𑁯. 𑀭𑀢𑀦𑀯𑀕𑁆𑀕𑁄

𑁧. 𑀅𑀦𑁆𑀢𑁂𑀧𑀼𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀦𑀺𑀓𑁆𑀔𑀦𑁆𑀢𑀭𑀸𑀚𑀓𑁂 𑀅𑀦𑀺𑀕𑁆𑀕𑀢𑀭𑀢𑀦𑀓𑁂𑀢𑀺 𑀏𑀢𑁆𑀣 ‘‘𑀲𑀬𑀦𑀺𑀖𑀭𑁂’’𑀢𑀺 𑀧𑀸𑀞𑀲𑁂𑀲𑁄 𑀤𑀝𑁆𑀞𑀩𑁆𑀩𑁄𑀢𑀺 𑀆𑀳 ‘‘𑀅𑀦𑀺𑀓𑁆𑀔𑀦𑁆𑀢𑁄 𑀭𑀸𑀚𑀸 𑀇𑀢𑁄’’𑀢𑀺𑀆𑀤𑀺. 𑀢𑀢𑁆𑀣 𑀇𑀢𑁄𑀢𑀺 𑀲𑀬𑀦𑀺𑀖𑀭𑀢𑁄. 𑀲𑀬𑀦𑀺𑀖𑀭𑁂𑀢𑀺 𑀲𑀬𑀦𑀻𑀬𑀖𑀭𑁂. 𑀬𑀢𑁆𑀣 𑀭𑀜𑁆𑀜𑁄 𑀲𑀬𑀦𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺, 𑀅𑀦𑁆𑀢𑀫𑀲𑁄 𑀲𑀸𑀡𑀺𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑀫𑁆𑀧𑀺, 𑀢𑀲𑁆𑀫𑀺𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀭𑀢𑀺𑀚𑀦𑀦𑀝𑁆𑀞𑁂𑀦 𑀭𑀢𑀦𑀁, 𑀳𑀢𑁆𑀣𑀺𑀆𑀤𑀺. 𑀇𑀥 𑀧𑀦 𑀇𑀢𑁆𑀣𑀺𑀭𑀢𑀦𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀭𑀢𑀦𑀁 𑀯𑀼𑀘𑁆𑀘𑀢𑀺 𑀫𑀳𑁂𑀲𑀻’’𑀢𑀺.

𑀉𑀪𑁄𑀲𑀽𑀢𑀺 𑀭𑀸𑀚𑀫𑀳𑁂𑀲𑀻𑀲𑀼. 𑀓𑀺𑀭𑀺𑀬𑀸𑀓𑀺𑀭𑀺𑀬𑀦𑁆𑀢𑀺 𑀏𑀢𑁆𑀣 𑀇𑀦𑁆𑀤𑀔𑀻𑀮𑀸𑀢𑀺𑀓𑁆𑀓𑀫𑁄 𑀓𑀺𑀭𑀺𑀬𑀁, 𑀅𑀧𑁆𑀧𑀝𑀺𑀲𑀁𑀯𑀺𑀤𑀺𑀢𑀁 𑀅𑀓𑀺𑀭𑀺𑀬𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀦𑁆𑀢𑁂𑀧𑀼𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀭𑀢𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀫𑀼𑀢𑁆𑀢𑀸𑀤𑀺𑀤𑀲𑀯𑀺𑀥𑀦𑁆𑀢𑀺 ‘‘𑀫𑀼𑀢𑁆𑀢𑀸 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀗𑁆𑀔𑁄 𑀲𑀺𑀮𑀸 𑀧𑀯𑀸𑀴𑀁 𑀭𑀚𑀢𑀁 𑀚𑀸𑀢𑀭𑀽𑀧𑀁 𑀮𑁄𑀳𑀺𑀢𑀗𑁆𑀓𑁄 𑀫𑀲𑀸𑀭𑀕𑀮𑁆𑀮’’𑀦𑁆𑀢𑀺 (𑀧𑀸𑀘𑀺. 𑁫𑁦𑁬) 𑀤𑀲𑀯𑀺𑀥𑀁 𑀭𑀢𑀦𑀁. 𑀅𑀚𑁆𑀛𑀸𑀯𑀲𑀣𑁂𑀢𑀺 𑀕𑁂𑀳𑁂. 𑀢𑁂𑀦𑀸𑀳 ‘‘𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺, 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀆𑀯𑀲𑀣𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀆𑀯𑀲𑀣𑁄𑀢𑀺 𑀘𑁂𑀢𑁆𑀣 𑀅𑀦𑁆𑀢𑁄𑀕𑀸𑀫𑁂 𑀦𑀺𑀯𑀺𑀝𑁆𑀞𑀕𑁂𑀳𑀁 𑀅𑀥𑀺𑀧𑁆𑀧𑁂𑀢𑀁. 𑀆𑀭𑀸𑀫𑁂 𑀦𑀺𑀯𑀺𑀝𑁆𑀞𑀕𑁂𑀳𑀁 𑀧𑀦 𑀅𑀚𑁆𑀛𑀸𑀭𑀸𑀫𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀁. ‘‘𑀆𑀯𑀲𑀣𑁄𑀢𑀺 𑀘𑁂𑀢𑁆𑀣 𑀅𑀦𑁆𑀢𑁄𑀆𑀭𑀸𑀫𑁂 𑀯𑀸 𑀳𑁄𑀢𑀼, 𑀅𑀜𑁆𑀜𑀢𑁆𑀣 𑀯𑀸, 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀯𑀼𑀘𑁆𑀘𑀢𑀻’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁫𑁦𑁬) 𑀓𑁂𑀘𑀺. 𑀲𑀩𑁆𑀩𑁂𑀲𑀫𑁆𑀧𑀺 𑀅𑀢𑁆𑀣𑀸𑀬 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀅𑀢𑁆𑀢𑀦𑁄 𑀯𑀸 𑀢𑁂𑀲𑀁 𑀲𑀗𑁆𑀖𑀸𑀤𑀻𑀦𑀁 𑀯𑀸 𑀅𑀢𑁆𑀣𑀸𑀬 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀯𑀸 𑀉𑀕𑁆𑀕𑀡𑁆𑀳𑀸𑀧𑁂𑀦𑁆𑀢𑀲𑁆𑀲 𑀯𑀸 𑀤𑀼𑀓𑁆𑀓𑀝𑀫𑁂𑀯. 𑀲𑀘𑁂 𑀧𑀦 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀓𑀁 𑀅𑀯𑀲𑁆𑀲𑀁 𑀧𑀝𑀺𑀲𑀸𑀫𑁂𑀢𑀩𑁆𑀩𑀁 𑀓𑀧𑁆𑀧𑀺𑀬𑀪𑀡𑁆𑀟𑀁 𑀳𑁄𑀢𑀺, 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀕𑀳𑁂𑀢𑁆𑀯𑀸 𑀧𑀝𑀺𑀲𑀸𑀫𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀢𑀸𑀤𑀺𑀲𑀁 𑀧𑀦𑀸’’𑀢𑀺𑀆𑀤𑀺. 𑀢𑀸𑀤𑀺𑀲𑀦𑁆𑀢𑀺 𑀬𑀁 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀓𑀁 𑀅𑀯𑀲𑁆𑀲𑀁 𑀧𑀝𑀺𑀲𑀸𑀫𑁂𑀢𑀩𑁆𑀩𑀁 𑀓𑀧𑁆𑀧𑀺𑀬𑀪𑀡𑁆𑀟𑀁, 𑀢𑀸𑀤𑀺𑀲𑀁. 𑀙𑀦𑁆𑀤𑁂𑀦𑀧𑀺 𑀪𑀬𑁂𑀦𑀧𑀻𑀢𑀺 𑀯𑀟𑁆𑀠𑀓𑀺𑀆𑀤𑀻𑀲𑀼 𑀙𑀦𑁆𑀤𑁂𑀦𑀧𑀺, 𑀭𑀸𑀚𑀯𑀮𑁆𑀮𑀪𑁂𑀲𑀼 𑀪𑀬𑁂𑀦𑀧𑀺.

𑀢𑀸𑀤𑀺𑀲𑁂 𑀞𑀸𑀦𑁂𑀢𑀺 𑀫𑀳𑀸𑀯𑀺𑀳𑀸𑀭𑀲𑀤𑀺𑀲𑀲𑁆𑀲 𑀫𑀳𑀸𑀭𑀸𑀫𑀲𑁆𑀲 𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑁂 𑀧𑀭𑀺𑀯𑁂𑀡𑁂. 𑀲𑀜𑁆𑀜𑀸𑀡𑀁 𑀓𑀢𑁆𑀯𑀸𑀢𑀺 ‘‘𑀏𑀢𑁆𑀢𑀓𑀸 𑀓𑀳𑀸𑀧𑀡𑀸’’𑀢𑀺𑀆𑀤𑀺𑀦𑀸 𑀭𑀽𑀧𑁂𑀦 𑀯𑀸 𑀮𑀜𑁆𑀙𑀦𑀸𑀤𑀺𑀦𑀺𑀫𑀺𑀢𑁆𑀢𑁂𑀦 𑀯𑀸 𑀲𑀜𑁆𑀜𑀸𑀡𑀁 𑀓𑀢𑁆𑀯𑀸, 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀢𑀺𑀭𑀽𑀧𑀸𑀦𑀁 𑀪𑀺𑀓𑁆𑀔𑀽𑀦𑀁 𑀳𑀢𑁆𑀣𑁂𑀢𑀺 𑀮𑀚𑁆𑀚𑀻𑀦𑀁 𑀓𑀼𑀓𑁆𑀓𑀼𑀘𑁆𑀘𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀳𑀢𑁆𑀣𑁂. 𑀮𑁄𑀮𑀚𑀸𑀢𑀺𑀓𑀸𑀦𑀜𑁆𑀳𑀺 𑀳𑀢𑁆𑀣𑁂 𑀞𑀧𑁂𑀢𑀼𑀁 𑀦 𑀮𑀩𑁆𑀪𑀢𑀺. 𑀦𑁂𑀯 𑀧𑀓𑁆𑀓𑀫𑀢𑀻𑀢𑀺 𑀦𑁂𑀯 𑀢𑀫𑁆𑀳𑀸 𑀆𑀯𑀸𑀲𑀸 𑀧𑀓𑁆𑀓𑀫𑀢𑀺. ‘‘𑀣𑀸𑀯𑀭𑀁 𑀲𑁂𑀦𑀸𑀲𑀦𑀁 𑀯𑀸’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀘𑀻𑀯𑀭𑀸𑀤𑀺𑀫𑀽𑀮𑀁 𑀦 𑀓𑀸𑀢𑀩𑁆𑀩𑀦𑁆𑀢𑀺 (𑀧𑀸𑀘𑀺. 𑀅𑀝𑁆𑀞. 𑁫𑁦𑁬) 𑀤𑀲𑁆𑀲𑁂𑀢𑀺. 𑀢𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀬𑀁 𑀣𑀸𑀯𑀭𑀲𑁂𑀦𑀸𑀲𑀦𑀸𑀤𑀺 𑀓𑀢𑀁, 𑀢𑀁 𑀉𑀧𑀸𑀲𑀓 𑀢𑀯 𑀲𑀦𑁆𑀢𑀓𑁂𑀦 𑀇𑀤𑀁 𑀦𑀸𑀫 𑀓𑀢𑀦𑁆𑀢𑀺 𑀏𑀯𑀁 𑀤𑀲𑁆𑀲𑁂𑀢𑁆𑀯𑀸. 𑀲𑀫𑀸𑀤𑀧𑁂𑀢𑁆𑀯𑀸𑀢𑀺 𑀅𑀜𑁆𑀜𑀁 𑀲𑀫𑀸𑀤𑀧𑁂𑀢𑁆𑀯𑀸, ‘‘𑀉𑀤𑁆𑀤𑀺𑀲𑁆𑀲 𑀅𑀭𑀺𑀬𑀸 𑀢𑀺𑀝𑁆𑀞𑀦𑁆𑀢𑀺, 𑀏𑀲𑀸 𑀅𑀭𑀺𑀬𑀸𑀦 𑀬𑀸𑀘𑀦𑀸’’𑀢𑀺 𑀯𑀼𑀢𑁆𑀢𑀦𑀬𑁂𑀦 𑀬𑀸𑀘𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀅𑀦𑀼𑀜𑁆𑀜𑀸𑀢𑀝𑁆𑀞𑀸𑀦𑁂𑀢𑀺 𑀅𑀚𑁆𑀛𑀸𑀭𑀸𑀫𑀅𑀚𑁆𑀛𑀸𑀯𑀲𑀣𑁂. 𑀆𑀫𑀸𑀲𑀦𑁆𑀢𑀺 𑀆𑀫𑀲𑀺𑀢𑀩𑁆𑀩𑀜𑁆𑀘𑁂𑀯 𑀧𑀝𑀺𑀲𑀸𑀫𑁂𑀢𑀩𑁆𑀩𑀜𑁆𑀘 𑀯𑀢𑁆𑀣𑀸𑀤𑀺.

𑀭𑀢𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀯𑀺𑀓𑀸𑀮𑀕𑀸𑀫𑀧𑁆𑀧𑀯𑁂𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀘𑀸𑀭𑀺𑀢𑁆𑀢𑁂𑀢𑀺 𑀘𑀸𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑁂. 𑀉𑀧𑀘𑀸𑀭𑀦𑁆𑀢𑀺 𑀤𑀼𑀢𑀺𑀬𑀮𑁂𑀟𑁆𑀟𑀼𑀧𑀸𑀢𑀁. 𑀅𑀜𑁆𑀜𑀁 𑀕𑀸𑀫𑀁 𑀕𑀘𑁆𑀙𑀦𑁆𑀢𑀸𑀦𑀁 𑀧𑀼𑀦 𑀆𑀧𑀼𑀘𑁆𑀙𑀦𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀉𑀲𑁆𑀲𑀸𑀳𑀁 𑀅𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑁆𑀯𑀸 𑀅𑀜𑁆𑀜𑀁 𑀕𑀸𑀫𑀁 𑀕𑀘𑁆𑀙𑀦𑁆𑀢𑀸𑀦𑀁 𑀕𑀸𑀫𑀲𑀢𑀫𑁆𑀧𑀺 𑀳𑁄𑀢𑀼, 𑀧𑀼𑀦 𑀆𑀧𑀼𑀘𑁆𑀙𑀦𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺. 𑀉𑀲𑁆𑀲𑀸𑀳𑀦𑁆𑀢𑀺 𑀕𑀸𑀫𑀧𑁆𑀧𑀯𑀺𑀲𑀦𑀼𑀲𑁆𑀲𑀸𑀳𑀁. 𑀅𑀦𑁆𑀢𑀭𑀸𑀭𑀸𑀫𑀸𑀤𑀻𑀲𑀼 (𑀧𑀸𑀘𑀺. 𑀅𑀝𑁆𑀞. 𑁫𑁧𑁫) 𑀦 𑀓𑁂𑀯𑀮𑀁 𑀅𑀦𑀸𑀧𑀼𑀘𑁆𑀙𑀸 𑀕𑀘𑁆𑀙𑀦𑁆𑀢𑀲𑁆𑀲𑁂𑀯, 𑀓𑀸𑀬𑀩𑀦𑁆𑀥𑀦𑀁 𑀅𑀩𑀦𑁆𑀥𑀺𑀢𑁆𑀯𑀸 𑀲𑀗𑁆𑀖𑀸𑀝𑀺𑀁 𑀅𑀧𑀸𑀭𑀼𑀧𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀺. 𑀆𑀧𑀤𑀸𑀲𑀽𑀢𑀺 𑀲𑀻𑀳𑁄 𑀯𑀸 𑀩𑁆𑀬𑀕𑁆𑀖𑁄 𑀯𑀸 𑀆𑀕𑀘𑁆𑀙𑀢𑀺, 𑀫𑁂𑀖𑁄 𑀯𑀸 𑀉𑀝𑁆𑀞𑁂𑀢𑀺, 𑀅𑀜𑁆𑀜𑁄 𑀯𑀸 𑀓𑁄𑀘𑀺 𑀉𑀧𑀤𑁆𑀤𑀯𑁄 𑀉𑀧𑁆𑀧𑀚𑁆𑀚𑀢𑀺, 𑀅𑀦𑀸𑀧𑀢𑁆𑀢𑀺. 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀩𑀳𑀺𑀕𑀸𑀫𑀢𑁄 𑀅𑀦𑁆𑀢𑁄𑀕𑀸𑀫𑀁 𑀧𑀯𑀺𑀲𑀺𑀢𑀼𑀁 𑀯𑀝𑁆𑀝𑀢𑀺.

𑀯𑀺𑀓𑀸𑀮𑀕𑀸𑀫𑀧𑁆𑀧𑀯𑁂𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀽𑀘𑀺𑀖𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁫𑁧𑁭) 𑀧𑀞𑀫𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀘𑁆𑀙𑀸 𑀤𑁂𑀲𑁂𑀢𑀩𑁆𑀩𑀢𑁆𑀢𑀸 𑀢𑀁 𑀪𑁂𑀤𑀦𑀓𑀁 𑀅𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀲𑁆𑀲 𑀅𑀢𑁆𑀣𑀻𑀢𑀺.

𑀅𑀭𑀡𑀺𑀓𑁂𑀢𑀺 𑀅𑀭𑀡𑀺𑀥𑀦𑀼𑀓𑁂. 𑀯𑀺𑀥𑁂𑀢𑀺 𑀯𑁂𑀥𑀓𑁂. 𑀯𑀸𑀲𑀺𑀚𑀝𑁂𑀢𑀺 𑀯𑀸𑀲𑀺𑀤𑀡𑁆𑀟𑀓𑁂 𑀘.

𑀲𑀽𑀘𑀺𑀖𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀫𑀜𑁆𑀘𑀧𑀻𑀞𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀝𑁆𑀞𑀗𑁆𑀕𑀼𑀮𑀧𑀸𑀤𑀓𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄. ‘‘𑀙𑁂𑀤𑀦𑀓𑀁 𑀪𑁂𑀤𑀦𑀓𑀲𑀤𑀺𑀲𑀫𑁂𑀯𑀸’’𑀢𑀺 𑀇𑀫𑀺𑀦𑀸 ‘‘𑀙𑁂𑀤𑀦𑀫𑁂𑀯 𑀙𑁂𑀤𑀦𑀓𑀁, 𑀢𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀙𑁂𑀤𑀦𑀓’’𑀦𑁆𑀢𑀺 𑀇𑀫𑀫𑀢𑁆𑀣𑀁 𑀅𑀢𑀺𑀤𑀺𑀲𑀢𑀺.

𑀬𑀣𑀸 𑀧𑀫𑀸𑀡𑀫𑁂𑀯 𑀉𑀧𑀭𑀺 𑀤𑀺𑀲𑁆𑀲𑀢𑀺, 𑀏𑀯𑀁 𑀦𑀺𑀔𑀡𑀺𑀢𑁆𑀯𑀸 𑀯𑀸𑀢𑀺 𑀲𑀘𑁂 𑀧𑀦 𑀦 𑀙𑀺𑀦𑁆𑀤𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀬𑀣𑀸 𑀧𑀫𑀸𑀡𑀫𑁂𑀯 𑀉𑀧𑀭𑀺 𑀤𑀺𑀲𑁆𑀲𑀢𑀺, 𑀏𑀯𑀁 𑀪𑀽𑀫𑀺𑀬𑀁 𑀦𑀺𑀔𑀡𑀺𑀢𑁆𑀯𑀸 𑀯𑀸. 𑀅𑀝𑁆𑀝𑀓𑀁 𑀯𑀸 𑀩𑀦𑁆𑀥𑀺𑀢𑁆𑀯𑀸𑀢𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀼𑀮𑀸𑀲𑀗𑁆𑀖𑀸𑀢𑁂 𑀞𑀧𑁂𑀢𑁆𑀯𑀸 𑀅𑀝𑁆𑀝𑀁 𑀓𑀢𑁆𑀯𑀸.

𑀫𑀜𑁆𑀘𑀧𑀻𑀞𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀢𑀽𑀮𑁄𑀦𑀤𑁆𑀥𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀘𑀺𑀫𑀺𑀮𑀺𑀓𑀁 𑀧𑀢𑁆𑀣𑀭𑀺𑀢𑁆𑀯𑀸 𑀢𑀽𑀮𑀁 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀫𑀜𑁆𑀘𑀧𑀻𑀞𑀸𑀦𑀁 𑀉𑀧𑀭𑀺 𑀘𑀺𑀫𑀺𑀮𑀺𑀓𑀁 𑀧𑀢𑁆𑀣𑀭𑀺𑀢𑁆𑀯𑀸 𑀢𑀲𑁆𑀲 𑀉𑀧𑀭𑀺 𑀢𑀽𑀮𑀁 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀉𑀧𑀭𑀺 𑀘𑀺𑀫𑀺𑀮𑀺𑀓𑀸𑀬𑀸𑀢𑀺 𑀉𑀧𑀭𑀺𑀫𑀪𑀸𑀕𑁂 𑀘𑀺𑀫𑀺𑀮𑀺𑀓𑀸𑀬.

𑀲𑀻𑀲𑀧𑁆𑀧𑀫𑀸𑀡𑀦𑁆𑀢𑀺 (𑀘𑀽𑀴𑀯. 𑀅𑀝𑁆𑀞. 𑁨𑁯𑁭; 𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁩.𑁨𑁯𑁭) 𑀬𑀢𑁆𑀣 𑀕𑀮𑀯𑀸𑀝𑀓𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀲𑀻𑀲𑀁 𑀉𑀧𑀤𑀳𑀦𑁆𑀢𑀺, 𑀢𑀁 𑀲𑀻𑀲𑀧𑁆𑀧𑀫𑀸𑀡𑀁. 𑀢𑀜𑁆𑀘 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀢𑁄 𑀢𑀺𑀭𑀺𑀬𑀁 𑀫𑀼𑀝𑁆𑀞𑀺𑀭𑀢𑀦𑀁 𑀳𑁄𑀢𑀺, 𑀤𑀻𑀖𑀢𑁄 𑀤𑁆𑀯𑀺𑀭𑀢𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀲 𑀯𑀺𑀢𑁆𑀣𑀸𑀭𑀢𑁄 𑀢𑀻𑀲𑀼 𑀓𑁄𑀡𑁂𑀲𑀽’’𑀢𑀺𑀆𑀤𑀺𑀫𑀸𑀳. 𑀤𑁆𑀯𑀺𑀦𑁆𑀦𑀁 𑀅𑀦𑁆𑀢𑀭𑀁 𑀯𑀺𑀤𑀢𑁆𑀣𑀺 𑀘𑀢𑀼𑀭𑀗𑁆𑀕𑀼𑀮𑀁 𑀳𑁄𑀢𑀻𑀢𑀺 𑀤𑁆𑀯𑀺𑀦𑁆𑀦𑀁 𑀓𑁄𑀡𑀸𑀦𑀁 𑀅𑀦𑁆𑀢𑀭𑀁 𑀫𑀺𑀦𑀺𑀬𑀫𑀸𑀦𑀁 𑀯𑀺𑀤𑀢𑁆𑀣𑀺 𑀘𑁂𑀯 𑀘𑀢𑀼𑀭𑀗𑁆𑀕𑀼𑀮𑀜𑁆𑀘 𑀳𑁄𑀢𑀺. 𑀫𑀚𑁆𑀛𑁂 𑀫𑀼𑀝𑁆𑀞𑀺𑀭𑀢𑀦𑀦𑁆𑀢𑀺 𑀩𑀺𑀩𑁆𑀩𑁄𑀳𑀦𑀲𑁆𑀲 𑀫𑀚𑁆𑀛𑀁 𑀢𑀺𑀭𑀺𑀬𑀢𑁄 𑀫𑀼𑀝𑁆𑀞𑀺𑀭𑀢𑀦𑀧𑁆𑀧𑀫𑀸𑀡𑀁 𑀳𑁄𑀢𑀺. 𑀅𑀬𑀜𑁆𑀳𑀺 𑀲𑀻𑀲𑀧𑁆𑀧𑀫𑀸𑀡𑀲𑁆𑀲 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄. 𑀢𑀢𑁄 𑀉𑀤𑁆𑀥𑀁 𑀦 𑀯𑀝𑁆𑀝𑀢𑀺, 𑀳𑁂𑀝𑁆𑀞𑀸 𑀯𑀝𑁆𑀝𑀢𑀺. 𑀅𑀕𑀺𑀮𑀸𑀦𑀲𑁆𑀲 𑀲𑀻𑀲𑀽𑀧𑀥𑀸𑀦𑀜𑁆𑀘 𑀧𑀸𑀤𑀽𑀧𑀥𑀸𑀦𑀜𑁆𑀘𑀸𑀢𑀺 𑀤𑁆𑀯𑀬𑀫𑁂𑀯 𑀯𑀝𑁆𑀝𑀢𑀺. 𑀕𑀺𑀮𑀸𑀦𑀲𑁆𑀲 𑀩𑀺𑀩𑁆𑀩𑁄𑀳𑀦𑀸𑀦𑀺 𑀲𑀦𑁆𑀣𑀭𑀺𑀢𑁆𑀯𑀸 𑀉𑀧𑀭𑀺 𑀧𑀘𑁆𑀘𑀢𑁆𑀣𑀭𑀡𑀁 𑀤𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺.

𑀢𑀽𑀮𑁄𑀦𑀤𑁆𑀥𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀦𑀺𑀲𑀻𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀢𑁆𑀢𑀫𑀁 𑀉𑀢𑁆𑀢𑀸𑀦𑀫𑁂𑀯.

𑀦𑀺𑀲𑀻𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀥𑁄𑀦𑀸𑀪𑀺𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀦𑁆𑀢𑀺 𑀦𑀸𑀪𑀺𑀬𑀸 𑀳𑁂𑀝𑁆𑀞𑀸 𑀚𑀸𑀡𑀼𑀫𑀡𑁆𑀟𑀮𑀸𑀦𑀁 𑀉𑀧𑀭𑀺. 𑀓𑀡𑁆𑀟𑀼𑀧𑀻𑀴𑀓𑀅𑀲𑁆𑀲𑀸𑀯𑀣𑀼𑀮𑁆𑀮𑀓𑀘𑁆𑀙𑀸𑀩𑀸𑀥𑀸𑀦𑀦𑁆𑀢𑀺 𑀏𑀢𑁆𑀣 𑀓𑀡𑁆𑀟𑀽𑀢𑀺 𑀓𑀘𑁆𑀙𑀼. 𑀧𑀻𑀴𑀓𑀸𑀢𑀺 𑀮𑁄𑀳𑀺𑀢𑀢𑀼𑀡𑁆𑀟𑀺𑀓𑀸 𑀲𑀼𑀔𑀼𑀫𑀧𑀻𑀴𑀓𑀸. 𑀅𑀲𑁆𑀲𑀸𑀯𑁄𑀢𑀺 𑀅𑀭𑀺𑀲𑀪𑀕𑀦𑁆𑀤𑀮𑀫𑀥𑀼𑀫𑁂𑀳𑀸𑀦𑀁 𑀯𑀲𑁂𑀦 𑀅𑀲𑀼𑀘𑀺𑀧𑀕𑁆𑀖𑀭𑀡𑀁. 𑀣𑀼𑀮𑁆𑀮𑀓𑀘𑁆𑀙𑀸𑀩𑀸𑀥𑁄𑀢𑀺 𑀫𑀳𑀸𑀧𑀻𑀴𑀓𑀸𑀩𑀸𑀥𑁄 𑀯𑀼𑀘𑁆𑀘𑀢𑀺.

𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯-𑁧𑁦. 𑀯𑀲𑁆𑀲𑀺𑀓𑀲𑀸𑀝𑀺𑀓𑀦𑀦𑁆𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀦𑀯𑀫𑀁 𑀤𑀲𑀫𑀜𑁆𑀘 𑀉𑀢𑁆𑀢𑀸𑀦𑀫𑁂𑀯.

𑀯𑀲𑁆𑀲𑀺𑀓𑀲𑀸𑀝𑀺𑀓𑀦𑀦𑁆𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀭𑀢𑀦𑀯𑀕𑁆𑀕𑁄 𑀦𑀯𑀫𑁄.

𑀇𑀢𑀺 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸𑀬

𑀯𑀺𑀦𑀬𑀢𑁆𑀣𑀫𑀜𑁆𑀚𑀽𑀲𑀸𑀬𑀁 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀺𑀬𑀁

𑀧𑀸𑀘𑀺𑀢𑁆𑀢𑀺𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.