𑀧𑀸𑀝𑀺𑀤𑁂𑀲𑀦𑀻𑀬𑀓𑀡𑁆𑀟𑀁

𑁧. 𑀧𑀞𑀫𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑀸𑀬𑀸𑀢𑀺 𑀭𑀣𑀺𑀓𑀁 𑀩𑁆𑀬𑀽𑀳𑀁 𑀲𑀺𑀗𑁆𑀖𑀸𑀝𑀓𑀁 𑀖𑀭𑀁 𑀧𑀯𑀺𑀝𑁆𑀞𑀸𑀬. 𑀅𑀲𑀧𑁆𑀧𑀸𑀬𑀦𑁆𑀢𑀺 𑀲𑀕𑁆𑀕𑀫𑁄𑀓𑁆𑀔𑀸𑀦𑀁 𑀅𑀳𑀺𑀢𑀁 𑀅𑀦𑀦𑀼𑀓𑀽𑀮𑀁. 𑀪𑀺𑀓𑁆𑀔𑀼𑀦𑀺𑀬𑀸 𑀅𑀦𑁆𑀢𑀭𑀖𑀭𑁂 𑀞𑀢𑁆𑀯𑀸 𑀤𑀤𑀫𑀸𑀦𑀸𑀬 𑀯𑀲𑁂𑀦𑁂𑀢𑁆𑀣 𑀆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀪𑀺𑀓𑁆𑀔𑀼𑀲𑁆𑀲 𑀞𑀺𑀢𑀝𑁆𑀞𑀸𑀦𑀁 𑀧𑀦 𑀅𑀧𑁆𑀧𑀫𑀸𑀡𑀁. 𑀢𑁂𑀦𑀸𑀳 ‘‘𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑀸𑀬𑀸𑀢𑀺 𑀯𑀘𑀦𑀢𑁄’’𑀢𑀺𑀆𑀤𑀺. 𑀅𑀦𑁆𑀢𑀭𑀸𑀭𑀸𑀫𑀸𑀤𑀻𑀲𑀽𑀢𑀺 𑀅𑀦𑁆𑀢𑀭𑀸𑀭𑀸𑀫𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀢𑀺𑀢𑁆𑀣𑀺𑀬𑀲𑁂𑀬𑁆𑀬𑀸𑀧𑀝𑀺𑀓𑁆𑀓𑀫𑀦𑁂𑀲𑀼. 𑀭𑀣𑀺𑀬𑀸𑀩𑁆𑀬𑀽𑀳𑀲𑀺𑀗𑁆𑀖𑀸𑀝𑀓𑀖𑀭𑀸𑀦𑀦𑁆𑀢𑀺 𑀏𑀢𑁆𑀣 𑀭𑀣𑀺𑀬𑀸𑀢𑀺 𑀭𑀘𑁆𑀙𑀸. 𑀩𑁆𑀬𑀽𑀳𑀦𑁆𑀢𑀺 𑀅𑀦𑀺𑀩𑁆𑀩𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑀸 𑀕𑀢𑀧𑀘𑁆𑀘𑀸𑀕𑀢𑀭𑀘𑁆𑀙𑀸. 𑀲𑀺𑀗𑁆𑀖𑀸𑀝𑀓𑀦𑁆𑀢𑀺 𑀘𑀢𑀼𑀓𑁆𑀓𑁄𑀡𑀁 𑀯𑀸 𑀢𑀺𑀓𑁄𑀡𑀁 𑀯𑀸 𑀫𑀕𑁆𑀕𑀲𑀫𑁄𑀥𑀸𑀦𑀝𑁆𑀞𑀸𑀦𑀁. 𑀖𑀭𑀦𑁆𑀢𑀺 𑀓𑀼𑀮𑀖𑀭𑀁. 𑀬𑀣𑀸 𑀘 𑀭𑀣𑀺𑀬𑀸𑀤𑀻𑀲𑀼 𑀞𑀢𑁆𑀯𑀸 𑀤𑀤𑀫𑀸𑀦𑀸𑀬 𑀕𑀡𑁆𑀳𑀢𑁄 𑀆𑀧𑀢𑁆𑀢𑀺, 𑀏𑀯𑀁 𑀳𑀢𑁆𑀣𑀺𑀲𑀸𑀮𑀸𑀤𑀻𑀲𑀼𑀧𑀺 𑀤𑀝𑁆𑀞𑀩𑁆𑀩𑀁.

‘‘𑀬𑀸𑀫𑀓𑀸𑀮𑀺𑀓𑀸𑀤𑀻𑀲𑀼 𑀧𑀝𑀺𑀕𑁆𑀕𑀳𑀡𑁂𑀧𑀺 𑀅𑀚𑁆𑀛𑁄𑀳𑀭𑀡𑁂𑀧𑀺 𑀤𑀼𑀓𑁆𑀓𑀝’’𑀦𑁆𑀢𑀺 𑀇𑀤𑀁 𑀆𑀫𑀺𑀲𑁂𑀦 𑀅𑀲𑀫𑁆𑀪𑀺𑀦𑁆𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀲𑀫𑁆𑀪𑀺𑀦𑁆𑀦𑁂 𑀧𑀦 𑀏𑀓𑀭𑀲𑁂 𑀧𑀸𑀝𑀺𑀤𑁂𑀲𑀦𑀻𑀬𑀫𑁂𑀯. 𑀏𑀓𑀢𑁄 𑀉𑀧𑀲𑀫𑁆𑀧𑀦𑁆𑀦𑀸𑀬𑀸𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀦𑁆𑀦𑀸𑀬, 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀦𑁆𑀦𑀸𑀬 𑀧𑀦 𑀬𑀣𑀸𑀯𑀢𑁆𑀣𑀼𑀓𑀫𑁂𑀯.

𑀜𑀸𑀢𑀺𑀓𑀸𑀬 𑀯𑀸 𑀤𑀸𑀧𑁂𑀦𑁆𑀢𑀺𑀬𑀸𑀢𑀺 𑀲𑀬𑀁 𑀅𑀤𑀢𑁆𑀯𑀸 𑀬𑀸𑀬 𑀓𑀸𑀬𑀘𑀺 𑀜𑀸𑀢𑀺𑀓𑀸𑀬 𑀤𑀸𑀧𑁂𑀦𑁆𑀢𑀺𑀬𑀸, 𑀅𑀜𑁆𑀜𑀸𑀢𑀺𑀓𑀸𑀬𑀸𑀢𑀺 𑀅𑀢𑁆𑀣𑁄. 𑀉𑀧𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀸 𑀤𑀤𑀫𑀸𑀦𑀸𑀬𑀸𑀢𑀺 𑀪𑀽𑀫𑀺𑀬𑀁 𑀞𑀧𑁂𑀢𑁆𑀯𑀸 ‘‘𑀇𑀤𑀁, 𑀅𑀬𑁆𑀬, 𑀢𑀼𑀫𑁆𑀳𑀸𑀓𑀁 𑀤𑀫𑁆𑀫𑀻’’𑀢𑀺 𑀤𑀤𑀫𑀸𑀦𑀸𑀬. 𑀏𑀯𑀁 𑀤𑀺𑀦𑁆𑀦𑀁 ‘‘𑀲𑀸𑀥𑀼, 𑀪𑀕𑀺𑀦𑀻’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀸𑀬 𑀏𑀯 𑀯𑀸 𑀪𑀺𑀓𑁆𑀔𑀼𑀦𑀺𑀬𑀸, 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 𑀧𑀝𑀺𑀕𑁆𑀕𑀳𑀸𑀧𑁂𑀢𑁆𑀯𑀸 𑀇𑀤𑀁 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺.

𑀧𑀞𑀫𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀬𑁄 𑀘 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀢𑁆𑀢𑀦𑁄 𑀯𑀸 𑀪𑀢𑁆𑀢𑀁 𑀤𑀸𑀧𑁂𑀦𑁆𑀢𑀺𑀬𑀸𑀢𑀺 𑀏𑀢𑁆𑀣 𑀲𑀘𑁂𑀧𑀺 𑀅𑀢𑁆𑀢𑀦𑁄 𑀪𑀢𑁆𑀢𑀁 𑀤𑁂𑀢𑀺, 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀅𑀦𑀸𑀧𑀢𑁆𑀢𑀺𑀬𑁂𑀯, 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂𑀦 𑀆𑀧𑀢𑁆𑀢𑀺. 𑀅𑀜𑁆𑀜𑁂𑀲𑀁 𑀯𑀸 𑀪𑀢𑁆𑀢𑀁 𑀤𑁂𑀦𑁆𑀢𑀺𑀬𑀸𑀢𑀺 𑀏𑀢𑁆𑀣 𑀧𑀦 𑀲𑀘𑁂 𑀤𑀸𑀧𑁂𑀬𑁆𑀬, 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀆𑀧𑀢𑁆𑀢𑀺 𑀪𑀯𑁂𑀬𑁆𑀬, 𑀤𑁂𑀦𑁆𑀢𑀺𑀬𑀸 𑀧𑀦 𑀦𑁂𑀯 𑀇𑀫𑀺𑀦𑀸, 𑀦 𑀧𑀼𑀭𑀺𑀫𑁂𑀦 𑀆𑀧𑀢𑁆𑀢𑀺.

𑀤𑀼𑀢𑀺𑀬𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀢𑀺𑀬𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀮𑀤𑁆𑀥𑀲𑁂𑀓𑁆𑀔𑀲𑀫𑁆𑀫𑀼𑀢𑀺𑀓𑀸𑀦𑀻𑀢𑀺 𑀜𑀢𑁆𑀢𑀺𑀤𑀼𑀢𑀺𑀬𑁂𑀦 𑀓𑀫𑁆𑀫𑁂𑀦 𑀮𑀤𑁆𑀥𑀲𑁂𑀓𑁆𑀔𑀲𑀫𑁆𑀫𑀼𑀢𑀺𑀓𑀸𑀦𑀺. 𑀬𑀜𑁆𑀳𑀺 𑀓𑀼𑀮𑀁 𑀲𑀤𑁆𑀥𑀸𑀬 𑀯𑀟𑁆𑀠𑀢𑀺, 𑀪𑁄𑀕𑁂𑀦 𑀳𑀸𑀬𑀢𑀺, 𑀏𑀯𑀭𑀽𑀧𑀲𑁆𑀲 𑀓𑀼𑀮𑀲𑁆𑀲 𑀜𑀢𑁆𑀢𑀺𑀤𑀼𑀢𑀺𑀬𑁂𑀦 𑀓𑀫𑁆𑀫𑁂𑀦 𑀲𑁂𑀓𑁆𑀔𑀲𑀫𑁆𑀫𑀼𑀢𑀺𑀁 𑀤𑁂𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀖𑀭𑀢𑁄 𑀦𑀻𑀳𑀭𑀺𑀢𑁆𑀯𑀸𑀢𑀺 𑀖𑀭𑀢𑁄 𑀆𑀲𑀦𑀲𑀸𑀮𑀁 𑀯𑀸 𑀯𑀺𑀳𑀸𑀭𑀁 𑀯𑀸 𑀆𑀦𑁂𑀢𑁆𑀯𑀸. 𑀢𑁂𑀦𑀸𑀳 ‘‘𑀆𑀲𑀦𑀲𑀸𑀮𑀸𑀤𑀻𑀲𑀼 𑀯𑀸’’𑀢𑀺. 𑀇𑀫𑀲𑁆𑀲 ‘‘𑀤𑁂𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀤𑁆𑀯𑀸𑀭𑀫𑀽𑀮𑁂 𑀯𑀸 𑀞𑀧𑀺𑀢𑀁 𑀤𑁂𑀦𑁆𑀢𑀻𑀢𑀺 𑀤𑁆𑀯𑀸𑀭𑀫𑀽𑀮𑁂 𑀞𑀧𑀺𑀢𑀁 𑀧𑀘𑁆𑀙𑀸 𑀲𑀫𑁆𑀧𑀢𑁆𑀢𑀲𑁆𑀲 𑀤𑁂𑀦𑁆𑀢𑀺. 𑀪𑀺𑀓𑁆𑀔𑀼𑀁 𑀧𑀦 𑀤𑀺𑀲𑁆𑀯𑀸 𑀅𑀦𑁆𑀢𑁄𑀕𑁂𑀳𑀢𑁄 𑀦𑀻𑀳𑀭𑀺𑀢𑁆𑀯𑀸 𑀤𑀺𑀬𑁆𑀬𑀫𑀸𑀦𑀁 𑀦 𑀯𑀝𑁆𑀝𑀢𑀺. 𑀦𑀺𑀘𑁆𑀘𑀪𑀢𑁆𑀢𑀓𑁂𑀢𑀺 𑀦𑀺𑀘𑁆𑀘𑀁 𑀤𑀸𑀢𑀩𑁆𑀩𑀪𑀢𑁆𑀢𑀓𑁂. 𑀲𑀮𑀸𑀓𑀪𑀢𑁆𑀢𑁂𑀢𑀺 𑀭𑀼𑀓𑁆𑀔𑀲𑀸𑀭𑀫𑀬𑀸𑀬 𑀲𑀮𑀸𑀓𑀸𑀬 𑀯𑀸 𑀯𑁂𑀴𑀼𑀯𑀺𑀮𑀻𑀯𑀢𑀸𑀮𑀧𑀡𑁆𑀡𑀸𑀤𑀺𑀫𑀬𑀸𑀬 𑀧𑀝𑁆𑀝𑀺𑀓𑀸𑀬 𑀯𑀸 ‘‘𑀅𑀲𑀼𑀓𑀲𑁆𑀲 𑀦𑀸𑀫 𑀲𑀮𑀸𑀓𑀪𑀢𑁆𑀢’’𑀦𑁆𑀢𑀺 𑀏𑀯𑀁 𑀅𑀓𑁆𑀔𑀭𑀸𑀦𑀺 𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸 𑀕𑀸𑀳𑀸𑀧𑁂𑀢𑁆𑀯𑀸 𑀤𑀸𑀢𑀩𑁆𑀩𑀪𑀢𑁆𑀢𑁂. 𑀧𑀓𑁆𑀔𑀺𑀓𑁂𑀢𑀺 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀏𑀓𑀤𑀺𑀯𑀲𑁂 𑀤𑀸𑀢𑀩𑁆𑀩𑀪𑀢𑁆𑀢𑁂. 𑀉𑀧𑁄𑀲𑀣𑀺𑀓𑁂𑀢𑀺 𑀉𑀧𑁄𑀲𑀣𑁂 𑀤𑀸𑀢𑀩𑁆𑀩𑀪𑀢𑁆𑀢𑁂. 𑀧𑀸𑀝𑀺𑀧𑀤𑀺𑀓𑁂𑀢𑀺 𑀧𑀸𑀝𑀺𑀧𑀤𑀤𑀺𑀯𑀲𑁂 𑀤𑀸𑀢𑀩𑁆𑀩𑀪𑀢𑁆𑀢𑁂.

𑀢𑀢𑀺𑀬𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀢𑀼𑀢𑁆𑀣𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀲𑁆𑀲 𑀧𑀭𑀺𑀯𑀸𑀭𑀁 𑀓𑀢𑁆𑀯𑀸, 𑀅𑀜𑁆𑀜𑀁 𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀩𑀳𑀼𑀓𑀫𑁆𑀧𑀻𑀢𑀺 𑀬𑀸𑀕𑀼𑀬𑀸 𑀧𑀝𑀺𑀲𑀁𑀯𑀺𑀤𑀺𑀢𑀁 𑀓𑀢𑁆𑀯𑀸 ‘‘𑀓𑀺𑀁 𑀲𑀼𑀤𑁆𑀥𑀸𑀬 𑀬𑀸𑀕𑀼𑀬𑀸 𑀤𑀺𑀦𑁆𑀦𑀸𑀬, 𑀧𑀽𑀯𑀪𑀢𑁆𑀢𑀸𑀤𑀻𑀦𑀺𑀧𑀺 𑀏𑀢𑀺𑀲𑁆𑀲𑀸 𑀬𑀸𑀕𑀼𑀬𑀸 𑀧𑀭𑀺𑀯𑀸𑀭𑀁 𑀓𑀢𑁆𑀯𑀸, 𑀤𑀲𑁆𑀲𑀸𑀫𑀸’’𑀢𑀺𑀆𑀤𑀺𑀦𑀸 𑀢𑀲𑁆𑀲 𑀔𑀸𑀤𑀦𑀻𑀬𑀲𑁆𑀲 𑀯𑀸 𑀪𑁄𑀚𑀦𑀻𑀬𑀲𑁆𑀲 𑀯𑀸 𑀧𑀭𑀺𑀯𑀸𑀭𑀁 𑀓𑀢𑁆𑀯𑀸, 𑀅𑀜𑁆𑀜𑀁 𑀯𑀸 𑀬𑀁 𑀓𑀺𑀜𑁆𑀘𑀺 𑀢𑁂𑀦 𑀲𑀤𑁆𑀥𑀺𑀁 𑀩𑀳𑀼𑀓𑀫𑁆𑀧𑀺 𑀆𑀳𑀭𑀻𑀬𑀢𑀼. 𑀔𑀸𑀤𑀦𑀻𑀬𑀦𑁆𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 ‘‘𑀪𑁄𑀚𑀦𑀻𑀬𑀁 𑀯𑀸’’𑀢𑀺𑀧𑀺 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸. 𑀢𑁂𑀦 𑀲𑀤𑁆𑀥𑀺𑀁 𑀆𑀳𑀭𑀦𑁆𑀢𑀽𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀅𑀢𑁆𑀢𑀦𑁄 𑀤𑁂𑀬𑁆𑀬𑀥𑀫𑁆𑀫𑀁 𑀆𑀳𑀭𑀦𑁆𑀢𑀼. ‘‘𑀬𑀸𑀕𑀼𑀬𑀸 𑀧𑀝𑀺𑀲𑀁𑀯𑀺𑀤𑀺𑀢𑀁 𑀓𑀢𑁆𑀯𑀸 𑀧𑀽𑀯𑀁 𑀯𑀸 𑀪𑀢𑁆𑀢𑀁 𑀯𑀸 𑀆𑀳𑀭𑀦𑁆𑀢𑀺, 𑀏𑀢𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁫𑁭𑁩) 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁.

𑀧𑀝𑀺𑀲𑀁𑀯𑀺𑀤𑀺𑀢𑀕𑀺𑀮𑀸𑀦𑀸𑀯𑀲𑁂𑀲𑀓𑀁 𑀯𑀸𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀜𑁆𑀘 𑀕𑀺𑀮𑀸𑀦𑁄 𑀘 𑀧𑀝𑀺𑀲𑀁𑀯𑀺𑀤𑀺𑀢𑀕𑀺𑀮𑀸𑀦𑀸, 𑀢𑁂𑀲𑀁 𑀅𑀯𑀲𑁂𑀲𑀓𑀁, 𑀧𑀝𑀺𑀲𑀁𑀯𑀺𑀤𑀺𑀢𑀲𑁆𑀲 𑀘 𑀕𑀺𑀮𑀸𑀦𑀲𑁆𑀲 𑀘 𑀲𑁂𑀲𑀓𑀦𑁆𑀢𑀺 𑀅𑀢𑁆𑀣𑁄. 𑀏𑀓𑀲𑁆𑀲𑀢𑁆𑀣𑀸𑀬 𑀧𑀝𑀺𑀲𑀁𑀯𑀺𑀤𑀺𑀢𑀁 𑀓𑀢𑁆𑀯𑀸 𑀆𑀳𑀝𑀁, 𑀢𑀲𑁆𑀲 𑀲𑁂𑀲𑀓𑀁 𑀅𑀜𑁆𑀜𑀲𑁆𑀲𑀸𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀘𑀢𑀼𑀦𑁆𑀦𑀁 𑀯𑀸 𑀧𑀜𑁆𑀘𑀦𑁆𑀦𑀁 𑀯𑀸 𑀧𑀝𑀺𑀲𑀁𑀯𑀺𑀤𑀺𑀢𑀁 𑀓𑀢𑁆𑀯𑀸 𑀩𑀳𑀽𑀦𑀁 𑀆𑀳𑀝𑀁 𑀳𑁄𑀢𑀺, 𑀅𑀜𑁆𑀜𑁂𑀲𑀫𑁆𑀧𑀺 𑀤𑀸𑀢𑀼𑀁 𑀇𑀘𑁆𑀙𑀦𑁆𑀢𑀺, 𑀏𑀢𑀫𑁆𑀧𑀺 𑀧𑀝𑀺𑀲𑀁𑀯𑀺𑀤𑀺𑀢𑀲𑁂𑀲𑀓𑀫𑁂𑀯, 𑀲𑀩𑁆𑀩𑁂𑀲𑀫𑁆𑀧𑀺 𑀯𑀝𑁆𑀝𑀢𑀺. 𑀅𑀣 𑀅𑀥𑀺𑀓𑀫𑁂𑀯 𑀳𑁄𑀢𑀺, 𑀲𑀦𑁆𑀦𑀺𑀥𑀺𑀁 𑀫𑁄𑀘𑁂𑀢𑁆𑀯𑀸 𑀞𑀧𑀺𑀢𑀁 𑀤𑀼𑀢𑀺𑀬𑀤𑀺𑀯𑀲𑁂𑀧𑀺 𑀯𑀝𑁆𑀝𑀢𑀺. 𑀕𑀺𑀮𑀸𑀦𑀲𑁆𑀲𑀸𑀳𑀝𑀸𑀯𑀲𑁂𑀲𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑀁 𑀧𑀦 𑀅𑀧𑁆𑀧𑀝𑀺𑀲𑀁𑀯𑀺𑀤𑀺𑀢𑀫𑁂𑀯 𑀓𑀢𑁆𑀯𑀸 𑀆𑀪𑀢𑀁, 𑀢𑀁 𑀩𑀳𑀺𑀆𑀭𑀸𑀫𑀁 𑀧𑁂𑀲𑁂𑀢𑁆𑀯𑀸 𑀧𑀝𑀺𑀲𑀁𑀯𑀺𑀤𑀺𑀢𑀁 𑀓𑀸𑀭𑁂𑀢𑁆𑀯𑀸 𑀆𑀳𑀭𑀸𑀧𑁂𑀢𑀩𑁆𑀩𑀁, 𑀪𑀺𑀓𑁆𑀔𑀽𑀳𑀺 𑀯𑀸 𑀕𑀦𑁆𑀢𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀕𑀳𑁂𑀢𑀩𑁆𑀩𑀁. 𑀬𑀫𑁆𑀧𑀺 𑀯𑀺𑀳𑀸𑀭𑀫𑀚𑁆𑀛𑁂𑀦 𑀕𑀘𑁆𑀙𑀦𑁆𑀢𑁄 𑀯𑀸 𑀯𑀦𑀘𑀭𑀓𑀸𑀤𑀬𑁄 𑀯𑀸 𑀯𑀦𑀢𑁄 𑀆𑀳𑀭𑀺𑀢𑁆𑀯𑀸 𑀤𑁂𑀦𑁆𑀢𑀺, 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀝𑀺𑀲𑀁𑀯𑀺𑀤𑀺𑀢𑀁 𑀓𑀸𑀭𑁂𑀢𑀩𑁆𑀩𑀁. 𑀓𑀢𑁆𑀣𑀘𑀺 𑀧𑀦 𑀧𑁄𑀢𑁆𑀣𑀓𑁂𑀲𑀼 ‘‘𑀧𑀝𑀺𑀲𑀁𑀯𑀺𑀤𑀺𑀢𑀁 𑀓𑀢𑁆𑀯𑀸 𑀆𑀳𑀝𑀁 𑀯𑀸 𑀕𑀺𑀮𑀸𑀦𑀸𑀯𑀲𑁂𑀲𑀓𑀁 𑀯𑀸’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀲𑁄 𑀦 𑀕𑀳𑁂𑀢𑀩𑁆𑀩𑁄. 𑀢𑀢𑁆𑀣𑀚𑀸𑀢𑀓𑀫𑁂𑀯 𑀯𑀸𑀢𑀺 𑀆𑀭𑀸𑀫𑁂 𑀚𑀸𑀢𑀓𑀫𑁂𑀯. 𑀫𑀽𑀮𑀨𑀮𑀸𑀤𑀺𑀦𑁆𑀢𑀺 𑀫𑀽𑀮𑀨𑀮𑀢𑀘𑀧𑀢𑁆𑀢𑀸𑀤𑀺𑀁 𑀅𑀜𑁆𑀜𑁂𑀦 𑀓𑀧𑁆𑀧𑀺𑀬𑀁 𑀓𑀢𑁆𑀯𑀸 𑀤𑀺𑀦𑁆𑀦𑀁 𑀧𑀭𑀺𑀪𑀼𑀜𑁆𑀚𑀢𑁄 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀧𑀦 𑀢𑀁 𑀕𑀸𑀫𑀁 𑀳𑀭𑀺𑀢𑁆𑀯𑀸 𑀧𑀘𑀺𑀢𑁆𑀯𑀸 𑀆𑀳𑀭𑀦𑁆𑀢𑀺, 𑀦 𑀯𑀝𑁆𑀝𑀢𑀺. 𑀧𑀝𑀺𑀲𑀁𑀯𑀺𑀤𑀺𑀢𑀁 𑀓𑀸𑀭𑁂𑀢𑀩𑁆𑀩𑀁.

𑀘𑀢𑀼𑀢𑁆𑀣𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸𑀬

𑀯𑀺𑀦𑀬𑀢𑁆𑀣𑀫𑀜𑁆𑀚𑀽𑀲𑀸𑀬𑀁 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀺𑀬𑀁

𑀧𑀸𑀝𑀺𑀤𑁂𑀲𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.