𑁮. 𑀲𑀳𑀥𑀫𑁆𑀫𑀺𑀓𑀯𑀕𑁆𑀕𑁄

𑁧. 𑀲𑀳𑀥𑀫𑁆𑀫𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀳𑀥𑀫𑁆𑀫𑀺𑀓𑀁 𑀯𑀼𑀘𑁆𑀘𑀫𑀸𑀦𑁄𑀢𑀺 𑀲𑀳𑀥𑀫𑁆𑀫𑀺𑀓𑁂𑀦 𑀯𑀼𑀘𑁆𑀘𑀫𑀸𑀦𑁄. 𑀓𑀭𑀡𑀢𑁆𑀣𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. ‘‘𑀧𑀜𑁆𑀘𑀳𑀺 𑀲𑀳𑀥𑀫𑁆𑀫𑀺𑀓𑁂𑀳𑀺 𑀲𑀺𑀓𑁆𑀔𑀺𑀢𑀩𑁆𑀩𑀢𑁆𑀢𑀸, 𑀢𑁂𑀲𑀁 𑀯𑀸 𑀲𑀦𑁆𑀢𑀓𑀢𑁆𑀢𑀸 ‘𑀲𑀳𑀥𑀫𑁆𑀫𑀺𑀓’𑀦𑁆𑀢𑀺 𑀮𑀤𑁆𑀥𑀦𑀸𑀫𑁂𑀦 𑀩𑀼𑀤𑁆𑀥𑀧𑀜𑁆𑀜𑀢𑁆𑀢𑁂𑀦 𑀲𑀺𑀓𑁆𑀔𑀸𑀧𑀤𑁂𑀦 𑀯𑀼𑀘𑁆𑀘𑀫𑀸𑀦𑁄𑀢𑀺 𑀅𑀢𑁆𑀣𑁄’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀤𑀼𑀩𑁆𑀩𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸; 𑀧𑀸𑀭𑀸. 𑀅𑀝𑁆𑀞. 𑁨.𑁪𑁨𑁫-𑁪𑁨𑁬) 𑀤𑀼𑀩𑁆𑀩𑀘𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀢𑁆𑀢𑀸 ‘‘𑀲𑀳𑀥𑀫𑁆𑀫𑀺𑀓𑀁 𑀯𑀼𑀘𑁆𑀘𑀫𑀸𑀦𑁄𑀢𑀺 𑀇𑀫𑀲𑁆𑀲𑀢𑁆𑀣𑁄 𑀤𑀼𑀩𑁆𑀩𑀘𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀁. 𑀅𑀦𑀸𑀤𑀭𑀺𑀬𑀪𑀬𑀸𑀢𑀺 𑀅𑀦𑀸𑀤𑀭𑀓𑀭𑀡𑁂 𑀪𑀬𑀸, 𑀢𑀢𑁆𑀣 𑀧𑀸𑀘𑀺𑀢𑁆𑀢𑀺𑀬𑀪𑀬𑀸𑀢𑀺 𑀅𑀢𑁆𑀣𑁄. 𑀮𑁂𑀲𑁂𑀦 𑀏𑀯𑀁 𑀯𑀤𑀦𑁆𑀢𑀲𑁆𑀲𑀸𑀢𑀺 𑀉𑀚𑀼𑀓𑀁 ‘‘𑀦 𑀲𑀺𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀅𑀯𑀢𑁆𑀯𑀸 ‘‘𑀬𑀸𑀯 𑀦 𑀅𑀜𑁆𑀜𑀁 𑀪𑀺𑀓𑁆𑀔𑀼’’𑀦𑁆𑀢𑀺𑀆𑀤𑀺𑀦𑀸 𑀮𑁂𑀲𑁂𑀦 𑀯𑀤𑀦𑁆𑀢𑀲𑁆𑀲.

𑀲𑀳𑀥𑀫𑁆𑀫𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀯𑀺𑀮𑁂𑀔𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀔𑀼𑀤𑁆𑀤𑀓𑁂𑀳𑀺 𑀘 𑀅𑀦𑀼𑀔𑀼𑀤𑁆𑀤𑀓𑁂𑀳𑀺 𑀘𑀸𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀸𑀤𑀻𑀳𑀺 𑀔𑀼𑀤𑁆𑀤𑀓𑁂𑀳𑀺 𑀘𑁂𑀯 𑀣𑀼𑀮𑁆𑀮𑀘𑁆𑀘𑀬𑀸𑀤𑀻𑀳𑀺 𑀅𑀦𑀼𑀔𑀼𑀤𑁆𑀤𑀓𑁂𑀳𑀺 𑀘. 𑀞𑀧𑁂𑀢𑁆𑀯𑀸 𑀳𑀺 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀅𑀯𑀲𑁂𑀲𑀸𑀦𑀺 𑀲𑀩𑁆𑀩𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀭𑀺𑀬𑀸𑀬𑁂𑀦 𑀔𑀼𑀤𑁆𑀤𑀓𑀸𑀦𑀺 𑀘𑁂𑀯 𑀳𑁄𑀦𑁆𑀢𑀺 𑀅𑀦𑀼𑀔𑀼𑀤𑁆𑀤𑀓𑀸𑀦𑀺 𑀘. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀜𑁆𑀘𑀲𑀢𑀺𑀓𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁪𑁪𑁧) 𑁋

‘‘𑀓𑀢𑀫𑀸𑀦𑀺 𑀧𑀦, 𑀪𑀦𑁆𑀢𑁂, 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺? 𑀏𑀓𑀘𑁆𑀘𑁂 𑀣𑁂𑀭𑀸 𑀏𑀯𑀫𑀸𑀳𑀁𑀲𑀼 𑁋 ‘𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀻’𑀢𑀺. 𑀏𑀓𑀘𑁆𑀘𑁂 𑀣𑁂𑀭𑀸 𑀏𑀯𑀫𑀸𑀳𑀁𑀲𑀼 𑁋 ‘𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀞𑀧𑁂𑀢𑁆𑀯𑀸 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀻’𑀢𑀺. 𑀏𑀓𑀘𑁆𑀘𑁂 𑀣𑁂𑀭𑀸 𑀏𑀯𑀫𑀸𑀳𑀁𑀲𑀼 𑁋 ‘𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀞𑀧𑁂𑀢𑁆𑀯𑀸 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑁂 𑀞𑀧𑁂𑀢𑁆𑀯𑀸 𑀤𑁆𑀯𑁂 𑀅𑀦𑀺𑀬𑀢𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀻’𑀢𑀺. 𑀏𑀓𑀘𑁆𑀘𑁂 𑀣𑁂𑀭𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀞𑀧𑁂𑀢𑁆𑀯𑀸 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑁂 𑀞𑀧𑁂𑀢𑁆𑀯𑀸 𑀤𑁆𑀯𑁂 𑀅𑀦𑀺𑀬𑀢𑁂 𑀞𑀧𑁂𑀢𑁆𑀯𑀸 𑀢𑀺𑀁𑀲 𑀦𑀺𑀲𑁆𑀲𑀕𑁆𑀕𑀺𑀬𑁂 𑀧𑀸𑀘𑀺𑀢𑁆𑀢𑀺𑀬𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀻’𑀢𑀺. 𑀏𑀓𑀘𑁆𑀘𑁂 𑀣𑁂𑀭𑀸 𑀏𑀯𑀫𑀸𑀳𑀁𑀲𑀼 𑁋 ‘𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀞𑀧𑁂𑀢𑁆𑀯𑀸 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑁂 𑀞𑀧𑁂𑀢𑁆𑀯𑀸 𑀤𑁆𑀯𑁂 𑀅𑀦𑀺𑀬𑀢𑁂 𑀞𑀧𑁂𑀢𑁆𑀯𑀸 𑀢𑀺𑀁𑀲 𑀦𑀺𑀲𑁆𑀲𑀕𑁆𑀕𑀺𑀬𑁂 𑀧𑀸𑀘𑀺𑀢𑁆𑀢𑀺𑀬𑁂 𑀞𑀧𑁂𑀢𑁆𑀯𑀸 𑀤𑁆𑀯𑁂𑀦𑀯𑀼𑀢𑀺𑀧𑀸𑀘𑀺𑀢𑁆𑀢𑀺𑀬𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀻’𑀢𑀺. 𑀏𑀓𑀘𑁆𑀘𑁂 𑀣𑁂𑀭𑀸 𑀏𑀯𑀫𑀸𑀳𑀁𑀲𑀼 ‘𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀞𑀧𑁂𑀢𑁆𑀯𑀸 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑁂 𑀞𑀧𑁂𑀢𑁆𑀯𑀸 𑀤𑁆𑀯𑁂 𑀅𑀦𑀺𑀬𑀢𑁂 𑀞𑀧𑁂𑀢𑁆𑀯𑀸 𑀢𑀺𑀁𑀲 𑀦𑀺𑀲𑁆𑀲𑀕𑁆𑀕𑀺𑀬𑁂 𑀧𑀸𑀘𑀺𑀢𑁆𑀢𑀺𑀬𑁂 𑀞𑀧𑁂𑀢𑁆𑀯𑀸 𑀤𑁆𑀯𑁂𑀦𑀯𑀼𑀢𑀺𑀧𑀸𑀘𑀺𑀢𑁆𑀢𑀺𑀬𑁂 𑀞𑀧𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀧𑀸𑀝𑀺𑀤𑁂𑀲𑀦𑀻𑀬𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀻’’’𑀢𑀺.

𑀬𑀁 𑀧𑀦 𑀦𑀸𑀕𑀲𑁂𑀦𑀢𑁆𑀣𑁂𑀭𑁂𑀦 𑀫𑀺𑀮𑀺𑀦𑁆𑀤𑀭𑀜𑁆𑀜𑀸 𑀧𑀼𑀝𑁆𑀞𑁂𑀦 𑀯𑀼𑀢𑁆𑀢𑀁 ‘‘𑀤𑀼𑀓𑁆𑀓𑀝𑀁, 𑀫𑀳𑀸𑀭𑀸𑀚, 𑀔𑀼𑀤𑁆𑀤𑀓𑀁 𑀲𑀺𑀓𑁆𑀔𑀸𑀧𑀤𑀁, 𑀤𑀼𑀩𑁆𑀪𑀸𑀲𑀺𑀢𑀁 𑀅𑀦𑀼𑀔𑀼𑀤𑁆𑀤𑀓’’𑀦𑁆𑀢𑀺 (𑀫𑀺. 𑀧. 𑁪.𑁨.𑁧), 𑀢𑀢𑁆𑀣 𑀅𑀦𑁆𑀢𑀺𑀫𑀓𑁄𑀝𑁆𑀞𑀸𑀲𑀫𑁂𑀯 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀁 𑀯𑀸𑀤𑀧𑀣𑁄𑀧𑀘𑁆𑀙𑁂𑀤𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀁𑀯𑀢𑁆𑀢𑀦𑀫𑀭𑀺𑀬𑀸𑀤𑀧𑀭𑀺𑀘𑁆𑀙𑁂𑀤𑀯𑀘𑀦𑀦𑁆𑀢𑀺 𑀲𑀁𑀯𑀢𑁆𑀢𑀦𑀲𑁆𑀲 𑀫𑀭𑀺𑀬𑀸𑀤𑀸 𑀅𑀯𑀥𑀺 𑀲𑀁𑀯𑀢𑁆𑀢𑀦𑀫𑀭𑀺𑀬𑀸𑀤𑀸, 𑀢𑀸𑀬 𑀦𑀺𑀬𑀫𑀯𑀲𑁂𑀦 𑀬𑁄 𑀧𑀭𑀺𑀘𑁆𑀙𑁂𑀤𑁄, 𑀢𑀲𑁆𑀲 𑀯𑀘𑀦𑀁 𑀲𑀁𑀯𑀢𑁆𑀢𑀦𑀫𑀭𑀺𑀬𑀸𑀤𑀧𑀭𑀺𑀘𑁆𑀙𑁂𑀤𑀯𑀘𑀦𑀁. 𑀇𑀤𑀸𑀦𑀺 𑀢𑀁 𑀫𑀭𑀺𑀬𑀸𑀤𑀁 𑀯𑀺𑀯𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀤𑁆𑀤𑀺𑀲𑀦𑁆𑀢𑀻𑀢𑀺 𑀆𑀘𑀭𑀺𑀬𑀸 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀉𑀤𑁆𑀤𑀺𑀲𑀦𑁆𑀢𑀺. 𑀉𑀤𑁆𑀤𑀺𑀲𑀸𑀧𑁂𑀦𑁆𑀢𑀻𑀢𑀺 𑀆𑀘𑀭𑀺𑀬𑀁 𑀬𑀸𑀘𑀺𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑀸 𑀉𑀤𑁆𑀤𑀺𑀲𑀸𑀧𑁂𑀦𑁆𑀢𑀺. 𑀲𑀚𑁆𑀛𑀸𑀬𑀦𑁆𑀢𑀻𑀢𑀺 𑀥𑀸𑀭𑁂𑀦𑁆𑀢𑀺. 𑀓𑀼𑀓𑁆𑀓𑀼𑀘𑁆𑀘𑀯𑀺𑀧𑁆𑀧𑀝𑀺𑀲𑀸𑀭𑁄𑀢𑀺 𑀓𑀼𑀓𑁆𑀓𑀼𑀘𑁆𑀘𑀲𑀗𑁆𑀔𑀸𑀢𑁄 𑀯𑀺𑀧𑁆𑀧𑀝𑀺𑀲𑀸𑀭𑁄. 𑀯𑀺𑀳𑁂𑀲𑀸𑀯𑀺𑀘𑀺𑀓𑀺𑀘𑁆𑀙𑀸𑀫𑀦𑁄𑀯𑀺𑀮𑁂𑀔𑀸𑀢𑀺 𑀯𑀺𑀳𑁂𑀲𑀸𑀯𑀺𑀘𑀺𑀓𑀺𑀘𑁆𑀙𑀸𑀲𑀗𑁆𑀔𑀸𑀢𑀸 𑀫𑀦𑁄𑀯𑀺𑀮𑁂𑀔𑀸. 𑀕𑀭𑀳𑀡𑁂𑀢𑀺 𑀦𑀺𑀦𑁆𑀤𑀦𑁂.

𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀯𑀺𑀯𑀡𑁆𑀡𑀦𑁂𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀦𑁆𑀤𑀢𑁄 𑀢𑀲𑁆𑀲 𑀢𑀲𑁆𑀫𑀺𑀁 𑀯𑀺𑀫𑀢𑀺𑀁 𑀉𑀧𑁆𑀧𑀸𑀤𑁂𑀢𑀼𑀁 𑀯𑀺𑀦𑀬𑀯𑀺𑀯𑀡𑁆𑀡𑀦𑁂.

𑀯𑀺𑀮𑁂𑀔𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀫𑁄𑀳𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀲𑁆𑀫𑀺𑀁 𑀅𑀦𑀸𑀘𑀸𑀭𑁂𑀢𑀺 𑀢𑀲𑁆𑀫𑀺𑀁 𑀅𑀦𑀸𑀘𑀸𑀭𑁂 𑀆𑀘𑀺𑀡𑁆𑀡𑁂. 𑀫𑁄𑀓𑁆𑀔𑁄 𑀦𑀢𑁆𑀣𑀻𑀢𑀺 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀫𑁄𑀓𑁆𑀔𑁄 𑀦𑀢𑁆𑀣𑀺. 𑀢𑀲𑁆𑀲 𑀢𑁂𑀢𑀺 𑀢𑀲𑁆𑀲 𑀢𑀯. 𑀅𑀮𑀸𑀪𑀸𑀢𑀺 𑀬𑁂 𑀅𑀜𑁆𑀜𑁂𑀲𑀁 𑀧𑀸𑀢𑀺𑀫𑁄𑀓𑁆𑀔𑁂 𑀉𑀤𑁆𑀤𑀺𑀲𑁆𑀲𑀫𑀸𑀦𑁂 𑀲𑀸𑀥𑀼𑀓𑀁 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺𑀓𑀭𑀡𑀲𑁆𑀲 𑀆𑀦𑀺𑀲𑀁𑀲𑀲𑀜𑁆𑀜𑀺𑀢𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸 𑀘 𑀮𑀸𑀪𑀸 𑀇𑀘𑁆𑀙𑀺𑀢𑀩𑁆𑀩𑀸, 𑀢𑁂 𑀲𑀩𑁆𑀩𑁂 𑀢𑀼𑀬𑁆𑀳𑀁 𑀅𑀮𑀸𑀪𑀸 𑀏𑀯 𑀳𑁄𑀦𑁆𑀢𑀺. 𑀤𑀼𑀮𑁆𑀮𑀤𑁆𑀥𑀦𑁆𑀢𑀺 𑀧𑀼𑀜𑁆𑀜𑀯𑀺𑀲𑁂𑀲𑁂𑀦 𑀮𑀤𑁆𑀥𑀫𑁆𑀧𑀺 𑀫𑀦𑀼𑀲𑁆𑀲𑀢𑁆𑀢𑀁 𑀤𑀼𑀮𑁆𑀮𑀤𑁆𑀥𑀁. 𑀲𑀸𑀥𑀼𑀓𑀦𑁆𑀢𑀺 𑀲𑀼𑀝𑁆𑀞𑀼. 𑀅𑀝𑁆𑀞𑀺𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑀺𑀓𑀪𑀸𑀯𑀁 𑀓𑀢𑁆𑀯𑀸, 𑀅𑀢𑁆𑀣𑀺𑀓𑁄 𑀳𑀼𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀜𑀢𑁆𑀢𑀺𑀤𑀼𑀢𑀺𑀬𑁂𑀦 𑀓𑀫𑁆𑀫𑁂𑀦𑀸𑀢𑀺 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁪𑁪𑁬) 𑀧𑀤𑀪𑀸𑀚𑀦𑀺𑀬𑀁 𑀯𑀼𑀢𑁆𑀢𑁂𑀦 𑀫𑁄𑀳𑀸𑀭𑁄𑀧𑀦𑀓𑁂𑀦 𑀜𑀢𑁆𑀢𑀺𑀤𑀼𑀢𑀺𑀬𑁂𑀦 𑀓𑀫𑁆𑀫𑁂𑀦.

𑀅𑀥𑀫𑁆𑀫𑀓𑀫𑁆𑀫𑁂𑀢𑀺 𑀏𑀢𑁆𑀣 𑀫𑁄𑀳𑀸𑀭𑁄𑀧𑀦𑀓𑀫𑁆𑀫𑀁 𑀅𑀥𑀺𑀧𑁆𑀧𑁂𑀢𑀁.

𑀫𑁄𑀳𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀳𑀸𑀭𑀁 𑀤𑀤𑁂𑀬𑁆𑀬𑀸𑀢𑀺 𑀅𑀦𑁆𑀢𑀫𑀲𑁄 𑀉𑀧𑁆𑀧𑀮𑀧𑀢𑁆𑀢𑀁 𑀉𑀧𑀸𑀤𑀸𑀬 𑀓𑀸𑀬𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀁 𑀅𑀜𑁆𑀜𑀢𑀭𑁂𑀦 𑀧𑀳𑀸𑀭𑀁 𑀤𑀤𑁂𑀬𑁆𑀬. 𑀏𑀯𑀁 𑀧𑀦 𑀧𑀳𑀸𑀭𑁂 𑀤𑀺𑀦𑁆𑀦𑁂 𑀳𑀢𑁆𑀣𑁄 𑀯𑀸 𑀪𑀺𑀚𑁆𑀚𑀢𑀼, 𑀧𑀸𑀤𑁄 𑀯𑀸 𑀲𑀻𑀲𑀁 𑀯𑀸, 𑀫𑀭𑀢𑀼 𑀯𑀸, 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀢𑁂𑀦𑀸𑀳 ‘‘𑀧𑀳𑀭𑀺𑀢𑀼𑀓𑀸𑀫𑀢𑀸𑀬𑀸’’𑀢𑀺𑀆𑀤𑀺.

𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀢𑀺 𑀕𑀳𑀝𑁆𑀞𑁂 𑀯𑀸 𑀧𑀩𑁆𑀩𑀚𑀺𑀢𑁂 𑀯𑀸 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑁂 𑀯𑀸 𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑁂𑀧𑀺. 𑀲𑀘𑁂 𑀧𑀦 𑀭𑀢𑁆𑀢𑀘𑀺𑀢𑁆𑀢𑁄 𑀇𑀢𑁆𑀣𑀺𑀁 𑀧𑀳𑀭𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀓𑁂𑀦𑀘𑀺 𑀯𑀺𑀳𑁂𑀞𑀺𑀬𑀫𑀸𑀦𑀲𑁆𑀲𑀸𑀢𑀺 𑀫𑀦𑀼𑀲𑁆𑀲𑁂𑀦 𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑁂𑀦 𑀯𑀸 𑀯𑀺𑀳𑁂𑀞𑀺𑀬𑀫𑀸𑀦𑀲𑁆𑀲. 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑀲𑁆𑀲𑀸𑀢𑀺 𑀢𑀢𑁄 𑀅𑀢𑁆𑀢𑀦𑁄 𑀫𑁄𑀓𑁆𑀔𑀁 𑀧𑀢𑁆𑀣𑀬𑀫𑀸𑀦𑀲𑁆𑀲. 𑀲𑀘𑁂𑀧𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 (𑀧𑀸𑀘𑀺. 𑀅𑀝𑁆𑀞. 𑁪𑁫𑁩) 𑀘𑁄𑀭𑀁 𑀯𑀸 𑀧𑀘𑁆𑀘𑀢𑁆𑀣𑀺𑀓𑀁 𑀯𑀸 𑀯𑀺𑀳𑁂𑀞𑁂𑀢𑀼𑀓𑀸𑀫𑀁 𑀤𑀺𑀲𑁆𑀯𑀸 ‘‘𑀉𑀧𑀸𑀲𑀓, 𑀏𑀢𑁆𑀣𑁂𑀯 𑀢𑀺𑀝𑁆𑀞, 𑀫𑀸 𑀆𑀕𑀫𑀺𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀁 ‘‘𑀕𑀘𑁆𑀙 𑀭𑁂’’𑀢𑀺 𑀫𑀼𑀕𑁆𑀕𑀭𑁂𑀦 𑀯𑀸 𑀲𑀢𑁆𑀣𑀓𑁂𑀦 𑀯𑀸 𑀧𑀳𑀭𑀺𑀢𑁆𑀯𑀸 𑀬𑀸𑀢𑀺, 𑀲𑁄 𑀘𑁂 𑀢𑁂𑀦 𑀧𑀳𑀸𑀭𑁂𑀦 𑀫𑀭𑀢𑀺, 𑀅𑀦𑀸𑀧𑀢𑁆𑀢𑀺𑀬𑁂𑀯. 𑀯𑀸𑀴𑀫𑀺𑀕𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀧𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀢𑀮𑀲𑀢𑁆𑀢𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀮𑀲𑀢𑁆𑀢𑀺𑀓𑀦𑁆𑀢𑀺 𑀢𑀮𑀫𑁂𑀯 𑀢𑀮𑀲𑀢𑁆𑀢𑀺𑀓𑀁. ‘‘𑀧𑁄𑀣𑀦𑀲𑀫𑀢𑁆𑀣𑀝𑁆𑀞𑁂𑀦 𑀲𑀢𑁆𑀢𑀺𑀓’’𑀦𑁆𑀢𑀺 (𑀯𑀚𑀺𑀭. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁪𑁫𑁬) 𑀏𑀓𑁂. 𑀉𑀘𑁆𑀘𑀸𑀭𑁂𑀬𑁆𑀬𑀸𑀢𑀺 𑀉𑀓𑁆𑀔𑀺𑀧𑁂𑀬𑁆𑀬. 𑀦𑀧𑀳𑀭𑀺𑀢𑀼𑀓𑀸𑀫𑀢𑀸𑀬 𑀤𑀺𑀦𑁆𑀦𑀢𑁆𑀢𑀸 𑀤𑀼𑀓𑁆𑀓𑀝𑀦𑁆𑀢𑀺 𑀏𑀢𑁆𑀣 𑀧𑀳𑀭𑀺𑀢𑀼𑀓𑀸𑀫𑀢𑀸𑀬 𑀧𑀳𑀭𑀺𑀢𑁂 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂𑀦 𑀧𑀸𑀘𑀺𑀢𑁆𑀢𑀺𑀬𑀁. 𑀉𑀘𑁆𑀘𑀸𑀭𑁂𑀢𑀼𑀓𑀸𑀫𑀢𑀸𑀬 𑀓𑁂𑀯𑀮𑀁 𑀉𑀕𑁆𑀕𑀺𑀭𑀡𑀫𑀢𑁆𑀢𑁂 𑀓𑀢𑁂 𑀇𑀫𑀺𑀦𑀸 𑀧𑀸𑀘𑀺𑀢𑁆𑀢𑀺𑀬𑀁. 𑀇𑀫𑀺𑀦𑀸 𑀧𑀦 𑀯𑀺𑀭𑀚𑁆𑀛𑀺𑀢𑁆𑀯𑀸 𑀧𑀳𑀸𑀭𑁄 𑀤𑀺𑀦𑁆𑀦𑁄, 𑀢𑀲𑁆𑀫𑀸 𑀤𑀼𑀓𑁆𑀓𑀝𑀁. 𑀏𑀢𑁆𑀣 𑀧𑀦 ‘‘𑀢𑀺𑀭𑀘𑁆𑀙𑀸𑀦𑀕𑀢𑀸𑀤𑀻𑀦𑀁 𑀅𑀲𑀼𑀘𑀺𑀓𑀭𑀡𑀸𑀤𑀻𑀦𑀺 𑀤𑀺𑀲𑁆𑀯𑀸 𑀓𑀼𑀚𑁆𑀛𑀺𑀢𑁆𑀯𑀸𑀧𑀺 𑀉𑀕𑁆𑀕𑀺𑀭𑀦𑁆𑀢𑀲𑁆𑀲 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑁄𑀬𑁂𑀯𑀸’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁪𑁭𑁧) 𑀯𑀤𑀦𑁆𑀢𑀺.

𑀢𑀮𑀲𑀢𑁆𑀢𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀫𑀽𑀮𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀁 𑀉𑀢𑁆𑀢𑀸𑀦𑀫𑁂𑀯.

𑀅𑀫𑀽𑀮𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀜𑁆𑀘𑀺𑀘𑁆𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲𑀸𑀢𑀺 (𑀯𑀚𑀺𑀭. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁪𑁬𑁮) 𑀲𑀁𑀲𑀬𑀁 𑀚𑀦𑁂𑀦𑁆𑀢𑀲𑁆𑀲. 𑀧𑀭𑁄 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀸𑀤𑁂𑀢𑀼 𑀯𑀸, 𑀫𑀸 𑀯𑀸, 𑀢𑀁 𑀅𑀧𑁆𑀧𑀫𑀸𑀡𑀁. 𑀫𑀜𑁆𑀜𑁂𑀢𑀺 𑀢𑀓𑁆𑀓𑀬𑀸𑀫𑀺. 𑀆𑀤𑀺𑀲𑀤𑁆𑀤𑁂𑀦 ‘‘𑀯𑀺𑀓𑀸𑀮𑁂 𑀫𑀜𑁆𑀜𑁂 𑀢𑀬𑀸 𑀪𑀼𑀢𑁆𑀢𑀁, 𑀫𑀚𑁆𑀚𑀁 𑀫𑀜𑁆𑀜𑁂 𑀢𑀬𑀸 𑀧𑀻𑀢𑀁, 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀭𑀳𑁄 𑀫𑀜𑁆𑀜𑁂 𑀢𑀬𑀸 𑀦𑀺𑀲𑀺𑀦𑁆𑀦’’𑀦𑁆𑀢𑀺𑀆𑀤𑀻𑀦𑀁 (𑀧𑀸𑀘𑀺. 𑁪𑁬𑁬) 𑀕𑀳𑀡𑀁. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀢𑀺 𑀲𑀸𑀫𑀡𑁂𑀭𑁂.

𑀲𑀜𑁆𑀘𑀺𑀘𑁆𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀉𑀧𑀲𑁆𑀲𑀼𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀼𑀬𑁆𑀬𑀢𑀻𑀢𑀺 𑀲𑀼𑀢𑀺, 𑀲𑀤𑁆𑀤𑁄, 𑀲𑀼𑀢𑀺𑀬𑀸 𑀲𑀫𑀻𑀧𑀁 𑀉𑀧𑀲𑁆𑀲𑀼𑀢𑀻𑀢𑀺 𑀆𑀳 ‘‘𑀲𑀼𑀢𑀺𑀲𑀫𑀻𑀧’’𑀦𑁆𑀢𑀺, 𑀲𑀤𑁆𑀤𑀲𑀫𑀻𑀧𑀦𑁆𑀢𑀺 𑀅𑀢𑁆𑀣𑁄. 𑀬𑀢𑁆𑀣 𑀧𑀦 𑀞𑀺𑀢𑁂𑀦 𑀲𑀓𑁆𑀓𑀸 𑀳𑁄𑀢𑀺 𑀲𑀤𑁆𑀤𑀁 𑀲𑁄𑀢𑀼𑀁, 𑀢𑀢𑁆𑀣 𑀢𑀺𑀝𑁆𑀞𑀦𑁆𑀢𑁄 𑀲𑀤𑁆𑀤𑀲𑀫𑀻𑀧𑁂 𑀢𑀺𑀝𑁆𑀞𑀢𑀺 𑀦𑀸𑀫𑀸𑀢𑀺 𑀆𑀳 ‘‘𑀬𑀢𑁆𑀣 𑀞𑀢𑁆𑀯𑀸’’𑀢𑀺𑀆𑀤𑀺. 𑀅𑀣 𑀯𑀸 𑀉𑀧𑁂𑀘𑁆𑀘 𑀲𑀼𑀬𑁆𑀬𑀢𑀺 𑀏𑀢𑁆𑀣𑀸𑀢𑀺 𑀉𑀧𑀲𑁆𑀲𑀼𑀢𑀺, 𑀞𑀸𑀦𑀁, 𑀬𑀁 𑀞𑀸𑀦𑀁 𑀉𑀧𑀕𑀢𑁂𑀦 𑀲𑀓𑁆𑀓𑀸 𑀳𑁄𑀢𑀺 𑀓𑀣𑁂𑀦𑁆𑀢𑀸𑀦𑀁 𑀲𑀤𑁆𑀤𑀁 𑀲𑁄𑀢𑀼𑀁, 𑀢𑀢𑁆𑀣𑀸𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀼𑀭𑀺𑀢𑀕𑀫𑀦𑁂𑀧𑀻𑀢𑀺 𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑀲𑁆𑀲 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀸𑀦𑀁 𑀲𑀤𑁆𑀤𑀲𑀯𑀦𑀢𑁆𑀣𑀁 𑀲𑀻𑀖𑀕𑀫𑀦𑁂𑀧𑀺. 𑀑𑀳𑀻𑀬𑀫𑀸𑀦𑁂𑀧𑀻𑀢𑀺 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀲𑁆𑀲 𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑀸𑀦𑀁 𑀯𑀘𑀦𑀲𑀯𑀦𑀢𑁆𑀣𑀁 𑀑𑀳𑀻𑀬𑀫𑀸𑀦𑁂𑀧𑀺.

𑀯𑀽𑀧𑀲𑀫𑀺𑀲𑁆𑀲𑀸𑀫𑀻𑀢𑀺 𑀉𑀧𑀲𑀫𑀁 𑀕𑀫𑀺𑀲𑁆𑀲𑀸𑀫𑀺, 𑀓𑀮𑀳𑀁 𑀦 𑀓𑀭𑀺𑀲𑁆𑀲𑀸𑀫𑀺. 𑀅𑀢𑁆𑀢𑀸𑀦𑀁 𑀧𑀭𑀺𑀫𑁄𑀘𑁂𑀲𑁆𑀲𑀸𑀫𑀻𑀢𑀺 𑀫𑀫 𑀅𑀓𑀸𑀭𑀓𑀪𑀸𑀯𑀁 𑀓𑀣𑁂𑀢𑁆𑀯𑀸 𑀅𑀢𑁆𑀢𑀸𑀦𑀁 𑀧𑀭𑀺𑀫𑁄𑀘𑁂𑀲𑁆𑀲𑀸𑀫𑀺. 𑀲𑀺𑀬𑀸 𑀓𑀺𑀭𑀺𑀬𑀦𑁆𑀢𑀺 𑀓𑀤𑀸𑀘𑀺 𑀲𑁄𑀢𑀼𑀓𑀸𑀫𑀢𑀸𑀬 𑀕𑀫𑀦𑀯𑀲𑁂𑀦 𑀲𑀫𑀼𑀝𑁆𑀞𑀸𑀦𑀢𑁄 𑀲𑀺𑀬𑀸 𑀓𑀺𑀭𑀺𑀬𑀁. 𑀲𑀺𑀬𑀸 𑀅𑀓𑀺𑀭𑀺𑀬𑀦𑁆𑀢𑀺 𑀓𑀤𑀸𑀘𑀺 𑀞𑀺𑀢𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀫𑀦𑁆𑀢𑀬𑀫𑀸𑀦𑀸𑀦𑀁 𑀅𑀚𑀸𑀦𑀸𑀧𑀦𑀯𑀲𑁂𑀦 𑀲𑀫𑀼𑀝𑁆𑀞𑀸𑀦𑀢𑁄 𑀲𑀺𑀬𑀸 𑀅𑀓𑀺𑀭𑀺𑀬𑀁.

𑀉𑀧𑀲𑁆𑀲𑀼𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀓𑀫𑁆𑀫𑀧𑁆𑀧𑀝𑀺𑀩𑀸𑀳𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀥𑀫𑁆𑀫𑀺𑀓𑀸𑀦𑀦𑁆𑀢𑀺 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀓𑀢𑀢𑁆𑀢𑀸 𑀥𑀫𑁆𑀫𑁄 𑀏𑀢𑁂𑀲𑀼 𑀅𑀢𑁆𑀣𑀻𑀢𑀺 𑀥𑀫𑁆𑀫𑀺𑀓𑀸𑀦𑀺, 𑀢𑁂𑀲𑀁 𑀥𑀫𑁆𑀫𑀺𑀓𑀸𑀦𑀁. 𑀓𑀫𑁆𑀫𑀸𑀦𑀦𑁆𑀢𑀺 𑀘𑀢𑀼𑀦𑁆𑀦𑀁 𑀲𑀗𑁆𑀖𑀓𑀫𑁆𑀫𑀸𑀦𑀁. 𑀢𑁂𑀦𑀸𑀳 ‘‘𑀥𑀫𑁆𑀫𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀥𑀫𑁆𑀫𑁂𑀦𑀸𑀢𑀺 𑀪𑀽𑀢𑁂𑀦 𑀯𑀢𑁆𑀣𑀼𑀦𑀸. 𑀯𑀺𑀦𑀬𑁂𑀦𑀸𑀢𑀺 𑀘𑁄𑀤𑀦𑀸𑀬 𑀘𑁂𑀯 𑀲𑀸𑀭𑀡𑀸𑀬 𑀘. 𑀲𑀢𑁆𑀣𑀼𑀲𑀸𑀲𑀦𑁂𑀦𑀸𑀢𑀺 𑀜𑀢𑁆𑀢𑀺𑀲𑀫𑁆𑀧𑀤𑀸𑀬 𑀘𑁂𑀯 𑀅𑀦𑀼𑀲𑁆𑀲𑀯𑀦𑀸𑀲𑀫𑁆𑀧𑀤𑀸𑀬 𑀘. 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲𑀸𑀢𑀺 𑀲𑀻𑀫𑀝𑁆𑀞𑀓𑀲𑀗𑁆𑀖𑀁 𑀲𑁄𑀥𑁂𑀢𑁆𑀯𑀸 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑀁 𑀆𑀳𑀭𑀺𑀢𑁆𑀯𑀸 𑀓𑀢𑁆𑀢𑀩𑁆𑀩𑀢𑁆𑀢𑀸 𑀓𑀸𑀬𑁂𑀦 𑀘𑁂𑀯 𑀘𑀺𑀢𑁆𑀢𑁂𑀦 𑀘 𑀏𑀓𑀻𑀪𑀽𑀢𑀲𑁆𑀲 𑀲𑀗𑁆𑀖𑀲𑁆𑀲. 𑀢𑀁 𑀢𑀁 𑀯𑀢𑁆𑀣𑀼𑀦𑁆𑀢𑀺 𑀅𑀯𑀡𑁆𑀡𑀪𑀡𑀦𑀸𑀤𑀺𑀁 𑀢𑀁 𑀢𑀁 𑀯𑀢𑁆𑀣𑀼.

𑀑𑀲𑀸𑀭𑁂𑀦𑁆𑀢𑀺 𑀲𑀗𑁆𑀖𑀫𑀚𑁆𑀛𑀁 𑀏𑀢𑁂𑀦𑀸𑀢𑀺 𑀑𑀲𑀸𑀭𑀡𑀁. 𑀦𑀺𑀲𑁆𑀲𑀸𑀭𑁂𑀦𑁆𑀢𑀺 𑀲𑀗𑁆𑀖𑀫𑁆𑀳𑀸 𑀏𑀢𑁂𑀦𑀸𑀢𑀺 𑀦𑀺𑀲𑁆𑀲𑀸𑀭𑀡𑀁. 𑀪𑀡𑁆𑀟𑀼𑀓𑀫𑁆𑀫𑀦𑁆𑀢𑀺 𑀫𑀼𑀡𑁆𑀟𑀓𑀭𑀡𑀁, 𑀓𑁂𑀲𑀘𑁆𑀙𑁂𑀤𑀦𑀸𑀧𑀼𑀘𑁆𑀙𑀦𑀦𑁆𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀫𑁂𑀯 𑀮𑀓𑁆𑀔𑀡𑀁 𑀓𑀫𑁆𑀫𑀮𑀓𑁆𑀔𑀡𑀁. 𑀑𑀲𑀸𑀭𑀡𑀸𑀤𑀬𑁄 𑀯𑀺𑀬 𑀓𑀫𑁆𑀫𑀜𑁆𑀘 𑀳𑀼𑀢𑁆𑀯𑀸 𑀅𑀜𑁆𑀜𑀜𑁆𑀘 𑀦𑀸𑀫𑀁 𑀦 𑀮𑀪𑀢𑀺, 𑀓𑀫𑁆𑀫𑀫𑁂𑀯 𑀳𑀼𑀢𑁆𑀯𑀸 𑀮𑀓𑁆𑀔𑀻𑀬𑀢𑀻𑀢𑀺 𑀓𑀫𑁆𑀫𑀮𑀓𑁆𑀔𑀡𑀦𑁆𑀢𑀺 𑀅𑀢𑁆𑀣𑁄. ‘‘𑀑𑀲𑀸𑀭𑀡𑀁 𑀦𑀺𑀲𑁆𑀲𑀸𑀭𑀡’’𑀦𑁆𑀢𑀺 (𑀧𑀭𑀺. 𑀅𑀝𑁆𑀞. 𑁪𑁯𑁫-𑁪𑁯𑁬) 𑀘𑁂𑀢𑁆𑀣 𑀧𑀤𑀲𑀺𑀮𑀺𑀝𑁆𑀞𑀢𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀧𑀞𑀫𑀁 𑀧𑀦 𑀦𑀺𑀲𑁆𑀲𑀸𑀭𑀡𑀸 𑀳𑁄𑀢𑀺, 𑀧𑀘𑁆𑀙𑀸 𑀑𑀲𑀸𑀭𑀡𑀸𑀢𑀺 𑀆𑀳 ‘‘𑀢𑀢𑁆𑀣 𑀓𑀡𑁆𑀝𑀓𑀲𑀸𑀫𑀡𑁂𑀭𑀲𑁆𑀲𑀸’’𑀢𑀺𑀆𑀤𑀺. 𑀓𑀡𑁆𑀝𑀓𑀲𑀸𑀫𑀡𑁂𑀭𑀲𑁆𑀲 𑀦𑀸𑀲𑀦𑀸 𑀯𑀺𑀬 𑀦𑀺𑀲𑁆𑀲𑀸𑀭𑀡𑀸𑀢𑀺 𑀬𑀣𑀸 𑀓𑀡𑁆𑀝𑀓𑀲𑀸𑀫𑀡𑁂𑀭𑀲𑁆𑀲 𑀤𑀡𑁆𑀟𑀓𑀫𑁆𑀫𑀦𑀸𑀲𑀦𑀸 𑀦𑀺𑀲𑁆𑀲𑀸𑀭𑀡𑀸, 𑀢𑀣𑀸 𑀩𑀼𑀤𑁆𑀥𑀲𑁆𑀲 𑀯𑀸 𑀥𑀫𑁆𑀫𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀅𑀯𑀡𑁆𑀡𑀁 𑀪𑀡𑀢𑁄, 𑀅𑀓𑀧𑁆𑀧𑀺𑀬𑀁 ‘‘𑀓𑀧𑁆𑀧𑀺𑀬’’𑀦𑁆𑀢𑀺 𑀤𑀻𑀧𑀬𑀢𑁄, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀜𑁆𑀜𑀲𑁆𑀲𑀸𑀧𑀺 𑀲𑀸𑀫𑀡𑁂𑀭𑀲𑁆𑀲 𑁋

‘‘𑀲𑀗𑁆𑀖𑀁, 𑀪𑀦𑁆𑀢𑁂, 𑀧𑀼𑀘𑁆𑀙𑀸𑀫𑀺 ‘𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀲𑀸𑀫𑀡𑁂𑀭𑁄 𑀩𑀼𑀤𑁆𑀥𑀲𑁆𑀲 𑀯𑀸 𑀥𑀫𑁆𑀫𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀅𑀯𑀡𑁆𑀡𑀯𑀸𑀤𑀻 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄, 𑀬𑀁 𑀅𑀜𑁆𑀜𑁂 𑀲𑀸𑀫𑀡𑁂𑀭𑀸 𑀮𑀪𑀦𑁆𑀢𑀺 𑀤𑀺𑀭𑀢𑁆𑀢𑀢𑀺𑀭𑀢𑁆𑀢𑀁 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀳𑀲𑁂𑀬𑁆𑀬𑀁, 𑀢𑀲𑁆𑀲 𑀅𑀮𑀸𑀪𑀸𑀬 𑀦𑀺𑀲𑁆𑀲𑀸𑀭𑀡𑀸 𑀭𑀼𑀘𑁆𑀘𑀢𑀺 𑀲𑀗𑁆𑀖𑀲𑁆𑀲𑀸’𑀢𑀺. 𑀤𑀼𑀢𑀺𑀬𑀫𑁆𑀧𑀺…𑀧𑁂… 𑀢𑀢𑀺𑀬𑀫𑁆𑀧𑀺, 𑀪𑀦𑁆𑀢𑁂, 𑀲𑀗𑁆𑀖𑀁 𑀧𑀼𑀘𑁆𑀙𑀸𑀫𑀺 ‘𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀲𑀸𑀫𑀡𑁂𑀭𑁄…𑀧𑁂… 𑀭𑀼𑀘𑁆𑀘𑀢𑀺 𑀲𑀗𑁆𑀖𑀲𑁆𑀲𑀸’𑀢𑀺, 𑀘𑀭 𑀧𑀺𑀭𑁂 𑀯𑀺𑀦𑀲𑁆𑀲𑀸’’𑀢𑀺 (𑀧𑀭𑀺. 𑀅𑀝𑁆𑀞. 𑁪𑁯𑁫-𑁪𑁯𑁬) 𑁋

𑀓𑀢𑁆𑀢𑀩𑁆𑀩𑀦𑀸𑀲𑀦𑀸 𑀦𑀺𑀲𑁆𑀲𑀸𑀭𑀡𑀸𑀢𑀺 𑀅𑀢𑁆𑀣𑁄. 𑀢𑀸𑀤𑀺𑀲𑀁𑀬𑁂𑀯 𑀲𑀫𑁆𑀫𑀸𑀯𑀢𑁆𑀢𑀦𑁆𑀢𑀁 𑀤𑀺𑀲𑁆𑀯𑀸 𑀧𑀯𑁂𑀲𑀦𑀸 𑀑𑀲𑀸𑀭𑀡𑀸𑀢𑀺 𑀢𑀸𑀤𑀺𑀲𑀁𑀬𑁂𑀯 𑀅𑀧𑀭𑁂𑀦 𑀲𑀫𑀬𑁂𑀦 ‘‘𑀅𑀳𑀁, 𑀪𑀦𑁆𑀢𑁂, 𑀩𑀸𑀮𑀢𑀸𑀬 𑀅𑀜𑁆𑀜𑀸𑀡𑀢𑀸𑀬 𑀅𑀮𑀓𑁆𑀔𑀺𑀓𑀢𑀸𑀬 𑀏𑀯𑀁 𑀅𑀓𑀸𑀲𑀺𑀁, 𑀲𑁆𑀯𑀸𑀳𑀁 𑀲𑀗𑁆𑀖𑀁 𑀔𑀫𑀸𑀧𑁂𑀫𑀻’’𑀢𑀺 𑀔𑀫𑀸𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀬𑀸𑀯𑀢𑀢𑀺𑀬𑀁 𑀬𑀸𑀘𑀸𑀧𑁂𑀢𑁆𑀯𑀸 𑁋

‘‘𑀲𑀗𑁆𑀖𑀁, 𑀪𑀦𑁆𑀢𑁂, 𑀧𑀼𑀘𑁆𑀙𑀸𑀫𑀺 ‘𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀲𑀸𑀫𑀡𑁂𑀭𑁄 𑀩𑀼𑀤𑁆𑀥𑀲𑁆𑀲 𑀯𑀸 𑀥𑀫𑁆𑀫𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀅𑀯𑀡𑁆𑀡𑀯𑀸𑀤𑀻 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄, 𑀬𑀁 𑀅𑀜𑁆𑀜𑁂 𑀲𑀸𑀫𑀡𑁂𑀭𑀸 𑀮𑀪𑀦𑁆𑀢𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀤𑀺𑀭𑀢𑁆𑀢𑀢𑀺𑀭𑀢𑁆𑀢𑀁 𑀲𑀳𑀲𑁂𑀬𑁆𑀬𑀁, 𑀢𑀲𑁆𑀲 𑀅𑀮𑀸𑀪𑀸𑀬 𑀦𑀺𑀲𑁆𑀲𑀸𑀭𑀺𑀢𑁄, 𑀲𑁆𑀯𑀸𑀬𑀁 𑀇𑀤𑀸𑀦𑀺 𑀲𑁄𑀭𑀢𑁄 𑀦𑀺𑀯𑀸𑀢𑀯𑀼𑀢𑁆𑀢𑀺 𑀮𑀚𑁆𑀚𑀺𑀥𑀫𑁆𑀫𑀁 𑀑𑀓𑁆𑀓𑀦𑁆𑀢𑁄 𑀳𑀺𑀭𑁄𑀢𑁆𑀢𑀧𑁆𑀧𑁂 𑀧𑀢𑀺𑀝𑁆𑀞𑀺𑀢𑁄 𑀓𑀢𑀤𑀡𑁆𑀟𑀓𑀫𑁆𑀫𑁄 𑀅𑀘𑁆𑀘𑀬𑀁 𑀤𑁂𑀲𑁂𑀢𑀺, 𑀇𑀫𑀲𑁆𑀲 𑀲𑀸𑀫𑀡𑁂𑀭𑀲𑁆𑀲 𑀬𑀣𑀸 𑀧𑀼𑀭𑁂 𑀓𑀸𑀬𑀲𑀫𑁆𑀪𑁄𑀕𑀲𑀸𑀫𑀕𑁆𑀕𑀺𑀤𑀸𑀦𑀁 𑀭𑀼𑀘𑁆𑀘𑀢𑀺 𑀲𑀗𑁆𑀖𑀲𑁆𑀲𑀸’𑀢𑀺. 𑀤𑀼𑀢𑀺𑀬𑀫𑁆𑀧𑀺…𑀧𑁂… 𑀢𑀢𑀺𑀬𑀫𑁆𑀧𑀺, 𑀪𑀦𑁆𑀢𑁂, 𑀲𑀗𑁆𑀖𑀁 𑀧𑀼𑀘𑁆𑀙𑀸𑀫𑀺…𑀧𑁂… 𑀭𑀼𑀘𑁆𑀘𑀢𑀺 𑀲𑀗𑁆𑀖𑀲𑁆𑀲𑀸’’𑀢𑀺 (𑀧𑀭𑀺. 𑀅𑀝𑁆𑀞. 𑁪𑁯𑁫-𑁪𑁯𑁬) 𑁋

𑀧𑀯𑁂𑀲𑀦𑀸 𑀑𑀲𑀸𑀭𑀡𑀸𑀢𑀺 𑀅𑀢𑁆𑀣𑁄.

𑀓𑁂𑀲𑀘𑁆𑀙𑁂𑀤𑀦𑀸𑀧𑀼𑀘𑁆𑀙𑀦𑀦𑁆𑀢𑀺 𑀲𑀻𑀫𑀸𑀧𑀭𑀺𑀬𑀸𑀧𑀦𑁆𑀦𑁂 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀁 𑀢𑀢𑁆𑀣 𑀦𑁂𑀢𑁆𑀯𑀸 ‘‘𑀲𑀗𑁆𑀖𑀁, 𑀪𑀦𑁆𑀢𑁂, 𑀇𑀫𑀲𑁆𑀲 𑀤𑀸𑀭𑀓𑀲𑁆𑀲 𑀪𑀡𑁆𑀟𑀼𑀓𑀫𑁆𑀫𑀁 𑀆𑀧𑀼𑀘𑁆𑀙𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀲𑀓𑀺𑀁 𑀯𑀸 𑀯𑀘𑀦𑀁. 𑀇𑀥 𑀘 ‘‘𑀇𑀫𑀲𑁆𑀲 𑀤𑀸𑀭𑀓𑀲𑁆𑀲 𑀪𑀡𑁆𑀟𑀼𑀓𑀫𑁆𑀫𑀁 𑀆𑀧𑀼𑀘𑁆𑀙𑀸𑀫𑀸’’𑀢𑀺𑀧𑀺 ‘‘𑀇𑀫𑀲𑁆𑀲 𑀲𑀫𑀡𑀓𑀭𑀡𑀁 𑀆𑀧𑀼𑀘𑁆𑀙𑀸𑀫𑀸’’𑀢𑀺𑀧𑀺 ‘‘𑀇𑀫𑀲𑁆𑀲 𑀧𑀩𑁆𑀩𑀸𑀚𑀦𑀁 𑀆𑀧𑀼𑀘𑁆𑀙𑀸𑀫𑀸’’𑀢𑀺𑀧𑀺 ‘‘𑀅𑀬𑀁 𑀲𑀫𑀡𑁄 𑀳𑁄𑀢𑀼𑀓𑀸𑀫𑁄’’𑀢𑀺𑀧𑀺 ‘‘𑀅𑀬𑀁 𑀧𑀩𑁆𑀩𑀚𑀺𑀢𑀼𑀓𑀸𑀫𑁄’’𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺𑀬𑁂𑀯.

𑀫𑀼𑀔𑀭𑀲𑁆𑀲𑀸𑀢𑀺 𑀫𑀼𑀔𑁂𑀦 𑀔𑀭𑀲𑁆𑀲. 𑀬𑀁 𑀅𑀯𑀦𑁆𑀤𑀺𑀬𑀓𑀫𑁆𑀫𑀁 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀊𑀭𑀼𑀁 𑀯𑀺𑀯𑀭𑀺𑀢𑁆𑀯𑀸 𑀤𑀲𑁆𑀲𑀦𑀸𑀤𑀺𑀯𑀢𑁆𑀣𑀽𑀲𑀽𑀢𑀺 𑁋

‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀺𑀬𑁄 𑀓𑀤𑁆𑀤𑀫𑁄𑀤𑀓𑁂𑀦 𑀑𑀲𑀺𑀜𑁆𑀘𑀦𑁆𑀢𑀺 ‘𑀅𑀧𑁆𑀧𑁂𑀯 𑀦𑀸𑀫 𑀅𑀫𑁆𑀳𑁂𑀲𑀼 𑀲𑀸𑀭𑀚𑁆𑀚𑁂𑀬𑁆𑀬𑀼’𑀦𑁆𑀢𑀺, 𑀓𑀸𑀬𑀁 𑀯𑀺𑀯𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀤𑀲𑁆𑀲𑁂𑀦𑁆𑀢𑀺, 𑀊𑀭𑀼𑀁 𑀯𑀺𑀯𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀤𑀲𑁆𑀲𑁂𑀦𑁆𑀢𑀺, 𑀅𑀗𑁆𑀕𑀚𑀸𑀢𑀁 𑀯𑀺𑀯𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀤𑀲𑁆𑀲𑁂𑀦𑁆𑀢𑀺, 𑀪𑀺𑀓𑁆𑀔𑀼𑀦𑀺𑀬𑁄 𑀑𑀪𑀸𑀲𑁂𑀦𑁆𑀢𑀺, 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀲𑀫𑁆𑀧𑀬𑁄𑀚𑁂𑀦𑁆𑀢𑀺 ‘𑀅𑀧𑁆𑀧𑁂𑀯 𑀦𑀸𑀫 𑀅𑀫𑁆𑀳𑁂𑀲𑀼 𑀲𑀸𑀭𑀚𑁆𑀚𑁂𑀬𑁆𑀬𑀼’’’𑀦𑁆𑀢𑀺 (𑀘𑀽𑀴𑀯. 𑁪𑁧𑁧) 𑁋

𑀇𑀫𑁂𑀲𑀼 𑀯𑀢𑁆𑀣𑀽𑀲𑀼.

𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀓𑀸𑀤𑀻𑀦𑀦𑁆𑀢𑀺 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀚𑀺𑀡𑁆𑀡𑀘𑀻𑀯𑀭𑀦𑀝𑁆𑀞𑀘𑀻𑀯𑀭𑀕𑀺𑀮𑀸𑀦𑀩𑀳𑀼𑀲𑁆𑀲𑀼𑀢𑀲𑀗𑁆𑀖𑀪𑀸𑀭𑀦𑀺𑀢𑁆𑀣𑀭𑀓𑀸𑀤𑀻𑀦𑀁. 𑀘𑀻𑀯𑀭𑀸𑀤𑀻𑀦𑀻𑀢𑀺 𑀘𑀻𑀯𑀭𑀪𑁂𑀲𑀚𑁆𑀚𑀲𑁂𑀦𑀸𑀲𑀦𑀸𑀤𑀻𑀦𑀺. 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀻𑀢𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀺 𑀫𑀽𑀮𑀢𑀘𑀧𑀢𑁆𑀢𑀅𑀗𑁆𑀓𑀼𑀭𑀧𑀼𑀧𑁆𑀨𑀨𑀮𑀸𑀤𑀻𑀦𑀺. 𑀅𑀧𑀦𑁂𑀢𑀩𑁆𑀩𑀸𑀦𑀺𑀧𑀺 𑀯𑀢𑁆𑀣𑀽𑀦𑀻𑀢𑀺 𑀆𑀯𑀸𑀲𑀓𑀭𑀡𑀸𑀤𑀺𑀅𑀢𑁆𑀣𑀁 𑀳𑀭𑀺𑀢𑀩𑁆𑀩𑀸𑀦𑀺𑀧𑀺 𑀙𑀸𑀬𑀽𑀧𑀕𑀨𑀮𑀽𑀧𑀕𑀭𑀼𑀓𑁆𑀔𑀸𑀤𑀻𑀦𑀺. 𑀢𑀣𑀸𑀭𑀽𑀧𑀁 𑀯𑀸 𑀥𑀫𑁆𑀫𑀺𑀓𑀁 𑀓𑀢𑀺𑀓𑀁 𑀓𑀭𑁄𑀦𑁆𑀢𑁂𑀳𑀻𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀢𑁆𑀣𑀸𑀬 𑀤𑀺𑀦𑁆𑀦𑀢𑁄 𑀆𑀯𑀸𑀲𑀚𑀕𑁆𑀕𑀦𑀸𑀤𑀺𑀓𑀁 𑀢𑀸𑀤𑀺𑀲𑀁 𑀯𑀸 𑀅𑀜𑁆𑀜𑀫𑁆𑀧𑀺 𑀥𑀫𑁆𑀫𑀺𑀓𑀁 𑀓𑀢𑀺𑀓𑀁 𑀓𑀭𑁄𑀦𑁆𑀢𑁂𑀳𑀺.

𑀦𑁂𑀯 𑀲𑀼𑀢𑁆𑀢𑀁 𑀆𑀕𑀘𑁆𑀙𑀢𑀻𑀢𑀺 𑀦 𑀫𑀸𑀢𑀺𑀓𑀸 𑀆𑀕𑀘𑁆𑀙𑀢𑀺. 𑀦𑁄 𑀲𑀼𑀢𑁆𑀢𑀯𑀺𑀪𑀗𑁆𑀕𑁄𑀢𑀺 𑀯𑀺𑀦𑀬𑁄𑀧𑀺 𑀦 𑀧𑀕𑀼𑀡𑁄. 𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀸𑀬 𑀅𑀢𑁆𑀣𑀁 𑀧𑀝𑀺𑀩𑀸𑀳𑀢𑀻𑀢𑀺 (𑀘𑀽𑀴𑀯. 𑀅𑀝𑁆𑀞. 𑁨𑁩𑁩) 𑀩𑁆𑀬𑀜𑁆𑀚𑀦𑀫𑀢𑁆𑀢𑀫𑁂𑀯 𑀕𑀳𑁂𑀢𑁆𑀯𑀸 𑀅𑀢𑁆𑀣𑀁 𑀧𑀝𑀺𑀲𑁂𑀥𑁂𑀢𑀺. 𑀚𑀸𑀢𑀭𑀽𑀧𑀭𑀚𑀢𑀔𑁂𑀢𑁆𑀢𑀯𑀢𑁆𑀣𑀼𑀧𑁆𑀧𑀝𑀺𑀕𑁆𑀕𑀳𑀡𑀸𑀤𑀻𑀲𑀼 𑀯𑀺𑀦𑀬𑀥𑀭𑁂𑀳𑀺 𑀪𑀺𑀓𑁆𑀔𑀽𑀳𑀺 𑀆𑀧𑀢𑁆𑀢𑀺𑀬𑀸 𑀓𑀸𑀭𑀺𑀬𑀫𑀸𑀦𑁂 𑀤𑀺𑀲𑁆𑀯𑀸 ‘‘𑀓𑀺𑀁 𑀇𑀫𑁂 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀣, 𑀦𑀦𑀼 ‘𑀚𑀸𑀢𑀭𑀽𑀧𑀭𑀚𑀢𑀧𑁆𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’𑀢𑀺 (𑀤𑀻. 𑀦𑀺. 𑁧.𑁧𑁦, 𑁧𑁯𑁪) 𑀏𑀯𑀁 𑀲𑀼𑀢𑁆𑀢𑁂 𑀧𑀝𑀺𑀯𑀺𑀭𑀢𑀺𑀫𑀢𑁆𑀢𑀫𑁂𑀯 𑀯𑀼𑀢𑁆𑀢𑀁, 𑀦𑀢𑁆𑀣𑀺 𑀏𑀢𑁆𑀣 𑀆𑀧𑀢𑁆𑀢𑀻’’𑀢𑀺 𑀯𑀤𑀢𑀺. 𑀅𑀧𑀭𑁄 𑀥𑀫𑁆𑀫𑀓𑀣𑀺𑀓𑁄 𑀲𑀼𑀢𑁆𑀢𑀲𑁆𑀲 𑀆𑀕𑀢𑀢𑁆𑀢𑀸 𑀑𑀮𑀫𑁆𑀩𑁂𑀢𑁆𑀯𑀸 𑀦𑀺𑀯𑀸𑀲𑁂𑀦𑁆𑀢𑀸𑀦𑀁 𑀆𑀧𑀢𑁆𑀢𑀺𑀬𑀸 𑀆𑀭𑁄𑀧𑀺𑀬𑀫𑀸𑀦𑀸𑀬 ‘‘𑀓𑀺𑀁 𑀇𑀫𑁂𑀲𑀁 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀣, 𑀦𑀦𑀼 ‘𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀸 𑀓𑀭𑀡𑀻𑀬𑀸’𑀢𑀺 (𑀧𑀸𑀘𑀺. 𑁫𑁭𑁬) 𑀏𑀯𑀁 𑀲𑀺𑀓𑁆𑀔𑀸𑀓𑀭𑀡𑀫𑀢𑁆𑀢𑀫𑁂𑀯 𑀯𑀼𑀢𑁆𑀢𑀁, 𑀦𑀢𑁆𑀣𑀺 𑀏𑀢𑁆𑀣 𑀆𑀧𑀢𑁆𑀢𑀻’’𑀢𑀺 𑀯𑀤𑀢𑀺. 𑀉𑀩𑁆𑀩𑀸𑀳𑀺𑀓 𑀯𑀺𑀦𑀺𑀘𑁆𑀙𑀬𑁂𑀢𑀺 𑀲𑀫𑀣𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀉𑀩𑁆𑀩𑀸𑀳𑀺𑀓𑀯𑀺𑀦𑀺𑀘𑁆𑀙𑀬𑁂 ‘‘𑀲𑀻𑀮𑀯𑀸 𑀳𑁄𑀢𑀻’’𑀢𑀺𑀆𑀤𑀺𑀓𑀸𑀬 𑀳𑀺 𑀤𑀲𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁂 𑀤𑁆𑀯𑁂 𑀢𑀬𑁄 𑀪𑀺𑀓𑁆𑀔𑀽 𑀉𑀘𑁆𑀘𑀺𑀦𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑁄 𑀉𑀩𑁆𑀩𑀸𑀳𑀺𑀓𑀯𑀺𑀦𑀺𑀘𑁆𑀙𑀬𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀧𑀯𑀸𑀭𑀡𑀧𑁆𑀧𑀘𑁆𑀘𑀼𑀓𑁆𑀓𑀟𑁆𑀠𑀦𑀸𑀢𑀺 𑀧𑀯𑀸𑀭𑀡𑀸𑀬 𑀉𑀓𑁆𑀓𑀲𑁆𑀲𑀦𑀸, 𑀉𑀤𑁆𑀥𑀁 𑀓𑀟𑁆𑀠𑀦𑀸𑀢𑀺 𑀅𑀢𑁆𑀣𑁄. 𑀢𑀺𑀡𑀯𑀢𑁆𑀣𑀸𑀭𑀓𑀲𑀫𑀣𑁂 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀜𑀢𑁆𑀢𑀺 𑀘𑀸𑀢𑀺 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀅𑀫𑁆𑀳𑀸𑀓𑀁 𑀪𑀡𑁆𑀟𑀦𑀚𑀸𑀢𑀸𑀦𑀁…𑀧𑁂… 𑀞𑀧𑁂𑀢𑁆𑀯𑀸 𑀕𑀺𑀳𑀺𑀧𑁆𑀧𑀝𑀺𑀲𑀁𑀬𑀼𑀢𑁆𑀢’’𑀦𑁆𑀢𑀺 (𑀘𑀽𑀴𑀯. 𑁨𑁧𑁨-𑁨𑁧𑁩) 𑀏𑀯𑀁 𑀢𑀺𑀡𑀯𑀢𑁆𑀣𑀸𑀭𑀓𑀲𑀫𑀣𑁂 𑀓𑀢𑀸 𑀲𑀩𑁆𑀩𑀧𑀞𑀫𑀸 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀜𑀢𑁆𑀢𑀺 𑀘.

𑀅𑀮𑀸𑀪𑀸𑀬 𑀧𑀭𑀺𑀲𑀓𑁆𑀓𑀦𑀸𑀤𑀺𑀓𑁂𑀳𑀻𑀢𑀺 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀅𑀮𑀸𑀪𑀢𑁆𑀣𑀸𑀬 𑀧𑀬𑁄𑀕𑀓𑀭𑀡𑀸𑀤𑀺𑀓𑁂𑀳𑀺. 𑀆𑀤𑀺𑀲𑀤𑁆𑀤𑁂𑀦 ‘‘𑀅𑀦𑀢𑁆𑀣𑀸𑀬 𑀧𑀭𑀺𑀲𑀓𑁆𑀓𑀦𑀁, 𑀅𑀦𑀸𑀯𑀸𑀲𑀸𑀬 𑀧𑀭𑀺𑀲𑀓𑁆𑀓𑀦𑀁, 𑀅𑀓𑁆𑀓𑁄𑀲𑀦𑀧𑀭𑀺𑀪𑀸𑀲𑀦𑀁, 𑀪𑀺𑀓𑁆𑀔𑀽 𑀪𑀺𑀓𑁆𑀔𑀽𑀳𑀺 𑀪𑁂𑀤𑀦𑀁, 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀪𑀡𑀦𑀁, 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀪𑀡𑀦𑀁, 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀪𑀡𑀦’’𑀦𑁆𑀢𑀺 (𑀘𑀽𑀴𑀯. 𑁨𑁬𑁫) 𑀅𑀯𑀲𑁂𑀲𑀁 𑀲𑀢𑁆𑀢𑀗𑁆𑀕𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲𑀸𑀢𑀺 𑀅𑀝𑁆𑀞𑀳𑀺 𑀘𑁂𑀯 𑀅𑀗𑁆𑀕𑁂𑀳𑀺 𑀏𑀓𑁂𑀓𑁂𑀦𑀧𑀺 𑀅𑀗𑁆𑀕𑁂𑀦 𑀘 𑀲𑀫𑀦𑁆𑀦𑀸𑀕𑀢𑀲𑁆𑀲. 𑀅𑀲𑀫𑁆𑀪𑁄𑀕𑀓𑀭𑀡𑀢𑁆𑀣𑀦𑁆𑀢𑀺 𑀢𑁂𑀦 𑀤𑀺𑀦𑁆𑀦𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀧𑁆𑀧𑀝𑀺𑀕𑁆𑀕𑀳𑀡𑀢𑁆𑀣𑀁. 𑀧𑀢𑁆𑀢𑀦𑀺𑀓𑁆𑀓𑀼𑀚𑁆𑀚𑀦𑀯𑀲𑁂𑀦𑀸𑀢𑀺 𑀓𑀫𑁆𑀫𑀯𑀸𑀘𑀸𑀬 𑀧𑀢𑁆𑀢𑀦𑀺𑀓𑁆𑀓𑀼𑀚𑁆𑀚𑀦𑀯𑀲𑁂𑀦, 𑀦 𑀅𑀥𑁄𑀫𑀼𑀔𑀝𑁆𑀞𑀧𑀦𑀯𑀲𑁂𑀦. 𑀧𑀢𑁆𑀢𑀼𑀓𑁆𑀓𑀼𑀚𑁆𑀚𑀦𑀯𑀲𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀲𑁂𑀯𑀸𑀢𑀺 𑀬𑁄 𑀧𑀢𑁆𑀢𑀦𑀺𑀓𑁆𑀓𑀼𑀚𑁆𑀚𑀦𑀯𑀲𑁂𑀦 𑀓𑀢𑀦𑀺𑀲𑁆𑀲𑀸𑀭𑀡𑁄, 𑀢𑀲𑁆𑀲𑁂𑀯 𑀉𑀧𑀸𑀲𑀓𑀲𑁆𑀲. 𑀲𑀫𑁆𑀫𑀸𑀯𑀢𑁆𑀢𑀦𑁆𑀢𑀲𑁆𑀲𑀸𑀢𑀺 𑀬𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀧𑀢𑁆𑀢𑀼𑀓𑁆𑀓𑀼𑀚𑁆𑀚𑀦𑀁, 𑀢𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲. 𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀸 𑀦𑀺𑀲𑁆𑀲𑀸𑀭𑀡𑀸, 𑀑𑀲𑀸𑀭𑀡𑀸 𑀘.

𑀲𑀽𑀘𑀺𑀬𑀸𑀤𑀺𑀅𑀧𑁆𑀧𑀫𑀢𑁆𑀢𑀓𑀁 𑀢𑀁𑀢𑀤𑀢𑁆𑀣𑀺𑀓𑀸𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑀺 𑀤𑁂𑀢𑀻𑀢𑀺 𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀓𑁄. 𑀲𑀸𑀝𑀺𑀬𑀕𑁆𑀕𑀸𑀳𑀸𑀧𑀓𑁄𑀢𑀺 𑀯𑀲𑁆𑀲𑀺𑀓𑀲𑀸𑀝𑀺𑀬𑀕𑁆𑀕𑀸𑀳𑀸𑀧𑀓𑁄. 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂 𑀆𑀭𑀸𑀫𑀺𑀓𑁂 𑀧𑁂𑀲𑀦𑀢𑁆𑀣𑀸𑀬 𑀤𑀸𑀢𑀩𑁆𑀩𑀸 𑀲𑀫𑁆𑀫𑀼𑀢𑀺 𑀆𑀭𑀸𑀫𑀺𑀓𑀧𑁂𑀲𑀓𑀲𑀫𑁆𑀫𑀼𑀢𑀺. 𑀏𑀲 𑀦𑀬𑁄 𑀲𑀸𑀫𑀡𑁂𑀭𑀧𑁂𑀲𑀓𑀲𑀫𑁆𑀫𑀼𑀢𑀻𑀢𑀺 𑀏𑀢𑁆𑀣𑀸𑀧𑀺.

𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀤𑀻𑀦𑀁 𑀲𑀢𑁆𑀢𑀦𑁆𑀦𑀦𑁆𑀢𑀺 𑀢𑀚𑁆𑀚𑀦𑀻𑀬𑀁, 𑀦𑀺𑀬𑀲𑀁, 𑀧𑀩𑁆𑀩𑀸𑀚𑀦𑀻𑀬𑀁, 𑀧𑀝𑀺𑀲𑀸𑀭𑀡𑀻𑀬𑀁, 𑀢𑀺𑀯𑀺𑀥𑀜𑁆𑀘 𑀉𑀓𑁆𑀔𑁂𑀧𑀦𑀻𑀬𑀦𑁆𑀢𑀺 𑀢𑀚𑁆𑀚𑀦𑀻𑀬𑀸𑀤𑀻𑀦𑀁 𑀲𑀢𑁆𑀢𑀦𑁆𑀦𑀁. 𑀅𑀝𑁆𑀞𑀬𑀸𑀯𑀢𑀢𑀺𑀬𑀓𑀸𑀢𑀺 𑀪𑀺𑀓𑁆𑀔𑀽𑀦𑀁 𑀯𑀲𑁂𑀦 𑀘𑀢𑁆𑀢𑀸𑀭𑁄, 𑀪𑀺𑀓𑁆𑀔𑀼𑀦𑀻𑀦𑀁 𑀯𑀲𑁂𑀦 𑀘𑀢𑁆𑀢𑀸𑀭𑁄𑀢𑀺 𑀅𑀝𑁆𑀞 𑀲𑀗𑁆𑀖𑀸𑀤𑀺𑀲𑁂𑀲𑀸.

𑀜𑀢𑁆𑀢𑀺𑀓𑀫𑁆𑀫𑀸𑀤𑀺𑀯𑀲𑁂𑀦𑀸𑀢𑀺 𑀜𑀢𑁆𑀢𑀺𑀓𑀫𑁆𑀫𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀯𑀲𑁂𑀦. ‘‘𑀓𑀭𑀺𑀬𑀫𑀸𑀦𑀁 𑀤𑀴𑁆𑀳𑀢𑀭𑀁 𑀳𑁄𑀢𑀺, 𑀢𑀲𑁆𑀫𑀸 𑀓𑀸𑀢𑀩𑁆𑀩’’𑀦𑁆𑀢𑀺 𑀏𑀓𑀘𑁆𑀘𑁂 𑀯𑀤𑀦𑁆𑀢𑀺. 𑀏𑀯𑀁 𑀧𑀦 𑀲𑀢𑀺 𑀓𑀫𑁆𑀫𑀲𑀗𑁆𑀓𑀭𑁄 𑀳𑁄𑀢𑀺, 𑀢𑀲𑁆𑀫𑀸 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯. 𑀲𑀘𑁂 𑀧𑀦 𑀅𑀓𑁆𑀔𑀭𑀧𑀭𑀺𑀳𑀻𑀦𑀁 𑀯𑀸 𑀧𑀤𑀧𑀭𑀺𑀳𑀻𑀦𑀁 𑀯𑀸 𑀤𑀼𑀭𑀼𑀢𑁆𑀢𑀧𑀤𑀁 𑀯𑀸 𑀳𑁄𑀢𑀺, 𑀢𑀲𑁆𑀲 𑀲𑁄𑀥𑀦𑀢𑁆𑀣𑀁 𑀧𑀼𑀦𑀧𑁆𑀧𑀼𑀦𑀁 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀇𑀤𑀁 𑀅𑀓𑀼𑀧𑁆𑀧𑀓𑀫𑁆𑀫𑀲𑁆𑀲 𑀤𑀴𑁆𑀳𑀻𑀓𑀫𑁆𑀫𑀁 𑀳𑁄𑀢𑀺, 𑀓𑀼𑀧𑁆𑀧𑀓𑀫𑁆𑀫𑁂 𑀓𑀫𑁆𑀫𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀲𑀓𑀮𑀓𑁆𑀔𑀡𑁂𑀦𑁂𑀯𑀸𑀢𑀺 𑀜𑀢𑁆𑀢𑀺𑀜𑁆𑀘 𑀘𑀢𑀲𑁆𑀲𑁄 𑀘 𑀓𑀫𑁆𑀫𑀯𑀸𑀘𑀸𑀬𑁄 𑀲𑀸𑀯𑁂𑀢𑁆𑀯𑀸𑀯. 𑀦 𑀲𑁂𑀲𑀓𑀫𑁆𑀫𑀯𑀲𑁂𑀦𑀸𑀢𑀺 𑀅𑀧𑀮𑁄𑀓𑀦𑀓𑀫𑁆𑀫𑀸𑀤𑀺𑀦𑀸 𑀅𑀯𑀲𑁂𑀲𑀓𑀫𑁆𑀫𑀯𑀲𑁂𑀦 𑀦 𑀓𑀸𑀢𑀩𑁆𑀩𑀁.

𑀓𑀫𑁆𑀫𑀧𑁆𑀧𑀝𑀺𑀩𑀸𑀳𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀙𑀦𑁆𑀤𑀁𑀅𑀤𑀢𑁆𑀯𑀸𑀕𑀫𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀆𑀭𑁄𑀘𑀺𑀢𑀁 𑀯𑀢𑁆𑀣𑀼 𑀅𑀯𑀺𑀦𑀺𑀘𑁆𑀙𑀺𑀢𑀦𑁆𑀢𑀺 𑀆𑀭𑁄𑀘𑀺𑀢𑀯𑀢𑁆𑀣𑀼 𑀆𑀧𑀢𑁆𑀢𑀺𑀓𑀪𑀸𑀯𑁂𑀦 𑀦 𑀯𑀺𑀦𑀺𑀘𑁆𑀙𑀺𑀢𑀁. 𑀏𑀢𑁆𑀣 𑀘 𑀘𑁄𑀤𑀓𑁂𑀦 𑀘 𑀘𑀼𑀤𑀺𑀢𑀓𑁂𑀦 𑀘 𑀅𑀢𑁆𑀢𑀦𑁄 𑀓𑀣𑀸 𑀓𑀣𑀺𑀢𑀸, 𑀅𑀦𑀼𑀯𑀺𑀚𑁆𑀚𑀓𑁄 𑀲𑀫𑁆𑀫𑀢𑁄, 𑀏𑀢𑁆𑀢𑀸𑀯𑀢𑀸 𑀯𑀢𑁆𑀣𑀼𑀫𑁂𑀯 𑀆𑀭𑁄𑀘𑀺𑀢𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀙𑀦𑁆𑀤𑀁 𑀅𑀤𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑁂𑀬𑁆𑀬𑀸𑀢𑀺 ‘‘𑀓𑀣𑀁 𑀇𑀤𑀁 𑀓𑀫𑁆𑀫𑀁 𑀓𑀼𑀧𑁆𑀧𑀁 𑀅𑀲𑁆𑀲, 𑀯𑀕𑁆𑀕𑀁 𑀅𑀲𑁆𑀲, 𑀦 𑀓𑀭𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁪𑁮𑁧) 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀙𑀦𑁆𑀤𑀁 𑀅𑀤𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀲𑀦𑀢𑁄 𑀉𑀝𑁆𑀞𑀸𑀬 𑀕𑀘𑁆𑀙𑁂𑀬𑁆𑀬. 𑀢𑁂𑀦𑀸𑀳 ‘‘𑀬𑁄 𑀪𑀺𑀓𑁆𑀔𑀽’’𑀢𑀺𑀆𑀤𑀺. 𑀓𑀺𑀭𑀺𑀬𑀸𑀓𑀺𑀭𑀺𑀬𑀦𑁆𑀢𑀺 𑀏𑀢𑁆𑀣 𑀕𑀫𑀦𑀁 𑀓𑀺𑀭𑀺𑀬𑀁, 𑀙𑀦𑁆𑀤𑀲𑁆𑀲 𑀅𑀤𑀸𑀦𑀁 𑀅𑀓𑀺𑀭𑀺𑀬𑀁.

𑀙𑀦𑁆𑀤𑀁𑀅𑀤𑀢𑁆𑀯𑀸𑀕𑀫𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀤𑀼𑀩𑁆𑀩𑀮𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀬𑀣𑀸𑀲𑀦𑁆𑀣𑀼𑀢𑀦𑁆𑀢𑀺 𑀬𑀣𑀸𑀫𑀺𑀢𑁆𑀢𑀁. 𑀢𑁂𑀦𑀸𑀳 ‘‘𑀬𑁄 𑀬𑁄’’𑀢𑀺 𑀆𑀤𑀺. 𑀢𑀢𑁆𑀣 𑀫𑀺𑀢𑁆𑀢𑀲𑀦𑁆𑀤𑀺𑀝𑁆𑀞𑀲𑀫𑁆𑀪𑀢𑁆𑀢𑀯𑀲𑁂𑀦𑀸𑀢𑀺 𑀫𑀺𑀢𑁆𑀢𑀲𑀦𑁆𑀤𑀺𑀝𑁆𑀞𑀲𑀫𑁆𑀪𑀢𑁆𑀢𑀸𑀦𑀁 𑀯𑀲𑁂𑀦. 𑀢𑀢𑁆𑀣 𑀫𑀺𑀢𑁆𑀢𑀸 𑀫𑀺𑀢𑁆𑀢𑀸𑀯. 𑀲𑀦𑁆𑀤𑀺𑀝𑁆𑀞𑀸 𑀢𑀢𑁆𑀣 𑀢𑀢𑁆𑀣 𑀲𑀗𑁆𑀕𑀫𑁆𑀫 𑀤𑀺𑀝𑁆𑀞𑀫𑀢𑁆𑀢𑀸 𑀦𑀸𑀢𑀺𑀤𑀴𑁆𑀳𑀫𑀺𑀢𑁆𑀢𑀸. 𑀲𑀫𑁆𑀪𑀢𑁆𑀢𑀸 𑀲𑀼𑀝𑁆𑀞𑀼 𑀪𑀢𑁆𑀢𑀸 𑀲𑀺𑀦𑁂𑀳𑀯𑀦𑁆𑀢𑁄 𑀤𑀴𑁆𑀳𑀫𑀺𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀧𑀜𑁆𑀘 𑀕𑀭𑀼𑀪𑀡𑁆𑀟𑀸𑀦𑀻𑀢𑀺 𑀭𑀸𑀲𑀺𑀯𑀲𑁂𑀦 𑀧𑀜𑁆𑀘 𑀕𑀭𑀼𑀪𑀡𑁆𑀟𑀸𑀦𑀺, 𑀲𑀭𑀽𑀧𑀯𑀲𑁂𑀦 𑀧𑀦𑁂𑀢𑀸𑀦𑀺 𑀩𑀳𑀽𑀦𑀺 𑀳𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀭𑀸𑀲𑀺𑀯𑀲𑁂𑀦 𑀧𑀜𑁆𑀘 𑀕𑀭𑀼𑀪𑀡𑁆𑀟𑀸𑀦𑀺 𑀯𑀼𑀢𑁆𑀢𑀸𑀦𑀻’’𑀢𑀺. 𑀆𑀭𑀸𑀫𑁄 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧; 𑀯𑀺. 𑀲𑀗𑁆𑀕. 𑀅𑀝𑁆𑀞. 𑁨𑁨𑁭) 𑀦𑀸𑀫 𑀧𑀼𑀧𑁆𑀨𑀸𑀭𑀸𑀫𑁄 𑀯𑀸 𑀨𑀮𑀸𑀭𑀸𑀫𑁄 𑀯𑀸. 𑀆𑀭𑀸𑀫𑀯𑀢𑁆𑀣𑀼 𑀦𑀸𑀫 𑀢𑁂𑀲𑀁𑀬𑁂𑀯 𑀆𑀭𑀸𑀫𑀸𑀦𑀁 𑀅𑀢𑁆𑀣𑀸𑀬 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀞𑀧𑀺𑀢𑁄𑀓𑀸𑀲𑁄, 𑀢𑁂𑀲𑀼 𑀯𑀸 𑀆𑀭𑀸𑀫𑁂𑀲𑀼 𑀯𑀺𑀦𑀝𑁆𑀞𑁂𑀲𑀼 𑀢𑁂𑀲𑀁 𑀧𑁄𑀭𑀸𑀡𑀓𑀪𑀽𑀫𑀺𑀪𑀸𑀕𑁄. 𑀯𑀺𑀳𑀸𑀭𑁄 𑀦𑀸𑀫 𑀬𑀁 𑀓𑀺𑀜𑁆𑀘𑀺 𑀧𑀸𑀲𑀸𑀤𑀸𑀤𑀺𑀲𑁂𑀦𑀸𑀲𑀦𑀁. 𑀯𑀺𑀳𑀸𑀭𑀯𑀢𑁆𑀣𑀼 𑀦𑀸𑀫 𑀢𑀲𑁆𑀲 𑀧𑀢𑀺𑀝𑁆𑀞𑀸𑀦𑁄𑀓𑀸𑀲𑁄. 𑀫𑀜𑁆𑀘𑁄 𑀦𑀸𑀫 𑀫𑀲𑀸𑀭𑀓𑁄 𑀩𑀼𑀦𑁆𑀤𑀺𑀓𑀸𑀩𑀤𑁆𑀥𑁄, 𑀓𑀼𑀴𑀻𑀭𑀧𑀸𑀤𑀓𑁄, 𑀆𑀳𑀘𑁆𑀘𑀧𑀸𑀤𑀓𑁄𑀢𑀺 𑀇𑀫𑁂𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁 𑀫𑀜𑁆𑀘𑀸𑀦𑀁 𑀅𑀜𑁆𑀜𑀢𑀭𑁄. 𑀧𑀻𑀞𑀁 𑀦𑀸𑀫 𑀫𑀲𑀸𑀭𑀓𑀸𑀤𑀻𑀦𑀁𑀬𑁂𑀯 𑀘𑀢𑀼𑀦𑁆𑀦𑀁 𑀧𑀻𑀞𑀸𑀦𑀁 𑀅𑀜𑁆𑀜𑀢𑀭𑀁. 𑀪𑀺𑀲𑀺 𑀦𑀸𑀫 𑀉𑀡𑁆𑀡𑀪𑀺𑀲𑀺𑀆𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀪𑀺𑀲𑀻𑀦𑀁 𑀅𑀜𑁆𑀜𑀢𑀭𑀸. 𑀩𑀺𑀩𑁆𑀩𑁄𑀳𑀦𑀁 𑀦𑀸𑀫 𑀭𑀼𑀓𑁆𑀔𑀢𑀽𑀮𑀮𑀢𑀸𑀢𑀽𑀮𑀧𑁄𑀝𑀓𑀺𑀢𑀽𑀮𑀸𑀦𑀁 𑀅𑀜𑁆𑀜𑀢𑀭𑁂𑀦 𑀧𑀼𑀡𑁆𑀡𑀁. 𑀮𑁄𑀳𑀓𑀼𑀫𑁆𑀪𑀻 𑀦𑀸𑀫 𑀓𑀸𑀴𑀮𑁄𑀳𑁂𑀦 𑀯𑀸 𑀢𑀫𑁆𑀩𑀮𑁄𑀳𑁂𑀦 𑀯𑀸 𑀬𑁂𑀦 𑀓𑁂𑀦𑀘𑀺 𑀮𑁄𑀳𑁂𑀦 𑀓𑀢𑀸 𑀓𑀼𑀫𑁆𑀪𑀻. 𑀮𑁄𑀳𑀪𑀸𑀡𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀧𑀦 𑀪𑀸𑀡𑀓𑀦𑁆𑀢𑀺 𑀅𑀭𑀜𑁆𑀚𑀭𑁄 𑀯𑀼𑀘𑁆𑀘𑀢𑀺. 𑀯𑀸𑀭𑀓𑁄𑀢𑀺 𑀖𑀝𑁄. 𑀓𑀝𑀸𑀳𑀁 𑀓𑀝𑀸𑀳𑀫𑁂𑀯. 𑀯𑀸𑀲𑀺𑀆𑀤𑀻𑀲𑀼, 𑀯𑀮𑁆𑀮𑀺𑀆𑀤𑀻𑀲𑀼 𑀘 𑀤𑀼𑀯𑀺𑀜𑁆𑀜𑁂𑀬𑁆𑀬𑀁 𑀦𑀸𑀫 𑀦𑀢𑁆𑀣𑀺. 𑀏𑀯𑀁 𑁋

𑀤𑁆𑀯𑀺𑀲𑀗𑁆𑀕𑀳𑀸𑀦𑀺 𑀤𑁆𑀯𑁂 𑀳𑁄𑀦𑁆𑀢𑀺, 𑀢𑀢𑀺𑀬𑀁 𑀘𑀢𑀼𑀲𑀗𑁆𑀕𑀳𑀁;

𑀘𑀢𑀼𑀢𑁆𑀣𑀁 𑀦𑀯𑀓𑁄𑀝𑁆𑀞𑀸𑀲𑀁, 𑀧𑀜𑁆𑀘𑀫𑀁 𑀅𑀝𑁆𑀞𑀪𑁂𑀤𑀦𑀁.

𑀇𑀢𑀺 𑀧𑀜𑁆𑀘𑀳𑀺 𑀭𑀸𑀲𑀻𑀳𑀺, 𑀧𑀜𑁆𑀘𑀦𑀺𑀫𑁆𑀫𑀮𑀮𑁄𑀘𑀦𑁄;

𑀧𑀜𑁆𑀘𑀯𑀻𑀲𑀯𑀺𑀥𑀁 𑀦𑀸𑀣𑁄, 𑀕𑀭𑀼𑀪𑀡𑁆𑀟𑀁 𑀧𑀓𑀸𑀲𑀬𑀺. (𑀘𑀽𑀴𑀯. 𑀅𑀝𑁆𑀞. 𑁩𑁨𑁧; 𑀯𑀺. 𑀲𑀗𑁆𑀕. 𑀅𑀝𑁆𑀞. 𑁨𑁨𑁭);

𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀯𑀸 𑀯𑀺𑀪𑀚𑀺𑀢𑀼𑀁 𑀯𑀸 𑀦 𑀯𑀝𑁆𑀝𑀢𑀻𑀢𑀺 𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀯𑀸 𑀯𑀺𑀪𑀚𑀺𑀢𑀼𑀁 𑀯𑀸 𑀦 𑀯𑀝𑁆𑀝𑀦𑁆𑀢𑀺. 𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀧𑀦 𑀯𑀺𑀲𑁆𑀲𑀚𑁆𑀚𑀦𑁆𑀢𑀲𑁆𑀲, 𑀯𑀺𑀪𑀚𑀦𑁆𑀢𑀲𑁆𑀲 𑀘 𑀅𑀦𑀸𑀧𑀢𑁆𑀢𑀺. 𑀢𑁂𑀦𑀸𑀳 ‘‘𑀣𑀸𑀯𑀭𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀣𑀸𑀯𑀭𑁂𑀦 𑀣𑀸𑀯𑀭𑀦𑁆𑀢𑀺 𑀆𑀭𑀸𑀫𑀆𑀭𑀸𑀫𑀯𑀢𑁆𑀣𑀼𑀯𑀺𑀳𑀸𑀭𑀯𑀺𑀳𑀸𑀭𑀯𑀢𑁆𑀣𑀼𑀦𑀸 𑀆𑀭𑀸𑀫𑀁 𑀆𑀭𑀸𑀫𑀯𑀢𑁆𑀣𑀼𑀁 𑀯𑀺𑀳𑀸𑀭𑀁 𑀯𑀺𑀳𑀸𑀭𑀯𑀢𑁆𑀣𑀼𑀁. 𑀇𑀢𑀭𑁂𑀦𑀸𑀢𑀺 𑀅𑀣𑀸𑀯𑀭𑁂𑀦, 𑀧𑀘𑁆𑀙𑀺𑀫𑀭𑀸𑀲𑀺𑀢𑁆𑀢𑀬𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀓𑀧𑁆𑀧𑀺𑀬𑁂𑀦𑀸𑀢𑀺 𑀲𑀼𑀯𑀡𑁆𑀡𑀫𑀬𑀫𑀜𑁆𑀘𑀸𑀤𑀺𑀦𑀸 𑀘𑁂𑀯 𑀅𑀓𑀧𑁆𑀧𑀺𑀬𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑁂𑀳𑀺 𑀘. 𑀫𑀳𑀕𑁆𑀖𑀓𑀧𑁆𑀧𑀺𑀬𑁂𑀦𑀸𑀢𑀺 𑀤𑀦𑁆𑀢𑀫𑀬𑀫𑀜𑁆𑀘𑀸𑀤𑀺𑀦𑀸 𑀘𑁂𑀯 𑀧𑀸𑀯𑀸𑀭𑀸𑀤𑀺𑀦𑀸 𑀘. 𑀇𑀢𑀭𑀦𑁆𑀢𑀺 𑀅𑀣𑀸𑀯𑀭𑀁. 𑀓𑀧𑁆𑀧𑀺𑀬𑀧𑀭𑀺𑀯𑀢𑁆𑀢𑀦𑁂𑀦 𑀧𑀭𑀺𑀯𑀢𑁆𑀢𑁂𑀢𑀼𑀦𑁆𑀢𑀺 𑀬𑀣𑀸 𑀅𑀓𑀧𑁆𑀧𑀺𑀬𑀁 𑀦 𑀳𑁄𑀢𑀺, 𑀏𑀯𑀁 𑀧𑀭𑀺𑀯𑀢𑁆𑀢𑁂𑀢𑀼𑀁.

𑀢𑀢𑁆𑀭𑀸𑀬𑀁 𑀧𑀭𑀺𑀯𑀢𑁆𑀢𑀦𑀦𑀬𑁄 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧; 𑀯𑀺. 𑀲𑀗𑁆𑀕. 𑀅𑀝𑁆𑀞. 𑁨𑁨𑁮) 𑁋 𑀲𑀗𑁆𑀖𑀲𑁆𑀲 𑀦𑀸𑀴𑀺𑀓𑁂𑀭𑀸𑀭𑀸𑀫𑁄 𑀤𑀽𑀭𑁂 𑀳𑁄𑀢𑀺, 𑀓𑀧𑁆𑀧𑀺𑀬𑀓𑀸𑀭𑀓𑀸𑀯 𑀩𑀳𑀼𑀢𑀭𑀁 𑀔𑀸𑀤𑀦𑁆𑀢𑀺, 𑀬𑀫𑁆𑀧𑀺 𑀦 𑀔𑀸𑀤𑀦𑁆𑀢𑀺, 𑀢𑀢𑁄 𑀲𑀓𑀝𑀯𑁂𑀢𑀦𑀁 𑀤𑀢𑁆𑀯𑀸 𑀅𑀧𑁆𑀧𑀫𑁂𑀯 𑀆𑀳𑀭𑀦𑁆𑀢𑀺. 𑀅𑀜𑁆𑀜𑁂𑀲𑀁 𑀧𑀦 𑀢𑀲𑁆𑀲𑀸𑀭𑀸𑀫𑀲𑁆𑀲 𑀅𑀯𑀺𑀤𑀽𑀭𑁂 𑀕𑀸𑀫𑀯𑀸𑀲𑀻𑀦𑀁 𑀫𑀦𑀼𑀲𑁆𑀲𑀸𑀦𑀁 𑀯𑀺𑀳𑀸𑀭𑀲𑁆𑀲 𑀲𑀫𑀻𑀧𑁂 𑀆𑀭𑀸𑀫𑁄 𑀳𑁄𑀢𑀺, 𑀢𑁂 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀓𑁂𑀦 𑀆𑀭𑀸𑀫𑁂𑀦 𑀢𑀁 𑀆𑀭𑀸𑀫𑀁 𑀬𑀸𑀘𑀦𑁆𑀢𑀺, 𑀲𑀗𑁆𑀖𑁂𑀦 ‘‘𑀭𑀼𑀘𑁆𑀘𑀢𑀺 𑀲𑀗𑁆𑀖𑀲𑁆𑀲𑀸’’𑀢𑀺 𑀅𑀧𑀮𑁄𑀓𑁂𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑁄. 𑀲𑀘𑁂𑀧𑀺 𑀪𑀺𑀓𑁆𑀔𑀽𑀦𑀁 𑀭𑀼𑀓𑁆𑀔𑀲𑀳𑀲𑁆𑀲𑀁 𑀳𑁄𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀧𑀜𑁆𑀘𑀲𑀢𑀸𑀦𑀺, ‘‘𑀢𑀼𑀫𑁆𑀳𑀸𑀓𑀁 𑀆𑀭𑀸𑀫𑁄 𑀔𑀼𑀤𑁆𑀤𑀓𑁄’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀓𑀺𑀜𑁆𑀘𑀸𑀧𑀺 𑀅𑀬𑀁 𑀔𑀼𑀤𑁆𑀤𑀓𑁄, 𑀅𑀣 𑀔𑁄 𑀇𑀢𑀭𑀢𑁄 𑀩𑀳𑀼𑀢𑀭𑀁 𑀆𑀬𑀁 𑀤𑁂𑀢𑀺. 𑀲𑀘𑁂𑀧𑀺 𑀲𑀫𑀓𑀫𑁂𑀯 𑀤𑁂𑀢𑀺, 𑀏𑀯𑀫𑁆𑀧𑀺 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀲𑀓𑁆𑀓𑀸𑀢𑀺 𑀕𑀳𑁂𑀢𑀩𑁆𑀩𑀫𑁂𑀯. 𑀲𑀘𑁂 𑀧𑀦 𑀫𑀦𑀼𑀲𑁆𑀲𑀸𑀦𑀁 𑀩𑀳𑀼𑀢𑀭𑀸 𑀭𑀼𑀓𑁆𑀔𑀸 𑀳𑁄𑀦𑁆𑀢𑀺, ‘‘𑀦𑀦𑀼 𑀢𑀼𑀫𑁆𑀳𑀸𑀓𑀁 𑀩𑀳𑀼𑀢𑀭𑀸 𑀭𑀼𑀓𑁆𑀔𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 ‘‘𑀅𑀢𑀺𑀭𑁂𑀓𑀁 𑀅𑀫𑁆𑀳𑀸𑀓𑀁 𑀧𑀼𑀜𑁆𑀜𑀁 𑀳𑁄𑀢𑀼, 𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀯𑀤𑀦𑁆𑀢𑀺, 𑀚𑀸𑀦𑀸𑀧𑁂𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀽𑀦𑀁 𑀭𑀼𑀓𑁆𑀔𑀸 𑀨𑀮𑀥𑀸𑀭𑀺𑀦𑁄, 𑀫𑀦𑀼𑀲𑁆𑀲𑀸𑀦𑀁 𑀭𑀼𑀓𑁆𑀔𑀸 𑀦 𑀢𑀸𑀯 𑀨𑀮𑀁 𑀕𑀡𑁆𑀳𑀦𑁆𑀢𑀺. 𑀓𑀺𑀜𑁆𑀘𑀸𑀧𑀺 𑀦 𑀕𑀡𑁆𑀳𑀦𑁆𑀢𑀺, 𑀦 𑀘𑀺𑀭𑁂𑀦 𑀕𑀡𑁆𑀳𑀺𑀲𑁆𑀲𑀦𑁆𑀢𑀻𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀫𑁂𑀯. 𑀫𑀦𑀼𑀲𑁆𑀲𑀸𑀦𑀁 𑀭𑀼𑀓𑁆𑀔𑀸 𑀨𑀮𑀥𑀸𑀭𑀺𑀦𑁄, 𑀪𑀺𑀓𑁆𑀔𑀽𑀦𑀁 𑀭𑀼𑀓𑁆𑀔𑀸 𑀦 𑀢𑀸𑀯 𑀨𑀮𑀁 𑀕𑀡𑁆𑀳𑀦𑁆𑀢𑀺, ‘‘𑀦𑀦𑀼 𑀢𑀼𑀫𑁆𑀳𑀸𑀓𑀁 𑀭𑀼𑀓𑁆𑀔𑀸 𑀨𑀮𑀥𑀸𑀭𑀺𑀦𑁄’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 ‘‘𑀕𑀡𑁆𑀳𑀣, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀧𑀼𑀜𑁆𑀜𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑁂𑀦𑁆𑀢𑀺, 𑀚𑀸𑀦𑀸𑀧𑁂𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀁 𑀆𑀭𑀸𑀫𑁂𑀦 𑀆𑀭𑀸𑀫𑁄 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑁄, 𑀏𑀢𑁂𑀦𑁂𑀯 𑀦𑀬𑁂𑀦 𑀆𑀭𑀸𑀫𑀯𑀢𑁆𑀣𑀼𑀧𑀺 𑀯𑀺𑀳𑀸𑀭𑁄𑀧𑀺 𑀯𑀺𑀳𑀸𑀭𑀯𑀢𑁆𑀣𑀼𑀧𑀺 𑀆𑀭𑀸𑀫𑁂𑀦 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀁. 𑀆𑀭𑀸𑀫𑀯𑀢𑁆𑀣𑀼𑀦𑀸 𑀘 𑀫𑀳𑀦𑁆𑀢𑁂𑀦 𑀯𑀸 𑀔𑀼𑀤𑁆𑀤𑀓𑁂𑀦 𑀯𑀸 𑀆𑀭𑀸𑀫𑀁 𑀆𑀭𑀸𑀫𑀯𑀢𑁆𑀣𑀼𑀁 𑀯𑀺𑀳𑀸𑀭𑀁 𑀯𑀺𑀳𑀸𑀭𑀯𑀢𑁆𑀣𑀼𑀦𑁆𑀢𑀺.

𑀓𑀣𑀁 𑀯𑀺𑀳𑀸𑀭𑁂𑀦 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧; 𑀯𑀺. 𑀲𑀗𑁆𑀕. 𑀅𑀝𑁆𑀞. 𑁨𑁨𑁮) 𑀯𑀺𑀳𑀸𑀭𑁄 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑁄? 𑀲𑀗𑁆𑀖𑀲𑁆𑀲 𑀅𑀦𑁆𑀢𑁄𑀕𑀸𑀫𑁂 𑀕𑁂𑀳𑀁 𑀳𑁄𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀯𑀺𑀳𑀸𑀭𑀫𑀚𑁆𑀛𑁂 𑀧𑀸𑀲𑀸𑀤𑁄, 𑀉𑀪𑁄𑀧𑀺 𑀅𑀕𑁆𑀖𑁂𑀦 𑀲𑀫𑀓𑀸. 𑀲𑀘𑁂 𑀫𑀦𑀼𑀲𑁆𑀲𑀸 𑀢𑁂𑀦 𑀧𑀸𑀲𑀸𑀤𑁂𑀦 𑀢𑀁 𑀕𑁂𑀳𑀁 𑀬𑀸𑀘𑀦𑁆𑀢𑀺, 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀽𑀦𑀁 𑀘𑁂 𑀫𑀳𑀕𑁆𑀖𑀢𑀭𑀁 𑀕𑁂𑀳𑀁 𑀳𑁄𑀢𑀺, ‘‘𑀫𑀳𑀕𑁆𑀖𑀢𑀭𑀁 𑀅𑀫𑁆𑀳𑀸𑀓𑀁 𑀕𑁂𑀳’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀜𑁆𑀘𑀸𑀧𑀺 𑀫𑀳𑀕𑁆𑀖𑀢𑀭𑀁 𑀧𑀩𑁆𑀩𑀚𑀺𑀢𑀸𑀦𑀁 𑀅𑀲𑀸𑀭𑀼𑀧𑁆𑀧𑀁, 𑀦 𑀲𑀓𑁆𑀓𑀸 𑀢𑀢𑁆𑀣 𑀧𑀩𑁆𑀩𑀚𑀺𑀢𑁂𑀳𑀺 𑀯𑀲𑀺𑀢𑀼𑀁, 𑀇𑀤𑀁 𑀧𑀦 𑀲𑀸𑀭𑀼𑀧𑁆𑀧𑀁, 𑀕𑀡𑁆𑀳𑀣𑀸’’𑀢𑀺 𑀯𑀤𑀦𑁆𑀢𑀺, 𑀏𑀯𑀫𑁆𑀧𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀫𑀦𑀼𑀲𑁆𑀲𑀸𑀦𑀁 𑀫𑀳𑀕𑁆𑀖𑀁 𑀳𑁄𑀢𑀺 ‘‘𑀦𑀦𑀼 𑀢𑀼𑀫𑁆𑀳𑀸𑀓𑀁 𑀕𑁂𑀳𑀁 𑀫𑀳𑀕𑁆𑀖’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. ‘‘𑀳𑁄𑀢𑀼, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀧𑀼𑀜𑁆𑀜𑀁 𑀪𑀯𑀺𑀲𑁆𑀲𑀢𑀺, 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀁 𑀯𑀺𑀳𑀸𑀭𑁂𑀦 𑀯𑀺𑀳𑀸𑀭𑁄 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑁄. 𑀏𑀢𑁂𑀦𑁂𑀯 𑀦𑀬𑁂𑀦 𑀯𑀺𑀳𑀸𑀭𑀯𑀢𑁆𑀣𑀼𑀧𑀺 𑀆𑀭𑀸𑀫𑁄𑀧𑀺 𑀆𑀭𑀸𑀫𑀯𑀢𑁆𑀣𑀼𑀧𑀺 𑀯𑀺𑀳𑀸𑀭𑁂𑀦 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀁. 𑀯𑀺𑀳𑀸𑀭𑀯𑀢𑁆𑀣𑀼𑀦𑀸 𑀘 𑀫𑀳𑀕𑁆𑀖𑁂𑀦 𑀯𑀸 𑀅𑀧𑁆𑀧𑀕𑁆𑀖𑁂𑀦 𑀯𑀸 𑀯𑀺𑀳𑀸𑀭𑀁 𑀯𑀺𑀳𑀸𑀭𑀯𑀢𑁆𑀣𑀼𑀁 𑀆𑀭𑀸𑀫𑀁 𑀆𑀭𑀸𑀫𑀯𑀢𑁆𑀣𑀼𑀁. 𑀏𑀯𑀁 𑀢𑀸𑀯 𑀣𑀸𑀯𑀭𑁂𑀦 𑀣𑀸𑀯𑀭𑀧𑀭𑀺𑀯𑀢𑁆𑀢𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀇𑀢𑀭𑁂𑀦 𑀇𑀢𑀭𑀧𑀭𑀺𑀯𑀢𑁆𑀢𑀦𑁂 𑀧𑀦 𑀫𑀜𑁆𑀘𑀧𑀻𑀞𑀁 𑀫𑀳𑀦𑁆𑀢𑀁 𑀯𑀸 𑀳𑁄𑀢𑀼, 𑀔𑀼𑀤𑁆𑀤𑀓𑀁 𑀯𑀸 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧; 𑀯𑀺. 𑀲𑀗𑁆𑀕. 𑀅𑀝𑁆𑀞. 𑁨𑁨𑁮), 𑀅𑀦𑁆𑀢𑀫𑀲𑁄 𑀘𑀢𑀼𑀭𑀗𑁆𑀕𑀼𑀮𑀧𑀸𑀤𑀓𑀁 𑀕𑀸𑀫𑀤𑀸𑀭𑀓𑁂𑀳𑀺 𑀧𑀁𑀲𑁆𑀯𑀸𑀕𑀸𑀭𑀓𑁂𑀲𑀼 𑀓𑀻𑀴𑀦𑁆𑀢𑁂𑀳𑀺 𑀓𑀢𑀫𑁆𑀧𑀺 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺. 𑀲𑀘𑁂𑀧𑀺 𑀭𑀸𑀚𑀸 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀬𑁄 𑀯𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀫𑀜𑁆𑀘𑀲𑀢𑀁 𑀯𑀸 𑀫𑀜𑁆𑀘𑀲𑀳𑀲𑁆𑀲𑀁 𑀯𑀸 𑀤𑁂𑀦𑁆𑀢𑀺, 𑀲𑀩𑁆𑀩𑁂 𑀓𑀧𑁆𑀧𑀺𑀬𑀫𑀜𑁆𑀘𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀸, 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀯𑀼𑀟𑁆𑀠𑀧𑁆𑀧𑀝𑀺𑀧𑀸𑀝𑀺𑀬𑀸 ‘‘𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀤𑀸𑀢𑀩𑁆𑀩𑀸, 𑀦 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦 𑀤𑀸𑀢𑀩𑁆𑀩𑀸. 𑀅𑀢𑀺𑀭𑁂𑀓𑀫𑀜𑁆𑀘𑁂 𑀪𑀡𑁆𑀟𑀸𑀕𑀸𑀭𑀸𑀤𑀻𑀲𑀼 𑀧𑀜𑁆𑀜𑀧𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀩𑀳𑀺𑀲𑀻𑀫𑀸𑀬 ‘‘𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀤𑀺𑀦𑁆𑀦𑀫𑀜𑁆𑀘𑁄 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑁂 𑀤𑀸𑀢𑀩𑁆𑀩𑁄. 𑀢𑀢𑁆𑀣 𑀘𑁂 𑀩𑀳𑀽 𑀫𑀜𑁆𑀘𑀸 𑀳𑁄𑀦𑁆𑀢𑀺, 𑀫𑀜𑁆𑀘𑁂𑀦 𑀓𑀫𑁆𑀫𑀁 𑀦𑀢𑁆𑀣𑀺. 𑀬𑀲𑁆𑀲 𑀯𑀲𑀦𑀝𑁆𑀞𑀸𑀦𑁂 𑀓𑀫𑁆𑀫𑀁 𑀅𑀢𑁆𑀣𑀺, 𑀢𑀢𑁆𑀣 ‘‘𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀤𑀸𑀢𑀩𑁆𑀩𑁄, 𑀦 𑀧𑀼𑀕𑁆𑀕𑀮𑀺𑀓𑀪𑁄𑀕𑁂𑀦. 𑀫𑀳𑀕𑁆𑀖𑁂𑀦 𑀲𑀢𑀕𑁆𑀖𑀦𑀓𑁂𑀦 𑀯𑀸 𑀲𑀳𑀲𑁆𑀲𑀕𑁆𑀖𑀦𑀓𑁂𑀦 𑀯𑀸 𑀫𑀜𑁆𑀘𑁂𑀦 𑀅𑀜𑁆𑀜𑀁 𑀫𑀜𑁆𑀘𑀲𑀢𑀁 𑀮𑀪𑀢𑀺, 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀦 𑀓𑁂𑀯𑀮𑀁 𑀫𑀜𑁆𑀘𑁂𑀦 𑀫𑀜𑁆𑀘𑁄𑀬𑁂𑀯, 𑀆𑀭𑀸𑀫𑀆𑀭𑀸𑀫𑀯𑀢𑁆𑀣𑀼𑀯𑀺𑀳𑀸𑀭𑀯𑀺𑀳𑀸𑀭𑀯𑀢𑁆𑀣𑀼𑀧𑀻𑀞𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑀸𑀦𑀺𑀧𑀺 𑀧𑀭𑀺𑀯𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀺. 𑀏𑀲𑁂𑀯 𑀦𑀬𑁄 𑀧𑀻𑀞𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑁂𑀲𑀼𑀧𑀺. 𑀯𑀭𑀲𑁂𑀦𑀸𑀲𑀦𑀸𑀤𑀻𑀦𑀁 𑀲𑀁𑀭𑀓𑁆𑀔𑀡𑀢𑁆𑀣𑀦𑁆𑀢𑀺 𑀲𑀘𑁂 𑀤𑀼𑀩𑁆𑀪𑀺𑀓𑁆𑀔𑀁 𑀳𑁄𑀢𑀺, 𑀪𑀺𑀓𑁆𑀔𑀽 𑀧𑀺𑀡𑁆𑀟𑀧𑀸𑀢𑁂𑀦 𑀦 𑀬𑀸𑀧𑁂𑀦𑁆𑀢𑀺, 𑀏𑀢𑁆𑀣 𑀭𑀸𑀚𑀭𑁄𑀕𑀘𑁄𑀭𑀪𑀬𑀸𑀦𑀺, 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑀸𑀦𑀁 𑀯𑀺𑀳𑀸𑀭𑀸 𑀧𑀮𑀼𑀚𑁆𑀚𑀦𑁆𑀢𑀺, 𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀺𑀓𑁂 𑀯𑀺𑀦𑀸𑀲𑁂𑀦𑁆𑀢𑀺, 𑀲𑁂𑀦𑀸𑀲𑀦𑀧𑀘𑁆𑀘𑀬𑀁 𑀲𑀦𑁆𑀥𑀸𑀬 𑀬𑀸𑀧𑁂𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺, 𑀏𑀯𑀭𑀽𑀧𑁂 𑀓𑀸𑀮𑁂 𑀯𑀭𑀲𑁂𑀦𑀸𑀲𑀦𑀸𑀤𑀻𑀦𑀁 𑀲𑀁𑀭𑀓𑁆𑀔𑀡𑀢𑁆𑀣𑀁. 𑀮𑀸𑀫𑀓𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀢𑀼𑀦𑁆𑀢𑀺 𑀮𑀸𑀫𑀓𑀁 𑀮𑀸𑀫𑀓𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁, 𑀮𑀸𑀫𑀓𑀓𑁄𑀝𑀺𑀬𑀸 𑀯𑀺𑀲𑁆𑀲𑀚𑁆𑀚𑁂𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀢𑁄 𑀮𑀤𑁆𑀥𑀬𑀸𑀕𑀼𑀪𑀢𑁆𑀢𑀘𑀻𑀯𑀭𑀸𑀤𑀻𑀦𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀓𑀸𑀴𑀮𑁄𑀳𑀢𑀫𑁆𑀩𑀮𑁄𑀳𑀓𑀁𑀲𑀮𑁄𑀳𑀯𑀝𑁆𑀝𑀮𑁄𑀳𑀸𑀦𑀦𑁆𑀢𑀺 𑀏𑀢𑁆𑀣 𑀓𑀁𑀲𑀮𑁄𑀳𑀁, 𑀯𑀝𑁆𑀝𑀮𑁄𑀳𑀜𑁆𑀘 𑀓𑀺𑀢𑁆𑀢𑀺𑀫𑀮𑁄𑀳𑀁. 𑀢𑀻𑀡𑀺 𑀳𑀺 𑀓𑀺𑀢𑁆𑀢𑀺𑀫𑀮𑁄𑀳𑀸𑀦𑀺 𑀓𑀁𑀲𑀮𑁄𑀳𑀁, 𑀯𑀝𑁆𑀝𑀮𑁄𑀳𑀁, 𑀆𑀭𑀓𑀽𑀝𑀦𑁆𑀢𑀺. 𑀢𑀢𑁆𑀣 𑀢𑀺𑀧𑀼𑀢𑀫𑁆𑀩𑁂 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀁 𑀓𑀁𑀲𑀮𑁄𑀳𑀁, 𑀲𑀻𑀢𑀢𑀫𑁆𑀩𑁂 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀁 𑀯𑀝𑁆𑀝𑀮𑁄𑀳𑀁, 𑀭𑀲𑀓𑀢𑀫𑁆𑀩𑁂 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀁 𑀆𑀭𑀓𑀽𑀝𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀁𑀲𑀮𑁄𑀳𑀁, 𑀯𑀝𑁆𑀝𑀮𑁄𑀳𑀜𑁆𑀘 𑀓𑀺𑀢𑁆𑀢𑀺𑀫𑀮𑁄𑀳’’𑀦𑁆𑀢𑀺. 𑀢𑀢𑁄 𑀅𑀢𑀺𑀭𑁂𑀓𑀦𑁆𑀢𑀺 𑀢𑀢𑁄 𑀅𑀢𑀺𑀭𑁂𑀓𑀕𑁆𑀕𑀡𑁆𑀳𑀦𑀓𑁄.

𑀲𑀭𑀓𑁄𑀢𑀺 𑀫𑀚𑁆𑀛𑁂 𑀫𑀓𑀼𑀴𑀁 𑀤𑀲𑁆𑀲𑁂𑀢𑁆𑀯𑀸 𑀫𑀼𑀔𑀯𑀝𑁆𑀝𑀺𑀯𑀺𑀢𑁆𑀣𑀢𑀁 𑀓𑀢𑁆𑀯𑀸 𑀧𑀺𑀝𑁆𑀞𑀺𑀢𑁄 𑀦𑀸𑀫𑁂𑀢𑁆𑀯𑀸 𑀓𑀸𑀢𑀩𑁆𑀩𑀁 𑀏𑀓𑀁 𑀪𑀸𑀚𑀦𑀁. ‘‘𑀲𑀭𑀸𑀯’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀆𑀤𑀺𑀲𑀤𑁆𑀤𑁂𑀦 𑀓𑀜𑁆𑀘𑀦𑀓𑀸𑀤𑀻𑀦𑀁 𑀕𑀺𑀳𑀺𑀉𑀧𑀓𑀭𑀡𑀸𑀦𑀁 𑀕𑀳𑀡𑀁. 𑀢𑀸𑀦𑀺 𑀳𑀺 𑀔𑀼𑀤𑁆𑀤𑀓𑀸𑀦𑀺𑀧𑀺 𑀕𑀭𑀼𑀪𑀡𑁆𑀟𑀸𑀦𑁂𑀯 𑀕𑀺𑀳𑀺𑀉𑀧𑀓𑀭𑀡𑀢𑁆𑀢𑀸𑀢𑀺. 𑀧𑀺-𑀲𑀤𑁆𑀤𑁂𑀦 𑀧𑀕𑁂𑀯 𑀫𑀳𑀦𑁆𑀢𑀸𑀦𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀫𑀸𑀦𑀺 𑀧𑀦 𑀪𑀸𑀚𑀦𑀻𑀬𑀸𑀦𑀺 𑀪𑀺𑀓𑁆𑀔𑀽𑀧𑀓𑀭𑀡𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀘 𑀏𑀢𑀸𑀦𑀺, 𑀏𑀯𑀁 𑀓𑀼𑀡𑁆𑀟𑀺𑀓𑀸𑀧𑀺 𑀪𑀸𑀚𑀦𑀻𑀬𑀸. 𑀯𑀓𑁆𑀔𑀢𑀺 𑀳𑀺 ‘‘𑀬𑀣𑀸 𑀘 𑀫𑀢𑁆𑀢𑀺𑀓𑀸𑀪𑀡𑁆𑀟𑁂, 𑀏𑀯𑀁 𑀮𑁄𑀳𑀪𑀡𑁆𑀟𑁂𑀧𑀺 𑀓𑀼𑀡𑁆𑀟𑀺𑀓𑀸 𑀪𑀸𑀚𑀦𑀻𑀬𑀓𑁄𑀝𑁆𑀞𑀸𑀲𑀫𑁂𑀯 𑀪𑀚𑀢𑀻’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀤𑀼𑀩𑁆𑀩𑀮𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸). 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦𑀸𑀢𑀺 𑀆𑀕𑀦𑁆𑀢𑀼𑀓𑀸𑀦𑀁 𑀯𑀼𑀟𑁆𑀠𑀢𑀭𑀸𑀦𑀁 𑀤𑀢𑁆𑀯𑀸 𑀧𑀭𑀺𑀪𑁄𑀕𑁂𑀦. 𑀕𑀺𑀳𑀺𑀯𑀺𑀓𑀝𑀸𑀢𑀺 𑀕𑀺𑀳𑀻𑀳𑀺 𑀯𑀺𑀓𑀢𑀸 𑀧𑀜𑁆𑀜𑀢𑁆𑀢𑀸, 𑀅𑀢𑁆𑀢𑀦𑁄 𑀯𑀸 𑀲𑀦𑁆𑀢𑀓𑀓𑀭𑀡𑁂𑀦 𑀯𑀺𑀭𑀽𑀧𑀁 𑀓𑀢𑀸. 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦 𑀦 𑀯𑀝𑁆𑀝𑀢𑀻𑀢𑀺 𑀆𑀕𑀦𑁆𑀢𑀼𑀓𑀸𑀦𑀁 𑀅𑀤𑀢𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀯𑀺𑀬 𑀕𑀳𑁂𑀢𑁆𑀯𑀸 𑀧𑀭𑀺𑀳𑀭𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀧𑀺𑀧𑁆𑀨𑀮𑀺𑀓𑁄𑀢𑀺 𑀓𑀢𑁆𑀢𑀭𑀺. 𑀆𑀭𑀓𑀡𑁆𑀝𑀓𑀁 𑀲𑀽𑀘𑀺𑀯𑁂𑀥𑀓𑀁. 𑀢𑀸𑀴𑀁 𑀬𑀦𑁆𑀢𑀁. 𑀓𑀢𑁆𑀢𑀭𑀬𑀝𑁆𑀞𑀺𑀯𑁂𑀥𑀓𑁄 𑀓𑀢𑁆𑀢𑀭𑀬𑀝𑁆𑀞𑀺𑀯𑀮𑀬𑀁. 𑀬𑀣𑀸 𑀢𑀣𑀸 𑀖𑀦𑀓𑀢𑀁 𑀮𑁄𑀳𑀦𑁆𑀢𑀺 𑀮𑁄𑀳𑀯𑀝𑁆𑀝𑀺 𑀮𑁄𑀳𑀕𑀼𑀴𑁄 𑀮𑁄𑀳𑀧𑀺𑀡𑁆𑀟𑀺 𑀮𑁄𑀳𑀘𑀓𑁆𑀓𑀮𑀺𑀓𑀦𑁆𑀢𑀺 𑀏𑀯𑀁 𑀖𑀦𑀓𑀢𑀁 𑀮𑁄𑀳𑀁. 𑀔𑀻𑀭𑀧𑀸𑀲𑀸𑀡𑀫𑀬𑀸𑀦𑀻𑀢𑀺 𑀫𑀼𑀤𑀼𑀓𑀔𑀻𑀭𑀯𑀡𑁆𑀡𑀧𑀸𑀲𑀸𑀡𑀫𑀬𑀸𑀦𑀺.

𑀕𑀺𑀳𑀺𑀯𑀺𑀓𑀝𑀸𑀦𑀺𑀧𑀺 𑀦 𑀯𑀝𑁆𑀝𑀦𑁆𑀢𑀺 𑀅𑀦𑀸𑀫𑀸𑀲𑀢𑁆𑀢𑀸. 𑀧𑀺-𑀲𑀤𑁆𑀤𑁂𑀦 𑀧𑀕𑁂𑀯 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀯𑀸 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦 𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀲𑁂𑀦𑀸𑀲𑀦𑀧𑀭𑀺𑀪𑁄𑀕𑁄 𑀧𑀦 𑀲𑀩𑁆𑀩𑀓𑀧𑁆𑀧𑀺𑀬𑁄. 𑀢𑀲𑁆𑀫𑀸 𑀚𑀸𑀢𑀭𑀽𑀧𑀸𑀤𑀺𑀫𑀬𑀸 𑀲𑀩𑁆𑀩𑁂𑀧𑀺 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀸 𑀆𑀫𑀸𑀲𑀸. 𑀢𑁂𑀦𑀸𑀳 ‘‘𑀲𑁂𑀦𑀸𑀲𑀦𑀧𑀭𑀺𑀪𑁄𑀕𑁂 𑀧𑀦𑀸’’𑀢𑀺𑀆𑀤𑀺.

𑀲𑁂𑀲𑀸𑀢𑀺 𑀢𑀢𑁄 𑀫𑀳𑀢𑁆𑀢𑀭𑀻 𑀯𑀸𑀲𑀺. 𑀬𑀸 𑀧𑀦𑀸𑀢𑀺 𑀬𑀸 𑀓𑀼𑀤𑀸𑀭𑀻 𑀧𑀦. 𑀓𑀼𑀤𑀸𑀮𑁄 𑀅𑀦𑁆𑀢𑀫𑀲𑁄 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑁄𑀧𑀺 𑀕𑀭𑀼𑀪𑀡𑁆𑀟𑀫𑁂𑀯. 𑀦𑀺𑀔𑀸𑀤𑀦𑀁 𑀘𑀢𑀼𑀭𑀲𑁆𑀲𑀫𑀼𑀔𑀁 𑀯𑀸 𑀳𑁄𑀢𑀼, 𑀤𑁄𑀡𑀺𑀫𑀼𑀔𑀁 𑀯𑀸 𑀯𑀗𑁆𑀓𑀁 𑀯𑀸 𑀉𑀚𑀼𑀓𑀁 𑀯𑀸, 𑀅𑀦𑁆𑀢𑀫𑀲𑁄 𑀲𑀫𑁆𑀫𑀼𑀜𑁆𑀚𑀦𑀺𑀤𑀡𑁆𑀟𑀓𑀯𑁂𑀥𑀦𑀫𑁆𑀧𑀺 𑀤𑀡𑁆𑀟𑀩𑀦𑁆𑀥𑀁 𑀘𑁂, 𑀕𑀭𑀼𑀪𑀡𑁆𑀟𑀫𑁂𑀯. 𑀢𑁂𑀦𑀸𑀳 ‘‘𑀓𑀼𑀤𑀸𑀮𑁄 𑀤𑀡𑁆𑀟𑀩𑀦𑁆𑀥𑀦𑀺𑀔𑀸𑀤𑀦𑀁 𑀯𑀸 𑀅𑀕𑀭𑀼𑀪𑀡𑁆𑀟𑀁 𑀦𑀸𑀫 𑀦𑀢𑁆𑀣𑀻’’𑀢𑀺. 𑀲𑀺𑀧𑀸𑀝𑀺𑀓𑀸 𑀦𑀸𑀫 𑀔𑀼𑀭𑀓𑁄𑀲𑁄. 𑀲𑀺𑀔𑀭𑀁 𑀧𑀦 𑀤𑀡𑁆𑀟𑀩𑀦𑁆𑀥𑀦𑀺𑀔𑀸𑀤𑀦𑀁 𑀅𑀦𑀼𑀮𑁄𑀫𑁂𑀢𑀻𑀢𑀺 𑀆𑀳 ‘‘𑀲𑀺𑀔𑀭𑀫𑁆𑀧𑀺 𑀦𑀺𑀔𑀸𑀤𑀦𑁂𑀦𑁂𑀯 𑀲𑀗𑁆𑀕𑀳𑀺𑀢’’𑀦𑁆𑀢𑀺. 𑀲𑀘𑁂 𑀢𑀫𑁆𑀧𑀺 𑀧𑀦 𑀅𑀤𑀡𑁆𑀟𑀓𑀁 𑀨𑀮𑀫𑀢𑁆𑀢𑀁, 𑀪𑀸𑀚𑀦𑀻𑀬𑀁. 𑀉𑀧𑀓𑁆𑀔𑀭𑁂𑀢𑀺 𑀯𑀸𑀲𑀺𑀆𑀤𑀺𑀪𑀡𑁆𑀟𑀸𑀦𑀺.

𑀧𑀢𑁆𑀢𑀩𑀦𑁆𑀥𑀓𑁄 𑀦𑀸𑀫 𑀧𑀢𑁆𑀢𑀲𑁆𑀲 𑀕𑀡𑁆𑀞𑀺𑀓𑀸𑀤𑀺𑀓𑀸𑀭𑀓𑁄. ‘‘𑀧𑀝𑀺𑀫𑀸𑀲𑀼𑀯𑀡𑁆𑀡𑀸𑀤𑀺𑀧𑀢𑁆𑀢𑀓𑀸𑀭𑀓𑁄’’𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀺𑀧𑀼𑀘𑁆𑀙𑁂𑀤𑀦𑀓𑀲𑀢𑁆𑀣𑀁, 𑀲𑀼𑀯𑀡𑁆𑀡𑀘𑁆𑀙𑁂𑀤𑀦𑀓𑀲𑀢𑁆𑀣𑀁, 𑀓𑀢𑀧𑀭𑀺𑀓𑀫𑁆𑀫𑀘𑀫𑁆𑀫𑀘𑁆𑀙𑀺𑀦𑁆𑀤𑀦𑀓𑀔𑀼𑀤𑁆𑀤𑀓𑀲𑀢𑁆𑀣𑀦𑁆𑀢𑀺 𑀇𑀫𑀸𑀦𑀺 𑀘𑁂𑀢𑁆𑀣 𑀢𑀻𑀡𑀺 𑀧𑀺𑀧𑁆𑀨𑀮𑀺𑀓𑀁 𑀅𑀦𑀼𑀮𑁄𑀫𑁂𑀦𑁆𑀢𑀻𑀢𑀺 𑀆𑀳 ‘‘𑀅𑀬𑀁 𑀧𑀦 𑀯𑀺𑀲𑁂𑀲𑁄’’𑀢𑀺𑀆𑀤𑀺. 𑀇𑀢𑀭𑀸𑀦𑀻𑀢𑀺 𑀫𑀳𑀸𑀓𑀢𑁆𑀢𑀭𑀺𑀆𑀤𑀻𑀦𑀺.

𑀅𑀟𑁆𑀠𑀩𑀸𑀳𑀼𑀧𑁆𑀧𑀫𑀸𑀡𑀸𑀢𑀺 (𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁩.𑁩𑁨𑁧) 𑀓𑀧𑁆𑀧𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀁𑀲𑀓𑀽𑀝𑀧𑁆𑀧𑀫𑀸𑀡𑀸, 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀧𑁆𑀧𑀫𑀸𑀡𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣𑀚𑀸𑀢𑀓𑀸𑀢𑀺 𑀲𑀗𑁆𑀖𑀺𑀓𑀪𑀽𑀫𑀺𑀬𑀁 𑀚𑀸𑀢𑀸. 𑀆𑀭𑀓𑁆𑀔𑀲𑀁𑀯𑀺𑀥𑀸𑀦𑁂𑀦 𑀭𑀓𑁆𑀔𑀺𑀢𑀢𑁆𑀢𑀸 𑀭𑀓𑁆𑀔𑀺𑀢𑀸 𑀘 𑀲𑀸 𑀫𑀜𑁆𑀚𑀽𑀲𑀸𑀤𑀻𑀲𑀼 𑀧𑀓𑁆𑀔𑀺𑀢𑁆𑀢𑀁 𑀯𑀺𑀬 𑀬𑀣𑀸 𑀢𑀁 𑀦 𑀦𑀲𑁆𑀲𑀢𑀺, 𑀏𑀯𑀁 𑀕𑁄𑀧𑀦𑀢𑁄 𑀕𑁄𑀧𑀺𑀢𑀸 𑀘𑀸𑀢𑀺 𑀭𑀓𑁆𑀔𑀺𑀢𑀕𑁄𑀧𑀺𑀢𑀸. 𑀢𑀢𑁆𑀣𑀚𑀸𑀢𑀓𑀸𑀧𑀺 𑀧𑀦 𑀅𑀭𑀓𑁆𑀔𑀺𑀢𑀸 𑀕𑀭𑀼𑀪𑀡𑁆𑀟𑀫𑁂𑀯 𑀦 𑀳𑁄𑀢𑀺. ‘‘𑀲𑀗𑁆𑀖𑀓𑀫𑁆𑀫𑁂 𑀘 𑀘𑁂𑀢𑀺𑀬𑀓𑀫𑁆𑀫𑁂 𑀘 𑀓𑀢𑁂’’𑀢𑀺 𑀇𑀫𑀺𑀦𑀸 𑀲𑀗𑁆𑀖𑀲𑀦𑁆𑀢𑀓𑁂𑀦 𑀘𑁂𑀢𑀺𑀬𑀲𑀦𑁆𑀢𑀓𑀁 𑀭𑀓𑁆𑀔𑀺𑀢𑀼𑀁, 𑀧𑀭𑀺𑀯𑀢𑁆𑀢𑀺𑀢𑀼𑀜𑁆𑀘 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀲𑀼𑀢𑁆𑀢𑀁 𑀧𑀦𑀸𑀢𑀺 𑀯𑀝𑁆𑀝𑀺𑀢𑀜𑁆𑀘𑁂𑀯 𑀅𑀯𑀝𑁆𑀝𑀺𑀢𑀜𑁆𑀘 𑀲𑀼𑀢𑁆𑀢𑀁.

𑀅𑀝𑁆𑀞𑀗𑁆𑀕𑀼𑀮𑀲𑀽𑀘𑀺𑀤𑀡𑁆𑀟𑀫𑀢𑁆𑀢𑁄𑀢𑀺 𑀅𑀦𑁆𑀢𑀫𑀲𑁄 𑀤𑀻𑀖𑀲𑁄 𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑁄, 𑀧𑀭𑀺𑀡𑀸𑀳𑀢𑁄 𑀲𑀻𑀳𑀴𑀧𑀡𑁆𑀡𑀲𑀽𑀘𑀺𑀤𑀡𑁆𑀟𑀫𑀢𑁆𑀢𑁄. 𑀏𑀢𑁆𑀣𑀸𑀢𑀺 𑀯𑁂𑀴𑀼𑀪𑀡𑁆𑀟𑁂. 𑀤𑀟𑁆𑀠𑀁 𑀕𑁂𑀳𑀁 𑀬𑁂𑀲𑀁 𑀢𑁂𑀢𑀺 𑀤𑀟𑁆𑀠𑀕𑁂𑀳𑀸. 𑀦 𑀯𑀸𑀭𑁂𑀢𑀩𑁆𑀩𑀸𑀢𑀺 ‘‘𑀫𑀸 𑀕𑀡𑁆𑀳𑀺𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺 𑀦 𑀦𑀺𑀲𑁂𑀥𑁂𑀢𑀩𑁆𑀩𑀸. 𑀤𑁂𑀲𑀦𑁆𑀢𑀭𑀕𑀢𑁂𑀦 𑀲𑀫𑁆𑀧𑀢𑁆𑀢𑀯𑀺𑀳𑀸𑀭𑁂 𑀲𑀗𑁆𑀖𑀺𑀓𑀸𑀯𑀸𑀲𑁂 𑀞𑀧𑁂𑀢𑀩𑁆𑀩𑀸.

𑀅𑀯𑀲𑁂𑀲𑀜𑁆𑀘 𑀙𑀤𑀦𑀢𑀺𑀡𑀦𑁆𑀢𑀺 𑀫𑀼𑀜𑁆𑀚𑀧𑀩𑁆𑀩𑀚𑁂𑀳𑀺 𑀅𑀯𑀲𑁂𑀲𑀁 𑀬𑀁 𑀓𑀺𑀜𑁆𑀘𑀺 𑀙𑀤𑀦𑀢𑀺𑀡𑀁. 𑀬𑀢𑁆𑀣 𑀧𑀦 𑀢𑀺𑀡𑀁 𑀦𑀢𑁆𑀣𑀺, 𑀢𑀢𑁆𑀣 𑀧𑀡𑁆𑀡𑁂𑀳𑀺 𑀙𑀸𑀤𑁂𑀦𑁆𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧). 𑀢𑀲𑁆𑀫𑀸 𑀧𑀡𑁆𑀡𑀫𑁆𑀧𑀺 𑀢𑀺𑀡𑁂𑀦𑁂𑀯 𑀲𑀗𑁆𑀕𑀳𑀺𑀢𑀦𑁆𑀢𑀺 𑀆𑀳 ‘‘𑀙𑀤𑀦𑀢𑀺𑀡𑀲𑀗𑁆𑀔𑁂𑀧𑀕𑀢𑁂𑀲𑀽’’𑀢𑀺𑀆𑀤𑀺. 𑀅𑀝𑁆𑀞𑀗𑁆𑀕𑀼𑀮𑀧𑁆𑀧𑀫𑀸𑀡𑁄𑀧𑀻𑀢𑀺 𑀯𑀺𑀢𑁆𑀣𑀸𑀭𑀢𑁄 𑀅𑀝𑁆𑀞𑀗𑁆𑀕𑀼𑀮𑀧𑁆𑀧𑀫𑀸𑀡𑁄. 𑀮𑀺𑀔𑀺𑀢𑀧𑁄𑀢𑁆𑀣𑀓𑁄 𑀧𑀦 𑀕𑀭𑀼𑀪𑀡𑁆𑀟𑀁 𑀦 𑀳𑁄𑀢𑀺.

𑀯𑁂𑀴𑀼𑀫𑁆𑀳𑀺 𑀯𑀼𑀢𑁆𑀢𑀧𑁆𑀧𑀫𑀸𑀡𑁄𑀢𑀺 ‘‘𑀅𑀝𑁆𑀞𑀗𑁆𑀕𑀼𑀮𑀲𑀽𑀘𑀺𑀤𑀡𑁆𑀟𑀓𑀫𑀢𑁆𑀢𑁄𑀧𑀻’’𑀢𑀺 𑀯𑁂𑀴𑀼𑀪𑀡𑁆𑀟𑁂 𑀯𑀼𑀢𑁆𑀢𑀧𑁆𑀧𑀫𑀸𑀡𑁄. 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑁄 𑀯𑀸𑀢𑀺 𑀤𑀸𑀭𑀼𑀤𑀼𑀮𑁆𑀮𑀪𑀝𑁆𑀞𑀸𑀦𑁂 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑁄 𑀯𑀸. 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀓𑁆𑀓𑀫𑁂𑀦 𑀤𑀸𑀭𑀼𑀪𑀡𑁆𑀟𑀯𑀺𑀦𑀺𑀘𑁆𑀙𑀬𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀓𑁆𑀓𑀫𑁂𑀦 𑀯𑀢𑁆𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀆𑀲𑀦𑁆𑀤𑀺𑀓𑀸𑀤𑀻𑀦𑀻𑀢𑀺 𑀏𑀢𑁆𑀣 𑀆𑀲𑀦𑁆𑀤𑀺𑀓𑁄𑀢𑀺 𑀘𑀢𑀼𑀭𑀲𑁆𑀲𑀧𑀻𑀞𑀁 𑀯𑀼𑀘𑁆𑀘𑀢𑀺. ‘‘𑀉𑀘𑁆𑀘𑀓𑀫𑁆𑀧𑀺 𑀆𑀲𑀦𑁆𑀤𑀺𑀓’’𑀦𑁆𑀢𑀺 𑀯𑀘𑀦𑀢𑁄 𑀏𑀓𑀢𑁄𑀪𑀸𑀕𑁂𑀦 𑀤𑀻𑀖𑀧𑀻𑀞𑀫𑁂𑀯 𑀳𑀺 𑀅𑀝𑁆𑀞𑀗𑁆𑀕𑀼𑀮𑀧𑀸𑀤𑀓𑀁 𑀯𑀝𑁆𑀝𑀢𑀺. 𑀘𑀢𑀼𑀭𑀲𑁆𑀲𑀸𑀲𑀦𑁆𑀤𑀺𑀓𑁄 𑀧𑀦 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑁄𑀧𑀺 𑀯𑀝𑁆𑀞𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀆𑀤𑀺𑀲𑀤𑁆𑀤𑁂𑀦 ‘‘𑀲𑀢𑁆𑀢𑀗𑁆𑀕𑁄, 𑀪𑀤𑁆𑀤𑀧𑀻𑀞𑀓𑀁, 𑀏𑀴𑀓𑀧𑀸𑀤𑀓𑀧𑀻𑀞𑀁, 𑀆𑀫𑀮𑀓𑀯𑀝𑁆𑀝𑀓𑀧𑀻𑀞𑀁, 𑀨𑀮𑀓𑀁, 𑀓𑁄𑀘𑁆𑀙𑀁, 𑀧𑀮𑀸𑀮𑀧𑀻𑀞𑀓’’𑀦𑁆𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧) 𑀇𑀫𑁂 𑀲𑀗𑁆𑀕𑀡𑁆𑀳𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀅𑀦𑁆𑀢𑀫𑀲𑁄’’𑀢𑀺𑀆𑀤𑀺. 𑀧𑀡𑁆𑀡𑁂𑀳𑀺 𑀯𑀸𑀢𑀺 𑀓𑀤𑀮𑀺𑀧𑀡𑁆𑀡𑀸𑀤𑀻𑀳𑀺 𑀯𑀸. 𑀩𑁆𑀬𑀕𑁆𑀖𑀘𑀫𑁆𑀫𑁄𑀦𑀤𑁆𑀥𑀫𑁆𑀧𑀺 𑀯𑀸𑀴𑀭𑀽𑀧𑀧𑀭𑀺𑀓𑁆𑀔𑀺𑀢𑁆𑀢𑀁 𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑀁 𑀓𑁄𑀘𑁆𑀙𑀓𑀁 𑀕𑀭𑀼𑀪𑀡𑁆𑀟𑀫𑁂𑀯.

𑀖𑀝𑁆𑀝𑀦𑀨𑀮𑀓𑀁 𑀦𑀸𑀫 𑀬𑀢𑁆𑀣 𑀞𑀧𑁂𑀢𑁆𑀯𑀸 𑀭𑀚𑀺𑀢𑀘𑀻𑀯𑀭𑀁 𑀳𑀢𑁆𑀣𑁂𑀦 𑀖𑀝𑁆𑀝𑁂𑀦𑁆𑀢𑀺. 𑀖𑀝𑁆𑀝𑀦𑀫𑀼𑀕𑁆𑀕𑀭𑁄 𑀦𑀸𑀫 𑀅𑀦𑀼𑀯𑀸𑀢𑀸𑀤𑀺𑀖𑀝𑁆𑀝𑀦𑀓𑁄𑀢𑀺 𑀯𑀤𑀦𑁆𑀢𑀺. 𑀤𑀡𑁆𑀟𑀫𑀼𑀕𑁆𑀕𑀭𑁄 𑀦𑀸𑀫 𑀬𑁂𑀦 𑀭𑀚𑀺𑀢𑀘𑀻𑀯𑀭𑀁 𑀧𑁄𑀣𑁂𑀦𑁆𑀢𑀺. 𑀅𑀫𑁆𑀩𑀡𑀦𑁆𑀢𑀺 𑀨𑀮𑀓𑁂𑀳𑀺 𑀧𑁄𑀓𑁆𑀔𑀭𑀡𑀻 𑀯𑀺𑀬 𑀓𑀢𑀁 𑀧𑀸𑀦𑀻𑀬𑀪𑀸𑀚𑀦𑀁. 𑀭𑀚𑀦𑀤𑁄𑀡𑀻𑀢𑀺 𑀧𑀓𑁆𑀓𑀭𑀚𑀦𑀁 𑀆𑀓𑀺𑀭𑀺𑀢𑁆𑀯𑀸 𑀞𑀧𑀦𑀪𑀸𑀚𑀦𑀁.

𑀅𑀓𑀧𑁆𑀧𑀺𑀬𑀘𑀫𑁆𑀫𑀦𑁆𑀢𑀺 𑀲𑀻𑀳𑀸𑀤𑀻𑀦𑀁 𑀘𑀫𑁆𑀫𑀁. ‘‘𑀪𑀽𑀫𑀢𑁆𑀣𑀭𑀡𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀇𑀤𑀁 𑀅𑀓𑀧𑁆𑀧𑀺𑀬𑀘𑀫𑁆𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀧𑀘𑁆𑀘𑀢𑁆𑀣𑀭𑀡𑀕𑀢𑀺𑀓’’𑀦𑁆𑀢𑀺 𑀇𑀫𑀺𑀦𑀸 𑀫𑀜𑁆𑀘𑀧𑀻𑀞𑁂𑀧𑀺 𑀅𑀢𑁆𑀣𑀭𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀧𑀸𑀯𑀸𑀭𑀸𑀤𑀺𑀧𑀘𑁆𑀘𑀢𑁆𑀣𑀭𑀡𑀫𑁆𑀧𑀺 𑀕𑀭𑀼𑀪𑀡𑁆𑀟𑀦𑁆𑀢𑀺 𑀏𑀓𑁂. 𑀦𑁄𑀢𑀺 𑀅𑀧𑀭𑁂. 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀓𑀧𑁆𑀧𑀺𑀬𑀘𑀫𑁆𑀫𑀸𑀦𑀻𑀢𑀺 𑀫𑀺𑀕𑀸𑀤𑀻𑀦𑀁 𑀘𑀫𑁆𑀫𑀸𑀦𑀺.

𑀲𑀩𑁆𑀩𑀁 𑀘𑀓𑁆𑀓𑀬𑀼𑀢𑁆𑀢𑀬𑀸𑀦𑀦𑁆𑀢𑀺 𑀭𑀣𑀲𑀓𑀝𑀸𑀤𑀺𑀓𑀁 𑀲𑀩𑁆𑀩𑀘𑀓𑁆𑀓𑀬𑀼𑀢𑁆𑀢𑀬𑀸𑀦𑀁. 𑀯𑀺𑀲𑀗𑁆𑀔𑀭𑀺𑀢𑀘𑀓𑁆𑀓𑀁 𑀧𑀦 𑀬𑀸𑀦𑀁 𑀪𑀸𑀚𑀦𑀻𑀬𑀁. 𑀅𑀦𑀼𑀜𑁆𑀜𑀸𑀢𑀯𑀸𑀲𑀺 𑀦𑀸𑀫 𑀬𑀸 𑀲𑀺𑀧𑀸𑀝𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀭𑀺𑀳𑀭𑀺𑀢𑀼𑀁 𑀲𑀓𑁆𑀓𑀸𑀢𑀺 𑀯𑀼𑀢𑁆𑀢𑀸. 𑀫𑀼𑀝𑁆𑀞𑀺𑀧𑀡𑁆𑀡𑀦𑁆𑀢𑀺 𑀢𑀸𑀮𑀧𑀢𑁆𑀢𑀁. 𑀢𑀜𑁆𑀳𑀺 𑀫𑀼𑀝𑁆𑀞𑀺𑀦𑀸 𑀕𑀳𑁂𑀢𑁆𑀯𑀸 𑀧𑀭𑀺𑀳𑀭𑀦𑁆𑀢𑀻𑀢𑀺 ‘‘𑀫𑀼𑀝𑁆𑀞𑀺𑀧𑀡𑁆𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀫𑀼𑀝𑁆𑀞𑀺𑀧𑀡𑁆𑀡𑀦𑁆𑀢𑀺 𑀙𑀢𑁆𑀢𑀘𑁆𑀙𑀤𑀦𑀧𑀡𑁆𑀡𑀫𑁂𑀯𑀸𑀢𑀺 𑀓𑁂𑀘𑀺. 𑀅𑀭𑀡𑀺𑀲𑀳𑀺𑀢𑀦𑁆𑀢𑀺 𑀅𑀭𑀡𑀺𑀬𑀼𑀕𑀴𑀁, 𑀉𑀢𑁆𑀢𑀭𑀸𑀭𑀡𑀻, 𑀅𑀥𑀭𑀸𑀭𑀡𑀻𑀢𑀺 𑀅𑀭𑀡𑀺𑀤𑁆𑀯𑀬𑀦𑁆𑀢𑀺 𑀅𑀢𑁆𑀣𑁄.

𑀨𑀸𑀢𑀺𑀓𑀫𑁆𑀫𑀁 𑀓𑀢𑁆𑀯𑀸𑀢𑀺 𑀅𑀦𑁆𑀢𑀫𑀲𑁄 𑀢𑀁𑀅𑀕𑁆𑀖𑀦𑀓𑀯𑀸𑀮𑀺𑀓𑀸𑀬𑀧𑀺 𑀣𑀸𑀯𑀭𑀁 𑀯𑀟𑁆𑀠𑀺𑀓𑀫𑁆𑀫𑀁 𑀓𑀢𑁆𑀯𑀸. 𑀨𑀸𑀢𑀺𑀓𑀫𑁆𑀫𑀁 𑀅𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑁂𑀦 𑀢𑀢𑁆𑀣𑁂𑀯 𑀯𑀮𑀜𑁆𑀚𑁂𑀢𑀩𑁆𑀩𑁄. 𑀕𑀫𑀦𑀓𑀸𑀮𑁂 𑀲𑀗𑁆𑀖𑀺𑀓𑁂 𑀆𑀯𑀸𑀲𑁂 𑀞𑀧𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀅𑀲𑀢𑀺𑀬𑀸 𑀕𑀳𑁂𑀢𑁆𑀯𑀸 𑀕𑀢𑁂𑀦 𑀧𑀳𑀺𑀡𑀺𑀢𑁆𑀯𑀸 𑀤𑀸𑀢𑀩𑁆𑀩𑁄. 𑀤𑁂𑀲𑀦𑁆𑀢𑀭𑀕𑀢𑁂𑀦 𑀲𑀫𑁆𑀧𑀢𑁆𑀢𑀯𑀺𑀳𑀸𑀭𑁂 𑀲𑀗𑁆𑀖𑀺𑀓𑀸𑀯𑀸𑀲𑁂 𑀞𑀧𑁂𑀢𑀩𑁆𑀩𑁄. 𑀏𑀢𑁆𑀣𑀸𑀢𑀺 𑀫𑀢𑁆𑀢𑀺𑀓𑀸𑀪𑀡𑁆𑀟𑁂. 𑀓𑀼𑀡𑁆𑀟𑀺𑀓𑀸𑀢𑀺 𑀅𑀬𑁄𑀓𑀼𑀡𑁆𑀟𑀺𑀓𑀸 𑀘𑁂𑀯 𑀢𑀫𑁆𑀩𑀮𑁄𑀳𑀓𑀼𑀡𑁆𑀟𑀺𑀓𑀸 𑀘. 𑀪𑀸𑀚𑀦𑀻𑀬𑀓𑁄𑀝𑁆𑀞𑀸𑀲𑀫𑁂𑀯 𑀪𑀚𑀢𑀻𑀢𑀺 𑀪𑀸𑀚𑀦𑀻𑀬𑀧𑀓𑁆𑀔𑀫𑁂𑀯 𑀲𑁂𑀯𑀢𑀺, 𑀦 𑀢𑀼 𑀕𑀭𑀼𑀪𑀡𑁆𑀟𑀦𑁆𑀢𑀺 𑀅𑀢𑁆𑀣𑁄. 𑀓𑀜𑁆𑀘𑀦𑀓𑁄 𑀧𑀦 𑀕𑀭𑀼𑀪𑀡𑁆𑀟𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑀭𑀦𑁆𑀢𑀺 𑀕𑀭𑀼𑀪𑀡𑁆𑀟𑀁.

𑀤𑀼𑀩𑁆𑀩𑀮𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀧𑀭𑀺𑀡𑀸𑀫𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑁆𑀯𑀸𑀤𑀲𑀫𑁂 𑀦 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀺.

𑀧𑀭𑀺𑀡𑀸𑀫𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀳𑀥𑀫𑁆𑀫𑀺𑀓𑀯𑀕𑁆𑀕𑁄 𑀅𑀝𑁆𑀞𑀫𑁄.