𑀓𑀗𑁆𑀔𑀸𑀯𑀺𑀢𑀭𑀡𑀻-𑀅𑀪𑀺𑀦𑀯𑀝𑀻𑀓𑀸

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀢𑀺𑀮𑁄𑀓𑀢𑀺𑀮𑀓𑀁 𑀩𑀼𑀤𑁆𑀥𑀁, 𑀯𑀦𑁆𑀤𑁂 𑀲𑀼𑀤𑁆𑀥𑀕𑀼𑀡𑀸𑀓𑀭𑀁;

𑀓𑀭𑀼𑀡𑀸𑀲𑀻𑀢𑀮𑀻𑀪𑀽𑀢-𑀳𑀤𑀬𑀁 𑀫𑀳𑀺𑀢𑁄𑀤𑀬𑀁.

𑀢𑁂𑀦𑀸𑀧𑀺 𑀥𑀫𑁆𑀫𑀭𑀸𑀚𑁂𑀦, 𑀮𑁄𑀓𑁂𑀓𑀸𑀘𑀭𑀺𑀬𑁂𑀦 𑀬𑁄;

𑀧𑀽𑀚𑀺𑀢𑁄 𑀢𑀜𑁆𑀘 𑀲𑀤𑁆𑀥𑀫𑁆𑀫𑀁, 𑀯𑀦𑁆𑀤𑁂 𑀕𑀫𑁆𑀪𑀻𑀭𑀫𑀼𑀢𑁆𑀢𑀫𑀁.

𑀫𑀼𑀦𑀺𑀦𑁆𑀤𑀘𑀦𑁆𑀤𑀲𑀤𑁆𑀥𑀫𑁆𑀫-𑀭𑀁𑀲𑀻𑀳𑀺 𑀯𑀺𑀫𑀮𑁂𑀳𑀺 𑀬𑁄;

𑀩𑁄𑀥𑀺𑀢𑁄𑀳𑀁 𑀲𑀤𑀸 𑀯𑀦𑁆𑀤𑁂, 𑀢𑀁 𑀲𑀗𑁆𑀖𑀁 𑀓𑀼𑀫𑀼𑀤𑀸𑀓𑀭𑀁.

𑀯𑀺𑀦𑀬𑁂 𑀦𑀬𑀕𑀫𑁆𑀪𑀻𑀭𑁂, 𑀲𑀩𑁆𑀩𑀣𑀸 𑀧𑀸𑀭𑀤𑀲𑁆𑀲𑀺𑀦𑀸;

𑀯𑀸𑀤𑀺𑀦𑀸 𑀤𑀼𑀢𑁆𑀢𑀭𑀸𑀕𑀸𑀥-𑀲𑀩𑁆𑀩𑀲𑀢𑁆𑀣𑀫𑀳𑀡𑁆𑀡𑀯𑁂.

𑀬𑀸 𑀓𑀢𑀸 𑀩𑀼𑀤𑁆𑀥𑀖𑁄𑀲𑁂𑀦, 𑀣𑁂𑀭𑁂𑀦 𑀣𑀺𑀭𑀘𑁂𑀢𑀲𑀸;

𑀓𑀗𑁆𑀔𑀸𑀯𑀺𑀢𑀭𑀡𑀻 𑀦𑀸𑀫, 𑀫𑀸𑀢𑀺𑀓𑀝𑁆𑀞𑀓𑀣𑀸 𑀲𑀼𑀪𑀸.

𑀣𑀺𑀭𑀸𑀦𑁂𑀓𑀕𑀼𑀡𑁄𑀖𑁂𑀦, 𑀣𑁂𑀭𑁂𑀦 𑀯𑀺𑀦𑀬𑀜𑁆𑀜𑀼𑀦𑀸;

𑀓𑀮𑁆𑀬𑀸𑀡𑀸𑀘𑀸𑀭𑀬𑀼𑀢𑁆𑀢𑁂𑀦, 𑀥𑀻𑀫𑀢𑀸 𑀫𑀼𑀦𑀺𑀲𑀽𑀦𑀼𑀦𑀸;

𑀯𑀺𑀦𑀬𑀝𑁆𑀞𑀺𑀢𑀺𑀓𑀸𑀫𑁂𑀦, 𑀲𑀼𑀫𑁂𑀥𑁂𑀦𑀸𑀪𑀺𑀬𑀸𑀘𑀺𑀢𑁄.

𑀢𑀫𑀳𑀁 𑀯𑀡𑁆𑀡𑀬𑀺𑀲𑁆𑀲𑀸𑀫𑀺, 𑀲𑀼𑀯𑀺𑀲𑀼𑀤𑁆𑀥𑀫𑀦𑀸𑀓𑀼𑀮𑀁;

𑀲𑀸𑀥𑀯𑁄 𑀢𑀁 𑀦𑀺𑀲𑀸𑀫𑁂𑀣, 𑀲𑀓𑁆𑀓𑀘𑁆𑀘𑀁 𑀫𑀫 𑀪𑀸𑀲𑀢𑁄𑀢𑀺.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸

𑀲𑀩𑁆𑀩𑀓𑀼𑀲𑀮𑀥𑀫𑁆𑀫𑀧𑁆𑀧𑀫𑀼𑀔𑀲𑁆𑀲 𑀯𑀺𑀧𑀼𑀮𑁄𑀴𑀸𑀭𑀕𑀼𑀡𑀯𑀺𑀲𑁂𑀲𑀸𑀯𑀳𑀲𑁆𑀲 𑀧𑀭𑀫𑀕𑀫𑁆𑀪𑀻𑀭𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀁 𑀓𑀢𑁆𑀢𑀼𑀓𑀸𑀫𑁄𑀬𑀫𑀸𑀘𑀭𑀺𑀬𑁄 𑀧𑀞𑀫𑀁 𑀢𑀸𑀯 ‘‘𑀩𑀼𑀤𑁆𑀥𑀁 𑀥𑀫𑁆𑀫’’𑀦𑁆𑀢𑀺𑀆𑀤𑀺𑀦𑀸 𑀭𑀢𑀦𑀢𑁆𑀢𑀬𑀧𑁆𑀧𑀡𑀸𑀫𑀓𑀭𑀡𑁂𑀦 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀧𑀼𑀦𑀸𑀢𑀺. 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀲𑀦𑁆𑀢𑀸𑀦𑀦𑀺𑀲𑁆𑀲𑀬𑀸 𑀳𑀺 𑀧𑀜𑁆𑀜𑀸 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀬𑀣𑀸𑀥𑀺𑀧𑁆𑀧𑁂𑀢𑀲𑀁𑀯𑀡𑁆𑀡𑀦𑀸𑀬 𑀧𑀭𑀺𑀬𑁄𑀲𑀸𑀦𑀕𑀫𑀦𑀲𑀫𑀢𑁆𑀣𑀸 𑀳𑁄𑀢𑀻𑀢𑀺. 𑀅𑀧𑀺𑀘 𑀭𑀢𑀦𑀢𑁆𑀢𑀬𑀧𑁆𑀧𑀡𑀸𑀫𑁂𑀦 𑀯𑀺𑀥𑀼𑀢𑀲𑀩𑁆𑀩𑀓𑀺𑀩𑁆𑀩𑀺𑀲𑁂 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀪𑀯𑀦𑁆𑀢𑀭𑀽𑀧𑀘𑀺𑀢𑀸𑀦𑀺𑀧𑀺 𑀅𑀦𑁆𑀢𑀭𑀸𑀬𑀺𑀓𑀓𑀫𑁆𑀫𑀸𑀦𑀺 𑀧𑀘𑁆𑀘𑀬𑀯𑁂𑀓𑀮𑁆𑀮𑀢𑁄 𑀬𑀣𑀸𑀥𑀺𑀧𑁆𑀧𑁂𑀢𑀸𑀬 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀬 𑀦𑀸𑀮𑀫𑀦𑁆𑀢𑀭𑀸𑀬𑀓𑀭𑀡𑀸𑀬𑀸𑀢𑀺𑀧𑀺 𑀆𑀘𑀭𑀺𑀬𑀲𑁆𑀲 𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀸.

𑀢𑀢𑁆𑀣 𑀩𑀼𑀤𑁆𑀥𑀲𑀤𑁆𑀤𑀲𑁆𑀲 𑀢𑀸𑀯 ‘‘𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄, 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁧𑁯𑁨; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁯𑁭; 𑀧𑀝𑀺. 𑀫. 𑁧.𑁧𑁬𑁨) 𑀦𑀺𑀤𑁆𑀤𑁂𑀲𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 𑀲𑀯𑀸𑀲𑀦𑀸𑀬 𑀅𑀜𑁆𑀜𑀸𑀡𑀦𑀺𑀤𑁆𑀤𑀸𑀬 𑀅𑀘𑁆𑀘𑀦𑁆𑀢𑀯𑀺𑀕𑀫𑀢𑁄, 𑀩𑀼𑀤𑁆𑀥𑀺𑀬𑀸 𑀯𑀸 𑀯𑀺𑀓𑀲𑀺𑀢𑀪𑀸𑀯𑀢𑁄 𑀩𑀼𑀤𑁆𑀥𑀯𑀸𑀢𑀺 𑀩𑀼𑀤𑁆𑀥𑁄 𑀚𑀸𑀕𑀭𑀡𑀯𑀺𑀓𑀲𑀦𑀢𑁆𑀣𑀯𑀲𑁂𑀦. 𑀅𑀣 𑀯𑀸 𑀓𑀲𑁆𑀲𑀘𑀺𑀧𑀺 𑀜𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀦𑀯𑀩𑀼𑀤𑁆𑀥𑀲𑁆𑀲 𑀅𑀪𑀸𑀯𑁂𑀦, 𑀜𑁂𑀬𑁆𑀬𑀯𑀺𑀲𑁂𑀲𑀲𑁆𑀲 𑀘 𑀓𑀫𑁆𑀫𑀪𑀸𑀯𑁂𑀦 𑀅𑀕𑁆𑀕𑀳𑀡𑀢𑁄 𑀓𑀫𑁆𑀫𑀯𑀘𑀦𑀺𑀘𑁆𑀙𑀸𑀬 𑀅𑀪𑀸𑀯𑁂𑀦 𑀅𑀯𑀕𑀫𑀦𑀢𑁆𑀣𑀯𑀲𑁂𑀦𑁂𑀯 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄 𑀮𑀩𑁆𑀪𑀢𑀻𑀢𑀺 𑀩𑀼𑀤𑁆𑀥𑀯𑀸𑀢𑀺 𑀩𑀼𑀤𑁆𑀥𑁄 𑀬𑀣𑀸 ‘‘𑀤𑀺𑀓𑁆𑀔𑀺𑀢𑁄 𑀦 𑀤𑀤𑀸𑀢𑀻’’𑀢𑀺. 𑀅𑀢𑁆𑀣𑀢𑁄 𑀧𑀦 𑀧𑀸𑀭𑀫𑀺𑀢𑀸𑀧𑀭𑀺𑀪𑀸𑀯𑀺𑀢𑁂𑀦 𑀲𑀬𑀫𑁆𑀪𑀼𑀜𑀸𑀡𑁂𑀦 𑀲𑀳𑀯𑀸𑀲𑀦𑀸𑀬 𑀯𑀺𑀕𑀢𑀯𑀺𑀤𑁆𑀥𑀲𑁆𑀢𑀦𑀺𑀭𑀯𑀲𑁂𑀲𑀼𑀧𑀓𑁆𑀓𑀺𑀮𑁂𑀲𑁄 𑀫𑀳𑀸𑀓𑀭𑀼𑀡𑀸𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺𑀅𑀧𑀭𑀺𑀫𑁂𑀬𑁆𑀬𑀕𑀼𑀡𑀕𑀡𑀸𑀥𑀸𑀭𑁄𑀯 𑀔𑀦𑁆𑀥𑀲𑀦𑁆𑀢𑀸𑀦𑁄 𑀩𑀼𑀤𑁆𑀥𑁄. 𑀬𑀣𑀸𑀳 𑁋

‘‘𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸 𑀲𑀬𑀫𑁆𑀪𑀽 𑀅𑀦𑀸𑀘𑀭𑀺𑀬𑀓𑁄 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀸𑀫𑀁 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀺, 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄, 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯’’𑀦𑁆𑀢𑀺 (𑀫𑀳𑀸𑀦𑀺. 𑁧𑁯𑁨; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁯𑁭; 𑀧𑀝𑀺. 𑀫. 𑁧.𑁧𑁬𑁧),

𑀢𑀁 𑀩𑀼𑀤𑁆𑀥𑀁.

𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄. 𑀅𑀬𑀜𑁆𑀳𑀺 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀅𑀧𑀸𑀬𑀤𑀼𑀓𑁆𑀔𑁂, 𑀲𑀁𑀲𑀸𑀭𑀤𑀼𑀓𑁆𑀔𑁂 𑀘 𑀅𑀧𑀢𑀫𑀸𑀦𑁂 𑀥𑀸𑀭𑁂𑀢𑀻𑀢𑀺, 𑀢𑀦𑁆𑀦𑀺𑀩𑁆𑀩𑀢𑁆𑀢𑀓𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀜𑁆𑀘𑁂𑀢𑁆𑀣 𑀥𑀸𑀭𑀡𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑁄, 𑀢𑀲𑁆𑀲 𑀢𑀤𑀢𑁆𑀣𑀲𑀺𑀤𑁆𑀥𑀺𑀳𑁂𑀢𑀼𑀢𑀸𑀬 𑀦𑀺𑀩𑁆𑀩𑀸𑀦𑀜𑁆𑀘𑀸𑀢𑀺 𑀉𑀪𑀬𑀫𑁂𑀯 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀥𑀸𑀭𑁂𑀢𑀺. 𑀅𑀭𑀺𑀬𑀨𑀮𑀜𑁆𑀘 𑀧𑀦 𑀢𑀁𑀲𑀫𑀼𑀘𑁆𑀙𑀺𑀦𑁆𑀦𑀓𑀺𑀮𑁂𑀲𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁂𑀦 𑀢𑀤𑀦𑀼𑀓𑀽𑀮𑀢𑀸𑀬, 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀘 𑀢𑀤𑀥𑀺𑀕𑀫𑀳𑁂𑀢𑀼𑀢𑀸𑀬𑀸𑀢𑀺 𑀉𑀪𑀬𑀫𑁆𑀧𑀺 𑀧𑀭𑀺𑀬𑀸𑀬𑀢𑁄 𑀥𑀸𑀭𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀢𑀁 𑀥𑀫𑁆𑀫𑀁. 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀢𑁂𑀦 𑀬𑀣𑀸𑀯𑀼𑀢𑁆𑀢𑀁 𑀩𑀼𑀤𑁆𑀥𑀁, 𑀇𑀫𑀜𑁆𑀘 𑀥𑀫𑁆𑀫𑀁 𑀯𑀦𑁆𑀤𑀺𑀢𑁆𑀯𑀸𑀢𑀺 𑀩𑀼𑀤𑁆𑀥𑀭𑀢𑀦𑁂𑀦 𑀲𑀳 𑀯𑀦𑁆𑀤𑀦𑀓𑀺𑀭𑀺𑀬𑀸𑀬 𑀥𑀫𑁆𑀫𑀭𑀢𑀦𑀁 𑀲𑀫𑀼𑀘𑁆𑀘𑀺𑀦𑁄𑀢𑀺.

𑀦 𑀓𑁂𑀯𑀮𑀁 𑀇𑀤𑀁 𑀤𑁆𑀯𑀬𑀫𑁂𑀯𑀸𑀢𑀺 𑀆𑀳 ‘‘𑀲𑀗𑁆𑀖𑀜𑁆𑀘𑀸’’𑀢𑀺. 𑀅𑀭𑀺𑀬𑁂𑀦 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑁄 𑀖𑀝𑀺𑀢𑁄𑀢𑀺 𑀲𑀗𑁆𑀖𑁄, 𑀅𑀝𑁆𑀞𑀅𑀭𑀺𑀬𑀧𑀼𑀕𑁆𑀕𑀮𑀲𑀫𑀽𑀳𑁄. 𑀢𑁂𑀳𑀺 𑀢𑁂𑀳𑀺 𑀯𑀸 𑀫𑀕𑁆𑀕𑀨𑀮𑁂𑀳𑀺 𑀓𑀺𑀮𑁂𑀲𑀤𑀭𑀣𑀸𑀦𑀁 𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀯𑀲𑁂𑀦 𑀲𑀫𑁆𑀫𑀤𑁂𑀯 𑀖𑀸𑀢𑀺𑀢𑀢𑁆𑀢𑀸 𑀲𑀗𑁆𑀖𑁄, 𑀧𑁄𑀣𑀼𑀚𑁆𑀚𑀦𑀺𑀓𑀲𑀗𑁆𑀖𑀲𑁆𑀲𑀸𑀧𑀺 𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀤𑀸𑀬 𑀞𑀺𑀢𑀢𑁆𑀢𑀸 𑀧𑀼𑀭𑀺𑀫𑀘𑁂𑀢𑀦𑀸𑀬 𑀯𑀺𑀬 𑀤𑀸𑀦𑁂 𑀏𑀢𑁆𑀣𑁂𑀯 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑁄𑀧𑀺 𑀳𑀺 𑀓𑀺𑀜𑁆𑀘𑀸𑀧𑀺 𑀅𑀭𑀺𑀬𑁂𑀦 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀅𑀲𑀁𑀳𑀢𑁄, 𑀦𑀺𑀬𑁆𑀬𑀸𑀦𑀺𑀓𑀧𑀓𑁆𑀔𑀺𑀬𑁂𑀦 𑀧𑀦 𑀧𑁄𑀣𑀼𑀚𑁆𑀚𑀦𑀺𑀓𑁂𑀦 𑀲𑀁𑀳𑀢𑀢𑁆𑀢𑀸 𑀤𑀓𑁆𑀔𑀺𑀡𑁂𑀬𑁆𑀬𑀧𑀡𑀺𑀧𑀸𑀢𑀸𑀭𑀳𑁄 𑀲𑀗𑁆𑀖𑁄𑀬𑁂𑀯𑀸𑀢𑀺, 𑀢𑀁 𑀲𑀗𑁆𑀖𑀁. 𑀘-𑀲𑀤𑁆𑀤𑀲𑁆𑀲𑀢𑁆𑀣𑁄 𑀏𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀓𑀺𑀁𑀯𑀺𑀲𑀺𑀝𑁆𑀞𑀁 𑀩𑀼𑀤𑁆𑀥𑀁, 𑀥𑀫𑁆𑀫𑀁, 𑀲𑀗𑁆𑀖𑀜𑁆𑀘𑀸𑀢𑀺 𑀆𑀳 ‘‘𑀯𑀦𑁆𑀤𑀦𑀸𑀫𑀸𑀦𑀧𑀽𑀚𑀸𑀲𑀓𑁆𑀓𑀸𑀭𑀪𑀸𑀚𑀦’’𑀦𑁆𑀢𑀺. 𑀇𑀤𑀜𑁆𑀘 𑀯𑀺𑀲𑁂𑀲𑀦𑀁 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁 ‘‘𑀯𑀦𑁆𑀤𑀦𑀸𑀫𑀸𑀦𑀧𑀽𑀚𑀸𑀲𑀓𑁆𑀓𑀸𑀭𑀪𑀸𑀚𑀦𑀁. 𑀩𑀼𑀤𑁆𑀥𑀁…𑀧𑁂… 𑀯𑀦𑁆𑀤𑀦𑀸𑀫𑀸𑀦𑀧𑀽𑀚𑀸𑀲𑀓𑁆𑀓𑀸𑀭𑀪𑀸𑀚𑀦𑀁 𑀲𑀗𑁆𑀖𑀜𑁆𑀘𑀸’’𑀢𑀺. 𑀢𑀢𑁆𑀣 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 𑀅𑀭𑀳𑀢𑀸𑀤𑀻𑀳𑀺 𑀕𑀼𑀡𑁂𑀳𑀺 𑀲𑁂𑀝𑁆𑀞𑀪𑀸𑀯𑁂𑀦 𑀓𑀭𑀺𑀬𑀫𑀸𑀦𑁄 𑀧𑀡𑀸𑀫𑁄 𑀯𑀦𑁆𑀤𑀦𑀸, 𑀲𑀫𑁆𑀫𑀸𑀦𑁄 𑀫𑀸𑀦𑁄, 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀉𑀧𑀳𑀸𑀭𑁄 𑀧𑀽𑀚𑀸, 𑀅𑀪𑀺𑀲𑀗𑁆𑀔𑀢𑀧𑀘𑁆𑀘𑀬𑀤𑀸𑀦𑀁 𑀲𑀓𑁆𑀓𑀸𑀭𑁄, 𑀯𑀦𑁆𑀤𑀦𑀸 𑀘 𑀫𑀸𑀦𑁄 𑀘 𑀧𑀽𑀚𑀸 𑀘 𑀲𑀓𑁆𑀓𑀸𑀭𑁄 𑀘 𑀯𑀦𑁆𑀤𑀦𑀸𑀫𑀸𑀦𑀧𑀽𑀚𑀸𑀲𑀓𑁆𑀓𑀸𑀭𑀸, 𑀢𑁂𑀲𑀁 𑀫𑀳𑀧𑁆𑀨𑀮𑀪𑀸𑀯𑀓𑀭𑀡𑁂𑀦 𑀪𑀸𑀚𑀦𑀢𑁆𑀢𑀸 𑀆𑀥𑀸𑀭𑀢𑁆𑀢𑀸 𑀯𑀦𑁆𑀤𑀦𑀸𑀫𑀸𑀦𑀧𑀽𑀚𑀸𑀲𑀓𑁆𑀓𑀸𑀭𑀪𑀸𑀚𑀦𑀁. 𑀇𑀫𑀺𑀦𑀸 𑀭𑀢𑀦𑀢𑁆𑀢𑀬𑀲𑁆𑀲 𑀅𑀭𑀳𑀢𑀸𑀤𑀻𑀳𑀺 𑀕𑀼𑀡𑁂𑀳𑀺 𑀅𑀲𑀫𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑀦𑁆𑀤𑀲𑁆𑀲𑀦𑀫𑁆𑀧𑀺 𑀢𑀓𑁆𑀓𑀢𑀲𑁆𑀲 𑀦𑀺𑀧𑀘𑁆𑀘𑀓𑀸𑀭𑀲𑁆𑀲 𑀲𑀲𑀦𑁆𑀢𑀸𑀦𑀧𑀯𑀦𑀸𑀤𑀺𑀯𑀲𑁂𑀦 𑀬𑀣𑀸𑀥𑀺𑀧𑁆𑀧𑁂𑀢𑀸𑀬 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀬 𑀦𑀺𑀧𑁆𑀨𑀸𑀤𑀦𑀲𑀫𑀢𑁆𑀣𑀪𑀸𑀯𑀤𑀻𑀧𑀦𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸 𑀯𑀦𑁆𑀤𑀺𑀢𑁆𑀯𑀸𑀢𑀺 𑀅𑀭𑀳𑀢𑀸𑀤𑀺𑀅𑀦𑁂𑀓𑀧𑁆𑀧𑀓𑀸𑀭𑀕𑀼𑀡𑀯𑀺𑀲𑁂𑀲𑀸𑀦𑀼𑀲𑁆𑀲𑀭𑀡𑀯𑀲𑁂𑀦 𑀯𑀺𑀯𑀺𑀥𑁂𑀦, 𑀯𑀺𑀲𑁂𑀲𑁂𑀦 𑀯𑀸 𑀧𑀲𑀦𑁆𑀦𑁂𑀦 𑀫𑀦𑀲𑀸 𑀲𑀤𑁆𑀥𑀺𑀁 𑀓𑀸𑀬𑀯𑀸𑀘𑀸𑀳𑀺 𑀓𑀭𑀡𑀪𑀽𑀢𑀸𑀳𑀺 𑀅𑀪𑀺𑀯𑀦𑁆𑀤𑀺𑀬𑀸𑀢𑀺 𑀅𑀢𑁆𑀣𑁄, 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀦𑀫𑀲𑁆𑀲𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀺𑀯𑀺𑀥𑀸 𑀘𑀸𑀬𑀁 𑀯𑀦𑁆𑀤𑀦𑀸 𑀓𑀸𑀬𑀯𑀘𑀻𑀫𑀦𑁄𑀯𑀦𑁆𑀤𑀦𑀸𑀦𑀁 𑀯𑀲𑁂𑀦. 𑀢𑀢𑁆𑀣 𑀩𑀼𑀤𑁆𑀥𑀸𑀤𑀺𑀕𑀼𑀡𑀸𑀭𑀫𑁆𑀫𑀡𑀸 𑀓𑀸𑀫𑀸𑀯𑀘𑀭𑀓𑀼𑀲𑀮𑀓𑀺𑀭𑀺𑀬𑀸𑀦𑀁 𑀅𑀜𑁆𑀜𑀢𑀭𑀘𑁂𑀢𑀦𑀸 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑁄 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀓𑀸𑀬𑀯𑀘𑀻𑀯𑀦𑁆𑀤𑀦𑀸𑀢𑀺 𑀯𑀼𑀘𑁆𑀘𑀢𑀺, 𑀉𑀪𑀬𑀯𑀺𑀜𑁆𑀜𑀢𑁆𑀢𑀺𑀬𑁄 𑀧𑀦 𑀅𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀫𑀦𑁄𑀯𑀦𑁆𑀤𑀦𑀸𑀢𑀺. 𑀇𑀫𑀲𑁆𑀲 𑀧𑀤𑀲𑁆𑀲 ‘‘𑀯𑀡𑁆𑀡𑀦𑀁 𑀯𑀡𑁆𑀡𑀬𑀺𑀲𑁆𑀲𑀸𑀫𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄.

𑀏𑀯𑀁 𑀭𑀢𑀦𑀢𑁆𑀢𑀬𑀲𑁆𑀲 𑀧𑀡𑀸𑀫𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀪𑀽𑀢𑀸𑀦𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀜𑁆𑀘 𑀧𑀡𑀸𑀫𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀣𑁂𑀭𑀯𑀁𑀲𑀧𑁆𑀧𑀤𑀻𑀧𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀢𑀜𑁆𑀚𑀮𑀻 𑀧𑀼𑀩𑁆𑀩𑀸𑀘𑀭𑀺𑀬𑀲𑀻𑀳𑀸𑀦𑀁 𑀦𑀫𑁄 𑀓𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀢𑁄 𑀅𑀜𑁆𑀚𑀮𑀺 𑀓𑀭𑀧𑀼𑀝𑁄 𑀏𑀢𑁂𑀦𑀸𑀢𑀺 𑀓𑀢𑀜𑁆𑀚𑀮𑀻. 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀜𑁆𑀳𑁂𑀢𑁆𑀣 𑀤𑀻𑀖𑁄, 𑀓𑀢𑀜𑁆𑀚𑀮𑀻 𑀳𑀼𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀼𑀩𑁆𑀩𑀸𑀘𑀭𑀺𑀬𑀸 𑀧𑁄𑀭𑀸𑀡𑀝𑁆𑀞𑀓𑀣𑀸𑀓𑀸𑀭𑀸 𑀢𑀫𑁆𑀩𑀧𑀡𑁆𑀡𑀺𑀬𑀸 𑀫𑀳𑀸𑀣𑁂𑀭𑀸, 𑀢𑁂 𑀏𑀯 𑀧𑀭𑀺𑀲𑁆𑀲𑀬𑀲𑀳𑀦𑀢𑁄, 𑀧𑀝𑀺𑀧𑀓𑁆𑀔𑀪𑀽𑀢𑀓𑀺𑀮𑁂𑀲𑀳𑀦𑀦𑀢𑁄, 𑀧𑀭𑀯𑀸𑀤𑀺𑀫𑀺𑀕𑁂𑀳𑀺 𑀅𑀧𑀥𑀁𑀲𑀦𑀻𑀬𑀢𑁄 𑀘 𑀲𑀻𑀳𑀲𑀤𑀺𑀲𑀢𑁆𑀢𑀸 𑀲𑀻𑀳𑀸𑀢𑀺 𑀧𑀼𑀩𑁆𑀩𑀸𑀘𑀭𑀺𑀬𑀲𑀻𑀳𑀸, 𑀢𑁂𑀲𑀁 𑀧𑀼𑀩𑁆𑀩𑀸𑀘𑀭𑀺𑀬𑀲𑀻𑀳𑀸𑀦𑀁. 𑀓𑀻𑀤𑀺𑀲𑀸 𑀢𑁂 𑀧𑀼𑀩𑁆𑀩𑀸𑀘𑀭𑀺𑀬𑀲𑀻𑀳𑀸, 𑀬𑁂𑀲𑀁 𑀢𑀬𑀸 𑀦𑀫𑁄 𑀓𑀭𑀻𑀬𑀢𑀻𑀢𑀺 𑀆𑀳 ‘‘𑀣𑁂𑀭𑀯𑀁𑀲𑀧𑁆𑀧𑀤𑀻𑀧𑀸𑀦’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀣𑁂𑀭𑀯𑀁𑀲𑀧𑁆𑀧𑀤𑀻𑀧𑀸𑀦𑀦𑁆𑀢𑀺 𑀣𑀺𑀭𑁂𑀳𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀸𑀢𑀺 𑀣𑁂𑀭𑀸, 𑀫𑀳𑀸𑀓𑀲𑁆𑀲𑀧𑀸𑀤𑀬𑁄, 𑀢𑁂𑀲𑀁 𑀯𑀁𑀲𑁄 𑀅𑀦𑁆𑀯𑀬𑁄𑀢𑀺 𑀣𑁂𑀭𑀯𑀁𑀲𑁄. 𑀏𑀢𑁂𑀦 𑀪𑀺𑀦𑁆𑀦𑀮𑀤𑁆𑀥𑀺𑀓𑀸𑀦𑀁 𑀲𑀢𑁆𑀢𑀭𑀲𑀪𑁂𑀤𑀸𑀦𑀁 𑀫𑀳𑀸𑀲𑀗𑁆𑀖𑀺𑀓𑀸𑀤𑀻𑀦𑀁 𑀯𑀁𑀲𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀣𑁂𑀭𑀯𑀁𑀲𑀧𑀭𑀺𑀬𑀸𑀧𑀦𑁆𑀦𑀸 𑀳𑀼𑀢𑁆𑀯𑀸 𑀧𑀦 𑀆𑀕𑀫𑀸𑀥𑀺𑀕𑀫𑀲𑀫𑁆𑀧𑀦𑁆𑀦𑀢𑁆𑀢𑀸 𑀧𑀜𑁆𑀜𑀸𑀧𑀚𑁆𑀚𑁄𑀢𑁂𑀦 𑀢𑀲𑁆𑀲 𑀣𑁂𑀭𑀯𑀁𑀲𑀲𑁆𑀲 𑀤𑀻𑀧𑀦𑀢𑁄 𑀣𑁂𑀭𑀯𑀁𑀲𑀧𑁆𑀧𑀤𑀻𑀧𑀸, 𑀧𑀼𑀩𑁆𑀩𑀸𑀘𑀭𑀺𑀬𑀲𑀻𑀳𑀸, 𑀢𑁂𑀲𑀁 𑀣𑁂𑀭𑀯𑀁𑀲𑀧𑁆𑀧𑀤𑀻𑀧𑀸𑀦𑀁. 𑀅𑀲𑀁𑀳𑀻𑀭𑀢𑁆𑀢𑀸 𑀣𑀺𑀭𑀸𑀦𑀁. 𑀯𑀺𑀦𑀬𑀓𑁆𑀓𑀫𑁂𑀢𑀺 𑀆𑀭𑀫𑁆𑀪𑀸𑀦𑀼𑀭𑀽𑀧𑀯𑀘𑀦𑀫𑁂𑀢𑀁, 𑀢𑁂 𑀧𑀦 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑁂𑀲𑀼𑀧𑀺 𑀣𑀺𑀭𑀸 𑀏𑀯.

𑀏𑀯𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀫𑁆𑀧𑀺 𑀧𑀡𑀸𑀫𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀁𑀯𑀡𑁆𑀡𑁂𑀢𑀩𑁆𑀩𑀥𑀫𑁆𑀫𑀯𑀺𑀲𑁂𑀲𑀲𑁆𑀲 𑀅𑀪𑀺𑀥𑀸𑀦𑀸𑀦𑀺𑀲𑀁𑀲𑀁, 𑀤𑁂𑀲𑀓𑀲𑀫𑁆𑀧𑀢𑁆𑀢𑀺𑀬𑁄 𑀘 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀸𑀫𑁄𑀓𑁆𑀔’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀳𑁂𑀲𑀺𑀦𑀸 𑀬𑀁 𑀧𑀸𑀢𑀺𑀫𑁄𑀓𑁆𑀔𑀁 𑀧𑀓𑀸𑀲𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀫𑀳𑁂𑀲𑀺𑀦𑀸𑀢𑀺 𑀫𑀳𑀦𑁆𑀢𑁂 𑀲𑀻𑀮𑀸𑀤𑀺𑀓𑁂 𑀧𑀜𑁆𑀘 𑀥𑀫𑁆𑀫𑀓𑁆𑀔𑀦𑁆𑀥𑁂 𑀏𑀲𑀻 𑀕𑀯𑁂𑀲𑀻𑀢𑀺 𑀫𑀳𑁂𑀲𑀺. 𑀫𑀳𑀦𑁆𑀢𑁂𑀳𑀺 𑀏𑀲𑀺𑀢𑁄𑀢𑀺 𑀯𑀸 𑀧𑀼𑀣𑀼𑀚𑁆𑀚𑀦𑀲𑁂𑀔𑀸𑀲𑁂𑀔𑀇𑀲𑀻𑀳𑀺 𑀯𑀺𑀲𑀺𑀝𑁆𑀞𑀢𑁆𑀢𑀸 𑀫𑀳𑀦𑁆𑀢𑁄 𑀇𑀲𑀻𑀢𑀺 𑀯𑀸 𑀫𑀳𑁂𑀲𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀢𑁂𑀦 𑀫𑀳𑁂𑀲𑀺𑀦𑀸. 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀲𑀢𑁆𑀢𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑀲𑀁𑀯𑀭𑀪𑀽𑀢𑀁 𑀲𑀺𑀓𑁆𑀔𑀸𑀧𑀤𑀲𑀻𑀮𑀁, 𑀢𑀤𑁆𑀤𑀻𑀧𑀦𑀢𑁄 𑀉𑀪𑀢𑁄𑀯𑀺𑀪𑀗𑁆𑀕𑀲𑀼𑀢𑁆𑀢𑀲𑀗𑁆𑀔𑀸𑀢𑀁 𑀕𑀦𑁆𑀣𑀧𑀸𑀢𑀺𑀫𑁄𑀓𑁆𑀔𑀫𑁂𑀯 𑀯𑀸. 𑀓𑀺𑀫𑁆𑀪𑀽𑀢𑀦𑁆𑀢𑀺 𑀆𑀳 ‘‘𑀧𑀸𑀫𑁄𑀓𑁆𑀔’’𑀦𑁆𑀢𑀺𑀆𑀤𑀺. 𑀧𑀫𑀼𑀔𑁂 𑀲𑀸𑀥𑀽𑀢𑀺 𑀧𑀫𑁄𑀓𑁆𑀔𑀁, 𑀧𑀫𑁄𑀓𑁆𑀔𑀫𑁂𑀯 𑀧𑀸𑀫𑁄𑀓𑁆𑀔𑀁, 𑀯𑀚𑁆𑀚𑀧𑀝𑀺𑀧𑀓𑁆𑀔𑀢𑁆𑀢𑀸 𑀅𑀦𑀯𑀚𑁆𑀚𑀸𑀦𑀁 𑀲𑀫𑀸𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀸𑀦𑀁 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀆𑀤𑀺 𑀧𑀢𑀺𑀝𑁆𑀞𑀸𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. ‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑀜𑁆𑀜𑁄, 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁩, 𑁧𑁯𑁨; 𑀧𑁂𑀝𑀓𑁄. 𑁨𑁨; 𑀫𑀺. 𑀧. 𑁨.𑁧.𑁯) 𑀳𑀺 𑀯𑀼𑀢𑁆𑀢𑀁. 𑀫𑀼𑀔𑀫𑀺𑀯𑀸𑀢𑀺 𑀫𑀼𑀔𑀁, 𑀤𑁆𑀯𑀸𑀭𑀁. 𑀬𑀣𑀸 𑀳𑀺 𑀲𑀢𑁆𑀢𑀸𑀦𑀁 𑀔𑀚𑁆𑀚𑀪𑁄𑀚𑁆𑀚𑀮𑁂𑀬𑁆𑀬𑀧𑁂𑀬𑁆𑀬𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄𑀧𑀺 𑀆𑀳𑀸𑀭𑁄 𑀫𑀼𑀔𑁂𑀦 𑀧𑀯𑀺𑀲𑀺𑀢𑁆𑀯𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀨𑀭𑀢𑀺, 𑀏𑀯𑀁 𑀬𑁄𑀕𑀺𑀦𑁄𑀧𑀺 𑀘𑀸𑀢𑀼𑀪𑀽𑀫𑀓𑀓𑀼𑀲𑀮𑀁 𑀲𑀻𑀮𑀫𑀼𑀔𑁂𑀦 𑀧𑀯𑀺𑀲𑀺𑀢𑁆𑀯𑀸 𑀅𑀢𑁆𑀣𑀲𑀺𑀤𑁆𑀥𑀺𑀁 𑀲𑀫𑁆𑀧𑀸𑀤𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀼𑀔𑀫𑀺𑀯𑀸𑀢𑀺 𑀫𑀼𑀔’’𑀦𑁆𑀢𑀺. 𑀅𑀣 𑀯𑀸 𑀫𑀼𑀔𑀁 𑀤𑁆𑀯𑀸𑀭𑀁 𑀫𑁄𑀓𑁆𑀔𑀧𑁆𑀧𑀯𑁂𑀲𑀸𑀬 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀅𑀯𑀺𑀧𑁆𑀧𑀝𑀺𑀲𑀸𑀭𑀢𑁆𑀣𑀸𑀦𑀺 𑀔𑁄, 𑀆𑀦𑀦𑁆𑀤, 𑀓𑀼𑀲𑀮𑀸𑀦𑀺 𑀲𑀻𑀮𑀸𑀦𑀻’’𑀢𑀺 (𑀅. 𑀦𑀺. 𑁧𑁧.𑁧).

𑀢𑀣𑀸 𑁋

‘‘𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀧𑀸𑀫𑁄𑀚𑁆𑀚𑀢𑁆𑀣𑀸𑀬, 𑀧𑀸𑀫𑁄𑀚𑁆𑀚𑀁 𑀧𑀻𑀢𑀢𑁆𑀣𑀸𑀬, 𑀧𑀻𑀢𑀺 𑀧𑀲𑁆𑀲𑀤𑁆𑀥𑀢𑁆𑀣𑀸𑀬, 𑀧𑀲𑁆𑀲𑀤𑁆𑀥𑀺 𑀲𑀼𑀔𑀢𑁆𑀣𑀸𑀬, 𑀲𑀼𑀔𑀁 𑀲𑀫𑀸𑀥𑀢𑁆𑀣𑀸𑀬, 𑀲𑀫𑀸𑀥𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀢𑁆𑀣𑀸𑀬, 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁 𑀦𑀺𑀩𑁆𑀩𑀺𑀤𑀢𑁆𑀣𑀸𑀬, 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀢𑁆𑀣𑀸𑀬, 𑀯𑀺𑀭𑀸𑀕𑁄 𑀯𑀺𑀫𑀼𑀢𑁆𑀢𑀢𑁆𑀣𑀸𑀬, 𑀯𑀺𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀢𑁆𑀣𑀸𑀬, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬𑀸’’𑀢𑀺 (𑀧𑀭𑀺. 𑁩𑁬𑁬) 𑀘.

𑀏𑀯𑀁 𑀲𑀁𑀯𑀡𑁆𑀡𑁂𑀢𑀩𑁆𑀩𑀥𑀫𑁆𑀫𑀲𑁆𑀲 𑀅𑀪𑀺𑀥𑀸𑀦𑀸𑀤𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀁𑀯𑀡𑁆𑀡𑀦𑀸𑀬 𑀦𑀺𑀫𑀺𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀽𑀭𑀢𑁂𑀦𑀸’’𑀢𑀺𑀆𑀤𑀺𑀦𑀸 𑀘𑀢𑀼𑀢𑁆𑀣𑀕𑀸𑀣𑀫𑀸𑀳. 𑀢𑀢𑁆𑀣 𑀲𑀽𑀭𑀢𑁂𑀦𑀸𑀢𑀺 𑀲𑁄𑀪𑀦𑁂 𑀭𑀢𑁄𑀢𑀺 𑀲𑀽𑀭𑀢𑁄 𑀉-𑀓𑀸𑀭𑀲𑁆𑀲 𑀤𑀻𑀖𑀁 𑀓𑀢𑁆𑀯𑀸, 𑀢𑁂𑀦 𑀲𑀽𑀭𑀢𑁂𑀦, 𑀲𑁄𑀪𑀦𑁂 𑀓𑀸𑀬𑀺𑀓𑀯𑀸𑀘𑀲𑀺𑀓𑀓𑀫𑁆𑀫𑁂 𑀭𑀢𑁂𑀦𑀸𑀢𑀺 𑀅𑀢𑁆𑀣𑁄, 𑀯𑀺𑀦𑀻𑀢𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀯𑀸𑀢𑁂𑀦𑀸𑀢𑀺 𑀦𑀻𑀘𑀯𑀼𑀢𑁆𑀢𑀺𑀦𑀸. 𑀲𑀼𑀘𑀺𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀦𑀸𑀢𑀺 𑀲𑀼𑀘𑀺𑀪𑀽𑀢𑀸 𑀓𑀺𑀮𑁂𑀲𑀲𑀮𑁆𑀮𑀺𑀔𑀦𑀲𑀫𑀢𑁆𑀣𑀸 𑀯𑀼𑀢𑁆𑀢𑀺 𑀧𑀝𑀺𑀧𑀢𑁆𑀢𑀺 𑀏𑀢𑀲𑁆𑀲𑀸𑀢𑀺 𑀲𑀼𑀘𑀺𑀲𑀮𑁆𑀮𑁂𑀔𑀯𑀼𑀢𑁆𑀢𑀺, 𑀢𑁂𑀦 𑀲𑀼𑀘𑀺𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀦𑀸, 𑀧𑀭𑀺𑀲𑀼𑀤𑁆𑀥𑀸𑀬 𑀅𑀧𑁆𑀧𑀺𑀘𑁆𑀙𑀯𑀼𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀯𑀺𑀦𑀬𑀸𑀘𑀸𑀭𑀬𑀼𑀢𑁆𑀢𑁂𑀦𑀸𑀢𑀺 𑀯𑀸𑀭𑀺𑀢𑁆𑀢𑀘𑀸𑀭𑀺𑀢𑁆𑀢𑀲𑀻𑀮𑀲𑀫𑁆𑀧𑀦𑁆𑀦𑁂𑀦. 𑀅𑀣 𑀯𑀸 𑀯𑀺𑀦𑀬𑁄𑀢𑀺 𑀘𑁂𑀢𑁆𑀣 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀤𑀺𑀪𑁂𑀤𑁄 𑀲𑀁𑀯𑀭𑀯𑀺𑀦𑀬𑁄. 𑀆𑀘𑀸𑀭𑁄𑀢𑀺 𑀆𑀘𑀸𑀭𑀕𑁄𑀘𑀭𑀦𑀺𑀤𑁆𑀤𑁂𑀲𑁂 𑀆𑀕𑀢𑀲𑀫𑀡𑀲𑀸𑀭𑀼𑀧𑁆𑀧𑀸𑀘𑀸𑀭𑁄. 𑀲𑁄𑀡𑀢𑁆𑀣𑁂𑀭𑁂𑀦𑀸𑀢𑀺 𑀏𑀢𑁆𑀣 𑀲𑁄𑀡𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀣𑀺𑀭𑁂𑀳𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀣𑁂𑀭𑁄. 𑀬𑀸𑀘𑀺𑀢𑁄𑀢𑀺 𑀅𑀪𑀺𑀬𑀸𑀘𑀺𑀢𑁄. 𑀣𑁂𑀭𑁄 𑀳𑀺 𑀧𑀸𑀢𑀺𑀫𑁄𑀓𑁆𑀔𑀲𑁆𑀲 𑀕𑀫𑁆𑀪𑀻𑀭𑀢𑀸𑀬 𑀤𑀼𑀭𑀯𑀕𑀸𑀳𑀢𑀁, 𑀆𑀘𑀭𑀺𑀬𑀲𑁆𑀲 𑀘 𑀢𑀁𑀲𑀁𑀯𑀡𑁆𑀡𑀦𑀸𑀬 𑀲𑀸𑀫𑀢𑁆𑀣𑀺𑀬𑀁 𑀜𑀢𑁆𑀯𑀸 ‘‘𑀧𑀸𑀢𑀺𑀫𑁄𑀓𑁆𑀔𑀲𑁆𑀲 𑀢𑀬𑀸 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀓𑀸𑀢𑀩𑁆𑀩𑀸. 𑀏𑀯𑀜𑁆𑀳𑀺 𑀲𑀸𑀲𑀦𑀲𑁆𑀲 𑀲𑀼𑀘𑀺𑀭𑀝𑁆𑀞𑀺𑀢𑀺𑀓𑀢𑀸 𑀳𑁄𑀢𑀻’’𑀢𑀺 𑀲𑀸𑀦𑀺𑀲𑀁𑀲𑀕𑀸𑀭𑀯𑁂𑀦 𑀬𑀸𑀘𑀦𑀁 𑀅𑀓𑀸𑀲𑀺. 𑀢𑀤𑀲𑁆𑀲 𑀬𑀸𑀘𑀦𑀁 𑀅𑀢𑁆𑀢𑀦𑁄 𑀲𑀁𑀯𑀡𑁆𑀡𑀦𑀸𑀬 𑀦𑀺𑀤𑀸𑀦𑀪𑀽𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀸𑀘𑀺𑀢𑁄’’𑀢𑀺 𑀆𑀳.

𑀏𑀢𑁆𑀣 𑀘 ‘‘𑀲𑀽𑀭𑀢𑁂𑀦𑀸’’𑀢𑀺 𑀇𑀫𑀺𑀦𑀸𑀲𑁆𑀲 𑀲𑁄𑀭𑀘𑁆𑀘𑀁 𑀯𑀼𑀘𑁆𑀘𑀢𑀺. ‘‘𑀦𑀺𑀯𑀸𑀢𑁂𑀦𑀸’’𑀢𑀺 𑀇𑀫𑀺𑀦𑀸 𑀦𑀻𑀘𑀫𑀦𑀢𑀸 𑀦𑀺𑀯𑀸𑀢𑀯𑀼𑀢𑁆𑀢𑀺𑀢𑀸, 𑀬𑀸𑀬 𑀦𑀺𑀯𑀸𑀢𑀯𑀼𑀢𑁆𑀢𑀺𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀦𑀺𑀳𑀢𑀫𑀸𑀦𑁄, 𑀦𑀺𑀳𑀢𑀤𑀧𑁆𑀧𑁄, 𑀧𑀸𑀤𑀧𑀼𑀜𑁆𑀙𑀦𑀘𑁄𑀴𑀓𑀲𑀫𑁄, 𑀪𑀺𑀦𑁆𑀦𑀯𑀺𑀲𑀸𑀡𑀽𑀲𑀪𑀲𑀫𑁄, 𑀉𑀤𑁆𑀥𑀝𑀤𑀸𑀞𑀲𑀧𑁆𑀧𑀲𑀫𑁄 𑀘 𑀳𑀼𑀢𑁆𑀯𑀸 𑀲𑀡𑁆𑀳𑁄 𑀲𑀔𑀺𑀮𑁄 𑀲𑀼𑀔𑀲𑀫𑁆𑀪𑀸𑀲𑁄 𑀳𑁄𑀢𑀺. ‘‘𑀲𑀼𑀘𑀺𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀦𑀸’’𑀢𑀺 𑀇𑀫𑀺𑀦𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. ‘‘𑀯𑀺𑀦𑀬𑀸𑀘𑀸𑀭𑀬𑀼𑀢𑁆𑀢𑁂𑀦𑀸’’𑀢𑀺 𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀫𑀦𑁂𑀓𑀕𑀼𑀡𑁂𑀳𑀺 𑀢𑀲𑁆𑀲 𑀅𑀪𑀺𑀢𑁆𑀣𑀯𑀦𑀁 𑀬𑀣𑀸𑀯𑀼𑀢𑁆𑀢𑀕𑀼𑀡𑀲𑀫𑀦𑁆𑀦𑀸𑀕𑀢𑀲𑁆𑀲 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀅𑀚𑁆𑀛𑁂𑀲𑀦𑀁 𑀦 𑀲𑀓𑁆𑀓𑀸 𑀧𑀝𑀺𑀩𑀸𑀳𑀺𑀢𑀼𑀦𑁆𑀢𑀺 𑀧𑀭𑀫𑀕𑀫𑁆𑀪𑀻𑀭𑀲𑁆𑀲𑀸𑀧𑀺 𑀧𑀸𑀢𑀺𑀫𑁄𑀓𑁆𑀔𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀬𑀁 𑀧𑀯𑀢𑁆𑀢𑀸𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀓𑀺𑀜𑁆𑀘 𑁋 𑀢𑀸𑀤𑀺𑀲𑀲𑁆𑀲 𑀅𑀚𑁆𑀛𑁂𑀲𑀦𑀁 𑀦𑀺𑀲𑁆𑀲𑀸𑀬 𑀓𑀭𑀺𑀬𑀫𑀸𑀦𑀸 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀢𑀲𑁆𑀲 𑀅𑀚𑁆𑀛𑁂𑀲𑀦𑀸𑀥𑀺𑀧𑀘𑁆𑀘𑁂𑀦, 𑀫𑀫𑀜𑁆𑀘 𑀉𑀲𑁆𑀲𑀸𑀳𑀲𑀫𑁆𑀧𑀢𑁆𑀢𑀺𑀬𑀸 𑀦 𑀘𑀺𑀭𑁂𑀦 𑀧𑀭𑀺𑀬𑁄𑀲𑀸𑀦𑀁 𑀕𑀘𑁆𑀙𑀢𑀻𑀢𑀺 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀯𑀁 𑀲𑀁𑀯𑀡𑁆𑀡𑀦𑀸𑀬 𑀦𑀺𑀫𑀺𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲𑀯𑀦𑁂 𑀲𑁄𑀢𑀼𑀚𑀦𑀲𑁆𑀲𑀸𑀤𑀭𑀁 𑀚𑀦𑁂𑀢𑀼𑀁 𑀢𑀧𑁆𑀧𑀬𑁄𑀚𑀦𑀓𑀭𑀡𑀧𑁆𑀧𑀓𑀸𑀭𑀦𑀺𑀲𑁆𑀲𑀬𑀸𑀪𑀺𑀥𑀸𑀦𑀸𑀤𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 ‘‘𑀬𑀁 𑀫𑀳𑁂𑀲𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀁 𑀧𑀓𑀸𑀲𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀺𑀁 𑀧𑀸𑀢𑀺𑀫𑁄𑀓𑁆𑀔𑁂. 𑀲𑀜𑁆𑀚𑀸𑀢𑀓𑀗𑁆𑀔𑀸𑀦𑀦𑁆𑀢𑀺 𑀧𑀤𑀧𑀤𑀢𑁆𑀣𑀯𑀺𑀦𑀺𑀘𑁆𑀙𑀬𑀯𑀲𑁂𑀦 𑀲𑀜𑁆𑀚𑀸𑀢𑀓𑀗𑁆𑀔𑀸𑀦𑀁, 𑀲𑀫𑀼𑀧𑁆𑀧𑀦𑁆𑀦𑀲𑀁𑀲𑀬𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀓𑀗𑁆𑀔𑀸𑀯𑀺𑀢𑀭𑀡𑀢𑁆𑀣𑀸𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑀁𑀲𑀬𑀲𑁆𑀲 𑀅𑀢𑀺𑀓𑁆𑀓𑀫𑀦𑀢𑁆𑀣𑀸𑀬. 𑀢𑀲𑁆𑀲𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑁆𑀲. 𑀯𑀡𑁆𑀡𑀻𑀬𑀢𑀺 𑀅𑀢𑁆𑀣𑁄 𑀓𑀣𑀻𑀬𑀢𑀺 𑀏𑀢𑀸𑀬𑀸𑀢𑀺 𑀯𑀡𑁆𑀡𑀦𑀸, 𑀅𑀝𑁆𑀞𑀓𑀣𑀸, 𑀢𑀁 𑀯𑀡𑁆𑀡𑀦𑀁. 𑀇𑀫𑀲𑁆𑀲 𑀘 ‘‘𑀯𑀡𑁆𑀡𑀬𑀺𑀲𑁆𑀲𑀸𑀫𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀓𑀺𑀁𑀪𑀽𑀢𑀦𑁆𑀢𑀺 𑀆𑀳 ‘‘𑀧𑀭𑀺𑀧𑀼𑀡𑁆𑀡𑀯𑀺𑀦𑀺𑀘𑁆𑀙𑀬’’𑀦𑁆𑀢𑀺𑀆𑀤𑀺. 𑀧𑀭𑀺𑀧𑀼𑀡𑁆𑀡𑀯𑀺𑀦𑀺𑀘𑁆𑀙𑀬𑀦𑁆𑀢𑀺 𑀔𑀦𑁆𑀥𑀓𑀧𑀭𑀺𑀯𑀸𑀭𑀧𑀤𑀪𑀸𑀚𑀦𑀸𑀤𑀺𑀯𑀲𑁂𑀦 𑀅𑀲𑀸𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑀲𑁆𑀲 𑀘 𑀦𑀺𑀤𑀸𑀦𑀸𑀤𑀺𑀯𑀲𑁂𑀦 𑀲𑀢𑁆𑀢𑀭𑀲𑀧𑁆𑀧𑀪𑁂𑀤𑀲𑁆𑀲 𑀘 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀲𑀸𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑀲𑁆𑀲 𑀧𑀓𑀸𑀲𑀦𑀢𑁄 𑀲𑀫𑁆𑀧𑀼𑀡𑁆𑀡𑀯𑀺𑀦𑀺𑀘𑁆𑀙𑀬𑀁.

𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀦𑁆𑀢𑀺 𑀫𑀳𑀸𑀫𑁂𑀖𑀯𑀦𑀼𑀬𑁆𑀬𑀸𑀦𑀪𑀽𑀫𑀺𑀪𑀸𑀕𑁂 𑀧𑀢𑀺𑀝𑁆𑀞𑀺𑀢𑁄 𑀯𑀺𑀳𑀸𑀭𑁄 𑀫𑀳𑀸𑀯𑀺𑀳𑀸𑀭𑁄, 𑀬𑁄 𑀲𑀢𑁆𑀣𑀼𑀦𑁄 𑀫𑀳𑀸𑀩𑁄𑀥𑀺𑀦𑀸 𑀯𑀺𑀪𑀽𑀲𑀺𑀢𑁄, 𑀢𑀢𑁆𑀣 𑀯𑀲𑀦𑁆𑀢𑀺 𑀲𑀻𑀮𑁂𑀦𑀸𑀢𑀺 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄, 𑀢𑁂𑀲𑀁 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁. 𑀯𑀸𑀘𑀦𑀸𑀫𑀕𑁆𑀕𑀦𑀺𑀲𑁆𑀲𑀺𑀢𑀦𑁆𑀢𑀺 𑀓𑀣𑀸𑀫𑀕𑁆𑀕𑀦𑀺𑀲𑁆𑀲𑀺𑀢𑀁, 𑀅𑀝𑁆𑀞𑀓𑀣𑀸𑀦𑀺𑀲𑁆𑀲𑀺𑀢𑀦𑁆𑀢𑀺 𑀅𑀢𑁆𑀣𑁄, 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀲𑀻𑀳𑀴𑀝𑁆𑀞𑀓𑀣𑀸𑀦𑀬𑀁 𑀇𑀥 𑀦𑀺𑀲𑁆𑀲𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀡𑁆𑀡𑀬𑀺𑀲𑁆𑀲𑀸𑀫𑀻𑀢𑀺 𑀧𑀯𑀢𑁆𑀢𑀬𑀺𑀲𑁆𑀲𑀸𑀫𑀺. 𑀦𑀸𑀫𑁂𑀦𑀸𑀢𑀺 𑀅𑀢𑁆𑀢𑀦𑁄 𑀕𑀼𑀡𑀦𑀸𑀫𑁂𑀦. 𑀓𑀗𑁆𑀔𑀸𑀯𑀺𑀢𑀭𑀦𑁆𑀢𑀺 𑀏𑀢𑀸𑀬𑀸𑀢𑀺 𑀓𑀗𑁆𑀔𑀸𑀯𑀺𑀢𑀭𑀡𑀻, 𑀢𑀁 𑀓𑀗𑁆𑀔𑀸𑀯𑀺𑀢𑀭𑀡𑀺𑀁. 𑀲𑀼𑀪𑀦𑁆𑀢𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀢𑁆𑀢𑀸 𑀲𑀼𑀦𑁆𑀤𑀭𑀁, 𑀲𑀤𑁆𑀤𑀮𑀓𑁆𑀔𑀡𑀲𑀼𑀪𑀢𑁄, 𑀯𑀺𑀦𑀺𑀘𑁆𑀙𑀬𑀲𑀼𑀪𑀢𑁄, 𑀯𑀺𑀜𑁆𑀜𑁂𑀬𑁆𑀬𑀲𑀼𑀪𑀢𑁄 𑀘 𑀲𑀼𑀪𑀁 𑀧𑀭𑀺𑀲𑀼𑀤𑁆𑀥𑀁. 𑀏𑀢𑁆𑀣 𑀘 ‘‘𑀓𑀗𑁆𑀔𑀸𑀯𑀺𑀢𑀭𑀡𑀢𑁆𑀣𑀸𑀬𑀸’’𑀢𑀺 𑀇𑀫𑀺𑀦𑀸 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀺, 𑀧𑀼𑀭𑀺𑀧𑀼𑀡𑁆𑀡𑀯𑀺𑀦𑀺𑀘𑁆𑀙𑀬’’𑀦𑁆𑀢𑀺 𑀇𑀫𑀺𑀦𑀸 𑀲𑀁𑀯𑀡𑁆𑀡𑀦𑀸𑀧𑁆𑀧𑀓𑀸𑀭𑀁, ‘‘𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀯𑀸𑀘𑀦𑀸𑀫𑀕𑁆𑀕𑀦𑀺𑀲𑁆𑀲𑀺𑀢’’𑀦𑁆𑀢𑀺 𑀇𑀫𑀺𑀦𑀸 𑀲𑀁𑀯𑀡𑁆𑀡𑀦𑀸𑀬 𑀦𑀺𑀲𑁆𑀲𑀬𑀯𑀺𑀲𑀼𑀤𑁆𑀥𑀺𑀁 𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀺𑀲𑀗𑁆𑀓𑀭𑀤𑁄𑀲𑀯𑀺𑀯𑀚𑁆𑀚𑀦𑀢𑁄, ‘‘𑀯𑀡𑁆𑀡𑀬𑀺𑀲𑁆𑀲𑀸𑀫𑀻’’𑀢𑀺 𑀇𑀫𑀺𑀦𑀸 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀁 𑀤𑀲𑁆𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀯𑀢𑁆𑀢𑀬𑀺𑀲𑁆𑀲𑀸𑀫𑀻’’𑀢𑀺𑀧𑀺 𑀧𑀸𑀞𑁄.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑀸𑀦𑀯𑀡𑁆𑀡𑀦𑀸

𑀏𑀯𑀁 𑀭𑀢𑀦𑀢𑁆𑀢𑀬𑀧𑀡𑀸𑀫𑀸𑀤𑀺𑀲𑀳𑀺𑀢𑀁 𑀲𑀜𑁆𑀜𑀸𑀤𑀺𑀓𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀧𑀸𑀢𑀺𑀫𑁄𑀓𑁆𑀔𑀲𑁆𑀲 𑀯𑀡𑁆𑀡𑀦𑀁 𑀯𑀡𑁆𑀡𑀬𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀸𑀢𑀺𑀫𑁄𑀓𑁆𑀔𑀁 𑀢𑀸𑀯 𑀯𑀘𑀦𑀢𑁆𑀣𑀢𑁄, 𑀲𑀭𑀽𑀧𑀪𑁂𑀤𑀢𑁄, 𑀕𑀦𑁆𑀣𑀪𑁂𑀤𑀢𑁄, 𑀉𑀤𑁆𑀤𑁂𑀲𑀯𑀺𑀪𑀸𑀕𑀢𑁄, 𑀉𑀤𑁆𑀤𑁂𑀲𑀧𑀭𑀺𑀘𑁆𑀙𑁂𑀤𑀢𑁄 𑀘 𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑀤𑀼𑀤𑁆𑀤𑁂𑀲𑀓𑁆𑀓𑀫𑁂𑀦𑀸𑀬𑀁 𑀯𑀡𑁆𑀡𑀦𑀸 𑀪𑀯𑀺𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁.

𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀕𑀸𑀣𑀸𑀧𑀤𑁂. 𑀧𑀅𑀢𑀺𑀫𑁄𑀓𑁆𑀔𑀦𑁆𑀢𑀺 𑀧𑀓𑀸𑀭𑀢𑁄 𑀅𑀢𑀺𑀯𑀺𑀬 𑀲𑀻𑀮𑁂𑀲𑀼 𑀫𑀼𑀔𑀪𑀽𑀢𑀁. 𑀅𑀢𑀺𑀧𑀫𑁄𑀓𑁆𑀔𑀦𑁆𑀢𑀺 𑀢𑀫𑁂𑀯 𑀧𑀤𑀁 𑀉𑀧𑀲𑀕𑁆𑀕𑀩𑁆𑀬𑀢𑁆𑀢𑀬𑁂𑀦 𑀯𑀤𑀢𑀺. 𑀅𑀣 𑀯𑀸 𑀧 𑀅𑀢𑀺 𑀫𑁄𑀓𑁆𑀔𑀦𑁆𑀢𑀺 𑀧𑀤𑀘𑁆𑀙𑁂𑀤𑁄, 𑀢𑀲𑁆𑀲 𑀉𑀧𑀲𑀕𑁆𑀕𑀩𑁆𑀬𑀢𑁆𑀢𑀬𑁂𑀦𑀢𑁆𑀣𑀫𑀸𑀳 ‘‘𑀅𑀢𑀺𑀧𑀫𑁄𑀓𑁆𑀔’’𑀦𑁆𑀢𑀺. 𑀏𑀯𑀁 𑀧𑀪𑁂𑀤𑀢𑁄 𑀧𑀤𑀯𑀡𑁆𑀡𑀦𑀁 𑀓𑀢𑁆𑀯𑀸 𑀲𑀤𑁆𑀤𑀢𑁆𑀣𑀢𑁄 𑀯𑀤𑀢𑀺 ‘‘𑀅𑀢𑀺𑀲𑁂𑀝𑁆𑀞𑀁 𑀅𑀢𑀺𑀉𑀢𑁆𑀢𑀫𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀏𑀢𑁆𑀣 𑀘 𑀲𑀻𑀮𑀧𑀸𑀢𑀺𑀫𑁄𑀓𑁆𑀔𑀁 𑀲𑀩𑁆𑀩𑀕𑀼𑀡𑀸𑀦𑀁 𑀫𑀽𑀮𑀪𑀸𑀯𑀢𑁄 𑀲𑁂𑀝𑁆𑀞𑀁, 𑀕𑀦𑁆𑀣𑀧𑀸𑀢𑀺𑀫𑁄𑀓𑁆𑀔𑀁 𑀧𑀦 𑀲𑁂𑀝𑁆𑀞𑀕𑀼𑀡𑀲𑀳𑀘𑀭𑀡𑀢𑁄 𑀲𑁂𑀝𑁆𑀞𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀉𑀢𑁆𑀢𑀫𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀻𑀢𑀺 𑀏𑀯𑀁. 𑀇𑀫𑀺𑀦𑀸 𑀬𑀣𑀸𑀯𑀼𑀢𑁆𑀢𑀯𑀘𑀦𑀢𑁆𑀣𑀁 𑀦𑀺𑀤𑀲𑁆𑀲𑁂𑀢𑀺. 𑀦𑀺𑀤𑀲𑁆𑀲𑀦𑀢𑁆𑀣𑁄 𑀳𑀺 𑀅𑀬𑀁 𑀇𑀢𑀺-𑀲𑀤𑁆𑀤𑁄 ‘‘𑀲𑀩𑁆𑀩𑀫𑀢𑁆𑀣𑀻𑀢𑀺 𑀔𑁄, 𑀓𑀘𑁆𑀘𑀸𑀦, 𑀅𑀬𑀫𑁂𑀓𑁄 𑀅𑀦𑁆𑀢𑁄, 𑀲𑀩𑁆𑀩𑀁 𑀦𑀢𑁆𑀣𑀻𑀢𑀺 𑀔𑁄, 𑀓𑀘𑁆𑀘𑀸𑀦, 𑀅𑀬𑀁 𑀤𑀼𑀢𑀺𑀬𑁄 𑀅𑀦𑁆𑀢𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁧𑁫; 𑁩.𑁯𑁦) 𑀯𑀺𑀬. 𑀇𑀫𑀺𑀦𑀸𑀢𑀺 𑀆𑀲𑀦𑁆𑀦𑀧𑀘𑁆𑀘𑀓𑁆𑀔𑀯𑀘𑀦𑀁 𑀇𑀢𑀺-𑀲𑀤𑁆𑀤𑁂𑀦 𑀅𑀦𑀦𑁆𑀢𑀭𑀦𑀺𑀤𑀲𑁆𑀲𑀺𑀢𑀲𑁆𑀲, 𑀧𑀝𑀺𑀕𑁆𑀕𑀸𑀳𑀓𑁂𑀳𑀺 𑀘 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀺𑀯𑀻𑀣𑀺𑀬𑀸 𑀧𑀝𑀺𑀧𑀦𑁆𑀦𑀲𑁆𑀲 𑀯𑀘𑀦𑀢𑁆𑀣𑀲𑁆𑀲 𑀯𑀘𑀦𑀢𑁄. 𑀅𑀣 𑀯𑀸 𑀇𑀫𑀺𑀦𑀸𑀢𑀺 𑀆𑀲𑀦𑁆𑀦𑀧𑀘𑁆𑀘𑀓𑁆𑀔𑀪𑀸𑀯𑀓𑀭𑀡𑀯𑀘𑀦𑀁 𑀬𑀣𑀸𑀯𑀼𑀢𑁆𑀢𑀲𑁆𑀲 𑀯𑀘𑀦𑀢𑁆𑀣𑀲𑁆𑀲 𑀅𑀪𑀺𑀫𑀼𑀔𑀻𑀓𑀭𑀡𑀢𑁄. 𑀯𑀘𑀦𑀢𑁆𑀣𑁂𑀦𑀸𑀢𑀺 ‘‘𑀅𑀢𑀺𑀲𑁂𑀝𑁆𑀞’’𑀦𑁆𑀢𑀺 𑀲𑀤𑁆𑀤𑀢𑁆𑀣𑁂𑀦. 𑀏𑀓𑀯𑀺𑀥𑀫𑁆𑀧𑀻𑀢𑀺 𑀏𑀓𑀓𑁄𑀝𑁆𑀞𑀸𑀲𑀫𑁆𑀧𑀺. 𑀲𑀻𑀮𑀕𑀦𑁆𑀣𑀪𑁂𑀤𑀢𑁄 𑀤𑀼𑀯𑀺𑀥𑀁 𑀳𑁄𑀢𑀻𑀢𑀺 𑀧𑀼𑀦 𑀲𑀻𑀮𑀕𑀦𑁆𑀣𑀲𑀗𑁆𑀔𑀸𑀢𑁂𑀦 𑀧𑀪𑁂𑀤𑁂𑀦 𑀤𑀼𑀯𑀺𑀥𑀁 𑀳𑁄𑀢𑀺, 𑀲𑀻𑀮𑀧𑀸𑀢𑀺𑀫𑁄𑀓𑁆𑀔𑀁, 𑀕𑀦𑁆𑀣𑀧𑀸𑀢𑀺𑀫𑁄𑀓𑁆𑀔𑀜𑁆𑀘𑀸𑀢𑀺 𑀤𑀼𑀯𑀺𑀥𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀢𑀤𑀼𑀪𑀬𑀲𑁆𑀲𑀸𑀧𑀺 𑀲𑀼𑀢𑁆𑀢𑁂 𑀆𑀕𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀸𑀢𑀺 𑀭𑀓𑁆𑀔𑀢𑀻𑀢𑀺 𑀧𑀸𑀢𑀺, 𑀢𑀁 𑀫𑁄𑀓𑁆𑀔𑁂𑀢𑀺 𑀫𑁄𑀘𑁂𑀢𑀺 𑀆𑀧𑀸𑀬𑀺𑀓𑀸𑀤𑀻𑀳𑀺 𑀤𑀼𑀓𑁆𑀔𑁂𑀳𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀁, 𑀲𑀁𑀯𑀭𑀡𑀁 𑀲𑀁𑀯𑀭𑁄, 𑀓𑀸𑀬𑀯𑀸𑀘𑀸𑀳𑀺 𑀅𑀯𑀻𑀢𑀺𑀓𑁆𑀓𑀫𑁄, 𑀧𑀸𑀢𑀺𑀫𑁄𑀓𑁆𑀔𑀫𑁂𑀯 𑀲𑀁𑀯𑀭𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀲𑀁𑀯𑀼𑀢𑁄 𑀲𑀫𑀦𑁆𑀦𑀸𑀕𑀢𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄. 𑀯𑀺𑀳𑀭𑀢𑀻𑀢𑀺 𑀯𑀢𑁆𑀢𑀢𑀺.

𑀆𑀤𑀺𑀫𑁂𑀢𑀦𑁆𑀢𑀺 𑀏𑀢𑀁 𑀲𑀺𑀓𑁆𑀔𑀸𑀧𑀤𑀲𑀻𑀮𑀁 𑀧𑀼𑀩𑁆𑀩𑀼𑀧𑁆𑀧𑀢𑁆𑀢𑀺𑀅𑀢𑁆𑀣𑁂𑀦 𑀆𑀤𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀉𑀢𑁆𑀢𑀺𑀬, 𑀆𑀤𑀺𑀫𑁂𑀯 𑀯𑀺𑀲𑁄𑀥𑁂𑀳𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀓𑁄 𑀘𑀸𑀤𑀺 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁? 𑀲𑀻𑀮𑀜𑁆𑀘 𑀲𑀼𑀯𑀺𑀲𑀼𑀤𑁆𑀥𑀁, 𑀤𑀺𑀝𑁆𑀞𑀺 𑀘 𑀉𑀚𑀼𑀓𑀸’’𑀢𑀺 (𑀲𑀁. 𑀦𑀺. 𑁫.𑁩𑁮𑁨).

𑀬𑀣𑀸 𑀳𑀺 𑀦𑀕𑀭𑀯𑀟𑁆𑀠𑀓𑀻 𑀦𑀕𑀭𑀁 𑀫𑀸𑀧𑁂𑀢𑀼𑀓𑀸𑀫𑁄 𑀧𑀞𑀫𑀁 𑀦𑀕𑀭𑀝𑁆𑀞𑀸𑀦𑀁 𑀲𑁄𑀥𑁂𑀢𑀺, 𑀢𑀢𑁄 𑀅𑀧𑀭𑀪𑀸𑀕𑁂 𑀯𑀻𑀣𑀺𑀘𑀢𑀼𑀓𑁆𑀓𑀲𑀺𑀗𑁆𑀖𑀸𑀝𑀓𑀸𑀤𑀺𑀧𑀭𑀺𑀘𑁆𑀙𑁂𑀤𑁂𑀦 𑀯𑀺𑀪𑀚𑀺𑀢𑁆𑀯𑀸 𑀦𑀕𑀭𑀁 𑀫𑀸𑀧𑁂𑀢𑀺, 𑀬𑀣𑀸 𑀯𑀸 𑀧𑀦 𑀭𑀚𑀓𑁄 𑀧𑀞𑀫𑀁 𑀢𑀻𑀳𑀺 𑀔𑀸𑀭𑁂𑀳𑀺 𑀯𑀢𑁆𑀣𑀁 𑀥𑁄𑀯𑀺𑀢𑁆𑀯𑀸 𑀧𑀭𑀺𑀲𑀼𑀤𑁆𑀥𑁂 𑀯𑀢𑁆𑀣𑁂 𑀬𑀤𑀺𑀘𑁆𑀙𑀓𑀁 𑀭𑀗𑁆𑀕𑀚𑀸𑀢𑀁 𑀉𑀧𑀦𑁂𑀢𑀺, 𑀬𑀣𑀸 𑀯𑀸 𑀧𑀦 𑀙𑁂𑀓𑁄 𑀘𑀺𑀢𑁆𑀢𑀓𑀸𑀭𑁄 𑀭𑀽𑀧𑀁 𑀮𑀺𑀔𑀺𑀢𑀼𑀓𑀸𑀫𑁄 𑀆𑀤𑀺𑀢𑁄𑀯 𑀪𑀺𑀢𑁆𑀢𑀺𑀧𑀭𑀺𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀢𑁄 𑀅𑀧𑀭𑀪𑀸𑀕𑁂 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀏𑀯𑀫𑁂𑀯 𑀬𑁄𑀕𑀸𑀯𑀘𑀭𑁄 𑀆𑀤𑀺𑀢𑁄𑀯 𑀲𑀻𑀮𑀁 𑀯𑀺𑀲𑁄𑀥𑁂𑀢𑁆𑀯𑀸 𑀅𑀧𑀭𑀪𑀸𑀕𑁂 𑀲𑀫𑀣𑀯𑀺𑀧𑀲𑁆𑀲𑀦𑀸𑀤𑀬𑁄 𑀥𑀫𑁆𑀫𑁂 𑀲𑀘𑁆𑀙𑀺𑀓𑀭𑁄𑀢𑀺. 𑀢𑀲𑁆𑀫𑀸 𑀲𑀻𑀮𑀁 ‘‘𑀆𑀤𑀻’’𑀢𑀺 𑀯𑀼𑀢𑁆𑀢𑀁. ‘‘𑀫𑀼𑀔𑀫𑁂𑀢’’𑀦𑁆𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀆𑀤𑀺𑀲𑀤𑁆𑀤𑁂𑀦 ‘‘𑀧𑀸𑀢𑀺𑀫𑁄𑀓𑁆𑀔𑁂 𑀘 𑀲𑀁𑀯𑀭𑁄’’𑀢𑀺𑀆𑀤𑀺𑀧𑀸𑀴𑀺𑀁 (𑀤𑀻. 𑀦𑀺. 𑁨.𑁯𑁦; 𑀥. 𑀧. 𑁧𑁮𑁫) 𑀲𑀗𑁆𑀕𑀡𑁆𑀳𑀸𑀢𑀺.

𑀲𑀻𑀮𑀦𑁆𑀢𑀺 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀯𑀲𑁂𑀦 𑀤𑀼𑀯𑀺𑀥𑀁 𑀯𑀺𑀦𑀬𑀧𑀺𑀝𑀓𑀧𑀭𑀺𑀬𑀸𑀧𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀲𑀻𑀮𑀁, 𑀥𑀫𑁆𑀫𑀢𑁄 𑀧𑀦 𑀲𑀻𑀮𑀁 𑀦𑀸𑀫 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀯𑀸 𑀯𑀺𑀭𑀫𑀦𑁆𑀢𑀲𑁆𑀲, 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀯𑀸 𑀧𑀽𑀭𑁂𑀦𑁆𑀢𑀲𑁆𑀲 𑀘𑁂𑀢𑀦𑀸𑀤𑀬𑁄 𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 ‘‘𑀓𑀺𑀁 𑀲𑀻𑀮𑀦𑁆𑀢𑀺 𑀘𑁂𑀢𑀦𑀸 𑀲𑀻𑀮𑀁 𑀘𑁂𑀢𑀲𑀺𑀓𑀁 𑀲𑀻𑀮𑀁 𑀲𑀁𑀯𑀭𑁄 𑀲𑀻𑀮𑀁 𑀅𑀯𑀻𑀢𑀺𑀓𑁆𑀓𑀫𑁄 𑀲𑀻𑀮’’𑀦𑁆𑀢𑀺 (𑀧𑀝𑀺. 𑀫. 𑁧.𑁩𑁯) ‘‘𑀉𑀪𑀬𑀸𑀦𑀺 𑀔𑁄 𑀧𑀦𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀸𑀦𑀻’’𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀧𑀸𑀢𑀺𑀫𑁄𑀓𑁆𑀔𑀯𑀲𑁂𑀦 𑀉𑀪𑀬𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀸𑀦𑀺, 𑀤𑁆𑀯𑁂 𑀫𑀸𑀢𑀺𑀓𑀸𑀢𑀺 𑀅𑀢𑁆𑀣𑁄. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑁆𑀲. 𑀯𑀺𑀢𑁆𑀣𑀸𑀭𑁂𑀦𑀸𑀢𑀺 𑀉𑀪𑀢𑁄𑀯𑀺𑀪𑀗𑁆𑀕𑁂𑀦 𑀲𑀤𑁆𑀥𑀺𑀁. 𑀲𑁆𑀯𑀸𑀕𑀢𑀸𑀦𑀻𑀢𑀺 𑀲𑀼𑀝𑁆𑀞𑀼 𑀆𑀕𑀢𑀸𑀦𑀺. 𑀆𑀤𑀺𑀲𑀤𑁆𑀤𑁂𑀦 ‘‘𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸’’𑀢𑀺𑀆𑀤𑀺𑀧𑀸𑀴𑀺𑀁 (𑀫𑀳𑀸𑀯. 𑁧𑁩𑁪) 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀲𑀻𑀮𑀕𑀦𑁆𑀣𑀧𑀸𑀢𑀺𑀫𑁄𑀓𑁆𑀔𑁂𑀲𑀼. 𑀬𑁄𑀢𑀺 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑁄, 𑀬𑁄 𑀓𑁄𑀘𑀺 𑀧𑀼𑀕𑁆𑀕𑀮𑁄. 𑀦𑀦𑁆𑀢𑀺 𑀯𑀺𑀦𑀬𑀧𑀭𑀺𑀬𑀸𑀧𑀦𑁆𑀦𑀲𑀻𑀮𑀁. 𑀭𑀓𑁆𑀔𑀢𑀻𑀢𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀅𑀯𑀺𑀓𑁄𑀧𑁂𑀦𑁆𑀢𑁄 𑀧𑀸𑀮𑁂𑀢𑀺. 𑀢𑀁 ‘‘𑀧𑀸𑀢𑀻’’𑀢𑀺 𑀮𑀤𑁆𑀥𑀦𑀸𑀫𑀁 𑀧𑀸𑀢𑀺𑀫𑁄𑀓𑁆𑀔𑀲𑀻𑀮𑁂 𑀞𑀺𑀢𑀁. 𑀫𑁄𑀘𑁂𑀢𑀻𑀢𑀺 𑀲𑀳𑀓𑀸𑀭𑀺𑀓𑀸𑀭𑀡𑀪𑀸𑀯𑀢𑁄 𑀫𑁄𑀓𑁆𑀔𑁂𑀢𑀺. 𑀅𑀧𑀸𑀬𑁂 𑀚𑀸𑀢𑀁 𑀆𑀧𑀸𑀬𑀺𑀓𑀁, 𑀤𑀼𑀓𑁆𑀔𑀁, 𑀢𑀁 𑀆𑀤𑀺 𑀬𑁂𑀲𑀁 𑀢𑀸𑀦𑀺 𑀆𑀧𑀸𑀬𑀺𑀓𑀸𑀤𑀻𑀦𑀺. 𑀆𑀤𑀺𑀲𑀤𑁆𑀤𑁂𑀦 𑀢𑀤𑀜𑁆𑀜𑀁 𑀲𑀩𑁆𑀩𑀁 𑀲𑀁𑀲𑀸𑀭𑀤𑀼𑀓𑁆𑀔𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀢𑁆𑀢𑀸𑀦𑀼𑀯𑀸𑀤𑀸𑀤𑀻𑀳𑀻𑀢𑀺 𑀅𑀢𑁆𑀢𑀸𑀦𑀁 𑀅𑀦𑀼𑀯𑀸𑀤𑁄 𑀅𑀢𑁆𑀢𑀸𑀦𑀼𑀯𑀸𑀤𑁄, 𑀲𑁄 𑀆𑀤𑀺 𑀬𑁂𑀲𑀁 𑀢𑀸𑀦𑀺 𑀅𑀢𑁆𑀢𑀸𑀦𑀼𑀯𑀸𑀤𑀸𑀤𑀻𑀦𑀺, 𑀢𑁂𑀳𑀺 𑀅𑀢𑁆𑀢𑀸𑀦𑀼𑀯𑀸𑀤𑀸𑀤𑀻𑀳𑀺. 𑀆𑀤𑀺𑀲𑀤𑁆𑀤𑁂𑀦 𑀧𑀭𑀸𑀦𑀼𑀯𑀸𑀤𑀤𑀡𑁆𑀟𑀤𑀼𑀕𑁆𑀕𑀢𑀺𑀪𑀬𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀲𑁆𑀲 𑀚𑁄𑀢𑀓𑀢𑁆𑀢𑀸𑀢𑀺 𑀢𑀲𑁆𑀲 𑀲𑀻𑀮𑀧𑀸𑀢𑀺𑀫𑁄𑀓𑁆𑀔𑀲𑁆𑀲 𑀤𑀻𑀧𑀦𑀢𑁆𑀢𑀸. 𑀆𑀤𑀺𑀫𑁆𑀳𑀺 𑀧𑀦 𑀯𑀼𑀢𑁆𑀢𑁄 𑀯𑀘𑀦𑀢𑁆𑀣𑁄𑀢𑀺 ‘‘𑀅𑀢𑀺𑀲𑁂𑀝𑁆𑀞’’𑀦𑁆𑀢𑀺𑀆𑀤𑀺𑀦𑀸 𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑁄 𑀯𑀘𑀦𑀢𑁆𑀣𑁄. 𑀉𑀪𑀺𑀦𑁆𑀦𑀫𑁆𑀧𑀺 𑀲𑀸𑀥𑀸𑀭𑀡𑁄 𑀳𑁄𑀢𑀺 𑀲𑀻𑀮𑀧𑀸𑀢𑀺𑀫𑁄𑀓𑁆𑀔𑀁 𑀲𑀩𑁆𑀩𑀕𑀼𑀡𑀸𑀦𑀁 𑀫𑀽𑀮𑀪𑀸𑀯𑀢𑁄 𑀲𑁂𑀝𑁆𑀞𑀁, 𑀕𑀦𑁆𑀣𑀧𑀸𑀢𑀺𑀫𑁄𑀓𑁆𑀔𑀁 𑀲𑁂𑀝𑁆𑀞𑀕𑀼𑀡𑀲𑀳𑀘𑀭𑀡𑀢𑁄 𑀲𑁂𑀝𑁆𑀞𑀦𑁆𑀢𑀺.

𑀢𑀢𑁆𑀣𑀸𑀢𑀺 𑀢𑁂𑀲𑀼 𑀲𑀻𑀮𑀧𑀸𑀢𑀺𑀫𑁄𑀓𑁆𑀔𑀕𑀦𑁆𑀣𑀧𑀸𑀢𑀺𑀫𑁄𑀓𑁆𑀔𑁂𑀲𑀼. ‘‘𑀅𑀬𑀁 𑀯𑀡𑁆𑀡𑀦𑀸’’𑀢𑀺 𑀯𑀓𑁆𑀔𑀫𑀸𑀦𑀯𑀡𑁆𑀡𑀦𑀫𑀸𑀳. 𑀕𑀦𑁆𑀣𑀧𑀸𑀢𑀺𑀫𑁄𑀓𑁆𑀔𑀲𑁆𑀲 𑀢𑀸𑀯 𑀬𑀼𑀚𑁆𑀚𑀢𑀼, 𑀓𑀣𑀁 𑀲𑀻𑀮𑀧𑀸𑀢𑀺𑀫𑁄𑀓𑁆𑀔𑀲𑁆𑀲 𑀬𑀼𑀚𑁆𑀚𑀢𑀻𑀢𑀺 𑀆𑀳 ‘‘𑀕𑀦𑁆𑀣𑁂 𑀳𑀻’’𑀢𑀺𑀆𑀤𑀺. 𑀳𑀻𑀢𑀺 𑀓𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑁄. 𑀢𑀲𑁆𑀲𑀸𑀢𑀺 𑀕𑀦𑁆𑀣𑀲𑁆𑀲. 𑀅𑀢𑁆𑀣𑁄𑀢𑀺 𑀲𑀻𑀮𑀁. 𑀯𑀡𑁆𑀡𑀺𑀢𑁄𑀯 𑀳𑁄𑀢𑀻𑀢𑀺 𑀕𑀦𑁆𑀣𑀯𑀡𑁆𑀡𑀦𑀸𑀫𑀼𑀔𑁂𑀦 𑀅𑀢𑁆𑀣𑀲𑁆𑀲𑁂𑀯 𑀯𑀡𑁆𑀡𑀦𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀫𑀸 𑀕𑀦𑁆𑀣𑁂 𑀯𑀡𑁆𑀡𑀺𑀢𑁂 𑀢𑀤𑀯𑀺𑀦𑀸𑀪𑀸𑀯𑀢𑁄 𑀢𑀲𑁆𑀲𑀢𑁆𑀣𑁄 𑀯𑀡𑁆𑀡𑀺𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀲𑀻𑀮𑀧𑀸𑀢𑀺𑀫𑁄𑀓𑁆𑀔𑀲𑁆𑀲𑀧𑀺 𑀬𑀼𑀚𑁆𑀚𑀢𑀻𑀢𑀺.

𑀏𑀯𑀁 𑀲𑀭𑀽𑀧𑀪𑁂𑀤𑀢𑁄 𑀯𑀯𑀢𑁆𑀣𑀧𑁂𑀢𑁆𑀯𑀸 𑀇𑀤𑀸𑀦𑀺 𑀕𑀦𑁆𑀣𑀪𑁂𑀤𑀢𑁄 𑀯𑀯𑀢𑁆𑀣𑀧𑁂𑀢𑀼𑀁 ‘‘𑀢𑀁 𑀧𑀦𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑀪𑀺𑀓𑁆𑀔𑀼𑀦𑀻𑀧𑀸𑀢𑀺𑀫𑁄𑀓𑁆𑀔𑁂𑀲𑀼 𑀤𑁆𑀯𑀻𑀲𑀼. 𑀉𑀤𑁆𑀤𑁂𑀲𑀸 𑀧𑀭𑀺𑀘𑁆𑀙𑀺𑀚𑁆𑀚𑀦𑁆𑀢𑀺 𑀬𑁂𑀳𑀺 𑀯𑀓𑁆𑀔𑀫𑀸𑀦𑀯𑀘𑀦𑀧𑁆𑀧𑀩𑀦𑁆𑀥𑁂𑀳𑀺, 𑀢𑁂 𑀉𑀤𑁆𑀤𑁂𑀲𑀧𑀭𑀺𑀘𑁆𑀙𑁂𑀤𑀸, 𑀢𑁂𑀳𑀺. 𑀯𑀯𑀢𑁆𑀣𑀺𑀢𑀦𑁆𑀢𑀺 𑀅𑀲𑀗𑁆𑀓𑀭𑀢𑁄 𑀞𑀺𑀢𑀁.

𑀏𑀯𑀁 𑀕𑀦𑁆𑀣𑀪𑁂𑀤𑀢𑁄 𑀯𑀯𑀢𑁆𑀣𑀧𑁂𑀢𑁆𑀯𑀸 𑀇𑀤𑀸𑀦𑀺 𑀉𑀤𑁆𑀤𑁂𑀲𑀯𑀺𑀪𑀸𑀕𑀢𑁄 𑀯𑀯𑀢𑁆𑀣𑀧𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀉𑀤𑁆𑀤𑀺𑀲𑀻𑀬𑀢𑀺 𑀲𑀭𑀽𑀧𑁂𑀦 𑀓𑀣𑀻𑀬𑀢𑀺 𑀏𑀢𑁆𑀣, 𑀏𑀢𑁂𑀦𑀸𑀢𑀺 𑀯𑀸 𑀉𑀤𑁆𑀤𑁂𑀲𑁄, 𑀦𑀺𑀤𑀸𑀦𑀲𑁆𑀲 𑀉𑀤𑁆𑀤𑁂𑀲𑁄𑀢𑀺 𑀦𑀺𑀤𑀸𑀦𑀼𑀤𑁆𑀤𑁂𑀲𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀯𑀺𑀢𑁆𑀣𑀸𑀭𑁄𑀯 𑀉𑀤𑁆𑀤𑁂𑀲𑁄 𑀯𑀺𑀢𑁆𑀣𑀸𑀭𑀼𑀤𑁆𑀤𑁂𑀲𑁄.

𑀇𑀤𑀸𑀦𑀺 𑀦𑀺𑀤𑀸𑀦𑀼𑀤𑁆𑀤𑁂𑀲𑀸𑀤𑀻𑀦𑀁 𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 ‘‘𑀢𑀢𑁆𑀣 𑀦𑀺𑀤𑀸𑀦𑀼𑀤𑁆𑀤𑁂𑀲𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀧𑀜𑁆𑀘𑀲𑀼 𑀉𑀤𑁆𑀤𑁂𑀲𑁂𑀲𑀼. 𑀦𑀺𑀤𑀸𑀦𑀼𑀤𑁆𑀤𑁂𑀲𑁄 𑀉𑀤𑁆𑀤𑀺𑀝𑁆𑀞𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀁 𑀧𑀦𑁂𑀢𑁆𑀣 𑀦𑀺𑀤𑀸𑀦𑀼𑀤𑁆𑀤𑁂𑀲𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄…𑀧𑁂… 𑀆𑀯𑀺𑀓𑀢𑀸 𑀳𑀺𑀲𑁆𑀲 𑀨𑀸𑀲𑀼 𑀳𑁄𑀢𑀻’’𑀢𑀺 𑀇𑀥𑀸𑀕𑀢𑀦𑀺𑀤𑀸𑀦𑀧𑀸𑀴𑀺𑀁 𑀤𑀲𑁆𑀲𑁂𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀉𑀤𑁆𑀤𑁂𑀲𑀓𑀸𑀮𑁂 𑀯𑀢𑁆𑀢𑀩𑁆𑀩𑀲𑁆𑀲𑀸𑀧𑀺 ‘‘𑀉𑀤𑁆𑀤𑀺𑀝𑁆𑀞𑀁 𑀔𑁄 𑀆𑀬𑀲𑁆𑀫𑀦𑁆𑀢𑁄 𑀦𑀺𑀤𑀸𑀦’’𑀦𑁆𑀢𑀺 𑀇𑀫𑀲𑁆𑀲 𑀧𑀸𑀞𑀲𑁆𑀲 𑀬𑁄𑀚𑀦𑀁 𑀅𑀓𑀢𑁆𑀯𑀸 ‘‘𑀢𑀢𑁆𑀣𑀸𑀬𑀲𑁆𑀫𑀦𑁆𑀢𑁂 𑀧𑀼𑀘𑁆𑀙𑀸𑀫𑀻’’𑀢𑀺𑀆𑀤𑀺𑀦𑀸 𑀅𑀦𑀼𑀲𑀸𑀯𑀦𑀸𑀤𑀺𑀓𑀫𑁂𑀯 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑀺𑀢𑀁, 𑀢𑀁 𑀧𑀦 𑀅𑀧𑀭𑀺𑀧𑀼𑀡𑁆𑀡𑀦𑀺𑀤𑀸𑀦𑀧𑀸𑀴𑀺𑀤𑀲𑁆𑀲𑀦𑀧𑀼𑀩𑁆𑀩𑀓𑀦𑀺𑀤𑀸𑀦𑀼𑀤𑁆𑀤𑁂𑀲𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁, 𑀔𑀼𑀤𑁆𑀤𑀓𑀧𑁂𑀬𑁆𑀬𑀸𑀮𑀯𑀲𑁂𑀦 𑀯𑀸 𑀧𑀸𑀓𑀝𑀢𑁆𑀢𑀸 𑀢𑀲𑁆𑀲 𑀅𑀬𑁄𑀚𑀦𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀉𑀤𑁆𑀤𑁂𑀲𑀓𑀸𑀮𑁂 𑀧𑀦 𑀬𑁄𑀚𑁂𑀢𑁆𑀯𑀸𑀯 𑀯𑀢𑁆𑀢𑀩𑁆𑀩𑀁. 𑀯𑀓𑁆𑀔𑀢𑀺 𑀳𑀺 ‘‘𑀢𑀁 𑀧𑀦𑁂𑀢𑀁 𑀧𑀸𑀭𑀸𑀚𑀺𑀓𑀸𑀤𑀻𑀦𑀁 𑀅𑀯𑀲𑀸𑀦𑁂 𑀤𑀺𑀲𑁆𑀲𑀢𑀺, 𑀦 𑀦𑀺𑀤𑀸𑀦𑀸𑀯𑀲𑀸𑀦𑁂. 𑀓𑀺𑀜𑁆𑀘𑀸𑀧𑀺 𑀦 𑀤𑀺𑀲𑁆𑀲𑀢𑀺, 𑀅𑀣 𑀔𑁄 𑀉𑀤𑁆𑀤𑁂𑀲𑀓𑀸𑀮𑁂 ‘𑀆𑀯𑀺𑀓𑀢𑀸 𑀳𑀺𑀲𑁆𑀲 𑀨𑀸𑀲𑀼 𑀳𑁄𑀢𑀻’𑀢𑀺 𑀯𑀢𑁆𑀯𑀸 ‘𑀉𑀤𑁆𑀤𑀺𑀝𑁆𑀞𑀁 𑀔𑁄 𑀆𑀬𑀲𑁆𑀫𑀦𑁆𑀢𑁄 𑀦𑀺𑀤𑀸𑀦𑀁, 𑀢𑀢𑁆𑀣𑀸𑀬𑀲𑁆𑀫𑀦𑁆𑀢𑁂 𑀧𑀼𑀘𑁆𑀙𑀸𑀫𑀻’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀢𑁆𑀢𑀩𑁆𑀩𑀫𑁂𑀯𑀸’’𑀢𑀺𑀆𑀤𑀺. 𑀅𑀯𑀲𑁂𑀲𑁂 𑀲𑀼𑀢𑁂𑀦 𑀲𑀸𑀯𑀺𑀢𑁂𑀢𑀺 𑀅𑀯𑀲𑀺𑀝𑁆𑀞𑀁 𑀧𑀸𑀭𑀸𑀚𑀺𑀓𑀼𑀤𑁆𑀤𑁂𑀲𑀸𑀤𑀺𑀘𑀢𑀼𑀓𑁆𑀓𑀁 ‘‘𑀲𑀼𑀢𑀸 𑀔𑁄 𑀧𑀦𑀸𑀬𑀲𑁆𑀫𑀦𑁆𑀢𑁂𑀳𑀺 𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸…𑀧𑁂… 𑀅𑀯𑀺𑀯𑀤𑀫𑀸𑀦𑁂𑀳𑀺 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 𑀏𑀯𑀁 𑀲𑀼𑀢𑀯𑀲𑁂𑀦 𑀲𑀸𑀯𑀺𑀢𑁂.

𑀏𑀢𑁂𑀦𑁂𑀯 𑀦𑀬𑁂𑀦 𑀲𑁂𑀲𑀸 𑀢𑀬𑁄 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀧𑀭𑀺𑀘𑁆𑀙𑁂𑀤𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀸𑀭𑀸𑀚𑀺𑀓𑀼𑀤𑁆𑀤𑁂𑀲𑀸𑀤𑀻𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀧𑀸𑀭𑀸𑀚𑀺𑀓𑀼𑀤𑁆𑀤𑁂𑀲𑀸𑀤𑀻𑀦𑀁 𑀧𑀭𑀺𑀘𑁆𑀙𑁂𑀤𑀸 𑀬𑁄𑀚𑁂𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀺𑀤𑀸𑀦𑀲𑁆𑀲 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀸𑀭𑀸𑀚𑀺𑀓𑀸𑀤𑀻𑀦𑀺 𑀑𑀲𑀸𑀧𑁂𑀢𑁆𑀯𑀸𑀢𑀺 𑀦𑀺𑀤𑀸𑀦𑀁, 𑀧𑀸𑀭𑀸𑀚𑀺𑀓𑀜𑁆𑀘, 𑀢𑀤𑀼𑀪𑀬𑀁 𑀲𑀗𑁆𑀖𑀸𑀤𑀺𑀲𑁂𑀲𑀜𑁆𑀘, 𑀢𑀁𑀢𑀺𑀓𑀁 𑀅𑀦𑀺𑀬𑀢𑀜𑁆𑀘𑀸𑀢𑀺 𑀏𑀯𑀁 𑀬𑀣𑀸𑀓𑁆𑀓𑀫𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀧𑀸𑀭𑀸𑀚𑀺𑀓𑀸𑀤𑀻𑀦𑀺 𑀧𑀭𑀺𑀬𑁄𑀲𑀸𑀧𑁂𑀢𑁆𑀯𑀸. 𑀬𑁄𑀚𑁂𑀢𑀩𑁆𑀩𑀸𑀢𑀺 ‘‘𑀅𑀯𑀲𑁂𑀲𑁂 𑀲𑀼𑀢𑁂𑀦 𑀲𑀸𑀯𑀺𑀢𑁂 𑀉𑀤𑁆𑀤𑀺𑀝𑁆𑀞𑁄 𑀳𑁄𑀢𑀺 𑀧𑀸𑀭𑀸𑀚𑀺𑀓𑀼𑀤𑁆𑀤𑁂𑀲𑁄’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀸. 𑀅𑀯𑀲𑁂𑀲𑀁 𑀲𑀼𑀢𑁂𑀦 𑀲𑀸𑀯𑁂𑀢𑀩𑁆𑀩𑀦𑁆𑀢𑀺 𑀯𑀘𑀦𑀢𑁄𑀢𑀺 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁂 𑁋

‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸 𑀦𑀺𑀤𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀅𑀯𑀲𑁂𑀲𑀁 𑀲𑀼𑀢𑁂𑀦 𑀲𑀸𑀯𑁂𑀢𑀩𑁆𑀩𑀁, 𑀅𑀬𑀁 𑀧𑀞𑀫𑁄 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄. 𑀦𑀺𑀤𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀅𑀯𑀲𑁂𑀲𑀁 𑀲𑀼𑀢𑁂𑀦 𑀲𑀸𑀯𑁂𑀢𑀩𑁆𑀩𑀁, 𑀅𑀬𑀁 𑀤𑀼𑀢𑀺𑀬𑁄 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁧𑁫𑁦) 𑁋

𑀏𑀯𑀁 𑀯𑀼𑀢𑁆𑀢𑀢𑁆𑀢𑀸. 𑀬𑀲𑁆𑀫𑀺𑀁 𑀯𑀺𑀧𑁆𑀧𑀓𑀢𑁂𑀢𑀺 𑀬𑀲𑁆𑀫𑀺𑀁 𑀉𑀤𑁆𑀤𑁂𑀲𑁂 𑀅𑀧𑀭𑀺𑀬𑁄𑀲𑀺𑀢𑁂. 𑀅𑀦𑁆𑀢𑀭𑀸𑀬𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀤𑀲𑀲𑀼 𑀅𑀦𑁆𑀢𑀭𑀸𑀬𑁂𑀲𑀼 𑀬𑁄 𑀓𑁄𑀘𑀺 𑀅𑀦𑁆𑀢𑀭𑀸𑀬𑁄 𑀉𑀧𑁆𑀧𑀚𑁆𑀚𑀢𑀺. 𑀤𑀲 𑀅𑀦𑁆𑀢𑀭𑀸𑀬𑀸 𑀦𑀸𑀫 𑁋 𑀭𑀸𑀚𑀦𑁆𑀢𑀭𑀸𑀬𑁄, 𑀘𑁄𑀭𑀦𑁆𑀢𑀭𑀸𑀬𑁄, 𑀅𑀕𑁆𑀬𑀦𑁆𑀢𑀭𑀸𑀬𑁄, 𑀉𑀤𑀓𑀦𑁆𑀢𑀭𑀸𑀬𑁄, 𑀫𑀦𑀼𑀲𑁆𑀲𑀦𑁆𑀢𑀭𑀸𑀬𑁄, 𑀅𑀫𑀦𑀼𑀲𑁆𑀲𑀦𑁆𑀢𑀭𑀸𑀬𑁄, 𑀯𑀸𑀴𑀦𑁆𑀢𑀭𑀸𑀬𑁄, 𑀲𑀭𑀻𑀲𑀧𑀦𑁆𑀢𑀭𑀸𑀬𑁄, 𑀚𑀻𑀯𑀺𑀢𑀦𑁆𑀢𑀭𑀸𑀬𑁄, 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁄𑀢𑀺. 𑀢𑀢𑁆𑀣 𑀲𑀘𑁂 𑀪𑀺𑀓𑁆𑀔𑀽𑀲𑀼 ‘‘𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁫𑁦) 𑀦𑀺𑀲𑀺𑀦𑁆𑀦𑁂𑀲𑀼 𑀭𑀸𑀚𑀸 𑀆𑀕𑀘𑁆𑀙𑀢𑀺, 𑀅𑀬𑀁 𑀭𑀸𑀚𑀦𑁆𑀢𑀭𑀸𑀬𑁄. 𑀘𑁄𑀭𑀸 𑀆𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀘𑁄𑀭𑀦𑁆𑀢𑀭𑀸𑀬𑁄. 𑀤𑀯𑀤𑀸𑀳𑁄 𑀯𑀸 𑀆𑀕𑀘𑁆𑀙𑀢𑀺, 𑀆𑀯𑀸𑀲𑁂 𑀯𑀸 𑀅𑀕𑁆𑀕𑀺 𑀉𑀝𑁆𑀞𑀳𑀢𑀺, 𑀅𑀬𑀁 𑀅𑀕𑁆𑀬𑀦𑁆𑀢𑀭𑀸𑀬𑁄. 𑀫𑁂𑀖𑁄 𑀯𑀸 𑀉𑀝𑁆𑀞𑀳𑀢𑀺, 𑀑𑀖𑁄 𑀯𑀸 𑀆𑀕𑀘𑁆𑀙𑀢𑀺, 𑀅𑀬𑀁 𑀉𑀤𑀓𑀦𑁆𑀢𑀭𑀸𑀬𑁄. 𑀩𑀳𑀽 𑀫𑀦𑀼𑀲𑁆𑀲𑀸 𑀆𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀫𑀦𑀼𑀲𑁆𑀲𑀦𑁆𑀢𑀭𑀸𑀬𑁄. 𑀪𑀺𑀓𑁆𑀔𑀼𑀁 𑀬𑀓𑁆𑀔𑁄 𑀕𑀡𑁆𑀳𑀸𑀢𑀺, 𑀅𑀬𑀁 𑀅𑀫𑀦𑀼𑀲𑁆𑀲𑀦𑁆𑀢𑀭𑀸𑀬𑁄. 𑀩𑁆𑀬𑀕𑁆𑀖𑀸𑀤𑀬𑁄 𑀘𑀡𑁆𑀟𑀫𑀺𑀕𑀸 𑀆𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀯𑀸𑀴𑀦𑁆𑀢𑀭𑀸𑀬𑁄. 𑀪𑀺𑀓𑁆𑀔𑀼𑀁 𑀲𑀧𑁆𑀧𑀸𑀤𑀬𑁄 𑀟𑀁𑀲𑀦𑁆𑀢𑀺, 𑀅𑀬𑀁 𑀲𑀭𑀻𑀲𑀧𑀦𑁆𑀢𑀭𑀸𑀬𑁄. 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀯𑀸 𑀳𑁄𑀢𑀺, 𑀓𑀸𑀮𑀁 𑀯𑀸 𑀓𑀭𑁄𑀢𑀺, 𑀯𑁂𑀭𑀺𑀦𑁄 𑀯𑀸 𑀢𑀁 𑀫𑀸𑀭𑁂𑀢𑀼𑀓𑀸𑀫𑀸 𑀕𑀡𑁆𑀳𑀦𑁆𑀢𑀺, 𑀅𑀬𑀁 𑀚𑀻𑀯𑀺𑀢𑀦𑁆𑀢𑀭𑀸𑀬𑁄. 𑀫𑀦𑀼𑀲𑁆𑀲𑀸 𑀏𑀓𑀁 𑀯𑀸 𑀩𑀳𑀽 𑀯𑀸 𑀪𑀺𑀓𑁆𑀔𑀽 𑀩𑁆𑀭𑀳𑁆𑀫𑀘𑀭𑀺𑀬𑀸 𑀘𑀸𑀯𑁂𑀢𑀼𑀓𑀸𑀫𑀸 𑀕𑀡𑁆𑀳𑀦𑁆𑀢𑀺, 𑀅𑀬𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁄. 𑀇𑀢𑀺 𑀬𑀁 𑀯𑀼𑀢𑁆𑀢𑀁 ‘‘𑀅𑀦𑁆𑀢𑀭𑀸𑀬𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀤𑀲𑀲𑀼 𑀅𑀦𑁆𑀢𑀭𑀸𑀬𑁂𑀲𑀼 𑀬𑁄 𑀓𑁄𑀘𑀺 𑀅𑀦𑁆𑀢𑀭𑀸𑀬𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺, 𑀢𑀲𑁆𑀲𑀢𑁆𑀣𑁄 𑀧𑀓𑀸𑀲𑀺𑀢𑁄 𑀳𑁄𑀢𑀻𑀢𑀺.

𑀢𑁂𑀦 𑀲𑀤𑁆𑀥𑀺𑀦𑁆𑀢𑀺 𑀯𑀺𑀧𑁆𑀧𑀓𑀢𑀼𑀤𑁆𑀤𑁂𑀲𑁂𑀦 𑀲𑀤𑁆𑀥𑀺𑀁. 𑀅𑀯𑀲𑁂𑀲𑀁 𑀲𑀼𑀢𑁂𑀦 𑀲𑀸𑀯𑁂𑀢𑀩𑁆𑀩𑀁 𑀉𑀤𑁆𑀤𑀺𑀝𑁆𑀞𑀉𑀤𑁆𑀤𑁂𑀲𑀸𑀧𑁂𑀓𑁆𑀔𑀢𑁆𑀢𑀸 𑀅𑀯𑀲𑁂𑀲𑀯𑀘𑀦𑀲𑁆𑀲. 𑀬𑀣𑀸𑀳 ‘‘𑀦𑀺𑀤𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸’’𑀢𑀺𑀆𑀤𑀺 (𑀫𑀳𑀸𑀯. 𑁧𑁫𑁦). 𑀢𑁂𑀦𑀸𑀳 ‘‘𑀦𑀺𑀤𑀸𑀦𑀼𑀤𑁆𑀤𑁂𑀲𑁂 𑀧𑀦𑀸’’𑀢𑀺𑀆𑀤𑀺. 𑀲𑀼𑀢𑁂𑀦 𑀲𑀸𑀯𑁂𑀢𑀩𑁆𑀩𑀁 𑀦𑀸𑀫 𑀦𑀢𑁆𑀣𑀺 𑀉𑀧𑁄𑀲𑀣𑀲𑁆𑀲 𑀅𑀦𑁆𑀢𑀭𑀸𑀬𑁄𑀯 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀺𑀬𑀢𑀼𑀤𑁆𑀤𑁂𑀲𑁄 𑀧𑀭𑀺𑀳𑀸𑀬𑀢𑀻𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀅𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀅𑀪𑀸𑀯𑀢𑁄. 𑀢𑀤𑀪𑀸𑀯𑁄 𑀘 ‘‘𑀇𑀤𑀫𑁂𑀯 𑀮𑀓𑁆𑀔𑀡𑀁 𑀢𑀢𑁆𑀣𑀸𑀧𑀺 𑀅𑀦𑀼𑀕𑀢’’𑀦𑁆𑀢𑀺 𑀓𑀢𑁆𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀦𑁆𑀢𑀺 𑀅𑀯𑀲𑁂𑀲𑀼𑀤𑁆𑀤𑁂𑀲𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀁. 𑀏𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀸𑀢𑀺𑀫𑁄𑀓𑁆𑀔𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀸𑀯𑀸𑀢𑀺 𑀧𑀞𑀫𑀁. 𑀇𑀤𑀦𑁆𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀩𑀼𑀤𑁆𑀥𑀺𑀬𑀁 𑀯𑀺𑀧𑀭𑀺𑀯𑀢𑁆𑀢𑀫𑀸𑀦𑀁 𑀲𑀸𑀫𑀜𑁆𑀜𑁂𑀦 𑀤𑀲𑁆𑀲𑁂𑀢𑀺, 𑀇𑀤𑀁 𑀅𑀓𑁆𑀔𑀭𑀧𑀤𑀦𑀺𑀬𑀫𑀺𑀢𑀕𑀦𑁆𑀣𑀺𑀢𑀁 𑀯𑀘𑀦𑀁 𑀯𑀼𑀘𑁆𑀘𑀢𑀺 𑀓𑀣𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀁 𑀢𑀦𑁆𑀢𑀺 𑀆𑀳, ‘‘𑀲𑀼𑀡𑀸𑀢𑀼 𑀫𑁂𑀢𑀺𑀆𑀤𑀻𑀦’’𑀦𑁆𑀢𑀺𑀆𑀤𑀺.

𑀢𑀢𑁆𑀣 𑀲𑀼𑀡𑀸𑀢𑀼 𑀫𑁂𑀢𑀺𑀆𑀤𑀻𑀦𑀦𑁆𑀢𑀺 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄 𑀅𑀚𑁆𑀚𑀼𑀧𑁄𑀲𑀣𑁄’’𑀢𑀺𑀆𑀤𑀻𑀦𑀁 𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑁂 𑀆𑀕𑀢𑀸𑀦𑀁 𑀲𑀼𑀢𑁆𑀢𑀧𑀤𑀸𑀦𑀁. 𑀅𑀢𑁆𑀣𑀦𑀺𑀘𑁆𑀙𑀬𑀦𑁆𑀢𑀺 𑀅𑀪𑀺𑀥𑁂𑀬𑁆𑀬𑀢𑁆𑀣𑀲𑁆𑀲 𑀘𑁂𑀯 𑀅𑀥𑀺𑀧𑁆𑀧𑀸𑀬𑀢𑁆𑀣𑀲𑁆𑀲 𑀘 𑀦𑀺𑀘𑁆𑀙𑀬𑀦𑀁, 𑀯𑀯𑀢𑁆𑀣𑀸𑀧𑀦𑀦𑁆𑀢𑀺 𑀅𑀢𑁆𑀣𑁄. 𑀇𑀫𑀸𑀬 𑀳𑀺 𑀅𑀝𑁆𑀞𑀓𑀣𑀸𑀬 𑀢𑁂𑀲𑀁 𑀅𑀪𑀺𑀥𑁂𑀬𑁆𑀬𑀢𑁆𑀣𑁄 𑀘𑁂𑀯 𑀅𑀥𑀺𑀧𑁆𑀧𑀸𑀬𑀢𑁆𑀣𑁄 𑀘 𑀅𑀦𑁂𑀓𑀥𑀸 𑀯𑀯𑀢𑁆𑀣𑀸𑀧𑀻𑀬𑀢𑀺. 𑀅𑀣 𑀯𑀸 𑀦𑀺𑀘𑁆𑀙𑀺𑀦𑁆𑀦𑁄𑀢𑀺 𑀦𑀺𑀘𑁆𑀙𑀬𑁄. 𑀕𑀡𑁆𑀞𑀺𑀝𑁆𑀞𑀸𑀦𑁂𑀲𑀼 𑀔𑀻𑀮𑀫𑀤𑁆𑀤𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀯𑀺𑀫𑀢𑀺𑀘𑁆𑀙𑁂𑀤𑀓𑀣𑀸, 𑀅𑀢𑁆𑀣𑁄 𑀘 𑀦𑀺𑀘𑁆𑀙𑀬𑁄 𑀘 𑀅𑀢𑁆𑀣𑀦𑀺𑀘𑁆𑀙𑀬𑁄, 𑀢𑀁 𑀅𑀢𑁆𑀣𑀦𑀺𑀘𑁆𑀙𑀬𑀁, 𑀫𑀬𑀸 𑀯𑀼𑀘𑁆𑀘𑀫𑀸𑀦𑀁 𑀅𑀢𑁆𑀣𑀜𑁆𑀘 𑀯𑀺𑀦𑀺𑀘𑁆𑀙𑀬𑀜𑁆𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀻𑀮𑀲𑀫𑁆𑀧𑀦𑁆𑀦𑀸𑀢𑀺 𑀲𑀫𑀦𑁆𑀢𑀢𑁄 𑀧𑀦𑁆𑀦𑀁 𑀧𑀢𑁆𑀢𑀁 𑀧𑀼𑀡𑁆𑀡𑀦𑁆𑀢𑀺 𑀲𑀫𑁆𑀧𑀦𑁆𑀦𑀁, 𑀲𑀻𑀮𑀁 𑀲𑀫𑁆𑀧𑀦𑁆𑀦𑀫𑁂𑀢𑁂𑀲𑀦𑁆𑀢𑀺 𑀲𑀻𑀮𑀲𑀫𑁆𑀧𑀦𑁆𑀦𑀸, 𑀧𑀭𑀺𑀧𑀼𑀡𑁆𑀡𑀲𑀻𑀮𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀫𑁆𑀫𑀤𑁂𑀯 𑀧𑀦𑁆𑀦𑀸 𑀕𑀢𑀸 𑀉𑀧𑀸𑀕𑀢𑀸𑀢𑀺 𑀲𑀫𑁆𑀧𑀦𑁆𑀦𑀸, 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑀸 𑀲𑀻𑀮𑀲𑀫𑁆𑀧𑀦𑁆𑀦𑀸, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀉𑀧𑁂𑀢𑀸𑀢𑀺 𑀅𑀢𑁆𑀣𑁄. 𑀅𑀥𑀺𑀲𑀻𑀮𑀅𑀥𑀺𑀘𑀺𑀢𑁆𑀢𑀅𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀸 𑀢𑀺𑀲𑁆𑀲𑁄𑀧𑀺 𑀲𑀺𑀓𑁆𑀔𑀺𑀢𑀩𑁆𑀩𑀝𑁆𑀞𑁂𑀦 𑀲𑀺𑀓𑁆𑀔𑀸, 𑀢𑀁 𑀓𑀸𑀫𑁂𑀦𑁆𑀢𑀻𑀢𑀺 𑀲𑀺𑀓𑁆𑀔𑀸𑀓𑀸𑀫𑀸. 𑀲𑀼𑀡𑀦𑁆𑀢𑀼 𑀫𑁂𑀢𑀺 𑀢𑁂 𑀲𑀩𑁆𑀩𑁂𑀧𑀺 𑀪𑀺𑀓𑁆𑀔𑀯𑁄 𑀫𑀫 𑀲𑀦𑁆𑀢𑀺𑀓𑀸 𑀦𑀺𑀲𑀸𑀫𑁂𑀦𑁆𑀢𑀼. 𑀇𑀫𑀺𑀦𑀸 𑀅𑀢𑁆𑀢𑀦𑁄 𑀲𑀁𑀯𑀡𑁆𑀡𑀦𑀸𑀬 𑀲𑀓𑁆𑀓𑀘𑁆𑀘𑀁 𑀲𑀯𑀦𑁂 𑀦𑀺𑀬𑁄𑀚𑁂𑀢𑀺. 𑀲𑀓𑁆𑀓𑀘𑁆𑀘𑀲𑀯𑀦𑀧𑀝𑀺𑀩𑀤𑁆𑀥𑀸 𑀳𑀺 𑀲𑀩𑁆𑀩𑀸𑀧𑀺 𑀲𑀸𑀲𑀦𑀲𑀫𑁆𑀧𑀢𑁆𑀢𑀻𑀢𑀺. 𑀏𑀢𑁆𑀣 𑀘 𑀲𑀻𑀮𑀲𑀫𑁆𑀧𑀦𑁆𑀦𑀸𑀦𑀁 𑀲𑀺𑀓𑁆𑀔𑀸𑀓𑀸𑀫𑀸𑀦𑀁𑀬𑁂𑀯 𑀪𑀺𑀓𑁆𑀔𑀽𑀦𑀁 𑀕𑀳𑀡𑀁 𑀢𑀤𑀜𑁆𑀜𑁂𑀲𑀁 𑀇𑀫𑀺𑀲𑁆𑀲𑀸 𑀲𑀁𑀯𑀡𑁆𑀡𑀦𑀸𑀬 𑀅𑀪𑀸𑀚𑀦𑀪𑀸𑀯𑀢𑁄. 𑀦 𑀳𑀺 𑀢𑁂 𑀯𑀺𑀦𑀬𑀁 𑀲𑁄𑀢𑀩𑁆𑀩𑀁, 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀜𑁆𑀘 𑀫𑀜𑁆𑀜𑀺𑀲𑁆𑀲𑀦𑁆𑀢𑀺.

𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀕𑀸𑀣𑀸𑀧𑀤𑁂, 𑀏𑀢𑁂𑀲𑀁 𑀯𑀸 𑀕𑀸𑀣𑀸𑀬 𑀲𑀗𑁆𑀕𑀳𑀺𑀢𑀸𑀦𑀁 ‘‘𑀲𑀼𑀡𑀸𑀢𑀼 𑀫𑁂’’𑀢𑀺𑀆𑀤𑀻𑀦𑀁 𑀧𑀤𑀸𑀦𑀫𑀦𑁆𑀢𑀭𑁂. 𑀲𑀯𑀦𑁂 𑀆𑀡𑀢𑁆𑀢𑀺𑀯𑀘𑀦𑀁 𑀲𑀯𑀦𑀸𑀡𑀢𑁆𑀢𑀺𑀯𑀘𑀦𑀁. 𑀓𑀺𑀜𑁆𑀘𑀸𑀧𑀺 𑀲𑀯𑀦𑀸𑀡𑀢𑁆𑀢𑀺𑀯𑀘𑀦𑀁, 𑀢𑀣𑀸𑀧𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁂𑀦 𑀏𑀯𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀢𑁆𑀢𑀸 𑀪𑀕𑀯𑀢𑁄 𑀆𑀡𑀢𑁆𑀢𑀺, 𑀦 𑀉𑀤𑁆𑀤𑁂𑀲𑀓𑀲𑁆𑀲𑀸𑀢𑀺 𑀦𑀯𑀓𑀢𑀭𑁂𑀦𑀸𑀧𑀺 𑀇𑀤𑀁 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺 𑀲𑀗𑁆𑀖𑀕𑀸𑀭𑀯𑁂𑀦, 𑀲𑀗𑁆𑀖𑀩𑀳𑀼𑀫𑀸𑀦𑁂𑀦 𑀘 𑀲𑀳𑀺𑀢𑀢𑁆𑀢𑀸 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀯𑀘𑀦𑀁. 𑀲𑀗𑁆𑀖𑁄 𑀳𑀺 𑀲𑀼𑀧𑁆𑀧𑀝𑀺𑀧𑀦𑁆𑀦𑀢𑀸𑀤𑀺𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑀢𑁆𑀢𑀸 𑀉𑀢𑁆𑀢𑀫𑀁 𑀕𑀸𑀭𑀯𑀧𑁆𑀧𑀢𑀺𑀲𑁆𑀲𑀯𑀝𑁆𑀞𑀸𑀦𑀁. 𑀇𑀤𑀜𑁆𑀘 𑀲𑀩𑁆𑀩𑀁 𑀓𑁂𑀦 𑀓𑀢𑁆𑀣 𑀓𑀤𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀲𑀩𑁆𑀩𑀫𑁂𑀯 𑀘𑁂𑀢’’𑀦𑁆𑀢𑀺𑀆𑀤𑀺. 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀅𑀦𑀼𑀚𑀸𑀦𑀦𑁆𑀢𑁂𑀦𑀸𑀢𑀺 𑁋

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼𑀁, 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀉𑀤𑁆𑀤𑀺𑀲𑀺𑀢𑀩𑁆𑀩𑀁, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 ‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄’’’𑀢𑀺 (𑀫𑀳𑀸𑀯. 𑁧𑁩𑁩-𑁧𑁩𑁪) 𑁋

𑀏𑀯𑀫𑀸𑀤𑀺𑀦𑀸 𑀅𑀦𑀼𑀚𑀸𑀦𑀦𑁆𑀢𑁂𑀦. 𑀭𑀸𑀚𑀕𑀳𑁂𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀢𑀜𑁆𑀳𑀺 𑀫𑀦𑁆𑀥𑀸𑀢𑀼𑀫𑀳𑀸𑀕𑁄𑀯𑀺𑀦𑁆𑀤𑀸𑀤𑀻𑀳𑀺 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 ‘‘𑀭𑀸𑀚𑀕𑀳’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀧𑀦𑁂𑀢𑀁 𑀩𑀼𑀤𑁆𑀥𑀓𑀸𑀮𑁂, 𑀘𑀓𑁆𑀓𑀯𑀢𑁆𑀢𑀺𑀓𑀸𑀮𑁂 𑀘 𑀦𑀕𑀭𑀁 𑀳𑁄𑀢𑀺, 𑀲𑁂𑀲𑀓𑀸𑀮𑁂 𑀲𑀼𑀜𑁆𑀜𑀁 𑀳𑁄𑀢𑀺 𑀬𑀓𑁆𑀔𑀧𑀭𑀺𑀕𑁆𑀕𑀳𑀺𑀢𑀁, 𑀢𑁂𑀲𑀁 𑀯𑀲𑀦𑀝𑁆𑀞𑀸𑀦𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀇𑀤𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁂𑀦 𑀯𑀢𑁆𑀢𑀩𑁆𑀩𑀯𑀘𑀦𑀁, 𑀢𑀲𑁆𑀫𑀸. 𑀓𑀺𑀁 𑀢𑁂 𑀉𑀪𑁄𑀧𑀺 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺, 𑀬𑁂𑀦𑁂𑀯𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀲𑀗𑁆𑀖𑀢𑁆𑀣𑁂𑀭𑁄 𑀯𑀸 𑀳𑀻’’𑀢𑀺𑀆𑀤𑀺. 𑀣𑁂𑀭𑀸𑀥𑀺𑀓𑀦𑁆𑀢𑀺 𑀣𑁂𑀭𑀸𑀥𑀻𑀦𑀁, 𑀣𑁂𑀭𑀸𑀬𑀢𑁆𑀢𑀁 𑀪𑀯𑀺𑀢𑀼𑀦𑁆𑀢𑀺 𑀅𑀢𑁆𑀣𑁄. ‘‘𑀣𑁂𑀭𑀸𑀥𑁂𑀬𑁆𑀬’’𑀦𑁆𑀢𑀺 𑀯𑀸 𑀧𑀸𑀞𑁄, 𑀲𑁄𑀬𑁂𑀯𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀢𑀺𑀲𑁆𑀲𑀁 𑀧𑀭𑀺𑀲𑀸𑀬𑀁. 𑀩𑁆𑀬𑀢𑁆𑀢𑁄𑀢𑀺 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀧𑀕𑀼𑀡𑀫𑀸𑀢𑀺𑀓𑁄𑀢𑀺 𑀅𑀢𑁆𑀣𑁄. 𑀧𑀝𑀺𑀩𑀮𑁄𑀢𑀺 𑀯𑀢𑁆𑀢𑀼𑀁 𑀲𑀫𑀢𑁆𑀣𑁄, 𑀅𑀪𑀻𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀤𑀳𑀭𑀲𑁆𑀲𑀸𑀧𑀺 𑀩𑁆𑀬𑀢𑁆𑀢𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑁄 𑀅𑀦𑀼𑀜𑁆𑀜𑀸𑀢𑁄, 𑀅𑀣 𑀔𑁄 𑀏𑀢𑁆𑀣𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀲𑀘𑁂 𑀣𑁂𑀭𑀲𑁆𑀲 𑀧𑀜𑁆𑀘 𑀯𑀸 𑀘𑀢𑁆𑀢𑀸𑀭𑁄 𑀯𑀸 𑀢𑀬𑁄 𑀯𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸 𑀦𑀸𑀕𑀘𑁆𑀙𑀦𑁆𑀢𑀺, 𑀤𑁆𑀯𑁂 𑀧𑀦 𑀅𑀓𑁆𑀔𑀡𑁆𑀟𑀸 𑀲𑀼𑀯𑀺𑀲𑀤𑀸 𑀯𑀸𑀘𑀼𑀕𑁆𑀕𑀢𑀸 𑀳𑁄𑀦𑁆𑀢𑀺, 𑀣𑁂𑀭𑀸𑀬𑀢𑁆𑀢𑁄𑀯 𑀧𑀸𑀢𑀺𑀫𑁄𑀓𑁆𑀔𑁄. 𑀲𑀘𑁂 𑀧𑀦 𑀏𑀢𑁆𑀢𑀓𑀫𑁆𑀧𑀺 𑀯𑀺𑀲𑀤𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀩𑁆𑀬𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀬𑀢𑁆𑀢𑁄𑀢𑀺.

𑀇𑀤𑀸𑀦𑀺 ‘‘𑀲𑀗𑁆𑀖𑁄’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀇𑀥𑀸𑀥𑀺𑀧𑁆𑀧𑁂𑀢𑀲𑀗𑁆𑀖𑀁 𑀯𑀺𑀲𑁂𑀲𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀖𑁄𑀢𑀺 𑀇𑀫𑀺𑀦𑀸 𑀧𑀦 𑀧𑀤𑁂𑀦𑀸’’𑀢𑀺𑀆𑀤𑀺𑀫𑀸𑀳 𑀓𑀺𑀜𑁆𑀘𑀸𑀧𑀻𑀢𑀺 𑀅𑀦𑀼𑀕𑁆𑀕𑀳𑀢𑁆𑀣𑁂 𑀦𑀺𑀧𑀸𑀢𑁄, 𑀢𑀲𑁆𑀲 𑀬𑀤𑀺 𑀦𑀸𑀫𑀸𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀓𑁆𑀔𑀦𑁆𑀢𑀺 𑀏𑀢𑀸𑀬 𑀲𑀢𑁆𑀢𑀸 𑀬𑀣𑀸𑀥𑀺𑀧𑁆𑀧𑁂𑀢𑀸𑀳𑀺 𑀲𑀫𑁆𑀧𑀢𑁆𑀢𑀻𑀳𑀺 𑀯𑀟𑁆𑀠𑀦𑁆𑀢𑀻𑀢𑀺 𑀤𑀓𑁆𑀔𑀺𑀡𑀸, 𑀧𑀭𑀮𑁄𑀓𑀁 𑀲𑀤𑁆𑀤𑀳𑀺𑀢𑁆𑀯𑀸 𑀤𑀸𑀢𑀩𑁆𑀩𑀁 𑀤𑀸𑀦𑀁, 𑀢𑀁 𑀤𑀓𑁆𑀔𑀺𑀡𑀁 𑀅𑀭𑀳𑀢𑀺, 𑀤𑀓𑁆𑀔𑀺𑀡𑀸𑀬 𑀯𑀸 𑀳𑀺𑀢𑁄, 𑀬𑀲𑁆𑀫𑀸 𑀦𑀁 𑀫𑀳𑀧𑁆𑀨𑀮𑀓𑀸𑀭𑀺𑀢𑀸𑀬 𑀯𑀺𑀲𑁄𑀥𑁂𑀢𑀻𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑁄, 𑀤𑀺𑀝𑁆𑀞𑀺𑀲𑀻𑀮𑀲𑀗𑁆𑀖𑀸𑀢𑁂𑀦 𑀲𑀁𑀳𑀢𑁄𑀢𑀺 𑀲𑀗𑁆𑀖𑁄, 𑀤𑀓𑁆𑀔𑀺𑀡𑁂𑀬𑁆𑀬𑁄 𑀘 𑀲𑁄 𑀲𑀗𑁆𑀖𑁄 𑀘𑀸𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑀲𑀗𑁆𑀖𑁄. 𑀲𑀫𑁆𑀫𑀼𑀢𑀺𑀬𑀸 𑀘𑀢𑀼𑀯𑀕𑁆𑀕𑀸𑀤𑀺𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸 𑀲𑀺𑀤𑁆𑀥𑁄 𑀲𑀗𑁆𑀖𑁄 𑀲𑀫𑁆𑀫𑀼𑀢𑀺𑀲𑀗𑁆𑀖𑁄. 𑀅𑀯𑀺𑀲𑁂𑀲𑁂𑀦𑀸𑀢𑀺 ‘‘𑀅𑀭𑀺𑀬𑀸’’𑀢𑀺 𑀯𑀸 ‘‘𑀧𑀼𑀣𑀼𑀚𑁆𑀚𑀦𑀸’’𑀢𑀺 𑀯𑀸 𑀅𑀯𑀺𑀲𑁂𑀲𑁂𑀢𑁆𑀯𑀸 𑀲𑀸𑀫𑀜𑁆𑀜𑁂𑀦. 𑀲𑁄𑀢𑀺 𑀲𑀫𑁆𑀫𑀼𑀢𑀺𑀲𑀗𑁆𑀖𑁄. 𑀇𑀥𑀸𑀢𑀺 𑀇𑀫𑀺𑀲𑁆𑀲𑀁 𑀉𑀧𑁄𑀲𑀣𑀜𑀢𑁆𑀢𑀺𑀬𑀁. 𑀅𑀥𑀺𑀧𑁆𑀧𑁂𑀢𑁄 𑀉𑀧𑁄𑀲𑀣𑀜𑀢𑁆𑀢𑀺𑀬𑀸 𑀅𑀯𑀺𑀲𑁂𑀲𑀢𑁆𑀢𑀸. 𑀦𑀦𑀼 𑀘 𑀲𑁄𑀧𑀺 𑀧𑀜𑁆𑀘𑀯𑀺𑀥𑁄 𑀳𑁄𑀢𑀺, 𑀢𑀢𑁆𑀣 𑀓𑀢𑀫𑁄 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬𑀸𑀳 ‘‘𑀲𑁄 𑀧𑀦𑁂𑀲𑀸’’𑀢𑀺𑀆𑀤𑀺. 𑀓𑀫𑁆𑀫𑀯𑀲𑁂𑀦𑀸𑀢𑀺 𑀯𑀺𑀦𑀬𑀓𑀫𑁆𑀫𑀯𑀲𑁂𑀦. 𑀧𑀜𑁆𑀘 𑀯𑀺𑀥𑀸 𑀧𑀓𑀸𑀭𑀸 𑀅𑀲𑁆𑀲 𑀲𑀫𑁆𑀫𑀼𑀢𑀺𑀲𑀗𑁆𑀖𑀲𑁆𑀲𑀸𑀢𑀺 𑀧𑀜𑁆𑀘𑀯𑀺𑀥𑁄. 𑀢𑀣𑀸 𑀳𑀺 𑀯𑀺𑀥𑀬𑀼𑀢𑁆𑀢𑀕𑀢𑀧𑁆𑀧𑀓𑀸𑀭𑀲𑀤𑁆𑀤𑁂 𑀲𑀫𑀸𑀦𑀢𑁆𑀣𑁂 𑀯𑀡𑁆𑀡𑀬𑀦𑁆𑀢𑀺. 𑀘𑀢𑀼𑀦𑁆𑀦𑀁 𑀯𑀕𑁆𑀕𑁄 𑀲𑀫𑀽𑀳𑁄𑀢𑀺 𑀘𑀢𑀼𑀯𑀕𑁆𑀕𑁄, 𑀘𑀢𑀼𑀧𑀭𑀺𑀫𑀸𑀡𑀬𑀼𑀢𑁆𑀢𑁄 𑀯𑀸 𑀯𑀕𑁆𑀕𑁄 𑀘𑀢𑀼𑀯𑀕𑁆𑀕𑁄. 𑀏𑀯𑀁 𑀧𑀜𑁆𑀘𑀯𑀕𑁆𑀕𑀸𑀤𑀺.

𑀇𑀤𑀸𑀦𑀺 𑀬𑁂𑀲𑀁 𑀓𑀫𑁆𑀫𑀸𑀦𑀁 𑀯𑀲𑁂𑀦𑀸𑀬𑀁 𑀧𑀜𑁆𑀘𑀯𑀺𑀥𑁄 𑀳𑁄𑀢𑀺, 𑀢𑀁 𑀯𑀺𑀲𑁂𑀲𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀧𑀜𑁆𑀘𑀯𑀺𑀥𑁂 𑀲𑀗𑁆𑀖𑁂. 𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀉𑀧𑀲𑀫𑁆𑀧𑀤𑀓𑀫𑁆𑀫𑀲𑁆𑀲 𑀤𑀲𑀯𑀕𑁆𑀕𑀓𑀭𑀡𑀻𑀬𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀞𑀧𑁂𑀢𑁆𑀯𑀸…𑀧𑁂… 𑀉𑀧𑀲𑀫𑁆𑀧𑀤𑀜𑁆𑀘𑀸’’𑀢𑀺. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 ‘‘𑀦 𑀓𑀺𑀜𑁆𑀘𑀺 𑀲𑀗𑁆𑀖𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀇𑀫𑀫𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀬𑀤𑀺 𑀏𑀯𑀁 𑀓𑀺𑀫𑀢𑁆𑀣𑀁 𑀅𑀢𑀺𑀭𑁂𑀓𑀯𑀻𑀲𑀢𑀺𑀯𑀕𑁆𑀕𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀲𑁄 𑀧𑀦𑀸’’𑀢𑀺𑀆𑀤𑀺. 𑀅𑀢𑀺𑀭𑁂𑀓𑀢𑀭𑁂𑀦𑀸𑀢𑀺 𑀘𑀢𑀼𑀯𑀕𑁆𑀕𑀸𑀤𑀺𑀓𑀭𑀡𑀻𑀬𑀁 𑀧𑀜𑁆𑀘𑀯𑀕𑁆𑀕𑀸𑀤𑀺𑀦𑀸 𑀅𑀢𑀺𑀭𑁂𑀓𑀢𑀭𑁂𑀦, 𑀤𑀲𑀯𑀕𑁆𑀕𑀓𑀭𑀡𑀻𑀬𑀜𑁆𑀘 𑀏𑀓𑀸𑀤𑀲𑀯𑀕𑁆𑀕𑀸𑀤𑀺𑀦𑀸 𑀅𑀢𑀺𑀭𑁂𑀓𑀢𑀭𑁂𑀦. 𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀜𑀸𑀧𑀦𑀢𑁆𑀣𑀁. 𑀇𑀤𑀫𑁂𑀯 𑀘𑀸𑀦𑁂𑀦 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀦𑁆𑀢𑀺 ‘‘𑀓𑀫𑁆𑀫𑀯𑀲𑁂𑀦 𑀧𑀜𑁆𑀘𑀯𑀺𑀥𑁄’’𑀢𑀺 𑀯𑀼𑀢𑁆𑀢𑀁. 𑀓𑀫𑁆𑀫𑀲𑁆𑀲𑀸𑀦𑀺𑀬𑀫𑁂 𑀓𑀣𑀫𑁂𑀢𑀁 𑀬𑀼𑀚𑁆𑀚𑁂𑀬𑁆𑀬𑀸𑀢𑀺 𑀈𑀤𑀺𑀲𑀻 𑀘𑁄𑀤𑀦𑀸 𑀅𑀦𑀯𑀓𑀸𑀲𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂𑀢𑀺 𑀉𑀧𑁄𑀲𑀣𑁂.

𑀉𑀧𑁄𑀲𑀣𑀲𑀤𑁆𑀤𑁄 𑀧𑀦𑀸𑀬𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀲𑀻𑀮𑀉𑀧𑀯𑀸𑀲𑀧𑀜𑁆𑀜𑀢𑁆𑀢𑀺𑀤𑀺𑀯𑀲𑁂𑀲𑀼 𑀯𑀢𑁆𑀢𑀢𑀺. 𑀢𑀣𑀸 𑀳𑁂𑀲 ‘‘𑀆𑀬𑀸𑀫𑀸𑀯𑀼𑀲𑁄 𑀓𑀧𑁆𑀧𑀺𑀦, 𑀉𑀧𑁄𑀲𑀣𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁫𑁦; 𑀫. 𑀦𑀺. 𑀅𑀝𑁆𑀞. 𑁩.𑁮𑁫) 𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂 𑀆𑀕𑀢𑁄, ‘‘𑀏𑀯𑀁 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀔𑁄, 𑀯𑀺𑀲𑀸𑀔𑁂, 𑀉𑀧𑁄𑀲𑀣𑁄 𑀉𑀧𑀯𑀼𑀢𑁆𑀣𑁄’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁮.𑁪𑁩) 𑀲𑀻𑀮𑁂, ‘‘𑀲𑀼𑀤𑁆𑀥𑀲𑁆𑀲 𑀯𑁂 𑀲𑀤𑀸 𑀨𑀕𑁆𑀕𑀼, 𑀲𑀼𑀤𑁆𑀥𑀲𑁆𑀲𑀼𑀧𑁄𑀲𑀣𑁄 𑀲𑀤𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁭𑁯) 𑀉𑀧𑀯𑀸𑀲𑁂, ‘‘𑀉𑀧𑁄𑀲𑀣𑁄 𑀦𑀸𑀫 𑀦𑀸𑀕𑀭𑀸𑀚𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁪𑁬) 𑀧𑀜𑁆𑀜𑀢𑁆𑀢𑀺𑀬𑀁, ‘‘𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁧𑁮𑁧) 𑀤𑀺𑀯𑀲𑁂, 𑀇𑀥𑀸𑀧𑀺 𑀤𑀺𑀯𑀲𑁂𑀬𑁂𑀯 𑀯𑀢𑁆𑀢𑀫𑀸𑀦𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀅𑀚𑁆𑀚 𑀉𑀧𑁄𑀲𑀣𑀤𑀺𑀯𑀲𑁄’’𑀢𑀺𑀆𑀤𑀺. 𑀉𑀧𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀉𑀧𑁄𑀲𑀣𑁄. 𑀉𑀧𑀯𑀲𑀦𑁆𑀢𑀻𑀢𑀺 𑀲𑀻𑀮𑁂𑀦 𑀯𑀸 𑀲𑀩𑁆𑀩𑀲𑁄 𑀆𑀳𑀸𑀭𑀲𑁆𑀲 𑀅𑀪𑀼𑀜𑁆𑀚𑀦𑀲𑀗𑁆𑀔𑀸𑀢𑁂𑀦 𑀅𑀦𑀲𑀦𑁂𑀦 𑀯𑀸 𑀔𑀻𑀭𑀧𑀸𑀦𑀫𑀥𑀼𑀧𑀸𑀦𑀸𑀤𑀺𑀫𑀢𑁆𑀢𑁂𑀦 𑀯𑀸 𑀉𑀧𑁂𑀢𑀸 𑀳𑀼𑀢𑁆𑀯𑀸 𑀯𑀲𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀲𑀩𑁆𑀩𑁂𑀲𑀫𑁆𑀧𑀺 𑀯𑀸𑀓𑁆𑀬𑀸𑀦𑀁 𑀏𑀯-𑀓𑀸𑀭𑀢𑁆𑀣𑀲𑀳𑀺𑀢𑀢𑁆𑀢𑀸 ‘‘𑀉𑀧𑁄𑀲𑀣𑁄’’𑀢𑀺 𑀏𑀢𑀲𑁆𑀲 ‘‘𑀉𑀧𑁄𑀲𑀣𑁄 𑀏𑀯𑀸’’𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀏𑀢𑁂𑀦 𑀅𑀦𑀼𑀧𑁄𑀲𑀣𑀤𑀺𑀯𑀲𑀁 𑀧𑀝𑀺𑀓𑁆𑀔𑀺𑀧𑀢𑀻’’𑀢𑀺. 𑀇𑀫𑀺𑀦𑀸 𑀅𑀯𑀥𑀸𑀭𑀡𑁂𑀦 𑀦𑀺𑀭𑀸𑀓𑀢𑀁 𑀤𑀲𑁆𑀲𑁂𑀢𑀺, 𑀅𑀣 𑀯𑀸 𑀲𑀤𑁆𑀤𑀦𑁆𑀢𑀭𑀢𑁆𑀣𑀸𑀧𑁄𑀳𑀦𑀯𑀲𑁂𑀦 𑀲𑀤𑁆𑀤𑁄 𑀅𑀢𑁆𑀣𑀁 𑀯𑀤𑀢𑀻𑀢𑀺 ‘‘𑀉𑀧𑁄𑀲𑀣𑁄’’𑀢𑀺 𑀏𑀢𑀲𑁆𑀲 ‘‘𑀅𑀦𑀼𑀧𑁄𑀲𑀣𑁄 𑀦 𑀳𑁄𑀢𑀻’’𑀢𑀺 𑀅𑀬𑀫𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 ‘‘𑀏𑀢𑁂𑀦 𑀅𑀦𑀼𑀧𑁄𑀲𑀣𑀤𑀺𑀯𑀲𑀁 𑀧𑀝𑀺𑀓𑁆𑀔𑀺𑀧𑀢𑀻’’𑀢𑀺. ‘‘𑀏𑀲 𑀦𑀬𑁄 𑀧𑀦𑁆𑀦𑀭𑀲𑁄’’𑀢𑀺 𑀇𑀫𑀺𑀦𑀸 𑀅𑀜𑁆𑀜𑀁 𑀉𑀧𑁄𑀲𑀣𑀤𑀺𑀯𑀲𑀁 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀏𑀢𑁆𑀣𑀸𑀧𑀺. 𑀏𑀢𑁂𑀦𑀸𑀢𑀺 ‘‘𑀉𑀧𑁄𑀲𑀣𑁄’’𑀢𑀺 𑀏𑀢𑁂𑀦 𑀲𑀤𑁆𑀤𑁂𑀦. 𑀧𑀜𑁆𑀘𑀤𑀲𑀦𑁆𑀦𑀁 𑀢𑀺𑀣𑀻𑀦𑀁 𑀧𑀽𑀭𑀡𑀯𑀲𑁂𑀦 𑀧𑀦𑁆𑀦𑀭𑀲𑁄. 𑀧𑀦𑁆𑀦𑀭𑀲𑁄𑀢𑀺 𑀇𑀫𑀺𑀦𑀸 𑀅𑀜𑁆𑀜𑀁 𑀉𑀧𑁄𑀲𑀣𑀤𑀺𑀯𑀲𑀁 𑀧𑀝𑀺𑀓𑁆𑀔𑀺𑀧𑀢𑀻’’𑀢𑀺 𑀲𑀁𑀔𑀺𑀢𑁆𑀢𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀤𑀺𑀯𑀲𑀯𑀲𑁂𑀦 𑀳𑀻’’𑀢𑀺𑀆𑀤𑀺𑀫𑀸𑀳. 𑀘𑀢𑀼𑀤𑁆𑀤𑀲𑀺𑀬𑀁 𑀦𑀺𑀬𑀼𑀢𑁆𑀢𑁄 𑀘𑀸𑀢𑀼𑀤𑁆𑀤𑀲𑀺𑀓𑁄. 𑀏𑀯𑀁 𑀧𑀦𑁆𑀦𑀭𑀲𑀺𑀓𑁄. 𑀲𑀸𑀫𑀕𑁆𑀕𑀺𑀉𑀧𑁄𑀲𑀣𑁄 𑀦𑀸𑀫 𑀲𑀗𑁆𑀖𑀲𑀸𑀫𑀕𑁆𑀕𑀺𑀓𑀢𑀤𑀺𑀯𑀲𑁂 𑀓𑀸𑀢𑀩𑁆𑀩𑀉𑀧𑁄𑀲𑀣𑁄. 𑀳𑁂𑀫𑀦𑁆𑀢𑀕𑀺𑀫𑁆𑀳𑀯𑀲𑁆𑀲𑀸𑀦𑀸𑀦𑀁 𑀢𑀺𑀡𑁆𑀡𑀁 𑀉𑀢𑀽𑀦𑀦𑁆𑀢𑀺 𑀏𑀢𑁆𑀣 𑀳𑁂𑀫𑀦𑁆𑀢𑀉𑀢𑀼 𑀦𑀸𑀫 𑀅𑀧𑀭𑀓𑀢𑁆𑀢𑀺𑀓𑀲𑁆𑀲 𑀓𑀸𑀴𑀧𑀓𑁆𑀔𑀧𑀸𑀝𑀺𑀧𑀤𑀢𑁄 𑀧𑀝𑁆𑀞𑀸𑀬 𑀨𑀕𑁆𑀕𑀼𑀦𑀧𑀼𑀡𑁆𑀡𑀫𑀧𑀭𑀺𑀬𑁄𑀲𑀸𑀦𑀸 𑀘𑀢𑁆𑀢𑀸𑀭𑁄 𑀫𑀸𑀲𑀸, 𑀕𑀺𑀫𑁆𑀳𑀉𑀢𑀼 𑀦𑀸𑀫 𑀨𑀕𑁆𑀕𑀼𑀦𑀲𑁆𑀲 𑀓𑀸𑀮𑀧𑀓𑁆𑀔𑀧𑀸𑀝𑀺𑀧𑀤𑀢𑁄 𑀧𑀝𑁆𑀞𑀸𑀬 𑀆𑀲𑀸𑀴𑁆𑀳𑀧𑀼𑀡𑁆𑀡𑀫𑀧𑀭𑀺𑀬𑁄𑀲𑀸𑀦𑀸 𑀘𑀢𑁆𑀢𑀸𑀭𑁄 𑀫𑀸𑀲𑀸, 𑀯𑀲𑁆𑀲𑀸𑀦𑀉𑀢𑀼 𑀦𑀸𑀫 𑀆𑀲𑀸𑀴𑁆𑀳𑀲𑁆𑀲 𑀓𑀸𑀴𑀧𑀓𑁆𑀔𑀧𑀸𑀝𑀺𑀧𑀤𑀢𑁄 𑀧𑀝𑁆𑀞𑀸𑀬 𑀅𑀧𑀭𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀧𑀭𑀺𑀬𑁄𑀲𑀸𑀦𑀸 𑀘𑀢𑁆𑀢𑀸𑀭𑁄 𑀫𑀸𑀲𑀸. 𑀢𑀢𑀺𑀬𑀲𑀢𑁆𑀢𑀫𑀧𑀓𑁆𑀔𑁂𑀲𑀼 𑀤𑁆𑀯𑁂 𑀤𑁆𑀯𑁂 𑀓𑀢𑁆𑀯𑀸 𑀙 𑀘𑀸𑀢𑀼𑀤𑁆𑀤𑀲𑀺𑀓𑀸𑀢𑀺 𑀳𑁂𑀫𑀦𑁆𑀢𑀲𑁆𑀲 𑀉𑀢𑀼𑀦𑁄 𑀢𑀢𑀺𑀬𑁂 𑀘 𑀲𑀢𑁆𑀢𑀫𑁂 𑀘 𑀧𑀓𑁆𑀔𑁂 𑀤𑁆𑀯𑁂 𑀘𑀸𑀢𑀼𑀤𑁆𑀤𑀲𑀺𑀓𑀸, 𑀏𑀯𑀫𑀺𑀢𑀭𑁂𑀲𑀁 𑀉𑀢𑀽𑀦𑀦𑁆𑀢𑀺 𑀙 𑀘𑀸𑀢𑀼𑀤𑁆𑀤𑀲𑀺𑀓𑀸. 𑀲𑁂𑀲𑀸 𑀧𑀦𑁆𑀦𑀭𑀲𑀺𑀓𑀸𑀢𑀺 𑀲𑁂𑀲𑀸 𑀅𑀝𑁆𑀞𑀸𑀭𑀲 𑀧𑀦𑁆𑀦𑀭𑀲𑀺𑀓𑀸. 𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋

‘‘𑀓𑀢𑁆𑀢𑀺𑀓𑀲𑁆𑀲 𑀘 𑀓𑀸𑀴𑀫𑁆𑀳𑀸, 𑀬𑀸𑀯 𑀨𑀕𑁆𑀕𑀼𑀦𑀧𑀼𑀡𑁆𑀡𑀫𑀸;

‘𑀳𑁂𑀫𑀦𑁆𑀢𑀓𑀸𑀮𑁄’𑀢𑀺 𑀯𑀺𑀜𑁆𑀜𑁂𑀬𑁆𑀬𑁄, 𑀅𑀝𑁆𑀞 𑀳𑁄𑀦𑁆𑀢𑀺 𑀉𑀧𑁄𑀲𑀣𑀸.

‘‘𑀨𑀕𑁆𑀕𑀼𑀦𑀲𑁆𑀲 𑀘 𑀓𑀸𑀴𑀫𑁆𑀳𑀸, 𑀬𑀸𑀯 𑀆𑀲𑀸𑀴𑁆𑀳𑀧𑀼𑀡𑁆𑀡𑀫𑀸;

‘𑀕𑀺𑀫𑁆𑀳𑀓𑀸𑀮𑁄’𑀢𑀺 𑀯𑀺𑀜𑁆𑀜𑁂𑀬𑁆𑀬𑁄, 𑀅𑀝𑁆𑀞 𑀳𑁄𑀦𑁆𑀢𑀺 𑀉𑀧𑁄𑀲𑀣𑀸.

‘‘𑀆𑀲𑀸𑀴𑁆𑀳𑀲𑁆𑀲 𑀘 𑀓𑀸𑀴𑀫𑁆𑀳𑀸, 𑀬𑀸𑀯 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸;

‘𑀯𑀲𑁆𑀲𑀓𑀸𑀮𑁄’𑀢𑀺 𑀯𑀺𑀜𑁆𑀜𑁂𑀬𑁆𑀬𑁄, 𑀅𑀝𑁆𑀞 𑀳𑁄𑀦𑁆𑀢𑀺 𑀉𑀧𑁄𑀲𑀣𑀸.

‘‘𑀉𑀢𑀽𑀦𑀁 𑀧𑀦 𑀢𑀺𑀡𑁆𑀡𑀦𑁆𑀦𑀁, 𑀧𑀓𑁆𑀔𑁂 𑀢𑀢𑀺𑀬𑀲𑀢𑁆𑀢𑀫𑁂;

‘𑀘𑀸𑀢𑀼𑀤𑁆𑀤𑀲𑁄’𑀢𑀺 𑀧𑀸𑀢𑀺𑀫𑁄𑀓𑁆𑀔𑀁, 𑀉𑀤𑁆𑀤𑀺𑀲𑀦𑁆𑀢𑀺 𑀦𑀬𑀜𑁆𑀜𑀼𑀦𑁄’’𑀢𑀺.

𑀧𑀓𑀢𑀺𑀬𑀸 𑀦𑀩𑀳𑀼𑀢𑀭𑀸𑀯𑀸𑀲𑀺𑀓𑀸𑀤𑀺𑀧𑀘𑁆𑀘𑀬𑁂𑀦 𑀓𑀸𑀢𑀩𑁆𑀩𑀁 𑀧𑀓𑀢𑀺𑀘𑀸𑀭𑀺𑀢𑁆𑀢𑀁. 𑀩𑀳𑀼𑀢𑀭𑀸𑀯𑀸𑀲𑀺𑀓𑀸𑀤𑀺𑀧𑀘𑁆𑀘𑀬𑁂 𑀧𑀦 𑀲𑀢𑀺 𑀅𑀜𑁆𑀜𑀲𑁆𑀫𑀺𑀁 𑀘𑀸𑀢𑀼𑀤𑁆𑀤𑀲𑁂𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀦𑀸𑀳 ‘‘𑀲𑀓𑀺’’𑀦𑁆𑀢𑀺𑀆𑀤𑀺. 𑀲𑀓𑀺𑀦𑁆𑀢𑀺 𑀏𑀓𑀲𑁆𑀫𑀺𑀁 𑀯𑀸𑀭𑁂. 𑀆𑀯𑀸𑀲𑀺𑀓𑀸𑀦𑀁 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀆𑀯𑀸𑀲𑀺𑀓𑁂𑀳𑀺 ‘‘𑀅𑀚𑁆𑀚𑀼𑀧𑁄𑀲𑀣𑁄 𑀘𑀸𑀢𑀼𑀤𑁆𑀤𑀲𑁄’’𑀢𑀺 𑀧𑀼𑀩𑁆𑀩𑀓𑀺𑀘𑁆𑀘𑁂 𑀓𑀭𑀺𑀬𑀫𑀸𑀦𑁂 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁, 𑀦 𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀁. 𑀆𑀤𑀺𑀲𑀤𑁆𑀤𑁂𑀦 ‘‘𑀆𑀯𑀸𑀲𑀺𑀓𑁂𑀳𑀺 𑀆𑀕𑀦𑁆𑀢𑀼𑀓𑀸𑀦𑀁 𑀅𑀦𑀼𑀯𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑁧𑁭𑁮) 𑀯𑀘𑀦𑀁, ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀤𑁆𑀯𑁂 𑀢𑀬𑁄 𑀉𑀧𑁄𑀲𑀣𑁂 𑀘𑀸𑀢𑀼𑀤𑁆𑀤𑀲𑀺𑀓𑁂 𑀓𑀸𑀢𑀼𑀁, 𑀓𑀣𑀁 𑀫𑀬𑀁 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀧𑀞𑀫𑀢𑀭𑀁 𑀧𑀯𑀸𑀭𑁂𑀬𑁆𑀬𑀸𑀫𑀸’’𑀢𑀺 (𑀫𑀳𑀸𑀯. 𑁨𑁪𑁦) 𑀯𑀘𑀦𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀢𑁆𑀣 𑀘 𑀧𑀞𑀫𑀲𑀼𑀢𑁆𑀢𑀲𑁆𑀲 𑀏𑀓𑁂𑀓𑀲𑁆𑀲 𑀉𑀢𑀼𑀦𑁄 𑀢𑀢𑀺𑀬𑀲𑀢𑁆𑀢𑀫𑀧𑀓𑁆𑀔𑀲𑁆𑀲 𑀘𑀸𑀢𑀼𑀤𑁆𑀤𑀲𑁂 𑀯𑀸 𑀅𑀯𑀲𑁂𑀲𑀲𑁆𑀲 𑀧𑀦𑁆𑀦𑀭𑀲𑁂 𑀯𑀸 𑀲𑀓𑀺𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀦𑁆𑀢𑀺 𑀧𑀓𑀢𑀺𑀘𑀸𑀭𑀺𑀢𑁆𑀢𑀯𑀲𑁂𑀦𑀧𑀺 𑀅𑀢𑁆𑀣𑀲𑀫𑁆𑀪𑀯𑀢𑁄 ‘‘𑀆𑀕𑀦𑁆𑀢𑀼𑀓𑁂𑀳𑀻’’𑀢𑀺𑀆𑀤𑀻𑀦𑀺 𑀲𑀼𑀢𑁆𑀢𑀸𑀦𑀺 𑀤𑀲𑁆𑀲𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸𑀭𑀽𑀧𑀧𑀘𑁆𑀘𑀬𑁂 𑀲𑀢𑀻𑀢𑀺 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀘𑀸𑀢𑀼𑀤𑁆𑀤𑀲𑀺𑀓𑁂 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀅𑀦𑀼𑀭𑀽𑀧𑁂 ‘‘𑀆𑀯𑀸𑀲𑀺𑀓𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀺𑀓𑁂 𑀧𑀘𑁆𑀘𑀬𑁂 𑀲𑀢𑀺. 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀘𑀸𑀢𑀼𑀤𑁆𑀤𑀲𑁂𑀢𑀺 𑀢𑀺𑀡𑁆𑀡𑀁 𑀉𑀢𑀽𑀦𑀁 𑀢𑀢𑀺𑀬𑀲𑀢𑁆𑀢𑀫𑀧𑀓𑁆𑀔𑀘𑀸𑀢𑀼𑀤𑁆𑀤𑀲𑀢𑁄 𑀅𑀜𑁆𑀜𑀲𑁆𑀫𑀺𑀁 𑀘𑀸𑀢𑀼𑀤𑁆𑀤𑀲𑁂.

𑀦 𑀓𑁂𑀯𑀮𑀁 𑀉𑀧𑁄𑀲𑀣𑀤𑀺𑀯𑀲𑀸𑀯 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀧𑀼𑀭𑀺𑀫𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀧𑀦𑀸’’𑀢𑀺𑀆𑀤𑀺. 𑀫𑀸 𑀇𑀢𑀺 𑀘𑀦𑁆𑀤𑁄 𑀯𑀼𑀘𑁆𑀘𑀢𑀺 𑀢𑀲𑁆𑀲 𑀕𑀢𑀺𑀬𑀸 𑀤𑀺𑀯𑀲𑀲𑁆𑀲 𑀫𑀺𑀦𑀺𑀢𑀩𑁆𑀩𑀢𑁄, 𑀲𑁄 𑀏𑀢𑁆𑀣 𑀲𑀩𑁆𑀩𑀓𑀮𑀸𑀧𑀸𑀭𑀺𑀧𑀽𑀭𑀺𑀬𑀸 𑀧𑀼𑀡𑁆𑀡𑁄𑀢𑀺 𑀧𑀼𑀡𑁆𑀡𑀫𑀸, 𑀧𑀼𑀩𑁆𑀩𑀓𑀢𑁆𑀢𑀺𑀓𑀸𑀬 𑀧𑀼𑀡𑁆𑀡𑀫𑀸 𑀧𑀼𑀩𑁆𑀩𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸, 𑀅𑀲𑁆𑀲𑀬𑀼𑀚𑀧𑀼𑀡𑁆𑀡𑀫𑀸. 𑀲𑀸 𑀳𑀺 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀁 𑀦𑀺𑀯𑀢𑁆𑀢𑁂𑀢𑀼𑀁 𑀏𑀯𑀁 𑀯𑀼𑀢𑁆𑀢𑀸. 𑀢𑁂𑀲𑀁𑀬𑁂𑀯𑀸𑀢𑀺 𑀧𑀼𑀭𑀺𑀫𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁𑀬𑁂𑀯. 𑀪𑀡𑁆𑀟𑀦𑀓𑀸𑀭𑀓𑁂𑀳𑀻𑀢𑀺 𑀓𑀮𑀳𑀓𑀸𑀭𑀓𑁂𑀳𑀺. 𑀧𑀘𑁆𑀘𑀼𑀓𑁆𑀓𑀟𑁆𑀠𑀦𑁆𑀢𑀻𑀢𑀺 𑀉𑀓𑁆𑀓𑀟𑁆𑀠𑀦𑁆𑀢𑀺. 𑀪𑀡𑁆𑀟𑀦𑀓𑀸𑀭𑀓𑁂𑀳𑀺 𑀅𑀦𑀼𑀯𑀸𑀤𑀯𑀲𑁂𑀦 𑀅𑀲𑁆𑀲𑀬𑀼𑀚𑀧𑀼𑀡𑁆𑀡𑀫𑀸𑀤𑀺𑀁 𑀧𑀭𑀺𑀘𑁆𑀘𑀚𑀦𑁆𑀢𑀸 𑀧𑀯𑀸𑀭𑀡𑀁 𑀓𑀸𑀴𑀧𑀓𑁆𑀔𑀁, 𑀚𑀼𑀡𑁆𑀳𑀧𑀓𑁆𑀔𑀦𑁆𑀢𑀺 𑀉𑀤𑁆𑀥𑀁 𑀓𑀟𑁆𑀠𑀦𑁆𑀢𑀻𑀢𑀺 𑀅𑀢𑁆𑀣𑁄. ‘‘𑀲𑀼𑀡𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑁄 𑀆𑀯𑀸𑀲𑀺𑀓𑀸, 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀇𑀤𑀸𑀦𑀺 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸𑀫, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀫, 𑀆𑀕𑀫𑁂 𑀓𑀸𑀴𑁂 𑀧𑀯𑀸𑀭𑁂𑀬𑁆𑀬𑀸𑀫𑀸’’𑀢𑀺 (𑀫𑀳𑀸𑀯. 𑁨𑁪𑁦) ‘‘𑀲𑀼𑀡𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑁄 𑀆𑀯𑀸𑀲𑀺𑀓𑀸, 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀇𑀤𑀸𑀦𑀺 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸𑀫, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀫, 𑀆𑀕𑀫𑁂 𑀚𑀼𑀡𑁆𑀳𑁂 𑀧𑀯𑀸𑀭𑁂𑀬𑁆𑀬𑀸𑀫𑀸’’𑀢𑀺 𑀘 𑀏𑀯𑀁 𑀜𑀢𑁆𑀢𑀺𑀬𑀸 𑀧𑀯𑀸𑀭𑀡𑀁 𑀉𑀓𑁆𑀓𑀟𑁆𑀠𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀣𑀸𑀢𑀺 𑀅𑀦𑀦𑁆𑀢𑀭𑀢𑁆𑀣𑁂 𑀦𑀺𑀧𑀸𑀢𑁄. 𑀘𑀢𑀼𑀤𑁆𑀤𑀲𑀦𑁆𑀦𑀁 𑀧𑀽𑀭𑀡𑁄 𑀘𑀸𑀢𑀼𑀤𑁆𑀤𑀲𑁄, 𑀤𑀺𑀯𑀲𑁄. 𑀬𑀁 𑀲𑀦𑁆𑀥𑀸𑀬 ‘‘𑀆𑀕𑀫𑁂 𑀚𑀼𑀡𑁆𑀳𑁂 𑀧𑀯𑀸𑀭𑁂𑀬𑁆𑀬𑀸𑀫𑀸’’𑀢𑀺 𑀜𑀢𑁆𑀢𑀺𑀁 𑀞𑀧𑀬𑀺𑀁𑀲𑀼, 𑀢𑀲𑁆𑀫𑀺𑀁 𑀧𑀦 𑀆𑀕𑀫𑁂 𑀚𑀼𑀡𑁆𑀳𑁂 𑀓𑁄𑀫𑀼𑀤𑀺𑀬𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀅𑀯𑀲𑁆𑀲𑀁 𑀧𑀯𑀸𑀭𑁂𑀢𑀩𑁆𑀩𑀁. 𑀦 𑀳𑀺 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀸𑀭𑁂𑀢𑀼𑀁 𑀮𑀩𑁆𑀪𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀢𑀫𑁆𑀧𑀺 𑀚𑀼𑀡𑁆𑀳𑀁 𑀅𑀦𑀼𑀯𑀲𑁂𑀬𑁆𑀬𑀼𑀁, 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀲𑀩𑁆𑀩𑁂𑀳𑁂𑀯 𑀆𑀕𑀫𑁂 𑀚𑀼𑀡𑁆𑀳𑁂 𑀓𑁄𑀫𑀼𑀤𑀺𑀬𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀅𑀓𑀸𑀫𑀸 𑀧𑀯𑀸𑀭𑁂𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑁨𑁪𑁦).

𑀢𑁂𑀦𑁂𑀯𑀸𑀳 ‘‘𑀧𑀘𑁆𑀙𑀺𑀫𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀜𑁆𑀘 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸 𑀏𑀯𑀸’’𑀢𑀺. 𑀬𑀤𑀺 𑀳𑀺 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀸𑀭𑁂𑀬𑁆𑀬, 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑁂𑀬𑁆𑀬. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀦 𑀘, 𑀪𑀺𑀓𑁆𑀔𑀯𑁂, 𑀅𑀧𑀯𑀸𑀭𑀡𑀸𑀬 𑀧𑀯𑀸𑀭𑁂𑀢𑀩𑁆𑀩𑀁 𑀅𑀜𑁆𑀜𑀢𑁆𑀭 𑀲𑀗𑁆𑀖𑀲𑀸𑀫𑀕𑁆𑀕𑀺𑀬𑀸’’𑀢𑀺 (𑀫𑀳𑀸𑀯. 𑁨𑁩𑁩). 𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀸𑀬𑁄𑀕𑀢𑁄 𑀧𑀯𑀸𑀭𑀡𑀸𑀤𑀺𑀯𑀲𑀸. 𑀧𑀺𑀲𑀤𑁆𑀤𑁂𑀦 𑀦 𑀓𑁂𑀯𑀮𑀁 𑀧𑀯𑀸𑀭𑀡𑀸𑀤𑀺𑀯𑀲𑀸𑀬𑁂𑀯, 𑀅𑀣 𑀔𑁄 𑀉𑀧𑁄𑀲𑀣𑀤𑀺𑀯𑀲𑀸𑀧𑀺 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀸𑀦𑀺 𑀬𑁄 𑀲𑁄 𑀲𑀸𑀫𑀕𑁆𑀕𑀺𑀉𑀧𑁄𑀲𑀣𑀤𑀺𑀯𑀲𑁄 𑀯𑀼𑀢𑁆𑀢𑁄, 𑀢𑀜𑁆𑀘 𑀢𑀧𑁆𑀧𑀲𑀗𑁆𑀕𑁂𑀦 𑀲𑀸𑀫𑀕𑁆𑀕𑀺𑀧𑀯𑀸𑀭𑀡𑀸𑀤𑀺𑀯𑀲𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀤𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀑𑀲𑀸𑀭𑀺𑀢𑁂 𑀢𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑁆𑀫𑀺𑀦𑁆𑀢𑀺 𑀉𑀓𑁆𑀔𑀺𑀢𑁆𑀢𑀓𑁂 𑀪𑀺𑀓𑁆𑀔𑀼𑀲𑁆𑀫𑀺𑀁 𑀑𑀲𑀸𑀭𑀺𑀢𑁂, 𑀢𑀁 𑀕𑀳𑁂𑀢𑁆𑀯𑀸 𑀲𑀻𑀫𑀁 𑀕𑀦𑁆𑀢𑁆𑀯𑀸 𑀆𑀧𑀢𑁆𑀢𑀺𑀁 𑀤𑁂𑀲𑀸𑀧𑁂𑀢𑁆𑀯𑀸 𑀓𑀫𑁆𑀫𑀯𑀸𑀘𑀸𑀬 𑀓𑀫𑁆𑀫𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀧𑀯𑁂𑀲𑀺𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲𑀸𑀢𑀺 𑀢𑀲𑁆𑀲 𑀅𑀥𑀺𑀓𑀭𑀡𑀲𑁆𑀲. 𑀢𑀤𑀸 𑀞𑀧𑁂𑀢𑁆𑀯𑀸…𑀧𑁂… 𑀉𑀧𑁄𑀲𑀣𑀤𑀺𑀯𑀲𑁄 𑀦𑀸𑀫 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀁 𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀢𑀸𑀯𑀤𑁂𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀸𑀯𑀤𑁂𑀯𑀸𑀢𑀺 𑀢𑀁 𑀤𑀺𑀯𑀲𑀫𑁂𑀯. 𑀯𑀘𑀦𑀢𑁄𑀢𑀺 𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁪𑁭𑁫) 𑀯𑀼𑀢𑁆𑀢𑀢𑁆𑀢𑀸. 𑀬𑀢𑁆𑀣 𑀧𑀦 𑀧𑀢𑁆𑀢𑀘𑀻𑀯𑀭𑀸𑀤𑀻𑀦𑀁 𑀅𑀢𑁆𑀣𑀸𑀬 𑀅𑀧𑁆𑀧𑀫𑀢𑁆𑀢𑀓𑁂𑀦 𑀓𑀸𑀭𑀡𑁂𑀦 𑀯𑀺𑀯𑀤𑀦𑁆𑀢𑀸 𑀉𑀧𑁄𑀲𑀣𑀁 𑀯𑀸 𑀧𑀯𑀸𑀭𑀡𑀁 𑀯𑀸 𑀞𑀧𑁂𑀦𑁆𑀢𑀺, 𑀢𑀢𑁆𑀣 𑀢𑀲𑁆𑀫𑀺𑀁 𑀅𑀥𑀺𑀓𑀭𑀡𑁂 𑀯𑀺𑀦𑀺𑀘𑁆𑀙𑀺𑀢𑁂 ‘‘𑀲𑀫𑀕𑁆𑀕𑀸 𑀚𑀸𑀢𑀫𑁆𑀳𑀸’’𑀢𑀺 𑀅𑀦𑁆𑀢𑀭𑀸 𑀲𑀸𑀫𑀕𑁆𑀕𑀺𑀉𑀧𑁄𑀲𑀣𑀁 𑀓𑀸𑀢𑀼𑀁 𑀦 𑀮𑀪𑀦𑁆𑀢𑀺. 𑀓𑀭𑁄𑀦𑁆𑀢𑁂𑀳𑀺 𑀅𑀦𑀼𑀧𑁄𑀲𑀣𑁂 𑀉𑀧𑁄𑀲𑀣𑁄 𑀓𑀢𑁄 𑀦𑀸𑀫 𑀳𑁄𑀢𑀺. 𑀓𑀢𑁆𑀢𑀺𑀓𑀫𑀸𑀲𑀩𑁆𑀪𑀦𑁆𑀢𑀭𑁂𑀢𑀺 𑀏𑀢𑁆𑀣 𑀓𑀢𑁆𑀢𑀺𑀓𑀫𑀸𑀲𑁄 𑀦𑀸𑀫 𑀧𑀼𑀩𑁆𑀩𑀓𑀢𑁆𑀢𑀺𑀓𑀫𑀸𑀲𑀲𑁆𑀲 𑀓𑀸𑀴𑀧𑀓𑁆𑀔𑀧𑀸𑀝𑀺𑀧𑀤𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀧𑀭𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸, 𑀢𑀸𑀯 𑀏𑀓𑀽𑀦𑀢𑀺𑀁𑀲𑀭𑀢𑁆𑀢𑀺𑀤𑀺𑀯𑁄, 𑀢𑀲𑁆𑀲𑀩𑁆𑀪𑀦𑁆𑀢𑀭𑁂, 𑀢𑀢𑁄 𑀧𑀘𑁆𑀙𑀸 𑀯𑀸 𑀧𑀦 𑀧𑀼𑀭𑁂 𑀯𑀸 𑀦 𑀯𑀝𑁆𑀝𑀢𑀺. 𑀅𑀬𑀫𑁂𑀯 𑀬𑁄 𑀓𑁄𑀘𑀺 𑀤𑀺𑀯𑀲𑁄𑀬𑁂𑀯. 𑀇𑀥𑀸𑀧𑀺 𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑁂 𑀲𑀸𑀫𑀕𑁆𑀕𑀺𑀬𑀸 𑀲𑀤𑀺𑀲𑀸𑀯 𑀲𑀸𑀫𑀕𑁆𑀕𑀻 𑀯𑁂𑀤𑀺𑀢𑀩𑁆𑀩𑀸. 𑀬𑁂 𑀧𑀦 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀅𑀧𑁆𑀧𑀫𑀢𑁆𑀢𑀓𑁂 𑀧𑀯𑀸𑀭𑀡𑀁 𑀞𑀧𑁂𑀢𑁆𑀯𑀸 𑀲𑀫𑀕𑁆𑀕𑀸 𑀳𑁄𑀦𑁆𑀢𑀺, 𑀢𑁂𑀳𑀺 𑀧𑀯𑀸𑀭𑀡𑀸𑀬𑀫𑁂𑀯 𑀧𑀯𑀸𑀭𑀡𑀸 𑀓𑀸𑀢𑀩𑁆𑀩𑀸, 𑀢𑀸𑀯𑀤𑁂𑀯 𑀦 𑀓𑀸𑀢𑀩𑁆𑀩𑀸. 𑀓𑀭𑁄𑀦𑁆𑀢𑁂𑀳𑀺 𑀅𑀧𑁆𑀧𑀯𑀸𑀭𑀡𑀸𑀬 𑀧𑀯𑀸𑀭𑀡𑀸 𑀓𑀢𑀸 𑀳𑁄𑀢𑀺. 𑀦 𑀓𑀸𑀢𑀩𑁆𑀩𑁄𑀬𑁂𑀯𑀸𑀢𑀺 𑀦𑀺𑀬𑀫𑁂𑀦 𑀬𑀤𑀺 𑀓𑀭𑁄𑀢𑀺, 𑀤𑀼𑀓𑁆𑀓𑀝𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀳𑀺 𑀉𑀧𑁄𑀲𑀣𑀓𑀭𑀡𑁂 𑀤𑀼𑀓𑁆𑀓𑀝𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀦, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑁄𑀲𑀣𑁂 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀲𑀗𑁆𑀖𑀲𑀸𑀫𑀕𑁆𑀕𑀺𑀬𑀸’’𑀢𑀺 (𑀫𑀳𑀸𑀯. 𑁧𑁮𑁩).

‘‘𑀧𑀢𑁆𑀢𑀓𑀸𑀮𑀫𑁂𑀯 𑀧𑀢𑁆𑀢𑀓𑀮𑁆𑀮’’𑀦𑁆𑀢𑀺 𑀇𑀫𑀺𑀦𑀸 𑀲𑀓𑀢𑁆𑀣𑁂 𑀪𑀸𑀯𑀧𑁆𑀧𑀘𑁆𑀘𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀦𑀸𑀲𑀢𑀻𑀢𑀺 𑀅𑀦𑁆𑀯𑀬𑀢𑁄 𑀯𑀼𑀢𑁆𑀢𑀫𑁂𑀯 𑀩𑁆𑀬𑀢𑀺𑀭𑁂𑀓𑀢𑁄 𑀤𑀴𑁆𑀳𑀁 𑀓𑀭𑁄𑀢𑀺.

𑀅𑀦𑀼𑀭𑀽𑀧𑀸𑀢𑀺 𑀅𑀭𑀳𑀸 𑀅𑀦𑀼𑀘𑁆𑀙𑀯𑀺𑀓𑀸, 𑀲𑀸𑀫𑀺𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀩𑁆𑀩𑀦𑁆𑀢𑀺𑀫𑁂𑀦𑀸𑀢𑀺 𑀲𑀩𑁆𑀩𑀳𑁂𑀝𑁆𑀞𑀺𑀫𑁂𑀦 𑀘𑀢𑁆𑀢𑀸𑀭𑁄, 𑀦 𑀢𑁂𑀳𑀺 𑀯𑀺𑀦𑀸 𑀢𑀁 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑀻𑀬𑀢𑀺, 𑀦 𑀢𑁂𑀲𑀁 𑀙𑀦𑁆𑀤𑁄 𑀯𑀸 𑀧𑀸𑀭𑀺𑀲𑀼𑀤𑁆𑀥𑀺 𑀯𑀸 𑀏𑀢𑀺. 𑀅𑀯𑀲𑁂𑀲𑀸 𑀧𑀦 𑀲𑀘𑁂𑀧𑀺 𑀲𑀳𑀲𑁆𑀲𑀫𑀢𑁆𑀢𑀸 𑀳𑁄𑀦𑁆𑀢𑀺, 𑀲𑀘𑁂 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀲𑀩𑁆𑀩𑁂 𑀙𑀦𑁆𑀤𑀸𑀭𑀳𑀸𑀯 𑀳𑁄𑀦𑁆𑀢𑀺, 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀼 𑀯𑀸, 𑀫𑀸 𑀯𑀸, 𑀓𑀫𑁆𑀫𑀁 𑀦 𑀓𑀼𑀧𑁆𑀧𑀢𑀺. 𑀧𑀓𑀢𑀢𑁆𑀢𑀸𑀢𑀺 𑀅𑀦𑀼𑀓𑁆𑀔𑀺𑀢𑁆𑀢𑀸, 𑀧𑀸𑀭𑀸𑀚𑀺𑀓𑀁 𑀅𑀦𑀚𑁆𑀛𑀸𑀧𑀦𑁆𑀦𑀸 𑀘. 𑀳𑀢𑁆𑀣𑀧𑀸𑀲𑁄 𑀦𑀸𑀫 𑀤𑀺𑀬𑀟𑁆𑀠𑀳𑀢𑁆𑀣𑀧𑁆𑀧𑀫𑀸𑀡𑁄.

𑀲𑀻𑀫𑀸 𑀘 𑀦𑀸𑀫𑁂𑀲𑀸 𑀓𑀢𑀫𑀸, 𑀬𑀢𑁆𑀣 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑀸 𑀓𑀫𑁆𑀫𑀧𑁆𑀧𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬 𑀲𑀻𑀫𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀪𑀸𑀕𑀯𑀦𑁆𑀢𑀸𑀦𑀁 𑀲𑀪𑀸𑀯𑀯𑀺𑀪𑀸𑀯𑀦𑀁 𑀯𑀺𑀪𑀸𑀕𑀤𑀲𑁆𑀲𑀦𑀫𑀼𑀔𑁂𑀦𑁂𑀯 𑀳𑁄𑀢𑀻𑀢𑀺 ‘‘𑀲𑀻𑀫𑀸 𑀘 𑀦𑀸𑀫𑁂𑀲𑀸’’𑀢𑀺𑀆𑀤𑀺𑀫𑀸𑀳. 𑀲𑀫𑁆𑀪𑀺𑀦𑁆𑀤𑀦𑁆𑀢𑁂𑀦𑀸𑀢𑀺 𑀫𑀺𑀲𑁆𑀲𑀻𑀓𑀭𑁄𑀦𑁆𑀢𑁂𑀦. 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁂𑀦𑀸𑀢𑀺 𑀫𑀤𑁆𑀤𑀦𑁆𑀢𑁂𑀦, 𑀅𑀦𑁆𑀢𑁄 𑀓𑀭𑁄𑀦𑁆𑀢𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀸 𑀯𑀺𑀧𑀢𑁆𑀢𑀺𑀲𑀻𑀫𑀸𑀬𑁄 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀲𑁆𑀫𑀸 𑀯𑀺𑀧𑀢𑁆𑀢𑀺𑀲𑀻𑀫𑀸𑀬𑁄 𑀦𑀸𑀫𑀸𑀢𑀺 𑀆𑀳 ‘‘𑀏𑀓𑀸𑀤𑀲𑀳𑀻’’𑀢𑀺𑀆𑀤𑀺. 𑀆𑀓𑀸𑀭𑁂𑀳𑀻𑀢𑀺 𑀓𑀸𑀭𑀡𑁂𑀳𑀺. 𑀯𑀘𑀦𑀢𑁄𑀢𑀺 𑀓𑀫𑁆𑀫𑀯𑀕𑁆𑀕𑁂 (𑀧𑀭𑀺. 𑁪𑁮𑁨 𑀆𑀤𑀬𑁄) 𑀓𑀣𑀺𑀢𑀢𑁆𑀢𑀸. 𑀲𑀗𑁆𑀖𑀓𑀫𑁆𑀫𑀁 𑀦𑀸𑀫𑁂𑀢𑀁 𑀯𑀻𑀲𑀢𑀺𑀯𑀕𑁆𑀕𑀓𑀭𑀡𑀻𑀬𑀧𑀭𑀫𑀦𑁆𑀢𑀺 𑀆𑀳 ‘‘𑀬𑀢𑁆𑀣 𑀏𑀓𑀯𑀻𑀲𑀢𑀺 𑀪𑀺𑀓𑁆𑀔𑀽 𑀦𑀺𑀲𑀻𑀤𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻’’𑀢𑀺. 𑀬𑀲𑁆𑀲𑀁 𑀲𑀻𑀫𑀸𑀬𑀁 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀓𑀫𑁆𑀫𑀸𑀭𑀳𑁂𑀦 𑀲𑀤𑁆𑀥𑀺𑀁 𑀏𑀓𑀯𑀻𑀲𑀢𑀺 𑀪𑀺𑀓𑁆𑀔𑀽 𑀧𑀭𑀺𑀫𑀡𑁆𑀟𑀮𑀸𑀓𑀸𑀭𑁂𑀦 𑀦𑀺𑀲𑀻𑀤𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀅𑀬𑀁 𑀅𑀢𑀺𑀔𑀼𑀤𑁆𑀤𑀓𑀸 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀏𑀯𑀭𑀽𑀧𑀸 𑀘 𑀲𑀻𑀫𑀸 𑀲𑀫𑁆𑀫𑀢𑀸𑀧𑀺 𑀅𑀲𑀫𑁆𑀫𑀢𑀸, 𑀕𑀸𑀫𑀔𑁂𑀢𑁆𑀢𑀲𑀤𑀺𑀲𑀸𑀯 𑀳𑁄𑀢𑀺, 𑀢𑀢𑁆𑀣 𑀓𑀢𑀁 𑀓𑀫𑁆𑀫𑀁 𑀓𑀼𑀧𑁆𑀧𑀢𑀺. 𑀏𑀲 𑀦𑀬𑁄 𑀲𑁂𑀲𑀲𑀻𑀫𑀸𑀲𑀼𑀧𑀺.

𑀲𑀫𑁆𑀫𑀢𑀸𑀢𑀺 𑀩𑀤𑁆𑀥𑀸, 𑀯𑀸𑀘𑀺𑀢𑀓𑀫𑁆𑀫𑀯𑀸𑀘𑀸𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀯𑀸𑀘𑀸𑀬 𑀯𑀸𑀘𑀦𑀫𑁂𑀯 𑀳𑀺 𑀩𑀦𑁆𑀥𑀦𑀁 𑀦𑀸𑀫. 𑀦𑀺𑀫𑀺𑀢𑁆𑀢𑀁 𑀦 𑀉𑀧𑀕𑀘𑁆𑀙𑀢𑀻𑀢𑀺 𑀅𑀦𑀺𑀫𑀺𑀢𑁆𑀢𑀼𑀧𑀕𑁄, 𑀢𑀁 𑀅𑀦𑀺𑀫𑀺𑀢𑁆𑀢𑀼𑀧𑀕𑀁, 𑀅𑀦𑀺𑀫𑀺𑀢𑁆𑀢𑀸𑀭𑀳𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀘𑀲𑀸𑀭𑀭𑀼𑀓𑁆𑀔𑁄 𑀦𑀸𑀫 𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀺𑀓𑀸. 𑀧𑀁𑀲𑀼𑀧𑀼𑀜𑁆𑀚𑀯𑀸𑀮𑀼𑀓𑀸𑀧𑀼𑀜𑁆𑀚𑀸𑀦𑀦𑁆𑀢𑀺 𑀧𑀁𑀲𑀼𑀭𑀸𑀲𑀺𑀯𑀸𑀮𑀼𑀓𑀸𑀭𑀸𑀲𑀻𑀦𑀁 𑀫𑀚𑁆𑀛𑁂. 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀧𑁄𑀢𑁆𑀣𑀓𑁂𑀲𑀼 𑀧𑀦 𑀓𑀢𑁆𑀣𑀘𑀺 ‘‘𑀧𑀁𑀲𑀼𑀧𑀼𑀜𑁆𑀚𑀁 𑀯𑀸 𑀯𑀸𑀮𑀼𑀓𑀸𑀧𑀼𑀜𑁆𑀚𑀁 𑀯𑀸 𑀅𑀜𑁆𑀜𑀢𑀭’’𑀦𑁆𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀲𑁄 𑀧𑀦 𑀅𑀧𑀸𑀞𑁄. 𑀦 𑀳𑀺 𑀲𑁄 ‘‘𑀅𑀜𑁆𑀜𑀢𑀭’’𑀦𑁆𑀢𑀺 𑀇𑀫𑀺𑀦𑀸 𑀬𑀼𑀚𑁆𑀚𑀢𑀻𑀢𑀺. 𑀅𑀦𑁆𑀢𑀭𑀸𑀢𑀺 𑀦𑀺𑀫𑀺𑀢𑁆𑀢𑀼𑀧𑀕𑀦𑀺𑀫𑀺𑀢𑁆𑀢𑀸𑀦𑀫𑀦𑁆𑀢𑀭𑀸. 𑀏𑀢𑁆𑀣 𑀘 𑀬𑀸 𑀢𑀻𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀩𑀚𑁆𑀛𑀫𑀸𑀦𑀸 𑀅𑀦𑀺𑀫𑀺𑀢𑁆𑀢𑀼𑀧𑀕𑁂𑀲𑀼 𑀢𑀘𑀲𑀸𑀭𑀭𑀼𑀓𑁆𑀔𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀅𑀦𑁆𑀢𑀭𑀸 𑀏𑀓𑀁 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀲𑀫𑁆𑀫𑀢𑀸, 𑀲𑀸 𑀔𑀡𑁆𑀟𑀦𑀺𑀫𑀺𑀢𑁆𑀢𑀸 𑀦𑀸𑀫 𑀳𑁄𑀢𑀺. 𑀬𑀸 𑀧𑀦 𑀘𑀢𑀼𑀧𑀜𑁆𑀘𑀦𑀺𑀫𑀺𑀢𑁆𑀢𑀸𑀤𑀻𑀳𑀺 𑀩𑀚𑁆𑀛𑀫𑀸𑀦𑀸 𑀇𑀫𑁂𑀲𑀼 𑀢𑀘𑀲𑀸𑀭𑀭𑀼𑀓𑁆𑀔𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀅𑀦𑁆𑀢𑀭𑀸 𑀏𑀓𑀁 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀲𑀫𑁆𑀫𑀢𑀸, 𑀲𑀸 𑀔𑀡𑁆𑀟𑀦𑀺𑀫𑀺𑀢𑁆𑀢𑀸 𑀦𑀸𑀫 𑀦 𑀳𑁄𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺 𑀦𑀺𑀫𑀺𑀢𑁆𑀢𑀼𑀧𑀕𑀸𑀦𑀁 𑀦𑀺𑀫𑀺𑀢𑁆𑀢𑀸𑀦𑀁 𑀢𑀺𑀡𑁆𑀡𑀁 𑀲𑀩𑁆𑀪𑀸𑀯𑀢𑁄. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀲𑀩𑁆𑀩𑁂𑀦 𑀲𑀩𑁆𑀩𑀦𑁆𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦. 𑀦𑀺𑀫𑀺𑀢𑁆𑀢𑀸𑀦𑀁 𑀩𑀳𑀺 𑀞𑀺𑀢𑁂𑀦 𑀲𑀫𑁆𑀫𑀢𑀸𑀢𑀺 𑀢𑁂𑀲𑀁 𑀩𑀳𑀺 𑀞𑀺𑀢𑁂𑀦 𑀯𑀸𑀘𑀺𑀢𑀓𑀫𑁆𑀫𑀯𑀸𑀘𑀸. 𑀦𑀺𑀫𑀺𑀢𑁆𑀢𑀸𑀦𑀺 𑀧𑀦 𑀅𑀦𑁆𑀢𑁄 𑀘 𑀩𑀳𑀺 𑀘 𑀞𑀢𑁆𑀯𑀸 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀦𑁆𑀢𑀺.

𑀏𑀯𑀁 𑀲𑀫𑁆𑀫𑀢𑀸𑀧𑀻𑀢𑀺 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀓𑀫𑁆𑀫𑀯𑀸𑀘𑀸𑀬 𑀲𑀫𑁆𑀫𑀢𑀸𑀧𑀺. 𑀇𑀫𑀲𑁆𑀲 ‘‘𑀅𑀲𑀫𑁆𑀫𑀢𑀸𑀯 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀸, 𑀪𑀺𑀓𑁆𑀔𑀯𑁂, 𑀦𑀤𑀻 𑀅𑀲𑀻𑀫𑀸𑀢𑀺 𑀬𑀸 𑀓𑀸𑀘𑀺 𑀦𑀤𑀻𑀮𑀓𑁆𑀔𑀡𑀧𑁆𑀧𑀢𑁆𑀢𑀸 𑀦𑀤𑀻 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 ‘‘𑀏𑀢𑀁 𑀩𑀤𑁆𑀥𑀲𑀻𑀫𑀁 𑀓𑀭𑁄𑀫𑀸’’𑀢𑀺 𑀓𑀢𑀸𑀧𑀺 𑀅𑀲𑀻𑀫𑀸, 𑀩𑀤𑁆𑀥𑀲𑀻𑀫𑀸 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀧𑀦 𑀲𑀸 𑀩𑀤𑁆𑀥𑀲𑀻𑀫𑀸𑀲𑀤𑀺𑀲𑀸. 𑀲𑀩𑁆𑀩𑀢𑁆𑀣 𑀲𑀗𑁆𑀖𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. ‘‘𑀲𑀁𑀲𑀝𑁆𑀞𑀯𑀺𑀝𑀧𑀸’’𑀢𑀺 𑀇𑀫𑀺𑀦𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀆𑀲𑀦𑁆𑀦𑀢𑀁 𑀤𑀻𑀧𑁂𑀢𑀺. 𑀩𑀤𑁆𑀥𑀸 𑀳𑁄𑀢𑀻𑀢𑀺 𑀧𑀘𑁆𑀙𑀺𑀫𑀤𑀺𑀲𑀸𑀪𑀸𑀕𑁂 𑀲𑀻𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀲𑁆𑀲𑀸 𑀧𑀤𑁂𑀲𑀦𑁆𑀢𑀺 𑀢𑀲𑁆𑀲𑀸 𑀏𑀓𑀤𑁂𑀲𑀁. 𑀬𑀢𑁆𑀣 𑀞𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀓𑀫𑁆𑀫𑀁 𑀓𑀸𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺, 𑀢𑀸𑀤𑀺𑀲𑀁 𑀏𑀓𑀤𑁂𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀢𑁆𑀣 𑀧𑀦 𑀞𑀺𑀢𑁂𑀳𑀺 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀢𑀸𑀤𑀺𑀲𑀁 𑀧𑀤𑁂𑀲𑀁 𑀅𑀦𑁆𑀢𑁄 𑀓𑀭𑀺𑀢𑁆𑀯𑀸 𑀩𑀦𑁆𑀥𑀦𑁆𑀢𑀸 𑀲𑀻𑀫𑀸𑀬 𑀲𑀻𑀫𑀁 𑀲𑀫𑁆𑀪𑀺𑀦𑁆𑀤𑀦𑁆𑀢𑀺 𑀦𑀸𑀫, 𑀦 𑀢𑀼 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀺 𑀦𑀸𑀫𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀕𑀡𑁆𑀞𑀺𑀧𑀤𑁂𑀲𑀼 𑀧𑀦 ‘‘𑀲𑀫𑁆𑀪𑀺𑀦𑁆𑀤𑀦𑀁 𑀧𑀭𑁂𑀲𑀁 𑀲𑀻𑀫𑀸𑀬 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀦𑀺𑀫𑀺𑀢𑁆𑀢𑁂 𑀓𑀺𑀢𑁆𑀢𑁂𑀢𑁆𑀯𑀸 𑀮𑁂𑀔𑀸𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀩𑀦𑁆𑀥𑀦𑀁. 𑀅𑀚𑁆𑀛𑁄𑀢𑁆𑀣𑀭𑀡𑀁 𑀦𑀸𑀫 𑀧𑀭𑁂𑀲𑀁 𑀲𑀻𑀫𑀸𑀬 𑀦𑀺𑀫𑀺𑀢𑁆𑀢𑁂 𑀓𑀺𑀢𑁆𑀢𑁂𑀢𑁆𑀯𑀸 𑀢𑀁 𑀲𑀓𑀮𑀁 𑀯𑀸 𑀢𑀲𑁆𑀲𑁂𑀓𑀤𑁂𑀲𑀁 𑀯𑀸 𑀅𑀦𑁆𑀢𑁄 𑀓𑀭𑁄𑀦𑁆𑀢𑁂𑀦 𑀢𑀲𑁆𑀲𑀸 𑀩𑀳𑀺 𑀏𑀓𑀺𑀲𑁆𑀲𑀁 𑀤𑁆𑀯𑀻𑀲𑀼 𑀯𑀸 𑀤𑀺𑀲𑀸𑀲𑀼 𑀦𑀺𑀫𑀺𑀢𑁆𑀢𑁂 𑀓𑀺𑀢𑁆𑀢𑁂𑀢𑁆𑀯𑀸 𑀩𑀦𑁆𑀥𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑀧𑀩𑁆𑀩𑀢𑀸𑀤𑀻𑀦𑀁 𑀦𑀺𑀫𑀺𑀢𑁆𑀢𑀸𑀦𑀁 𑀲𑀫𑁆𑀧𑀤𑀸 𑀦𑀺𑀫𑀺𑀢𑁆𑀢𑀲𑀫𑁆𑀧𑀢𑁆𑀢𑀺. 𑀧𑀩𑁆𑀩𑀢𑁄𑀯 𑀦𑀺𑀫𑀺𑀢𑁆𑀢𑀁 𑀧𑀩𑁆𑀩𑀢𑀦𑀺𑀫𑀺𑀢𑁆𑀢𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀏𑀯𑀁 𑀯𑀼𑀢𑁆𑀢𑁂𑀲𑀽𑀢𑀺 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁧𑁩𑁮 𑀆𑀤𑀬𑁄) 𑀲𑀻𑀫𑀸𑀲𑀫𑁆𑀫𑀼𑀢𑀺𑀬𑀁 𑀯𑀼𑀢𑁆𑀢𑁂𑀲𑀼. 𑀇𑀫𑁂𑀳𑀺 𑀘 𑀧𑀦 𑀅𑀝𑁆𑀞𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑁂𑀳𑀺𑀧𑀺 𑀅𑀜𑁆𑀜𑀫𑀜𑁆𑀜𑀫𑀺𑀲𑁆𑀲𑁂𑀳𑀺𑀧𑀺 𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀦𑀸𑀳 ‘‘𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂 𑀬𑀣𑀸𑀮𑀤𑁆𑀥𑀸𑀦𑀺 𑀦𑀺𑀫𑀺𑀢𑁆𑀢𑀼𑀧𑀕𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀻’’𑀢𑀺. 𑀏𑀓𑁂𑀦, 𑀧𑀦 𑀤𑁆𑀯𑀻𑀳𑀺 𑀯𑀸 𑀦𑀺𑀫𑀺𑀢𑁆𑀢𑁂𑀳𑀺 𑀲𑀫𑁆𑀫𑀦𑁆𑀦𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀻𑀡𑀺 𑀧𑀦 𑀆𑀤𑀺𑀁 𑀓𑀢𑁆𑀯𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀦𑀺𑀫𑀺𑀢𑁆𑀢𑀸𑀦𑀁 𑀲𑀢𑁂𑀦𑀸𑀧𑀺 𑀯𑀝𑁆𑀝𑀢𑀺. ‘‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀯𑀺𑀦𑀬𑀥𑀭𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑀁, ‘‘𑀧𑀩𑁆𑀩𑀢𑁄, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 𑀧𑀼𑀦 𑀯𑀺𑀦𑀬𑀥𑀭𑁂𑀦𑁂𑀯 ‘‘𑀏𑀲𑁄 𑀧𑀩𑁆𑀩𑀢𑁄 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀏𑀯𑀁 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑀩𑁆𑀩𑀁. ‘‘𑀏𑀢𑀁 𑀧𑀩𑁆𑀩𑀢𑀁 𑀦𑀺𑀫𑀺𑀢𑁆𑀢𑀁 𑀓𑀭𑁄𑀫, 𑀦𑀺𑀫𑀺𑀢𑁆𑀢𑀁 𑀓𑀭𑀺𑀲𑁆𑀲𑀸𑀫, 𑀦𑀺𑀫𑀺𑀢𑁆𑀢𑀁 𑀓𑀢𑁄, 𑀦𑀺𑀫𑀺𑀢𑁆𑀢𑀁 𑀳𑁄𑀢𑀼, 𑀳𑁄𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀧𑀦 𑀓𑀺𑀢𑁆𑀢𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀧𑀸𑀲𑀸𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀦𑀸𑀳 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢’’𑀦𑁆𑀢𑀺𑀆𑀤𑀺. ‘‘𑀧𑀩𑁆𑀩𑀢𑁄, 𑀪𑀦𑁆𑀢𑁂, 𑀉𑀤𑀓𑀁, 𑀪𑀦𑁆𑀢𑁂’’𑀢𑀺 𑀏𑀯𑀁 𑀧𑀦 𑀉𑀧𑀲𑀫𑁆𑀧𑀦𑁆𑀦𑁄 𑀯𑀸 𑀆𑀘𑀺𑀓𑁆𑀔𑀢𑀼, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀯𑀸, 𑀯𑀝𑁆𑀝𑀢𑀺𑀬𑁂𑀯. 𑀆𑀤𑀺𑀲𑀤𑁆𑀤𑁂𑀦 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀅𑀦𑀼𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢𑀁? 𑀧𑀸𑀲𑀸𑀡𑁄, 𑀪𑀦𑁆𑀢𑁂, 𑀏𑀲𑁄 𑀧𑀸𑀲𑀸𑀡𑁄 𑀦𑀺𑀫𑀺𑀢𑁆𑀢𑀁. 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬, 𑀤𑀓𑁆𑀔𑀺𑀡𑀸𑀬 𑀅𑀦𑀼𑀤𑀺𑀲𑀸𑀬, 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬, 𑀧𑀘𑁆𑀙𑀺𑀫𑀸𑀬 𑀅𑀦𑀼𑀤𑀺𑀲𑀸𑀬, 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬, 𑀉𑀢𑁆𑀢𑀭𑀸𑀬 𑀅𑀦𑀼𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢𑀁? 𑀉𑀤𑀓𑀁, 𑀪𑀦𑁆𑀢𑁂, 𑀏𑀢𑀁 𑀉𑀤𑀓𑀁 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀇𑀤𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀢𑁆𑀣 𑀧𑀦 𑀅𑀝𑁆𑀞𑀢𑁆𑀯𑀸 𑀧𑀼𑀦 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢𑀁? 𑀧𑀩𑁆𑀩𑀢𑁄, 𑀪𑀦𑁆𑀢𑁂, 𑀏𑀲𑁄 𑀧𑀩𑁆𑀩𑀢𑁄 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀏𑀯𑀁 𑀧𑀞𑀫𑀁 𑀓𑀺𑀢𑁆𑀢𑀺𑀢𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑁆𑀯𑀸𑀯 𑀞𑀧𑁂𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀦𑀺𑀫𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀁 𑀖𑀝𑀺𑀢𑀁 𑀳𑁄𑀢𑀺. 𑀲𑀫𑁆𑀫𑀸 𑀓𑀺𑀢𑁆𑀢𑁂𑀢𑁆𑀯𑀸𑀢𑀺 𑀅𑀜𑁆𑀜𑀫𑀜𑁆𑀜𑀦𑀸𑀫𑀯𑀺𑀧𑀭𑀺𑀬𑀸𑀬𑁂𑀦, 𑀅𑀦𑀺𑀫𑀺𑀢𑁆𑀢𑀸𑀦𑀁 𑀦𑀸𑀫𑁂𑀦 𑀘 𑀅𑀓𑀺𑀢𑁆𑀢𑁂𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀦𑀬𑁂𑀦 𑀓𑀺𑀢𑁆𑀢𑁂𑀢𑁆𑀯𑀸. 𑀲𑀫𑁆𑀫𑀢𑀸𑀢𑀺 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁧𑁩𑁯 𑀆𑀤𑀬𑁄) 𑀯𑀼𑀢𑁆𑀢𑀸𑀬 𑀧𑀭𑀺𑀲𑀼𑀤𑁆𑀥𑀸𑀬 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀩𑀤𑁆𑀥𑀸. 𑀢𑀢𑁆𑀣 𑀦𑀺𑀫𑀺𑀢𑁆𑀢𑀸𑀦𑀺 𑀲𑀓𑀺𑀁 𑀓𑀺𑀢𑁆𑀢𑀺𑀢𑀸𑀦𑀺𑀧𑀺 𑀓𑀺𑀢𑁆𑀢𑀺𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀧𑀦 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀫𑀫𑀡𑁆𑀟𑀮𑀁 𑀲𑀫𑁆𑀩𑀦𑁆𑀥𑀦𑁆𑀢𑁂𑀦 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁩𑁮) 𑀯𑀼𑀢𑁆𑀢𑀁.

𑀢𑀢𑁆𑀭𑀸𑀢𑀺 𑀢𑁂𑀲𑀼 𑀅𑀝𑁆𑀞𑀲𑀼 𑀦𑀺𑀫𑀺𑀢𑁆𑀢𑁂𑀲𑀼. 𑀦𑀺𑀫𑀺𑀢𑁆𑀢𑀼𑀧𑀕𑀢𑀸𑀢𑀺 𑀦𑀺𑀫𑀺𑀢𑁆𑀢𑀬𑁄𑀕𑁆𑀬𑀢𑀸. ‘‘𑀳𑀢𑁆𑀣𑀺𑀧𑁆𑀧𑀫𑀸𑀡𑀢𑁄 𑀧𑀝𑁆𑀞𑀸𑀬𑀸’’𑀢𑀺 𑀯𑀘𑀦𑀢𑁄 𑀳𑀢𑁆𑀣𑀺𑀧𑁆𑀧𑀫𑀸𑀡𑁄𑀧𑀺 𑀦𑀺𑀫𑀺𑀢𑁆𑀢𑀼𑀧𑀕𑁄𑀬𑁂𑀯. 𑀳𑀢𑁆𑀣𑀻 𑀧𑀦 𑀲𑀢𑁆𑀢𑀭𑀢𑀦𑁄 𑀯𑀸 𑀅𑀟𑁆𑀠𑀝𑁆𑀞𑀭𑀢𑀦𑁄 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁩𑁮) 𑀯𑀸. 𑀢𑀢𑁄 𑀑𑀫𑀓𑀢𑀭𑁄𑀢𑀺 𑀢𑀢𑁄 𑀳𑀢𑁆𑀣𑀺𑀧𑁆𑀧𑀫𑀸𑀡𑀢𑁄 𑀔𑀼𑀤𑁆𑀤𑀓𑀢𑀭𑁄. 𑀲𑀘𑁂 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀘𑀢𑁆𑀢𑀸𑀭𑁄 𑀯𑀸 𑀢𑀻𑀲𑀼 𑀯𑀸 𑀢𑀬𑁄 𑀧𑀩𑁆𑀩𑀢𑀸 𑀳𑁄𑀦𑁆𑀢𑀺, 𑀘𑀢𑀽𑀳𑀺, 𑀢𑀻𑀳𑀺 𑀯𑀸 𑀧𑀩𑁆𑀩𑀢𑀦𑀺𑀫𑀺𑀢𑁆𑀢𑁂𑀳𑁂𑀯 𑀲𑀫𑁆𑀫𑀦𑁆𑀦𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺, 𑀤𑁆𑀯𑀻𑀳𑀺 𑀧𑀦 𑀦𑀺𑀫𑀺𑀢𑁆𑀢𑁂𑀳𑀺, 𑀏𑀓𑁂𑀦 𑀯𑀸 𑀲𑀫𑁆𑀫𑀦𑁆𑀦𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀇𑀢𑁄 𑀧𑀭𑁂𑀲𑀼 𑀧𑀸𑀲𑀸𑀡𑀦𑀺𑀫𑀺𑀢𑁆𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀧𑀩𑁆𑀩𑀢𑀦𑀺𑀫𑀺𑀢𑁆𑀢𑀁 𑀓𑀭𑁄𑀦𑁆𑀢𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑀁 ‘‘𑀏𑀓𑀸𑀩𑀤𑁆𑀥𑁄, 𑀦 𑀏𑀓𑀸𑀩𑀤𑁆𑀥𑁄’’𑀢𑀺. 𑀲𑀘𑁂 𑀏𑀓𑀸𑀩𑀤𑁆𑀥𑁄 𑀳𑁄𑀢𑀺, 𑀦 𑀓𑀸𑀢𑀩𑁆𑀩𑁄. 𑀢𑀜𑁆𑀳𑀺 𑀘𑀢𑀽𑀲𑀼 𑀯𑀸 𑀅𑀝𑁆𑀞𑀲𑀼 𑀯𑀸 𑀤𑀺𑀲𑀸𑀲𑀼 𑀓𑀺𑀢𑁆𑀢𑁂𑀦𑁆𑀢𑁂𑀦𑀸𑀧𑀺 𑀏𑀓𑀫𑁂𑀯 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑀺𑀢𑀁 𑀳𑁄𑀢𑀺. 𑀢𑀲𑁆𑀫𑀸 𑀬𑁄 𑀏𑀯𑀁 𑀘𑀓𑁆𑀓𑀲𑀡𑁆𑀞𑀸𑀦𑁂𑀦 𑀯𑀺𑀳𑀸𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑁄 𑀧𑀩𑁆𑀩𑀢𑁄, 𑀢𑀁 𑀏𑀓𑀤𑀺𑀲𑀸𑀬 𑀓𑀺𑀢𑁆𑀢𑁂𑀢𑁆𑀯𑀸 𑀅𑀜𑁆𑀜𑀸𑀲𑀼 𑀤𑀺𑀲𑀸𑀲𑀼 𑀢𑀁 𑀩𑀳𑀺𑀤𑁆𑀥𑀸 𑀓𑀢𑁆𑀯𑀸 𑀅𑀦𑁆𑀢𑁄 𑀅𑀜𑁆𑀜𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑀩𑁆𑀩𑀸𑀦𑀺. 𑀲𑀘𑁂 𑀧𑀩𑁆𑀩𑀢𑀲𑁆𑀲 𑀢𑀢𑀺𑀬𑀪𑀸𑀕𑀁 𑀯𑀸 𑀉𑀧𑀟𑁆𑀠𑀁 𑀯𑀸 𑀅𑀦𑁆𑀢𑁄𑀲𑀻𑀫𑀸𑀬 𑀓𑀢𑁆𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀧𑀩𑁆𑀩𑀢𑀁 𑀅𑀓𑀺𑀢𑁆𑀢𑁂𑀢𑁆𑀯𑀸 𑀬𑀢𑁆𑀢𑀓𑀁 𑀧𑀤𑁂𑀲𑀁 𑀅𑀦𑁆𑀢𑁄 𑀓𑀢𑁆𑀢𑀼𑀓𑀸𑀫𑀸, 𑀢𑀲𑁆𑀲 𑀧𑀭𑀢𑁄 𑀢𑀲𑁆𑀫𑀺𑀁𑀬𑁂𑀯 𑀧𑀩𑁆𑀩𑀢𑁂 𑀚𑀸𑀢𑀭𑀼𑀓𑁆𑀔𑀯𑀫𑁆𑀫𑀺𑀓𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑀩𑁆𑀩𑀁. 𑀲𑀘𑁂 𑀬𑁄𑀚𑀦𑀤𑁆𑀯𑀺𑀬𑁄𑀚𑀦𑀧𑁆𑀧𑀫𑀸𑀡𑀁 𑀲𑀩𑁆𑀩𑀁 𑀧𑀩𑁆𑀩𑀢𑀁 𑀅𑀦𑁆𑀢𑁄 𑀓𑀢𑁆𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀧𑀩𑁆𑀩𑀢𑀲𑁆𑀲 𑀧𑀭𑀢𑁄 𑀪𑀽𑀫𑀺𑀬𑀁 𑀚𑀸𑀢𑀭𑀼𑀓𑁆𑀔𑀯𑀫𑁆𑀫𑀺𑀓𑀸𑀤𑀻𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑀩𑁆𑀩𑀸𑀦𑀺 (𑀫𑀳𑀸𑀯. 𑀅𑀝𑁆𑀞. 𑁧𑁩𑁮; 𑀯𑀺. 𑀲𑀗𑁆𑀕. 𑀅𑀝𑁆𑀞. 𑁧𑁫𑁮).

𑀲𑀗𑁆𑀔𑀁 𑀕𑀘𑁆𑀙𑀢𑀻𑀢𑀺 𑀕𑀡𑀦𑀁 𑀯𑁄𑀳𑀸𑀭𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀤𑁆𑀯𑀢𑁆𑀢𑀺𑀁𑀲𑀧𑀮𑀕𑀼𑀴𑀧𑀺𑀡𑁆𑀟𑀧𑀭𑀺𑀫𑀸𑀡𑁄𑀢𑀺 𑀣𑀽𑀮𑀢𑀸𑀬, 𑀦 𑀢𑀼𑀮𑀕𑀡𑀦𑀸𑀬. 𑀢𑀢𑁆𑀣 ‘‘𑀏𑀓𑀧𑀮𑀁 𑀦𑀸𑀫 𑀤𑀲𑀓𑀮𑀜𑁆𑀚’’𑀦𑁆𑀢𑀺 𑀯𑀤𑀦𑁆𑀢𑀺. 𑀇𑀝𑁆𑀞𑀓𑀸 𑀫𑀳𑀦𑁆𑀢𑀸𑀧𑀺 𑀦 𑀯𑀝𑁆𑀝𑀢𑀺. 𑀢𑀣𑀸 𑀅𑀦𑀺𑀫𑀺𑀢𑁆𑀢𑀼𑀧𑀕𑀧𑀸𑀲𑀸𑀡𑀸𑀦𑀁 𑀭𑀸𑀲𑀺, 𑀧𑀕𑁂𑀯 𑀧𑀁𑀲𑀼𑀯𑀸𑀮𑀼𑀓𑀸𑀭𑀸𑀲𑀺. 𑀪𑀽𑀫𑀺𑀲𑀫𑁄 𑀔𑀮𑀫𑀡𑁆𑀟𑀮𑀲𑀤𑀺𑀲𑁄 𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀯𑀸 𑀪𑀽𑀫𑀺𑀢𑁄 𑀔𑀸𑀡𑀼𑀓𑁄 𑀯𑀺𑀬 𑀉𑀝𑁆𑀞𑀺𑀢𑀧𑀸𑀲𑀸𑀡𑁄 𑀯𑀸 𑀳𑁄𑀢𑀺, 𑀲𑁄𑀧𑀺 𑀧𑀫𑀸𑀡𑀽𑀧𑀕𑁄 𑀘𑁂, 𑀯𑀝𑁆𑀝𑀢𑀺. ‘‘𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀧𑀦 𑀅𑀢𑀺𑀫𑀳𑀦𑁆𑀢𑁄𑀧𑀺 𑀧𑀸𑀲𑀸𑀡𑀲𑀗𑁆𑀔𑀫𑁂𑀯 𑀕𑀘𑁆𑀙𑀢𑀻𑀢𑀺 𑀆𑀳 ‘‘𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀧𑀦𑀸’’𑀢𑀺𑀆𑀤𑀺. 𑀢𑀲𑁆𑀫𑀸 𑀲𑀘𑁂 𑀫𑀳𑀢𑁄 𑀧𑀺𑀝𑁆𑀞𑀺𑀧𑀸𑀲𑀸𑀡𑀲𑁆𑀲 𑀏𑀓𑀁 𑀧𑀤𑁂𑀲𑀁 𑀅𑀦𑁆𑀢𑁄𑀲𑀻𑀫𑀸𑀬𑀁 𑀓𑀢𑁆𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀢𑀁 𑀅𑀓𑀺𑀢𑁆𑀢𑁂𑀢𑁆𑀯𑀸 𑀢𑀲𑁆𑀲𑀼𑀧𑀭𑀺 𑀅𑀜𑁆𑀜𑁄 𑀧𑀸𑀲𑀸𑀡𑁄 𑀓𑀺𑀢𑁆𑀢𑁂𑀢𑀩𑁆𑀩𑁄. 𑀲𑀘𑁂 𑀧𑀺𑀝𑁆𑀞𑀺𑀧𑀸𑀲𑀸𑀡𑀼𑀧𑀭𑀺 𑀯𑀺𑀳𑀸𑀭𑀁 𑀓𑀭𑁄𑀦𑁆𑀢𑀺, 𑀯𑀺𑀳𑀸𑀭𑀫𑀚𑁆𑀛𑁂𑀦 𑀘 𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀏𑀯𑀭𑀽𑀧𑁄 𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀦 𑀯𑀝𑁆𑀝𑀢𑀺. 𑀲𑀘𑁂 𑀳𑀺 𑀢𑀁 𑀓𑀺𑀢𑁆𑀢𑁂𑀦𑁆𑀢𑀺, 𑀦𑀺𑀫𑀺𑀢𑁆𑀢𑀲𑁆𑀲𑀼𑀧𑀭𑀺 𑀯𑀺𑀳𑀸𑀭𑁄 𑀳𑁄𑀢𑀺, 𑀦𑀺𑀫𑀺𑀢𑁆𑀢𑀜𑁆𑀘 𑀦𑀸𑀫 𑀩𑀳𑀺𑀲𑀻𑀫𑀸𑀬𑀁 𑀳𑁄𑀢𑀺, 𑀯𑀺𑀳𑀸𑀭𑁄𑀧𑀺 𑀩𑀳𑀺𑀲𑀻𑀫𑀸𑀬𑀁 𑀆𑀧𑀚𑁆𑀚𑀢𑀺. 𑀯𑀺𑀳𑀸𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀧𑀦 𑀏𑀓𑀢𑁆𑀣 𑀓𑀺𑀢𑁆𑀢𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀦 𑀓𑀺𑀢𑁆𑀢𑁂𑀢𑀩𑁆𑀩𑁄.

𑀯𑀦𑀦𑀺𑀫𑀺𑀢𑁆𑀢𑁂 𑀢𑀺𑀡𑀯𑀦𑀁 𑀯𑀸 𑀢𑀘𑀲𑀸𑀭𑀭𑀼𑀓𑁆𑀔𑀯𑀦𑀁 𑀯𑀸 𑀦 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀅𑀦𑁆𑀢𑁄𑀲𑀸𑀭𑁂𑀳𑀻’’𑀢𑀺𑀆𑀤𑀺. 𑀅𑀦𑁆𑀢𑁄𑀲𑀸𑀭𑀸 𑀦𑀸𑀫 𑀅𑀫𑁆𑀩𑀚𑀫𑁆𑀩𑀼𑀧𑀦𑀲𑀸𑀤𑀬𑁄. 𑀅𑀦𑁆𑀢𑁄𑀲𑀸𑀭𑀫𑀺𑀲𑁆𑀲𑀓𑁂𑀳𑀻𑀢𑀺 𑀅𑀦𑁆𑀢𑁄 𑀲𑀸𑀭𑁄 𑀬𑁂𑀲𑀁 𑀢𑁂 𑀅𑀦𑁆𑀢𑁄𑀲𑀸𑀭𑀸, 𑀢𑁂𑀳𑀺 𑀫𑀺𑀲𑁆𑀲𑀓𑀸 𑀅𑀦𑁆𑀢𑁄𑀲𑀸𑀭𑀫𑀺𑀲𑁆𑀲𑀓𑀸, 𑀢𑁂𑀳𑀺. 𑀘𑀢𑀼𑀧𑀜𑁆𑀘𑀭𑀼𑀓𑁆𑀔𑀫𑀢𑁆𑀢𑀫𑁆𑀧𑀻𑀢𑀺 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑀦𑀸𑀳. 𑀉𑀓𑁆𑀓𑀁𑀲𑀢𑁄 𑀧𑀦 𑀬𑁄𑀚𑀦𑀲𑀢𑀺𑀓𑀫𑁆𑀧𑀺 𑀯𑀦𑀁 𑀯𑀝𑁆𑀝𑀢𑀺. 𑀏𑀢𑁆𑀣 𑀧𑀦 𑀘𑀢𑀼𑀭𑀼𑀓𑁆𑀔𑀫𑀢𑁆𑀢𑀜𑁆𑀘𑁂, 𑀢𑀬𑁄 𑀲𑀸𑀭𑀢𑁄, 𑀏𑀓𑁄 𑀅𑀲𑀸𑀭𑀢𑁄. 𑀧𑀜𑁆𑀘𑀭𑀼𑀓𑁆𑀔𑀫𑀢𑁆𑀢𑀜𑁆𑀘𑁂, 𑀢𑀬𑁄 𑀲𑀸𑀭𑀢𑁄, 𑀤𑁆𑀯𑁂 𑀅𑀲𑀸𑀭𑀢𑁄𑀢𑀺 𑀕𑀳𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀯𑀦𑀫𑀚𑁆𑀛𑁂 𑀯𑀺𑀳𑀸𑀭𑀁 𑀓𑀭𑁄𑀦𑁆𑀢𑀺, 𑀢𑀁 𑀯𑀦𑀁 𑀦 𑀓𑀺𑀢𑁆𑀢𑁂𑀢𑀩𑁆𑀩𑀁. 𑀏𑀓𑀤𑁂𑀲𑀁 𑀅𑀦𑁆𑀢𑁄𑀲𑀻𑀫𑀸𑀬𑀁 𑀓𑀢𑁆𑀢𑀼𑀓𑀸𑀫𑁂𑀳𑀺𑀧𑀺 𑀯𑀦𑀁 𑀅𑀓𑀺𑀢𑁆𑀢𑁂𑀢𑁆𑀯𑀸 𑀢𑀢𑁆𑀣 𑀭𑀼𑀓𑁆𑀔𑀧𑀸𑀲𑀸𑀡𑀸𑀤𑀬𑁄 𑀓𑀺𑀢𑁆𑀢𑁂𑀢𑀩𑁆𑀩𑀸, 𑀯𑀺𑀳𑀸𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀯𑀦𑀁 𑀏𑀓𑀢𑁆𑀣 𑀓𑀺𑀢𑁆𑀢𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀦 𑀓𑀺𑀢𑁆𑀢𑁂𑀢𑀩𑁆𑀩𑀁 (𑀫𑀳𑀸𑀯. 𑀅𑀝𑁆𑀞. 𑁧𑁩𑁮).

𑀭𑀼𑀓𑁆𑀔𑀦𑀺𑀫𑀺𑀢𑁆𑀢𑁂𑀧𑀺 𑀢𑀘𑀲𑀸𑀭𑀭𑀼𑀓𑁆𑀔𑁄 𑀦 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀅𑀦𑁆𑀢𑁄𑀲𑀸𑀭𑁄’’𑀢𑀺. ‘‘𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀺𑀢𑁄’’𑀢𑀺 𑀇𑀫𑀺𑀦𑀸 𑀓𑀼𑀝𑀲𑀭𑀸𑀯𑀸𑀤𑀻𑀲𑀼 𑀞𑀺𑀢𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀢𑀢𑁄 𑀅𑀧𑀦𑁂𑀢𑁆𑀯𑀸 𑀧𑀦 𑀢𑀗𑁆𑀔𑀡𑀫𑁆𑀧𑀺 𑀪𑀽𑀫𑀺𑀬𑀁 𑀭𑁄𑀧𑁂𑀢𑁆𑀯𑀸 𑀓𑁄𑀝𑁆𑀞𑀓𑀁 𑀓𑀢𑁆𑀯𑀸 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑁆𑀯𑀸 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀺, 𑀦𑀯𑀫𑀽𑀮𑀲𑀸𑀔𑀸𑀦𑀺𑀕𑁆𑀕𑀫𑀦𑀁 𑀅𑀓𑀸𑀭𑀡𑀁. 𑀔𑀦𑁆𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀭𑁄𑀧𑀺𑀢𑁂 𑀧𑀦 𑀏𑀢𑀁 𑀬𑀼𑀚𑁆𑀚𑀢𑀺. 𑀲𑀽𑀘𑀺𑀤𑀡𑁆𑀟𑀓𑀧𑁆𑀧𑀫𑀸𑀡𑁄𑀢𑀺 ‘‘𑀲𑀻𑀳𑀴𑀤𑀻𑀧𑁂 𑀮𑁂𑀔𑀦𑀤𑀡𑁆𑀟𑀧𑁆𑀧𑀫𑀸𑀡𑁄’’𑀢𑀺 𑀯𑀤𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁩𑁮), 𑀲𑁄 𑀘 𑀓𑀦𑀺𑀝𑁆𑀞𑀗𑁆𑀕𑀼𑀮𑀺𑀧𑀭𑀺𑀫𑀸𑀡𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀇𑀤𑀁 𑀧𑀦 𑀭𑀼𑀓𑁆𑀔𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀦𑁆𑀢𑁂𑀦 ‘‘𑀭𑀼𑀓𑁆𑀔𑁄’’𑀢𑀺𑀧𑀺, ‘‘𑀲𑀸𑀓𑀭𑀼𑀓𑁆𑀔𑁄, 𑀲𑀸𑀮𑀭𑀼𑀓𑁆𑀔𑁄’’𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀏𑀓𑀸𑀩𑀤𑁆𑀥𑀁 𑀧𑀦 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀦𑀺𑀕𑁆𑀭𑁄𑀥𑀲𑀤𑀺𑀲𑀁 𑀭𑀼𑀓𑁆𑀔𑀁 𑀏𑀓𑀢𑁆𑀣 𑀓𑀺𑀢𑁆𑀢𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀓𑀺𑀢𑁆𑀢𑁂𑀢𑀼𑀁 𑀦 𑀯𑀝𑁆𑀝𑀢𑀺.

𑀫𑀕𑁆𑀕𑀦𑀺𑀫𑀺𑀢𑁆𑀢𑁂 𑀅𑀭𑀜𑁆𑀜𑀔𑁂𑀢𑁆𑀢𑀦𑀤𑀻𑀢𑀴𑀸𑀓𑀫𑀕𑁆𑀕𑀸𑀤𑀬𑁄 𑀦 𑀯𑀝𑁆𑀝𑀦𑁆𑀢𑀻𑀢𑀺 𑀆𑀳 ‘‘𑀚𑀗𑁆𑀖𑀫𑀕𑁆𑀕𑁄 𑀯𑀸 𑀳𑁄𑀢𑀽’’𑀢𑀺𑀆𑀤𑀺. 𑀬𑁄 𑀧𑀦 𑀚𑀗𑁆𑀖𑀫𑀕𑁆𑀕𑁄 𑀲𑀓𑀝𑀫𑀕𑁆𑀕𑀢𑁄 𑀑𑀓𑁆𑀓𑀫𑀺𑀢𑁆𑀯𑀸 𑀧𑀼𑀦 𑀲𑀓𑀝𑀫𑀕𑁆𑀕𑀫𑁂𑀯 𑀑𑀢𑀭𑀢𑀺, 𑀬𑁂 𑀯𑀸 𑀚𑀗𑁆𑀖𑀫𑀕𑁆𑀕𑀲𑀓𑀝𑀫𑀕𑁆𑀕𑀸 𑀅𑀯𑀮𑀜𑁆𑀚𑀺𑀢𑀸, 𑀢𑁂 𑀦 𑀯𑀝𑁆𑀝𑀦𑁆𑀢𑀺. 𑀢𑁂𑀦𑀸𑀳 ‘‘𑀚𑀗𑁆𑀖𑀲𑀢𑁆𑀣𑀲𑀓𑀝𑀲𑀢𑁆𑀣𑁂𑀳𑀻’’𑀢𑀺𑀆𑀤𑀺. 𑀏𑀢𑁆𑀣 𑀘 𑀲𑀘𑁂 𑀲𑀓𑀝𑀫𑀕𑁆𑀕𑀲𑁆𑀲 𑀅𑀦𑁆𑀢𑀺𑀫𑀘𑀓𑁆𑀓𑀫𑀕𑁆𑀕𑀁 𑀦𑀺𑀫𑀺𑀢𑁆𑀢𑀁 𑀓𑀭𑁄𑀦𑁆𑀢𑀺, 𑀫𑀕𑁆𑀕𑁄 𑀩𑀳𑀺𑀲𑀻𑀫𑀸𑀬 𑀳𑁄𑀢𑀺. 𑀲𑀘𑁂 𑀩𑀸𑀳𑀺𑀭𑀘𑀓𑁆𑀓𑀫𑀕𑁆𑀕𑀁 𑀦𑀺𑀫𑀺𑀢𑁆𑀢𑀁 𑀓𑀭𑁄𑀦𑁆𑀢𑀺, 𑀩𑀸𑀳𑀺𑀭𑀘𑀓𑁆𑀓𑀫𑀕𑁆𑀕𑁄𑀯 𑀩𑀳𑀺𑀲𑀻𑀫𑀸𑀬 𑀳𑁄𑀢𑀺, 𑀲𑁂𑀲𑀁 𑀅𑀦𑁆𑀢𑁄𑀲𑀻𑀫𑀁 𑀪𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀘𑁂𑀧𑀺 𑀤𑁆𑀯𑁂 𑀫𑀕𑁆𑀕𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀘𑁆𑀙𑀸 𑀲𑀓𑀝𑀥𑀼𑀭𑀫𑀺𑀯 𑀏𑀓𑀻𑀪𑀯𑀦𑁆𑀢𑀺, 𑀤𑁆𑀯𑀺𑀥𑀸 𑀪𑀺𑀦𑁆𑀦𑀝𑁆𑀞𑀸𑀦𑁂 𑀯𑀸 𑀲𑀫𑁆𑀩𑀦𑁆𑀥𑀝𑁆𑀞𑀸𑀦𑁂 𑀯𑀸 𑀲𑀓𑀺𑀁 𑀓𑀺𑀢𑁆𑀢𑁂𑀢𑁆𑀯𑀸 𑀧𑀼𑀦 𑀦 𑀓𑀺𑀢𑁆𑀢𑁂𑀢𑀩𑁆𑀩𑀸. 𑀏𑀓𑀸𑀩𑀤𑁆𑀥𑀦𑀺𑀫𑀺𑀢𑁆𑀢𑀜𑁆𑀳𑁂𑀢𑀁 𑀳𑁄𑀢𑀺.

𑀲𑀘𑁂 𑀯𑀺𑀳𑀸𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀕𑀘𑁆𑀙𑀦𑁆𑀢𑀺, 𑀫𑀚𑁆𑀛𑁂 𑀏𑀓𑀁 𑀓𑀺𑀢𑁆𑀢𑁂𑀢𑁆𑀯𑀸 𑀅𑀧𑀭𑀁 𑀓𑀺𑀢𑁆𑀢𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀏𑀓𑀸𑀩𑀤𑁆𑀥𑀦𑀺𑀫𑀺𑀢𑁆𑀢𑀜𑁆𑀳𑁂𑀢𑀁. 𑀓𑁄𑀡𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀕𑀢𑀁 𑀧𑀦 𑀧𑀭𑀪𑀸𑀕𑁂 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀺. 𑀯𑀺𑀳𑀸𑀭𑀫𑀚𑁆𑀛𑁂𑀦 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀕𑀢𑀫𑀕𑁆𑀕𑁄 𑀧𑀦 𑀦 𑀓𑀺𑀢𑁆𑀢𑁂𑀢𑀩𑁆𑀩𑁄. 𑀓𑀺𑀢𑁆𑀢𑀺𑀢𑁂 𑀧𑀦 𑀦𑀺𑀫𑀺𑀢𑁆𑀢𑀲𑁆𑀲 𑀉𑀧𑀭𑀺 𑀯𑀺𑀳𑀸𑀭𑁄 𑀳𑁄𑀢𑀺. 𑀇𑀫𑀜𑁆𑀘 𑀫𑀕𑁆𑀕𑀁 𑀓𑀺𑀢𑁆𑀢𑁂𑀦𑁆𑀢𑁂𑀦 ‘‘𑀫𑀕𑁆𑀕𑁄 𑀧𑀚𑁆𑀚𑁄 𑀧𑀣𑁄’’𑀢𑀺𑀆𑀤𑀺𑀦𑀸 (𑀘𑀽𑀴𑀦𑀺. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁧𑁦𑁧) 𑀯𑀼𑀢𑁆𑀢𑁂𑀲𑀼 𑀤𑀲𑀲𑀼 𑀦𑀸𑀫𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀦𑀸𑀫𑁂𑀦 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀺. 𑀧𑀭𑀺𑀔𑀸𑀲𑀡𑁆𑀞𑀸𑀦𑁂𑀦 𑀯𑀺𑀳𑀸𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀢𑀫𑀕𑁆𑀕𑁄 𑀏𑀓𑀢𑁆𑀣 𑀓𑀺𑀢𑁆𑀢𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀓𑀺𑀢𑁆𑀢𑁂𑀢𑀼𑀁 𑀦 𑀯𑀝𑁆𑀝𑀢𑀺.

𑀬𑀁 𑀧𑀦 𑀅𑀩𑀤𑁆𑀥𑀲𑀻𑀫𑀸𑀮𑀓𑁆𑀔𑀡𑁂 𑀦𑀤𑀺𑀁 𑀯𑀓𑁆𑀔𑀸𑀫𑀸𑀢𑀺 ‘‘𑀬𑀲𑁆𑀲𑀸 𑀥𑀫𑁆𑀫𑀺𑀓𑀸𑀦𑀁 𑀭𑀸𑀚𑀽𑀦𑀁 𑀓𑀸𑀮𑁂’’𑀢𑀺𑀆𑀤𑀺𑀦𑀸 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬𑀁 𑀦𑀤𑀺𑀬𑀸 𑀯𑀓𑁆𑀔𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀬𑀸 𑀧𑀦 𑀦𑀤𑀻 𑀫𑀕𑁆𑀕𑁄 𑀯𑀺𑀬 𑀲𑀓𑀝𑀥𑀼𑀭𑀲𑀡𑁆𑀞𑀸𑀦𑁂𑀦 𑀯𑀸 𑀧𑀭𑀺𑀔𑀸𑀲𑀡𑁆𑀞𑀸𑀦𑁂𑀦 𑀯𑀸 𑀯𑀺𑀳𑀸𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀢𑀸, 𑀦𑀁 𑀏𑀓𑀢𑁆𑀣 𑀓𑀺𑀢𑁆𑀢𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀓𑀺𑀢𑁆𑀢𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀯𑀺𑀳𑀸𑀭𑀲𑁆𑀲 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀅𑀜𑁆𑀜𑀫𑀜𑁆𑀜𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀕𑀢𑁂 𑀦𑀤𑀻𑀘𑀢𑀼𑀓𑁆𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀲𑀫𑁆𑀫𑀺𑀲𑁆𑀲𑀦𑀤𑀺𑀬𑁄 𑀧𑀦 𑀘𑀢𑀲𑁆𑀲𑁄𑀧𑀺 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀯𑀢𑀺𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀭𑀼𑀓𑁆𑀔𑀧𑀸𑀤𑁂 𑀦𑀺𑀔𑀡𑀺𑀢𑁆𑀯𑀸 𑀯𑀮𑁆𑀮𑀺𑀧𑀮𑀸𑀮𑀸𑀤𑀻𑀳𑀺 𑀦𑀤𑀻𑀲𑁄𑀢𑀁 𑀭𑀼𑀫𑁆𑀪𑀦𑁆𑀢𑀺, 𑀉𑀤𑀓𑀫𑁆𑀧𑀺 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀆𑀯𑀭𑀡𑀁 𑀧𑀯𑀢𑁆𑀢𑀢𑀺𑀬𑁂𑀯, 𑀦𑀺𑀫𑀺𑀢𑁆𑀢𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀬𑀣𑀸 𑀧𑀦 𑀉𑀤𑀓𑀁 𑀦𑀧𑁆𑀧𑀯𑀢𑁆𑀢𑀢𑀺, 𑀏𑀯𑀁 𑀲𑁂𑀢𑀼𑀫𑁆𑀳𑀺 𑀓𑀢𑁂 𑀅𑀧𑁆𑀧𑀯𑀢𑁆𑀢𑀫𑀸𑀦𑀸 𑀦𑀤𑀻 𑀦𑀺𑀫𑀺𑀢𑁆𑀢𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀧𑀯𑀢𑁆𑀢𑀦𑀝𑁆𑀞𑀸𑀦𑁂 𑀦𑀤𑀻𑀦𑀺𑀫𑀺𑀢𑁆𑀢𑀁, 𑀅𑀧𑁆𑀧𑀯𑀢𑁆𑀢𑀦𑀝𑁆𑀞𑀸𑀦𑁂 𑀉𑀤𑀓𑀦𑀺𑀫𑀺𑀢𑁆𑀢𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑀬𑀸 𑀧𑀦 𑀤𑀼𑀩𑁆𑀩𑀼𑀝𑁆𑀞𑀺𑀓𑀸𑀮𑁂 𑀯𑀸 𑀕𑀺𑀫𑁆𑀳𑁂 𑀯𑀸 𑀦𑀺𑀭𑀼𑀤𑀓𑀪𑀸𑀯𑁂𑀦 𑀦𑀧𑁆𑀧𑀯𑀢𑁆𑀢𑀢𑀺, 𑀲𑀸 𑀯𑀝𑁆𑀝𑀢𑀺. 𑀫𑀳𑀸𑀦𑀤𑀺𑀢𑁄 𑀉𑀤𑀓𑀫𑀸𑀢𑀺𑀓𑀁 𑀦𑀻𑀳𑀭𑀦𑁆𑀢𑀺, 𑀲𑀸 𑀓𑀼𑀦𑁆𑀦𑀤𑀻𑀲𑀤𑀺𑀲𑀸 𑀳𑀼𑀢𑁆𑀯𑀸 𑀢𑀻𑀡𑀺 𑀲𑀲𑁆𑀲𑀸𑀦𑀺 𑀲𑀫𑁆𑀧𑀸𑀤𑁂𑀦𑁆𑀢𑀻 𑀦𑀺𑀘𑁆𑀘𑀁 𑀧𑀯𑀢𑁆𑀢𑀢𑀺. 𑀓𑀺𑀜𑁆𑀘𑀸𑀧𑀺 𑀧𑀯𑀢𑁆𑀢𑀢𑀺, 𑀦𑀺𑀫𑀺𑀢𑁆𑀢𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑀸 𑀧𑀦 𑀫𑀽𑀮𑁂 𑀫𑀳𑀸𑀦𑀤𑀺𑀢𑁄 𑀦𑀺𑀕𑁆𑀕𑀢𑀸𑀧𑀺 𑀓𑀸𑀮𑀦𑁆𑀢𑀭𑁂𑀦 𑀢𑁂𑀦𑁂𑀯 𑀦𑀺𑀕𑁆𑀕𑀢𑀫𑀕𑁆𑀕𑁂𑀦 𑀦𑀤𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀬𑀫𑁂𑀯 𑀕𑀘𑁆𑀙𑀢𑀺, 𑀕𑀘𑁆𑀙𑀦𑁆𑀢𑀻 𑀘 𑀧𑀭𑀢𑁄 𑀲𑀼𑀲𑀼𑀫𑀸𑀭𑀸𑀤𑀺𑀲𑀫𑀸𑀓𑀺𑀡𑁆𑀡𑀸 𑀦𑀸𑀯𑀸𑀤𑀻𑀳𑀺 𑀲𑀜𑁆𑀘𑀭𑀺𑀢𑀩𑁆𑀩𑀸 𑀦𑀤𑀻 𑀳𑁄𑀢𑀺, 𑀢𑀁 𑀦𑀺𑀫𑀺𑀢𑁆𑀢𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑀅𑀲𑀦𑁆𑀤𑀫𑀸𑀦𑀦𑁆𑀢𑀺 𑀅𑀧𑁆𑀧𑀯𑀢𑁆𑀢𑀫𑀸𑀦𑀁. 𑀲𑀦𑁆𑀤𑀫𑀸𑀦𑀁 𑀦𑀸𑀫 𑀑𑀖𑀦𑀤𑀻𑀉𑀤𑀓𑀯𑀸𑀳𑀓𑀫𑀸𑀢𑀺𑀓𑀸𑀲𑀼 𑀉𑀤𑀓𑀁. 𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀓𑀸𑀮𑀁 𑀅𑀢𑀺𑀝𑁆𑀞𑀦𑁆𑀢𑀦𑁆𑀢𑀺 ‘‘𑀬𑀸𑀯 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑀸 𑀲𑀡𑁆𑀞𑀫𑀸𑀦𑀓’’𑀦𑁆𑀢𑀺 𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀓𑀸𑀮𑀁 𑀅𑀢𑀺𑀝𑁆𑀞𑀦𑁆𑀢𑀁. 𑀪𑀸𑀚𑀦𑀕𑀢𑀦𑁆𑀢𑀺 𑀦𑀸𑀯𑀸𑀘𑀸𑀝𑀺𑀆𑀤𑀻𑀲𑀼 𑀪𑀸𑀚𑀦𑁂𑀲𑀼 𑀕𑀢𑀁. 𑀬𑀁 𑀧𑀦 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 ‘‘𑀕𑀫𑁆𑀪𑀻𑀭𑁂𑀲𑀼 𑀆𑀯𑀸𑀝𑀸𑀤𑀻𑀲𑀼 𑀉𑀓𑁆𑀔𑁂𑀧𑀺𑀫𑀁 𑀉𑀤𑀓𑀁 𑀦𑀺𑀫𑀺𑀢𑁆𑀢𑀁 𑀦 𑀓𑀸𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁩𑁮; 𑀯𑀺. 𑀲𑀗𑁆𑀕. 𑀅𑀝𑁆𑀞. 𑁧𑁫𑁮) 𑀯𑀼𑀢𑁆𑀢𑀁, 𑀢𑀁 𑀤𑀼𑀯𑀼𑀢𑁆𑀢𑀁, 𑀅𑀢𑁆𑀢𑀦𑁄 𑀫𑀢𑀺𑀫𑀢𑁆𑀢𑀫𑁂𑀯. 𑀞𑀺𑀢𑀁 𑀧𑀦 𑀅𑀦𑁆𑀢𑀫𑀲𑁄 𑀲𑀽𑀓𑀭𑀔𑀢𑀸𑀬𑀧𑀺 𑀕𑀸𑀫𑀤𑀸𑀭𑀓𑀸𑀦𑀁 𑀓𑀻𑀴𑀦𑀯𑀸𑀧𑀺𑀬𑀫𑁆𑀧𑀺 𑀲𑀘𑁂 𑀬𑀸𑀯 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑀁 𑀢𑀺𑀝𑁆𑀞𑀢𑀺, 𑀅𑀧𑁆𑀧𑀁 𑀯𑀸 𑀳𑁄𑀢𑀼, 𑀩𑀳𑀼 𑀯𑀸, 𑀯𑀝𑁆𑀝𑀢𑀺𑀬𑁂𑀯. 𑀢𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀦𑀺𑀫𑀺𑀢𑁆𑀢𑀲𑀜𑁆𑀜𑀸𑀓𑀭𑀡𑀢𑁆𑀣𑀁 𑀧𑀸𑀲𑀸𑀡𑀯𑀸𑀮𑀺𑀓𑀸𑀧𑀁𑀲𑀼𑀆𑀤𑀺𑀭𑀸𑀲𑀺 𑀯𑀸 𑀧𑀸𑀲𑀸𑀡𑀢𑁆𑀣𑀫𑁆𑀪𑁄 𑀯𑀸 𑀤𑀸𑀭𑀼𑀢𑁆𑀣𑀫𑁆𑀪𑁄 𑀯𑀸 𑀓𑀸𑀢𑀩𑁆𑀩𑁄.

𑀏𑀯𑀁 𑀦𑀺𑀫𑀺𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑁂𑀳𑀺 𑀆𑀓𑀸𑀭𑁂𑀳𑀺 𑀩𑀤𑁆𑀥𑀸 𑀧𑀭𑀺𑀲𑀸𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀸 𑀦𑀸𑀫 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀭𑀺𑀲𑀸𑀲𑀫𑁆𑀧𑀢𑁆𑀢𑀺𑀬𑀸 𑀬𑀼𑀢𑁆𑀢𑀸 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀇𑀫𑀲𑁆𑀲 𑀧𑀦 𑀓𑀫𑁆𑀫𑀲𑁆𑀲 𑀘𑀢𑀼𑀯𑀕𑁆𑀕𑀓𑀭𑀡𑀻𑀬𑀢𑁆𑀢𑀸 ‘‘𑀘𑀢𑀽𑀳𑀺 𑀪𑀺𑀓𑁆𑀔𑀽𑀳𑀻’’𑀢𑀺 𑀯𑀼𑀢𑁆𑀢𑀁. 𑀇𑀫𑀜𑁆𑀘 𑀲𑀻𑀫𑀁 𑀩𑀦𑁆𑀥𑀺𑀢𑀼𑀓𑀸𑀫𑁂𑀳𑀺 𑀲𑀸𑀫𑀦𑁆𑀢𑀯𑀺𑀳𑀸𑀭𑁂𑀲𑀼 𑀪𑀺𑀓𑁆𑀔𑀽 𑀢𑀲𑁆𑀲 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀁 𑀧𑀼𑀘𑁆𑀙𑀺𑀢𑁆𑀯𑀸 𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑀸𑀦𑀁 𑀲𑀻𑀫𑀸𑀬 𑀲𑀻𑀫𑀦𑁆𑀢𑀭𑀺𑀓𑀁, 𑀅𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑀸𑀦𑀁 𑀲𑀻𑀫𑀸𑀬 𑀉𑀧𑀘𑀸𑀭𑀁 𑀞𑀧𑁂𑀢𑁆𑀯𑀸 𑀤𑀺𑀲𑀸𑀘𑀸𑀭𑀺𑀓𑀪𑀺𑀓𑁆𑀔𑀽𑀦𑀁 𑀦𑀺𑀲𑁆𑀲𑀜𑁆𑀘𑀸𑀭𑀲𑀫𑀬𑁂 𑀲𑀘𑁂 𑀏𑀓𑀲𑁆𑀫𑀺𑀁 𑀕𑀸𑀫𑀔𑁂𑀢𑁆𑀢𑁂 𑀲𑀻𑀫𑀁 𑀩𑀦𑁆𑀥𑀺𑀢𑀼𑀓𑀸𑀫𑀸, 𑀬𑁂 𑀢𑀢𑁆𑀣 𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑀸, 𑀢𑁂𑀲𑀼 𑀪𑀺𑀓𑁆𑀔𑀽𑀦𑀁 ‘‘𑀫𑀬𑀁 𑀅𑀚𑁆𑀚 𑀲𑀻𑀫𑀁 𑀩𑀦𑁆𑀥𑀺𑀲𑁆𑀲𑀸𑀫, 𑀢𑀼𑀫𑁆𑀳𑁂 𑀲𑀓𑀲𑀓𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀢𑁄 𑀫𑀸 𑀦𑀺𑀓𑁆𑀔𑀫𑀺𑀢𑁆𑀣𑀸’’𑀢𑀺 𑀧𑁂𑀲𑁂𑀢𑀩𑁆𑀩𑀁. 𑀬𑁂 𑀅𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑀸, 𑀢𑁂𑀲𑀼 𑀪𑀺𑀓𑁆𑀔𑀽 𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑀩𑁆𑀩𑀸, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀭𑀸𑀧𑁂𑀢𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀸𑀯𑀢𑀺𑀓𑀸 𑀢𑀲𑁆𑀫𑀺𑀁 𑀕𑀸𑀫𑀔𑁂𑀢𑁆𑀢𑁂’’𑀢𑀺𑀆𑀤𑀺. 𑀢𑀲𑁆𑀫𑀺𑀁 𑀕𑀸𑀫𑀔𑁂𑀢𑁆𑀢𑁂𑀢𑀺 𑀬𑀲𑁆𑀫𑀺𑀁 𑀕𑀸𑀫𑀔𑁂𑀢𑁆𑀢𑁂 𑀞𑀢𑁆𑀯𑀸 𑀓𑀫𑁆𑀫𑀯𑀸𑀘𑀁 𑀯𑀸𑀘𑁂𑀦𑁆𑀢𑀺, 𑀢𑀲𑁆𑀫𑀺𑀁 𑀕𑀸𑀫𑀔𑁂𑀢𑁆𑀢𑁂. ‘‘𑀲𑀘𑁂 𑀅𑀜𑁆𑀜𑀸𑀦𑀺𑀧𑀺 𑀕𑀸𑀫𑀔𑁂𑀢𑁆𑀢𑀸𑀦𑀺 𑀅𑀦𑁆𑀢𑁄 𑀓𑀢𑁆𑀢𑀼𑀓𑀸𑀫𑀸, 𑀢𑁂𑀲𑀼 𑀕𑀸𑀫𑁂𑀲𑀼 𑀬𑁂 𑀪𑀺𑀓𑁆𑀔𑀽 𑀯𑀲𑀦𑁆𑀢𑀺, 𑀢𑁂𑀳𑀺𑀧𑀺 𑀆𑀕𑀦𑁆𑀢𑀩𑁆𑀩𑀁, 𑀅𑀦𑀸𑀕𑀘𑁆𑀙𑀦𑁆𑀢𑀸𑀦𑀁 𑀙𑀦𑁆𑀤𑁄 𑀆𑀳𑀭𑀺𑀢𑀩𑁆𑀩𑁄’’𑀢𑀺 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀆𑀳. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦𑀸𑀳 ‘‘𑀦𑀸𑀦𑀸𑀕𑀸𑀫𑀔𑁂𑀢𑁆𑀢𑀸𑀦𑀺 𑀦𑀸𑀫 𑀧𑀸𑀝𑀺𑀬𑁂𑀓𑁆𑀓𑀁 𑀩𑀤𑁆𑀥𑀲𑀻𑀫𑀸𑀲𑀤𑀺𑀲𑀸𑀦𑀺, 𑀦 𑀢𑀢𑁄 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺 𑀆𑀕𑀘𑁆𑀙𑀢𑀺. 𑀅𑀦𑁆𑀢𑁄𑀦𑀺𑀫𑀺𑀢𑁆𑀢𑀕𑀢𑁂𑀳𑀺 𑀧𑀦 𑀪𑀺𑀓𑁆𑀔𑀽𑀳𑀺 𑀆𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 𑀆𑀳 ‘‘𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸𑀲𑀫𑁆𑀫𑀦𑁆𑀦𑀦𑀓𑀸𑀮𑁂 𑀆𑀕𑀫𑀦𑀫𑁆𑀧𑀺 𑀅𑀦𑀸𑀕𑀫𑀦𑀫𑁆𑀧𑀺 𑀯𑀝𑁆𑀝𑀢𑀺, 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀲𑀫𑁆𑀫𑀦𑁆𑀦𑀦𑀓𑀸𑀮𑁂 𑀧𑀦 𑀅𑀦𑁆𑀢𑁄𑀦𑀺𑀫𑀺𑀢𑁆𑀢𑀕𑀢𑁂𑀳𑀺 𑀆𑀕𑀦𑁆𑀢𑀩𑁆𑀩𑀁. 𑀅𑀦𑀸𑀕𑀘𑁆𑀙𑀦𑁆𑀢𑀸𑀦𑀁 𑀙𑀦𑁆𑀤𑁄 𑀆𑀳𑀭𑀺𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁩𑁮).

𑀇𑀤𑀸𑀦𑀺 𑀬𑁂𑀳𑀺 𑀆𑀓𑀸𑀭𑁂𑀳𑀺 𑀲𑀫𑁆𑀫𑀢𑀸 𑀓𑀫𑁆𑀫𑀯𑀸𑀘𑀸𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀸 𑀦𑀸𑀫 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀫𑁆𑀫𑀯𑀸𑀘𑀸𑀲𑀫𑁆𑀧𑀢𑁆𑀢𑀺𑀬𑀸 𑀬𑀼𑀢𑁆𑀢𑀸 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀆𑀤𑀺𑀲𑀤𑁆𑀤𑁂𑀦. ‘‘𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀏𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀲𑀻𑀫𑀁 𑀲𑀫𑁆𑀫𑀦𑁆𑀦𑁂𑀬𑁆𑀬 𑀲𑀫𑀸𑀦𑀲𑀁𑀯𑀸𑀲𑀁 𑀏𑀓𑀽𑀧𑁄𑀲𑀣𑀁, 𑀏𑀲𑀸 𑀜𑀢𑁆𑀢𑀺. 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀬𑀸𑀯𑀢𑀸 𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑀸 𑀓𑀺𑀢𑁆𑀢𑀺𑀢𑀸, 𑀲𑀗𑁆𑀖𑁄 𑀏𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀺 𑀲𑀫𑀸𑀦𑀲𑀁𑀯𑀸𑀲𑀁 𑀏𑀓𑀽𑀧𑁄𑀲𑀣𑀁, 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀏𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀲𑀻𑀫𑀸𑀬 𑀲𑀫𑁆𑀫𑀼𑀢𑀺 𑀲𑀫𑀸𑀦𑀲𑀁𑀯𑀸𑀲𑀸𑀬 𑀏𑀓𑀽𑀧𑁄𑀲𑀣𑀸𑀬, 𑀲𑁄 𑀢𑀼𑀡𑁆𑀳𑀲𑁆𑀲. 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬. 𑀲𑀫𑁆𑀫𑀢𑀸 𑀲𑀻𑀫𑀸 𑀲𑀗𑁆𑀖𑁂𑀦 𑀏𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸, 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 (𑀫𑀳𑀸𑀯. 𑁧𑁩𑁯) 𑀇𑀫𑀁 𑀧𑀸𑀴𑀺𑀲𑁂𑀲𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀼𑀢𑁆𑀢𑀸𑀬𑀸𑀢𑀺 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀸𑀬. 𑀜𑀢𑁆𑀢𑀺𑀤𑁄𑀲𑀅𑀦𑀼𑀲𑁆𑀲𑀸𑀯𑀦𑀤𑁄𑀲𑁂𑀳𑀺 𑀯𑀺𑀭𑀳𑀺𑀢𑀢𑁆𑀢𑀸 𑀧𑀭𑀺𑀲𑀼𑀤𑁆𑀥𑀸𑀬.

𑀔𑀡𑁆𑀟𑀲𑀻𑀫𑀸 (𑀫𑀳𑀸𑀯. 𑀅𑀝𑁆𑀞. 𑁧𑁩𑁮; 𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁩𑁮; 𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁧𑁩𑁮) 𑀦𑀸𑀫 𑀔𑀼𑀤𑁆𑀤𑀓𑀲𑀻𑀫𑀸. 𑀲𑀫𑀸𑀦𑀲𑀁𑀯𑀸𑀲𑀓𑀢𑁆𑀣𑀁 𑀲𑀫𑁆𑀫𑀢𑀸 𑀲𑀻𑀫𑀸 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸. 𑀅𑀯𑀺𑀧𑁆𑀧𑀯𑀸𑀲𑀢𑁆𑀣𑀁 𑀲𑀫𑁆𑀫𑀢𑀸 𑀲𑀻𑀫𑀸 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸. 𑀇𑀫𑀸𑀲𑀼 𑀧𑀦 𑀢𑀻𑀲𑀼 𑀲𑀻𑀫𑀁 𑀲𑀫𑁆𑀫𑀦𑁆𑀦𑀦𑁆𑀢𑁂𑀳𑀺 𑀧𑀩𑁆𑀩𑀚𑁆𑀚𑀼𑀧𑀲𑀫𑁆𑀧𑀤𑀸𑀤𑀻𑀦𑀁 𑀲𑀗𑁆𑀖𑀓𑀫𑁆𑀫𑀸𑀦𑀁 𑀲𑀼𑀔𑀓𑀭𑀡𑀢𑁆𑀣𑀁 𑀧𑀞𑀫𑀁 𑀔𑀡𑁆𑀟𑀲𑀻𑀫𑀸 𑀩𑀦𑁆𑀥𑀺𑀢𑀩𑁆𑀩𑀸. 𑀢𑀁 𑀧𑀦 𑀩𑀦𑁆𑀥𑀦𑁆𑀢𑁂𑀳𑀺 𑀯𑀢𑁆𑀢𑀁 𑀚𑀸𑀦𑀺𑀢𑀩𑁆𑀩𑀁. 𑀲𑀘𑁂 𑀳𑀺 𑀩𑁄𑀥𑀺𑀘𑁂𑀢𑀺𑀬𑀪𑀢𑁆𑀢𑀲𑀸𑀮𑀸𑀤𑀻𑀦𑀺 𑀲𑀩𑁆𑀩𑀯𑀢𑁆𑀣𑀽𑀦𑀺 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀓𑀢𑀯𑀺𑀳𑀸𑀭𑁂 𑀩𑀦𑁆𑀥𑀦𑁆𑀢𑀺, 𑀯𑀺𑀳𑀸𑀭𑀫𑀚𑁆𑀛𑁂 𑀩𑀳𑀽𑀦𑀁 𑀲𑀫𑁄𑀲𑀭𑀡𑀝𑁆𑀞𑀸𑀦𑁂 𑀅𑀩𑀦𑁆𑀥𑀺𑀢𑁆𑀯𑀸 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀯𑀺𑀯𑀺𑀢𑁆𑀢𑁄𑀓𑀸𑀲𑁂 𑀩𑀦𑁆𑀥𑀺𑀢𑀩𑁆𑀩𑀸. 𑀅𑀓𑀢𑀯𑀺𑀳𑀸𑀭𑁂 𑀩𑀦𑁆𑀥𑀦𑁆𑀢𑁂𑀳𑀺 𑀩𑁄𑀥𑀺𑀘𑁂𑀢𑀺𑀬𑀸𑀤𑀻𑀦𑀁 𑀲𑀩𑁆𑀩𑀯𑀢𑁆𑀣𑀽𑀦𑀁 𑀞𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀬𑀣𑀸 𑀧𑀢𑀺𑀝𑁆𑀞𑀺𑀢𑁂𑀲𑀼 𑀯𑀢𑁆𑀣𑀽𑀲𑀼 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀯𑀺𑀯𑀺𑀢𑁆𑀢𑁄𑀓𑀸𑀲𑁂 𑀳𑁄𑀢𑀺, 𑀏𑀯𑀁 𑀩𑀦𑁆𑀥𑀺𑀢𑀩𑁆𑀩𑀸. 𑀲𑀸 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀲𑀘𑁂 𑀏𑀓𑀯𑀻𑀲𑀢𑀺𑀪𑀺𑀓𑁆𑀔𑀽 𑀕𑀡𑁆𑀳𑀸𑀢𑀺, 𑀯𑀝𑁆𑀝𑀢𑀺. 𑀢𑀢𑁄 𑀑𑀭𑀁 𑀦 𑀯𑀝𑁆𑀝𑀢𑀺. 𑀧𑀭𑀁 𑀪𑀺𑀓𑁆𑀔𑀼𑀲𑀳𑀲𑁆𑀲𑀁 𑀕𑀡𑁆𑀳𑀦𑁆𑀢𑀻𑀧𑀺 𑀯𑀝𑁆𑀝𑀢𑀺. 𑀢𑀁 𑀩𑀦𑁆𑀥𑀦𑁆𑀢𑁂𑀳𑀺 𑀲𑀻𑀫𑀸𑀫𑀸𑀴𑀓𑀲𑁆𑀲 𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑀼𑀧𑀕𑀸 𑀧𑀸𑀲𑀸𑀡𑀸 𑀞𑀧𑁂𑀢𑀩𑁆𑀩𑀸, 𑀦 𑀔𑀡𑁆𑀟𑀲𑀻𑀫𑀸𑀬 𑀞𑀺𑀢𑁂𑀳𑀺 𑀫𑀳𑀸𑀲𑀻𑀫𑀸 𑀩𑀦𑁆𑀥𑀺𑀢𑀩𑁆𑀩𑀸, 𑀦 𑀫𑀳𑀸𑀲𑀻𑀫𑀸𑀬 𑀞𑀺𑀢𑁂𑀳𑀺 𑀔𑀡𑁆𑀟𑀲𑀻𑀫𑀸. 𑀔𑀡𑁆𑀟𑀲𑀻𑀫𑀸𑀬𑀫𑁂𑀯 𑀧𑀦 𑀞𑀢𑁆𑀯𑀸 𑀔𑀡𑁆𑀟𑀲𑀻𑀫𑀸 𑀩𑀦𑁆𑀥𑀺𑀢𑀩𑁆𑀩𑀸, 𑀫𑀳𑀸𑀲𑀻𑀫𑀸𑀬𑀫𑁂𑀯 𑀞𑀢𑁆𑀯𑀸 𑀫𑀳𑀸𑀲𑀻𑀫𑀸.

𑀢𑀢𑁆𑀭𑀸𑀬𑀁 𑀩𑀦𑁆𑀥𑀦𑀯𑀺𑀥𑀺 𑁋 𑀲𑀫𑀦𑁆𑀢𑀸 ‘‘𑀏𑀲𑁄 𑀧𑀸𑀲𑀸𑀡𑁄 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀏𑀯𑀁 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀓𑀫𑁆𑀫𑀯𑀸𑀘𑀸𑀬 𑀲𑀻𑀫𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀅𑀣 𑀢𑀲𑁆𑀲𑀸 𑀏𑀯 𑀤𑀴𑁆𑀳𑀻𑀓𑀫𑁆𑀫𑀢𑁆𑀣𑀁 𑀅𑀯𑀺𑀧𑁆𑀧𑀯𑀸𑀲𑀓𑀫𑁆𑀫𑀯𑀸𑀘𑀸 𑀓𑀸𑀢𑀩𑁆𑀩𑀸. 𑀏𑀯𑀜𑁆𑀳𑀺 ‘‘𑀲𑀻𑀫𑀁 𑀲𑀫𑀽𑀳𑀦𑀺𑀲𑁆𑀲𑀸𑀫𑀸’’𑀢𑀺 𑀆𑀕𑀢𑀸 𑀲𑀫𑀽𑀳𑀦𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀩𑀳𑀺 𑀲𑀻𑀫𑀦𑁆𑀢𑀭𑀺𑀓𑀧𑀸𑀲𑀸𑀡𑀸 𑀞𑀧𑁂𑀢𑀩𑁆𑀩𑀸, 𑀲𑀻𑀫𑀦𑁆𑀢𑀭𑀺𑀓𑀸 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀘𑀢𑀼𑀭𑀗𑁆𑀕𑀼𑀮𑀧𑁆𑀧𑀫𑀸𑀡𑀸𑀧𑀺 (𑀫𑀳𑀸𑀯. 𑀅𑀝𑁆𑀞. 𑁧𑁩𑁮; 𑀯𑀺. 𑀲𑀗𑁆𑀕. 𑀅𑀝𑁆𑀞. 𑁧𑁬𑁩) 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀯𑀺𑀳𑀸𑀭𑁄 𑀫𑀳𑀸 𑀳𑁄𑀢𑀺, 𑀤𑁆𑀯𑁂𑀧𑀺 𑀢𑀺𑀲𑁆𑀲𑁄𑀧𑀺 𑀢𑀢𑀼𑀢𑁆𑀢𑀭𑀺𑀧𑀺 𑀔𑀡𑁆𑀟𑀲𑀻𑀫𑀸𑀬𑁄 𑀩𑀦𑁆𑀥𑀺𑀢𑀩𑁆𑀩𑀸.

𑀏𑀯𑀁 𑀔𑀡𑁆𑀟𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀫𑀳𑀸𑀲𑀻𑀫𑀸𑀲𑀫𑁆𑀫𑀼𑀢𑀺𑀓𑀸𑀮𑁂 𑀔𑀡𑁆𑀟𑀲𑀻𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀳𑀸𑀲𑀻𑀫𑀸𑀬𑀁 𑀞𑀢𑁆𑀯𑀸 𑀲𑀫𑀦𑁆𑀢𑀸 𑀅𑀦𑀼𑀧𑀭𑀺𑀬𑀸𑀬𑀦𑁆𑀢𑁂𑀳𑀺 𑀲𑀻𑀫𑀦𑁆𑀢𑀭𑀺𑀓𑀧𑀸𑀲𑀸𑀡𑀸 𑀓𑀺𑀢𑁆𑀢𑁂𑀢𑀩𑁆𑀩𑀸. 𑀢𑀢𑁄 𑀅𑀯𑀲𑁂𑀲𑀦𑀺𑀫𑀺𑀢𑁆𑀢𑁂 𑀓𑀺𑀢𑁆𑀢𑁂𑀢𑁆𑀯𑀸 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀦𑁆𑀢𑁂𑀳𑀺 𑀓𑀫𑁆𑀫𑀯𑀸𑀘𑀸𑀬 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀢𑀲𑁆𑀲𑀸 𑀤𑀴𑁆𑀳𑀻𑀓𑀫𑁆𑀫𑀢𑁆𑀣𑀁 𑀅𑀯𑀺𑀧𑁆𑀧𑀯𑀸𑀲𑀓𑀫𑁆𑀫𑀯𑀸𑀘𑀸𑀧𑀺 𑀓𑀸𑀢𑀩𑁆𑀩𑀸. 𑀏𑀯𑀜𑁆𑀳𑀺 ‘‘𑀲𑀻𑀫𑀁 𑀲𑀫𑀽𑀳𑀦𑀺𑀲𑁆𑀲𑀸𑀫𑀸’’𑀢𑀺 𑀆𑀕𑀢𑀸 𑀲𑀫𑀽𑀳𑀦𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀲𑀘𑁂 𑀧𑀦 𑀔𑀡𑁆𑀟𑀲𑀻𑀫𑀸𑀬 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀢𑀢𑁄 𑀲𑀻𑀫𑀦𑁆𑀢𑀭𑀺𑀓𑀸𑀬 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀫𑀳𑀸𑀲𑀻𑀫𑀸𑀬 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀦𑁆𑀢𑀺, 𑀏𑀯𑀁 𑀢𑀻𑀲𑀼 𑀞𑀸𑀦𑁂𑀲𑀼 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀬𑀁 𑀲𑀻𑀫𑀁 𑀇𑀘𑁆𑀙𑀦𑁆𑀢𑀺, 𑀢𑀁 𑀧𑀞𑀫𑀁 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀔𑀡𑁆𑀟𑀲𑀻𑀫𑀢𑁄𑀯 𑀧𑀝𑁆𑀞𑀸𑀬 𑀩𑀦𑁆𑀥𑀺𑀢𑀩𑁆𑀩𑀸. 𑀏𑀯𑀁 𑀩𑀤𑁆𑀥𑀸𑀲𑀼 𑀧𑀦 𑀲𑀻𑀫𑀸𑀲𑀼 𑀔𑀡𑁆𑀟𑀲𑀻𑀫𑀸𑀬𑀁 𑀞𑀺𑀢𑀸 𑀪𑀺𑀓𑁆𑀔𑀽 𑀫𑀳𑀸𑀲𑀻𑀫𑀸𑀬𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀦 𑀓𑁄𑀧𑁂𑀦𑁆𑀢𑀺, 𑀫𑀳𑀸𑀲𑀻𑀫𑀸𑀬𑀁 𑀯𑀸 𑀞𑀺𑀢𑀸 𑀔𑀡𑁆𑀟𑀲𑀻𑀫𑀸𑀬𑀁 𑀓𑀭𑁄𑀦𑁆𑀢𑀸𑀦𑀁. 𑀲𑀻𑀫𑀦𑁆𑀢𑀭𑀺𑀓𑀸𑀬 𑀧𑀦 𑀞𑀺𑀢𑀸 𑀉𑀪𑀺𑀦𑁆𑀦𑀫𑁆𑀧𑀺 𑀦 𑀓𑁄𑀧𑀦𑁆𑀢𑀺. 𑀕𑀸𑀫𑀔𑁂𑀢𑁆𑀢𑁂 𑀞𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀧𑀦 𑀲𑀻𑀫𑀦𑁆𑀢𑀭𑀺𑀓𑀸𑀬 𑀞𑀺𑀢𑀸 𑀓𑁄𑀧𑁂𑀦𑁆𑀢𑀺. 𑀲𑀻𑀫𑀦𑁆𑀢𑀭𑀺𑀓𑀸 𑀳𑀺 𑀕𑀸𑀫𑀔𑁂𑀢𑁆𑀢𑀁 𑀪𑀚𑀢𑀺. 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀲𑀫𑁆𑀫𑀦𑁆𑀦𑀦𑁂 𑀓𑀢𑁂 𑀲𑀢𑀺 𑀲𑀸 𑀘 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀦𑀸𑀫 𑀳𑁄𑀢𑀺. 𑀢𑁂𑀦𑀸𑀳 ‘‘𑀢𑀲𑁆𑀲𑀸𑀬𑁂𑀯 𑀧𑀪𑁂𑀤𑁄’’𑀢𑀺. 𑀢𑀲𑁆𑀲𑀸𑀬𑁂𑀯𑀸𑀢𑀺 𑀩𑀤𑁆𑀥𑀲𑀻𑀫𑀸𑀬 𑀏𑀯.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 ‘‘𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘𑀸’’𑀢𑀺 (𑀫𑀳𑀸𑀯. 𑁧𑁪𑁪) 𑀯𑀘𑀦𑀢𑁄 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘 𑀦 𑀑𑀢𑀭𑀢𑀺, 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸 𑀧𑀦 𑀢𑀢𑁆𑀣𑀸𑀧𑀺 𑀑𑀢𑀭𑀢𑀺. 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸 𑀘𑁂𑀢𑁆𑀣 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀕𑀘𑁆𑀙𑀢𑀺, 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀧𑀦 𑀬𑀢𑁆𑀣 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸, 𑀢𑀢𑁆𑀣𑁂𑀯 𑀕𑀘𑁆𑀙𑀢𑀺. 𑀦 𑀳𑀺 𑀢𑀲𑁆𑀲𑀸 𑀯𑀺𑀲𑀼𑀁 𑀦𑀺𑀫𑀺𑀢𑁆𑀢𑀓𑀺𑀢𑁆𑀢𑀦𑀁 𑀅𑀢𑁆𑀣𑀺. 𑀢𑀢𑁆𑀣 𑀲𑀘𑁂 𑀅𑀯𑀺𑀧𑁆𑀧𑀯𑀸𑀲𑀸𑀬 𑀲𑀫𑁆𑀫𑀼𑀢𑀺𑀓𑀸𑀮𑁂 𑀕𑀸𑀫𑁄 𑀅𑀢𑁆𑀣𑀺, 𑀢𑀁 𑀲𑀸 𑀦 𑀑𑀢𑀭𑀢𑀺. 𑀲𑀘𑁂 𑀧𑀦 𑀲𑀫𑁆𑀫𑀢𑀸𑀬 𑀲𑀻𑀫𑀸𑀬 𑀧𑀘𑁆𑀙𑀸 𑀕𑀸𑀫𑁄 𑀦𑀺𑀯𑀺𑀲𑀢𑀺, 𑀲𑁄𑀧𑀺 𑀲𑀻𑀫𑀸𑀲𑀗𑁆𑀔𑀫𑁂𑀯 𑀕𑀘𑁆𑀙𑀢𑀺. 𑀬𑀣𑀸 𑀘 𑀧𑀘𑁆𑀙𑀸 𑀦𑀺𑀯𑀺𑀝𑁆𑀞𑁄, 𑀏𑀯𑀁 𑀧𑀞𑀫𑀁 𑀦𑀺𑀯𑀺𑀝𑁆𑀞𑀲𑁆𑀲 𑀧𑀘𑁆𑀙𑀸 𑀯𑀟𑁆𑀠𑀺𑀢𑀧𑁆𑀧𑀤𑁂𑀲𑁄𑀧𑀺 𑀲𑀻𑀫𑀸𑀲𑀗𑁆𑀔𑀫𑁂𑀯 𑀕𑀘𑁆𑀙𑀢𑀺. 𑀲𑀘𑁂𑀧𑀺 𑀲𑀻𑀫𑀸𑀲𑀫𑁆𑀫𑀼𑀢𑀺𑀓𑀸𑀮𑁂 𑀕𑁂𑀳𑀸𑀦𑀺 𑀓𑀢𑀸𑀦𑀺, ‘‘𑀧𑀯𑀺𑀲𑀺𑀲𑁆𑀲𑀸𑀫𑀸’’𑀢𑀺 𑀆𑀮𑀬𑁄𑀧𑀺 𑀅𑀢𑁆𑀣𑀺, 𑀫𑀦𑀼𑀲𑁆𑀲𑀸 𑀧𑀦 𑀅𑀧𑁆𑀧𑀯𑀺𑀝𑁆𑀞𑀸, 𑀧𑁄𑀭𑀸𑀡𑀕𑀸𑀫𑀁 𑀯𑀸 𑀲𑀕𑁂𑀳𑀫𑁂𑀯 𑀙𑀟𑁆𑀟𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀢𑀸, 𑀅𑀕𑀸𑀫𑁄𑀬𑁂𑀯 𑀏𑀲, 𑀲𑀻𑀫𑀸 𑀑𑀢𑀭𑀢𑀺. 𑀲𑀘𑁂 𑀧𑀦 𑀏𑀓𑀫𑁆𑀧𑀺 𑀓𑀼𑀮𑀁 𑀧𑀯𑀺𑀝𑁆𑀞𑀁 𑀯𑀸 𑀅𑀕𑀢𑀁 𑀯𑀸 𑀅𑀢𑁆𑀣𑀺, 𑀕𑀸𑀫𑁄𑀬𑁂𑀯, 𑀲𑀻𑀫𑀸 𑀦 𑀑𑀢𑀭𑀢𑀺.

𑀏𑀯𑀁 𑀩𑀤𑁆𑀥𑀲𑀻𑀫𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀩𑀤𑁆𑀥𑀲𑀻𑀫𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀩𑀤𑁆𑀥𑀲𑀻𑀫𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀕𑀸𑀫𑁄 𑀏𑀯 𑀲𑀻𑀫𑀸 𑀕𑀸𑀫𑀲𑀻𑀫𑀸. 𑀕𑀸𑀫𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀦𑀺𑀕𑀫𑀦𑀕𑀭𑀸𑀦𑀫𑁆𑀧𑀺 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀢𑁆𑀢𑀓𑁂 𑀧𑀤𑁂𑀲𑁂 𑀢𑀲𑁆𑀲 𑀕𑀸𑀫𑀲𑁆𑀲 𑀕𑀸𑀫𑀪𑁄𑀚𑀓𑀸 𑀩𑀮𑀺𑀁 𑀮𑀪𑀦𑁆𑀢𑀺, 𑀲𑁄 𑀧𑀤𑁂𑀲𑁄 𑀅𑀧𑁆𑀧𑁄 𑀯𑀸 𑀳𑁄𑀢𑀼, 𑀫𑀳𑀦𑁆𑀢𑁄 𑀯𑀸, 𑀏𑀓𑀁 𑀕𑀸𑀫𑀔𑁂𑀢𑁆𑀢𑀁 𑀦𑀸𑀫. 𑀬𑀫𑁆𑀧𑀺 𑀏𑀓𑀲𑁆𑀫𑀺𑀁𑀬𑁂𑀯 𑀕𑀸𑀫𑀔𑁂𑀢𑁆𑀢𑁂 𑀏𑀓𑀁 𑀧𑀤𑁂𑀲𑀁 ‘‘𑀅𑀬𑀁 𑀯𑀺𑀲𑀼𑀁 𑀕𑀸𑀫𑁄 𑀳𑁄𑀢𑀽’’𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀭𑀸𑀚𑀸 𑀓𑀲𑁆𑀲𑀘𑀺 𑀤𑁂𑀢𑀺, 𑀲𑁄𑀧𑀺 𑀯𑀺𑀲𑀼𑀁𑀕𑀸𑀫𑀲𑀻𑀫𑀸 𑀳𑁄𑀢𑀺𑀬𑁂𑀯. 𑀢𑀲𑁆𑀫𑀸 𑀲𑀸 𑀘 𑀇𑀢𑀭𑀸 𑀘 𑀧𑀓𑀢𑀺𑀕𑀸𑀫𑀲𑀻𑀫𑀸 𑀩𑀤𑁆𑀥𑀲𑀻𑀫𑀸𑀲𑀤𑀺𑀲𑀸𑀯 𑀳𑁄𑀢𑀺. 𑀓𑁂𑀯𑀮𑀁 𑀧𑀦 𑀢𑀺𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀧𑀭𑀺𑀳𑀸𑀭𑀁 𑀦 𑀮𑀪𑀢𑀻𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁪𑁭).

𑀅𑀕𑀸𑀫𑀓𑁂 𑀅𑀭𑀜𑁆𑀜𑁂𑀢𑀺 𑀯𑀺𑀜𑁆𑀛𑀸𑀝𑀯𑀺𑀲𑀤𑀺𑀲𑁂 𑀅𑀭𑀜𑁆𑀜𑁂. 𑀢𑁂𑀦𑀸𑀳 ‘‘𑀅𑀕𑀸𑀫𑀓𑀁 𑀦𑀸𑀫𑀸’’𑀢𑀺𑀆𑀤𑀺. 𑀅𑀬𑀁 𑀧𑀦 𑀲𑀻𑀫𑀸 𑀢𑀺𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀧𑀭𑀺𑀳𑀸𑀭𑀫𑁆𑀧𑀺 𑀮𑀪𑀢𑀺. 𑀫𑀘𑁆𑀙𑀩𑀦𑁆𑀥𑀸𑀦𑀦𑁆𑀢𑀺 𑀓𑁂𑀯𑀝𑁆𑀝𑀸𑀦𑀁. 𑀅𑀕𑀫𑀦𑀧𑀣𑁂𑀲𑀽𑀢𑀺 𑀕𑀦𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀧𑀣𑁂𑀲𑀼. 𑀬𑀢𑁆𑀣 𑀢𑀤𑀳𑁂𑀯 𑀕𑀦𑁆𑀢𑁆𑀯𑀸 𑀢𑀤𑀳𑁂𑀯 𑀧𑀘𑁆𑀘𑀸𑀕𑀦𑁆𑀢𑀼𑀁 𑀦 𑀲𑀓𑁆𑀓𑀸 𑀳𑁄𑀢𑀺, 𑀢𑀸𑀤𑀺𑀲𑁂𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀲𑀁 𑀕𑀫𑀦𑀧𑀭𑀺𑀬𑀦𑁆𑀢𑀲𑁆𑀲 𑀑𑀭𑀢𑁄 𑀧𑀦 𑀕𑀸𑀫𑀲𑀻𑀫𑀸𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀢𑀢𑁆𑀣 𑀕𑀸𑀫𑀲𑀻𑀫𑀁 𑀅𑀲𑁄𑀥𑁂𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀫𑀚𑁆𑀛𑁂 𑀞𑀺𑀢𑀸𑀦𑀁 𑀲𑀩𑁆𑀩𑀤𑀺𑀲𑀸𑀲𑀼 𑀲𑀢𑁆𑀢𑀩𑁆𑀪𑀦𑁆𑀢𑀭𑀸𑀢𑀺 𑀫𑀚𑁆𑀛𑁂 𑀞𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀞𑀺𑀢𑁄𑀓𑀸𑀲𑀢𑁄 𑀲𑀩𑁆𑀩𑀤𑀺𑀲𑀸𑀲𑀼 𑀲𑀢𑁆𑀢𑀩𑁆𑀪𑀦𑁆𑀢𑀭𑀸. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀅𑀩𑁆𑀪𑀦𑁆𑀢𑀭𑁂𑀲𑀼. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀭𑀺𑀲𑀯𑀲𑁂𑀦 𑀯𑀟𑁆𑀠𑀢𑀺, 𑀢𑀲𑁆𑀫𑀸. 𑀉𑀧𑀘𑀸𑀭𑀢𑁆𑀣𑀸𑀬𑀸𑀢𑀺 𑀲𑀻𑀫𑁄𑀧𑀘𑀸𑀭𑀢𑁆𑀣𑀸𑀬. 𑀲𑀻𑀫𑀸𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀩𑀤𑁆𑀥𑀲𑀻𑀫𑀸𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸. 𑀲𑀫𑀸𑀦𑁄 𑀲𑀁𑀯𑀸𑀲𑁄 𑀏𑀢𑁆𑀣𑀸𑀢𑀺 𑀲𑀫𑀸𑀦𑀲𑀁𑀯𑀸𑀲𑀸. 𑀏𑀓𑁄 𑀉𑀧𑁄𑀲𑀣𑁄 𑀏𑀢𑁆𑀣𑀸𑀢𑀺 𑀏𑀓𑀽𑀧𑁄𑀲𑀣𑀸. 𑀏𑀢𑁆𑀣 𑀘 𑀉𑀧𑁄𑀲𑀣𑀲𑁆𑀲 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀅𑀯𑀲𑁂𑀲𑀓𑀫𑁆𑀫𑀯𑀲𑁂𑀦 𑀲𑀫𑀸𑀦𑀲𑀁𑀯𑀸𑀲𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀸𑀢𑀺 𑀅𑀩𑀤𑁆𑀥𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑀼𑀁 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁧𑁪𑁯) 𑀯𑀼𑀢𑁆𑀢𑀸. 𑀅𑀦𑀼 𑀅𑀦𑀼 𑀅𑀟𑁆𑀠𑀫𑀸𑀲𑀁 𑀅𑀦𑁆𑀯𑀟𑁆𑀠𑀫𑀸𑀲𑀁, 𑀅𑀟𑁆𑀠𑀫𑀸𑀲𑁂 𑀅𑀟𑁆𑀠𑀫𑀸𑀲𑁂𑀢𑀺 𑀅𑀢𑁆𑀣𑁄. 𑀏𑀯𑀁 ‘‘𑀅𑀦𑀼𑀤𑀲𑀸𑀳’’𑀦𑁆𑀢𑀺𑀆𑀤𑀻𑀲𑀼𑀧𑀺. 𑀤𑁂𑀯𑁂𑀢𑀺 𑀫𑁂𑀖𑁂. 𑀯𑀮𑀸𑀳𑀓𑁂𑀲𑀼 𑀯𑀺𑀕𑀢𑀫𑀢𑁆𑀢𑁂𑀲𑀽𑀢𑀺 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑁂 𑀪𑀼𑀫𑁆𑀫𑀁. 𑀲𑁄𑀢𑀦𑁆𑀢𑀺 𑀉𑀤𑀓𑀧𑁆𑀧𑀯𑀸𑀳𑁄 𑀯𑀼𑀘𑁆𑀘𑀢𑀺. 𑀢𑀺𑀢𑁆𑀣𑁂𑀦 𑀯𑀸 𑀅𑀢𑀺𑀢𑁆𑀣𑁂𑀦 𑀯𑀸 𑀑𑀢𑀭𑀺𑀢𑁆𑀯𑀸𑀢𑀺 𑀧𑀸𑀞𑀲𑁂𑀲𑁄. 𑀢𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸𑀢𑀺 𑀬𑀣𑀸 𑀢𑀺𑀫𑀡𑁆𑀟𑀮𑀧𑀝𑀺𑀘𑁆𑀙𑀸𑀤𑀦𑀁 𑀳𑁄𑀢𑀺, 𑀏𑀯𑀁 𑀦𑀺𑀯𑀸𑀲𑁂𑀢𑁆𑀯𑀸. 𑀉𑀢𑁆𑀢𑀭𑀦𑁆𑀢𑀺𑀬𑀸𑀢𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀉𑀢𑁆𑀢𑀭𑀦𑁆𑀢𑀺𑀬𑀸. 𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑁂 (𑀧𑀸𑀘𑀺. 𑁬𑁯𑁨) 𑀪𑀺𑀓𑁆𑀔𑀼𑀦𑀺𑀬𑀸 𑀯𑀲𑁂𑀦 𑀦𑀤𑀻𑀮𑀓𑁆𑀔𑀡𑀲𑁆𑀲 𑀧𑀸𑀴𑀺𑀬𑀁 𑀆𑀕𑀢𑀢𑁆𑀢𑀸 ‘‘𑀪𑀺𑀓𑁆𑀔𑀼𑀦𑀺𑀬𑀸’’𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀯𑀺𑀲𑁂𑀲𑀲𑀩𑁆𑀪𑀸𑀯𑀢𑁄.

𑀓𑁂𑀦𑀘𑀺 𑀔𑀡𑀺𑀢𑁆𑀯𑀸 𑀅𑀓𑀢𑁄𑀢𑀺 𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑁂𑀦𑀧𑀺 𑀔𑀡𑀺𑀢𑁆𑀯𑀸 𑀅𑀓𑀢𑁄. 𑀦𑀤𑀺𑀁 𑀯𑀸 𑀲𑀫𑀼𑀤𑁆𑀤𑀁 𑀯𑀸 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀦𑀤𑀻𑀓𑀽𑀮𑀁 𑀯𑀸 𑀲𑀫𑀼𑀤𑁆𑀤𑀯𑁂𑀮𑀁 𑀯𑀸 𑀪𑀺𑀦𑁆𑀤𑀺𑀢𑁆𑀯𑀸. 𑀏𑀢𑀁 𑀮𑀓𑁆𑀔𑀡𑀦𑁆𑀢𑀺 ‘‘𑀬𑀢𑁆𑀣 𑀦𑀤𑀺𑀬𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀯𑀲𑁆𑀲𑀓𑀸𑀮𑁂 𑀉𑀤𑀓𑀁 𑀲𑀦𑁆𑀢𑀺𑀝𑁆𑀞𑀢𑀻’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑀯𑀼𑀢𑁆𑀢𑀧𑁆𑀧𑀓𑀸𑀭𑀮𑀓𑁆𑀔𑀡𑀁. 𑀮𑁄𑀡𑀻𑀧𑀺 𑀚𑀸𑀢𑀲𑁆𑀲𑀭𑀲𑀗𑁆𑀔𑀫𑁂𑀯 𑀕𑀘𑁆𑀙𑀢𑀺. 𑀬𑀢𑁆𑀣 𑀧𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀯𑀲𑁆𑀲𑀓𑀸𑀮𑁂 𑀯𑀲𑁆𑀲𑁂 𑀧𑀘𑁆𑀙𑀺𑀦𑁆𑀦𑀫𑀢𑁆𑀢𑁂 𑀧𑀺𑀯𑀺𑀢𑀼𑀁 𑀯𑀸 𑀳𑀢𑁆𑀣𑀧𑀸𑀤𑁂 𑀥𑁄𑀯𑀺𑀢𑀼𑀁 𑀯𑀸 𑀉𑀤𑀓𑀁 𑀦 𑀳𑁄𑀢𑀺 𑀲𑀼𑀓𑁆𑀔𑀢𑀺, 𑀅𑀬𑀁 𑀚𑀸𑀢𑀲𑁆𑀲𑀭𑁄 𑀕𑀸𑀫𑀔𑁂𑀢𑁆𑀢𑀲𑀗𑁆𑀔𑀫𑁂𑀯 𑀕𑀘𑁆𑀙𑀢𑀺.

𑀉𑀤𑀓𑀼𑀓𑁆𑀔𑁂𑀧𑀸𑀢𑀺 𑀓𑀭𑀡𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀆𑀳 ‘‘𑀉𑀤𑀓𑀼𑀓𑁆𑀔𑁂𑀧𑁂𑀦𑀸’’𑀢𑀺. 𑀓𑀣𑀁 𑀧𑀦 𑀉𑀤𑀓𑀁 𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀫𑀚𑁆𑀛𑀺𑀫𑁂𑀦 𑀧𑀼𑀭𑀺𑀲𑁂𑀦𑀸𑀢𑀺 𑀣𑀸𑀫𑀫𑀚𑁆𑀛𑀺𑀫𑁂𑀦 𑀧𑀼𑀭𑀺𑀲𑁂𑀦. 𑀅𑀬𑀁 𑀉𑀤𑀓𑀼𑀓𑁆𑀔𑁂𑀧𑁄 𑀦𑀸𑀫𑀸𑀢𑀺 𑀅𑀬𑀁 𑀉𑀤𑀓𑀼𑀓𑁆𑀔𑁂𑀧𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸 𑀲𑀻𑀫𑀸 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀬𑀸𑀯 𑀧𑀭𑀺𑀲𑀸 𑀯𑀟𑁆𑀠𑀢𑀺, 𑀢𑀸𑀯 𑀅𑀬𑀁 𑀲𑀻𑀫𑀸𑀧𑀺 𑀯𑀟𑁆𑀠𑀢𑀺, 𑀧𑀭𑀺𑀲𑀧𑀭𑀺𑀬𑀦𑁆𑀢𑀢𑁄 𑀉𑀤𑀓𑀼𑀓𑁆𑀔𑁂𑀧𑁄𑀬𑁂𑀯 𑀧𑀫𑀸𑀡𑀁. 𑀲𑀘𑁂 𑀧𑀦 𑀦𑀤𑀻 𑀦𑀸𑀢𑀺𑀤𑀻𑀖𑀸 𑀳𑁄𑀢𑀺, 𑀧𑀪𑀯𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀼𑀔𑀤𑁆𑀯𑀸𑀭𑀁 𑀲𑀩𑁆𑀩𑀢𑁆𑀣 𑀲𑀗𑁆𑀖𑁄 𑀦𑀺𑀲𑀻𑀤𑀢𑀺, 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀓𑀫𑁆𑀫𑀁 𑀦𑀢𑁆𑀣𑀺. 𑀲𑀓𑀮𑀸𑀧𑀺 𑀦𑀤𑀻 𑀏𑀢𑁂𑀲𑀁𑀬𑁂𑀯 𑀪𑀺𑀓𑁆𑀔𑀽𑀦𑀁 𑀧𑀳𑁄𑀢𑀺.

𑀧𑀓𑀢𑀺𑀯𑀲𑁆𑀲𑀓𑀸𑀮𑁂𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀧𑀓𑀢𑀺𑀯𑀲𑁆𑀲𑀓𑀸𑀮𑁂. 𑀘𑀢𑀽𑀲𑀼 𑀫𑀸𑀲𑁂𑀲𑀽𑀢𑀺 𑀯𑀲𑁆𑀲𑀸𑀦𑀲𑁆𑀲 𑀘𑀢𑀽𑀲𑀼 𑀫𑀸𑀲𑁂𑀲𑀼. 𑀅𑀢𑀺𑀯𑀼𑀝𑁆𑀞𑀺𑀓𑀸𑀮𑁂 𑀑𑀖𑁂𑀦 𑀑𑀢𑁆𑀣𑀢𑁄𑀓𑀸𑀲𑁄 𑀦 𑀕𑀳𑁂𑀢𑀩𑁆𑀩𑁄. 𑀲𑁄 𑀳𑀺 𑀕𑀸𑀫𑀲𑀻𑀫𑀸𑀲𑀗𑁆𑀔𑀫𑁂𑀯 𑀕𑀘𑁆𑀙𑀢𑀺. 𑀅𑀦𑁆𑀢𑁄𑀦𑀤𑀺𑀬𑀁 𑀚𑀸𑀢𑀲𑁆𑀲𑀭𑁂 𑀚𑀸𑀢𑀧𑀺𑀝𑁆𑀞𑀺𑀧𑀸𑀲𑀸𑀡𑀤𑀻𑀧𑀓𑁂𑀲𑀼𑀧𑀺 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀘𑁂 𑀧𑀦 𑀦𑀤𑀻 𑀧𑀭𑀺𑀧𑀼𑀡𑁆𑀡𑀸 𑀳𑁄𑀢𑀺 𑀲𑀫𑀢𑀺𑀢𑁆𑀣𑀺𑀓𑀸, 𑀉𑀤𑀓𑀲𑀸𑀝𑀺𑀓𑀁 𑀦𑀺𑀯𑀸𑀲𑁂𑀢𑁆𑀯𑀸𑀧𑀺 𑀅𑀦𑁆𑀢𑁄𑀦𑀤𑀺𑀬𑀁𑀬𑁂𑀯 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀲𑀘𑁂 𑀦 𑀲𑀓𑁆𑀓𑁄𑀦𑁆𑀢𑀺, 𑀦𑀸𑀯𑀸𑀬𑀧𑀺 𑀞𑀢𑁆𑀯𑀸 𑀓𑀸𑀢𑀩𑁆𑀩𑀁. 𑀕𑀘𑁆𑀙𑀦𑁆𑀢𑀺𑀬𑀸 𑀧𑀦 𑀦𑀸𑀯𑀸𑀬 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀓𑀲𑁆𑀫𑀸? 𑀉𑀤𑀓𑀼𑀓𑁆𑀔𑁂𑀧𑀫𑀢𑁆𑀢𑀫𑁂𑀯 𑀳𑀺 𑀲𑀻𑀫𑀸, 𑀢𑀁 𑀦𑀸𑀯𑀸 𑀲𑀻𑀖𑀫𑁂𑀯 𑀅𑀢𑀺𑀓𑁆𑀓𑀸𑀫𑁂𑀢𑀺. 𑀏𑀯𑀁 𑀲𑀢𑀺 𑀅𑀜𑁆𑀜𑀺𑀲𑁆𑀲𑀸 𑀲𑀻𑀫𑀸𑀬 𑀜𑀢𑁆𑀢𑀺, 𑀅𑀜𑁆𑀜𑀺𑀲𑁆𑀲𑀸 𑀅𑀦𑀼𑀲𑁆𑀲𑀸𑀯𑀦𑀸 𑀳𑁄𑀢𑀺, 𑀢𑀲𑁆𑀫𑀸 𑀦𑀸𑀯𑀁 𑀅𑀭𑀺𑀢𑁆𑀢𑁂𑀦 𑀯𑀸 𑀞𑀧𑁂𑀢𑁆𑀯𑀸, 𑀧𑀸𑀲𑀸𑀡𑁂 𑀯𑀸 𑀮𑀫𑁆𑀩𑀺𑀢𑁆𑀯𑀸, 𑀅𑀦𑁆𑀢𑁄𑀦𑀤𑀺𑀬𑀁 𑀚𑀸𑀢𑀭𑀼𑀓𑁆𑀔𑁂 𑀯𑀸 𑀩𑀦𑁆𑀥𑀺𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀅𑀦𑁆𑀢𑁄𑀦𑀤𑀺𑀬𑀁 𑀩𑀤𑁆𑀥𑀅𑀝𑁆𑀝𑀓𑁂𑀧𑀺 𑀅𑀦𑁆𑀢𑁄𑀦𑀤𑀺𑀬𑀁 𑀚𑀸𑀢𑀭𑀼𑀓𑁆𑀔𑁂𑀧𑀺 𑀞𑀺𑀢𑁂𑀳𑀺 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑀲𑀘𑁂 𑀧𑀦 𑀭𑀼𑀓𑁆𑀔𑀲𑁆𑀲 𑀲𑀸𑀔𑀸 𑀯𑀸 𑀢𑀢𑁄 𑀦𑀺𑀓𑁆𑀔𑀦𑁆𑀢𑀧𑀸𑀭𑁄𑀳𑁄 𑀯𑀸 𑀩𑀳𑀺𑀦𑀤𑀻𑀢𑀻𑀭𑁂 𑀯𑀺𑀳𑀸𑀭𑀲𑀻𑀫𑀸𑀬 𑀯𑀸 𑀕𑀸𑀫𑀲𑀻𑀫𑀸𑀬 𑀯𑀸 𑀧𑀢𑀺𑀝𑁆𑀞𑀺𑀢𑁄, 𑀲𑀻𑀫𑀁 𑀯𑀸 𑀲𑁄𑀥𑁂𑀢𑁆𑀯𑀸, 𑀲𑀸𑀔𑀁 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀩𑀳𑀺𑀦𑀤𑀻𑀢𑀻𑀭𑁂 𑀚𑀸𑀢𑀭𑀼𑀓𑁆𑀔𑀲𑁆𑀲 𑀅𑀦𑁆𑀢𑁄𑀦𑀤𑀺𑀬𑀁 𑀧𑀯𑀺𑀝𑁆𑀞𑀲𑀸𑀔𑀸𑀬 𑀯𑀸 𑀧𑀸𑀭𑁄𑀳𑁂 𑀯𑀸 𑀦𑀸𑀯𑀁 𑀩𑀦𑁆𑀥𑀺𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀓𑀭𑁄𑀦𑁆𑀢𑁂𑀳𑀺 𑀲𑀻𑀫𑀸 𑀯𑀸 𑀲𑁄𑀥𑁂𑀢𑀩𑁆𑀩𑀸, 𑀲𑀸𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀯𑀸 𑀢𑀲𑁆𑀲 𑀩𑀳𑀺𑀧𑀢𑀺𑀝𑁆𑀞𑀺𑀢𑀪𑀸𑀕𑁄 𑀦𑀸𑀲𑁂𑀢𑀩𑁆𑀩𑁄. 𑀦𑀤𑀻𑀢𑀻𑀭𑁂 𑀧𑀦 𑀔𑀸𑀡𑀼𑀓𑀁 𑀓𑁄𑀝𑁆𑀝𑁂𑀢𑁆𑀯𑀸 𑀢𑀢𑁆𑀣 𑀩𑀦𑁆𑀥𑀦𑀸𑀯𑀸𑀬 𑀦 𑀯𑀝𑁆𑀝𑀢𑀺𑀬𑁂𑀯.

𑀦𑀤𑀺𑀬𑀁 𑀲𑁂𑀢𑀼𑀁 𑀓𑀭𑁄𑀦𑁆𑀢𑀺, 𑀲𑀘𑁂 𑀅𑀦𑁆𑀢𑁄𑀦𑀤𑀺𑀬𑀁𑀬𑁂𑀯 𑀲𑁂𑀢𑀼 𑀯𑀸 𑀲𑁂𑀢𑀼𑀧𑀸𑀤𑀸 𑀯𑀸, 𑀲𑁂𑀢𑀼𑀫𑁆𑀳𑀺 𑀞𑀺𑀢𑁂𑀳𑀺 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀲𑁂𑀢𑀼 𑀯𑀸 𑀲𑁂𑀢𑀼𑀧𑀸𑀤𑀸 𑀯𑀸 𑀩𑀳𑀺𑀢𑀻𑀭𑁂 𑀧𑀢𑀺𑀝𑁆𑀞𑀺𑀢𑀸, 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀻𑀫𑀁 𑀲𑁄𑀥𑁂𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀅𑀣 𑀲𑁂𑀢𑀼𑀧𑀸𑀤𑀸 𑀅𑀦𑁆𑀢𑁄, 𑀲𑁂𑀢𑀼 𑀧𑀦 𑀉𑀪𑀺𑀦𑁆𑀦𑀫𑁆𑀧𑀺 𑀢𑀻𑀭𑀸𑀦𑀁 𑀉𑀧𑀭𑀺𑀆𑀓𑀸𑀲𑁂 𑀞𑀺𑀢𑁄, 𑀯𑀝𑁆𑀝𑀢𑀺. 𑀚𑀸𑀢𑀲𑁆𑀲𑀭𑁂𑀧𑀺 𑀏𑀲𑁂𑀯 𑀦𑀬𑁄.

‘‘𑀬𑀲𑁆𑀫𑀺𑀁 𑀧𑀤𑁂𑀲𑁂 𑀧𑀓𑀢𑀺𑀯𑀻𑀘𑀺𑀬𑁄 𑀑𑀢𑁆𑀣𑀭𑀺𑀢𑁆𑀯𑀸 𑀲𑀡𑁆𑀞𑀳𑀦𑁆𑀢𑀻’’𑀢𑀺 𑀏𑀢𑁂𑀦 𑀬𑀁 𑀧𑀤𑁂𑀲𑀁 𑀉𑀤𑁆𑀥𑀁 𑀯𑀟𑁆𑀠𑀦𑀓𑀉𑀤𑀓𑀁 𑀯𑀸 𑀧𑀓𑀢𑀺𑀯𑀻𑀘𑀺𑀬𑁄 𑀯𑀸 𑀯𑁂𑀕𑁂𑀦 𑀆𑀕𑀦𑁆𑀢𑁆𑀯𑀸 𑀑𑀢𑁆𑀣𑀭𑀦𑁆𑀢𑀺, 𑀢𑀢𑁆𑀣 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁪𑁭) 𑀤𑀲𑁆𑀲𑁂𑀢𑀺. 𑀲𑀘𑁂 𑀊𑀫𑀺𑀯𑁂𑀕𑁄 𑀩𑀸𑀥𑀢𑀺, 𑀦𑀸𑀯𑀸𑀬 𑀯𑀸 𑀅𑀝𑁆𑀝𑀓𑁂 𑀯𑀸 𑀞𑀢𑁆𑀯𑀸 𑀓𑀸𑀢𑀩𑁆𑀩𑀁. 𑀢𑁂𑀲𑀼 𑀯𑀺𑀦𑀺𑀘𑁆𑀙𑀬𑁄 𑀦𑀤𑀺𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀲𑀘𑁂 𑀧𑀦 𑀲𑀫𑀼𑀤𑁆𑀤𑁄 𑀕𑀸𑀫𑀲𑀻𑀫𑀁 𑀯𑀸 𑀦𑀺𑀕𑀫𑀲𑀻𑀫𑀁 𑀯𑀸 𑀑𑀢𑁆𑀣𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀲𑀫𑀼𑀤𑁆𑀤𑁄𑀯 𑀳𑁄𑀢𑀺. 𑀢𑀢𑁆𑀣 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀓𑀧𑁆𑀧𑀺𑀬𑀪𑀽𑀫𑀻𑀢𑀺 𑀑𑀢𑁆𑀣𑀭𑀺𑀢𑁆𑀯𑀸 𑀲𑀡𑁆𑀞𑀺𑀢𑀉𑀤𑀓𑀦𑁆𑀢𑀢𑁄 𑀧𑀝𑁆𑀞𑀸𑀬 𑀅𑀦𑁆𑀢𑁄 𑀦𑀤𑀻𑀚𑀸𑀢𑀲𑁆𑀲𑀭𑀲𑀫𑀼𑀤𑁆𑀤𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀤𑀼𑀩𑁆𑀩𑀼𑀝𑁆𑀞𑀺𑀓𑀸𑀮𑁂𑀢𑀺 𑀯𑀲𑁆𑀲𑀸𑀦𑀳𑁂𑀫𑀦𑁆𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀼𑀓𑁆𑀔𑁂𑀲𑀼𑀧𑀻𑀢𑀺 𑀦𑀺𑀭𑀼𑀤𑀓𑁂𑀲𑀼𑀧𑀺. 𑀬𑀣𑀸 𑀘 𑀯𑀸𑀧𑀺𑀔𑀡𑀦𑁂, 𑀏𑀯𑀁 𑀆𑀯𑀸𑀝𑀧𑁄𑀓𑁆𑀔𑀭𑀡𑀻𑀆𑀤𑀻𑀦𑀁 𑀔𑀡𑀦𑁂𑀧𑀺 𑀕𑀸𑀫𑀔𑁂𑀢𑁆𑀢𑀁 𑀳𑁄𑀢𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀧𑁆𑀧𑀁 𑀯𑀸 𑀓𑀭𑁄𑀦𑁆𑀢𑀻𑀢𑀺 𑀮𑀸𑀩𑀼𑀢𑀺𑀧𑀼𑀲𑀓𑀸𑀤𑀺𑀯𑀧𑁆𑀧𑀁 𑀯𑀸 𑀓𑀭𑁄𑀦𑁆𑀢𑀺. 𑀢𑀁 𑀞𑀸𑀦𑀦𑁆𑀢𑀺 𑀬𑀢𑁆𑀣 𑀯𑀸𑀧𑀺𑀆𑀤𑀺𑀓𑀁 𑀓𑀢𑀁, 𑀢𑀁 𑀞𑀸𑀦𑀁. 𑀅𑀜𑁆𑀜𑀁 𑀧𑀦 𑀓𑀧𑁆𑀧𑀺𑀬𑀪𑀽𑀫𑀺. 𑀲𑀘𑁂 𑀧𑀦 𑀚𑀸𑀢𑀲𑁆𑀲𑀭𑀁 𑀧𑀽𑀭𑁂𑀢𑁆𑀯𑀸 𑀣𑀮𑀁 𑀓𑀭𑁄𑀦𑁆𑀢𑀺, 𑀏𑀓𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂 𑀧𑀸𑀴𑀺𑀁 𑀩𑀦𑁆𑀥𑀺𑀢𑁆𑀯𑀸 𑀲𑀩𑁆𑀩𑀫𑁂𑀯 𑀦𑀁 𑀫𑀳𑀸𑀢𑀴𑀸𑀓𑀁 𑀯𑀸 𑀓𑀭𑁄𑀦𑁆𑀢𑀺, 𑀲𑀩𑁆𑀩𑁄𑀧𑀺 𑀅𑀚𑀸𑀢𑀲𑁆𑀲𑀭𑁄 𑀳𑁄𑀢𑀺. 𑀕𑀸𑀫𑀲𑀻𑀫𑀸𑀲𑀗𑁆𑀔𑀫𑁂𑀯 𑀕𑀘𑁆𑀙𑀢𑀺.

𑀲𑀘𑁂 𑀦𑀤𑀺𑀫𑁆𑀧𑀺 𑀯𑀺𑀦𑀸𑀲𑁂𑀢𑁆𑀯𑀸 𑀢𑀴𑀸𑀓𑀁 𑀓𑀭𑁄𑀦𑁆𑀢𑀺, 𑀳𑁂𑀝𑁆𑀞𑀸 𑀧𑀸𑀴𑀺 𑀩𑀤𑁆𑀥𑀸, 𑀉𑀤𑀓𑀁 𑀆𑀕𑀦𑁆𑀢𑁆𑀯𑀸 𑀢𑀴𑀸𑀓𑀁 𑀧𑀽𑀭𑁂𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀏𑀢𑁆𑀣 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀉𑀧𑀭𑀺 𑀧𑀯𑀢𑁆𑀢𑀦𑀝𑁆𑀞𑀸𑀦𑁂 𑀙𑀟𑁆𑀟𑀺𑀢𑀁 𑀉𑀤𑀓𑀁 𑀦𑀤𑀺𑀁 𑀑𑀢𑁆𑀣𑀭𑀺𑀢𑁆𑀯𑀸 𑀲𑀦𑁆𑀤𑀦𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀯𑀝𑁆𑀝𑀢𑀺. 𑀓𑀸𑀘𑀺 𑀦𑀤𑀻 𑀓𑀸𑀮𑀦𑁆𑀢𑀭𑁂𑀦 𑀉𑀧𑁆𑀧𑀢𑀺𑀢𑁆𑀯𑀸 𑀕𑀸𑀫𑀦𑀺𑀕𑀫𑀲𑀻𑀫𑀁 𑀑𑀢𑁆𑀣𑀭𑀺𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀦𑀤𑀻𑀬𑁂𑀯 𑀳𑁄𑀢𑀺, 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀯𑀺𑀳𑀸𑀭𑀲𑀻𑀫𑀁 𑀑𑀢𑁆𑀣𑀭𑀢𑀺 ‘‘𑀯𑀺𑀳𑀸𑀭𑀲𑀻𑀫𑀸’’𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀦𑁆𑀢𑁄 𑀕𑀘𑁆𑀙𑀢𑀺, 𑀢𑀲𑁆𑀫𑀸. 𑀲𑀫𑀦𑁆𑀢𑀸 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄𑀢𑀺 𑀧𑀳𑁄𑀦𑀓𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀢𑁆𑀣 𑀧𑀦 𑀓𑀼𑀦𑁆𑀦𑀤𑀻𑀆𑀤𑀻𑀲𑀼 𑀦𑀧𑁆𑀧𑀳𑁄𑀢𑀺, 𑀢𑀢𑁆𑀣 𑀧𑀳𑁄𑀦𑀓𑀝𑁆𑀞𑀸𑀦𑀢𑁄 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄. 𑀉𑀧𑀘𑀸𑀭𑀢𑁆𑀣𑀸𑀬𑀸𑀢𑀺 𑀲𑀻𑀫𑁄𑀧𑀘𑀸𑀭𑀢𑁆𑀣𑀸𑀬.

𑀓𑀲𑁆𑀫𑀸 𑀧𑀦 𑀅𑀜𑁆𑀜𑀫𑁂𑀓𑀁 𑀲𑀢𑁆𑀢𑀩𑁆𑀪𑀦𑁆𑀢𑀭𑀁, 𑀅𑀜𑁆𑀜𑁄 𑀏𑀓𑁄 𑀉𑀤𑀓𑀼𑀓𑁆𑀔𑁂𑀧𑁄 𑀘 𑀉𑀧𑀘𑀸𑀭𑀢𑁆𑀣𑀸𑀬 𑀞𑀧𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀅𑀬𑀁 𑀳𑀻’’𑀢𑀺𑀆𑀤𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁪𑁭; 𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁪𑁭) 𑁋 𑀬𑀲𑁆𑀫𑀸 𑀅𑀬𑀁 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀘 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀘 𑀪𑀺𑀓𑁆𑀔𑀽𑀦𑀁 𑀞𑀺𑀢𑁄𑀓𑀸𑀲𑀢𑁄 𑀧𑀝𑁆𑀞𑀸𑀬 𑀮𑀩𑁆𑀪𑀢𑀺, 𑀢𑁂 𑀘 𑀪𑀺𑀓𑁆𑀔𑀽 𑀦 𑀲𑀩𑁆𑀩𑀤𑀸 𑀏𑀓𑀲𑀤𑀺𑀲𑀸, 𑀓𑀤𑀸𑀘𑀺 𑀯𑀟𑁆𑀠𑀦𑁆𑀢𑀺, 𑀓𑀤𑀸𑀘𑀺 𑀧𑀭𑀺𑀳𑀸𑀬𑀦𑁆𑀢𑀺. 𑀬𑀤𑀸 𑀘 𑀯𑀟𑁆𑀠𑀦𑁆𑀢𑀺, 𑀢𑀤𑀸 𑀲𑀻𑀫𑀸𑀲𑀗𑁆𑀓𑀭𑁄 𑀳𑁄𑀢𑀺. 𑀢𑀲𑁆𑀫𑀸 𑀅𑀜𑁆𑀜𑀫𑁂𑀓𑀁 𑀲𑀢𑁆𑀢𑀩𑁆𑀪𑀦𑁆𑀢𑀭𑀁, 𑀅𑀜𑁆𑀜𑁄 𑀏𑀓𑁄 𑀉𑀤𑀓𑀼𑀓𑁆𑀔𑁂𑀧𑁄 𑀘 𑀉𑀧𑀘𑀸𑀭𑀢𑁆𑀣𑀸𑀬 𑀞𑀧𑁂𑀢𑀩𑁆𑀩𑁄𑀢𑀺. 𑀬𑀁 𑀧𑀦 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 ‘‘𑀢𑀢𑁄 𑀅𑀥𑀺𑀓𑀁 𑀯𑀝𑁆𑀝𑀢𑀺𑀬𑁂𑀯, 𑀊𑀦𑀓𑀁 𑀧𑀦 𑀦 𑀯𑀝𑁆𑀝𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁪𑁭) 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀏𑀢𑀤𑀢𑁆𑀣𑀫𑁂𑀯, 𑀦 𑀧𑀦 𑀢𑀢𑁆𑀣 𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀼𑀧𑁆𑀧𑀢𑁆𑀢𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀧𑀭𑀺𑀘𑁆𑀙𑁂𑀤𑀢𑁄 𑀩𑀳𑀺 𑀅𑀜𑁆𑀜𑀁 𑀢𑀢𑁆𑀢𑀓𑀁𑀬𑁂𑀯 𑀧𑀭𑀺𑀘𑁆𑀙𑁂𑀤𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄𑀧𑀻𑀢𑀺 𑀅𑀢𑁆𑀢𑀦𑁄 𑀲𑀢𑁆𑀢𑀩𑁆𑀪𑀦𑁆𑀢𑀭𑁂𑀦, 𑀉𑀤𑀓𑀼𑀓𑁆𑀔𑁂𑀧𑁂𑀦 𑀯𑀸 𑀬𑁄 𑀢𑁂𑀲𑀁 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑁆𑀲, 𑀉𑀤𑀓𑀼𑀓𑁆𑀔𑁂𑀧𑀲𑁆𑀲 𑀯𑀸 𑀧𑀭𑀺𑀘𑁆𑀙𑁂𑀤𑁄, 𑀢𑀢𑁄 𑀩𑀳𑀺 𑀅𑀜𑁆𑀜𑀁 𑀢𑀢𑁆𑀢𑀓𑀁𑀬𑁂𑀯 𑀧𑀭𑀺𑀘𑁆𑀙𑁂𑀤𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄𑀧𑀻𑀢𑀺 𑀅𑀢𑁆𑀣𑁄. 𑀓𑀣𑀫𑁂𑀢𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀇𑀤𑀁 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀲𑀦𑁆𑀦𑀺𑀝𑁆𑀞𑀸𑀦’’𑀦𑁆𑀢𑀺, 𑀇𑀤𑀁 ‘‘𑀓𑀫𑁆𑀫𑀁 𑀓𑁄𑀧𑁂𑀢𑀻’’𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀤𑀻𑀲𑀼 𑀯𑀯𑀢𑁆𑀣𑀸𑀦𑀦𑁆𑀢𑀺 𑀅𑀢𑁆𑀣𑁄. ‘‘𑀇𑀢𑀺 𑀇𑀫’’𑀦𑁆𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀦𑀺𑀕𑀫𑀦𑀁. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀩𑀤𑁆𑀥𑀸𑀩𑀤𑁆𑀥𑀯𑀲𑁂𑀦𑁂𑀥, 𑀲𑀻𑀫𑀸 𑀦𑀸𑀫 𑀤𑁆𑀯𑀺𑀥𑀸 𑀢𑀳𑀺𑀁;

𑀢𑀺𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀸 𑀯𑀚𑁆𑀚𑀺-𑀢𑁂𑀓𑀸𑀤𑀲 𑀯𑀺𑀧𑀢𑁆𑀢𑀺𑀓𑀸;

𑀩𑀤𑁆𑀥𑀲𑀻𑀫𑀸 𑀢𑀺𑀥𑀸 𑀔𑀡𑁆𑀟𑀸-𑀤𑀺𑀢𑁄 𑀕𑀸𑀫𑀸𑀤𑀺𑀢𑁄 𑀧𑀭𑀸’’𑀢𑀺.

𑀲𑀪𑀸𑀕𑀸𑀧𑀢𑁆𑀢𑀺 𑀘 𑀦𑀸𑀫𑁂𑀲𑀸 𑀤𑀼𑀯𑀺𑀥𑀸 𑀯𑀢𑁆𑀣𑀼𑀲𑀪𑀸𑀕𑀸, 𑀆𑀧𑀢𑁆𑀢𑀺𑀲𑀪𑀸𑀕𑀸𑀢𑀺. 𑀢𑀢𑁆𑀣 𑀇𑀥 𑀯𑀢𑁆𑀣𑀼𑀲𑀪𑀸𑀕𑀸 𑀅𑀥𑀺𑀧𑁆𑀧𑁂𑀢𑀸, 𑀦𑁂𑀢𑀭𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀲𑀩𑁆𑀩𑁄 𑀲𑀗𑁆𑀖𑁄 𑀯𑀺𑀓𑀸𑀮𑀪𑁄𑀚𑀦𑀸𑀤𑀺𑀦𑀸’’𑀢𑀺𑀆𑀤𑀺𑀫𑀸𑀳. 𑀮𑀳𑀼𑀓𑀸𑀧𑀢𑁆𑀢𑀺𑀦𑁆𑀢𑀺 𑀮𑀳𑀼𑀓𑁂𑀦 𑀯𑀺𑀦𑀬𑀓𑀫𑁆𑀫𑁂𑀦 𑀯𑀺𑀲𑀼𑀚𑁆𑀛𑀦𑀢𑁄 𑀮𑀳𑀼𑀓𑀸 𑀣𑀼𑀮𑁆𑀮𑀘𑁆𑀘𑀬𑀧𑀸𑀘𑀺𑀢𑁆𑀢𑀺𑀬𑀧𑀸𑀝𑀺𑀤𑁂𑀲𑀦𑀻𑀬𑀤𑀼𑀓𑁆𑀓𑀝𑀤𑀼𑀩𑁆𑀪𑀸𑀲𑀺𑀢𑀲𑀗𑁆𑀔𑀸𑀢𑀸 𑀧𑀜𑁆𑀘𑀸𑀧𑀢𑁆𑀢𑀺𑀬𑁄. 𑀯𑀢𑁆𑀣𑀼𑀲𑀪𑀸𑀕𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀬𑀸𑀧𑀺 𑀲𑀢𑀺 𑀉𑀧𑁄𑀲𑀣𑀓𑀫𑁆𑀫𑀁 𑀧𑀢𑁆𑀢𑀓𑀮𑁆𑀮𑀁 𑀦 𑀳𑁄𑀢𑀺𑀬𑁂𑀯. 𑀬𑀣𑀸𑀳 ‘‘𑀲𑀪𑀸𑀕𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀦𑁆𑀦𑀲𑁆𑀲 𑀧𑀦 𑀲𑀦𑁆𑀢𑀺𑀓𑁂 𑀆𑀯𑀺 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀆𑀯𑀺 𑀓𑀭𑁄𑀢𑀺, 𑀆𑀧𑀢𑁆𑀢𑀺 𑀆𑀯𑀺𑀓𑀢𑀸 𑀳𑁄𑀢𑀺, 𑀤𑀼𑀓𑁆𑀓𑀝𑀸 𑀧𑀦 𑀦 𑀫𑀼𑀘𑁆𑀘𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨). 𑀢𑀲𑁆𑀲𑀸 𑀧𑀦 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀢𑁄 𑀏𑀯𑀁 𑀯𑀼𑀢𑁆𑀢𑀁. 𑀯𑀢𑁆𑀣𑀼𑀲𑀪𑀸𑀕𑀸𑀢𑀺 𑀯𑀢𑁆𑀣𑀼𑀯𑀲𑁂𑀦 𑀲𑀫𑀸𑀦𑀪𑀸𑀕𑀸, 𑀏𑀓𑀓𑁄𑀝𑁆𑀞𑀸𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀫𑁂𑀯 𑀯𑀢𑁆𑀣𑀼𑀲𑀪𑀸𑀕𑀁 𑀤𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀺 ‘‘𑀦, 𑀪𑀺𑀓𑁆𑀔𑀯𑁂, 𑀲𑀪𑀸𑀕𑀸 𑀆𑀧𑀢𑁆𑀢𑀺 𑀤𑁂𑀲𑁂𑀢𑀩𑁆𑀩𑀸, 𑀬𑁄 𑀤𑁂𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁧𑁬𑁯) 𑀯𑀼𑀢𑁆𑀢𑀢𑁆𑀢𑀸, 𑀦 𑀧𑀦 𑀆𑀧𑀢𑁆𑀢𑀺𑀲𑀪𑀸𑀕𑀁. 𑀢𑁂𑀦𑀸𑀳 ‘‘𑀯𑀺𑀓𑀸𑀮𑀪𑁄𑀚𑀦𑀧𑀘𑁆𑀘𑀬𑀸 𑀆𑀧𑀦𑁆𑀦𑀁 𑀧𑀦𑀸’’𑀢𑀺𑀆𑀤𑀺. 𑀆𑀧𑀢𑁆𑀢𑀺𑀲𑀪𑀸𑀕𑀦𑁆𑀢𑀺 𑀆𑀧𑀢𑁆𑀢𑀺𑀬𑀸 𑀲𑀫𑀸𑀦𑀪𑀸𑀕𑀁.

𑀲𑀸𑀫𑀦𑁆𑀢𑀸 𑀆𑀯𑀸𑀲𑀸𑀢𑀺 𑀲𑀸𑀫𑀦𑁆𑀢𑀆𑀯𑀸𑀲𑀁, 𑀲𑀫𑀻𑀧𑀯𑀺𑀳𑀸𑀭𑀦𑁆𑀢𑀺 𑀅𑀢𑁆𑀣𑁄. 𑀲𑀚𑁆𑀚𑀼𑀓𑀦𑁆𑀢𑀺 𑀢𑀤𑀳𑁂𑀯𑀸𑀕𑀫𑀦𑀢𑁆𑀣𑀸𑀬. 𑀧𑀸𑀳𑁂𑀢𑀩𑁆𑀩𑁄𑀢𑀺 𑀧𑁂𑀲𑁂𑀢𑀩𑁆𑀩𑁄. 𑀇𑀘𑁆𑀘𑁂𑀢𑀁 𑀓𑀼𑀲𑀮𑀦𑁆𑀢𑀺 𑀇𑀢𑀺 𑀏𑀢𑀁 𑀲𑀼𑀦𑁆𑀤𑀭𑀁 𑀪𑀤𑁆𑀤𑀓𑀁, 𑀮𑀤𑁆𑀥𑀓𑀧𑁆𑀧𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑁄 𑀘𑁂 𑀮𑀪𑁂𑀣𑀸𑀢𑀺 𑀯𑀺𑀳𑀸𑀭𑀸𑀦𑀁 𑀤𑀽𑀭𑀢𑀸𑀬 𑀯𑀸 𑀫𑀕𑁆𑀕𑁂 𑀧𑀭𑀺𑀧𑀦𑁆𑀣𑀸𑀤𑀺𑀦𑀸 𑀯𑀸 𑀬𑀤𑀺 𑀦 𑀮𑀪𑁂𑀣. ‘‘𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀝𑀺𑀓𑀭𑀺𑀲𑁆𑀲𑀢𑀻’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀲𑀪𑀸𑀕𑀸𑀧𑀢𑁆𑀢𑀺 𑀆𑀯𑀺 𑀓𑀸𑀢𑀼𑀫𑁆𑀧𑀺 𑀦 𑀮𑀩𑁆𑀪𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀬𑀤𑀺 𑀮𑀪𑁂𑀬𑁆𑀬, 𑀆𑀯𑀺 𑀓𑀢𑁆𑀯𑀸𑀧𑀺 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬. 𑀬𑀤𑀺 𑀧𑀦 𑀲𑀩𑁆𑀩𑁄 𑀲𑀗𑁆𑀖𑁄 𑀲𑀪𑀸𑀕𑀁 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀦𑁆𑀦𑁄 𑀳𑁄𑀢𑀺, 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀉𑀧𑁄𑀲𑀣𑀲𑁆𑀲 𑀅𑀦𑁆𑀢𑀭𑀸𑀬𑁄𑀯 𑀳𑁄𑀢𑀺. 𑀉𑀪𑁄𑀧𑀺 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀦𑁆𑀢𑀺 ‘‘𑀦, 𑀪𑀺𑀓𑁆𑀔𑀯𑁂, 𑀲𑀪𑀸𑀕𑀸 𑀆𑀧𑀢𑁆𑀢𑀺 𑀤𑁂𑀲𑁂𑀢𑀩𑁆𑀩𑀸, 𑀬𑁄 𑀤𑁂𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀦, 𑀪𑀺𑀓𑁆𑀔𑀯𑁂, 𑀲𑀪𑀸𑀕𑀸 𑀆𑀧𑀢𑁆𑀢𑀺 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸, 𑀬𑁄 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁧𑁬𑁯) 𑀯𑀼𑀢𑁆𑀢𑀢𑁆𑀢𑀸. 𑀯𑀺𑀫𑀢𑀺 𑀲𑀁𑀲𑀬𑁄, 𑀢𑀢𑁆𑀣 𑀦𑀺𑀬𑀼𑀢𑁆𑀢𑁄 𑀯𑁂𑀫𑀢𑀺𑀓𑁄. ‘‘𑀧𑀼𑀦 𑀦𑀺𑀩𑁆𑀩𑁂𑀫𑀢𑀺𑀓𑁄 𑀳𑀼𑀢𑁆𑀯𑀸 𑀤𑁂𑀲𑁂𑀢𑀩𑁆𑀩𑀫𑁂𑀯𑀸’’𑀢𑀺 𑀦𑁂𑀯 𑀧𑀸𑀴𑀺𑀬𑀁, 𑀦 𑀘 𑀅𑀝𑁆𑀞𑀓𑀣𑀸𑀬𑀁 𑀅𑀢𑁆𑀣𑀺, 𑀤𑁂𑀲𑀺𑀢𑁂 𑀧𑀦 𑀤𑁄𑀲𑁄 𑀦𑀢𑁆𑀣𑀺. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀧𑀸𑀭𑀺𑀲𑀼𑀤𑁆𑀥𑀺𑀁 𑀆𑀬𑀲𑁆𑀫𑀦𑁆𑀢𑁄 𑀆𑀭𑁄𑀘𑁂𑀣𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀸𑀧𑀢𑁆𑀢𑀺𑀓𑀲𑁆𑀲 𑀉𑀧𑁄𑀲𑀣𑀓𑀭𑀡𑁂 𑀧𑀜𑁆𑀜𑀢𑁆𑀢𑀁 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀓𑀲𑁆𑀫𑀸 𑀲𑀪𑀸𑀕𑀸𑀧𑀢𑁆𑀢𑀺𑀬𑁂𑀯 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀏𑀢𑀸𑀲𑀼 𑀳𑀻’’𑀢𑀺𑀆𑀤𑀺. 𑀯𑀺𑀲𑀪𑀸𑀕𑀸𑀧𑀢𑁆𑀢𑀻𑀲𑀼 𑀯𑀺𑀚𑁆𑀚𑀫𑀸𑀦𑀸𑀲𑀼𑀧𑀺 𑀧𑀢𑁆𑀢𑀓𑀮𑁆𑀮𑀁 𑀳𑁄𑀢𑀺𑀬𑁂𑀯𑀸𑀢𑀺 𑀯𑀺𑀲𑀪𑀸𑀕𑀸𑀲𑀼 𑀧𑀦 𑀯𑀺𑀚𑁆𑀚𑀫𑀸𑀦𑀸𑀲𑀼 𑀢𑁂𑀲𑀁𑀬𑁂𑀯 𑀧𑀼𑀕𑁆𑀕𑀮𑀸𑀦𑀁 𑀆𑀧𑀢𑁆𑀢𑀺, 𑀦 𑀲𑀗𑁆𑀖𑀲𑁆𑀲𑀸𑀢𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁 𑀳𑁄𑀢𑀺𑀬𑁂𑀯.

𑀅𑀦𑁆𑀢𑀺𑀫𑀯𑀢𑁆𑀣𑀼𑀅𑀚𑁆𑀛𑀸𑀧𑀦𑁆𑀦𑀓𑁄 𑀦𑀸𑀫 𑀘𑀢𑀼𑀦𑁆𑀦𑀁 𑀧𑀸𑀭𑀸𑀚𑀺𑀓𑀸𑀦𑀁 𑀅𑀜𑁆𑀜𑀢𑀭𑀁 𑀅𑀚𑁆𑀛𑀸𑀧𑀦𑁆𑀦𑀓𑁄. 𑀧𑀡𑁆𑀟𑀓𑀸𑀤𑀻𑀦𑀁 𑀯𑀺𑀦𑀺𑀘𑁆𑀙𑀬𑁄 𑀧𑀭𑀢𑁄 𑀧𑀸𑀭𑀸𑀚𑀺𑀓𑀼𑀤𑁆𑀤𑁂𑀲𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀺𑀭𑀘𑁆𑀙𑀸𑀦𑀕𑀢𑁄𑀢𑀺 𑀅𑀦𑁆𑀢𑀫𑀲𑁄 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀉𑀧𑀸𑀤𑀸𑀬 𑀬𑁄 𑀓𑁄𑀘𑀺 𑀦𑀸𑀕𑀫𑀸𑀡𑀯𑀓𑀸𑀤𑀺𑀓𑁄 𑀅𑀫𑀦𑀼𑀲𑁆𑀲𑀚𑀸𑀢𑀺𑀓𑁄 𑀯𑁂𑀤𑀺𑀢𑀩𑁆𑀩𑁄, 𑀦 𑀅𑀲𑁆𑀲𑀕𑁄𑀡𑀸𑀤𑀬𑁄. 𑀢𑁂𑀦𑀸𑀳 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺. 𑀢𑀢𑁆𑀣 𑀏𑀢𑁆𑀣𑀸𑀢𑀺 𑀏𑀢𑀺𑀲𑁆𑀲𑀁 𑀯𑀚𑁆𑀚𑀦𑀻𑀬𑀧𑀼𑀕𑁆𑀕𑀮𑀓𑀣𑀸𑀬𑀁. 𑀬𑀲𑁆𑀲 𑀉𑀧𑀲𑀫𑁆𑀧𑀤𑀸 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 ‘‘𑀢𑀺𑀭𑀘𑁆𑀙𑀸𑀦𑀕𑀢𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄, 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁧𑁧𑁧) 𑀬𑀲𑁆𑀲 𑀦𑀸𑀕𑀲𑀼𑀧𑀡𑁆𑀡𑀸𑀤𑀺𑀦𑁄 𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲 𑀉𑀧𑀲𑀫𑁆𑀧𑀤𑀸 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀲𑁄 𑀇𑀥𑀸𑀧𑀺 𑀢𑀺𑀭𑀘𑁆𑀙𑀸𑀦𑀕𑀢𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀳𑀺 𑀅𑀦𑁆𑀢𑀫𑀲𑁄 𑀤𑁂𑀯𑁂 𑀉𑀧𑀸𑀤𑀸𑀬 𑀦𑀸𑀕𑀫𑀸𑀡𑀯𑀓𑀸𑀤𑀺𑀓𑁄 𑀬𑁄 𑀓𑁄𑀘𑀺 𑀅𑀫𑀦𑀼𑀲𑁆𑀲𑀚𑀸𑀢𑀺𑀓𑁄 ‘‘𑀢𑀺𑀭𑀘𑁆𑀙𑀸𑀦𑀕𑀢𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀯𑀼𑀢𑁆𑀢𑀜𑁆𑀳𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 ‘‘𑀢𑀺𑀭𑀘𑁆𑀙𑀸𑀦𑀕𑀢𑁄, 𑀪𑀺𑀓𑁆𑀔𑀯𑁂𑀢𑀺 𑀏𑀢𑁆𑀣 𑀦𑀸𑀕𑁄 𑀯𑀸 𑀳𑁄𑀢𑀼 𑀲𑀼𑀧𑀡𑁆𑀡𑀫𑀸𑀡𑀯𑀓𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑁄, 𑀅𑀦𑁆𑀢𑀫𑀲𑁄 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀉𑀧𑀸𑀤𑀸𑀬 𑀬𑁄 𑀓𑁄𑀘𑀺 𑀅𑀫𑀦𑀼𑀲𑁆𑀲𑀚𑀸𑀢𑀺𑀬𑁄, 𑀲𑁄 𑀲𑀩𑁆𑀩𑁄𑀯 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 ‘𑀢𑀺𑀭𑀘𑁆𑀙𑀸𑀦𑀕𑀢𑁄’𑀢𑀺 𑀯𑁂𑀤𑀺𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁧𑁧). 𑀢𑀺𑀢𑁆𑀣𑀁 𑀯𑀼𑀘𑁆𑀘𑀢𑀺 𑀮𑀤𑁆𑀥𑀺, 𑀢𑀁 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀢𑀺𑀢𑁆𑀣𑀺𑀓𑀸, 𑀢𑀺𑀢𑁆𑀣𑀺𑀓𑀸 𑀏𑀯 𑀢𑀺𑀢𑁆𑀣𑀺𑀬𑀸, 𑀇𑀢𑁄 𑀅𑀜𑁆𑀜𑀮𑀤𑁆𑀥𑀺𑀓𑀸𑀢𑀺 𑀅𑀢𑁆𑀣𑁄.

𑀲𑀼𑀢𑁆𑀢𑀲𑁆𑀲 𑀉𑀤𑁆𑀤𑁂𑀲𑁄 𑀲𑀼𑀢𑁆𑀢𑀼𑀤𑁆𑀤𑁂𑀲𑁄. 𑀧𑀸𑀭𑀺𑀲𑀼𑀤𑁆𑀥𑀺 𑀏𑀯 𑀉𑀧𑁄𑀲𑀣𑁄 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄. 𑀏𑀲𑁂𑀯 𑀦𑀬𑁄 𑀅𑀥𑀺𑀝𑁆𑀞𑀸𑀦𑀼𑀧𑁄𑀲𑀣𑁄𑀢𑀺 𑀏𑀢𑁆𑀣𑀸𑀧𑀺. 𑀲𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄. 𑀑𑀯𑀸𑀤𑁄𑀯 𑀧𑀸𑀢𑀺𑀫𑁄𑀓𑁆𑀔𑀁, 𑀢𑀲𑁆𑀲 𑀉𑀤𑁆𑀤𑁂𑀲𑁄 𑀲𑀭𑀽𑀧𑁂𑀦 𑀓𑀣𑀦𑀁 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄. ‘‘𑀇𑀫𑀲𑁆𑀫𑀺𑀁 𑀯𑀻𑀢𑀺𑀓𑁆𑀓𑀫𑁂 𑀅𑀬𑀁 𑀦𑀸𑀫 𑀆𑀧𑀢𑁆𑀢𑀻’’𑀢𑀺 𑀏𑀯𑀁 𑀆𑀧𑀢𑁆𑀢𑀺𑀯𑀲𑁂𑀦 𑀆𑀡𑀸𑀧𑀦𑀁 𑀧𑀜𑁆𑀜𑀸𑀧𑀦𑀁 𑀆𑀡𑀸, 𑀲𑁂𑀲𑀁 𑀅𑀦𑀦𑁆𑀢𑀭𑀲𑀤𑀺𑀲𑀫𑁂𑀯.

𑀔𑀦𑁆𑀢𑀻 𑀧𑀭𑀫𑀁 𑀢𑀧𑁄 𑀢𑀺𑀢𑀺𑀓𑁆𑀔𑀸…𑀧𑁂… 𑀯𑀼𑀢𑁆𑀢𑀸 𑀢𑀺𑀲𑁆𑀲𑁄 𑀕𑀸𑀣𑀸𑀬𑁄 𑀦𑀸𑀫 𑁋

‘‘𑀔𑀦𑁆𑀢𑀻 𑀧𑀭𑀫𑀁 𑀢𑀧𑁄 𑀢𑀺𑀢𑀺𑀓𑁆𑀔𑀸;

𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸;

𑀦 𑀳𑀺 𑀧𑀩𑁆𑀩𑀚𑀺𑀢𑁄 𑀧𑀭𑀽𑀧𑀖𑀸𑀢𑀻;

𑀦 𑀲𑀫𑀡𑁄 𑀳𑁄𑀢𑀺 𑀧𑀭𑀁 𑀯𑀺𑀳𑁂𑀞𑀬𑀦𑁆𑀢𑁄.

‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀁, 𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸;

𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀧𑀦𑀁, 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦𑀁.

‘‘𑀅𑀦𑀽𑀧𑀯𑀸𑀤𑁄 𑀅𑀦𑀽𑀧𑀖𑀸𑀢𑁄, 𑀧𑀸𑀢𑀺𑀫𑁄𑀓𑁆𑀔𑁂 𑀘 𑀲𑀁𑀯𑀭𑁄;

𑀫𑀢𑁆𑀢𑀜𑁆𑀜𑀼𑀢𑀸 𑀘 𑀪𑀢𑁆𑀢𑀲𑁆𑀫𑀺𑀁, 𑀧𑀦𑁆𑀢𑀜𑁆𑀘 𑀲𑀬𑀦𑀸𑀲𑀦𑀁;

𑀅𑀥𑀺𑀘𑀺𑀢𑁆𑀢𑁂 𑀘 𑀆𑀬𑁄𑀕𑁄, 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺.(𑀤𑀻. 𑀦𑀺. 𑁨.𑁯𑁦; 𑀥. 𑀧. 𑁧𑁮𑁩-𑁧𑁮𑁫) 𑁋

𑀇𑀫𑀸 𑀢𑀺𑀲𑁆𑀲𑁄 𑀕𑀸𑀣𑀸𑀬𑁄.

𑀢𑀢𑁆𑀣 𑀔𑀦𑁆𑀢𑀻 𑀧𑀭𑀫𑀁 𑀢𑀧𑁄𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁨.𑁯𑁦; 𑀥. 𑀧. 𑀅𑀝𑁆𑀞. 𑁨.𑁧𑁮𑁫) 𑀅𑀥𑀺𑀯𑀸𑀲𑀦𑀔𑀦𑁆𑀢𑀺 𑀦𑀸𑀫 𑀧𑀭𑀫𑀁 𑀢𑀧𑁄. 𑀢𑀺𑀢𑀺𑀓𑁆𑀔𑀸𑀢𑀺 𑀔𑀦𑁆𑀢𑀺𑀬𑀸 𑀏𑀯 𑀯𑁂𑀯𑀘𑀦𑀁, 𑀢𑀺𑀢𑀺𑀓𑁆𑀔𑀸𑀲𑀗𑁆𑀔𑀸𑀢𑀸 𑀅𑀥𑀺𑀯𑀸𑀲𑀦𑀔𑀦𑁆𑀢𑀺 𑀉𑀢𑁆𑀢𑀫𑀁 𑀢𑀧𑁄𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀯𑀤𑀦𑁆𑀢𑀻𑀢𑀺 𑀲𑀩𑁆𑀩𑀸𑀓𑀸𑀭𑁂𑀦 𑀧𑀦 𑀦𑀺𑀩𑁆𑀩𑀸𑀦𑀁 ‘‘𑀧𑀭𑀫’’𑀦𑁆𑀢𑀺 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸. 𑀦 𑀳𑀺 𑀧𑀩𑁆𑀩𑀚𑀺𑀢𑁄 𑀧𑀭𑀽𑀧𑀖𑀸𑀢𑀻𑀢𑀺 𑀬𑁄 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀯𑀺𑀭𑀳𑀺𑀢𑀢𑁆𑀢𑀸 𑀧𑀭𑀁 𑀉𑀧𑀖𑀸𑀢𑁂𑀢𑀺 𑀩𑀸𑀥𑀢𑀺 𑀯𑀺𑀳𑀺𑀁𑀲𑀢𑀺, 𑀲𑁄 𑀧𑀩𑁆𑀩𑀚𑀺𑀢𑁄 𑀦𑀸𑀫 𑀦 𑀳𑁄𑀢𑀺. 𑀘𑀢𑀼𑀢𑁆𑀣𑀧𑀸𑀤𑁄 𑀧𑀦 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. ‘‘𑀦 𑀳𑀺 𑀧𑀩𑁆𑀩𑀚𑀺𑀢𑁄’’𑀢𑀺 𑀏𑀢𑀲𑁆𑀲 𑀳𑀺 ‘‘𑀦𑀲𑀫𑀡𑁄 𑀳𑁄𑀢𑀻’’𑀢𑀺 𑀯𑁂𑀯𑀘𑀦𑀁. ‘‘𑀧𑀭𑀽𑀧𑀖𑀸𑀢𑀻’’𑀢𑀺 𑀏𑀢𑀲𑁆𑀲 ‘‘𑀧𑀭𑀁 𑀯𑀺𑀳𑁂𑀞𑀬𑀦𑁆𑀢𑁄’’𑀢𑀺 𑀯𑁂𑀯𑀘𑀦𑀁. 𑀅𑀣 𑀯𑀸 𑀧𑀭𑀽𑀧𑀖𑀸𑀢𑀻𑀢𑀺 𑀲𑀻𑀮𑀽𑀧𑀖𑀸𑀢𑀻. 𑀲𑀻𑀮𑀜𑁆𑀳𑀺 𑀉𑀢𑁆𑀢𑀫𑀝𑁆𑀞𑁂𑀦 ‘‘𑀧𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑁄 𑀘 𑀲𑀫𑀡𑁄 𑀧𑀭𑀁 𑀬𑀁 𑀓𑀜𑁆𑀘𑀺 𑀲𑀢𑁆𑀢𑀁 𑀯𑀺𑀳𑁂𑀞𑀬𑀦𑁆𑀢𑁄 𑀧𑀭𑀽𑀧𑀖𑀸𑀢𑀻 𑀳𑁄𑀢𑀺, 𑀅𑀢𑁆𑀢𑀦𑁄 𑀲𑀻𑀮𑀯𑀺𑀦𑀸𑀲𑀓𑁄, 𑀲𑁄 𑀧𑀩𑁆𑀩𑀚𑀺𑀢𑁄 𑀦𑀸𑀫 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀬𑁄 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀬𑀸 𑀅𑀪𑀸𑀯𑀸 𑀧𑀭𑀽𑀧𑀖𑀸𑀢𑀻 𑀳𑁄𑀢𑀺, 𑀧𑀭𑀁 𑀅𑀦𑁆𑀢𑀫𑀲𑁄 𑀟𑀁𑀲𑀫𑀓𑀲𑀫𑁆𑀧𑀺 𑀲𑀜𑁆𑀘𑀺𑀘𑁆𑀘 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀲𑁄 𑀦 𑀳𑀺 𑀧𑀩𑁆𑀩𑀚𑀺𑀢𑁄. 𑀓𑀺𑀁 𑀓𑀸𑀭𑀡𑀸? 𑀫𑀮𑀲𑁆𑀲 𑀅𑀧𑀩𑁆𑀩𑀸𑀚𑀺𑀢𑀢𑁆𑀢𑀸. ‘‘𑀧𑀩𑁆𑀩𑀸𑀚𑀬𑀫𑀢𑁆𑀢𑀦𑁄 𑀫𑀮𑀁, 𑀢𑀲𑁆𑀫𑀸 ‘𑀧𑀩𑁆𑀩𑀚𑀺𑀢𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀥. 𑀧. 𑁩𑁮𑁮) 𑀇𑀤𑀜𑁆𑀳𑀺 𑀧𑀩𑁆𑀩𑀚𑀺𑀢𑀮𑀓𑁆𑀔𑀡𑀁. 𑀬𑁄𑀧𑀺 𑀦 𑀳𑁂𑀯 𑀔𑁄 𑀉𑀧𑀖𑀸𑀢𑁂𑀢𑀺 𑀦 𑀫𑀸𑀭𑁂𑀢𑀺, 𑀅𑀧𑀺𑀘 𑀤𑀡𑁆𑀟𑀸𑀤𑀻𑀳𑀺 𑀯𑀺𑀳𑁂𑀞𑁂𑀢𑀺, 𑀲𑁄 𑀧𑀭𑀁 𑀯𑀺𑀳𑁂𑀞𑀬𑀦𑁆𑀢𑁄 𑀲𑀫𑀡𑁄 𑀦 𑀳𑁄𑀢𑀺. 𑀓𑀺𑀁 𑀓𑀸𑀭𑀡𑀸? 𑀯𑀺𑀳𑁂𑀲𑀸𑀬 𑀅𑀲𑀫𑀺𑀢𑀢𑁆𑀢𑀸. ‘‘𑀲𑀫𑀺𑀢𑀢𑁆𑀢𑀸 𑀳𑀺 𑀧𑀸𑀧𑀸𑀦𑀁, ‘𑀲𑀫𑀡𑁄’𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺 (𑀥. 𑀧. 𑁨𑁬𑁫) 𑀇𑀤𑀜𑁆𑀳𑀺 𑀲𑀫𑀡𑀮𑀓𑁆𑀔𑀡𑀁.

𑀤𑀼𑀢𑀺𑀬𑀕𑀸𑀣𑀸𑀬 𑀲𑀩𑁆𑀩𑀧𑀸𑀧𑀲𑁆𑀲𑀸𑀢𑀺 𑀲𑀩𑁆𑀩𑀸𑀓𑀼𑀲𑀮𑀲𑁆𑀲. 𑀅𑀓𑀭𑀡𑀦𑁆𑀢𑀺 𑀅𑀦𑀼𑀧𑁆𑀧𑀸𑀤𑀦𑀁. 𑀓𑀼𑀲𑀮𑀲𑁆𑀲𑀸𑀢𑀺 𑀘𑀢𑀼𑀪𑀽𑀫𑀓𑀓𑀼𑀲𑀮𑀲𑁆𑀲. 𑀉𑀧𑀲𑀫𑁆𑀧𑀤𑀸𑀢𑀺 𑀉𑀧𑀲𑀫𑁆𑀧𑀸𑀤𑀦𑀁 𑀧𑀝𑀺𑀮𑀸𑀪𑁄. 𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀧𑀦𑀦𑁆𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑁆𑀲 𑀯𑁄𑀤𑀸𑀧𑀦𑀁 𑀧𑀪𑀲𑁆𑀲𑀭𑀪𑀸𑀯𑀓𑀭𑀡𑀁 𑀲𑀩𑁆𑀩𑀲𑁄 𑀧𑀭𑀺𑀲𑁄𑀥𑀦𑀁, 𑀢𑀁 𑀧𑀦 𑀅𑀭𑀳𑀢𑁆𑀢𑁂𑀦 𑀳𑁄𑀢𑀺. 𑀇𑀢𑀺 𑀲𑀻𑀮𑀲𑀁𑀯𑀭𑁂𑀦 𑀲𑀩𑁆𑀩𑀧𑀸𑀧𑀁 𑀧𑀳𑀸𑀬 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀳𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀳𑀺 𑀓𑀼𑀲𑀮𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀅𑀭𑀳𑀢𑁆𑀢𑀨𑀮𑁂𑀦 𑀘𑀺𑀢𑁆𑀢𑀁 𑀧𑀭𑀺𑀬𑁄𑀤𑀸𑀧𑁂𑀢𑀩𑁆𑀩𑀦𑁆𑀢𑀺 𑀏𑀢𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀑𑀯𑀸𑀤𑁄 𑀅𑀦𑀼𑀲𑀺𑀝𑁆𑀞𑀺.

𑀢𑀢𑀺𑀬𑀕𑀸𑀣𑀸𑀬 𑀅𑀦𑀽𑀧𑀯𑀸𑀤𑁄𑀢𑀺 𑀯𑀸𑀘𑀸𑀬 𑀓𑀲𑁆𑀲𑀘𑀺 𑀅𑀦𑀼𑀧𑀯𑀤𑀦𑀁. 𑀅𑀦𑀽𑀧𑀖𑀸𑀢𑁄𑀢𑀺 𑀓𑀸𑀬𑁂𑀦 𑀓𑀲𑁆𑀲𑀘𑀺 𑀉𑀧𑀖𑀸𑀢𑀲𑁆𑀲 𑀅𑀓𑀭𑀡𑀁. 𑀧𑀸𑀢𑀺𑀫𑁄𑀓𑁆𑀔𑁂𑀢𑀺 𑀬𑀁 𑀢𑀁 𑀧𑀸𑀢𑀺𑀫𑁄𑀓𑁆𑀔𑀁 𑀧𑀅𑀢𑀺𑀫𑁄𑀓𑁆𑀔𑀁 𑀅𑀢𑀺𑀧𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀲𑀻𑀮𑀁, 𑀧𑀸𑀢𑀺 𑀯𑀸 𑀅𑀕𑀢𑀺𑀯𑀺𑀲𑁂𑀲𑁂𑀳𑀺, 𑀫𑁄𑀓𑁆𑀔𑁂𑀢𑀺 𑀤𑀼𑀕𑁆𑀕𑀢𑀺𑀪𑀬𑁂𑀳𑀺. 𑀬𑁄 𑀯𑀸 𑀦𑀁 𑀧𑀸𑀢𑀺, 𑀢𑀁 𑀫𑁄𑀓𑁆𑀔𑁂𑀢𑀻𑀢𑀺 ‘‘𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 𑀧𑀸𑀢𑀺𑀫𑁄𑀓𑁆𑀔𑁂 𑀘. 𑀲𑀁𑀯𑀭𑁄𑀢𑀺 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀅𑀯𑀻𑀢𑀺𑀓𑁆𑀓𑀫𑀮𑀓𑁆𑀔𑀡𑁄 𑀲𑀁𑀯𑀭𑁄. 𑀫𑀢𑁆𑀢𑀜𑁆𑀜𑀼𑀢𑀸𑀢𑀺 𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑀯𑀲𑁂𑀦 𑀧𑀫𑀸𑀡𑀜𑁆𑀜𑀼𑀢𑀸. 𑀧𑀦𑁆𑀢𑀜𑁆𑀘 𑀲𑀬𑀦𑀸𑀲𑀦𑀦𑁆𑀢𑀺 𑀚𑀦𑀲𑀗𑁆𑀖𑀝𑁆𑀝𑀦𑀯𑀺𑀭𑀳𑀺𑀢𑀁 𑀦𑀺𑀚𑁆𑀚𑀦𑀲𑀫𑁆𑀩𑀸𑀥𑀁 𑀯𑀺𑀯𑀺𑀢𑁆𑀢𑀁, 𑀲𑁂𑀦𑀸𑀲𑀦𑀜𑁆𑀘. 𑀏𑀢𑁆𑀣 𑀘 𑀤𑁆𑀯𑀺𑀳𑀺𑀬𑁂𑀯 𑀧𑀘𑁆𑀘𑀬𑁂𑀳𑀺 𑀘𑀢𑀼𑀧𑀘𑁆𑀘𑀬𑀲𑀦𑁆𑀢𑁄𑀲𑁄 𑀤𑀻𑀧𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄 𑀧𑀘𑁆𑀘𑀬𑀲𑀦𑁆𑀢𑁄𑀲𑀲𑀸𑀫𑀜𑁆𑀜𑁂𑀦 𑀇𑀢𑀭𑀤𑁆𑀯𑀬𑀲𑁆𑀲𑀸𑀧𑀺 𑀮𑀓𑁆𑀔𑀡𑀳𑀸𑀭𑀦𑀬𑁂𑀦 𑀚𑁄𑀢𑀺𑀢𑀢𑁆𑀢𑀸. 𑀅𑀥𑀺𑀘𑀺𑀢𑁆𑀢𑁂 𑀘 𑀆𑀬𑁄𑀕𑁄𑀢𑀺 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀁 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀁, 𑀢𑀢𑁄𑀧𑀺 𑀫𑀕𑁆𑀕𑀨𑀮𑀘𑀺𑀢𑁆𑀢𑀫𑁂𑀯 𑀅𑀥𑀺𑀘𑀺𑀢𑁆𑀢𑀁, 𑀢𑀲𑁆𑀫𑀺𑀁 𑀬𑀣𑀸𑀯𑀼𑀢𑁆𑀢𑁂 𑀅𑀥𑀺𑀘𑀺𑀢𑁆𑀢𑁂 𑀆𑀬𑁄𑀕𑁄 𑀘 𑀅𑀦𑀼𑀬𑁄𑀕𑁄 𑀘𑀸𑀢𑀺 𑀅𑀢𑁆𑀣𑁄. 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦𑀦𑁆𑀢𑀺 𑀏𑀢𑀁 𑀧𑀭𑀲𑁆𑀲 𑀅𑀦𑀼𑀧𑀯𑀤𑀦𑀁, 𑀅𑀦𑀼𑀧𑀖𑀸𑀢𑀦𑀁, 𑀧𑀸𑀢𑀺𑀫𑁄𑀓𑁆𑀔𑁂 𑀲𑀁𑀯𑀭𑁄, 𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑁂𑀲𑀼 𑀫𑀢𑁆𑀢𑀜𑁆𑀜𑀼𑀢𑀸, 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀯𑀲𑀺𑀪𑀸𑀯𑀸𑀬 𑀯𑀺𑀯𑀺𑀢𑁆𑀢𑀲𑁂𑀦𑀸𑀲𑀦𑀲𑁂𑀯𑀦𑀜𑁆𑀘 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀑𑀯𑀸𑀤𑁄 𑀅𑀦𑀼𑀲𑀺𑀝𑁆𑀞𑀻𑀢𑀺. 𑀇𑀫𑀸 𑀧𑀦 𑀢𑀺𑀲𑁆𑀲𑁄 𑀕𑀸𑀣𑀸 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀕𑀸𑀣𑀸𑀬𑁄 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀁 𑀩𑀼𑀤𑁆𑀥𑀸 𑀏𑀯 𑀉𑀤𑁆𑀤𑀺𑀲𑀦𑁆𑀢𑀺, 𑀦 𑀲𑀸𑀯𑀓𑀸.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁩𑁪) 𑀦𑀬𑁂𑀦 𑀯𑀼𑀢𑁆𑀢𑀁 𑀆𑀡𑀸𑀧𑀸𑀢𑀺𑀫𑁄𑀓𑁆𑀔𑀁 𑀦𑀸𑀫. 𑀢𑀁 𑀲𑀸𑀯𑀓𑀸 𑀏𑀯 𑀉𑀤𑁆𑀤𑀺𑀲𑀦𑁆𑀢𑀺, 𑀦 𑀩𑀼𑀤𑁆𑀥𑀸 𑀲𑀗𑁆𑀖𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀦 𑀘 𑀢𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀆𑀳 ‘‘𑀢𑀁 𑀲𑀸𑀯𑀓𑀸 𑀏𑀯 𑀉𑀤𑁆𑀤𑀺𑀲𑀦𑁆𑀢𑀺, 𑀦 𑀩𑀼𑀤𑁆𑀥𑀸’’𑀢𑀺. 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂𑀢𑀺 ‘‘𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸’’𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂.

𑀅𑀦𑀼𑀧𑀕𑀢𑁄 𑀦𑀸𑀫 𑀢𑀢𑁆𑀣𑁂𑀯 𑀉𑀧𑀲𑀫𑁆𑀧𑀦𑁆𑀦𑁄, 𑀅𑀲𑀢𑀺𑀬𑀸 𑀧𑀼𑀭𑀺𑀫𑀺𑀓𑀸𑀬 𑀅𑀦𑀼𑀧𑀕𑀢𑁄 𑀯𑀸. 𑀘𑀸𑀢𑀼𑀫𑀸𑀲𑀺𑀦𑀺𑀬𑀦𑁆𑀢𑀺 𑀘𑀸𑀢𑀼𑀫𑀸𑀲𑀺𑀬𑀁. 𑀲𑀸 𑀳𑀺 𑀘𑀢𑀼𑀦𑁆𑀦𑀁 𑀫𑀸𑀲𑀸𑀦𑀁 𑀧𑀸𑀭𑀺𑀧𑀽𑀭𑀺𑀪𑀽𑀢𑀸𑀢𑀺 𑀘𑀸𑀢𑀼𑀫𑀸𑀲𑀻, 𑀲𑀸 𑀏𑀯 ‘‘𑀘𑀸𑀢𑀼𑀫𑀸𑀲𑀺𑀦𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲𑀁 𑀘𑀸𑀢𑀼𑀫𑀸𑀲𑀺𑀦𑀺𑀬𑀁. 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀲𑀺𑀦𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀓𑀸𑀬𑀲𑀸𑀫𑀕𑁆𑀕𑀺𑀦𑁆𑀢𑀺 𑀓𑀸𑀬𑁂𑀦 𑀲𑀫𑀕𑁆𑀕𑀪𑀸𑀯𑀁, 𑀳𑀢𑁆𑀣𑀧𑀸𑀲𑀽𑀧𑀕𑀫𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑁋 𑀲𑀘𑁂 𑀧𑀼𑀭𑀺𑀫𑀺𑀓𑀸𑀬 𑀧𑀜𑁆𑀘 𑀪𑀺𑀓𑁆𑀔𑀽 𑀯𑀲𑁆𑀲𑀁 𑀉𑀧𑀕𑀢𑀸, 𑀧𑀘𑁆𑀙𑀺𑀫𑀺𑀓𑀸𑀬𑀧𑀺 𑀧𑀜𑁆𑀘, 𑀧𑀼𑀭𑀺𑀫𑁂𑀳𑀺 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀧𑀯𑀸𑀭𑀺𑀢𑁂 𑀧𑀘𑁆𑀙𑀺𑀫𑁂𑀳𑀺 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄, 𑀦 𑀏𑀓𑀲𑁆𑀫𑀺𑀁 𑀉𑀧𑁄𑀲𑀣𑀕𑁆𑀕𑁂 𑀤𑁆𑀯𑁂 𑀜𑀢𑁆𑀢𑀺𑀬𑁄 𑀞𑀧𑁂𑀢𑀩𑁆𑀩𑀸. 𑀲𑀘𑁂𑀧𑀺 𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀕𑀢𑀸 𑀘𑀢𑁆𑀢𑀸𑀭𑁄, 𑀢𑀬𑁄, 𑀤𑁆𑀯𑁂, 𑀏𑀓𑁄 𑀯𑀸 𑀳𑁄𑀢𑀺, 𑀏𑀲𑁂𑀯 𑀦𑀬𑁄. 𑀅𑀣 𑀧𑀼𑀭𑀺𑀫𑀺𑀓𑀸𑀬 𑀘𑀢𑁆𑀢𑀸𑀭𑁄, 𑀧𑀘𑁆𑀙𑀺𑀫𑀺𑀓𑀸𑀬𑀧𑀺 𑀘𑀢𑁆𑀢𑀸𑀭𑁄, 𑀢𑀬𑁄, 𑀤𑁆𑀯𑁂, 𑀏𑀓𑁄 𑀯𑀸, 𑀏𑀲𑁂𑀯 𑀦𑀬𑁄. 𑀅𑀣 𑀧𑀼𑀭𑀺𑀫𑀺𑀓𑀸𑀬 𑀢𑀬𑁄, 𑀧𑀘𑁆𑀙𑀺𑀫𑀺𑀓𑀸𑀬 𑀢𑀬𑁄, 𑀤𑁆𑀯𑁂 𑀯𑀸, 𑀏𑀲𑁂𑀯 𑀦𑀬𑁄. 𑀇𑀤𑀜𑁆𑀳𑁂𑀢𑁆𑀣 𑀮𑀓𑁆𑀔𑀡𑀁 𑁋 𑀲𑀘𑁂 𑀧𑀼𑀭𑀺𑀫𑀺𑀓𑀸𑀬 𑀉𑀧𑀕𑀢𑁂𑀳𑀺 𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀕𑀢𑀸 𑀣𑁄𑀓𑀢𑀭𑀸 𑀘𑁂𑀯 𑀳𑁄𑀦𑁆𑀢𑀺 𑀲𑀫𑀲𑀫𑀸 𑀘, 𑀲𑀗𑁆𑀖𑀧𑁆𑀧𑀯𑀸𑀭𑀡𑀸𑀬 𑀘 𑀕𑀡𑀁 𑀧𑀽𑀭𑁂𑀦𑁆𑀢𑀺, 𑀲𑀗𑁆𑀖𑀧𑁆𑀧𑀯𑀸𑀭𑀡𑀸𑀯𑀲𑁂𑀦 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀧𑀼𑀭𑀺𑀫𑁂𑀳𑀺 𑀧𑀯𑀸𑀭𑁂𑀢𑀩𑁆𑀩𑀸. 𑀲𑀘𑁂 𑀧𑀦 𑀧𑀼𑀭𑀺𑀫𑀺𑀓𑀸𑀬 𑀢𑀬𑁄, 𑀧𑀘𑁆𑀙𑀺𑀫𑀺𑀓𑀸𑀬 𑀏𑀓𑁄 𑀳𑁄𑀢𑀺, 𑀢𑁂𑀦 𑀲𑀤𑁆𑀥𑀺𑀁 𑀢𑁂 𑀘𑀢𑁆𑀢𑀸𑀭𑁄 𑀳𑁄𑀦𑁆𑀢𑀺, 𑀘𑀢𑀼𑀦𑁆𑀦𑀁 𑀲𑀗𑁆𑀖𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀧𑀯𑀸𑀭𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀕𑀡𑀜𑀢𑁆𑀢𑀺𑀬𑀸 𑀧𑀦 𑀲𑁄 𑀕𑀡𑀧𑀽𑀭𑀓𑁄 𑀳𑁄𑀢𑀺, 𑀢𑀲𑁆𑀫𑀸 𑀕𑀡𑀯𑀲𑁂𑀦 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀧𑀼𑀭𑀺𑀫𑁂𑀳𑀺 𑀧𑀯𑀸𑀭𑁂𑀢𑀩𑁆𑀩𑀁, 𑀇𑀢𑀭𑁂𑀦 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀲𑀘𑁂 𑀧𑀼𑀭𑀺𑀫𑀺𑀓𑀸𑀬 𑀤𑁆𑀯𑁂, 𑀧𑀘𑁆𑀙𑀺𑀫𑀺𑀓𑀸𑀬 𑀤𑁆𑀯𑁂 𑀯𑀸 𑀏𑀓𑁄 𑀯𑀸, 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀼𑀭𑀺𑀫𑀺𑀓𑀸𑀬 𑀏𑀓𑁄, 𑀧𑀘𑁆𑀙𑀺𑀫𑀺𑀓𑀸𑀬𑀧𑀺 𑀏𑀓𑁄, 𑀏𑀓𑁂𑀦 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀁, 𑀏𑀓𑁂𑀦 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀲𑀘𑁂 𑀧𑀼𑀭𑀺𑀫𑀯𑀲𑁆𑀲𑀽𑀧𑀕𑀢𑁂𑀳𑀺 𑀧𑀘𑁆𑀙𑀺𑀫𑀯𑀲𑁆𑀲𑀽𑀧𑀕𑀢𑀸 𑀏𑀓𑁂𑀦𑀧𑀺 𑀅𑀥𑀺𑀓𑀢𑀭𑀸 𑀳𑁄𑀦𑁆𑀢𑀺, 𑀧𑀞𑀫𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀧𑀘𑁆𑀙𑀸 𑀣𑁄𑀓𑀢𑀭𑁂𑀳𑀺 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀁. 𑀓𑀢𑁆𑀢𑀺𑀓𑀘𑀸𑀢𑀼𑀫𑀸𑀲𑀺𑀦𑀺𑀧𑀯𑀸𑀭𑀡𑀸𑀬 𑀧𑀦 𑀲𑀘𑁂 𑀧𑀞𑀫𑀁 𑀯𑀲𑁆𑀲𑀽𑀧𑀕𑀢𑁂𑀳𑀺 𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑁂𑀳𑀺 𑀧𑀘𑁆𑀙𑀸 𑀉𑀧𑀕𑀢𑀸 𑀅𑀥𑀺𑀓𑀢𑀭𑀸 𑀯𑀸 𑀲𑀫𑀲𑀫𑀸 𑀯𑀸 𑀳𑁄𑀦𑁆𑀢𑀺, 𑀧𑀯𑀸𑀭𑀡𑀸𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀧𑀯𑀸𑀭𑁂𑀢𑀩𑁆𑀩𑀁. 𑀢𑁂𑀳𑀺 𑀧𑀯𑀸𑀭𑀺𑀢𑁂 𑀧𑀘𑁆𑀙𑀸 𑀇𑀢𑀭𑁂𑀳𑀺 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀅𑀣 𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑀸 𑀩𑀳𑀽 𑀳𑁄𑀦𑁆𑀢𑀺, 𑀧𑀘𑁆𑀙𑀸 𑀯𑀲𑁆𑀲𑀽𑀧𑀕𑀢𑀸 𑀣𑁄𑀓𑀸 𑀯𑀸 𑀏𑀓𑁄 𑀯𑀸, 𑀧𑀸𑀢𑀺𑀫𑁄𑀓𑁆𑀔𑁂 𑀉𑀤𑁆𑀤𑀺𑀝𑁆𑀞𑁂 𑀧𑀘𑁆𑀙𑀸 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀢𑁂𑀦 𑀧𑀯𑀸𑀭𑁂𑀢𑀩𑁆𑀩𑀦𑁆𑀢𑀺.

𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸𑀢𑀺 𑀏𑀓𑀲𑁆𑀫𑀺𑀁 𑀅𑀁𑀲𑁂 𑀲𑀸𑀥𑀼𑀓𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀢𑀺 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀁 𑀅𑀜𑁆𑀚𑀮𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸. 𑀲𑀘𑁂 𑀧𑀦 𑀢𑀢𑁆𑀣 𑀧𑀸𑀭𑀺𑀯𑀸𑀲𑀺𑀓𑁄𑀧𑀺 𑀅𑀢𑁆𑀣𑀺, 𑀲𑀗𑁆𑀖𑀦𑀯𑀓𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀲𑀺𑀦𑁆𑀦𑁂𑀦 𑀅𑀢𑁆𑀢𑀦𑁄 𑀧𑀸𑀴𑀺𑀬𑀸 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀧𑀸𑀢𑀺𑀫𑁄𑀓𑁆𑀔𑁂 𑀉𑀤𑁆𑀤𑀺𑀲𑀺𑀬𑀫𑀸𑀦𑁂 𑀧𑀦 𑀧𑀸𑀴𑀺𑀬𑀸 𑀅𑀦𑀺𑀲𑀻𑀤𑀺𑀢𑁆𑀯𑀸 𑀧𑀸𑀴𑀺𑀁 𑀯𑀺𑀳𑀸𑀬 𑀳𑀢𑁆𑀣𑀧𑀸𑀲𑀁 𑀅𑀫𑀼𑀜𑁆𑀘𑀦𑁆𑀢𑁂𑀦 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀧𑀯𑀸𑀭𑀡𑀸𑀬𑀧𑀺 𑀏𑀲𑁂𑀯 𑀦𑀬𑁄.

𑀲𑀩𑁆𑀩𑀁 𑀧𑀼𑀩𑁆𑀩𑀓𑀭𑀡𑀻𑀬𑀦𑁆𑀢𑀺 𑀲𑀫𑁆𑀫𑀚𑁆𑀚𑀦𑀸𑀤𑀺𑀁 𑀦𑀯𑀯𑀺𑀥𑀁 𑀧𑀼𑀩𑁆𑀩𑀓𑀺𑀘𑁆𑀘𑀁. 𑀬𑀣𑀸 𑀘 𑀲𑀩𑁆𑀩𑁄 𑀲𑀗𑁆𑀖𑁄 𑀲𑀪𑀸𑀕𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄…𑀧𑁂… 𑀧𑀝𑀺𑀓𑀭𑀺𑀲𑁆𑀲𑀢𑀻’’𑀢𑀺 (𑀫𑀳𑀸𑀯. 𑁧𑁭𑁧) 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀮𑀪𑀢𑀺, 𑀏𑀯𑀫𑁂𑀢𑁆𑀣𑀸𑀧𑀺 𑀢𑀻𑀳𑀺 ‘‘𑀲𑀼𑀡𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑀸 𑀇𑀫𑁂 𑀪𑀺𑀓𑁆𑀔𑀽 𑀲𑀪𑀸𑀕𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀸, 𑀬𑀤𑀸 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀲𑀼𑀤𑁆𑀥𑀁 𑀅𑀦𑀸𑀧𑀢𑁆𑀢𑀺𑀓𑀁 𑀧𑀲𑁆𑀲𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀕𑀡𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸, 𑀤𑁆𑀯𑀻𑀳𑀺𑀧𑀺 ‘‘𑀅𑀜𑁆𑀜𑀁 𑀲𑀼𑀤𑁆𑀥𑀁 𑀧𑀲𑁆𑀲𑀺𑀢𑁆𑀯𑀸 𑀧𑀝𑀺𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀏𑀓𑁂𑀦𑀸𑀧𑀺 ‘‘𑀧𑀭𑀺𑀲𑀼𑀤𑁆𑀥𑀁 𑀮𑀪𑀺𑀢𑁆𑀯𑀸 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑀁 𑀓𑀢𑁆𑀯𑀸 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀢𑀤𑀳𑀽𑀢𑀺 𑀢𑀲𑁆𑀫𑀺𑀁 𑀅𑀳𑀼, 𑀢𑀲𑁆𑀫𑀺𑀁 𑀤𑀺𑀯𑀲𑁂𑀢𑀺 𑀅𑀢𑁆𑀣𑁄. 𑀦𑀸𑀦𑀸𑀲𑀁𑀯𑀸𑀲𑀓𑁂𑀳𑀻𑀢𑀺 𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑁂𑀳𑀺. 𑀅𑀦𑀸𑀯𑀸𑀲𑁄 𑀦𑀸𑀫 𑀦𑀯𑀓𑀫𑁆𑀫𑀲𑀸𑀮𑀸𑀤𑀺𑀓𑁄 𑀬𑁄 𑀓𑁄𑀘𑀺 𑀧𑀤𑁂𑀲𑁄. 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦𑀸𑀢𑀺 𑀲𑀗𑁆𑀖𑀧𑁆𑀧𑀳𑁄𑀦𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀯𑀺𑀦𑀸. 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀤𑀲𑀯𑀺𑀥𑀫𑀦𑁆𑀢𑀭𑀸𑀬𑀁 𑀯𑀺𑀦𑀸. 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀦 𑀧𑀭𑀺𑀘𑁆𑀙𑁂𑀤𑁂𑀦 𑀅𑀢𑁆𑀢𑀘𑀢𑀼𑀢𑁆𑀣𑁂𑀦 𑀅𑀦𑁆𑀢𑀭𑀸𑀬𑁂 𑀯𑀸 𑀲𑀢𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀬𑀣𑀸 𑀘 𑀆𑀯𑀸𑀲𑀸𑀤𑀬𑁄 𑀦 𑀕𑀦𑁆𑀢𑀩𑁆𑀩𑀸, 𑀏𑀯𑀁 𑀲𑀘𑁂 𑀯𑀺𑀳𑀸𑀭𑁂 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀉𑀧𑁄𑀲𑀣𑀸𑀥𑀺𑀝𑁆𑀞𑀸𑀦𑀢𑁆𑀣𑀁 𑀲𑀻𑀫𑀸𑀧𑀺 𑀦𑀤𑀻𑀧𑀺 𑀦 𑀕𑀦𑁆𑀢𑀩𑁆𑀩𑀸. 𑀲𑀘𑁂 𑀧𑀦𑁂𑀢𑁆𑀣 𑀓𑁄𑀘𑀺 𑀪𑀺𑀓𑁆𑀔𑀼 𑀳𑁄𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀯𑀺𑀲𑁆𑀲𑀝𑁆𑀞𑀉𑀧𑁄𑀲𑀣𑀸𑀧𑀺 𑀆𑀯𑀸𑀲𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀁 𑀕𑀢𑁄 𑀅𑀥𑀺𑀝𑁆𑀞𑀸𑀢𑀼𑀫𑁆𑀧𑀺 𑀮𑀪𑀢𑀺. 𑀆𑀭𑀜𑁆𑀜𑀓𑁂𑀦𑀸𑀧𑀺 𑀪𑀺𑀓𑁆𑀔𑀼𑀦𑀸 𑀉𑀧𑁄𑀲𑀣𑀤𑀺𑀯𑀲𑁂 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀳𑀸𑀭𑀫𑁂𑀯 𑀆𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀅𑀜𑁆𑀜𑀁 𑀯𑀺𑀳𑀸𑀭𑀁 𑀑𑀓𑁆𑀓𑀫𑀢𑀺, 𑀢𑀢𑁆𑀣 𑀉𑀧𑁄𑀲𑀣𑀁 𑀓𑀢𑁆𑀯𑀸𑀯 𑀆𑀕𑀦𑁆𑀢𑀩𑁆𑀩𑀁, 𑀅𑀓𑀢𑁆𑀯𑀸 𑀆𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑀁 𑀚𑀜𑁆𑀜𑀸 ‘‘𑀅𑀚𑁆𑀚𑁂𑀯 𑀢𑀢𑁆𑀣 𑀕𑀦𑁆𑀢𑀼𑀁 𑀲𑀓𑁆𑀓𑁄𑀫𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁮𑁧) 𑀏𑀯𑀭𑀽𑀧𑁄 𑀧𑀦 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄. 𑀢𑀢𑁆𑀣 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑁂𑀦𑀸𑀧𑀺 𑀳𑀺 𑀇𑀫𑀺𑀦𑀸 𑀦𑁂𑀯 𑀉𑀧𑁄𑀲𑀣𑀦𑁆𑀢𑀭𑀸𑀬𑁄 𑀓𑀢𑁄 𑀪𑀯𑀺𑀲𑁆𑀲𑀢𑀻𑀢𑀺.

𑀉𑀤𑀓𑀁 𑀆𑀲𑀦𑁂𑀦 𑀘𑀸𑀢𑀺 𑀆𑀲𑀦𑁂𑀦 𑀲𑀳 𑀧𑀸𑀦𑀻𑀬𑀧𑀭𑀺𑀪𑁄𑀚𑀦𑀻𑀬𑀁 𑀉𑀤𑀓𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑀢𑁄 𑀧𑀞𑀫𑀁 𑀓𑀢𑁆𑀢𑀩𑁆𑀩𑀁 𑀧𑀼𑀩𑁆𑀩𑀓𑀭𑀡𑀁. 𑀧𑀼𑀩𑁆𑀩𑀓𑀭𑀡𑀢𑁄 𑀧𑀘𑁆𑀙𑀸 𑀓𑀢𑁆𑀢𑀩𑁆𑀩𑀫𑁆𑀧𑀺 𑀉𑀧𑁄𑀲𑀣𑀓𑀫𑁆𑀫𑀢𑁄 𑀧𑀞𑀫𑀁 𑀓𑀢𑁆𑀢𑀩𑁆𑀩𑀢𑁆𑀢𑀸 𑀧𑀼𑀩𑁆𑀩𑀓𑀺𑀘𑁆𑀘𑀁. 𑀉𑀪𑀬𑀫𑁆𑀧𑀺 𑀘𑁂𑀢𑀁 𑀉𑀧𑁄𑀲𑀣𑀓𑀫𑁆𑀫𑀢𑁄 𑀧𑀞𑀫𑀁 𑀓𑀢𑁆𑀢𑀩𑁆𑀩𑀢𑁆𑀢𑀸 ‘‘𑀧𑀼𑀩𑁆𑀩𑀓𑀺𑀘𑁆𑀘’’𑀫𑀺𑀘𑁆𑀘𑁂𑀯 𑀏𑀢𑁆𑀣 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀏𑀯𑀁 𑀤𑁆𑀯𑀻𑀳𑀺 𑀦𑀸𑀫𑁂𑀳𑀺 𑀦𑀯𑀯𑀺𑀥𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀤𑀲𑁆𑀲𑀺𑀢’’𑀦𑁆𑀢𑀺. 𑀓𑀺𑀁 𑀢𑀁 𑀓𑀢𑀦𑁆𑀢𑀺 𑀧𑀼𑀘𑁆𑀙𑀢𑀻𑀢𑀺 𑀆𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀢𑀁 𑀅𑀓𑀢𑁆𑀯𑀸 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺 ‘‘𑀦, 𑀪𑀺𑀓𑁆𑀔𑀯𑁂, 𑀣𑁂𑀭𑁂𑀦 𑀆𑀡𑀢𑁆𑀢𑁂𑀦 𑀅𑀕𑀺𑀮𑀸𑀦𑁂𑀦 𑀦 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁, 𑀬𑁄 𑀦 𑀲𑀫𑁆𑀫𑀚𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺𑀆𑀤𑀺 (𑀫𑀳𑀸𑀯. 𑁧𑁫𑁯) 𑀯𑀘𑀦𑀢𑁄. 𑀢𑁂𑀦𑁂𑀯𑀸𑀳 ‘‘𑀢𑀲𑁆𑀫𑀸 𑀣𑁂𑀭𑁂𑀦 𑀆𑀡𑀢𑁆𑀢𑁂𑀦𑀸’’𑀢𑀺𑀆𑀤𑀺.

𑀲𑀘𑁂 𑀧𑀦 𑀆𑀡𑀢𑁆𑀢𑁄 𑀲𑀫𑁆𑀫𑀚𑁆𑀚𑀦𑀺𑀁 𑀢𑀸𑀯𑀓𑀸𑀮𑀺𑀓𑀫𑁆𑀧𑀺 𑀦 𑀮𑀪𑀢𑀺, 𑀲𑀸𑀔𑀸𑀪𑀗𑁆𑀕𑀁 𑀓𑀧𑁆𑀧𑀺𑀬𑀁 𑀓𑀸𑀭𑁂𑀢𑁆𑀯𑀸 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁. 𑀢𑀫𑁆𑀧𑀺 𑀅𑀮𑀪𑀦𑁆𑀢𑀲𑁆𑀲 𑀮𑀤𑁆𑀥𑀓𑀧𑁆𑀧𑀺𑀬𑀁 𑀳𑁄𑀢𑀺. 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀦𑁆𑀢𑀺 𑀆𑀕𑀦𑁆𑀢𑀼𑀓𑀸𑀦𑀁 𑀅𑀢𑁆𑀣𑀸𑀬 𑀧𑀸𑀦𑀻𑀬𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁. 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑀩𑁆𑀩𑀦𑁆𑀢𑀺 𑀧𑀻𑀞𑀨𑀮𑀓𑀸𑀤𑀺𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑀩𑁆𑀩𑀁. 𑀲𑀘𑁂 𑀉𑀧𑁄𑀲𑀣𑀸𑀕𑀸𑀭𑁂 𑀆𑀲𑀦𑀸𑀦𑀺 𑀦𑀢𑁆𑀣𑀺, 𑀲𑀁𑀖𑀺𑀓𑀸𑀯𑀸𑀲𑀢𑁄𑀧𑀺 𑀆𑀳𑀭𑀺𑀢𑁆𑀯𑀸 𑀧𑀜𑁆𑀜𑀸𑀧𑁂𑀢𑁆𑀯𑀸 𑀧𑀼𑀦 𑀳𑀭𑀺𑀢𑀩𑁆𑀩𑀸𑀦𑀺. 𑀆𑀲𑀦𑁂𑀲𑀼 𑀅𑀲𑀢𑀺 𑀓𑀝𑀲𑀸𑀭𑀓𑁂𑀧𑀺 𑀢𑀝𑁆𑀝𑀺𑀓𑀸𑀬𑁄𑀧𑀺 𑀧𑀜𑁆𑀜𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀢𑀝𑁆𑀝𑀺𑀓𑀸𑀲𑀼𑀧𑀺 𑀅𑀲𑀢𑀺 𑀲𑀸𑀔𑀸𑀪𑀗𑁆𑀕𑀸𑀦𑀺 𑀓𑀧𑁆𑀧𑀺𑀬𑀁 𑀓𑀸𑀭𑁂𑀢𑁆𑀯𑀸 𑀧𑀜𑁆𑀜𑀸𑀧𑁂𑀢𑀩𑁆𑀩𑀸𑀦𑀺. 𑀓𑀧𑁆𑀧𑀺𑀬𑀓𑀸𑀭𑀓𑀁 𑀅𑀮𑀪𑀦𑁆𑀢𑀲𑁆𑀲 𑀮𑀤𑁆𑀥𑀓𑀧𑁆𑀧𑀺𑀬𑀁 𑀳𑁄𑀢𑀺. 𑀧𑀤𑀻𑀧𑁄 𑀓𑀸𑀢𑀩𑁆𑀩𑁄𑀢𑀺 𑀧𑀤𑀻𑀧𑁂𑀢𑀩𑁆𑀩𑁄, 𑀧𑀤𑀻𑀧𑀼𑀚𑁆𑀚𑀮𑀦𑀁 𑀓𑀸𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀡𑀸𑀧𑁂𑀦𑁆𑀢𑁂𑀦 𑀧𑀦 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀑𑀓𑀸𑀲𑁂 𑀢𑁂𑀮𑀁 𑀯𑀸 𑀯𑀝𑁆𑀝𑀺 𑀯𑀸 𑀓𑀧𑀮𑁆𑀮𑀺𑀓𑀸 𑀯𑀸 𑀅𑀢𑁆𑀣𑀺, 𑀢𑀁 𑀕𑀳𑁂𑀢𑁆𑀯𑀸 𑀓𑀭𑁄𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀲𑀘𑁂 𑀢𑁂𑀮𑀸𑀤𑀻𑀦𑀺 𑀦𑀢𑁆𑀣𑀺, 𑀧𑀭𑀺𑀬𑁂𑀲𑀺𑀢𑀩𑁆𑀩𑀸𑀦𑀺. 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀮𑀪𑀦𑁆𑀢𑀲𑁆𑀲 𑀮𑀤𑁆𑀥𑀓𑀧𑁆𑀧𑀺𑀬𑀁 𑀳𑁄𑀢𑀺. 𑀅𑀧𑀺𑀘 𑀓𑀧𑀸𑀮𑁂 𑀅𑀕𑁆𑀕𑀺𑀧𑀺 𑀚𑀸𑀮𑁂𑀢𑀩𑁆𑀩𑁄. 𑀆𑀡𑀸𑀧𑁂𑀦𑁆𑀢𑁂𑀦 𑀘 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀸 𑀲𑀤𑀸𑀓𑀸𑀮𑀫𑁂𑀯 𑀏𑀓𑁄 𑀯𑀸 𑀪𑀸𑀭𑀦𑀺𑀢𑁆𑀣𑀭𑀡𑀓𑁄 𑀯𑀸 𑀲𑀭𑀪𑀸𑀡𑀓𑀥𑀫𑁆𑀫𑀓𑀣𑀺𑀓𑀸𑀤𑀻𑀲𑀼 𑀅𑀜𑁆𑀜𑀢𑀭𑁄 𑀯𑀸 𑀦 𑀆𑀡𑀸𑀧𑁂𑀢𑀩𑁆𑀩𑁄, 𑀅𑀯𑀲𑁂𑀲𑀸 𑀧𑀦 𑀯𑀸𑀭𑁂𑀦 𑀆𑀡𑀸𑀧𑁂𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀣𑁂𑀭𑁂𑀦𑀸𑀧𑀺 𑀧𑀢𑀺𑀭𑀽𑀧𑀁 𑀜𑀢𑁆𑀯𑀸 𑀆𑀡𑀸𑀧𑁂𑀢𑀩𑁆𑀩’’𑀦𑁆𑀢𑀺.

𑀩𑀳𑀺 𑀉𑀧𑁄𑀲𑀣𑀁 𑀓𑀢𑁆𑀯𑀸 𑀆𑀕𑀢𑁂𑀦𑀸𑀢𑀺 𑀦𑀤𑀺𑀬𑀸 𑀯𑀸 𑀲𑀻𑀫𑀸𑀬 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀉𑀧𑁄𑀲𑀣𑀁 𑀓𑀢𑁆𑀯𑀸 𑀆𑀕𑀢𑁂𑀦 𑀙𑀦𑁆𑀤𑁄 𑀤𑀸𑀢𑀩𑁆𑀩𑁄, ‘‘𑀓𑀢𑁄 𑀫𑀬𑀸 𑀉𑀧𑁄𑀲𑀣𑁄’’𑀢𑀺 𑀅𑀘𑁆𑀙𑀺𑀢𑀼𑀁 𑀦 𑀮𑀪𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀺𑀘𑁆𑀘𑀧𑁆𑀧𑀲𑀼𑀢𑁄 𑀯𑀸𑀢𑀺 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀤𑀺𑀓𑀺𑀘𑁆𑀘𑀧𑁆𑀧𑀲𑀼𑀢𑁄 𑀯𑀸. 𑀲𑀘𑁂 𑀕𑀺𑀮𑀸𑀦𑁄 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀫𑀜𑁆𑀘𑁂𑀦 𑀯𑀸 𑀧𑀻𑀞𑁂𑀦 𑀯𑀸 𑀲𑀗𑁆𑀖𑀫𑀚𑁆𑀛𑀁 𑀆𑀦𑁂𑀢𑁆𑀯𑀸 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀲𑀘𑁂 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 ‘‘𑀲𑀘𑁂 𑀔𑁄 𑀫𑀬𑀁 𑀇𑀫𑀁 𑀕𑀺𑀮𑀸𑀦𑀁 𑀞𑀸𑀦𑀸 𑀘𑀸𑀯𑁂𑀲𑁆𑀲𑀸𑀫, 𑀆𑀩𑀸𑀥𑁄 𑀯𑀸 𑀅𑀪𑀺𑀯𑀟𑁆𑀠𑀺𑀲𑁆𑀲𑀢𑀺, 𑀓𑀸𑀮𑀓𑀺𑀭𑀺𑀬𑀸 𑀯𑀸 𑀪𑀯𑀺𑀲𑁆𑀲𑀢𑀻’’𑀢𑀺, 𑀦 𑀢𑁆𑀯𑁂𑀯 𑀲𑁄 𑀕𑀺𑀮𑀸𑀦𑁄 𑀞𑀸𑀦𑀸 𑀘𑀸𑀯𑁂𑀢𑀩𑁆𑀩𑁄, 𑀲𑀗𑁆𑀖𑁂𑀦 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄, 𑀦 𑀢𑁆𑀯𑁂𑀯 𑀯𑀕𑁆𑀕𑁂𑀦 𑀲𑀗𑁆𑀖𑁂𑀦 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀓𑀭𑁂𑀬𑁆𑀬 𑀘𑁂, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑀘𑁂 𑀩𑀳𑀽 𑀢𑀸𑀤𑀺𑀲𑀸 𑀕𑀺𑀮𑀸𑀦𑀸 𑀳𑁄𑀦𑁆𑀢𑀺, 𑀲𑀗𑁆𑀖𑁂𑀦 𑀧𑀝𑀺𑀧𑀸𑀝𑀺𑀬𑀸 𑀞𑀢𑁆𑀯𑀸 𑀲𑀩𑁆𑀩𑁂 𑀳𑀢𑁆𑀣𑀧𑀸𑀲𑁂 𑀓𑀸𑀢𑀩𑁆𑀩𑀸. 𑀲𑀘𑁂 𑀤𑀽𑀭𑁂 𑀤𑀽𑀭𑁂 𑀳𑁄𑀦𑁆𑀢𑀺, 𑀲𑀗𑁆𑀖𑁄 𑀦𑀧𑁆𑀧𑀳𑁄𑀢𑀺, 𑀢𑀁 𑀤𑀺𑀯𑀲𑀁 𑀉𑀧𑁄𑀲𑀣𑁄 𑀦 𑀓𑀸𑀢𑀩𑁆𑀩𑁄, 𑀦 𑀢𑁆𑀯𑁂𑀯 𑀯𑀕𑁆𑀕𑁂𑀦 𑀲𑀗𑁆𑀖𑁂𑀦 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑁂𑀦𑁆𑀢𑁂𑀦 𑀙𑀦𑁆𑀤𑀫𑁆𑀧𑀺 𑀤𑀸𑀢𑀼𑀁, 𑀲𑀦𑁆𑀢𑀺 𑀲𑀗𑁆𑀖𑀲𑁆𑀲 𑀓𑀭𑀡𑀻𑀬’’𑀦𑁆𑀢𑀺 (𑀫𑀳𑀸𑀯. 𑁧𑁬𑁫) 𑀯𑀼𑀢𑁆𑀢𑀢𑁆𑀢𑀸 𑀪𑀕𑀯𑀢𑁄 𑀆𑀡𑀁 𑀓𑀭𑁄𑀦𑁆𑀢𑁂𑀦 ‘‘𑀙𑀦𑁆𑀤𑀁 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑀁. ‘‘𑀙𑀦𑁆𑀤𑀳𑀸𑀭𑀓𑁄 𑀘𑁂, 𑀪𑀺𑀓𑁆𑀔𑀯𑁂, 𑀤𑀺𑀦𑁆𑀦𑁂 𑀙𑀦𑁆𑀤𑁂 𑀢𑀢𑁆𑀣𑁂𑀯 𑀧𑀓𑁆𑀓𑀫𑀢𑀺, 𑀅𑀜𑁆𑀜𑀲𑁆𑀲 𑀤𑀸𑀢𑀩𑁆𑀩𑁄 𑀙𑀦𑁆𑀤𑁄’’𑀢𑀺𑀆𑀤𑀺𑀯𑀘𑀦𑀢𑁄 (𑀫𑀳𑀸𑀯. 𑁧𑁬𑁫) 𑀧𑀼𑀦 𑀅𑀢𑁆𑀢𑀦𑁄 𑀙𑀦𑁆𑀤𑀤𑀸𑀦𑀧𑀭𑀺𑀲𑁆𑀲𑀫𑀯𑀺𑀦𑁄𑀤𑀦𑀢𑁆𑀣𑀁 ‘‘𑀙𑀦𑁆𑀤𑀁 𑀫𑁂 𑀳𑀭𑀸’’𑀢𑀺 𑀯𑀼𑀢𑁆𑀢𑀁. ‘‘𑀙𑀦𑁆𑀤𑀳𑀸𑀭𑀓𑁄 𑀘𑁂, 𑀪𑀺𑀓𑁆𑀔𑀯𑁂, 𑀤𑀺𑀦𑁆𑀦𑁂 𑀙𑀦𑁆𑀤𑁂 𑀲𑀗𑁆𑀖𑀧𑁆𑀧𑀢𑁆𑀢𑁄 𑀲𑀜𑁆𑀘𑀺𑀘𑁆𑀘 𑀦 𑀆𑀭𑁄𑀘𑁂𑀢𑀺, 𑀆𑀳𑀝𑁄 𑀳𑁄𑀢𑀺 𑀙𑀦𑁆𑀤𑁄, 𑀙𑀦𑁆𑀤𑀳𑀸𑀭𑀓𑀲𑁆𑀲 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁧𑁬𑁫) 𑀯𑀼𑀢𑁆𑀢𑀢𑁆𑀢𑀸 𑀤𑀼𑀓𑁆𑀓𑀝𑀢𑁄 𑀢𑀁 𑀫𑁄𑀘𑁂𑀢𑀼𑀁 ‘‘𑀙𑀦𑁆𑀤𑀁 𑀫𑁂 𑀆𑀭𑁄𑀘𑁂𑀳𑀻’’𑀢𑀺 𑀯𑀼𑀢𑁆𑀢𑀁.

𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀉𑀪𑀬𑁂𑀦 𑀯𑀸 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑁄𑀢𑀺 𑀫𑀦𑀲𑀸 𑀘𑀺𑀦𑁆𑀢𑁂𑀢𑁆𑀯𑀸 𑀓𑀸𑀬𑀧𑁆𑀧𑀬𑁄𑀕𑀁 𑀓𑀭𑁄𑀦𑁆𑀢𑁂𑀦 𑀬𑁂𑀦 𑀓𑁂𑀦𑀘𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀦 𑀯𑀸, 𑀯𑀸𑀘𑀁 𑀧𑀦 𑀦𑀺𑀘𑁆𑀙𑀸𑀭𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑁂𑀦 𑀢𑀣𑁂𑀯 𑀯𑀸𑀘𑀸𑀬 𑀯𑀸, 𑀉𑀪𑀬𑀣𑀸𑀧𑀺 𑀲𑀓𑁆𑀓𑁄𑀦𑁆𑀢𑁂𑀦 𑀓𑀸𑀬𑀯𑀸𑀘𑀸𑀳𑀺 𑀯𑀸 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑁄, 𑀚𑀸𑀦𑀸𑀧𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. ‘‘𑀅𑀬𑀁 𑀅𑀢𑁆𑀣𑁄’’𑀢𑀺 𑀯𑀘𑀦𑀢𑁄 𑀧𑀦 𑀬𑀸𑀬 𑀓𑀸𑀬𑀘𑀺𑀧𑀺 𑀪𑀸𑀲𑀸𑀬 𑀯𑀺𑀜𑁆𑀜𑀸𑀧𑁂𑀢𑀼𑀁 𑀯𑀝𑁆𑀝𑀢𑀺, 𑀧𑀸𑀭𑀺𑀲𑀼𑀤𑁆𑀥𑀺𑀤𑀸𑀦𑁂𑀧𑀺 𑀙𑀦𑁆𑀤𑀤𑀸𑀦𑁂 𑀯𑀼𑀢𑁆𑀢𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄. 𑀢𑀁 𑀧𑀦 𑀤𑁂𑀦𑁆𑀢𑁂𑀦 𑀧𑀞𑀫𑀁 𑀲𑀦𑁆𑀢𑀻 𑀆𑀧𑀢𑁆𑀢𑀺 𑀤𑁂𑀲𑁂𑀢𑀩𑁆𑀩𑀸. 𑀦 𑀳𑀺 𑀲𑀸𑀧𑀢𑁆𑀢𑀺𑀓𑁄 𑀲𑀫𑀸𑀦𑁄 ‘‘𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑀫𑁆𑀫𑀺, 𑀧𑀸𑀭𑀺𑀲𑀼𑀤𑁆𑀥𑀺𑀁 𑀫𑁂 𑀳𑀭, 𑀧𑀸𑀭𑀺𑀲𑀼𑀤𑁆𑀥𑀺𑀁 𑀫𑁂 𑀆𑀭𑁄𑀘𑁂𑀳𑀻’’𑀢𑀺 (𑀫𑀳𑀸𑀯. 𑁧𑁬𑁪) 𑀯𑀢𑁆𑀢𑀼𑀁 𑀮𑀪𑀢𑀺. ‘‘𑀲𑀦𑁆𑀢𑀺 𑀲𑀗𑁆𑀖𑀲𑁆𑀲 𑀓𑀭𑀡𑀻𑀬𑀸𑀦𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦 ‘‘𑀲𑀦𑁆𑀢𑀺 𑀲𑀗𑁆𑀖𑀲𑁆𑀲 𑀓𑀭𑀡𑀻𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀲𑀜𑁆𑀘 𑀅𑀢𑁆𑀢𑀦𑁄 𑀘 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑁂𑀢𑀻𑀢𑀺 𑀏𑀢𑁆𑀣 𑀙𑀦𑁆𑀤𑁄 𑀘 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺 𑀘 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺, 𑀢𑀁 𑀤𑁂𑀢𑀻𑀢𑀺 𑀲𑀭𑀽𑀧𑁂𑀓𑀲𑁂𑀲𑀦𑀬𑁂𑀦 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀇𑀢𑀭𑀸𑀢𑀺 𑀅𑀜𑁆𑀜𑁂𑀲𑀁 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺. 𑀩𑀺𑀴𑀸𑀮𑀲𑀗𑁆𑀔𑀮𑀺𑀓𑀸 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀻𑀢𑀺 𑀏𑀢𑁆𑀣 𑀩𑀺𑀴𑀸𑀮𑀲𑀗𑁆𑀔𑀮𑀺𑀓𑀸 𑀦𑀸𑀫 𑀩𑀺𑀴𑀸𑀮𑀩𑀦𑁆𑀥𑀦𑀁. 𑀢𑀢𑁆𑀣 𑀳𑀺 𑀲𑀗𑁆𑀔𑀮𑀺𑀓𑀸𑀬 𑀧𑀞𑀫𑀯𑀮𑀬𑀁 𑀤𑀼𑀢𑀺𑀬𑀯𑀮𑀬𑀁𑀬𑁂𑀯 𑀧𑀸𑀧𑀼𑀡𑀸𑀢𑀺, 𑀦 𑀢𑀢𑀺𑀬𑀁, 𑀏𑀯𑀫𑀬𑀫𑁆𑀧𑀺 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺 𑀤𑀸𑀬𑀓𑁂𑀦 𑀬𑀲𑁆𑀲 𑀤𑀺𑀦𑁆𑀦𑀸, 𑀢𑀢𑁄 𑀅𑀜𑁆𑀜𑀢𑁆𑀣 𑀦 𑀕𑀘𑁆𑀙𑀢𑀻𑀢𑀺 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁬𑁪; 𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁬𑁪). 𑀢𑀲𑁆𑀫𑀸 𑀲𑀸 𑀩𑀺𑀴𑀸𑀮𑀲𑀗𑁆𑀔𑀮𑀺𑀓𑀲𑀤𑀺𑀲𑀢𑁆𑀢𑀸 ‘‘𑀩𑀺𑀴𑀸𑀮𑀲𑀗𑁆𑀔𑀮𑀺𑀓𑀸’’𑀢𑀺 𑀯𑀼𑀢𑁆𑀢𑀸. 𑀩𑀺𑀴𑀸𑀮𑀲𑀗𑁆𑀔𑀮𑀺𑀓𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀬𑀸𑀲𑀁 𑀓𑀸𑀲𑀜𑁆𑀘𑀺 𑀲𑀗𑁆𑀔𑀮𑀺𑀓𑀸𑀦𑀁 𑀉𑀧𑀮𑀓𑁆𑀔𑀡𑀫𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀉𑀢𑀼𑀓𑁆𑀔𑀸𑀦𑀦𑁆𑀢𑀺 𑀢𑀁 𑀢𑀁 𑀓𑀺𑀭𑀺𑀬𑀁 𑀅𑀭𑀢𑀺 𑀯𑀢𑁆𑀢𑁂𑀢𑀻𑀢𑀺 𑀉𑀢𑀼, 𑀢𑀲𑁆𑀲 𑀅𑀓𑁆𑀔𑀸𑀦𑀁 𑀉𑀢𑀼𑀓𑁆𑀔𑀸𑀦𑀁, 𑀉𑀢𑀼𑀆𑀘𑀺𑀓𑁆𑀔𑀦𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸 𑀘 𑀢𑀲𑁆𑀲 𑀆𑀘𑀺𑀓𑁆𑀔𑀦𑀁, 𑀢𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀳𑁂𑀫𑀦𑁆𑀢𑀸𑀤𑀻𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀕𑀡𑀦𑀸𑀢𑀺 𑀓𑀮𑀦𑀸. 𑀪𑀺𑀓𑁆𑀔𑀼𑀦𑀻𑀦𑀁 𑀅𑀝𑁆𑀞𑀕𑀭𑀼𑀥𑀫𑁆𑀫𑁂𑀳𑀺 𑀑𑀯𑀤𑀦𑀁 𑀪𑀺𑀓𑁆𑀔𑀼𑀦𑁄𑀯𑀸𑀤𑁄. 𑀲𑁆𑀯𑁂 𑀉𑀧𑁄𑀲𑀣𑁄𑀢𑀺 𑀆𑀕𑀦𑁆𑀢𑁆𑀯𑀸𑀢𑀺 ‘‘𑀲𑁆𑀯𑁂 𑀉𑀧𑁄𑀲𑀣𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑁂 𑀅𑀚𑁆𑀚𑁂𑀯 𑀆𑀕𑀦𑁆𑀢𑁆𑀯𑀸 𑀧𑀦𑁆𑀦𑀭𑀲𑀺𑀓𑁂 𑀉𑀧𑁄𑀲𑀣𑁂 𑀧𑀓𑁆𑀔𑀲𑁆𑀲 𑀘𑀸𑀢𑀼𑀤𑁆𑀤𑀲𑀺𑀬𑀁, 𑀘𑀸𑀢𑀼𑀤𑁆𑀤𑀲𑀺𑀓𑁂 𑀢𑁂𑀭𑀲𑀺𑀬𑀁 𑀆𑀕𑀦𑁆𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀧𑀓𑁆𑀔𑀲𑁆𑀲 𑀢𑁂𑀭𑀲𑀺𑀬𑀁𑀬𑁂𑀯 𑀆𑀕𑀦𑁆𑀢𑁆𑀯𑀸 ‘𑀅𑀬𑀁 𑀉𑀧𑁄𑀲𑀣𑁄 𑀘𑀸𑀢𑀼𑀤𑁆𑀤𑀲𑀺𑀓𑁄 𑀯𑀸 𑀧𑀦𑁆𑀦𑀭𑀲𑀺𑀓𑁄 𑀯𑀸’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀘𑀺. 𑀅𑀝𑁆𑀞. 𑁧𑁪𑁯) 𑀯𑀼𑀢𑁆𑀢𑀁. 𑀏𑀯𑀁 𑀧𑀼𑀘𑁆𑀙𑀺𑀢𑁂𑀦 𑀘 𑀪𑀺𑀓𑁆𑀔𑀼𑀦𑀸 𑀲𑀘𑁂 𑀘𑀸𑀢𑀼𑀤𑁆𑀤𑀲𑀺𑀬𑀁 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, ‘‘𑀘𑀸𑀢𑀼𑀤𑁆𑀤𑀲𑀺𑀓𑁄 𑀪𑀕𑀺𑀦𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀧𑀦𑁆𑀦𑀭𑀲𑀺𑀬𑀁 𑀓𑀭𑁄𑀦𑁆𑀢𑀺, ‘‘𑀧𑀦𑁆𑀦𑀭𑀲𑀺𑀓𑁄 𑀪𑀕𑀺𑀦𑀻’’𑀢𑀺 𑀯𑀢𑁆𑀢𑀩𑁆𑀩𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀞𑀧𑁂𑀢𑁆𑀯𑀸 𑀩𑀸𑀮𑀁, 𑀞𑀧𑁂𑀢𑁆𑀯𑀸 𑀕𑀺𑀮𑀸𑀦𑀁, 𑀞𑀧𑁂𑀢𑁆𑀯𑀸 𑀕𑀫𑀺𑀓𑀁 𑀅𑀯𑀲𑁂𑀲𑁂𑀳𑀺 𑀑𑀯𑀸𑀤𑀁 𑀕𑀳𑁂𑀢𑀼’’𑀦𑁆𑀢𑀺 (𑀘𑀽𑀴𑀯. 𑁪𑁧𑁪) 𑀯𑀼𑀢𑁆𑀢𑀢𑁆𑀢𑀸 ‘‘𑀢𑀁 𑀞𑀧𑁂𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀭𑁄𑀘𑀦𑀯𑀺𑀥𑀸𑀦𑀁 𑀅𑀚𑀸𑀦𑀦𑁆𑀢𑁄 𑀩𑀸𑀮𑁄. 𑀘𑀸𑀢𑀼𑀤𑁆𑀤𑀲𑀺𑀓𑀧𑀦𑁆𑀦𑀭𑀲𑀺𑀓𑁂𑀲𑀼 𑀉𑀧𑁄𑀲𑀣𑁂𑀲𑀼 𑀯𑀸 𑀧𑀸𑀝𑀺𑀧𑀤𑁂 𑀯𑀸 𑀕𑀦𑁆𑀢𑀼𑀓𑀸𑀫𑁄 𑀕𑀫𑀺𑀬𑁄, 𑀤𑀼𑀢𑀺𑀬𑀧𑀓𑁆𑀔𑀤𑀺𑀯𑀲𑀢𑁄 𑀧𑀦 𑀧𑀝𑁆𑀞𑀸𑀬 𑀢𑀢𑁄 𑀉𑀤𑁆𑀥𑀁 𑀕𑀘𑁆𑀙𑀦𑁆𑀢𑁄 𑀇𑀥 𑀕𑀫𑀺𑀬𑁄 𑀦𑀸𑀫 𑀦 𑀳𑁄𑀢𑀺. 𑀅𑀭𑀜𑁆𑀜𑁂 𑀦𑀺𑀯𑀸𑀲𑁄 𑀅𑀲𑁆𑀲𑀸𑀢𑀺 𑀆𑀭𑀜𑁆𑀜𑀺𑀓𑁄. 𑀲𑁄𑀧𑀺 ‘‘𑀅𑀳𑀁 𑀅𑀭𑀜𑁆𑀜𑀯𑀸𑀲𑀻, 𑀲𑁆𑀯𑁂 𑀉𑀧𑁄𑀲𑀣𑁄, 𑀯𑀺𑀳𑀸𑀭𑁂 𑀦 𑀯𑀲𑀸𑀫𑀻’’𑀢𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀼𑀁 𑀦 𑀮𑀪𑀢𑀺. 𑀬𑀤𑀺 𑀦 𑀕𑀡𑁆𑀳𑁂𑀬𑁆𑀬, 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑁂𑀬𑁆𑀬. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀦, 𑀪𑀺𑀓𑁆𑀔𑀯𑁂, 𑀑𑀯𑀸𑀤𑁄 𑀦 𑀕𑀳𑁂𑀢𑀩𑁆𑀩𑁄, 𑀬𑁄 𑀦 𑀕𑀡𑁆𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁪𑁧𑁪). 𑀢𑁂𑀦 𑀧𑀦 𑀧𑀘𑁆𑀘𑀸𑀳𑀭𑀡𑀢𑁆𑀣𑀸𑀬 𑀲𑀗𑁆𑀓𑁂𑀢𑁄 𑀓𑀸𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀭𑀜𑁆𑀜𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀑𑀯𑀸𑀤𑀁 𑀕𑀳𑁂𑀢𑀼𑀁, 𑀲𑀗𑁆𑀓𑁂𑀢𑀜𑁆𑀘 𑀓𑀸𑀢𑀼𑀁 𑀅𑀢𑁆𑀭 𑀧𑀢𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺 (𑀘𑀽𑀴𑀯. 𑁪𑁧𑁫). 𑀢𑀲𑁆𑀫𑀸 𑀆𑀭𑀜𑁆𑀜𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀘𑁂 𑀪𑀺𑀓𑁆𑀔𑀼𑀦𑀻𑀦𑀁 𑀯𑀲𑀦𑀕𑀸𑀫𑁂 𑀪𑀺𑀓𑁆𑀔𑀸 𑀮𑀩𑁆𑀪𑀢𑀺, 𑀢𑀢𑁆𑀣𑁂𑀯 𑀘𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀤𑀺𑀲𑁆𑀯𑀸 𑀆𑀭𑁄𑀘𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀦𑁄 𑀘𑀲𑁆𑀲 𑀢𑀢𑁆𑀣 𑀪𑀺𑀓𑁆𑀔𑀸 𑀲𑀼𑀮𑀪𑀸 𑀳𑁄𑀢𑀺, 𑀲𑀸𑀫𑀦𑁆𑀢𑀕𑀸𑀫𑁂 𑀘𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀕𑀸𑀫𑀁 𑀆𑀕𑀫𑁆𑀫 𑀢𑀣𑁂𑀯 𑀓𑀸𑀢𑀩𑁆𑀩𑀁. 𑀲𑀘𑁂 𑀤𑀽𑀭𑀁 𑀕𑀦𑁆𑀢𑀩𑁆𑀩𑀁 𑀳𑁄𑀢𑀺, 𑀲𑀗𑁆𑀓𑁂𑀢𑁄 𑀓𑀸𑀢𑀩𑁆𑀩𑁄 ‘‘𑀅𑀳𑀁 𑀅𑀲𑀼𑀓𑀁 𑀦𑀸𑀫 𑀢𑀼𑀫𑁆𑀳𑀸𑀓𑀁 𑀕𑀸𑀫𑀤𑁆𑀯𑀸𑀭𑁂 𑀲𑀪𑀁 𑀯𑀸 𑀫𑀡𑁆𑀟𑀧𑀁 𑀯𑀸 𑀭𑀼𑀓𑁆𑀔𑀫𑀽𑀮𑀁 𑀯𑀸 𑀉𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀺, 𑀢𑀢𑁆𑀭 𑀆𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺. 𑀪𑀺𑀓𑁆𑀔𑀼𑀦𑀻𑀳𑀺 𑀢𑀢𑁆𑀭 𑀕𑀦𑁆𑀢𑀩𑁆𑀩𑀁, 𑀅𑀕𑀦𑁆𑀢𑀼𑀁 𑀦 𑀮𑀩𑁆𑀪𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑀸 𑀲𑀗𑁆𑀓𑁂𑀢𑀁 𑀦 𑀕𑀦𑁆𑀢𑀩𑁆𑀩𑀁, 𑀬𑀸 𑀦 𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁪𑁧𑁫). 𑀉𑀧𑁄𑀲𑀣𑀕𑁆𑀕𑁂𑀢𑀺 𑀉𑀧𑁄𑀲𑀣𑀓𑀭𑀡𑀝𑁆𑀞𑀸𑀦𑁂. 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀻𑀢𑀺 𑁋

‘‘𑀲𑀻𑀮𑀯𑀸 𑀳𑁄𑀢𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄, 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺 𑀲𑀼𑀢𑀥𑀭𑁄 𑀲𑀼𑀢𑀲𑀦𑁆𑀦𑀺𑀘𑀬𑁄, 𑀬𑁂 𑀢𑁂 𑀥𑀫𑁆𑀫𑀸 𑀆𑀤𑀺𑀓𑀮𑁆𑀬𑀸𑀡𑀸 𑀫𑀚𑁆𑀛𑁂𑀓𑀮𑁆𑀬𑀸𑀡𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀪𑀺𑀯𑀤𑀦𑁆𑀢𑀺, 𑀢𑀣𑀸𑀭𑀽𑀧𑀸𑀲𑁆𑀲 𑀥𑀫𑁆𑀫𑀸 𑀩𑀳𑀼𑀲𑁆𑀲𑀼𑀢𑀸 𑀳𑁄𑀦𑁆𑀢𑀺, 𑀥𑀸𑀢𑀸 𑀯𑀘𑀲𑀸 𑀧𑀭𑀺𑀘𑀺𑀢𑀸, 𑀫𑀦𑀲𑀸 𑀅𑀦𑀼𑀧𑁂𑀓𑁆𑀔𑀺𑀢𑀸, 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸. 𑀉𑀪𑀬𑀸𑀦𑀺 𑀔𑁄 𑀧𑀦𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀸𑀦𑀺 𑀯𑀺𑀢𑁆𑀣𑀸𑀭𑁂𑀦 𑀲𑁆𑀯𑀸𑀕𑀢𑀸𑀦𑀺 𑀳𑁄𑀦𑁆𑀢𑀺 𑀲𑀼𑀯𑀺𑀪𑀢𑁆𑀢𑀸𑀦𑀺 𑀲𑀼𑀧𑁆𑀧𑀯𑀢𑁆𑀢𑀻𑀦𑀺 𑀲𑀼𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑀲𑀼𑀢𑁆𑀢𑀲𑁄 𑀅𑀦𑀼𑀩𑁆𑀬𑀜𑁆𑀚𑀦𑀲𑁄. 𑀓𑀮𑁆𑀬𑀸𑀡𑀯𑀸𑀘𑁄 𑀳𑁄𑀢𑀺 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄. 𑀬𑁂𑀪𑀼𑀬𑁆𑀬𑁂𑀦 𑀪𑀺𑀓𑁆𑀔𑀼𑀦𑀻𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄. 𑀧𑀝𑀺𑀩𑀮𑁄 𑀳𑁄𑀢𑀺 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀺𑀢𑀼𑀁. 𑀦 𑀔𑁄 𑀧𑀦𑁂𑀢𑀁 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑀸𑀬 𑀓𑀸𑀲𑀸𑀬𑀯𑀢𑁆𑀣𑀯𑀲𑀦𑀸𑀬 𑀕𑀭𑀼𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑀧𑀼𑀩𑁆𑀩𑁄 𑀳𑁄𑀢𑀺. 𑀯𑀻𑀲𑀢𑀺𑀯𑀲𑁆𑀲𑁄 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀯𑀻𑀲𑀢𑀺𑀯𑀲𑁆𑀲𑁄 𑀯𑀸’’𑀢𑀺 (𑀧𑀸𑀘𑀺. 𑁧𑁪𑁭) 𑁋

𑀇𑀫𑁂𑀳𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺. 𑀧𑀸𑀲𑀸𑀤𑀺𑀓𑁂𑀦𑀸𑀢𑀺 𑀧𑀲𑀸𑀤𑀸𑀯𑀳𑁂𑀦 𑀦𑀺𑀤𑁆𑀤𑁄𑀲𑁂𑀦 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑁂𑀦. 𑀲𑀫𑁆𑀧𑀸𑀤𑁂𑀢𑀽𑀢𑀺 𑀢𑀺𑀯𑀺𑀥𑀁 𑀲𑀺𑀓𑁆𑀔𑀁 𑀲𑀫𑁆𑀧𑀸𑀤𑁂𑀢𑀼. 𑀬𑀤𑀸 𑀧𑀦 𑀢𑀸𑀳𑀺 𑀪𑀺𑀓𑁆𑀔𑀼𑀦𑀻𑀳𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑀁𑀬𑁂𑀯 𑀤𑀺𑀲𑁆𑀯𑀸 𑀑𑀯𑀸𑀤𑁄 𑀬𑀸𑀘𑀺𑀢𑁄, 𑀢𑀤𑀸 𑀉𑀧𑁄𑀲𑀣𑀕𑁆𑀕𑁂 𑀲𑀦𑁆𑀦𑀺𑀧𑀢𑀺𑀢𑁂𑀳𑀺 𑀪𑀺𑀓𑁆𑀔𑀼𑀲𑀗𑁆𑀖𑁂𑀳𑀺 𑀧𑀼𑀩𑁆𑀩𑀓𑀺𑀘𑁆𑀘𑀯𑀲𑁂𑀦 ‘‘𑀅𑀢𑁆𑀣𑀺 𑀓𑀸𑀘𑀺 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀸𑀤𑀁 𑀬𑀸𑀘𑀫𑀸𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁂 ‘‘𑀏𑀯𑀁 𑀯𑀤𑁂𑀳𑀻’’𑀢𑀺 𑀅𑀢𑁆𑀢𑀦𑀸 𑀯𑀢𑁆𑀢𑀩𑁆𑀩𑀯𑀘𑀦𑀁 𑀅𑀜𑁆𑀜𑁂𑀦 𑀓𑀣𑀸𑀧𑁂𑀢𑁆𑀯𑀸 ‘‘𑀅𑀢𑁆𑀣𑀺 𑀓𑁄𑀘𑀺 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄 𑀲𑀫𑁆𑀫𑀢𑁄’’𑀢𑀺𑀆𑀤𑀺𑀁 𑀲𑀬𑀁 𑀯𑀢𑁆𑀯𑀸 𑀧𑀼𑀦 𑀲𑀬𑀫𑁂𑀯 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀆𑀭𑁄𑀘𑁂𑀢𑀩𑁆𑀩𑀁. 𑀅𑀜𑁆𑀜𑁂𑀦 𑀯𑀸 𑀪𑀺𑀓𑁆𑀔𑀼𑀦𑀸 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀸𑀧𑁂𑀢𑀩𑁆𑀩𑀁. 𑀇𑀤𑀦𑁆𑀢𑀺 ‘‘𑀢𑀸𑀳𑀻’’𑀢𑀺 𑀩𑀳𑀼𑀯𑀘𑀦𑀁. 𑀏𑀓𑀢𑁄 𑀲𑀳𑁂𑀯.

𑀜𑀢𑁆𑀢𑀺𑀝𑁆𑀞𑀧𑀓𑁂𑀦 𑀯𑀸𑀢𑀺 𑀬𑀢𑁆𑀣 𑀢𑀺𑀡𑁆𑀡𑀁 𑀯𑀲𑀦𑀝𑁆𑀞𑀸𑀦𑁂 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀦𑀢𑁆𑀣𑀺, 𑀢𑀢𑁆𑀣 𑀜𑀢𑁆𑀢𑀺𑀝𑁆𑀞𑀧𑀦𑀓𑁂𑀦 𑀯𑀸. 𑀇𑀢𑀭𑁂𑀦 𑀯𑀸𑀢𑀺 𑀬𑀢𑁆𑀣 𑀤𑁆𑀯𑁂 𑀪𑀺𑀓𑁆𑀔𑀽 𑀯𑀲𑀦𑁆𑀢𑀺, 𑀏𑀓𑁄 𑀯𑀸, 𑀢𑀢𑁆𑀣 𑀇𑀢𑀭𑁂𑀦 𑀯𑀸 𑀪𑀺𑀓𑁆𑀔𑀼𑀦𑀸 𑀲𑀘𑁂 𑀲𑀬𑀫𑁂𑀯 𑀲𑀫𑁆𑀫𑀢𑁄, ‘‘𑀅𑀳’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. 𑀢𑀣𑁂𑀯𑀸𑀢𑀺 𑀉𑀧𑁄𑀲𑀣𑀕𑁆𑀕𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯. ‘‘𑀆𑀭𑁄𑀘𑁂𑀢𑁆𑀯𑀸𑀯𑀸’’𑀢𑀺 𑀇𑀫𑀺𑀦𑀸 𑀅𑀦𑀸𑀭𑁄𑀘𑀦𑀁 𑀧𑀝𑀺𑀓𑁆𑀔𑀺𑀧𑀢𑀺. ‘‘𑀦, 𑀪𑀺𑀓𑁆𑀔𑀯𑁂, 𑀑𑀯𑀸𑀤𑁄 𑀦 𑀆𑀭𑁄𑀘𑁂𑀢𑀩𑁆𑀩𑁄, 𑀬𑁄 𑀦 𑀆𑀭𑁄𑀘𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁪𑁧𑁫) 𑀯𑀘𑀦𑀢𑁄 𑀑𑀯𑀸𑀤𑀁 𑀕𑀳𑁂𑀢𑁆𑀯𑀸 𑀉𑀧𑁄𑀲𑀣𑀕𑁆𑀕𑁂 𑀅𑀦𑀸𑀭𑁄𑀘𑁂𑀢𑀼𑀁 𑀦 𑀯𑀝𑁆𑀝𑀢𑀺.

𑀧𑀭𑀺𑀲𑀼𑀤𑁆𑀥𑀪𑀸𑀯𑀦𑁆𑀢𑀺 𑀆𑀧𑀢𑁆𑀢𑀺𑀬𑀸 𑀧𑀭𑀺𑀲𑀼𑀤𑁆𑀥𑀢𑀁. 𑀆𑀭𑁄𑀘𑁂𑀣𑀸𑀢𑀺 𑀆𑀯𑀺 𑀓𑀭𑁄𑀣. 𑀏𑀢𑁆𑀣 𑀲𑀺𑀬𑀸𑀢𑀺 ‘‘𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀏𑀢𑀲𑁆𑀫𑀺𑀁 𑀧𑀤𑁂 𑀅𑀬𑀫𑀦𑀼𑀬𑁄𑀕𑁄 𑀪𑀯𑁂𑀬𑁆𑀬. 𑀓𑀺𑀁 𑀢𑀁, 𑀬𑀁 𑀲𑀺𑀬𑀸𑀢𑀺 𑀆𑀳 ‘‘𑀲𑀗𑁆𑀖𑁄 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸’’𑀢𑀺𑀆𑀤𑀺. 𑀧𑀼𑀩𑁆𑀩𑁂𑀦𑀸𑀧𑀭𑀁 𑀲𑀦𑁆𑀥𑀺𑀬𑀢𑀻𑀢𑀺 𑀧𑀼𑀩𑁆𑀩𑀯𑀘𑀦𑁂𑀦 𑀅𑀧𑀭𑀁 𑀯𑀘𑀦𑀁 𑀲𑀦𑁆𑀥𑀸𑀦𑀁 𑀕𑀘𑁆𑀙𑀢𑀺. 𑀲𑀸𑀫𑀕𑁆𑀕𑀺𑀬𑀸𑀢𑀺 𑀓𑀸𑀬𑀘𑀺𑀢𑁆𑀢𑁂𑀳𑀺 𑀲𑀳𑀺𑀢𑀢𑀸𑀬. 𑀕𑀡𑀲𑁆𑀲𑀸𑀢𑀺 𑀉𑀤𑁆𑀤𑁂𑀲𑀓𑀁 𑀞𑀧𑁂𑀢𑁆𑀯𑀸 𑀘𑀢𑀼𑀯𑀕𑁆𑀕𑁂 𑀲𑁂𑀲𑀪𑀺𑀓𑁆𑀔𑀽𑀦𑀁. 𑀲𑀗𑁆𑀖𑀲𑁆𑀲 𑀉𑀤𑁆𑀤𑀺𑀝𑁆𑀞𑀁 𑀳𑁄𑀢𑀻𑀢𑀺 𑀲𑀗𑁆𑀖𑁂𑀦 𑀉𑀤𑁆𑀤𑀺𑀝𑁆𑀞𑀁 𑀳𑁄𑀢𑀺. 𑀓𑀭𑀡𑀢𑁆𑀣𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀏𑀢𑁆𑀣𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂. 𑀮𑀓𑁆𑀔𑀡𑀦𑁆𑀢𑀺 𑀲𑀪𑀸𑀯𑁄.

𑀣𑁂𑀭𑀸 𑀘 𑀦𑀯𑀸 𑀘 𑀫𑀚𑁆𑀛𑀺𑀫𑀸 𑀘𑀸𑀢𑀺 𑀏𑀢𑁆𑀣 𑀤𑀲𑀯𑀲𑁆𑀲𑀸, 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑀸 𑀘 𑀣𑁂𑀭𑀸. 𑀊𑀦𑀧𑀜𑁆𑀘𑀯𑀲𑁆𑀲𑀸 𑀦𑀯𑀸. 𑀧𑀜𑁆𑀘𑀯𑀲𑁆𑀲𑀸, 𑀅𑀢𑀺𑀭𑁂𑀓𑀧𑀜𑁆𑀘𑀯𑀲𑁆𑀲𑀸 𑀘 𑀫𑀚𑁆𑀛𑀺𑀫𑀸. 𑀅𑀝𑁆𑀞𑀺𑀁 𑀓𑀢𑁆𑀯𑀸𑀢𑀺 𑀅𑀢𑁆𑀢𑀸𑀦𑀁 𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑁂𑀦 𑀅𑀢𑁆𑀣𑀺𑀓𑀁 𑀓𑀢𑁆𑀯𑀸, 𑀢𑀁 𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 ‘‘𑀇𑀤𑀁 𑀫𑀬𑁆𑀳𑀁 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 𑀅𑀢𑁆𑀣𑀺𑀁 𑀓𑀢𑁆𑀯𑀸. 𑀫𑀦𑀲𑀺 𑀓𑀭𑀺𑀢𑁆𑀯𑀸𑀢𑀺 𑀘𑀺𑀢𑁆𑀢𑁂 𑀞𑀧𑁂𑀢𑁆𑀯𑀸. 𑀲𑁄𑀢𑀤𑁆𑀯𑀸𑀭𑀯𑀲𑁂𑀦𑀸𑀢𑀺 𑀲𑁄𑀢𑀤𑁆𑀯𑀸𑀭𑀺𑀓𑀚𑀯𑀦𑀯𑀺𑀜𑁆𑀜𑀸𑀡𑀯𑀲𑁂𑀦. 𑀲𑀩𑁆𑀩𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀸𑀫𑀸𑀢𑀺 𑀘𑀺𑀢𑁆𑀢𑀲𑁆𑀲 𑀣𑁄𑀓𑀫𑁆𑀧𑀺 𑀩𑀳𑀺 𑀕𑀦𑁆𑀢𑀼𑀁 𑀅𑀤𑁂𑀦𑁆𑀢𑀸 𑀲𑀩𑁆𑀩𑁂𑀦 𑀘𑀺𑀢𑁆𑀢𑁂𑀦 𑀆𑀯𑀚𑁆𑀚𑁂𑀫, 𑀲𑀮𑁆𑀮𑀓𑁆𑀔𑁂𑀫𑀸𑀢𑀺 𑀅𑀢𑁆𑀣𑁄. 𑀫𑀦𑀲𑀺 𑀓𑀭𑁄𑀫𑀸𑀢𑀺 𑀆𑀯𑀚𑁆𑀚𑁂𑀫, 𑀲𑀫𑀦𑁆𑀦𑀸𑀳𑀭𑀸𑀫𑀸𑀢𑀺 𑀅𑀢𑁆𑀣𑁄. 𑀲𑁄 𑀘 𑀔𑁄 𑀫𑀦𑀲𑀺𑀓𑀸𑀭𑁄 𑀦 𑀏𑀢𑁆𑀣 𑀆𑀭𑀫𑁆𑀫𑀡𑀧𑁆𑀧𑀝𑀺𑀧𑀸𑀤𑀦𑀮𑀓𑁆𑀔𑀡𑁄, 𑀅𑀣 𑀔𑁄 𑀯𑀻𑀣𑀺𑀧𑁆𑀧𑀝𑀺𑀧𑀸𑀤𑀦𑀚𑀯𑀦𑀧𑁆𑀧𑀝𑀺𑀧𑀸𑀤𑀦𑀫𑀦𑀲𑀺𑀓𑀸𑀭𑀧𑀼𑀩𑁆𑀩𑀓𑀘𑀺𑀢𑁆𑀢𑁂 𑀞𑀧𑀦𑀮𑀓𑁆𑀔𑀡𑁄𑀢𑀺 𑀆𑀳 ‘‘𑀏𑀓𑀕𑁆𑀕𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀘𑀺𑀢𑁆𑀢𑁂 𑀞𑀧𑁂𑀬𑁆𑀬𑀸𑀫𑀸’’𑀢𑀺. 𑀦 𑀲𑀫𑁂𑀢𑀻𑀢𑀺 𑀦 𑀲𑀁𑀕𑀘𑁆𑀙𑀢𑀺. 𑀓𑀲𑁆𑀫𑀸 𑀦 𑀲𑀁𑀕𑀘𑁆𑀙𑀢𑀻𑀢𑀺 𑀆𑀳 ‘‘𑀲𑀫𑀕𑁆𑀕𑀲𑁆𑀲 𑀳𑀻’’𑀢𑀺𑀆𑀤𑀺. 𑀓𑀺𑀜𑁆𑀘 𑀪𑀺𑀬𑁆𑀬𑁄𑀢𑀺 𑀆𑀳 ‘‘𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁄 𑀘𑀸’’𑀢𑀺𑀆𑀤𑀺. 𑀲𑀗𑁆𑀖𑀧𑀭𑀺𑀬𑀸𑀧𑀦𑁆𑀦𑁄𑀢𑀺 𑀲𑀗𑁆𑀖𑁂 𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑁆𑀢𑁄𑀕𑀥𑁄.

𑀇𑀤𑀸𑀦𑀺 𑀢𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀬𑀲𑁆𑀫𑀦𑁆𑀢𑁄𑀢𑀺 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀧𑀺𑀬𑀯𑀘𑀦𑁂𑀦 𑀆𑀮𑀧𑀦𑀁.

𑀅𑀮𑀚𑁆𑀚𑀺𑀢𑀸𑀢𑀺 𑀅𑀮𑀚𑁆𑀚𑀺𑀢𑀸𑀬, 𑀅𑀮𑀚𑁆𑀚𑀦𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀢𑀺𑀬𑀢𑁆𑀣𑁂 𑀳𑀺 𑀇𑀤𑀁 𑀧𑀘𑁆𑀘𑀢𑁆𑀢𑀯𑀘𑀦𑀁. ‘‘𑀅𑀜𑁆𑀜𑀸𑀡𑀢𑀸’’𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑀼𑀓𑁆𑀓𑀼𑀘𑁆𑀘𑀧𑁆𑀧𑀓𑀢𑀢𑀸𑀢𑀺 𑀓𑀼𑀓𑁆𑀓𑀼𑀘𑁆𑀘𑁂𑀦 𑀅𑀪𑀺𑀪𑀽𑀢𑀢𑀸𑀬. 𑀲𑀢𑀺𑀲𑀫𑁆𑀫𑁄𑀲𑀸𑀢𑀺 𑀲𑀢𑀺𑀯𑀺𑀧𑁆𑀧𑀯𑀸𑀲𑀢𑁄. 𑀯𑀻𑀢𑀺𑀓𑁆𑀓𑀫𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑀦𑀁.

𑀲𑀜𑁆𑀘𑀺𑀘𑁆𑀘𑀸𑀢𑀺 𑀲𑀜𑁆𑀘𑁂𑀢𑁂𑀢𑁆𑀯𑀸, 𑀅𑀓𑀧𑁆𑀧𑀺𑀬𑀪𑀸𑀯𑀁 𑀚𑀸𑀦𑀦𑁆𑀢𑁄𑀬𑁂𑀯 𑀯𑀻𑀢𑀺𑀓𑁆𑀓𑀫𑀘𑀺𑀢𑁆𑀢𑀁 𑀧𑁂𑀲𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀕𑀽𑀳𑀢𑀻𑀢𑀺 𑀦𑀺𑀕𑀽𑀳𑀢𑀺 𑀦 𑀤𑁂𑀲𑁂𑀢𑀺 𑀦 𑀯𑀼𑀝𑁆𑀞𑀸𑀢𑀺. 𑀮𑀚𑁆𑀚𑀸𑀬 𑀧𑀭𑀺𑀕𑀽𑀳𑀦𑁆𑀢𑁄 𑀅𑀮𑀚𑁆𑀚𑀻 𑀦 𑀳𑁄𑀢𑀺, ‘‘𑀓𑀺𑀁 𑀇𑀫𑀺𑀦𑀸’’𑀢𑀺 𑀅𑀦𑀸𑀤𑀭𑀺𑀬𑁂𑀦 𑀧𑀭𑀺𑀕𑀽𑀳𑀦𑁆𑀢𑁄 𑀅𑀮𑀚𑁆𑀚𑀻 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀕𑀢𑀺𑀕𑀫𑀦𑀜𑁆𑀘 𑀕𑀘𑁆𑀙𑀢𑀻𑀢𑀺 𑀪𑀡𑁆𑀟𑀪𑀸𑀚𑀦𑀻𑀬𑀝𑁆𑀞𑀸𑀦𑀸𑀤𑀻𑀲𑀼 𑀙𑀦𑁆𑀤𑀸𑀕𑀢𑀺𑀆𑀤𑀺𑀪𑁂𑀤𑀁 𑀅𑀕𑀢𑀺𑀕𑀫𑀦𑀜𑁆𑀘 𑀕𑀘𑁆𑀙𑀢𑀺. 𑀅𑀮𑀚𑁆𑀚𑀺𑀧𑀼𑀕𑁆𑀕𑀮𑁄𑀢𑀺 𑀅𑀚𑁆𑀛𑀢𑁆𑀢𑀺𑀓𑀲𑀫𑀼𑀝𑁆𑀞𑀸𑀦𑀮𑀚𑁆𑀚𑀸𑀯𑀺𑀭𑀳𑀺𑀢𑁄 𑀧𑀼𑀕𑁆𑀕𑀮𑁄. 𑀏𑀢𑁆𑀣 𑀘 ‘‘𑀲𑀜𑁆𑀘𑀺𑀘𑁆𑀘𑀸’’𑀢𑀺 𑀇𑀫𑀺𑀦𑀸 𑀅𑀦𑀸𑀤𑀭𑀺𑀬𑀯𑀲𑁂𑀦𑁂𑀯 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑁄, 𑀆𑀧𑀦𑁆𑀦𑀜𑁆𑀘 𑀆𑀧𑀢𑁆𑀢𑀺𑀁 𑀧𑀭𑀺𑀕𑀽𑀳𑀦𑁆𑀢𑁄, 𑀪𑀡𑁆𑀟𑀪𑀸𑀚𑀦𑀻𑀬𑀝𑁆𑀞𑀸𑀦𑀸𑀤𑀻𑀲𑀼 𑀅𑀕𑀢𑀺𑀕𑀫𑀦𑀁 𑀕𑀘𑁆𑀙𑀦𑁆𑀢𑁄 𑀘 𑀅𑀮𑀚𑁆𑀚𑀻 𑀳𑁄𑀢𑀺, 𑀦 𑀇𑀢𑀭𑁄𑀢𑀺 𑀤𑀲𑁆𑀲𑁂𑀢𑀺.

𑀫𑀦𑁆𑀤𑁄𑀢𑀺 𑀫𑀦𑁆𑀤𑀧𑀜𑁆𑀜𑁄, 𑀅𑀧𑀜𑁆𑀜𑀲𑁆𑀲𑁂𑀯𑁂𑀢𑀁 𑀦𑀸𑀫𑀁. 𑀫𑁄𑀫𑀽𑀳𑁄𑀢𑀺 𑀅𑀢𑀺𑀲𑀁𑀫𑀽𑀴𑁆𑀳𑁄. 𑀯𑀺𑀭𑀸𑀥𑁂𑀢𑀻𑀢𑀺 𑀦 𑀭𑀸𑀥𑁂𑀢𑀺 𑀦 𑀲𑀸𑀥𑁂𑀢𑀺. 𑀓𑀼𑀓𑁆𑀓𑀼𑀘𑁆𑀘𑁂𑀢𑀺 𑀯𑀺𑀦𑀬𑀲𑀁𑀲𑀬𑁂. 𑀓𑀧𑁆𑀧𑀺𑀬𑀁 𑀘𑁂 𑀓𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺 𑀯𑀺𑀦𑀬𑀥𑀭𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦 𑀯𑀢𑁆𑀣𑀼𑀁 𑀑𑀮𑁄𑀓𑁂𑀢𑁆𑀯𑀸 𑀫𑀸𑀢𑀺𑀓𑀁, 𑀧𑀤𑀪𑀸𑀚𑀦𑀁, 𑀅𑀦𑁆𑀢𑀭𑀸𑀧𑀢𑁆𑀢𑀺𑀁, 𑀅𑀦𑀸𑀧𑀢𑁆𑀢𑀺𑀜𑁆𑀘 𑀑𑀮𑁄𑀓𑁂𑀢𑁆𑀯𑀸 ‘‘𑀓𑀧𑁆𑀧𑀢𑀺, 𑀆𑀯𑀼𑀲𑁄, 𑀫𑀸 𑀏𑀢𑁆𑀣 𑀓𑀗𑁆𑀔𑀻’’𑀢𑀺 𑀯𑀼𑀢𑁆𑀢𑁂 𑀓𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬.

𑀲𑀳𑀲𑁂𑀬𑁆𑀬𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀸𑀤𑀻𑀦𑀻𑀢𑀺 𑀏𑀢𑁆𑀣 𑀲𑀳𑀲𑁂𑀬𑁆𑀬𑀸 𑀦𑀸𑀫 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀉𑀢𑁆𑀢𑀭𑀺𑀤𑀺𑀭𑀢𑁆𑀢𑀢𑀺𑀭𑀢𑁆𑀢𑀁 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺, 𑀯𑀺𑀧𑁆𑀧𑀯𑀸𑀲𑁄 𑀦𑀸𑀫 𑀏𑀓𑀭𑀢𑁆𑀢𑀙𑀸𑀭𑀢𑁆𑀢𑀯𑀲𑁂𑀦 𑀯𑀺𑀧𑁆𑀧𑀯𑀸𑀲𑁄. 𑀆𑀤𑀺𑀲𑀤𑁆𑀤𑁂𑀦 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑀸𑀤𑀻𑀲𑀼 𑀆𑀧𑀢𑁆𑀢𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀦𑁆𑀢𑀺 𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀣𑀼𑀮𑁆𑀮𑀘𑁆𑀘𑀬𑀧𑀸𑀘𑀺𑀢𑁆𑀢𑀺𑀬𑀧𑀸𑀝𑀺𑀤𑁂𑀲𑀦𑀻𑀬𑀤𑀼𑀓𑁆𑀓𑀝𑀤𑀼𑀩𑁆𑀪𑀸𑀲𑀺𑀢𑀲𑀗𑁆𑀔𑀸𑀢𑀸𑀦𑀁 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁.

𑀤𑁂𑀲𑁂𑀢𑀼 𑀯𑀸 𑀧𑀓𑀸𑀲𑁂𑀢𑀼 𑀯𑀸𑀢𑀺 𑀲𑀗𑁆𑀖𑀫𑀚𑁆𑀛𑁂 𑀯𑀸 𑀕𑀡𑀫𑀚𑁆𑀛𑁂 𑀯𑀸 𑀏𑀓𑀧𑀼𑀕𑁆𑀕𑀮𑁂 𑀯𑀸 𑀤𑁂𑀲𑁂𑀢𑀼 𑀯𑀸 𑀧𑀓𑀸𑀲𑁂𑀢𑀼 𑀯𑀸. 𑀏𑀢𑁆𑀣 𑀘 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀤𑁂𑀲𑀦𑀸 𑀦𑀸𑀫 𑀪𑀺𑀓𑁆𑀔𑀼𑀪𑀸𑀯𑀲𑁆𑀲 𑀧𑀭𑀺𑀘𑁆𑀘𑀸𑀕𑁄. 𑀯𑀼𑀝𑁆𑀞𑀸𑀦𑀁 𑀧𑀦 𑀤𑁂𑀲𑀦𑀸𑀯𑀺𑀲𑁂𑀲𑀢𑁆𑀢𑀸 ‘‘𑀤𑁂𑀲𑀦𑀸’’𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀓𑀸𑀲𑁂𑀢𑀼 𑀯𑀸𑀢𑀺 𑀆𑀭𑁄𑀘𑁂𑀢𑀼 𑀯𑀸.

𑀏𑀯𑀁 𑀅𑀦𑀸𑀧𑀦𑁆𑀦𑀸 𑀯𑀸𑀢𑀺 𑀏𑀯𑀁 𑀙𑀦𑁆𑀦𑀁 𑀆𑀓𑀸𑀭𑀸𑀦𑀁 𑀅𑀜𑁆𑀜𑀢𑀭𑁂𑀦 𑀅𑀦𑀸𑀧𑀦𑁆𑀦𑀸 𑀯𑀸. 𑀯𑀼𑀝𑁆𑀞𑀺𑀢𑀸 𑀯𑀸𑀢𑀺 𑀧𑀭𑀺𑀯𑀸𑀲𑀸𑀤𑀺𑀦𑀸 𑀯𑀼𑀝𑁆𑀞𑀺𑀢𑀸 𑀯𑀸. 𑀆𑀭𑁄𑀘𑀺𑀢𑀸 𑀯𑀸𑀢𑀺 𑀆𑀯𑀺𑀓𑀢𑀸 𑀯𑀸. 𑀆𑀭𑁄𑀘𑁂𑀦𑁆𑀢𑁄 𑀘 ‘‘𑀢𑀼𑀬𑁆𑀳𑀁 𑀲𑀦𑁆𑀢𑀺𑀓𑁂 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀯𑀺𑀓𑀭𑁄𑀫𑀻’’𑀢𑀺 𑀯𑀸 ‘‘𑀆𑀘𑀺𑀓𑁆𑀔𑀸𑀫𑀻’’𑀢𑀺 𑀯𑀸 ‘‘𑀆𑀭𑁄𑀘𑁂𑀫𑀻’’𑀢𑀺 𑀯𑀸 ‘‘𑀫𑀫 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀪𑀸𑀯𑀁 𑀚𑀸𑀦𑀸𑀳𑀻’’𑀢𑀺 𑀯𑀸 𑀯𑀤𑀢𑀼, ‘‘𑀏𑀓𑀁 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀆𑀯𑀺𑀓𑀭𑁄𑀫𑀻’’𑀢𑀺 𑀯𑀸 𑀆𑀤𑀺𑀦𑀸 𑀦𑀬𑁂𑀦 𑀯𑀤𑀢𑀼, 𑀲𑀩𑁆𑀩𑁂𑀳𑀺𑀧𑀺 𑀆𑀓𑀸𑀭𑁂𑀳𑀺 𑀆𑀭𑁄𑀘𑀺𑀢𑀸𑀯 𑀳𑁄𑀢𑀺. 𑀲𑀘𑁂 𑀧𑀦 𑀕𑀭𑀼𑀓𑀸𑀧𑀢𑁆𑀢𑀺𑀁 𑀆𑀯𑀺𑀓𑀭𑁄𑀦𑁆𑀢𑁄 ‘‘𑀮𑀳𑀼𑀓𑀸𑀧𑀢𑁆𑀢𑀺𑀁 𑀆𑀯𑀺𑀓𑀭𑁄𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀤𑀢𑀺, 𑀅𑀦𑀸𑀯𑀺𑀓𑀢𑀸 𑀳𑁄𑀢𑀺 𑀆𑀧𑀢𑁆𑀢𑀺. 𑀯𑀢𑁆𑀣𑀼𑀁 𑀆𑀭𑁄𑀘𑁂𑀢𑀺, 𑀆𑀧𑀢𑁆𑀢𑀺𑀁 𑀆𑀭𑁄𑀘𑁂𑀢𑀺, 𑀉𑀪𑀬𑀁 𑀆𑀭𑁄𑀘𑁂𑀢𑀺, 𑀢𑀺𑀯𑀺𑀥𑁂𑀦𑀸𑀧𑀺 𑀆𑀭𑁄𑀘𑀺𑀢𑀸𑀯 𑀳𑁄𑀢𑀺. 𑀅𑀲𑀦𑁆𑀢𑀺𑀬𑀸 𑀆𑀧𑀢𑁆𑀢𑀺𑀬𑀸𑀢𑀺 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑁂 𑀪𑀼𑀫𑁆𑀫𑀁. 𑀢𑀼𑀡𑁆𑀳𑀻𑀪𑀸𑀯𑁂𑀦𑀸𑀧𑀺 𑀳𑀻𑀢𑀺 𑀏𑀢𑁆𑀣 𑀦 𑀓𑁂𑀯𑀮𑀁 ‘‘𑀆𑀫, 𑀫𑀬𑀁 𑀧𑀭𑀺𑀲𑀼𑀤𑁆𑀥𑀸’’𑀢𑀺 𑀯𑀼𑀢𑁆𑀢𑁂𑀬𑁂𑀯, 𑀅𑀣 𑀔𑁄 𑀢𑀼𑀡𑁆𑀳𑀻𑀪𑀸𑀯𑁂𑀦𑀸𑀧𑀻𑀢𑀺 𑀅𑀧𑀺𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀺𑀁 𑀢𑀁 𑀬𑀸𑀯𑀢𑀢𑀺𑀬𑀸𑀦𑀼𑀲𑀸𑀯𑀺𑀢𑀁 𑀦𑀸𑀫, 𑀓𑀣𑀜𑁆𑀘𑁂𑀢𑀁 𑀬𑀸𑀯𑀢𑀢𑀺𑀬𑀸𑀦𑀼𑀲𑀸𑀯𑀺𑀢𑀁 𑀳𑁄𑀢𑀻𑀢𑀺 𑀯𑀺𑀘𑀸𑀭𑀡𑀸𑀬𑀁 𑀆𑀘𑀭𑀺𑀬𑀸𑀦𑀁 𑀫𑀢𑀺𑀪𑁂𑀤𑀫𑀼𑀔𑁂𑀦 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀸𑀯𑀢𑀢𑀺𑀬𑀁 𑀅𑀦𑀼𑀲𑀸𑀯𑀺𑀢𑀁 𑀳𑁄𑀢𑀻𑀢𑀺 𑀏𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀤𑁂𑀢𑀁 𑀢𑀺𑀓𑁆𑀔𑀢𑁆𑀢𑀼𑀁 𑀅𑀦𑀼𑀲𑀸𑀯𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀢𑁆𑀣𑀩𑁆𑀬𑀜𑁆𑀚𑀦𑀪𑁂𑀤𑀢𑁄𑀢𑀺 𑀅𑀭𑀻𑀬𑀢𑀺 𑀜𑀸𑀬𑀢𑀻𑀢𑀺 𑀅𑀢𑁆𑀣𑁄, 𑀅𑀪𑀺𑀥𑁂𑀬𑁆𑀬𑀁, 𑀩𑁆𑀬𑀜𑁆𑀚𑀻𑀬𑀢𑀺 𑀅𑀢𑁆𑀣𑁄 𑀅𑀦𑁂𑀦𑀸𑀢𑀺 𑀩𑁆𑀬𑀜𑁆𑀚𑀦𑀁, 𑀅𑀓𑁆𑀔𑀭𑀁, 𑀅𑀢𑁆𑀣𑁄 𑀘 𑀩𑁆𑀬𑀜𑁆𑀚𑀦𑀜𑁆𑀘 𑀅𑀢𑁆𑀣𑀩𑁆𑀬𑀜𑁆𑀚𑀦𑀸𑀦𑀺, 𑀢𑁂𑀲𑀁 𑀪𑁂𑀤𑁄 𑀅𑀢𑁆𑀣𑀩𑁆𑀬𑀜𑁆𑀚𑀦𑀪𑁂𑀤𑁄, 𑀢𑀢𑁄, 𑀅𑀢𑁆𑀣𑀲𑁆𑀲 𑀘 𑀩𑁆𑀬𑀜𑁆𑀚𑀦𑀲𑁆𑀲 𑀘 𑀯𑀺𑀲𑀤𑀺𑀲𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀅𑀦𑀼𑀲𑀸𑀯𑀦𑀜𑁆𑀳𑀺 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀳𑀻𑀢𑀺 𑀓𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑁄. 𑀢𑀲𑁆𑀲 𑀧𑀦 ‘‘𑀅𑀪𑀺𑀦𑁆𑀦’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀢𑀺 𑀪𑀺𑀦𑁆𑀦𑀢𑁆𑀢𑀸. 𑀅𑀲𑁆𑀲𑀸𑀢𑀺 ‘‘𑀬𑀲𑁆𑀲 𑀲𑀺𑀬𑀸’’𑀢𑀺𑀆𑀤𑀺𑀯𑀘𑀦𑀢𑁆𑀢𑀬𑀲𑁆𑀲. 𑀅𑀯𑀲𑁆𑀲𑀜𑁆𑀘𑁂𑀢𑀫𑁂𑀯𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀅𑀢𑀺𑀧𑁆𑀧𑀲𑀗𑁆𑀕𑁄𑀧𑀺 𑀲𑀺𑀬𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀤𑀺 𑀘𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀏𑀢𑀦𑁆𑀢𑀺 ‘‘𑀬𑀲𑁆𑀲 𑀲𑀺𑀬𑀸’’𑀢𑀺𑀆𑀤𑀺𑀯𑀘𑀦𑀢𑁆𑀢𑀬𑀁. 𑀅𑀧𑀭𑁂 ‘‘𑀅𑀦𑀼𑀲𑀸𑀯𑀺𑀢’’𑀦𑁆𑀢𑀺 𑀧𑀤𑀁 𑀦 𑀅𑀢𑀻𑀢𑀢𑁆𑀣𑀁 𑀤𑀻𑀧𑁂𑀢𑀺, 𑀅𑀣 𑀔𑁄 𑀅𑀦𑀸𑀕𑀢𑀢𑁆𑀣𑀁. 𑀥𑀸𑀢𑁆𑀯𑀢𑁆𑀣𑀲𑀫𑁆𑀩𑀦𑁆𑀥𑁄 𑀓𑀸𑀮𑀦𑁆𑀢𑀭𑀯𑀺𑀳𑀺𑀢𑁄𑀧𑀺 𑀧𑀘𑁆𑀘𑀬𑁄 𑀓𑀸𑀮𑀦𑁆𑀢𑀭𑁂 𑀲𑀸𑀥𑀼 𑀳𑁄𑀢𑀻𑀢𑀺 𑀯𑀺𑀓𑀧𑁆𑀧𑁂𑀲𑀼𑀁. 𑀢𑁂𑀦𑀸𑀳 ‘‘𑀅𑀧𑀭𑁂 ‘𑀅𑀦𑀼𑀲𑀸𑀯𑀺𑀢’𑀦𑁆𑀢𑀺 𑀧𑀤𑀲𑁆𑀲𑀸’’𑀢𑀺𑀆𑀤𑀺. 𑀉𑀧𑀭𑀺 𑀉𑀤𑁆𑀤𑁂𑀲𑀸𑀯𑀲𑀸𑀦𑁂𑀢𑀺 𑀧𑀸𑀭𑀸𑀚𑀺𑀓𑀼𑀤𑁆𑀤𑁂𑀲𑀸𑀯𑀲𑀸𑀦𑁂. 𑀅𑀢𑁆𑀣𑀬𑀼𑀢𑁆𑀢𑀻𑀦𑀁 𑀅𑀪𑀸𑀯𑀢𑁄𑀢𑀺 𑀅𑀦𑀸𑀕𑀢𑀢𑁆𑀣𑀲𑁆𑀲 𑀘 𑀓𑀸𑀭𑀡𑀲𑁆𑀲 𑀘 𑀅𑀪𑀸𑀯𑀢𑁄. 𑀇𑀤𑀸𑀦𑀺 𑀢𑀫𑁂𑀯 𑀯𑀺𑀪𑀸𑀯𑁂𑀢𑀼𑀁 ‘‘𑀇𑀤𑀁 𑀳𑀻’’𑀢𑀺𑀆𑀤𑀺𑀫𑀸𑀳. 𑀓𑀣𑀫𑁂𑀢𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀬𑀤𑀺 𑀘𑀲𑁆𑀲𑀸’’𑀢𑀺𑀆𑀤𑀺. 𑀅𑀬𑀦𑁆𑀢𑀺 𑀅𑀦𑀸𑀕𑀢𑀓𑀸𑀮𑁄. 𑀅𑀦𑀼𑀲𑀸𑀯𑀺𑀢𑀁 𑀳𑁂𑀲𑁆𑀲𑀢𑀻𑀢𑀺 𑀯𑀤𑁂𑀬𑁆𑀬𑀸𑀢𑀺 𑀅𑀦𑀼𑀧𑁆𑀧𑀬𑁄𑀕𑀁 𑀅𑀦𑀸𑀕𑀢𑀓𑀸𑀮𑀁 𑀓𑀢𑁆𑀯𑀸 ‘‘𑀅𑀦𑀼𑀲𑀸𑀯𑀺𑀢𑀁 𑀳𑁂𑀲𑁆𑀲𑀢𑀻’’𑀢𑀺 𑀩𑀼𑀤𑁆𑀥𑁄 𑀯𑀤𑁂𑀬𑁆𑀬. 𑀅𑀬𑀁 𑀳𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑁋 𑀬𑀤𑀺 𑀘𑁂𑀢𑁆𑀣 𑀥𑀸𑀢𑁆𑀯𑀢𑁆𑀣𑀲𑀫𑁆𑀩𑀦𑁆𑀥𑁄 𑀢-𑀧𑀘𑁆𑀘𑀬𑁄 𑀲𑀺𑀬𑀸, 𑀢𑀣𑀸 𑀲𑀢𑀺 𑀥𑀸𑀢𑁆𑀯𑀢𑁆𑀣𑀲𑀫𑁆𑀩𑀦𑁆𑀥𑁄 𑀦𑀸𑀫 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀬𑀪𑀸𑀯𑁄, 𑀲𑁄 𑀘 𑀅𑀦𑀼𑀧𑁆𑀧𑀬𑁄𑀕𑀲𑁆𑀲 𑀲𑀫𑀸𑀦𑀢𑁆𑀣𑀪𑀸𑀯𑁂 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀦𑀸𑀲𑀢𑀻𑀢𑀺 ‘‘𑀳𑁂𑀲𑁆𑀲𑀢𑀻’’𑀢𑀺 𑀅𑀦𑀼𑀧𑁆𑀧𑀬𑁄𑀕𑀁 𑀯𑀤𑁂𑀬𑁆𑀬, 𑀦 𑀘 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀅𑀦𑀸𑀕𑀢𑀁 𑀦 𑀤𑀻𑀧𑁂𑀢𑀺, 𑀅𑀢𑀻𑀢𑀓𑀸𑀮𑀫𑁂𑀯 𑀤𑀻𑀧𑁂𑀢𑀻𑀢𑀺. 𑀅𑀦𑀼𑀲𑀸𑀯𑀺𑀬𑀫𑀸𑀦𑁂𑀢𑀺 𑀯𑀘𑀦𑀢𑁄𑀢𑀺 ‘‘𑀅𑀦𑀼𑀲𑀸𑀯𑀺𑀬𑀫𑀸𑀦𑁂’’𑀢𑀺 𑀯𑀢𑁆𑀢𑀫𑀸𑀦𑀓𑀸𑀮𑀯𑀘𑀦𑀢𑁄. 𑀬𑀤𑀺 𑀏𑀯𑀁 ‘‘𑀬𑀸𑀯𑀢𑀢𑀺𑀬𑀁 𑀅𑀦𑀼𑀲𑀸𑀯𑀺𑀢𑀁 𑀳𑁄𑀢𑀻’’𑀢𑀺 𑀓𑀺𑀫𑀺𑀤𑀦𑁆𑀢𑀺 𑀆𑀳 ‘‘𑀬𑀸𑀯𑀢𑀢𑀺𑀬’’𑀦𑁆𑀢𑀺𑀆𑀤𑀺. 𑀓𑀺𑀁 𑀢𑁂𑀦 𑀮𑀓𑁆𑀔𑀻𑀬𑀢𑀺, 𑀬𑁂𑀦𑁂𑀢𑀁 𑀮𑀓𑁆𑀔𑀡𑀯𑀘𑀦𑀫𑀢𑁆𑀢𑀁 𑀲𑀺𑀬𑀸𑀢𑀺 𑀆𑀳 ‘‘𑀢𑁂𑀦𑀸’’𑀢𑀺𑀆𑀤𑀺. 𑀢𑁂𑀦𑀸𑀢𑀺 𑀮𑀓𑁆𑀔𑀡𑀯𑀘𑀦𑀫𑀢𑁆𑀢𑁂𑀦 𑀳𑁂𑀢𑀼𑀦𑀸.

𑀢𑀤𑁂𑀢𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀁. 𑀢𑀁 𑀧𑀦𑁂𑀢𑀦𑁆𑀢𑀺 ‘‘𑀢𑀢𑁆𑀣𑀸𑀬𑀲𑁆𑀫𑀦𑁆𑀢𑁂 𑀧𑀼𑀘𑁆𑀙𑀸𑀫𑀻’’𑀢𑀺𑀆𑀤𑀺𑀓𑀁 𑀬𑀸𑀯𑀢𑀢𑀺𑀬𑀸𑀦𑀼𑀲𑀸𑀯𑀦𑀁. 𑀦 𑀤𑀺𑀲𑁆𑀲𑀢𑀻𑀢𑀺 𑀦𑁄𑀧𑀮𑀩𑁆𑀪𑀢𑀺. 𑀇𑀫𑀫𑁂𑀯 𑀘 𑀅𑀢𑁆𑀣𑀦𑁆𑀢𑀺 𑀇𑀫𑀁 𑀅𑀫𑁆𑀳𑁂𑀳𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁. 𑀬𑀤𑀺 𑀳𑀺 ‘‘𑀬𑀲𑁆𑀲 𑀲𑀺𑀬𑀸 𑀆𑀧𑀢𑁆𑀢𑀻’’𑀢𑀺𑀆𑀤𑀺𑀯𑀘𑀦𑀢𑁆𑀢𑀬𑀁 𑀬𑀸𑀯𑀢𑀢𑀺𑀬𑀸𑀦𑀼𑀲𑀸𑀯𑀦𑀁 𑀲𑀺𑀬𑀸, 𑀢𑀤𑁂𑀯 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁧𑁩𑁨 𑀆𑀤𑀬𑁄) 𑀯𑀤𑁂𑀬𑁆𑀬, 𑀦 𑀧𑀦 ‘‘𑀲𑀓𑀺𑀫𑁆𑀧𑀺 𑀅𑀦𑀼𑀲𑀸𑀯𑀺𑀢𑀁 𑀳𑁄𑀢𑀻’’𑀢𑀺𑀆𑀤𑀺𑀓𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀦𑀼 𑀘𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑀅𑀝𑁆𑀞𑀓𑀣𑀸𑀲𑀼 𑀦 𑀆𑀕𑀢𑁄, 𑀅𑀣 𑀓𑀼𑀢𑁄 𑀮𑀤𑁆𑀥𑁄𑀢𑀺 𑀆𑀳 ‘‘𑀅𑀬𑀫𑁂𑀢𑁆𑀣𑀸’’𑀢𑀺𑀆𑀤𑀺. 𑀯𑀺𑀦𑀬𑀝𑁆𑀞𑀸𑀦𑁂𑀲𑀼 𑀓𑀢𑀧𑀭𑀺𑀘𑀬𑀸𑀦𑀁 𑀆𑀘𑀭𑀺𑀬𑀸𑀦𑀁 𑀢𑀁 𑀢𑀁 𑀅𑀢𑁆𑀣𑀁 𑀜𑀸𑀧𑁂𑀦𑁆𑀢𑀻 𑀧𑀯𑁂𑀡𑀺 𑀆𑀘𑀭𑀺𑀬𑀧𑀭𑀫𑁆𑀧𑀭𑀸, 𑀢𑀸𑀬 𑀆𑀪𑀢𑁄 𑀆𑀦𑀻𑀢𑁄 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀪𑀢𑁄.