𑁬. 𑀲𑀼𑀭𑀸𑀧𑀸𑀦𑀯𑀕𑁆𑀕𑁄

𑁧. 𑀲𑀼𑀭𑀸𑀧𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀺𑀝𑁆𑀞𑀸𑀤𑀻𑀳𑀺 𑀓𑀢𑀁 𑀫𑀚𑁆𑀚𑀁 𑀲𑀼𑀭𑀸𑀢𑀺 𑀧𑀺𑀝𑁆𑀞𑀧𑀽𑀯𑀑𑀤𑀦𑀓𑀺𑀡𑁆𑀡𑀲𑀫𑁆𑀪𑀸𑀭𑁂𑀳𑀺 𑀓𑀢𑀁 𑀫𑀚𑁆𑀚𑀁 𑀲𑀼𑀭𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀧𑀺𑀝𑁆𑀞𑀲𑀼𑀭𑀸, 𑀧𑀽𑀯𑀲𑀼𑀭𑀸, 𑀑𑀤𑀦𑀲𑀼𑀭𑀸, 𑀓𑀺𑀡𑁆𑀡𑀧𑀓𑁆𑀔𑀺𑀢𑁆𑀢𑀸, 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑀸𑀢𑀺 (𑀧𑀸𑀘𑀺. 𑁩𑁨𑁮) 𑀇𑀫𑀸𑀦𑀺 𑀧𑀜𑁆𑀘 𑀲𑀼𑀭𑀸 𑀦𑀸𑀫𑀸𑀢𑀺. 𑀢𑀢𑁆𑀣 𑀧𑀺𑀝𑁆𑀞𑀁 𑀪𑀸𑀚𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀚𑁆𑀚𑀁 𑀉𑀤𑀓𑀁 𑀤𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸 𑀓𑀢𑀸 𑀧𑀺𑀝𑁆𑀞𑀲𑀼𑀭𑀸 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁩𑁨𑁬-𑁩𑁨𑁮). 𑀏𑀯𑀁 𑀲𑁂𑀲𑀸𑀲𑀼𑀧𑀺. 𑀓𑀺𑀡𑁆𑀡𑀸𑀢𑀺 𑀧𑀦 𑀢𑀲𑁆𑀲𑀸 𑀲𑀼𑀭𑀸𑀬 𑀩𑀻𑀚𑀁 𑀯𑀼𑀘𑁆𑀘𑀢𑀺. 𑀬𑁂 ‘‘𑀲𑀼𑀭𑀸𑀫𑁄𑀤𑀓𑀸’’𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀸 𑀓𑀺𑀡𑁆𑀡𑀧𑀓𑁆𑀔𑀺𑀢𑁆𑀢𑀸. 𑀳𑀭𑀻𑀢𑀓𑀺𑀲𑀸𑀲𑀧𑀸𑀤𑀺𑀦𑀸𑀦𑀸𑀲𑀫𑁆𑀪𑀸𑀭𑁂𑀳𑀺 𑀲𑀁𑀬𑁄𑀚𑀺𑀢𑀸 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑀸.

𑀧𑀼𑀧𑁆𑀨𑀸𑀤𑀻𑀳𑀺 𑀓𑀢𑁄 𑀆𑀲𑀯𑁄 𑀫𑁂𑀭𑀬𑀦𑁆𑀢𑀺 𑀧𑀼𑀧𑁆𑀨𑀨𑀮𑀫𑀥𑀼𑀕𑀼𑀴𑀲𑀫𑁆𑀪𑀸𑀭𑁂𑀳𑀺 𑀓𑀢𑁄 𑀘𑀺𑀭𑀧𑀭𑀺𑀯𑀸𑀲𑀺𑀢𑁄 𑀫𑁂𑀭𑀬𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀧𑀼𑀧𑁆𑀨𑀸𑀲𑀯𑁄, 𑀨𑀮𑀸𑀲𑀯𑁄, 𑀫𑀥𑁆𑀯𑀸𑀲𑀯𑁄, 𑀕𑀼𑀴𑀸𑀲𑀯𑁄, 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑁄𑀢𑀺 𑀧𑀜𑁆𑀘𑀫𑁂𑀭𑀬𑀁 𑀦𑀸𑀫𑀸𑀢𑀺. 𑀢𑀢𑁆𑀣 𑀫𑀥𑀼𑀓𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀺 𑀧𑀼𑀧𑁆𑀨𑀭𑀲𑁄 𑀘𑀺𑀭𑀧𑀭𑀺𑀯𑀸𑀲𑀺𑀢𑁄 𑀧𑀼𑀧𑁆𑀨𑀸𑀲𑀯𑁄. 𑀧𑀦𑀲𑀸𑀤𑀺𑀨𑀮𑀭𑀲𑁄 𑀨𑀮𑀸𑀲𑀯𑁄. 𑀫𑀼𑀤𑁆𑀤𑀺𑀓𑀸𑀭𑀲𑁄 𑀫𑀥𑁆𑀯𑀸𑀲𑀯𑁄. 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀧𑀦 ‘‘𑀨𑀮𑀸𑀲𑀯𑁄 𑀦𑀸𑀫 𑀫𑀼𑀤𑁆𑀤𑀺𑀓𑀸𑀨𑀮𑀸𑀤𑀻𑀦𑀺 𑀫𑀤𑁆𑀤𑀺𑀢𑁆𑀯𑀸 𑀢𑁂𑀲𑀁 𑀭𑀲𑁂𑀦 𑀓𑀢𑁄. 𑀫𑀥𑁆𑀯𑀸𑀲𑀯𑁄 𑀦𑀸𑀫 𑀫𑀼𑀤𑁆𑀤𑀺𑀓𑀸𑀦𑀁 𑀚𑀸𑀢𑀺𑀭𑀲𑁂𑀦 𑀓𑀢𑁄, 𑀫𑀓𑁆𑀔𑀺𑀓𑀸𑀫𑀥𑀼𑀦𑀸𑀧𑀺 𑀓𑀭𑀻𑀬𑀢𑀻𑀢𑀺 𑀯𑀤𑀦𑁆𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁩𑁨𑁮) 𑀯𑀼𑀢𑁆𑀢𑀁. 𑀉𑀘𑁆𑀙𑀼𑀭𑀲𑁄 𑀕𑀼𑀴𑀸𑀲𑀯𑁄. 𑀳𑀭𑀻𑀢𑀓𑀸𑀫𑀮𑀓𑀓𑀝𑀼𑀓𑀪𑀡𑁆𑀟𑀸𑀤𑀺𑀦𑀸𑀦𑀸𑀲𑀫𑁆𑀪𑀸𑀭𑀸𑀦𑀁 𑀭𑀲𑁄 𑀘𑀺𑀭𑀧𑀭𑀺𑀯𑀸𑀲𑀺𑀢𑁄 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑁄. 𑀏𑀢𑁆𑀣 𑀘 𑀲𑀼𑀭𑀸𑀬, 𑀫𑁂𑀭𑀬𑀲𑁆𑀲 𑀘 𑀲𑀫𑀸𑀦𑁂𑀧𑀺 𑀲𑀫𑁆𑀪𑀸𑀭𑀲𑀁𑀬𑁄𑀕𑁂 𑀫𑀤𑁆𑀤𑀺𑀢𑁆𑀯𑀸 𑀓𑀢𑀸 𑀲𑀼𑀭𑀸, 𑀘𑀺𑀭𑀧𑀭𑀺𑀯𑀸𑀲𑀺𑀢𑀫𑀢𑁆𑀢𑁂𑀦 𑀫𑁂𑀭𑀬𑀦𑁆𑀢𑀺 𑀏𑀯𑀫𑀺𑀫𑁂𑀲𑀁 𑀦𑀸𑀦𑀸𑀓𑀭𑀡𑀁 𑀤𑀝𑁆𑀞𑀩𑁆𑀩𑀁. 𑀩𑀻𑀚𑀢𑁄 𑀧𑀝𑁆𑀞𑀸𑀬𑀸𑀢𑀺 𑀲𑀫𑁆𑀪𑀸𑀭𑁂 𑀧𑀝𑀺𑀬𑀸𑀤𑁂𑀢𑁆𑀯𑀸 𑀘𑀸𑀝𑀺𑀬𑀁 𑀧𑀓𑁆𑀔𑀺𑀢𑁆𑀢𑀓𑀸𑀮𑀢𑁄 𑀘𑁂𑀯 𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀻𑀦𑀁 𑀧𑀼𑀧𑁆𑀨𑀭𑀲𑀲𑁆𑀲 𑀅𑀪𑀺𑀦𑀯𑀓𑀸𑀮𑀢𑁄 𑀘 𑀧𑀝𑁆𑀞𑀸𑀬.

𑀮𑁄𑀡𑀲𑁄𑀯𑀻𑀭𑀓𑀁 𑀯𑀸 𑀲𑀼𑀢𑁆𑀢𑀁 𑀯𑀸𑀢𑀺 𑀇𑀫𑁂 𑀤𑁆𑀯𑁂 𑀅𑀦𑁂𑀓𑁂𑀳𑀺 𑀪𑁂𑀲𑀚𑁆𑀚𑁂𑀳𑀺 𑀅𑀪𑀺𑀲𑀗𑁆𑀔𑀢𑀸 𑀆𑀲𑀯𑀯𑀺𑀲𑁂𑀲𑀸. 𑀯𑀸𑀲𑀕𑁆𑀕𑀸𑀳𑀸𑀧𑀦𑀢𑁆𑀣𑀦𑁆𑀢𑀺 𑀲𑀼𑀕𑀦𑁆𑀥𑀪𑀸𑀯𑀕𑀸𑀳𑀸𑀧𑀦𑀢𑁆𑀣𑀁. 𑀯𑀢𑁆𑀣𑀼𑀁 𑀅𑀚𑀸𑀦𑀦𑀢𑀸𑀬 𑀘𑁂𑀢𑁆𑀣 𑀅𑀘𑀺𑀢𑁆𑀢𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀓𑀼𑀲𑀮𑁂𑀦𑁂𑀯 𑀧𑀸𑀢𑀩𑁆𑀩𑀢𑀸𑀬 𑀮𑁄𑀓𑀯𑀚𑁆𑀚𑀁. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸𑀬 𑀯𑀼𑀢𑁆𑀢𑀦𑀬𑀫𑁂𑀯.

𑀲𑀼𑀭𑀸𑀧𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀳𑀲𑀸𑀥𑀺𑀧𑁆𑀧𑀸𑀬𑀲𑁆𑀲𑀸𑀢𑀺 𑀔𑀺𑀟𑁆𑀟𑀸𑀥𑀺𑀧𑁆𑀧𑀸𑀬𑀲𑁆𑀲, 𑀇𑀫𑀺𑀦𑀸 𑀓𑀸𑀬𑀲𑀁𑀲𑀕𑁆𑀕𑀸𑀥𑀺𑀧𑁆𑀧𑀸𑀬𑀁 𑀧𑀝𑀺𑀓𑁆𑀔𑀺𑀧𑀢𑀺.

𑀏𑀢𑁆𑀣 𑀘 𑀪𑀺𑀓𑁆𑀔𑀼𑀦𑀺𑀫𑁆𑀧𑀺 𑀳𑀲𑀸𑀥𑀺𑀧𑁆𑀧𑀸𑀬𑁂𑀦 𑀨𑀼𑀲𑀢𑁄 𑀪𑀺𑀓𑁆𑀔𑀼𑀲𑁆𑀲 𑀤𑀼𑀓𑁆𑀓𑀝𑀁. 𑀢𑀣𑀸 𑀪𑀺𑀓𑁆𑀔𑀼𑀫𑁆𑀧𑀺 𑀨𑀼𑀲𑀦𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸𑀢𑀺 𑀆𑀳 ‘‘𑀇𑀥 𑀧𑀦 𑀪𑀺𑀓𑁆𑀔𑀼𑀦𑀻𑀧𑀺 𑀪𑀺𑀓𑁆𑀔𑀼𑀲𑁆𑀲, 𑀪𑀺𑀓𑁆𑀔𑀼 𑀘 𑀪𑀺𑀓𑁆𑀔𑀼𑀦𑀺𑀬𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀏𑀯𑀸’’𑀢𑀺. 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀸𑀤𑀻𑀲𑀼 𑀲𑀩𑁆𑀩𑀢𑁆𑀣𑀸𑀢𑀺 ‘‘𑀓𑀸𑀬𑁂𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂, 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀓𑀸𑀬𑁂, 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂, 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀓𑀸𑀬𑁂, 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂, 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑁂’’𑀢𑀺 (𑀧𑀸𑀘𑀺. 𑁩𑁩𑁨) 𑀲𑀩𑁆𑀩𑀢𑁆𑀣. 𑀲𑀢𑀺 𑀓𑀭𑀡𑀻𑀬𑁂 𑀆𑀫𑀲𑀢𑁄𑀢𑀺 𑀲𑀢𑀺 𑀓𑀭𑀡𑀻𑀬𑁂 𑀧𑀼𑀭𑀺𑀲𑀁 𑀆𑀫𑀲𑀢𑁄 𑀅𑀦𑀸𑀧𑀢𑁆𑀢𑀺. 𑀇𑀢𑁆𑀣𑀻 𑀧𑀦 𑀲𑀢𑀺 𑀓𑀭𑀡𑀻𑀬𑁂𑀧𑀺 𑀆𑀫𑀲𑀺𑀢𑀼𑀁 𑀦 𑀯𑀝𑁆𑀝𑀢𑀺.

𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀳𑀲𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀉𑀧𑀭𑀺𑀕𑁄𑀧𑁆𑀨𑀓𑁂𑀢𑀺 𑀕𑁄𑀧𑁆𑀨𑀓𑀸𑀦𑀁 𑀉𑀧𑀭𑀺𑀪𑀸𑀕𑀧𑁆𑀧𑀫𑀸𑀡𑁂. 𑀳𑀲𑀸𑀥𑀺𑀧𑁆𑀧𑀸𑀬𑁄𑀢𑀺 𑀓𑀻𑀴𑀸𑀥𑀺𑀧𑁆𑀧𑀸𑀬𑁄. 𑀬𑁂𑀦 𑀬𑁂𑀦 𑀅𑀗𑁆𑀕𑁂𑀦𑀸𑀢𑀺 𑀳𑀢𑁆𑀣𑀧𑀸𑀤𑀸𑀤𑀻𑀲𑀼 𑀬𑁂𑀦 𑀬𑁂𑀦 𑀅𑀗𑁆𑀕𑁂𑀦. 𑀢𑀣𑀸 𑀦𑀸𑀯𑀸𑀬 𑀓𑀻𑀴𑀢𑁄𑀢𑀺 𑀨𑀺𑀬𑀸𑀭𑀺𑀢𑁆𑀢𑀸𑀤𑀻𑀳𑀺 𑀦𑀸𑀯𑀁 𑀧𑀸𑀚𑁂𑀦𑁆𑀢𑀲𑁆𑀲 𑀯𑀸 𑀢𑀻𑀭𑁂 𑀉𑀲𑁆𑀲𑀸𑀭𑁂𑀦𑁆𑀢𑀲𑁆𑀲 𑀯𑀸 𑀤𑀼𑀓𑁆𑀓𑀝𑀦𑁆𑀢𑀺 𑀅𑀢𑁆𑀣𑁄.

𑀳𑀲𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀦𑀸𑀤𑀭𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀼𑀯𑀺𑀥𑀜𑁆𑀳𑁂𑀢𑁆𑀣 𑀅𑀦𑀸𑀤𑀭𑀺𑀬𑀁 𑀧𑀼𑀕𑁆𑀕𑀮𑀸𑀦𑀸𑀤𑀭𑀺𑀬𑀜𑁆𑀘 𑀥𑀫𑁆𑀫𑀸𑀦𑀸𑀤𑀭𑀺𑀬𑀜𑁆𑀘𑀸𑀢𑀺 𑀆𑀳 ‘‘𑀧𑀼𑀕𑁆𑀕𑀮𑀲𑁆𑀲 𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑁄 𑀪𑀺𑀓𑁆𑀔𑀼 𑀉𑀧𑀲𑀫𑁆𑀧𑀦𑁆𑀦𑁂𑀦 𑀧𑀜𑁆𑀜𑀢𑁆𑀢𑁂𑀦 𑀯𑀼𑀘𑁆𑀘𑀫𑀸𑀦𑁄 ‘‘𑀅𑀬𑀁 𑀉𑀓𑁆𑀔𑀺𑀢𑁆𑀢𑀓𑁄 𑀯𑀸 𑀯𑀫𑁆𑀪𑀺𑀢𑁄 𑀯𑀸 𑀕𑀭𑀳𑀺𑀢𑁄 𑀯𑀸, 𑀇𑀫𑀲𑁆𑀲 𑀯𑀘𑀦𑀁 𑀅𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 (𑀧𑀸𑀘𑀺. 𑁩𑁪𑁨) 𑀅𑀦𑀸𑀤𑀭𑀺𑀬𑀁 𑀓𑀭𑁄𑀢𑀺, 𑀅𑀬𑀁 𑀧𑀼𑀕𑁆𑀕𑀮𑁂 𑀅𑀦𑀸𑀤𑀭𑀺𑀬𑀁 𑀓𑀭𑁄𑀢𑀺 𑀦𑀸𑀫. 𑀬𑁄 𑀧𑀦 𑀧𑀜𑁆𑀜𑀢𑁆𑀢𑁂𑀦 𑀯𑀼𑀘𑁆𑀘𑀫𑀸𑀦𑁄 ‘‘𑀓𑀣𑀸𑀬𑀁 𑀦𑀲𑁆𑀲𑁂𑀬𑁆𑀬 𑀯𑀸 𑀯𑀺𑀦𑀲𑁆𑀲𑁂𑀬𑁆𑀬 𑀯𑀸 𑀅𑀦𑁆𑀢𑀭𑀥𑀸𑀬𑁂𑀬𑁆𑀬 𑀯𑀸’’𑀢𑀺, 𑀢𑀁 𑀯𑀸 𑀦𑀲𑀺𑀓𑁆𑀔𑀺𑀢𑀼𑀓𑀸𑀫𑁄 𑀅𑀦𑀸𑀤𑀭𑀺𑀬𑀁 𑀓𑀭𑁄𑀢𑀺, 𑀅𑀬𑀁 𑀥𑀫𑁆𑀫𑁂 𑀅𑀦𑀸𑀤𑀭𑀺𑀬𑀁 𑀓𑀭𑁄𑀢𑀺 𑀦𑀸𑀫. 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺.

𑀇𑀤𑀁 𑀦 𑀲𑀮𑁆𑀮𑁂𑀔𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀲𑀫𑁆𑀫𑀸 𑀓𑀺𑀮𑁂𑀲𑁂 𑀮𑀺𑀔𑀢𑀻𑀢𑀺 𑀲𑀮𑁆𑀮𑁂𑀔𑁄, 𑀅𑀧𑁆𑀧𑀺𑀘𑁆𑀙𑀢𑀸, 𑀢𑀤𑀢𑁆𑀣𑀁 𑀦𑀬𑀺𑀤𑀁 𑀲𑀁𑀯𑀢𑁆𑀢𑀢𑀺. 𑀆𑀤𑀺𑀲𑀤𑁆𑀤𑁂𑀦 ‘‘𑀇𑀤𑀁 𑀦 𑀥𑀼𑀢𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀺, 𑀦 𑀧𑀸𑀲𑀸𑀤𑀺𑀓𑀢𑀸𑀬, 𑀦 𑀅𑀧𑀘𑀬𑀸𑀬, 𑀦 𑀯𑀻𑀭𑀺𑀬𑀸𑀭𑀫𑁆𑀪𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺 (𑀧𑀸𑀘𑀺. 𑁩𑁪𑁩) 𑀇𑀤𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀧𑀜𑁆𑀜𑀢𑁆𑀢𑁂𑀦𑀸𑀢𑀺 𑀲𑀼𑀢𑁆𑀢𑁂 𑀯𑀸 𑀅𑀪𑀺𑀥𑀫𑁆𑀫𑁂 𑀯𑀸 𑀆𑀕𑀢𑁂𑀦. 𑀧𑀯𑁂𑀡𑀺𑀆𑀕𑀢𑀦𑁆𑀢𑀺 𑀲𑀗𑁆𑀕𑀻𑀢𑀺𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀳𑀸𑀓𑀲𑁆𑀲𑀧𑀸𑀤𑀺𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀬 𑀆𑀕𑀢𑀁. 𑀲𑀘𑁂 𑀧𑀦 𑀬𑀲𑁆𑀫𑀸 𑀉𑀘𑁆𑀙𑀼𑀭𑀲𑁄 𑀲𑀢𑁆𑀢𑀸𑀳𑀓𑀸𑀮𑀺𑀓𑁄, 𑀢𑀲𑁆𑀲 𑀓𑀲𑀝𑁄 𑀬𑀸𑀯𑀚𑀻𑀯𑀺𑀓𑁄, 𑀤𑁆𑀯𑀺𑀦𑁆𑀦𑀁𑀬𑁂𑀯 𑀲𑀫𑀯𑀸𑀬𑁄 𑀉𑀘𑁆𑀙𑀼𑀬𑀝𑁆𑀞𑀺, 𑀢𑀲𑁆𑀫𑀸 𑀯𑀺𑀓𑀸𑀮𑁂 𑀉𑀘𑁆𑀙𑀼𑀬𑀝𑁆𑀞𑀺𑀁 𑀔𑀸𑀤𑀺𑀢𑀼𑀁 𑀯𑀝𑁆𑀝𑀢𑀺 𑀕𑀼𑀴𑀳𑀭𑀻𑀢𑀓𑀁 𑀯𑀺𑀬𑀸𑀢𑀺 𑀏𑀯𑀫𑀸𑀤𑀺𑀓𑀁 𑀕𑀸𑀭𑀬𑁆𑀳𑀸𑀘𑀭𑀺𑀬𑀼𑀕𑁆𑀕𑀳𑀁 𑀕𑀳𑁂𑀢𑁆𑀯𑀸 ‘‘𑀏𑀯𑀁 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀸𑀦𑀁 𑀉𑀕𑁆𑀕𑀳𑁄 𑀧𑀭𑀺𑀧𑀼𑀘𑁆𑀙𑀸’’𑀢𑀺 𑀪𑀡𑀢𑀺, 𑀆𑀧𑀢𑁆𑀢𑀺𑀬𑁂𑀯.

𑀅𑀦𑀸𑀤𑀭𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀪𑀺𑀁𑀲𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀭𑀽𑀧𑀸𑀤𑀻𑀦𑀻𑀢𑀺 𑀪𑀬𑀸𑀦𑀓𑀸𑀦𑀺 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀦𑀺. 𑀪𑀬𑀸𑀦𑀓𑀓𑀣𑀦𑁆𑀢𑀺 𑀘𑁄𑀭𑀓𑀦𑁆𑀢𑀸𑀭𑀯𑀸𑀴𑀓𑀦𑁆𑀢𑀸𑀭𑀧𑀺𑀲𑀸𑀘𑀓𑀦𑁆𑀢𑀸𑀭𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀁.

𑀪𑀺𑀁𑀲𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀚𑁄𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀕𑀺𑀮𑀸𑀦𑁄𑀢𑀺 𑀬𑀲𑁆𑀲 𑀯𑀺𑀦𑀸 𑀅𑀕𑁆𑀕𑀺𑀦𑀸 𑀨𑀸𑀲𑀼 𑀳𑁄𑀢𑀺, 𑀲𑁄 𑀇𑀥 𑀅𑀕𑀺𑀮𑀸𑀦𑁄 𑀦𑀸𑀫. 𑀚𑁄𑀢𑀺𑀦𑁆𑀢𑀺 𑀅𑀕𑁆𑀕𑀺𑀁.

𑀪𑀕𑁆𑀕𑁂𑀲𑀽𑀢𑀺 𑀏𑀯𑀁𑀦𑀸𑀫𑀓𑁂 𑀚𑀦𑀧𑀤𑁂. 𑀪𑀕𑁆𑀕𑀸𑀦𑀸𑀫 𑀚𑀸𑀦𑀧𑀤𑀺𑀦𑁄 𑀭𑀸𑀚𑀓𑀼𑀫𑀸𑀭𑀸, 𑀢𑁂𑀲𑀁 𑀦𑀺𑀯𑀸𑀲𑁄 𑀏𑀓𑁄𑀧𑀺 𑀚𑀦𑀧𑀤𑁄 𑀭𑀼𑀴𑁆𑀳𑀺𑀲𑀤𑁆𑀤𑁂𑀦 ‘‘𑀪𑀕𑁆𑀕𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀪𑀕𑁆𑀕𑁂𑀲𑀽𑀢𑀺 𑀏𑀯𑀁𑀦𑀸𑀫𑀓𑁂 𑀚𑀦𑀧𑀤𑁂’’𑀢𑀺. 𑀢𑀣𑀸 𑀧𑀢𑀺𑀮𑀸𑀢𑀁 𑀉𑀓𑁆𑀔𑀺𑀧𑀦𑁆𑀢𑀲𑁆𑀲𑀸𑀢𑀺 𑀟𑀬𑁆𑀳𑀫𑀸𑀦𑀁 𑀅𑀮𑀸𑀢𑀁 𑀧𑀢𑀺𑀢𑀁 𑀉𑀓𑁆𑀔𑀺𑀧𑀦𑁆𑀢𑀲𑁆𑀲 𑀢𑀣𑀸 𑀤𑀼𑀓𑁆𑀓𑀝𑀦𑁆𑀢𑀺 𑀅𑀢𑁆𑀣𑁄. 𑀢𑀜𑁆𑀘𑀸𑀢𑀺 𑀤𑀼𑀓𑁆𑀓𑀝𑀁 𑀧𑀭𑀸𑀫𑀲𑀢𑀺. 𑀅𑀯𑀺𑀚𑁆𑀛𑀸𑀢𑀦𑁆𑀢𑀺 𑀅𑀦𑀺𑀩𑁆𑀩𑀼𑀢𑀸𑀮𑀸𑀢𑀁. 𑀧𑀤𑀻𑀧𑀚𑁄𑀢𑀺𑀓𑀚𑀦𑁆𑀢𑀸𑀖𑀭𑁂𑀢𑀺 𑀧𑀤𑀻𑀧𑀼𑀚𑁆𑀚𑀮𑀦𑀧𑀢𑁆𑀢𑀧𑀘𑀦𑀲𑁂𑀤𑀓𑀫𑁆𑀫𑀸𑀤𑀻𑀲𑀼 𑀚𑁄𑀢𑀺𑀓𑀭𑀡𑁂 𑀅𑀕𑁆𑀕𑀺𑀲𑀸𑀮𑀸𑀬𑀜𑁆𑀘 𑀲𑀫𑀸𑀤𑀳𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸𑀭𑀽𑀧𑀧𑁆𑀧𑀘𑁆𑀘𑀬𑁂𑀢𑀺 𑀞𑀧𑁂𑀢𑁆𑀯𑀸 𑀧𑀤𑀻𑀧𑀸𑀤𑀻𑀦𑀺 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀢𑀣𑀸𑀭𑀽𑀧𑀧𑀘𑁆𑀘𑀬𑁂. 𑀆𑀧𑀤𑀸𑀲𑀽𑀢𑀺 𑀤𑀼𑀝𑁆𑀞𑀯𑀸𑀴𑀫𑀺𑀕𑀅𑀫𑀦𑀼𑀲𑁆𑀲𑁂𑀳𑀺 𑀉𑀧𑀤𑁆𑀤𑀯𑁂𑀲𑀼.

𑀚𑁄𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀦𑀳𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀤𑀺𑀬𑀟𑁆𑀠𑁄 𑀫𑀸𑀲𑁄 𑀲𑁂𑀲𑁄 𑀕𑀺𑀫𑁆𑀳𑀸𑀦’’𑀦𑁆𑀢𑀺 ‘‘𑀯𑀲𑁆𑀲𑀸𑀦𑀲𑁆𑀲 𑀧𑀞𑀫𑁄 𑀫𑀸𑀲𑁄’’𑀇𑀘𑁆𑀘𑁂𑀢𑁂 𑀅𑀟𑁆𑀠𑀢𑁂𑀬𑁆𑀬𑀫𑀸𑀲𑀸 𑀉𑀡𑁆𑀳𑀲𑀫𑀬𑁄, 𑀧𑀭𑀺𑀴𑀸𑀳𑀲𑀫𑀬𑁄𑀢𑀺 𑀕𑀺𑀫𑁆𑀳𑀸𑀦𑀁 𑀲𑁂𑀲𑁄 𑀤𑀺𑀬𑀟𑁆𑀠𑁄 𑀫𑀸𑀲𑁄 𑀉𑀡𑁆𑀳𑀲𑀫𑀬𑁄, 𑀯𑀲𑁆𑀲𑀸𑀦𑀲𑁆𑀲 𑀧𑀞𑀫𑁄 𑀫𑀸𑀲𑁄 𑀧𑀭𑀺𑀴𑀸𑀳𑀲𑀫𑀬𑁄𑀢𑀺 𑀏𑀯𑀁 𑀏𑀢𑁂 𑀅𑀟𑁆𑀠𑀢𑁂𑀬𑁆𑀬𑀫𑀸𑀲𑀸 𑀓𑀫𑁂𑀦 𑀉𑀡𑁆𑀳𑀲𑀫𑀬𑁄, 𑀧𑀭𑀺𑀴𑀸𑀳𑀲𑀫𑀬𑁄 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄 𑀢𑁂𑀦𑁂𑀯 𑀧𑀤𑀪𑀸𑀚𑀦𑀺𑀬𑀁 ‘‘𑀉𑀡𑁆𑀳𑀲𑀫𑀬𑁄 𑀦𑀸𑀫 𑀤𑀺𑀬𑀟𑁆𑀠𑁄 𑀫𑀸𑀲𑁄 𑀲𑁂𑀲𑁄 𑀕𑀺𑀫𑁆𑀳𑀸𑀦’’𑀦𑁆𑀢𑀺, ‘‘𑀧𑀭𑀺𑀴𑀸𑀳𑀲𑀫𑀬𑁄 𑀦𑀸𑀫 𑀯𑀲𑁆𑀲𑀸𑀦𑀲𑁆𑀲 𑀧𑀞𑀫𑁄 𑀫𑀸𑀲𑁄’’𑀢𑀺 𑀯𑀼𑀢𑁆𑀢𑀁. 𑀬𑀤𑀸 𑀯𑀺𑀦𑀸 𑀦𑀳𑀸𑀦𑁂𑀦 𑀦 𑀨𑀸𑀲𑀼 𑀳𑁄𑀢𑀺, 𑀅𑀬𑀁 𑀕𑀺𑀮𑀸𑀦𑀲𑀫𑀬𑁄. 𑀧𑀤𑀪𑀸𑀚𑀦𑀺𑀬𑀁 (𑀧𑀸𑀘𑀺. 𑁩𑁬𑁪) 𑀧𑀦 𑀕𑀺𑀮𑀸𑀦𑁂 𑀦𑀺𑀘𑁆𑀙𑀺𑀢𑁂 𑀕𑀺𑀮𑀸𑀦𑀓𑀸𑀮𑁄 𑀦𑀺𑀘𑁆𑀙𑀺𑀢𑁄𑀯 𑀳𑁄𑀢𑀻𑀢𑀺 ‘‘𑀬𑀲𑁆𑀲 𑀯𑀺𑀦𑀸 𑀦𑀳𑀸𑀦𑁂𑀦 𑀦 𑀨𑀸𑀲𑀼 𑀳𑁄𑀢𑀺, ‘𑀕𑀺𑀮𑀸𑀦𑀲𑀫𑀬𑁄’𑀢𑀺 𑀦𑀳𑀸𑀬𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀯𑁂𑀡𑀲𑀫𑁆𑀫𑀚𑁆𑀚𑀦𑀫𑀢𑁆𑀢𑀫𑁆𑀧𑀻𑀢𑀺 𑀅𑀦𑁆𑀢𑀫𑀲𑁄 𑀧𑀭𑀺𑀯𑁂𑀡𑀲𑀫𑁆𑀫𑀚𑁆𑀚𑀦𑀫𑀢𑁆𑀢𑀫𑁆𑀧𑀺.

𑀯𑀸𑀮𑀼𑀓𑀁 𑀉𑀓𑁆𑀓𑀺𑀭𑀺𑀢𑁆𑀯𑀸𑀢𑀺 𑀲𑀼𑀓𑁆𑀔𑀸𑀬 𑀦𑀤𑀺𑀬𑀸 𑀯𑀸𑀮𑀺𑀓𑀁 𑀉𑀢𑁆𑀢𑀺𑀭𑀺𑀢𑁆𑀯𑀸. 𑀆𑀯𑀸𑀝𑁂𑀲𑀼𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀦𑀤𑀺𑀬𑀁 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀆𑀧𑀤𑀸𑀲𑀽𑀢𑀺 𑀪𑀫𑀭𑀸𑀤𑀻𑀳𑀺 𑀅𑀦𑀼𑀩𑀦𑁆𑀥𑁂𑀲𑀼.

𑀦𑀳𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀤𑀼𑀩𑁆𑀩𑀡𑁆𑀡𑀓𑀭𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀮𑀸𑀪𑀲𑀤𑁆𑀤𑁄𑀬𑀁 𑀓𑀫𑁆𑀫𑀲𑀸𑀥𑀦𑁄 ‘‘𑀓𑁄 𑀪𑀯𑀢𑀸 𑀮𑀸𑀪𑁄 𑀮𑀤𑁆𑀥𑁄’’𑀢𑀺𑀆𑀤𑀻𑀲𑀼 𑀯𑀺𑀬, 𑀲𑁄 𑀘𑁂𑀢𑁆𑀣 𑀅𑀢𑀻𑀢𑀓𑀸𑀮𑀺𑀓𑁄𑀢𑀺 𑀆𑀳 ‘‘𑀅𑀮𑀩𑁆𑀪𑀻𑀢𑀺 𑀮𑀪𑁄’’𑀢𑀺, 𑀮𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. ‘‘𑀮𑀪𑁄 𑀏𑀯 𑀮𑀸𑀪𑁄’’𑀢𑀺 𑀇𑀫𑀺𑀦𑀸 𑀲𑀓𑀢𑁆𑀣𑁂 𑀡𑀧𑀘𑁆𑀘𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀓𑀺𑀁 𑀅𑀮𑀩𑁆𑀪𑀻𑀢𑀺 𑀓𑀺𑀁 𑀮𑀤𑁆𑀥𑀁. 𑀦𑀯𑀦𑁆𑀢𑀺 𑀅𑀪𑀺𑀦𑀯𑀁. 𑀏𑀢𑁆𑀢𑀸𑀯𑀢𑀸 𑀘 𑀦𑀯𑀜𑁆𑀘 𑀢𑀁 𑀘𑀻𑀯𑀭𑀜𑁆𑀘𑀸𑀢𑀺 𑀦𑀯𑀘𑀻𑀯𑀭𑀁, 𑀦𑀯𑀘𑀻𑀯𑀭𑀁 𑀮𑀸𑀪𑁄 𑀏𑀢𑁂𑀦𑀸𑀢𑀺 𑀦𑀯𑀘𑀻𑀯𑀭𑀮𑀸𑀪𑁄𑀢𑀺 𑀏𑀯𑀫𑁂𑀢𑁆𑀣 𑀲𑀫𑀸𑀲𑁄 𑀤𑀝𑁆𑀞𑀩𑁆𑀩𑁄𑀢𑀺. 𑀬𑀤𑀺 𑀏𑀯𑀁 𑀓𑀣𑀁 ‘‘𑀦𑀯𑀁 𑀘𑀻𑀯𑀭𑀮𑀸𑀪𑁂𑀦𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀇𑀢𑀺 𑀦𑀯𑀘𑀻𑀯𑀭𑀮𑀸𑀪𑁂𑀦𑀸’’𑀢𑀺𑀆𑀤𑀺. 𑀏𑀢𑁆𑀣 𑀘 ‘‘𑀯𑀺𑀓𑀧𑁆𑀧𑀦𑀼𑀧𑀕𑀁 𑀧𑀘𑁆𑀙𑀺𑀫’’𑀦𑁆𑀢𑀺 𑀦 𑀯𑀼𑀢𑁆𑀢𑀢𑁆𑀢𑀸 𑀘𑀻𑀯𑀭𑀦𑁆𑀢𑀺 𑀬𑀁 𑀦𑀺𑀯𑀸𑀲𑁂𑀢𑀼𑀁 𑀯𑀸 𑀧𑀸𑀭𑀼𑀧𑀺𑀢𑀼𑀁 𑀯𑀸 𑀲𑀓𑁆𑀓𑀸 𑀳𑁄𑀢𑀺, 𑀢𑀤𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀼𑀧𑀕𑀁 𑀘𑀻𑀯𑀭’’𑀦𑁆𑀢𑀺. ‘‘𑀤𑀼𑀩𑁆𑀩𑀡𑁆𑀡𑀓𑀭𑀡𑀁 𑀆𑀤𑀸𑀢𑀩𑁆𑀩’’𑀦𑁆𑀢𑀺 𑀏𑀢𑀁 𑀓𑀧𑁆𑀧𑀩𑀺𑀦𑁆𑀤𑀼𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀦𑀻𑀮𑀸𑀤𑀻𑀳𑀺 𑀲𑀓𑀮𑀘𑀻𑀯𑀭𑀁 𑀤𑀼𑀩𑁆𑀩𑀡𑁆𑀡𑀓𑀭𑀡𑀁, 𑀢𑀜𑁆𑀘 𑀧𑀦 𑀓𑀧𑁆𑀧𑀁 𑀆𑀤𑀺𑀬𑀦𑁆𑀢𑁂𑀦 𑀘𑀻𑀯𑀭𑀁 𑀭𑀚𑀺𑀢𑁆𑀯𑀸 𑀘𑀢𑀽𑀲𑀼 𑀯𑀸 𑀓𑁄𑀡𑁂𑀲𑀼, 𑀢𑀻𑀲𑀼 𑀯𑀸 𑀤𑁆𑀯𑀻𑀲𑀼 𑀯𑀸 𑀏𑀓𑀲𑁆𑀫𑀺𑀁 𑀯𑀸 𑀓𑁄𑀡𑁂 𑀫𑁄𑀭𑀲𑁆𑀲 𑀅𑀓𑁆𑀔𑀺𑀫𑀡𑁆𑀟𑀮𑀫𑀢𑁆𑀢𑀁 𑀯𑀸 𑀫𑀗𑁆𑀕𑀼𑀮𑀧𑀺𑀝𑁆𑀞𑀺𑀫𑀢𑁆𑀢𑀁 𑀯𑀸 𑀆𑀤𑀸𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀢𑀲𑁆𑀲𑀸’’𑀢𑀺𑀆𑀤𑀺. 𑀓𑀁𑀲𑀦𑀻𑀮𑁂𑀦𑀸𑀢𑀺 𑀘𑀫𑁆𑀫𑀓𑀸𑀭𑀦𑀻𑀮𑁂𑀦. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀅𑀬𑁄𑀫𑀮𑀁 𑀮𑁄𑀳𑀫𑀮𑀁, 𑀏𑀢𑀁 𑀓𑀁𑀲𑀦𑀻𑀮𑀁 𑀦𑀸𑀫𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁩𑁬𑁮) 𑀯𑀼𑀢𑁆𑀢𑀁. 𑀧𑀢𑁆𑀢𑀦𑀻𑀮𑁂𑀦𑀸𑀢𑀺 𑀬𑁂𑀦 𑀓𑁂𑀦𑀘𑀺 𑀦𑀻𑀮𑀯𑀡𑁆𑀡𑁂𑀦 𑀧𑀡𑁆𑀡𑀭𑀲𑁂𑀦. 𑀓𑀧𑁆𑀧𑀩𑀺𑀦𑁆𑀤𑀼𑀁 𑀆𑀤𑀺𑀬𑀺𑀢𑁆𑀯𑀸𑀢𑀺 𑀯𑀝𑁆𑀝𑀁 𑀏𑀓𑀁 𑀓𑀧𑁆𑀧𑀩𑀺𑀦𑁆𑀤𑀼𑀁 𑀆𑀤𑀺𑀬𑀺𑀢𑁆𑀯𑀸.

𑀧𑀸𑀴𑀺𑀓𑀧𑁆𑀧𑀓𑀡𑁆𑀡𑀺𑀓𑀓𑀧𑁆𑀧𑀸𑀤𑀬𑁄 𑀧𑀦 𑀲𑀩𑁆𑀩𑀝𑁆𑀞𑀓𑀣𑀸𑀲𑀼 𑀧𑀝𑀺𑀲𑀺𑀤𑁆𑀥𑀸. 𑀅𑀕𑁆𑀕𑀴𑀸𑀤𑀻𑀦𑀺 𑀓𑀧𑁆𑀧𑀓𑀢𑀘𑀻𑀯𑀭𑁂 𑀧𑀦 𑀧𑀘𑁆𑀙𑀸 𑀆𑀭𑁄𑀧𑁂𑀢𑁆𑀯𑀸 𑀓𑀧𑁆𑀧𑀓𑀭𑀡𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀆𑀳 ‘‘𑀧𑀘𑁆𑀙𑀸 𑀆𑀭𑁄𑀧𑀺𑀢𑁂𑀲𑀽’’𑀢𑀺𑀆𑀤𑀺. 𑀅𑀕𑁆𑀕𑀴𑀅𑀦𑀼𑀯𑀸𑀢𑀧𑀭𑀺𑀪𑀡𑁆𑀟𑁂𑀲𑀽𑀢𑀺 𑀉𑀤𑁆𑀥𑀭𑀺𑀢𑁆𑀯𑀸 𑀅𑀮𑁆𑀮𑀺𑀬𑀸𑀧𑀦𑀓𑀔𑀡𑁆𑀟𑀧𑀺𑀝𑁆𑀞𑀺𑀅𑀦𑀼𑀯𑀸𑀢𑀓𑀼𑀘𑁆𑀙𑀺𑀅𑀦𑀼𑀯𑀸𑀢𑁂𑀲𑀼. 𑀓𑀺𑀭𑀺𑀬𑀸𑀓𑀺𑀭𑀺𑀬𑀦𑁆𑀢𑀺 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀢𑁄, 𑀓𑀧𑁆𑀧𑀲𑁆𑀲 𑀅𑀦𑀸𑀤𑀸𑀦𑀢𑁄 𑀓𑀺𑀭𑀺𑀬𑀸𑀓𑀺𑀭𑀺𑀬𑀁.

𑀤𑀼𑀩𑁆𑀩𑀡𑁆𑀡𑀓𑀭𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀯𑀺𑀓𑀧𑁆𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀫𑁆𑀫𑀼𑀔𑁂𑀦 𑀯𑀺𑀓𑀧𑁆𑀧𑀦𑀸 𑀲𑀫𑁆𑀫𑀼𑀔𑀯𑀺𑀓𑀧𑁆𑀧𑀦𑀸. 𑀧𑀭𑀫𑁆𑀫𑀼𑀔𑁂𑀦 𑀯𑀺𑀓𑀧𑁆𑀧𑀦𑀸 𑀧𑀭𑀫𑁆𑀫𑀼𑀔𑀯𑀺𑀓𑀧𑁆𑀧𑀦𑀸. 𑀲𑀦𑁆𑀦𑀺𑀳𑀺𑀢𑀸𑀲𑀦𑁆𑀦𑀺𑀳𑀺𑀢𑀪𑀸𑀯𑀦𑁆𑀢𑀺 𑀆𑀲𑀦𑁆𑀦𑀤𑀽𑀭𑀪𑀸𑀯𑀁. 𑀆𑀲𑀦𑁆𑀦𑀤𑀽𑀭𑀪𑀸𑀯𑁄 𑀘 𑀅𑀥𑀺𑀝𑁆𑀞𑀸𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀫𑀺𑀢𑁆𑀢𑁄𑀢𑀺 𑀤𑀴𑁆𑀳𑀫𑀺𑀢𑁆𑀢𑁄. 𑀲𑀦𑁆𑀤𑀺𑀝𑁆𑀞𑁄𑀢𑀺 𑀤𑀺𑀝𑁆𑀞𑀫𑀢𑁆𑀢𑁄 𑀦𑀸𑀢𑀺𑀤𑀴𑁆𑀳𑀫𑀺𑀢𑁆𑀢𑁄. 𑀅𑀓𑀢𑀧𑀘𑁆𑀘𑀼𑀤𑁆𑀥𑀸𑀭𑀦𑁆𑀢𑀺 ‘‘𑀫𑀬𑁆𑀳𑀁 𑀲𑀦𑁆𑀢𑀓𑀁 𑀧𑀭𑀺𑀪𑀼𑀜𑁆𑀚 𑀯𑀸 𑀯𑀺𑀲𑁆𑀲𑀚𑁆𑀚𑁂𑀳𑀺 𑀯𑀸’’𑀢𑀺𑀆𑀤𑀺𑀦𑀸 𑀅𑀓𑀢𑀧𑀘𑁆𑀘𑀼𑀤𑁆𑀥𑀸𑀭𑀁. 𑀬𑁂𑀦 𑀯𑀺𑀦𑀬𑀓𑀫𑁆𑀫𑀁 𑀓𑀢𑀦𑁆𑀢𑀺 𑀬𑁂𑀦 𑀲𑀤𑁆𑀥𑀺𑀁 𑀯𑀺𑀦𑀬𑀓𑀫𑁆𑀫𑀁 𑀓𑀢𑀁.

𑀧𑀭𑀺𑀪𑁄𑀕𑁂𑀦 𑀓𑀸𑀬𑀓𑀫𑁆𑀫𑀁, 𑀅𑀧𑀘𑁆𑀘𑀼𑀤𑁆𑀥𑀸𑀭𑀸𑀧𑀦𑁂𑀦 𑀯𑀘𑀻𑀓𑀫𑁆𑀫𑀦𑁆𑀢𑀺 𑀆𑀳 ‘‘𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀧𑀞𑀫𑀓𑀣𑀺𑀦𑀲𑀤𑀺𑀲𑀸𑀦𑁂𑀯𑀸’’𑀢𑀺. 𑀓𑀺𑀭𑀺𑀬𑀸𑀓𑀺𑀭𑀺𑀬𑀦𑁆𑀢𑀺 𑀏𑀢𑁆𑀣 𑀧𑀭𑀺𑀪𑀼𑀜𑁆𑀚𑀦𑀁 𑀓𑀺𑀭𑀺𑀬𑀁. 𑀅𑀧𑀘𑁆𑀘𑀼𑀤𑁆𑀥𑀸𑀭𑀸𑀧𑀦𑀁 𑀅𑀓𑀺𑀭𑀺𑀬𑀁.

𑀯𑀺𑀓𑀧𑁆𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀅𑀧𑀦𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀥𑀺𑀝𑁆𑀞𑀸𑀦𑀼𑀧𑀕𑀦𑁆𑀢𑀺 𑀅𑀥𑀺𑀝𑁆𑀞𑀸𑀦𑀬𑁄𑀕𑁆𑀕𑀁 𑀅𑀬𑁄𑀧𑀢𑁆𑀢𑀜𑁆𑀘𑁂𑀯 𑀫𑀢𑁆𑀢𑀺𑀓𑀸𑀧𑀢𑁆𑀢𑀜𑁆𑀘. 𑀲𑀽𑀓𑀭𑀦𑁆𑀢𑀓𑀁 𑀦𑀸𑀫 𑀓𑀼𑀜𑁆𑀘𑀺𑀓𑀸𑀓𑁄𑀲𑁄 𑀯𑀺𑀬 𑀅𑀦𑁆𑀢𑁄 𑀲𑀼𑀲𑀺𑀭𑀁 𑀓𑀢𑁆𑀯𑀸 𑀓𑁄𑀝𑁆𑀝𑀺𑀢𑀁.

𑀅𑀜𑁆𑀜𑀁 𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀧𑀸𑀴𑀺𑀬𑀸 𑀅𑀦𑀸𑀕𑀢𑀧𑀢𑁆𑀢𑀢𑁆𑀣𑀯𑀺𑀓𑀸𑀤𑀺𑀁. 𑀥𑀫𑁆𑀫𑀓𑀣𑀁 𑀓𑀢𑁆𑀯𑀸𑀢𑀺 ‘‘𑀲𑀫𑀡𑁂𑀦 𑀦𑀸𑀫 𑀅𑀦𑀺𑀳𑀺𑀢𑀧𑀭𑀺𑀓𑁆𑀔𑀸𑀭𑁂𑀦 𑀪𑀯𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀏𑀯𑀁 ‘‘𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀦𑀺𑀓𑁆𑀔𑀺𑀧𑀢𑁄 𑀅𑀦𑀸𑀧𑀢𑁆𑀢𑀺.

𑀅𑀧𑀦𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀭𑀸𑀧𑀸𑀦𑀯𑀕𑁆𑀕𑁄 𑀙𑀝𑁆𑀞𑁄.