𑁭. 𑀕𑀩𑁆𑀪𑀺𑀦𑀻𑀯𑀕𑁆𑀕𑁄

𑁧-𑁨. 𑀕𑀩𑁆𑀪𑀺𑀦𑀻𑀆𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀞𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀣𑀦𑁂 𑀪𑀯𑀁 𑀣𑀜𑁆𑀜𑀁, 𑀔𑀻𑀭𑀁. 𑀬𑀁 𑀧𑀸𑀬𑁂𑀢𑀻𑀢𑀺 𑀬𑀁 𑀤𑀸𑀭𑀓𑀁 𑀧𑀸𑀬𑁂𑀢𑀺.

𑀕𑀩𑁆𑀪𑀺𑀦𑀻𑀆𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀞𑀫𑀲𑀺𑀓𑁆𑀔𑀫𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀅𑀯𑀻𑀢𑀺𑀓𑁆𑀓𑀫𑁆𑀫 𑀲𑀫𑀸𑀤𑀸𑀦𑀁 𑀲𑀫𑀸𑀤𑀺𑀬𑀸𑀫𑀺…𑀧𑁂… 𑀯𑀺𑀓𑀸𑀮𑀪𑁄𑀚𑀦𑀸 𑀯𑁂𑀭𑀫𑀡𑀺𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀅𑀯𑀻𑀢𑀺𑀓𑁆𑀓𑀫𑁆𑀫 𑀲𑀫𑀸𑀤𑀸𑀦𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 (𑀧𑀸𑀘𑀺. 𑁧𑁦𑁭𑁯) 𑀧𑀤𑀪𑀸𑀚𑀦𑀲𑀫𑀻𑀧𑁂 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑀬𑁂𑀦. 𑀇𑀫𑀸 𑀧𑀦 𑀙 𑀲𑀺𑀓𑁆𑀔𑀸𑀬𑁄 𑀲𑀝𑁆𑀞𑀺𑀯𑀲𑁆𑀲𑀸𑀬𑀧𑀺 𑀧𑀩𑁆𑀩𑀚𑀺𑀢𑀸𑀬 𑀤𑀸𑀢𑀩𑁆𑀩𑀸𑀬𑁂𑀯, 𑀦 𑀏𑀢𑀸𑀲𑀼 𑀅𑀲𑀺𑀓𑁆𑀔𑀺𑀢𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀸.

𑀧𑀞𑀫𑀲𑀺𑀓𑁆𑀔𑀫𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪-𑁫. 𑀤𑀼𑀢𑀺𑀬𑀲𑀺𑀓𑁆𑀔𑀫𑀸𑀦𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀸 𑀉𑀧𑀲𑀫𑁆𑀧𑀤𑀸𑀲𑀫𑁆𑀫𑀼𑀢𑀺 𑀦 𑀤𑀺𑀦𑁆𑀦𑀸 𑀳𑁄𑀢𑀻𑀢𑀺 𑀧𑀤𑀪𑀸𑀚𑀦𑀲𑀫𑀻𑀧𑁂 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀯𑀼𑀢𑁆𑀢𑀸 𑀉𑀧𑀲𑀫𑁆𑀧𑀤𑀸𑀲𑀫𑁆𑀫𑀼𑀢𑀺 𑀜𑀢𑁆𑀢𑀺𑀤𑀼𑀢𑀺𑀬𑀸𑀬 𑀓𑀫𑁆𑀫𑀯𑀸𑀘𑀸𑀬 𑀦 𑀤𑀺𑀦𑁆𑀦𑀸 𑀳𑁄𑀢𑀺.

𑀧𑀜𑁆𑀘𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀤𑀼𑀢𑀺𑀬𑀲𑀺𑀓𑁆𑀔𑀫𑀸𑀦𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬-𑁧𑁦. 𑀤𑀼𑀢𑀺𑀬𑀕𑀺𑀳𑀺𑀕𑀢𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀲𑀯𑀲𑁆𑀲𑀸𑀬 𑀕𑀺𑀳𑀺𑀕𑀢𑀸𑀬 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀤𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀁 𑀉𑀧𑀲𑀫𑁆𑀧𑀸𑀤𑁂𑀢𑀼𑀁 𑀯𑀝𑁆𑀝𑀢𑀺.

𑀲𑀢𑁆𑀢𑀫𑀅𑀝𑁆𑀞𑀫𑀦𑀯𑀫𑀤𑀲𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀤𑀼𑀢𑀺𑀬𑀕𑀺𑀳𑀺𑀕𑀢𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀕𑀩𑁆𑀪𑀺𑀦𑀻𑀯𑀕𑁆𑀕𑁄 𑀲𑀢𑁆𑀢𑀫𑁄.