𑀧𑀸𑀘𑀺𑀢𑁆𑀢𑀺𑀬𑀓𑀡𑁆𑀟𑀁

𑁧. 𑀮𑀲𑀼𑀡𑀯𑀕𑁆𑀕𑁄

𑁧. 𑀮𑀲𑀼𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀮𑀲𑀼𑀡’’𑀦𑁆𑀢𑀺 𑀓𑀺𑀜𑁆𑀘𑀸𑀧𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀫𑀕𑀥𑁂𑀲𑀼 𑀚𑀸𑀢𑀁 𑀮𑀲𑀼𑀡𑀫𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀁, 𑀢𑀫𑁆𑀧𑀺 𑀪𑀡𑁆𑀟𑀺𑀓𑀮𑀲𑀼𑀡𑀫𑁂𑀯𑀸𑀢𑀺 𑀆𑀳 𑀫𑀕𑀥𑀭𑀝𑁆𑀞𑁂 𑀚𑀸𑀢’’𑀦𑁆𑀢𑀺𑀆𑀤𑀺.

𑀪𑀡𑁆𑀟𑀺𑀓𑀮𑀲𑀼𑀡𑀦𑁆𑀢𑀺 𑀧𑁄𑀝𑁆𑀝𑀮𑀺𑀓𑀮𑀲𑀼𑀡𑀫𑁂𑀯, 𑀲𑀫𑁆𑀧𑀼𑀡𑁆𑀡𑀫𑀺𑀜𑁆𑀚𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀦𑀸𑀳 ‘‘𑀦 𑀏𑀓𑀤𑁆𑀯𑀺𑀢𑀺𑀫𑀺𑀜𑁆𑀚𑀓’’𑀦𑁆𑀢𑀺. 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂𑀢𑀺 (𑀧𑀸𑀘𑀺. 𑀅𑀝𑁆𑀞. 𑁭𑁯𑁫) 𑀏𑀢𑁆𑀣 𑀲𑀘𑁂 𑀤𑁆𑀯𑁂 𑀢𑀬𑁄 𑀪𑀡𑁆𑀟𑀺𑀓𑁂 𑀏𑀓𑀢𑁄𑀬𑁂𑀯 𑀲𑀗𑁆𑀔𑀸𑀤𑀺𑀢𑁆𑀯𑀸 𑀅𑀚𑁆𑀛𑁄𑀳𑀭𑀢𑀺, 𑀏𑀓𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀪𑀜𑁆𑀚𑀺𑀢𑁆𑀯𑀸 𑀏𑀓𑁂𑀓𑀫𑀺𑀜𑁆𑀚𑀓𑀁 𑀔𑀸𑀤𑀦𑁆𑀢𑀺𑀬𑀸 𑀧𑀦 𑀧𑀬𑁄𑀕𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀸𑀦𑀺.

𑀧𑀮𑀡𑁆𑀟𑀼𑀓𑀸𑀤𑀻𑀦𑀁 𑀯𑀡𑁆𑀡𑁂𑀦 𑀯𑀸 𑀫𑀺𑀜𑁆𑀚𑀸𑀬 𑀯𑀸 𑀦𑀸𑀦𑀸𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀯𑀡𑁆𑀡𑁂𑀦 𑀢𑀸𑀯 𑀧𑀮𑀡𑁆𑀟𑀼𑀓𑁄 𑀦𑀸𑀫 𑀧𑀡𑁆𑀟𑀼𑀯𑀡𑁆𑀡𑁄 𑀳𑁄𑀢𑀺, 𑀪𑀜𑁆𑀚𑀦𑀓𑁄 𑀮𑁄𑀳𑀺𑀢𑀯𑀡𑁆𑀡𑁄, 𑀳𑀭𑀺𑀢𑀓𑁄 𑀳𑀭𑀺𑀢𑀧𑀡𑁆𑀡𑀯𑀡𑁆𑀡𑁄. 𑀫𑀺𑀜𑁆𑀚𑀸𑀬 𑀧𑀦 𑀧𑀮𑀡𑁆𑀟𑀼𑀓𑀲𑁆𑀲 𑀏𑀓𑀸 𑀫𑀺𑀜𑁆𑀚𑀸 𑀳𑁄𑀢𑀺, 𑀪𑀜𑁆𑀚𑀦𑀓𑀲𑁆𑀲 𑀤𑁆𑀯𑁂, 𑀳𑀭𑀺𑀢𑀓𑀲𑁆𑀲 𑀢𑀺𑀲𑁆𑀲𑁄. 𑀘𑀸𑀧𑀮𑀲𑀼𑀡𑁄 𑀅𑀫𑀺𑀜𑁆𑀚𑀓𑁄. 𑀅𑀗𑁆𑀓𑀼𑀭𑀫𑀢𑁆𑀢𑀫𑁂𑀯 𑀳𑀺 𑀢𑀲𑁆𑀲 𑀳𑁄𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 𑀧𑀦 ‘‘𑀧𑀮𑀡𑁆𑀟𑀼𑀓𑀲𑁆𑀲 𑀢𑀻𑀡𑀺 𑀫𑀺𑀜𑁆𑀚𑀸𑀦𑀺, 𑀪𑀜𑁆𑀚𑀦𑀓𑀲𑁆𑀲 𑀤𑁆𑀯𑁂, 𑀳𑀭𑀺𑀢𑀓𑀲𑁆𑀲 𑀏𑀓’’𑀦𑁆𑀢𑀺 (𑀧𑀸𑀘𑀺. 𑀅𑀝𑁆𑀞. 𑁭𑁯𑁭) 𑀯𑀼𑀢𑁆𑀢𑀁. 𑀏𑀢𑁂 𑀧𑀮𑀡𑁆𑀟𑀼𑀓𑀸𑀤𑀬𑁄 𑀲𑀪𑀸𑀯𑁂𑀦𑁂𑀯 𑀯𑀝𑁆𑀝𑀦𑁆𑀢𑀺. 𑀲𑀽𑀧𑀲𑀫𑁆𑀧𑀸𑀓𑀸𑀤𑀻𑀲𑀼 𑀧𑀦 𑀫𑀸𑀕𑀥𑀓𑀫𑁆𑀧𑀺 𑀯𑀝𑁆𑀝𑀢𑀺. 𑀢𑀜𑁆𑀳𑀺 𑀧𑀘𑁆𑀘𑀫𑀸𑀦𑁂𑀲𑀼 𑀫𑀼𑀕𑁆𑀕𑀲𑀽𑀧𑀸𑀤𑀻𑀲𑀼 𑀯𑀸 𑀫𑀘𑁆𑀙𑀫𑀁𑀲𑀯𑀺𑀓𑀢𑀺𑀬𑀸 𑀯𑀸 𑀢𑁂𑀮𑁂 𑀯𑀸 𑀩𑀤𑀭𑀲𑀸𑀴𑀯𑀸𑀤𑀻𑀲𑀼 𑀯𑀸 𑀅𑀫𑁆𑀩𑀺𑀮𑀲𑀸𑀓𑀸𑀤𑀻𑀲𑀼 𑀯𑀸 𑀉𑀢𑁆𑀢𑀭𑀺𑀪𑀗𑁆𑀕𑁂𑀲𑀼 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀦𑁆𑀢𑀫𑀲𑁄 𑀬𑀸𑀕𑀼𑀪𑀢𑁆𑀢𑁂𑀧𑀺 𑀧𑀓𑁆𑀔𑀺𑀢𑁆𑀢𑀁 𑀯𑀝𑁆𑀝𑀢𑀺. 𑀩𑀤𑀭𑀲𑀸𑀴𑀯𑀁 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁭𑁯𑁩-𑁭𑁯𑁭) 𑀦𑀸𑀫 𑀩𑀤𑀭𑀨𑀮𑀸𑀦𑀺 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀘𑀼𑀡𑁆𑀡𑁂𑀢𑁆𑀯𑀸 𑀓𑀢𑁆𑀢𑀩𑁆𑀩𑀸 𑀔𑀸𑀤𑀦𑀻𑀬𑀯𑀺𑀓𑀢𑀺.

𑀮𑀲𑀼𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀫𑁆𑀩𑀸𑀥𑀮𑁄𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀧𑀝𑀺𑀘𑁆𑀙𑀦𑁆𑀦𑁄𑀓𑀸𑀲𑁂’’𑀢𑀺 𑀏𑀢𑀲𑁆𑀲 𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀁 ‘‘𑀉𑀧𑀓𑀘𑁆𑀙𑀓𑁂𑀲𑀼 𑀘 𑀫𑀼𑀢𑁆𑀢𑀓𑀭𑀡𑁂 𑀘𑀸𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁.

𑀆𑀩𑀸𑀥𑀧𑀘𑁆𑀘𑀬𑀸𑀢𑀺 𑀓𑀡𑁆𑀟𑀼𑀓𑀘𑁆𑀙𑀼𑀆𑀤𑀺𑀆𑀩𑀸𑀥𑀧𑀘𑁆𑀘𑀬𑀸 𑀲𑀁𑀳𑀭𑀸𑀧𑁂𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺. ‘‘𑀪𑀺𑀓𑁆𑀔𑀼𑀲𑁆𑀲 𑀏𑀢𑁆𑀣 𑀘 𑀮𑀲𑀼𑀡𑁂 𑀘 𑀤𑀼𑀓𑁆𑀓𑀝’’𑀦𑁆𑀢𑀺 (𑀯𑀚𑀺𑀭. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁮𑁦𑁦) 𑀧𑁄𑀭𑀸𑀡𑀸.

𑀲𑀫𑁆𑀩𑀸𑀥𑀮𑁄𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀮𑀖𑀸𑀢𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀮𑀖𑀸𑀢𑀓𑁂𑀢𑀺 𑀫𑀢𑁆𑀣𑀓𑁂 𑀧𑀳𑀸𑀭𑀤𑀸𑀦𑁂, 𑀢𑀜𑁆𑀘 𑀔𑁄 𑀢𑀮𑀁 ‘‘𑀫𑀼𑀢𑁆𑀢𑀓𑀭𑀡𑁂 𑀧𑀳𑀸𑀭𑀁 𑀤𑁂𑀢𑀻’’𑀢𑀺 (𑀧𑀸𑀘𑀺. 𑁮𑁦𑁪) 𑀧𑀤𑀪𑀸𑀚𑀦𑀺𑀬𑀁𑀯𑀼𑀢𑁆𑀢𑀢𑁆𑀢𑀸 ‘‘𑀫𑀼𑀢𑁆𑀢𑀓𑀭𑀡𑀲𑁆𑀲𑀸’’𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀫𑀼𑀢𑁆𑀢𑀓𑀭𑀡𑀲𑁆𑀲 𑀢𑀮𑀖𑀸𑀢𑀦𑁂’’𑀢𑀺. 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀸𑀡𑀢𑁆𑀢𑀺𑀓𑀦𑁆𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀅𑀜𑁆𑀜𑀁 𑀆𑀡𑀸𑀧𑁂𑀦𑁆𑀢𑀺𑀬𑀸 𑀲𑀸𑀡𑀢𑁆𑀢𑀺𑀓𑀁.

𑀢𑀮𑀖𑀸𑀢𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀚𑀢𑀼𑀫𑀝𑁆𑀞𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀯𑀢𑁆𑀣𑀼𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 ‘‘𑀚𑀢𑀼𑀫𑀝𑁆𑀞𑀓𑁂’’𑀢𑀺 𑀏𑀢𑀁 𑀦𑀺𑀤𑀸𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀲𑁆𑀲 𑀯𑀢𑁆𑀣𑀼𑀦𑁄 𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀬𑀁 𑀓𑀺𑀜𑁆𑀘𑀺 𑀧𑀦 𑀤𑀡𑁆𑀟𑀓𑀁 𑀧𑀯𑁂𑀲𑁂𑀦𑁆𑀢𑀺𑀬𑀸 𑀆𑀧𑀢𑁆𑀢𑀺𑀬𑁂𑀯. 𑀢𑁂𑀦𑀸𑀳 ‘‘𑀓𑀸𑀫𑀭𑀸𑀕𑁂𑀦 𑀧𑀦𑀸’’𑀢𑀺𑀆𑀤𑀺.

𑀚𑀢𑀼𑀫𑀝𑁆𑀞𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀉𑀤𑀓𑀲𑀼𑀤𑁆𑀥𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀆𑀤𑀸𑀢𑀩𑁆𑀩𑀦𑁆𑀢𑀺 𑀧𑀯𑁂𑀲𑁂𑀢𑀩𑁆𑀩𑀁. 𑀅𑀕𑁆𑀕𑀧𑀩𑁆𑀩𑀦𑁆𑀢𑀺 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀕𑁆𑀕𑀧𑀩𑁆𑀩𑀁. 𑀢𑀢𑀺𑀬𑀁 𑀧𑀩𑁆𑀩𑀁 𑀧𑀯𑁂𑀲𑁂𑀢𑀻𑀢𑀺 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀢𑀢𑀺𑀬𑀁 𑀧𑀩𑁆𑀩𑀁 𑀧𑀯𑁂𑀲𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀧𑀸𑀘𑀺. 𑀅𑀝𑁆𑀞. 𑁮𑁧𑁨) ‘‘𑀕𑀫𑁆𑀪𑀻𑀭𑀢𑁄 𑀤𑁆𑀯𑀺𑀦𑁆𑀦𑀁 𑀧𑀩𑁆𑀩𑀸𑀦𑀁 𑀉𑀧𑀭𑀺 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀧𑀯𑁂𑀲𑁂𑀦𑁆𑀢𑀺𑀬𑀸 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑀅𑀢𑀺𑀕𑀫𑁆𑀪𑀻𑀭𑀁 𑀉𑀤𑀓𑀲𑀼𑀤𑁆𑀥𑀺𑀓𑀁 𑀆𑀤𑀺𑀬𑀦𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀅𑀢𑀺𑀅𑀦𑁆𑀢𑁄 𑀧𑀯𑁂𑀲𑁂𑀢𑁆𑀯𑀸 𑀉𑀤𑀓𑀥𑁄𑀯𑀦𑀓𑀭𑀡𑀯𑀢𑁆𑀣𑀼𑀲𑁆𑀫𑀺𑀁. 𑀉𑀤𑀓𑀲𑀼𑀤𑁆𑀥𑀺𑀧𑀘𑁆𑀘𑀬𑁂𑀦 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁮𑁧𑁨) 𑀧𑀦 𑀲𑀢𑀺𑀧𑀺 𑀨𑀲𑁆𑀲𑀲𑁆𑀲𑀸𑀤𑀺𑀬𑀦𑁂 𑀬𑀣𑀸𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑁂 𑀅𑀦𑀸𑀧𑀢𑁆𑀢𑀺.

𑀉𑀤𑀓𑀲𑀼𑀤𑁆𑀥𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀉𑀧𑀢𑀺𑀝𑁆𑀞𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀓𑁆𑀓𑀸𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑁂𑀦𑀸𑀢𑀺 𑀢𑀓𑁆𑀓𑀤𑀥𑀺𑀫𑀢𑁆𑀣𑀼𑀭𑀲𑀔𑀻𑀭𑀸𑀤𑀻𑀲𑀼 𑀅𑀜𑁆𑀜𑀢𑀭𑁂𑀦. 𑀬𑀸𑀬 𑀓𑀸𑀬𑀘𑀺 𑀩𑀻𑀚𑀦𑀺𑀬𑀸𑀢𑀺 𑀅𑀦𑁆𑀢𑀫𑀲𑁄 𑀘𑀻𑀯𑀭𑀓𑀡𑁆𑀡𑀁 𑀉𑀧𑀸𑀤𑀸𑀬 𑀬𑀸𑀬 𑀓𑀸𑀬𑀘𑀺 𑀩𑀻𑀚𑀦𑀺𑀬𑀸.

𑀇𑀫𑀁 𑀧𑀺𑀯𑀣𑀸𑀢𑀺 𑀇𑀫𑀁 𑀧𑀸𑀦𑀻𑀬𑀁 𑀯𑀸 𑀲𑀽𑀧𑀸𑀤𑀺𑀁 𑀯𑀸 𑀧𑀺𑀯𑀣. 𑀇𑀫𑀺𑀦𑀸 𑀩𑀻𑀚𑀣𑀸𑀢𑀺 𑀇𑀫𑀺𑀦𑀸 𑀢𑀸𑀮𑀯𑀡𑁆𑀝𑁂𑀦 𑀩𑀻𑀚𑀣. 𑀤𑀸𑀧𑁂𑀦𑁆𑀢𑀺𑀬𑀸𑀢𑀺 𑀅𑀜𑁆𑀜𑁂𑀦 𑀉𑀪𑀬𑀫𑁆𑀧𑀺 𑀤𑀸𑀧𑁂𑀦𑁆𑀢𑀺𑀬𑀸.

𑀉𑀧𑀢𑀺𑀝𑁆𑀞𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀆𑀫𑀓𑀥𑀜𑁆𑀜𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀯𑀺𑀜𑁆𑀜𑀢𑁆𑀢𑀺 𑀘𑁂𑀯 𑀪𑁄𑀚𑀦𑀜𑁆𑀘 𑀧𑀫𑀸𑀡𑀁, 𑀢𑀲𑁆𑀫𑀸. 𑀦 𑀓𑁂𑀯𑀮𑀜𑁆𑀘𑁂𑀢𑁆𑀣 𑀧𑀝𑀺𑀕𑁆𑀕𑀳𑀡𑁂𑀬𑁂𑀯 𑀤𑀼𑀓𑁆𑀓𑀝𑀁 𑀳𑁄𑀢𑀺, 𑀧𑀝𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀦 𑀅𑀭𑀜𑁆𑀜𑀢𑁄 𑀆𑀳𑀭𑀡𑁂𑀧𑀺 𑀲𑀼𑀓𑁆𑀔𑀸𑀧𑀦𑁂𑀧𑀺 𑀯𑀤𑁆𑀤𑀮𑀺𑀤𑀺𑀯𑀲𑁂 𑀪𑀚𑁆𑀚𑀦𑀢𑁆𑀣𑀸𑀬 𑀉𑀤𑁆𑀥𑀦𑀲𑀚𑁆𑀚𑀦𑁂𑀧𑀺 𑀓𑀧𑀮𑁆𑀮𑀲𑀚𑁆𑀚𑀦𑁂𑀧𑀺 𑀤𑀩𑁆𑀩𑀺𑀲𑀚𑁆𑀚𑀦𑁂𑀧𑀺 𑀤𑀸𑀭𑀽𑀦𑀺 𑀆𑀤𑀸𑀬 𑀅𑀕𑁆𑀕𑀺𑀓𑀭𑀡𑁂𑀧𑀺 𑀓𑀧𑀮𑁆𑀮𑀫𑁆𑀳𑀺 𑀥𑀜𑁆𑀜𑀧𑀓𑁆𑀔𑀺𑀧𑀦𑁂𑀧𑀺 𑀤𑀩𑁆𑀩𑀺𑀬𑀸 𑀲𑀗𑁆𑀖𑀝𑁆𑀝𑀦𑁂𑀲𑀼𑀧𑀺 𑀓𑁄𑀝𑁆𑀝𑀦𑀢𑁆𑀣𑀁 𑀉𑀤𑀼𑀓𑁆𑀔𑀮𑀫𑀼𑀲𑀮𑀸𑀤𑀺𑀲𑀚𑁆𑀚𑀦𑁂𑀲𑀼𑀧𑀺 𑀓𑁄𑀝𑁆𑀝𑀦𑀧𑀧𑁆𑀨𑁄𑀝𑀦𑀥𑁄𑀯𑀦𑀸𑀤𑀻𑀲𑀼𑀧𑀺 𑀬𑀸𑀯 𑀫𑀼𑀔𑁂 𑀞𑀧𑁂𑀢𑁆𑀯𑀸 𑀅𑀚𑁆𑀛𑁄𑀳𑀭𑀡𑀢𑁆𑀣𑀁 𑀤𑀦𑁆𑀢𑁂𑀳𑀺 𑀲𑀗𑁆𑀔𑀸𑀤𑀢𑀺, 𑀢𑀸𑀯 𑀲𑀩𑁆𑀩𑀧𑁆𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀸𑀦𑀻𑀢𑀺 𑀆𑀳 ‘‘𑀧𑀝𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀤𑀦𑁆𑀢𑁂𑀳𑀺 𑀲𑀁𑀔𑀸𑀤𑀦𑀁, 𑀢𑀸𑀯 𑀧𑀼𑀩𑁆𑀩𑀧𑁆𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀸𑀦𑀻’’𑀢𑀺.

𑀆𑀫𑀓𑀥𑀜𑁆𑀜𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀧𑀞𑀫𑀉𑀘𑁆𑀘𑀸𑀭𑀙𑀟𑁆𑀟𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀺𑀭𑁄𑀓𑀼𑀝𑁆𑀝𑁂𑀢𑀺 𑀖𑀭𑀓𑀼𑀝𑁆𑀝𑀲𑁆𑀲 𑀧𑀭𑀪𑀸𑀕𑁂. 𑀢𑀺𑀭𑁄𑀧𑀸𑀓𑀸𑀭𑁂𑀢𑀺 𑀧𑀭𑀺𑀓𑁆𑀔𑁂𑀧𑀧𑀸𑀓𑀸𑀭𑀲𑁆𑀲 𑀢𑀺𑀭𑁄𑀪𑀸𑀕𑁂, 𑀢𑁂 𑀘 𑀔𑁄 𑀓𑀼𑀝𑁆𑀝𑀧𑀸𑀓𑀸𑀭𑀸 𑀇𑀝𑁆𑀞𑀓𑀲𑀺𑀮𑀤𑀸𑀭𑀽𑀦𑀁 𑀯𑀲𑁂𑀦 𑀢𑀺𑀧𑁆𑀧𑀓𑀸𑀭𑀸𑀢𑀺 𑀆𑀳 ‘‘𑀬𑀲𑁆𑀲 𑀓𑀲𑁆𑀲𑀘𑀺 𑀓𑀼𑀝𑁆𑀝𑀲𑁆𑀲 𑀯𑀸 𑀧𑀸𑀓𑀸𑀭𑀲𑁆𑀲 𑀯𑀸 𑀧𑀭𑀢𑁄’’𑀢𑀺. 𑀲𑀩𑁆𑀩𑀸𑀦𑀺𑀧𑁂𑀢𑀸𑀦𑀺 𑀏𑀓𑀢𑁄 𑀙𑀟𑁆𑀟𑁂𑀦𑁆𑀢𑀺𑀬𑀸𑀢𑀺 𑀏𑀢𑀸𑀦𑀺 𑀘𑀢𑁆𑀢𑀸𑀭𑀺𑀧𑀺 𑀯𑀢𑁆𑀣𑀽𑀦𑀺 𑀏𑀓𑀢𑁄 𑀙𑀟𑁆𑀟𑁂𑀦𑁆𑀢𑀺𑀬𑀸. 𑀧𑀸𑀝𑁂𑀓𑁆𑀓𑀁 𑀧𑀦 𑀙𑀟𑁆𑀟𑁂𑀦𑁆𑀢𑀺𑀬𑀸 𑀯𑀢𑁆𑀣𑀼𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄. 𑀆𑀡𑀢𑁆𑀢𑀺𑀬𑀫𑁆𑀧𑀺 𑀏𑀲𑁂𑀯 𑀦𑀬𑁄.

𑀪𑀺𑀓𑁆𑀔𑀼𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀪𑀺𑀓𑁆𑀔𑀼𑀲𑁆𑀲 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀁.

𑀧𑀞𑀫𑀉𑀘𑁆𑀘𑀸𑀭𑀙𑀟𑁆𑀟𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀤𑀼𑀢𑀺𑀬𑀉𑀘𑁆𑀘𑀸𑀭𑀙𑀟𑁆𑀟𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀪𑀺𑀓𑁆𑀔𑀼𑀦𑀺𑀬𑀸𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀪𑀺𑀓𑁆𑀔𑀼𑀁 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀅𑀦𑀺𑀓𑁆𑀔𑀺𑀢𑁆𑀢𑀩𑀻𑀚𑁂𑀲𑀼 (𑀧𑀸𑀘𑀺. 𑀅𑀝𑁆𑀞. 𑁮𑁩𑁦) 𑀧𑀦 𑀔𑁂𑀢𑁆𑀢𑁂𑀲𑀼 𑀓𑁄𑀡𑀸𑀤𑀻𑀲𑀼 𑀯𑀸 𑀅𑀲𑀜𑁆𑀚𑀸𑀢𑀭𑁄𑀧𑀺𑀫𑁂𑀲𑀼 𑀔𑁂𑀢𑁆𑀢𑀫𑀭𑀺𑀬𑀸𑀤𑀸𑀤𑀻𑀲𑀼 𑀯𑀸 𑀙𑀟𑁆𑀟𑁂𑀢𑀼𑀁 𑀯𑀝𑁆𑀝𑀢𑀺. 𑀫𑀦𑀼𑀲𑁆𑀲𑀸𑀦𑀁 𑀓𑀘𑀯𑀭𑀙𑀟𑁆𑀟𑀦𑀝𑁆𑀞𑀸𑀦𑁂𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀙𑀟𑁆𑀟𑀺𑀢𑀔𑁂𑀢𑁆𑀢𑁂𑀢𑀺 𑀫𑀦𑀼𑀲𑁆𑀲𑁂𑀲𑀼 𑀲𑀲𑁆𑀲𑀁 𑀉𑀤𑁆𑀥𑀭𑀺𑀢𑁆𑀯𑀸 𑀕𑀢𑁂𑀲𑀼 𑀙𑀟𑁆𑀟𑀺𑀢𑀔𑁂𑀢𑁆𑀢𑀁 𑀦𑀸𑀫 𑀳𑁄𑀢𑀺, 𑀢𑀢𑁆𑀣 𑀯𑀝𑁆𑀝𑀢𑀺. 𑀬𑀢𑁆𑀣 𑀧𑀦 ‘‘𑀮𑀸𑀬𑀺𑀢𑀫𑁆𑀧𑀺 𑀧𑀼𑀩𑁆𑀩𑀡𑁆𑀡𑀸𑀤𑀺 𑀧𑀼𑀦 𑀉𑀝𑁆𑀞𑀳𑀺𑀲𑁆𑀲𑀢𑀻’’𑀢𑀺 𑀭𑀓𑁆𑀔𑀦𑁆𑀢𑀺, 𑀢𑀢𑁆𑀣 𑀬𑀣𑀸𑀯𑀢𑁆𑀣𑀼𑀓𑀫𑁂𑀯. 𑀲𑀸𑀫𑀺𑀓𑁂 𑀅𑀧𑀮𑁄𑀓𑁂𑀢𑁆𑀯𑀸𑀢𑀺 𑀏𑀢𑁆𑀣 𑀔𑁂𑀢𑁆𑀢𑀧𑀸𑀮𑀓𑀸, 𑀆𑀭𑀸𑀫𑀸𑀤𑀺𑀕𑁄𑀧𑀓𑀸 𑀘 𑀲𑀸𑀫𑀺𑀓𑀸𑀯. 𑀇𑀫𑀺𑀦𑀸 𑀘 𑀲𑀗𑁆𑀖𑀲𑀦𑁆𑀢𑀓𑁂 𑀪𑀺𑀓𑁆𑀔𑀼𑀲𑁆𑀲 𑀙𑀟𑁆𑀟𑁂𑀢𑀼𑀁 𑀯𑀝𑁆𑀝𑀢𑀺 𑀲𑀗𑁆𑀖𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸, 𑀦 𑀪𑀺𑀓𑁆𑀔𑀼𑀦𑀻𑀦𑀁. 𑀪𑀺𑀓𑁆𑀔𑀼𑀦𑀻𑀦𑀁 𑀧𑀦 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂 𑀪𑀺𑀓𑁆𑀔𑀼𑀲𑀦𑁆𑀢𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀸𑀭𑀼𑀧𑁆𑀧𑀯𑀲𑁂𑀦 𑀓𑀸𑀢𑀩𑁆𑀩𑀁.

𑀤𑀼𑀢𑀺𑀬𑀉𑀘𑁆𑀘𑀸𑀭𑀙𑀟𑁆𑀟𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀦𑀘𑁆𑀘𑀕𑀻𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀦𑀘𑁆𑀘𑀦𑁆𑀢𑀺 𑀦𑀝𑀸𑀤𑀬𑁄 𑀯𑀸 𑀦𑀘𑁆𑀘𑀦𑁆𑀢𑀼, 𑀲𑁄𑀡𑁆𑀟𑀸 𑀯𑀸 𑀅𑀦𑁆𑀢𑀫𑀲𑁄 𑀫𑁄𑀭𑀲𑀼𑀯𑀫𑀓𑁆𑀓𑀝𑀸𑀤𑀬𑁄𑀧𑀺, 𑀲𑀩𑁆𑀩𑀫𑁂𑀢𑀁 𑀦𑀘𑁆𑀘𑀫𑁂𑀯. 𑀢𑁂𑀦𑀸𑀳 ‘‘𑀦𑀘𑁆𑀘𑀦𑁆𑀢𑀺 𑀅𑀦𑁆𑀢𑀫𑀲𑁄 𑀫𑁄𑀭𑀦𑀘𑁆𑀘𑀫𑁆𑀧𑀻’’𑀢𑀺. 𑀕𑀻𑀢𑀦𑁆𑀢𑀺 𑀦𑀝𑀸𑀤𑀻𑀦𑀁 𑀯𑀸 𑀕𑀻𑀢𑀁 𑀳𑁄𑀢𑀼, 𑀅𑀭𑀺𑀬𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀭𑀢𑀦𑀢𑁆𑀢𑀬𑀕𑀼𑀡𑀽𑀧𑀲𑀁𑀳𑀺𑀢𑀁 𑀲𑀸𑀥𑀼𑀓𑀻𑀴𑀺𑀢𑀕𑀻𑀢𑀁 𑀯𑀸, 𑀅𑀦𑁆𑀢𑀫𑀲𑁄 ‘‘𑀤𑀦𑁆𑀢𑀕𑀻𑀢𑀫𑁆𑀧𑀺 𑀕𑀸𑀬𑀺𑀲𑁆𑀲𑀸𑀫𑀸’’𑀢𑀺 𑀧𑀼𑀩𑁆𑀩𑀪𑀸𑀕𑁂 𑀑𑀓𑀽𑀚𑀦𑁆𑀢𑀸 𑀓𑀭𑁄𑀦𑁆𑀢𑀺, 𑀲𑀩𑁆𑀩𑀫𑁂𑀢𑀁 𑀕𑀻𑀢𑀫𑁂𑀯. 𑀢𑁂𑀦𑀸𑀳 ‘‘𑀕𑀻𑀢𑀦𑁆𑀢𑀺 𑀅𑀦𑁆𑀢𑀫𑀲𑁄 𑀥𑀫𑁆𑀫𑀪𑀸𑀡𑀓𑀕𑀻𑀢𑀫𑁆𑀧𑀻’’𑀢𑀺. 𑀢𑀢𑁆𑀣 𑀥𑀫𑁆𑀫𑀪𑀸𑀡𑀓𑀕𑀻𑀢𑀁 𑀦𑀸𑀫 𑀅𑀲𑀜𑁆𑀜𑀢𑀪𑀺𑀓𑁆𑀔𑀽𑀦𑀁 𑀢𑀁 𑀢𑀁 𑀯𑀢𑁆𑀢𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀢𑀺𑀤𑀻𑀖𑀁 𑀓𑀢𑁆𑀯𑀸 𑀕𑀻𑀢𑀲𑁆𑀲𑀭𑁂𑀦 𑀥𑀫𑁆𑀫𑀪𑀡𑀦𑀁, 𑀢𑀫𑁆𑀧𑀺 𑀦𑁂𑀯 𑀪𑀺𑀓𑁆𑀔𑀼𑀦𑁄, 𑀦 𑀪𑀺𑀓𑁆𑀔𑀼𑀦𑀻𑀦𑀁 𑀯𑀝𑁆𑀝𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓𑀝𑁆𑀞𑀓𑀣𑀸𑀬 (𑀔𑀼. 𑀧𑀸. 𑀅𑀝𑁆𑀞. 𑁨.𑀧𑀘𑁆𑀙𑀺𑀫𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀕𑀻𑀢𑀁 𑀯𑀝𑁆𑀝𑀢𑀺, 𑀕𑀻𑀢𑀽𑀧𑀲𑀁𑀳𑀺𑀢𑁄 𑀧𑀦 𑀥𑀫𑁆𑀫𑁄 𑀦 𑀯𑀝𑁆𑀝𑀢𑀻’’𑀢𑀺. 𑀢𑀲𑁆𑀫𑀸 𑀥𑀫𑁆𑀫𑀁 𑀪𑀡𑀦𑁆𑀢𑁂𑀦 𑀚𑀸𑀢𑀓𑀯𑀢𑁆𑀢𑀸𑀤𑀺𑀁 𑀢𑀁 𑀢𑀁 𑀯𑀢𑁆𑀢𑀁 𑀅𑀯𑀺𑀦𑀸𑀲𑁂𑀢𑁆𑀯𑀸 𑀘𑀢𑀼𑀭𑀲𑁆𑀲𑁂𑀦 (𑀘𑀽𑀴𑀯. 𑀅𑀝𑁆𑀞. 𑁨𑁪𑁯) 𑀯𑀢𑁆𑀢𑁂𑀦 𑀧𑀭𑀺𑀫𑀡𑁆𑀟𑀮𑀸𑀦𑀺 𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀤𑀲𑁆𑀲𑁂𑀢𑀩𑁆𑀩𑀸𑀦𑀺. 𑀯𑀸𑀤𑀺𑀢𑀦𑁆𑀢𑀺 𑀢𑀦𑁆𑀢𑀺𑀩𑀤𑁆𑀥𑀸𑀤𑀺𑀯𑀸𑀤𑀦𑀻𑀬𑀪𑀡𑁆𑀟𑀯𑀸𑀤𑀺𑀢𑀁 𑀯𑀸 𑀳𑁄𑀢𑀼, 𑀓𑀼𑀝𑀪𑁂𑀭𑀺𑀯𑀸𑀤𑀺𑀢𑀁 𑀯𑀸 𑀅𑀦𑁆𑀢𑀫𑀲𑁄 𑀉𑀤𑀓𑀪𑁂𑀭𑀺𑀯𑀸𑀤𑀺𑀢𑀫𑁆𑀧𑀺, 𑀲𑀩𑁆𑀩𑀫𑁂𑀯𑁂𑀢𑀁 𑀯𑀸𑀤𑀺𑀢𑀫𑁂𑀯. 𑀢𑁂𑀦𑀸𑀳 ‘‘𑀯𑀸𑀤𑀺𑀢𑀦𑁆𑀢𑀺 𑀅𑀦𑁆𑀢𑀫𑀲𑁄 𑀉𑀤𑀓𑀪𑁂𑀭𑀺𑀯𑀸𑀤𑀺𑀢’’𑀦𑁆𑀢𑀺. 𑀬𑀁 𑀧𑀦 𑀦𑀺𑀝𑁆𑀞𑀼𑀪𑀦𑁆𑀢𑀻 𑀯𑀸 𑀲𑀸𑀲𑀗𑁆𑀓𑁂 𑀯𑀸 𑀞𑀺𑀢𑀸 𑀅𑀘𑁆𑀙𑀭𑀺𑀓𑀁 𑀯𑀸 𑀨𑁄𑀝𑁂𑀢𑀺, 𑀧𑀸𑀡𑀺𑀁 𑀯𑀸 𑀧𑀳𑀭𑀢𑀺, 𑀢𑀢𑁆𑀣 𑀅𑀦𑀸𑀧𑀢𑁆𑀢𑀺. 𑀤𑀲𑁆𑀲𑀦𑁂𑀦 𑀘𑁂𑀢𑁆𑀣 𑀲𑀯𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀁 𑀯𑀺𑀭𑀽𑀧𑁂𑀓𑀲𑁂𑀲𑀦𑀬𑁂𑀦. 𑀆𑀮𑁄𑀘𑀦𑀲𑀪𑀸𑀯𑀢𑀸𑀬 𑀯𑀸 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀲𑀯𑀦𑀓𑀺𑀭𑀺𑀬𑀸𑀬𑀧𑀺 𑀤𑀲𑁆𑀲𑀦𑀲𑀗𑁆𑀔𑁂𑀧𑀲𑀩𑁆𑀪𑀸𑀯𑀢𑁄 ‘‘𑀤𑀲𑁆𑀲𑀦𑀸𑀬’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀏𑀢𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀤𑀲𑁆𑀲𑀦𑀸𑀬 𑀕𑀘𑁆𑀙𑀦𑁆𑀢𑀺𑀬𑀸’’𑀢𑀺. 𑀬𑀢𑁆𑀣 𑀞𑀺𑀢𑀸𑀢𑀺 𑀏𑀯𑀁 𑀕𑀦𑁆𑀢𑁆𑀯𑀸 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀞𑀺𑀢𑀸.

𑀦𑀦𑀼 𑀘 𑀲𑀬𑀁𑀦𑀘𑁆𑀘𑀦𑀸𑀤𑀻𑀲𑀼 𑀧𑀸𑀘𑀺𑀢𑁆𑀢𑀺𑀬𑀁 𑀧𑀸𑀴𑀺𑀬𑀁 𑀦 𑀯𑀼𑀢𑁆𑀢𑀁, 𑀅𑀣 𑀓𑀣𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢’’𑀦𑁆𑀢𑀺, 𑀇𑀫𑀺𑀦𑀸 𑀧𑀸𑀴𑀺𑀬𑀁 𑀅𑀯𑀼𑀢𑁆𑀢𑁂𑀧𑀺 𑀅𑀝𑁆𑀞𑀓𑀣𑀸𑀧𑀫𑀸𑀡𑁂𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀏𑀴𑀓𑀮𑁄𑀫𑀲𑀤𑀺𑀲𑀸𑀦𑀻𑀢𑀺 𑀧𑀦 𑀫𑀸𑀢𑀺𑀓𑀸𑀕𑀢𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑁂𑀯 𑀯𑀲𑁂𑀦 𑀯𑀼𑀢𑁆𑀢𑀁, 𑀲𑀩𑁆𑀩𑁂𑀲𑀁 𑀯𑀲𑁂𑀦 𑀧𑀦 𑀙𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. ‘‘𑀆𑀭𑀸𑀫𑁂 𑀞𑀢𑁆𑀯𑀸’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀲𑁂𑀲𑀇𑀭𑀺𑀬𑀸𑀧𑀣𑁂𑀳𑀺 𑀬𑀼𑀢𑁆𑀢𑀸𑀬 𑀧𑀲𑁆𑀲𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀬𑀸 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸. 𑀇𑀢𑀭𑀣𑀸 𑀳𑀺 𑀦𑀺𑀲𑀺𑀦𑁆𑀦𑀸𑀧𑀺 𑀧𑀲𑁆𑀲𑀺𑀢𑀼𑀁 𑀦 𑀮𑀪𑁂𑀬𑁆𑀬. ‘‘𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀳𑀸𑀭𑀢𑁄 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀺𑀬𑀸 𑀆𑀧𑀢𑁆𑀢𑀺𑀬𑁂𑀯. 𑀆𑀲𑀦𑀲𑀸𑀮𑀸𑀬 𑀦𑀺𑀲𑀺𑀦𑁆𑀦𑀸 𑀧𑀲𑁆𑀲𑀢𑀺, 𑀅𑀦𑀸𑀧𑀢𑁆𑀢𑀺, ‘‘𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀉𑀝𑁆𑀞𑀳𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺𑀬𑀸 𑀆𑀧𑀢𑁆𑀢𑀺. 𑀯𑀻𑀣𑀺𑀬𑀁 𑀞𑀢𑁆𑀯𑀸 𑀕𑀻𑀯𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀲𑁆𑀲𑀦𑁆𑀢𑀺𑀬𑀸𑀧𑀺 𑀆𑀧𑀢𑁆𑀢𑀺𑀬𑁂𑀯. 𑀪𑀺𑀓𑁆𑀔𑀼𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄, 𑀆𑀧𑀢𑁆𑀢𑀺𑀪𑁂𑀤𑁄𑀯 𑀦𑀸𑀦𑀁.

𑀦𑀘𑁆𑀘𑀕𑀻𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀮𑀲𑀼𑀡𑀯𑀕𑁆𑀕𑁄 𑀧𑀞𑀫𑁄.

𑁨. 𑀭𑀢𑁆𑀢𑀦𑁆𑀥𑀓𑀸𑀭𑀯𑀕𑁆𑀕𑁄

𑁧. 𑀭𑀢𑁆𑀢𑀦𑁆𑀥𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀭𑀳𑁄𑀧𑁂𑀓𑁆𑀔𑀸𑀬𑀸𑀢𑀺 𑀦𑀭𑀳𑁄𑀅𑀲𑁆𑀲𑀸𑀤𑀸𑀧𑁂𑀓𑁆𑀔𑀸𑀬. 𑀅𑀜𑁆𑀜𑀯𑀺𑀳𑀺𑀢𑀸𑀬𑀸𑀢𑀺 𑀭𑀳𑁄𑀅𑀲𑁆𑀲𑀸𑀤𑀢𑁄 𑀅𑀜𑁆𑀜𑀯𑀺𑀳𑀺𑀢𑀸𑀯 𑀳𑀼𑀢𑁆𑀯𑀸 𑀜𑀸𑀢𑀺𑀁 𑀯𑀸 𑀧𑀼𑀘𑁆𑀙𑀦𑁆𑀢𑀺𑀬𑀸, 𑀤𑀸𑀦𑁂 𑀯𑀸 𑀧𑀽𑀚𑀸𑀬 𑀯𑀸 𑀫𑀦𑁆𑀢𑁂𑀦𑁆𑀢𑀺𑀬𑀸.

𑀭𑀢𑁆𑀢𑀦𑁆𑀥𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨-𑁩. 𑀧𑀝𑀺𑀘𑁆𑀙𑀦𑁆𑀦𑁄𑀓𑀸𑀲𑀅𑀚𑁆𑀛𑁄𑀓𑀸𑀲𑀲𑀮𑁆𑀮𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀼𑀢𑀺𑀬𑀢𑀢𑀺𑀬𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀧𑀝𑀺𑀘𑁆𑀙𑀦𑁆𑀦𑁄𑀓𑀸𑀲𑀅𑀚𑁆𑀛𑁄𑀓𑀸𑀲𑀲𑀮𑁆𑀮𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀤𑀼𑀢𑀺𑀬𑀺𑀓𑀉𑀬𑁆𑀬𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀧𑀼𑀭𑀺𑀫𑀦𑀬𑁂𑀦𑁂𑀯𑀸’’𑀢𑀺 𑀇𑀫𑀺𑀦𑀸 ‘‘𑀲𑀦𑁆𑀢𑀺𑀝𑁆𑀞𑁂𑀬𑁆𑀬 𑀯𑀸𑀢𑀺 𑀳𑀢𑁆𑀣𑀧𑀸𑀲𑁂 𑀞𑀺𑀢𑀫𑀢𑁆𑀢𑀸𑀬 𑀧𑀸𑀘𑀺𑀢𑁆𑀢𑀺𑀬𑀁, 𑀲𑀮𑁆𑀮𑀧𑁂𑀬𑁆𑀬 𑀯𑀸𑀢𑀺 𑀢𑀢𑁆𑀣 𑀞𑀢𑁆𑀯𑀸 𑀕𑁂𑀳𑀲𑀺𑀓𑀓𑀣𑀁 𑀓𑀣𑁂𑀦𑁆𑀢𑀺𑀬𑀸𑀧𑀺 𑀧𑀸𑀘𑀺𑀢𑁆𑀢𑀺𑀬𑀫𑁂𑀯, 𑀦𑀺𑀓𑀡𑁆𑀡𑀺𑀓𑀁 𑀯𑀸 𑀚𑀧𑁆𑀧𑁂𑀬𑁆𑀬𑀸𑀢𑀺 𑀓𑀡𑁆𑀡𑀫𑀽𑀮𑁂 𑀚𑀧𑁆𑀧𑁂𑀦𑁆𑀢𑀺𑀬𑀸𑀧𑀺 𑀧𑀸𑀘𑀺𑀢𑁆𑀢𑀺𑀬𑀫𑁂𑀯𑀸’’𑀢𑀺 𑀇𑀫𑀁 𑀦𑀬𑀁 𑀤𑀲𑁆𑀲𑁂𑀢𑀺.

𑀤𑀼𑀢𑀺𑀬𑀺𑀓𑀉𑀬𑁆𑀬𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀅𑀦𑀸𑀧𑀼𑀘𑁆𑀙𑀸𑀧𑀓𑁆𑀓𑀫𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀆𑀲𑀻𑀤𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀲𑀦𑀦𑁆𑀢𑀺 𑀆𑀳 ‘‘𑀧𑀮𑁆𑀮𑀗𑁆𑀓𑀲𑁆𑀲𑁄𑀓𑀸𑀲𑀪𑀽𑀢𑁂’’𑀢𑀺, 𑀊𑀭𑀼𑀩𑀤𑁆𑀥𑀸𑀲𑀦𑀲𑁆𑀲 𑀑𑀓𑀸𑀲𑁂𑀢𑀺 𑀅𑀢𑁆𑀣𑁄. 𑀅𑀦𑁄𑀯𑀲𑁆𑀲𑀓𑀦𑁆𑀢𑀺 𑀦𑀺𑀩𑁆𑀩𑀓𑁄𑀓𑀸𑀲𑀁. 𑀅𑀚𑁆𑀛𑁄𑀓𑀸𑀲𑁂 𑀉𑀧𑀘𑀸𑀭𑀦𑁆𑀢𑀺 𑀅𑀚𑁆𑀛𑁄𑀓𑀸𑀲𑁂 𑀦𑀺𑀲𑀻𑀤𑀺𑀢𑁆𑀯𑀸 𑀤𑁆𑀯𑀸𑀤𑀲𑀳𑀢𑁆𑀣𑀧𑁆𑀧𑀫𑀸𑀡𑀁 𑀧𑀤𑁂𑀲𑀁. 𑀕𑀺𑀮𑀸𑀦𑀸𑀬𑀸𑀢𑀺 𑀬𑀸 𑀢𑀸𑀤𑀺𑀲𑁂𑀦 𑀕𑁂𑀮𑀜𑁆𑀜𑁂𑀦 𑀆𑀧𑀼𑀘𑁆𑀙𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀆𑀧𑀤𑀸𑀲𑀽𑀢𑀺 𑀖𑀭𑁂 𑀅𑀕𑁆𑀕𑀺 𑀯𑀸 𑀉𑀝𑁆𑀞𑀺𑀢𑁄 𑀳𑁄𑀢𑀺, 𑀘𑁄𑀭𑁄 𑀯𑀸, 𑀏𑀯𑀭𑀽𑀧𑁂 𑀉𑀧𑀤𑁆𑀤𑀯𑁂 𑀅𑀦𑀸𑀧𑀼𑀘𑁆𑀙𑀸 𑀧𑀓𑁆𑀓𑀫𑀢𑀺, 𑀅𑀦𑀸𑀧𑀢𑁆𑀢𑀺.

𑀅𑀦𑀸𑀧𑀼𑀘𑁆𑀙𑀸𑀧𑀓𑁆𑀓𑀫𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀦𑀸𑀧𑀼𑀘𑁆𑀙𑀸𑀅𑀪𑀺𑀦𑀺𑀲𑀻𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀥𑀼𑀯𑀧𑀜𑁆𑀜𑀢𑁆𑀢𑁂𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀅𑀢𑁆𑀣𑀸𑀬 𑀦𑀺𑀘𑁆𑀘𑀧𑀜𑁆𑀜𑀢𑁆𑀢𑁂.

𑀅𑀦𑀸𑀧𑀼𑀘𑁆𑀙𑀸𑀅𑀪𑀺𑀦𑀺𑀲𑀻𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀅𑀦𑀸𑀧𑀼𑀘𑁆𑀙𑀸𑀲𑀦𑁆𑀣𑀭𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀓𑀼𑀮𑀸𑀦𑀻𑀢𑀺 𑀓𑀼𑀮𑀲𑁆𑀲 𑀖𑀭𑀸𑀦𑀺.

𑀅𑀦𑀸𑀧𑀼𑀘𑁆𑀙𑀸𑀲𑀦𑁆𑀣𑀭𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀧𑀭𑀉𑀚𑁆𑀛𑀸𑀧𑀦𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀝𑁆𑀞𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀧𑀭𑀉𑀚𑁆𑀛𑀸𑀧𑀦𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀭𑀅𑀪𑀺𑀲𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀫𑀦𑀼𑀲𑁆𑀲𑀤𑁄𑀪𑀕𑁆𑀕𑁂𑀦 𑀯𑀸𑀢𑀺 ‘‘𑀓𑀸𑀡𑀸 𑀳𑁄𑀫𑀺, 𑀓𑀼𑀡𑀻 𑀳𑁄𑀫𑀺, 𑀇𑀢𑀭𑀸 𑀯𑀸 𑀈𑀤𑀺𑀲𑀸 𑀳𑁄𑀢𑀽’’𑀢𑀺𑀆𑀤𑀺𑀦𑀸 𑀫𑀦𑀼𑀲𑁆𑀲𑀯𑀺𑀭𑀽𑀧𑀪𑀸𑀯𑁂𑀦. 𑀅𑀢𑁆𑀣𑀥𑀫𑁆𑀫𑀅𑀦𑀼𑀲𑀸𑀲𑀦𑀺𑀧𑀼𑀭𑁂𑀓𑁆𑀔𑀸𑀭𑀸𑀦𑀦𑁆𑀢𑀺 𑀏𑀢𑁆𑀣 𑀅𑀢𑁆𑀣𑀧𑀼𑀭𑁂𑀓𑁆𑀔𑀸𑀭𑀸𑀬𑀸𑀢𑀺 𑀅𑀝𑁆𑀞𑀓𑀣𑀁 𑀓𑀣𑁂𑀦𑁆𑀢𑀺𑀬𑀸. 𑀥𑀫𑁆𑀫𑀧𑀼𑀭𑁂𑀓𑁆𑀔𑀸𑀭𑀸𑀬𑀸𑀢𑀺 𑀧𑀸𑀴𑀺𑀁 𑀯𑀸𑀘𑁂𑀦𑁆𑀢𑀺𑀬𑀸. 𑀅𑀦𑀼𑀲𑀸𑀲𑀦𑀺𑀧𑀼𑀭𑁂𑀓𑁆𑀔𑀸𑀭𑀸𑀬𑀸𑀢𑀺 ‘‘𑀇𑀤𑀸𑀦𑀺𑀧𑀺 𑀢𑁆𑀯𑀁 𑀏𑀤𑀺𑀲𑀸, 𑀲𑀸𑀥𑀼 𑀯𑀺𑀭𑀫𑀲𑁆𑀲𑀼, 𑀦𑁄 𑀘𑁂 𑀯𑀺𑀭𑀫𑀲𑀺, 𑀅𑀤𑁆𑀥𑀸 𑀧𑀼𑀦 𑀏𑀯𑀭𑀽𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 𑀦𑀺𑀭𑀬𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀲𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀲𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁮𑁭𑁮) 𑀏𑀯𑀁 𑀅𑀦𑀼𑀲𑀸𑀲𑀦𑀺𑀬𑀁 𑀞𑀢𑁆𑀯𑀸 𑀯𑀤𑀦𑁆𑀢𑀺𑀬𑀸.

𑀧𑀭𑀅𑀪𑀺𑀲𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀭𑁄𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀲𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀭𑁄𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀭𑀢𑁆𑀢𑀦𑁆𑀥𑀓𑀸𑀭𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀦𑀕𑁆𑀕𑀯𑀕𑁆𑀕𑁄

𑁧-𑁨. 𑀦𑀕𑁆𑀕𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀇𑀤𑀦𑁆𑀢𑀺 𑀇𑀤𑀁 𑀉𑀤𑀓𑀲𑀸𑀝𑀺𑀓𑀘𑀻𑀯𑀭𑀁.

𑀤𑀼𑀢𑀺𑀬𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀦𑀕𑁆𑀕𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀘𑀻𑀯𑀭𑀲𑀺𑀩𑁆𑀩𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀯𑀺𑀲𑀺𑀩𑁆𑀩𑁂𑀢𑁆𑀯𑀸𑀢𑀺 𑀯𑀺𑀚𑀝𑁂𑀢𑁆𑀯𑀸. 𑀥𑀼𑀭𑀁 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂𑀢𑀺 𑀥𑀼𑀭𑁂 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂, 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀘𑁂𑀧𑀺 𑀧𑀘𑁆𑀙𑀸 𑀲𑀺𑀩𑁆𑀩𑀢𑀺, 𑀆𑀧𑀢𑁆𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄.

𑀘𑀻𑀯𑀭𑀲𑀺𑀩𑁆𑀩𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀗𑁆𑀖𑀸𑀝𑀺𑀘𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀇𑀤𑀁 𑀫𑁂 𑀘𑀻𑀯𑀭𑀁 𑀫𑀳𑀕𑁆𑀖𑀁 𑀈𑀤𑀺𑀲𑁂 𑀘𑁄𑀭𑀪𑀬𑁂 𑀦 𑀲𑀓𑁆𑀓𑀸 𑀥𑀸𑀭𑁂𑀢𑀼𑀦𑁆𑀢𑀺 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀽’’𑀢𑀺 𑀏𑀢𑁆𑀣 𑀧𑀸𑀞𑁄. 𑀲𑁄 𑀧𑀦 𑀓𑀸𑀓𑀧𑀤𑀲𑀜𑁆𑀚𑀦𑀺𑀢𑀫𑁄𑀳𑁂𑀳𑀺 𑀮𑁂𑀔𑀓𑁂𑀳𑀺 𑀉𑀧𑀭𑀺𑀲𑀺𑀓𑁆𑀔𑀸𑀧𑀤𑁂 𑀮𑀺𑀔𑀺𑀢𑁄. 𑀓𑀺𑀜𑁆𑀘𑀸𑀧𑀺 𑀢𑀢𑁆𑀣 𑀮𑀺𑀔𑀺𑀢𑁄, 𑀏𑀢𑁆𑀣𑁂𑀯 𑀧𑀦 𑀤𑀝𑁆𑀞𑀩𑁆𑀩𑁄.

𑀲𑀗𑁆𑀖𑀸𑀝𑀺𑀘𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀘𑀻𑀯𑀭𑀲𑀗𑁆𑀓𑀫𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀆𑀧𑀤𑀸𑀲𑀼 𑀯𑀸 𑀥𑀸𑀭𑁂𑀢𑀻𑀢𑀺 𑀲𑀘𑁂 𑀅𑀧𑀸𑀭𑀼𑀢𑀁 𑀯𑀸 𑀅𑀦𑀺𑀯𑀢𑁆𑀣𑀁 𑀯𑀸 𑀘𑁄𑀭𑀸 𑀳𑀭𑀦𑁆𑀢𑀺, 𑀏𑀯𑀭𑀽𑀧𑀸𑀲𑀽 𑀆𑀧𑀤𑀸𑀲𑀼 𑀥𑀸𑀭𑁂𑀢𑀺, 𑀅𑀦𑀸𑀧𑀢𑁆𑀢𑀺.

𑀘𑀻𑀯𑀭𑀲𑀗𑁆𑀓𑀫𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀕𑀡𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀜𑁆𑀜𑀲𑁆𑀫𑀺𑀁 𑀧𑀭𑀺𑀓𑁆𑀔𑀸𑀭𑁂𑀢𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀣𑀸𑀮𑀓𑀸𑀤𑀻𑀦𑀁 𑀯𑀸 𑀲𑀧𑁆𑀧𑀺𑀢𑁂𑀮𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁. ‘‘𑀲𑀫𑀕𑁆𑀖𑀓𑀸𑀮𑁂 𑀤𑀲𑁆𑀲𑀣𑀸’’𑀢𑀺 𑀏𑀯𑀁 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀯𑀸𑀭𑁂𑀦𑁆𑀢𑀺𑀬𑀸𑀢𑀺 ‘‘𑀓𑀺𑀢𑁆𑀢𑀓𑀁 𑀅𑀕𑁆𑀖𑀦𑀓𑀁 𑀤𑀸𑀢𑀼𑀓𑀸𑀫𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 (𑀧𑀸𑀘𑀺. 𑀅𑀝𑁆𑀞. 𑁯𑁦𑁯) ‘‘𑀏𑀢𑁆𑀢𑀓𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀆𑀕𑀫𑁂𑀣 𑀢𑀸𑀯, 𑀇𑀤𑀸𑀦𑀺 𑀯𑀢𑁆𑀣𑀁 𑀫𑀳𑀕𑁆𑀖𑀁, 𑀓𑀢𑀺𑀧𑀸𑀳𑁂𑀦 𑀓𑀧𑁆𑀧𑀸𑀲𑁂 𑀆𑀳𑀝𑁂 𑀲𑀫𑀕𑁆𑀖𑀁 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀫𑀺𑀁 𑀓𑀸𑀮𑁂 𑀤𑀲𑁆𑀲𑀣𑀸’’𑀢𑀺 𑀏𑀯𑀁 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀯𑀸𑀭𑁂𑀦𑁆𑀢𑀺𑀬𑀸.

𑀕𑀡𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭-𑁧𑁦. 𑀧𑀝𑀺𑀩𑀸𑀳𑀦𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀩𑀸𑀳𑀦𑁆𑀢𑀺𑀬𑀸𑀢𑀺 ‘‘𑀏𑀓𑀺𑀲𑁆𑀲𑀸 𑀏𑀓𑀁 𑀲𑀸𑀝𑀓𑀁 𑀦𑀧𑁆𑀧𑀳𑁄𑀢𑀺, 𑀆𑀕𑀫𑁂𑀣 𑀢𑀸𑀯, 𑀓𑀢𑀺𑀧𑀸𑀳𑁂𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀢𑁄 𑀪𑀸𑀚𑁂𑀲𑁆𑀲𑀸𑀫𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁯𑁧𑁫) 𑀏𑀯𑀁 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀩𑀸𑀳𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺.

𑀅𑀝𑁆𑀞𑀫𑀦𑀯𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀲𑁂𑀲𑀦𑁆𑀢𑀺 ‘‘𑀥𑀫𑁆𑀫𑀺𑀓𑁂 𑀯𑁂𑀫𑀢𑀺𑀓𑀸𑀬𑀸’’𑀢𑀺𑀆𑀤𑀺𑀓𑀁 𑀅𑀯𑀲𑁂𑀲𑀁. 𑀢𑀢𑁆𑀣 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀩𑀸𑀳𑀦𑁆𑀢𑀺𑀬𑀸𑀢𑀺 ‘‘𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀚𑀺𑀡𑁆𑀡𑀘𑀻𑀯𑀭𑁄, 𑀓𑀣𑀺𑀦𑀸𑀦𑀺𑀲𑀁𑀲𑀫𑀽𑀮𑀓𑁄 𑀫𑀳𑀸𑀮𑀸𑀪𑁄’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁯𑁩𑁧) 𑀏𑀯𑀭𑀽𑀧𑀁 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀩𑀸𑀳𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺.

𑀧𑀝𑀺𑀩𑀸𑀳𑀦𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀕𑁆𑀕𑀯𑀕𑁆𑀕𑁄 𑀢𑀢𑀺𑀬𑁄.

𑁪. 𑀢𑀼𑀯𑀝𑁆𑀝𑀯𑀕𑁆𑀕𑁄

𑁧-𑁩. 𑀏𑀓𑀫𑀜𑁆𑀘𑀢𑀼𑀯𑀝𑁆𑀝𑀦𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀞𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀯𑀯𑀢𑁆𑀣𑀸𑀦𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 (𑀧𑀸𑀘𑀺. 𑀅𑀝𑁆𑀞. 𑁯𑁪𑁦) 𑀫𑀚𑁆𑀛𑁂 𑀓𑀸𑀲𑀸𑀬𑀁 𑀯𑀸 𑀓𑀢𑁆𑀢𑀭𑀬𑀝𑁆𑀞𑀺𑀁 𑀯𑀸 𑀅𑀦𑁆𑀢𑀫𑀲𑁄 𑀓𑀸𑀬𑀩𑀦𑁆𑀥𑀦𑀫𑁆𑀧𑀺 𑀞𑀧𑁂𑀢𑁆𑀯𑀸 𑀦𑀺𑀧𑀚𑁆𑀚𑀦𑁆𑀢𑀻𑀦𑀁 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄.

𑀢𑀢𑀺𑀬𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀏𑀓𑀫𑀜𑁆𑀘𑀢𑀼𑀯𑀝𑁆𑀝𑀦𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪-𑁯. 𑀦𑀉𑀧𑀝𑁆𑀞𑀸𑀧𑀦𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀮𑀪𑀦𑁆𑀢𑀺𑀬𑀸𑀢𑀺 𑀅𑀜𑁆𑀜𑀁 𑀉𑀧𑀝𑁆𑀞𑀸𑀬𑀺𑀓𑀁 𑀅𑀮𑀪𑀦𑁆𑀢𑀺𑀬𑀸. 𑀕𑀺𑀮𑀸𑀦𑀸𑀬𑀸𑀢𑀺 𑀲𑀬𑀁 𑀕𑀺𑀮𑀸𑀦𑀸𑀬. 𑀆𑀧𑀤𑀸𑀲𑀽𑀢𑀺 𑀢𑀣𑀸𑀭𑀽𑀧𑁂 𑀉𑀧𑀤𑁆𑀤𑀯𑁂 𑀲𑀢𑀺.

𑀧𑀜𑁆𑀘𑀫𑀙𑀝𑁆𑀞𑀲𑀢𑁆𑀢𑀫 𑀅𑀝𑁆𑀞𑀫𑀦𑀯𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀦𑀉𑀧𑀝𑁆𑀞𑀸𑀧𑀦𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀘𑀸𑀭𑀺𑀓𑀦𑀧𑀓𑁆𑀓𑀫𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀥𑀼𑀭𑁂 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂𑀢𑀺 𑀲𑀘𑁂 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀙𑀸 𑀧𑀓𑁆𑀓𑀫𑀢𑀺, 𑀆𑀧𑀢𑁆𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀅𑀦𑁆𑀢𑀭𑀸𑀬𑁂 𑀲𑀢𑀻𑀢𑀺 𑀤𑀲𑀯𑀺𑀥𑁂𑀲𑀼 𑀅𑀦𑁆𑀢𑀭𑀸𑀬𑁂𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀲𑀢𑀺. ‘‘𑀕𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀓𑁆𑀔𑀦𑁆𑀢𑀸, 𑀦𑀤𑀻 𑀯𑀸 𑀧𑀽𑀭𑀸, 𑀯𑀦𑀤𑀸𑀳𑁄 𑀯𑀸 𑀆𑀕𑀢𑁄, 𑀘𑁄𑀭𑀸 𑀯𑀸 𑀫𑀕𑁆𑀕𑁂 𑀳𑁄𑀦𑁆𑀢𑀺, 𑀫𑁂𑀖𑁄 𑀯𑀸 𑀉𑀝𑁆𑀞𑀳𑀢𑀺, 𑀦𑀺𑀯𑀢𑁆𑀢𑀺𑀢𑀼𑀁 𑀯𑀝𑁆𑀝𑀢𑀺.

𑀘𑀸𑀭𑀺𑀓𑀦𑀧𑀓𑁆𑀓𑀫𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀼𑀯𑀝𑁆𑀝𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑁫. 𑀘𑀺𑀢𑁆𑀢𑀸𑀕𑀸𑀭𑀯𑀕𑁆𑀕𑁄

𑁧. 𑀭𑀸𑀚𑀸𑀕𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀓𑀻𑀴𑀦𑀘𑀺𑀢𑁆𑀢𑀲𑀸𑀮𑀦𑁆𑀢𑀺 𑀦 𑀭𑀜𑁆𑀜𑁄𑀯 𑀓𑀻𑀴𑀦𑀘𑀺𑀢𑁆𑀢𑀲𑀸𑀮𑀁, 𑀅𑀣 𑀔𑁄 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀫𑀦𑀼𑀲𑁆𑀲𑀸𑀦𑀁 𑀓𑀻𑀴𑀦𑀢𑁆𑀣𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀓𑀢𑀲𑀸𑀮𑀁. 𑀏𑀲 𑀦𑀬𑁄 ‘‘𑀓𑀻𑀴𑀦𑀉𑀧𑀯𑀦’’𑀦𑁆𑀢𑀺𑀆𑀤𑀻𑀲𑀼𑀧𑀺. 𑀬𑀣𑀸𑀳 ‘‘𑀭𑀸𑀚𑀸𑀕𑀸𑀭𑀁 𑀦𑀸𑀫 𑀬𑀢𑁆𑀣 𑀓𑀢𑁆𑀣𑀘𑀺 𑀭𑀜𑁆𑀜𑁄 𑀓𑀻𑀴𑀺𑀢𑀼𑀁 𑀭𑀫𑀺𑀢𑀼𑀁 𑀓𑀢𑀁 𑀳𑁄𑀢𑀻’’𑀢𑀺𑀆𑀤𑀺𑀓𑁄 (𑀧𑀸𑀘𑀺. 𑁯𑁭𑁯) 𑀯𑀺𑀢𑁆𑀣𑀸𑀭𑁄. 𑀢𑀢𑁆𑀣 𑀓𑀻𑀴𑀦𑀉𑀧𑀯𑀦𑀦𑁆𑀢𑀺 𑀓𑀻𑀴𑀦𑀢𑁆𑀣𑀁 𑀅𑀦𑁆𑀢𑁄𑀦𑀕𑀭𑁂 𑀓𑀢𑀁 𑀆𑀭𑀸𑀫𑀁. 𑀓𑀻𑀴𑀦𑀼𑀬𑁆𑀬𑀸𑀦𑀦𑁆𑀢𑀺 𑀢𑀣𑁂𑀯 𑀩𑀳𑀺𑀦𑀕𑀭𑁂 𑀓𑀢𑀁 𑀉𑀬𑁆𑀬𑀸𑀦𑀁.

𑀭𑀸𑀚𑀸𑀕𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀆𑀲𑀦𑁆𑀤𑀺𑀧𑀭𑀺𑀪𑀼𑀜𑁆𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀢𑀺𑀓𑁆𑀓𑀦𑁆𑀢𑀧𑁆𑀧𑀫𑀸𑀡𑀸𑀢𑀺 𑀅𑀝𑁆𑀞𑀗𑁆𑀕𑀼𑀮𑀢𑁄 𑀅𑀢𑀺𑀓𑁆𑀓𑀦𑁆𑀢𑀧𑁆𑀧𑀫𑀸𑀡𑀧𑀸𑀤𑀓𑀸. 𑀯𑀼𑀢𑁆𑀢𑁄𑀢𑀺 𑀧𑀤𑀪𑀸𑀚𑀦𑀺𑀬𑀁 𑀯𑀼𑀢𑁆𑀢𑁄. ‘‘𑀅𑀓𑀧𑁆𑀧𑀺𑀬𑀭𑀽𑀧𑀸𑀓𑀼𑀮𑁄 𑀅𑀓𑀧𑁆𑀧𑀺𑀬𑀫𑀜𑁆𑀘𑁄 𑀧𑀮𑁆𑀮𑀗𑁆𑀓𑁄’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁨𑁫𑁪) 𑀲𑀸𑀭𑀲𑀫𑀸𑀲𑀸𑀘𑀭𑀺𑀬𑁄.

𑀆𑀲𑀦𑁆𑀤𑀺𑀧𑀭𑀺𑀪𑀼𑀜𑁆𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀼𑀢𑁆𑀢𑀓𑀦𑁆𑀢𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀉𑀚𑁆𑀚𑀯𑀼𑀚𑁆𑀚𑀯𑁂𑀢𑀺 𑀉𑀕𑁆𑀕𑀺𑀭𑀺𑀢𑁆𑀯𑀸 𑀉𑀕𑁆𑀕𑀺𑀭𑀺𑀢𑁆𑀯𑀸 𑀯𑁂𑀞𑀦𑁂. 𑀓𑀦𑁆𑀢𑀺𑀢𑀲𑀼𑀢𑁆𑀢𑀁 𑀓𑀦𑁆𑀢𑀦𑁆𑀢𑀺𑀬𑀸𑀢𑀺 𑀤𑀲𑀺𑀓𑀲𑀼𑀢𑁆𑀢𑀸𑀤𑀺𑀁 𑀲𑀗𑁆𑀖𑀸𑀝𑁂𑀢𑁆𑀯𑀸 𑀓𑀦𑁆𑀢𑀦𑁆𑀢𑀺𑀬𑀸, 𑀤𑀼𑀓𑁆𑀓𑀦𑁆𑀢𑀺𑀢𑀁 𑀯𑀸 𑀧𑀝𑀺𑀓𑀦𑁆𑀢𑀦𑁆𑀢𑀺𑀬𑀸.

𑀲𑀼𑀢𑁆𑀢𑀓𑀦𑁆𑀢𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀕𑀺𑀳𑀺𑀯𑁂𑀬𑁆𑀬𑀸𑀯𑀘𑁆𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀢𑁆𑀢𑀦𑁄 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀲𑁆𑀲 𑀘𑀸𑀢𑀺 𑀲𑀘𑁂𑀧𑀺 𑀫𑀸𑀢𑀸𑀧𑀺𑀢𑀭𑁄 𑀆𑀕𑀘𑁆𑀙𑀦𑁆𑀢𑀺, 𑀬𑀁 𑀓𑀺𑀜𑁆𑀘𑀺 𑀩𑀻𑀚𑀦𑀺𑀁 𑀯𑀸 𑀲𑀫𑁆𑀫𑀼𑀜𑁆𑀚𑀦𑀺𑀤𑀡𑁆𑀟𑀓𑀁 𑀯𑀸 𑀓𑀸𑀭𑀸𑀧𑁂𑀢𑁆𑀯𑀸 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀬𑀁 𑀓𑀺𑀜𑁆𑀘𑀺 𑀯𑀸 𑀧𑀘𑀺𑀢𑀼𑀁 𑀯𑀝𑁆𑀝𑀢𑀺.

𑀕𑀺𑀳𑀺𑀯𑁂𑀬𑁆𑀬𑀸𑀯𑀘𑁆𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁬. 𑀅𑀥𑀺𑀓𑀭𑀡𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀦𑀦𑁆𑀢𑀭𑀸𑀬𑀺𑀓𑀺𑀦𑀻𑀢𑀺 𑀤𑀲𑀯𑀺𑀥𑁂𑀲𑀼 𑀅𑀦𑁆𑀢𑀭𑀸𑀬𑁂𑀲𑀼 𑀏𑀓𑁂𑀦𑀸𑀧𑀺 𑀅𑀦𑀦𑁆𑀢𑀭𑀸𑀬𑀺𑀓𑀺𑀦𑀻. 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀙𑀸 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑀻 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸𑀯 𑀯𑀺𑀦𑀺𑀘𑁆𑀙𑀺𑀦𑀸𑀢𑀺.

𑀙𑀝𑁆𑀞𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀅𑀥𑀺𑀓𑀭𑀡𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀆𑀯𑀲𑀣𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀆𑀧𑀤𑀸𑀲𑀽𑀢𑀺 𑀫𑀳𑀕𑁆𑀖𑀘𑀻𑀯𑀭𑀁 𑀲𑀭𑀻𑀭𑀢𑁄 𑀫𑁄𑀘𑁂𑀢𑁆𑀯𑀸 𑀲𑀼𑀧𑁆𑀧𑀝𑀺𑀲𑀸𑀫𑀺𑀢𑀫𑁆𑀧𑀺 𑀘𑁄𑀭𑀸 𑀳𑀭𑀦𑁆𑀢𑀺, 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀦𑀺𑀯𑀸𑀲𑁂𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺.

𑀆𑀯𑀲𑀣𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀆𑀯𑀲𑀣𑀯𑀺𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀓𑀯𑀸𑀝𑀩𑀤𑁆𑀥𑀯𑀺𑀳𑀸𑀭𑀦𑁆𑀢𑀺 𑀤𑁆𑀯𑀸𑀭𑀩𑀤𑁆𑀥𑀯𑀺𑀳𑀸𑀭𑀁. 𑀕𑀺𑀮𑀸𑀦𑀸𑀬𑀸𑀢𑀺 𑀯𑀘𑀻𑀪𑁂𑀤𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑀸𑀬. 𑀆𑀧𑀤𑀸𑀲𑀽𑀢𑀺 𑀭𑀝𑁆𑀞𑁂 𑀪𑀺𑀚𑁆𑀚𑀦𑁆𑀢𑁂 𑀆𑀯𑀸𑀲𑁂 𑀙𑀟𑁆𑀟𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼.

𑀆𑀯𑀲𑀣𑀯𑀺𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀧𑀭𑀺𑀬𑀸𑀧𑀼𑀡𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀳𑀢𑁆𑀣𑀺𑀆𑀤𑀻𑀲𑀼𑀧𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁧𑁦𑁧𑁫) 𑀲𑀺𑀧𑁆𑀧𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄, 𑀢𑀣𑀸 𑀆𑀣𑀩𑁆𑀩𑀡𑀸𑀤𑀻𑀲𑀼 𑀫𑀦𑁆𑀢𑀲𑀤𑁆𑀤𑁄. 𑀢𑀢𑁆𑀣 𑀣𑀭𑀽𑀢𑀺 𑀔𑀕𑁆𑀕𑀫𑀼𑀝𑁆𑀞𑀺. 𑀆𑀣𑀩𑁆𑀩𑀡𑀫𑀦𑁆𑀢𑁄 𑀦𑀸𑀫 𑀆𑀣𑀩𑁆𑀩𑀡𑀯𑁂𑀤𑀯𑀺𑀳𑀺𑀢𑁄 𑀧𑀭𑀽𑀧𑀖𑀸𑀢𑀓𑀭𑁄 𑀫𑀦𑁆𑀢𑁄. 𑀔𑀺𑀮𑀦𑀫𑀦𑁆𑀢𑁄 𑀦𑀸𑀫 𑀤𑀸𑀭𑀼𑀲𑀸𑀭𑀔𑀺𑀮𑀁 𑀫𑀦𑁆𑀢𑁂𑀢𑁆𑀯𑀸 𑀧𑀣𑀯𑀺𑀬𑀁 𑀧𑀯𑁂𑀲𑁂𑀢𑁆𑀯𑀸 𑀫𑀸𑀭𑀡𑀫𑀦𑁆𑀢𑁄. 𑀅𑀕𑀤𑀧𑁆𑀧𑀬𑁄𑀕𑁄 𑀦𑀸𑀫 𑀯𑀺𑀲𑀬𑁄𑀚𑀦𑀁.

𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀧𑀭𑀺𑀬𑀸𑀧𑀼𑀡𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀯𑀸𑀘𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀮𑁂𑀔𑁂𑀢𑀺 𑀮𑀺𑀔𑀲𑀺𑀧𑁆𑀧𑁂. 𑀥𑀸𑀭𑀡𑀸𑀬 𑀯𑀸𑀢𑀺 𑀥𑀸𑀭𑀡𑀲𑀢𑁆𑀣𑁂, 𑀬𑀲𑁆𑀫𑀺𑀁 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀧𑀚𑁆𑀚𑀦𑁆𑀢𑀸 𑀩𑀳𑀽𑀦𑀺𑀧𑀺 𑀕𑀦𑁆𑀣𑀸𑀦𑀺 𑀥𑀸𑀭𑁂𑀦𑁆𑀢𑀺. 𑀦𑀸𑀕𑀫𑀡𑁆𑀟𑀮𑀸𑀤𑀺𑀓𑁂𑀢𑀺 𑀏𑀢𑁆𑀣 𑀦𑀸𑀕𑀫𑀡𑁆𑀟𑀮𑀁 𑀦𑀸𑀫 𑀲𑀧𑁆𑀧𑀸𑀦𑀁 𑀧𑀯𑁂𑀲𑀦𑀺𑀯𑀸𑀭𑀡𑀢𑁆𑀣𑀁 𑀫𑀡𑁆𑀟𑀮𑀩𑀤𑁆𑀥𑀫𑀦𑁆𑀢𑁄.

𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀯𑀸𑀘𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀺𑀢𑁆𑀢𑀸𑀕𑀸𑀭𑀯𑀕𑁆𑀕𑁄 𑀧𑀜𑁆𑀘𑀫𑁄.

𑁬. 𑀆𑀭𑀸𑀫𑀯𑀕𑁆𑀕𑁄

𑁧-𑁨. 𑀆𑀭𑀸𑀫𑀧𑀯𑀺𑀲𑀦𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀻𑀲𑀸𑀦𑀼𑀮𑁄𑀓𑀺𑀓𑀸𑀬𑀸𑀢𑀺 𑀲𑀻𑀲𑀁 𑀅𑀦𑀼𑀮𑁄𑀓𑁂𑀦𑁆𑀢𑀺𑀬𑀸. 𑀬𑀢𑁆𑀣 𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀲𑀦𑁆𑀦𑀺𑀧𑀢𑀺𑀢𑀸𑀢𑀺 𑀬𑀢𑁆𑀣 𑀪𑀺𑀓𑁆𑀔𑀼𑀦𑀺𑀬𑁄 𑀧𑀞𑀫𑀢𑀭𑀁 𑀲𑀚𑁆𑀛𑀸𑀬𑀦𑀘𑁂𑀢𑀺𑀬𑀯𑀦𑁆𑀤𑀦𑀸𑀤𑀺𑀅𑀢𑁆𑀣𑀁 𑀲𑀦𑁆𑀦𑀺𑀧𑀢𑀺𑀢𑀸. 𑀆𑀧𑀤𑀸𑀲𑀽𑀢𑀺 𑀓𑁂𑀦𑀘𑀺 𑀉𑀧𑀤𑁆𑀤𑀼𑀢𑀸 𑀳𑁄𑀢𑀺, 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀧𑀯𑀺𑀲𑀺𑀢𑀼𑀁 𑀯𑀝𑁆𑀝𑀢𑀺.

𑀤𑀼𑀢𑀺𑀬𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀆𑀭𑀸𑀫𑀧𑀯𑀺𑀲𑀦𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩-𑁪. 𑀕𑀡𑀧𑀭𑀺𑀪𑀸𑀲𑀦𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑁂𑀲𑀦𑁆𑀢𑀺 ‘‘𑀅𑀢𑁆𑀣𑀥𑀫𑁆𑀫𑀅𑀦𑀼𑀲𑀸𑀲𑀦𑀺𑀧𑀼𑀭𑁂𑀓𑁆𑀔𑀸𑀭𑀸𑀬𑀸’’𑀢𑀺𑀆𑀤𑀺𑀓𑀁 𑀅𑀯𑀲𑁂𑀲𑀁. 𑀢𑀢𑁆𑀣 𑀅𑀦𑀼𑀲𑀸𑀲𑀦𑀺𑀧𑀼𑀭𑁂𑀓𑁆𑀔𑀸𑀭𑀸𑀬𑀸𑀢𑀺 ‘‘𑀇𑀤𑀸𑀦𑀺𑀧𑀺 𑀢𑁆𑀯𑀁 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑀅𑀝𑁆𑀞. 𑁧𑁦𑁩𑁬) 𑀦𑀬𑁂𑀦 𑀅𑀦𑀼𑀲𑀸𑀲𑀦𑀺𑀧𑀓𑁆𑀔𑁂 𑀞𑀢𑁆𑀯𑀸 𑀯𑀤𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺.

𑀘𑀢𑀼𑀢𑁆𑀣𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀕𑀡𑀧𑀭𑀺𑀪𑀸𑀲𑀦𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀓𑀼𑀮𑀫𑀘𑁆𑀙𑀭𑀺𑀦𑀻𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀓𑀼𑀮𑁂 𑀫𑀘𑁆𑀙𑀭𑁄 𑀓𑀼𑀮𑀫𑀘𑁆𑀙𑀭𑁄𑀢𑀺 𑀧𑀼𑀭𑀺𑀫𑀲𑁆𑀫𑀺𑀁 𑀧𑀓𑁆𑀔𑁂 𑀲𑀓𑀢𑁆𑀣𑁂 𑀇𑀦𑀻𑀧𑀘𑁆𑀘𑀬𑁄, 𑀢𑀁 𑀓𑀼𑀮𑀁 𑀅𑀲𑁆𑀲𑀤𑁆𑀥𑀁 𑀅𑀧𑁆𑀧𑀲𑀦𑁆𑀦𑀦𑁆𑀢𑀺 𑀓𑀼𑀮𑀲𑁆𑀲 𑀅𑀕𑀼𑀡𑀁, 𑀅𑀬𑀲𑀁 𑀯𑀸 𑀪𑀸𑀲𑀦𑁆𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀼𑀦𑀻𑀦𑀁 𑀅𑀯𑀡𑁆𑀡𑀁 𑀪𑀸𑀲𑀦𑁆𑀢𑀺𑀬𑀸𑀢𑀺 ‘‘𑀪𑀺𑀓𑁆𑀔𑀼𑀦𑀺𑀬𑁄 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁧𑁦𑁪𑁩) 𑀪𑀺𑀓𑁆𑀔𑀼𑀦𑀻𑀦𑀁 𑀅𑀕𑀼𑀡𑀁, 𑀅𑀬𑀲𑀁 𑀯𑀸 𑀪𑀸𑀲𑀦𑁆𑀢𑀺𑀬𑀸.

𑀲𑀦𑁆𑀢𑀁𑀬𑁂𑀯 𑀆𑀤𑀻𑀦𑀯𑀦𑁆𑀢𑀺 𑀓𑀼𑀮𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀯𑀸 𑀲𑀦𑁆𑀢𑀁𑀬𑁂𑀯 𑀅𑀕𑀼𑀡𑀁.

𑀓𑀼𑀮𑀫𑀘𑁆𑀙𑀭𑀺𑀦𑀻𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬-𑁮. 𑀅𑀪𑀺𑀓𑁆𑀔𑀼𑀓𑀸𑀯𑀸𑀲𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸