𑀧𑀸𑀘𑀺𑀢𑁆𑀢𑀺𑀬𑀓𑀡𑁆𑀟𑀁

𑁧. 𑀫𑀼𑀲𑀸𑀯𑀸𑀤𑀯𑀕𑁆𑀕𑁄

𑁧. 𑀫𑀼𑀲𑀸𑀯𑀸𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂𑀢𑀺 𑀏𑀢𑁆𑀣 𑀫𑀼𑀲𑀸𑀢𑀺 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀯𑀢𑁆𑀣𑀼, 𑀯𑀸𑀤𑁄𑀢𑀺 𑀢𑀲𑁆𑀲 𑀪𑀽𑀢𑀢𑁄 𑀢𑀘𑁆𑀙𑀢𑁄 𑀯𑀺𑀜𑁆𑀜𑀸𑀧𑀦𑀁, 𑀲𑀫𑁆𑀧𑀚𑀸𑀦𑀲𑁆𑀲 𑀫𑀼𑀲𑀸𑀯𑀸𑀤𑁄 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁄, 𑀢𑀲𑁆𑀫𑀺𑀁 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀼𑀩𑁆𑀩𑁂’’𑀢𑀺𑀆𑀤𑀺. 𑀲𑁄 𑀘 𑀧𑀦 𑀫𑀼𑀲𑀸𑀯𑀸𑀤𑁄 𑀧𑀼𑀩𑁆𑀩𑀪𑀸𑀕𑀓𑁆𑀔𑀡𑁂, 𑀢𑀗𑁆𑀔𑀡𑁂 𑀘 𑀯𑀺𑀚𑀸𑀦𑀦𑁆𑀢𑀲𑁆𑀲 𑀳𑁄𑀢𑀺 ‘‘𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 ‘𑀫𑀼𑀲𑀸 𑀪𑀡𑀺𑀲𑁆𑀲’𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 ‘𑀫𑀼𑀲𑀸 𑀪𑀡𑀸𑀫𑀻’’’𑀢𑀺 (𑀧𑀸𑀘𑀺. 𑁪) 𑀯𑀼𑀢𑁆𑀢𑀢𑁆𑀢𑀸𑀢𑀺 𑀆𑀳 ‘‘𑀧𑀼𑀩𑁆𑀩𑁂𑀧𑀺 𑀚𑀸𑀦𑀺𑀢𑁆𑀯𑀸 𑀯𑀘𑀦𑀓𑁆𑀔𑀡𑁂𑀧𑀺 𑀚𑀸𑀦𑀦𑁆𑀢𑀲𑁆𑀲𑀸’’𑀢𑀺. 𑀏𑀢𑀜𑁆𑀳𑀺 𑀤𑁆𑀯𑀬𑀁 𑀅𑀗𑁆𑀕𑀪𑀽𑀢𑀁, 𑀇𑀢𑀭𑀁 𑀧𑀦 𑀳𑁄𑀢𑀼 𑀯𑀸, 𑀫𑀸 𑀯𑀸, 𑀅𑀓𑀸𑀭𑀡𑀫𑁂𑀢𑀁. 𑀦𑀦𑀼 𑀘𑁂𑀢𑀁 𑀪𑀡𑀦𑀫𑁂𑀯 𑀜𑀸𑀬𑀢𑀻𑀢𑀺 𑀆𑀳 ‘‘𑀪𑀡𑀦𑀜𑁆𑀘 𑀦𑀸𑀫𑀸’’𑀢𑀺𑀆𑀤𑀺. 𑀅𑀪𑀽𑀢𑀲𑁆𑀲𑀸𑀢𑀺 𑀅𑀢𑀘𑁆𑀙𑀲𑁆𑀲.

𑀳𑀢𑁆𑀣𑀓𑀁 𑀲𑀓𑁆𑀬𑀧𑀼𑀢𑁆𑀢𑀦𑁆𑀢𑀺 𑀏𑀢𑁆𑀣 𑀳𑀢𑁆𑀣𑀓𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁. 𑀲𑀓𑁆𑀬𑀸𑀦𑀁 𑀧𑀼𑀢𑁆𑀢𑁄𑀢𑀺 𑀲𑀓𑁆𑀬𑀧𑀼𑀢𑁆𑀢𑁄. 𑀩𑀼𑀤𑁆𑀥𑀓𑀸𑀮𑁂 𑀓𑀺𑀭 𑀲𑀓𑁆𑀬𑀓𑀼𑀮𑀢𑁄 𑀅𑀲𑀻𑀢𑀺 𑀧𑀼𑀭𑀺𑀲𑀲𑀳𑀲𑁆𑀲𑀸𑀦𑀺 𑀧𑀩𑁆𑀩𑀚𑀺𑀁𑀲𑀼, 𑀢𑁂𑀲𑀁 𑀲𑁄 𑀅𑀜𑁆𑀜𑀢𑀭𑁄. 𑀅𑀯𑀚𑀸𑀦𑀺𑀢𑁆𑀯𑀸 𑀧𑀝𑀺𑀚𑀸𑀦𑀦𑀸𑀤𑀺𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀏𑀢𑁆𑀣 𑀅𑀯𑀚𑀸𑀦𑀺𑀢𑁆𑀯𑀸 𑀧𑀝𑀺𑀚𑀸𑀦𑀦𑀁 𑀦𑀸𑀫 𑀢𑀺𑀢𑁆𑀣𑀺𑀬𑁂𑀳𑀺 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁄 𑀅𑀢𑁆𑀢𑀦𑁄 𑀯𑀸𑀤𑁂 𑀓𑀜𑁆𑀘𑀺 𑀤𑁄𑀲𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 ‘‘𑀦𑀸𑀬𑀁 𑀫𑀫 𑀯𑀸𑀤𑁄’’𑀢𑀺 𑀅𑀯𑀚𑀸𑀦𑀺𑀢𑁆𑀯𑀸 𑀧𑀼𑀦 𑀓𑀣𑁂𑀦𑁆𑀢𑁄 𑀓𑀣𑁂𑀦𑁆𑀢𑁄 𑀦𑀺𑀤𑁆𑀤𑁄𑀲𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀫𑀫𑁂𑀯 𑀅𑀬𑀁 𑀯𑀸𑀤𑁄’’𑀢𑀺 𑀧𑀝𑀺𑀚𑀸𑀦𑀸𑀢𑀺. 𑀆𑀤𑀺𑀲𑀤𑁆𑀤𑁂𑀦 𑀧𑀝𑀺𑀚𑀸𑀦𑀺𑀢𑁆𑀯𑀸 𑀅𑀯𑀚𑀸𑀦𑀦𑀁, 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀡𑀁, 𑀲𑀫𑁆𑀧𑀚𑀸𑀦𑀫𑀼𑀲𑀸𑀪𑀸𑀲𑀦𑀁, 𑀲𑀗𑁆𑀓𑁂𑀢𑀁 𑀓𑀢𑁆𑀯𑀸 𑀯𑀺𑀲𑀁𑀯𑀸𑀤𑀓𑀭𑀡𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀇𑀤𑀸𑀦𑀺 𑀆𑀧𑀢𑁆𑀢𑀺𑀪𑁂𑀤𑀤𑀲𑁆𑀲𑀦𑀢𑁆𑀣𑀁 ‘‘𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀭𑁄𑀘𑀦𑀢𑁆𑀣’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀲𑀳𑀲𑀸 𑀪𑀡𑀦𑁆𑀢𑀲𑁆𑀲𑀸𑀢𑀺 𑀅𑀯𑀻𑀫𑀁𑀲𑀺𑀢𑁆𑀯𑀸 𑀯𑁂𑀕𑁂𑀦 𑀤𑀺𑀝𑁆𑀞𑀫𑁆𑀧𑀺 ‘‘𑀅𑀤𑀺𑀝𑁆𑀞𑀁 𑀫𑁂’’𑀢𑀺𑀆𑀤𑀺𑀦𑀸 𑀪𑀡𑀦𑁆𑀢𑀲𑁆𑀲. ‘‘𑀅𑀜𑁆𑀜𑀁 𑀪𑀡𑀺𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀁 𑀪𑀡𑀦𑁆𑀢𑀲𑁆𑀲𑀸𑀢𑀺 𑀬𑁄 𑀫𑀦𑁆𑀤𑀢𑁆𑀢𑀸 𑀫𑁄𑀫𑀽𑀳𑀢𑁆𑀢𑀸 𑀧𑀓𑁆𑀔𑀮𑀦𑁆𑀢𑁄 ‘‘𑀘𑀻𑀯𑀭’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀘𑀻𑀭’’𑀦𑁆𑀢𑀺𑀆𑀤𑀻𑀦𑀺 𑀪𑀡𑀢𑀺, 𑀅𑀬𑀁 ‘‘𑀅𑀜𑁆𑀜𑀁 𑀪𑀡𑀺𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀁 𑀪𑀡𑀢𑀺 𑀦𑀸𑀫. 𑀬𑁄 𑀧𑀦 𑀲𑀸𑀫𑀡𑁂𑀭𑁂𑀦 ‘‘𑀅𑀧𑀺, 𑀪𑀦𑁆𑀢𑁂, 𑀫𑀬𑁆𑀳𑀁 𑀉𑀧𑀚𑁆𑀛𑀸𑀬𑀁 𑀧𑀲𑁆𑀲𑀺𑀢𑁆𑀣𑀸’’𑀢𑀺 𑀯𑀼𑀢𑁆𑀢𑁄 𑀓𑁂𑀴𑀺𑀁 𑀓𑀼𑀭𑀼𑀫𑀸𑀦𑁄 ‘‘𑀢𑀯 𑀉𑀧𑀚𑁆𑀛𑀸𑀬𑁄 𑀤𑀸𑀭𑀼𑀲𑀓𑀝𑀁 𑀬𑁄𑀚𑁂𑀢𑁆𑀯𑀸 𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀸 𑀲𑀺𑀗𑁆𑀕𑀸𑀮𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀲𑁆𑀲𑀸𑀬𑀁 𑀲𑀤𑁆𑀤𑁄’’𑀢𑀺 𑀯𑀼𑀢𑁆𑀢𑁄 ‘‘𑀫𑀸𑀢𑀼𑀬𑀸 𑀢𑁂 𑀬𑀸𑀦𑁂𑀦 𑀕𑀘𑁆𑀙𑀦𑁆𑀢𑀺𑀬𑀸 𑀓𑀤𑁆𑀤𑀫𑁂 𑀮𑀕𑁆𑀕𑀘𑀓𑁆𑀓𑀁 𑀉𑀤𑁆𑀥𑀭𑀦𑁆𑀢𑀸𑀦𑀁 𑀅𑀬𑀁 𑀲𑀤𑁆𑀤𑁄’’𑀢𑀺 𑀯𑀸 𑀏𑀯𑀁 𑀦𑁂𑀯 𑀤𑀯𑀸, 𑀦 𑀭𑀯𑀸 𑀅𑀜𑁆𑀜𑀁 𑀪𑀡𑀢𑀺, 𑀲𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺𑀬𑁂𑀯. 𑀅𑀜𑁆𑀜𑀸 𑀧𑀽𑀭𑀡𑀓𑀣𑀸 𑀦𑀸𑀫 𑀳𑁄𑀢𑀺 𑁋 𑀏𑀓𑁄 𑀕𑀸𑀫𑁂 𑀣𑁄𑀓𑀁 𑀢𑁂𑀮𑀁 𑀮𑀪𑀺𑀢𑁆𑀯𑀸 𑀯𑀺𑀳𑀸𑀭𑀁 𑀆𑀕𑀢𑁄 𑀲𑀸𑀫𑀡𑁂𑀭𑀁 𑀪𑀡𑀢𑀺 ‘‘𑀢𑁆𑀯𑀁 𑀅𑀚𑁆𑀚 𑀓𑀼𑀳𑀺𑀁 𑀕𑀢𑁄, 𑀕𑀸𑀫𑁄 𑀏𑀓𑀢𑁂𑀮𑁄 𑀅𑀳𑁄𑀲𑀻’’𑀢𑀺 𑀯𑀸, 𑀧𑀘𑁆𑀙𑀺𑀓𑀸𑀬 𑀞𑀧𑀺𑀢𑀁 𑀧𑀽𑀯𑀔𑀡𑁆𑀟𑀁 𑀮𑀪𑀺𑀢𑁆𑀯𑀸 ‘‘𑀅𑀚𑁆𑀚 𑀕𑀸𑀫𑁂 𑀧𑀘𑁆𑀙𑀺𑀓𑀸𑀳𑀺 𑀧𑀽𑀯𑁂 𑀘𑀸𑀭𑁂𑀲𑀼’’𑀦𑁆𑀢𑀺 𑀯𑀸, 𑀅𑀬𑀁 𑀫𑀼𑀲𑀸𑀯𑀸𑀤𑁄𑀯 𑀳𑁄𑀢𑀺. 𑀯𑀺𑀲𑀁𑀯𑀸𑀤𑀦𑀧𑀼𑀭𑁂𑀓𑁆𑀔𑀸𑀭𑀢𑀸𑀢𑀺 𑀯𑀺𑀲𑀁 𑀯𑀸𑀤𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀺𑀲𑀁𑀯𑀸𑀤𑀦𑀁, 𑀯𑀜𑁆𑀘𑀦𑀸𑀥𑀺𑀧𑁆𑀧𑀸𑀬𑀯𑀲𑀧𑁆𑀧𑀯𑀢𑁆𑀢𑀁 𑀘𑀺𑀢𑁆𑀢𑀁, 𑀢𑀲𑁆𑀲 𑀧𑀼𑀭𑁂𑀓𑁆𑀔𑀸𑀭𑀢𑀸 𑀯𑀺𑀲𑀁𑀯𑀸𑀤𑀦𑀧𑀼𑀭𑁂𑀓𑁆𑀔𑀸𑀭𑀢𑀸, 𑀯𑀺𑀲𑀁𑀯𑀸𑀤𑀦𑀘𑀺𑀢𑁆𑀢𑀲𑁆𑀲 𑀧𑀼𑀭𑀢𑁄 𑀓𑀭𑀡𑀦𑁆𑀢𑀺 𑀅𑀢𑁆𑀣𑁄.

𑀫𑀼𑀲𑀸𑀯𑀸𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀑𑀫𑀲𑀯𑀸𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀑𑀫𑀲𑀯𑀸𑀤𑁂𑀢𑀺 𑀔𑀼𑀁𑀲𑀦𑀕𑀭𑀳𑀡𑀯𑀘𑀦𑁂. 𑀬𑀲𑁆𑀫𑀸 𑀧𑀦 𑀢𑀁 𑀦𑁂𑀯 𑀓𑀡𑁆𑀡𑀲𑀼𑀔𑀁, 𑀦 𑀳𑀤𑀬𑀲𑀼𑀔𑀁, 𑀢𑀲𑁆𑀫𑀸 𑀢𑁂𑀦 𑀓𑀡𑁆𑀡𑀜𑁆𑀘𑁂𑀯 𑀳𑀤𑀬𑀜𑁆𑀘 𑀯𑀺𑀚𑁆𑀛𑀢𑀻𑀢𑀺 𑀆𑀳 ‘‘𑀑𑀯𑀺𑀚𑁆𑀛𑀦𑀯𑀘𑀦𑁂’’𑀢𑀺, 𑀚𑀸𑀢𑀺𑀆𑀤𑀻𑀳𑀺 𑀖𑀝𑁂𑀢𑁆𑀯𑀸 𑀯𑀘𑀦𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀚𑀸𑀢𑀺𑀦𑀸𑀫𑀸’’𑀢𑀺𑀆𑀤𑀺. 𑀢𑀢𑁆𑀣 𑀚𑀸𑀢𑀺 𑀦𑀸𑀫 𑀩𑁆𑀭𑀸𑀳𑁆𑀫𑀡𑀸𑀤𑀺 𑀉𑀓𑁆𑀓𑀝𑁆𑀞𑀸 𑀘𑁂𑀯 𑀘𑀡𑁆𑀟𑀸𑀮𑀸𑀤𑀺 𑀳𑀻𑀦𑀸 𑀘 𑀚𑀸𑀢𑀺. 𑀦𑀸𑀫𑀁 𑀦𑀸𑀫 𑀅𑀯𑀓𑀡𑁆𑀡𑀓𑀸𑀤𑀺 𑀳𑀻𑀦𑀜𑁆𑀘𑁂𑀯 𑀩𑀼𑀤𑁆𑀥𑀭𑀓𑁆𑀔𑀺𑀢𑀸𑀤𑀺 𑀉𑀓𑁆𑀓𑀝𑁆𑀞𑀜𑁆𑀘 𑀦𑀸𑀫𑀁. 𑀕𑁄𑀢𑁆𑀢𑀁 𑀦𑀸𑀫 𑀓𑁄𑀲𑀺𑀬𑀸𑀤𑀺 𑀳𑀻𑀦𑀜𑁆𑀘𑁂𑀯 𑀕𑁄𑀢𑀫𑀸𑀤𑀺 𑀉𑀓𑁆𑀓𑀝𑁆𑀞𑀜𑁆𑀘 𑀕𑁄𑀢𑁆𑀢𑀁. 𑀓𑀫𑁆𑀫𑀁 𑀦𑀸𑀫 𑀧𑀼𑀧𑁆𑀨𑀙𑀟𑁆𑀟𑀓𑀸𑀤𑀺 𑀳𑀻𑀦𑀜𑁆𑀘𑁂𑀯 𑀓𑀲𑀺𑀯𑀡𑀺𑀚𑁆𑀚𑀸𑀤𑀺 𑀉𑀓𑁆𑀓𑀝𑁆𑀞𑀜𑁆𑀘 𑀓𑀫𑁆𑀫𑀁. 𑀲𑀺𑀧𑁆𑀧𑀁 𑀦𑀸𑀫 𑀦𑀴𑀓𑀸𑀭𑀸𑀤𑀺 𑀳𑀻𑀦𑀜𑁆𑀘𑁂𑀯 𑀫𑀼𑀤𑁆𑀤𑀸𑀕𑀡𑀦𑀸𑀤𑀺 𑀉𑀓𑁆𑀓𑀝𑁆𑀞𑀜𑁆𑀘 𑀲𑀺𑀧𑁆𑀧𑀁. 𑀆𑀩𑀸𑀥𑁄 𑀦𑀸𑀫 𑀲𑀩𑁆𑀩𑁄𑀧𑀺 𑀭𑁄𑀕𑁄 𑀳𑀻𑀦𑁄𑀬𑁂𑀯. 𑀅𑀣 𑀯𑀸 𑀫𑀥𑀼𑀫𑁂𑀳𑁄 𑀉𑀓𑁆𑀓𑀝𑁆𑀞𑁄, 𑀲𑁂𑀲𑁄 𑀳𑀻𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀮𑀺𑀗𑁆𑀕𑀁 𑀦𑀸𑀫 𑀅𑀢𑀺𑀤𑀻𑀖𑀸𑀤𑀺 𑀳𑀻𑀦𑀜𑁆𑀘𑁂𑀯 𑀦𑀸𑀢𑀺𑀤𑀻𑀖𑀸𑀤𑀺 𑀉𑀓𑁆𑀓𑀝𑁆𑀞𑀜𑁆𑀘 𑀮𑀺𑀗𑁆𑀕𑀁. 𑀓𑀺𑀮𑁂𑀲𑁄 𑀦𑀸𑀫 𑀭𑀸𑀕𑀸𑀤𑀺𑀓𑁄 𑀲𑀩𑁆𑀩𑁄𑀧𑀺 𑀓𑀺𑀮𑁂𑀲𑁄. 𑀆𑀧𑀢𑁆𑀢𑀺 𑀦𑀸𑀫 𑀲𑁄𑀢𑀸𑀧𑀢𑁆𑀢𑀸𑀤𑀺𑀓𑀸 𑀉𑀓𑁆𑀓𑀝𑁆𑀞𑀸 𑀘𑁂𑀯 𑀧𑀸𑀭𑀸𑀚𑀺𑀓𑀸𑀤𑀺 𑀅𑀦𑀼𑀓𑁆𑀓𑀝𑁆𑀞𑀸 𑀘 𑀆𑀧𑀢𑁆𑀢𑀺. 𑀅𑀓𑁆𑀓𑁄𑀲𑁄 𑀦𑀸𑀫 ‘‘𑀑𑀝𑁆𑀞𑁄𑀲𑀻’’𑀢𑀺𑀆𑀤𑀺𑀓𑁄 𑀳𑀻𑀦𑁄 𑀘𑁂𑀯 ‘‘𑀧𑀡𑁆𑀟𑀺𑀢𑁄𑀲𑀻’’𑀢𑀺𑀆𑀤𑀺𑀓𑁄 (𑀧𑀸𑀘𑀺. 𑁧𑁫) 𑀉𑀓𑁆𑀓𑀝𑁆𑀞𑁄 𑀘 𑀅𑀓𑁆𑀓𑁄𑀲𑁄.

𑀬𑀣𑀸 𑀢𑀣𑀸𑀢𑀺 𑀧𑀸𑀴𑀺𑀆𑀕𑀢𑀸𑀦𑀸𑀕𑀢𑀧𑀤𑀸𑀦𑀁 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦. 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀁 𑀪𑀺𑀓𑁆𑀔𑀼𑀦𑀺𑀆𑀤𑀬𑁄 𑀲𑀩𑁆𑀩𑁂 𑀲𑀢𑁆𑀢𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀝𑁆𑀞𑀸𑀦𑁂 𑀞𑀺𑀢𑀸𑀢𑀺 𑀆𑀳 ‘‘𑀇𑀥 𑀘𑀸’’𑀢𑀺𑀆𑀤𑀺. 𑀤𑀯𑀓𑀫𑁆𑀬𑀢𑀸 𑀦𑀸𑀫 𑀓𑁂𑀴𑀺𑀳𑀲𑀸𑀥𑀺𑀧𑁆𑀧𑀸𑀬𑀢𑀸. 𑀲𑀩𑁆𑀩𑀢𑁆𑀣𑀸𑀢𑀺 𑀉𑀧𑀲𑀫𑁆𑀧𑀦𑁆𑀦𑀸𑀦𑀼𑀧𑀲𑀫𑁆𑀧𑀦𑁆𑀦𑁂𑀲𑀼 𑀘𑁂𑀯 𑀧𑀸𑀴𑀺𑀆𑀕𑀢𑀸𑀦𑀸𑀕𑀢𑀧𑀤𑁂𑀲𑀼 𑀘𑀸𑀢𑀺 𑀲𑀩𑁆𑀩𑀢𑁆𑀣. 𑀅𑀢𑁆𑀣𑀥𑀫𑁆𑀫𑀅𑀦𑀼𑀲𑀸𑀲𑀦𑀺𑀧𑀼𑀭𑁂𑀓𑁆𑀔𑀸𑀭𑀸𑀦𑀦𑁆𑀢𑀺 𑀏𑀢𑁆𑀣 ‘‘𑀘𑀡𑁆𑀟𑀸𑀮𑁄𑀲𑀻’’𑀢𑀺𑀆𑀤𑀺𑀓𑀸𑀬 𑀧𑀸𑀴𑀺𑀬𑀸 𑀅𑀢𑁆𑀣𑀁 𑀯𑀡𑁆𑀡𑁂𑀦𑁆𑀢𑁄 𑀅𑀢𑁆𑀣𑀧𑀼𑀭𑁂𑀓𑁆𑀔𑀸𑀭𑁄 𑀦𑀸𑀫. 𑀧𑀸𑀴𑀺𑀁 𑀯𑀸𑀘𑁂𑀦𑁆𑀢𑁄 𑀥𑀫𑁆𑀫𑀧𑀼𑀭𑁂𑀓𑁆𑀔𑀸𑀭𑁄 𑀦𑀸𑀫. 𑀅𑀦𑀼𑀲𑀺𑀝𑁆𑀞𑀺𑀬𑀁 𑀞𑀢𑁆𑀯𑀸 ‘‘𑀇𑀤𑀸𑀦𑀺𑀧𑀺 𑀘𑀡𑁆𑀟𑀸𑀮𑁄𑀲𑀺, 𑀧𑀸𑀧𑀁 𑀫𑀸 𑀅𑀓𑀸𑀲𑀺. 𑀫𑀸 𑀢𑀫𑁄𑀢𑀫𑀧𑀭𑀸𑀬𑀡𑁄 𑀅𑀳𑁄𑀲𑀻’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑀅𑀝𑁆𑀞. 𑁩𑁫) 𑀦𑀬𑁂𑀦 𑀓𑀣𑁂𑀦𑁆𑀢𑁄 𑀅𑀦𑀼𑀲𑀸𑀲𑀦𑀺𑀧𑀼𑀭𑁂𑀓𑁆𑀔𑀸𑀭𑁄 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀑𑀫𑀲𑀯𑀸𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑁂𑀲𑀼𑀜𑁆𑀜𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀪𑀺𑀓𑁆𑀔𑀼𑀧𑁂𑀲𑀼𑀜𑁆𑀜𑁂𑀢𑀺 𑀧𑀺𑀲𑀢𑀻𑀢𑀺 𑀧𑀺𑀲𑀼𑀡𑀸, 𑀬𑀸𑀬 𑀯𑀸𑀘𑀸𑀬 𑀲𑀫𑀕𑁆𑀕𑁂 𑀲𑀢𑁆𑀢𑁂 𑀅𑀯𑀬𑀯𑀪𑀽𑀢𑁂 𑀯𑀕𑁆𑀕𑁂 𑀪𑀺𑀦𑁆𑀦𑁂 𑀓𑀭𑁄𑀢𑀺, 𑀲𑀸 𑀯𑀸𑀘𑀸 𑀧𑀺𑀲𑀼𑀡𑀸, 𑀧𑀺𑀲𑀼𑀡𑀸 𑀏𑀯 𑀧𑁂𑀲𑀼𑀜𑁆𑀜𑀁, 𑀢𑀸𑀬 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄 𑀧𑀺𑀲𑀼𑀡𑁄, 𑀢𑀲𑁆𑀲 𑀓𑀫𑁆𑀫𑀁 𑀧𑁂𑀲𑀼𑀜𑁆𑀜𑀁, 𑀪𑀺𑀓𑁆𑀔𑀼𑀲𑁆𑀲 𑀧𑁂𑀲𑀼𑀜𑁆𑀜𑀁 𑀪𑀺𑀓𑁆𑀔𑀼𑀧𑁂𑀲𑀼𑀜𑁆𑀜𑀁, 𑀢𑀲𑁆𑀫𑀺𑀁 𑀪𑀺𑀓𑁆𑀔𑀼𑀧𑁂𑀲𑀼𑀜𑁆𑀜𑁂, 𑀪𑀺𑀓𑁆𑀔𑀼𑀢𑁄 𑀲𑀼𑀢𑁆𑀯𑀸 𑀪𑀺𑀓𑁆𑀔𑀼𑀦𑀸, 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀉𑀧𑀲𑀁𑀳𑀝𑀧𑁂𑀲𑀼𑀜𑁆𑀜𑁂𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀚𑀸𑀢𑀺𑀆𑀤𑀻𑀳𑀻’’𑀢𑀺𑀆𑀤𑀺. 𑀢𑀜𑁆𑀘 𑀔𑁄 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀉𑀧𑀲𑀁𑀳𑀭𑀢𑀻𑀢𑀺 𑀆𑀳 ‘‘𑀪𑀺𑀓𑁆𑀔𑀼𑀦𑁄 𑀧𑀺𑀬𑀓𑀫𑁆𑀬𑀢𑀸𑀬 𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀪𑀺𑀓𑁆𑀔𑀼𑀦𑁄 𑀧𑀺𑀬𑀓𑀫𑁆𑀬𑀢𑀸𑀬𑀸𑀢𑀺 𑀬𑀲𑁆𑀲 𑀢𑀁 𑀪𑀸𑀲𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 ‘‘𑀏𑀯𑀫𑀳𑀁 𑀏𑀢𑀲𑁆𑀲 𑀧𑀺𑀬𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀧𑀺𑀬𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑀢𑀸𑀬. 𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀦𑀸𑀢𑀺 ‘‘𑀏𑀯𑀫𑀬𑀁 𑀢𑁂𑀦 𑀲𑀤𑁆𑀥𑀺𑀁 𑀪𑀺𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀧𑀭𑀲𑁆𑀲 𑀧𑀭𑁂𑀦 𑀪𑁂𑀤𑀁 𑀇𑀘𑁆𑀙𑀦𑁆𑀢𑁂𑀦. 𑀅𑀣 𑀯𑀸 𑀧𑀺𑀬𑀲𑀼𑀜𑁆𑀜𑀓𑀭𑀡𑀢𑁄 𑀧𑁂𑀲𑀼𑀜𑁆𑀜𑀁 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁩𑁬) 𑀦𑀺𑀭𑀼𑀢𑁆𑀢𑀺𑀦𑀬𑁂𑀦, 𑀬𑀸𑀬 𑀯𑀸𑀘𑀸𑀬 𑀬𑀲𑁆𑀲 𑀢𑀁 𑀪𑀸𑀲𑀢𑀺, 𑀢𑀲𑁆𑀲 𑀳𑀤𑀬𑁂 𑀅𑀢𑁆𑀢𑀦𑁄 𑀧𑀺𑀬𑀪𑀸𑀯𑀁, 𑀧𑀭𑀲𑁆𑀲 𑀘 𑀲𑀼𑀜𑁆𑀜𑀪𑀸𑀯𑀁 𑀓𑀭𑁄𑀢𑀺, 𑀲𑀸 𑀯𑀸𑀘𑀸, ‘‘𑀪𑀺𑀓𑁆𑀔𑀼𑀲𑁆𑀲 𑀧𑁂𑀲𑀼𑀜𑁆𑀜𑀁 𑀪𑀺𑀓𑁆𑀔𑀼𑀧𑁂𑀲𑀼𑀜𑁆𑀜’’𑀦𑁆𑀢𑀺𑀆𑀤𑀺𑀦𑀸 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. ‘‘𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀚𑀸𑀢𑀺𑀆𑀤𑀻𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦.

𑀧𑀸𑀴𑀺𑀫𑀼𑀢𑁆𑀢𑀓𑀅𑀓𑁆𑀓𑁄𑀲𑀽𑀧𑀲𑀁𑀳𑀸𑀭𑁂𑀢𑀺 ‘‘𑀘𑁄𑀭𑁄𑀲𑀻’’𑀢𑀺𑀆𑀤𑀺𑀦𑀸 𑀅𑀓𑁆𑀓𑁄𑀲𑀲𑁆𑀲 𑀉𑀧𑀲𑀁𑀳𑀸𑀭𑁂. ‘‘𑀅𑀦𑀓𑁆𑀓𑁄𑀲𑀯𑀢𑁆𑀣𑀼𑀪𑀽𑀢𑀁 𑀧𑀦 𑀧𑁂𑀲𑀼𑀜𑁆𑀜𑀓𑀭𑀁 𑀢𑀲𑁆𑀲 𑀓𑀺𑀭𑀺𑀬𑀁, 𑀯𑀘𑀦𑀁 𑀯𑀸 𑀧𑀺𑀬𑀓𑀫𑁆𑀬𑀢𑀸𑀬 𑀉𑀧𑀲𑀁𑀳𑀭𑀦𑁆𑀢𑀲𑁆𑀲 𑀓𑀺𑀜𑁆𑀘𑀸𑀧𑀺 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀆𑀧𑀢𑁆𑀢𑀺 𑀦 𑀤𑀺𑀲𑁆𑀲𑀢𑀺, 𑀢𑀣𑀸𑀧𑀺 𑀤𑀼𑀓𑁆𑀓𑀝𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁩𑁬) 𑀯𑀤𑀦𑁆𑀢𑀺. 𑀧𑀸𑀧𑀕𑀭𑀳𑀺𑀢𑀸𑀬 𑀯𑀤𑀦𑁆𑀢𑀲𑁆𑀲𑀸𑀢𑀺 𑀏𑀓𑀁 𑀅𑀓𑁆𑀓𑁄𑀲𑀦𑁆𑀢𑀁, 𑀏𑀓𑀜𑁆𑀘 𑀔𑀫𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀳𑁄 𑀦𑀺𑀮𑁆𑀮𑀚𑁆𑀚𑁄, 𑀈𑀤𑀺𑀲𑀫𑁆𑀧𑀺 𑀦𑀸𑀫 𑀪𑀯𑀦𑁆𑀢𑀁 𑀧𑀼𑀦 𑀯𑀢𑁆𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀓𑁂𑀯𑀮𑀁 𑀧𑀸𑀧𑀕𑀭𑀳𑀺𑀢𑀸𑀬 𑀪𑀡𑀦𑁆𑀢𑀲𑁆𑀲.

𑀧𑁂𑀲𑀼𑀜𑁆𑀜𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀤𑀲𑁄𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀤𑀲𑁄 𑀥𑀫𑁆𑀫𑀁 𑀯𑀸𑀘𑁂𑀬𑁆𑀬𑀸𑀢𑀺 𑀏𑀓𑀢𑁄 𑀧𑀤𑀁 𑀧𑀤𑀁 𑀥𑀫𑁆𑀫𑀁 𑀯𑀸𑀘𑁂𑀬𑁆𑀬, 𑀓𑁄𑀝𑁆𑀞𑀸𑀲𑀁 𑀓𑁄𑀝𑁆𑀞𑀸𑀲𑀁 𑀯𑀸𑀘𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀦 𑀓𑁂𑀯𑀮𑀁 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀆𑀭𑀼𑀴𑁆𑀳𑀥𑀫𑁆𑀫𑀁𑀬𑁂𑀯 𑀧𑀤𑀲𑁄 𑀯𑀸𑀘𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺, 𑀢𑀲𑁆𑀫𑀸 ‘‘𑀲𑀗𑁆𑀕𑀻𑀢𑀺𑀢𑁆𑀢𑀬𑀁 𑀅𑀦𑀸𑀭𑀼𑀴𑁆𑀳𑀫𑁆𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀤𑀺-𑀲𑀤𑁆𑀤𑁂𑀦 (𑀧𑀸𑀘𑀺. 𑀅𑀝𑁆𑀞. 𑁪𑁫) 𑀲𑀻𑀮𑀽𑀧𑀤𑁂𑀲 𑀥𑀼𑀢𑀗𑁆𑀕𑀧𑀜𑁆𑀳𑀆𑀭𑀫𑁆𑀫𑀡𑀓𑀣𑀸 𑀩𑀼𑀤𑁆𑀥𑀺𑀓𑀤𑀡𑁆𑀟𑀓𑀜𑁆𑀜𑀸𑀡𑀯𑀢𑁆𑀣𑀼𑀅𑀲𑀼𑀪𑀓𑀣𑀸𑀤𑀻𑀦𑀁 𑀕𑀳𑀡𑀁. 𑀫𑁂𑀡𑁆𑀟𑀓𑀫𑀺𑀮𑀺𑀦𑁆𑀤𑀧𑀜𑁆𑀳𑁂𑀲𑀼 𑀣𑁂𑀭𑀲𑁆𑀲 𑀲𑀓𑀧𑁆𑀧𑀝𑀺𑀪𑀸𑀦𑁂 𑀅𑀦𑀸𑀧𑀢𑁆𑀢𑀺. 𑀬𑀁 𑀭𑀜𑁆𑀜𑁄 𑀲𑀜𑁆𑀜𑀸𑀧𑀦𑀢𑁆𑀣𑀁 𑀆𑀳𑀭𑀺𑀢𑁆𑀯𑀸 𑀯𑀼𑀢𑁆𑀢𑀁, 𑀢𑀢𑁆𑀣 𑀆𑀧𑀢𑁆𑀢𑀺. 𑀯𑀡𑁆𑀡𑀧𑀺𑀝𑀓𑀅𑀗𑁆𑀕𑀼𑀮𑀺𑀫𑀸𑀮𑀧𑀺𑀝𑀓𑀭𑀝𑁆𑀞𑀧𑀸𑀮𑀕𑀚𑁆𑀚𑀺𑀢𑀆𑀴𑀯𑀓𑀕𑀚𑁆𑀚𑀺𑀢𑀕𑀽𑀴𑁆𑀳𑀫𑀕𑁆𑀕𑀕𑀽𑀴𑁆𑀳𑀯𑁂𑀲𑁆𑀲𑀦𑁆𑀢𑀭𑀕𑀽𑀴𑁆𑀳𑀯𑀺𑀦𑀬𑀯𑁂𑀤𑀮𑁆𑀮𑀧𑀺𑀝𑀓𑀸𑀤𑀻𑀦𑀺 𑀧𑀦 𑀅𑀩𑀼𑀤𑁆𑀥𑀯𑀘𑀦𑀸𑀦𑀺𑀬𑁂𑀯.

𑀬𑀲𑁆𑀫𑀸 𑀧𑀦 𑀢𑀁 𑀧𑀤𑀁 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀤𑀸𑀦𑀼𑀧𑀤𑀅𑀦𑁆𑀯𑀓𑁆𑀔𑀭𑀸𑀦𑀼𑀩𑁆𑀬𑀜𑁆𑀚𑀦𑁂𑀲𑀽’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀤𑀦𑁆𑀢𑀺 𑀏𑀓𑁄 𑀕𑀸𑀣𑀸𑀧𑀸𑀤𑁄 𑀅𑀥𑀺𑀧𑁆𑀧𑁂𑀢𑁄. 𑀅𑀦𑀼𑀧𑀤𑀦𑁆𑀢𑀺 𑀤𑀼𑀢𑀺𑀬𑀧𑀸𑀤𑁄. 𑀅𑀦𑁆𑀯𑀓𑁆𑀔𑀭𑀦𑁆𑀢𑀺 𑀏𑀓𑁂𑀓𑀁 𑀅𑀓𑁆𑀔𑀭𑀁. 𑀅𑀦𑀼𑀩𑁆𑀬𑀜𑁆𑀚𑀦𑀦𑁆𑀢𑀺 𑀧𑀼𑀭𑀺𑀫𑀩𑁆𑀬𑀜𑁆𑀚𑀦𑁂𑀦 𑀲𑀤𑀺𑀲𑀁 𑀧𑀘𑁆𑀙𑀸𑀩𑁆𑀬𑀜𑁆𑀚𑀦𑀁. 𑀬𑀁 𑀓𑀺𑀜𑁆𑀘𑀺 𑀯𑀸 𑀏𑀓𑀁 𑀅𑀓𑁆𑀔𑀭𑀁 𑀅𑀦𑁆𑀯𑀓𑁆𑀔𑀭𑀁. 𑀅𑀓𑁆𑀔𑀭𑀲𑀫𑀽𑀳𑁄 𑀅𑀦𑀼𑀩𑁆𑀬𑀜𑁆𑀚𑀦𑀁. 𑀅𑀓𑁆𑀔𑀭𑀸𑀦𑀼𑀩𑁆𑀬𑀜𑁆𑀚𑀦𑀲𑀫𑀽𑀳𑁄 𑀧𑀤𑀁. 𑀧𑀞𑀫𑀁 𑀧𑀤𑀁 𑀧𑀤𑀫𑁂𑀯, 𑀤𑀼𑀢𑀺𑀬𑀁 𑀅𑀦𑀼𑀧𑀤𑀦𑁆𑀢𑀺 𑀏𑀯𑀫𑁂𑀢𑁆𑀣 𑀦𑀸𑀦𑀸𑀓𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁂𑀲𑀼 𑀧𑀤𑀸𑀤𑀻𑀲𑀼 𑀬𑀁 𑀓𑀜𑁆𑀘𑀺 𑀓𑁄𑀝𑁆𑀞𑀸𑀲𑀁 𑀪𑀺𑀓𑁆𑀔𑀼𑀜𑁆𑀘 𑀪𑀺𑀓𑁆𑀔𑀼𑀦𑀺𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀧𑀼𑀕𑁆𑀕𑀮𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀪𑀡𑀦𑁆𑀢𑀲𑁆𑀲 𑀧𑀤𑀸𑀤𑀺𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀏𑀢𑁆𑀣 𑀕𑀸𑀣𑀸𑀩𑀦𑁆𑀥𑁂𑀲𑀼 (𑀧𑀸𑀘𑀺. 𑀅𑀝𑁆𑀞. 𑁪𑁫) 𑀢𑀸𑀯 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸’’𑀢𑀺 (𑀥. 𑀧. 𑁧, 𑁨) 𑀏𑀓𑀫𑁂𑀓𑀁 𑀧𑀤𑀁 𑀲𑀸𑀫𑀡𑁂𑀭𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀆𑀭𑀪𑀺𑀢𑁆𑀯𑀸 𑀏𑀓𑀢𑁄𑀬𑁂𑀯 𑀦𑀺𑀝𑁆𑀞𑀸𑀧𑁂𑀦𑁆𑀢𑀲𑁆𑀲 𑀧𑀤𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀁. 𑀣𑁂𑀭𑁂𑀦 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑁂 𑀢𑀁 𑀧𑀤𑀁 𑀅𑀧𑀸𑀧𑀼𑀡𑀺𑀢𑁆𑀯𑀸 ‘‘𑀫𑀦𑁄𑀲𑁂𑀝𑁆𑀞𑀸 𑀫𑀦𑁄𑀫𑀬𑀸’’𑀢𑀺 𑀯𑀘𑀦𑀓𑀸𑀮𑁂 𑀧𑀢𑁆𑀢𑁂𑀦 𑀲𑀸𑀫𑀡𑁂𑀭𑁂𑀦 𑀏𑀓𑀢𑁄 𑀪𑀡𑀦𑁆𑀢𑀲𑁆𑀲 𑀅𑀦𑀼𑀧𑀤𑀕𑀡𑀦𑀸𑀬. ‘‘𑀭𑀽𑀧𑀁 𑀅𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺 (𑀫. 𑀦𑀺. 𑁧.𑁩𑁫𑁩, 𑁩𑁫𑁬) 𑀯𑀘𑀦𑀓𑀸𑀮𑁂 𑀢𑁂𑀦 𑀲𑀤𑁆𑀥𑀺𑀁 ‘‘𑀭𑀽’’ 𑀓𑀸𑀭𑀫𑀢𑁆𑀢𑀫𑁂𑀯 𑀯𑀸𑀘𑁂𑀦𑁆𑀢𑀲𑁆𑀲 𑀅𑀦𑁆𑀯𑀓𑁆𑀔𑀭𑀕𑀡𑀦𑀸𑀬. 𑀏𑀲 𑀦𑀬𑁄 𑀕𑀸𑀣𑀸𑀩𑀦𑁆𑀥𑁂𑀧𑀺. ‘‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀁, 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸’’𑀢𑀺 (𑀫. 𑀦𑀺. 𑁧.𑁩𑁫𑁩, 𑁩𑁫𑁬) 𑀇𑀫𑀁 𑀲𑀼𑀢𑁆𑀢𑀁 𑀯𑀸𑀘𑀬𑀫𑀸𑀦𑁄 𑀣𑁂𑀭𑁂𑀦 ‘‘𑀭𑀽𑀧𑀁 𑀅𑀦𑀺𑀘𑁆𑀘’’𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁂 𑀲𑀸𑀫𑀡𑁂𑀭𑁄 𑀲𑀻𑀖𑀧𑀜𑁆𑀜𑀢𑀸𑀬 ‘‘𑀯𑁂𑀤𑀦𑀸 𑀅𑀦𑀺𑀘𑁆𑀘𑀸’’𑀢𑀺 𑀇𑀫𑀁 𑀅𑀦𑀺𑀘𑁆𑀘𑀧𑀤𑀁 𑀣𑁂𑀭𑀲𑁆𑀲 ‘‘𑀭𑀽𑀧𑀁 𑀅𑀦𑀺𑀘𑁆𑀘’’𑀦𑁆𑀢𑀺 𑀏𑀢𑁂𑀦 𑀅𑀦𑀺𑀘𑁆𑀘𑀧𑀤𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀪𑀡𑀦𑁆𑀢𑁄 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀢𑀺, 𑀏𑀯𑀁 𑀯𑀸𑀘𑁂𑀦𑁆𑀢𑀲𑁆𑀲 𑀅𑀦𑀼𑀩𑁆𑀬𑀜𑁆𑀚𑀦𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀺𑀯𑁂𑀫𑀢𑀺𑀓𑀉𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀻𑀦𑀁 𑀯𑀲𑁂𑀦 𑀢𑀻𑀡𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀉𑀤𑁆𑀤𑁂𑀲𑀕𑁆𑀕𑀳𑀡𑁂 𑀏𑀓𑀢𑁄 𑀪𑀡𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀲 𑀦𑀬𑁄 ‘‘𑀲𑀚𑁆𑀛𑀸𑀬𑀓𑀭𑀡𑁂, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀉𑀤𑁆𑀤𑁂𑀲𑀕𑁆𑀕𑀳𑀡𑁂’’𑀢𑀺 𑀏𑀢𑁆𑀣𑀸𑀧𑀺. 𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀉𑀧𑀲𑀫𑁆𑀧𑀦𑁆𑀦𑁄 𑀘 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀘 𑀦𑀺𑀲𑀻𑀤𑀺𑀢𑁆𑀯𑀸 𑀉𑀤𑁆𑀤𑀺𑀲𑀸𑀧𑁂𑀦𑁆𑀢𑀺. 𑀆𑀘𑀭𑀺𑀬𑁄 ‘‘𑀦𑀺𑀲𑀺𑀦𑁆𑀦𑀸𑀦𑀁 𑀪𑀡𑀸𑀫𑀻’’𑀢𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀯𑀤𑀢𑀺, 𑀆𑀘𑀭𑀺𑀬𑀲𑁆𑀲𑁂𑀯 𑀆𑀧𑀢𑁆𑀢𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀲𑀤𑁆𑀥𑀺𑀁 𑀕𑀡𑁆𑀳𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀤𑁆𑀯𑁂𑀧𑀺 𑀞𑀺𑀢𑀸 𑀕𑀡𑁆𑀳𑀦𑁆𑀢𑀺, 𑀏𑀲𑁂𑀯 𑀦𑀬𑁄. 𑀤𑀳𑀭𑀪𑀺𑀓𑁆𑀔𑀼 𑀦𑀺𑀲𑀺𑀦𑁆𑀦𑁄, 𑀲𑀸𑀫𑀡𑁂𑀭𑁄 𑀞𑀺𑀢𑁄, ‘‘𑀦𑀺𑀲𑀺𑀦𑁆𑀦𑀲𑁆𑀲 𑀪𑀡𑀸𑀫𑀻’’𑀢𑀺 𑀪𑀡𑀢𑁄 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀤𑀳𑀭𑁄 𑀢𑀺𑀝𑁆𑀞𑀢𑀺, 𑀇𑀢𑀭𑁄 𑀦𑀺𑀲𑀻𑀤𑀢𑀺, ‘‘𑀞𑀺𑀢𑀲𑁆𑀲 𑀪𑀡𑀸𑀫𑀻’’𑀢𑀺 𑀪𑀡𑀢𑁄𑀧𑀺 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀩𑀳𑀽𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑀭𑁂 𑀏𑀓𑁄 𑀲𑀸𑀫𑀡𑁂𑀭𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀢𑀲𑁆𑀫𑀺𑀁 𑀦𑀺𑀲𑀺𑀦𑁆𑀦𑁂 𑀧𑀤𑀲𑁄 𑀥𑀫𑁆𑀫𑀁 𑀯𑀸𑀘𑁂𑀦𑁆𑀢𑀲𑁆𑀲 𑀅𑀘𑀺𑀢𑁆𑀢𑀓𑀸 𑀆𑀧𑀢𑁆𑀢𑀺. 𑀲𑀘𑁂 𑀲𑀸𑀫𑀡𑁂𑀭𑁄 𑀉𑀧𑀘𑀸𑀭𑀁 𑀫𑀼𑀜𑁆𑀘𑀺𑀢𑁆𑀯𑀸 𑀞𑀺𑀢𑁄 𑀯𑀸 𑀦𑀺𑀲𑀺𑀦𑁆𑀦𑁄 𑀯𑀸 𑀳𑁄𑀢𑀺, 𑀬𑁂𑀲𑀁 𑀯𑀸𑀘𑁂𑀢𑀺, 𑀢𑁂𑀲𑀼 𑀅𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀏𑀓𑁂𑀦 𑀤𑀺𑀲𑀸𑀪𑀸𑀕𑁂𑀦 𑀧𑀮𑀸𑀬𑀦𑀓𑀕𑀦𑁆𑀣𑀁 𑀦𑀸𑀫 𑀕𑀡𑁆𑀳𑀸𑀢𑀻𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀅𑀦𑀸𑀧𑀢𑁆𑀢𑀺.

𑀲𑀚𑁆𑀛𑀸𑀬𑀓𑀭𑀡𑁂𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀲𑀚𑁆𑀛𑀸𑀬𑀓𑀭𑀡𑁂. 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀉𑀤𑁆𑀤𑁂𑀲𑀕𑁆𑀕𑀳𑀡𑁂𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀦𑁆𑀢𑀺𑀓𑁂 𑀉𑀤𑁆𑀤𑁂𑀲𑀕𑁆𑀕𑀳𑀡𑁂. 𑀬𑁂𑀪𑀼𑀬𑁆𑀬𑁂𑀦 𑀧𑀕𑀼𑀡𑀕𑀦𑁆𑀣𑀁 𑀪𑀡𑀦𑁆𑀢𑀲𑁆𑀲𑀸𑀢𑀺 𑀲𑀘𑁂 𑀏𑀓𑀕𑀸𑀣𑀸𑀬 𑀏𑀓𑁄 𑀧𑀸𑀤𑁄 𑀦𑀸𑀕𑀘𑁆𑀙𑀢𑀺, 𑀅𑀯𑀲𑁂𑀲𑀸 𑀆𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀬𑁂𑀪𑀼𑀬𑁆𑀬𑁂𑀦 𑀧𑀕𑀼𑀡𑀕𑀦𑁆𑀣𑁄 𑀦𑀸𑀫. 𑀏𑀢𑁂𑀦 𑀦𑀬𑁂𑀦 𑀲𑀼𑀢𑁆𑀢𑁂𑀧𑀺 𑀯𑁂𑀤𑀺𑀢𑀩𑁆𑀩𑁄, 𑀢𑀁 𑀪𑀡𑀦𑁆𑀢𑀲𑁆𑀲. 𑀑𑀲𑀸𑀭𑁂𑀦𑁆𑀢𑀲𑁆𑀲 𑀘𑀸𑀢𑀺 𑀧𑀭𑀺𑀲𑀸𑀫𑀚𑁆𑀛𑁂 𑀲𑀼𑀢𑁆𑀢𑀁 𑀉𑀘𑁆𑀘𑀸𑀭𑁂𑀦𑁆𑀢𑀲𑁆𑀲 𑀘.

𑀧𑀤𑀲𑁄𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀞𑀫𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀇𑀥 ‘‘𑀪𑀺𑀓𑁆𑀔𑀼𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦𑀸𑀫𑀸’’𑀢𑀺 (𑀧𑀸𑀘𑀺. 𑁫𑁨) 𑀯𑀘𑀦𑀢𑁄 𑀢𑀺𑀭𑀘𑁆𑀙𑀸𑀦𑀕𑀢𑁄𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁄𑀬𑁂𑀯, 𑀲𑁄 𑀘 𑀔𑁄 𑀦 𑀲𑀩𑁆𑀩𑁄, 𑀫𑁂𑀣𑀼𑀦𑀥𑀫𑁆𑀫𑀸𑀧𑀢𑁆𑀢𑀺𑀬𑀸 𑀯𑀢𑁆𑀣𑀼𑀪𑀽𑀢𑁄𑀯𑀸𑀢𑀺 𑀆𑀳 ‘‘𑀅𑀦𑁆𑀢𑀫𑀲𑁄’’𑀢𑀺𑀆𑀤𑀺. 𑀢𑀲𑁆𑀲 𑀘 𑀧𑀭𑀺𑀘𑁆𑀙𑁂𑀤𑁄 𑀫𑁂𑀣𑀼𑀦𑀥𑀫𑁆𑀫𑀸𑀧𑀢𑁆𑀢𑀺𑀬𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀤𑀺𑀭𑀢𑁆𑀢𑀢𑀺𑀭𑀢𑁆𑀢𑀦𑁆𑀢𑀺 𑀏𑀢𑁆𑀣 𑀤𑀺𑀭𑀢𑁆𑀢𑀯𑀘𑀦𑁂𑀦 𑀦 𑀓𑁄𑀘𑀺 𑀯𑀺𑀲𑁂𑀲𑀢𑁆𑀣𑁄 𑀮𑀩𑁆𑀪𑀢𑀺, 𑀓𑁂𑀯𑀮𑀁 𑀮𑁄𑀓𑀯𑁄𑀳𑀸𑀭𑀯𑀲𑁂𑀦 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀬, 𑀫𑀼𑀔𑀸𑀭𑀼𑀴𑁆𑀳𑀢𑀸𑀬 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀤𑁆𑀯𑀺𑀦𑁆𑀦𑀁 𑀯𑀸 𑀢𑀺𑀡𑁆𑀡𑀁 𑀯𑀸 𑀭𑀢𑁆𑀢𑀻𑀦𑀦𑁆𑀢𑀺 𑀧𑀦 𑀯𑀘𑀦𑀢𑁆𑀣𑀫𑀢𑁆𑀢𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀦𑀺𑀭𑀦𑁆𑀢𑀭𑀢𑀺𑀭𑀢𑁆𑀢𑀤𑀲𑁆𑀲𑀦𑀢𑁆𑀣𑀁 𑀯𑀸 𑀤𑀺𑀭𑀢𑁆𑀢𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀳𑀲𑁂𑀬𑁆𑀬𑀦𑁆𑀢𑀺 𑀏𑀓𑀢𑁄 𑀲𑁂𑀬𑁆𑀬𑀁. 𑀲𑁂𑀬𑁆𑀬𑀸𑀢𑀺 𑀘 𑀓𑀸𑀬𑀧𑁆𑀧𑀲𑀸𑀭𑀡𑀲𑀗𑁆𑀔𑀸𑀢𑀁 𑀲𑀬𑀦𑀫𑁆𑀧𑀺 𑀯𑀼𑀘𑁆𑀘𑀢𑀺 ‘‘𑀲𑀬𑀦𑀁 𑀲𑁂𑀬𑁆𑀬𑀸’’𑀢𑀺 𑀓𑀢𑁆𑀯𑀸, 𑀬𑀲𑁆𑀫𑀺𑀁 𑀲𑁂𑀦𑀸𑀲𑀦𑁂 𑀲𑀬𑀦𑁆𑀢𑀺, 𑀢𑀫𑁆𑀧𑀺 ‘‘𑀲𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑁂𑀬𑁆𑀬𑀸’’𑀢𑀺 𑀓𑀢𑁆𑀯𑀸. 𑀢𑀤𑀼𑀪𑀬𑀫𑁆𑀧𑀺 𑀇𑀥 𑀲𑀸𑀫𑀜𑁆𑀜𑁂𑀦, 𑀏𑀓𑀲𑁂𑀲𑀦𑀬𑁂𑀦 𑀯𑀸 𑀕𑀳𑀺𑀢𑀦𑁆𑀢𑀺 𑀆𑀳 ‘‘𑀲𑀩𑁆𑀩𑀘𑁆𑀙𑀦𑁆𑀦𑀧𑀭𑀺𑀘𑁆𑀙𑀦𑁆𑀦𑁂’’𑀢𑀺𑀆𑀤𑀺.

𑀢𑀢𑁆𑀣 𑀬𑀁 𑀲𑁂𑀦𑀸𑀲𑀦𑀁 𑀉𑀧𑀭𑀺 𑀧𑀜𑁆𑀘𑀳𑀺 𑀙𑀤𑀦𑁂𑀳𑀺 (𑀧𑀸𑀘𑀺. 𑀅𑀝𑁆𑀞. 𑁫𑁧), 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 𑀅𑀦𑁆𑀢𑀫𑀲𑁄 𑀯𑀢𑁆𑀣𑁂𑀦𑀸𑀧𑀺 𑀲𑀩𑁆𑀩𑀫𑁂𑀯 𑀧𑀭𑀺𑀘𑁆𑀙𑀦𑁆𑀦𑀁, 𑀪𑀽𑀫𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀙𑀤𑀦𑀁 𑀆𑀳𑀘𑁆𑀘, 𑀅𑀦𑀸𑀳𑀘𑁆𑀘𑀸𑀧𑀺 𑀯𑀸 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀬𑀸𑀬𑁂𑀦 𑀤𑀺𑀬𑀟𑁆𑀠𑀳𑀢𑁆𑀣𑀼𑀩𑁆𑀩𑁂𑀥𑁂𑀦 𑀧𑀸𑀓𑀸𑀭𑁂𑀦 𑀯𑀸 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 𑀅𑀦𑁆𑀢𑀫𑀲𑁄 𑀯𑀢𑁆𑀣𑁂𑀦𑀸𑀧𑀺 𑀧𑀭𑀺𑀓𑁆𑀔𑀺𑀢𑁆𑀢𑀁, 𑀇𑀤𑀁 𑀲𑀩𑁆𑀩𑀘𑁆𑀙𑀦𑁆𑀦𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑀁 𑀦𑀸𑀫. 𑀬𑀲𑁆𑀲 𑀧𑀦 𑀉𑀧𑀭𑀺 𑀩𑀳𑀼𑀢𑀭𑀁 𑀞𑀸𑀦𑀁 𑀙𑀦𑁆𑀦𑀁, 𑀅𑀧𑁆𑀧𑀁 𑀅𑀘𑁆𑀙𑀦𑁆𑀦𑀁, 𑀲𑀫𑀦𑁆𑀢𑀢𑁄 𑀘 𑀩𑀳𑀼𑀢𑀭𑀁 𑀧𑀭𑀺𑀓𑁆𑀔𑀺𑀢𑁆𑀢𑀁, 𑀅𑀧𑁆𑀧𑀁 𑀅𑀧𑀭𑀺𑀓𑁆𑀔𑀺𑀢𑁆𑀢𑀁, 𑀇𑀤𑀁 𑀬𑁂𑀪𑀼𑀬𑁆𑀬𑁂𑀦 𑀙𑀦𑁆𑀦𑀁 𑀬𑁂𑀪𑀼𑀬𑁆𑀬𑁂𑀦 𑀧𑀭𑀺𑀘𑁆𑀙𑀦𑁆𑀦𑀁 𑀦𑀸𑀫. 𑀢𑀲𑁆𑀫𑀺𑀁 𑀲𑀩𑁆𑀩𑀘𑁆𑀙𑀦𑁆𑀦𑀧𑀭𑀺𑀘𑁆𑀙𑀦𑁆𑀦𑁂, 𑀬𑁂𑀪𑀼𑀬𑁆𑀬𑁂𑀦 𑀙𑀦𑁆𑀦𑀧𑀭𑀺𑀘𑁆𑀙𑀦𑁆𑀦𑁂 𑀯𑀸.

𑀯𑀺𑀤𑀳𑁂𑀬𑁆𑀬𑀸𑀢𑀺 𑀓𑀭𑁂𑀬𑁆𑀬, 𑀢𑀜𑁆𑀘 𑀔𑁄 𑀅𑀢𑁆𑀣𑀢𑁄 𑀲𑀫𑁆𑀧𑀸𑀤𑀦𑀦𑁆𑀢𑀺 𑀆𑀳 ‘‘𑀲𑀫𑁆𑀧𑀸𑀤𑁂𑀬𑁆𑀬𑀸’’𑀢𑀺. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 ‘‘𑀲𑁂𑀦𑀸𑀲𑀦𑀲𑀗𑁆𑀔𑀸𑀢𑀁 𑀲𑁂𑀬𑁆𑀬𑀁 𑀧𑀯𑀺𑀲𑀺𑀢𑁆𑀯𑀸 𑀓𑀸𑀬𑀧𑁆𑀧𑀲𑀸𑀭𑀡𑀲𑀗𑁆𑀔𑀸𑀢𑀁 𑀲𑁂𑀬𑁆𑀬𑀁 𑀓𑀧𑁆𑀧𑁂𑀬𑁆𑀬 𑀯𑀺𑀤𑀳𑁂𑀬𑁆𑀬 𑀲𑀫𑁆𑀧𑀸𑀤𑁂𑀬𑁆𑀬𑀸’’𑀢𑀺. 𑀤𑀺𑀬𑀟𑁆𑀠𑀳𑀢𑁆𑀣𑀼𑀩𑁆𑀩𑁂𑀥𑁄 𑀯𑀟𑁆𑀠𑀓𑀺𑀳𑀢𑁆𑀣𑁂𑀦 𑀕𑀳𑁂𑀢𑀩𑁆𑀩𑁄. 𑀏𑀓𑀽𑀧𑀘𑀸𑀭𑁄𑀢𑀺 𑀯𑀮𑀜𑁆𑀚𑀦𑀤𑁆𑀯𑀸𑀭𑀲𑁆𑀲 𑀏𑀓𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀢𑀕𑀩𑁆𑀪𑀁 𑀯𑀸 𑀘𑀢𑀼𑀲𑀸𑀮𑀁 𑀏𑀓𑀽𑀧𑀘𑀸𑀭𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀯𑀸𑀢𑀺 𑀧𑀼𑀭𑀺𑀫𑀧𑀼𑀭𑀺𑀫𑀤𑀺𑀯𑀲𑁂 𑀬𑀢𑁆𑀣 𑀯𑀼𑀝𑁆𑀞𑀁, 𑀢𑀲𑁆𑀫𑀺𑀁𑀬𑁂𑀯 𑀲𑁂𑀦𑀸𑀲𑀦𑁂 𑀯𑀸. 𑀅𑀜𑁆𑀜𑀢𑁆𑀣 𑀯𑀸 𑀢𑀸𑀤𑀺𑀲𑁂𑀢𑀺 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑁂 𑀅𑀜𑁆𑀜𑀲𑁆𑀫𑀺𑀁 𑀧𑀼𑀩𑁆𑀩𑁂 𑀅𑀯𑀼𑀝𑁆𑀞𑀲𑁂𑀦𑀸𑀲𑀦𑁂 𑀯𑀸. 𑀢𑁂𑀦 𑀯𑀸𑀢𑀺 𑀬𑁂𑀦 𑀲𑀳 𑀧𑀼𑀭𑀺𑀫𑀧𑀼𑀭𑀺𑀫𑀤𑀺𑀯𑀲𑁂 𑀯𑀼𑀝𑁆𑀞𑀁, 𑀢𑁂𑀦 𑀯𑀸. 𑀅𑀜𑁆𑀜𑁂𑀦 𑀯𑀸𑀢𑀺 𑀬𑁂𑀦 𑀲𑀳 𑀧𑀼𑀭𑀺𑀫𑀧𑀼𑀭𑀺𑀫𑀲𑁆𑀫𑀺𑀁 𑀤𑀺𑀯𑀲𑁂 𑀯𑀼𑀝𑁆𑀞𑀁, 𑀢𑀢𑁄 𑀅𑀜𑁆𑀜𑁂𑀦 𑀯𑀸. 𑀲𑀗𑁆𑀔𑁂𑀧𑁄𑀢𑀺 𑀲𑀗𑁆𑀔𑁂𑀧𑀯𑀡𑁆𑀡𑀦𑀸. 𑀬𑀤𑀺 𑀏𑀯𑀁 𑀯𑀺𑀢𑁆𑀣𑀸𑀭𑁄 𑀓𑀣𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀯𑀺𑀢𑁆𑀣𑀸𑀭𑁄 𑀧𑀦𑀸’’𑀢𑀺𑀆𑀤𑀺.

𑀉𑀧𑀟𑁆𑀠𑀘𑁆𑀙𑀦𑁆𑀦𑀧𑀭𑀺𑀘𑁆𑀙𑀦𑁆𑀦𑀸𑀤𑀻𑀲𑀽𑀢𑀺 𑀆𑀤𑀺𑀲𑀤𑁆𑀤𑁂𑀦 ‘‘𑀲𑀩𑁆𑀩𑀘𑁆𑀙𑀦𑁆𑀦𑁂 𑀘𑀽𑀴𑀓𑀧𑀭𑀺𑀘𑁆𑀙𑀦𑁆𑀦𑁂 𑀤𑀼𑀓𑁆𑀓𑀝𑀁, 𑀬𑁂𑀪𑀼𑀬𑁆𑀬𑁂𑀦 𑀙𑀦𑁆𑀦𑁂 𑀘𑀽𑀴𑀓𑀧𑀭𑀺𑀘𑁆𑀙𑀦𑁆𑀦𑁂 𑀤𑀼𑀓𑁆𑀓𑀝𑀁, 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑁂 𑀘𑀽𑀴𑀓𑀘𑁆𑀙𑀦𑁆𑀦𑁂 𑀤𑀼𑀓𑁆𑀓𑀝𑀁, 𑀬𑁂𑀪𑀼𑀬𑁆𑀬𑁂𑀦 𑀧𑀭𑀺𑀘𑁆𑀙𑀦𑁆𑀦𑁂 𑀘𑀽𑀴𑀓𑀘𑁆𑀙𑀦𑁆𑀦𑁂 𑀤𑀼𑀓𑁆𑀓𑀝’’𑀦𑁆𑀢𑀺 (𑀧𑀸𑀘𑀺. 𑀅𑀝𑁆𑀞. 𑁫𑁩) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸𑀦𑀁 𑀕𑀳𑀡𑀁. 𑀢𑀢𑀺𑀬𑀸𑀬 𑀭𑀢𑁆𑀢𑀺𑀬𑀸 𑀧𑀼𑀭𑀸𑀭𑀼𑀡𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀼𑀦 𑀯𑀲𑀦𑁆𑀢𑀲𑁆𑀲𑀸𑀢𑀺 𑀢𑀢𑀺𑀬𑀸𑀬 𑀭𑀢𑁆𑀢𑀺𑀬𑀸 𑀅𑀭𑀼𑀡𑀢𑁄 𑀧𑀼𑀭𑁂𑀢𑀭𑀫𑁂𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀭𑀼𑀡𑀁 𑀩𑀳𑀺 𑀉𑀝𑁆𑀞𑀸𑀧𑁂𑀢𑁆𑀯𑀸 𑀘𑀢𑀼𑀢𑁆𑀣𑀤𑀺𑀯𑀲𑁂 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀧𑀼𑀦 𑀯𑀲𑀦𑁆𑀢𑀲𑁆𑀲. 𑀲𑀩𑁆𑀩𑀘𑁆𑀙𑀦𑁆𑀦𑀲𑀩𑁆𑀩𑀸𑀧𑀭𑀺𑀘𑁆𑀙𑀦𑁆𑀦𑀸𑀤𑀻𑀲𑀽𑀢𑀺 𑀏𑀢𑁆𑀣 𑀧𑀦 𑀆𑀤𑀺𑀲𑀤𑁆𑀤𑁂𑀦 ‘‘𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑁂 𑀲𑀩𑁆𑀩𑀅𑀘𑁆𑀙𑀦𑁆𑀦𑁂, 𑀬𑁂𑀪𑀼𑀬𑁆𑀬𑁂𑀦 𑀅𑀘𑁆𑀙𑀦𑁆𑀦𑁂 𑀬𑁂𑀪𑀼𑀬𑁆𑀬𑁂𑀦 𑀅𑀧𑀭𑀺𑀘𑁆𑀙𑀦𑁆𑀦𑁂’’𑀢𑀺 (𑀧𑀸𑀘𑀺. 𑁫𑁪) 𑀧𑀸𑀴𑀺𑀬𑀁 𑀆𑀕𑀢𑀸𑀦𑀁, ‘‘𑀉𑀧𑀟𑁆𑀠𑀘𑁆𑀙𑀦𑁆𑀦𑁂 𑀘𑀽𑀴𑀓𑀧𑀭𑀺𑀘𑁆𑀙𑀦𑁆𑀦𑁂 𑀅𑀦𑀸𑀧𑀢𑁆𑀢𑀺, 𑀉𑀧𑀟𑁆𑀠𑀧𑀭𑀺𑀘𑁆𑀙𑀦𑁆𑀦𑁂 𑀘𑀽𑀴𑀓𑀘𑁆𑀙𑀦𑁆𑀦𑁂 𑀅𑀦𑀸𑀧𑀢𑁆𑀢𑀺, 𑀘𑀽𑀴𑀓𑀘𑁆𑀙𑀦𑁆𑀦𑁂 𑀘𑀽𑀴𑀓𑀧𑀭𑀺𑀘𑁆𑀙𑀦𑁆𑀦𑁂 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁫𑁩) 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀸𑀦𑀜𑁆𑀘 𑀕𑀳𑀡𑀁.

𑀧𑀞𑀫𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀤𑀼𑀢𑀺𑀬𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸𑀢𑀺 𑀚𑀻𑀯𑀫𑀸𑀦𑀓𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸. ‘‘𑀫𑀢𑀺𑀢𑁆𑀣𑀻 𑀧𑀦 𑀓𑀺𑀜𑁆𑀘𑀸𑀧𑀺 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑀸, 𑀅𑀦𑀼𑀧𑀸𑀤𑀺𑀦𑁆𑀦𑀧𑀓𑁆𑀔𑁂 𑀧𑀦 𑀞𑀺𑀢𑀢𑁆𑀢𑀸 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺𑀁 𑀦 𑀓𑀭𑁄𑀢𑀻’’𑀢𑀺 (𑀯𑀚𑀺𑀭. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁫𑁫) 𑀯𑀤𑀦𑁆𑀢𑀺. 𑀅𑀤𑀺𑀲𑁆𑀲𑀫𑀸𑀦𑀭𑀽𑀧𑀸𑀳𑀺 𑀧𑀦 𑀬𑀓𑁆𑀔𑀺𑀧𑁂𑀢𑀻𑀳𑀺, 𑀫𑁂𑀣𑀼𑀦𑀲𑁆𑀲 𑀅𑀯𑀢𑁆𑀣𑀼𑀪𑀽𑀢𑀸𑀬 𑀘 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸 𑀅𑀦𑀸𑀧𑀢𑁆𑀢𑀺. 𑀧𑀞𑀫𑀤𑀺𑀯𑀲𑁂𑀧𑀻𑀢𑀺 𑀧𑀞𑀫𑀲𑁆𑀫𑀺𑀁 𑀯𑀺𑀬 𑀲𑀺𑀓𑁆𑀔𑀸𑀧𑀤𑁂 𑀦 𑀘𑀢𑀼𑀢𑁆𑀣𑁂𑀬𑁂𑀯 𑀤𑀺𑀯𑀲𑁂, 𑀅𑀣 𑀔𑁄 𑀇𑀥 𑀧𑀞𑀫𑀤𑀺𑀯𑀲𑁂𑀧𑀻𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀇𑀥 𑀤𑀺𑀯𑀲𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀗𑁆𑀕𑁂𑀲𑀼 𑀧𑀦 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼𑀓𑀲𑁂𑀦𑀸𑀲𑀦𑀁, 𑀢𑀢𑁆𑀣 𑀫𑀸𑀢𑀼𑀕𑀸𑀫𑁂𑀦 𑀲𑀳 𑀦𑀺𑀧𑀚𑁆𑀚𑀦𑀁, 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀦𑁆𑀢𑀺 𑀢𑀻𑀡𑀺 𑀅𑀗𑁆𑀕𑀸𑀦𑀻𑀢𑀺 𑀅𑀬𑀫𑁆𑀧𑀺 𑀯𑀺𑀲𑁂𑀲𑁄 𑀤𑀝𑁆𑀞𑀩𑁆𑀩𑁄.

𑀤𑀼𑀢𑀺𑀬𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀥𑀫𑁆𑀫𑀤𑁂𑀲𑀦𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀙𑀧𑁆𑀧𑀜𑁆𑀘𑀯𑀸𑀘𑀸𑀳𑀻𑀢𑀺 𑀙𑀳𑀺 𑀧𑀜𑁆𑀘𑀳𑀺 𑀯𑀸𑀘𑀸𑀳𑀺. 𑀯𑀸𑀘𑀸𑀧𑀭𑀺𑀘𑁆𑀙𑁂𑀤𑁄 𑀧𑀦𑁂𑀢𑁆𑀣 𑀓𑀣𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀉𑀢𑁆𑀢𑀭𑀺 𑀙𑀧𑁆𑀧𑀜𑁆𑀘𑀯𑀸𑀘𑀸𑀳𑀻’’𑀢𑀺𑀆𑀤𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀼𑀢𑁆𑀢𑁂, 𑀅𑀝𑁆𑀞𑀓𑀣𑀸𑀬𑀜𑁆𑀘. 𑀲𑀘𑁂 𑀅𑀝𑁆𑀞𑀓𑀣𑀁, 𑀥𑀫𑁆𑀫𑀧𑀤𑀁, 𑀚𑀸𑀢𑀓𑀸𑀤𑀺𑀯𑀢𑁆𑀣𑀼𑀁 𑀯𑀸 𑀓𑀣𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀙𑀧𑁆𑀧𑀤𑀫𑀢𑁆𑀢𑀫𑁂𑀯 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺. 𑀧𑀸𑀴𑀺𑀬𑀸 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁂𑀦 𑀏𑀓𑀁 𑀧𑀤𑀁 𑀧𑀸𑀴𑀺𑀢𑁄, 𑀧𑀜𑁆𑀘 𑀅𑀝𑁆𑀞𑀓𑀣𑀸𑀢𑁄𑀢𑀺 𑀏𑀯𑀁 𑀙 𑀧𑀤𑀸𑀦𑀺 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀓𑀣𑁂𑀢𑀩𑁆𑀩𑁄. 𑀧𑀼𑀭𑀺𑀲𑁂𑀦𑀸𑀢𑀺 𑀫𑀦𑀼𑀲𑁆𑀲𑀧𑀼𑀭𑀺𑀲𑁂𑀦. 𑀢𑁂𑀦𑀸𑀳 ‘‘𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀁 𑀕𑀳𑁂𑀢𑁆𑀯𑀸 𑀧𑀦𑀸’’𑀢𑀺𑀆𑀤𑀺.

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀫𑀸𑀢𑀼𑀕𑀸𑀫𑁂 𑀫𑀸𑀢𑀼𑀕𑀸𑀫𑀲𑀜𑁆𑀜𑀺𑀯𑁂𑀫𑀢𑀺𑀓𑀅𑀫𑀸𑀢𑀼𑀕𑀸𑀫𑀲𑀜𑁆𑀜𑀻𑀦𑀁 𑀯𑀲𑁂𑀦 𑀢𑀻𑀡𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀅𑀜𑁆𑀜𑀲𑁆𑀲 𑀯𑀸 𑀫𑀸𑀢𑀼𑀕𑀸𑀫𑀲𑁆𑀲𑀸𑀢𑀺 𑀏𑀓𑀲𑁆𑀲 𑀫𑀸𑀢𑀼𑀕𑀸𑀫𑀲𑁆𑀲 𑀤𑁂𑀲𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀧𑀼𑀦 𑀆𑀕𑀢𑀲𑁆𑀲 𑀅𑀜𑁆𑀜𑀲𑁆𑀲 𑀫𑀸𑀢𑀼𑀕𑀸𑀫𑀲𑁆𑀲, 𑀏𑀯𑀁 𑀧𑀦 𑀏𑀓𑀸𑀲𑀦𑁂 𑀦𑀺𑀲𑀺𑀦𑁆𑀦𑁂𑀦 𑀫𑀸𑀢𑀼𑀕𑀸𑀫𑀲𑀢𑀲𑁆𑀲𑀸𑀧𑀺 𑀤𑁂𑀲𑁂𑀢𑀼𑀁 𑀯𑀝𑁆𑀝𑀢𑀺. ‘‘𑀯𑀺𑀜𑁆𑀜𑀼𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸’’𑀢𑀺 𑀯𑀘𑀦𑀢𑁄 𑀅𑀯𑀺𑀜𑁆𑀜𑀺𑀢𑁆𑀣𑀺𑀬𑀸𑀧𑀺 𑀤𑁂𑀲𑀬𑀢𑁄 𑀅𑀦𑀸𑀧𑀢𑁆𑀢𑀺. 𑀇𑀭𑀺𑀬𑀸𑀧𑀣𑀧𑀭𑀺𑀯𑀢𑁆𑀢𑀸𑀪𑀸𑀯𑁄𑀢𑀺 𑀅𑀢𑁆𑀢𑀦𑁄 𑀯𑀸 𑀫𑀸𑀢𑀼𑀕𑀸𑀫𑀲𑁆𑀲 𑀯𑀸 𑀇𑀭𑀺𑀬𑀸𑀧𑀣𑀧𑀭𑀺𑀯𑀢𑁆𑀢𑀸𑀪𑀸𑀯𑁄. 𑀓𑀧𑁆𑀧𑀺𑀬𑀓𑀸𑀭𑀓𑀲𑁆𑀲𑀸𑀪𑀸𑀯𑁄𑀢𑀺 𑀯𑀺𑀜𑁆𑀜𑀼𑀲𑁆𑀲 𑀓𑀧𑁆𑀧𑀺𑀬𑀓𑀸𑀭𑀓𑀲𑁆𑀲𑀸𑀪𑀸𑀯𑁄, 𑀤𑀼𑀢𑀺𑀬𑀸𑀦𑀺𑀬𑀢𑁂 𑀯𑀼𑀢𑁆𑀢𑀮𑀓𑁆𑀔𑀡𑀲𑁆𑀲 𑀫𑀦𑀼𑀲𑁆𑀲𑀲𑁆𑀲 𑀅𑀪𑀸𑀯𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀭𑀺𑀬𑀸𑀓𑀺𑀭𑀺𑀬𑀦𑁆𑀢𑀺 𑀏𑀢𑁆𑀣 𑀉𑀢𑁆𑀢𑀭𑀺 𑀙𑀧𑁆𑀧𑀜𑁆𑀘𑀯𑀸𑀘𑀸𑀳𑀺 𑀥𑀫𑁆𑀫𑀤𑁂𑀲𑀦𑀸 𑀓𑀺𑀭𑀺𑀬𑀸, 𑀓𑀧𑁆𑀧𑀺𑀬𑀓𑀸𑀭𑀓𑀲𑁆𑀲 𑀅𑀕𑁆𑀕𑀳𑀡𑀁 𑀅𑀓𑀺𑀭𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀥𑀫𑁆𑀫𑀤𑁂𑀲𑀦𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀪𑀽𑀢𑀸𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑀸𑀢𑀺 ‘‘𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺’’𑀦𑁆𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁭𑁧) 𑀉𑀚𑀼𑀓𑀫𑁂𑀯. 𑀧𑀭𑀺𑀬𑀸𑀬𑁂𑀦 𑀆𑀭𑁄𑀘𑀺𑀢𑀦𑁆𑀢𑀺 ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀺, 𑀲𑁄 𑀪𑀺𑀓𑁆𑀔𑀼 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺, 𑀲𑀫𑀸𑀧𑀚𑁆𑀚𑀢𑀺, 𑀲𑀫𑀸𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁭𑁫) 𑀅𑀜𑁆𑀜𑀸𑀧𑀤𑁂𑀲𑁂𑀦 𑀪𑀡𑀺𑀢𑀁. 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 (𑀧𑀸𑀘𑀺. 𑀅𑀝𑁆𑀞. 𑁭𑁭), 𑀧𑀦 𑀅𑀦𑁆𑀢𑀭𑀸 𑀯𑀸 𑀅𑀢𑀺𑀓𑀟𑁆𑀠𑀺𑀬𑀫𑀸𑀦𑁂𑀦 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀪𑀽𑀢𑀁 𑀆𑀭𑁄𑀘𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀦𑀢𑀺𑀓𑀟𑁆𑀠𑀺𑀬𑀫𑀸𑀦𑁂𑀦𑀸𑀧𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁭𑁭) 𑀢𑀣𑀸𑀭𑀽𑀧𑁂 𑀓𑀸𑀭𑀡𑁂 𑀲𑀢𑀺 𑀆𑀭𑁄𑀘𑁂𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀢𑁂𑀦𑁂𑀯 𑀅𑀜𑁆𑀜𑀢𑀭𑁂𑀦 𑀤𑀳𑀭𑀪𑀺𑀓𑁆𑀔𑀼𑀦𑀸 𑀉𑀧𑀯𑀤𑀺𑀢𑁄 𑀅𑀜𑁆𑀜𑀢𑀭𑁄 𑀣𑁂𑀭𑁄 ‘‘𑀆𑀯𑀼𑀲𑁄, 𑀉𑀧𑀭𑀺𑀫𑀕𑁆𑀕𑀢𑁆𑀣𑀸𑀬 𑀯𑀸𑀬𑀸𑀫𑀁 𑀫𑀸 𑀅𑀓𑀸𑀲𑀺, 𑀔𑀻𑀡𑀸𑀲𑀯𑁄 𑀢𑀬𑀸 𑀉𑀧𑀯𑀤𑀺𑀢𑁄’’𑀢𑀺 𑀆𑀳. 𑀣𑁂𑀭𑁂𑀦 𑀘 ‘‘𑀅𑀢𑁆𑀣𑀺 𑀢𑁂, 𑀆𑀯𑀼𑀲𑁄, 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀢𑀺𑀝𑁆𑀞𑀸’’𑀢𑀺 𑀧𑀼𑀝𑁆𑀞𑁄 𑀤𑀳𑀭𑀪𑀺𑀓𑁆𑀔𑀼 ‘‘𑀆𑀫, 𑀪𑀦𑁆𑀢𑁂, 𑀲𑁄𑀢𑀸𑀧𑀦𑁆𑀦𑁄 𑀆𑀳’’𑀦𑁆𑀢𑀺 𑀅𑀯𑁄𑀘. ‘‘𑀓𑀸𑀭𑀓𑁄 𑀅𑀬’’𑀦𑁆𑀢𑀺 𑀜𑀢𑁆𑀯𑀸𑀧𑀺 𑀧𑀝𑀺𑀧𑀢𑁆𑀢𑀺𑀬𑀸 𑀅𑀫𑁄𑀖𑀪𑀸𑀯𑀤𑀲𑁆𑀲𑀦𑁂𑀦 𑀲𑀫𑀼𑀢𑁆𑀢𑁂𑀚𑀦𑀸𑀬, 𑀲𑀫𑁆𑀧𑀳𑀁𑀲𑀦𑀸𑀬 𑀘 𑀅𑀭𑀺𑀬𑀸 𑀅𑀢𑁆𑀢𑀸𑀦𑀁 𑀧𑀓𑀸𑀲𑁂𑀦𑁆𑀢𑀺𑀬𑁂𑀯. 𑀢𑁂𑀦𑀸𑀳 ‘‘𑀢𑀣𑀸𑀭𑀽𑀧𑁂 𑀓𑀸𑀭𑀡𑁂 𑀲𑀢𑀺 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀆𑀭𑁄𑀘𑀬𑀢𑁄’’𑀢𑀺. 𑀲𑀼𑀢𑀧𑀭𑀺𑀬𑀢𑁆𑀢𑀺𑀲𑀻𑀮𑀕𑀼𑀡𑀁 𑀧𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲𑀧𑀺 𑀆𑀭𑁄𑀘𑁂𑀢𑀼𑀁 𑀯𑀝𑁆𑀝𑀢𑀺. 𑀓𑀲𑁆𑀫𑀸 𑀦 𑀇𑀥 𑀉𑀫𑁆𑀫𑀢𑁆𑀢𑀓𑀸𑀤𑀬𑁄 𑀕𑀳𑀺𑀢𑀸𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀆𑀤𑀺𑀲𑀤𑁆𑀤𑁂𑀦 𑀔𑀺𑀢𑁆𑀢𑀘𑀺𑀢𑁆𑀢𑀯𑁂𑀤𑀦𑀸𑀝𑁆𑀝𑀸𑀦𑀁 𑀕𑀳𑀡𑀁. 𑀢𑀲𑁆𑀫𑀺𑀁 𑀲𑀢𑀻𑀢𑀺 𑀉𑀫𑁆𑀫𑀢𑁆𑀢𑀓𑀸𑀤𑀺𑀪𑀸𑀯𑁂 𑀲𑀢𑀺. 𑀇𑀥 𑀦 𑀕𑀳𑀺𑀢𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀧𑀤𑀪𑀸𑀚𑀦𑀺𑀬𑀁 𑀦 𑀕𑀳𑀺𑀢𑀸. 𑀅𑀘𑀺𑀢𑁆𑀢𑀓𑀦𑁆𑀢𑀺 𑀧𑀡𑁆𑀡𑀢𑁆𑀢𑀺𑀚𑀸𑀦𑀦𑀘𑀺𑀢𑁆𑀢𑀸𑀪𑀸𑀯𑁂𑀦 𑀅𑀘𑀺𑀢𑁆𑀢𑀓𑀁. 𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑁂𑀳𑀺 𑀤𑁆𑀯𑀺𑀘𑀺𑀢𑁆𑀢’’𑀦𑁆𑀢𑀺 𑀇𑀤𑀁 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀅𑀭𑀺𑀬𑀧𑀼𑀕𑁆𑀕𑀮𑁂𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦 𑀳𑀺 𑀧𑀡𑁆𑀡𑀢𑁆𑀢𑀺𑀁 𑀅𑀚𑀸𑀦𑀦𑁆𑀢𑀸 𑀛𑀸𑀦𑀮𑀸𑀪𑀺𑀦𑁄 𑀧𑀼𑀣𑀼𑀚𑁆𑀚𑀦𑀸 𑀯𑀢𑁆𑀣𑀼𑀫𑁆𑀳𑀺 𑀮𑁄𑀪𑀯𑀲𑁂𑀦 𑀅𑀓𑀼𑀲𑀮𑀘𑀺𑀢𑁆𑀢𑁂𑀦𑀸𑀧𑀺 𑀦 𑀆𑀭𑁄𑀘𑁂𑀦𑁆𑀢𑀻𑀢𑀺. 𑀤𑀼𑀓𑁆𑀔𑀯𑁂𑀤𑀦𑀸𑀬 𑀯𑀸 𑀅𑀪𑀸𑀯𑀢𑁄 ‘‘𑀤𑁆𑀯𑀺𑀯𑁂𑀤𑀦’’𑀦𑁆𑀢𑀺 𑀇𑀫𑀲𑁆𑀲 𑀅𑀦𑀼𑀭𑀽𑀧𑀁 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀪𑀽𑀢𑀸𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀤𑀼𑀝𑁆𑀞𑀼𑀮𑁆𑀮𑀸𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑁆𑀯𑀺𑀦𑁆𑀦𑀁 ‘𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀦𑁆𑀢𑀺 𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀲𑀗𑁆𑀔𑀸𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁. 𑀆𑀬𑀢𑀺𑀁 𑀲𑀁𑀯𑀭𑀢𑁆𑀣𑀸𑀬𑀸𑀢𑀺 ‘‘𑀏𑀯𑀫𑁂𑀲 𑀧𑀭𑁂𑀲𑀼 𑀳𑀺𑀭𑁄𑀢𑁆𑀢𑀧𑁆𑀧𑁂𑀦𑀸𑀧𑀺 𑀆𑀬𑀢𑀺𑀁 𑀲𑀁𑀯𑀭𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀆𑀬𑀢𑀺𑀁 𑀲𑀁𑀯𑀭𑀢𑁆𑀣𑀸𑀬. 𑀆𑀧𑀢𑁆𑀢𑀻𑀦𑀜𑁆𑀘 𑀓𑀼𑀮𑀸𑀦𑀜𑁆𑀘 𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀯𑀸 𑀅𑀓𑀢𑁆𑀯𑀸 𑀯𑀸𑀢𑀺 ‘‘𑀏𑀢𑁆𑀢𑀓𑀸 𑀆𑀧𑀢𑁆𑀢𑀺𑀬𑁄 𑀆𑀭𑁄𑀘𑁂𑀢𑀩𑁆𑀩𑀸, 𑀏𑀢𑁆𑀢𑀓𑁂𑀲𑀼 𑀓𑀼𑀮𑁂𑀲𑀼 𑀆𑀭𑁄𑀘𑁂𑀢𑀩𑁆𑀩𑀸’’𑀢𑀺 𑀏𑀯𑀁 𑀆𑀧𑀢𑁆𑀢𑀻𑀦𑀜𑁆𑀘 𑀓𑀼𑀮𑀸𑀦𑀜𑁆𑀘 𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀯𑀸 𑀅𑀓𑀢𑁆𑀯𑀸 𑀯𑀸.

𑀅𑀤𑀼𑀝𑁆𑀞𑀼𑀮𑁆𑀮𑀸𑀬𑀸𑀢𑀺 𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀧𑀜𑁆𑀘𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀸𑀬 𑀅𑀤𑀼𑀝𑁆𑀞𑀼𑀮𑁆𑀮𑀸𑀬 𑀆𑀧𑀢𑁆𑀢𑀺𑀬𑀸. 𑀅𑀯𑀲𑁂𑀲𑁂 𑀙 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀯𑀚𑁆𑀚𑀺𑀢𑁂 𑀲𑁂𑀲𑁂 𑀙 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂. 𑀧𑀼𑀭𑀺𑀫𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑀁 𑀤𑀼𑀝𑁆𑀞𑀼𑀮𑁆𑀮𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀯𑁂𑀭𑀫𑀡𑀺𑀆𑀤𑀺𑀓𑀲𑁆𑀲 𑀆𑀤𑀺𑀢𑁄 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑀁 𑀤𑀼𑀝𑁆𑀞𑀼𑀮𑁆𑀮𑀁. 𑀇𑀢𑀭𑀁 𑀅𑀤𑀼𑀝𑁆𑀞𑀼𑀮𑁆𑀮𑀁 𑀯𑀸 𑀅𑀚𑁆𑀛𑀸𑀘𑀸𑀭𑀦𑁆𑀢𑀺 𑀢𑀢𑁄 𑀅𑀜𑁆𑀜𑀁 𑀯𑀺𑀓𑀸𑀮𑀪𑁄𑀚𑀦𑀸𑀤𑀺𑀓𑀧𑀜𑁆𑀘𑀓𑀁, 𑀲𑀼𑀓𑁆𑀓𑀯𑀺𑀲𑀝𑁆𑀞𑀺𑀓𑀸𑀬𑀲𑀁𑀲𑀕𑁆𑀕𑀤𑀼𑀝𑁆𑀞𑀼𑀮𑁆𑀮𑀅𑀢𑁆𑀢𑀓𑀸𑀫𑀜𑁆𑀘𑁂𑀢𑀺 𑀅𑀤𑀼𑀝𑁆𑀞𑀼𑀮𑁆𑀮𑀁 𑀯𑀸 𑀅𑀚𑁆𑀛𑀸𑀘𑀸𑀭𑀁. 𑀯𑀢𑁆𑀣𑀼𑀫𑀢𑁆𑀢𑀦𑁆𑀢𑀺 ‘‘𑀅𑀬𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀆𑀧𑀦𑁆𑀦𑁄, 𑀤𑀼𑀝𑁆𑀞𑀼𑀮𑁆𑀮𑀁, 𑀅𑀢𑁆𑀢𑀓𑀸𑀫𑀁, 𑀓𑀸𑀬𑀲𑀁𑀲𑀕𑁆𑀕𑀁 𑀆𑀧𑀦𑁆𑀦𑁄’’𑀢𑀺 𑀏𑀯𑀁 𑀯𑀢𑁆𑀣𑀼𑀫𑀢𑁆𑀢𑀁 𑀯𑀸 𑀆𑀭𑁄𑀘𑁂𑀦𑁆𑀢𑀲𑁆𑀲. 𑀆𑀧𑀢𑁆𑀢𑀺𑀫𑀢𑁆𑀢𑀦𑁆𑀢𑀺 ‘‘𑀅𑀬𑀁 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑁄, 𑀲𑀗𑁆𑀖𑀸𑀤𑀺𑀲𑁂𑀲𑀁, 𑀣𑀼𑀮𑁆𑀮𑀘𑁆𑀘𑀬𑀁, 𑀧𑀸𑀘𑀺𑀢𑁆𑀢𑀺𑀬𑀁, 𑀧𑀸𑀝𑀺𑀤𑁂𑀲𑀦𑀻𑀬𑀁, 𑀤𑀼𑀓𑁆𑀓𑀝𑀁, 𑀤𑀼𑀩𑁆𑀪𑀸𑀲𑀺𑀢𑀁 𑀆𑀧𑀦𑁆𑀦𑁄’’𑀢𑀺 𑀏𑀯𑀁 𑀆𑀧𑀢𑁆𑀢𑀺𑀫𑀢𑁆𑀢𑀁 𑀯𑀸 𑀆𑀭𑁄𑀘𑁂𑀦𑁆𑀢𑀲𑁆𑀲. 𑀯𑀼𑀢𑁆𑀢𑀮𑀓𑁆𑀔𑀡𑀲𑁆𑀲𑀸𑀢𑀺 ‘‘𑀧𑀸𑀭𑀸𑀚𑀺𑀓𑀁 𑀅𑀦𑀚𑁆𑀛𑀸𑀧𑀦𑁆𑀦𑀲𑁆𑀲𑀸’’𑀢𑀺 𑀓𑀗𑁆𑀔𑀸. 𑀅𑀝𑁆𑀞. 𑀤𑀼𑀝𑁆𑀞𑀼𑀮𑁆𑀮𑀸𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀏𑀯𑀁 𑀯𑀼𑀢𑁆𑀢𑀮𑀓𑁆𑀔𑀡𑀲𑁆𑀲. 𑀲𑀯𑀢𑁆𑀣𑀼𑀓𑁄𑀢𑀺 𑀯𑀢𑁆𑀣𑀼𑀦𑀸 𑀲𑀳 𑀖𑀝𑀺𑀢𑁄.

𑀤𑀼𑀝𑁆𑀞𑀼𑀮𑁆𑀮𑀸𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀣𑀯𑀻𑀔𑀡𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀸𑀲𑀸𑀡𑀲𑀓𑁆𑀔𑀭𑀓𑀣𑀮𑀫𑀭𑀼𑀫𑁆𑀩𑀯𑀸𑀮𑀼𑀓𑀸𑀤𑀻𑀲𑀽𑀢𑀺 𑀏𑀢𑁆𑀣 𑀫𑀼𑀝𑁆𑀞𑀺𑀧𑁆𑀧𑀫𑀸𑀡𑀢𑁄 𑀉𑀧𑀭𑀺 𑀧𑀸𑀲𑀸𑀡𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀫𑀼𑀝𑁆𑀞𑀺𑀧𑁆𑀧𑀫𑀸𑀡𑀸 𑀲𑀓𑁆𑀔𑀭𑀸. 𑀓𑀣𑀮𑀸𑀢𑀺 𑀓𑀧𑀸𑀮𑀔𑀡𑁆𑀟𑀸𑀦𑀺. 𑀫𑀭𑀼𑀫𑁆𑀩𑀸𑀢𑀺 𑀓𑀝𑀲𑀓𑁆𑀔𑀭𑀸. 𑀯𑀸𑀮𑀼𑀓𑀸 𑀯𑀸𑀮𑀺𑀓𑀸𑀬𑁂𑀯. 𑀅𑀜𑁆𑀜𑀢𑀭𑀲𑁆𑀲 𑀢𑀢𑀺𑀬𑀪𑀸𑀕𑁄 𑀳𑁄𑀢𑀻𑀢𑀺 𑀢𑀢𑀺𑀬𑁄 𑀪𑀸𑀕𑁄 𑀳𑁄𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀢𑁄 𑀧𑀁𑀲𑀼𑀁 𑀯𑀸 𑀫𑀢𑁆𑀢𑀺𑀓𑀁 𑀯𑀸 𑀆𑀳𑀭𑀸𑀧𑁂𑀢𑁆𑀯𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀢𑁂 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀧𑀁𑀲𑀼 𑀯𑀸 𑀫𑀢𑁆𑀢𑀺𑀓𑀸 𑀯𑀸 𑀏𑀓𑁄 𑀧𑀸𑀲𑀸𑀡𑀸𑀤𑀻𑀲𑀼 𑀅𑀜𑁆𑀜𑀢𑀭𑁄 𑀳𑁄𑀢𑀺, 𑀅𑀬𑀁 𑀫𑀺𑀲𑁆𑀲𑀓𑀧𑀣𑀯𑀻 𑀦𑀸𑀫𑀸𑀢𑀺. 𑀑𑀯𑀝𑁆𑀞𑁄 𑀦𑀸𑀫 𑀤𑁂𑀯𑁂𑀦 𑀑𑀯𑀝𑁆𑀞𑁄 (𑀧𑀸𑀘𑀺. 𑁮𑁬). 𑀯𑀼𑀢𑁆𑀢𑀦𑁆𑀢𑀺 𑀧𑀤𑀪𑀸𑀚𑀦𑀺𑀬𑀁, 𑀲𑀻𑀳𑀴𑀝𑁆𑀞𑀓𑀣𑀸𑀬𑀫𑁂𑀯 𑀯𑀸 𑀯𑀼𑀢𑁆𑀢𑀁. 𑀅𑀥𑀺𑀓𑀢𑀭𑀧𑀸𑀲𑀸𑀡𑀸𑀤𑀺𑀫𑀺𑀲𑁆𑀲𑀸𑀢𑀺 𑀅𑀥𑀺𑀓𑀢𑀭𑀧𑀸𑀲𑀸𑀡𑀸𑀤𑀻𑀳𑀺 𑀫𑀺𑀲𑁆𑀲𑀸, 𑀅𑀤𑀟𑁆𑀠𑀸𑀧𑀺 𑀯𑀼𑀢𑁆𑀢𑀧𑁆𑀧𑀫𑀸𑀡𑀢𑁄 𑀅𑀥𑀺𑀓𑀢𑀭𑀧𑀸𑀲𑀸𑀡𑀸𑀤𑀺𑀫𑀺𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀸-𑀲𑀤𑁆𑀤𑁄 𑀅𑀯𑀼𑀢𑁆𑀢𑀯𑀺𑀓𑀧𑁆𑀧𑀢𑁆𑀣𑁄, 𑀢𑁂𑀦 𑀊𑀦𑀓𑀘𑀢𑀼𑀫𑀸𑀲𑁄𑀯𑀝𑁆𑀞𑀧𑀣𑀯𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀼𑀤𑁆𑀥𑀧𑀸𑀲𑀸𑀡𑀸𑀤𑀺𑀪𑁂𑀤𑀸𑀬𑀸𑀢𑀺 𑀲𑀼𑀤𑁆𑀥𑀸 𑀧𑀸𑀲𑀸𑀡𑀸 𑀏𑀢𑁆𑀣𑀸𑀢𑀺 𑀲𑀼𑀤𑁆𑀥𑀧𑀸𑀲𑀸𑀡𑀸, 𑀲𑀸 𑀆𑀤𑀺 𑀬𑀲𑁆𑀲 𑀪𑁂𑀤𑀲𑁆𑀲 𑀲𑁄 𑀲𑀼𑀤𑁆𑀥𑀧𑀸𑀲𑀸𑀡𑀸𑀤𑀺. 𑀆𑀤𑀺-𑀲𑀤𑁆𑀤𑁂𑀦 𑀲𑀼𑀤𑁆𑀥𑀲𑀓𑁆𑀔𑀭𑀸𑀤𑀻𑀦𑀁 𑀕𑀳𑀡𑀁. 𑀲𑀼𑀤𑁆𑀥𑀧𑀸𑀲𑀸𑀡𑀸𑀤𑀺𑀪𑁂𑀤𑁄 𑀬𑀲𑁆𑀲𑀸 𑀲𑀸 𑀲𑀼𑀤𑁆𑀥𑀧𑀸𑀲𑀸𑀡𑀸𑀤𑀺𑀪𑁂𑀤𑀸, 𑀢𑀸𑀬 𑀲𑀼𑀤𑁆𑀥𑀧𑀸𑀲𑀸𑀡𑀸𑀤𑀺𑀪𑁂𑀤𑀸𑀬, 𑀲𑀼𑀤𑁆𑀥𑀧𑀸𑀲𑀸𑀡𑀸𑀤𑀺𑀧𑁆𑀧𑀓𑀸𑀭𑀸𑀬𑀸𑀢𑀺 𑀅𑀢𑁆𑀣𑁄.

𑀲𑀬𑀁 𑀔𑀡𑀢𑀻𑀢𑀺 𑀏𑀢𑁆𑀣 𑀬𑁄 𑀅𑀦𑁆𑀢𑀫𑀲𑁄 𑀧𑀸𑀤𑀗𑁆𑀕𑀼𑀝𑁆𑀞𑀓𑁂𑀦𑀧𑀺 𑀔𑀡𑀢𑀺, 𑀉𑀤𑀓𑀫𑁆𑀧𑀺 𑀙𑀟𑁆𑀟𑁂𑀦𑁆𑀢𑁄 𑀪𑀺𑀦𑁆𑀤𑀢𑀺, 𑀧𑀸𑀤𑀗𑁆𑀕𑀼𑀝𑁆𑀞𑀓𑁂𑀦𑀧𑀺 𑀯𑀺𑀮𑀺𑀔𑀢𑀺, 𑀧𑀢𑁆𑀢𑀫𑁆𑀧𑀺 𑀧𑀘𑀦𑁆𑀢𑁄 𑀤𑀳𑀢𑀺, 𑀲𑁄 𑀲𑀩𑁆𑀩𑁄 𑀔𑀡𑀢𑀺𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀔𑀡𑀦𑀪𑁂𑀤𑀦𑀯𑀺𑀮𑁂𑀔𑀦𑀧𑀘𑀦𑀸𑀤𑀻𑀳𑀺 𑀯𑀺𑀓𑁄𑀧𑁂𑀢𑀻𑀢𑀺. 𑀧𑀢𑁆𑀢𑀁 𑀧𑀘𑀦𑁆𑀢𑁂𑀦 (𑀧𑀸𑀘𑀺. 𑀅𑀝𑁆𑀞. 𑁮𑁭) 𑀳𑀺 𑀧𑀼𑀩𑁆𑀩𑁂 𑀧𑀓𑁆𑀓𑀝𑁆𑀞𑀸𑀦𑁂𑀬𑁂𑀯 𑀧𑀘𑀺𑀢𑀩𑁆𑀩𑁄. 𑀅𑀤𑀟𑁆𑀠𑀸𑀬 𑀧𑀣𑀯𑀺𑀬𑀸 𑀅𑀕𑁆𑀕𑀺𑀁 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀧𑀢𑁆𑀢𑀧𑀘𑀦𑀓𑀧𑀸𑀮𑀲𑁆𑀲 𑀧𑀦 𑀉𑀧𑀭𑀺 𑀅𑀕𑁆𑀕𑀺𑀁 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀤𑀸𑀭𑀽𑀦𑀁 𑀉𑀧𑀭𑀺 𑀞𑀧𑁂𑀢𑀺, 𑀲𑁄 𑀅𑀕𑁆𑀕𑀺 𑀢𑀸𑀦𑀺 𑀤𑀳𑀦𑁆𑀢𑁄 𑀕𑀦𑁆𑀢𑁆𑀯𑀸 𑀧𑀣𑀯𑀺𑀁 𑀤𑀳𑀢𑀺, 𑀦 𑀯𑀝𑁆𑀝𑀢𑀺. 𑀇𑀝𑁆𑀞𑀓𑀧𑀸𑀲𑀸𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀭𑀸𑀧𑀺 𑀳𑀺 𑀇𑀝𑁆𑀞𑀓𑀸𑀤𑀻𑀦𑀁𑀬𑁂𑀯 𑀉𑀧𑀭𑀺 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀓𑀲𑁆𑀫𑀸? 𑀢𑁂𑀲𑀁 𑀅𑀦𑀼𑀧𑀸𑀤𑀸𑀦𑀢𑁆𑀢𑀸. 𑀦 𑀳𑀺 𑀢𑀸𑀦𑀺 𑀅𑀕𑁆𑀕𑀺𑀲𑁆𑀲 𑀉𑀧𑀸𑀤𑀸𑀦𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺. 𑀲𑀼𑀓𑁆𑀔𑀔𑀸𑀡𑀼𑀭𑀼𑀓𑁆𑀔𑀸𑀤𑀻𑀲𑀼𑀧𑀺 𑀅𑀕𑁆𑀕𑀺𑀁 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀧𑀦 ‘‘𑀧𑀣𑀯𑀺𑀁 𑀅𑀧𑀢𑁆𑀢𑀫𑁂𑀯 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀤𑁂𑀢𑀺, 𑀯𑀝𑁆𑀝𑀢𑀺. 𑀧𑀘𑁆𑀙𑀸 𑀦𑀺𑀩𑁆𑀩𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀯𑀺𑀲𑀬𑀢𑁆𑀢𑀸 𑀅𑀦𑀸𑀧𑀢𑁆𑀢𑀺. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀔𑀡𑀦𑀪𑁂𑀤𑀦𑀯𑀺𑀮𑀺𑀔𑀦𑀧𑀘𑀦𑀸𑀤𑀻𑀳𑀻’’𑀢𑀺 𑀯𑀼𑀢𑁆𑀢𑁂𑀦𑁂𑀯 𑀦𑀬𑁂𑀦. 𑀦𑀺𑀬𑀫𑁂𑀢𑁆𑀯𑀸𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸. 𑀇𑀢𑀭𑁄𑀢𑀺 𑀆𑀡𑀸𑀧𑀓𑁄.

‘‘𑀧𑁄𑀓𑁆𑀔𑀭𑀡𑀺𑀁 𑀔𑀡𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁮𑁬) 𑀯𑀤𑀢𑀺, 𑀯𑀝𑁆𑀝𑀢𑀺. 𑀔𑀢𑀸𑀬𑁂𑀯 𑀧𑁄𑀓𑁆𑀔𑀭𑀡𑀻 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀅𑀬𑀁 𑀓𑀧𑁆𑀧𑀺𑀬𑀯𑁄𑀳𑀸𑀭𑁄. 𑀏𑀲 𑀦𑀬𑁄 ‘‘𑀯𑀸𑀧𑀺𑀁, 𑀢𑀴𑀸𑀓𑀁, 𑀆𑀯𑀸𑀝𑀁 𑀔𑀡𑀸’’𑀢𑀺𑀆𑀤𑀻𑀲𑀼𑀧𑀺. ‘‘𑀇𑀫𑀁 𑀑𑀓𑀸𑀲𑀁 𑀔𑀡, 𑀇𑀫𑀲𑁆𑀫𑀺𑀁 𑀑𑀓𑀸𑀲𑁂 𑀧𑁄𑀓𑁆𑀔𑀭𑀡𑀺𑀁 𑀔𑀡𑀸’’𑀢𑀺 𑀧𑀦 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺. ‘‘𑀓𑀦𑁆𑀤𑀁 𑀔𑀡 𑀫𑀽𑀮𑀁 𑀔𑀡𑀸’’𑀢𑀺 𑀅𑀦𑀺𑀬𑀫𑁂𑀢𑁆𑀯𑀸 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. ‘‘𑀇𑀫𑀁 𑀯𑀮𑁆𑀮𑀺𑀁 𑀔𑀡, 𑀇𑀫𑀲𑁆𑀫𑀺𑀁 𑀑𑀓𑀸𑀲𑁂 𑀓𑀦𑁆𑀤𑀁 𑀯𑀸 𑀫𑀽𑀮𑀁 𑀯𑀸 𑀔𑀡𑀸’’𑀢𑀺 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑁂𑀦𑀸𑀳 ‘‘𑀑𑀓𑀸𑀲𑀁 𑀅𑀦𑀺𑀬𑀫𑁂𑀢𑁆𑀯𑀸…𑀧𑁂… 𑀪𑀡𑀦𑁆𑀢𑀲𑁆𑀲𑀸’’𑀢𑀺. 𑀆𑀢𑀧𑁂𑀦 𑀲𑀼𑀓𑁆𑀔𑀓𑀤𑁆𑀤𑀫𑁄 𑀘 𑀨𑀮𑀢𑀺, 𑀢𑀢𑁆𑀭 𑀬𑁄 𑀳𑁂𑀝𑁆𑀞𑀸 𑀧𑀣𑀯𑀺𑀬𑀸 𑀅𑀲𑀫𑁆𑀩𑀤𑁆𑀥𑁄, 𑀢𑀫𑁂𑀯 𑀅𑀧𑀦𑁂𑀢𑀼𑀁 𑀯𑀝𑁆𑀝𑀢𑀺. 𑀏𑀲 𑀦𑀬𑁄 𑀕𑁄𑀓𑀡𑁆𑀝𑀓𑁂𑀧𑀺. 𑀢𑁂𑀦𑀸𑀳 ‘‘𑀆𑀢𑀧𑁂𑀦…𑀧𑁂… 𑀅𑀲𑀫𑁆𑀩𑀤𑁆𑀥’’𑀦𑁆𑀢𑀺. 𑀢𑀢𑁆𑀣 𑀕𑁄𑀓𑀡𑁆𑀝𑀓𑁄 (𑀧𑀸𑀘𑀺. 𑀅𑀝𑁆𑀞. 𑁮𑁬) 𑀦𑀸𑀫 𑀕𑀸𑀯𑀻𑀦𑀁 𑀔𑀼𑀭𑀘𑁆𑀙𑀺𑀦𑁆𑀦𑀓𑀤𑁆𑀤𑀫𑁄 𑀯𑀼𑀘𑁆𑀘𑀢𑀺. 𑀲𑀘𑁂 𑀧𑀦 𑀳𑁂𑀝𑁆𑀞𑀺𑀫𑀢𑀮𑁂𑀦 𑀪𑀽𑀫𑀺𑀲𑀫𑁆𑀩𑀦𑁆𑀥𑁄, 𑀯𑀺𑀓𑁄𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀪𑀺𑀚𑁆𑀚𑀺𑀢𑁆𑀯𑀸 𑀧𑀢𑀺𑀢𑀦𑀤𑀺𑀢𑀝𑀦𑁆𑀢𑀺 𑀪𑀺𑀚𑁆𑀚𑀺𑀢𑁆𑀯𑀸 𑀦𑀤𑀺𑀲𑀸𑀫𑀦𑁆𑀢𑀸 𑀧𑀢𑀺𑀢𑀁 𑀑𑀫𑀓𑀘𑀸𑀢𑀼𑀫𑀸𑀲𑀁 𑀑𑀯𑀝𑁆𑀞𑀁 𑀦𑀤𑀺𑀢𑀝𑀁. 𑀲𑀘𑁂 𑀧𑀦 𑀪𑀺𑀚𑁆𑀚𑀺𑀢𑁆𑀯𑀸 𑀉𑀤𑀓𑁂𑀬𑁂𑀯 𑀧𑀓𑀢𑀺, 𑀤𑁂𑀯𑁂 𑀅𑀢𑀺𑀭𑁂𑀓𑀘𑀸𑀢𑀼𑀫𑀸𑀲𑀁 𑀑𑀯𑀝𑁆𑀞𑁂𑀧𑀺 𑀉𑀤𑀓𑁂𑀬𑁂𑀯 𑀉𑀤𑀓𑀲𑁆𑀲 𑀧𑀢𑀺𑀢𑀢𑁆𑀢𑀸 𑀯𑀝𑁆𑀝𑀢𑀺. 𑀫𑀳𑀦𑁆𑀢𑀫𑁆𑀧𑀺 𑀦𑀗𑁆𑀕𑀮𑀘𑁆𑀙𑀺𑀦𑁆𑀦𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀦𑁆𑀢𑀺 𑀫𑀳𑀦𑁆𑀢𑀫𑁆𑀧𑀺 𑀓𑀲𑀺𑀢𑀝𑁆𑀞𑀸𑀦𑁂 𑀳𑁂𑀝𑁆𑀞𑀸 𑀧𑀣𑀯𑀺𑀬𑀸 𑀅𑀲𑀫𑁆𑀩𑀤𑁆𑀥𑀁 𑀦𑀗𑁆𑀕𑀮𑀘𑁆𑀙𑀺𑀦𑁆𑀦𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀁. 𑀏𑀯𑀫𑀸𑀤𑀺𑀲𑀤𑁆𑀤𑁂𑀦 𑀓𑀽𑀝𑀸𑀲𑀺𑀜𑁆𑀘𑀦𑀬𑁄𑀕𑁆𑀕𑀢𑀦𑀼𑀓𑀓𑀤𑁆𑀤𑀫𑀸𑀤𑀻𑀦𑀁 𑀕𑀳𑀡𑀁. 𑀅𑀲𑀜𑁆𑀘𑀺𑀘𑁆𑀘 𑀭𑀼𑀓𑁆𑀔𑀸𑀤𑀺𑀧𑀯𑀝𑁆𑀝𑀦𑁂𑀦 𑀪𑀺𑀦𑁆𑀤𑀦𑁆𑀢𑀲𑁆𑀲𑀸𑀢𑀺 𑀧𑀸𑀲𑀸𑀡𑀭𑀼𑀓𑁆𑀔𑀸𑀤𑀻𑀦𑀺 𑀯𑀸 𑀧𑀯𑀝𑁆𑀝𑁂𑀦𑁆𑀢𑀲𑁆𑀲, 𑀓𑀢𑁆𑀢𑀭𑀤𑀡𑁆𑀟𑁂𑀦 𑀯𑀸 𑀆𑀳𑀘𑁆𑀘 𑀆𑀳𑀘𑁆𑀘 𑀕𑀘𑁆𑀙𑀦𑁆𑀢𑀲𑁆𑀲 𑀧𑀣𑀯𑀻 𑀪𑀺𑀚𑁆𑀚𑀢𑀺, 𑀲𑀸 ‘‘𑀢𑁂𑀦 𑀪𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀲𑀜𑁆𑀘𑀺𑀘𑁆𑀘 𑀅𑀪𑀺𑀦𑁆𑀦𑀢𑁆𑀢𑀸 𑀅𑀲𑀜𑁆𑀘𑀺𑀘𑁆𑀘 𑀪𑀺𑀦𑁆𑀦𑀸 𑀦𑀸𑀫 𑀳𑁄𑀢𑀺, 𑀇𑀢𑀺 𑀅𑀲𑀜𑁆𑀘𑀺𑀘𑁆𑀘 𑀭𑀼𑀓𑁆𑀔𑀸𑀤𑀺𑀧𑁆𑀧𑀯𑀝𑁆𑀝𑀦𑁂𑀦 𑀪𑀺𑀦𑁆𑀤𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀲𑀢𑀺𑀬𑀸 𑀧𑀸𑀤𑀗𑁆𑀕𑀼𑀝𑁆𑀞𑀓𑀸𑀤𑀻𑀳𑀺 𑀯𑀺𑀮𑀺𑀔𑀦𑁆𑀢𑀲𑁆𑀲𑀸𑀢𑀺 𑀬𑁄 𑀅𑀜𑁆𑀜𑀯𑀺𑀳𑀺𑀢𑁄 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀓𑀺𑀜𑁆𑀘𑀺 𑀓𑀣𑁂𑀦𑁆𑀢𑁄 𑀧𑀸𑀤𑀗𑁆𑀕𑀼𑀝𑁆𑀞𑀓𑁂𑀦 𑀯𑀸 𑀓𑀢𑁆𑀢𑀭𑀬𑀝𑁆𑀞𑀺𑀬𑀸 𑀯𑀸 𑀧𑀣𑀯𑀺𑀁 𑀯𑀺𑀮𑀺𑀔𑀦𑁆𑀢𑁄 𑀢𑀺𑀝𑁆𑀞𑀢𑀺, 𑀢𑀲𑁆𑀲 𑀏𑀯𑀁 𑀅𑀲𑀢𑀺𑀬𑀸 𑀧𑀸𑀤𑀗𑁆𑀕𑀼𑀝𑁆𑀞𑀓𑀸𑀤𑀻𑀳𑀺 𑀯𑀺𑀮𑀺𑀔𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀧𑀣𑀯𑀻𑀔𑀡𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀼𑀲𑀸𑀯𑀸𑀤𑀯𑀕𑁆𑀕𑁄 𑀧𑀞𑀫𑁄.

𑁨. 𑀪𑀽𑀢𑀕𑀸𑀫𑀯𑀕𑁆𑀕𑁄

𑁧. 𑀪𑀽𑀢𑀕𑀸𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀪𑀯𑀦𑁆𑀢𑀻’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁯𑁦) 𑀇𑀫𑀺𑀦𑀸 𑀯𑀺𑀭𑀼𑀴𑁆𑀳𑀫𑀽𑀮𑁂 𑀦𑀻𑀮𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 𑀯𑀟𑁆𑀠𑀫𑀸𑀦𑀓𑁂 𑀢𑀭𑀼𑀡𑀕𑀘𑁆𑀙𑁂 𑀤𑀲𑁆𑀲𑁂𑀢𑀺. ‘‘𑀅𑀳𑁂𑀲𑀼’’𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀯𑀟𑁆𑀠𑀺𑀢𑁆𑀯𑀸 𑀞𑀺𑀢𑁂 𑀫𑀳𑀦𑁆𑀢𑁂 𑀭𑀼𑀓𑁆𑀔𑀕𑀘𑁆𑀙𑀸𑀤𑀺𑀓𑁂 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀚𑀸𑀬𑀦𑁆𑀢𑀻’’𑀢𑀺𑀆𑀤𑀺. 𑀏𑀢𑁆𑀣 𑀘 ‘‘𑀪𑀯𑀦𑁆𑀢𑀻’’𑀢𑀺 𑀇𑀫𑀲𑁆𑀲 𑀯𑀺𑀯𑀭𑀡𑀁 ‘‘𑀚𑀸𑀬𑀦𑁆𑀢𑀺 𑀯𑀟𑁆𑀠𑀦𑁆𑀢𑀻’’𑀢𑀺, ‘‘𑀅𑀳𑁂𑀲𑀼’’𑀦𑁆𑀢𑀺 𑀇𑀫𑀲𑁆𑀲 ‘‘𑀚𑀸𑀢𑀸 𑀯𑀟𑁆𑀠𑀺𑀢𑀸’’𑀢𑀺. 𑀕𑀸𑀫𑁄𑀢𑀺 𑀲𑀫𑀽𑀳𑁄. 𑀧𑀢𑀺𑀝𑁆𑀞𑀺𑀢𑀳𑀭𑀺𑀢𑀢𑀺𑀡𑀭𑀼𑀓𑁆𑀔𑀸𑀤𑀻𑀦𑀦𑁆𑀢𑀺 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀺𑀢𑀲𑁆𑀲 𑀳𑀭𑀺𑀢𑀢𑀺𑀡𑀲𑁆𑀲 𑀘𑁂𑀯 𑀳𑀭𑀺𑀢𑀭𑀼𑀓𑁆𑀔𑀸𑀤𑀻𑀦𑀜𑁆𑀘. 𑀆𑀤𑀺𑀲𑀤𑁆𑀤𑁂𑀦 𑀑𑀲𑀥𑀺𑀕𑀘𑁆𑀙𑀮𑀢𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀦𑀺𑀫𑀺𑀢𑁆𑀢𑀢𑁆𑀣𑁂 𑀘 𑀪𑀼𑀫𑁆𑀫𑀁. 𑀬𑁄 𑀅𑀢𑁆𑀣𑁄 𑀲𑀫𑁆𑀧𑀚𑁆𑀚𑀢𑀺, 𑀢𑀫𑀸𑀳 ‘‘𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬𑀸’’𑀢𑀺𑀆𑀤𑀺𑀦𑀸.

𑀦𑀦𑀼 𑀘 𑀭𑀼𑀓𑁆𑀔𑀸𑀤𑀬𑁄 𑀘𑀺𑀢𑁆𑀢𑀭𑀳𑀺𑀢𑀢𑀸𑀬 𑀦 𑀚𑀻𑀯𑀸, 𑀘𑀺𑀢𑁆𑀢𑀭𑀳𑀺𑀢𑀢𑀸 𑀘 𑀧𑀭𑀺𑀨𑀦𑁆𑀤𑀸𑀪𑀸𑀯𑀢𑁄, 𑀙𑀺𑀦𑁆𑀦𑁂𑀧𑀺 𑀯𑀺𑀭𑀼𑀳𑀦𑀢𑁄, 𑀯𑀺𑀲𑀤𑀺𑀲𑀚𑀸𑀢𑀺𑀓𑀪𑀸𑀯𑀢𑁄, 𑀘𑀢𑀼𑀬𑁄𑀦𑀺𑀬𑀁 𑀅𑀧𑀭𑀺𑀬𑀸𑀧𑀦𑁆𑀦𑀢𑁄 𑀘 𑀯𑁂𑀤𑀺𑀢𑀩𑁆𑀩𑀸, 𑀯𑀼𑀟𑁆𑀠𑀺 𑀧𑀦 𑀧𑀯𑀸𑀴𑀲𑀺𑀮𑀸𑀮𑀯𑀡𑀸𑀦𑀫𑁆𑀧𑀺 𑀯𑀺𑀚𑁆𑀚𑀢𑀻𑀢𑀺 𑀦 𑀢𑁂𑀲𑀁 𑀚𑀻𑀯𑀪𑀸𑀯𑁂 𑀓𑀸𑀭𑀡𑀁, 𑀯𑀺𑀲𑀬𑀕𑁆𑀕𑀳𑀡𑀜𑁆𑀘 𑀦𑁂𑀲𑀁 𑀧𑀭𑀺𑀓𑀧𑁆𑀧𑀦𑀸𑀫𑀢𑁆𑀢𑀁 𑀲𑀼𑀧𑀦𑀁 𑀯𑀺𑀬 𑀘𑀺𑀜𑁆𑀘𑀸𑀤𑀻𑀦𑀁, 𑀢𑀣𑀸 𑀤𑁄𑀳𑀴𑀸𑀤𑀬𑁄, 𑀅𑀣 𑀓𑀲𑁆𑀫𑀸 𑀪𑀽𑀢𑀕𑀸𑀫𑀲𑁆𑀲 𑀧𑀸𑀢𑀩𑁆𑀬𑀢𑀸𑀬 𑀧𑀸𑀘𑀺𑀢𑁆𑀢𑀺𑀬𑀁 𑀇𑀘𑁆𑀙𑀺𑀢𑀦𑁆𑀢𑀺? 𑀲𑀫𑀡𑀅𑀲𑀸𑀭𑀼𑀧𑁆𑀧𑀢𑁄, 𑀢𑀦𑁆𑀦𑀺𑀲𑁆𑀲𑀺𑀢𑀲𑀢𑁆𑀢𑀸𑀦𑀼𑀭𑀓𑁆𑀔𑀡𑀢𑁄 𑀘. 𑀢𑁂𑀦𑁂𑀯𑀸𑀳 ‘‘𑀚𑀻𑀯𑀲𑀜𑁆𑀜𑀺𑀦𑁄 𑀳𑀺 𑀫𑁄𑀖𑀧𑀼𑀭𑀺𑀲𑀸 𑀫𑀦𑀼𑀲𑁆𑀲𑀸 𑀭𑀼𑀓𑁆𑀔𑀲𑁆𑀫𑀺’’𑀦𑁆𑀢𑀺𑀆𑀤𑀺 (𑀧𑀸𑀘𑀺. 𑁮𑁯). 𑀲𑀸𑀲𑀧𑀩𑀻𑀚𑀓𑀲𑁂𑀯𑀸𑀮𑀫𑁆𑀧𑀻𑀢𑀺 𑀲𑀸𑀲𑀧𑀩𑀻𑀚𑀓𑀲𑀗𑁆𑀔𑀸𑀢𑀁 𑀲𑁂𑀯𑀸𑀮𑀫𑁆𑀧𑀺, 𑀲𑀸𑀲𑀧𑀲𑁂𑀯𑀸𑀮𑀁, 𑀩𑀻𑀚𑀓𑀲𑁂𑀯𑀸𑀮𑀫𑁆𑀧𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀲𑀸𑀲𑀧𑀲𑁂𑀯𑀸𑀮𑁄 𑀦𑀸𑀫 𑀲𑀸𑀲𑀧𑀫𑀢𑁆𑀢𑁄 𑀔𑀼𑀤𑁆𑀤𑀓𑀲𑁂𑀯𑀸𑀮𑁄. 𑀩𑀻𑀚𑀓𑀲𑁂𑀯𑀸𑀮𑁄 𑀦𑀸𑀫 𑀉𑀧𑀭𑀺 𑀔𑀼𑀤𑁆𑀤𑀓𑀧𑀢𑁆𑀢𑁄 𑀳𑁂𑀝𑁆𑀞𑀸 𑀔𑀼𑀤𑁆𑀤𑀓𑀫𑀽𑀮𑁄 𑀲𑁂𑀯𑀸𑀮𑁄.

𑀫𑀽𑀮𑀩𑀻𑀚𑀔𑀦𑁆𑀥𑀩𑀻𑀚𑀨𑀴𑀼𑀩𑀻𑀚𑀅𑀕𑁆𑀕𑀩𑀻𑀚𑀩𑀻𑀚𑀩𑀻𑀚𑀸𑀦𑀦𑁆𑀢𑀺 𑀏𑀢𑁆𑀣 𑀫𑀽𑀮𑀫𑁂𑀯 𑀩𑀻𑀚𑀁 𑀫𑀽𑀮𑀩𑀻𑀚𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀢𑀢𑁆𑀣 𑀫𑀽𑀮𑀩𑀻𑀚𑀁 𑀳𑀮𑀺𑀤𑁆𑀤𑀺𑀆𑀤𑀺𑀓𑀁. 𑀔𑀦𑁆𑀥𑀩𑀻𑀚𑀁 𑀅𑀲𑁆𑀲𑀢𑁆𑀣𑀸𑀤𑀺𑀓𑀁. 𑀨𑀴𑀼𑀩𑀻𑀚𑀁 𑀉𑀘𑁆𑀙𑀼𑀆𑀤𑀺𑀓𑀁. 𑀅𑀕𑁆𑀕𑀩𑀻𑀚𑀁 𑀳𑀺𑀭𑀺𑀯𑁂𑀭𑀸𑀤𑀺𑀓𑀁. 𑀩𑀻𑀚𑀁𑀩𑀻𑀚𑀁 𑀧𑀼𑀩𑁆𑀩𑀡𑁆𑀡𑀸𑀤𑀺𑀓𑀁. 𑀪𑀸𑀚𑀦𑀕𑀢𑀦𑁆𑀢𑀺 𑀲𑀭𑀸𑀯𑀸𑀤𑀺𑀪𑀸𑀚𑀦𑀕𑀢𑀁. 𑀦𑀺𑀓𑁆𑀔𑀦𑁆𑀢𑀁 𑀫𑀽𑀮𑀫𑀢𑁆𑀢𑀁 𑀏𑀢𑀲𑁆𑀫𑀸𑀢𑀺 𑀦𑀺𑀓𑁆𑀔𑀦𑁆𑀢𑀫𑀽𑀮𑀫𑀢𑁆𑀢𑀁. 𑀫𑀢𑁆𑀢 𑀲𑀤𑁆𑀤𑁂𑀦 𑀘𑁂𑀢𑁆𑀣 𑀧𑀡𑁆𑀡𑀲𑁆𑀲 𑀦𑀺𑀓𑁆𑀔𑀫𑀦𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀏𑀲 𑀦𑀬𑁄 𑀦𑀺𑀓𑁆𑀔𑀦𑁆𑀢𑀅𑀗𑁆𑀓𑀼𑀭𑀫𑀢𑁆𑀢𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀲𑀘𑁂 𑀧𑀦 𑀫𑀽𑀮𑀜𑁆𑀘 𑀧𑀡𑁆𑀡𑀜𑁆𑀘 𑀦𑀺𑀕𑁆𑀕𑀢𑀁, 𑀪𑀽𑀢𑀕𑀸𑀫𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀯𑀺𑀤𑀢𑁆𑀣𑀺𑀫𑀢𑁆𑀢𑀸 𑀧𑀢𑁆𑀢𑀯𑀝𑁆𑀝𑀺 𑀦𑀺𑀕𑁆𑀕𑀘𑁆𑀙𑀢𑀻𑀢𑀺 𑀯𑀺𑀤𑀢𑁆𑀣𑀺𑀫𑀢𑁆𑀢𑀸 𑀅𑀦𑀻𑀮𑀯𑀡𑁆𑀡𑀸 𑀧𑀢𑁆𑀢𑀯𑀝𑁆𑀝𑀺 𑀦𑀺𑀓𑁆𑀔𑀫𑀢𑀺. 𑀢𑁂𑀦𑀸𑀳 ‘‘𑀦𑀺𑀓𑁆𑀔𑀦𑁆𑀢𑁂’’𑀢𑀺𑀆𑀤𑀺. 𑀳𑀭𑀺𑀢𑁄 𑀦 𑀳𑁄𑀢𑀻𑀢𑀺 𑀦𑀻𑀮𑀯𑀡𑁆𑀡𑁄 𑀦 𑀳𑁄𑀢𑀺. 𑀫𑀼𑀕𑁆𑀕𑀸𑀤𑀻𑀦𑀁 𑀧𑀦 𑀧𑀡𑁆𑀡𑁂𑀲𑀼 𑀉𑀝𑁆𑀞𑀺𑀢𑁂𑀲𑀼, 𑀯𑀻𑀳𑀺𑀆𑀤𑀻𑀦𑀁 𑀯𑀸 𑀅𑀗𑁆𑀓𑀼𑀭𑁂 𑀳𑀭𑀺𑀢𑁂 𑀪𑀽𑀢𑀕𑀸𑀫𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀏𑀲 𑀦𑀬𑁄 𑀅𑀫𑁆𑀩𑀝𑁆𑀞𑀺𑀆𑀤𑀻𑀲𑀼.

𑀪𑀽𑀢𑀕𑀸𑀫𑀩𑀻𑀚𑀕𑀸𑀫𑁂𑀢𑀺 𑀏𑀢𑁆𑀣 𑀪𑀽𑀢𑀕𑀸𑀫𑀢𑁄 𑀯𑀺𑀬𑁄𑀚𑀺𑀢𑀁 𑀯𑀺𑀭𑀼𑀳𑀦𑀲𑀫𑀢𑁆𑀣𑀫𑁂𑀯 𑀫𑀽𑀮𑀩𑀻𑀚𑀸𑀤𑀺𑀓𑀁 𑀩𑀻𑀚𑀕𑀸𑀫𑁄 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀉𑀪𑀬𑀢𑁆𑀣𑀸𑀢𑀺 𑀪𑀽𑀢𑀕𑀸𑀫𑀩𑀻𑀚𑀕𑀸𑀫𑁂𑀲𑀼. 𑀅𑀢𑀣𑀸𑀲𑀜𑁆𑀜𑀺𑀲𑁆𑀲𑀸𑀢𑀺 𑀅𑀪𑀽𑀢𑀕𑀸𑀫𑀸𑀩𑀻𑀚𑀕𑀸𑀫𑀲𑀜𑁆𑀜𑀺𑀲𑁆𑀲. 𑀓𑁄 𑀧𑀦 𑀯𑀸𑀤𑁄 𑀅𑀪𑀽𑀢𑀕𑀸𑀫𑀸𑀩𑀻𑀚𑀕𑀸𑀫𑁂𑀲𑀼 𑀅𑀪𑀽𑀢𑀕𑀸𑀫𑀸𑀩𑀻𑀚𑀕𑀸𑀫𑀲𑀜𑁆𑀜𑀺𑀲𑁆𑀲. 𑀅𑀲𑀜𑁆𑀘𑀺𑀘𑁆𑀘𑀸𑀢𑀺 𑀧𑀸𑀲𑀸𑀡𑀭𑀼𑀓𑁆𑀔𑀸𑀤𑀻𑀦𑀺 𑀯𑀸 𑀧𑀯𑀝𑁆𑀝𑁂𑀦𑁆𑀢𑀲𑁆𑀲, 𑀲𑀸𑀔𑀁 𑀯𑀸 𑀓𑀟𑁆𑀠𑀦𑁆𑀢𑀲𑁆𑀲, 𑀓𑀢𑁆𑀢𑀭𑀤𑀡𑁆𑀟𑁂𑀦 𑀯𑀸 𑀪𑀽𑀫𑀺𑀁 𑀧𑀳𑀭𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀢𑀺𑀡𑀸𑀦𑀺 𑀓𑀼𑀧𑁆𑀧𑀦𑁆𑀢𑀺. 𑀢𑀸𑀦𑀺 𑀢𑁂𑀦 ‘‘𑀯𑀺𑀓𑁄𑀧𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀲𑀜𑁆𑀘𑀺𑀘𑁆𑀘 𑀅𑀯𑀺𑀓𑁄𑀧𑀺𑀢𑀢𑁆𑀢𑀸 𑀅𑀲𑀜𑁆𑀘𑀺𑀘𑁆𑀘 𑀯𑀺𑀓𑁄𑀧𑀺𑀢𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀇𑀢𑀺 𑀅𑀲𑀜𑁆𑀘𑀺𑀘𑁆𑀘 𑀯𑀺𑀓𑁄𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀅𑀲𑀢𑀺𑀬𑀸𑀢𑀺 𑀅𑀜𑁆𑀜𑀯𑀺𑀳𑀺𑀢𑁄 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀓𑀺𑀜𑁆𑀘𑀺 𑀓𑀣𑁂𑀦𑁆𑀢𑁄 𑀧𑀸𑀤𑀗𑁆𑀕𑀼𑀝𑁆𑀞𑀓𑁂𑀦 𑀯𑀸 𑀳𑀢𑁆𑀣𑁂𑀦 𑀯𑀸 𑀢𑀺𑀡𑀁 𑀯𑀸 𑀮𑀢𑀁 𑀯𑀸 𑀯𑀺𑀓𑁄𑀧𑁂𑀦𑁆𑀢𑁄 𑀢𑀺𑀝𑁆𑀞𑀢𑀺, 𑀏𑀯𑀁 𑀅𑀲𑀢𑀺𑀬𑀸 𑀯𑀺𑀓𑁄𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀅𑀚𑀸𑀦𑀺𑀢𑁆𑀯𑀸𑀢𑀺 𑀏𑀢𑁆𑀣 𑀅𑀩𑁆𑀪𑀦𑁆𑀢𑀭𑁂 ‘‘𑀩𑀻𑀚𑀕𑀸𑀫𑁄’’𑀢𑀺 𑀯𑀸 ‘‘𑀪𑀽𑀢𑀕𑀸𑀫𑁄’’𑀢𑀺 𑀯𑀸 𑀦 𑀚𑀸𑀦𑀸𑀢𑀺, ‘‘𑀯𑀺𑀓𑁄𑀧𑁂𑀫𑀻’’𑀢𑀺 𑀧𑀦 𑀚𑀸𑀦𑀸𑀢𑀺. 𑀏𑀯𑀁 𑀢𑀺𑀡𑁂 𑀯𑀸 𑀧𑀮𑀸𑀮𑀧𑀼𑀜𑁆𑀚𑁂 𑀯𑀸 𑀔𑀡𑀺𑀢𑁆𑀢𑀺𑀁 𑀯𑀸 𑀓𑀼𑀤𑀸𑀮𑀁 𑀯𑀸 𑀲𑀗𑁆𑀕𑁄𑀧𑀦𑀢𑁆𑀣𑀸𑀬 𑀞𑀧𑁂𑀢𑀺, 𑀟𑀬𑁆𑀳𑀫𑀸𑀦𑀳𑀢𑁆𑀣𑁄 𑀯𑀸 𑀅𑀕𑁆𑀕𑀺𑀁 𑀧𑀸𑀢𑁂𑀢𑀺. 𑀢𑀢𑁆𑀭 𑀘𑁂 𑀢𑀺𑀡𑀸𑀦𑀺 𑀙𑀺𑀚𑁆𑀚𑀦𑁆𑀢𑀺 𑀯𑀸 𑀟𑀬𑁆𑀳𑀦𑁆𑀢𑀺 𑀯𑀸, 𑀏𑀯𑀁 𑀅𑀚𑀸𑀦𑀺𑀢𑁆𑀯𑀸 𑀯𑀺𑀓𑁄𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀬𑁂𑀦 𑀓𑁂𑀦𑀘𑀺 𑀅𑀕𑁆𑀕𑀺𑀦𑀸𑀢𑀺 𑀓𑀝𑁆𑀞𑀕𑁆𑀕𑀺𑀕𑁄𑀫𑀬𑀕𑁆𑀕𑀺𑀆𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀅𑀕𑁆𑀕𑀺𑀦𑀸, 𑀅𑀦𑁆𑀢𑀫𑀲𑁄 𑀮𑁄𑀳𑀔𑀡𑁆𑀟𑁂𑀦𑀧𑀺 𑀆𑀤𑀺𑀢𑁆𑀢𑁂𑀦. ‘‘𑀓𑀧𑁆𑀧𑀺𑀬’’𑀦𑁆𑀢𑀺 𑀯𑀢𑁆𑀯𑀸𑀯𑀸𑀢𑀺 𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬 ‘‘𑀓𑀧𑁆𑀧𑀺𑀬’’𑀦𑁆𑀢𑀺 𑀯𑀢𑁆𑀯𑀸𑀯. 𑀏𑀯-𑀲𑀤𑁆𑀤𑁂𑀦 𑀧𑀞𑀫𑀁 𑀅𑀕𑁆𑀕𑀺𑀦𑀸 𑀨𑀼𑀲𑀺𑀢𑁆𑀯𑀸 𑀧𑀘𑁆𑀙𑀸 ‘‘𑀓𑀧𑁆𑀧𑀺𑀬’’𑀦𑁆𑀢𑀺 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀤𑀲𑁆𑀲𑁂𑀢𑀺. ‘‘𑀧𑀞𑀫𑀁 𑀅𑀕𑁆𑀕𑀺𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀁 𑀅𑀦𑀼𑀤𑁆𑀥𑀭𑀺𑀢𑁆𑀯𑀸𑀯 ‘𑀓𑀧𑁆𑀧𑀺𑀬’𑀦𑁆𑀢𑀺 𑀯𑀼𑀢𑁆𑀢𑁂 𑀧𑀦 𑀯𑀝𑁆𑀝𑀢𑀻’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁯𑁩) 𑀯𑀤𑀦𑁆𑀢𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀢𑀣𑁂𑀯𑀸𑀢𑀺 ‘𑀓𑀧𑁆𑀧𑀺𑀬’𑀦𑁆𑀢𑀺 𑀯𑀢𑁆𑀯𑀸𑀯. 𑀅𑀲𑁆𑀲𑀫𑀳𑀺𑀁𑀲𑀲𑀽𑀓𑀭𑀫𑀺𑀕𑀕𑁄𑀭𑀽𑀧𑀸𑀦𑀁 𑀧𑀦 𑀔𑀼𑀭𑀸 𑀅𑀢𑀺𑀔𑀺𑀡𑀸, 𑀢𑀲𑁆𑀫𑀸 𑀢𑁂𑀳𑀺 𑀦 𑀓𑀸𑀢𑀩𑁆𑀩𑀁, 𑀓𑀢𑀫𑁆𑀧𑀺 𑀅𑀓𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀞𑀧𑁂𑀢𑁆𑀯𑀸 𑀕𑁄𑀫𑀳𑀺𑀁𑀲𑀸𑀤𑀻𑀦𑀁 𑀔𑀼𑀭𑁂’’𑀢𑀺. 𑀳𑀢𑁆𑀣𑀺𑀦𑀔𑀸 𑀧𑀦 𑀔𑀼𑀭𑀸 𑀦 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀳𑀺 𑀯𑀝𑁆𑀝𑀢𑀺. 𑀢𑀺𑀭𑀘𑁆𑀙𑀸𑀦𑀸𑀦𑀦𑁆𑀢𑀺 𑀲𑀻𑀳𑀩𑁆𑀬𑀕𑁆𑀖𑀤𑀻𑀧𑀺𑀫𑀓𑁆𑀓𑀝𑀸𑀦𑀁, 𑀲𑀓𑀼𑀦𑁆𑀢𑀸𑀦𑀜𑁆𑀘. 𑀢𑁂𑀲𑀜𑁆𑀳𑀺 𑀦𑀔𑀸 𑀢𑀺𑀔𑀺𑀡𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀳𑀺 𑀓𑀸𑀢𑀩𑁆𑀩𑀁. ‘‘𑀅𑀦𑁆𑀢𑀫𑀲𑁄 𑀙𑀺𑀦𑁆𑀤𑀺𑀢𑁆𑀯𑀸 𑀆𑀳𑀝𑁂𑀦𑀧𑀻’’𑀢𑀺 𑀇𑀫𑀺𑀦𑀸 𑀬𑁂𑀳𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀢𑁂𑀳𑀺 𑀢𑀢𑁆𑀣𑀚𑀸𑀢𑀓𑁂𑀳𑀺 𑀓𑀸𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀲𑀢𑁆𑀣𑁂 𑀯𑀼𑀢𑁆𑀢𑀦𑀬𑁂𑀦𑁂𑀯𑀸’’𑀢𑀺 𑀇𑀫𑀺𑀦𑀸 𑀙𑁂𑀤𑀁 𑀯𑀸 𑀯𑁂𑀥𑀁 𑀯𑀸 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀓𑀧𑁆𑀧𑀺𑀬𑀦𑁆𑀢𑀺 𑀯𑀢𑁆𑀯𑀸𑀯𑀸’’𑀢𑀺 𑀯𑀼𑀢𑁆𑀢𑀫𑀢𑀺𑀤𑀺𑀲𑀢𑀺. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 ‘‘𑀓𑀧𑁆𑀧𑀺𑀬𑀦𑁆𑀢𑀺 𑀯𑀢𑁆𑀯𑀸𑀯 𑀓𑀸𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀓𑀧𑁆𑀧𑀺𑀬𑀁 𑀓𑀭𑁄𑀦𑁆𑀢𑁂𑀦 𑀓𑀢𑁆𑀢𑀩𑁆𑀩𑀸𑀓𑀸𑀭𑀫𑁂𑀯 𑀤𑀲𑁆𑀲𑀺𑀢𑀁, 𑀢𑀣𑀸𑀧𑀺 𑀪𑀺𑀓𑁆𑀔𑀼𑀦𑀸 ‘‘𑀓𑀧𑁆𑀧𑀺𑀬𑀁 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂𑀬𑁂𑀯 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 ‘‘𑀓𑀧𑁆𑀧𑀺𑀬’’𑀦𑁆𑀢𑀺 𑀯𑀢𑁆𑀯𑀸 𑀅𑀕𑁆𑀕𑀺𑀧𑀭𑀺𑀚𑀺𑀢𑀸𑀤𑀺 𑀓𑀸𑀢𑀩𑁆𑀩𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀯𑀘𑀦𑀁 𑀧𑀦 ‘‘𑀧𑀼𑀦𑀧𑀺 𑀓𑀧𑁆𑀧𑀺𑀬𑀁 𑀓𑀭𑁄𑀳𑀻𑀢𑀺 𑀓𑀸𑀭𑁂𑀢𑁆𑀯𑀸𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀧𑀞𑀫𑀫𑁂𑀯 𑀯𑀼𑀢𑁆𑀢𑀢𑁆𑀢𑀸.

𑀏𑀓𑀲𑁆𑀫𑀺𑀁…𑀧𑁂… 𑀓𑀧𑁆𑀧𑀺𑀬𑁂 𑀓𑀢𑁂 𑀲𑀩𑁆𑀩𑀁 𑀓𑀢𑀁 𑀳𑁄𑀢𑀻𑀢𑀺 𑀏𑀓𑀁𑀬𑁂𑀯 ‘‘𑀓𑀧𑁆𑀧𑀺𑀬𑀁 𑀓𑀭𑁄𑀫𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀧𑀺 𑀓𑀧𑁆𑀧𑀺𑀬𑁂 𑀓𑀢𑁂 𑀏𑀓𑀸𑀩𑀤𑁆𑀥𑀢𑁆𑀢𑀸 𑀲𑀩𑁆𑀩𑀁 𑀓𑀢𑀁 𑀳𑁄𑀢𑀺. 𑀤𑀸𑀭𑀼𑀓𑀁 𑀯𑀺𑀚𑁆𑀛𑀢𑀻𑀢𑀺 𑀚𑀸𑀦𑀺𑀢𑁆𑀯𑀸 𑀯𑀸 𑀅𑀚𑀸𑀦𑀺𑀢𑁆𑀯𑀸 𑀯𑀸 𑀯𑀺𑀚𑁆𑀛𑀢𑀺 𑀯𑀸 𑀯𑀺𑀚𑁆𑀛𑀸𑀧𑁂𑀢𑀺 𑀯𑀸, 𑀯𑀝𑁆𑀝𑀢𑀺𑀬𑁂𑀯. 𑀪𑀢𑁆𑀢𑀲𑀺𑀢𑁆𑀣𑁂 𑀯𑀺𑀚𑁆𑀛𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀁 𑀯𑀺𑀚𑁆𑀛𑀢𑀺, 𑀦 𑀯𑀝𑁆𑀝𑀢𑀻𑀢𑀺 𑀯𑀮𑁆𑀮𑀺𑀆𑀤𑀻𑀦𑀁 𑀪𑀸𑀚𑀦𑀕𑀢𑀺𑀓𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑀺𑀦𑁆𑀤𑀸𑀧𑁂𑀢𑁆𑀯𑀸 𑀓𑀧𑁆𑀧𑀺𑀬𑀁 𑀓𑀸𑀭𑁂𑀢𑀩𑁆𑀩𑀦𑁆𑀢𑀺 𑀩𑀻𑀚𑀢𑁄 𑀫𑀼𑀢𑁆𑀢𑀲𑁆𑀲 𑀓𑀝𑀸𑀳𑀲𑁆𑀲 𑀪𑀸𑀚𑀦𑀕𑀢𑀺𑀓𑀢𑁆𑀢𑀸 𑀯𑀼𑀢𑁆𑀢𑀁. 𑀅𑀩𑀻𑀚𑀦𑁆𑀢𑀺 𑀅𑀗𑁆𑀓𑀼𑀭𑀚𑀦𑀦𑀲𑀫𑀢𑁆𑀣𑀩𑀻𑀚𑀭𑀳𑀺𑀢𑀢𑀭𑀼𑀡𑀫𑁆𑀩𑀨𑀮𑀸𑀤𑀺. 𑀢𑁂𑀦𑀸𑀳 ‘‘𑀬𑀁 𑀧𑀦 𑀨𑀮𑀁 𑀢𑀭𑀼𑀡𑀁 𑀳𑁄𑀢𑀺, 𑀅𑀩𑀻𑀚’’𑀦𑁆𑀢𑀺. 𑀦𑀺𑀩𑁆𑀩𑀢𑁆𑀢𑀩𑀻𑀚𑀁 𑀦𑀸𑀫 𑀩𑀻𑀚𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀯𑀺𑀲𑀼𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀁 𑀅𑀫𑁆𑀩𑀧𑀦𑀲𑀸𑀤𑀺𑀨𑀮𑀁. 𑀢𑁂𑀦𑀸𑀳 ‘‘𑀩𑀻𑀚𑀁 𑀅𑀧𑀦𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺. 𑀢𑀢𑁆𑀣 𑀓𑀧𑁆𑀧𑀺𑀬𑀓𑀭𑀡𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀲𑀬𑀫𑁂𑀯 𑀓𑀧𑁆𑀧𑀺𑀬𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀪𑀽𑀢𑀕𑀸𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀜𑁆𑀜𑀯𑀸𑀤𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀬𑀫𑀢𑁆𑀣𑀦𑁆𑀢𑀺 ‘‘𑀢𑁆𑀯𑀁 𑀓𑀺𑀭 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀁 𑀆𑀧𑀦𑁆𑀦𑁄’’𑀢𑀺𑀆𑀤𑀺𑀓𑀁 𑀬𑀁 𑀓𑀺𑀜𑁆𑀘𑀺 𑀅𑀢𑁆𑀣𑀁. 𑀢𑀢𑁄 𑀅𑀜𑁆𑀜𑀦𑁆𑀢𑀺 𑀧𑀼𑀘𑁆𑀙𑀺𑀢𑀢𑁆𑀣𑀢𑁄 𑀅𑀜𑁆𑀜𑀫𑀢𑁆𑀣𑀁. 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀡𑀲𑁆𑀲𑀸𑀢𑀺 𑀯𑀺𑀦𑀬𑀥𑀭𑁂𑀦 𑀬𑀁 𑀯𑀘𑀦𑀁 𑀤𑁄𑀲𑀧𑀼𑀘𑁆𑀙𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀢𑀢𑁄 𑀅𑀜𑁆𑀜𑁂𑀦 𑀯𑀘𑀦𑁂𑀦 𑀧𑀝𑀺𑀘𑁆𑀙𑀸𑀤𑀦𑀲𑁆𑀲. 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑁄𑀧𑀺 𑀳𑀺 𑀘𑀭𑀲𑀤𑁆𑀤𑁄 𑀳𑁄𑀢𑀺 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀁. 𑀯𑀼𑀢𑁆𑀢𑀦𑁆𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁.

𑀲𑀸𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀢𑀺 𑀏𑀢𑁆𑀣 𑀞𑀧𑁂𑀢𑁆𑀯𑀸 𑀧𑀸𑀭𑀸𑀚𑀺𑀓𑀁 𑀲𑁂𑀲𑀸 𑀲𑀸𑀯𑀲𑁂𑀲𑀸𑀧𑀢𑁆𑀢𑀺 𑀦𑀸𑀫, 𑀢𑀁 𑀆𑀧𑀦𑁆𑀦𑁄. 𑀅𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄𑀢𑀺 ‘‘𑀓𑀺𑀁, 𑀆𑀯𑀼𑀲𑁄, 𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀬𑀫𑀸𑀦𑁄. 𑀅𑀜𑁆𑀜𑁂𑀦 𑀯𑀘𑀦𑁂𑀦𑀸𑀢𑀺 ‘‘𑀓𑁄 𑀆𑀧𑀦𑁆𑀦𑁄? 𑀓𑀺𑀁 𑀆𑀧𑀦𑁆𑀦𑁄? 𑀓𑀺𑀲𑁆𑀫𑀺𑀁 𑀆𑀧𑀦𑁆𑀦𑁄? 𑀓𑀣𑀁 𑀆𑀧𑀦𑁆𑀦𑁄? 𑀓𑀁 𑀪𑀡𑀣? 𑀓𑀺𑀁 𑀪𑀡𑀣𑀸’’𑀢𑀺 𑀅𑀜𑁆𑀜𑁂𑀦 𑀯𑀘𑀦𑁂𑀦. 𑀅𑀜𑁆𑀜𑀦𑁆𑀢𑀺 ‘‘𑀓𑀺𑀁 𑀢𑁆𑀯𑀁 𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻’’𑀢𑀺𑀆𑀤𑀺𑀓𑀁 𑀅𑀦𑀼𑀬𑀼𑀜𑁆𑀚𑀓𑀯𑀘𑀦𑀁. 𑀢𑀣𑀸 𑀢𑀣𑀸 𑀯𑀺𑀓𑁆𑀔𑀺𑀧𑀢𑀻𑀢𑀺 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦 𑀯𑀺𑀓𑁆𑀔𑀺𑀧𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀲𑁄 (𑀧𑀸𑀘𑀺. 𑀅𑀝𑁆𑀞. 𑁯𑁪) 𑀓𑀺𑀜𑁆𑀘𑀺 𑀯𑀻𑀢𑀺𑀓𑁆𑀓𑀫𑀁 𑀤𑀺𑀲𑁆𑀯𑀸 ‘‘𑀆𑀯𑀼𑀲𑁄, 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻’’𑀢𑀺 𑀲𑀗𑁆𑀖𑀫𑀚𑁆𑀛𑁂 𑀆𑀧𑀢𑁆𑀢𑀺𑀬𑀸 𑀅𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄 ‘‘𑀓𑁄 𑀆𑀧𑀦𑁆𑀦𑁄’’𑀢𑀺 𑀯𑀤𑀢𑀺. 𑀢𑀢𑁄 ‘‘𑀢𑁆𑀯’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀅𑀳𑀁 𑀓𑀺𑀁 𑀆𑀧𑀦𑁆𑀦𑁄’’𑀢𑀺 𑀯𑀤𑀢𑀺. 𑀅𑀣 ‘‘𑀧𑀸𑀘𑀺𑀢𑁆𑀢𑀺𑀬𑀁 𑀯𑀸 𑀤𑀼𑀓𑁆𑀓𑀝𑀁 𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀳𑀁 𑀓𑀺𑀲𑁆𑀫𑀺𑀁 𑀆𑀧𑀦𑁆𑀦𑁄’’𑀢𑀺 𑀯𑀤𑀢𑀺. 𑀢𑀢𑁄 ‘‘𑀅𑀫𑀼𑀓𑀲𑁆𑀫𑀺𑀁 𑀦𑀸𑀫 𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀅𑀳𑀁 𑀓𑀣𑀁 𑀆𑀧𑀦𑁆𑀦𑁄, 𑀓𑀺𑀁 𑀓𑀭𑁄𑀦𑁆𑀢𑁄 𑀆𑀧𑀦𑁆𑀦𑁄𑀫𑁆𑀳𑀻’’𑀢𑀺 𑀧𑀼𑀘𑁆𑀙𑀢𑀺. 𑀅𑀣 ‘‘𑀇𑀤𑀁 𑀦𑀸𑀫 𑀓𑀭𑁄𑀦𑁆𑀢𑁄 𑀆𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁂 ‘‘𑀓𑀁 𑀪𑀡𑀣𑀸’’𑀢𑀺 𑀯𑀤𑀢𑀺. 𑀢𑀢𑁄 ‘‘𑀢𑀁 𑀪𑀡𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀪𑀡𑀣𑀸’’𑀢𑀺 𑀏𑀯𑀫𑀦𑁂𑀓𑁂𑀳𑀺 𑀧𑀓𑀸𑀭𑁂𑀳𑀺 𑀯𑀺𑀓𑁆𑀔𑀺𑀧𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀬𑁄 𑀧𑀦 𑀪𑀺𑀓𑁆𑀔𑀼 𑀲𑀸𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄, 𑀢𑀁 𑀦 𑀓𑀣𑁂𑀢𑀼𑀓𑀸𑀫𑁄 𑀢𑀼𑀡𑁆𑀳𑀻𑀪𑀸𑀯𑁂𑀦 𑀯𑀺𑀳𑁂𑀲𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀳𑁂𑀲𑁂𑀢𑀻𑀢𑀺 𑀘𑀺𑀭𑀦𑀺𑀲𑀚𑁆𑀚𑀸𑀘𑀺𑀭𑀪𑀸𑀲𑀦𑁂𑀳𑀺 𑀧𑀺𑀝𑁆𑀞𑀺𑀆𑀕𑀺𑀮𑀸𑀬𑀦𑀢𑀸𑀮𑀼𑀲𑁄𑀲𑀸𑀤𑀺𑀯𑀲𑁂𑀦 𑀲𑀗𑁆𑀖𑀁 𑀯𑀺𑀳𑁂𑀲𑁂𑀢𑀺, 𑀧𑀭𑀺𑀲𑁆𑀲𑀫𑀁 𑀢𑁂𑀲𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀲𑁆𑀲𑀫𑁄 𑀳𑀺 𑀯𑀺𑀳𑁂𑀲𑀸 𑀦𑀸𑀫. 𑀅𑀜𑁆𑀜𑀯𑀸𑀤𑀓𑀓𑀫𑁆𑀫𑀦𑁆𑀢𑀺 𑀅𑀜𑁆𑀜𑀯𑀸𑀤𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀜𑁆𑀜𑀯𑀸𑀤𑀓𑀸𑀭𑁄𑀧𑀦𑀢𑁆𑀣𑀁 𑀓𑀸𑀢𑀩𑁆𑀩𑀁 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁. 𑀯𑀺𑀳𑁂𑀲𑀓𑀓𑀫𑁆𑀫𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀺𑀁 𑀲𑀗𑁆𑀖𑁂𑀦 𑀓𑀢𑁂𑀢𑀺 𑀢𑀲𑁆𑀫𑀺𑀁 𑀅𑀜𑁆𑀜𑀯𑀸𑀤𑀓𑀓𑀫𑁆𑀫𑁂 𑀘 𑀯𑀺𑀳𑁂𑀲𑀓𑀓𑀫𑁆𑀫𑁂 𑀘 𑀲𑀗𑁆𑀖𑁂𑀦 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀓𑀢𑁂. 𑀢𑀣𑀸 𑀓𑀭𑁄𑀦𑁆𑀢𑀸𑀦𑀦𑁆𑀢𑀺 𑀢𑀁 𑀧𑀓𑀸𑀭𑀁 𑀓𑀭𑁄𑀦𑁆𑀢𑀸𑀦𑀁, 𑀅𑀜𑁆𑀜𑀯𑀸𑀤𑀓𑀜𑁆𑀘 𑀯𑀺𑀳𑁂𑀲𑀓𑀜𑁆𑀘 𑀓𑀭𑁄𑀦𑁆𑀢𑀸𑀦𑀦𑁆𑀢𑀺 𑀅𑀢𑁆𑀣𑁄.

‘‘𑀯𑀺𑀳𑁂𑀲𑀓𑁂𑀢𑀺 𑀅𑀬𑀫𑁂𑀢𑁆𑀣 𑀅𑀦𑀼𑀧𑀜𑁆𑀜𑀢𑁆𑀢𑀻’’𑀢𑀺 𑀅𑀯𑀘𑀦𑀜𑁆𑀘𑁂𑀢𑁆𑀣 ‘‘𑀆𑀧𑀢𑁆𑀢𑀺𑀓𑀭𑀸 𑀘 𑀳𑁄𑀢𑀺 𑀅𑀜𑁆𑀜𑀯𑀸𑀤𑀓𑀲𑀺𑀓𑁆𑀔𑀸𑀧𑀤𑀸𑀤𑀻𑀲𑀼 𑀯𑀺𑀬𑀸’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸) 𑀯𑀼𑀢𑁆𑀢𑀢𑁆𑀢𑀸𑀬𑁂𑀯 𑀧𑀜𑁆𑀜𑀸𑀬𑀢𑀻𑀢𑀺 𑀓𑀢𑁆𑀯𑀸. 𑀏𑀲 𑀦𑀬𑁄 𑀉𑀧𑀭𑀺 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀥𑀫𑁆𑀫𑀓𑀫𑁆𑀫𑁂 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀺𑀯𑁂𑀫𑀢𑀺𑀓𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀻𑀦𑀁 𑀯𑀲𑁂𑀦 𑀢𑀻𑀡𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀅𑀥𑀫𑁆𑀫𑀓𑀫𑁆𑀫𑁂 𑀢𑀺𑀓𑀤𑀼𑀓𑁆𑀓𑀝𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑀸𑀭𑁄𑀧𑀺𑀢𑁂𑀢𑀺 𑀓𑀫𑁆𑀫𑀯𑀸𑀘𑀸𑀬 𑀅𑀦𑀸𑀭𑁄𑀧𑀺𑀢𑁂, 𑀅𑀧𑁆𑀧𑀢𑀺𑀝𑁆𑀞𑀸𑀧𑀺𑀢𑁂𑀢𑀺 𑀅𑀢𑁆𑀣𑁄. 𑀕𑁂𑀮𑀜𑁆𑀜𑁂𑀦𑀸𑀢𑀺 𑀬𑁂𑀦 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀫𑀼𑀔𑁂 𑀢𑀸𑀤𑀺𑀲𑁂𑀦 𑀩𑁆𑀬𑀸𑀥𑀺𑀦𑀸. 𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀸𑀤𑀻𑀦𑀺 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀲𑀗𑁆𑀖𑀫𑀚𑁆𑀛𑁂 𑀓𑀣𑀺𑀢𑁂 𑀢𑀧𑁆𑀧𑀘𑁆𑀘𑀬𑀸 𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀁 𑀯𑀸 𑀓𑀮𑀳𑁄 𑀯𑀸 𑀯𑀺𑀕𑁆𑀕𑀳𑁄 𑀯𑀸 𑀯𑀺𑀯𑀸𑀤𑁄 𑀯𑀸 𑀲𑀗𑁆𑀖𑀪𑁂𑀤𑁄 𑀯𑀸 𑀲𑀗𑁆𑀖𑀭𑀸𑀚𑀺 𑀯𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀇𑀫𑀺𑀦𑀸 𑀯𑀸 𑀅𑀥𑀺𑀧𑁆𑀧𑀸𑀬𑁂𑀦 𑀦 𑀓𑀣𑁂𑀦𑁆𑀢𑀲𑁆𑀲. 𑀏𑀢𑁆𑀣 𑀘 𑀅𑀥𑀫𑁆𑀫𑁂𑀦𑀸𑀢𑀺 𑀅𑀪𑀽𑀢𑁂𑀦 𑀯𑀢𑁆𑀣𑀼𑀦𑀸.

‘‘𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑀤𑀺𑀲𑀸𑀦𑀻’’𑀢𑀺 𑀅𑀯𑀺𑀲𑁂𑀲𑀁 𑀅𑀢𑀺𑀤𑀺𑀲𑀺𑀢𑁆𑀯𑀸 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀤𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀺𑀬𑀸 𑀓𑀺𑀭𑀺𑀬𑀁 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀦𑁆𑀢𑀲𑁆𑀲. 𑀲𑀺𑀬𑀸 𑀅𑀓𑀺𑀭𑀺𑀬𑀁 𑀢𑀼𑀡𑁆𑀳𑀻𑀪𑀸𑀯𑁂𑀦 𑀯𑀺𑀳𑁂𑀲𑁂𑀦𑁆𑀢𑀲𑁆𑀲.

𑀅𑀜𑁆𑀜𑀯𑀸𑀤𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀉𑀚𑁆𑀛𑀸𑀧𑀦𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀬𑁂𑀦 𑀯𑀘𑀦𑁂𑀦𑀸𑀢𑀺 ‘‘𑀙𑀦𑁆𑀤𑀸𑀬 𑀇𑀢𑁆𑀣𑀦𑁆𑀦𑀸𑀫𑁄 𑀇𑀤𑀁 𑀦𑀸𑀫 𑀓𑀭𑁄𑀢𑀻’’𑀢𑀺𑀆𑀤𑀺𑀓𑁂𑀦 𑀬𑁂𑀦 𑀯𑀘𑀦𑁂𑀦. 𑀢𑁂𑀦𑀸𑀳 ‘‘𑀙𑀦𑁆𑀤𑀸𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀙𑀦𑁆𑀤𑀸𑀬𑀸𑀢𑀺 𑀙𑀦𑁆𑀤𑁂𑀦 𑀧𑀓𑁆𑀔𑀧𑀸𑀢𑁂𑀦. ‘‘𑀅𑀓𑁆𑀔𑀭𑀸𑀬 𑀯𑀸𑀘𑁂𑀢𑀻’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁪𑁬) 𑀯𑀺𑀬 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀏𑀲. 𑀇𑀤𑀁 𑀦𑀸𑀫 𑀓𑀭𑁄𑀢𑀻𑀢𑀺 𑀅𑀢𑁆𑀢𑀦𑁄 𑀲𑀦𑁆𑀤𑀺𑀝𑁆𑀞𑀲𑀫𑁆𑀪𑀢𑁆𑀢𑀸𑀦𑀁 𑀧𑀡𑀻𑀢𑀁 𑀲𑁂𑀦𑀸𑀲𑀦𑀁 𑀯𑀸 𑀧𑀜𑁆𑀜𑀧𑁂𑀢𑀺, 𑀪𑀢𑁆𑀢𑀸𑀤𑀺𑀓𑀁 𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑀸𑀤𑀺𑀪𑁂𑀤𑀦𑁆𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀪𑀢𑁆𑀢𑀼𑀤𑁆𑀤𑁂𑀲𑀓𑀬𑀸𑀕𑀼𑀪𑀸𑀚𑀓𑀨𑀮𑀪𑀸𑀚𑀓𑀸𑀤𑀻𑀦𑀁 𑀕𑀳𑀡𑀁. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀁 𑀛𑁂-𑀲𑀤𑁆𑀤𑁄 𑀑𑀮𑁄𑀓𑀦𑀢𑁆𑀣𑁄𑀧𑀺 𑀳𑁄𑀢𑀻𑀢𑀺 𑀆𑀳 ‘‘𑀅𑀯𑀜𑁆𑀜𑀸𑀬 𑀑𑀮𑁄𑀓𑀸𑀧𑁂𑀦𑁆𑀢𑀻’’𑀢𑀺. 𑀘𑀺𑀦𑁆𑀢𑀦𑀢𑁆𑀣𑁄𑀬𑁂𑀯 𑀯𑀸 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀮𑀸𑀫𑀓𑀢𑁄 𑀯𑀸 𑀘𑀺𑀦𑁆𑀢𑀸𑀧𑁂𑀦𑁆𑀢𑀻’’𑀢𑀺. 𑀢𑀣𑁂𑀯 𑀯𑀤𑀦𑁆𑀢𑀸𑀢𑀺 ‘‘𑀙𑀦𑁆𑀤𑀸𑀬 𑀇𑀢𑁆𑀣𑀦𑁆𑀦𑀸𑀫𑁄 𑀇𑀤𑀁 𑀦𑀸𑀫 𑀓𑀭𑁄𑀢𑀻’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀸. 𑀯𑀼𑀢𑁆𑀢𑀦𑁆𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. ‘‘𑀔𑀺𑀬𑁆𑀬𑀦𑀓𑁂’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁧𑁦𑁫) 𑀅𑀬𑀫𑁂𑀢𑁆𑀣 𑀅𑀦𑀼𑀧𑀜𑁆𑀜𑀢𑁆𑀢𑀺.

𑀅𑀲𑀫𑁆𑀫𑀢𑀲𑁆𑀲𑀸𑀢𑀺 𑀲𑀗𑁆𑀖𑁂𑀦 𑀓𑀫𑁆𑀫𑀯𑀸𑀘𑀸𑀬 𑀅𑀲𑀫𑁆𑀫𑀢𑀲𑁆𑀲. 𑀓𑁂𑀯𑀮𑀁 ‘‘𑀢𑀯𑁂𑀲𑁄 𑀪𑀸𑀭𑁄’’𑀢𑀺 𑀲𑀗𑁆𑀖𑁂𑀦 𑀆𑀭𑁄𑀧𑀺𑀢𑀪𑀸𑀭𑀲𑁆𑀲, 𑀪𑀺𑀓𑁆𑀔𑀽𑀦𑀁 𑀯𑀸 𑀨𑀸𑀲𑀼𑀯𑀺𑀳𑀸𑀭𑀢𑁆𑀣𑀸𑀬 𑀲𑀬𑀫𑁂𑀯 𑀪𑀸𑀭𑀁 𑀯𑀳𑀦𑁆𑀢𑀲𑁆𑀲, 𑀬𑀢𑁆𑀭 𑀯𑀸 𑀤𑁆𑀯𑁂 𑀢𑀬𑁄 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺, 𑀢𑀢𑁆𑀭 𑀢𑀸𑀤𑀺𑀲𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀲𑁆𑀲 𑀓𑀲𑁆𑀲𑀘𑀻𑀢𑀺 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀯𑀸 𑀬𑀲𑁆𑀲 𑀓𑀲𑁆𑀲𑀘𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑀦 𑀲𑀫𑁆𑀫𑀢𑀲𑁆𑀲 𑀯𑀸 𑀅𑀲𑀫𑁆𑀫𑀢𑀲𑁆𑀲 𑀯𑀸𑀢𑀺 𑀏𑀢𑁆𑀣 𑀧𑀦 (𑀧𑀸𑀘𑀺. 𑀅𑀝𑁆𑀞. 𑁧𑁦𑁬) 𑀓𑀺𑀜𑁆𑀘𑀸𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀢𑁂𑀭𑀲 𑀲𑀫𑁆𑀫𑀢𑀺𑀬𑁄 𑀤𑀸𑀢𑀼𑀁 𑀦 𑀯𑀝𑁆𑀝𑀦𑁆𑀢𑀺, 𑀢𑀣𑀸𑀧𑀺 𑀬𑁄 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑁄 𑀧𑀘𑁆𑀙𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀪𑀸𑀯𑁂 𑀞𑀺𑀢𑁄, 𑀢𑀁 𑀲𑀦𑁆𑀥𑀸𑀬 ‘‘𑀲𑀫𑁆𑀫𑀢𑀲𑁆𑀲 𑀯𑀸’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀲 𑀧𑀦 𑀩𑁆𑀬𑀢𑁆𑀢𑀲𑁆𑀲 𑀲𑀸𑀫𑀡𑁂𑀭𑀲𑁆𑀲 𑀓𑁂𑀯𑀮𑀁 𑀲𑀗𑁆𑀖𑁂𑀦 𑀯𑀸 𑀲𑀫𑁆𑀫𑀢𑁂𑀦 𑀯𑀸 𑀪𑀺𑀓𑁆𑀔𑀼𑀦𑀸 ‘‘𑀢𑁆𑀯𑀁 𑀇𑀤𑀁 𑀓𑀫𑁆𑀫𑀁 𑀓𑀭𑁄𑀳𑀻’’𑀢𑀺 𑀪𑀸𑀭𑁄 𑀓𑀢𑁄, 𑀢𑀁 𑀲𑀦𑁆𑀥𑀸𑀬 ‘‘𑀅𑀲𑀫𑁆𑀫𑀢𑀲𑁆𑀲 𑀯𑀸’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀉𑀚𑁆𑀛𑀸𑀧𑀦𑀜𑁆𑀘 𑀔𑀺𑀬𑁆𑀬𑀦𑀜𑁆𑀘 𑀫𑀼𑀲𑀸𑀯𑀸𑀤𑀯𑀲𑁂𑀦 𑀧𑀯𑀢𑁆𑀢𑀁, 𑀢𑀲𑁆𑀫𑀸 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀇𑀫𑀺𑀦𑀸𑀯 𑀅𑀦𑀸𑀧𑀢𑁆𑀢𑀺, 𑀫𑀼𑀲𑀸𑀯𑀸𑀤𑁂𑀦 𑀧𑀦 𑀆𑀧𑀢𑁆𑀢𑀺𑀬𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁.

𑀉𑀚𑁆𑀛𑀸𑀧𑀦𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀞𑀫𑀲𑁂𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀫𑀜𑁆𑀘𑀁 𑀯𑀸𑀢𑀺 𑀫𑀲𑀸𑀭𑀓𑁄, 𑀩𑀼𑀦𑁆𑀤𑀺𑀓𑀸𑀩𑀤𑁆𑀥𑁄, 𑀓𑀼𑀴𑀻𑀭𑀧𑀸𑀤𑀓𑁄, 𑀆𑀳𑀘𑁆𑀘𑀧𑀸𑀤𑀓𑁄𑀢𑀺 𑀇𑀫𑁂𑀲𑀼 𑀘𑀢𑀽𑀲𑀼 𑀬𑀁 𑀓𑀜𑁆𑀘𑀺 𑀫𑀜𑁆𑀘𑀁 𑀯𑀸. 𑀧𑀻𑀞𑀁 𑀯𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀪𑀺𑀲𑀺𑀁 𑀯𑀸𑀢𑀺 𑀉𑀡𑁆𑀡𑀪𑀺𑀲𑀺, 𑀘𑁄𑀴𑀪𑀺𑀲𑀺, 𑀯𑀸𑀓𑀪𑀺𑀲𑀺, 𑀢𑀺𑀡𑀪𑀺𑀲𑀺, 𑀧𑀡𑁆𑀡𑀪𑀺𑀲𑀻𑀢𑀺 𑀇𑀫𑀸𑀲𑀼 𑀧𑀜𑁆𑀘𑀲𑀼 𑀪𑀺𑀲𑀻𑀲𑀼 𑀬𑀁 𑀓𑀜𑁆𑀘𑀺 𑀪𑀺𑀲𑀺𑀁 𑀯𑀸. 𑀢𑁂𑀦𑀸𑀳 ‘‘𑀫𑀜𑁆𑀘𑀸𑀤𑀻𑀲𑀽’’𑀢𑀺𑀆𑀤𑀺. 𑀢𑀢𑁆𑀣 ‘‘𑀫𑀜𑁆𑀘𑀲𑀗𑁆𑀔𑁂𑀧𑁂𑀦𑀸’’𑀢𑀺 𑀇𑀫𑀺𑀦𑀸 𑀧𑀻𑀞𑀲𑀗𑁆𑀔𑁂𑀧𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀓𑀧𑁆𑀧𑀺𑀬𑀘𑀫𑁆𑀫𑁂𑀦𑀸𑀢𑀺 𑀫𑀺𑀕𑀸𑀚𑁂𑀴𑀓𑀘𑀫𑁆𑀫𑁂𑀦. 𑀏𑀢𑁆𑀣 𑀧𑀦 𑀫𑀺𑀕𑀘𑀫𑁆𑀫𑁂 𑀏𑀡𑀺𑀫𑀺𑀕𑁄, 𑀯𑀸𑀢𑀫𑀺𑀕𑁄, 𑀧𑀲𑀤𑀫𑀺𑀕𑁄, 𑀓𑀼𑀭𑀼𑀗𑁆𑀕𑀫𑀺𑀕𑁄, 𑀫𑀺𑀕𑀫𑀸𑀢𑀼𑀓𑁄, 𑀭𑁄𑀳𑀺𑀢𑀫𑀺𑀕𑁄𑀢𑀺 𑀏𑀢𑁂𑀲𑀁𑀬𑁂𑀯 𑀘𑀫𑁆𑀫𑀸𑀦𑀺 𑀯𑀝𑁆𑀝𑀦𑁆𑀢𑀺, 𑀅𑀜𑁆𑀜𑁂𑀲𑀁 𑀧𑀦 𑁋

𑀫𑀓𑁆𑀓𑀝𑁄 𑀓𑀸𑀴𑀲𑀻𑀳𑁄 𑀘, 𑀲𑀭𑀪𑁄 𑀓𑀤𑀮𑀻𑀫𑀺𑀕𑁄;

𑀬𑁂 𑀘 𑀯𑀸𑀴𑀫𑀺𑀕𑀸 𑀓𑁂𑀘𑀺, 𑀢𑁂𑀲𑀁 𑀘𑀫𑁆𑀫𑀁 𑀦 𑀯𑀝𑁆𑀝𑀢𑀻𑀢𑀺. (𑀫𑀳𑀸𑀯. 𑀅𑀝𑁆𑀞. 𑁨𑁫𑁯);

𑀢𑀢𑁆𑀣 𑀯𑀸𑀴𑀫𑀺𑀕𑀸𑀢𑀺 𑀲𑀻𑀳𑀩𑁆𑀬𑀕𑁆𑀖𑀅𑀘𑁆𑀙𑀢𑀭𑀘𑁆𑀙𑀸. 𑀦 𑀓𑁂𑀯𑀮𑀜𑁆𑀘 𑀏𑀢𑁂𑀬𑁂𑀯, 𑀬𑁂𑀲𑀁 𑀧𑀦 𑀘𑀫𑁆𑀫𑀁 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁, 𑀢𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀅𑀦𑁆𑀢𑀫𑀲𑁄 𑀕𑁄𑀫𑀳𑀺𑀁𑀲𑀲𑀲𑀩𑀺𑀴𑀸𑀭𑀸𑀤𑀬𑁄𑀧𑀺 𑀲𑀩𑁆𑀩𑁂 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 ‘‘𑀯𑀸𑀴𑀫𑀺𑀕𑀸’’𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁂𑀲𑀜𑁆𑀳𑀺 𑀲𑀩𑁆𑀩𑁂𑀲𑀁 𑀘𑀫𑁆𑀫𑀁 𑀦 𑀯𑀝𑁆𑀝𑀢𑀺. 𑀢𑀸𑀮𑀻𑀲𑀧𑀢𑁆𑀢𑀦𑁆𑀢𑀺 𑀲𑀼𑀤𑁆𑀥𑀁 𑀢𑀫𑀸𑀮𑀧𑀢𑁆𑀢𑀁, 𑀅𑀜𑁆𑀜𑁂𑀦 𑀫𑀺𑀲𑁆𑀲𑀁 𑀧𑀦 𑀯𑀝𑁆𑀝𑀢𑀺. 𑀢𑀺𑀡𑀯𑀸𑀓𑀘𑁄𑀴𑁂𑀲𑀼 𑀅𑀓𑀧𑁆𑀧𑀺𑀬𑀁 𑀦𑀸𑀫 𑀦𑀢𑁆𑀣𑀺. 𑀓𑀺𑀁 𑀧𑀦𑁂𑀢𑁆𑀣 𑀩𑀺𑀩𑁆𑀩𑁄𑀳𑀦𑁂 𑀯𑀺𑀬 𑀦𑀺𑀲𑀻𑀤𑀺𑀢𑀼𑀜𑁆𑀘 𑀦𑀺𑀧𑀚𑁆𑀚𑀺𑀢𑀼𑀜𑁆𑀘 𑀦 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀦 𑀓𑁂𑀯𑀮𑀜𑁆𑀘𑁂𑀤𑀫𑁂𑀯𑀸𑀢𑀺 𑀆𑀳 ‘‘𑀧𑀫𑀸𑀡𑀧𑀭𑀺𑀘𑁆𑀙𑁂𑀤𑁄𑀧𑀺 𑀘𑁂𑀢𑁆𑀣 𑀦𑀢𑁆𑀣𑀻’’𑀢𑀺, ‘‘𑀏𑀢𑁆𑀢𑀓𑀫𑁂𑀯 𑀓𑀸𑀢𑀩𑁆𑀩’’𑀦𑁆𑀢𑀺 𑀪𑀺𑀲𑀺𑀬𑀸 𑀧𑀫𑀸𑀡𑀦𑀺𑀬𑀫𑁄𑀧𑀺 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀫𑀜𑁆𑀘𑀪𑀺𑀲𑀺𑀧𑀻𑀞𑀪𑀺𑀲𑀺𑀪𑀽𑀫𑀢𑁆𑀣𑀭𑀡𑀪𑀺𑀲𑀺𑀘𑀗𑁆𑀓𑀫𑀦𑀪𑀺𑀲𑀺𑀧𑀸𑀤𑀧𑀼𑀜𑁆𑀙𑀦𑀪𑀺𑀲𑀻𑀢𑀺 𑀏𑀢𑀸𑀲𑀁 𑀧𑀦 𑀅𑀦𑀼𑀭𑀽𑀧𑀢𑁄 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀢𑁆𑀢𑀦𑁄 𑀭𑀼𑀘𑀺𑀯𑀲𑁂𑀦 𑀧𑀫𑀸𑀡𑀁 𑀓𑀸𑀢𑀩𑁆𑀩𑀁. 𑀅𑀦𑁆𑀢𑁄 𑀲𑀁𑀯𑁂𑀮𑁆𑀮𑀺𑀢𑁆𑀯𑀸 𑀩𑀤𑁆𑀥𑀦𑁆𑀢𑀺 𑀬𑀣𑀸 𑀯𑁂𑀫𑀚𑁆𑀛𑀁 𑀲𑀁𑀔𑀺𑀢𑁆𑀢𑀁 𑀳𑁄𑀢𑀺, 𑀏𑀯𑀁 𑀫𑀚𑁆𑀛𑁂 𑀲𑀼𑀝𑁆𑀞𑀼 𑀯𑁂𑀞𑁂𑀢𑁆𑀯𑀸 𑀩𑀤𑁆𑀥𑀁.

𑀬𑁂 𑀅𑀝𑁆𑀞 𑀫𑀸𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀯𑀲𑁆𑀲𑀺𑀓𑀲𑀗𑁆𑀓𑁂𑀢𑀸’’𑀢𑀺 𑀏𑀢𑀲𑁆𑀲𑁂𑀯 𑀯𑀺𑀯𑀭𑀡𑀁 ‘‘𑀯𑀲𑁆𑀲𑀸𑀦𑀫𑀸𑀲𑀸𑀢𑀺 𑀏𑀯𑀁 𑀅𑀧𑀜𑁆𑀜𑀸𑀢𑀸’’𑀢𑀺, 𑀅𑀧𑁆𑀧𑀢𑀺𑀢𑀸 𑀅𑀧𑁆𑀧𑀲𑀺𑀤𑁆𑀥𑀸𑀢𑀺 𑀅𑀢𑁆𑀣𑁄. ‘‘𑀅𑀲𑀜𑁆𑀜𑀺𑀢𑀸’’𑀢𑀺𑀧𑀺 𑀧𑀸𑀞𑁄, 𑀢𑀢𑁆𑀣 𑀅𑀯𑀺𑀜𑁆𑀜𑀸𑀢𑀸𑀢𑀺 𑀅𑀢𑁆𑀣𑁄. 𑀅𑀝𑁆𑀞 𑀫𑀸𑀲𑀸𑀢𑀺 𑀘𑀢𑁆𑀢𑀸𑀭𑁄 𑀳𑁂𑀫𑀦𑁆𑀢𑀺𑀓𑀸, 𑀘𑀢𑁆𑀢𑀸𑀭𑁄 𑀕𑀺𑀫𑁆𑀳𑀺𑀓𑀸 𑀫𑀸𑀲𑀸𑀢𑀺 𑀅𑀝𑁆𑀞 𑀫𑀸𑀲𑀸. 𑀑𑀯𑀲𑁆𑀲𑀓𑀫𑀡𑁆𑀟𑀧𑁂𑀢𑀺 𑀲𑀸𑀔𑀸𑀫𑀡𑁆𑀟𑀧𑀧𑀤𑀭𑀫𑀡𑁆𑀟𑀧𑀸𑀦𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀑𑀯𑀲𑁆𑀲𑀓𑁂 𑀫𑀡𑁆𑀟𑀧𑁂. 𑀬𑀢𑁆𑀣𑀸𑀢𑀺 𑀬𑁂𑀲𑀼 𑀚𑀦𑀧𑀤𑁂𑀲𑀼. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀚𑀦𑀧𑀤𑁂𑀲𑀼. 𑀓𑀸𑀓𑀸𑀤𑀻𑀦𑀁 𑀦𑀺𑀩𑀤𑁆𑀥𑀯𑀸𑀲𑀭𑀼𑀓𑁆𑀔𑀫𑀽𑀮𑁂𑀢𑀺 𑀬𑀢𑁆𑀣 𑀥𑀼𑀯𑀦𑀺𑀯𑀸𑀲𑁂𑀦 𑀓𑀸𑀓𑀸 𑀯𑀸 𑀓𑀼𑀮𑀸𑀮𑀸 𑀯𑀸 𑀅𑀜𑁆𑀜𑁂 𑀯𑀸 𑀲𑀓𑀼𑀦𑁆𑀢𑀸 𑀓𑀼𑀮𑀸𑀯𑀓𑁂 𑀓𑀢𑁆𑀯𑀸 𑀯𑀲𑀦𑁆𑀢𑀺, 𑀢𑀸𑀤𑀺𑀲𑀲𑁆𑀲 𑀓𑀸𑀓𑀸𑀤𑀻𑀦𑀁 𑀦𑀺𑀩𑀤𑁆𑀥𑀯𑀸𑀲𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀭𑀼𑀓𑁆𑀔𑀲𑁆𑀲 𑀳𑁂𑀝𑁆𑀞𑀸. 𑀬𑀢𑁆𑀣 𑀧𑀦 𑀕𑁄𑀘𑀭𑀧𑁆𑀧𑀲𑀼𑀢𑀸 𑀲𑀓𑀼𑀦𑁆𑀢𑀸 𑀯𑀺𑀲𑁆𑀲𑀫𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀫𑀽𑀮𑁂 𑀦𑀺𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀺. ‘‘𑀓𑀤𑀸𑀘𑀺𑀧𑀻’’𑀢𑀺 𑀇𑀫𑀺𑀦𑀸 𑀦 𑀓𑁂𑀯𑀮𑀁 𑀯𑀲𑁆𑀲𑀺𑀓𑀲𑀗𑁆𑀓𑁂𑀢𑁂𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀧𑀤𑁂𑀲𑁂. 𑀬𑀤𑀸𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂.

𑀲𑁄𑀢𑀺 𑀬𑀲𑁆𑀲𑀢𑁆𑀣𑀸𑀬 𑀲𑀦𑁆𑀣𑀢𑁄, 𑀲𑁄. 𑀧𑀓𑀢𑀺𑀲𑀦𑁆𑀣𑀢𑁂𑀢𑀺 𑀧𑀓𑀢𑀺𑀬𑀸𑀯 𑀲𑀦𑁆𑀣𑀢𑁂, 𑀬𑀁 𑀦𑁂𑀯𑀢𑁆𑀢𑀦𑀸 𑀲𑀦𑁆𑀣𑀢𑀁, 𑀦 𑀧𑀭𑁂𑀦 𑀲𑀦𑁆𑀣𑀭𑀸𑀧𑀺𑀢𑀁, 𑀢𑀲𑁆𑀫𑀺𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀮𑀚𑁆𑀚𑀻 𑀳𑁄𑀢𑀻𑀢𑀺 𑀮𑀚𑁆𑀚𑀦𑀲𑀻𑀮𑁄 𑀳𑁄𑀢𑀺, 𑀧𑀭𑀺𑀓𑁆𑀔𑀸𑀭𑀯𑀺𑀦𑀸𑀲𑀦𑁂 𑀪𑀻𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑁄 𑀧𑀮𑀺𑀩𑁄𑀥𑀁 𑀯𑀺𑀬 𑀫𑀜𑁆𑀜𑀢𑀻’’𑀢𑀺, 𑀇𑀫𑀺𑀦𑀸 𑀅𑀮𑀚𑁆𑀚𑀺𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀦𑀺𑀭𑀧𑁂𑀓𑁆𑀔𑁄𑀢𑀺 ‘‘𑀆𑀕𑀦𑁆𑀢𑁆𑀯𑀸 𑀉𑀤𑁆𑀥𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀧𑁂𑀓𑁆𑀔𑀸𑀭𑀳𑀺𑀢𑁄, 𑀇𑀫𑀺𑀦𑀸 𑀲𑀸𑀧𑁂𑀓𑁆𑀔𑁄 𑀘𑁂 𑀕𑀘𑁆𑀙𑀢𑀺, 𑀅𑀦𑀸𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯 𑀳𑀺 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 ‘‘𑀑𑀢𑀸𑀧𑁂𑀦𑁆𑀢𑁄 𑀕𑀘𑁆𑀙𑀢𑀻’’𑀢𑀺 (𑀧𑀸𑀘𑀺. 𑁧𑁧𑁩) 𑀯𑀼𑀢𑁆𑀢𑀁. 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑁄𑀢𑀺 𑀢𑀁 𑀫𑀕𑁆𑀕𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑁄. 𑀮𑁂𑀟𑁆𑀟𑀼𑀧𑀸𑀢𑀽𑀧𑀘𑀸𑀭𑀢𑁄 𑀩𑀳𑀺 𑀞𑀺𑀢𑀢𑁆𑀢𑀸 ‘‘𑀧𑀸𑀤𑀼𑀤𑁆𑀥𑀸𑀭𑁂𑀦 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁, 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑀲𑁆𑀲 𑀧𑀞𑀫𑀧𑀸𑀤𑀼𑀤𑁆𑀥𑀸𑀭𑁂 𑀤𑀼𑀓𑁆𑀓𑀝𑀁, 𑀤𑀼𑀢𑀺𑀬𑀧𑀸𑀤𑀼𑀤𑁆𑀥𑀸𑀭𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀢𑁆𑀣𑁄.

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀲𑀗𑁆𑀖𑀺𑀓𑁂 𑀲𑀗𑁆𑀖𑀺𑀓𑀲𑀜𑁆𑀜𑀺𑀯𑁂𑀫𑀢𑀺𑀓𑀧𑀼𑀕𑁆𑀕𑀮𑀺𑀓𑀲𑀜𑁆𑀜𑀻𑀦𑀁 𑀯𑀲𑁂𑀦. 𑀇𑀫𑀺𑀦𑀸𑀯 𑀦𑀬𑁂𑀦 𑀢𑀺𑀓𑀤𑀼𑀓𑁆𑀓𑀝𑀫𑁆𑀧𑀺 𑀯𑁂𑀤𑀺𑀢𑀩𑁆𑀩𑀁. 𑀘𑀺𑀫𑀺𑀮𑀺𑀓𑀸𑀤𑀻𑀦𑀁 𑀅𑀢𑁆𑀣𑁄 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑁂 𑀤𑀲𑁆𑀲𑀺𑀢𑁄𑀯. 𑀧𑀸𑀤𑀧𑀼𑀜𑁆𑀙𑀦𑀻 (𑀧𑀸𑀘𑀺. 𑀅𑀝𑁆𑀞. 𑁧𑁧𑁨) 𑀦𑀸𑀫 𑀭𑀚𑁆𑀚𑀼𑀓𑁂𑀳𑀺 𑀯𑀸 𑀧𑀺𑀮𑁄𑀢𑀺𑀓𑀸𑀳𑀺 𑀯𑀸 𑀧𑀸𑀤𑀧𑀼𑀜𑁆𑀙𑀦𑀢𑁆𑀣𑀁 𑀓𑀢𑀸. 𑀨𑀮𑀓𑀧𑀻𑀞𑀁 𑀦𑀸𑀫 𑀨𑀮𑀓𑀫𑀬𑀁 𑀧𑀻𑀞𑀁. 𑀦 𑀓𑁂𑀯𑀮𑀁 𑀘𑀺𑀫𑀺𑀮𑀺𑀓𑀸𑀤𑀻𑀦𑀺𑀬𑁂𑀯 𑀅𑀚𑁆𑀛𑁄𑀓𑀸𑀲𑁂 𑀞𑀧𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀆𑀳 ‘‘𑀬𑀁 𑀯𑀸 𑀧𑀦𑀸’’𑀢𑀺𑀆𑀤𑀺. 𑀬𑀁 𑀓𑀺𑀜𑁆𑀘𑀺 𑀤𑀸𑀭𑀼𑀪𑀡𑁆𑀟𑀁, 𑀬𑀁 𑀓𑀺𑀜𑁆𑀘𑀺 𑀫𑀢𑁆𑀢𑀺𑀓𑀸𑀪𑀡𑁆𑀟𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀦𑁆𑀢𑀫𑀲𑁄 𑀧𑀢𑁆𑀢𑀸𑀥𑀸𑀭𑀓𑀫𑁆𑀧𑀻’’𑀢𑀺 𑀇𑀫𑀺𑀦𑀸 𑀢𑀸𑀮𑀯𑀡𑁆𑀝𑀩𑀻𑀚𑀦𑀺𑀧𑀢𑁆𑀢𑀧𑀸𑀦𑀻𑀬𑀉𑀴𑀉𑀗𑁆𑀓𑀧𑀸𑀦𑀻𑀬𑀲𑀗𑁆𑀔𑀸𑀤𑀻𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺.

𑀅𑀭𑀜𑁆𑀜𑁂 (𑀧𑀸𑀘𑀺. 𑀅𑀝𑁆𑀞. 𑁧𑁧𑁦) 𑀧𑀡𑁆𑀡𑀓𑀼𑀝𑀻𑀲𑀼 𑀯𑀲𑀦𑁆𑀢𑀸𑀦𑀁 𑀲𑀻𑀮𑀲𑀫𑁆𑀧𑀤𑀸𑀬 𑀧𑀲𑀦𑁆𑀦𑀘𑀺𑀢𑁆𑀢𑀸 𑀫𑀦𑀼𑀲𑁆𑀲𑀸 𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀤𑁂𑀦𑁆𑀢𑀺 ‘‘𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺, 𑀢𑀢𑁆𑀣 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀆𑀭𑀜𑁆𑀜𑀓𑁂𑀦 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀲𑀢𑀺 𑀅𑀦𑁄𑀯𑀲𑁆𑀲𑀓𑁂𑀢𑀺 𑀧𑀩𑁆𑀪𑀸𑀭𑀸𑀤𑀺𑀅𑀦𑁄𑀯𑀲𑁆𑀲𑀓𑀝𑁆𑀞𑀸𑀦𑁂 𑀅𑀲𑀢𑀺. 𑀇𑀤𑀜𑁆𑀘 𑀮𑀓𑁆𑀔𑀡𑀯𑀘𑀦𑀁 ‘‘𑀲𑀪𑀸𑀕𑀸𑀦𑀁 𑀅𑀪𑀸𑀯𑁂’’𑀢𑀺 𑀘 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸. 𑀆𑀭𑀜𑁆𑀜𑀓𑁂𑀦 𑀳𑀺 𑀪𑀺𑀓𑁆𑀔𑀼𑀦𑀸 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑁂𑀦 𑀲𑀸𑀫𑀦𑁆𑀢𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀦𑀁 𑀧𑁂𑀲𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀲𑀪𑀸𑀕𑀸𑀦𑀁 𑀅𑀪𑀸𑀯𑁂 𑀅𑀦𑁄𑀯𑀲𑁆𑀲𑀓𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀅𑀦𑁄𑀯𑀲𑁆𑀲𑀓𑁂 𑀅𑀲𑀢𑀺 𑀭𑀼𑀓𑁆𑀔𑁂 𑀮𑀕𑁆𑀕𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁.

𑀦 𑀓𑁂𑀯𑀮𑀁 𑀇𑀤𑀁𑀬𑁂𑀯 𑀓𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀬𑀣𑀸 𑀯𑀸’’𑀢𑀺𑀆𑀤𑀺. 𑀬𑀣𑀸 𑀯𑀸 𑀉𑀧𑀘𑀺𑀓𑀸𑀳𑀺 𑀦 𑀔𑀚𑁆𑀚𑀢𑀻𑀢𑀺 𑀬𑀣𑀸 𑀞𑀧𑀺𑀢𑁂 𑀉𑀧𑀘𑀺𑀓𑀸𑀳𑀺 𑀲𑁂𑀦𑀸𑀲𑀦𑀁 𑀦 𑀔𑀚𑁆𑀚𑀢𑀺, 𑀏𑀯𑀁 𑀢𑀣𑀸 𑀧𑀸𑀲𑀸𑀡𑀸𑀦𑀁 𑀉𑀧𑀭𑀺 𑀞𑀧𑀦𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀘𑀢𑀽𑀲𑀼 (𑀧𑀸𑀘𑀺. 𑀅𑀝𑁆𑀞. 𑁧𑁧𑁬) 𑀧𑀸𑀲𑀸𑀡𑁂𑀲𑀼 𑀫𑀜𑁆𑀘𑀁 𑀞𑀧𑁂𑀢𑁆𑀯𑀸 𑀫𑀜𑁆𑀘𑁂 𑀅𑀯𑀲𑁂𑀲𑀫𑀜𑁆𑀘𑀧𑀻𑀞𑀸𑀦𑀺 𑀆𑀭𑁄𑀧𑁂𑀢𑁆𑀯𑀸 𑀉𑀧𑀭𑀺 𑀪𑀺𑀲𑀺𑀆𑀤𑀺𑀓𑀁 𑀭𑀸𑀲𑀺𑀁 𑀓𑀢𑁆𑀯𑀸 𑀤𑀸𑀭𑀼𑀪𑀡𑁆𑀟𑀁 𑀫𑀢𑁆𑀢𑀺𑀓𑀸𑀪𑀡𑁆𑀟𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀕𑀫𑀺𑀓𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀦𑁆𑀢𑀺.

𑀅𑀩𑁆𑀪𑁄𑀓𑀸𑀲𑀺𑀓𑁂𑀦𑀸𑀧𑀺 ‘‘𑀅𑀳𑀁 𑀉𑀓𑁆𑀓𑀝𑁆𑀞𑀅𑀩𑁆𑀪𑁄𑀓𑀸𑀲𑀺𑀓𑁄’’𑀢𑀺 𑀘𑀻𑀯𑀭𑀓𑀼𑀝𑀺𑀫𑁆𑀧𑀺 𑀅𑀓𑀢𑁆𑀯𑀸 𑀅𑀲𑀫𑀬𑁂 𑀅𑀚𑁆𑀛𑁄𑀓𑀸𑀲𑁂 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁 𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀯𑀸 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀩𑁆𑀪𑁄𑀓𑀸𑀲𑀺𑀓𑁂𑀦𑀸’’𑀢𑀺𑀆𑀤𑀺. 𑀲𑀘𑁂 𑀧𑀦 𑀘𑀢𑀼𑀕𑁆𑀕𑀼𑀡𑁂𑀦𑀧𑀺 𑀘𑀻𑀯𑀭𑁂𑀦 𑀓𑀢𑀓𑀼𑀝𑀺 𑀅𑀢𑁂𑀫𑁂𑀦𑁆𑀢𑀁 𑀭𑀓𑁆𑀔𑀺𑀢𑀼𑀁 𑀦𑁂𑀯 𑀲𑀓𑁆𑀓𑁄𑀢𑀺, 𑀲𑀢𑁆𑀢𑀸𑀳𑀯𑀤𑁆𑀤𑀮𑀺𑀓𑀸𑀤𑀻𑀦𑀺 𑀪𑀯𑀦𑁆𑀢𑀺, 𑀪𑀺𑀓𑁆𑀔𑀼𑀦𑁄 𑀓𑀸𑀬𑀸𑀦𑀼𑀕𑀢𑀺𑀓𑀢𑁆𑀢𑀸 𑀯𑀝𑁆𑀝𑀢𑀺. 𑀭𑀼𑀓𑁆𑀔𑀫𑀽𑀮𑀺𑀓𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄.

𑀬𑀲𑁆𑀫𑀺𑀁 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁄 𑀭𑀼𑀳𑀢𑀺, 𑀢𑀲𑁆𑀲 𑀲𑀦𑁆𑀢𑀓𑀁 𑀅𑀢𑁆𑀢𑀦𑁄 𑀧𑀼𑀕𑁆𑀕𑀮𑀺𑀓𑀫𑀺𑀯 𑀳𑁄𑀢𑀻𑀢𑀺 𑀆𑀳 ‘‘𑀯𑀺𑀲𑁆𑀲𑀸𑀲𑀺𑀓𑀧𑀼𑀕𑁆𑀕𑀮𑀺𑀓𑁂’’𑀢𑀺. 𑀬𑀲𑁆𑀫𑀺𑀁 𑀧𑀦 𑀯𑀺𑀲𑁆𑀲𑀸𑀲𑁄 𑀦 𑀭𑀼𑀳𑀢𑀺, 𑀢𑀲𑁆𑀲 𑀲𑀦𑁆𑀢𑀓𑁂 𑀤𑀼𑀓𑁆𑀓𑀝𑀫𑁂𑀯. 𑀅𑀫𑀦𑀼𑀲𑁆𑀲𑁄𑀢𑀺 𑀬𑀓𑁆𑀔𑁄 𑀯𑀸 𑀧𑁂𑀢𑁄 𑀯𑀸. 𑀧𑀮𑀺𑀩𑀼𑀤𑁆𑀥𑀁 𑀳𑁄𑀢𑀻𑀢𑀺 𑀉𑀧𑀤𑁆𑀤𑀼𑀢𑀁 𑀳𑁄𑀢𑀺.

𑀧𑀞𑀫𑀲𑁂𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀤𑀼𑀢𑀺𑀬𑀲𑁂𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀬𑀁 𑀓𑀺𑀜𑁆𑀘𑀺 𑀘𑀫𑁆𑀫𑀦𑁆𑀢𑀺 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀬𑀁 𑀓𑀺𑀜𑁆𑀘𑀺 𑀘𑀫𑁆𑀫𑀁. 𑀦𑀦𑀼 ‘‘𑀦, 𑀪𑀺𑀓𑁆𑀔𑀯𑁂, 𑀫𑀳𑀸𑀘𑀫𑁆𑀫𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺 𑀲𑀻𑀳𑀘𑀫𑁆𑀫𑀁 𑀩𑁆𑀬𑀕𑁆𑀖𑀘𑀫𑁆𑀫𑀁 𑀤𑀻𑀧𑀺𑀘𑀫𑁆𑀫𑀁, 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁨𑁫𑁫) 𑀔𑀦𑁆𑀥𑀓𑁂 𑀲𑀻𑀳𑀘𑀫𑁆𑀫𑀸𑀤𑀻𑀦𑀁 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄𑀢𑀺 𑀆𑀳 ‘‘𑀲𑀻𑀳𑀘𑀫𑁆𑀫𑀸𑀤𑀻𑀦𑀜𑁆𑀳𑀻’’𑀢𑀺𑀆𑀤𑀺. 𑀧𑀭𑀺𑀳𑀭𑀡𑁂𑀬𑁂𑀯 𑀧𑀝𑀺𑀓𑁆𑀔𑁂𑀧𑁄𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀢𑁆𑀯𑀸 𑀢𑀁 𑀢𑀁 𑀯𑀺𑀳𑀸𑀭𑀁 𑀳𑀭𑀺𑀢𑁆𑀯𑀸 𑀫𑀜𑁆𑀘𑀧𑀻𑀞𑀸𑀤𑀻𑀲𑀼 𑀅𑀢𑁆𑀣𑀭𑀺𑀢𑁆𑀯𑀸 𑀧𑀭𑀺𑀪𑁄𑀕𑁂𑀬𑁂𑀯 𑀧𑀝𑀺𑀓𑁆𑀔𑁂𑀧𑁄, 𑀲𑁂𑀦𑀸𑀲𑀦𑀲𑀦𑁆𑀢𑀓𑀁 𑀓𑀢𑁆𑀯𑀸 𑀪𑀽𑀫𑀢𑁆𑀣𑀭𑀡𑀯𑀲𑁂𑀦 𑀧𑀦 𑀧𑀭𑀺𑀪𑁄𑀕𑁂 𑀦𑁂𑀯𑀢𑁆𑀣𑀺 𑀤𑁄𑀲𑁄. 𑀢𑁂𑀦𑀸𑀳 ‘‘𑀲𑁂𑀦𑀸𑀲𑀦𑀧𑀭𑀺𑀪𑁄𑀕𑁂 𑀧𑀦 𑀅𑀓𑀧𑁆𑀧𑀺𑀬𑀘𑀫𑁆𑀫𑀁 𑀦𑀸𑀫 𑀦𑀢𑁆𑀣𑀻’’𑀢𑀺. 𑀧𑀸𑀯𑀸𑀭𑁂𑀦𑁆𑀢𑀺 𑀲𑀜𑁆𑀙𑀸𑀤𑁂𑀦𑁆𑀢𑀺 𑀲𑀭𑀻𑀭𑀁 𑀏𑀢𑁂𑀦𑀸𑀢𑀺 𑀧𑀸𑀯𑀸𑀭𑁄. 𑀓𑁄𑀚𑀯𑁄𑀢𑀺 𑀉𑀤𑁆𑀤𑀮𑁄𑀫𑀺𑀏𑀓𑀦𑁆𑀢𑀮𑁄𑀫𑀺𑀆𑀤𑀺𑀓𑁄𑀚𑀯𑀢𑁆𑀣𑀭𑀡𑀁. 𑀲𑁂𑀲𑀦𑁆𑀢𑀺 𑀪𑀺𑀲𑀺 𑀦𑀺𑀲𑀻𑀤𑀦𑀁 𑀢𑀺𑀡𑀲𑀦𑁆𑀣𑀸𑀭𑁄 𑀧𑀡𑁆𑀡𑀲𑀦𑁆𑀣𑀸𑀭𑁄𑀢𑀺 𑀅𑀯𑀲𑀺𑀝𑁆𑀞𑀁 𑀲𑁂𑀦𑀸𑀲𑀦𑀁. 𑀢𑀢𑁆𑀣 𑀪𑀺𑀲𑀻𑀢𑀺 𑀫𑀜𑁆𑀘𑀓𑀪𑀺𑀲𑀺 𑀯𑀸 𑀧𑀻𑀞𑀓𑀪𑀺𑀲𑀺 𑀯𑀸. 𑀦𑀺𑀲𑀻𑀤𑀦𑀦𑁆𑀢𑀺 𑀲𑀤𑀲𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀺𑀡𑀲𑀦𑁆𑀣𑀸𑀭𑁄𑀢𑀺 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀢𑀺𑀡𑀸𑀦𑀁 𑀲𑀦𑁆𑀣𑀸𑀭𑁄. 𑀏𑀲 𑀦𑀬𑁄 𑀧𑀡𑁆𑀡𑀲𑀦𑁆𑀣𑀸𑀭𑁂. 𑀏𑀢𑁆𑀣 𑀘 𑀪𑀺𑀲𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀢𑀸 𑀧𑀸𑀓𑀝𑀸. 𑀦𑀺𑀲𑀻𑀤𑀦𑀁 𑀦𑀺𑀲𑀻𑀤𑀦𑀲𑀺𑀓𑁆𑀔𑀸𑀧𑀤𑁂𑀦𑁂𑀯 (𑀧𑀸𑀘𑀺. 𑁫𑁩𑁧 𑀆𑀤𑀬𑁄) 𑀧𑀸𑀓𑀝𑀁. 𑀢𑀺𑀡𑀲𑀦𑁆𑀣𑀸𑀭𑀧𑀡𑁆𑀡𑀲𑀦𑁆𑀣𑀸𑀭𑀸𑀦𑀺 𑀧𑀦 𑀮𑁄𑀓𑀧𑀲𑀺𑀤𑁆𑀥𑀸𑀦𑀺𑀬𑁂𑀯. 𑀢𑁂𑀦𑁂𑀯𑀸𑀳 ‘‘𑀧𑀸𑀓𑀝𑀫𑁂𑀯𑀸’’𑀢𑀺.

𑀦𑁂𑀯 𑀉𑀤𑁆𑀥𑀭𑁂𑀬𑁆𑀬, 𑀦 𑀉𑀤𑁆𑀥𑀭𑀸𑀧𑁂𑀬𑁆𑀬𑀸𑀢𑀺 𑀅𑀢𑁆𑀢𑀦𑀸 𑀯𑀸 𑀉𑀤𑁆𑀥𑀭𑀺𑀢𑁆𑀯𑀸 𑀧𑀢𑀺𑀭𑀽𑀧𑁂 𑀞𑀸𑀦𑁂 𑀦 𑀞𑀧𑁂𑀬𑁆𑀬, 𑀧𑀭𑁂𑀦 𑀯𑀸 𑀢𑀣𑀸 𑀦 𑀓𑀸𑀭𑁂𑀬𑁆𑀬. 𑀢𑁂𑀦𑀸𑀳 ‘‘𑀬𑀣𑀸 𑀞𑀧𑀺𑀢’’𑀦𑁆𑀢𑀺𑀆𑀤𑀺. 𑀢𑀁 𑀞𑀧𑁂𑀦𑁆𑀢𑁂𑀦 𑀘 ‘‘𑀘𑀢𑀽𑀲𑀼 𑀧𑀸𑀲𑀸𑀡𑁂𑀲𑀽’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑀅𑀝𑁆𑀞. 𑁧𑁧𑁬) 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀦𑁆𑀢𑁄𑀕𑁂𑀳𑁂 𑀅𑀦𑁄𑀯𑀲𑁆𑀲𑀓𑁂 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀲𑀘𑁂 𑀧𑀦 𑀲𑁂𑀦𑀸𑀲𑀦𑀁 𑀑𑀯𑀲𑁆𑀲𑀢𑀺, 𑀙𑀤𑀦𑀢𑁆𑀣𑀜𑁆𑀘 𑀢𑀺𑀡𑀁 𑀯𑀸 𑀇𑀝𑁆𑀞𑀓𑀸 𑀯𑀸 𑀆𑀦𑀻𑀢𑀸 𑀳𑁄𑀦𑁆𑀢𑀺. 𑀲𑀘𑁂 𑀉𑀲𑁆𑀲𑀳𑀢𑀺, 𑀙𑀸𑀤𑁂𑀢𑀩𑁆𑀩𑀁. 𑀦𑁄 𑀘𑁂 𑀲𑀓𑁆𑀓𑁄𑀢𑀺, 𑀬𑁄 𑀑𑀓𑀸𑀲𑁄 𑀅𑀦𑁄𑀯𑀲𑁆𑀲𑀓𑁄, 𑀢𑀢𑁆𑀣 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀲𑀘𑁂 𑀲𑀩𑁆𑀩𑀫𑁆𑀧𑀺 𑀑𑀯𑀲𑁆𑀲𑀢𑀺, 𑀉𑀲𑁆𑀲𑀳𑀦𑁆𑀢𑁂𑀦 𑀅𑀦𑁆𑀢𑁄𑀕𑀸𑀫𑁂 𑀉𑀧𑀸𑀲𑀓𑀸𑀦𑀁 𑀖𑀭𑁂 𑀞𑀧𑁂𑀢𑀩𑁆𑀩𑀁. 𑀲𑀘𑁂 𑀢𑁂𑀧𑀺 ‘‘𑀲𑀗𑁆𑀖𑀺𑀓𑀁 𑀦𑀸𑀫, 𑀪𑀦𑁆𑀢𑁂, 𑀪𑀸𑀭𑀺𑀬𑀁, 𑀅𑀕𑁆𑀕𑀺𑀤𑀸𑀳𑀸𑀤𑀻𑀦𑀁 𑀪𑀸𑀬𑀸𑀫𑀸’’𑀢𑀺 𑀦 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺, 𑀅𑀚𑁆𑀛𑁄𑀓𑀸𑀲𑁂 𑀧𑀸𑀲𑀸𑀡𑀸𑀦𑀁 𑀉𑀧𑀭𑀺 𑀫𑀜𑁆𑀘𑀁 𑀞𑀧𑁂𑀢𑁆𑀯𑀸 𑀲𑁂𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀡𑁂𑀳𑀺 𑀘 𑀧𑀡𑁆𑀡𑁂𑀳𑀺 𑀘 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀁. 𑀬𑀜𑁆𑀳𑀺 𑀢𑀢𑁆𑀣 𑀅𑀗𑁆𑀕𑀫𑀢𑁆𑀢𑀫𑁆𑀧𑀺 𑀅𑀯𑀲𑀺𑀲𑁆𑀲𑀢𑀺, 𑀢𑀁 𑀅𑀜𑁆𑀜𑁂𑀲𑀁 𑀢𑀢𑁆𑀣 𑀆𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀉𑀧𑀓𑀸𑀭𑀁 𑀪𑀯𑀺𑀲𑁆𑀲𑀢𑀻𑀢𑀺. 𑀉𑀧𑀘𑀸𑀭𑀦𑁆𑀢𑀺 𑀲𑀩𑁆𑀩𑀧𑀘𑁆𑀙𑀺𑀫𑀲𑁂𑀦𑀸𑀲𑀦𑀢𑁄 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑀸.

𑀅𑀬𑀫𑁂𑀢𑁆𑀣 𑀆𑀧𑀼𑀘𑁆𑀙𑀺𑀢𑀩𑁆𑀩𑀸𑀦𑀸𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀦𑀺𑀘𑁆𑀙𑀬𑁄 𑁋 (𑀧𑀸𑀘𑀺. 𑀅𑀝𑁆𑀞. 𑁧𑁧𑁮) 𑀬𑀸 𑀢𑀸𑀯 𑀪𑀽𑀫𑀺𑀬𑀁 𑀤𑀻𑀖𑀲𑀸𑀮𑀸 𑀯𑀸 𑀧𑀡𑁆𑀡𑀲𑀸𑀮𑀸 𑀯𑀸 𑀳𑁄𑀢𑀺, 𑀬𑀁 𑀯𑀸 𑀭𑀼𑀓𑁆𑀔𑀢𑁆𑀣𑀫𑁆𑀪𑁂𑀲𑀼 𑀓𑀢𑀕𑁂𑀳𑀁 𑀉𑀧𑀘𑀺𑀓𑀸𑀦𑀁 𑀉𑀝𑁆𑀞𑀸𑀦𑀝𑁆𑀞𑀸𑀦𑀁 𑀳𑁄𑀢𑀺, 𑀢𑀢𑁄 𑀧𑀓𑁆𑀓𑀫𑀦𑁆𑀢𑁂𑀦 𑀆𑀧𑀼𑀘𑁆𑀙𑀺𑀢𑁆𑀯𑀸𑀯 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀢𑀲𑁆𑀫𑀺𑀜𑁆𑀳𑀺 𑀓𑀢𑀺𑀧𑀬𑀸𑀦𑀺 𑀤𑀺𑀯𑀲𑀸𑀦𑀺 𑀅𑀚𑀕𑁆𑀕𑀺𑀬𑀫𑀸𑀦𑁂 𑀯𑀫𑁆𑀫𑀺𑀓𑀸𑀯 𑀲𑀦𑁆𑀢𑀺𑀝𑁆𑀞𑀦𑁆𑀢𑀺. 𑀬𑀁 𑀧𑀦 𑀧𑀸𑀲𑀸𑀡𑀧𑀺𑀝𑁆𑀞𑀺𑀬𑀁 𑀯𑀸 𑀧𑀸𑀲𑀸𑀡𑀢𑁆𑀣𑀫𑁆𑀪𑁂𑀲𑀼 𑀯𑀸 𑀓𑀢𑀲𑁂𑀦𑀸𑀲𑀦𑀁 𑀲𑀺𑀮𑀼𑀘𑁆𑀘𑀬𑀮𑁂𑀡𑀁 𑀯𑀸 𑀲𑀼𑀥𑀸𑀮𑀺𑀢𑁆𑀢𑀲𑁂𑀦𑀸𑀲𑀦𑀁 𑀯𑀸, 𑀬𑀢𑁆𑀣 𑀉𑀧𑀘𑀺𑀓𑀸𑀲𑀗𑁆𑀓𑀸 𑀦𑀢𑁆𑀣𑀺, 𑀢𑀢𑁄 𑀧𑀓𑁆𑀓𑀫𑀦𑁆𑀢𑀲𑁆𑀲 𑀆𑀧𑀼𑀘𑁆𑀙𑀺𑀢𑁆𑀯𑀸𑀧𑀺 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸𑀧𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀦𑀸𑀳 ‘‘𑀬𑀢𑁆𑀣 𑀧𑀦𑀸’’𑀢𑀺𑀆𑀤𑀺. 𑀲𑀘𑁂 𑀢𑀸𑀤𑀺𑀲𑁂𑀧𑀺 𑀲𑁂𑀦𑀸𑀲𑀦𑁂 𑀏𑀓𑁂𑀦 𑀧𑀲𑁆𑀲𑁂𑀦 𑀉𑀧𑀘𑀺𑀓𑀸 𑀆𑀭𑁄𑀳𑀦𑁆𑀢𑀺, 𑀆𑀧𑀼𑀘𑁆𑀙𑀺𑀢𑁆𑀯𑀸𑀯 𑀕𑀦𑁆𑀢𑀩𑁆𑀩𑀁. 𑀆𑀧𑀼𑀘𑁆𑀙𑀦𑀁 𑀧𑀦 𑀯𑀢𑁆𑀢𑀦𑁆𑀢𑀺 𑀆𑀧𑀼𑀘𑁆𑀙𑀦𑀁 𑀕𑀫𑀺𑀓𑀯𑀢𑁆𑀢𑀁. 𑀇𑀤𑀜𑁆𑀘 𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀧𑀦 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁧𑁧𑁮) 𑀤𑀲𑁆𑀲𑀦𑀢𑁆𑀣𑀁. 𑀓𑁂𑀘𑀺 𑀧𑀦 ‘‘𑀤𑀼𑀓𑁆𑀓𑀝𑀦𑁆𑀢𑀺 𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀚𑁆𑀚𑀢𑀺 𑀯𑀢𑁆𑀢𑀓𑁆𑀔𑀦𑁆𑀥𑀓𑀝𑁆𑀞𑀓𑀣𑀸𑀬 ‘‘𑀬𑀁 𑀧𑀸𑀲𑀸𑀡𑀧𑀺𑀝𑁆𑀞𑀺𑀬𑀁 𑀯𑀸 𑀧𑀸𑀲𑀸𑀡𑀢𑁆𑀣𑀫𑁆𑀪𑁂𑀲𑀼 𑀯𑀸 𑀓𑀢𑀲𑁂𑀦𑀸𑀲𑀦𑀁, 𑀬𑀢𑁆𑀣 𑀉𑀧𑀘𑀺𑀓𑀸𑀦𑀸𑀭𑁄𑀳𑀦𑁆𑀢𑀺, 𑀢𑀁 𑀅𑀦𑀸𑀧𑀼𑀘𑁆𑀙𑀦𑁆𑀢𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁬𑁦) 𑀯𑀼𑀢𑁆𑀢𑀢𑁆𑀢𑀸. 𑀆𑀧𑀼𑀘𑁆𑀙𑀦𑁆𑀢𑁂𑀦 𑀧𑀦 𑀪𑀺𑀓𑁆𑀔𑀼𑀫𑁆𑀳𑀺 (𑀧𑀸𑀘𑀺. 𑀅𑀝𑁆𑀞. 𑁧𑁧𑁬) 𑀲𑀢𑀺 𑀪𑀺𑀓𑁆𑀔𑀼 𑀆𑀧𑀼𑀘𑁆𑀙𑀺𑀢𑀩𑁆𑀩𑁄, 𑀢𑀲𑁆𑀫𑀺𑀁 𑀅𑀲𑀢𑀺 𑀲𑀸𑀫𑀡𑁂𑀭𑁄, 𑀢𑀲𑁆𑀫𑀺𑀁 𑀅𑀲𑀢𑀺 𑀆𑀭𑀸𑀫𑀺𑀓𑁄, 𑀢𑀲𑁆𑀫𑀺𑀫𑁆𑀧𑀺 𑀅𑀲𑀢𑀺 𑀬𑁂𑀦 𑀯𑀺𑀳𑀸𑀭𑁄 𑀓𑀸𑀭𑀸𑀧𑀺𑀢𑁄, 𑀲𑁄 𑀯𑀺𑀳𑀸𑀭𑀲𑀸𑀫𑀺𑀓𑁄, 𑀢𑀲𑁆𑀲 𑀯𑀸 𑀓𑀼𑀮𑁂 𑀬𑁄 𑀓𑁄𑀘𑀺 𑀆𑀧𑀼𑀘𑁆𑀙𑀺𑀢𑀩𑁆𑀩𑁄.

‘‘𑀉𑀧𑀘𑀸𑀭𑁂’’𑀢𑀺 𑀏𑀢𑀲𑁆𑀲𑁂𑀯 𑀯𑀺𑀯𑀭𑀡𑀁 ‘‘𑀩𑀳𑀺 𑀆𑀲𑀦𑁆𑀦𑁂’’𑀢𑀺, 𑀯𑀺𑀳𑀸𑀭𑀲𑁆𑀲 𑀩𑀳𑀺 𑀆𑀲𑀦𑁆𑀦𑀝𑁆𑀞𑀸𑀦𑁂𑀢𑀺 𑀅𑀢𑁆𑀣𑁄. 𑀉𑀧𑀝𑁆𑀞𑀸𑀦𑀲𑀸𑀮𑀸𑀬 𑀯𑀸𑀢𑀺 𑀪𑁄𑀚𑀦𑀲𑀸𑀮𑀸𑀬𑀁 𑀯𑀸. 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀜𑁆𑀳𑀺 𑀤𑀲𑀯𑀺𑀥𑀁 𑀲𑁂𑀬𑁆𑀬𑀁 𑀅𑀦𑁆𑀢𑁄𑀕𑀩𑁆𑀪𑀸𑀤𑀺𑀫𑁆𑀳𑀺 𑀕𑀼𑀢𑁆𑀢𑀝𑁆𑀞𑀸𑀦𑁂 𑀧𑀜𑁆𑀜𑀧𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀬𑀲𑁆𑀫𑀸 𑀲𑁂𑀬𑁆𑀬𑀸𑀧𑀺 𑀲𑁂𑀦𑀸𑀲𑀦𑀫𑁆𑀧𑀺 𑀉𑀧𑀘𑀺𑀓𑀸𑀳𑀺 𑀧𑀮𑀼𑀚𑁆𑀚𑀢𑀺, 𑀯𑀫𑁆𑀫𑀺𑀓𑀭𑀸𑀲𑀺𑀬𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁. 𑀩𑀳𑀺 𑀧𑀦 𑀉𑀧𑀝𑁆𑀞𑀸𑀦𑀲𑀸𑀮𑀸𑀤𑀻𑀲𑀼 𑀧𑀜𑁆𑀜𑀧𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀲𑁂𑀬𑁆𑀬𑀸𑀫𑀢𑁆𑀢𑀫𑁂𑀯 𑀦𑀲𑁆𑀲𑁂𑀬𑁆𑀬 𑀞𑀸𑀦𑀲𑁆𑀲 𑀅𑀕𑀼𑀢𑁆𑀢𑀢𑀸𑀬, 𑀦 𑀲𑁂𑀦𑀸𑀲𑀦𑀁, 𑀢𑀲𑁆𑀫𑀸 𑀏𑀢𑁆𑀣 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁. 𑀫𑀜𑁆𑀘𑀧𑀻𑀞𑀁 𑀧𑀦 𑀬𑀲𑁆𑀫𑀸 𑀦 𑀲𑀓𑁆𑀓𑀸 𑀲𑀳𑀲𑀸 𑀉𑀧𑀘𑀺𑀓𑀸𑀳𑀺 𑀔𑀸𑀬𑀺𑀢𑀼𑀁, 𑀢𑀲𑁆𑀫𑀸 𑀢𑀁 𑀯𑀺𑀳𑀸𑀭𑁂𑀧𑀺 𑀲𑀦𑁆𑀣𑀭𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁. 𑀯𑀺𑀳𑀸𑀭𑀽𑀧𑀘𑀸𑀭𑁂 𑀧𑀦 𑀢𑀁 𑀯𑀺𑀳𑀸𑀭𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑀸 𑀤𑀺𑀲𑁆𑀯𑀸𑀯 𑀧𑀝𑀺𑀲𑀸𑀫𑁂𑀦𑁆𑀢𑀺.

𑀉𑀤𑁆𑀥𑀭𑀡𑀸𑀦𑀺 𑀓𑀢𑁆𑀯𑀸𑀢𑀺 𑀏𑀢𑁆𑀣 𑀉𑀤𑁆𑀥𑀭𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁂𑀦 𑀫𑀜𑁆𑀘𑀧𑀻𑀞𑀓𑀯𑀸𑀦𑀁 𑀲𑀩𑁆𑀩𑀁 𑀅𑀧𑀦𑁂𑀢𑁆𑀯𑀸 (𑀧𑀸𑀘𑀺. 𑀅𑀝𑁆𑀞. 𑁧𑁧𑁮) 𑀲𑀁𑀳𑀭𑀺𑀢𑁆𑀯𑀸 𑀘𑀻𑀯𑀭𑀯𑀁𑀲𑁂 𑀮𑀕𑁆𑀕𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀧𑀘𑁆𑀙𑀸 𑀆𑀕𑀦𑁆𑀢𑁆𑀯𑀸 𑀯𑀲𑀦𑀓𑀪𑀺𑀓𑁆𑀔𑀼𑀦𑀸𑀧𑀺 𑀧𑀼𑀦 𑀫𑀜𑁆𑀘𑀧𑀻𑀞𑀁 𑀯𑀸 𑀧𑀜𑁆𑀜𑀧𑁂𑀢𑁆𑀯𑀸 𑀲𑀬𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁂𑀦 𑀢𑀣𑁂𑀯 𑀓𑀸𑀢𑀩𑁆𑀩𑀁. 𑀅𑀦𑁆𑀢𑁄𑀓𑀼𑀝𑁆𑀝𑀢𑁄 𑀲𑁂𑀬𑁆𑀬𑀁 𑀩𑀳𑀺𑀓𑀼𑀝𑁆𑀝𑁂 𑀧𑀜𑁆𑀜𑀧𑁂𑀢𑁆𑀯𑀸 𑀯𑀲𑀦𑁆𑀢𑁂𑀦 𑀕𑀫𑀦𑀓𑀸𑀮𑁂 𑀧𑀼𑀦 𑀕𑀳𑀺𑀢𑀝𑁆𑀞𑀸𑀦𑁂𑀬𑁂𑀯 𑀧𑀝𑀺𑀲𑀸𑀫𑁂𑀢𑀩𑁆𑀩𑀁. 𑀉𑀧𑀭𑀺𑀧𑀸𑀲𑀸𑀤𑀢𑁄 𑀑𑀭𑁄𑀧𑁂𑀢𑁆𑀯𑀸 𑀳𑁂𑀝𑁆𑀞𑀸𑀧𑀸𑀲𑀸𑀤𑁂 𑀯𑀲𑀦𑁆𑀢𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄. 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑁂𑀲𑀼 𑀫𑀜𑁆𑀘𑀧𑀻𑀞𑀁 𑀧𑀜𑁆𑀜𑀧𑁂𑀢𑁆𑀯𑀸𑀧𑀺 𑀕𑀫𑀦𑀓𑀸𑀮𑁂 𑀧𑀼𑀦 𑀕𑀳𑀺𑀢𑀝𑁆𑀞𑀸𑀦𑁂𑀬𑁂𑀯 𑀞𑀧𑁂𑀢𑀩𑁆𑀩𑀁. 𑀉𑀤𑁆𑀥𑀭𑀸𑀧𑁂𑀢𑁆𑀯𑀸 𑀕𑀫𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀆𑀧𑀼𑀘𑁆𑀙𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁂𑀦 𑀧𑀦 ‘‘𑀪𑀺𑀓𑁆𑀔𑀼𑀫𑁆𑀳𑀺 𑀲𑀢𑀺 𑀪𑀺𑀓𑁆𑀔𑀼 𑀆𑀧𑀼𑀘𑁆𑀙𑀺𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑀅𑀝𑁆𑀞. 𑁧𑁧𑁬) 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀧𑀼𑀘𑁆𑀙𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀁.

𑀤𑀼𑀢𑀺𑀬𑀲𑁂𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀦𑀼𑀧𑀔𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀚𑀸𑀦’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀅𑀦𑀼𑀝𑁆𑀞𑀸𑀧𑀦𑀻𑀬𑁄 ‘𑀅𑀬’𑀦𑁆𑀢𑀺 𑀚𑀸𑀦𑀦𑁆𑀢𑁄’’𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀓𑀼𑀢𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀢𑁂𑀦𑁂𑀯𑀲𑁆𑀲𑀸’’𑀢𑀺𑀆𑀤𑀺. 𑀦𑀦𑀼 𑀧𑀤𑀪𑀸𑀚𑀦𑁂𑀧𑀺 𑀯𑀼𑀟𑁆𑀠𑀪𑀸𑀯𑀸𑀤𑀺𑀚𑀸𑀦𑀦𑀫𑁂𑀯 𑀯𑀼𑀢𑁆𑀢𑀁, 𑀦 𑀢𑀼 𑀅𑀦𑀼𑀝𑁆𑀞𑀸𑀧𑀦𑀻𑀬𑀪𑀸𑀯𑀦𑁆𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬𑀸𑀳 ‘‘𑀯𑀼𑀟𑁆𑀠𑁄 𑀳𑀻’’𑀢𑀺𑀆𑀤𑀺. 𑀩𑀳𑀽𑀧𑀓𑀸𑀭𑀢𑀦𑁆𑀢𑀺 ‘‘𑀪𑀡𑁆𑀟𑀸𑀕𑀸𑀭𑀺𑀓𑀢𑁆𑀢𑀸𑀤𑀺𑀩𑀳𑀼𑀉𑀧𑀓𑀸𑀭𑀪𑀸𑀯𑀁’’. 𑀦 𑀓𑁂𑀯𑀮𑀁 𑀇𑀤𑀫𑁂𑀯𑀸𑀢𑀺 𑀆𑀳 ‘‘𑀕𑀼𑀡𑀯𑀺𑀲𑀺𑀝𑁆𑀞𑀢𑀜𑁆𑀘𑀸’’𑀢𑀺𑀆𑀤𑀺, 𑀢𑁂𑀦 𑀩𑀳𑀽𑀧𑀓𑀸𑀭𑀢𑁆𑀢𑁂𑀧𑀺 𑀕𑀼𑀡𑀯𑀺𑀲𑀺𑀝𑁆𑀞𑀢𑁆𑀢𑀸𑀪𑀸𑀯𑁂, 𑀕𑀼𑀡𑀯𑀺𑀲𑀺𑀝𑁆𑀞𑀢𑁆𑀢𑁂𑀧𑀺 𑀩𑀳𑀽𑀧𑀓𑀸𑀭𑀢𑁆𑀢𑀸𑀪𑀸𑀯𑁂 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀩𑀳𑀽𑀧𑀓𑀸𑀭𑀢𑀁, 𑀥𑀫𑁆𑀫𑀓𑀣𑀺𑀓𑀸𑀤𑀻𑀦𑀁 𑀕𑀼𑀡𑀯𑀺𑀲𑀺𑀝𑁆𑀞𑀢𑀜𑁆𑀘 𑀲𑀮𑁆𑀮𑀓𑁆𑀔𑁂𑀢𑁆𑀯𑀸’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁧𑁧𑁯-𑁧𑁨𑁧) 𑀓𑁂𑀘𑀺. 𑀥𑀼𑀯𑀯𑀸𑀲𑀢𑁆𑀣𑀸𑀬𑀸𑀢𑀺 𑀦𑀺𑀘𑁆𑀘𑀯𑀸𑀲𑀢𑁆𑀣𑀸𑀬. 𑀲𑀫𑁆𑀫𑀦𑁆𑀦𑀺𑀢𑁆𑀯𑀸𑀢𑀺 𑀅𑀧𑀮𑁄𑀓𑀦𑁂𑀦 𑀓𑀫𑁆𑀫𑁂𑀦 𑀲𑀫𑁆𑀫𑀦𑁆𑀦𑀺𑀢𑁆𑀯𑀸. 𑀓𑀸𑀫𑀜𑁆𑀘𑁂𑀢𑁆𑀣 𑀕𑀺𑀮𑀸𑀦𑀲𑁆𑀲𑀸𑀧𑀺 𑀲𑀗𑁆𑀖𑁄𑀬𑁂𑀯 𑀅𑀦𑀼𑀘𑁆𑀙𑀯𑀺𑀓𑀁 𑀲𑁂𑀦𑀸𑀲𑀦𑀁 𑀤𑁂𑀢𑀺, 𑀕𑀺𑀮𑀸𑀦𑁄 𑀧𑀦 𑀅𑀧𑀮𑁄𑀓𑁂𑀢𑁆𑀯𑀸 𑀲𑀗𑁆𑀖𑁂𑀦 𑀅𑀤𑀺𑀦𑁆𑀦𑀲𑁂𑀦𑀸𑀲𑀦𑁄𑀧𑀺 𑀦 𑀧𑀻𑀴𑁂𑀢𑀩𑁆𑀩𑁄 𑀅𑀦𑀼𑀓𑀫𑁆𑀧𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 𑀯𑀺𑀲𑀼𑀁 𑀯𑀼𑀢𑁆𑀢𑁄.

𑀲𑀫𑀦𑁆𑀢𑀸 𑀤𑀺𑀬𑀟𑁆𑀠𑁄 𑀳𑀢𑁆𑀣𑁄𑀢𑀺 𑀫𑀚𑁆𑀛𑁂 𑀧𑀜𑁆𑀜𑀢𑁆𑀢𑀁 𑀫𑀜𑁆𑀘𑀧𑀻𑀞𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀓𑀧𑀲𑁆𑀲𑁂𑀦 𑀘𑁂 𑀧𑀳𑁄𑀦𑀓𑀤𑀺𑀲𑀸 𑀤𑀺𑀲𑁆𑀲𑀢𑀺, 𑀢𑀢𑁄 𑀕𑀳𑁂𑀢𑀩𑁆𑀩𑀁. 𑀧𑀸𑀤𑀥𑁄𑀯𑀦𑀧𑀸𑀲𑀸𑀡𑀢𑁄𑀢𑀺 𑀤𑁆𑀯𑀸𑀭𑁂 𑀦𑀺𑀓𑁆𑀔𑀺𑀢𑁆𑀢𑀧𑀸𑀤𑀥𑁄𑀯𑀦𑀧𑀸𑀲𑀸𑀡𑀢𑁄. 𑀦𑀺𑀲𑀻𑀤𑀦𑁆𑀢𑀲𑁆𑀲 𑀯𑀸 𑀦𑀺𑀧𑀚𑁆𑀚𑀦𑁆𑀢𑀲𑁆𑀲 𑀯𑀸 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀏𑀢𑁆𑀣 𑀦𑀺𑀲𑀻𑀤𑀦𑀫𑀢𑁆𑀢𑁂𑀦, 𑀦𑀺𑀧𑀚𑁆𑀚𑀦𑀫𑀢𑁆𑀢𑁂𑀦𑁂𑀯 𑀯𑀸 𑀧𑀸𑀘𑀺𑀢𑁆𑀢𑀺𑀬𑀁. 𑀧𑀼𑀦𑀧𑁆𑀧𑀼𑀦𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀦𑀺𑀲𑀻𑀤𑀢𑁄 𑀯𑀸 𑀦𑀺𑀧𑀚𑁆𑀚𑀢𑁄 𑀯𑀸.

𑀲𑀗𑁆𑀖𑀺𑀓𑁂 𑀲𑀗𑁆𑀖𑀺𑀓𑀲𑀜𑁆𑀜𑀺𑀯𑁂𑀫𑀢𑀺𑀓𑀧𑀼𑀕𑁆𑀕𑀮𑀺𑀓𑀲𑀜𑁆𑀜𑀻𑀦𑀁 𑀯𑀲𑁂𑀦 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀺𑀓𑀤𑀼𑀓𑁆𑀓𑀝𑀁 𑀧𑀦 𑀧𑀼𑀕𑁆𑀕𑀮𑀺𑀓𑁂 𑀲𑀗𑁆𑀖𑀺𑀓𑀲𑀜𑁆𑀜𑀺𑀯𑁂𑀫𑀢𑀺𑀓𑀅𑀜𑁆𑀜𑀧𑀼𑀕𑁆𑀕𑀮𑀺𑀓𑀲𑀜𑁆𑀜𑀻𑀦𑀁 𑀯𑀲𑁂𑀦. 𑀯𑀺𑀳𑀸𑀭𑀲𑁆𑀲 𑀉𑀧𑀘𑀸𑀭𑁂𑀢𑀺 𑀢𑀲𑁆𑀲 𑀩𑀳𑀺 𑀆𑀲𑀦𑁆𑀦𑀧𑁆𑀧𑀤𑁂𑀲𑁂.

𑀅𑀦𑀼𑀧𑀔𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀦𑀺𑀓𑁆𑀓𑀟𑁆𑀠𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀦𑁂𑀓𑀓𑁄𑀝𑁆𑀞𑀓𑀸𑀦𑀻𑀢𑀺 𑀅𑀦𑁂𑀓𑀤𑁆𑀯𑀸𑀭𑀓𑁄𑀝𑁆𑀞𑀓𑀸𑀦𑀺. ‘‘𑀦𑀺𑀓𑁆𑀔𑀫𑀸𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀘𑁂 𑀦𑀺𑀓𑁆𑀔𑀫𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁧𑁨𑁬) 𑀯𑀤𑀦𑁆𑀢𑀺.

𑀢𑀲𑁆𑀲 𑀧𑀭𑀺𑀓𑁆𑀔𑀸𑀭𑀦𑀺𑀓𑁆𑀓𑀟𑁆𑀠𑀦𑁂𑀢𑀺 𑀢𑀲𑁆𑀲 𑀲𑀦𑁆𑀢𑀓𑀁 𑀬𑀁 𑀓𑀺𑀜𑁆𑀘𑀺 𑀧𑀢𑁆𑀢𑀘𑀻𑀯𑀭𑀧𑀭𑀺𑀲𑁆𑀲𑀸𑀯𑀦𑀥𑀫𑁆𑀫𑀓𑀭𑀡𑀫𑀜𑁆𑀘𑀧𑀻𑀞𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑀸𑀤𑀺𑀪𑁂𑀤𑀁 𑀅𑀦𑁆𑀢𑀫𑀲𑁄 𑀭𑀚𑀦𑀙𑀮𑁆𑀮𑀺𑀧𑀺 𑀅𑀢𑁆𑀣𑀺, 𑀢𑀲𑁆𑀲 𑀧𑀭𑀺𑀓𑁆𑀔𑀸𑀭𑀲𑁆𑀲 𑀦𑀺𑀓𑁆𑀓𑀟𑁆𑀠𑀦𑁂. 𑀢𑀜𑁆𑀘𑀸𑀢𑀺 𑀤𑀼𑀓𑁆𑀓𑀝𑀁 𑀧𑀭𑀸𑀫𑀲𑀢𑀺. 𑀦𑀺𑀓𑁆𑀓𑀟𑁆𑀠𑀸𑀧𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀕𑀸𑀴𑁆𑀳𑀁 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑁂𑀲𑀼 𑀧𑀦 𑀏𑀓𑀸𑀯 𑀆𑀧𑀢𑁆𑀢𑀺.

𑀪𑀡𑁆𑀟𑀦𑀓𑀸𑀭𑀓𑀓𑀮𑀳𑀓𑀸𑀭𑀓𑀫𑁂𑀯 𑀲𑀓𑀮𑀲𑀗𑁆𑀖𑀸𑀭𑀸𑀫𑀢𑁄 𑀦𑀺𑀓𑁆𑀓𑀟𑁆𑀠𑀺𑀢𑀼𑀁 𑀮𑀪𑀢𑀺. 𑀲𑁄 𑀳𑀺 𑀧𑀓𑁆𑀔𑀁 𑀮𑀪𑀺𑀢𑁆𑀯𑀸 𑀲𑀗𑁆𑀖𑀫𑁆𑀧𑀺 𑀪𑀺𑀦𑁆𑀤𑁂𑀬𑁆𑀬. 𑀅𑀮𑀚𑁆𑀚𑀺𑀆𑀤𑀬𑁄 𑀧𑀦 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀢𑁄𑀬𑁂𑀯 𑀦𑀺𑀓𑁆𑀓𑀟𑁆𑀠𑀺𑀢𑀩𑁆𑀩𑀸. 𑀲𑀓𑀮𑀲𑀗𑁆𑀖𑀸𑀭𑀸𑀫𑀢𑁄 𑀦𑀺𑀓𑁆𑀓𑀟𑁆𑀠𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑁂𑀦𑀸𑀳 ‘‘𑀲𑀓𑀮𑀲𑀗𑁆𑀖𑀸𑀭𑀸𑀫𑀢𑁄𑀧𑀻’’𑀢𑀺𑀆𑀤𑀺.

𑀦𑀺𑀓𑁆𑀓𑀟𑁆𑀠𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀯𑁂𑀳𑀸𑀲𑀓𑀼𑀝𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀉𑀧𑀭𑀺𑀯𑁂𑀳𑀸𑀲𑀓𑀼𑀝𑀺𑀬𑀸𑀢𑀺 𑀉𑀧𑀭𑀺𑀫𑀢𑀮𑁂 𑀅𑀲𑀦𑁆𑀣𑀢𑀧𑀤𑀭𑀸𑀬 𑀓𑀼𑀝𑀺𑀬𑀸. 𑀢𑁂𑀦𑀸𑀳 ‘‘𑀉𑀧𑀭𑀺 𑀅𑀘𑁆𑀙𑀦𑁆𑀦𑀢𑀮𑀸𑀬𑀸’’𑀢𑀺𑀆𑀤𑀺. 𑀬𑀸 𑀳𑀺 𑀓𑀸𑀘𑀺 𑀉𑀧𑀭𑀺 𑀅𑀘𑁆𑀙𑀦𑁆𑀦𑀢𑀮𑀸 𑀤𑁆𑀯𑀺𑀪𑀽𑀫𑀺𑀓𑀓𑀼𑀝𑀺𑀓𑀸 𑀯𑀸 𑀢𑀺𑀪𑀽𑀫𑀺𑀓𑀸𑀤𑀺𑀓𑀼𑀝𑀺𑀓𑀸 𑀯𑀸, 𑀲𑀸 ‘‘𑀯𑁂𑀳𑀸𑀲𑀓𑀼𑀝𑀻’’𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀜𑁆𑀳𑀺 𑀯𑁂𑀳𑀸𑀲𑀓𑀼𑀝𑀺𑀮𑀓𑁆𑀔𑀡𑀁. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀧𑀤𑀪𑀸𑀚𑀦𑁂 ‘‘𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀲𑀻𑀲𑀖𑀝𑁆𑀝𑀸’’𑀢𑀺 (𑀧𑀸𑀘𑀺. 𑁧𑁩𑁧) 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀧𑀤𑀪𑀸𑀚𑀦𑁂 𑀧𑀦𑀸’’𑀢𑀺𑀆𑀤𑀺. 𑀇𑀥 𑀅𑀥𑀺𑀧𑁆𑀧𑁂𑀢𑀁 𑀓𑀼𑀝𑀺𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀅𑀥𑀺𑀧𑁆𑀧𑁂𑀢𑀁 𑀯𑁂𑀳𑀸𑀲𑀓𑀼𑀝𑀺𑀁 𑀤𑀲𑁆𑀲𑁂𑀢𑀼𑀁. 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲𑀸𑀢𑀺 𑀧𑀫𑀸𑀡𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲. 𑀲𑀩𑁆𑀩𑀳𑁂𑀝𑁆𑀞𑀺𑀫𑀸𑀳𑀺 𑀢𑀼𑀮𑀸𑀳𑀺 𑀲𑀻𑀲𑀁 𑀦 𑀖𑀝𑁆𑀝𑁂𑀢𑀻𑀢𑀺 𑀅𑀲𑀻𑀲𑀖𑀝𑁆𑀝𑀸. 𑀅𑀗𑁆𑀕𑁂 𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀅𑀝𑀦𑀺𑀬𑁄 𑀯𑀺𑀚𑁆𑀛𑀺𑀢𑁆𑀯𑀸. 𑀧𑀯𑁂𑀲𑀺𑀢𑀧𑀸𑀤𑀓𑀦𑁆𑀢𑀺 𑀧𑀯𑁂𑀲𑀺𑀢𑀧𑀸𑀤𑀲𑀺𑀔𑀁. 𑀢𑀲𑁆𑀫𑀸𑀢𑀺 ‘‘𑀪𑀽𑀫𑀢𑁆𑀣𑁂 𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀓𑀸𑀭𑀡𑀪𑀸𑀯𑁂𑀦 𑀧𑀘𑁆𑀘𑀸𑀫𑀲𑀢𑀺. 𑀬𑀲𑁆𑀫𑀸 𑀆𑀳𑀘𑁆𑀘𑀧𑀸𑀤𑀓𑀸𑀤𑀻𑀲𑀼 𑀬𑀣𑀸𑀯𑀼𑀢𑁆𑀢𑁄 𑀅𑀢𑁆𑀣𑁄 𑀳𑁄𑀢𑀺, 𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀳𑀲𑀸𑀢𑀺 𑀅𑀪𑀺𑀪𑀯𑀺𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸. 𑀅𑀯𑁂𑀳𑀸𑀲𑀓𑀼𑀝𑀺𑀓𑀸𑀬𑀸𑀢𑀺 𑀪𑀽𑀫𑀺𑀬𑀁 𑀓𑀢𑀧𑀡𑁆𑀡𑀲𑀸𑀮𑀸𑀤𑀻𑀲𑀼, 𑀢𑀢𑁆𑀣 𑀅𑀦𑀸𑀧𑀢𑁆𑀢𑀺. 𑀦 𑀳𑀺 𑀲𑀓𑁆𑀓𑀸 𑀢𑀢𑁆𑀣 𑀧𑀭𑀲𑁆𑀲 𑀧𑀻𑀴𑀸 𑀓𑀸𑀢𑀼𑀁. 𑀲𑀻𑀲𑀖𑀝𑁆𑀝𑀸𑀬𑀸𑀢𑀺 𑀬𑀸 𑀲𑀻𑀲𑀁 𑀖𑀝𑁆𑀝𑀸 𑀳𑁄𑀢𑀺, 𑀢𑀢𑁆𑀣𑀸𑀧𑀺 𑀅𑀦𑀸𑀧𑀢𑁆𑀢𑀺. 𑀦 𑀳𑀺 𑀲𑀓𑁆𑀓𑀸 𑀢𑀢𑁆𑀣 𑀳𑁂𑀝𑁆𑀞𑀸𑀧𑀸𑀲𑀸𑀤𑁂 𑀅𑀦𑁄𑀡𑀢𑁂𑀦 𑀯𑀺𑀘𑀭𑀺𑀢𑀼𑀁, 𑀢𑀲𑁆𑀫𑀸 𑀅𑀲𑀜𑁆𑀘𑀭𑀡𑀝𑁆𑀞𑀸𑀦𑀢𑁆𑀢𑀸 𑀧𑀭𑀧𑀻𑀴𑀸 𑀦 𑀪𑀯𑀺𑀲𑁆𑀲𑀢𑀺. 𑀉𑀧𑀭𑀺𑀢𑀮𑀁 𑀯𑀸 𑀧𑀤𑀭𑀲𑀜𑁆𑀘𑀺𑀢𑀦𑁆𑀢𑀺 𑀉𑀧𑀭𑀺𑀫𑀢𑀮𑀁 𑀤𑀸𑀭𑀼𑀨𑀮𑀓𑁂𑀳𑀺 𑀖𑀦𑀲𑀦𑁆𑀣𑀢𑀁. 𑀓𑀺𑀜𑁆𑀘𑀺 𑀕𑀡𑁆𑀳𑀸𑀢𑀺 𑀯𑀸𑀢𑀺 𑀉𑀧𑀭𑀺 𑀦𑀸𑀕𑀤𑀦𑁆𑀢𑀓𑀸𑀤𑀻𑀲𑀼 𑀮𑀕𑁆𑀕𑀺𑀢𑀁 𑀘𑀻𑀯𑀭𑀸𑀤𑀺𑀁 𑀬𑀁 𑀓𑀺𑀜𑁆𑀘𑀺 𑀕𑀡𑁆𑀳𑀸𑀢𑀺 𑀯𑀸. 𑀮𑀕𑁆𑀕𑀢𑀺 𑀯𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀧𑀝𑀺𑀧𑀓𑁆𑀔𑀪𑀽𑀢𑀸 𑀆𑀡𑀺 𑀧𑀝𑀸𑀡𑀺. 𑀬𑀲𑁆𑀲𑀸 𑀤𑀺𑀦𑁆𑀦𑀸𑀬 𑀦𑀺𑀲𑀻𑀤𑀦𑁆𑀢𑁂𑀧𑀺 𑀧𑀸𑀤𑀸 𑀦 𑀦𑀺𑀧𑀢𑀦𑁆𑀢𑀺, 𑀏𑀯𑀁𑀪𑀽𑀢𑀸 𑀆𑀡𑀺 𑀫𑀜𑁆𑀘𑀧𑀻𑀞𑀸𑀦𑀁 𑀧𑀸𑀤𑀲𑀺𑀔𑀸𑀲𑀼 𑀤𑀺𑀦𑁆𑀦𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀸𑀤𑀲𑀻𑀲𑀸𑀦’’𑀦𑁆𑀢𑀺𑀆𑀤𑀺.

𑀯𑁂𑀳𑀸𑀲𑀓𑀼𑀝𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀫𑀳𑀮𑁆𑀮𑀓𑀯𑀺𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀺𑀝𑁆𑀞𑀲𑀗𑁆𑀖𑀸𑀝𑀲𑁆𑀲𑀸𑀢𑀺 𑀤𑁆𑀯𑀸𑀭𑀩𑀦𑁆𑀥𑀲𑁆𑀲. 𑀲𑀸𑀫𑀦𑁆𑀢𑀸 𑀅𑀟𑁆𑀠𑀢𑁂𑀬𑁆𑀬𑀳𑀢𑁆𑀣𑁄 𑀧𑀤𑁂𑀲𑁄𑀢𑀺 𑀬𑀲𑁆𑀲 (𑀧𑀸𑀘𑀺. 𑀅𑀝𑁆𑀞. 𑁧𑁩𑁫) 𑀯𑁂𑀫𑀚𑁆𑀛𑁂 𑀤𑁆𑀯𑀸𑀭𑀁 𑀳𑁄𑀢𑀺, 𑀉𑀧𑀭𑀺𑀪𑀸𑀕𑁂 𑀘 𑀉𑀘𑁆𑀘𑀸 𑀪𑀺𑀢𑁆𑀢𑀺, 𑀢𑀲𑁆𑀲 𑀢𑀻𑀲𑀼 𑀤𑀺𑀲𑀸𑀲𑀼 𑀲𑀸𑀫𑀦𑁆𑀢𑀸 𑀅𑀟𑁆𑀠𑀢𑁂𑀬𑁆𑀬𑀳𑀢𑁆𑀣𑁄 𑀧𑀤𑁂𑀲𑁄. 𑀔𑀼𑀤𑁆𑀤𑀓𑀲𑁆𑀲 𑀧𑀦 𑀯𑀺𑀳𑀸𑀭𑀲𑁆𑀲 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼. 𑀢𑀢𑁆𑀭𑀸𑀧𑀺 𑀬𑀁 𑀪𑀺𑀢𑁆𑀢𑀺𑀁 𑀯𑀺𑀯𑀭𑀺𑀬𑀫𑀸𑀦𑀁 𑀓𑀯𑀸𑀝𑀁 𑀆𑀳𑀦𑀢𑀺, 𑀲𑀸 𑀅𑀧𑀭𑀺𑀧𑀼𑀡𑁆𑀡𑀽𑀧𑀘𑀸𑀭𑀸𑀧𑀺 𑀳𑁄𑀢𑀺. 𑀲𑀘𑁂 𑀧𑀦 𑀤𑁆𑀯𑀸𑀭𑀲𑁆𑀲 𑀅𑀥𑁄𑀪𑀸𑀕𑁂𑀧𑀺 𑀮𑁂𑀧𑁄𑀓𑀸𑀲𑁄 𑀅𑀢𑁆𑀣𑀺, 𑀢𑀫𑁆𑀧𑀺 𑀮𑀺𑀫𑁆𑀧𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀕𑁆𑀕𑀴𑀝𑁆𑀞𑀧𑀦𑀸𑀬𑀸𑀢𑀺 𑀏𑀢𑁆𑀣 𑀅𑀕𑁆𑀕𑀴𑀲𑀤𑁆𑀤𑁂𑀦 𑀢𑀁𑀲𑀫𑁆𑀩𑀦𑁆𑀥𑀢𑁄 𑀤𑁆𑀯𑀸𑀭𑀨𑀮𑀓𑀲𑀳𑀺𑀢𑀁 𑀤𑁆𑀯𑀸𑀭𑀩𑀦𑁆𑀥𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀢𑁂𑀦𑀸𑀳 ‘‘𑀲𑀓𑀯𑀸𑀝𑀓𑀲𑁆𑀲𑀸’’𑀢𑀺𑀆𑀤𑀺. ‘‘𑀦𑀺𑀘𑁆𑀘𑀮𑀪𑀸𑀯𑀢𑁆𑀣𑀸𑀬𑀸’’𑀢𑀺 𑀇𑀫𑀺𑀦𑀸 𑀢𑀜𑁆𑀘 𑀔𑁄 𑀞𑀧𑀦𑀁 𑀇𑀥 𑀦𑀺𑀘𑁆𑀘𑀮𑀪𑀸𑀯𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀓𑁄 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄𑀢𑀺 𑀆𑀳 ‘‘𑀓𑀯𑀸𑀝𑀜𑁆𑀳𑀻’’𑀢𑀺𑀆𑀤𑀺. 𑀓𑀫𑁆𑀧𑀢𑀻𑀢𑀺 𑀘𑀮𑀢𑀺. 𑀬𑀸𑀯 𑀤𑁆𑀯𑀸𑀭𑀓𑁄𑀲𑀸 𑀅𑀕𑁆𑀕𑀴𑀝𑁆𑀞𑀧𑀦𑀸𑀬 𑀧𑀼𑀦𑀧𑁆𑀧𑀼𑀦𑀁 𑀮𑀺𑀫𑁆𑀧𑀺𑀢𑀩𑁆𑀩𑁄 𑀯𑀸 𑀮𑁂𑀧𑀸𑀧𑁂𑀢𑀩𑁆𑀩𑁄 𑀯𑀸𑀢𑀺 𑀅𑀕𑁆𑀕𑀴𑀝𑁆𑀞𑀧𑀦𑀢𑁆𑀣𑀸𑀬 𑀬𑀸𑀯 𑀤𑁆𑀯𑀸𑀭𑀓𑁄𑀲𑀸 𑀧𑀼𑀦𑀧𑁆𑀧𑀼𑀦𑀁 𑀅𑀢𑁆𑀢𑀦𑀸 𑀮𑀺𑀫𑁆𑀧𑀺𑀢𑀩𑁆𑀩𑁄 𑀯𑀸, 𑀧𑀭𑁂𑀳𑀺 𑀮𑁂𑀧𑀸𑀧𑁂𑀢𑀩𑁆𑀩𑁄 𑀯𑀸𑀢𑀺 𑀅𑀢𑁆𑀣𑁄.

𑀦𑀦𑀼 𑀘𑀸𑀬𑀫𑀢𑁆𑀣𑁄 𑀦𑁂𑀯 𑀫𑀸𑀢𑀺𑀓𑀸𑀬𑀁, 𑀦 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑁄, 𑀅𑀣 𑀓𑀼𑀢𑁄 𑀤𑀝𑁆𑀞𑀩𑁆𑀩𑁄𑀢𑀺 𑀆𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀓𑀺𑀜𑁆𑀘𑀸𑀧𑀻𑀢𑀺 𑀬𑀤𑀺𑀧𑀺. 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑀲𑁆𑀲 𑀦𑀺𑀤𑀸𑀦𑁂. 𑀅𑀥𑀺𑀓𑀸𑀭𑀢𑁄𑀢𑀺 𑀅𑀦𑀼𑀯𑀢𑁆𑀢𑀦𑀢𑁄. 𑀆𑀮𑁄𑀓𑀁 𑀲𑀦𑁆𑀥𑁂𑀢𑀺 𑀧𑀺𑀥𑁂𑀢𑀻𑀢𑀺 𑀆𑀮𑁄𑀓𑀲𑀦𑁆𑀥𑀺. 𑀢𑁂𑀦𑀸𑀳 ‘‘𑀆𑀮𑁄𑀓𑀲𑀦𑁆𑀥𑀻𑀢𑀺 𑀯𑀸𑀢𑀧𑀸𑀦𑀓𑀯𑀸𑀝𑀓𑀸 𑀯𑀼𑀘𑁆𑀘𑀦𑁆𑀢𑀻’’𑀢𑀺. 𑀢𑀢𑁆𑀣 𑀯𑀸𑀢𑀧𑀸𑀦𑀓𑀯𑀸𑀝𑀓𑀸𑀢𑀺 𑀯𑀸𑀢𑀧𑀸𑀦𑀨𑀮𑀓𑀸. 𑀅𑀦𑀼𑀜𑁆𑀜𑀸𑀢𑀧𑁆𑀧𑀤𑁂𑀲𑀢𑁄 𑀧𑀦 𑀅𑀜𑁆𑀜𑀢𑁆𑀣 𑀧𑀼𑀦𑀧𑁆𑀧𑀼𑀦𑀁 𑀯𑀺𑀮𑀺𑀫𑁆𑀧𑀺𑀢𑀼𑀁 𑀯𑀸 𑀯𑀺𑀮𑀺𑀫𑁆𑀧𑀸𑀧𑁂𑀢𑀼𑀁 𑀯𑀸 𑀦 𑀯𑀝𑁆𑀝𑀢𑀺. ‘‘𑀫𑀢𑁆𑀢𑀺𑀓𑀸𑀬 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀼𑀦 𑀘𑀢𑀼𑀢𑁆𑀣𑀮𑁂𑀧𑁂 𑀤𑀺𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁧𑁩𑁫) 𑀓𑁂𑀘𑀺. ‘‘𑀧𑀼𑀦𑀧𑁆𑀧𑀼𑀦𑀁 𑀮𑁂𑀧𑀤𑀸𑀦𑀲𑁆𑀲 𑀯𑀼𑀢𑁆𑀢𑀧𑁆𑀧𑀫𑀸𑀡𑀢𑁄 𑀅𑀜𑁆𑀜𑀢𑁆𑀣 𑀧𑀝𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀧𑀸𑀘𑀺𑀢𑁆𑀢𑀺𑀬𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸 𑀤𑀼𑀓𑁆𑀓𑀝’’𑀦𑁆𑀢𑀺 𑀅𑀧𑀭𑁂.

𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀲𑀁𑀯𑀺𑀥𑀸𑀢𑀩𑁆𑀩𑀁. 𑀅𑀧𑁆𑀧𑀳𑀭𑀺𑀢𑁂𑀢𑀺 𑀏𑀢𑁆𑀣 𑀅𑀧𑁆𑀧𑀲𑀤𑁆𑀤𑁄 ‘‘𑀅𑀧𑁆𑀧𑀺𑀘𑁆𑀙𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁫𑁨, 𑁩𑁩𑁬; 𑀲𑀁. 𑀦𑀺. 𑁨.𑁧𑁪𑁮) 𑀯𑀺𑀬 𑀅𑀪𑀸𑀯𑀢𑁆𑀣𑁄𑀢𑀺 𑀆𑀳 ‘‘𑀅𑀳𑀭𑀺𑀢𑁂’’𑀢𑀺. 𑀲𑀸𑀮𑀺𑀯𑀻𑀳𑀺𑀆𑀤𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁩𑁦) 𑀧𑀼𑀩𑁆𑀩𑀡𑁆𑀡𑀁 ‘‘𑀧𑀼𑀭𑀓𑁆𑀔𑀢𑀁 𑀲𑀲𑁆𑀲𑀨𑀮’’𑀦𑁆𑀢𑀺 𑀓𑀢𑁆𑀯𑀸, 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀫𑀼𑀕𑁆𑀕𑀫𑀸𑀲𑀸𑀤𑀺 𑀅𑀧𑀭𑀡𑁆𑀡𑀁. 𑀯𑀼𑀢𑁆𑀢𑀦𑁆𑀢𑀺 𑀯𑀧𑀺𑀢𑀁. ‘‘𑀢𑀲𑁆𑀫𑀺𑀁 𑀞𑀢𑁆𑀯𑀸 𑀅𑀥𑀺𑀝𑁆𑀞𑀳𑀦𑁆𑀢𑁄 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀻’’𑀢𑀺 𑀇𑀫𑀺𑀦𑀸 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀲𑀫𑀦𑁆𑀢𑀸 𑀯𑀼𑀢𑁆𑀢𑀧𑁆𑀧𑀫𑀸𑀡𑁂 𑀧𑀭𑀺𑀘𑁆𑀙𑁂𑀤𑁂 𑀧𑀼𑀩𑁆𑀩𑀡𑁆𑀡𑀸𑀤𑀻𑀦𑀺 𑀦 𑀲𑀦𑁆𑀢𑀺, 𑀢𑀢𑁆𑀣 𑀯𑀺𑀳𑀸𑀭𑁄 𑀓𑀸𑀭𑁂𑀢𑀩𑁆𑀩𑁄. 𑀬𑀢𑁆𑀣 𑀧𑀦 𑀲𑀦𑁆𑀢𑀺, 𑀢𑀢𑁆𑀣 𑀓𑀸𑀭𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀣𑁂𑀯𑀸𑀢𑀺 𑀫𑀼𑀔𑀯𑀝𑁆𑀝𑀺𑀅𑀦𑁆𑀢𑁂𑀦. 𑀢𑀲𑁆𑀫𑀺𑀁 𑀞𑀸𑀢𑀩𑁆𑀩𑀁 𑀧𑀢𑀦𑁆𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀅𑀧𑀢𑀦𑁄𑀓𑀸𑀲𑀢𑁆𑀢𑀸, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑀭𑀺 𑀦 𑀧𑀢𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀲𑁆𑀲 𑀧𑀦 𑀑𑀓𑀸𑀲𑀲𑁆𑀲 𑀅𑀩𑁆𑀪𑀦𑁆𑀢𑀭𑀁 𑀯𑀺𑀳𑀸𑀭𑀲𑁆𑀲 𑀧𑀢𑀦𑁆𑀢𑀲𑁆𑀲 𑀑𑀓𑀸𑀲𑁄 𑀳𑁄𑀢𑀻𑀢𑀺 𑀅𑀧𑁆𑀧𑀳𑀭𑀺𑀢𑁂𑀧𑀺 𑀢𑀲𑁆𑀫𑀺𑀁 𑀞𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀮𑀪𑀢𑀺. 𑀢𑁂𑀦𑀸𑀳 ‘‘𑀢𑀲𑁆𑀲 𑀅𑀦𑁆𑀢𑁄 𑀅𑀳𑀭𑀺𑀢𑁂𑀧𑀺 𑀞𑀸𑀢𑀼𑀁 𑀦 𑀮𑀪𑀢𑀻’’𑀢𑀺.

𑀢𑀢𑁄 𑀘𑁂 𑀉𑀢𑁆𑀢𑀭𑀻𑀢𑀺 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀯𑀸 𑀧𑀭𑀺𑀬𑀸𑀬𑀸𑀦𑀁 𑀯𑀸 𑀉𑀧𑀭𑀺 𑀘𑀢𑀼𑀢𑁆𑀣𑁂 𑀫𑀕𑁆𑀕𑁂 𑀯𑀸 𑀧𑀭𑀺𑀬𑀸𑀬𑁂 𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀫𑀕𑁆𑀕𑁂𑀦 𑀙𑀸𑀤𑀺𑀬𑀫𑀸𑀦𑁂’’𑀢𑀺𑀆𑀤𑀺. 𑀢𑀢𑁆𑀣 𑀫𑀕𑁆𑀕𑁂𑀦 𑀙𑀸𑀤𑀺𑀬𑀫𑀸𑀦𑁂𑀢𑀺 𑀅𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀚𑀼𑀓𑀫𑁂𑀯 𑀙𑀸𑀤𑀺𑀬𑀫𑀸𑀦𑁂. 𑀧𑀭𑀺𑀬𑀸𑀬𑁂𑀦𑀸𑀢𑀺 𑀧𑀭𑀺𑀓𑁆𑀔𑁂𑀧𑁂𑀦. 𑀢𑀢𑁆𑀣 𑀫𑀕𑁆𑀕𑁂𑀦 𑀙𑀸𑀤𑀦𑀁 𑀇𑀝𑁆𑀞𑀓𑀲𑀺𑀮𑀸𑀲𑀼𑀥𑀸𑀳𑀺 𑀮𑀩𑁆𑀪𑀢𑀺, 𑀧𑀭𑀺𑀬𑀸𑀬𑁂𑀦 𑀙𑀸𑀤𑀦𑀁 𑀢𑀺𑀡𑀧𑀡𑁆𑀡𑁂𑀳𑀻𑀢𑀺 𑀆𑀳 ‘‘𑀇𑀝𑁆𑀞𑀓𑀲𑀺𑀮𑀸𑀲𑀼𑀥𑀸𑀳𑀻’’𑀢𑀺𑀆𑀤𑀺. 𑀢𑀲𑁆𑀫𑀸 𑀬𑀣𑀸 𑀇𑀘𑁆𑀙𑀢𑀺, 𑀢𑀣𑀸 𑀤𑁆𑀯𑁂 𑀫𑀕𑁆𑀕𑁂 𑀯𑀸 𑀤𑁆𑀯𑁂 𑀧𑀭𑀺𑀬𑀸𑀬𑁂 𑀯𑀸 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀢𑀢𑀺𑀬𑀁 𑀫𑀕𑁆𑀕𑀁 𑀯𑀸 𑀧𑀭𑀺𑀬𑀸𑀬𑀁 𑀯𑀸 ‘‘𑀏𑀯𑀁 𑀙𑀸𑀤𑁂𑀳𑀻’’𑀢𑀺 𑀆𑀡𑀸𑀧𑁂𑀢𑁆𑀯𑀸 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀲𑀘𑁂 𑀦 𑀧𑀓𑁆𑀓𑀫𑀢𑀺, 𑀢𑀼𑀡𑁆𑀳𑀻𑀪𑀸𑀯𑁂𑀦 𑀞𑀸𑀢𑀩𑁆𑀩𑀁. 𑀲𑀩𑁆𑀩𑀫𑁆𑀧𑀺 𑀘𑁂𑀢𑀁 𑀙𑀤𑀦𑀁 𑀙𑀤𑀦𑀽𑀧𑀭𑀺 𑀯𑁂𑀤𑀺𑀢𑀩𑁆𑀩𑀁. 𑀉𑀧𑀭𑀽𑀧𑀭𑀺𑀙𑀦𑁆𑀦𑁄 𑀳𑀺 𑀯𑀺𑀳𑀸𑀭𑁄 𑀘𑀺𑀭𑀁 𑀅𑀦𑁄𑀯𑀲𑁆𑀲𑀓𑁄 𑀳𑁄𑀢𑀻𑀢𑀺 𑀫𑀜𑁆𑀜𑀫𑀸𑀦𑀸 𑀏𑀯𑀁 𑀙𑀸𑀤𑁂𑀦𑁆𑀢𑀺. 𑀢𑀺𑀡𑀫𑀼𑀝𑁆𑀞𑀺𑀕𑀡𑀦𑀸𑀬𑀸𑀢𑀺 𑀢𑀺𑀡𑀓𑀭𑀴𑀕𑀡𑀦𑀸𑀬.

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀢𑀺𑀭𑁂𑀓𑀤𑁆𑀯𑀢𑁆𑀢𑀺𑀧𑀭𑀺𑀬𑀸𑀬𑁂 𑀅𑀢𑀺𑀭𑁂𑀓𑀲𑀜𑁆𑀜𑀺𑀯𑁂𑀫𑀢𑀺𑀓𑀊𑀦𑀓𑀲𑀜𑁆𑀜𑀻𑀦𑀁 𑀯𑀲𑁂𑀦 𑀢𑀻𑀡𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀲𑁂𑀢𑀯𑀡𑁆𑀡𑀸𑀤𑀺𑀓𑀭𑀡𑁂𑀢𑀺 𑀲𑁂𑀢𑀯𑀡𑁆𑀡𑀓𑀸𑀴𑀯𑀡𑁆𑀡𑀕𑁂𑀭𑀼𑀓𑀧𑀭𑀺𑀓𑀫𑁆𑀫𑀫𑀸𑀮𑀸𑀓𑀫𑁆𑀫𑀮𑀢𑀸𑀓𑀫𑁆𑀫𑀫𑀓𑀭𑀤𑀦𑁆𑀢𑀓𑀧𑀜𑁆𑀘𑀧𑀝𑀺𑀓𑀸𑀦𑀁 𑀓𑀭𑀡𑁂. 𑀮𑁂𑀡𑀕𑀼𑀳𑀸𑀢𑀺𑀡𑀓𑀼𑀝𑀺𑀓𑀸𑀤𑀻𑀲𑀽𑀢𑀺 𑀏𑀢𑁆𑀣 𑀮𑁂𑀡𑀦𑁆𑀢𑀺 𑀤𑁆𑀯𑀸𑀭𑀩𑀤𑁆𑀥𑀁. 𑀕𑀼𑀳𑀸𑀢𑀺 𑀓𑁂𑀯𑀮𑀸 𑀧𑀩𑁆𑀩𑀢𑀕𑀼𑀳𑀸. 𑀢𑀺𑀡𑀓𑀼𑀝𑀺𑀓𑀸 𑀧𑀸𑀓𑀝𑀸 𑀏𑀯.

𑀫𑀳𑀮𑁆𑀮𑀓𑀯𑀺𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀧𑁆𑀧𑀸𑀡𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀏𑀓𑀲𑁆𑀫𑀺𑀁 𑀖𑀝𑁂 𑀏𑀓𑀸𑀯 𑀆𑀧𑀢𑁆𑀢𑀻𑀢𑀺 𑀏𑀓𑀲𑁆𑀫𑀺𑀁 𑀉𑀤𑀓𑀖𑀝𑁂 𑀏𑀓𑀸𑀯 𑀆𑀧𑀢𑁆𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀪𑀸𑀚𑀦𑁂𑀲𑀼. 𑀯𑀺𑀘𑁆𑀙𑀺𑀦𑁆𑀤𑀦𑁆𑀢𑀲𑁆𑀲𑀸𑀢𑀺 𑀥𑀸𑀭𑀁 𑀯𑀺𑀘𑁆𑀙𑀺𑀦𑁆𑀤𑀦𑁆𑀢𑀲𑁆𑀲. 𑀏𑀓𑁂𑀓𑀁 𑀧𑀓𑁆𑀔𑀺𑀧𑀦𑁆𑀢𑀲𑁆𑀲𑀸𑀢𑀺 𑀏𑀓𑁂𑀓𑀁 𑀢𑀺𑀡𑀁 𑀯𑀸 𑀧𑀡𑁆𑀡𑀁 𑀯𑀸 𑀫𑀢𑁆𑀢𑀺𑀓𑀁 𑀯𑀸 𑀅𑀜𑁆𑀜𑀁 𑀯𑀸 𑀓𑀝𑁆𑀞𑀕𑁄𑀫𑀬𑀸𑀤𑀺𑀁 𑀧𑀓𑁆𑀔𑀺𑀧𑀦𑁆𑀢𑀲𑁆𑀲. 𑀧𑀭𑀺𑀬𑀸𑀤𑀸𑀦𑀦𑁆𑀢𑀺 𑀔𑀬𑀁.

‘‘𑀧𑀤𑀻𑀧𑁂 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁧𑁪𑁦) 𑀧𑀢𑀺𑀢𑁆𑀯𑀸 𑀧𑀝𑀗𑁆𑀕𑀸𑀤𑀺𑀧𑀸𑀡𑀓𑀸 𑀫𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀚𑀸𑀦𑀦𑁆𑀢𑀲𑁆𑀲𑀸𑀧𑀺 𑀓𑀼𑀲𑀮𑀘𑀺𑀢𑁆𑀢𑁂𑀦 𑀧𑀤𑀻𑀧𑀼𑀚𑁆𑀚𑀮𑀦𑀁 𑀯𑀺𑀬 ‘‘𑀲𑀺𑀜𑁆𑀘𑀦𑁂𑀦 𑀧𑀸𑀡𑀓𑀸 𑀫𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀧𑀼𑀩𑁆𑀩𑀪𑀸𑀕𑁂 𑀚𑀸𑀦𑀦𑁆𑀢𑀲𑁆𑀲𑀸𑀧𑀺 ‘‘𑀇𑀤𑀁 𑀚𑀮𑀁 𑀲𑀺𑀜𑁆𑀘𑀸𑀫𑀻’’𑀢𑀺 𑀲𑀺𑀜𑁆𑀘𑀦𑁆𑀢𑀲𑁆𑀲 𑀯𑀥𑀓𑀘𑀺𑀢𑁆𑀢𑀁 𑀦 𑀳𑁄𑀢𑀻𑀢𑀺 𑀆𑀳 ‘‘𑀯𑀺𑀦𑀸 𑀯𑀥𑀓𑀘𑁂𑀢𑀦𑀸𑀬𑀸’’𑀢𑀺𑀆𑀤𑀺. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀧𑀡𑁆𑀡𑀢𑁆𑀢𑀺𑀯𑀚𑁆𑀚’’𑀦𑁆𑀢𑀺 𑀇𑀤𑀫𑁆𑀧𑀺 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀢𑀺𑀘𑀺𑀢𑁆𑀢𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀯𑀲𑁂𑀦 𑀢𑀺𑀘𑀺𑀢𑁆𑀢𑀁. 𑀢𑀣𑀸 𑀳𑀺 𑀧𑀡𑁆𑀡𑀢𑁆𑀢𑀺𑀁 𑀫𑀤𑁆𑀤𑀺𑀢𑁆𑀯𑀸 𑀲𑀺𑀜𑁆𑀘𑀦𑁆𑀢𑀲𑁆𑀲 𑀯𑀸 𑀲𑀺𑀜𑁆𑀘𑀸𑀧𑁂𑀦𑁆𑀢𑀲𑁆𑀲 𑀯𑀸 𑀅𑀓𑀼𑀲𑀮𑀘𑀺𑀢𑁆𑀢𑁂𑀦 𑀳𑁄𑀢𑀺, ‘‘𑀆𑀲𑀦𑀁 𑀥𑁄𑀯𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑁂𑀦 𑀥𑁄𑀯𑀦𑀢𑁆𑀣𑀁 𑀲𑀺𑀜𑁆𑀘𑀦𑁆𑀢𑀲𑁆𑀲 𑀯𑀸 𑀲𑀺𑀜𑁆𑀘𑀸𑀧𑁂𑀦𑁆𑀢𑀲𑁆𑀲 𑀯𑀸 𑀓𑀼𑀲𑀮𑀘𑀺𑀢𑁆𑀢𑁂𑀦 𑀳𑁄𑀢𑀺, 𑀧𑀡𑁆𑀡𑀢𑁆𑀢𑀺𑀁 𑀅𑀚𑀸𑀦𑀢𑀸 𑀅𑀭𑀳𑀢𑀸 𑀲𑀺𑀜𑁆𑀘𑀦𑀸𑀤𑀺𑀓𑀭𑀡𑁂 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑁂𑀦 𑀳𑁄𑀢𑀻𑀢𑀺 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑀯𑀲𑁂𑀦 𑀢𑀺𑀘𑀺𑀢𑁆𑀢𑀁 𑀳𑁄𑀢𑀺.

𑀲𑀧𑁆𑀧𑀸𑀡𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀽𑀢𑀕𑀸𑀫𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀑𑀯𑀸𑀤𑀯𑀕𑁆𑀕𑁄

𑁧. 𑀑𑀯𑀸𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀲𑁆𑀲𑀸𑀢𑀺 ‘‘𑀲𑀻𑀮𑀯𑀸 𑀳𑁄𑀢𑀻’’𑀢𑀺𑀆𑀤𑀻𑀳𑀺 (𑀧𑀸𑀘𑀺. 𑁧𑁪𑁭) 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲. 𑀅𑀦𑀼𑀜𑁆𑀜𑀸𑀢𑀸𑀢𑀺 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀦𑀺𑀤𑀸𑀦𑁂 𑀅𑀦𑀼𑀜𑁆𑀜𑀸𑀢𑀸. ‘‘𑀯𑀲𑁆𑀲𑀲𑀢𑀽𑀧𑀲𑀫𑁆𑀧𑀦𑁆𑀦𑀸𑀬𑀸’’𑀢𑀺𑀆𑀤𑀺 𑀯𑀓𑁆𑀔𑀫𑀸𑀦𑀅𑀝𑁆𑀞𑀕𑀭𑀼𑀥𑀫𑁆𑀫𑀤𑀲𑁆𑀲𑀦𑀁. 𑀢𑀢𑁆𑀣 𑀲𑀸𑀫𑀻𑀘𑀺𑀓𑀫𑁆𑀫𑀦𑁆𑀢𑀺 𑀫𑀕𑁆𑀕𑀲𑀫𑁆𑀧𑀤𑀸𑀦𑀩𑀻𑀚𑀦𑀧𑀸𑀦𑀻𑀬𑀸𑀧𑀼𑀘𑁆𑀙𑀦𑀸𑀤𑀺𑀓𑀁 𑀅𑀦𑀼𑀘𑁆𑀙𑀯𑀺𑀓𑀁 𑀯𑀢𑁆𑀢𑀁. 𑀆𑀤𑀺𑀲𑀤𑁆𑀤𑁂𑀦 𑁋

‘‘𑀦 𑀪𑀺𑀓𑁆𑀔𑀼𑀦𑀺𑀬𑀸 𑀅𑀪𑀺𑀓𑁆𑀔𑀼𑀓𑁂 𑀆𑀯𑀸𑀲𑁂 𑀯𑀲𑁆𑀲𑀁 𑀯𑀲𑀺𑀢𑀩𑁆𑀩𑀁, 𑀅𑀦𑁆𑀯𑀤𑁆𑀥𑀫𑀸𑀲𑀁 𑀪𑀺𑀓𑁆𑀔𑀼𑀦𑀺𑀬𑀸 𑀪𑀺𑀓𑁆𑀔𑀼𑀲𑀗𑁆𑀖𑀢𑁄 𑀤𑁆𑀯𑁂 𑀥𑀫𑁆𑀫𑀸 𑀧𑀘𑁆𑀘𑀸𑀲𑀻𑀲𑀺𑀢𑀩𑁆𑀩𑀸 𑀉𑀧𑁄𑀲𑀣𑀧𑀼𑀘𑁆𑀙𑀓𑀜𑁆𑀘 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀜𑁆𑀘, 𑀯𑀲𑁆𑀲𑀁𑀯𑀼𑀝𑁆𑀞𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀉𑀪𑀢𑁄𑀲𑀗𑁆𑀖𑁂 𑀢𑀻𑀳𑀺 𑀞𑀸𑀦𑁂𑀳𑀺 𑀧𑀯𑀸𑀭𑁂𑀢𑀩𑁆𑀩𑀁 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸, 𑀕𑀭𑀼𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀉𑀪𑀢𑁄𑀲𑀗𑁆𑀖𑁂 𑀧𑀓𑁆𑀔𑀫𑀸𑀦𑀢𑁆𑀢𑀁 𑀘𑀭𑀺𑀢𑀩𑁆𑀩𑀁, 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀫𑀸𑀦𑀸𑀬 𑀉𑀪𑀢𑁄𑀲𑀗𑁆𑀖𑁂 𑀉𑀧𑀲𑀫𑁆𑀧𑀤𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑀸, 𑀦 𑀪𑀺𑀓𑁆𑀔𑀼𑀦𑀺𑀬𑀸 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀪𑀺𑀓𑁆𑀔𑀼 𑀅𑀓𑁆𑀓𑁄𑀲𑀺𑀢𑀩𑁆𑀩𑁄 𑀧𑀭𑀺𑀪𑀸𑀲𑀺𑀢𑀩𑁆𑀩𑁄, 𑀅𑀚𑁆𑀚𑀢𑀕𑁆𑀕𑁂 𑀑𑀯𑀝𑁄 𑀪𑀺𑀓𑁆𑀔𑀼𑀦𑀻𑀦𑀁 𑀪𑀺𑀓𑁆𑀔𑀽𑀲𑀼 𑀯𑀘𑀦𑀧𑀣𑁄, 𑀅𑀦𑁄𑀯𑀝𑁄 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀲𑀼 𑀯𑀘𑀦𑀧𑀣𑁄’’𑀢𑀺 (𑀘𑀽𑀴𑀯. 𑁪𑁦𑁩; 𑀅. 𑀦𑀺. 𑁮.𑁫𑁧) 𑁋

𑀇𑀫𑁂 𑀲𑀢𑁆𑀢 𑀥𑀫𑁆𑀫𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀕𑀭𑀼𑀥𑀫𑁆𑀫𑁂𑀢𑀺 𑀕𑀭𑀼𑀓𑁂 𑀥𑀫𑁆𑀫𑁂. 𑀢𑁂 𑀳𑀺 𑀕𑀸𑀭𑀯𑀁 𑀓𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀳𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀕𑀭𑀼𑀥𑀫𑁆𑀫𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀅𑀜𑁆𑀜𑁂𑀦 𑀯𑀸 𑀥𑀫𑁆𑀫𑁂𑀦𑀸𑀢𑀺 𑀞𑀧𑁂𑀢𑁆𑀯𑀸 𑀅𑀝𑁆𑀞 𑀕𑀭𑀼𑀥𑀫𑁆𑀫𑁂 𑀅𑀜𑁆𑀜𑁂𑀦 𑀬𑁂𑀦 𑀓𑁂𑀦𑀘𑀺 𑀥𑀫𑁆𑀫𑁂𑀦. 𑀪𑀺𑀓𑁆𑀔𑀼𑀦𑀻𑀲𑀼 𑀉𑀧𑀲𑀫𑁆𑀧𑀦𑁆𑀦𑀫𑀢𑁆𑀢𑀁 𑀯𑀸 𑀑𑀯𑀤𑀢𑁄𑀢𑀺 𑀪𑀺𑀓𑁆𑀔𑀼𑀦𑀻𑀲𑀼 𑀉𑀧𑀲𑀫𑁆𑀧𑀦𑁆𑀦𑀫𑀢𑁆𑀢𑀁 𑀕𑀭𑀼𑀥𑀫𑁆𑀫𑁂𑀦 𑀑𑀯𑀤𑀢𑁄 𑀯𑀸. 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀦𑁆𑀦𑀸𑀬 𑀬𑀣𑀸𑀯𑀢𑁆𑀣𑀼𑀓𑀫𑁂𑀯. ‘‘𑀅𑀥𑀫𑁆𑀫𑀓𑀫𑁆𑀫𑁂’’𑀢𑀺𑀆𑀤𑀻𑀲𑀼 𑀪𑀺𑀓𑁆𑀔𑀼𑀦𑁄𑀯𑀸𑀤𑀲𑀫𑁆𑀫𑀼𑀢𑀺𑀓𑀫𑁆𑀫𑀁 ‘‘𑀓𑀫𑁆𑀫’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀲𑀫𑁆𑀫𑀢𑀲𑁆𑀲𑀸𑀧𑀻’’𑀢𑀺𑀆𑀤𑀺. 𑀯𑀕𑁆𑀕𑁂 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂 𑀑𑀯𑀤𑀢𑁄 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀯𑀕𑁆𑀕𑁂 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂 𑀑𑀯𑀤𑀢𑁄 𑀯𑀕𑁆𑀕𑀲𑀜𑁆𑀜𑀺𑀯𑁂𑀫𑀢𑀺𑀓𑀲𑀫𑀕𑁆𑀕𑀲𑀜𑁆𑀜𑀻𑀦𑀁 𑀯𑀲𑁂𑀦 𑀢𑀻𑀡𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀢𑀣𑀸 𑀯𑁂𑀫𑀢𑀺𑀓𑀲𑁆𑀲 𑀘𑀸𑀢𑀺 𑀅𑀥𑀫𑁆𑀫𑀓𑀫𑁆𑀫𑁂 𑀯𑁂𑀫𑀢𑀺𑀓𑀲𑁆𑀲 𑀘 𑀯𑀕𑁆𑀕𑁂 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂 𑀑𑀯𑀤𑀢𑁄 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀺𑀦𑁄 𑀘𑀸𑀢𑀺 𑀏𑀢𑁆𑀣𑀸𑀧𑀺. 𑀬𑀣𑀸 𑀘 𑀯𑀕𑁆𑀕𑁂 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂 𑀑𑀯𑀤𑀢𑁄 𑀦𑀯 𑀧𑀸𑀘𑀺𑀢𑁆𑀢𑀺𑀬𑀸𑀦𑀺, 𑀏𑀯𑀁 𑀅𑀥𑀫𑁆𑀫𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀺𑀦𑁄 𑀲𑀫𑀕𑁆𑀕𑁂 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂 𑀑𑀯𑀤𑀢𑁄 𑀢𑀲𑁆𑀫𑀺𑀁 𑀲𑀗𑁆𑀖𑁂 𑀯𑀕𑁆𑀕𑀲𑀜𑁆𑀜𑀺𑀯𑁂𑀫𑀢𑀺𑀓𑀲𑀫𑀕𑁆𑀕𑀲𑀜𑁆𑀜𑀻𑀦𑀁 𑀯𑀲𑁂𑀦 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀢𑀣𑀸 𑀯𑁂𑀫𑀢𑀺𑀓𑀲𑁆𑀲 𑀘 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀺𑀦𑁄 𑀘𑀸𑀢𑀺 𑀦𑀯 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀢𑁂𑀦𑀸𑀳 ‘‘𑀲𑀫𑀕𑁆𑀕𑁂𑀧𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂 𑀦𑀯𑀸’’𑀢𑀺𑀆𑀤𑀺. 𑀥𑀫𑁆𑀫𑀓𑀫𑁆𑀫𑁂 𑀧𑀦 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀺𑀦𑁄 𑀯𑀕𑁆𑀕𑀁 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀑𑀯𑀤𑀢𑁄 𑀢𑀺𑀓𑀤𑀼𑀓𑁆𑀓𑀝𑀁, 𑀢𑀣𑀸 𑀯𑁂𑀫𑀢𑀺𑀓𑀲𑁆𑀲, 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀺𑀦𑁄 𑀘𑀸𑀢𑀺 𑀦𑀯 𑀤𑀼𑀓𑁆𑀓𑀝𑀸𑀦𑀺. 𑀲𑀫𑀕𑁆𑀕𑀁 𑀧𑀦 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀑𑀯𑀤𑀢𑁄 𑀅𑀝𑁆𑀞𑀸𑀢𑀺 𑀲𑀢𑁆𑀢𑀭𑀲 𑀤𑀼𑀓𑁆𑀓𑀝𑀸𑀦𑀺. 𑀢𑁂𑀦𑀸𑀳 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺. 𑀅𑀜𑁆𑀜𑀁 𑀥𑀫𑁆𑀫𑀦𑁆𑀢𑀺 𑀅𑀜𑁆𑀜𑀁 𑀲𑀼𑀢𑁆𑀢𑀦𑁆𑀢𑀁 𑀯𑀸 𑀅𑀪𑀺𑀥𑀫𑁆𑀫𑀁 𑀯𑀸. ‘‘𑀲𑀫𑀕𑁆𑀕𑀸𑀫𑁆𑀳𑀸𑀬𑁆𑀬𑀸’’𑀢𑀺 𑀯𑀘𑀦𑁂𑀦 𑀳𑀺 𑀑𑀯𑀸𑀤𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀺. 𑀢𑀲𑁆𑀫𑀸 𑀞𑀧𑁂𑀢𑁆𑀯𑀸 𑀑𑀯𑀸𑀤𑀁 𑀅𑀜𑁆𑀜𑀁 𑀥𑀫𑁆𑀫𑀁 𑀪𑀡𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀑𑀯𑀸𑀤𑀜𑁆𑀘 𑀅𑀦𑀺𑀬𑁆𑀬𑀸𑀢𑁂𑀢𑁆𑀯𑀸𑀢𑀺 ‘‘𑀏𑀲𑁄 𑀪𑀕𑀺𑀦𑀺 𑀑𑀯𑀸𑀤𑁄’’𑀢𑀺 𑀅𑀯𑀢𑁆𑀯𑀸. 𑀧𑀭𑀺𑀧𑀼𑀘𑁆𑀙𑀁 𑀤𑁂𑀢𑀻𑀢𑀺 𑀢𑀲𑁆𑀲𑀸𑀬𑁂𑀯 𑀧𑀕𑀼𑀡𑀸𑀬 𑀕𑀭𑀼𑀥𑀫𑁆𑀫𑀧𑀸𑀴𑀺𑀬𑀸 𑀅𑀢𑁆𑀣𑀁 𑀪𑀡𑀢𑀺. 𑀑𑀲𑀸𑀭𑁂𑀳𑀻𑀢𑀺 𑀉𑀘𑁆𑀘𑀸𑀭𑁂𑀳𑀺, 𑀓𑀣𑁂𑀳𑀻𑀢𑀺 𑀅𑀢𑁆𑀣𑁄. 𑀑𑀲𑀸𑀭𑁂𑀢𑀻𑀢𑀺 𑀅𑀝𑁆𑀞𑀕𑀭𑀼𑀥𑀫𑁆𑀫𑀧𑀸𑀴𑀺𑀁 𑀯𑀤𑀢𑀺. 𑀧𑀜𑁆𑀳𑀁 𑀧𑀼𑀝𑁆𑀞𑁄𑀢𑀺 𑀕𑀭𑀼𑀥𑀫𑁆𑀫𑀦𑀺𑀲𑁆𑀲𑀺𑀢𑀁 𑀯𑀸 𑀔𑀦𑁆𑀥𑀸𑀤𑀺𑀦𑀺𑀲𑁆𑀲𑀺𑀢𑀁 𑀯𑀸 𑀧𑀜𑁆𑀳𑀁 𑀪𑀺𑀓𑁆𑀔𑀼𑀦𑀺𑀬𑀸 𑀧𑀼𑀝𑁆𑀞𑁄.

𑀑𑀯𑀸𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀢𑁆𑀣𑀗𑁆𑀕𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀦𑁆𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂 𑀉𑀧𑀲𑀫𑁆𑀧𑀦𑁆𑀦𑀫𑀢𑁆𑀢𑀁. 𑀇𑀢𑁄 𑀧𑀭𑀫𑁆𑀧𑀺 𑀘 𑀬𑀢𑁆𑀣 𑀬𑀢𑁆𑀣 ‘‘𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀲𑀩𑁆𑀩𑀢𑁆𑀣 𑀅𑀬𑀫𑁂𑀯 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀅𑀢𑁆𑀣𑀗𑁆𑀕𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀁𑀯𑀸𑀲𑀸𑀬𑀸𑀢𑀺 𑀉𑀧𑁄𑀲𑀣𑀸𑀤𑀺𑀅𑀢𑁆𑀣𑀁. 𑀇𑀢𑀭𑀦𑁆𑀢𑀺 𑀉𑀪𑀢𑁄𑀲𑀗𑁆𑀖𑁂 𑀉𑀧𑀲𑀫𑁆𑀧𑀦𑁆𑀦𑀁.

𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀆𑀫𑀺𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀆𑀫𑀲𑀺𑀢𑀩𑁆𑀩𑀢𑁄 𑀆𑀫𑀺𑀲𑀁, 𑀘𑀻𑀯𑀭𑀸𑀤𑀺, 𑀆𑀫𑀺𑀲𑀫𑁂𑀯 𑀳𑁂𑀢𑀼 𑀆𑀫𑀺𑀲𑀳𑁂𑀢𑀼. 𑀢𑁂𑀦𑀸𑀳 ‘‘𑀘𑀻𑀯𑀭𑀸𑀤𑀻𑀦𑀁 𑀅𑀜𑁆𑀜𑀢𑀭𑀳𑁂𑀢𑀽’’𑀢𑀺. 𑀆𑀤𑀺𑀲𑀤𑁆𑀤𑁂𑀦 𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀲𑀓𑁆𑀓𑀸𑀭𑀕𑀭𑀼𑀓𑀸𑀭𑀫𑀸𑀦𑀦𑀯𑀦𑁆𑀤𑀦𑀧𑀽𑀚𑀦𑀸𑀦𑀁 𑀕𑀳𑀡𑀁. 𑀅𑀯𑀡𑁆𑀡𑀓𑀸𑀫𑀢𑀸𑀬𑀸𑀢𑀺 𑀅𑀬𑀲𑀓𑀸𑀫𑀢𑀸𑀬𑁂𑀯.

𑀥𑀫𑁆𑀫𑀓𑀫𑁆𑀫𑁂𑀢𑀺𑀆𑀤𑀻𑀲𑀼 𑀪𑀺𑀓𑁆𑀔𑀼𑀦𑁄𑀯𑀸𑀤𑀲𑀫𑁆𑀫𑀼𑀢𑀺𑀓𑀫𑁆𑀫𑀁 ‘‘𑀓𑀫𑁆𑀫’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀺𑀯𑁂𑀫𑀢𑀺𑀓𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀻𑀦𑀁 𑀯𑀲𑁂𑀦 𑀢𑀻𑀡𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀢𑀣𑁂𑀯 𑀅𑀥𑀫𑁆𑀫𑀓𑀫𑁆𑀫𑁂 𑀢𑀺𑀓𑀤𑀼𑀓𑁆𑀓𑀝𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀲𑀫𑁆𑀫𑀢𑀦𑁆𑀢𑀺 𑀲𑀫𑁆𑀫𑀢𑁂𑀦 𑀯𑀸 𑀲𑀗𑁆𑀖𑁂𑀦 𑀯𑀸 𑀪𑀸𑀭𑀁 𑀓𑀢𑁆𑀯𑀸 𑀞𑀧𑀺𑀢𑀁 𑀉𑀧𑀲𑀫𑁆𑀧𑀦𑁆𑀦𑀁. 𑀦𑀦𑀼 𑀑𑀯𑀸𑀤𑀲𑀫𑁆𑀫𑀼𑀢𑀺 𑀉𑀧𑀲𑀫𑁆𑀧𑀦𑁆𑀦𑀲𑁆𑀲𑁂𑀯 𑀤𑀻𑀬𑀢𑀺, 𑀦 𑀲𑀸𑀫𑀡𑁂𑀭𑀲𑁆𑀲𑀸𑀢𑀺 𑀆𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀲𑀫𑁆𑀫𑀢𑁂𑀦 𑀯𑀸 𑀲𑀗𑁆𑀖𑁂𑀦 𑀯𑀸 𑀞𑀧𑀺𑀢𑁄 𑀧𑀦 𑀩𑀳𑀼𑀲𑁆𑀲𑀼𑀢𑁄 𑀲𑀸𑀫𑀡𑁂𑀭𑁄 ‘‘𑀅𑀲𑀫𑁆𑀫𑀢𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑀓𑀢𑀺𑀬𑀸 𑀘𑀻𑀯𑀭𑀸𑀤𑀺𑀳𑁂𑀢𑀼 𑀑𑀯𑀤𑀦𑁆𑀢𑀁 𑀧𑀦 𑀏𑀯𑀁 𑀪𑀡𑀦𑁆𑀢𑀲𑁆𑀲𑀸𑀢𑀺 𑀧𑀓𑀢𑀺𑀬𑀸 𑀘𑀻𑀯𑀭𑀸𑀤𑀺𑀳𑁂𑀢𑀼 𑀑𑀯𑀤𑀦𑁆𑀢𑀁 ‘‘𑀏𑀲 𑀘𑀻𑀯𑀭𑀸𑀤𑀺𑀳𑁂𑀢𑀼 𑀑𑀯𑀤𑀢𑀻’’𑀢𑀺 𑀲𑀜𑁆𑀜𑀸𑀬 𑀏𑀯𑀁 𑀪𑀡𑀦𑁆𑀢𑀲𑁆𑀲. ‘‘𑀦 𑀘𑀻𑀯𑀭𑀸𑀤𑀺𑀳𑁂𑀢𑀼 𑀑𑀯𑀤𑀢𑀻’’𑀢𑀺 𑀲𑀜𑁆𑀜𑀸𑀬 𑀧𑀦 𑀏𑀯𑀁 𑀪𑀡𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀅𑀦𑀸𑀫𑀺𑀲𑀦𑁆𑀢𑀭𑀢𑀸𑀢𑀺 𑀆𑀫𑀺𑀲𑀘𑀺𑀢𑁆𑀢𑀸𑀪𑀸𑀯𑁄, ‘‘𑀆𑀫𑀺𑀲𑀳𑁂𑀢𑀼 𑀑𑀯𑀤𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀅𑀚𑁆𑀛𑀸𑀲𑀬𑀸𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑀧𑀭𑀺𑀬𑀸𑀬𑁄 𑀳𑁂𑀢𑁆𑀣 𑀅𑀦𑁆𑀢𑀭𑀲𑀤𑁆𑀤𑁄 ‘‘𑀬𑀲𑁆𑀲𑀦𑁆𑀢𑀭𑀢𑁄 𑀦 𑀲𑀦𑁆𑀢𑀺 𑀓𑁄𑀧𑀸’’𑀢𑀺𑀆𑀤𑀻𑀲𑀼 (𑀉𑀤𑀸. 𑁨𑁦) 𑀯𑀺𑀬.

𑀆𑀫𑀺𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀘𑀻𑀯𑀭𑀤𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀘𑀻𑀯𑀭𑀤𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀘𑀻𑀯𑀭𑀲𑀺𑀩𑁆𑀩𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀽𑀘𑀺𑀁 𑀧𑀯𑁂𑀲𑁂𑀢𑁆𑀯𑀸 𑀧𑀯𑁂𑀲𑁂𑀢𑁆𑀯𑀸 𑀦𑀻𑀳𑀭𑀡𑁂𑀢𑀺 𑀆𑀭𑀸𑀧𑀣𑁂 𑀆𑀭𑀸𑀧𑀣𑁂 𑀧𑀸𑀘𑀺𑀢𑁆𑀢𑀺𑀬𑀁. ‘‘𑀲𑀺𑀩𑁆𑀩𑀺𑀲𑁆𑀲𑀸𑀫𑀻’’𑀢𑀺 𑀧𑀦 𑀯𑀺𑀘𑀸𑀭𑁂𑀦𑁆𑀢𑀲𑁆𑀲, 𑀙𑀺𑀦𑁆𑀤𑀦𑁆𑀢𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀁. 𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀯𑀺𑀚𑁆𑀛𑀺𑀢𑁆𑀯𑀸 𑀲𑀓𑀺𑀁 𑀦𑀻𑀳𑀭𑀦𑁆𑀢𑀲𑁆𑀲𑀸𑀢𑀺 𑀲𑀓𑀮𑀲𑀽𑀘𑀺𑀁 𑀅𑀦𑀻𑀳𑀭𑀦𑁆𑀢𑁄 𑀤𑀻𑀖𑀲𑀼𑀢𑁆𑀢𑀧𑁆𑀧𑀯𑁂𑀲𑀦𑀢𑁆𑀣𑀁 𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀯𑀺𑀚𑁆𑀛𑀺𑀢𑁆𑀯𑀸 𑀲𑀓𑀺𑀁 𑀦𑀻𑀳𑀭𑀦𑁆𑀢𑀲𑁆𑀲. ‘‘𑀲𑀺𑀩𑁆𑀩𑀸’’𑀢𑀺 𑀯𑀼𑀢𑁆𑀢𑁄𑀢𑀺 𑀲𑀓𑀺𑀁 ‘‘𑀘𑀻𑀯𑀭𑀁 𑀲𑀺𑀩𑁆𑀩𑀸’’𑀢𑀺 𑀯𑀼𑀢𑁆𑀢𑁄. 𑀦𑀺𑀝𑁆𑀞𑀸𑀧𑁂𑀢𑀻𑀢𑀺 𑀲𑀩𑁆𑀩𑀁 𑀲𑀽𑀘𑀺𑀓𑀫𑁆𑀫𑀁 𑀧𑀭𑀺𑀬𑁄𑀲𑀸𑀧𑁂𑀢𑀺. 𑀢𑀲𑁆𑀲 𑀆𑀭𑀸𑀧𑀣𑁂 𑀆𑀭𑀸𑀧𑀣𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀆𑀡𑀢𑁆𑀢𑀲𑁆𑀲 𑀲𑀽𑀘𑀺𑀁 𑀧𑀯𑁂𑀲𑁂𑀢𑁆𑀯𑀸 𑀧𑀯𑁂𑀲𑁂𑀢𑁆𑀯𑀸 𑀦𑀻𑀳𑀭𑀡𑁂 𑀏𑀓𑀫𑁂𑀓𑀁 𑀧𑀸𑀘𑀺𑀢𑁆𑀢𑀺𑀬𑀁.

𑀉𑀤𑀸𑀬𑀺𑀢𑁆𑀣𑁂𑀭𑀦𑁆𑀢𑀺 𑀮𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑀁. 𑀯𑀼𑀢𑁆𑀢𑀮𑀓𑁆𑀔𑀡𑀁 𑀲𑀺𑀩𑁆𑀩𑀦𑀁 𑀯𑀸 𑀲𑀺𑀩𑁆𑀩𑀸𑀧𑀦𑀁 𑀯𑀸𑀢𑀺 ‘‘𑀲𑀽𑀘𑀺𑀁 𑀧𑀯𑁂𑀲𑁂𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀮𑀓𑁆𑀔𑀡𑀁 𑀲𑀺𑀩𑁆𑀩𑀦𑀁 𑀯𑀸 𑀲𑀺𑀩𑁆𑀩𑀸𑀧𑀦𑀁 𑀯𑀸.

𑀘𑀻𑀯𑀭𑀲𑀺𑀩𑁆𑀩𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀁𑀯𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀁𑀯𑀺𑀤𑀳𑀺𑀢𑁆𑀯𑀸𑀢𑀺 ‘‘𑀏𑀳𑀺, 𑀅𑀲𑀼𑀓𑀕𑀸𑀫𑀁 𑀕𑀘𑁆𑀙𑀸𑀫𑀸’’𑀢𑀺 𑀯𑀸 ‘‘𑀲𑁆𑀯𑁂 𑀅𑀳𑀁 𑀕𑀘𑁆𑀙𑀸𑀫𑀺, 𑀢𑁆𑀯𑀫𑁆𑀧𑀺 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀯𑀸 𑀯𑀢𑁆𑀯𑀸. 𑀢𑀜𑁆𑀘 𑀔𑁄 𑀲𑀁𑀯𑀺𑀤𑀳𑀦𑀁 𑀅𑀢𑁆𑀣𑀢𑁄 𑀲𑀗𑁆𑀓𑁂𑀢𑀓𑀫𑁆𑀫𑀦𑁆𑀢𑀺 𑀆𑀳 ‘‘𑀕𑀫𑀦𑀓𑀸𑀮𑁂 𑀲𑀗𑁆𑀓𑁂𑀢𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄’’𑀢𑀺. 𑀅𑀓𑀧𑁆𑀧𑀺𑀬𑀪𑀽𑀫𑀺𑀬𑀁 𑀲𑀁𑀯𑀺𑀤𑀳𑀦𑁆𑀢𑀲𑁆𑀲𑀸𑀢𑀺 𑀅𑀦𑁆𑀢𑁄𑀕𑀸𑀫𑁂, 𑀪𑀺𑀓𑁆𑀔𑀼𑀦𑀺𑀉𑀧𑀲𑁆𑀲𑀬𑀤𑁆𑀯𑀸𑀭𑁂, 𑀭𑀣𑀺𑀓𑀸𑀬, 𑀅𑀜𑁆𑀜𑁂𑀲𑀼 𑀯𑀸 𑀘𑀢𑀼𑀓𑁆𑀓𑀲𑀺𑀗𑁆𑀖𑀸𑀝𑀓𑀳𑀢𑁆𑀣𑀺𑀲𑀸𑀮𑀸𑀤𑀻𑀲𑀼 𑀞𑀢𑁆𑀯𑀸 𑀲𑀁𑀯𑀺𑀤𑀳𑀦𑁆𑀢𑀲𑁆𑀲. 𑀢𑁂𑀦𑀸𑀳 ‘‘𑀢𑀢𑁆𑀣 𑀞𑀧𑁂𑀢𑁆𑀯𑀸’’𑀢𑀺𑀆𑀤𑀺. 𑀆𑀲𑀦𑁆𑀦𑀲𑁆𑀲𑀸𑀧𑀻𑀢𑀺 𑀅𑀘𑁆𑀘𑀸𑀲𑀦𑁆𑀦𑀲𑁆𑀲𑀸𑀧𑀺, 𑀭𑀢𑀦𑀫𑀢𑁆𑀢𑀦𑁆𑀢𑀭𑀲𑁆𑀲𑀸𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀜𑁆𑀜𑀲𑁆𑀲 𑀕𑀸𑀫𑀲𑁆𑀲𑀸𑀢𑀺 𑀬𑀢𑁄 𑀦𑀺𑀓𑁆𑀔𑀫𑀢𑀺, 𑀢𑀢𑁄 𑀅𑀜𑁆𑀜𑀲𑁆𑀲 𑀕𑀸𑀫𑀲𑁆𑀲. 𑀢𑀁 𑀑𑀓𑁆𑀓𑀫𑀦𑁆𑀢𑀲𑁆𑀲𑀸𑀢𑀺 𑀢𑀁 𑀅𑀦𑁆𑀢𑀭𑀕𑀸𑀫𑀲𑁆𑀲 𑀉𑀧𑀘𑀸𑀭𑀁 𑀑𑀓𑁆𑀓𑀫𑀦𑁆𑀢𑀲𑁆𑀲. 𑀲𑀘𑁂 𑀤𑀽𑀭𑀁 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀕𑀸𑀫𑀽𑀧𑀘𑀸𑀭𑀕𑀡𑀦𑀸𑀬 𑀑𑀓𑁆𑀓𑀫𑀦𑁆𑀢𑁂 𑀑𑀓𑁆𑀓𑀫𑀦𑁆𑀢𑁂 𑀧𑀼𑀭𑀺𑀫𑀦𑀬𑁂𑀦𑁂𑀯 𑀆𑀧𑀢𑁆𑀢𑀺. 𑀢𑁂𑀦𑀸𑀳 ‘‘𑀇𑀢𑀺 𑀕𑀸𑀫𑀽𑀧𑀘𑀸𑀭𑁄𑀓𑁆𑀓𑀫𑀦𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀸𑀦𑀻’’𑀢𑀺. 𑀢𑀲𑁆𑀲 𑀢𑀲𑁆𑀲 𑀧𑀦 𑀕𑀸𑀫𑀲𑁆𑀲 𑀅𑀢𑀺𑀓𑁆𑀓𑀫𑀦𑁂 𑀅𑀦𑀸𑀧𑀢𑁆𑀢𑀺. 𑀕𑀸𑀫𑁂 𑀅𑀲𑀢𑀻𑀢𑀺 𑀅𑀤𑁆𑀥𑀬𑁄𑀚𑀦𑀩𑁆𑀪𑀦𑁆𑀢𑀭𑁂 𑀕𑀸𑀫𑁂 𑀅𑀲𑀢𑀺. 𑀢𑀲𑁆𑀫𑀺𑀁 𑀧𑀦 𑀕𑀸𑀫𑁂 𑀲𑀢𑀺 𑀕𑀸𑀫𑀦𑁆𑀢𑀭𑀕𑀡𑀦𑀸𑀬𑁂𑀯 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀅𑀤𑁆𑀥𑀬𑁄𑀚𑀦𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀤𑁆𑀥𑀬𑁄𑀚𑀦𑁂 𑀅𑀤𑁆𑀥𑀬𑁄𑀚𑀦𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀏𑀓𑀫𑁂𑀓𑀁 𑀅𑀤𑁆𑀥𑀬𑁄𑀚𑀦𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲 ‘‘𑀇𑀤𑀸𑀦𑀺 𑀅𑀢𑀺𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺 𑀧𑀞𑀫𑀧𑀸𑀤𑁂 𑀤𑀼𑀓𑁆𑀓𑀝𑀁, 𑀤𑀼𑀢𑀺𑀬𑀧𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀜𑁆𑀳𑀺 𑀦𑀬𑁂 𑀅𑀢𑀺𑀓𑁆𑀓𑀫𑀦𑁂 𑀆𑀧𑀢𑁆𑀢𑀺, 𑀑𑀓𑁆𑀓𑀫𑀦𑁂 𑀅𑀦𑀸𑀧𑀢𑁆𑀢𑀺.

𑀯𑀺𑀲𑀗𑁆𑀓𑁂𑀢𑁂𑀦𑀸𑀢𑀺 (𑀧𑀸𑀘𑀺. 𑀅𑀝𑁆𑀞. 𑁧𑁮𑁫) 𑀏𑀢𑁆𑀣 ‘‘𑀧𑀼𑀭𑁂𑀪𑀢𑁆𑀢𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀕𑀘𑁆𑀙𑀦𑁆𑀢𑀺, ‘‘𑀅𑀚𑁆𑀚 𑀯𑀸 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀲𑁆𑀯𑁂 𑀕𑀘𑁆𑀙𑀦𑁆𑀢𑀺, 𑀏𑀯𑀁 𑀓𑀸𑀮𑀯𑀺𑀲𑀗𑁆𑀓𑁂𑀢𑁂𑀬𑁂𑀯 𑀅𑀦𑀸𑀧𑀢𑁆𑀢𑀺. 𑀤𑁆𑀯𑀸𑀭𑀯𑀺𑀲𑀗𑁆𑀓𑁂𑀢𑁂, 𑀧𑀦 𑀫𑀕𑁆𑀕𑀯𑀺𑀲𑀗𑁆𑀓𑁂𑀢𑁂, 𑀯𑀸 𑀲𑀢𑀺𑀧𑀺 𑀆𑀧𑀢𑁆𑀢𑀺𑀬𑁂𑀯. 𑀆𑀧𑀤𑀸𑀲𑀽𑀢𑀺 𑀭𑀝𑁆𑀞𑀪𑁂𑀤𑁂 𑀘𑀓𑁆𑀓𑀲𑀫𑀸𑀭𑀼𑀴𑁆𑀳𑀸 𑀚𑀸𑀦𑀧𑀤𑀸 𑀧𑀭𑀺𑀬𑀸𑀬𑀦𑁆𑀢𑀺, 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀅𑀦𑀸𑀧𑀢𑁆𑀢𑀺. 𑀘𑀓𑁆𑀓𑀲𑀫𑀸𑀭𑀼𑀴𑁆𑀳𑀸𑀢𑀺 𑀘 𑀇𑀭𑀺𑀬𑀸𑀧𑀣𑀘𑀓𑁆𑀓𑀁 𑀯𑀸 𑀲𑀓𑀝𑀘𑀓𑁆𑀓𑀁 𑀯𑀸 𑀲𑀫𑀸𑀭𑀼𑀴𑁆𑀳𑀸𑀢𑀺 𑀅𑀢𑁆𑀣𑁄. 𑀫𑀸𑀢𑀼𑀕𑀸𑀫𑀲𑀺𑀓𑁆𑀔𑀸𑀧𑀤𑁂𑀦𑀸𑀢𑀺 (𑀧𑀸𑀘𑀺. 𑁪𑁧𑁩 𑀆𑀤𑀬𑁄) 𑀲𑀧𑁆𑀧𑀸𑀡𑀓𑀯𑀕𑁆𑀕𑁂 𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑁂𑀦.

𑀲𑀁𑀯𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀦𑀸𑀯𑀸𑀪𑀺𑀭𑀼𑀳𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀓𑀻𑀴𑀸𑀧𑀼𑀭𑁂𑀓𑁆𑀔𑀸𑀭𑁄𑀢𑀺 𑀮𑁄𑀓𑀲𑁆𑀲𑀸𑀤𑀫𑀺𑀢𑁆𑀢𑀲𑀦𑁆𑀣𑀯𑀯𑀲𑁂𑀦 𑀓𑀻𑀴𑀸𑀧𑀼𑀭𑁂𑀓𑁆𑀔𑀸𑀭𑁄. 𑀢𑀣𑁂𑀯𑀸𑀢𑀺 𑀓𑀻𑀴𑀸𑀯𑀲𑁂𑀦𑁂𑀯. 𑀅𑀕𑀸𑀫𑀓𑀢𑀻𑀭𑀧𑀲𑁆𑀲𑁂𑀦𑀸𑀢𑀺 𑀅𑀤𑁆𑀥𑀬𑁄𑀚𑀦𑀩𑁆𑀪𑀦𑁆𑀢𑀭𑁂 𑀕𑀸𑀫𑀸𑀦𑀁 𑀅𑀪𑀸𑀯𑀢𑁄 𑀅𑀕𑀸𑀫𑀓𑀢𑀻𑀭𑀧𑀲𑁆𑀲𑁂𑀦. 𑀧𑀸𑀴𑀺𑀬𑀁 ‘‘𑀉𑀤𑁆𑀥𑀁𑀕𑀸𑀫𑀺𑀦𑀺𑀁 𑀯𑀸 𑀅𑀥𑁄𑀕𑀸𑀫𑀺𑀦𑀺𑀁 𑀯𑀸’’𑀢𑀺 (𑀧𑀸𑀘𑀺. 𑁧𑁮𑁬) 𑀯𑀘𑀦𑀢𑁄 𑀧𑀦 𑀯𑀸𑀧𑀺𑀲𑀫𑀼𑀤𑁆𑀤𑀸𑀤𑀻𑀲𑀼 𑀓𑀻𑀴𑀸𑀧𑀼𑀭𑁂𑀓𑁆𑀔𑀸𑀭𑀢𑀸𑀬𑀧𑀺 𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀢𑁂𑀦𑀸𑀳 ‘‘𑀲𑀫𑀼𑀤𑁆𑀤𑁂 𑀧𑀦 𑀬𑀣𑀸𑀲𑀼𑀔𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀯𑀺𑀲𑀗𑁆𑀓𑁂𑀢𑁂𑀦𑀸𑀢𑀺 𑀇𑀥𑀸𑀧𑀺 𑀓𑀸𑀮𑀯𑀺𑀲𑀗𑁆𑀓𑁂𑀢𑁂𑀦𑁂𑀯 𑀅𑀦𑀸𑀧𑀢𑁆𑀢𑀺, 𑀢𑀺𑀢𑁆𑀣𑀯𑀺𑀲𑀗𑁆𑀓𑁂𑀢𑁂𑀦, 𑀧𑀦 𑀦𑀸𑀯𑀸𑀯𑀺𑀲𑀗𑁆𑀓𑁂𑀢𑁂𑀦 𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁂𑀯.

𑀲𑁂𑀲𑀦𑁆𑀢𑀺 𑀲𑀤𑁆𑀥𑀺𑀁 𑀲𑀫𑀼𑀝𑁆𑀞𑀸𑀦𑀸𑀤𑀻𑀳𑀺 𑀅𑀯𑀲𑁂𑀲𑀁, 𑀓𑁂𑀘𑀺 𑀧𑀦 ‘‘𑀓𑀻𑀴𑀸𑀧𑀼𑀭𑁂𑀓𑁆𑀔𑀸𑀭𑁄 ‘𑀲𑀁𑀯𑀺𑀤𑀳𑀺𑀢𑁆𑀯𑀸’𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁧𑁮𑁮) 𑀯𑀘𑀦𑀢𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀅𑀓𑀼𑀲𑀮𑀘𑀺𑀢𑁆𑀢𑀁 𑀮𑁄𑀓𑀯𑀚𑁆𑀚𑀁, 𑀢𑀲𑁆𑀫𑀸 𑀲𑁂𑀲𑀁 𑀦𑀸𑀫 𑀞𑀧𑁂𑀢𑁆𑀯𑀸 ‘𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁 𑀢𑀺𑀘𑀺𑀢𑁆𑀢’𑀦𑁆𑀢𑀺 𑀇𑀤𑀁 𑀤𑁆𑀯𑀬𑀁 𑀅𑀯𑀲𑁂𑀲’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀓𑀻𑀴𑀸𑀧𑀼𑀭𑁂𑀓𑁆𑀔𑀸𑀭𑀢𑀸𑀬 𑀳𑀺 𑀅𑀪𑀺𑀭𑀼𑀳𑀺𑀢𑁆𑀯𑀸𑀧𑀺 𑀕𑀸𑀫𑀦𑁆𑀢𑀭𑁄𑀓𑁆𑀓𑀫𑀦𑁂, 𑀅𑀤𑁆𑀥𑀬𑁄𑀚𑀦𑀸𑀢𑀺𑀓𑁆𑀓𑀫𑁂 𑀯𑀸 𑀲𑀁𑀯𑁂𑀕𑀁 𑀧𑀝𑀺𑀮𑀪𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀯𑀸 𑀲𑀘𑁆𑀙𑀺𑀓𑀭𑁂𑀬𑁆𑀬, 𑀦𑀺𑀤𑁆𑀤𑀁 𑀯𑀸 𑀑𑀓𑁆𑀓𑀫𑁂𑀬𑁆𑀬, 𑀓𑀫𑁆𑀫𑀝𑁆𑀞𑀸𑀦𑀁 𑀯𑀸 𑀫𑀦𑀲𑀺 𑀓𑀭𑁄𑀦𑁆𑀢𑁄 𑀕𑀘𑁆𑀙𑁂𑀬𑁆𑀬, 𑀓𑀼𑀢𑁄 𑀘𑀲𑁆𑀲 𑀅𑀓𑀼𑀲𑀮𑀘𑀺𑀢𑁆𑀢𑀲𑀫𑀗𑁆𑀕𑀺𑀢𑀸, 𑀬𑁂𑀦𑀺𑀤𑀁 𑀲𑀺𑀓𑁆𑀔𑀸𑀧𑀤𑀁 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀮𑁄𑀓𑀯𑀚𑁆𑀚𑀜𑁆𑀘 𑀲𑀺𑀬𑀸𑀢𑀺.

𑀦𑀸𑀯𑀸𑀪𑀺𑀭𑀼𑀳𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀭𑀺𑀧𑀸𑀘𑀺𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀭𑀺𑀧𑀸𑀘𑀺𑀢𑀦𑁆𑀢𑀺 𑀧𑀭𑀺𑀧𑀸𑀓𑀫𑀸𑀧𑀸𑀤𑀺𑀢𑀁, 𑀬𑀣𑀸 𑀮𑀪𑀢𑀺, 𑀢𑀣𑀸 𑀓𑀢𑁆𑀯𑀸 𑀞𑀧𑀺𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀦𑁂𑀯 𑀢𑀲𑁆𑀲𑀸’’𑀢𑀺𑀆𑀤𑀺 𑀢𑀲𑁆𑀲𑀸𑀢𑀺 𑀬𑁄 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀪𑀺𑀓𑁆𑀔𑀼𑀲𑁆𑀲 𑀕𑀼𑀡𑀁 𑀧𑀓𑀸𑀲𑁂𑀢𑁆𑀯𑀸𑀢𑀺 ‘‘𑀅𑀬𑁆𑀬𑁄 𑀪𑀸𑀡𑀓𑁄, 𑀅𑀬𑁆𑀬𑁄 𑀩𑀳𑀼𑀲𑁆𑀲𑀼𑀢𑁄’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁧𑁯𑁫) 𑀕𑀼𑀡𑀁 𑀧𑀓𑀸𑀲𑁂𑀢𑁆𑀯𑀸. 𑀧𑀺𑀡𑁆𑀟𑀧𑀸𑀢𑀦𑁆𑀢𑀺 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑀁. 𑀓𑀫𑁆𑀫𑀲𑀸𑀥𑀦𑁄𑀬𑀁 𑀲𑀫𑀸𑀭𑀫𑁆𑀪𑀲𑀤𑁆𑀤𑁄𑀢𑀺 𑀆𑀳 ‘‘𑀲𑀫𑀸𑀭𑀤𑁆𑀥’’𑀦𑁆𑀢𑀺. 𑀧𑀝𑀺𑀬𑀸𑀤𑀺𑀢𑀲𑁆𑀲𑀸𑀢𑀺 𑀲𑀫𑁆𑀧𑀸𑀤𑀺𑀢𑀲𑁆𑀲. 𑀬𑀲𑁆𑀫𑀸 𑀜𑀸𑀢𑀓𑀧𑁆𑀧𑀯𑀸𑀭𑀺𑀢𑁂𑀳𑀺 𑀪𑀺𑀓𑁆𑀔𑀼𑀲𑁆𑀲 𑀅𑀢𑁆𑀣𑀸𑀬 𑀅𑀲𑀫𑀸𑀭𑀤𑁆𑀥𑁄𑀧𑀺 𑀧𑀺𑀡𑁆𑀟𑀧𑀸𑀢𑁄 𑀅𑀢𑁆𑀣𑀢𑁄 𑀲𑀫𑀸𑀭𑀤𑁆𑀥𑁄𑀯 𑀳𑁄𑀢𑀺 𑀬𑀣𑀸𑀲𑀼𑀔𑀁 𑀳𑀭𑀸𑀧𑁂𑀢𑀩𑁆𑀩𑀢𑁄, 𑀢𑀲𑁆𑀫𑀸 ‘‘𑀜𑀸𑀢𑀓𑀧𑁆𑀧𑀯𑀸𑀭𑀺𑀢𑀸𑀦𑀁 𑀯𑀸 𑀲𑀦𑁆𑀢𑀓’’𑀦𑁆𑀢𑀺 𑀯𑀼𑀢𑁆𑀢𑀁.