𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁄

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑁧. 𑀯𑀦𑁆𑀤𑀺𑀢𑁆𑀯𑀸 𑀲𑀺𑀭𑀲𑀸 𑀲𑁂𑀝𑁆𑀞𑀁, 𑀩𑀼𑀤𑁆𑀥𑀫𑀧𑁆𑀧𑀝𑀺𑀧𑀼𑀕𑁆𑀕𑀮𑀁;

𑀪𑀯𑀸𑀪𑀸𑀯𑀓𑀭𑀁 𑀥𑀫𑁆𑀫𑀁, 𑀕𑀡𑀜𑁆𑀘𑁂𑀯 𑀦𑀺𑀭𑀗𑁆𑀕𑀡𑀁.

𑁨. 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀜𑁆𑀘, 𑀳𑀺𑀢𑀢𑁆𑀣𑀸𑀬 𑀲𑀫𑀸𑀳𑀺𑀢𑁄;

𑀧𑀯𑀓𑁆𑀔𑀸𑀫𑀺 𑀲𑀫𑀸𑀲𑁂𑀦, 𑀯𑀺𑀦𑀬𑀲𑁆𑀲𑀯𑀺𑀦𑀺𑀘𑁆𑀙𑀬𑀁.

𑁩. 𑀅𑀦𑀸𑀓𑀼𑀮𑀫𑀲𑀁𑀓𑀺𑀡𑁆𑀡𑀁, 𑀫𑀥𑀼𑀭𑀢𑁆𑀣𑀧𑀤𑀓𑁆𑀓𑀫𑀁;

𑀧𑀝𑀼𑀪𑀸𑀯𑀓𑀭𑀁 𑀏𑀢𑀁, 𑀧𑀭𑀫𑀁 𑀯𑀺𑀦𑀬𑀓𑁆𑀓𑀫𑁂.

𑁪. 𑀅𑀧𑀸𑀭𑀁 𑀑𑀢𑀭𑀦𑁆𑀢𑀸𑀦𑀁, 𑀲𑀸𑀭𑀁 𑀯𑀺𑀦𑀬𑀲𑀸𑀕𑀭𑀁;

𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀜𑁆𑀘, 𑀦𑀸𑀯𑀸𑀪𑀽𑀢𑀁 𑀫𑀦𑁄𑀭𑀫𑀁.

𑁫. 𑀢𑀲𑁆𑀫𑀸 𑀯𑀺𑀦𑀬𑀦𑀽𑀧𑀸𑀬𑀁, 𑀯𑀺𑀦𑀬𑀲𑁆𑀲𑀯𑀺𑀦𑀺𑀘𑁆𑀙𑀬𑀁;

𑀅𑀯𑀺𑀓𑁆𑀔𑀺𑀢𑁆𑀢𑁂𑀦 𑀘𑀺𑀢𑁆𑀢𑁂𑀦, 𑀯𑀤𑀢𑁄 𑀫𑁂 𑀦𑀺𑀩𑁄𑀥𑀣.

𑀪𑀺𑀓𑁆𑀔𑀼𑀯𑀺𑀪𑀗𑁆𑀕𑁄

𑀧𑀸𑀭𑀸𑀚𑀺𑀓𑀓𑀣𑀸

𑀧𑀞𑀫𑀧𑀸𑀭𑀸𑀚𑀺𑀓𑀓𑀣𑀸

𑁬. 𑀢𑀺𑀯𑀺𑀥𑁂 𑀢𑀺𑀮𑀫𑀢𑁆𑀢𑀫𑁆𑀧𑀺, 𑀫𑀕𑁆𑀕𑁂 𑀲𑁂𑀯𑀦𑀘𑁂𑀢𑀦𑁄;

𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀦𑁆𑀢𑁄, 𑀅𑀮𑁆𑀮𑁄𑀓𑀸𑀲𑁂 𑀧𑀭𑀸𑀚𑀺𑀢𑁄.

𑁭. 𑀧𑀯𑁂𑀲𑀦𑀁 𑀧𑀯𑀺𑀝𑁆𑀞𑀁 𑀯𑀸, 𑀞𑀺𑀢𑀫𑀼𑀤𑁆𑀥𑀭𑀡𑀫𑁆𑀧𑀺 𑀯𑀸;

𑀲𑀲𑀺𑀓𑁆𑀔𑁄 𑀲𑀸𑀤𑀺𑀬𑀦𑁆𑀢𑁄 𑀲𑁄, 𑀞𑀧𑁂𑀢𑁆𑀯𑀸 𑀓𑀺𑀭𑀺𑀬𑀁 𑀘𑀼𑀢𑁄.

𑁮. 𑀲𑀦𑁆𑀣𑀢𑁂𑀦𑀗𑁆𑀕𑀚𑀸𑀢𑁂𑀦, 𑀲𑀦𑁆𑀣𑀢𑀁 𑀯𑀸 𑀅𑀲𑀦𑁆𑀣𑀢𑀁;

𑀫𑀕𑁆𑀕𑀁 𑀧𑀦 𑀧𑀯𑁂𑀲𑁂𑀦𑁆𑀢𑁄, 𑀢𑀣𑁂𑀯𑀸𑀲𑀦𑁆𑀣𑀢𑁂𑀦 𑀘.

𑁯. 𑀉𑀧𑀸𑀤𑀺𑀦𑁆𑀦𑁂𑀦𑀼𑀧𑀸𑀤𑀺𑀦𑁆𑀦𑁂, 𑀅𑀦𑀼𑀧𑀸𑀤𑀺𑀦𑁆𑀦𑀓𑁂𑀦 𑀯𑀸;

𑀖𑀝𑁆𑀝𑀺𑀢𑁂 𑀅𑀦𑀼𑀧𑀸𑀤𑀺𑀦𑁆𑀦𑁂, 𑀲𑀘𑁂 𑀲𑀸𑀤𑀺𑀬𑀢𑁂𑀢𑁆𑀣 𑀲𑁄.

𑁧𑁦. 𑀳𑁄𑀢𑀺 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂, 𑀧𑀯𑀺𑀝𑁆𑀞𑁂 𑀢𑀼 𑀧𑀭𑀸𑀚𑀺𑀢𑁄;

𑀔𑁂𑀢𑁆𑀢𑁂 𑀣𑀼𑀮𑁆𑀮𑀘𑁆𑀘𑀬𑀁 𑀢𑀲𑁆𑀲, 𑀤𑀼𑀓𑁆𑀓𑀝𑀜𑁆𑀘 𑀯𑀺𑀦𑀺𑀤𑁆𑀤𑀺𑀲𑁂.

𑁧𑁧. 𑀫𑀢𑁂 𑀅𑀓𑁆𑀔𑀸𑀬𑀺𑀢𑁂 𑀘𑀸𑀧𑀺, 𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑁂𑀧𑀺 𑀘;

𑀫𑁂𑀣𑀼𑀦𑀁 𑀧𑀝𑀺𑀲𑁂𑀯𑀦𑁆𑀢𑁄, 𑀳𑁄𑀢𑀺 𑀧𑀸𑀭𑀸𑀚𑀺𑀓𑁄 𑀦𑀭𑁄.

𑁧𑁨. 𑀬𑁂𑀪𑀼𑀬𑁆𑀬𑀓𑁆𑀔𑀸𑀬𑀺𑀢𑁂 𑀘𑀸𑀧𑀺, 𑀉𑀧𑀟𑁆𑀠𑀓𑁆𑀔𑀸𑀬𑀺𑀢𑁂𑀧𑀺 𑀘;

𑀳𑁄𑀢𑀺 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺, 𑀲𑁂𑀲𑁂 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑁧𑁩. 𑀦𑀺𑀫𑀺𑀢𑁆𑀢𑀫𑀢𑁆𑀢𑀁 𑀲𑁂𑀲𑁂𑀢𑁆𑀯𑀸, 𑀔𑀸𑀬𑀺𑀢𑁂𑀧𑀺 𑀲𑀭𑀻𑀭𑀓𑁂;

𑀦𑀺𑀫𑀺𑀢𑁆𑀢𑁂 𑀫𑁂𑀣𑀼𑀦𑀁 𑀢𑀲𑁆𑀫𑀺𑀁, 𑀲𑁂𑀯𑀢𑁄𑀧𑀺 𑀧𑀭𑀸𑀚𑀬𑁄.

𑁧𑁪. 𑀉𑀤𑁆𑀥𑀼𑀫𑀸𑀢𑀸𑀤𑀺𑀲𑀫𑁆𑀧𑀢𑁆𑀢𑁂, 𑀲𑀩𑁆𑀩𑀢𑁆𑀣𑀸𑀧𑀺 𑀘 𑀤𑀼𑀓𑁆𑀓𑀝𑀁;

𑀔𑀸𑀬𑀺𑀢𑀸𑀓𑁆𑀔𑀸𑀬𑀺𑀢𑀁 𑀦𑀸𑀫, 𑀲𑀩𑁆𑀩𑀁 𑀫𑀢𑀲𑀭𑀻𑀭𑀓𑁂.

𑁧𑁫. 𑀙𑀺𑀦𑁆𑀤𑀺𑀢𑁆𑀯𑀸 𑀧𑀦 𑀢𑀘𑁆𑀙𑁂𑀢𑁆𑀯𑀸, 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀝𑀺𑀢𑁂 𑀧𑀦;

𑀯𑀡𑀲𑀗𑁆𑀔𑁂𑀧𑀢𑁄 𑀢𑀲𑁆𑀫𑀺𑀁, 𑀲𑁂𑀯𑀁 𑀣𑀼𑀮𑁆𑀮𑀘𑁆𑀘𑀬𑀁 𑀨𑀼𑀲𑁂.

𑁧𑁬. 𑀢𑀢𑁄 𑀫𑁂𑀣𑀼𑀦𑀭𑀸𑀕𑁂𑀦, 𑀧𑀢𑀺𑀢𑀸𑀬 𑀦𑀺𑀫𑀺𑀢𑁆𑀢𑀢𑁄;

𑀢𑀸𑀬𑀁 𑀉𑀧𑀓𑁆𑀓𑀫𑀦𑁆𑀢𑀲𑁆𑀲, 𑀤𑀼𑀓𑁆𑀓𑀝𑀁 𑀫𑀁𑀲𑀧𑁂𑀲𑀺𑀬𑀁.

𑁧𑁭. 𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑁂𑀧𑀺, 𑀫𑀁𑀲𑁂 𑀦𑁆𑀳𑀸𑀭𑀼𑀫𑁆𑀳𑀺 𑀯𑀸 𑀲𑀢𑀺;

𑀫𑁂𑀣𑀼𑀦𑀁 𑀧𑀝𑀺𑀲𑁂𑀯𑀦𑁆𑀢𑁄, 𑀚𑀻𑀯𑀫𑀸𑀦𑁂 𑀧𑀭𑀸𑀚𑀺𑀢𑁄.

𑁧𑁮. 𑀓𑀡𑁆𑀡𑀘𑁆𑀙𑀺𑀤𑁆𑀤𑀓𑁆𑀔𑀺𑀦𑀸𑀲𑀸𑀲𑀼, 𑀯𑀢𑁆𑀣𑀺𑀓𑁄𑀲𑁂 𑀯𑀡𑁂𑀲𑀼 𑀯𑀸;

𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀦𑁆𑀢𑁄, 𑀭𑀸𑀕𑀸 𑀣𑀼𑀮𑁆𑀮𑀘𑁆𑀘𑀬𑀁 𑀨𑀼𑀲𑁂.

𑁧𑁯. 𑀅𑀯𑀲𑁂𑀲𑀲𑀭𑀻𑀭𑀲𑁆𑀫𑀺𑀁, 𑀉𑀧𑀓𑀘𑁆𑀙𑀽𑀭𑀼𑀓𑀸𑀤𑀺𑀲𑀼;

𑀯𑀲𑀸 𑀫𑁂𑀣𑀼𑀦𑀭𑀸𑀕𑀲𑁆𑀲, 𑀲𑁂𑀯𑀫𑀸𑀦𑀲𑁆𑀲 𑀤𑀼𑀓𑁆𑀓𑀝𑀁.

𑁨𑁦. 𑀅𑀲𑁆𑀲𑀕𑁄𑀫𑀳𑀺𑀲𑀸𑀤𑀻𑀦𑀁, 𑀑𑀝𑁆𑀞𑀕𑀤𑁆𑀭𑀪𑀤𑀦𑁆𑀢𑀺𑀦𑀁;

𑀦𑀸𑀲𑀸𑀲𑀼 𑀯𑀢𑁆𑀣𑀺𑀓𑁄𑀲𑁂𑀲𑀼, 𑀲𑁂𑀯𑀁 𑀣𑀼𑀮𑁆𑀮𑀘𑁆𑀘𑀬𑀁 𑀨𑀼𑀲𑁂.

𑁨𑁧. 𑀢𑀣𑀸 𑀲𑀩𑁆𑀩𑀢𑀺𑀭𑀘𑁆𑀙𑀸𑀦𑀁, 𑀅𑀓𑁆𑀔𑀺𑀓𑀡𑁆𑀡𑀯𑀡𑁂𑀲𑀼𑀧𑀺;

𑀅𑀯𑀲𑁂𑀲𑀲𑀭𑀻𑀭𑁂𑀲𑀼, 𑀲𑁂𑀯𑀫𑀸𑀦𑀲𑁆𑀲 𑀤𑀼𑀓𑁆𑀓𑀝𑀁.

𑁨𑁨. 𑀢𑁂𑀲𑀁 𑀅𑀮𑁆𑀮𑀲𑀭𑀻𑀭𑁂𑀲𑀼, 𑀫𑀢𑀸𑀦𑀁 𑀲𑁂𑀯𑀢𑁄 𑀧𑀦;

𑀢𑀺𑀯𑀺𑀥𑀸𑀧𑀺 𑀲𑀺𑀬𑀸𑀧𑀢𑁆𑀢𑀺, 𑀔𑁂𑀢𑁆𑀢𑀲𑁆𑀫𑀺𑀁 𑀢𑀺𑀯𑀺𑀥𑁂 𑀲𑀢𑀺.

𑁨𑁩. 𑀩𑀳𑀺 𑀫𑁂𑀣𑀼𑀦𑀭𑀸𑀕𑁂𑀦, 𑀦𑀺𑀫𑀺𑀢𑁆𑀢𑀁 𑀇𑀢𑁆𑀣𑀺𑀬𑀸 𑀧𑀦;

𑀦𑀺𑀫𑀺𑀢𑁆𑀢𑁂𑀦 𑀙𑀼𑀧𑀦𑁆𑀢𑀲𑁆𑀲, 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸.

𑁨𑁪. 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦, 𑀦𑀺𑀫𑀺𑀢𑁆𑀢𑁂𑀦 𑀫𑀼𑀔𑁂𑀦 𑀯𑀸;

𑀦𑀺𑀫𑀺𑀢𑁆𑀢𑀁 𑀇𑀢𑁆𑀣𑀺𑀬𑀸 𑀢𑀲𑁆𑀲, 𑀙𑀼𑀧𑀢𑁄 𑀕𑀭𑀼𑀓𑀁 𑀲𑀺𑀬𑀸.

𑁨𑁫. 𑀢𑀣𑁂𑀯𑁄𑀪𑀬𑀭𑀸𑀕𑁂𑀦, 𑀦𑀺𑀫𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲𑀧𑀺;

𑀦𑀺𑀫𑀺𑀢𑁆𑀢𑁂𑀦 𑀙𑀼𑀧𑀦𑁆𑀢𑀲𑁆𑀲, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑁨𑁬. 𑀦𑀺𑀫𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀁 𑀢𑀼, 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸;

𑀣𑀼𑀮𑁆𑀮𑀘𑁆𑀘𑀬𑀁 𑀙𑀼𑀧𑀦𑁆𑀢𑀲𑁆𑀲, 𑀳𑁄𑀢𑀺 𑀫𑁂𑀣𑀼𑀦𑀭𑀸𑀕𑀢𑁄.

𑁨𑁭. 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦, 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸;

𑀦𑀺𑀫𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀲𑁆𑀲, 𑀙𑀼𑀧𑀦𑁂 𑀤𑀼𑀓𑁆𑀓𑀝𑀁 𑀫𑀢𑀁.

𑁨𑁮. 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀢𑁆𑀯𑀸, 𑀢𑀫𑀸𑀯𑀝𑁆𑀝𑀓𑀢𑁂 𑀫𑀼𑀔𑁂;

𑀢𑀢𑁆𑀣𑀸𑀓𑀸𑀲𑀕𑀢𑀁 𑀓𑀢𑁆𑀯𑀸, 𑀦𑀻𑀳𑀭𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑁨𑁯. 𑀢𑀣𑀸 𑀘𑀢𑀽𑀳𑀺 𑀧𑀲𑁆𑀲𑁂𑀳𑀺, 𑀇𑀢𑁆𑀣𑀺𑀬𑀸 𑀳𑁂𑀝𑁆𑀞𑀺𑀫𑀢𑁆𑀢𑀮𑀁;

𑀅𑀙𑀼𑀧𑀦𑁆𑀢𑀁 𑀧𑀯𑁂𑀲𑁂𑀢𑁆𑀯𑀸, 𑀦𑀻𑀳𑀭𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑁩𑁦. 𑀉𑀧𑁆𑀧𑀸𑀝𑀺𑀢𑁄𑀝𑁆𑀞𑀫𑀁𑀲𑁂𑀲𑀼, 𑀩𑀳𑀺 𑀦𑀺𑀓𑁆𑀔𑀦𑁆𑀢𑀓𑁂𑀲𑀼 𑀯𑀸;

𑀤𑀦𑁆𑀢𑁂𑀲𑀼 𑀯𑀸𑀬𑀫𑀦𑁆𑀢𑀲𑁆𑀲, 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸.

𑁩𑁧. 𑀅𑀝𑁆𑀞𑀺𑀲𑀗𑁆𑀖𑀝𑁆𑀝𑀦𑀁 𑀓𑀢𑁆𑀯𑀸, 𑀫𑀕𑁆𑀕𑁂 𑀤𑀼𑀯𑀺𑀥𑀭𑀸𑀕𑀢𑁄;

𑀲𑀼𑀓𑁆𑀓𑁂 𑀫𑀼𑀢𑁆𑀢𑁂𑀧𑀺 𑀯𑀸𑀫𑀼𑀢𑁆𑀢𑁂, 𑀯𑀸𑀬𑀫𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑁩𑁨. 𑀇𑀢𑁆𑀣𑀺𑀁 𑀫𑁂𑀣𑀼𑀦𑀭𑀸𑀕𑁂𑀦, 𑀆𑀮𑀺𑀗𑁆𑀕𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁;

𑀳𑀢𑁆𑀣𑀕𑁆𑀕𑀸𑀳𑀧𑀭𑀸𑀫𑀸𑀲-𑀘𑀼𑀫𑁆𑀩𑀦𑀸𑀤𑀻𑀲𑁆𑀯𑀬𑀁 𑀦𑀬𑁄.

𑁩𑁩. 𑀅𑀧𑀤𑁂 𑀅𑀳𑀬𑁄 𑀫𑀘𑁆𑀙𑀸, 𑀓𑀧𑁄𑀢𑀸 𑀤𑁆𑀯𑀺𑀧𑀤𑁂𑀧𑀺 𑀘;

𑀕𑁄𑀥𑀸 𑀘𑀢𑀼𑀧𑁆𑀧𑀤𑁂 𑀳𑁂𑀝𑁆𑀞𑀸, 𑀯𑀢𑁆𑀣𑀼 𑀧𑀸𑀭𑀸𑀚𑀺𑀓𑀲𑁆𑀲𑀺𑀫𑁂.

𑁩𑁪. 𑀲𑁂𑀯𑁂𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑀁, 𑀫𑀕𑁆𑀕𑁂 𑀫𑀕𑁆𑀕𑀧𑁆𑀧𑀯𑁂𑀲𑀦𑀁;

𑀇𑀤𑀫𑀗𑁆𑀕𑀤𑁆𑀯𑀬𑀁 𑀯𑀼𑀢𑁆𑀢𑀁, 𑀧𑀞𑀫𑀦𑁆𑀢𑀺𑀫𑀯𑀢𑁆𑀣𑀼𑀦𑁄.

𑁩𑁫. 𑀤𑀼𑀓𑁆𑀓𑀝𑀁 𑀧𑀞𑀫𑀲𑁆𑀲𑁂𑀯, 𑀲𑀸𑀫𑀦𑁆𑀢𑀫𑀺𑀢𑀺 𑀯𑀡𑁆𑀡𑀺𑀢𑀁;

𑀲𑁂𑀲𑀸𑀦𑀁 𑀧𑀦 𑀢𑀺𑀡𑁆𑀡𑀫𑁆𑀧𑀺, 𑀣𑀼𑀮𑁆𑀮𑀘𑁆𑀘𑀬𑀫𑀼𑀤𑀻𑀭𑀺𑀢𑀁.

𑁩𑁬. ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀜𑀸𑀢𑀩𑁆𑀩𑀁, 𑀅𑀚𑀸𑀦𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀢𑀣𑁂𑀯𑀸𑀲𑀸𑀤𑀺𑀬𑀦𑁆𑀢𑀲𑁆𑀲, 𑀚𑀸𑀦𑀦𑁆𑀢𑀲𑁆𑀲𑀸𑀤𑀺𑀓𑀫𑁆𑀫𑀺𑀦𑁄.

𑁩𑁭. 𑀯𑀺𑀦𑀬𑁂 𑀅𑀦𑀬𑀽𑀧𑀭𑀫𑁂 𑀧𑀭𑀫𑁂;

𑀲𑀼𑀚𑀦𑀲𑁆𑀲 𑀲𑀼𑀔𑀸𑀦𑀬𑀦𑁂 𑀦𑀬𑀦𑁂;

𑀧𑀝𑀼 𑀳𑁄𑀢𑀺 𑀧𑀥𑀸𑀦𑀭𑀢𑁄 𑀦 𑀭𑀢𑁄;

𑀇𑀥 𑀬𑁄 𑀧𑀦 𑀲𑀸𑀭𑀫𑀢𑁂 𑀭𑀫𑀢𑁂.

𑁩𑁮. 𑀇𑀫𑀁 𑀳𑀺𑀢𑀯𑀺𑀪𑀸𑀯𑀦𑀁 𑀪𑀸𑀯𑀦𑀁;

𑀅𑀯𑁂𑀤𑀺 𑀲𑀼𑀭𑀲𑀫𑁆𑀪𑀯𑀁 𑀲𑀫𑁆𑀪𑀯𑀁;

𑀲 𑀫𑀸𑀭𑀩𑀴𑀺𑀲𑀸𑀲𑀦𑁂 𑀲𑀸𑀲𑀦𑁂;

𑀲𑀫𑁄 𑀪𑀯𑀢𑀼𑀧𑀸𑀮𑀺𑀦𑀸 𑀧𑀸𑀮𑀺𑀦𑀸.

𑀇𑀢𑀺 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀧𑀞𑀫𑀧𑀸𑀭𑀸𑀚𑀺𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀓𑀣𑀸

𑁩𑁯. 𑀆𑀤𑀺𑀬𑀦𑁆𑀢𑁄 𑀳𑀭𑀦𑁆𑀢𑁄𑀯-𑀳𑀭𑀦𑁆𑀢𑁄 𑀇𑀭𑀺𑀬𑀸𑀧𑀣𑀁;

𑀯𑀺𑀓𑁄𑀧𑁂𑀦𑁆𑀢𑁄 𑀢𑀣𑀸 𑀞𑀸𑀦𑀸, 𑀘𑀸𑀯𑁂𑀦𑁆𑀢𑁄𑀧𑀺 𑀧𑀭𑀸𑀚𑀺𑀢𑁄.

𑁪𑁦. 𑀢𑀢𑁆𑀣 𑀦𑀸𑀦𑁂𑀓𑀪𑀡𑁆𑀟𑀸𑀦𑀁, 𑀧𑀜𑁆𑀘𑀓𑀸𑀦𑀁 𑀯𑀲𑀸 𑀧𑀦;

𑀅𑀯𑀳𑀸𑀭𑀸 𑀤𑀲𑁂𑀯𑁂𑀢𑁂, 𑀯𑀺𑀜𑁆𑀜𑀸𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸.

𑁪𑁧. 𑀲𑀸𑀳𑀢𑁆𑀣𑀸𑀡𑀢𑁆𑀢𑀺𑀓𑁄 𑀘𑁂𑀯, 𑀦𑀺𑀲𑁆𑀲𑀕𑁆𑀕𑁄 𑀅𑀢𑁆𑀣𑀲𑀸𑀥𑀓𑁄;

𑀥𑀼𑀭𑀦𑀺𑀓𑁆𑀔𑁂𑀧𑀦𑀜𑁆𑀘𑀸𑀢𑀺, 𑀇𑀤𑀁 𑀲𑀸𑀳𑀢𑁆𑀣𑀧𑀜𑁆𑀘𑀓𑀁.

𑁪𑁨. 𑀧𑀼𑀩𑁆𑀩𑀲𑀳𑀧𑀬𑁄𑀕𑁄 𑀘, 𑀲𑀁𑀯𑀺𑀤𑀸𑀳𑀭𑀡𑀫𑁆𑀧𑀺 𑀘;

𑀲𑀗𑁆𑀓𑁂𑀢𑀓𑀫𑁆𑀫𑀁 𑀦𑁂𑀫𑀺𑀢𑁆𑀢𑀁, 𑀧𑀼𑀩𑁆𑀩𑀬𑁄𑀕𑀸𑀤𑀺𑀧𑀜𑁆𑀘𑀓𑀁.

𑁪𑁩. 𑀣𑁂𑀬𑁆𑀬𑀧𑀲𑀬𑁆𑀳𑀧𑀭𑀺𑀓𑀧𑁆𑀧-𑀧𑀝𑀺𑀘𑁆𑀙𑀦𑁆𑀦𑀓𑀼𑀲𑀸𑀤𑀺𑀓𑀸;

𑀅𑀯𑀳𑀸𑀭𑀸 𑀇𑀫𑁂 𑀧𑀜𑁆𑀘, 𑀯𑁂𑀤𑀺𑀢𑀩𑁆𑀩𑀸𑀯 𑀯𑀺𑀜𑁆𑀜𑀼𑀦𑀸.

𑁪𑁪. 𑀯𑀢𑁆𑀣𑀼𑀓𑀸𑀮𑀕𑁆𑀖𑀤𑁂𑀲𑁂 𑀘, 𑀧𑀭𑀺𑀪𑁄𑀕𑀜𑁆𑀘 𑀧𑀜𑁆𑀘𑀧𑀺;

𑀜𑀢𑁆𑀯𑀸 𑀏𑀢𑀸𑀦𑀺 𑀓𑀸𑀢𑀩𑁆𑀩𑁄, 𑀧𑀡𑁆𑀟𑀺𑀢𑁂𑀦 𑀯𑀺𑀦𑀺𑀘𑁆𑀙𑀬𑁄.

𑁪𑁫. 𑀤𑀼𑀢𑀺𑀬𑀁 𑀯𑀸𑀧𑀺 𑀓𑀼𑀤𑁆𑀤𑀸𑀮𑀁, 𑀧𑀺𑀝𑀓𑀁 𑀧𑀭𑀺𑀬𑁂𑀲𑀢𑁄;

𑀕𑀘𑁆𑀙𑀢𑁄 𑀣𑁂𑀬𑁆𑀬𑀘𑀺𑀢𑁆𑀢𑁂𑀦, 𑀤𑀼𑀓𑁆𑀓𑀝𑀁 𑀧𑀼𑀩𑁆𑀩𑀬𑁄𑀕𑀢𑁄.

𑁪𑁬. 𑀢𑀢𑁆𑀣𑀚𑀸𑀢𑀓𑀓𑀝𑁆𑀞𑀁 𑀯𑀸, 𑀮𑀢𑀁 𑀯𑀸 𑀙𑀺𑀦𑁆𑀤𑀢𑁄 𑀧𑀦;

𑀤𑀼𑀓𑁆𑀓𑀝𑀁 𑀉𑀪𑀬𑀢𑁆𑀣𑀸𑀧𑀺, 𑀯𑀼𑀢𑁆𑀢𑀁 𑀲𑀳𑀧𑀬𑁄𑀕𑀢𑁄.

𑁪𑁭. 𑀧𑀣𑀯𑀺𑀁 𑀔𑀡𑀢𑁄 𑀯𑀸𑀧𑀺, 𑀩𑁆𑀬𑀽𑀳𑀢𑁄 𑀧𑀁𑀲𑀼𑀫𑁂𑀯 𑀯𑀸;

𑀆𑀫𑀲𑀦𑁆𑀢𑀲𑁆𑀲 𑀯𑀸 𑀓𑀼𑀫𑁆𑀪𑀺𑀁, 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀁.

𑁪𑁮. 𑀫𑀼𑀔𑁂 𑀧𑀸𑀲𑀁 𑀧𑀯𑁂𑀲𑁂𑀢𑁆𑀯𑀸, 𑀔𑀸𑀡𑀼𑀓𑁂 𑀩𑀤𑁆𑀥𑀓𑀼𑀫𑁆𑀪𑀺𑀬𑀸;

𑀩𑀦𑁆𑀥𑀦𑀸𑀦𑀁 𑀯𑀲𑀸 𑀜𑁂𑀬𑁆𑀬𑁄, 𑀞𑀸𑀦𑀪𑁂𑀤𑁄 𑀯𑀺𑀚𑀸𑀦𑀢𑀸.

𑁪𑁯. 𑀤𑁆𑀯𑁂 𑀞𑀸𑀦𑀸𑀦𑀺 𑀧𑀦𑁂𑀓𑀲𑁆𑀫𑀺𑀁, 𑀔𑀸𑀡𑀼𑀓𑁂 𑀩𑀤𑁆𑀥𑀓𑀼𑀫𑁆𑀪𑀺𑀬𑀸;

𑀯𑀮𑀬𑀁 𑀭𑀼𑀓𑁆𑀔𑀫𑀽𑀮𑀲𑁆𑀫𑀺𑀁, 𑀧𑀯𑁂𑀲𑁂𑀢𑁆𑀯𑀸 𑀓𑀢𑀸𑀬 𑀯𑀸.

𑁫𑁦. 𑀉𑀤𑁆𑀥𑀭𑀦𑁆𑀢𑀲𑁆𑀲 𑀔𑀸𑀡𑀼𑀁 𑀯𑀸, 𑀙𑀺𑀦𑁆𑀤𑀢𑁄 𑀲𑀗𑁆𑀔𑀮𑀺𑀫𑁆𑀧𑀺 𑀯𑀸;

𑀣𑀼𑀮𑁆𑀮𑀘𑁆𑀘𑀬𑀁 𑀢𑀢𑁄 𑀓𑀼𑀫𑁆𑀪𑀺𑀁, 𑀞𑀸𑀦𑀸 𑀘𑀸𑀯𑁂𑀢𑀺 𑀘𑁂 𑀘𑀼𑀢𑁄.

𑁫𑁧. 𑀧𑀞𑀫𑀁 𑀧𑀦 𑀓𑀼𑀫𑁆𑀪𑀺𑀁 𑀯𑀸, 𑀉𑀤𑁆𑀥𑀭𑀺𑀢𑁆𑀯𑀸 𑀢𑀣𑀸 𑀧𑀼𑀦;

𑀞𑀸𑀦𑀸 𑀘𑀸𑀯𑁂𑀢𑀺 𑀔𑀸𑀡𑀼𑀁 𑀯𑀸, 𑀲𑀗𑁆𑀔𑀮𑀺𑀁 𑀯𑀸𑀧𑀺 𑀲𑁄 𑀦𑀬𑁄.

𑁫𑁨. 𑀇𑀢𑁄 𑀘𑀺𑀢𑁄 𑀘 𑀖𑀁𑀲𑀦𑁆𑀢𑁄, 𑀫𑀽𑀮𑁂 𑀲𑀸𑀭𑁂𑀢𑀺 𑀭𑀓𑁆𑀔𑀢𑀺;

𑀯𑀮𑀬𑀁 𑀔𑁂𑀕𑀢𑀁 𑀢𑀢𑁆𑀣, 𑀓𑀭𑁄𑀦𑁆𑀢𑁄𑀯 𑀧𑀭𑀸𑀚𑀺𑀢𑁄.

𑁫𑁩. 𑀚𑀸𑀢𑀁 𑀙𑀺𑀦𑁆𑀤𑀢𑀺 𑀘𑁂 𑀭𑀼𑀓𑁆𑀔𑀁, 𑀤𑀼𑀓𑁆𑀓𑀝𑀁 𑀓𑀼𑀫𑁆𑀪𑀺𑀫𑀢𑁆𑀣𑀓𑁂;

𑀲𑀫𑀻𑀧𑁂 𑀙𑀺𑀦𑁆𑀤𑀢𑁄 𑀢𑀲𑁆𑀲, 𑀧𑀸𑀘𑀺𑀢𑁆𑀢𑀺𑀬𑀫𑀢𑀢𑁆𑀣𑀚𑀁.

𑁫𑁪. 𑀅𑀦𑁆𑀢𑁄𑀓𑀼𑀫𑁆𑀪𑀺𑀕𑀢𑀁 𑀪𑀡𑁆𑀟𑀁, 𑀨𑀦𑁆𑀤𑀸𑀧𑁂𑀢𑀺 𑀲𑀘𑁂 𑀧𑀦;

𑀅𑀧𑀩𑁆𑀬𑀽𑀳𑁂𑀢𑀺 𑀢𑀢𑁆𑀣𑁂𑀯, 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸.

𑁫𑁫. 𑀳𑀭𑀦𑁆𑀢𑁄 𑀓𑀼𑀫𑁆𑀪𑀺𑀬𑀸 𑀪𑀡𑁆𑀟𑀁, 𑀫𑀼𑀝𑁆𑀞𑀺𑀁 𑀙𑀺𑀦𑁆𑀤𑀢𑀺 𑀅𑀢𑁆𑀢𑀦𑁄;

𑀪𑀸𑀚𑀦𑁂 𑀯𑀸 𑀕𑀢𑀁 𑀓𑀢𑁆𑀯𑀸, 𑀳𑁄𑀢𑀺 𑀪𑀺𑀓𑁆𑀔𑀼 𑀧𑀭𑀸𑀚𑀺𑀢𑁄.

𑁫𑁬. 𑀳𑀸𑀭𑀁 𑀯𑀸 𑀧𑀦 𑀧𑀸𑀫𑀗𑁆𑀕𑀁, 𑀲𑀼𑀢𑁆𑀢𑀸𑀭𑀼𑀴𑁆𑀳𑀁 𑀢𑀼 𑀓𑀼𑀫𑁆𑀪𑀺𑀬𑀸;

𑀨𑀦𑁆𑀤𑀸𑀧𑁂𑀢𑀺 𑀬𑀣𑀸𑀯𑀢𑁆𑀣𑀼𑀁, 𑀞𑀸𑀦𑀸 𑀘𑀸𑀯𑁂𑀢𑀺 𑀘𑁂 𑀘𑀼𑀢𑁄.

𑁫𑁭. 𑀲𑀧𑁆𑀧𑀺𑀆𑀤𑀻𑀲𑀼 𑀬𑀁 𑀓𑀺𑀜𑁆𑀘𑀺, 𑀧𑀺𑀯𑀢𑁄 𑀧𑀸𑀤𑀧𑀽𑀭𑀡𑀁;

𑀏𑀓𑁂𑀦𑁂𑀯 𑀧𑀬𑁄𑀕𑁂𑀦, 𑀧𑀻𑀢𑀫𑀢𑁆𑀢𑁂 𑀧𑀭𑀸𑀚𑀬𑁄.

𑁫𑁮. 𑀓𑀢𑁆𑀯𑀸𑀯 𑀥𑀼𑀭𑀦𑀺𑀓𑁆𑀔𑁂𑀧𑀁, 𑀧𑀺𑀯𑀦𑁆𑀢𑀲𑁆𑀲 𑀧𑀼𑀦𑀧𑁆𑀧𑀼𑀦𑀁;

𑀲𑀓𑀮𑀫𑁆𑀧𑀺 𑀘 𑀢𑀁 𑀓𑀼𑀫𑁆𑀪𑀺𑀁, 𑀧𑀺𑀯𑀢𑁄 𑀦 𑀧𑀭𑀸𑀚𑀬𑁄.

𑁫𑁯. 𑀲𑀘𑁂 𑀔𑀺𑀧𑀢𑀺 𑀬𑀁 𑀓𑀺𑀜𑁆𑀘𑀺, 𑀪𑀡𑁆𑀟𑀓𑀁 𑀢𑁂𑀮𑀓𑀼𑀫𑁆𑀪𑀺𑀬𑀁;

𑀢𑀁 𑀧𑀸𑀤𑀕𑁆𑀖𑀦𑀓𑀁 𑀢𑁂𑀮𑀁, 𑀥𑀼𑀯𑀁 𑀧𑀺𑀯𑀢𑀺 𑀢𑀸𑀯𑀤𑁂.

𑁬𑁦. 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂𑀯, 𑀣𑁂𑀬𑁆𑀬𑀘𑀺𑀢𑁆𑀢𑁄 𑀯𑀺𑀦𑀲𑁆𑀲𑀢𑀺;

𑀆𑀯𑀺𑀜𑁆𑀚𑁂𑀢𑁆𑀯𑀸𑀧𑀺 𑀯𑀸 𑀓𑀼𑀫𑁆𑀪𑀺𑀁, 𑀢𑁂𑀮𑀁 𑀕𑀸𑀴𑁂𑀢𑀺 𑀘𑁂 𑀢𑀣𑀸.

𑁬𑁧. 𑀢𑁂𑀮𑀲𑁆𑀲𑀸𑀓𑀺𑀭𑀡𑀁 𑀜𑀢𑁆𑀯𑀸, 𑀔𑀺𑀢𑁆𑀢𑀁 𑀭𑀺𑀢𑁆𑀢𑀸𑀬 𑀓𑀼𑀫𑁆𑀪𑀺𑀬𑀸;

𑀧𑀻𑀢𑀁 𑀢𑁂𑀮𑀜𑁆𑀘 𑀢𑀁 𑀪𑀡𑁆𑀟𑀁, 𑀉𑀤𑁆𑀥𑀭𑀦𑁆𑀢𑁄𑀯 𑀥𑀁𑀲𑀺𑀢𑁄.

𑁬𑁨. 𑀢𑀢𑁆𑀣𑁂𑀯 𑀪𑀺𑀦𑁆𑀤𑀢𑁄 𑀢𑁂𑀮𑀁, 𑀙𑀟𑁆𑀟𑁂𑀦𑁆𑀢𑀲𑁆𑀲 𑀢𑀣𑁂𑀯 𑀘;

𑀛𑀸𑀧𑁂𑀦𑁆𑀢𑀲𑁆𑀲 𑀅𑀪𑁄𑀕𑀁 𑀯𑀸, 𑀓𑀭𑁄𑀦𑁆𑀢𑀲𑁆𑀲 𑀘 𑀤𑀼𑀓𑁆𑀓𑀝𑀁.

𑀪𑀽𑀫𑀝𑁆𑀞𑀓𑀣𑀸.

𑁬𑁩. 𑀞𑀧𑀺𑀢𑀁 𑀧𑀢𑁆𑀣𑀭𑀺𑀢𑁆𑀯𑀸 𑀘, 𑀲𑀸𑀝𑀓𑀢𑁆𑀣𑀭𑀡𑀸𑀤𑀺𑀓𑀁;

𑀯𑁂𑀞𑁂𑀢𑁆𑀯𑀸 𑀉𑀤𑁆𑀥𑀭𑀦𑁆𑀢𑀲𑁆𑀲, 𑀫𑀼𑀢𑁆𑀢𑁂 𑀞𑀸𑀦𑀸 𑀧𑀭𑀸𑀪𑀯𑁄.

𑁬𑁪. 𑀑𑀭𑀺𑀫𑀦𑁆𑀢𑁂𑀦 𑀯𑀸 𑀨𑀼𑀝𑁆𑀞-𑀫𑁄𑀓𑀸𑀲𑀁 𑀧𑀸𑀭𑀺𑀫𑀦𑁆𑀢𑀢𑁄;

𑀧𑀸𑀭𑀸𑀚𑀺𑀓𑀫𑀢𑀺𑀓𑁆𑀓𑀦𑁆𑀢𑁂, 𑀓𑀟𑁆𑀠𑀢𑁄 𑀉𑀚𑀼𑀓𑀫𑁆𑀧𑀺 𑀯𑀸.

𑀣𑀮𑀝𑁆𑀞𑀓𑀣𑀸.

𑁬𑁫. 𑀧𑀼𑀭𑀢𑁄 𑀫𑀼𑀔𑀢𑀼𑀡𑁆𑀟𑀜𑁆𑀘, 𑀓𑀮𑀸𑀧𑀕𑁆𑀕𑀜𑁆𑀘 𑀧𑀘𑁆𑀙𑀢𑁄;

𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀼 𑀧𑀓𑁆𑀔𑀦𑁆𑀢𑁄, 𑀳𑁂𑀝𑁆𑀞𑀸 𑀧𑀸𑀤𑀦𑀔𑀸 𑀢𑀣𑀸.

𑁬𑁬. 𑀉𑀤𑁆𑀥𑀜𑁆𑀘𑀸𑀧𑀺 𑀲𑀺𑀔𑀕𑁆𑀕𑀦𑁆𑀢𑀺, 𑀕𑀕𑀦𑁂 𑀕𑀘𑁆𑀙𑀢𑁄 𑀧𑀦;

𑀫𑁄𑀭𑀲𑁆𑀲 𑀙 𑀧𑀭𑀺𑀘𑁆𑀙𑁂𑀤𑀸, 𑀯𑁂𑀤𑀺𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸.

𑁬𑁭. 𑀪𑀺𑀓𑁆𑀔𑀼 ‘‘𑀲𑀲𑁆𑀲𑀸𑀫𑀺𑀓𑀁 𑀫𑁄𑀭𑀁, 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀔𑁂𑀕𑀢𑀁;

𑀳𑀢𑁆𑀣𑀁 𑀯𑀸𑀧𑀺 𑀧𑀲𑀸𑀭𑁂𑀢𑀺, 𑀧𑀼𑀭𑀢𑁄 𑀯𑀸𑀲𑁆𑀲 𑀢𑀺𑀝𑁆𑀞𑀢𑀺.

𑁬𑁮. 𑀫𑁄𑀭𑁄𑀧𑀺 𑀕𑀕𑀦𑁂 𑀧𑀓𑁆𑀔𑁂, 𑀘𑀸𑀭𑁂𑀢𑀺 𑀦 𑀘 𑀕𑀘𑁆𑀙𑀢𑀺;

𑀤𑀼𑀓𑁆𑀓𑀝𑀁 𑀕𑀫𑀦𑀘𑁆𑀙𑁂𑀤𑁂, 𑀆𑀫𑀲𑀦𑁆𑀢𑀲𑁆𑀲 𑀘𑁂𑀯 𑀢𑀁.