𑀲𑀗𑁆𑀖𑀸𑀤𑀺𑀲𑁂𑀲𑀓𑀡𑁆𑀟𑀁

𑀧𑀺𑀬𑀯𑀘𑀦𑁂𑀦 𑀆𑀮𑀧𑀦𑀦𑁆𑀢𑀺 𑀧𑀺𑀬𑀸𑀬𑀺𑀢𑀩𑁆𑀩𑀯𑀘𑀦𑁂𑀦𑀸𑀮𑀧𑀦𑀁, 𑀲𑀸𑀥𑀽𑀦𑀁 𑀲𑀫𑀸𑀮𑀧𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀸𑀥𑀯𑁄 𑀳𑀺 𑀧𑀭𑁂 ‘‘𑀪𑁄𑀦𑁆𑀢𑁄’’𑀢𑀺 𑀯𑀸 ‘‘𑀤𑁂𑀯𑀸𑀦𑀁𑀧𑀺𑀬𑀸’’𑀢𑀺 𑀯𑀸 ‘‘𑀪𑀤𑁆𑀭𑀪𑀯’’𑀦𑁆𑀢𑀺 𑀯𑀸 ‘‘𑀆𑀬𑀲𑁆𑀫𑀦𑁆𑀢𑁄’’𑀢𑀺 𑀯𑀸 𑀲𑀫𑀸𑀮𑀧𑀦𑁆𑀢𑀺.

𑁧. 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀁-𑀲𑀤𑁆𑀤𑁄 𑀯𑀺𑀚𑁆𑀚𑀫𑀸𑀦𑀢𑁆𑀣𑁄𑀢𑀺 𑀆𑀳 ‘‘𑀲𑀁𑀯𑀺𑀚𑁆𑀚𑀢𑀻’’𑀢𑀺. 𑀘𑁂𑀢𑀦𑀸𑀢𑀺 𑀯𑀻𑀢𑀺𑀓𑁆𑀓𑀫𑀯𑀲𑀧𑁆𑀧𑀯𑀢𑁆𑀢𑀸 𑀧𑀼𑀩𑁆𑀩𑀪𑀸𑀕𑀘𑁂𑀢𑀦𑀸, 𑀫𑁄𑀘𑀦𑀲𑁆𑀲𑀸𑀤𑀘𑁂𑀢𑀦𑀸𑀢𑀺 𑀅𑀢𑁆𑀣𑁄. 𑀅𑀲𑁆𑀲𑀸𑀢𑀺 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸. 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑁂𑀦𑁂𑀯 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀯𑀼𑀢𑁆𑀢𑀢𑁆𑀢𑀸 𑀇𑀓-𑀲𑀤𑁆𑀤𑀲𑁆𑀲 𑀯𑀺𑀲𑀼𑀁 𑀅𑀢𑁆𑀣𑁄 𑀦𑀢𑁆𑀣𑀻𑀢𑀺 𑀆𑀳 ‘‘𑀲𑀜𑁆𑀘𑁂𑀢𑀦𑀸𑀯 𑀲𑀜𑁆𑀘𑁂𑀢𑀦𑀺𑀓𑀸’’𑀢𑀺. 𑀇𑀤𑀸𑀦𑀺 𑀇𑀓-𑀲𑀤𑁆𑀤𑁄𑀯 𑀅𑀢𑁆𑀣𑀺𑀅𑀢𑁆𑀣𑀁 𑀧𑀓𑀸𑀲𑁂𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀜𑁆𑀘𑁂𑀢𑀦𑀸 𑀯𑀸’’𑀢𑀺𑀆𑀤𑀺𑀫𑀸𑀳. 𑀲𑀁𑀯𑀺𑀚𑁆𑀚𑀫𑀸𑀦𑀸 𑀘𑁂𑀢𑀦𑀸 𑀲𑀜𑁆𑀘𑁂𑀢𑀦𑀸. 𑀲𑀼𑀓𑁆𑀓𑀲𑁆𑀲𑀸𑀢𑀺 𑀲𑀫𑁆𑀪𑀯𑀲𑁆𑀲. 𑀯𑀺𑀲𑀝𑁆𑀞𑀻𑀢𑀺 𑀯𑀺𑀲𑁆𑀲𑀕𑁆𑀕𑁄.

𑀇𑀤𑀸𑀦𑀺 𑀢𑀁 𑀬𑀲𑁆𑀫𑀺𑀁 𑀓𑀸𑀮𑁂 𑀫𑁄𑀘𑁂𑀢𑀺, 𑀬𑁂𑀦𑀸𑀥𑀺𑀧𑁆𑀧𑀸𑀬𑁂𑀦 𑀫𑁄𑀘𑁂𑀢𑀺, 𑀬𑁂𑀦 𑀘𑁄𑀧𑀸𑀬𑁂𑀦 𑀫𑁄𑀘𑁂𑀢𑀺, 𑀬𑀜𑁆𑀘 𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑀲𑁆𑀲 𑀯𑀢𑁆𑀣𑀼, 𑀢𑀁 𑀲𑀩𑁆𑀩𑀁 𑀲𑀗𑁆𑀔𑁂𑀧𑀢𑁄 𑀯𑀺𑀪𑀸𑀯𑁂𑀢𑁆𑀯𑀸 𑀲𑀭𑀽𑀧𑀢𑁄 𑀢𑀁 𑀯𑀺𑀲𑀝𑁆𑀞𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀸𑀕𑀽𑀧𑀢𑁆𑀣𑀫𑁆𑀪𑀸𑀤𑀻𑀲𑀽’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀭𑀸𑀕𑀲𑁆𑀲 𑀩𑀮𑀯𑀪𑀸𑀯𑁄, 𑀭𑀸𑀕𑁂𑀦 𑀯𑀸 𑀅𑀗𑁆𑀕𑀚𑀸𑀢𑀲𑁆𑀲𑀽𑀧𑀢𑁆𑀣𑀫𑁆𑀪𑁄 𑀣𑀤𑁆𑀥𑀪𑀸𑀯𑁄 𑀭𑀸𑀕𑀽𑀧𑀢𑁆𑀣𑀫𑁆𑀪𑁄, 𑀲𑁄 𑀆𑀤𑀺 𑀬𑁂𑀲𑀁 𑀢𑁂 𑀭𑀸𑀕𑀽𑀧𑀢𑁆𑀣𑀫𑁆𑀪𑀸𑀤𑀬𑁄, 𑀢𑁂𑀲𑀼 𑀭𑀸𑀕𑀽𑀧𑀢𑁆𑀣𑀫𑁆𑀪𑀸𑀤𑀻𑀲𑀼. 𑀆𑀤𑀺𑀲𑀤𑁆𑀤𑁂𑀦 (𑀧𑀸𑀭𑀸. 𑁨𑁩𑁮) 𑀯𑀘𑁆𑀘𑀽𑀧𑀢𑁆𑀣𑀫𑁆𑀪𑀧𑀲𑁆𑀲𑀸𑀯𑀽𑀧𑀢𑁆𑀣𑀫𑁆𑀪𑀯𑀸𑀢𑀽𑀧𑀢𑁆𑀣𑀫𑁆𑀪𑀉𑀘𑁆𑀘𑀸𑀮𑀺𑀗𑁆𑀕𑀧𑀸𑀡𑀓𑀤𑀝𑁆𑀞𑀽𑀧𑀢𑁆𑀣𑀫𑁆𑀪𑀸𑀦𑀁 𑀕𑀳𑀡𑀁. 𑀓𑀫𑁆𑀫𑀜𑁆𑀜𑀢𑀁 𑀧𑀢𑁆𑀢𑁂𑀢𑀺 𑀫𑁄𑀘𑀦𑀓𑀫𑁆𑀫𑀓𑁆𑀔𑀫𑀢𑀸𑀬 𑀓𑀫𑁆𑀫𑀦𑀺𑀬𑀢𑀁 𑀧𑀢𑁆𑀢𑁂, 𑀅𑀚𑁆𑀛𑀢𑁆𑀢𑀭𑀽𑀧𑀸𑀤𑀻𑀲𑀼 𑀉𑀧𑀓𑁆𑀓𑀫𑀸𑀭𑀳𑀪𑀸𑀯𑀁 𑀧𑀢𑁆𑀢𑁂𑀢𑀺 𑀅𑀢𑁆𑀣𑁄. 𑀅𑀭𑁄𑀕𑀲𑁆𑀲 𑀪𑀸𑀯𑁄 𑀆𑀭𑁄𑀕𑁆𑀬𑀁, 𑀢𑀁 𑀆𑀤𑀺 𑀬𑁂𑀲𑀁 𑀢𑁂 𑀆𑀭𑁄𑀕𑁆𑀬𑀸𑀤𑀬𑁄, 𑀢𑁂𑀲𑀼 𑀆𑀭𑁄𑀕𑁆𑀬𑀸𑀤𑀻𑀲𑀼. 𑀆𑀤𑀺𑀲𑀤𑁆𑀤𑁂𑀦 𑀲𑀼𑀔𑀪𑁂𑀲𑀚𑁆𑀚𑀤𑀸𑀦𑀧𑀼𑀜𑁆𑀜𑀬𑀜𑁆𑀜𑀲𑀕𑁆𑀕𑀩𑀻𑀚𑀯𑀻𑀫𑀁𑀲𑀤𑀯𑀸𑀦𑀁 𑀕𑀳𑀡𑀁. 𑀅𑀚𑁆𑀛𑀢𑁆𑀢𑀭𑀽𑀧𑀁 𑀅𑀚𑁆𑀛𑀢𑁆𑀢𑀁 𑀉𑀧𑀸𑀤𑀺𑀦𑁆𑀦𑀭𑀽𑀧𑀁, 𑀢𑀁 𑀆𑀤𑀺 𑀬𑁂𑀲𑀁 𑀢𑁂 𑀅𑀚𑁆𑀛𑀢𑁆𑀢𑀭𑀽𑀧𑀸𑀤𑀬𑁄, 𑀢𑁂𑀲𑀼. 𑀆𑀤𑀺𑀲𑀤𑁆𑀤𑁂𑀦 𑀩𑀳𑀺𑀤𑁆𑀥𑀸𑀭𑀽𑀧𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀽𑀧𑀆𑀓𑀸𑀲𑁂𑀓𑀝𑀺𑀓𑀫𑁆𑀧𑀦𑀸𑀦𑀁 𑀕𑀳𑀡𑀁. 𑀫𑁄𑀘𑀦𑁂 𑀅𑀲𑁆𑀲𑀸𑀤𑁄 𑀲𑀼𑀔𑀯𑁂𑀤𑀦𑀸 𑀫𑁄𑀘𑀦𑀲𑁆𑀲𑀸𑀤𑁄, 𑀫𑁄𑀘𑀦𑀢𑁆𑀣𑀁 𑀧𑀼𑀩𑁆𑀩𑀪𑀸𑀕𑁂 𑀧𑀯𑀢𑁆𑀢𑀭𑀸𑀕𑁄, 𑀲𑀫𑁆𑀧𑀬𑀼𑀢𑁆𑀢𑀅𑀲𑁆𑀲𑀸𑀤𑀲𑀻𑀲𑁂𑀦 𑀘𑁂𑀢𑁆𑀣 𑀭𑀸𑀕𑁄 𑀯𑀼𑀢𑁆𑀢𑁄, 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀢𑀦𑀸 𑀫𑁄𑀘𑀦𑀲𑁆𑀲𑀸𑀤𑀘𑁂𑀢𑀦𑀸, 𑀢𑀸𑀬. 𑀇𑀫𑀺𑀦𑀸 𑀫𑀼𑀘𑁆𑀘𑀦𑀲𑁆𑀲𑀸𑀤𑁄 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁪𑁦) 𑀫𑀼𑀢𑁆𑀢𑀲𑁆𑀲𑀸𑀤𑁄 𑀫𑁂𑀣𑀼𑀦𑀲𑁆𑀲𑀸𑀤𑁄 𑀨𑀲𑁆𑀲𑀲𑁆𑀲𑀸𑀤𑁄 𑀓𑀡𑁆𑀟𑀼𑀯𑀦𑀲𑁆𑀲𑀸𑀤𑁄 𑀤𑀲𑁆𑀲𑀦𑀲𑁆𑀲𑀸𑀤𑁄 𑀦𑀺𑀲𑀚𑁆𑀚𑀲𑁆𑀲𑀸𑀤𑁄 𑀯𑀸𑀘𑀲𑁆𑀲𑀸𑀤𑁄 𑀕𑁂𑀳𑀲𑀺𑀢𑀧𑁂𑀫𑀁 𑀯𑀦𑀪𑀗𑁆𑀕𑀺𑀬𑀦𑁆𑀢𑀺 𑀇𑀫𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀢𑀦𑀸𑀬𑁄 𑀧𑀝𑀺𑀓𑁆𑀔𑀺𑀧𑀢𑀺, 𑀢𑀸𑀳𑀺 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀫𑀼𑀢𑁆𑀢𑁂𑀧𑀺 𑀅𑀦𑀸𑀧𑀢𑁆𑀢𑀺. ‘‘𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀦𑁆𑀢𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀧𑀦 𑀊𑀭𑀼𑀫𑀤𑁆𑀤𑀸𑀧𑀦𑀸𑀤𑀻𑀦𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀢𑁂𑀦 𑀳𑀺 𑀲𑀢𑀺𑀧𑀺 𑀫𑁄𑀘𑀦𑀲𑁆𑀲𑀸𑀤𑁂 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀸𑀪𑀸𑀯𑀢𑁄 𑀫𑀼𑀢𑁆𑀢𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 ‘‘𑀲𑀸 𑀘 𑀔𑁄 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀦𑁆𑀢𑀲𑁆𑀲𑁂𑀯, 𑀳𑀢𑁆𑀣𑀧𑀭𑀺𑀓𑀫𑁆𑀫𑀧𑀸𑀤𑀧𑀭𑀺𑀓𑀫𑁆𑀫𑀕𑀢𑁆𑀢𑀧𑀭𑀺𑀓𑀫𑁆𑀫𑀓𑀭𑀡𑁂𑀦 𑀲𑀘𑁂𑀧𑀺 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺.

𑀆𑀲𑀬𑀥𑀸𑀢𑀼𑀦𑀸𑀦𑀸𑀢𑁆𑀢𑀢𑁄𑀢𑀺 𑀧𑀺𑀢𑁆𑀢𑀲𑁂𑀫𑁆𑀳𑀧𑀼𑀩𑁆𑀩𑀮𑁄𑀳𑀺𑀢𑀸𑀲𑀬𑀸𑀦𑀜𑁆𑀘𑁂𑀯 𑀧𑀣𑀯𑀻𑀥𑀸𑀢𑀼𑀆𑀤𑀻𑀦𑀜𑁆𑀘 𑀘𑀢𑀼𑀦𑁆𑀦𑀁 𑀥𑀸𑀢𑀽𑀦𑀁, 𑀭𑀲𑀲𑁄𑀡𑀺𑀢𑀸𑀤𑀻𑀦𑀁 𑀯𑀸 𑀲𑀢𑁆𑀢𑀦𑁆𑀦𑀁 𑀥𑀸𑀢𑀽𑀦𑀁 𑀦𑀸𑀦𑀸𑀢𑁆𑀢𑀢𑁄. 𑀞𑀸𑀦𑀸 𑀘𑀸𑀯𑀦𑀸𑀢𑀺 𑀲𑀼𑀓𑁆𑀓𑀲𑁆𑀲 𑀬𑀁 𑀞𑀸𑀦𑀁, 𑀢𑀢𑁄 𑀘𑀼𑀢𑀺. 𑀲𑀼𑀓𑁆𑀓𑀲𑁆𑀲 𑀳𑀺 𑀯𑀢𑁆𑀣𑀺𑀲𑀻𑀲𑀁 𑀓𑀝𑀺 𑀓𑀸𑀬𑁄𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁩𑁭) 𑀢𑀺𑀥𑀸 𑀞𑀸𑀦𑀁 𑀧𑀓𑀧𑁆𑀧𑁂𑀦𑁆𑀢𑀺. 𑀏𑀓𑁄 𑀓𑀺𑀭𑀸𑀘𑀭𑀺𑀬𑁄 ‘‘𑀯𑀢𑁆𑀣𑀺𑀲𑀻𑀲𑀁 𑀲𑀼𑀓𑁆𑀓𑀲𑁆𑀲 𑀞𑀸𑀦’’𑀦𑁆𑀢𑀺 𑀆𑀳, 𑀏𑀓𑁄 ‘‘𑀓𑀝𑀻’’𑀢𑀺, 𑀏𑀓𑁄 ‘‘𑀲𑀓𑀮𑁄 𑀓𑀸𑀬𑁄’’𑀢𑀺. 𑀢𑁂𑀲𑀼 𑀢𑀢𑀺𑀬𑀲𑁆𑀲 𑀪𑀸𑀲𑀺𑀢𑀁 𑀲𑀼𑀪𑀸𑀲𑀺𑀢𑀁. 𑀓𑁂𑀲𑀮𑁄𑀫𑀦𑀔𑀤𑀦𑁆𑀢𑀸𑀦𑀜𑁆𑀳𑀺 𑀫𑀁𑀲𑀯𑀺𑀦𑀺𑀫𑀼𑀢𑁆𑀢𑀝𑁆𑀞𑀸𑀦𑀁, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀸, 𑀣𑀤𑁆𑀥𑀲𑀼𑀓𑁆𑀔𑀘𑀫𑁆𑀫𑀸𑀦𑀺 𑀘 𑀯𑀚𑁆𑀚𑁂𑀢𑁆𑀯𑀸 𑀅𑀯𑀲𑁂𑀲𑁄 𑀙𑀯𑀺𑀫𑀁𑀲𑀮𑁄𑀳𑀺𑀢𑀸𑀦𑀼𑀕𑀢𑁄 𑀲𑀩𑁆𑀩𑁄𑀧𑀺 𑀓𑀸𑀬𑁄 𑀓𑀸𑀬𑀧𑁆𑀧𑀲𑀸𑀤𑀪𑀸𑀯𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀩𑀤𑁆𑀥𑀧𑀺𑀢𑁆𑀢𑀸𑀦𑀁, 𑀲𑀫𑁆𑀪𑀯𑀲𑁆𑀲 𑀘 𑀞𑀸𑀦𑀫𑁂𑀯. 𑀢𑀣𑀸 𑀳𑀺 𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑁂𑀦𑀸𑀪𑀺𑀪𑀽𑀢𑀸𑀦𑀁 𑀳𑀢𑁆𑀣𑀻𑀦𑀁 𑀉𑀪𑁄𑀳𑀺 𑀓𑀡𑁆𑀡𑀘𑀽𑀴𑀺𑀓𑀸𑀳𑀺 𑀲𑀫𑁆𑀪𑀯𑁄 𑀦𑀺𑀓𑁆𑀔𑀫𑀢𑀺.

𑀏𑀢𑁆𑀣 𑀘 ‘‘𑀭𑀸𑀕𑀽𑀧𑀢𑁆𑀣𑀫𑁆𑀪𑀸𑀤𑀻𑀲𑀽’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁩𑁭) 𑀓𑀸𑀮𑁄 𑀤𑀲𑁆𑀲𑀺𑀢𑁄. 𑀭𑀸𑀕𑀽𑀧𑀢𑁆𑀣𑀫𑁆𑀪𑀸𑀤𑀺𑀓𑀸𑀮𑁂𑀲𑀼 𑀳𑀺 𑀅𑀗𑁆𑀕𑀚𑀸𑀢𑀁 𑀓𑀫𑁆𑀫𑀦𑀺𑀬𑀁 𑀳𑁄𑀢𑀺. 𑀬𑀲𑁆𑀲 𑀓𑀫𑁆𑀫𑀦𑀺𑀬𑀢𑁆𑀢𑁂 𑀲𑀢𑀺 𑀫𑁄𑀘𑁂𑀢𑀺, 𑀇𑀢𑁄 𑀧𑀭𑀁 𑀅𑀜𑁆𑀜𑁄 𑀓𑀸𑀮𑁄 𑀦𑀢𑁆𑀣𑀺. 𑀦 𑀳𑀺 𑀯𑀺𑀦𑀸 𑀭𑀸𑀕𑀽𑀧𑀢𑁆𑀣𑀫𑁆𑀪𑀸𑀤𑀻𑀳𑀺 𑀧𑀼𑀩𑁆𑀩𑀡𑁆𑀳𑀸𑀤𑀬𑁄 𑀓𑀸𑀮𑀪𑁂𑀤𑀸 𑀫𑁄𑀘𑀦𑁂 𑀦𑀺𑀫𑀺𑀢𑁆𑀢𑀁 𑀳𑁄𑀦𑁆𑀢𑀺. ‘‘𑀆𑀭𑁄𑀕𑁆𑀬𑀸𑀤𑀻𑀲𑀽’’𑀢𑀺𑀆𑀤𑀺𑀦𑀸 𑀧𑀦 𑀅𑀥𑀺𑀧𑁆𑀧𑀸𑀬𑁄 𑀤𑀲𑁆𑀲𑀺𑀢𑁄. 𑀏𑀯𑀭𑀽𑀧𑁂𑀦 𑀳𑀺 𑀅𑀥𑀺𑀧𑁆𑀧𑀸𑀬𑀪𑁂𑀤𑁂𑀦 𑀫𑁄𑀘𑁂𑀢𑀺, 𑀦 𑀅𑀜𑁆𑀜𑀣𑀸. ‘‘𑀅𑀚𑁆𑀛𑀢𑁆𑀢𑀭𑀽𑀧𑀸𑀤𑀻𑀲𑀽’’𑀢𑀺𑀆𑀤𑀺𑀦𑀸 𑀉𑀧𑀸𑀬𑁄 𑀤𑀲𑁆𑀲𑀺𑀢𑁄. 𑀅𑀚𑁆𑀛𑀢𑁆𑀢𑀭𑀽𑀧𑁂 𑀯𑀸 𑀳𑀺 𑀫𑁄𑀘𑁂𑀬𑁆𑀬, 𑀩𑀳𑀺𑀤𑁆𑀥𑀸𑀭𑀽𑀧𑁂 𑀯𑀸, 𑀉𑀪𑀬𑀢𑁆𑀣 𑀯𑀸, 𑀆𑀓𑀸𑀲𑁂 𑀯𑀸 𑀓𑀝𑀺𑀁 𑀓𑀫𑁆𑀧𑁂𑀦𑁆𑀢𑁄, 𑀇𑀢𑁄 𑀧𑀭𑀁 𑀅𑀜𑁆𑀜𑁄 𑀉𑀧𑀸𑀬𑁄 𑀦𑀢𑁆𑀣𑀺. 𑀦𑀻𑀮𑀸𑀤𑀺𑀯𑀲𑁂𑀦𑀸’’𑀢𑀺𑀆𑀤𑀻𑀳𑀺 𑀧𑀦 𑀤𑀲𑀳𑀺 𑀦𑀯𑀫𑀲𑁆𑀲 𑀅𑀥𑀺𑀧𑁆𑀧𑀸𑀬𑀲𑁆𑀲 𑀯𑀢𑁆𑀣𑀼 𑀤𑀲𑁆𑀲𑀺𑀢𑀁. 𑀯𑀻𑀫𑀁𑀲𑀦𑁆𑀢𑁄 𑀳𑀺 𑀦𑀻𑀮𑀸𑀤𑀻𑀲𑀼 𑀅𑀜𑁆𑀜𑀢𑀭𑀯𑀲𑁂𑀦 𑀯𑀻𑀫𑀁𑀲𑀢𑀺, 𑀦 𑀢𑁂𑀳𑀺 𑀯𑀺𑀦𑀺𑀫𑀼𑀢𑁆𑀢𑀦𑁆𑀢𑀺. ‘‘𑀞𑀸𑀦𑀸 𑀘𑀸𑀯𑀦𑀸’’𑀢𑀺 𑀇𑀫𑀺𑀦𑀸 𑀧𑀦 𑀅𑀢𑁆𑀣𑀢𑁄 𑀯𑀺𑀲𑁆𑀲𑀝𑁆𑀞𑀺 𑀤𑀲𑁆𑀲𑀺𑀢𑀸. 𑀬𑀣𑀸𑀳 ‘‘𑀯𑀺𑀲𑁆𑀲𑀝𑁆𑀞𑀻𑀢𑀺 𑀞𑀸𑀦𑀢𑁄 𑀘𑀸𑀯𑀦𑀸 𑀯𑀼𑀘𑁆𑀘𑀢𑀻’’𑀢𑀺 (𑀧𑀸𑀭𑀸. 𑁨𑁩𑁭). 𑀲𑀸 𑀘𑀸𑀬𑀁 𑀢𑀲𑁆𑀲 𑀲𑀼𑀓𑁆𑀓𑀲𑁆𑀲 𑀞𑀸𑀦𑀸 𑀘𑀸𑀯𑀦𑀸 𑀭𑀸𑀕𑀯𑀲𑁂𑀦. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀓𑀣𑀸𑀯𑀢𑁆𑀣𑀼𑀅𑀝𑁆𑀞𑀓𑀣𑀸𑀬𑀁 ‘‘𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀦𑀸𑀫 𑀭𑀸𑀕𑀲𑀫𑀼𑀝𑁆𑀞𑀸𑀦𑀸 𑀳𑁄𑀢𑀻’’𑀢𑀺 (𑀓𑀣𑀸. 𑀅𑀝𑁆𑀞. 𑁩𑁦𑁭). 𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸𑀢𑀺 𑀲𑀼𑀧𑀺𑀦𑁄 𑀏𑀯 𑀲𑀼𑀧𑀺𑀦𑀦𑁆𑀢𑁄, 𑀢𑀁 𑀞𑀧𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀬𑀸 𑀲𑀼𑀧𑀺𑀦𑁂’’𑀢𑀺𑀆𑀤𑀺. 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀇𑀫𑀲𑁆𑀲 𑀆𑀧𑀢𑁆𑀢𑀺𑀦𑀺𑀓𑀸𑀬𑀲𑁆𑀲 𑀦𑀸𑀫𑀁. 𑀢𑁂𑀦𑀸𑀳 ‘‘𑀬𑀸 𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸’’𑀢𑀺𑀆𑀤𑀺. 𑀆𑀧𑀢𑁆𑀢𑀺𑀦𑀺𑀓𑀸𑀬𑁄𑀢𑀺 𑀆𑀧𑀢𑁆𑀢𑀺𑀲𑀫𑀽𑀳𑁄. 𑀓𑀺𑀜𑁆𑀘𑀸𑀧𑀺 𑀅𑀬𑀁 𑀏𑀓𑀸𑀯 𑀆𑀧𑀢𑁆𑀢𑀺, 𑀭𑀼𑀴𑁆𑀳𑀺𑀲𑀤𑁆𑀤𑁂𑀦, 𑀧𑀦 𑀅𑀯𑀬𑀯𑁂 𑀲𑀫𑀽𑀳𑀯𑁄𑀳𑀸𑀭𑁂𑀦 𑀯𑀸 ‘‘𑀦𑀺𑀓𑀸𑀬𑁄’’𑀢𑀺 𑀯𑀼𑀢𑁆𑀢𑁄 ‘‘𑀏𑀓𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀏𑀓𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 𑀯𑀺𑀬.

𑀅𑀲𑁆𑀲𑀸𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁧𑁬 𑀲𑀁𑀖𑀸𑀤𑀺𑀲𑁂𑀲𑀓𑀡𑁆𑀟) 𑀆𑀧𑀢𑁆𑀢𑀺𑀦𑀺𑀓𑀸𑀬𑀲𑁆𑀲. 𑀦𑀦𑀼 𑀘 𑀅𑀬𑀼𑀢𑁆𑀢𑁄𑀬𑀁 𑀦𑀺𑀤𑁆𑀤𑁂𑀲𑁄 ‘‘𑀲𑀗𑁆𑀖𑁄 𑀆𑀤𑀺𑀫𑁆𑀳𑀺 𑀘𑁂𑀯 𑀲𑁂𑀲𑁂 𑀘 𑀇𑀘𑁆𑀙𑀺𑀢𑀩𑁆𑀩𑁄 𑀅𑀲𑁆𑀲𑀸’’𑀢𑀺. 𑀦 𑀳𑀺 𑀆𑀧𑀢𑁆𑀢𑀺𑀦𑀺𑀓𑀸𑀬𑀲𑁆𑀲 𑀆𑀤𑀺𑀫𑁆𑀳𑀺 𑀘𑁂𑀯 𑀲𑁂𑀲𑁂 𑀘 𑀲𑀗𑁆𑀖𑁄 𑀇𑀘𑁆𑀙𑀺𑀢𑁄, 𑀓𑀺𑀜𑁆𑀘𑀭𑀳𑀺 𑀯𑀼𑀝𑁆𑀞𑀸𑀦𑀲𑁆𑀲𑀸𑀢𑀺 𑀇𑀫𑀁 𑀘𑁄𑀤𑀦𑀁 𑀫𑀦𑀲𑀺 𑀦𑀺𑀥𑀸𑀬 𑀬𑀣𑀸 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀣𑀸 𑀅𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀺𑀢𑀼𑀁 ‘‘𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺𑀫𑀸𑀳. 𑀆𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀦𑀲𑁆𑀲 𑀆𑀤𑀺𑀫𑁆𑀳𑀺 𑀘𑁂𑀯 𑀲𑁂𑀲𑁂 𑀘 𑀇𑀘𑁆𑀙𑀺𑀢𑁄 𑀲𑀗𑁆𑀖𑁄 𑀆𑀧𑀢𑁆𑀢𑀺𑀬𑀸𑀯 𑀇𑀘𑁆𑀙𑀺𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀦𑁆𑀢𑀺 𑀆𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀦𑀁, 𑀅𑀦𑀸𑀧𑀢𑁆𑀢𑀺𑀓𑀪𑀸𑀯𑀽𑀧𑀕𑀫𑀦𑀦𑁆𑀢𑀺 𑀅𑀢𑁆𑀣𑁄.

𑀤𑀓𑀲𑁄𑀢𑀦𑁆𑀢𑀺 𑀧𑀲𑁆𑀲𑀸𑀯𑀫𑀕𑁆𑀕𑀁, 𑀅𑀗𑁆𑀕𑀚𑀸𑀢𑀧𑁆𑀧𑀤𑁂𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀤𑀺 𑀏𑀯𑀁 𑀅𑀣 𑀓𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀤𑀓𑀲𑁄𑀢𑀁 𑀑𑀢𑀺𑀡𑁆𑀡𑀫𑀢𑁆𑀢𑁂’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀞𑀸𑀦𑀢𑁄 𑀧𑀦 𑀘𑀼𑀢’’𑀦𑁆𑀢𑀺𑀆𑀤𑀺. 𑀅𑀯𑀲𑁆𑀲𑀫𑁂𑀯 𑀤𑀓𑀲𑁄𑀢𑀁 𑀑𑀢𑀭𑀢𑀺 𑀅𑀥𑀺𑀯𑀸𑀲𑁂𑀢𑁆𑀯𑀸 𑀅𑀦𑁆𑀢𑀭𑀸 𑀦𑀺𑀯𑀸𑀭𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸. 𑀤𑀓𑀲𑁄𑀢𑁄𑀭𑁄𑀳𑀦𑀢𑁄 (𑀲𑀸𑀭𑀢𑁆𑀣. 𑀝𑀻. 𑁨.𑁨𑁩𑁬-𑁨𑁩𑁭) 𑀧𑀝𑁆𑀞𑀸𑀬 𑀧𑀦 𑀉𑀧𑀸𑀤𑀺𑀦𑁆𑀦𑀢𑁄 𑀯𑀺𑀦𑀺𑀫𑀼𑀢𑁆𑀢𑀢𑁆𑀢𑀸 𑀲𑀫𑁆𑀪𑀯𑀭𑀽𑀧𑀁 𑀉𑀢𑀼𑀲𑀫𑀼𑀝𑁆𑀞𑀸𑀦𑀫𑁂𑀯 𑀅𑀯𑀲𑀺𑀲𑁆𑀲𑀢𑀺, 𑀲𑁂𑀲𑀁 𑀢𑀺𑀲𑀫𑀼𑀝𑁆𑀞𑀸𑀦𑀁 𑀦𑀢𑁆𑀣𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀞𑀸𑀦𑀢𑁄 𑀘𑀼𑀢𑀁 𑀤𑀓𑀲𑁄𑀢𑀁 𑀑𑀢𑀭𑀢𑀺, 𑀢𑀲𑁆𑀫𑀸.

𑀅𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸𑀢𑀺 𑀪𑁂𑀲𑀚𑁆𑀚𑁂𑀦 𑀦𑀺𑀫𑀺𑀢𑁆𑀢𑀁 𑀆𑀮𑀺𑀫𑁆𑀧𑀦𑁆𑀢𑀲𑁆𑀲 𑀉𑀘𑁆𑀘𑀸𑀭𑀸𑀤𑀻𑀦𑀺 𑀯𑀸 𑀓𑀭𑁄𑀦𑁆𑀢𑀲𑁆𑀲. 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑀲𑁆𑀲𑀸𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁩𑁭) 𑀥𑀸𑀢𑀼𑀓𑁆𑀔𑁄𑀪𑀢𑁄 𑀯𑀸 𑀅𑀦𑀼𑀪𑀽𑀢𑀧𑀼𑀩𑁆𑀩𑀢𑁄 𑀯𑀸 𑀤𑁂𑀯𑀢𑁄𑀧𑀲𑀁𑀳𑀸𑀭𑀢𑁄 𑀯𑀸 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀢𑁄 𑀯𑀸𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑀲𑁆𑀲. 𑀓𑀺𑀁 𑀧𑀦𑁂𑀢𑀁 𑀧𑀲𑁆𑀲𑀦𑁆𑀢𑁄 𑀲𑀼𑀢𑁆𑀢𑁄 𑀧𑀲𑁆𑀲𑀢𑀺, 𑀧𑀝𑀺𑀩𑀼𑀤𑁆𑀥𑁄, 𑀉𑀤𑀸𑀳𑀼 𑀦𑁂𑀯 𑀲𑀼𑀢𑁆𑀢𑁄, 𑀦 𑀧𑀝𑀺𑀩𑀼𑀤𑁆𑀥𑁄𑀢𑀺? 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀢𑀸𑀯 𑀲𑀼𑀢𑁆𑀢𑁄 𑀧𑀲𑁆𑀲𑀢𑀺, 𑀅𑀪𑀺𑀥𑀫𑁆𑀫𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀺. 𑀪𑀯𑀗𑁆𑀕𑀘𑀺𑀢𑁆𑀢𑁂𑀦 𑀳𑀺 𑀲𑀼𑀧𑀢𑀺, 𑀢𑀁 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀁 𑀯𑀸 𑀭𑀸𑀕𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀁 𑀯𑀸 𑀦 𑀳𑁄𑀢𑀺. 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑀲𑁆𑀲 𑀘 𑀈𑀤𑀺𑀲𑀸𑀦𑀺 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀣 𑀧𑀝𑀺𑀩𑀼𑀤𑁆𑀥𑁄 𑀧𑀲𑁆𑀲𑀢𑀺, 𑀯𑀺𑀦𑀬𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀺. 𑀬𑀜𑁆𑀳𑀺 𑀧𑀝𑀺𑀩𑀼𑀤𑁆𑀥𑁄 𑀧𑀲𑁆𑀲𑀢𑀺, 𑀢𑀁 𑀲𑀩𑁆𑀩𑁄𑀳𑀸𑀭𑀺𑀓𑀘𑀺𑀢𑁆𑀢𑁂𑀦 𑀧𑀲𑁆𑀲𑀢𑀺. 𑀲𑀩𑁆𑀩𑁄𑀳𑀸𑀭𑀺𑀓𑀘𑀺𑀢𑁆𑀢𑁂𑀦 𑀘 𑀓𑀢𑁂 𑀯𑀻𑀢𑀺𑀓𑁆𑀓𑀫𑁂 𑀅𑀦𑀸𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑁂𑀦 𑀧𑀦 𑀓𑀢𑁂𑀧𑀺 𑀯𑀻𑀢𑀺𑀓𑁆𑀓𑀫𑁂 𑀏𑀓𑀦𑁆𑀢𑀁 𑀅𑀦𑀸𑀧𑀢𑁆𑀢𑀺 𑀏𑀯. 𑀅𑀣 𑀦𑁂𑀯 𑀲𑀼𑀢𑁆𑀢𑁄 𑀦 𑀧𑀝𑀺𑀩𑀼𑀤𑁆𑀥𑁄 𑀧𑀲𑁆𑀲𑀢𑀺, 𑀓𑁄 𑀦𑀸𑀫 𑀧𑀲𑁆𑀲𑀢𑀺, 𑀏𑀯𑀜𑁆𑀘 𑀲𑀢𑀺 𑀲𑀼𑀧𑀺𑀦𑀲𑁆𑀲 𑀅𑀪𑀸𑀯𑁄𑀯 𑀆𑀧𑀚𑁆𑀚𑀢𑀻𑀢𑀺? 𑀦 𑀅𑀪𑀸𑀯𑁄, 𑀓𑀲𑁆𑀫𑀸? 𑀬𑀲𑁆𑀫𑀸 𑀓𑀧𑀺𑀫𑀺𑀤𑁆𑀥𑀧𑀭𑁂𑀢𑁄 𑀧𑀲𑁆𑀲𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀓𑀧𑀺𑀫𑀺𑀤𑁆𑀥𑀧𑀭𑁂𑀢𑁄 𑀔𑁄 𑀫𑀳𑀸𑀭𑀸𑀚 𑀲𑀼𑀧𑀺𑀦𑀁 𑀧𑀲𑁆𑀲𑀢𑀻’’𑀢𑀺 (𑀫𑀺. 𑀧. 𑁫.𑁩.𑁫). 𑀓𑀧𑀺𑀫𑀺𑀤𑁆𑀥𑀧𑀭𑁂𑀢𑁄𑀢𑀺 𑀫𑀓𑁆𑀓𑀝𑀦𑀺𑀤𑁆𑀤𑀸𑀬 𑀬𑀼𑀢𑁆𑀢𑁄. 𑀬𑀣𑀸 𑀳𑀺 𑀫𑀓𑁆𑀓𑀝𑀲𑁆𑀲 𑀦𑀺𑀤𑁆𑀤𑀸 𑀮𑀳𑀼𑀧𑀭𑀺𑀯𑀢𑁆𑀢𑀸 𑀳𑁄𑀢𑀺, 𑀏𑀯𑀁 𑀬𑀸 𑀦𑀺𑀤𑁆𑀤𑀸 𑀧𑀼𑀦𑀧𑁆𑀧𑀼𑀦𑀁 𑀓𑀼𑀲𑀮𑀸𑀤𑀺𑀘𑀺𑀢𑁆𑀢𑀯𑁄𑀓𑀺𑀡𑁆𑀡𑀢𑁆𑀢𑀸 𑀮𑀳𑀼𑀧𑀭𑀺𑀯𑀢𑁆𑀢𑀸, 𑀬𑀲𑁆𑀲𑀸 𑀧𑀯𑀢𑁆𑀢𑀺𑀬𑀁 𑀧𑀼𑀦𑀧𑁆𑀧𑀼𑀦𑀁 𑀪𑀯𑀗𑁆𑀕𑀢𑁄 𑀉𑀢𑁆𑀢𑀭𑀡𑀁 𑀳𑁄𑀢𑀺, 𑀢𑀸𑀬 𑀬𑀼𑀢𑁆𑀢𑁄 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺. 𑀬𑀲𑁆𑀲 𑀘 𑀏𑀯𑀁 𑀧𑀲𑁆𑀲𑀦𑁆𑀢𑀲𑁆𑀲 𑀲𑀼𑀧𑀺𑀦𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀯𑀺𑀬, 𑀓𑀸𑀬𑀲𑀁𑀲𑀕𑁆𑀕𑀸𑀤𑀻𑀦𑀺 𑀆𑀧𑀚𑁆𑀚𑀦𑁆𑀢𑀲𑁆𑀲 𑀯𑀺𑀬 𑀘 𑀲𑀼𑀧𑀺𑀦𑀦𑁆𑀢𑁂𑀦𑁂𑀯 𑀓𑀸𑀭𑀡𑁂𑀦 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀢𑀲𑁆𑀲𑀧𑀺 𑀅𑀦𑀸𑀧𑀢𑁆𑀢𑀺. 𑀲𑀼𑀧𑀺𑀦𑁂 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁬𑁨) 𑀧𑀦 𑀉𑀧𑁆𑀧𑀦𑁆𑀦𑀸𑀬 𑀅𑀲𑁆𑀲𑀸𑀤𑀘𑁂𑀢𑀦𑀸𑀬 𑀲𑀘𑀲𑁆𑀲 𑀯𑀺𑀲𑀬𑁄 𑀳𑁄𑀢𑀺, 𑀦𑀺𑀘𑁆𑀘𑀮𑁂𑀦 𑀪𑀯𑀺𑀢𑀩𑁆𑀩𑀁, 𑀦 𑀳𑀢𑁆𑀣𑁂𑀦 𑀦𑀺𑀫𑀺𑀢𑁆𑀢𑀁 𑀓𑀻𑀴𑀸𑀧𑁂𑀢𑀩𑁆𑀩𑀁. 𑀓𑀸𑀲𑀸𑀯𑀧𑀘𑁆𑀘𑀢𑁆𑀣𑀭𑀡𑀭𑀓𑁆𑀔𑀡𑀢𑁆𑀣𑀁 𑀧𑀦 𑀳𑀢𑁆𑀣𑀧𑀼𑀝𑁂𑀦 𑀕𑀳𑁂𑀢𑁆𑀯𑀸 𑀚𑀕𑁆𑀕𑀦𑀢𑁆𑀣𑀸𑀬 𑀉𑀤𑀓𑀝𑁆𑀞𑀸𑀦𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺.

𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀑𑀢𑀺𑀡𑁆𑀡𑁄’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁨𑁭𑁦) 𑀇𑀤𑀁 𑀓𑀫𑁆𑀫𑀲𑀸𑀥𑀦𑀁, 𑀓𑀢𑁆𑀢𑀼𑀲𑀸𑀥𑀦𑀁 𑀯𑀸 𑀳𑁄𑀢𑀻𑀢𑀺 𑀢𑀤𑀼𑀪𑀬𑀯𑀲𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀓𑁆𑀔𑀸𑀤𑀻𑀳𑀺 𑀯𑀺𑀬 𑀲𑀢𑁆𑀢𑀸’’𑀢𑀺𑀆𑀤𑀺𑀫𑀸𑀳. 𑀅𑀲𑀫𑀧𑁂𑀓𑁆𑀔𑀺𑀢𑁆𑀯𑀸𑀢𑀺 𑀬𑀣𑀸𑀲𑀪𑀸𑀯𑀁 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸, 𑀬𑀣𑀸 𑀢𑁂 𑀭𑀢𑀺𑀚𑀦𑀓𑀸 𑀭𑀽𑀧𑀸𑀤𑀬𑁄 𑀯𑀺𑀲𑀬𑀸 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀲𑀼𑀪𑀸𑀦𑀢𑁆𑀢𑀸𑀓𑀸𑀭𑁂𑀦 𑀅𑀯𑀝𑁆𑀞𑀺𑀢𑀸, 𑀢𑀣𑀸 𑀅𑀧𑀲𑁆𑀲𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀭𑀺𑀡𑀢𑁂𑀦𑀸𑀢𑀺 𑀧𑀭𑀺𑀯𑀢𑁆𑀢𑁂𑀦. 𑀢𑁂𑀦𑀸𑀳 ‘‘𑀬𑀣𑀸 𑀧𑀭𑀺𑀯𑀢𑁆𑀢𑀫𑀸𑀦’’𑀦𑁆𑀢𑀺𑀆𑀤𑀺. 𑀯𑀼𑀢𑁆𑀢𑀭𑀸𑀕𑀯𑀲𑁂𑀦𑀸𑀢𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑀯𑀲𑁂𑀦. 𑀢𑀤𑀳𑀼𑀚𑀸𑀢𑀸𑀬𑀧𑀻𑀢𑀺 𑀢𑀲𑁆𑀫𑀺𑀁 𑀅𑀳𑀦𑀺 𑀚𑀸𑀢𑀁 𑀚𑀦𑀦𑀁 𑀏𑀢𑀺𑀲𑁆𑀲𑀸𑀢𑀺 𑀢𑀤𑀳𑀼𑀚𑀸𑀢𑀸, 𑀢𑀲𑁆𑀫𑀺𑀁 𑀅𑀳𑀦𑀺 𑀚𑀸𑀢𑀸𑀢𑀺 𑀯𑀸 𑀢𑀤𑀳𑀼𑀚𑀸𑀢𑀸, 𑀢𑀸𑀬, 𑀢𑀁 𑀤𑀺𑀯𑀲𑀁 𑀚𑀸𑀢𑀸𑀬𑀧𑀻𑀢𑀺 𑀅𑀢𑁆𑀣𑁄, 𑀚𑀸𑀢𑀫𑀢𑁆𑀢𑀸𑀬 𑀅𑀮𑁆𑀮𑀫𑀁𑀲𑀧𑁂𑀲𑀺𑀯𑀡𑁆𑀡𑀸𑀬𑀧𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀲𑁆𑀲𑀸𑀢𑀺 ‘‘𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀧𑀤𑀲𑁆𑀲. 𑀇𑀤𑀸𑀦𑀺 𑀳𑀢𑁆𑀣𑀸𑀤𑀻𑀦𑀁 𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀁 ‘‘𑀢𑀢𑁆𑀣 𑀳𑀢𑁆𑀣𑁄 𑀦𑀸𑀫 𑀓𑀧𑁆𑀧𑀭𑀢𑁄 𑀧𑀝𑁆𑀞𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀓𑀧𑁆𑀧𑀭𑀢𑁄 𑀧𑀝𑁆𑀞𑀸𑀬𑀸𑀢𑀺 𑀤𑀼𑀢𑀺𑀬𑀫𑀳𑀸𑀲𑀦𑁆𑀥𑀺𑀁 𑀉𑀧𑀸𑀤𑀸𑀬. 𑀅𑀜𑁆𑀜𑀢𑁆𑀣 𑀧𑀦 𑀫𑀡𑀺𑀩𑀦𑁆𑀥𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀕𑁆𑀕𑀦𑀔𑀸 𑀳𑀢𑁆𑀣𑁄. 𑀯𑀺𑀦𑀦𑁆𑀥𑀺𑀢𑁆𑀯𑀸 𑀯𑀸 𑀅𑀯𑀺𑀦𑀦𑁆𑀥𑀺𑀢𑁆𑀯𑀸 𑀯𑀸 𑀓𑀢𑀓𑁂𑀲𑀓𑀮𑀸𑀧𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀯𑀺𑀦𑀦𑁆𑀥𑀺𑀢𑁆𑀯𑀸𑀢𑀺 𑀢𑀻𑀳𑀺 𑀓𑁂𑀲𑀯𑀝𑁆𑀝𑀻𑀳𑀺 𑀕𑀦𑁆𑀣𑀺𑀢𑁆𑀯𑀸. 𑀲𑀼𑀯𑀡𑁆𑀡𑀘𑀻𑀭𑀓𑀦𑁆𑀢𑀺 𑀲𑀼𑀯𑀡𑁆𑀡𑀧𑀸𑀴𑀺𑀁. 𑀳𑀢𑁆𑀣𑀜𑁆𑀘 𑀯𑁂𑀡𑀺𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀲𑀭𑀻𑀭𑀁 𑀅𑀗𑁆𑀕𑀦𑁆𑀢𑀺 𑀆𑀳 ‘‘𑀅𑀯𑀲𑁂𑀲𑀲𑁆𑀲 𑀲𑀭𑀻𑀭𑀲𑁆𑀲𑀸’’𑀢𑀺𑀆𑀤𑀺.

𑀬𑁄 𑀳𑀺 𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁄𑀧𑀺 𑀦𑀺𑀘𑁆𑀘𑀮𑁂𑀦 𑀓𑀸𑀬𑁂𑀦 𑀓𑁂𑀯𑀮𑀁 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺 𑀲𑀸𑀤𑀺𑀬𑀢𑀺 𑀅𑀦𑀼𑀪𑁄𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂 𑀆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀅𑀦𑀸𑀧𑀢𑁆𑀢𑀻𑀢𑀺 𑀆𑀳 ‘‘𑀓𑀸𑀬𑁂𑀦 𑀅𑀯𑀸𑀬𑀫𑀺𑀢𑁆𑀯𑀸’’𑀢𑀺𑀆𑀤𑀺. 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑁂𑀦𑀸𑀢𑀺 𑀇𑀢𑁆𑀣𑀺𑀢𑁄 𑀫𑀼𑀘𑁆𑀘𑀺𑀢𑀼𑀓𑀸𑀫𑀢𑀸𑀥𑀺𑀧𑁆𑀧𑀸𑀬𑁂𑀦. 𑀅𑀲𑀜𑁆𑀘𑀺𑀘𑁆𑀘𑀸𑀢𑀺 ‘‘𑀇𑀫𑀺𑀦𑀸 𑀉𑀧𑀸𑀬𑁂𑀦 𑀇𑀫𑀁 𑀨𑀼𑀲𑀺𑀲𑁆𑀲𑀸𑀫𑀻’’𑀢𑀺 𑀅𑀘𑁂𑀢𑁂𑀢𑁆𑀯𑀸. 𑀏𑀯𑀜𑁆𑀳𑀺 𑀅𑀘𑁂𑀢𑁂𑀢𑁆𑀯𑀸 𑀧𑀢𑁆𑀢𑀧𑁆𑀧𑀝𑀺𑀕𑁆𑀕𑀳𑀡𑀸𑀤𑀻𑀲𑀼 𑀫𑀸𑀢𑀼𑀕𑀸𑀫𑀲𑁆𑀲 𑀅𑀗𑁆𑀕𑁂 𑀨𑀼𑀝𑁆𑀞𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀅𑀲𑀢𑀺𑀬𑀸𑀢𑀺 𑀅𑀜𑁆𑀜𑀯𑀺𑀳𑀺𑀢𑁄 𑀳𑁄𑀢𑀺, ‘‘𑀫𑀸𑀢𑀼𑀕𑀸𑀫𑀁 𑀨𑀼𑀲𑀺𑀲𑁆𑀲𑀸𑀫𑀻’’𑀢𑀺 𑀲𑀢𑀺 𑀦𑀢𑁆𑀣𑀺, 𑀏𑀯𑀁 𑀅𑀲𑀢𑀺𑀬𑀸 𑀳𑀢𑁆𑀣𑀧𑀸𑀤𑀧𑀲𑀸𑀭𑀡𑀸𑀤𑀺𑀓𑀸𑀮𑁂 𑀨𑀼𑀲𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀤𑀸𑀭𑀓𑀯𑁂𑀲𑁂𑀦 𑀞𑀺𑀢𑀁 𑀤𑀸𑀭𑀺𑀓𑀁 ‘‘𑀇𑀢𑁆𑀣𑀻’’𑀢𑀺 𑀅𑀚𑀸𑀦𑀦𑁆𑀢𑁄 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀨𑀼𑀲𑀢𑀺, 𑀏𑀯𑀁 ‘‘𑀇𑀢𑁆𑀣𑀻’’𑀢𑀺 𑀅𑀚𑀸𑀦𑀦𑁆𑀢𑀲𑁆𑀲 𑀨𑀼𑀲𑀢𑁄 𑀅𑀦𑀸𑀧𑀢𑁆𑀢𑀺. 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑀸𑀢𑀺 𑀓𑀸𑀬𑀲𑀁𑀲𑀕𑁆𑀕𑀁 𑀅𑀲𑀸𑀤𑀺𑀬𑀦𑁆𑀢𑀲𑁆𑀲 𑀩𑀸𑀳𑀸𑀧𑀭𑀫𑁆𑀧𑀭𑀸𑀬 𑀦𑀻𑀢𑀪𑀺𑀓𑁆𑀔𑀼𑀲𑁆𑀲 𑀯𑀺𑀬 𑀅𑀦𑀸𑀧𑀢𑁆𑀢𑀺. 𑀇𑀥 𑀧𑀦 𑀉𑀤𑀸𑀬𑀺𑀢𑁆𑀣𑁂𑀭𑁄 𑀆𑀤𑀺𑀓𑀫𑁆𑀫𑀺𑀓𑁄. 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑀭𑀸𑀕𑀯𑀲𑁂𑀦𑀸𑀢𑀺 𑀤𑀼𑀝𑁆𑀞𑀼𑀮𑁆𑀮𑀸 𑀯𑀸𑀘𑀸 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸, 𑀢𑀸𑀬 𑀅𑀲𑁆𑀲𑀸𑀤𑀘𑁂𑀢𑀦𑀸 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑁄, 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀭𑀸𑀕𑀯𑀲𑁂𑀦. 𑀏𑀢𑁆𑀣𑀸𑀥𑀺𑀧𑁆𑀧𑁂𑀢𑀁 𑀫𑀸𑀢𑀼𑀕𑀸𑀫𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀸𑀢𑀼𑀕𑀸𑀫’’𑀦𑁆𑀢𑀺𑀆𑀤𑀺𑀫𑀸𑀳. 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀲𑀁𑀮𑀓𑁆𑀔𑀡𑀲𑀫𑀢𑁆𑀣𑀦𑁆𑀢𑀺 𑀅𑀲𑀤𑁆𑀥𑀫𑁆𑀫𑀲𑀤𑁆𑀥𑀫𑁆𑀫𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁 𑀓𑀣𑀁 𑀚𑀸𑀦𑀺𑀢𑀼𑀁 𑀲𑀫𑀢𑁆𑀣𑀁. 𑀬𑀸 𑀧𑀦 𑀫𑀳𑀮𑁆𑀮𑀺𑀓𑀸𑀧𑀺 𑀩𑀸𑀮𑀸 𑀏𑀴𑀫𑀽𑀕𑀸, 𑀅𑀬𑀁 𑀇𑀥𑀸𑀦𑀥𑀺𑀧𑁆𑀧𑁂𑀢𑀸. 𑀯𑀡𑁆𑀡𑁄 𑀦𑀸𑀫 𑀤𑁆𑀯𑁂 𑀫𑀕𑁆𑀕𑁂 𑀉𑀤𑁆𑀤𑀺𑀲𑁆𑀲 ‘‘𑀇𑀢𑁆𑀣𑀺𑀮𑀓𑁆𑀔𑀡𑁂𑀦 𑀲𑀼𑀪𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑀸𑀲𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁮𑁫) 𑀣𑁄𑀫𑀦𑀸. 𑀅𑀯𑀡𑁆𑀡𑁄 𑀦𑀸𑀫 𑀤𑁆𑀯𑁂 𑀫𑀕𑁆𑀕𑁂 𑀉𑀤𑁆𑀤𑀺𑀲𑁆𑀲 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀕𑀭𑀳𑀦𑀸, ‘‘𑀇𑀢𑁆𑀣𑀺𑀮𑀓𑁆𑀔𑀡𑁂𑀦 𑀲𑀼𑀪𑀮𑀓𑁆𑀔𑀡𑁂𑀦 𑀅𑀲𑀫𑀦𑁆𑀦𑀸𑀕𑀢𑀸𑀲𑀻’’𑀢𑀺𑀆𑀤𑀻𑀳𑀺 𑀔𑀼𑀁𑀲𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀸𑀘𑀦𑀸 𑀦𑀸𑀫 ‘‘𑀤𑁂𑀳𑀺 𑀫𑁂, 𑀅𑀭𑀳𑀲𑀺 𑀫𑁂 𑀤𑀸𑀢𑀼’’𑀦𑁆𑀢𑀺 (𑀧𑀸𑀭𑀸. 𑁨𑁮𑁫) 𑀯𑀘𑀦𑀁. 𑀆𑀬𑀸𑀘𑀦𑀸 𑀦𑀸𑀫 ‘‘𑀓𑀤𑀸 𑀢𑁂 𑀫𑀸𑀢𑀸 𑀧𑀲𑀻𑀤𑀺𑀲𑁆𑀲𑀢𑀺, 𑀓𑀤𑀸 𑀢𑁂 𑀧𑀺𑀢𑀸 𑀧𑀲𑀻𑀤𑀺𑀲𑁆𑀲𑀢𑀺, 𑀓𑀤𑀸 𑀢𑁂 𑀤𑁂𑀯𑀢𑀸𑀬𑁄 𑀧𑀲𑀻𑀤𑀺𑀲𑁆𑀲𑀦𑁆𑀢𑀺, 𑀓𑀤𑀸 𑀢𑁂 𑀲𑀼𑀔𑀡𑁄 𑀲𑀼𑀮𑀬𑁄 𑀲𑀼𑀫𑀼𑀳𑀼𑀢𑁆𑀢𑁄 𑀪𑀯𑀺𑀲𑁆𑀲𑀢𑀺, 𑀓𑀤𑀸 𑀢𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 (𑀧𑀸𑀭𑀸. 𑁨𑁮𑁫) 𑀯𑀘𑀦𑀁. 𑀧𑀼𑀘𑁆𑀙𑀦𑀁 𑀦𑀸𑀫 ‘‘𑀓𑀣𑀁 𑀢𑁆𑀯𑀁 𑀲𑀸𑀫𑀺𑀓𑀲𑁆𑀲 𑀤𑁂𑀲𑀺, 𑀓𑀣𑀁 𑀚𑀸𑀭𑀲𑁆𑀲 𑀤𑁂𑀲𑀻’’𑀢𑀺 (𑀧𑀸𑀭𑀸. 𑁨𑁮𑁫) 𑀯𑀘𑀦𑀁. 𑀧𑀝𑀺𑀧𑀼𑀘𑁆𑀙𑀦𑀁 𑀦𑀸𑀫 ‘‘𑀏𑀯𑀁 𑀓𑀺𑀭 𑀢𑁆𑀯𑀁 𑀲𑀸𑀫𑀺𑀓𑀲𑁆𑀲 𑀤𑁂𑀢𑀺, 𑀏𑀯𑀁 𑀚𑀸𑀭𑀲𑁆𑀲 𑀤𑁂𑀲𑀻’’𑀢𑀺 (𑀧𑀸𑀭𑀸. 𑁨𑁮𑁫) 𑀯𑀘𑀦𑀁. 𑀆𑀘𑀺𑀓𑁆𑀔𑀦𑀁 𑀦𑀸𑀫 𑀧𑀼𑀝𑁆𑀞𑀲𑁆𑀲 ‘‘𑀏𑀯𑀁 𑀤𑁂𑀳𑀺, 𑀏𑀯𑀁 𑀤𑁂𑀦𑁆𑀢𑀸 𑀲𑀸𑀫𑀺𑀓𑀲𑁆𑀲 𑀧𑀺𑀬𑀸 𑀪𑀯𑀺𑀲𑁆𑀲𑀲𑀺, 𑀫𑀦𑀸𑀧𑀸 𑀘𑀸’’𑀢𑀺 (𑀧𑀸𑀭𑀸. 𑁨𑁮𑁫) 𑀪𑀡𑀦𑀁. 𑀅𑀦𑀼𑀲𑀸𑀲𑀦𑀁 𑀦𑀸𑀫 𑀅𑀧𑀼𑀝𑁆𑀞𑀲𑁆𑀲 ‘‘𑀏𑀯𑀁 𑀤𑁂𑀳𑀺, 𑀏𑀯𑀁 𑀤𑁂𑀦𑁆𑀢𑀸 𑀲𑀸𑀫𑀺𑀓𑀲𑁆𑀲 𑀧𑀺𑀬𑀸 𑀪𑀯𑀺𑀲𑁆𑀲𑀲𑀺, 𑀫𑀦𑀸𑀧𑀸 𑀘𑀸’’𑀢𑀺 (𑀧𑀸𑀭𑀸. 𑁨𑁮𑁫) 𑀪𑀯𑀦𑀁. 𑀅𑀓𑁆𑀓𑁄𑀲𑀦𑀁 (𑀧𑀸𑀭𑀸. 𑁨𑁮𑁫) 𑀦𑀸𑀫 ‘‘𑀅𑀦𑀺𑀫𑀺𑀢𑁆𑀢𑀸𑀲𑀺, 𑀦𑀺𑀫𑀺𑀢𑁆𑀢𑀫𑀢𑁆𑀢𑀸𑀲𑀺, 𑀅𑀮𑁄𑀳𑀺𑀢𑀸𑀲𑀺, 𑀥𑀼𑀯𑀮𑁄𑀳𑀺𑀢𑀸𑀲𑀺, 𑀥𑀼𑀯𑀘𑁄𑀴𑀸𑀲𑀺, 𑀧𑀕𑁆𑀖𑀭𑀦𑁆𑀢𑀻𑀲𑀺, 𑀲𑀺𑀔𑀭𑀡𑀻𑀲𑀺, 𑀇𑀢𑁆𑀣𑀺𑀧𑀡𑁆𑀟𑀓𑀸𑀲𑀺, 𑀯𑁂𑀧𑀼𑀭𑀺𑀲𑀺𑀓𑀸𑀲𑀺, 𑀲𑀫𑁆𑀪𑀺𑀦𑁆𑀦𑀸𑀲𑀺, 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀲𑀻’’𑀢𑀺 (𑀧𑀸𑀭𑀸. 𑁨𑁮𑁫) 𑀯𑀘𑀦𑀁. 𑀬𑀲𑁆𑀫𑀸 𑀫𑁂𑀣𑀼𑀦𑀼𑀧𑀲𑀁𑀳𑀺𑀢𑀸𑀬 𑀯𑀸𑀘𑀸𑀬 𑀅𑀥𑀺𑀓𑀁 𑀤𑀼𑀝𑁆𑀞𑀼𑀮𑁆𑀮𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀫𑁂𑀣𑀼𑀦𑀼𑀧𑀲𑀁𑀳𑀺𑀢𑀸𑀳𑀻’’𑀢𑀺 𑀇𑀤𑀁 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀬 𑀲𑀺𑀔𑀸𑀧𑀢𑁆𑀢𑀮𑀓𑁆𑀔𑀡𑀤𑀲𑁆𑀲𑀦𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀫𑁂𑀣𑀼𑀦𑀼𑀧𑀲𑀁𑀳𑀺𑀢𑀸𑀬𑁂𑀯 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀢𑁆𑀢𑀸. 𑀲𑀺𑀔𑀭𑀡𑀻𑀲𑀻𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁮𑁫) 𑀩𑀳𑀺𑀦𑀺𑀓𑁆𑀔𑀦𑁆𑀢𑀆𑀡𑀺𑀫𑀁𑀲𑀸. 𑀲𑀫𑁆𑀪𑀺𑀦𑁆𑀦𑀸𑀲𑀻𑀢𑀺 𑀲𑀫𑁆𑀪𑀺𑀦𑁆𑀦𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀸. 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀲𑀻𑀢𑀺 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑁂𑀦, 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑁂𑀦 𑀘𑀸𑀢𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑁂𑀳𑀺 𑀲𑀫𑀦𑁆𑀦𑀸𑀕𑀢𑀸.

𑀏𑀢𑁆𑀣 𑀘 𑀯𑀡𑁆𑀡𑀪𑀡𑀦𑁂 𑀢𑀸𑀯 ‘‘𑀇𑀢𑁆𑀣𑀺𑀮𑀓𑁆𑀔𑀡𑁂𑀦 𑀲𑀼𑀪𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑀸𑀲𑀻’’𑀢𑀺 𑀯𑀤𑀢𑀺, 𑀦 𑀢𑀸𑀯 𑀲𑀻𑀲𑀁 𑀏𑀢𑀺. ‘‘𑀢𑀯 𑀯𑀘𑁆𑀘𑀫𑀕𑁆𑀕𑁄 𑀘 𑀧𑀲𑁆𑀲𑀸𑀯𑀫𑀕𑁆𑀕𑁄 𑀘 𑀲𑀼𑀪𑁄 𑀲𑀼𑀪𑀲𑀡𑁆𑀞𑀸𑀦𑁄 𑀤𑀲𑁆𑀲𑀦𑀻𑀬𑁄, 𑀈𑀤𑀺𑀲𑁂𑀦 𑀦𑀸𑀫 𑀇𑀢𑁆𑀣𑀺𑀮𑀓𑁆𑀔𑀡𑁂𑀦 𑀲𑀼𑀪𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑀸𑀲𑀻’’𑀢𑀺 𑀯𑀤𑀢𑀺, 𑀲𑀻𑀲𑀁 𑀏𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀅𑀯𑀡𑁆𑀡𑀪𑀡𑀦𑁂 𑀧𑀦 ‘‘𑀅𑀦𑀺𑀫𑀺𑀢𑁆𑀢𑀸𑀲𑀻’’𑀢𑀺𑀆𑀤𑀻𑀳𑀺 𑀏𑀓𑀸𑀤𑀲𑀳𑀺 𑀧𑀤𑁂𑀳𑀺 𑀅𑀯𑀡𑁆𑀡𑁂 𑀅𑀖𑀝𑀺𑀢𑁂 𑀲𑀻𑀲𑀁 𑀦 𑀏𑀢𑀺, 𑀖𑀝𑀺𑀢𑁂𑀧𑀺 𑀢𑁂𑀲𑀼 ‘‘𑀲𑀺𑀔𑀭𑀡𑀻𑀲𑀺 𑀲𑀫𑁆𑀪𑀺𑀦𑁆𑀦𑀸𑀲𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀲𑀻’’𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀖𑀝𑀺𑀢𑁂𑀬𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀬𑀸𑀘𑀦𑀸𑀬𑀧𑀺 ‘‘𑀤𑁂𑀳𑀺 𑀫𑁂’’𑀢𑀺 𑀏𑀢𑁆𑀢𑀓𑁂𑀦𑁂𑀯 𑀲𑀻𑀲𑀁 𑀦 𑀏𑀢𑀺, ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀤𑁂𑀳𑀻’’𑀢𑀺 𑀏𑀯𑀁 𑀫𑁂𑀣𑀼𑀦𑀥𑀫𑁆𑀫𑁂𑀦 𑀖𑀝𑀺𑀢𑁂 𑀏𑀯 𑀲𑀗𑁆𑀖𑀸𑀤𑀺𑀲𑁂𑀲𑁄.

‘‘𑀓𑀤𑀸 𑀢𑁂 𑀫𑀸𑀢𑀸 𑀧𑀲𑀻𑀤𑀺𑀲𑁆𑀲𑀢𑀻’’𑀢𑀺𑀆𑀤𑀻𑀲𑀼 𑀆𑀬𑀸𑀘𑀦𑀯𑀘𑀦𑁂𑀲𑀼𑀧𑀺 𑀏𑀢𑁆𑀢𑀓𑁂𑀦𑁂𑀯 𑀲𑀻𑀲𑀁 𑀦 𑀏𑀢𑀺, ‘‘𑀓𑀤𑀸 𑀢𑁂 𑀫𑀸𑀢𑀸 𑀧𑀲𑀻𑀤𑀺𑀲𑁆𑀲𑀢𑀺, 𑀓𑀤𑀸 𑀢𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀢𑀯 𑀫𑀸𑀢𑀭𑀺 𑀧𑀲𑀦𑁆𑀦𑀸𑀬 𑀯𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀧𑀦 𑀦𑀬𑁂𑀦 𑀫𑁂𑀣𑀼𑀦𑀥𑀫𑁆𑀫𑁂𑀦 𑀖𑀝𑀺𑀢𑁂𑀬𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄.

‘‘𑀓𑀣𑀁 𑀢𑁆𑀯𑀁 𑀲𑀸𑀫𑀺𑀓𑀲𑁆𑀲 𑀤𑁂𑀲𑀻’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁨𑁮𑁫) 𑀧𑀼𑀘𑁆𑀙𑀸𑀯𑀘𑀦𑁂𑀲𑀼𑀧𑀺 ‘‘𑀫𑁂𑀣𑀼𑀦𑀁 𑀥𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑁂𑀬𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄. ‘‘𑀏𑀯𑀁 𑀓𑀺𑀭 𑀢𑁆𑀯𑀁 𑀲𑀸𑀫𑀺𑀓𑀲𑁆𑀲 𑀤𑁂𑀲𑀻’’𑀢𑀺 (𑀧𑀸𑀭𑀸. 𑁨𑁮𑁫) 𑀧𑀝𑀺𑀧𑀼𑀘𑁆𑀙𑀸𑀯𑀘𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀆𑀘𑀺𑀓𑁆𑀔𑀦𑀸𑀬 𑀘 ‘‘𑀏𑀯𑀁 𑀤𑁂𑀳𑀻’’𑀢𑀺, ‘‘𑀏𑀯𑀁 𑀤𑀤𑀫𑀸𑀦𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀲𑀻𑀲𑀁 𑀦 𑀏𑀢𑀺, ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀏𑀯𑀁 𑀤𑁂𑀳𑀺, 𑀏𑀯𑀁 𑀉𑀧𑀦𑁂𑀳𑀺, 𑀏𑀯𑀁 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀤𑀤𑀫𑀸𑀦𑀸 𑀉𑀧𑀦𑀬𑀫𑀸𑀦𑀸 𑀲𑀸𑀫𑀺𑀓𑀲𑁆𑀲 𑀧𑀺𑀬𑀸 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀧𑀦 𑀦𑀬𑁂𑀦 𑀫𑁂𑀣𑀼𑀦𑀥𑀫𑁆𑀫𑁂𑀦 𑀖𑀝𑀺𑀢𑁂𑀬𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀅𑀦𑀼𑀲𑀸𑀲𑀦𑀺𑀯𑀘𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀅𑀓𑁆𑀓𑁄𑀲𑀯𑀘𑀦𑁂𑀲𑀼 𑀧𑀦 𑀏𑀓𑀸𑀤𑀲𑀲𑀼 ‘‘𑀲𑀺𑀔𑀭𑀡𑀻𑀲𑀺 𑀲𑀫𑁆𑀪𑀺𑀦𑁆𑀦𑀸𑀲𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀲𑀻’’𑀢𑀺 𑀇𑀫𑀸𑀦𑀺 𑀢𑀻𑀡𑀺𑀬𑁂𑀯 𑀧𑀤𑀸𑀦𑀺 𑀲𑀼𑀤𑁆𑀥𑀸𑀦𑀺 𑀲𑀻𑀲𑀁 𑀏𑀦𑁆𑀢𑀺, 𑀇𑀢𑀺 𑀇𑀫𑀸𑀦𑀺 𑀘 𑀢𑀻𑀡𑀺, 𑀧𑀼𑀭𑀺𑀫𑀸𑀦𑀺 𑀘 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀫𑁂𑀣𑀼𑀦𑀥𑀫𑁆𑀫𑀧𑀤𑀸𑀦𑀺 𑀢𑀻𑀡𑀻𑀢𑀺 𑀙 𑀧𑀤𑀸𑀦𑀺 𑀲𑀼𑀤𑁆𑀥𑀸𑀦𑀺 𑀆𑀧𑀢𑁆𑀢𑀺𑀓𑀭𑀸𑀦𑀺, 𑀲𑁂𑀲𑀸𑀦𑀺 ‘‘𑀅𑀦𑀺𑀫𑀺𑀢𑁆𑀢𑀸𑀲𑀻’’𑀢𑀺𑀆𑀤𑀻𑀦𑀺 𑀅𑀦𑀺𑀫𑀺𑀢𑁆𑀢𑁂 ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀫𑁂 𑀤𑁂𑀳𑀻’’𑀢𑀺 𑀯𑀸 ‘‘𑀅𑀦𑀺𑀫𑀺𑀢𑁆𑀢𑀸𑀲𑀺, 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀫𑁂 𑀤𑁂𑀳𑀻’’𑀢𑀺 𑀯𑀸 𑀆𑀤𑀺𑀦𑀸 𑀦𑀬𑁂𑀦 𑀫𑁂𑀣𑀼𑀦𑀥𑀫𑁆𑀫𑁂𑀦 𑀖𑀝𑀺𑀢𑀸𑀦𑁂𑀯 𑀆𑀧𑀢𑁆𑀢𑀺𑀓𑀭𑀸𑀦𑀺 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀅𑀥𑀓𑁆𑀔𑀓𑀦𑁆𑀢𑀺 𑀅𑀓𑁆𑀔𑀓𑀢𑁄 𑀧𑀝𑁆𑀞𑀸𑀬 𑀅𑀥𑁄. 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀦𑁆𑀢𑀺 𑀚𑀸𑀡𑀼𑀫𑀡𑁆𑀟𑀮𑀢𑁄 𑀧𑀝𑁆𑀞𑀸𑀬 𑀉𑀤𑁆𑀥𑀁. 𑀉𑀩𑁆𑀪𑀓𑁆𑀔𑀓𑀦𑁆𑀢𑀺 𑀅𑀓𑁆𑀔𑀓𑀢𑁄 𑀧𑀝𑁆𑀞𑀸𑀬 𑀉𑀤𑁆𑀥𑀁. 𑀅𑀥𑁄𑀚𑀸𑀡𑀼𑀫𑀡𑁆𑀟𑀮𑀦𑁆𑀢𑀺 𑀚𑀸𑀡𑀼𑀫𑀡𑁆𑀟𑀮𑀢𑁄 𑀧𑀝𑁆𑀞𑀸𑀬 𑀅𑀥𑁄. 𑀅𑀓𑁆𑀔𑀓𑀁, 𑀧𑀦 𑀚𑀸𑀡𑀼𑀫𑀡𑁆𑀟𑀮𑀜𑁆𑀘 𑀏𑀢𑁆𑀣𑁂𑀯 𑀤𑀼𑀓𑁆𑀓𑀝𑀔𑁂𑀢𑁆𑀢𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀓𑀸𑀬𑀲𑀁𑀲𑀕𑁆𑀕𑁂 𑀯𑀺𑀬. 𑀦 𑀳𑀺 𑀩𑀼𑀤𑁆𑀥𑀸 𑀕𑀭𑀼𑀓𑀸𑀧𑀢𑁆𑀢𑀺𑀁 𑀲𑀸𑀯𑀲𑁂𑀲𑀁 𑀧𑀜𑁆𑀜𑀸𑀧𑁂𑀦𑁆𑀢𑀻𑀢𑀺. 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀦𑁆𑀢𑀺 𑀯𑀢𑁆𑀣𑀁 𑀯𑀸 𑀧𑀼𑀧𑁆𑀨𑀁 𑀯𑀸 𑀆𑀪𑀭𑀡𑀁 𑀯𑀸.

𑀅𑀢𑁆𑀣𑀥𑀫𑁆𑀫𑀅𑀦𑀼𑀲𑀸𑀲𑀦𑀺𑀧𑀼𑀭𑁂𑀓𑁆𑀔𑀸𑀭𑀸𑀦𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁮𑁭) 𑀏𑀢𑁆𑀣 ‘‘𑀅𑀦𑀺𑀫𑀺𑀢𑁆𑀢𑀸’’𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀅𑀢𑁆𑀣𑀁 𑀓𑀣𑁂𑀦𑁆𑀢𑁄, 𑀅𑀝𑁆𑀞𑀓𑀣𑀁 𑀯𑀸 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑁄 𑀅𑀢𑁆𑀣𑀧𑀼𑀭𑁂𑀓𑁆𑀔𑀸𑀭𑁄 𑀦𑀸𑀫, 𑀧𑀸𑀴𑀺𑀁 𑀯𑀸𑀘𑁂𑀦𑁆𑀢𑁄, 𑀲𑀚𑁆𑀛𑀸𑀬𑀁 𑀯𑀸 𑀓𑀭𑁄𑀦𑁆𑀢𑁄 𑀥𑀫𑁆𑀫𑀧𑀼𑀭𑁂𑀓𑁆𑀔𑀸𑀭𑁄 𑀦𑀸𑀫, ‘‘𑀇𑀤𑀸𑀦𑀺𑀧𑀺 𑀅𑀦𑀺𑀫𑀺𑀢𑁆𑀢𑀸𑀲𑀺, 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀲𑀺, 𑀅𑀧𑁆𑀧𑀫𑀸𑀤𑀁 𑀤𑀸𑀦𑀺 𑀓𑀭𑁂𑀬𑁆𑀬𑀸𑀲𑀺, 𑀬𑀣𑀸 𑀆𑀬𑀢𑀺𑀫𑁆𑀧𑀺 𑀏𑀯𑀭𑀽𑀧𑀸 𑀫𑀸 𑀳𑁄𑀳𑀺𑀲𑀻’’𑀢𑀺 𑀪𑀡𑀦𑁆𑀢𑁄 𑀅𑀦𑀼𑀲𑀸𑀲𑀦𑀺𑀧𑀼𑀭𑁂𑀓𑁆𑀔𑀸𑀭𑁄 𑀦𑀸𑀫. 𑀇𑀢𑀺 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘 𑀅𑀦𑀼𑀲𑀸𑀲𑀦𑀺𑀜𑁆𑀘 𑀧𑀼𑀭𑀓𑁆𑀔𑀺𑀢𑁆𑀯𑀸 𑀪𑀡𑀦𑁆𑀢𑀸𑀦𑀁 𑀅𑀦𑀸𑀧𑀢𑁆𑀢𑀺. 𑀬𑁄 𑀧𑀦 𑀪𑀺𑀓𑁆𑀔𑀼𑀦𑀻𑀦𑀁 𑀧𑀸𑀴𑀺𑀁 𑀯𑀸𑀘𑁂𑀦𑁆𑀢𑁄 𑀧𑀓𑀢𑀺𑀯𑀸𑀘𑀦𑀸𑀫𑀕𑁆𑀕𑀁 𑀧𑀳𑀸𑀬 𑀳𑀲𑀦𑁆𑀢𑁄 𑀳𑀲𑀦𑁆𑀢𑁄 ‘‘𑀲𑀺𑀔𑀭𑀡𑀻𑀲𑀺, 𑀲𑀫𑁆𑀪𑀺𑀦𑁆𑀦𑀸𑀲𑀺, 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀲𑀻’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀪𑀡𑀢𑀺, 𑀢𑀲𑁆𑀲 𑀆𑀧𑀢𑁆𑀢𑀺𑀬𑁂𑀯. 𑀇𑀥 𑀆𑀤𑀺𑀓𑀫𑁆𑀫𑀺𑀓𑁄 𑀉𑀤𑀸𑀬𑀺𑀢𑁆𑀣𑁂𑀭𑁄, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺 𑀆𑀤𑀺𑀓𑀫𑁆𑀫𑀺𑀓𑀲𑁆𑀲. 𑀦𑀦𑀼 ‘‘𑀲𑀺𑀔𑀭𑀡𑀻’’𑀢𑀺𑀆𑀤𑀻𑀳𑀺 𑀅𑀓𑁆𑀓𑁄𑀲𑀦𑁆𑀢𑀲𑁆𑀲 𑀧𑀝𑀺𑀖𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀤𑀼𑀓𑁆𑀔𑀯𑁂𑀤𑀦𑀸𑀬𑀧𑀺 𑀪𑀯𑀺𑀢𑀩𑁆𑀩𑀁, 𑀅𑀣 𑀓𑀲𑁆𑀫𑀸 𑀤𑁆𑀯𑀺𑀯𑁂𑀤𑀦𑀦𑁆𑀢𑀺? 𑀦𑀸𑀬𑀁 𑀤𑁄𑀲𑁄. 𑀭𑀸𑀕𑀯𑀲𑁂𑀦 𑀳𑀺 𑀅𑀬𑀁 𑀆𑀧𑀢𑁆𑀢𑀺, 𑀦 𑀧𑀝𑀺𑀖𑀯𑀲𑁂𑀦, 𑀢𑀲𑁆𑀫𑀸 𑀭𑀸𑀕𑀯𑀲𑁂𑀦𑁂𑀯 𑀧𑀯𑀢𑁆𑀢𑁄 𑀅𑀓𑁆𑀓𑁄𑀲𑁄 𑀇𑀥𑀸𑀥𑀺𑀧𑁆𑀧𑁂𑀢𑁄, 𑀦 𑀧𑀝𑀺𑀖𑀯𑀲𑁂𑀦𑀸𑀧𑀻𑀢𑀺.

𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀢𑁆𑀢𑀓𑀸𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀯𑀲𑁂𑀦𑀸𑀢𑀺 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀭𑀸𑀕𑀯𑀲𑁂𑀦. 𑀇𑀥𑀸𑀧𑀺 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀚𑀸𑀦𑀦𑀲𑀫𑀢𑁆𑀣𑀸𑀯 𑀇𑀢𑁆𑀣𑀻 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀤𑀼𑀝𑁆𑀞𑀼𑀮𑁆𑀮𑁄𑀪𑀸𑀲𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀇𑀢𑁆𑀣𑀺𑀬𑀸’’𑀢𑀺. 𑀲𑀫𑀻𑀧𑁂𑀢𑀺 𑀲𑀯𑀦𑀽𑀧𑀘𑀸𑀭𑁂. ‘‘𑀞𑀢𑁆𑀯𑀸’’𑀢𑀺 𑀧𑀸𑀞𑀲𑁂𑀲𑁄. 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀢𑀺 𑀓𑀸𑀫𑀻𑀬𑀢𑀻𑀢𑀺 𑀓𑀸𑀫𑁄, 𑀫𑁂𑀣𑀼𑀦𑀥𑀫𑁆𑀫𑁄, 𑀧𑀭𑀺𑀘𑀭𑀡𑀁 𑀉𑀧𑀝𑁆𑀞𑀸𑀦𑀁 𑀧𑀭𑀺𑀘𑀭𑀺𑀬𑀸, 𑀲𑀸𑀯 𑀧𑀸𑀭𑀺𑀘𑀭𑀺𑀬𑀸, 𑀓𑀸𑀫𑁂𑀦 𑀧𑀸𑀭𑀺𑀘𑀭𑀺𑀬𑀸 𑀓𑀸𑀫𑀧𑀸𑀭𑀺𑀘𑀭𑀺𑀬𑀸, 𑀅𑀢𑁆𑀢𑀦𑁄 𑀓𑀸𑀫𑀧𑀸𑀭𑀺𑀘𑀭𑀺𑀬𑀸 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸, 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀫𑁂𑀣𑀼𑀦𑀥𑀫𑁆𑀫𑁂𑀦 𑀉𑀧𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀓𑀸𑀫𑀺𑀢𑀸𑀢𑀺 𑀓𑀸𑀫𑀸, 𑀧𑀸𑀭𑀺𑀘𑀭𑀺𑀬𑀸, 𑀅𑀢𑁆𑀢𑀦𑁄 𑀓𑀸𑀫𑀸 𑀅𑀢𑁆𑀢𑀓𑀸𑀫𑀸, 𑀅𑀢𑁆𑀢𑀓𑀸𑀫𑀸 𑀘 𑀲𑀸 𑀧𑀸𑀭𑀺𑀘𑀭𑀺𑀬𑀸 𑀘𑀸𑀢𑀺 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸, 𑀲𑀬𑀁 𑀫𑁂𑀣𑀼𑀦𑀭𑀸𑀕𑀯𑀲𑁂𑀦 𑀧𑀢𑁆𑀣𑀺𑀢𑀉𑀧𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀫𑁂𑀣𑀼𑀦𑀥𑀫𑁆𑀫𑀲𑀗𑁆𑀔𑀸𑀢𑁂𑀦𑀸’’𑀢𑀺𑀆𑀤𑀺. 𑀏𑀢𑁆𑀣 𑀘 𑀧𑀞𑀫𑁂𑀦 𑀅𑀢𑁆𑀣𑀯𑀺𑀓𑀧𑁆𑀧𑁂𑀦 𑀓𑀸𑀫𑀳𑁂𑀢𑀼𑀧𑀸𑀭𑀺𑀘𑀭𑀺𑀬𑀸𑀲𑀗𑁆𑀔𑀸𑀢𑀁 𑀅𑀢𑁆𑀣𑀢𑁆𑀢𑀬𑀁 𑀤𑀲𑁆𑀲𑁂𑀢𑀺, 𑀤𑀼𑀢𑀺𑀬𑁂𑀦 𑀅𑀥𑀺𑀧𑁆𑀧𑀸𑀬𑀧𑀸𑀭𑀺𑀘𑀭𑀺𑀬𑀸𑀲𑀗𑁆𑀔𑀸𑀢𑀁 𑀅𑀢𑁆𑀣𑀤𑁆𑀯𑀬𑀁. 𑀩𑁆𑀬𑀜𑁆𑀚𑀦𑁂 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁯𑁧) 𑀧𑀦 𑀆𑀤𑀭𑀁 𑀅𑀓𑀢𑁆𑀯𑀸 𑀅𑀢𑁆𑀣𑀫𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀢𑀦𑁄 𑀓𑀸𑀫𑀁 𑀅𑀢𑁆𑀢𑀦𑁄 𑀳𑁂𑀢𑀼𑀁 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀅𑀢𑁆𑀢𑀦𑁄 𑀧𑀸𑀭𑀺𑀘𑀭𑀺𑀬’’𑀦𑁆𑀢𑀺 (𑀧𑀸𑀭𑀸. 𑁨𑁯𑁨) 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁. ‘‘𑀅𑀢𑁆𑀢𑀦𑁄 𑀓𑀸𑀫𑀁 𑀅𑀢𑁆𑀢𑀦𑁄 𑀳𑁂𑀢𑀼𑀁 𑀅𑀢𑁆𑀢𑀦𑁄 𑀧𑀸𑀭𑀺𑀘𑀭𑀺𑀬’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑁂 𑀚𑀸𑀦𑀺𑀲𑁆𑀲𑀦𑁆𑀢𑀺 𑀧𑀡𑁆𑀟𑀺𑀢𑀸 ‘‘𑀏𑀢𑁆𑀢𑀸𑀯𑀢𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀓𑀸𑀫𑀧𑀸𑀭𑀺𑀘𑀭𑀺𑀬𑀸 𑀯𑀼𑀢𑁆𑀢𑀸’’𑀢𑀺, ‘‘𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀅𑀢𑁆𑀢𑀦𑁄 𑀧𑀸𑀭𑀺𑀘𑀭𑀺𑀬’’𑀦𑁆𑀢𑀺 (𑀧𑀸𑀭𑀸. 𑁨𑁯𑁨) 𑀯𑀼𑀢𑁆𑀢𑁂𑀧𑀺 𑀚𑀸𑀦𑀺𑀲𑁆𑀲𑀦𑁆𑀢𑀺 ‘‘𑀏𑀢𑁆𑀢𑀸𑀯𑀢𑀸 𑀅𑀢𑁆𑀢𑀦𑀸 𑀇𑀘𑁆𑀙𑀺𑀢𑀓𑀸𑀫𑀺𑀢𑀝𑁆𑀞𑁂𑀦 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸 𑀯𑀼𑀢𑁆𑀢𑀸’’𑀢𑀺.

𑀓𑀮𑁆𑀬𑀸𑀡𑁂𑀦 𑀪𑀤𑁆𑀤𑀓𑁂𑀦 𑀕𑀼𑀡𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀓𑀮𑁆𑀬𑀸𑀡𑀥𑀫𑁆𑀫𑀁. 𑀢𑁂𑀦𑀸𑀳 ‘‘𑀢𑀤𑀼𑀪𑀬𑁂𑀦𑀸𑀧𑀻’’𑀢𑀺𑀆𑀤𑀺. 𑀅𑀪𑀺𑀭𑀫𑁂𑀬𑁆𑀬𑀸𑀢𑀺 𑀢𑁄𑀲𑁂𑀬𑁆𑀬. 𑀏𑀢𑀤𑀕𑁆𑀕𑀦𑁆𑀢𑀺 𑀏𑀲𑀸 𑀅𑀕𑁆𑀕𑀸. 𑀧𑀸𑀭𑀺𑀘𑀭𑀺𑀬𑀸𑀦𑀦𑁆𑀢𑀺 𑀧𑀸𑀭𑀺𑀘𑀭𑀺𑀬𑀸𑀦𑀁 𑀫𑀚𑁆𑀛𑁂, 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀦𑀦𑀼 𑀤𑀼𑀝𑁆𑀞𑀮𑁆𑀮𑀯𑀸𑀘𑀸𑀲𑀺𑀓𑁆𑀔𑀸𑀧𑀤𑁂 (𑀧𑀸𑀭𑀸. 𑁨𑁮𑁫) 𑀫𑁂𑀣𑀼𑀦𑀬𑀸𑀘𑀦𑀁 𑀆𑀕𑀢𑀁, 𑀅𑀣 𑀓𑀲𑁆𑀫𑀸 𑀇𑀤𑀁 𑀯𑀼𑀢𑁆𑀢𑀁? 𑀦𑀸𑀬𑀁 𑀤𑁄𑀲𑁄. 𑀢𑀢𑁆𑀣 (𑀲𑀸𑀭𑀢𑁆𑀣. 𑀝𑀻. 𑁨.𑁨𑁯𑁧) 𑀳𑀺 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑀭𑀸𑀕𑀯𑀲𑁂𑀦 𑀯𑀼𑀢𑁆𑀢𑀁, 𑀇𑀥 𑀧𑀦 𑀅𑀢𑁆𑀢𑀦𑁄 𑀫𑁂𑀣𑀼𑀦𑀲𑁆𑀲𑀸𑀤𑀭𑀸𑀕𑀯𑀲𑁂𑀦𑀸𑀢𑀺.

𑀢𑀲𑁆𑀫𑀺𑀁𑀬𑁂𑀯 𑀔𑀡𑁂𑀢𑀺 𑀪𑀡𑀺𑀢𑀓𑁆𑀔𑀡𑁂. 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀦 𑀧𑀡𑁆𑀟𑀓𑀕𑀢𑀺𑀓𑀢𑁆𑀢𑀸 𑀯𑀺𑀲𑀼𑀁 𑀦 𑀯𑀼𑀢𑁆𑀢𑁄. ‘‘𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑁂 𑀓𑀸𑀬𑀲𑀁𑀲𑀕𑁆𑀕𑁂 𑀯𑀺𑀬 𑀬𑀓𑁆𑀔𑀺𑀧𑁂𑀢𑀻𑀲𑀼𑀧𑀺 𑀤𑀼𑀝𑁆𑀞𑀼𑀮𑁆𑀮𑀢𑁆𑀢𑀓𑀸𑀫𑀯𑀘𑀦𑁂 𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺 (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁨𑁯𑁫) 𑀯𑀤𑀦𑁆𑀢𑀺. 𑀢𑀲𑁆𑀫𑀺𑀁𑀬𑁂𑀯𑀸𑀢𑀺 𑀧𑀡𑁆𑀟𑀓𑁂𑀬𑁂𑀯 𑀇𑀢𑁆𑀣𑀺𑀲𑀜𑁆𑀜𑀺𑀦𑁄 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀪𑀡𑀦𑁂𑀧𑀺 𑀤𑀼𑀓𑁆𑀓𑀝𑀁. ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀺, 𑀢𑀲𑁆𑀲 𑀅𑀕𑁆𑀕𑀤𑀸𑀦𑀁 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀤𑁂𑀳𑀻’’𑀢𑀺 𑀧𑀭𑀺𑀬𑀸𑀬𑀯𑀘𑀦𑁂𑀧𑀺 𑀤𑀼𑀓𑁆𑀓𑀝𑀁. ‘‘𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬 𑀬𑀸 𑀫𑀸𑀤𑀺𑀲𑀁 ‘𑀲𑀻𑀮𑀯𑀦𑁆𑀢’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸’’𑀢𑀺 (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁨𑁯𑁫) 𑀏𑀓𑁂. ‘‘𑀧𑀜𑁆𑀘𑀲𑀼 𑀅𑀗𑁆𑀕𑁂𑀲𑀼 𑀲𑀩𑁆𑀪𑀸𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑁄𑀯𑀸’’𑀢𑀺 𑀅𑀧𑀭𑁂. ‘‘𑀫𑁂𑀣𑀼𑀦𑀼𑀧𑀲𑀁𑀳𑀺𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀘𑀻𑀯𑀭𑀸𑀤𑀻𑀳𑀺…𑀧𑁂… 𑀪𑀸𑀲𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑀅𑀢𑁆𑀢𑀓𑀸𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀜𑁆𑀘𑀭𑀡𑀁 𑀲𑀜𑁆𑀘𑀭𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀜𑁆𑀘𑀭𑀻, 𑀲𑀜𑁆𑀘𑀭𑀡𑀲𑀻𑀮𑁄𑀢𑀺 𑀯𑀸 𑀲𑀜𑁆𑀘𑀭𑀻, 𑀢𑀲𑁆𑀲 𑀪𑀸𑀯𑁄 𑀲𑀜𑁆𑀘𑀭𑀺𑀢𑁆𑀢𑀁, 𑀲𑀜𑁆𑀘𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀢𑀜𑁆𑀘 𑀧𑀭𑀢𑁄 ‘‘𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀫𑀢𑀺’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀯𑁂𑀫𑀚𑁆𑀛𑁂𑀢𑀺 𑀆𑀳 ‘‘𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀅𑀦𑁆𑀢𑀭𑁂 𑀲𑀜𑁆𑀘𑀭𑀡𑀪𑀸𑀯’’𑀦𑁆𑀢𑀺. 𑀧𑀝𑀺𑀕𑁆𑀕𑀡𑁆𑀳𑀦𑀯𑀻𑀫𑀁𑀲𑀦𑀧𑀘𑁆𑀘𑀸𑀳𑀭𑀡𑀸𑀦𑀻𑀢𑀺 𑀏𑀢𑁆𑀣 𑀧𑀝𑀺𑀕𑁆𑀕𑀡𑁆𑀳𑀦𑀁 𑀦𑀸𑀫 𑀧𑀼𑀭𑀺𑀲𑁂𑀦 𑀯𑀸 𑀇𑀢𑁆𑀣𑀺𑀬𑀸 𑀯𑀸 𑀉𑀪𑀺𑀦𑁆𑀦𑀁 𑀫𑀸𑀢𑀸𑀤𑀻𑀳𑀺 𑀯𑀸 ‘‘𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸 𑀏𑀯𑀁 𑀪𑀡𑀸𑀳𑀻’’𑀢𑀺 𑀯𑀼𑀢𑁆𑀢𑁂 𑀢𑁂𑀲𑀁 𑀯𑀘𑀦𑀁 ‘‘𑀲𑀸𑀥𑀽’’𑀢𑀺 𑀯𑀸 ‘‘𑀳𑁄𑀢𑀽’’𑀢𑀺 𑀯𑀸 ‘‘𑀪𑀡𑀸𑀫𑀻’’𑀢𑀺 𑀯𑀸 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸, 𑀲𑀻𑀲𑀓𑀫𑁆𑀧𑀦𑀸𑀤𑀻𑀳𑀺 𑀯𑀸 𑀲𑀫𑁆𑀧𑀝𑀺𑀘𑁆𑀙𑀦𑀁. 𑀯𑀻𑀫𑀁𑀲𑀦𑀁 𑀦𑀸𑀫 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀲𑁆𑀲 𑀯𑀸 𑀢𑁂𑀲𑀁 𑀅𑀯𑀲𑁆𑀲𑀁 𑀆𑀭𑁄𑀘𑀦𑀓𑀸𑀦𑀁 𑀫𑀸𑀢𑀸𑀧𑀺𑀢𑀼𑀪𑀸𑀢𑀸𑀪𑀕𑀺𑀦𑀺𑀆𑀤𑀻𑀦𑀁 𑀯𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀲𑀸𑀲𑀦𑀲𑁆𑀲 𑀆𑀭𑁄𑀘𑀦𑀁. 𑀧𑀘𑁆𑀘𑀸𑀳𑀭𑀡𑀁 𑀦𑀸𑀫 𑀢𑁂𑀦 𑀕𑀦𑁆𑀢𑁆𑀯𑀸 𑀆𑀭𑁄𑀘𑀺𑀢𑁂 𑀲𑀸 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀢𑀼 𑀯𑀸, 𑀫𑀸 𑀯𑀸, 𑀮𑀚𑁆𑀚𑀸𑀬 𑀯𑀸 𑀢𑀼𑀡𑁆𑀳𑀻 𑀳𑁄𑀢𑀼, 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀲𑁆𑀲 𑀯𑀸 𑀢𑀲𑁆𑀲𑀸 𑀧𑀯𑀢𑁆𑀢𑀺𑀬𑀸 𑀆𑀭𑁄𑀘𑀦𑀁. 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀧𑀝𑀺𑀧𑀚𑁆𑀚𑁂𑀬𑁆𑀬.

𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀫𑀢𑀺𑀁 𑀧𑀼𑀭𑀺𑀲𑀲𑁆𑀲 𑀯𑀸 𑀇𑀢𑁆𑀣𑀺𑀫𑀢𑀺𑀦𑁆𑀢𑀺 𑀏𑀢𑁆𑀣 ‘‘𑀆𑀭𑁄𑀘𑁂𑀬𑁆𑀬𑀸’’𑀢𑀺 𑀧𑀸𑀞𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦𑁂𑀯𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀚𑀸𑀬𑀸𑀪𑀸𑀯𑁂𑀢𑀺 𑀪𑀭𑀺𑀬𑀸𑀪𑀸𑀯𑁂. 𑀚𑀸𑀭𑀪𑀸𑀯𑁂𑀢𑀺 𑀧𑀢𑀺𑀪𑀸𑀯𑁂, 𑀦𑀺𑀫𑀺𑀢𑁆𑀢𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀢𑀲𑁆𑀫𑀸 𑀪𑀭𑀺𑀬𑀸𑀪𑀸𑀯𑀦𑀺𑀫𑀺𑀢𑁆𑀢𑀁 𑀧𑀢𑀺𑀪𑀸𑀯𑀦𑀺𑀫𑀺𑀢𑁆𑀢𑀁, 𑀪𑀭𑀺𑀬𑀸𑀪𑀸𑀯𑀳𑁂𑀢𑀼 𑀧𑀢𑀺𑀪𑀸𑀯𑀳𑁂𑀢𑀼, 𑀪𑀭𑀺𑀬𑀸𑀪𑀸𑀯𑀧𑀘𑁆𑀘𑀬𑀸 𑀧𑀢𑀺𑀪𑀸𑀯𑀧𑀘𑁆𑀘𑀬𑀸 𑀆𑀭𑁄𑀘𑁂𑀢𑀻𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 ‘‘𑀚𑀸𑀬𑀢𑁆𑀢𑀦𑁂 𑀆𑀭𑁄𑀘𑁂𑀢𑀻’’𑀢𑀺𑀆𑀤𑀻𑀲𑀼𑀧𑀺. ‘‘𑀚𑀸𑀬𑀢𑁆𑀢𑀦𑁂 𑀯𑀸 𑀚𑀸𑀭𑀢𑁆𑀢𑀦𑁂 𑀯𑀸’’𑀢𑀺 𑀳𑀺 𑀇𑀤𑀁 𑀬𑀤𑀢𑁆𑀣𑀁 𑀢𑀁 𑀢𑁂𑀲𑀁 𑀫𑀢𑀺𑀁 𑀆𑀭𑁄𑀘𑁂𑀢𑀺, 𑀢𑀁 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀧𑀦 𑀧𑀤𑀪𑀸𑀚𑀦𑀺𑀬𑀁 (𑀧𑀸𑀭𑀸. 𑁩𑁦𑁨) 𑀯𑀼𑀢𑁆𑀢𑀦𑀬𑁂𑀦𑀸𑀧𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀓𑀺𑀜𑁆𑀘𑀸𑀧𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀧𑀤𑀪𑀸𑀚𑀦𑀺𑀬𑀁 𑀯𑀼𑀢𑁆𑀢𑀁, ‘‘𑀚𑀸𑀬𑀢𑁆𑀢𑀦𑁂 𑀯𑀸 𑀚𑀸𑀭𑀢𑁆𑀢𑀦𑁂 𑀯𑀸’’𑀢𑀺 𑀧𑀦 𑀦𑀺𑀤𑁆𑀤𑁂𑀲𑀲𑁆𑀲 𑀉𑀪𑀬𑀮𑀺𑀗𑁆𑀕𑀲𑀸𑀥𑀸𑀭𑀡𑀢𑁆𑀢𑀸 𑀧𑀼𑀭𑀺𑀲𑀮𑀺𑀗𑁆𑀕𑀯𑀲𑁂𑀦𑀸𑀧𑀺 𑀬𑁄𑀚𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀏𑀢𑁂𑀦𑁂𑀯 𑀉𑀧𑀸𑀬𑁂𑀦𑀸’’𑀢𑀺𑀆𑀤𑀺. 𑀫𑀼𑀳𑀼𑀢𑁆𑀢𑀺𑀓𑀸𑀢𑀺 𑀕𑀡𑀺𑀓𑀸. ‘‘𑀅𑀦𑁆𑀢𑀫𑀲𑁄 𑀢𑀗𑁆𑀔𑀡𑀺𑀓𑀸𑀬𑀧𑀻’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀏𑀢𑁂𑀦𑁂𑀯 𑀉𑀧𑀸𑀬𑁂𑀦𑀸’’𑀢𑀺𑀆𑀤𑀺.

𑀅𑀜𑁆𑀜𑀢𑁆𑀭 𑀦𑀸𑀮𑀁𑀯𑀘𑀦𑀻𑀬𑀸𑀬𑀸𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁩𑁩𑁯-𑁩𑁪𑁦) 𑀤𑁂𑀲𑀘𑀸𑀭𑀺𑀢𑁆𑀢𑀯𑀲𑁂𑀦 𑀧𑀡𑁆𑀡𑀤𑀸𑀦𑀸𑀤𑀺𑀦𑀸 𑀅𑀧𑀭𑀺𑀘𑁆𑀘𑀢𑁆𑀢𑀁 𑀞𑀧𑁂𑀢𑁆𑀯𑀸. 𑀲𑀜𑁆𑀘𑀭𑀺𑀢𑁆𑀢𑀯𑀲𑁂𑀦 𑀪𑀺𑀓𑁆𑀔𑀼𑀦𑀸 𑀯𑀘𑀦𑀻𑀬𑀸 𑀦 𑀳𑁄𑀢𑀻𑀢𑀺 𑀦𑀸𑀮𑀁𑀯𑀘𑀦𑀻𑀬𑀸, 𑀢𑀁 𑀞𑀧𑁂𑀢𑁆𑀯𑀸𑀢𑀺 𑀓𑁂𑀘𑀺. 𑀅𑀧𑁆𑀧𑁂𑀦 𑀯𑀸 𑀩𑀳𑀼𑀦𑀸 𑀯𑀸 𑀥𑀦𑁂𑀦 𑀓𑀻𑀢𑀸 𑀥𑀦𑀓𑁆𑀓𑀻𑀢𑀸. 𑀬𑀲𑁆𑀫𑀸 𑀧𑀦 𑀲𑀸 𑀦 𑀓𑀻𑀢𑀫𑀢𑁆𑀢𑀸𑀬𑁂𑀯 𑀪𑀭𑀺𑀬𑀸, 𑀲𑀁𑀯𑀸𑀲𑀢𑁆𑀣𑀸𑀬 𑀧𑀦 𑀓𑀻𑀢𑀢𑁆𑀢𑀸 𑀪𑀭𑀺𑀬𑀸, 𑀢𑀲𑁆𑀫𑀸𑀲𑁆𑀲 𑀦𑀺𑀤𑁆𑀤𑁂𑀲𑁂 ‘‘𑀥𑀦𑁂𑀦 𑀓𑀺𑀡𑀺𑀢𑁆𑀯𑀸 𑀯𑀸𑀲𑁂𑀢𑀻’’𑀢𑀺 (𑀧𑀸𑀭𑀸. 𑁩𑁦𑁪) 𑀯𑀼𑀢𑁆𑀢𑀁. 𑀙𑀦𑁆𑀤𑀯𑀸𑀲𑀺𑀦𑀻𑀢𑀺 𑀙𑀦𑁆𑀤𑁂𑀦 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀯𑀲𑀢𑀻𑀢𑀺 𑀙𑀦𑁆𑀤𑀯𑀸𑀲𑀺𑀦𑀻. 𑀬𑀲𑁆𑀫𑀸 𑀧𑀦 𑀲𑀸 𑀦 𑀅𑀢𑁆𑀢𑀦𑁄 𑀙𑀦𑁆𑀤𑀫𑀢𑁆𑀢𑁂𑀦𑁂𑀯 𑀪𑀭𑀺𑀬𑀸 𑀳𑁄𑀢𑀺, 𑀧𑀼𑀭𑀺𑀲𑁂𑀦 𑀧𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀸, 𑀢𑀲𑁆𑀫𑀸𑀲𑁆𑀲 𑀦𑀺𑀤𑁆𑀤𑁂𑀲𑁂 ‘‘𑀧𑀺𑀬𑁄 𑀧𑀺𑀬𑀁 𑀯𑀸𑀲𑁂𑀢𑀻’’𑀢𑀺 (𑀧𑀸𑀭𑀸. 𑁩𑁦𑁪) 𑀯𑀼𑀢𑁆𑀢𑀁. 𑀆𑀤𑀺𑀲𑀤𑁆𑀤𑁂𑀦 ‘‘𑀪𑁄𑀕𑀯𑀸𑀲𑀺𑀦𑀻, 𑀧𑀝𑀯𑀸𑀲𑀺𑀦𑀻, 𑀑𑀤𑀧𑀢𑁆𑀢𑀓𑀺𑀦𑀻, 𑀑𑀪𑀝𑀘𑀼𑀫𑁆𑀩𑀝𑀸, 𑀤𑀸𑀲𑀻 𑀘 𑀪𑀭𑀺𑀬𑀸 𑀘, 𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀘, 𑀥𑀚𑀸𑀳𑀝𑀸, 𑀫𑀼𑀳𑀼𑀢𑁆𑀢𑀺𑀓𑀸’’𑀢𑀺 (𑀧𑀸𑀭𑀸. 𑁩𑁦𑁪) 𑀇𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀆𑀓𑀸𑀭𑀸𑀦𑀁 𑀕𑀳𑀡𑀁. 𑀬𑀣𑀸 𑀘 ‘‘𑀙𑀦𑁆𑀤𑀯𑀸𑀲𑀺𑀦𑀻’’𑀢𑀺𑀆𑀤𑀻𑀲𑀼 𑀅𑀜𑁆𑀜𑀢𑀭𑀯𑀲𑁂𑀦 𑀯𑀤𑀢𑁄 𑀯𑀺𑀲𑀗𑁆𑀓𑁂𑀢𑁄 𑀦𑀢𑁆𑀣𑀺, 𑀏𑀯𑀁 𑀧𑀸𑀴𑀺𑀬𑀁 𑀅𑀯𑀼𑀢𑁆𑀢𑁂𑀲𑀼𑀧𑀺 ‘‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸, 𑀚𑀸𑀬𑀸, 𑀧𑀚𑀸𑀧𑀢𑀺, 𑀧𑀼𑀢𑁆𑀢𑀫𑀸𑀢𑀸, 𑀖𑀭𑀡𑀻, 𑀖𑀭𑀲𑀸𑀫𑀺𑀦𑀻, 𑀪𑀢𑁆𑀢𑀭𑀦𑁆𑀥𑀺𑀓𑀸, 𑀲𑀼𑀲𑁆𑀲𑀽𑀲𑀺𑀓𑀸, 𑀧𑀭𑀺𑀘𑀸𑀭𑀺𑀓𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁦𑁫) 𑀏𑀯𑀫𑀸𑀤𑀻𑀲𑀼 𑀲𑀁𑀯𑀸𑀲𑀧𑀭𑀺𑀤𑀻𑀧𑀓𑁂𑀲𑀼 𑀯𑀘𑀦𑁂𑀲𑀼 𑀅𑀜𑁆𑀜𑀢𑀭𑀯𑀲𑁂𑀦 𑀯𑀤𑀦𑁆𑀢𑀲𑁆𑀲𑀸𑀧𑀺 𑀯𑀺𑀲𑀗𑁆𑀓𑁂𑀢𑁄 𑀦𑀢𑁆𑀣𑀺, 𑀢𑀺𑀯𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀬𑁂𑀯.

𑀫𑀸𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀻𑀢𑀺 𑀏𑀢𑁆𑀣 𑀫𑀸𑀢𑀼𑀭𑀓𑁆𑀔𑀺𑀢𑀸 𑀦𑀸𑀫 𑀫𑀸𑀢𑀭𑀸 𑀭𑀓𑁆𑀔𑀺𑀢𑀸, 𑀬𑀣𑀸 𑀧𑀼𑀭𑀺𑀲𑁂𑀦 𑀲𑀳 𑀲𑀁𑀯𑀸𑀲𑀁 𑀦 𑀓𑀧𑁆𑀧𑁂𑀢𑀺, 𑀏𑀯𑀁 𑀫𑀸𑀢𑀭𑀸 𑀭𑀓𑁆𑀔𑀺𑀢𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀲𑁆𑀲 𑀧𑀤𑀪𑀸𑀚𑀦𑁂𑀧𑀺 ‘‘𑀫𑀸𑀢𑀸 𑀭𑀓𑁆𑀔𑀢𑀺 𑀕𑁄𑀧𑁂𑀢𑀺, 𑀇𑀲𑁆𑀲𑀭𑀺𑀬𑀁 𑀓𑀸𑀭𑁂𑀢𑀺, 𑀯𑀲𑀁 𑀯𑀢𑁆𑀢𑁂𑀢𑀻’’𑀢𑀺 (𑀧𑀸𑀭𑀸. 𑁩𑁦𑁪) 𑀯𑀼𑀢𑁆𑀢𑀁. 𑀧𑀺𑀢𑀼𑀭𑀓𑁆𑀔𑀺𑀢𑀸𑀤𑀻𑀲𑀽𑀢𑀺 ‘‘𑀧𑀺𑀢𑀼𑀭𑀓𑁆𑀔𑀺𑀢𑀸, 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀸, 𑀪𑀸𑀢𑀼𑀭𑀓𑁆𑀔𑀺𑀢𑀸, 𑀪𑀕𑀺𑀦𑀺𑀭𑀓𑁆𑀔𑀺𑀢𑀸, 𑀜𑀸𑀢𑀺𑀭𑀓𑁆𑀔𑀺𑀢𑀸, 𑀕𑁄𑀢𑁆𑀢𑀭𑀓𑁆𑀔𑀺𑀢𑀸, 𑀥𑀫𑁆𑀫𑀭𑀓𑁆𑀔𑀺𑀢𑀸, 𑀲𑀸𑀭𑀓𑁆𑀔𑀸, 𑀲𑀧𑀭𑀺𑀤𑀡𑁆𑀟𑀸’’𑀢𑀺 (𑀧𑀸𑀭𑀸. 𑁩𑁦𑁩) 𑀏𑀯𑀁 𑀯𑀼𑀢𑁆𑀢𑁂𑀲𑀼 𑀧𑀺𑀢𑀼𑀭𑀓𑁆𑀔𑀺𑀢𑀸𑀤𑀻𑀲𑀼. 𑀬𑀣𑀸 𑀘 𑀏𑀢𑁆𑀣, 𑀏𑀯𑀁 ‘‘𑀧𑀺𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀻’’𑀢𑀺𑀆𑀤𑀻𑀲𑀼𑀧𑀺 𑀦𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀗𑁆𑀖𑀲𑁆𑀲 𑀯𑀸 𑀘𑁂𑀢𑀺𑀬𑀲𑁆𑀲 𑀯𑀸 𑀕𑀺𑀮𑀸𑀦𑀲𑁆𑀲 𑀯𑀸 𑀓𑀺𑀘𑁆𑀘𑁂𑀦 𑀕𑀘𑁆𑀙𑀦𑁆𑀢𑀲𑁆𑀲𑀸𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁪𑁦) 𑀏𑀢𑁆𑀣 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀉𑀧𑁄𑀲𑀣𑀸𑀕𑀸𑀭𑀁 𑀯𑀸 𑀓𑀺𑀜𑁆𑀘𑀺 𑀯𑀸 𑀯𑀺𑀧𑁆𑀧𑀓𑀢𑀁 𑀳𑁄𑀢𑀺. 𑀢𑀢𑁆𑀣 𑀓𑀸𑀭𑀼𑀓𑀸𑀦𑀁 𑀪𑀢𑁆𑀢𑀯𑁂𑀢𑀦𑀢𑁆𑀣𑀸𑀬 𑀉𑀧𑀸𑀲𑀓𑁄 𑀯𑀸 𑀉𑀧𑀸𑀲𑀺𑀓𑀸𑀬 𑀲𑀦𑁆𑀢𑀺𑀓𑀁 𑀪𑀺𑀓𑁆𑀔𑀼𑀁 𑀧𑀳𑀺𑀡𑁂𑀬𑁆𑀬, 𑀉𑀧𑀸𑀲𑀺𑀓𑀸 𑀯𑀸 𑀉𑀧𑀸𑀲𑀓𑀲𑁆𑀲, 𑀏𑀯𑀭𑀽𑀧𑁂𑀦 𑀲𑀗𑁆𑀖𑀓𑀺𑀘𑁆𑀘𑁂𑀦 𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀘𑁂𑀢𑀺𑀬𑀓𑀫𑁆𑀫𑁂 𑀓𑀭𑀺𑀬𑀫𑀸𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀕𑀺𑀮𑀸𑀦𑀲𑁆𑀲 𑀪𑁂𑀲𑀚𑁆𑀚𑀢𑁆𑀣𑀸𑀬𑀧𑀺 𑀉𑀧𑀸𑀲𑀓𑁂𑀦 𑀯𑀸 𑀉𑀧𑀸𑀲𑀺𑀓𑀸𑀬 𑀲𑀦𑁆𑀢𑀺𑀓𑀁, 𑀉𑀧𑀸𑀲𑀺𑀓𑀸𑀬 𑀯𑀸 𑀉𑀧𑀸𑀲𑀓𑀲𑁆𑀲 𑀲𑀦𑁆𑀢𑀺𑀓𑀁 𑀧𑀳𑀺𑀢𑀲𑁆𑀲 𑀕𑀘𑁆𑀙𑀢𑁄 𑀅𑀦𑀸𑀧𑀢𑁆𑀢𑀺.

𑀓𑀺𑀜𑁆𑀘𑀸𑀧𑀺 𑀏𑀢𑁆𑀣 ‘‘𑀇𑀢𑁆𑀣𑀻 𑀦𑀸𑀫 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀦 𑀬𑀓𑁆𑀔𑀻 𑀦 𑀧𑁂𑀢𑀻 𑀦 𑀢𑀺𑀭𑀘𑁆𑀙𑀸𑀦𑀕𑀢𑀸. 𑀧𑀼𑀭𑀺𑀲𑁄 𑀦𑀸𑀫 𑀫𑀦𑀼𑀲𑁆𑀲𑀧𑀼𑀭𑀺𑀲𑁄, 𑀦 𑀬𑀓𑁆𑀔𑁄’’𑀢𑀺𑀆𑀤𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁩𑁪𑁧) 𑀦𑀢𑁆𑀣𑀺, 𑀢𑀣𑀸𑀧𑀺 𑀫𑀦𑀼𑀲𑁆𑀲𑀚𑀸𑀢𑀺𑀓𑀸𑀯 𑀇𑀢𑁆𑀣𑀺𑀧𑀼𑀭𑀺𑀲𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀢𑁂𑀲𑀁 𑀫𑀦𑀼𑀲𑁆𑀲𑀚𑀸𑀢𑀺𑀓𑀢𑀸’’𑀢𑀺. 𑀦𑀦𑀸𑀮𑀁𑀯𑀘𑀦𑀻𑀬𑀢𑀸𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀧𑀭𑀺𑀘𑁆𑀘𑀢𑁆𑀢𑀸 𑀅𑀮𑀁𑀯𑀘𑀦𑀻𑀬𑀸. 𑀦𑀺𑀯𑀸𑀭𑀡𑀢𑁆𑀣𑁄 𑀳𑀺 𑀏𑀢𑁆𑀣 𑀅𑀮𑀁-𑀲𑀤𑁆𑀤𑁄. 𑀦 𑀅𑀮𑀁𑀯𑀘𑀦𑀻𑀬𑀸 𑀦𑀸𑀮𑀁𑀯𑀘𑀦𑀻𑀬𑀸, 𑀦 𑀦𑀸𑀮𑀁𑀯𑀘𑀦𑀻𑀬𑀸, 𑀢𑀲𑁆𑀲𑀸 𑀪𑀸𑀯𑁄 𑀦𑀦𑀸𑀮𑀁𑀯𑀘𑀦𑀻𑀬𑀢𑀸, ‘‘𑀅𑀮𑀁𑀯𑀘𑀦𑀻𑀬𑀢𑀸’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁 𑀳𑁄𑀢𑀺.

𑀧𑀡𑁆𑀡𑀢𑁆𑀢𑀺𑀦𑁆𑀢𑀺, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁. 𑀓𑀸𑀬𑀯𑀺𑀓𑀸𑀭𑁂𑀦𑀸𑀢𑀺 𑀲𑀻𑀲𑀼𑀓𑁆𑀔𑀺𑀧𑀦𑀸𑀤𑀺𑀓𑀸𑀬𑀯𑀺𑀓𑀸𑀭𑁂𑀦. 𑀢𑀣𑁂𑀯 𑀯𑀻𑀫𑀁𑀲𑀺𑀢𑁆𑀯𑀸 𑀢𑀣𑁂𑀯 𑀧𑀘𑁆𑀘𑀸𑀳𑀭𑀦𑁆𑀢𑀲𑁆𑀲𑀸𑀢𑀺 𑀳𑀢𑁆𑀣𑀫𑀼𑀤𑁆𑀤𑀸𑀤𑀺𑀦𑀸 𑀓𑀸𑀬𑀯𑀺𑀓𑀸𑀭𑁂𑀦 𑀯𑀻𑀫𑀁𑀲𑀺𑀢𑁆𑀯𑀸 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀢𑀣𑁂𑀯 𑀆𑀭𑁄𑀘𑁂𑀦𑁆𑀢𑀲𑁆𑀲. 𑀆𑀕𑀫𑀺𑀲𑁆𑀲𑀢𑀻𑀢𑀺 𑀢𑀯 𑀲𑀦𑁆𑀢𑀺𑀓𑁂 𑀥𑀫𑁆𑀫𑀲𑁆𑀲𑀯𑀦𑀸𑀤𑀺𑀅𑀢𑁆𑀣𑀁 𑀆𑀕𑀫𑀺𑀲𑁆𑀲𑀢𑀺. 𑀓𑁂𑀦𑀘𑀺 𑀯𑀼𑀢𑁆𑀢𑁂𑀢𑀺 𑀆𑀲𑀦𑀲𑀸𑀮𑀸𑀤𑀻𑀲𑀼 𑀦𑀺𑀲𑀺𑀦𑁆𑀦𑀲𑁆𑀲 𑀓𑁂𑀦𑀘𑀺 𑀧𑀼𑀭𑀺𑀲𑁂𑀦 𑀯𑀼𑀢𑁆𑀢𑁂. 𑀲𑀘𑁂 𑀳𑀺 𑀔𑀻𑀡𑀸𑀲𑀯𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀓𑀼𑀚𑁆𑀛𑀺𑀢𑁆𑀯𑀸 𑀅𑀮𑀁𑀯𑀘𑀦𑀻𑀬𑀸 𑀳𑁄𑀦𑁆𑀢𑀺, 𑀢𑀜𑁆𑀘 𑀪𑀺𑀓𑁆𑀔𑀼𑀁 𑀖𑀭𑀁 𑀉𑀧𑀕𑀢𑀁 𑀧𑀺𑀢𑀸 𑀯𑀤𑀢𑀺 ‘‘𑀫𑀸𑀢𑀸 𑀢𑁂, 𑀢𑀸𑀢, 𑀫𑀁 𑀫𑀳𑀮𑁆𑀮𑀓𑀁 𑀙𑀟𑁆𑀟𑁂𑀢𑁆𑀯𑀸 𑀜𑀸𑀢𑀺𑀓𑀼𑀮𑀁 𑀕𑀢𑀸, 𑀕𑀘𑁆𑀙 𑀦𑀁 𑀫𑀁 𑀉𑀧𑀝𑁆𑀞𑀸𑀢𑀼𑀁 𑀧𑁂𑀲𑁂𑀳𑀻’’𑀢𑀺. 𑀲𑁄 𑀘𑁂 𑀕𑀦𑁆𑀢𑁆𑀯𑀸 𑀢𑀁 𑀯𑀢𑁆𑀯𑀸 𑀧𑀼𑀦 𑀧𑀺𑀢𑀼𑀦𑁄 𑀢𑀲𑁆𑀲𑀸 𑀆𑀕𑀫𑀦𑀁 𑀯𑀸 𑀅𑀦𑀸𑀕𑀫𑀦𑀁 𑀯𑀸 𑀆𑀭𑁄𑀘𑁂𑀢𑀺, 𑀏𑀯𑀁 𑀆𑀭𑁄𑀘𑁂𑀦𑁆𑀢𑀲𑁆𑀲 𑀢𑀲𑁆𑀲𑀧𑀺 𑀓𑀸𑀬𑀯𑀸𑀘𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀢𑁂𑀦𑀸𑀳 ‘‘𑀧𑀡𑁆𑀡𑀢𑁆𑀢𑀺𑀁 𑀅𑀚𑀸𑀦𑀦𑁆𑀢𑀲𑁆𑀲 𑀧𑀦𑀸’’𑀢𑀺𑀆𑀤𑀺. 𑀔𑀻𑀡𑀸𑀲𑀯𑀲𑁆𑀲𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁂𑀦 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀤𑀻𑀧𑁂𑀢𑀺. 𑀧𑀺𑀢𑀼𑀯𑀘𑀦𑁂𑀦𑀸𑀢𑀺 𑀅𑀢𑁆𑀢𑀦𑁄 𑀧𑀺𑀢𑀼𑀯𑀘𑀦𑁂𑀦. 𑀕𑀦𑁆𑀢𑁆𑀯𑀸𑀢𑀺 𑀢𑀲𑁆𑀲𑀸 𑀲𑀫𑀻𑀧𑀁 𑀕𑀦𑁆𑀢𑁆𑀯𑀸. 𑀧𑀡𑁆𑀡𑀢𑁆𑀢𑀺𑀁, 𑀅𑀮𑀁𑀯𑀘𑀦𑀻𑀬𑀪𑀸𑀯𑀜𑁆𑀘𑀸𑀢𑀺 𑀉𑀪𑀬𑀁 𑀅𑀚𑀸𑀦𑀦𑁆𑀢𑀲𑁆𑀲𑀧𑀺 𑀓𑀸𑀬𑀯𑀸𑀘𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀢𑀤𑀼𑀪𑀬𑀦𑁆𑀢𑀺 𑀧𑀡𑁆𑀡𑀢𑁆𑀢𑀺𑀁, 𑀅𑀮𑀁𑀯𑀘𑀦𑀻𑀬𑀪𑀸𑀯𑀜𑁆𑀘. 𑀬𑀁 𑀧𑀦 𑀧𑀡𑁆𑀡𑀢𑁆𑀢𑀺𑀁 𑀚𑀸𑀦𑀺𑀢𑁆𑀯𑀸 𑀏𑀢𑁂𑀳𑁂𑀯 𑀢𑀻𑀳𑀺 𑀦𑀬𑁂𑀳𑀺 𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀚𑁆𑀚𑀢𑁄 𑀓𑀸𑀬𑀘𑀺𑀢𑁆𑀢𑀢𑁄, 𑀯𑀸𑀘𑀸𑀘𑀺𑀢𑁆𑀢𑀢𑁄, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺. 𑀇𑀫𑀸𑀦𑀺 𑀢𑀻𑀡𑀺 𑀧𑀡𑁆𑀡𑀢𑁆𑀢𑀺𑀚𑀸𑀦𑀦𑀘𑀺𑀢𑁆𑀢𑁂𑀦 ‘‘𑀲𑀘𑀺𑀢𑁆𑀢𑀓𑀲𑀫𑀼𑀝𑁆𑀞𑀸𑀦𑀸𑀦𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀅𑀬𑀼𑀢𑁆𑀢𑀁. 𑀦 𑀳𑀺 𑀧𑀡𑁆𑀡𑀢𑁆𑀢𑀺𑀁 𑀚𑀸𑀦𑀺𑀢𑁆𑀯𑀸𑀧𑀺 ‘‘𑀦𑀸𑀮𑀁𑀯𑀘𑀦𑀻𑀬𑀸’’𑀢𑀺 𑀫𑀜𑁆𑀜𑀫𑀸𑀦𑀲𑁆𑀲 𑀲𑀘𑀺𑀢𑁆𑀢𑀓𑁂𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀆𑀧𑀢𑁆𑀢𑀺 𑀲𑀫𑀼𑀝𑁆𑀞𑀸𑀢𑀻𑀢𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺 𑀯𑀻𑀢𑀺𑀓𑁆𑀓𑀫𑀘𑁂𑀢𑀦𑀸𑀬 𑀅𑀲𑀫𑁆𑀪𑀯𑀢𑁄.

𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀜𑁆𑀜𑀸𑀘𑀺𑀓𑀸𑀬 𑀧𑀦𑀸𑀢𑀺 𑀏𑀢𑁆𑀣 𑀲𑀦𑁆𑀢𑀺 𑀅𑀢𑁆𑀢𑀯𑀸𑀘𑀓𑁄 𑀢𑀢𑀺𑀬𑀢𑁆𑀣𑁂 𑀦𑀺𑀧𑀸𑀢𑁄, 𑀬𑀸𑀘𑀺𑀓𑀸𑀢𑀺 𑀪𑀸𑀯𑀲𑀸𑀥𑀦𑁄, 𑀢𑁂𑀲𑀜𑁆𑀘 𑀫𑀚𑁆𑀛𑁂𑀧𑀤𑀮𑁄𑀧𑀲𑀫𑀸𑀲𑁄. 𑀧𑀦𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀫𑁂𑀯. 𑀢𑁂𑀦𑀸𑀳 ‘‘𑀲𑀬𑀁 𑀧𑀯𑀢𑁆𑀢𑀺𑀢𑀬𑀸𑀘𑀦𑀸 𑀯𑀼𑀘𑁆𑀘𑀢𑀻’’𑀢𑀺. 𑀬𑀸 𑀳𑀺 𑀅𑀢𑁆𑀢𑀦𑀸 𑀧𑀯𑀢𑁆𑀢𑀺𑀢𑀸, 𑀲𑀸 𑀅𑀢𑁆𑀢𑀦𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀦𑀦𑀼 𑀦 𑀲𑀓𑁆𑀓𑀸 𑀬𑀸𑀘𑀦𑀸𑀬𑁂𑀯 𑀓𑀼𑀝𑀺𑀁 𑀓𑀸𑀢𑀼𑀦𑁆𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬 𑀢𑀲𑁆𑀲𑀸𑀥𑀺𑀧𑁆𑀧𑀸𑀬𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀬𑀁 𑀬𑀸𑀘𑀺𑀢𑀓𑁂𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀬𑀁 𑀬𑀸𑀘𑀺𑀢𑀓𑁂𑀳𑀻𑀢𑀺 ‘‘𑀯𑀸𑀲𑀺𑀁 𑀤𑁂𑀣, 𑀨𑀭𑀲𑀼𑀁 𑀤𑁂𑀣𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁩𑁪𑁨) 𑀲𑀬𑀁 𑀬𑀸𑀘𑀺𑀢𑀓𑁂𑀳𑀺. 𑀉𑀧𑀓𑀭𑀡𑁂𑀳𑀻𑀢𑀺 𑀯𑀸𑀲𑀺𑀬𑀸𑀤𑀻𑀳𑀺. 𑀧𑀭𑁂𑀦 𑀪𑀡𑁆𑀟𑀲𑀸𑀫𑀺𑀓𑁂𑀦 ‘‘𑀫𑀫 𑀇𑀤’’𑀦𑁆𑀢𑀺 𑀅𑀧𑀭𑀺𑀘𑁆𑀘𑀸𑀕𑀸𑀭𑀓𑁆𑀔𑀡𑀕𑁄𑀧𑀦𑀯𑀲𑁂𑀦 𑀧𑀭𑀺𑀕𑁆𑀕𑀳𑀺𑀢𑀁 𑀧𑀭𑀧𑀭𑀺𑀕𑁆𑀕𑀳𑀺𑀢𑀓𑀁, 𑀧𑀭𑀲𑀦𑁆𑀢𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀽𑀮𑀘𑁆𑀙𑁂𑀤𑀯𑀲𑁂𑀦𑀸𑀢𑀺 𑀫𑀽𑀮𑀲𑁆𑀲 𑀙𑀺𑀦𑁆𑀤𑀦𑀯𑀲𑁂𑀦, 𑀧𑀭𑀲𑀦𑁆𑀢𑀓𑀪𑀸𑀯𑀢𑁄 𑀫𑁄𑀘𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀜𑁆𑀳𑀺 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄 𑀬𑀸𑀘𑀦𑁆𑀢𑀲𑁆𑀲 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁. 𑀢𑀸𑀯𑀓𑀸𑀮𑀺𑀓𑀁 𑀧𑀦 𑀯𑀝𑁆𑀝𑀢𑀻𑀢𑀺 𑀢𑀸𑀯𑀓𑀸𑀮𑀺𑀓𑀁 𑀓𑀢𑁆𑀯𑀸 𑀬𑀸𑀘𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀓𑀓𑀫𑁆𑀫𑀁 𑀦 𑀬𑀸𑀘𑀺𑀢𑀩𑁆𑀩𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑀲𑀺𑀓𑁆𑀔𑀸𑀧𑀤𑀭𑀓𑁆𑀔𑀡𑀢𑁆𑀣𑀁 𑀯𑀼𑀢𑁆𑀢𑀁. ‘‘𑀳𑀢𑁆𑀣𑀓𑀫𑁆𑀫𑀁 𑀤𑁂𑀣𑀸’’𑀢𑀺 𑀅𑀦𑀺𑀬𑀫𑁂𑀢𑁆𑀯𑀸𑀧𑀺 𑀦 𑀬𑀸𑀘𑀺𑀢𑀩𑁆𑀩𑀸. 𑀏𑀯𑀁 𑀬𑀸𑀘𑀺𑀢𑀸 𑀳𑀺 𑀢𑁂 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀪𑀺𑀓𑁆𑀔𑀼𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀫𑀺𑀕𑁂𑀧𑀺 𑀫𑀸𑀭𑁂𑀢𑁆𑀯𑀸 𑀆𑀳𑀭𑁂𑀬𑁆𑀬𑀼𑀁. 𑀦𑀺𑀬𑀫𑁂𑀢𑁆𑀯𑀸 𑀧𑀦 ‘‘𑀯𑀺𑀳𑀸𑀭𑁂 𑀓𑀺𑀜𑁆𑀘𑀺 𑀓𑀢𑁆𑀢𑀩𑁆𑀩𑀁 𑀅𑀢𑁆𑀣𑀺, 𑀢𑀢𑁆𑀣 𑀳𑀢𑁆𑀣𑀓𑀫𑁆𑀫𑀁 𑀤𑁂𑀣𑀸’’𑀢𑀺 𑀬𑀸𑀘𑀺𑀢𑀩𑁆𑀩𑀸. ‘‘𑀓𑀼𑀝𑀺 𑀦𑀸𑀫 𑀉𑀮𑁆𑀮𑀺𑀢𑁆𑀢𑀸 𑀯𑀸 𑀳𑁄𑀢𑀺, 𑀅𑀯𑀮𑀺𑀢𑁆𑀢𑀸 𑀯𑀸 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀸 𑀯𑀸’’𑀢𑀺 (𑀧𑀸𑀭𑀸. 𑁩𑁪𑁫) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀢𑁆𑀢𑀸 ‘‘𑀓𑀼𑀝𑀺𑀦𑁆𑀢𑀺 𑀉𑀮𑁆𑀮𑀺𑀢𑁆𑀢𑀸𑀤𑀻𑀲𑀼 𑀅𑀜𑁆𑀜𑀢𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀤𑁆𑀥𑀁 𑀫𑀼𑀔𑀁 𑀮𑀺𑀢𑁆𑀢𑀸 𑀉𑀮𑁆𑀮𑀺𑀢𑁆𑀢𑀸. 𑀅𑀦𑁆𑀢𑁄 𑀮𑀺𑀫𑁆𑀧𑀦𑁆𑀢𑀸 𑀳𑀺 𑀏𑀯𑀁 𑀮𑀺𑀫𑁆𑀧𑀦𑁆𑀢𑀺. 𑀅𑀥𑁄 𑀫𑀼𑀔𑀁 𑀮𑀺𑀢𑁆𑀢𑀸 𑀅𑀯𑀮𑀺𑀢𑁆𑀢𑀸. 𑀩𑀳𑀺 𑀮𑀺𑀫𑁆𑀧𑀦𑁆𑀢𑀸 𑀳𑀺 𑀏𑀯𑀁 𑀮𑀺𑀫𑁆𑀧𑀦𑁆𑀢𑀺. 𑀢𑁂𑀦𑀸𑀳 ‘‘𑀢𑀢𑁆𑀣 𑀉𑀮𑁆𑀮𑀺𑀢𑁆𑀢𑀸 𑀦𑀸𑀫𑀸’’𑀢𑀺𑀆𑀤𑀺. 𑀧𑀺𑀝𑁆𑀞𑀲𑀗𑁆𑀖𑀸𑀝𑁄𑀢𑀺 𑀤𑁆𑀯𑀸𑀭𑀩𑀸𑀳𑀸. ‘‘𑀲𑀼𑀥𑀸𑀬 𑀯𑀸 𑀫𑀢𑁆𑀢𑀺𑀓𑀸𑀬 𑀯𑀸’’𑀢𑀺 𑀏𑀢𑁂𑀦 𑀞𑀧𑁂𑀢𑁆𑀯𑀸 𑀇𑀫𑁂 𑀤𑁆𑀯𑁂 𑀮𑁂𑀧𑁂 𑀅𑀯𑀲𑁂𑀲𑁄 𑀪𑀲𑁆𑀫𑀸𑀕𑁄𑀫𑀬𑀸𑀤𑀺𑀪𑁂𑀤𑁄 𑀅𑀮𑁂𑀧𑁄𑀢𑀺 𑀤𑀲𑁆𑀲𑁂𑀢𑀺.

𑀬𑀲𑁆𑀫𑀸 𑀧𑀦 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀭𑁄𑀦𑁆𑀢𑁂𑀦𑀸𑀧𑀺 𑀇𑀥 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁, 𑀢𑀲𑁆𑀫𑀸 ‘‘𑀲𑀬𑀁 𑀯𑀸 𑀓𑀭𑁄𑀦𑁆𑀢𑁂𑀦 𑀆𑀡𑀢𑁆𑀢𑀺𑀬𑀸 𑀯𑀸 𑀓𑀸𑀭𑀸𑀧𑁂𑀦𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 ‘‘𑀲𑀬𑀁 𑀯𑀸 𑀓𑀭𑁄𑀦𑁆𑀢𑁂𑀦𑀸’’𑀢𑀺 𑀇𑀫𑀺𑀦𑀸 𑀲𑀸𑀫𑀢𑁆𑀣𑀺𑀬𑀢𑁄 𑀮𑀩𑁆𑀪𑀫𑀸𑀦𑀫𑀢𑁆𑀣𑀫𑀸𑀳, 𑀦 𑀢𑀼 𑀧𑀤𑀢𑁆𑀣𑀢𑁄. ‘‘𑀆𑀡𑀢𑁆𑀢𑀺𑀬𑀸 𑀯𑀸 𑀓𑀸𑀭𑀸𑀧𑁂𑀦𑁆𑀢𑁂𑀦𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁪𑁮-𑁩𑁪𑁯) 𑀧𑀦 𑀧𑀤𑀢𑁆𑀣𑀢𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀬𑀤𑀺 𑀧𑀦 ‘‘𑀓𑀭𑁄𑀦𑁆𑀢𑁂𑀦 𑀯𑀸 𑀓𑀸𑀭𑀸𑀧𑁂𑀦𑁆𑀢𑁂𑀦 𑀯𑀸’’𑀢𑀺 𑀯𑀤𑁂𑀬𑁆𑀬, 𑀩𑁆𑀬𑀜𑁆𑀚𑀦𑀁 𑀯𑀺𑀮𑁄𑀫𑀺𑀢𑀁 𑀪𑀯𑁂𑀬𑁆𑀬. 𑀦 𑀳𑀺 𑀓𑀸𑀭𑀸𑀧𑁂𑀦𑁆𑀢𑁄 𑀓𑀭𑁄𑀦𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀏𑀤𑀺𑀲𑀻 𑀘𑁄𑀤𑀦𑀸 𑀅𑀦𑀯𑀓𑀸𑀲𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀢𑁆𑀣𑀺 𑀲𑀸𑀫𑀻 𑀧𑀢𑀺 𑀏𑀢𑀺𑀲𑁆𑀲𑀸𑀢𑀺 𑀅𑀲𑀸𑀫𑀺𑀓𑀸, 𑀢𑀁 𑀅𑀲𑀸𑀫𑀺𑀓𑀁, 𑀅𑀦𑀺𑀲𑁆𑀲𑀭𑀦𑁆𑀢𑀺 𑀅𑀢𑁆𑀣𑁄. 𑀅𑀦𑀺𑀲𑁆𑀲𑀭𑀢𑀸 𑀘𑁂𑀢𑁆𑀣 𑀓𑀸𑀭𑀸𑀧𑀦𑁂𑀦𑀸𑀢𑀺 𑀆𑀳 ‘‘𑀓𑀸𑀭𑁂𑀢𑀸 𑀤𑀸𑀬𑀓𑁂𑀦 𑀯𑀺𑀭𑀳𑀺𑀢’’𑀦𑁆𑀢𑀺. 𑀉𑀤𑁆𑀤𑁂𑀲𑁄𑀢𑀺 𑀉𑀤𑁆𑀤𑀺𑀲𑀺𑀢𑀩𑁆𑀩𑁄.

𑀢𑀢𑁆𑀭𑀸𑀢𑀺 𑀲𑀸𑀫𑀺𑀲𑁆𑀫𑀺𑀁 𑀪𑀼𑀫𑁆𑀫𑀯𑀘𑀦𑀦𑁆𑀢𑀺 𑀆𑀳 ‘‘𑀢𑀲𑁆𑀲𑀸 𑀓𑀼𑀝𑀺𑀬𑀸’’𑀢𑀺. 𑀤𑀻𑀖𑀲𑁄𑀢𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀆𑀳 ‘‘𑀤𑀻𑀖𑀢𑁄’’𑀢𑀺. 𑀩𑀳𑀺𑀓𑀼𑀝𑁆𑀝𑁂𑀢𑀺 𑀓𑀼𑀝𑁆𑀝𑀲𑁆𑀲 𑀩𑀳𑀺, 𑀣𑀼𑀲𑁂𑀦 𑀫𑀺𑀲𑁆𑀲𑀓𑁄 𑀧𑀺𑀡𑁆𑀟𑁄 𑀣𑀼𑀲𑀧𑀺𑀡𑁆𑀟𑁄, 𑀢𑀲𑁆𑀲 𑀧𑀭𑀺𑀬𑀦𑁆𑀢𑁄 𑀣𑀼𑀲𑀧𑀺𑀡𑁆𑀟𑀧𑀭𑀺𑀬𑀦𑁆𑀢𑁄, 𑀢𑁂𑀦, 𑀣𑀼𑀲𑀫𑀺𑀲𑁆𑀲𑀓𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀧𑀭𑀺𑀬𑀦𑁆𑀢𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀣𑀼𑀲𑀧𑀺𑀡𑁆𑀟𑀲𑁆𑀲𑀽𑀧𑀭𑀺 𑀲𑁂𑀢𑀓𑀫𑁆𑀫𑀁 𑀧𑀦 𑀅𑀩𑁆𑀩𑁄𑀳𑀸𑀭𑀺𑀓𑀁. 𑀅𑀩𑁆𑀪𑀦𑁆𑀢𑀭𑁂 𑀪𑀯𑁄 𑀅𑀩𑁆𑀪𑀦𑁆𑀢𑀭𑀺𑀫𑁄, 𑀢𑁂𑀦. 𑀬𑀢𑁆𑀣𑀸𑀢𑀺 𑀬𑀲𑁆𑀲𑀁 𑀓𑀼𑀝𑀺𑀬𑀁. 𑀧𑀫𑀸𑀡𑀬𑀼𑀢𑁆𑀢𑁄𑀢𑀺 𑀧𑀓𑀢𑀺𑀯𑀺𑀤𑀢𑁆𑀣𑀺𑀬𑀸 𑀦𑀯𑀯𑀺𑀤𑀢𑁆𑀣𑀺𑀧𑀫𑀸𑀡𑁄. ‘‘𑀢𑀺𑀭𑀺𑀬𑀁 𑀲𑀢𑁆𑀢𑀦𑁆𑀢𑀭𑀸’’𑀢𑀺 (𑀧𑀸𑀭𑀸. 𑁩𑁪𑁮) 𑀉𑀓𑁆𑀓𑀁𑀲𑀢𑁄 𑀧𑀫𑀸𑀡𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 ‘‘𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀘𑀢𑀼𑀳𑀢𑁆𑀣𑀯𑀺𑀢𑁆𑀣𑀸𑀭𑀸 𑀦 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁.

𑀲𑁄𑀥𑁂𑀢𑁆𑀯𑀸𑀢𑀺 𑀲𑀫𑀢𑀮𑀲𑀻𑀫𑀫𑀡𑁆𑀟𑀮𑀲𑀤𑀺𑀲𑀁 𑀓𑀢𑁆𑀯𑀸. 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀦𑀬𑁂𑀦 𑀲𑀗𑁆𑀖𑀁 𑀢𑀺𑀓𑁆𑀔𑀢𑁆𑀢𑀼𑀁 𑀬𑀸𑀘𑀺𑀢𑁆𑀯𑀸𑀢𑀺 ‘‘𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 ‘𑀅𑀳𑀁, 𑀪𑀦𑁆𑀢𑁂, 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀢𑁆𑀢𑀼𑀓𑀸𑀫𑁄 𑀅𑀲𑀸𑀫𑀺𑀓𑀁 𑀅𑀢𑁆𑀢𑀼𑀤𑁆𑀤𑁂𑀲𑀁, 𑀲𑁄𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀓𑀼𑀝𑀺𑀯𑀢𑁆𑀣𑀼𑀑𑀮𑁄𑀓𑀦𑀁 𑀬𑀸𑀘𑀸𑀫𑀻’’’𑀢𑀺 (𑀧𑀸𑀭𑀸. 𑁩𑁪𑁯) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀦𑀬𑁂𑀦 𑀢𑀺𑀓𑁆𑀔𑀢𑁆𑀢𑀼𑀁 𑀬𑀸𑀘𑀺𑀢𑁆𑀯𑀸. 𑀲𑀗𑁆𑀖𑁂𑀦 𑀯𑀸 𑀲𑀫𑁆𑀫𑀢𑀸𑀢𑀺 𑀧𑀤𑀪𑀸𑀚𑀦𑀺𑀬𑀁 (𑀧𑀸𑀭𑀸. 𑁩𑁫𑁦) 𑀯𑀼𑀢𑁆𑀢𑁂𑀦 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑁂𑀦, 𑀅𑀧𑀮𑁄𑀓𑀦𑀓𑀫𑁆𑀫𑀯𑀲𑁂𑀦 𑀯𑀸 𑀲𑀗𑁆𑀖𑁂𑀦 𑀲𑀫𑁆𑀫𑀢𑀸. 𑀯𑀢𑁆𑀣𑀽𑀢𑀺 𑀓𑀼𑀝𑀺𑀯𑀢𑁆𑀣𑀼. 𑀅𑀦𑀸𑀭𑀫𑁆𑀪𑀦𑁆𑀢𑀺 𑀅𑀦𑀼𑀧𑀤𑁆𑀤𑀯𑀁. 𑀧𑀭𑀺𑀢𑁄 𑀓𑀫𑀢𑀺 𑀕𑀘𑁆𑀙𑀢𑀺 𑀏𑀢𑁆𑀣𑀸𑀢𑀺 𑀧𑀭𑀺𑀓𑁆𑀓𑀫𑀦𑀁, 𑀢𑁂𑀦 𑀲𑀳 𑀯𑀢𑁆𑀢𑀢𑀻𑀢𑀺 𑀲𑀧𑀭𑀺𑀓𑁆𑀓𑀫𑀦𑀁, 𑀲𑀉𑀧𑀘𑀸𑀭𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀢𑁂𑀳𑀺 𑀪𑀺𑀓𑁆𑀔𑀽𑀳𑀻’’𑀢𑀺𑀆𑀤𑀺.

𑀓𑀺𑀧𑀺𑀮𑁆𑀮𑀺𑀓𑀸𑀤𑀻𑀦𑀦𑁆𑀢𑀺 𑀏𑀢𑁆𑀣 𑀓𑀺𑀧𑀺𑀮𑁆𑀮𑀺𑀓𑀸 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁫𑁩) 𑀦𑀸𑀫 𑀭𑀢𑁆𑀢𑀓𑀸𑀴𑀧𑀺𑀗𑁆𑀕𑀮𑀸𑀤𑀺𑀪𑁂𑀤𑀸 𑀬𑀸 𑀓𑀸𑀘𑀺, 𑀢𑀸 𑀆𑀤𑀺 𑀬𑁂𑀲𑀁 𑀢𑀸𑀦𑀺 𑀓𑀺𑀧𑀺𑀮𑁆𑀮𑀺𑀓𑀸𑀤𑀻𑀦𑀺, 𑀢𑁂𑀲𑀁. 𑀆𑀤𑀺𑀲𑀤𑁆𑀤𑁂𑀦 𑀉𑀧𑀘𑀺𑀓𑀸𑀤𑀻𑀦𑀁 𑀲𑀗𑁆𑀕𑀳𑀡𑀁. 𑀆𑀲𑀬𑁄𑀢𑀺 𑀦𑀺𑀩𑀤𑁆𑀥𑀯𑀲𑀦𑀝𑁆𑀞𑀸𑀦𑀁, 𑀲𑁄 𑀆𑀤𑀺 𑀬𑁂𑀲𑀁 𑀢𑁂 𑀆𑀲𑀬𑀸𑀤𑀬𑁄, 𑀢𑁂𑀳𑀺. 𑀆𑀤𑀺𑀲𑀤𑁆𑀤𑁂𑀦 𑀘𑁂𑀢𑁆𑀣 𑀦𑀺𑀲𑁆𑀲𑀺𑀢𑀲𑁆𑀲 𑀕𑀳𑀡𑀁. 𑀲𑁄𑀴𑀲𑀳𑀺 𑀉𑀧𑀤𑁆𑀤𑀯𑁂𑀳𑀻𑀢𑀺 ‘‘𑀓𑀺𑀧𑀺𑀮𑁆𑀮𑀺𑀓𑀸𑀦𑀁 𑀯𑀸 𑀆𑀲𑀬𑁄 𑀳𑁄𑀢𑀺, 𑀉𑀧𑀘𑀺𑀓𑀸𑀦𑀁 𑀯𑀸 𑀉𑀦𑁆𑀤𑀽𑀭𑀸𑀦𑀁 𑀯𑀸 𑀅𑀳𑀻𑀦𑀁 𑀯𑀸 𑀯𑀺𑀘𑁆𑀙𑀺𑀓𑀸𑀦𑀁 𑀯𑀸 𑀲𑀢𑀧𑀤𑀻𑀦𑀁 𑀯𑀸 𑀳𑀢𑁆𑀣𑀻𑀦𑀁 𑀯𑀸 𑀅𑀲𑁆𑀲𑀸𑀦𑀁 𑀯𑀸 𑀲𑀻𑀳𑀸𑀦𑀁 𑀯𑀸 𑀩𑁆𑀬𑀕𑁆𑀖𑀸𑀦𑀁 𑀯𑀸 𑀤𑀻𑀧𑀻𑀦𑀁 𑀯𑀸 𑀅𑀘𑁆𑀙𑀸𑀦𑀁 𑀯𑀸 𑀢𑀭𑀘𑁆𑀙𑀸𑀦𑀁 𑀯𑀸 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀧𑀸𑀡𑀸𑀦𑀁 𑀯𑀸 𑀆𑀲𑀬𑁄 𑀳𑁄𑀢𑀺, 𑀧𑀼𑀩𑁆𑀩𑀡𑁆𑀡𑀦𑀺𑀲𑁆𑀲𑀺𑀢𑀁 𑀯𑀸 𑀳𑁄𑀢𑀺, 𑀅𑀧𑀭𑀡𑁆𑀡𑀅𑀩𑁆𑀪𑀸𑀖𑀸𑀢𑀆𑀖𑀸𑀢𑀦𑀲𑀼𑀲𑀸𑀦𑀉𑀬𑁆𑀬𑀸𑀦𑀭𑀸𑀚𑀯𑀢𑁆𑀣𑀼𑀳𑀢𑁆𑀣𑀺𑀲𑀸𑀮𑀸𑀅𑀲𑁆𑀲𑀲𑀸𑀮𑀸𑀩𑀦𑁆𑀥𑀦𑀸𑀕𑀸𑀭𑀧𑀸𑀦𑀸𑀕𑀸𑀭𑀲𑀽𑀦𑀭𑀘𑁆𑀙𑀸𑀘𑀘𑁆𑀘𑀭𑀲𑀪𑀸𑀲𑀁𑀲𑀭𑀡𑀦𑀺𑀲𑁆𑀲𑀺𑀢𑀁 𑀯𑀸 𑀳𑁄𑀢𑀻’’𑀢𑀺 (𑀧𑀸𑀭𑀸. 𑁩𑁫𑁩) 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀲𑁄𑀴𑀲𑀳𑀺 𑀉𑀧𑀤𑁆𑀤𑀯𑁂𑀳𑀺. 𑀢𑀢𑁆𑀣 𑀘 𑀅𑀩𑁆𑀪𑀸𑀖𑀸𑀢𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁫𑁩) 𑀦𑀸𑀫 𑀓𑀸𑀭𑀡𑀸𑀖𑀭𑀁. 𑀆𑀖𑀸𑀢𑀦𑀁 𑀦𑀸𑀫 𑀥𑀫𑁆𑀫𑀕𑀦𑁆𑀥𑀺𑀓𑀸. 𑀲𑀼𑀲𑀸𑀦𑀦𑁆𑀢𑀺 𑀫𑀳𑀸𑀲𑀼𑀲𑀸𑀦𑀁. 𑀲𑀁𑀲𑀭𑀡𑀁 𑀦𑀸𑀫 𑀅𑀦𑀺𑀩𑁆𑀩𑀺𑀚𑁆𑀛𑀕𑀫𑀦𑀻𑀬𑁄 𑀕𑀢𑀧𑀘𑁆𑀘𑀸𑀕𑀢𑀫𑀕𑁆𑀕𑁄.

𑀆𑀯𑀺𑀚𑁆𑀛𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬𑀸𑀢𑀺 𑀙𑀺𑀦𑁆𑀦𑀢𑀝𑀸𑀤𑀻𑀦𑀫𑀪𑀸𑀯𑀢𑁄 𑀅𑀦𑀼𑀧𑀭𑀺𑀬𑀸𑀬𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬. 𑀢𑁂𑀦 𑀪𑀺𑀓𑁆𑀔𑀼𑀦𑀸𑀢𑀺 𑀓𑀼𑀝𑀺𑀓𑀸𑀭𑀓𑁂𑀦 𑀪𑀺𑀓𑁆𑀔𑀼𑀦𑀸. 𑀬𑀸𑀘𑀺𑀢𑁂𑀳𑀻𑀢𑀺 ‘‘𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 ‘𑀅𑀳𑀁, 𑀪𑀦𑁆𑀢𑁂, 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀢𑁆𑀢𑀼𑀓𑀸𑀫𑁄 𑀅𑀲𑀸𑀫𑀺𑀓𑀁 𑀅𑀢𑁆𑀢𑀼𑀤𑁆𑀤𑁂𑀲𑀁, 𑀲𑁄𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀓𑀼𑀝𑀺𑀯𑀢𑁆𑀣𑀼𑀤𑁂𑀲𑀦𑀁 𑀬𑀸𑀘𑀸𑀫𑀻’’’𑀢𑀺 (𑀧𑀸𑀭𑀸. 𑁩𑁫𑁧) 𑀢𑀺𑀓𑁆𑀔𑀢𑁆𑀢𑀼𑀁 𑀬𑀸𑀘𑀺𑀢𑁂𑀳𑀺. 𑀜𑀢𑁆𑀢𑀺𑀤𑀼𑀢𑀺𑀬𑁂𑀦 𑀓𑀫𑁆𑀫𑁂𑀦𑀸𑀢𑀺 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀢𑁆𑀢𑀼𑀓𑀸𑀫𑁄 𑀅𑀲𑀸𑀫𑀺𑀓𑀁 𑀅𑀢𑁆𑀢𑀼𑀤𑁆𑀤𑁂𑀲𑀁, 𑀲𑁄 𑀲𑀗𑁆𑀖𑀁 𑀓𑀼𑀝𑀺𑀯𑀢𑁆𑀣𑀼𑀤𑁂𑀲𑀦𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀼𑀝𑀺𑀯𑀢𑁆𑀣𑀼𑀁 𑀤𑁂𑀲𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺. 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀢𑁆𑀢𑀼𑀓𑀸𑀫𑁄 𑀅𑀲𑀸𑀫𑀺𑀓𑀁 𑀅𑀢𑁆𑀢𑀼𑀤𑁆𑀤𑁂𑀲𑀁, 𑀲𑁄 𑀲𑀗𑁆𑀖𑀁 𑀓𑀼𑀝𑀺𑀯𑀢𑁆𑀣𑀼𑀤𑁂𑀲𑀦𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀼𑀝𑀺𑀯𑀢𑁆𑀣𑀼𑀁 𑀤𑁂𑀲𑁂𑀢𑀺, 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀼𑀝𑀺𑀯𑀢𑁆𑀣𑀼𑀲𑁆𑀲 𑀤𑁂𑀲𑀦𑀸, 𑀲𑁄 𑀢𑀼𑀡𑁆𑀳𑀲𑁆𑀲. 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬. 𑀤𑁂𑀲𑀺𑀢𑀁 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀼𑀝𑀺𑀯𑀢𑁆𑀣𑀼, 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 𑁋

𑀏𑀯𑀁 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑁂𑀦 𑀜𑀢𑁆𑀢𑀺𑀤𑀼𑀢𑀺𑀬𑁂𑀦 𑀓𑀫𑁆𑀫𑁂𑀦. 𑀆𑀴𑀯𑀺𑀓𑀸 𑀦𑀸𑀫 𑀆𑀴𑀯𑀺𑀭𑀝𑁆𑀞𑁂 𑀚𑀸𑀢𑀸 𑀤𑀸𑀭𑀓𑀸, 𑀢𑁂 𑀧𑀩𑁆𑀩𑀚𑀺𑀢𑀓𑀸𑀮𑁂𑀧𑀺 ‘‘𑀆𑀴𑀯𑀺𑀓𑀸’’𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀁𑀲𑀼. 𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀆𑀴𑀯𑀺𑀓𑁂 𑀪𑀺𑀓𑁆𑀔𑀽’’𑀢𑀺. 𑀮𑁂𑀧𑁂 𑀖𑀝𑀺𑀢𑁂𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁫𑁩) 𑀅𑀦𑁆𑀢𑁄𑀮𑁂𑀧𑁂 𑀯𑀸 𑀅𑀦𑁆𑀢𑁄𑀮𑁂𑀧𑁂𑀦 𑀲𑀤𑁆𑀥𑀺𑀁 𑀪𑀺𑀢𑁆𑀢𑀺𑀜𑁆𑀘 𑀙𑀤𑀦𑀜𑁆𑀘 𑀏𑀓𑀸𑀩𑀤𑁆𑀥𑀁 𑀓𑀢𑁆𑀯𑀸 𑀖𑀝𑀺𑀢𑁂, 𑀩𑀳𑀺𑀮𑁂𑀧𑁂 𑀯𑀸 𑀩𑀳𑀺𑀮𑁂𑀧𑁂𑀦 𑀲𑀤𑁆𑀥𑀺𑀁 𑀖𑀝𑀺𑀢𑁂. 𑀤𑁆𑀯𑁂 𑀘 𑀤𑀼𑀓𑁆𑀓𑀝𑀸𑀦𑀺 𑀲𑀸𑀭𑀫𑁆𑀪𑀅𑀧𑀭𑀺𑀓𑁆𑀓𑀫𑀦𑀯𑀲𑁂𑀦. 𑀉𑀪𑀬𑀯𑀺𑀧𑀦𑁆𑀦𑀸𑀢𑀺 𑀉𑀪𑀬𑁂𑀳𑀺 𑀤𑁂𑀲𑀦𑀸𑀧𑀫𑀸𑀡𑁂𑀳𑀺 𑀯𑀺𑀧𑀦𑁆𑀦𑀸 𑀯𑀺𑀭𑀳𑀺𑀢𑀸 𑀉𑀪𑀬𑀯𑀺𑀧𑀦𑁆𑀦𑀸, 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀺𑀦𑁆𑀢𑀺 𑀤𑁆𑀯𑀸𑀭𑀩𑀦𑁆𑀥𑁂 𑀯𑀸 𑀯𑀸𑀢𑀧𑀸𑀦𑁂 𑀯𑀸. 𑀮𑁂𑀧𑁄 𑀦 𑀖𑀝𑀺𑀬𑀢𑀻𑀢𑀺 𑀧𑀼𑀩𑁆𑀩𑁂 𑀤𑀺𑀦𑁆𑀦𑀮𑁂𑀧𑁄 𑀤𑁆𑀯𑀸𑀭𑀩𑀦𑁆𑀥𑁂𑀦 𑀯𑀸 𑀯𑀸𑀢𑀧𑀸𑀦𑁂𑀦 𑀯𑀸 𑀲𑀤𑁆𑀥𑀺𑀁 𑀦 𑀖𑀝𑀺𑀬𑀢𑀺, 𑀏𑀓𑀸𑀩𑀤𑁆𑀥𑀁 𑀳𑀼𑀢𑁆𑀯𑀸 𑀦 𑀢𑀺𑀝𑁆𑀞𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀦𑁆𑀢𑀺 𑀤𑁆𑀯𑀸𑀭𑀩𑀦𑁆𑀥𑀁 𑀯𑀸 𑀯𑀸𑀢𑀧𑀸𑀦𑀁 𑀯𑀸 𑀧𑀭𑀸𑀫𑀲𑀢𑀺. 𑀧𑀞𑀫𑀫𑁂𑀯𑀸𑀢𑀺 𑀮𑁂𑀧𑀓𑀺𑀘𑁆𑀘𑀲𑁆𑀲 𑀦𑀺𑀝𑁆𑀞𑀺𑀢𑀢𑁆𑀢𑀸 𑀤𑁆𑀯𑀸𑀭𑀩𑀦𑁆𑀥𑀯𑀸𑀢𑀧𑀸𑀦𑀸𑀦𑀁 𑀞𑀧𑀦𑀢𑁄 𑀧𑀼𑀩𑁆𑀩𑁂𑀬𑁂𑀯, 𑀮𑁂𑀧𑀲𑁆𑀲 𑀦𑀺𑀝𑁆𑀞𑀺𑀢𑀓𑁆𑀔𑀡𑁂𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀺𑀓𑀁 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀺𑀓𑀁 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁩𑁫𑁫) 𑀧𑀤𑀪𑀸𑀚𑀦𑀺𑀬𑀁 𑀯𑀼𑀢𑁆𑀢𑀢𑁆𑀢𑀸 ‘‘𑀓𑁂𑀯𑀮𑀁 𑀲𑀸𑀭𑀫𑁆𑀪𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀧𑁆𑀧𑀓𑀢𑀦𑁆𑀢𑀺 𑀅𑀦𑀺𑀝𑁆𑀞𑀺𑀢𑀁. 𑀅𑀜𑁆𑀜𑀲𑁆𑀲 𑀤𑀤𑀢𑁄 𑀘𑀸𑀢𑀺 𑀅𑀜𑁆𑀜𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀤𑀤𑀢𑁄 𑀘. 𑀕𑀼𑀳𑀸 𑀦𑀸𑀫 𑀇𑀝𑁆𑀞𑀓𑀕𑀼𑀳𑀸 𑀯𑀸 𑀲𑀺𑀮𑀸𑀕𑀼𑀳𑀸 𑀯𑀸 𑀤𑀸𑀭𑀼𑀕𑀼𑀳𑀸 𑀯𑀸 𑀪𑀽𑀫𑀺𑀕𑀼𑀳𑀸 𑀯𑀸. 𑀢𑀺𑀡𑀓𑀼𑀝𑀺 𑀦𑀸𑀫 𑀲𑀢𑁆𑀢𑀪𑀽𑀫𑀺𑀓𑁄𑀧𑀺 𑀧𑀸𑀲𑀸𑀤𑁄 𑀢𑀺𑀡𑀘𑁆𑀙𑀤𑀦𑁄 ‘‘𑀢𑀺𑀡𑀓𑀼𑀝𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀺. 𑀅𑀜𑁆𑀜𑀲𑁆𑀲𑀸𑀢𑀺 𑀆𑀘𑀭𑀺𑀬𑀲𑁆𑀲 𑀯𑀸 𑀉𑀧𑀚𑁆𑀛𑀸𑀬𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸. 𑀯𑀸𑀲𑀸𑀕𑀸𑀭𑀁 𑀞𑀧𑁂𑀢𑁆𑀯𑀸𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁬𑁪) 𑀅𑀢𑁆𑀢𑀦𑁄 𑀯𑀲𑀦𑀢𑁆𑀣𑀸𑀬 𑀯𑀸𑀲𑀸𑀕𑀸𑀭𑀁 𑀞𑀧𑁂𑀢𑁆𑀯𑀸. 𑀉𑀧𑁄𑀲𑀣𑀸𑀕𑀸𑀭𑀸𑀤𑀻𑀲𑀽𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀚𑀦𑁆𑀢𑀸𑀖𑀭𑀪𑁄𑀚𑀦𑀲𑀸𑀮𑀸𑀅𑀕𑁆𑀕𑀺𑀲𑀸𑀮𑀸𑀦𑀁 𑀕𑀳𑀡𑀁. 𑀳𑁂𑀝𑁆𑀞𑀺𑀫𑀧𑀫𑀸𑀡𑀲𑀫𑁆𑀪𑀯𑁄𑀢𑀺 𑀘𑀢𑀼𑀳𑀢𑁆𑀣𑀯𑀺𑀢𑁆𑀣𑀺𑀡𑁆𑀡𑀢𑀸. 𑀅𑀤𑁂𑀲𑀸𑀧𑁂𑀢𑁆𑀯𑀸 𑀓𑀭𑁄𑀢𑁄𑀢𑀺 𑀯𑀢𑁆𑀣𑀼𑀁 𑀅𑀤𑁂𑀲𑀸𑀧𑁂𑀢𑁆𑀯𑀸 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁, 𑀧𑀫𑀸𑀡𑀬𑀼𑀢𑁆𑀢𑀁 𑀯𑀸 𑀓𑀭𑁄𑀢𑁄. 𑀏𑀢𑁆𑀣 𑀘 𑀯𑀢𑁆𑀣𑀼𑀦𑁄 𑀅𑀤𑁂𑀲𑀸𑀧𑀦𑀁 𑀅𑀓𑀺𑀭𑀺𑀬𑀸. 𑀓𑀼𑀝𑀺𑀓𑀭𑀡𑀁 𑀓𑀺𑀭𑀺𑀬𑀸.

𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀯𑀺𑀳𑀸𑀭𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀫𑀳𑀦𑁆𑀢𑀁 𑀮𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀫𑀳𑀮𑁆𑀮𑀓𑁄, 𑀢𑀁 𑀫𑀳𑀮𑁆𑀮𑀓𑀁. 𑀬𑁄 𑀘 𑀬𑀁 𑀕𑀡𑁆𑀳𑀸𑀢𑀺, 𑀲𑁄 𑀢𑀲𑁆𑀲 𑀅𑀢𑁆𑀣𑀻𑀢𑀺 𑀆𑀳 ‘‘𑀫𑀳𑀦𑁆𑀢𑀪𑀸𑀯𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑀳𑀮𑁆𑀮𑀓𑁄’’𑀢𑀺. 𑀲𑁄 𑀘 𑀫𑀳𑀦𑁆𑀢𑀪𑀸𑀯𑁄 𑀓𑁂𑀦, 𑀓𑀼𑀢𑁄 𑀘𑀸𑀢𑀺 𑀆𑀳 ‘‘𑀲𑀲𑀸𑀫𑀺𑀓𑀪𑀸𑀯𑁂𑀦𑀸’’𑀢𑀺𑀆𑀤𑀺. 𑀦 𑀓𑁂𑀯𑀮𑀁 𑀲𑀲𑀸𑀫𑀺𑀓𑀪𑀸𑀯𑁂𑀦𑁂𑀯𑀸𑀢𑀺 𑀆𑀳 ‘‘𑀬𑀲𑁆𑀫𑀸 𑀯𑀸’’𑀢𑀺𑀆𑀤𑀺. 𑀬𑀤𑀺 𑀏𑀯𑀁 𑀅𑀣 𑀓𑀲𑁆𑀫𑀸 ‘‘𑀫𑀳𑀮𑁆𑀮𑀓𑁄 𑀦𑀸𑀫 𑀯𑀺𑀳𑀸𑀭𑁄 𑀲𑀲𑀸𑀫𑀺𑀓𑁄 𑀯𑀼𑀘𑁆𑀘𑀢𑀻’’𑀢𑀺 (𑀧𑀸𑀭𑀸. 𑁩𑁬𑁭) 𑀏𑀢𑁆𑀢𑀓𑀫𑁂𑀯 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀯𑀺𑀳𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀺𑀳𑀸𑀭𑁄, 𑀆𑀯𑀸𑀲𑁄. 𑀫𑀸𑀢𑀺𑀓𑀸𑀬𑀁 𑀪𑀺𑀓𑁆𑀔𑀽 𑀯𑀸 𑀅𑀦𑀪𑀺𑀦𑁂𑀬𑁆𑀬𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 ‘‘𑀅𑀬𑀁 𑀯𑀸 𑀲𑁄 𑀫𑀳𑀸𑀦𑀸𑀕𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀅𑀯𑀥𑀸𑀭𑀡𑀢𑁆𑀣𑁄.

𑀓𑁄𑀲𑀫𑁆𑀩𑀺𑀬𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁩𑁬𑁫) 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀢𑀲𑁆𑀲 𑀓𑀺𑀭 𑀦𑀕𑀭𑀲𑁆𑀲 𑀆𑀭𑀸𑀫𑀧𑁄𑀓𑁆𑀔𑀭𑀡𑀺𑀆𑀤𑀻𑀲𑀼 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀓𑁄𑀲𑀫𑁆𑀩𑀭𑀼𑀓𑁆𑀔𑀸𑀯 𑀉𑀲𑁆𑀲𑀦𑁆𑀦𑀸 𑀅𑀳𑁂𑀲𑀼𑀁, 𑀢𑀲𑁆𑀫𑀸 𑀢𑀁 ‘‘𑀓𑁄𑀲𑀫𑁆𑀩𑀻’’𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺. ‘‘𑀓𑀼𑀲𑀼𑀫𑁆𑀩𑀲𑁆𑀲 𑀦𑀸𑀫 𑀇𑀲𑀺𑀦𑁄 𑀅𑀲𑁆𑀲𑀫𑀢𑁄 𑀅𑀯𑀺𑀤𑀽𑀭𑁂 𑀫𑀸𑀧𑀺𑀢𑀢𑁆𑀢𑀸’’𑀢𑀺 𑀏𑀓𑁂. 𑀙𑀦𑁆𑀦𑀢𑁆𑀣𑁂𑀭𑀁 𑀆𑀭𑀩𑁆𑀪𑀸𑀢𑀺 𑀬𑁄 𑀅𑀪𑀺𑀦𑀺𑀓𑁆𑀔𑀫𑀦𑀓𑀸𑀮𑁂 𑀲𑀤𑁆𑀥𑀺𑀁 𑀦𑀺𑀓𑁆𑀔𑀦𑁆𑀢𑁄, 𑀬𑀲𑁆𑀲 𑀘 𑀲𑀢𑁆𑀣𑀸𑀭𑀸 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀩𑁆𑀭𑀳𑁆𑀫𑀤𑀡𑁆𑀟𑁄 (𑀘𑀽𑀴𑀯. 𑁪𑁪𑁫) 𑀆𑀡𑀢𑁆𑀢𑁄, 𑀢𑀁 𑀙𑀦𑁆𑀦𑀢𑁆𑀣𑁂𑀭𑀁 𑀆𑀭𑀩𑁆𑀪. 𑀘𑁂𑀢𑀺𑀬𑀭𑀼𑀓𑁆𑀔𑀦𑁆𑀢𑀺 𑀘𑀺𑀢𑁆𑀢𑀻𑀓𑀢𑀝𑁆𑀞𑁂𑀦 𑀘𑁂𑀢𑀺𑀬𑀁, 𑀧𑀽𑀚𑀸𑀭𑀳𑀸𑀦𑀁 𑀤𑁂𑀯𑀝𑁆𑀞𑀸𑀦𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁, ‘‘𑀘𑁂𑀢𑀺𑀬’’𑀦𑁆𑀢𑀺 𑀲𑀫𑁆𑀫𑀢𑀁 𑀭𑀼𑀓𑁆𑀔𑀁 𑀘𑁂𑀢𑀺𑀬𑀭𑀼𑀓𑁆𑀔𑀁. 𑀯𑀢𑁆𑀣𑀼𑀦𑁄 𑀅𑀤𑁂𑀲𑀦𑀸𑀬 𑀆𑀧𑀚𑁆𑀚𑀦𑀢𑁄 ‘‘𑀅𑀓𑀺𑀭𑀺𑀬𑀫𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀦𑀪𑀸𑀯𑁄’’𑀢𑀺 𑀯𑀼𑀢𑁆𑀢𑀁. 𑀫𑀢𑁆𑀢-𑀲𑀤𑁆𑀤𑁂𑀦 𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀦𑀢𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀓𑁂𑀘𑀺 𑀧𑀦 ‘‘𑀯𑀢𑁆𑀣𑀼𑀅𑀤𑁂𑀲𑀦𑀸𑀬, 𑀓𑀼𑀝𑀺𑀓𑀭𑀡𑁂𑀦 𑀘 𑀲𑀫𑀼𑀝𑁆𑀞𑀸𑀦𑀢𑁄 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀻’’𑀢𑀺 𑀯𑀤𑀦𑁆𑀢𑀺. 𑀧𑀫𑀸𑀡𑀦𑀺𑀬𑀫𑀸𑀪𑀸𑀯𑁄𑀯 𑀯𑀺𑀲𑁂𑀲𑁄.

𑀯𑀺𑀳𑀸𑀭𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀽𑀲𑀻𑀬𑀢𑀻𑀢𑀺 𑀤𑀼𑀝𑁆𑀞𑁄, 𑀤𑀽𑀲𑁂𑀢𑀺 𑀧𑀭𑀁 𑀯𑀺𑀦𑀸𑀲𑁂𑀢𑀻𑀢𑀺 𑀤𑁄𑀲𑁄. 𑀢𑁂𑀦𑀸𑀳 ‘‘𑀤𑀽𑀲𑀺𑀢𑁄 𑀘𑁂𑀯𑀸’’𑀢𑀺𑀆𑀤𑀺. 𑀇𑀤𑀸𑀦𑀺 ‘‘𑀤𑀽𑀲𑀺𑀢𑁄 𑀘𑁂𑀯 𑀤𑀽𑀲𑀓𑁄 𑀘𑀸’’𑀢𑀺 𑀇𑀫𑀺𑀦𑀸 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀉𑀧𑁆𑀧𑀦𑁆𑀦𑁂 𑀳𑀺 𑀤𑁄𑀲𑁂’’𑀢𑀺𑀆𑀤𑀺𑀫𑀸𑀳. 𑀧𑀓𑀢𑀺𑀪𑀸𑀯𑀁 𑀚𑀳𑀸𑀧𑀺𑀢𑁄𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁩𑁮𑁫-𑁩𑁮𑁬) 𑀲𑁄𑀫𑁆𑀫𑀪𑀸𑀯𑀁 𑀚𑀳𑀸𑀧𑀺𑀢𑁄𑀢𑀺 𑀅𑀢𑁆𑀣𑁄, 𑀯𑀺𑀓𑀸𑀭𑀫𑀸𑀧𑀸𑀤𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀓𑀸𑀭𑀦𑀸𑀦𑀸𑀢𑁆𑀢𑁂𑀦𑀸𑀢𑀺 𑀤𑀽𑀲𑀺𑀢𑀸𑀓𑀸𑀭𑀲𑁆𑀲 𑀘𑁂𑀯 𑀤𑀽𑀲𑀓𑀸𑀓𑀸𑀭𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀆𑀓𑀸𑀭𑀸𑀦𑀁 𑀦𑀸𑀦𑀸𑀪𑀸𑀯𑁂𑀦. 𑀦𑀧𑁆𑀧𑀢𑀺𑀢𑁄𑀢𑀺 𑀧𑀻𑀢𑀺𑀲𑀼𑀔𑀸𑀤𑀻𑀳𑀺 𑀦 𑀅𑀪𑀺𑀕𑀢𑁄 𑀅𑀦𑀼𑀧𑀕𑀢𑁄, 𑀦 𑀉𑀧𑀕𑀢𑁄𑀢𑀺 𑀅𑀢𑁆𑀣𑁄. 𑀬𑁄 𑀘 𑀧𑀻𑀢𑀺𑀲𑀼𑀔𑀸𑀤𑀻𑀳𑀺 𑀅𑀦𑀼𑀧𑀕𑀢𑁄, 𑀲𑁄 𑀢𑁂𑀳𑀺 𑀯𑀚𑁆𑀚𑀺𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀧𑀻𑀢𑀺𑀲𑀼𑀔𑀸𑀤𑀻𑀳𑀺 𑀯𑀺𑀯𑀚𑁆𑀚𑀺𑀢𑁄’’𑀢𑀺. 𑀬𑁄 𑀘 𑀢𑁂𑀳𑀺 𑀯𑀚𑁆𑀚𑀺𑀢𑁄, 𑀦 𑀲𑁄 𑀢𑁂𑀳𑀺 𑀅𑀪𑀺𑀲𑀝𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀦 𑀅𑀪𑀺𑀲𑀝𑁄’’𑀢𑀺, 𑀧𑀻𑀢𑀺𑀲𑀼𑀔𑀸𑀤𑀻𑀳𑀺 𑀦 𑀧𑀢𑁆𑀣𑀝𑁄𑀢𑀺 𑀅𑀢𑁆𑀣𑁄. 𑀦𑀸𑀲𑁆𑀲 𑀫𑀽𑀮𑀦𑁆𑀢𑀺 𑀅𑀫𑀽𑀮𑀓𑀁. 𑀢𑀁 𑀧𑀦 𑀅𑀫𑀽𑀮𑀓𑀢𑁆𑀢𑀁 𑀬𑀲𑁆𑀫𑀸 𑀘𑁄𑀤𑀓𑀯𑀲𑁂𑀦 𑀅𑀥𑀺𑀧𑁆𑀧𑁂𑀢𑀁, 𑀦 𑀘𑀼𑀤𑀺𑀢𑀓𑀯𑀲𑁂𑀦, 𑀢𑀲𑁆𑀫𑀸 𑀢𑀤𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀘𑁄𑀤𑀓𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀦𑁆𑀢𑀺 𑀧𑀸𑀭𑀸𑀚𑀺𑀓𑀁. 𑀏𑀢𑀦𑁆𑀢𑀺 𑀘𑀼𑀤𑀺𑀢𑀓𑀲𑁆𑀲 𑀆𑀧𑀦𑁆𑀦𑀸𑀦𑀸𑀧𑀦𑁆𑀦𑀢𑁆𑀢𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂.

𑀇𑀤𑀸𑀦𑀺 𑀅𑀢𑁆𑀢𑀦𑀸 𑀯𑀼𑀢𑁆𑀢𑀫𑁂𑀯 𑀤𑀺𑀝𑁆𑀞𑀸𑀤𑀺𑀁 𑀯𑀺𑀯𑀭𑀺𑀢𑀼𑀁 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀣𑁂𑀯𑀸𑀢𑀺 ‘‘𑀧𑀲𑀸𑀤𑀲𑁄𑀢𑁂𑀦 𑀯𑀸 𑀤𑀺𑀩𑁆𑀩𑀲𑁄𑀢𑁂𑀦 𑀯𑀸’’𑀢𑀺 𑀇𑀫𑀫𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀧𑀭𑀺𑀲𑀗𑁆𑀓𑀺𑀢𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁮𑁫-𑁩𑁮𑁬) 𑀧𑀦 𑀢𑀺𑀯𑀺𑀥𑀁 𑀤𑀺𑀝𑁆𑀞𑀧𑀭𑀺𑀲𑀗𑁆𑀓𑀺𑀢𑀁, 𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀁, 𑀫𑀼𑀢𑀧𑀭𑀺𑀲𑀗𑁆𑀓𑀺𑀢𑀦𑁆𑀢𑀺. 𑀢𑀢𑁆𑀣 𑀪𑀺𑀓𑁆𑀔𑀼𑀜𑁆𑀘 𑀫𑀸𑀢𑀼𑀕𑀸𑀫𑀜𑁆𑀘 𑀢𑀣𑀸𑀭𑀽𑀧𑁂 𑀞𑀸𑀦𑁂 𑀤𑀺𑀲𑁆𑀯𑀸 ‘‘𑀅𑀤𑁆𑀥𑀸 𑀇𑀫𑁂𑀳𑀺 𑀓𑀢’’𑀦𑁆𑀢𑀺 𑀯𑀸 ‘‘𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀸 𑀧𑀭𑀺𑀲𑀗𑁆𑀓𑀺𑀢𑀁, 𑀇𑀤𑀁 𑀤𑀺𑀝𑁆𑀞𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫. 𑀅𑀦𑁆𑀥𑀓𑀸𑀭𑁂 𑀯𑀸 𑀧𑀝𑀺𑀘𑁆𑀙𑀦𑁆𑀦𑁄𑀓𑀸𑀲𑁂 𑀯𑀸 𑀪𑀺𑀓𑁆𑀔𑀼𑀲𑁆𑀲 𑀘 𑀫𑀸𑀢𑀼𑀕𑀸𑀫𑀲𑁆𑀲 𑀘 𑀯𑀘𑀦𑀁 𑀲𑀼𑀢𑁆𑀯𑀸 𑀤𑀼𑀢𑀺𑀬𑀲𑁆𑀲 𑀅𑀢𑁆𑀣𑀺𑀪𑀸𑀯𑀁 𑀅𑀚𑀸𑀦𑀢𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀧𑀭𑀺𑀲𑀗𑁆𑀓𑀺𑀢𑀁, 𑀇𑀤𑀁 𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫. 𑀥𑀼𑀢𑁆𑀢𑁂𑀳𑀺 𑀇𑀢𑁆𑀣𑀻𑀳𑀺 𑀲𑀤𑁆𑀥𑀺𑀁 𑀧𑀘𑁆𑀘𑀦𑁆𑀢𑀯𑀺𑀳𑀸𑀭𑁂 𑀫𑀡𑁆𑀟𑀧𑁂 𑀯𑀸 𑀲𑀸𑀮𑀸𑀤𑀻𑀲𑀼 𑀯𑀸 𑀧𑀼𑀧𑁆𑀨𑀕𑀦𑁆𑀥𑀫𑀁𑀲𑀲𑀼𑀭𑀸𑀤𑀻𑀦𑀺 𑀅𑀦𑀼𑀪𑀯𑀺𑀢𑁆𑀯𑀸 𑀕𑀢𑀝𑁆𑀞𑀸𑀦𑀁 𑀤𑀺𑀲𑁆𑀯𑀸 ‘‘𑀓𑁂𑀦 𑀦𑀼 𑀔𑁄 𑀇𑀤𑀁 𑀓𑀢’’𑀦𑁆𑀢𑀺 𑀯𑀻𑀫𑀁𑀲𑀦𑁆𑀢𑁂𑀦 𑀢𑀢𑁆𑀭 𑀓𑁂𑀦𑀘𑀺 𑀪𑀺𑀓𑁆𑀔𑀼𑀦𑀸 𑀕𑀦𑁆𑀥𑀸𑀤𑀻𑀳𑀺 𑀧𑀽𑀚𑀸 𑀓𑀢𑀸 𑀳𑁄𑀢𑀺, 𑀪𑁂𑀲𑀚𑁆𑀚𑀢𑁆𑀣𑀸𑀬 𑀅𑀭𑀺𑀝𑁆𑀞𑀁 𑀯𑀸 𑀧𑀻𑀢𑀁, 𑀲𑁄 𑀢𑀲𑁆𑀲 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 ‘‘𑀅𑀬𑀁 𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀭𑀺𑀲𑀗𑁆𑀓𑀺𑀢𑀁, 𑀇𑀤𑀁 𑀫𑀼𑀢𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫. 𑀏𑀯𑀁 𑀢𑀺𑀯𑀺𑀥𑀲𑁆𑀲 𑀧𑀭𑀺𑀲𑀗𑁆𑀓𑀺𑀢𑀲𑁆𑀲 𑀅𑀪𑀸𑀯𑁄 𑀅𑀧𑀭𑀺𑀲𑀗𑁆𑀓𑀺𑀢𑀁. 𑀢𑁂𑀦𑀸𑀳 ‘‘𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀲𑁂𑀦 𑀘𑁂𑀢𑀲𑀸 𑀅𑀧𑀭𑀺𑀲𑀗𑁆𑀓𑀺𑀢’’𑀦𑁆𑀢𑀺. 𑀢𑀜𑁆𑀘 𑀧𑀦𑁂𑀢𑀁 𑀤𑀺𑀝𑁆𑀞𑀸𑀤𑀺𑀓𑀁 𑀦 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀯𑀸𑀢𑀺 𑀆𑀳 ‘‘𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 𑀯𑀸’’𑀢𑀺. 𑀬𑀲𑁆𑀫𑀸 ‘‘𑀢𑁆𑀯𑀁 𑀧𑀡𑁆𑀟𑀓𑁄’’𑀢𑀺𑀆𑀤𑀺𑀯𑀘𑀦𑁂𑀦𑀸𑀧𑀺 𑀘𑁄𑀤𑀬𑀢𑁄 𑀆𑀧𑀢𑁆𑀢𑀺𑀬𑁂𑀯, 𑀢𑀲𑁆𑀫𑀸 ‘‘𑀪𑀺𑀓𑁆𑀔𑀼𑀦𑁄 𑀅𑀦𑀼𑀭𑀽𑀧𑁂𑀲𑀼 𑀏𑀓𑀽𑀦𑀯𑀻𑀲𑀢𑀺𑀬𑀸 𑀅𑀜𑁆𑀜𑀢𑀭𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀏𑀯𑀁 𑀅𑀣 𑀓𑀲𑁆𑀫𑀸 𑀧𑀤𑀪𑀸𑀚𑀦𑁂 ‘‘𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦𑀸𑀢𑀺 𑀘𑀢𑀼𑀦𑁆𑀦𑀁 𑀅𑀜𑁆𑀜𑀢𑀭𑁂𑀦𑀸’’𑀢𑀺 (𑀧𑀸𑀭𑀸. 𑁩𑁮𑁬) 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀧𑀤𑀪𑀸𑀚𑀦𑁂 𑀧𑀦𑀸’’𑀢𑀺𑀆𑀤𑀺. 𑀉𑀧𑀲𑀕𑁆𑀕𑀦𑀺𑀧𑀸𑀢𑀸𑀦𑀁 𑀯𑀸𑀘𑀓𑀲𑀤𑁆𑀤𑀲𑀦𑁆𑀦𑀺𑀝𑁆𑀞𑀸𑀦𑁂 𑀢𑀤𑀢𑁆𑀣𑀚𑁄𑀢𑀦𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄 ‘‘𑀥𑀁𑀲𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀁. 𑀥𑀁𑀲𑀦𑀜𑁆𑀘𑁂𑀢𑁆𑀣 𑀅𑀪𑀺𑀪𑀯𑀦𑀁. 𑀢𑁂𑀦𑀸𑀳 ‘‘𑀅𑀪𑀺𑀪𑀯𑁂𑀬𑁆𑀬𑀸’’𑀢𑀺. ‘‘𑀢𑁆𑀯𑀁 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀸𑀢𑀺 ‘‘𑀢𑁆𑀯𑀁 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺, 𑀅𑀤𑀺𑀦𑁆𑀦𑀁 𑀆𑀤𑀺𑀬𑀺, 𑀫𑀦𑀼𑀲𑁆𑀲𑀁 𑀖𑀸𑀢𑀬𑀺𑀢𑁆𑀣, 𑀅𑀪𑀽𑀢𑀁 𑀆𑀭𑁄𑀘𑀬𑀺𑀢𑁆𑀣𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀸. 𑀏𑀢𑁆𑀣 𑀘 ‘‘𑀅𑀲𑁆𑀲𑀫𑀡𑁄𑀲𑀻’𑀢𑀺 𑀅𑀯𑀦𑁆𑀤𑀦𑀓𑀸𑀭𑀡𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑁄 𑀦 𑀯𑀦𑁆𑀤𑀺𑀢𑀩𑁆𑀩𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁 𑀅𑀯𑀦𑁆𑀤𑀺𑀬𑁂𑀲𑀼 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸, ‘‘𑀧𑀘𑁆𑀙𑀸 𑀉𑀧𑀲𑀫𑁆𑀧𑀦𑁆𑀦𑁂𑀦 𑀧𑀼𑀭𑁂 𑀉𑀧𑀲𑀫𑁆𑀧𑀦𑁆𑀦𑁄 𑀯𑀦𑁆𑀤𑀺𑀬𑁄’’𑀢𑀺 (𑀧𑀭𑀺. 𑁪𑁬𑁮) 𑀯𑀼𑀢𑁆𑀢𑀢𑁆𑀢𑀸 𑀘. 𑀇𑀤𑀁 𑀧𑀦 𑀅𑀢𑁆𑀢𑀦𑀸 𑀯𑀢𑁆𑀢𑀩𑁆𑀩𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁.

𑀲𑀫𑀻𑀧𑁂𑀢𑀺 𑀤𑁆𑀯𑀸𑀤𑀲𑀳𑀢𑁆𑀣𑀧𑀫𑀸𑀡𑁂 𑀧𑀤𑁂𑀲𑁂. 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀫𑁂𑀯 𑀳𑀺 𑀳𑀢𑁆𑀣𑀫𑀼𑀤𑁆𑀤𑀸𑀬 𑀲𑀻𑀲𑀁 𑀦 𑀏𑀢𑀺, 𑀇𑀤𑀁 𑀧𑀦 𑀅𑀦𑀼𑀤𑁆𑀥𑀁𑀲𑀦𑀁, 𑀅𑀪𑀽𑀢𑀭𑁄𑀘𑀦𑀜𑁆𑀘 𑀏𑀢𑀺𑀬𑁂𑀯. 𑀢𑁂𑀦𑀸𑀳 ‘‘𑀳𑀢𑁆𑀣𑀫𑀼𑀤𑁆𑀤𑀸𑀬 𑀏𑀯 𑀯𑀸’’𑀢𑀺. 𑀩𑁆𑀭𑀳𑁆𑀫𑀘𑀭𑀺𑀬𑀸𑀢𑀺 𑀩𑁆𑀭𑀳𑁆𑀫𑀁 𑀲𑁂𑀝𑁆𑀞𑀁 𑀧𑀲𑀢𑁆𑀣𑀁 𑀘𑀭𑀺𑀬𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀩𑁆𑀭𑀳𑁆𑀫𑀽𑀦𑀁 𑀯𑀸 𑀲𑁂𑀝𑁆𑀞𑀸𑀦𑀁 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀅𑀭𑀺𑀬𑀲𑀸𑀯𑀓𑀸𑀦𑀁, 𑀩𑁆𑀭𑀳𑁆𑀫𑀸𑀦𑀜𑁆𑀘 𑀘𑀭𑀺𑀬𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀢𑀫𑁆𑀳𑀸 𑀩𑁆𑀭𑀳𑁆𑀫𑀘𑀭𑀺𑀬𑀸. 𑀢𑁂𑀦𑀸𑀳 ‘‘𑀲𑁂𑀝𑁆𑀞𑀘𑀭𑀺𑀬𑀸’’𑀢𑀺. 𑀲𑀸𑀥𑀼 𑀯𑀢𑀲𑁆𑀲 𑀏𑀓𑀦𑁆𑀢𑁂𑀦 𑀪𑀤𑁆𑀤𑀓𑀁 𑀪𑀯𑁂𑀬𑁆𑀬. ‘‘𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀤𑀺𑀲𑀢𑁆𑀢𑀯𑀺𑀥𑀫𑁆𑀧𑀺 𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀦𑁆𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 𑀓𑀫𑁆𑀫𑀸𑀥𑀺𑀧𑁆𑀧𑀸𑀬𑁄. ‘‘𑀆𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀅𑀥𑀺𑀧𑁆𑀧𑀸𑀬𑁄 𑀯𑀼𑀝𑁆𑀞𑀸𑀦𑀸𑀥𑀺𑀧𑁆𑀧𑀸𑀬𑁄. 𑀅𑀦𑀼𑀯𑀺𑀚𑁆𑀚𑀦𑀸𑀥𑀺𑀧𑁆𑀧𑀸𑀬𑁄𑀢𑀺 𑀯𑀻𑀫𑀁𑀲𑀦𑀸𑀥𑀺𑀧𑁆𑀧𑀸𑀬𑁄, 𑀉𑀧𑀧𑀭𑀺𑀓𑁆𑀔𑀸𑀥𑀺𑀧𑁆𑀧𑀸𑀬𑁄. 𑀅𑀦𑀼𑀯𑀺𑀚𑁆𑀚𑀓𑁂𑀦𑀸𑀢𑀺 𑀲𑀗𑁆𑀖𑀫𑀚𑁆𑀛𑁂 𑀑𑀢𑀺𑀡𑁆𑀡𑀁 𑀅𑀥𑀺𑀓𑀭𑀡𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑀼𑀁 𑀦𑀺𑀲𑀺𑀦𑁆𑀦𑁂𑀦 𑀯𑀺𑀦𑀬𑀥𑀭𑁂𑀦. 𑀓𑀺𑀁 𑀢𑁂 𑀤𑀺𑀝𑁆𑀞𑀦𑁆𑀢𑀺 𑀢𑀬𑀸 𑀓𑀺𑀁 𑀤𑀺𑀝𑁆𑀞𑀁, 𑀧𑀞𑀫𑀁 𑀧𑀸𑀭𑀸𑀚𑀺𑀓𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄, 𑀤𑀼𑀢𑀺𑀬𑀁 𑀢𑀢𑀺𑀬𑀁 𑀘𑀢𑀼𑀢𑁆𑀣𑀁 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀤𑀺𑀲𑀤𑁆𑀤𑁂𑀦 ‘‘𑀓𑀺𑀦𑁆𑀢𑀺 𑀢𑁂 𑀤𑀺𑀝𑁆𑀞𑀁, 𑀓𑀤𑀸 𑀢𑁂 𑀤𑀺𑀝𑁆𑀞𑀁, 𑀓𑀢𑁆𑀣 𑀢𑁂 𑀤𑀺𑀝𑁆𑀞’’𑀦𑁆𑀢𑀺 𑀇𑀫𑀁 𑀦𑀬𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀲𑀫𑀦𑀢𑁆𑀣𑀸𑀬 𑀧𑀯𑀢𑁆𑀢𑀫𑀸𑀦𑁂𑀳𑀺 𑀲𑀫𑀣𑁂𑀳𑀺 𑀅𑀥𑀺𑀓𑀸𑀢𑀩𑁆𑀩𑀦𑁆𑀢𑀺 𑀅𑀥𑀺𑀓𑀭𑀡𑀁. 𑀬𑀣𑀸 𑀳𑀺 𑀲𑀫𑀦𑀯𑀲𑁂𑀦 𑀲𑀫𑀣𑀸𑀦𑀁 𑀯𑀺𑀯𑀸𑀤𑀸𑀤𑀻𑀲𑀼 𑀅𑀥𑀺𑀓𑀢𑀪𑀸𑀯𑁄, 𑀏𑀯𑀁 𑀯𑀺𑀯𑀸𑀤𑀸𑀤𑀻𑀦𑀁 𑀢𑁂𑀳𑀺 𑀅𑀥𑀺𑀓𑀢𑁆𑀢𑀩𑁆𑀩𑀢𑀸𑀢𑀺. 𑀢𑁂𑀦𑀸𑀳 ‘‘𑀲𑀫𑀣𑁂𑀳𑀺 𑀅𑀥𑀺𑀓𑀭𑀡𑀻𑀬𑀪𑀸𑀯𑁂𑀦𑀸’’𑀢𑀺𑀆𑀤𑀺. 𑀇𑀫𑀺𑀦𑀸 𑀳𑀺 𑀅𑀥𑀺𑀓𑀭𑀡𑀲𑀤𑁆𑀤𑀲𑁆𑀲 𑀓𑀫𑁆𑀫𑀲𑀸𑀥𑀦𑀢𑀸 𑀯𑀼𑀢𑁆𑀢𑀸. 𑀅𑀥𑀺𑀓𑀭𑀡𑀦𑁆𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀅𑀥𑀺𑀓𑀭𑀡𑀁. 𑀯𑀺𑀯𑀸𑀤𑀸𑀤𑀻𑀦𑀺 𑀅𑀥𑀺𑀓𑀭𑀡𑀸𑀦𑀺 𑀲𑀫𑁂𑀦𑁆𑀢𑀺 𑀯𑀽𑀧𑀲𑀫𑁂𑀦𑁆𑀢𑀻𑀢𑀺 𑀲𑀫𑀣𑀸, 𑀲𑀫𑁆𑀫𑀼𑀔𑀸𑀯𑀺𑀦𑀬𑀸𑀤𑀬𑁄. 𑀅𑀣 𑀯𑀸 𑀅𑀥𑀺𑀓𑀭𑀻𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀅𑀥𑀺𑀓𑀭𑀡𑀁. 𑀓𑁂 𑀅𑀥𑀺𑀓𑀭𑀻𑀬𑀦𑁆𑀢𑀺? 𑀲𑀫𑀣𑀸. 𑀓𑀣𑀁 𑀅𑀥𑀺𑀓𑀭𑀻𑀬𑀦𑁆𑀢𑀺? 𑀲𑀫𑀦𑀯𑀲𑁂𑀦. 𑀅𑀥𑀺𑀓𑀭𑀡𑀁 𑀲𑀫𑁂𑀦𑁆𑀢𑀺 𑀯𑀽𑀧𑀲𑀫𑁂𑀦𑁆𑀢𑀻𑀢𑀺𑀧𑀺 𑀲𑀫𑀣𑀸𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸𑀥𑀺𑀓𑀭𑀡𑁂𑀳𑀺 𑀘𑁄𑀤𑀦𑀸𑀬 𑀅𑀪𑀸𑀯𑀢𑁄 ‘‘𑀇𑀤𑀁 𑀧𑀦 𑀧𑀸𑀭𑀸𑀚𑀺𑀓𑀲𑀗𑁆𑀔𑀸𑀢𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀫𑁂𑀯 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀧𑀢𑁆𑀢𑀺𑀬𑁂𑀯 𑀅𑀥𑀺𑀓𑀭𑀡𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀅𑀦𑀼𑀤𑁆𑀥𑀁𑀲𑀺𑀢𑀓𑁆𑀔𑀡𑁂𑀬𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀲𑁄 𑀘𑁂 𑀢𑀗𑁆𑀔𑀡𑁂𑀬𑁂𑀯 𑀚𑀸𑀦𑀸𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑁂𑀢𑀺 𑀫𑁂𑀢𑁆𑀢𑀺𑀬𑀜𑁆𑀘 𑀪𑀽𑀫𑀚𑀓𑀜𑁆𑀘. 𑀙𑀩𑁆𑀩𑀕𑁆𑀕𑀺𑀬𑀸𑀦𑀁 𑀅𑀕𑁆𑀕𑀧𑀼𑀭𑀺𑀲𑀸 𑀏𑀢𑁂. 𑀲𑀼𑀤𑁆𑀥𑀁 𑀯𑀸𑀢𑀺 𑀧𑀸𑀭𑀸𑀚𑀺𑀓𑀫𑀦𑀸𑀧𑀦𑁆𑀦𑀁 𑀯𑀸. ‘‘𑀲𑀘𑁂 𑀲𑁄 𑀢𑀗𑁆𑀔𑀡𑁂𑀬𑁂𑀯 𑀚𑀸𑀦𑀸𑀢𑀻’’𑀢𑀺 𑀇𑀫𑀺𑀦𑀸 𑀆𑀯𑀚𑁆𑀚𑀦𑀲𑀫𑀬𑀫𑀸𑀳. 𑀢𑀗𑁆𑀔𑀡𑁂𑀬𑁂𑀯 𑀚𑀸𑀦𑀦𑀁 𑀦𑀸𑀫 𑀤𑀼𑀓𑁆𑀓𑀭𑀁, 𑀲𑀫𑀬𑁂𑀦 𑀆𑀯𑀚𑁆𑀚𑀺𑀢𑁆𑀯𑀸 𑀜𑀸𑀢𑁂 𑀧𑀦 𑀜𑀸𑀢𑀫𑁂𑀯 𑀳𑁄𑀢𑀺. 𑀧𑀘𑁆𑀙𑀸 𑀘𑁂 𑀚𑀸𑀦𑀸𑀢𑀺, 𑀲𑀻𑀲𑀁 𑀦 𑀏𑀢𑀺. 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀅𑀪𑀽𑀢𑀸𑀭𑁄𑀘𑀦𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀅𑀢𑁆𑀢𑀓𑀸𑀫𑀤𑀼𑀝𑁆𑀞𑀤𑁄𑀲𑀪𑀽𑀢𑀸𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺 𑀲𑀩𑁆𑀩𑀸𑀦𑁂𑀯 𑀳𑀺 𑀇𑀫𑀸𑀦𑀺 𑀏𑀓𑀧𑀭𑀺𑀘𑁆𑀙𑁂𑀤𑀸𑀦𑀺. 𑀬𑀲𑁆𑀫𑀸 𑀧𑀦 𑀧𑀭𑀫𑁆𑀫𑀼𑀔𑀸 𑀲𑀢𑁆𑀢𑀳𑀺𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀯𑀤𑀢𑁄 𑀤𑀼𑀓𑁆𑀓𑀝𑀫𑁂𑀯, 𑀢𑀲𑁆𑀫𑀸 ‘‘𑀧𑀭𑀫𑁆𑀫𑀼𑀔𑀸 𑀘𑁄𑀤𑁂𑀦𑁆𑀢𑀲𑁆𑀲 𑀧𑀦 𑀲𑀻𑀲𑀁 𑀦 𑀏𑀢𑀻’’𑀢𑀺 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀦𑀬𑀸𑀧𑀢𑁆𑀢𑀺𑀬𑁄𑀢𑀺 ‘‘𑀯𑀸𑀘𑀸𑀬 𑀯𑀸𑀘𑀸𑀬𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑀸 𑀲𑀗𑁆𑀖𑀸𑀤𑀺𑀲𑁂𑀲𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑁄. 𑀢𑀣𑁂𑀯𑀸𑀢𑀺 𑀯𑀸𑀘𑀸𑀬 𑀯𑀸𑀘𑀸𑀬𑁂𑀯. 𑀯𑀤𑀦𑁆𑀢𑀲𑁆𑀲𑀸𑀢𑀺 𑀲𑀢𑁆𑀢𑀳𑀺𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀉𑀧𑀲𑀫𑁆𑀧𑀦𑁆𑀦𑀁 𑀲𑀫𑁆𑀫𑀼𑀔𑀸 𑀯𑀤𑀦𑁆𑀢𑀲𑁆𑀲. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀯𑀸𑀘𑀸𑀬 𑀯𑀸𑀘𑀸𑀬𑁂𑀯. 𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀁 𑀲𑀫𑁆𑀫𑀼𑀔𑀸 𑀯𑀤𑀦𑁆𑀢𑀲𑁆𑀲 𑀯𑀸𑀘𑀸𑀬 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀆𑀳 ‘‘𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸 𑀯𑀤𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀫𑁂𑀯𑀸’’𑀢𑀺. 𑀏𑀯𑀲𑀤𑁆𑀤𑁂𑀦 𑀤𑀼𑀓𑁆𑀓𑀝𑀁 𑀦𑀺𑀯𑀢𑁆𑀢𑀻𑀬𑀢𑀺. 𑀅𑀲𑀫𑁆𑀫𑀼𑀔𑀸 𑀲𑀢𑁆𑀢𑀳𑀺𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀯𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀲𑀢𑁆𑀢𑀯𑀺𑀥𑀫𑁆𑀧𑀺 𑀓𑀫𑁆𑀫𑀦𑁆𑀢𑀺 𑀢𑀚𑁆𑀚𑀦𑀻𑀬𑀁, 𑀦𑀺𑀬𑀲𑀁, 𑀧𑀩𑁆𑀩𑀸𑀚𑀦𑀻𑀬𑀁, 𑀧𑀝𑀺𑀲𑀸𑀭𑀡𑀻𑀬𑀁, 𑀢𑀺𑀯𑀺𑀥𑀜𑁆𑀘 𑀉𑀓𑁆𑀔𑁂𑀧𑀦𑀻𑀬𑀦𑁆𑀢𑀺 𑀲𑀢𑁆𑀢𑀯𑀺𑀥𑀫𑁆𑀧𑀺 𑀓𑀫𑁆𑀫𑀁.

𑀉𑀧𑁄𑀲𑀣𑀁 𑀯𑀸 𑀧𑀯𑀸𑀭𑀡𑀁 𑀯𑀸 𑀞𑀧𑁂𑀦𑁆𑀢𑀲𑁆𑀲 𑀘 𑀑𑀓𑀸𑀲𑀓𑀫𑁆𑀫𑀁 𑀦𑀢𑁆𑀣𑀻𑀢𑀺 𑀏𑀢𑁆𑀣 𑀉𑀧𑁄𑀲𑀣𑀢𑁄 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸 𑀞𑀧𑀺𑀢𑁄𑀧𑀺 𑀅𑀝𑁆𑀞𑀧𑀺𑀢𑁄 𑀳𑁄𑀢𑀺. 𑀔𑁂𑀢𑁆𑀢𑁂 𑀞𑀧𑀺𑀢𑁄 𑀧𑀦 𑀞𑀧𑀺𑀢𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀅𑀚𑁆𑀚𑀼𑀧𑁄𑀲𑀣𑁄 𑀧𑀦𑁆𑀦𑀭𑀲𑁄, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸’’𑀢𑀺 𑀏𑀢𑁆𑀣 𑀬𑀸𑀯 𑀭𑁂-𑀓𑀸𑀭𑀁 𑀪𑀡𑀢𑀺, 𑀢𑀸𑀯 𑀞𑀧𑁂𑀢𑀩𑁆𑀩𑁄, 𑀇𑀤𑀁 𑀔𑁂𑀢𑁆𑀢𑀁. 𑀬𑁆𑀬-𑀓𑀸𑀭𑁂 𑀧𑀦 𑀯𑀼𑀢𑁆𑀢𑁂 𑀞𑀧𑁂𑀦𑁆𑀢𑁂𑀦 𑀧𑀘𑁆𑀙𑀸 𑀞𑀧𑀺𑀢𑁄 𑀦𑀸𑀫 𑀳𑁄𑀢𑀺. ‘‘𑀲𑀼𑀡𑀸𑀢𑀼 𑀫𑁂’’𑀢𑀺 𑀅𑀦𑀸𑀭𑀤𑁆𑀥𑁂 𑀞𑀧𑁂𑀦𑁆𑀢𑁂𑀦 𑀧𑀼𑀭𑁂 𑀞𑀧𑀺𑀢𑁄 𑀳𑁄𑀢𑀺. 𑀧𑀯𑀸𑀭𑀡𑀸𑀝𑁆𑀞𑀧𑀦𑀁 𑀧𑀦 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀁, 𑀧𑀼𑀕𑁆𑀕𑀮𑀺𑀓𑀜𑁆𑀘𑀸𑀢𑀺 𑀤𑀼𑀯𑀺𑀥𑀁. 𑀢𑀢𑁆𑀣 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑁂 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄…𑀧𑁂… 𑀲𑀗𑁆𑀖𑁄 𑀢𑁂𑀯𑀸𑀘𑀺𑀓𑀁 𑀧𑀯𑀸𑀭𑁂𑀬𑁆𑀬𑀸’’𑀢𑀺 𑀲𑀼-𑀓𑀸𑀭𑀢𑁄 𑀬𑀸𑀯 𑀭𑁂-𑀓𑀸𑀭𑁄, 𑀢𑀸𑀯 𑀅𑀧𑀭𑀺𑀬𑁄𑀲𑀺𑀢𑀸𑀯 𑀳𑁄𑀢𑀺 𑀧𑀯𑀸𑀭𑀡𑀸, 𑀏𑀢𑁆𑀣𑀦𑁆𑀢𑀭𑁂 𑀏𑀓𑀧𑀤𑁂𑀧𑀺 𑀞𑀧𑁂𑀦𑁆𑀢𑁂𑀦 𑀞𑀧𑀺𑀢𑀸 𑀳𑁄𑀢𑀺 𑀧𑀯𑀸𑀭𑀡𑀸. 𑀬𑁆𑀬-𑀓𑀸𑀭𑁂 𑀧𑀦 𑀧𑀢𑁆𑀢𑁂 𑀧𑀭𑀺𑀬𑁄𑀲𑀺𑀢𑀸𑀯 𑀳𑁄𑀢𑀺, 𑀢𑀲𑁆𑀫𑀸 𑀢𑀢𑁄 𑀧𑀝𑁆𑀞𑀸𑀬 𑀞𑀧𑁂𑀦𑁆𑀢𑁂𑀦 𑀅𑀝𑁆𑀞𑀧𑀺𑀢𑀸 𑀳𑁄𑀢𑀺. 𑀧𑀼𑀕𑁆𑀕𑀮𑀺𑀓𑀝𑁆𑀞𑀧𑀦𑁂 𑀧𑀦 ‘‘𑀲𑀗𑁆𑀖𑀁, 𑀪𑀦𑁆𑀢𑁂, 𑀧𑀯𑀸𑀭𑁂𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀪𑀦𑁆𑀢𑁂 𑀲𑀗𑁆𑀖𑀁 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸…𑀧𑁂… 𑀧𑀲𑁆𑀲𑀦𑁆𑀢𑁄 𑀧𑀝𑀻’’𑀢𑀺 (𑀫𑀳𑀸𑀯. 𑁨𑁧𑁦) 𑀲𑀁-𑀓𑀸𑀭𑀢𑁄 𑀬𑀸𑀯 𑀅𑀬𑀁 𑀲𑀩𑁆𑀩𑀧𑀘𑁆𑀙𑀺𑀫𑁄 𑀝𑀺-𑀓𑀸𑀭𑁄, 𑀢𑀸𑀯 𑀅𑀧𑀭𑀺𑀬𑁄𑀲𑀺𑀢𑀸𑀯 𑀳𑁄𑀢𑀺 𑀧𑀯𑀸𑀭𑀡𑀸, 𑀏𑀢𑁆𑀣𑀦𑁆𑀢𑀭𑁂 𑀏𑀓𑀧𑀤𑁂𑀧𑀺 𑀞𑀧𑁂𑀦𑁆𑀢𑁂𑀦 𑀞𑀧𑀺𑀢𑀸 𑀳𑁄𑀢𑀺 𑀧𑀯𑀸𑀭𑀡𑀸. ‘‘𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀧𑀦 𑀧𑀭𑀺𑀬𑁄𑀲𑀺𑀢𑀸 𑀳𑁄𑀢𑀺, 𑀢𑀲𑁆𑀫𑀸 ‘‘𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀢𑀲𑁆𑀫𑀺𑀁 𑀧𑀤𑁂 𑀲𑀫𑁆𑀧𑀢𑁆𑀢𑁂 𑀞𑀧𑀺𑀢𑀸𑀧𑀺 𑀅𑀝𑁆𑀞𑀧𑀺𑀢𑀸 𑀳𑁄𑀢𑀺. 𑀏𑀲𑁂𑀯 𑀦𑀬𑁄 𑀤𑁆𑀯𑁂𑀯𑀸𑀘𑀺𑀓𑀏𑀓𑀯𑀸𑀘𑀺𑀓𑀲𑀫𑀸𑀦𑀯𑀲𑁆𑀲𑀺𑀓𑀸𑀲𑀼. 𑀏𑀢𑀸𑀲𑀼𑀧𑀺 𑀳𑀺 𑀝𑀺-𑀓𑀸𑀭𑀸𑀯𑀲𑀸𑀦𑀁𑀬𑁂𑀯 𑀞𑀧𑀦𑀓𑁆𑀔𑁂𑀢𑁆𑀢𑀦𑁆𑀢𑀺. 𑀢𑁂𑀦𑀸𑀳 ‘‘𑀞𑀧𑀦𑀓𑁆𑀔𑁂𑀢𑁆𑀢𑀁 𑀧𑀦 𑀚𑀸𑀦𑀺𑀢𑀩𑁆𑀩’’𑀦𑁆𑀢𑀺. 𑀑𑀲𑀝𑁂 𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀘𑁄𑀤𑀓𑁂𑀦 𑀅𑀢𑁆𑀢𑀦𑀸 𑀯𑀢𑁆𑀢𑀩𑁆𑀩𑁂 𑀲𑀗𑁆𑀖𑀫𑀚𑁆𑀛𑁂 𑀉𑀤𑀸𑀳𑀝𑁂. 𑀇𑀤𑀜𑁆𑀘 𑀇𑀤𑀜𑁆𑀘 𑀓𑀭𑁄𑀢𑀻𑀢𑀺 𑀧𑀸𑀡𑀸𑀢𑀺𑀧𑀸𑀢𑀁, 𑀅𑀤𑀺𑀦𑁆𑀦𑀸𑀤𑀸𑀦𑀜𑁆𑀘 𑀓𑀭𑁄𑀢𑀺, 𑀚𑀸𑀢𑀭𑀽𑀧𑀭𑀚𑀢𑀜𑁆𑀘 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀅𑀲𑀼𑀓𑁄 𑀘 𑀅𑀲𑀼𑀓𑁄 𑀘 𑀅𑀲𑁆𑀲𑀫𑀡𑁄, 𑀅𑀦𑀼𑀧𑀸𑀲𑀓𑁄𑀢𑀺 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑁂𑀦 𑀧𑀭𑀫𑁆𑀫𑀼𑀔𑀸 𑀯𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀲𑀫𑁆𑀫𑀼𑀔𑀸 𑀯𑀤𑀦𑁆𑀢𑀲𑁆𑀲 𑀧𑀦 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀢𑁂𑀦𑀸𑀳 ‘‘𑀲𑀘𑁂 𑀧𑀦 𑀑𑀤𑀺𑀲𑁆𑀲 𑀦𑀺𑀬𑀫𑁂𑀢𑁆𑀯𑀸’’𑀢𑀺𑀆𑀤𑀺. 𑀲𑀗𑁆𑀔𑁆𑀬𑀼𑀧𑀕𑀫𑀦𑀦𑁆𑀢𑀺 𑀯𑁄𑀳𑀸𑀭𑀽𑀧𑀕𑀫𑀦𑀁.

𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀅𑀜𑁆𑀜𑀪𑀸𑀕𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀜𑁆𑀜𑀪𑀸𑀕𑀲𑁆𑀲𑀸𑀢𑀺 𑀅𑀜𑁆𑀜𑀓𑁄𑀝𑁆𑀞𑀸𑀲𑀲𑁆𑀲, 𑀬𑀁 𑀘𑁄𑀤𑁂𑀢𑀼𑀓𑀸𑀫𑁄, 𑀢𑀲𑁆𑀲 𑀚𑀸𑀢𑀺𑀆𑀤𑀺𑀢𑁄 𑀅𑀜𑁆𑀜𑀲𑁆𑀲 𑀢𑀺𑀭𑀘𑁆𑀙𑀸𑀦𑀚𑀸𑀢𑀺𑀆𑀤𑀺𑀓𑁄𑀝𑁆𑀞𑀸𑀲𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀦𑁆𑀢𑀺 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁂𑀦 𑀙𑀕𑀮𑀓𑀸𑀤𑀺𑀁 𑀦𑀺𑀤𑁆𑀤𑀺𑀲𑀢𑀺, 𑀅𑀬𑀁 𑀙𑀕𑀮𑀓𑀸𑀤𑀺𑀓𑁄𑀢𑀺 𑀅𑀢𑁆𑀣𑁄, 𑀅𑀥𑀺𑀓𑀭𑀡𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀯𑀸 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀇𑀤𑀁 𑀙𑀕𑀮𑀓𑀸𑀤𑀺𑀲𑀗𑁆𑀔𑀸𑀢𑀁 𑀅𑀥𑀺𑀓𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀜𑁆𑀜𑀪𑀸𑀕𑁄 𑀯𑀸𑀢𑀺 𑀢𑀺𑀭𑀘𑁆𑀙𑀸𑀦𑀚𑀸𑀢𑀺𑀆𑀤𑀺𑀪𑁂𑀤𑁄 𑀅𑀜𑁆𑀜𑁄 𑀓𑁄𑀝𑁆𑀞𑀸𑀲𑁄 𑀯𑀸. 𑀅𑀲𑁆𑀲𑀸𑀢𑀺 𑀙𑀕𑀮𑀓𑀸𑀤𑀺𑀓𑀲𑁆𑀲. 𑀅𑀜𑁆𑀜𑀪𑀸𑀕𑀺𑀬𑀁 𑀙𑀕𑀮𑀓𑀸𑀤𑀺. 𑀏𑀢𑁆𑀣 𑀘 ‘‘𑀅𑀜𑁆𑀜𑀪𑀸𑀕𑀲𑀫𑁆𑀩𑀦𑁆𑀥𑀺 𑀅𑀜𑁆𑀜𑀪𑀸𑀕𑀺𑀬’’𑀦𑁆𑀢𑀺 𑀧𑀞𑀫𑀯𑀺𑀕𑁆𑀕𑀳𑀲𑁆𑀲 𑀅𑀢𑁆𑀣𑁄, ‘‘𑀅𑀜𑁆𑀜𑀪𑀸𑀕𑀯𑀦𑁆𑀢𑀁 𑀅𑀜𑁆𑀜𑀪𑀸𑀕𑀺𑀬’’𑀦𑁆𑀢𑀺 𑀤𑀼𑀢𑀺𑀬𑀯𑀺𑀕𑁆𑀕𑀳𑀲𑁆𑀲. 𑀞𑀧𑁂𑀢𑁆𑀯𑀸 𑀧𑀦 𑀢𑀺𑀭𑀘𑁆𑀙𑀸𑀦𑀚𑀸𑀢𑀺𑀆𑀤𑀺𑀓𑀁 𑀧𑀭𑀫𑀢𑁆𑀣𑀢𑁄 𑀯𑀺𑀲𑀼𑀁 𑀙𑀕𑀮𑀓𑀸𑀤𑀺𑀓𑁂 𑀅𑀲𑀢𑀺𑀧𑀺 ‘‘𑀧𑀝𑀺𑀫𑀸𑀬 𑀲𑀭𑀻𑀭’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀅𑀪𑁂𑀤𑁂𑀧𑀺 𑀪𑁂𑀤𑀓𑀧𑁆𑀧𑀦𑀸𑀬 𑀧𑀯𑀢𑁆𑀢𑀮𑁄𑀓𑀯𑁄𑀳𑀸𑀭𑀯𑀲𑁂𑀦 ‘‘𑀅𑀜𑁆𑀜𑀪𑀸𑀕𑀲𑁆𑀲 𑀇𑀤𑀁, 𑀅𑀜𑁆𑀜𑀪𑀸𑀕𑁄 𑀯𑀸 𑀅𑀲𑁆𑀲 𑀅𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀥𑀺𑀓𑀭𑀻𑀬𑀢𑀺 𑀏𑀢𑁆𑀣𑀸𑀢𑀺 𑀅𑀥𑀺𑀓𑀭𑀡𑀁. 𑀢𑁂𑀦𑀸𑀳 ‘‘𑀆𑀥𑀸𑀭𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀆𑀥𑀭𑀻𑀬𑀢𑀺 𑀅𑀲𑁆𑀫𑀺𑀦𑁆𑀢𑀺 𑀆𑀥𑀸𑀭𑁄, 𑀧𑀢𑀺𑀝𑁆𑀞𑀸𑀦𑀁. 𑀢𑁂𑀦𑀸𑀳 ‘‘𑀯𑀢𑁆𑀣𑀼 𑀅𑀥𑀺𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺.

𑀇𑀤𑀸𑀦𑀺 ‘‘𑀅𑀜𑁆𑀜𑀪𑀸𑀕𑀲𑁆𑀲 𑀇𑀤’’𑀦𑁆𑀢𑀺𑀆𑀤𑀺𑀦𑀸 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀓𑁂𑀯𑀮𑀁 𑀦𑀬𑀤𑀲𑁆𑀲𑀦𑀢𑁆𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀆𑀕𑀢𑀫𑁂𑀯 𑀕𑀳𑁂𑀢𑁆𑀯𑀸 𑀯𑀺𑀪𑀚𑀦𑁆𑀢𑁄 ‘‘𑀬𑁄 𑀳𑀺 𑀲𑁄’’𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀦𑀦𑀼 𑀅𑀦𑀸𑀕𑀢𑁂 𑀏𑀯𑀁 𑀘𑁄𑀤𑁂𑀦𑁆𑀢𑀸𑀦𑀁 𑀧𑀸𑀧𑀪𑀺𑀓𑁆𑀔𑀽𑀦𑀁 𑀮𑁂𑀲𑁄𑀓𑀸𑀲𑀧𑀺𑀤𑀳𑀦𑀢𑁆𑀣𑀁 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀦 𑀧𑀦 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸𑀦𑀁. 𑀢𑁂𑀲𑀜𑁆𑀳𑀺 𑀆𑀤𑀺𑀓𑀫𑁆𑀫𑀺𑀓𑀢𑁆𑀢𑀸 𑀅𑀦𑀸𑀧𑀢𑁆𑀢𑀺, 𑀢𑀲𑁆𑀫𑀸 𑀲𑀸𑀫𑀜𑁆𑀜𑁂𑀦 𑀅𑀢𑁆𑀣𑁄 𑀯𑀺𑀪𑀚𑀺𑀢𑀩𑁆𑀩𑁄. 𑀦 𑀧𑀦 ‘‘𑀬𑁄 𑀳𑀺 𑀲𑁄 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀯𑀺𑀲𑁂𑀲𑁂𑀦𑀸𑀢𑀺 𑀏𑀤𑀺𑀲𑀻 𑀘𑁄𑀤𑀦𑀸 𑀅𑀦𑀯𑀓𑀸𑀲𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀳𑀻𑀢𑀺 𑀓𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑁄, 𑀬𑀲𑁆𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀦𑁆𑀢𑀺 𑀅𑀢𑁆𑀣𑀲𑁆𑀲 𑀉𑀧𑁆𑀧𑀢𑁆𑀢𑀺 𑀅𑀢𑁆𑀣𑀼𑀧𑁆𑀧𑀢𑁆𑀢𑀺, 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀬𑁂𑀯 𑀅𑀝𑁆𑀞𑀼𑀧𑁆𑀧𑀢𑁆𑀢𑀺, 𑀢𑀲𑁆𑀲𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁, 𑀲𑀺𑀓𑁆𑀔𑀸𑀧𑀤𑀲𑁆𑀲 𑀦𑀺𑀤𑀸𑀦𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀙𑀕𑀮𑀓𑁄𑀢𑀺 𑀲𑁂𑀢𑀙𑀕𑀮𑀓𑁄. 𑀲𑁄𑀢𑀺 𑀙𑀕𑀮𑀓𑁄. 𑀇𑀫𑀲𑁆𑀲 𑀧𑀦 ‘‘𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑀲𑁆𑀲…𑀧𑁂… 𑀙𑀕𑀮𑀓𑀪𑀸𑀯𑀲𑁆𑀲 𑀘𑀸𑀢𑀺 ‘‘𑀢𑀺𑀭𑀘𑁆𑀙𑀸𑀦𑀚𑀸𑀢𑀺𑀬𑀸 𑀘𑁂𑀯 𑀙𑀕𑀮𑀓𑀪𑀸𑀯𑀲𑁆𑀲 𑀘𑀸’’𑀢𑀺 𑀲𑀗𑁆𑀔𑀸𑀢𑀲𑁆𑀲 𑀅𑀜𑁆𑀜𑀲𑁆𑀲 𑀪𑀸𑀕𑀲𑁆𑀲 𑀓𑁄𑀝𑁆𑀞𑀸𑀲𑀲𑁆𑀲, 𑀧𑀓𑁆𑀔𑀲𑁆𑀲𑀸𑀢𑀺 𑀅𑀢𑁆𑀣𑁄.

𑀓𑀼𑀢𑁄𑀬𑀫𑀜𑁆𑀜𑁄, 𑀬𑀢𑁄 ‘‘𑀅𑀜𑁆𑀜𑀲𑁆𑀲 𑀪𑀸𑀕𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑁆𑀯𑀸𑀬𑀁…𑀧𑁂… 𑀢𑀢𑁄’’𑀢𑀺. 𑀢𑀢𑁆𑀣 𑀫𑀦𑀼𑀲𑁆𑀲𑀚𑀸𑀢𑀺 𑀘𑁂𑀯 𑀪𑀺𑀓𑁆𑀔𑀼𑀪𑀸𑀯𑁄 𑀘𑀸𑀢𑀺 𑀬𑁄 𑀅𑀬𑀁 𑀪𑀸𑀕𑁄 𑀓𑁄𑀝𑁆𑀞𑀸𑀲𑁄 𑀧𑀓𑁆𑀔𑁄𑀢𑀺 𑀲𑀫𑁆𑀩𑀦𑁆𑀥𑁄, ‘‘𑀫𑀦𑀼𑀲𑁆𑀲𑀚𑀸𑀢𑀺 𑀘𑁂𑀯 𑀪𑀺𑀓𑁆𑀔𑀼𑀪𑀸𑀯𑁄 𑀘𑀸’’𑀢𑀺 𑀲𑀗𑁆𑀔𑀸𑀢𑁄 𑀬𑁄 𑀅𑀬𑀁 𑀪𑀸𑀕𑁄 𑀓𑁄𑀝𑁆𑀞𑀸𑀲𑁄 𑀧𑀓𑁆𑀔𑁄𑀢𑀺 𑀅𑀢𑁆𑀣𑁄. 𑀢𑀢𑁄𑀢𑀺 ‘‘𑀫𑀦𑀼𑀲𑁆𑀲𑀚𑀸𑀢𑀺 𑀘𑁂𑀯 𑀪𑀺𑀓𑁆𑀔𑀼𑀪𑀸𑀯𑁄 𑀘𑀸’’𑀢𑀺 𑀪𑀸𑀕𑀢𑁄. 𑀲𑁄 𑀯𑀸 𑀅𑀜𑁆𑀜𑀪𑀸𑀕𑁄𑀢𑀺 𑀬𑀣𑀸𑀯𑀼𑀢𑁆𑀢𑀢𑀺𑀭𑀘𑁆𑀙𑀸𑀦𑀚𑀸𑀢𑀺𑀙𑀕𑀮𑀓𑀪𑀸𑀯𑀲𑀗𑁆𑀔𑀸𑀢𑁄 𑀲𑁄 𑀅𑀜𑁆𑀜𑀪𑀸𑀕𑁄 𑀯𑀸. 𑀅𑀲𑁆𑀲𑀸𑀢𑀺 𑀙𑀕𑀮𑀓𑀲𑁆𑀲. 𑀅𑀢𑁆𑀣𑀻𑀢𑀺 𑀉𑀧𑀮𑀩𑁆𑀪𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀜𑁆𑀜𑀪𑀸𑀕𑀲𑁆𑀲 𑀙𑀕𑀮𑀓𑁄 𑀳𑁄𑀢𑀺, 𑀬𑀲𑁆𑀫𑀸 𑀘 𑀲𑁄 𑀯𑀸 𑀅𑀜𑁆𑀜𑀪𑀸𑀕𑁄 𑀅𑀲𑁆𑀲 𑀅𑀢𑁆𑀣𑀺, 𑀢𑀲𑁆𑀫𑀸. 𑀅𑀜𑁆𑀜𑀪𑀸𑀕𑀺𑀬𑀲𑀗𑁆𑀔𑁆𑀬𑀁 𑀮𑀪𑀢𑀻𑀢𑀺 𑀏𑀢𑁆𑀣 ‘‘𑀲𑁄 𑀬𑁆𑀯𑀸𑀬’’𑀦𑁆𑀢𑀺 𑀇𑀥 𑀲𑁄-𑀲𑀤𑁆𑀤𑀫𑁂𑀯 𑀆𑀦𑁂𑀢𑁆𑀯𑀸 𑀲𑁄 𑀅𑀜𑁆𑀜𑀪𑀸𑀕𑀺𑀬𑀲𑀗𑁆𑀔𑀁 𑀮𑀪𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁, ‘‘𑀲𑁄’’𑀢𑀺 𑀯𑀸 𑀧𑀸𑀞𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀲𑁄 𑀧𑀦 𑀅𑀥𑀺𑀓𑀭𑀡𑀲𑀤𑁆𑀤𑀢𑁄 𑀧𑀭𑀁 𑀤𑀝𑁆𑀞𑀩𑁆𑀩𑁄, ‘‘𑀅𑀥𑀺𑀓𑀭𑀡’’𑀦𑁆𑀢𑀺 𑀘 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀢𑁂𑀲𑀦𑁆𑀢𑀺 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸𑀦𑀁. 𑀇𑀫𑀁 𑀫𑀬𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀦𑀸𑀫 𑀓𑀭𑁄𑀫𑀸𑀢𑀺 𑀙𑀕𑀮𑀓𑀁 𑀅𑀚𑀺𑀓𑀸𑀬 𑀯𑀺𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀫𑀬𑀁, 𑀆𑀯𑀼𑀲𑁄, 𑀇𑀫𑀁 𑀙𑀕𑀮𑀓𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀦𑀸𑀫 𑀓𑀭𑁄𑀫𑀸’’𑀢𑀺 𑀯𑀤𑀦𑁆𑀢𑀸𑀦𑀁. 𑀦𑀸𑀫𑀓𑀭𑀡𑀲𑀜𑁆𑀜𑀸𑀬𑀸𑀢𑀺 𑀦𑀸𑀫𑀓𑀭𑀡𑀲𑀗𑁆𑀔𑀸𑀢𑀸𑀬 𑀲𑀜𑁆𑀜𑀸𑀬. 𑀏𑀢𑁆𑀣𑀸𑀧𑀺 ‘‘𑀬𑁄 𑀲𑁄’’𑀢𑀺𑀆𑀤𑀺𑀓𑀁 𑀆𑀦𑁂𑀢𑁆𑀯𑀸 𑀢𑀲𑁆𑀲𑀸 𑀦𑀸𑀫𑀓𑀭𑀡𑀲𑀜𑁆𑀜𑀸𑀬 𑀬𑁄 𑀲𑁄 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 ‘‘𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀦𑀸𑀫𑀸’’𑀢𑀺 𑀙𑀕𑀮𑀓𑁄 𑀯𑀼𑀢𑁆𑀢𑁄, 𑀲𑁄 𑀬𑀲𑁆𑀫𑀸 𑀆𑀥𑀸𑀭𑁄 𑀯𑀢𑁆𑀣𑀼 𑀅𑀥𑀺𑀝𑁆𑀞𑀸𑀦𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀇𑀤𑀸𑀦𑀺 𑀓𑀣𑀫𑁂𑀢𑀁 𑀯𑀺𑀜𑁆𑀜𑀸𑀬𑀢𑀺 ‘‘𑀅𑀥𑀺𑀓𑀭𑀡’’𑀦𑁆𑀢𑀺 𑀘𑁂𑀢𑁆𑀣 𑀆𑀥𑀸𑀭𑁄 𑀯𑁂𑀤𑀺𑀢𑀩𑁆𑀩𑁄, 𑀦 𑀯𑀺𑀯𑀸𑀤𑀸𑀥𑀺𑀓𑀭𑀡𑀸𑀤𑀻𑀲𑀼 𑀅𑀜𑁆𑀜𑀢𑀭𑀦𑁆𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀜𑁆𑀳𑀺 𑀲𑀦𑁆𑀥𑀸𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀦𑁆𑀢𑀺 𑀢𑀲𑁆𑀲𑀸 𑀦𑀸𑀫𑀓𑀭𑀡𑀲𑀜𑁆𑀜𑀸𑀬 𑀅𑀥𑀺𑀝𑁆𑀞𑀸𑀦𑀪𑀽𑀢𑀁 𑀙𑀕𑀮𑀓𑀁 𑀧𑀘𑁆𑀘𑀸𑀫𑀲𑀢𑀺. 𑀯𑀺𑀯𑀸𑀤𑀸𑀥𑀺𑀓𑀭𑀡𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀲𑀦𑁆𑀥𑀸𑀬 𑀦 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀓𑀸𑀭𑀡𑀁 𑀧𑀼𑀘𑁆𑀙𑀢𑀺 ‘‘𑀓𑀲𑁆𑀫𑀸’’𑀢𑀺. 𑀓𑀸𑀭𑀡𑀫𑀸𑀳 ‘‘𑀅𑀲𑀫𑁆𑀪𑀯𑀢𑁄’’𑀢𑀺. 𑀇𑀤𑀸𑀦𑀺 𑀢𑀫𑁂𑀯 𑀅𑀲𑀫𑁆𑀪𑀯𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀦 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦 𑀳𑀺 𑀉𑀧𑀸𑀤𑀺𑀬𑀺𑀁𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑀸𑀤𑀺𑀬𑀺𑀁𑀲𑀽𑀢𑀺 𑀕𑀡𑁆𑀳𑀺𑀁𑀲𑀼. 𑀓𑀺𑀁 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀫𑁆𑀧𑀺 𑀮𑁂𑀲𑁄 𑀅𑀢𑁆𑀣𑀺, 𑀬𑁂𑀦𑁂𑀯𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀦 𑀘 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦’’𑀦𑁆𑀢𑀺𑀆𑀤𑀺. 𑀇𑀤𑀸𑀦𑀺 𑀢𑀫𑁂𑀯 𑀲𑀫𑀢𑁆𑀣𑁂𑀢𑀼𑀁 ‘‘𑀚𑀸𑀢𑀺𑀮𑁂𑀲𑀸𑀤𑀬𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀚𑀸𑀢𑀺𑀬𑁂𑀯 𑀮𑁂𑀲𑁄 𑀚𑀸𑀢𑀺𑀮𑁂𑀲𑁄. 𑀆𑀤𑀺𑀲𑀤𑁆𑀤𑁂𑀦 𑀦𑀸𑀫𑀮𑁂𑀲𑀸𑀤𑀻𑀦𑀁 𑀕𑀳𑀡𑀁. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀮𑁂𑀲𑀸 𑀚𑀸𑀢𑀺𑀦𑀸𑀫𑀕𑁄𑀢𑁆𑀢-𑀮𑀺𑀗𑁆𑀕𑀸𑀧𑀢𑁆𑀢𑀺𑀯𑀲𑀸𑀧𑀺 𑀘;

𑀧𑀢𑁆𑀢𑀘𑀻𑀯𑀭𑀼𑀧𑀚𑁆𑀛𑀸𑀬𑀸-𑀘𑀭𑀺𑀬𑀸𑀯𑀸𑀲𑀯𑀲𑀸 𑀤𑀲𑀸’’𑀢𑀺.

𑀆𑀧𑀢𑁆𑀢𑀺𑀮𑁂𑀲𑁄 𑀦𑀸𑀫 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄 𑀳𑁄𑀢𑀺. 𑀢𑀜𑁆𑀘𑁂 𑀧𑀸𑀭𑀸𑀚𑀺𑀓𑁂𑀦 𑀘𑁄𑀤𑁂𑀢𑀺 ‘‘𑀅𑀲𑁆𑀲𑀫𑀡𑁄𑀲𑀺, 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀲𑀻’’𑀢𑀺, 𑀆𑀧𑀢𑁆𑀢𑀺 𑀯𑀸𑀘𑀸𑀬 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸𑀢𑀺 (𑀧𑀸𑀭𑀸. 𑁩𑁯𑁬) 𑀏𑀯𑀁 𑀆𑀧𑀢𑁆𑀢𑀺𑀮𑁂𑀲𑀫𑁆𑀧𑀺 𑀧𑀼𑀕𑁆𑀕𑀮𑀲𑁆𑀫𑀺𑀁𑀬𑁂𑀯 𑀆𑀭𑁄𑀧𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 ‘‘𑀧𑀼𑀕𑁆𑀕𑀮𑀸𑀦𑀁𑀬𑁂𑀯 𑀮𑁂𑀲𑀸 𑀯𑀼𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑀜𑁆𑀘 ‘‘𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄’’𑀢𑀺 𑀦𑀸𑀫𑀦𑁆𑀢𑀺 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑁂𑀳𑀺 𑀙𑀕𑀮𑀓𑀲𑁆𑀲 𑀓𑀢𑀁 𑀢𑀁 ‘‘𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄’’𑀢𑀺 𑀦𑀸𑀫𑀜𑁆𑀘. 𑀏𑀯𑀁 𑀅𑀲𑀫𑁆𑀪𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀇𑀫𑀺𑀦𑀸𑀯 𑀧𑀲𑀗𑁆𑀕𑁂𑀦 𑀤𑁂𑀲𑀮𑁂𑀲𑀲𑀤𑁆𑀤𑀸𑀦𑀁 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀢𑀼𑀁 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀤𑁆𑀯𑀻𑀲𑀼 𑀤𑁂𑀲𑀮𑁂𑀲𑁂𑀲𑀼. 𑀤𑁂𑀲𑁄 𑀦𑀸𑀫 𑀚𑀸𑀢𑀺𑀆𑀤𑀺𑀪𑁂𑀤𑁄 𑀯𑁄𑀳𑀸𑀭𑁄. 𑀢𑁂𑀦𑀸𑀳 ‘‘𑀚𑀸𑀢𑀺𑀆𑀤𑀻𑀲𑀽’’𑀢𑀺𑀆𑀤𑀺. 𑀅𑀜𑁆𑀜𑀫𑁆𑀧𑀺 𑀯𑀢𑁆𑀣𑀼𑀦𑁆𑀢𑀺 𑀬𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑀁, 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀫𑁆𑀧𑀺 𑀯𑀢𑁆𑀣𑀼𑀁. 𑀓𑀣𑀁 𑀲𑀺𑀮𑀺𑀲𑁆𑀲𑀢𑀻𑀢𑀺 𑀆𑀳 ‘‘𑀯𑁄𑀳𑀸𑀭𑀫𑀢𑁆𑀢𑁂𑀦𑁂𑀯𑀸’’𑀢𑀺𑀆𑀤𑀺, 𑀯𑁄𑀳𑀸𑀭𑀫𑀢𑁆𑀢𑁂𑀦𑁂𑀯, 𑀦 𑀢𑀼 𑀅𑀢𑁆𑀣𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀈𑀲𑀓𑀁 𑀅𑀮𑁆𑀮𑀻𑀬𑀢𑀻’’𑀢𑀺 𑀇𑀫𑀺𑀦𑀸 ‘‘𑀮𑁂𑀲𑁄’’𑀢𑀺 𑀮𑀺𑀲 𑀅𑀮𑁆𑀮𑀻𑀪𑀸𑀯𑁂𑀢𑀺 𑀇𑀫𑀲𑁆𑀲 𑀭𑀽𑀧𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀓𑀺𑀜𑁆𑀘𑀸𑀧𑀺 𑀤𑁂𑀲𑀮𑁂𑀲𑀸𑀦𑀁 𑀯𑀼𑀢𑁆𑀢𑀦𑀬𑁂𑀦 𑀩𑁆𑀬𑀜𑁆𑀚𑀦𑀢𑁄 𑀦𑀸𑀦𑀸𑀓𑀭𑀡𑀁 𑀅𑀢𑁆𑀣𑀺, 𑀅𑀢𑁆𑀣𑀢𑁄 𑀧𑀦 𑀦𑀢𑁆𑀣𑀻𑀢𑀺 𑀆𑀳 ‘‘𑀚𑀸𑀢𑀺𑀆𑀤𑀻𑀦𑀁𑀬𑁂𑀯 𑀅𑀜𑁆𑀜𑀢𑀭𑀓𑁄𑀝𑁆𑀞𑀸𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺.

𑀬𑀤𑀺 𑀧𑀦 𑀦𑀸𑀫𑀓𑀭𑀡𑀲𑀜𑁆𑀜𑀸𑀬 𑀆𑀥𑀸𑀭𑀪𑀽𑀢𑀁 𑀙𑀕𑀮𑀓𑀁 𑀲𑀦𑁆𑀥𑀸𑀬 ‘‘𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁, 𑀅𑀣 𑀓𑀲𑁆𑀫𑀸 𑀧𑀤𑀪𑀸𑀚𑀦𑁂 𑀢𑀁 𑀅𑀯𑀺𑀪𑀚𑀺𑀢𑁆𑀯𑀸 ‘‘𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲𑀸𑀢𑀺 𑀆𑀧𑀢𑁆𑀢𑀜𑁆𑀜𑀪𑀸𑀕𑀺𑀬𑀁 𑀯𑀸 𑀳𑁄𑀢𑀺 𑀅𑀥𑀺𑀓𑀭𑀡𑀜𑁆𑀜𑀪𑀸𑀕𑀺𑀬𑀁 𑀯𑀸’’𑀢𑀺𑀆𑀤𑀺 (𑀧𑀸𑀭𑀸. 𑁩𑁯𑁩) 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀧𑀤𑀪𑀸𑀚𑀦𑁂 𑀧𑀦𑀸’’𑀢𑀺𑀆𑀤𑀺. 𑀢𑀦𑁆𑀢𑀺 𑀆𑀥𑀸𑀭𑀲𑀗𑁆𑀔𑀸𑀢𑀁 𑀅𑀥𑀺𑀓𑀭𑀡𑀁. 𑀆𑀯𑀺𑀪𑀽𑀢𑀁 𑀧𑀸𑀓𑀝𑀁. 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦𑀸𑀢𑀺 𑀢𑁂𑀦 𑀯𑀢𑁆𑀢𑀩𑁆𑀩𑀅𑀢𑁆𑀣𑀸𑀦𑀁 𑀉𑀤𑁆𑀥𑀭𑀡𑀯𑀲𑁂𑀦. 𑀦𑀦𑀼 𑀘 ‘‘𑀅𑀢𑁆𑀣𑀫𑀢𑁆𑀢𑀁 𑀧𑀢𑀺 𑀲𑀤𑁆𑀤𑀸 𑀅𑀪𑀺𑀦𑀺𑀯𑀺𑀲𑀦𑁆𑀢𑀻’’𑀢𑀺 𑀦 𑀏𑀓𑁂𑀦 𑀲𑀤𑁆𑀤𑁂𑀦 𑀅𑀦𑁂𑀓𑀢𑁆𑀣𑀸 𑀅𑀪𑀺𑀥𑀻𑀬𑀦𑁆𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁 𑀲𑀤𑁆𑀤𑀯𑀺𑀲𑁂𑀲𑁂 𑀅𑀧𑁂𑀓𑁆𑀔𑀺𑀢𑁂, 𑀢𑁂𑀲𑀁 𑀢𑁂𑀲𑀁 𑀧𑀦 𑀅𑀢𑁆𑀣𑀸𑀦𑀁 𑀅𑀥𑀺𑀓𑀭𑀡𑀲𑀤𑁆𑀤𑀯𑀘𑀦𑀻𑀬𑀢𑀸𑀲𑀸𑀫𑀜𑁆𑀜𑀁 𑀉𑀧𑀸𑀤𑀸𑀬 𑀯𑀼𑀘𑁆𑀘𑀫𑀸𑀦𑁄 𑀅𑀬𑀁 𑀯𑀺𑀘𑀸𑀭𑁄 𑀅𑀥𑀺𑀓𑀭𑀡𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁄𑀢𑀺 𑀯𑀼𑀢𑁆𑀢𑁄. 𑀢𑁂𑀦𑁂𑀯𑀸𑀳 ‘‘𑀅𑀥𑀺𑀓𑀭𑀡𑀦𑁆𑀢𑀺 𑀯𑀘𑀦𑀲𑀸𑀫𑀜𑁆𑀜𑀢𑁄 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀧𑀯𑀢𑁆𑀢𑀸𑀦𑀺 𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀻’’𑀢𑀺. 𑀅𑀜𑁆𑀜𑀪𑀸𑀕𑀺𑀬𑀢𑀸𑀢𑀺 𑀅𑀜𑁆𑀜𑀧𑀓𑁆𑀔𑀺𑀬𑀢𑀸. 𑀢𑀩𑁆𑀪𑀸𑀕𑀺𑀬𑀢𑀸𑀢𑀺 𑀢𑀧𑁆𑀧𑀓𑁆𑀔𑀺𑀬𑀢𑀸. 𑀅𑀧𑀸𑀓𑀝𑀸 𑀧𑀤𑀪𑀸𑀚𑀦𑀢𑁄 𑀅𑀜𑁆𑀜𑀢𑁆𑀭 𑀤𑀲𑁆𑀲𑀺𑀢𑀝𑁆𑀞𑀸𑀦𑀸𑀪𑀸𑀯𑀢𑁄. 𑀅𑀯𑀲𑀸𑀦𑁂 𑀆𑀧𑀢𑁆𑀢𑀜𑁆𑀜𑀪𑀸𑀕𑀺𑀬𑁂𑀦 𑀘𑁄𑀤𑀦𑀜𑁆𑀘𑀸𑀢𑀺 ‘‘𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄 𑀳𑁄𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁂 𑀲𑀗𑁆𑀖𑀸𑀤𑀺𑀲𑁂𑀲𑀤𑀺𑀝𑁆𑀞𑀺 𑀳𑁄𑀢𑀺, 𑀢𑀜𑁆𑀘𑁂 𑀧𑀸𑀭𑀸𑀚𑀺𑀓𑁂𑀦 𑀘𑁄𑀤𑁂𑀢𑀻’’𑀢𑀺𑀆𑀤𑀺𑀘𑁄𑀤𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀥𑀺𑀓𑀭𑀡𑀜𑁆𑀜𑀪𑀸𑀕𑀺𑀬’’𑀦𑁆𑀢𑀺. 𑀏𑀓𑀫𑁂𑀓𑀜𑁆𑀳𑀺 𑀅𑀥𑀺𑀓𑀭𑀡𑀁 𑀇𑀢𑀭𑁂𑀲𑀁 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀅𑀜𑁆𑀜𑀪𑀸𑀕𑀺𑀬𑀁 𑀅𑀜𑁆𑀜𑀧𑀓𑁆𑀔𑀺𑀬𑀁 𑀅𑀜𑁆𑀜𑀓𑁄𑀝𑁆𑀞𑀸𑀲𑀺𑀬𑀁 𑀳𑁄𑀢𑀺 𑀯𑀢𑁆𑀣𑀼𑀯𑀺𑀲𑀪𑀸𑀕𑀢𑁆𑀢𑀸. 𑀆𑀤𑀺𑀲𑀤𑁆𑀤𑁂𑀦 ‘‘𑀓𑀣𑀁 𑀅𑀥𑀺𑀓𑀭𑀡𑀁 𑀅𑀥𑀺𑀓𑀭𑀡𑀲𑁆𑀲 𑀅𑀜𑁆𑀜𑀪𑀸𑀕𑀺𑀬’’𑀦𑁆𑀢𑀺𑀆𑀤𑀺𑀓𑁄 𑀧𑀤𑀯𑀺𑀪𑀸𑀕𑁄 𑀲𑀗𑁆𑀕𑀳𑀺𑀢𑁄.

𑀓𑀺𑀜𑁆𑀘𑀺 𑀤𑁂𑀲𑀁 𑀮𑁂𑀲𑀫𑀢𑁆𑀢𑀁 𑀉𑀧𑀸𑀤𑀸𑀬𑀸𑀢𑀺 𑀏𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀲𑁆𑀲𑀸𑀧𑀺 𑀅𑀲𑀫𑁆𑀪𑀯𑀤𑀲𑁆𑀲𑀦𑀧𑁆𑀧𑀲𑀗𑁆𑀕𑁂𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀢𑀸 ‘‘𑀲𑁂𑀲𑀸 𑀯𑀺𑀦𑀺𑀘𑁆𑀙𑀬𑀓𑀣𑀸 𑀅𑀝𑁆𑀞𑀫𑁂 𑀯𑀼𑀢𑁆𑀢𑀲𑀤𑀺𑀲𑀸𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑁂𑀲𑀸 𑀯𑀺𑀦𑀺𑀘𑁆𑀙𑀬𑀓𑀣𑀸𑀢𑀺 ‘‘𑀧𑀸𑀭𑀸𑀚𑀺𑀓𑁂𑀦𑀸𑀢𑀺 𑀪𑀺𑀓𑁆𑀔𑀼𑀦𑁄 𑀅𑀦𑀼𑀭𑀽𑀧𑁂𑀲𑀼 𑀏𑀓𑀽𑀦𑀯𑀺𑀲𑀢𑀺𑀬𑀸 𑀅𑀜𑁆𑀜𑀢𑀭𑁂𑀦𑀸’’𑀢𑀺𑀆𑀤𑀺𑀓𑀸 (𑀓𑀗𑁆𑀔𑀸. 𑀅𑀝𑁆𑀞. 𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀺𑀦𑀺𑀘𑁆𑀙𑀬𑀓𑀣𑀸. 𑀯𑀼𑀢𑁆𑀢𑀲𑀤𑀺𑀲𑀸𑀬𑁂𑀯𑀸𑀢𑀺 𑀏𑀢𑁆𑀣 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀬𑀸 𑀯𑀢𑁆𑀢𑀩𑁆𑀩𑀸, 𑀢𑁂𑀦 𑀲𑀺𑀓𑁆𑀔𑀸𑀧𑀤𑁂𑀦 𑀲𑀸𑀥𑀸𑀭𑀡𑀪𑀽𑀢𑀸 𑀲𑀸 𑀯𑀼𑀢𑁆𑀢𑀲𑀤𑀺𑀲𑀸𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀦 𑀅𑀲𑀸𑀥𑀸𑀭𑀡𑀪𑀽𑀢𑀸 𑀅𑀧𑀼𑀩𑁆𑀩𑀯𑀡𑁆𑀡𑀦𑀸𑀬 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀅𑀬𑀁 𑀧𑀦𑀸’’𑀢𑀺𑀆𑀤𑀺. 𑀧𑀼𑀭𑀺𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂𑀧𑀺 𑀢𑀣𑀸𑀲𑀜𑁆𑀜𑀺𑀦𑁄 𑀅𑀦𑀸𑀧𑀢𑁆𑀢𑀺𑀓𑀢𑁆𑀢𑀸 ‘‘𑀇𑀥 𑀘𑀸’’𑀢𑀺 𑀯𑀼𑀢𑁆𑀢𑀁. 𑀢𑀣𑀸𑀲𑀜𑁆𑀜𑀺𑀦𑁄𑀧𑀻𑀢𑀺 ‘‘𑀧𑀸𑀭𑀸𑀚𑀺𑀓𑀁𑀬𑁂𑀯 𑀅𑀬𑀁 𑀆𑀧𑀦𑁆𑀦𑁄’’𑀢𑀺 𑀏𑀯𑀁𑀲𑀜𑁆𑀜𑀺𑀦𑁄𑀧𑀺. 𑀇𑀢𑀺𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄 𑀯𑀸 𑀧𑀓𑀸𑀭𑀢𑁆𑀣𑁄 𑀯𑀸. 𑀢𑁂𑀦 𑀓𑁂𑀦𑀘𑀺 𑀪𑀺𑀓𑁆𑀔𑀼𑀦𑀸 𑀅𑀜𑁆𑀜𑁄 𑀓𑁄𑀘𑀺 𑀔𑀢𑁆𑀢𑀺𑀬𑀚𑀸𑀢𑀺𑀓𑁄 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄 𑀳𑁄𑀢𑀺, 𑀅𑀣 𑀲𑁄 𑀅𑀜𑁆𑀜𑀁 𑀅𑀢𑁆𑀢𑀦𑁄 𑀯𑁂𑀭𑀺𑀁 𑀔𑀢𑁆𑀢𑀺𑀬𑀚𑀸𑀢𑀺𑀓𑀁 𑀪𑀺𑀓𑁆𑀔𑀼𑀁 𑀧𑀲𑁆𑀲𑀺𑀢𑁆𑀯𑀸 𑀢𑀁 𑀔𑀢𑁆𑀢𑀺𑀬𑀚𑀸𑀢𑀺𑀮𑁂𑀲𑀁 𑀕𑀳𑁂𑀢𑁆𑀯𑀸 𑀏𑀯𑀁 𑀘𑁄𑀤𑁂𑀢𑀺 ‘‘𑀔𑀢𑁆𑀢𑀺𑀬𑁄 𑀫𑀬𑀸 𑀤𑀺𑀝𑁆𑀞𑁄 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄, 𑀢𑁆𑀯𑀁 𑀔𑀢𑁆𑀢𑀺𑀬𑁄 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄𑀲𑀺, 𑀅𑀣 𑀯𑀸 𑀢𑁆𑀯𑀁 𑀔𑁄 𑀔𑀢𑁆𑀢𑀺𑀬𑁄, 𑀦 𑀅𑀜𑁆𑀜𑁄, 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄𑀲𑀺, 𑀅𑀲𑁆𑀲𑀫𑀡𑁄𑀲𑀺, 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀲𑀺, 𑀦𑀢𑁆𑀣𑀺 𑀢𑀬𑀸 𑀲𑀤𑁆𑀥𑀺𑀁 𑀉𑀧𑁄𑀲𑀣𑁄 𑀯𑀸 𑀧𑀯𑀸𑀭𑀡𑀸 𑀯𑀸 𑀲𑀗𑁆𑀖𑀓𑀫𑁆𑀫𑀁 𑀯𑀸’’𑀢𑀺, 𑀆𑀧𑀢𑁆𑀢𑀺 𑀯𑀸𑀘𑀸𑀬 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀏𑀢𑁆𑀣 𑀘 𑀢𑁂𑀲𑀁 𑀔𑀢𑁆𑀢𑀺𑀬𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀲𑀤𑀺𑀲𑀲𑁆𑀲 𑀢𑀲𑁆𑀲 𑀢𑀲𑁆𑀲 𑀤𑀻𑀖𑀸𑀤𑀺𑀦𑁄 𑀯𑀸 𑀤𑀺𑀝𑁆𑀞𑀸𑀤𑀺𑀦𑁄 𑀯𑀸 𑀯𑀲𑁂𑀦 𑀅𑀜𑁆𑀜𑀪𑀸𑀕𑀺𑀬𑀢𑀸, 𑀔𑀢𑁆𑀢𑀺𑀬𑀚𑀸𑀢𑀺𑀧𑀜𑁆𑀜𑀢𑁆𑀢𑀺𑀬𑀸 𑀆𑀥𑀸𑀭𑀯𑀲𑁂𑀦 𑀅𑀥𑀺𑀓𑀭𑀡𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀏𑀲 𑀦𑀬𑁄 𑀦𑀸𑀫𑀮𑁂𑀲𑀸𑀤𑀻𑀲𑀼𑀧𑀺.

𑀆𑀧𑀢𑁆𑀢𑀺𑀮𑁂𑀲𑁂 𑀧𑀦 𑀓𑁂𑀦𑀘𑀺 𑀪𑀺𑀓𑁆𑀔𑀼𑀦𑀸 𑀓𑁄𑀘𑀺 𑀪𑀺𑀓𑁆𑀔𑀼 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄 𑀳𑁄𑀢𑀺, 𑀲𑁄 𑀘𑁂𑀢𑀁 𑀪𑀺𑀓𑁆𑀔𑀼𑀁 𑀧𑀸𑀭𑀸𑀚𑀺𑀓𑁂𑀦 𑀘𑁄𑀤𑁂𑀢𑀺, 𑀆𑀧𑀢𑁆𑀢𑀺 𑀯𑀸𑀘𑀸𑀬 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀬𑀤𑀺 𑀏𑀯𑀁 𑀓𑀣𑀁 𑀅𑀜𑁆𑀜𑀪𑀸𑀕𑀺𑀬𑀁 𑀅𑀥𑀺𑀓𑀭𑀡𑀁 𑀳𑁄𑀢𑀻𑀢𑀺? 𑀬𑀜𑁆𑀳𑀺 𑀲𑁄 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄, 𑀢𑀁 𑀧𑀸𑀭𑀸𑀚𑀺𑀓𑀲𑁆𑀲 𑀅𑀜𑁆𑀜𑀪𑀸𑀕𑀺𑀬𑀁 𑀅𑀥𑀺𑀓𑀭𑀡𑀁, 𑀢𑀲𑁆𑀲 𑀧𑀦 𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀮𑁂𑀲𑁄 𑀦𑀸𑀫. 𑀬𑁄 𑀲𑁄 𑀲𑀩𑁆𑀩𑀔𑀢𑁆𑀢𑀺𑀬𑀸𑀦𑀁 𑀲𑀸𑀥𑀸𑀭𑀡𑁄 𑀔𑀢𑁆𑀢𑀺𑀬𑀪𑀸𑀯𑁄 𑀯𑀺𑀬 𑀲𑀩𑁆𑀩𑀸𑀧𑀢𑁆𑀢𑀻𑀦𑀁 𑀲𑀸𑀥𑀸𑀭𑀡𑁄 𑀆𑀧𑀢𑁆𑀢𑀺𑀪𑀸𑀯𑁄. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 ‘‘𑀓𑁂𑀦𑀘𑀺 𑀪𑀺𑀓𑁆𑀔𑀼𑀦𑀸 𑀓𑁄𑀘𑀺 𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄 𑀳𑁄𑀢𑀻’’𑀢𑀺𑀆𑀤𑀺𑀓𑀁 𑀯𑀺𑀲𑁂𑀲𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀅𑀜𑁆𑀜𑀪𑀸𑀕𑀺𑀬𑀲𑀺𑀓𑁆𑀔𑀁 𑀬𑁄, 𑀦𑁂𑀯 𑀲𑀺𑀓𑁆𑀔𑀢𑀺 𑀬𑀼𑀢𑁆𑀢𑀺𑀢𑁄;

𑀕𑀘𑁆𑀙𑁂 𑀯𑀺𑀦𑀬𑀯𑀺𑀜𑁆𑀜𑀽𑀳𑀺, 𑀅𑀜𑁆𑀜𑀪𑀸𑀕𑀺𑀬𑀢𑀁𑀯 𑀲𑁄. (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁪𑁦𑁮);

𑀅𑀜𑁆𑀜𑀪𑀸𑀕𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀳𑀺𑀢𑀲𑁆𑀲𑀸𑀢𑀺 𑀓𑀸𑀬𑀘𑀺𑀢𑁆𑀢𑁂𑀳𑀺 𑀏𑀓𑀻𑀪𑀽𑀢𑀲𑁆𑀲. 𑀢𑁂𑀦𑀸𑀳 ‘‘𑀘𑀺𑀢𑁆𑀢𑁂𑀦 𑀘 𑀲𑀭𑀻𑀭𑁂𑀦 𑀘 𑀅𑀯𑀺𑀬𑀼𑀢𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄’’𑀢𑀺. 𑀅𑀲𑁆𑀲𑀸𑀢𑀺 ‘‘𑀲𑀫𑀕𑁆𑀕𑀲𑁆𑀲𑀸’’𑀢𑀺 𑀧𑀤𑀲𑁆𑀲. 𑀲𑀫𑀸𑀦𑀲𑀁𑀯𑀸𑀲𑀓𑁄𑀢𑀺 𑀲𑀫𑀸𑀦𑁄 𑀏𑀓𑀽𑀧𑁄𑀲𑀣𑀸𑀤𑀺𑀪𑁂𑀤𑁄 𑀲𑀁𑀯𑀸𑀲𑁄 𑀅𑀲𑁆𑀲𑀸𑀢𑀺 𑀲𑀫𑀸𑀦𑀲𑀁𑀯𑀸𑀲𑀓𑁄, 𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑁂𑀦 𑀯𑀸 𑀓𑀫𑁆𑀫𑀦𑀸𑀦𑀸𑀲𑀁𑀯𑀸𑀲𑀓𑁂𑀦 𑀯𑀸 𑀯𑀺𑀭𑀳𑀺𑀢𑁄. 𑀓𑀸𑀬𑀲𑀸𑀫𑀕𑁆𑀕𑀺𑀤𑀸𑀦𑀢𑁄𑀢𑀺 𑀓𑀸𑀬𑁂𑀦, 𑀓𑀸𑀬𑀲𑁆𑀲 𑀯𑀸 𑀲𑀸𑀫𑀕𑁆𑀕𑀺𑀬𑀸 𑀲𑀳𑀺𑀢𑀪𑀸𑀯𑀲𑁆𑀲 𑀤𑀸𑀦𑀢𑁄, 𑀢𑁂𑀲𑀼 𑀢𑁂𑀲𑀼 𑀲𑀗𑁆𑀖𑀓𑀫𑁆𑀫𑁂𑀲𑀼 𑀳𑀢𑁆𑀣𑀧𑀸𑀲𑀽𑀧𑀕𑀫𑀦𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀣𑀁 𑀦𑀸𑀫𑀸𑀬𑀁 𑀪𑀺𑀚𑁆𑀚𑁂𑀬𑁆𑀬𑀸𑀢𑀺 𑀅𑀬𑀁 𑀲𑀗𑁆𑀖𑁄 𑀓𑁂𑀦 𑀦𑀼 𑀔𑁄 𑀉𑀧𑀸𑀬𑁂𑀦 𑀯𑀕𑁆𑀕𑁄 𑀪𑀯𑁂𑀬𑁆𑀬. 𑀯𑀸𑀬𑀸𑀫𑁂𑀬𑁆𑀬𑀸𑀢𑀺 𑀉𑀲𑁆𑀲𑀸𑀳𑀁 𑀓𑀭𑁂𑀬𑁆𑀬, 𑀧𑀓𑁆𑀔𑀁 𑀧𑀭𑀺𑀬𑁂𑀲𑁂𑀬𑁆𑀬, 𑀕𑀡𑀁 𑀩𑀦𑁆𑀥𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀢𑁆𑀢𑀦𑁄 𑀨𑀮𑀁 𑀓𑀭𑁄𑀢𑀻𑀢𑀺 𑀓𑀭𑀡𑀁, 𑀬𑀁 𑀓𑀺𑀜𑁆𑀘𑀺 𑀓𑀸𑀭𑀡𑀁, 𑀅𑀥𑀺𑀓𑀁 𑀓𑀭𑀡𑀦𑁆𑀢𑀺 𑀅𑀥𑀺𑀓𑀭𑀡𑀁, 𑀯𑀺𑀲𑁂𑀲𑀓𑀸𑀭𑀡𑀁, 𑀯𑀺𑀲𑁂𑀲𑀓𑀸𑀭𑀡𑀜𑁆𑀘 𑀲𑀗𑁆𑀖𑀪𑁂𑀤𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 ‘‘𑀪𑁂𑀤𑀦𑀲𑁆𑀲𑀸’’𑀢𑀺𑀆𑀤𑀺. 𑀪𑁂𑀤𑀓𑀭𑀯𑀢𑁆𑀣𑀼𑀯𑀲𑁂𑀦 𑀅𑀝𑁆𑀞𑀸𑀭𑀲𑀯𑀺𑀥𑀦𑁆𑀢𑀺 𑁋

‘‘𑀇𑀥𑀼𑀧𑀸𑀮𑀺 𑀪𑀺𑀓𑁆𑀔𑀽 𑀅𑀥𑀫𑁆𑀫𑀁 ‘𑀥𑀫𑁆𑀫𑁄’𑀢𑀺 𑀤𑀻𑀧𑁂𑀦𑁆𑀢𑀺, 𑀥𑀫𑁆𑀫𑀁 ‘𑀅𑀥𑀫𑁆𑀫𑁄’𑀢𑀺 𑀤𑀻𑀧𑁂𑀦𑁆𑀢𑀺. 𑀅𑀯𑀺𑀦𑀬𑀁 ‘𑀯𑀺𑀦𑀬𑁄’𑀢𑀺 𑀤𑀻𑀧𑁂𑀦𑁆𑀢𑀺, 𑀯𑀺𑀦𑀬𑀁 ‘𑀅𑀯𑀺𑀦𑀬𑁄’𑀢𑀺 𑀤𑀻𑀧𑁂𑀦𑁆𑀢𑀺. 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 ‘𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸’𑀢𑀺 𑀤𑀻𑀧𑁂𑀦𑁆𑀢𑀺, 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 ‘𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸’𑀢𑀺 𑀤𑀻𑀧𑁂𑀦𑁆𑀢𑀺. 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 ‘𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸’𑀢𑀺 𑀤𑀻𑀧𑁂𑀦𑁆𑀢𑀺, 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 ‘𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸’𑀢𑀺 𑀤𑀻𑀧𑁂𑀦𑁆𑀢𑀺. 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 ‘𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸’𑀢𑀺 𑀤𑀻𑀧𑁂𑀦𑁆𑀢𑀺, 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 ‘𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸’𑀢𑀺 𑀤𑀻𑀧𑁂𑀦𑁆𑀢𑀺. 𑀅𑀦𑀸𑀧𑀢𑁆𑀢𑀺𑀁 ‘𑀆𑀧𑀢𑁆𑀢𑀻’𑀢𑀺 𑀤𑀻𑀧𑁂𑀦𑁆𑀢𑀺, 𑀆𑀧𑀢𑁆𑀢𑀺𑀁 ‘𑀅𑀦𑀸𑀧𑀢𑁆𑀢𑀻’𑀢𑀺 𑀤𑀻𑀧𑁂𑀦𑁆𑀢𑀺. 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 ‘𑀕𑀭𑀼𑀓𑀸 𑀆𑀧𑀢𑁆𑀢𑀻’𑀢𑀺 𑀤𑀻𑀧𑁂𑀦𑁆𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 ‘𑀮𑀳𑀼𑀓𑀸 𑀆𑀧𑀢𑁆𑀢𑀻’𑀢𑀺 𑀤𑀻𑀧𑁂𑀦𑁆𑀢𑀺. 𑀲𑀸𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 ‘𑀅𑀦𑀯𑀲𑁂𑀲𑀸 𑀆𑀧𑀢𑁆𑀢𑀻’𑀢𑀺 𑀤𑀻𑀧𑁂𑀦𑁆𑀢𑀺, 𑀅𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 ‘𑀲𑀸𑀯𑀲𑁂𑀲𑀸 𑀆𑀧𑀢𑁆𑀢𑀻’𑀢𑀺 𑀤𑀻𑀧𑁂𑀦𑁆𑀢𑀺. 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 ‘𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻’𑀢𑀺 𑀤𑀻𑀧𑁂𑀦𑁆𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 ‘𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻’𑀢𑀺 𑀤𑀻𑀧𑁂𑀦𑁆𑀢𑀻’’𑀢𑀺 (𑀘𑀽𑀴𑀯. 𑁩𑁫𑁨) 𑁋

𑀏𑀯𑀁 𑀓𑀫𑁆𑀫𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀸𑀦𑀁 𑀅𑀝𑁆𑀞𑀸𑀭𑀲𑀦𑁆𑀦𑀁 𑀪𑁂𑀤𑀓𑀭𑀡𑀸𑀦𑀁 𑀯𑀲𑁂𑀦 𑀅𑀝𑁆𑀞𑀸𑀭𑀲𑀯𑀺𑀥𑀁. 𑀓𑀸𑀭𑀡𑀜𑁆𑀳𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀨𑀮𑀁 𑀏𑀢𑁆𑀣 𑀯𑀲𑀢𑀻𑀢𑀺 ‘‘𑀯𑀢𑁆𑀣𑀽’’𑀢𑀺 𑀯𑀼𑀘𑁆𑀘𑀢𑀺. 𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋

‘‘𑀥𑀫𑁆𑀫𑀯𑀺𑀦𑀬𑀪𑀸𑀲𑀺𑀢𑀸-𑀘𑀺𑀡𑁆𑀡𑀧𑀜𑁆𑀜𑀢𑁆𑀢𑀺𑀓𑀸 𑀤𑀼𑀓𑀸;

𑀆𑀧𑀢𑁆𑀢𑀺𑀮𑀳𑀼𑀤𑀼𑀝𑁆𑀞𑀼𑀮𑁆𑀮-𑀲𑀸𑀯𑀲𑁂𑀲𑀤𑀼𑀓𑀸𑀦𑀺 𑀘.

‘‘𑀏𑀢𑀸𑀦𑀝𑁆𑀞𑀸𑀭𑀲 ‘𑀪𑁂𑀤-𑀓𑀭𑀯𑀢𑁆𑀣𑀽’𑀢𑀺 𑀯𑀼𑀘𑁆𑀘𑀭𑁂;

𑀯𑀺𑀧𑀮𑁆𑀮𑀸𑀲𑀕𑀳𑀺𑀢𑀸𑀦𑀺, 𑀯𑀸𑀤𑀫𑀽𑀮𑀽𑀧𑀦𑀺𑀲𑁆𑀲𑀬𑀸’’𑀢𑀺.

𑀧𑀕𑁆𑀕𑀬𑁆𑀳𑀸𑀢𑀺 𑀧𑀕𑁆𑀕𑀳𑀺𑀢𑀁 𑀅𑀩𑁆𑀪𑀼𑀲𑁆𑀲𑀺𑀢𑀁 𑀧𑀸𑀓𑀝𑀁 𑀓𑀢𑁆𑀯𑀸. 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀬𑀣𑀸𑀲𑀫𑀸𑀤𑀺𑀦𑁆𑀦𑀁, 𑀬𑀣𑀸𑀧𑀕𑁆𑀕𑀳𑀺𑀢𑀫𑁂𑀯 𑀘 𑀓𑀢𑁆𑀯𑀸 𑀅𑀘𑁆𑀙𑁂𑀬𑁆𑀬. 𑀬𑀲𑁆𑀫𑀸 𑀧𑀦 𑀏𑀯𑀁 𑀧𑀕𑁆𑀕𑀡𑁆𑀳𑀢𑀸, 𑀢𑀺𑀝𑁆𑀞𑀢𑀸 𑀘 𑀢𑀁 𑀤𑀻𑀧𑀺𑀢𑀜𑁆𑀘𑁂𑀯 𑀅𑀯𑀺𑀦𑀺𑀲𑁆𑀲𑀝𑁆𑀞𑀜𑁆𑀘 𑀳𑁄𑀢𑀺, 𑀢𑀲𑁆𑀫𑀸 ‘‘𑀤𑀻𑀧𑁂𑀬𑁆𑀬 𑀘𑁂𑀯 𑀦𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀬𑁆𑀬 𑀘𑀸’’𑀢𑀺 𑀯𑀼𑀢𑁆𑀢𑀁. 𑀓𑀻𑀯 𑀤𑀽𑀭𑁂 𑀲𑀼𑀢𑁆𑀯𑀸 𑀕𑀦𑁆𑀢𑁆𑀯𑀸 𑀅𑀯𑀤𑀦𑁆𑀢𑀸𑀦𑀁 𑀤𑀼𑀓𑁆𑀓𑀝𑀦𑁆𑀢𑀺 𑀆𑀳 ‘‘𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦𑀸’’𑀢𑀺𑀆𑀤𑀺. 𑀧𑀺-𑀲𑀤𑁆𑀤𑁄 𑀘𑁂𑀢𑁆𑀣 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑁄, 𑀢𑀲𑁆𑀲 ‘‘𑀅𑀟𑁆𑀠𑀬𑁄𑀚𑀦𑀫𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 ‘‘𑀅𑀟𑁆𑀠𑀬𑁄𑀚𑀦𑀫𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸 𑀏𑀓𑀯𑀺𑀳𑀸𑀭𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀤𑀻𑀧𑁂𑀢𑀺. ‘‘𑀕𑀦𑁆𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀤𑀽𑀢𑀁 𑀯𑀸 𑀧𑀡𑁆𑀡𑀁 𑀯𑀸 𑀧𑁂𑀲𑁂𑀢𑁆𑀯𑀸 𑀯𑀤𑀢𑁄𑀧𑀺 𑀆𑀧𑀢𑁆𑀢𑀺𑀫𑁄𑀓𑁆𑀔𑁄 𑀦𑀢𑁆𑀣𑀺, 𑀲𑀬𑀫𑁂𑀯 𑀧𑀦 𑀕𑀦𑁆𑀢𑁆𑀯𑀸 ‘‘𑀕𑀭𑀼𑀓𑁄 𑀔𑁄, 𑀆𑀯𑀼𑀲𑁄, 𑀲𑀗𑁆𑀖𑀪𑁂𑀤𑁄, 𑀫𑀸 𑀲𑀗𑁆𑀖𑀪𑁂𑀤𑀸𑀬 𑀧𑀭𑀓𑁆𑀓𑀫𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁧𑁧) 𑀦𑀺𑀯𑀸𑀭𑁂𑀢𑀩𑁆𑀩𑁄𑀢𑀺 𑀤𑀻𑀧𑁂𑀢𑀺.

𑀲𑀫𑀸𑀕𑀘𑁆𑀙𑀢𑀽𑀢𑀺 𑀏𑀓𑀻𑀪𑀯𑀢𑀼. 𑀏𑀓𑀻𑀪𑀸𑀯𑁄 𑀘 𑀲𑀫𑀸𑀦𑀮𑀤𑁆𑀥𑀺𑀯𑀲𑁂𑀦 𑀳𑁄𑀢𑀻𑀢𑀺 𑀆𑀳 ‘‘𑀏𑀓𑀮𑀤𑁆𑀥𑀺𑀓𑁄 𑀳𑁄𑀢𑀽’’𑀢𑀺. 𑀏𑀓𑀸 𑀮𑀤𑁆𑀥𑀺 𑀕𑀳𑀡𑀁 𑀅𑀲𑁆𑀲𑀸𑀢𑀺 𑀏𑀓𑀮𑀤𑁆𑀥𑀺𑀓𑁄, 𑀏𑀓𑀤𑀺𑀝𑁆𑀞𑀺𑀓𑁄𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀫𑀜𑁆𑀜𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀫𑀸𑀦𑀤𑀺𑀝𑁆𑀞𑀺𑀘𑀺𑀢𑁆𑀢𑀢𑀸𑀲𑀗𑁆𑀔𑀸𑀢𑀸𑀬 𑀲𑀫𑁆𑀧𑀢𑁆𑀢𑀺𑀬𑀸. ‘‘𑀅𑀜𑁆𑀜𑀫𑀜𑁆𑀜𑀲𑁆𑀲 𑀕𑀼𑀡𑀮𑀸𑀪𑀸𑀤𑀺𑀓𑀸𑀬 𑀲𑀫𑁆𑀧𑀢𑁆𑀢𑀺𑀬𑀸’’𑀢𑀺 𑀓𑁂𑀘𑀺. 𑀅𑀲𑀫𑀕𑁆𑀕𑁄 𑀳𑀺 𑀯𑀺𑀲𑀼𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀢𑀺, 𑀩𑀳𑀺𑀲𑀻𑀫𑀸𑀬𑀁 𑀯𑀸 𑀅𑀦𑀼𑀧𑀭𑀺𑀯𑁂𑀡𑀺𑀬𑀁 𑀯𑀸𑀢𑀺 𑀦 𑀏𑀓𑀼𑀤𑁆𑀤𑁂𑀲𑁄. 𑀢𑁂𑀦𑀸𑀳 ‘‘𑀏𑀓𑀢𑁄 𑀧𑀯𑀢𑁆𑀢𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄𑀢𑀺 𑀅𑀢𑁆𑀣𑁄’’𑀢𑀺. 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑁄 𑀤𑀼𑀓𑁆𑀓𑀝𑀦𑁆𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀤𑀦𑁆𑀢𑀸𑀦𑀁 𑀕𑀡𑀦𑀸𑀬 𑀤𑀼𑀓𑁆𑀓𑀝𑀁. 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀁 𑀓𑀸𑀢𑀩𑁆𑀩𑀦𑁆𑀢𑀺 𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀪𑁂𑀤𑀸𑀬 𑀧𑀭𑀓𑁆𑀓𑀫𑀢𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁧𑁩) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀸𑀳𑀺 𑀜𑀢𑁆𑀢𑀺𑀘𑀢𑀼𑀢𑁆𑀣𑀸𑀳𑀺 𑀢𑀻𑀳𑀺 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀯𑀸𑀘𑀸𑀳𑀺 𑀓𑀫𑁆𑀫𑀁 𑀓𑀸𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀪𑁂𑀤𑀸𑀬 𑀧𑀭𑀓𑁆𑀓𑀫𑁂𑀬𑁆𑀬𑀸’’𑀢𑀺 𑀯𑀺𑀲𑀼𑀁 𑀯𑀼𑀢𑁆𑀢𑀢𑁆𑀢𑀸 𑀪𑁂𑀤𑀦𑀲𑀁𑀯𑀢𑁆𑀢𑀦𑀺𑀓𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀲𑀫𑀸𑀤𑀸𑀬 𑀧𑀕𑁆𑀕𑀡𑁆𑀳𑀦𑀢𑁄 𑀧𑀼𑀩𑁆𑀩𑁂𑀧𑀺 𑀧𑀓𑁆𑀔𑀧𑀭𑀺𑀬𑁂𑀲𑀦𑀸𑀤𑀺𑀯𑀲𑁂𑀦 𑀲𑀗𑁆𑀖𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑁆𑀢𑀲𑁆𑀲 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀁 𑀓𑀸𑀢𑀩𑁆𑀩𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀪𑀸𑀯𑀢𑁄 ‘‘𑀲𑁄𑀢𑁆𑀣𑀺𑀪𑀸𑀯𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺 𑀯𑀼𑀢𑁆𑀢𑀁.

𑀓𑀺𑀜𑁆𑀘𑀸𑀧𑀺 𑀪𑀺𑀓𑁆𑀔𑀼𑀦𑀻 𑀲𑀗𑁆𑀖𑀁 𑀦 𑀪𑀺𑀦𑁆𑀤𑀢𑀺, 𑀅𑀧𑀺𑀘 𑀔𑁄 𑀪𑁂𑀤𑀸𑀬 𑀧𑀭𑀓𑁆𑀓𑀫𑀢𑀻𑀢𑀺 ‘‘𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑀲𑁆𑀲 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁, 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀣𑀼𑀮𑁆𑀮𑀘𑁆𑀘𑀬𑀸 𑀘 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻𑀢𑀺 𑀆𑀳 ‘‘𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑁂’’𑀢𑀺𑀆𑀤𑀺. 𑀢𑀜𑁆𑀘 𑀤𑀼𑀓𑁆𑀓𑀝𑀁 𑀢𑁂 𑀘 𑀣𑀼𑀮𑁆𑀮𑀘𑁆𑀘𑀬𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻𑀢𑀺 𑀬𑀜𑁆𑀘 𑀜𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑁂 𑀤𑀼𑀓𑁆𑀓𑀝𑀁 𑀆𑀧𑀦𑁆𑀦𑁄, 𑀬𑁂 𑀘 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀣𑀼𑀮𑁆𑀮𑀘𑁆𑀘𑀬𑁂, 𑀢𑀸 𑀢𑀺𑀲𑁆𑀲𑁄𑀧𑀺 𑀆𑀧𑀢𑁆𑀢𑀺𑀬𑁄 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑁂𑀦 𑀅𑀲𑀸𑀥𑀸𑀭𑀡𑀸𑀧𑀢𑁆𑀢𑀺𑀬𑁄 𑀯𑀺𑀬 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺. 𑀲𑀘𑁂 𑀧𑀦𑀲𑁆𑀲 𑀜𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑁂 𑀮𑀚𑁆𑀚𑀺𑀥𑀫𑁆𑀫𑁄 𑀑𑀓𑁆𑀓𑀫𑀢𑀺, 𑀲𑀁𑀯𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀺. 𑀅𑀣 𑀢𑀁 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀪𑁂𑀤𑀸𑀬 𑀧𑀭𑀓𑁆𑀓𑀫𑀢𑀺 𑀘𑁂𑀯 𑀪𑁂𑀤𑀦𑀲𑀁𑀯𑀢𑁆𑀢𑀦𑀺𑀓𑀁 𑀅𑀥𑀺𑀓𑀭𑀡𑀁 𑀲𑀫𑀸𑀤𑀸𑀬 𑀧𑀕𑁆𑀕𑀬𑁆𑀳 𑀢𑀺𑀝𑁆𑀞𑀢𑀺 𑀘, 𑀜𑀢𑁆𑀢𑀺𑀤𑀼𑀓𑁆𑀓𑀝𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀧𑀞𑀫𑀓𑀫𑁆𑀫𑀯𑀸𑀘𑀸𑀬 𑀣𑀼𑀮𑁆𑀮𑀘𑁆𑀘𑀬𑁂 𑀧𑀢𑀺𑀝𑁆𑀞𑀸𑀢𑀺. 𑀏𑀲 𑀦𑀬𑁄 𑀇𑀢𑀭𑀓𑀫𑁆𑀫𑀯𑀸𑀘𑀸𑀬𑀫𑁆𑀧𑀺. 𑀅𑀲𑀫𑀦𑀼𑀪𑀸𑀲𑀺𑀬𑀫𑀸𑀦𑀲𑁆𑀲 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀲𑁆𑀲𑀸𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀅𑀦𑀸𑀧𑀢𑁆𑀢𑀺. 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀲𑁆𑀲𑀸𑀧𑀺 𑀜𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀯𑀸 𑀜𑀢𑁆𑀢𑀺𑀓𑁆𑀔𑀡𑁂 𑀯𑀸 𑀜𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑁂 𑀯𑀸 𑀧𑀞𑀫𑀸𑀬 𑀯𑀸 𑀅𑀦𑀼𑀲𑁆𑀲𑀸𑀯𑀦𑀸𑀬 𑀤𑀼𑀢𑀺𑀬𑀸𑀬 𑀯𑀸 𑀢𑀢𑀺𑀬𑀸𑀬 𑀯𑀸 𑀬𑀸𑀯 𑀬𑁆𑀬-𑀓𑀸𑀭𑀁 𑀦 𑀲𑀫𑁆𑀧𑀸𑀧𑀼𑀡𑀸𑀢𑀺, 𑀢𑀸𑀯 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀅𑀦𑀸𑀧𑀢𑁆𑀢𑀺. 𑀢𑁂𑀦𑀸𑀳 ‘‘𑀅𑀲𑀫𑀦𑀼𑀪𑀸𑀲𑀺𑀬𑀫𑀸𑀦𑀲𑁆𑀲 𑀘𑀸’’𑀢𑀺𑀆𑀤𑀺.

𑀏𑀢𑁆𑀣 𑀧𑀦 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁧𑁬) ‘‘𑀤𑁂𑀯𑀤𑀢𑁆𑀢𑁄 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀪𑁂𑀤𑀸𑀬 𑀧𑀭𑀓𑁆𑀓𑀫𑀺, 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺 (𑀧𑀭𑀺. 𑁧𑁭) 𑀧𑀭𑀺𑀯𑀸𑀭𑁂 𑀆𑀕𑀢𑀢𑁆𑀢𑀸 𑀤𑁂𑀯𑀤𑀢𑁆𑀢𑁄 𑀆𑀤𑀺𑀓𑀫𑁆𑀫𑀺𑀓𑁄, 𑀲𑁄 𑀘 𑀔𑁄 𑀲𑀗𑁆𑀖𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑀲𑁆𑀲𑁂𑀯, 𑀦 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀲𑁆𑀲. 𑀦 𑀳𑀺 𑀢𑀲𑁆𑀲 𑀢𑀁 𑀓𑀫𑁆𑀫𑀁 𑀓𑀢𑀁. 𑀓𑀣𑀫𑀺𑀤𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀘𑁂? 𑀲𑀼𑀢𑁆𑀢𑀢𑁄. 𑀢𑀣𑀸 𑀳𑀺 ‘‘𑀅𑀭𑀺𑀝𑁆𑀞𑁄 𑀪𑀺𑀓𑁆𑀔𑀼 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑁄 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀦𑀸𑀬 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀺, 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺 𑀧𑀭𑀺𑀯𑀸𑀭𑁂 𑀆𑀕𑀢𑀢𑁆𑀢𑀸 𑀅𑀭𑀺𑀝𑁆𑀞𑀲𑁆𑀲 𑀓𑀫𑁆𑀫𑀁 𑀓𑀢𑀦𑁆𑀢𑀺 𑀧𑀜𑁆𑀜𑀸𑀬𑀢𑀺, 𑀦 𑀢𑀣𑀸 𑀤𑁂𑀯𑀤𑀢𑁆𑀢𑀲𑁆𑀲. 𑀅𑀣𑀸𑀧𑀺𑀲𑁆𑀲 𑀓𑀢𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀓𑁄𑀘𑀺 𑀅𑀢𑁆𑀢𑀦𑁄 𑀭𑀼𑀘𑀺𑀫𑀢𑁆𑀢𑁂𑀦 𑀯𑀤𑁂𑀬𑁆𑀬, 𑀢𑀣𑀸𑀧𑀺 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁂 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀅𑀦𑀸𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀦 𑀳𑀺 𑀧𑀜𑁆𑀜𑀢𑁆𑀢𑀁 𑀲𑀺𑀓𑁆𑀔𑀸𑀧𑀤𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀅𑀜𑁆𑀜𑀢𑁆𑀭 𑀑𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁄 𑀅𑀦𑀸𑀧𑀢𑁆𑀢𑀺 𑀦𑀸𑀫 𑀤𑀺𑀲𑁆𑀲𑀢𑀺. 𑀬𑀫𑁆𑀧𑀺 𑀅𑀭𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀤𑀪𑀸𑀚𑀦𑁂 𑀅𑀦𑀸𑀧𑀢𑁆𑀢𑀺𑀬𑀁 ‘‘𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸’’𑀢𑀺 𑀧𑁄𑀢𑁆𑀣𑀓𑁂𑀲𑀼 𑀮𑀺𑀔𑀺𑀢𑀁, 𑀢𑀁 𑀧𑀫𑀸𑀤𑀮𑀺𑀔𑀺𑀢𑀁, 𑀧𑀫𑀸𑀤𑀮𑀺𑀔𑀺𑀢𑀪𑀸𑀯𑁄 𑀘 𑀢𑀲𑁆𑀲 ‘‘𑀧𑀞𑀫𑀁 𑀅𑀭𑀺𑀝𑁆𑀞𑁄 𑀪𑀺𑀓𑁆𑀔𑀼 𑀘𑁄𑀤𑁂𑀢𑀩𑁆𑀩𑁄, 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑀩𑁆𑀩𑁄, 𑀲𑀸𑀭𑁂𑀢𑁆𑀯𑀸 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑀩𑁆𑀩𑁄’’𑀢𑀺 (𑀘𑀽𑀴𑀯. 𑁬𑁫) 𑀏𑀯𑀁 𑀓𑀫𑁆𑀫𑀓𑁆𑀔𑀦𑁆𑀥𑀓𑁂 𑀆𑀧𑀢𑁆𑀢𑀺𑀭𑁄𑀧𑀦𑀢𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀥 𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑁂 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀤𑁂𑀯𑀤𑀢𑁆𑀢𑀲𑁆𑀲 𑀬𑀲𑁆𑀫𑀸 𑀢𑀁 𑀓𑀫𑁆𑀫𑀁 𑀦 𑀓𑀢𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁧𑁬), 𑀢𑀲𑁆𑀫𑀸𑀲𑁆𑀲 𑀆𑀧𑀢𑁆𑀢𑀺𑀬𑁂𑀯 𑀦 𑀚𑀸𑀢𑀸. 𑀲𑀺𑀓𑁆𑀔𑀸𑀧𑀤𑀁 𑀧𑀦 𑀢𑀁 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀦𑁆𑀢𑀺 𑀓𑀢𑁆𑀯𑀸 ‘‘𑀆𑀤𑀺𑀓𑀫𑁆𑀫𑀺𑀓𑁄’’𑀢𑀺 𑀯𑀼𑀢𑁆𑀢𑁄. 𑀇𑀢𑀺 𑀆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄𑀬𑁂𑀯𑀲𑁆𑀲 𑀅𑀦𑀸𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀲𑀸 𑀧𑀦𑁂𑀲𑀸 𑀓𑀺𑀜𑁆𑀘𑀸𑀧𑀺 ‘‘𑀅𑀲𑀫𑀦𑀼𑀪𑀸𑀲𑀺𑀬𑀫𑀸𑀦𑀲𑁆𑀲𑀸’’𑀢𑀺 𑀇𑀫𑀺𑀦𑀸𑀯 𑀲𑀺𑀤𑁆𑀥𑀸. 𑀬𑀲𑁆𑀫𑀸 𑀧𑀦 𑀅𑀲𑀫𑀦𑀼𑀪𑀸𑀲𑀺𑀬𑀫𑀸𑀦𑁄 𑀦𑀸𑀫 𑀬𑀲𑁆𑀲 𑀓𑁂𑀯𑀮𑀁 𑀲𑀫𑀦𑀼𑀪𑀸𑀲𑀦𑀁 𑀦 𑀓𑀭𑁄𑀦𑁆𑀢𑀺, 𑀲𑁄 𑀯𑀼𑀘𑁆𑀘𑀢𑀺, 𑀦 𑀆𑀤𑀺𑀓𑀫𑁆𑀫𑀺𑀓𑁄. 𑀅𑀬𑀜𑁆𑀘 𑀤𑁂𑀯𑀤𑀢𑁆𑀢𑁄 𑀆𑀤𑀺𑀓𑀫𑁆𑀫𑀺𑀓𑁄𑀬𑁂𑀯. 𑀢𑀲𑁆𑀫𑀸 ‘‘𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸’’𑀢𑀺 (𑀧𑀸𑀭𑀸. 𑁪𑁧𑁬) 𑀯𑀼𑀢𑁆𑀢𑀁. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀞𑀧𑁂𑀢𑁆𑀯𑀸 𑀅𑀭𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀁 𑀲𑀩𑁆𑀩𑀲𑀫𑀦𑀼𑀪𑀸𑀲𑀦𑀸𑀲𑀼 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀦𑀢𑁄 𑀲𑀫𑀦𑀼𑀪𑀸𑀲𑀦𑀲𑀫𑀼𑀝𑁆𑀞𑀸𑀦𑀁. ‘‘𑀧𑀝𑀺𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 𑀓𑀸𑀬𑀯𑀺𑀓𑀸𑀭𑀁 𑀯𑀸 𑀯𑀘𑀻𑀪𑁂𑀤𑀁 𑀯𑀸 𑀅𑀓𑀭𑁄𑀦𑁆𑀢𑀲𑁆𑀲𑁂𑀯 𑀧𑀦 𑀆𑀧𑀚𑁆𑀚𑀦𑀢𑁄 𑀅𑀓𑀺𑀭𑀺𑀬𑀁. ‘‘𑀦𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 𑀲𑀜𑁆𑀜𑀸𑀬 𑀅𑀪𑀸𑀯𑁂𑀦 𑀫𑀼𑀘𑁆𑀘𑀦𑀢𑁄 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁. ‘‘𑀦𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 𑀚𑀸𑀦𑀦𑀘𑀺𑀢𑁆𑀢𑁂𑀦𑁂𑀯 𑀲𑀘𑀺𑀢𑁆𑀢𑀓𑀁.

𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀪𑁂𑀤𑀸𑀦𑀼𑀯𑀢𑁆𑀢𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀲𑁆𑀲𑁂𑀯𑀸𑀢𑀺 𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑁆𑀢𑀲𑁆𑀲𑁂𑀯. 𑀔𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀧𑀦𑀸𑀢𑀺 𑀯𑀺𑀲𑁂𑀲𑁂 𑀦𑀺𑀧𑀸𑀢𑁄. 𑀬𑀁 𑀯𑀘𑀦𑀁 𑀲𑀫𑀕𑁆𑀕𑁂𑀧𑀺 𑀯𑀕𑁆𑀕𑁂 𑀅𑀯𑀬𑀯𑀪𑀽𑀢𑁂 𑀓𑀭𑁄𑀢𑀺 𑀪𑀺𑀦𑁆𑀤𑀢𑀺, 𑀢𑀁 𑀓𑀮𑀳𑀓𑀸𑀭𑀓𑀯𑀘𑀦𑀁 𑀇𑀥 ‘‘𑀯𑀕𑁆𑀕’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀯𑀕𑁆𑀕𑀁 𑀅𑀲𑀸𑀫𑀕𑁆𑀕𑀺𑀧𑀓𑁆𑀔𑀺𑀬𑀯𑀘𑀦𑀁 𑀯𑀤𑀦𑁆𑀢𑀻’’𑀢𑀺. 𑀅𑀲𑀸𑀫𑀕𑁆𑀕𑀺𑀧𑀓𑁆𑀔𑁂 𑀪𑀯𑀸 𑀅𑀲𑀸𑀫𑀕𑁆𑀕𑀺𑀧𑀓𑁆𑀔𑀺𑀬𑀸, 𑀓𑀮𑀳𑀓𑀸𑀭𑀓𑀸, 𑀢𑁂𑀲𑀁 𑀯𑀘𑀦𑀁 𑀅𑀲𑀸𑀫𑀕𑁆𑀕𑀺𑀧𑀓𑁆𑀔𑀺𑀬𑀯𑀘𑀦𑀁, 𑀅𑀲𑀸𑀫𑀕𑁆𑀕𑀺𑀧𑀓𑁆𑀔𑁂 𑀯𑀸 𑀪𑀯𑀁 𑀯𑀘𑀦𑀁 𑀅𑀲𑀸𑀫𑀕𑁆𑀕𑀺𑀧𑀓𑁆𑀔𑀺𑀬𑀯𑀘𑀦𑀁. ‘‘𑀦 𑀳𑀺 𑀲𑀗𑁆𑀖𑁄 𑀲𑀗𑁆𑀖𑀲𑁆𑀲 𑀓𑀫𑁆𑀫𑀁 𑀓𑀭𑁄𑀢𑀻’’𑀢𑀺 𑀇𑀤𑀁 𑀦𑀺𑀕𑁆𑀕𑀳𑀯𑀲𑁂𑀦 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀉𑀩𑁆𑀩𑀸𑀳𑀺𑀓𑀸𑀤𑀺𑀓𑀫𑁆𑀫𑀁 𑀧𑀦 𑀩𑀳𑀽𑀦𑀫𑁆𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀥𑀫𑁆𑀫𑀯𑀸𑀤𑀻𑀢𑀺 𑀪𑀽𑀢𑀯𑀸𑀤𑀻. 𑀯𑀺𑀦𑀬𑀯𑀸𑀤𑀻𑀢𑀺 𑀯𑀽𑀧𑀲𑀫𑀯𑀸𑀤𑀻. 𑀚𑀸𑀦𑀸𑀢𑀺 𑀦𑁄𑀢𑀺 𑀏𑀢𑁆𑀣𑀸𑀧𑀺 ‘‘𑀙𑀦𑁆𑀤𑀜𑁆𑀘 𑀭𑀼𑀘𑀺𑀜𑁆𑀘𑀸’’𑀢𑀺 𑀇𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀅𑀫𑁆𑀳𑀸𑀓𑀁 𑀙𑀦𑁆𑀤𑀸𑀤𑀻𑀦𑀺 𑀚𑀸𑀦𑀸𑀢𑀻’’𑀢𑀺. 𑀪𑀸𑀲𑀢𑀻𑀢𑀺 𑀏𑀢𑁆𑀣 ‘‘𑀦𑁄’’𑀢𑀺 𑀇𑀤𑀁 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁂𑀦 𑀬𑀼𑀚𑁆𑀚𑀢𑀺. 𑀢𑁂𑀦𑀸𑀳 ‘‘𑀏𑀯𑀁 𑀓𑀭𑁄𑀫𑀸𑀢𑀺 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀪𑀸𑀲𑀢𑀻’’𑀢𑀺. ‘‘𑀏𑀢’’𑀦𑁆𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀓𑀫𑁆𑀫𑀁 𑀧𑀘𑁆𑀘𑀸𑀫𑀝𑁆𑀞𑀦𑁆𑀢𑀺 𑀆𑀳 ‘‘𑀬𑀁 𑀲𑁄 𑀓𑀭𑁄𑀢𑀻’’𑀢𑀺𑀆𑀤𑀺. 𑀲𑁄𑀢𑀺 𑀲𑀗𑁆𑀖𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑁆𑀢𑁄. 𑀲𑀫𑁂𑀢𑀸𑀬𑀲𑁆𑀫𑀦𑁆𑀢𑀸𑀦𑀦𑁆𑀢𑀺 𑀏𑀢𑁆𑀣 ‘‘𑀘𑀺𑀢𑁆𑀢’’𑀦𑁆𑀢𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀆𑀬𑀲𑁆𑀫𑀦𑁆𑀢𑀸𑀦𑀁 𑀘𑀺𑀢𑁆𑀢’’𑀦𑁆𑀢𑀺. 𑀯𑀼𑀢𑁆𑀢𑀲𑀤𑀺𑀲𑀸𑀬𑁂𑀯𑀸𑀢𑀺 𑀏𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀅𑀜𑁆𑀜𑀪𑀸𑀕𑀺𑀬𑀲𑀺𑀓𑁆𑀔𑀸𑀧𑀤𑀝𑁆𑀞𑀓𑀣𑀸𑀬 𑀯𑀡𑁆𑀡𑀦𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀅𑀜𑁆𑀜𑀪𑀸𑀕𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀼𑀢𑁆𑀢𑀫𑁂𑀯.

𑀪𑁂𑀤𑀸𑀦𑀼𑀯𑀢𑁆𑀢𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀤𑀼𑀩𑁆𑀩𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀼𑀓𑁆𑀔𑁂𑀦 𑀯𑀢𑁆𑀢𑀩𑁆𑀩𑁄 𑀅𑀦𑀼𑀲𑀸𑀲𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄 𑀲𑀪𑀸𑀯𑁄 𑀅𑀲𑁆𑀲𑀸𑀢𑀺 𑀤𑀼𑀩𑁆𑀩𑀘𑀚𑀸𑀢𑀺𑀓𑁄, 𑀯𑀺𑀮𑁄𑀫𑀪𑀸𑀯𑀻. 𑀢𑁂𑀦𑀸𑀳 ‘‘𑀤𑀼𑀩𑁆𑀩𑀘𑀲𑀪𑀸𑀯𑁄’’𑀢𑀺𑀆𑀤𑀺. 𑀯𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀯𑀼𑀘𑁆𑀘𑀫𑀸𑀦𑁂 𑀅𑀲𑀳𑀦𑀢𑁄 𑀑𑀯𑀤𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄. 𑀉𑀤𑁆𑀤𑀺𑀲𑀻𑀬𑀢𑀻𑀢𑀺 𑀉𑀤𑁆𑀤𑁂𑀲𑁄, 𑀧𑀸𑀢𑀺𑀫𑁄𑀓𑁆𑀔𑁄, 𑀢𑀲𑁆𑀫𑀺𑀁 𑀧𑀭𑀺𑀬𑀸𑀧𑀦𑁆𑀦𑀸 𑀅𑀦𑁆𑀢𑁄𑀕𑀥𑀸 𑀉𑀤𑁆𑀤𑁂𑀲𑀧𑀭𑀺𑀬𑀸𑀧𑀦𑁆𑀦𑀸, 𑀢𑁂𑀲𑀼 𑀉𑀤𑁆𑀤𑁂𑀲𑀧𑀭𑀺𑀬𑀸𑀧𑀦𑁆𑀦𑁂𑀲𑀼. 𑀢𑁂𑀦𑀸𑀳 ‘‘𑀉𑀤𑁆𑀤𑁂𑀲𑁂’’𑀢𑀺𑀆𑀤𑀺. 𑀅𑀣 𑀲𑀩𑁆𑀩𑀸𑀦𑁂𑀯 𑀲𑀺𑀓𑁆𑀔𑀸𑀧𑀤𑀸𑀦𑀺 𑀓𑀣𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀧𑀭𑀺𑀬𑀸𑀧𑀦𑁆𑀦𑀸𑀦𑀻𑀢𑀺 𑀆𑀳 ‘‘𑀬𑀲𑁆𑀲 𑀲𑀺𑀬𑀸 𑀆𑀧𑀢𑁆𑀢𑀺, 𑀲𑁄 ‘𑀆𑀯𑀺𑀓𑀭𑁂𑀬𑁆𑀬𑀸’𑀢𑀺 𑀏𑀯𑀁 𑀲𑀗𑁆𑀕𑀳𑀺𑀢𑀢𑁆𑀢𑀸’’𑀢𑀺. ‘‘𑀬𑀲𑁆𑀲 𑀲𑀺𑀬𑀸 𑀆𑀧𑀢𑁆𑀢𑀻’’𑀢𑀺 𑀇𑀫𑀺𑀦𑀸 𑀲𑀩𑁆𑀩𑀸𑀧𑀺 𑀆𑀧𑀢𑁆𑀢𑀺𑀬𑁄 𑀦𑀺𑀤𑀸𑀦𑀼𑀤𑁆𑀤𑁂𑀲𑁂 𑀲𑀗𑁆𑀕𑀳𑀺𑀢𑀸 𑀏𑀯 𑀳𑁄𑀦𑁆𑀢𑀺. 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀬 𑀅𑀥𑀺𑀕𑀫𑀽𑀧𑀸𑀬𑀪𑀽𑀢𑁂𑀲𑀼 𑀯𑀺𑀦𑀬𑀧𑀜𑁆𑀜𑀢𑁆𑀢𑀻𑀲𑀽𑀢𑀺 𑀅𑀢𑁆𑀣𑁄. 𑀲𑁄 𑀧𑀦 𑀧𑀸𑀓𑀝𑁄𑀬𑁂𑀯𑀸𑀢𑀺 𑀅𑀝𑁆𑀞𑀓𑀣𑀸𑀬𑀁 𑀦 𑀯𑀼𑀢𑁆𑀢𑁄. 𑀧𑀜𑁆𑀘𑀳𑀺 𑀲𑀳𑀥𑀫𑁆𑀫𑀺𑀓𑁂𑀳𑀻𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀺𑀲𑀸𑀫𑀡𑁂𑀭𑀲𑀸𑀫𑀡𑁂𑀭𑀺𑀲𑀺𑀓𑁆𑀔𑀫𑀸𑀦𑀸𑀳𑀺. 𑀲𑀺𑀓𑁆𑀔𑀺𑀢𑀩𑁆𑀩𑀢𑁆𑀢𑀸𑀢𑀺 𑀮𑀩𑁆𑀪𑀫𑀸𑀦𑀯𑀲𑁂𑀦 𑀲𑀺𑀓𑁆𑀔𑀺𑀢𑀩𑁆𑀩𑀢𑁆𑀢𑀸. 𑀢𑀣𑀸 𑀳𑀺 𑀢𑁂𑀳𑀺 𑀬𑀣𑀸𑀲𑀓𑀁 𑀲𑀺𑀓𑁆𑀔𑀸 𑀲𑀺𑀓𑁆𑀔𑀻𑀬𑀢𑀺, 𑀦 𑀲𑀩𑁆𑀩𑀸. 𑀩𑀼𑀤𑁆𑀥𑀧𑀜𑁆𑀜𑀢𑁆𑀢𑁂𑀦𑀸𑀢𑀺 𑀩𑀼𑀤𑁆𑀥𑁂𑀦 𑀞𑀧𑀺𑀢𑁂𑀦, 𑀯𑀺𑀳𑀺𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀳𑀥𑀫𑁆𑀫𑀺𑀓𑁂𑀦 𑀲𑀓𑀸𑀭𑀡𑁂𑀦 𑀯𑀼𑀘𑁆𑀘𑀫𑀸𑀦𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀯𑀘𑀦𑀸𑀬𑀸𑀢𑀺 𑀦𑀺𑀲𑁆𑀲𑀓𑁆𑀓𑁂 𑀲𑀫𑁆𑀧𑀤𑀸𑀦𑀯𑀘𑀦𑀦𑁆𑀢𑀺 𑀆𑀳 ‘‘𑀢𑀢𑁄 𑀫𑀫 𑀯𑀘𑀦𑀢𑁄’’𑀢𑀺.

𑀤𑀼𑀩𑁆𑀩𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀓𑀼𑀮𑀤𑀽𑀲𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀦𑀕𑀭𑀲𑁆𑀲𑀸𑀧𑀺 𑀕𑀸𑀫𑀯𑀺𑀲𑁂𑀲𑀢𑁆𑀢𑀸 𑀇𑀥 𑀕𑀸𑀫𑀕𑁆𑀕𑀳𑀡𑁂𑀦𑁂𑀯 𑀦𑀕𑀭𑀫𑁆𑀧𑀺 𑀕𑀳𑀺𑀢𑀦𑁆𑀢𑀺 𑀆𑀳 ‘‘𑀦𑀕𑀭𑀫𑁆𑀧𑀺 𑀕𑀸𑀫𑁂 𑀅𑀦𑁆𑀢𑁄𑀕𑀥𑀫𑁂𑀯𑀸’’𑀢𑀺, 𑀯𑀸-𑀲𑀤𑁆𑀤𑁂𑀦 𑀯𑀸 𑀅𑀦𑀼𑀢𑁆𑀢𑀯𑀺𑀓𑀧𑁆𑀧𑀢𑁆𑀣𑁂𑀦 𑀕𑀳𑀡𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀅𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑁄 𑀲𑀸𑀧𑀡𑁄 𑀦𑀺𑀕𑀫𑁄, 𑀲𑀧𑀸𑀓𑀸𑀭𑀸𑀧𑀡𑀁 𑀦𑀕𑀭𑀁, 𑀢𑀁𑀢𑀁𑀯𑀺𑀧𑀭𑀻𑀢𑁄 𑀕𑀸𑀫𑁄𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀯𑀺𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀓𑀼𑀮𑀸𑀦𑀺 𑀤𑀽𑀲𑁂𑀢𑀻𑀢𑀺 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀯𑁂𑀲𑁆𑀲𑀲𑀼𑀤𑁆𑀤𑀯𑀲𑁂𑀦 𑀘𑀢𑁆𑀢𑀸𑀭𑀺 𑀓𑀼𑀮𑀸𑀦𑀺 𑀯𑀺𑀓𑀸𑀭𑀁 𑀆𑀧𑀸𑀤𑁂𑀢𑀺. 𑀤𑀽𑀲𑁂𑀦𑁆𑀢𑁄 𑀘 𑀦 𑀅𑀲𑀼𑀘𑀺𑀓𑀤𑁆𑀤𑀫𑀸𑀤𑀻𑀳𑀺 𑀤𑀽𑀲𑁂𑀢𑀺, 𑀅𑀣 𑀔𑁄 𑀅𑀢𑁆𑀢𑀦𑁄 𑀤𑀼𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀢𑁂𑀲𑀁 𑀧𑀲𑀸𑀤𑀁 𑀯𑀺𑀦𑀸𑀲𑁂𑀢𑀺. 𑀢𑁂𑀦𑀸𑀳 ‘‘𑀧𑀼𑀧𑁆𑀨𑀤𑀸𑀦𑀸𑀤𑀻𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀳𑀭𑀺𑀢𑁆𑀯𑀸 𑀯𑀸 𑀳𑀭𑀸𑀧𑁂𑀢𑁆𑀯𑀸 𑀯𑀸 𑀧𑀓𑁆𑀓𑁄𑀲𑀺𑀢𑁆𑀯𑀸 𑀯𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀯𑀸 𑀲𑀬𑀁 𑀯𑀸 𑀉𑀧𑀕𑀢𑀸𑀦𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁩𑁬-𑁪𑁩𑁭) 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀲𑁆𑀲 𑀧𑀼𑀧𑁆𑀨𑀲𑁆𑀲 𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬 𑀤𑀸𑀦𑀁 𑀧𑀼𑀧𑁆𑀨𑀤𑀸𑀦𑀁, 𑀢𑀁 𑀆𑀤𑀺 𑀬𑁂𑀲𑀁 𑀢𑁂 𑀧𑀼𑀧𑁆𑀨𑀤𑀸𑀦𑀸𑀤𑀬𑁄, 𑀢𑁂𑀳𑀺 𑀧𑀼𑀧𑁆𑀨𑀤𑀸𑀦𑀸𑀤𑀻𑀳𑀺. 𑀆𑀤𑀺𑀲𑀤𑁆𑀤𑁂𑀦 (𑀧𑀸𑀭𑀸. 𑁪𑁩𑁭) 𑀨𑀮𑀤𑀸𑀦𑀘𑀼𑀡𑁆𑀡𑀫𑀢𑁆𑀢𑀺𑀓𑀸𑀤𑀦𑁆𑀢𑀓𑀝𑁆𑀞𑀯𑁂𑀴𑀼𑀯𑁂𑀚𑁆𑀚𑀺𑀓𑀸𑀚𑀗𑁆𑀖𑀧𑁂𑀲𑀦𑀺𑀓𑀸𑀦𑀁 𑀕𑀳𑀡𑀁. 𑀲𑀤𑁆𑀥𑀁 𑀯𑀺𑀦𑀸𑀲𑁂𑀦𑁆𑀢𑁄𑀢𑀺 𑀢𑀣𑀸 𑀅𑀓𑀭𑁄𑀦𑁆𑀢𑁂𑀲𑀼 𑀅𑀜𑁆𑀜𑁂𑀲𑀼 𑀧𑁂𑀲𑀮𑁂𑀲𑀼 𑀪𑀺𑀓𑁆𑀔𑀽𑀲𑀼 𑀅𑀧𑁆𑀧𑀲𑀸𑀤𑀁 𑀅𑀤𑀲𑁆𑀲𑀦𑀁 𑀕𑀫𑁂𑀦𑁆𑀢𑁄. 𑀧𑀼𑀧𑁆𑀨𑀤𑀸𑀦𑀸𑀤𑀻𑀳𑀺 𑀘 𑀢𑁂𑀳𑀺 𑀓𑀢𑀲𑀗𑁆𑀕𑀳𑁂𑀳𑀺 𑀅𑀜𑁆𑀜𑁂 𑀧𑁂𑀲𑀮𑁂 𑀢𑀣𑀸 𑀅𑀓𑀭𑁄𑀦𑁆𑀢𑁂 𑀢𑁂 𑀫𑀦𑀼𑀲𑁆𑀲𑀸 𑀇𑀲𑁆𑀲𑀦𑁆𑀢𑀺 𑀦 𑀅𑀮𑁆𑀮𑀻𑀬𑀦𑁆𑀢𑀻𑀢𑀺 𑀲𑁄 𑀢𑁂𑀲𑀁 𑀧𑀲𑀸𑀤𑀁 𑀯𑀺𑀦𑀸𑀲𑁂𑀢𑀺 𑀦𑀸𑀫𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀸𑀧𑀓𑀸 𑀲𑀫𑀸𑀘𑀸𑀭𑀸𑀢𑀺 𑀩𑀼𑀤𑁆𑀥𑀧𑁆𑀧𑀝𑀺𑀓𑀼𑀝𑁆𑀞𑀢𑁆𑀢𑀸 𑀮𑀸𑀫𑀓𑀸 𑀲𑀫𑀸𑀘𑀸𑀭𑀸. 𑀢𑁂 𑀧𑀦 𑀬𑀲𑁆𑀫𑀸 𑀓𑀼𑀮𑀲𑀗𑁆𑀕𑀳𑀢𑁆𑀣𑀁 𑀫𑀸𑀮𑀸𑀯𑀘𑁆𑀙𑀭𑁄𑀧𑀦𑀸𑀤𑀬𑁄 𑀇𑀥 𑀅𑀥𑀺𑀧𑁆𑀧𑁂𑀢𑀸, 𑀢𑀲𑁆𑀫𑀸 ‘‘𑀫𑀸𑀮𑀸𑀯𑀘𑁆𑀙𑀭𑁄𑀧𑀦𑀸𑀤𑀬𑁄’’𑀢𑀺 𑀯𑀼𑀢𑁆𑀢𑀁. 𑀆𑀭𑀸𑀫𑀸𑀤𑀻𑀦𑀫𑀢𑁆𑀣𑀸𑀬 𑀧𑀦 𑀓𑀧𑁆𑀧𑀺𑀬𑀯𑁄𑀳𑀸𑀭𑀸𑀤𑀻𑀳𑀺 𑀭𑁄𑀧𑀸𑀧𑀦𑀸𑀤𑀺𑀓𑀁 𑀯𑀝𑁆𑀝𑀢𑀺. 𑀢𑀢𑁆𑀣 𑀫𑀸𑀮𑀸𑀯𑀘𑁆𑀙𑀦𑁆𑀢𑀺 𑀢𑀭𑀼𑀡𑀧𑀼𑀧𑁆𑀨𑀭𑀼𑀓𑁆𑀔𑀁. 𑀢𑀭𑀼𑀡𑀓𑀸 𑀳𑀺 𑀧𑀼𑀧𑁆𑀨𑀭𑀼𑀓𑁆𑀔𑀸𑀧𑀺 𑀧𑀼𑀧𑁆𑀨𑀕𑀘𑁆𑀙𑀸𑀧𑀺 ‘‘𑀫𑀸𑀮𑀸𑀯𑀘𑁆𑀙𑀸’’𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺, 𑀢𑀲𑁆𑀲 𑀭𑁄𑀧𑀦𑀁 𑀫𑀸𑀮𑀸𑀯𑀘𑁆𑀙𑀭𑁄𑀧𑀦𑀁, 𑀢𑀁 𑀆𑀤𑀺 𑀬𑁂𑀲𑀁 𑀢𑁂 𑀫𑀸𑀮𑀸𑀯𑀘𑁆𑀙𑀭𑁄𑀧𑀦𑀸𑀤𑀬𑁄. 𑀆𑀤𑀺𑀲𑀤𑁆𑀤𑁂𑀦 𑀘𑁂𑀢𑁆𑀣 𑀭𑁄𑀧𑀸𑀧𑀦𑀲𑀺𑀜𑁆𑀘𑀦𑀲𑀺𑀜𑁆𑀘𑀸𑀧𑀦𑀑𑀘𑀺𑀦𑀦𑀑𑀘𑀺𑀦𑀸𑀧𑀦𑀕𑀦𑁆𑀣𑀦𑀕𑀦𑁆𑀣𑀸𑀧𑀦𑀸𑀦𑀁 𑀕𑀳𑀡𑀁.

𑀫𑀸𑀢𑀺𑀓𑀸𑀬𑀁 𑀤𑀺𑀲𑁆𑀲𑀦𑁆𑀢𑀻𑀢𑀺 𑀬𑁂 𑀧𑀘𑁆𑀘𑀓𑁆𑀔𑀢𑁄 𑀧𑀲𑁆𑀲𑀦𑁆𑀢𑀺, 𑀢𑁂𑀳𑀺 𑀤𑀺𑀲𑁆𑀲𑀦𑁆𑀢𑀺. 𑀲𑀼𑀬𑁆𑀬𑀦𑁆𑀢𑀻𑀢𑀺 𑀬𑁂 𑀧𑀭𑀢𑁄 𑀲𑀼𑀡𑀦𑁆𑀢𑀺, 𑀢𑁂𑀳𑀺 𑀲𑁄𑀢𑀤𑁆𑀯𑀸𑀭𑁂𑀦 𑀲𑀼𑀢𑁆𑀯𑀸 𑀉𑀧𑀥𑀸𑀭𑀻𑀬𑀦𑁆𑀢𑀺. 𑀤𑀼𑀝𑁆𑀞𑀸𑀦𑀻𑀢𑀺 𑀤𑀽𑀲𑀺𑀢𑀸𑀦𑀺. 𑀅𑀮𑀁 𑀢𑁂 𑀇𑀥 𑀯𑀸𑀲𑁂𑀦𑀸𑀢𑀺 𑀢𑀯 𑀇𑀥 𑀯𑀸𑀲𑁂𑀦 𑀅𑀮𑀁, 𑀫𑀸 𑀇𑀥 𑀢𑀯 𑀯𑀸𑀲𑁄 𑀳𑁄𑀢𑀽𑀢𑀺 𑀅𑀢𑁆𑀣𑁄. 𑀯𑀸𑀭𑀡𑀢𑁆𑀣𑁄 𑀳𑀺 𑀇𑀥 𑀅𑀮𑀁-𑀲𑀤𑁆𑀤𑁄. 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑁄𑀢𑀺 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑁆𑀯𑀸 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀇𑀫𑁂 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁩𑁪) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀸𑀬 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀯𑀸𑀘𑀸𑀬 𑀓𑀢𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑁄. 𑀬𑀲𑁆𑀫𑀺𑀜𑁆𑀘 𑀯𑀺𑀳𑀸𑀭𑁂 𑀯𑀲𑀢𑀻𑀢𑀺 𑀕𑀸𑀫𑀢𑁄 𑀩𑀳𑀺𑀯𑀺𑀳𑀸𑀭𑀫𑀸𑀳. 𑀦𑁂𑀯 𑀢𑀲𑁆𑀫𑀺𑀁 𑀕𑀸𑀫𑁂…𑀧𑁂… 𑀘𑀭𑀺𑀢𑀼𑀁 𑀮𑀪𑀢𑀻𑀢𑀺 𑀲𑀘𑁂𑀧𑀺 𑀕𑀸𑀫𑁄 𑀯𑀸 𑀦𑀺𑀕𑀫𑁄 𑀯𑀸 𑀤𑁆𑀯𑀸𑀤𑀲𑀬𑁄𑀚𑀦𑀧𑀭𑀫𑁄 𑀳𑁄𑀢𑀺, 𑀢𑀺𑀬𑁄𑀚𑀦𑀧𑀭𑀫𑁄 𑀘 𑀯𑀺𑀳𑀸𑀭𑁄 𑀳𑁄𑀢𑀺, 𑀦𑁂𑀯 𑀢𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁 𑀮𑀪𑀢𑀺, 𑀦 𑀯𑀺𑀳𑀸𑀭𑁂 𑀯𑀲𑀺𑀢𑀼𑀁. 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀦𑁆𑀢𑁂𑀦 𑀲𑀸𑀫𑀦𑁆𑀢𑀕𑀸𑀫𑁂𑀧𑀺 𑀧𑀺𑀡𑁆𑀟𑀸𑀬 𑀦 𑀘𑀭𑀺𑀢𑀩𑁆𑀩𑀁, 𑀲𑀸𑀫𑀦𑁆𑀢𑀯𑀺𑀳𑀸𑀭𑁂𑀧𑀺 𑀯𑀲𑀦𑁆𑀢𑁂𑀦 𑀢𑀲𑁆𑀫𑀺𑀁 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀦 𑀘𑀭𑀺𑀢𑀩𑁆𑀩𑀁. 𑀲𑀸𑀫𑀦𑁆𑀢𑀯𑀺𑀳𑀸𑀭𑁂 𑀯𑀲𑀦𑁆𑀢𑁂𑀦 𑀧𑀦 𑀲𑀸𑀫𑀦𑁆𑀢𑀕𑀸𑀫𑁂 𑀘𑀭𑀺𑀢𑀼𑀁 𑀯𑀝𑁆𑀝𑀢𑀺. 𑀆𑀧𑀚𑁆𑀚𑀺𑀢𑀩𑁆𑀩𑀸 𑀆𑀧𑀢𑁆𑀢𑀺𑀬𑁄𑀢𑀺 𑀓𑀼𑀮𑀲𑀗𑁆𑀕𑀳𑀢𑁆𑀣𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀤𑀸𑀦𑁂 𑀤𑀼𑀓𑁆𑀓𑀝𑀁, 𑀇𑀲𑁆𑀲𑀭𑀯𑀢𑀸𑀬 𑀲𑀗𑁆𑀖𑀲𑀦𑁆𑀢𑀓𑀤𑀸𑀦𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀧𑀲𑀬𑁆𑀳 𑀤𑀸𑀦𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 𑀇𑀫𑀸 𑀆𑀧𑀢𑁆𑀢𑀺𑀬𑁄. 𑀫𑀸𑀢𑀺𑀓𑀸𑀬𑀁 ‘‘𑀧𑀓𑁆𑀓𑀫𑀢𑀸 𑀬𑀲𑁆𑀫𑀸’’𑀢𑀺 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑀲𑁆𑀲 𑀯𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀁. 𑀆𑀤𑀺𑀫𑁆𑀳𑀺 𑀧𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀯𑀲𑁂𑀦 𑀤𑀝𑁆𑀞𑀩𑁆𑀩𑀁. 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑁂𑀢𑀺 𑀅𑀲𑁆𑀲𑀚𑀺𑀜𑁆𑀘𑁂𑀯 𑀧𑀼𑀦𑀩𑁆𑀩𑀲𑀼𑀓𑀜𑁆𑀘.

𑀓𑀼𑀮𑀤𑀽𑀲𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀗𑁆𑀖𑀸𑀤𑀺𑀲𑁂𑀲𑀦𑀺𑀕𑀫𑀦𑀯𑀡𑁆𑀡𑀦𑀸

𑀧𑀞𑀫𑀸𑀧𑀢𑁆𑀢𑀺𑀓𑀸𑀢𑀺 𑀅𑀯𑀬𑀯𑁂𑀦 𑀯𑀺𑀕𑁆𑀕𑀳𑁄 𑀲𑀫𑀼𑀤𑀸𑀬𑁄 𑀲𑀫𑀸𑀲𑀢𑁆𑀣𑁄𑀢𑀺 𑀆𑀳 ‘‘𑀧𑀞𑀫𑀁 𑀆𑀧𑀢𑁆𑀢𑀺 𑀏𑀢𑁂𑀲𑀦𑁆𑀢𑀺 𑀧𑀞𑀫𑀸𑀧𑀢𑁆𑀢𑀺𑀓𑀸’’𑀢𑀺. 𑀯𑀻𑀢𑀺𑀓𑁆𑀓𑀫𑀦𑀓𑁆𑀔𑀡𑁂𑀬𑁂𑀯𑀸𑀢𑀺 𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑀦𑀓𑁆𑀔𑀡𑁂𑀬𑁂𑀯. 𑀏𑀯-𑀓𑀸𑀭𑁂𑀦 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀓𑁆𑀔𑀡𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀳𑀲𑁆𑀲 𑀬𑀢𑁆𑀢𑀓𑁄 𑀧𑀭𑀺𑀘𑁆𑀙𑁂𑀤𑁄 𑀬𑀸𑀯𑀢𑀻𑀳𑀁. 𑀢𑁂𑀦𑀸𑀳 ‘‘𑀬𑀢𑁆𑀢𑀓𑀸𑀦𑀺 𑀅𑀳𑀸𑀦𑀻’’𑀢𑀺. 𑀅𑀳𑀸𑀦𑀻𑀢𑀺 𑀘 𑀤𑀺𑀯𑀲𑀸𑀦𑀻𑀢𑀺 𑀅𑀢𑁆𑀣𑁄.

𑀯𑀢𑁆𑀣𑀼𑀯𑀲𑁂𑀦 𑀯𑀸𑀢𑀺 𑀅𑀲𑀼𑀘𑀺𑀫𑁄𑀘𑀦𑀸𑀤𑀺𑀯𑀻𑀢𑀺𑀓𑁆𑀓𑀫𑀫𑀢𑁆𑀢𑀯𑀲𑁂𑀦 𑀯𑀸. 𑀇𑀤𑀦𑁆𑀢𑀺 𑀇𑀤𑀁 𑀯𑀻𑀢𑀺𑀓𑁆𑀓𑀫𑀁. 𑀦𑀸𑀫𑀫𑀢𑁆𑀢𑀯𑀲𑁂𑀦 𑀯𑀸 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑀸 𑀆𑀧𑀢𑁆𑀢𑀻𑀢𑀺 ‘‘𑀅𑀬𑀁 𑀲𑀗𑁆𑀖𑀸𑀤𑀺𑀲𑁂𑀲𑁄 𑀦𑀸𑀫 𑀆𑀧𑀢𑁆𑀢𑀻’’𑀢𑀺 𑀏𑀯𑀁 𑀯𑀺𑀦𑀸 𑀯𑀢𑁆𑀣𑀼𑀁 𑀦𑀸𑀫𑀯𑀲𑁂𑀦 𑀯𑀸. 𑀫𑀢𑁆𑀢𑀲𑀤𑁆𑀤𑁂𑀦 𑀘𑁂𑀢𑁆𑀣 𑀯𑀢𑁆𑀣𑀼𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀧𑁄𑀢𑁆𑀣𑀓𑁂𑀲𑀼 𑀧𑀦 𑀓𑀢𑁆𑀣𑀘𑀺 ‘‘𑀦𑀸𑀫𑀕𑁄𑀢𑁆𑀢𑀯𑀲𑁂𑀦 𑀯𑀸’’𑀢𑀺 𑀮𑀺𑀔𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁 ‘‘𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑀸 𑀆𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀇𑀤𑀸𑀦𑀺 𑀦𑀁 𑀓𑀲𑁆𑀲𑀘𑀺 𑀦 𑀆𑀭𑁄𑀘𑁂𑀲𑁆𑀲𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀆𑀭𑁄𑀘𑀦𑁂 𑀉𑀲𑁆𑀲𑀸𑀳𑀁 𑀞𑀧𑁂𑀢𑁆𑀯𑀸. 𑀦 𑀓𑁂𑀯𑀮𑀁 𑀯𑀢𑁆𑀣𑀼𑀦𑀸𑀫𑀯𑀲𑁂𑀦𑁂𑀯 𑀆𑀧𑀢𑁆𑀢𑀺𑀲𑀜𑁆𑀜𑀻 𑀳𑀼𑀢𑁆𑀯𑀸 𑀙𑀸𑀤𑁂𑀦𑁆𑀢𑀲𑁆𑀲𑁂𑀯, 𑀅𑀣 𑀔𑁄 𑀬𑁄𑀧𑀺 𑀏𑀯𑀁 𑀅𑀚𑀸𑀦𑀦𑁆𑀢𑁄 𑀓𑁂𑀯𑀮𑀁 ‘‘𑀆𑀧𑀢𑁆𑀢𑀺𑀁 𑀙𑀸𑀤𑁂𑀫𑀻’’𑀢𑀺 𑀆𑀧𑀢𑁆𑀢𑀺𑀲𑀜𑁆𑀜𑀸𑀬 𑀙𑀸𑀤𑁂𑀢𑀺, 𑀢𑀲𑁆𑀲𑀧𑀺 𑀙𑀦𑁆𑀦𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀘𑁂 𑀧𑀦𑁂𑀢𑁆𑀣 𑀅𑀦𑀸𑀧𑀢𑁆𑀢𑀺𑀲𑀜𑁆𑀜𑀻 𑀯𑀸 𑀳𑁄𑀢𑀺, 𑀅𑀜𑁆𑀜𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑀲𑀜𑁆𑀜𑀻 𑀯𑀸 𑀯𑁂𑀫𑀢𑀺𑀓𑁄 𑀯𑀸 𑀳𑀼𑀢𑁆𑀯𑀸 ‘‘𑀦 𑀤𑀸𑀦𑀺 𑀦𑀁 𑀓𑀲𑁆𑀲𑀘𑀺 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀙𑀸𑀤𑁂𑀢𑀼𑀓𑀸𑀫𑁄𑀯 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀺, 𑀅𑀘𑁆𑀙𑀦𑁆𑀦𑀸𑀯 𑀳𑁄𑀢𑀻𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀅𑀦𑀸𑀧𑀢𑁆𑀢𑀺 𑀧𑀦 𑀆𑀧𑀢𑁆𑀢𑀺𑀲𑀜𑁆𑀜𑀸𑀬𑀧𑀺 𑀅𑀦𑀸𑀧𑀢𑁆𑀢𑀺𑀲𑀜𑁆𑀜𑀸𑀬𑀧𑀺 𑀙𑀸𑀤𑁂𑀦𑁆𑀢𑁂𑀦 𑀅𑀘𑁆𑀙𑀸𑀤𑀺𑀢𑀸𑀯 𑀳𑁄𑀢𑀺. 𑀮𑀳𑀼𑀓𑀁 𑀯𑀸 ‘‘𑀕𑀭𑀼𑀓𑀸’’𑀢𑀺 𑀕𑀭𑀼𑀓𑀁 𑀯𑀸 ‘‘𑀮𑀳𑀼𑀓𑀸’’𑀢𑀺 𑀙𑀸𑀤𑁂𑀢𑀺, 𑀅𑀮𑀚𑁆𑀚𑀺𑀧𑀓𑁆𑀔𑁂 𑀢𑀺𑀝𑁆𑀞𑀢𑀺, 𑀆𑀧𑀢𑁆𑀢𑀺 𑀧𑀦 𑀅𑀘𑁆𑀙𑀦𑁆𑀦𑀸 𑀳𑁄𑀢𑀺. 𑀕𑀭𑀼𑀓𑀁 ‘‘𑀮𑀳𑀼𑀓𑀸’’𑀢𑀺 𑀫𑀜𑁆𑀜𑀫𑀸𑀦𑁄 𑀤𑁂𑀲𑁂𑀢𑀺, 𑀦𑁂𑀯 𑀤𑁂𑀲𑀺𑀢𑀸 𑀳𑁄𑀢𑀺 𑀦𑀘𑁆𑀙𑀦𑁆𑀦𑀸.

𑀧𑀓𑀢𑁄 𑀲𑀪𑀸𑀯𑀪𑀽𑀢𑁄 𑀅𑀢𑁆𑀢𑀸 𑀅𑀲𑁆𑀲𑀸𑀢𑀺 𑀧𑀓𑀢𑀢𑁆𑀢𑁄, 𑀦 𑀓𑀫𑁆𑀫𑁂𑀳𑀺 𑀯𑀺𑀓𑀢𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀦𑀼𑀓𑁆𑀔𑀺𑀢𑁆𑀢𑁄 𑀲𑀫𑀸𑀦𑀲𑀁𑀯𑀸𑀲𑀓𑁄’’𑀢𑀺. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀦 𑀤𑀸𑀦𑀺 𑀦𑀁 𑀓𑀲𑁆𑀲𑀘𑀺 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑁂𑀯 𑀦𑀬𑁂𑀦. 𑀅𑀣 ‘‘𑀫𑀬𑁆𑀳𑀁 𑀲𑀗𑁆𑀖𑁂𑀦 𑀓𑀫𑁆𑀫𑀁 𑀓𑀢’’𑀦𑁆𑀢𑀺 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨) 𑀅𑀧𑀓𑀢𑀢𑁆𑀢𑀲𑀜𑁆𑀜𑀻 𑀳𑀼𑀢𑁆𑀯𑀸 𑀙𑀸𑀤𑁂𑀢𑀺, 𑀅𑀘𑁆𑀙𑀦𑁆𑀦𑀸𑀯 𑀳𑁄𑀢𑀺. 𑀅𑀧𑀓𑀢𑀢𑁆𑀢𑁂𑀦 𑀧𑀦 𑀧𑀓𑀢𑀢𑁆𑀢𑀲𑀜𑁆𑀜𑀺𑀦𑀸 𑀯𑀸 𑀧𑀓𑀢𑀢𑁆𑀢𑁂𑀦 𑀅𑀧𑀓𑀢𑀢𑁆𑀢𑀲𑀜𑁆𑀜𑀺𑀦𑀸 𑀯𑀸 𑀙𑀸𑀤𑀺𑀢𑀸𑀧𑀺 𑀅𑀘𑁆𑀙𑀦𑁆𑀦𑀸𑀯 𑀳𑁄𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀆𑀧𑀚𑁆𑀚𑀢𑀺 𑀕𑀭𑀼𑀓𑀁 𑀲𑀸𑀯𑀲𑁂𑀲𑀁;

𑀙𑀸𑀤𑁂𑀢𑀺 𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘;

𑀦 𑀪𑀺𑀓𑁆𑀔𑀼𑀦𑀻 𑀦𑁄 𑀘 𑀨𑀼𑀲𑁂𑀬𑁆𑀬 𑀯𑀚𑁆𑀚𑀁;

𑀧𑀜𑁆𑀳𑀸𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸’’𑀢𑀺. (𑀧𑀭𑀺. 𑁪𑁮𑁧);

𑀅𑀬𑀜𑁆𑀳𑀺 𑀧𑀜𑁆𑀳𑁄 𑀉𑀓𑁆𑀔𑀺𑀢𑁆𑀢𑀓𑁂𑀦 𑀓𑀣𑀺𑀢𑁄.

𑀤𑀲𑀲𑀼 𑀅𑀦𑁆𑀢𑀭𑀸𑀬𑁂𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀲𑀘𑁂 𑀧𑀦 𑀬𑁄 𑀪𑀻𑀭𑀼𑀓𑀚𑀸𑀢𑀺𑀓𑀢𑀸𑀬 𑀅𑀦𑁆𑀥𑀓𑀸𑀭𑁂 𑀅𑀫𑀦𑀼𑀲𑁆𑀲𑀘𑀡𑁆𑀟𑀫𑀺𑀕𑀪𑀬𑁂𑀦 𑀅𑀦𑁆𑀢𑀭𑀸𑀬𑀺𑀓𑀲𑀜𑁆𑀜𑀻 𑀳𑀼𑀢𑁆𑀯𑀸 𑀙𑀸𑀤𑁂𑀢𑀺, 𑀅𑀘𑁆𑀙𑀦𑁆𑀦𑀸𑀯 𑀳𑁄𑀢𑀺. 𑀬𑀲𑁆𑀲𑀧𑀺 𑀧𑀩𑁆𑀩𑀢𑀯𑀺𑀳𑀸𑀭𑁂 𑀯𑀲𑀦𑁆𑀢𑀲𑁆𑀲 𑀓𑀦𑁆𑀤𑀭𑀁 𑀯𑀸 𑀦𑀤𑀺𑀁 𑀯𑀸 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀆𑀭𑁄𑀘𑁂𑀢𑀩𑁆𑀩𑀁 𑀳𑁄𑀢𑀺, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀘 𑀘𑀡𑁆𑀟𑀯𑀸𑀴𑀅𑀫𑀦𑀼𑀲𑁆𑀲𑀸𑀤𑀺𑀪𑀬𑀁 𑀅𑀢𑁆𑀣𑀺, 𑀫𑀕𑁆𑀕𑁂 𑀅𑀚𑀕𑀭𑀸 𑀦𑀺𑀧𑀚𑁆𑀚𑀦𑁆𑀢𑀺, 𑀦𑀤𑀻 𑀧𑀽𑀭𑀸 𑀳𑁄𑀢𑀺, 𑀏𑀢𑀲𑁆𑀫𑀺𑀁 𑀲𑀢𑀺𑀬𑁂𑀯 𑀅𑀦𑁆𑀢𑀭𑀸𑀬𑁂 𑀅𑀦𑁆𑀢𑀭𑀸𑀬𑀺𑀓𑀲𑀜𑁆𑀜𑀻 𑀳𑀼𑀢𑁆𑀯𑀸 𑀙𑀸𑀤𑁂𑀢𑀺, 𑀅𑀘𑁆𑀙𑀦𑁆𑀦𑀸𑀯 𑀳𑁄𑀢𑀺. 𑀅𑀦𑁆𑀢𑀭𑀸𑀬𑀺𑀓𑀲𑁆𑀲 𑀧𑀦 𑀅𑀦𑁆𑀢𑀭𑀸𑀬𑀺𑀓𑀲𑀜𑁆𑀜𑀸𑀬 𑀯𑀸 𑀅𑀦𑀦𑁆𑀢𑀭𑀸𑀬𑀺𑀓𑀲𑀜𑁆𑀜𑀸𑀬 𑀯𑀸 𑀙𑀸𑀤𑀬𑀢𑁄 𑀅𑀘𑁆𑀙𑀦𑁆𑀦𑀸𑀯.

𑀪𑀺𑀓𑁆𑀔𑀼𑀦𑁄𑀢𑀺 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀲𑀘𑀲𑁆𑀲 𑀫𑀼𑀔𑁂 𑀅𑀧𑁆𑀧𑀫𑀢𑁆𑀢𑀓𑁄 𑀕𑀡𑁆𑀟𑁄 𑀯𑀸 𑀳𑁄𑀢𑀺, 𑀳𑀦𑀼𑀓𑀯𑀸𑀢𑁄 𑀯𑀸 𑀯𑀺𑀚𑁆𑀛𑀢𑀺, 𑀤𑀦𑁆𑀢𑁄 𑀯𑀸 𑀭𑀼𑀚𑁆𑀚𑀢𑀺, 𑀪𑀺𑀓𑁆𑀔𑀸 𑀯𑀸 𑀫𑀦𑁆𑀤𑀸 𑀮𑀤𑁆𑀥𑀸 𑀳𑁄𑀢𑀺, 𑀢𑀸𑀯𑀢𑀓𑁂𑀦 𑀧𑀦 𑀦𑁂𑀯 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀦 𑀕𑀦𑁆𑀢𑀼𑀁. 𑀅𑀧𑀺𑀘 𑀔𑁄 ‘‘𑀦 𑀲𑀓𑁆𑀓𑁄𑀫𑀻’’𑀢𑀺 𑀲𑀜𑁆𑀜𑀻 𑀳𑁄𑀢𑀺, 𑀅𑀬𑀁 𑀧𑀳𑀼 𑀳𑀼𑀢𑁆𑀯𑀸 𑀅𑀧𑁆𑀧𑀳𑀼𑀲𑀜𑁆𑀜𑀻 𑀦𑀸𑀫. 𑀇𑀫𑀺𑀦𑀸 𑀙𑀸𑀤𑀺𑀢𑀸𑀧𑀺 𑀅𑀘𑁆𑀙𑀸𑀤𑀺𑀢𑀸. 𑀅𑀧𑁆𑀧𑀳𑀼𑀦𑀸 𑀧𑀦 𑀯𑀢𑁆𑀢𑀼𑀁 𑀯𑀸 𑀕𑀦𑁆𑀢𑀼𑀁 𑀯𑀸 𑀅𑀲𑀫𑀢𑁆𑀣𑁂𑀦 𑀧𑀳𑀼𑀲𑀜𑁆𑀜𑀺𑀦𑀸 𑀯𑀸 𑀅𑀧𑁆𑀧𑀳𑀼𑀲𑀜𑁆𑀜𑀺𑀦𑀸 𑀯𑀸 𑀙𑀸𑀤𑀺𑀢𑀸𑀧𑀺 𑀅𑀘𑁆𑀙𑀸𑀤𑀺𑀢𑀸𑀯.

𑀇𑀤𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺 𑀇𑀤𑀁 𑀅𑀗𑁆𑀕𑀤𑁆𑀯𑀬𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀲𑀘𑁂 𑀧𑀦 ‘‘𑀙𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀧𑀼𑀭𑁂𑀪𑀢𑁆𑀢𑁂 𑀯𑀸 𑀧𑀘𑁆𑀙𑀸𑀪𑀢𑁆𑀢𑁂 𑀯𑀸 𑀧𑀞𑀫𑀬𑀸𑀫𑀸𑀤𑀻𑀲𑀼 𑀯𑀸 𑀮𑀚𑁆𑀚𑀺𑀥𑀫𑁆𑀫𑀁 𑀑𑀓𑁆𑀓𑀫𑀢𑀺, 𑀅𑀦𑁆𑀢𑁄𑀅𑀭𑀼𑀡𑁂𑀬𑁂𑀯 𑀆𑀭𑁄𑀘𑁂𑀢𑀺, 𑀅𑀬𑀁 𑀙𑀸𑀤𑁂𑀢𑀼𑀓𑀸𑀫𑁄 𑀦 𑀙𑀸𑀤𑁂𑀢𑀺 𑀦𑀸𑀫.

𑀬𑀲𑁆𑀲 𑀧𑀦 𑀅𑀪𑀺𑀓𑁆𑀔𑀼𑀓𑁂 𑀞𑀸𑀦𑁂 𑀯𑀲𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀕𑀫𑀦𑀁 𑀆𑀕𑀫𑁂𑀦𑁆𑀢𑀲𑁆𑀲 𑀯𑀸, 𑀲𑀪𑀸𑀕𑀲𑁆𑀲 𑀲𑀦𑁆𑀢𑀺𑀓𑀁 𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀅𑀟𑁆𑀠𑀫𑀸𑀲𑁄𑀧𑀺 𑀫𑀸𑀲𑁄𑀧𑀺 𑀅𑀢𑀺𑀓𑁆𑀓𑀫𑀢𑀺, 𑀅𑀬𑀁 𑀦𑀘𑁆𑀙𑀸𑀤𑁂𑀢𑀼𑀓𑀸𑀫𑁄 𑀙𑀸𑀤𑁂𑀢𑀺 𑀦𑀸𑀫. 𑀅𑀬𑀫𑁆𑀧𑀺 𑀅𑀘𑁆𑀙𑀦𑁆𑀦𑀸𑀯 𑀳𑁄𑀢𑀺.

𑀬𑁄 𑀧𑀦 𑀆𑀧𑀦𑁆𑀦𑀫𑀢𑁆𑀢𑁄𑀯 𑀅𑀕𑁆𑀕𑀺𑀁 𑀅𑀓𑁆𑀓𑀦𑁆𑀢𑀧𑀼𑀭𑀺𑀲𑁄 𑀯𑀺𑀬 𑀲𑀳𑀲𑀸 𑀅𑀧𑀓𑁆𑀓𑀫𑀺𑀢𑁆𑀯𑀸 𑀲𑀪𑀸𑀕𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀆𑀯𑀺 𑀓𑀭𑁄𑀢𑀺, 𑀅𑀬𑀁 𑀦𑀘𑁆𑀙𑀸𑀤𑁂𑀢𑀼𑀓𑀸𑀫𑁄𑀯 𑀦 𑀙𑀸𑀤𑁂𑀢𑀺 𑀦𑀸𑀫. 𑀲𑀪𑀸𑀕𑀫𑀢𑁆𑀢𑀫𑁂𑀯 𑀧𑀫𑀸𑀡𑀦𑁆𑀢𑀺 𑀅𑀯𑁂𑀭𑀺𑀲𑀪𑀸𑀕𑀫𑀢𑁆𑀢𑀫𑁂𑀯 𑀧𑀫𑀸𑀡𑀁. 𑀅𑀯𑁂𑀭𑀺𑀲𑀪𑀸𑀕𑀲𑁆𑀲 𑀳𑀺 𑀲𑀦𑁆𑀢𑀺𑀓𑁂 𑀆𑀭𑁄𑀘𑁂𑀢𑀩𑁆𑀩𑀁. 𑀬𑁄 𑀧𑀦 𑀯𑀺𑀲𑀪𑀸𑀕𑁄 𑀳𑁄𑀢𑀺 𑀲𑀼𑀢𑁆𑀯𑀸 𑀧𑀓𑀸𑀲𑁂𑀢𑀼𑀓𑀸𑀫𑁄, 𑀏𑀯𑀭𑀽𑀧𑀲𑁆𑀲 𑀉𑀧𑀚𑁆𑀛𑀸𑀬𑀲𑁆𑀲𑀧𑀺 𑀲𑀦𑁆𑀢𑀺𑀓𑁂 𑀦 𑀆𑀭𑁄𑀘𑁂𑀢𑀩𑁆𑀩𑀸. 𑀢𑀢𑁆𑀣 𑀧𑀼𑀭𑁂𑀪𑀢𑁆𑀢𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀼, 𑀧𑀘𑁆𑀙𑀸𑀪𑀢𑁆𑀢𑀁 𑀯𑀸 𑀤𑀺𑀯𑀸 𑀯𑀸 𑀭𑀢𑁆𑀢𑀺𑀁 𑀯𑀸, 𑀬𑀸𑀯 𑀅𑀭𑀼𑀡𑀁 𑀦 𑀉𑀕𑁆𑀕𑀘𑁆𑀙𑀢𑀺, 𑀢𑀸𑀯 𑀆𑀭𑁄𑀘𑁂𑀢𑀩𑁆𑀩𑀁. 𑀉𑀤𑁆𑀥𑀲𑁆𑀢𑁂 𑀅𑀭𑀼𑀡𑁂 𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺, 𑀧𑀝𑀺𑀘𑁆𑀙𑀸𑀤𑀦𑀧𑀘𑁆𑀘𑀬𑀸 𑀘 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀲𑀗𑁆𑀔𑁂𑀧𑀢𑁄𑀢𑀺 𑀲𑀫𑀸𑀲𑀢𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀯𑀼𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀓𑀸𑀫𑀸 𑀧𑀭𑀺𑀯𑀢𑁆𑀣𑀩𑁆𑀩𑀦𑁆𑀢𑀺 𑀅𑀧𑁆𑀧𑀝𑀺𑀓𑀫𑁆𑀫𑀓𑀢𑀸𑀬 𑀆𑀧𑀢𑁆𑀢𑀺𑀬𑀸 𑀲𑀕𑁆𑀕𑀫𑁄𑀓𑁆𑀔𑀸𑀯𑀭𑀡𑀪𑀸𑀯𑀢𑁄 𑀅𑀦𑀺𑀘𑁆𑀙𑀦𑁆𑀢𑁂𑀦𑀸𑀧𑀺 𑀧𑀭𑀺𑀯𑀲𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀦 𑀓𑀸𑀫𑁂𑀦𑀸’’𑀢𑀺𑀆𑀤𑀺. 𑀧𑀭𑀺𑀯𑀸𑀲𑀁 𑀲𑀫𑀸𑀤𑀸𑀬𑀸𑀢𑀺 𑀧𑀭𑀺𑀯𑀸𑀲𑀯𑀢𑁆𑀢𑀁 𑀲𑀗𑁆𑀖𑀫𑀚𑁆𑀛𑁂 𑀲𑀫𑀸𑀤𑀺𑀬𑀺𑀢𑁆𑀯𑀸. 𑀬𑀤𑀺𑀧𑀺 𑀘𑀢𑀼𑀩𑁆𑀩𑀺𑀥𑁄 𑀧𑀭𑀺𑀯𑀸𑀲𑁄 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁄, 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁄, 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄, 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄𑀢𑀺, 𑀢𑀣𑀸𑀧𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁄 𑀇𑀥 𑀦 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀢𑀢𑁆𑀣 𑀧𑀝𑀺𑀘𑁆𑀙𑀦𑁆𑀦…𑀧𑁂… 𑀢𑀺𑀯𑀺𑀥𑁄 𑀧𑀭𑀺𑀯𑀸𑀲𑁄’’𑀢𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀯𑀸𑀓𑁆𑀬𑁂. 𑀧𑀝𑀺𑀘𑁆𑀙𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸 𑀲𑀢𑀺 𑀤𑀸𑀢𑀩𑁆𑀩𑁄 𑀧𑀭𑀺𑀯𑀸𑀲𑁄 𑀧𑀝𑀺𑀘𑁆𑀙𑀦𑁆𑀦𑀯𑀺𑀲𑀬𑀢𑀸𑀬 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁄. 𑀲𑀼𑀤𑁆𑀥𑀦𑁆𑀢𑀢𑁄 𑀧𑀝𑁆𑀞𑀸𑀬 𑀤𑀸𑀢𑀩𑁆𑀩𑁄 𑀧𑀭𑀺𑀯𑀸𑀲𑁄 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄. 𑀲𑀫𑁄𑀤𑀳𑀺𑀢𑁆𑀯𑀸 𑀤𑀸𑀢𑀩𑁆𑀩𑁄 𑀧𑀭𑀺𑀯𑀸𑀲𑁄 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄.

𑀇𑀤𑀸𑀦𑀺 𑀢𑁂 𑀢𑀺𑀯𑀺𑀥𑁂𑀬𑁂𑀯 𑀧𑀭𑀺𑀯𑀸𑀲𑁂 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀳𑀻𑀢𑀺 𑀬𑀲𑁆𑀫𑀸. 𑀏𑀓𑀸𑀳𑀁 𑀧𑀝𑀺𑀘𑁆𑀙𑀦𑁆𑀦𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀆𑀧𑀢𑁆𑀢𑀺 𑀘 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀦 𑀦𑀬𑁂𑀦. 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀏𑀢𑁆𑀣 𑀇𑀢𑀺𑀲𑀤𑁆𑀤𑁄 ‘‘𑀇𑀢𑀺 𑀯𑀸, 𑀇𑀢𑀺 𑀏𑀯𑀭𑀽𑀧𑀸 𑀯𑀺𑀲𑀽𑀓𑀤𑀲𑁆𑀲𑀦𑀸 𑀧𑀝𑀺𑀯𑀺𑀭𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁧𑁩, 𑁧𑁯𑁭) 𑀯𑀺𑀬 𑀆𑀤𑀺𑀅𑀢𑁆𑀣𑁄. 𑀢𑁂𑀦 ‘‘𑀲𑁄𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀬𑀸𑀘𑀸𑀫𑀻’’𑀢𑀺 𑀇𑀫𑀁 𑀧𑀸𑀴𑀺𑀲𑁂𑀲𑀁 (𑀘𑀽𑀴𑀯. 𑁧𑁦𑁨) 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀯𑀁 𑀧𑀭𑀺𑀯𑀸𑀲𑀁 𑀬𑀸𑀘𑀸𑀧𑁂𑀢𑁆𑀯𑀸𑀢𑀺 𑀏𑀯𑀁 𑀬𑀸𑀯𑀢𑀢𑀺𑀬𑀁 𑀬𑀸𑀘𑀸𑀧𑁂𑀢𑁆𑀯𑀸. 𑀔𑀦𑁆𑀥𑀓𑁂 𑀆𑀕𑀢𑀦𑀬𑁂𑀦𑀸𑀢𑀺 𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁯𑁭 𑀆𑀤𑀬𑁄) 𑀆𑀕𑀢𑀦𑀬𑁂𑀦. 𑀢𑀢𑁄𑀢𑀺 𑀧𑀓𑁆𑀔𑀢𑁄 𑀧𑀝𑁆𑀞𑀸𑀬. 𑀅𑀢𑀺𑀭𑁂𑀓𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀧𑀓𑁆𑀔𑀲𑁆𑀲 𑀅𑀢𑀺𑀭𑁂𑀓𑁄 𑀅𑀢𑀺𑀭𑁂𑀓𑀧𑀓𑁆𑀔𑁄, 𑀢𑀁 𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁄𑀢𑀺 𑀢𑀺𑀁𑀲𑀢𑀺𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬. 𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀲𑀢𑁆𑀢𑀸𑀦𑀁 𑀆𑀬𑀼𑀁 𑀫𑀺𑀦𑀦𑁆𑀢𑁄 𑀯𑀺𑀬 𑀲𑀺𑀬𑀢𑀺 𑀅𑀦𑁆𑀢𑀁 𑀓𑀭𑁄𑀢𑀻𑀢𑀺 𑀫𑀸𑀲𑁄, 𑀢𑀺𑀁𑀲𑀭𑀢𑁆𑀢𑀺𑀦𑁆𑀤𑀺𑀯𑁄, 𑀢𑀁 𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀁𑀯𑀘𑁆𑀙𑀭𑁂 𑀧𑀼𑀡𑁆𑀡𑁂𑀢𑀺 𑀢𑀁 𑀢𑀁 𑀲𑀢𑁆𑀢𑀁, 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀜𑁆𑀘 𑀲𑀗𑁆𑀕𑀫𑁆𑀫 𑀯𑀤𑀦𑁆𑀢𑁄 𑀯𑀺𑀬 𑀲𑀭𑀢𑀺 𑀧𑀯𑀢𑁆𑀢𑀢𑀻𑀢𑀺 𑀲𑀁𑀯𑀘𑁆𑀙𑀭𑁄, 𑀤𑁆𑀯𑀸𑀤𑀲 𑀫𑀸𑀲𑀸, 𑀢𑀲𑁆𑀫𑀺𑀁 𑀧𑀭𑀺𑀧𑀼𑀡𑁆𑀡𑁂.

𑀯𑀢𑁆𑀣𑀼𑀓𑀺𑀢𑁆𑀢𑀦𑀯𑀲𑁂𑀦 𑀯𑀸𑀢𑀺 𑀦𑀸𑀫𑁂𑀦 𑀲𑀳 𑀯𑀢𑁆𑀣𑀼𑀓𑀺𑀢𑁆𑀢𑀦𑀯𑀲𑁂𑀦 𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯 𑀳𑀺 𑀉𑀧𑀭𑀺 ‘‘𑀦𑀸𑀫𑀫𑀢𑁆𑀢𑀯𑀲𑁂𑀦 𑀯𑀸’’𑀢𑀺 𑀫𑀢𑁆𑀢𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀸𑀫𑀫𑀢𑁆𑀢𑀯𑀲𑁂𑀦𑀸𑀢𑀺 𑀯𑀢𑁆𑀣𑀼𑀓𑀺𑀢𑁆𑀢𑀦𑀁 𑀯𑀺𑀦𑀸 𑀓𑁂𑀯𑀮𑀁 𑀦𑀸𑀫𑀲𑁆𑀲𑁂𑀯 𑀯𑀲𑁂𑀦. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀤𑀼𑀯𑀺𑀥𑁂 𑀦𑀸𑀫𑁂 ‘‘𑀆𑀧𑀢𑁆𑀢𑀻’’𑀢𑀺 𑀲𑀩𑁆𑀩𑀲𑀸𑀥𑀸𑀭𑀡𑀁 𑀦𑀸𑀫𑀁, 𑀢𑀲𑁆𑀫𑀸. 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀻𑀢𑀺 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀦𑀸𑀫𑀸𑀬𑀁. 𑀇𑀢𑀺𑀲𑀤𑁆𑀤𑁄 𑀳𑁂𑀢𑁆𑀣 𑀯𑀘𑀦𑀻𑀬𑀢𑁆𑀣𑀁 𑀦𑀺𑀤𑀲𑁆𑀲𑁂𑀢𑀺. 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁 ‘‘𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀻’’𑀢𑀺 𑀓𑀸𑀬𑀲𑀁𑀲𑀕𑁆𑀕𑀸𑀤𑀻𑀦𑀫𑁆𑀧𑀺 𑀯𑀢𑁆𑀣𑀼𑀆𑀤𑀺𑀪𑀸𑀯𑁂𑀦 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸. 𑀯𑀢𑁆𑀣𑀼 𑀘𑁂𑀯 𑀕𑁄𑀢𑁆𑀢𑀜𑁆𑀘𑀸𑀢𑀺 𑀯𑀻𑀢𑀺𑀓𑁆𑀓𑀫𑀢𑁆𑀢𑀸 𑀯𑀢𑁆𑀣𑀼 𑀘𑁂𑀯 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁆𑀢𑀸 𑀕𑁄𑀢𑁆𑀢𑀜𑁆𑀘. 𑀕𑀁 𑀢𑀸𑀬𑀢𑀻𑀢𑀺 𑀕𑁄𑀢𑁆𑀢𑀁, 𑀲𑀚𑀸𑀢𑀺𑀢𑁄 𑀅𑀜𑁆𑀜𑀢𑁆𑀣 𑀓𑀸𑀬𑀲𑀁𑀲𑀕𑁆𑀕𑀸𑀤𑀻𑀲𑀼 𑀕𑀦𑁆𑀢𑀼𑀁 𑀅𑀤𑀢𑁆𑀯𑀸 𑀩𑀼𑀤𑁆𑀥𑀺𑀁, 𑀯𑀘𑀦𑀜𑁆𑀘 𑀭𑀓𑁆𑀔𑀢𑀻𑀢𑀺 𑀅𑀢𑁆𑀣𑁄. 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄 𑀦𑀸𑀫𑀸𑀬𑀁. 𑀏𑀢𑁆𑀣 𑀧𑀦 𑀇𑀢𑀺𑀲𑀤𑁆𑀤𑁄 𑀯𑀘𑀦𑀯𑀘𑀦𑀻𑀬𑀲𑀫𑀼𑀤𑀸𑀬𑀁 𑀦𑀺𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘𑀸’’𑀢𑀺, 𑀲𑀚𑀸𑀢𑀺𑀲𑀸𑀥𑀸𑀭𑀡𑀦𑀸𑀫𑀢𑁆𑀢𑀸 𑀦𑀸𑀫𑀜𑁆𑀘𑁂𑀯 𑀢𑁂𑀦 𑀢𑁂𑀦 𑀯𑀻𑀢𑀺𑀓𑁆𑀓𑀫𑁂𑀦𑀸𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀆𑀧𑀢𑁆𑀢𑀺 𑀘𑀸𑀢𑀺 𑀅𑀢𑁆𑀣𑁄. 𑀇𑀤𑀫𑁆𑀧𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀯 ‘‘𑀆𑀧𑀢𑁆𑀢𑀺𑀬𑁄’’𑀢𑀺 𑀇𑀫𑀲𑁆𑀲𑀸𑀧𑀺 𑀦𑀸𑀫𑀸𑀤𑀺𑀪𑀸𑀯𑁂𑀦 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸. 𑀇𑀢𑀺𑀲𑀤𑁆𑀤𑁄 𑀯𑀸 𑀆𑀤𑀺𑀅𑀢𑁆𑀣𑁄. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀓𑀸𑀬𑀲𑀁𑀲𑀕𑁆𑀕𑀦𑁆𑀢𑀺𑀆𑀤𑀺𑀯𑀘𑀦𑁂𑀦𑀸𑀧𑀻’’𑀢𑀺𑀆𑀤𑀺𑀓𑀫𑁆𑀧𑀺 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺.

𑀢𑀬𑀺𑀤𑀁 𑀓𑀫𑁆𑀫𑀯𑀸𑀘𑀸𑀬 𑀓𑁂𑀦 𑀯𑀘𑀦𑁂𑀦 𑀕𑀳𑀺𑀢𑀦𑁆𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. ‘‘𑀆𑀧𑀢𑁆𑀢𑀻’’𑀢𑀺 𑀲𑀩𑁆𑀩𑀲𑀸𑀥𑀸𑀭𑀡𑀦𑀸𑀫𑀢𑁆𑀢𑀸, 𑀯𑀻𑀢𑀺𑀓𑁆𑀓𑀫𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀘 𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘 𑀳𑁄𑀢𑀻𑀢𑀺 𑀆𑀳 ‘‘𑀆𑀧𑀢𑁆𑀢𑀺𑀬𑁄𑀢𑀺 𑀯𑀘𑀦𑁂𑀦𑀸𑀧𑀻’’𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀇𑀤𑀁 𑀧𑀭𑀺𑀯𑀸𑀲𑀸𑀤𑀺𑀯𑀺𑀦𑀬𑀓𑀫𑁆𑀫𑀁 𑀯𑀢𑁆𑀣𑀼𑀯𑀲𑁂𑀦, 𑀕𑁄𑀢𑁆𑀢𑀯𑀲𑁂𑀦, 𑀦𑀸𑀫𑀯𑀲𑁂𑀦, 𑀆𑀧𑀢𑁆𑀢𑀺𑀯𑀲𑁂𑀦 𑀘 𑀓𑀸𑀢𑀼𑀁 𑀯𑀝𑁆𑀝𑀢𑀺𑀬𑁂𑀯, 𑀢𑀲𑁆𑀫𑀸. 𑀏𑀢𑁂𑀲𑀽𑀢𑀺 𑀯𑀢𑁆𑀣𑀼𑀆𑀤𑀻𑀲𑀼, 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀆𑀤𑀻𑀲𑀼 𑀯𑀸. 𑀯𑀢𑁆𑀢𑀁 𑀲𑀫𑀸𑀤𑀸𑀢𑀩𑁆𑀩𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀤𑁆𑀯𑀻𑀲𑀼 𑀧𑀤𑁂𑀲𑀼 𑀏𑀓𑁂𑀦𑀧𑀺 𑀲𑀫𑀸𑀤𑀸𑀢𑀩𑁆𑀩𑀁. 𑀤𑁆𑀯𑀻𑀳𑀺 𑀧𑀦 𑀲𑀼𑀲𑀫𑀸𑀤𑀺𑀦𑁆𑀦𑀁𑀬𑁂𑀯. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀲𑀫𑀸𑀤𑀸𑀦𑁂𑀧𑀺 𑀏𑀲𑁂𑀯 𑀦𑀬𑁄’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸).

𑀆𑀭𑁄𑀘𑁂𑀢𑁆𑀯𑀸𑀢𑀺 𑁋

‘‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁, 𑀲𑁄𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀬𑀸𑀘𑀺𑀁, 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀏𑀓𑀸𑀳𑀧𑀭𑀺𑀯𑀸𑀲𑀁 𑀅𑀤𑀸𑀲𑀺, 𑀲𑁄𑀳𑀁 𑀧𑀭𑀺𑀯𑀲𑀸𑀫𑀺, 𑀯𑁂𑀤𑀬𑀸𑀫𑀳𑀁, 𑀪𑀦𑁆𑀢𑁂, ‘𑀯𑁂𑀤𑀬𑀢𑀻’𑀢𑀺 𑀫𑀁 𑀲𑀗𑁆𑀖𑁄 𑀥𑀸𑀭𑁂𑀢𑀽’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨) 𑁋

𑀏𑀯𑀫𑀸𑀤𑀺𑀦𑀸 𑀢𑀁 𑀢𑀁 𑀬𑁄𑀚𑀦𑀸𑀦𑀼𑀭𑀽𑀧𑀁 𑀆𑀭𑁄𑀘𑁂𑀢𑁆𑀯𑀸. 𑀇𑀫𑀜𑁆𑀘 𑀧𑀦𑀢𑁆𑀣𑀁 𑀕𑀳𑁂𑀢𑁆𑀯𑀸 𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬 𑀆𑀭𑁄𑀘𑁂𑀢𑀼𑀁 𑀯𑀝𑁆𑀝𑀢𑀺𑀬𑁂𑀯 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨). ‘‘𑀧𑀼𑀦 𑀆𑀕𑀢𑀸𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀦𑁆𑀢𑁂𑀦𑀸’’𑀢𑀺 𑀇𑀤𑀁 𑀆𑀕𑀦𑁆𑀢𑀼𑀓𑀁 𑀪𑀺𑀓𑁆𑀔𑀼𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀏𑀓𑀲𑁆𑀲 𑀆𑀭𑁄𑀘𑁂𑀦𑁆𑀢𑁂𑀦 𑀅𑀯𑀲𑀸𑀦𑁂 ‘‘𑀯𑁂𑀤𑀬𑀢𑀻𑀢𑀺 𑀫𑀁 𑀆𑀬𑀲𑁆𑀫𑀸 𑀥𑀸𑀭𑁂𑀢𑀼’’, 𑀤𑁆𑀯𑀺𑀦𑁆𑀦𑀁 ‘‘𑀆𑀬𑀲𑁆𑀫𑀦𑁆𑀢𑀸 𑀥𑀸𑀭𑁂𑀦𑁆𑀢𑀼’’, 𑀢𑀺𑀡𑁆𑀡𑀁 ‘‘𑀆𑀬𑀲𑁆𑀫𑀦𑁆𑀢𑁄 𑀥𑀸𑀭𑁂𑀦𑁆𑀢𑀽’’𑀢𑀺 𑀯𑀢𑁆𑀢𑀩𑁆𑀩𑀁. 𑀯𑀢𑁆𑀢𑀪𑁂𑀤𑀜𑁆𑀘 𑀭𑀢𑁆𑀢𑀺𑀘𑁆𑀙𑁂𑀤𑀜𑁆𑀘 𑀅𑀓𑀢𑁆𑀯𑀸𑀢𑀺 ‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸𑀤𑀺𑀢𑀩𑁆𑀩𑀁 𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀧𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑁭𑁫) 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑁂 𑀬𑀸𑀦𑀺 𑀘𑀢𑀼𑀦𑀯𑀼𑀢𑀺 𑀯𑀢𑁆𑀢𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑁂𑀲𑀁 𑀪𑁂𑀤𑀜𑁆𑀘, 𑀬𑁄 𑀘 ‘‘𑀢𑀬𑁄 𑀔𑁄, 𑀉𑀧𑀸𑀮𑀺, 𑀧𑀸𑀭𑀺𑀯𑀸𑀲𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑀢𑁆𑀢𑀺𑀘𑁆𑀙𑁂𑀤𑀸 𑀲𑀳𑀯𑀸𑀲𑁄 𑀯𑀺𑀧𑁆𑀧𑀯𑀸𑀲𑁄 𑀅𑀦𑀸𑀭𑁄𑀘𑀦𑀸’’𑀢𑀺 (𑀘𑀽𑀴𑀯. 𑁮𑁩) 𑀭𑀢𑁆𑀢𑀺𑀘𑁆𑀙𑁂𑀤𑁄 𑀯𑀼𑀢𑁆𑀢𑁄, 𑀢𑀜𑁆𑀘 𑀅𑀓𑀢𑁆𑀯𑀸.

𑀅𑀬𑀁 𑀳𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑁋 𑀲𑀘𑁂 (𑀘𑀽𑀴𑀯. 𑀅𑀝𑁆𑀞. 𑁭𑁬) 𑀆𑀕𑀦𑁆𑀢𑀼𑀓𑀸 𑀫𑀼𑀳𑀼𑀢𑁆𑀢𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 𑀯𑀸 𑀅𑀯𑀺𑀲𑁆𑀲𑀫𑀺𑀢𑁆𑀯𑀸 𑀏𑀯 𑀯𑀸 𑀯𑀺𑀳𑀸𑀭𑀫𑀚𑁆𑀛𑁂𑀦 𑀕𑀘𑁆𑀙𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀆𑀭𑁄𑀘𑁂𑀢𑀩𑁆𑀩𑀁. 𑀲𑀘𑁂 𑀢𑀲𑁆𑀲 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 𑀕𑀘𑁆𑀙𑀦𑁆𑀢𑀺, 𑀅𑀬𑀜𑁆𑀘 𑀕𑀢𑀓𑀸𑀮𑁂 𑀚𑀸𑀦𑀸𑀢𑀺, 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀢𑀩𑁆𑀩𑀁. 𑀲𑀫𑁆𑀧𑀸𑀧𑀼𑀡𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑁄𑀯 𑀳𑁄𑀢𑀺, 𑀦 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀁. 𑀬𑁂𑀧𑀺 𑀅𑀦𑁆𑀢𑁄𑀯𑀺𑀳𑀸𑀭𑀁 𑀅𑀧𑁆𑀧𑀯𑀺𑀲𑀺𑀢𑁆𑀯𑀸 𑀉𑀧𑀘𑀸𑀭𑀲𑀻𑀫𑀁 𑀑𑀓𑁆𑀓𑀫𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀅𑀬𑀜𑁆𑀘 𑀦𑁂𑀲𑀁 𑀙𑀢𑁆𑀢𑀲𑀤𑁆𑀤𑀁 𑀯𑀸 𑀉𑀓𑁆𑀓𑀸𑀲𑀺𑀢𑀲𑀤𑁆𑀤𑀁 𑀯𑀸 𑀔𑀺𑀧𑀺𑀢𑀲𑀤𑁆𑀤𑀁 𑀯𑀸 𑀲𑀼𑀢𑁆𑀯𑀸𑀯 𑀆𑀕𑀦𑁆𑀢𑀼𑀓𑀪𑀸𑀯𑀁 𑀚𑀸𑀦𑀸𑀢𑀺, 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀢𑀩𑁆𑀩𑀁. 𑀕𑀢𑀓𑀸𑀮𑁂 𑀚𑀸𑀦𑀦𑁆𑀢𑁂𑀦𑀸𑀧𑀺 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀆𑀭𑁄𑀘𑁂𑀢𑀩𑁆𑀩𑀫𑁂𑀯. 𑀲𑀫𑁆𑀧𑀸𑀧𑀼𑀡𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑁄𑀯 𑀳𑁄𑀢𑀺, 𑀦 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀁. 𑀬𑁄𑀧𑀺 𑀭𑀢𑁆𑀢𑀺𑀁𑀬𑁂𑀯 𑀆𑀕𑀦𑁆𑀢𑁆𑀯𑀸 𑀭𑀢𑁆𑀢𑀺𑀁𑀬𑁂𑀯 𑀕𑀘𑁆𑀙𑀢𑀺, 𑀲𑁄𑀧𑀺𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑀁 𑀓𑀭𑁄𑀢𑀺. 𑀅𑀜𑁆𑀜𑀸𑀢𑀢𑁆𑀢𑀸 𑀧𑀦 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀁 𑀦𑀢𑁆𑀣𑀺. 𑀲𑀘𑁂 𑀅𑀚𑀸𑀦𑀺𑀢𑁆𑀯𑀸𑀯 𑀅𑀩𑁆𑀪𑀸𑀦𑀁 𑀓𑀭𑁄𑀢𑀺, 𑀅𑀓𑀢𑀫𑁂𑀯 𑀳𑁄𑀢𑀻𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 (𑀘𑀽𑀴𑀯. 𑀅𑀝𑁆𑀞. 𑁭𑁬) 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀅𑀥𑀺𑀓𑀸 𑀭𑀢𑁆𑀢𑀺𑀬𑁄 𑀕𑀳𑁂𑀢𑁆𑀯𑀸 𑀓𑀸𑀢𑀩𑁆𑀩𑀁. 𑀅𑀬𑀁 𑀅𑀧𑀡𑁆𑀡𑀓𑀧𑁆𑀧𑀝𑀺𑀧𑀤𑀸.

𑀦𑀤𑀺𑀆𑀤𑀻𑀲𑀼 𑀦𑀸𑀯𑀸𑀬 𑀕𑀘𑁆𑀙𑀦𑁆𑀢𑀫𑁆𑀧𑀺 𑀧𑀭𑀢𑀻𑀭𑁂 𑀞𑀺𑀢𑀫𑁆𑀧𑀺 𑀆𑀓𑀸𑀲𑁂 𑀕𑀘𑁆𑀙𑀦𑁆𑀢𑀫𑁆𑀧𑀺 𑀧𑀩𑁆𑀩𑀢𑀢𑀮𑀅𑀭𑀜𑁆𑀜𑀸𑀤𑀻𑀲𑀼 𑀤𑀽𑀭𑁂 𑀞𑀺𑀢𑀫𑁆𑀧𑀺 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀲𑀘𑁂 ‘‘𑀪𑀺𑀓𑁆𑀔𑀽’’𑀢𑀺 𑀯𑀯𑀢𑁆𑀣𑀸𑀦𑀁 𑀅𑀢𑁆𑀣𑀺, 𑀦𑀸𑀯𑀸𑀤𑀻𑀳𑀺 𑀯𑀸 𑀕𑀦𑁆𑀢𑁆𑀯𑀸, 𑀫𑀳𑀸𑀲𑀤𑁆𑀤𑀁 𑀓𑀢𑁆𑀯𑀸 𑀯𑀸 𑀯𑁂𑀕𑁂𑀦 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀯𑀸 𑀆𑀭𑁄𑀘𑁂𑀢𑀩𑁆𑀩𑀁, 𑀅𑀦𑀸𑀭𑁄𑀘𑁂𑀦𑁆𑀢𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑁄 𑀘𑁂𑀯 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀜𑁆𑀘. 𑀲𑀘𑁂 𑀯𑀸𑀬𑀫𑀦𑁆𑀢𑁄𑀧𑀺 𑀲𑀫𑁆𑀧𑀸𑀧𑀼𑀡𑀺𑀢𑀼𑀁 𑀯𑀸 𑀲𑀸𑀯𑁂𑀢𑀼𑀁 𑀯𑀸 𑀦 𑀲𑀓𑁆𑀓𑁄𑀢𑀺, 𑀭𑀢𑁆𑀢𑀺𑀘𑁆𑀙𑁂𑀤𑁄𑀯 𑀳𑁄𑀢𑀺, 𑀦 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀁.

𑀅𑀜𑁆𑀜𑀁 𑀓𑀜𑁆𑀘𑀺 𑀯𑀺𑀳𑀸𑀭𑀁 𑀕𑀢𑁂𑀦𑀧𑀺 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀢𑀩𑁆𑀩𑀫𑁂𑀯 (𑀘𑀽𑀴𑀯. 𑀅𑀝𑁆𑀞. 𑁭𑁬). 𑀲𑀘𑁂 𑀲𑀩𑁆𑀩𑁂 𑀏𑀓𑀝𑁆𑀞𑀸𑀦𑁂 𑀞𑀺𑀢𑁂 𑀧𑀲𑁆𑀲𑀢𑀺, 𑀏𑀓𑀝𑁆𑀞𑀸𑀦𑁂 𑀞𑀺𑀢𑁂𑀦𑁂𑀯 𑀆𑀭𑁄𑀘𑁂𑀢𑀩𑁆𑀩𑀁. 𑀅𑀣 𑀭𑀼𑀓𑁆𑀔𑀫𑀽𑀮𑀸𑀤𑀻𑀲𑀼 𑀯𑀺𑀲𑀼𑀁 𑀯𑀺𑀲𑀼𑀁 𑀞𑀺𑀢𑀸 𑀳𑁄𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀢𑀩𑁆𑀩𑀁. 𑀲𑀜𑁆𑀘𑀺𑀘𑁆𑀘 𑀅𑀦𑀸𑀭𑁄𑀘𑁂𑀦𑁆𑀢𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑁄 𑀘 𑀳𑁄𑀢𑀺, 𑀯𑀢𑁆𑀢𑀪𑁂𑀤𑁂 𑀘 𑀤𑀼𑀓𑁆𑀓𑀝𑀁. 𑀅𑀣 𑀯𑀺𑀘𑀺𑀦𑀦𑁆𑀢𑁄 𑀏𑀓𑀘𑁆𑀘𑁂 𑀦 𑀧𑀲𑁆𑀲𑀢𑀺, 𑀭𑀢𑁆𑀢𑀺𑀘𑁆𑀙𑁂𑀤𑁄𑀯 𑀳𑁄𑀢𑀺, 𑀦 𑀘 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀁. 𑀲𑀜𑁆𑀘𑀺𑀘𑁆𑀘 𑀅𑀦𑀸𑀭𑁄𑀘𑁂𑀦𑁆𑀢𑀲𑁆𑀲 𑀧𑀦 𑀭𑀢𑁆𑀢𑀺𑀘𑁆𑀙𑁂𑀤𑁄 𑀘𑁂𑀯 𑀳𑁄𑀢𑀺, 𑀯𑀢𑁆𑀢𑀪𑁂𑀤𑁂 𑀘 𑀤𑀼𑀓𑁆𑀓𑀝𑀁.

𑀢𑀢𑁆𑀣𑁂𑀯𑀸𑀢𑀺 𑀫𑀸𑀴𑀓𑀲𑀻𑀫𑀸𑀬𑀫𑁂𑀯. 𑀫𑀸𑀴𑀓𑀢𑁄 𑀧𑀦 𑀪𑀺𑀓𑁆𑀔𑀽𑀲𑀼 𑀦𑀺𑀓𑁆𑀔𑀦𑁆𑀢𑁂𑀲𑀼 𑀏𑀓𑀲𑁆𑀲𑀧𑀺 𑀲𑀦𑁆𑀢𑀺𑀓𑁂 𑀦𑀺𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀺 (𑀘𑀽𑀴𑀯. 𑀅𑀝𑁆𑀞. 𑁯𑁭). 𑀫𑀸𑀴𑀓𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀢𑀺𑀁 𑀧𑀝𑀺𑀮𑀪𑀦𑁆𑀢𑁂𑀦 𑀲𑀳 𑀕𑀘𑁆𑀙𑀦𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀏𑀓𑀧𑀼𑀕𑁆𑀕𑀮𑀲𑁆𑀲 𑀯𑀸 𑀲𑀦𑁆𑀢𑀺𑀓𑁂’’𑀢𑀺. 𑀲𑀘𑁂 𑀲𑁄𑀧𑀺 𑀧𑀓𑁆𑀓𑀦𑁆𑀢𑁄, 𑀅𑀜𑁆𑀜𑀲𑁆𑀲 𑀬𑀲𑁆𑀲 𑀫𑀸𑀴𑀓𑁂 𑀦𑀸𑀭𑁄𑀘𑀺𑀢𑀁, 𑀢𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀧𑀓𑀢𑀢𑁆𑀢𑀝𑁆𑀞𑀸𑀦𑁂𑀢𑀺 𑀲𑀗𑁆𑀖𑀓𑀫𑁆𑀫𑀸𑀦𑀁 𑀅𑀭𑀳𑀝𑁆𑀞𑀸𑀦𑁂. 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 (𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁩.𑁯𑁭) 𑀪𑀺𑀓𑁆𑀔𑀽𑀦𑀁 𑀲𑀚𑁆𑀛𑀸𑀬𑀦𑀲𑀤𑁆𑀤𑀲𑀯𑀦𑀽𑀧𑀘𑀸𑀭𑀯𑀺𑀚𑀳𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀫𑀳𑀸𑀫𑀕𑁆𑀕𑀢𑁄 𑀑𑀓𑁆𑀓𑀫𑁆𑀫𑀸𑀢𑀺 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀪𑀺𑀓𑁆𑀔𑀽𑀦𑀁 𑀉𑀧𑀘𑀸𑀭𑀯𑀺𑀚𑀳𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀕𑀼𑀫𑁆𑀩𑁂𑀦 𑀯𑀸 𑀯𑀢𑀺𑀬𑀸 𑀯𑀸 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂𑀢𑀺 𑀤𑀲𑁆𑀲𑀦𑀽𑀧𑀘𑀸𑀭𑀯𑀺𑀚𑀳𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀯𑀢𑁆𑀢𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀆𑀭𑁄𑀘𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀢𑁆𑀢𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀧𑀭𑀺𑀯𑀸𑀲𑁄 𑀆𑀭𑁄𑀘𑁂𑀢𑀩𑁆𑀩𑁄. ‘‘𑀆𑀭𑁄𑀘𑁂𑀢𑀩𑁆𑀩’’𑀦𑁆𑀢𑀺 𑀧𑀦 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀁. 𑀆𑀭𑁄𑀘𑁂𑀦𑁆𑀢𑁂𑀦 𑀘 𑀲𑀘𑁂 𑀦𑀯𑀓𑀢𑀭𑁄 𑀳𑁄𑀢𑀺, ‘‘𑀆𑀯𑀼𑀲𑁄’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀯𑀼𑀟𑁆𑀠𑀢𑀭𑁄, ‘‘𑀪𑀦𑁆𑀢𑁂’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀅𑀜𑁆𑀜𑁄 𑀓𑁄𑀘𑀺 𑀪𑀺𑀓𑁆𑀔𑀼 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀢𑀁 𑀞𑀸𑀦𑀁 𑀆𑀕𑀘𑁆𑀙𑀢𑀺. 𑀲𑀘𑁂 𑀏𑀲 𑀦𑀁 𑀧𑀲𑁆𑀲𑀢𑀺, 𑀲𑀤𑁆𑀤𑀁 𑀯𑀸 𑀢𑀲𑁆𑀲 𑀲𑀼𑀡𑀸𑀢𑀺, 𑀆𑀭𑁄𑀘𑁂𑀢𑀩𑁆𑀩𑀁. 𑀅𑀦𑀸𑀭𑁄𑀘𑁂𑀦𑁆𑀢𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑁄 𑀘𑁂𑀯 𑀯𑀢𑁆𑀢𑀪𑁂𑀤𑁄 𑀘. 𑀢𑁂𑀦𑀸𑀳 ‘‘𑀬𑀫𑁆𑀧𑀺 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺, 𑀢𑀲𑁆𑀲𑀸𑀧𑀺 𑀆𑀭𑁄𑀘𑁂𑀢𑀩𑁆𑀩𑀫𑁂𑀯𑀸’’𑀢𑀺. 𑀅𑀣 𑀤𑁆𑀯𑀸𑀤𑀲𑀳𑀢𑁆𑀣𑀁 𑀉𑀧𑀘𑀸𑀭𑀁 𑀑𑀓𑁆𑀓𑀫𑀺𑀢𑁆𑀯𑀸 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 𑀕𑀘𑁆𑀙𑀢𑀺, 𑀭𑀢𑁆𑀢𑀺𑀘𑁆𑀙𑁂𑀤𑁄 𑀳𑁄𑀢𑀺𑀬𑁂𑀯, 𑀯𑀢𑁆𑀢𑀪𑁂𑀤𑁄 𑀧𑀦 𑀦𑀢𑁆𑀣𑀺. 𑀉𑀝𑁆𑀞𑀺𑀢𑁂𑀢𑀺 𑀉𑀕𑁆𑀕𑀢𑁂. 𑀬𑀁 𑀲𑀩𑁆𑀩𑀧𑀞𑀫𑀁 𑀪𑀺𑀓𑁆𑀔𑀼𑀦𑁆𑀢𑀺 𑀯𑀺𑀳𑀸𑀭𑀢𑁄 𑀦𑀺𑀓𑁆𑀔𑀫𑀦𑁆𑀢𑀁 𑀯𑀸 𑀆𑀕𑀦𑁆𑀢𑀼𑀓𑀁 𑀯𑀸 𑀲𑀩𑁆𑀩𑀧𑀞𑀫𑀁 𑀬𑀁 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺. 𑀢𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀅𑀦𑀸𑀭𑁄𑀘𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀢𑀼 𑀭𑀢𑁆𑀢𑀺𑀘𑁆𑀙𑁂𑀤𑀁 𑀲𑀦𑁆𑀥𑀸𑀬. 𑀇𑀢𑀭𑀣𑀸 𑀳𑀺 ‘‘𑀯𑀺𑀳𑀸𑀭𑀲𑀻𑀫𑀸𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀲𑀩𑁆𑀩𑁂𑀲𑀁 𑀆𑀭𑁄𑀘𑁂𑀢𑁆𑀯𑀸’’𑀢𑀺 𑀯𑀤𑁂𑀬𑁆𑀬. 𑀬𑀸𑀯 𑀭𑀢𑁆𑀢𑀺𑀬𑁄 𑀧𑀽𑀭𑁂𑀦𑁆𑀢𑀻𑀢𑀺 𑀬𑀢𑁆𑀢𑀓𑀸 𑀭𑀢𑁆𑀢𑀺𑀬𑁄 𑀆𑀧𑀢𑁆𑀢𑀺 𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺, 𑀢𑀢𑁆𑀢𑀓𑀸 𑀭𑀢𑁆𑀢𑀺𑀬𑁄 𑀬𑀸𑀯 𑀧𑀽𑀭𑁂𑀦𑁆𑀢𑀺, 𑀢𑀸𑀯 𑀧𑀭𑀺𑀯𑀢𑁆𑀣𑀩𑁆𑀩𑀁. 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀧𑀦 ‘‘𑀏𑀯𑀁 𑀬𑀢𑁆𑀢𑀓𑀸𑀦𑀺 𑀤𑀺𑀯𑀲𑀸𑀦𑀺 𑀆𑀧𑀢𑁆𑀢𑀺 𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺, 𑀢𑀢𑁆𑀢𑀓𑀸𑀦𑀺, 𑀢𑀢𑁄 𑀅𑀥𑀺𑀓𑀢𑀭𑀸𑀦𑀺 𑀯𑀸 𑀓𑀼𑀓𑁆𑀓𑀼𑀘𑁆𑀘𑀯𑀺𑀦𑁄𑀤𑀦𑀢𑁆𑀣𑀸𑀬 𑀧𑀭𑀺𑀯𑀲𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀯𑀺𑀢𑁆𑀣𑀸𑀭𑁄𑀢𑀺 𑀧𑀧𑀜𑁆𑀘𑁄.

𑀇𑀢𑀭𑁂𑀲𑀼 𑀧𑀦 𑀤𑁆𑀯𑀻𑀲𑀽𑀢𑀺 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄, 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄𑀢𑀺 𑀤𑁆𑀯𑀺𑀦𑁆𑀦𑀁 𑀫𑀚𑁆𑀛𑁂. 𑀔𑀦𑁆𑀥𑀓𑁂𑀢𑀺 𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁧𑁫𑁬 𑀆𑀤𑀬𑁄). 𑀘𑀽𑀴𑀲𑀼𑀤𑁆𑀥𑀦𑁆𑀢𑁄 𑀫𑀳𑀸𑀲𑀼𑀤𑁆𑀥𑀦𑁆𑀢𑁄𑀢𑀺 𑀏𑀢𑁆𑀣 𑀬𑁄 𑀉𑀧𑀲𑀫𑁆𑀧𑀤𑀢𑁄 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨; 𑀯𑀺. 𑀲𑀗𑁆𑀕. 𑀅𑀝𑁆𑀞. 𑁨𑁪𑁨) 𑀧𑀝𑁆𑀞𑀸𑀬 𑀅𑀦𑀼𑀮𑁄𑀫𑀓𑁆𑀓𑀫𑁂𑀦 𑀯𑀸 𑀆𑀭𑁄𑀘𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀧𑀝𑀺𑀮𑁄𑀫𑀓𑁆𑀓𑀫𑁂𑀦 𑀯𑀸 ‘‘𑀅𑀲𑀼𑀓𑀜𑁆𑀘 𑀅𑀲𑀼𑀓𑀜𑁆𑀘 𑀤𑀺𑀯𑀲𑀁 𑀯𑀸 𑀧𑀓𑁆𑀔𑀁 𑀯𑀸 𑀫𑀸𑀲𑀁 𑀯𑀸 𑀲𑀁𑀯𑀘𑁆𑀙𑀭𑀁 𑀯𑀸 𑀢𑀯 𑀲𑀼𑀤𑁆𑀥𑀪𑀸𑀯𑀁 𑀚𑀸𑀦𑀸𑀲𑀻’’𑀢𑀺 𑀧𑀼𑀘𑁆𑀙𑀺𑀬𑀫𑀸𑀦𑁄 ‘‘𑀆𑀫, 𑀪𑀦𑁆𑀢𑁂, 𑀚𑀸𑀦𑀸𑀫𑀺, 𑀏𑀢𑁆𑀢𑀓𑀁 𑀦𑀸𑀫 𑀓𑀸𑀮𑀁 𑀅𑀳𑀁 𑀲𑀼𑀤𑁆𑀥𑁄’’𑀢𑀺 𑀯𑀤𑀢𑀺, 𑀢𑀲𑁆𑀲 𑀤𑀺𑀦𑁆𑀦𑁄 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 ‘‘𑀘𑀽𑀴𑀲𑀼𑀤𑁆𑀥𑀦𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀺.

𑀢𑀁 𑀕𑀳𑁂𑀢𑁆𑀯𑀸 𑀧𑀭𑀺𑀯𑀲𑀦𑁆𑀢𑁂𑀦 𑀬𑀢𑁆𑀢𑀓𑀁 𑀓𑀸𑀮𑀁 𑀅𑀢𑁆𑀢𑀦𑁄 𑀲𑀼𑀤𑁆𑀥𑀪𑀸𑀯𑀁 𑀚𑀸𑀦𑀸𑀢𑀺, 𑀢𑀢𑁆𑀢𑀓𑀁 𑀅𑀧𑀦𑁂𑀢𑁆𑀯𑀸 𑀅𑀯𑀲𑁂𑀲𑀁 𑀫𑀸𑀲𑀁 𑀯𑀸 𑀤𑁆𑀯𑁂𑀫𑀸𑀲𑀁 𑀯𑀸 𑀧𑀭𑀺𑀯𑀲𑀺𑀢𑀩𑁆𑀩𑀁. 𑀲𑀘𑁂 ‘‘𑀫𑀸𑀲𑀫𑀢𑁆𑀢𑀁 𑀅𑀲𑀼𑀤𑁆𑀥𑁄𑀫𑁆𑀳𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀭𑀺𑀯𑀸𑀲𑀁 𑀅𑀕𑁆𑀕𑀳𑁂𑀲𑀺, 𑀧𑀭𑀺𑀯𑀲𑀦𑁆𑀢𑁄 𑀘 𑀧𑀼𑀦 𑀅𑀜𑁆𑀜𑀁 𑀫𑀸𑀲𑀁 𑀲𑀭𑀢𑀺, 𑀢𑀫𑁆𑀧𑀺 𑀫𑀸𑀲𑀁 𑀧𑀭𑀺𑀯𑀲𑀺𑀢𑀩𑁆𑀩𑀫𑁂𑀯, 𑀧𑀼𑀦 𑀧𑀭𑀺𑀯𑀸𑀲𑀤𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀅𑀣 ‘‘𑀤𑁆𑀯𑁂𑀫𑀸𑀲𑀁 𑀅𑀲𑀼𑀤𑁆𑀥𑁄𑀫𑁆𑀳𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀕𑁆𑀕𑀳𑁂𑀲𑀺, 𑀧𑀭𑀺𑀯𑀲𑀦𑁆𑀢𑁄 𑀘 ‘‘𑀫𑀸𑀲𑀫𑀢𑁆𑀢𑀫𑁂𑀯𑀸𑀳𑀁 𑀅𑀲𑀼𑀤𑁆𑀥𑁄𑀫𑁆𑀳𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀭𑁄𑀢𑀺, 𑀫𑀸𑀲𑀫𑁂𑀯 𑀧𑀭𑀺𑀯𑀲𑀺𑀢𑀩𑁆𑀩𑀁, 𑀧𑀼𑀦 𑀧𑀭𑀺𑀯𑀸𑀲𑀤𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀅𑀬𑀜𑁆𑀳𑀺 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 𑀉𑀤𑁆𑀥𑀫𑁆𑀧𑀺 𑀆𑀭𑁄𑀳𑀢𑀺, 𑀳𑁂𑀝𑁆𑀞𑀸𑀧𑀺 𑀑𑀭𑁄𑀳𑀢𑀺, 𑀇𑀤𑀫𑀲𑁆𑀲 𑀮𑀓𑁆𑀔𑀡𑀁.

𑀬𑁄 𑀧𑀦 𑀬𑀣𑀸𑀯𑀼𑀢𑁆𑀢𑁂𑀦 𑀅𑀦𑀼𑀮𑁄𑀫𑀧𑁆𑀧𑀝𑀺𑀮𑁄𑀫𑀯𑀲𑁂𑀦 𑀧𑀼𑀘𑁆𑀙𑀺𑀬𑀫𑀸𑀦𑁄𑀧𑀺 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨) 𑀦 𑀚𑀸𑀦𑀸𑀢𑀺 𑀦𑀲𑁆𑀲𑀭𑀢𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀯𑁂𑀫𑀢𑀺𑀓𑁄 𑀯𑀸 𑀳𑁄𑀢𑀺, 𑀢𑀲𑁆𑀲 𑀤𑀺𑀦𑁆𑀦𑁄 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 ‘‘𑀫𑀳𑀸𑀲𑀼𑀤𑁆𑀥𑀦𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀕𑀳𑁂𑀢𑁆𑀯𑀸 𑀕𑀳𑀺𑀢𑀤𑀺𑀯𑀲𑀢𑁄 𑀬𑀸𑀯 𑀉𑀧𑀲𑀫𑁆𑀧𑀤𑀤𑀺𑀯𑀲𑁄, 𑀢𑀸𑀯 𑀭𑀢𑁆𑀢𑀺𑀬𑁄 𑀕𑀡𑁂𑀢𑁆𑀯𑀸 𑀧𑀭𑀺𑀯𑀲𑀺𑀢𑀩𑁆𑀩𑀁. 𑀅𑀬𑀁 𑀉𑀤𑁆𑀥𑀁 𑀦𑀸𑀭𑁄𑀳𑀢𑀺, 𑀳𑁂𑀝𑁆𑀞𑀸 𑀧𑀦 𑀑𑀭𑁄𑀳𑀢𑀺. 𑀢𑀲𑁆𑀫𑀸 𑀲𑀘𑁂 𑀧𑀭𑀺𑀯𑀲𑀦𑁆𑀢𑁄 𑀭𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑁂 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀭𑁄𑀢𑀺 ‘‘𑀫𑀸𑀲𑁄 𑀯𑀸 𑀲𑀁𑀯𑀘𑁆𑀙𑀭𑁄 𑀯𑀸 𑀫𑀬𑁆𑀳𑀁 𑀆𑀧𑀦𑁆𑀦𑀲𑁆𑀲𑀸’’𑀢𑀺, 𑀫𑀸𑀲𑀁 𑀯𑀸 𑀲𑀁𑀯𑀘𑁆𑀙𑀭𑀁 𑀯𑀸 𑀧𑀭𑀺𑀯𑀲𑀺𑀢𑀩𑁆𑀩𑀁. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀅𑀳𑀁 𑀲𑀼𑀤𑁆𑀥𑁄’’𑀢𑀺 𑀯𑀤𑀦𑁆𑀢𑀲𑁆𑀲 𑀘𑀽𑀴𑀲𑀼𑀤𑁆𑀥𑀦𑁆𑀢𑁄 𑀤𑀻𑀬𑀢𑀺, 𑀢𑀣𑀸𑀧𑀺 𑀦𑀺𑀬𑀫𑁂𑀦𑁂𑀯 𑀚𑀸𑀦𑀦𑀸𑀪𑀸𑀯𑀸 ‘‘𑀤𑀼𑀯𑀺𑀥𑁄𑀧𑀺 𑀘𑁂𑀲…𑀧𑁂… 𑀤𑀸𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀤𑀸𑀦𑀯𑀺𑀥𑀺 𑀔𑀦𑁆𑀥𑀓𑁂 𑀆𑀕𑀢𑁄𑀢𑀺 𑀢𑀲𑁆𑀲 𑀤𑀼𑀯𑀺𑀥𑀲𑁆𑀲𑀸𑀧𑀺 𑀲𑀼𑀤𑁆𑀥𑀦𑁆𑀢𑀲𑁆𑀲 𑀤𑀸𑀦𑀯𑀺𑀥𑀺 ‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸…𑀧𑁂… 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄’’𑀢𑀺𑀆𑀤𑀺𑀦𑀸 𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁧𑁫𑁬) 𑀆𑀕𑀢𑁄. 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀲 𑀦𑀬𑁄 𑀯𑀺𑀦𑀺𑀘𑁆𑀙𑀬𑀓𑀣𑀸 𑀧𑀦 𑀯𑀺𑀢𑁆𑀣𑀸𑀭𑀢𑁄 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀯𑀼𑀢𑁆𑀢𑀸𑀢𑀺 𑀏𑀢𑁆𑀣𑀸𑀧𑀺.

𑀑𑀥𑀼𑀦𑀺𑀢𑁆𑀯𑀸 𑀅𑀯𑀥𑀼𑀬 𑀧𑀳𑀸𑀬 𑀲𑀫𑁄𑀥𑀸𑀦𑁄 𑀑𑀥𑀸𑀦𑀲𑀫𑁄𑀥𑀸𑀦𑁄. 𑀘𑀺𑀭𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀅𑀕𑁆𑀖𑁂𑀦 𑀲𑀫𑁄𑀥𑀸𑀦𑁄 𑀅𑀕𑁆𑀖𑀲𑀫𑁄𑀥𑀸𑀦𑁄. 𑀫𑀺𑀲𑁆𑀲𑀓𑀸𑀦𑀁 𑀲𑀫𑁄𑀥𑀸𑀦𑁄 𑀫𑀺𑀲𑁆𑀲𑀓𑀲𑀫𑁄𑀥𑀸𑀦𑁄. 𑀇𑀤𑀸𑀦𑀺 𑀢𑀁 𑀢𑀺𑀯𑀺𑀥𑀫𑁆𑀧𑀺 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀅𑀦𑁆𑀢𑀭𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀲𑁆𑀲𑀸𑀢𑀺 𑀬𑁄 𑀧𑀭𑀺𑀯𑀸𑀲𑀁 𑀕𑀳𑁂𑀢𑁆𑀯𑀸 𑀅𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑁄 𑀳𑀼𑀢𑁆𑀯𑀸 𑀧𑀭𑀺𑀯𑀲𑀦𑁆𑀢𑁄 𑀅𑀧𑀭𑀺𑀦𑀺𑀝𑁆𑀞𑀺𑀢𑁂𑀬𑁂𑀯 𑀧𑀭𑀺𑀯𑀸𑀲𑁂 𑀅𑀦𑁆𑀢𑀭𑀸 𑀯𑁂𑀫𑀚𑁆𑀛𑁂 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀢𑀲𑁆𑀲. 𑀧𑀭𑀺𑀯𑀼𑀢𑁆𑀣𑀤𑀺𑀯𑀲𑁂𑀢𑀺 𑀮𑀓𑁆𑀔𑀡𑀯𑀘𑀦𑀫𑁂𑀢𑀁, 𑀢𑁂𑀦 ‘‘𑀫𑀸𑀦𑀢𑁆𑀢𑀘𑀺𑀡𑁆𑀡𑀤𑀺𑀯𑀲𑁂 𑀘𑀸’’𑀢𑀺𑀧𑀺 𑀯𑀼𑀢𑁆𑀢𑀫𑁂𑀯 𑀳𑁄𑀢𑀺. 𑀫𑀓𑁆𑀔𑁂𑀢𑁆𑀯𑀸𑀢𑀺 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑀯𑀲𑁂𑀦 𑀫𑀓𑁆𑀔𑁂𑀢𑁆𑀯𑀸. 𑀲𑀫𑁄𑀤𑀳𑀺𑀢𑁆𑀯𑀸𑀢𑀺 𑀫𑀽𑀮𑀸𑀧𑀢𑁆𑀢𑀺𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸, 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀤𑀸𑀢𑀩𑁆𑀩𑀧𑀭𑀺𑀯𑀸𑀲𑁄𑀢𑀺 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄’’𑀢𑀺𑀆𑀤𑀺𑀦𑀸 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀤𑀸𑀢𑀩𑁆𑀩𑀧𑀭𑀺𑀯𑀸𑀲𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄 𑀧𑀝𑀺𑀘𑁆𑀙𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸 𑀧𑀭𑀺𑀯𑀸𑀲𑀁 𑀕𑀳𑁂𑀢𑁆𑀯𑀸 𑀧𑀭𑀺𑀯𑀲𑀦𑁆𑀢𑁄 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨; 𑀯𑀺. 𑀲𑀗𑁆𑀕. 𑀅𑀝𑁆𑀞. 𑁨𑁪𑁩) 𑀯𑀸 𑀫𑀸𑀦𑀢𑁆𑀢𑀸𑀭𑀳𑁄 𑀯𑀸 𑀫𑀸𑀦𑀢𑁆𑀢𑀁 𑀘𑀭𑀦𑁆𑀢𑁄 𑀯𑀸 𑀅𑀩𑁆𑀪𑀸𑀦𑀸𑀭𑀳𑁄 𑀯𑀸 𑀅𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑁄 𑀅𑀜𑁆𑀜𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑀼𑀭𑀺𑀫𑀸𑀧𑀢𑁆𑀢𑀺𑀬𑀸 𑀲𑀫𑀸 𑀯𑀸 𑀊𑀦𑀢𑀭𑀸 𑀯𑀸 𑀭𑀢𑁆𑀢𑀺𑀬𑁄 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀢𑀲𑁆𑀲 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑁂𑀦 𑀢𑁂 𑀧𑀭𑀺𑀯𑀼𑀢𑁆𑀣𑀤𑀺𑀯𑀲𑁂 𑀘 𑀫𑀸𑀦𑀢𑁆𑀢𑀘𑀺𑀡𑁆𑀡𑀤𑀺𑀯𑀲𑁂 𑀘 𑀲𑀩𑁆𑀩𑁂 𑀑𑀥𑀼𑀦𑀺𑀢𑁆𑀯𑀸 𑀅𑀤𑀺𑀯𑀲𑁂 𑀓𑀢𑁆𑀯𑀸 𑀧𑀘𑁆𑀙𑀸 𑀆𑀧𑀦𑁆𑀦𑀸𑀧𑀢𑁆𑀢𑀺𑀁 𑀫𑀽𑀮𑀸𑀧𑀢𑁆𑀢𑀺𑀬𑀁 𑀲𑀫𑁄𑀥𑀸𑀬 𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄𑀢𑀺.

𑀲𑀘𑁂 𑀧𑀦 𑀅𑀦𑁆𑀢𑀭𑀸𑀧𑀢𑁆𑀢𑀺 𑀫𑀽𑀮𑀸𑀧𑀢𑁆𑀢𑀺𑀢𑁄 𑀅𑀢𑀺𑀭𑁂𑀓𑀧𑁆𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨), 𑀢𑀁 𑀫𑀽𑀮𑀸𑀧𑀢𑁆𑀢𑀺𑀁 𑀓𑀢𑁆𑀯𑀸 𑀢𑀢𑁆𑀣 𑀇𑀢𑀭𑀁 𑀲𑀫𑁄𑀥𑀸𑀬 𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄. 𑀲𑀘𑁂 𑀧𑀦 𑀅𑀦𑁆𑀢𑀭𑀸𑀧𑀢𑁆𑀢𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑀁 𑀅𑀓𑀢𑁆𑀯𑀸 𑀧𑀼𑀩𑁆𑀩𑁂 𑀕𑀳𑀺𑀢𑀧𑀭𑀺𑀯𑀸𑀲𑁂𑀦𑁂𑀯 𑀧𑀭𑀺𑀯𑀲𑀺𑀢𑀩𑁆𑀩𑀁.

𑀬𑀸 𑀏𑀓𑀸 𑀯𑀸…𑀧𑁂… 𑀲𑀩𑁆𑀩𑀘𑀺𑀭𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀢𑀺 𑀬𑀸 𑀏𑀓𑀸 𑀯𑀸 𑀆𑀧𑀢𑁆𑀢𑀺 𑀲𑀩𑁆𑀩𑀘𑀺𑀭𑀧𑁆𑀧𑀝𑀺𑀘𑁆𑀙𑀦𑁆𑀦𑀸, 𑀬𑀸 𑀤𑁆𑀯𑁂 𑀯𑀸 𑀢𑀺𑀲𑁆𑀲𑁄 𑀯𑀸 𑀲𑀫𑁆𑀩𑀳𑀼𑀮𑀸 𑀯𑀸 𑀆𑀧𑀢𑁆𑀢𑀺𑀬𑁄 𑀲𑀩𑁆𑀩𑀘𑀺𑀭𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀢𑀺 𑀅𑀢𑁆𑀣𑁄. 𑀢𑀸𑀲𑀦𑁆𑀢𑀺 𑀲𑀩𑁆𑀩𑀘𑀺𑀭𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀆𑀧𑀢𑁆𑀢𑀻𑀦𑀁. 𑀤𑀸𑀦𑀯𑀺𑀥𑀺 𑀧𑀦𑀲𑁆𑀲 𑀔𑀦𑁆𑀥𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀬𑀲𑁆𑀲 𑀧𑀦 𑀲𑀢𑀁 𑀆𑀧𑀢𑁆𑀢𑀺𑀬𑁄 𑀤𑀲𑀸𑀳𑀧𑀝𑀺𑀘𑁆𑀙𑀦𑁆𑀦𑀸, 𑀅𑀧𑀭𑀫𑁆𑀧𑀺 𑀲𑀢𑀁 𑀆𑀧𑀢𑁆𑀢𑀺𑀬𑁄 𑀤𑀲𑀸𑀳𑀧𑀝𑀺𑀘𑁆𑀙𑀦𑁆𑀦𑀸, 𑀅𑀧𑀭𑀫𑁆𑀧𑀺 𑀲𑀢𑀁 𑀆𑀧𑀢𑁆𑀢𑀺𑀬𑁄 𑀤𑀲𑀸𑀳𑀧𑀝𑀺𑀘𑁆𑀙𑀦𑁆𑀦𑀸𑀢𑀺 𑀏𑀯𑀁 𑀤𑀲𑀓𑁆𑀔𑀢𑁆𑀢𑀼𑀁 𑀓𑀢𑁆𑀯𑀸 𑀆𑀧𑀢𑁆𑀢𑀺𑀲𑀳𑀲𑁆𑀲𑀁 𑀤𑀺𑀯𑀲𑀲𑀢𑀧𑀝𑀺𑀘𑁆𑀙𑀦𑁆𑀦𑀁 𑀳𑁄𑀢𑀺, 𑀢𑁂𑀦 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺? 𑀲𑀩𑁆𑀩𑀁 𑀲𑀫𑁄𑀤𑀳𑀺𑀢𑁆𑀯𑀸 𑀤𑀲 𑀤𑀺𑀯𑀲𑁂 𑀧𑀭𑀺𑀯𑀲𑀺𑀢𑀩𑁆𑀩𑀁. 𑀏𑀯𑀁 𑀏𑀓𑁂𑀦𑁂𑀯 𑀤𑀲𑀸𑀳𑁂𑀦 𑀤𑀺𑀯𑀲𑀲𑀢𑀫𑁆𑀧𑀺 𑀧𑀭𑀺𑀯𑀲𑀺𑀢𑀫𑁂𑀯 𑀳𑁄𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀤𑀲𑀲𑀢𑀁 𑀭𑀢𑁆𑀢𑀺𑀲𑀢𑀁, 𑀆𑀧𑀢𑁆𑀢𑀺𑀬𑁄 𑀙𑀸𑀤𑀬𑀺𑀢𑁆𑀯𑀸𑀦;

𑀤𑀲 𑀭𑀢𑁆𑀢𑀺𑀬𑁄 𑀯𑀲𑀺𑀢𑁆𑀯𑀸𑀦, 𑀫𑀼𑀘𑁆𑀘𑁂𑀬𑁆𑀬 𑀧𑀸𑀭𑀺𑀯𑀸𑀲𑀺𑀓𑁄’’𑀢𑀺. (𑀧𑀭𑀺. 𑁪𑁭𑁭);

𑀅𑀬𑀁 𑀅𑀕𑁆𑀖𑀲𑀫𑁄𑀥𑀸𑀦𑁄 𑀦𑀸𑀫.

𑀇𑀤𑀸𑀦𑀺 𑀫𑀺𑀲𑁆𑀲𑀓𑀲𑀫𑁄𑀥𑀸𑀦𑀁 𑀦𑀺𑀤𑁆𑀤𑀺𑀲𑀺𑀢𑀼𑀁 ‘‘𑀫𑀺𑀲𑁆𑀲𑀓𑀲𑀫𑁄𑀥𑀸𑀦𑁄 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀦𑀬𑁄 𑁋

‘‘𑀅𑀳𑀁, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀏𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁, 𑀏𑀓𑀁 𑀓𑀸𑀬𑀲𑀁𑀲𑀕𑁆𑀕𑀁, 𑀏𑀓𑀁 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀁, 𑀏𑀓𑀁 𑀅𑀢𑁆𑀢𑀓𑀸𑀫𑀁, 𑀏𑀓𑀁 𑀲𑀜𑁆𑀘𑀭𑀺𑀢𑁆𑀢𑀁, 𑀏𑀓𑀁 𑀓𑀼𑀝𑀺𑀓𑀸𑀭𑀓𑀁, 𑀏𑀓𑀁 𑀯𑀺𑀳𑀸𑀭𑀓𑀸𑀭𑀓𑀁, 𑀏𑀓𑀁 𑀤𑀼𑀝𑁆𑀞𑀤𑁄𑀲𑀁, 𑀏𑀓𑀁 𑀅𑀜𑁆𑀜𑀪𑀸𑀕𑀺𑀬𑀁, 𑀏𑀓𑀁 𑀲𑀗𑁆𑀖𑀪𑁂𑀤𑀁, 𑀏𑀓𑀁 𑀪𑁂𑀤𑀸𑀦𑀼𑀯𑀢𑁆𑀢𑀓𑀁, 𑀏𑀓𑀁 𑀤𑀼𑀩𑁆𑀩𑀘𑀁, 𑀏𑀓𑀁 𑀓𑀼𑀮𑀤𑀽𑀲𑀓𑀁, 𑀲𑁄𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀁 𑀬𑀸𑀘𑀸𑀫𑀻’’𑀢𑀺 𑁋

𑀢𑀺𑀓𑁆𑀔𑀢𑁆𑀢𑀼𑀁 𑀬𑀸𑀘𑀸𑀧𑁂𑀢𑁆𑀯𑀸 𑀢𑀤𑀦𑀼𑀭𑀽𑀧𑀸𑀬 𑀓𑀫𑁆𑀫𑀯𑀸𑀘𑀸𑀬 𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄. 𑀏𑀢𑁆𑀣 𑀘 ‘‘𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀦𑀸𑀦𑀸𑀯𑀢𑁆𑀣𑀼𑀓𑀸𑀬𑁄’’𑀢𑀺𑀧𑀺 ‘‘𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺’’𑀦𑁆𑀢𑀺𑀧𑀺 𑀏𑀯𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀯𑀢𑁆𑀣𑀼𑀯𑀲𑁂𑀦𑀧𑀺 𑀕𑁄𑀢𑁆𑀢𑀯𑀲𑁂𑀦𑀧𑀺 𑀦𑀸𑀫𑀯𑀲𑁂𑀦𑀧𑀺 𑀆𑀧𑀢𑁆𑀢𑀺𑀯𑀲𑁂𑀦𑀧𑀺 𑀬𑁄𑀚𑁂𑀢𑁆𑀯𑀸 𑀓𑀫𑁆𑀫𑀯𑀸𑀘𑀁 𑀓𑀸𑀢𑀼𑀁 𑀯𑀝𑁆𑀞𑀢𑀺𑀬𑁂𑀯𑀸𑀢𑀺. 𑀅𑀬𑀁 𑀫𑀺𑀲𑁆𑀲𑀓𑀲𑀫𑁄𑀥𑀸𑀦𑁄. 𑀲𑀩𑁆𑀩𑀧𑀭𑀺𑀯𑀸𑀲𑀓𑀫𑁆𑀫𑀯𑀸𑀘𑀸𑀯𑀲𑀸𑀦𑁂 𑀧𑀦 𑀦𑀺𑀓𑁆𑀔𑀺𑀢𑁆𑀢𑀸𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑀸𑀤𑀺𑀓𑀣𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀢𑀺𑀯𑀺𑀥𑁂𑀧𑀺 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁂 𑀅𑀢𑁆𑀣𑀫𑀢𑁆𑀢𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸, 𑀯𑀺𑀦𑀺𑀘𑁆𑀙𑀬𑀸𑀤𑀻𑀦𑀁 𑀯𑀸 𑀅𑀦𑀸𑀫𑀝𑁆𑀞𑀢𑁆𑀢𑀸 ‘‘𑀅𑀬𑀁 𑀢𑀺𑀯𑀺𑀥𑁂𑀧𑀺 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁂 𑀲𑀗𑁆𑀔𑁂𑀧𑀓𑀣𑀸’’𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀯𑀺𑀲𑀬𑀢𑁆𑀢𑀸 𑀲𑀫𑁄𑀥𑀸𑀦𑀯𑀺𑀘𑀸𑀭𑀡𑀸𑀬 𑀲𑀸 𑀦𑀺𑀭𑀯𑀲𑁂𑀲𑀸 𑀓𑀼𑀢𑁄 𑀮𑀤𑁆𑀥𑀩𑁆𑀩𑀸𑀢𑀺 𑀆𑀳 ‘‘𑀯𑀺𑀢𑁆𑀣𑀸𑀭𑁄’’𑀢𑀺𑀆𑀤𑀺.

𑀙𑀸𑀭𑀢𑁆𑀢𑀦𑁆𑀢𑀺 𑀭𑀸 𑀲𑀤𑁆𑀤𑁄 𑀢𑀻𑀬𑀢𑀺 𑀙𑀺𑀚𑁆𑀚𑀢𑀺 𑀏𑀢𑁆𑀣𑀸𑀢𑀺 𑀭𑀢𑁆𑀢𑀺, 𑀲𑀢𑁆𑀢𑀸𑀦𑀁 𑀲𑀤𑁆𑀤𑀲𑁆𑀲 𑀯𑀽𑀧𑀲𑀫𑀦𑀓𑀸𑀮𑁄𑀢𑀺 𑀅𑀢𑁆𑀣𑁄, 𑀙 𑀭𑀢𑁆𑀢𑀺𑀬𑁄 𑀲𑀫𑀸𑀳𑀝𑀸, 𑀙𑀦𑁆𑀦𑀁 𑀭𑀢𑁆𑀢𑀻𑀦𑀁 𑀯𑀸 𑀲𑀫𑀸𑀳𑀸𑀭𑁄 𑀙𑀭𑀢𑁆𑀢𑀁, 𑀙𑀭𑀢𑁆𑀢𑀫𑁂𑀯 𑀙𑀸𑀭𑀢𑁆𑀢𑀁, 𑀅𑀯𑀬𑀯𑀩𑁆𑀬𑀢𑀺𑀭𑁂𑀓𑁂𑀦 𑀲𑀫𑀼𑀤𑀸𑀬𑀲𑁆𑀲𑀸𑀪𑀸𑀯𑀢𑁄 𑀙 𑀭𑀢𑁆𑀢𑀺𑀬𑁄𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄.

𑀧𑀭𑀺𑀯𑀸𑀲𑀁 𑀅𑀤𑀢𑁆𑀯𑀸 𑀫𑀸𑀦𑀢𑁆𑀢𑀫𑁂𑀯 𑀤𑀸𑀢𑀩𑁆𑀩𑀦𑁆𑀢𑀺 𑀬𑀲𑁆𑀫𑀸 𑀆𑀧𑀢𑁆𑀢𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸, 𑀬𑀲𑁆𑀫𑀸 𑀘 𑀆𑀧𑀦𑁆𑀦𑀪𑀸𑀯𑁂𑀦𑁂𑀯 𑀫𑀸𑀦𑀢𑁆𑀢𑀸𑀭𑀳𑁄 𑀳𑁄𑀢𑀺, 𑀢𑀲𑁆𑀫𑀸 𑀧𑀭𑀺𑀯𑀸𑀲𑀁 𑀅𑀤𑀢𑁆𑀯𑀸 𑀓𑁂𑀯𑀮𑀁 𑀫𑀸𑀦𑀢𑁆𑀢𑀫𑁂𑀯 𑀤𑀸𑀢𑀩𑁆𑀩𑀁. 𑀬𑀁 𑀧𑀝𑀺𑀘𑁆𑀙𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑀲𑁆𑀲 𑀤𑀻𑀬𑀢𑀺, 𑀇𑀤𑀁 𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀁 𑀦𑀸𑀫𑀸𑀢𑀺 𑀆𑀳 ‘‘𑀬𑀲𑁆𑀲 𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀻’’𑀢𑀺𑀆𑀤𑀺. 𑀇𑀤𑀦𑁆𑀢𑀺 𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀯𑀸𑀓𑁆𑀬𑁂. 𑀓𑀣𑀁 𑀧𑀦 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀫𑀸𑀦𑀢𑁆𑀢𑀸𑀦𑀁 𑀤𑀸𑀦𑀯𑀺𑀥𑀺 𑀘 𑀯𑀺𑀦𑀺𑀘𑁆𑀙𑀬𑀓𑀣𑀸 𑀘 𑀯𑁂𑀤𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀉𑀪𑀺𑀦𑁆𑀦𑀫𑁆𑀧𑀺 𑀧𑀦𑀸’’𑀢𑀺𑀆𑀤𑀺.

𑀅𑀬𑀦𑁆𑀢𑀺 𑀯𑀓𑁆𑀔𑀫𑀸𑀦𑀁 𑀲𑀦𑁆𑀥𑀸𑀬𑀸𑀳. 𑀧𑀭𑀺𑀯𑀸𑀲𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀧𑀤𑁂𑀲𑀦𑁆𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀭𑀺𑀓𑁆𑀔𑁂𑀧𑀢𑁄, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀢𑁄 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀳𑀸𑀫𑀕𑁆𑀕𑀢𑁄 𑀑𑀓𑁆𑀓𑀫𑁆𑀫 𑀕𑀼𑀫𑁆𑀩𑁂𑀦 𑀯𑀸 𑀯𑀢𑀺𑀬𑀸 𑀯𑀸 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑀁. 𑀲𑀫𑀸𑀤𑀺𑀬𑀺𑀢𑁆𑀯𑀸𑀢𑀺 𑀅𑀦𑁆𑀢𑁄𑀅𑀭𑀼𑀡𑁂𑀬𑁂𑀯 𑀲𑀫𑀸𑀤𑀺𑀬𑀺𑀢𑁆𑀯𑀸. 𑀆𑀭𑁄𑀘𑁂𑀢𑁆𑀯𑀸𑀢𑀺 𑁋

‘‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁, 𑀲𑁄𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀬𑀸𑀘𑀺𑀁, 𑀢𑀲𑁆𑀲 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀙𑀸𑀭𑀢𑁆𑀢𑀁 𑀫𑀸𑀦𑀢𑁆𑀢𑀁 𑀅𑀤𑀸𑀲𑀺, 𑀲𑁄𑀳𑀁 𑀫𑀸𑀦𑀢𑁆𑀢𑀁 𑀘𑀭𑀸𑀫𑀺, 𑀯𑁂𑀤𑀬𑀸𑀫𑀳𑀁, 𑀪𑀦𑁆𑀢𑁂, 𑀯𑁂𑀤𑀬𑀢𑀻’𑀢𑀺 𑀫𑀁 𑀲𑀗𑁆𑀖𑁄 𑀥𑀸𑀭𑁂𑀢𑀽’’𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑀅𑀝𑁆𑀞. 𑁯𑁭) 𑁋

𑀆𑀧𑀢𑁆𑀢𑀺𑀤𑀺𑀯𑀲𑀸𑀦𑀼𑀭𑀽𑀧𑀁 𑀆𑀭𑁄𑀘𑁂𑀢𑁆𑀯𑀸. 𑀇𑀫𑀜𑁆𑀘 𑀧𑀦 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 (𑀘𑀽𑀴𑀯. 𑀅𑀝𑁆𑀞. 𑁯𑁭) 𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬 𑀆𑀭𑁄𑀘𑁂𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀆𑀭𑁄𑀘𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀘 𑀏𑀓𑀁 𑀪𑀺𑀓𑁆𑀔𑀼𑀁 𑀞𑀧𑁂𑀢𑁆𑀯𑀸 𑀲𑁂𑀲𑁂𑀳𑀺 𑀲𑀢𑀺 𑀓𑀭𑀡𑀻𑀬𑁂 𑀕𑀦𑁆𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀅𑀭𑀼𑀡𑁂 𑀉𑀝𑁆𑀞𑀺𑀢𑁂 𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀲𑀘𑁂 𑀲𑁄𑀧𑀺 𑀓𑁂𑀦𑀘𑀺 𑀓𑀫𑁆𑀫𑁂𑀦 𑀧𑀼𑀭𑁂 𑀅𑀭𑀼𑀡𑁂𑀬𑁂𑀯 𑀕𑀘𑁆𑀙𑀢𑀺, 𑀅𑀜𑁆𑀜𑀁 𑀯𑀺𑀳𑀸𑀭𑀢𑁄 𑀦𑀺𑀓𑁆𑀔𑀦𑁆𑀢𑀁 𑀯𑀸 𑀆𑀕𑀦𑁆𑀢𑀼𑀓𑀁 𑀯𑀸 𑀬𑀁 𑀧𑀞𑀫𑀁 𑀧𑀲𑁆𑀲𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀆𑀭𑁄𑀘𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀅𑀬𑀜𑁆𑀘 𑀬𑀲𑁆𑀫𑀸 𑀕𑀡𑀲𑁆𑀲 𑀆𑀭𑁄𑀘𑁂𑀢𑁆𑀯𑀸, 𑀪𑀺𑀓𑁆𑀔𑀽𑀦𑀜𑁆𑀘 𑀅𑀢𑁆𑀣𑀺𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀯 𑀯𑀲𑀺, 𑀢𑁂𑀦𑀲𑁆𑀲 𑀊𑀦𑁂 𑀕𑀡𑁂 𑀘𑀭𑀡𑀤𑁄𑀲𑁄 𑀯𑀸 𑀯𑀺𑀧𑁆𑀧𑀯𑀸𑀲𑁄 𑀯𑀸 𑀦 𑀳𑁄𑀢𑀺. 𑀲𑀘𑁂 𑀧𑀦 𑀓𑀜𑁆𑀘𑀺 𑀦 𑀧𑀲𑁆𑀲𑀢𑀺, 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀬𑀁 𑀧𑀞𑀫𑀁 𑀧𑀲𑁆𑀲𑀢𑀺, 𑀢𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀢𑀢𑁄 𑀢𑁂𑀲𑀼 𑀕𑀢𑁂𑀲𑀼 𑀯𑀸 𑀅𑀕𑀢𑁂𑀲𑀼 𑀯𑀸 𑀧𑀼𑀭𑀺𑀫𑀦𑀬𑁂𑀦 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺.

𑀬𑀢𑁆𑀣 𑀲𑀺𑀬𑀸𑀢𑀺 𑀬𑀲𑁆𑀲𑀁 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸𑀬𑀁 𑀯𑀻𑀲𑀢𑀺𑀕𑀡𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀢𑁆𑀣𑀺. 𑀅𑀯𑁆𑀳𑀸𑀢𑀩𑁆𑀩𑁄𑀢𑀺 𑀅𑀩𑁆𑀪𑀸𑀦𑀓𑀫𑁆𑀫𑀯𑀲𑁂𑀦 𑀧𑀓𑁆𑀓𑁄𑀲𑀺𑀢𑀩𑁆𑀩𑁄. 𑀅𑀩𑁆𑀪𑀸𑀦𑀓𑀫𑁆𑀫𑀁 𑀧𑀦 𑀓𑀣𑀦𑁆𑀢𑀺 𑀆𑀳 ‘‘𑀅𑀩𑁆𑀪𑀸𑀦𑀓𑀫𑁆𑀫𑀁 𑀧𑀦𑀸’’𑀢𑀺𑀆𑀤𑀺. 𑀧𑀸𑀴𑀺𑀯𑀲𑁂𑀦𑀸𑀢𑀺 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄’’𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑁧𑁦𑁧) 𑀧𑀸𑀴𑀺𑀯𑀲𑁂𑀦. 𑀯𑀺𑀦𑀺𑀘𑁆𑀙𑀬𑀯𑀲𑁂𑀦𑀸𑀢𑀺 ‘‘𑀅𑀩𑁆𑀪𑀦𑁆𑀢𑁂𑀳𑀺 𑀘 𑀧𑀞𑀫𑀁 𑀅𑀩𑁆𑀪𑀸𑀦𑀸𑀭𑀳𑁄 𑀓𑀸𑀢𑀩𑁆𑀩𑁄. 𑀅𑀬𑀜𑁆𑀳𑀺 𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑀢𑁆𑀢𑀸 𑀧𑀓𑀢𑀢𑁆𑀢𑀝𑁆𑀞𑀸𑀦𑁂 𑀞𑀺𑀢𑁄, 𑀧𑀓𑀢𑀢𑁆𑀢𑀲𑁆𑀲 𑀘 𑀅𑀩𑁆𑀪𑀸𑀦𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀯𑀢𑁆𑀢𑀁 𑀲𑀫𑀸𑀤𑀧𑁂𑀢𑀩𑁆𑀩𑁄. 𑀯𑀢𑁆𑀢𑁂 𑀲𑀫𑀸𑀤𑀺𑀦𑁆𑀦𑁂 𑀅𑀩𑁆𑀪𑀸𑀦𑀸𑀭𑀳𑁄 𑀳𑁄𑀢𑀺. 𑀢𑁂𑀦𑀸𑀧𑀺 𑀯𑀢𑁆𑀢𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀆𑀭𑁄𑀘𑁂𑀢𑁆𑀯𑀸 𑀅𑀩𑁆𑀪𑀸𑀦𑀁 𑀬𑀸𑀘𑀺𑀢𑀩𑁆𑀩𑀁. 𑀅𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑀲𑁆𑀲 𑀧𑀦 𑀯𑀢𑁆𑀢𑀲𑀫𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀲𑁄 𑀳𑀺 𑀙𑀸𑀭𑀢𑁆𑀢𑀸𑀢𑀺𑀓𑁆𑀓𑀫𑁂𑀦𑁂𑀯 𑀅𑀩𑁆𑀪𑀸𑀦𑀸𑀭𑀳𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑀅𑀝𑁆𑀞. 𑁯𑁭) 𑀯𑀺𑀦𑀺𑀘𑁆𑀙𑀬𑀯𑀲𑁂𑀦. 𑀢𑀁 𑀧𑀦𑁂𑀢𑀁 𑀲𑀩𑁆𑀩𑀁 𑀧𑀭𑀺𑀯𑀸𑀲𑀸𑀤𑀺𑀓𑀫𑁆𑀫𑀁 𑀧𑀸𑀴𑀺𑀯𑀲𑁂𑀦 (𑀘𑀽𑀴𑀯. 𑁭𑁫) 𑀘 𑀅𑀝𑁆𑀞𑀓𑀣𑀸𑀯𑀲𑁂𑀦 (𑀘𑀽𑀴𑀯. 𑀅𑀝𑁆𑀞. 𑁭𑁫, 𑁯𑁭) 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀅𑀢𑀺𑀯𑀺𑀢𑁆𑀣𑀸𑀭𑀪𑀬𑁂𑀦 𑀦 𑀯𑀺𑀢𑁆𑀣𑀸𑀭𑀬𑀺𑀫𑁆𑀳, 𑀅𑀢𑁆𑀣𑀺𑀓𑁂𑀳𑀺 𑀧𑀦 𑀢𑀢𑁄𑀯 𑀕𑀳𑁂𑀢𑀩𑁆𑀩𑀁. 𑀇𑀫𑀲𑁆𑀲 𑀧𑀦 𑀓𑀫𑁆𑀫𑀲𑁆𑀲 𑀯𑀻𑀲𑀢𑀺𑀯𑀕𑁆𑀕𑀓𑀭𑀡𑀻𑀬𑀢𑁆𑀢𑀸 𑀢𑀢𑁄 𑀊𑀦𑀢𑀭𑁂𑀦 𑀓𑀢𑀁 𑀓𑀼𑀧𑁆𑀧𑀢𑀺. 𑀢𑁂𑀦𑀸𑀳 ‘‘𑀏𑀓𑁂𑀦𑀸𑀧𑀺 𑀘𑁂…𑀧𑁂… 𑀅𑀦𑀩𑁆𑀪𑀺𑀢𑁄’’𑀢𑀺. 𑀅𑀬𑀦𑁆𑀢𑀺 𑀅𑀬𑀁 𑀬𑀣𑀸𑀯𑀼𑀢𑁆𑀢𑀸. 𑀲𑀸𑀫𑀻𑀘𑀻𑀢𑀺 𑀯𑀢𑁆𑀢𑀁.

𑀇𑀢𑀺 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸𑀬

𑀯𑀺𑀦𑀬𑀢𑁆𑀣𑀫𑀜𑁆𑀚𑀽𑀲𑀸𑀬𑀁 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀺𑀬𑀁

𑀲𑀗𑁆𑀖𑀸𑀤𑀺𑀲𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.