𑀧𑀸𑀭𑀸𑀚𑀺𑀓𑀓𑀡𑁆𑀟𑀁

𑀇𑀤𑀸𑀦𑀺 𑀦𑀺𑀤𑀸𑀦𑀼𑀤𑁆𑀤𑁂𑀲𑀸𑀦𑀦𑁆𑀢𑀭𑀁 𑀯𑀼𑀢𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀼𑀤𑁆𑀤𑁂𑀲𑀲𑁆𑀲 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀢𑀼𑀁 ‘‘𑀇𑀤𑀸𑀦𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀦𑀺𑀤𑀸𑀦𑀸𑀦𑀦𑁆𑀢𑀭𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀦𑀺𑀤𑀸𑀦𑀁 𑀅𑀦𑀦𑁆𑀢𑀭𑀁 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣𑀸𑀢𑀺 𑀧𑀸𑀭𑀸𑀚𑀺𑀓𑀓𑀡𑁆𑀟𑁂. 𑀧𑀸𑀢𑀺𑀫𑁄𑀓𑁆𑀔𑁂𑀢𑀺 𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑁂. 𑀘𑀢𑁆𑀢𑀸𑀭𑁄𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄 𑀊𑀦𑀸𑀢𑀺𑀭𑁂𑀓𑀪𑀸𑀯𑀦𑀺𑀯𑀢𑁆𑀢𑀦𑀢𑁄. 𑀧𑀸𑀭𑀸𑀚𑀺𑀓𑀸𑀢𑀺 𑀲𑀚𑀸𑀢𑀺𑀦𑀸𑀫𑀁. 𑀆𑀧𑀢𑁆𑀢𑀺𑀬𑁄𑀢𑀺 𑀲𑀩𑁆𑀩𑀲𑀸𑀥𑀸𑀭𑀡𑀦𑀸𑀫𑀁. 𑀉𑀤𑁆𑀤𑀺𑀲𑀻𑀬𑀢𑀻𑀢𑀺 𑀉𑀤𑁆𑀤𑁂𑀲𑁄. 𑀪𑀸𑀯𑀧𑁆𑀧𑀥𑀸𑀦𑁄𑀬𑀁 𑀦𑀺𑀤𑁆𑀤𑁂𑀲𑁄. 𑀢𑁂𑀦𑀸𑀳 ‘‘𑀉𑀤𑁆𑀤𑀺𑀲𑀺𑀢𑀩𑁆𑀩𑀢’’𑀦𑁆𑀢𑀺.

𑁧. 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸

𑀬𑁄 𑀧𑀦𑀸𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁪𑁫 𑀪𑀺𑀓𑁆𑀔𑀼𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸) 𑀏𑀢𑁆𑀣 𑀬𑀲𑁆𑀫𑀸 𑀧𑀦𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀬𑁄𑀢𑀺 𑀅𑀢𑁆𑀣𑀧𑀤𑀁, 𑀢𑀜𑁆𑀘 𑀅𑀦𑀺𑀬𑀫𑁂𑀦 𑀧𑀼𑀕𑁆𑀕𑀮𑀁 𑀤𑀻𑀧𑁂𑀢𑀺. 𑀢𑀲𑁆𑀫𑀸 𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄 𑀓𑁄𑀘𑀻’’𑀢𑀺 𑀆𑀳. 𑀬𑀲𑁆𑀫𑀸 𑀧𑀦 𑀬𑁄 𑀬𑁄𑀓𑁄𑀘𑀺 𑀦𑀸𑀫, 𑀲𑁄 𑀅𑀯𑀲𑁆𑀲𑀁 𑀮𑀺𑀗𑁆𑀕𑀬𑀼𑀢𑁆𑀢𑀚𑀸𑀢𑀺𑀦𑀸𑀫𑀕𑁄𑀢𑁆𑀢𑀲𑀻𑀮𑀯𑀺𑀳𑀸𑀭𑀕𑁄𑀘𑀭𑀯𑀬𑁂𑀲𑀼 𑀏𑀓𑁂𑀦𑀸𑀓𑀸𑀭𑁂𑀦 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀢𑀁 𑀢𑀣𑀸 𑀜𑀸𑀧𑁂𑀢𑀼𑀁 ‘‘𑀭𑀲𑁆𑀲𑀤𑀻𑀖𑀸𑀤𑀺𑀦𑀸’’𑀢𑀺𑀆𑀤𑀺𑀫𑀸𑀳. 𑀆𑀤𑀺𑀲𑀤𑁆𑀤𑁂𑀦 𑀦𑀯𑀓𑀫𑁆𑀫𑀸𑀤𑀻𑀦𑀁 𑀕𑀳𑀡𑀁. 𑀮𑀺𑀗𑁆𑀕𑀸𑀤𑀺𑀪𑁂𑀤𑁂𑀦𑀸𑀢𑀺 𑀮𑀺𑀗𑁆𑀕𑀻𑀬𑀢𑀺𑀜𑀸𑀬𑀢𑀺 𑀏𑀢𑁂𑀦𑀸𑀢𑀺 𑀮𑀺𑀗𑁆𑀕𑀁, 𑀢𑀁 𑀆𑀤𑀺 𑀬𑁂𑀲𑀁 𑀢𑁂𑀢𑀺 𑀮𑀺𑀗𑁆𑀕𑀸𑀤𑀬𑁄, 𑀢𑁂𑀲𑀁 𑀪𑁂𑀤𑁄 𑀮𑀺𑀗𑁆𑀕𑀸𑀤𑀺𑀪𑁂𑀤𑁄, 𑀢𑁂𑀦 𑀮𑀺𑀗𑁆𑀕𑀸𑀤𑀺𑀪𑁂𑀤𑁂𑀦. 𑀏𑀢𑁆𑀣𑀸𑀤𑀺𑀲𑀤𑁆𑀤𑁂𑀦 𑀧𑀦 𑀬𑀼𑀢𑁆𑀢𑀸𑀤𑀻𑀦𑀁 𑀕𑀳𑀡𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀮𑀺𑀗𑁆𑀕𑀯𑀲𑁂𑀦 𑀬𑀸𑀤𑀺𑀲𑁄 𑀯𑀸 𑀢𑀸𑀤𑀺𑀲𑁄 𑀯𑀸 𑀳𑁄𑀢𑀼, 𑀤𑀻𑀖𑁄 𑀯𑀸 𑀭𑀲𑁆𑀲𑁄 𑀯𑀸 𑀓𑀸𑀴𑁄 𑀯𑀸 𑀑𑀤𑀸𑀢𑁄 𑀯𑀸 𑀫𑀗𑁆𑀕𑀼𑀭𑀘𑁆𑀙𑀯𑀺 𑀯𑀸 𑀓𑀺𑀲𑁄 𑀯𑀸 𑀣𑀽𑀮𑁄 𑀯𑀸. 𑀬𑁄𑀕𑀯𑀲𑁂𑀦 𑀬𑁂𑀦 𑀯𑀸 𑀢𑁂𑀦 𑀯𑀸 𑀬𑀼𑀢𑁆𑀢𑁄 𑀳𑁄𑀢𑀼, 𑀦𑀯𑀓𑀫𑁆𑀫𑀬𑀼𑀢𑁆𑀢𑁄 𑀯𑀸 𑀉𑀤𑁆𑀤𑁂𑀲𑀬𑀼𑀢𑁆𑀢𑁄 𑀯𑀸 𑀯𑀸𑀲𑀥𑀼𑀭𑀬𑀼𑀢𑁆𑀢𑁄 𑀯𑀸. 𑀚𑀸𑀢𑀺𑀯𑀲𑁂𑀦 𑀬𑀁𑀚𑀘𑁆𑀘𑁄 𑀯𑀸 𑀢𑀁𑀚𑀘𑁆𑀘𑁄 𑀯𑀸 𑀳𑁄𑀢𑀼, 𑀔𑀢𑁆𑀢𑀺𑀬𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀯𑁂𑀲𑁆𑀲𑁄 𑀯𑀸 𑀲𑀼𑀤𑁆𑀥𑁄 𑀯𑀸. 𑀦𑀸𑀫𑀯𑀲𑁂𑀦 𑀬𑀣𑀸𑀦𑀸𑀫𑁄 𑀯𑀸 𑀢𑀣𑀸𑀦𑀸𑀫𑁄 𑀯𑀸 𑀳𑁄𑀢𑀼, 𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀯𑀸 𑀥𑀫𑁆𑀫𑀭𑀓𑁆𑀔𑀺𑀢𑁄 𑀯𑀸 𑀲𑀗𑁆𑀖𑀭𑀓𑁆𑀔𑀺𑀢𑁄 𑀯𑀸. 𑀕𑁄𑀢𑁆𑀢𑀯𑀲𑁂𑀦 𑀬𑀣𑀸𑀕𑁄𑀢𑁆𑀢𑁄 𑀯𑀸 𑀢𑀣𑀸𑀕𑁄𑀢𑁆𑀢𑁄 𑀯𑀸 𑀳𑁄𑀢𑀼, 𑀓𑀘𑁆𑀘𑀸𑀬𑀦𑁄 𑀯𑀸 𑀯𑀸𑀲𑀺𑀝𑁆𑀞𑁄 𑀯𑀸 𑀓𑁄𑀲𑀺𑀬𑁄 𑀯𑀸. 𑀲𑀻𑀮𑁂𑀲𑀼 𑀬𑀣𑀸𑀲𑀻𑀮𑁄 𑀯𑀸 𑀢𑀣𑀸𑀲𑀻𑀮𑁄 𑀯𑀸 𑀳𑁄𑀢𑀼, 𑀦𑀯𑀓𑀫𑁆𑀫𑀲𑀻𑀮𑁄 𑀯𑀸 𑀉𑀤𑁆𑀤𑁂𑀲𑀲𑀻𑀮𑁄 𑀯𑀸 𑀯𑀸𑀲𑀥𑀼𑀭𑀲𑀻𑀮𑁄 𑀯𑀸. 𑀯𑀺𑀳𑀸𑀭𑁂𑀲𑀼𑀧𑀺 𑀬𑀣𑀸𑀯𑀺𑀳𑀸𑀭𑀻 𑀯𑀸 𑀢𑀣𑀸𑀯𑀺𑀳𑀸𑀭𑀻 𑀯𑀸 𑀳𑁄𑀢𑀼, 𑀦𑀯𑀓𑀫𑁆𑀫𑀯𑀺𑀳𑀸𑀭𑀻 𑀯𑀸 𑀉𑀤𑁆𑀤𑁂𑀲𑀯𑀺𑀳𑀸𑀭𑀻 𑀯𑀸 𑀯𑀸𑀲𑀥𑀼𑀭𑀯𑀺𑀳𑀸𑀭𑀻 𑀯𑀸. 𑀕𑁄𑀘𑀭𑁂𑀲𑀼𑀧𑀺 𑀬𑀣𑀸𑀕𑁄𑀘𑀭𑁄 𑀯𑀸 𑀢𑀣𑀸𑀕𑁄𑀘𑀭𑁄 𑀯𑀸 𑀳𑁄𑀢𑀼, 𑀦𑀯𑀓𑀫𑁆𑀫𑀕𑁄𑀘𑀭𑁄 𑀯𑀸 𑀉𑀤𑁆𑀤𑁂𑀲𑀕𑁄𑀘𑀭𑁄 𑀯𑀸 𑀯𑀸𑀲𑀥𑀼𑀭𑀕𑁄𑀘𑀭𑁄 𑀯𑀸. 𑀯𑀬𑁂𑀲𑀼𑀧𑀺 𑀬𑁄 𑀯𑀸 𑀲𑁄 𑀯𑀸 𑀳𑁄𑀢𑀼 𑀣𑁂𑀭𑁄 𑀯𑀸 𑀦𑀯𑁄 𑀯𑀸 𑀫𑀚𑁆𑀛𑀺𑀫𑁄 𑀯𑀸, 𑀅𑀣 𑀔𑁄 𑀲𑀩𑁆𑀩𑁄𑀯 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 ‘‘𑀬𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀇𑀤𑀸𑀦𑀺 ‘‘𑀪𑀺𑀓𑁆𑀔𑀽’’𑀢𑀺 𑀧𑀤𑀁 𑀲𑀁𑀯𑀡𑁆𑀡𑁂𑀢𑀼𑀁 ‘‘𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀏𑀳𑀺 𑀪𑀺𑀓𑁆𑀔𑀽’’𑀢𑀺 𑀪𑀕𑀯𑀢𑁄 𑀯𑀘𑀦𑀫𑀢𑁆𑀢𑁂𑀦 𑀪𑀺𑀓𑁆𑀔𑀼𑀪𑀸𑀯𑁄 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀸. ‘‘𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁦𑁫) 𑀦𑀬𑁂𑀦 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸𑀘𑀁 𑀪𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑁂𑀳𑀺 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀉𑀧𑀲𑀫𑁆𑀧𑀤𑀸 𑀲𑀭𑀡𑀕𑀫𑀦𑀽𑀧𑀲𑀫𑁆𑀧𑀤𑀸. 𑀑𑀯𑀸𑀤𑀧𑁆𑀧𑀝𑀺𑀕𑁆𑀕𑀳𑀡𑀽𑀧𑀲𑀫𑁆𑀧𑀤𑀸 (𑀧𑀸𑀭𑀸. 𑀅𑀝𑁆𑀞. 𑁧.𑁪𑁫) 𑀦𑀸𑀫 𑁋

‘‘𑀢𑀲𑁆𑀫𑀸𑀢𑀺𑀳 𑀢𑁂, 𑀓𑀲𑁆𑀲𑀧, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 ‘𑀢𑀺𑀩𑁆𑀩𑀁 𑀫𑁂 𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀪𑀯𑀺𑀲𑁆𑀲𑀢𑀺 𑀣𑁂𑀭𑁂𑀲𑀼 𑀦𑀯𑁂𑀲𑀼 𑀫𑀚𑁆𑀛𑀺𑀫𑁂𑀲𑀽’𑀢𑀺, 𑀏𑀯𑀜𑁆𑀳𑀺 𑀢𑁂 𑀓𑀲𑁆𑀲𑀧 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀢𑀲𑁆𑀫𑀸𑀢𑀺𑀳 𑀢𑁂, 𑀓𑀲𑁆𑀲𑀧, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 ‘𑀬𑀁 𑀓𑀺𑀜𑁆𑀘𑀺 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀺 𑀓𑀼𑀲𑀮𑀽𑀧𑀲𑀁𑀳𑀺𑀢𑀁, 𑀲𑀩𑁆𑀩𑀁 𑀢𑀁 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀲𑀩𑁆𑀩𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑁄 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀻’𑀢𑀺, 𑀏𑀯𑀜𑁆𑀳𑀺 𑀢𑁂, 𑀓𑀲𑁆𑀲𑀧, 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀢𑀲𑁆𑀫𑀸𑀢𑀺𑀳 𑀢𑁂, 𑀓𑀲𑁆𑀲𑀧, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 ‘𑀲𑀸𑀢𑀲𑀳𑀕𑀢𑀸 𑀘 𑀫𑁂 𑀓𑀸𑀬𑀕𑀢𑀸𑀲𑀢𑀺 𑀦 𑀯𑀺𑀚𑀳𑀺𑀲𑁆𑀲𑀢𑀻’𑀢𑀺, 𑀏𑀯𑀜𑁆𑀳𑀺 𑀢𑁂, 𑀓𑀲𑁆𑀲𑀧, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 (𑀲𑀁. 𑀦𑀺. 𑁨.𑁧𑁫𑁪) 𑁋

𑀇𑀫𑀺𑀦𑀸 𑀑𑀯𑀸𑀤𑀧𑁆𑀧𑀝𑀺𑀕𑁆𑀕𑀳𑀡𑁂𑀦 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀅𑀦𑀼𑀜𑁆𑀜𑀸𑀢𑀉𑀧𑀲𑀫𑁆𑀧𑀤𑀸.

𑀧𑀜𑁆𑀳𑀸𑀩𑁆𑀬𑀸𑀓𑀭𑀡𑀽𑀧𑀲𑀫𑁆𑀧𑀤𑀸 𑀦𑀸𑀫 𑀲𑁄𑀧𑀸𑀓𑀲𑁆𑀲 𑀅𑀦𑀼𑀜𑁆𑀜𑀸𑀢𑀉𑀧𑀲𑀫𑁆𑀧𑀤𑀸. 𑀪𑀕𑀯𑀸 𑀓𑀺𑀭 𑀧𑀼𑀩𑁆𑀩𑀸𑀭𑀸𑀫𑁂 𑀅𑀦𑀼𑀘𑀗𑁆𑀓𑀫𑀦𑁆𑀢𑀁 𑀲𑁄𑀧𑀸𑀓𑀲𑀸𑀫𑀡𑁂𑀭𑀁 ‘‘‘𑀉𑀤𑁆𑀥𑀼𑀫𑀸𑀢𑀓𑀲𑀜𑁆𑀜𑀸’𑀢𑀺 𑀯𑀸 𑀲𑁄𑀧𑀸𑀓 ‘𑀭𑀽𑀧𑀲𑀜𑁆𑀜𑀸’𑀢𑀺 𑀯𑀸 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀦𑀸𑀦𑀸𑀩𑁆𑀬𑀜𑁆𑀚𑀦𑀸, 𑀉𑀤𑀸𑀳𑀼 𑀏𑀓𑀢𑁆𑀣𑀸 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁪𑁫) 𑀤𑀲 𑀅𑀲𑀼𑀪𑀦𑀺𑀲𑁆𑀲𑀺𑀢𑁂 𑀧𑀜𑁆𑀳𑁂 𑀧𑀼𑀘𑁆𑀙𑀺. 𑀲𑁄 𑀢𑁂 𑀩𑁆𑀬𑀸𑀓𑀸𑀲𑀺. 𑀪𑀕𑀯𑀸 𑀢𑀲𑁆𑀲 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 ‘‘𑀓𑀢𑀺𑀯𑀲𑁆𑀲𑁄 𑀢𑁆𑀯𑀁, 𑀲𑁄𑀧𑀸𑀓𑀸’’𑀢𑀺 𑀧𑀼𑀘𑁆𑀙𑀺. 𑀲𑀢𑁆𑀢𑀯𑀲𑁆𑀲𑁄𑀳𑀁 𑀪𑀕𑀯𑀸𑀢𑀺. ‘‘𑀲𑁄𑀧𑀸𑀓, 𑀢𑁆𑀯𑀁 𑀫𑀫 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀧𑀜𑁆𑀳𑁂 𑀩𑁆𑀬𑀸𑀓𑀸𑀲𑀻’’𑀢𑀺 𑀆𑀭𑀤𑁆𑀥𑀘𑀺𑀢𑁆𑀢𑁄 𑀉𑀧𑀲𑀫𑁆𑀧𑀤𑀁 𑀅𑀦𑀼𑀚𑀸𑀦𑀺, 𑀅𑀬𑀁 𑀧𑀜𑁆𑀳𑀸𑀩𑁆𑀬𑀸𑀓𑀭𑀡𑀽𑀧𑀲𑀫𑁆𑀧𑀤𑀸.

𑀅𑀝𑁆𑀞𑀕𑀭𑀼𑀥𑀫𑁆𑀫𑀧𑀝𑀺𑀕𑁆𑀕𑀳𑀡𑀽𑀧𑀲𑀫𑁆𑀧𑀤𑀸 𑀦𑀸𑀫 𑀫𑀳𑀸𑀧𑀚𑀸𑀧𑀢𑀺𑀬𑀸 𑀅𑀝𑁆𑀞𑀕𑀭𑀼𑀥𑀫𑁆𑀫𑀧𑁆𑀧𑀝𑀺𑀕𑁆𑀕𑀳𑀡𑁂𑀦 𑀅𑀦𑀼𑀜𑁆𑀜𑀸𑀢𑀉𑀧𑀲𑀫𑁆𑀧𑀤𑀸.

𑀤𑀽𑀢𑁂𑀦𑀽𑀧𑀲𑀫𑁆𑀧𑀤𑀸 𑀦𑀸𑀫 𑀅𑀟𑁆𑀠𑀓𑀸𑀲𑀺𑀬𑀸 𑀕𑀡𑀺𑀓𑀸𑀬 𑀅𑀦𑀼𑀜𑁆𑀜𑀸𑀢𑀉𑀧𑀲𑀫𑁆𑀧𑀤𑀸.

𑀅𑀝𑁆𑀞𑀯𑀸𑀘𑀺𑀓𑀽𑀧𑀲𑀫𑁆𑀧𑀤𑀸 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑀸 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀢𑁄 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦, 𑀪𑀺𑀓𑁆𑀔𑀼𑀲𑀗𑁆𑀖𑀢𑁄 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦𑀸𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀓𑀫𑁆𑀫𑁂𑀳𑀺 𑀉𑀧𑀲𑀫𑁆𑀧𑀤𑀸.

𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀽𑀧𑀲𑀫𑁆𑀧𑀤𑀸 𑀦𑀸𑀫 𑀪𑀺𑀓𑁆𑀔𑀽𑀦𑀁 𑀏𑀢𑀭𑀳𑀺 𑀉𑀧𑀲𑀫𑁆𑀧𑀤𑀸. 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦𑀸𑀢𑀺 𑀢𑀻𑀳𑀺 𑀅𑀦𑀼𑀲𑁆𑀲𑀸𑀯𑀦𑀸𑀳𑀺, 𑀏𑀓𑀸𑀬 𑀘 𑀜𑀢𑁆𑀢𑀺𑀬𑀸𑀢𑀺 𑀏𑀯𑀁 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦. 𑀓𑀺𑀜𑁆𑀘𑀸𑀧𑀺 𑀳𑀺 𑀜𑀢𑁆𑀢𑀺 𑀲𑀩𑁆𑀩𑀧𑀞𑀫𑀁 𑀯𑀼𑀘𑁆𑀘𑀢𑀺, 𑀢𑀺𑀲𑁆𑀲𑀦𑁆𑀦𑀁 𑀧𑀦 𑀅𑀦𑀼𑀲𑁆𑀲𑀸𑀯𑀦𑀸𑀦𑀁 𑀅𑀢𑁆𑀣𑀩𑁆𑀬𑀜𑁆𑀚𑀦𑀪𑁂𑀤𑀸𑀪𑀸𑀯𑀢𑁄 𑀅𑀢𑁆𑀣𑀩𑁆𑀬𑀜𑁆𑀚𑀦𑀪𑀺𑀦𑁆𑀦𑀁 𑀜𑀢𑁆𑀢𑀺𑀁 𑀢𑀸𑀲𑀁 𑀘𑀢𑀼𑀢𑁆𑀣𑀦𑁆𑀢𑀺 𑀓𑀢𑁆𑀯𑀸 ‘‘𑀜𑀢𑁆𑀢𑀺𑀘𑀢𑀼𑀢𑁆𑀣’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀓𑀼𑀧𑁆𑀧𑁂𑀦𑀸𑀢𑀺 𑀅𑀓𑁄𑀧𑁂𑀢𑀩𑁆𑀩𑀢𑀁, 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀢𑀜𑁆𑀘 𑀉𑀧𑀕𑀢𑁂𑀦. 𑀞𑀸𑀦𑀸𑀭𑀳𑁂𑀦𑀸𑀢𑀺 𑀓𑀸𑀭𑀡𑀸𑀭𑀳𑁂𑀦 𑀲𑀢𑁆𑀣𑀼 𑀲𑀸𑀲𑀦𑀸𑀭𑀳𑁂𑀦. 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀫 𑀉𑀧𑀭𑀺𑀪𑀸𑀯𑀁 𑀲𑀫𑀸𑀧𑀦𑁆𑀦𑁄, 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀼𑀪𑀸𑀯𑁄 𑀳𑀺 𑀉𑀧𑀭𑀺𑀪𑀸𑀯𑁄, 𑀢𑀜𑁆𑀘𑁂𑀲 𑀬𑀣𑀸𑀯𑀼𑀢𑁆𑀢𑁂𑀦 𑀓𑀫𑁆𑀫𑁂𑀦 𑀲𑀫𑀸𑀧𑀦𑁆𑀦𑀢𑁆𑀢𑀸 ‘‘𑀉𑀧𑀲𑀫𑁆𑀧𑀦𑁆𑀦𑁄’’𑀢𑀺 𑀯𑀼𑀘𑁆𑀘𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀇𑀫𑀺𑀦𑀸𑀯 𑀉𑀧𑀲𑀫𑁆𑀧𑀦𑁆𑀦𑁄 𑀇𑀥 𑀕𑀳𑀺𑀢𑁄, 𑀦𑀸𑀜𑁆𑀜𑁂𑀳𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀸 𑀅𑀦𑁆𑀢𑀺𑀫𑀪𑀯𑀺𑀓𑀸𑀦𑀫𑁂𑀯, 𑀲𑀭𑀡𑀕𑀫𑀦𑀽𑀧𑀲𑀫𑁆𑀧𑀤𑀸 𑀧𑀭𑀺𑀲𑀼𑀤𑁆𑀥𑀸𑀦𑀁, 𑀑𑀯𑀸𑀤𑀧𑁆𑀧𑀝𑀺𑀕𑁆𑀕𑀳𑀡𑀧𑀜𑁆𑀳𑀸𑀩𑁆𑀬𑀸𑀓𑀭𑀡𑀽𑀧𑀲𑀫𑁆𑀧𑀤𑀸 𑀫𑀳𑀸𑀓𑀲𑁆𑀲𑀧𑀲𑁄𑀧𑀸𑀓𑀸𑀦𑀁, 𑀦 𑀘 𑀢𑁂 𑀪𑀩𑁆𑀩𑀸 𑀧𑀸𑀭𑀸𑀚𑀺𑀓𑀸𑀤𑀺𑀮𑁄𑀓𑀯𑀚𑁆𑀚𑀁 𑀆𑀧𑀚𑁆𑀚𑀺𑀢𑀼𑀁, 𑀅𑀝𑁆𑀞𑀕𑀭𑀼𑀥𑀫𑁆𑀫𑀧𑁆𑀧𑀝𑀺𑀕𑁆𑀕𑀳𑀡𑀸𑀤𑀬𑁄 𑀘 𑀪𑀺𑀓𑁆𑀔𑀼𑀦𑀻𑀦𑀁𑀬𑁂𑀯 𑀅𑀦𑀼𑀜𑁆𑀜𑀸𑀢𑀸. 𑀅𑀬𑀜𑁆𑀘 𑀪𑀺𑀓𑁆𑀔𑀼, 𑀢𑀲𑁆𑀫𑀸 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦𑁂𑀯 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑁂𑀦 𑀉𑀧𑀲𑀫𑁆𑀧𑀦𑁆𑀦𑁄 𑀇𑀥 𑀕𑀳𑀺𑀢𑁄, 𑀦𑀸𑀜𑁆𑀜𑁂𑀳𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑁂𑀲𑀼 𑀧𑀦 𑀲𑀺𑀓𑁆𑀔𑀸𑀧𑀤𑁂𑀲𑀼 𑀅𑀜𑁆𑀜𑁂𑀧𑀺 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀸𑀬 𑀉𑀧𑀲𑀫𑁆𑀧𑀦𑁆𑀦𑀸𑀤𑀬𑁄 𑀲𑀗𑁆𑀕𑀬𑁆𑀳𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁪𑁫 𑀪𑀺𑀓𑁆𑀔𑀼𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸). 𑀯𑀓𑁆𑀔𑀢𑀺 𑀳𑀺 ‘‘𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑁂𑀲𑀼 𑀧𑀦 𑀅𑀜𑁆𑀜𑁂𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻’’𑀢𑀺. 𑀇𑀤𑀸𑀦𑀺 ‘‘𑀅𑀓𑀼𑀧𑁆𑀧𑁂𑀦 𑀞𑀸𑀦𑀸𑀭𑀳𑁂𑀦 𑀉𑀧𑀲𑀫𑁆𑀧𑀦𑁆𑀦𑁄’’𑀢𑀺 𑀲𑀁𑀔𑀺𑀢𑁆𑀢𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀲 𑀧𑀦𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣𑀸𑀢𑀺 𑀢𑁂𑀲𑀼 𑀧𑀜𑁆𑀘𑀲𑀼. 𑀯𑀲𑀢𑀺 𑀏𑀢𑁆𑀣𑀸𑀢𑀺 𑀯𑀢𑁆𑀣𑀼, 𑀆𑀥𑀸𑀭𑁄 𑀧𑀢𑀺𑀝𑁆𑀞𑀸. 𑀢𑁂𑀦𑀸𑀳 ‘‘𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄 𑀧𑀼𑀕𑁆𑀕𑀮𑁄’’𑀢𑀺. 𑀊𑀦𑀸𑀦𑀺 𑀅𑀧𑀭𑀺𑀧𑀼𑀡𑁆𑀡𑀸𑀦𑀺 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀅𑀲𑁆𑀲𑀸𑀢𑀺 𑀊𑀦𑀯𑀻𑀲𑀢𑀺𑀯𑀲𑁆𑀲𑁄. 𑀏𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀉𑀧𑀭𑀺 𑀲𑀧𑁆𑀧𑀸𑀡𑀓𑀯𑀕𑁆𑀕𑁂 𑀊𑀦𑀯𑀻𑀲𑀢𑀺𑀲𑀺𑀓𑁆𑀔𑀸𑀧𑀤𑁂 (𑀓𑀗𑁆𑀔𑀸. 𑀅𑀝𑁆𑀞. 𑀊𑀦𑀯𑀻𑀲𑀢𑀺𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀢𑁂𑀲𑀽𑀢𑀺 𑀧𑀡𑁆𑀟𑀓𑀸𑀤𑀻𑀲𑀼 𑀏𑀓𑀸𑀤𑀲𑀲𑀼 𑀅𑀪𑀩𑁆𑀩𑀧𑀼𑀕𑁆𑀕𑀮𑁂𑀲𑀼. 𑀧𑀡𑁆𑀟𑀓𑁄 (𑀫𑀳𑀸𑀯. 𑀅𑀝𑁆𑀞. 𑁧𑁦𑁯) 𑀧𑀦𑁂𑀢𑁆𑀣 𑀧𑀜𑁆𑀘𑀯𑀺𑀥𑁄 𑀳𑁄𑀢𑀺 𑀆𑀲𑀺𑀢𑁆𑀢𑀧𑀡𑁆𑀟𑀓𑁄, 𑀉𑀲𑀽𑀬𑀧𑀡𑁆𑀟𑀓𑁄, 𑀑𑀧𑀓𑁆𑀓𑀫𑀺𑀓𑀧𑀡𑁆𑀟𑀓𑁄, 𑀦𑀧𑀼𑀁𑀲𑀓𑀧𑀡𑁆𑀟𑀓𑁄, 𑀧𑀓𑁆𑀔𑀧𑀡𑁆𑀟𑀓𑁄𑀢𑀺. 𑀢𑁂𑀲𑀼 𑀆𑀲𑀺𑀢𑁆𑀢𑀧𑀡𑁆𑀟𑀓𑀲𑁆𑀲 𑀘 𑀉𑀲𑀽𑀬𑀧𑀡𑁆𑀟𑀓𑀲𑁆𑀲 𑀘 𑀧𑀩𑁆𑀩𑀚𑁆𑀚𑀸 𑀦 𑀯𑀸𑀭𑀺𑀢𑀸, 𑀇𑀢𑀭𑁂𑀲𑀁 𑀢𑀺𑀡𑁆𑀡𑀁 𑀯𑀸𑀭𑀺𑀢𑀸. 𑀢𑁂𑀲𑀼𑀧𑀺 𑀧𑀓𑁆𑀔𑀧𑀡𑁆𑀟𑀓𑀲𑁆𑀲 𑀬𑀲𑁆𑀫𑀺𑀁 𑀧𑀓𑁆𑀔𑁂 𑀧𑀡𑁆𑀟𑀓𑁄 𑀳𑁄𑀢𑀺, 𑀢𑀲𑁆𑀫𑀺𑀁𑀬𑁂𑀯𑀲𑁆𑀲 𑀧𑀓𑁆𑀔𑁂 𑀧𑀩𑁆𑀩𑀚𑁆𑀚𑀸 𑀯𑀸𑀭𑀺𑀢𑀸𑀢𑀺. 𑀢𑀬𑁄 𑀘𑁂𑀢𑁆𑀣 𑀧𑀩𑁆𑀩𑀚𑁆𑀚𑀽𑀧𑀲𑀫𑁆𑀧𑀤𑀸𑀦𑀁 𑀅𑀪𑀩𑁆𑀩𑀢𑀸𑀬 𑀅𑀯𑀢𑁆𑀣𑀽. 𑀢𑁂𑀦𑀸𑀳 ‘‘𑀆𑀲𑀺𑀢𑁆𑀢𑀧𑀡𑁆𑀟𑀓𑀜𑁆𑀘𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀲𑁆𑀲 𑀧𑀭𑁂𑀲𑀁 𑀅𑀗𑁆𑀕𑀚𑀸𑀢𑀁 𑀫𑀼𑀔𑁂𑀦 𑀕𑀳𑁂𑀢𑁆𑀯𑀸 𑀅𑀲𑀼𑀘𑀺𑀦𑀸 𑀆𑀲𑀺𑀢𑁆𑀢𑀲𑁆𑀲 𑀧𑀭𑀺𑀴𑀸𑀳𑁄 𑀯𑀽𑀧𑀲𑀫𑁆𑀫𑀢𑀺, 𑀅𑀬𑀁 𑀆𑀲𑀺𑀢𑁆𑀢𑀧𑀡𑁆𑀟𑀓𑁄. 𑀬𑀲𑁆𑀲 𑀧𑀭𑁂𑀲𑀁 𑀅𑀚𑁆𑀛𑀸𑀘𑀸𑀭𑀁 𑀧𑀲𑁆𑀲𑀢𑁄 𑀉𑀲𑀽𑀬𑀸𑀬 𑀉𑀧𑁆𑀧𑀦𑁆𑀦𑀸𑀬 𑀧𑀭𑀺𑀴𑀸𑀳𑁄 𑀯𑀽𑀧𑀲𑀫𑁆𑀫𑀢𑀺, 𑀅𑀬𑀁 𑀉𑀲𑀽𑀬𑀧𑀡𑁆𑀟𑀓𑁄. 𑀬𑀲𑁆𑀲 𑀉𑀧𑀓𑁆𑀓𑀫𑁂𑀦 𑀩𑀻𑀚𑀸𑀦𑀺 𑀅𑀧𑀦𑀻𑀢𑀸𑀦𑀺, 𑀅𑀬𑀁 𑀑𑀧𑀓𑁆𑀓𑀫𑀺𑀓𑀧𑀡𑁆𑀟𑀓𑁄 (𑀯𑀺. 𑀲𑀗𑁆𑀕. 𑀅𑀝𑁆𑀞. 𑁧𑁩𑁫; 𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁦𑁯). 𑀬𑁄 𑀧𑀦 𑀧𑀝𑀺𑀲𑀦𑁆𑀥𑀺𑀬𑀁𑀬𑁂𑀯 𑀅𑀪𑀸𑀯𑀓𑁄 𑀉𑀧𑁆𑀧𑀦𑁆𑀦𑁄, 𑀅𑀬𑀁 𑀦𑀧𑀼𑀁𑀲𑀓𑀧𑀡𑁆𑀟𑀓𑁄. 𑀏𑀓𑀘𑁆𑀘𑁄 𑀧𑀦 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀼𑀪𑀸𑀯𑁂𑀦 𑀓𑀸𑀴𑀧𑀓𑁆𑀔𑁂 𑀧𑀡𑁆𑀟𑀓𑁄 𑀳𑁄𑀢𑀺, 𑀚𑀼𑀡𑁆𑀳𑀧𑀓𑁆𑀔𑁂 𑀧𑀦𑀲𑁆𑀲 𑀧𑀭𑀺𑀴𑀸𑀳𑁄 𑀯𑀽𑀧𑀲𑀫𑁆𑀫𑀢𑀺, 𑀅𑀬𑀁 𑀧𑀓𑁆𑀔𑀧𑀡𑁆𑀟𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀣𑁂𑀬𑁆𑀬𑁂𑀦 𑀲𑀁𑀯𑀸𑀲𑁄 𑀏𑀢𑀲𑁆𑀲𑀸𑀢𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄. 𑀲𑁄 𑀘 𑀦 𑀲𑀁𑀯𑀸𑀲𑀫𑀢𑁆𑀢𑀲𑁆𑀲𑁂𑀯 𑀣𑁂𑀦𑀓𑁄 𑀇𑀥𑀸𑀥𑀺𑀧𑁆𑀧𑁂𑀢𑁄, 𑀅𑀣 𑀔𑁄 𑀮𑀺𑀗𑁆𑀕𑀲𑁆𑀲, 𑀢𑀤𑀼𑀪𑀬𑀲𑁆𑀲 𑀘 𑀣𑁂𑀦𑀓𑁄𑀧𑀻𑀢𑀺 𑀆𑀳 ‘‘𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀧𑀦 𑀢𑀺𑀯𑀺𑀥𑁄’’𑀢𑀺𑀆𑀤𑀺. 𑀦 𑀪𑀺𑀓𑁆𑀔𑀼𑀯𑀲𑁆𑀲𑀸𑀦𑀺 𑀕𑀡𑁂𑀢𑀻𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁧𑁦) ‘‘𑀅𑀳𑀁 𑀤𑀲𑀯𑀲𑁆𑀲𑁄 𑀯𑀸 𑀯𑀻𑀲𑀢𑀺𑀯𑀲𑁆𑀲𑁄 𑀯𑀸’’𑀢𑀺 𑀫𑀼𑀲𑀸 𑀯𑀢𑁆𑀯𑀸 𑀪𑀺𑀓𑁆𑀔𑀼𑀯𑀲𑁆𑀲𑀸𑀦𑀺 𑀦 𑀕𑀡𑁂𑀢𑀺. 𑀦 𑀬𑀣𑀸𑀯𑀼𑀟𑁆𑀠𑀁 𑀪𑀺𑀓𑁆𑀔𑀽𑀦𑀁 𑀯𑀸 𑀲𑀸𑀫𑀡𑁂𑀭𑀸𑀦𑀁 𑀯𑀸 𑀯𑀦𑁆𑀤𑀦𑀁 𑀲𑀸𑀤𑀺𑀬𑀢𑀻𑀢𑀺 𑀅𑀢𑁆𑀢𑀦𑀸 𑀫𑀼𑀲𑀸𑀯𑀸𑀤𑀁 𑀓𑀢𑁆𑀯𑀸 𑀤𑀲𑁆𑀲𑀺𑀢𑀯𑀲𑁆𑀲𑀸𑀦𑀼𑀭𑀽𑀧𑁂𑀦 𑀬𑀣𑀸𑀯𑀼𑀟𑁆𑀠𑀁 𑀯𑀦𑁆𑀤𑀦𑀁 𑀦𑀸𑀥𑀺𑀯𑀸𑀲𑁂𑀢𑀺. 𑀦 𑀆𑀲𑀦𑁂𑀦 𑀧𑀝𑀺𑀩𑀸𑀳𑀢𑀻𑀢𑀺 ‘‘𑀅𑀧𑁂𑀳𑀺, 𑀫𑁂 𑀏𑀢𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀆𑀲𑀦𑁂𑀦 𑀦𑀧𑁆𑀧𑀝𑀺𑀩𑀸𑀳𑀢𑀺. 𑀦 𑀉𑀧𑁄𑀲𑀣𑀸𑀤𑀻𑀲𑀼 𑀲𑀦𑁆𑀤𑀺𑀲𑁆𑀲𑀢𑀻𑀢𑀺 𑀉𑀧𑁄𑀲𑀣𑀧𑁆𑀧𑀯𑀸𑀭𑀡𑀸𑀤𑀻𑀲𑀼 𑀦 𑀲𑀦𑁆𑀤𑀺𑀲𑁆𑀲𑀢𑀺. 𑀮𑀺𑀗𑁆𑀕𑀫𑀢𑁆𑀢𑀲𑁆𑀲𑁂𑀯𑀸𑀢𑀺 𑀏𑀯𑀲𑀤𑁆𑀤𑁂𑀦 𑀲𑀁𑀯𑀸𑀲𑀁 𑀦𑀺𑀯𑀢𑁆𑀢𑁂𑀢𑀺. 𑀲𑀫𑀸𑀦𑁄𑀢𑀺 𑀲𑀦𑁆𑀢𑁄. 𑀮𑀺𑀗𑁆𑀕𑀸𑀦𑀼𑀭𑀽𑀧𑀲𑁆𑀲 𑀲𑀁𑀯𑀸𑀲𑀲𑁆𑀲𑀸𑀢𑀺 𑀲𑀸𑀫𑀡𑁂𑀭𑀮𑀺𑀗𑁆𑀕𑀸𑀦𑀼𑀭𑀽𑀧𑀲𑁆𑀲 𑀲𑀸𑀫𑀡𑁂𑀭𑀲𑀁𑀯𑀸𑀲𑀲𑁆𑀲. 𑀲𑀘𑁂 𑀧𑀦 𑀓𑀸𑀲𑀸𑀬𑁂 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀦𑀕𑁆𑀕𑁄 𑀯𑀸 𑀑𑀤𑀸𑀢𑀯𑀢𑁆𑀣𑀦𑀺𑀯𑀢𑁆𑀣𑁄 𑀯𑀸 𑀫𑁂𑀣𑀼𑀦𑀲𑁂𑀯𑀦𑀸𑀤𑀻𑀳𑀺 𑀅𑀲𑁆𑀲𑀫𑀡𑁄 𑀳𑀼𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀦𑀺𑀯𑀸𑀲𑁂𑀢𑀺, 𑀮𑀺𑀗𑁆𑀕𑀢𑁆𑀣𑁂𑀦𑀓𑁄 𑀳𑁄𑀢𑀺. 𑀲𑀘𑁂 𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 𑀓𑀸𑀲𑀸𑀬𑀁 𑀑𑀯𑀝𑁆𑀝𑀺𑀓𑀁 𑀓𑀢𑁆𑀯𑀸, 𑀅𑀜𑁆𑀜𑁂𑀦 𑀯𑀸 𑀆𑀓𑀸𑀭𑁂𑀦 𑀕𑀺𑀳𑀺𑀦𑀺𑀯𑀸𑀲𑀦𑁂𑀦 𑀦𑀺𑀯𑀸𑀲𑁂𑀢𑀺 ‘‘𑀲𑁄𑀪𑀢𑀺 𑀦𑀼 𑀔𑁄 𑀫𑁂 𑀕𑀺𑀳𑀺𑀮𑀺𑀗𑁆𑀕𑀁, 𑀦 𑀲𑁄𑀪𑀢𑀻’’𑀢𑀺 𑀯𑀻𑀫𑀁𑀲𑀦𑀢𑁆𑀣𑀁, 𑀭𑀓𑁆𑀔𑀢𑀺 𑀢𑀸𑀯, ‘‘𑀲𑁄𑀪𑀢𑀻’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀼𑀦 𑀮𑀺𑀗𑁆𑀕𑀁 𑀲𑀸𑀤𑀺𑀬𑀢𑀺, 𑀮𑀺𑀗𑁆𑀕𑀢𑁆𑀣𑁂𑀦𑀓𑁄 𑀳𑁄𑀢𑀺. 𑀑𑀤𑀸𑀢𑀁 𑀦𑀺𑀯𑀸𑀲𑁂𑀢𑁆𑀯𑀸 𑀯𑀻𑀫𑀁𑀲𑀦𑀲𑀫𑁆𑀧𑀝𑀺𑀘𑁆𑀙𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂𑀧𑀺 𑀦𑀺𑀯𑀢𑁆𑀣𑀓𑀸𑀲𑀸𑀯𑀲𑁆𑀲 𑀉𑀧𑀭𑀺 𑀑𑀤𑀸𑀢𑀁 𑀦𑀺𑀯𑀸𑀲𑁂𑀢𑁆𑀯𑀸 𑀯𑀻𑀫𑀁𑀲𑀢𑀺 𑀯𑀸 𑀲𑀫𑁆𑀧𑀝𑀺𑀘𑁆𑀙𑀢𑀺 𑀯𑀸, 𑀭𑀓𑁆𑀔𑀢𑀺 𑀏𑀯.

𑀅𑀦𑁆𑀢𑀺𑀫𑀯𑀢𑁆𑀣𑀼𑀅𑀚𑁆𑀛𑀸𑀧𑀦𑁆𑀦𑀓𑁂𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑀓𑁂 𑀪𑀺𑀓𑁆𑀔𑀼𑀫𑁆𑀳𑀺𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀘𑁂 𑀓𑁄𑀘𑀺 𑀪𑀺𑀓𑁆𑀔𑀼 𑀓𑀸𑀲𑀸𑀬𑁂 𑀲𑀉𑀲𑁆𑀲𑀸𑀳𑁄𑀯 𑀑𑀤𑀸𑀢𑀁 𑀦𑀺𑀯𑀸𑀲𑁂𑀢𑁆𑀯𑀸 𑀫𑁂𑀣𑀼𑀦𑀁 𑀧𑀝𑀺𑀲𑁂𑀯𑀺𑀢𑁆𑀯𑀸 𑀧𑀼𑀦 𑀓𑀸𑀲𑀸𑀬𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀯𑀲𑁆𑀲𑀕𑀡𑀦𑀸𑀤𑀺𑀪𑁂𑀤𑀁 𑀲𑀩𑁆𑀩𑀁 𑀯𑀺𑀥𑀺𑀁 𑀆𑀧𑀚𑁆𑀚𑀢𑀺, 𑀅𑀬𑀁 𑀪𑀺𑀓𑁆𑀔𑀽𑀳𑀺 𑀤𑀺𑀦𑁆𑀦𑀮𑀺𑀗𑁆𑀕𑀲𑁆𑀲 𑀅𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸 𑀦 𑀮𑀺𑀗𑁆𑀕𑀢𑁆𑀣𑁂𑀦𑀓𑁄, 𑀮𑀺𑀗𑁆𑀕𑀸𑀦𑀼𑀭𑀽𑀧𑀲𑁆𑀲 𑀲𑀁𑀯𑀸𑀲𑀲𑁆𑀲 𑀲𑀸𑀤𑀺𑀢𑀢𑁆𑀢𑀸 𑀦𑀸𑀧𑀺 𑀲𑀁𑀯𑀸𑀲𑀢𑁆𑀣𑁂𑀦𑀓𑁄𑀢𑀺. 𑀯𑀺𑀤𑁂𑀲𑀦𑁆𑀢𑀺 𑀧𑀭𑀤𑁂𑀲𑀁. 𑀇𑀤𑀜𑁆𑀘 𑀯𑀜𑁆𑀘𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀬𑁄 𑀧𑀦 𑀲𑀤𑁂𑀲𑁂𑀧𑀺 𑀏𑀯𑀁 𑀓𑀭𑁄𑀢𑀺, 𑀲𑁄𑀧𑀺 𑀲𑀁𑀯𑀸𑀲𑀢𑁆𑀣𑁂𑀦𑀓𑁄𑀯. ‘‘𑀲𑀁𑀯𑀸𑀲𑀫𑀢𑁆𑀢𑀲𑁆𑀲𑁂𑀯𑀸’’𑀢𑀺 𑀇𑀫𑀺𑀦𑀸 𑀮𑀺𑀗𑁆𑀕𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀲𑀘𑁂 𑀓𑁄𑀘𑀺 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄 (𑀫𑀳𑀸𑀯. 𑀅𑀝𑁆𑀞. 𑁧𑁧𑁦) 𑀪𑀺𑀓𑁆𑀔𑀼𑀯𑀲𑁆𑀲𑀸𑀦𑀺 𑀕𑀡𑁂𑀢𑁆𑀯𑀸 𑀫𑀳𑀸𑀧𑁂𑀴𑀸𑀤𑀻𑀲𑀼 𑀤𑀺𑀬𑁆𑀬𑀫𑀸𑀦𑀪𑀢𑁆𑀢𑀁 𑀕𑀡𑁆𑀳𑀸𑀢𑀺, 𑀲𑁄𑀧𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀳𑁄𑀢𑀺. 𑀲𑀬𑀁 𑀲𑀸𑀫𑀡𑁂𑀭𑁄𑀯 𑀲𑀸𑀫𑀡𑁂𑀭𑀧𑁆𑀧𑀝𑀺𑀧𑀸𑀝𑀺𑀬𑀸 𑀓𑀽𑀝𑀯𑀲𑁆𑀲𑀸𑀦𑀺 𑀕𑀡𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀺. 𑀪𑀺𑀓𑁆𑀔𑀼 𑀧𑀦 𑀪𑀺𑀓𑁆𑀔𑀼𑀧𑀝𑀺𑀧𑀸𑀝𑀺𑀬𑀸 𑀓𑀽𑀝𑀯𑀲𑁆𑀲𑀸𑀦𑀺 𑀕𑀡𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄.

𑀦𑀦𑀼 𑀲𑀁𑀯𑀸𑀲𑁄 𑀦𑀸𑀫 𑀏𑀓𑀓𑀫𑁆𑀫𑀁 𑀏𑀓𑀼𑀤𑁆𑀤𑁂𑀲𑁄 𑀲𑀫𑀲𑀺𑀓𑁆𑀔𑀢𑀸𑀢𑀺 𑀆𑀳 ‘‘𑀪𑀺𑀓𑁆𑀔𑀼𑀯𑀲𑁆𑀲𑀕𑀡𑀦𑀸𑀤𑀺𑀓𑁄 𑀳𑀻’’𑀢𑀺𑀆𑀤𑀺. 𑀇𑀫𑀺𑀦𑀸 𑀦 𑀓𑁂𑀯𑀮𑀁 𑀏𑀓𑀓𑀫𑁆𑀫𑀸𑀤𑀺𑀓𑁄𑀯 𑀓𑀺𑀭𑀺𑀬𑀪𑁂𑀤𑁄 𑀲𑀁𑀯𑀸𑀲𑁄𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑁄, 𑀅𑀣 𑀔𑁄 𑀢𑀤𑀜𑁆𑀜𑁄 𑀪𑀺𑀓𑁆𑀔𑀼𑀯𑀲𑁆𑀲𑀕𑀡𑀦𑀸𑀤𑀺𑀓𑁄𑀧𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂𑀢𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑀸𑀥𑀺𑀓𑀸𑀭𑁂. 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬𑀸𑀢𑀺 𑀲𑀺𑀓𑁆𑀔𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀘𑁂 𑀓𑁄𑀘𑀺 𑀪𑀺𑀓𑁆𑀔𑀼 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀮𑀺𑀗𑁆𑀕𑀁 𑀅𑀦𑀧𑀦𑁂𑀢𑁆𑀯𑀸 𑀤𑀼𑀲𑁆𑀲𑀻𑀮𑀓𑀫𑁆𑀫𑀁 𑀓𑀢𑁆𑀯𑀸 𑀯𑀸 𑀅𑀓𑀢𑁆𑀯𑀸 𑀯𑀸 ‘‘𑀦 𑀫𑀁 𑀓𑁄𑀘𑀺 𑀚𑀸𑀦𑀸𑀢𑀻’’𑀢𑀺 𑀧𑀼𑀦 𑀲𑀩𑁆𑀩𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀯𑀲𑁆𑀲𑀕𑀡𑀦𑀸𑀤𑀺𑀪𑁂𑀤𑀁 𑀯𑀺𑀥𑀺𑀁 𑀧𑀝𑀺𑀧𑀚𑁆𑀚𑀢𑀺, 𑀲𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀳𑁄𑀢𑀻𑀢𑀺.

𑀲𑀘𑁂 𑀧𑀦 𑀓𑀲𑁆𑀲𑀘𑀺 𑀭𑀸𑀚𑀸 𑀓𑀼𑀤𑁆𑀥𑁄 𑀳𑁄𑀢𑀺, 𑀲𑁄 ‘‘𑀏𑀯𑀁 𑀫𑁂 𑀲𑁄𑀢𑁆𑀣𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀬𑀫𑁂𑀯 𑀮𑀺𑀗𑁆𑀕𑀁 𑀕𑀳𑁂𑀢𑁆𑀯𑀸 𑀧𑀮𑀸𑀬𑀢𑀺. 𑀢𑀁 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀦𑁆𑀢𑀺. 𑀭𑀸𑀚𑀸 ‘‘𑀲𑀘𑁂 𑀧𑀩𑁆𑀩𑀚𑀺𑀢𑁄, 𑀦 𑀢𑀁 𑀮𑀩𑁆𑀪𑀸 𑀓𑀺𑀜𑁆𑀘𑀺 𑀓𑀸𑀢𑀼’’𑀦𑁆𑀢𑀺 𑀢𑀲𑁆𑀫𑀺𑀁 𑀓𑁄𑀥𑀁 𑀧𑀝𑀺𑀯𑀺𑀦𑁂𑀢𑀺. 𑀲𑁄 ‘‘𑀯𑀽𑀧𑀲𑀦𑁆𑀢𑀁 𑀫𑁂 𑀭𑀸𑀚𑀪𑀬’’𑀦𑁆𑀢𑀺 𑀲𑀗𑁆𑀖𑀫𑀚𑁆𑀛𑀁 𑀅𑀦𑁄𑀲𑀭𑀺𑀢𑁆𑀯𑀸𑀯 𑀕𑀺𑀳𑀺𑀮𑀺𑀗𑁆𑀕𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀅𑀣𑀸𑀧𑀺 ‘‘𑀲𑀸𑀲𑀦𑀁 𑀦𑀺𑀲𑁆𑀲𑀸𑀬 𑀫𑀬𑀸 𑀚𑀻𑀯𑀺𑀢𑀁 𑀮𑀤𑁆𑀥𑀁, 𑀳𑀦𑁆𑀤 𑀤𑀸𑀦𑀺 𑀅𑀳𑀁 𑀧𑀩𑁆𑀩𑀚𑀸𑀫𑀻’’𑀢𑀺 𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑁄 𑀢𑁂𑀦𑁂𑀯 𑀮𑀺𑀗𑁆𑀕𑁂𑀦 𑀆𑀕𑀦𑁆𑀢𑁆𑀯𑀸 𑀆𑀕𑀦𑁆𑀢𑀼𑀓𑀯𑀢𑁆𑀢𑀁 𑀦 𑀲𑀸𑀤𑀺𑀬𑀢𑀺, 𑀪𑀺𑀓𑁆𑀔𑀽𑀳𑀺 𑀧𑀼𑀝𑁆𑀞𑁄 𑀯𑀸 𑀅𑀧𑀼𑀝𑁆𑀞𑁄 𑀯𑀸 𑀬𑀣𑀸𑀪𑀽𑀢𑀫𑀢𑁆𑀢𑀸𑀦𑀁 𑀆𑀯𑀺𑀓𑀢𑁆𑀯𑀸𑀯 𑀧𑀩𑁆𑀩𑀚𑁆𑀚𑀁 𑀬𑀸𑀘𑀢𑀺, 𑀮𑀺𑀗𑁆𑀕𑀁 𑀅𑀧𑀦𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀲𑀘𑁂 𑀧𑀦 𑀯𑀢𑁆𑀢𑀁 𑀲𑀸𑀤𑀺𑀬𑀢𑀺, 𑀧𑀩𑁆𑀩𑀚𑀺𑀢𑀸𑀮𑀬𑀁 𑀤𑀲𑁆𑀲𑁂𑀢𑀺, 𑀲𑀩𑁆𑀩𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀯𑀲𑁆𑀲𑀕𑀡𑀦𑀸𑀤𑀺𑀪𑁂𑀤𑀁 𑀧𑀝𑀺𑀧𑀚𑁆𑀚𑀢𑀺, 𑀅𑀬𑀁 𑀧𑀦 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄.

𑀇𑀥 𑀧𑀦𑁂𑀓𑀘𑁆𑀘𑁄 𑀤𑀼𑀩𑁆𑀪𑀺𑀓𑁆𑀔𑁂 𑀚𑀻𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀬𑀫𑁂𑀯 𑀮𑀺𑀗𑁆𑀕𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑀧𑀸𑀲𑀡𑁆𑀟𑀺𑀬𑀪𑀢𑁆𑀢𑀸𑀦𑀺 𑀪𑀼𑀜𑁆𑀚𑀦𑁆𑀢𑁄 𑀤𑀼𑀩𑁆𑀪𑀺𑀓𑁆𑀔𑁂 𑀯𑀻𑀢𑀺𑀯𑀢𑁆𑀢𑁂 𑀲𑀗𑁆𑀖𑀫𑀚𑁆𑀛𑀁 𑀅𑀦𑁄𑀲𑀭𑀺𑀢𑁆𑀯𑀸𑀯 𑀕𑀺𑀳𑀺𑀮𑀺𑀗𑁆𑀕𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀅𑀧𑀭𑁄 𑀫𑀳𑀸𑀓𑀦𑁆𑀢𑀸𑀭𑀁 𑀦𑀺𑀢𑁆𑀣𑀭𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀲𑀢𑁆𑀣𑀯𑀸𑀳𑁄 𑀘 𑀧𑀩𑁆𑀩𑀚𑀺𑀢𑁂 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺. 𑀲𑁄 ‘‘𑀏𑀯𑀁 𑀫𑀁 𑀲𑀢𑁆𑀣𑀯𑀸𑀳𑁄 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀢𑀻’’𑀢𑀺 𑀲𑀬𑀫𑁂𑀯 𑀮𑀺𑀗𑁆𑀕𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀯𑀸𑀳𑁂𑀦 𑀲𑀤𑁆𑀥𑀺𑀁 𑀓𑀦𑁆𑀢𑀸𑀭𑀁 𑀦𑀺𑀢𑁆𑀣𑀭𑀺𑀢𑁆𑀯𑀸 𑀔𑁂𑀫𑀦𑁆𑀢𑀁 𑀧𑀢𑁆𑀯𑀸 𑀲𑀗𑁆𑀖𑀫𑀚𑁆𑀛𑀁 𑀅𑀦𑁄𑀲𑀭𑀺𑀢𑁆𑀯𑀸𑀯 𑀕𑀺𑀳𑀺𑀮𑀺𑀗𑁆𑀕𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀅𑀧𑀭𑁄 𑀭𑁄𑀕𑀪𑀬𑁂 (𑀫𑀳𑀸𑀯. 𑀅𑀝𑁆𑀞. 𑁧𑁧𑁦; 𑀯𑀺. 𑀲𑀗𑁆𑀕. 𑀅𑀝𑁆𑀞. 𑁧𑁩𑁮) 𑀉𑀧𑁆𑀧𑀦𑁆𑀦𑁂 𑀚𑀻𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀬𑀫𑁂𑀯 𑀮𑀺𑀗𑁆𑀕𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑀧𑀸𑀲𑀡𑁆𑀟𑀺𑀬𑀪𑀢𑁆𑀢𑀸𑀦𑀺 𑀪𑀼𑀜𑁆𑀚𑀦𑁆𑀢𑁄 𑀭𑁄𑀕𑀪𑀬𑁂 𑀯𑀽𑀧𑀲𑀦𑁆𑀢𑁂 𑀲𑀗𑁆𑀖𑀫𑀚𑁆𑀛𑀁 𑀅𑀦𑁄𑀲𑀭𑀺𑀢𑁆𑀯𑀸𑀯 𑀕𑀺𑀳𑀺𑀮𑀺𑀗𑁆𑀕𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀅𑀧𑀭𑀲𑁆𑀲 𑀏𑀓𑁄 𑀯𑁂𑀭𑀺𑀓𑁄 𑀓𑀼𑀤𑁆𑀥𑁄 𑀳𑁄𑀢𑀺, 𑀖𑀸𑀢𑁂𑀢𑀼𑀓𑀸𑀫𑁄 𑀦𑀁 𑀯𑀺𑀘𑀭𑀢𑀺. 𑀲𑁄 ‘‘𑀏𑀯𑀁 𑀫𑁂 𑀲𑁄𑀢𑁆𑀣𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀬𑀫𑁂𑀯 𑀮𑀺𑀗𑁆𑀕𑀁 𑀕𑀳𑁂𑀢𑁆𑀯𑀸 𑀧𑀮𑀸𑀬𑀢𑀺. 𑀯𑁂𑀭𑀺𑀓𑁄 ‘‘𑀓𑀼𑀳𑀺𑀁 𑀲𑁄’’𑀢𑀺 𑀧𑀭𑀺𑀬𑁂𑀲𑀦𑁆𑀢𑁄 ‘‘𑀧𑀩𑁆𑀩𑀚𑀺𑀢𑁆𑀯𑀸 𑀧𑀮𑀸𑀢𑁄’’𑀢𑀺 𑀲𑀼𑀢𑁆𑀯𑀸 ‘‘𑀲𑀘𑁂 𑀧𑀩𑁆𑀩𑀚𑀺𑀢𑁄, 𑀦 𑀢𑀁 𑀮𑀩𑁆𑀪𑀸 𑀓𑀺𑀜𑁆𑀘𑀺 𑀓𑀸𑀢𑀼’’𑀦𑁆𑀢𑀺 𑀢𑀲𑁆𑀫𑀺𑀁 𑀓𑁄𑀥𑀁 𑀧𑀝𑀺𑀯𑀺𑀦𑁂𑀢𑀺. 𑀲𑁄 ‘‘𑀯𑀽𑀧𑀲𑀦𑁆𑀢𑀁 𑀫𑁂 𑀯𑁂𑀭𑀺𑀪𑀬’’𑀦𑁆𑀢𑀺 𑀲𑀗𑁆𑀖𑀫𑀚𑁆𑀛𑀁 𑀅𑀦𑁄𑀲𑀭𑀺𑀢𑁆𑀯𑀸𑀯 𑀕𑀺𑀳𑀺𑀮𑀺𑀗𑁆𑀕𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀅𑀧𑀭𑁄 𑀜𑀸𑀢𑀺𑀓𑀼𑀮𑀁 𑀕𑀦𑁆𑀢𑁆𑀯𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀕𑀺𑀳𑀻 𑀳𑀼𑀢𑁆𑀯𑀸 ‘‘𑀇𑀫𑀸𑀦𑀺 𑀘𑀻𑀯𑀭𑀸𑀦𑀺 𑀇𑀥 𑀯𑀺𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀲𑀘𑁂𑀧𑀺 𑀇𑀫𑀸𑀦𑀺 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀫𑀺𑀲𑁆𑀲𑀸𑀫𑀺, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀁 ‘𑀘𑁄𑀭𑁄’𑀢𑀺 𑀕𑀳𑁂𑀲𑁆𑀲𑀦𑁆𑀢𑀺, 𑀬𑀁𑀦𑀽𑀦𑀸𑀳𑀁 𑀓𑀸𑀬𑀧𑀭𑀺𑀳𑀸𑀭𑀺𑀬𑀸𑀦𑀺 𑀓𑀢𑁆𑀯𑀸 𑀕𑀘𑁆𑀙𑁂𑀬𑁆𑀬’’𑀦𑁆𑀢𑀺 𑀘𑀻𑀯𑀭𑀸𑀳𑀭𑀡𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀘 𑀧𑀸𑀭𑀼𑀧𑀺𑀢𑁆𑀯𑀸 𑀘 𑀯𑀺𑀳𑀸𑀭𑀁 𑀕𑀘𑁆𑀙𑀢𑀺. 𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀲𑀸𑀫𑀡𑁂𑀭𑀸 𑀘 𑀤𑀳𑀭𑀸 𑀘 𑀅𑀩𑁆𑀪𑀼𑀕𑁆𑀕𑀘𑁆𑀙𑀦𑁆𑀢𑀺, 𑀯𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑀺. 𑀲𑁄 𑀦 𑀲𑀸𑀤𑀺𑀬𑀢𑀺, 𑀬𑀣𑀸𑀪𑀽𑀢𑀫𑀢𑁆𑀢𑀸𑀦𑀁 𑀆𑀯𑀺𑀓𑀭𑁄𑀢𑀺. 𑀲𑀘𑁂 𑀪𑀺𑀓𑁆𑀔𑀽 ‘‘𑀦 𑀤𑀸𑀦𑀺 𑀫𑀬𑀁 𑀢𑀁 𑀫𑀼𑀜𑁆𑀘𑀺𑀲𑁆𑀲𑀸𑀫𑀸’’𑀢𑀺 𑀩𑀮𑀓𑁆𑀓𑀸𑀭𑁂𑀦 𑀧𑀩𑁆𑀩𑀸𑀚𑁂𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀓𑀸𑀲𑀸𑀬𑀸𑀦𑀺 𑀅𑀧𑀦𑁂𑀢𑁆𑀯𑀸 𑀧𑀼𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀲𑀘𑁂 𑀧𑀦 ‘‘𑀦 𑀇𑀫𑁂 𑀫𑀫 𑀳𑀻𑀦𑀸𑀬𑀸𑀯𑀢𑁆𑀢𑀪𑀸𑀯𑀁 𑀚𑀸𑀦𑀦𑁆𑀢𑀻’’𑀢𑀺 𑀢𑀁𑀬𑁂𑀯 𑀪𑀺𑀓𑁆𑀔𑀼𑀪𑀸𑀯𑀁 𑀧𑀝𑀺𑀚𑀸𑀦𑀺𑀢𑁆𑀯𑀸 𑀲𑀩𑁆𑀩𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀯𑀲𑁆𑀲𑀕𑀡𑀦𑀸𑀤𑀺𑀪𑁂𑀤𑀁 𑀯𑀺𑀥𑀺𑀁 𑀧𑀝𑀺𑀧𑀚𑁆𑀚𑀢𑀺, 𑀅𑀬𑀁 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀭𑀸𑀚𑀤𑀼𑀩𑁆𑀪𑀺𑀓𑁆𑀔𑀓𑀦𑁆𑀢𑀸𑀭-𑀭𑁄𑀕𑀯𑁂𑀭𑀻𑀪𑀬𑁂𑀦 𑀯𑀸’’𑀢𑀺𑀆𑀤𑀺. 𑀪𑀬𑀲𑀤𑁆𑀤𑁄 𑀘𑁂𑀢𑁆𑀣 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄 ‘‘𑀭𑀸𑀚𑀪𑀬𑁂𑀦, 𑀤𑀼𑀩𑁆𑀪𑀺𑀓𑁆𑀔𑀪𑀬𑁂𑀦𑀸’’𑀢𑀺𑀆𑀤𑀺𑀦𑀸. 𑀮𑀺𑀗𑁆𑀕𑀁 𑀆𑀤𑀺𑀬𑀢𑀻𑀢𑀺 𑀯𑁂𑀲𑀁 𑀕𑀡𑁆𑀳𑀸𑀢𑀺. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀲𑀁𑀯𑀸𑀲𑀁 𑀦𑀸𑀥𑀺𑀯𑀸𑀲𑁂𑀢𑀺, 𑀬𑀸𑀯 𑀲𑁄 𑀲𑀼𑀤𑁆𑀥𑀫𑀸𑀦𑀲𑁄𑀢𑀺 𑀪𑀺𑀓𑁆𑀔𑀽𑀦𑀁 𑀯𑀜𑁆𑀘𑁂𑀢𑀼𑀓𑀸𑀫𑀢𑀸𑀬 𑀅𑀪𑀸𑀯𑀢𑁄 𑀬𑁄 𑀲𑀼𑀤𑁆𑀥𑀫𑀸𑀦𑀲𑁄 𑀬𑀸𑀯 𑀲𑀁𑀯𑀸𑀲𑀁 𑀦𑀸𑀥𑀺𑀯𑀸𑀲𑁂𑀢𑀺, 𑀢𑀸𑀯 𑀏𑀲 ‘‘𑀕𑀺𑀳𑀻 𑀫𑀁 ‘𑀲𑀫𑀡𑁄’𑀢𑀺 𑀚𑀸𑀦𑀦𑁆𑀢𑀽’’𑀢𑀺 𑀯𑀜𑁆𑀘𑀦𑀘𑀺𑀢𑁆𑀢𑁂 𑀲𑀢𑀺𑀧𑀺 𑀪𑀺𑀓𑁆𑀔𑀽𑀦𑀁 𑀯𑀜𑁆𑀘𑁂𑀢𑀼𑀓𑀸𑀫𑀢𑀸𑀬 𑀅𑀪𑀸𑀯𑀢𑁄 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦𑀸𑀫𑀸𑀢𑀺 𑀦 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

𑀢𑀺𑀢𑁆𑀣𑀺𑀬𑁂𑀲𑀼 𑀧𑀓𑁆𑀓𑀦𑁆𑀢𑀓𑁄 𑀧𑀯𑀺𑀝𑁆𑀞𑁄𑀢𑀺 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄. 𑀲𑁄 𑀘 𑀦 𑀓𑁂𑀯𑀮𑀁 𑀢𑀢𑁆𑀣 𑀧𑀯𑀺𑀝𑁆𑀞𑀫𑀢𑁆𑀢𑁂𑀦𑁂𑀯 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀳𑁄𑀢𑀺, 𑀅𑀣 𑀔𑁄 𑀢𑁂𑀲𑀁 𑀮𑀤𑁆𑀥𑀺𑀕𑁆𑀕𑀳𑀡𑁂𑀦. 𑀢𑁂𑀦𑀸𑀳 ‘‘𑀬𑁄 𑀧𑀦𑀸’’𑀢𑀺𑀆𑀤𑀺. ‘‘𑀉𑀧𑀲𑀫𑁆𑀧𑀦𑁆𑀦𑁄’’𑀢𑀺 𑀇𑀫𑀺𑀦𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀓𑀼𑀭𑀼𑀦𑁆𑀤𑀺𑀅𑀝𑁆𑀞𑀓𑀣𑀸𑀬𑀁 ‘‘𑀅𑀬𑀜𑁆𑀘 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀦𑀸𑀫 𑀉𑀧𑀲𑀫𑁆𑀧𑀦𑁆𑀦𑀪𑀺𑀓𑁆𑀔𑀼𑀦𑀸 𑀓𑀣𑀺𑀢𑁄, 𑀢𑀲𑁆𑀫𑀸 𑀲𑀸𑀫𑀡𑁂𑀭𑁄 𑀲𑀮𑀺𑀗𑁆𑀕𑁂𑀦 𑀢𑀺𑀢𑁆𑀣𑀸𑀬𑀢𑀦𑀁 𑀕𑀢𑁄𑀧𑀺 𑀧𑀼𑀦 𑀧𑀩𑁆𑀩𑀚𑁆𑀚𑀜𑁆𑀘 𑀉𑀧𑀲𑀫𑁆𑀧𑀤𑀜𑁆𑀘 𑀮𑀪𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁧𑁦). 𑀓𑀼𑀲𑀘𑀻𑀭𑀸𑀤𑀺𑀓𑀦𑁆𑀢𑀺 𑀏𑀢𑁆𑀣𑀸𑀤𑀺𑀲𑀤𑁆𑀤𑁂𑀦 𑀨𑀮𑀓𑀓𑁆𑀔𑀡𑁆𑀟𑀚𑀝𑀸𑀤𑀻𑀦𑀁 𑀕𑀳𑀡𑀁. 𑀲𑀘𑁂𑀧𑀺 ‘‘𑀅𑀬𑀁 𑀧𑀩𑁆𑀩𑀚𑁆𑀚𑀸 𑀲𑁂𑀝𑁆𑀞𑀸’’𑀢𑀺 𑀲𑁂𑀝𑁆𑀞𑀪𑀸𑀯𑀁 𑀯𑀸 𑀉𑀧𑀕𑀘𑁆𑀙𑀢𑀺, 𑀦 𑀫𑀼𑀘𑁆𑀘𑀢𑀺, 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄𑀯 𑀳𑁄𑀢𑀺. 𑀯𑀢𑀸𑀦𑀻𑀢𑀺 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀸𑀤𑀻𑀦𑀺 𑀯𑀢𑀸𑀦𑀺. 𑀲𑀘𑁂 𑀧𑀦 ‘‘𑀲𑁄𑀪𑀢𑀺 𑀦𑀼 𑀔𑁄 𑀫𑁂 𑀢𑀺𑀢𑁆𑀣𑀺𑀬𑀧𑀩𑁆𑀩𑀚𑁆𑀚𑀸, 𑀦𑀦𑀼 𑀔𑁄 𑀲𑁄𑀪𑀢𑀻’’𑀢𑀺 𑀯𑀻𑀫𑀁𑀲𑀦𑀢𑁆𑀣𑀁 𑀓𑀼𑀲𑀘𑀻𑀭𑀸𑀤𑀻𑀦𑀺 𑀦𑀺𑀯𑀸𑀲𑁂𑀢𑀺, 𑀚𑀝𑀁 𑀯𑀸 𑀩𑀦𑁆𑀥𑀢𑀺, 𑀔𑀸𑀭𑀺𑀓𑀸𑀚𑀁 𑀯𑀸 𑀆𑀤𑀺𑀬𑀢𑀺, 𑀬𑀸𑀯 𑀦 𑀲𑀫𑁆𑀧𑀝𑀺𑀘𑁆𑀙𑀢𑀺 𑀢𑀁 𑀮𑀤𑁆𑀥𑀺𑀁, 𑀢𑀸𑀯 𑀭𑀓𑁆𑀔𑀢𑀺, 𑀲𑀫𑁆𑀧𑀝𑀺𑀘𑁆𑀙𑀺𑀢𑀫𑀢𑁆𑀢𑁂 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀳𑁄𑀢𑀺. 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁄 𑀧𑀦 𑀓𑀼𑀲𑀘𑀻𑀭𑀸𑀤𑀻𑀦𑀺 𑀦𑀺𑀯𑀸𑀲𑁂𑀦𑁆𑀢𑁄, 𑀭𑀸𑀚𑀪𑀬𑀸𑀤𑀻𑀳𑀺 𑀯𑀸 𑀢𑀺𑀢𑁆𑀣𑀺𑀬𑀮𑀺𑀗𑁆𑀕𑀁 𑀕𑀡𑁆𑀳𑀦𑁆𑀢𑁄 𑀮𑀤𑁆𑀥𑀺𑀬𑀸 𑀅𑀪𑀸𑀯𑁂𑀦 𑀦𑁂𑀯 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀳𑁄𑀢𑀺.

𑀅𑀯𑀲𑁂𑀲𑁄 𑀲𑀩𑁆𑀩𑁄𑀧𑀻𑀢𑀺 𑀦𑀸𑀕𑀲𑀼𑀧𑀡𑁆𑀡𑀬𑀓𑁆𑀔𑀕𑀦𑁆𑀥𑀩𑁆𑀩𑀸𑀤𑀺𑀓𑁄. 𑀬𑀜𑁆𑀳𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑀬𑀣𑀸 𑀲𑀫𑀸𑀦𑀚𑀸𑀢𑀺𑀓𑀲𑁆𑀲 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁧𑁨) 𑀯𑀺𑀓𑁄𑀧𑀦𑁂 𑀓𑀫𑁆𑀫𑀁 𑀕𑀭𑀼𑀢𑀭𑀁, 𑀦 𑀢𑀣𑀸 𑀯𑀺𑀚𑀸𑀢𑀺𑀓𑀲𑁆𑀲𑀸𑀢𑀺 𑀆𑀳 ‘‘𑀫𑀦𑀼𑀲𑁆𑀲𑀚𑀸𑀢𑀺𑀓𑀸’’𑀢𑀺. 𑀧𑀼𑀢𑁆𑀢𑀲𑀫𑁆𑀩𑀦𑁆𑀥𑁂𑀦 𑀫𑀸𑀢𑀸𑀧𑀺𑀢𑀼𑀲𑀫𑀜𑁆𑀜𑀸, 𑀤𑀢𑁆𑀢𑀓𑀺𑀢𑁆𑀢𑀺𑀫𑀸𑀤𑀺𑀯𑀲𑁂𑀦𑀧𑀺 𑀧𑀼𑀢𑁆𑀢𑀯𑁄𑀳𑀸𑀭𑁄 𑀮𑁄𑀓𑁂 𑀤𑀺𑀲𑁆𑀲𑀢𑀺, 𑀲𑁄 𑀘 𑀔𑁄 𑀧𑀭𑀺𑀬𑀸𑀬𑀢𑁄𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀲𑀺𑀤𑁆𑀥𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀚𑀦𑁂𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀚𑀦𑁂𑀢𑁆𑀢𑀻𑀢𑀺 𑀚𑀦𑀺𑀓𑀸, 𑀫𑀸𑀢𑀸𑀢𑀺 𑀅𑀢𑁆𑀣𑁄. 𑀬𑀣𑀸 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀞𑀺𑀢𑀲𑁆𑀲𑁂𑀯 𑀓𑀼𑀲𑀮𑀥𑀫𑁆𑀫𑀸𑀦𑀁 𑀢𑀺𑀓𑁆𑀔𑀯𑀺𑀲𑀤𑀲𑀽𑀭𑀪𑀸𑀯𑀸𑀧𑀢𑁆𑀢𑀺, 𑀬𑀣𑀸 𑀢𑀁 𑀢𑀺𑀡𑁆𑀡𑀫𑁆𑀧𑀺 𑀩𑁄𑀥𑀺𑀲𑀢𑁆𑀢𑀸𑀦𑀁 𑀩𑁄𑀥𑀺𑀢𑁆𑀢𑀬𑀦𑀺𑀧𑁆𑀨𑀢𑁆𑀢𑀺𑀬𑀁, 𑀏𑀯𑀁 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀞𑀺𑀢𑀲𑁆𑀲𑁂𑀯 𑀅𑀓𑀼𑀲𑀮𑀥𑀫𑁆𑀫𑀸𑀦𑀫𑁆𑀧𑀺 𑀢𑀺𑀓𑁆𑀔𑀯𑀺𑀲𑀤𑀲𑀽𑀭𑀪𑀸𑀯𑀸𑀧𑀢𑁆𑀢𑀻𑀢𑀺 𑀆𑀳 ‘‘𑀫𑀦𑀼𑀲𑁆𑀲𑀪𑀽𑀢𑁂𑀦𑁂𑀯𑀸’’𑀢𑀺. 𑀲𑀜𑁆𑀘𑀺𑀘𑁆𑀘𑀸𑀢𑀺 ‘‘𑀧𑀸𑀡𑁄’’𑀢𑀺 𑀲𑀜𑁆𑀜𑀸𑀬 𑀲𑀤𑁆𑀥𑀺𑀁 𑀯𑀥𑀓𑀘𑁂𑀢𑀦𑀸𑀬 𑀘𑁂𑀢𑁂𑀢𑁆𑀯𑀸. 𑀅𑀬𑀁 𑀫𑀸𑀢𑀼𑀖𑀸𑀢𑀓𑁄 𑀦𑀸𑀫𑀸𑀢𑀺 𑀅𑀬𑀁 𑀆𑀦𑀦𑁆𑀢𑀭𑀺𑀬𑁂𑀦 𑀫𑀸𑀢𑀼𑀖𑀸𑀢𑀓𑀓𑀫𑁆𑀫𑁂𑀦 𑀫𑀸𑀢𑀼𑀖𑀸𑀢𑀓𑁄 𑀦𑀸𑀫. 𑀬𑁂𑀦 𑀧𑀦 𑀫𑀦𑀼𑀲𑁆𑀲𑀺𑀢𑁆𑀣𑀺𑀪𑀽𑀢𑀸𑀧𑀺 𑀅𑀚𑀦𑀺𑀓𑀸 𑀧𑁄𑀲𑀸𑀯𑀦𑀺𑀓𑀫𑀸𑀢𑀸 𑀯𑀸 𑀫𑀳𑀸𑀫𑀸𑀢𑀸 𑀯𑀸 𑀘𑀽𑀴𑀫𑀸𑀢𑀸 𑀯𑀸 𑀚𑀦𑀺𑀓𑀸𑀧𑀺 𑀯𑀸 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀪𑀽𑀢𑀸 𑀫𑀸𑀢𑀸 𑀖𑀸𑀢𑀺𑀢𑀸, 𑀢𑀲𑁆𑀲 𑀧𑀩𑁆𑀩𑀚𑁆𑀚𑀸 𑀦 𑀯𑀸𑀭𑀺𑀢𑀸, 𑀦 𑀘 𑀆𑀦𑀦𑁆𑀢𑀭𑀺𑀓𑁄 𑀳𑁄𑀢𑀺. 𑀬𑁂𑀦 𑀲𑀬𑀁 𑀢𑀺𑀭𑀘𑁆𑀙𑀸𑀦𑀪𑀽𑀢𑁂𑀦 𑀫𑀦𑀼𑀲𑁆𑀲𑀺𑀢𑁆𑀣𑀺𑀪𑀽𑀢𑀸 𑀫𑀸𑀢𑀸 𑀖𑀸𑀢𑀺𑀢𑀸, 𑀲𑁄𑀧𑀺 𑀆𑀦𑀦𑁆𑀢𑀭𑀺𑀓𑁄 𑀦 𑀳𑁄𑀢𑀺. 𑀢𑀺𑀭𑀘𑁆𑀙𑀸𑀦𑀕𑀢𑀢𑁆𑀢𑀸 𑀧𑀦𑀲𑁆𑀲 𑀧𑀩𑁆𑀩𑀚𑁆𑀚𑀸 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀓𑀫𑁆𑀫𑀁 𑀧𑀦𑀲𑁆𑀲 𑀪𑀸𑀭𑀺𑀬𑀁 𑀳𑁄𑀢𑀺, 𑀆𑀦𑀦𑁆𑀢𑀭𑀺𑀬𑀁 𑀆𑀳𑀘𑁆𑀘𑁂𑀯 𑀢𑀺𑀝𑁆𑀞𑀢𑀺.

𑀬𑁂𑀦 𑀫𑀦𑀼𑀲𑁆𑀲𑀪𑀽𑀢𑁄 𑀚𑀦𑀓𑁄 𑀧𑀺𑀢𑀸 𑀲𑀬𑀫𑁆𑀧𑀺 𑀫𑀦𑀼𑀲𑁆𑀲𑀚𑀸𑀢𑀺𑀓𑁂𑀦𑁂𑀯 𑀲𑀢𑀸 𑀲𑀜𑁆𑀘𑀺𑀘𑁆𑀘 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑁄, 𑀅𑀬𑀁 𑀆𑀦𑀦𑁆𑀢𑀭𑀺𑀬𑁂𑀦 𑀧𑀺𑀢𑀼𑀖𑀸𑀢𑀓𑀓𑀫𑁆𑀫𑁂𑀦 𑀧𑀺𑀢𑀼𑀖𑀸𑀢𑀓𑁄 𑀦𑀸𑀫𑀸𑀢𑀺 𑀇𑀫𑀫𑀢𑁆𑀣𑀁 𑀅𑀢𑀺𑀤𑀺𑀲𑀦𑁆𑀢𑁄 ‘‘𑀧𑀺𑀢𑀼𑀖𑀸𑀢𑀓𑁂𑀧𑀺 𑀏𑀲𑁂𑀯 𑀦𑀬𑁄’’𑀢𑀺 𑀆𑀳. 𑀲𑀘𑁂𑀧𑀺 𑀳𑀺 𑀯𑁂𑀲𑀺𑀬𑀸 𑀧𑀼𑀢𑁆𑀢𑁄 𑀳𑁄𑀢𑀺, ‘‘𑀅𑀬𑀁 𑀫𑁂 𑀧𑀺𑀢𑀸’’𑀢𑀺 𑀦 𑀚𑀸𑀦𑀸𑀢𑀺, 𑀬𑀲𑁆𑀲 𑀲𑀫𑁆𑀪𑀯𑁂𑀦 𑀦𑀺𑀩𑁆𑀩𑀢𑁆𑀢𑁄, 𑀲𑁄 𑀘 𑀢𑁂𑀦 𑀖𑀸𑀢𑀺𑀢𑁄, ‘‘𑀧𑀺𑀢𑀼𑀖𑀸𑀢𑀓𑁄’’𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀆𑀦𑀦𑁆𑀢𑀭𑀺𑀬𑀜𑁆𑀘 𑀨𑀼𑀲𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁧𑁪).

𑀏𑀴𑀓𑀘𑀢𑀼𑀓𑁆𑀓𑀁 (𑀫. 𑀦𑀺. 𑀅𑀝𑁆𑀞. 𑁩.𑁧𑁨𑁮; 𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁭𑁫; 𑀯𑀺𑀪. 𑀅𑀝𑁆𑀞. 𑁮𑁦𑁯; 𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁧𑁨), 𑀲𑀗𑁆𑀕𑀸𑀫𑀘𑀢𑀼𑀓𑁆𑀓𑀁, 𑀘𑁄𑀭𑀘𑀢𑀼𑀓𑁆𑀓𑀜𑁆𑀘𑁂𑀢𑁆𑀣 𑀓𑀣𑁂𑀢𑀩𑁆𑀩𑀁. ‘‘𑀏𑀴𑀓𑀁 𑀫𑀸𑀭𑁂𑀫𑀻’’𑀢𑀺 𑀅𑀪𑀺𑀲𑀦𑁆𑀥𑀺𑀦𑀸𑀧𑀺 𑀳𑀺 𑀏𑀴𑀓𑀝𑁆𑀞𑀸𑀦𑁂 𑀞𑀺𑀢𑀁 𑀫𑀦𑀼𑀲𑁆𑀲𑀪𑀽𑀢𑀁 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸 𑀫𑀸𑀭𑁂𑀦𑁆𑀢𑁄 𑀆𑀦𑀦𑁆𑀢𑀭𑀺𑀬𑀁 𑀨𑀼𑀲𑀢𑀺 𑀫𑀸𑀭𑀡𑀸𑀥𑀺𑀧𑁆𑀧𑀸𑀬𑁂𑀦𑁂𑀯 𑀆𑀦𑀦𑁆𑀢𑀭𑀺𑀬𑀯𑀢𑁆𑀣𑀼𑀦𑁄 𑀯𑀺𑀓𑁄𑀧𑀺𑀢𑀢𑁆𑀢𑀸. 𑀏𑀴𑀓𑀸𑀪𑀺𑀲𑀦𑁆𑀥𑀺𑀦𑀸, 𑀧𑀦 𑀫𑀸𑀢𑀸𑀧𑀺𑀢𑀺𑀅𑀪𑀺𑀲𑀦𑁆𑀥𑀺𑀦𑀸 𑀯𑀸 𑀏𑀴𑀓𑀁 𑀫𑀸𑀭𑁂𑀦𑁆𑀢𑁄 𑀆𑀦𑀦𑁆𑀢𑀭𑀺𑀬𑀁 𑀦 𑀨𑀼𑀲𑀢𑀺 𑀆𑀦𑀦𑁆𑀢𑀭𑀺𑀬𑀯𑀢𑁆𑀣𑀼𑀅𑀪𑀸𑀯𑀢𑁄. 𑀫𑀸𑀢𑀸𑀧𑀺𑀢𑀺𑀅𑀪𑀺𑀲𑀦𑁆𑀥𑀺𑀦𑀸 𑀫𑀸𑀢𑀸𑀧𑀺𑀢𑀭𑁄 𑀫𑀸𑀭𑁂𑀦𑁆𑀢𑁄 𑀨𑀼𑀲𑀢𑁂𑀯. 𑀏𑀲𑁂𑀯 𑀦𑀬𑁄 𑀇𑀢𑀭𑀲𑁆𑀫𑀺𑀫𑁆𑀧𑀺 𑀘𑀢𑀼𑀓𑁆𑀓𑀤𑁆𑀯𑀬𑁂. 𑀲𑀩𑁆𑀩𑀢𑁆𑀣 𑀳𑀺 𑀧𑀼𑀭𑀺𑀫𑀁 𑀅𑀪𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀅𑀧𑁆𑀧𑀫𑀸𑀡𑀁, 𑀯𑀥𑀓𑀘𑀺𑀢𑁆𑀢𑀁, 𑀧𑀦 𑀢𑀤𑀸𑀭𑀫𑁆𑀫𑀡𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀆𑀦𑀦𑁆𑀢𑀭𑀺𑀬𑀸𑀦𑀸𑀦𑀦𑁆𑀢𑀭𑀺𑀬𑀪𑀸𑀯𑁂 𑀧𑀫𑀸𑀡𑀁.

𑀅𑀭𑀳𑀦𑁆𑀢𑀖𑀸𑀢𑀓𑁄𑀧𑀺 𑀫𑀦𑀼𑀲𑁆𑀲𑀅𑀭𑀳𑀦𑁆𑀢𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀬𑁂𑀦 𑀅𑀦𑁆𑀢𑀫𑀲𑁄 𑀕𑀺𑀳𑀺𑀮𑀺𑀗𑁆𑀕𑁂 𑀞𑀺𑀢𑁄𑀧𑀻’’𑀢𑀺𑀆𑀤𑀺. 𑀅𑀫𑀦𑀼𑀲𑁆𑀲𑀚𑀸𑀢𑀺𑀓𑀁 𑀧𑀦 𑀅𑀭𑀳𑀦𑁆𑀢𑀁, 𑀫𑀦𑀼𑀲𑁆𑀲𑀚𑀸𑀢𑀺𑀓𑀁 𑀯𑀸 𑀅𑀯𑀲𑁂𑀲𑀁 𑀅𑀭𑀺𑀬𑀧𑀼𑀕𑁆𑀕𑀮𑀁 𑀖𑀸𑀢𑁂𑀢𑁆𑀯𑀸 𑀆𑀦𑀦𑁆𑀢𑀭𑀺𑀓𑁄 𑀦 𑀳𑁄𑀢𑀺, 𑀧𑀩𑁆𑀩𑀚𑁆𑀚𑀸𑀧𑀺𑀲𑁆𑀲 𑀦 𑀯𑀸𑀭𑀺𑀢𑀸, 𑀓𑀫𑁆𑀫𑀁 𑀧𑀦 𑀩𑀮𑀯𑀁 𑀳𑁄𑀢𑀺. 𑀢𑀺𑀭𑀘𑁆𑀙𑀸𑀦𑁄 𑀫𑀦𑀼𑀲𑁆𑀲𑀅𑀭𑀳𑀦𑁆𑀢𑀫𑁆𑀧𑀺 𑀖𑀸𑀢𑁂𑀢𑁆𑀯𑀸 𑀆𑀦𑀦𑁆𑀢𑀭𑀺𑀓𑁄 𑀦 𑀳𑁄𑀢𑀺, 𑀓𑀫𑁆𑀫𑀁 𑀧𑀦 𑀪𑀸𑀭𑀺𑀬𑀦𑁆𑀢𑀺 𑀅𑀬𑀫𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄. 𑀬𑀣𑀸 𑀫𑀸𑀢𑀸𑀧𑀺𑀢𑀽𑀲𑀼, 𑀏𑀯𑀁 𑀅𑀭𑀳𑀦𑁆𑀢𑁂𑀧𑀺 𑀏𑀴𑀓𑀘𑀢𑀼𑀓𑁆𑀓𑀸𑀤𑀻𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀦𑀺𑀦𑁆𑀢𑀺 𑀧𑀭𑀺𑀲𑀼𑀤𑁆𑀥𑀲𑀻𑀮𑀁 𑀉𑀪𑀢𑁄𑀲𑀗𑁆𑀖𑁂 𑀉𑀧𑀲𑀫𑁆𑀧𑀦𑁆𑀦𑀁 𑀪𑀺𑀓𑁆𑀔𑀼𑀦𑀺𑀁. 𑀬𑁄 (𑀫𑀳𑀸𑀯. 𑀅𑀝𑁆𑀞. 𑁧𑁧𑁫) 𑀧𑀦 𑀓𑀸𑀬𑀲𑀁𑀲𑀕𑁆𑀕𑁂𑀦 𑀲𑀻𑀮𑀯𑀺𑀦𑀸𑀲𑀁 𑀧𑀸𑀧𑁂𑀢𑀺, 𑀢𑀲𑁆𑀲 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀦 𑀯𑀸𑀭𑀺𑀢𑀸. 𑀩𑀮𑀓𑁆𑀓𑀸𑀭𑁂𑀦 𑀑𑀤𑀸𑀢𑀯𑀢𑁆𑀣𑀯𑀲𑀦𑀁 𑀓𑀢𑁆𑀯𑀸 𑀅𑀦𑀺𑀘𑁆𑀙𑀫𑀸𑀦𑀁𑀬𑁂𑀯 𑀤𑀽𑀲𑁂𑀦𑁆𑀢𑁄𑀧𑀺 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄𑀬𑁂𑀯, 𑀩𑀮𑀓𑁆𑀓𑀸𑀭𑁂𑀦 𑀧𑀦 𑀑𑀤𑀸𑀢𑀯𑀢𑁆𑀣𑀯𑀲𑀦𑀁 𑀓𑀢𑁆𑀯𑀸 𑀇𑀘𑁆𑀙𑀫𑀸𑀦𑀁 𑀤𑀽𑀲𑁂𑀦𑁆𑀢𑁄 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄 𑀦 𑀳𑁄𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀕𑀺𑀳𑀺𑀪𑀸𑀯𑁂 𑀲𑀫𑁆𑀧𑀝𑀺𑀘𑁆𑀙𑀺𑀢𑀫𑀢𑁆𑀢𑁂𑀬𑁂𑀯 𑀲𑀸 𑀅𑀪𑀺𑀓𑁆𑀔𑀼𑀦𑀻 𑀳𑁄𑀢𑀺. 𑀲𑀓𑀺𑀁 𑀲𑀻𑀮𑀯𑀺𑀧𑀦𑁆𑀦𑀁 𑀧𑀦 𑀧𑀘𑁆𑀙𑀸 𑀤𑀽𑀲𑁂𑀦𑁆𑀢𑁄 𑀲𑀺𑀓𑁆𑀔𑀫𑀸𑀦𑀲𑀸𑀫𑀡𑁂𑀭𑀻𑀲𑀼 𑀘 𑀯𑀺𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑁄 𑀦𑁂𑀯 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄 𑀳𑁄𑀢𑀺, 𑀧𑀩𑁆𑀩𑀚𑁆𑀚𑀁, 𑀉𑀧𑀲𑀫𑁆𑀧𑀤𑀜𑁆𑀘 𑀮𑀪𑀢𑀻𑀢𑀺.

𑀥𑀫𑁆𑀫𑀢𑁄 𑀉𑀕𑁆𑀕𑀢𑀁 𑀅𑀧𑀕𑀢𑀁 𑀉𑀤𑁆𑀥𑀫𑁆𑀫𑀁. 𑀉𑀩𑁆𑀩𑀺𑀦𑀬𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀘𑀢𑀼𑀦𑁆𑀦𑀁 𑀓𑀫𑁆𑀫𑀸𑀦𑀦𑁆𑀢𑀺 𑀅𑀧𑀮𑁄𑀓𑀦𑀜𑀢𑁆𑀢𑀺𑀜𑀢𑁆𑀢𑀺𑀤𑀼𑀢𑀺𑀬𑀜𑀢𑁆𑀢𑀺𑀘𑀢𑀼𑀢𑁆𑀣𑀲𑀗𑁆𑀔𑀸𑀢𑀸𑀦𑀁 𑀘𑀢𑀼𑀦𑁆𑀦𑀁 𑀓𑀫𑁆𑀫𑀸𑀦𑀁. 𑀇𑀫𑁂𑀲𑀜𑁆𑀳𑀺 𑀅𑀜𑁆𑀜𑀢𑀭𑀁 𑀲𑀗𑁆𑀖𑀓𑀫𑁆𑀫𑀁 𑀏𑀓𑀲𑀻𑀫𑀸𑀬𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀭𑁄𑀦𑁆𑀢𑁂𑀦 𑀲𑀗𑁆𑀖𑁄 𑀪𑀺𑀦𑁆𑀦𑁄 𑀦𑀸𑀫 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀢𑀼𑀦𑁆𑀦𑀁 𑀓𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑀯𑀲𑁂𑀦 𑀲𑀗𑁆𑀖𑀁 𑀪𑀺𑀦𑁆𑀤𑀢𑀻’’𑀢𑀺.

‘‘𑀤𑀼𑀝𑁆𑀞𑀘𑀺𑀢𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀯𑀥𑀓𑀘𑀺𑀢𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀯𑀥𑀓𑀘𑁂𑀢𑀦𑀸𑀬 𑀳𑀺 𑀤𑀽𑀲𑀺𑀢𑀁 𑀘𑀺𑀢𑁆𑀢𑀁 𑀇𑀥 𑀤𑀼𑀝𑁆𑀞𑀘𑀺𑀢𑁆𑀢𑀁 𑀦𑀸𑀫. 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀦𑁆𑀢𑁄𑀲𑀭𑀻𑀭𑁂𑀬𑁂𑀯 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀢𑀺, 𑀲𑀜𑁆𑀘𑀺𑀢𑀁 𑀓𑀭𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀢𑀣𑀸𑀕𑀢𑀲𑁆𑀲 𑀅𑀪𑁂𑀚𑁆𑀚𑀓𑀸𑀬𑀢𑀸𑀬 𑀧𑀭𑀽𑀧𑀓𑁆𑀓𑀫𑁂𑀦 𑀥𑀫𑁆𑀫𑀁 𑀪𑀺𑀦𑁆𑀤𑀺𑀢𑁆𑀯𑀸 𑀮𑁄𑀳𑀺𑀢𑀁 𑀧𑀕𑁆𑀖𑀭𑀢𑀺, 𑀲𑀭𑀻𑀭𑀲𑁆𑀲 𑀧𑀦 𑀅𑀦𑁆𑀢𑁄𑀬𑁂𑀯 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀮𑁄𑀳𑀺𑀢𑀁 𑀲𑀫𑁄𑀲𑀭𑀢𑀺, 𑀆𑀖𑀸𑀢𑁂𑀦 𑀧𑀓𑀼𑀧𑁆𑀧𑀫𑀸𑀦𑀁 𑀲𑀜𑁆𑀘𑀺𑀢𑀁 𑀳𑁄𑀢𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀬𑁄 𑀧𑀦 𑀭𑁄𑀕𑀯𑀽𑀧𑀲𑀫𑀦𑀢𑁆𑀣𑀁 𑀚𑀻𑀯𑀓𑁄 𑀯𑀺𑀬 𑀲𑀢𑁆𑀣𑁂𑀦 𑀨𑀸𑀮𑁂𑀢𑁆𑀯𑀸 𑀧𑀽𑀢𑀺𑀫𑀁𑀲𑀜𑁆𑀘 𑀮𑁄𑀳𑀺𑀢𑀜𑁆𑀘 𑀦𑀻𑀳𑀭𑀺𑀢𑁆𑀯𑀸 𑀨𑀸𑀲𑀼𑀓𑀁 𑀓𑀭𑁄𑀢𑀺, 𑀅𑀬𑀁 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄 𑀦 𑀳𑁄𑀢𑀺, 𑀩𑀳𑀼𑀁 𑀧𑀦 𑀲𑁄 𑀧𑀼𑀜𑁆𑀜𑀁 𑀧𑀲𑀯𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁧𑁫).

𑀤𑀼𑀯𑀺𑀥𑀫𑁆𑀧𑀺 𑀩𑁆𑀬𑀜𑁆𑀚𑀦𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀓𑀫𑁆𑀫𑀤𑁆𑀯𑀬𑀢𑁄 𑀲𑀫𑀼𑀝𑁆𑀞𑀺𑀢𑀁 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁, 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀜𑁆𑀘𑀸𑀢𑀺 𑀤𑀼𑀯𑀺𑀥𑀫𑁆𑀧𑀺 𑀩𑁆𑀬𑀜𑁆𑀚𑀦𑀁. 𑀇𑀫𑀺𑀦𑀸 𑀘 𑀯𑀺𑀕𑁆𑀕𑀳𑁂𑀦 ‘‘𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄’’𑀢𑀺 𑀅𑀲𑀫𑀸𑀦𑀸𑀥𑀺𑀓𑀭𑀡𑀯𑀺𑀲𑀬𑁄 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁄𑀬𑀁, 𑀧𑀼𑀭𑀺𑀫𑀧𑀤𑁂 𑀘 𑀯𑀺𑀪𑀢𑁆𑀢𑀺𑀅𑀮𑁄𑀧𑁄𑀢𑀺 𑀤𑀲𑁆𑀲𑁂𑀢𑀺. 𑀲𑁄 𑀤𑀼𑀯𑀺𑀥𑁄 𑀳𑁄𑀢𑀺 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄, 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀘𑀸𑀢𑀺. 𑀢𑀢𑁆𑀣 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀧𑀸𑀓𑀝𑀁 𑀳𑁄𑀢𑀺, 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀧𑀝𑀺𑀘𑁆𑀙𑀦𑁆𑀦𑀁. 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀧𑀸𑀓𑀝𑀁, 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀧𑀝𑀺𑀘𑁆𑀙𑀦𑁆𑀦𑀁. 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀇𑀢𑁆𑀣𑀻𑀲𑀼 𑀧𑀼𑀭𑀺𑀲𑀢𑁆𑀢𑀁 𑀓𑀭𑁄𑀦𑁆𑀢𑀲𑁆𑀲 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀧𑀝𑀺𑀘𑁆𑀙𑀦𑁆𑀦𑀁 𑀳𑁄𑀢𑀺, 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀧𑀸𑀓𑀝𑀁 𑀳𑁄𑀢𑀺. 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀧𑀼𑀭𑀺𑀲𑀸𑀦𑀁 𑀇𑀢𑁆𑀣𑀺𑀪𑀸𑀯𑀁 𑀉𑀧𑀕𑀘𑁆𑀙𑀦𑁆𑀢𑀲𑁆𑀲 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀧𑀝𑀺𑀘𑁆𑀙𑀦𑁆𑀦𑀁 𑀳𑁄𑀢𑀺, 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀧𑀸𑀓𑀝𑀁 𑀳𑁄𑀢𑀺. 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀲𑀬𑀜𑁆𑀘 𑀕𑀩𑁆𑀪𑀁 𑀕𑀡𑁆𑀳𑀸𑀢𑀺, 𑀧𑀭𑀜𑁆𑀘 𑀕𑀡𑁆𑀳𑀸𑀧𑁂𑀢𑀺. 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀦 𑀲𑀬𑀁 𑀦 𑀕𑀡𑁆𑀳𑀸𑀢𑀺, 𑀧𑀭𑀁 𑀕𑀡𑁆𑀳𑀸𑀧𑁂𑀢𑀻𑀢𑀺 𑀇𑀤𑀫𑁂𑀢𑁂𑀲𑀁 𑀦𑀸𑀦𑀸𑀓𑀭𑀡𑀁.

𑀅𑀧𑀭𑀸𑀫𑀲𑀦𑀸𑀦𑀻𑀢𑀺 𑀅𑀕𑁆𑀕𑀳𑀡𑀸𑀦𑀺 𑀅𑀯𑀘𑀦𑀸𑀦𑀺. ‘‘𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄’’𑀢𑀺 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀲𑁆𑀲 𑀅𑀓𑀺𑀢𑁆𑀢𑀦𑀦𑁆𑀢𑀺 𑀬𑀲𑁆𑀲 𑀉𑀧𑀲𑀫𑁆𑀧𑀤𑀸 𑀓𑀭𑀻𑀬𑀢𑀺, 𑀢𑀲𑁆𑀲 𑀅𑀓𑀺𑀢𑁆𑀢𑀦𑀁, ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄 𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄’’𑀢𑀺 (𑀧𑀭𑀺. 𑀅𑀝𑁆𑀞. 𑁪𑁮𑁪) 𑀅𑀯𑀘𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀉𑀧𑀚𑁆𑀛𑀸𑀬𑀲𑁆𑀲 𑀅𑀓𑀺𑀢𑁆𑀢𑀦𑀦𑁆𑀢𑀺 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄 𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀯𑀢𑁆𑀯𑀸 ‘‘𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲𑀸’’𑀢𑀺 𑀅𑀯𑀘𑀦𑀁. 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀜𑀢𑁆𑀢𑀺𑀬𑀸 𑀅𑀦𑀼𑀘𑁆𑀘𑀸𑀭𑀡𑀦𑁆𑀢𑀺 𑀜𑀢𑁆𑀢𑀺𑀁 𑀅𑀝𑁆𑀞𑀧𑁂𑀢𑁆𑀯𑀸 𑀘𑀢𑀼𑀓𑁆𑀔𑀢𑁆𑀢𑀼𑀁 𑀓𑀫𑁆𑀫𑀯𑀸𑀘𑀸𑀬 𑀏𑀯 𑀅𑀦𑀼𑀲𑁆𑀲𑀸𑀯𑀦𑀓𑀫𑁆𑀫𑀲𑁆𑀲 𑀓𑀭𑀡𑀁. 𑀲𑀫𑁆𑀧𑀦𑁆𑀦𑀦𑁆𑀢𑀺 𑀉𑀧𑁂𑀢𑀁.

𑀳𑀸𑀧𑀦𑀁 𑀧𑀭𑀺𑀘𑁆𑀘𑀚𑀦𑀁. 𑀬𑁄𑀧𑀺 𑀏𑀓𑀁 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀲𑀓𑀺𑀁𑀬𑁂𑀯 𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀅𑀦𑀼𑀲𑁆𑀲𑀸𑀯𑀦𑀁 𑀓𑀭𑁄𑀢𑀺, 𑀅𑀬𑀫𑁆𑀧𑀺 𑀲𑀸𑀯𑀦𑀁 𑀳𑀸𑀧𑁂𑀢𑀺𑀬𑁂𑀯. 𑀤𑀼𑀭𑀼𑀘𑁆𑀘𑀸𑀭𑀡𑀁 𑀦𑀸𑀫 𑀅𑀜𑁆𑀜𑀲𑁆𑀫𑀺𑀁 𑀅𑀓𑁆𑀔𑀭𑁂 𑀯𑀢𑁆𑀢𑀩𑁆𑀩𑁂 𑀅𑀜𑁆𑀜𑀲𑁆𑀲 𑀯𑀘𑀦𑀁. 𑀢𑀲𑁆𑀫𑀸 𑀓𑀫𑁆𑀫𑀯𑀸𑀘𑀁 𑀓𑀭𑁄𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀬𑁆𑀯𑀸𑀬𑀁 𑁋

‘‘𑀲𑀺𑀣𑀺𑀮𑀁 𑀥𑀦𑀺𑀢𑀜𑁆𑀘 𑀤𑀻𑀖𑀭𑀲𑁆𑀲𑀁;

𑀕𑀭𑀼𑀓𑀁 𑀮𑀳𑀼𑀓𑀜𑁆𑀘𑁂𑀯 𑀦𑀺𑀕𑁆𑀕𑀳𑀻𑀢𑀁;

𑀲𑀫𑁆𑀩𑀦𑁆𑀥𑀯𑀯𑀢𑁆𑀣𑀺𑀢𑀁 𑀯𑀺𑀫𑀼𑀢𑁆𑀢𑀁;

𑀤𑀲𑀥𑀸 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸 𑀧𑀪𑁂𑀤𑁄’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁯𑁦; 𑀫. 𑀦𑀺. 𑀅𑀝𑁆𑀞. 𑁧.𑁨𑁯𑁧; 𑀅. 𑀦𑀺. 𑀅𑀝𑁆𑀞. 𑁨.𑁩.𑁬𑁪, 𑀧𑀭𑀺. 𑀅𑀝𑁆𑀞. 𑁪𑁮𑁫; 𑀯𑀺. 𑀲𑀗𑁆𑀕. 𑀅𑀝𑁆𑀞. 𑁨𑁫𑁨) 𑁋

𑀯𑀼𑀢𑁆𑀢𑁄, 𑀅𑀬𑀁 𑀲𑀼𑀝𑁆𑀞𑀼 𑀉𑀧𑀮𑀓𑁆𑀔𑁂𑀢𑀩𑁆𑀩𑁄. 𑀏𑀢𑁆𑀣 𑀳𑀺 𑀲𑀺𑀣𑀺𑀮𑀁 𑀦𑀸𑀫 𑀧𑀜𑁆𑀘𑀲𑀼 𑀯𑀕𑁆𑀕𑁂𑀲𑀼 𑀧𑀞𑀫𑀢𑀢𑀺𑀬𑀁. 𑀥𑀦𑀺𑀢𑀁 𑀦𑀸𑀫 𑀢𑁂𑀲𑁆𑀯𑁂𑀯 𑀤𑀼𑀢𑀺𑀬𑀘𑀢𑀼𑀢𑁆𑀣𑀁. 𑀤𑀻𑀖𑀦𑁆𑀢𑀺 𑀤𑀻𑀖𑁂𑀦 𑀓𑀸𑀮𑁂𑀦 𑀯𑀢𑁆𑀢𑀩𑁆𑀩𑀁 𑀆-𑀓𑀸𑀭𑀸𑀤𑀺. 𑀭𑀲𑁆𑀲𑀦𑁆𑀢𑀺 𑀢𑀢𑁄 𑀉𑀧𑀟𑁆𑀠𑀓𑀸𑀮𑁂𑀦 𑀯𑀢𑁆𑀢𑀩𑁆𑀩𑀁 𑀅-𑀓𑀸𑀭𑀸𑀤𑀺. 𑀕𑀭𑀼𑀓𑀦𑁆𑀢𑀺 𑀤𑀻𑀖𑀫𑁂𑀯, 𑀬𑀁 𑀯𑀸 ‘‘𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲 𑀬𑀲𑁆𑀲 𑀦𑀓𑁆𑀔𑀫𑀢𑀻’’𑀢𑀺 𑀏𑀯𑀁 𑀲𑀁𑀬𑁄𑀕𑀧𑀭𑀁 𑀓𑀢𑁆𑀯𑀸 𑀯𑀼𑀘𑁆𑀘𑀢𑀺. 𑀮𑀳𑀼𑀓𑀦𑁆𑀢𑀺 𑀭𑀲𑁆𑀲𑀫𑁂𑀯, 𑀬𑀁 𑀯𑀸 ‘‘𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲 𑀬𑀲𑁆𑀲 𑀦 𑀔𑀫𑀢𑀻’’𑀢𑀺 𑀏𑀯𑀁 𑀅𑀲𑀁𑀬𑁄𑀕𑀧𑀭𑀁 𑀓𑀢𑁆𑀯𑀸 𑀯𑀼𑀘𑁆𑀘𑀢𑀺. 𑀦𑀺𑀕𑁆𑀕𑀳𑀻𑀢𑀦𑁆𑀢𑀺 𑀬𑀁 𑀓𑀭𑀡𑀸𑀦𑀺 𑀦𑀺𑀕𑁆𑀕𑀳𑁂𑀢𑁆𑀯𑀸 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀯𑀺𑀯𑀝𑁂𑀦 𑀫𑀼𑀔𑁂𑀦 𑀲𑀸𑀦𑀼𑀦𑀸𑀲𑀺𑀓𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀁. 𑀲𑀫𑁆𑀩𑀦𑁆𑀥𑀦𑁆𑀢𑀺 𑀬𑀁 𑀧𑀭𑀧𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 ‘‘𑀢𑀼𑀡𑁆𑀳𑀺𑀲𑁆𑀲𑀸’’𑀢𑀺 𑀯𑀸 ‘‘𑀢𑀼𑀡𑁆𑀳𑀲𑁆𑀲𑀸’’𑀢𑀺 𑀯𑀸 𑀯𑀼𑀘𑁆𑀘𑀢𑀺. 𑀯𑀯𑀢𑁆𑀣𑀺𑀢𑀦𑁆𑀢𑀺 𑀬𑀁 𑀧𑀭𑀧𑀤𑁂𑀦 𑀲𑀫𑁆𑀩𑀦𑁆𑀥𑀁 𑀅𑀓𑀢𑁆𑀯𑀸 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀢𑀼𑀡𑁆𑀳𑀻 𑀅𑀲𑁆𑀲𑀸’’𑀢𑀺 𑀯𑀸 ‘‘𑀢𑀼𑀡𑁆𑀳 𑀅𑀲𑁆𑀲𑀸’’𑀢𑀺 𑀯𑀸 𑀯𑀼𑀘𑁆𑀘𑀢𑀺. 𑀯𑀺𑀫𑀼𑀢𑁆𑀢𑀦𑁆𑀢𑀺 𑀬𑀁 𑀓𑀭𑀡𑀸𑀦𑀺 𑀅𑀦𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀯𑀺𑀯𑀝𑁂𑀦 𑀫𑀼𑀔𑁂𑀦 𑀅𑀦𑀼𑀦𑀸𑀲𑀺𑀓𑀁 𑀅𑀓𑀢𑁆𑀯𑀸 𑀯𑀼𑀘𑁆𑀘𑀢𑀺.

𑀢𑀢𑁆𑀣 ‘‘𑀲𑀼𑀡𑀸𑀢𑀼 𑀫𑁂’’𑀢𑀺 𑀯𑀢𑁆𑀢𑀩𑁆𑀩𑁂 𑀢-𑀓𑀸𑀭𑀲𑁆𑀲 𑀣-𑀓𑀸𑀭𑀁 𑀓𑀢𑁆𑀯𑀸 ‘‘𑀲𑀼𑀡𑀸𑀣𑀼 𑀫𑁂’’𑀢𑀺 𑀯𑀘𑀦𑀁 𑀲𑀺𑀣𑀺𑀮𑀲𑁆𑀲 𑀥𑀦𑀺𑀢𑀓𑀭𑀡𑀁 𑀦𑀸𑀫, 𑀢𑀣𑀸 ‘‘𑀧𑀢𑁆𑀢𑀓𑀮𑁆𑀮𑀁 𑀏𑀲𑀸 𑀜𑀢𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀧𑀢𑁆𑀣𑀓𑀮𑁆𑀮𑀁 𑀏𑀲𑀸 𑀜𑀢𑁆𑀢𑀻’’𑀢𑀺𑀆𑀤𑀺𑀯𑀘𑀦𑀜𑁆𑀘. ‘‘𑀪𑀦𑁆𑀢𑁂, 𑀲𑀗𑁆𑀖𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀪-𑀓𑀸𑀭 𑀖-𑀓𑀸𑀭𑀸𑀦𑀁 𑀩-𑀓𑀸𑀭 𑀕-𑀓𑀸𑀭𑁂 𑀓𑀢𑁆𑀯𑀸 ‘‘𑀩𑀦𑁆𑀢𑁂 𑀲𑀁𑀕𑁄’’𑀢𑀺 𑀯𑀘𑀦𑀁 𑀥𑀦𑀺𑀢𑀲𑁆𑀲 𑀲𑀺𑀣𑀺𑀮𑀓𑀭𑀡𑀁 𑀦𑀸𑀫. ‘‘𑀲𑀼𑀡𑀸𑀢𑀼 𑀫𑁂’’𑀢𑀺 𑀯𑀺𑀯𑀝𑁂𑀦 𑀫𑀼𑀔𑁂𑀦 𑀯𑀢𑁆𑀢𑀩𑁆𑀩𑁂 ‘‘𑀲𑀼𑀡𑀁𑀢𑀼 𑀫𑁂’’𑀢𑀺 𑀯𑀸 ‘‘𑀏𑀲𑀸 𑀜𑀢𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀏𑀲𑀁 𑀜𑀢𑁆𑀢𑀻’’𑀢𑀺 𑀯𑀸 𑀅𑀯𑀺𑀯𑀝𑁂𑀦 𑀫𑀼𑀔𑁂𑀦 𑀅𑀦𑀼𑀦𑀸𑀲𑀺𑀓𑀁 𑀓𑀢𑁆𑀯𑀸 𑀯𑀘𑀦𑀁 𑀯𑀺𑀫𑀼𑀢𑁆𑀢𑀲𑁆𑀲 𑀦𑀺𑀕𑁆𑀕𑀳𑀺𑀢𑀯𑀘𑀦𑀁 𑀦𑀸𑀫. ‘‘𑀧𑀢𑁆𑀢𑀓𑀮𑁆𑀮’’𑀦𑁆𑀢𑀺 𑀅𑀯𑀺𑀯𑀝𑁂𑀦 𑀫𑀼𑀔𑁂𑀦 𑀅𑀦𑀼𑀦𑀸𑀲𑀺𑀓𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑁂 ‘‘𑀧𑀢𑁆𑀢𑀓𑀮𑁆𑀮𑀸’’𑀢𑀺 𑀯𑀺𑀯𑀝𑁂𑀦 𑀫𑀼𑀔𑁂𑀦 𑀅𑀦𑀼𑀦𑀸𑀲𑀺𑀓𑀁 𑀅𑀓𑀢𑁆𑀯𑀸 𑀯𑀘𑀦𑀁 𑀦𑀺𑀕𑁆𑀕𑀳𑀺𑀢𑀲𑁆𑀲 𑀯𑀺𑀫𑀼𑀢𑁆𑀢𑀯𑀘𑀦𑀁 𑀦𑀸𑀫. 𑀇𑀢𑀺 𑀲𑀺𑀣𑀺𑀮𑁂 𑀓𑀢𑁆𑀢𑀩𑁆𑀩𑁂 𑀥𑀦𑀺𑀢𑀁, 𑀥𑀦𑀺𑀢𑁂 𑀓𑀢𑁆𑀢𑀩𑁆𑀩𑁂 𑀲𑀺𑀣𑀺𑀮𑀁, 𑀯𑀺𑀫𑀼𑀢𑁆𑀢𑁂 𑀓𑀢𑁆𑀢𑀩𑁆𑀩𑁂 𑀦𑀺𑀕𑁆𑀕𑀳𑀺𑀢𑀁, 𑀦𑀺𑀕𑁆𑀕𑀳𑀺𑀢𑁂 𑀓𑀢𑁆𑀢𑀩𑁆𑀩𑁂 𑀯𑀺𑀫𑀼𑀢𑁆𑀢𑀦𑁆𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀩𑁆𑀬𑀜𑁆𑀚𑀦𑀸𑀦𑀺 𑀅𑀦𑁆𑀢𑁄𑀓𑀫𑁆𑀫𑀯𑀸𑀘𑀸𑀬 𑀓𑀫𑁆𑀫𑀁 𑀤𑀽𑀲𑁂𑀦𑁆𑀢𑀺. 𑀏𑀯𑀁 𑀯𑀤𑀦𑁆𑀢𑁄 𑀳𑀺 𑀅𑀜𑁆𑀜𑀲𑁆𑀫𑀺𑀁 𑀅𑀓𑁆𑀔𑀭𑁂 𑀯𑀢𑁆𑀢𑀩𑁆𑀩𑁂 𑀅𑀜𑁆𑀜𑀁 𑀯𑀤𑀢𑀺, 𑀤𑀼𑀭𑀼𑀢𑁆𑀢𑀁 𑀓𑀭𑁄𑀢𑀻𑀢𑀺 𑀯𑀼𑀘𑁆𑀘𑀢𑀺.

𑀇𑀢𑀭𑁂𑀲𑀼 𑀧𑀦 𑀤𑀻𑀖𑀭𑀲𑁆𑀲𑀸𑀤𑀻𑀲𑀼 𑀙𑀲𑀼 𑀩𑁆𑀬𑀜𑁆𑀚𑀦𑁂𑀲𑀼 𑀤𑀻𑀖𑀝𑁆𑀞𑀸𑀦𑁂 𑀤𑀻𑀖𑀫𑁂𑀯. 𑀭𑀲𑁆𑀲𑀝𑁆𑀞𑀸𑀦𑁂 𑀘 𑀭𑀲𑁆𑀲𑀫𑁂𑀯𑀸𑀢𑀺 𑀏𑀯𑀁 𑀬𑀣𑀸𑀞𑀸𑀦𑁂 𑀢𑀁 𑀢𑀤𑁂𑀯 𑀅𑀓𑁆𑀔𑀭𑀁 𑀪𑀸𑀲𑀦𑁆𑀢𑁂𑀦 𑀅𑀦𑀼𑀓𑁆𑀓𑀫𑀸𑀕𑀢𑀁 𑀧𑀯𑁂𑀡𑀺𑀁 𑀅𑀯𑀺𑀦𑀸𑀲𑁂𑀦𑁆𑀢𑁂𑀦 𑀓𑀫𑁆𑀫𑀯𑀸𑀘𑀸 𑀓𑀸𑀢𑀩𑁆𑀩𑀸. 𑀲𑀘𑁂 𑀧𑀦 𑀏𑀯𑀁 𑀅𑀓𑀢𑁆𑀯𑀸 𑀤𑀻𑀖𑁂 𑀯𑀢𑁆𑀢𑀩𑁆𑀩𑁂 𑀭𑀲𑁆𑀲𑀁, 𑀭𑀲𑁆𑀲𑁂 𑀯𑀸 𑀯𑀢𑁆𑀢𑀩𑁆𑀩𑁂 𑀤𑀻𑀖𑀁 𑀯𑀤𑀢𑀺, 𑀢𑀣𑀸 𑀕𑀭𑀼𑀓𑁂 𑀯𑀢𑁆𑀢𑀩𑁆𑀩𑁂 𑀮𑀳𑀼𑀓𑀁, 𑀮𑀳𑀼𑀓𑁂 𑀯𑀸 𑀯𑀢𑁆𑀢𑀩𑁆𑀩𑁂 𑀕𑀭𑀼𑀓𑀁 𑀯𑀤𑀢𑀺, 𑀲𑀫𑁆𑀩𑀦𑁆𑀥𑁂 𑀯𑀸 𑀧𑀦 𑀯𑀢𑁆𑀢𑀩𑁆𑀩𑁂 𑀯𑀯𑀢𑁆𑀣𑀺𑀢𑀁, 𑀯𑀯𑀢𑁆𑀣𑀺𑀢𑁂 𑀯𑀸 𑀯𑀢𑁆𑀢𑀩𑁆𑀩𑁂 𑀲𑀫𑁆𑀩𑀦𑁆𑀥𑀁 𑀯𑀤𑀢𑀺, 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀓𑀫𑁆𑀫𑀯𑀸𑀘𑀸 𑀦 𑀓𑀼𑀧𑁆𑀧𑀢𑀺. 𑀇𑀫𑀸𑀦𑀺 𑀳𑀺 𑀙 𑀩𑁆𑀬𑀜𑁆𑀚𑀦𑀸𑀦𑀺 𑀓𑀫𑁆𑀫𑀁 𑀦 𑀓𑁄𑀧𑁂𑀦𑁆𑀢𑀺.

𑀬𑀁 𑀧𑀦 𑀲𑀼𑀢𑁆𑀢𑀦𑁆𑀢𑀺𑀓𑀢𑁆𑀣𑁂𑀭𑀸 ‘‘𑀤-𑀓𑀸𑀭𑁄 𑀢-𑀓𑀸𑀭𑀫𑀸𑀧𑀚𑁆𑀚𑀢𑀺, 𑀢-𑀓𑀸𑀭𑁄 𑀤-𑀓𑀸𑀭𑀫𑀸𑀧𑀚𑁆𑀚𑀢𑀺, 𑀘-𑀓𑀸𑀭𑁄 𑀚-𑀓𑀸𑀭𑀫𑀸𑀧𑀚𑁆𑀚𑀢𑀺, 𑀚-𑀓𑀸𑀭𑁄 𑀘-𑀓𑀸𑀭𑀫𑀸𑀧𑀚𑁆𑀚𑀢𑀺, 𑀬-𑀓𑀸𑀭𑁄 𑀓-𑀓𑀸𑀭𑀫𑀸𑀧𑀚𑁆𑀚𑀢𑀺, 𑀓-𑀓𑀸𑀭𑁄 𑀬-𑀓𑀸𑀭𑀫𑀸𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀤-𑀓𑀸𑀭𑀸𑀤𑀻𑀲𑀼 𑀯𑀢𑁆𑀢𑀩𑁆𑀩𑁂𑀲𑀼 𑀢-𑀓𑀸𑀭𑀸𑀤𑀻𑀦𑀁 𑀯𑀘𑀦𑀁 𑀦 𑀯𑀺𑀭𑀼𑀚𑁆𑀛𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀓𑀫𑁆𑀫𑀯𑀸𑀘𑀁 𑀧𑀢𑁆𑀯𑀸 𑀦 𑀯𑀝𑁆𑀝𑀢𑀺. 𑀢𑀲𑁆𑀫𑀸 𑀯𑀺𑀦𑀬𑀥𑀭𑁂𑀦 𑀦𑁂𑀯 𑀤-𑀓𑀸𑀭𑁄 𑀢-𑀓𑀸𑀭𑁄 𑀓𑀸𑀢𑀩𑁆𑀩𑁄…𑀧𑁂… 𑀦 𑀓-𑀓𑀸𑀭𑁄 𑀬-𑀓𑀸𑀭𑁄. 𑀬𑀣𑀸𑀧𑀸𑀴𑀺𑀬𑀸 𑀦𑀺𑀭𑀼𑀢𑁆𑀢𑀺𑀁 𑀲𑁄𑀥𑁂𑀢𑁆𑀯𑀸 𑀤𑀲𑀯𑀺𑀥𑀸𑀬 𑀩𑁆𑀬𑀜𑁆𑀚𑀦𑀦𑀺𑀭𑀼𑀢𑁆𑀢𑀺𑀬𑀸 𑀯𑀼𑀢𑁆𑀢𑀤𑁄𑀲𑁂 𑀧𑀭𑀺𑀳𑀭𑀦𑁆𑀢𑁂𑀦 𑀓𑀫𑁆𑀫𑀯𑀸𑀘𑀸 𑀓𑀸𑀢𑀩𑁆𑀩𑀸. 𑀇𑀢𑀭𑀣𑀸 𑀳𑀺 𑀲𑀸𑀯𑀦𑀁 𑀳𑀸𑀧𑁂𑀢𑀺 𑀦𑀸𑀫. 𑀜𑀢𑁆𑀢𑀺𑀁 𑀅𑀝𑁆𑀞𑀧𑁂𑀢𑁆𑀯𑀸 𑀧𑀞𑀫𑀁 𑀅𑀦𑀼𑀲𑁆𑀲𑀸𑀯𑀦𑀓𑀭𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸𑀢𑀺 𑀬𑀢𑁆𑀢𑀓𑀸 𑀪𑀺𑀓𑁆𑀔𑀽 𑀢𑀲𑁆𑀲 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀲𑁆𑀲 𑀧𑀢𑁆𑀢𑀸 𑀬𑀼𑀢𑁆𑀢𑀸 𑀅𑀦𑀼𑀭𑀽𑀧𑀸. 𑀢𑁂 𑀘 𑀔𑁄 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀬𑀸𑀬𑁂𑀦 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸 𑀏𑀓𑀲𑀻𑀫𑀝𑁆𑀞𑀸 𑀧𑀜𑁆𑀘 𑀧𑀓𑀢𑀢𑁆𑀢𑀸 𑀪𑀺𑀓𑁆𑀔𑀽. 𑀦 𑀳𑀺 𑀢𑁂𑀳𑀺 𑀯𑀺𑀦𑀸 𑀢𑀁 𑀓𑀫𑁆𑀫𑀁 𑀓𑀭𑀻𑀬𑀢𑀺, 𑀦 𑀢𑁂𑀲𑀁 𑀙𑀦𑁆𑀤𑁄 𑀏𑀢𑀺. 𑀅𑀯𑀲𑁂𑀲𑀸 𑀧𑀦 𑀲𑀘𑁂𑀧𑀺 𑀲𑀳𑀲𑁆𑀲𑀫𑀢𑁆𑀢𑀸 𑀳𑁄𑀦𑁆𑀢𑀺, 𑀲𑀘𑁂 𑀏𑀓𑀲𑀻𑀫𑀝𑁆𑀞𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀲𑀩𑁆𑀩𑁂 𑀙𑀦𑁆𑀤𑀸𑀭𑀳𑀸𑀯 𑀳𑁄𑀦𑁆𑀢𑀺, 𑀙𑀦𑁆𑀤𑀁 𑀤𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀼 𑀯𑀸, 𑀫𑀸 𑀯𑀸, 𑀓𑀫𑁆𑀫𑀁 𑀦 𑀓𑀼𑀧𑁆𑀧𑀢𑀺. 𑀧𑀝𑀺𑀓𑁆𑀓𑁄𑀲𑀦𑀦𑁆𑀢𑀺 𑀦𑀺𑀯𑀸𑀭𑀡𑀁. 𑀢𑀺𑀝𑁆𑀞𑀢𑀺 𑀏𑀢𑁆𑀣 𑀨𑀮𑀁 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀞𑀸𑀦𑀁, 𑀓𑀸𑀭𑀡𑀁. 𑀇𑀥 𑀧𑀦 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀓𑀭𑀡𑀲𑁆𑀲 𑀓𑀸𑀭𑀡𑀢𑁆𑀢𑀸 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀯𑀸𑀘𑀸𑀲𑀗𑁆𑀔𑀸𑀢𑀁 𑀪𑀕𑀯𑀢𑁄 𑀯𑀘𑀦𑀁 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀓𑀸𑀭𑀡𑀸𑀭𑀳𑀢𑁆𑀢𑀸 𑀧𑀦 𑀲𑀢𑁆𑀣𑀼 𑀲𑀸𑀲𑀦𑀸𑀭𑀳𑀢𑁆𑀢𑀸’’𑀢𑀺. 𑀬𑀣𑀸 𑀘 ‘‘𑀢𑀁 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀪𑀕𑀯𑀢𑀸 𑀅𑀦𑀼𑀲𑀺𑀝𑁆𑀞𑀁, 𑀢𑀣𑀸𑀓𑀭𑀡𑀁 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀲𑁆𑀲 𑀓𑀸𑀭𑀡𑀁 𑀳𑁄𑀢𑀻𑀢𑀺 𑀞𑀸𑀦𑀸𑀭𑀳𑀁 𑀦𑀸𑀫. 𑀓𑁂𑀘𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁪𑁫) 𑀧𑀦 ‘‘𑀞𑀸𑀦𑀸𑀭𑀳𑁂𑀦𑀸𑀢𑀺 𑀏𑀢𑁆𑀣 ‘𑀦, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀘𑁆𑀙𑀺𑀦𑁆𑀦𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄’𑀢𑀺𑀆𑀤𑀺 (𑀫𑀳𑀸𑀯. 𑁧𑁧𑁯) 𑀲𑀢𑁆𑀣𑀼𑀲𑀸𑀲𑀦𑀁 𑀞𑀸𑀦’’𑀦𑁆𑀢𑀺 𑀯𑀤𑀦𑁆𑀢𑀺. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀧𑀸𑀭𑀸𑀚𑀺𑀓𑁂. 𑀬𑀣𑀸 𑀘 𑀇𑀥, 𑀏𑀯𑀁 𑀲𑀩𑁆𑀩𑀢𑁆𑀣𑀸𑀧𑀺 𑀮𑁄𑀓𑀯𑀚𑁆𑀚𑀲𑀺𑀓𑁆𑀔𑀸𑀧𑀤𑁂𑀲𑀼 𑀅𑀬𑀫𑁂𑀯 𑀅𑀥𑀺𑀧𑁆𑀧𑁂𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑁂𑀲𑀼 𑀧𑀦𑀸’’𑀢𑀺𑀆𑀤𑀺. 𑀅𑀜𑁆𑀜𑁂𑀧𑀻𑀢𑀺 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀦𑁆𑀦𑀸𑀤𑀬𑁄𑀧𑀺. 𑀓𑀣𑀫𑁂𑀢𑀁 𑀯𑀺𑀜𑁆𑀜𑀸𑀬𑀢𑀺 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀅𑀜𑁆𑀜𑁂𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺? 𑀅𑀢𑁆𑀣𑀢𑁄 𑀆𑀧𑀦𑁆𑀦𑀢𑁆𑀢𑀸. 𑀢𑀣𑀸 𑀳𑀺 ‘‘𑀤𑁆𑀯𑁂 𑀧𑀼𑀕𑁆𑀕𑀮𑀸 𑀅𑀪𑀩𑁆𑀩𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀼𑀁 𑀩𑀼𑀤𑁆𑀥𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘, 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀪𑀩𑁆𑀩𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀼𑀁 𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘𑀸’’𑀢𑀺 (𑀧𑀭𑀺. 𑁩𑁨𑁨) 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀢𑁆𑀢𑀸. 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀦𑁆𑀦𑀸𑀤𑀬𑁄𑀧𑀺 𑀅𑀲𑀜𑁆𑀘𑀺𑀘𑁆𑀘 𑀅𑀲𑁆𑀲𑀢𑀺𑀬𑀸 𑀅𑀘𑀺𑀢𑁆𑀢𑀓𑀁 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺𑀆𑀤𑀺𑀪𑁂𑀤𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁪𑁫) 𑀅𑀢𑁆𑀣𑀢𑁄 𑀆𑀧𑀦𑁆𑀦𑀁.

𑀇𑀤𑀸𑀦𑀺 ‘‘𑀪𑀺𑀓𑁆𑀔𑀽𑀦’’𑀦𑁆𑀢𑀺 𑀇𑀫𑀁 𑀧𑀤𑀁 𑀯𑀺𑀲𑁂𑀲𑀢𑁆𑀣𑀸𑀪𑀸𑀯𑀢𑁄 𑀯𑀺𑀲𑀼𑀁 𑀅𑀯𑀡𑁆𑀡𑁂𑀢𑁆𑀯𑀸𑀯 𑀬𑀁 𑀲𑀺𑀓𑁆𑀔𑀜𑁆𑀘 𑀲𑀸𑀚𑀻𑀯𑀜𑁆𑀘 𑀲𑀫𑀸𑀧𑀦𑁆𑀦𑀢𑁆𑀢𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑀺𑀆𑀤𑀺𑀫𑀸𑀳. 𑀲𑀺𑀓𑁆𑀔𑀺𑀢𑀩𑁆𑀩𑀸𑀢𑀺 𑀲𑀺𑀓𑁆𑀔𑀸, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁, 𑀲𑀳 𑀚𑀻𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀸𑀚𑀻𑀯𑀁, 𑀫𑀸𑀢𑀺𑀓𑀸𑀤𑀺𑀪𑁂𑀤𑀸 𑀧𑀡𑁆𑀡𑀢𑁆𑀢𑀺, 𑀲𑀺𑀓𑁆𑀔𑀸 𑀘 𑀲𑀸𑀚𑀻𑀯𑀜𑁆𑀘 𑀲𑀺𑀓𑁆𑀔𑀸𑀲𑀸𑀚𑀻𑀯𑀁, 𑀢𑀤𑀼𑀪𑀬𑀁 𑀲𑀫𑀸𑀧𑀦𑁆𑀦𑁄 𑀉𑀧𑀕𑀢𑁄𑀢𑀺 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄. 𑀢𑁂𑀦𑀸𑀳 ‘‘𑀬𑀸 𑀪𑀺𑀓𑁆𑀔𑀽𑀦’’𑀦𑁆𑀢𑀺𑀆𑀤𑀺. 𑀏𑀢𑁆𑀣 𑀘 ‘‘𑀲𑀺𑀓𑁆𑀔𑀸’’𑀢𑀺 𑀲𑀸𑀚𑀻𑀯𑀲𑀳𑀘𑀭𑀺𑀬𑀢𑁄 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀯 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀅𑀥𑀺𑀲𑀻𑀮𑀲𑀗𑁆𑀔𑀸𑀢𑀸’’𑀢𑀺. 𑀅𑀥𑀺𑀓𑀁 𑀉𑀢𑁆𑀢𑀫𑀁 𑀲𑀻𑀮𑀦𑁆𑀢𑀺 𑀅𑀥𑀺𑀲𑀻𑀮𑀁, ‘‘𑀅𑀥𑀺𑀲𑀻𑀮’’𑀦𑁆𑀢𑀺 𑀲𑀗𑁆𑀔𑀸𑀢𑀸 𑀅𑀥𑀺𑀲𑀻𑀮𑀲𑀗𑁆𑀔𑀸𑀢𑀸.

𑀓𑀢𑀫𑀁 𑀧𑀦𑁂𑀢𑁆𑀣 𑀲𑀻𑀮𑀁, 𑀓𑀢𑀫𑀁 𑀅𑀥𑀺𑀲𑀻𑀮𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀧𑀜𑁆𑀘𑀗𑁆𑀕𑀤𑀲𑀗𑁆𑀕𑀲𑀻𑀮𑀁 𑀢𑀸𑀯 𑀲𑀻𑀮𑀫𑁂𑀯, 𑀦 𑀢𑀁 𑀅𑀥𑀺𑀲𑀻𑀮𑀁. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀧𑀦 𑀅𑀥𑀺𑀲𑀻𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀜𑁆𑀳𑀺 𑀲𑀽𑀭𑀺𑀬𑁄 𑀯𑀺𑀬 𑀧𑀚𑁆𑀚𑁄𑀢𑀸𑀦𑀁, 𑀲𑀺𑀦𑁂𑀭𑀼 𑀯𑀺𑀬 𑀘 𑀧𑀩𑁆𑀩𑀢𑀸𑀦𑀁 𑀲𑀩𑁆𑀩𑀮𑁄𑀓𑀺𑀬𑀲𑀻𑀮𑀸𑀦𑀁 𑀅𑀥𑀺𑀓𑀜𑁆𑀘𑁂𑀯 𑀉𑀢𑁆𑀢𑀫𑀜𑁆𑀘, 𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀬𑁂𑀯 𑀘 𑀧𑀯𑀢𑁆𑀢𑀢𑀺, 𑀦 𑀯𑀺𑀦𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀸. 𑀦 𑀳𑀺 𑀢𑀁 𑀧𑀜𑁆𑀜𑀢𑁆𑀢𑀺𑀁 𑀉𑀤𑁆𑀥𑀭𑀺𑀢𑁆𑀯𑀸 𑀅𑀜𑁆𑀜𑁄 𑀲𑀢𑁆𑀢𑁄 𑀧𑀜𑁆𑀜𑀸𑀧𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀩𑀼𑀤𑁆𑀥𑀸𑀬𑁂𑀯 𑀧𑀦𑀲𑁆𑀲 𑀲𑀩𑁆𑀩𑀲𑁄 𑀓𑀸𑀬𑀯𑀘𑀻𑀤𑁆𑀯𑀸𑀭𑀚𑁆𑀛𑀸𑀘𑀸𑀭𑀲𑁄𑀢𑀁 𑀙𑀺𑀦𑁆𑀤𑀺𑀢𑁆𑀯𑀸 𑀢𑀲𑁆𑀲 𑀢𑀲𑁆𑀲 𑀯𑀻𑀢𑀺𑀓𑁆𑀓𑀫𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁 𑀢𑀁 𑀢𑀁 𑀲𑀻𑀮𑀲𑀁𑀯𑀭𑀁 𑀧𑀜𑁆𑀜𑀸𑀧𑁂𑀦𑁆𑀢𑀺. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀢𑁄𑀧𑀺 𑀘 𑀫𑀕𑁆𑀕𑀨𑀮𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀲𑀻𑀮𑀁 𑀅𑀥𑀺𑀲𑀻𑀮𑀁, 𑀢𑀁 𑀧𑀦 𑀇𑀥 𑀦 𑀅𑀥𑀺𑀧𑁆𑀧𑁂𑀢𑀁. 𑀦 𑀳𑀺 𑀢𑀁 𑀲𑀫𑀸𑀧𑀦𑁆𑀦𑁄 𑀫𑁂𑀣𑀼𑀦𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺.

𑀏𑀢𑁂𑀢𑀺 𑀦𑀸𑀦𑀸𑀤𑁂𑀲𑀚𑀸𑀢𑀺𑀕𑁄𑀢𑁆𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑀸 𑀪𑀺𑀓𑁆𑀔𑀽. 𑀲𑀳 𑀚𑀻𑀯𑀦𑁆𑀢𑀻𑀢𑀺 𑀏𑀓𑀼𑀤𑁆𑀤𑁂𑀲𑀸𑀤𑀺𑀯𑀲𑁂𑀦 𑀲𑀳 𑀧𑀯𑀢𑁆𑀢𑀦𑁆𑀢𑀺. 𑀢𑁂𑀦𑀸𑀳 ‘‘𑀏𑀓𑀚𑀻𑀯𑀺𑀓𑀸 𑀲𑀪𑀸𑀕𑀯𑀼𑀢𑁆𑀢𑀺𑀦𑁄’’𑀢𑀺. 𑀲𑀺𑀓𑁆𑀔𑀸𑀧𑀤𑀲𑀗𑁆𑀔𑀸𑀢𑀦𑁆𑀢𑀺 𑀧𑀡𑁆𑀡𑀢𑁆𑀢𑀺𑀲𑀗𑁆𑀔𑀸𑀢𑀁. 𑀲𑀸𑀧𑀺 𑀳𑀺 𑀯𑀺𑀭𑀢𑀺𑀆𑀤𑀻𑀦𑀁 𑀤𑀻𑀧𑀦𑀢𑁄 ‘‘𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀬𑁄 𑀢𑀢𑁆𑀣 𑀦𑀸𑀫𑀓𑀸𑀬𑁄 𑀧𑀤𑀓𑀸𑀬𑁄 𑀦𑀺𑀭𑀼𑀢𑁆𑀢𑀺𑀓𑀸𑀬𑁄 𑀩𑁆𑀬𑀜𑁆𑀚𑀦𑀓𑀸𑀬𑁄’’𑀢𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼. 𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀦𑁆𑀢𑁄𑀢𑀺 𑀅𑀓𑀢𑁆𑀢𑀩𑁆𑀩𑀧𑀭𑀺𑀯𑀚𑁆𑀚𑀦𑀓𑀢𑁆𑀢𑀩𑁆𑀩𑀓𑀭𑀡𑀯𑀲𑁂𑀦 𑀯𑀸𑀭𑀺𑀢𑁆𑀢𑀘𑀸𑀭𑀺𑀢𑁆𑀢𑀲𑀗𑁆𑀔𑀸𑀢𑀁 𑀤𑀼𑀯𑀺𑀥𑀁 𑀲𑀻𑀮𑀁 𑀧𑀭𑀺𑀧𑀽𑀭𑁂𑀦𑁆𑀢𑁄𑀢𑀺 𑀅𑀢𑁆𑀣𑁄, 𑀯𑀸𑀭𑀺𑀢𑁆𑀢𑀲𑀻𑀮𑀯𑀲𑁂𑀦 𑀯𑀺𑀭𑀢𑀺𑀲𑀫𑁆𑀧𑀬𑀼𑀢𑁆𑀢𑀘𑁂𑀢𑀦𑀁, 𑀘𑀸𑀭𑀺𑀢𑁆𑀢𑀲𑀻𑀮𑀯𑀲𑁂𑀦 𑀯𑀺𑀭𑀢𑀺𑀯𑀺𑀧𑁆𑀧𑀬𑀼𑀢𑁆𑀢𑀘𑁂𑀢𑀦𑀜𑁆𑀘 𑀅𑀢𑁆𑀢𑀦𑀺 𑀧𑀯𑀢𑁆𑀢𑁂𑀦𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀸𑀚𑀻𑀯𑀜𑁆𑀘 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄𑀢𑀺 𑀲𑀺𑀓𑁆𑀔𑀸𑀧𑀤𑀜𑁆𑀘 𑀅𑀫𑀤𑁆𑀤𑀦𑁆𑀢𑁄, 𑀲𑀻𑀮𑀲𑀁𑀯𑀭𑀡𑀁, 𑀲𑀸𑀚𑀻𑀯𑀸𑀦𑀢𑀺𑀓𑁆𑀓𑀫𑀦𑀜𑁆𑀘𑀸𑀢𑀺 𑀇𑀤𑀫𑁂𑀯 𑀤𑁆𑀯𑀬𑀁 𑀇𑀥 𑀲𑀫𑀸𑀧𑀚𑁆𑀚𑀦𑀁 𑀦𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑀲𑀸𑀚𑀻𑀯𑀸𑀦𑀢𑀺𑀓𑁆𑀓𑀫𑁄 𑀲𑀺𑀓𑁆𑀔𑀸𑀧𑀸𑀭𑀺𑀧𑀽𑀭𑀺𑀬𑀸 𑀧𑀘𑁆𑀘𑀬𑁄. 𑀢𑀲𑁆𑀲𑀸𑀦𑀢𑀺𑀓𑁆𑀓𑀫𑀦𑀢𑁄 𑀳𑀺 𑀬𑀸𑀯 𑀫𑀕𑁆𑀕𑀸 𑀲𑀺𑀓𑁆𑀔𑀸 𑀧𑀭𑀺𑀧𑀽𑀭𑀢𑀺. 𑀅𑀧𑀺𑀘𑁂𑀢𑁆𑀣 ‘‘𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀦𑁆𑀢𑁄’’𑀢𑀺 𑀇𑀫𑀺𑀦𑀸 𑀯𑀺𑀭𑀢𑀺𑀘𑁂𑀢𑀦𑀸𑀲𑀗𑁆𑀔𑀸𑀢𑀲𑁆𑀲 𑀲𑀻𑀮𑀲𑀁𑀯𑀭𑀲𑁆𑀲 𑀯𑀺𑀲𑁂𑀲𑀢𑁄 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀦𑀓𑀸𑀮𑁄𑀯 𑀕𑀳𑀺𑀢𑁄, ‘‘𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄’’𑀢𑀺 𑀇𑀫𑀺𑀦𑀸 𑀧𑀦 𑀅𑀧𑁆𑀧𑀯𑀢𑁆𑀢𑀦𑀓𑀸𑀮𑁄𑀧𑀺. 𑀲𑀺𑀓𑁆𑀔𑀜𑁆𑀳𑀺 𑀧𑀭𑀺𑀧𑀽𑀭𑀡𑀯𑀲𑁂𑀦 𑀅𑀢𑁆𑀢𑀦𑀺 𑀧𑀯𑀢𑁆𑀢𑁂𑀦𑁆𑀢𑁄𑀧𑀺 𑀦𑀺𑀤𑁆𑀤𑀸𑀤𑀺𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑁂𑀦𑁆𑀢𑁄𑀧𑀺 𑀯𑀻𑀢𑀺𑀓𑁆𑀓𑀫𑀸𑀪𑀸𑀯𑀸 𑀲𑀺𑀓𑁆𑀔𑀦𑀯𑀲𑁂𑀦 𑀲𑀫𑀸𑀧𑀦𑁆𑀦𑁄𑀢𑀺 𑀯𑀼𑀘𑁆𑀘𑀢𑀺.

𑀬𑀲𑁆𑀫𑀸 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀲𑁆𑀲 𑀏𑀓𑀘𑁆𑀘𑀁 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀁 𑀅𑀢𑁆𑀣𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀲𑀦𑁆𑀥𑀸𑀬 ‘‘𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸’’𑀢𑀺 𑀆𑀳𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀺𑀬𑀸 (𑀧𑀸𑀭𑀸. 𑀅𑀝𑁆𑀞. 𑁧.𑁪𑁫 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀯𑀺𑀪𑀗𑁆𑀕𑀯𑀡𑁆𑀡𑀦𑀸), 𑀬𑀲𑁆𑀫𑀸 𑀦 𑀲𑀩𑁆𑀩𑀁 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀁 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁, 𑀢𑀲𑁆𑀫𑀸 ‘‘𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸’’𑀢𑀺 𑀧𑀞𑀫𑀁 𑀯𑀢𑁆𑀯𑀸 𑀢𑀲𑁆𑀲 𑀅𑀢𑁆𑀣𑀦𑀺𑀬𑀫𑀦𑀢𑁆𑀣𑀁 ‘‘𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀢𑀁 𑀦, 𑀓𑀲𑁆𑀫𑀸? 𑀅𑀢𑁆𑀣𑀸𑀦𑀼𑀓𑁆𑀓𑀫𑀸𑀪𑀸𑀯𑀢𑁄. ‘‘𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑀺 𑀳𑀺 𑀯𑀼𑀢𑁆𑀢𑀢𑁆𑀢𑀸 𑀬𑀁 𑀲𑀺𑀓𑁆𑀔𑀁 𑀲𑀫𑀸𑀧𑀦𑁆𑀦𑁄, 𑀢𑀁 𑀅𑀧𑀘𑁆𑀘𑀓𑁆𑀔𑀸𑀬, 𑀬𑀜𑁆𑀘 𑀲𑀸𑀚𑀻𑀯𑀁 𑀲𑀫𑀸𑀧𑀦𑁆𑀦𑁄, 𑀢𑀢𑁆𑀣 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸𑀢𑀺 𑀯𑀼𑀘𑁆𑀘𑀫𑀸𑀦𑁂 𑀅𑀦𑀼𑀓𑁆𑀓𑀫𑁂𑀦𑁂𑀯 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀳𑁄𑀢𑀺, 𑀦 𑀅𑀜𑁆𑀜𑀣𑀸. 𑀢𑀲𑁆𑀫𑀸 𑀇𑀤𑀫𑁂𑀯 𑀧𑀞𑀫𑀁 𑀯𑀼𑀢𑁆𑀢𑀦𑁆𑀢𑀺.

𑀇𑀤𑀸𑀦𑀺 𑀢𑀤𑀼𑀪𑀬𑀫𑁂𑀯 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀤𑀪𑀸𑀯𑁂𑀦𑀸𑀢𑀺 𑀢𑁂𑀲𑀁 𑀘𑀺𑀢𑁆𑀢𑀸𑀤𑀻𑀦𑀁 𑀅𑀪𑀸𑀯𑁂𑀦. 𑀘𑀯𑀺𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑁂𑀦𑀸𑀢𑀺 𑀅𑀧𑀕𑀦𑁆𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑁂𑀦. 𑀤𑀯𑀸𑀢𑀺 𑀲𑀳𑀲𑀸. 𑀬𑁄 𑀳𑀺 𑀅𑀜𑁆𑀜𑀁 𑀪𑀡𑀺𑀢𑀼𑀓𑀸𑀫𑁄 𑀲𑀳𑀲𑀸 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀪𑀡𑀢𑀺, 𑀅𑀬𑀁 𑀤𑀯𑀸 𑀯𑀤𑀢𑀺 𑀦𑀸𑀫. 𑀭𑀯𑀸𑀢𑀺 𑀯𑀺𑀭𑀚𑁆𑀛𑀺𑀢𑁆𑀯𑀸. 𑀬𑁄 𑀳𑀺 𑀅𑀜𑁆𑀜𑀁 𑀪𑀡𑀺𑀢𑀼𑀓𑀸𑀫𑁄 𑀯𑀺𑀭𑀼𑀚𑁆𑀛𑀺𑀢𑁆𑀯𑀸 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀪𑀡𑀢𑀺, 𑀅𑀬𑀁 𑀭𑀯𑀸 𑀪𑀡𑀢𑀺 𑀦𑀸𑀫. 𑀧𑀼𑀭𑀺𑀫𑁂𑀦 𑀓𑁄 𑀯𑀺𑀲𑁂𑀲𑁄𑀢𑀺 𑀘𑁂? 𑀧𑀼𑀭𑀺𑀫𑀁 𑀧𑀡𑁆𑀟𑀺𑀢𑀲𑁆𑀲𑀸𑀧𑀺 𑀲𑀳𑀲𑀸𑀯𑀲𑁂𑀦 𑀅𑀜𑁆𑀜𑀪𑀡𑀦𑀁, 𑀇𑀤𑀁 𑀧𑀦 𑀫𑀦𑁆𑀤𑀢𑁆𑀢𑀸 𑀫𑁄𑀫𑀽𑀳𑀢𑁆𑀢𑀸 𑀧𑀓𑁆𑀔𑀮𑀦𑁆𑀢𑀲𑁆𑀲 ‘‘𑀅𑀜𑁆𑀜𑀁 𑀪𑀡𑀺𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀪𑀡𑀦𑀁. ‘‘𑀅𑀓𑁆𑀔𑀭𑀲𑀫𑀬𑀸𑀦𑀪𑀺𑀜𑁆𑀜𑀸𑀢𑀢𑀸𑀬 𑀯𑀸 𑀓𑀭𑀡𑀲𑀫𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀯𑀸 𑀓𑀣𑁂𑀢𑀩𑁆𑀩𑀁 𑀓𑀣𑁂𑀢𑀼𑀫𑀲𑀓𑁆𑀓𑁄𑀦𑁆𑀢𑁄 𑀳𑀼𑀢𑁆𑀯𑀸 𑀅𑀜𑁆𑀜𑀁 𑀓𑀣𑁂𑀦𑁆𑀢𑁄 𑀭𑀯𑀸 𑀪𑀡𑀢𑀺 𑀦𑀸𑀫𑀸’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁫𑁪) 𑀏𑀓𑁂.

𑀯𑀚𑁆𑀚𑀸𑀯𑀚𑁆𑀚𑀁 𑀉𑀧𑀦𑀺𑀚𑁆𑀛𑀸𑀬𑀢𑀻𑀢𑀺 𑀉𑀧𑀚𑁆𑀛𑀸𑀬𑁄, 𑀢𑀁 𑀉𑀧𑀚𑁆𑀛𑀸𑀬𑀁. ‘‘𑀏𑀯𑀁 𑀲𑀚𑁆𑀛𑀸𑀬𑀺𑀢𑀩𑁆𑀩𑀁, 𑀏𑀯𑀁 𑀅𑀪𑀺𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀆𑀘𑀸𑀭𑀲𑀺𑀓𑁆𑀔𑀸𑀧𑀦𑀓𑁄 𑀆𑀘𑀭𑀺𑀬𑁄. 𑀅𑀦𑁆𑀢𑁂 𑀲𑀫𑀻𑀧𑁂 𑀯𑀲𑀢𑀺 𑀲𑀻𑀮𑁂𑀦𑀸𑀢𑀺 𑀅𑀦𑁆𑀢𑁂𑀯𑀸𑀲𑀻, 𑀯𑀺𑀪𑀢𑁆𑀢𑀺𑀅𑀮𑁄𑀧𑁂𑀦 𑀬𑀣𑀸 ‘‘𑀯𑀦𑁂𑀓𑀲𑁂𑀭𑀼𑀓𑀸’’𑀢𑀺. 𑀲𑀫𑀸𑀦𑁄 𑀉𑀧𑀚𑁆𑀛𑀸𑀬𑁄 𑀅𑀲𑁆𑀲𑀸𑀢𑀺 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑁄. 𑀏𑀯𑀁 𑀲𑀫𑀸𑀦𑀸𑀘𑀭𑀺𑀬𑀓𑁄. 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁆𑀢𑀺 𑀪𑀺𑀓𑁆𑀔𑀼𑀁. 𑀲𑁄 𑀳𑀺 ‘‘𑀏𑀓𑀓𑀫𑁆𑀫𑀁, 𑀏𑀓𑀼𑀤𑁆𑀤𑁂𑀲𑁄, 𑀲𑀫𑀲𑀺𑀓𑁆𑀔𑀢𑀸’’𑀢𑀺 𑀇𑀫𑀁 𑀩𑁆𑀭𑀳𑁆𑀫𑀁 𑀲𑀫𑀸𑀦𑀁 𑀘𑀭𑀢𑀺, 𑀢𑀲𑁆𑀫𑀸 ‘‘𑀲𑀩𑁆𑀭𑀳𑁆𑀫𑀘𑀸𑀭𑀻’’𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀯𑀼𑀢𑁆𑀢𑀸𑀦𑀦𑁆𑀢𑀺 𑀏𑀯𑀁 𑀧𑀤𑀪𑀸𑀚𑀦𑀻𑀬𑁂 𑀯𑀼𑀢𑁆𑀢𑀸𑀦𑀁. 𑀬𑀣𑀸 𑀳𑀺 𑀮𑁄𑀓𑁂 𑀲𑀲𑁆𑀲𑀸𑀦𑀁 𑀯𑀺𑀭𑀼𑀳𑀦𑀝𑁆𑀞𑀸𑀦𑀁 ‘‘𑀔𑁂𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑀺𑀫𑀸𑀦𑀺𑀧𑀺 𑀩𑀼𑀤𑁆𑀥𑀸𑀤𑀻𑀦𑀺 𑀧𑀤𑀸𑀦𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀲𑁆𑀲 𑀯𑀺𑀭𑀼𑀳𑀦𑀝𑁆𑀞𑀸𑀦𑀢𑁆𑀣𑀸 ‘‘𑀔𑁂𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀆𑀳 ‘‘𑀇𑀫𑁂𑀲𑀁 𑀤𑁆𑀯𑀸𑀯𑀻𑀲𑀢𑀺𑀬𑀸 𑀔𑁂𑀢𑁆𑀢𑀧𑀤𑀸𑀦’’𑀦𑁆𑀢𑀺. 𑀬𑀲𑁆𑀫𑀸 𑀧𑀦𑁂𑀢𑁂𑀲𑀁 𑀯𑁂𑀯𑀘𑀦𑁂𑀳𑀺𑀧𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀲𑀯𑁂𑀯𑀘𑀦𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀯𑀺𑀯𑀺𑀥𑀁 𑀏𑀓𑀲𑁆𑀫𑀺𑀁𑀬𑁂𑀯 𑀅𑀢𑁆𑀣𑁂 𑀯𑀘𑀦𑀁 𑀯𑀺𑀯𑀘𑀦𑀁, 𑀯𑀺𑀯𑀘𑀦𑀫𑁂𑀯 𑀯𑁂𑀯𑀘𑀦𑀁, 𑀧𑀭𑀺𑀬𑀸𑀬𑀦𑀸𑀫𑀁, 𑀲𑀳 𑀯𑁂𑀯𑀘𑀦𑁂𑀳𑀻𑀢𑀺 𑀲𑀯𑁂𑀯𑀘𑀦𑀁, 𑀢𑀲𑁆𑀲 𑀲𑀯𑁂𑀯𑀘𑀦𑀲𑁆𑀲. 𑀏𑀢𑁆𑀣 𑀘 𑀯𑀡𑁆𑀡𑀧𑀝𑁆𑀞𑀸𑀦𑁂 (𑀲𑀸𑀭𑀢𑁆𑀣. 𑀝𑀻. 𑁨.𑁫𑁨; 𑀯𑀺. 𑀯𑀺. 𑀝𑀻. 𑁧.𑁫𑁩; 𑀯𑀚𑀺𑀭. 𑀝𑀻. 𑁫𑁩) 𑀆𑀕𑀢𑀁 𑀦𑀸𑀫𑀲𑀳𑀲𑁆𑀲𑀁, 𑀉𑀧𑀸𑀮𑀺𑀕𑀸𑀣𑀸𑀲𑀼 (𑀫. 𑀦𑀺. 𑁨.𑁭𑁬) 𑀦𑀸𑀫𑀲𑀢𑀁, 𑀅𑀜𑁆𑀜𑀸𑀦𑀺 𑀘 𑀕𑀼𑀡𑀢𑁄 𑀮𑀩𑁆𑀪𑀫𑀸𑀦𑀸𑀦𑀺 𑀦𑀸𑀫𑀸𑀦𑀺 ‘‘𑀩𑀼𑀤𑁆𑀥𑀯𑁂𑀯𑀘𑀦𑀸𑀦𑀻’’𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑀩𑁆𑀩𑀸𑀦𑀺𑀧𑀺 𑀥𑀫𑁆𑀫𑀲𑁆𑀲 𑀦𑀸𑀫𑀸𑀦𑀺 ‘‘𑀥𑀫𑁆𑀫𑀯𑁂𑀯𑀘𑀦𑀸𑀦𑀻’’𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀢𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀯𑀢𑁆𑀢𑀼𑀓𑀸𑀫𑀲𑁆𑀲 𑀬𑀁 𑀓𑀺𑀜𑁆𑀘𑀺 𑀯𑀤𑀢𑁄 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀻𑀢𑀺 𑀢𑁂𑀲𑀼 𑀤𑁆𑀯𑀸𑀯𑀻𑀲𑀢𑀺𑀬𑀸 𑀔𑁂𑀢𑁆𑀢𑀧𑀤𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀏𑀓𑀁 𑀧𑀤𑀁 𑀯𑀢𑁆𑀢𑀼𑀓𑀸𑀫𑀲𑁆𑀲 𑀢𑀢𑁄 𑀅𑀜𑁆𑀜𑀁 𑀬𑀁 𑀓𑀺𑀜𑁆𑀘𑀺 𑀧𑀤𑀫𑁆𑀧𑀺 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀯𑀤𑀢𑁄 𑀔𑁂𑀢𑁆𑀢𑀧𑀤𑀦𑁆𑀢𑁄𑀕𑀥𑀢𑁆𑀢𑀸 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀘𑁂 𑀧𑀦𑀸𑀬𑀁 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀯𑀢𑁆𑀢𑀼𑀓𑀸𑀫𑁄 𑀧𑀤𑀧𑀘𑁆𑀘𑀸𑀪𑀝𑁆𑀞𑀁 𑀓𑀢𑁆𑀯𑀸 ‘‘𑀧𑀘𑁆𑀘𑀓𑁆𑀔𑀸𑀫𑀺 𑀩𑀼𑀤𑁆𑀥’’𑀦𑁆𑀢𑀺 𑀯𑀸 𑀯𑀤𑁂𑀬𑁆𑀬, 𑀫𑀺𑀮𑀓𑁆𑀔𑀪𑀸𑀲𑀸𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑀪𑀸𑀲𑀸𑀬 𑀢𑀫𑀢𑁆𑀣𑀁 𑀯𑀤𑁂𑀬𑁆𑀬, ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀯𑀢𑁆𑀢𑀼𑀓𑀸𑀫𑁄 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 ‘‘𑀥𑀫𑁆𑀫𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀯𑀸 ‘‘𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀯𑀸 𑀯𑀤𑁂𑀬𑁆𑀬, 𑀲𑁂𑀬𑁆𑀬𑀣𑀸𑀧𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀯𑀺𑀪𑀗𑁆𑀕𑁂 ‘‘𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀸𑀫𑀻’’𑀢𑀺 𑀯𑀢𑁆𑀢𑀼𑀓𑀸𑀫𑁄 ‘‘𑀤𑀼𑀢𑀺𑀬𑀁 𑀛𑀸𑀦’’𑀦𑁆𑀢𑀺 𑀯𑀤𑀢𑀺. 𑀲𑀘𑁂 ‘‘𑀬𑀲𑁆𑀲 𑀯𑀤𑀢𑀺, 𑀲𑁄 𑀅𑀬𑀁 𑀪𑀺𑀓𑁆𑀔𑀼𑀪𑀸𑀯𑀁 𑀘𑀚𑀺𑀢𑀼𑀓𑀸𑀫𑁄 𑀏𑀢𑀫𑀢𑁆𑀣𑀁 𑀯𑀤𑀢𑀻’’𑀢𑀺 𑀏𑀢𑁆𑀢𑀓𑀫𑀢𑁆𑀢𑀫𑁆𑀧𑀺 𑀚𑀸𑀦𑀸𑀢𑀺, 𑀯𑀺𑀭𑀤𑁆𑀥𑀁 𑀦𑀸𑀫 𑀦𑀢𑁆𑀣𑀺, 𑀔𑁂𑀢𑁆𑀢𑀫𑁂𑀯 𑀑𑀢𑀺𑀡𑁆𑀡𑀁, 𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺 𑀲𑀺𑀓𑁆𑀔𑀸. 𑀲𑀓𑁆𑀓𑀢𑁆𑀢𑀸 𑀯𑀸 𑀩𑁆𑀭𑀳𑁆𑀫𑀢𑁆𑀢𑀸 𑀯𑀸 𑀘𑀼𑀢𑀲𑀢𑁆𑀢𑁄 𑀯𑀺𑀬 𑀘𑀼𑀢𑁄𑀯 𑀳𑁄𑀢𑀺 𑀲𑀸𑀲𑀦𑀸𑀢𑀺.

𑀅𑀮𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁫𑁨) 𑀳𑁄𑀢𑀼, 𑀧𑀭𑀺𑀬𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀓𑀺𑀁 𑀦𑀼 𑀫𑁂𑀢𑀺 𑀓𑀺𑀁 𑀫𑀬𑁆𑀳𑀁 𑀓𑀺𑀘𑁆𑀘𑀁, 𑀓𑀺𑀁 𑀓𑀭𑀡𑀻𑀬𑀁, 𑀓𑀺𑀁 𑀲𑀸𑀥𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀦 𑀫𑀫𑀢𑁆𑀣𑁄𑀢𑀺 𑀦𑀢𑁆𑀣𑀺 𑀫𑀫 𑀅𑀢𑁆𑀣𑁄. 𑀲𑀼𑀫𑀼𑀢𑁆𑀢𑀸𑀳𑀦𑁆𑀢𑀺 𑀲𑀼𑀝𑁆𑀞𑀼 𑀫𑀼𑀢𑁆𑀢𑁄 𑀅𑀳𑀁. 𑀧𑀼𑀭𑀺𑀫𑁂𑀳𑀺 𑀘𑀼𑀤𑁆𑀤𑀲𑀳𑀺 𑀧𑀤𑁂𑀳𑀻𑀢𑀺 𑀩𑀼𑀤𑁆𑀥𑀸𑀤𑀻𑀳𑀺 𑀲𑀩𑁆𑀭𑀳𑁆𑀫𑀘𑀸𑀭𑀺𑀧𑀭𑀺𑀬𑀦𑁆𑀢𑁂𑀳𑀺 𑀧𑀼𑀭𑀺𑀫𑁂𑀳𑀺 𑀘𑀼𑀤𑁆𑀤𑀲𑀳𑀺 𑀧𑀤𑁂𑀳𑀺. 𑀬𑀦𑁆𑀦𑀽𑀦𑀸𑀳𑀁 𑀧𑀘𑁆𑀘𑀓𑁆𑀔𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 ‘‘𑀬𑀦𑁆𑀦𑀽𑀦𑀸’’𑀢𑀺 𑀧𑀭𑀺𑀯𑀺𑀢𑀓𑁆𑀓𑀤𑀲𑁆𑀲𑀦𑁂 𑀦𑀺𑀧𑀸𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀲𑀘𑀸𑀳𑀁 𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑁂𑀬𑁆𑀬𑀁, 𑀲𑀸𑀥𑀼 𑀯𑀢 𑀫𑁂 𑀲𑀺𑀬𑀸’’𑀢𑀺. 𑀆𑀤𑀺𑀲𑀤𑁆𑀤𑁂𑀦 ‘‘𑀧𑀘𑁆𑀘𑀓𑁆𑀔𑀺’’𑀦𑁆𑀢𑀺 𑀯𑀸 ‘‘𑀧𑀘𑁆𑀘𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀳𑁄𑀫𑀻’’𑀢𑀺 𑀯𑀸 ‘‘𑀚𑀸𑀢𑁄𑀫𑁆𑀳𑀻’’𑀢𑀺 𑀯𑀸 ‘‘𑀅𑀫𑁆𑀳𑀻’’𑀢𑀺 𑀯𑀸 𑀏𑀯𑀁𑀪𑀽𑀢𑀸𑀦𑀁 𑀕𑀳𑀡𑀁. 𑀲𑀘𑁂 𑀧𑀦 ‘‘𑀅𑀚𑁆𑀚 𑀧𑀝𑁆𑀞𑀸𑀬 ‘𑀕𑀺𑀳𑀻’𑀢𑀺 𑀫𑀁 𑀥𑀸𑀭𑁂𑀳𑀻’’𑀢𑀺 𑀯𑀸 ‘‘𑀚𑀸𑀦𑀸𑀳𑀻’’𑀢𑀺 𑀯𑀸 ‘‘𑀲𑀜𑁆𑀚𑀸𑀦𑀸𑀳𑀻’’𑀢𑀺 𑀯𑀸 ‘‘𑀫𑀦𑀲𑀺 𑀓𑀭𑁄𑀳𑀻’’𑀢𑀺 𑀯𑀸 𑀯𑀤𑀢𑀺, 𑀅𑀭𑀺𑀬𑀓𑁂𑀦 𑀯𑀸 𑀯𑀤𑀢𑀺, 𑀫𑀺𑀮𑀓𑁆𑀔𑀓𑁂𑀦 𑀯𑀸. 𑀏𑀯𑀫𑁂𑀢𑀲𑁆𑀫𑀺𑀁 𑀅𑀢𑁆𑀣𑁂 𑀯𑀼𑀢𑁆𑀢𑁂 𑀬𑀲𑁆𑀲 𑀯𑀤𑀢𑀺, 𑀲𑀘𑁂 𑀲𑁄 𑀚𑀸𑀦𑀸𑀢𑀺, 𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺 ‘‘𑀉𑀧𑀸𑀲𑀓𑁄’’𑀢𑀺𑀆𑀤𑀻𑀲𑀼 𑀲𑀢𑁆𑀢𑀲𑀼 𑀧𑀤𑁂𑀲𑀼. 𑀏𑀢𑁆𑀣 𑀘 𑀅𑀭𑀺𑀬𑀓𑀁 𑀦𑀸𑀫 𑀫𑀸𑀕𑀥𑀯𑁄𑀳𑀸𑀭𑁄. 𑀫𑀺𑀮𑀓𑁆𑀔𑀓𑀁 𑀦𑀸𑀫 𑀅𑀦𑀭𑀺𑀬𑀓𑁄 𑀅𑀦𑁆𑀥𑀤𑀫𑀺𑀴𑀸𑀤𑀺.

𑀅𑀓𑁆𑀔𑀭𑀮𑀺𑀔𑀦𑀦𑁆𑀢𑀺 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺𑀆𑀤𑀺𑀦𑀸 𑀅𑀜𑁆𑀜𑁂𑀲𑀁 𑀤𑀲𑁆𑀲𑀦𑀢𑁆𑀣𑀁 𑀅𑀓𑁆𑀔𑀭𑀮𑀺𑀔𑀦𑀁. 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀓𑁄 𑀅𑀗𑁆𑀕𑀼𑀮𑀺𑀲𑀗𑁆𑀓𑁄𑀘𑀦𑀸𑀤𑀺𑀓𑁄 𑀳𑀢𑁆𑀣𑀯𑀺𑀓𑀸𑀭𑁄 𑀳𑀢𑁆𑀣𑀫𑀼𑀤𑁆𑀤𑀸, 𑀳𑀢𑁆𑀣𑀲𑀤𑁆𑀤𑁄 𑀘𑁂𑀢𑁆𑀣 𑀢𑀤𑁂𑀓𑀤𑁂𑀲𑁂𑀲𑀼 𑀅𑀗𑁆𑀕𑀼𑀮𑀻𑀲𑀼 𑀤𑀝𑁆𑀞𑀩𑁆𑀩𑁄 ‘‘𑀦 𑀪𑀼𑀜𑁆𑀚𑀫𑀸𑀦𑁄 𑀲𑀩𑁆𑀩𑀁 𑀳𑀢𑁆𑀣𑀁 𑀫𑀼𑀔𑁂 𑀧𑀓𑁆𑀔𑀺𑀧𑀺𑀲𑁆𑀲𑀸𑀫𑀻’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁬𑁧𑁮) 𑀯𑀺𑀬. 𑀢𑀲𑁆𑀫𑀸 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀓𑀲𑁆𑀲 𑀅𑀗𑁆𑀕𑀼𑀮𑀺𑀲𑀗𑁆𑀓𑁄𑀘𑀦𑀸𑀤𑀺𑀦𑁄 𑀳𑀢𑁆𑀣𑀯𑀺𑀓𑀸𑀭𑀲𑁆𑀲 𑀤𑀲𑁆𑀲𑀦𑀁 𑀳𑀢𑁆𑀣𑀫𑀼𑀤𑁆𑀤𑀸𑀤𑀺𑀤𑀲𑁆𑀲𑀦𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁫𑁧) 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀆𑀤𑀺𑀲𑀤𑁆𑀤𑁂𑀦 𑀲𑀻𑀲𑀓𑀫𑁆𑀧𑀦𑀤𑀲𑁆𑀲𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀉𑀫𑁆𑀫𑀢𑁆𑀢𑀓𑀔𑀺𑀢𑁆𑀢𑀘𑀺𑀢𑁆𑀢𑀯𑁂𑀤𑀦𑀸𑀝𑁆𑀝𑀸𑀦𑀦𑁆𑀢𑀺 𑀏𑀢𑁆𑀣 𑀉𑀫𑁆𑀫𑀢𑁆𑀢𑀓𑁄𑀢𑀺 𑀧𑀺𑀢𑁆𑀢𑀼𑀫𑁆𑀫𑀢𑁆𑀢𑀓𑁄. 𑀔𑀺𑀢𑁆𑀢𑀘𑀺𑀢𑁆𑀢𑁄𑀢𑀺 𑀬𑀓𑁆𑀔𑁂𑀳𑀺 𑀓𑀢𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑁄, 𑀬𑀓𑁆𑀔𑀼𑀫𑁆𑀫𑀢𑁆𑀢𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀪𑀺𑀦𑁆𑀦𑀁 𑀧𑀦 𑀯𑀺𑀲𑁂𑀲𑁄 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀯𑁂𑀤𑀦𑀸𑀝𑁆𑀝𑁄𑀢𑀺 𑀩𑀮𑀯𑀢𑀺𑀬𑀸 𑀤𑀼𑀓𑁆𑀔𑀯𑁂𑀤𑀦𑀸𑀬 𑀨𑀼𑀝𑁆𑀞𑁄 𑀫𑀼𑀘𑁆𑀙𑀸𑀧𑀭𑁂𑀢𑁄, 𑀢𑁂𑀦 𑀯𑀺𑀧𑁆𑀧𑀮𑀧𑀦𑁆𑀢𑁂𑀦 𑀧𑀘𑁆𑀘𑀓𑁆𑀔𑀸𑀢𑀸𑀧𑀺 𑀅𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺. 𑀫𑀦𑀼𑀲𑁆𑀲𑀚𑀸𑀢𑀺𑀓𑁄 𑀳𑁄𑀢𑀻𑀢𑀺 𑀲𑀪𑀸𑀕𑁄 𑀯𑀸 𑀯𑀺𑀲𑀪𑀸𑀕𑁄 𑀯𑀸 𑀕𑀳𑀝𑁆𑀞𑁄 𑀯𑀸 𑀧𑀩𑁆𑀩𑀚𑀺𑀢𑁄 𑀯𑀸 𑀯𑀺𑀜𑁆𑀜𑀽 𑀬𑁄𑀓𑁄𑀘𑀺 𑀫𑀦𑀼𑀲𑁆𑀲𑁄 𑀳𑁄𑀢𑀺. 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀦𑁆𑀢𑀺 𑀏𑀢𑁆𑀣𑀸𑀤𑀺𑀲𑀤𑁆𑀤𑁂𑀦 𑀔𑀺𑀢𑁆𑀢𑀘𑀺𑀢𑁆𑀢𑀯𑁂𑀤𑀦𑀸𑀝𑁆𑀝𑀤𑁂𑀯𑀢𑀸𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀕𑀳𑀡𑀁. 𑀢𑀢𑁆𑀭 𑀉𑀫𑁆𑀫𑀢𑁆𑀢𑀓𑀔𑀺𑀢𑁆𑀢𑀘𑀺𑀢𑁆𑀢𑀯𑁂𑀤𑀦𑀸𑀝𑁆𑀝𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀲𑀦𑁆𑀢𑀺𑀓𑁂 𑀧𑀘𑁆𑀘𑀓𑁆𑀔𑀸𑀢𑀸𑀧𑀺 𑀅𑀚𑀸𑀦𑀦𑀪𑀸𑀯𑁂𑀦 𑀅𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺. 𑀤𑁂𑀯𑀢𑀸𑀬 𑀧𑀦 𑀲𑀦𑁆𑀢𑀺𑀓𑁂 𑀅𑀢𑀺𑀔𑀺𑀧𑁆𑀧𑀁 𑀚𑀸𑀦𑀦𑀪𑀸𑀯𑁂𑀦. 𑀤𑁂𑀯𑀢𑀸 𑀦𑀸𑀫 𑀫𑀳𑀸𑀧𑀜𑁆𑀜𑀸 𑀢𑀺𑀳𑁂𑀢𑀼𑀓𑀧𑁆𑀧𑀝𑀺𑀲𑀦𑁆𑀥𑀺𑀓𑀸 𑀅𑀢𑀺𑀔𑀺𑀧𑁆𑀧𑀁 𑀚𑀸𑀦𑀦𑁆𑀢𑀺, 𑀘𑀺𑀢𑁆𑀢𑀜𑁆𑀘 𑀦𑀸𑀫𑁂𑀢𑀁 𑀮𑀳𑀼𑀧𑀭𑀺𑀯𑀢𑁆𑀢𑀁, 𑀢𑀲𑁆𑀫𑀸 ‘‘𑀘𑀺𑀢𑁆𑀢𑀮𑀳𑀼𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀘𑀺𑀢𑁆𑀢𑀯𑀲𑁂𑀦𑁂𑀯 𑀫𑀸 𑀅𑀢𑀺𑀔𑀺𑀧𑁆𑀧𑀁 𑀯𑀺𑀦𑀸𑀲𑁄 𑀅𑀳𑁄𑀲𑀻’’𑀢𑀺 𑀤𑁂𑀯𑀢𑀸𑀬 𑀲𑀦𑁆𑀢𑀺𑀓𑁂 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀧𑀝𑀺𑀓𑁆𑀔𑀺𑀧𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦 𑀘 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀁 𑀅𑀜𑁆𑀜𑀢𑀭𑁄’’𑀢𑀺. 𑀤𑀽𑀢𑁂𑀦 𑀯𑀸𑀢𑀺 ‘‘𑀫𑀫 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀪𑀸𑀯𑀁 𑀓𑀣𑁂𑀳𑀻’’𑀢𑀺 𑀫𑀼𑀔𑀲𑀸𑀲𑀦𑀯𑀲𑁂𑀦 𑀤𑀽𑀢𑁂𑀦 𑀯𑀸. 𑀧𑀡𑁆𑀡𑁂𑀦 𑀯𑀸𑀢𑀺 𑀧𑀡𑁆𑀡𑁂 𑀮𑀺𑀔𑀺𑀢𑁆𑀯𑀸 𑀧𑀳𑀺𑀡𑀯𑀲𑁂𑀦 𑀧𑀡𑁆𑀡𑁂𑀦 𑀯𑀸.

𑀲𑀘𑁂 𑀢𑁂 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀪𑀸𑀯𑀁 𑀚𑀸𑀦𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀯𑀚𑁆𑀚𑀦𑀲𑀫𑀬𑁂𑀢𑀺 𑀅𑀢𑁆𑀣𑀸𑀪𑁄𑀕𑀲𑀫𑀬𑁂. 𑀇𑀫𑀺𑀦𑀸 𑀢𑀁 𑀔𑀡𑀁𑀬𑁂𑀯 𑀧𑀦 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀤𑀼𑀚𑁆𑀚𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀯𑀘𑀦𑀸𑀦𑀦𑁆𑀢𑀭𑀫𑁂𑀯𑀸𑀢𑀺 𑀯𑀘𑀦𑀲𑁆𑀲 𑀅𑀦𑀦𑁆𑀢𑀭𑀫𑁂𑀯, 𑀆𑀯𑀚𑁆𑀚𑀦𑀲𑀫𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀏𑀯-𑀲𑀤𑁆𑀤𑁂𑀦 𑀧𑀦 𑀘𑀺𑀭𑁂𑀦 𑀚𑀸𑀦𑀦𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀉𑀓𑁆𑀓𑀡𑁆𑀞𑀺𑀢𑁄𑀢𑀺 𑀅𑀦𑀪𑀺𑀭𑀢𑀺𑀬𑀸 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀓𑀺𑀘𑁆𑀙𑀚𑀻𑀯𑀺𑀓𑀁 𑀧𑀢𑁆𑀢𑁄. 𑀅𑀣 𑀯𑀸 ‘‘𑀅𑀚𑁆𑀚 𑀬𑀸𑀫𑀺, 𑀲𑁆𑀯𑁂 𑀬𑀸𑀫𑀺, 𑀇𑀢𑁄 𑀬𑀸𑀫𑀺, 𑀏𑀢𑁆𑀣 𑀬𑀸𑀫𑀻’’𑀢𑀺 𑀉𑀤𑁆𑀥𑀁 𑀓𑀡𑁆𑀞𑀁 𑀓𑀢𑁆𑀯𑀸 𑀯𑀺𑀳𑀭𑀫𑀸𑀦𑁄 𑀯𑀺𑀓𑁆𑀔𑀺𑀢𑁆𑀢𑁄, 𑀅𑀦𑁂𑀓𑀕𑁆𑀕𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀜𑁆𑀘 ‘‘𑀅𑀦𑀪𑀺𑀭𑀢𑁄 𑀲𑀸𑀫𑀜𑁆𑀜𑀸 𑀘𑀯𑀺𑀢𑀼𑀓𑀸𑀫𑁄’’𑀢𑀺𑀆𑀤𑀻𑀦𑀁 (𑀧𑀸𑀭𑀸. 𑁪𑁫) 𑀉𑀧𑀮𑀓𑁆𑀔𑀡𑀁. 𑀬𑁂𑀦 𑀓𑁂𑀦𑀘𑀺…𑀧𑁂… 𑀚𑀸𑀦𑀦𑁆𑀢𑀻𑀢𑀺 𑀲𑀘𑁂 𑀢𑁂‘‘𑀉𑀓𑁆𑀓𑀡𑁆𑀞𑀺𑀢𑁄’’𑀢𑀺 𑀯𑀸 ‘‘𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑁂𑀢𑀻’’𑀢𑀺 𑀯𑀸 ‘‘𑀅𑀦𑀪𑀺𑀭𑀢𑁄’’𑀢𑀺 𑀯𑀸 ‘‘𑀲𑀸𑀫𑀜𑁆𑀜𑀸 𑀘𑀯𑀺𑀢𑀼𑀓𑀸𑀫𑁄’’𑀢𑀺 𑀯𑀸 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀪𑀸𑀯𑀁 𑀚𑀸𑀦𑀦𑁆𑀢𑀺. 𑀇𑀤𑀜𑁆𑀳𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀜𑁆𑀘 𑀉𑀧𑀭𑀺 𑀅𑀪𑀽𑀢𑀸𑀭𑁄𑀘𑀦𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀅𑀢𑁆𑀢𑀓𑀸𑀫𑀤𑀼𑀝𑁆𑀞𑀤𑁄𑀲𑀪𑀽𑀢𑀸𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀸𑀦𑀺 𑀘 𑀏𑀓𑀧𑀭𑀺𑀘𑁆𑀙𑁂𑀤𑀸𑀦𑀺, 𑀆𑀯𑀚𑁆𑀚𑀦𑀲𑀫𑀬𑁂 𑀜𑀸𑀢𑁂 𑀏𑀯 𑀲𑀻𑀲𑀁 𑀏𑀦𑁆𑀢𑀺. ‘‘𑀓𑀺𑀁 𑀅𑀬𑀁 𑀪𑀡𑀢𑀻’’𑀢𑀺 𑀓𑀗𑁆𑀔𑀢𑀸 𑀘𑀺𑀭𑁂𑀦 𑀜𑀸𑀢𑁂 𑀲𑀻𑀲𑀁 𑀦 𑀏𑀦𑁆𑀢𑀺. 𑀢𑁂𑀦𑀸𑀳 ‘‘𑀅𑀣 𑀅𑀧𑀭𑀪𑀸𑀕𑁂’’𑀢𑀺𑀆𑀤𑀺. 𑀅𑀣 𑀤𑁆𑀯𑀺𑀦𑁆𑀦𑀁 𑀞𑀺𑀢𑀝𑁆𑀞𑀸𑀦𑁂 𑀤𑁆𑀯𑀺𑀦𑁆𑀦𑀫𑁆𑀧𑀺 𑀦𑀺𑀬𑀫𑁂𑀢𑁆𑀯𑀸 ‘‘𑀏𑀢𑁂𑀲𑀁 𑀆𑀭𑁄𑀘𑁂𑀫𑀻’’𑀢𑀺 𑀯𑀤𑀢𑀺, 𑀢𑁂𑀲𑀼 𑀏𑀓𑀲𑁆𑀫𑀺𑀁 𑀚𑀸𑀦𑀦𑁆𑀢𑁂𑀧𑀺 𑀤𑁆𑀯𑀻𑀲𑀼 𑀚𑀸𑀦𑀦𑁆𑀢𑁂𑀲𑀼𑀧𑀺 𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺 𑀲𑀺𑀓𑁆𑀔𑀸. 𑀏𑀯𑀁 𑀲𑀫𑁆𑀩𑀳𑀼𑀮𑁂𑀲𑀼𑀧𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀢𑀲𑁆𑀲 𑀯𑀘𑀦𑀸𑀦𑀦𑁆𑀢𑀭’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀦 𑀦𑀬𑁂𑀦. 𑀬𑁄 𑀓𑁄𑀘𑀺 𑀫𑀦𑀼𑀲𑁆𑀲𑀚𑀸𑀢𑀺𑀓𑁄𑀢𑀺 𑀅𑀦𑁆𑀢𑀫𑀲𑁄 𑀦𑀯𑀓𑀫𑁆𑀫𑀺𑀓𑀁 𑀉𑀧𑀸𑀤𑀸𑀬 𑀬𑁄 𑀓𑁄𑀘𑀺 𑀫𑀦𑀼𑀲𑁆𑀲𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑁋

‘‘𑀲𑀘𑁂 𑀧𑀦 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀲𑀪𑀸𑀕𑁂 𑀪𑀺𑀓𑁆𑀔𑀽 𑀧𑀭𑀺𑀲𑀗𑁆𑀓𑀫𑀸𑀦𑁄 ‘𑀬𑁄 𑀓𑁄𑀘𑀺 𑀚𑀸𑀦𑀸𑀢𑀽’𑀢𑀺 𑀉𑀘𑁆𑀘𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑁄 ‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’𑀢𑀺 𑀯𑀤𑀢𑀺, 𑀢𑀜𑁆𑀘 𑀅𑀯𑀺𑀤𑀽𑀭𑁂 𑀞𑀺𑀢𑁄 𑀦𑀯𑀓𑀫𑁆𑀫𑀺𑀓𑁄 𑀯𑀸 𑀅𑀜𑁆𑀜𑁄 𑀯𑀸 𑀲𑀫𑀬𑀜𑁆𑀜𑀽 𑀧𑀼𑀭𑀺𑀲𑁄 𑀲𑀼𑀢𑁆𑀯𑀸 ‘𑀉𑀓𑁆𑀓𑀡𑁆𑀞𑀺𑀢𑁄 𑀅𑀬𑀁 𑀲𑀫𑀡𑁄 𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑁂𑀢𑀺, 𑀲𑀸𑀲𑀦𑀢𑁄 𑀘𑀼𑀢𑁄’𑀢𑀺 𑀚𑀸𑀦𑀸𑀢𑀺, 𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺 𑀲𑀺𑀓𑁆𑀔𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁫𑁧).

𑀲𑀘𑁂 𑀯𑀘𑀦𑀢𑁆𑀣𑀁 𑀜𑀢𑁆𑀯𑀸𑀧𑀺 ‘‘𑀅𑀬𑀁 𑀉𑀓𑁆𑀓𑀡𑁆𑀞𑀺𑀢𑁄’’𑀢𑀺 𑀯𑀸 ‘‘𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑁂𑀢𑀻’’𑀢𑀺 𑀯𑀸 𑀦 𑀚𑀸𑀦𑀸𑀢𑀺, 𑀅𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺 𑀲𑀺𑀓𑁆𑀔𑀸. 𑀲𑀘𑁂 𑀧𑀦 𑀯𑀘𑀦𑀢𑁆𑀣𑀁 𑀅𑀚𑀸𑀦𑀺𑀢𑁆𑀯𑀸𑀧𑀺 ‘‘𑀉𑀓𑁆𑀓𑀡𑁆𑀞𑀺𑀢𑁄’’𑀢𑀺 𑀯𑀸 ‘‘𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑁂𑀢𑀻’’𑀢𑀺 𑀯𑀸 𑀚𑀸𑀦𑀸𑀢𑀺, 𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺 𑀲𑀺𑀓𑁆𑀔𑀸. 𑀤𑀯𑀸𑀬𑀧𑀻𑀢𑀺 𑀓𑀻𑀴𑀸𑀥𑀺𑀧𑁆𑀧𑀸𑀬𑁂𑀦𑀧𑀺. 𑀘𑀺𑀢𑁆𑀢𑀸𑀤𑀻𑀦𑀁 𑀯𑀸 𑀯𑀲𑁂𑀦𑀸𑀢𑀺 𑀘𑀺𑀢𑁆𑀢𑀸𑀤𑀻𑀦𑀁 𑀯𑀸 𑀙𑀴𑀗𑁆𑀕𑀸𑀦𑀁 𑀯𑀲𑁂𑀦. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀘𑀺𑀢𑁆𑀢𑀁 𑀔𑁂𑀢𑁆𑀢𑀜𑁆𑀘 𑀓𑀸𑀮𑁄 𑀘, 𑀧𑀬𑁄𑀕𑁄 𑀧𑀼𑀕𑁆𑀕𑀮𑁄 𑀢𑀣𑀸;

𑀯𑀺𑀚𑀸𑀦𑀦𑀦𑁆𑀢𑀺 𑀲𑀺𑀓𑁆𑀔𑀸𑀬, 𑀧𑀘𑁆𑀘𑀓𑁆𑀔𑀸𑀦𑀁 𑀙𑀴𑀗𑁆𑀕𑀺𑀓’’𑀦𑁆𑀢𑀺.

𑀲𑀩𑁆𑀩𑀲𑁄 𑀯𑀸 𑀧𑀦 𑀅𑀧𑀘𑁆𑀘𑀓𑁆𑀔𑀸𑀦𑁂𑀦𑀸𑀢𑀺 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺𑀆𑀤𑀻𑀲𑀼 𑀬𑁂𑀦 𑀬𑁂𑀦 𑀧𑀭𑀺𑀬𑀸𑀬𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀢𑀢𑁄 𑀏𑀓𑀲𑁆𑀲𑀧𑀺 𑀧𑀘𑁆𑀘𑀓𑁆𑀔𑀸𑀦𑀲𑁆𑀲 𑀅𑀪𑀸𑀯𑁂𑀦. 𑀇𑀫𑀺𑀦𑀸 𑀧𑀦 ‘‘𑀇𑀤𑀁 𑀧𑀤𑀁 𑀲𑀸𑀯𑁂𑀲𑁆𑀲𑀸𑀫𑀺, 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀬𑀲𑁆𑀲 𑀳𑀺 𑀏𑀯𑀭𑀽𑀧𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀦𑀢𑁆𑀣𑀺, 𑀲𑁄 𑀲𑀩𑁆𑀩𑀲𑁄 𑀦 𑀧𑀘𑁆𑀘𑀓𑁆𑀔𑀸𑀢𑀺 𑀦𑀸𑀫𑀸𑀢𑀺. 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀲𑁆𑀲𑀸𑀢𑀺 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺𑀆𑀤𑀺𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀲𑁆𑀲. 𑀅𑀢𑁆𑀣𑀪𑀽𑀢𑀁 𑀏𑀓𑀘𑁆𑀘𑀁 𑀤𑀼𑀩𑁆𑀩𑀮𑁆𑀬𑀦𑁆𑀢𑀺 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺, 𑀏𑀯𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀜𑁆𑀘𑁂𑀯 𑀳𑁄𑀢𑀺, 𑀲𑀺𑀓𑁆𑀔𑀸 𑀘 𑀧𑀘𑁆𑀘𑀓𑁆𑀔𑀸𑀢𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁫𑁩) 𑀯𑀼𑀢𑁆𑀢𑁂𑀳𑀺 𑀬𑁂𑀳𑀺 𑀯𑀘𑀦𑁂𑀳𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀜𑁆𑀘𑁂𑀯 𑀳𑁄𑀢𑀺 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀜𑁆𑀘, 𑀢𑀁 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺𑀆𑀤𑀺𑀓𑀁 𑀅𑀢𑁆𑀣𑀪𑀽𑀢𑀁 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸. ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺𑀆𑀤𑀺𑀫𑁆𑀳𑀺 𑀧𑀦 𑀯𑀼𑀢𑁆𑀢𑁂 𑀲𑀺𑀓𑁆𑀔𑀸𑀧𑀭𑀺𑀧𑀽𑀭𑀡𑁂 𑀤𑀼𑀩𑁆𑀩𑀮𑀪𑀸𑀯𑀲𑁆𑀲𑀸𑀧𑀺 𑀕𑀫𑁆𑀬𑀫𑀸𑀦𑀢𑁆𑀢𑀸 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀲𑁆𑀲 𑀇𑀤𑀁 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀁 𑀅𑀢𑁆𑀣𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀘 ‘‘𑀅𑀢𑁆𑀣𑀪𑀽𑀢’’𑀦𑁆𑀢𑀺 𑀇𑀫𑀺𑀦𑀸 ‘‘𑀬𑀦𑁆𑀦𑀽𑀦𑀸𑀳𑀁 𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑁂𑀬𑁆𑀬’’𑀦𑁆𑀢𑀺𑀆𑀤𑀺𑀓𑀁 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀬𑁂𑀦 𑀳𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀜𑁆𑀘𑁂𑀯 𑀳𑁄𑀢𑀺 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀜𑁆𑀘, 𑀢𑀤𑁂𑀯 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀲𑁆𑀲 𑀅𑀢𑁆𑀣𑀪𑀽𑀢𑀁. 𑀬𑁂𑀦 𑀧𑀦 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀫𑁂𑀯 𑀳𑁄𑀢𑀺, 𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁, 𑀦 𑀢𑀁 𑀢𑀲𑁆𑀲 𑀅𑀢𑁆𑀣𑀪𑀽𑀢𑀦𑁆𑀢𑀺.

𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑁂𑀦 𑀲𑀤𑀺𑀲𑀪𑀸𑀯𑀸𑀧𑀢𑁆𑀢𑀺𑀬𑀸 𑀫𑀺𑀣𑀼𑀦𑀸𑀦𑀁 𑀅𑀬𑀦𑁆𑀢𑀺 ‘‘𑀫𑁂𑀣𑀼𑀦𑁄’’𑀢𑀺 𑀥𑀫𑁆𑀫𑁄𑀯 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑁂𑀦𑀸𑀢𑀺 𑀭𑀸𑀕𑀲𑁆𑀲 𑀧𑀭𑀺𑀬𑀼𑀝𑁆𑀞𑀸𑀦𑁂𑀦, 𑀫𑁂𑀣𑀼𑀦𑀭𑀸𑀕𑀲𑁆𑀲 𑀧𑀯𑀢𑁆𑀢𑀺𑀬𑀸 𑀧𑀭𑀺𑀬𑁄𑀦𑀤𑁆𑀥𑀘𑀺𑀢𑁆𑀢𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀥𑀫𑁆𑀫𑁄𑀢𑀺 𑀅𑀚𑁆𑀛𑀸𑀘𑀸𑀭𑁄. ‘‘𑀧𑀮𑀫𑁆𑀩𑀢𑁂 𑀯𑀺𑀮𑀫𑁆𑀩𑀢𑁂’’𑀢𑀺𑀆𑀤𑀻𑀲𑀼 𑀯𑀺𑀬 𑀉𑀧𑀲𑀕𑁆𑀕𑀲𑁆𑀲 𑀓𑁄𑀘𑀺 𑀅𑀢𑁆𑀣𑀯𑀺𑀲𑁂𑀲𑁄 𑀦𑀢𑁆𑀣𑀻𑀢𑀺 𑀆𑀳 ‘‘𑀲𑁂𑀯𑁂𑀬𑁆𑀬𑀸’’𑀢𑀺. 𑀅𑀚𑁆𑀛𑀸𑀧𑀚𑁆𑀚𑁂𑀬𑁆𑀬𑀸𑀢𑀺 𑀅𑀪𑀺𑀪𑀼𑀬𑁆𑀬 𑀧𑀚𑁆𑀚𑁂𑀬𑁆𑀬. 𑀲𑀩𑁆𑀩𑀦𑁆𑀢𑀺𑀫𑁂𑀦𑀸𑀢𑀺 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺…𑀧𑁂… 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀫𑀦𑀼𑀲𑁆𑀲𑀺𑀢𑁆𑀣𑀺𑀦𑀸𑀕𑀕𑀭𑀼𑀴𑀫𑀸𑀡𑀯𑀺𑀓𑀸𑀤𑀻𑀦𑀁 𑀲𑀩𑁆𑀩𑀸𑀲𑀁 𑀅𑀦𑁆𑀢𑀺𑀫𑁂𑀦. 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀸𑀢𑀺 𑀢𑀺𑀭𑀘𑁆𑀙𑀸𑀦𑁂𑀲𑀼 𑀉𑀧𑁆𑀧𑀦𑁆𑀦𑀸𑀬. 𑀢𑁂𑀦𑀸𑀳 ‘‘𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑀸’’𑀢𑀺. 𑀧𑀸𑀭𑀸𑀚𑀺𑀓𑀸𑀬 𑀯𑀢𑁆𑀣𑀼𑀪𑀽𑀢𑀸 𑀏𑀯 𑀘𑁂𑀢𑁆𑀣 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀻 ‘‘𑀢𑀺𑀭𑀘𑁆𑀙𑀸𑀦𑀕𑀢𑀸’’𑀢𑀺 𑀕𑀳𑁂𑀢𑀩𑁆𑀩𑀸, 𑀦 𑀲𑀩𑁆𑀩𑀸. 𑀢𑀢𑁆𑀭𑀸𑀬𑀁 𑀧𑀭𑀺𑀘𑁆𑀙𑁂𑀤𑁄 𑁋

‘‘𑀅𑀧𑀤𑀸𑀦𑀁 𑀅𑀳𑀺𑀫𑀘𑁆𑀙𑀸, 𑀤𑁆𑀯𑀺𑀧𑀤𑀸𑀦𑀜𑁆𑀘 𑀓𑀼𑀓𑁆𑀓𑀼𑀝𑀻;

𑀘𑀢𑀼𑀧𑁆𑀧𑀤𑀸𑀦𑀁 𑀫𑀚𑁆𑀚𑀸𑀭𑀻, 𑀯𑀢𑁆𑀣𑀼 𑀧𑀸𑀭𑀸𑀚𑀺𑀓𑀲𑁆𑀲𑀺𑀫𑀸’’𑀢𑀺. (𑀧𑀸𑀭𑀸. 𑀅𑀝𑁆𑀞. 𑁧.𑁫𑁫)

𑀢𑀢𑁆𑀣 𑀅𑀳𑀺𑀕𑁆𑀕𑀳𑀡𑁂𑀦 𑀲𑀩𑁆𑀩𑀸𑀧𑀺 𑀅𑀚𑀕𑀭𑀕𑁄𑀦𑀲𑀸𑀤𑀺𑀪𑁂𑀤𑀸 𑀤𑀻𑀖𑀚𑀸𑀢𑀺 𑀲𑀗𑁆𑀕𑀳𑀺𑀢𑀸. 𑀢𑀲𑁆𑀫𑀸 𑀤𑀻𑀖𑀚𑀸𑀢𑀻𑀲𑀼 𑀬𑀢𑁆𑀣 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀲𑀓𑁆𑀓𑀸 𑀢𑀺𑀮𑀨𑀮𑀫𑀢𑁆𑀢𑀫𑁆𑀧𑀺 𑀧𑀯𑁂𑀲𑁂𑀢𑀼𑀁, 𑀲𑀸 𑀧𑀸𑀭𑀸𑀚𑀺𑀓𑀯𑀢𑁆𑀣𑀼, 𑀅𑀯𑀲𑁂𑀲𑀸 𑀤𑀼𑀓𑁆𑀓𑀝𑀯𑀢𑁆𑀣𑀽𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀫𑀘𑁆𑀙𑀕𑁆𑀕𑀳𑀡𑁂𑀦 𑀲𑀩𑁆𑀩𑀸𑀧𑀺 𑀫𑀘𑁆𑀙𑀓𑀘𑁆𑀙𑀧𑀫𑀡𑁆𑀟𑀽𑀓𑀸𑀤𑀺𑀪𑁂𑀤𑀸 𑀑𑀤𑀓𑀚𑀸𑀢𑀺 𑀲𑀗𑁆𑀕𑀳𑀺𑀢𑀸. 𑀢𑀢𑁆𑀭𑀸𑀧𑀺 𑀤𑀻𑀖𑀚𑀸𑀢𑀺𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀸𑀭𑀸𑀚𑀺𑀓𑀯𑀢𑁆𑀣𑀼 𑀘 𑀤𑀼𑀓𑁆𑀓𑀝𑀯𑀢𑁆𑀣𑀼 𑀘 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀧𑀢𑀗𑁆𑀕𑀫𑀼𑀔𑀫𑀡𑁆𑀟𑀽𑀓𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑁂𑀲𑀁 𑀫𑀼𑀔𑀲𑀡𑁆𑀞𑀸𑀦𑀁 𑀫𑀳𑀦𑁆𑀢𑀁, 𑀙𑀺𑀤𑁆𑀤𑀁 𑀅𑀧𑁆𑀧𑀓𑀁, 𑀢𑀢𑁆𑀣 𑀧𑀯𑁂𑀲𑀦𑀁 𑀦𑀧𑁆𑀧𑀳𑁄𑀢𑀺, 𑀫𑀼𑀔𑀲𑀡𑁆𑀞𑀸𑀦𑀁 𑀧𑀦 𑀯𑀡𑀲𑀗𑁆𑀔𑁂𑀧𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀢𑀁 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀽𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀼𑀓𑁆𑀓𑀼𑀝𑀺𑀕𑁆𑀕𑀳𑀡𑁂𑀦 𑀲𑀩𑁆𑀩𑀸𑀧𑀺 𑀓𑀸𑀓𑀓𑀧𑁄𑀢𑀸𑀤𑀺𑀪𑁂𑀤𑀸 𑀧𑀓𑁆𑀔𑀺𑀚𑀸𑀢𑀺 𑀲𑀗𑁆𑀕𑀳𑀺𑀢𑀸. 𑀢𑀢𑁆𑀭𑀸𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀸𑀭𑀸𑀚𑀺𑀓𑀯𑀢𑁆𑀣𑀼 𑀘 𑀤𑀼𑀓𑁆𑀓𑀝𑀯𑀢𑁆𑀣𑀼 𑀘 𑀯𑁂𑀤𑀺𑀢𑀩𑁆𑀩𑀁. 𑀫𑀚𑁆𑀚𑀸𑀭𑀺𑀕𑁆𑀕𑀳𑀡𑁂𑀦 𑀲𑀩𑁆𑀩𑀸𑀧𑀺 𑀭𑀼𑀓𑁆𑀔𑀲𑀼𑀦𑀔𑀫𑀗𑁆𑀕𑀼𑀲𑀕𑁄𑀥𑀸𑀤𑀺𑀪𑁂𑀤𑀸 𑀘𑀢𑀼𑀧𑁆𑀧𑀤𑀚𑀸𑀢𑀺 𑀲𑀗𑁆𑀕𑀳𑀺𑀢𑀸. 𑀢𑀢𑁆𑀭𑀸𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀸𑀭𑀸𑀚𑀺𑀓𑀯𑀢𑁆𑀣𑀼 𑀘 𑀤𑀼𑀓𑁆𑀓𑀝𑀯𑀢𑁆𑀣𑀼 𑀘 𑀯𑁂𑀤𑀺𑀢𑀩𑁆𑀩𑀁.

𑀧𑀸𑀭𑀸𑀚𑀺𑀓𑁄 𑀳𑁄𑀢𑀻𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁫𑁫) 𑀧𑀭𑀸𑀚𑀺𑀢𑁄 𑀳𑁄𑀢𑀺 𑀧𑀭𑀸𑀚𑀬𑀁 𑀅𑀧𑀦𑁆𑀦𑁄. 𑀅𑀬𑀜𑁆𑀳𑀺 𑀧𑀸𑀭𑀸𑀚𑀺𑀓𑀲𑀤𑁆𑀤𑁄 𑀲𑀺𑀓𑁆𑀔𑀸𑀧𑀤𑀸𑀧𑀢𑁆𑀢𑀺𑀧𑀼𑀕𑁆𑀕𑀮𑁂𑀲𑀼 𑀯𑀢𑁆𑀢𑀢𑀺. 𑀢𑀢𑁆𑀣 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀆𑀦𑀦𑁆𑀤, 𑀅𑀦𑀯𑀓𑀸𑀲𑁄, 𑀬𑀁 𑀢𑀣𑀸𑀕𑀢𑁄 𑀯𑀚𑁆𑀚𑀻𑀦𑀁 𑀯𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸𑀦𑀁 𑀯𑀸 𑀓𑀸𑀭𑀡𑀸 𑀲𑀸𑀯𑀓𑀸𑀦𑀁 𑀧𑀸𑀭𑀸𑀚𑀺𑀓𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀲𑀫𑀽𑀳𑀦𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁪𑁩) 𑀏𑀯𑀁 𑀲𑀺𑀓𑁆𑀔𑀸𑀧𑀤𑁂 𑀯𑀢𑁆𑀢𑀫𑀸𑀦𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄 𑀧𑀸𑀭𑀸𑀚𑀺𑀓’’𑀦𑁆𑀢𑀺 (𑀧𑀸𑀭𑀸. 𑁬𑁭) 𑀏𑀯𑀁 𑀆𑀧𑀢𑁆𑀢𑀺𑀬𑀁. ‘‘𑀦 𑀫𑀬𑀁 𑀧𑀸𑀭𑀸𑀚𑀺𑀓𑀸, 𑀬𑁄 𑀅𑀯𑀳𑀝𑁄, 𑀲𑁄 𑀧𑀸𑀭𑀸𑀚𑀺𑀓𑁄’’𑀢𑀺 (𑀧𑀸𑀭𑀸. 𑁧𑁫𑁫) 𑀏𑀯𑀁 𑀧𑀼𑀕𑁆𑀕𑀮𑁂 𑀯𑀢𑁆𑀢𑀫𑀸𑀦𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦 𑀅𑀦𑀼𑀤𑁆𑀥𑀁𑀲𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁩𑁮𑁪) 𑀧𑀦 𑀥𑀫𑁆𑀫𑁂 𑀯𑀢𑁆𑀢𑀢𑀻𑀢𑀺 𑀯𑀤𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀢𑀢𑁆𑀣 ‘‘𑀥𑀫𑁆𑀫𑁄’’𑀢𑀺 𑀓𑀢𑁆𑀣𑀘𑀺 𑀆𑀧𑀢𑁆𑀢𑀺, 𑀓𑀢𑁆𑀣𑀘𑀺 𑀲𑀺𑀓𑁆𑀔𑀸𑀧𑀤𑀫𑁂𑀯 𑀅𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 𑀲𑁄 𑀯𑀺𑀲𑀼𑀁 𑀦 𑀯𑀢𑁆𑀢𑀩𑁆𑀩𑁄. 𑀢𑀢𑁆𑀣 𑀲𑀺𑀓𑁆𑀔𑀸𑀧𑀤𑀁 𑀬𑁄 𑀢𑀁 𑀅𑀢𑀺𑀓𑁆𑀓𑀫𑀢𑀺, 𑀢𑀁 𑀧𑀭𑀸𑀚𑁂𑀢𑀺, 𑀢𑀲𑁆𑀫𑀸 ‘‘𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀆𑀧𑀢𑁆𑀢𑀺 𑀧𑀦 𑀬𑁄 𑀦𑀁 𑀅𑀚𑁆𑀛𑀸𑀧𑀚𑁆𑀚𑀢𑀺, 𑀢𑀁 𑀧𑀭𑀸𑀚𑁂𑀢𑀺, 𑀢𑀲𑁆𑀫𑀸 ‘‘𑀧𑀸𑀭𑀸𑀚𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀺. 𑀧𑀼𑀕𑁆𑀕𑀮𑁄 𑀬𑀲𑁆𑀫𑀸 𑀧𑀭𑀸𑀚𑀺𑀢𑁄 𑀧𑀭𑀸𑀚𑀬𑀫𑀸𑀧𑀦𑁆𑀦𑁄, 𑀢𑀲𑁆𑀫𑀸 ‘‘𑀧𑀸𑀭𑀸𑀚𑀺𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀧𑀼𑀕𑁆𑀕𑀮𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀧𑀸𑀭𑀸𑀚𑀺𑀓𑁄 𑀳𑁄𑀢𑀻’’𑀢𑀺𑀆𑀤𑀺. 𑀇𑀫𑀺𑀦𑀸𑀧𑀺 𑀇𑀤𑀁 𑀤𑀲𑁆𑀲𑁂𑀢𑀺 𑁋 ‘‘𑀧𑀭𑀸𑀚𑀺𑀢𑀲𑀤𑁆𑀤𑁂 𑀉𑀧𑀲𑀕𑁆𑀕𑀲𑁆𑀲 𑀯𑀼𑀤𑁆𑀥𑀺𑀁 𑀓𑀢𑁆𑀯𑀸, 𑀢-𑀓𑀸𑀭𑀲𑁆𑀲 𑀘 𑀓-𑀓𑀸𑀭𑀁 𑀓𑀢𑁆𑀯𑀸 𑀧𑀸𑀭𑀸𑀚𑀺𑀓𑁄 𑀳𑁄𑀢𑀻𑀢𑀺 𑀦𑀺𑀤𑁆𑀤𑀺𑀝𑁆𑀞𑁄’’𑀢𑀺.

𑀅𑀧𑀮𑁄𑀓𑀦𑀸𑀤𑀺 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀲𑀗𑁆𑀖𑀓𑀫𑁆𑀫𑀁 𑀲𑀻𑀫𑀸𑀧𑀭𑀺𑀘𑁆𑀙𑀺𑀦𑁆𑀦𑁂𑀳𑀺 𑀧𑀓𑀢𑀢𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀏𑀓𑀢𑁄 𑀓𑀢𑁆𑀢𑀩𑁆𑀩𑀢𑁆𑀢𑀸 𑀏𑀓𑀓𑀫𑁆𑀫𑀁 𑀦𑀸𑀫. 𑀆𑀤𑀺𑀲𑀤𑁆𑀤𑁂𑀦 𑀏𑀓𑀼𑀤𑁆𑀤𑁂𑀲𑀲𑀫𑀲𑀺𑀓𑁆𑀔𑀢𑀸𑀦𑀁 𑀕𑀳𑀡𑀁. 𑀢𑀢𑁆𑀣 𑀧𑀜𑁆𑀘𑀯𑀺𑀥𑁄𑀧𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀏𑀓𑀢𑁄 𑀉𑀤𑁆𑀤𑀺𑀲𑀺𑀢𑀩𑁆𑀩𑀢𑁆𑀢𑀸 𑀏𑀓𑀼𑀤𑁆𑀤𑁂𑀲𑁄 𑀦𑀸𑀫. 𑀦𑀳𑀸𑀧𑀺𑀢𑀧𑀼𑀩𑁆𑀩𑀓𑀸𑀤𑀻𑀦𑀁 𑀯𑀺𑀬 𑀑𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀲𑀩𑁆𑀩𑀫𑁆𑀧𑀺 𑀲𑀺𑀓𑁆𑀔𑀸𑀧𑀤𑀁 𑀲𑀩𑁆𑀩𑁂𑀳𑀺𑀧𑀺 𑀮𑀚𑁆𑀚𑀺𑀧𑀼𑀕𑁆𑀕𑀮𑁂𑀳𑀺 𑀲𑀫𑀁 𑀲𑀺𑀓𑁆𑀔𑀺𑀢𑀩𑁆𑀩𑀪𑀸𑀯𑀢𑁄 𑀲𑀫𑀲𑀺𑀓𑁆𑀔𑀢𑀸 𑀦𑀸𑀫. 𑀬𑀲𑁆𑀫𑀸 𑀲𑀩𑁆𑀩𑁂𑀧𑀺 𑀮𑀚𑁆𑀚𑀺𑀦𑁄 𑀏𑀢𑁂𑀲𑀼 𑀏𑀓𑀓𑀫𑁆𑀫𑀸𑀤𑀻𑀲𑀼 𑀲𑀳 𑀯𑀲𑀦𑁆𑀢𑀺, 𑀦 𑀏𑀓𑁄𑀧𑀺 𑀢𑀢𑁄 𑀩𑀳𑀺𑀤𑁆𑀥𑀸 𑀲𑀦𑁆𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀢𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀕𑀳𑁂𑀢𑁆𑀯𑀸 𑀏𑀓𑀓𑀫𑁆𑀫𑀸𑀤𑀺𑀓𑁄 𑀢𑀺𑀯𑀺𑀥𑁄𑀧𑀺 𑀲𑀁𑀯𑀸𑀲𑁄 𑀦𑀸𑀫𑀸𑀢𑀺 𑀆𑀳 ‘‘𑀲𑁄 𑀘 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀲𑀁𑀯𑀸𑀲𑁄 𑀢𑁂𑀦 𑀧𑀼𑀕𑁆𑀕𑀮𑁂𑀦 𑀲𑀤𑁆𑀥𑀺𑀁 𑀦𑀢𑁆𑀣𑀺, 𑀢𑁂𑀦 𑀓𑀸𑀭𑀡𑁂𑀦 𑀲𑁄 𑀧𑀸𑀭𑀸𑀚𑀺𑀓𑁄 𑀧𑀼𑀕𑁆𑀕𑀮𑁄 ‘𑀅𑀲𑀁𑀯𑀸𑀲𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁫𑁫).

𑀇𑀤𑀸𑀦𑀺 𑀬𑀲𑁆𑀫𑀸 𑀦 𑀓𑁂𑀯𑀮𑀁 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀏𑀯 𑀦𑀺𑀫𑀺𑀢𑁆𑀢𑀁 𑀧𑀸𑀭𑀸𑀚𑀺𑀓𑀯𑀢𑁆𑀣𑀼, 𑀅𑀣 𑀔𑁄 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀻𑀦𑀫𑁆𑀧𑀺. 𑀦 𑀘 𑀇𑀢𑁆𑀣𑀺𑀬𑀸 𑀏𑀯. 𑀅𑀣 𑀔𑁄 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀧𑀡𑁆𑀟𑀓𑀧𑀼𑀭𑀺𑀲𑀸𑀦𑀫𑁆𑀧𑀺, 𑀢𑀲𑁆𑀫𑀸 𑀢𑁂 𑀲𑀢𑁆𑀢𑁂, 𑀢𑁂𑀲𑀜𑁆𑀘 𑀬𑀁 𑀬𑀁 𑀦𑀺𑀫𑀺𑀢𑁆𑀢𑀁 𑀯𑀢𑁆𑀣𑀼 𑀳𑁄𑀢𑀺, 𑀢𑀁 𑀢𑀁 𑀦𑀺𑀫𑀺𑀢𑁆𑀢𑀁, 𑀢𑀢𑁆𑀣 𑀘 𑀬𑀣𑀸 𑀧𑀝𑀺𑀲𑁂𑀯𑀦𑁆𑀢𑁄 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺, 𑀢𑀜𑁆𑀘 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀁 𑀧𑀦𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂. 𑀢𑁂𑀲𑀽𑀢𑀺 𑀬𑁂 𑀢𑀺𑀁𑀲𑀫𑀕𑁆𑀕𑀸 𑀯𑀼𑀢𑁆𑀢𑀸, 𑀢𑁂𑀲𑀼. 𑀅𑀢𑁆𑀢𑀦𑁄 𑀯𑀸𑀢𑀺 𑀮𑀫𑁆𑀩𑀺𑀫𑀼𑀤𑀼𑀧𑀺𑀝𑁆𑀞𑀺𑀓𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀦𑁆𑀣𑀢𑀲𑁆𑀲 𑀯𑀸𑀢𑀺 𑀬𑁂𑀦 𑀓𑁂𑀦𑀘𑀺 𑀯𑀢𑁆𑀣𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀯𑀸𑀓𑀧𑀝𑁆𑀝𑁂𑀦 𑀯𑀸 𑀘𑀫𑁆𑀫𑁂𑀦 𑀯𑀸 𑀢𑀺𑀧𑀼𑀲𑀻𑀲𑀸𑀤𑀻𑀦𑀁 𑀧𑀝𑁆𑀝𑁂𑀦 𑀯𑀸 𑀧𑀮𑀺𑀯𑁂𑀞𑁂𑀢𑁆𑀯𑀸, 𑀅𑀦𑁆𑀢𑁄 𑀯𑀸 𑀧𑀯𑁂𑀲𑁂𑀢𑁆𑀯𑀸 𑀧𑀝𑀺𑀘𑁆𑀙𑀦𑁆𑀦𑀲𑁆𑀲. 𑀅𑀓𑁆𑀔𑀸𑀬𑀺𑀢𑀲𑁆𑀲 𑀯𑀸𑀢𑀺 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀻𑀳𑀺 𑀅𑀓𑁆𑀔𑀸𑀤𑀺𑀢𑀲𑁆𑀲. 𑀬𑁂𑀪𑀼𑀬𑁆𑀬𑁂𑀦 𑀅𑀓𑁆𑀔𑀸𑀬𑀺𑀢𑀲𑁆𑀲𑀸𑀢𑀺 𑀬𑀸𑀯 𑀉𑀧𑀟𑁆𑀠𑀓𑁆𑀔𑀸𑀬𑀺𑀢𑁄 𑀦𑀸𑀫 𑀦 𑀳𑁄𑀢𑀺, 𑀏𑀯𑀁 𑀅𑀓𑁆𑀔𑀸𑀬𑀺𑀢𑀲𑁆𑀲. 𑀅𑀮𑁆𑀮𑁄𑀓𑀸𑀲𑁂𑀢𑀺 𑀢𑀺𑀦𑁆𑀢𑁄𑀓𑀸𑀲𑁂. 𑀲𑀦𑁆𑀣𑀢𑀦𑁆𑀢𑀺 𑀢𑁂𑀲𑀁𑀬𑁂𑀯 𑀯𑀢𑁆𑀣𑀸𑀤𑀻𑀦𑀁 𑀬𑁂𑀦 𑀓𑁂𑀦𑀘𑀺 𑀧𑀝𑀺𑀘𑁆𑀙𑀦𑁆𑀦𑀁. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀦 𑀳𑁂𑀢𑁆𑀣 𑀅𑀦𑀼𑀧𑀸𑀤𑀺𑀦𑁆𑀦𑀓𑀁 𑀅𑀦𑀼𑀧𑀸𑀤𑀺𑀦𑁆𑀦𑀓𑁂𑀦 𑀙𑀼𑀧𑀢𑀺, 𑀫𑀼𑀢𑁆𑀢𑀺 𑀅𑀢𑁆𑀣𑀺, 𑀅𑀣 𑀔𑁄 𑀉𑀧𑀸𑀤𑀺𑀦𑁆𑀦𑀓𑁂𑀦 𑀯𑀸 𑀅𑀦𑀼𑀧𑀸𑀤𑀺𑀦𑁆𑀦𑀓𑀁 𑀖𑀝𑁆𑀝𑀺𑀬𑀢𑀼, 𑀅𑀦𑀼𑀧𑀸𑀤𑀺𑀦𑁆𑀦𑀓𑁂𑀦 𑀯𑀸 𑀉𑀧𑀸𑀤𑀺𑀦𑁆𑀦𑀓𑀁, 𑀅𑀦𑀼𑀧𑀸𑀤𑀺𑀦𑁆𑀦𑀓𑁂𑀦 𑀯𑀸 𑀅𑀦𑀼𑀧𑀸𑀤𑀺𑀦𑁆𑀦𑀓𑀁, 𑀉𑀧𑀸𑀤𑀺𑀦𑁆𑀦𑀓𑁂𑀦 𑀯𑀸 𑀉𑀧𑀸𑀤𑀺𑀦𑁆𑀦𑀓𑀁. 𑀲𑀘𑁂 𑀬𑀢𑁆𑀢𑀓𑁂 𑀧𑀯𑀺𑀝𑁆𑀞𑁂 𑀧𑀸𑀭𑀸𑀚𑀺𑀓𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀢𑀓𑀁 𑀲𑁂𑀯𑀦𑀘𑀺𑀢𑁆𑀢𑁂𑀦 𑀧𑀯𑁂𑀲𑁂𑀢𑀺, 𑀲𑀩𑁆𑀩𑀢𑁆𑀣𑀸𑀬𑀁 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀦𑀸𑀫 𑀳𑁄𑀢𑀻𑀢𑀺.

𑀏𑀯𑀁 𑀲𑁂𑀯𑀦𑀘𑀺𑀢𑁆𑀢𑁂𑀦𑁂𑀯 𑀧𑀯𑁂𑀲𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀢𑀁 𑀧𑀯𑁂𑀲𑀦𑀁 𑀦𑀸𑀫 𑀦 𑀓𑁂𑀯𑀮𑀁 𑀅𑀢𑁆𑀢𑀽𑀧𑀓𑁆𑀓𑀫𑁂𑀦𑁂𑀯, 𑀧𑀭𑀽𑀧𑀓𑁆𑀓𑀫𑁂𑀦𑀸𑀧𑀺 𑀳𑁄𑀢𑀺. 𑀢𑀢𑁆𑀭𑀸𑀧𑀺 𑀲𑀸𑀤𑀺𑀬𑀦𑁆𑀢𑀲𑁆𑀲𑁂𑀯 𑀆𑀧𑀢𑁆𑀢𑀺 𑀧𑀝𑀺𑀲𑁂𑀯𑀦𑀘𑀺𑀢𑁆𑀢𑀲𑀫𑀗𑁆𑀕𑀺𑀲𑁆𑀲, 𑀦 𑀇𑀢𑀭𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀭𑁂𑀦 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀭𑁂𑀦𑀸𑀢𑀺 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸𑀤𑀺𑀦𑀸 𑀬𑁂𑀦 𑀓𑁂𑀦𑀘𑀺 𑀅𑀜𑁆𑀜𑁂𑀦. 𑀧𑀯𑁂𑀲𑀦𑀧𑀯𑀺𑀝𑁆𑀞𑀝𑁆𑀞𑀺𑀢𑀉𑀤𑁆𑀥𑀭𑀡𑁂𑀲𑀽𑀢𑀺 𑀏𑀢𑁆𑀣 𑀅𑀕𑁆𑀕𑀢𑁄 (𑀲𑀸𑀭𑀢𑁆𑀣. 𑀝𑀻. 𑁨.𑁫𑁮) 𑀬𑀸𑀯 𑀫𑀽𑀮𑀸 𑀧𑀯𑁂𑀲𑀦𑀁 𑀧𑀯𑁂𑀲𑀦𑀁 𑀦𑀸𑀫. 𑀅𑀗𑁆𑀕𑀚𑀸𑀢𑀲𑁆𑀲 𑀬𑀢𑁆𑀢𑀓𑀁 𑀞𑀸𑀦𑀁 𑀧𑀯𑁂𑀲𑀦𑀸𑀭𑀳𑀁, 𑀢𑀢𑁆𑀢𑀓𑀁 𑀅𑀦𑀯𑀲𑁂𑀲𑀢𑁄 𑀧𑀯𑀺𑀝𑁆𑀞𑀁 𑀧𑀯𑀺𑀝𑁆𑀞𑀁 𑀦𑀸𑀫. 𑀏𑀯𑀁 𑀧𑀯𑀺𑀝𑁆𑀞𑀲𑁆𑀲 𑀉𑀤𑁆𑀥𑀭𑀡𑀸𑀭𑀫𑁆𑀪𑀢𑁄 𑀅𑀦𑁆𑀢𑀭𑀸 𑀞𑀺𑀢𑀓𑀸𑀮𑁄 𑀞𑀺𑀢𑀁 𑀦𑀸𑀫. 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀧𑀦 𑀫𑀸𑀢𑀼𑀕𑀸𑀫𑀲𑁆𑀲 𑀲𑀼𑀓𑁆𑀓𑀯𑀺𑀲𑀝𑁆𑀞𑀺𑀁 𑀧𑀢𑁆𑀯𑀸 𑀲𑀩𑁆𑀩𑀣𑀸 𑀯𑀸𑀬𑀸𑀫𑀢𑁄 𑀑𑀭𑀫𑀺𑀢𑁆𑀯𑀸 𑀞𑀺𑀢𑀓𑀸𑀮𑀁 𑀲𑀦𑁆𑀥𑀸𑀬 ‘‘𑀲𑀼𑀓𑁆𑀓𑀯𑀺𑀲𑀝𑁆𑀞𑀺𑀲𑀫𑀬𑁂’’𑀢𑀺 𑀯𑀼𑀢𑁆𑀢𑀁. 𑀉𑀤𑁆𑀥𑀭𑀡𑀁 𑀦𑀸𑀫 𑀬𑀸𑀯 𑀅𑀕𑁆𑀕𑀸 𑀦𑀻𑀳𑀭𑀡𑀓𑀸𑀮𑁄. 𑀲𑀸𑀤𑀺𑀬𑀢𑀻𑀢𑀺 𑀲𑁂𑀯𑀦𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑀺. 𑀅𑀲𑀸𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑁄𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀳𑀺 𑀲𑀩𑁆𑀩𑁂𑀳𑀺 𑀲𑀺𑀓𑁆𑀔𑀸𑀧𑀤𑁂𑀳𑀺 𑀅𑀲𑀸𑀥𑀸𑀭𑀡𑁄 𑀯𑀺𑀦𑀺𑀘𑁆𑀙𑀬𑁄.

𑀲𑀸𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑀢𑁆𑀣𑀦𑁆𑀢𑀺 𑀧𑀭𑀺𑀯𑀸𑀭𑀯𑀲𑁂𑀦 𑀲𑀸𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑀢𑁆𑀣𑀁. 𑀫𑀸𑀢𑀺𑀓𑀸𑀢𑀺 𑀫𑀸𑀢𑀸, 𑀚𑀦𑁂𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀤𑀤𑀸𑀢𑀺 𑀤𑁂𑀲𑀦𑀁 𑀤𑁂𑀲𑀯𑀲𑁂𑀦 𑀅𑀯𑀺𑀤𑀺𑀢𑀁 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀦𑀺𑀤𑀲𑁆𑀲𑁂𑀢𑀻𑀢𑀺 𑀦𑀺𑀤𑀸𑀦𑀁. 𑀧𑀜𑁆𑀜𑀸𑀧𑀻𑀬𑀢𑀻𑀢𑀺 𑀧𑀜𑁆𑀜𑀢𑁆𑀢𑀺, 𑀢𑀲𑁆𑀲𑀸 𑀧𑀓𑀸𑀭𑁄 𑀧𑀜𑁆𑀜𑀢𑁆𑀢𑀺𑀯𑀺𑀥𑀺 𑀅𑀗𑁆𑀕𑁂𑀢𑀺 𑀕𑀫𑁂𑀢𑀺 𑀜𑀸𑀧𑁂𑀢𑀻𑀢𑀺 𑀅𑀗𑁆𑀕𑀁, 𑀓𑀸𑀭𑀡𑀁. 𑀲𑀫𑀼𑀝𑁆𑀞𑀳𑀦𑁆𑀢𑀺 𑀆𑀧𑀢𑁆𑀢𑀺𑀬𑁄 𑀏𑀢𑁂𑀦𑀸𑀢𑀺 𑀲𑀫𑀼𑀝𑁆𑀞𑀸𑀦𑀁, 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀁, 𑀢𑀲𑁆𑀲 𑀯𑀺𑀥𑀺 𑀲𑀫𑀼𑀝𑁆𑀞𑀸𑀦𑀯𑀺𑀥𑀺. 𑀯𑀚𑁆𑀚𑀓𑀫𑁆𑀫𑀧𑁆𑀧𑀪𑁂𑀤𑀜𑁆𑀘𑀸𑀢𑀺 𑀏𑀢𑁆𑀣 𑀧𑀪𑁂𑀤𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄 ‘‘𑀯𑀚𑁆𑀚𑀧𑁆𑀧𑀪𑁂𑀤𑀁, 𑀓𑀫𑁆𑀫𑀧𑁆𑀧𑀪𑁂𑀤𑀜𑁆𑀘𑀸’’𑀢𑀺. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂.

𑀧𑀜𑁆𑀜𑀢𑁆𑀢𑀺𑀝𑁆𑀞𑀸𑀦𑀦𑁆𑀢𑀺 𑀧𑀜𑁆𑀜𑀢𑁆𑀢𑀺𑀝𑁆𑀞𑀧𑀦𑀲𑁆𑀲 𑀞𑀸𑀦𑀁, 𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀜𑁆𑀜𑀢𑁆𑀢𑀺𑀤𑁂𑀲𑁄𑀢𑀺 𑀅𑀢𑁆𑀣𑁄. 𑀧𑀼𑀕𑁆𑀕𑀮𑁄𑀢𑀺 𑀏𑀢𑁆𑀣 𑀆𑀤𑀺𑀓𑀫𑁆𑀫𑀺𑀓𑁄𑀬𑁂𑀯 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀧𑀼𑀕𑁆𑀕𑀮𑁄 𑀦𑀸𑀫 𑀬𑀁 𑀬𑀁 𑀆𑀭𑀩𑁆𑀪 𑀢𑀁 𑀢𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺, 𑀲𑁄 𑀲𑁄 𑀧𑀼𑀕𑁆𑀕𑀮𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋

‘‘𑀲𑀼𑀤𑀺𑀦𑁆𑀦𑁄 𑀥𑀦𑀺𑀬𑁄 𑀲𑀫𑁆𑀩𑀳𑀼𑀮𑀸 𑀯𑀕𑁆𑀕𑀼𑀫𑀼𑀤𑀦𑁆𑀢𑀺𑀓𑀸;

𑀲𑁂𑀬𑁆𑀬𑀲𑀓𑁄 𑀉𑀤𑀸𑀬𑀺 𑀘𑀸-𑀴𑀯𑀓𑀸 𑀙𑀦𑁆𑀦𑀫𑁂𑀢𑁆𑀢𑀺𑀬𑀸.

‘‘𑀤𑁂𑀯𑀤𑀢𑁆𑀢𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼-𑀙𑀩𑁆𑀩𑀕𑁆𑀕𑀺𑀬𑁄𑀧𑀦𑀦𑁆𑀤𑀜𑁆𑀜𑀢𑀭𑁄𑀧𑀺 𑀘;

𑀳𑀢𑁆𑀣𑀓𑁄 𑀘𑀸𑀦𑀼𑀭𑀼𑀤𑁆𑀥𑁄 𑀘, 𑀲𑀢𑁆𑀢𑀭𑀲 𑀘𑀽𑀴𑀧𑀦𑁆𑀣𑀓𑁄.

‘‘𑀩𑁂𑀮𑀝𑁆𑀞𑀲𑀻𑀲𑁄 𑀘𑀸𑀦𑀦𑁆𑀤𑁄, 𑀲𑀸𑀕𑀢𑁄𑀭𑀺𑀝𑁆𑀞𑀦𑀸𑀫𑀓𑁄;

𑀦𑀦𑁆𑀤𑀢𑁆𑀣𑁂𑀭𑁂𑀦 𑀢𑁂𑀯𑀻𑀲, 𑀪𑀺𑀓𑁆𑀔𑀽𑀦𑀁 𑀆𑀤𑀺𑀓𑀫𑁆𑀫𑀺𑀓𑀸.

‘‘𑀲𑀼𑀦𑁆𑀤𑀭𑀻𑀦𑀦𑁆𑀤𑀸 𑀣𑀼𑀮𑁆𑀮𑀦𑀦𑁆𑀤𑀸, 𑀙𑀩𑁆𑀩𑀕𑁆𑀕𑀺𑀬𑀜𑁆𑀜𑀢𑀭𑀸𑀧𑀺 𑀘;

𑀘𑀡𑁆𑀟𑀓𑀸𑀴𑀻 𑀲𑀫𑁆𑀩𑀳𑀼𑀮𑀸, 𑀤𑁆𑀯𑁂 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀧𑀭𑀸;

𑀪𑀺𑀓𑁆𑀔𑀼𑀦𑀻𑀦𑀁 𑀢𑀼 𑀲𑀢𑁆𑀢𑁂𑀯, 𑀳𑁄𑀦𑁆𑀢𑀺 𑀢𑀸 𑀆𑀤𑀺𑀓𑀫𑁆𑀫𑀺𑀓𑀸’’𑀢𑀺.

𑀢𑀲𑁆𑀲 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀬𑀁 𑀬𑀁 𑀲𑀼𑀤𑀺𑀦𑁆𑀦𑀸𑀤𑀺𑀓𑀁 𑀧𑀼𑀕𑁆𑀕𑀮𑀁 𑀆𑀭𑀩𑁆𑀪 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀢𑀲𑁆𑀲 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀧𑀜𑁆𑀜𑀢𑁆𑀢𑀻𑀢𑀺 𑀧𑀞𑀫𑀧𑀜𑁆𑀜𑀢𑁆𑀢𑀺. 𑀧𑀞𑀫𑀧𑀜𑁆𑀜𑀢𑁆𑀢𑀺𑀬𑀸 𑀧𑀘𑁆𑀙𑀸 𑀞𑀧𑀺𑀢𑀸 𑀧𑀜𑁆𑀜𑀢𑁆𑀢𑀺 𑀅𑀦𑀼𑀧𑀜𑁆𑀜𑀢𑁆𑀢𑀺. 𑀅𑀦𑀼𑀧𑁆𑀧𑀦𑁆𑀦𑁂 𑀤𑁄𑀲𑁂 𑀞𑀧𑀺𑀢𑀸 𑀧𑀜𑁆𑀜𑀢𑁆𑀢𑀺 𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺. 𑀲𑀩𑁆𑀩𑀢𑁆𑀣 𑀫𑀚𑁆𑀛𑀺𑀫𑀤𑁂𑀲𑁂 𑀘𑁂𑀯 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀘𑀸𑀢𑀺 𑀲𑀩𑁆𑀩𑁂𑀲𑀼 𑀧𑀤𑁂𑀲𑁂𑀲𑀼 𑀞𑀧𑀺𑀢𑀸 𑀧𑀜𑁆𑀜𑀢𑁆𑀢𑀺 𑀲𑀩𑁆𑀩𑀢𑁆𑀣𑀧𑀜𑁆𑀜𑀢𑁆𑀢𑀺. 𑀫𑀚𑁆𑀛𑀺𑀫𑀤𑁂𑀲𑁂𑀬𑁂𑀯 𑀞𑀧𑀺𑀢𑀸 𑀧𑀜𑁆𑀜𑀢𑁆𑀢𑀺 𑀧𑀤𑁂𑀲𑀧𑀜𑁆𑀜𑀢𑁆𑀢𑀺. 𑀪𑀺𑀓𑁆𑀔𑀽𑀦𑀜𑁆𑀘𑁂𑀯 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀲𑀸𑀥𑀸𑀭𑀡𑀪𑀽𑀢𑀸 𑀧𑀜𑁆𑀜𑀢𑁆𑀢𑀺 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺. 𑀲𑀼𑀤𑁆𑀥𑀪𑀺𑀓𑁆𑀔𑀽𑀦𑀫𑁂𑀯, 𑀲𑀼𑀤𑁆𑀥𑀪𑀺𑀓𑁆𑀔𑀼𑀦𑀻𑀦𑀁 𑀯𑀸 𑀧𑀜𑁆𑀜𑀢𑁆𑀢𑀁 𑀲𑀺𑀓𑁆𑀔𑀸𑀧𑀤𑀁 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺. 𑀉𑀪𑀺𑀦𑁆𑀦𑀫𑁆𑀧𑀺 𑀧𑀜𑁆𑀜𑀢𑁆𑀢𑀺 𑀉𑀪𑀢𑁄𑀧𑀜𑁆𑀜𑀢𑁆𑀢𑀺. 𑀯𑀺𑀦𑀬𑀥𑀭𑀧𑀜𑁆𑀘𑀫𑁂𑀦𑀸𑀢𑀺 𑀅𑀦𑀼𑀲𑁆𑀲𑀸𑀯𑀦𑀓𑀸𑀘𑀭𑀺𑀬𑀧𑀜𑁆𑀘𑀫𑁂𑀦. 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀸𑀢𑀺 𑀘𑀢𑀼𑀧𑁆𑀧𑀝𑀮𑀢𑁄 𑀧𑀝𑁆𑀞𑀸𑀬 𑀓𑀢𑀸 𑀉𑀧𑀸𑀳𑀦𑀸, 𑀦 𑀏𑀓𑀤𑁆𑀯𑀺𑀢𑀺𑀧𑀝𑀮𑀸. 𑀘𑀫𑁆𑀫𑀢𑁆𑀣𑀭𑀡𑀦𑁆𑀢𑀺 𑀅𑀢𑁆𑀣𑀭𑀺𑀢𑀩𑁆𑀩𑀁 𑀘𑀫𑁆𑀫𑀁. 𑀏𑀢𑁂𑀲𑀁 𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸 𑀧𑀤𑁂𑀲𑀧𑀜𑁆𑀜𑀢𑁆𑀢𑀺 𑀦𑀸𑀫𑀸𑀢𑀺 𑀏𑀢𑁂𑀲𑀁 𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸 𑀧𑀜𑁆𑀜𑀢𑁆𑀢𑀺 𑀫𑀚𑁆𑀛𑀺𑀫𑀤𑁂𑀲𑁂𑀬𑁂𑀯 𑀧𑀜𑁆𑀜𑀢𑁆𑀢𑀸𑀢𑀺 𑀧𑀤𑁂𑀲𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀢𑁂𑀦𑁂𑀯𑀸𑀳 ‘‘𑀫𑀚𑁆𑀛𑀺𑀫𑀤𑁂𑀲𑁂𑀬𑁂𑀯 𑀳𑀻’’𑀢𑀺𑀆𑀤𑀺. 𑀬𑀲𑁆𑀫𑀸 𑀫𑀚𑁆𑀛𑀺𑀫𑀤𑁂𑀲𑁂𑀬𑁂𑀯 𑀬𑀣𑀸𑀯𑀼𑀢𑁆𑀢𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑁂 𑀆𑀧𑀢𑁆𑀢𑀺 𑀳𑁄𑀢𑀺, 𑀦 𑀧𑀘𑁆𑀘𑀦𑁆𑀢𑀺𑀫𑀚𑀦𑀧𑀤𑁂, 𑀢𑀲𑁆𑀫𑀸 𑀧𑀤𑁂𑀲𑀧𑀜𑁆𑀜𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀥𑀼𑀯𑀦𑁆𑀳𑀸𑀦𑀁 𑀧𑀝𑀺𑀓𑁆𑀔𑁂𑀧𑀫𑀢𑁆𑀢𑀦𑁆𑀢𑀺 𑀦𑀺𑀘𑁆𑀘𑀦𑀳𑀸𑀦𑀧𑁆𑀧𑀝𑀺𑀲𑁂𑀥𑀦𑀫𑁂𑀯. 𑀏𑀢𑁆𑀣 𑀘 𑀫𑀢𑁆𑀢𑀲𑀤𑁆𑀤𑁂𑀦 𑀅𑀜𑁆𑀜𑀸𑀦𑀺 𑀢𑀻𑀡𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀢𑀸𑀦𑀺 𑀳𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀯𑀺𑀦𑀬𑀥𑀭𑀧𑀜𑁆𑀘𑀫𑁂𑀦 𑀕𑀡𑁂𑀦 𑀉𑀧𑀲𑀫𑁆𑀧𑀤’’𑀦𑁆𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁨𑁫𑁯) 𑀘𑀫𑁆𑀫𑀓𑁆𑀔𑀦𑁆𑀥𑀓𑁂 𑀆𑀕𑀢𑀸𑀦𑀺. 𑀢𑁂𑀦𑁂𑀯𑀸𑀳 ‘‘𑀢𑀢𑁄 𑀅𑀜𑁆𑀜𑀸 𑀧𑀤𑁂𑀲𑀧𑀜𑁆𑀜𑀢𑁆𑀢𑀺 𑀦𑀸𑀫 𑀦𑀢𑁆𑀣𑀻’’𑀢𑀺. 𑀲𑀩𑁆𑀩𑀸𑀦𑀻𑀢𑀺 𑀢𑀢𑁄 𑀅𑀯𑀲𑁂𑀲𑀸𑀦𑀺 𑀲𑀩𑁆𑀩𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺 𑀅𑀝𑁆𑀞𑀕𑀭𑀼𑀥𑀫𑁆𑀫𑀯𑀲𑁂𑀦 𑀪𑀺𑀓𑁆𑀔𑀼𑀦𑀻𑀦𑀁𑀬𑁂𑀯 𑀆𑀕𑀢𑀸, 𑀬𑀲𑁆𑀫𑀸 𑀘 𑀥𑀼𑀯𑀦𑁆𑀳𑀸𑀦𑀁 𑀧𑀝𑀺𑀓𑁆𑀔𑁂𑀧𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀧𑀸𑀢𑀺𑀫𑁄𑀓𑁆𑀔𑁂 𑀲𑀩𑁆𑀩𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀩𑁆𑀩𑀢𑁆𑀣𑀧𑀜𑁆𑀜𑀢𑁆𑀢𑀺𑀬𑁂𑀯 𑀳𑁄𑀦𑁆𑀢𑀺, 𑀬𑀲𑁆𑀫𑀸 𑀘 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺𑀤𑀼𑀓𑀜𑁆𑀘 𑀏𑀓𑀢𑁄𑀧𑀜𑁆𑀜𑀢𑁆𑀢𑀺𑀤𑀼𑀓𑀜𑁆𑀘 𑀩𑁆𑀬𑀜𑁆𑀚𑀦𑀫𑀢𑁆𑀢𑀁 𑀦𑀸𑀦𑀁, 𑀅𑀢𑁆𑀣𑀢𑁄 𑀏𑀓𑀁, 𑀢𑀲𑁆𑀫𑀸. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀆𑀧𑀢𑁆𑀢𑀺𑀪𑁂𑀤𑁄 𑀳𑁂𑀢𑁆𑀣 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀆𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀆𑀧𑀢𑁆𑀢𑀻𑀢𑀺 𑀧𑀼𑀩𑁆𑀩𑀧𑁆𑀧𑀬𑁄𑀕𑀸𑀤𑀺𑀯𑀲𑁂𑀦 𑀆𑀧𑀢𑁆𑀢𑀺𑀪𑁂𑀤𑁄’’𑀢𑀺. 𑀲𑀻𑀮𑀆𑀘𑀸𑀭𑀤𑀺𑀝𑁆𑀞𑀺𑀆𑀚𑀻𑀯𑀯𑀺𑀧𑀢𑁆𑀢𑀻𑀦𑀦𑁆𑀢𑀺 𑀏𑀢𑁆𑀣 𑀧𑀞𑀫𑀸 𑀤𑁆𑀯𑁂 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀲𑀻𑀮𑀯𑀺𑀧𑀢𑁆𑀢𑀺 𑀦𑀸𑀫, 𑀅𑀯𑀲𑁂𑀲𑀸 𑀧𑀜𑁆𑀘 𑀆𑀘𑀸𑀭𑀯𑀺𑀧𑀢𑁆𑀢𑀺 𑀦𑀸𑀫, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀘 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀤𑀺𑀝𑁆𑀞𑀺 𑀘 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺 𑀦𑀸𑀫, 𑀆𑀚𑀻𑀯𑀳𑁂𑀢𑀼 𑀧𑀜𑁆𑀜𑀢𑁆𑀢𑀸𑀦𑀺 𑀙 𑀲𑀺𑀓𑁆𑀔𑀸𑀧𑀤𑀸𑀦𑀺 𑀆𑀚𑀻𑀯𑀯𑀺𑀧𑀢𑁆𑀢𑀺 𑀦𑀸𑀫, 𑀇𑀢𑀺 𑀇𑀫𑀸𑀲𑀁 𑀲𑀻𑀮𑀆𑀘𑀸𑀭𑀤𑀺𑀝𑁆𑀞𑀺𑀆𑀚𑀻𑀯𑀯𑀺𑀧𑀢𑁆𑀢𑀻𑀦𑀁 𑀅𑀜𑁆𑀜𑀢𑀭𑀸𑀢𑀺 𑀅𑀢𑁆𑀣𑁄.

𑀦 𑀓𑁂𑀯𑀮𑀁 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀼𑀘𑁆𑀘𑀦𑁆𑀢𑀻𑀢𑀺 𑀆𑀳 ‘‘𑀬𑀸𑀦𑀺 𑀲𑀺𑀓𑁆𑀔𑀸𑀧𑀤𑀲𑀫𑀼𑀝𑁆𑀞𑀸𑀦𑀸𑀦𑀻𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺. 𑀏𑀢𑀸𑀦𑀺 𑀳𑀺 𑀓𑀺𑀜𑁆𑀘𑀸𑀧𑀺 𑀆𑀧𑀢𑁆𑀢𑀺𑀬𑀸 𑀲𑀫𑀼𑀝𑁆𑀞𑀸𑀦𑀸𑀦𑀺, 𑀦 𑀲𑀺𑀓𑁆𑀔𑀸𑀧𑀤𑀲𑁆𑀲, 𑀯𑁄𑀳𑀸𑀭𑀲𑀼𑀔𑀢𑁆𑀣𑀁 𑀧𑀦𑁂𑀯𑀁 𑀯𑀼𑀘𑁆𑀘𑀦𑁆𑀢𑀻𑀢𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀙𑀲𑀼 𑀲𑀫𑀼𑀝𑁆𑀞𑀸𑀦𑁂𑀲𑀼. 𑀢𑁂𑀲𑀽𑀢𑀺 𑀲𑀘𑀺𑀢𑁆𑀢𑀓𑀸𑀘𑀺𑀢𑁆𑀢𑀓𑁂𑀲𑀼. 𑀏𑀓𑀁 𑀲𑀫𑀼𑀝𑁆𑀞𑀸𑀦𑀁 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀁 𑀏𑀢𑀺𑀲𑁆𑀲𑀸𑀢𑀺 𑀏𑀓𑀲𑀫𑀼𑀝𑁆𑀞𑀸𑀦𑀸, 𑀏𑀓𑁂𑀦 𑀯𑀸 𑀲𑀫𑀼𑀝𑁆𑀞𑀸𑀦𑀁 𑀏𑀢𑀺𑀲𑁆𑀲𑀸𑀢𑀺 𑀏𑀓𑀲𑀫𑀼𑀝𑁆𑀞𑀸𑀦𑀸. ‘‘𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀸’’𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀲𑀫𑀼𑀝𑁆𑀞𑀸𑀦𑀯𑀲𑁂𑀦𑀸𑀢𑀺 𑀲𑀫𑀼𑀝𑁆𑀞𑀸𑀦𑀲𑀻𑀲𑀯𑀲𑁂𑀦. 𑀧𑀞𑀫𑀧𑀸𑀭𑀸𑀚𑀺𑀓𑀁 𑀲𑀫𑀼𑀝𑁆𑀞𑀸𑀦𑀁 𑀏𑀢𑀺𑀲𑁆𑀲𑀸𑀢𑀺 𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀸. 𑀢𑀣𑀸 𑀅𑀤𑀺𑀦𑁆𑀦𑀸𑀤𑀸𑀦𑀲𑀫𑀼𑀝𑁆𑀞𑀸𑀦𑀸’’𑀢𑀺𑀆𑀤𑀻𑀲𑀼𑀧𑀺.

𑀲𑀬𑀁 𑀧𑀣𑀯𑀺𑀔𑀡𑀦𑁂 𑀓𑀸𑀬𑁂𑀦, 𑀧𑀭𑁂 𑀆𑀡𑀸𑀧𑁂𑀢𑁆𑀯𑀸 𑀔𑀡𑀸𑀧𑀦𑁂 𑀯𑀸𑀘𑀸𑀬 𑀘 𑀆𑀧𑀢𑁆𑀢𑀺𑀲𑀫𑁆𑀪𑀯𑀢𑁄 ‘‘𑀧𑀣𑀯𑀺𑀔𑀡𑀦𑀸𑀤𑀻𑀲𑀼 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀆𑀤𑀺𑀲𑀤𑁆𑀤𑁂𑀦 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀦𑀁 𑀧𑀭𑀺𑀕𑁆𑀕𑀳𑁄. 𑀧𑀞𑀫𑀓𑀣𑀺𑀦𑀸𑀧𑀢𑁆𑀢𑀺 𑀓𑀸𑀬𑀯𑀸𑀘𑀢𑁄 𑀓𑀢𑁆𑀢𑀩𑁆𑀩𑀁 𑀅𑀥𑀺𑀝𑁆𑀞𑀸𑀦𑀁 𑀯𑀸 𑀯𑀺𑀓𑀧𑁆𑀧𑀦𑀁 𑀯𑀸 𑀅𑀓𑀭𑁄𑀦𑁆𑀢𑀲𑁆𑀲 𑀳𑁄𑀢𑀺, 𑀦𑁄 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀆𑀳 ‘‘𑀧𑀞𑀫𑀓𑀣𑀺𑀦𑀸𑀧𑀢𑁆𑀢𑀺 𑀯𑀺𑀬𑀸’’𑀢𑀺. 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀳𑀢𑁆𑀣𑀢𑁄 𑀘𑀻𑀯𑀭𑀧𑁆𑀧𑀝𑀺𑀕𑁆𑀕𑀳𑀡𑀸𑀧𑀢𑁆𑀢𑀺 𑀢𑀲𑁆𑀲𑀸 𑀳𑀢𑁆𑀣𑀢𑁄 𑀘𑀻𑀯𑀭𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲, 𑀧𑀭𑀺𑀯𑀢𑁆𑀢𑀓𑀁 𑀅𑀤𑁂𑀦𑁆𑀢𑀲𑁆𑀲 𑀘 𑀳𑁄𑀢𑀻𑀢𑀺 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺. ‘‘𑀲𑀺𑀬𑀸 𑀓𑀭𑁄𑀦𑁆𑀢𑀲𑁆𑀲𑀸’’𑀢𑀺𑀆𑀤𑀻𑀲𑀼 𑀲𑀺𑀬𑀸𑀢𑀺 ‘‘𑀲𑀺𑀬𑀸 𑀔𑁄 𑀧𑀦 𑀢𑁂 𑀩𑁆𑀭𑀸𑀳𑁆𑀫𑀡 𑀏𑀯𑀫𑀲𑁆𑀲𑀸’’𑀢𑀺𑀆𑀤𑀻𑀲𑀼 𑀯𑀺𑀬 ‘‘𑀓𑀤𑀸𑀘𑀻’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑁄 𑀦𑀺𑀧𑀸𑀢𑁄. 𑀭𑀽𑀧𑀺𑀬𑀧𑁆𑀧𑀝𑀺𑀕𑁆𑀕𑀳𑀡𑀸𑀧𑀢𑁆𑀢𑀺 𑀲𑀺𑀬𑀸 𑀓𑀺𑀭𑀺𑀬𑀸 𑀕𑀳𑀡𑁂𑀦 𑀆𑀧𑀚𑁆𑀚𑀦𑀢𑁄, 𑀲𑀺𑀬𑀸 𑀅𑀓𑀺𑀭𑀺𑀬𑀸 𑀧𑀝𑀺𑀓𑁆𑀔𑁂𑀧𑀲𑁆𑀲 𑀅𑀓𑀭𑀡𑀢𑁄𑀢𑀺 𑀆𑀳 ‘‘𑀭𑀽𑀧𑀺𑀬𑀧𑁆𑀧𑀝𑀺𑀕𑁆𑀕𑀳𑀡𑀸𑀧𑀢𑁆𑀢𑀺 𑀯𑀺𑀬𑀸’’𑀢𑀺. 𑀓𑀼𑀝𑀺𑀓𑀸𑀭𑀸𑀧𑀢𑁆𑀢𑀺 𑀯𑀢𑁆𑀣𑀼𑀁 𑀤𑁂𑀲𑀸𑀧𑁂𑀢𑁆𑀯𑀸 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀓𑀭𑀡𑁂 𑀓𑀭𑁄𑀦𑁆𑀢𑀲𑁆𑀲 𑀲𑀺𑀬𑀸, 𑀅𑀤𑁂𑀲𑀸𑀧𑁂𑀢𑁆𑀯𑀸 𑀧𑀦 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀓𑀭𑀡𑁂 𑀧𑀫𑀸𑀡𑀬𑀼𑀢𑁆𑀢𑀁 𑀯𑀸 𑀓𑀭𑁄𑀦𑁆𑀢𑀲𑁆𑀲 𑀘 𑀅𑀓𑀭𑁄𑀦𑁆𑀢𑀲𑁆𑀲 𑀘 𑀲𑀺𑀬𑀸𑀢𑀺 𑀆𑀳 ‘‘𑀓𑀼𑀝𑀺𑀓𑀸𑀭𑀸𑀧𑀢𑁆𑀢𑀺 𑀯𑀺𑀬𑀸’’𑀢𑀺.

𑀲𑀜𑁆𑀜𑀸𑀬 𑀅𑀪𑀸𑀯𑁂𑀦 𑀯𑀺𑀫𑁄𑀓𑁆𑀔𑁄 𑀅𑀲𑁆𑀲𑀸𑀢𑀺 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁄𑀢𑀺 𑀫𑀚𑁆𑀛𑁂𑀧𑀤𑀮𑁄𑀧𑀲𑀫𑀸𑀲𑁄 𑀤𑀝𑁆𑀞𑀩𑁆𑀩𑁄𑀢𑀺 𑀆𑀳 ‘‘𑀬𑀢𑁄 𑀯𑀻𑀢𑀺𑀓𑁆𑀓𑀫𑀲𑀜𑁆𑀜𑀸𑀬𑀸’’𑀢𑀺𑀆𑀤𑀺. 𑀇𑀢𑀭𑀸 𑀦𑀸𑀫 𑀬𑀢𑁄 𑀯𑀻𑀢𑀺𑀓𑁆𑀓𑀫𑀲𑀜𑁆𑀜𑀸𑀬 𑀅𑀪𑀸𑀯𑁂𑀦 𑀦 𑀫𑀼𑀘𑁆𑀘𑀢𑀺, 𑀲𑀸 𑀇𑀢𑀭𑀲𑀤𑁆𑀤𑀲𑁆𑀲 𑀯𑀼𑀢𑁆𑀢𑀧𑁆𑀧𑀝𑀺𑀬𑁄𑀕𑀺𑀯𑀺𑀲𑀬𑀢𑁆𑀢𑀸. 𑀬𑀸 𑀅𑀘𑀺𑀢𑁆𑀢𑀓𑁂𑀦 𑀯𑀸 𑀲𑀘𑀺𑀢𑁆𑀢𑀓𑀫𑀺𑀲𑁆𑀲𑀓𑁂𑀦 𑀯𑀸 𑀲𑀫𑀼𑀝𑁆𑀞𑀸𑀢𑀻𑀢𑀺 𑀬𑀸 𑀆𑀧𑀢𑁆𑀢𑀺 𑀓𑀤𑀸𑀘𑀺 𑀅𑀘𑀺𑀢𑁆𑀢𑀓𑁂𑀦 𑀯𑀸 𑀓𑀤𑀸𑀘𑀺 𑀲𑀘𑀺𑀢𑁆𑀢𑀓𑀫𑀺𑀲𑁆𑀲𑀓𑁂𑀦 𑀯𑀸 𑀲𑀫𑀼𑀝𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀸𑀢𑀺. 𑀏𑀢𑁆𑀣 𑀘 𑀲𑀜𑁆𑀜𑀸𑀤𑀼𑀓𑀁 𑀅𑀦𑀸𑀧𑀢𑁆𑀢𑀺𑀫𑀼𑀔𑁂𑀦 𑀯𑀼𑀢𑁆𑀢𑀁, 𑀲𑀘𑀺𑀢𑁆𑀢𑀓𑀤𑀼𑀓𑀁 𑀆𑀧𑀢𑁆𑀢𑀺𑀫𑀼𑀔𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀬𑀲𑁆𑀲𑀸 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯 𑀳𑁄𑀢𑀻𑀢𑀺 𑀬𑀲𑁆𑀲𑀸 𑀲𑀘𑀺𑀢𑁆𑀢𑀓𑀸𑀬 𑀆𑀧𑀢𑁆𑀢𑀺𑀬𑀸 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯 𑀳𑁄𑀢𑀺, 𑀬𑀲𑁆𑀲𑀸 𑀘 𑀲𑀘𑀺𑀢𑁆𑀢𑀓𑀸𑀘𑀺𑀢𑁆𑀢𑀓𑀲𑀗𑁆𑀔𑀸𑀢𑀸𑀬 𑀲𑀼𑀭𑀸𑀧𑀸𑀦𑀸𑀤𑀺𑀅𑀘𑀺𑀢𑁆𑀢𑀓𑀸𑀬 𑀆𑀧𑀢𑁆𑀢𑀺𑀬𑀸 𑀯𑀢𑁆𑀣𑀼𑀯𑀺𑀚𑀸𑀦𑀦𑀘𑀺𑀢𑁆𑀢𑁂𑀦 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯 𑀳𑁄𑀢𑀺, 𑀅𑀬𑀁 𑀮𑁄𑀓𑀯𑀚𑁆𑀚𑀸. ‘‘𑀲𑀘𑀺𑀢𑁆𑀢𑀓𑀧𑀓𑁆𑀔𑁂’’𑀢𑀺 𑀳𑀺 𑀇𑀤𑀁 𑀯𑀘𑀦𑀁 𑀲𑀘𑀺𑀢𑁆𑀢𑀓𑀸𑀘𑀺𑀢𑁆𑀢𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦 𑀳𑀺 𑀏𑀓𑀁𑀲𑀢𑁄 𑀲𑀘𑀺𑀢𑁆𑀢𑀓𑀲𑁆𑀲 ‘‘𑀲𑀘𑀺𑀢𑁆𑀢𑀓𑀧𑀓𑁆𑀔𑁂’’𑀢𑀺 𑀯𑀺𑀲𑁂𑀲𑀦𑁂 𑀧𑀬𑁄𑀚𑀦𑀁 𑀅𑀢𑁆𑀣𑀻𑀢𑀺. 𑀬𑀁 𑀧𑀦𑁂𑀢𑁆𑀣 𑀕𑀡𑁆𑀞𑀺𑀧𑀤𑁂 ‘‘𑀲𑀼𑀭𑀸𑀧𑀸𑀦𑀲𑁆𑀫𑀺𑀜𑁆𑀳𑀺 ‘𑀲𑀼𑀭𑀸’𑀢𑀺 𑀯𑀸 ‘𑀦 𑀯𑀝𑁆𑀝𑀢𑀻’𑀢𑀺 𑀯𑀸 𑀚𑀸𑀦𑀺𑀢𑁆𑀯𑀸 𑀧𑀺𑀯𑀦𑁂 𑀅𑀓𑀼𑀲𑀮𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀦 𑀯𑀝𑁆𑀝𑀢𑀻𑀢𑀺 𑀯𑀸 𑀚𑀸𑀦𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀯𑀘𑀦𑀁 𑀦 𑀬𑀼𑀚𑁆𑀚𑀢𑀺 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀲𑁆𑀲𑀸𑀧𑀺 𑀮𑁄𑀓𑀯𑀚𑁆𑀚𑀪𑀸𑀯𑀧𑁆𑀧𑀲𑀗𑁆𑀕𑀢𑁄. 𑀬𑀲𑁆𑀲𑀸 𑀧𑀦 ‘‘𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯𑀸’’𑀢𑀺 𑀦𑀺𑀬𑀫𑁄 𑀦𑀢𑁆𑀣𑀺, 𑀲𑀸 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑁂𑀲𑀸 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀸’’𑀢𑀺. 𑀢𑀣𑀸 𑀳𑀺 𑀢𑀲𑁆𑀲𑀸 𑀯𑀢𑁆𑀣𑀼𑀯𑀺𑀚𑀸𑀦𑀦𑀘𑀺𑀢𑁆𑀢𑁂𑀦 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀲𑀺𑀬𑀸 𑀓𑀼𑀲𑀮𑀁, 𑀲𑀺𑀬𑀸 𑀅𑀓𑀼𑀲𑀮𑀁, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀦𑁆𑀢𑀺 ‘‘𑀅𑀓𑀼𑀲𑀮𑀫𑁂𑀯𑀸’’𑀢𑀺 𑀦𑀺𑀬𑀫𑁄 𑀦𑀢𑁆𑀣𑀺. 𑀉𑀪𑀬𑀢𑁆𑀣 𑀆𑀧𑀚𑁆𑀚𑀺𑀢𑀩𑁆𑀩𑀸𑀢𑀺 𑀓𑀸𑀬𑀤𑁆𑀯𑀸𑀭𑁂, 𑀯𑀘𑀻𑀤𑁆𑀯𑀸𑀭𑁂 𑀘𑀸𑀢𑀺 𑀉𑀪𑀬𑀢𑁆𑀣 𑀆𑀧𑀚𑁆𑀚𑀺𑀢𑀩𑁆𑀩𑀸 𑀆𑀧𑀢𑁆𑀢𑀺, 𑀢𑀸 𑀧𑀦 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀬𑁄. ‘‘𑀫𑀦𑁄𑀤𑁆𑀯𑀸𑀭𑁂 𑀆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀻’’𑀢𑀺 𑀇𑀤𑀁 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁 𑀉𑀧𑀦𑀺𑀓𑁆𑀔𑀺𑀢𑁆𑀢𑀲𑀸𑀤𑀺𑀬𑀦𑀸𑀤𑀻𑀲𑀼 𑀆𑀧𑀢𑁆𑀢𑀺𑀲𑀫𑁆𑀪𑀯𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀓𑀼𑀲𑀮𑀘𑀺𑀢𑁆𑀢𑁄 𑀯𑀸 𑀆𑀧𑀚𑁆𑀚𑀢𑀻𑀢𑀺 𑀧𑀸𑀭𑀸𑀚𑀺𑀓𑀲𑀼𑀓𑁆𑀓𑀯𑀺𑀲𑀝𑁆𑀞𑀺𑀓𑀸𑀬𑀲𑀁𑀲𑀕𑁆𑀕𑀤𑀼𑀝𑁆𑀞𑀼𑀮𑁆𑀮𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀤𑀼𑀝𑁆𑀞𑀤𑁄𑀲𑀲𑀗𑁆𑀖𑀪𑁂𑀤𑀧𑁆𑀧𑀳𑀸𑀭𑀤𑀸𑀦𑀢𑀮𑀲𑀢𑁆𑀢𑀺𑀓𑀸𑀤𑀺𑀪𑁂𑀤𑀁 𑀆𑀧𑀢𑁆𑀢𑀺𑀁 𑀅𑀓𑀼𑀲𑀮𑀘𑀺𑀢𑁆𑀢𑁄 𑀆𑀧𑀚𑁆𑀚𑀢𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀧𑀤𑀲𑁄𑀥𑀫𑁆𑀫𑀁 𑀯𑀸𑀘𑁂𑀦𑁆𑀢𑁄, 𑀫𑀸𑀢𑀼𑀕𑀸𑀫𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄𑀢𑀺 𑀏𑀯𑀭𑀽𑀧𑀁 𑀆𑀧𑀢𑁆𑀢𑀺𑀁 𑀓𑀼𑀲𑀮𑀘𑀺𑀢𑁆𑀢𑁄 𑀆𑀧𑀚𑁆𑀚𑀢𑀺. 𑀅𑀲𑀜𑁆𑀘𑀺𑀘𑁆𑀘𑀲𑀳𑀲𑁂𑀬𑁆𑀬𑀸𑀤𑀺𑀁 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑁄 𑀆𑀧𑀚𑁆𑀚𑀢𑀺. 𑀬𑀁 𑀅𑀭𑀳𑀸 𑀆𑀧𑀚𑁆𑀚𑀢𑀺, 𑀲𑀩𑁆𑀩𑀁 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑁄𑀯 𑀆𑀧𑀚𑁆𑀚𑀢𑀺. 𑀢𑁂𑀦𑀸𑀳 ‘‘𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑁄 𑀯𑀸’’𑀢𑀺.

𑀤𑀼𑀓𑁆𑀔𑀯𑁂𑀤𑀦𑀸𑀲𑀫𑀗𑁆𑀕𑀻 𑀯𑀸𑀢𑀺 𑀤𑀼𑀝𑁆𑀞𑀤𑁄𑀲𑀸𑀤𑀺𑀪𑁂𑀤𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑁄 𑀤𑀼𑀓𑁆𑀔𑀯𑁂𑀤𑀦𑀸𑀲𑀫𑀗𑁆𑀕𑀻 𑀆𑀧𑀚𑁆𑀚𑀢𑀺. 𑀫𑁂𑀣𑀼𑀦𑀥𑀫𑁆𑀫𑀸𑀤𑀺𑀪𑁂𑀤𑀁 𑀧𑀦 𑀲𑀼𑀔𑀯𑁂𑀤𑀦𑀸𑀲𑀫𑀗𑁆𑀕𑀻 𑀆𑀧𑀚𑁆𑀚𑀢𑀺. 𑀬𑀁 𑀲𑀼𑀔𑀯𑁂𑀤𑀦𑀸𑀲𑀫𑀗𑁆𑀕𑀻 𑀆𑀧𑀚𑁆𑀚𑀢𑀺, 𑀢𑀁𑀬𑁂𑀯 𑀫𑀚𑁆𑀛𑀢𑁆𑀢𑁄 𑀳𑀼𑀢𑁆𑀯𑀸 𑀆𑀧𑀚𑁆𑀚𑀦𑁆𑀢𑁄 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀸𑀲𑀫𑀗𑁆𑀕𑀻 𑀆𑀧𑀚𑁆𑀚𑀢𑀺. 𑀢𑁂𑀦𑀸𑀳 ‘‘𑀇𑀢𑀭𑀯𑁂𑀤𑀦𑀸𑀤𑁆𑀯𑀬𑀲𑀫𑀗𑁆𑀕𑀻 𑀯𑀸’’𑀢𑀺. 𑀇𑀤𑀫𑁆𑀧𑀺 𑀘 𑀢𑀺𑀓𑀤𑁆𑀯𑀬𑀁 𑀬𑁂𑀪𑀼𑀬𑁆𑀬𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑁄 𑀳𑀺 𑀅𑀘𑀺𑀢𑁆𑀢𑀓𑁄 𑀅𑀯𑁂𑀤𑀦𑁄 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻𑀢𑀺. 𑀓𑀺𑀜𑁆𑀘𑀸𑀧𑀺 𑀏𑀯𑀁 𑀅𑀦𑀺𑀬𑀫𑁂𑀦 𑀯𑀼𑀢𑁆𑀢𑀁, 𑀯𑀺𑀲𑁂𑀲𑁄 𑀧𑀦𑁂𑀢𑁆𑀣 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀲𑀦𑁆𑀢𑁂𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀦𑁆𑀢𑁂𑀧𑀻𑀢𑀺 𑀳𑀺 𑀯𑀺𑀲𑁂𑀲𑀸𑀪𑀺𑀥𑀸𑀦𑀦𑀺𑀫𑀺𑀢𑁆𑀢𑀸𑀪𑁆𑀬𑀽𑀧𑀕𑀫𑁂𑀯 𑀬𑀼𑀚𑁆𑀚𑀢𑀺. 𑀲𑀩𑁆𑀩𑁂𑀲𑀁 𑀯𑀲𑁂𑀦 𑀢𑀻𑀡𑀺 𑀘𑀺𑀢𑁆𑀢𑀸𑀦𑀻𑀢𑀺 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁 𑀯𑀲𑁂𑀦 𑀧𑀤𑀲𑁄𑀥𑀫𑁆𑀫𑀸𑀤𑀻𑀲𑀼 𑀢𑀻𑀡𑀺 𑀘𑀺𑀢𑁆𑀢𑀸𑀦𑀺.

𑀇𑀤𑀸𑀦𑀺 𑀢𑀁 𑀬𑀣𑀸𑀯𑀼𑀢𑁆𑀢𑀦𑀺𑀤𑀸𑀦𑀸𑀤𑀺𑀯𑁂𑀤𑀦𑀸𑀢𑁆𑀢𑀺𑀓𑀧𑀭𑀺𑀬𑁄𑀲𑀸𑀦𑀁 𑀲𑀢𑁆𑀢𑀭𑀲𑀧𑁆𑀧𑀓𑀸𑀭𑀁 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀬𑁄𑀚𑁂𑀢𑀼𑀁 ‘‘𑀇𑀥 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀧𑀞𑀫𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑁂. 𑀯𑁂𑀲𑀸𑀮𑀺𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀧𑀯𑀢𑁆𑀢𑀯𑁄𑀳𑀸𑀭𑁂 𑀦𑀕𑀭𑁂. 𑀢𑀜𑁆𑀳𑀺 𑀦𑀕𑀭𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑀯𑀟𑁆𑀠𑀦𑁂𑀦 𑀯𑀺𑀲𑀸𑀮𑀻𑀪𑀽𑀢𑀢𑁆𑀢𑀸 ‘‘𑀯𑁂𑀲𑀸𑀮𑀻’’𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀫𑁆𑀧𑀺 𑀘 𑀦𑀕𑀭𑀁 𑀲𑀩𑁆𑀩𑀜𑁆𑀜𑀼𑀢𑀁 𑀲𑀫𑁆𑀧𑀢𑁆𑀢𑁂𑀬𑁂𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀲𑀩𑁆𑀩𑀸𑀓𑀸𑀭𑀯𑁂𑀧𑀼𑀮𑁆𑀮𑀢𑁆𑀢𑀁 𑀧𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬𑀸’’𑀢𑀺 𑀘 ‘‘𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀧𑀻’’𑀢𑀺 𑀘 𑀤𑁆𑀯𑁂 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑁄𑀢𑀺 𑀫𑀓𑁆𑀓𑀝𑀺𑀯𑀚𑁆𑀚𑀺𑀧𑀼𑀢𑁆𑀢𑀓𑀯𑀢𑁆𑀣𑀽𑀦𑀁 𑀯𑀲𑁂𑀦 𑀯𑀼𑀢𑁆𑀢𑀸. ‘‘𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀸’’𑀢𑀺 𑀘 ‘‘𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬𑀸’’𑀢𑀺 𑀘 𑀇𑀫𑀸 𑀤𑁆𑀯𑁂 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑁄. 𑀆𑀧𑀢𑁆𑀢𑀺𑀓𑀭𑀸 𑀘 𑀳𑁄𑀢𑀻𑀢𑀺 𑀧𑀞𑀫𑀧𑀜𑁆𑀜𑀢𑁆𑀢𑀺𑀢𑁄 𑀯𑀺𑀲𑀼𑀁𑀬𑁂𑀯𑀸𑀧𑀢𑁆𑀢𑀺𑀓𑀭𑀸 𑀘 𑀳𑁄𑀢𑀺. 𑀅𑀜𑁆𑀜𑀯𑀸𑀤𑀓𑀲𑀺𑀓𑁆𑀔𑀸𑀧𑀤𑀸𑀤𑀻𑀲𑀼 𑀯𑀺𑀬𑀸𑀢𑀺 𑀅𑀜𑁆𑀜𑀯𑀸𑀤𑀓𑀲𑀺𑀓𑁆𑀔𑀸𑀧𑀤𑀸𑀤𑀻𑀲𑀼 ‘‘𑀯𑀺𑀳𑁂𑀲𑀓𑁂’’𑀢𑀺𑀆𑀤𑀺𑀓𑀸 (𑀧𑀸𑀘𑀺. 𑁯𑁮) 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀆𑀤𑀺𑀲𑀤𑁆𑀤𑁂𑀦 𑀉𑀚𑁆𑀛𑀸𑀧𑀦𑀓𑀲𑁆𑀲 𑀧𑀭𑀺𑀕𑁆𑀕𑀳𑁄. 𑀏𑀢𑁆𑀣 𑀳𑀺 𑀅𑀜𑁆𑀜𑀯𑀸𑀤𑀓𑀸𑀤𑀺𑀢𑁄 𑀯𑀺𑀲𑀼𑀁𑀬𑁂𑀯 𑀯𑀺𑀳𑁂𑀲𑀓𑀸𑀤𑀻𑀲𑀼𑀧𑀺 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀺. 𑀬𑀣𑀸𑀳 ‘‘𑀭𑁄𑀧𑀺𑀢𑁂 𑀯𑀺𑀳𑁂𑀲𑀓𑁂 𑀲𑀗𑁆𑀖𑀫𑀚𑁆𑀛𑁂 𑀯𑀢𑁆𑀣𑀼𑀲𑁆𑀫𑀺𑀁 𑀯𑀸 𑀆𑀧𑀢𑁆𑀢𑀺𑀬𑀸 𑀯𑀸 𑀅𑀦𑀬𑀼𑀜𑁆𑀚𑀺𑀬𑀫𑀸𑀦𑁄 𑀢𑀁 𑀦𑀓𑀣𑁂𑀢𑀼𑀓𑀸𑀫𑁄 𑀢𑀁 𑀦𑀉𑀕𑁆𑀖𑀸𑀝𑁂𑀢𑀼𑀓𑀸𑀫𑁄 𑀢𑀼𑀡𑁆𑀳𑀻𑀪𑀽𑀢𑁄 𑀲𑀗𑁆𑀖𑀁 𑀯𑀺𑀳𑁂𑀲𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺𑀆𑀤𑀺 (𑀧𑀸𑀭𑀸. 𑁧𑁦𑁦). 𑀲𑀼𑀧𑀺𑀦𑀦𑁆𑀢𑁂 𑀯𑀺𑀚𑁆𑀚𑀫𑀸𑀦𑀸𑀧𑀺 𑀫𑁄𑀘𑀦𑀲𑁆𑀲𑀸𑀤𑀘𑁂𑀢𑀦𑀸 𑀅𑀩𑁆𑀩𑁄𑀳𑀸𑀭𑀺𑀓𑀢𑁆𑀢𑀸 𑀅𑀦𑀸𑀧𑀢𑁆𑀢𑀺𑀓𑀭𑀸𑀢𑀺 𑀆𑀳 ‘‘𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸𑀢𑀺𑀆𑀤𑀺𑀓𑀸 𑀯𑀺𑀬𑀸’’𑀢𑀺. 𑀢𑀣𑀸 𑀳𑀺 𑀣𑀺𑀦𑀫𑀺𑀤𑁆𑀥𑁂𑀦 𑀅𑀪𑀺𑀪𑀽𑀢𑀢𑁆𑀢𑀸 𑀲𑀼𑀧𑀺𑀦𑁂 𑀘𑀺𑀢𑁆𑀢𑀁 𑀅𑀩𑁆𑀩𑁄𑀳𑀸𑀭𑀺𑀓𑀁, 𑀘𑀺𑀢𑁆𑀢𑀲𑁆𑀲 𑀅𑀩𑁆𑀩𑁄𑀳𑀸𑀭𑀺𑀓𑀢𑁆𑀢𑀸 𑀑𑀧𑀓𑁆𑀓𑀫𑀦𑀓𑀺𑀭𑀺𑀬𑀸𑀧𑀯𑀢𑁆𑀢𑀦𑀺𑀓𑀸𑀧𑀺 𑀘𑁂𑀢𑀦𑀸 𑀅𑀩𑁆𑀩𑁄𑀳𑀸𑀭𑀺𑀓𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀅𑀢𑁆𑀣𑁂𑀲𑀸, 𑀪𑀺𑀓𑁆𑀔𑀯𑁂, 𑀘𑁂𑀢𑀦𑀸, 𑀲𑀸 𑀘 𑀔𑁄 𑀅𑀩𑁆𑀩𑁄𑀳𑀸𑀭𑀺𑀓𑀸’’𑀢𑀺 (𑀧𑀸𑀭𑀸. 𑁨𑁩𑁫), 𑀢𑀲𑁆𑀫𑀸 ‘‘𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸’’𑀢𑀺 𑀅𑀬𑀁 𑀅𑀦𑀼𑀧𑀜𑁆𑀜𑀢𑁆𑀢𑀺 𑀅𑀦𑀸𑀧𑀢𑁆𑀢𑀺𑀓𑀭𑀸 𑀚𑀸𑀢𑀸. 𑀆𑀤𑀺𑀲𑀤𑁆𑀤𑁂𑀦 ‘‘𑀅𑀜𑁆𑀜𑀢𑁆𑀭 𑀅𑀥𑀺𑀫𑀸𑀦𑀸’’𑀢𑀺𑀆𑀤𑀺𑀓𑀁 (𑀧𑀸𑀭𑀸. 𑁧𑁯𑁭) 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀲𑀼 𑀯𑀺𑀬𑀸𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀲𑀼 ‘‘𑀅𑀭𑀜𑁆𑀜𑀸 𑀯𑀸’’𑀢𑀺𑀆𑀤𑀺𑀓𑀸 (𑀧𑀸𑀭𑀸. 𑁯𑁧) 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀧𑀦 𑀆𑀤𑀺𑀲𑀤𑁆𑀤𑁂𑀦 𑀧𑀞𑀫𑀧𑀸𑀭𑀸𑀚𑀺𑀓𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀏𑀢𑁆𑀣 𑀳𑀺 ‘‘𑀢𑀜𑁆𑀘 𑀔𑁄 𑀕𑀸𑀫𑁂, 𑀦𑁄 𑀅𑀭𑀜𑁆𑀜𑁂’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁯𑁦) 𑀦𑀬𑁂𑀦 𑀮𑁂𑀲𑀁 𑀑𑀟𑁆𑀟𑁂𑀦𑁆𑀢𑀸𑀦𑀁 𑀮𑁂𑀲𑀧𑀺𑀤𑀳𑀦𑀢𑁆𑀣𑀁 ‘‘𑀅𑀭𑀜𑁆𑀜𑀸 𑀯𑀸’’𑀢𑀺𑀆𑀤𑀺𑀓𑀸 𑀅𑀦𑀼𑀧𑀜𑁆𑀜𑀢𑁆𑀢𑀺 𑀯𑀼𑀢𑁆𑀢𑀸𑀢𑀺 𑀉𑀧𑀢𑁆𑀣𑀫𑁆𑀪𑀓𑀭𑀸𑀯 𑀳𑁄𑀢𑀺. 𑀢𑁂𑀦𑁂𑀯 𑀳𑀺 ‘‘𑀦𑀦𑀼, 𑀆𑀯𑀼𑀲𑁄, 𑀢𑀣𑁂𑀯𑁂𑀢𑀁 𑀳𑁄𑀢𑀻’’𑀢𑀺 (𑀧𑀸𑀭𑀸. 𑁯𑁦) 𑀪𑀺𑀓𑁆𑀔𑀽𑀳𑀺 𑀯𑀼𑀢𑁆𑀢𑀁.

𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀫𑀕𑁆𑀕𑁂𑀢𑀺 ‘‘𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀕𑀢𑀯𑀲𑁂𑀦𑀸’’𑀢𑀺𑀆𑀤𑀺𑀦𑀸 (𑀓𑀗𑁆𑀔𑀸. 𑀅𑀝𑁆𑀞. 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸) 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀢𑀺𑀁𑀲𑀫𑀕𑁆𑀕𑁂. 𑀇𑀫𑀲𑁆𑀲 𑀧𑀦 ‘‘𑀙𑀺𑀦𑁆𑀦𑁂’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀢𑀘𑀸𑀤𑀻𑀦𑀺 𑀅𑀦𑀯𑀲𑁂𑀲𑁂𑀢𑁆𑀯𑀸𑀢𑀺 𑀦𑀺𑀫𑀺𑀢𑁆𑀢𑀧𑁆𑀧𑀤𑁂𑀲𑁂 𑀩𑀳𑀺 𑀞𑀺𑀢𑀸𑀦𑀺 𑀙𑀯𑀺𑀘𑀫𑁆𑀫𑀸𑀦𑀺 𑀅𑀦𑀯𑀲𑁂𑀲𑁂𑀢𑁆𑀯𑀸. 𑀦𑀺𑀫𑀺𑀢𑁆𑀢𑀲𑀡𑁆𑀞𑀸𑀦𑀫𑀢𑁆𑀢𑀁 𑀧𑀜𑁆𑀜𑀸𑀬𑀢𑀻𑀢𑀺 𑀦𑀺𑀫𑀺𑀢𑁆𑀢𑀫𑀁𑀲𑀲𑁆𑀲 𑀧𑀦 𑀅𑀩𑁆𑀪𑀦𑁆𑀢𑀭𑁂 𑀙𑀯𑀺𑀘𑀫𑁆𑀫𑀲𑁆𑀲 𑀘 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀘𑀫𑁆𑀫𑀔𑀺𑀮𑀦𑁆𑀢𑀺 𑀘𑀫𑁆𑀫𑀓𑁆𑀔𑀡𑁆𑀟𑀁. ‘‘𑀉𑀡𑁆𑀡𑀺𑀕𑀡𑁆𑀟𑁄’’𑀢𑀺𑀧𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁫𑁫; 𑀯𑀺. 𑀯𑀺. 𑀝𑀻. 𑁧.𑁫𑁫) 𑀯𑀤𑀦𑁆𑀢𑀺. 𑀢𑀜𑁆𑀳𑀺 𑀦𑀺𑀫𑀺𑀢𑁆𑀢𑁂 𑀚𑀸𑀢𑀢𑁆𑀢𑀸 𑀦𑀺𑀫𑀺𑀢𑁆𑀢𑀫𑁂𑀯. 𑀢𑁂𑀦𑀸𑀳 ‘‘𑀲𑁂𑀯𑀦𑀘𑀺𑀢𑁆𑀢𑁂 𑀲𑀢𑀺 𑀧𑀸𑀭𑀸𑀚𑀺𑀓’’𑀦𑁆𑀢𑀺. 𑀲𑁂𑀯𑀦𑀘𑀺𑀢𑁆𑀢𑁂𑀢𑀺 𑀫𑁂𑀣𑀼𑀦𑀲𑁂𑀯𑀦𑀘𑀺𑀢𑁆𑀢𑁂. 𑀓𑀸𑀬𑀲𑀁𑀲𑀕𑁆𑀕𑀲𑁂𑀯𑀦𑀘𑀺𑀢𑁆𑀢𑁂 𑀧𑀦 𑀲𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄𑀯. 𑀦𑀝𑁆𑀞𑁄 𑀓𑀸𑀬𑀧𑁆𑀧𑀲𑀸𑀤𑁄 𑀏𑀢𑁆𑀣𑀸𑀢𑀺 𑀦𑀝𑁆𑀞𑀓𑀸𑀬𑀧𑁆𑀧𑀲𑀸𑀤𑀁, 𑀲𑀼𑀓𑁆𑀔𑀧𑀻𑀴𑀓𑀁 𑀯𑀸 𑀫𑀢𑀘𑀫𑁆𑀫𑀁 𑀯𑀸𑀢𑀺 𑀅𑀢𑁆𑀣𑁄. 𑀫𑀢𑁂 𑀅𑀓𑁆𑀔𑀸𑀬𑀺𑀢𑁂, 𑀬𑁂𑀪𑀼𑀬𑁆𑀬𑁂𑀦 𑀅𑀓𑁆𑀔𑀸𑀬𑀺𑀢𑁂 𑀘 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀯𑀘𑀦𑀢𑁄 (𑀧𑀸𑀭𑀸. 𑁬𑁧) 𑀧𑀦 𑀦𑀝𑁆𑀞𑀓𑀸𑀬𑀧𑁆𑀧𑀲𑀸𑀤𑁂𑀧𑀺 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑁂 𑀧𑀯𑁂𑀲𑁂𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑁂𑀯. 𑀦𑀺𑀫𑀺𑀢𑁆𑀢𑀲𑀡𑁆𑀞𑀸𑀦𑀫𑀢𑁆𑀢𑀫𑁆𑀧𑀺 𑀅𑀦𑀯𑀲𑁂𑀲𑁂𑀢𑁆𑀯𑀸𑀢𑀺 𑀦𑀺𑀫𑀺𑀢𑁆𑀢𑀸𑀓𑀸𑀭𑁂𑀦 𑀞𑀺𑀢𑀁 𑀬𑀣𑀸𑀯𑀼𑀢𑁆𑀢𑀦𑀺𑀫𑀺𑀢𑁆𑀢𑀫𑀁𑀲𑀸𑀤𑀺𑀫𑁆𑀧𑀺 𑀅𑀦𑀯𑀲𑁂𑀲𑁂𑀢𑁆𑀯𑀸. 𑀯𑀡𑀲𑀗𑁆𑀔𑁂𑀧𑀯𑀲𑁂𑀦𑀸𑀢𑀺 𑀯𑀡𑀲𑀗𑁆𑀕𑀳𑀯𑀲𑁂𑀦. 𑀯𑀡𑁂 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 ‘‘𑀅𑀫𑀕𑁆𑀕𑁂𑀦 𑀅𑀫𑀕𑁆𑀕𑀁 𑀧𑀯𑁂𑀲𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀧𑀸𑀭𑀸. 𑁬𑁬) 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀺𑀜𑁆𑀳𑀺 𑀲𑀼𑀢𑁆𑀢𑁂 𑀤𑁆𑀯𑀻𑀲𑀼 𑀲𑀫𑁆𑀪𑀺𑀦𑁆𑀦𑀯𑀡𑁂𑀲𑀼 𑀏𑀓𑁂𑀦 𑀯𑀡𑁂𑀦 𑀧𑀯𑁂𑀲𑁂𑀢𑁆𑀯𑀸 𑀤𑀼𑀢𑀺𑀬𑁂𑀦 𑀦𑀻𑀳𑀭𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 ‘‘𑀇𑀫𑀲𑁆𑀲 𑀲𑀢𑁆𑀢𑀲𑁆𑀲 𑀅𑀦𑀼𑀮𑁄𑀫𑀯𑀲𑁂𑀦 𑀲𑀩𑁆𑀩𑀢𑁆𑀣 𑀯𑀡𑀲𑀗𑁆𑀔𑁂𑀧𑁂 𑀣𑀼𑀮𑁆𑀮𑀘𑁆𑀘𑀬𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁬𑁬). 𑀫𑀦𑀼𑀲𑁆𑀲𑀸𑀦𑀁 𑀧𑀦 𑀅𑀓𑁆𑀔𑀺𑀆𑀤𑀬𑁄𑀧𑀺 𑀯𑀡𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑀡𑁂𑀦 𑀏𑀓𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀲𑀁 𑀯𑀡𑀲𑀗𑁆𑀕𑀳𑁄 ‘‘𑀦𑀯𑀤𑁆𑀯𑀸𑀭𑁄 𑀫𑀳𑀸𑀯𑀡𑁄’’𑀢𑀺 (𑀫𑀺. 𑀧. 𑁨.𑁬.𑁧) 𑀏𑀯𑀫𑀸𑀤𑀺𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀧𑀡𑁆𑀟𑀓𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸𑀦𑀁 𑀫𑀦𑀼𑀲𑁆𑀲𑀸𑀦𑀁. 𑀯𑀢𑁆𑀣𑀺𑀓𑁄𑀲𑁂𑀲𑀽𑀢𑀺 𑀯𑀢𑁆𑀣𑀺𑀧𑀼𑀝𑁂𑀲𑀼 𑀧𑀼𑀭𑀺𑀲𑀸𑀦𑀁 𑀅𑀗𑁆𑀕𑀚𑀸𑀢𑀓𑁄𑀲𑁂𑀲𑀼. 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀦𑀜𑁆𑀘 𑀢𑀺𑀭𑀘𑁆𑀙𑀸𑀦𑀸𑀦𑀦𑁆𑀢𑀺 𑀳𑀢𑁆𑀣𑀺𑀅𑀲𑁆𑀲𑀕𑁄𑀡𑀕𑀤𑁆𑀭𑀪𑀑𑀝𑁆𑀞𑀫𑀳𑀺𑀁𑀲𑀸𑀤𑀻𑀦𑀁 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁. 𑀢𑀺𑀭𑀘𑁆𑀙𑀸𑀦𑀸𑀦𑀁 𑀧𑀦𑀸𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁. 𑀲𑀩𑁆𑀩𑁂𑀲𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀫𑀦𑀼𑀲𑁆𑀲𑀸𑀤𑀻𑀦𑀁 𑀲𑀩𑁆𑀩𑁂𑀲𑀁.

𑀏𑀯𑀁 𑀚𑀻𑀯𑀫𑀸𑀦𑀓𑀲𑀭𑀻𑀭𑁂 𑀮𑀩𑁆𑀪𑀫𑀸𑀦𑀁 𑀆𑀧𑀢𑁆𑀢𑀺𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀫𑀢𑀲𑀭𑀻𑀭𑁂 𑀮𑀩𑁆𑀪𑀫𑀸𑀦𑀁 𑀆𑀧𑀢𑁆𑀢𑀺𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀢𑀲𑀭𑀻𑀭𑁂’’𑀢𑀺𑀆𑀤𑀺𑀫𑀸𑀳. 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀫𑀼𑀔𑀫𑀕𑁆𑀕𑀸𑀦𑀁 𑀘𑀢𑀽𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀞𑀧𑁂𑀢𑁆𑀯𑀸 𑀬𑀤𑀸 𑀅𑀧𑀭𑁂 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀔𑀸𑀤𑀺𑀢𑀸, 𑀢𑀤𑀸 𑀉𑀧𑀟𑁆𑀠𑀓𑁆𑀔𑀸𑀬𑀺𑀢𑀁 𑀦𑀸𑀫 𑀳𑁄𑀢𑀺. 𑀦 𑀓𑀼𑀣𑀺𑀢𑀁 𑀳𑁄𑀢𑀻𑀢𑀺 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀪𑀸𑀯𑁂𑀦 𑀓𑀼𑀣𑀺𑀢𑀁 𑀦 𑀳𑁄𑀢𑀺, 𑀅𑀮𑁆𑀮𑀦𑁆𑀢𑀺 𑀅𑀢𑁆𑀣𑁄. 𑀬𑀤𑀸 𑀧𑀦 𑀲𑀭𑀻𑀭𑀁 𑀉𑀤𑁆𑀥𑀼𑀫𑀸𑀢𑀓𑀁 𑀳𑁄𑀢𑀺 𑀓𑀼𑀣𑀺𑀢𑀁 𑀦𑀻𑀮𑀫𑀓𑁆𑀔𑀺𑀓𑀲𑀫𑀸𑀓𑀺𑀡𑁆𑀡𑀁 𑀓𑀺𑀫𑀺𑀓𑀼𑀮𑀲𑀫𑀸𑀓𑀼𑀮𑀁 𑀦𑀯𑀳𑀺 𑀯𑀡𑀫𑀼𑀔𑁂𑀳𑀺 𑀧𑀕𑁆𑀕𑀴𑀺𑀢𑀧𑀼𑀩𑁆𑀩𑀓𑀼𑀡𑀧𑀪𑀸𑀯𑁂𑀦 𑀉𑀧𑀕𑀦𑁆𑀢𑀼𑀫𑁆𑀧𑀺 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 (𑀧𑀸𑀭𑀸. 𑀅𑀝𑁆𑀞. 𑁧.𑁫𑁯-𑁬𑁦), 𑀢𑀤𑀸 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀜𑁆𑀘 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀼𑀜𑁆𑀘 𑀯𑀺𑀚𑀳𑀢𑀺, 𑀤𑀼𑀓𑁆𑀓𑀝𑀯𑀢𑁆𑀣𑀼𑀫𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀓𑀼𑀣𑀺𑀢𑁂 𑀤𑀼𑀓𑁆𑀓𑀝’’𑀦𑁆𑀢𑀺. 𑀓𑀼𑀣𑀺𑀢𑁂𑀢𑀺 𑀉𑀤𑁆𑀥𑀼𑀫𑀸𑀢𑀓𑀪𑀸𑀯𑀧𑁆𑀧𑀢𑁆𑀢𑁂. 𑀈𑀤𑀺𑀲𑁂 𑀳𑀺 𑀲𑀭𑀻𑀭𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀉𑀧𑀓𑁆𑀓𑀫𑀢𑁄 𑀤𑀼𑀓𑁆𑀓𑀝𑀁. 𑀢𑀣𑀸 𑀯𑀝𑁆𑀝𑀓𑀢𑁂 𑀫𑀼𑀔𑁂 𑀅𑀘𑁆𑀙𑀼𑀧𑀦𑁆𑀢𑀁 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀦𑁆𑀢𑀲𑁆𑀲𑀸𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁭𑁩) 𑀯𑀺𑀯𑀝𑁆𑀝𑁂 𑀫𑀼𑀔𑁂 𑀘𑀢𑁆𑀢𑀸𑀭𑀺 𑀧𑀲𑁆𑀲𑀸𑀦𑀺, 𑀢𑀸𑀮𑀼𑀓𑀜𑁆𑀘 𑀅𑀧𑁆𑀨𑀼𑀲𑀦𑁆𑀢𑀁 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀅𑀢𑁆𑀣𑁄. 𑀲𑀘𑁂 𑀧𑀦 𑀳𑁂𑀝𑁆𑀞𑀸 𑀯𑀸 𑀉𑀧𑀭𑀺 𑀯𑀸 𑀉𑀪𑀬𑀧𑀲𑁆𑀲𑁂𑀳𑀺 𑀯𑀸 𑀙𑀼𑀧𑀦𑁆𑀢𑀁 𑀧𑀯𑁂𑀲𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀘𑀢𑀽𑀳𑀺 𑀧𑀲𑁆𑀲𑁂𑀳𑀺 𑀅𑀘𑁆𑀙𑀼𑀧𑀦𑁆𑀢𑀁 𑀧𑀯𑁂𑀲𑁂𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑁂 𑀢𑀸𑀮𑀼𑀓𑀁 𑀙𑀼𑀧𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯. 𑀩𑀳𑀺 𑀦𑀺𑀓𑁆𑀔𑀦𑁆𑀢𑀚𑀺𑀯𑁆𑀳𑀸𑀬 𑀯𑀸 𑀤𑀦𑁆𑀢𑁂𑀲𑀼 𑀯𑀸 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀚𑀻𑀯𑀫𑀸𑀦𑀓𑀲𑀭𑀻𑀭𑁂𑀧𑀺 𑀩𑀳𑀺 𑀦𑀺𑀓𑁆𑀔𑀦𑁆𑀢𑀚𑀺𑀯𑁆𑀳𑀸𑀬 𑀣𑀼𑀮𑁆𑀮𑀘𑁆𑀘𑀬𑀫𑁂𑀯. 𑀬𑀤𑀺 𑀧𑀦 𑀩𑀳𑀺 𑀚𑀺𑀯𑁆𑀳𑀸𑀬 𑀧𑀮𑀺𑀯𑁂𑀞𑁂𑀢𑁆𑀯𑀸 𑀅𑀦𑁆𑀢𑁄𑀫𑀼𑀔𑀁 𑀧𑀯𑁂𑀲𑁂𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯. 𑀬𑀤𑀺 𑀧𑀦 𑀤𑀦𑁆𑀢𑀸 𑀲𑀼𑀨𑀼𑀲𑀺𑀢𑀸, 𑀅𑀦𑁆𑀢𑁄𑀫𑀼𑀔𑁂 𑀑𑀓𑀸𑀲𑁄 𑀦𑀢𑁆𑀣𑀺, 𑀤𑀦𑁆𑀢𑀸 𑀘 𑀩𑀳𑀺 𑀑𑀝𑁆𑀞𑀫𑀁𑀲𑁂𑀦 𑀧𑀝𑀺𑀘𑁆𑀙𑀦𑁆𑀦𑀸, 𑀢𑀢𑁆𑀣 𑀯𑀸𑀢𑁂𑀦 𑀅𑀲𑀫𑁆𑀨𑀼𑀝𑁆𑀞𑀁 𑀅𑀮𑁆𑀮𑁄𑀓𑀸𑀲𑀁 𑀢𑀺𑀮𑀨𑀮𑀫𑀢𑁆𑀢𑀫𑁆𑀧𑀺 𑀧𑀯𑁂𑀲𑁂𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀫𑁂𑀯. 𑀉𑀧𑁆𑀧𑀸𑀝𑀺𑀢𑁂 𑀧𑀦 𑀑𑀝𑁆𑀞𑀫𑀁𑀲𑁂 𑀤𑀦𑁆𑀢𑁂𑀲𑀼𑀬𑁂𑀯 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁. 𑀬𑁄𑀧𑀺 𑀤𑀦𑁆𑀢𑁄 𑀩𑀳𑀺 𑀦𑀺𑀓𑁆𑀔𑀫𑀦𑁆𑀢𑁄 𑀢𑀺𑀝𑁆𑀞𑀢𑀺, 𑀦 𑀲𑀓𑁆𑀓𑀸 𑀑𑀝𑁆𑀞𑁂𑀳𑀺 𑀧𑀺𑀤𑀳𑀺𑀢𑀼𑀁, 𑀢𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀯𑁂𑀤𑀦𑀸𑀬 𑀅𑀝𑁆𑀝𑁄 𑀧𑀻𑀴𑀺𑀢𑁄 𑀯𑁂𑀤𑀦𑀸𑀝𑁆𑀝𑁄. 𑀉𑀫𑁆𑀫𑀢𑁆𑀢𑀓𑁄𑀢𑀺 𑀘𑁂𑀢𑁆𑀣 𑀧𑀺𑀢𑁆𑀢𑀼𑀫𑁆𑀫𑀢𑁆𑀢𑀓𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀬𑁄 𑀧𑀺𑀢𑁆𑀢𑀯𑀲𑁂𑀦𑀸’’𑀢𑀺𑀆𑀤𑀺. 𑀧𑀺𑀢𑁆𑀢𑀯𑀲𑁂𑀦𑀸𑀢𑀺 𑀩𑀤𑁆𑀥𑀧𑀺𑀢𑁆𑀢𑀯𑀲𑁂𑀦. 𑀢𑀲𑁆𑀫𑀺𑀜𑁆𑀳𑀺 𑀩𑀤𑁆𑀥𑀧𑀺𑀢𑁆𑀢𑁂 𑀧𑀺𑀢𑁆𑀢𑀓𑁄𑀲𑀢𑁄 𑀘𑀮𑀺𑀢𑁆𑀯𑀸 𑀩𑀳𑀺 𑀦𑀺𑀓𑁆𑀔𑀫𑀦𑁆𑀢𑁂 𑀲𑀢𑁆𑀢𑀸 𑀉𑀫𑁆𑀫𑀢𑁆𑀢𑀓𑀸 𑀳𑁄𑀦𑁆𑀢𑀺, 𑀯𑀺𑀧𑀮𑁆𑀮𑀢𑁆𑀣𑀲𑀜𑁆𑀜𑀸 𑀳𑀺𑀭𑁄𑀢𑁆𑀢𑀧𑁆𑀧𑀁 𑀙𑀟𑁆𑀟𑁂𑀢𑁆𑀯𑀸 𑀅𑀲𑀸𑀭𑀼𑀧𑁆𑀧𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀮𑀳𑀼𑀓𑀕𑀭𑀼𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀫𑀤𑁆𑀤𑀦𑁆𑀢𑀸𑀧𑀺 𑀦 𑀚𑀸𑀦𑀦𑁆𑀢𑀺, 𑀪𑁂𑀲𑀚𑁆𑀚𑀓𑀺𑀭𑀺𑀬𑀸𑀬𑀧𑀺 𑀅𑀢𑁂𑀓𑀺𑀘𑁆𑀙𑀸 𑀳𑁄𑀦𑁆𑀢𑀺, 𑀏𑀯𑀭𑀽𑀧𑀲𑁆𑀲 𑀉𑀫𑁆𑀫𑀢𑁆𑀢𑀓𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀩𑀤𑁆𑀥𑀧𑀺𑀢𑁆𑀢𑀁 𑀧𑀦 𑀮𑁄𑀳𑀺𑀢𑀁 𑀯𑀺𑀬 𑀲𑀩𑁆𑀩𑀗𑁆𑀕𑀕𑀢𑀁, 𑀢𑀫𑁆𑀳𑀺 𑀓𑀼𑀧𑀺𑀢𑁂 𑀲𑀢𑁆𑀢𑀸𑀦𑀁 𑀓𑀡𑁆𑀟𑀼𑀓𑀘𑁆𑀙𑀼𑀲𑀭𑀻𑀭𑀓𑀫𑁆𑀧𑀸𑀤𑀻𑀦𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀪𑁂𑀲𑀚𑁆𑀚𑀓𑀺𑀭𑀺𑀬𑀸𑀬 𑀯𑀽𑀧𑀲𑀫𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀩𑀤𑁆𑀥𑀧𑀺𑀢𑁆𑀢𑀯𑀲𑁂𑀦𑀸’’𑀢𑀺. 𑀔𑀺𑀢𑁆𑀢𑀘𑀺𑀢𑁆𑀢𑁄 𑀦𑀸𑀫 𑀯𑀺𑀲𑁆𑀲𑀝𑁆𑀞𑀘𑀺𑀢𑁆𑀢𑁄 𑀬𑀓𑁆𑀔𑀼𑀫𑁆𑀫𑀢𑁆𑀢𑀓𑁄 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀬𑀓𑁆𑀔𑁂𑀳𑀺 𑀓𑀢𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑁄 𑀔𑀺𑀢𑁆𑀢𑀘𑀺𑀢𑁆𑀢𑁄’’𑀢𑀺. 𑀬𑀓𑁆𑀔𑀸 𑀓𑀺𑀭 𑀪𑁂𑀭𑀯𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀫𑀼𑀔𑁂𑀦 𑀳𑀢𑁆𑀣𑀁 𑀧𑀯𑁂𑀲𑁂𑀢𑁆𑀯𑀸, 𑀳𑀤𑀬𑀭𑀽𑀧𑀁 𑀯𑀸 𑀫𑀤𑁆𑀤𑀦𑁆𑀢𑀸 𑀲𑀢𑁆𑀢𑁂 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁂 𑀯𑀺𑀧𑀮𑁆𑀮𑀢𑁆𑀣𑀲𑀜𑁆𑀜𑁂 𑀓𑀭𑁄𑀦𑁆𑀢𑀺, 𑀏𑀯𑀭𑀽𑀧𑀲𑁆𑀲 𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀢𑁂𑀲𑀁 𑀧𑀦 𑀉𑀪𑀺𑀦𑁆𑀦𑀁 𑀅𑀬𑀁 𑀯𑀺𑀲𑁂𑀲𑁄 𑁋 𑀧𑀺𑀢𑁆𑀢𑀼𑀫𑁆𑀫𑀢𑁆𑀢𑀓𑁄 𑀦𑀺𑀘𑁆𑀘𑀫𑁂𑀯 𑀉𑀫𑁆𑀫𑀢𑁆𑀢𑀓𑁄 𑀳𑁄𑀢𑀺, 𑀧𑀓𑀢𑀺𑀲𑀜𑁆𑀜𑀁 𑀦 𑀮𑀪𑀢𑀺. 𑀬𑀓𑁆𑀔𑀼𑀫𑁆𑀫𑀢𑁆𑀢𑀓𑁄 𑀅𑀦𑁆𑀢𑀭𑀦𑁆𑀢𑀭𑀸 𑀧𑀓𑀢𑀺𑀲𑀜𑁆𑀜𑀁 𑀧𑀝𑀺𑀮𑀪𑀢𑀺. 𑀇𑀥 𑀧𑀦 𑀧𑀺𑀢𑁆𑀢𑀼𑀫𑁆𑀫𑀢𑁆𑀢𑀓𑁄 𑀯𑀸 𑀳𑁄𑀢𑀼, 𑀬𑀓𑁆𑀔𑀼𑀫𑁆𑀫𑀢𑁆𑀢𑀓𑁄 𑀯𑀸, 𑀬𑁄 𑀲𑀩𑁆𑀩𑀲𑁄 𑀫𑀼𑀝𑁆𑀞𑀲𑁆𑀲𑀢𑀺 𑀓𑀺𑀜𑁆𑀘𑀺 𑀦 𑀚𑀸𑀦𑀸𑀢𑀺, 𑀅𑀕𑁆𑀕𑀺𑀫𑁆𑀧𑀺 𑀲𑀼𑀯𑀡𑁆𑀡𑀫𑁆𑀧𑀺 𑀕𑀽𑀣𑀫𑁆𑀧𑀺 𑀘𑀦𑁆𑀤𑀦𑀫𑁆𑀧𑀺 𑀏𑀓𑀲𑀤𑀺𑀲𑀁 𑀫𑀤𑁆𑀤𑀦𑁆𑀢𑁄𑀯 𑀯𑀺𑀘𑀭𑀢𑀺, 𑀏𑀯𑀭𑀽𑀧𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀦𑁆𑀢𑀭𑀦𑁆𑀢𑀭𑀸 𑀧𑀓𑀢𑀺𑀲𑀜𑁆𑀜𑀁 𑀧𑀝𑀺𑀮𑀪𑀺𑀢𑁆𑀯𑀸 𑀜𑀢𑁆𑀯𑀸 𑀓𑀭𑁄𑀦𑁆𑀢𑀲𑁆𑀲 𑀧𑀦 𑀆𑀧𑀢𑁆𑀢𑀺𑀬𑁂𑀯. 𑀢𑁂𑀦𑀸𑀳 ‘‘𑀤𑁆𑀯𑀺𑀦𑁆𑀦𑀫𑁆𑀧𑀺 𑀘 𑀏𑀢𑁂𑀲’’𑀦𑁆𑀢𑀺𑀆𑀤𑀺.

𑀅𑀥𑀺𑀫𑀢𑁆𑀢𑀯𑁂𑀤𑀦𑀸𑀬𑀸𑀢𑀺 𑀅𑀥𑀺𑀓𑀧𑁆𑀧𑀫𑀸𑀡𑀸𑀬 𑀤𑀼𑀓𑁆𑀔𑀯𑁂𑀤𑀦𑀸𑀬. 𑀆𑀤𑀺𑀓𑀫𑁆𑀫𑁂 𑀦𑀺𑀬𑀼𑀢𑁆𑀢𑁄 𑀆𑀤𑀺𑀓𑀫𑁆𑀫𑀺𑀓𑁄, 𑀬𑁄 𑀘 𑀆𑀤𑀺𑀓𑀫𑁆𑀫𑁂 𑀦𑀺𑀬𑀼𑀢𑁆𑀢𑁄, 𑀲𑁄 𑀢𑀲𑁆𑀫𑀺𑀁 𑀓𑀫𑁆𑀫𑁂 𑀆𑀤𑀺𑀪𑀽𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀬𑁄’’𑀢𑀺𑀆𑀤𑀺. 𑀇𑀥 𑀧𑀦 𑀲𑀼𑀤𑀺𑀦𑁆𑀦𑀢𑁆𑀣𑁂𑀭𑁄 𑀆𑀤𑀺𑀓𑀫𑁆𑀫𑀺𑀓𑁄, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀯𑀲𑁂𑀲𑀸𑀦𑀁 𑀫𑀓𑁆𑀓𑀝𑀺𑀲𑀫𑀡𑀯𑀚𑁆𑀚𑀺𑀧𑀼𑀢𑁆𑀢𑀓𑀸𑀤𑀻𑀦𑀁 𑀆𑀧𑀢𑁆𑀢𑀺𑀬𑁂𑀯. 𑀧𑀝𑀺𑀧𑀸𑀤𑀦𑀁 𑀲𑀫𑁆𑀧𑀸𑀤𑀦𑀁. 𑀓𑀭𑁄𑀦𑁆𑀢𑁄𑀬𑁂𑀯 𑀳𑀺 𑀢𑀁 𑀆𑀧𑀚𑁆𑀚𑀢𑀻𑀢𑀺 𑀓𑀺𑀭𑀺𑀬𑀁. 𑀇𑀤𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁬𑁬) 𑀧𑀦 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁 𑀫𑁂𑀣𑀼𑀦𑀥𑀫𑁆𑀫𑁂 𑀧𑀭𑀽𑀧𑀓𑁆𑀓𑀫𑁂 𑀲𑀢𑀺 𑀲𑀸𑀤𑀺𑀬𑀦𑁆𑀢𑀲𑁆𑀲 𑀅𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀪𑀸𑀯𑀢𑁄. 𑀫𑁂𑀣𑀼𑀦𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀳𑀺 𑀓𑀸𑀫𑀲𑀜𑁆𑀜𑀸𑀬 𑀅𑀪𑀸𑀯𑁂𑀦 𑀫𑀼𑀘𑁆𑀘𑀦𑀢𑁄 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁. ‘‘𑀅𑀦𑀸𑀧𑀢𑁆𑀢𑀺 𑀅𑀚𑀸𑀦𑀦𑁆𑀢𑀲𑁆𑀲, 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑀸’’𑀢𑀺 (𑀧𑀸𑀭𑀸. 𑁬𑁬) 𑀳𑀺 𑀯𑀼𑀢𑁆𑀢𑀁. 𑀫𑁂𑀣𑀼𑀦𑀘𑀺𑀢𑁆𑀢𑁂𑀦𑁂𑀯 𑀦𑀁 𑀆𑀧𑀚𑁆𑀚𑀢𑀺, 𑀦 𑀯𑀺𑀦𑀸 𑀘𑀺𑀢𑁆𑀢𑁂𑀦𑀸𑀢𑀺 𑀲𑀘𑀺𑀢𑁆𑀢𑀓𑀁. 𑀭𑀸𑀕𑀯𑀲𑁂𑀦𑁂𑀯 𑀆𑀧𑀚𑁆𑀚𑀺𑀢𑀩𑁆𑀩𑀢𑁄 𑀮𑁄𑀓𑀯𑀚𑁆𑀚𑀁. 𑀓𑀸𑀬𑀤𑁆𑀯𑀸𑀭𑁂𑀦𑁂𑀯 𑀲𑀫𑀼𑀝𑁆𑀞𑀸𑀦𑀢𑁄 𑀓𑀸𑀬𑀓𑀫𑁆𑀫𑀁. 𑀘𑀺𑀢𑁆𑀢𑀁 𑀧𑀦𑁂𑀢𑁆𑀣 𑀅𑀗𑁆𑀕𑀫𑀢𑁆𑀢𑀁 𑀳𑁄𑀢𑀺, 𑀦 𑀢𑀲𑁆𑀲 𑀯𑀲𑁂𑀦 𑀓𑀫𑁆𑀫𑀪𑀸𑀯𑁄 𑀮𑀩𑁆𑀪𑀢𑀺. 𑀮𑁄𑀪𑀘𑀺𑀢𑁆𑀢𑁂𑀦𑁂𑀯 𑀆𑀧𑀚𑁆𑀚𑀺𑀢𑀩𑁆𑀩𑀢𑁄 𑀅𑀓𑀼𑀲𑀮𑀘𑀺𑀢𑁆𑀢𑀁. 𑀲𑀼𑀔𑀲𑀫𑀗𑁆𑀕𑀻 𑀯𑀸 𑀉𑀧𑁂𑀓𑁆𑀔𑀸𑀲𑀫𑀗𑁆𑀕𑀻 𑀯𑀸 𑀆𑀧𑀚𑁆𑀚𑀢𑀻𑀢𑀺 𑀤𑁆𑀯𑀺𑀯𑁂𑀤𑀦𑀁. 𑀦𑀦𑀼 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀆𑀧𑀢𑁆𑀢𑀺𑀬𑀸 𑀳𑁄𑀦𑁆𑀢𑀺, 𑀦 𑀲𑀺𑀓𑁆𑀔𑀸𑀧𑀤𑀲𑁆𑀲, 𑀅𑀣 𑀓𑀲𑁆𑀫𑀸 𑀲𑀺𑀓𑁆𑀔𑀸𑀧𑀤𑀲𑁆𑀲 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀆𑀳 ‘‘𑀇𑀫𑀸𑀦𑀺 𑀘 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀦𑀸𑀫𑀸’’𑀢𑀺𑀆𑀤𑀺. 𑀆𑀧𑀢𑁆𑀢𑀺𑀬𑀸 𑀳𑁄𑀦𑁆𑀢𑀻𑀢𑀺 𑀅𑀚𑁆𑀛𑀸𑀘𑀸𑀭𑀲𑁆𑀲 𑀳𑁄𑀦𑁆𑀢𑀺.

𑀫𑀼𑀦𑀦𑀢𑁄 𑀅𑀦𑀼𑀫𑀼𑀦𑀦𑀢𑁄 𑀫𑀼𑀢𑀺, 𑀜𑀸𑀡𑀁, 𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑀼𑀢𑀺𑀫𑀸, 𑀜𑀸𑀡𑀯𑀸𑀢𑀺 𑀅𑀢𑁆𑀣𑁄.

𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸

𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀤𑁆𑀯𑀻𑀲𑀼. 𑀏𑀓𑀓𑀼𑀝𑀺𑀓𑀸𑀤𑀺𑀪𑁂𑀤𑁄 𑀲𑀩𑁆𑀩𑁄𑀧𑀺 𑀕𑀸𑀫𑁄𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀏𑀓𑀓𑀼𑀝𑀺𑀓𑀸𑀤𑀺𑀪𑁂𑀤𑁄𑀢𑀺 𑀬𑀲𑁆𑀫𑀺𑀁 𑀕𑀸𑀫𑁂 𑀏𑀓𑀸 𑀏𑀯 𑀓𑀼𑀝𑀺 𑀏𑀓𑀁 𑀕𑁂𑀳𑀁 𑀲𑁂𑀬𑁆𑀬𑀣𑀸𑀧𑀺 𑀫𑀮𑀬𑀚𑀦𑀧𑀤𑁂, 𑀅𑀬𑀁 𑀏𑀓𑀓𑀼𑀝𑀺𑀓𑁄 𑀕𑀸𑀫𑁄 𑀦𑀸𑀫. 𑀆𑀤𑀺𑀲𑀤𑁆𑀤𑁂𑀦 ‘‘𑀤𑁆𑀯𑀺𑀓𑀼𑀝𑀺𑀓𑁄𑀧𑀺 𑀕𑀸𑀫𑁄, 𑀢𑀺𑀓𑀼𑀝𑀺𑀓𑁄𑀧𑀺 𑀕𑀸𑀫𑁄, 𑀘𑀢𑀼𑀓𑁆𑀓𑀼𑀝𑀺𑀓𑁄𑀧𑀺 𑀕𑀸𑀫𑁄’’𑀢𑀺 (𑀧𑀸𑀭𑀸. 𑁯𑁨) 𑀯𑀼𑀢𑁆𑀢𑀧𑁆𑀧𑀪𑁂𑀤𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀪𑀺𑀦𑀯𑀦𑀺𑀯𑀺𑀝𑁆𑀞𑁄 𑀏𑀓𑀓𑀼𑀝𑀺𑀓𑀸𑀤𑀺𑀕𑀸𑀫𑁄 𑀧𑀦 𑀬𑀸𑀯 𑀫𑀦𑀼𑀲𑁆𑀲𑀸 𑀧𑀯𑀺𑀲𑀺𑀢𑁆𑀯𑀸 𑀯𑀸𑀲𑀁 𑀦 𑀓𑀧𑁆𑀧𑁂𑀦𑁆𑀢𑀺, 𑀢𑀸𑀯 𑀕𑀸𑀫𑀲𑀗𑁆𑀔𑀁 𑀦 𑀕𑀘𑁆𑀙𑀢𑀺. 𑀓𑀺𑀁𑀪𑀽𑀢𑁄𑀢𑀺 𑀆𑀳 ‘‘𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑀭𑀺𑀓𑁆𑀔𑀺𑀢𑁆𑀢𑁄 𑀦𑀸𑀫 𑀇𑀝𑁆𑀞𑀓𑀧𑀸𑀓𑀸𑀭𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀦𑁆𑀢𑀫𑀲𑁄 𑀓𑀡𑁆𑀝𑀓𑀲𑀸𑀔𑀸𑀳𑀺𑀧𑀺 𑀧𑀭𑀺𑀓𑁆𑀔𑀺𑀢𑁆𑀢𑁄. 𑀢𑀩𑁆𑀩𑀺𑀧𑀭𑀻𑀢𑁄 𑀅𑀧𑀭𑀺𑀓𑁆𑀔𑀺𑀢𑁆𑀢𑁄. 𑀅𑀫𑀦𑀼𑀲𑁆𑀲𑁄 𑀦𑀸𑀫 𑀬𑁄 𑀲𑀩𑁆𑀩𑀲𑁄 𑀯𑀸 𑀫𑀦𑀼𑀲𑁆𑀲𑀸𑀦𑀁 𑀅𑀪𑀸𑀯𑁂𑀦 𑀬𑀓𑁆𑀔𑀧𑀭𑀺𑀕𑁆𑀕𑀳𑀪𑀽𑀢𑁄, 𑀬𑀢𑁄 𑀯𑀸 𑀫𑀦𑀼𑀲𑁆𑀲𑀸 𑀓𑁂𑀦𑀘𑀺 𑀓𑀭𑀡𑀻𑀬𑁂𑀦 𑀧𑀼𑀦𑀧𑀺 𑀆𑀕𑀦𑁆𑀢𑀼𑀓𑀸𑀫𑀸 𑀏𑀯 𑀅𑀧𑀓𑁆𑀓𑀦𑁆𑀢𑀸, 𑀬𑀢𑁄 𑀧𑀦 𑀦𑀺𑀭𑀧𑁂𑀓𑁆𑀔𑀸 𑀳𑀼𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺, 𑀲𑁄 𑀕𑀸𑀫𑀲𑀗𑁆𑀔𑀁 𑀦 𑀕𑀘𑁆𑀙𑀢𑀺. 𑀦 𑀓𑁂𑀯𑀮𑀁 𑀏𑀓𑀓𑀼𑀝𑀺𑀓𑀸𑀤𑀺𑀪𑁂𑀤𑁄𑀯𑀸𑀢𑀺 𑀆𑀳 ‘‘𑀅𑀦𑁆𑀢𑀫𑀲𑁄’’𑀢𑀺𑀆𑀤𑀺. 𑀬𑁄 𑀓𑁄𑀘𑀺 𑀲𑀢𑁆𑀣𑁄𑀧𑀻𑀢𑀺 𑀚𑀗𑁆𑀖𑀲𑀢𑁆𑀣𑀲𑀓𑀝𑀲𑀢𑁆𑀣𑀸𑀤𑀻𑀲𑀼 𑀬𑁄 𑀓𑁄𑀘𑀺 𑀲𑀢𑁆𑀣𑁄𑀧𑀺. 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀦𑀺𑀕𑀫𑀦𑀕𑀭𑀸𑀦𑀺 𑀯𑀺𑀬 𑀕𑀸𑀫𑀕𑁆𑀕𑀳𑀡𑁂𑀦𑁂𑀯 𑀕𑀸𑀫𑀽𑀧𑀘𑀸𑀭𑁄𑀧𑀺 𑀲𑀗𑁆𑀕𑀳𑀺𑀢𑁄𑀢𑀺 𑀆𑀳 ‘‘𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘𑀸’’𑀢𑀺. 𑀅𑀜𑁆𑀜𑀣𑀸 𑀧𑀦 𑀫𑀸𑀢𑀺𑀓𑀸𑀬 𑀅𑀦𑀯𑀲𑁂𑀲𑀢𑁄 𑀅𑀯𑀳𑀸𑀭𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑁄 𑀓𑀢𑁄 𑀦𑀸𑀫 𑀦 𑀳𑁄𑀢𑀺, 𑀦 𑀘 𑀩𑀼𑀤𑁆𑀥𑀸 𑀲𑀸𑀯𑀲𑁂𑀲𑀁 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀸𑀧𑁂𑀦𑁆𑀢𑀺.

𑀢𑀢𑁆𑀣𑀸𑀢𑀺 𑀢𑁂𑀲𑀼 𑀕𑀸𑀫𑀕𑀸𑀫𑀽𑀧𑀘𑀸𑀭𑁂𑀲𑀼. 𑀤𑁆𑀯𑀸𑀭𑁂𑀢𑀺 𑀦𑀺𑀩𑁆𑀩𑀓𑁄𑀲𑀲𑁆𑀲 𑀉𑀤𑀓𑀧𑀢𑀦𑀝𑁆𑀞𑀸𑀦𑀢𑁄 𑀅𑀩𑁆𑀪𑀦𑁆𑀢𑀭𑁂. 𑀅𑀦𑁆𑀢𑁄𑀕𑁂𑀳𑁂𑀢𑀺 𑀧𑀫𑀼𑀔𑀲𑁆𑀲 𑀅𑀩𑁆𑀪𑀦𑁆𑀢𑀭𑁂. 𑀓𑀢𑀧𑀭𑀺𑀓𑁆𑀔𑁂𑀧𑁄𑀢𑀺 𑀧𑀸𑀓𑀸𑀭𑀯𑀢𑀺𑀆𑀤𑀻𑀳𑀺 𑀓𑀢𑀧𑀭𑀺𑀓𑁆𑀔𑁂𑀧𑁄. 𑀲𑀼𑀧𑁆𑀧𑀧𑀢𑀦𑀸𑀤𑀺𑀧𑀭𑀺𑀘𑁆𑀙𑁂𑀤𑁄 𑀧𑀦𑁂𑀢𑁆𑀣 𑀅𑀧𑀭𑀺𑀓𑁆𑀔𑀺𑀢𑁆𑀢𑀖𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄. 𑀦 𑀓𑁂𑀯𑀮𑀁 𑀖𑀭𑀲𑁆𑀲 𑀧𑀼𑀭𑀢𑁄, 𑀅𑀣 𑀔𑁄 𑀲𑀫𑀦𑁆𑀢𑀢𑁄 𑀢𑀢𑁆𑀢𑀓𑁄𑀯 𑀧𑀭𑀺𑀘𑁆𑀙𑁂𑀤𑁄 𑀖𑀭𑀽𑀧𑀘𑀸𑀭𑁄 𑀦𑀸𑀫𑀸𑀢𑀺 𑀕𑀳𑁂𑀢𑀩𑁆𑀩𑀁. ‘‘𑀧𑀼𑀭𑀢𑁄’’𑀢𑀺𑀆𑀤𑀺𑀓𑀁 𑀧𑀦 𑀮𑁄𑀓𑀺𑀬𑁂𑀳𑀺 𑀢𑀣𑀸𑀓𑀭𑀡𑀢𑁄 𑀯𑀼𑀢𑁆𑀢𑀁. 𑀣𑀸𑀫𑀫𑀚𑁆𑀛𑀺𑀫𑀲𑁆𑀲𑀸𑀢𑀺 𑀫𑀚𑁆𑀛𑀺𑀫𑀣𑀸𑀫𑀲𑁆𑀲, 𑀦𑁂𑀯 𑀅𑀧𑁆𑀧𑀣𑀸𑀫𑀲𑁆𑀲, 𑀦 𑀫𑀳𑀸𑀣𑀸𑀫𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀬𑀣𑀸 𑀢𑀭𑀼𑀡𑀫𑀦𑀼𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀬𑀣𑀸 𑀫𑀸𑀢𑀼𑀕𑀸𑀫𑁄 𑀓𑀸𑀓𑁂 𑀉𑀟𑁆𑀟𑀸𑀧𑁂𑀦𑁆𑀢𑁄 𑀉𑀚𑀼𑀓𑀫𑁂𑀯 𑀳𑀢𑁆𑀣𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀮𑁂𑀟𑁆𑀟𑀼𑀁 𑀔𑀺𑀧𑀢𑀺, 𑀬𑀣𑀸 𑀘 𑀉𑀤𑀓𑀼𑀓𑁆𑀔𑁂𑀧𑁂 𑀉𑀤𑀓𑀁 𑀔𑀺𑀧𑀦𑁆𑀢𑀺, 𑀏𑀯𑀁 𑀔𑀺𑀢𑁆𑀢𑀲𑁆𑀲 𑀮𑁂𑀟𑁆𑀟𑀼𑀲𑁆𑀲 𑀧𑀢𑀺𑀢𑀝𑁆𑀞𑀸𑀦𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀯𑀢𑁆𑀢𑀺𑀢𑁆𑀯𑀸𑀢𑀺 𑀮𑀼𑀞𑀺𑀢𑁆𑀯𑀸, 𑀧𑀭𑀺𑀯𑀢𑁆𑀢𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀲 𑀲𑀘𑁂 𑀤𑁆𑀯𑁂 𑀇𑀦𑁆𑀤𑀔𑀻𑀮𑀸 𑀳𑁄𑀦𑁆𑀢𑀻𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁨) 𑀢𑀲𑁆𑀲 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀲𑀘𑁂 𑀅𑀦𑀼𑀭𑀸𑀥𑀧𑀼𑀭𑀲𑁆𑀲𑁂𑀯 𑀤𑁆𑀯𑁂 𑀉𑀫𑁆𑀫𑀸𑀭𑀸 𑀳𑁄𑀦𑁆𑀢𑀺. 𑀬𑀲𑁆𑀲 𑀧𑀦 𑀏𑀓𑁄, 𑀢𑀲𑁆𑀲 𑀕𑀸𑀫𑀤𑁆𑀯𑀸𑀭𑀩𑀸𑀳𑀸𑀦𑀁 𑀯𑁂𑀫𑀚𑁆𑀛𑁂 𑀞𑀺𑀢𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑀩𑁆𑀪𑀦𑁆𑀢𑀭𑀁 𑀕𑀸𑀫𑀽𑀧𑀘𑀸𑀭𑁄 𑀦𑀸𑀫. 𑀬𑀢𑁆𑀭 𑀧𑀦 𑀇𑀦𑁆𑀤𑀔𑀻𑀮𑁄 𑀦𑀢𑁆𑀣𑀺, 𑀢𑀢𑁆𑀭 𑀕𑀸𑀫𑀤𑁆𑀯𑀸𑀭𑀩𑀸𑀳𑀸𑀦𑀁 𑀯𑁂𑀫𑀚𑁆𑀛𑀁. 𑀬𑀢𑁆𑀭 𑀤𑁆𑀯𑀸𑀭𑀩𑀸𑀳𑀸𑀧𑀺 𑀦𑀢𑁆𑀣𑀺, 𑀢𑀢𑁆𑀣 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀯𑀢𑀺𑀬𑀸 𑀯𑀸 𑀧𑀸𑀓𑀸𑀭𑀲𑁆𑀲 𑀯𑀸 𑀓𑁄𑀝𑀺𑀯𑁂𑀫𑀚𑁆𑀛𑀁𑀯 𑀇𑀦𑁆𑀤𑀔𑀻𑀮𑀝𑁆𑀞𑀸𑀦𑀺𑀬𑀢𑁆𑀢𑀸 𑀇𑀦𑁆𑀤𑀔𑀻𑀮𑁄𑀢𑀺 𑀕𑀳𑁂𑀢𑀩𑁆𑀩𑀁. 𑀬𑁄 𑀧𑀦 𑀕𑀸𑀫𑁄 𑀧𑀼𑀩𑁆𑀩𑁂 𑀫𑀳𑀸 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀓𑀼𑀮𑁂𑀲𑀼 𑀦𑀝𑁆𑀞𑁂𑀲𑀼 𑀅𑀧𑁆𑀧𑀓𑁄 𑀳𑁄𑀢𑀺, 𑀲𑁄 𑀖𑀭𑀽𑀧𑀘𑀸𑀭𑀢𑁄 𑀮𑁂𑀟𑁆𑀟𑀼𑀧𑀸𑀢𑁂𑀦𑁂𑀯 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄. 𑀧𑀼𑀭𑀺𑀫𑀧𑀭𑀺𑀘𑁆𑀙𑁂𑀤𑁄 𑀧𑀦𑀲𑁆𑀲 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲𑀸𑀧𑀺 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲𑀸𑀧𑀺 𑀅𑀧𑁆𑀧𑀫𑀸𑀡𑀫𑁂𑀯𑀸𑀢𑀺. 𑀦𑀦𑀼 𑀘𑁂𑀢𑀁 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀉𑀧𑀘𑀸𑀭𑀤𑀲𑁆𑀲𑀦𑀁 𑀧𑀤𑀪𑀸𑀚𑀦𑁂𑀦 𑀯𑀺𑀭𑀼𑀤𑁆𑀥𑀫𑀺𑀯 𑀤𑀺𑀲𑁆𑀲𑀢𑀺. 𑀢𑀢𑁆𑀣 𑀳𑀺 ‘‘𑀕𑀸𑀫𑀽𑀧𑀘𑀸𑀭𑁄 𑀦𑀸𑀫 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀇𑀦𑁆𑀤𑀔𑀻𑀮𑁂 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄’’𑀢𑀺 (𑀧𑀸𑀭𑀸. 𑁯𑁨) 𑀯𑀢𑁆𑀯𑀸 ‘‘𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄’’𑀢𑀺 (𑀧𑀸𑀭𑀸. 𑁯𑁨) 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀦 𑀧𑀦 𑀢𑀁 𑀮𑁂𑀟𑁆𑀟𑀼𑀧𑀸𑀢𑀁 𑀕𑀸𑀫𑀲𑀗𑁆𑀔𑁂𑀧𑀁 𑀓𑀢𑁆𑀯𑀸 𑀢𑀢𑁄 𑀧𑀭𑀁 𑀕𑀸𑀫𑀽𑀧𑀘𑀸𑀭𑁄𑀢𑀺 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀧𑀤𑀪𑀸𑀚𑀦𑁂𑀧𑀺 𑀳𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺.

𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀇𑀥 𑀕𑀸𑀫𑁄 𑀦𑀸𑀫 𑀤𑀼𑀯𑀺𑀥𑁄 𑀳𑁄𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑁄 𑀘 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀘 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁨). 𑀢𑀢𑁆𑀭 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑁄𑀬𑁂𑀯 𑀧𑀭𑀺𑀘𑁆𑀙𑁂𑀤𑁄. 𑀢𑀲𑁆𑀫𑀸 𑀢𑀲𑁆𑀲 𑀯𑀺𑀲𑀼𑀁 𑀧𑀭𑀺𑀘𑁆𑀙𑁂𑀤𑀁 𑀅𑀯𑀢𑁆𑀯𑀸 ‘‘𑀕𑀸𑀫𑀽𑀧𑀘𑀸𑀭𑁄 𑀦𑀸𑀫 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀇𑀦𑁆𑀤𑀔𑀻𑀮𑁂 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄’’𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀦 𑀕𑀸𑀫𑀲𑁆𑀲 𑀕𑀸𑀫𑀧𑀭𑀺𑀘𑁆𑀙𑁂𑀤𑁄 𑀯𑀢𑁆𑀢𑀩𑁆𑀩𑁄. 𑀢𑀲𑁆𑀫𑀸 𑀢𑀲𑁆𑀲 𑀕𑀸𑀫𑀲𑁆𑀲 𑀕𑀸𑀫𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 ‘‘𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄’’𑀢𑀺 (𑀧𑀸𑀭𑀸. 𑁯𑁨) 𑀯𑀼𑀢𑁆𑀢𑀁. 𑀕𑀸𑀫𑀧𑀭𑀺𑀘𑁆𑀙𑁂𑀤𑁂 𑀘 𑀤𑀲𑁆𑀲𑀺𑀢𑁂 𑀕𑀸𑀫𑀽𑀧𑀘𑀸𑀭𑀮𑀓𑁆𑀔𑀡𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺 𑀧𑀼𑀦 ‘‘𑀢𑀢𑁆𑀣 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄’’𑀢𑀺 𑀦 𑀯𑀼𑀢𑁆𑀢𑀁, 𑀅𑀢𑁆𑀣𑁄 𑀧𑀦 𑀢𑀢𑁆𑀣𑀸𑀧𑀺 𑀅𑀬𑀫𑁂𑀯 𑀬𑀣𑀸𑀯𑀼𑀢𑁆𑀢𑁄𑀢𑀺. 𑀬𑁄 𑀧𑀦 𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑀁𑀬𑁂𑀯 ‘‘𑀕𑀸𑀫𑀽𑀧𑀘𑀸𑀭𑁄’’𑀢𑀺 𑀯𑀤𑀢𑀺, 𑀢𑀲𑁆𑀲 𑀖𑀭𑀽𑀧𑀘𑀸𑀭𑁄 ‘‘𑀕𑀸𑀫𑁄’’𑀢𑀺 𑀆𑀧𑀚𑁆𑀚𑀢𑀺. 𑀢𑀢𑁄 𑀖𑀭𑀁 𑀖𑀭𑀽𑀧𑀘𑀸𑀭𑁄, 𑀕𑀸𑀫𑁄 𑀕𑀸𑀫𑀽𑀧𑀘𑀸𑀭𑁄𑀢𑀺 𑀏𑀲 𑀯𑀺𑀪𑀸𑀕𑁄 𑀲𑀗𑁆𑀓𑀭𑀻𑀬𑀢𑀺. 𑀅𑀲𑀁𑀓𑀭𑀢𑁄 𑀘𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀫𑀸 𑀧𑀸𑀴𑀺𑀜𑁆𑀘 𑀅𑀝𑁆𑀞𑀓𑀣𑀜𑁆𑀘 𑀲𑀁𑀲𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣 𑀕𑀸𑀫𑁄, 𑀕𑀸𑀫𑀽𑀧𑀘𑀸𑀭𑁄 𑀘 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀢𑀢𑁆𑀣𑀸𑀢𑀺 𑀢𑁂𑀲𑀼 𑀤𑁆𑀯𑀻𑀲𑀼 𑀉𑀧𑀘𑀸𑀭𑁂𑀲𑀼. 𑀬𑁆𑀯𑀸𑀬𑀁 𑀉𑀧𑀘𑀸𑀭𑁄 𑀤𑀲𑁆𑀲𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑀸𑀤𑀻𑀲𑀽𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀅𑀲𑀁𑀓𑀘𑁆𑀘𑀺𑀓𑀸𑀕𑀸𑀫𑀧𑁆𑀧𑀯𑁂𑀲𑀦𑀁 (𑀧𑀸𑀘𑀺. 𑁧𑁨𑁨𑁫) 𑀲𑀗𑁆𑀕𑀡𑁆𑀳𑀸𑀢𑀺. 𑀬𑁄 𑀧𑀦 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑁄 𑀯𑀼𑀢𑁆𑀢𑁄, 𑀲𑁄 𑀦 𑀓𑀢𑁆𑀣𑀘𑀺 𑀯𑀺𑀦𑀬𑀧𑀺𑀝𑀓𑁂 𑀉𑀧𑀬𑁄𑀕𑀁 𑀕𑀢𑁄. 𑀓𑁂𑀯𑀮𑀁 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑁄𑀓𑀸𑀲𑀢𑁄 𑀅𑀧𑀭𑁄 𑀏𑀓𑁄 𑀮𑁂𑀟𑁆𑀟𑀼𑀧𑀸𑀢𑁄 𑀕𑀸𑀫𑀽𑀧𑀘𑀸𑀭𑁄 𑀦𑀸𑀫𑀸𑀢𑀺 𑀜𑀸𑀧𑀦𑀢𑁆𑀣𑀁 𑀯𑀼𑀢𑁆𑀢𑁄. 𑀏𑀯𑀁 𑀯𑀼𑀢𑁆𑀢𑁂 𑀳𑀺 𑀜𑀸𑀬𑀢𑀺 ‘‘𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲𑀸𑀧𑀺 𑀘𑁂 𑀕𑀸𑀫𑀲𑁆𑀲 𑀏𑀓𑁄 𑀮𑁂𑀟𑁆𑀟𑀼𑀧𑀸𑀢𑁄 𑀓𑀧𑁆𑀧𑀺𑀬𑀪𑀽𑀫𑀺 𑀲𑀫𑀸𑀦𑁄 𑀉𑀧𑀘𑀸𑀭𑁄𑀢𑀺 𑀯𑀼𑀢𑁆𑀢𑁄, 𑀧𑀕𑁂𑀯 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑁄𑀓𑀸𑀲𑀢𑁄 𑀏𑀓𑁄’’𑀢𑀺. 𑀇𑀫𑁂𑀲𑀁 𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀇𑀫𑁂𑀲𑀁 𑀕𑀸𑀫𑀸𑀭𑀜𑁆𑀜𑀸𑀦𑀁 𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸 𑀅𑀝𑁆𑀞𑀓𑀣𑀸𑀬𑀁. 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀦𑁆𑀢𑀺 𑀧𑀸𑀤𑀕𑁆𑀖𑀦𑀓𑀁. 𑀅𑀯𑀳𑀭𑀦𑁆𑀢𑀲𑁆𑀲𑀸𑀢𑀺 𑀕𑀡𑁆𑀳𑀦𑁆𑀢𑀲𑁆𑀲.

𑀅𑀤𑀺𑀦𑁆𑀦𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁯𑁨) 𑀤𑀦𑁆𑀢𑀧𑁄𑀦𑀲𑀺𑀓𑁆𑀔𑀸𑀧𑀤𑁂 𑀅𑀢𑁆𑀢𑀦𑁄 𑀲𑀦𑁆𑀢𑀓𑀫𑁆𑀧𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀁 𑀓𑀧𑁆𑀧𑀺𑀬𑀁 𑀅𑀚𑁆𑀛𑁄𑀳𑀭𑀡𑀻𑀬𑀁 𑀯𑀼𑀘𑁆𑀘𑀢𑀺, 𑀇𑀥 𑀧𑀦 𑀬𑀁 𑀓𑀺𑀜𑁆𑀘𑀺 𑀧𑀭𑀧𑀭𑀺𑀕𑁆𑀕𑀳𑀺𑀢𑀁 𑀲𑀲𑀸𑀫𑀺𑀓𑀁 𑀪𑀡𑁆𑀟𑀁, 𑀢𑀤𑁂𑀢𑀁 𑀢𑁂𑀳𑀺 𑀲𑀸𑀫𑀺𑀓𑁂𑀳𑀺 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀦 𑀤𑀺𑀦𑁆𑀦𑀦𑁆𑀢𑀺 𑀅𑀤𑀺𑀦𑁆𑀦𑀁. 𑀅𑀯𑀳𑀸𑀭𑀧𑁆𑀧𑀳𑁄𑀦𑀓𑀫𑁂𑀯 𑀧𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀜𑁆𑀜𑀲𑁆𑀲 𑀫𑀦𑀼𑀲𑁆𑀲𑀚𑀸𑀢𑀺𑀓𑀲𑁆𑀲 𑀲𑀦𑁆𑀢𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀗𑁆𑀔𑀸𑀲𑀤𑁆𑀤𑀲𑁆𑀲𑁂𑀯 𑀢-𑀓𑀸𑀭𑁂𑀦 𑀯𑀟𑁆𑀠𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 ‘‘𑀲𑀗𑁆𑀔𑀸 𑀲𑀗𑁆𑀔𑀸𑀢𑀦𑁆𑀢𑀺 𑀅𑀢𑁆𑀣𑀢𑁄 𑀏𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀢𑁆𑀣𑀢𑁄 𑀏𑀓𑀦𑁆𑀢𑀺 𑀧𑀤𑀢𑁆𑀣𑀢𑁄 𑀏𑀓𑀁, 𑀅𑀦𑀢𑁆𑀣𑀦𑁆𑀢𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑁄𑀝𑁆𑀞𑀸𑀲𑀲𑁆𑀲𑁂𑀢𑀁 𑀦𑀸𑀫𑀁 𑀪𑀸𑀕𑀢𑁄 𑀲𑀗𑁆𑀔𑀸𑀬𑀢𑀺 𑀉𑀧𑀝𑁆𑀞𑀸𑀢𑀻𑀢𑀺 𑀓𑀢𑁆𑀯𑀸. 𑀧𑀧𑀜𑁆𑀘𑀲𑀗𑁆𑀔𑀸𑀢𑀺 𑀲𑀢𑁆𑀢𑀸𑀦𑀁 𑀲𑀁𑀲𑀸𑀭𑁂 𑀧𑀧𑀜𑁆𑀘𑁂𑀦𑁆𑀢𑀺 𑀘𑀺𑀭𑀸𑀬𑀦𑁆𑀢𑀻𑀢𑀺 𑀧𑀧𑀜𑁆𑀘𑀸, 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀬𑁄, 𑀬𑀲𑁆𑀲 𑀯𑀸 𑀉𑀧𑁆𑀧𑀦𑁆𑀦𑀸, 𑀢𑀁 ‘‘𑀭𑀢𑁆𑀢𑁄’’𑀢𑀺 𑀯𑀸 ‘‘𑀫𑀢𑁆𑀢𑁄’’𑀢𑀺 𑀯𑀸 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀦𑀺𑀯𑀺𑀝𑁆𑀞𑁄’’𑀢𑀺 𑀯𑀸 𑀧𑀧𑀜𑁆𑀘𑁂𑀦𑁆𑀢𑀺 𑀩𑁆𑀬𑀜𑁆𑀚𑁂𑀦𑁆𑀢𑀻𑀢𑀺 𑀧𑀧𑀜𑁆𑀘𑀸, 𑀲𑀗𑁆𑀔𑀸 𑀯𑀼𑀘𑁆𑀘𑀢𑀺 𑀓𑁄𑀝𑁆𑀞𑀸𑀲𑁄, 𑀧𑀧𑀜𑁆𑀘𑀸𑀯 𑀲𑀗𑁆𑀔𑀸 𑀧𑀧𑀜𑁆𑀘𑀲𑀗𑁆𑀔𑀸, 𑀧𑀧𑀜𑁆𑀘𑀓𑁄𑀝𑁆𑀞𑀸𑀲𑀸𑀢𑀺 𑀅𑀢𑁆𑀣𑁄, 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀣𑁂𑀬𑁆𑀬𑀘𑀺𑀢𑁆𑀢𑀲𑀗𑁆𑀔𑀸𑀢𑁄𑀢𑀺 ‘‘𑀣𑁂𑀬𑁆𑀬𑀘𑀺𑀢𑁆𑀢𑁄’’𑀢𑀺 𑀓𑀣𑀺𑀢𑁄. 𑀏𑀓𑁄 𑀘𑀺𑀢𑁆𑀢𑀓𑁄𑀝𑁆𑀞𑀸𑀲𑁄𑀢𑀺 𑀯𑀺𑀲𑁆𑀲𑀸𑀲𑀢𑀸𑀯𑀓𑀸𑀮𑀺𑀓𑀸𑀤𑀺𑀕𑁆𑀕𑀸𑀳𑀯𑀲𑀧𑁆𑀧𑀯𑀢𑁆𑀢𑀅𑀣𑁂𑀬𑁆𑀬𑀘𑀺𑀢𑁆𑀢𑀓𑁄𑀝𑁆𑀞𑀸𑀲𑀢𑁄 𑀅𑀜𑁆𑀜𑁄 𑀘𑀺𑀢𑁆𑀢𑀓𑁄𑀝𑁆𑀞𑀸𑀲𑁄. 𑀣𑁂𑀬𑁆𑀬𑀲𑀗𑁆𑀔𑀸𑀢𑁂𑀦𑀸𑀢𑀺 𑀣𑁂𑀬𑁆𑀬𑀪𑀽𑀢𑀘𑀺𑀢𑁆𑀢𑀓𑁄𑀝𑁆𑀞𑀸𑀲𑁂𑀦. 𑀬𑀤𑀺 𑀏𑀯𑀁 𑀅𑀣 𑀓𑀲𑁆𑀫𑀸 𑀏𑀢𑀲𑁆𑀲 𑀯𑀺𑀪𑀗𑁆𑀕𑁂 ‘‘𑀣𑁂𑀬𑁆𑀬𑀘𑀺𑀢𑁆𑀢𑁄 𑀅𑀯𑀳𑀭𑀡𑀘𑀺𑀢𑁆𑀢𑁄’’𑀢𑀺 (𑀧𑀸𑀭𑀸. 𑁯𑁨) 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑁄 𑀘𑀸’’𑀢𑀺𑀆𑀤𑀺. 𑀩𑁆𑀬𑀜𑁆𑀚𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸𑀢𑀺 𑀩𑁆𑀬𑀜𑁆𑀚𑀦𑁂 𑀆𑀤𑀭𑀁 𑀅𑀓𑀢𑁆𑀯𑀸𑀢𑀺 𑀅𑀢𑁆𑀣𑁄, 𑀲𑀤𑁆𑀤𑀢𑁆𑀣𑀫𑀦𑀧𑁂𑀓𑁆𑀔𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀢𑁆𑀣𑀫𑁂𑀯𑀸𑀢𑀺 𑀪𑀸𑀯𑀢𑁆𑀣𑀫𑁂𑀯.

𑀢𑁂 𑀧𑀦 𑀅𑀯𑀳𑀸𑀭𑀸𑀢𑀺 𑀢𑁂 𑀧𑀜𑁆𑀘𑀯𑀻𑀲𑀢𑀺 𑀅𑀯𑀳𑀸𑀭𑀸. 𑀲𑀯𑀺𑀜𑁆𑀜𑀸𑀡𑀓𑀸𑀯𑀺𑀜𑁆𑀜𑀸𑀡𑀓𑀯𑀲𑁂𑀦 𑀦𑀸𑀦𑀸𑀯𑀺𑀥𑁄 𑀪𑀡𑁆𑀟𑁄 𑀏𑀢𑀲𑁆𑀲 𑀧𑀜𑁆𑀘𑀓𑀲𑁆𑀲𑀸𑀢𑀺 𑀦𑀸𑀦𑀸𑀪𑀡𑁆𑀟𑀁, 𑀧𑀜𑁆𑀘𑀦𑁆𑀦𑀁 𑀅𑀯𑀳𑀸𑀭𑀸𑀦𑀁 𑀲𑀫𑀽𑀳𑁄 𑀧𑀜𑁆𑀘𑀓𑀁, 𑀧𑀜𑁆𑀘𑀧𑀭𑀺𑀫𑀸𑀡𑀫𑀲𑁆𑀲𑀸𑀢𑀺 𑀯𑀸 𑀧𑀜𑁆𑀘𑀓𑀁, 𑀦𑀸𑀦𑀸𑀪𑀡𑁆𑀟𑀫𑁂𑀯 𑀧𑀜𑁆𑀘𑀓𑀁 𑀦𑀸𑀦𑀸𑀪𑀡𑁆𑀟𑀧𑀜𑁆𑀘𑀓𑀁. 𑀲𑀯𑀺𑀜𑁆𑀜𑀸𑀡𑀓𑀯𑀲𑁂𑀦 𑀏𑀓𑁄 𑀪𑀡𑁆𑀟𑁄 𑀏𑀢𑀲𑁆𑀲𑀸𑀢𑀺 𑀏𑀓𑀪𑀡𑁆𑀟𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀲𑀸𑀳𑀢𑁆𑀣𑀺𑀓𑁄𑀯 𑀧𑀜𑁆𑀘𑀓𑀁 𑀲𑀸𑀳𑀢𑁆𑀣𑀺𑀓𑀧𑀜𑁆𑀘𑀓𑀁. 𑀆𑀤𑀺𑀧𑀤𑀯𑀲𑁂𑀦 𑀘𑁂𑀢𑀁 𑀦𑀸𑀫𑀁 𑀓𑀼𑀲𑀮𑀸𑀤𑀺𑀢𑁆𑀢𑀺𑀓𑀲𑁆𑀲 𑀓𑀼𑀲𑀮𑀢𑁆𑀢𑀺𑀓𑀯𑁄𑀳𑀸𑀭𑁄 𑀯𑀺𑀬. 𑀢𑀲𑁆𑀫𑀸 𑀲𑀸𑀳𑀢𑁆𑀣𑀺𑀓𑀸𑀤𑀺𑀧𑀜𑁆𑀘𑀓𑀦𑁆𑀢𑀺 𑀅𑀢𑁆𑀣𑀢𑁄 𑀤𑀝𑁆𑀞𑀩𑁆𑀩𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼 𑀧𑀜𑁆𑀘𑀓𑀤𑁆𑀯𑀬𑁂𑀲𑀼. 𑀏𑀢𑀲𑁆𑀲𑁂𑀯𑀸𑀢𑀺 ‘‘𑀆𑀤𑀺𑀬𑁂𑀬𑁆𑀬𑀸’’𑀢𑀺 𑀏𑀢𑀲𑁆𑀲𑁂𑀯 𑀫𑀸𑀢𑀺𑀓𑀸𑀧𑀤𑀲𑁆𑀲. 𑀇𑀫𑁂𑀲𑀁 𑀧𑀤𑀸𑀦𑀁 𑀯𑀲𑁂𑀦𑀸𑀢𑀺 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀧𑀤𑀸𑀦𑀁 𑀯𑀲𑁂𑀦. 𑀏𑀢𑁆𑀣 𑀘 𑀧𑀞𑀫𑀧𑀤𑀁 𑀅𑀪𑀺𑀬𑁄𑀕𑀯𑀲𑁂𑀦 𑀯𑀼𑀢𑁆𑀢𑀁, 𑀤𑀼𑀢𑀺𑀬𑀧𑀤𑀁 𑀅𑀜𑁆𑀜𑁂𑀲𑀁 𑀪𑀡𑁆𑀟𑀁 𑀳𑀭𑀦𑁆𑀢𑀲𑁆𑀲 𑀕𑀘𑁆𑀙𑀢𑁄 𑀯𑀲𑁂𑀦, 𑀢𑀢𑀺𑀬𑀧𑀤𑀁 𑀉𑀧𑀦𑀺𑀓𑁆𑀔𑀺𑀢𑁆𑀢𑀪𑀡𑁆𑀟𑀯𑀲𑁂𑀦, 𑀘𑀢𑀼𑀢𑁆𑀣𑀁 𑀲𑀯𑀺𑀜𑁆𑀜𑀸𑀡𑀓𑀯𑀲𑁂𑀦, 𑀧𑀜𑁆𑀘𑀫𑀁 𑀣𑀮𑁂 𑀦𑀺𑀓𑁆𑀔𑀺𑀢𑁆𑀢𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 𑀦𑁂𑀲𑀁 𑀅𑀢𑁆𑀣𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀤𑁆𑀯𑀻𑀲𑀼 𑀧𑀜𑁆𑀘𑀓𑁂𑀲𑀼. 𑀇𑀢𑀭𑀦𑁆𑀢𑀺 𑀏𑀓𑀪𑀡𑁆𑀟𑀧𑀜𑁆𑀘𑀓𑀁. 𑀆𑀭𑀸𑀫𑀦𑁆𑀢𑀺 𑀧𑀼𑀧𑁆𑀨𑀸𑀭𑀸𑀫𑀨𑀮𑀸𑀭𑀸𑀫𑀁. 𑀅𑀪𑀺𑀬𑀼𑀜𑁆𑀚𑀢𑀻𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁦𑁨) 𑀧𑀭𑀲𑀦𑁆𑀢𑀓𑀁 ‘‘𑀫𑀫 𑀲𑀦𑁆𑀢𑀓𑁄𑀯 𑀅𑀬’’𑀦𑁆𑀢𑀺 𑀫𑀼𑀲𑀸 𑀪𑀡𑀺𑀢𑁆𑀯𑀸 𑀅𑀪𑀺𑀬𑀼𑀜𑁆𑀚𑀢𑀺 𑀘𑁄𑀤𑁂𑀢𑀺, 𑀅𑀝𑁆𑀝𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂𑀧𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀧𑀼𑀩𑁆𑀩𑀧𑀬𑁄𑀕𑀢𑁆𑀢𑀸 𑀤𑀼𑀓𑁆𑀓𑀝𑀦𑁆𑀢𑀺 𑀆𑀳 ‘‘𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺, 𑀤𑀼𑀓𑁆𑀓𑀝𑀲𑀗𑁆𑀔𑀸𑀢𑀸 𑀆𑀧𑀢𑁆𑀢𑀺 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀤𑀼𑀓𑁆𑀓𑀝𑀲𑀜𑁆𑀜𑀺𑀢𑀲𑁆𑀲 𑀯𑀻𑀢𑀺𑀓𑁆𑀓𑀫𑀲𑁆𑀲 𑀆𑀧𑀚𑁆𑀚𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 ‘‘𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺𑀆𑀤𑀻𑀲𑀼. 𑀲𑀸𑀫𑀺𑀓𑀲𑁆𑀲 𑀯𑀺𑀫𑀢𑀺𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀯𑀺𑀦𑀺𑀘𑁆𑀙𑀬𑀓𑀼𑀲𑀮𑀢𑀸𑀬, 𑀩𑀮𑀯𑀦𑀺𑀲𑁆𑀲𑀺𑀢𑀸𑀤𑀺𑀪𑀸𑀯𑁂𑀦 𑀯𑀸 𑀆𑀭𑀸𑀫𑀲𑀸𑀫𑀺𑀓𑀲𑁆𑀲 𑀲𑀁𑀲𑀬𑀁 𑀚𑀦𑁂𑀢𑀺. 𑀓𑀣𑀁? 𑀢𑀜𑁆𑀳𑀺 𑀢𑀣𑀸 𑀯𑀺𑀦𑀺𑀘𑁆𑀙𑀬𑀧𑁆𑀧𑀲𑀼𑀢𑀁 𑀤𑀺𑀲𑁆𑀯𑀸 𑀲𑀸𑀫𑀺𑀓𑁄 𑀘𑀺𑀦𑁆𑀢𑁂𑀢𑀺 ‘‘𑀲𑀓𑁆𑀔𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀅𑀳𑀁 𑀇𑀫𑀁 𑀆𑀭𑀸𑀫𑀁 𑀅𑀢𑁆𑀢𑀦𑁄 𑀓𑀸𑀢𑀼𑀁, 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺 𑀦𑀼 𑀔𑁄’’𑀢𑀺. 𑀏𑀯𑀁 𑀢𑀲𑁆𑀲 𑀯𑀺𑀫𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀢𑁂𑀦 𑀉𑀧𑁆𑀧𑀸𑀤𑀺𑀢𑀸 𑀳𑁄𑀢𑀺. 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀻𑀢𑀺 𑀬𑀤𑀸 𑀧𑀦 𑀲𑀸𑀫𑀺𑀓𑁄 ‘‘𑀅𑀬𑀁 𑀣𑀤𑁆𑀥𑁄 𑀓𑀓𑁆𑀔𑀴𑁄 𑀚𑀻𑀯𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑀫𑁆𑀧𑀺 𑀫𑁂 𑀓𑀭𑁂𑀬𑁆𑀬, 𑀅𑀮𑀁 𑀤𑀸𑀦𑀺 𑀫𑀬𑁆𑀳𑀁 𑀇𑀫𑀺𑀦𑀸 𑀆𑀭𑀸𑀫𑁂𑀦𑀸’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀺, 𑀉𑀲𑁆𑀲𑀸𑀳𑀁 𑀞𑀧𑁂𑀢𑀺, 𑀅𑀢𑁆𑀢𑀦𑁄 𑀲𑀦𑁆𑀢𑀓𑀓𑀭𑀡𑁂 𑀦𑀺𑀭𑀼𑀲𑁆𑀲𑀸𑀳𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑀲𑀘𑁂 𑀲𑀬𑀫𑁆𑀧𑀺 𑀓𑀢𑀥𑀼𑀭𑀦𑀺𑀓𑁆𑀔𑁂𑀧𑁄 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀧𑀦 𑀲𑀸𑀫𑀺𑀓𑁂𑀦 𑀥𑀼𑀭𑁂 𑀦𑀺𑀓𑁆𑀔𑀺𑀢𑁆𑀢𑁂𑀧𑀺 𑀅𑀪𑀺𑀬𑀼𑀜𑁆𑀚𑀓𑁄 𑀥𑀼𑀭𑀁 𑀅𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀯 ‘‘𑀇𑀫𑀁 𑀲𑀼𑀝𑁆𑀞𑀼 𑀧𑀻𑀴𑁂𑀢𑁆𑀯𑀸 𑀫𑀫 𑀆𑀡𑀸𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀓𑀺𑀗𑁆𑀓𑀸𑀭𑀧𑁆𑀧𑀝𑀺𑀲𑁆𑀲𑀸𑀯𑀺𑀪𑀸𑀯𑁂 𑀞𑀧𑁂𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀤𑀸𑀢𑀩𑁆𑀩𑀪𑀸𑀯𑁂 𑀲𑀉𑀲𑁆𑀲𑀸𑀳𑁄, 𑀭𑀓𑁆𑀔𑀢𑀺 𑀢𑀸𑀯. 𑀅𑀣𑀸𑀧𑀺 𑀅𑀪𑀺𑀬𑀼𑀜𑁆𑀚𑀓𑁄 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀦 𑀤𑀸𑀦𑀺 𑀇𑀫𑀁 𑀇𑀫𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀺, 𑀲𑀸𑀫𑀺𑀓𑁄 𑀧𑀦 𑀥𑀼𑀭𑀁 𑀦 𑀦𑀺𑀓𑁆𑀔𑀺𑀧𑀢𑀺, 𑀧𑀓𑁆𑀔𑀁 𑀧𑀭𑀺𑀬𑁂𑀲𑀢𑀺, 𑀓𑀸𑀮𑀁 𑀆𑀕𑀫𑁂𑀢𑀺, ‘‘𑀮𑀚𑁆𑀚𑀺𑀧𑀭𑀺𑀲𑀁 𑀢𑀸𑀯 𑀮𑀪𑀸𑀫𑀺, 𑀧𑀘𑁆𑀙𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀕𑀳𑀡𑁂𑀬𑁂𑀯 𑀲𑀉𑀲𑁆𑀲𑀸𑀳𑁄 𑀳𑁄𑀢𑀺, 𑀭𑀓𑁆𑀔𑀢𑀺𑀬𑁂𑀯. 𑀬𑀤𑀸 𑀧𑀦 ‘‘𑀲𑁄𑀧𑀺 𑀦 𑀤𑀲𑁆𑀲𑀸𑀫𑀻’’𑀢𑀺, ‘‘𑀲𑀸𑀫𑀺𑀓𑁄𑀧𑀺 𑀦 𑀮𑀘𑁆𑀙𑀸𑀫𑀻’’𑀢𑀺 𑀏𑀯𑀁 𑀉𑀪𑁄 𑀥𑀼𑀭𑀁 𑀦𑀺𑀓𑁆𑀔𑀺𑀧𑀦𑁆𑀢𑀺, 𑀢𑀤𑀸 𑀅𑀪𑀺𑀬𑀼𑀜𑁆𑀚𑀓𑀲𑁆𑀲 𑀧𑀸𑀭𑀸𑀚𑀺𑀓𑀁.

𑀅𑀜𑁆𑀜𑀲𑁆𑀲 𑀪𑀡𑁆𑀟𑀁 𑀳𑀭𑀦𑁆𑀢𑁄𑀢𑀺 𑀯𑁂𑀢𑀦𑁂𑀦 𑀯𑀸 𑀫𑀺𑀢𑁆𑀢𑀪𑀸𑀯𑁂𑀦 𑀯𑀸 𑀅𑀜𑁆𑀜𑀲𑁆𑀲 𑀪𑀡𑁆𑀟𑀁 𑀳𑀭𑀦𑁆𑀢𑁄. 𑀲𑀻𑀲𑁂 𑀪𑀸𑀭𑀦𑁆𑀢𑀺 𑀲𑀻𑀲𑁂 𑀞𑀺𑀢𑀪𑀸𑀭𑀁. 𑀲𑀻𑀲𑀲𑁆𑀲 𑀢𑀸𑀯 𑀧𑀼𑀭𑀺𑀫𑀕𑀮𑁂 𑀕𑀮𑀯𑀸𑀝𑀓𑁄, 𑀧𑀺𑀝𑁆𑀞𑀺𑀕𑀮𑁂 𑀓𑁂𑀲𑀜𑁆𑀘𑀺 𑀓𑁂𑀲𑀦𑁆𑀢𑁂 𑀆𑀯𑀝𑁆𑀝𑁄 𑀳𑁄𑀢𑀺, 𑀕𑀮𑀲𑁆𑀲𑁂𑀯 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀓𑁂𑀲𑀜𑁆𑀘𑀺 𑀓𑁂𑀲𑀸 𑀑𑀭𑀼𑀬𑁆𑀳 𑀚𑀸𑀬𑀦𑁆𑀢𑀺, 𑀬𑁂 ‘‘𑀓𑀡𑁆𑀡𑀘𑀽𑀴𑀺𑀓𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀲𑀁 𑀅𑀥𑁄𑀪𑀸𑀕𑁄 𑀘𑀸𑀢𑀺 𑀅𑀬𑀁 𑀳𑁂𑀝𑁆𑀞𑀺𑀫𑀓𑁄 𑀧𑀭𑀺𑀘𑁆𑀙𑁂𑀤𑁄, 𑀢𑀢𑁄 𑀉𑀧𑀭𑀺 𑀲𑀻𑀲𑀁, 𑀏𑀢𑁆𑀣𑀦𑁆𑀢𑀭𑁂 𑀞𑀺𑀢𑀪𑀸𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀔𑀦𑁆𑀥𑀁 𑀑𑀭𑁄𑀧𑁂𑀢𑀻𑀢𑀺 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀓𑀡𑁆𑀡𑀘𑀽𑀴𑀺𑀓𑀸𑀳𑀺 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸, 𑀓𑀧𑁆𑀧𑀭𑁂𑀳𑀺 𑀧𑀝𑁆𑀞𑀸𑀬 𑀉𑀧𑀭𑀺, 𑀧𑀺𑀝𑁆𑀞𑀺𑀕𑀮𑀸𑀯𑀝𑁆𑀝𑀢𑁄 𑀘 𑀕𑀮𑀯𑀸𑀝𑀓𑀢𑁄 𑀘 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸, 𑀧𑀺𑀝𑁆𑀞𑀺𑀯𑁂𑀫𑀚𑁆𑀛𑀸𑀯𑀝𑁆𑀝𑀢𑁄 𑀘 𑀉𑀭𑀧𑀭𑀺𑀘𑁆𑀙𑁂𑀤𑀫𑀚𑁆𑀛𑁂, 𑀳𑀤𑀬𑀸𑀯𑀸𑀝𑀓𑀢𑁄 𑀘 𑀧𑀝𑁆𑀞𑀸𑀬 𑀉𑀧𑀭𑀺 𑀔𑀦𑁆𑀥𑁄, 𑀢𑀁 𑀑𑀭𑁄𑀧𑁂𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑁋 𑀬𑁄 𑀪𑀺𑀓𑁆𑀔𑀼 ‘‘𑀇𑀤𑀁 𑀕𑀳𑁂𑀢𑁆𑀯𑀸 𑀏𑀢𑁆𑀣 𑀬𑀸𑀳𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁦𑁧) 𑀲𑀸𑀫𑀺𑀓𑁂𑀳𑀺 𑀅𑀦𑀸𑀡𑀢𑁆𑀢𑁄 𑀲𑀬𑀫𑁂𑀯 ‘‘𑀫𑀬𑁆𑀳𑀁 𑀇𑀤𑀁 𑀦𑀸𑀫 𑀤𑁂𑀣, 𑀅𑀳𑀁 𑀯𑁄 𑀪𑀡𑁆𑀟𑀁 𑀯𑀳𑀸𑀫𑀻’’𑀢𑀺 𑀢𑁂𑀲𑀁 𑀪𑀡𑁆𑀟𑀁 𑀲𑀻𑀲𑁂𑀦 𑀆𑀤𑀸𑀬 𑀕𑀘𑁆𑀙𑀦𑁆𑀢𑁄 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀢𑀁 𑀪𑀡𑁆𑀟𑀁 𑀆𑀫𑀲𑀢𑀺, 𑀤𑀼𑀓𑁆𑀓𑀝𑀁. 𑀬𑀣𑀸𑀯𑀼𑀢𑁆𑀢𑀲𑀻𑀲𑀧𑀭𑀺𑀘𑁆𑀙𑁂𑀤𑀁 𑀅𑀦𑀢𑀺𑀓𑁆𑀓𑀫𑀦𑁆𑀢𑁄𑀯 𑀇𑀢𑁄 𑀘𑀺𑀢𑁄 𑀘 𑀖𑀁𑀲𑀦𑁆𑀢𑁄 𑀲𑀸𑀭𑁂𑀢𑀺𑀧𑀺 𑀧𑀘𑁆𑀘𑀸𑀲𑀸𑀭𑁂𑀢𑀺𑀧𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀔𑀦𑁆𑀥𑀁 𑀑𑀭𑁄𑀧𑀺𑀢𑀫𑀢𑁆𑀢𑁂 𑀓𑀺𑀜𑁆𑀘𑀸𑀧𑀺 𑀲𑀸𑀫𑀺𑀓𑀸𑀦𑀁 ‘‘𑀯𑀳𑀢𑀽’’𑀢𑀺 𑀘𑀺𑀢𑁆𑀢𑀁 𑀅𑀢𑁆𑀣𑀺, 𑀢𑁂𑀳𑀺 𑀧𑀦 𑀅𑀦𑀸𑀡𑀢𑁆𑀢𑀢𑁆𑀢𑀸 𑀧𑀸𑀭𑀸𑀚𑀺𑀓𑀁. 𑀔𑀦𑁆𑀥𑀁 𑀧𑀦 𑀅𑀦𑁄𑀭𑁄𑀧𑁂𑀢𑁆𑀯𑀸𑀧𑀺 𑀲𑀻𑀲𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀘𑀸𑀯𑁂𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁. 𑀬𑀫𑀓𑀪𑀸𑀭𑀲𑁆𑀲 𑀧𑀦 𑀏𑀓𑁄 𑀪𑀸𑀕𑁄 𑀲𑀻𑀲𑁂 𑀧𑀢𑀺𑀝𑁆𑀞𑀸𑀢𑀺, 𑀏𑀓𑁄 𑀧𑀺𑀝𑁆𑀞𑀺𑀬𑀁, 𑀢𑀢𑁆𑀣 𑀤𑁆𑀯𑀺𑀦𑁆𑀦𑀁 𑀞𑀸𑀦𑀸𑀦𑀁 𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 𑀲𑀼𑀤𑁆𑀥𑀲𑀻𑀲𑀪𑀸𑀭𑀲𑁆𑀲𑁂𑀯 𑀯𑀲𑁂𑀦 𑀯𑀼𑀢𑁆𑀢𑁄. 𑀬𑁄 𑀘𑀸𑀬𑀁 𑀲𑀻𑀲𑀪𑀸𑀭𑁂 𑀯𑀼𑀢𑁆𑀢𑁄, 𑀔𑀦𑁆𑀥𑀪𑀸𑀭𑀸𑀤𑀻𑀲𑀼𑀧𑀺 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀪𑀡𑁆𑀟𑀦𑁆𑀢𑀺 𑀲𑀗𑁆𑀕𑁄𑀧𑀦𑀢𑁆𑀣𑀸𑀬 𑀅𑀢𑁆𑀢𑀦𑁄 𑀳𑀢𑁆𑀣𑁂 𑀧𑀭𑁂𑀳𑀺 𑀞𑀧𑀺𑀢𑀪𑀡𑁆𑀟𑀁. 𑀅𑀳𑀁 𑀦 𑀕𑀡𑁆𑀳𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀢𑀻𑀢𑀢𑁆𑀣𑁂 𑀘𑁂𑀢𑀁 𑀯𑀢𑁆𑀢𑀫𑀸𑀦𑀯𑀘𑀦𑀁, 𑀦𑀸𑀳𑀁 𑀕𑀳𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀓𑀝𑀁 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁧𑁧) 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂𑀧𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀧𑀼𑀩𑁆𑀩𑀧𑀬𑁄𑀕𑀢𑁆𑀢𑀸. ‘‘𑀓𑀺𑀁 𑀢𑀼𑀫𑁆𑀳𑁂 𑀪𑀡𑀣, 𑀦𑁂𑀯𑀺𑀤𑀁 𑀫𑀬𑁆𑀳𑀁 𑀅𑀦𑀼𑀭𑀽𑀧𑀁, 𑀦 𑀢𑀼𑀫𑁆𑀳𑀸𑀓’’𑀦𑁆𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀲𑀸𑀫𑀺𑀓𑀲𑁆𑀲 𑀯𑀺𑀫𑀢𑀺𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 ‘‘𑀭𑀳𑁄 𑀫𑀬𑀸 𑀏𑀢𑀲𑁆𑀲 𑀳𑀢𑁆𑀣𑁂 𑀞𑀧𑀺𑀢𑀁, 𑀦 𑀅𑀜𑁆𑀜𑁄 𑀓𑁄𑀘𑀺 𑀚𑀸𑀦𑀸𑀢𑀺, 𑀤𑀲𑁆𑀲𑀢𑀺 𑀦𑀼 𑀔𑁄 𑀫𑁂, 𑀦𑁄’’𑀢𑀺 𑀲𑀸𑀫𑀺𑀓𑀲𑁆𑀲 𑀯𑀺𑀫𑀢𑀺𑀁 𑀉𑀧𑁆𑀧𑀸𑀤𑁂𑀢𑀺. 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀻𑀢𑀺 𑀢𑀲𑁆𑀲 𑀨𑀭𑀼𑀲𑀸𑀤𑀺𑀪𑀸𑀯𑀁 𑀤𑀺𑀲𑁆𑀯𑀸 𑀉𑀲𑁆𑀲𑀸𑀳𑀁 𑀞𑀧𑁂𑀢𑀺. 𑀢𑀢𑁆𑀭 𑀲𑀘𑀸𑀬𑀁 𑀪𑀺𑀓𑁆𑀔𑀼 ‘‘𑀓𑀺𑀮𑀫𑁂𑀢𑁆𑀯𑀸 𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀤𑀸𑀦𑁂 𑀲𑀉𑀲𑁆𑀲𑀸𑀳𑁄, 𑀭𑀓𑁆𑀔𑀢𑀺 𑀢𑀸𑀯. 𑀲𑀘𑁂 𑀲𑁄 𑀤𑀸𑀦𑁂 𑀦𑀺𑀭𑀼𑀲𑁆𑀲𑀸𑀳𑁄, 𑀪𑀡𑁆𑀟𑀲𑀸𑀫𑀺𑀓𑁄 𑀧𑀦 𑀕𑀳𑀡𑁂 𑀲𑀉𑀲𑁆𑀲𑀸𑀳𑁄, 𑀭𑀓𑁆𑀔𑀢𑁂𑀯. 𑀬𑀤𑀺 𑀧𑀦 𑀲𑁄 𑀢𑀲𑁆𑀫𑀺𑀁 𑀤𑀸𑀦𑁂 𑀦𑀺𑀭𑀼𑀲𑁆𑀲𑀸𑀳𑁄, 𑀪𑀡𑁆𑀟𑀲𑀸𑀫𑀺𑀓𑁄𑀧𑀺 ‘‘𑀦 𑀫𑀬𑁆𑀳𑀁 𑀤𑀲𑁆𑀲𑀢𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀺, 𑀏𑀯𑀁 𑀉𑀪𑀺𑀦𑁆𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀪𑀺𑀓𑁆𑀔𑀼𑀦𑁄 𑀧𑀸𑀭𑀸𑀚𑀺𑀓𑀁. 𑀬𑀤𑀺𑀧𑀺 𑀫𑀼𑀔𑁂𑀦 ‘‘𑀤𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺, 𑀘𑀺𑀢𑁆𑀢𑁂𑀦 𑀧𑀦 𑀅𑀤𑀸𑀢𑀼𑀓𑀸𑀫𑁄, 𑀏𑀯𑀫𑁆𑀧𑀺 𑀲𑀸𑀫𑀺𑀓𑀲𑁆𑀲 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀪𑀺𑀓𑁆𑀔𑀼𑀦𑁄 𑀧𑀸𑀭𑀸𑀚𑀺𑀓𑀁.

𑀲𑀳𑀪𑀡𑁆𑀟𑀳𑀸𑀭𑀓𑀁 𑀦𑁂𑀲𑁆𑀲𑀸𑀫𑀻𑀢𑀺 ‘‘𑀲𑀳𑀪𑀡𑁆𑀟𑀳𑀸𑀭𑀓𑀁 𑀪𑀡𑁆𑀟𑀁 𑀦𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸. 𑀧𑀞𑀫𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀢𑀻𑀢𑀺 𑀪𑀡𑁆𑀟𑀳𑀸𑀭𑀓𑀁 𑀢𑀚𑁆𑀚𑁂𑀢𑁆𑀯𑀸 𑀢𑀲𑁆𑀲 𑀕𑀫𑀦𑀧𑀣𑀁 𑀯𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑀸 𑀭𑀼𑀘𑀺𑀢𑀫𑀕𑁆𑀕𑀁 𑀏𑀓𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀢𑀺. 𑀣𑀮𑀝𑁆𑀞𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁫) 𑀣𑀮𑁂 𑀦𑀺𑀓𑁆𑀔𑀺𑀢𑁆𑀢𑀁, 𑀪𑀽𑀫𑀺𑀢𑀮𑁂 𑀯𑀸 𑀧𑀸𑀲𑀸𑀡𑀧𑀩𑁆𑀩𑀢𑀢𑀮𑀸𑀤𑀻𑀲𑀼 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀝𑀺𑀘𑁆𑀙𑀦𑁆𑀦𑁂 𑀯𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑁂 𑀯𑀸 𑀞𑀧𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀨𑀦𑁆𑀤𑀸𑀧𑁂𑀢𑀺, 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀬𑁄 𑀨𑀦𑁆𑀤𑀸𑀧𑁂𑀢𑀺, 𑀢𑀲𑁆𑀲 𑀧𑀬𑁄𑀕𑁂 𑀧𑀬𑁄𑀕𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀆𑀫𑀲𑀦𑁂 𑀤𑀼𑀓𑁆𑀓𑀝𑀁, 𑀨𑀦𑁆𑀤𑀸𑀧𑀦𑁂 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 𑀯𑀺𑀲𑀼𑀁 𑀯𑀺𑀲𑀼𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀆𑀫𑀲𑀦𑀨𑀦𑁆𑀤𑀸𑀧𑀦𑀧𑀬𑁄𑀕𑁂 𑀓𑀭𑁄𑀦𑁆𑀢𑀲𑁆𑀲𑁂𑀯 𑀳𑁄𑀢𑀺. ‘‘𑀏𑀓𑀧𑀬𑁄𑀕𑁂𑀦 𑀕𑀡𑁆𑀳𑀦𑁆𑀢𑀲𑁆𑀲 𑀧𑀦 𑀉𑀤𑁆𑀥𑀸𑀭𑁂 𑀧𑀸𑀭𑀸𑀚𑀺𑀓𑀫𑁂𑀯, 𑀦 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀸𑀦𑀻’’𑀢𑀺 𑀯𑀤𑀦𑁆𑀢𑀺. 𑀞𑀸𑀦𑀸𑀢𑀺 𑀞𑀺𑀢𑀝𑁆𑀞𑀸𑀦𑀢𑁄. 𑀲𑀘𑁂 𑀢𑀁 𑀣𑀮𑀝𑁆𑀞𑀁 𑀭𑀸𑀲𑀺𑀓𑀢𑀁 𑀳𑁄𑀢𑀺, 𑀅𑀦𑁆𑀢𑁄𑀓𑀼𑀫𑁆𑀪𑀺𑀬𑀁 𑀪𑀸𑀚𑀦𑀕𑀢𑀓𑀭𑀡𑀫𑀼𑀝𑁆𑀞𑀺𑀘𑁆𑀙𑁂𑀤𑀦𑀯𑀺𑀦𑀺𑀘𑁆𑀙𑀬𑁂𑀦 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁. 𑀲𑀘𑁂 𑀏𑀓𑀸𑀩𑀤𑁆𑀥𑀁 𑀲𑀺𑀮𑁂𑀲𑀦𑀺𑀬𑁆𑀬𑀸𑀲𑀸𑀤𑀺, 𑀧𑀓𑁆𑀓𑀫𑀥𑀼𑀨𑀸𑀡𑀺𑀢𑀯𑀺𑀦𑀺𑀘𑁆𑀙𑀬𑁂𑀦 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁. 𑀲𑀘𑁂 𑀕𑀭𑀼𑀓𑀁 𑀳𑁄𑀢𑀺 𑀪𑀸𑀭𑀩𑀤𑁆𑀥𑀁 𑀮𑁄𑀳𑀧𑀺𑀡𑁆𑀟𑀺𑀢𑁂𑀮𑀫𑀥𑀼𑀖𑀝𑀸𑀤𑀺 𑀯𑀸, 𑀓𑀼𑀫𑁆𑀪𑀺𑀬𑀁 𑀞𑀸𑀦𑀸𑀘𑀸𑀯𑀦𑀯𑀺𑀦𑀺𑀘𑁆𑀙𑀬𑁂𑀦 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁. 𑀲𑀗𑁆𑀔𑀮𑀺𑀓𑀸𑀩𑀤𑁆𑀥𑀲𑁆𑀲 𑀘 𑀞𑀸𑀦𑀪𑁂𑀤𑁄 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑁄. 𑀧𑀢𑁆𑀣𑀭𑀺𑀢𑁆𑀯𑀸 𑀞𑀧𑀺𑀢𑀁 𑀧𑀦 𑀧𑀸𑀯𑀸𑀭𑀢𑁆𑀣𑀭𑀡𑀓𑀝𑀲𑀸𑀭𑀓𑀸𑀤𑀺𑀁 𑀉𑀚𑀼𑀓𑀁 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀢𑀺, 𑀧𑀸𑀭𑀺𑀫𑀦𑁆𑀢𑁂 𑀑𑀭𑀺𑀫𑀦𑁆𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀅𑀢𑀺𑀓𑁆𑀓𑀦𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀢𑀣𑁂𑀯 𑀕𑀳𑁂𑀢𑁆𑀯𑀸 𑀧𑀭𑀢𑁄 𑀧𑁂𑀮𑁆𑀮𑀢𑀺, 𑀧𑀸𑀭𑀺𑀫𑀦𑁆𑀢𑁂 𑀨𑀼𑀝𑁆𑀞𑁄𑀓𑀸𑀲𑀁 𑀑𑀭𑀺𑀫𑀦𑁆𑀢𑁂 𑀅𑀢𑀺𑀓𑁆𑀓𑀦𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀯𑀸𑀫𑀢𑁄 𑀯𑀸 𑀤𑀓𑁆𑀔𑀺𑀡𑀢𑁄 𑀯𑀸 𑀅𑀧𑀦𑀸𑀫𑁂𑀦𑁆𑀢𑀲𑁆𑀲 𑀯𑀸𑀫𑀦𑁆𑀢𑁂𑀦 𑀯𑀸 𑀤𑀓𑁆𑀔𑀺𑀡𑀦𑁆𑀢𑁂𑀦 𑀯𑀸 𑀨𑀼𑀝𑁆𑀞𑁄𑀓𑀸𑀲𑀁 𑀤𑀓𑁆𑀔𑀺𑀡𑀦𑁆𑀢𑁂 𑀯𑀸 𑀯𑀸𑀫𑀦𑁆𑀢𑁂 𑀯𑀸 𑀅𑀢𑀺𑀓𑁆𑀓𑀦𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀯𑁂𑀞𑁂𑀢𑁆𑀯𑀸 𑀉𑀤𑁆𑀥𑀭𑀢𑀺, 𑀓𑁂𑀲𑀕𑁆𑀕𑀫𑀢𑁆𑀢𑀁 𑀆𑀓𑀸𑀲𑀕𑀢𑀁 𑀓𑀭𑁄𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁.

𑀲𑀓𑁄 𑀳𑀢𑁆𑀣𑁄 𑀲𑀳𑀢𑁆𑀣𑁄, 𑀢𑁂𑀦 𑀦𑀺𑀩𑁆𑀩𑀢𑁆𑀢𑁄, 𑀢𑀲𑁆𑀲 𑀯𑀸 𑀲𑀫𑁆𑀩𑀦𑁆𑀥𑀻𑀢𑀺 𑀲𑀸𑀳𑀢𑁆𑀣𑀺𑀓𑁄, 𑀅𑀯𑀳𑀸𑀭𑁄. 𑀆𑀡𑀸𑀧𑀦𑀁 𑀆𑀡𑀢𑁆𑀢𑀺, 𑀢𑀸𑀬 𑀆𑀡𑀢𑁆𑀢𑀺𑀬𑀸 𑀦𑀺𑀩𑁆𑀩𑀢𑁆𑀢𑁄 𑀅𑀯𑀳𑀸𑀭𑁄 𑀆𑀡𑀢𑁆𑀢𑀺𑀓𑁄. 𑀦𑀺𑀲𑁆𑀲𑀚𑁆𑀚𑀦𑀁 𑀦𑀺𑀲𑁆𑀲𑀕𑁆𑀕𑁄, 𑀲𑀼𑀗𑁆𑀓𑀖𑀸𑀢𑀝𑁆𑀞𑀸𑀦𑁂, 𑀧𑀭𑀺𑀓𑀧𑁆𑀧𑀺𑀢𑁄𑀓𑀸𑀲𑁂 𑀘 𑀞𑀢𑁆𑀯𑀸 𑀪𑀡𑁆𑀟𑀲𑁆𑀲 𑀩𑀳𑀺 𑀦𑀺𑀧𑀸𑀢𑀦𑀁, 𑀦𑀺𑀲𑁆𑀲𑀕𑁆𑀕𑁄𑀯 𑀦𑀺𑀲𑁆𑀲𑀕𑁆𑀕𑀺𑀬𑁄. 𑀓𑀺𑀭𑀺𑀬𑀸𑀲𑀺𑀤𑁆𑀥𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀲𑀸𑀥𑁂𑀢𑀻𑀢𑀺 𑀅𑀢𑁆𑀣𑀲𑀸𑀥𑀓𑁄. 𑀥𑀼𑀭𑀲𑁆𑀲 𑀆𑀮𑀬𑀲𑀗𑁆𑀔𑀸𑀢𑀲𑁆𑀲 𑀪𑀸𑀭𑀲𑁆𑀲 𑀦𑀺𑀓𑁆𑀔𑀺𑀧𑀦𑀁 𑀧𑀭𑀺𑀘𑁆𑀘𑀚𑀦𑀁 𑀦𑀺𑀭𑀼𑀲𑁆𑀲𑀸𑀳𑀪𑀸𑀯𑀸𑀧𑀚𑁆𑀚𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁄. 𑀇𑀤𑀸𑀦𑀺 𑀩𑁆𑀬𑀜𑁆𑀚𑀦𑁂 𑀆𑀤𑀭𑀁 𑀅𑀓𑀢𑁆𑀯𑀸 𑀢𑁂𑀲𑀁 𑀅𑀢𑁆𑀣𑀫𑀢𑁆𑀢𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀲𑀸𑀳𑀢𑁆𑀣𑀺𑀓𑁄 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀲𑀳𑀢𑁆𑀣𑀸𑀢𑀺 𑀲𑀳𑀢𑁆𑀣𑁂𑀦. 𑀓𑀭𑀡𑀢𑁆𑀣𑁂 𑀳𑀺 𑀇𑀤𑀁 𑀦𑀺𑀲𑁆𑀲𑀓𑁆𑀓𑀯𑀘𑀦𑀁. ‘‘𑀅𑀲𑀼𑀓𑀲𑁆𑀲 𑀪𑀡𑁆𑀟𑀁 𑀅𑀯𑀳𑀭𑀸’’𑀢𑀺 𑀅𑀜𑁆𑀜𑀁 𑀆𑀡𑀸𑀧𑁂𑀢𑀻𑀢𑀺 𑀏𑀢𑁆𑀣𑀸𑀧𑀺 𑀆𑀡𑀢𑁆𑀢𑀺𑀓𑁆𑀔𑀡𑁂 𑀏𑀯 𑀆𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸. 𑀬𑀤𑀺 𑀏𑀯𑀁 𑀇𑀫𑀲𑁆𑀲, 𑀅𑀢𑁆𑀣𑀲𑀸𑀥𑀓𑀲𑁆𑀲 𑀘 𑀓𑁄 𑀯𑀺𑀲𑁂𑀲𑁄𑀢𑀺? 𑀢𑀁 𑀔𑀡𑀁 𑀏𑀯 𑀕𑀳𑀡𑁂 𑀦𑀺𑀬𑀼𑀜𑁆𑀚𑀦𑀁 𑀆𑀡𑀢𑁆𑀢𑀺𑀓𑀧𑀬𑁄𑀕𑁄, 𑀓𑀸𑀮𑀦𑁆𑀢𑀭𑁂𑀦 𑀕𑀳𑀡𑀢𑁆𑀣𑀁 𑀦𑀺𑀬𑁄𑀕𑁄 𑀅𑀢𑁆𑀣𑀲𑀸𑀥𑀓𑁄𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁯𑁨; 𑀯𑀺. 𑀯𑀺. 𑀝𑀻. 𑁧.𑁯𑁨) 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄𑀢𑀺. 𑀢𑁂𑀦𑁂𑀯𑀸𑀳 ‘‘𑀅𑀲𑀼𑀓𑀲𑁆𑀲 𑀪𑀡𑁆𑀟𑀁 𑀬𑀤𑀸 𑀲𑀓𑁆𑀓𑁄𑀲𑀺, 𑀢𑀤𑀸 𑀢𑀁 𑀅𑀯𑀳𑀭𑀸𑀢𑀺 𑀆𑀡𑀸𑀧𑁂𑀢𑀻’’𑀢𑀺.

𑀲𑀼𑀗𑁆𑀓𑀖𑀸𑀢𑀧𑀭𑀺𑀓𑀧𑁆𑀧𑀺𑀢𑁄𑀓𑀸𑀲𑀸𑀦𑀦𑁆𑀢𑀺 𑀲𑀼𑀗𑁆𑀓𑀖𑀸𑀢𑀜𑁆𑀘 𑀧𑀭𑀺𑀓𑀧𑁆𑀧𑀺𑀢𑁄𑀓𑀸𑀲𑁄 𑀘 𑀲𑀼𑀗𑁆𑀓𑀖𑀸𑀢𑀧𑀭𑀺𑀓𑀧𑁆𑀧𑀺𑀢𑁄𑀓𑀸𑀲𑀸, 𑀢𑁂𑀲𑀁. 𑀢𑀢𑁆𑀣 𑀲𑀼𑀗𑁆𑀓𑀖𑀸𑀢𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁧𑁩) 𑀭𑀼𑀓𑁆𑀔𑀧𑀩𑁆𑀩𑀢𑀸𑀤𑀺𑀲𑀜𑁆𑀜𑀸𑀡𑁂𑀦 𑀦𑀺𑀬𑀫𑀺𑀢𑀲𑁆𑀲 𑀲𑀼𑀗𑁆𑀓𑀝𑁆𑀞𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀜𑁆𑀳𑀺 𑀬𑀲𑁆𑀫𑀸 𑀢𑀢𑁄 𑀭𑀸𑀚𑀤𑁂𑀬𑁆𑀬𑀪𑀸𑀕𑀁 𑀲𑀼𑀗𑁆𑀓𑀁 𑀅𑀤𑀢𑁆𑀯𑀸 𑀦𑀻𑀳𑀭𑀦𑁆𑀢𑀸 𑀭𑀜𑁆𑀜𑁄 𑀲𑀼𑀗𑁆𑀓𑀁 𑀳𑀦𑀦𑁆𑀢𑀺 𑀯𑀺𑀦𑀸𑀲𑁂𑀦𑁆𑀢𑀺, 𑀢𑀲𑁆𑀫𑀸 ‘‘𑀲𑀼𑀗𑁆𑀓𑀖𑀸𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀓𑁄𑀘𑀺 𑀧𑀭𑀧𑀭𑀺𑀯𑁂𑀡𑀸𑀤𑀻𑀦𑀺 𑀧𑀯𑀺𑀝𑁆𑀞𑁄 𑀓𑀺𑀜𑁆𑀘𑀺 𑀮𑁄𑀪𑀦𑁂𑀬𑁆𑀬𑀪𑀡𑁆𑀟𑀁 𑀤𑀺𑀲𑁆𑀯𑀸 𑀤𑁆𑀯𑀸𑀭𑀧𑁆𑀧𑀫𑀼𑀔𑀸𑀤𑀺𑀯𑀲𑁂𑀦 𑀬𑀁 𑀞𑀸𑀦𑀁 ‘‘𑀲𑀘𑁂 𑀫𑀁 𑀏𑀢𑁆𑀣𑀦𑁆𑀢𑀭𑁂 𑀧𑀲𑁆𑀲𑀺𑀲𑁆𑀲𑀦𑁆𑀢𑀺, 𑀤𑀝𑁆𑀞𑀼𑀓𑀸𑀫𑀢𑀸𑀬 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀯𑀺𑀬 𑀤𑀲𑁆𑀲𑀸𑀫𑀺, 𑀦𑁄 𑀘𑁂 𑀧𑀲𑁆𑀲𑀺𑀲𑁆𑀲𑀦𑁆𑀢𑀺, 𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀓𑀧𑁆𑀧𑁂𑀢𑀺, 𑀅𑀬𑀁 𑀧𑀭𑀺𑀓𑀧𑁆𑀧𑀺𑀢𑁄𑀓𑀸𑀲𑁄. 𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁨𑁧) 𑀅𑀢𑁆𑀣𑀲𑀸𑀥𑀓𑀘𑁂𑀢𑀦𑀸𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑀁. 𑀲𑀘𑁂𑀧𑀺 𑀅𑀯𑀳𑀸𑀭𑀓𑁄 𑀲𑀝𑁆𑀞𑀺𑀯𑀲𑁆𑀲𑀸𑀢𑀺𑀓𑁆𑀓𑀫𑁂𑀦𑀧𑀺 𑀢𑀁 𑀪𑀡𑁆𑀟𑀁 𑀅𑀯𑀳𑀭𑀢𑀺, 𑀆𑀡𑀸𑀧𑀓𑁄 𑀘 𑀅𑀦𑁆𑀢𑀭𑀸𑀬𑁂𑀯 𑀓𑀸𑀮𑀁 𑀓𑀭𑁄𑀢𑀺, 𑀳𑀻𑀦𑀸𑀬 𑀯𑀸 𑀆𑀯𑀢𑁆𑀢𑀢𑀺, 𑀅𑀲𑁆𑀲𑀫𑀡𑁄𑀯 𑀳𑀼𑀢𑁆𑀯𑀸 𑀓𑀸𑀮𑀁 𑀯𑀸 𑀓𑀭𑀺𑀲𑁆𑀲𑀢𑀺, 𑀳𑀻𑀦𑀸𑀬 𑀯𑀸 𑀆𑀯𑀢𑁆𑀢𑀺𑀲𑁆𑀲𑀢𑀺, 𑀅𑀯𑀳𑀸𑀭𑀓𑀲𑁆𑀲 𑀧𑀦 𑀅𑀯𑀳𑀸𑀭𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑀁. 𑀧𑀸𑀤𑀕𑁆𑀖𑀦𑀓𑀢𑁂𑀮𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁪) 𑀏𑀢𑁆𑀣 𑀧𑀸𑀤𑁄 𑀦𑀸𑀫 𑀓𑀳𑀸𑀧𑀡𑀲𑁆𑀲 𑀘𑀢𑀼𑀢𑁆𑀣𑁄 𑀪𑀸𑀕𑁄, 𑀢𑀁 𑀅𑀕𑁆𑀖𑀢𑀻𑀢𑀺 𑀧𑀸𑀤𑀕𑁆𑀖𑀦𑀓𑀁, 𑀧𑀸𑀤𑀕𑁆𑀖𑀦𑀓𑀜𑁆𑀘 𑀢𑀁 𑀢𑁂𑀮𑀜𑁆𑀘𑀸𑀢𑀺 𑀧𑀸𑀤𑀕𑁆𑀖𑀦𑀓𑀢𑁂𑀮𑀁. 𑀉𑀧𑀸𑀳𑀦𑀸 𑀆𑀤𑀺 𑀬𑁂𑀲𑀁 𑀯𑀢𑁆𑀣𑀽𑀦𑀁 𑀢𑀸𑀦𑀺 𑀉𑀧𑀸𑀳𑀦𑀸𑀤𑀻𑀦𑀺. 𑀆𑀤𑀺𑀲𑀤𑁆𑀤𑁂𑀦 𑀤𑀼𑀓𑀽𑀮𑀲𑀸𑀝𑀓𑀘𑀫𑁆𑀫𑀓𑁆𑀔𑀡𑁆𑀟𑀸𑀤𑀻𑀦𑀁 𑀕𑀳𑀡𑀁. 𑀧𑀓𑁆𑀔𑀺𑀧𑀢𑀻𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀓𑁆𑀔𑀺𑀧𑀢𑀺. 𑀢𑁂𑀦𑀸𑀳 ‘‘𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂𑀬𑁂𑀯 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀲𑀘𑁂 𑀧𑀦 𑀅𑀢𑁆𑀢𑀦𑁄𑀧𑀺 𑀓𑀼𑀫𑁆𑀪𑀺𑀬𑀁 𑀅𑀜𑁆𑀜𑁄 𑀲𑀧𑁆𑀧𑀺𑀁 𑀯𑀸 𑀢𑁂𑀮𑀁 𑀯𑀸 𑀆𑀓𑀺𑀭𑀢𑀺, 𑀢𑀢𑁆𑀭 𑀘𑀸𑀬𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀢𑁂𑀮𑀧𑀺𑀯𑀦𑀓𑀁 𑀪𑀡𑁆𑀟𑀁 𑀧𑀓𑁆𑀔𑀺𑀧𑀢𑀺, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀸𑀭𑀸𑀚𑀺𑀓𑀁.

𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀧𑀬𑀼𑀜𑁆𑀚𑀦𑀁 𑀆𑀡𑀸𑀧𑀦𑀁 𑀧𑀬𑁄𑀕𑁄, 𑀆𑀡𑀢𑁆𑀢𑀲𑁆𑀲 𑀪𑀡𑁆𑀟𑀕𑁆𑀕𑀳𑀡𑀢𑁄 𑀧𑀼𑀩𑁆𑀩𑀢𑁆𑀢𑀸 𑀧𑀼𑀩𑁆𑀩𑁄, 𑀇𑀢𑀺 𑀧𑀼𑀩𑁆𑀩𑁄 𑀘 𑀲𑁄 𑀧𑀬𑁄𑀕𑁄 𑀘𑀸𑀢𑀺 𑀧𑀼𑀩𑁆𑀩𑀧𑀬𑁄𑀕𑁄. 𑀧𑀬𑁄𑀕𑁂𑀦 𑀲𑀳 𑀯𑀢𑁆𑀢𑀫𑀸𑀦𑁄 𑀅𑀯𑀳𑀸𑀭𑁄 𑀲𑀳𑀧𑀬𑁄𑀕𑁄. 𑀲𑀫𑀁 𑀏𑀓𑀻 𑀳𑀼𑀢𑁆𑀯𑀸 𑀯𑀺𑀤𑀳𑀺𑀢𑁆𑀯𑀸 𑀫𑀦𑁆𑀢𑁂𑀢𑁆𑀯𑀸 𑀅𑀯𑀳𑀭𑀡𑀁 𑀲𑀁𑀯𑀺𑀥𑀸𑀯𑀳𑀸𑀭𑁄, 𑀅𑀜𑁆𑀜𑀫𑀜𑁆𑀜𑀁 𑀲𑀜𑁆𑀜𑀼𑀧𑁆𑀧𑀢𑁆𑀢𑀺𑀬𑀸 𑀓𑀢𑀸𑀯𑀳𑀸𑀭𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀼𑀩𑁆𑀩𑀡𑁆𑀳𑀸𑀤𑀺𑀓𑀸𑀮𑀧𑀭𑀺𑀘𑁆𑀙𑁂𑀤𑁂𑀦 𑀲𑀜𑁆𑀚𑀸𑀦𑀦𑀁 𑀲𑀗𑁆𑀓𑁂𑀢𑁄, 𑀢𑀲𑁆𑀲 𑀓𑀫𑁆𑀫𑀁 𑀲𑀗𑁆𑀓𑁂𑀢𑀓𑀫𑁆𑀫𑀁. 𑀦𑀺𑀫𑀺𑀢𑁆𑀢𑀲𑁆𑀲 𑀓𑀫𑁆𑀫𑀁 𑀦𑀺𑀫𑀺𑀢𑁆𑀢𑀓𑀫𑁆𑀫𑀁, 𑀲𑀜𑁆𑀜𑀼𑀧𑁆𑀧𑀸𑀤𑀦𑀢𑁆𑀣𑀁 𑀓𑀲𑁆𑀲𑀘𑀺 𑀦𑀺𑀫𑀺𑀢𑁆𑀢𑀲𑁆𑀲 𑀓𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀧𑀼𑀩𑁆𑀩𑀧𑀬𑁄𑀕𑀸𑀤𑀻𑀲𑀼 𑀧𑀜𑁆𑀘𑀲𑀼. 𑀔𑀺𑀮𑀸𑀤𑀻𑀦𑀺 𑀲𑀗𑁆𑀓𑀸𑀫𑁂𑀢𑁆𑀯𑀸 𑀔𑁂𑀢𑁆𑀢𑀸𑀤𑀺𑀕𑁆𑀕𑀳𑀡𑀯𑀲𑁂𑀦𑀸𑀢𑀺 𑀔𑀺𑀮𑀁, 𑀭𑀚𑁆𑀚𑀼𑀁, 𑀯𑀢𑀺𑀁, 𑀫𑀭𑀺𑀬𑀸𑀤𑀁 𑀯𑀸 𑀧𑀸𑀓𑀸𑀭𑀁 𑀯𑀸 𑀲𑀗𑁆𑀓𑀸𑀫𑁂𑀢𑁆𑀯𑀸 𑀔𑁂𑀢𑁆𑀢𑀕𑁆𑀕𑀳𑀡𑀯𑀲𑁂𑀦, 𑀔𑀺𑀮𑀁, 𑀭𑀚𑁆𑀚𑀼𑀁, 𑀯𑀢𑀺𑀁, 𑀫𑀭𑀺𑀬𑀸𑀤𑀁 𑀯𑀸 𑀧𑀸𑀓𑀸𑀭𑀁 𑀯𑀸 𑀲𑀗𑁆𑀓𑀸𑀫𑁂𑀢𑁆𑀯𑀸 𑀯𑀢𑁆𑀣𑀼𑀕𑁆𑀕𑀳𑀡𑀯𑀲𑁂𑀦. 𑀲𑀘𑁂 𑀧𑀦 𑀤𑁆𑀯𑀻𑀳𑀺 𑀔𑀺𑀮𑁂𑀳𑀺 𑀕𑀳𑁂𑀢𑀩𑁆𑀩𑀁 𑀳𑁄𑀢𑀺, 𑀧𑀞𑀫𑁂 𑀔𑀺𑀮𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀤𑀼𑀢𑀺𑀬𑁂 𑀧𑀸𑀭𑀸𑀚𑀺𑀓𑀁 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁦𑁪). 𑀲𑀘𑁂 𑀢𑀻𑀳𑀺 𑀕𑀳𑁂𑀢𑀩𑁆𑀩𑀁 𑀳𑁄𑀢𑀺, 𑀧𑀞𑀫𑁂 𑀤𑀼𑀓𑁆𑀓𑀝𑀁, 𑀤𑀼𑀢𑀺𑀬𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀢𑀢𑀺𑀬𑁂 𑀧𑀸𑀭𑀸𑀚𑀺𑀓𑀁. 𑀏𑀯𑀁 𑀩𑀳𑀼𑀓𑁂𑀲𑀼𑀧𑀺 𑀅𑀯𑀲𑀸𑀦𑁂 𑀤𑁆𑀯𑁂 𑀞𑀧𑁂𑀢𑁆𑀯𑀸 𑀧𑀼𑀭𑀺𑀫𑁂𑀳𑀺 𑀤𑀼𑀓𑁆𑀓𑀝𑀁, 𑀅𑀯𑀲𑀸𑀦𑁂 𑀤𑁆𑀯𑀺𑀦𑁆𑀦𑀁 𑀏𑀓𑁂𑀦 𑀣𑀼𑀮𑁆𑀮𑀘𑁆𑀘𑀬𑀁, 𑀇𑀢𑀭𑁂𑀦 𑀧𑀸𑀭𑀸𑀚𑀺𑀓𑀁. 𑀭𑀚𑁆𑀚𑀼𑀧𑀲𑀸𑀭𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀁 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 ‘‘𑀢𑀜𑁆𑀘 𑀔𑁄 𑀲𑀸𑀫𑀺𑀓𑀸𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁂𑀦𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁦𑁪) 𑀯𑀼𑀢𑁆𑀢𑀁, 𑀢𑀁 ‘‘𑀔𑁂𑀢𑁆𑀢𑀁 𑀅𑀪𑀺𑀬𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺𑀆𑀤𑀺 (𑀧𑀸𑀭𑀸. 𑁧𑁦𑁪) -𑀅𑀥𑀺𑀓𑀸𑀭𑁂 𑀯𑀼𑀢𑁆𑀢𑀢𑁆𑀢𑀸 𑀅𑀪𑀺𑀬𑁄𑀕𑀯𑀲𑁂𑀦 𑀕𑀳𑀡𑀁 𑀲𑀦𑁆𑀥𑀸𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀁𑀯𑀺𑀤𑀳𑀺𑀢𑁆𑀯𑀸𑀢𑀺 𑀏𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑀁𑀫𑀦𑁆𑀢𑀬𑀺𑀢𑁆𑀯𑀸𑀢𑀺 𑀏𑀓𑀘𑁆𑀙𑀦𑁆𑀤𑀢𑀸𑀬 𑀏𑀓𑀚𑁆𑀛𑀸𑀲𑀬𑀢𑀸𑀬 𑀪𑀡𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀅𑀯𑀳𑀸𑀭𑁂 𑀅𑀲𑀫𑁆𑀫𑁄𑀳𑀢𑁆𑀣𑀁 ‘‘𑀏𑀯𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀕𑀢𑁂𑀲𑀼 𑀳𑀻’’𑀢𑀺𑀆𑀤𑀺𑀫𑀸𑀳. 𑀲𑀜𑁆𑀚𑀸𑀦𑀦𑀓𑀫𑁆𑀫𑀦𑁆𑀢𑀺 𑀧𑀼𑀩𑁆𑀩𑀡𑁆𑀳𑀸𑀤𑀺𑀓𑀸𑀮𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑀜𑁆𑀜𑀸𑀡𑀓𑀭𑀡𑀁. 𑀢𑁂𑀦𑀸𑀳 ‘‘𑀲𑀘𑁂 𑀳𑀻’’𑀢𑀺𑀆𑀤𑀺.

𑀏𑀢𑁆𑀣 𑀘 ‘‘𑀧𑀼𑀭𑁂𑀪𑀢𑁆𑀢𑀁 𑀅𑀯𑀳𑀭𑀸’’𑀢𑀺 𑀯𑀼𑀢𑁆𑀢𑁂 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁧𑁯) 𑀅𑀚𑁆𑀚 𑀯𑀸 𑀧𑀼𑀭𑁂𑀪𑀢𑁆𑀢𑀁 𑀅𑀯𑀳𑀭𑀢𑀼, 𑀲𑁆𑀯𑁂 𑀯𑀸, 𑀅𑀦𑀸𑀕𑀢𑁂 𑀯𑀸 𑀲𑀁𑀯𑀘𑁆𑀙𑀭𑁂, 𑀦𑀢𑁆𑀣𑀺 𑀯𑀺𑀲𑀗𑁆𑀓𑁂𑀢𑁄, 𑀉𑀪𑀺𑀦𑁆𑀦𑀫𑁆𑀧𑀺 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀧𑀦 ‘‘𑀅𑀚𑁆𑀚 𑀧𑀼𑀭𑁂𑀪𑀢𑁆𑀢𑀁 𑀅𑀯𑀳𑀭𑀸’’𑀢𑀺 𑀯𑀼𑀢𑁆𑀢𑁂 𑀲𑁆𑀯𑁂 𑀅𑀯𑀳𑀭𑀢𑀺. ‘‘𑀅𑀚𑁆𑀚𑀸’’𑀢𑀺 𑀦𑀺𑀬𑀫𑀺𑀢𑀁 𑀲𑀗𑁆𑀓𑁂𑀢𑀁 𑀅𑀢𑀺𑀓𑁆𑀓𑀫𑁆𑀫 𑀧𑀘𑁆𑀙𑀸 𑀅𑀯𑀳𑀝𑀁 𑀳𑁄𑀢𑀺. 𑀲𑀘𑁂 ‘‘𑀲𑁆𑀯𑁂 𑀧𑀼𑀭𑁂𑀪𑀢𑁆𑀢𑀁 𑀅𑀯𑀳𑀭𑀸’’𑀢𑀺 𑀯𑀼𑀢𑁆𑀢𑁂 𑀅𑀚𑁆𑀚 𑀧𑀼𑀭𑁂𑀪𑀢𑁆𑀢𑀁 𑀅𑀯𑀳𑀭𑀢𑀺, ‘‘𑀲𑁆𑀯𑁂’’𑀢𑀺 𑀦𑀺𑀬𑀫𑀺𑀢𑀁 𑀢𑀁 𑀲𑀗𑁆𑀓𑁂𑀢𑀁 𑀅𑀧𑀢𑁆𑀯𑀸 𑀧𑀼𑀭𑁂 𑀅𑀯𑀳𑀝𑀁 𑀳𑁄𑀢𑀺, 𑀏𑀯𑀁 𑀅𑀯𑀳𑀭𑀦𑁆𑀢𑀲𑁆𑀲 𑀅𑀯𑀳𑀸𑀭𑀓𑀲𑁆𑀲𑁂𑀯 𑀧𑀸𑀭𑀸𑀚𑀺𑀓𑀁, 𑀫𑀽𑀮𑀝𑁆𑀞𑀲𑁆𑀲 𑀅𑀦𑀸𑀧𑀢𑁆𑀢𑀺. ‘‘𑀲𑁆𑀯𑁂𑀯 𑀧𑀼𑀭𑁂𑀪𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀢𑀤𑀳𑁂𑀯 𑀯𑀸, 𑀲𑁆𑀯𑁂 𑀧𑀘𑁆𑀙𑀸𑀪𑀢𑁆𑀢𑀁 𑀯𑀸 𑀅𑀯𑀳𑀭𑀦𑁆𑀢𑁄𑀧𑀺 𑀢𑀁𑀲𑀗𑁆𑀓𑁂𑀢𑀢𑁄 𑀧𑀼𑀭𑁂 𑀘 𑀧𑀘𑁆𑀙𑀸 𑀘 𑀅𑀯𑀳𑀭𑀢𑀺. 𑀬𑁄 𑀧𑀦 𑀏𑀯𑀁𑀅𑀓𑀢𑁆𑀯𑀸 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀫𑁂𑀯 𑀅𑀯𑀳𑀭𑀢𑀺, 𑀅𑀬𑀁 𑀲𑀗𑁆𑀓𑁂𑀢𑀢𑁄 𑀅𑀧𑀼𑀭𑁂 𑀅𑀧𑀘𑁆𑀙𑀸 𑀢𑀁 𑀅𑀯𑀳𑀭𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀲 𑀦𑀬𑁄 𑀧𑀘𑁆𑀙𑀸𑀪𑀢𑁆𑀢𑀭𑀢𑁆𑀢𑀺𑀦𑁆𑀤𑀺𑀯𑁂𑀲𑀼𑀧𑀺, 𑀧𑀼𑀭𑀺𑀫𑀬𑀸𑀫𑀫𑀚𑁆𑀛𑀺𑀫𑀬𑀸𑀫𑀧𑀘𑁆𑀙𑀺𑀫𑀬𑀸𑀫𑀓𑀸𑀴𑀚𑀼𑀡𑁆𑀳𑀫𑀸𑀲𑀉𑀢𑀼𑀲𑀁𑀯𑀘𑁆𑀙𑀭𑀸𑀤𑀺𑀯𑀲𑁂𑀦𑀸𑀧𑀺 𑀏𑀢𑁆𑀣 𑀲𑀗𑁆𑀓𑁂𑀢𑀯𑀺𑀲𑀗𑁆𑀓𑁂𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀭𑀪𑀡𑁆𑀟𑀸𑀯𑀳𑀸𑀭𑀲𑀜𑁆𑀜𑀼𑀧𑁆𑀧𑀸𑀤𑀲𑁆𑀲 𑀳𑁂𑀢𑀼𑀢𑁆𑀢𑀸 𑀅𑀓𑁆𑀔𑀺𑀦𑀺𑀔𑀡𑀸𑀤𑀻𑀦𑁂𑀯 𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀓𑁆𑀔𑀺𑀦𑀺𑀔𑀡𑀸𑀤𑀺𑀦𑀺𑀫𑀺𑀢𑁆𑀢𑀁, 𑀢𑀲𑁆𑀲 𑀓𑀭𑀡𑀁 𑀅𑀓𑁆𑀔𑀺𑀦𑀺𑀔𑀡𑀸𑀤𑀺𑀦𑀺𑀫𑀺𑀢𑁆𑀢𑀓𑀭𑀡𑀁. 𑀆𑀤𑀺𑀲𑀤𑁆𑀤𑁂𑀦 𑀪𑀫𑀼𑀓𑀼𑀓𑁆𑀔𑁂𑀧𑀲𑀻𑀲𑀓𑀫𑁆𑀧𑀦𑀳𑀢𑁆𑀣𑀮𑀗𑁆𑀖𑀦𑀧𑀸𑀡𑀺𑀧𑁆𑀧𑀳𑀸𑀭𑀅𑀗𑁆𑀕𑀼𑀮𑀺𑀨𑁄𑀝𑀦𑀕𑀻𑀯𑀼𑀦𑁆𑀦𑀸𑀫𑀦𑀉𑀓𑁆𑀓𑀸𑀲𑀦𑀸𑀤𑀺𑀅𑀦𑁂𑀓𑀧𑁆𑀧𑀓𑀸𑀭𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑁂𑀲𑀫𑁂𑀢𑁆𑀣 𑀲𑀗𑁆𑀓𑁂𑀢𑀓𑀫𑁆𑀫𑁂 𑀯𑀼𑀢𑁆𑀢𑀦𑀬𑀫𑁂𑀯.

𑀣𑁂𑀦𑁄 𑀯𑀼𑀘𑁆𑀘𑀢𑀺 𑀘𑁄𑀭𑁄, 𑀢𑀲𑁆𑀲 𑀪𑀸𑀯𑁄 𑀣𑁂𑀬𑁆𑀬𑀁, 𑀢𑁂𑀦 𑀅𑀯𑀳𑀭𑀡𑀁 𑀣𑁂𑀬𑁆𑀬𑀸𑀯𑀳𑀸𑀭𑁄. 𑀧𑀲𑀬𑁆𑀳 𑀅𑀪𑀺𑀪𑀯𑀺𑀢𑁆𑀯𑀸 𑀅𑀯𑀳𑀭𑀡𑀁 𑀧𑀲𑀬𑁆𑀳𑀸𑀯𑀳𑀸𑀭𑁄. 𑀯𑀢𑁆𑀣𑀲𑀼𑀢𑁆𑀢𑀸𑀤𑀺𑀓𑀁 𑀧𑀭𑀺𑀘𑁆𑀙𑀺𑀚𑁆𑀚 𑀓𑀧𑁆𑀧𑀦𑀁 𑀧𑀭𑀺𑀓𑀧𑁆𑀧𑁄, 𑀢𑁂𑀦 𑀅𑀯𑀳𑀭𑀡𑀁 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄. 𑀢𑀺𑀡𑀧𑀡𑁆𑀡𑀸𑀤𑀻𑀳𑀺 𑀧𑀝𑀺𑀘𑁆𑀙𑀦𑁆𑀦𑀲𑁆𑀲 𑀅𑀯𑀳𑀸𑀭𑁄 𑀧𑀝𑀺𑀘𑁆𑀙𑀦𑁆𑀦𑀸𑀯𑀳𑀸𑀭𑁄. 𑀓𑀼𑀲𑁂𑀦 𑀅𑀯𑀳𑀸𑀭𑁄 𑀓𑀼𑀲𑀸𑀯𑀳𑀸𑀭𑁄. 𑀓𑀽𑀝𑀫𑀸𑀦𑀓𑀽𑀝𑀓𑀳𑀸𑀧𑀡𑀸𑀤𑀻𑀳𑀻𑀢𑀺 𑀏𑀢𑁆𑀣 𑀓𑀽𑀝𑀫𑀸𑀦𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁦; 𑀫. 𑀦𑀺. 𑀅𑀝𑁆𑀞. 𑁧.𑁨𑁯𑁩; 𑀧𑀼. 𑀧. 𑀅𑀝𑁆𑀞. 𑁧𑁭𑁯) 𑀦𑀸𑀫 𑀳𑀤𑀬𑀪𑁂𑀤𑀲𑀺𑀔𑀸𑀪𑁂𑀤𑀭𑀚𑁆𑀚𑀼𑀪𑁂𑀤𑀯𑀲𑁂𑀦 𑀢𑀺𑀯𑀺𑀥𑀁 𑀫𑀸𑀦𑀓𑀽𑀝𑀁. 𑀢𑀢𑁆𑀣 𑀳𑀤𑀬𑀦𑁆𑀢𑀺 𑀦𑀸𑀴𑀺𑀆𑀤𑀺𑀫𑀸𑀦𑀪𑀸𑀚𑀦𑀸𑀦𑀁 𑀅𑀩𑁆𑀪𑀦𑁆𑀢𑀭𑀁, 𑀢𑀲𑁆𑀲 𑀪𑁂𑀤𑁄 𑀙𑀺𑀤𑁆𑀤𑀓𑀭𑀡𑀁 𑀳𑀤𑀬𑀪𑁂𑀤𑁄, 𑀲𑁄 𑀲𑀧𑁆𑀧𑀺𑀢𑁂𑀮𑀸𑀤𑀺𑀫𑀺𑀦𑀦𑀓𑀸𑀮𑁂 𑀮𑀩𑁆𑀪𑀢𑀺. 𑀢𑀸𑀦𑀺 𑀳𑀺 𑀕𑀡𑁆𑀳𑀦𑁆𑀢𑁄 𑀳𑁂𑀝𑁆𑀞𑀸𑀙𑀺𑀤𑁆𑀤𑁂𑀦 𑀫𑀸𑀦𑁂𑀦 ‘‘𑀲𑀡𑀺𑀓𑀁 𑀆𑀲𑀺𑀜𑁆𑀘𑀸’’𑀢𑀺 𑀯𑀢𑁆𑀯𑀸 𑀅𑀦𑁆𑀢𑁄𑀪𑀸𑀚𑀦𑁂 𑀩𑀳𑀼𑀁 𑀧𑀕𑁆𑀖𑀭𑀸𑀧𑁂𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀤𑀤𑀦𑁆𑀢𑁄 𑀘 𑀙𑀺𑀤𑁆𑀤𑀁 𑀧𑀺𑀥𑀸𑀬 𑀲𑀻𑀖𑀁 𑀧𑀽𑀭𑁂𑀢𑁆𑀯𑀸 𑀤𑁂𑀢𑀺.

𑀲𑀺𑀔𑀸𑀪𑁂𑀤𑁄 𑀧𑀦 𑀢𑀺𑀮𑀢𑀡𑁆𑀟𑀼𑀮𑀸𑀤𑀺𑀫𑀺𑀦𑀦𑀓𑀸𑀮𑁂 𑀮𑀩𑁆𑀪𑀢𑀺. 𑀢𑀸𑀦𑀺 𑀳𑀺 𑀕𑀡𑁆𑀳𑀦𑁆𑀢𑁄 𑀲𑀡𑀺𑀓𑀁 𑀲𑀺𑀔𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀤𑀤𑀦𑁆𑀢𑁄 𑀯𑁂𑀕𑁂𑀦 𑀧𑀽𑀭𑁂𑀢𑁆𑀯𑀸 𑀲𑀺𑀔𑀁 𑀙𑀺𑀦𑁆𑀤𑀦𑁆𑀢𑁄 𑀤𑁂𑀢𑀺.

𑀭𑀚𑁆𑀚𑀼𑀪𑁂𑀤𑁄 𑀔𑁂𑀢𑁆𑀢𑀯𑀢𑁆𑀣𑀼𑀫𑀺𑀦𑀦𑀓𑀸𑀮𑁂 𑀮𑀩𑁆𑀪𑀢𑀺. 𑀔𑁂𑀢𑁆𑀢𑀸𑀤𑀺𑀁 𑀫𑀺𑀦𑀦𑁆𑀢𑀸 𑀳𑀺 𑀅𑀫𑀳𑀦𑁆𑀢𑀫𑁆𑀧𑀺 𑀫𑀳𑀦𑁆𑀢𑀁 𑀓𑀢𑁆𑀯𑀸 𑀫𑀺𑀦𑀦𑁆𑀢𑀺, 𑀫𑀳𑀦𑁆𑀢𑀫𑁆𑀧𑀺 𑀅𑀫𑀳𑀦𑁆𑀢𑀁.

𑀢𑀫𑁆𑀩𑀓𑀁𑀲𑀸𑀤𑀺𑀫𑀬𑁄 𑀓𑀽𑀝𑁄 𑀓𑀳𑀸𑀧𑀡𑁄 𑀓𑀽𑀝𑀓𑀳𑀸𑀧𑀡𑁄. 𑀆𑀤𑀺𑀲𑀤𑁆𑀤𑁂𑀦 𑀢𑀼𑀮𑀸𑀓𑀽𑀝𑀓𑀁𑀲𑀓𑀽𑀝𑀯𑀜𑁆𑀘𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀢𑀼𑀮𑀸𑀓𑀽𑀝𑀁 𑀭𑀽𑀧𑀓𑀽𑀝𑀁, 𑀅𑀗𑁆𑀕𑀓𑀽𑀝𑀁, 𑀕𑀳𑀡𑀓𑀽𑀝𑀁, 𑀧𑀝𑀺𑀘𑁆𑀙𑀦𑁆𑀦𑀓𑀽𑀝𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀭𑀽𑀧𑀓𑀽𑀝𑀁 𑀦𑀸𑀫 𑀤𑁆𑀯𑁂 𑀢𑀼𑀮𑀸 𑀲𑀫𑀭𑀽𑀧𑀸 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀫𑀳𑀢𑀺𑀬𑀸 𑀕𑀡𑁆𑀳𑀸𑀢𑀺, 𑀤𑀤𑀦𑁆𑀢𑁄 𑀔𑀼𑀤𑁆𑀤𑀺𑀓𑀸𑀬 𑀤𑁂𑀢𑀺. 𑀅𑀗𑁆𑀕𑀓𑀽𑀝𑀁 𑀦𑀸𑀫 𑀕𑀡𑁆𑀳𑀦𑁆𑀢𑁄 𑀧𑀘𑁆𑀙𑀸𑀪𑀸𑀕𑁂 𑀳𑀢𑁆𑀣𑁂𑀦 𑀢𑀼𑀮𑀁 𑀅𑀓𑁆𑀓𑀫𑀢𑀺, 𑀤𑀤𑀦𑁆𑀢𑁄 𑀧𑀼𑀩𑁆𑀩𑀪𑀸𑀕𑁂 𑀅𑀓𑁆𑀓𑀫𑀢𑀺. 𑀕𑀳𑀡𑀓𑀽𑀝𑀁 𑀦𑀸𑀫 𑀕𑀡𑁆𑀳𑀦𑁆𑀢𑁄 𑀫𑀽𑀮𑁂 𑀭𑀚𑁆𑀚𑀼𑀁 𑀕𑀡𑁆𑀳𑀸𑀢𑀺, 𑀤𑀤𑀦𑁆𑀢𑁄 𑀅𑀕𑁆𑀕𑁂. 𑀧𑀝𑀺𑀘𑁆𑀙𑀦𑁆𑀦𑀓𑀽𑀝𑀁 𑀦𑀸𑀫 𑀢𑀼𑀮𑀁 𑀲𑀼𑀲𑀺𑀭𑀁 𑀓𑀢𑁆𑀯𑀸 𑀅𑀦𑁆𑀢𑁄 𑀅𑀬𑀘𑀼𑀡𑁆𑀡𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀢𑀁 𑀧𑀘𑁆𑀙𑀸𑀪𑀸𑀕𑁂 𑀓𑀭𑁄𑀢𑀺, 𑀤𑀤𑀦𑁆𑀢𑁄 𑀅𑀕𑁆𑀕𑀪𑀸𑀕𑁂.

𑀓𑀁𑀲𑁄 𑀯𑀼𑀘𑁆𑀘𑀢𑀺 𑀲𑀼𑀯𑀡𑁆𑀡𑀧𑀸𑀢𑀺, 𑀢𑀸𑀬 𑀯𑀜𑁆𑀘𑀦𑀁 𑀓𑀁𑀲𑀓𑀽𑀝𑀁. 𑀓𑀣𑀁? 𑀏𑀓𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀓𑀢𑁆𑀯𑀸 𑀅𑀜𑁆𑀜𑀸 𑀤𑁆𑀯𑁂 𑀢𑀺𑀲𑁆𑀲𑁄 𑀮𑁄𑀳𑀧𑀸𑀢𑀺𑀬𑁄 𑀲𑀼𑀯𑀡𑁆𑀡𑀯𑀡𑁆𑀡𑀸 𑀓𑀭𑁄𑀦𑁆𑀢𑀺. 𑀢𑀢𑁄 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀓𑀺𑀜𑁆𑀘𑀺𑀤𑁂𑀯 𑀅𑀟𑁆𑀠𑀁 𑀓𑀼𑀮𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀲𑀼𑀯𑀡𑁆𑀡𑀪𑀸𑀚𑀦𑀸𑀦𑀺 𑀓𑀺𑀡𑀸𑀣𑀸’’𑀢𑀺 𑀯𑀢𑁆𑀯𑀸 𑀅𑀕𑁆𑀖𑁂 𑀧𑀼𑀘𑁆𑀙𑀺𑀢𑁂 𑀲𑀫𑀕𑁆𑀖𑀢𑀭𑀁 𑀤𑀸𑀢𑀼𑀓𑀸𑀫𑀸 𑀳𑁄𑀦𑁆𑀢𑀺. 𑀢𑀢𑁄 𑀢𑁂𑀳𑀺 ‘‘𑀓𑀣𑀁 𑀇𑀫𑁂𑀲𑀁 𑀲𑀼𑀯𑀡𑁆𑀡𑀪𑀸𑀯𑁄 𑀚𑀸𑀦𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑁂 ‘‘𑀯𑀻𑀫𑀁𑀲𑀺𑀢𑁆𑀯𑀸 𑀕𑀡𑁆𑀳𑀣𑀸’’𑀢𑀺 𑀲𑀼𑀯𑀡𑁆𑀡𑀧𑀸𑀢𑀺𑀁 𑀧𑀸𑀲𑀸𑀡𑁂 𑀖𑀁𑀲𑀺𑀢𑁆𑀯𑀸 𑀲𑀩𑁆𑀩𑀸 𑀧𑀸𑀢𑀺𑀬𑁄 𑀤𑀢𑁆𑀯𑀸 𑀕𑀘𑁆𑀙𑀢𑀺.

𑀯𑀜𑁆𑀘𑀦𑀁 𑀦𑀸𑀫 𑀢𑁂𑀳𑀺 𑀢𑁂𑀳𑀺 𑀉𑀧𑀸𑀬𑁂𑀳𑀺 𑀧𑀭𑁂𑀲𑀁 𑀯𑀜𑁆𑀘𑀦𑀁. 𑀢𑀢𑁆𑀭𑀺𑀤𑀫𑁂𑀓𑀁 𑀯𑀢𑁆𑀣𑀼 𑁋 𑀏𑀓𑁄 𑀓𑀺𑀭 𑀮𑀼𑀤𑁆𑀤𑀓𑁄 𑀫𑀺𑀕𑀜𑁆𑀘 𑀫𑀺𑀕𑀧𑁄𑀢𑀓𑀜𑁆𑀘 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀢𑀺, 𑀢𑀫𑁂𑀓𑁄 𑀥𑀼𑀢𑁆𑀢𑁄 ‘‘𑀓𑀺𑀁 𑀪𑁄 𑀫𑀺𑀕𑁄 𑀅𑀕𑁆𑀖𑀢𑀺, 𑀓𑀺𑀁 𑀫𑀺𑀕𑀧𑁄𑀢𑀓𑁄’’𑀢𑀺 𑀆𑀳. ‘‘𑀫𑀺𑀕𑁄 𑀤𑁆𑀯𑁂 𑀓𑀳𑀸𑀧𑀡𑁂, 𑀫𑀺𑀕𑀧𑁄𑀢𑀓𑁄 𑀏𑀓’’𑀦𑁆𑀢𑀺 𑀯𑀼𑀢𑁆𑀢𑁂 𑀏𑀓𑀁 𑀓𑀳𑀸𑀧𑀡𑀁 𑀤𑀢𑁆𑀯𑀸 𑀫𑀺𑀕𑀧𑁄𑀢𑀓𑀁 𑀕𑀳𑁂𑀢𑁆𑀯𑀸 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑁂𑀦𑁆𑀢𑁄 ‘‘𑀦 𑀫𑁂 𑀪𑁄 𑀫𑀺𑀕𑀧𑁄𑀢𑀓𑁂𑀦 𑀅𑀢𑁆𑀣𑁄, 𑀫𑀺𑀕𑀁 𑀫𑁂 𑀤𑁂𑀳𑀻’’𑀢𑀺 𑀆𑀳. ‘‘𑀢𑁂𑀦 𑀳𑀺 𑀤𑁆𑀯𑁂 𑀓𑀳𑀸𑀧𑀡𑁂 𑀤𑁂𑀳𑀻’’𑀢𑀺 𑀆𑀳. 𑀲𑁄 𑀆𑀳 ‘‘𑀦𑀦𑀼 𑀪𑁄 𑀫𑀬𑀸 𑀧𑀞𑀫𑀁 𑀏𑀓𑁄 𑀓𑀳𑀸𑀧𑀡𑁄 𑀤𑀺𑀦𑁆𑀦𑁄’’𑀢𑀺. 𑀆𑀫 𑀤𑀺𑀦𑁆𑀦𑁄, 𑀇𑀫𑀁 𑀫𑀺𑀕𑀧𑁄𑀢𑀓𑀁 𑀕𑀡𑁆𑀳, 𑀏𑀯𑀁 𑀲𑁄 𑀘 𑀓𑀳𑀸𑀧𑀡𑁄, 𑀅𑀬𑀜𑁆𑀘 𑀓𑀳𑀸𑀧𑀡𑀕𑁆𑀖𑀦𑀓𑁄 𑀫𑀺𑀕𑀧𑁄𑀢𑀓𑁄𑀢𑀺 𑀤𑁆𑀯𑁂 𑀓𑀳𑀸𑀧𑀡𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺. 𑀲𑁄 ‘‘𑀓𑀸𑀭𑀡𑀁 𑀯𑀤𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀫𑀺𑀕𑀧𑁄𑀢𑀓𑀁 𑀕𑀳𑁂𑀢𑁆𑀯𑀸 𑀫𑀺𑀕𑀁 𑀅𑀤𑀸𑀲𑀻𑀢𑀺.

𑀧𑀲𑀬𑁆𑀳𑀸𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁩𑁮) 𑀧𑀭𑁂 𑀅𑀪𑀺𑀪𑀼𑀬𑁆𑀬. 𑀕𑀸𑀫𑀁 𑀖𑀸𑀢𑁂𑀦𑁆𑀢𑀻𑀢𑀺 𑀕𑀸𑀫𑀖𑀸𑀢𑀓𑀸, 𑀕𑀸𑀫𑀁 𑀧𑀳𑀭𑀦𑁆𑀢𑀸 𑀘𑁄𑀭𑀸, 𑀢𑁂 𑀆𑀤𑀺 𑀬𑁂𑀲𑀁 𑀢𑁂 𑀕𑀸𑀫𑀖𑀸𑀢𑀓𑀸𑀤𑀬𑁄. 𑀆𑀤𑀺𑀲𑀤𑁆𑀤𑁂𑀦 𑀘𑁂𑀢𑁆𑀣 𑀧𑀦𑁆𑀣𑀖𑀸𑀢𑀓𑀸𑀤𑀻𑀦𑀁 𑀕𑀳𑀡𑀁. 𑀉𑀤𑁆𑀥𑀸𑀭𑁂𑀬𑁂𑀯 𑀧𑀸𑀭𑀸𑀚𑀺𑀓𑀦𑁆𑀢𑀺 ‘‘𑀲𑀘𑁂 𑀲𑀸𑀝𑀓𑁄 𑀪𑀯𑀺𑀲𑁆𑀲𑀢𑀺, 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀓𑀧𑁆𑀧𑀲𑁆𑀲 𑀧𑀯𑀢𑁆𑀢𑀢𑁆𑀢𑀸, 𑀲𑀸𑀝𑀓𑀲𑁆𑀲 𑀘 𑀢𑀢𑁆𑀣 𑀲𑀩𑁆𑀪𑀸𑀯𑀢𑁄. 𑀧𑀤𑀯𑀸𑀭𑁂𑀦 𑀓𑀸𑀭𑁂𑀢𑀩𑁆𑀩𑁄𑀢𑀺 𑀪𑀽𑀫𑀺𑀬𑀁 𑀅𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀯 𑀯𑀻𑀫𑀁𑀲𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀪𑀡𑁆𑀟𑀤𑁂𑀬𑁆𑀬𑀦𑁆𑀢𑀺 𑀬𑀁 𑀧𑀭𑀲𑁆𑀲 𑀦𑀝𑁆𑀞𑀁, 𑀢𑀲𑁆𑀲 𑀫𑀽𑀮𑀁 𑀯𑀸 𑀢𑀤𑁂𑀯 𑀯𑀸 𑀪𑀡𑁆𑀟𑀁 𑀤𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀢𑀲𑁆𑀲𑀸𑀢𑀺 𑀬𑁄 𑀏𑀯𑀁 𑀧𑀭𑀺𑀓𑀧𑁆𑀧𑁂𑀢𑀺, 𑀢𑀲𑁆𑀲. 𑀇𑀫𑀲𑁆𑀲 ‘‘𑀅𑀯𑀳𑀸𑀭𑁄 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄.

𑀧𑀭𑁂𑀲𑀦𑁆𑀢𑀺 𑀓𑀻𑀴𑀦𑁆𑀢𑀸𑀦𑀁, 𑀧𑀯𑀺𑀲𑀦𑁆𑀢𑀸𑀦𑀁 𑀯𑀸 𑀧𑀭𑁂𑀲𑀁 𑀫𑀦𑀼𑀲𑁆𑀲𑀸𑀦𑀁. ‘‘𑀧𑀘𑁆𑀙𑀸 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀁𑀲𑀼𑀦𑀸 𑀯𑀸 𑀧𑀡𑁆𑀡𑁂𑀦 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑀻𑀢𑀺 ‘‘𑀲𑀘𑁂 𑀇𑀤𑀸𑀦𑁂𑀯 𑀑𑀦𑀫𑀺𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀺, ‘𑀓𑀺𑀁 𑀲𑀫𑀡𑁄 𑀕𑀡𑁆𑀳𑀸𑀢𑀻’𑀢𑀺 𑀫𑀁 𑀚𑀸𑀦𑀺𑀢𑁆𑀯𑀸 𑀯𑀺𑀳𑁂𑀞𑁂𑀬𑁆𑀬𑀼𑀁 𑀧𑀘𑁆𑀙𑀸 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀁𑀲𑀼𑀦𑀸 𑀯𑀸 𑀧𑀡𑁆𑀡𑁂𑀦 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑀺. 𑀉𑀤𑁆𑀥𑀸𑀭𑁄 𑀦𑀢𑁆𑀣𑀻𑀢𑀺 𑀞𑀸𑀦𑀸𑀘𑀸𑀯𑀦𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀲𑀸𑀫𑀺𑀓𑀸𑀢𑀺 𑀅𑀦𑁆𑀢𑀸𑀕𑀸𑀫𑀁 𑀧𑀯𑀺𑀲𑀺𑀢𑀼𑀓𑀸𑀫𑀸 𑀪𑀡𑁆𑀟𑀲𑀸𑀫𑀺𑀓𑀸 𑀫𑀦𑀼𑀲𑁆𑀲𑀸. 𑀉𑀤𑁆𑀥𑀸𑀭𑁂𑀢𑀺 𑀉𑀤𑁆𑀥𑀭𑀡𑁂, 𑀞𑀸𑀦𑀸𑀘𑀸𑀯𑀦𑁂𑀢𑀺 𑀅𑀢𑁆𑀣𑁄. 𑀞𑀸𑀦𑀸𑀘𑀸𑀯𑀦𑀜𑁆𑀘𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀧𑀯𑁂𑀲𑁂𑀢𑀻𑀢𑀺 𑀞𑀸𑀦𑀸𑀘𑀸𑀯𑀦𑀯𑀲𑁂𑀦 𑀧𑀯𑁂𑀲𑁂𑀢𑀺, 𑀳𑁂𑀝𑁆𑀞𑀺𑀫𑀦𑁆𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀉𑀧𑀭𑀺𑀫𑀦𑁆𑀢𑁂𑀦 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑁄 𑀧𑀯𑁂𑀲𑁂𑀢𑀻𑀢𑀺 𑀅𑀢𑁆𑀣𑁄.

𑀲𑀫𑀕𑁆𑀖𑀢𑀭𑀦𑁆𑀢𑀺 𑀅𑀧𑁆𑀧𑀕𑁆𑀖𑀢𑀭𑀁. 𑀉𑀤𑁆𑀥𑀝𑀫𑀢𑁆𑀢𑁂 𑀅𑀯𑀳𑀸𑀭𑁄𑀢𑀺 𑀲𑀓𑀪𑀸𑀯𑀧𑁆𑀧𑀬𑁄𑀕𑀲𑁆𑀲 𑀦𑀺𑀝𑁆𑀞𑀸𑀧𑀺𑀢𑀢𑁆𑀢𑀸, 𑀦 𑀅𑀢𑁆𑀣𑀲𑀸𑀥𑀓𑀯𑀲𑁂𑀦. 𑀉𑀤𑁆𑀥𑀸𑀭𑁂 𑀭𑀓𑁆𑀔𑀢𑀺 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑁂 𑀧𑀸𑀢𑁂𑀢𑀼𑀓𑀸𑀫𑀢𑀸𑀬 𑀉𑀤𑁆𑀥𑀝𑀢𑁆𑀢𑀸. 𑀏𑀲𑁂𑀯 𑀦𑀬𑁄 𑀧𑀸𑀢𑀦𑁂𑀧𑀺 𑀭𑀓𑁆𑀔𑀢𑀻𑀢𑀺 𑀏𑀢𑁆𑀣𑀸𑀧𑀺. ‘‘𑀉𑀤𑁆𑀥𑀸𑀭𑁂𑀬𑁂𑀯 𑀭𑀓𑁆𑀔𑀢𑀻’’𑀢𑀺 𑀇𑀫𑀺𑀦𑀸𑀯 𑀧𑀸𑀢𑀦𑁂 𑀦 𑀭𑀓𑁆𑀔𑀢𑀻𑀢𑀺 𑀅𑀢𑁆𑀣𑁂 𑀲𑀺𑀤𑁆𑀥𑁂𑀧𑀺 𑀅𑀢𑁆𑀣𑀲𑀸𑀥𑀓𑀯𑀲𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀉𑀤𑁆𑀥𑀭𑀺𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀘𑁂 𑀧𑀦 𑀤𑁆𑀯𑀻𑀲𑀼𑀧𑀺 𑀓𑁄𑀝𑁆𑀞𑀸𑀲𑁂𑀲𑀼 𑀧𑀢𑀺𑀢𑀤𑀡𑁆𑀟𑀓𑁂 𑀅𑀤𑀲𑁆𑀲𑀦𑀁 𑀕𑀫𑁂𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁩𑁮), 𑀢𑀢𑁄 𑀅𑀯𑀲𑁂𑀲𑀪𑀺𑀓𑁆𑀔𑀽𑀲𑀼 𑀕𑀢𑁂𑀲𑀼 𑀇𑀢𑀭𑁄 ‘‘𑀫𑀬𑁆𑀳𑀁, 𑀪𑀦𑁆𑀢𑁂, 𑀤𑀡𑁆𑀟𑀓𑁄 𑀦 𑀧𑀜𑁆𑀜𑀸𑀬𑀢𑀻’’𑀢𑀺, ‘‘𑀫𑀬𑁆𑀳𑀫𑁆𑀧𑀺, 𑀆𑀯𑀼𑀲𑁄, 𑀦 𑀧𑀜𑁆𑀜𑀸𑀬𑀢𑀻’’𑀢𑀺, ‘‘𑀓𑀢𑀫𑁄 𑀧𑀦, 𑀪𑀦𑁆𑀢𑁂, 𑀫𑀬𑁆𑀳𑀁 𑀪𑀸𑀕𑁄’’𑀢𑀺. ‘‘𑀅𑀬𑀁 𑀢𑀼𑀬𑁆𑀳𑀁 𑀪𑀸𑀕𑁄’’𑀢𑀺 𑀅𑀢𑁆𑀢𑀦𑁄 𑀪𑀸𑀕𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀺𑀁 𑀯𑀺𑀯𑀤𑀺𑀢𑁆𑀯𑀸 𑀯𑀸 𑀅𑀯𑀺𑀯𑀤𑀺𑀢𑁆𑀯𑀸 𑀯𑀸 𑀢𑀁 𑀕𑀡𑁆𑀳𑀺𑀢𑁆𑀯𑀸 𑀕𑀢𑁂 𑀇𑀢𑀭𑁄 𑀢𑀲𑁆𑀲 𑀪𑀸𑀕𑀁 𑀉𑀤𑁆𑀥𑀭𑀢𑀺, 𑀉𑀤𑁆𑀥𑀸𑀭𑁂 𑀧𑀸𑀭𑀸𑀚𑀺𑀓𑀁. 𑀲𑀘𑁂𑀧𑀺 𑀢𑁂𑀦 ‘‘𑀅𑀳𑀁 𑀫𑀫 𑀪𑀸𑀕𑀁 𑀢𑀼𑀬𑁆𑀳𑀁 𑀦 𑀤𑁂𑀫𑀺, 𑀢𑁆𑀯𑀁 𑀧𑀦 𑀅𑀢𑁆𑀢𑀦𑁄 𑀪𑀸𑀕𑀁 𑀜𑀢𑁆𑀯𑀸 𑀕𑀡𑁆𑀳𑀸’’𑀢𑀺 𑀯𑀼𑀢𑁆𑀢𑁂𑀧𑀺 ‘‘𑀦𑀸𑀬𑀁 𑀫𑀫𑀸’’𑀢𑀺 𑀚𑀸𑀦𑀦𑁆𑀢𑁄𑀧𑀺 𑀢𑀲𑁆𑀲𑁂𑀯 𑀪𑀸𑀕𑀁 𑀕𑀡𑁆𑀳𑀸𑀢𑀺, 𑀉𑀤𑁆𑀥𑀸𑀭𑁂 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀧𑀦 𑀇𑀢𑀭𑁄 ‘‘𑀅𑀬𑀁 𑀢𑀼𑀬𑁆𑀳𑀁 𑀪𑀸𑀕𑁄, 𑀅𑀬𑀁 𑀫𑀬𑁆𑀳𑀁 𑀪𑀸𑀕𑁄𑀢𑀺 𑀓𑀺𑀁 𑀇𑀫𑀺𑀦𑀸 𑀯𑀺𑀯𑀸𑀤𑁂𑀦𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀫𑀬𑁆𑀳𑀁 𑀯𑀸 𑀧𑀢𑁆𑀢𑁄 𑀳𑁄𑀢𑀼, 𑀢𑀼𑀫𑁆𑀳𑀸𑀓𑀁 𑀯𑀸, 𑀬𑁄 𑀯𑀭𑀪𑀸𑀕𑁄, 𑀢𑀁 𑀢𑀼𑀫𑁆𑀳𑁂 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, 𑀤𑀺𑀦𑁆𑀦𑀓𑀁 𑀦𑀸𑀫 𑀕𑀳𑀺𑀢𑀁 𑀳𑁄𑀢𑀺, 𑀦𑀢𑁆𑀣𑁂𑀢𑁆𑀣 𑀅𑀯𑀳𑀸𑀭𑁄. 𑀲𑀘𑁂 𑀲𑁄 𑀯𑀺𑀯𑀸𑀤𑀪𑀻𑀭𑀼𑀓𑁄 𑀪𑀺𑀓𑁆𑀔𑀼 ‘‘𑀬𑀁 𑀢𑀼𑀬𑁆𑀳𑀁 𑀭𑀼𑀘𑁆𑀘𑀢𑀺, 𑀢𑀁 𑀕𑀡𑁆𑀳𑀸’’𑀢𑀺 𑀯𑀼𑀢𑁆𑀢𑁄 𑀅𑀢𑁆𑀢𑀦𑁄 𑀧𑀢𑁆𑀢𑀁 𑀯𑀭𑀪𑀸𑀕𑀁 𑀞𑀧𑁂𑀢𑁆𑀯𑀸 𑀮𑀸𑀫𑀓𑀁𑀬𑁂𑀯 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀢𑁄 𑀇𑀢𑀭𑀲𑁆𑀲 𑀯𑀺𑀘𑀺𑀦𑀺𑀢𑀸𑀯𑀲𑁂𑀲𑀁 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀅𑀯𑀳𑀸𑀭𑁄 𑀦𑀢𑁆𑀣𑁂𑀯. 𑀏𑀯𑀫𑀺𑀫𑀸𑀦𑀺 𑀧𑀜𑁆𑀘 𑀧𑀜𑁆𑀘𑀓𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀇𑀫𑁂 𑀧𑀜𑁆𑀘𑀯𑀻𑀲𑀢𑀺 𑀅𑀯𑀳𑀸𑀭𑀸 𑀯𑁂𑀤𑀺𑀢𑀩𑁆𑀩𑀸. 𑀦𑀺𑀝𑁆𑀞𑀺𑀢𑁄 ‘‘𑀆𑀤𑀺𑀬𑁂𑀬𑁆𑀬𑀸’’𑀢𑀺 𑀇𑀫𑀲𑁆𑀲 𑀧𑀤𑀲𑁆𑀲 𑀯𑀺𑀦𑀺𑀘𑁆𑀙𑀬𑁄. 𑀢𑁂𑀦𑀸𑀳 ‘‘𑀇𑀢𑀺 𑀬𑀁 𑀯𑀼𑀢𑁆𑀢𑀁…𑀧𑁂… 𑀬𑀲𑁆𑀲𑀢𑁆𑀣𑁄 𑀧𑀓𑀸𑀲𑀺𑀢𑁄 𑀳𑁄𑀢𑀻’’𑀢𑀺.

𑀭𑀸𑀚𑀸𑀦𑁄𑀢𑀺 𑀓𑀺𑀜𑁆𑀘𑀸𑀧𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁, 𑀅𑀧𑀭𑀸𑀥𑀸𑀦𑀼𑀭𑀽𑀧𑀁 𑀧𑀦 𑀙𑁂𑀚𑁆𑀚𑀪𑁂𑀚𑁆𑀚𑀸𑀦𑀼𑀲𑀸𑀲𑀓𑁄 𑀧𑀫𑀸𑀡𑀪𑀽𑀢𑁄𑀯 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀭𑀸𑀚𑀸𑀦𑁄𑀢𑀺 𑀇𑀤𑀁 𑀩𑀺𑀫𑁆𑀩𑀺𑀲𑀸𑀭𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺. 𑀲𑁄 𑀳𑀺 𑀥𑀫𑁆𑀫𑀺𑀓𑀭𑀸𑀚𑀢𑁆𑀢𑀸 𑀬𑀣𑀸𑀧𑀯𑁂𑀡𑀺𑀬𑀸𑀯 𑀓𑀭𑁄𑀢𑀺. 𑀅𑀜𑁆𑀜𑁂 𑀧𑀦 𑀓𑀸𑀓𑀡𑀺𑀓𑀫𑀢𑁆𑀢𑀲𑁆𑀲𑀧𑀺 𑀲𑀻𑀲𑀁 𑀙𑀺𑀦𑁆𑀤𑁂𑀬𑁆𑀬𑀼𑀁, 𑀩𑀳𑀼𑀓𑀲𑁆𑀲𑀸𑀧𑀺 𑀦 𑀯𑀸 𑀓𑀺𑀜𑁆𑀘𑀺 𑀓𑀭𑁂𑀬𑁆𑀬𑀼𑀁. 𑀢𑁂𑀦𑀸𑀳 ‘‘𑀅𑀜𑁆𑀜𑁂 𑀧𑀦𑀸’’𑀢𑀺𑀆𑀤𑀺. 𑀳𑀦𑀦𑀁 𑀦𑀸𑀫 𑀧𑁄𑀣𑀦𑀜𑁆𑀘𑁂𑀯 𑀙𑁂𑀤𑀦𑀜𑁆𑀘𑀸𑀢𑀺 𑀆𑀳 ‘‘𑀳𑀢𑁆𑀣𑀸𑀤𑀻𑀳𑀺 𑀯𑀸’’𑀢𑀺𑀆𑀤𑀺. 𑀆𑀤𑀺𑀲𑀤𑁆𑀤𑁂𑀦 𑀧𑀸𑀤𑀓𑀲𑀸𑀯𑁂𑀢𑁆𑀢𑀅𑀟𑁆𑀠𑀤𑀡𑁆𑀟𑀓𑀸𑀦𑀁 𑀕𑀳𑀡𑀁. 𑀭𑀚𑁆𑀚𑀼𑀩𑀦𑁆𑀥𑀦𑀸𑀤𑀻𑀳𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀅𑀦𑁆𑀤𑀼𑀩𑀦𑁆𑀥𑀦𑀲𑀗𑁆𑀔𑀮𑀺𑀓𑀸𑀩𑀦𑁆𑀥𑀦𑀖𑀭𑀩𑀦𑁆𑀥𑀦𑀦𑀕𑀭𑀩𑀦𑁆𑀥𑀦𑀧𑀼𑀭𑀺𑀲𑀕𑀼𑀢𑁆𑀢𑀻𑀦𑀁 𑀕𑀳𑀡𑀁. 𑀦𑀻𑀳𑀭𑁂𑀬𑁆𑀬𑀼𑀦𑁆𑀢𑀺 𑀭𑀝𑁆𑀞𑀢𑁄 𑀦𑀺𑀓𑁆𑀔𑀸𑀫𑁂𑀬𑁆𑀬𑀼𑀁. 𑀘𑁄𑀭𑁄𑀲𑀺…𑀧𑁂… 𑀣𑁂𑀦𑁄𑀲𑀻𑀢𑀺 𑀏𑀢𑁆𑀣 ‘‘𑀧𑀭𑀺𑀪𑀸𑀲𑁂𑀬𑁆𑀬𑀼’’𑀦𑁆𑀢𑀺 𑀧𑀤𑀁 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁 𑀊𑀦𑀢𑁆𑀢𑀸 𑀧𑀤𑀧𑁆𑀧𑀬𑁄𑀕𑀲𑁆𑀲. 𑀢𑁂𑀦𑀸𑀳 ‘‘𑀇𑀫𑁂𑀳𑀺 𑀯𑀘𑀦𑁂𑀳𑀺 𑀧𑀭𑀺𑀪𑀸𑀲𑁂𑀬𑁆𑀬𑀼’’𑀦𑁆𑀢𑀺. 𑀬𑀣𑀸𑀭𑀽𑀧𑀁 𑀧𑀦 𑀬𑀲𑁆𑀫𑀸 𑀧𑀸𑀤𑀢𑁄 𑀧𑀝𑁆𑀞𑀸𑀬 𑀳𑁄𑀢𑀺, 𑀢𑀲𑁆𑀫𑀸 ‘‘𑀧𑀸𑀤𑀲𑁆𑀲 𑀯𑀸 𑀧𑀸𑀤𑀸𑀭𑀳𑀲𑁆𑀲 𑀯𑀸’’𑀢𑀺 𑀆𑀳. 𑀧𑁄𑀭𑀸𑀡𑀓𑀲𑁆𑀲 𑀓𑀳𑀸𑀧𑀡𑀲𑁆𑀲 𑀘𑀢𑀼𑀢𑁆𑀣𑁄 𑀪𑀸𑀕𑁄 𑀧𑀸𑀤𑁄, 𑀧𑀸𑀤𑀁 𑀅𑀭𑀳𑀢𑀻𑀢𑀺 𑀧𑀸𑀤𑀸𑀭𑀳𑁄, 𑀢𑀲𑁆𑀲 𑀧𑀸𑀤𑀲𑁆𑀲 𑀯𑀸 𑀧𑀸𑀤𑀸𑀭𑀳𑀲𑁆𑀲 𑀯𑀸. 𑀏𑀢𑁆𑀣 𑀘 𑀧𑀸𑀤𑁂𑀦 𑀓𑀳𑀸𑀧𑀡𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑀁 𑀅𑀓𑀧𑁆𑀧𑀺𑀬𑀪𑀡𑁆𑀟𑀫𑁂𑀯 𑀤𑀲𑁆𑀲𑁂𑀢𑀺, 𑀧𑀸𑀤𑀸𑀭𑀳𑁂𑀦 𑀧𑀸𑀤𑀕𑁆𑀖𑀦𑀓𑀁 𑀓𑀧𑁆𑀧𑀺𑀬𑀪𑀡𑁆𑀟𑀁. 𑀏𑀢𑁆𑀢𑀸𑀯𑀢𑀸 𑀳𑁂𑀝𑁆𑀞𑀺𑀫𑀦𑁆𑀢𑀤𑀲𑁆𑀲𑀦𑁂𑀦 𑀲𑀩𑁆𑀩𑀸𑀓𑀸𑀭𑁂𑀦 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀧𑁆𑀧𑀳𑁄𑀦𑀓𑀯𑀢𑁆𑀣𑀼 𑀤𑀲𑁆𑀲𑀺𑀢𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀧𑁄𑀭𑀸𑀡𑀓𑀲𑁆𑀲𑀸𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁮𑁮; 𑀯𑀺. 𑀯𑀺. 𑀝𑀻. 𑁧.𑁮𑁮) 𑀧𑁄𑀭𑀸𑀡𑀲𑀢𑁆𑀣𑀸𑀦𑀼𑀭𑀽𑀧𑀁 𑀉𑀧𑁆𑀧𑀸𑀤𑀺𑀢𑀲𑁆𑀲 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀲𑁆𑀲 𑀦𑀻𑀮𑀓𑀳𑀸𑀧𑀡𑀲𑀤𑀺𑀲𑀲𑁆𑀲 𑀓𑀳𑀸𑀧𑀡𑀲𑁆𑀲. 𑀏𑀢𑁂𑀦 𑀭𑀼𑀤𑁆𑀭𑀤𑀸𑀫𑀓𑀸𑀤𑀻𑀦𑀺 𑀧𑀝𑀺𑀓𑁆𑀔𑀺𑀧𑀢𑀺.

𑀏𑀯𑀁 𑀅𑀲𑀸𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀸𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀸𑀚𑀕𑀳𑁂’’𑀢𑀺𑀆𑀤𑀺𑀫𑀸𑀳. 𑀭𑀜𑁆𑀜𑁄𑀢𑀺 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑁄. 𑀫𑀸𑀲𑀓𑁄 𑀦𑀸𑀫 𑀧𑁄𑀭𑀸𑀡𑀓𑀲𑁆𑀲 𑀓𑀳𑀸𑀧𑀡𑀲𑁆𑀲 𑀯𑀻𑀲𑀢𑀺𑀫𑁄 𑀪𑀸𑀕𑁄. 𑀬𑁄 𑀮𑁄𑀓𑁂 ‘‘𑀫𑀜𑁆𑀚𑁂𑀝𑁆𑀞𑀻’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀇𑀤𑀸𑀦𑀺 𑀇𑀫𑀲𑁆𑀫𑀺𑀁 𑀅𑀤𑀺𑀦𑁆𑀦𑀸𑀤𑀸𑀦𑁂 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀊𑀦𑀫𑀸𑀲𑀓𑀸𑀢𑀺𑀭𑁂𑀓𑀫𑀸𑀲𑀓𑀧𑀜𑁆𑀘𑀫𑀸𑀲𑀓𑁂𑀲𑀼. 𑀧𑀭𑀺𑀳𑀻𑀦𑀸𑀧𑀭𑀺𑀳𑀻𑀦𑀯𑀲𑁂𑀦𑀸𑀢𑀺 𑀅𑀕𑁆𑀖𑀲𑁆𑀲 𑀧𑀭𑀺𑀳𑀻𑀦𑀸𑀧𑀭𑀺𑀳𑀻𑀦𑀯𑀲𑁂𑀦. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀇𑀤𑀜𑁆𑀳𑀺 𑀅𑀤𑀺𑀦𑁆𑀦𑀸𑀤𑀸𑀦𑀁 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑁂𑀦 𑀑𑀢𑀺𑀡𑁆𑀡𑁂 𑀯𑀢𑁆𑀣𑀼𑀲𑁆𑀫𑀺𑀁 𑀲𑀳𑀲𑀸 𑀅𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀧𑀜𑁆𑀘 𑀞𑀸𑀦𑀸𑀦𑀺 𑀑𑀮𑁄𑀓𑁂𑀢𑀩𑁆𑀩𑀸𑀦𑀺. 𑀬𑀸𑀦𑀺 𑀲𑀦𑁆𑀥𑀸𑀬 𑀧𑁄𑀭𑀸𑀡𑀸 𑀆𑀳𑀼 𑁋

‘‘𑀯𑀢𑁆𑀣𑀼𑀁 𑀓𑀸𑀮𑀜𑁆𑀘 𑀤𑁂𑀲𑀜𑁆𑀘, 𑀅𑀕𑁆𑀖𑀁 𑀧𑀭𑀺𑀪𑁄𑀕𑀧𑀜𑁆𑀘𑀫𑀁;

𑀢𑀼𑀮𑀬𑀺𑀢𑁆𑀯𑀸 𑀧𑀜𑁆𑀘𑀞𑀸𑀦𑀸𑀦𑀺, 𑀥𑀸𑀭𑁂𑀬𑁆𑀬𑀢𑁆𑀣𑀁 𑀯𑀺𑀘𑀓𑁆𑀔𑀡𑁄’’𑀢𑀺. (𑀧𑀸𑀭𑀸. 𑀅𑀝𑁆𑀞. 𑁧.𑁯𑁨);

𑀢𑀢𑁆𑀣 𑀘 𑀯𑀢𑁆𑀣𑀽𑀢𑀺 𑀪𑀡𑁆𑀟𑀁. 𑀅𑀯𑀳𑀸𑀭𑀓𑁂𑀦 𑀳𑀺 ‘‘𑀫𑀬𑀸 𑀇𑀤𑀁 𑀦𑀸𑀫 𑀅𑀯𑀳𑀝’’𑀦𑁆𑀢𑀺 𑀯𑀼𑀢𑁆𑀢𑁂𑀧𑀺 𑀆𑀧𑀢𑁆𑀢𑀺𑀁 𑀅𑀦𑀸𑀭𑁄𑀧𑁂𑀢𑁆𑀯𑀸𑀯 𑀢𑀁 𑀪𑀡𑁆𑀟𑀁 𑀲𑀲𑀸𑀫𑀺𑀓𑀁 𑀯𑀸 𑀅𑀲𑀸𑀫𑀺𑀓𑀁 𑀯𑀸𑀢𑀺 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁. 𑀲𑀲𑀸𑀫𑀺𑀓𑁂𑀧𑀺 𑀲𑀸𑀫𑀺𑀓𑀸𑀦𑀁 𑀲𑀸𑀮𑀬𑀪𑀸𑀯𑁄 𑀯𑀸 𑀦𑀺𑀭𑀸𑀮𑀬𑀪𑀸𑀯𑁄 𑀯𑀸 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑁄. 𑀲𑀘𑁂 𑀢𑁂𑀲𑀁 𑀲𑀸𑀮𑀬𑀓𑀸𑀮𑁂 𑀅𑀯𑀳𑀝𑀁, 𑀪𑀡𑁆𑀟𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀆𑀧𑀢𑁆𑀢𑀺 𑀓𑀸𑀭𑁂𑀢𑀩𑁆𑀩𑀸. 𑀲𑀘𑁂 𑀦𑀺𑀭𑀸𑀮𑀬𑀓𑀸𑀮𑁂, 𑀦 𑀧𑀸𑀭𑀸𑀚𑀺𑀓𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀪𑀡𑁆𑀟𑀲𑀸𑀫𑀺𑀓𑁂𑀲𑀼 𑀧𑀦 𑀪𑀡𑁆𑀟𑀁 𑀆𑀳𑀭𑀸𑀧𑁂𑀦𑁆𑀢𑁂𑀲𑀼 𑀪𑀡𑁆𑀟𑀁 𑀤𑀸𑀢𑀩𑁆𑀩𑀁. 𑀅𑀬𑀫𑁂𑀢𑁆𑀣 𑀲𑀸𑀫𑀻𑀘𑀺. 𑀏𑀯𑀁 𑀯𑀢𑁆𑀣𑀼 𑀑𑀮𑁄𑀓𑁂𑀢𑀩𑁆𑀩𑀁.

𑀓𑀸𑀮𑁄𑀢𑀺 𑀅𑀯𑀳𑀸𑀭𑀓𑀸𑀮𑁄. 𑀢𑀤𑁂𑀯 𑀳𑀺 𑀪𑀡𑁆𑀟𑀁 𑀓𑀤𑀸𑀘𑀺 𑀲𑀫𑀕𑁆𑀖𑀁 𑀳𑁄𑀢𑀺, 𑀓𑀤𑀸𑀘𑀺 𑀫𑀳𑀕𑁆𑀖𑀁. 𑀢𑀲𑁆𑀫𑀸 𑀢𑀁 𑀪𑀡𑁆𑀟𑀁 𑀬𑀲𑁆𑀫𑀺𑀁 𑀓𑀸𑀮𑁂 𑀅𑀯𑀳𑀝𑀁, 𑀢𑀲𑁆𑀫𑀺𑀁𑀬𑁂𑀯 𑀓𑀸𑀮𑁂 𑀬𑁄 𑀢𑀲𑁆𑀲 𑀅𑀕𑁆𑀖𑁄, 𑀢𑁂𑀦 𑀅𑀕𑁆𑀖𑁂𑀦 𑀆𑀧𑀢𑁆𑀢𑀺 𑀓𑀸𑀭𑁂𑀢𑀩𑁆𑀩𑀸. 𑀏𑀯𑀁 𑀓𑀸𑀮𑁄 𑀑𑀮𑁄𑀓𑁂𑀢𑀩𑁆𑀩𑁄.

𑀤𑁂𑀲𑁄𑀢𑀺 𑀅𑀯𑀳𑀸𑀭𑀤𑁂𑀲𑁄. 𑀢𑀜𑁆𑀳𑀺 𑀪𑀡𑁆𑀟𑀁 𑀬𑀲𑁆𑀫𑀺𑀁 𑀤𑁂𑀲𑁂 𑀅𑀯𑀳𑀝𑀁, 𑀢𑀲𑁆𑀫𑀺𑀁𑀬𑁂𑀯 𑀤𑁂𑀲𑁂 𑀬𑁄 𑀢𑀲𑁆𑀲 𑀅𑀕𑁆𑀖𑁄, 𑀢𑁂𑀦 𑀅𑀕𑁆𑀖𑁂𑀦 𑀆𑀧𑀢𑁆𑀢𑀺 𑀓𑀸𑀭𑁂𑀢𑀩𑁆𑀩𑀸. 𑀪𑀡𑁆𑀟𑀼𑀝𑁆𑀞𑀸𑀦𑀤𑁂𑀲𑁂 𑀳𑀺 𑀪𑀡𑁆𑀟𑀁 𑀲𑀫𑀕𑁆𑀖𑀁 𑀳𑁄𑀢𑀺, 𑀅𑀜𑁆𑀜𑀢𑁆𑀣 𑀫𑀳𑀕𑁆𑀖𑀁. 𑀏𑀯𑀁 𑀤𑁂𑀲𑁄 𑀑𑀮𑁄𑀓𑁂𑀢𑀩𑁆𑀩𑁄.

𑀅𑀕𑁆𑀖𑁄𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁨) 𑀪𑀡𑁆𑀟𑀕𑁆𑀖𑁄. 𑀦𑀯𑀪𑀡𑁆𑀟𑀲𑁆𑀲 𑀳𑀺 𑀬𑁄 𑀅𑀕𑁆𑀖𑁄, 𑀲𑁄 𑀧𑀘𑁆𑀙𑀸 𑀧𑀭𑀺𑀳𑀸𑀬𑀢𑀺. 𑀬𑀣𑀸 𑀦𑀯𑀥𑁄𑀢𑁄 𑀧𑀢𑁆𑀢𑁄 𑀅𑀝𑁆𑀞 𑀯𑀸 𑀤𑀲 𑀯𑀸 𑀅𑀕𑁆𑀖𑀢𑀺, 𑀲𑁄 𑀧𑀘𑁆𑀙𑀸 𑀪𑀺𑀦𑁆𑀦𑁄 𑀯𑀸 𑀙𑀺𑀤𑁆𑀤𑁄 𑀯𑀸 𑀆𑀡𑀺𑀕𑀡𑁆𑀞𑀺𑀓𑀸𑀳𑀢𑁄 𑀯𑀸 𑀅𑀧𑁆𑀧𑀕𑁆𑀖𑁄 𑀳𑁄𑀢𑀺, 𑀢𑀲𑁆𑀫𑀸 𑀦 𑀲𑀩𑁆𑀩𑀤𑀸 𑀪𑀡𑁆𑀟𑀁 𑀧𑀓𑀢𑀺𑀅𑀕𑁆𑀖𑁂𑀦𑁂𑀯 𑀓𑀸𑀢𑀩𑁆𑀩𑀦𑁆𑀢𑀺. 𑀏𑀯𑀁 𑀅𑀕𑁆𑀖𑁄 𑀑𑀮𑁄𑀓𑁂𑀢𑀩𑁆𑀩𑁄.

𑀧𑀭𑀺𑀪𑁄𑀕𑁄𑀢𑀺 𑀪𑀡𑁆𑀟𑀲𑁆𑀲 𑀧𑀭𑀺𑀪𑁄𑀕𑁄. 𑀧𑀭𑀺𑀪𑁄𑀕𑁂𑀦𑀸𑀧𑀺 𑀳𑀺 𑀯𑀸𑀲𑀺𑀆𑀤𑀺𑀪𑀡𑁆𑀟𑀲𑁆𑀲 𑀅𑀕𑁆𑀖𑁄 𑀧𑀭𑀺𑀳𑀸𑀬𑀢𑀺, 𑀢𑀲𑁆𑀫𑀸 𑀏𑀯𑀁 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁 𑁋 𑀲𑀘𑁂 𑀓𑁄𑀘𑀺 𑀓𑀲𑁆𑀲𑀘𑀺 𑀧𑀸𑀤𑀕𑁆𑀖𑀦𑀓𑀁 𑀯𑀸𑀲𑀺𑀁 𑀳𑀭𑀢𑀺, 𑀢𑀢𑁆𑀭 𑀯𑀸𑀲𑀺𑀲𑀸𑀫𑀺𑀓𑁄 𑀧𑀼𑀘𑁆𑀙𑀺𑀢𑀩𑁆𑀩𑁄 ‘‘𑀢𑀬𑀸 𑀅𑀬𑀁 𑀯𑀸𑀲𑀺 𑀓𑀺𑀢𑁆𑀢𑀓𑁂𑀦 𑀓𑀻𑀢𑀸’’𑀢𑀺. ‘‘𑀧𑀸𑀤𑁂𑀦, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀧𑀦 𑀢𑁂 𑀓𑀺𑀡𑀺𑀢𑁆𑀯𑀸𑀯 𑀞𑀧𑀺𑀢𑀸, 𑀉𑀤𑀸𑀳𑀼 𑀢𑀁 𑀯𑀮𑀜𑁆𑀚𑁂𑀲𑀻’’𑀢𑀺? 𑀲𑀘𑁂 𑀯𑀤𑀢𑀺 ‘‘𑀏𑀓𑀤𑀺𑀯𑀲𑀁 𑀫𑁂 𑀤𑀦𑁆𑀢𑀓𑀝𑁆𑀞𑀁 𑀯𑀸 𑀭𑀚𑀦𑀙𑀮𑁆𑀮𑀺 𑀯𑀸 𑀧𑀢𑁆𑀢𑀧𑀘𑀦𑀤𑀸𑀭𑀼 𑀯𑀸 𑀙𑀺𑀦𑁆𑀦𑀁, 𑀖𑀁𑀲𑀺𑀢𑁆𑀯𑀸 𑀯𑀸 𑀦𑀺𑀲𑀺𑀢𑀸’’𑀢𑀺. 𑀅𑀣𑀲𑁆𑀲 𑀧𑁄𑀭𑀸𑀡𑁄 𑀅𑀕𑁆𑀖𑁄 𑀪𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘 𑀯𑀸𑀲𑀺𑀬𑀸, 𑀏𑀯𑀁 𑀅𑀜𑁆𑀚𑀦𑀺𑀬𑀸 𑀯𑀸 𑀅𑀜𑁆𑀚𑀦𑀺𑀲𑀮𑀸𑀓𑀸𑀬 𑀯𑀸 𑀓𑀼𑀜𑁆𑀘𑀺𑀓𑀸𑀬 𑀯𑀸 𑀧𑀮𑀸𑀮𑁂𑀦 𑀯𑀸 𑀣𑀼𑀲𑁂𑀳𑀺 𑀯𑀸 𑀇𑀝𑁆𑀞𑀓𑀘𑀼𑀡𑁆𑀡𑁂𑀦 𑀯𑀸 𑀏𑀓𑀯𑀸𑀭𑀁 𑀖𑀁𑀲𑀺𑀢𑁆𑀯𑀸 𑀥𑁄𑀯𑀦𑀫𑀢𑁆𑀢𑁂𑀦𑀸𑀧𑀺 𑀅𑀕𑁆𑀖𑁄 𑀪𑀲𑁆𑀲𑀢𑀺. 𑀢𑀺𑀧𑀼𑀫𑀡𑁆𑀟𑀮𑀲𑁆𑀲 𑀫𑀓𑀭𑀤𑀦𑁆𑀢𑀘𑁆𑀙𑁂𑀤𑀦𑁂𑀦𑀸𑀧𑀺 𑀧𑀭𑀺𑀫𑀤𑁆𑀤𑀦𑀫𑀢𑁆𑀢𑁂𑀦𑀸𑀧𑀺, 𑀉𑀤𑀓𑀲𑀸𑀝𑀺𑀓𑀸𑀬 𑀲𑀓𑀺𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑁂𑀦𑀸𑀧𑀺, 𑀧𑀭𑀺𑀪𑁄𑀕𑀲𑀻𑀲𑁂𑀦 𑀅𑀁𑀲𑁂 𑀯𑀸 𑀲𑀻𑀲𑁂 𑀯𑀸 𑀞𑀧𑀦𑀫𑀢𑁆𑀢𑁂𑀦𑀸𑀧𑀺, 𑀢𑀡𑁆𑀟𑀼𑀮𑀸𑀤𑀻𑀦𑀁 𑀧𑀧𑁆𑀨𑁄𑀝𑀦𑁂𑀦𑀸𑀧𑀺 𑀢𑀢𑁄 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀅𑀧𑀦𑀬𑀦𑁂𑀦𑀧𑀺, 𑀅𑀦𑁆𑀢𑀫𑀲𑁄 𑀏𑀓𑀁 𑀧𑀸𑀲𑀸𑀡𑀲𑀓𑁆𑀔𑀭𑀁 𑀉𑀤𑁆𑀥𑀭𑀺𑀢𑁆𑀯𑀸 𑀙𑀟𑁆𑀟𑀺𑀢𑀫𑀢𑁆𑀢𑁂𑀦𑀸𑀧𑀺, 𑀲𑀧𑁆𑀧𑀺𑀢𑁂𑀮𑀸𑀤𑀻𑀦𑀁 𑀪𑀸𑀚𑀦𑀦𑁆𑀢𑀭𑀧𑀭𑀺𑀯𑀢𑁆𑀢𑀦𑁂𑀦𑀧𑀺, 𑀅𑀦𑁆𑀢𑀫𑀲𑁄 𑀢𑀢𑁄 𑀫𑀓𑁆𑀔𑀺𑀓𑀁 𑀯𑀸 𑀓𑀺𑀧𑀺𑀮𑁆𑀮𑀺𑀓𑀁 𑀯𑀸 𑀉𑀤𑁆𑀥𑀭𑀺𑀢𑁆𑀯𑀸 𑀙𑀟𑁆𑀟𑀺𑀢𑀫𑀢𑁆𑀢𑁂𑀦𑀧𑀺, 𑀕𑀼𑀴𑀧𑀺𑀡𑁆𑀟𑀓𑀲𑁆𑀲 𑀫𑀥𑀼𑀭𑀪𑀸𑀯𑀚𑀸𑀦𑀦𑀢𑁆𑀣𑀁 𑀦𑀔𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀅𑀡𑀼𑀫𑀢𑁆𑀢𑀁 𑀕𑀳𑀺𑀢𑀫𑀢𑁆𑀢𑁂𑀦𑀧𑀺 𑀅𑀕𑁆𑀖𑁄 𑀪𑀲𑁆𑀲𑀢𑀺. 𑀢𑀲𑁆𑀫𑀸 𑀬𑀁 𑀓𑀺𑀜𑁆𑀘𑀺 𑀧𑀸𑀤𑀕𑁆𑀖𑀦𑀓𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀸𑀫𑀺𑀓𑁂𑀦 𑀧𑀭𑀺𑀪𑁄𑀕𑁂𑀦 𑀊𑀦𑀁 𑀓𑀢𑀁 𑀳𑁄𑀢𑀺, 𑀦 𑀢𑀁 𑀅𑀯𑀳𑀸𑀭𑀓𑁄 𑀪𑀺𑀓𑁆𑀔𑀼 𑀧𑀸𑀭𑀸𑀚𑀺𑀓𑁂𑀦 𑀓𑀸𑀭𑁂𑀢𑀩𑁆𑀩𑁄𑀢𑀺. 𑀏𑀯𑀁 𑀧𑀭𑀺𑀪𑁄𑀕𑁄 𑀑𑀮𑁄𑀓𑁂𑀢𑀩𑁆𑀩𑁄.

𑀏𑀯𑀁 𑀇𑀫𑀸𑀦𑀺 𑀢𑀼𑀮𑀬𑀺𑀢𑁆𑀯𑀸 𑀧𑀜𑁆𑀘 𑀞𑀸𑀦𑀸𑀦𑀺 𑀥𑀸𑀭𑁂𑀬𑁆𑀬 𑀅𑀢𑁆𑀣𑀁 𑀯𑀺𑀘𑀓𑁆𑀔𑀡𑁄 𑀆𑀧𑀢𑁆𑀢𑀺𑀁 𑀯𑀸 𑀅𑀦𑀸𑀧𑀢𑁆𑀢𑀺𑀁 𑀯𑀸 𑀕𑀭𑀼𑀓𑀁 𑀯𑀸 𑀮𑀳𑀼𑀓𑀁 𑀯𑀸 𑀆𑀧𑀢𑁆𑀢𑀺𑀁 𑀬𑀣𑀸𑀞𑀸𑀦𑁂 𑀞𑀧𑁂𑀬𑁆𑀬𑀸𑀢𑀺.

𑀏𑀯𑀁 𑀢𑀢𑁆𑀣 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀦𑀸𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀓𑀲𑀜𑁆𑀜𑀺𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀓𑀲𑀜𑁆𑀜𑀺𑀲𑁆𑀲𑀸𑀢𑀺 ‘‘𑀫𑀬𑁆𑀳𑀁 𑀲𑀦𑁆𑀢𑀓𑀁 𑀇𑀤𑀁 𑀪𑀡𑁆𑀟’’𑀦𑁆𑀢𑀺 𑀏𑀯𑀁 𑀲𑀓𑀲𑀜𑁆𑀜𑀺𑀲𑁆𑀲 𑀧𑀭𑀪𑀡𑁆𑀟𑀫𑁆𑀧𑀺 𑀕𑀡𑁆𑀳𑀢𑁄 𑀕𑀳𑀡𑁂 𑀅𑀦𑀸𑀧𑀢𑁆𑀢𑀺, 𑀕𑀳𑀺𑀢𑀁 𑀧𑀦 𑀧𑀼𑀦 𑀤𑀸𑀢𑀩𑁆𑀩𑀁. 𑀲𑀘𑁂 𑀲𑀸𑀫𑀺𑀓𑁂𑀳𑀺 ‘‘𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁄 𑀦 𑀤𑁂𑀢𑀺, 𑀢𑁂𑀲𑀁 𑀥𑀼𑀭𑀦𑀺𑀓𑁆𑀔𑁂𑀧𑁂 𑀧𑀸𑀭𑀸𑀚𑀺𑀓𑀁. 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁂𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁩𑁧) 𑀯𑀺𑀲𑁆𑀲𑀸𑀲𑀕𑁆𑀕𑀳𑀡𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀮𑀓𑁆𑀔𑀡𑀁 𑀧𑀦 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀚𑀸𑀦𑀺𑀢𑀩𑁆𑀩𑀁 𑁋

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀯𑀺𑀲𑁆𑀲𑀸𑀲𑀁 𑀕𑀳𑁂𑀢𑀼𑀁, 𑀲𑀦𑁆𑀤𑀺𑀝𑁆𑀞𑁄 𑀘 𑀳𑁄𑀢𑀺, 𑀲𑀫𑁆𑀪𑀢𑁆𑀢𑁄 𑀘 𑀆𑀮𑀧𑀺𑀢𑁄 𑀘 𑀚𑀻𑀯𑀢𑀺 𑀘 𑀚𑀸𑀦𑀸𑀢𑀺 𑀘 ‘𑀕𑀳𑀺𑀢𑁂 𑀫𑁂 𑀅𑀢𑁆𑀢𑀫𑀦𑁄’’’𑀢𑀺 (𑀫𑀳𑀸𑀯. 𑁩𑁫𑁬).

𑀢𑀢𑁆𑀣 𑀲𑀦𑁆𑀤𑀺𑀝𑁆𑀞𑁄𑀢𑀺 𑀤𑀺𑀝𑁆𑀞𑀫𑀢𑁆𑀢𑀓𑀫𑀺𑀢𑁆𑀢𑁄. 𑀲𑀫𑁆𑀪𑀢𑁆𑀢𑁄𑀢𑀺 𑀤𑀴𑁆𑀳𑀫𑀺𑀢𑁆𑀢𑁄. 𑀆𑀮𑀧𑀺𑀢𑁄𑀢𑀺 ‘‘𑀫𑀫 𑀲𑀦𑁆𑀢𑀓𑀁 𑀬𑀁 𑀇𑀘𑁆𑀙𑀲𑀺, 𑀢𑀁 𑀕𑀡𑁆𑀳𑁂𑀬𑁆𑀬𑀸𑀲𑀺, 𑀆𑀧𑀼𑀘𑁆𑀙𑀺𑀢𑁆𑀯𑀸 𑀕𑀳𑀡𑁂 𑀓𑀸𑀭𑀡𑀁 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑁄. 𑀚𑀻𑀯𑀢𑀻𑀢𑀺 𑀅𑀦𑀼𑀝𑁆𑀞𑀸𑀦𑀲𑁂𑀬𑁆𑀬𑀸𑀬 𑀲𑀬𑀺𑀢𑁄𑀧𑀺 𑀬𑀸𑀯 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀁 𑀦 𑀧𑀸𑀧𑀼𑀡𑀸𑀢𑀺. 𑀕𑀳𑀺𑀢𑁂 𑀘 𑀅𑀢𑁆𑀢𑀫𑀦𑁄𑀢𑀺 𑀕𑀳𑀺𑀢𑁂 𑀢𑀼𑀝𑁆𑀞𑀘𑀺𑀢𑁆𑀢𑁄. 𑀏𑀯𑀭𑀽𑀧𑀲𑁆𑀲 𑀲𑀦𑁆𑀢𑀓𑀁 ‘‘𑀕𑀳𑀺𑀢𑁂 𑀫𑁂 𑀅𑀢𑁆𑀢𑀫𑀦𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀦𑁆𑀢𑁂𑀦 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀯𑀲𑁂𑀦 𑀘𑁂𑀢𑀸𑀦𑀺 𑀧𑀜𑁆𑀘𑀗𑁆𑀕𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁄 𑀧𑀦 𑀢𑀻𑀳𑀺 𑀅𑀗𑁆𑀕𑁂𑀳𑀺 𑀭𑀼𑀳𑀢𑀺. 𑀓𑀣𑀁? 𑀲𑀦𑁆𑀤𑀺𑀝𑁆𑀞𑁄, 𑀚𑀻𑀯𑀢𑀺, 𑀕𑀳𑀺𑀢𑁂 𑀅𑀢𑁆𑀢𑀫𑀦𑁄, 𑀲𑀫𑁆𑀪𑀢𑁆𑀢𑁄, 𑀚𑀻𑀯𑀢𑀺, 𑀕𑀳𑀺𑀢𑁂 𑀅𑀢𑁆𑀢𑀫𑀦𑁄, 𑀆𑀮𑀧𑀺𑀢𑁄, 𑀚𑀻𑀯𑀢𑀺, 𑀕𑀳𑀺𑀢𑁂 𑀅𑀢𑁆𑀢𑀫𑀦𑁄𑀢𑀺 𑀏𑀯𑀁.

𑀬𑁄 𑀧𑀦 𑀚𑀻𑀯𑀢𑀺, 𑀦 𑀘 𑀕𑀳𑀺𑀢𑁂 𑀅𑀢𑁆𑀢𑀫𑀦𑁄 𑀳𑁄𑀢𑀺, 𑀢𑀲𑁆𑀲 𑀲𑀦𑁆𑀢𑀓𑀁 𑀯𑀺𑀲𑁆𑀲𑀸𑀲𑀪𑀸𑀯𑁂𑀦 𑀕𑀳𑀺𑀢𑀫𑁆𑀧𑀺 𑀧𑀼𑀦 𑀤𑀸𑀢𑀩𑁆𑀩𑀁. 𑀤𑀤𑀦𑁆𑀢𑁂𑀦 𑀘 𑀫𑀢𑀓𑀥𑀦𑀁 𑀢𑀸𑀯 𑀬𑁂 𑀢𑀲𑁆𑀲 𑀥𑀦𑁂 𑀇𑀲𑁆𑀲𑀭𑀸 𑀕𑀳𑀝𑁆𑀞𑀸 𑀯𑀸 𑀧𑀩𑁆𑀩𑀚𑀺𑀢𑀸 𑀯𑀸, 𑀢𑁂𑀲𑀁 𑀤𑀸𑀢𑀩𑁆𑀩𑀁. 𑀅𑀦𑀢𑁆𑀢𑀫𑀦𑀲𑁆𑀲 𑀲𑀦𑁆𑀢𑀓𑀁 𑀢𑀲𑁆𑀲𑁂𑀯 𑀤𑀸𑀢𑀩𑁆𑀩𑀁. 𑀬𑁄 𑀧𑀦 𑀧𑀞𑀫𑀁𑀬𑁂𑀯 ‘‘𑀲𑀼𑀝𑁆𑀞𑀼 𑀓𑀢𑀁 𑀢𑀬𑀸 𑀫𑀫 𑀲𑀦𑁆𑀢𑀓𑀁 𑀕𑀡𑁆𑀳𑀦𑁆𑀢𑁂𑀦𑀸’’𑀢𑀺 𑀯𑀘𑀻𑀪𑁂𑀤𑁂𑀦 𑀯𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦 𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀧𑀘𑁆𑀙𑀸 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀓𑀼𑀧𑀺𑀢𑁄, 𑀲𑁄 𑀧𑀘𑁆𑀘𑀸𑀳𑀭𑀸𑀧𑁂𑀢𑀼𑀁 𑀦 𑀮𑀪𑀢𑀺. 𑀬𑁄 𑀘 𑀅𑀤𑀸𑀢𑀼𑀓𑀸𑀫𑁄, 𑀘𑀺𑀢𑁆𑀢𑁂𑀦 𑀧𑀦 𑀅𑀥𑀺𑀯𑀸𑀲𑁂𑀢𑀺, 𑀦 𑀓𑀺𑀜𑁆𑀘𑀺 𑀯𑀤𑀢𑀺, 𑀲𑁄𑀧𑀺 𑀧𑀼𑀦 𑀧𑀘𑁆𑀘𑀸𑀳𑀭𑀸𑀧𑁂𑀢𑀼𑀁 𑀦 𑀮𑀪𑀢𑀺. 𑀬𑁄 𑀧𑀦 ‘‘𑀫𑀬𑀸 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀓𑀁 𑀕𑀳𑀺𑀢’’𑀦𑁆𑀢𑀺 𑀯𑀸 ‘‘𑀧𑀭𑀺𑀪𑀼𑀢𑁆𑀢’’𑀦𑁆𑀢𑀺 𑀯𑀸 𑀯𑀼𑀢𑁆𑀢𑁄 𑀕𑀳𑀺𑀢𑀁 𑀯𑀸 𑀳𑁄𑀢𑀼, 𑀧𑀭𑀺𑀪𑀼𑀢𑁆𑀢𑀁 𑀯𑀸, ‘‘𑀫𑀬𑀸 𑀧𑀦 𑀢𑀁 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀞𑀧𑀺𑀢𑀁, 𑀧𑀸𑀓𑀢𑀺𑀓𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀢𑀺, 𑀅𑀬𑀁 𑀧𑀘𑁆𑀘𑀸𑀳𑀭𑀸𑀧𑁂𑀢𑀼𑀁 𑀮𑀪𑀢𑀺.

𑀢𑀸𑀯𑀓𑀸𑀮𑀺𑀓𑁂𑀢𑀺 ‘‘𑀧𑀝𑀺𑀤𑀲𑁆𑀲𑀸𑀫𑀺 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀕𑀡𑁆𑀳𑀦𑁆𑀢𑀲𑁆𑀲 𑀢𑀸𑀯𑀓𑀸𑀮𑀺𑀓𑁂𑀧𑀺 𑀕𑀳𑀡𑁂 𑀅𑀦𑀸𑀧𑀢𑁆𑀢𑀺. 𑀕𑀳𑀺𑀢𑀁 𑀧𑀦 𑀲𑀘𑁂 𑀪𑀡𑁆𑀟𑀲𑀸𑀫𑀺𑀓𑁄 𑀧𑀼𑀕𑁆𑀕𑀮𑁄 𑀯𑀸 𑀕𑀡𑁄 𑀯𑀸 ‘‘𑀢𑀼𑀬𑁆𑀳𑁂𑀯𑁂𑀢𑀁 𑀳𑁄𑀢𑀽’’𑀢𑀺 𑀅𑀦𑀼𑀚𑀸𑀦𑀸𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀅𑀦𑀼𑀚𑀸𑀦𑀸𑀢𑀺, 𑀆𑀳𑀭𑀸𑀧𑁂𑀦𑁆𑀢𑁂 𑀤𑀸𑀢𑀩𑁆𑀩𑀁. 𑀲𑀗𑁆𑀖𑀲𑀦𑁆𑀢𑀓𑀁 𑀧𑀦 𑀧𑀝𑀺𑀤𑀸𑀢𑀼𑀫𑁂𑀯 𑀯𑀝𑁆𑀝𑀢𑀺.

𑀧𑁂𑀢𑀧𑀭𑀺𑀕𑁆𑀕𑀳𑁂𑀢𑀺 𑀏𑀢𑁆𑀣 𑀧𑀦 𑀧𑁂𑀢𑁆𑀢𑀺𑀯𑀺𑀲𑀬𑁂 𑀉𑀧𑀧𑀦𑁆𑀦𑀸𑀧𑀺, 𑀓𑀸𑀮𑀁 𑀓𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀦𑀺𑀩𑁆𑀩𑀢𑁆𑀢𑀸𑀧𑀺, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀬𑁄 𑀤𑁂𑀯𑀸𑀧𑀺 𑀲𑀩𑁆𑀩𑁂 ‘‘𑀧𑁂𑀢𑀸’’𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀢𑀸, 𑀢𑁂𑀲𑀁 𑀧𑀭𑀺𑀕𑁆𑀕𑀳𑁂 𑀅𑀦𑀸𑀧𑀢𑁆𑀢𑀺. 𑀤𑁂𑀯𑀢𑀸𑀬 𑀧𑀦 𑀉𑀤𑁆𑀤𑀺𑀲𑁆𑀲 𑀩𑀮𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀳𑀺 𑀭𑀼𑀓𑁆𑀔𑀸𑀤𑀻𑀲𑀼 𑀮𑀕𑁆𑀕𑀺𑀢𑀲𑀸𑀝𑀓𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀢𑀜𑁆𑀘 𑀔𑁄 𑀆𑀭𑀓𑁆𑀔𑀓𑁂𑀳𑀺 𑀅𑀧𑀭𑀺𑀕𑁆𑀕𑀳𑀺𑀢𑁂, 𑀧𑀭𑀺𑀕𑁆𑀕𑀳𑀺𑀢𑀁 𑀧𑀦 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁧𑁩𑁧).

𑀢𑀺𑀭𑀘𑁆𑀙𑀸𑀦𑀕𑀢𑀧𑀭𑀺𑀕𑁆𑀕𑀳𑁂𑀢𑀺 𑀦𑀸𑀕𑀲𑀼𑀧𑀡𑁆𑀡𑀸𑀤𑀻𑀦𑀁 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀧𑀭𑀺𑀕𑁆𑀕𑀳𑁂. 𑀲𑀘𑁂𑀧𑀺 𑀳𑀺 𑀤𑁂𑀯𑁄 𑀯𑀸 𑀦𑀸𑀕𑀲𑀼𑀧𑀡𑁆𑀡𑁄 𑀯𑀸 𑀫𑀦𑀼𑀲𑁆𑀲𑀭𑀽𑀧𑁂𑀦 𑀆𑀧𑀡𑀁 𑀧𑀲𑀸𑀭𑁂𑀢𑀺, 𑀢𑀢𑁄 𑀘𑀲𑁆𑀲 𑀲𑀦𑁆𑀢𑀓𑀁 𑀓𑁄𑀘𑀺 𑀤𑀺𑀩𑁆𑀩𑀘𑀓𑁆𑀔𑀼𑀓𑁄 𑀪𑀺𑀓𑁆𑀔𑀼 𑀢𑀁 𑀜𑀢𑁆𑀯𑀸 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀯𑀝𑁆𑀝𑀢𑀺.

𑀧𑀁𑀲𑀼𑀓𑀽𑀮𑀲𑀜𑁆𑀜𑀺𑀲𑁆𑀲𑀸𑀢𑀺 ‘‘𑀅𑀲𑀸𑀫𑀺𑀓𑀁 𑀇𑀤𑀁 𑀧𑀁𑀲𑀼𑀓𑀽𑀮’’𑀦𑁆𑀢𑀺 𑀏𑀯𑀲𑀜𑁆𑀜𑀺𑀲𑁆𑀲𑀸𑀧𑀺 𑀕𑀳𑀡𑁂 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀧𑀦 𑀢𑀁 𑀲𑀲𑀸𑀫𑀺𑀓𑀁 𑀳𑁄𑀢𑀺, 𑀆𑀳𑀭𑀸𑀧𑁂𑀦𑁆𑀢𑁂 𑀤𑀸𑀢𑀩𑁆𑀩𑀁. 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑁂𑀯. 𑀆𑀤𑀺𑀓𑀫𑁆𑀫𑀺𑀓𑁄 𑀧𑀦𑁂𑀢𑁆𑀣 𑀥𑀦𑀺𑀬𑁄. 𑀅𑀯𑀲𑁂𑀲𑀸𑀦𑀁 𑀧𑀦 𑀭𑀚𑀓𑀪𑀡𑁆𑀟𑀺𑀓𑀸𑀤𑀺𑀘𑁄𑀭𑀸𑀦𑀁 𑀙𑀩𑁆𑀩𑀕𑁆𑀕𑀺𑀬𑀸𑀤𑀻𑀦𑀁 𑀆𑀧𑀢𑁆𑀢𑀺𑀬𑁂𑀯.

𑀲𑀘𑀺𑀢𑁆𑀢𑀓𑁂𑀳𑀺 𑀢𑀻𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀇𑀤𑀁 𑀲𑀫𑀼𑀝𑁆𑀞𑀸𑀢𑀻𑀢𑀺 𑀆𑀳 ‘‘𑀅𑀤𑀺𑀦𑁆𑀦𑀸𑀤𑀸𑀦𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺. 𑀢𑀣𑀸 𑀳𑀺 𑀲𑀸𑀳𑀢𑁆𑀣𑀺𑀓𑀁 𑀓𑀸𑀬𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀆𑀡𑀢𑁆𑀢𑀺𑀓𑀁 𑀯𑀸𑀘𑀸𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀲𑀸𑀳𑀢𑁆𑀢𑀺𑀓𑀸𑀡𑀢𑁆𑀢𑀺𑀓𑀁 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀢𑀜𑁆𑀘 𑀔𑁄 ‘‘𑀪𑀸𑀭𑀺𑀬𑀫𑀺𑀤𑀁, 𑀢𑁆𑀯𑀁 𑀏𑀓𑀧𑀲𑁆𑀲𑀁 𑀕𑀡𑁆𑀳, 𑀅𑀳𑀁 𑀏𑀓𑀧𑀲𑁆𑀲’’𑀦𑁆𑀢𑀺 𑀲𑀁𑀯𑀺𑀥𑀸𑀬 𑀉𑀪𑀬𑁂𑀲𑀁 𑀧𑀬𑁄𑀕𑁂𑀦 𑀏𑀓𑀲𑁆𑀲 𑀯𑀢𑁆𑀣𑀼𑀦𑁄 𑀞𑀸𑀦𑀸𑀘𑀸𑀯𑀦𑁂 𑀮𑀩𑁆𑀪𑀢𑀺. ‘‘𑀓𑀸𑀬𑀯𑀘𑀻𑀓𑀫𑁆𑀫’’𑀦𑁆𑀢𑀺 𑀅𑀯𑀘𑀦𑀁 𑀧𑀦 𑀓𑀸𑀬𑀯𑀸𑀘𑀸𑀦𑀁 𑀈𑀤𑀺𑀲𑁂 𑀞𑀸𑀦𑁂 𑀅𑀗𑁆𑀕𑀫𑀢𑁆𑀢𑀢𑁆𑀢𑀸. 𑀬𑀸𑀬 𑀧𑀦 𑀘𑁂𑀢𑀦𑀸𑀬 𑀲𑀫𑀼𑀝𑁆𑀞𑀸𑀧𑀺𑀢𑁄 𑀧𑀬𑁄𑀕𑁄 𑀲𑀸𑀳𑀢𑁆𑀣𑀺𑀓𑁄 𑀯𑀸 𑀆𑀡𑀢𑁆𑀢𑀺𑀓𑁄 𑀯𑀸 𑀧𑀥𑀸𑀦𑀪𑀸𑀯𑁂𑀦 𑀞𑀸𑀦𑀸𑀘𑀸𑀯𑀦𑀁 𑀲𑀸𑀥𑁂𑀢𑀺, 𑀢𑀲𑁆𑀲𑀸 𑀯𑀲𑁂𑀦 𑀆𑀧𑀢𑁆𑀢𑀺 𑀓𑀸𑀭𑁂𑀢𑀩𑁆𑀩𑀸. 𑀅𑀜𑁆𑀜𑀣𑀸 𑀲𑀸𑀳𑀢𑁆𑀣𑀺𑀓𑀁 𑀯𑀸 𑀆𑀡𑀢𑁆𑀢𑀺𑀓𑀲𑁆𑀲 𑀅𑀗𑁆𑀕𑀁 𑀦 𑀳𑁄𑀢𑀺, 𑀆𑀡𑀢𑁆𑀢𑀺𑀓𑀁 𑀯𑀸 𑀲𑀸𑀳𑀢𑁆𑀣𑀺𑀓𑀲𑁆𑀲𑀸𑀢𑀺 𑀇𑀤𑀁 𑀯𑀺𑀭𑀼𑀚𑁆𑀛𑀢𑀺. ‘‘𑀅𑀤𑀺𑀦𑁆𑀦𑀁 𑀆𑀤𑀺𑀬𑀸𑀫𑀻’’𑀢𑀺 𑀲𑀜𑁆𑀜𑀸𑀬 𑀅𑀪𑀸𑀯𑁂𑀦 𑀫𑀼𑀘𑁆𑀘𑀦𑀢𑁄 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁. 𑀓𑀸𑀬𑁂𑀦 𑀓𑀢𑀁 𑀓𑀫𑁆𑀫𑀁 𑀓𑀸𑀬𑀓𑀫𑁆𑀫𑀁, 𑀓𑀸𑀬𑀤𑁆𑀯𑀸𑀭𑁂𑀦 𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀘𑀻𑀓𑀫𑁆𑀫𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀼𑀝𑁆𑀞𑁄 𑀯𑀸 𑀪𑀻𑀢𑁄 𑀯𑀸 𑀫𑀚𑁆𑀛𑀢𑁆𑀢𑁄 𑀯𑀸 𑀦𑀁 𑀆𑀧𑀚𑁆𑀚𑀢𑀻𑀢𑀺 𑀢𑀺𑀯𑁂𑀤𑀦𑀁. 𑀲𑁂𑀲𑀁 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸

𑀲𑀦𑁆𑀢𑀺 𑀲𑀳𑀢𑁆𑀣𑁂 𑀉𑀧𑀲𑀕𑁆𑀕𑁄. 𑀢𑁂𑀦 𑀲𑀤𑁆𑀥𑀺𑀁 𑀉𑀲𑁆𑀲𑀼𑀓𑁆𑀓𑀯𑀘𑀦𑀫𑁂𑀢𑀁 ‘‘𑀲𑀜𑁆𑀘𑀺𑀘𑁆𑀘𑀸’’𑀢𑀺 𑀆𑀳 ‘‘𑀲𑀜𑁆𑀘𑁂𑀢𑁂𑀢𑁆𑀯𑀸’’𑀢𑀺𑀆𑀤𑀺. 𑀉𑀲𑁆𑀲𑀼𑀓𑁆𑀓𑀯𑀘𑀦𑀦𑁆𑀢𑀺 𑀏𑀢𑁆𑀣 𑀉𑀲𑁆𑀲𑀼𑀓𑁆𑀓𑀯𑀘𑀦𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁧𑁭𑁨) 𑀦𑀸𑀫 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀯𑀘𑀦𑀁. 𑀅𑀬𑀜𑁆𑀳𑀺 𑀲𑀫𑀸𑀦𑀓𑀢𑁆𑀢𑀼𑀓𑁂𑀲𑀼 𑀧𑀼𑀩𑁆𑀩𑀸𑀧𑀭𑀓𑀸𑀮𑀓𑀺𑀭𑀺𑀬𑀸𑀯𑀘𑀦𑁂𑀲𑀼 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀯𑀘𑀦𑀲𑁆𑀲 𑀦𑀺𑀭𑀼𑀢𑁆𑀢𑀺𑀯𑁄𑀳𑀸𑀭𑁄. 𑀇𑀤𑀸𑀦𑀺 ‘‘𑀲𑀤𑁆𑀥𑀺𑀁 𑀘𑁂𑀢𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀧𑀸𑀡𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀧𑀸𑀡𑁄’’𑀢𑀺 𑀲𑀜𑁆𑀜𑀸𑀬 𑀲𑀤𑁆𑀥𑀺𑀁𑀬𑁂𑀯𑀸𑀢𑀺 ‘‘𑀧𑀸𑀡𑁄’’𑀢𑀺 𑀲𑀜𑁆𑀜𑀁 𑀅𑀯𑀺𑀚𑀳𑀺𑀢𑁆𑀯𑀸 𑀏𑀯, ‘‘𑀧𑀸𑀡𑁄’’𑀢𑀺 𑀲𑀜𑁆𑀜𑀼𑀧𑁆𑀧𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀓𑀣𑀁 𑀏𑀓𑀓𑁆𑀔𑀡𑁂 𑀏𑀓𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀪𑀬𑀸𑀭𑀫𑁆𑀫𑀡𑀪𑀸𑀯𑁄𑀢𑀺 𑀏𑀤𑀺𑀲𑀻 𑀘𑁄𑀤𑀦𑀸 𑀅𑀦𑀯𑀓𑀸𑀲𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀓𑁂𑀘𑀺 𑀧𑀦 ‘‘𑀜𑀸𑀢𑀧𑀭𑀺𑀜𑁆𑀜𑀸𑀬 𑀤𑀺𑀝𑁆𑀞𑀲𑀪𑀸𑀯𑁂𑀲𑀼 𑀥𑀫𑁆𑀫𑁂𑀲𑀼 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 (𑀲𑀸𑀭𑀢𑁆𑀣. 𑀝𑀻. 𑁨.𑁧𑁭𑁨) ‘𑀭𑀽𑀧𑀁 𑀅𑀦𑀺𑀘𑁆𑀘’𑀦𑁆𑀢𑀺𑀆𑀤𑀺𑀦𑀸 𑀲𑀪𑀸𑀯𑁂𑀦 𑀲𑀤𑁆𑀥𑀺𑀁 𑀏𑀓𑀓𑁆𑀔𑀡𑁂 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀚𑀸𑀦𑀦𑀁 𑀯𑀺𑀬 ‘𑀧𑀸𑀡𑁄’𑀢𑀺 𑀲𑀜𑁆𑀜𑀸𑀬 𑀲𑀤𑁆𑀥𑀺𑀁𑀬𑁂𑀯 ‘𑀯𑀥𑀸𑀫𑀺 𑀦’𑀦𑁆𑀢𑀺 𑀚𑀸𑀦𑀸𑀢𑀻’’𑀢𑀺 𑀯𑀤𑀦𑁆𑀢𑀺. 𑀅𑀧𑀭𑁂 𑀧𑀦 𑀆𑀘𑀭𑀺𑀬𑀸 𑀢𑀢𑁆𑀣𑀸𑀧𑀺 𑀏𑀯𑀁 𑀦 𑀓𑀣𑁂𑀦𑁆𑀢𑀺. 𑀏𑀢𑁆𑀣 𑀘 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄’’𑀢𑀺 𑀅𑀯𑀢𑁆𑀯𑀸 ‘‘𑀧𑀸𑀡𑁄’’𑀢𑀺 𑀯𑀘𑀦𑀁 ‘‘𑀫𑀦𑀼𑀲𑁆𑀲𑁄 𑀅𑀬’’𑀦𑁆𑀢𑀺 𑀅𑀚𑀸𑀦𑀺𑀢𑁆𑀯𑀸 𑀓𑁂𑀯𑀮𑀁 𑀲𑀢𑁆𑀢𑀲𑀜𑁆𑀜𑀸𑀬 𑀖𑀸𑀢𑁂𑀦𑁆𑀢𑀲𑁆𑀲𑀸𑀧𑀺 𑀧𑀸𑀭𑀸𑀚𑀺𑀓𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀘𑁂𑀢𑁂𑀢𑁆𑀯𑀸𑀢𑀺 𑀘𑀺𑀦𑁆𑀢𑁂𑀢𑁆𑀯𑀸. 𑀧𑀓𑀧𑁆𑀧𑁂𑀢𑁆𑀯𑀸𑀢𑀺 𑀅𑀪𑀺𑀯𑀺𑀘𑀸𑀭𑁂𑀢𑁆𑀯𑀸, 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀫𑀦𑀼𑀲𑁆𑀲𑀅𑀢𑁆𑀢𑀪𑀸𑀯𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀤𑀲𑁆𑀲𑁂𑀢𑀼𑀁 ‘‘𑀫𑀦𑀼𑀲𑁆𑀲𑀯𑀺𑀕𑁆𑀕𑀳’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀮𑀮𑀢𑁄 𑀧𑀝𑁆𑀞𑀸𑀬𑀸𑀢𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑀓𑀮𑀮𑀭𑀽𑀧𑀢𑁄 𑀧𑀝𑁆𑀞𑀸𑀬. 𑀓𑀮𑀮𑀭𑀽𑀧𑀁 𑀦𑀸𑀫 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀓𑀸𑀬𑀯𑀢𑁆𑀣𑀼𑀪𑀸𑀯𑀤𑀲𑀓𑀯𑀲𑁂𑀦 𑀲𑀫𑀢𑀺𑀁𑀲 𑀭𑀽𑀧𑀸𑀦𑀺, 𑀦𑀧𑀼𑀁𑀲𑀓𑀸𑀦𑀁 𑀓𑀸𑀬𑀯𑀢𑁆𑀣𑀼𑀤𑀲𑀓𑀯𑀲𑁂𑀦 𑀯𑀻𑀲𑀢𑀺. 𑀢𑀢𑁆𑀣 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀓𑀮𑀮𑀭𑀽𑀧𑀁 𑀚𑀸𑀢𑀺𑀉𑀡𑁆𑀡𑀸𑀬 𑀏𑀓𑁂𑀦 𑀅𑀁𑀲𑀼𑀦𑀸 𑀉𑀤𑁆𑀥𑀝𑀢𑁂𑀮𑀩𑀺𑀦𑁆𑀤𑀼𑀫𑀢𑁆𑀢𑀁 𑀳𑁄𑀢𑀺 𑀅𑀘𑁆𑀙𑀁 𑀯𑀺𑀧𑁆𑀧𑀲𑀦𑁆𑀦𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 𑁋

‘‘𑀢𑀺𑀮𑀢𑁂𑀮𑀲𑁆𑀲 𑀬𑀣𑀸 𑀩𑀺𑀦𑁆𑀤𑀼, 𑀲𑀧𑁆𑀧𑀺𑀫𑀡𑁆𑀟𑁄 𑀅𑀦𑀸𑀯𑀺𑀮𑁄;

𑀏𑀯𑀁𑀯𑀡𑁆𑀡𑀧𑁆𑀧𑀝𑀺𑀪𑀸𑀕𑀁, ‘𑀓𑀮𑀮’𑀦𑁆𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. (𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁨𑁩𑁫; 𑀯𑀺𑀪. 𑀅𑀝𑁆𑀞. 𑁨𑁬; 𑀧𑀸𑀭𑀸. 𑀅𑀝𑁆𑀞. 𑁨.𑁧𑁭𑁨);

𑀏𑀯𑀁 𑀧𑀭𑀺𑀢𑁆𑀢𑀓𑀁 𑀯𑀢𑁆𑀣𑀼𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀫𑀭𑀡𑀓𑀸𑀮𑀸 𑀏𑀢𑁆𑀣𑀦𑁆𑀢𑀭𑁂 𑀅𑀦𑀼𑀧𑀼𑀩𑁆𑀩𑁂𑀦 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑁄 𑀅𑀢𑁆𑀢𑀪𑀸𑀯𑁄 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀜𑁆𑀘 𑀬𑁂𑀪𑀼𑀬𑁆𑀬𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀑𑀧𑀧𑀸𑀢𑀺𑀓𑀲𑀁𑀲𑁂𑀤𑀚𑀸𑀧𑀺 𑀳𑀺 𑀫𑀦𑀼𑀲𑁆𑀲𑀸 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀬𑁂𑀯. 𑀓𑀮𑀮𑀓𑀸𑀮𑁂𑀧𑀻𑀢𑀺 𑀧𑀞𑀫𑀲𑀢𑁆𑀢𑀸𑀳𑁂𑀧𑀺. 𑀢𑀢𑁆𑀣 𑀳𑀺 𑀲𑀦𑁆𑀢𑀢𑀺𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀓𑀮𑀮𑀲𑀗𑁆𑀔𑀸𑀢𑀁 𑀅𑀢𑁆𑀢𑀪𑀸𑀯𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀁 𑀲𑀓𑁆𑀓𑀸, 𑀦 𑀧𑀦 𑀲𑀩𑁆𑀩𑀧𑀞𑀫𑀁 𑀓𑀮𑀮𑀭𑀽𑀧𑀁. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀳𑀺 𑀲𑀤𑁆𑀥𑀺𑀁 𑀢𑀺𑀁𑀲 𑀓𑀫𑁆𑀫𑀚𑀭𑀽𑀧𑀸𑀦𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀢𑁂𑀲𑀼 𑀧𑀦 𑀞𑀺𑀢𑁂𑀲𑀼𑀬𑁂𑀯 𑀲𑁄𑀴𑀲 𑀪𑀯𑀗𑁆𑀕𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀤𑀸𑀭𑀓𑀲𑁆𑀲 𑀯𑀸 𑀫𑀸𑀢𑀼𑀬𑀸 𑀯𑀸 𑀧𑀦𑀲𑁆𑀲 𑀅𑀦𑁆𑀢𑀭𑀸𑀬𑁄 𑀦𑀢𑁆𑀣𑀺. 𑀅𑀬𑀜𑁆𑀳𑀺 𑀫𑀭𑀡𑀲𑁆𑀲 𑀅𑀦𑁄𑀓𑀸𑀲𑁄 𑀦𑀸𑀫. 𑀪𑁂𑀲𑀚𑁆𑀚𑀲𑀫𑁆𑀧𑀤𑀸𑀦𑁂𑀦𑀸𑀢𑀺 𑀕𑀩𑁆𑀪𑀧𑀸𑀢𑀦𑀪𑁂𑀲𑀚𑁆𑀚𑀤𑀸𑀦𑁂𑀦. 𑀢𑀢𑁄 𑀯𑀸 𑀉𑀤𑁆𑀥𑀫𑁆𑀧𑀻𑀢𑀺 𑀅𑀩𑁆𑀩𑀼𑀤𑀧𑁂𑀲𑀺𑀓𑀸𑀮𑀸𑀤𑀻𑀲𑀼𑀧𑀺. 𑀚𑀻𑀯𑀺𑀢𑀸 𑀯𑀺𑀬𑁄𑀚𑁂𑀬𑁆𑀬𑀸𑀢𑀺 𑀲𑀦𑁆𑀢𑀢𑀺𑀯𑀺𑀓𑁄𑀧𑀦𑀯𑀲𑁂𑀦 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀢𑁄 𑀅𑀧𑀦𑁂𑀬𑁆𑀬.

𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲𑀸𑀢𑀺 ‘‘𑀲𑀜𑁆𑀘𑀺𑀘𑁆𑀘 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁧𑁭𑁧) 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲. 𑀆𑀯𑀺𑀪𑀸𑀯𑀢𑁆𑀣𑀦𑁆𑀢𑀺 𑀧𑀓𑀸𑀲𑀦𑀢𑁆𑀣𑀁. 𑀧𑀸𑀡𑀲𑁆𑀲 𑀅𑀢𑀺𑀧𑀸𑀢𑁄 𑀧𑀸𑀡𑀸𑀢𑀺𑀧𑀸𑀢𑁄, 𑀧𑀸𑀡𑀯𑀥𑁄 𑀧𑀸𑀡𑀖𑀸𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀢𑁆𑀢𑁄𑀢𑀺 𑀔𑀦𑁆𑀥𑀲𑀦𑁆𑀢𑀸𑀦𑁄. 𑀢𑀢𑁆𑀣 𑀳𑀺 𑀲𑀢𑁆𑀢𑀧𑀜𑁆𑀜𑀢𑁆𑀢𑀺. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀭𑀽𑀧𑀸𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂 𑀳𑀺 𑀯𑀺𑀓𑁄𑀧𑀺𑀢𑁂 𑀇𑀢𑀭𑀫𑁆𑀧𑀺 𑀢𑀁𑀲𑀫𑁆𑀩𑀦𑁆𑀥𑀢𑀸𑀬 𑀯𑀺𑀦𑀲𑁆𑀲𑀢𑀻𑀢𑀺. 𑀬𑀸𑀬 𑀘𑁂𑀢𑀦𑀸𑀬𑀸𑀢𑀺 𑀢𑀲𑁆𑀫𑀺𑀁 𑀧𑀸𑀡𑁂 𑀧𑀸𑀡𑀲𑀜𑁆𑀜𑀺𑀦𑁄 𑀓𑀸𑀬𑀯𑀘𑀻𑀤𑁆𑀯𑀸𑀭𑀸𑀦𑀁 𑀅𑀜𑁆𑀜𑀢𑀭𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸𑀬 𑀬𑀸𑀬 𑀘𑁂𑀢𑀦𑀸𑀬. 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀧𑀯𑀢𑁆𑀢𑀸𑀬 𑀯𑀥𑀓𑀘𑁂𑀢𑀦𑀸𑀬 𑀧𑀸𑀡𑀸𑀢𑀺𑀧𑀸𑀢𑀪𑀸𑀯𑁄 𑀦𑀢𑁆𑀣𑀺. 𑀲𑀸 𑀘𑁂𑀢𑀦𑀸𑀢𑀺 𑀲𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀉𑀧𑀓𑁆𑀓𑀫𑀲𑀫𑀼𑀝𑁆𑀞𑀸𑀧𑀺𑀓𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑀸𑀦𑀁 𑀅𑀜𑁆𑀜𑀢𑀭𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀯𑀥𑀓𑀘𑁂𑀢𑀦𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀸𑀬 𑀘𑁂𑀢𑀦𑀸𑀬 𑀧𑀯𑀢𑁆𑀢𑀫𑀸𑀦𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑁂𑀲𑀼 𑀫𑀳𑀸𑀪𑀽𑀢𑁂𑀲𑀼 𑀉𑀧𑀓𑁆𑀓𑀫𑀓𑀭𑀡𑀳𑁂𑀢𑀼 𑀢𑀁𑀫𑀳𑀸𑀪𑀽𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀓𑀫𑀳𑀸𑀪𑀽𑀢𑀸 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁧𑁭𑁨), 𑀲𑀸 𑀢𑀸𑀤𑀺𑀲𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀧𑀸𑀡𑀸𑀢𑀺𑀧𑀸𑀢𑁄. 𑀮𑀤𑁆𑀥𑀽𑀧𑀓𑁆𑀓𑀫𑀸𑀦𑀺 𑀳𑀺 𑀫𑀳𑀸𑀪𑀽𑀢𑀸𑀦𑀺 𑀇𑀢𑀭𑀪𑀽𑀢𑀸𑀦𑀺 𑀯𑀺𑀬 𑀦 𑀯𑀺𑀲𑀤𑀸𑀦𑀻𑀢𑀺 𑀲𑀫𑀸𑀦𑀚𑀸𑀢𑀺𑀓𑀸𑀦𑀁 𑀓𑀸𑀭𑀡𑀁 𑀦 𑀳𑁄𑀦𑁆𑀢𑀻𑀢𑀺.

𑀧𑀸𑀡𑀸𑀢𑀺𑀧𑀸𑀢𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀧𑀸𑀡𑀸𑀢𑀺𑀧𑀸𑀢𑀻. 𑀲𑀁𑀲𑀕𑁆𑀕𑁂 𑀅𑀬𑀫𑀻𑀓𑀸𑀭𑁄. 𑀢𑁂𑀦𑀸𑀳 ‘‘𑀯𑀼𑀢𑁆𑀢𑀘𑁂𑀢𑀦𑀸𑀬 𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑁄’’𑀢𑀺. 𑀲𑀓𑁄 𑀳𑀢𑁆𑀣𑁄 𑀲𑀳𑀢𑁆𑀣𑁄, 𑀢𑁂𑀦 𑀦𑀺𑀩𑁆𑀩𑀢𑁆𑀢𑁄 𑀧𑀬𑁄𑀕𑁄 𑀲𑀸𑀳𑀢𑁆𑀣𑀺𑀓𑁄. 𑀦𑀺𑀲𑁆𑀲𑀚𑁆𑀚𑀦𑀁 𑀦𑀺𑀲𑁆𑀲𑀕𑁆𑀕𑁄, 𑀲𑁄𑀯 𑀦𑀺𑀲𑁆𑀲𑀕𑁆𑀕𑀺𑀬𑁄. 𑀏𑀯𑀁 𑀆𑀡𑀢𑁆𑀢𑀺𑀓𑁄. 𑀯𑀺𑀚𑁆𑀚𑀸𑀫𑀬𑁄 𑀫𑀦𑁆𑀢𑀧𑀭𑀺𑀚𑀧𑁆𑀧𑀦𑀬𑁄𑀕𑁄. 𑀇𑀤𑁆𑀥𑀺𑀫𑀬𑁄 𑀓𑀫𑁆𑀫𑀯𑀺𑀧𑀸𑀓𑀚𑀺𑀤𑁆𑀥𑀺𑀫𑀬𑁄.

𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑁂𑀬𑁂𑀯 𑀙 𑀧𑀬𑁄𑀕𑁂 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀙𑀲𑀼 𑀧𑀬𑁄𑀕𑁂𑀲𑀼. 𑀲𑀸𑀳𑀢𑁆𑀣𑀺𑀓𑁄𑀢𑀺 𑀏𑀢𑁆𑀣 𑀳𑀢𑁆𑀣𑁄 𑀉𑀧𑀮𑀓𑁆𑀔𑀡𑀪𑀸𑀯𑁂𑀦 𑀕𑀳𑀺𑀢𑁄𑀢𑀺 𑀆𑀳 ‘‘𑀓𑀸𑀬𑁂𑀦 𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀓𑀸𑀬𑁂𑀦𑀸𑀢𑀺 𑀳𑀢𑁆𑀣𑁂𑀦 𑀯𑀸 𑀧𑀸𑀤𑁂𑀦 𑀯𑀸 𑀫𑀼𑀝𑁆𑀞𑀺𑀦𑀸 𑀯𑀸 𑀚𑀸𑀡𑀼𑀦𑀸 𑀯𑀸 𑀬𑁂𑀦 𑀓𑁂𑀦𑀘𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀦. 𑀓𑀸𑀬𑁂𑀓𑀤𑁂𑀲𑁄 𑀳𑁂𑀢𑁆𑀣 𑀳𑀢𑁆𑀣𑀸𑀤𑀺𑀓𑀸𑀬𑁄 𑀅𑀯𑀬𑀯𑁂 𑀲𑀫𑀼𑀤𑀸𑀬𑁄𑀧𑀘𑀸𑀭𑁄 𑀬𑀣𑀸 ‘‘𑀕𑀸𑀫𑁄 𑀤𑀟𑁆𑀠𑁄’’𑀢𑀺. 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦𑀸𑀢𑀺 𑀓𑀸𑀬𑀢𑁄 𑀅𑀫𑁄𑀘𑀺𑀢𑁂𑀦 𑀅𑀲𑀺𑀆𑀤𑀺𑀦𑀸 𑀧𑀳𑀭𑀡𑁂𑀦. 𑀧𑀳𑀭𑀡𑀦𑁆𑀢𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀲𑀳𑀺𑀢𑀸𑀬 𑀯𑀥𑀓𑀘𑁂𑀢𑀦𑀸𑀬 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑀸𑀥𑀦𑀁. 𑀓𑀸𑀬𑁂𑀦 𑀯𑀸 𑀲𑀢𑁆𑀢𑀺𑀆𑀤𑀻𑀦𑀁, 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀯𑀸 𑀉𑀲𑀼𑀬𑀦𑁆𑀢𑀧𑀸𑀲𑀸𑀡𑀸𑀤𑀻𑀦𑀁 𑀦𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀲𑀸𑀳𑀢𑁆𑀣𑀺𑀓𑀦𑀺𑀲𑁆𑀲𑀕𑁆𑀕𑀺𑀬𑁂𑀲𑀼. 𑀉𑀤𑁆𑀤𑀺𑀲𑁆𑀲𑀸𑀦𑀼𑀤𑁆𑀤𑀺𑀲𑁆𑀲𑀪𑁂𑀤𑀢𑁄𑀢𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀘 𑀅𑀦𑀼𑀤𑁆𑀤𑀺𑀲𑀺𑀢𑁆𑀯𑀸 𑀘 𑀧𑀯𑀢𑁆𑀢𑀺𑀪𑁂𑀤𑁂𑀦. 𑀉𑀤𑁆𑀤𑀺𑀲𑀦𑀁 𑀉𑀤𑁆𑀤𑀺𑀲𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀉𑀤𑁆𑀤𑀺𑀲𑀓𑁄, 𑀧𑀬𑁄𑀕𑁄, 𑀢𑀲𑁆𑀫𑀺𑀁. 𑀩𑀚𑁆𑀛𑀢𑀺 𑀏𑀢𑁂𑀦𑀸𑀢𑀺 𑀩𑀤𑁆𑀥𑁄, 𑀓𑀫𑁆𑀫𑀫𑁂𑀯 𑀩𑀤𑁆𑀥𑁄 𑀓𑀫𑁆𑀫𑀩𑀤𑁆𑀥𑁄, 𑀧𑀸𑀡𑀸𑀢𑀺𑀧𑀸𑀢𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀩𑀦𑁆𑀥𑀦𑀁 𑀩𑀤𑁆𑀥𑁄, 𑀓𑀫𑁆𑀫𑀼𑀦𑀸 𑀩𑀤𑁆𑀥𑁄 𑀓𑀫𑁆𑀫𑀩𑀤𑁆𑀥𑁄, 𑀲𑁄 𑀅𑀲𑁆𑀲 𑀳𑁄𑀢𑀺, 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀫𑀲𑁆𑀲 𑀲𑀺𑀤𑁆𑀥𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀪𑀬𑀢𑁆𑀣𑀸𑀧𑀻𑀢𑀺 𑀉𑀤𑁆𑀤𑀺𑀲𑀓𑁂, 𑀅𑀦𑀼𑀤𑁆𑀤𑀺𑀲𑀓𑁂 𑀘𑀸𑀢𑀺 𑀤𑁆𑀯𑀻𑀲𑀼𑀧𑀺. 𑀧𑀘𑁆𑀙𑀸 𑀯𑀸 𑀢𑁂𑀦𑁂𑀯 𑀭𑁄𑀕𑁂𑀦 𑀫𑀭𑀢𑀽𑀢𑀺 𑀬𑁄𑀚𑀦𑀸. 𑀧𑀳𑀭𑀺𑀢𑀓𑁆𑀔𑀡𑁂𑀬𑁂𑀯𑀸𑀢𑀺 𑀫𑀭𑀡𑀸𑀬 𑀧𑀳𑁄𑀦𑀓𑀧𑁆𑀧𑀳𑀸𑀭𑀲𑁆𑀲 𑀮𑀤𑁆𑀥𑀓𑁆𑀔𑀡𑁂𑀬𑁂𑀯 𑀓𑀫𑁆𑀫𑀩𑀤𑁆𑀥𑁄. 𑀬𑀤𑀺 𑀅𑀯𑀲𑁆𑀲𑀁 𑀢𑁂𑀦 𑀫𑀭𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀘𑁂 𑀧𑀦 𑀫𑀭𑀡𑀸𑀥𑀺𑀧𑁆𑀧𑀸𑀬𑁂𑀦 𑀧𑀳𑀸𑀭𑀁 𑀤𑀢𑁆𑀯𑀸 𑀢𑁂𑀦 𑀅𑀫𑀢𑀲𑁆𑀲 𑀧𑀼𑀦 𑀅𑀜𑁆𑀜𑁂𑀦 𑀘𑀺𑀢𑁆𑀢𑁂𑀦 𑀧𑀳𑀸𑀭𑁂 𑀤𑀺𑀦𑁆𑀦𑁂 𑀧𑀘𑁆𑀙𑀸𑀧𑀺 𑀧𑀞𑀫𑀧𑁆𑀧𑀳𑀸𑀭𑁂𑀦𑁂𑀯 𑀫𑀭𑀢𑀺, 𑀢𑀤𑀸𑀯 𑀓𑀫𑁆𑀫𑀩𑀤𑁆𑀥𑁄. 𑀅𑀣 𑀤𑀼𑀢𑀺𑀬𑀧𑀳𑀸𑀭𑁂𑀦 𑀫𑀭𑀢𑀺, 𑀦𑀢𑁆𑀣𑀺 𑀧𑀸𑀡𑀸𑀢𑀺𑀧𑀸𑀢𑁄. 𑀉𑀪𑀬𑁂𑀳𑀺 𑀫𑀢𑁂𑀧𑀺 𑀧𑀞𑀫𑀧𑁆𑀧𑀳𑀸𑀭𑁂𑀦𑁂𑀯 𑀓𑀫𑁆𑀫𑀩𑀤𑁆𑀥𑁄, 𑀉𑀪𑀬𑁂𑀳𑀺𑀧𑀺 𑀅𑀫𑀢𑁂 𑀦𑁂𑀯𑀢𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑁄. 𑀏𑀲 𑀦𑀬𑁄 𑀩𑀳𑀽𑀳𑀺𑀧𑀺 𑀏𑀓𑀲𑁆𑀲 𑀧𑀳𑀸𑀭𑁂 𑀤𑀺𑀦𑁆𑀦𑁂. 𑀢𑀢𑁆𑀭𑀸𑀧𑀺 𑀳𑀺 𑀬𑀲𑁆𑀲 𑀧𑀳𑀸𑀭𑁂𑀦 𑀫𑀭𑀢𑀺, 𑀢𑀲𑁆𑀲𑁂𑀯 𑀓𑀫𑁆𑀫𑀩𑀤𑁆𑀥𑁄𑀢𑀺. 𑀆𑀡𑀸𑀧𑀦𑀁 𑀦𑀸𑀫 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀲𑀳𑀺𑀢𑀸𑀬 𑀯𑀥𑀓𑀘𑁂𑀢𑀦𑀸𑀬 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑀸𑀥𑀦𑀁.

𑀇𑀤𑀸𑀦𑀺 𑀇𑀫𑀲𑁆𑀫𑀺𑀁 𑀆𑀡𑀢𑁆𑀢𑀺𑀓𑀧𑀬𑁄𑀕𑁂 𑀲𑀗𑁆𑀓𑁂𑀢𑀯𑀺𑀲𑀗𑁆𑀓𑁂𑀢𑀪𑀸𑀯𑀚𑀸𑀦𑀦𑀢𑁆𑀣𑀁 𑀙𑀩𑁆𑀩𑀺𑀥𑀁 𑀦𑀺𑀬𑀫𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀆𑀡𑀢𑁆𑀢𑀺𑀓𑀧𑀬𑁄𑀕𑁂. 𑀆𑀡𑀢𑁆𑀢𑀺𑀦𑀺𑀬𑀸𑀫𑀓𑀸𑀢𑀺 𑀆𑀡𑀢𑁆𑀢𑀺𑀓𑀧𑀬𑁄𑀕𑀲𑀸𑀥𑀺𑀓𑀸. 𑀏𑀢𑁂𑀲𑀼 𑀳𑀺 𑀅𑀯𑀺𑀭𑀚𑁆𑀛𑀺𑀢𑁂𑀲𑀼𑀬𑁂𑀯 𑀆𑀡𑀢𑁆𑀢𑀺𑀓𑀧𑀬𑁄𑀕𑁄 𑀳𑁄𑀢𑀺, 𑀦 𑀅𑀜𑁆𑀜𑀣𑀸𑀢𑀺.