𑁭. 𑀲𑀧𑁆𑀧𑀸𑀡𑀓𑀯𑀕𑁆𑀕𑁄

𑁧. 𑀲𑀜𑁆𑀘𑀺𑀘𑁆𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀦𑁆𑀢𑀫𑀲𑁄 𑀫𑀜𑁆𑀘𑀧𑀻𑀞𑀁 𑀲𑁄𑀥𑁂𑀦𑁆𑀢𑁄 𑀫𑀗𑁆𑀕𑀼𑀮𑀩𑀻𑀚𑀓𑁂𑀧𑀺 𑀧𑀸𑀡𑀲𑀜𑁆𑀜𑀻 𑀦𑀺𑀓𑁆𑀓𑀸𑀭𑀼𑀡𑀺𑀓𑀢𑀸𑀬 𑀢𑀁 𑀪𑀺𑀦𑁆𑀤𑀦𑁆𑀢𑁄 𑀅𑀧𑀦𑁂𑀢𑀺 (𑀧𑀸𑀘𑀺. 𑀅𑀝𑁆𑀞. 𑁩𑁮𑁨), 𑀧𑀸𑀘𑀺𑀢𑁆𑀢𑀺𑀬𑀁. 𑀢𑁂𑀦𑀸𑀳 ‘‘𑀢𑀁 𑀔𑀼𑀤𑁆𑀤𑀓𑀫𑁆𑀧𑀻’’𑀢𑀺𑀆𑀤𑀺. 𑀉𑀧𑀓𑁆𑀓𑀫𑀫𑀳𑀦𑁆𑀢𑀢𑀸𑀬 𑀅𑀓𑀼𑀲𑀮𑀁 𑀫𑀳𑀦𑁆𑀢𑀁 𑀳𑁄𑀢𑀻𑀢𑀺 𑀩𑀳𑀼𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀚𑀯𑀦𑁂𑀳𑀺 𑀮𑀤𑁆𑀥𑀸𑀲𑁂𑀯𑀦𑀸𑀬 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀬 𑀯𑀲𑁂𑀦 𑀧𑀬𑁄𑀕𑀲𑁆𑀲 𑀫𑀳𑀦𑁆𑀢𑀢𑁆𑀢𑀸 𑀅𑀓𑀼𑀲𑀮𑀁 𑀫𑀳𑀦𑁆𑀢𑀁 𑀳𑁄𑀢𑀺, 𑀫𑀳𑀸𑀲𑀸𑀯𑀚𑁆𑀚𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀜𑁆𑀘𑀺𑀘𑁆𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀧𑁆𑀧𑀸𑀡𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀏𑀢𑁆𑀣 𑀘 𑀧𑀝𑀗𑁆𑀕𑀧𑀸𑀡𑀓𑀸𑀦𑀁 𑀧𑀢𑀦𑀁 𑀜𑀢𑁆𑀯𑀸𑀧𑀺 𑀲𑀼𑀤𑁆𑀥𑀘𑀺𑀢𑁆𑀢𑀢𑀸𑀬 𑀧𑀤𑀻𑀧𑀼𑀚𑁆𑀚𑀮𑀦𑁂 𑀯𑀺𑀬 𑀲𑀧𑁆𑀧𑀸𑀡𑀓𑀪𑀸𑀯𑀁 𑀜𑀢𑁆𑀯𑀸𑀧𑀺 𑀉𑀤𑀓𑀲𑀜𑁆𑀜𑀸𑀬 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀲𑀧𑁆𑀧𑀸𑀡𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀉𑀓𑁆𑀓𑁄𑀝𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀲𑁆𑀲 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀬𑁂𑀦 𑀬𑁂𑀦 𑀯𑀽𑀧𑀲𑀫𑀺𑀢𑀁, 𑀢𑀲𑁆𑀲 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄. ‘‘𑀅𑀓𑀢𑀁 𑀓𑀫𑁆𑀫’’𑀦𑁆𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄𑀢𑀺 ‘‘𑀅𑀓𑀢𑀁 𑀓𑀫𑁆𑀫𑀁, 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁, 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫𑀁, 𑀅𑀦𑀺𑀳𑀢𑀁 𑀤𑀼𑀦𑁆𑀦𑀺𑀳𑀢𑀁 𑀧𑀼𑀦 𑀦𑀺𑀳𑀦𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀘𑀺. 𑁩𑁯𑁪) 𑀯𑀤𑀦𑁆𑀢𑁄. 𑀬𑀣𑀸𑀞𑀺𑀢𑀪𑀸𑀯𑁂𑀦 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀤𑀤𑁂𑀬𑁆𑀬𑀸𑀢𑀺 𑀢𑁂𑀲𑀁 𑀧𑀯𑀢𑁆𑀢𑀺 𑀆𑀓𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀬𑀁 𑀧𑀦 𑀥𑀫𑁆𑀫𑁂𑀦 𑀅𑀥𑀺𑀓𑀭𑀡𑀁 𑀦𑀺𑀳𑀢𑀁, 𑀢𑀁 𑀲𑀼𑀦𑀺𑀳𑀢𑀫𑁂𑀯𑀸’’𑀢𑀺.

𑀉𑀓𑁆𑀓𑁄𑀝𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀤𑀼𑀝𑁆𑀞𑀼𑀮𑁆𑀮𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀧𑀤𑀪𑀸𑀚𑀦𑀺𑀬𑀁 𑀤𑀲𑁆𑀲𑀺𑀢𑀸𑀦𑀻𑀢𑀺 𑀆𑀳 ‘‘𑀤𑀼𑀝𑁆𑀞𑀼𑀮𑁆𑀮𑀦𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺. 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦𑀸𑀢𑀺 ‘‘𑀲𑀸𑀫𑀁 𑀯𑀸 𑀚𑀸𑀦𑀸𑀢𑀺, 𑀅𑀜𑁆𑀜𑁂 𑀯𑀸 𑀢𑀲𑁆𑀲 𑀆𑀭𑁄𑀘𑁂𑀦𑁆𑀢𑀺, 𑀲𑁄 𑀯𑀸 𑀆𑀭𑁄𑀘𑁂𑀢𑀻’’𑀢𑀺 (𑀧𑀸𑀘𑀺. 𑁩𑁯𑁯) 𑀯𑀼𑀢𑁆𑀢𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦. 𑀧𑀸𑀘𑀺𑀢𑁆𑀢𑀺𑀬𑀁 𑀥𑀼𑀭𑀁 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀘𑁂 𑀧𑀘𑁆𑀙𑀸𑀧𑀺 𑀆𑀭𑁄𑀘𑁂𑀢𑀺, 𑀥𑀼𑀭𑀦𑀺𑀓𑁆𑀔𑁂𑀧𑀦𑁂 𑀆𑀧𑀢𑁆𑀢𑀺𑀢𑁄 𑀦 𑀫𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀲𑀘𑁂𑀧𑀻’’𑀢𑀺𑀆𑀤𑀺. 𑀲𑀫𑀡𑀲𑀢𑀫𑁆𑀧𑀺 𑀆𑀧𑀚𑁆𑀚𑀢𑀺𑀬𑁂𑀯𑀸𑀢𑀺 𑀲𑀫𑀡𑀲𑀢𑀫𑁆𑀧𑀺 𑀲𑀼𑀢𑁆𑀯𑀸 𑀬𑀤𑀺 𑀙𑀸𑀤𑁂𑀢𑀺, 𑀧𑀸𑀘𑀺𑀢𑁆𑀢𑀺𑀬𑀁 𑀆𑀧𑀚𑁆𑀚𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀬𑁂𑀦𑀲𑁆𑀲 𑀆𑀭𑁄𑀘𑀺𑀢𑀦𑁆𑀢𑀺 𑀬𑁂𑀦 𑀤𑀼𑀢𑀺𑀬𑁂𑀦 𑀅𑀲𑁆𑀲 𑀢𑀢𑀺𑀬𑀲𑁆𑀲 𑀆𑀭𑁄𑀘𑀺𑀢𑀁. 𑀢𑀲𑁆𑀲𑁂𑀯𑀸𑀢𑀺 𑀢𑀲𑁆𑀲 𑀤𑀼𑀢𑀺𑀬𑀲𑁆𑀲𑁂𑀯. 𑀆𑀭𑁄𑀘𑁂𑀢𑀻𑀢𑀺 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀫𑁂𑀯 ‘‘𑀫𑀸 𑀓𑀲𑁆𑀲𑀘𑀺 𑀆𑀭𑁄𑀘𑁂𑀲𑀻’’𑀢𑀺 𑀯𑀤𑀢𑀺. 𑀓𑁄𑀝𑀺𑀙𑀺𑀦𑁆𑀦𑀸 𑀳𑁄𑀢𑀻𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁩𑁯𑁯) 𑀬𑀲𑁆𑀫𑀸 𑀧𑀝𑀺𑀘𑁆𑀙𑀸𑀤𑀦𑀧𑀘𑁆𑀘𑀬𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸𑀯 𑀤𑀼𑀢𑀺𑀬𑁂𑀦 𑀢𑀢𑀺𑀬𑀲𑁆𑀲 𑀆𑀭𑁄𑀘𑀺𑀢𑀁, 𑀢𑀲𑁆𑀫𑀸 𑀢𑀧𑁆𑀧𑀘𑁆𑀘𑀬𑀸 𑀧𑀼𑀦 𑀢𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀸𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀆𑀧𑀢𑁆𑀢𑀺𑀬𑀸 𑀓𑁄𑀝𑀺 𑀙𑀺𑀦𑁆𑀦𑀸 𑀦𑀸𑀫 𑀳𑁄𑀢𑀺.

𑀆𑀤𑀺𑀧𑀤𑁂𑀢𑀺 𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀺𑀲𑀜𑁆𑀜𑀻, 𑀯𑁂𑀫𑀢𑀺𑀓𑁄, 𑀅𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀺𑀲𑀜𑁆𑀜𑀻𑀢𑀺 𑀇𑀫𑁂𑀲𑀼 𑀢𑀻𑀲𑀼 ‘‘𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀺𑀲𑀜𑁆𑀜𑀻 𑀧𑀝𑀺𑀘𑁆𑀙𑀸𑀤𑁂𑀢𑀻’’𑀢𑀺 (𑀧𑀸𑀘𑀺. 𑁪𑁦𑁦) 𑀇𑀫𑀲𑁆𑀫𑀺𑀁 𑀧𑀞𑀫𑀧𑀤𑁂. 𑀇𑀢𑀭𑁂𑀲𑀼 𑀤𑁆𑀯𑀻𑀲𑀽𑀢𑀺 ‘‘𑀯𑁂𑀫𑀢𑀺𑀓𑁄 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀺𑀲𑀜𑁆𑀜𑀻 𑀧𑀝𑀺𑀘𑁆𑀙𑀸𑀤𑁂𑀢𑀻’’𑀢𑀺 𑀇𑀫𑁂𑀲𑀼 𑀧𑀤𑁂𑀲𑀼. 𑀅𑀤𑀼𑀝𑁆𑀞𑀼𑀮𑁆𑀮𑀸𑀬𑀸𑀢𑀺 𑀅𑀯𑀲𑁂𑀲𑀧𑀜𑁆𑀘𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂. 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀼𑀝𑁆𑀞𑀼𑀮𑁆𑀮𑁂 𑀯𑀸 𑀅𑀤𑀼𑀝𑁆𑀞𑀼𑀮𑁆𑀮𑁂 𑀯𑀸 𑀅𑀚𑁆𑀛𑀸𑀘𑀸𑀭𑁂𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑀼𑀭𑀺𑀫𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑁂 𑀤𑀼𑀝𑁆𑀞𑀼𑀮𑁆𑀮𑁂 𑀯𑀸 𑀇𑀢𑀭𑀲𑁆𑀫𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑁂 𑀯𑀸 𑀅𑀚𑁆𑀛𑀸𑀘𑀸𑀭𑁂. 𑀬𑀁 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀓𑁆𑀓𑀯𑀺𑀲𑀝𑁆𑀞𑀺 𑀘 𑀓𑀸𑀬𑀲𑀁𑀲𑀕𑁆𑀕𑁄 𑀘𑀸𑀢𑀺 𑀅𑀬𑀁 𑀤𑀼𑀝𑁆𑀞𑀼𑀮𑁆𑀮𑀅𑀚𑁆𑀛𑀸𑀘𑀸𑀭𑁄 𑀦𑀸𑀫𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁪𑁦𑁦) 𑀯𑀼𑀢𑁆𑀢𑀁, 𑀢𑀁 𑀤𑀼𑀝𑁆𑀞𑀼𑀮𑁆𑀮𑀸𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀝𑁆𑀞𑀓𑀣𑀸𑀬 (𑀧𑀸𑀘𑀺. 𑀅𑀝𑁆𑀞. 𑁭𑁮 𑀆𑀤𑀬𑁄) 𑀦 𑀲𑀫𑁂𑀢𑀺, 𑀦 𑀘𑀸𑀧𑀺 𑀏𑀯𑀁 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺 ‘‘𑀆𑀭𑁄𑀘𑀦𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀼𑀝𑁆𑀞𑀼𑀮𑁆𑀮𑀁 𑀅𑀜𑁆𑀜𑀣𑀸 𑀅𑀥𑀺𑀧𑁆𑀧𑁂𑀢𑀁, 𑀧𑀝𑀺𑀘𑁆𑀙𑀸𑀤𑀦𑁂 𑀅𑀜𑁆𑀜𑀣𑀸’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁪𑁦𑁦) 𑀯𑀺𑀲𑁂𑀲𑀓𑀸𑀭𑀡𑀲𑁆𑀲𑀸𑀦𑀼𑀧𑀮𑀩𑁆𑀪𑀦𑀢𑁄, 𑀢𑀲𑁆𑀫𑀸 𑀢𑀁 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁.

𑀤𑀼𑀝𑁆𑀞𑀼𑀮𑁆𑀮𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀊𑀦𑀯𑀻𑀲𑀢𑀺𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀕𑀩𑁆𑀪𑀯𑀻𑀲𑁄𑀧𑀺 𑀳𑀺 ‘‘𑀧𑀭𑀺𑀧𑀼𑀡𑁆𑀡𑀯𑀻𑀲𑁄’’ 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻𑀢𑀺 𑀆𑀳 ‘‘𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬𑀸𑀢𑀺 𑀬𑀁 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀞𑀫𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀧𑀞𑀫𑀁 𑀯𑀺𑀜𑁆𑀜𑀸𑀡𑀁 𑀧𑀸𑀢𑀼𑀪𑀽𑀢𑀁, 𑀢𑀁 𑀆𑀤𑀺𑀁 𑀓𑀢𑁆𑀯𑀸. 𑀲𑁄𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀊𑀦𑀯𑀻𑀲𑀢𑀺𑀯𑀲𑁆𑀲𑁄 𑀉𑀧𑀲𑀫𑁆𑀧𑀸𑀤𑀺𑀢𑁄, 𑀲𑁄 𑀧𑀼𑀕𑁆𑀕𑀮𑁄. 𑀅𑀜𑁆𑀜𑀁 𑀉𑀧𑀲𑀫𑁆𑀧𑀸𑀤𑁂𑀢𑀻𑀢𑀺 𑀉𑀧𑀚𑁆𑀛𑀸𑀬𑁄 𑀯𑀸 𑀓𑀫𑁆𑀫𑀯𑀸𑀘𑀸𑀘𑀭𑀺𑀬𑁄 𑀯𑀸 𑀳𑀼𑀢𑁆𑀯𑀸 𑀅𑀜𑁆𑀜𑀁 𑀧𑀼𑀕𑁆𑀕𑀮𑀁 𑀉𑀧𑀲𑀫𑁆𑀧𑀸𑀤𑁂𑀢𑀺. 𑀢𑀦𑁆𑀢𑀺 𑀊𑀦𑀯𑀻𑀲𑀢𑀺𑀯𑀲𑁆𑀲𑀁 𑀧𑀼𑀕𑁆𑀕𑀮𑀁. 𑀲𑀻𑀫𑀁 𑀯𑀸 𑀲𑀫𑁆𑀫𑀦𑁆𑀦𑀢𑀻𑀢𑀺 𑀦𑀯𑀁 𑀲𑀻𑀫𑀁 𑀩𑀦𑁆𑀥𑀢𑀺.

𑀊𑀦𑀯𑀻𑀲𑀢𑀺𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀣𑁂𑀬𑁆𑀬𑀲𑀢𑁆𑀣𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀭𑀸𑀚𑀸𑀦𑀁 𑀯𑀸 𑀯𑀜𑁆𑀘𑁂𑀢𑁆𑀯𑀸𑀢𑀺 𑀭𑀸𑀚𑀸𑀦𑀁 𑀣𑁂𑀦𑁂𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀓𑀁 𑀓𑀺𑀜𑁆𑀘𑀺 𑀕𑀳𑁂𑀢𑁆𑀯𑀸, ‘‘𑀇𑀤𑀸𑀦𑀺 𑀢𑀲𑁆𑀲 𑀦 𑀤𑀲𑁆𑀲𑀸𑀫𑀸’’𑀢𑀺 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀅𑀓𑀢𑀓𑀫𑁆𑀫𑀸 𑀘𑁂𑀯 𑀓𑀢𑀓𑀫𑁆𑀫𑀸 𑀘 𑀘𑁄𑀭𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀲 𑀦𑀬𑁄 𑀲𑀼𑀗𑁆𑀓𑀁 𑀧𑀭𑀺𑀳𑀭𑀺𑀢𑀼𑀓𑀸𑀫𑀸𑀢𑀺 𑀏𑀢𑁆𑀣𑀸𑀧𑀺.

𑀓𑀸𑀮𑀯𑀺𑀲𑀗𑁆𑀓𑁂𑀢𑁂𑀦𑀸𑀢𑀺 𑀓𑀸𑀮𑀲𑁆𑀲 𑀯𑀺𑀲𑀗𑁆𑀓𑁂𑀢𑁂𑀦, 𑀤𑀺𑀯𑀲𑀯𑀺𑀲𑀗𑁆𑀓𑁂𑀢𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀕𑁆𑀕𑀯𑀺𑀲𑀗𑁆𑀓𑁂𑀢𑁂𑀦, 𑀧𑀦 𑀅𑀝𑀯𑀺𑀯𑀺𑀲𑀗𑁆𑀓𑁂𑀢𑁂𑀦 𑀯𑀸 𑀕𑀘𑁆𑀙𑀢𑁄 𑀆𑀧𑀢𑁆𑀢𑀺𑀬𑁂𑀯.

𑀣𑁂𑀬𑁆𑀬𑀲𑀢𑁆𑀣𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀁𑀯𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀫𑀸𑀢𑀼𑀕𑀸𑀫𑁂𑀦𑀸𑀢𑀺 𑀇𑀢𑁆𑀣𑀺𑀬𑀸. 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸, 𑀧𑀦 𑀲𑀺𑀓𑁆𑀔𑀫𑀸𑀦𑀸, 𑀲𑀸𑀫𑀡𑁂𑀭𑀻 𑀘𑀸𑀢𑀺 𑀇𑀫𑀸 𑀢𑀺𑀲𑁆𑀲𑁄𑀧𑀺 𑀇𑀥 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀇𑀫𑀸𑀲𑀁 𑀧𑀦 𑀢𑀺𑀲𑁆𑀲𑀦𑁆𑀦𑀁 𑀲𑀫𑀬𑁄 𑀭𑀓𑁆𑀔𑀢𑀺. 𑀅𑀬𑀫𑁂𑀢𑀸𑀲𑀁, 𑀫𑀸𑀢𑀼𑀕𑀸𑀫𑀲𑁆𑀲 𑀘 𑀯𑀺𑀲𑁂𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀁𑀯𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀭𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀁𑀢𑀁𑀲𑀫𑁆𑀧𑀢𑁆𑀢𑀺𑀬𑀸 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁪𑁧𑁭) 𑀯𑀺𑀩𑀦𑁆𑀥𑀦𑀯𑀲𑁂𑀦 𑀲𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀅𑀦𑁆𑀢𑀭𑁂 𑀯𑁂𑀫𑀚𑁆𑀛𑁂 𑀏𑀢𑀺 𑀆𑀕𑀘𑁆𑀙𑀢𑀻𑀢𑀺 𑀅𑀦𑁆𑀢𑀭𑀸𑀬𑁄, 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀦𑀢𑁆𑀣𑁄, 𑀅𑀦𑀢𑀺𑀓𑁆𑀓𑀫𑀦𑀢𑁆𑀣𑁂𑀦 𑀢𑀲𑁆𑀫𑀺𑀁 𑀅𑀦𑁆𑀢𑀭𑀸𑀬𑁂 𑀦𑀺𑀬𑀼𑀢𑁆𑀢𑀸, 𑀅𑀦𑁆𑀢𑀭𑀸𑀬𑀁 𑀯𑀸 𑀨𑀮𑀁 𑀅𑀭𑀳𑀦𑁆𑀢𑀺, 𑀅𑀦𑁆𑀢𑀭𑀸𑀬𑀲𑁆𑀲 𑀯𑀸 𑀓𑀭𑀡𑀲𑀻𑀮𑀸𑀢𑀺 𑀅𑀦𑁆𑀢𑀭𑀸𑀬𑀺𑀓𑀸. 𑀢𑁂𑀦𑀸𑀳 ‘‘𑀲𑀕𑁆𑀕𑀫𑁄𑀓𑁆𑀔𑀸𑀦𑀁 𑀅𑀦𑁆𑀢𑀭𑀸𑀬𑀁 𑀓𑀭𑁄𑀦𑁆𑀢𑀻𑀢𑀺 𑀅𑀦𑁆𑀢𑀭𑀸𑀬𑀺𑀓𑀸’’𑀢𑀺 (𑀫. 𑀦𑀺. 𑀅𑀝𑁆𑀞. 𑁧.𑁨𑁩𑁪). 𑀢𑁂 𑀓𑀫𑁆𑀫𑀓𑀺𑀮𑁂𑀲𑀯𑀺𑀧𑀸𑀓𑀉𑀧𑀯𑀸𑀤𑀧𑀜𑁆𑀜𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀧𑀜𑁆𑀘𑀯𑀺𑀥𑀸𑀢𑀺 𑀏𑀢𑁆𑀣 𑀘 𑀧𑀜𑁆𑀘𑀸𑀦𑀦𑁆𑀢𑀭𑀺𑀬𑀓𑀫𑁆𑀫𑀁 𑀓𑀫𑁆𑀫𑀦𑁆𑀢𑀭𑀸𑀬𑀺𑀓𑀁 𑀦𑀸𑀫, 𑀢𑀣𑀸 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑀓𑀫𑁆𑀫𑀁. 𑀢𑀁 𑀧𑀦 𑀫𑁄𑀓𑁆𑀔𑀲𑁆𑀲𑁂𑀯 𑀅𑀦𑁆𑀢𑀭𑀸𑀬𑀁 𑀓𑀭𑁄𑀢𑀺, 𑀦 𑀲𑀕𑁆𑀕𑀲𑁆𑀲. 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀥𑀫𑁆𑀫𑀸 𑀓𑀺𑀮𑁂𑀲𑀦𑁆𑀢𑀭𑀸𑀬𑀺𑀓𑀸 𑀦𑀸𑀫. 𑀧𑀡𑁆𑀟𑀓𑀢𑀺𑀭𑀘𑁆𑀙𑀸𑀦𑀕𑀢𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀦𑀁 𑀧𑀝𑀺𑀲𑀦𑁆𑀥𑀺𑀥𑀫𑁆𑀫𑀸 𑀯𑀺𑀧𑀸𑀓𑀦𑁆𑀢𑀭𑀸𑀬𑀺𑀓𑀸 𑀦𑀸𑀫. 𑀅𑀭𑀺𑀬𑀽𑀧𑀯𑀸𑀤𑀸 𑀉𑀧𑀯𑀸𑀤𑀦𑁆𑀢𑀭𑀸𑀬𑀺𑀓𑀸 𑀦𑀸𑀫. 𑀢𑁂 𑀧𑀦 𑀬𑀸𑀯 𑀅𑀭𑀺𑀬𑁂 𑀦 𑀔𑀫𑀸𑀧𑁂𑀦𑁆𑀢𑀺, 𑀢𑀸𑀯𑀤𑁂𑀯, 𑀦 𑀢𑀢𑁄 𑀧𑀭𑀁. 𑀲𑀜𑁆𑀘𑀺𑀘𑁆𑀘 𑀆𑀧𑀦𑁆𑀦𑀸 𑀆𑀧𑀢𑁆𑀢𑀺𑀬𑁄 𑀧𑀜𑁆𑀜𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀦𑁆𑀢𑀭𑀸𑀬𑀺𑀓𑀸 𑀦𑀸𑀫. 𑀢𑀸𑀧𑀺 𑀬𑀸𑀯 𑀪𑀺𑀓𑁆𑀔𑀼𑀪𑀸𑀯𑀁 𑀯𑀸 𑀧𑀝𑀺𑀚𑀸𑀦𑀸𑀢𑀺, 𑀦 𑀯𑀼𑀝𑁆𑀞𑀸𑀢𑀺 𑀯𑀸 𑀦 𑀤𑁂𑀲𑁂𑀢𑀺 𑀯𑀸, 𑀢𑀸𑀯𑀤𑁂𑀯, 𑀦 𑀢𑀢𑁄 𑀧𑀭𑀁.

𑀢𑀢𑁆𑀭𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁧.𑁨𑁩𑁪; 𑀧𑀸𑀘𑀺. 𑀅𑀝𑁆𑀞. 𑁪𑁧𑁭) 𑀅𑀭𑀺𑀝𑁆𑀞𑁄 𑀪𑀺𑀓𑁆𑀔𑀼 𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀓𑀣𑀺𑀓𑁄 𑀲𑁂𑀲𑀦𑁆𑀢𑀭𑀸𑀬𑀺𑀓𑁂 𑀚𑀸𑀦𑀸𑀢𑀺, 𑀯𑀺𑀦𑀬𑁂 𑀧𑀦 𑀅𑀓𑁄𑀯𑀺𑀤𑀢𑁆𑀢𑀸 𑀧𑀡𑁆𑀡𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀦𑁆𑀢𑀭𑀸𑀬𑀺𑀓𑁂 𑀦 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀭𑀳𑁄𑀕𑀢𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺 ‘‘𑀇𑀫𑁂 𑀆𑀕𑀸𑀭𑀺𑀓𑀸 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀲𑁄𑀢𑀸𑀧𑀦𑁆𑀦𑀸𑀧𑀺 𑀲𑀓𑀤𑀸𑀕𑀸𑀫𑀺𑀦𑁄𑀧𑀺 𑀅𑀦𑀸𑀕𑀸𑀫𑀺𑀦𑁄𑀧𑀺 𑀳𑁄𑀦𑁆𑀢𑀺, 𑀪𑀺𑀓𑁆𑀔𑀽𑀧𑀺 𑀫𑀦𑀸𑀧𑀺𑀓𑀸𑀦𑀺 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀺 𑀭𑀽𑀧𑀸𑀦𑀺 𑀧𑀲𑁆𑀲𑀦𑁆𑀢𑀺…𑀧𑁂… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑁂 𑀨𑁄𑀝𑁆𑀞𑀩𑁆𑀩𑁂 𑀨𑀼𑀲𑀦𑁆𑀢𑀺, 𑀫𑀼𑀤𑀼𑀓𑀸𑀦𑀺 𑀅𑀢𑁆𑀣𑀭𑀡𑀧𑀸𑀯𑀼𑀭𑀡𑀸𑀤𑀻𑀦𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀏𑀢𑀁 𑀲𑀩𑁆𑀩𑀁 𑀯𑀝𑁆𑀝𑀢𑀺. 𑀓𑀲𑁆𑀫𑀸? 𑀇𑀢𑁆𑀣𑀺𑀭𑀽𑀧𑀸…𑀧𑁂… 𑀇𑀢𑁆𑀣𑀺𑀨𑁄𑀝𑁆𑀞𑀩𑁆𑀩𑀸 𑀏𑀯 𑀦 𑀯𑀝𑁆𑀝𑀦𑁆𑀢𑀺, 𑀏𑀢𑁂𑀧𑀺 𑀯𑀝𑁆𑀝𑀦𑁆𑀢𑀻’’𑀢𑀺 𑀏𑀯𑀁 𑀭𑀲𑁂𑀦 𑀭𑀲𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀲𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑀜𑁆𑀘 𑀦𑀺𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑀜𑁆𑀘 𑀏𑀓𑀁 𑀓𑀢𑁆𑀯𑀸 𑀣𑀽𑀮𑀯𑀸𑀓𑁂𑀳𑀺 𑀲𑀤𑁆𑀥𑀺𑀁 𑀅𑀢𑀺𑀲𑀼𑀔𑀼𑀫𑀲𑀼𑀢𑁆𑀢𑀁 𑀖𑀝𑁂𑀦𑁆𑀢𑁄 𑀯𑀺𑀬, 𑀲𑀸𑀲𑀧𑁂𑀦 𑀲𑀤𑁆𑀥𑀺𑀁 𑀲𑀺𑀦𑁂𑀭𑀼𑀁 𑀉𑀧𑀲𑀁𑀳𑀭𑀦𑁆𑀢𑁄 𑀯𑀺𑀬 𑀘 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀓𑀺𑀁 𑀪𑀕𑀯𑀢𑀸 𑀫𑀳𑀸𑀲𑀫𑀼𑀤𑁆𑀤𑀁 𑀩𑀦𑁆𑀥𑀦𑁆𑀢𑁂𑀦 𑀯𑀺𑀬 𑀫𑀳𑀢𑀸 𑀉𑀲𑁆𑀲𑀸𑀳𑁂𑀦 𑀧𑀞𑀫𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀢𑁆𑀢𑀁, 𑀦𑀢𑁆𑀣𑀺 𑀏𑀢𑁆𑀣 𑀤𑁄𑀲𑁄’’𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀧𑀝𑀺𑀯𑀺𑀭𑀼𑀚𑁆𑀛𑀦𑁆𑀢𑁄 𑀪𑀩𑁆𑀩𑀧𑀼𑀕𑁆𑀕𑀮𑀸𑀦𑀁 𑀆𑀲𑀁 𑀙𑀺𑀦𑁆𑀤𑀦𑁆𑀢𑁄 𑀚𑀺𑀦𑀲𑁆𑀲 𑀆𑀡𑀸𑀘𑀓𑁆𑀓𑁂 𑀧𑀳𑀸𑀭𑀫𑀤𑀸𑀲𑀺. 𑀢𑁂𑀦𑀸𑀳 ‘‘𑀢𑁂𑀲𑀽’’𑀢𑀺𑀆𑀤𑀺.

𑀢𑀢𑁆𑀣 𑀢𑁂𑀲𑀽𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀅𑀦𑁆𑀢𑀭𑀸𑀬𑁂𑀲𑀼. 𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀓𑀸𑀫𑀸𑀢𑀺 𑀏𑀢𑁆𑀣 𑀅𑀝𑁆𑀞𑀺𑀓𑀗𑁆𑀓𑀮𑀁 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁪𑁧𑁭) 𑀦𑀸𑀫 𑀉𑀭𑀝𑁆𑀞𑀺 𑀯𑀸 𑀧𑀺𑀝𑁆𑀞𑀺𑀓𑀡𑁆𑀝𑀓𑀁 𑀯𑀸 𑀲𑀻𑀲𑀝𑁆𑀞𑀺 𑀯𑀸. 𑀢𑀜𑁆𑀳𑀺 𑀦𑀺𑀫𑁆𑀫𑀁𑀲𑀢𑁆𑀢𑀸 ‘‘𑀓𑀗𑁆𑀓𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀕𑀢𑀫𑀁𑀲𑀸𑀬 𑀳𑀺 𑀅𑀝𑁆𑀞𑀺𑀲𑀗𑁆𑀔𑀮𑀺𑀓𑀸𑀬 𑀏𑀓𑀝𑁆𑀞𑀺𑀫𑁆𑀳𑀺 𑀯𑀸 𑀓𑀗𑁆𑀓𑀮𑀲𑀤𑁆𑀤𑁄 𑀦𑀺𑀭𑀼𑀴𑁆𑀳𑁄, 𑀢𑀁𑀲𑀤𑀺𑀲𑀸 𑀓𑀸𑀫𑀸 𑀅𑀧𑁆𑀧𑀲𑁆𑀲𑀸𑀤𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄. 𑀆𑀤𑀺𑀲𑀤𑁆𑀤𑁂𑀦 ‘‘𑀫𑀁𑀲𑀧𑁂𑀲𑀽𑀧𑀫𑀸 𑀓𑀸𑀫𑀸, 𑀢𑀺𑀡𑀼𑀓𑁆𑀓𑀽𑀧𑀫𑀸 𑀓𑀸𑀫𑀸, 𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸 𑀓𑀸𑀫𑀸, 𑀲𑀼𑀧𑀺𑀦𑀓𑀽𑀧𑀫𑀸 𑀓𑀸𑀫𑀸, 𑀬𑀸𑀘𑀺𑀢𑀓𑀽𑀧𑀫𑀸 𑀓𑀸𑀫𑀸, 𑀭𑀼𑀓𑁆𑀔𑀨𑀮𑀽𑀧𑀫𑀸 𑀓𑀸𑀫𑀸, 𑀅𑀲𑀺𑀲𑀽𑀦𑀽𑀧𑀫𑀸 𑀓𑀸𑀫𑀸, 𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀓𑀸𑀫𑀸, 𑀲𑀧𑁆𑀧𑀲𑀺𑀭𑀽𑀧𑀫𑀸 𑀓𑀸𑀫𑀸’’𑀢𑀺 (𑀫. 𑀦𑀺. 𑁧.𑁨𑁩𑁪, 𑁨𑁩𑁬; 𑁨.𑁪𑁩-𑁪𑁮; 𑀧𑀸𑀘𑀺. 𑁪𑁧𑁭; 𑀘𑀽𑀴𑀯. 𑁬𑁫) 𑀏𑀢𑁂𑀲𑀁 𑀕𑀳𑀡𑀁.

𑀢𑀢𑁆𑀣 𑀫𑀁𑀲𑀧𑁂𑀲𑀽𑀧𑀫𑀸 𑀓𑀸𑀫𑀸 (𑀧𑀸𑀘𑀺. 𑀅𑀝𑁆𑀞. 𑁪𑁧𑁭) 𑀩𑀳𑀼𑀲𑀸𑀥𑀸𑀭𑀡𑀝𑁆𑀞𑁂𑀦. 𑀢𑀺𑀡𑀼𑀓𑁆𑀓𑀽𑀧𑀫𑀸 𑀓𑀸𑀫𑀸 𑀅𑀦𑀼𑀤𑀳𑀦𑀝𑁆𑀞𑁂𑀦. 𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸 𑀓𑀸𑀫𑀸 𑀫𑀳𑀸𑀪𑀺𑀢𑀸𑀧𑀦𑀝𑁆𑀞𑁂𑀦. 𑀲𑀼𑀧𑀺𑀦𑀓𑀽𑀧𑀫𑀸 𑀓𑀸𑀫𑀸 𑀇𑀢𑁆𑀢𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀝𑁆𑀞𑁂𑀦. 𑀬𑀸𑀘𑀺𑀢𑀓𑀽𑀧𑀫𑀸 𑀓𑀸𑀫𑀸 𑀢𑀸𑀯𑀓𑀸𑀮𑀺𑀓𑀝𑁆𑀞𑁂𑀦. 𑀭𑀼𑀓𑁆𑀔𑀨𑀮𑀽𑀧𑀫𑀸 𑀓𑀸𑀫𑀸 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀧𑀮𑀺𑀪𑀜𑁆𑀚𑀦𑀝𑁆𑀞𑁂𑀦. 𑀅𑀲𑀺𑀲𑀽𑀦𑀽𑀧𑀫𑀸 𑀅𑀥𑀺𑀓𑀼𑀝𑁆𑀝𑀦𑀝𑁆𑀞𑁂𑀦. 𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀯𑀺𑀦𑀺𑀯𑀺𑀚𑁆𑀛𑀦𑀝𑁆𑀞𑁂𑀦. 𑀲𑀧𑁆𑀧𑀲𑀺𑀭𑀽𑀧𑀫𑀸 𑀲𑀸𑀲𑀗𑁆𑀓𑀲𑀧𑁆𑀧𑀝𑀺𑀪𑀬𑀝𑁆𑀞𑁂𑀦.

𑀢𑀣𑁂𑀯𑀸𑀢𑀺 ‘‘𑀫𑀸 𑀆𑀬𑀲𑁆𑀫𑀸’’𑀢𑀺𑀆𑀤𑀻𑀳𑀺. 𑀇𑀢𑀭𑁂𑀲𑀦𑁆𑀢𑀺 𑀲𑁄 𑀲𑀗𑁆𑀖𑀫𑀚𑁆𑀛𑀁 𑀆𑀓𑀟𑁆𑀠𑀺𑀢𑁆𑀯𑀸 𑀬𑁂𑀳𑀺 ‘‘𑀫𑀸 𑀆𑀬𑀲𑁆𑀫𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄, 𑀢𑀢𑁆𑀣 𑀢𑁂𑀳𑀺 𑀅𑀜𑁆𑀜𑁂𑀲𑀁 𑀲𑀼𑀢𑀸𑀦𑀁 𑀪𑀺𑀓𑁆𑀔𑀽𑀦𑀁. 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦𑀸𑀢𑀺 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁪𑁨𑁦) 𑀧𑀤𑀪𑀸𑀚𑀦𑀺𑀬𑀁 𑀯𑀼𑀢𑁆𑀢𑁂𑀦 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦.

𑀅𑀭𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀉𑀓𑁆𑀔𑀺𑀢𑁆𑀢𑀲𑀫𑁆𑀪𑁄𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀓𑀢𑀸𑀦𑀼𑀥𑀫𑁆𑀫𑁂𑀦𑀸𑀢𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁄𑀲𑀸𑀭𑀺𑀢𑁂𑀦. 𑀢𑁂𑀦𑀸𑀳 ‘‘𑀅𑀦𑀼𑀥𑀫𑁆𑀫𑁄 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺. 𑀏𑀢𑁆𑀣 𑀅𑀦𑀼𑀥𑀫𑁆𑀫𑁄𑀢𑀺 𑀑𑀲𑀸𑀭𑀡𑀸 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀲𑁆𑀲𑀸𑀦𑀼𑀭𑀽𑀧𑁄, 𑀧𑀘𑁆𑀙𑀸 𑀓𑀢𑁆𑀢𑀩𑁆𑀩𑁄 𑀯𑀸 𑀥𑀫𑁆𑀫𑁄𑀢𑀺 𑀅𑀦𑀼𑀥𑀫𑁆𑀫𑁄. 𑀅𑀦𑀼𑀮𑁄𑀫𑀯𑀢𑁆𑀢𑀁 𑀤𑀺𑀲𑁆𑀯𑀸𑀢𑀺 ‘‘𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄’’𑀢𑀺𑀆𑀤𑀺𑀓𑀁 (𑀘𑀽𑀴𑀯. 𑁭𑁦) 𑀅𑀝𑁆𑀞𑀸𑀭𑀲𑀯𑀺𑀥𑀁 𑀯𑀢𑁆𑀢𑀁 𑀤𑀺𑀲𑁆𑀯𑀸, 𑀏𑀢𑁂𑀲𑀼 𑀅𑀝𑁆𑀞𑀸𑀭𑀲𑀲𑀼 𑀅𑀦𑀼𑀮𑁄𑀫𑀯𑀢𑁆𑀢𑁂𑀲𑀼 𑀯𑀢𑁆𑀢𑀦𑁆𑀢𑀁 𑀤𑀺𑀲𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀫𑀺𑀲𑀲𑀫𑁆𑀪𑁄𑀕𑀁 𑀯𑀸 𑀥𑀫𑁆𑀫𑀲𑀫𑁆𑀪𑁄𑀕𑀁 𑀯𑀸𑀢𑀺 𑀏𑀢𑁆𑀣 𑀬𑀁 𑀓𑀺𑀜𑁆𑀘𑀺 𑀆𑀫𑀺𑀲𑀲𑁆𑀲 𑀤𑀸𑀦𑀁, 𑀧𑀝𑀺𑀕𑁆𑀕𑀳𑀡𑀜𑁆𑀘 𑀆𑀫𑀺𑀲𑀲𑀫𑁆𑀪𑁄𑀕𑁄. 𑀥𑀫𑁆𑀫𑀲𑁆𑀲 𑀉𑀤𑁆𑀤𑀺𑀲𑀦𑀁, 𑀉𑀤𑁆𑀤𑀺𑀲𑀸𑀧𑀦𑀜𑁆𑀘 𑀥𑀫𑁆𑀫𑀲𑀫𑁆𑀪𑁄𑀕𑁄. 𑀲𑀁𑀯𑀲𑁂𑀬𑁆𑀬𑀸𑀢𑀺 ‘‘𑀉𑀧𑁄𑀲𑀣𑀁 𑀯𑀸 𑀧𑀯𑀸𑀭𑀡𑀁 𑀯𑀸 𑀲𑀗𑁆𑀖𑀓𑀫𑁆𑀫𑀁 𑀯𑀸’’𑀢𑀺 (𑀧𑀸𑀘𑀺. 𑁪𑁨𑁫) 𑀏𑀯𑀁 𑀧𑀤𑀪𑀸𑀚𑀦𑀺𑀬𑀁 𑀯𑀼𑀢𑁆𑀢𑀁 𑀢𑀺𑀯𑀺𑀥𑀁 𑀲𑀁𑀯𑀸𑀲𑀁 𑀓𑀭𑁂𑀬𑁆𑀬. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀉𑀧𑁄𑀲𑀣𑀧𑀯𑀸𑀭𑀡𑀸𑀧𑀺 𑀲𑀗𑁆𑀖𑁂𑀳𑀺𑀬𑁂𑀯 𑀓𑀸𑀢𑀩𑁆𑀩𑀢𑁆𑀢𑀸 𑀲𑀗𑁆𑀖𑀓𑀫𑁆𑀫𑀸𑀦𑀺𑀬𑁂𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 ‘‘𑀉𑀧𑁄𑀲𑀣𑀸𑀤𑀺𑀓𑀁 𑀲𑀗𑁆𑀖𑀓𑀫𑁆𑀫𑀁 𑀓𑀭𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀁. 𑀧𑀬𑁄𑀕𑁂 𑀧𑀬𑁄𑀕𑁂𑀢𑀺 𑀤𑀸𑀦𑁂 𑀤𑀸𑀦𑁂, 𑀕𑀳𑀡𑁂 𑀕𑀳𑀡𑁂 𑀘𑀸𑀢𑀺 𑀅𑀢𑁆𑀣𑁄.

𑀧𑀡𑁆𑀡𑀢𑁆𑀢𑀺𑀁 𑀅𑀚𑀸𑀦𑀦𑁆𑀢𑁂𑀦 𑀅𑀭𑀳𑀢𑀸𑀧𑀺 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 ‘‘𑀢𑀺𑀘𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀉𑀓𑁆𑀔𑀺𑀢𑁆𑀢𑀲𑀫𑁆𑀪𑁄𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀓𑀡𑁆𑀝𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀺𑀭𑁂𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁪𑁨𑁮) 𑀦𑀺𑀧𑀸𑀢𑀧𑀤𑀁 𑀲𑀫𑁆𑀩𑁄𑀥𑀦𑁂 𑀯𑀢𑁆𑀢𑀫𑀸𑀦𑀁 𑀧𑀭𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀁 𑀯𑀤𑀦𑁆𑀢𑀻𑀢𑀺 𑀆𑀳 ‘‘𑀧𑀭 𑀅𑀫𑀸𑀫𑀓𑀸’’𑀢𑀺, 𑀅𑀫𑁆𑀳𑀸𑀓𑀁 𑀅𑀦𑀚𑁆𑀛𑀢𑁆𑀢𑀺𑀓𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀧𑀺𑀭𑁂𑀢𑀺 𑀯𑀸 ‘‘𑀧𑀭𑀢𑁄’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑀁 𑀦𑀺𑀧𑀸𑀢𑀧𑀤𑀁, 𑀢𑀲𑁆𑀫𑀸 𑀘𑀭 𑀧𑀺𑀭𑁂𑀢𑀺 𑀧𑀭𑀢𑁄 𑀕𑀘𑁆𑀙, 𑀫𑀸 𑀇𑀥 𑀢𑀺𑀝𑁆𑀞𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀓𑀡𑁆𑀝𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀧𑁆𑀧𑀸𑀡𑀓𑀯𑀕𑁆𑀕𑁄 𑀲𑀢𑁆𑀢𑀫𑁄.