𑁪. 𑀪𑁄𑀚𑀦𑀯𑀕𑁆𑀕𑁄

𑁧. 𑀆𑀯𑀲𑀣𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀅𑀕𑀺𑀮𑀸𑀦𑁄’’𑀢𑀺 𑀏𑀢𑁆𑀣 𑀅𑀦𑁆𑀢𑀫𑀲𑁄 𑀤𑁆𑀯𑀺𑀕𑀸𑀯𑀼𑀢𑀁 𑀕𑀦𑁆𑀢𑀼𑀁 𑀲𑀫𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀅𑀤𑁆𑀥𑀬𑁄𑀚𑀦𑀫𑁆𑀧𑀺 𑀕𑀦𑁆𑀢𑀼𑀁 𑀲𑀫𑀢𑁆𑀣𑁂𑀦𑀸’’𑀢𑀺. 𑀆𑀯𑀲𑀣𑀧𑀺𑀡𑁆𑀟𑁄𑀢𑀺 𑀆𑀯𑀲𑀣𑁂 𑀧𑀺𑀡𑁆𑀟𑁄, 𑀲𑀸𑀮𑀸𑀤𑀻𑀲𑀼 𑀅𑀦𑁄𑀤𑀺𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀜𑁆𑀜𑀢𑁆𑀢𑀁 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑀁 𑀪𑁄𑀚𑀦𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀇𑀫𑁂𑀲𑀁 𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀇𑀫𑁂𑀲𑀁 𑀯𑀸𑀢𑀺 𑀇𑀫𑁂𑀲𑀁 𑀧𑀸𑀲𑀡𑁆𑀟𑀸𑀦𑀁 𑀯𑀸. 𑀏𑀢𑁆𑀢𑀓𑀸𑀦𑀁 𑀯𑀸𑀢𑀺 𑀇𑀫𑀲𑁆𑀫𑀺𑀁 𑀧𑀸𑀲𑀡𑁆𑀟𑁂 𑀏𑀢𑁆𑀢𑀓𑀸𑀦𑀁 𑀧𑀸𑀲𑀡𑁆𑀟𑀸𑀦𑀁 𑀯𑀸. 𑀧𑀸𑀲𑀡𑁆𑀟𑀦𑁆𑀢𑀺 𑀙𑀦𑁆𑀦𑀯𑀼𑀢𑀺𑀯𑀺𑀥𑀁 𑀲𑀫𑀡𑀧𑀭𑀺𑀩𑁆𑀩𑀸𑀚𑀓𑀸𑀤𑀺𑀁. 𑀢𑁂 𑀳𑀺 𑀢𑀡𑁆𑀳𑀸𑀧𑀸𑀲𑀜𑁆𑀘𑁂𑀯 𑀤𑀺𑀝𑁆𑀞𑀺𑀧𑀸𑀲𑀜𑁆𑀘 𑀟𑁂𑀦𑁆𑀢𑀺 𑀑𑀟𑁆𑀟𑁂𑀦𑁆𑀢𑀻𑀢𑀺 𑀧𑀸𑀲𑀡𑁆𑀟𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀦𑁄𑀤𑀺𑀲𑁆𑀲𑀸𑀢𑀺 𑀅𑀦𑀼𑀤𑁆𑀤𑀺𑀲𑀺𑀢𑁆𑀯𑀸, 𑀅𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀸𑀮𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 𑀲𑀸𑀮𑀸𑀭𑀼𑀓𑁆𑀔𑀫𑀽𑀮𑀅𑀩𑁆𑀪𑁄𑀓𑀸𑀲𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀸𑀦𑁂𑀲𑀼. 𑀏𑀓𑀤𑀺𑀯𑀲𑀫𑁂𑀯 𑀪𑀼𑀜𑁆𑀚𑀺𑀢𑀩𑁆𑀩𑁄𑀢𑀺 𑀏𑀓𑀤𑀺𑀯𑀲𑀁 𑀲𑀓𑀺𑀁𑀬𑁂𑀯 𑀪𑀼𑀜𑁆𑀚𑀺𑀢𑀩𑁆𑀩𑁄, 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀧𑀼𑀦𑀧𑁆𑀧𑀼𑀦𑀁 𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀤𑀼𑀢𑀺𑀬𑀤𑀺𑀯𑀲𑀢𑁄 𑀧𑀝𑁆𑀞𑀸𑀬𑀸𑀢𑀺 𑀪𑀼𑀢𑁆𑀢𑀤𑀺𑀯𑀲𑀲𑁆𑀲 𑀤𑀼𑀢𑀺𑀬𑀤𑀺𑀯𑀲𑀢𑁄 𑀧𑀝𑁆𑀞𑀸𑀬. 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀆𑀮𑁄𑀧𑁂 𑀆𑀮𑁄𑀧𑁂 𑀓𑀩𑀴𑁂 𑀓𑀩𑀴𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀦𑀸𑀦𑀸𑀓𑀼𑀮𑁂𑀳𑀺 (𑀧𑀸𑀘𑀺. 𑀅𑀝𑁆𑀞. 𑁨𑁦𑁬) 𑀧𑀦 𑀦𑀸𑀦𑀸𑀝𑁆𑀞𑀸𑀦𑁂𑀲𑀼 𑀧𑀜𑁆𑀜𑀢𑁆𑀢𑀁, 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀏𑀓𑀤𑀺𑀯𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀅𑀜𑁆𑀜𑀢𑁆𑀣 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, 𑀧𑀝𑀺𑀧𑀸𑀝𑀺𑀁 𑀧𑀦 𑀔𑁂𑀧𑁂𑀢𑁆𑀯𑀸 𑀧𑀼𑀦 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀏𑀓𑀧𑀽𑀕𑀦𑀸𑀦𑀸𑀧𑀽𑀕𑀏𑀓𑀕𑀸𑀫𑀦𑀸𑀦𑀸𑀕𑀸𑀫𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑁄𑀧𑀺 𑀏𑀓𑀓𑀼𑀮𑀲𑁆𑀲 𑀯𑀸 𑀦𑀸𑀦𑀸𑀓𑀼𑀮𑀸𑀦𑀁 𑀯𑀸 𑀏𑀓𑀢𑁄 𑀧𑀜𑁆𑀜𑀢𑁆𑀢𑁄 𑀢𑀡𑁆𑀟𑀼𑀮𑀸𑀤𑀻𑀦𑀁 𑀅𑀪𑀸𑀯𑁂𑀦 𑀅𑀦𑁆𑀢𑀭𑀦𑁆𑀢𑀭𑀸 𑀙𑀺𑀚𑁆𑀚𑀢𑀺, 𑀲𑁄𑀧𑀺 𑀦 𑀪𑀼𑀜𑁆𑀚𑀺𑀢𑀩𑁆𑀩𑁄. 𑀲𑀘𑁂 𑀧𑀦 ‘‘𑀦 𑀲𑀓𑁆𑀓𑁄𑀫 𑀤𑀸𑀢𑀼’’𑀦𑁆𑀢𑀺 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀼𑀦 𑀓𑀮𑁆𑀬𑀸𑀡𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀤𑀸𑀢𑀼𑀁 𑀆𑀭𑀪𑀦𑁆𑀢𑀺, 𑀏𑀢𑀁 𑀧𑀼𑀦 𑀏𑀓𑀤𑀺𑀯𑀲𑀁 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺.

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀕𑀺𑀮𑀸𑀦𑁂 𑀅𑀕𑀺𑀮𑀸𑀦𑀲𑀜𑁆𑀜𑀺𑀯𑁂𑀫𑀢𑀺𑀓𑀕𑀺𑀮𑀸𑀦𑀲𑀜𑁆𑀜𑀻𑀦𑀁 𑀯𑀲𑁂𑀦 𑀢𑀻𑀡𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀕𑀺𑀮𑀸𑀦𑀲𑁆𑀲 𑀕𑀺𑀮𑀸𑀦𑀲𑀜𑁆𑀜𑀺𑀦𑁄𑀢𑀺 𑀕𑀺𑀮𑀸𑀦𑀲𑁆𑀲 𑀧𑀦 ‘‘𑀕𑀺𑀮𑀸𑀦𑁄 𑀅𑀳’’𑀦𑁆𑀢𑀺 𑀲𑀜𑁆𑀜𑀺𑀦𑁄 𑀅𑀦𑀼𑀯𑀲𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀲𑀓𑀺𑀁 𑀪𑀼𑀜𑁆𑀚𑀢𑀻𑀢𑀺 𑀏𑀓𑀤𑀺𑀯𑀲𑀁 𑀪𑀼𑀜𑁆𑀚𑀢𑀺. ‘‘𑀕𑀘𑁆𑀙𑀦𑁆𑀢𑁄 𑀯𑀸’’𑀢𑀺 𑀇𑀤𑀁 𑀅𑀤𑁆𑀥𑀬𑁄𑀚𑀦𑀯𑀲𑁂𑀦 𑀕𑀳𑁂𑀢𑀩𑁆𑀩𑀁, 𑀢𑀣𑀸 ‘‘𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑁄’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁨𑁦𑁮) 𑀇𑀤𑀫𑁆𑀧𑀻𑀢𑀺 𑀯𑀤𑀦𑁆𑀢𑀺. 𑀓𑁂𑀦𑀘𑀺 𑀉𑀧𑀤𑁆𑀤𑀯𑁂𑀦𑀸𑀢𑀺 𑀦𑀤𑀺𑀧𑀽𑀭𑀘𑁄𑀭𑀪𑀬𑀸𑀤𑀺𑀦𑀸 𑀓𑁂𑀦𑀘𑀺 𑀉𑀧𑀤𑁆𑀤𑀯𑁂𑀦. 𑀅𑀜𑁆𑀜𑀦𑁆𑀢𑀺 𑀬𑀸𑀕𑀼𑀔𑀚𑁆𑀚𑀓𑀨𑀮𑀸𑀨𑀮𑀸𑀤𑀺𑀪𑁂𑀤𑀁 𑀬𑀁 𑀓𑀺𑀜𑁆𑀘𑀺 𑀅𑀜𑁆𑀜𑀁. 𑀅𑀦𑀼𑀯𑀲𑀺𑀢𑁆𑀯𑀸𑀢𑀺 𑀧𑀼𑀦 𑀯𑀲𑀺𑀢𑁆𑀯𑀸.

𑀆𑀯𑀲𑀣𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀕𑀡𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀕𑀡𑀪𑁄𑀚𑀦𑁂𑀢𑀺 𑀕𑀡𑁂𑀦 𑀮𑀤𑁆𑀥𑀢𑁆𑀢𑀸 𑀕𑀡𑀲𑁆𑀲 𑀲𑀦𑁆𑀢𑀓𑁂 𑀪𑁄𑀚𑀦𑁂. 𑀢𑁂𑀦𑀸𑀳 ‘‘𑀕𑀡𑀲𑁆𑀲 𑀪𑁄𑀚𑀦𑁂’’𑀢𑀺. 𑀦𑀦𑀼 𑀘𑁂𑀢𑁆𑀣 ‘‘𑀕𑀡𑀲𑁆𑀲 𑀪𑁄𑀚𑀦𑁂’’𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀘 𑀔𑁄 𑀕𑀡𑁄 ‘‘𑀓𑀢𑁆𑀣𑀘𑀺 𑀤𑁆𑀯𑀻𑀳𑀺, 𑀓𑀢𑁆𑀣𑀘𑀺 𑀢𑀻𑀳𑀻’’𑀢𑀺𑀆𑀤𑀺𑀦𑀸 𑀅𑀦𑁂𑀓𑀥𑀸 𑀅𑀥𑀺𑀧𑁆𑀧𑁂𑀢𑁄, 𑀇𑀥 𑀓𑀢𑀺𑀳𑀻𑀢𑀺 𑀆𑀳 ‘‘𑀇𑀥 𑀘𑀸’’𑀢𑀺𑀆𑀤𑀺. 𑀢𑀁 𑀧𑀦𑁂𑀢𑀁 𑀕𑀡𑀪𑁄𑀚𑀦𑀁 𑀤𑁆𑀯𑀻𑀳𑀺 𑀧𑀓𑀸𑀭𑁂𑀳𑀺 𑀧𑀲𑀯𑀢𑀺 𑀦𑀺𑀫𑀦𑁆𑀢𑀦𑀢𑁄 𑀯𑀸 𑀯𑀺𑀜𑁆𑀜𑀢𑁆𑀢𑀺𑀢𑁄 𑀯𑀸𑀢𑀺 𑀆𑀳 ‘‘𑀢𑁂𑀲𑀁 𑀦𑀺𑀫𑀦𑁆𑀢𑀦𑀢𑁄 𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀦𑀺𑀫𑀦𑁆𑀢𑀦𑀢𑁄 𑀯𑀸𑀢𑀺 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑀢𑁄 𑀯𑀸. 𑀑𑀤𑀦𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀦𑁆𑀢𑀺 𑀑𑀤𑀦𑀲𑀢𑁆𑀢𑀼𑀓𑀼𑀫𑁆𑀫𑀸𑀲𑀫𑀘𑁆𑀙𑀫𑀁𑀲𑀸𑀦𑀁 𑀧𑀜𑁆𑀘𑀦𑁆𑀦𑀁.

‘‘𑀑𑀤𑀦𑁂𑀦 𑀦𑀺𑀫𑀦𑁆𑀢𑁂𑀫𑀺, 𑀑𑀤𑀦𑀁 𑀫𑁂 𑀕𑀡𑁆𑀳𑀣𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑁂𑀦 𑀓𑁂𑀦𑀘𑀺 𑀯𑁂𑀯𑀘𑀦𑁂𑀦 𑀯𑀸 𑀪𑀸𑀲𑀦𑁆𑀢𑀭𑁂𑀦 𑀯𑀸 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀦𑀺𑀫𑀦𑁆𑀢𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀢𑁆𑀢𑀸𑀭𑁄𑀢𑀺 𑀏𑀓𑀝𑁆𑀞𑀸𑀦𑁂 𑀯𑀸 𑀦𑀸𑀦𑀸𑀝𑁆𑀞𑀸𑀦𑁂𑀲𑀼 𑀯𑀸 𑀞𑀺𑀢𑁂 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽. 𑀮𑀓𑁆𑀔𑀡𑀯𑀘𑀦𑀜𑁆𑀘𑁂𑀢𑀁, 𑀢𑀲𑁆𑀫𑀸 𑀘𑀢𑁆𑀢𑀸𑀭𑁄 𑀯𑀸 𑀢𑀢𑁄 𑀯𑀸 𑀅𑀥𑀺𑀓𑁂 𑀪𑀺𑀓𑁆𑀔𑀽𑀢𑀺 𑀅𑀢𑁆𑀣𑁄. 𑀯𑁂𑀯𑀘𑀦𑁂𑀦 𑀯𑀸𑀢𑀺 𑀪𑀢𑁆𑀢𑀅𑀦𑁆𑀦𑀸𑀤𑀺𑀧𑀭𑀺𑀬𑀸𑀬𑀲𑀤𑁆𑀤𑁂𑀦 𑀯𑀸. 𑀪𑀸𑀲𑀦𑁆𑀢𑀭𑁂𑀦 𑀯𑀸𑀢𑀺 𑀅𑀦𑁆𑀥𑀤𑀫𑀺𑀴𑀸𑀤𑀺𑀪𑀸𑀲𑀦𑁆𑀢𑀭𑁂𑀦 𑀯𑀸. 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀦𑀸𑀫𑀁 𑀕𑀳𑁂𑀢𑁆𑀯𑀸𑀢𑀺 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑀲𑁆𑀲 𑀦𑀸𑀫𑀁 𑀕𑀳𑁂𑀢𑁆𑀯𑀸. 𑀑𑀤𑀦𑁂𑀦 𑀦𑀺𑀫𑀦𑁆𑀢𑁂𑀫𑀻𑀢𑀺 𑀢𑀼𑀫𑁆𑀳𑁂 𑀪𑀦𑁆𑀢𑁂 𑀑𑀤𑀦𑁂𑀦 𑀦𑀺𑀫𑀦𑁆𑀢𑁂𑀫𑀺. 𑀆𑀤𑀺𑀲𑀤𑁆𑀤𑁂𑀦 ‘‘𑀆𑀓𑀗𑁆𑀔𑀣 𑀑𑀮𑁄𑀓𑁂𑀣 𑀅𑀥𑀺𑀯𑀸𑀲𑁂𑀣 𑀧𑀝𑀺𑀫𑀸𑀦𑁂𑀣, 𑀲𑀢𑁆𑀢𑀼𑀦𑀸 𑀦𑀺𑀫𑀦𑁆𑀢𑁂𑀫𑀺, 𑀲𑀢𑁆𑀢𑀼𑀁 𑀫𑁂 𑀕𑀡𑁆𑀳𑀣 𑀆𑀓𑀗𑁆𑀔𑀣 𑀑𑀮𑁄𑀓𑁂𑀣 𑀅𑀥𑀺𑀯𑀸𑀲𑁂𑀣 𑀧𑀝𑀺𑀫𑀸𑀦𑁂𑀣𑀸’’𑀢𑀺𑀆𑀤𑀻𑀦𑀁 (𑀧𑀸𑀘𑀺. 𑀅𑀝𑁆𑀞. 𑁨𑁧𑁭-𑁨𑁧𑁮) 𑀕𑀳𑀡𑀁. 𑀏𑀓𑀢𑁄 𑀯𑀸𑀢𑀺 𑀏𑀓𑀢𑁆𑀣 𑀞𑀺𑀢𑁂 𑀯𑀸 𑀦𑀺𑀲𑀺𑀦𑁆𑀦𑁂 𑀯𑀸 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 ‘‘𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀑𑀤𑀦𑁂𑀦 𑀦𑀺𑀫𑀦𑁆𑀢𑁂𑀫𑀻’’𑀢𑀺𑀆𑀤𑀺𑀦𑀸 𑀏𑀯𑀁 𑀏𑀓𑀢𑁄 𑀦𑀺𑀫𑀦𑁆𑀢𑀺𑀢𑀸. 𑀦𑀸𑀦𑀸𑀢𑁄 𑀯𑀸 𑀦𑀺𑀫𑀦𑁆𑀢𑀺𑀢𑀸𑀢𑀺 𑀘𑀢𑁆𑀢𑀸𑀭𑀺 𑀧𑀭𑀺𑀯𑁂𑀡𑀸𑀦𑀺 𑀯𑀸 𑀯𑀺𑀳𑀸𑀭𑁂 𑀯𑀸 𑀕𑀦𑁆𑀢𑁆𑀯𑀸 𑀦𑀸𑀦𑀸𑀢𑁄 𑀯𑀸 𑀦𑀺𑀫𑀦𑁆𑀢𑀺𑀢𑀸. 𑀏𑀓𑀝𑁆𑀞𑀸𑀦𑁂 𑀞𑀺𑀢𑁂𑀲𑀼𑀬𑁂𑀯 𑀯𑀸 𑀏𑀓𑁄 𑀧𑀼𑀢𑁆𑀢𑁂𑀦, 𑀏𑀓𑁄 𑀧𑀺𑀢𑀭𑀸𑀢𑀺 𑀏𑀯𑀫𑁆𑀧𑀺 𑀦𑀺𑀫𑀦𑁆𑀢𑀺𑀢𑀸 𑀦𑀸𑀦𑀸𑀢𑁄𑀬𑁂𑀯 𑀦𑀺𑀫𑀦𑁆𑀢𑀺𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀏𑀓𑀢𑁄 𑀕𑀡𑁆𑀳𑀦𑁆𑀢𑀺𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀤𑁆𑀯𑀸𑀤𑀲𑀳𑀢𑁆𑀣𑀽𑀧𑀘𑀸𑀭𑁂 𑀞𑀺𑀢𑀸 𑀕𑀡𑁆𑀳𑀦𑁆𑀢𑀺.

𑀓𑀲𑁆𑀫𑀸 𑀧𑀦 𑀦𑀸𑀦𑀸𑀢𑁄 𑀪𑀼𑀢𑁆𑀢𑁂𑀧𑀺 𑀕𑀡𑀪𑁄𑀚𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀧𑀝𑀺𑀕𑁆𑀕𑀳𑀡𑀫𑁂𑀯 𑀳𑁂𑀢𑁆𑀣 𑀧𑀫𑀸𑀡’’𑀦𑁆𑀢𑀺. 𑀬𑀤𑀺 𑀏𑀯𑀁 𑀅𑀣 𑀓𑀲𑁆𑀫𑀸 𑀧𑀸𑀴𑀺𑀬𑀁 ‘‘𑀕𑀡𑀪𑁄𑀚𑀦𑀁 𑀦𑀸𑀫 𑀬𑀢𑁆𑀣 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑁂𑀦 𑀪𑁄𑀚𑀦𑁂𑀦 𑀦𑀺𑀫𑀦𑁆𑀢𑀺𑀢𑀸 𑀪𑀼𑀜𑁆𑀚𑀦𑁆𑀢𑀺, 𑀏𑀢𑀁 𑀕𑀡𑀪𑁄𑀚𑀦𑀁 𑀦𑀸𑀫𑀸’’𑀢𑀺 (𑀧𑀸𑀘𑀺. 𑁨𑁧𑁮) 𑀯𑀼𑀢𑁆𑀢𑀁? 𑀢𑀁 𑀧𑀝𑀺𑀕𑁆𑀕𑀳𑀡𑀦𑀺𑀬𑀫𑀦𑀢𑁆𑀣𑀫𑁂𑀯. 𑀦 𑀳𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀁 𑀪𑀺𑀓𑁆𑀔𑀽 𑀪𑀼𑀜𑁆𑀚𑀦𑁆𑀢𑀻𑀢𑀺 ‘‘𑀪𑀼𑀜𑁆𑀚𑀦𑁆𑀢𑀻’’𑀢𑀺 𑀧𑀤𑀁 𑀧𑀝𑀺𑀕𑁆𑀕𑀳𑀡𑀦𑀺𑀬𑀫𑀯𑀘𑀦𑀁 𑀳𑁄𑀢𑀺. 𑀏𑀓𑀢𑁄 𑀯𑀸 𑀦𑀸𑀦𑀸𑀢𑁄 𑀯𑀸 𑀯𑀺𑀜𑁆𑀜𑀸𑀧𑁂𑀢𑁆𑀯𑀸𑀢𑀺 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀏𑀓𑀢𑁄 𑀞𑀺𑀢𑀸 𑀯𑀸 𑀦𑀺𑀲𑀺𑀦𑁆𑀦𑀸 𑀯𑀸 𑀉𑀧𑀸𑀲𑀓𑀁 𑀤𑀺𑀲𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀘𑀢𑀼𑀦𑁆𑀦𑀫𑁆𑀧𑀺 𑀪𑀢𑁆𑀢𑀁 𑀤𑁂𑀳𑀻’’𑀢𑀺 𑀯𑀸 𑀧𑀸𑀝𑁂𑀓𑁆𑀓𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀫𑀬𑁆𑀳𑀁 𑀪𑀢𑁆𑀢𑀁 𑀤𑁂𑀳𑀺, 𑀫𑀬𑁆𑀳𑀁 𑀪𑀢𑁆𑀢𑀁 𑀤𑁂𑀳𑀻’’𑀢𑀺 𑀯𑀸 𑀏𑀓𑀢𑁄 𑀯𑀸 𑀦𑀸𑀦𑀸𑀢𑁄 𑀯𑀸 𑀯𑀺𑀜𑁆𑀜𑀸𑀧𑁂𑀢𑁆𑀯𑀸. 𑀢𑀲𑁆𑀲 𑀤𑀼𑀯𑀺𑀥𑀲𑁆𑀲𑀸𑀧𑀻𑀢𑀺 𑀬𑀜𑁆𑀘 𑀦𑀺𑀫𑀦𑁆𑀢𑀦𑀢𑁄 𑀮𑀤𑁆𑀥𑀁 𑀕𑀡𑀪𑁄𑀚𑀦𑀁, 𑀬𑀜𑁆𑀘 𑀯𑀺𑀜𑁆𑀜𑀢𑁆𑀢𑀺𑀢𑁄 𑀮𑀤𑁆𑀥𑀁, 𑀢𑀲𑁆𑀲 𑀤𑀼𑀯𑀺𑀥𑀲𑁆𑀲𑀸𑀧𑀺 𑀕𑀡𑀪𑁄𑀚𑀦𑀲𑁆𑀲. 𑀏𑀯𑀁 𑀧𑀝𑀺𑀕𑁆𑀕𑀳𑀡𑁂𑀢𑀺 𑀏𑀓𑀢𑁄 𑀧𑀝𑀺𑀕𑁆𑀕𑀳𑀡𑁂.

𑀧𑀸𑀤𑀸𑀦𑀫𑁆𑀧𑀺 𑀨𑀮𑀺𑀢𑀢𑁆𑀢𑀸𑀢𑀺 (𑀧𑀸𑀘𑀺. 𑀅𑀝𑁆𑀞. 𑁨𑁧𑁭-𑁨𑁧𑁮) 𑀅𑀦𑁆𑀢𑀫𑀲𑁄 𑀧𑀸𑀤𑀸𑀦𑀫𑁆𑀧𑀺 𑀬𑀣𑀸 𑀫𑀳𑀸𑀘𑀫𑁆𑀫𑀲𑁆𑀲 𑀧𑀭𑀢𑁄 𑀫𑀁𑀲𑀁 𑀤𑀺𑀲𑁆𑀲𑀢𑀺, 𑀏𑀯𑀁 𑀨𑀮𑀺𑀢𑀢𑁆𑀢𑀸. 𑀦 𑀲𑀓𑁆𑀓𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀦𑁆𑀢𑀺 𑀯𑀸𑀮𑀺𑀓𑀸𑀬 𑀯𑀸 𑀲𑀓𑁆𑀔𑀭𑀸𑀬 𑀯𑀸 𑀨𑀼𑀝𑁆𑀞𑀫𑀢𑁆𑀢𑁂 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀢𑁄 𑀅𑀦𑁆𑀢𑁄𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀘𑀻𑀯𑀭𑁂 𑀓𑀭𑀺𑀬𑀫𑀸𑀦𑁂𑀢𑀺 𑀲𑀸𑀝𑀓𑀜𑁆𑀘 𑀲𑀼𑀢𑁆𑀢𑀜𑁆𑀘 𑀮𑀪𑀺𑀢𑁆𑀯𑀸 𑀘𑀻𑀯𑀭𑁂 𑀓𑀭𑀺𑀬𑀫𑀸𑀦𑁂. 𑀬𑀁 𑀓𑀺𑀜𑁆𑀘𑀺 𑀘𑀻𑀯𑀭𑁂 𑀓𑀢𑁆𑀢𑀩𑁆𑀩𑀓𑀫𑁆𑀫𑀦𑁆𑀢𑀺 𑀘𑀻𑀯𑀭𑀯𑀺𑀘𑀸𑀭𑀡𑀙𑀺𑀦𑁆𑀤𑀦𑀫𑁄𑀖𑀲𑀼𑀢𑁆𑀢𑀸𑀭𑁄𑀧𑀦𑀸𑀤𑀺 𑀬𑀁 𑀓𑀺𑀜𑁆𑀘𑀺 𑀘𑀻𑀯𑀭𑁂 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁, 𑀅𑀦𑁆𑀢𑀫𑀲𑁄 𑀲𑀽𑀘𑀺𑀯𑁂𑀥𑀦𑀫𑁆𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀤𑁆𑀥𑀬𑁄𑀚𑀦𑀫𑁆𑀧𑀻’’𑀢𑀺𑀆𑀤𑀺 𑀅𑀯𑀓𑀁𑀲𑀢𑁄 𑀯𑀼𑀢𑁆𑀢𑀁. 𑀬𑁄 𑀧𑀦 𑀤𑀽𑀭𑀁 𑀕𑀦𑁆𑀢𑀼𑀓𑀸𑀫𑁄, 𑀢𑀢𑁆𑀣 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀕𑀘𑁆𑀙𑀦𑁆𑀢𑁄 𑀅𑀤𑁆𑀥𑀬𑁄𑀚𑀦𑀩𑁆𑀪𑀦𑁆𑀢𑀭𑁂 𑀕𑀸𑀯𑀼𑀢𑁂𑀧𑀺 𑀪𑀼𑀜𑁆𑀚𑀺𑀢𑀼𑀁 𑀮𑀪𑀢𑀺, 𑀕𑀢𑁄 𑀧𑀦 𑀏𑀓𑀤𑀺𑀯𑀲𑀁. 𑀬𑀤𑀸 𑀦𑀸𑀯𑀁 𑀅𑀪𑀺𑀭𑀼𑀳𑀺𑀢𑀼𑀓𑀸𑀫𑁄 𑀯𑀸 𑀳𑁄𑀢𑀺 𑀆𑀭𑀼𑀴𑁆𑀳𑁄 𑀯𑀸 𑀑𑀭𑀼𑀴𑁆𑀳𑁄 𑀯𑀸, 𑀅𑀬𑀁 𑀦𑀸𑀯𑀸𑀪𑀺𑀭𑀼𑀳𑀦𑀲𑀫𑀬𑁄 𑀦𑀸𑀫𑀸𑀢𑀺 𑀆𑀳 ‘‘𑀦𑀸𑀯𑀸𑀪𑀺𑀭𑀼𑀳𑀦𑀲𑀫𑀬𑁂𑀧𑀺 𑀏𑀲𑁂𑀯 𑀦𑀬𑁄’’𑀢𑀺. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀅𑀪𑀺𑀭𑀼𑀴𑁆𑀳𑁂𑀦 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸𑀧𑀺 𑀬𑀸𑀯 𑀦 𑀑𑀭𑁄𑀳𑀢𑀺, 𑀢𑀸𑀯 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽𑀢𑀺 𑀅𑀦𑁆𑀢𑀺𑀫𑀧𑀭𑀺𑀘𑁆𑀙𑁂𑀤𑁄. 𑀬𑀢𑁆𑀣 𑀧𑀦 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀲𑀦𑁆𑀦𑀺𑀧𑀢𑀺𑀢𑀁, 𑀢𑀢𑁆𑀣 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀢𑀲𑁆𑀫𑀸 𑀢𑀸𑀤𑀺𑀲𑁂 𑀓𑀸𑀮𑁂 ‘‘𑀫𑀳𑀸𑀲𑀫𑀬𑁄’’𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀬𑁄 𑀓𑁄𑀘𑀺 𑀧𑀩𑁆𑀩𑀚𑀺𑀢𑁄𑀢𑀺 𑀲𑀳𑀥𑀫𑁆𑀫𑀺𑀓𑁂𑀲𑀼 𑀯𑀸 𑀢𑀺𑀢𑁆𑀣𑀺𑀬𑁂𑀲𑀼 𑀯𑀸 𑀅𑀜𑁆𑀜𑀢𑀭𑁄.

𑀬𑁂 𑀘 𑀤𑁆𑀯𑁂 𑀢𑀬𑁄 𑀏𑀓𑀢𑁄 𑀕𑀡𑁆𑀳𑀦𑁆𑀢𑀻𑀢𑀺 𑀬𑁂𑀧𑀺 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑀁 𑀲𑀸𑀤𑀺𑀬𑀺𑀢𑁆𑀯𑀸 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀏𑀓𑀢𑁄 𑀕𑀡𑁆𑀳𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀅𑀦𑀸𑀧𑀢𑁆𑀢𑀺. 𑀧𑀡𑀻𑀢𑀪𑁄𑀚𑀦𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀻𑀳𑀺 𑀧𑀦 𑀆𑀧𑀢𑁆𑀢𑀺𑀬𑁂𑀯𑀸𑀢𑀺 𑀯𑀤𑀦𑁆𑀢𑀺, 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁. 𑀦𑀺𑀘𑁆𑀘𑀪𑀢𑁆𑀢𑀸𑀤𑀻𑀲𑀽𑀢𑀺 𑀦𑀺𑀘𑁆𑀘𑀪𑀢𑁆𑀢𑁂 𑀲𑀮𑀸𑀓𑀪𑀢𑁆𑀢𑁂 𑀧𑀓𑁆𑀔𑀺𑀓𑁂 𑀉𑀧𑁄𑀲𑀣𑀺𑀓𑁂 𑀧𑀸𑀝𑀺𑀧𑀤𑀺𑀓𑁂. 𑀢𑀢𑁆𑀣 𑀦𑀺𑀘𑁆𑀘𑀪𑀢𑁆𑀢𑀦𑁆𑀢𑀺 𑀥𑀼𑀯𑀪𑀢𑁆𑀢𑀁 𑀯𑀼𑀘𑁆𑀘𑀢𑀺. ‘‘𑀦𑀺𑀘𑁆𑀘𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀦𑁆𑀢𑀺, 𑀩𑀳𑀽𑀦𑀫𑁆𑀧𑀺 𑀏𑀓𑀢𑁄 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀮𑀸𑀓𑀪𑀢𑁆𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀕𑀡𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀭𑀫𑁆𑀧𑀭𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀕𑀡𑀪𑁄𑀚𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀑𑀤𑀦𑁂𑀦 𑀦𑀺𑀫𑀦𑁆𑀢𑁂𑀫𑀺, 𑀑𑀤𑀦𑀁 𑀫𑁂 𑀕𑀡𑁆𑀳𑀣𑀸’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑀅𑀝𑁆𑀞. 𑁨𑁧𑁭-𑁨𑁧𑁮) 𑀦𑀬𑁂𑀦 𑀬𑁂𑀦 𑀓𑁂𑀦𑀘𑀺 𑀯𑁂𑀯𑀘𑀦𑁂𑀦 𑀯𑀸 𑀪𑀸𑀲𑀦𑁆𑀢𑀭𑁂𑀦 𑀯𑀸 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑀲𑁆𑀲 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀦𑀺𑀫𑀦𑁆𑀢𑁂𑀢𑀻𑀢𑀺 𑀯𑀼𑀢𑁆𑀢𑁂𑀦𑁂𑀯 𑀦𑀬𑁂𑀦. 𑀦𑀺𑀫𑀦𑁆𑀢𑀺𑀢𑀲𑁆𑀲𑀸𑀢𑀺 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑁂𑀦 𑀦𑀺𑀫𑀦𑁆𑀢𑀺𑀢𑀲𑁆𑀲. 𑀅𑀯𑀺𑀓𑀧𑁆𑀧𑁂𑀢𑁆𑀯𑀸𑀢𑀺 𑀲𑀫𑁆𑀫𑀼𑀔𑀸𑀲𑀫𑁆𑀫𑀼𑀔𑀯𑀲𑁂𑀦 𑀅𑀯𑀺𑀓𑀧𑁆𑀧𑁂𑀢𑁆𑀯𑀸, 𑀅𑀧𑀭𑀺𑀘𑁆𑀘𑀚𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀳𑀺 𑀪𑀢𑁆𑀢𑀯𑀺𑀓𑀧𑁆𑀧𑀦𑀸 𑀦𑀸𑀫 𑀲𑀫𑁆𑀫𑀼𑀔𑀸𑀧𑀭𑀫𑁆𑀫𑀼𑀔𑀸𑀧𑀺 𑀯𑀝𑁆𑀝𑀢𑀺. 𑀢𑁂𑀦𑀸𑀳 ‘‘𑀬𑁄 𑀪𑀺𑀓𑁆𑀔𑀼 𑀧𑀜𑁆𑀘𑀲𑀼 𑀲𑀳𑀥𑀫𑁆𑀫𑀺𑀓𑁂𑀲𑀽’’𑀢𑀺𑀆𑀤𑀺.

𑀅𑀜𑁆𑀜𑀢𑁆𑀭 𑀦𑀺𑀫𑀦𑁆𑀢𑀦𑀪𑁄𑀚𑀦𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀅𑀜𑁆𑀜𑀢𑁆𑀭 𑀧𑀞𑀫𑀁 𑀦𑀺𑀫𑀦𑁆𑀢𑀺𑀢𑀸 𑀳𑀼𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀦𑀺𑀫𑀦𑁆𑀢𑀦𑁂 𑀪𑀼𑀜𑁆𑀚𑀦𑀯𑀢𑁆𑀣𑀼𑀲𑁆𑀫𑀺𑀁. 𑀬𑀤𑀺 𑀢𑀺𑀯𑀺𑀥𑀸 𑀅𑀦𑀼𑀧𑀜𑁆𑀜𑀢𑁆𑀢𑀺, 𑀅𑀣 𑀓𑀲𑁆𑀫𑀸 𑀧𑀭𑀺𑀯𑀸𑀭𑁂 ‘‘𑀘𑀢𑀲𑁆𑀲𑁄 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀧𑀭𑀺𑀯𑀸𑀭𑁂 𑀧𑀦𑀸’’𑀢𑀺𑀆𑀤𑀺. 𑀯𑀺𑀓𑀧𑁆𑀧𑀦𑀫𑁆𑀧𑀺 𑀕𑀳𑁂𑀢𑁆𑀯𑀸𑀢𑀺 𑀯𑀺𑀓𑀧𑁆𑀧𑀦𑀸𑀦𑀼𑀚𑀸𑀦𑀦𑀫𑁆𑀧𑀺 𑀅𑀦𑀼𑀧𑀜𑁆𑀜𑀢𑁆𑀢𑀺𑀲𑀫𑀸𑀦𑀦𑁆𑀢𑀺 𑀅𑀦𑀼𑀧𑀜𑁆𑀜𑀢𑁆𑀢𑀺𑀪𑀸𑀯𑁂𑀦 𑀕𑀳𑁂𑀢𑁆𑀯𑀸. 𑀏𑀓𑀲𑀁𑀲𑀝𑁆𑀞𑀸𑀦𑀻𑀢𑀺 𑀏𑀓𑀲𑁆𑀫𑀺𑀁 𑀫𑀺𑀲𑁆𑀲𑀺𑀢𑀸𑀦𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 (𑀧𑀸𑀘𑀺. 𑀅𑀝𑁆𑀞. 𑁨𑁨𑁯) 𑁋 𑀤𑁆𑀯𑁂 𑀢𑀻𑀡𑀺 𑀓𑀼𑀮𑀸𑀦𑀺 𑀦𑀺𑀫𑀦𑁆𑀢𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀆𑀳𑀭𑀺𑀢𑁆𑀯𑀸 𑀪𑀢𑁆𑀢𑀁 𑀆𑀓𑀺𑀭𑀦𑁆𑀢𑀺, 𑀲𑀽𑀧𑀩𑁆𑀬𑀜𑁆𑀚𑀦𑀁 𑀆𑀓𑀺𑀭𑀦𑁆𑀢𑀺, 𑀏𑀓𑀫𑀺𑀲𑁆𑀲𑀓𑀁 𑀳𑁄𑀢𑀺, 𑀏𑀢𑁆𑀣 𑀅𑀦𑀸𑀧𑀢𑁆𑀢𑀻𑀢𑀺. 𑀲𑀘𑁂 𑀧𑀦 𑀫𑀽𑀮𑀦𑀺𑀫𑀦𑁆𑀢𑀦𑀁 𑀳𑁂𑀝𑁆𑀞𑀸 𑀳𑁄𑀢𑀺, 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀉𑀧𑀭𑀺, 𑀢𑀁 𑀉𑀧𑀭𑀺𑀢𑁄 𑀧𑀝𑁆𑀞𑀸𑀬 𑀪𑀼𑀜𑁆𑀚𑀦𑁆𑀢𑀲𑁆𑀲 𑀆𑀧𑀢𑁆𑀢𑀺. 𑀳𑀢𑁆𑀣𑀁 𑀧𑀦 𑀅𑀦𑁆𑀢𑁄 𑀧𑀯𑁂𑀲𑁂𑀢𑁆𑀯𑀸 𑀧𑀞𑀫𑀦𑀺𑀫𑀦𑁆𑀢𑀦𑀢𑁄 𑀏𑀓𑀫𑁆𑀧𑀺 𑀓𑀩𑀴𑀁 𑀉𑀤𑁆𑀥𑀭𑀺𑀢𑁆𑀯𑀸 𑀪𑀼𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀣𑀸 𑀢𑀣𑀸 𑀯𑀸 𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀤𑁆𑀯𑁂 𑀢𑀻𑀡𑀺 𑀦𑀺𑀫𑀦𑁆𑀢𑀦𑀸𑀦𑀺 𑀏𑀓𑀢𑁄 𑀯𑀸 𑀓𑀢𑁆𑀯𑀸 𑀪𑀼𑀜𑁆𑀚𑀢𑀻𑀢𑀺 𑀤𑁆𑀯𑁂 𑀢𑀻𑀡𑀺 𑀦𑀺𑀫𑀦𑁆𑀢𑀦𑀸𑀦𑀺 𑀏𑀓𑀢𑁄 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀺𑀲𑁆𑀲𑁂𑀢𑁆𑀯𑀸 𑀏𑀓𑀁 𑀓𑀢𑁆𑀯𑀸 𑀪𑀼𑀜𑁆𑀚𑀢𑀻𑀢𑀺 𑀅𑀢𑁆𑀣𑁄. ‘‘𑀲𑀓𑀮𑁂𑀦 𑀕𑀸𑀫𑁂𑀦 𑀯𑀸’’𑀢𑀺𑀆𑀤𑀻𑀲𑀼 𑀲𑀓𑀮𑁂𑀦 𑀕𑀸𑀫𑁂𑀦 𑀏𑀓𑀢𑁄 𑀳𑀼𑀢𑁆𑀯𑀸 𑀦𑀺𑀫𑀦𑁆𑀢𑀺𑀢𑀲𑁆𑀲𑁂𑀯 𑀬𑀢𑁆𑀣 𑀓𑀢𑁆𑀣𑀘𑀺 𑀪𑀼𑀜𑁆𑀚𑀢𑁄 𑀅𑀦𑀸𑀧𑀢𑁆𑀢𑀺. 𑀧𑀽𑀕𑁂𑀧𑀺 𑀏𑀲𑁂𑀯 𑀦𑀬𑁄. 𑀦𑀺𑀫𑀦𑁆𑀢𑀺𑀬𑀫𑀸𑀦𑁄 𑀯𑀸 ‘‘𑀪𑀺𑀓𑁆𑀔𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀻𑀢𑀺 ‘‘𑀪𑀢𑁆𑀢𑀁 𑀕𑀡𑁆𑀳𑀸’’𑀢𑀺 𑀦𑀺𑀫𑀦𑁆𑀢𑀺𑀬𑀫𑀸𑀦𑁄 ‘‘𑀦 𑀫𑀬𑁆𑀳𑀁 𑀢𑀯 𑀪𑀢𑁆𑀢𑁂𑀦 𑀅𑀢𑁆𑀣𑁄, 𑀪𑀺𑀓𑁆𑀔𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀪𑀡𑀢𑀺. 𑀓𑀺𑀭𑀺𑀬𑀸𑀓𑀺𑀭𑀺𑀬𑀦𑁆𑀢𑀺 𑀏𑀢𑁆𑀣 𑀪𑁄𑀚𑀦𑀁 𑀓𑀺𑀭𑀺𑀬𑀁, 𑀅𑀯𑀺𑀓𑀧𑁆𑀧𑀦𑀁 𑀅𑀓𑀺𑀭𑀺𑀬𑀁.

𑀧𑀭𑀫𑁆𑀧𑀭𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀓𑀸𑀡𑀫𑀸𑀢𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀳𑁂𑀡𑀓𑀢𑁆𑀣𑀸𑀬𑀸𑀢𑀺 𑀧𑀡𑁆𑀡𑀸𑀓𑀸𑀭𑀢𑁆𑀣𑀸𑀬. 𑀧𑀸𑀣𑁂𑀬𑁆𑀬𑀢𑁆𑀣𑀸𑀬𑀸𑀢𑀺 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀸𑀦𑀁 𑀅𑀦𑁆𑀢𑀭𑀸𑀫𑀕𑁆𑀕𑀢𑁆𑀣𑀸𑀬. 𑀲𑀢𑁆𑀢𑀽𑀢𑀺 𑀩𑀤𑁆𑀥𑀲𑀢𑁆𑀢𑀼, 𑀅𑀩𑀤𑁆𑀥𑀲𑀢𑁆𑀢𑀼 𑀘. 𑀤𑁆𑀯𑀢𑁆𑀢𑀺𑀧𑀢𑁆𑀢𑀧𑀽𑀭𑁂 𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀫𑀼𑀔𑀯𑀝𑁆𑀝𑀺𑀬𑀸 𑀳𑁂𑀝𑁆𑀞𑀺𑀫𑀮𑁂𑀔𑀸𑀬 𑀲𑀫𑀁 𑀧𑀽𑀭𑁂 𑀤𑁆𑀯𑀢𑁆𑀢𑀺𑀧𑀢𑁆𑀢𑀧𑀽𑀭𑁂 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀲 𑀘𑀢𑁆𑀣𑀲𑁆𑀲 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀸𑀓𑀝𑀢𑁆𑀢𑀸 𑀢𑀢𑁆𑀣 𑀓𑀢𑁆𑀢𑀩𑁆𑀩𑀧𑁆𑀧𑀓𑀸𑀭𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀲𑁂𑀲𑀦𑁆𑀢𑀺 𑀢𑀢𑁄 𑀏𑀓𑀧𑀢𑁆𑀢𑀢𑁄 𑀅𑀜𑁆𑀜𑀁 𑀧𑀢𑁆𑀢𑀁. 𑀲𑀘𑁂 𑀢𑀬𑁄 𑀧𑀢𑁆𑀢𑀧𑀽𑀭𑀸 𑀕𑀳𑀺𑀢𑀸 𑀤𑁆𑀯𑁂, 𑀲𑀘𑁂 𑀤𑁆𑀯𑁂 𑀕𑀳𑀺𑀢𑀸, 𑀏𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀕𑀫𑀦𑁂 𑀯𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁂𑀢𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 𑀉𑀧𑀤𑁆𑀤𑀯𑀁 𑀤𑀺𑀲𑁆𑀯𑀸, 𑀅𑀦𑀢𑁆𑀣𑀺𑀓𑀢𑀸𑀬 𑀯𑀸 ‘‘𑀫𑀬𑀁 𑀇𑀤𑀸𑀦𑀺 𑀦 𑀧𑁂𑀲𑀺𑀲𑁆𑀲𑀸𑀫 𑀦 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀏𑀯𑀁 𑀕𑀫𑀦𑁂 𑀉𑀧𑀘𑁆𑀙𑀺𑀦𑁆𑀦𑁂 𑀤𑁂𑀦𑁆𑀢𑀸𑀦𑀦𑁆𑀢𑀺 𑀅𑀢𑁆𑀣𑁄.

𑀓𑀸𑀡𑀫𑀸𑀢𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀞𑀫𑀧𑀯𑀸𑀭𑀡𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀪𑀼𑀢𑁆𑀢𑀯𑀸𑀢𑀺 𑀓𑀢𑀪𑀢𑁆𑀢𑀓𑀺𑀘𑁆𑀘𑁄. 𑀲𑀸𑀲𑀧𑀫𑀢𑁆𑀢𑀫𑁆𑀧𑀺 𑀅𑀚𑁆𑀛𑁄𑀳𑀭𑀺𑀢𑀦𑁆𑀢𑀺 𑀏𑀯𑀁 𑀧𑀭𑀺𑀢𑁆𑀢𑀫𑁆𑀧𑀺 𑀪𑁄𑀚𑀦𑀁 𑀲𑀗𑁆𑀔𑀸𑀤𑀺𑀢𑁆𑀯𑀸 𑀯𑀸 𑀅𑀲𑀗𑁆𑀔𑀸𑀤𑀺𑀢𑁆𑀯𑀸 𑀯𑀸 𑀕𑀺𑀮𑀺𑀢𑀁. 𑀧𑀯𑀸𑀭𑀺𑀢𑁄𑀢𑀺 𑀧𑀝𑀺𑀓𑁆𑀔𑁂𑀧𑀺𑀢𑁄. 𑀬𑁄 𑀳𑀺 𑀪𑀼𑀜𑁆𑀚𑀦𑁆𑀢𑁄 𑀧𑀭𑀺𑀯𑁂𑀲𑀓𑁂𑀦 𑀉𑀧𑀦𑀻𑀢𑀁 𑀪𑁄𑀚𑀦𑀁 𑀅𑀦𑀺𑀘𑁆𑀙𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺, 𑀲𑁄 𑀢𑁂𑀦 𑀧𑀯𑀸𑀭𑀺𑀢𑁄 𑀧𑀝𑀺𑀓𑁆𑀔𑀺𑀧𑀺𑀢𑁄 𑀦𑀸𑀫 𑀳𑁄𑀢𑀺. 𑀩𑁆𑀬𑀜𑁆𑀚𑀦𑀁 𑀧𑀦 𑀅𑀦𑀸𑀤𑀺𑀬𑀺𑀢𑁆𑀯𑀸 𑀅𑀢𑁆𑀣𑀫𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀓𑀢𑀧𑁆𑀧𑀯𑀸𑀭𑀡𑁄 𑀓𑀢𑀧𑁆𑀧𑀝𑀺𑀓𑁆𑀔𑁂𑀧𑁄𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀲𑁄𑀧𑀺 𑀘 𑀧𑀝𑀺𑀓𑁆𑀔𑁂𑀧𑁄 𑀬𑀲𑁆𑀫𑀸 𑀦 𑀧𑀝𑀺𑀓𑁆𑀔𑁂𑀧𑀫𑀢𑁆𑀢𑁂𑀦, 𑀅𑀣 𑀔𑁄 𑀧𑀜𑁆𑀘𑀗𑁆𑀕𑀯𑀲𑁂𑀦. 𑀢𑁂𑀦𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀅𑀲𑀦𑀁 𑀧𑀜𑁆𑀜𑀸𑀬𑀢𑀻’’𑀢𑀺𑀆𑀤𑀺 (𑀧𑀸𑀘𑀺. 𑁨𑁩𑁯) 𑀯𑀼𑀢𑁆𑀢𑀁.

𑀪𑁄𑀚𑀦𑀁 𑀧𑀜𑁆𑀜𑀸𑀬𑀢𑀻𑀢𑀺 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑀁 𑀧𑀢𑁆𑀢𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑁂𑀦𑀸𑀳 ‘‘𑀧𑀯𑀸𑀭𑀡𑀧𑁆𑀧𑀳𑁄𑀦𑀓𑀁 𑀘𑁂 𑀪𑁄𑀚𑀦’’𑀦𑁆𑀢𑀺𑀆𑀤𑀺. 𑀲𑀸𑀮𑀻𑀢𑀺 (𑀧𑀸𑀘𑀺. 𑀅𑀝𑁆𑀞. 𑁨𑁩𑁮-𑁨𑁩𑁯) 𑀅𑀦𑁆𑀢𑀫𑀲𑁄 𑀦𑀻𑀯𑀸𑀭𑀁 𑀉𑀧𑀸𑀤𑀸𑀬 𑀲𑀩𑁆𑀩𑀸𑀧𑀺 𑀲𑀸𑀮𑀺𑀚𑀸𑀢𑀺. 𑀯𑀻𑀳𑀻𑀢𑀺 𑀲𑀩𑁆𑀩𑀸𑀧𑀺 𑀯𑀻𑀳𑀺𑀚𑀸𑀢𑀺. 𑀬𑀯𑀕𑁄𑀥𑀼𑀫𑁂𑀲𑀼 𑀪𑁂𑀤𑁄 𑀦𑀢𑁆𑀣𑀺. 𑀓𑀗𑁆𑀕𑀽𑀢𑀺 𑀲𑁂𑀢𑀭𑀢𑁆𑀢𑀓𑀸𑀴𑀪𑁂𑀤𑀸 𑀲𑀩𑁆𑀩𑀸𑀧𑀺 𑀓𑀗𑁆𑀕𑀼𑀚𑀸𑀢𑀺. 𑀯𑀭𑀓𑁄𑀢𑀺 𑀅𑀦𑁆𑀢𑀫𑀲𑁄 𑀯𑀭𑀓𑀘𑁄𑀭𑀓𑀁 𑀉𑀧𑀸𑀤𑀸𑀬 𑀲𑀩𑁆𑀩𑀸𑀧𑀺 𑀲𑁂𑀢𑀯𑀡𑁆𑀡𑀸 𑀯𑀭𑀓𑀚𑀸𑀢𑀺. 𑀓𑀼𑀤𑁆𑀭𑀽𑀲𑀓𑁄𑀢𑀺 𑀓𑀸𑀴𑀓𑁄𑀤𑁆𑀭𑀯𑁄 𑀘𑁂𑀯 𑀲𑀸𑀫𑀸𑀓𑀸𑀤𑀺𑀪𑁂𑀤𑀸 𑀘 𑀲𑀩𑁆𑀩𑀸𑀧𑀺 𑀢𑀺𑀡𑀥𑀜𑁆𑀜𑀚𑀸𑀢𑀺.

𑀦𑀻𑀯𑀸𑀭𑀯𑀭𑀓𑀘𑁄𑀭𑀓𑀸 𑀘𑁂𑀢𑁆𑀣 ‘‘𑀥𑀜𑁆𑀜𑀸𑀦𑀼𑀮𑁄𑀫𑀸’’𑀢𑀺 𑀯𑀤𑀦𑁆𑀢𑀺. 𑀬𑀸𑀕𑀼𑀦𑁆𑀢𑀺 𑀅𑀫𑁆𑀩𑀺𑀮𑀬𑀸𑀕𑀼𑀔𑀻𑀭𑀬𑀸𑀕𑀼𑀆𑀤𑀺𑀪𑁂𑀤𑀁 𑀬𑀁 𑀓𑀺𑀜𑁆𑀘𑀺 𑀬𑀸𑀕𑀼𑀁. 𑀇𑀫𑀺𑀦𑀸𑀯 𑀧𑀸𑀬𑀸𑀲𑀲𑁆𑀲𑀸𑀧𑀺 𑀕𑀳𑀺𑀢𑀢𑁆𑀢𑀸 ‘‘𑀅𑀫𑁆𑀩𑀺𑀮𑀧𑀸𑀬𑀸𑀲𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀧𑀘𑀸𑀫𑀸𑀢𑀺 𑀯𑀸’’𑀢𑀺 𑀦 𑀯𑀼𑀢𑁆𑀢𑀁. 𑀧𑀯𑀸𑀭𑀡𑀁 𑀚𑀦𑁂𑀢𑀻𑀢𑀺 𑀅𑀦𑀢𑀺𑀭𑀺𑀢𑁆𑀢𑀪𑁄𑀚𑀦𑀸𑀧𑀢𑁆𑀢𑀺𑀦𑀺𑀩𑀦𑁆𑀥𑀦𑀁 𑀧𑀝𑀺𑀓𑁆𑀔𑁂𑀧𑀁 𑀲𑀸𑀥𑁂𑀢𑀺. 𑀲𑀘𑁂 𑀧𑀦 𑀑𑀥𑀺 𑀦 𑀧𑀜𑁆𑀜𑀸𑀬𑀢𑀺, 𑀬𑀸𑀕𑀼𑀲𑀗𑁆𑀕𑀳𑀁 𑀕𑀘𑁆𑀙𑀢𑀺, 𑀧𑀯𑀸𑀭𑀡𑀁 𑀦 𑀚𑀦𑁂𑀢𑀺. 𑀧𑀼𑀦 𑀧𑀯𑀸𑀭𑀡𑀁 𑀚𑀦𑁂𑀢𑀺 𑀖𑀦𑀪𑀸𑀯𑀕𑀫𑀦𑀢𑁄 𑀧𑀝𑁆𑀞𑀸𑀬 𑀪𑁄𑀚𑀦𑀲𑀗𑁆𑀕𑀳𑀺𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀉𑀤𑀓𑀓𑀜𑁆𑀚𑀺𑀓𑀔𑀻𑀭𑀸𑀤𑀻𑀦𑀺 𑀆𑀓𑀺𑀭𑀺𑀢𑁆𑀯𑀸𑀢𑀺 𑀉𑀤𑀓𑀜𑁆𑀘𑁂𑀯 𑀓𑀜𑁆𑀚𑀺𑀓𑀜𑁆𑀘 𑀔𑀻𑀭𑀸𑀤𑀻𑀦𑀺 𑀘 𑀆𑀓𑀺𑀭𑀺𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀫𑀤𑁆𑀤𑀺𑀢𑁆𑀯𑀸 𑀪𑀢𑁆𑀢𑀫𑀺𑀲𑁆𑀲𑀓𑁂 𑀓𑀢𑁆𑀯𑀸. 𑀢𑁂𑀦𑀸𑀳 ‘‘𑀬𑀸𑀕𑀼𑀁 𑀕𑀡𑁆𑀳𑀣𑀸’’𑀢𑀺𑀆𑀤𑀺. 𑀲𑀘𑁂 𑀧𑀦 𑀪𑀢𑁆𑀢𑁂 𑀉𑀤𑀓𑀓𑀜𑁆𑀚𑀺𑀓𑀔𑀻𑀭𑀸𑀤𑀻𑀦𑀺 𑀆𑀓𑀺𑀭𑀺𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸 ‘‘𑀬𑀸𑀕𑀼𑀁 𑀕𑀡𑁆𑀳𑀣𑀸’’𑀢𑀺 𑀤𑁂𑀦𑁆𑀢𑀺, 𑀧𑀯𑀸𑀭𑀡𑀸 𑀦 𑀳𑁄𑀢𑀺. 𑀬𑀸𑀕𑀼𑀬𑀸𑀧𑀻𑀢𑀺 𑀏𑀯𑀁 𑀬𑀸𑀕𑀼𑀲𑀗𑁆𑀕𑀳𑀁 𑀕𑀢𑀸𑀬 𑀯𑀸 𑀅𑀜𑁆𑀜𑀸𑀬 𑀯𑀸 𑀬𑀸𑀕𑀼𑀬𑀸𑀧𑀺. 𑀲𑀼𑀤𑁆𑀥𑀭𑀲𑀓𑁄, 𑀧𑀦 𑀭𑀲𑀓𑀬𑀸𑀕𑀼 𑀯𑀸 𑀦 𑀚𑀦𑁂𑀢𑀺.

𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑀯𑀲𑁂𑀦 𑀯𑀺𑀧𑁆𑀧𑀓𑀢𑀪𑁄𑀚𑀦𑀪𑀸𑀯𑀲𑁆𑀲 𑀉𑀧𑀘𑁆𑀙𑀺𑀦𑁆𑀦𑀢𑁆𑀢𑀸 ‘‘𑀤𑁆𑀯𑁂𑀧𑀺 𑀔𑀸𑀤𑀺𑀢𑀸𑀦𑀺 𑀳𑁄𑀦𑁆𑀢𑀺…𑀧𑁂… 𑀦 𑀧𑀯𑀸𑀭𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀓𑀧𑁆𑀧𑀺𑀬𑀫𑀁𑀲𑀁 (𑀧𑀸𑀘𑀺. 𑀅𑀝𑁆𑀞. 𑁨𑁩𑁮-𑁨𑁩𑁯), 𑀅𑀓𑀧𑁆𑀧𑀺𑀬𑀪𑁄𑀚𑀦𑀜𑁆𑀘 𑀩𑀼𑀤𑁆𑀥𑀧𑀝𑀺𑀓𑀼𑀝𑁆𑀞𑀁 𑀧𑀝𑀺𑀓𑁆𑀔𑀺𑀧𑀢𑁄 𑀧𑀯𑀸𑀭𑀡𑀸𑀬 𑀅𑀯𑀢𑁆𑀣𑀼𑀢𑀸𑀬 𑀦 𑀧𑀯𑀸𑀭𑀡𑀸 𑀳𑁄𑀢𑀻𑀢𑀺 𑀆𑀳 ‘‘𑀬𑁄 𑀧𑀦𑀸’’𑀢𑀺𑀆𑀤𑀺. 𑀬𑀜𑁆𑀳𑀺 𑀪𑀺𑀓𑁆𑀔𑀼𑀦𑁄 𑀔𑀸𑀤𑀺𑀢𑀼𑀁 𑀯𑀝𑁆𑀝𑀢𑀺, 𑀢𑀁 𑀏𑀯 𑀧𑀝𑀺𑀓𑁆𑀔𑀺𑀧𑀢𑁄 𑀧𑀯𑀸𑀭𑀡𑀸 𑀳𑁄𑀢𑀺. 𑀇𑀤𑀁 𑀧𑀦 𑀚𑀸𑀦𑀦𑁆𑀢𑁄 𑀅𑀓𑀧𑁆𑀧𑀺𑀬𑀢𑁆𑀢𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀚𑀸𑀦𑀦𑁆𑀢𑁄𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀝𑁆𑀞𑀸𑀦𑁂 𑀞𑀺𑀢𑀫𑁂𑀯 𑀧𑀝𑀺𑀓𑁆𑀔𑀺𑀧𑀢𑀺 𑀦𑀸𑀫, 𑀢𑀲𑁆𑀫𑀸 𑀦 𑀧𑀯𑀸𑀭𑁂𑀢𑀺. 𑀲𑀘𑁂 𑀧𑀦 𑀅𑀓𑀧𑁆𑀧𑀺𑀬𑀫𑀁𑀲𑀁 𑀔𑀸𑀤𑀦𑁆𑀢𑁄 𑀓𑀧𑁆𑀧𑀺𑀬𑀫𑀁𑀲𑀁 𑀯𑀸 𑀪𑁄𑀚𑀦𑀁 𑀯𑀸 𑀧𑀝𑀺𑀓𑁆𑀔𑀺𑀧𑀢𑀺, 𑀧𑀯𑀸𑀭𑁂𑀢𑀺. 𑀓𑀲𑁆𑀫𑀸? 𑀯𑀢𑁆𑀣𑀼𑀢𑀸𑀬. 𑀬𑀜𑁆𑀳𑀺 𑀢𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀁 𑀧𑀯𑀸𑀭𑀡𑀸𑀬 𑀯𑀢𑁆𑀣𑀼. 𑀬𑀁 𑀧𑀦 𑀔𑀸𑀤𑀢𑀺, 𑀢𑀁 𑀓𑀺𑀜𑁆𑀘𑀸𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀝𑁆𑀞𑀸𑀦𑁂 𑀞𑀺𑀢𑀁, 𑀔𑀸𑀤𑀺𑀬𑀫𑀸𑀦𑀁 𑀧𑀦 𑀫𑀁𑀲𑀪𑀸𑀯𑀁 𑀦 𑀚𑀳𑀢𑀺, 𑀢𑀲𑁆𑀫𑀸 𑀧𑀯𑀸𑀭𑁂𑀢𑀺. 𑀓𑁄 𑀧𑀦 𑀯𑀸𑀤𑁄 𑀓𑀧𑁆𑀧𑀺𑀬𑀫𑀁𑀲𑀁 𑀔𑀸𑀤𑀢𑁄 𑀓𑀧𑁆𑀧𑀺𑀬𑀫𑀁𑀲𑀪𑁄𑀚𑀦𑀧𑁆𑀧𑀝𑀺𑀓𑁆𑀔𑁂𑀧𑁂. 𑀏𑀲 𑀦𑀬𑁄 𑀅𑀓𑀧𑁆𑀧𑀺𑀬𑀪𑁄𑀚𑀦𑀁 𑀔𑀸𑀤𑀢𑁄 𑀓𑀧𑁆𑀧𑀺𑀬𑀪𑁄𑀚𑀦𑀧𑁆𑀧𑀝𑀺𑀓𑁆𑀔𑁂𑀧𑁂.

𑀪𑁄𑀚𑀦𑁂 𑀲𑀢𑀻𑀢𑀺 𑀧𑀜𑁆𑀘𑀲𑀼 𑀪𑁄𑀚𑀦𑁂𑀲𑀼 𑀏𑀓𑀲𑁆𑀫𑀺𑀫𑁆𑀧𑀺 𑀪𑁄𑀚𑀦𑁂 𑀲𑀢𑀺. 𑀅𑀜𑁆𑀜𑀁 𑀯𑀼𑀢𑁆𑀢𑀮𑀓𑁆𑀔𑀡𑀁 𑀪𑁄𑀚𑀦𑀦𑁆𑀢𑀺 𑀧𑀢𑁆𑀢𑀸𑀤𑀺𑀕𑀢𑀢𑁄 𑀅𑀜𑁆𑀜𑀁 𑀯𑀼𑀢𑁆𑀢𑀮𑀓𑁆𑀔𑀡𑀁 𑀧𑀜𑁆𑀘𑀲𑀼 𑀪𑁄𑀚𑀦𑁂𑀲𑀼 𑀏𑀓𑀫𑁆𑀧𑀺 𑀪𑁄𑀚𑀦𑀁. ‘‘𑀦𑀺𑀭𑀧𑁂𑀓𑁆𑀔𑁄 𑀳𑁄𑀢𑀻’’𑀢𑀺 𑀏𑀢𑀲𑁆𑀲𑁂𑀯 𑀯𑀺𑀯𑀭𑀡𑀁 ‘‘𑀬𑀁 𑀧𑀢𑁆𑀢𑀸𑀤𑀻𑀲𑀽’’𑀢𑀺𑀆𑀤𑀺. 𑀦 𑀓𑁂𑀯𑀮𑀁 𑀦𑀺𑀭𑀧𑁂𑀓𑁆𑀔𑁄 𑀯𑀸𑀢𑀺 𑀆𑀳 ‘‘𑀅𑀜𑁆𑀜𑀢𑁆𑀭 𑀯𑀸’’𑀢𑀺𑀆𑀤𑀺. 𑀲𑁄 𑀧𑀝𑀺𑀓𑁆𑀔𑀺𑀧𑀦𑁆𑀢𑁄𑀧𑀺 𑀦 𑀧𑀯𑀸𑀭𑁂𑀢𑀻𑀢𑀺 𑀢𑀲𑁆𑀫𑀺𑀁 𑀘𑁂 𑀅𑀦𑁆𑀢𑀭𑁂 𑀅𑀜𑁆𑀜𑀁 𑀪𑁄𑀚𑀦𑀁 𑀅𑀪𑀺𑀳𑀝𑀁, 𑀢𑀁 𑀲𑁄 𑀧𑀝𑀺𑀓𑁆𑀔𑀺𑀧𑀦𑁆𑀢𑁄𑀧𑀺 𑀦 𑀧𑀯𑀸𑀭𑁂𑀢𑀺. 𑀓𑀲𑁆𑀫𑀸? 𑀯𑀺𑀧𑁆𑀧𑀓𑀢𑀪𑁄𑀚𑀦𑀪𑀸𑀯𑀲𑁆𑀲 𑀉𑀧𑀘𑁆𑀙𑀺𑀦𑁆𑀦𑀢𑁆𑀢𑀸.

‘‘𑀉𑀧𑀦𑀸𑀫𑁂𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁨𑁩𑁮-𑁨𑁩𑁯) 𑀇𑀫𑀺𑀦𑀸 𑀓𑀸𑀬𑀸𑀪𑀺𑀳𑀸𑀭𑀁 𑀤𑀲𑁆𑀲𑁂𑀢𑀺. 𑀳𑀢𑁆𑀣𑁂 𑀯𑀸 𑀆𑀥𑀸𑀭𑀓𑁂 𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀅𑀯𑀼𑀢𑁆𑀢𑀯𑀺𑀓𑀧𑁆𑀧𑀢𑁆𑀣𑁄, 𑀢𑁂𑀦 ‘‘𑀊𑀭𑀽𑀲𑀼 𑀯𑀸’’𑀢𑀺 𑀯𑀺𑀓𑀧𑁆𑀧𑁂𑀢𑀺. 𑀤𑀽𑀭𑁂 𑀦𑀺𑀲𑀺𑀦𑁆𑀦𑀲𑁆𑀲 𑀤𑀳𑀭𑀪𑀺𑀓𑁆𑀔𑀼𑀲𑁆𑀲 𑀧𑀢𑁆𑀢𑀁 𑀧𑁂𑀲𑁂𑀢𑁆𑀯𑀸 ‘‘𑀇𑀢𑁄 𑀑𑀤𑀦𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀤𑀢𑀺, 𑀕𑀡𑁆𑀳𑀺𑀢𑁆𑀯𑀸 𑀧𑀦 𑀕𑀢𑁄 𑀢𑀼𑀡𑁆𑀳𑀻 𑀢𑀺𑀝𑁆𑀞𑀢𑀺, 𑀢𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀢𑁄 𑀏𑀲𑁂𑀯 𑀦𑀬𑁄. 𑀓𑀲𑁆𑀫𑀸? 𑀪𑀺𑀓𑁆𑀔𑀼𑀲𑁆𑀲 𑀤𑀽𑀭𑀪𑀸𑀯𑀢𑁄, 𑀤𑀽𑀢𑀲𑁆𑀲 𑀘 𑀅𑀦𑀪𑀺𑀳𑀭𑀡𑀢𑁄. 𑀲𑀘𑁂 𑀧𑀦 𑀕𑀳𑁂𑀢𑁆𑀯𑀸 𑀆𑀕𑀢𑁄 𑀪𑀺𑀓𑁆𑀔𑀼 ‘‘𑀇𑀫𑀁 𑀪𑀢𑁆𑀢𑀁 𑀕𑀡𑁆𑀳𑀸’’𑀢𑀺 𑀯𑀤𑀢𑀺, 𑀢𑀁 𑀧𑀝𑀺𑀓𑁆𑀔𑀺𑀧𑀢𑁄 𑀧𑀯𑀸𑀭𑀡𑀸 𑀳𑁄𑀢𑀺. 𑀏𑀯𑀁 𑀯𑀼𑀢𑁆𑀢𑁂𑀧𑀻𑀢𑀺 ‘‘𑀪𑀢𑁆𑀢𑀁 𑀕𑀡𑁆𑀳𑀸’’𑀢𑀺 𑀯𑀼𑀢𑁆𑀢𑁂𑀧𑀺.

𑀪𑀢𑁆𑀢𑀧𑀘𑁆𑀙𑀺𑀁 𑀕𑀳𑁂𑀢𑁆𑀯𑀸 𑀧𑀭𑀺𑀯𑀺𑀲𑀦𑁆𑀢𑀲𑁆𑀲𑀸𑀢𑀺 𑀏𑀓𑁂𑀦 𑀳𑀢𑁆𑀣𑁂𑀦 𑀪𑀢𑁆𑀢𑀧𑀘𑁆𑀙𑀺𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀓𑀝𑀘𑁆𑀙𑀼𑀁 𑀕𑀳𑁂𑀢𑁆𑀯𑀸 𑀧𑀭𑀺𑀯𑀺𑀲𑀦𑁆𑀢𑀲𑁆𑀲. 𑀅𑀜𑁆𑀜𑁄 ‘‘𑀅𑀳𑀁 𑀥𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀕𑀳𑀺𑀢𑀫𑀢𑁆𑀢𑀓𑀫𑁂𑀯 𑀓𑀭𑁄𑀢𑀻𑀢𑀺 𑀅𑀜𑁆𑀜𑁄 𑀆𑀕𑀦𑁆𑀢𑁆𑀯𑀸 ‘‘𑀅𑀳𑀁 𑀧𑀘𑁆𑀙𑀺𑀁 𑀥𑀸𑀭𑁂𑀲𑁆𑀲𑀸𑀫𑀺, 𑀢𑁆𑀯𑀁 𑀑𑀤𑀦𑀁 𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀕𑀳𑀺𑀢𑀫𑀢𑁆𑀢𑀓𑀫𑁂𑀯 𑀓𑀭𑁄𑀢𑀺. 𑀅𑀪𑀺𑀳𑀝𑀸𑀯 𑀳𑁄𑀢𑀻𑀢𑀺 𑀧𑀭𑀺𑀯𑁂𑀲𑀓𑁂𑀦𑁂𑀯 𑀅𑀪𑀺𑀳𑀝𑀸𑀯 𑀳𑁄𑀢𑀺. 𑀇𑀤𑀸𑀦𑀺 𑀅𑀲𑀢𑀺 𑀢𑀲𑁆𑀲 𑀤𑀸𑀢𑀼𑀓𑀸𑀫𑀸𑀪𑀺𑀳𑀸𑀭𑁂 𑀕𑀳𑀡𑀲𑀫𑀬𑁂𑀧𑀺 𑀧𑀝𑀺𑀓𑁆𑀔𑀺𑀧𑀢𑁄 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀤𑁆𑀥𑀝𑁂𑀢𑀺 𑀉𑀤𑁆𑀥𑀝𑁂 𑀪𑀢𑁆𑀢𑁂. 𑀓𑀝𑀘𑁆𑀙𑀼𑀅𑀪𑀺𑀳𑀸𑀭𑁄𑀬𑁂𑀯 𑀳𑀺 𑀢𑀲𑁆𑀲 𑀅𑀪𑀺𑀳𑀸𑀭𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀦𑁆𑀢𑀭𑀲𑁆𑀲 𑀤𑀺𑀬𑁆𑀬𑀫𑀸𑀦𑁂𑀢𑀺 𑀅𑀦𑀦𑁆𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀢𑁆𑀢𑁂 𑀤𑀺𑀬𑁆𑀬𑀫𑀸𑀦𑁂. 𑀓𑀸𑀬𑀯𑀺𑀓𑀸𑀭𑁂𑀦𑀸𑀢𑀺 ‘‘𑀅𑀗𑁆𑀕𑀼𑀮𑀺𑀁 𑀯𑀸 𑀳𑀢𑁆𑀣𑀁 𑀯𑀸 𑀫𑀘𑁆𑀙𑀺𑀓𑀩𑀻𑀚𑀦𑀺𑀁 𑀯𑀸 𑀘𑀻𑀯𑀭𑀓𑀡𑁆𑀡𑀁 𑀯𑀸 𑀘𑀸𑀮𑁂𑀢𑀺, 𑀪𑀫𑀼𑀓𑀸𑀬 𑀯𑀸 𑀆𑀓𑀸𑀭𑀁 𑀓𑀭𑁄𑀢𑀺, 𑀓𑀼𑀤𑁆𑀥𑁄 𑀯𑀸 𑀑𑀮𑁄𑀓𑁂𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁨𑁩𑁮-𑁨𑁩𑁯) 𑀏𑀯𑀁 𑀯𑀼𑀢𑁆𑀢𑁂𑀦 𑀅𑀗𑁆𑀕𑀼𑀮𑀺𑀘𑀮𑀦𑀸𑀤𑀺𑀦𑀸 𑀓𑀸𑀬𑀯𑀺𑀓𑀸𑀭𑁂𑀦. ‘‘𑀅𑀮𑀁 𑀫𑀸 𑀤𑁂𑀳𑀻’’𑀢𑀺𑀆𑀤𑀺𑀦𑀸 𑀯𑀘𑀻𑀯𑀺𑀓𑀸𑀭𑁂𑀦𑀸𑀢𑀺 ‘‘𑀅𑀮’’𑀦𑁆𑀢𑀺 𑀯𑀸 ‘‘𑀦 𑀕𑀡𑁆𑀳𑀸𑀫𑀻’’𑀢𑀺 𑀯𑀸 ‘‘𑀫𑀸 𑀆𑀓𑀺𑀭𑀸’’𑀢𑀺 𑀯𑀸 ‘‘𑀅𑀧𑀕𑀘𑁆𑀙𑀸’’𑀢𑀺 𑀯𑀸 𑀏𑀯𑀁 𑀬𑁂𑀦 𑀓𑁂𑀦𑀘𑀺 𑀯𑀘𑀻𑀯𑀺𑀓𑀸𑀭𑁂𑀦.

𑀅𑀪𑀺𑀳𑀝𑁂 𑀧𑀦 𑀪𑀢𑁆𑀢𑁂 𑀧𑀯𑀸𑀭𑀡𑀸𑀬 𑀪𑀻𑀢𑁄 𑀳𑀢𑁆𑀣𑁂 𑀅𑀧𑀦𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀧𑀢𑁆𑀢𑁂 𑀑𑀤𑀦𑀁 𑀆𑀓𑀺𑀭𑀦𑁆𑀢𑀁 ‘‘𑀆𑀓𑀺𑀭 𑀆𑀓𑀺𑀭, 𑀓𑁄𑀝𑁆𑀝𑁂𑀢𑁆𑀯𑀸 𑀧𑀽𑀭𑁂𑀳𑀻’’𑀢𑀺 𑀯𑀤𑀢𑁄 𑀧𑀯𑀸𑀭𑀡𑀸 𑀦 𑀳𑁄𑀢𑀺. 𑀏𑀲 𑀦𑀬𑁄 𑀪𑀢𑁆𑀢𑀁 𑀅𑀪𑀺𑀳𑀭𑀦𑁆𑀢𑀁 𑀪𑀺𑀓𑁆𑀔𑀼𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀓𑀺𑀁, 𑀆𑀯𑀼𑀲𑁄, 𑀇𑀢𑁄𑀧𑀺 𑀓𑀺𑀜𑁆𑀘𑀺 𑀕𑀡𑁆𑀳𑀺𑀲𑁆𑀲𑀲𑀺, 𑀤𑀫𑁆𑀫𑀺 𑀢𑁂 𑀓𑀺𑀜𑁆𑀘𑀻’’𑀢𑀺 𑀯𑀤𑀢𑁄𑀧𑀺.

‘‘𑀭𑀲𑀁 𑀧𑀝𑀺𑀕𑁆𑀕𑀡𑁆𑀳𑀣𑀸’’𑀢𑀺 𑀅𑀧𑁆𑀧𑀯𑀸𑀭𑀡𑀸𑀚𑀦𑀓𑀲𑁆𑀲 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 ‘‘𑀢𑀁 𑀲𑀼𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀢𑁄 𑀧𑀯𑀸𑀭𑀡𑀸 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. 𑀫𑀁𑀲𑀭𑀲𑀦𑁆𑀢𑀺 𑀏𑀢𑁆𑀣 𑀧𑀦 𑀦 𑀓𑁂𑀯𑀮𑀁 𑀫𑀁𑀲𑀲𑁆𑀲 𑀭𑀲𑀁 ‘‘𑀫𑀁𑀲𑀭𑀲’’𑀫𑀺𑀘𑁆𑀘𑁂𑀯 𑀯𑀺𑀜𑁆𑀜𑀸𑀬𑀢𑀺, 𑀅𑀣 𑀔𑁄 𑀫𑀁𑀲𑀜𑁆𑀘 𑀭𑀲𑀜𑁆𑀘 𑀫𑀁𑀲𑀭𑀲𑀦𑁆𑀢𑀺 𑀏𑀯𑀁 𑀧𑀯𑀸𑀭𑀡𑀸𑀚𑀦𑀓𑀦𑀸𑀫𑀯𑀲𑁂𑀦𑀸𑀧𑀺. 𑀢𑀲𑁆𑀫𑀸 𑀢𑀁 𑀧𑀝𑀺𑀓𑁆𑀔𑀺𑀧𑀢𑁄 𑀧𑀯𑀸𑀭𑀡𑀸𑀯 𑀳𑁄𑀢𑀻𑀢𑀺 𑀆𑀳 ‘‘𑀫𑀁𑀲𑀭𑀲𑀦𑁆𑀢𑀺 𑀯𑀼𑀢𑁆𑀢𑁂 𑀧𑀦 𑀧𑀝𑀺𑀓𑁆𑀔𑀺𑀧𑀢𑁄 𑀧𑀯𑀸𑀭𑀡𑀸 𑀳𑁄𑀢𑀻’’𑀢𑀺. 𑀧𑀭𑀢𑁄 𑀫𑀘𑁆𑀙𑀫𑀁𑀲𑀁 𑀩𑁆𑀬𑀜𑁆𑀚𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀬𑀲𑁆𑀫𑀺𑀁 𑀇𑀭𑀺𑀬𑀸𑀧𑀣𑁂 𑀧𑀯𑀸𑀭𑁂𑀢𑀺, 𑀢𑀁 𑀅𑀯𑀺𑀓𑁄𑀧𑁂𑀦𑁆𑀢𑁂𑀦𑁂𑀯 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀬𑁄 𑀕𑀘𑁆𑀙𑀦𑁆𑀢𑁄 (𑀧𑀸𑀘𑀺. 𑀅𑀝𑁆𑀞. 𑁨𑁩𑁮-𑁨𑁩𑁯) 𑀧𑀯𑀸𑀭𑁂𑀢𑀺, 𑀢𑁂𑀦 𑀕𑀘𑁆𑀙𑀦𑁆𑀢𑁂𑀦𑁂𑀯 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀓𑀤𑁆𑀤𑀫𑀁 𑀯𑀸 𑀉𑀤𑀓𑀁 𑀯𑀸 𑀧𑀢𑁆𑀯𑀸 𑀞𑀺𑀢𑁂𑀦 𑀅𑀢𑀺𑀭𑀺𑀢𑁆𑀢𑀁 𑀓𑀸𑀭𑁂𑀢𑀩𑁆𑀩𑀁. 𑀲𑀘𑁂 𑀅𑀦𑁆𑀢𑀭𑀸 𑀦𑀤𑀻 𑀧𑀽𑀭𑀸 𑀳𑁄𑀢𑀺, 𑀦𑀤𑀺𑀢𑀻𑀭𑁂 𑀕𑀼𑀫𑁆𑀩𑀁 𑀅𑀦𑀼𑀧𑀭𑀺𑀬𑀸𑀬𑀦𑁆𑀢𑁂𑀦 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀅𑀣 𑀦𑀸𑀯𑀸 𑀯𑀸 𑀲𑁂𑀢𑀼 𑀯𑀸 𑀅𑀢𑁆𑀣𑀺, 𑀢𑀁 𑀅𑀪𑀺𑀭𑀼𑀳𑀺𑀢𑁆𑀯𑀸𑀧𑀺 𑀘𑀗𑁆𑀓𑀫𑀦𑁆𑀢𑁂𑀦𑁂𑀯 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀕𑀫𑀦𑀁 𑀦 𑀉𑀧𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀁. 𑀏𑀲 𑀦𑀬𑁄 𑀇𑀢𑀭𑀇𑀭𑀺𑀬𑀸𑀧𑀣𑁂𑀲𑀼𑀧𑀺. 𑀢𑀁 𑀢𑀁 𑀇𑀭𑀺𑀬𑀸𑀧𑀣𑀁 𑀓𑁄𑀧𑁂𑀦𑁆𑀢𑁂𑀦 𑀅𑀢𑀺𑀭𑀺𑀢𑁆𑀢𑀁 𑀓𑀸𑀭𑁂𑀢𑀩𑁆𑀩𑀁. 𑀬𑁄 𑀉𑀓𑁆𑀓𑀼𑀝𑀺𑀓𑁄𑀯 𑀦𑀺𑀲𑀻𑀤𑀺𑀢𑁆𑀯𑀸 𑀧𑀯𑀸𑀭𑁂𑀢𑀺, 𑀢𑁂𑀦 𑀉𑀓𑁆𑀓𑀼𑀝𑀺𑀓𑁂𑀦𑁂𑀯 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀢𑀲𑁆𑀲 𑀧𑀦 𑀳𑁂𑀝𑁆𑀞𑀸 𑀧𑀮𑀸𑀮𑀧𑀻𑀞𑀁 𑀯𑀸 𑀓𑀺𑀜𑁆𑀘𑀺 𑀯𑀸 𑀦𑀺𑀲𑀻𑀤𑀦𑀁 𑀤𑀸𑀢𑀩𑁆𑀩𑀁. 𑀧𑀻𑀞𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀯𑀸𑀭𑀺𑀢𑁂𑀦 𑀧𑀦 𑀆𑀲𑀦𑀁 𑀅𑀘𑀸𑀮𑁂𑀢𑁆𑀯𑀸𑀯 𑀘𑀢𑀲𑁆𑀲𑁄 𑀤𑀺𑀲𑀸 𑀧𑀭𑀺𑀯𑀢𑁆𑀢𑀦𑁆𑀢𑁂𑀦 𑀪𑀼𑀜𑁆𑀚𑀺𑀢𑀼𑀁 𑀮𑀩𑁆𑀪𑀢𑀺. 𑀫𑀜𑁆𑀘𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀯𑀸𑀭𑀺𑀢𑁂𑀦 𑀇𑀢𑁄 𑀯𑀸 𑀏𑀢𑁆𑀢𑁄 𑀯𑀸 𑀲𑀁𑀲𑀭𑀺𑀢𑀼𑀁 𑀦 𑀮𑀩𑁆𑀪𑀢𑀺. 𑀲𑀘𑁂 𑀧𑀦 𑀲𑀳 𑀫𑀜𑁆𑀘𑁂𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀜𑁆𑀜𑀢𑁆𑀭 𑀦𑁂𑀦𑁆𑀢𑀺, 𑀯𑀝𑁆𑀝𑀢𑀺. 𑀦𑀺𑀧𑀚𑁆𑀚𑀺𑀢𑁆𑀯𑀸 𑀧𑀯𑀸𑀭𑀺𑀢𑁂𑀦𑀸𑀧𑀺 𑀦𑀺𑀧𑀦𑁆𑀦𑁂𑀦𑁂𑀯 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀧𑀭𑀺𑀯𑀢𑁆𑀢𑀦𑁆𑀢𑁂𑀦 𑀬𑁂𑀦 𑀧𑀲𑁆𑀲𑁂𑀦 𑀦𑀺𑀧𑀦𑁆𑀦𑁄, 𑀢𑀲𑁆𑀲 𑀞𑀸𑀦𑀁 𑀦𑀸𑀢𑀺𑀓𑁆𑀓𑀫𑁂𑀢𑀩𑁆𑀩𑀁.

𑀅𑀮𑀫𑁂𑀢𑀁 𑀲𑀩𑁆𑀩𑀦𑁆𑀢𑀺 𑀏𑀢𑀁 𑀲𑀩𑁆𑀩𑀁 𑀅𑀮𑀁 𑀧𑀭𑀺𑀬𑀢𑁆𑀢𑀁, 𑀇𑀤𑀫𑁆𑀧𑀺 𑀢𑁂 𑀅𑀥𑀺𑀓𑀁, 𑀇𑀢𑁄 𑀅𑀜𑁆𑀜𑀁 𑀦 𑀮𑀘𑁆𑀙𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑁄 𑀅𑀢𑀺𑀭𑀺𑀢𑁆𑀢𑀁 𑀓𑀭𑁄𑀢𑀻𑀢𑀺 𑀬𑁄 ‘‘𑀅𑀮𑀫𑁂𑀢𑀁 𑀲𑀩𑁆𑀩’’𑀦𑁆𑀢𑀺 𑀅𑀢𑀺𑀭𑀺𑀢𑁆𑀢𑀁 𑀓𑀭𑁄𑀢𑀺. 𑀧𑀝𑀺𑀧𑀓𑁆𑀔𑀦𑀬𑁂𑀦𑀸𑀢𑀺 ‘‘𑀓𑀧𑁆𑀧𑀺𑀬𑀓𑀢𑀁, 𑀧𑀝𑀺𑀕𑁆𑀕𑀳𑀺𑀢𑀓𑀢𑀁, 𑀉𑀘𑁆𑀘𑀸𑀭𑀺𑀢𑀓𑀢𑀁, 𑀳𑀢𑁆𑀣𑀧𑀸𑀲𑁂 𑀓𑀢𑀁, 𑀪𑀼𑀢𑁆𑀢𑀸𑀯𑀺𑀦𑀸 𑀓𑀢𑀁, 𑀪𑀼𑀢𑁆𑀢𑀸𑀯𑀺𑀦𑀸 𑀧𑀯𑀸𑀭𑀺𑀢𑁂𑀦 𑀆𑀲𑀦𑀸 𑀅𑀯𑀼𑀝𑁆𑀞𑀺𑀢𑁂𑀦 𑀓𑀢𑀁 ‘𑀅𑀮𑀫𑁂𑀢𑀁 𑀲𑀩𑁆𑀩’𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺 (𑀧𑀸𑀘𑀺. 𑁨𑁩𑁯) 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀯𑀺𑀦𑀬𑀓𑀫𑁆𑀫𑀸𑀓𑀸𑀭𑁂𑀳𑀺 𑀬𑀁 𑀅𑀢𑀺𑀭𑀺𑀢𑁆𑀢𑀁 𑀓𑀧𑁆𑀧𑀺𑀬𑀁 𑀓𑀢𑀁, 𑀬𑀜𑁆𑀘 𑀕𑀺𑀮𑀸𑀦𑀸𑀢𑀺𑀭𑀺𑀢𑁆𑀢𑀁, 𑀢𑀤𑀼𑀪𑀬𑀫𑁆𑀧𑀺 𑀅𑀢𑀺𑀭𑀺𑀢𑁆𑀢𑀦𑁆𑀢𑀺 𑀏𑀯𑀁 𑀢𑀲𑁆𑀲𑁂𑀯 𑀧𑀝𑀺𑀧𑀓𑁆𑀔𑀦𑀬𑁂𑀦. 𑀏𑀢𑁆𑀣 𑀘 ‘‘𑀅𑀮𑀫𑁂𑀢𑀁 𑀲𑀩𑁆𑀩’’𑀦𑁆𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀢𑀩𑁆𑀩𑀁, 𑀅𑀬𑀁 𑀓𑀺𑀭 𑀆𑀘𑀺𑀡𑁆𑀡𑁄. 𑀯𑀺𑀦𑀬𑀥𑀭𑀸 𑀧𑀦 ‘‘𑀲𑀓𑀺𑀁 𑀏𑀯 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺.

𑀓𑀲𑁆𑀫𑀸 𑀢𑀁 𑀲𑁄 𑀧𑀼𑀦 𑀓𑀸𑀢𑀼𑀁 𑀦 𑀮𑀪𑀢𑀻𑀢𑀺 𑀆𑀳 ‘‘𑀬𑀜𑁆𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀬𑀜𑁆𑀳𑀺 𑀅𑀓𑀢𑀦𑁆𑀢𑀺 𑀬𑁂𑀦 𑀧𑀞𑀫𑀁 𑀓𑀧𑁆𑀧𑀺𑀬𑀁 𑀓𑀢𑀁, 𑀢𑁂𑀦 𑀬𑀁 𑀅𑀓𑀢𑀁, 𑀢𑀁 𑀓𑀸𑀢𑀩𑁆𑀩𑀁. 𑀧𑀞𑀫𑀪𑀸𑀚𑀦𑁂 𑀧𑀦 𑀓𑀸𑀢𑀼𑀁 𑀦 𑀮𑀩𑁆𑀪𑀢𑀺. 𑀬𑁂𑀦 𑀘 𑀅𑀓𑀢𑀦𑁆𑀢𑀺 𑀅𑀜𑁆𑀜𑁂𑀦 𑀪𑀺𑀓𑁆𑀔𑀼𑀦𑀸 𑀬𑁂𑀦 𑀧𑀞𑀫𑀁 𑀦 𑀓𑀢𑀁, 𑀢𑁂𑀦 𑀘 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀦𑁆𑀢𑀺 𑀲𑀻𑀳𑀴𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀅𑀜𑁆𑀜𑀲𑁆𑀫𑀺𑀁 𑀧𑀦 𑀪𑀸𑀚𑀦𑁂𑀢𑀺 𑀬𑀲𑁆𑀫𑀺𑀁 𑀧𑀦 𑀪𑀸𑀚𑀦𑁂 𑀧𑀞𑀫𑀁 𑀓𑀢𑀁, 𑀢𑀢𑁄 𑀅𑀜𑁆𑀜𑀲𑁆𑀫𑀺𑀁 𑀧𑀢𑁆𑀢𑁂 𑀯𑀸 𑀓𑀼𑀡𑁆𑀟𑁂 𑀯𑀸 𑀧𑀘𑁆𑀙𑀺𑀬𑀁 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀼𑀭𑀢𑁄 𑀞𑀧𑁂𑀢𑁆𑀯𑀸 𑀑𑀦𑀸𑀫𑀺𑀢𑀪𑀸𑀚𑀦𑁂.

𑀅𑀜𑁆𑀜𑀢𑁆𑀭 𑀪𑀼𑀜𑁆𑀚𑀦𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀪𑀼𑀢𑁆𑀢𑀸𑀯𑀺𑀦𑀸 𑀧𑀯𑀸𑀭𑀺𑀢𑁂𑀦 𑀳𑀼𑀢𑁆𑀯𑀸 𑀅𑀜𑁆𑀜𑀢𑁆𑀭 𑀪𑀼𑀜𑁆𑀚𑀦𑀯𑀢𑁆𑀣𑀼𑀲𑁆𑀫𑀺𑀁. 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀦𑀢𑀺𑀭𑀺𑀢𑁆𑀢𑁂 𑀅𑀦𑀢𑀺𑀭𑀺𑀢𑁆𑀢𑀲𑀜𑁆𑀜𑀺𑀯𑁂𑀫𑀢𑀺𑀓𑀅𑀢𑀺𑀭𑀺𑀢𑁆𑀢𑀲𑀜𑁆𑀜𑀻𑀦𑀁 𑀯𑀲𑁂𑀦 𑀢𑀻𑀡𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀅𑀚𑁆𑀛𑁄𑀳𑀭𑀢𑁄 𑀘 𑀤𑀼𑀓𑁆𑀓𑀝𑀦𑁆𑀢𑀺 𑀅𑀚𑁆𑀛𑁄𑀳𑀭𑀢𑁄 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀤𑀼𑀓𑁆𑀓𑀝𑀁. 𑀲𑀘𑁂 𑀧𑀦 𑀆𑀫𑀺𑀲𑀲𑀁𑀲𑀝𑁆𑀞𑀸𑀦𑀺 𑀳𑁄𑀦𑁆𑀢𑀺, 𑀆𑀳𑀸𑀭𑀢𑁆𑀣𑀸𑀬𑀧𑀺 𑀅𑀦𑀸𑀳𑀸𑀭𑀢𑁆𑀣𑀸𑀬𑀧𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀚𑁆𑀛𑁄𑀳𑀭𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀢𑁂𑀲𑀁 𑀅𑀦𑀼𑀜𑁆𑀜𑀸𑀢𑀧𑀭𑀺𑀪𑁄𑀕𑀯𑀲𑁂𑀦𑀸𑀢𑀺 𑀬𑀸𑀫𑀓𑀸𑀮𑀺𑀓𑀸𑀤𑀻𑀦𑀁 𑀅𑀦𑀼𑀜𑁆𑀜𑀸𑀢𑀧𑀭𑀺𑀪𑁄𑀕𑀯𑀲𑁂𑀦, 𑀬𑀸𑀫𑀓𑀸𑀮𑀺𑀓𑀁 𑀧𑀺𑀧𑀸𑀲𑀸𑀬 𑀲𑀢𑀺 𑀧𑀺𑀧𑀸𑀲𑀘𑁆𑀙𑁂𑀤𑀦𑀢𑁆𑀣𑀁, 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀬𑀸𑀯𑀚𑀻𑀯𑀺𑀓𑀜𑁆𑀘 𑀢𑁂𑀦 𑀢𑁂𑀦 𑀉𑀧𑀲𑀫𑁂𑀢𑀩𑁆𑀩𑀓𑁂 𑀆𑀩𑀸𑀥𑁂 𑀲𑀢𑀺 𑀢𑀲𑁆𑀲 𑀉𑀧𑀲𑀫𑀦𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀫𑁆𑀧𑀺 𑀅𑀚𑁆𑀛𑁄𑀳𑀭𑀡𑀢𑁄 𑀓𑀸𑀬𑀓𑀫𑁆𑀫𑀁, 𑀯𑀸𑀘𑀸𑀬 ‘‘𑀅𑀢𑀺𑀭𑀺𑀢𑁆𑀢𑀁 𑀓𑀭𑁄𑀣 𑀪𑀦𑁆𑀢𑁂’’𑀢𑀺 𑀅𑀓𑀸𑀭𑀸𑀧𑀦𑁂𑀦 𑀯𑀘𑀻𑀓𑀫𑁆𑀫𑀦𑁆𑀢𑀺 𑀆𑀳 ‘‘𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀧𑀞𑀫𑀓𑀣𑀺𑀦𑀲𑀤𑀺𑀲𑀸𑀦𑁂𑀯𑀸’’𑀢𑀺. 𑀓𑀺𑀭𑀺𑀬𑀸𑀓𑀺𑀭𑀺𑀬𑀦𑁆𑀢𑀺 𑀏𑀢𑁆𑀣 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀪𑀼𑀜𑁆𑀚𑀦𑀁 𑀓𑀺𑀭𑀺𑀬𑀁. 𑀅𑀢𑀺𑀭𑀺𑀢𑁆𑀢𑀲𑁆𑀲 𑀅𑀓𑀭𑀡𑀁 𑀅𑀓𑀺𑀭𑀺𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀞𑀫𑀧𑀯𑀸𑀭𑀡𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀤𑀼𑀢𑀺𑀬𑀧𑀯𑀸𑀭𑀡𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀼𑀢𑁆𑀯𑀸 𑀯𑀸𑀢𑀺 𑀅𑀜𑁆𑀜𑁂𑀦 𑀯𑀸 𑀢𑁂𑀦𑁂𑀯 𑀯𑀸 𑀆𑀭𑁄𑀘𑀺𑀢𑀁 𑀲𑀼𑀢𑁆𑀯𑀸. ‘‘𑀪𑀼𑀢𑁆𑀢𑀲𑁆𑀫𑀺𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁨𑁪𑁩) 𑀯𑀼𑀢𑁆𑀢𑀢𑁆𑀢𑀸 𑀪𑁄𑀚𑀦𑀧𑀭𑀺𑀬𑁄𑀲𑀸𑀦𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁.

𑀤𑀼𑀢𑀺𑀬𑀧𑀯𑀸𑀭𑀡𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀯𑀺𑀓𑀸𑀮𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀯𑀺𑀓𑀸𑀮𑁂𑀢𑀺 𑀏𑀢𑁆𑀣 𑀅𑀭𑀼𑀡𑀼𑀕𑁆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑁄, 𑀅𑀬𑀁 𑀩𑀼𑀤𑁆𑀥𑀸𑀤𑀻𑀦𑀁 𑀅𑀭𑀺𑀬𑀸𑀦𑀁 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑁄 𑀪𑁄𑀚𑀦𑀲𑁆𑀲 𑀓𑀸𑀮𑁄 𑀦𑀸𑀫. 𑀢𑀤𑀜𑁆𑀜𑁄 𑀯𑀺𑀓𑀸𑀮𑁄 ‘‘𑀯𑀺𑀕𑀢𑁄 𑀓𑀸𑀮𑁄’’𑀢𑀺 𑀓𑀢𑁆𑀯𑀸. 𑀢𑁂𑀦𑀸𑀳 ‘‘𑀯𑀺𑀕𑀢𑁂 𑀓𑀸𑀮𑁂’’𑀢𑀺𑀆𑀤𑀺. 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑁄𑀧𑀺 (𑀧𑀸𑀘𑀺. 𑀅𑀝𑁆𑀞. 𑁨𑁪𑁮-𑁨𑁪𑁯) 𑀓𑀸𑀮𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀧𑀦 𑀔𑀸𑀤𑀺𑀢𑀼𑀁 𑀯𑀸 𑀪𑀼𑀜𑁆𑀚𑀺𑀢𑀼𑀁 𑀯𑀸 𑀦 𑀲𑀓𑁆𑀓𑀸. 𑀲𑀳𑀲𑀸 𑀧𑀺𑀯𑀺𑀢𑀼𑀁 𑀲𑀓𑁆𑀓𑀸 𑀪𑀯𑁂𑀬𑁆𑀬, 𑀓𑀼𑀓𑁆𑀓𑀼𑀘𑁆𑀘𑀓𑁂𑀦 𑀧𑀦 𑀦 𑀓𑀸𑀢𑀩𑁆𑀩𑀁. 𑀓𑀸𑀮𑀧𑀭𑀺𑀘𑁆𑀙𑁂𑀤𑀚𑀸𑀦𑀦𑀢𑁆𑀣𑀜𑁆𑀘 𑀓𑀸𑀮𑀢𑁆𑀣𑀫𑁆𑀪𑁄 𑀬𑁄𑀚𑁂𑀢𑀩𑁆𑀩𑁄. 𑀓𑀸𑀮𑀩𑁆𑀪𑀦𑁆𑀢𑀭𑁂𑀯 𑀪𑀢𑁆𑀢𑀓𑀺𑀘𑁆𑀘𑀁 𑀓𑀸𑀢𑀩𑁆𑀩𑀁. ‘‘𑀬𑀁 𑀓𑀺𑀜𑁆𑀘𑀺…𑀧𑁂… 𑀔𑀸𑀤𑀦𑀻𑀬𑀁 𑀯𑀸’’𑀢𑀺 𑀇𑀫𑀺𑀦𑀸 𑀬𑀁 𑀢𑀸𑀯 𑀲𑀓𑁆𑀔𑀮𑀺𑀫𑁄𑀤𑀓𑀸𑀤𑀺 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀫𑀬𑀁, 𑀢𑀢𑁆𑀣 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀪𑁄𑀚𑀦𑀻𑀬𑀁 𑀦𑀸𑀫 𑀧𑀜𑁆𑀘 𑀪𑁄𑀚𑀦𑀸𑀦𑀺.

𑀲𑀢𑀺 𑀧𑀘𑁆𑀘𑀬𑁂𑀢𑀺 𑀧𑀺𑀧𑀸𑀲𑀸𑀤𑀺𑀓𑀸𑀭𑀡𑁂 𑀯𑀺𑀚𑁆𑀚𑀫𑀸𑀦𑁂. 𑀭𑁄𑀫𑀝𑁆𑀞𑀓𑀲𑁆𑀲𑀸𑀢𑀺 𑀭𑁄𑀫𑀝𑁆𑀞𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀚𑁆𑀛𑁄𑀳𑀭𑀺𑀢𑁆𑀯𑀸 𑀉𑀕𑁆𑀕𑀺𑀭𑀺𑀢𑁆𑀯𑀸 𑀫𑀼𑀔𑁂𑀯 𑀞𑀧𑀺𑀢𑁄 𑀩𑀳𑀺 𑀫𑀼𑀔𑀤𑁆𑀯𑀸𑀭𑀸 𑀯𑀺𑀦𑀺𑀕𑁆𑀕𑀢𑁄 𑀪𑁄𑀚𑀦𑀲𑁆𑀲 𑀫𑀕𑁆𑀕𑀸 𑀩𑀳𑀺 𑀦𑀺𑀕𑁆𑀕𑀢𑁄 ‘‘𑀭𑁄𑀫𑀝𑁆𑀞𑁄’’𑀢𑀺 𑀧𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀅𑀚𑁆𑀛𑁄𑀳𑀭𑀺𑀢𑁆𑀯𑀸 𑀉𑀕𑁆𑀕𑀺𑀭𑀺𑀢𑁆𑀯𑀸 𑀫𑀼𑀔𑁂𑀯 𑀞𑀧𑀺𑀢𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦𑀸𑀳 ‘‘𑀦 𑀘, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺. 𑀞𑀧𑁂𑀢𑁆𑀯𑀸 𑀭𑁄𑀫𑀝𑁆𑀞𑀓𑀁 𑀲𑁂𑀲𑀸𑀦𑀁 𑀆𑀕𑀢𑀁 𑀉𑀕𑁆𑀕𑀸𑀭𑀁 𑀫𑀼𑀔𑁂 𑀲𑀦𑁆𑀥𑀸𑀭𑁂𑀢𑁆𑀯𑀸 𑀕𑀺𑀮𑀦𑁆𑀢𑀸𑀦𑀁 𑀆𑀧𑀢𑁆𑀢𑀺. 𑀲𑀘𑁂 𑀧𑀦 𑀅𑀲𑀦𑁆𑀥𑀸𑀭𑁂𑀦𑁆𑀢𑀫𑁂𑀯 𑀧𑀭𑀕𑀮𑀁 𑀕𑀘𑁆𑀙𑀢𑀺, 𑀯𑀝𑁆𑀝𑀢𑀺.

𑀯𑀺𑀓𑀸𑀮𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀓𑀸𑀭𑁄 𑀓𑀭𑀡𑀁 𑀓𑀺𑀭𑀺𑀬𑀸𑀢𑀺 𑀅𑀢𑁆𑀣𑀢𑁄 𑀏𑀓’’𑀦𑁆𑀢𑀺 𑀏𑀢𑁂𑀦 𑀓𑀸𑀭𑀲𑀤𑁆𑀤𑀲𑁆𑀲 𑀪𑀸𑀯𑀢𑁆𑀣𑀢𑀁 𑀤𑀲𑁆𑀲𑁂𑀢𑀺. 𑀲𑀫𑁆𑀫𑀸 𑀦𑀺𑀥𑀸𑀦𑀁 𑀞𑀧𑀦𑀁 𑀲𑀦𑁆𑀦𑀺𑀥𑀺. ‘‘𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀏𑀓𑀭𑀢𑁆𑀢𑀁 𑀯𑀻𑀢𑀺𑀦𑀸𑀫𑀺𑀢𑀲𑁆𑀲𑁂𑀢𑀁 𑀦𑀸𑀫’’𑀦𑁆𑀢𑀺 𑀇𑀫𑀺𑀦𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀏𑀓𑀭𑀢𑁆𑀢𑀁 𑀯𑀻𑀢𑀺𑀦𑀸𑀫𑀺𑀢𑁂 𑀇𑀫𑀲𑁆𑀲 𑀤𑀼𑀤𑁆𑀥𑁄𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀓𑀺𑀜𑁆𑀘𑀸𑀧𑀺 𑀬𑀸𑀫𑀓𑀸𑀮𑀺𑀓𑀁 𑀔𑀸𑀤𑀦𑀻𑀬𑀁, 𑀪𑁄𑀚𑀦𑀻𑀬𑀁 𑀯𑀸 𑀦 𑀳𑁄𑀢𑀺, ‘‘𑀅𑀦𑀸𑀧𑀢𑁆𑀢𑀺 𑀬𑀸𑀫𑀓𑀸𑀮𑀺𑀓𑀁 𑀬𑀸𑀫𑁂 𑀦𑀺𑀤𑀳𑀺𑀢𑁆𑀯𑀸 𑀪𑀼𑀜𑁆𑀚𑀢𑀻’’𑀢𑀺𑀆𑀤𑀺 𑀯𑀘𑀦𑀢𑁄 𑀧𑀦 𑀢𑀢𑁆𑀣𑀸𑀧𑀺 𑀬𑀸𑀫𑀸𑀢𑀺𑀓𑁆𑀓𑀫𑁂 𑀲𑀦𑁆𑀦𑀺𑀥𑀺𑀧𑀘𑁆𑀘𑀬𑀸 𑀧𑀸𑀘𑀺𑀢𑁆𑀢𑀺𑀬𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 ‘‘𑀬𑀁 𑀓𑀺𑀜𑁆𑀘𑀺 𑀬𑀸𑀯𑀓𑀸𑀮𑀺𑀓𑀁 𑀯𑀸 𑀬𑀸𑀫𑀓𑀸𑀮𑀺𑀓𑀁 𑀯𑀸’’𑀢𑀺 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀤𑀼𑀤𑁆𑀥𑁄𑀢𑀪𑀸𑀯𑀫𑁂𑀯 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀁 𑀅𑀗𑁆𑀕𑀼𑀮𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀁 𑀅𑀗𑁆𑀕𑀼𑀮𑀺𑀬𑀸 𑀖𑀁𑀲𑀦𑁆𑀢𑀲𑁆𑀲 𑀮𑁂𑀔𑀸 𑀧𑀜𑁆𑀜𑀸𑀬𑀢𑀻𑀢𑀺 𑀬𑀁 𑀧𑀢𑁆𑀢𑀁 𑀥𑁄𑀢𑀁 𑀅𑀗𑁆𑀕𑀼𑀮𑀺𑀬𑀸 𑀖𑀁𑀲𑀦𑁆𑀢𑀲𑁆𑀲 𑀧𑀢𑁆𑀢𑁂 𑀅𑀗𑁆𑀕𑀼𑀮𑀺𑀮𑁂𑀔𑀸 𑀧𑀜𑁆𑀜𑀸𑀬𑀢𑀺, 𑀲𑁄 𑀧𑀢𑁆𑀢𑁄 𑀤𑀼𑀤𑁆𑀥𑁄𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀮𑀯𑀡𑁆𑀡𑀧𑀢𑁆𑀢𑁂 𑀧𑀦 𑀅𑀗𑁆𑀕𑀼𑀮𑀺𑀮𑁂𑀔𑀸 𑀧𑀜𑁆𑀜𑀸𑀬𑀢𑀺, 𑀲𑀸 𑀅𑀩𑁆𑀩𑁄𑀳𑀸𑀭𑀺𑀓𑀸. 𑀲𑁆𑀦𑁂𑀳𑁄𑀢𑀺 𑀢𑁂𑀮𑀁. 𑀲𑀦𑁆𑀤𑀺𑀲𑁆𑀲𑀢𑀻𑀢𑀺 𑀬𑀸𑀕𑀼𑀬𑀸 𑀉𑀧𑀭𑀺 𑀲𑀦𑁆𑀤𑀺𑀲𑁆𑀲𑀢𑀺. 𑀢𑀸𑀤𑀺𑀲𑁂 𑀧𑀢𑁆𑀢𑁂𑀧𑀻𑀢𑀺 𑀧𑀝𑀺𑀕𑁆𑀕𑀳𑀡𑀁 𑀅𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀲𑀬𑀁 𑀯𑀸 𑀅𑀜𑁆𑀜𑁂𑀦 𑀯𑀸 𑀪𑁄𑀚𑀦𑀁 𑀦𑀻𑀳𑀭𑀺𑀢𑁆𑀯𑀸 𑀦 𑀲𑀫𑁆𑀫𑀸 𑀥𑁄𑀢𑁂 𑀧𑀢𑁆𑀢𑁂𑀧𑀺. 𑀧𑀼𑀦𑀤𑀺𑀯𑀲𑁂 𑀪𑀼𑀜𑁆𑀚𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀧𑀢𑁆𑀢𑁂 𑀮𑀕𑁆𑀕𑀁 𑀅𑀯𑀺𑀚𑀳𑀺𑀢𑀧𑁆𑀧𑀝𑀺𑀕𑁆𑀕𑀳𑀡𑀁 𑀳𑁄𑀢𑀻𑀢𑀺 𑀤𑀼𑀢𑀺𑀬𑀤𑀺𑀯𑀲𑁂 𑀪𑀼𑀜𑁆𑀚𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁. 𑀧𑀭𑀺𑀘𑁆𑀘𑀢𑁆𑀢𑁂 𑀧𑀦 𑀧𑀢𑁆𑀢𑁂 𑀧𑀼𑀦𑀤𑀺𑀯𑀲𑁂 𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀬𑀁 𑀧𑀦𑀸𑀢𑀺 𑀬𑀁 𑀪𑁄𑀚𑀦𑀁 𑀧𑀦. 𑀅𑀧𑀭𑀺𑀘𑁆𑀘𑀢𑁆𑀢𑀫𑁂𑀯 𑀳𑀻𑀢𑀺 𑀅𑀦𑀧𑁂𑀓𑁆𑀔𑀯𑀺𑀲𑁆𑀲𑀚𑁆𑀚𑀦𑁂𑀦 𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀦𑀺𑀭𑀧𑁂𑀓𑁆𑀔𑀤𑀸𑀦𑁂𑀦 𑀯𑀸 𑀅𑀧𑀭𑀺𑀘𑁆𑀘𑀢𑁆𑀢𑀫𑁂𑀯. 𑀓𑀧𑁆𑀧𑀺𑀬 𑀪𑁄𑀚𑀦𑀦𑁆𑀢𑀺 𑀅𑀦𑁆𑀢𑀫𑀲𑁄 𑀏𑀓𑀲𑀺𑀢𑁆𑀣𑀫𑀢𑁆𑀢𑀫𑁆𑀧𑀺 𑀓𑀧𑁆𑀧𑀺𑀬𑀪𑁄𑀚𑀦𑀁. 𑀅𑀓𑀧𑁆𑀧𑀺𑀬𑁂𑀲𑀽𑀢𑀺 𑀅𑀓𑀧𑁆𑀧𑀺𑀬𑀫𑀁𑀲𑁂𑀲𑀼. 𑀲𑁂𑀲𑁂𑀲𑀽𑀢𑀺 𑀫𑀦𑀼𑀲𑁆𑀲𑀫𑀁𑀲𑀢𑁄 𑀅𑀯𑀲𑁂𑀲𑁂𑀲𑀼 𑀳𑀢𑁆𑀣𑀺𑀅𑀲𑁆𑀲𑀲𑀼𑀦𑀔𑀅𑀳𑀺𑀲𑀻𑀳𑀩𑁆𑀬𑀕𑁆𑀖𑀤𑀻𑀧𑀺𑀅𑀘𑁆𑀙𑀢𑀭𑀘𑁆𑀙𑀫𑀁𑀲𑁂𑀲𑀼 𑀘𑁂𑀯 𑀅𑀧𑁆𑀧𑀝𑀺𑀯𑁂𑀓𑁆𑀔𑀺𑀢𑁂 𑀉𑀤𑁆𑀤𑀺𑀲𑁆𑀲𑀓𑀢𑀫𑀁𑀲𑁂 𑀘. 𑀧𑀸𑀴𑀺𑀬𑀁 ‘‘𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀬𑀸𑀯𑀚𑀻𑀯𑀺𑀓𑀁 𑀆𑀳𑀸𑀭𑀢𑁆𑀣𑀸𑀬 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁨𑁫𑁫) 𑀲𑀦𑁆𑀦𑀺𑀳𑀺𑀢𑁂𑀲𑀼 𑀲𑀢𑁆𑀢𑀸𑀳𑀓𑀸𑀮𑀺𑀓𑀬𑀸𑀯𑀚𑀻𑀯𑀺𑀓𑁂𑀲𑀼 𑀧𑀼𑀭𑁂𑀪𑀢𑁆𑀢𑀫𑁆𑀧𑀺 𑀆𑀳𑀸𑀭𑀢𑁆𑀣𑀸𑀬 𑀅𑀚𑁆𑀛𑁄𑀳𑀭𑀡𑁂𑀧𑀺 𑀤𑀼𑀓𑁆𑀓𑀝𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀬𑀸𑀫𑀓𑀸𑀮𑀺𑀓𑁂𑀧𑀺 𑀆𑀳𑀸𑀭𑀢𑁆𑀣𑀸𑀬 𑀅𑀚𑁆𑀛𑁄𑀳𑀭𑀡𑁂𑀧𑀺 𑀯𑀺𑀲𑀼𑀁 𑀤𑀼𑀓𑁆𑀓𑀝𑁂𑀦𑀸𑀧𑀺 𑀪𑀯𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀆𑀳𑀸𑀭𑀢𑁆𑀣𑀸𑀬 𑀅𑀚𑁆𑀛𑁄𑀳𑀭𑀢𑁄 𑀤𑀼𑀓𑁆𑀓𑀝𑁂𑀦 𑀲𑀤𑁆𑀥𑀺𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺. 𑀲𑀩𑁆𑀩𑀯𑀺𑀓𑀧𑁆𑀧𑁂𑀲𑀽𑀢𑀺 ‘‘𑀓𑀧𑁆𑀧𑀺𑀬𑀪𑁄𑀚𑀦𑀁 𑀪𑀼𑀜𑁆𑀚𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀲𑀼 𑀲𑀩𑁆𑀩𑁂𑀲𑀼 𑀯𑀺𑀓𑀧𑁆𑀧𑁂𑀲𑀼 𑀅𑀧𑀭𑀫𑁆𑀧𑀺 𑀧𑀸𑀘𑀺𑀢𑁆𑀢𑀺𑀬𑀁 𑀯𑀟𑁆𑀠𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 (𑀧𑀸𑀘𑀺. 𑀅𑀝𑁆𑀞. 𑁨𑁫𑁩) 𑁋 𑀓𑀧𑁆𑀧𑀺𑀬𑀪𑁄𑀚𑀦𑁂 𑀤𑁆𑀯𑁂 𑀧𑀸𑀘𑀺𑀢𑁆𑀢𑀺𑀬𑀸𑀦𑀺, 𑀫𑀦𑀼𑀲𑁆𑀲𑀫𑀁𑀲𑁂 𑀣𑀼𑀮𑁆𑀮𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀤𑁆𑀯𑁂 𑀧𑀸𑀘𑀺𑀢𑁆𑀢𑀺𑀬𑀸𑀦𑀺, 𑀅𑀯𑀲𑁂𑀲𑁂𑀲𑀼 𑀧𑀦 𑀅𑀓𑀧𑁆𑀧𑀺𑀬𑀫𑀁𑀲𑁂𑀲𑀼 𑀤𑀼𑀓𑁆𑀓𑀝𑁂𑀦 𑀲𑀤𑁆𑀥𑀺𑀁 𑀤𑁆𑀯𑁂 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀬𑀸𑀫𑀓𑀸𑀮𑀺𑀓𑀁 𑀲𑀢𑀺 𑀧𑀘𑁆𑀘𑀬𑁂 𑀲𑀸𑀫𑀺𑀲𑁂𑀦 𑀫𑀼𑀔𑁂𑀦 𑀅𑀚𑁆𑀛𑁄𑀳𑀭𑀢𑁄 𑀤𑁆𑀯𑁂 𑀧𑀸𑀘𑀺𑀢𑁆𑀢𑀺𑀬𑀸𑀦𑀺, 𑀦𑀺𑀭𑀸𑀫𑀺𑀲𑁂𑀦 𑀏𑀓𑀫𑁂𑀯. 𑀆𑀳𑀸𑀭𑀢𑁆𑀣𑀸𑀬 𑀅𑀚𑁆𑀛𑁄𑀳𑀭𑀢𑁄 𑀯𑀺𑀓𑀧𑁆𑀧𑀤𑁆𑀯𑀬𑁂𑀧𑀺 𑀤𑀼𑀓𑁆𑀓𑀝𑁂𑀦 𑀲𑀤𑁆𑀥𑀺𑀦𑁆𑀢𑀺.

𑀅𑀯𑀲𑁂𑀲𑁂𑀲𑀽𑀢𑀺 𑀬𑀸𑀫𑀓𑀸𑀮𑀺𑀓𑀸𑀤𑀺𑀢𑁄 𑀅𑀯𑀲𑁂𑀲𑁂𑀲𑀼. 𑀧𑀸𑀘𑀺𑀢𑁆𑀢𑀺𑀬𑀁 𑀯𑀟𑁆𑀠𑀢𑀺𑀬𑁂𑀯𑀸𑀢𑀺 𑀅𑀧𑀭𑀫𑁆𑀧𑀺 𑀧𑀸𑀘𑀺𑀢𑁆𑀢𑀺𑀬𑀁 𑀯𑀟𑁆𑀠𑀢𑀺𑀬𑁂𑀯. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀘𑁂 𑀯𑀺𑀓𑀸𑀮𑁂 𑀅𑀚𑁆𑀛𑁄𑀳𑀭𑀢𑀺, 𑀧𑀓𑀢𑀺𑀪𑁄𑀚𑀦𑁂 𑀲𑀦𑁆𑀦𑀺𑀥𑀺𑀧𑀘𑁆𑀘𑀬𑀸 𑀘 𑀯𑀺𑀓𑀸𑀮𑀪𑁄𑀚𑀦𑀧𑀘𑁆𑀘𑀬𑀸 𑀘 𑀤𑁆𑀯𑁂 𑀧𑀸𑀘𑀺𑀢𑁆𑀢𑀺𑀬𑀸𑀦𑀺, 𑀅𑀓𑀧𑁆𑀧𑀺𑀬𑀫𑀁𑀲𑁂𑀲𑀼 𑀫𑀦𑀼𑀲𑁆𑀲𑀫𑀁𑀲𑁂 𑀣𑀼𑀮𑁆𑀮𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀤𑁆𑀯𑁂 𑀧𑀸𑀘𑀺𑀢𑁆𑀢𑀺𑀬𑀸𑀦𑀺, 𑀅𑀯𑀲𑁂𑀲𑁂𑀲𑀼 𑀤𑀼𑀓𑁆𑀓𑀝𑁂𑀦 𑀲𑀤𑁆𑀥𑀺𑀁 𑀤𑁆𑀯𑁂𑀢𑀺.

𑀩𑁂𑀮𑀝𑁆𑀞𑀲𑀻𑀲𑁄 𑀦𑀸𑀫 𑀚𑀝𑀺𑀮𑀲𑀳𑀲𑁆𑀲𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀏𑀓𑁄 𑀫𑀳𑀸𑀣𑁂𑀭𑁄. 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀲𑀦𑁆𑀦𑀺𑀥𑀺𑀓𑀸𑀭𑀓𑁂 𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀜𑁆𑀜𑀺𑀯𑁂𑀫𑀢𑀺𑀓𑀅𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀜𑁆𑀜𑀻𑀦𑀁 𑀯𑀲𑁂𑀦 𑀢𑀻𑀡𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀲𑀁𑀲𑀝𑁆𑀞𑀸𑀦𑀻𑀢𑀺 𑀲𑀁𑀲𑀝𑁆𑀞𑀭𑀲𑀸𑀦𑀺. 𑀲𑀫𑁆𑀪𑀺𑀦𑁆𑀦𑀭𑀲𑀁 𑀲𑀦𑁆𑀥𑀸𑀬𑁂𑀯 𑀳𑀺 ‘‘𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑁂 𑀓𑀧𑁆𑀧𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀏𑀢𑁆𑀣 𑀘 𑀅𑀲𑀫𑁆𑀪𑀺𑀦𑁆𑀦𑀭𑀲𑀦𑁆𑀢𑀺 𑀅𑀫𑀺𑀲𑁆𑀲𑀺𑀢𑀭𑀲𑀁. 𑀇𑀤𑀜𑁆𑀘 𑀲𑀻𑀢𑀮𑀧𑀸𑀬𑀸𑀲𑀸𑀤𑀺𑀦𑀸 𑀲𑀳 𑀮𑀤𑁆𑀥𑀁 𑀲𑀧𑁆𑀧𑀺𑀧𑀺𑀡𑁆𑀟𑀸𑀤𑀺𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀲𑀼𑀥𑁄𑀢𑀁 𑀯𑀸’’𑀢𑀺 𑀇𑀤𑀁 𑀧𑀦 𑀧𑀺𑀡𑁆𑀟𑀧𑀸𑀢𑁂𑀦 𑀲𑀤𑁆𑀥𑀺𑀁 𑀮𑀤𑁆𑀥𑀁 𑀢𑀓𑁆𑀓𑁄𑀮𑀚𑀸𑀢𑀺𑀨𑀮𑀸𑀤𑀺𑀁, 𑀬𑀸𑀕𑀼𑀆𑀤𑀻𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀺𑀦𑁆𑀦𑀲𑀺𑀗𑁆𑀕𑀻𑀯𑁂𑀭𑀸𑀤𑀺𑀓𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀢𑁂𑀦𑀸𑀢𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀦. 𑀢𑀤𑀳𑀼 𑀧𑀝𑀺𑀕𑁆𑀕𑀳𑀺𑀢𑀁 𑀅𑀲𑁆𑀲𑀸𑀢𑀺 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁, 𑀢𑁂𑀦 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑁂𑀦. 𑀏𑀲 𑀦𑀬𑁄 ‘‘𑀤𑁆𑀯𑀻𑀳𑀧𑀝𑀺𑀕𑁆𑀕𑀳𑀺𑀢𑁂𑀦𑀸’’𑀢𑀺𑀆𑀤𑀻𑀲𑀼𑀧𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀫𑁆𑀧𑀺 𑀯𑀝𑁆𑀝𑀢𑀺, 𑀢𑀲𑁆𑀫𑀸. 𑀧𑀝𑀺𑀕𑁆𑀕𑀳𑀺𑀢𑀁 𑀲𑀢𑁆𑀢𑀸𑀳𑀁 𑀓𑀧𑁆𑀧𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 ‘‘𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀬𑀸𑀯𑀚𑀻𑀯𑀺𑀓𑀁 𑀧𑀝𑀺𑀕𑁆𑀕𑀳𑀺𑀢𑀁 𑀲𑀢𑁆𑀢𑀸𑀳𑀁 𑀓𑀧𑁆𑀧𑀢𑀺, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀦𑁆𑀢𑁂 𑀦 𑀓𑀧𑁆𑀧𑀢𑀻’’𑀢𑀺 (𑀫𑀳𑀸𑀯. 𑁩𑁦𑁫) 𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀫𑀼𑀔𑁂 𑀏𑀓𑀭𑀢𑁆𑀢𑀁 𑀦 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀫𑀼𑀔𑁂 𑀧𑀓𑁆𑀔𑀺𑀢𑁆𑀢𑀫𑁂𑀯 𑀬𑀲𑁆𑀫𑀸 𑀲𑀦𑁆𑀦𑀺𑀥𑀺 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 ‘‘𑀫𑀼𑀔𑀲𑀦𑁆𑀦𑀺𑀥𑀻’’𑀢𑀺 𑀯𑀼𑀢𑁆𑀢𑀁.

𑀘𑀢𑀲𑁆𑀲𑁄 𑀓𑀧𑁆𑀧𑀺𑀬𑀪𑀽𑀫𑀺𑀬𑁄𑀢𑀺 𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀸, 𑀕𑁄𑀦𑀺𑀲𑀸𑀤𑀺𑀓𑀸, 𑀕𑀳𑀧𑀢𑀺, 𑀲𑀫𑁆𑀫𑀼𑀢𑀻𑀢𑀺 𑀘𑀢𑀲𑁆𑀲𑁄 𑀓𑀧𑁆𑀧𑀺𑀬𑀓𑀼𑀝𑀺𑀬𑁄. 𑀢𑀢𑁆𑀣 𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀸 (𑀫𑀳𑀸𑀯. 𑀅𑀝𑁆𑀞. 𑁨𑁯𑁫) 𑀦𑀸𑀫 𑀕𑁂𑀳𑁂 𑀓𑀭𑀺𑀬𑀫𑀸𑀦𑁂 𑀲𑀫𑁆𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑁂𑀳𑀺 ‘‘𑀓𑀧𑁆𑀧𑀺𑀬𑀓𑀼𑀝𑀺𑀁 𑀓𑀭𑁄𑀫, 𑀓𑀧𑁆𑀧𑀺𑀬𑀓𑀼𑀝𑀺𑀁 𑀓𑀭𑁄𑀫𑀸’’𑀢𑀺 𑀯𑀸 ‘‘𑀓𑀧𑁆𑀧𑀺𑀬𑀓𑀼𑀝𑀺 𑀓𑀧𑁆𑀧𑀺𑀬𑀓𑀼𑀝𑀻’’𑀢𑀺 𑀯𑀸 𑀯𑀤𑀦𑁆𑀢𑁂𑀳𑀺 𑀞𑀧𑀺𑀢𑀧𑀞𑀫𑀺𑀝𑁆𑀞𑀓𑀣𑀫𑁆𑀪𑀸𑀤𑀺𑀓𑀸 𑀲𑀗𑁆𑀖𑀲𑁆𑀲 𑀯𑀸 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀸 𑀓𑀼𑀝𑀺. 𑀬𑁄 𑀧𑀦 𑀆𑀭𑀸𑀫𑁄 𑀬𑁂𑀪𑀼𑀬𑁆𑀬𑁂𑀦 𑀯𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺, 𑀲𑀓𑀮𑁄𑀧𑀺 𑀯𑀸, 𑀲𑁄 ‘‘𑀕𑁄𑀦𑀺𑀲𑀸𑀤𑀻’’𑀢𑀺 𑀯𑀼𑀘𑁆𑀘𑀢𑀺. 𑀕𑀳𑀧𑀢𑀻𑀢𑀺 𑀬𑀸 𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀁 𑀲𑁂𑀲𑁂𑀳𑀺 ‘‘𑀓𑀧𑁆𑀧𑀺𑀬𑀓𑀼𑀝𑀺𑀁 𑀤𑁂𑀫𑀸’’𑀢𑀺 𑀤𑀺𑀦𑁆𑀦𑀸, 𑀢𑁂𑀲𑀁 𑀯𑀸 𑀲𑀦𑁆𑀢𑀓𑀸. 𑀲𑀫𑁆𑀫𑀼𑀢𑀺 𑀦𑀸𑀫 𑀓𑀫𑁆𑀫𑀯𑀸𑀘𑀸𑀬 𑀲𑀸𑀯𑁂𑀢𑁆𑀯𑀸 𑀓𑀢𑀸. 𑀓𑀣𑀁 𑀧𑀦𑁂𑀢𑀸𑀲𑀁 𑀯𑀺𑀦𑀺𑀘𑁆𑀙𑀬𑁄 𑀚𑀸𑀦𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀢𑀸𑀲𑀁 𑀯𑀺𑀦𑀺𑀘𑁆𑀙𑀬𑁄 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀯𑀼𑀢𑁆𑀢𑁄’’𑀢𑀺.

𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀡𑀻𑀢𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀧𑀡𑀻𑀢𑀪𑁄𑀚𑀦𑀸𑀦𑀻’’𑀢𑀺 𑀇𑀤𑀁 𑀫𑀚𑁆𑀛𑁂 𑀧𑀤𑀮𑁄𑀧𑀁 𑀓𑀢𑁆𑀯𑀸 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀆𑀳 ‘‘𑀧𑀡𑀻𑀢𑀲𑀁𑀲𑀝𑁆𑀞𑀸𑀦𑀻’’𑀢𑀺𑀆𑀤𑀺. 𑀲𑀩𑁆𑀩𑁄𑀧𑀺 ‘‘𑀑𑀤𑀓𑁄’’𑀢𑀺 𑀯𑀼𑀢𑁆𑀢𑀮𑀓𑁆𑀔𑀡𑁄 𑀫𑀘𑁆𑀙𑁄𑀢𑀺 ‘‘𑀫𑀘𑁆𑀙𑁄 𑀦𑀸𑀫 𑀑𑀤𑀓𑁄 𑀯𑀼𑀘𑁆𑀘𑀢𑀻’’𑀢𑀺 (𑀧𑀸𑀘𑀺. 𑁨𑁬𑁦) 𑀏𑀯𑀁 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀮𑀓𑁆𑀔𑀡𑁄, 𑀲𑀩𑁆𑀩𑁄𑀧𑀺 𑀫𑀘𑁆𑀙𑁄 𑀏𑀯. 𑀬𑁄 𑀓𑁄𑀘𑀺 𑀉𑀤𑀓𑁂 𑀚𑀸𑀢𑁄 𑀫𑀘𑁆𑀙𑁄 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀳𑀸𑀦𑀸𑀫𑀲𑀺𑀓𑁆𑀔𑀸𑀧𑀤𑁂𑀦𑀸𑀢𑀺 𑁋

‘‘𑀅𑀕𑀺𑀮𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀘𑀢𑀼𑀫𑀸𑀲𑀧𑀘𑁆𑀘𑀬𑀧𑀯𑀸𑀭𑀡𑀸 𑀲𑀸𑀤𑀺𑀢𑀩𑁆𑀩𑀸 𑀅𑀜𑁆𑀜𑀢𑁆𑀭 𑀧𑀼𑀦𑀧𑀯𑀸𑀭𑀡𑀸𑀬 𑀅𑀜𑁆𑀜𑀢𑁆𑀭 𑀦𑀺𑀘𑁆𑀘𑀧𑀯𑀸𑀭𑀡𑀸𑀬. 𑀢𑀢𑁄 𑀘𑁂 𑀉𑀢𑁆𑀢𑀭𑀺 𑀲𑀸𑀤𑀺𑀬𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑁋

𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 (𑀧𑀸𑀘𑀺. 𑁩𑁦𑁬). 𑀏𑀢𑁆𑀣 𑀳𑀺 𑀲𑀗𑁆𑀖𑀯𑀲𑁂𑀦 𑀕𑀺𑀮𑀸𑀦𑀧𑀘𑁆𑀘𑀬𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑀝𑁆𑀞𑀸𑀦𑁂 𑀲𑀘𑁂 𑀢𑀢𑁆𑀣 𑀭𑀢𑁆𑀢𑀻𑀳𑀺 𑀯𑀸 𑀪𑁂𑀲𑀚𑁆𑀚𑁂𑀳𑀺 𑀯𑀸 𑀧𑀭𑀺𑀘𑁆𑀙𑁂𑀤𑁄 𑀓𑀢𑁄 𑀳𑁄𑀢𑀺 ‘‘𑀏𑀢𑁆𑀢𑀺𑀓𑀸𑀬𑁂𑀯 𑀭𑀢𑁆𑀢𑀺𑀬𑁄, 𑀏𑀢𑁆𑀢𑀓𑀸𑀦𑀺 𑀯𑀸 𑀪𑁂𑀲𑀚𑁆𑀚𑀸𑀦𑀺 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑀸𑀦𑀻’’𑀢𑀺, 𑀢𑀢𑁄 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀢𑁄 𑀯𑀸 𑀪𑁂𑀲𑀚𑁆𑀚𑀧𑀭𑀺𑀬𑀦𑁆𑀢𑀢𑁄 𑀯𑀸 𑀉𑀢𑁆𑀢𑀭𑀺 𑀦𑀪𑁂𑀲𑀚𑁆𑀚𑀓𑀭𑀡𑀻𑀬𑁂𑀦 𑀯𑀸 𑀪𑁂𑀲𑀚𑁆𑀚𑀁, 𑀅𑀜𑁆𑀜𑀪𑁂𑀲𑀚𑁆𑀚𑀓𑀭𑀡𑀻𑀬𑁂𑀦 𑀯𑀸 𑀅𑀜𑁆𑀜𑀁 𑀪𑁂𑀲𑀚𑁆𑀚𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀅𑀕𑀺𑀮𑀸𑀦𑁄 𑀕𑀺𑀮𑀸𑀦𑀲𑀜𑁆𑀜𑀻𑀧𑀺 𑀳𑀼𑀢𑁆𑀯𑀸 𑀧𑀜𑁆𑀘 𑀪𑁂𑀲𑀚𑁆𑀚𑀸𑀦𑀺 𑀯𑀺𑀜𑁆𑀜𑀸𑀧𑁂𑀦𑁆𑀢𑁄 𑀦𑀪𑁂𑀲𑀚𑁆𑀚𑀓𑀭𑀡𑀻𑀬𑁂𑀦 𑀪𑁂𑀲𑀚𑁆𑀚𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺 ‘‘𑀫𑀳𑀸𑀦𑀸𑀫𑀲𑀺𑀓𑁆𑀔𑀸𑀧𑀤𑁂𑀦 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁.

𑀬𑁄 𑀧𑀦 𑀦𑀪𑁂𑀲𑀚𑁆𑀚𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀅𑀣 𑀔𑁄 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀪𑀼𑀜𑁆𑀚𑀦𑀢𑁆𑀣𑀸𑀬, 𑀲𑁄 𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀬𑀸𑀬𑁂𑀯 𑀓𑀸𑀭𑁂𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 ‘‘𑀲𑀼𑀤𑁆𑀥𑀸𑀦𑀺 𑀲𑀧𑁆𑀧𑀺𑀆𑀤𑀻𑀦𑀺 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑁄 𑀧𑀸𑀘𑀺𑀢𑁆𑀢𑀺𑀬𑀁 𑀦𑀸𑀧𑀚𑁆𑀚𑀢𑀺, 𑀲𑁂𑀔𑀺𑀬𑁂𑀲𑀼 𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁨𑁫𑁯). 𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄𑀢𑀺 ‘‘𑀦 𑀲𑀽𑀧𑀁 𑀯𑀸 𑀑𑀤𑀦𑀁 𑀯𑀸 𑀅𑀕𑀺𑀮𑀸𑀦𑁄’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁬𑁧𑁩) 𑀲𑀺𑀓𑁆𑀔𑀸𑀧𑀤𑁂𑀦 𑀓𑀸𑀭𑁂𑀢𑀩𑁆𑀩𑁄, 𑀤𑀼𑀓𑁆𑀓𑀝𑁂𑀦 𑀓𑀸𑀭𑁂𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀺𑀦𑀸𑀢𑀺 𑀇𑀫𑀺𑀦𑀸 𑀧𑀡𑀻𑀢𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑁂𑀦.

‘‘𑀲𑀧𑁆𑀧𑀺𑀪𑀢𑁆𑀢𑀁 𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑀓𑀺𑀁 𑀳𑁄𑀢𑀻𑀢𑀺 𑀆𑀳 ‘‘𑀲𑀧𑁆𑀧𑀺𑀪𑀢𑁆𑀢𑀁 ‘𑀤𑁂𑀳𑀻’𑀢𑀺 𑀯𑀼𑀢𑁆𑀢𑁂 𑀧𑀦𑀸’’𑀢𑀺𑀆𑀤𑀺. 𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀫𑁂𑀯 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀲𑁆𑀫𑀸𑀢𑀺 𑀆𑀳 ‘‘𑀬𑀲𑁆𑀫𑀸’’𑀢𑀺𑀆𑀤𑀺. 𑀅𑀣 𑀬𑀣𑀸 ‘‘𑀧𑀡𑀻𑀢𑀪𑁄𑀚𑀦𑀸𑀦𑀻’’𑀢𑀺, 𑀏𑀯𑀁 ‘‘𑀲𑀧𑁆𑀧𑀺𑀪𑀢𑁆𑀢’’𑀦𑁆𑀢𑀺 𑀇𑀤𑀫𑁆𑀧𑀺 𑀓𑀲𑁆𑀫𑀸 𑀦 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? 𑀅𑀦𑁂𑀓𑀦𑁆𑀢𑀺𑀓𑀢𑁆𑀢𑀸. 𑀢𑀣𑀸 𑀳𑀺 ‘‘𑀧𑀡𑀻𑀢𑀪𑁄𑀚𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂 ‘‘𑀧𑀡𑀻𑀢𑀲𑀁𑀲𑀝𑁆𑀞𑀸𑀦𑀺 𑀪𑁄𑀚𑀦𑀸𑀦𑀺 𑀧𑀡𑀻𑀢𑀪𑁄𑀚𑀦𑀸𑀦𑀻’’𑀢𑀺 𑀅𑀬𑀫𑀢𑁆𑀣𑁄 𑀏𑀓𑀦𑁆𑀢𑀢𑁄 𑀧𑀜𑁆𑀜𑀸𑀬𑀢𑀺, ‘‘𑀲𑀧𑁆𑀧𑀺𑀪𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀧𑀦 ‘‘𑀲𑀧𑁆𑀧𑀺𑀫𑀬𑀁 𑀪𑀢𑁆𑀢𑀁 𑀲𑀧𑁆𑀧𑀺𑀪𑀢𑁆𑀢’’𑀦𑁆𑀢𑀺𑀧𑀺 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸 ‘𑀲𑀧𑁆𑀧𑀺𑀲𑀁𑀲𑀝𑁆𑀞𑀁 𑀪𑀢𑁆𑀢𑀁 𑀲𑀧𑁆𑀧𑀺𑀪𑀢𑁆𑀢’’𑀦𑁆𑀢𑀺 𑀅𑀬𑀫𑀢𑁆𑀣𑁄 𑀦 𑀏𑀓𑀦𑁆𑀢𑀢𑁄 𑀧𑀜𑁆𑀜𑀸𑀬𑀢𑀺. 𑀏𑀲 𑀦𑀬𑁄 ‘‘𑀦𑀯𑀦𑀻𑀢𑀪𑀢𑁆𑀢𑀁 𑀤𑁂𑀳𑀻’’𑀢𑀺𑀆𑀤𑀻𑀲𑀼𑀧𑀺.

𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 ‘‘𑀪𑀢𑁆𑀢𑀁 𑀤𑀢𑁆𑀯𑀸 𑀲𑀧𑁆𑀧𑀺𑀁 𑀓𑀢𑁆𑀯𑀸 𑀪𑀼𑀜𑁆𑀚𑀸’’𑀢𑀺 𑀧𑀼𑀭𑀺𑀫𑁂𑀦𑁂𑀯 𑀦𑀬𑁂𑀦. 𑀲𑀘𑁂 𑀧𑀦 ‘‘𑀲𑀧𑁆𑀧𑀺𑀦𑀸’’𑀢𑀺 𑀯𑀼𑀢𑁆𑀢𑁂 𑀓𑁂𑀯𑀮𑀁 𑀲𑁂𑀲𑁂𑀲𑀼 𑀦𑀯𑀦𑀻𑀢𑀸𑀤𑀻𑀲𑀼 𑀅𑀜𑁆𑀜𑀢𑀭𑁂𑀦 𑀤𑁂𑀢𑀺, 𑀯𑀺𑀲𑀗𑁆𑀓𑁂𑀢𑀫𑁂𑀯 𑀳𑁄𑀢𑀺. 𑀅𑀦𑀸𑀧𑀢𑁆𑀢𑀻𑀢𑀺 𑀯𑀺𑀲𑀗𑁆𑀓𑁂𑀢𑀢𑁆𑀢𑀸 𑀲𑀩𑁆𑀩𑀸𑀳𑀺𑀬𑁂𑀯 𑀆𑀧𑀢𑁆𑀢𑀻𑀳𑀺 𑀅𑀦𑀸𑀧𑀢𑁆𑀢𑀺. ‘‘𑀓𑀺𑀜𑁆𑀘𑀸𑀧𑀺 𑀅𑀦𑀸𑀧𑀢𑁆𑀢𑀺, 𑀅𑀢𑁆𑀢𑀦𑁄 𑀧𑀦 𑀧𑀬𑁄𑀕𑁂𑀦 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀦 𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺. 𑀓𑀧𑁆𑀧𑀺𑀬𑀲𑀧𑁆𑀧𑀺𑀦𑀸𑀢𑀺 𑀓𑀧𑁆𑀧𑀺𑀬𑀫𑀁𑀲𑀲𑀧𑁆𑀧𑀺𑀦𑀸. 𑀏𑀲 𑀦𑀬𑁄 𑀅𑀓𑀧𑁆𑀧𑀺𑀬𑀲𑀧𑁆𑀧𑀺𑀦𑀸𑀢𑀺 𑀏𑀢𑁆𑀣𑀸𑀧𑀺. 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀢𑀸 𑀳𑀺 𑀫𑀁𑀲𑀸𑀦𑀁𑀬𑁂𑀯, 𑀦 𑀲𑀧𑁆𑀧𑀺𑀆𑀤𑀻𑀦𑀁. 𑀞𑀧𑁂𑀢𑁆𑀯𑀸 𑀏𑀓𑀁 𑀫𑀦𑀼𑀲𑁆𑀲𑀯𑀲𑀸𑀢𑁂𑀮𑀁 𑀲𑀩𑁆𑀩𑁂𑀲𑀁 𑀔𑀻𑀭𑀤𑀥𑀺𑀲𑀧𑁆𑀧𑀺𑀦𑀯𑀦𑀻𑀢𑀯𑀲𑀸𑀢𑁂𑀮𑁂𑀲𑀼 𑀅𑀓𑀧𑁆𑀧𑀺𑀬𑀁 𑀦𑀸𑀫 𑀦𑀢𑁆𑀣𑀺.

𑀧𑀭𑀺𑀪𑁄𑀕𑁂𑀧𑀺 𑀤𑀼𑀓𑁆𑀓𑀝𑀫𑁂𑀯 𑀇𑀥 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀘𑁂 𑀅𑀲𑀢𑀺 𑀅𑀓𑀧𑁆𑀧𑀺𑀬𑀲𑀧𑁆𑀧𑀺𑀫𑁆𑀳𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀓𑀧𑁆𑀧𑀺𑀬𑀦𑀯𑀦𑀻𑀢𑀸𑀤𑀻𑀦𑀺 𑀤𑁂𑀢𑀺 ‘‘𑀲𑀧𑁆𑀧𑀺𑀁 𑀓𑀢𑁆𑀯𑀸 𑀪𑀼𑀜𑁆𑀚𑀸’’𑀢𑀺, 𑀅𑀓𑀧𑁆𑀧𑀺𑀬𑀲𑀧𑁆𑀧𑀺𑀦𑀸𑀯 𑀤𑀺𑀦𑁆𑀦𑀁 𑀳𑁄𑀢𑀺. 𑀬𑀣𑀸 𑀘 ‘‘𑀓𑀧𑁆𑀧𑀺𑀬𑀲𑀧𑁆𑀧𑀺𑀦𑀸 𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑀅𑀓𑀧𑁆𑀧𑀺𑀬𑀲𑀧𑁆𑀧𑀺𑀦𑀸 𑀤𑁂𑀢𑀺, 𑀯𑀺𑀲𑀗𑁆𑀓𑁂𑀢𑀁, 𑀏𑀯𑀁 ‘‘‘𑀅𑀓𑀧𑁆𑀧𑀺𑀬𑀲𑀧𑁆𑀧𑀺𑀦𑀸’𑀢𑀺 𑀯𑀼𑀢𑁆𑀢𑁂 𑀓𑀧𑁆𑀧𑀺𑀬𑀲𑀧𑁆𑀧𑀺𑀦𑀸 𑀤𑁂𑀢𑀻’’𑀢𑀺 𑀏𑀢𑁆𑀣𑀸𑀧𑀺 𑀧𑀝𑀺𑀧𑀸𑀝𑀺𑀬𑀸 𑀏𑀓𑀫𑁂𑀓𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑁂𑀧𑀺 𑀅𑀬𑀫𑁂𑀯𑀢𑁆𑀣𑁄 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸, 𑀲𑁄 𑀘 𑀲𑀗𑁆𑀔𑁂𑀧𑁂𑀦𑀧𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺 𑀯𑀺𑀢𑁆𑀣𑀸𑀭𑀦𑀬𑀁 𑀳𑀺𑀢𑁆𑀯𑀸 𑀇𑀫𑀺𑀦𑀸𑀯 𑀦𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑁂𑀦 𑀬𑁂𑀦 𑀯𑀺𑀜𑁆𑀜𑀢𑁆𑀢𑀺 𑀳𑁄𑀢𑀺, 𑀢𑀲𑁆𑀫𑀺𑀁 𑀯𑀸 𑀢𑀲𑁆𑀲 𑀫𑀽𑀮𑁂 𑀯𑀸 𑀮𑀤𑁆𑀥𑁂 𑀢𑀁 𑀢𑀁 𑀮𑀤𑁆𑀥𑀫𑁂𑀯 𑀳𑁄𑀢𑀺. 𑀲𑀘𑁂 𑀧𑀦 𑀅𑀜𑁆𑀜𑀁 𑀧𑀸𑀴𑀺𑀬𑀸 𑀆𑀕𑀢𑀁 𑀯𑀸 𑀅𑀦𑀸𑀕𑀢𑀁 𑀯𑀸 𑀤𑁂𑀢𑀺, 𑀯𑀺𑀲𑀗𑁆𑀓𑁂𑀢𑀦𑁆𑀢𑀺. 𑀦𑀸𑀦𑀸𑀝𑁆𑀞𑀸𑀦𑁂 𑀯𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀖𑀭𑁂 𑀲𑀧𑁆𑀧𑀺𑀁, 𑀇𑀢𑀭𑀲𑁆𑀫𑀺𑀁 𑀦𑀯𑀦𑀻𑀢𑀦𑁆𑀢𑀺𑀆𑀤𑀺𑀦𑀸 𑀦𑀸𑀦𑀸𑀝𑁆𑀞𑀸𑀦𑁂 𑀯𑀸.

𑀧𑀡𑀻𑀢𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀦𑁆𑀢𑀧𑁄𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀓𑀸𑀬𑁂𑀦𑀸𑀢𑀺 𑀳𑀢𑁆𑀣𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀲𑀭𑀻𑀭𑀸𑀯𑀬𑀯𑁂𑀦, 𑀅𑀦𑁆𑀢𑀫𑀲𑁄 𑀧𑀸𑀤𑀗𑁆𑀕𑀼𑀮𑀺𑀬𑀸𑀧𑀺 𑀕𑀡𑁆𑀳𑀦𑁆𑀢𑁄 𑀓𑀸𑀬𑁂𑀦 𑀕𑀡𑁆𑀳𑀸𑀢𑀺 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀤𑀸𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦𑀸𑀢𑀺 𑀧𑀢𑁆𑀢𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀲𑀭𑀻𑀭𑀲𑀫𑁆𑀩𑀤𑁆𑀥𑁂𑀦 𑀉𑀧𑀓𑀭𑀡𑁂𑀦. 𑀤𑀸𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀓𑀝𑀘𑁆𑀙𑀼𑀆𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀉𑀧𑀓𑀭𑀡𑁂𑀦 𑀤𑀺𑀦𑁆𑀦𑀁 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀤𑀺𑀦𑁆𑀦𑀁𑀬𑁂𑀯 𑀳𑁄𑀢𑀺. 𑀅𑀜𑁆𑀜𑀢𑀭𑁂𑀦𑀸𑀢𑀺 𑀓𑀸𑀬𑁂𑀦 𑀯𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀯𑀸 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀦𑀺𑀲𑁆𑀲𑀕𑁆𑀕𑀺𑀬𑁂𑀦𑀸𑀢𑀺 (𑀧𑀸𑀘𑀺. 𑀅𑀝𑁆𑀞. 𑁨𑁬𑁫) 𑀓𑀸𑀬𑀢𑁄 𑀘 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀢𑁄 𑀘 𑀫𑁄𑀘𑁂𑀢𑁆𑀯𑀸 𑀳𑀢𑁆𑀣𑀧𑀸𑀲𑁂 𑀞𑀺𑀢𑀲𑁆𑀲 𑀓𑀸𑀬𑁂 𑀯𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂 𑀯𑀸 𑀧𑀸𑀢𑀺𑀬𑀫𑀸𑀦𑀜𑁆𑀳𑀺 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀧𑀬𑁄𑀕𑁂𑀦 𑀤𑀺𑀦𑁆𑀦𑀁 𑀦𑀸𑀫 𑀳𑁄𑀢𑀺. 𑀢𑀲𑁆𑀲𑀸𑀢𑀺 𑀧𑀝𑀺𑀕𑁆𑀕𑀳𑀺𑀢𑀓𑀲𑁆𑀲. 𑀯𑀼𑀢𑁆𑀢𑀯𑀺𑀧𑀮𑁆𑀮𑀸𑀲𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀲𑁆𑀲 𑀧𑀝𑀺𑀧𑀓𑁆𑀔𑀯𑀲𑁂𑀦. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀁 𑀓𑀸𑀬𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀁 𑀅𑀜𑁆𑀜𑀢𑀭𑁂𑀦 𑀤𑀺𑀬𑁆𑀬𑀫𑀸𑀦𑁂 𑀓𑀸𑀬𑁂𑀦 𑀯𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀯𑀸 𑀕𑀡𑁆𑀳𑀸𑀢𑀺, 𑀏𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀦𑀸𑀫𑀸𑀢𑀺.

𑀲𑀁𑀳𑀸𑀭𑀺𑀫𑁂𑀦𑀸𑀢𑀺 𑀣𑀸𑀫𑀫𑀚𑁆𑀛𑀺𑀫𑁂𑀦 𑀧𑀼𑀭𑀺𑀲𑁂𑀦 𑀲𑀁𑀳𑀸𑀭𑀺𑀫𑁂𑀦, 𑀇𑀫𑀺𑀦𑀸 𑀅𑀲𑀁𑀳𑀸𑀭𑀺𑀫𑁂 𑀨𑀮𑀓𑁂 𑀯𑀸 𑀧𑀸𑀲𑀸𑀡𑁂 𑀯𑀸 𑀧𑀝𑀺𑀕𑁆𑀕𑀳𑀡𑀁 𑀦 𑀭𑀼𑀳𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀥𑀸𑀭𑁂𑀢𑀼𑀁 𑀲𑀫𑀢𑁆𑀣𑁂𑀦𑀸𑀢𑀺 𑀲𑀦𑁆𑀥𑀸𑀭𑁂𑀢𑀼𑀁 𑀬𑁄𑀕𑁆𑀕𑁂𑀦, 𑀇𑀫𑀺𑀦𑀸 𑀲𑀼𑀔𑀼𑀫𑁂𑀲𑀼 𑀢𑀺𑀦𑁆𑀢𑀺𑀡𑀺𑀓𑀸𑀤𑀺𑀧𑀡𑁆𑀡𑁂𑀲𑀼 𑀧𑀝𑀺𑀕𑁆𑀕𑀳𑀡𑀁 𑀦 𑀭𑀼𑀳𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀢𑀢𑁆𑀣𑀚𑀸𑀢𑀓𑀭𑀼𑀓𑁆𑀔𑀧𑀡𑁆𑀡𑁂𑀦𑀸𑀢𑀺 𑀚𑀸𑀢𑀝𑁆𑀞𑀸𑀦𑀢𑁄 𑀘𑀼𑀢𑁂𑀦 𑀧𑀤𑀼𑀫𑀺𑀦𑀺𑀧𑀡𑁆𑀡𑀸𑀤𑀺𑀦𑀸, 𑀇𑀫𑀺𑀦𑀸 𑀧𑀦 𑀫𑀳𑀦𑁆𑀢𑁂𑀧𑀺 𑀢𑀢𑁆𑀣𑀚𑀸𑀢𑀓𑁂 𑀧𑀤𑀼𑀫𑀺𑀦𑀺𑀧𑀡𑁆𑀡𑁂 𑀯𑀸 𑀓𑀺𑀁𑀲𑀼𑀓𑀧𑀡𑁆𑀡𑀸𑀤𑀺𑀫𑁆𑀳𑀺 𑀯𑀸 𑀧𑀝𑀺𑀕𑁆𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀦 𑀳𑀺 𑀢𑀁 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀲𑀗𑁆𑀔𑀁 𑀕𑀘𑁆𑀙𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀬𑀣𑀸 𑀘 𑀢𑀢𑁆𑀣𑀚𑀸𑀢𑀓𑁂, 𑀏𑀯𑀁 𑀔𑀸𑀡𑀼𑀓𑁂 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀫𑀜𑁆𑀘𑀸𑀤𑀺𑀫𑁆𑀳𑀺𑀧𑀺. 𑀦𑀦𑀼 𑀧𑀝𑀺𑀩𑀤𑁆𑀥𑀧𑁆𑀧𑀝𑀺𑀩𑀤𑁆𑀥𑁂𑀦𑀸𑀧𑀺 𑀧𑀢𑁆𑀢𑀸𑀥𑀸𑀭𑀸𑀤𑀺𑀦𑀸 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀧𑀝𑀺𑀕𑁆𑀕𑀳𑀡𑀁 𑀭𑀼𑀳𑀢𑀺, 𑀅𑀣 𑀓𑀲𑁆𑀫𑀸 𑀓𑀸𑀬𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀳𑀺𑀬𑁂𑀯 𑀧𑀝𑀺𑀕𑁆𑀕𑀳𑀡𑀁 𑀇𑀥 𑀯𑀼𑀢𑁆𑀢𑀁, 𑀦 𑀧𑀝𑀺𑀩𑀤𑁆𑀥𑀧𑁆𑀧𑀝𑀺𑀩𑀤𑁆𑀥𑁂𑀦𑀸𑀧𑀻𑀢𑀺 𑀆𑀳 ‘‘𑀧𑀝𑀺𑀩𑀤𑁆𑀥𑀧𑁆𑀧𑀝𑀺𑀩𑀤𑁆𑀥𑀁 𑀦𑀸𑀫 𑀇𑀥 𑀦𑀢𑁆𑀣𑀻’’𑀢𑀺. 𑀓𑁂𑀘𑀺 𑀧𑀦 ‘‘𑀆𑀥𑀸𑀭𑀓𑁂𑀦 𑀧𑀝𑀺𑀕𑁆𑀕𑀳𑀡𑀁 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀧𑁆𑀧𑀝𑀺𑀩𑀤𑁆𑀥𑁂𑀦 𑀧𑀝𑀺𑀕𑁆𑀕𑀳𑀡𑀁 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀦 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀯𑀘𑀦𑀫𑀢𑁆𑀢𑀫𑁂𑀯. 𑀅𑀢𑁆𑀣𑀢𑁄 𑀧𑀦 𑀲𑀩𑁆𑀩𑀫𑁆𑀧𑀺 𑀢𑀁 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀫𑁂𑀯 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀅𑀓𑀮𑁆𑀮𑀓𑁄𑀢𑀺 𑀕𑀺𑀮𑀸𑀦𑁄. 𑀫𑀼𑀔𑁂𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀲𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀼𑀔𑁂𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀅𑀪𑀺𑀳𑀝𑀪𑀸𑀚𑀦𑀢𑁄 𑀧𑀢𑀺𑀢𑀭𑀚𑀫𑁆𑀧𑀺 𑀯𑀝𑁆𑀝𑀢𑀺 𑀅𑀪𑀺𑀳𑀝𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀳𑁄.

𑀢𑀲𑁆𑀫𑀺𑀁 𑀞𑀢𑁆𑀯𑀸𑀢𑀺 𑀢𑀸𑀤𑀺𑀲𑁂 𑀳𑀢𑁆𑀣𑀧𑀸𑀲𑁂 𑀞𑀢𑁆𑀯𑀸. 𑀬𑀦𑁆𑀢𑀺 𑀬𑀁 𑀪𑀸𑀭𑀁. 𑀫𑀚𑁆𑀛𑀺𑀫𑁄 𑀧𑀼𑀭𑀺𑀲𑁄𑀢𑀺 𑀣𑀸𑀫𑀫𑀚𑁆𑀛𑀺𑀫𑀧𑀼𑀭𑀺𑀲𑁄. 𑀯𑀺𑀦𑀬𑁂 𑀧𑀜𑁆𑀜𑀢𑁆𑀢𑀁 𑀤𑀼𑀓𑁆𑀓𑀝𑀁 𑀯𑀺𑀦𑀬𑀤𑀼𑀓𑁆𑀓𑀝𑀁. 𑀢𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀢𑁆𑀯𑀸𑀢𑀺 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀯𑀺𑀳𑀸𑀭𑀁 𑀯𑀸 𑀆𑀲𑀦𑀲𑀸𑀮𑀁 𑀯𑀸 𑀕𑀦𑁆𑀢𑁆𑀯𑀸 𑀢𑀁 𑀪𑀺𑀓𑁆𑀔𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀢𑁆𑀯𑀸, 𑀇𑀤𑀜𑁆𑀘 𑀧𑀼𑀩𑁆𑀩𑀸𑀪𑁄𑀕𑀲𑁆𑀲 𑀅𑀦𑀼𑀭𑀽𑀧𑀯𑀲𑁂𑀦 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀢𑀁 ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦 𑀢𑀁𑀲𑀦𑁆𑀢𑀓𑀁 𑀦𑀸𑀫 𑀦 𑀳𑁄𑀢𑀺, 𑀢𑀲𑁆𑀫𑀸 𑀯𑀺𑀦𑀸𑀧𑀺 𑀢𑀲𑁆𑀲 𑀤𑀸𑀦𑀸𑀤𑀺𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺.

𑀅𑀲𑁆𑀲𑀼𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀸𑀤𑀻𑀲𑀽𑀢𑀺 𑀏𑀢𑁆𑀣 𑀅𑀲𑁆𑀲𑀼 𑀦𑀸𑀫 𑀅𑀓𑁆𑀔𑀺𑀚𑀮𑀁. 𑀔𑁂𑀴𑁄 𑀦𑀸𑀫 𑀮𑀸𑀮𑀸. 𑀲𑀺𑀗𑁆𑀖𑀸𑀡𑀺𑀓𑀸𑀢𑀺 𑀅𑀦𑁆𑀢𑁄𑀲𑀻𑀲𑀢𑁄 𑀧𑀽𑀢𑀺𑀲𑁂𑀫𑁆𑀳𑀪𑀸𑀯𑀁 𑀆𑀧𑀦𑁆𑀦𑀁 𑀫𑀢𑁆𑀣𑀮𑀼𑀗𑁆𑀕𑀁 𑀕𑀮𑀺𑀢𑁆𑀯𑀸 𑀢𑀸𑀮𑀼𑀫𑀢𑁆𑀣𑀓𑀯𑀺𑀯𑀭𑁂𑀦 𑀑𑀢𑀭𑀺𑀢𑁆𑀯𑀸 𑀦𑀸𑀲𑀸𑀧𑀼𑀝𑁂 𑀧𑀽𑀭𑁂𑀢𑁆𑀯𑀸 𑀞𑀺𑀢𑀁 𑀯𑀼𑀘𑁆𑀘𑀢𑀺, 𑀆𑀤𑀺𑀲𑀤𑁆𑀤𑁂𑀦 𑀫𑀼𑀢𑁆𑀢𑀓𑀭𑀻𑀲𑀲𑁂𑀫𑁆𑀳𑀤𑀦𑁆𑀢𑀫𑀮𑀅𑀓𑁆𑀔𑀺𑀕𑀽𑀣𑀓𑀡𑁆𑀡𑀕𑀽𑀣𑀓𑀸𑀦𑀁, 𑀲𑀭𑀻𑀭𑁂 𑀉𑀝𑁆𑀞𑀺𑀢𑀮𑁄𑀡𑀲𑁆𑀲 𑀘 𑀕𑀳𑀡𑀁. 𑀞𑀸𑀦𑀢𑁄𑀢𑀺 𑀅𑀓𑁆𑀔𑀺𑀓𑀽𑀧𑀸𑀤𑀺𑀢𑁄. 𑀅𑀦𑁆𑀢𑀭𑀸 𑀘𑁂 𑀕𑀡𑁆𑀳𑀸𑀢𑀺, 𑀓𑀺𑀁 𑀳𑁄𑀢𑀻𑀢𑀺 𑀆𑀳 ‘‘𑀉𑀕𑁆𑀕𑀳𑀺𑀢𑀓𑀁 𑀦𑀸𑀫 𑀳𑁄𑀢𑀻’’𑀢𑀺, 𑀤𑀼𑀝𑁆𑀞𑀼 𑀕𑀳𑀺𑀢𑀓𑀁 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀨𑀮𑀺𑀦𑀺𑀦𑁆𑀢𑀺 𑀨𑀮𑀯𑀦𑁆𑀢𑀁. 𑀢𑀢𑁆𑀣𑀚𑀸𑀢𑀓𑀨𑀮𑀺𑀦𑀺𑀲𑀸𑀔𑀸𑀬 𑀯𑀸𑀢𑀺 𑀢𑀲𑁆𑀫𑀺𑀁 𑀭𑀼𑀓𑁆𑀔𑁂 𑀚𑀸𑀢𑀸𑀬 𑀨𑀮𑀺𑀦𑀺𑀲𑀸𑀔𑀸𑀬 𑀯𑀸. 𑀤𑀼𑀭𑀼𑀧𑀘𑀺𑀡𑁆𑀡𑀤𑀼𑀓𑁆𑀓𑀝𑀦𑁆𑀢𑀺 ‘‘𑀦 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀸𑀭𑀺𑀢𑀲𑁆𑀲 𑀓𑀢𑀢𑁆𑀢𑀸 𑀤𑀼𑀝𑁆𑀞𑀼 𑀆𑀘𑀺𑀡𑁆𑀡𑀁 𑀘𑀭𑀺𑀢𑀦𑁆𑀢𑀺 𑀤𑀼𑀭𑀼𑀧𑀘𑀺𑀡𑁆𑀡𑀁, 𑀢𑀲𑁆𑀫𑀺𑀁 𑀤𑀼𑀓𑁆𑀓𑀝𑀁 𑀤𑀼𑀭𑀼𑀧𑀘𑀺𑀡𑁆𑀡𑀤𑀼𑀓𑁆𑀓𑀝𑀜𑁆𑀘 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑀆𑀳𑀭𑀻𑀬𑀢𑀻𑀢𑀺 𑀆𑀳𑀸𑀭𑁄, 𑀅𑀚𑁆𑀛𑁄𑀳𑀭𑀺𑀢𑀩𑁆𑀩𑀁 𑀬𑀁 𑀓𑀺𑀜𑁆𑀘𑀺, 𑀇𑀥 𑀧𑀦 𑀘𑀢𑁆𑀢𑀸𑀭𑀺 𑀓𑀸𑀮𑀺𑀓𑀸𑀦𑀺 𑀅𑀥𑀺𑀧𑁆𑀧𑁂𑀢𑀸𑀦𑀻𑀢𑀺 𑀆𑀳 ‘‘𑀬𑀁 𑀓𑀺𑀜𑁆𑀘𑀻’’𑀢𑀺𑀆𑀤𑀺. 𑀢𑀢𑁆𑀣 𑀅𑀭𑀼𑀡𑀼𑀕𑁆𑀕𑀫𑀦𑀢𑁄 𑀬𑀸𑀯 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑀸 𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀬𑀸𑀯 𑀓𑀸𑀮𑁄 𑀅𑀲𑁆𑀲𑀸𑀢𑀺 𑀬𑀸𑀯𑀓𑀸𑀮𑀺𑀓𑀁. 𑀅𑀭𑀼𑀡𑀼𑀕𑁆𑀕𑀫𑀦𑀢𑁄 𑀬𑀸𑀯 𑀬𑀸𑀫𑀸𑀯𑀲𑀸𑀦𑀸 𑀧𑀺𑀧𑀸𑀲𑀸𑀬 𑀲𑀢𑀺 𑀧𑀺𑀧𑀸𑀲𑀘𑁆𑀙𑁂𑀤𑀦𑀢𑁆𑀣𑀁 𑀧𑀸𑀢𑀩𑁆𑀩𑀢𑁄 𑀬𑀸𑀫𑁄 𑀓𑀸𑀮𑁄 𑀅𑀲𑁆𑀲𑀸𑀢𑀺 𑀬𑀸𑀫𑀓𑀸𑀮𑀺𑀓𑀁. 𑀬𑀸𑀯 𑀲𑀢𑁆𑀢𑀸𑀳𑀁 𑀦𑀺𑀤𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀲𑀢𑁆𑀢𑀸𑀳𑀁 𑀓𑀸𑀮𑁄 𑀅𑀲𑁆𑀲𑀸𑀢𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑀁. 𑀬𑀸𑀯𑀚𑀻𑀯𑀫𑁆𑀧𑀺 𑀧𑀭𑀺𑀳𑀭𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀬𑀸𑀯 𑀚𑀻𑀯𑀁 𑀏𑀢𑀲𑁆𑀲𑀸𑀢𑀺 𑀬𑀸𑀯𑀚𑀻𑀯𑀺𑀓𑀁. 𑀢𑁂𑀦𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺.

𑀯𑀦𑀫𑀽𑀮𑀧𑀢𑁆𑀢𑀧𑀼𑀧𑁆𑀨𑀨𑀮𑀸𑀤𑀻𑀢𑀺 𑀏𑀢𑁆𑀣 𑀢𑀸𑀯 𑀫𑀽𑀮𑀁 𑀦𑀸𑀫 𑀫𑀽𑀮𑀓𑀔𑀸𑀭𑀓𑀘𑀘𑁆𑀘𑀼𑀢𑀫𑁆𑀩𑀓𑀸𑀤𑀻𑀦𑀁 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀧𑀓𑀢𑀺𑀆𑀳𑀸𑀭𑀯𑀲𑁂𑀦 𑀫𑀦𑀼𑀲𑁆𑀲𑀸𑀦𑀁 𑀔𑀸𑀤𑀦𑀻𑀬𑀢𑁆𑀣𑀜𑁆𑀘𑁂𑀯 𑀪𑁄𑀚𑀦𑀻𑀬𑀢𑁆𑀣𑀜𑁆𑀘 𑀨𑀭𑀡𑀓𑀁 𑀲𑀽𑀧𑁂𑀬𑁆𑀬𑀧𑀡𑁆𑀡𑀫𑀽𑀮𑀁. 𑀧𑀢𑁆𑀢𑀁 𑀦𑀸𑀫 𑀫𑀽𑀮𑀓𑀔𑀸𑀭𑀓𑀘𑀘𑁆𑀘𑀼𑀢𑀫𑁆𑀩𑀓𑀸𑀤𑀻𑀦𑀁 𑀢𑀸𑀤𑀺𑀲𑀁𑀬𑁂𑀯 𑀧𑀢𑁆𑀢𑀁. 𑀧𑀼𑀧𑁆𑀨𑀁 𑀦𑀸𑀫 𑀫𑀽𑀮𑀓𑀔𑀸𑀭𑀓𑀸𑀤𑀻𑀦𑀁 𑀢𑀸𑀤𑀺𑀲𑀁𑀬𑁂𑀯 𑀧𑀼𑀧𑁆𑀨𑀁. 𑀨𑀮𑀁 𑀦𑀸𑀫 𑀧𑀦𑀲𑀮𑀩𑀼𑀚𑀸𑀤𑀻𑀦𑀁 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀧𑀓𑀢𑀺𑀆𑀳𑀸𑀭𑀯𑀲𑁂𑀦 𑀫𑀦𑀼𑀲𑁆𑀲𑀸𑀦𑀁 𑀔𑀸𑀤𑀦𑀻𑀬𑀢𑁆𑀣𑀜𑁆𑀘𑁂𑀯 𑀪𑁄𑀚𑀦𑀻𑀬𑀢𑁆𑀣𑀜𑁆𑀘 𑀨𑀭𑀡𑀓𑀁 𑀨𑀮𑀁. 𑀆𑀤𑀺𑀲𑀤𑁆𑀤𑁂𑀦 𑀓𑀦𑁆𑀤𑀫𑀽𑀮𑀸𑀤𑀻𑀦𑀁 𑀕𑀳𑀡𑀁.

𑀅𑀫𑁆𑀩𑀧𑀸𑀦𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁦𑁦) 𑀆𑀫𑁂𑀳𑀺 𑀯𑀸 𑀧𑀓𑁆𑀓𑁂𑀳𑀺 𑀯𑀸 𑀅𑀫𑁆𑀩𑁂𑀳𑀺 𑀓𑀢𑀧𑀸𑀦𑀁. 𑀢𑀢𑁆𑀣 𑀆𑀫𑁂𑀳𑀺 𑀓𑀭𑁄𑀦𑁆𑀢𑁂𑀦 𑀅𑀫𑁆𑀩𑀢𑀭𑀼𑀡𑀸𑀤𑀻𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀉𑀤𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀆𑀢𑀧𑁂 𑀆𑀤𑀺𑀘𑁆𑀘𑀧𑀸𑀓𑁂𑀦 𑀧𑀘𑀺𑀢𑁆𑀯𑀸 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑁂𑀳𑀺 𑀫𑀥𑀼𑀲𑀓𑁆𑀓𑀭𑀓𑀧𑁆𑀧𑀽𑀭𑀸𑀤𑀻𑀳𑀺 𑀬𑁄𑀚𑁂𑀢𑁆𑀯𑀸 𑀓𑀸𑀢𑀩𑁆𑀩𑀁. 𑀏𑀯𑀁 𑀓𑀢𑀁 𑀧𑀼𑀭𑁂𑀪𑀢𑁆𑀢𑀫𑁂𑀯 𑀓𑀧𑁆𑀧𑀢𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀓𑀢𑀁 𑀮𑀪𑀺𑀢𑁆𑀯𑀸 𑀧𑀦 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀧𑀭𑀺𑀪𑁄𑀕𑁂𑀦𑀸𑀧𑀺 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀁 𑀦𑀺𑀭𑀸𑀫𑀺𑀲𑀧𑀭𑀺𑀪𑁄𑀕𑁂𑀦 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀯𑀝𑁆𑀝𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀧𑀸𑀦𑁂𑀲𑀼.

𑀢𑁂𑀲𑀼 𑀧𑀦 𑀚𑀫𑁆𑀩𑀼𑀧𑀸𑀦𑀦𑁆𑀢𑀺 𑀚𑀫𑁆𑀩𑀼𑀨𑀮𑁂𑀳𑀺 𑀓𑀢𑀧𑀸𑀦𑀁. 𑀘𑁄𑀘𑀧𑀸𑀦𑀦𑁆𑀢𑀺 𑀅𑀝𑁆𑀞𑀺𑀓𑁂𑀳𑀺 𑀓𑀤𑀮𑀺𑀨𑀮𑁂𑀳𑀺 𑀓𑀢𑀧𑀸𑀦𑀁. 𑀫𑁄𑀘𑀧𑀸𑀦𑀦𑁆𑀢𑀺 𑀅𑀦𑀝𑁆𑀞𑀺𑀓𑁂𑀳𑀺 𑀓𑀤𑀮𑀺𑀨𑀮𑁂𑀳𑀺 𑀓𑀢𑀧𑀸𑀦𑀁. 𑀫𑀥𑀼𑀓𑀧𑀸𑀦𑀦𑁆𑀢𑀺 𑀫𑀥𑀼𑀓𑀸𑀦𑀁 𑀚𑀸𑀢𑀺𑀭𑀲𑁂𑀦 𑀓𑀢𑀧𑀸𑀦𑀁. 𑀢𑀁 𑀧𑀦 𑀉𑀤𑀓𑀲𑀫𑁆𑀪𑀺𑀦𑁆𑀦𑀁 𑀯𑀝𑁆𑀝𑀢𑀺, 𑀲𑀼𑀤𑁆𑀥𑀁 𑀦 𑀯𑀝𑁆𑀝𑀢𑀺. 𑀫𑀼𑀤𑁆𑀤𑀺𑀓𑀸𑀧𑀸𑀦𑀦𑁆𑀢𑀺 𑀫𑀼𑀤𑁆𑀤𑀺𑀓𑀸 𑀉𑀤𑀓𑁂 𑀫𑀤𑁆𑀤𑀺𑀢𑁆𑀯𑀸 𑀅𑀫𑁆𑀩𑀧𑀸𑀦𑀁 𑀯𑀺𑀬 𑀓𑀢𑀧𑀸𑀦𑀁. 𑀲𑀸𑀮𑀽𑀓𑀧𑀸𑀦𑀦𑁆𑀢𑀺 𑀭𑀢𑁆𑀢𑀼𑀧𑁆𑀧𑀮𑀦𑀻𑀮𑀼𑀧𑁆𑀧𑀮𑀸𑀤𑀻𑀦𑀁 𑀲𑀸𑀮𑀽𑀓𑁂 𑀫𑀤𑁆𑀤𑀺𑀢𑁆𑀯𑀸 𑀓𑀢𑀧𑀸𑀦𑀁. 𑀨𑀸𑀭𑀼𑀲𑀓𑀧𑀸𑀦𑀦𑁆𑀢𑀺 𑀨𑀸𑀭𑀼𑀲𑀓𑁂𑀳𑀺 𑀅𑀫𑁆𑀩𑀧𑀸𑀦𑀁 𑀯𑀺𑀬 𑀓𑀢𑀧𑀸𑀦𑀁. 𑀇𑀫𑀺𑀦𑀸𑀯 𑀦𑀬𑁂𑀦 𑀯𑁂𑀢𑁆𑀢𑀧𑀸𑀦𑀸𑀤𑀻𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀢𑀸𑀦𑀺 𑀘 𑀧𑀦 𑀲𑀩𑁆𑀩𑀸𑀦𑀺 𑀧𑀸𑀦𑀸𑀦𑀺 𑀅𑀕𑁆𑀕𑀺𑀧𑀸𑀓𑀸𑀦𑀺 𑀦 𑀯𑀝𑁆𑀝𑀦𑁆𑀢𑀺. 𑀢𑁂𑀦𑀸𑀳 ‘‘𑀲𑀻𑀢𑁄𑀤𑀓𑁂𑀦𑀸’’𑀢𑀺𑀆𑀤𑀺. 𑀅𑀯𑀲𑁂𑀲𑁂𑀲𑀼𑀧𑀺 𑀅𑀦𑀼𑀜𑁆𑀜𑀸𑀢𑀨𑀮𑀧𑀢𑁆𑀢𑀧𑀼𑀧𑁆𑀨𑀭𑀲𑁂𑀲𑀽𑀢𑀺 𑀥𑀜𑁆𑀜𑀨𑀮𑀧𑀓𑁆𑀓𑀲𑀸𑀓𑀫𑀥𑀼𑀓𑀧𑀼𑀧𑁆𑀨𑀭𑀲𑀢𑁄 𑀅𑀯𑀲𑁂𑀲𑁂𑀲𑀼 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀨𑀮𑀭𑀲𑀁 𑀞𑀧𑁂𑀢𑁆𑀯𑀸 𑀥𑀜𑁆𑀜𑀨𑀮𑀭𑀲’’𑀦𑁆𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁩𑁦𑁦) 𑀅𑀦𑀼𑀜𑁆𑀜𑀸𑀢𑀓𑁂𑀲𑀼 𑀨𑀮𑀧𑀢𑁆𑀢𑀧𑀼𑀧𑁆𑀨𑀭𑀲𑁂𑀲𑀼𑀧𑀺.

𑀔𑀸𑀤𑀦𑀻𑀬𑀢𑁆𑀣𑀦𑁆𑀢𑀺 𑀔𑀸𑀤𑀦𑀻𑀬𑁂𑀦 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁. 𑀦𑁂𑀯 𑀨𑀭𑀢𑀻𑀢𑀺 𑀦 𑀦𑀺𑀧𑁆𑀨𑀸𑀤𑁂𑀢𑀺. 𑀅𑀦𑀸𑀳𑀸𑀭𑁂𑀧𑀺 𑀉𑀤𑀓𑁂 𑀆𑀳𑀸𑀭𑀲𑀜𑁆𑀜𑀸𑀬𑀸𑀢𑀺 ‘‘𑀆𑀳𑀸𑀭𑀁 𑀆𑀳𑀭𑁂𑀬𑁆𑀬𑀸’’𑀢𑀺 𑀧𑀤𑀲𑁆𑀲 𑀧𑀤𑀪𑀸𑀚𑀦𑁂 (𑀧𑀸𑀘𑀺. 𑁨𑁬𑁫) 𑀯𑀼𑀢𑁆𑀢𑀫𑀢𑁆𑀣𑀁 𑀲𑀫𑁆𑀫𑀸 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀆𑀳𑀭𑀻𑀬𑀢𑀻𑀢𑀺 𑀆𑀳𑀸𑀭𑁄’’𑀢𑀺 𑀅𑀦𑀸𑀳𑀸𑀭𑁂𑀧𑀺 𑀉𑀤𑀓𑁂 𑀆𑀳𑀸𑀭𑀲𑀜𑁆𑀜𑀸𑀬 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸𑀦𑀁. 𑀤𑀦𑁆𑀢𑀧𑁄𑀦𑁂 𑀘 ‘‘𑀫𑀼𑀔𑀤𑁆𑀯𑀸𑀭𑀁 𑀆𑀳𑀝𑀁 𑀇𑀤’’𑀦𑁆𑀢𑀺 𑀲𑀜𑁆𑀜𑀸𑀬𑀸𑀢𑀺 𑀫𑀼𑀔𑀤𑁆𑀯𑀸𑀭𑀁 𑀅𑀦𑀸𑀳𑀝𑀫𑁆𑀧𑀺 𑀤𑀦𑁆𑀢𑀧𑁄𑀦𑀁 ‘‘𑀫𑀼𑀔𑀤𑁆𑀯𑀸𑀭𑀁 𑀆𑀳𑀝𑀁 𑀇𑀤𑀁 𑀤𑀦𑁆𑀢𑀧𑁄𑀦’’𑀦𑁆𑀢𑀺 𑀯𑀺𑀧𑀮𑁆𑀮𑀢𑁆𑀣𑀲𑀜𑁆𑀜𑀸𑀬 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸𑀦𑀁. 𑀬𑀣𑀸𑀲𑀼𑀔𑀁 𑀧𑀸𑀢𑀼𑀦𑁆𑀢𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀯𑀸 𑀅𑀧𑁆𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀯𑀸 𑀬𑀣𑀸𑀓𑀸𑀫𑀁 𑀧𑀸𑀢𑀼𑀁. 𑀤𑀦𑁆𑀢𑀧𑁄𑀦𑀧𑀭𑀺𑀪𑁄𑀕𑁂𑀦𑀸𑀢𑀺 𑀤𑀦𑁆𑀢𑀓𑀝𑁆𑀞𑀧𑀭𑀺𑀪𑁄𑀕𑁂𑀦, 𑀤𑀦𑁆𑀢𑀥𑁄𑀯𑀦𑀸𑀤𑀺𑀦𑀸𑀢𑀺 𑀅𑀢𑁆𑀣𑁄, 𑀇𑀫𑀺𑀦𑀸 𑀢𑀲𑁆𑀲 𑀧𑀦 𑀭𑀲𑀁 𑀕𑀺𑀮𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀘𑀢𑁆𑀢𑀸𑀭𑀺 𑀫𑀳𑀸𑀯𑀺𑀓𑀝𑀸𑀦𑀻𑀢𑀺 𑀕𑀽𑀣𑀁, 𑀫𑀼𑀢𑁆𑀢𑀁, 𑀙𑀸𑀭𑀺𑀓𑀸, 𑀫𑀢𑁆𑀢𑀺𑀓𑀸 (𑀫𑀳𑀸𑀯. 𑁨𑁬𑁮) 𑀘 ‘‘𑀆𑀲𑀬𑀸𑀤𑀺𑀯𑀲𑁂𑀦 𑀯𑀺𑀭𑀽𑀧𑀸𑀦𑀺 𑀚𑀸𑀢𑀸𑀦𑀻’’𑀢𑀺 𑀓𑀢𑁆𑀯𑀸 𑀯𑀺𑀓𑀝𑀸𑀦𑀻𑀢𑀺 𑀯𑀸 𑀅𑀧𑀓𑀢𑀺𑀪𑁄𑀚𑀦𑀢𑁆𑀢𑀸 𑀯𑀺𑀓𑀝𑀸𑀦𑀺 ‘‘𑀯𑀺𑀭𑀽𑀧𑀸𑀦𑀺 𑀚𑀸𑀢𑀸𑀦𑀻’’𑀢𑀺 𑀯𑀸 𑀅𑀢𑁆𑀣𑁄. 𑀲𑀢𑀺 𑀧𑀘𑁆𑀘𑀬𑁂𑀢𑀺 𑀓𑀸𑀭𑀡𑁂 𑀲𑀢𑀺, 𑀲𑀧𑁆𑀧𑀤𑀝𑁆𑀞𑁂𑀢𑀺 𑀅𑀢𑁆𑀣𑁄. 𑀥𑀽𑀫𑀸𑀤𑀺𑀅𑀩𑁆𑀩𑁄𑀳𑀸𑀭𑀺𑀓𑀸𑀪𑀸𑀯𑁄𑀢𑀺 𑀥𑀽𑀫𑀧𑀼𑀧𑁆𑀨𑀕𑀦𑁆𑀥𑀤𑀦𑁆𑀢𑀔𑀬𑀸𑀤𑀺𑀅𑀩𑁆𑀩𑁄𑀳𑀸𑀭𑀺𑀓𑀸𑀪𑀸𑀯𑁄.

𑀤𑀦𑁆𑀢𑀧𑁄𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑁄𑀚𑀦𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.