𑀅𑀦𑀺𑀬𑀢𑀓𑀡𑁆𑀟𑀁

𑁧. 𑀧𑀞𑀫𑀅𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀫𑀸𑀢𑀼𑀕𑀸𑀫𑁂𑀦𑀸’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀏𑀓𑀸𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀫𑀸𑀢𑀼𑀕𑀸𑀫𑀲𑀗𑁆𑀔𑀸𑀢𑀸𑀬 𑀏𑀓𑀸𑀬 𑀇𑀢𑁆𑀣𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀭𑀳𑁄𑀢𑀺 𑀅𑀧𑁆𑀧𑀓𑀸𑀲𑀁. 𑀅𑀧𑁆𑀧𑀓𑀸𑀲𑀢𑀸 𑀘 𑀬𑁄 𑀅𑀦𑀸𑀧𑀢𑁆𑀢𑀺𑀁 𑀓𑀭𑁄𑀢𑀺, 𑀢𑀲𑁆𑀲 𑀅𑀧𑀘𑁆𑀘𑀓𑁆𑀔𑀪𑀸𑀯𑀢𑁄𑀢𑀺 𑀆𑀳 ‘‘𑀘𑀓𑁆𑀔𑀼𑀲𑁆𑀲 𑀭𑀳𑁄’’𑀢𑀺. 𑀦𑀦𑀼 ‘‘𑀭𑀳𑁄 𑀦𑀸𑀫 𑀘𑀓𑁆𑀔𑀼𑀲𑁆𑀲 𑀭𑀳𑁄, 𑀲𑁄𑀢𑀲𑁆𑀲 𑀭𑀳𑁄. 𑀘𑀓𑁆𑀔𑀼𑀲𑁆𑀲 𑀭𑀳𑁄 𑀦𑀸𑀫 𑀦 𑀲𑀓𑁆𑀓𑀸 𑀳𑁄𑀢𑀺 𑀅𑀓𑁆𑀔𑀺𑀁 𑀯𑀸 𑀦𑀺𑀔𑀡𑀺𑀬𑀫𑀸𑀦𑁂, 𑀪𑀫𑀼𑀓𑀁 𑀯𑀸 𑀉𑀓𑁆𑀔𑀺𑀧𑀺𑀬𑀫𑀸𑀦𑁂, 𑀲𑀻𑀲𑀁 𑀯𑀸 𑀉𑀓𑁆𑀔𑀺𑀧𑀺𑀬𑀫𑀸𑀦𑁂 𑀧𑀲𑁆𑀲𑀺𑀢𑀼𑀁. 𑀲𑁄𑀢𑀲𑁆𑀲 𑀭𑀳𑁄 𑀦𑀸𑀫 𑀦 𑀲𑀓𑁆𑀓𑀸 𑀳𑁄𑀢𑀺 𑀧𑀓𑀢𑀺𑀓𑀣𑀸 𑀲𑁄𑀢𑀼’’𑀦𑁆𑀢𑀺 𑀧𑀤𑀪𑀸𑀚𑀦𑀧𑀸𑀴𑀺𑀬𑀁 𑀲𑁄𑀢𑀲𑁆𑀲 𑀭𑀳𑁄𑀢𑀺 𑀆𑀕𑀢𑀁, 𑀅𑀣 𑀓𑀲𑁆𑀫𑀸 𑀢𑀁 𑀅𑀯𑀢𑁆𑀯𑀸 ‘‘𑀘𑀓𑁆𑀔𑀼𑀲𑁆𑀲 𑀭𑀳𑁄’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀇𑀫𑀺𑀦𑀸 𑀧𑀸𑀴𑀺𑀬𑀁 ‘‘𑀲𑁄𑀢𑀲𑁆𑀲 𑀭𑀳𑁄’’𑀢𑀺 𑀇𑀤𑀁 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀣 𑀓𑀣𑀫𑁂𑀢𑀁 𑀯𑀺𑀜𑁆𑀜𑀸𑀬𑀢𑀺 ‘‘𑀘𑀓𑁆𑀔𑀼𑀲𑁆𑀲𑁂𑀯 𑀭𑀳𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄’’𑀢𑀺? ‘‘𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂’’𑀢𑀺 𑀯𑀘𑀦𑀢𑁄 ‘‘𑀲𑀓𑁆𑀓𑀸 𑀳𑁄𑀢𑀺 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑀼’’𑀦𑁆𑀢𑀺 (𑀧𑀸𑀭𑀸. 𑁪𑁪𑁫) 𑀘 𑀯𑀼𑀢𑁆𑀢𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀲𑀘𑁂𑀧𑀻’’𑀢𑀺𑀆𑀤𑀺. ‘‘𑀧𑀺𑀳𑀺𑀢𑀓𑀯𑀸𑀝𑀲𑁆𑀲𑀸’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁪𑁪𑁪-𑁪𑁪𑁫) 𑀇𑀫𑀺𑀦𑀸 𑀧𑀝𑀺𑀘𑁆𑀙𑀦𑁆𑀦𑀪𑀸𑀯𑀢𑁄 𑀘𑀓𑁆𑀔𑀼𑀲𑁆𑀲 𑀭𑀳𑁄𑀲𑀩𑁆𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀧𑀺𑀳𑀺𑀢𑀓𑀯𑀸𑀝𑀲𑁆𑀲 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁪𑁪-𑁪𑁪𑁫) 𑀧𑀦 𑀤𑁆𑀯𑀸𑀭𑁂 𑀦𑀺𑀲𑀺𑀦𑁆𑀦𑁄 𑀅𑀦𑀸𑀧𑀢𑁆𑀢𑀺𑀁 𑀓𑀭𑁄𑀢𑀺, 𑀦 𑀓𑁂𑀯𑀮𑀁 𑀅𑀧𑀺𑀳𑀺𑀢𑀓𑀯𑀸𑀝𑀲𑁆𑀲 𑀕𑀩𑁆𑀪𑀲𑁆𑀲 𑀤𑁆𑀯𑀸𑀭𑁂 𑀦𑀺𑀲𑀺𑀦𑁆𑀦𑁄𑀯 𑀅𑀦𑀸𑀧𑀢𑁆𑀢𑀺𑀁 𑀓𑀭𑁄𑀢𑀺, 𑀅𑀦𑁆𑀢𑁄𑀤𑁆𑀯𑀸𑀤𑀲𑀳𑀢𑁆𑀣𑁂 𑀑𑀓𑀸𑀲𑁂 𑀦𑀺𑀲𑀺𑀦𑁆𑀦𑁄𑀧𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀬𑀢𑁆𑀣 𑀧𑀦 𑀲𑀓𑁆𑀓𑀸 𑀤𑀝𑁆𑀞𑀼’’𑀦𑁆𑀢𑀺𑀆𑀤𑀺. 𑀬𑀲𑁆𑀫𑀸 𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁄 𑀓𑀧𑀺𑀫𑀺𑀤𑁆𑀥𑀧𑀭𑁂𑀢𑁄 𑀓𑀜𑁆𑀘𑀺 𑀓𑀸𑀮𑀁 𑀘𑀓𑁆𑀔𑀽𑀦𑀺 𑀉𑀫𑁆𑀫𑀻𑀮𑁂𑀢𑀺, 𑀓𑀜𑁆𑀘𑀺 𑀓𑀸𑀮𑀁 𑀦𑀺𑀫𑀻𑀮𑁂𑀢𑀺, 𑀦 𑀘 𑀫𑀳𑀸𑀦𑀺𑀤𑁆𑀤𑀁 𑀑𑀓𑁆𑀓𑀫𑀢𑀺, 𑀢𑀲𑁆𑀫𑀸 ‘‘𑀦𑀺𑀤𑁆𑀤𑀸𑀬𑀦𑁆𑀢𑁄𑀧𑀺 𑀅𑀦𑀸𑀧𑀢𑁆𑀢𑀺𑀁 𑀓𑀭𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁄 𑀧𑀦 𑀢𑀸𑀤𑀺𑀲𑁄 𑀦 𑀳𑁄𑀢𑀻𑀢𑀺 𑀆𑀳 ‘‘𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁄𑀧𑀺 𑀦 𑀓𑀭𑁄𑀢𑀻’’𑀢𑀺, 𑀅𑀦𑀸𑀧𑀢𑁆𑀢𑀺𑀁 𑀦 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀫𑁂𑀣𑀼𑀦𑀲𑁆𑀲 𑀫𑀸𑀢𑀼𑀕𑀸𑀫𑁄 𑀤𑀼𑀢𑀺𑀬𑁄 𑀦 𑀳𑁄𑀢𑀺. 𑀇𑀢𑁆𑀣𑀺𑀬𑁄 𑀳𑀺 𑀅𑀜𑁆𑀜𑀫𑀜𑁆𑀜𑀺𑀲𑁆𑀲𑀸 𑀯𑀚𑁆𑀚𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀺. 𑀢𑁂𑀦𑁂𑀯 𑀯𑁂𑀲𑀸𑀮𑀺𑀬𑀁 (𑀧𑀸𑀭𑀸. 𑁭𑁬-𑁭𑁭) 𑀫𑀳𑀸𑀯𑀦𑁂 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀦𑀺𑀧𑀦𑁆𑀦𑁂 𑀪𑀺𑀓𑁆𑀔𑀼𑀫𑁆𑀳𑀺 𑀲𑀫𑁆𑀩𑀳𑀼𑀮𑀸 𑀇𑀢𑁆𑀣𑀺𑀬𑁄 𑀬𑀸𑀯𑀤𑀢𑁆𑀣𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀢𑁂𑀦𑀸𑀳 ‘‘𑀇𑀢𑁆𑀣𑀻𑀦𑀁 𑀧𑀦 𑀲𑀢𑀫𑁆𑀧𑀺 𑀦 𑀓𑀭𑁄𑀢𑀻’’𑀢𑀺. 𑀢𑀁 𑀓𑀫𑁆𑀫𑀦𑁆𑀢𑀺 𑀅𑀚𑁆𑀛𑀸𑀘𑀸𑀭𑀓𑀫𑁆𑀫𑀁. 𑀬𑀲𑁆𑀫𑀸 𑀦𑀺𑀲𑀻𑀤𑀺𑀢𑁆𑀯𑀸𑀯 𑀦𑀺𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀦𑀺𑀧𑀚𑁆𑀚𑀦𑀫𑁆𑀧𑀺 𑀅𑀦𑁆𑀢𑁄𑀓𑀢𑁆𑀯𑀸 ‘‘𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑁂𑀦 𑀓𑀸𑀭𑁂𑀢𑀩𑁆𑀩𑁄𑀢𑀺 𑀦𑀺𑀲𑀚𑁆𑀚𑀁 𑀧𑀝𑀺𑀚𑀸𑀦𑀫𑀸𑀦𑀲𑁆𑀲 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑀲𑀫𑀸𑀬𑁄𑀕𑁄 𑀳𑁄𑀢𑀺𑀬𑁂𑀯𑀸𑀢𑀺 𑀯𑀼𑀢𑁆𑀢𑀁. 𑀧𑀸𑀭𑀸𑀚𑀺𑀓𑁂𑀦, 𑀧𑀦 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀘 𑀧𑀸𑀘𑀺𑀢𑁆𑀢𑀺𑀬𑁂𑀦 𑀘 𑀢𑁂𑀦𑀸𑀓𑀸𑀭𑁂𑀦 𑀦𑀺𑀲𑀚𑁆𑀚𑀁 𑀧𑀝𑀺𑀚𑀸𑀦𑀫𑀸𑀦𑁄𑀯 𑀓𑀸𑀭𑁂𑀢𑀩𑁆𑀩𑁄. 𑀦 𑀅𑀧𑁆𑀧𑀝𑀺𑀚𑀸𑀦𑀫𑀸𑀦𑁄𑀢𑀺 𑀦𑀺𑀲𑀚𑁆𑀚𑀁 𑀅𑀧𑁆𑀧𑀝𑀺𑀚𑀸𑀦𑀫𑀸𑀦𑁄 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑁂𑀦 𑀦 𑀓𑀸𑀭𑁂𑀢𑀩𑁆𑀩𑁄𑀢𑀺. 𑀅𑀮𑀚𑁆𑀚𑀻𑀧𑀺 𑀳𑀺 𑀧𑀝𑀺𑀚𑀸𑀦𑀫𑀸𑀦𑁄𑀯 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄. 𑀬𑀸𑀯 𑀦 𑀧𑀝𑀺𑀚𑀸𑀦𑀸𑀢𑀺, 𑀢𑀸𑀯 ‘‘𑀦𑁂𑀯 𑀲𑀼𑀤𑁆𑀥𑁄’’𑀢𑀺 𑀯𑀸 ‘‘𑀦 𑀅𑀲𑀼𑀤𑁆𑀥𑁄’’𑀢𑀺 𑀯𑀸 𑀯𑀢𑁆𑀢𑀩𑁆𑀩𑁄, 𑀯𑀢𑁆𑀢𑀸𑀦𑀼𑀲𑀦𑁆𑀥𑀺𑀦𑀸 𑀧𑀦 𑀓𑀸𑀭𑁂𑀢𑀩𑁆𑀩𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀧𑀝𑀺𑀜𑁆𑀜𑀸 𑀮𑀚𑁆𑀚𑀻𑀲𑀼 𑀓𑀢𑀸, 𑀅𑀮𑀚𑁆𑀚𑀻𑀲𑀼 𑀏𑀯𑀁 𑀦 𑀯𑀺𑀚𑁆𑀚𑀢𑀺;

𑀩𑀳𑀼𑀫𑁆𑀧𑀺 𑀅𑀮𑀚𑁆𑀚𑀻 𑀪𑀸𑀲𑁂𑀬𑁆𑀬, 𑀯𑀢𑁆𑀢𑀸𑀦𑀼𑀲𑀦𑁆𑀥𑀺𑀢𑁂𑀦 𑀓𑀸𑀭𑀬𑁂’’𑀢𑀺. (𑀧𑀭𑀺. 𑁩𑁫𑁯);

𑀦 𑀓𑁂𑀯𑀮𑀁 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑁂𑀦 𑀘𑁄𑀤𑀦𑀸𑀬𑀫𑁂𑀯 𑀏𑀯𑀁 𑀧𑀝𑀺𑀜𑁆𑀜𑀸𑀬 𑀓𑀸𑀭𑁂𑀢𑀩𑁆𑀩𑁄, 𑀅𑀣 𑀔𑁄 𑀦𑀺𑀲𑀚𑁆𑀚𑀸𑀤𑀺𑀦𑀸 𑀆𑀓𑀸𑀭𑁂𑀦 𑀲𑀤𑁆𑀥𑀺𑀁 𑀘𑁄𑀤𑀦𑀸𑀬𑀧𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑁂𑀦 𑀯𑀸 𑀲𑀸 𑀲𑀤𑁆𑀥𑁂𑀬𑁆𑀬𑀯𑀘𑀲𑀸 𑀉𑀧𑀸𑀲𑀺𑀓𑀸 𑀯𑀤𑁂𑀬𑁆𑀬, 𑀢𑁂𑀦 𑀲𑁄 𑀪𑀺𑀓𑁆𑀔𑀼 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀦𑀺𑀲𑀚𑁆𑀚𑀸𑀤𑀻𑀲𑀼 𑀆𑀓𑀸𑀭𑁂𑀲𑀽’’𑀢𑀺𑀆𑀤𑀺. 𑀏𑀢𑁆𑀣 𑀘 ‘‘𑀧𑀝𑀺𑀚𑀸𑀦𑀫𑀸𑀦𑁄’’𑀢𑀺 𑀅𑀯𑀼𑀢𑁆𑀢𑁂𑀧𑀺 𑀅𑀥𑀺𑀓𑀸𑀭𑀢𑁆𑀢𑀸 ‘‘𑀧𑀝𑀺𑀚𑀸𑀦𑀫𑀸𑀦𑁄𑀯 𑀢𑁂𑀦 𑀲𑁄 𑀪𑀺𑀓𑁆𑀔𑀼 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀢𑀣𑀸𑀭𑀽𑀧𑀸𑀬 (𑀲𑀸𑀭𑀢𑁆𑀣. 𑀝𑀻. 𑁨.𑁪𑁪𑁪-𑁪𑁪𑁫) 𑀉𑀧𑀸𑀲𑀺𑀓𑀸𑀬 𑀯𑀘𑀦𑁂 𑀅𑀜𑁆𑀜𑀣𑀢𑁆𑀢𑀸𑀪𑀸𑀯𑀢𑁄 𑀤𑀺𑀝𑁆𑀞𑀁 𑀦𑀸𑀫 𑀢𑀣𑀸𑀧𑀺 𑀳𑁄𑀢𑀺, 𑀅𑀜𑁆𑀜𑀣𑀸𑀧𑀺 𑀳𑁄𑀢𑀻𑀢𑀺 𑀤𑀲𑁆𑀲𑀦𑁂 𑀅𑀜𑁆𑀜𑀣𑀢𑁆𑀢𑀲𑀫𑁆𑀪𑀯𑀁 𑀤𑀲𑁆𑀲𑁂𑀢𑀺. 𑀅𑀦𑁂𑀓𑀁𑀲𑀺𑀓𑀢𑀸𑀬 𑀦 𑀦𑀺𑀬𑀢𑁄𑀢𑀺 𑀅𑀦𑀺𑀬𑀢𑁄. 𑀢𑁂𑀦𑀸𑀳 ‘‘𑀢𑀺𑀡𑁆𑀡𑀁 𑀆𑀧𑀢𑁆𑀢𑀻𑀦’’𑀦𑁆𑀢𑀺𑀆𑀤𑀺.

𑀭𑀳𑁄𑀦𑀺𑀲𑀚𑁆𑀚𑀲𑁆𑀲𑀸𑀤𑁂𑀦 𑀫𑀸𑀢𑀼𑀕𑀸𑀫𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀓𑀸𑀫𑁄 𑀅𑀓𑁆𑀔𑀺𑀁 𑀅𑀜𑁆𑀚𑁂𑀢𑀺, 𑀤𑀼𑀓𑁆𑀓𑀝𑀁. 𑀦𑀺𑀯𑀸𑀲𑀦𑀁 𑀦𑀺𑀯𑀸𑀲𑁂𑀢𑀺, 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀢𑀺, 𑀘𑀻𑀯𑀭𑀁 𑀧𑀸𑀭𑀼𑀧𑀢𑀺, 𑀲𑀩𑁆𑀩𑀢𑁆𑀣 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀕𑀘𑁆𑀙𑀢𑀺, 𑀧𑀤𑀯𑀸𑀭𑁂 𑀧𑀤𑀯𑀸𑀭𑁂 𑀤𑀼𑀓𑁆𑀓𑀝𑀁. 𑀕𑀦𑁆𑀢𑁆𑀯𑀸𑀦 𑀦𑀺𑀲𑀻𑀤𑀢𑀺, 𑀤𑀼𑀓𑁆𑀓𑀝𑀫𑁂𑀯. 𑀢𑁂𑀦𑀸𑀳 ‘‘𑀫𑁂𑀣𑀼𑀦𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀓𑀺𑀮𑁂𑀲𑀲𑀗𑁆𑀔𑀸𑀢𑁂𑀦𑀸’’𑀢𑀺𑀆𑀤𑀺. 𑀏𑀢𑁆𑀣 𑀘 𑀭𑀳𑁄𑀦𑀺𑀲𑀚𑁆𑀚𑀲𑁆𑀲𑀸𑀤𑀲𑁆𑀲 𑀅𑀲𑀢𑀺𑀧𑀺 𑀫𑁂𑀣𑀼𑀦𑀭𑀸𑀕𑀪𑀸𑀯𑁂 𑀢𑀧𑁆𑀧𑀝𑀺𑀩𑀤𑁆𑀥𑀓𑀺𑀮𑁂𑀲𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀫𑁂𑀣𑀼𑀦𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀓𑀺𑀮𑁂𑀲𑀲𑀗𑁆𑀔𑀸𑀢𑁂𑀦𑀸’’𑀢𑀺. 𑀢𑁂𑀦𑁂𑀯 𑀲𑀦𑁆𑀦𑀺𑀲𑁆𑀲𑀺𑀢𑀕𑁆𑀕𑀳𑀡𑀁 𑀓𑀢𑀁. 𑀭𑀳𑀲𑁆𑀲𑀸𑀤𑁂𑀦𑀸𑀢𑀺 ‘‘𑀇𑀢𑁆𑀣𑀦𑁆𑀦𑀸𑀫𑀸𑀬 𑀲𑀤𑁆𑀥𑀺𑀁 𑀭𑀳𑁄 𑀦𑀺𑀲𑀻𑀤𑀺𑀢𑁆𑀯𑀸 𑀳𑀲𑀺𑀢𑀮𑀧𑀺𑀢𑀸𑀤𑀺𑀓𑀁 𑀓𑀭𑁂𑀬𑁆𑀬’’𑀦𑁆𑀢𑀺 𑀉𑀧𑁆𑀧𑀦𑁆𑀦𑀅𑀲𑁆𑀲𑀸𑀤𑀳𑁂𑀢𑀼. 𑀦𑀺𑀲𑀚𑁆𑀚𑀸𑀬 𑀧𑀸𑀘𑀺𑀢𑁆𑀢𑀺𑀬𑀁 𑀅𑀲𑀢𑀺 𑀉𑀧𑀘𑀸𑀭𑀕𑀢𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀅𑀦𑀺𑀤𑁆𑀤𑀸𑀬𑀦𑁆𑀢𑁂 𑀅𑀦𑀦𑁆𑀥𑁂 𑀯𑀺𑀜𑁆𑀜𑀼𑀧𑀼𑀭𑀺𑀲𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀘𑁂 𑀲𑀸 𑀇𑀢𑁆𑀣𑀻 𑀓𑁂𑀦𑀘𑀺 𑀓𑀭𑀡𑀻𑀬𑁂𑀦 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀧𑀼𑀦𑀧𑁆𑀧𑀼𑀦𑀁 𑀦𑀺𑀲𑀻𑀤𑀢𑀺, 𑀦𑀺𑀲𑀚𑁆𑀚𑀸𑀬 𑀦𑀺𑀲𑀚𑁆𑀚𑀸𑀬 𑀧𑀸𑀘𑀺𑀢𑁆𑀢𑀺𑀬𑀁. 𑀬𑀁 𑀲𑀦𑁆𑀥𑀸𑀬 𑀕𑀢𑁄, 𑀲𑀸 𑀦 𑀤𑀺𑀝𑁆𑀞𑀸, 𑀅𑀜𑁆𑀜𑀸 𑀆𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀢𑀺, 𑀅𑀲𑁆𑀲𑀸𑀤𑁂 𑀉𑀧𑁆𑀧𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀘𑁂 𑀲𑀫𑁆𑀩𑀳𑀼𑀮𑀸 𑀆𑀕𑀘𑁆𑀙𑀦𑁆𑀢𑀺, 𑀫𑀸𑀢𑀼𑀕𑀸𑀫𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀘𑁂 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀧𑀼𑀦𑀧𑁆𑀧𑀼𑀦𑀁 𑀦𑀺𑀲𑀻𑀤𑀦𑁆𑀢𑀺, 𑀦𑀺𑀲𑀚𑁆𑀚𑀸𑀕𑀡𑀦𑀸𑀬𑀧𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀅𑀦𑀺𑀬𑀫𑁂𑀢𑁆𑀯𑀸 ‘‘𑀤𑀺𑀝𑁆𑀞𑀤𑀺𑀝𑁆𑀞𑀸𑀬 𑀲𑀤𑁆𑀥𑀺𑀁 𑀭𑀳𑀲𑁆𑀲𑀸𑀤𑀁 𑀓𑀧𑁆𑀧𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲𑀸𑀧𑀺 𑀆𑀕𑀢𑀸𑀕𑀢𑀸𑀦𑀁 𑀯𑀲𑁂𑀦, 𑀧𑀼𑀦𑀧𑁆𑀧𑀼𑀦𑀁 𑀦𑀺𑀲𑀚𑁆𑀚𑀸𑀬 𑀯𑀲𑁂𑀦 𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀧𑀢𑁆𑀢𑀺𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀧𑀼𑀭𑀺𑀲𑁂𑀢𑀺 𑀅𑀦𑀦𑁆𑀥𑁂 𑀯𑀺𑀜𑁆𑀜𑀼𑀧𑀼𑀭𑀺𑀲𑁂. 𑀉𑀧𑀘𑀸𑀭𑀕𑀢𑁂 𑀲𑀢𑀻𑀢𑀺 𑀤𑁆𑀯𑀸𑀤𑀲𑀳𑀢𑁆𑀣𑀩𑁆𑀪𑀦𑁆𑀢𑀭𑀕𑀢𑁂 𑀲𑀢𑀺. 𑀲𑀘𑁂 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀬 𑀇𑀢𑁆𑀣𑀺𑀬𑀸 𑀭𑀳𑀲𑁆𑀲𑀸𑀤𑁄 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀫𑁆𑀧𑀺 𑀅𑀦𑀸𑀧𑀢𑁆𑀢𑀺.

𑀧𑀞𑀫𑀅𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀅𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀦𑀳𑁂𑀯 𑀔𑁄 𑀧𑀦 𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀏𑀢𑁆𑀣 𑀧𑀦 𑀬𑀫𑁆𑀧𑀺 𑀩𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀁 𑀅𑀦𑁆𑀢𑁄 𑀯𑀺𑀯𑀝𑀁 𑀧𑀭𑀺𑀯𑁂𑀡𑀗𑁆𑀕𑀡𑀸𑀤𑀺, 𑀢𑀫𑁆𑀧𑀺 𑀅𑀦𑁆𑀢𑁄𑀕𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀏𑀯𑀭𑀽𑀧𑀜𑁆𑀳𑀺 𑀞𑀸𑀦𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑁂𑀬𑁂𑀯 𑀕𑀳𑀺𑀢’’𑀦𑁆𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁫𑁩) 𑀯𑀼𑀢𑁆𑀢𑀁. 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀯𑀸𑀢𑀺 𑀓𑀸𑀬𑀲𑀁𑀲𑀕𑁆𑀕𑀤𑀼𑀝𑁆𑀞𑀼𑀮𑁆𑀮𑁄𑀪𑀸𑀲𑀦𑀲𑀗𑁆𑀔𑀸𑀢𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀯𑀸. 𑀢𑁂𑀦𑁂𑀯 𑀳𑀺 𑀧𑀤𑀪𑀸𑀚𑀦𑁂 ‘‘𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 ‘𑀅𑀬𑁆𑀬𑁄, 𑀫𑀬𑀸 𑀤𑀺𑀝𑁆𑀞𑁄 𑀦𑀺𑀲𑀺𑀦𑁆𑀦𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀦𑁆𑀢𑁄’’’𑀢𑀺𑀆𑀤𑀺 (𑀧𑀸𑀭𑀸. 𑁪𑁫𑁫) 𑀯𑀼𑀢𑁆𑀢𑀁. 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀯𑀲𑁂𑀦 𑀆𑀕𑀢𑀁. 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀜𑁆𑀘 𑀲𑀼𑀢𑁆𑀯𑀸 𑀢𑀁 𑀫𑀸𑀢𑀼𑀕𑀸𑀫𑁄𑀧𑀺 𑀦 𑀧𑀝𑀺𑀘𑁆𑀙𑀸𑀤𑁂𑀢𑀺. 𑀢𑀣𑀸 𑀳𑀺 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀺𑀓𑁆𑀔𑀸𑀧𑀤𑁂 (𑀧𑀸𑀭𑀸. 𑁨𑁮𑁩 𑀆𑀤𑀬𑁄) 𑀬𑀸 𑀧𑀦 𑀢𑀸 𑀇𑀢𑁆𑀣𑀺𑀬𑁄 𑀳𑀺𑀭𑀺𑀫𑀦𑀸, 𑀢𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀺𑀓𑁆𑀔𑀽 𑀉𑀚𑁆𑀛𑀸𑀧𑁂𑀲𑀼𑀁, 𑀢𑀲𑁆𑀫𑀸 𑀇𑀥 𑀇𑀢𑁆𑀣𑀻𑀧𑀺 𑀅𑀦𑀸𑀧𑀢𑁆𑀢𑀺𑀁 𑀓𑀭𑁄𑀢𑀻𑀢𑀺 𑀆𑀳 ‘‘𑀇𑀢𑁆𑀣𑀻𑀧𑀻’’𑀢𑀺. 𑀅𑀣 𑀯𑀸 𑀇𑀥 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀇𑀢𑁆𑀣𑀻𑀧𑀺 𑀅𑀦𑀸𑀧𑀢𑁆𑀢𑀺𑀁 𑀓𑀭𑁄𑀢𑀺, 𑀧𑀞𑀫𑁂 𑀧𑀦 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀇𑀢𑁆𑀣𑀺𑀲𑀢𑀫𑁆𑀧𑀺 𑀅𑀦𑀸𑀧𑀢𑁆𑀢𑀺𑀁 𑀦 𑀓𑀭𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀦𑀦𑁆𑀥𑁄 𑀅𑀩𑀥𑀺𑀭𑁄𑀢𑀺 𑀏𑀢𑁆𑀣 𑀓𑀸𑀬𑀲𑀁𑀲𑀕𑁆𑀕𑀯𑀲𑁂𑀦 𑀅𑀦𑀦𑁆𑀥𑁄 𑀯𑀼𑀢𑁆𑀢𑁄, 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀯𑀲𑁂𑀦 𑀅𑀩𑀥𑀺𑀭𑁄.

𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀘𑀺𑀢𑁆𑀢𑀢𑁄 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀲𑀼𑀔𑀫𑀚𑁆𑀛𑀢𑁆𑀢𑀯𑁂𑀤𑀦𑀸𑀳𑀺 𑀤𑁆𑀯𑀺𑀯𑁂𑀤𑀦𑀁. 𑀢𑁂𑀦𑀸𑀳 ‘‘𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀧𑀦𑁂𑀢𑁆𑀣 𑀅𑀤𑀺𑀦𑁆𑀦𑀸𑀤𑀸𑀦𑀲𑀤𑀺𑀲𑀸𑀦𑁂𑀯𑀸’’𑀢𑀺. 𑀏𑀢𑁆𑀣 𑀘 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀦𑁆𑀢𑁄 𑀤𑀼𑀝𑁆𑀞𑀼𑀮𑁆𑀮𑀫𑁆𑀧𑀺 𑀪𑀡𑀢𑀺, 𑀤𑀼𑀝𑁆𑀞𑀼𑀮𑁆𑀮𑀁 𑀪𑀡𑀦𑁆𑀢𑁄 𑀦𑀺𑀲𑀻𑀤𑀢𑀺 𑀘𑀸𑀢𑀺 ‘‘𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀻’’𑀢𑀺 𑀯𑀼𑀢𑁆𑀢𑀁, 𑀤𑀼𑀝𑁆𑀞𑀼𑀮𑁆𑀮𑀫𑁂𑀯 𑀯𑀸 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑀤𑀼𑀢𑀺𑀬𑀅𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

‘‘𑀅𑀦𑀺𑀬𑀢𑀼𑀤𑁆𑀤𑁂𑀲𑁄 𑀘𑀸𑀬𑀁 𑀤𑀺𑀝𑁆𑀞𑀸𑀤𑀺𑀲𑀫𑀽𑀮𑀓𑀘𑁄𑀤𑀦𑀸𑀬 𑀯𑀢𑁆𑀣𑀼𑀁 𑀧𑀝𑀺𑀚𑀸𑀦𑀫𑀸𑀦𑁄𑀯 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄, 𑀦 𑀇𑀢𑀭𑁄𑀢𑀺 𑀆𑀧𑀢𑁆𑀢𑀺𑀭𑁄𑀧𑀦𑀸𑀭𑁄𑀧𑀦𑀮𑀓𑁆𑀔𑀡𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑁄’’𑀢𑀺 𑀯𑀤𑀦𑁆𑀢𑀺.

𑀇𑀢𑀺 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸𑀬

𑀯𑀺𑀦𑀬𑀢𑁆𑀣𑀫𑀜𑁆𑀚𑀽𑀲𑀸𑀬𑀁 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀺𑀬𑀁

𑀅𑀦𑀺𑀬𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.