𑁫. 𑀅𑀘𑁂𑀮𑀓𑀯𑀕𑁆𑀕𑁄

𑁧. 𑀅𑀘𑁂𑀮𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀘𑁂𑀮𑀓𑀲𑁆𑀲𑀸𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀩𑁆𑀩𑀚𑁆𑀚𑀸𑀲𑀫𑀸𑀧𑀦𑁆𑀦𑀲𑁆𑀲 𑀦𑀕𑁆𑀕𑀲𑁆𑀲. 𑀧𑀭𑀺𑀩𑁆𑀩𑀸𑀚𑀓𑀲𑁆𑀲𑀸𑀢𑀺 𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀜𑁆𑀘 𑀲𑀸𑀫𑀡𑁂𑀭𑀜𑁆𑀘 𑀅𑀯𑀲𑁂𑀲𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀩𑁆𑀩𑀚𑁆𑀚𑀸𑀲𑀫𑀸𑀧𑀦𑁆𑀦𑀲𑁆𑀲. 𑀧𑀭𑀺𑀩𑁆𑀩𑀸𑀚𑀺𑀓𑀸𑀬𑀸𑀢𑀺 𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀁, 𑀲𑀺𑀓𑁆𑀔𑀫𑀸𑀦𑀁, 𑀲𑀸𑀫𑀡𑁂𑀭𑀺𑀜𑁆𑀘 𑀅𑀯𑀲𑁂𑀲𑀸𑀬 𑀬𑀸𑀬 𑀓𑀸𑀬𑀘𑀺 𑀧𑀩𑁆𑀩𑀚𑁆𑀚𑀸𑀲𑀫𑀸𑀧𑀦𑁆𑀦𑀸𑀬. 𑀏𑀢𑁂 𑀘 𑀲𑀩𑁆𑀩𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀏𑀢𑁂𑀲𑀁 𑀅𑀘𑁂𑀮𑀓𑀸𑀤𑀻𑀦𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦’’𑀦𑁆𑀢𑀺.

𑀢𑁂𑀲𑀦𑁆𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁. 𑀪𑀸𑀚𑀦𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀆𑀫𑀺𑀲𑀪𑀭𑀺𑀢𑀁 𑀪𑀸𑀚𑀦𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸. 𑀩𑀸𑀳𑀺𑀭𑀸𑀮𑁂𑀧𑀦𑁆𑀢𑀺 𑀢𑁂𑀮𑀸𑀤𑀺𑀁.

𑀅𑀘𑁂𑀮𑀓𑀸𑀤𑀬𑁄 𑀬𑀲𑁆𑀫𑀸, 𑀢𑀺𑀢𑁆𑀣𑀺𑀬𑀸𑀯 𑀫𑀢𑀸 𑀇𑀥;

𑀢𑀲𑁆𑀫𑀸 𑀢𑀺𑀢𑁆𑀣𑀺𑀬𑀦𑀸𑀫𑁂𑀦, 𑀢𑀺𑀓𑀘𑁆𑀙𑁂𑀤𑁄 𑀓𑀢𑁄 𑀢𑀬𑁄.

𑀅𑀢𑀺𑀢𑁆𑀣𑀺𑀬𑀲𑁆𑀲 𑀦𑀕𑁆𑀕𑀲𑁆𑀲, 𑀢𑀣𑀸 𑀢𑀺𑀢𑁆𑀣𑀺𑀬𑀮𑀺𑀗𑁆𑀕𑀺𑀦𑁄;

𑀕𑀳𑀝𑁆𑀞𑀲𑁆𑀲𑀸𑀧𑀺 𑀪𑀺𑀓𑁆𑀔𑀼𑀲𑁆𑀲, 𑀓𑀧𑁆𑀧𑀢𑀻𑀢𑀺 𑀯𑀺𑀦𑀺𑀘𑁆𑀙𑀬𑁄.

𑀅𑀢𑀺𑀢𑁆𑀣𑀺𑀬𑀲𑁆𑀲 𑀘𑀺𑀢𑁆𑀢𑁂𑀦, 𑀢𑀺𑀢𑁆𑀣𑀺𑀬𑀲𑁆𑀲 𑀘 𑀮𑀺𑀗𑁆𑀕𑀺𑀦𑁄;

𑀲𑁄𑀢𑀸𑀧𑀦𑁆𑀦𑀸𑀤𑀺𑀦𑁄 𑀤𑀸𑀢𑀼𑀁, 𑀓𑀧𑁆𑀧𑀢𑀻𑀢𑀻𑀥 𑀦𑁄 𑀫𑀢𑀺.

𑀅𑀘𑁂𑀮𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀉𑀬𑁆𑀬𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸𑀢𑀺 𑀏𑀢𑁆𑀣 𑀦𑀕𑀭𑀫𑁆𑀧𑀺 𑀕𑀸𑀫𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀯𑀺𑀲𑀺𑀲𑁆𑀲𑀸𑀫𑀸𑀢𑀺 𑀏𑀢𑁆𑀣 𑀕𑀳𑁂𑀢𑁆𑀯𑀸 ‘‘𑀕𑀦𑁆𑀢𑁆𑀯𑀸’’𑀢𑀺 𑀧𑀸𑀞𑀲𑁂𑀲𑁄, 𑀅𑀲𑀫𑀦𑁆𑀦𑀸𑀳𑀸𑀭𑁄 𑀯𑀸 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀢𑀲𑁆𑀫𑀺𑀁 𑀕𑀸𑀫𑁂 𑀲𑀦𑁆𑀦𑀺𑀳𑀺𑀢𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 𑀯𑀸 ‘‘𑀏𑀳𑀸𑀯𑀼𑀲𑁄, 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀲𑁆𑀲𑀸𑀫𑀸’’𑀢𑀺 𑀪𑀺𑀓𑁆𑀔𑀼𑀁 𑀕𑀳𑁂𑀢𑁆𑀯𑀸 𑀕𑀦𑁆𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀁 𑀓𑀺𑀜𑁆𑀘𑀺 𑀆𑀫𑀺𑀲𑀦𑁆𑀢𑀺 𑀬𑀸𑀕𑀼𑀆𑀤𑀺𑀓𑀁 𑀬𑀁 𑀓𑀺𑀜𑁆𑀘𑀺 𑀆𑀫𑀺𑀲𑀁. 𑀉𑀬𑁆𑀬𑁄𑀚𑁂𑀬𑁆𑀬𑀸𑀢𑀺 𑀅𑀢𑁆𑀢𑀦𑁄 𑀓𑀻𑀴𑀸𑀦𑀼𑀭𑀽𑀧𑀁 𑀇𑀢𑁆𑀣𑀺𑀁 𑀤𑀺𑀲𑁆𑀯𑀸 𑀉𑀬𑁆𑀬𑁄𑀚𑁂𑀬𑁆𑀬 𑀧𑀳𑀺𑀡𑁂𑀬𑁆𑀬. 𑀢𑁂𑀦𑀸𑀳 ‘‘𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺’’𑀦𑁆𑀢𑀺𑀆𑀤𑀺. 𑀆𑀤𑀺𑀲𑀤𑁆𑀤𑁂𑀦 𑀯𑀼𑀢𑁆𑀢𑀸𑀯𑀲𑁂𑀲𑀁 𑀓𑀸𑀬𑀯𑀘𑀻𑀤𑁆𑀯𑀸𑀭𑀯𑀻𑀢𑀺𑀓𑁆𑀓𑀫𑀁 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀕𑀘𑁆𑀙𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸𑀢𑀺 ‘‘𑀕𑀘𑁆𑀙𑀸𑀯𑀼𑀲𑁄, 𑀦 𑀫𑁂 𑀢𑀬𑀸 𑀲𑀤𑁆𑀥𑀺𑀁 𑀓𑀣𑀸 𑀯𑀸 𑀦𑀺𑀲𑀚𑁆𑀚𑀸 𑀯𑀸 𑀨𑀸𑀲𑀼 𑀳𑁄𑀢𑀺, 𑀏𑀓𑀓𑀲𑁆𑀲 𑀫𑁂 𑀓𑀣𑀸 𑀯𑀸 𑀦𑀺𑀲𑀚𑁆𑀚𑀸 𑀯𑀸 𑀨𑀸𑀲𑀼 𑀳𑁄𑀢𑀻’’𑀢𑀺 (𑀧𑀸𑀘𑀺. 𑁨𑁭𑁫) 𑀯𑀢𑁆𑀯𑀸. 𑀏𑀢𑀁 𑀅𑀦𑀸𑀘𑀸𑀭𑀫𑁂𑀯𑀸𑀢𑀺 𑀏𑀢𑀁 𑀬𑀣𑀸𑀯𑀼𑀢𑁆𑀢𑀁 𑀳𑀲𑀦𑀸𑀤𑀺𑀅𑀦𑀸𑀘𑀸𑀭𑀫𑁂𑀯. 𑀦 𑀅𑀜𑁆𑀜𑀁 𑀧𑀢𑀺𑀭𑀽𑀧𑀁 𑀓𑀸𑀭𑀡𑀦𑁆𑀢𑀺 𑀞𑀧𑁂𑀢𑁆𑀯𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀅𑀦𑀸𑀘𑀸𑀭𑀁 𑀉𑀪𑀺𑀦𑁆𑀦𑀁 𑀏𑀓𑀢𑁄 𑀦 𑀬𑀸𑀧𑀦𑀸𑀤𑀺𑀁 𑀅𑀜𑁆𑀜𑀁 𑀧𑀢𑀺𑀭𑀽𑀧𑀓𑀸𑀭𑀡𑀁 𑀧𑀘𑁆𑀘𑀬𑀁 𑀓𑀭𑀺𑀢𑁆𑀯𑀸 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀲𑁆𑀲𑀸𑀢𑀺 𑀉𑀬𑁆𑀬𑁄𑀚𑀓𑀲𑁆𑀲. 𑀲𑁄𑀢𑀺 𑀬𑁄 𑀉𑀬𑁆𑀬𑁄𑀚𑀺𑀢𑁄, 𑀲𑁄.

𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀢𑀺 𑀲𑀸𑀫𑀡𑁂𑀭𑁂. 𑀲𑁄𑀯 𑀇𑀥 𑀅𑀦𑀼𑀧𑀲𑀫𑁆𑀧𑀦𑁆𑀦𑁄𑀢𑀺 𑀅𑀥𑀺𑀧𑁆𑀧𑁂𑀢𑁄𑀢𑀺 𑀯𑀤𑀦𑁆𑀢𑀺. 𑀉𑀪𑀺𑀦𑁆𑀦𑀫𑁆𑀧𑀻𑀢𑀺 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀯𑀸𑀢𑀺 𑀤𑁆𑀯𑀺𑀦𑁆𑀦𑀫𑁆𑀧𑀺. 𑀓𑀮𑀺𑀲𑀸𑀲𑀦𑀸𑀭𑁄𑀧𑀦𑁂𑀢𑀺 (𑀧𑀸𑀘𑀺. 𑀅𑀝𑁆𑀞. 𑁨𑁭𑁭) 𑀓𑀮𑀻𑀢𑀺 𑀓𑁄𑀥𑁄, 𑀢𑀲𑁆𑀲 𑀲𑀸𑀲𑀦𑀁 𑀆𑀡𑀁 𑀓𑀮𑀺𑀲𑀸𑀲𑀦𑀁, 𑀢𑀲𑁆𑀲𑀸𑀭𑁄𑀧𑀦𑁂𑀢𑀺 𑀅𑀢𑁆𑀣𑁄, ‘‘𑀅𑀧𑁆𑀧𑁂𑀯 𑀦𑀸𑀫 𑀇𑀫𑀺𑀦𑀸𑀧𑀺 𑀉𑀩𑁆𑀩𑀸𑀴𑁆𑀳𑁄 𑀧𑀓𑁆𑀓𑀫𑁂𑀬𑁆𑀬𑀸’’𑀢𑀺 𑀓𑁄𑀥𑀯𑀲𑁂𑀦 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀧𑀲𑁆𑀲𑀣 𑀪𑁄 𑀇𑀫𑀲𑁆𑀲 𑀞𑀸𑀦𑀁 𑀦𑀺𑀲𑀚𑁆𑀚𑀁 𑀆𑀮𑁄𑀓𑀺𑀢𑀁 𑀯𑀺𑀮𑁄𑀓𑀺𑀢𑀁, 𑀔𑀸𑀡𑀼 𑀯𑀺𑀬 𑀢𑀺𑀝𑁆𑀞𑀢𑀺, 𑀲𑀼𑀦𑀔𑁄 𑀯𑀺𑀬 𑀦𑀺𑀲𑀻𑀤𑀢𑀺, 𑀫𑀓𑁆𑀓𑀝𑁄 𑀯𑀺𑀬 𑀇𑀢𑁄 𑀘𑀺𑀢𑁄 𑀘 𑀯𑀺𑀮𑁄𑀓𑁂𑀢𑀻’’𑀢𑀺 𑀏𑀯𑀁 𑀅𑀫𑀦𑀸𑀧𑀯𑀘𑀦𑀲𑁆𑀲 𑀪𑀡𑀦𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀧𑀦𑁂𑀯𑀁 𑀪𑀡𑀦𑁂 𑀤𑁄𑀲𑁄 𑀦𑀢𑁆𑀣𑀺. 𑀏𑀯𑀫𑀸𑀤𑀻𑀳𑀻𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 ‘‘𑀫𑀳𑀕𑁆𑀖𑀁 𑀪𑀡𑁆𑀟𑀁 𑀧𑀲𑁆𑀲𑀺𑀢𑁆𑀯𑀸 𑀮𑁄𑀪𑀥𑀫𑁆𑀫𑀁 𑀉𑀧𑁆𑀧𑀸𑀤𑁂𑀲𑁆𑀲𑀢𑀻’’𑀢𑀺 𑀉𑀬𑁆𑀬𑁄𑀚𑁂𑀢𑀺, ‘‘𑀫𑀸𑀢𑀼𑀕𑀸𑀫𑀁 𑀧𑀲𑁆𑀲𑀺𑀢𑁆𑀯𑀸 𑀅𑀦𑀪𑀺𑀭𑀢𑀺𑀁 𑀉𑀧𑁆𑀧𑀸𑀤𑁂𑀲𑁆𑀲𑀢𑀻’’𑀢𑀺 𑀉𑀬𑁆𑀬𑁄𑀚𑁂𑀢𑀺, ‘‘𑀕𑀺𑀮𑀸𑀦𑀲𑁆𑀲 𑀯𑀸 𑀑𑀳𑀺𑀬𑁆𑀬𑀓𑀲𑁆𑀲 𑀯𑀸 𑀯𑀺𑀳𑀸𑀭𑀧𑀸𑀮𑀲𑁆𑀲 𑀯𑀸 𑀬𑀸𑀕𑀼𑀁 𑀯𑀸 𑀪𑀢𑁆𑀢𑀁 𑀯𑀸 𑀔𑀸𑀤𑀦𑀻𑀬𑀁 𑀯𑀸 𑀦𑀻𑀳𑀭𑀸’’𑀢𑀺 𑀉𑀬𑁆𑀬𑁄𑀚𑁂𑀢𑀺, ‘‘𑀦 𑀅𑀦𑀸𑀘𑀸𑀭𑀁 𑀆𑀘𑀭𑀺𑀢𑀼𑀓𑀸𑀫𑁄 𑀲𑀢𑀺 𑀓𑀭𑀡𑀻𑀬𑁂 𑀉𑀬𑁆𑀬𑁄𑀚𑁂𑀢𑀻’’𑀢𑀺 (𑀧𑀸𑀘𑀺. 𑁨𑁭𑁮) 𑀏𑀢𑁂𑀲𑀁 𑀕𑀳𑀡𑀁.

𑀉𑀬𑁆𑀬𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀲𑀪𑁄𑀚𑀦𑁂’’𑀢𑀺 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁄𑀬𑀁, 𑀉𑀪𑀲𑀤𑁆𑀤𑁂 𑀉𑀓𑀸𑀭𑀲𑁆𑀲 𑀘 𑀮𑁄𑀧𑁄𑀢𑀺 𑀆𑀳 ‘‘𑀲𑀳 𑀉𑀪𑁄𑀳𑀺 𑀚𑀦𑁂𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀉𑀪𑁄𑀳𑀺 𑀚𑀦𑁂𑀳𑀻𑀢𑀺 𑀚𑀸𑀬𑀸 𑀘 𑀧𑀢𑀺 𑀘𑀸𑀢𑀺 𑀉𑀪𑁄𑀳𑀺 𑀚𑀦𑁂𑀳𑀺. 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀯𑀸 𑀪𑁄𑀚𑀦𑀁, 𑀇𑀢𑁆𑀣𑀻 𑀘 𑀧𑀼𑀭𑀺𑀲𑁄 𑀘, 𑀢𑁂𑀦 𑀲𑀳 𑀯𑀢𑁆𑀢𑀢𑀻𑀢𑀺 𑀲𑀪𑁄𑀚𑀦𑀦𑁆𑀢𑀺 𑀆𑀳 ‘‘𑀅𑀣 𑀯𑀸’’𑀢𑀺𑀆𑀤𑀺. 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀲𑁆𑀲𑀸𑀢𑀺 𑀫𑁂𑀣𑀼𑀦𑀸𑀥𑀺𑀧𑁆𑀧𑀸𑀬𑀲𑁆𑀲. 𑀲𑀬𑀦𑀺𑀖𑀭𑀦𑁆𑀢𑀺 𑀲𑀬𑀦𑀻𑀬𑀖𑀭𑀁, 𑀯𑀸𑀲𑀕𑁂𑀳𑀦𑁆𑀢𑀺 𑀅𑀢𑁆𑀣𑁄. 𑀫𑀳𑀮𑁆𑀮𑀓𑀲𑁆𑀲𑀸𑀢𑀺 𑀫𑀳𑀮𑁆𑀮𑀓𑀲𑁆𑀲 𑀲𑀬𑀦𑀺𑀖𑀭𑀲𑁆𑀲. 𑀧𑀺𑀝𑁆𑀞𑀲𑀗𑁆𑀖𑀸𑀝𑀢𑁄𑀢𑀺 𑀤𑁆𑀯𑀸𑀭𑀩𑀸𑀳𑀢𑁄 𑀔𑀼𑀤𑁆𑀤𑀓𑀲𑁆𑀲 𑀯𑀸𑀢𑀺 𑀬𑀣𑀸 𑀢𑀣𑀸 𑀯𑀸 𑀓𑀢𑀲𑁆𑀲 𑀔𑀼𑀤𑁆𑀤𑀓𑀲𑁆𑀲 𑀲𑀬𑀦𑀺𑀖𑀭𑀲𑁆𑀲. 𑀯𑁂𑀫𑀚𑁆𑀛𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀺𑀲𑀻𑀤𑁂𑀬𑁆𑀬𑀸𑀢𑀺 𑀧𑀺𑀝𑁆𑀞𑀺𑀯𑀁𑀲𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀺𑀲𑀻𑀤𑁂𑀬𑁆𑀬. 𑀔𑀼𑀤𑁆𑀤𑀓𑀁 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁨𑁮𑁦) 𑀦𑀸𑀫 𑀲𑀬𑀦𑀺𑀖𑀭𑀁 𑀯𑀺𑀢𑁆𑀣𑀸𑀭𑀢𑁄 𑀧𑀜𑁆𑀘𑀳𑀢𑁆𑀣𑀧𑁆𑀧𑀫𑀸𑀡𑀁 𑀳𑁄𑀢𑀺, 𑀢𑀲𑁆𑀲 𑀘 𑀫𑀚𑁆𑀛𑀺𑀫𑀝𑁆𑀞𑀸𑀦𑀁 𑀧𑀺𑀝𑁆𑀞𑀲𑀗𑁆𑀖𑀸𑀝𑀢𑁄 𑀅𑀟𑁆𑀠𑀢𑁂𑀬𑁆𑀬𑀳𑀢𑁆𑀣𑀧𑁆𑀧𑀫𑀸𑀡𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀢𑀸𑀤𑀺𑀲𑁂 𑀲𑀬𑀦𑀺𑀖𑀭𑁂 𑀧𑀺𑀝𑁆𑀞𑀲𑀗𑁆𑀖𑀸𑀝𑀢𑁄 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀧𑀺𑀝𑁆𑀞𑀺𑀯𑀁𑀲𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀦𑀸𑀫 𑀳𑁄𑀢𑀺. 𑀏𑀯𑀁 𑀦𑀺𑀲𑀺𑀦𑁆𑀦𑁄 𑀘 𑀯𑁂𑀫𑀚𑁆𑀛𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀦𑀸𑀫 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀧𑀸𑀴𑀺𑀬𑀁 ‘‘𑀧𑀺𑀝𑁆𑀞𑀺𑀯𑀁𑀲𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀺𑀲𑀻𑀤𑀢𑀻’’𑀢𑀺 (𑀧𑀸𑀘𑀺. 𑁨𑁮𑁧). 𑀲𑀘𑀺𑀢𑁆𑀢𑀓𑀜𑁆𑀘𑁂𑀢𑁆𑀣 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀦𑀘𑀺𑀢𑁆𑀢𑁂𑀦 𑀤𑀝𑁆𑀞𑀩𑁆𑀩𑀁.

𑀲𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪-𑁫. 𑀭𑀳𑁄𑀧𑀝𑀺𑀘𑁆𑀙𑀦𑁆𑀦𑀭𑀳𑁄𑀦𑀺𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀘𑀢𑀼𑀢𑁆𑀣𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑁂 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀅𑀦𑀺𑀬𑀢𑀤𑁆𑀯𑀬𑁂 𑀯𑀼𑀢𑁆𑀢𑀫𑁂𑀯𑀸𑀢𑀺 𑀆𑀳 ‘‘𑀲𑁂𑀲𑁄 𑀓𑀣𑀸𑀦𑀬𑁄 𑀅𑀦𑀺𑀬𑀢𑀤𑁆𑀯𑀬𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄’’𑀢𑀺.

𑀭𑀳𑁄𑀧𑀝𑀺𑀘𑁆𑀙𑀦𑁆𑀦𑀭𑀳𑁄𑀦𑀺𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀘𑀸𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬 𑀤𑀲𑁆𑀲𑀦𑀽𑀧𑀘𑀸𑀭𑁂 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸𑀢𑀺 𑀬𑀢𑁆𑀣 𑀞𑀺𑀢𑀲𑁆𑀲 𑀓𑀼𑀮𑀸𑀦𑀺 𑀧𑀬𑀺𑀭𑀼𑀧𑀸𑀲𑀦𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀢𑁄 𑀧𑀝𑁆𑀞𑀸𑀬 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬 𑀤𑀲𑁆𑀲𑀦𑀽𑀧𑀘𑀸𑀭𑁂 𑀪𑀺𑀓𑁆𑀔𑀼𑀁 𑀧𑀲𑁆𑀲𑁂 𑀯𑀸 𑀅𑀪𑀺𑀫𑀼𑀔𑁂 𑀯𑀸 𑀤𑀺𑀲𑁆𑀯𑀸. 𑀧𑀓𑀢𑀺𑀯𑀘𑀦𑁂𑀦𑀸𑀢𑀺 𑀬𑀁 𑀤𑁆𑀯𑀸𑀤𑀲𑀳𑀢𑁆𑀣𑀩𑁆𑀪𑀦𑁆𑀢𑀭𑁂 𑀞𑀺𑀢𑁂𑀦 𑀲𑁄𑀢𑀼𑀁 𑀲𑀓𑁆𑀓𑀸, 𑀢𑀸𑀤𑀺𑀲𑁂𑀦 𑀯𑀘𑀦𑁂𑀦, 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀬𑁂𑀲𑀺𑀢𑁆𑀯𑀸 𑀆𑀭𑁄𑀘𑀦𑀓𑀺𑀘𑁆𑀘𑀁 𑀧𑀦 𑀦𑀢𑁆𑀣𑀺. 𑀬𑁄 𑀳𑀺 𑀏𑀯𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑁄, 𑀲𑁄 𑀅𑀲𑀦𑁆𑀢𑁄𑀬𑁂𑀯. 𑀢𑁂𑀦𑀸𑀳 ‘‘𑀢𑀸𑀤𑀺𑀲’’𑀦𑁆𑀢𑀺𑀆𑀤𑀺. 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸𑀢𑀺 𑀅𑀦𑀸𑀭𑁄𑀘𑁂𑀢𑁆𑀯𑀸.

𑀅𑀦𑁆𑀢𑀭𑀸𑀭𑀸𑀫𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀢𑀺𑀢𑁆𑀣𑀺𑀬𑀲𑁂𑀬𑁆𑀬𑀧𑀝𑀺𑀓𑁆𑀓𑀫𑀦𑀪𑀢𑁆𑀢𑀺𑀬𑀖𑀭𑀸𑀦𑀻𑀢𑀺 𑀏𑀢𑁆𑀣 𑀅𑀦𑁆𑀢𑀭𑀸𑀭𑀸𑀫𑀦𑁆𑀢𑀺 𑀅𑀦𑁆𑀢𑁄𑀕𑀸𑀫𑁂 𑀯𑀺𑀳𑀸𑀭𑁄. 𑀧𑀝𑀺𑀓𑁆𑀓𑀫𑀦𑀦𑁆𑀢𑀺 𑀆𑀲𑀦𑀲𑀸𑀮𑀸. 𑀪𑀢𑁆𑀢𑀺𑀬𑀖𑀭𑀦𑁆𑀢𑀺 𑀦𑀺𑀫𑀦𑁆𑀢𑀺𑀢𑀖𑀭𑀁 𑀯𑀸 𑀲𑀮𑀸𑀓𑀪𑀢𑁆𑀢𑀸𑀤𑀺𑀤𑀸𑀬𑀓𑀸𑀦𑀁 𑀯𑀸 𑀖𑀭𑀁. 𑀆𑀧𑀤𑀸𑀲𑀽𑀢𑀺 𑀚𑀻𑀯𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁂𑀲𑀼. 𑀓𑀺𑀭𑀺𑀬𑀸𑀓𑀺𑀭𑀺𑀬𑀦𑁆𑀢𑀺 𑀏𑀢𑁆𑀣 𑀓𑀼𑀮𑁂𑀲𑀼 𑀘𑀸𑀭𑀺𑀢𑁆𑀢𑀸𑀧𑀚𑁆𑀚𑀦𑀁 𑀓𑀺𑀭𑀺𑀬𑀁, 𑀅𑀦𑀸𑀧𑀼𑀘𑁆𑀙𑀦𑀁 𑀅𑀓𑀺𑀭𑀺𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀘𑀸𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀫𑀳𑀸𑀦𑀸𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀩𑁆𑀩𑀜𑁆𑀘𑁂𑀢𑀁 𑀯𑀢𑁆𑀣𑀼𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 ‘‘𑀅𑀕𑀺𑀮𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀘𑀢𑀼𑀫𑀸𑀲𑀧𑀘𑁆𑀘𑀬𑀧𑀯𑀸𑀭𑀡𑀸 𑀲𑀸𑀤𑀺𑀢𑀩𑁆𑀩𑀸 𑀅𑀜𑁆𑀜𑀢𑁆𑀭 𑀧𑀼𑀦𑀧𑀯𑀸𑀭𑀡𑀸𑀬 𑀅𑀜𑁆𑀜𑀢𑁆𑀭 𑀦𑀺𑀘𑁆𑀘𑀧𑀯𑀸𑀭𑀡𑀸𑀬𑀸’’𑀢𑀺 (𑀧𑀸𑀘𑀺. 𑁩𑁦𑁬) 𑀏𑀢𑀁 𑀲𑀩𑁆𑀩𑀁 𑀲𑀺𑀓𑁆𑀔𑀸𑀧𑀤𑀦𑀺𑀤𑀸𑀦𑀲𑀗𑁆𑀔𑀸𑀢𑀲𑁆𑀲 𑀯𑀢𑁆𑀣𑀼𑀦𑁄 𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀫𑀳𑀸𑀦𑀸𑀫𑁂𑀦 𑀲𑀓𑁆𑀓𑁂𑀦 ‘‘𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀘𑀢𑀼𑀫𑀸𑀲𑀁 𑀪𑁂𑀲𑀚𑁆𑀚𑁂𑀦 𑀧𑀯𑀸𑀭𑁂𑀢𑀼’’𑀦𑁆𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁩𑁦𑁩) 𑀉𑀲𑁆𑀲𑀦𑁆𑀦𑀼𑀲𑁆𑀲𑀦𑁆𑀦𑁂𑀦 𑀘 𑀪𑁂𑀲𑀚𑁆𑀚𑁂𑀦 𑀘𑀢𑀼𑀫𑀸𑀲𑀁 𑀧𑀼𑀦 𑀦𑀺𑀘𑁆𑀘𑀁 𑀧𑀯𑀸𑀭𑀡𑀸 𑀓𑀢𑀸, 𑀢𑀲𑁆𑀫𑀸 𑀪𑀕𑀯𑀢𑀸 𑀢𑀲𑁆𑀲 𑀯𑀲𑁂𑀦 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀜𑁆𑀜𑀢𑁆𑀭 𑀧𑀼𑀦𑀧𑀯𑀸𑀭𑀡𑀸𑀬𑀸𑀢𑀺 𑀬𑀤𑀺 𑀧𑀼𑀦𑀧𑀯𑀸𑀭𑀡𑀸 𑀅𑀢𑁆𑀣𑀺, 𑀢𑀁 𑀞𑀧𑁂𑀢𑁆𑀯𑀸. 𑀅𑀜𑁆𑀜𑀢𑁆𑀭 𑀦𑀺𑀘𑁆𑀘𑀧𑀯𑀸𑀭𑀡𑀸𑀬𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀬𑀤𑀺 𑀧𑀦 𑀢𑀸𑀧𑀺 𑀅𑀢𑁆𑀣𑀺, 𑀲𑀸𑀤𑀺𑀢𑀩𑁆𑀩𑀸𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄’’𑀢𑀺𑀆𑀤𑀺. 𑀢𑀢𑁆𑀣𑀸𑀢𑀺 𑀢𑀺𑀲𑁆𑀲𑀁 𑀧𑀯𑀸𑀭𑀡𑀸𑀬𑀁. 𑀪𑁂𑀲𑀚𑁆𑀚𑁂𑀳𑀺 𑀯𑀸 𑀧𑀭𑀺𑀘𑁆𑀙𑁂𑀤𑁄 𑀓𑀢𑁄 𑀳𑁄𑀢𑀻𑀢𑀺 ‘‘𑀲𑀧𑁆𑀧𑀺 𑀢𑁂𑀮’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀦𑀸𑀫𑀯𑀲𑁂𑀦 𑀯𑀸 ‘‘𑀧𑀢𑁆𑀣𑁂𑀦 𑀦𑀸𑀴𑀺𑀬𑀸 𑀆𑀴𑁆𑀳𑀓𑁂𑀦𑀸’’𑀢𑀺𑀆𑀤𑀺𑀦𑀸 𑀧𑀭𑀺𑀫𑀸𑀡𑀯𑀲𑁂𑀦 𑀯𑀸 ‘‘𑀏𑀢𑁆𑀢𑀓𑀸𑀦𑀺 𑀯𑀸 𑀪𑁂𑀲𑀚𑁆𑀚𑀸𑀦𑀺 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑀸𑀦𑀻’’𑀢𑀺 𑀪𑁂𑀲𑀚𑁆𑀚𑁂𑀳𑀺 𑀧𑀭𑀺𑀘𑁆𑀙𑁂𑀤𑁄 𑀓𑀢𑁄 𑀳𑁄𑀢𑀺. 𑀦𑀪𑁂𑀲𑀚𑁆𑀚𑀓𑀭𑀡𑀻𑀬𑁂𑀢𑀺 𑀫𑀺𑀲𑁆𑀲𑀓𑀪𑀢𑁆𑀢𑁂𑀦𑀸𑀧𑀺 𑀘𑁂 𑀬𑀸𑀧𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀦𑀪𑁂𑀲𑀚𑁆𑀚𑀓𑀭𑀡𑀻𑀬𑀁 𑀦𑀸𑀫 𑀳𑁄𑀢𑀺. 𑀅𑀜𑁆𑀜𑀁 𑀪𑁂𑀲𑀚𑁆𑀚𑀦𑁆𑀢𑀺 𑀲𑀧𑁆𑀧𑀺𑀦𑀸 𑀧𑀯𑀸𑀭𑀺𑀢𑁄 𑀢𑁂𑀮𑀁, 𑀆𑀴𑁆𑀳𑀓𑁂𑀦 𑀧𑀯𑀸𑀭𑀺𑀢𑁄 𑀤𑁄𑀡𑀁.

𑀬𑀣𑀸𑀪𑀽𑀢𑀁 𑀆𑀘𑀺𑀓𑁆𑀔𑀺𑀢𑁆𑀯𑀸𑀢𑀺 ‘‘𑀇𑀫𑁂𑀳𑀺 𑀢𑀬𑀸 𑀪𑁂𑀲𑀚𑁆𑀚𑁂𑀳𑀺 𑀧𑀯𑀸𑀭𑀺𑀢𑀫𑁆𑀳𑀸, 𑀅𑀫𑁆𑀳𑀸𑀓𑀜𑁆𑀘 𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀪𑁂𑀲𑀚𑁆𑀚𑁂𑀦 𑀅𑀢𑁆𑀣𑁄, 𑀬𑀸𑀲𑀼 𑀢𑀬𑀸 𑀭𑀢𑁆𑀢𑀻𑀲𑀼 𑀧𑀯𑀸𑀭𑀺𑀢𑀫𑁆𑀳𑀸, 𑀢𑀸 𑀭𑀢𑁆𑀢𑀺𑀬𑁄 𑀯𑀻𑀢𑀺𑀯𑀢𑁆𑀢𑀸, 𑀅𑀫𑁆𑀳𑀸𑀓𑀜𑁆𑀘 𑀪𑁂𑀲𑀚𑁆𑀚𑁂𑀦 𑀅𑀢𑁆𑀣𑁄’’𑀢𑀺 𑀬𑀣𑀸𑀪𑀽𑀢𑀁 𑀆𑀭𑁄𑀘𑁂𑀢𑁆𑀯𑀸. 𑀏𑀯𑀜𑁆𑀘 𑀯𑀺𑀜𑁆𑀜𑀸𑀧𑁂𑀢𑀼𑀁 𑀕𑀺𑀮𑀸𑀦𑁄𑀯 𑀮𑀪𑀢𑀺, 𑀦 𑀇𑀢𑀭𑁄.

𑀫𑀳𑀸𑀦𑀸𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀉𑀬𑁆𑀬𑀼𑀢𑁆𑀢𑀲𑁂𑀦𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀘𑀢𑀼𑀭𑀗𑁆𑀕𑀺𑀦𑀺𑀦𑁆𑀢𑀺 𑀳𑀢𑁆𑀣𑀺𑀅𑀲𑁆𑀲𑀭𑀣𑀧𑀢𑁆𑀢𑀻𑀢𑀺 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀏𑀢𑀺𑀲𑁆𑀲𑀸𑀢𑀺 𑀘𑀢𑀼𑀭𑀗𑁆𑀕𑀺𑀦𑀻, 𑀢𑀁 𑀘𑀢𑀼𑀭𑀗𑁆𑀕𑀺𑀦𑀺𑀁. ‘‘𑀤𑁆𑀯𑀸𑀤𑀲𑀧𑀼𑀭𑀺𑀲𑁄 𑀳𑀢𑁆𑀣𑀻, 𑀢𑀺𑀧𑀼𑀭𑀺𑀲𑁄 𑀅𑀲𑁆𑀲𑁄, 𑀘𑀢𑀼𑀧𑀼𑀭𑀺𑀲𑁄 𑀭𑀣𑁄, 𑀘𑀢𑁆𑀢𑀸𑀭𑁄 𑀧𑀼𑀭𑀺𑀲𑀸 𑀲𑀭𑀳𑀢𑁆𑀣𑀸 𑀧𑀢𑁆𑀢𑀻’’𑀢𑀺 (𑀧𑀸𑀘𑀺. 𑁩𑁧𑁪) 𑀅𑀬𑀁 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀸 𑀲𑁂𑀦𑀸 𑀦𑀸𑀫, 𑀈𑀤𑀺𑀲𑀁 𑀲𑁂𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀯𑀺𑀚𑀳𑀺𑀢𑁆𑀯𑀸𑀢𑀺 𑀓𑁂𑀦𑀘𑀺 𑀅𑀦𑁆𑀢𑀭𑀺𑀢𑀸 𑀯𑀸 𑀦𑀺𑀦𑁆𑀦𑀁 𑀑𑀭𑀼𑀴𑁆𑀳𑀸 𑀯𑀸 𑀦 𑀤𑀺𑀲𑁆𑀲𑀢𑀺, 𑀇𑀥 𑀞𑀢𑁆𑀯𑀸𑀦 𑀲𑀓𑁆𑀓𑀸 𑀤𑀝𑁆𑀞𑀼𑀦𑁆𑀢𑀺 𑀢𑀁 𑀤𑀲𑁆𑀲𑀦𑀽𑀧𑀘𑀸𑀭𑀁 𑀯𑀺𑀚𑀳𑀺𑀢𑁆𑀯𑀸 𑀅𑀜𑁆𑀜𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸.

𑀲𑁂𑀦𑀸𑀤𑀲𑁆𑀲𑀦𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀲𑁂𑀦𑀁 𑀤𑀲𑁆𑀲𑀦𑀸𑀬 𑀕𑀫𑀦𑀯𑀢𑁆𑀣𑀼𑀲𑁆𑀫𑀺𑀁. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀳𑀢𑁆𑀣𑀺𑀆𑀤𑀻𑀲𑀼 𑀏𑀓𑀫𑁂𑀓𑀦𑁆𑀢𑀺 𑀳𑀢𑁆𑀣𑀺𑀆𑀤𑀻𑀲𑀼 𑀘𑀢𑀽𑀲𑀼 𑀅𑀗𑁆𑀕𑁂𑀲𑀼 𑀏𑀓𑀫𑁂𑀓𑀁, 𑀅𑀦𑁆𑀢𑀫𑀲𑁄 𑀏𑀓𑀧𑀼𑀭𑀺𑀲𑀸𑀭𑀼𑀴𑁆𑀳𑀳𑀢𑁆𑀣𑀺𑀫𑁆𑀧𑀺 𑀏𑀓𑀫𑁆𑀧𑀺 𑀲𑀭𑀳𑀢𑁆𑀣𑀁 𑀧𑀼𑀭𑀺𑀲𑀦𑁆𑀢𑀺 𑀅𑀢𑁆𑀣𑁄. 𑀅𑀦𑀼𑀬𑁆𑀬𑀼𑀢𑁆𑀢𑀸 𑀦𑀸𑀫 𑀭𑀸𑀚𑀸 𑀉𑀬𑁆𑀬𑀸𑀦𑀁 𑀯𑀸 𑀦𑀤𑀺𑀁 𑀯𑀸 𑀕𑀘𑁆𑀙𑀢𑀺, 𑀏𑀯𑀁 𑀅𑀦𑀼𑀬𑁆𑀬𑀼𑀢𑁆𑀢𑀸 𑀳𑁄𑀢𑀺. 𑀢𑀣𑀸𑀭𑀽𑀧𑀧𑁆𑀧𑀘𑁆𑀘𑀬𑁂𑀢𑀺 ‘‘𑀫𑀸𑀢𑀼𑀮𑁄 𑀲𑁂𑀦𑀸𑀬 𑀕𑀺𑀮𑀸𑀦𑁄 𑀳𑁄𑀢𑀻’’𑀢𑀺𑀆𑀤𑀺𑀓𑁂 (𑀧𑀸𑀘𑀺. 𑁩𑁧𑁨) 𑀅𑀦𑀼𑀭𑀽𑀧𑀓𑀸𑀭𑀡𑁂 𑀲𑀢𑀺. 𑀆𑀧𑀤𑀸𑀲𑀽𑀢𑀺 𑀚𑀻𑀯𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁂𑀲𑀼 ‘‘𑀏𑀢𑁆𑀣 𑀕𑀢𑁄 𑀫𑀼𑀘𑁆𑀘𑀺𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀢𑁄 𑀅𑀦𑀸𑀧𑀢𑁆𑀢𑀺.

𑀉𑀬𑁆𑀬𑀼𑀢𑁆𑀢𑀲𑁂𑀦𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀲𑁂𑀦𑀸𑀯𑀸𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀝𑀺𑀲𑁂𑀦𑀸𑀭𑀼𑀤𑁆𑀥𑀸𑀬𑀸𑀢𑀺 𑀬𑀣𑀸 𑀲𑀜𑁆𑀘𑀸𑀭𑁄 𑀙𑀺𑀚𑁆𑀚𑀢𑀺, 𑀏𑀯𑀁 𑀧𑀝𑀺𑀲𑁂𑀦𑀸𑀬 𑀭𑀼𑀤𑁆𑀥𑀸𑀬 𑀲𑁂𑀦𑀸𑀬. 𑀓𑁂𑀦𑀘𑀺 𑀧𑀮𑀺𑀩𑀼𑀤𑁆𑀥𑀲𑁆𑀲𑀸𑀢𑀺 𑀯𑁂𑀭𑀺𑀓𑁂𑀦 𑀯𑀸 𑀇𑀲𑁆𑀲𑀭𑁂𑀦 𑀯𑀸 𑀓𑁂𑀦𑀘𑀺 𑀭𑀼𑀤𑁆𑀥𑀲𑁆𑀲.

𑀲𑁂𑀦𑀸𑀯𑀸𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀉𑀬𑁆𑀬𑁄𑀥𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀫𑁆𑀧𑀳𑀸𑀭𑀝𑁆𑀞𑀸𑀦𑀲𑁆𑀲𑀸𑀢𑀺 𑀬𑀼𑀤𑁆𑀥𑀪𑀽𑀫𑀺𑀬𑀸. 𑀩𑀮𑀲𑁆𑀲 𑀅𑀕𑁆𑀕𑀁 𑀚𑀸𑀦𑀦𑁆𑀢𑀻𑀢𑀺 ‘‘𑀏𑀢𑁆𑀢𑀓𑀸 𑀳𑀢𑁆𑀣𑀻, 𑀏𑀢𑁆𑀢𑀓𑀸 𑀅𑀲𑁆𑀲𑀸, 𑀏𑀢𑁆𑀢𑀓𑀸 𑀭𑀣𑀸, 𑀏𑀢𑁆𑀢𑀓𑀸 𑀧𑀢𑁆𑀢𑀻’’𑀢𑀺 (𑀧𑀸𑀘𑀺. 𑁩𑁨𑁪) 𑀩𑀮𑀲𑁆𑀲 𑀓𑁄𑀝𑁆𑀞𑀸𑀲𑀁 𑀚𑀸𑀦𑀦𑁆𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀺𑀳𑀸𑀭𑀕𑁆𑀕𑁂𑀦𑀸’’𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑁩𑁧𑁮) 𑀯𑀺𑀬 𑀓𑁄𑀝𑁆𑀞𑀸𑀲𑀢𑁆𑀣𑁄 𑀳𑁂𑀢𑁆𑀣 𑀅𑀕𑁆𑀕𑀲𑀤𑁆𑀤𑁄. 𑀢𑁂𑀦𑀸𑀳 ‘‘𑀩𑀮𑀕𑀡𑀦𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀲𑁂𑀦𑀸𑀬 𑀯𑀺𑀬𑀽𑀳𑀦𑁆𑀢𑀺 ‘‘𑀇𑀢𑁄 𑀳𑀢𑁆𑀣𑀻 𑀳𑁄𑀦𑁆𑀢𑀼, 𑀇𑀢𑁄 𑀅𑀲𑁆𑀲𑀸 𑀳𑁄𑀦𑁆𑀢𑀼, 𑀇𑀢𑁄 𑀭𑀣𑀸 𑀳𑁄𑀦𑁆𑀢𑀼, 𑀇𑀢𑁄 𑀧𑀢𑁆𑀢𑀻 𑀳𑁄𑀦𑁆𑀢𑀽’’𑀢𑀺 (𑀧𑀸𑀘𑀺. 𑁩𑁨𑁪) 𑀲𑁂𑀦𑀸𑀬 𑀞𑀧𑀦𑀁, 𑀭𑀸𑀲𑀺𑀁 𑀓𑀢𑁆𑀯𑀸 𑀞𑀧𑀦𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀲𑁂𑀦𑀸𑀲𑀦𑁆𑀦𑀺𑀯𑁂𑀲𑀲𑁆𑀲𑁂𑀢𑀁 𑀦𑀸𑀫’’𑀦𑁆𑀢𑀺. 𑀤𑁆𑀯𑀸𑀤𑀲𑀧𑀼𑀭𑀺𑀲𑁄 𑀳𑀢𑁆𑀣𑀻𑀢𑀺 𑀘𑀢𑁆𑀢𑀸𑀭𑁄 𑀆𑀭𑁄𑀳𑀓𑀸, 𑀏𑀓𑁂𑀓𑀧𑀸𑀤𑀭𑀓𑁆𑀔𑀓𑀸 𑀤𑁆𑀯𑁂 𑀤𑁆𑀯𑁂𑀢𑀺 𑀏𑀯𑀁 𑀤𑁆𑀯𑀸𑀤𑀲𑀧𑀼𑀭𑀺𑀲𑁄 𑀳𑀢𑁆𑀣𑀻. 𑀢𑀺𑀧𑀼𑀭𑀺𑀲𑁄 𑀅𑀲𑁆𑀲𑁄𑀢𑀺 𑀏𑀓𑁄 𑀆𑀭𑁄𑀳𑀓𑁄, 𑀤𑁆𑀯𑁂 𑀧𑀸𑀤𑀭𑀓𑁆𑀔𑀓𑀸𑀢𑀺 𑀏𑀯𑀁 𑀢𑀺𑀧𑀼𑀭𑀺𑀲𑁄 𑀅𑀲𑁆𑀲𑁄. 𑀘𑀢𑀼𑀧𑀼𑀭𑀺𑀲𑁄 𑀭𑀣𑁄𑀢𑀺 𑀏𑀓𑁄 𑀲𑀸𑀭𑀣𑀺, 𑀏𑀓𑁄 𑀬𑁄𑀥𑁄, 𑀤𑁆𑀯𑁂 𑀆𑀡𑀺𑀭𑀓𑁆𑀔𑀓𑀸𑀢𑀺 𑀏𑀯𑀁 𑀘𑀢𑀼𑀧𑀼𑀭𑀺𑀲𑁄 𑀭𑀣𑁄𑀢𑀺.

𑀉𑀬𑁆𑀬𑁄𑀥𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀘𑁂𑀮𑀓𑀯𑀕𑁆𑀕𑁄 𑀧𑀜𑁆𑀘𑀫𑁄.