𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀝𑀻𑀓𑀸

(𑀧𑀞𑀫𑁄 𑀪𑀸𑀕𑁄)

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

(𑀓)

𑀆𑀤𑀺𑀘𑁆𑀘𑀯𑀁𑀲𑀫𑁆𑀩𑀭𑀧𑀸𑀢𑀼𑀪𑀽𑀢𑀁;

𑀩𑁆𑀬𑀸𑀫𑀧𑁆𑀧𑀪𑀸𑀫𑀡𑁆𑀟𑀮𑀤𑁂𑀯𑀘𑀸𑀧𑀁;

𑀥𑀫𑁆𑀫𑀫𑁆𑀩𑀼𑀦𑀺𑀚𑁆𑀛𑀸𑀧𑀺𑀢𑀧𑀸𑀧𑀖𑀫𑁆𑀫𑀁;

𑀯𑀦𑁆𑀤𑀸𑀫𑀳𑀁 𑀩𑀼𑀤𑁆𑀥 𑀫𑀳𑀫𑁆𑀩𑀼𑀯𑀦𑁆𑀢𑀁.

(𑀔)

𑀧𑀲𑀦𑁆𑀦𑀕𑀫𑁆𑀪𑀻𑀭𑀧𑀤𑀸𑀴𑀺𑀲𑁄𑀢𑀁;

𑀦𑀸𑀦𑀸𑀦𑀬𑀸𑀦𑀦𑁆𑀢𑀢𑀭𑀗𑁆𑀕𑀫𑀸𑀮𑀁;

𑀲𑀻𑀮𑀸𑀤𑀺𑀔𑀦𑁆𑀥𑀸𑀫𑀺𑀢𑀫𑀘𑁆𑀙𑀕𑀼𑀫𑁆𑀩𑀁;

𑀯𑀦𑁆𑀤𑀸𑀫𑀳𑀁 𑀥𑀫𑁆𑀫 𑀫𑀳𑀸𑀲𑀯𑀦𑁆𑀢𑀺𑀁.

(𑀕)

𑀲𑀻𑀮𑁄𑀭𑀼𑀯𑁂𑀮𑀁 𑀥𑀼𑀢𑀲𑀗𑁆𑀔𑀫𑀸𑀮𑀁;

𑀲𑀦𑁆𑀢𑁄𑀲𑀢𑁄𑀬𑀁 𑀲𑀫𑀣𑀽𑀫𑀺𑀘𑀺𑀢𑁆𑀢𑀁;

𑀧𑀥𑀸𑀦𑀓𑀺𑀘𑁆𑀘𑀁 𑀅𑀥𑀺𑀘𑀺𑀢𑁆𑀢𑀲𑀸𑀭𑀁;

𑀯𑀦𑁆𑀤𑀸𑀫𑀳𑀁 𑀲𑀗𑁆𑀖 𑀫𑀳𑀸𑀲𑀫𑀼𑀤𑁆𑀤𑀁.

(𑀖)

𑀬𑁂 𑀢𑀦𑁆𑀢𑀺𑀥𑀫𑁆𑀫𑀁 𑀫𑀼𑀦𑀺𑀭𑀸𑀚𑀧𑀼𑀢𑁆𑀢𑀸;

𑀬𑀸𑀯𑀚𑁆𑀚𑀓𑀸𑀮𑀁 𑀧𑀭𑀺𑀧𑀸𑀮𑀬𑀦𑁆𑀢𑀸;

𑀲𑀁𑀯𑀡𑁆𑀡𑀦𑀁 𑀦𑀺𑀫𑁆𑀫𑀮𑀫𑀸𑀦𑀬𑀺𑀁𑀲𑀼;

𑀢𑁂 𑀧𑀼𑀩𑁆𑀩𑀓𑁂 𑀘𑀸𑀘𑀭𑀺𑀬𑁂 𑀦𑀫𑀸𑀫𑀺.

(𑀗)

𑀬𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀢𑀼𑀮𑁆𑀬𑀦𑀸𑀫𑁄;

𑀢𑀣𑀽𑀧𑀫𑁄 𑀲𑀻𑀳𑀴𑀤𑀻𑀧𑀤𑀻𑀧𑁄;

𑀫𑀫𑀁 𑀫𑀳𑀸𑀲𑀸𑀫𑀺𑀫𑀳𑀸𑀬𑀢𑀺𑀦𑁆𑀤𑁄;

𑀧𑀸𑀧𑁂𑀲𑀺 𑀯𑀼𑀟𑁆𑀠𑀺𑀁 𑀚𑀺𑀦𑀲𑀸𑀲𑀦𑀫𑁆𑀳𑀺.

(𑀘)

𑀝𑀻𑀓𑀸 𑀓𑀢𑀸 𑀅𑀝𑁆𑀞𑀓𑀣𑀸𑀬 𑀬𑁂𑀦;

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀦𑀸𑀫𑀺𑀓𑀸𑀬;

𑀅𑀗𑁆𑀕𑀼𑀢𑁆𑀢𑀭𑀸𑀬𑀝𑁆𑀞𑀓𑀣𑀸𑀬 𑀘𑁂𑀯;

𑀲𑀢𑁆𑀣𑀦𑁆𑀢𑀭𑀲𑁆𑀲𑀸𑀧𑀺 𑀘 𑀚𑁄𑀢𑀺𑀲𑀢𑁆𑀣𑀁.

(𑀙)

𑀦𑀺𑀓𑀸𑀬𑀲𑀸𑀫𑀕𑁆𑀕𑀺𑀯𑀺𑀥𑀸𑀬𑀓𑁂𑀦;

𑀭𑀜𑁆𑀜𑀸 𑀧𑀭𑀓𑁆𑀓𑀦𑁆𑀢𑀺𑀪𑀼𑀚𑁂𑀦 𑀲𑀫𑁆𑀫𑀸;

𑀮𑀗𑁆𑀓𑀺𑀲𑁆𑀲𑀭𑁂𑀦𑀸𑀧𑀺 𑀓𑀢𑁄𑀧𑀳𑀸𑀭𑀁;

𑀯𑀦𑁆𑀤𑁂 𑀕𑀭𑀼𑀁 𑀕𑀸𑀭𑀯𑀪𑀸𑀚𑀦𑀁 𑀢𑀁.

(𑀚)

𑀦𑀫𑀲𑁆𑀲𑀫𑀸𑀦𑁄𑀳𑀫𑀮𑀢𑁆𑀣𑀫𑁂𑀯𑀁;

𑀯𑀢𑁆𑀣𑀼𑀢𑁆𑀢𑀬𑀁 𑀯𑀦𑁆𑀤𑀺𑀢𑀯𑀦𑁆𑀤𑀦𑁂𑀬𑁆𑀬𑀁;

𑀬𑀁 𑀧𑀼𑀜𑁆𑀜𑀲𑀦𑁆𑀤𑁄𑀳𑀫𑀫𑀦𑁆𑀤𑀪𑀽𑀢𑀁;

𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀳𑀢𑀦𑁆𑀢𑀭𑀸𑀬𑁄.

(𑀛)

𑀬𑁄 𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑀸𑀲𑀪𑁂𑀦;

𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑁂𑀦𑀧𑀺 𑀲𑀼𑀧𑁆𑀧𑀲𑀢𑁆𑀣𑁄;

𑀲𑁄 𑀩𑀼𑀤𑁆𑀥𑀤𑀢𑁆𑀢𑀸𑀘𑀭𑀺𑀬𑀸𑀪𑀺𑀥𑀸𑀦𑁄;

𑀫𑀳𑀸𑀓𑀯𑀻 𑀣𑁂𑀭𑀺𑀬𑀯𑀁𑀲𑀤𑀻𑀧𑁄.

(𑀜)

𑀅𑀓𑀸𑀲𑀺 𑀬𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀯𑁆𑀳𑀬𑀁;

𑀲𑀉𑀢𑁆𑀢𑀭𑀁 𑀧𑀓𑀭𑀡𑀫𑀼𑀢𑁆𑀢𑀫𑀁 𑀳𑀺𑀢𑀁;

𑀅𑀧𑁂𑀓𑁆𑀔𑀢𑀁 𑀯𑀺𑀦𑀬𑀦𑀬𑁂𑀲𑀼 𑀧𑀸𑀝𑀯𑀁;

𑀧𑀼𑀭𑀸𑀲𑀺 𑀬𑀁 𑀯𑀺𑀯𑀭𑀡𑀫𑀲𑁆𑀲 𑀲𑀻𑀳𑀴𑀁.

(𑀝)

𑀬𑀲𑁆𑀫𑀸 𑀦 𑀤𑀻𑀧𑀦𑁆𑀢𑀭𑀺𑀓𑀸𑀦𑀫𑀢𑁆𑀣𑀁;

𑀲𑀸𑀥𑁂𑀢𑀺 𑀪𑀺𑀓𑁆𑀔𑀽𑀦𑀫𑀲𑁂𑀲𑀢𑁄 𑀢𑀁;

𑀢𑀲𑁆𑀫𑀸 𑀳𑀺 𑀲𑀩𑁆𑀩𑀢𑁆𑀣 𑀬𑀢𑀻𑀦𑀫𑀢𑁆𑀣𑀁;

𑀆𑀲𑀻𑀲𑀫𑀸𑀦𑁂𑀦 𑀤𑀬𑀸𑀮𑀬𑁂𑀦.

(𑀞)

𑀲𑀼𑀫𑀗𑁆𑀕𑀮𑀢𑁆𑀣𑁂𑀭𑀯𑀭𑁂𑀦 𑀬𑀲𑁆𑀫𑀸;

𑀲𑀓𑁆𑀓𑀘𑁆𑀘 𑀓𑀮𑁆𑀬𑀸𑀡𑀫𑀦𑁄𑀭𑀣𑁂𑀦;

𑀦𑀬𑀜𑁆𑀜𑀼𑀦𑀸𑀭𑀜𑁆𑀜𑀦𑀺𑀯𑀸𑀲𑀺𑀓𑁂𑀦;

𑀅𑀚𑁆𑀛𑁂𑀲𑀺𑀢𑁄 𑀲𑀸𑀥𑀼𑀕𑀼𑀡𑀸𑀓𑀭𑁂𑀦.

(𑀟)

𑀆𑀓𑀗𑁆𑀔𑀫𑀸𑀦𑁂𑀦 𑀘𑀺𑀭𑀧𑁆𑀧𑀯𑀢𑁆𑀢𑀺𑀁;

𑀥𑀫𑁆𑀫𑀲𑁆𑀲 𑀥𑀫𑁆𑀫𑀺𑀲𑁆𑀲𑀭𑀤𑁂𑀲𑀺𑀢𑀲𑁆𑀲;

𑀘𑁄𑀴𑀧𑁆𑀧𑀤𑀻𑀧𑁂𑀦 𑀘 𑀩𑀼𑀤𑁆𑀥𑀫𑀺𑀢𑁆𑀢-

𑀢𑁆𑀣𑁂𑀭𑁂𑀦 𑀲𑀤𑁆𑀥𑀸𑀤𑀺𑀕𑀼𑀡𑁄𑀤𑀺𑀢𑁂𑀦.

(𑀠)

𑀢𑀣𑀸 𑀫𑀳𑀸𑀓𑀲𑁆𑀲𑀧𑀅𑀯𑁆𑀳𑀬𑁂𑀦;

𑀣𑁂𑀭𑁂𑀦 𑀲𑀺𑀓𑁆𑀔𑀸𑀲𑀼 𑀲𑀕𑀸𑀭𑀯𑁂𑀦;

𑀓𑀼𑀤𑀺𑀝𑁆𑀞𑀺𑀫𑀢𑁆𑀢𑁂𑀪𑀯𑀺𑀤𑀸𑀭𑀓𑁂𑀦;

𑀲𑀻𑀳𑁂𑀦 𑀘𑁄𑀴𑀸𑀯𑀦𑀺𑀧𑀽𑀚𑀺𑀢𑁂𑀦.

(𑀡)

𑀬𑁄 𑀥𑀫𑁆𑀫𑀓𑀺𑀢𑁆𑀢𑀻𑀢𑀺 𑀧𑀲𑀢𑁆𑀣𑀦𑀸𑀫𑁄;

𑀢𑁂𑀦𑀸𑀧𑀺 𑀲𑀤𑁆𑀥𑁂𑀦 𑀉𑀧𑀸𑀲𑀓𑁂𑀦;

𑀲𑀻𑀮𑀸𑀤𑀺𑀦𑀸𑀦𑀸𑀕𑀼𑀡𑀫𑀡𑁆𑀟𑀺𑀢𑁂𑀦;

𑀲𑀤𑁆𑀥𑀫𑁆𑀫𑀓𑀸𑀫𑁂𑀦𑀺𑀥 𑀧𑀡𑁆𑀟𑀺𑀢𑁂𑀦.

(𑀢)

𑀲𑀤𑁆𑀥𑁂𑀦 𑀧𑀜𑁆𑀜𑀸𑀡𑀯𑀢𑀸 𑀯𑀴𑀢𑁆𑀢𑀸-;

𑀫𑀗𑁆𑀕𑀮𑁆𑀬𑀯𑀁𑀲𑁂𑀦 𑀫𑀳𑀸𑀬𑀲𑁂𑀦;

𑀆𑀬𑀸𑀘𑀺𑀢𑁄 𑀯𑀸𑀡𑀺𑀚𑀪𑀸𑀡𑀼𑀦𑀸𑀧𑀺;

𑀯𑀭𑀜𑁆𑀜𑀼𑀦𑀸 𑀲𑀸𑀥𑀼𑀕𑀼𑀡𑁄𑀤𑀬𑁂𑀦.

(𑀣)

𑀢𑀲𑁆𑀫𑀸 𑀢𑀫𑀸𑀭𑁄𑀧𑀺𑀬 𑀧𑀸𑀴𑀺𑀪𑀸𑀲𑀁;

𑀦𑀺𑀲𑁆𑀲𑀸𑀬 𑀧𑀼𑀩𑁆𑀩𑀸𑀘𑀭𑀺𑀬𑁄𑀧𑀤𑁂𑀲𑀁;

𑀳𑀺𑀢𑁆𑀯𑀸 𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀺𑀤𑁄𑀲𑀁;

𑀓𑀢𑁆𑀯𑀸𑀢𑀺𑀯𑀺𑀢𑁆𑀣𑀸𑀭𑀦𑀬𑀁 𑀲𑀫𑀸𑀲𑀁.

(𑀤)

𑀅𑀯𑀼𑀢𑁆𑀢𑀫𑀢𑁆𑀣𑀜𑁆𑀘 𑀧𑀓𑀸𑀲𑀬𑀦𑁆𑀢𑁄;

𑀧𑀸𑀞𑀓𑁆𑀓𑀫𑀜𑁆𑀘𑀸𑀧𑀺 𑀅𑀯𑁄𑀓𑁆𑀓𑀫𑀦𑁆𑀢𑁄;

𑀲𑀁𑀯𑀡𑁆𑀡𑀬𑀺𑀲𑁆𑀲𑀸𑀫𑀺 𑀢𑀤𑀢𑁆𑀣𑀲𑀸𑀭𑀁;

𑀆𑀤𑀸𑀬 𑀕𑀦𑁆𑀣𑀦𑁆𑀢𑀭𑀢𑁄𑀧𑀺 𑀲𑀸𑀭𑀁.

(𑀥)

𑀘𑀺𑀭𑀝𑁆𑀞𑀺𑀢𑀺𑀁 𑀧𑀢𑁆𑀣𑀬𑀢𑀸 𑀚𑀦𑀸𑀦𑀁;

𑀳𑀺𑀢𑀸𑀯𑀳𑀲𑁆𑀲𑀸𑀫𑀮𑀲𑀸𑀲𑀦𑀲𑁆𑀲;

𑀫𑀬𑀸 𑀲𑀫𑀸𑀲𑁂𑀦 𑀯𑀺𑀥𑀻𑀬𑀫𑀸𑀦𑀁;

𑀲𑀁𑀯𑀡𑁆𑀡𑀦𑀁 𑀲𑀸𑀥𑀼 𑀲𑀼𑀡𑀦𑁆𑀢𑀼 𑀲𑀦𑁆𑀢𑁄𑀢𑀺.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸

𑁧-𑁫.

.𑀲𑀼𑀯𑀺𑀧𑀼𑀮𑀸𑀫𑀮𑀲𑀤𑁆𑀥𑀸𑀧𑀜𑁆𑀜𑀸𑀤𑀺𑀕𑀼𑀡𑀲𑀫𑀼𑀤𑀬𑀸𑀯𑀳𑀁 𑀲𑀓𑀮𑀚𑀦𑀳𑀺𑀢𑁂𑀓𑀳𑁂𑀢𑀼𑀚𑀺𑀦𑀲𑀸𑀲𑀦𑀝𑁆𑀞𑀺𑀢𑀺𑀫𑀽𑀮𑀪𑀽𑀢𑀁 𑀯𑀺𑀦𑀬𑀧𑁆𑀧𑀓𑀭𑀡𑀫𑀺𑀤𑀫𑀸𑀭𑀪𑀦𑁆𑀢𑁄𑀬𑀫𑀸𑀘𑀭𑀺𑀬𑁄 𑀧𑀓𑀭𑀡𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀧𑁆𑀧𑀡𑀸𑀫𑀧𑀓𑀭𑀡𑀸𑀪𑀺𑀥𑀸𑀦𑀸𑀪𑀺𑀥𑁂𑀬𑁆𑀬𑀓𑀭𑀡𑀧𑁆𑀧𑀓𑀸𑀭𑀧𑀬𑁄𑀚𑀦𑀦𑀺𑀫𑀺𑀢𑁆𑀢𑀓𑀢𑁆𑀢𑀼𑀧𑀭𑀺𑀫𑀸𑀡𑀸𑀤𑀻𑀦𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀯𑀦𑁆𑀤𑀺𑀢𑁆𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀭𑀢𑀦𑀢𑁆𑀢𑀬𑀁 𑀦𑀸𑀫.

‘‘𑀘𑀺𑀢𑁆𑀢𑀻𑀓𑀢𑀁 𑀫𑀳𑀕𑁆𑀖𑀜𑁆𑀘, 𑀅𑀢𑀼𑀮𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀁;

𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁, 𑀭𑀢𑀦𑀁 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁩; 𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁨𑁨𑁩; 𑀔𑀼. 𑀧𑀸. 𑀅𑀝𑁆𑀞. 𑁬.𑁩; 𑀲𑀼. 𑀦𑀺. 𑀅𑀝𑁆𑀞. 𑁧.𑁨𑁨𑁬; 𑀫𑀳𑀸𑀦𑀺. 𑀅𑀝𑁆𑀞. 𑁫𑁦) 𑁋

𑀦𑀺𑀤𑁆𑀤𑀺𑀝𑁆𑀞𑀲𑀪𑀸𑀯𑀁

‘‘𑀩𑀼𑀤𑁆𑀥𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀥𑀫𑁆𑀫𑁄 𑀮𑁄𑀓𑀼𑀢𑁆𑀢𑀭𑁄 𑀦𑀯;

𑀲𑀗𑁆𑀖𑁄 𑀫𑀕𑁆𑀕𑀨𑀮𑀝𑁆𑀞𑁄 𑀘, 𑀇𑀘𑁆𑀘𑁂𑀢𑀁 𑀭𑀢𑀦𑀢𑁆𑀢𑀬’’𑀦𑁆𑀢𑀺. 𑁋

𑀯𑀺𑀪𑀸𑀯𑀺𑀢𑀧𑁆𑀧𑀪𑁂𑀤𑀁 𑀲𑀓𑀮𑀪𑀯𑀤𑀼𑀓𑁆𑀔𑀯𑀺𑀦𑀺𑀯𑀸𑀭𑀡𑀁 𑀢𑀺𑀪𑀯𑁂𑀦𑁂𑀓𑀧𑀝𑀺𑀲𑀭𑀡𑀁 𑀯𑀢𑁆𑀣𑀼𑀢𑁆𑀢𑀬𑀁.

𑀢𑀲𑁆𑀲 𑀧𑀡𑀸𑀫𑁄 𑀦𑀸𑀫 𑀧𑀡𑀸𑀫𑀓𑀺𑀭𑀺𑀬𑀸𑀦𑀺𑀧𑁆𑀨𑀸𑀤𑀺𑀓𑀸 𑀘𑁂𑀢𑀦𑀸. 𑀲𑀸 𑀢𑀺𑀯𑀺𑀥𑀸 𑀓𑀸𑀬𑀧𑀡𑀸𑀫𑁄 𑀯𑀘𑀻𑀧𑀡𑀸𑀫𑁄 𑀫𑀦𑁄𑀧𑀡𑀸𑀫𑁄𑀢𑀺. 𑀢𑀢𑁆𑀣 𑀓𑀸𑀬𑀧𑀡𑀸𑀫𑁄 𑀦𑀸𑀫 𑀭𑀢𑀦𑀢𑁆𑀢𑀬𑀕𑀼𑀡𑀸𑀦𑀼𑀲𑁆𑀲𑀭𑀡𑀧𑀼𑀩𑁆𑀩𑀺𑀓𑀸 𑀅𑀜𑁆𑀚𑀮𑀺𑀓𑀫𑁆𑀫𑀸𑀤𑀺𑀓𑀸𑀬𑀓𑀺𑀭𑀺𑀬𑀸𑀯𑀲𑀧𑁆𑀧𑀯𑀢𑁆𑀢𑀺𑀓𑀸 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸. 𑀯𑀘𑀻𑀧𑀡𑀸𑀫𑁄 𑀦𑀸𑀫 𑀢𑀣𑁂𑀯 𑀧𑀯𑀢𑁆𑀢𑀸 𑀦𑀸𑀦𑀸𑀯𑀺𑀥𑀕𑀼𑀡𑀯𑀺𑀲𑁂𑀲𑀯𑀺𑀪𑀸𑀯𑀦𑀲𑀪𑀸𑀯𑀣𑁄𑀫𑀦𑀸𑀓𑀺𑀭𑀺𑀬𑀸𑀯𑀲𑀧𑁆𑀧𑀯𑀢𑁆𑀢𑀺𑀓𑀸 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸. 𑀫𑀦𑁄𑀧𑀡𑀸𑀫𑁄 𑀦𑀸𑀫 𑀉𑀪𑀬𑀯𑀺𑀜𑁆𑀜𑀢𑁆𑀢𑀺𑀬𑁄 𑀅𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀓𑁂𑀯𑀮𑀁 𑀕𑀼𑀡𑀸𑀦𑀼𑀲𑁆𑀲𑀭𑀡𑁂𑀦 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀢𑀦𑁆𑀦𑀺𑀦𑁆𑀦𑀢𑀧𑁆𑀧𑁄𑀡𑀢𑀧𑁆𑀧𑀩𑁆𑀪𑀸𑀭𑀢𑀸𑀬 𑀕𑀸𑀭𑀯𑀩𑀳𑀼𑀫𑀸𑀦𑀦𑀯𑀲𑀧𑁆𑀧𑀯𑀢𑁆𑀢𑀺𑀲𑀸𑀥𑀺𑀓𑀸 𑀘𑁂𑀢𑀦𑀸.

𑀇𑀫𑀲𑁆𑀲 𑀢𑀸𑀯 𑀭𑀢𑀦𑀢𑁆𑀢𑀬𑀧𑀡𑀸𑀫𑀲𑁆𑀲 𑀤𑀲𑁆𑀲𑀦𑀁 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀲𑀸𑀥𑀦𑀢𑁆𑀣𑀁. 𑀕𑀼𑀡𑀸𑀢𑀺𑀲𑀬𑀬𑁄𑀕𑁂𑀦 𑀳𑀺 𑀧𑀡𑀸𑀫𑀸𑀭𑀳𑁂 𑀭𑀢𑀦𑀢𑁆𑀢𑀬𑁂 𑀓𑀢𑁄 𑀧𑀡𑀸𑀫𑁄 𑀧𑀼𑀜𑁆𑀜𑀯𑀺𑀲𑁂𑀲𑀪𑀸𑀯𑀢𑁄 𑀇𑀘𑁆𑀙𑀺𑀢𑀢𑁆𑀣𑀸𑀪𑀺𑀦𑀺𑀧𑁆𑀨𑀢𑁆𑀢𑀺𑀯𑀺𑀩𑀦𑁆𑀥𑀓𑁂𑀦 𑀉𑀧𑀖𑀸𑀢𑀓𑁂𑀦, 𑀉𑀧𑀧𑀻𑀴𑀓𑁂𑀦 𑀘 𑀅𑀧𑀼𑀜𑁆𑀜𑀓𑀫𑁆𑀫𑁂𑀦 𑀉𑀧𑀦𑀻𑀬𑀫𑀸𑀦𑀲𑁆𑀲 𑀉𑀧𑀤𑁆𑀤𑀯𑀚𑀸𑀮𑀲𑁆𑀲 𑀯𑀺𑀦𑀺𑀯𑀸𑀭𑀡𑁂𑀦 𑀬𑀣𑀸𑀮𑀤𑁆𑀥𑀲𑀫𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀓𑀲𑁆𑀲 𑀧𑀼𑀜𑁆𑀜𑀓𑀫𑁆𑀫𑀲𑁆𑀲 𑀅𑀦𑀼𑀩𑀮𑀧𑁆𑀧𑀤𑀸𑀦𑁂𑀦 𑀘 𑀢𑀩𑁆𑀩𑀺𑀧𑀸𑀓𑀲𑀦𑁆𑀢𑀢𑀺𑀬𑀸 𑀆𑀬𑀼𑀲𑀼𑀔𑀩𑀮𑀸𑀤𑀺𑀯𑀟𑁆𑀠𑀦𑁂𑀦 𑀘 𑀘𑀺𑀭𑀓𑀸𑀮𑀧𑁆𑀧𑀯𑀢𑁆𑀢𑀺𑀳𑁂𑀢𑀼𑀓𑁄𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀧𑀓𑀭𑀡𑀦𑀺𑀧𑁆𑀨𑀢𑁆𑀢𑀺𑀦𑀺𑀩𑀦𑁆𑀥𑀦𑀓𑁄 𑀳𑁄𑀢𑀺. 𑀅𑀣𑀸𑀧𑀺 𑀲𑁄𑀢𑀽𑀦𑀜𑁆𑀘 𑀯𑀦𑁆𑀤𑀦𑀻𑀬𑀯𑀦𑁆𑀤𑀦𑀸𑀧𑀼𑀩𑁆𑀩𑀓𑁂𑀦𑀸𑀭𑀫𑁆𑀪𑁂𑀦 𑀅𑀦𑀦𑁆𑀢𑀭𑀸𑀬𑁂𑀦 𑀉𑀕𑁆𑀕𑀳𑀡𑀥𑀸𑀭𑀡𑀸𑀤𑀺𑀓𑁆𑀓𑀫𑁂𑀦 𑀧𑀓𑀭𑀡𑀸𑀯𑀩𑁄𑀥𑀧𑁆𑀧𑀬𑁄𑀚𑀦𑀲𑀸𑀥𑀦𑀢𑁆𑀣𑀁. 𑀅𑀧𑀺𑀘 𑀲𑁄𑀢𑀽𑀦𑀫𑁂𑀯 𑀯𑀺𑀜𑁆𑀜𑀸𑀢𑀲𑀢𑁆𑀣𑀼𑀓𑀸𑀦𑀁 𑀪𑀕𑀯𑀢𑁄 𑀬𑀣𑀸𑀪𑀽𑀢𑀕𑀼𑀡𑀯𑀺𑀲𑁂𑀲𑀸𑀦𑀼𑀲𑁆𑀲𑀯𑀦𑁂𑀦 𑀲𑀫𑀼𑀧𑀚𑀸𑀢𑀧𑁆𑀧𑀲𑀸𑀤𑀸𑀦𑀁 𑀧𑀓𑀭𑀡𑁂 𑀕𑀸𑀭𑀯𑀼𑀧𑁆𑀧𑀸𑀤𑀦𑀢𑁆𑀣𑀁, 𑀅𑀯𑀺𑀜𑁆𑀜𑀸𑀢𑀲𑀢𑁆𑀣𑀼𑀓𑀸𑀦𑀁 𑀧𑀦 𑀧𑀓𑀭𑀡𑀲𑁆𑀲 𑀲𑁆𑀯𑀸𑀔𑁆𑀬𑀸𑀢𑀢𑀸𑀬 𑀢𑀧𑁆𑀧𑀪𑀯𑁂 𑀲𑀢𑁆𑀣𑀭𑀺 𑀕𑀸𑀭𑀯𑀼𑀧𑁆𑀧𑀸𑀤𑀦𑀢𑁆𑀣𑀜𑁆𑀘 𑀲𑁄𑀢𑀼𑀚𑀦𑀸𑀦𑀼𑀕𑁆𑀕𑀳𑀫𑁂𑀯 𑀧𑀥𑀸𑀦𑀁 𑀓𑀢𑁆𑀯𑀸 𑀆𑀘𑀭𑀺𑀬𑁂𑀳𑀺 𑀕𑀦𑁆𑀣𑀸𑀭𑀫𑁆𑀪𑁂 𑀣𑀼𑀢𑀺𑀧𑁆𑀧𑀡𑀸𑀫𑀧𑀭𑀺𑀤𑀻𑀧𑀓𑀸𑀦𑀁 𑀕𑀸𑀣𑀸𑀯𑀸𑀓𑁆𑀬𑀸𑀦𑀁 𑀦𑀺𑀓𑁆𑀔𑁂𑀧𑁄 𑀯𑀺𑀥𑀻𑀬𑀢𑀺. 𑀇𑀢𑀭𑀣𑀸 𑀯𑀺𑀦𑀸𑀧𑀺 𑀢𑀦𑁆𑀦𑀺𑀓𑁆𑀔𑁂𑀧𑀁 𑀓𑀸𑀬𑀫𑀦𑁄𑀧𑀡𑀸𑀫𑁂𑀦𑀸𑀧𑀺 𑀬𑀣𑀸𑀥𑀺𑀧𑁆𑀧𑁂𑀢𑀧𑁆𑀧𑀬𑁄𑀚𑀦𑀲𑀺𑀤𑁆𑀥𑀺𑀢𑁄 𑀓𑀺𑀫𑁂𑀢𑁂𑀦 𑀕𑀦𑁆𑀣𑀕𑀸𑀭𑀯𑀓𑀭𑁂𑀦𑀸𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀧𑀡𑀸𑀫𑀧𑁆𑀧𑀬𑁄𑀚𑀦𑀁 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀸𑀤𑀻𑀲𑀼 (𑀲𑀸𑀭𑀢𑁆𑀣. 𑀝𑀻. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸; 𑀯𑀺. 𑀯𑀺. 𑀝𑀻. 𑁨.𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸) 𑀤𑀲𑁆𑀲𑀺𑀢𑀦𑀬𑁂𑀦𑁂𑀯 𑀜𑀸𑀢𑀩𑁆𑀩𑀁.

𑀅𑀪𑀺𑀥𑀸𑀦𑀓𑀣𑀦𑀁 𑀧𑀦 𑀯𑁄𑀳𑀸𑀭𑀲𑀼𑀔𑀢𑁆𑀣𑀁. 𑀅𑀪𑀺𑀥𑁂𑀬𑁆𑀬𑀲𑁆𑀲 𑀲𑀫𑀼𑀤𑀺𑀢𑁂𑀦 𑀧𑀓𑀭𑀡𑁂𑀦 𑀧𑀝𑀺𑀧𑀸𑀤𑁂𑀢𑀩𑁆𑀩𑀲𑁆𑀲 𑀓𑀣𑀦𑀁 𑀧𑀓𑀭𑀡𑀲𑁆𑀲 𑀆𑀭𑀪𑀺𑀢𑀩𑁆𑀩𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀯𑀺𑀤𑀺𑀢𑀸𑀦𑀺𑀦𑁆𑀤𑀺𑀢𑀲𑀸𑀢𑁆𑀣𑀓𑀲𑀼𑀓𑀭𑀸𑀦𑀼𑀝𑁆𑀞𑀸𑀦𑀸𑀪𑀺 𑀥𑁂𑀬𑁆𑀬𑀫𑁂𑀯 𑀳𑀺 𑀧𑀓𑀭𑀡𑀁 𑀧𑀭𑀺𑀓𑁆𑀔𑀓𑀚𑀦𑀸 𑀆𑀭𑀪𑀺𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀻𑀢𑀺. 𑀓𑀭𑀡𑀧𑁆𑀧𑀓𑀸𑀭𑀲𑀦𑁆𑀤𑀲𑁆𑀲𑀦𑀁 𑀲𑁄𑀢𑀼𑀚𑀦𑀲𑀫𑀼𑀲𑁆𑀲𑀸𑀳𑀦𑀢𑁆𑀣𑀁. 𑀅𑀦𑀸𑀓𑀼𑀮𑀫𑀲𑀁𑀓𑀺𑀡𑁆𑀡𑀢𑀸𑀤𑀺𑀧𑁆𑀧𑀓𑀸𑀭𑁂𑀦 𑀳𑀺 𑀯𑀺𑀭𑀘𑀺𑀢𑀁 𑀧𑀓𑀭𑀡𑀁 𑀲𑁄𑀢𑀸𑀭𑁄 𑀲𑁄𑀢𑀼𑀫𑀼𑀲𑁆𑀲𑀳𑀦𑁆𑀢𑀻𑀢𑀺. 𑀧𑀬𑁄𑀚𑀦𑀓𑀣𑀦𑀁 𑀧𑀦 𑀧𑀓𑀭𑀡𑀚𑁆𑀛𑀸𑀬𑀦𑁂 𑀲𑁄𑀢𑀼𑀚𑀦𑀲𑀫𑀼𑀢𑁆𑀢𑁂𑀚𑀦𑀢𑁆𑀣𑀁. 𑀅𑀲𑀢𑀺 𑀳𑀺 𑀧𑀬𑁄𑀚𑀦𑀓𑀣𑀦𑁂 𑀅𑀯𑀺𑀜𑁆𑀜𑀸𑀢𑀧𑁆𑀧𑀬𑁄𑀚𑀦𑀸 𑀅𑀚𑁆𑀛𑀸𑀬𑀦𑁂 𑀩𑁆𑀬𑀸𑀯𑀝𑀸 𑀦 𑀳𑁄𑀦𑁆𑀢𑀻𑀢𑀺. 𑀦𑀺𑀫𑀺𑀢𑁆𑀢𑀓𑀣𑀦𑀁 𑀲𑀭𑀺𑀓𑁆𑀔𑀓𑀚𑀦𑀸𑀦𑀁 𑀧𑀓𑀭𑀡𑁂 𑀕𑀸𑀭𑀯𑀼𑀧𑁆𑀧𑀸𑀤𑀦𑀢𑁆𑀣𑀁. 𑀧𑀲𑀢𑁆𑀣𑀓𑀸𑀭𑀡𑀼𑀧𑁆𑀧𑀦𑁆𑀦𑁂𑀬𑁂𑀯 𑀳𑀺 𑀧𑀓𑀭𑀡𑁂 𑀲𑀭𑀺𑀓𑁆𑀔𑀓𑀸 𑀕𑀸𑀭𑀯𑀁 𑀚𑀦𑁂𑀦𑁆𑀢𑀻𑀢𑀺.

𑀓𑀢𑁆𑀢𑀼𑀓𑀣𑀦𑀁 𑀧𑀼𑀕𑁆𑀕𑀮𑀕𑀭𑀼𑀓𑀲𑁆𑀲 𑀧𑀓𑀭𑀡𑁂 𑀕𑀸𑀭𑀯𑁄 𑀧𑀼𑀕𑁆𑀕𑀮𑀕𑀸𑀭𑀯𑁂𑀦𑀧𑀺 𑀳𑁄𑀢𑀽𑀢𑀺. 𑀧𑀭𑀺𑀫𑀸𑀡𑀓𑀣𑀦𑀁 𑀅𑀲𑀚𑁆𑀛𑀸𑀬𑀦𑀸𑀤𑀺𑀧𑀲𑀼𑀢𑀸𑀦𑀁 𑀲𑀫𑁆𑀧𑀳𑀁𑀲𑀦𑀢𑁆𑀣𑀁. 𑀧𑀓𑀭𑀡𑀧𑀭𑀺𑀫𑀸𑀡𑀲𑁆𑀲𑀯𑀦𑁂𑀦 𑀳𑀺 𑀢𑁂 𑀲𑀫𑁆𑀧𑀳𑀝𑁆𑀞𑀸 ‘‘𑀓𑀺𑀢𑁆𑀢𑀓𑀫𑀺𑀤𑀫𑀧𑁆𑀧𑀓𑀁 𑀦 𑀘𑀺𑀭𑁂𑀦𑁂𑀯 𑀧𑀭𑀺𑀲𑀫𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀲𑀚𑁆𑀛𑀸𑀬𑀦𑀸𑀤𑀻𑀲𑀼 𑀯𑀢𑁆𑀢𑀦𑁆𑀢𑀻𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀲𑀓𑁆𑀓𑀘𑁆𑀘𑀲𑀯𑀦𑀦𑀺𑀬𑁄𑀚𑀦𑀁 𑀲𑀗𑁆𑀕𑀳𑀺𑀢𑀁, 𑀢𑀁 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀦𑀺𑀤𑀸𑀦𑀲𑀼𑀢𑀫𑀬𑀜𑀸𑀡𑀦𑀺𑀧𑁆𑀨𑀸𑀤𑀦𑀢𑁆𑀣𑀁. 𑀅𑀲𑀓𑁆𑀓𑀘𑁆𑀘𑀁 𑀲𑀼𑀡𑀫𑀸𑀦𑀲𑁆𑀲 𑀘 𑀲𑀯𑀦𑀸𑀪𑀸𑀯𑀢𑁄 𑀢𑀁𑀳𑁂𑀢𑀼𑀓𑀲𑁆𑀲 𑀲𑀼𑀢𑀫𑀬𑀜𑀸𑀡𑀲𑁆𑀲𑀸𑀧𑀺 𑀅𑀪𑀸𑀯𑁄𑀢𑀺. 𑀢𑀣𑀸 𑀳𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀧𑀼𑀕𑁆𑀕𑀮𑁄 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀯𑀼𑀘𑁆𑀘𑀫𑀸𑀦𑁄𑀧𑀺 ‘‘𑀦 𑀫𑀬𑀸 𑀲𑀼𑀢𑀁, 𑀧𑀼𑀦 𑀪𑀡𑀺𑀢𑀩𑁆𑀩’’𑀦𑁆𑀢𑀺 𑀪𑀡𑀢𑀺.

𑀢𑀢𑁆𑀣 𑀧𑀞𑀫𑀕𑀸𑀣𑀸𑀬𑀁 𑀢𑀸𑀯 ‘‘𑀯𑀦𑁆𑀤𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀢𑀺𑀯𑀺𑀥𑁄𑀧𑀺 𑀧𑀡𑀸𑀫𑁄 𑀅𑀯𑀺𑀲𑁂𑀲𑀢𑁄 𑀤𑀲𑁆𑀲𑀺𑀢𑁄. 𑀯𑀺𑀲𑁂𑀲𑀢𑁄 𑀧𑀦 ‘‘𑀲𑁂𑀝𑁆𑀞𑀁, 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑀁, 𑀪𑀯𑀸𑀪𑀸𑀯𑀓𑀭𑀁, 𑀦𑀺𑀭𑀗𑁆𑀕𑀡’’𑀦𑁆𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀧𑀤𑁂𑀳𑀺 𑀯𑀘𑀻𑀧𑀡𑀸𑀫𑁄, ‘‘𑀲𑀺𑀭𑀲𑀸’’𑀢𑀺 𑀇𑀫𑀺𑀦𑀸 𑀓𑀸𑀬𑀧𑁆𑀧𑀡𑀸𑀫𑁄, ‘‘𑀩𑀼𑀤𑁆𑀥𑀁, 𑀥𑀫𑁆𑀫𑀁, 𑀕𑀡𑀜𑁆𑀘𑀸’’𑀢𑀺 𑀇𑀫𑁂𑀳𑀺 𑀧𑀦 𑀢𑀻𑀳𑀺 𑀧𑀤𑁂𑀳𑀺 𑀧𑀡𑀸𑀫𑀓𑀺𑀭𑀺𑀬𑀸𑀬 𑀓𑀫𑁆𑀫𑀪𑀽𑀢𑀁 𑀭𑀢𑀦𑀢𑁆𑀢𑀬𑀁 𑀤𑀲𑁆𑀲𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

‘‘𑀯𑀺𑀦𑀬𑀲𑁆𑀲𑀯𑀺𑀦𑀺𑀘𑁆𑀙𑀬’’𑀦𑁆𑀢𑀺 𑀇𑀫𑀺𑀦𑀸 𑀅𑀪𑀺𑀥𑀸𑀦𑀁 𑀤𑀲𑁆𑀲𑀺𑀢𑀁 𑀅𑀮𑀼𑀢𑁆𑀢𑀲𑀫𑀸𑀲𑁂𑀦 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀦𑀸𑀫𑀲𑁆𑀲 𑀤𑀲𑁆𑀲𑀦𑀢𑁄. 𑀢𑀲𑁆𑀲 𑀅𑀦𑁆𑀯𑀢𑁆𑀣𑀪𑀸𑀯𑁂𑀦 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀪𑀽𑀢𑀁 𑀲𑀓𑀮𑁂𑀦𑀸𑀦𑁂𑀦 𑀧𑀓𑀭𑀡𑁂𑀦 𑀧𑀝𑀺𑀧𑀸𑀤𑁂𑀢𑀩𑁆𑀩𑀫𑀪𑀺𑀥𑁂𑀬𑁆𑀬𑀫𑁆𑀧𑀺 𑀢𑁂𑀦𑁂𑀯 𑀤𑀲𑁆𑀲𑀺𑀢𑀁. ‘‘𑀲𑀫𑀸𑀲𑁂𑀦𑀸’’𑀢𑀺 𑀘 ‘‘𑀅𑀦𑀸𑀓𑀼𑀮𑀫𑀲𑀁𑀓𑀺𑀡𑁆𑀡𑀁, 𑀫𑀥𑀼𑀭𑀢𑁆𑀣𑀧𑀤𑀓𑁆𑀓𑀫’’𑀦𑁆𑀢𑀺 𑀘 𑀏𑀢𑁂𑀳𑀺 𑀓𑀭𑀡𑀧𑁆𑀧𑀓𑀸𑀭𑁄 𑀤𑀲𑁆𑀲𑀺𑀢𑁄. ‘‘𑀳𑀺𑀢𑀢𑁆𑀣𑀸𑀬𑀸’’𑀢𑀺 𑀘 ‘‘𑀧𑀝𑀼𑀪𑀸𑀯𑀓𑀭𑀁 𑀯𑀺𑀦𑀬𑀓𑁆𑀓𑀫𑁂’’𑀢𑀺 𑀘 ‘‘𑀅𑀧𑀸𑀭𑀁 𑀑𑀢𑀭𑀦𑁆𑀢𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀘 𑀧𑀬𑁄𑀚𑀦𑀁. ‘‘𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦’’𑀦𑁆𑀢𑀺 𑀇𑀫𑀺𑀦𑀸 𑀩𑀸𑀳𑀺𑀭𑀦𑀺𑀫𑀺𑀢𑁆𑀢𑀁 𑀤𑀲𑁆𑀲𑀺𑀢𑀁. 𑀅𑀩𑁆𑀪𑀦𑁆𑀢𑀭𑀦𑀺𑀫𑀺𑀢𑁆𑀢𑀁 𑀧𑀦 𑀩𑀸𑀳𑀺𑀭𑀦𑀺𑀫𑀺𑀢𑁆𑀢𑀪𑀽𑀢𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀺𑀯𑀺𑀲𑀬𑀸 𑀓𑀭𑀼𑀡𑀸, 𑀲𑀸 𑀆𑀘𑀭𑀺𑀬𑀲𑁆𑀲 𑀧𑀓𑀭𑀡𑀸𑀭𑀫𑁆𑀪𑁂𑀦𑁂𑀯 𑀯𑀺𑀜𑁆𑀜𑀸𑀬𑀢𑀻𑀢𑀺 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀸. ‘‘𑀧𑀯𑀓𑁆𑀔𑀸𑀫𑀻’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁂𑀦 𑀮𑀩𑁆𑀪𑀫𑀸𑀦𑁄 ‘‘𑀅𑀳’’𑀦𑁆𑀢𑀺 𑀲𑀼𑀤𑁆𑀥𑀓𑀢𑁆𑀢𑀸 𑀲𑀸𑀫𑀜𑁆𑀜𑁂𑀦 𑀤𑀲𑁆𑀲𑀺𑀢𑁄. 𑀯𑀺𑀲𑁂𑀲𑀢𑁄 𑀧𑀦 𑀧𑀓𑀭𑀡𑀸𑀯𑀲𑀸𑀦𑁂 𑁋

‘‘𑀭𑀘𑀺𑀢𑁄 𑀩𑀼𑀤𑁆𑀥𑀤𑀢𑁆𑀢𑁂𑀦, 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀥𑀻𑀫𑀢𑀸;

𑀲𑀼𑀘𑀺𑀭𑀝𑁆𑀞𑀺𑀢𑀺𑀓𑀸𑀫𑁂𑀦, 𑀲𑀸𑀲𑀦𑀲𑁆𑀲 𑀫𑀳𑁂𑀲𑀺𑀦𑁄’’𑀢𑀺. (𑀉. 𑀯𑀺. 𑁯𑁬𑁧) 𑁋

𑀇𑀫𑀸𑀬 𑀕𑀸𑀣𑀸𑀬 𑀘𑁂𑀯 ‘‘𑀇𑀢𑀺 𑀢𑀫𑁆𑀩𑀧𑀡𑁆𑀡𑀺𑀬𑁂𑀦 𑀧𑀭𑀫𑀯𑁂𑀬𑁆𑀬𑀸𑀓𑀭𑀡𑁂𑀦 𑀢𑀺𑀧𑀺𑀝𑀓𑀦𑀬𑀯𑀺𑀥𑀺𑀓𑀼𑀲𑀮𑁂𑀦 𑀧𑀭𑀫𑀓𑀯𑀺𑀯𑀭𑀚𑀦 𑀳𑀤𑀬𑀧𑀤𑀼𑀫𑀯𑀦𑀯𑀺𑀓𑀲𑀦𑀓𑀭𑁂𑀦 𑀓𑀯𑀺𑀯𑀭𑀸𑀲𑀪𑁂𑀦 𑀧𑀭𑀫𑀭𑀢𑀺𑀓𑀭𑀯𑀭𑀫𑀥𑀼𑀭𑀯𑀘𑀦𑀼𑀕𑁆𑀕𑀸𑀭𑁂𑀦 𑀉𑀭𑀕𑀧𑀼𑀭𑁂𑀦 𑀩𑀼𑀤𑁆𑀥𑀤𑀢𑁆𑀢𑁂𑀦 𑀭𑀘𑀺𑀢𑁄𑀬𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁄’’𑀢𑀺 (𑀯𑀺. 𑀯𑀺. 𑁩𑁧𑁮𑁩) 𑀇𑀫𑀺𑀦𑀸 𑀯𑀸𑀓𑁆𑀬𑁂𑀦 𑀘 𑀤𑀲𑁆𑀲𑀺𑀢𑁄 𑁋 ‘‘𑀫𑀸𑀤𑀺𑀲𑀸𑀧𑀺 𑀓𑀯𑀻 𑀳𑁄𑀦𑁆𑀢𑀺, 𑀩𑀼𑀤𑁆𑀥𑀤𑀢𑁆𑀢𑁂 𑀤𑀺𑀯𑀗𑁆𑀕𑀢𑁂’’𑀢𑀺𑀆𑀤𑀺𑀦𑀸 𑀧𑀘𑁆𑀙𑀺𑀫𑀓𑁂𑀳𑀺 𑀘 𑀧𑀲𑀢𑁆𑀣𑀢𑀭𑁂𑀳𑀺 𑀓𑀯𑀺𑀯𑀭𑁂𑀳𑀺 𑀅𑀪𑀺𑀢𑁆𑀣𑀼𑀢𑀕𑀼𑀡𑁄 𑀪𑀤𑀦𑁆𑀢𑀩𑀼𑀤𑁆𑀥𑀤𑀢𑁆𑀢𑀸𑀘𑀭𑀺𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀳𑁂𑀢𑀼𑀓𑀢𑁆𑀢𑀸 𑀘 𑀢𑀢𑁆𑀣𑁂𑀯 𑀯𑀓𑁆𑀔𑀫𑀸𑀦𑁄 𑀧𑀓𑀭𑀡𑀚𑁆𑀛𑁂𑀲𑀦𑁂 𑀓𑀢𑀸𑀥𑀻𑀦𑁄 𑀩𑀼𑀤𑁆𑀥𑀲𑀻𑀳𑀫𑀳𑀸𑀣𑁂𑀭𑁄, 𑀲𑁄 𑁋

‘‘𑀯𑀼𑀢𑁆𑀢𑀲𑁆𑀲 𑀩𑀼𑀤𑁆𑀥𑀲𑀻𑀳𑁂𑀦;

𑀯𑀺𑀦𑀬𑀲𑁆𑀲 𑀯𑀺𑀦𑀺𑀘𑁆𑀙𑀬𑁄;

𑀩𑀼𑀤𑁆𑀥𑀲𑀻𑀳𑀁 𑀲𑀫𑀼𑀤𑁆𑀤𑀺𑀲𑁆𑀲;

𑀫𑀫 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁;

𑀓𑀢𑁄𑀬𑀁 𑀧𑀦 𑀪𑀺𑀓𑁆𑀔𑀽𑀦𑀁;

𑀳𑀺𑀢𑀢𑁆𑀣𑀸𑀬 𑀲𑀫𑀸𑀲𑀢𑁄’’𑀢𑀺. (𑀯𑀺. 𑀯𑀺. 𑁩𑁧𑁭𑁭-𑁩𑁧𑁭𑁮) 𑁋

𑀏𑀯𑀁 𑀤𑀲𑁆𑀲𑀺𑀢𑁄.

𑀉𑀢𑁆𑀢𑀭𑀧𑁆𑀧𑀓𑀭𑀡𑀲𑁆𑀲 𑀳𑁂𑀢𑀼𑀓𑀢𑁆𑀢𑀸 𑀧𑀦 𑀲𑀗𑁆𑀖𑀧𑀸𑀮𑀫𑀳𑀸𑀣𑁂𑀭𑁄, 𑀲𑁄𑀧𑀺 𑁋

‘‘𑀔𑀦𑁆𑀢𑀺𑀲𑁄𑀭𑀘𑁆𑀘𑀲𑁄𑀲𑀺𑀮𑁆𑀬-𑀩𑀼𑀤𑁆𑀥𑀺𑀲𑀤𑁆𑀥𑀸𑀤𑀬𑀸𑀤𑀬𑁄;

𑀧𑀢𑀺𑀝𑁆𑀞𑀺𑀢𑀸 𑀕𑀼𑀡𑀸 𑀬𑀲𑁆𑀫𑀺𑀁, 𑀭𑀢𑀦𑀸𑀦𑀻𑀯 𑀲𑀸𑀕𑀭𑁂.

‘‘𑀯𑀺𑀦𑀬𑀸𑀘𑀸𑀭𑀬𑀼𑀢𑁆𑀢𑁂𑀦, 𑀢𑁂𑀦 𑀲𑀓𑁆𑀓𑀘𑁆𑀘 𑀲𑀸𑀤𑀭𑀁;

𑀬𑀸𑀘𑀺𑀢𑁄 𑀲𑀗𑁆𑀖𑀧𑀸𑀮𑁂𑀦, 𑀣𑁂𑀭𑁂𑀦 𑀣𑀺𑀭𑀘𑁂𑀢𑀲𑀸.

‘‘𑀲𑀼𑀘𑀺𑀭𑀝𑁆𑀞𑀺𑀢𑀺𑀓𑀸𑀫𑁂𑀦, 𑀯𑀺𑀦𑀬𑀲𑁆𑀲 𑀫𑀳𑁂𑀲𑀺𑀦𑁄;

𑀪𑀺𑀓𑁆𑀔𑀽𑀦𑀁 𑀧𑀸𑀝𑀯𑀢𑁆𑀣𑀸𑀬, 𑀯𑀺𑀦𑀬𑀲𑁆𑀲𑀯𑀺𑀦𑀺𑀘𑁆𑀙𑀬𑁂;

𑀅𑀓𑀸𑀲𑀺𑀁 𑀧𑀭𑀫𑀁 𑀏𑀢𑀁, 𑀉𑀢𑁆𑀢𑀭𑀁 𑀦𑀸𑀫 𑀦𑀸𑀫𑀢𑁄’’𑀢𑀺. (𑀉. 𑀯𑀺. 𑁯𑁬𑁫-𑁯𑁬𑁮) 𑁋

𑀏𑀯𑀁 𑀤𑀲𑁆𑀲𑀺𑀢𑁄. 𑀦 𑀓𑁂𑀯𑀮𑀫𑁂𑀢𑁂 𑀤𑁆𑀯𑁂𑀬𑁂𑀯 𑀫𑀳𑀸𑀣𑁂𑀭𑀸 𑀳𑁂𑀢𑀼𑀓𑀢𑁆𑀢𑀸𑀭𑁄, 𑀅𑀣 𑀔𑁄 𑀫𑀳𑀸𑀯𑀁𑀲𑀸𑀤𑀻𑀲𑀼 𑁋

‘‘𑀩𑀼𑀤𑁆𑀥𑀲𑁆𑀲 𑀯𑀺𑀬 𑀕𑀫𑁆𑀪𑀻𑀭-

𑀖𑁄𑀲𑀢𑁆𑀢𑀸 𑀢𑀁 𑀯𑀺𑀬𑀸𑀓𑀭𑀼𑀁;

‘𑀩𑀼𑀤𑁆𑀥𑀖𑁄𑀲𑁄’𑀢𑀺 𑀬𑁄 𑀲𑁄 𑀳𑀺;

𑀩𑀼𑀤𑁆𑀥𑁄 𑀯𑀺𑀬 𑀫𑀳𑀻𑀢𑀮𑁂’’𑀢𑀺. 𑁋

𑀆𑀤𑀺𑀦𑀸 𑀦𑀬𑁂𑀦 𑀅𑀪𑀺𑀢𑁆𑀣𑀼𑀢𑀕𑀼𑀡𑁄 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀬𑀸 𑀅𑀝𑁆𑀞𑀓𑀣𑀸𑀓𑀸𑀭𑁄 𑀪𑀤𑀦𑁆𑀢𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑁄 𑀘 𑀅𑀦𑀼𑀲𑁆𑀲𑀼𑀢𑀺𑀯𑀲𑁂𑀦 ‘‘𑀳𑁂𑀢𑀼𑀓𑀢𑁆𑀢𑀸’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀓𑀣𑀁? 𑀅𑀬𑀁 𑀓𑀺𑀭 𑀪𑀤𑀦𑁆𑀢𑀩𑀼𑀤𑁆𑀥𑀤𑀢𑁆𑀢𑀸𑀘𑀭𑀺𑀬𑁄 𑀮𑀗𑁆𑀓𑀸𑀤𑀻𑀧𑀢𑁄 𑀲𑀚𑀸𑀢𑀺𑀪𑀽𑀫𑀺𑀁 𑀚𑀫𑁆𑀩𑀼𑀤𑀻𑀧𑀫𑀸𑀕𑀘𑁆𑀙𑀦𑁆𑀢𑁄 𑀪𑀤𑀦𑁆𑀢𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑀁 𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀓𑁂𑀳𑀺 𑀧𑀝𑀺𑀧𑀢𑁆𑀢𑀺𑀧𑀭𑀸𑀬𑀦𑁂𑀳𑀺 𑀬𑀼𑀢𑁆𑀢𑀩𑁆𑀬𑀢𑁆𑀢𑀕𑀼𑀡𑁄𑀧𑁂𑀢𑁂𑀳𑀺 𑀫𑀳𑀸𑀣𑁂𑀭𑀯𑀭𑁂𑀳𑀺 𑀓𑀢𑀸𑀭𑀸𑀥𑀦𑀁 𑀲𑀻𑀳𑀴𑀝𑁆𑀞𑀓𑀣𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀲𑀓𑀮𑀚𑀦𑀲𑀸𑀥𑀸𑀭𑀡𑀸𑀬 𑀫𑀽𑀮𑀪𑀸𑀲𑀸𑀬 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀬𑀸 𑀅𑀝𑁆𑀞𑀓𑀣𑀁 𑀮𑀺𑀔𑀺𑀢𑀼𑀁 𑀮𑀗𑁆𑀓𑀸𑀤𑀻𑀧𑀁 𑀕𑀘𑁆𑀙𑀦𑁆𑀢𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀤𑀺𑀲𑁆𑀯𑀸 𑀲𑀸𑀓𑀘𑁆𑀙𑀸𑀬 𑀲𑀫𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀲𑀩𑁆𑀩𑀮𑁄𑀓𑀸𑀢𑀻𑀢𑁂𑀦 𑀅𑀲𑀤𑀺𑀲𑁂𑀦 𑀧𑀡𑁆𑀟𑀺𑀘𑁆𑀘𑀕𑀼𑀡𑁂𑀦 𑀭𑀢𑀦𑀦𑀺𑀥𑀺𑀤𑀲𑁆𑀲𑀦𑁂 𑀧𑀭𑀫𑀤𑀮𑀺𑀤𑁆𑀤𑁄 𑀯𑀺𑀬 𑀩𑀮𑀯𑀧𑀭𑀺𑀢𑁄𑀲𑀁 𑀧𑀢𑁆𑀯𑀸 𑀅𑀝𑁆𑀞𑀓𑀣𑀫𑀲𑁆𑀲 𑀓𑀸𑀢𑀼𑀓𑀸𑀫𑀢𑀁 𑀜𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀬𑀣𑀸𑀥𑀺𑀧𑁆𑀧𑁂𑀢𑀧𑀭𑀺𑀬𑀦𑁆𑀢𑀮𑀺𑀔𑀺𑀢𑀫𑀝𑁆𑀞𑀓𑀣𑀁 𑀅𑀫𑁆𑀳𑀸𑀓𑀁 𑀧𑁂𑀲𑁂𑀣, 𑀫𑀬𑀫𑀲𑁆𑀲𑀸 𑀧𑀓𑀭𑀡𑀁 𑀮𑀺𑀔𑀸𑀫𑀸’’𑀢𑀺 𑀢𑀲𑁆𑀲 𑀲𑀫𑁆𑀫𑀼𑀔𑀸 𑀧𑀝𑀺𑀚𑀸𑀦𑀺𑀢𑁆𑀯𑀸 𑀢𑁂𑀦 𑀘 ‘‘𑀲𑀸𑀥𑀼 𑀢𑀣𑀸 𑀓𑀸𑀢𑀩𑁆𑀩’’𑀦𑁆𑀢𑀺 𑀅𑀚𑁆𑀛𑁂𑀲𑀺𑀢𑁄 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑀁, 𑀯𑀺𑀦𑀬𑀝𑁆𑀞𑀓𑀣𑀸𑀬 𑀲𑀉𑀢𑁆𑀢𑀭𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀧𑀓𑀭𑀡𑀜𑁆𑀘 𑀅𑀓𑀸𑀲𑀻𑀢𑀺 𑀅𑀦𑀼𑀲𑁆𑀲𑀼𑀬𑁆𑀬𑀢𑁂𑀢𑀺.

‘‘𑀲𑀫𑀸𑀲𑁂𑀦𑀸’’𑀢𑀺 𑀇𑀫𑀺𑀦𑀸 𑀘 𑀧𑀭𑀺𑀫𑀸𑀡𑀫𑁆𑀧𑀺 𑀲𑀸𑀫𑀜𑁆𑀜𑁂𑀦 𑀤𑀲𑁆𑀲𑀺𑀢𑀁 𑀯𑀺𑀢𑁆𑀣𑀸𑀭𑀧𑀭𑀺𑀫𑀸𑀡𑁂 𑀢𑀲𑁆𑀲 𑀧𑀭𑀺𑀫𑀸𑀡𑀲𑀸𑀫𑀜𑁆𑀜𑀲𑁆𑀲 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸. 𑀯𑀺𑀲𑁂𑀲𑀢𑁄 𑀧𑀦 𑀧𑀭𑀺𑀘𑁆𑀙𑁂𑀤𑀧𑀭𑀺𑀫𑀸𑀡𑀁 𑀕𑀦𑁆𑀣𑀧𑀭𑀺𑀫𑀸𑀡𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀢𑁆𑀣 𑀧𑀭𑀺𑀘𑁆𑀙𑁂𑀤𑀧𑀭𑀺𑀫𑀸𑀡𑀁 𑀇𑀫𑀲𑁆𑀫𑀺𑀁 𑀧𑀓𑀭𑀡𑁂 𑀓𑀣𑀸𑀯𑁄𑀳𑀸𑀭𑁂𑀦 𑀯𑀼𑀘𑁆𑀘𑀢𑀺.

𑀲𑁂𑀬𑁆𑀬𑀣𑀺𑀤𑀁? 𑁋 𑀧𑀸𑀭𑀸𑀚𑀺𑀓𑀓𑀣𑀸 𑀲𑀗𑁆𑀖𑀸𑀤𑀺𑀲𑁂𑀲𑀓𑀣𑀸 𑀅𑀦𑀺𑀬𑀢𑀓𑀣𑀸 𑀦𑀺𑀲𑁆𑀲𑀕𑁆𑀕𑀺𑀬𑀓𑀣𑀸 𑀧𑀸𑀘𑀺𑀢𑁆𑀢𑀺𑀬𑀓𑀣𑀸 𑀧𑀸𑀝𑀺𑀤𑁂𑀲𑀦𑀻𑀬𑀓𑀣𑀸 𑀲𑁂𑀔𑀺𑀬𑀓𑀣𑀸𑀢𑀺 𑀪𑀺𑀓𑁆𑀔𑀼𑀯𑀺𑀪𑀗𑁆𑀕𑀓𑀣𑀸 𑀲𑀢𑁆𑀢𑀯𑀺𑀥𑀸, 𑀢𑀢𑁄 𑀅𑀦𑀺𑀬𑀢𑀓𑀣𑀁 𑀯𑀚𑁆𑀚𑁂𑀢𑁆𑀯𑀸 𑀢𑀣𑁂𑀯 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑀓𑀣𑀸 𑀙𑀩𑁆𑀩𑀺𑀥𑀸, 𑀫𑀳𑀸𑀔𑀦𑁆𑀥𑀓𑀓𑀣𑀸𑀤𑀺𑀓𑀸 𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑀓𑀣𑀸𑀯𑀲𑀸𑀦𑀸 𑀯𑀻𑀲𑀢𑀺𑀯𑀺𑀥𑀸 𑀔𑀦𑁆𑀥𑀓𑀓𑀣𑀸, 𑀓𑀫𑁆𑀫𑀓𑀣𑀸, 𑀓𑀫𑁆𑀫𑀯𑀺𑀧𑀢𑁆𑀢𑀺𑀓𑀣𑀸, 𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑁄, 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀯𑀺𑀥𑀸𑀦𑀦𑁆𑀢𑀺 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀓𑀣𑀸𑀧𑀭𑀺𑀘𑁆𑀙𑁂𑀤𑁄 𑀲𑀢𑁆𑀢𑀢𑀺𑀁𑀲.

𑀉𑀢𑁆𑀢𑀭𑀧𑁆𑀧𑀓𑀭𑀡𑁂 𑀘 𑀯𑀼𑀢𑁆𑀢𑀦𑀬𑁂𑀦 𑀪𑀺𑀓𑁆𑀔𑀼𑀯𑀺𑀪𑀗𑁆𑀕𑁂 𑀲𑀢𑁆𑀢𑀯𑀺𑀥𑀸 𑀓𑀣𑀸, 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂 𑀙𑀩𑁆𑀩𑀺𑀥𑀸, 𑀢𑀤𑀦𑀦𑁆𑀢𑀭𑀸 𑀯𑀺𑀧𑀢𑁆𑀢𑀺𑀓𑀣𑀸, 𑀅𑀥𑀺𑀓𑀭𑀡𑀧𑀘𑁆𑀘𑀬𑀓𑀣𑀸, 𑀔𑀦𑁆𑀥𑀓𑀧𑀜𑁆𑀳𑀸𑀓𑀣𑀸, 𑀲𑀫𑀼𑀝𑁆𑀞𑀸𑀦𑀲𑀻𑀲𑀓𑀣𑀸, 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀓𑀣𑀸, 𑀏𑀓𑀼𑀢𑁆𑀢𑀭𑀦𑀬𑀓𑀣𑀸, 𑀲𑁂𑀤𑀫𑁄𑀘𑀦𑀓𑀣𑀸, 𑀯𑀺𑀪𑀗𑁆𑀕𑀤𑁆𑀯𑀬𑀦𑀺𑀤𑀸𑀦𑀸𑀤𑀺𑀓𑀣𑀸, 𑀲𑀩𑁆𑀩𑀗𑁆𑀕𑀮𑀓𑁆𑀔𑀡𑀓𑀣𑀸, 𑀧𑀭𑀺𑀯𑀸𑀭𑀲𑀗𑁆𑀓𑀮𑀦𑀓𑀣𑀸𑀢𑀺 𑀙𑀢𑁆𑀢𑀺𑀁𑀲 𑀓𑀣𑀸𑀧𑀭𑀺𑀘𑁆𑀙𑁂𑀤𑀸.

𑀦𑀺𑀲𑁆𑀲𑀦𑁆𑀤𑁂𑀳𑁂 𑀧𑀦 ‘‘𑀅𑀝𑁆𑀞𑀢𑀺𑀁𑀲 𑀓𑀣𑀸𑀧𑀭𑀺𑀘𑁆𑀙𑁂𑀤𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀏𑀓𑀼𑀢𑁆𑀢𑀭𑀦𑀬𑁂 𑀅𑀤𑀲𑁆𑀲𑀺𑀢𑁂𑀳𑀺𑀧𑀺 𑀤𑁆𑀯𑀸𑀤𑀲𑀓𑀧𑀦𑁆𑀦𑀭𑀲𑀓𑀦𑀬𑁂𑀳𑀺 𑀲𑀳 𑀲𑁄𑀴𑀲𑀧𑀭𑀺𑀘𑁆𑀙𑁂𑀤𑁂 𑀕𑀳𑁂𑀢𑁆𑀯𑀸 𑀅𑀧𑁆𑀧𑀓𑀁 𑀊𑀦𑀫𑀥𑀺𑀓𑀁 𑀕𑀡𑀦𑀽𑀧𑀕𑀁 𑀦 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀪𑀬𑀢𑁆𑀣 𑀓𑀣𑀸𑀧𑀭𑀺𑀘𑁆𑀙𑁂𑀤𑀧𑀭𑀺𑀫𑀸𑀡𑀁 𑀢𑁂𑀲𑀢𑁆𑀢𑀢𑀺𑀯𑀺𑀥𑀁 𑀳𑁄𑀢𑀺. 𑀦𑀺𑀲𑁆𑀲𑀦𑁆𑀤𑁂𑀳𑁂 ‘‘𑀧𑀜𑁆𑀘𑀲𑀢𑁆𑀢𑀢𑀺𑀯𑀺𑀥𑀸’’𑀢𑀺 𑀯𑀘𑀦𑁂 𑀧𑀭𑀺𑀳𑀸𑀭𑁄 𑀯𑀼𑀢𑁆𑀢𑀦𑀬𑁄𑀯. 𑀕𑀦𑁆𑀣𑀧𑀭𑀺𑀫𑀸𑀡𑀁 𑀧𑀦 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀅𑀲𑀻𑀢𑀺𑀕𑀦𑁆𑀣𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀕𑀦𑁆𑀣𑀲𑀳𑀲𑁆𑀲𑀸𑀦𑀺, 𑀉𑀢𑁆𑀢𑀭𑁂 𑀧𑀜𑁆𑀜𑀸𑀲𑀕𑀦𑁆𑀣𑀸𑀥𑀺𑀓𑀸𑀦𑀺 𑀦𑀯 𑀕𑀦𑁆𑀣𑀲𑀢𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀉𑀢𑁆𑀢𑀭𑀸𑀯𑀲𑀸𑀦𑁂 𑁋

‘‘𑀕𑀸𑀣𑀸 𑀘𑀢𑀼𑀲𑀳𑀲𑁆𑀲𑀸𑀦𑀺, 𑀲𑀢𑀜𑁆𑀘 𑀊𑀦𑀯𑀻𑀲𑀢𑀺;

𑀧𑀭𑀺𑀫𑀸𑀡𑀢𑁄𑀢𑀺 𑀯𑀺𑀜𑁆𑀜𑁂𑀬𑁆𑀬𑁄, 𑀯𑀺𑀦𑀬𑀲𑁆𑀲𑀯𑀺𑀦𑀺𑀘𑁆𑀙𑀬𑁄.

𑀧𑀜𑁆𑀜𑀸𑀲𑀸𑀥𑀺𑀓𑀲𑀗𑁆𑀔𑀸𑀦𑀺, 𑀦𑀯 𑀕𑀸𑀣𑀸𑀲𑀢𑀸𑀦𑀺 𑀳𑀺;

𑀕𑀡𑀦𑀸 𑀉𑀢𑁆𑀢𑀭𑀲𑁆𑀲𑀸𑀬𑀁, 𑀙𑀦𑁆𑀤𑀲𑀸𑀦𑀼𑀝𑁆𑀞𑀼𑀪𑁂𑀦 𑀢𑀽’’𑀢𑀺. (𑀉. 𑀯𑀺. 𑁯𑁬𑁯-𑁯𑁭𑁦);

𑀇𑀘𑁆𑀘𑁂𑀯𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁄 𑀉𑀢𑁆𑀢𑀭𑁄 𑀘𑀸𑀢𑀺 𑀤𑁆𑀯𑁂 𑀧𑀓𑀭𑀡𑀸𑀦𑀺 𑀢𑀺𑀁𑀲𑀸𑀥𑀺𑀓𑀸𑀦𑀺 𑀧𑀜𑁆𑀘𑀕𑀸𑀣𑀸𑀲𑀳𑀲𑁆𑀲𑀸𑀦𑀺. 𑀏𑀢𑁆𑀣 𑀘 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁄 𑀦𑀸𑀫 𑀉𑀪𑀢𑁄𑀯𑀺𑀪𑀗𑁆𑀕𑀔𑀦𑁆𑀥𑀓𑀸𑀕𑀢𑀯𑀺𑀦𑀺𑀘𑁆𑀙𑀬𑀲𑀗𑁆𑀕𑀸𑀳𑀓𑀧𑀓𑀭𑀡𑀁. 𑀢𑀢𑁄 𑀧𑀭𑀁 𑀧𑀭𑀺𑀯𑀸𑀭𑀢𑁆𑀣𑀲𑀗𑁆𑀕𑀸𑀳𑀓𑀧𑀓𑀭𑀡𑀁 𑀉𑀢𑁆𑀢𑀭𑁄 𑀦𑀸𑀫. 𑀢𑁂𑀦𑁂𑀯 𑀯𑀓𑁆𑀔𑀢𑀺 𑁋

‘‘𑀬𑁄 𑀫𑀬𑀸 𑀭𑀘𑀺𑀢𑁄 𑀲𑀸𑀭𑁄, 𑀯𑀺𑀦𑀬𑀲𑁆𑀲𑀯𑀺𑀦𑀺𑀘𑁆𑀙𑀬𑁄;

𑀢𑀲𑁆𑀲 𑀤𑀸𑀦𑀺 𑀓𑀭𑀺𑀲𑁆𑀲𑀸𑀫𑀺, 𑀲𑀩𑁆𑀩𑀸𑀦𑀼𑀢𑁆𑀢𑀭𑀫𑀼𑀢𑁆𑀢𑀭’’𑀦𑁆𑀢𑀺. (𑀉. 𑀯𑀺. 𑁨)