𑁩. 𑀢𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸

𑀲𑀦𑁆𑀢𑀺 𑀲𑀳𑀢𑁆𑀣𑁂 𑀉𑀧𑀲𑀕𑁆𑀕𑁄. 𑀢𑁂𑀦 𑀲𑀤𑁆𑀥𑀺𑀁 𑀉𑀲𑁆𑀲𑀼𑀓𑁆𑀓𑀯𑀘𑀦𑀫𑁂𑀢𑀁 ‘‘𑀲𑀜𑁆𑀘𑀺𑀘𑁆𑀘𑀸’’𑀢𑀺 𑀆𑀳 ‘‘𑀲𑀜𑁆𑀘𑁂𑀢𑁂𑀢𑁆𑀯𑀸’’𑀢𑀺𑀆𑀤𑀺. 𑀉𑀲𑁆𑀲𑀼𑀓𑁆𑀓𑀯𑀘𑀦𑀦𑁆𑀢𑀺 𑀏𑀢𑁆𑀣 𑀉𑀲𑁆𑀲𑀼𑀓𑁆𑀓𑀯𑀘𑀦𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁧𑁭𑁨) 𑀦𑀸𑀫 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀯𑀘𑀦𑀁. 𑀅𑀬𑀜𑁆𑀳𑀺 𑀲𑀫𑀸𑀦𑀓𑀢𑁆𑀢𑀼𑀓𑁂𑀲𑀼 𑀧𑀼𑀩𑁆𑀩𑀸𑀧𑀭𑀓𑀸𑀮𑀓𑀺𑀭𑀺𑀬𑀸𑀯𑀘𑀦𑁂𑀲𑀼 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀯𑀘𑀦𑀲𑁆𑀲 𑀦𑀺𑀭𑀼𑀢𑁆𑀢𑀺𑀯𑁄𑀳𑀸𑀭𑁄. 𑀇𑀤𑀸𑀦𑀺 ‘‘𑀲𑀤𑁆𑀥𑀺𑀁 𑀘𑁂𑀢𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀧𑀸𑀡𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀧𑀸𑀡𑁄’’𑀢𑀺 𑀲𑀜𑁆𑀜𑀸𑀬 𑀲𑀤𑁆𑀥𑀺𑀁𑀬𑁂𑀯𑀸𑀢𑀺 ‘‘𑀧𑀸𑀡𑁄’’𑀢𑀺 𑀲𑀜𑁆𑀜𑀁 𑀅𑀯𑀺𑀚𑀳𑀺𑀢𑁆𑀯𑀸 𑀏𑀯, ‘‘𑀧𑀸𑀡𑁄’’𑀢𑀺 𑀲𑀜𑁆𑀜𑀼𑀧𑁆𑀧𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀓𑀣𑀁 𑀏𑀓𑀓𑁆𑀔𑀡𑁂 𑀏𑀓𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀪𑀬𑀸𑀭𑀫𑁆𑀫𑀡𑀪𑀸𑀯𑁄𑀢𑀺 𑀏𑀤𑀺𑀲𑀻 𑀘𑁄𑀤𑀦𑀸 𑀅𑀦𑀯𑀓𑀸𑀲𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀓𑁂𑀘𑀺 𑀧𑀦 ‘‘𑀜𑀸𑀢𑀧𑀭𑀺𑀜𑁆𑀜𑀸𑀬 𑀤𑀺𑀝𑁆𑀞𑀲𑀪𑀸𑀯𑁂𑀲𑀼 𑀥𑀫𑁆𑀫𑁂𑀲𑀼 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 (𑀲𑀸𑀭𑀢𑁆𑀣. 𑀝𑀻. 𑁨.𑁧𑁭𑁨) ‘𑀭𑀽𑀧𑀁 𑀅𑀦𑀺𑀘𑁆𑀘’𑀦𑁆𑀢𑀺𑀆𑀤𑀺𑀦𑀸 𑀲𑀪𑀸𑀯𑁂𑀦 𑀲𑀤𑁆𑀥𑀺𑀁 𑀏𑀓𑀓𑁆𑀔𑀡𑁂 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀚𑀸𑀦𑀦𑀁 𑀯𑀺𑀬 ‘𑀧𑀸𑀡𑁄’𑀢𑀺 𑀲𑀜𑁆𑀜𑀸𑀬 𑀲𑀤𑁆𑀥𑀺𑀁𑀬𑁂𑀯 ‘𑀯𑀥𑀸𑀫𑀺 𑀦’𑀦𑁆𑀢𑀺 𑀚𑀸𑀦𑀸𑀢𑀻’’𑀢𑀺 𑀯𑀤𑀦𑁆𑀢𑀺. 𑀅𑀧𑀭𑁂 𑀧𑀦 𑀆𑀘𑀭𑀺𑀬𑀸 𑀢𑀢𑁆𑀣𑀸𑀧𑀺 𑀏𑀯𑀁 𑀦 𑀓𑀣𑁂𑀦𑁆𑀢𑀺. 𑀏𑀢𑁆𑀣 𑀘 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄’’𑀢𑀺 𑀅𑀯𑀢𑁆𑀯𑀸 ‘‘𑀧𑀸𑀡𑁄’’𑀢𑀺 𑀯𑀘𑀦𑀁 ‘‘𑀫𑀦𑀼𑀲𑁆𑀲𑁄 𑀅𑀬’’𑀦𑁆𑀢𑀺 𑀅𑀚𑀸𑀦𑀺𑀢𑁆𑀯𑀸 𑀓𑁂𑀯𑀮𑀁 𑀲𑀢𑁆𑀢𑀲𑀜𑁆𑀜𑀸𑀬 𑀖𑀸𑀢𑁂𑀦𑁆𑀢𑀲𑁆𑀲𑀸𑀧𑀺 𑀧𑀸𑀭𑀸𑀚𑀺𑀓𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀘𑁂𑀢𑁂𑀢𑁆𑀯𑀸𑀢𑀺 𑀘𑀺𑀦𑁆𑀢𑁂𑀢𑁆𑀯𑀸. 𑀧𑀓𑀧𑁆𑀧𑁂𑀢𑁆𑀯𑀸𑀢𑀺 𑀅𑀪𑀺𑀯𑀺𑀘𑀸𑀭𑁂𑀢𑁆𑀯𑀸, 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀫𑀦𑀼𑀲𑁆𑀲𑀅𑀢𑁆𑀢𑀪𑀸𑀯𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀤𑀲𑁆𑀲𑁂𑀢𑀼𑀁 ‘‘𑀫𑀦𑀼𑀲𑁆𑀲𑀯𑀺𑀕𑁆𑀕𑀳’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀮𑀮𑀢𑁄 𑀧𑀝𑁆𑀞𑀸𑀬𑀸𑀢𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑀓𑀮𑀮𑀭𑀽𑀧𑀢𑁄 𑀧𑀝𑁆𑀞𑀸𑀬. 𑀓𑀮𑀮𑀭𑀽𑀧𑀁 𑀦𑀸𑀫 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀓𑀸𑀬𑀯𑀢𑁆𑀣𑀼𑀪𑀸𑀯𑀤𑀲𑀓𑀯𑀲𑁂𑀦 𑀲𑀫𑀢𑀺𑀁𑀲 𑀭𑀽𑀧𑀸𑀦𑀺, 𑀦𑀧𑀼𑀁𑀲𑀓𑀸𑀦𑀁 𑀓𑀸𑀬𑀯𑀢𑁆𑀣𑀼𑀤𑀲𑀓𑀯𑀲𑁂𑀦 𑀯𑀻𑀲𑀢𑀺. 𑀢𑀢𑁆𑀣 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀓𑀮𑀮𑀭𑀽𑀧𑀁 𑀚𑀸𑀢𑀺𑀉𑀡𑁆𑀡𑀸𑀬 𑀏𑀓𑁂𑀦 𑀅𑀁𑀲𑀼𑀦𑀸 𑀉𑀤𑁆𑀥𑀝𑀢𑁂𑀮𑀩𑀺𑀦𑁆𑀤𑀼𑀫𑀢𑁆𑀢𑀁 𑀳𑁄𑀢𑀺 𑀅𑀘𑁆𑀙𑀁 𑀯𑀺𑀧𑁆𑀧𑀲𑀦𑁆𑀦𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 𑁋

‘‘𑀢𑀺𑀮𑀢𑁂𑀮𑀲𑁆𑀲 𑀬𑀣𑀸 𑀩𑀺𑀦𑁆𑀤𑀼, 𑀲𑀧𑁆𑀧𑀺𑀫𑀡𑁆𑀟𑁄 𑀅𑀦𑀸𑀯𑀺𑀮𑁄;

𑀏𑀯𑀁𑀯𑀡𑁆𑀡𑀧𑁆𑀧𑀝𑀺𑀪𑀸𑀕𑀁, ‘𑀓𑀮𑀮’𑀦𑁆𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. (𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁨𑁩𑁫; 𑀯𑀺𑀪. 𑀅𑀝𑁆𑀞. 𑁨𑁬; 𑀧𑀸𑀭𑀸. 𑀅𑀝𑁆𑀞. 𑁨.𑁧𑁭𑁨);

𑀏𑀯𑀁 𑀧𑀭𑀺𑀢𑁆𑀢𑀓𑀁 𑀯𑀢𑁆𑀣𑀼𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀫𑀭𑀡𑀓𑀸𑀮𑀸 𑀏𑀢𑁆𑀣𑀦𑁆𑀢𑀭𑁂 𑀅𑀦𑀼𑀧𑀼𑀩𑁆𑀩𑁂𑀦 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑁄 𑀅𑀢𑁆𑀢𑀪𑀸𑀯𑁄 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀜𑁆𑀘 𑀬𑁂𑀪𑀼𑀬𑁆𑀬𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀑𑀧𑀧𑀸𑀢𑀺𑀓𑀲𑀁𑀲𑁂𑀤𑀚𑀸𑀧𑀺 𑀳𑀺 𑀫𑀦𑀼𑀲𑁆𑀲𑀸 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀬𑁂𑀯. 𑀓𑀮𑀮𑀓𑀸𑀮𑁂𑀧𑀻𑀢𑀺 𑀧𑀞𑀫𑀲𑀢𑁆𑀢𑀸𑀳𑁂𑀧𑀺. 𑀢𑀢𑁆𑀣 𑀳𑀺 𑀲𑀦𑁆𑀢𑀢𑀺𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀓𑀮𑀮𑀲𑀗𑁆𑀔𑀸𑀢𑀁 𑀅𑀢𑁆𑀢𑀪𑀸𑀯𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀁 𑀲𑀓𑁆𑀓𑀸, 𑀦 𑀧𑀦 𑀲𑀩𑁆𑀩𑀧𑀞𑀫𑀁 𑀓𑀮𑀮𑀭𑀽𑀧𑀁. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀳𑀺 𑀲𑀤𑁆𑀥𑀺𑀁 𑀢𑀺𑀁𑀲 𑀓𑀫𑁆𑀫𑀚𑀭𑀽𑀧𑀸𑀦𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀢𑁂𑀲𑀼 𑀧𑀦 𑀞𑀺𑀢𑁂𑀲𑀼𑀬𑁂𑀯 𑀲𑁄𑀴𑀲 𑀪𑀯𑀗𑁆𑀕𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀤𑀸𑀭𑀓𑀲𑁆𑀲 𑀯𑀸 𑀫𑀸𑀢𑀼𑀬𑀸 𑀯𑀸 𑀧𑀦𑀲𑁆𑀲 𑀅𑀦𑁆𑀢𑀭𑀸𑀬𑁄 𑀦𑀢𑁆𑀣𑀺. 𑀅𑀬𑀜𑁆𑀳𑀺 𑀫𑀭𑀡𑀲𑁆𑀲 𑀅𑀦𑁄𑀓𑀸𑀲𑁄 𑀦𑀸𑀫. 𑀪𑁂𑀲𑀚𑁆𑀚𑀲𑀫𑁆𑀧𑀤𑀸𑀦𑁂𑀦𑀸𑀢𑀺 𑀕𑀩𑁆𑀪𑀧𑀸𑀢𑀦𑀪𑁂𑀲𑀚𑁆𑀚𑀤𑀸𑀦𑁂𑀦. 𑀢𑀢𑁄 𑀯𑀸 𑀉𑀤𑁆𑀥𑀫𑁆𑀧𑀻𑀢𑀺 𑀅𑀩𑁆𑀩𑀼𑀤𑀧𑁂𑀲𑀺𑀓𑀸𑀮𑀸𑀤𑀻𑀲𑀼𑀧𑀺. 𑀚𑀻𑀯𑀺𑀢𑀸 𑀯𑀺𑀬𑁄𑀚𑁂𑀬𑁆𑀬𑀸𑀢𑀺 𑀲𑀦𑁆𑀢𑀢𑀺𑀯𑀺𑀓𑁄𑀧𑀦𑀯𑀲𑁂𑀦 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀢𑁄 𑀅𑀧𑀦𑁂𑀬𑁆𑀬.

𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲𑀸𑀢𑀺 ‘‘𑀲𑀜𑁆𑀘𑀺𑀘𑁆𑀘 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁧𑁭𑁧) 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲. 𑀆𑀯𑀺𑀪𑀸𑀯𑀢𑁆𑀣𑀦𑁆𑀢𑀺 𑀧𑀓𑀸𑀲𑀦𑀢𑁆𑀣𑀁. 𑀧𑀸𑀡𑀲𑁆𑀲 𑀅𑀢𑀺𑀧𑀸𑀢𑁄 𑀧𑀸𑀡𑀸𑀢𑀺𑀧𑀸𑀢𑁄, 𑀧𑀸𑀡𑀯𑀥𑁄 𑀧𑀸𑀡𑀖𑀸𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀢𑁆𑀢𑁄𑀢𑀺 𑀔𑀦𑁆𑀥𑀲𑀦𑁆𑀢𑀸𑀦𑁄. 𑀢𑀢𑁆𑀣 𑀳𑀺 𑀲𑀢𑁆𑀢𑀧𑀜𑁆𑀜𑀢𑁆𑀢𑀺. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀭𑀽𑀧𑀸𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂 𑀳𑀺 𑀯𑀺𑀓𑁄𑀧𑀺𑀢𑁂 𑀇𑀢𑀭𑀫𑁆𑀧𑀺 𑀢𑀁𑀲𑀫𑁆𑀩𑀦𑁆𑀥𑀢𑀸𑀬 𑀯𑀺𑀦𑀲𑁆𑀲𑀢𑀻𑀢𑀺. 𑀬𑀸𑀬 𑀘𑁂𑀢𑀦𑀸𑀬𑀸𑀢𑀺 𑀢𑀲𑁆𑀫𑀺𑀁 𑀧𑀸𑀡𑁂 𑀧𑀸𑀡𑀲𑀜𑁆𑀜𑀺𑀦𑁄 𑀓𑀸𑀬𑀯𑀘𑀻𑀤𑁆𑀯𑀸𑀭𑀸𑀦𑀁 𑀅𑀜𑁆𑀜𑀢𑀭𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸𑀬 𑀬𑀸𑀬 𑀘𑁂𑀢𑀦𑀸𑀬. 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀧𑀯𑀢𑁆𑀢𑀸𑀬 𑀯𑀥𑀓𑀘𑁂𑀢𑀦𑀸𑀬 𑀧𑀸𑀡𑀸𑀢𑀺𑀧𑀸𑀢𑀪𑀸𑀯𑁄 𑀦𑀢𑁆𑀣𑀺. 𑀲𑀸 𑀘𑁂𑀢𑀦𑀸𑀢𑀺 𑀲𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀉𑀧𑀓𑁆𑀓𑀫𑀲𑀫𑀼𑀝𑁆𑀞𑀸𑀧𑀺𑀓𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑀸𑀦𑀁 𑀅𑀜𑁆𑀜𑀢𑀭𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀯𑀥𑀓𑀘𑁂𑀢𑀦𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀸𑀬 𑀘𑁂𑀢𑀦𑀸𑀬 𑀧𑀯𑀢𑁆𑀢𑀫𑀸𑀦𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑁂𑀲𑀼 𑀫𑀳𑀸𑀪𑀽𑀢𑁂𑀲𑀼 𑀉𑀧𑀓𑁆𑀓𑀫𑀓𑀭𑀡𑀳𑁂𑀢𑀼 𑀢𑀁𑀫𑀳𑀸𑀪𑀽𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀓𑀫𑀳𑀸𑀪𑀽𑀢𑀸 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁧𑁭𑁨), 𑀲𑀸 𑀢𑀸𑀤𑀺𑀲𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀧𑀸𑀡𑀸𑀢𑀺𑀧𑀸𑀢𑁄. 𑀮𑀤𑁆𑀥𑀽𑀧𑀓𑁆𑀓𑀫𑀸𑀦𑀺 𑀳𑀺 𑀫𑀳𑀸𑀪𑀽𑀢𑀸𑀦𑀺 𑀇𑀢𑀭𑀪𑀽𑀢𑀸𑀦𑀺 𑀯𑀺𑀬 𑀦 𑀯𑀺𑀲𑀤𑀸𑀦𑀻𑀢𑀺 𑀲𑀫𑀸𑀦𑀚𑀸𑀢𑀺𑀓𑀸𑀦𑀁 𑀓𑀸𑀭𑀡𑀁 𑀦 𑀳𑁄𑀦𑁆𑀢𑀻𑀢𑀺.

𑀧𑀸𑀡𑀸𑀢𑀺𑀧𑀸𑀢𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀧𑀸𑀡𑀸𑀢𑀺𑀧𑀸𑀢𑀻. 𑀲𑀁𑀲𑀕𑁆𑀕𑁂 𑀅𑀬𑀫𑀻𑀓𑀸𑀭𑁄. 𑀢𑁂𑀦𑀸𑀳 ‘‘𑀯𑀼𑀢𑁆𑀢𑀘𑁂𑀢𑀦𑀸𑀬 𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑁄’’𑀢𑀺. 𑀲𑀓𑁄 𑀳𑀢𑁆𑀣𑁄 𑀲𑀳𑀢𑁆𑀣𑁄, 𑀢𑁂𑀦 𑀦𑀺𑀩𑁆𑀩𑀢𑁆𑀢𑁄 𑀧𑀬𑁄𑀕𑁄 𑀲𑀸𑀳𑀢𑁆𑀣𑀺𑀓𑁄. 𑀦𑀺𑀲𑁆𑀲𑀚𑁆𑀚𑀦𑀁 𑀦𑀺𑀲𑁆𑀲𑀕𑁆𑀕𑁄, 𑀲𑁄𑀯 𑀦𑀺𑀲𑁆𑀲𑀕𑁆𑀕𑀺𑀬𑁄. 𑀏𑀯𑀁 𑀆𑀡𑀢𑁆𑀢𑀺𑀓𑁄. 𑀯𑀺𑀚𑁆𑀚𑀸𑀫𑀬𑁄 𑀫𑀦𑁆𑀢𑀧𑀭𑀺𑀚𑀧𑁆𑀧𑀦𑀬𑁄𑀕𑁄. 𑀇𑀤𑁆𑀥𑀺𑀫𑀬𑁄 𑀓𑀫𑁆𑀫𑀯𑀺𑀧𑀸𑀓𑀚𑀺𑀤𑁆𑀥𑀺𑀫𑀬𑁄.

𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑁂𑀬𑁂𑀯 𑀙 𑀧𑀬𑁄𑀕𑁂 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀙𑀲𑀼 𑀧𑀬𑁄𑀕𑁂𑀲𑀼. 𑀲𑀸𑀳𑀢𑁆𑀣𑀺𑀓𑁄𑀢𑀺 𑀏𑀢𑁆𑀣 𑀳𑀢𑁆𑀣𑁄 𑀉𑀧𑀮𑀓𑁆𑀔𑀡𑀪𑀸𑀯𑁂𑀦 𑀕𑀳𑀺𑀢𑁄𑀢𑀺 𑀆𑀳 ‘‘𑀓𑀸𑀬𑁂𑀦 𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀓𑀸𑀬𑁂𑀦𑀸𑀢𑀺 𑀳𑀢𑁆𑀣𑁂𑀦 𑀯𑀸 𑀧𑀸𑀤𑁂𑀦 𑀯𑀸 𑀫𑀼𑀝𑁆𑀞𑀺𑀦𑀸 𑀯𑀸 𑀚𑀸𑀡𑀼𑀦𑀸 𑀯𑀸 𑀬𑁂𑀦 𑀓𑁂𑀦𑀘𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀦. 𑀓𑀸𑀬𑁂𑀓𑀤𑁂𑀲𑁄 𑀳𑁂𑀢𑁆𑀣 𑀳𑀢𑁆𑀣𑀸𑀤𑀺𑀓𑀸𑀬𑁄 𑀅𑀯𑀬𑀯𑁂 𑀲𑀫𑀼𑀤𑀸𑀬𑁄𑀧𑀘𑀸𑀭𑁄 𑀬𑀣𑀸 ‘‘𑀕𑀸𑀫𑁄 𑀤𑀟𑁆𑀠𑁄’’𑀢𑀺. 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦𑀸𑀢𑀺 𑀓𑀸𑀬𑀢𑁄 𑀅𑀫𑁄𑀘𑀺𑀢𑁂𑀦 𑀅𑀲𑀺𑀆𑀤𑀺𑀦𑀸 𑀧𑀳𑀭𑀡𑁂𑀦. 𑀧𑀳𑀭𑀡𑀦𑁆𑀢𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀲𑀳𑀺𑀢𑀸𑀬 𑀯𑀥𑀓𑀘𑁂𑀢𑀦𑀸𑀬 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑀸𑀥𑀦𑀁. 𑀓𑀸𑀬𑁂𑀦 𑀯𑀸 𑀲𑀢𑁆𑀢𑀺𑀆𑀤𑀻𑀦𑀁, 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀯𑀸 𑀉𑀲𑀼𑀬𑀦𑁆𑀢𑀧𑀸𑀲𑀸𑀡𑀸𑀤𑀻𑀦𑀁 𑀦𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀲𑀸𑀳𑀢𑁆𑀣𑀺𑀓𑀦𑀺𑀲𑁆𑀲𑀕𑁆𑀕𑀺𑀬𑁂𑀲𑀼. 𑀉𑀤𑁆𑀤𑀺𑀲𑁆𑀲𑀸𑀦𑀼𑀤𑁆𑀤𑀺𑀲𑁆𑀲𑀪𑁂𑀤𑀢𑁄𑀢𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀘 𑀅𑀦𑀼𑀤𑁆𑀤𑀺𑀲𑀺𑀢𑁆𑀯𑀸 𑀘 𑀧𑀯𑀢𑁆𑀢𑀺𑀪𑁂𑀤𑁂𑀦. 𑀉𑀤𑁆𑀤𑀺𑀲𑀦𑀁 𑀉𑀤𑁆𑀤𑀺𑀲𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀉𑀤𑁆𑀤𑀺𑀲𑀓𑁄, 𑀧𑀬𑁄𑀕𑁄, 𑀢𑀲𑁆𑀫𑀺𑀁. 𑀩𑀚𑁆𑀛𑀢𑀺 𑀏𑀢𑁂𑀦𑀸𑀢𑀺 𑀩𑀤𑁆𑀥𑁄, 𑀓𑀫𑁆𑀫𑀫𑁂𑀯 𑀩𑀤𑁆𑀥𑁄 𑀓𑀫𑁆𑀫𑀩𑀤𑁆𑀥𑁄, 𑀧𑀸𑀡𑀸𑀢𑀺𑀧𑀸𑀢𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀩𑀦𑁆𑀥𑀦𑀁 𑀩𑀤𑁆𑀥𑁄, 𑀓𑀫𑁆𑀫𑀼𑀦𑀸 𑀩𑀤𑁆𑀥𑁄 𑀓𑀫𑁆𑀫𑀩𑀤𑁆𑀥𑁄, 𑀲𑁄 𑀅𑀲𑁆𑀲 𑀳𑁄𑀢𑀺, 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀫𑀲𑁆𑀲 𑀲𑀺𑀤𑁆𑀥𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀪𑀬𑀢𑁆𑀣𑀸𑀧𑀻𑀢𑀺 𑀉𑀤𑁆𑀤𑀺𑀲𑀓𑁂, 𑀅𑀦𑀼𑀤𑁆𑀤𑀺𑀲𑀓𑁂 𑀘𑀸𑀢𑀺 𑀤𑁆𑀯𑀻𑀲𑀼𑀧𑀺. 𑀧𑀘𑁆𑀙𑀸 𑀯𑀸 𑀢𑁂𑀦𑁂𑀯 𑀭𑁄𑀕𑁂𑀦 𑀫𑀭𑀢𑀽𑀢𑀺 𑀬𑁄𑀚𑀦𑀸. 𑀧𑀳𑀭𑀺𑀢𑀓𑁆𑀔𑀡𑁂𑀬𑁂𑀯𑀸𑀢𑀺 𑀫𑀭𑀡𑀸𑀬 𑀧𑀳𑁄𑀦𑀓𑀧𑁆𑀧𑀳𑀸𑀭𑀲𑁆𑀲 𑀮𑀤𑁆𑀥𑀓𑁆𑀔𑀡𑁂𑀬𑁂𑀯 𑀓𑀫𑁆𑀫𑀩𑀤𑁆𑀥𑁄. 𑀬𑀤𑀺 𑀅𑀯𑀲𑁆𑀲𑀁 𑀢𑁂𑀦 𑀫𑀭𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀘𑁂 𑀧𑀦 𑀫𑀭𑀡𑀸𑀥𑀺𑀧𑁆𑀧𑀸𑀬𑁂𑀦 𑀧𑀳𑀸𑀭𑀁 𑀤𑀢𑁆𑀯𑀸 𑀢𑁂𑀦 𑀅𑀫𑀢𑀲𑁆𑀲 𑀧𑀼𑀦 𑀅𑀜𑁆𑀜𑁂𑀦 𑀘𑀺𑀢𑁆𑀢𑁂𑀦 𑀧𑀳𑀸𑀭𑁂 𑀤𑀺𑀦𑁆𑀦𑁂 𑀧𑀘𑁆𑀙𑀸𑀧𑀺 𑀧𑀞𑀫𑀧𑁆𑀧𑀳𑀸𑀭𑁂𑀦𑁂𑀯 𑀫𑀭𑀢𑀺, 𑀢𑀤𑀸𑀯 𑀓𑀫𑁆𑀫𑀩𑀤𑁆𑀥𑁄. 𑀅𑀣 𑀤𑀼𑀢𑀺𑀬𑀧𑀳𑀸𑀭𑁂𑀦 𑀫𑀭𑀢𑀺, 𑀦𑀢𑁆𑀣𑀺 𑀧𑀸𑀡𑀸𑀢𑀺𑀧𑀸𑀢𑁄. 𑀉𑀪𑀬𑁂𑀳𑀺 𑀫𑀢𑁂𑀧𑀺 𑀧𑀞𑀫𑀧𑁆𑀧𑀳𑀸𑀭𑁂𑀦𑁂𑀯 𑀓𑀫𑁆𑀫𑀩𑀤𑁆𑀥𑁄, 𑀉𑀪𑀬𑁂𑀳𑀺𑀧𑀺 𑀅𑀫𑀢𑁂 𑀦𑁂𑀯𑀢𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑁄. 𑀏𑀲 𑀦𑀬𑁄 𑀩𑀳𑀽𑀳𑀺𑀧𑀺 𑀏𑀓𑀲𑁆𑀲 𑀧𑀳𑀸𑀭𑁂 𑀤𑀺𑀦𑁆𑀦𑁂. 𑀢𑀢𑁆𑀭𑀸𑀧𑀺 𑀳𑀺 𑀬𑀲𑁆𑀲 𑀧𑀳𑀸𑀭𑁂𑀦 𑀫𑀭𑀢𑀺, 𑀢𑀲𑁆𑀲𑁂𑀯 𑀓𑀫𑁆𑀫𑀩𑀤𑁆𑀥𑁄𑀢𑀺. 𑀆𑀡𑀸𑀧𑀦𑀁 𑀦𑀸𑀫 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀲𑀳𑀺𑀢𑀸𑀬 𑀯𑀥𑀓𑀘𑁂𑀢𑀦𑀸𑀬 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑀸𑀥𑀦𑀁.

𑀇𑀤𑀸𑀦𑀺 𑀇𑀫𑀲𑁆𑀫𑀺𑀁 𑀆𑀡𑀢𑁆𑀢𑀺𑀓𑀧𑀬𑁄𑀕𑁂 𑀲𑀗𑁆𑀓𑁂𑀢𑀯𑀺𑀲𑀗𑁆𑀓𑁂𑀢𑀪𑀸𑀯𑀚𑀸𑀦𑀦𑀢𑁆𑀣𑀁 𑀙𑀩𑁆𑀩𑀺𑀥𑀁 𑀦𑀺𑀬𑀫𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀆𑀡𑀢𑁆𑀢𑀺𑀓𑀧𑀬𑁄𑀕𑁂. 𑀆𑀡𑀢𑁆𑀢𑀺𑀦𑀺𑀬𑀸𑀫𑀓𑀸𑀢𑀺 𑀆𑀡𑀢𑁆𑀢𑀺𑀓𑀧𑀬𑁄𑀕𑀲𑀸𑀥𑀺𑀓𑀸. 𑀏𑀢𑁂𑀲𑀼 𑀳𑀺 𑀅𑀯𑀺𑀭𑀚𑁆𑀛𑀺𑀢𑁂𑀲𑀼𑀬𑁂𑀯 𑀆𑀡𑀢𑁆𑀢𑀺𑀓𑀧𑀬𑁄𑀕𑁄 𑀳𑁄𑀢𑀺, 𑀦 𑀅𑀜𑁆𑀜𑀣𑀸𑀢𑀺.

𑀧𑀼𑀕𑁆𑀕𑀮𑁄𑀢𑀺 𑀫𑀸𑀭𑁂𑀢𑀩𑁆𑀩𑁄 𑀧𑀼𑀕𑁆𑀕𑀮𑁄. 𑀢𑁂𑀦𑀸𑀳 ‘‘𑀬𑀁 𑀳𑀻’’𑀢𑀺𑀆𑀤𑀺. 𑀆𑀡𑀸𑀧𑀓𑀲𑁆𑀲 𑀆𑀧𑀢𑁆𑀢𑀻𑀢𑀺 𑀆𑀡𑀸𑀧𑀓𑀲𑁆𑀲 𑀆𑀡𑀢𑁆𑀢𑀺𑀓𑁆𑀔𑀡𑁂 𑀆𑀧𑀢𑁆𑀢𑀺, 𑀆𑀡𑀢𑁆𑀢𑀲𑁆𑀲 𑀫𑀸𑀭𑀡𑀓𑁆𑀔𑀡𑁂. 𑀆𑀡𑀸𑀧𑀓𑁄 𑀫𑀼𑀘𑁆𑀘𑀢𑀻𑀢𑀺 𑀆𑀡𑀢𑁆𑀢𑀲𑁆𑀲𑁂𑀯 𑀓𑀫𑁆𑀫𑀩𑀤𑁆𑀥𑁄, 𑀯𑀢𑁆𑀣𑀼𑀯𑀺𑀲𑁂𑀲𑁂𑀦 𑀧𑀦𑁂𑀢𑁆𑀣 𑀓𑀫𑁆𑀫𑀯𑀺𑀲𑁂𑀲𑁄 𑀘 𑀆𑀧𑀢𑁆𑀢𑀺𑀯𑀺𑀲𑁂𑀲𑁄 𑀘 𑀳𑁄𑀢𑀻𑀢𑀺. ‘‘𑀧𑀼𑀭𑁂𑀪𑀢𑁆𑀢𑀁 𑀫𑀸𑀭𑁂𑀳𑀻’’𑀢𑀺 𑀆𑀡𑀢𑁆𑀢𑁄 𑀧𑀼𑀭𑁂𑀪𑀢𑁆𑀢𑀫𑁂𑀯 𑀫𑀸𑀭𑁂𑀢𑀻𑀢𑀺 ‘‘𑀅𑀚𑁆𑀚 𑀲𑁆𑀯𑁂’’𑀢𑀺 𑀅𑀦𑀺𑀬𑀫𑁂𑀢𑁆𑀯𑀸 ‘‘𑀧𑀼𑀭𑁂𑀪𑀢𑁆𑀢𑀁 𑀫𑀸𑀭𑁂𑀳𑀻’’𑀢𑀺 𑀆𑀡𑀢𑁆𑀢𑁄 𑀬𑀤𑀸 𑀓𑀤𑀸𑀘𑀺 𑀧𑀼𑀭𑁂𑀪𑀢𑁆𑀢𑀁 𑀫𑀸𑀭𑁂𑀢𑀺. 𑀬𑁄 𑀧𑀦 ‘‘𑀅𑀚𑁆𑀚 𑀧𑀼𑀩𑁆𑀩𑀡𑁆𑀳𑁂’’𑀢𑀺 𑀯𑀼𑀢𑁆𑀢𑁄 𑀫𑀚𑁆𑀛𑀦𑁆𑀳𑁂 𑀯𑀸 𑀲𑀸𑀬𑀦𑁆𑀳𑁂 𑀯𑀸 𑀲𑁆𑀯𑁂 𑀯𑀸 𑀧𑀼𑀩𑁆𑀩𑀡𑁆𑀳𑁂 𑀫𑀸𑀭𑁂𑀢𑀺, 𑀯𑀺𑀲𑀗𑁆𑀓𑁂𑀢𑁄 𑀳𑁄𑀢𑀺, 𑀆𑀡𑀸𑀧𑀓𑀲𑁆𑀲 𑀦𑀢𑁆𑀣𑀺 𑀓𑀫𑁆𑀫𑀩𑀤𑁆𑀥𑁄. 𑀧𑀼𑀩𑁆𑀩𑀡𑁆𑀳𑁂 𑀫𑀸𑀭𑁂𑀢𑀼𑀁 𑀯𑀸𑀬𑀫𑀦𑁆𑀢𑀲𑁆𑀲 𑀫𑀚𑁆𑀛𑀦𑁆𑀳𑁂 𑀚𑀸𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁂𑀦 𑀦𑀬𑁂𑀦 𑀲𑀩𑁆𑀩𑀓𑀸𑀮𑀧𑁆𑀧𑀪𑁂𑀤𑁂𑀲𑀼 𑀲𑀗𑁆𑀓𑁂𑀢𑀯𑀺𑀲𑀗𑁆𑀓𑁂𑀢𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀁 𑀯𑀢𑁆𑀣𑀼𑀓𑀸𑀮𑁂𑀲𑀼 𑀲𑀗𑁆𑀓𑁂𑀢𑀯𑀺𑀲𑀗𑁆𑀓𑁂𑀢𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀑𑀓𑀸𑀲𑀸𑀤𑀻𑀲𑀼 𑀲𑀗𑁆𑀓𑁂𑀢𑀯𑀺𑀲𑀗𑁆𑀓𑁂𑀢𑀢𑀁 𑀅𑀢𑀺𑀤𑀺𑀲𑀦𑁆𑀢𑁄 ‘‘𑀇𑀫𑀺𑀦𑀸 𑀦𑀬𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀑𑀓𑀸𑀲𑁄𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁭𑁪) 𑀕𑀸𑀫𑁄 𑀯𑀸 𑀯𑀦𑀁 𑀯𑀸 𑀕𑁂𑀳𑀤𑁆𑀯𑀸𑀭𑀁 𑀯𑀸𑀢𑀺 𑀏𑀯𑀫𑀸𑀤𑀺𑀓𑁄. 𑀆𑀯𑀼𑀥𑀦𑁆𑀢𑀺 𑀅𑀲𑀺 𑀯𑀸 𑀉𑀲𑀼 𑀯𑀸 𑀲𑀢𑁆𑀢𑀺 𑀯𑀸𑀢𑀺 𑀏𑀯𑀫𑀸𑀤𑀺. 𑀇𑀭𑀺𑀬𑀸𑀧𑀣𑁄𑀢𑀺 𑀫𑀸𑀭𑁂𑀢𑀩𑁆𑀩𑀲𑁆𑀲 𑀕𑀫𑀦𑀁 𑀯𑀸 𑀦𑀺𑀲𑀚𑁆𑀚𑀸 𑀯𑀸𑀢𑀺 𑀏𑀯𑀫𑀸𑀤𑀺. 𑀓𑀺𑀭𑀺𑀬𑀸𑀯𑀺𑀲𑁂𑀲𑁄𑀢𑀺 𑀯𑀺𑀚𑁆𑀛𑀦𑀁 𑀯𑀸 𑀙𑁂𑀤𑀦𑀁 𑀯𑀸 𑀪𑁂𑀤𑀦𑀁 𑀯𑀸 𑀲𑀗𑁆𑀔𑀫𑀼𑀡𑁆𑀟𑀓𑀁 𑀯𑀸𑀢𑀺 𑀏𑀯𑀫𑀸𑀤𑀺. 𑀇𑀫𑁂𑀲𑀼 𑀬𑀣𑀸 𑀬𑀣𑀸 𑀯𑀥𑀓𑁄 𑀆𑀡𑀢𑁆𑀢𑁄, 𑀢𑀣𑀸 𑀢𑀣𑀸 𑀓𑀢𑁂 𑀆𑀡𑀸𑀧𑀓𑀲𑁆𑀲 𑀆𑀧𑀢𑁆𑀢𑀺, 𑀅𑀜𑁆𑀜𑀣𑀸 𑀓𑀢𑁂 𑀯𑀺𑀲𑀗𑁆𑀓𑁂𑀢𑁄 𑀳𑁄𑀢𑀺. 𑀢𑁂𑀦𑀸𑀳 ‘‘𑀇𑀫𑀺𑀦𑀸 𑀦𑀬𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀩𑁆𑀩𑀢𑁆𑀣𑀸𑀢𑀺 𑀑𑀓𑀸𑀲𑀸𑀤𑀻𑀲𑀼 𑀘𑀢𑀽𑀲𑀼. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀬𑀣𑀸𑀡𑀢𑁆𑀢𑀺𑀯𑀲𑁂𑀦𑁂𑀯, 𑀆𑀡𑀢𑁆𑀢𑁂𑀦 𑀓𑀢𑁂 𑀲𑀢𑀺;

𑀆𑀡𑀸𑀧𑀓𑀲𑁆𑀲 𑀆𑀧𑀢𑁆𑀢𑀺, 𑀯𑀺𑀲𑀗𑁆𑀓𑁂𑀢𑁄𑀜𑁆𑀜𑀣𑀸 𑀓𑀢𑁂’’𑀢𑀺.

𑀆𑀡𑀢𑁆𑀢𑀺𑀬𑀁 𑀧𑀦 𑀅𑀬𑀁 𑀯𑀺𑀲𑁂𑀲𑁄 𑁋 𑀅𑀥𑀺𑀝𑁆𑀞𑀸𑀬𑀸𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀆𑀡𑀸𑀧𑁂𑀢𑀺 ‘‘𑀏𑀯𑀁 𑀯𑀺𑀚𑁆𑀛, 𑀏𑀯𑀁 𑀧𑀳𑀭, 𑀏𑀯𑀁 𑀖𑀸𑀢𑁂𑀳𑀻’’𑀢𑀺 (𑀧𑀸𑀭𑀸. 𑁧𑁭𑁪) 𑀯𑀼𑀢𑁆𑀢𑀸𑀬 𑀧𑀸𑀴𑀺𑀬𑀸 𑀮𑀩𑁆𑀪𑀢𑀻𑀢𑀺 𑀜𑀸𑀢𑀩𑁆𑀩𑁄.

𑀑𑀧𑀢𑀦𑁆𑀢𑀺 𑀏𑀢𑁆𑀣𑀸𑀢𑀺 𑀑𑀧𑀸𑀢𑁄, 𑀆𑀯𑀸𑀝𑁄, 𑀢𑀲𑁆𑀲 𑀔𑀡𑀦𑀁 𑀑𑀧𑀸𑀢𑀓𑁆𑀔𑀡𑀦𑀁. 𑀅𑀧𑀲𑁆𑀲𑁂𑀦𑀲𑀁𑀯𑀺𑀥𑀸𑀦𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁭𑁭) 𑀅𑀧𑀲𑁆𑀲𑁂𑀦𑀲𑁆𑀲 𑀲𑀁𑀯𑀺𑀥𑀸𑀦𑀁. 𑀦𑀺𑀘𑁆𑀘𑀧𑀭𑀺𑀪𑁄𑀕𑁄 𑀫𑀜𑁆𑀘𑁄 𑀯𑀸 𑀧𑀻𑀞𑀁 𑀯𑀸 𑀅𑀧𑀲𑁆𑀲𑁂𑀦𑀨𑀮𑀓𑀁 𑀯𑀸 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀻𑀤𑀦𑁆𑀢𑀲𑁆𑀲 𑀅𑀧𑀲𑁆𑀲𑁂𑀦𑀓𑀢𑁆𑀣𑀫𑁆𑀪𑁄 𑀯𑀸 𑀢𑀢𑁆𑀣𑀚𑀸𑀢𑀓𑀭𑀼𑀓𑁆𑀔𑁄 𑀯𑀸 𑀘𑀗𑁆𑀓𑀫𑁂 𑀅𑀧𑀲𑁆𑀲𑀸𑀬 𑀢𑀺𑀝𑁆𑀞𑀦𑁆𑀢𑀲𑁆𑀲 𑀆𑀮𑀫𑁆𑀩𑀦𑀭𑀼𑀓𑁆𑀔𑁄 𑀯𑀸 𑀆𑀮𑀫𑁆𑀩𑀦𑀨𑀮𑀓𑀁 𑀯𑀸, 𑀲𑀩𑁆𑀩𑀫𑁆𑀧𑁂𑀢𑀁 𑀅𑀧𑀲𑁆𑀲𑀦𑀻𑀬𑀝𑁆𑀞𑁂𑀦 𑀅𑀧𑀲𑁆𑀲𑁂𑀦𑀁 𑀦𑀸𑀫, 𑀢𑀲𑁆𑀫𑀺𑀁 𑀅𑀧𑀲𑁆𑀲𑁂𑀦𑁂 𑀬𑀣𑀸 𑀅𑀧𑀲𑁆𑀲𑀬𑀦𑁆𑀢𑀁 𑀯𑀺𑀚𑁆𑀛𑀢𑀺 𑀯𑀸 𑀙𑀺𑀦𑁆𑀤𑀢𑀺 𑀯𑀸, 𑀢𑀣𑀸 𑀓𑀢𑁆𑀯𑀸 𑀯𑀸𑀲𑀺𑀨𑀭𑀲𑀼𑀲𑀢𑁆𑀢𑀺𑀆𑀭𑀓𑀡𑁆𑀝𑀓𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀲 𑀲𑀢𑁆𑀣𑀲𑁆𑀲 𑀞𑀧𑀦𑀦𑁆𑀢𑀺 𑀅𑀢𑁆𑀣𑁄.

𑀉𑀧𑀦𑀺𑀓𑁆𑀔𑀺𑀧𑀦𑀁 𑀦𑀸𑀫 𑀲𑀫𑀻𑀧𑁂 𑀦𑀺𑀓𑁆𑀔𑀺𑀧𑀦𑀁. 𑀫𑀦𑀸𑀧𑀲𑁆𑀲 𑀯𑀸 𑀅𑀫𑀦𑀸𑀧𑀲𑁆𑀲 𑀯𑀸 𑀭𑀽𑀧𑀲𑁆𑀲 𑀉𑀧𑀳𑀭𑀡𑀁 𑀲𑀫𑀻𑀧𑁂 𑀞𑀧𑀦𑀁 𑀭𑀽𑀧𑀽𑀧𑀳𑀸𑀭𑁄, 𑀅𑀢𑁆𑀢𑀦𑀸 𑀯𑀸 𑀬𑀓𑁆𑀔𑀧𑁂𑀢𑀸𑀤𑀺𑀯𑁂𑀲𑀁 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀦𑀁. 𑀆𑀤𑀺𑀲𑀤𑁆𑀤𑁂𑀦 𑀲𑀤𑁆𑀤𑀽𑀧𑀳𑀸𑀭𑀸𑀤𑀻𑀦𑀁 𑀕𑀳𑀡𑀁. 𑀏𑀢𑁆𑀣𑀸𑀧𑀻𑀢𑀺 𑀣𑀸𑀯𑀭𑀧𑀬𑁄𑀕𑁂𑀧𑀺. 𑀉𑀤𑁆𑀤𑀺𑀲𑁆𑀲𑀸𑀦𑀼𑀤𑁆𑀤𑀺𑀲𑁆𑀲𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄, 𑀬𑀢𑁄 𑀢𑀢𑁆𑀣𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀫𑁆𑀫𑀩𑀤𑁆𑀥𑁄 𑀳𑁄𑀢𑀺. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀫𑀽𑀮𑀝𑁆𑀞𑁂𑀦 𑀑𑀧𑀸𑀢𑀸𑀤𑀻𑀲𑀼 𑀧𑀭𑁂𑀲𑀁 𑀫𑀽𑀮𑁂𑀦 𑀯𑀸 𑀫𑀼𑀥𑀸 𑀯𑀸 𑀤𑀺𑀦𑁆𑀦𑁂𑀲𑀼𑀧𑀺 𑀬𑀤𑀺 𑀢𑀧𑁆𑀧𑀘𑁆𑀘𑀬𑀸 𑀓𑁄𑀘𑀺 𑀫𑀭𑀢𑀺, 𑀫𑀽𑀮𑀝𑁆𑀞𑀲𑁆𑀲𑁂𑀯 𑀓𑀫𑁆𑀫𑀩𑀤𑁆𑀥𑁄. 𑀬𑀤𑀺𑀧𑀺 𑀢𑁂𑀦, 𑀅𑀜𑁆𑀜𑁂𑀦 𑀯𑀸 𑀢𑀢𑁆𑀭 𑀑𑀧𑀸𑀢𑁂 𑀯𑀺𑀦𑀸𑀲𑁂𑀢𑁆𑀯𑀸 𑀪𑀽𑀫𑀺𑀲𑀫𑁂 𑀓𑀢𑁂𑀧𑀺 𑀧𑀁𑀲𑀼𑀳𑀸𑀭𑀓𑀸 𑀯𑀸 𑀧𑀁𑀲𑀼𑀁 𑀕𑀡𑁆𑀳𑀦𑁆𑀢𑀸, 𑀫𑀽𑀮𑀔𑀡𑀓𑀸 𑀯𑀸 𑀫𑀽𑀮𑀸𑀦𑀺 𑀔𑀡𑀦𑁆𑀢𑀸 𑀆𑀯𑀸𑀝𑀁 𑀓𑀭𑁄𑀦𑁆𑀢𑀺, 𑀤𑁂𑀯𑁂 𑀯𑀸 𑀯𑀲𑁆𑀲𑀦𑁆𑀢𑁂 𑀓𑀤𑁆𑀤𑀫𑁄 𑀚𑀸𑀬𑀢𑀺, 𑀢𑀢𑁆𑀣 𑀘 𑀓𑁄𑀘𑀺 𑀑𑀢𑀭𑀺𑀢𑁆𑀯𑀸 𑀯𑀸 𑀮𑀕𑁆𑀕𑀺𑀢𑁆𑀯𑀸 𑀯𑀸 𑀫𑀭𑀢𑀺, 𑀫𑀽𑀮𑀝𑁆𑀞𑀲𑁆𑀲𑁂𑀯 𑀓𑀫𑁆𑀫𑀩𑀤𑁆𑀥𑁄. 𑀬𑀤𑀺 𑀧𑀦 𑀬𑁂𑀦 𑀮𑀤𑁆𑀥𑀁, 𑀲𑁄 𑀯𑀸 𑀅𑀜𑁆𑀜𑁄 𑀯𑀸 𑀯𑀺𑀢𑁆𑀣𑀢𑀢𑀭𑀁 𑀯𑀸 𑀕𑀫𑁆𑀪𑀻𑀭𑀢𑀭𑀁 𑀯𑀸 𑀓𑀭𑁄𑀢𑀺, 𑀢𑀧𑁆𑀧𑀘𑁆𑀘𑀬𑀸 𑀘 𑀓𑁄𑀘𑀺 𑀫𑀭𑀢𑀺, 𑀉𑀪𑀬𑁂𑀲𑀫𑁆𑀧𑀺 𑀓𑀫𑁆𑀫𑀩𑀤𑁆𑀥𑁄. 𑀬𑀣𑀸 𑀢𑀼 𑀫𑀽𑀮𑀸𑀦𑀺 𑀫𑀽𑀮𑁂𑀳𑀺 𑀲𑀁𑀲𑀦𑁆𑀤𑀦𑁆𑀢𑀺, 𑀢𑀣𑀸 𑀢𑀢𑁆𑀣 𑀣𑀮𑁂 𑀓𑀢𑁂 𑀫𑀼𑀘𑁆𑀘𑀢𑀺. 𑀏𑀯𑀁 𑀅𑀧𑀲𑁆𑀲𑁂𑀦𑀲𑀁𑀯𑀺𑀥𑀸𑀦𑀸𑀤𑀻𑀲𑀼𑀧𑀺 𑀬𑀸𑀯 𑀢𑁂𑀲𑀁 𑀧𑀯𑀢𑁆𑀢𑀺, 𑀢𑀸𑀯 𑀬𑀣𑀸𑀲𑀫𑁆𑀪𑀯𑀁 𑀓𑀫𑁆𑀫𑀩𑀤𑁆𑀥𑁄 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀚𑁆𑀚𑀸𑀧𑀭𑀺𑀚𑀧𑁆𑀧𑀦𑀦𑁆𑀢𑀺 𑀆𑀣𑀩𑁆𑀩𑀡𑀺𑀓𑁂𑀳𑀺, 𑀯𑀺𑀚𑁆𑀚𑀸𑀥𑀭𑁂𑀳𑀺 𑀘 𑀫𑀦𑁆𑀢𑀧𑀭𑀺𑀚𑀧𑁆𑀧𑀦𑀁. 𑀓𑀫𑁆𑀫𑀯𑀺𑀧𑀸𑀓𑀚𑀸𑀬 𑀇𑀤𑁆𑀥𑀺𑀬𑀸𑀢𑀺 𑀲𑀸𑀢𑀺𑀲𑀬𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸𑀬 𑀓𑀫𑁆𑀫𑀯𑀺𑀧𑀸𑀓𑁂𑀦 𑀲𑀳𑀚𑀸𑀢𑀸𑀬 𑀇𑀤𑁆𑀥𑀺𑀬𑀸, 𑀓𑀫𑁆𑀫𑀲𑁆𑀲 𑀯𑀸 𑀯𑀺𑀧𑀸𑀓𑀪𑀸𑀯𑁂𑀦 𑀚𑀸𑀢𑀸𑀬 𑀇𑀤𑁆𑀥𑀺𑀬𑀸. 𑀧𑀬𑁄𑀚𑀦𑀦𑁆𑀢𑀺 𑀧𑀯𑀢𑁆𑀢𑀦𑀁, 𑀓𑀭𑀡𑀦𑁆𑀢𑀺 𑀅𑀢𑁆𑀣𑁄, 𑀤𑀸𑀞𑀸𑀯𑀼𑀥𑀸𑀤𑀻𑀦𑀁 𑀤𑀸𑀞𑀸𑀓𑁄𑀝𑀦𑀸𑀤𑀻𑀦𑀫𑀺𑀯 𑀫𑀸𑀭𑀡𑀢𑁆𑀣𑀁 𑀓𑀫𑁆𑀫𑀯𑀺𑀧𑀸𑀓𑀚𑀺𑀤𑁆𑀥𑀺𑀯𑀺𑀓𑀸𑀭𑀓𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑀫𑁆𑀫𑀲𑀸𑀥𑀦𑁄 𑀯𑀸𑀬𑀁 𑀳𑀸𑀭𑀓𑀲𑀤𑁆𑀤𑁄 𑀩𑀳𑀼𑀮𑀁𑀯𑀺𑀥𑀸𑀦𑁂𑀦 𑀢𑀢𑁆𑀣𑀸𑀧𑀺 𑀡𑁆𑀯𑀼𑀧𑀘𑁆𑀘𑀬𑀲𑁆𑀲 𑀲𑀺𑀚𑁆𑀛𑀦𑀢𑁄𑀢𑀺 𑀆𑀳 ‘‘𑀅𑀣 𑀯𑀸’’𑀢𑀺𑀆𑀤𑀺. 𑀚𑀻𑀯𑀺𑀢𑀳𑀭𑀡𑀓𑀁, 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁 𑀯𑀸 𑀲𑀢𑁆𑀣𑀫𑁂𑀯 𑀳𑀸𑀭𑀓𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁧𑁭𑁨) 𑀯𑀺𑀓𑀧𑁆𑀧𑀤𑁆𑀯𑀬𑁂𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀲𑀢𑁆𑀣𑀜𑁆𑀘 𑀢𑀁 𑀳𑀸𑀭𑀓𑀜𑁆𑀘𑀸𑀢𑀺 𑀲𑀢𑁆𑀣𑀳𑀸𑀭𑀓’’𑀦𑁆𑀢𑀺. ‘‘𑀳𑀸𑀭𑀓𑀲𑀢𑁆𑀣’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀯𑀺𑀲𑁂𑀲𑀦𑀲𑁆𑀲 𑀧𑀭𑀦𑀺𑀧𑀸𑀢𑀁 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀭𑀺𑀬𑁂𑀲𑁂𑀬𑁆𑀬𑀸𑀢𑀺 𑀕𑀯𑁂𑀲𑁂𑀬𑁆𑀬. ‘‘𑀬𑀣𑀸 𑀮𑀪𑀢𑀺, 𑀢𑀣𑀸 𑀓𑀭𑁂𑀬𑁆𑀬𑀸’’𑀢𑀺 𑀇𑀫𑀺𑀦𑀸 𑀧𑀦 𑀅𑀥𑀺𑀧𑁆𑀧𑀸𑀬𑀢𑁆𑀣𑀫𑀸𑀳, ‘‘𑀉𑀧𑀦𑀺𑀓𑁆𑀔𑀺𑀧𑁂𑀬𑁆𑀬𑀸’’𑀢𑀺 𑀇𑀫𑀺𑀦𑀸 𑀲𑀺𑀔𑀸𑀧𑀢𑁆𑀢𑀫𑀢𑁆𑀣𑀁. 𑀇𑀢𑀭𑀣𑀸 𑀳𑀺 ‘‘𑀧𑀭𑀺𑀬𑁂𑀲𑁂𑀬𑁆𑀬𑀸’’𑀢𑀺 𑀇𑀫𑀲𑁆𑀲 ‘‘𑀉𑀧𑀦𑀺𑀓𑁆𑀔𑀺𑀧𑁂𑀬𑁆𑀬𑀸’’𑀢𑀺 𑀅𑀬𑀫𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄 𑀦 𑀲𑀺𑀬𑀸. 𑀧𑀭𑀺𑀬𑀺𑀝𑁆𑀞𑀫𑀢𑁆𑀢𑁂𑀬𑁂𑀯𑀸𑀢𑀺 𑀧𑀭𑀺𑀬𑁂𑀲𑀺𑀢𑀫𑀢𑁆𑀢𑁂𑀬𑁂𑀯. 𑀬𑀤𑀺 𑀏𑀯𑀁 𑀅𑀣 𑀓𑀲𑁆𑀫𑀸 𑀧𑀸𑀴𑀺𑀬𑀁 ‘‘𑀲𑀢𑁆𑀣𑀳𑀸𑀭𑀓𑀁 𑀯𑀸𑀲𑁆𑀲 𑀧𑀭𑀺𑀬𑁂𑀲𑁂𑀬𑁆𑀬𑀸𑀢𑀺 𑀅𑀲𑀺𑀁 𑀯𑀸 𑀲𑀢𑁆𑀢𑀺𑀁 𑀯𑀸 𑀪𑁂𑀡𑁆𑀟𑀺𑀁 𑀯𑀸 𑀮𑀕𑀼𑀴𑀁 𑀯𑀸 𑀧𑀸𑀲𑀸𑀡𑀁 𑀯𑀸 𑀲𑀢𑁆𑀣𑀁 𑀯𑀸 𑀯𑀺𑀲𑀁 𑀯𑀸 𑀭𑀚𑁆𑀚𑀼𑀁 𑀯𑀸’’𑀢𑀺 (𑀧𑀸𑀭𑀸. 𑁧𑁭𑁨) 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀧𑀤𑀪𑀸𑀚𑀦𑁂 𑀧𑀦𑀸’’𑀢𑀺𑀆𑀤𑀺. 𑀅𑀲𑁆𑀲𑀸𑀢𑀺 ‘‘𑀲𑀢𑁆𑀣𑀳𑀸𑀭𑀓𑀁 𑀯𑀸𑀲𑁆𑀲 𑀧𑀭𑀺𑀬𑁂𑀲𑁂𑀬𑁆𑀬𑀸’’𑀢𑀺 𑀇𑀫𑀲𑁆𑀲 𑀧𑀤𑀲𑁆𑀲. 𑀩𑁆𑀬𑀜𑁆𑀚𑀦𑀸𑀦𑀼𑀭𑀽𑀧𑀢𑁄 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀅𑀢𑁆𑀣𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸 ‘‘𑀩𑁆𑀬𑀜𑁆𑀚𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀲𑀲𑀢𑀺 𑀳𑀺𑀁𑀲𑀢𑀻𑀢𑀺 𑀲𑀢𑁆𑀣𑀁, 𑀲𑀲𑀦𑁆𑀢𑀺 𑀳𑀺𑀁𑀲𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀲𑀢𑁆𑀣𑀁. 𑀆𑀤𑀺𑀲𑀤𑁆𑀤𑁂𑀦 ‘‘𑀲𑀢𑁆𑀢𑀺𑀁 𑀯𑀸’’𑀢𑀺𑀆𑀤𑀺𑀧𑀸𑀴𑀺𑀲𑁂𑀲𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀮𑀕𑀼𑀴𑀦𑁆𑀢𑀺 𑀫𑀼𑀕𑁆𑀕𑀭𑁄. 𑀲𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀸𑀯𑀲𑁂𑀲𑀁 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀔𑀁 𑀯𑁂𑀤𑀺𑀢𑀩𑁆𑀩𑀁.

𑀬𑁄 𑀏𑀯𑀁 𑀫𑀭𑀢𑀻𑀢𑀺 𑀬𑁄 𑀲𑀢𑁆𑀣𑀁 𑀯𑀸 𑀆𑀳𑀭𑀺𑀢𑁆𑀯𑀸, 𑀯𑀺𑀲𑀁 𑀯𑀸 𑀔𑀸𑀤𑀺𑀢𑁆𑀯𑀸, 𑀭𑀚𑁆𑀚𑀼𑀬𑀸 𑀯𑀸 𑀉𑀩𑁆𑀩𑀦𑁆𑀥𑀺𑀢𑁆𑀯𑀸, 𑀲𑁄𑀩𑁆𑀪𑀸𑀤𑀻𑀲𑀼 𑀯𑀸 𑀧𑀢𑀺𑀢𑁆𑀯𑀸, 𑀅𑀜𑁆𑀜𑁂𑀳𑀺 𑀯𑀸 𑀅𑀕𑁆𑀕𑀺𑀧𑀯𑁂𑀲𑀦𑀉𑀤𑀓𑀧𑀯𑁂𑀲𑀦𑀸𑀤𑀻𑀳𑀺 𑀉𑀧𑀸𑀬𑁂𑀳𑀺 𑀫𑀭𑀢𑀺. ‘‘𑀲𑁄 𑀥𑀦𑀁 𑀯𑀸 𑀮𑀪𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦𑀸𑀢𑀺 𑀲𑁄 𑀥𑀦𑀁 𑀯𑀸 𑀮𑀪𑀢𑀺, 𑀬𑀲𑀁 𑀯𑀸 𑀮𑀪𑀢𑀺, 𑀲𑀕𑁆𑀕𑀁 𑀯𑀸 𑀕𑀘𑁆𑀙𑀢𑀺, 𑀥𑀫𑁆𑀫𑁄 𑀯𑀸𑀲𑁆𑀲 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀦𑀬𑁂𑀦. 𑀓𑀺𑀫𑀦𑁂𑀦 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀏𑀢𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀏𑀢𑁂𑀦𑀸𑀢𑀺 ‘‘𑀫𑀭𑀡𑀯𑀡𑁆𑀡𑀁 𑀯𑀸 𑀲𑀁𑀯𑀡𑁆𑀡𑁂𑀬𑁆𑀬𑀸’’𑀢𑀺 𑀏𑀢𑁂𑀦 𑀯𑀘𑀦𑁂𑀦. 𑀦𑀬𑀺𑀥 𑀏𑀯𑀦𑁆𑀢𑀺 𑀇𑀥 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀧𑀸𑀭𑀸𑀚𑀺𑀓𑁂 𑀦 𑀏𑀯𑀁, 𑀦 𑀧𑀭𑀺𑀬𑀸𑀬𑀓𑀣𑀸𑀬 𑀫𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀲𑀁𑀯𑀡𑁆𑀡𑁂𑀬𑁆𑀬𑀸’’𑀢𑀺𑀆𑀤𑀺.

‘‘𑀲𑀢𑁆𑀣𑀁 𑀯𑀸 𑀆𑀳𑀭𑀸’’𑀢𑀺𑀆𑀤𑀺𑀦𑀸𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 ‘‘𑀯𑀺𑀲𑀁 𑀯𑀸 𑀔𑀸𑀤, 𑀭𑀚𑁆𑀚𑀼𑀬𑀸 𑀯𑀸 𑀉𑀩𑁆𑀩𑀦𑁆𑀥𑀺𑀢𑁆𑀯𑀸 𑀓𑀸𑀮𑀁 𑀓𑀭𑁄𑀳𑀺, 𑀲𑁄𑀩𑁆𑀪𑁂 𑀯𑀸 𑀦𑀭𑀓𑁂 𑀯𑀸 𑀧𑀧𑀸𑀢𑁂 𑀯𑀸 𑀧𑀧𑀢𑀸’’𑀢𑀺𑀆𑀤𑀺𑀁 (𑀧𑀸𑀭𑀸. 𑁧𑁭𑁨) 𑀲𑀩𑁆𑀩𑀁 𑀫𑀭𑀡𑀽𑀧𑀸𑀬𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀢𑁆𑀣 𑀘 𑀦𑀭𑀓𑁄 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁭𑁨) 𑀦𑀸𑀫 𑀢𑀢𑁆𑀣 𑀢𑀢𑁆𑀣 𑀨𑀮𑀦𑁆𑀢𑀺𑀬𑀸 𑀪𑀽𑀫𑀺𑀬𑀸 𑀲𑀬𑀫𑁂𑀯 𑀦𑀺𑀩𑁆𑀩𑀢𑁆𑀢𑀸 𑀫𑀳𑀸𑀤𑀭𑀻, 𑀬𑀢𑁆𑀣 𑀳𑀢𑁆𑀣𑀻𑀧𑀺 𑀧𑀢𑀦𑁆𑀢𑀺, 𑀘𑁄𑀭𑀸𑀧𑀺 𑀦𑀺𑀮𑀻𑀬𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀧𑀧𑀸𑀢𑁄𑀢𑀺 𑀧𑀩𑁆𑀩𑀢𑀦𑁆𑀢𑀭𑁂 𑀯𑀸 𑀣𑀮𑀦𑁆𑀢𑀭𑁂 𑀯𑀸 𑀏𑀓𑀢𑁄 𑀙𑀺𑀦𑁆𑀦𑁄. 𑀧𑀸𑀧𑀓𑁂𑀦𑀸𑀢𑀺 𑀮𑀸𑀫𑀓𑁂𑀦. 𑀤𑀼𑀚𑁆𑀚𑀻𑀯𑀺𑀢𑁂𑀦𑀸𑀢𑀺 𑀤𑀼𑀓𑁆𑀔𑀩𑀳𑀼𑀮𑀢𑁆𑀢𑀸 𑀤𑀼𑀓𑁆𑀔𑁂𑀦 𑀚𑀻𑀯𑀺𑀢𑁂𑀦. 𑀫𑀢𑀁 𑀢𑁂 𑀚𑀻𑀯𑀺𑀢𑀸 𑀲𑁂𑀬𑁆𑀬𑀸𑀢𑀺 𑀢𑀯 𑀫𑀭𑀡𑀁 𑀚𑀻𑀯𑀺𑀢𑀸 𑀲𑀼𑀦𑁆𑀤𑀭𑀢𑀭𑀁. 𑀘𑀺𑀢𑁆𑀢𑀫𑀲𑁆𑀲 𑀅𑀢𑁆𑀣𑀻𑀢𑀺 𑀘𑀺𑀢𑁆𑀢𑁄. 𑀢𑀣𑀸 𑀫𑀦𑁄. 𑀇𑀢𑀺-𑀲𑀤𑁆𑀤𑁄 ‘‘𑀲𑀩𑁆𑀩𑀫𑀢𑁆𑀣𑀻𑀢𑀺 𑀔𑁄, 𑀓𑀘𑁆𑀘𑀸𑀦, 𑀅𑀬𑀫𑁂𑀓𑁄 𑀅𑀦𑁆𑀢𑁄, 𑀲𑀩𑁆𑀩𑀁 𑀦𑀢𑁆𑀣𑀻𑀢𑀺 𑀔𑁄, 𑀓𑀘𑁆𑀘𑀸𑀦, 𑀅𑀬𑀁 𑀤𑀼𑀢𑀺𑀬𑁄 𑀅𑀦𑁆𑀢𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁧𑁫; 𑁩.𑁯𑁦) 𑀯𑀺𑀬 𑀦𑀺𑀤𑀲𑁆𑀲𑀦𑁂 𑀤𑀝𑁆𑀞𑀩𑁆𑀩𑁄 𑀬𑀣𑀸𑀯𑀼𑀢𑁆𑀢𑀲𑁆𑀲 𑀩𑀼𑀤𑁆𑀥𑀺𑀬𑀁 𑀯𑀺𑀧𑀭𑀺𑀯𑀢𑁆𑀢𑀫𑀸𑀦𑀲𑁆𑀲 𑀫𑀭𑀡𑀲𑁆𑀲 𑀦𑀺𑀤𑀲𑁆𑀲𑀦𑀢𑁄. 𑀢𑁂𑀦𑁂𑀯𑀸𑀳 ‘‘𑀫𑀢𑀁 𑀢𑁂 𑀚𑀻𑀯𑀺𑀢𑀸 𑀲𑁂𑀬𑁆𑀬𑁄’’𑀢𑀺𑀆𑀤𑀺.

𑀦𑀦𑀼 𑀘𑁂𑀢𑁆𑀣 ‘‘𑀫𑀦𑁄’’𑀢𑀺 𑀇𑀤𑀫𑁆𑀧𑀺 𑀅𑀢𑁆𑀣𑀢𑁄 𑀘𑀺𑀢𑁆𑀢𑀫𑁂𑀯, 𑀅𑀣 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺. 𑀘𑀺𑀢𑁆𑀢𑀲𑁆𑀲 𑀅𑀢𑁆𑀣𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀦𑀸𑀬𑀁 𑀘𑀺𑀢𑁆𑀢𑀲𑀤𑁆𑀤𑁄 ‘‘𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑁄’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁧𑁭𑁧) 𑀯𑀺𑀬 𑀯𑀺𑀘𑀺𑀢𑁆𑀢𑀸𑀤𑀺𑀅𑀢𑁆𑀣𑁄, 𑀅𑀣 𑀔𑁄 𑀯𑀺𑀜𑁆𑀜𑀸𑀡𑀯𑀘𑀦𑁄𑀢𑀺 𑀢𑀲𑁆𑀲 𑀅𑀢𑁆𑀣𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀧𑀼𑀦𑀭𑀼𑀢𑁆𑀢𑀺𑀤𑁄𑀲𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀓𑀣𑀫𑁂𑀢𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀢𑁂𑀦𑁂𑀯𑀲𑁆𑀲𑀸’’𑀢𑀺𑀆𑀤𑀺. 𑀘𑀺𑀢𑁆𑀢𑁄 𑀦𑀸𑀦𑀸𑀧𑁆𑀧𑀓𑀸𑀭𑀓𑁄 𑀲𑀗𑁆𑀓𑀧𑁆𑀧𑁄 𑀅𑀲𑁆𑀲𑀸𑀢𑀺 𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑁄. 𑀯𑀺𑀘𑀺𑀢𑁆𑀢𑀢𑁆𑀣𑁄 𑀳𑁂𑀢𑁆𑀣 𑀘𑀺𑀢𑁆𑀢𑀲𑀤𑁆𑀤𑁄 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀦𑀺𑀓𑀸𑀬𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀏𑀯𑀁 𑀘𑀺𑀢𑁆𑀢𑀁, 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁩.𑁧𑁦𑁦) 𑀯𑀺𑀬. 𑀢𑁂𑀦𑀸𑀳 ‘‘𑀯𑀺𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑁄’’𑀢𑀺. 𑀏𑀢𑁆𑀣𑀸𑀧𑀺 𑀇𑀢𑀺𑀲𑀤𑁆𑀤𑁄 𑀆𑀳𑀭𑀺𑀢𑀩𑁆𑀩𑁄𑀢𑀺 ‘‘𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑁄’’𑀢𑀺 𑀇𑀫𑀲𑁆𑀫𑀺𑀁 𑀧𑀤𑁂𑀧𑀺 𑀅𑀥𑀺𑀓𑀸𑀭𑀯𑀲𑁂𑀦 𑀇𑀢𑀺𑀲𑀤𑁆𑀤𑁄 𑀆𑀳𑀭𑀺𑀢𑀩𑁆𑀩𑁄. 𑀇𑀤𑀜𑁆𑀳𑀺 ‘‘𑀇𑀢𑀺 𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑁄’’𑀢𑀺 𑀏𑀯𑀁 𑀅𑀯𑀼𑀢𑁆𑀢𑀫𑁆𑀧𑀺 𑀅𑀥𑀺𑀓𑀸𑀭𑀢𑁄 𑀯𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺. 𑀲𑀗𑁆𑀓𑀧𑁆𑀧𑁄𑀢𑀺 𑀘𑁂𑀢𑁆𑀣 ‘‘𑀢𑀓𑁆𑀓𑁄 𑀯𑀺𑀢𑀓𑁆𑀓𑁄 𑀲𑀗𑁆𑀓𑀧𑁆𑀧𑁄’’𑀢𑀺𑀆𑀤𑀻𑀲𑀼 (𑀥. 𑀲. 𑁭) 𑀯𑀺𑀬 𑀦 𑀯𑀺𑀢𑀓𑁆𑀓𑀲𑁆𑀲𑁂𑀯 𑀦𑀸𑀫𑀁, 𑀅𑀣 𑀔𑁄 𑀢𑀲𑁆𑀲 𑀘 𑀅𑀜𑁆𑀜𑁂𑀲𑀜𑁆𑀘𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀓𑀧𑁆𑀧𑁄𑀢𑀺 𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀲𑀁𑀯𑀺𑀤𑀳𑀦𑀫𑀢𑁆𑀢𑀲𑁆𑀲𑀸𑀢𑀺 𑀲𑀜𑁆𑀜𑀸𑀘𑁂𑀢𑀦𑀸𑀯𑀺𑀢𑀓𑁆𑀓𑀲𑀗𑁆𑀔𑀸𑀢𑀲𑁆𑀲 𑀲𑀩𑁆𑀩𑀲𑁆𑀲 𑀲𑀁𑀯𑀺𑀤𑀳𑀦𑀲𑁆𑀲. 𑀲𑀸𑀫𑀜𑁆𑀜𑀢𑁆𑀣𑁄 𑀳𑁂𑀢𑁆𑀣 𑀫𑀢𑁆𑀢𑀲𑀤𑁆𑀤𑁄 ‘‘𑀩𑁆𑀭𑀸𑀳𑁆𑀫𑀡𑀫𑀢𑁆𑀢𑀁 𑀪𑁄𑀚𑁂𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀢𑁂𑀦𑀸𑀳 ‘‘𑀢𑀜𑁆𑀘 𑀲𑀁𑀯𑀺𑀤𑀳𑀦’’𑀦𑁆𑀢𑀺𑀆𑀤𑀺. 𑀇𑀫𑀺𑀦𑀸 𑀲𑀁𑀯𑀺𑀤𑀳𑀦𑀁 𑀦𑀸𑀫𑁂𑀢𑁆𑀣 𑀦 𑀯𑀺𑀥𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀥𑀺𑀧𑁆𑀧𑀸𑀬𑁄 𑀦𑀸𑀫 𑀯𑀺𑀢𑀓𑁆𑀓𑁄.

𑀉𑀘𑁆𑀘𑀸𑀯𑀘𑁂𑀦 𑀓𑀸𑀭𑀡𑁂𑀦𑀸𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁭𑁨) 𑀫𑀳𑀦𑁆𑀢𑀸𑀫𑀳𑀦𑁆𑀢𑁂𑀦 𑀉𑀧𑀸𑀬𑁂𑀦. 𑀢𑀢𑁆𑀣 𑀫𑀭𑀡𑀯𑀡𑁆𑀡𑀲𑀁𑀯𑀡𑁆𑀡𑀦𑁂 𑀢𑀸𑀯 𑀚𑀻𑀯𑀺𑀢𑁂 𑀆𑀤𑀻𑀦𑀯𑀤𑀲𑁆𑀲𑀦𑀯𑀲𑁂𑀦 𑀅𑀯𑀘𑀸𑀓𑀸𑀭𑀢𑀸, 𑀫𑀭𑀡𑁂 𑀯𑀡𑁆𑀡𑀪𑀡𑀦𑀯𑀲𑁂𑀦 𑀉𑀘𑁆𑀘𑀸𑀓𑀸𑀭𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀫𑀸𑀤𑀧𑀦𑁂 𑀧𑀦 𑀫𑀼𑀝𑁆𑀞𑀺𑀚𑀸𑀡𑀼𑀦𑀺𑀧𑁆𑀧𑁄𑀣𑀦𑀸𑀤𑀻𑀳𑀺 𑀫𑀭𑀡𑀲𑀫𑀸𑀤𑀧𑀦𑀯𑀲𑁂𑀦 𑀉𑀘𑁆𑀘𑀸𑀓𑀸𑀭𑀢𑀸, 𑀏𑀓𑀢𑁄 𑀪𑀼𑀜𑁆𑀚𑀦𑁆𑀢𑀲𑁆𑀲 𑀦𑀔𑁂 𑀯𑀺𑀲𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀭𑀡𑀸𑀤𑀺𑀲𑀫𑀸𑀤𑀧𑀦𑀯𑀲𑁂𑀦 𑀅𑀯𑀘𑀸𑀓𑀸𑀭𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀁 𑀅𑀲𑀸𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀲𑀸𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀯𑁂𑀲𑀸𑀮𑀺𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀑𑀧𑀸𑀢𑀓𑁆𑀔𑀡𑀦𑀸𑀤𑀻𑀲𑀼 𑀤𑀼𑀓𑁆𑀓𑀝𑀦𑁆𑀢𑀺 𑀏𑀢𑁆𑀣 𑀲𑀘𑁂𑀧𑀺 𑀚𑀸𑀢𑀧𑀣𑀯𑀺𑀁 𑀔𑀡𑀢𑀺, 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀧𑀼𑀩𑁆𑀩𑀧𑀬𑁄𑀕𑀢𑁆𑀢𑀸 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄 𑀦𑀸𑀕𑀲𑀼𑀧𑀡𑁆𑀡𑀸𑀤𑀺𑀲𑀤𑀺𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑁄 𑀢𑀺𑀭𑀘𑁆𑀙𑀸𑀦𑀕𑀢𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄, 𑀬𑀓𑁆𑀔𑁄 𑀘 𑀧𑁂𑀢𑁄 𑀘 𑀢𑀺𑀭𑀘𑁆𑀙𑀸𑀦𑀕𑀢𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄 𑀘 𑀬𑀓𑁆𑀔𑀧𑁂𑀢𑀢𑀺𑀭𑀘𑁆𑀙𑀸𑀦𑀕𑀢𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀸, 𑀢𑁂𑀲𑀁. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 𑀣𑀼𑀮𑁆𑀮𑀘𑁆𑀘𑀬𑀁 𑀅𑀢𑀺𑀤𑀺𑀲𑀢𑀺. 𑀇𑀤𑀸𑀦𑀺 ‘‘𑀇𑀫𑀺𑀦𑀸 𑀦𑀬𑁂𑀦𑀸’’𑀢𑀺𑀆𑀤𑀺𑀦𑀸 𑀅𑀧𑀲𑁆𑀲𑁂𑀦𑀲𑀁𑀯𑀺𑀥𑀸𑀦𑀸𑀤𑀻𑀲𑀼𑀧𑀺 𑀬𑀣𑀸𑀯𑀼𑀢𑁆𑀢𑀆𑀧𑀢𑁆𑀢𑀺𑀪𑁂𑀤𑀁 𑀅𑀢𑀺𑀤𑀺𑀲𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀅𑀧𑀲𑁆𑀲𑁂𑀦𑀲𑀁𑀯𑀺𑀥𑀸𑀦𑀸𑀤𑀻𑀲𑀼 𑀲𑀩𑁆𑀩𑁂𑀲𑀼 𑀧𑀬𑁄𑀕𑁂𑀲𑀼.

𑀇𑀤𑀸𑀦𑀺 𑀅𑀦𑀸𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀲𑀜𑁆𑀘𑀺𑀘𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀘 ‘‘𑀅𑀲𑀜𑁆𑀘𑀺𑀘𑁆𑀘𑀸’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁧𑁭𑁯) 𑀇𑀤𑀁 𑀫𑀭𑀡𑀲𑀁𑀯𑀢𑁆𑀢𑀦𑀺𑀓𑀉𑀧𑀓𑁆𑀓𑀫𑀲𑁆𑀲 𑀅𑀲𑀮𑁆𑀮𑀓𑁆𑀔𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, ‘‘𑀅𑀚𑀸𑀦𑀦𑁆𑀢𑀲𑁆𑀲𑀸’’𑀢𑀺 𑀇𑀤𑀁 𑀧𑀦 𑀫𑀭𑀡𑀲𑀁𑀯𑀢𑁆𑀢𑀦𑀺𑀓𑀉𑀧𑀓𑀭𑀡𑀲𑁆𑀲 𑀅𑀚𑀸𑀦𑀦𑀁 𑀲𑀦𑁆𑀥𑀸𑀬, ‘‘𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺 𑀇𑀤𑀁 𑀉𑀧𑀓𑁆𑀓𑀫𑀁 𑀚𑀸𑀦𑀦𑁆𑀢𑀲𑁆𑀲𑀸𑀧𑀺 𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲 𑀅𑀪𑀸𑀯𑀁. 𑀢𑁂𑀦𑀸𑀳 ‘‘𑀅𑀲𑀜𑁆𑀘𑀺𑀘𑁆𑀘𑀸’’𑀢𑀺𑀆𑀤𑀺. 𑀅𑀘𑁂𑀢𑁂𑀢𑁆𑀯𑀸𑀢𑀺 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸, 𑀯𑀺𑀭𑀚𑁆𑀛𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀫𑀼𑀲𑀮𑀼𑀲𑁆𑀲𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀯𑀺𑀬𑀸𑀢𑀺 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀢𑁆𑀢𑀕𑁆𑀕𑁂 𑀅𑀦𑁆𑀢𑀭𑀖𑀭𑁂 𑀆𑀲𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀫𑀼𑀲𑀮𑁂 𑀉𑀲𑁆𑀲𑀺𑀢𑁂 𑀏𑀓𑀁 𑀫𑀼𑀲𑀮𑀁 𑀅𑀕𑁆𑀕𑀳𑁂𑀲𑀺. 𑀤𑀼𑀢𑀺𑀬𑁄 𑀫𑀼𑀲𑀮𑁄 𑀧𑀭𑀺𑀧𑀢𑀺𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀲 𑀤𑀸𑀭𑀓𑀲𑁆𑀲 𑀫𑀢𑁆𑀣𑀓𑁂 𑀅𑀯𑀢𑁆𑀣𑀸𑀲𑀺. 𑀲𑁄 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… 𑀓𑀺𑀁𑀘𑀺𑀢𑁆𑀢𑁄 𑀢𑁆𑀯𑀁 𑀪𑀺𑀓𑁆𑀔𑀽𑀢𑀺. 𑀅𑀲𑀜𑁆𑀘𑀺𑀘𑁆𑀘 𑀅𑀳𑀁 𑀪𑀕𑀯𑀸𑀢𑀺. 𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀅𑀲𑀜𑁆𑀘𑀺𑀘𑁆𑀘𑀸’’𑀢𑀺 (𑀧𑀸𑀭𑀸. 𑁧𑁮𑁦) 𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀯𑀺𑀬.

𑀯𑀺𑀲𑀕𑀢𑀧𑀺𑀡𑁆𑀟𑀧𑀸𑀢𑀯𑀢𑁆𑀣𑀼𑀲𑁆𑀫𑀺𑀁 𑀯𑀺𑀬𑀸𑀢𑀺 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀧𑀺𑀡𑁆𑀟𑀘𑀸𑀭𑀺𑀓𑁄 𑀪𑀺𑀓𑁆𑀔𑀼 𑀯𑀺𑀲𑀕𑀢𑀁 𑀧𑀺𑀡𑁆𑀟𑀧𑀸𑀢𑀁 𑀮𑀪𑀺𑀢𑁆𑀯𑀸 𑀧𑀝𑀺𑀓𑁆𑀓𑀫𑀦𑀁 𑀳𑀭𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀅𑀕𑁆𑀕𑀓𑀸𑀭𑀺𑀓𑀁 𑀅𑀤𑀸𑀲𑀺. 𑀢𑁂 𑀪𑀺𑀓𑁆𑀔𑀽 𑀓𑀸𑀮𑀫𑀓𑀁𑀲𑀼. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… 𑀓𑀺𑀁𑀘𑀺𑀢𑁆𑀢𑁄 𑀢𑁆𑀯𑀁 𑀪𑀺𑀓𑁆𑀔𑀽𑀢𑀺. 𑀦𑀸𑀳𑀁 𑀪𑀕𑀯𑀸 𑀚𑀸𑀦𑀸𑀫𑀻𑀢𑀺. 𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀅𑀚𑀸𑀦𑀦𑁆𑀢𑀲𑁆𑀲𑀸’’𑀢𑀺 (𑀧𑀸𑀭𑀸. 𑁧𑁮𑁧) 𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀯𑀺𑀬.

𑀪𑁂𑀲𑀚𑁆𑀚𑀯𑀢𑁆𑀣𑀼𑀲𑁆𑀫𑀺𑀁 𑀯𑀺𑀬𑀸𑀢𑀺 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀯𑀜𑁆𑀛𑀸 𑀇𑀢𑁆𑀣𑀻 𑀓𑀼𑀮𑀽𑀧𑀓𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 ‘‘𑀇𑀗𑁆𑀖𑀸𑀬𑁆𑀬 𑀪𑁂𑀲𑀚𑁆𑀚𑀁 𑀚𑀸𑀦𑀸𑀳𑀺, 𑀬𑁂𑀦𑀸𑀳𑀁 𑀯𑀺𑀚𑀸𑀬𑁂𑀬𑁆𑀬’𑀦𑁆𑀢𑀺. ‘𑀲𑀼𑀝𑁆𑀞𑀼 𑀪𑀕𑀺𑀦𑀻’𑀢𑀺 𑀢𑀲𑁆𑀲𑀸 𑀪𑁂𑀲𑀚𑁆𑀚𑀁 𑀅𑀤𑀸𑀲𑀺. 𑀲𑀸 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… 𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀧𑀸𑀭𑀸𑀚𑀺𑀓𑀲𑁆𑀲, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁧𑁮𑁭) 𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀯𑀺𑀬. 𑀇𑀥 𑀆𑀤𑀺𑀓𑀫𑁆𑀫𑀺𑀓𑀸 𑀅𑀜𑁆𑀜𑀫𑀜𑁆𑀜𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑀪𑀺𑀓𑁆𑀔𑀽, 𑀢𑁂𑀲𑀁 𑀅𑀦𑀸𑀧𑀢𑁆𑀢𑀺. 𑀅𑀯𑀲𑁂𑀲𑀸𑀦𑀁 𑀫𑀭𑀡𑀯𑀡𑁆𑀡𑀲𑀁𑀯𑀡𑁆𑀡𑀦𑀓𑀸𑀤𑀻𑀦𑀁 𑀆𑀧𑀢𑁆𑀢𑀺𑀬𑁂𑀯.

𑀅𑀣 𑀓𑀣𑀁 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺, 𑀦𑀦𑀼 𑀭𑀸𑀚𑀸𑀦𑁄 𑀘𑁄𑀭𑀁 𑀤𑀺𑀲𑁆𑀯𑀸 𑀳𑀲𑀫𑀸𑀦𑀸𑀧𑀺 ‘‘𑀕𑀘𑁆𑀙𑀣, 𑀦𑀁 𑀖𑀸𑀢𑁂𑀣𑀸’’𑀢𑀺 𑀯𑀤𑀦𑁆𑀢𑀻𑀢𑀺? 𑀲𑀘𑁆𑀘𑀁 𑀳𑀲𑀫𑀸𑀦𑀸 𑀯𑀤𑀦𑁆𑀢𑀺, 𑀲𑁄 𑀧𑀦 𑀳𑀸𑀲𑁄 𑀢𑁂𑀲𑀁 𑀅𑀜𑁆𑀜𑀯𑀺𑀲𑀬𑁄, 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸 𑀤𑀼𑀓𑁆𑀔𑀲𑀫𑁆𑀧𑀬𑀼𑀢𑁆𑀢𑀸𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 ‘‘𑀲𑀘𑁂𑀧𑀺 𑀳𑀺 𑀲𑀺𑀭𑀺𑀲𑀬𑀦𑀁 𑀆𑀭𑀼𑀴𑁆𑀳𑁄 𑀭𑀚𑁆𑀚𑀲𑀫𑁆𑀧𑀢𑁆𑀢𑀺𑀲𑀼𑀔𑀫𑀦𑀼𑀪𑀯𑀦𑁆𑀢𑁄 𑀭𑀸𑀚𑀸 ‘𑀘𑁄𑀭𑁄 𑀤𑁂𑀯 𑀆𑀦𑀻𑀢𑁄’𑀢𑀺 𑀯𑀼𑀢𑁆𑀢𑁂 ‘𑀕𑀘𑁆𑀙𑀣 𑀦𑀁 𑀫𑀸𑀭𑁂𑀣𑀸’𑀢𑀺 𑀳𑀲𑀫𑀸𑀦𑁄 𑀪𑀡𑀢𑀺, 𑀤𑁄𑀫𑀦𑀲𑁆𑀲𑀘𑀺𑀢𑁆𑀢𑁂𑀦𑁂𑀯 𑀪𑀡𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀔𑀯𑁄𑀓𑀺𑀡𑁆𑀡𑀢𑁆𑀢𑀸, 𑀧𑀦 𑀅𑀦𑀼𑀧𑁆𑀧𑀩𑀦𑁆𑀥𑀸𑀪𑀸𑀯𑀸 𑀘 𑀤𑀼𑀚𑁆𑀚𑀸𑀦𑀫𑁂𑀢𑀁 𑀧𑀼𑀣𑀼𑀚𑁆𑀚𑀦𑁂𑀳𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁭𑁯).

𑀢𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.