𑁮. 𑀓𑀼𑀫𑀸𑀭𑀺𑀪𑀽𑀢𑀯𑀕𑁆𑀕𑁄

𑁧-𑁫. 𑀧𑀞𑀫𑀓𑀼𑀫𑀸𑀭𑀺𑀪𑀽𑀢𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀩𑁆𑀩𑀧𑀞𑀫𑀸 𑀤𑁆𑀯𑁂 𑀫𑀳𑀸𑀲𑀺𑀓𑁆𑀔𑀫𑀸𑀦𑀸𑀢𑀺 𑀕𑀩𑁆𑀪𑀺𑀦𑀺𑀯𑀕𑁆𑀕𑁂 𑀯𑀼𑀢𑁆𑀢𑀸 𑀤𑁆𑀯𑁂 𑀲𑀺𑀓𑁆𑀔𑀫𑀸𑀦𑀸. ‘‘𑀲𑀺𑀓𑁆𑀔𑀫𑀸𑀦𑀸’’𑀇𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑀸𑀢𑀺 𑀲𑀫𑁆𑀫𑀼𑀢𑀺𑀓𑀫𑁆𑀫𑀸𑀤𑀻𑀲𑀼 𑀏𑀯𑀁 𑀯𑀢𑁆𑀢𑀩𑁆𑀩𑀸. ‘‘𑀕𑀺𑀳𑀺𑀕𑀢𑀸’’𑀢𑀺 𑀯𑀸 ‘‘𑀓𑀼𑀫𑀸𑀭𑀺𑀪𑀽𑀢𑀸’’𑀢𑀺 𑀯𑀸 𑀦 𑀯𑀢𑁆𑀢𑀩𑁆𑀩𑀸𑀢𑀺 𑀲𑀘𑁂 𑀯𑀤𑀦𑁆𑀢𑀺, 𑀓𑀫𑁆𑀫𑀁 𑀓𑀼𑀧𑁆𑀧𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀘𑀢𑀼𑀢𑁆𑀣𑀧𑀜𑁆𑀘𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀧𑀞𑀫𑀓𑀼𑀫𑀸𑀭𑀺𑀪𑀽𑀢𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬-𑁮. 𑀔𑀻𑀬𑀦𑀥𑀫𑁆𑀫𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀯𑀼𑀝𑁆𑀞𑀸𑀧𑀦𑀲𑀫𑁆𑀫𑀼𑀢𑀺𑀬𑀸 𑀬𑀸𑀘𑀺𑀢𑀸𑀬𑀸𑀢𑀺 𑀉𑀧𑀲𑀫𑁆𑀧𑀤𑀸𑀲𑀫𑁆𑀫𑀼𑀢𑀺𑀬𑀸 𑀬𑀸𑀘𑀺𑀢𑀸𑀬.

𑀲𑀢𑁆𑀢𑀫𑀝𑁆𑀞𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀔𑀻𑀬𑀦𑀥𑀫𑁆𑀫𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀲𑁄𑀓𑀸𑀯𑀸𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀆𑀕𑀘𑁆𑀙𑀫𑀸𑀦𑀸𑀢𑀺 𑀆𑀕𑀘𑁆𑀙𑀦𑁆𑀢𑀻.

𑀲𑁄𑀓𑀸𑀯𑀸𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀅𑀦𑀦𑀼𑀜𑁆𑀜𑀸𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑁂𑀲𑀁 𑀅𑀢𑁆𑀣𑀺𑀪𑀸𑀯𑀁 𑀅𑀚𑀸𑀦𑀦𑁆𑀢𑀺𑀬𑀸𑀢𑀺 (𑀧𑀸𑀘𑀺. 𑀅𑀝𑁆𑀞. 𑁧𑁧𑁬𑁩) 𑀢𑁂𑀲𑀁 𑀫𑀸𑀢𑀸𑀤𑀻𑀦𑀁 𑀅𑀢𑁆𑀣𑀺𑀪𑀸𑀯𑀁 𑀅𑀚𑀸𑀦𑀦𑁆𑀢𑀺𑀬𑀸. 𑀅𑀦𑀦𑀼𑀜𑁆𑀜𑀸𑀢𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀬𑀁 𑀯𑀸𑀘𑀢𑁄, 𑀓𑀸𑀬𑀯𑀸𑀘𑀢𑁄, 𑀯𑀸𑀘𑀸𑀘𑀺𑀢𑁆𑀢𑀢𑁄, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀢𑀁 𑀅𑀦𑀦𑀼𑀜𑁆𑀜𑀸𑀢𑀲𑀫𑀼𑀝𑁆𑀞𑀸𑀦𑀁. 𑀓𑀣𑀁? 𑀅𑀩𑁆𑀪𑀸𑀦𑀓𑀫𑁆𑀫𑀸𑀤𑀻𑀲𑀼 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀔𑀡𑁆𑀟𑀲𑀻𑀫𑀸𑀬𑀁 𑀦𑀺𑀲𑀺𑀦𑁆𑀦𑀸 ‘‘𑀧𑀓𑁆𑀓𑁄𑀲𑀣 𑀲𑀺𑀓𑁆𑀔𑀫𑀸𑀦𑀁, 𑀇𑀥𑁂𑀯 𑀦𑀁 𑀉𑀧𑀲𑀫𑁆𑀧𑀸𑀤𑁂𑀲𑁆𑀲𑀸𑀫𑀸’’𑀢𑀺 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀏𑀯𑀁 𑀯𑀸𑀘𑀢𑁄 𑀲𑀫𑀼𑀝𑁆𑀞𑀸𑀢𑀺. ‘‘𑀉𑀧𑀲𑁆𑀲𑀬𑀢𑁄 𑀉𑀝𑁆𑀞𑀸𑀬 𑀉𑀧𑀲𑀫𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀔𑀡𑁆𑀟𑀲𑀻𑀫𑀁 𑀕𑀘𑁆𑀙𑀦𑁆𑀢𑀺𑀬𑀸 𑀓𑀸𑀬𑀯𑀸𑀘𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀧𑀡𑁆𑀡𑀢𑁆𑀢𑀺𑀁 𑀚𑀸𑀦𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀦𑁆𑀢𑀺𑀬𑀸 𑀯𑀸𑀘𑀸𑀘𑀺𑀢𑁆𑀢𑀢𑁄, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺. 𑀅𑀦𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑀦𑀢𑁄 𑀓𑀺𑀭𑀺𑀬𑀸𑀓𑀺𑀭𑀺𑀬𑀁.

𑀅𑀦𑀦𑀼𑀜𑁆𑀜𑀸𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀧𑀸𑀭𑀺𑀯𑀸𑀲𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀸𑀭𑀼𑀡𑀦𑁆𑀢𑀺 𑀧𑀸𑀧𑀁. 𑀧𑀢𑀺𑀫𑀸𑀦𑁂𑀦𑁆𑀢𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑀁.

𑀧𑀸𑀭𑀺𑀯𑀸𑀲𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀅𑀦𑀼𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀏𑀓𑀦𑁆𑀢𑀭𑀺𑀓𑀦𑁆𑀢𑀺 𑀏𑀓𑁂𑀦 𑀯𑀲𑁆𑀲𑁂𑀦 𑀅𑀦𑁆𑀢𑀭𑀺𑀓𑀁 𑀓𑀢𑁆𑀯𑀸.

𑀅𑀦𑀼𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀏𑀓𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀫𑀸𑀢𑀺𑀓𑀸𑀬𑀁 𑀏𑀓𑀁 𑀯𑀲𑁆𑀲𑀁 𑀤𑁆𑀯𑁂𑀢𑀺 𑀏𑀓𑀦𑁆𑀢𑀭𑀺𑀓𑁂 𑀏𑀓𑁂𑀓𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 𑀤𑁆𑀯𑁂. 𑀏𑀓𑀦𑁆𑀢𑀭𑀺𑀓𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸𑀢𑀺 𑀇𑀫𑀲𑁆𑀫𑀺𑀁 𑀯𑀲𑁆𑀲𑁂 𑀏𑀓𑀁, 𑀧𑀼𑀦 𑀏𑀓𑀦𑁆𑀢𑀭𑀺𑀓𑀁 𑀏𑀓𑀦𑁆𑀢𑀺 𑀤𑁆𑀯𑁂 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺.

𑀏𑀓𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀼𑀫𑀸𑀭𑀺𑀪𑀽𑀢𑀯𑀕𑁆𑀕𑁄 𑀅𑀝𑁆𑀞𑀫𑁄.