𑀲𑁂𑀔𑀺𑀬𑀓𑀡𑁆𑀟𑀁

𑁧. 𑀧𑀭𑀺𑀫𑀡𑁆𑀟𑀮𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀅𑀦𑁆𑀢𑀭𑀖𑀭𑁂’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀦 𑀯𑀼𑀢𑁆𑀢𑀢𑁆𑀢𑀸 ‘‘𑀆𑀭𑀸𑀫𑁂𑀧𑀺 𑀅𑀦𑁆𑀢𑀭𑀖𑀭𑁂𑀧𑀺 𑀲𑀩𑁆𑀩𑀢𑁆𑀣𑀸’’𑀢𑀺 𑀯𑀼𑀢𑁆𑀢𑀁. 𑀆𑀭𑀸𑀫𑁂𑀧𑀻𑀢𑀺 𑀩𑀼𑀤𑁆𑀥𑀽𑀧𑀝𑁆𑀞𑀸𑀦𑀸𑀤𑀺𑀓𑀸𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀣𑀸 ‘‘𑀢𑀢𑁆𑀭𑀺𑀫𑁂 𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸 𑀉𑀤𑁆𑀤𑁂𑀲𑀁 𑀆𑀕𑀘𑁆𑀙𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀢𑀢𑁆𑀣 𑀢𑀢𑁆𑀣 𑀧𑀭𑀺𑀘𑁆𑀙𑁂𑀤𑁄 𑀓𑀢𑁄, 𑀏𑀯𑀫𑁂𑀢𑁆𑀣𑀸𑀧𑀺 ‘‘𑀢𑀢𑁆𑀭𑀺𑀫𑁂 𑀧𑀜𑁆𑀘𑀲𑀢𑁆𑀢𑀢𑀺 𑀲𑁂𑀔𑀺𑀬𑀸 𑀥𑀫𑁆𑀫𑀸 𑀉𑀤𑁆𑀤𑁂𑀲𑀁 𑀆𑀕𑀘𑁆𑀙𑀦𑁆𑀢𑀻’’𑀢𑀺 𑀓𑀲𑁆𑀫𑀸 𑀧𑀭𑀺𑀘𑁆𑀙𑁂𑀤𑁄 𑀦 𑀓𑀢𑁄𑀢𑀺 𑀆𑀳 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺. 𑀯𑀢𑁆𑀢𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀯𑀢𑁆𑀢𑀸𑀦𑀺𑀧𑀻𑀢𑀺 𑀆𑀕𑀦𑁆𑀢𑀼𑀓𑀸𑀯𑀸𑀲𑀺𑀓𑀕𑀫𑀺𑀓𑀸𑀦𑀼𑀫𑁄𑀤𑀦𑀪𑀢𑁆𑀢𑀕𑁆𑀕𑀧𑀺𑀡𑁆𑀟𑀘𑀸𑀭𑀺𑀓𑀸𑀭𑀜𑁆𑀜𑀲𑁂𑀦𑀸𑀲𑀦𑀚𑀦𑁆𑀢𑀸𑀖𑀭𑀯𑀘𑁆𑀘𑀓𑀼𑀝𑀺𑀉𑀧𑀚𑁆𑀛𑀸𑀘𑀭𑀺𑀬𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀅𑀦𑁆𑀢𑁂𑀯𑀸𑀲𑀺𑀓𑀯𑀢𑁆𑀢𑀸𑀦𑀺. 𑀇𑀤𑀜𑁆𑀘 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀅𑀜𑁆𑀜𑁂𑀲𑀫𑁆𑀧𑀺 𑀔𑀦𑁆𑀥𑀓𑀯𑀢𑁆𑀢𑀸𑀦𑀁 𑀏𑀢𑁆𑀣𑁂𑀯 𑀲𑀗𑁆𑀕𑀳𑀲𑁆𑀲 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀲𑁂𑀔𑀺𑀬𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀯𑀢𑁆𑀢𑀓𑁆𑀔𑀦𑁆𑀥𑀓𑀸𑀤𑀻𑀲𑀼 (𑀘𑀽𑀴𑀯. 𑁩𑁫𑁬 𑀆𑀤𑀬𑁄) 𑀆𑀕𑀢𑀯𑀢𑁆𑀢𑀸𑀤𑀻𑀦𑀫𑁆𑀧𑀺 𑀕𑀳𑀡𑀁. 𑀢𑁂𑀧𑀺 𑀳𑀺 𑀲𑀺𑀓𑁆𑀔𑀺𑀢𑀩𑁆𑀩𑀝𑁆𑀞𑁂𑀦 ‘‘𑀲𑁂𑀔𑀺𑀬𑀸’’𑀢𑀺 𑀇𑀘𑁆𑀙𑀺𑀢𑀸. 𑀢𑀲𑁆𑀫𑀸 𑀫𑀸𑀢𑀺𑀓𑀸𑀬𑀁 𑀧𑀸𑀭𑀸𑀚𑀺𑀓𑀸𑀤𑀻𑀦𑀁 𑀯𑀺𑀬 𑀲𑁂𑀔𑀺𑀬𑀸𑀦𑀁 𑀧𑀭𑀺𑀘𑁆𑀙𑁂𑀤𑁄 𑀦 𑀓𑀢𑁄𑀢𑀺. 𑀦 𑀓𑁂𑀯𑀮𑀁 𑀯𑀢𑁆𑀢𑀓𑁆𑀔𑀦𑁆𑀥𑀓𑀸𑀤𑀻𑀲𑀼 (𑀘𑀽𑀴𑀯. 𑁩𑁫𑁬 𑀆𑀤𑀬𑁄) 𑀆𑀕𑀢𑀯𑀢𑁆𑀢𑀸𑀤𑀻𑀦𑀁 𑀕𑀳𑀡𑀢𑁆𑀣𑀫𑁂𑀯𑀸𑀢𑀺 𑀆𑀳 ‘‘𑀘𑀸𑀭𑀺𑀢𑁆𑀢𑀯𑀺𑀦𑀬𑀤𑀲𑁆𑀲𑀦𑀢𑁆𑀣𑀜𑁆𑀘𑀸’’𑀢𑀺. 𑀏𑀢𑁆𑀣𑀸𑀧𑀺 𑀧𑀭𑀺𑀘𑁆𑀙𑁂𑀤𑁄 𑀦 𑀓𑀢𑁄𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀫𑀸𑀢𑀺𑀓𑀸𑀬 ‘‘𑀤𑀼𑀓𑁆𑀓𑀝’’𑀦𑁆𑀢𑀺 𑀅𑀯𑀼𑀢𑁆𑀢𑁂 𑀓𑀣𑀁 𑀧𑀦𑁂𑀢𑁆𑀣 𑀤𑀼𑀓𑁆𑀓𑀝𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀬𑁄 𑀧𑀦𑀸’’𑀢𑀺𑀆𑀤𑀺.

𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑀦𑁆𑀢𑀺 𑀧𑀓𑀢𑀗𑁆𑀕𑀼𑀮𑁂𑀦 𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑀁. 𑀬𑁄 𑀧𑀦 𑀲𑀼𑀓𑁆𑀔𑀚𑀗𑁆𑀖𑁄 𑀯𑀸 𑀫𑀳𑀸𑀧𑀺𑀡𑁆𑀟𑀺𑀓𑀫𑀁𑀲𑁄 𑀯𑀸 𑀳𑁄𑀢𑀺, 𑀢𑀲𑁆𑀲 𑀲𑀸𑀭𑀼𑀧𑁆𑀧𑀢𑁆𑀣𑀸𑀬 𑀅𑀝𑁆𑀞𑀗𑁆𑀕𑀼𑀮𑀸𑀥𑀺𑀓𑀫𑁆𑀧𑀺 𑀑𑀢𑀸𑀭𑁂𑀢𑁆𑀯𑀸 𑀦𑀺𑀯𑀸𑀲𑁂𑀢𑀼𑀁 𑀯𑀝𑁆𑀝𑀢𑀺.

𑀧𑀸𑀲𑀦𑁆𑀢𑀦𑁆𑀢𑀺 𑀧𑀸𑀲𑀲𑁆𑀲 𑀅𑀦𑁆𑀢𑀁, 𑀤𑀲𑀸𑀫𑀽𑀮𑀦𑁆𑀢𑀺 𑀅𑀢𑁆𑀣𑁄.

𑀅𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀲𑁆𑀲𑀸𑀫𑀻𑀢𑀺 ‘‘𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸 𑀑𑀮𑀫𑁆𑀩𑁂𑀢𑁆𑀯𑀸 𑀦𑀺𑀯𑀸𑀲𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀅𑀲𑀜𑁆𑀘𑀺𑀘𑁆𑀘. 𑀓𑀺𑀜𑁆𑀘𑀸𑀧𑀺 𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀢𑀼𑀁 𑀅𑀚𑀸𑀦𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀢𑀣𑀸𑀧𑀺 𑀦𑀺𑀯𑀸𑀲𑀦𑀯𑀢𑁆𑀢𑀁 𑀲𑀸𑀥𑀼𑀓𑀁 𑀉𑀕𑁆𑀕𑀳𑁂𑀢𑀩𑁆𑀩𑀫𑁂𑀯. 𑀲𑀜𑁆𑀘𑀺𑀘𑁆𑀘 𑀅𑀦𑀼𑀕𑁆𑀕𑀳𑀡𑀜𑁆𑀳𑀺 𑀅𑀦𑀸𑀤𑀭𑀺𑀬𑀁 𑀲𑀺𑀬𑀸𑀢𑀺 𑀆𑀳 ‘‘𑀅𑀧𑀺𑀘 𑀦𑀺𑀯𑀸𑀲𑀦𑀯𑀢𑁆𑀢𑀁 𑀉𑀕𑁆𑀕𑀳𑁂𑀢𑀩𑁆𑀩’’𑀦𑁆𑀢𑀺.

𑀧𑀭𑀺𑀫𑀡𑁆𑀟𑀮𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀧𑀭𑀺𑀫𑀡𑁆𑀟𑀮𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀝𑀺𑀓𑁆𑀔𑀺𑀢𑁆𑀢𑀁 𑀕𑀺𑀳𑀺𑀧𑀸𑀭𑀼𑀢𑀦𑁆𑀢𑀺 𑀔𑀼𑀤𑁆𑀤𑀓𑀯𑀢𑁆𑀣𑀼𑀔𑀦𑁆𑀥𑀓𑁂 𑀧𑀝𑀺𑀓𑁆𑀔𑀺𑀢𑁆𑀢𑀁 𑀕𑀺𑀳𑀺𑀧𑀸𑀭𑀼𑀢𑀁. 𑀇𑀤𑀸𑀦𑀺 ‘‘𑀦, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑁨𑁮𑁦-𑁨𑁮𑁧) 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑀢𑁆𑀣𑀫𑁂𑀯 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀬𑀁 𑀓𑀺𑀜𑁆𑀘𑀺 𑀅𑀜𑁆𑀜𑀣𑀸 𑀧𑀸𑀭𑀼𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑁂𑀢𑀧𑀝𑀧𑀸𑀭𑀼𑀢𑀸𑀤𑀺 𑀕𑀺𑀳𑀺𑀧𑀸𑀭𑀼𑀢𑀁 𑀦𑀸𑀫, 𑀢𑀲𑁆𑀫𑀸. 𑀲𑁂𑀢𑀧𑀝𑀸𑀢𑀺 𑀏𑀢𑀲𑁆𑀲𑁂𑀯 𑀯𑀺𑀯𑀭𑀡𑀁. 𑀅𑀟𑁆𑀠𑀧𑀸𑀮𑀓𑀦𑀺𑀕𑀡𑁆𑀞𑀸𑀢𑀺 𑀅𑀟𑁆𑀠𑀁 𑀧𑀸𑀮𑁂𑀦𑁆𑀢𑀻𑀢𑀺 𑀅𑀟𑁆𑀠𑀧𑀸𑀮𑀓𑀸, 𑀅𑀟𑁆𑀠𑀧𑀸𑀮𑀓𑀸 𑀘 𑀢𑁂 𑀦𑀺𑀕𑀡𑁆𑀞𑀸 𑀘𑀸𑀢𑀺 𑀅𑀟𑁆𑀠𑀧𑀸𑀮𑀓𑀦𑀺𑀕𑀡𑁆𑀞𑀸. 𑀢𑁂 𑀳𑀺 𑀉𑀧𑀭𑀺 𑀏𑀓𑀫𑁂𑀯 𑀲𑁂𑀢𑀯𑀢𑁆𑀣𑀁 𑀉𑀧𑀓𑀘𑁆𑀙𑀓𑁂 𑀧𑀯𑁂𑀲𑁂𑀢𑁆𑀯𑀸 𑀧𑀭𑀺𑀤𑀳𑀦𑁆𑀢𑀺, 𑀳𑁂𑀝𑁆𑀞𑀸 𑀦𑀕𑁆𑀕𑀸𑀧𑀺 𑀅𑀟𑁆𑀠𑀫𑁂𑀯 𑀧𑀸𑀮𑁂𑀦𑁆𑀢𑀺. 𑀧𑀭𑀺𑀩𑁆𑀩𑀸𑀚𑀓𑀸𑀢𑀺 𑀕𑀺𑀳𑀺𑀩𑀦𑁆𑀥𑀦𑀁 𑀧𑀳𑀸𑀬 𑀧𑀩𑁆𑀩𑀚𑁆𑀚𑀽𑀧𑀕𑀢𑀸. 𑀉𑀭𑀁 𑀯𑀺𑀯𑀭𑀺𑀢𑁆𑀯𑀸𑀢𑀺 𑀳𑀤𑀬𑀫𑀚𑁆𑀛𑀁 𑀯𑀺𑀯𑀭𑀺𑀢𑁆𑀯𑀸. 𑀅𑀓𑁆𑀔𑀺𑀢𑀸𑀭𑀓𑀸𑀫𑀢𑁆𑀢𑀦𑁆𑀢𑀺 𑀅𑀓𑁆𑀔𑀺𑀫𑀢𑁆𑀢𑀁. 𑀆𑀭𑀸𑀫𑁂 𑀯𑀸𑀢𑀺 𑀩𑀼𑀤𑁆𑀥𑀽𑀧𑀝𑁆𑀞𑀸𑀦𑀸𑀤𑀺𑀓𑀸𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀦𑁆𑀢𑀭𑀖𑀭𑁂 𑀯𑀸𑀢𑀺 𑀅𑀦𑁆𑀢𑀭𑁂 𑀖𑀭𑀸𑀦𑀺 𑀏𑀢𑁆𑀣, 𑀏𑀢𑀲𑁆𑀲𑀸𑀢𑀺 𑀯𑀸 ‘‘𑀅𑀦𑁆𑀢𑀭𑀖𑀭’’𑀦𑁆𑀢𑀺 𑀮𑀤𑁆𑀥𑀦𑀸𑀫𑁂 𑀕𑀸𑀫𑁂.

𑀤𑀼𑀢𑀺𑀬𑀧𑀭𑀺𑀫𑀡𑁆𑀟𑀮𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩-𑁪. 𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀼𑀝𑁆𑀞𑀼 𑀧𑀝𑀺𑀘𑁆𑀙𑀦𑁆𑀦𑁄𑀢𑀺 𑀚𑀢𑁆𑀢𑀼𑀫𑁆𑀧𑀺 𑀉𑀭𑀫𑁆𑀧𑀺 𑀅𑀯𑀺𑀯𑀭𑀺𑀢𑁆𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀝𑁆𑀞𑀸𑀦𑁂 𑀧𑀝𑀺𑀘𑁆𑀙𑀸𑀤𑀦𑁂𑀦 𑀧𑀝𑀺𑀘𑁆𑀙𑀦𑁆𑀦𑁄, 𑀦 𑀲𑀻𑀲𑀧𑀸𑀭𑀼𑀢𑁄. 𑀢𑁂𑀦𑀸𑀳 ‘‘𑀕𑀡𑁆𑀞𑀺𑀓𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀕𑀡𑁆𑀞𑀺𑀓𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀕𑀡𑁆𑀞𑀺𑀓𑀁 𑀧𑀸𑀲𑀓𑁂 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸. 𑀅𑀦𑁆𑀢𑀭𑀖𑀭𑁂 𑀯𑀸𑀢𑀺 𑀕𑁄𑀘𑀭𑀕𑀸𑀫𑁂. 𑀏𑀓𑀤𑀺𑀯𑀲𑀫𑁆𑀧𑀺 𑀯𑀸𑀲𑀽𑀧𑀕𑀢𑀲𑁆𑀲 𑀲𑀦𑁆𑀢𑀺𑀓𑀁 𑀬𑀣𑀸𑀲𑀼𑀔𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀓𑁄 𑀧𑀦 𑀯𑀸𑀤𑁄 𑀘𑀢𑀼𑀧𑁆𑀧𑀜𑁆𑀘𑀸𑀳𑀁 𑀯𑀸𑀲𑀫𑀥𑀺𑀝𑁆𑀞𑀸𑀬 𑀯𑀲𑀺𑀢𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀦𑁆𑀢𑀺 𑀕𑀡𑁆𑀞𑀺𑀧𑀤𑁂 𑀮𑀺𑀔𑀺𑀢𑀁.

𑀯𑀸𑀲𑀽𑀧𑀕𑀢𑀲𑁆𑀲𑀸𑀢𑀺 𑀭𑀢𑁆𑀢𑀺𑀯𑀸𑀲𑀢𑁆𑀣𑀸𑀬 𑀉𑀧𑀕𑀢𑀲𑁆𑀲 𑀭𑀢𑁆𑀢𑀺𑀪𑀸𑀕𑁂 𑀯𑀸 𑀤𑀺𑀯𑀲𑀪𑀸𑀕𑁂 𑀯𑀸 𑀓𑀸𑀬𑀁 𑀯𑀺𑀯𑀭𑀺𑀢𑁆𑀯𑀸 𑀦𑀺𑀲𑀻𑀤𑀢𑁄 𑀅𑀦𑀸𑀧𑀢𑁆𑀢𑀺.

𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁬. 𑀲𑀼𑀲𑀁𑀯𑀼𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀼𑀲𑀁𑀯𑀼𑀢𑁄𑀢𑀺 𑀲𑀼𑀲𑀁𑀬𑀢𑁄. 𑀬𑀣𑀸 𑀧𑀦𑁂𑀢𑁆𑀣 𑀲𑀼𑀲𑀁𑀯𑀼𑀢𑁄 𑀦𑀸𑀫 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀳𑀢𑁆𑀣𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀲𑀼𑀲𑀁𑀯𑀼𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭-𑁮. 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀓𑀺𑀢𑁆𑀢𑀓𑁂𑀦 𑀧𑀦 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀳𑁄𑀢𑀻𑀢𑀺 𑀆𑀳 ‘‘𑀬𑀼𑀕𑀫𑀢𑁆𑀢𑀁 𑀪𑀽𑀫𑀺𑀪𑀸𑀕𑀁 𑀧𑁂𑀓𑁆𑀔𑀫𑀸𑀦𑁄’’𑀢𑀺. 𑀬𑀼𑀕𑀬𑀼𑀢𑁆𑀢𑀓𑁄 𑀳𑀺 𑀤𑀦𑁆𑀢𑁄 𑀆𑀚𑀸𑀦𑁂𑀬𑁆𑀬𑁄 𑀬𑀼𑀕𑀫𑀢𑁆𑀢𑀁 𑀧𑁂𑀓𑁆𑀔𑀢𑀺, 𑀧𑀼𑀭𑀢𑁄 𑀘𑀢𑀼𑀳𑀢𑁆𑀣𑀧𑁆𑀧𑀫𑀸𑀡𑀁 𑀪𑀽𑀫𑀺𑀪𑀸𑀕𑀁, 𑀇𑀫𑀺𑀦𑀸𑀧𑀺 𑀏𑀢𑁆𑀢𑀓𑀁 𑀧𑁂𑀓𑁆𑀔𑀦𑁆𑀢𑁂𑀦 𑀕𑀦𑁆𑀢𑀩𑁆𑀩𑀁. 𑀬𑁄 𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘 𑀢𑀁 𑀢𑀁 𑀤𑀺𑀲𑀸𑀪𑀸𑀕𑀁 𑀧𑀸𑀲𑀸𑀤𑀁 𑀓𑀽𑀝𑀸𑀕𑀸𑀭𑀁 𑀯𑀻𑀣𑀺𑀁 𑀑𑀮𑁄𑀓𑁂𑀦𑁆𑀢𑁄 𑀕𑀘𑁆𑀙𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀧𑀭𑀺𑀲𑁆𑀲𑀬𑀸𑀪𑀸𑀯𑀦𑁆𑀢𑀺 𑀧𑀭𑀺𑀲𑁆𑀲𑀬𑀦𑀝𑁆𑀞𑁂𑀦, 𑀅𑀪𑀺𑀪𑀯𑀦𑀝𑁆𑀞𑁂𑀦, 𑀯𑀺𑀳𑁂𑀞𑀦𑀝𑁆𑀞𑁂𑀦 𑀯𑀸 𑀧𑀭𑀺𑀲𑁆𑀲𑀬𑁄, 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀬𑁂𑀯 𑀧𑀭𑀺𑀲𑁆𑀲𑀬𑁄 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀧𑀭𑀺𑀲𑁆𑀲𑀬𑁄, 𑀢𑀲𑁆𑀲𑀸𑀪𑀸𑀯𑀁, 𑀳𑀢𑁆𑀣𑀺𑀅𑀲𑁆𑀲𑀸𑀤𑀺 𑀉𑀧𑀤𑁆𑀤𑀯𑀸𑀪𑀸𑀯𑀦𑁆𑀢𑀺 𑀅𑀢𑁆𑀣𑁄. ‘‘𑀬𑀣𑀸 𑀘 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀞𑀢𑁆𑀯𑀸, 𑀏𑀯𑀁 𑀕𑀘𑁆𑀙𑀦𑁆𑀢𑁄𑀧𑀺 𑀧𑀭𑀺𑀲𑁆𑀲𑀬𑀸𑀪𑀸𑀯𑀁 𑀑𑀮𑁄𑀓𑁂𑀢𑀼𑀁 𑀮𑀪𑀢𑀺𑀬𑁂𑀯, 𑀢𑀣𑀸 𑀕𑀸𑀫𑁂 𑀧𑀽𑀚’’𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁫𑁮𑁨) 𑀯𑀤𑀦𑁆𑀢𑀺.

𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯-𑁧𑁦. 𑀉𑀓𑁆𑀔𑀺𑀢𑁆𑀢𑀓𑀸𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀦𑁆𑀢𑁄𑀇𑀦𑁆𑀤𑀔𑀻𑀮𑀢𑁄 𑀧𑀝𑁆𑀞𑀸𑀬𑀸𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀅𑀦𑁆𑀢𑁄𑀉𑀫𑁆𑀫𑀸𑀭𑀢𑁄 𑀧𑀝𑁆𑀞𑀸𑀬, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀦 𑀤𑀼𑀢𑀺𑀬𑀮𑁂𑀟𑁆𑀟𑀼𑀧𑀸𑀢𑀢𑁄 𑀧𑀝𑁆𑀞𑀸𑀬 𑀦 𑀏𑀯𑀁 𑀕𑀦𑁆𑀢𑀩𑁆𑀩𑀁.

𑀉𑀓𑁆𑀔𑀺𑀢𑁆𑀢𑀓𑀸𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧-𑁧𑁨. 𑀉𑀚𑁆𑀚𑀕𑁆𑀖𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀳𑀲𑀦𑀻𑀬𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁, 𑀳𑀲𑀺𑀢𑀩𑁆𑀩𑀯𑀢𑁆𑀣𑀼𑀓𑀸𑀭𑀡𑀸𑀢𑀺 𑀅𑀢𑁆𑀣𑁄.

𑀉𑀚𑁆𑀚𑀕𑁆𑀖𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩-𑁧𑁪. 𑀉𑀘𑁆𑀘𑀲𑀤𑁆𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀓𑀺𑀢𑁆𑀢𑀸𑀯𑀢𑀸 𑀅𑀧𑁆𑀧𑀲𑀤𑁆𑀤𑁄 𑀳𑁄𑀢𑀻𑀢𑀺 𑀆𑀳 ‘‘𑀅𑀬𑀁 𑀧𑀦𑁂𑀢𑁆𑀣𑀸’’𑀢𑀺𑀆𑀤𑀺. 𑀲𑀤𑁆𑀤𑀫𑁂𑀯 𑀲𑀼𑀡𑀸𑀢𑀻𑀢𑀺 𑀅𑀧𑀭𑀺𑀩𑁆𑀬𑀢𑁆𑀢𑀓𑁆𑀔𑀭𑀁 𑀲𑀤𑁆𑀤𑀫𑀢𑁆𑀢𑀫𑁂𑀯 𑀲𑀼𑀡𑀸𑀢𑀺. 𑀢𑁂𑀦𑀸𑀳 ‘‘𑀓𑀣𑀁 𑀦 𑀯𑀯𑀢𑁆𑀣𑀧𑁂𑀢𑀻’’𑀢𑀺.

𑀉𑀘𑁆𑀘𑀲𑀤𑁆𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁫-𑁨𑁦. 𑀓𑀸𑀬𑀧𑁆𑀧𑀘𑀸𑀮𑀓𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀓𑀸𑀬𑀸𑀤𑀻𑀦𑀺 𑀧𑀕𑁆𑀕𑀳𑁂𑀢𑁆𑀯𑀸’’𑀢𑀺 𑀏𑀢𑀲𑁆𑀲𑁂𑀯 𑀯𑀺𑀯𑀭𑀡𑀁 ‘‘𑀦𑀺𑀘𑁆𑀘𑀮𑀸𑀦𑀺 𑀉𑀚𑀼𑀓𑀸𑀦𑀺 𑀞𑀧𑁂𑀢𑁆𑀯𑀸’’𑀢𑀺 𑀕𑀦𑁆𑀢𑀩𑁆𑀩𑀜𑁆𑀘𑁂𑀯 𑀦𑀺𑀲𑀻𑀤𑀺𑀢𑀩𑁆𑀩𑀜𑁆𑀘𑀸𑀢𑀺 𑀲𑀫𑁂𑀦 𑀇𑀭𑀺𑀬𑀸𑀧𑀣𑁂𑀦 𑀕𑀦𑁆𑀢𑀩𑁆𑀩𑀜𑁆𑀘𑁂𑀯 𑀦𑀺𑀲𑀻𑀤𑀺𑀢𑀩𑁆𑀩𑀜𑁆𑀘. 𑀓𑀸𑀬𑀧𑁆𑀧𑀘𑀸𑀮𑀓𑀸𑀤𑀺𑀬𑀼𑀢𑁆𑀢𑀁 𑀙𑀓𑁆𑀓𑀁.

𑀓𑀸𑀬𑀧𑁆𑀧𑀘𑀸𑀮𑀓𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁬. 𑀧𑀮𑁆𑀮𑀢𑁆𑀣𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀼𑀲𑁆𑀲𑀧𑀮𑁆𑀮𑀢𑁆𑀣𑀺𑀓𑀸𑀬𑀸𑀢𑀺 𑀏𑀢𑁆𑀣 𑀆𑀬𑁄𑀕𑀧𑀮𑁆𑀮𑀢𑁆𑀣𑀺𑀓𑀸𑀧𑀺 𑀤𑀼𑀲𑁆𑀲𑀧𑀮𑁆𑀮𑀢𑁆𑀣𑀺𑀓𑀸𑀬𑁂𑀯.

𑀧𑀮𑁆𑀮𑀢𑁆𑀣𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀙𑀩𑁆𑀩𑀻𑀲𑀢𑀺𑀲𑀸𑀭𑀼𑀧𑁆𑀧𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁭. 𑀲𑀓𑁆𑀓𑀘𑁆𑀘𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀢𑀺𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸𑀢𑀺 𑀙𑀟𑁆𑀟𑁂𑀢𑀼𑀓𑀸𑀫𑁄 𑀯𑀺𑀬 𑀅𑀳𑀼𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑁂 𑀲𑀢𑀺𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸, ‘‘𑀧𑀺𑀡𑁆𑀟𑀧𑀸𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀲𑀢𑀺𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸.

𑀲𑀓𑁆𑀓𑀘𑁆𑀘𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁮. 𑀧𑀢𑁆𑀢𑀲𑀜𑁆𑀜𑀻𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀉𑀧𑀦𑀺𑀩𑀤𑁆𑀥𑀲𑀜𑁆𑀜𑀻 𑀳𑀼𑀢𑁆𑀯𑀸𑀢𑀺 𑀧𑀺𑀡𑁆𑀟𑀧𑀸𑀢𑀁 𑀤𑁂𑀦𑁆𑀢𑁂 𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘 𑀢𑀳𑀁 𑀢𑀳𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀧𑀢𑁆𑀢𑁂 𑀆𑀪𑁄𑀕𑀲𑀜𑁆𑀜𑀻 𑀳𑀼𑀢𑁆𑀯𑀸.

𑀧𑀢𑁆𑀢𑀲𑀜𑁆𑀜𑀻𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁯. 𑀲𑀫𑀲𑀽𑀧𑀓𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀫𑀲𑀽𑀧𑀓𑀦𑁆𑀢𑀺 𑀧𑀫𑀸𑀡𑀬𑀼𑀢𑁆𑀢𑀁 𑀲𑀽𑀧𑀯𑀦𑁆𑀢𑀁 𑀓𑀢𑁆𑀯𑀸, 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄 𑀘𑀸𑀬𑀁. 𑀩𑁆𑀬𑀜𑁆𑀚𑀦𑀁 𑀧𑀦 𑀅𑀦𑀸𑀤𑀺𑀬𑀺𑀢𑁆𑀯𑀸 𑀅𑀢𑁆𑀣𑀫𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀲𑀫𑀲𑀽𑀧𑀓𑁄 𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀸𑀧𑀺 𑀲𑀽𑀧𑁂𑀬𑁆𑀬𑀩𑁆𑀬𑀜𑁆𑀚𑀦𑀯𑀺𑀓𑀢𑀻𑀢𑀺 𑀑𑀮𑁄𑀡𑀺𑀲𑀸𑀓𑀲𑀽𑀧𑁂𑀬𑁆𑀬𑀫𑀘𑁆𑀙𑀫𑀁𑀲𑀭𑀲𑀸𑀤𑀺𑀓𑀸 𑀲𑀩𑁆𑀩𑀸𑀧𑀺 𑀲𑀽𑀧𑁂𑀬𑁆𑀬𑀩𑁆𑀬𑀜𑁆𑀚𑀦𑀯𑀺𑀓𑀢𑀺.

𑀲𑀫𑀲𑀽𑀧𑀓𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩𑁦-𑁩𑁨. 𑀲𑀫𑀢𑀺𑀢𑁆𑀢𑀺𑀓𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀫𑀢𑀺𑀢𑁆𑀢𑀺𑀓𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀲𑀫𑀢𑀺𑀢𑁆𑀢𑀺𑀓𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀫𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑀫𑀧𑀼𑀡𑁆𑀡𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁬𑁦𑁫) 𑀧𑀢𑁆𑀢𑀲𑁆𑀲 𑀅𑀦𑁆𑀢𑁄𑀫𑀼𑀔𑀯𑀝𑁆𑀝𑀺𑀮𑁂𑀔𑀸𑀲𑀫𑀧𑀼𑀡𑁆𑀡𑀁. 𑀲𑀫𑀪𑀭𑀺𑀢𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀜𑁆𑀘 𑀔𑁄 𑀅𑀥𑀺𑀝𑁆𑀞𑀸𑀦𑀼𑀧𑀕𑀧𑀢𑁆𑀢𑀲𑁆𑀲𑁂𑀯, 𑀦𑁂𑀢𑀭𑀲𑁆𑀲. 𑀢𑁂𑀦𑀸𑀳 ‘‘𑀅𑀥𑀺𑀝𑁆𑀞𑀸𑀦𑀼𑀧𑀕𑀧𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺. 𑀭𑀘𑀺𑀢𑀦𑁆𑀢𑀺 𑀓𑀢𑀁, 𑀧𑀓𑁆𑀔𑀺𑀢𑁆𑀢𑀁 𑀧𑀽𑀭𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀬𑀁 𑀓𑀺𑀜𑁆𑀘𑀺 𑀬𑀸𑀯𑀓𑀸𑀮𑀺𑀓𑀦𑁆𑀢𑀺 𑀬𑀸𑀕𑀼𑀪𑀢𑁆𑀢𑀨𑀮𑀸𑀨𑀮𑀸𑀤𑀺𑀁 𑀬𑀁 𑀓𑀺𑀜𑁆𑀘𑀺 𑀆𑀫𑀺𑀲𑀚𑀸𑀢𑀺𑀓𑀁. 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 𑀅𑀥𑀺𑀝𑁆𑀞𑀸𑀦𑀼𑀧𑀕𑁄 𑀯𑀸 𑀳𑁄𑀢𑀼, 𑀅𑀦𑀥𑀺𑀝𑁆𑀞𑀸𑀦𑀼𑀧𑀕𑁄 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀢𑁆𑀢𑁂. 𑀣𑀽𑀧𑀻𑀓𑀢𑀸𑀦𑀻𑀢𑀺 𑀣𑀽𑀧𑀁 𑀯𑀺𑀬 𑀓𑀢𑀸𑀦𑀺, 𑀅𑀥𑀺𑀝𑁆𑀞𑀸𑀦𑀼𑀧𑀕𑀲𑁆𑀲 𑀧𑀢𑁆𑀢𑀲𑁆𑀲 𑀅𑀦𑁆𑀢𑁄𑀫𑀼𑀔𑀯𑀝𑁆𑀝𑀺𑀮𑁂𑀔𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀓𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀘 ‘‘𑀬𑀸𑀫𑀓𑀸𑀮𑀺𑀓𑀸𑀤𑀻𑀦𑀻’’𑀢𑀺 𑀇𑀫𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁, ‘‘𑀬𑀸𑀯𑀓𑀸𑀮𑀺𑀓’’𑀦𑁆𑀢𑀺 𑀇𑀫𑀲𑁆𑀲 𑀧𑀦 𑀯𑀲𑁂𑀦 𑀯𑀘𑀦𑀩𑁆𑀬𑀢𑁆𑀢𑀬𑀁 𑀓𑀢𑁆𑀯𑀸 ‘‘𑀣𑀽𑀧𑀻𑀓𑀢𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀧𑀺-𑀲𑀤𑁆𑀤𑁂𑀦 𑀅𑀣𑀽𑀧𑀻𑀓𑀢𑀸𑀦𑀺 𑀯𑀝𑁆𑀝𑀦𑁆𑀢𑀻𑀢𑀺 𑀏𑀢𑁆𑀣 𑀓𑀣𑀸𑀯 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀳𑁂𑀝𑁆𑀞𑀸 𑀑𑀭𑁄𑀳𑀢𑀻𑀢𑀺 𑀲𑀫𑀦𑁆𑀢𑀸 𑀑𑀓𑀸𑀲𑀲𑀩𑁆𑀪𑀸𑀯𑀢𑁄 𑀘𑀸𑀮𑀺𑀬𑀫𑀸𑀦𑀁 𑀳𑁂𑀝𑁆𑀞𑀸 𑀪𑀲𑁆𑀲𑀢𑀺. 𑀢𑀓𑁆𑀓𑁄𑀮𑀯𑀝𑀁𑀲𑀓𑀸𑀤𑀬𑁄𑀢𑀺 𑀏𑀢𑁆𑀣 𑀫𑀢𑁆𑀣𑀓𑁂 𑀞𑀧𑀺𑀢𑀢𑀓𑁆𑀓𑁄𑀮𑀫𑁂𑀯 𑀯𑀝𑀁𑀲𑀓𑀲𑀤𑀺𑀲𑀢𑁆𑀢𑀸 𑀢𑀓𑁆𑀓𑁄𑀮𑀯𑀝𑀁𑀲𑀓𑀁. 𑀆𑀤𑀺𑀲𑀤𑁆𑀤𑁂𑀦 𑀧𑀼𑀧𑁆𑀨𑀯𑀝𑀁𑀲𑀓𑀓𑀝𑀼𑀓𑀨𑀮𑀸𑀤𑀺𑀯𑀝𑀁𑀲𑀓𑀸𑀦𑀁 (𑀧𑀸𑀘𑀺. 𑀅𑀝𑁆𑀞. 𑁬𑁦𑁫) 𑀕𑀳𑀡𑀁, 𑀦 𑀢𑀁 𑀣𑀽𑀧𑀻𑀓𑀢𑀁 𑀦𑀸𑀫 𑀳𑁄𑀢𑀺 𑀧𑀸𑀝𑁂𑀓𑁆𑀓𑀁 𑀪𑀸𑀚𑀦𑀢𑁆𑀢𑀸 𑀧𑀡𑁆𑀡𑀸𑀤𑀻𑀦𑀁.

𑀲𑀫𑀢𑀺𑀢𑁆𑀢𑀺𑀓𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩𑁩-𑁩𑁪. 𑀲𑀧𑀤𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀧𑀤𑀸𑀦𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁬𑁦𑁮) 𑀏𑀢𑁆𑀣 𑀤𑀸𑀦𑀁 𑀯𑀼𑀘𑁆𑀘𑀢𑀺 𑀅𑀯𑀔𑀡𑁆𑀟𑀦𑀁, 𑀅𑀧𑁂𑀢𑀁 𑀤𑀸𑀦𑀢𑁄 𑀅𑀧𑀤𑀸𑀦𑀁, 𑀅𑀦𑀯𑀔𑀡𑁆𑀟𑀦𑁆𑀢𑀺 𑀅𑀢𑁆𑀣𑁄, 𑀲𑀳 𑀅𑀧𑀤𑀸𑀦𑁂𑀦 𑀲𑀧𑀤𑀸𑀦𑀁, 𑀅𑀯𑀔𑀡𑁆𑀟𑀦𑀯𑀺𑀭𑀳𑀺𑀢𑀁, 𑀅𑀦𑀼𑀧𑀝𑀺𑀧𑀸𑀝𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀢𑀢𑁆𑀣 𑀢𑀢𑁆𑀣 𑀑𑀥𑀺𑀁 𑀅𑀓𑀢𑁆𑀯𑀸 𑀅𑀦𑀼𑀧𑀝𑀺𑀧𑀸𑀝𑀺𑀬𑀸’’𑀢𑀺.

𑀲𑀧𑀤𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩𑁬. 𑀑𑀤𑀦𑀧𑁆𑀧𑀝𑀺𑀘𑁆𑀙𑀸𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀫𑀸𑀖𑀸𑀢𑀲𑀫𑀬𑀸𑀤𑀻𑀲𑀽𑀢𑀺 𑀏𑀢𑁆𑀣 𑀬𑀲𑁆𑀫𑀺𑀁 𑀲𑀫𑀬𑁂 ‘‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄’’𑀢𑀺 𑀭𑀸𑀚𑀸𑀦𑁄 𑀪𑁂𑀭𑀺𑀁 𑀘𑀭𑀸𑀧𑁂𑀦𑁆𑀢𑀺, 𑀅𑀬𑀁 𑀫𑀸𑀖𑀸𑀢𑀲𑀫𑀬𑁄 𑀦𑀸𑀫. 𑀩𑁆𑀬𑀜𑁆𑀚𑀦𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀤𑁂𑀦𑁆𑀢𑀻𑀢𑀺 𑀩𑁆𑀬𑀜𑁆𑀚𑀦𑀁 𑀙𑀦𑁆𑀦𑀁 𑀓𑀢𑁆𑀯𑀸 𑀤𑁂𑀦𑁆𑀢𑀺.

𑀑𑀤𑀦𑀧𑁆𑀧𑀝𑀺𑀘𑁆𑀙𑀸𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩𑁭. 𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀏𑀓𑀸𑀤𑀲𑀫𑁂𑀢𑀺 𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀬𑀁. 𑀏𑀢𑁆𑀣 𑀧𑀦 𑀬𑀲𑁆𑀲 𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑁂 𑀉𑀧𑁆𑀧𑀦𑁆𑀦𑁂 𑀧𑀼𑀦 𑀉𑀕𑁆𑀕𑀺𑀭𑀺𑀢𑀼𑀓𑀸𑀫𑀲𑁆𑀲𑀸𑀧𑀺 𑀲𑀘𑁂 𑀲𑀳𑀲𑀸 𑀧𑀯𑀺𑀲𑀢𑀺, 𑀅𑀬𑀁 𑀅𑀲𑀜𑁆𑀘𑀺𑀘𑁆𑀘 𑀧𑀭𑀺𑀪𑀼𑀜𑁆𑀚𑀢𑀺 𑀦𑀸𑀫. 𑀬𑁄 𑀧𑀦 𑀯𑀺𑀜𑁆𑀜𑀢𑁆𑀢𑀫𑁆𑀧𑀺 𑀅𑀯𑀺𑀜𑁆𑀜𑀢𑁆𑀢𑀫𑁆𑀧𑀺 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀞𑀺𑀢𑀁 𑀲𑀳𑀲𑀸 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀅𑀬𑀁 𑀅𑀲𑀢𑀺𑀬𑀸 𑀪𑀼𑀜𑁆𑀚𑀢𑀺 𑀦𑀸𑀫.

𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩𑁮. 𑀉𑀚𑁆𑀛𑀸𑀦𑀲𑀜𑁆𑀜𑀻𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀉𑀚𑁆𑀛𑀸𑀬𑀢𑀺 𑀏𑀢𑁂𑀦𑀸𑀢𑀺 𑀉𑀚𑁆𑀛𑀸𑀦𑀁, 𑀘𑀺𑀢𑁆𑀢𑀁, 𑀢𑀲𑁆𑀫𑀺𑀁 𑀲𑀜𑁆𑀜𑀸 𑀉𑀚𑁆𑀛𑀸𑀦𑀲𑀜𑁆𑀜𑀸𑀢𑀺 𑀆𑀳 ‘‘𑀉𑀚𑁆𑀛𑀸𑀦𑀲𑀜𑁆𑀜𑀻’’𑀢𑀺𑀆𑀤𑀺. 𑀑𑀮𑁄𑀓𑁂𑀦𑁆𑀢𑀲𑁆𑀲𑀸𑀢𑀺 𑀧𑀭𑁂𑀲𑀁 𑀧𑀢𑁆𑀢𑀁 𑀑𑀮𑁄𑀓𑁂𑀦𑁆𑀢𑀲𑁆𑀲.

𑀉𑀚𑁆𑀛𑀸𑀦𑀲𑀜𑁆𑀜𑀻𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩𑁯. 𑀓𑀩𑀴𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀫𑀬𑀽𑀭𑀡𑁆𑀟𑀁 𑀅𑀢𑀺𑀫𑀳𑀦𑁆𑀢’’𑀦𑁆𑀢𑀺 𑀯𑀘𑀦𑀢𑁄 𑀫𑀬𑀽𑀭𑀡𑁆𑀟𑀧𑁆𑀧𑀫𑀸𑀡𑁄𑀧𑀺 𑀓𑀩𑀴𑁄 𑀦 𑀯𑀝𑁆𑀝𑀢𑀺. 𑀓𑁂𑀘𑀺 𑀧𑀦 ‘‘𑀫𑀬𑀽𑀭𑀡𑁆𑀟𑀢𑁄 𑀫𑀳𑀦𑁆𑀢𑁄𑀯 𑀦 𑀯𑀝𑁆𑀝𑀢𑀺, 𑀦 𑀫𑀬𑀽𑀭𑀡𑁆𑀟𑀧𑁆𑀧𑀫𑀸𑀡𑁄’’𑀢𑀺𑀧𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀓𑀼𑀓𑁆𑀓𑀼𑀝𑀡𑁆𑀟𑀁 𑀅𑀢𑀺𑀔𑀼𑀤𑁆𑀤𑀓𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄, 𑀕𑀺𑀮𑀸𑀦𑀲𑁆𑀲 𑀧𑀦 𑀅𑀢𑀺𑀔𑀼𑀤𑁆𑀤𑀓𑀁 𑀓𑀩𑀴𑀁 𑀓𑀭𑁄𑀢𑁄𑀧𑀺 𑀅𑀦𑀸𑀧𑀢𑁆𑀢𑀺.

𑀓𑀩𑀴𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪𑁧-𑁪𑁨. 𑀅𑀦𑀸𑀳𑀝𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀓𑀮𑀁 𑀳𑀢𑁆𑀣𑀦𑁆𑀢𑀺 𑀲𑀓𑀮𑀸 𑀅𑀗𑁆𑀕𑀼𑀮𑀺𑀬𑁄. 𑀳𑀢𑁆𑀣𑀲𑀤𑁆𑀤𑁄 𑀘𑁂𑀢𑁆𑀣 𑀢𑀤𑁂𑀓𑀤𑁂𑀲𑁂𑀲𑀼 𑀅𑀗𑁆𑀕𑀼𑀮𑀻𑀲𑀼 𑀤𑀝𑁆𑀞𑀩𑁆𑀩𑁄 ‘‘𑀳𑀢𑁆𑀣𑀫𑀼𑀤𑁆𑀤𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀏𑀯𑀜𑁆𑀘 𑀓𑀢𑁆𑀯𑀸 𑀲𑀩𑁆𑀩𑀕𑁆𑀕𑀳𑀡𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀅𑀜𑁆𑀜𑀣𑀸 𑀲𑀓𑀮𑀁 𑀳𑀢𑁆𑀣𑀁 𑀫𑀼𑀔𑁂 𑀧𑀯𑁂𑀲𑁂𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀲𑀩𑁆𑀩𑀕𑁆𑀕𑀳𑀡𑀫𑀲𑀫𑀢𑁆𑀣𑀺𑀢𑀫𑁂𑀯 𑀲𑀺𑀬𑀸. 𑀲𑀫𑀼𑀤𑀸𑀬𑁂 𑀧𑀯𑀢𑁆𑀢𑀲𑁆𑀲 𑀘 𑀯𑁄𑀳𑀸𑀭𑀲𑁆𑀲 𑀅𑀯𑀬𑀯𑁂𑀧𑀺 𑀧𑀯𑀢𑁆𑀢𑀦𑀢𑁄 𑀏𑀓𑀗𑁆𑀕𑀼𑀮𑀺𑀫𑁆𑀧𑀺 𑀢𑀢𑁄 𑀏𑀓𑀤𑁂𑀲𑀫𑁆𑀧𑀺 𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀺.

𑀅𑀦𑀸𑀳𑀝𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪𑁩. 𑀲𑀓𑀩𑀴𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀢𑁆𑀢𑀓𑁂 𑀲𑀢𑀺 𑀯𑀝𑁆𑀝𑀢𑀻𑀢𑀺 𑀢𑀢𑁆𑀢𑀓𑁂 𑀫𑀼𑀔𑀫𑁆𑀳𑀺 𑀲𑀢𑀺 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺.

𑀲𑀓𑀩𑀴𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫𑁦-𑁫𑁧. 𑀘𑀧𑀼𑀘𑀧𑀼𑀓𑀸𑀭𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀘𑀧𑀼 𑀘𑀧𑀽’’𑀢𑀺 𑀏𑀯𑀁 𑀲𑀤𑁆𑀤𑀁 𑀓𑀢𑁆𑀯𑀸𑀢𑀺 ‘‘𑀘𑀧𑀼 𑀘𑀧𑀽’’𑀢𑀺 𑀏𑀯𑀁 𑀅𑀦𑀼𑀓𑀭𑀡𑀲𑀤𑁆𑀤𑀁 𑀓𑀢𑁆𑀯𑀸. ‘‘𑀧𑀜𑁆𑀘𑀯𑀻𑀲𑀢𑀺𑀫𑁂𑀧𑀺 𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 ‘‘𑀲𑀼𑀭𑀼𑀲𑀼𑀭𑀼𑀓𑀸𑀭𑀓𑀦𑁆𑀢𑀺 ‘𑀲𑀼𑀭𑀽 𑀲𑀼𑀭𑀽’𑀢𑀺 𑀏𑀯𑀁 𑀲𑀤𑁆𑀤𑀁 𑀓𑀢𑁆𑀯𑀸’’𑀢𑀺 𑀇𑀫𑀫𑀢𑁆𑀣𑀫𑀢𑀺𑀤𑀺𑀲𑀢𑀺.

𑀘𑀧𑀼𑀘𑀧𑀼𑀓𑀸𑀭𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀺𑀁𑀲𑀪𑁄𑀚𑀦𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫𑁭. 𑀙𑀢𑁆𑀢𑀧𑀸𑀡𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀬𑀁 𑀓𑀺𑀜𑁆𑀘𑀺 𑀙𑀢𑁆𑀢𑀦𑁆𑀢𑀺 𑀲𑁂𑀢𑀘𑁆𑀙𑀢𑁆𑀢𑀓𑀺𑀮𑀜𑁆𑀚𑀘𑁆𑀙𑀢𑁆𑀢𑀧𑀡𑁆𑀡𑀘𑁆𑀙𑀢𑁆𑀢𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀙𑀢𑁆𑀢𑀁. 𑀬𑀫𑁆𑀧𑀺 𑀢𑀢𑁆𑀣𑀚𑀸𑀢𑀓𑀤𑀡𑁆𑀟𑀓𑁂𑀦 𑀓𑀢𑀁 𑀏𑀓𑀧𑀡𑁆𑀡𑀘𑁆𑀙𑀢𑁆𑀢𑀁 𑀳𑁄𑀢𑀺, 𑀢𑀫𑁆𑀧𑀺 𑀙𑀢𑁆𑀢𑀫𑁂𑀯. 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀭𑀻𑀭𑀸𑀯𑀬𑀯𑁂𑀢𑀺 𑀅𑀁𑀲𑀊𑀭𑀼𑀆𑀤𑀺𑀓𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀭𑀻𑀭𑀸𑀯𑀬𑀯𑁂𑀢𑀺.

𑀙𑀢𑁆𑀢𑀧𑀸𑀡𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬𑁦. 𑀆𑀯𑀼𑀥𑀧𑀸𑀡𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀩𑁆𑀩𑀸𑀧𑀺 𑀥𑀦𑀼𑀯𑀺𑀓𑀢𑀻𑀢𑀺 𑀘𑀸𑀧𑀓𑁄𑀤𑀡𑁆𑀟𑀸𑀤𑀺𑀪𑁂𑀤𑀸 𑀲𑀩𑁆𑀩𑀸𑀧𑀺 𑀥𑀦𑀼𑀯𑀺𑀓𑀢𑀺. 𑀘𑀸𑀧𑁄𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁬𑁩𑁭) 𑀫𑀚𑁆𑀛𑁂 𑀯𑀗𑁆𑀓𑀸 𑀓𑀸𑀚𑀤𑀡𑁆𑀟𑀲𑀤𑀺𑀲𑀸 𑀥𑀦𑀼𑀯𑀺𑀓𑀢𑀺. 𑀓𑁄𑀤𑀡𑁆𑀟𑁄𑀢𑀺 𑀯𑀝𑁆𑀝𑀮𑀤𑀡𑁆𑀟𑀸 𑀥𑀦𑀼𑀯𑀺𑀓𑀢𑀺. 𑀧𑀝𑀺𑀫𑀼𑀓𑁆𑀓𑀦𑁆𑀢𑀺 𑀧𑀯𑁂𑀲𑀺𑀢𑀁 𑀮𑀕𑁆𑀕𑀺𑀢𑀁. 𑀬𑀸𑀯 𑀦 𑀕𑀡𑁆𑀳𑀸𑀢𑀻𑀢𑀺 𑀬𑀸𑀯 𑀳𑀢𑁆𑀣𑁂𑀦 𑀦 𑀕𑀡𑁆𑀳𑀸𑀢𑀺, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀢𑀸𑀯 𑀯𑀝𑁆𑀝𑀢𑀻𑀢𑀺 𑀢𑀸𑀯 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀯𑀝𑁆𑀝𑀢𑀺.

𑀆𑀯𑀼𑀥𑀧𑀸𑀡𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬𑁧-𑁬𑁨. 𑀧𑀸𑀤𑀼𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀓𑁂𑀯𑀮𑀁 𑀅𑀓𑁆𑀓𑀦𑁆𑀢𑀲𑁆𑀲𑀸𑀢𑀺 𑀓𑁂𑀯𑀮𑀁 𑀧𑀸𑀤𑀼𑀓𑀁 𑀅𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀲𑁆𑀲. 𑀧𑀝𑀺𑀫𑀼𑀓𑁆𑀓𑀲𑁆𑀲𑀸𑀢𑀺 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀞𑀺𑀢𑀲𑁆𑀲. 𑀢𑁂𑀦𑀸𑀳 ‘‘𑀧𑀯𑁂𑀲𑁂𑀢𑁆𑀯𑀸 𑀞𑀸𑀦𑀯𑀲𑁂𑀦𑀸’’𑀢𑀺.

𑀧𑀸𑀤𑀼𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬𑁩. 𑀬𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀬𑀸𑀦𑀕𑀢𑀲𑁆𑀲𑀸𑀢𑀺 ‘‘𑀬𑀸𑀦𑀁 𑀦𑀸𑀫 𑀯𑀬𑁆𑀳𑀁, 𑀭𑀣𑁄, 𑀲𑀓𑀝𑀁, 𑀲𑀦𑁆𑀥𑀫𑀸𑀦𑀺𑀓𑀸, 𑀲𑀺𑀯𑀺𑀓𑀸, 𑀧𑀸𑀝𑀗𑁆𑀓𑀻’’𑀢𑀺 (𑀧𑀸𑀘𑀺. 𑁬𑁪𑁦, 𑁧𑁧𑁮𑁭) 𑀯𑀼𑀢𑁆𑀢𑀁 𑀬𑀸𑀦𑀁 𑀉𑀧𑀸𑀤𑀸𑀬 𑀅𑀦𑁆𑀢𑀫𑀲𑁄 𑀳𑀢𑁆𑀣𑀲𑀗𑁆𑀖𑀸𑀝𑀫𑁆𑀳𑀺 𑀕𑀢𑀲𑁆𑀲. 𑀢𑁂𑀦𑀸𑀳 ‘‘𑀲𑀘𑁂𑀧𑀺 𑀤𑁆𑀯𑀻𑀳𑀺 𑀚𑀦𑁂𑀳𑀻’’𑀢𑀺𑀆𑀤𑀺. 𑀯𑀬𑁆𑀳𑀸𑀤𑀺𑀓𑁂𑀢𑀺 𑀏𑀢𑁆𑀣 𑀯𑀬𑁆𑀳𑀦𑁆𑀢𑀺 𑀉𑀧𑀭𑀺 𑀫𑀡𑁆𑀟𑀧𑀲𑀤𑀺𑀲𑀁 𑀧𑀤𑀭𑀘𑁆𑀙𑀤𑀦𑀁, 𑀲𑀩𑁆𑀩𑀧𑀸𑀮𑀺𑀕𑀼𑀡𑁆𑀞𑀺𑀫𑀁 𑀯𑀸 𑀙𑀸𑀤𑁂𑀢𑁆𑀯𑀸 𑀓𑀢𑀁 𑀲𑀓𑀝𑀯𑀺𑀲𑁂𑀲𑀁 ‘‘𑀯𑀬𑁆𑀳’’𑀦𑁆𑀢𑀺 𑀯𑀤𑀦𑁆𑀢𑀺. 𑀆𑀤𑀺𑀲𑀤𑁆𑀤𑁂𑀦 𑀭𑀣𑀸𑀤𑀻𑀦𑀁 𑀕𑀳𑀡𑀁.

𑀬𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭𑁫. 𑀉𑀤𑀓𑁂𑀉𑀘𑁆𑀘𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀓𑀺𑀡𑁆𑀡𑀓𑀦𑁆𑀢𑀺 𑀯𑁄𑀫𑀺𑀲𑁆𑀲𑀓𑀦𑀬𑀁. 𑀲𑀘𑀺𑀢𑁆𑀢𑀓𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁫𑁭𑁬) 𑀯𑀢𑁆𑀣𑀼𑀯𑀺𑀚𑀸𑀦𑀦𑀘𑀺𑀢𑁆𑀢𑁂𑀦, 𑀧𑀡𑁆𑀡𑀢𑁆𑀢𑀺𑀯𑀺𑀚𑀸𑀦𑀦𑀘𑀺𑀢𑁆𑀢𑁂𑀦 𑀘 𑀲𑀘𑀺𑀢𑁆𑀢𑀓𑀁. ‘‘𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘𑀸’’𑀢𑀺 (𑀧𑀸𑀘𑀺. 𑁬𑁫𑁪) 𑀯𑀼𑀢𑁆𑀢𑀢𑁆𑀢𑀸 𑀬𑀲𑁆𑀫𑀸 𑀅𑀦𑀸𑀤𑀭𑀺𑀬𑀯𑀲𑁂𑀦𑁂𑀯 𑀆𑀧𑀚𑁆𑀚𑀺𑀢𑀩𑁆𑀩𑀢𑁄 𑀇𑀤𑀁 𑀲𑀩𑁆𑀩𑀁 𑀓𑁂𑀯𑀮𑀁 𑀅𑀓𑀼𑀲𑀮𑀫𑁂𑀯, 𑀢𑀜𑁆𑀘 𑀧𑀓𑀢𑀺𑀬𑀸 𑀯𑀚𑁆𑀚𑀁, 𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀫𑀦𑀜𑁆𑀘 𑀤𑁄𑀫𑀦𑀲𑁆𑀲𑀺𑀓𑀲𑁆𑀲𑁂𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀮𑁄𑀓𑀯𑀚𑁆𑀚𑀁 𑀅𑀓𑀼𑀲𑀮𑀘𑀺𑀢𑁆𑀢𑀁 𑀤𑀼𑀓𑁆𑀔𑀯𑁂𑀤𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀏𑀓𑀽𑀦𑀯𑀻𑀲𑀢𑀺𑀥𑀫𑁆𑀫𑀤𑁂𑀲𑀦𑀸𑀧𑀝𑀺𑀲𑀁𑀬𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸𑀬

𑀯𑀺𑀦𑀬𑀢𑁆𑀣𑀫𑀜𑁆𑀚𑀽𑀲𑀸𑀬𑀁 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀺𑀬𑀁

𑀲𑁂𑀔𑀺𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀥𑀺𑀓𑀭𑀡𑀲𑀫𑀣𑀯𑀡𑁆𑀡𑀦𑀸

𑀕𑀡𑀦𑀧𑀭𑀺𑀘𑁆𑀙𑁂𑀤𑁄𑀢𑀺 𑀲𑀗𑁆𑀔𑁆𑀬𑀸𑀧𑀭𑀺𑀘𑁆𑀙𑁂𑀤𑁄. 𑀅𑀥𑀺𑀓𑀭𑀻𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀅𑀥𑀺𑀓𑀭𑀡𑀸𑀦𑀺. 𑀓𑁂 𑀅𑀥𑀺𑀓𑀭𑀻𑀬𑀦𑁆𑀢𑀺? 𑀲𑀫𑀣𑀸. 𑀓𑀣𑀁 𑀅𑀥𑀺𑀓𑀭𑀻𑀬𑀦𑁆𑀢𑀺? 𑀲𑀫𑀦𑀯𑀲𑁂𑀦. 𑀢𑀲𑁆𑀫𑀸 𑀢𑁂 𑀢𑁂𑀲𑀁 𑀲𑀫𑀦𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀻𑀢𑀺 𑀆𑀳 ‘‘𑀅𑀥𑀺𑀓𑀭𑀡𑀸𑀦𑀺 𑀲𑀫𑁂𑀦𑁆𑀢𑀻’’𑀢𑀺𑀆𑀤𑀺. 𑀉𑀧𑁆𑀧𑀦𑁆𑀦𑀸𑀦𑀁 𑀉𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀉𑀝𑁆𑀞𑀺𑀢𑀸𑀦𑀁 𑀉𑀝𑁆𑀞𑀺𑀢𑀸𑀦𑀁. 𑀓𑀺𑀜𑁆𑀘𑀸𑀧𑀺 𑀅𑀥𑀺𑀓𑀭𑀡𑀝𑁆𑀞𑁂𑀦 𑀏𑀓𑀯𑀺𑀥𑀁, 𑀢𑀣𑀸𑀧𑀺 𑀯𑀢𑁆𑀣𑀼𑀯𑀲𑁂𑀦 𑀦𑀸𑀦𑀸 𑀳𑁄𑀢𑀻𑀢𑀺 ‘‘𑀅𑀥𑀺𑀓𑀭𑀡𑀸𑀦’’𑀦𑁆𑀢𑀺 𑀩𑀳𑀼𑀯𑀘𑀦𑀁 𑀓𑀢𑀁. 𑀇𑀤𑀸𑀦𑀺 𑀢𑀲𑁆𑀲 𑀦𑀸𑀦𑀸𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀯𑀺𑀯𑀭𑀺𑀢𑀼𑀁 ‘‘𑀯𑀺𑀯𑀸𑀤𑀸𑀥𑀺𑀓𑀭𑀡’’𑀦𑁆𑀢𑀺𑀆𑀤𑀺𑀫𑀸𑀳. 𑀯𑀺𑀯𑀸𑀤𑁄𑀬𑁂𑀯 𑀅𑀥𑀺𑀓𑀭𑀡𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀲𑀫𑀣𑀢𑁆𑀣𑀦𑁆𑀢𑀺 𑀲𑀫𑀦𑀢𑁆𑀣𑀁.

𑀅𑀥𑀺𑀓𑀭𑀡𑀲𑁆𑀲 𑀲𑀫𑁆𑀫𑀼𑀔𑀸 𑀯𑀺𑀦𑀬𑀦𑀢𑁄 𑀲𑀫𑁆𑀫𑀼𑀔𑀸𑀯𑀺𑀦𑀬𑁄. 𑀤𑀩𑁆𑀩𑀫𑀮𑁆𑀮𑀧𑀼𑀢𑁆𑀢𑀢𑁆𑀣𑁂𑀭𑀲𑀤𑀺𑀲𑀲𑁆𑀲 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲𑁂𑀯 𑀤𑀸𑀢𑀩𑁆𑀩𑁄 𑀯𑀺𑀦𑀬𑁄 𑀲𑀢𑀺𑀯𑀺𑀦𑀬𑁄. 𑀲𑀫𑁆𑀫𑀽𑀴𑁆𑀳𑀲𑁆𑀲 𑀕𑀕𑁆𑀕𑀪𑀺𑀓𑁆𑀔𑀼𑀲𑀤𑀺𑀲𑀲𑁆𑀲 𑀉𑀫𑁆𑀫𑀢𑁆𑀢𑀓𑀲𑁆𑀲 𑀤𑀸𑀢𑀩𑁆𑀩𑁄 𑀯𑀺𑀦𑀬𑁄 𑀅𑀫𑀽𑀴𑁆𑀳𑀯𑀺𑀦𑀬𑁄. 𑀧𑀝𑀺𑀜𑁆𑀜𑀸𑀢𑁂𑀦 𑀓𑀭𑀡𑀪𑀽𑀢𑁂𑀦 𑀓𑀭𑀡𑀁 𑀧𑀝𑀺𑀜𑁆𑀜𑀸𑀢𑀓𑀭𑀡𑀁. 𑀅𑀣 𑀯𑀸 𑀧𑀝𑀺𑀜𑁆𑀜𑀸𑀢𑁂 𑀆𑀧𑀦𑁆𑀦𑀪𑀸𑀯𑀸𑀤𑀺𑀓𑁂 𑀓𑀭𑀡𑀁 𑀓𑀺𑀭𑀺𑀬𑀸, ‘‘𑀆𑀬𑀢𑀺𑀁 𑀲𑀁𑀯𑀭𑁂𑀬𑁆𑀬𑀸𑀲𑀻’’𑀢𑀺 𑀧𑀭𑀺𑀯𑀸𑀲𑀤𑀸𑀦𑀸𑀤𑀺𑀯𑀲𑁂𑀦 𑀘 𑀧𑀯𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀧𑀝𑀺𑀜𑁆𑀜𑀸𑀢𑀓𑀭𑀡𑀁. 𑀬𑀲𑁆𑀲𑀸 𑀓𑀺𑀭𑀺𑀬𑀸𑀬 𑀥𑀫𑁆𑀫𑀯𑀸𑀤𑀺𑀦𑁄 𑀩𑀳𑀼𑀢𑀭𑀸, 𑀏𑀲𑀸 𑀬𑁂𑀪𑀼𑀬𑁆𑀬𑀲𑀺𑀓𑀸 𑀦𑀸𑀫. 𑀬𑁄 𑀧𑀸𑀧𑀼𑀲𑁆𑀲𑀦𑁆𑀦𑀢𑀸𑀬 𑀧𑀸𑀧𑀺𑀬𑁄, 𑀧𑀼𑀕𑁆𑀕𑀮𑁄, 𑀢𑀲𑁆𑀲 𑀉𑀧𑀯𑀸𑀴𑀪𑀺𑀓𑁆𑀔𑀼𑀲𑀤𑀺𑀲𑀲𑁆𑀲 𑀓𑀢𑁆𑀢𑀩𑁆𑀩𑀢𑁄 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸, 𑀅𑀮𑀼𑀢𑁆𑀢𑀲𑀫𑀸𑀲𑁄𑀬𑀁. 𑀢𑀺𑀡𑀯𑀢𑁆𑀣𑀸𑀭𑀓𑀲𑀤𑀺𑀲𑀢𑁆𑀢𑀸 𑀢𑀺𑀡𑀯𑀢𑁆𑀣𑀸𑀭𑀓𑁄. 𑀬𑀣𑀸 (𑀘𑀽𑀴𑀯. 𑀅𑀝𑁆𑀞. 𑁨𑁧𑁨) 𑀳𑀺 𑀕𑀽𑀣𑀁 𑀯𑀸 𑀫𑀼𑀢𑁆𑀢𑀁 𑀯𑀸 𑀖𑀝𑁆𑀝𑀺𑀬𑀫𑀸𑀦𑀁 𑀤𑀼𑀕𑁆𑀕𑀦𑁆𑀥𑀢𑀸𑀬 𑀩𑀸𑀥𑀢𑀺, 𑀢𑀺𑀡𑁂𑀳𑀺 𑀅𑀯𑀢𑁆𑀣𑀭𑀺𑀢𑁆𑀯𑀸 𑀲𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀢𑀲𑁆𑀲 𑀧𑀦𑀲𑁆𑀲 𑀕𑀦𑁆𑀥𑁄 𑀦 𑀩𑀸𑀥𑀢𑀺, 𑀏𑀯𑀫𑁂𑀯 𑀬𑀁 𑀅𑀥𑀺𑀓𑀭𑀡𑀁 𑀫𑀽𑀮𑀸𑀦𑀼𑀫𑀽𑀮𑀁 𑀕𑀦𑁆𑀢𑁆𑀯𑀸 𑀯𑀽𑀧𑀲𑀫𑀺𑀬𑀫𑀸𑀦𑀁 𑀓𑀓𑁆𑀔𑀴𑀢𑁆𑀢𑀸𑀬 𑀯𑀸𑀴𑀢𑁆𑀢𑀸𑀬 𑀪𑁂𑀤𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀁 𑀇𑀫𑀺𑀦𑀸 𑀓𑀫𑁆𑀫𑁂𑀦 𑀯𑀽𑀧𑀲𑀦𑁆𑀢𑀁 𑀕𑀽𑀣𑀁 𑀯𑀺𑀬 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀧𑀝𑀺𑀘𑁆𑀙𑀦𑁆𑀦𑀁 𑀲𑀼𑀯𑀽𑀧𑀲𑀦𑁆𑀢𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀺𑀡𑀯𑀢𑁆𑀣𑀸𑀭𑀓𑀲𑀤𑀺𑀲𑀢𑁆𑀢𑀸 𑀢𑀺𑀡𑀯𑀢𑁆𑀣𑀸𑀭𑀓𑁄’’𑀢𑀺.

𑀢𑀢𑁆𑀭𑀸𑀢𑀺 𑀢𑁂𑀲𑀼 𑀲𑀢𑁆𑀢𑀲𑀼 𑀅𑀥𑀺𑀓𑀭𑀡𑀲𑀫𑀣𑁂𑀲𑀼. ‘‘𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀻’’𑀢𑀺 𑀮𑀓𑁆𑀔𑀡𑀯𑀘𑀦𑀫𑁂𑀢𑀁 ‘‘𑀬𑀤𑀺 𑀫𑁂 𑀩𑁆𑀬𑀸𑀥𑀺𑀓𑀸 𑀪𑀯𑁂𑀬𑁆𑀬𑀼𑀁, 𑀤𑀸𑀢𑀩𑁆𑀩𑀫𑀺𑀤𑀫𑁄𑀲𑀥’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑀝𑀻. 𑁨.𑁩.𑁩𑁯-𑁪𑁨) 𑀯𑀺𑀬. 𑀢𑀲𑁆𑀫𑀸 𑀢𑁂𑀲𑀼 𑀅𑀜𑁆𑀜𑀢𑀭𑁂𑀦 𑀯𑀺𑀯𑀤𑀦𑁆𑀢𑀸 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺 𑀯𑀺𑀯𑀤𑀦𑁆𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀯𑀸𑀤𑁄𑀢𑀺 𑀯𑀺𑀧𑀘𑁆𑀘𑀦𑀻𑀓𑀯𑀸𑀤𑁄. 𑀉𑀧𑀯𑀤𑀦𑀸𑀢𑀺 𑀅𑀓𑁆𑀓𑁄𑀲𑁄. 𑀘𑁄𑀤𑀦𑀸𑀢𑀺 𑀅𑀦𑀼𑀬𑁄𑀕𑁄. 𑀤𑁆𑀯𑁂𑀢𑀺 𑀣𑀼𑀮𑁆𑀮𑀘𑁆𑀘𑀬𑀤𑀼𑀩𑁆𑀪𑀸𑀲𑀺𑀢𑀸𑀧𑀢𑁆𑀢𑀺𑀬𑁄 𑀤𑁆𑀯𑁂. 𑀘𑀢𑀼𑀦𑁆𑀦𑀁 𑀓𑀫𑁆𑀫𑀸𑀦𑀁 𑀓𑀭𑀡𑀦𑁆𑀢𑀺 𑀘𑀢𑀼𑀦𑁆𑀦𑀁 𑀓𑀫𑁆𑀫𑀸𑀦𑀁 𑀅𑀦𑁆𑀢𑀭𑁂 𑀬𑀲𑁆𑀲 𑀓𑀲𑁆𑀲𑀘𑀺 𑀓𑀫𑁆𑀫𑀲𑁆𑀲 𑀓𑀭𑀡𑀁.

𑀏𑀯𑀁 𑀅𑀥𑀺𑀓𑀭𑀡𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀼 𑀇𑀤𑀁 𑀅𑀥𑀺𑀓𑀭𑀡𑀁 𑀏𑀢𑁆𑀢𑀓𑁂𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀫𑀺𑀁𑀬𑁂𑀯 𑀯𑀸 𑀲𑀫𑁆𑀫𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀢𑀢𑁆𑀣 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀉𑀧𑁆𑀧𑀦𑁆𑀦𑀦𑁆𑀢𑀺 ‘‘𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀫𑀬𑁆𑀳𑀁 𑀇𑀫𑀺𑀦𑀸 𑀧𑀢𑁆𑀢𑁄 𑀕𑀳𑀺𑀢𑁄, 𑀘𑀻𑀯𑀭𑀁 𑀕𑀳𑀺𑀢’’𑀦𑁆𑀢𑀺𑀆𑀤𑀺𑀦𑀸 (𑀧𑀭𑀺. 𑀅𑀝𑁆𑀞. 𑁩𑁪𑁧) 𑀦𑀬𑁂𑀦 𑀧𑀢𑁆𑀢𑀘𑀻𑀯𑀭𑀸𑀤𑀻𑀦𑀁 𑀅𑀢𑁆𑀣𑀸𑀬 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀢𑀲𑁆𑀫𑀺𑀁𑀬𑁂𑀯 𑀯𑀸 𑀲𑀫𑁆𑀫𑀢𑀻𑀢𑀺 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂𑀬𑁂𑀯 𑀆𑀯𑀸𑀲𑀺𑀓𑁂𑀳𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀅𑀮𑀁, 𑀆𑀯𑀼𑀲𑁄’’𑀢𑀺 𑀅𑀢𑁆𑀣𑀧𑀘𑁆𑀘𑀢𑁆𑀣𑀺𑀓𑁂 𑀲𑀜𑁆𑀜𑀸𑀧𑁂𑀢𑁆𑀯𑀸 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑁂𑀦𑁂𑀯 𑀯𑀽𑀧𑀲𑀫𑁂𑀦𑁆𑀢𑁂𑀳𑀺 𑀲𑀫𑁆𑀫𑀢𑀺. 𑀲𑀘𑁂 𑀧𑀦 𑀢𑀁 𑀅𑀥𑀺𑀓𑀭𑀡𑀁 𑀦𑁂𑀯𑀸𑀲𑀺𑀓𑀸 𑀯𑀽𑀧𑀲𑀫𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀅𑀣𑀜𑁆𑀜𑁄 𑀯𑀺𑀦𑀬𑀥𑀭𑁄 𑀆𑀕𑀦𑁆𑀢𑁆𑀯𑀸 ‘‘𑀓𑀺𑀁, 𑀆𑀯𑀼𑀲𑁄, 𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀉𑀧𑁄𑀲𑀣𑁄 𑀯𑀸 𑀧𑀯𑀸𑀭𑀡𑀸 𑀯𑀸 𑀞𑀺𑀢𑀸’’𑀢𑀺 𑀧𑀼𑀘𑁆𑀙𑀢𑀺, 𑀢𑁂𑀳𑀺 𑀘 𑀢𑀲𑁆𑀫𑀺𑀁 𑀓𑀸𑀭𑀡𑁂 𑀓𑀣𑀺𑀢𑁂 𑀢𑀁 𑀅𑀥𑀺𑀓𑀭𑀡𑀁 𑀔𑀦𑁆𑀥𑀓𑀢𑁄 𑀘 𑀧𑀭𑀺𑀯𑀸𑀭𑀢𑁄 𑀘 𑀲𑀼𑀢𑁆𑀢𑁂𑀦 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀯𑀽𑀧𑀲𑀫𑁂𑀢𑀺. 𑀏𑀯𑀫𑁆𑀧𑀺 𑀏𑀢𑀲𑁆𑀫𑀺𑀁𑀬𑁂𑀯 𑀲𑀫𑁆𑀫𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀜𑁆𑀜𑀢𑁆𑀣 𑀯𑀽𑀧𑀲𑀫𑁂𑀢𑀼𑀁 𑀕𑀘𑁆𑀙𑀦𑁆𑀢𑀸𑀦𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀸 𑀲𑀫𑁆𑀫𑀢𑀻𑀢𑀺 ‘‘𑀦 𑀫𑀬𑀁 𑀏𑀢𑀲𑁆𑀲 𑀯𑀺𑀦𑀺𑀘𑁆𑀙𑀬𑁂 𑀢𑀺𑀝𑁆𑀞𑀸𑀫, 𑀦𑀸𑀬𑀁 𑀯𑀺𑀦𑀬𑁂 𑀓𑀼𑀲𑀮𑁄, 𑀅𑀫𑀼𑀓𑀲𑁆𑀫𑀺𑀁 𑀦𑀸𑀫 𑀕𑀸𑀫𑁂 𑀯𑀺𑀦𑀬𑀥𑀭𑀸 𑀣𑁂𑀭𑀸 𑀯𑀲𑀦𑁆𑀢𑀺, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀺𑀦𑀺𑀘𑁆𑀙𑀺𑀦𑀺𑀲𑁆𑀲𑀸𑀫𑀸’’𑀢𑀺 𑀕𑀘𑁆𑀙𑀦𑁆𑀢𑀸𑀦𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀸 𑀓𑀸𑀭𑀡𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀲𑀜𑁆𑀜𑀸𑀧𑁂𑀦𑁆𑀢𑁂𑀳𑀺, 𑀅𑀜𑁆𑀜𑁂𑀳𑀺 𑀯𑀸 𑀢𑁂 𑀪𑀺𑀓𑁆𑀔𑀽 𑀦𑀺𑀚𑁆𑀛𑀸𑀧𑁂𑀦𑁆𑀢𑁂𑀳𑀺 𑀲𑀫𑁆𑀫𑀢𑀺. 𑀦 𑀳𑁂𑀯 𑀔𑁄 𑀧𑀦 𑀅𑀜𑁆𑀜𑀫𑀜𑁆𑀜𑀲𑀜𑁆𑀜𑀢𑁆𑀢𑀺𑀬𑀸 𑀯𑀸 𑀲𑀪𑀸𑀕𑀪𑀺𑀓𑁆𑀔𑀼𑀦𑀺𑀚𑁆𑀛𑀸𑀧𑀦𑁂𑀦 𑀯𑀸 𑀯𑀽𑀧𑀲𑀦𑁆𑀢𑀁 𑀳𑁄𑀢𑀺, 𑀅𑀧𑀺𑀘 𑀔𑁄 𑀧𑀝𑀺𑀧𑀣𑀁 𑀆𑀕𑀘𑁆𑀙𑀦𑁆𑀢𑁄 𑀏𑀓𑁄 𑀯𑀺𑀦𑀬𑀥𑀭𑁄 𑀤𑀺𑀲𑁆𑀯𑀸 ‘‘𑀓𑀢𑁆𑀣𑀸𑀯𑀼𑀲𑁄, 𑀕𑀘𑁆𑀙𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀫𑀼𑀓𑀁 𑀦𑀸𑀫 𑀕𑀸𑀫𑀁 𑀇𑀫𑀺𑀦𑀸 𑀦𑀸𑀫 𑀓𑀭𑀡𑁂𑀦𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀮𑀁, 𑀆𑀯𑀼𑀲𑁄, 𑀓𑀺𑀁 𑀢𑀢𑁆𑀣 𑀕𑀢𑁂𑀦𑀸’’𑀢𑀺 𑀢𑀢𑁆𑀣𑁂𑀯 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀺. 𑀏𑀯𑀫𑁆𑀧𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀽𑀧𑀲𑀫𑁆𑀫𑀢𑀺 𑀦𑀸𑀫.

𑀬𑀢𑁆𑀣 𑀕𑀦𑁆𑀢𑁆𑀯𑀸 𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀢𑀺𑀢𑀁, 𑀢𑀢𑁆𑀣 𑀲𑀗𑁆𑀖𑁂𑀦 𑀯𑀸𑀢𑀺 𑀲𑀘𑁂 𑀧𑀦 ‘‘𑀅𑀮𑀁, 𑀆𑀯𑀼𑀲𑁄, 𑀓𑀺𑀁 𑀢𑀢𑁆𑀣 𑀕𑀢𑁂𑀦𑀸’’𑀢𑀺 𑀯𑀼𑀘𑁆𑀘𑀫𑀸𑀦𑀸𑀧𑀺 ‘‘𑀫𑀬𑀁 𑀢𑀢𑁆𑀣𑁂𑀯 𑀕𑀦𑁆𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀁 𑀧𑀸𑀧𑁂𑀲𑁆𑀲𑀸𑀫𑀸’’𑀢𑀺 (𑀧𑀭𑀺. 𑀅𑀝𑁆𑀞. 𑁩𑁪𑁧) 𑀯𑀺𑀦𑀬𑀥𑀭𑀲𑁆𑀲 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀲𑀪𑀸𑀕𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀥𑀺𑀓𑀭𑀡𑀁 𑀦𑀺𑀬𑁆𑀬𑀸𑀢𑀺𑀢𑀁, 𑀢𑀢𑁆𑀣 𑀲𑀗𑁆𑀖𑁂𑀦 ‘‘𑀅𑀮𑀁, 𑀆𑀯𑀼𑀲𑁄, 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑀁 𑀦𑀸𑀫 𑀕𑀭𑀼𑀓’’𑀦𑁆𑀢𑀺 𑀢𑀢𑁆𑀣𑁂𑀯 𑀦𑀺𑀲𑀻𑀤𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀺𑀢𑀁 𑀲𑀫𑁆𑀫𑀢𑀺. 𑀦 𑀳𑁂𑀯 𑀔𑁄 𑀧𑀦 𑀲𑀪𑀸𑀕𑀪𑀺𑀓𑁆𑀔𑀽𑀦𑀁 𑀲𑀜𑁆𑀜𑀢𑁆𑀢𑀺𑀬𑀸 𑀯𑀽𑀧𑀲𑀦𑁆𑀢𑀁 𑀳𑁄𑀢𑀺, 𑀅𑀧𑀺𑀘 𑀔𑁄 𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀆𑀭𑁄𑀘𑀺𑀢𑀁 𑀲𑀗𑁆𑀖𑀫𑀚𑁆𑀛𑁂 𑀯𑀺𑀦𑀬𑀥𑀭𑀸 𑀯𑀽𑀧𑀲𑀫𑁂𑀦𑁆𑀢𑀺. 𑀏𑀯𑀫𑁆𑀧𑀺 𑀢𑀢𑁆𑀣 𑀲𑀗𑁆𑀖𑁂𑀦 𑀯𑀺𑀦𑀺𑀘𑁆𑀙𑀺𑀢𑀁 𑀲𑀫𑁆𑀫𑀢𑀺 𑀦𑀸𑀫.

𑀉𑀩𑁆𑀩𑀸𑀳𑀺𑀓𑀸𑀬 𑀲𑀫𑁆𑀫𑀢𑀧𑀼𑀕𑁆𑀕𑀮𑁂𑀳𑀺 𑀯𑀸 𑀯𑀺𑀦𑀺𑀘𑁆𑀙𑀺𑀢𑀦𑁆𑀢𑀺 𑀅𑀧𑀮𑁄𑀓𑁂𑀢𑁆𑀯𑀸 𑀯𑀸 𑀔𑀦𑁆𑀥𑀓𑁂 𑀯𑀼𑀢𑁆𑀢𑀸𑀬 𑀯𑀸 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀲𑀫𑁆𑀫𑀢𑁂𑀳𑀺 𑀧𑀼𑀕𑁆𑀕𑀮𑁂𑀳𑀺 𑀯𑀺𑀲𑀼𑀁 𑀯𑀸 𑀦𑀺𑀲𑀻𑀤𑀺𑀢𑁆𑀯𑀸, 𑀢𑀲𑁆𑀲𑀸𑀬𑁂𑀯 𑀯𑀸 𑀧𑀭𑀺𑀲𑀸𑀬 ‘‘𑀅𑀜𑁆𑀜𑁂𑀦 𑀦 𑀓𑀺𑀜𑁆𑀘𑀺 𑀓𑀣𑁂𑀢𑀩𑁆𑀩’’𑀦𑁆𑀢𑀺 (𑀘𑀽𑀴𑀯. 𑀅𑀝𑁆𑀞. 𑁨𑁩𑁧) 𑀲𑀸𑀯𑁂𑀢𑁆𑀯𑀸 𑀯𑀺𑀦𑀺𑀘𑁆𑀙𑀺𑀢𑀁. 𑀅𑀬𑀦𑁆𑀢𑀺 𑀅𑀬𑀁 𑀬𑀣𑀸𑀯𑀼𑀢𑁆𑀢𑀸 𑀘𑀢𑀼𑀩𑁆𑀩𑀺𑀥𑀸 𑀲𑀫𑁆𑀫𑀼𑀔𑀢𑀸.

𑀓𑀸𑀭𑀓𑀲𑀗𑁆𑀖𑀲𑁆𑀲𑀸𑀢𑀺 𑀯𑀽𑀧𑀲𑀫𑁂𑀢𑀼𑀁 𑀲𑀦𑁆𑀦𑀺𑀧𑀢𑀺𑀢𑀲𑁆𑀲 𑀓𑀸𑀭𑀓𑀲𑀗𑁆𑀖𑀲𑁆𑀲. 𑀲𑀗𑁆𑀖𑀲𑀸𑀫𑀕𑁆𑀕𑀺𑀯𑀲𑁂𑀦 𑀲𑀫𑁆𑀫𑀼𑀔𑀻𑀪𑀸𑀯𑁄𑀢𑀺 ‘‘𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸, 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀦 𑀧𑀝𑀺𑀓𑁆𑀓𑁄𑀲𑀦𑁆𑀢𑀻’’𑀢𑀺 (𑀘𑀽𑀴𑀯. 𑁨𑁨𑁮) 𑀏𑀯𑀁 𑀯𑀼𑀢𑁆𑀢𑀲𑀗𑁆𑀖𑀲𑀸𑀫𑀕𑁆𑀕𑀺𑀯𑀲𑁂𑀦 𑀲𑀫𑁆𑀫𑀼𑀔𑀻𑀪𑀸𑀯𑁄, 𑀏𑀢𑁂𑀦 𑀬𑀣𑀸 𑀢𑀣𑀸 𑀧𑀥𑀸𑀦𑀓𑀸𑀭𑀓𑀧𑀼𑀕𑁆𑀕𑀮𑀸𑀦𑀁 𑀲𑀫𑁆𑀫𑀼𑀔𑀢𑀸𑀫𑀢𑁆𑀢𑀁 𑀲𑀗𑁆𑀖𑀲𑀫𑁆𑀫𑀼𑀔𑀢𑀸 𑀦𑀸𑀫 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀪𑀽𑀢𑀢𑀸𑀢𑀺 𑀢𑀘𑁆𑀙𑀢𑀸. 𑀲𑀘𑁆𑀘𑀧𑀭𑀺𑀬𑀸𑀬𑁄 𑀳𑀺 𑀇𑀥 𑀥𑀫𑁆𑀫𑀲𑀤𑁆𑀤𑁄 ‘‘𑀥𑀫𑁆𑀫𑀯𑀸𑀤𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁯, 𑁧𑁯𑁪) 𑀯𑀺𑀬. 𑀯𑀺𑀦𑁂𑀢𑀺 𑀏𑀢𑁂𑀦𑀸𑀢𑀺 𑀯𑀺𑀦𑀬𑁄, 𑀢𑀲𑁆𑀲 𑀢𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀯𑀽𑀧𑀲𑀫𑀦𑀸𑀬 𑀪𑀕𑀯𑀢𑀸 𑀯𑀼𑀢𑁆𑀢𑀯𑀺𑀥𑀺, 𑀢𑀲𑁆𑀲 𑀯𑀺𑀦𑀬𑀲𑁆𑀲 𑀲𑀫𑁆𑀫𑀼𑀔𑀢𑀸 𑀯𑀺𑀦𑀬𑀲𑀫𑁆𑀫𑀼𑀔𑀢𑀸. 𑀢𑁂𑀦𑀸𑀳 ‘‘𑀬𑀣𑀸 𑀢𑀁…𑀧𑁂… 𑀯𑀺𑀦𑀬𑀲𑀫𑁆𑀫𑀼𑀔𑀢𑀸’’𑀢𑀺. 𑀬𑁂𑀦𑀸𑀢𑀺 𑀬𑁂𑀦 𑀧𑀼𑀕𑁆𑀕𑀮𑁂𑀦. 𑀅𑀢𑁆𑀣𑀧𑀘𑁆𑀘𑀢𑁆𑀣𑀺𑀓𑀸𑀦𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁩.𑁨𑁨𑁮) 𑀯𑀺𑀯𑀸𑀤𑀯𑀢𑁆𑀣𑀼𑀲𑀗𑁆𑀔𑀸𑀢𑁂 𑀅𑀢𑁆𑀣𑁂 𑀧𑀘𑁆𑀘𑀢𑁆𑀣𑀺𑀓𑀸𑀦𑀁. 𑀲𑀗𑁆𑀖𑀲𑀫𑁆𑀫𑀼𑀔𑀢𑀸 𑀧𑀭𑀺𑀳𑀸𑀬𑀢𑀺 𑀲𑀫𑁆𑀫𑀢𑀧𑀼𑀕𑁆𑀕𑀮𑁂𑀳𑁂𑀯 𑀯𑀽𑀧𑀲𑀫𑀦𑀢𑁄.

𑀦𑀦𑁆𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁. 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀦𑁆𑀢𑀺 (𑀘𑀽𑀴𑀯. 𑁨𑁩𑁪) ‘‘𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀕𑀳𑀺𑀢𑀸𑀕𑀳𑀺𑀢𑀁 𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑁂𑀳𑀺 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁. 𑀕𑀽𑀴𑁆𑀳𑀓𑀯𑀺𑀯𑀝𑀓𑀲𑀓𑀡𑁆𑀡𑀚𑀧𑁆𑀧𑀓𑁂𑀲𑀼 𑀢𑀻𑀲𑀼 𑀲𑀮𑀸𑀓𑀕𑁆𑀕𑀸𑀳𑁂𑀲𑀽𑀢𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀜𑁆𑀜𑀢𑁆𑀢𑀺𑀬𑀸 𑀢𑀬𑁄 𑀲𑀮𑀸𑀓𑀕𑁆𑀕𑀸𑀳𑀓𑁂 𑀕𑀽𑀴𑁆𑀳𑀓𑀁, 𑀯𑀺𑀯𑀝𑀓𑀁, 𑀲𑀓𑀡𑁆𑀡𑀚𑀧𑁆𑀧𑀓’’𑀦𑁆𑀢𑀺 (𑀘𑀽𑀴𑀯. 𑁨𑁩𑁫) 𑀲𑀫𑀣𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑁂𑀲𑀼 𑀢𑀻𑀲𑀼 𑀲𑀮𑀸𑀓𑀕𑁆𑀕𑀸𑀳𑁂𑀲𑀼. 𑀲𑀮𑀸𑀓𑀁 𑀕𑀸𑀳𑁂𑀢𑁆𑀯𑀸𑀢𑀺 𑀥𑀫𑁆𑀫𑀯𑀸𑀤𑀻𑀦𑀜𑁆𑀘 𑀅𑀥𑀫𑁆𑀫𑀯𑀸𑀤𑀻𑀦𑀜𑁆𑀘 𑀲𑀮𑀸𑀓𑀸𑀬𑁄 𑀦𑀺𑀫𑀺𑀢𑁆𑀢𑀲𑀜𑁆𑀜𑀁 𑀆𑀭𑁄𑀧𑁂𑀢𑁆𑀯𑀸 𑀘𑀻𑀯𑀭𑀪𑁄𑀕𑁂 𑀓𑀢𑁆𑀯𑀸 𑀲𑀫𑀣𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀦𑀬𑁂𑀦 𑀕𑀸𑀳𑀸𑀧𑁂𑀢𑁆𑀯𑀸. 𑀏𑀯𑀜𑁆𑀳𑀺 𑀢𑀢𑁆𑀣 𑀯𑀼𑀢𑁆𑀢𑀁 𑁋

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀕𑀽𑀴𑁆𑀳𑀓𑁄 𑀲𑀮𑀸𑀓𑀕𑁆𑀕𑀸𑀳𑁄 𑀳𑁄𑀢𑀺? 𑀢𑁂𑀦 𑀲𑀮𑀸𑀓𑀕𑁆𑀕𑀸𑀳𑀸𑀧𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀮𑀸𑀓𑀸𑀬𑁄 𑀯𑀡𑁆𑀡𑀸𑀯𑀡𑁆𑀡𑀸𑀬𑁄 𑀓𑀢𑁆𑀯𑀸 𑀏𑀓𑀫𑁂𑀓𑁄 𑀪𑀺𑀓𑁆𑀔𑀼 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 ‘𑀅𑀬𑀁 𑀏𑀯𑀁𑀯𑀸𑀤𑀺𑀲𑁆𑀲 𑀲𑀮𑀸𑀓𑀸, 𑀅𑀬𑀁 𑀏𑀯𑀁𑀯𑀸𑀤𑀺𑀲𑁆𑀲 𑀲𑀮𑀸𑀓𑀸, 𑀬𑀁 𑀇𑀘𑁆𑀙𑀲𑀺, 𑀢𑀁 𑀕𑀡𑁆𑀳𑀸𑀳𑀻’𑀢𑀺. 𑀕𑀳𑀺𑀢𑁂 𑀯𑀢𑁆𑀢𑀩𑁆𑀩𑁄 ‘𑀫𑀸 𑀘 𑀓𑀲𑁆𑀲𑀘𑀺 𑀤𑀲𑁆𑀲𑁂𑀳𑀻’𑀢𑀺. 𑀲𑀘𑁂 𑀚𑀸𑀦𑀸𑀢𑀺 ‘𑀅𑀥𑀫𑁆𑀫𑀯𑀸𑀤𑀻 𑀩𑀳𑀼𑀢𑀭𑀸’𑀢𑀺, ‘𑀤𑀼𑀕𑁆𑀕𑀳𑁄’𑀢𑀺 𑀧𑀘𑁆𑀘𑀼𑀓𑁆𑀓𑀟𑁆𑀠𑀺𑀢𑀩𑁆𑀩𑀁. 𑀲𑀘𑁂 𑀚𑀸𑀦𑀸𑀢𑀺 ‘𑀥𑀫𑁆𑀫𑀯𑀸𑀤𑀻 𑀩𑀳𑀼𑀢𑀭𑀸’𑀢𑀺, ‘𑀲𑀼𑀕𑁆𑀕𑀳𑁄’𑀢𑀺 𑀲𑀸𑀯𑁂𑀢𑀩𑁆𑀩𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀕𑀽𑀴𑁆𑀳𑀓𑁄 𑀲𑀮𑀸𑀓𑀕𑁆𑀕𑀸𑀳𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀯𑀺𑀯𑀝𑀓𑁄 𑀲𑀮𑀸𑀓𑀕𑁆𑀕𑀸𑀳𑁄 𑀳𑁄𑀢𑀺? 𑀲𑀘𑁂 𑀚𑀸𑀦𑀸𑀢𑀺 ‘𑀥𑀫𑁆𑀫𑀯𑀸𑀤𑀻 𑀩𑀳𑀼𑀢𑀭𑀸’𑀢𑀺, 𑀯𑀺𑀲𑁆𑀲𑀝𑁆𑀞𑁂𑀦𑁂𑀯 𑀯𑀺𑀯𑀝𑁂𑀦 𑀕𑀸𑀳𑁂𑀢𑀩𑁆𑀩𑁄. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀯𑀝𑀓𑁄 𑀲𑀮𑀸𑀓𑀕𑁆𑀕𑀸𑀳𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀓𑀡𑁆𑀡𑀚𑀧𑁆𑀧𑀓𑁄 𑀲𑀮𑀸𑀓𑀕𑁆𑀕𑀸𑀳𑁄 𑀳𑁄𑀢𑀺? 𑀢𑁂𑀦 𑀲𑀮𑀸𑀓𑀕𑁆𑀕𑀸𑀳𑀸𑀧𑀓𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀫𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑀓𑀡𑁆𑀡𑀓𑁂 𑀆𑀭𑁄𑀘𑁂𑀢𑀩𑁆𑀩𑀁 ‘𑀅𑀬𑀁 𑀏𑀯𑀁𑀯𑀸𑀤𑀺𑀲𑁆𑀲 𑀲𑀮𑀸𑀓𑀸, 𑀅𑀬𑀁 𑀏𑀯𑀯𑀸𑀤𑀺𑀲𑁆𑀲 𑀲𑀮𑀸𑀓𑀸, 𑀬𑀁 𑀇𑀘𑁆𑀙𑀲𑀺, 𑀢𑀁 𑀕𑀡𑁆𑀳𑀸𑀳𑀻’𑀢𑀺. 𑀕𑀳𑀺𑀢𑁂 𑀯𑀢𑁆𑀢𑀩𑁆𑀩𑁄 ‘𑀫𑀸 𑀘 𑀓𑀲𑁆𑀲𑀘𑀺 𑀆𑀭𑁄𑀘𑁂𑀳𑀻’𑀢𑀺. 𑀲𑀘𑁂 𑀚𑀸𑀦𑀸𑀢𑀺 ‘𑀅𑀥𑀫𑁆𑀫𑀯𑀸𑀤𑀻 𑀩𑀳𑀼𑀢𑀭𑀸’𑀢𑀺, ‘𑀤𑀼𑀕𑁆𑀕𑀳𑁄’𑀢𑀺 𑀧𑀘𑁆𑀘𑀼𑀓𑁆𑀓𑀟𑁆𑀠𑀺𑀢𑀩𑁆𑀩𑀁. 𑀲𑀘𑁂 𑀚𑀸𑀦𑀸𑀢𑀺 ‘𑀥𑀫𑁆𑀫𑀯𑀸𑀤𑀻 𑀩𑀳𑀼𑀢𑀭𑀸’𑀢𑀺, ‘𑀲𑀼𑀕𑁆𑀕𑀳𑁄’𑀢𑀺 𑀲𑀸𑀯𑁂𑀢𑀩𑁆𑀩𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀓𑀡𑁆𑀡𑀚𑀧𑁆𑀧𑀓𑁄 𑀲𑀮𑀸𑀓𑀕𑁆𑀕𑀸𑀳𑁄 𑀳𑁄𑀢𑀻’’𑀢𑀺.

𑀏𑀢𑁆𑀣 𑀘 𑀅𑀮𑀚𑁆𑀚𑀼𑀲𑁆𑀲𑀦𑁆𑀦𑀸𑀬 (𑀘𑀽𑀴𑀯. 𑀅𑀝𑁆𑀞. 𑁨𑁩𑁫) 𑀧𑀭𑀺𑀲𑀸𑀬 𑀕𑀽𑀴𑁆𑀳𑀓𑁄 𑀲𑀮𑀸𑀓𑀕𑁆𑀕𑀸𑀳𑁄 𑀓𑀸𑀢𑀩𑁆𑀩𑁄, 𑀮𑀚𑁆𑀚𑀼𑀲𑁆𑀲𑀦𑁆𑀦𑀸𑀬 𑀯𑀺𑀯𑀝𑀓𑁄, 𑀩𑀸𑀮𑀼𑀲𑁆𑀲𑀦𑁆𑀦𑀸𑀬 𑀲𑀓𑀡𑁆𑀡𑀚𑀧𑁆𑀧𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀥𑀫𑁆𑀫𑀯𑀸𑀤𑀻𑀦𑀁 𑀬𑁂𑀪𑀼𑀬𑁆𑀬𑀢𑀸𑀬𑀸𑀢𑀺 𑀥𑀫𑁆𑀫𑀯𑀸𑀤𑀻𑀦𑀁 𑀏𑀓𑁂𑀦𑀧𑀺 𑀅𑀥𑀺𑀓𑀢𑀸𑀬, 𑀓𑁄 𑀧𑀦 𑀯𑀸𑀤𑁄 𑀤𑁆𑀯𑀻𑀳𑀺 𑀢𑀻𑀳𑀺.

‘‘𑀘𑀢𑀽𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀻’’𑀢𑀺 𑀇𑀤𑀁 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀢𑁆𑀣 𑀧𑀦 𑀤𑁆𑀯𑀻𑀳𑀺 𑀏𑀯 𑀯𑀽𑀧𑀲𑀫𑀦𑀁 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀯𑀺𑀦𑀺𑀘𑁆𑀙𑀺𑀢𑀦𑁆𑀢𑀺 𑀲𑀘𑁂 𑀆𑀧𑀢𑁆𑀢𑀺 𑀦𑀢𑁆𑀣𑀺, 𑀉𑀪𑁄 𑀔𑀫𑀸𑀧𑁂𑀢𑁆𑀯𑀸, 𑀅𑀣 𑀅𑀢𑁆𑀣𑀺, 𑀆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀭𑁄𑀧𑀦𑀯𑀲𑁂𑀦 𑀯𑀺𑀦𑀺𑀘𑁆𑀙𑀺𑀢𑀁. 𑀧𑀝𑀺𑀓𑀫𑁆𑀫𑀁 𑀧𑀦 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑀫𑀣𑁂 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀻𑀢𑀺. 𑀦 𑀲𑀫𑀡𑀲𑀸𑀭𑀼𑀧𑁆𑀧𑀁 𑀅𑀲𑁆𑀲𑀸𑀫𑀡𑀓𑀁, 𑀲𑀫𑀡𑁂𑀳𑀺 𑀅𑀓𑀢𑁆𑀢𑀩𑁆𑀩𑀁, 𑀢𑀲𑁆𑀫𑀺𑀁. 𑀅𑀚𑁆𑀛𑀸𑀘𑀸𑀭𑁂 𑀯𑀻𑀢𑀺𑀓𑁆𑀓𑀫𑁂 𑀲𑀢𑀺.

𑀧𑀸𑀭𑀸𑀚𑀺𑀓𑀲𑀸𑀫𑀦𑁆𑀢𑁂𑀦 𑀯𑀸𑀢𑀺 𑀤𑀼𑀓𑁆𑀓𑀝𑁂𑀦 𑀯𑀸 𑀣𑀼𑀮𑁆𑀮𑀘𑁆𑀘𑀬𑁂𑀦 𑀯𑀸. 𑀫𑁂𑀣𑀼𑀦𑀥𑀫𑁆𑀫𑁂 𑀳𑀺 𑀧𑀸𑀭𑀸𑀚𑀺𑀓𑀲𑀸𑀫𑀦𑁆𑀢𑀸 𑀦𑀸𑀫 𑀤𑀼𑀓𑁆𑀓𑀝𑀁 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀲𑀼 𑀣𑀼𑀮𑁆𑀮𑀘𑁆𑀘𑀬𑀁. 𑀧𑀝𑀺𑀘𑀭𑀢𑁄𑀢𑀺 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀲𑁆𑀲. 𑀅𑀘𑁆𑀙𑀺𑀦𑁆𑀦𑀫𑀽𑀮𑁄 𑀪𑀯𑀺𑀲𑁆𑀲𑀢𑀻𑀢𑀺 𑀧𑀸𑀭𑀸𑀚𑀺𑀓𑀁 𑀅𑀦𑀸𑀧𑀦𑁆𑀦𑁄 𑀪𑀯𑀺𑀲𑁆𑀲𑀢𑀺, 𑀲𑀻𑀮𑀯𑀸 𑀪𑀯𑀺𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑁆𑀫𑀸 𑀯𑀢𑁆𑀢𑀺𑀢𑁆𑀯𑀸𑀢𑀺 𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸. 𑀑𑀲𑀸𑀭𑀡𑀁 𑀮𑀪𑀺𑀲𑁆𑀲𑀢𑀻𑀢𑀺 𑀓𑀫𑁆𑀫𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀮𑀪𑀺𑀲𑁆𑀲𑀢𑀺.

𑀢𑀲𑁆𑀲𑀸𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲. 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦𑁂𑀯 𑀯𑀽𑀧𑀲𑀫𑁄 𑀦𑀢𑁆𑀣𑀺 𑀧𑀝𑀺𑀜𑁆𑀜𑀸𑀬, 𑀢𑀣𑀸𑀭𑀽𑀧𑀸𑀬 𑀔𑀦𑁆𑀢𑀺𑀬𑀸 𑀯𑀸 𑀯𑀺𑀦𑀸 𑀅𑀯𑀽𑀧𑀲𑀫𑀦𑀢𑁄. 𑀬𑀸 𑀧𑀦 𑀧𑀝𑀺𑀜𑁆𑀜𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀏𑀢𑁆𑀣𑀸𑀢𑀺 𑀆𑀧𑀢𑁆𑀢𑀺𑀤𑁂𑀲𑀦𑀸𑀬𑀁. 𑀲𑀺𑀬𑀸𑀢𑀺 𑀅𑀯𑀲𑁆𑀲𑀁. 𑀓𑀓𑁆𑀔𑀴𑀢𑁆𑀢𑀸𑀬 𑀯𑀸𑀴𑀢𑁆𑀢𑀸𑀬𑀸𑀢𑀺 𑀓𑀓𑁆𑀔𑀴𑀪𑀸𑀯𑀸𑀬 𑀘𑁂𑀯 𑀯𑀸𑀴𑀪𑀸𑀯𑀸𑀬 𑀘. 𑀣𑀼𑀮𑁆𑀮𑀯𑀚𑁆𑀚𑀦𑁆𑀢𑀺 𑀧𑀸𑀭𑀸𑀚𑀺𑀓𑀜𑁆𑀘𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑀜𑁆𑀘. 𑀕𑀺𑀳𑀺𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀦𑁆𑀢𑀺 𑀕𑀺𑀳𑀻𑀦𑀁 𑀳𑀻𑀦𑁂𑀦 𑀔𑀼𑀁𑀲𑀦𑀯𑀫𑁆𑀪𑀦𑀥𑀫𑁆𑀫𑀺𑀓𑀧𑁆𑀧𑀝𑀺𑀲𑁆𑀲𑀯𑁂𑀲𑀼 𑀆𑀧𑀦𑁆𑀦𑀁 𑀆𑀧𑀢𑁆𑀢𑀺𑀁.

𑀬𑀣𑀸𑀦𑀼𑀭𑀽𑀧𑀦𑁆𑀢𑀺 ‘‘𑀤𑁆𑀯𑀻𑀳𑀺 𑀲𑀫𑀣𑁂𑀳𑀺, 𑀢𑀻𑀳𑀺, 𑀘𑀢𑀽𑀳𑀺, 𑀏𑀓𑁂𑀦𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑀣𑀸𑀦𑀼𑀭𑀽𑀧𑀁. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀫𑀣𑀸𑀥𑀺𑀓𑀸𑀭𑁂. 𑀯𑀺𑀦𑀺𑀘𑁆𑀙𑀬𑀦𑀬𑁄𑀢𑀺 𑀯𑀺𑀦𑀺𑀘𑁆𑀙𑀬𑀦𑀬𑀫𑀢𑁆𑀢𑀁. 𑀢𑁂𑀦𑀸𑀳 ‘‘𑀯𑀺𑀢𑁆𑀣𑀸𑀭𑁄 𑀧𑀦𑀸’’𑀢𑀺𑀆𑀤𑀺. 𑀅𑀲𑁆𑀲𑀸𑀢𑀺 𑀯𑀺𑀢𑁆𑀣𑀸𑀭𑀲𑁆𑀲. 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀯𑀼𑀢𑁆𑀢𑁄𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀦𑀸𑀫 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄. 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀢𑁆𑀢𑀓𑀦𑁆𑀢𑀺 𑀏𑀢𑀁𑀧𑀭𑀫𑀁, 𑀦 𑀇𑀢𑁄 𑀪𑀺𑀬𑁆𑀬𑁄.

𑀅𑀥𑀺𑀓𑀭𑀡𑀲𑀫𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸𑀬

𑀯𑀺𑀦𑀬𑀢𑁆𑀣𑀫𑀜𑁆𑀚𑀽𑀲𑀸𑀬𑀁 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀺𑀬𑀁

𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲