𑁪. 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸

𑀅𑀦𑀪𑀺𑀚𑀸𑀦𑀦𑁆𑀢𑀺 𑀦 𑀅𑀪𑀺𑀚𑀸𑀦𑀁. 𑀬𑁂𑀦 𑀳𑀺 𑀬𑁄 𑀥𑀫𑁆𑀫𑁄 𑀅𑀥𑀺𑀕𑀢𑁄, 𑀲𑁄 𑀢𑀲𑁆𑀲 𑀧𑀸𑀓𑀝𑁄 𑀳𑁄𑀢𑀻𑀢𑀺 𑀆𑀳 ‘‘𑀲𑀓𑀲𑀦𑁆𑀢𑀸𑀦𑁂’’𑀢𑀺𑀆𑀤𑀺. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀧𑀓𑀢𑀺𑀫𑀦𑀼𑀲𑁆𑀲𑁂𑀳𑀺 𑀉𑀢𑁆𑀢𑀭𑀺𑀢𑀭𑀸𑀦𑀁 𑀫𑀦𑀼𑀲𑁆𑀲𑀸𑀦𑀁, 𑀉𑀓𑁆𑀓𑀝𑁆𑀞𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀦𑁆𑀢𑀺 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀪𑀽𑀢𑀁 𑀅𑀥𑀺𑀕𑀢𑀥𑀫𑁆𑀫𑀁. 𑀅𑀣 𑀯𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄. 𑀫𑀦𑀼𑀲𑁆𑀲𑀥𑀫𑁆𑀫𑁄 𑀦𑀸𑀫 𑀯𑀺𑀦𑀸 𑀪𑀸𑀯𑀦𑀸𑀫𑀦𑀲𑀺𑀓𑀸𑀭𑁂𑀦 𑀧𑀓𑀢𑀺𑀬𑀸 𑀫𑀦𑀼𑀲𑁆𑀲𑁂𑀳𑀺 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑁄 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑁄. 𑀲𑁄 𑀳𑀺 𑀫𑀦𑀼𑀲𑁆𑀲𑀸𑀦𑀁 𑀘𑀺𑀢𑁆𑀢𑀸𑀥𑀺𑀝𑁆𑀞𑀸𑀦𑀫𑀢𑁆𑀢𑁂𑀦 𑀇𑀚𑁆𑀛𑀦𑀢𑁄 𑀢𑁂𑀲𑀁 𑀲𑁄 𑀪𑀸𑀯𑀺𑀢𑀥𑀫𑁆𑀫𑁄 𑀯𑀺𑀬 𑀞𑀺𑀢𑁄𑀢𑀺 𑀢𑀣𑀸 𑀯𑀼𑀢𑁆𑀢𑁄, 𑀫𑀦𑀼𑀲𑁆𑀲𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀢𑁂𑀲𑀼 𑀩𑀳𑀼𑀮𑀁 𑀧𑀯𑀢𑁆𑀢𑀦𑀢𑁄. 𑀛𑀸𑀦𑀸𑀤𑀺𑀓𑀁 𑀧𑀦 𑀢𑀩𑁆𑀩𑀺𑀥𑀼𑀭𑀦𑁆𑀢𑀺 𑀢𑀢𑀼𑀢𑁆𑀢𑀭𑀺, 𑀇𑀢𑀺 𑀉𑀢𑁆𑀢𑀭𑀺 𑀫𑀦𑀼𑀲𑁆𑀲𑀥𑀫𑁆𑀫𑀸𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄, 𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀦𑁆𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑀫𑀼𑀤𑀸𑀘𑀭𑀦𑁆𑀢𑁄𑀢𑀺 𑀆𑀭𑁄𑀘𑁂𑀦𑁆𑀢𑁄.

𑀓𑀺𑀜𑁆𑀘𑀸𑀧𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀲𑀩𑁆𑀩𑀸𑀯 𑀧𑀜𑁆𑀜𑀸 ‘‘𑀜𑀸𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀇𑀥 𑀧𑀦 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀸𑀯 𑀯𑁂𑀤𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀸 𑀚𑀸𑀦𑀦𑀝𑁆𑀞𑁂𑀦 𑀜𑀸𑀡’’𑀦𑁆𑀢𑀺. 𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑁆𑀢𑀸 𑀧𑀭𑀺𑀲𑀼𑀤𑁆𑀥𑀝𑁆𑀞𑁂𑀦 𑀅𑀭𑀺𑀬𑀦𑁆𑀢𑀺 𑀆𑀳 ‘‘𑀅𑀭𑀺𑀬𑀁 𑀯𑀺𑀲𑀼𑀤𑁆𑀥𑀁 𑀉𑀢𑁆𑀢𑀫’’𑀦𑁆𑀢𑀺. 𑀅𑀭𑀺𑀬𑀲𑀤𑁆𑀤𑁄 𑀘𑁂𑀢𑁆𑀣 𑀯𑀺𑀲𑀼𑀤𑁆𑀥𑀧𑀭𑀺𑀬𑀸𑀬𑁄, 𑀦 𑀮𑁄𑀓𑀼𑀢𑁆𑀢𑀭𑀧𑀭𑀺𑀬𑀸𑀬𑁄. 𑀛𑀸𑀦𑀸𑀤𑀺𑀪𑁂𑀤𑁂𑀢𑀺 𑀆𑀤𑀺𑀲𑀤𑁆𑀤𑁂𑀦 ‘‘𑀯𑀺𑀫𑁄𑀓𑁆𑀔𑁄, 𑀲𑀫𑀸𑀥𑀺, 𑀲𑀫𑀸𑀧𑀢𑁆𑀢𑀺, 𑀜𑀸𑀡𑀤𑀲𑁆𑀲𑀦𑀁, 𑀫𑀕𑁆𑀕𑀪𑀸𑀯𑀦𑀸, 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸, 𑀓𑀺𑀮𑁂𑀲𑀧𑁆𑀧𑀳𑀸𑀦𑀁, 𑀯𑀺𑀦𑀻𑀯𑀭𑀡𑀢𑀸 𑀘𑀺𑀢𑁆𑀢𑀲𑁆𑀲, 𑀲𑀼𑀜𑁆𑀜𑀸𑀕𑀸𑀭𑁂 𑀅𑀪𑀺𑀭𑀢𑀻’’𑀢𑀺 (𑀧𑀸𑀭𑀸. 𑁧𑁯𑁮) 𑀇𑀫𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀺𑀜𑁆𑀜𑀼𑀲𑁆𑀲 𑀫𑀦𑀼𑀲𑁆𑀲𑀚𑀸𑀢𑀺𑀓𑀲𑁆𑀲𑀸𑀢𑀺 𑀆𑀭𑁄𑀘𑁂𑀢𑀩𑁆𑀩𑀧𑀼𑀕𑁆𑀕𑀮𑀦𑀺𑀤𑀲𑁆𑀲𑀦𑀁. 𑀏𑀢𑀲𑁆𑀲 𑀳𑀺 𑀆𑀭𑁄𑀘𑀺𑀢𑁂 𑀆𑀭𑁄𑀘𑀺𑀢𑀁 𑀳𑁄𑀢𑀺, 𑀦 𑀤𑁂𑀯𑀩𑁆𑀭𑀳𑁆𑀫𑀸𑀦𑀁, 𑀦𑀸𑀧𑀺 𑀧𑁂𑀢𑀬𑀓𑁆𑀔𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀦𑁆𑀢𑀺. 𑀆𑀭𑁄𑀘𑁂𑀬𑁆𑀬𑀸𑀢𑀺 𑀯𑀤𑁂𑀬𑁆𑀬, 𑀯𑀺𑀜𑁆𑀜𑀸𑀧𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀦𑀸 𑀅𑀜𑁆𑀜𑀸𑀧𑀤𑁂𑀲𑁂𑀦𑀸𑀢𑀺 ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀺, 𑀲𑁄 𑀪𑀺𑀓𑁆𑀔𑀼 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁨𑁨𑁦) 𑀦𑀬𑁂𑀦 𑀅𑀜𑁆𑀜𑀸𑀧𑀤𑁂𑀲𑀁 𑀯𑀺𑀦𑀸𑀢𑀺 𑀅𑀢𑁆𑀣𑁄. 𑀇𑀥𑁂𑀯𑀸𑀢𑀺 ‘‘𑀇𑀢𑀺 𑀚𑀸𑀦𑀸𑀫𑀺, 𑀇𑀢𑀺 𑀧𑀲𑁆𑀲𑀸𑀫𑀻’’𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀧𑀤𑁂. ‘‘𑀢𑁂𑀦 𑀯𑀼𑀢𑁆𑀢’’𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀁.

𑀲𑀫𑀦𑀼𑀕𑁆𑀕𑀸𑀳𑀻𑀬𑀫𑀸𑀦𑁄𑀢𑀺 𑀘𑁄𑀤𑀺𑀬𑀫𑀸𑀦𑁄, 𑀬𑀁 𑀯𑀢𑁆𑀣𑀼 𑀆𑀭𑁄𑀘𑀺𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀓𑀺𑀁 𑀢𑁂 𑀅𑀥𑀺𑀕𑀢𑀁, 𑀓𑀺𑀦𑁆𑀢𑀺 𑀢𑁂 𑀅𑀥𑀺𑀕𑀢𑀁, 𑀓𑀤𑀸 𑀢𑁂 𑀅𑀥𑀺𑀕𑀢𑀁, 𑀓𑀢𑁆𑀣 𑀢𑁂 𑀅𑀥𑀺𑀕𑀢𑀁, 𑀓𑀢𑀫𑁂 𑀢𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀓𑀢𑀫𑁂𑀲𑀁 𑀢𑁆𑀯𑀁 𑀥𑀫𑁆𑀫𑀸𑀦𑀁 𑀮𑀸𑀪𑀻’𑀢𑀺 𑀓𑁂𑀦𑀘𑀺 𑀯𑀼𑀘𑁆𑀘𑀫𑀸𑀦𑁄’’𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀲𑀫𑀦𑀼𑀕𑁆𑀕𑀸𑀳𑀻𑀬𑀫𑀸𑀦𑁄𑀢𑀺 𑀦 𑀓𑁂𑀦𑀘𑀺 𑀯𑀼𑀘𑁆𑀘𑀫𑀸𑀦𑁄.

‘‘𑀪𑀺𑀓𑁆𑀔𑀼𑀪𑀸𑀯𑁂 𑀞𑀢𑁆𑀯𑀸 𑀅𑀪𑀩𑁆𑀩𑁄 𑀛𑀸𑀦𑀸𑀤𑀻𑀦𑀺 𑀅𑀥𑀺𑀕𑀦𑁆𑀢𑀼’’𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑀸𑀢𑀺𑀓𑁆𑀓𑀫𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑀢𑁆𑀢𑀸 𑀯𑀼𑀢𑁆𑀢𑀁. 𑀪𑀺𑀓𑁆𑀔𑀼𑀪𑀸𑀯𑁄 𑀳𑀺𑀲𑁆𑀲 𑀲𑀕𑁆𑀕𑀦𑁆𑀢𑀭𑀸𑀬𑁄 𑀘𑁂𑀯 𑀳𑁄𑀢𑀺 𑀫𑀕𑁆𑀕𑀦𑁆𑀢𑀭𑀸𑀬𑁄 𑀘 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁯𑁮). 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀲𑀸𑀫𑀜𑁆𑀜𑀁 𑀤𑀼𑀧𑁆𑀧𑀭𑀸𑀫𑀝𑁆𑀞𑀁, 𑀦𑀺𑀭𑀬𑀸𑀬𑀼𑀧𑀓𑀟𑁆𑀠𑀢𑀻’’𑀢𑀺 (𑀲𑀁. 𑀦𑀺. 𑁧.𑁮𑁯; 𑀥. 𑀧. 𑁩𑁧𑁧). 𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀲𑀺𑀣𑀺𑀮𑁄 𑀳𑀺 𑀧𑀭𑀺𑀩𑁆𑀩𑀸𑀚𑁄, 𑀪𑀺𑀬𑁆𑀬𑁄 𑀆𑀓𑀺𑀭𑀢𑁂 𑀭𑀚’’𑀦𑁆𑀢𑀺 (𑀲𑀁. 𑀦𑀺. 𑁧.𑁮𑁯; 𑀥. 𑀧. 𑁩𑁧𑁩). 𑀪𑀺𑀓𑁆𑀔𑀼𑀪𑀸𑀯𑁄𑀢𑀺 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀺𑀢𑁆𑀯𑀸 ‘‘𑀲𑀫𑀡𑁄 𑀅𑀳’’𑀦𑁆𑀢𑀺 𑀧𑀝𑀺𑀚𑀸𑀦𑀦𑀢𑁄 𑀯𑁄𑀳𑀸𑀭𑀫𑀢𑁆𑀢𑀲𑀺𑀤𑁆𑀥𑁄 𑀪𑀺𑀓𑁆𑀔𑀼𑀪𑀸𑀯𑁄. 𑀤𑀸𑀦𑀸𑀤𑀻𑀳𑀻𑀢𑀺 𑀤𑀸𑀦𑀲𑀭𑀡𑀲𑀻𑀮𑀲𑀁𑀯𑀭𑀸𑀤𑀻𑀳𑀺.

𑀅𑀚𑀸𑀦𑀫𑁂𑀯𑀸𑀢𑀺 𑀏𑀢𑁆𑀣 𑀏𑀯𑀸𑀢𑀺 𑀅𑀯𑀥𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑁄. ‘‘𑀅𑀚𑀸𑀦𑀫𑁂𑀯’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺. 𑀢𑀢𑁆𑀣 𑀧𑀦 ‘‘𑀏𑀯𑀁 𑀚𑀸𑀦𑀸𑀫𑀺, 𑀏𑀯𑀁 𑀧𑀲𑁆𑀲𑀸𑀫𑀻’’𑀢𑀺 𑀅𑀯𑀘𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀯𑀘𑀦𑀢𑁆𑀣𑀯𑀺𑀭𑀳𑀢𑁄𑀢𑀺 ‘‘𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺’’𑀦𑁆𑀢𑀺 𑀆𑀤𑀺𑀯𑀘𑀦𑀲𑁆𑀲 (𑀧𑀸𑀭𑀸. 𑁨𑁦𑁯) 𑀅𑀢𑁆𑀣𑀪𑀽𑀢𑁂𑀦 𑀛𑀸𑀦𑀸𑀤𑀺𑀦𑀸 𑀯𑀚𑁆𑀚𑀺𑀢𑀢𑁆𑀢𑀸 𑀢𑀼𑀘𑁆𑀙𑀁 𑀉𑀤𑀓𑀸𑀤𑀺𑀲𑀼𑀜𑁆𑀜𑀁 𑀪𑀸𑀚𑀦𑀁 𑀯𑀺𑀬. 𑀫𑀼𑀲𑀸𑀢𑀺 𑀯𑀺𑀲𑀁𑀯𑀸𑀤𑀦𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀧𑀭𑀯𑀺𑀲𑀁𑀯𑀸𑀤𑀓𑁄 𑀯𑀘𑀻𑀧𑀬𑁄𑀕𑁄, 𑀓𑀸𑀬𑀧𑀬𑁄𑀕𑁄 𑀯𑀸. 𑀢𑁂𑀦𑀸𑀳 ‘‘𑀯𑀜𑁆𑀘𑀦𑀸𑀥𑀺𑀧𑁆𑀧𑀸𑀬𑀢𑁄 𑀫𑀼𑀲𑀸’’𑀢𑀺. 𑀫𑀼𑀲𑀸 𑀘 𑀯𑀜𑁆𑀘𑀦𑀸𑀥𑀺𑀧𑁆𑀧𑀸𑀬𑁄 𑀘 𑀧𑀼𑀩𑁆𑀩𑀪𑀸𑀕𑀓𑁆𑀔𑀡𑁂, 𑀢𑀗𑁆𑀔𑀡𑁂 𑀘. 𑀯𑀼𑀢𑁆𑀢𑀜𑁆𑀳𑀺 ‘‘𑀧𑀼𑀩𑁆𑀩𑁂 𑀯𑀸𑀲𑁆𑀲 𑀳𑁄𑀢𑀺 ‘𑀫𑀼𑀲𑀸 𑀪𑀡𑀺𑀲𑁆𑀲’𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 ‘𑀫𑀼𑀲𑀸 𑀪𑀡𑀸𑀫𑀻’’’𑀢𑀺 (𑀧𑀸𑀭𑀸. 𑁨𑁦𑁦). 𑀏𑀢𑀜𑁆𑀳𑀺 𑀤𑁆𑀯𑀬𑀁 𑀅𑀗𑁆𑀕𑀪𑀽𑀢𑀁, 𑀇𑀢𑀭𑀁 𑀧𑀦 𑀳𑁄𑀢𑀼 𑀯𑀸, 𑀫𑀸 𑀯𑀸, 𑀅𑀓𑀸𑀭𑀡𑀫𑁂𑀢𑀁. 𑀅𑀪𑀡𑀺𑀦𑁆𑀢𑀺 𑀯𑀺𑀜𑁆𑀜𑀸𑀧𑀦𑀁 𑀅𑀓𑀸𑀲𑀺𑀁.

𑀅𑀜𑁆𑀜𑀢𑁆𑀭 𑀅𑀥𑀺𑀫𑀸𑀦𑀸𑀢𑀺 𑀅𑀥𑀺𑀕𑀢𑁄 𑀫𑀸𑀦𑁄, 𑀅𑀥𑀺𑀓𑁄 𑀯𑀸 𑀫𑀸𑀦𑁄 𑀅𑀥𑀺𑀫𑀸𑀦𑁄, 𑀣𑀤𑁆𑀥𑀫𑀸𑀦𑁄𑀢𑀺 𑀅𑀢𑁆𑀣𑁄, 𑀢𑀁 𑀯𑀺𑀦𑀸𑀢𑀺 𑀅𑀢𑁆𑀣𑁄. 𑀓𑀲𑁆𑀲 𑀧𑀦𑀸𑀬𑀁 𑀅𑀥𑀺𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺, 𑀓𑀲𑁆𑀲 𑀦𑀼𑀧𑁆𑀧𑀚𑁆𑀚𑀢𑀺? 𑀅𑀭𑀺𑀬𑀲𑀸𑀯𑀓𑀲𑁆𑀲 𑀢𑀸𑀯 𑀦𑀼𑀧𑁆𑀧𑀚𑁆𑀚𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁯𑁬). 𑀲𑁄 𑀳𑀺 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀧𑀳𑀻𑀦𑀓𑀺𑀮𑁂𑀲𑀸𑀯𑀲𑀺𑀝𑁆𑀞𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀅𑀭𑀺𑀬𑀕𑀼𑀡𑀧𑁆𑀧𑀝𑀺𑀯𑁂𑀥𑁂 𑀦𑀺𑀓𑁆𑀓𑀗𑁆𑀔𑁄, 𑀢𑀲𑁆𑀫𑀸 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 ‘‘𑀅𑀳𑀁 𑀲𑀓𑀤𑀸𑀕𑀸𑀫𑀻’’𑀢𑀺𑀆𑀤𑀺𑀯𑀲𑁂𑀦 𑀫𑀸𑀦𑁄 𑀦𑀼𑀧𑁆𑀧𑀚𑁆𑀚𑀢𑀺. 𑀤𑀼𑀲𑁆𑀲𑀻𑀮𑀲𑁆𑀲 𑀦𑀼𑀧𑁆𑀧𑀚𑁆𑀚𑀢𑀺. 𑀲𑁄 𑀳𑀺 𑀅𑀭𑀺𑀬𑀕𑀼𑀡𑀸𑀥𑀺𑀕𑀫𑁂 𑀦𑀺𑀭𑀸𑀲𑁄𑀯. 𑀲𑀻𑀮𑀯𑀢𑁄𑀧𑀺 𑀧𑀭𑀺𑀘𑁆𑀘𑀢𑁆𑀢𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀦𑀺𑀤𑁆𑀤𑀸𑀭𑀸𑀫𑀢𑀸𑀤𑀺𑀫𑀦𑀼𑀬𑀼𑀢𑁆𑀢𑀲𑁆𑀲 𑀦𑀼𑀧𑁆𑀧𑀚𑁆𑀚𑀢𑀺, 𑀲𑀼𑀧𑀭𑀺𑀲𑀼𑀤𑁆𑀥𑀲𑀻𑀮𑀲𑁆𑀲 𑀧𑀦 𑀓𑀫𑁆𑀫𑀝𑁆𑀞𑀸𑀦𑁂 𑀅𑀧𑁆𑀧𑀫𑀢𑁆𑀢𑀲𑁆𑀲 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂𑀦 𑀯𑀺𑀢𑀺𑀡𑁆𑀡𑀓𑀗𑁆𑀔𑀲𑁆𑀲 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑀲𑁆𑀲 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑀸𑀳 ‘‘𑀬𑁆𑀯𑀸𑀬’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁧𑁯𑁬) 𑀓𑀮𑀸𑀧𑀲𑀫𑁆𑀫𑀲𑀦𑀯𑀲𑁂𑀦 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀢𑁆𑀢𑀬𑀁 𑀆𑀭𑁄𑀧𑁂𑀢𑁆𑀯𑀸. 𑀲𑀫𑁆𑀫𑀲𑀦𑁆𑀢𑀲𑁆𑀲𑀸𑀢𑀺 𑀯𑀺𑀧𑀲𑁆𑀲𑀦𑁆𑀢𑀲𑁆𑀲. 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲𑀸𑀢𑀺 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀬 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲. 𑀅𑀧𑀢𑁆𑀢𑁂𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀅𑀧𑀢𑁆𑀢𑁂, 𑀅𑀦𑀥𑀺𑀕𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀢𑁆𑀢𑀲𑀜𑁆𑀜𑀺𑀢𑀸𑀲𑀗𑁆𑀔𑀸𑀢𑁄𑀢𑀺 ‘‘𑀧𑀢𑁆𑀢𑁄 𑀫𑀬𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄’’𑀢𑀺 𑀏𑀯𑀁𑀲𑀜𑁆𑀜𑀺𑀢𑀸𑀲𑀗𑁆𑀔𑀸𑀢𑁄 𑀅𑀥𑀺𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺. 𑀉𑀧𑁆𑀧𑀦𑁆𑀦𑁄 𑀘 𑀲𑀼𑀤𑁆𑀥𑀲𑀫𑀣𑀮𑀸𑀪𑀺𑀁 𑀯𑀸 𑀲𑀼𑀤𑁆𑀥𑀯𑀺𑀧𑀲𑁆𑀲𑀦𑀸𑀮𑀸𑀪𑀺𑀁 𑀯𑀸 𑀅𑀦𑁆𑀢𑀭𑀸 𑀞𑀧𑁂𑀢𑀺. 𑀲𑁄 𑀳𑀺 𑀤𑀲𑀧𑀺 𑀯𑀻𑀲𑀫𑁆𑀧𑀺 𑀢𑀺𑀁𑀲𑀫𑁆𑀧𑀺 𑀯𑀲𑁆𑀲𑀸𑀦𑀺 𑀓𑀺𑀮𑁂𑀲𑀲𑀫𑀼𑀤𑀸𑀘𑀸𑀭𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀅𑀳𑀁 𑀲𑁄𑀢𑀸𑀧𑀦𑁆𑀦𑁄’’𑀢𑀺 𑀯𑀸 ‘‘𑀲𑀓𑀤𑀸𑀕𑀸𑀫𑀻’’𑀢𑀺 𑀯𑀸 ‘‘𑀅𑀦𑀸𑀕𑀸𑀫𑀻’’𑀢𑀺 𑀯𑀸 𑀫𑀜𑁆𑀜𑀢𑀺. 𑀲𑀫𑀣𑀯𑀺𑀧𑀲𑁆𑀲𑀦𑀸𑀮𑀸𑀪𑀺𑀁 𑀧𑀦 𑀅𑀭𑀳𑀢𑁆𑀢𑁂𑀬𑁂𑀯 𑀞𑀧𑁂𑀢𑀺. 𑀢𑀲𑁆𑀲 𑀳𑀺 𑀲𑀫𑀸𑀥𑀺𑀩𑀮𑁂𑀦 𑀓𑀺𑀮𑁂𑀲𑀸 𑀯𑀺𑀓𑁆𑀔𑀫𑁆𑀪𑀺𑀢𑀸, 𑀯𑀺𑀧𑀲𑁆𑀲𑀦𑀸𑀩𑀮𑁂𑀦 𑀲𑀗𑁆𑀔𑀸𑀭𑀸 𑀲𑀼𑀧𑀭𑀺𑀕𑁆𑀕𑀳𑀺𑀢𑀸, 𑀢𑀲𑁆𑀫𑀸 𑀲𑀝𑁆𑀞𑀺𑀫𑁆𑀧𑀺 𑀯𑀲𑁆𑀲𑀸𑀦𑀺, 𑀅𑀲𑀻𑀢𑀺𑀫𑁆𑀧𑀺 𑀯𑀲𑁆𑀲𑀸𑀦𑀺, 𑀯𑀲𑁆𑀲𑀲𑀢𑀫𑁆𑀧𑀺 𑀓𑀺𑀮𑁂𑀲𑀸 𑀦 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀔𑀻𑀡𑀸𑀲𑀯𑀲𑁆𑀲𑁂𑀯 𑀘𑀺𑀢𑁆𑀢𑀸𑀘𑀸𑀭𑁄 𑀳𑁄𑀢𑀺. 𑀲𑁄 𑀏𑀯𑀁 𑀤𑀻𑀖𑀭𑀢𑁆𑀢𑀁 𑀓𑀺𑀮𑁂𑀲𑀲𑀫𑀼𑀤𑀸𑀘𑀸𑀭𑀁 𑀅𑀧𑀲𑁆𑀲𑀦𑁆𑀢𑁄 𑀅𑀦𑁆𑀢𑀭𑀸 𑀅𑀝𑁆𑀞𑀢𑁆𑀯𑀸𑀯 ‘‘𑀅𑀭𑀳𑀸 𑀅𑀳’’𑀦𑁆𑀢𑀺 𑀫𑀜𑁆𑀜𑀢𑀻𑀢𑀺. ‘‘𑀢𑀁 𑀅𑀥𑀺𑀫𑀸𑀦𑀁 𑀞𑀧𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 ‘‘𑀅𑀜𑁆𑀜𑀢𑁆𑀭𑀸’’𑀢𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀅𑀥𑀺𑀫𑀸𑀦𑀸’’𑀢𑀺 𑀉𑀧𑀬𑁄𑀕𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀧𑀸𑀧𑀺𑀘𑁆𑀙𑀢𑀸𑀬𑀸𑀢𑀺 𑀧𑀸𑀧𑀸 𑀇𑀘𑁆𑀙𑀸 𑀏𑀢𑀲𑁆𑀲𑀸𑀢𑀺 𑀧𑀸𑀧𑀺𑀘𑁆𑀙𑁄, 𑀢𑀲𑁆𑀲 𑀪𑀸𑀯𑁄 𑀧𑀸𑀧𑀺𑀘𑁆𑀙𑀢𑀸, 𑀢𑀸𑀬, 𑀧𑀸𑀧𑀺𑀓𑀸𑀬 𑀇𑀘𑁆𑀙𑀸𑀬𑀸𑀢𑀺 𑀅𑀢𑁆𑀣𑁄. 𑀬𑀸 𑀲𑀸 ‘‘𑀇𑀥𑁂𑀓𑀘𑁆𑀘𑁄 𑀤𑀼𑀲𑁆𑀲𑀻𑀮𑁄𑀯 𑀲𑀫𑀸𑀦𑁄 ‘𑀲𑀻𑀮𑀯𑀸’𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁫𑁧) 𑀦𑀬𑁂𑀦 𑀯𑀼𑀢𑁆𑀢𑀸, 𑀢𑀸𑀬 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀺𑀘𑁆𑀙𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀺𑀦𑀸 𑀧𑀦 𑀫𑀦𑁆𑀤𑀢𑁆𑀢𑀸 𑀫𑁄𑀫𑀽𑀳𑀢𑁆𑀢𑀸 𑀲𑀫𑀼𑀤𑀸𑀘𑀭𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀬𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀦 𑀓𑁂𑀯𑀮𑀁 𑀧𑀼𑀭𑀺𑀫𑀸 𑀢𑀬𑁄𑀯𑀸𑀢𑀺 𑀤𑀲𑁆𑀲𑁂𑀢𑀺.

𑀅𑀲𑀦𑁆𑀢𑀦𑁆𑀢𑀺 𑀅𑀪𑀽𑀢𑀁. 𑀛𑀸𑀦𑀸𑀤𑀺𑀥𑀫𑁆𑀫𑀦𑁆𑀢𑀺 𑀛𑀸𑀦𑀁, 𑀯𑀺𑀫𑁄𑀓𑁆𑀔𑁄, 𑀲𑀫𑀸𑀥𑀺, 𑀲𑀫𑀸𑀧𑀢𑁆𑀢𑀺, 𑀜𑀸𑀡𑀤𑀲𑁆𑀲𑀦𑀁, 𑀫𑀕𑁆𑀕𑀪𑀸𑀯𑀦𑀸, 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸, 𑀓𑀺𑀮𑁂𑀲𑀧𑁆𑀧𑀳𑀸𑀦𑀁, 𑀯𑀺𑀦𑀻𑀯𑀭𑀡𑀢𑀸 𑀘𑀺𑀢𑁆𑀢𑀲𑁆𑀲, 𑀲𑀼𑀜𑁆𑀜𑀸𑀕𑀸𑀭𑁂 𑀅𑀪𑀺𑀭𑀢𑀻’’𑀢𑀺 (𑀧𑀸𑀭𑀸. 𑁧𑁯𑁮) 𑀏𑀯𑀁 𑀯𑀼𑀢𑁆𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁. 𑀬𑀲𑁆𑀲 𑀆𑀭𑁄𑀘𑁂𑀢𑀻𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁧𑁫) 𑀯𑀸𑀘𑀸𑀬 𑀯𑀸 𑀳𑀢𑁆𑀣𑀯𑀺𑀓𑀸𑀭𑀸𑀤𑀻𑀳𑀺 𑀯𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑀘𑁄𑀧𑀦𑁂𑀳𑀺 𑀯𑀺𑀜𑁆𑀜𑀢𑁆𑀢𑀺𑀧𑀣𑁂 𑀞𑀺𑀢𑀲𑁆𑀲 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀆𑀭𑁄𑀘𑁂𑀢𑀺. 𑀯𑀺𑀜𑁆𑀜𑀢𑁆𑀢𑀺𑀧𑀣𑀁 𑀧𑀦 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄 𑀓𑁄𑀘𑀺 𑀘𑁂 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 (𑀲𑀸𑀭𑀢𑁆𑀣. 𑀝𑀻. 𑁨.𑁨𑁧𑁫), 𑀤𑀺𑀩𑁆𑀩𑀸𑀬 𑀘 𑀲𑁄𑀢𑀥𑀸𑀢𑀼𑀬𑀸 𑀤𑀺𑀲𑁆𑀯𑀸 𑀘 𑀲𑀼𑀢𑁆𑀯𑀸 𑀘 𑀚𑀸𑀦𑀸𑀢𑀺, 𑀦 𑀧𑀸𑀭𑀸𑀚𑀺𑀓𑀁. 𑀬𑁄𑀧𑀺 ‘‘𑀓𑀺𑀁 𑀅𑀬𑀁 𑀪𑀡𑀢𑀻’’𑀢𑀺 𑀲𑀁𑀲𑀬𑀁 𑀯𑀸 𑀆𑀧𑀚𑁆𑀚𑀢𑀺, 𑀘𑀺𑀭𑀁 𑀯𑀻𑀫𑀁𑀲𑀺𑀢𑁆𑀯𑀸 𑀯𑀸 𑀧𑀘𑁆𑀙𑀸 𑀚𑀸𑀦𑀸𑀢𑀺, ‘‘𑀅𑀯𑀺𑀚𑀸𑀦𑀦𑁆𑀢𑁄’’𑀇𑀘𑁆𑀘𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀬𑁄 𑀧𑀦 𑀛𑀸𑀦𑀸𑀤𑀻𑀦𑀺 𑀅𑀢𑁆𑀢𑀦𑁄 𑀅𑀥𑀺𑀕𑀫𑀯𑀲𑁂𑀦 𑀯𑀸 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀤𑀺𑀯𑀲𑁂𑀦 𑀯𑀸 𑀦 𑀚𑀸𑀦𑀸𑀢𑀺, 𑀓𑁂𑀯𑀮𑀁 ‘‘𑀛𑀸𑀦’’𑀦𑁆𑀢𑀺 𑀯𑀸 ‘‘𑀯𑀺𑀫𑁄𑀓𑁆𑀔𑁄’’𑀢𑀺 𑀯𑀸 𑀯𑀘𑀦𑀫𑀢𑁆𑀢𑀫𑁂𑀯 𑀲𑀼𑀢𑀁 𑀳𑁄𑀢𑀺, 𑀲𑁄𑀧𑀺 𑀢𑁂𑀦 𑀯𑀼𑀢𑁆𑀢𑁂 ‘‘𑀛𑀸𑀦𑀁 𑀓𑀺𑀭 𑀲𑀫𑀸𑀧𑀚𑁆𑀚𑀻’’𑀢𑀺 𑀏𑀲 𑀯𑀤𑀢𑀻𑀢𑀺 𑀬𑀤𑀺 𑀏𑀢𑁆𑀢𑀓𑀫𑀢𑁆𑀢𑀫𑁆𑀧𑀺 𑀚𑀸𑀦𑀸𑀢𑀺, ‘‘𑀚𑀸𑀦𑀸𑀢𑀺’’𑀘𑁆𑀘𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀢𑀲𑁆𑀲 𑀯𑀼𑀢𑁆𑀢𑁂 𑀧𑀸𑀭𑀸𑀚𑀺𑀓𑀫𑁂𑀯. 𑀲𑁂𑀲𑁄 𑀧𑀦 𑀏𑀓𑀲𑁆𑀲 𑀯𑀸 𑀤𑁆𑀯𑀺𑀦𑁆𑀦𑀁 𑀯𑀸 𑀩𑀳𑀽𑀦𑀁 𑀯𑀸 𑀦𑀺𑀬𑀫𑀺𑀢𑀸𑀦𑀺𑀬𑀫𑀺𑀢𑀯𑀲𑁂𑀦 𑀯𑀺𑀲𑁂𑀲𑁄 𑀲𑀩𑁆𑀩𑁄 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀧𑀭𑀺𑀬𑀸𑀬𑀪𑀸𑀲𑀦𑁂 𑀧𑀦 ‘‘𑀅𑀳’’𑀦𑁆𑀢𑀺 𑀅𑀯𑀼𑀢𑁆𑀢𑀢𑁆𑀢𑀸 𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀯𑀼𑀢𑁆𑀢𑁂𑀧𑀺 𑀣𑀼𑀮𑁆𑀮𑀘𑁆𑀘𑀬𑀁. 𑀯𑀺𑀲𑀁𑀯𑀸𑀤𑀦𑀸𑀥𑀺𑀧𑁆𑀧𑀸𑀬𑁂𑀦 𑀫𑀼𑀲𑀸𑀯𑀸𑀤𑀧𑀬𑁄𑀕𑀲𑁆𑀲 𑀓𑀢𑀢𑁆𑀢𑀸 𑀅𑀧𑁆𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀦𑁆𑀢𑀺 𑀆𑀳 ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀺…𑀧𑁂… 𑀤𑀼𑀓𑁆𑀓𑀝’’𑀦𑁆𑀢𑀺. 𑀅𑀦𑀼𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸𑀢𑀺 𑀉𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑀯𑀺𑀭𑀳𑀺𑀢𑀲𑁆𑀲, 𑀅𑀪𑀽𑀢𑀸𑀭𑁄𑀘𑀦𑀸𑀥𑀺𑀧𑁆𑀧𑀸𑀬𑀯𑀺𑀭𑀳𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀉𑀫𑁆𑀫𑀢𑁆𑀢𑀓𑀸𑀤𑀬𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀸 𑀏𑀯. 𑀇𑀥 𑀧𑀦 𑀆𑀤𑀺𑀓𑀫𑁆𑀫𑀺𑀓𑀸 𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑀪𑀺𑀓𑁆𑀔𑀽, 𑀢𑁂𑀲𑀁 𑀅𑀦𑀸𑀧𑀢𑁆𑀢𑀺.

𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀭𑀸𑀚𑀺𑀓𑀦𑀺𑀕𑀫𑀦𑀯𑀡𑁆𑀡𑀦𑀸

𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑁂. 𑀉𑀤𑁆𑀤𑀺𑀝𑁆𑀞𑀧𑀸𑀭𑀸𑀚𑀺𑀓𑀧𑀭𑀺𑀤𑀻𑀧𑀦𑀫𑁂𑀯𑀸𑀢𑀺 𑀉𑀤𑁆𑀤𑀺𑀝𑁆𑀞𑀸𑀦𑀁 𑀘𑀢𑀼𑀦𑁆𑀦𑀁 𑀧𑀸𑀭𑀸𑀚𑀺𑀓𑀸𑀦𑀁 𑀧𑀭𑀺𑀤𑀻𑀧𑀦𑀯𑀘𑀦𑀫𑁂𑀯. 𑀅𑀯𑀥𑀸𑀭𑀡𑀁 𑀧𑀦 𑀦 𑀅𑀜𑁆𑀜𑁂𑀲𑀫𑁆𑀧𑀻𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀢𑁂𑀦𑀸𑀳 ‘‘𑀲𑀫𑁄𑀥𑀸𑀦𑁂𑀢𑁆𑀯𑀸 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀫𑁄𑀥𑀸𑀦𑁂𑀢𑁆𑀯𑀸𑀢𑀺 𑀢𑀢𑁆𑀣 𑀢𑀢𑁆𑀣 𑀆𑀕𑀢𑀸𑀦𑀺 𑀏𑀢𑁆𑀣𑁂𑀯 𑀲𑀫𑁄𑀤𑀳𑀺𑀢𑁆𑀯𑀸, 𑀧𑀓𑁆𑀔𑀺𑀧𑀺𑀢𑁆𑀯𑀸 𑀭𑀸𑀲𑀺𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀸𑀴𑀺𑀬𑀁 𑀆𑀕𑀢𑀸𑀦𑀻𑀢𑀺 𑀉𑀤𑁆𑀤𑁂𑀲𑀧𑀸𑀴𑀺𑀬𑀁 𑀆𑀕𑀢𑀸𑀦𑀺. 𑀪𑀺𑀓𑁆𑀔𑀼𑀦𑀻𑀦𑀁 𑀅𑀲𑀸𑀥𑀸𑀭𑀡𑀸𑀦𑀺 𑀘𑀢𑁆𑀢𑀸𑀭𑀻𑀢𑀺 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀺𑀓𑀸, 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸, 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀸, 𑀅𑀝𑁆𑀞𑀯𑀢𑁆𑀣𑀼𑀓𑀸𑀢𑀺 𑀇𑀫𑀸𑀦𑀺 𑀪𑀺𑀓𑁆𑀔𑀼𑀦𑀻𑀦𑀁 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀘𑀢𑁆𑀢𑀸𑀭𑀺. 𑀧𑀡𑁆𑀟𑀓𑀸𑀤𑀻𑀦𑀜𑁆𑀳𑀺 𑀏𑀓𑀸𑀤𑀲𑀦𑁆𑀦𑀁 𑀅𑀪𑀩𑁆𑀩𑀪𑀸𑀯𑁄 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀲𑀤𑀺𑀲𑀢𑁆𑀢𑀸 𑀧𑀸𑀭𑀸𑀚𑀺𑀓𑁄𑀢𑀺 𑀆𑀳 ‘‘𑀏𑀓𑀸𑀤𑀲𑀦𑁆𑀦’’𑀦𑁆𑀢𑀺𑀆𑀤𑀺. 𑀅𑀪𑀩𑁆𑀩𑀪𑀸𑀯𑀲𑀗𑁆𑀔𑀸𑀢𑁂𑀳𑀻𑀢𑀺 𑀯𑀢𑁆𑀣𑀼𑀯𑀺𑀧𑀦𑁆𑀦𑀢𑀸𑀤𑀺𑀦𑀸 𑀧𑀩𑁆𑀩𑀚𑁆𑀚𑀽𑀧𑀲𑀫𑁆𑀧𑀤𑀸𑀬 𑀦𑀅𑀭𑀳𑀪𑀸𑀯𑀲𑀗𑁆𑀔𑀸𑀢𑁂𑀳𑀺. 𑀧𑀡𑁆𑀟𑀓𑀢𑀺𑀭𑀘𑁆𑀙𑀸𑀦𑀕𑀢𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁩𑁩) 𑀳𑀺 𑀢𑀬𑁄 𑀯𑀢𑁆𑀣𑀼𑀯𑀺𑀧𑀦𑁆𑀦𑀸 𑀅𑀳𑁂𑀢𑀼𑀓𑀧𑁆𑀧𑀝𑀺𑀲𑀦𑁆𑀥𑀺𑀓𑀸, 𑀢𑁂𑀲𑀁 𑀲𑀕𑁆𑀕𑁄 𑀅𑀯𑀸𑀭𑀺𑀢𑁄, 𑀫𑀕𑁆𑀕𑁄 𑀧𑀦 𑀯𑀸𑀭𑀺𑀢𑁄. 𑀅𑀪𑀩𑁆𑀩𑀸 𑀳𑀺 𑀢𑁂 𑀫𑀕𑁆𑀕𑀧𑁆𑀧𑀝𑀺𑀮𑀸𑀪𑀸𑀬 𑀯𑀢𑁆𑀣𑀼𑀯𑀺𑀧𑀦𑁆𑀦𑀢𑁆𑀢𑀸. 𑀧𑀩𑁆𑀩𑀚𑁆𑀚𑀸𑀧𑀺 𑀦𑁂𑀲𑀁 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀢𑀲𑁆𑀫𑀸 𑀢𑁂𑀧𑀺 𑀧𑀸𑀭𑀸𑀚𑀺𑀓𑀸𑀯. 𑀣𑁂𑀬𑁆𑀬𑀲𑀁𑀯𑀸𑀲𑀓𑁄, 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄, 𑀫𑀸𑀢𑀼𑀖𑀸𑀢𑀓𑁄, 𑀧𑀺𑀢𑀼𑀖𑀸𑀢𑀓𑁄, 𑀅𑀭𑀳𑀦𑁆𑀢𑀖𑀸𑀢𑀓𑁄, 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄, 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄, 𑀲𑀗𑁆𑀖𑀪𑁂𑀤𑀓𑁄𑀢𑀺 𑀇𑀫𑁂 𑀅𑀝𑁆𑀞 𑀅𑀢𑁆𑀢𑀦𑁄 𑀓𑀺𑀭𑀺𑀬𑀸𑀬 𑀯𑀺𑀧𑀦𑁆𑀦𑀢𑁆𑀢𑀸 𑀅𑀪𑀩𑁆𑀩𑀝𑁆𑀞𑀸𑀦𑀁 𑀧𑀢𑁆𑀢𑀸𑀢𑀺 𑀧𑀸𑀭𑀸𑀚𑀺𑀓𑀸𑀯. 𑀢𑁂𑀲𑀼 𑀣𑁂𑀬𑁆𑀬𑀲𑀁𑀯𑀸𑀲𑀓𑁄, 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄, 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀲𑀕𑁆𑀕𑁄 𑀅𑀯𑀸𑀭𑀺𑀢𑁄, 𑀫𑀕𑁆𑀕𑁄 𑀧𑀦 𑀯𑀸𑀭𑀺𑀢𑁄𑀯. 𑀇𑀢𑀭𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀪𑀬𑀫𑁆𑀧𑀺 𑀯𑀸𑀭𑀺𑀢𑀁. 𑀢𑁂 𑀳𑀺 𑀅𑀦𑀦𑁆𑀢𑀭𑀸𑀯 𑀦𑀭𑀓𑁂 𑀦𑀺𑀩𑁆𑀩𑀢𑁆𑀢𑀦𑀓𑀲𑀢𑁆𑀢𑀸. 𑀬𑀤𑀸 𑀪𑀺𑀓𑁆𑀔𑀼𑀦𑀻 𑀯𑀺𑀩𑁆𑀪𑀫𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀓𑀸𑀲𑀸𑀯𑀫𑁂𑀯 𑀯𑀸 𑀕𑀺𑀳𑀺𑀯𑀢𑁆𑀣𑀁 𑀯𑀸 𑀕𑀺𑀳𑀺𑀦𑀺𑀯𑀸𑀲𑀦𑀸𑀓𑀸𑀭𑁂𑀦 𑀦𑀺𑀯𑀸𑀲𑁂𑀢𑀺, 𑀢𑀤𑀸 𑀧𑀸𑀭𑀸𑀚𑀺𑀓𑀫𑀸𑀧𑀦𑁆𑀦𑀸 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑀸𑀬𑀸’’𑀢𑀺𑀆𑀤𑀺. 𑀲𑀸 𑀳𑀺 𑀅𑀚𑁆𑀛𑀸𑀘𑀸𑀭𑀯𑀻𑀢𑀺𑀓𑁆𑀓𑀫𑀁 𑀅𑀓𑀢𑁆𑀯𑀸𑀧𑀺 𑀏𑀢𑁆𑀢𑀸𑀯𑀢𑀸 𑀅𑀲𑁆𑀲𑀫𑀡𑀻 𑀦𑀸𑀫 𑀳𑁄𑀢𑀺.

𑀤𑀻𑀖𑀢𑀸𑀬 𑀮𑀫𑁆𑀩𑀫𑀸𑀦𑀁 𑀅𑀗𑁆𑀕𑀚𑀸𑀢𑀫𑁂𑀢𑀲𑁆𑀲𑀸𑀢𑀺 𑀮𑀫𑁆𑀩𑀻 (𑀲𑀸𑀭𑀢𑁆𑀣. 𑀝𑀻. 𑁨.𑁨𑁩𑁩). 𑀦 𑀲𑁄 𑀏𑀢𑁆𑀢𑀸𑀯𑀢𑀸 𑀧𑀸𑀭𑀸𑀚𑀺𑀓𑁄, 𑀅𑀣 𑀔𑁄 𑀬𑀤𑀸 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀁 𑀫𑀼𑀔𑁂 𑀯𑀸 𑀯𑀘𑁆𑀘𑀫𑀕𑁆𑀕𑁂 𑀯𑀸 𑀧𑀯𑁂𑀲𑁂𑀢𑀺, 𑀢𑀤𑀸 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀫𑀼𑀤𑀼𑀓𑀢𑀸 𑀧𑀺𑀝𑁆𑀞𑀺 𑀏𑀢𑀲𑁆𑀲𑀸𑀢𑀺 𑀫𑀼𑀤𑀼𑀧𑀺𑀝𑁆𑀞𑀺𑀓𑁄, 𑀓𑀢𑀧𑀭𑀺𑀓𑀫𑁆𑀫𑀸𑀬 𑀫𑀼𑀤𑀼𑀓𑀸𑀬 𑀧𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀲𑁄𑀧𑀺 𑀬𑀤𑀸 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀁 𑀅𑀢𑁆𑀢𑀦𑁄 𑀫𑀼𑀔𑀫𑀕𑁆𑀕𑀯𑀘𑁆𑀘𑀫𑀕𑁆𑀕𑁂𑀲𑀼 𑀅𑀜𑁆𑀜𑀢𑀭𑀁 𑀧𑀯𑁂𑀲𑁂𑀢𑀺, 𑀢𑀤𑀸 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀧𑀭𑀲𑁆𑀲 𑀅𑀗𑁆𑀕𑀚𑀸𑀢𑀁 𑀫𑀼𑀔𑁂𑀦 𑀕𑀡𑁆𑀳𑀸𑀢𑀻𑀢𑀺 𑀬𑁄 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀧𑀭𑀲𑁆𑀲 𑀲𑀼𑀢𑁆𑀢𑀲𑁆𑀲 𑀯𑀸 𑀧𑀫𑀢𑁆𑀢𑀲𑁆𑀲 𑀯𑀸 𑀅𑀗𑁆𑀕𑀚𑀸𑀢𑀁 𑀫𑀼𑀔𑁂𑀦 𑀕𑀡𑁆𑀳𑀸𑀢𑀺. 𑀧𑀭𑀲𑁆𑀲 𑀅𑀗𑁆𑀕𑀚𑀸𑀢𑁂 𑀅𑀪𑀺𑀦𑀺𑀲𑀻𑀤𑀢𑀻𑀢𑀺 𑀬𑁄 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀧𑀭𑀲𑁆𑀲 𑀅𑀗𑁆𑀕𑀚𑀸𑀢𑀁 𑀓𑀫𑁆𑀫𑀦𑀺𑀬𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀯𑀘𑁆𑀘𑀫𑀕𑁆𑀕𑁂𑀦 𑀢𑀲𑁆𑀲𑀽𑀧𑀭𑀺 𑀦𑀺𑀲𑀻𑀤𑀢𑀺, 𑀢𑀁 𑀅𑀢𑁆𑀢𑀦𑁄 𑀯𑀘𑁆𑀘𑀫𑀕𑁆𑀕𑀁 𑀧𑀯𑁂𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀏𑀢𑀸𑀦𑀺 𑀳𑀺 𑀘𑀢𑁆𑀢𑀸𑀭𑀺 𑀬𑀲𑁆𑀫𑀸 𑀉𑀪𑀺𑀦𑁆𑀦𑀁 𑀭𑀸𑀕𑀯𑀲𑁂𑀦 𑀲𑀤𑀺𑀲𑀪𑀸𑀯𑀽𑀧𑀕𑀢𑀸𑀦𑀁 𑀥𑀫𑁆𑀫𑁄 ‘‘𑀫𑁂𑀣𑀼𑀦𑀥𑀫𑁆𑀫𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀫𑁂𑀣𑀼𑀦𑀥𑀫𑁆𑀫𑀁 𑀅𑀧𑁆𑀧𑀝𑀺𑀲𑁂𑀯𑀺𑀢𑁆𑀯𑀸𑀬𑁂𑀯 𑀓𑁂𑀯𑀮𑀁 𑀫𑀕𑁆𑀕𑁂𑀦 𑀫𑀕𑁆𑀕𑀧𑁆𑀧𑀯𑁂𑀲𑀦𑀯𑀲𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀲𑁆𑀲 𑀅𑀦𑀼𑀮𑁄𑀫𑁂𑀦𑁆𑀢𑀻𑀢𑀺 ‘‘𑀅𑀦𑀼𑀮𑁄𑀫𑀧𑀸𑀭𑀸𑀚𑀺𑀓𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀏𑀢𑁆𑀣𑀸𑀳 𑁋 𑀫𑀸𑀢𑀼𑀖𑀸𑀢𑀓𑀧𑀺𑀢𑀼𑀖𑀸𑀢𑀓𑀅𑀭𑀳𑀦𑁆𑀢𑀖𑀸𑀢𑀓𑀸 𑀢𑀢𑀺𑀬𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑀸, 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄, 𑀮𑀫𑁆𑀩𑀺𑀆𑀤𑀬𑁄 𑀘𑀢𑁆𑀢𑀸𑀭𑁄 𑀘 𑀧𑀞𑀫𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑀸 𑀏𑀯𑀸𑀢𑀺 𑀓𑀢𑁆𑀯𑀸 𑀓𑀼𑀢𑁄 𑀘𑀢𑀼𑀯𑀻𑀲𑀢𑀻𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁨𑁩𑁩)? 𑀯𑀼𑀘𑁆𑀘𑀢𑁂 𑁋 𑀫𑀸𑀢𑀼𑀖𑀸𑀢𑀓𑀸𑀤𑀬𑁄 𑀳𑀺 𑀘𑀢𑁆𑀢𑀸𑀭𑁄 𑀇𑀥 𑀅𑀦𑀼𑀧𑀲𑀫𑁆𑀧𑀦𑁆𑀦𑀸 𑀏𑀯 𑀅𑀥𑀺𑀧𑁆𑀧𑁂𑀢𑀸, 𑀮𑀫𑁆𑀩𑀺𑀆𑀤𑀬𑁄 𑀘𑀢𑁆𑀢𑀸𑀭𑁄 𑀓𑀺𑀜𑁆𑀘𑀸𑀧𑀺 𑀧𑀞𑀫𑀧𑀸𑀭𑀸𑀚𑀺𑀓𑁂𑀦 𑀲𑀗𑁆𑀕𑀳𑀺𑀢𑀸, 𑀬𑀲𑁆𑀫𑀸 𑀧𑀦 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀫𑁂𑀣𑀼𑀦𑀥𑀫𑁆𑀫𑀁 𑀅𑀧𑁆𑀧𑀝𑀺𑀲𑁂𑀯𑀺𑀦𑁄 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀺𑀲𑀼𑀁 𑀯𑀼𑀢𑁆𑀢𑀸𑀢𑀺. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀓𑀘𑁆𑀘𑀺𑀢𑁆𑀣𑀸𑀢𑀺 𑀏𑀢𑁆𑀣 𑀓𑀘𑁆𑀘𑀺 𑀅𑀢𑁆𑀣𑀸𑀢𑀺 𑀧𑀤𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄.

𑀇𑀢𑀺 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸𑀬

𑀯𑀺𑀦𑀬𑀢𑁆𑀣𑀫𑀜𑁆𑀚𑀽𑀲𑀸𑀬𑀁 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀺𑀬𑀁

𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.