𑀧𑀸𑀝𑀺𑀤𑁂𑀲𑀦𑀻𑀬𑀓𑀡𑁆𑀟𑀁

𑁨. 𑀢𑁂𑀮𑀯𑀺𑀜𑁆𑀜𑀸𑀧𑀦𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀸𑀴𑀺𑀬𑀁 𑀅𑀦𑀸𑀕𑀢𑁂𑀲𑀼 𑀧𑀦 𑀅𑀝𑁆𑀞𑀲𑀼𑀧𑀻𑀢𑀺 𑀧𑀸𑀴𑀺𑀫𑀼𑀢𑁆𑀢𑀓𑁂𑀲𑀼 𑀲𑀧𑁆𑀧𑀺𑀆𑀤𑀻𑀲𑀼 𑀅𑀝𑁆𑀞𑀲𑀼𑀧𑀺.

𑀢𑁂𑀮𑀯𑀺𑀜𑁆𑀜𑀸𑀧𑀦𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸𑀬

𑀯𑀺𑀦𑀬𑀢𑁆𑀣𑀫𑀜𑁆𑀚𑀽𑀲𑀸𑀬𑀁 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀺𑀬𑀁

𑀪𑀺𑀓𑁆𑀔𑀼𑀦𑀺𑀧𑀸𑀢𑀺𑀫𑁄𑀓𑁆𑀔𑁂 𑀧𑀸𑀝𑀺𑀤𑁂𑀲𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀧𑀭𑀺𑀫𑀡𑁆𑀟𑀮𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑁂𑀔𑀺𑀬𑀸𑀦𑀺 𑀘𑁂𑀯𑀸𑀢𑀺 𑀧𑀜𑁆𑀘𑀲𑀢𑁆𑀢𑀢𑀺 𑀲𑁂𑀔𑀺𑀬𑀸𑀦𑀺 𑀘𑁂𑀯. ‘‘𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀇𑀫𑀺𑀦𑀸 𑀬𑀲𑁆𑀫𑀸 𑀢𑀸𑀤𑀺𑀲𑀁𑀬𑁂𑀯𑁂𑀢𑁆𑀣 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑀁 𑀯𑀺𑀤𑀽 𑀯𑀤𑀦𑁆𑀢𑀺, 𑀢𑀲𑁆𑀫𑀸 𑀯𑀺𑀲𑀼𑀁 𑀢𑁂𑀲𑀁 𑀅𑀢𑁆𑀣𑀯𑀡𑁆𑀡𑀦𑀸 𑀦 𑀯𑀼𑀢𑁆𑀢𑀸. 𑀢𑀢𑁆𑀣 𑀬𑀸 𑀯𑀼𑀢𑁆𑀢𑀸, 𑀲𑀸 𑀇𑀥𑀸𑀧𑀺 𑀯𑀼𑀢𑁆𑀢𑀸𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀺.

𑀧𑀭𑀺𑀫𑀡𑁆𑀟𑀮𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸𑀬

𑀯𑀺𑀦𑀬𑀢𑁆𑀣𑀫𑀜𑁆𑀚𑀽𑀲𑀸𑀬𑀁 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀺𑀬𑀁

𑀪𑀺𑀓𑁆𑀔𑀼𑀦𑀺𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀓𑀣𑀸𑀯𑀡𑁆𑀡𑀦𑀸

𑀬𑀁 𑀧𑀸𑀢𑀺𑀫𑁄𑀓𑁆𑀔𑀲𑁆𑀲 𑀯𑀡𑁆𑀡𑀦𑀁 𑀆𑀭𑀪𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦’’𑀦𑁆𑀢𑀺 𑀇𑀤𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀧𑀤𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀳𑀺 𑀯𑀸𑀢𑀺 𑀘. 𑀧𑀸𑀴𑀺𑀬𑀢𑁆𑀣𑀜𑁆𑀘 𑀓𑁂𑀯𑀮𑀦𑁆𑀢𑀺 𑀲𑀓𑀮𑀁 𑀧𑀸𑀴𑀺𑀅𑀢𑁆𑀣𑀜𑁆𑀘, 𑀉𑀪𑀢𑁄𑀯𑀺𑀪𑀗𑁆𑀕𑀜𑁆𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣𑀸𑀢𑀺 𑀏𑀢𑀺𑀲𑁆𑀲𑀁 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁. 𑀬𑀲𑁆𑀫𑀸 𑀦 𑀳𑀺 𑀅𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀦𑁆𑀢𑀺 𑀬𑀁 𑀧𑀤𑀁. 𑀲𑀻𑀳𑀴𑀝𑁆𑀞𑀓𑀣𑀸𑀦𑀬𑀦𑁆𑀢𑀺 𑀲𑀻𑀳𑀴𑀫𑀸𑀢𑀺𑀓𑀝𑁆𑀞𑀓𑀣𑀸𑀦𑀬𑀁. 𑀅𑀝𑁆𑀞𑀓𑀣𑀸𑀲𑀸𑀭𑀦𑁆𑀢𑀺 𑀲𑀻𑀳𑀴𑀫𑀸𑀢𑀺𑀓𑀝𑁆𑀞𑀓𑀣𑀸𑀬𑀁 𑀅𑀢𑁆𑀣𑀲𑀸𑀭𑀁, 𑀅𑀣 𑀯𑀸 𑀯𑀺𑀦𑀬𑀝𑁆𑀞𑀓𑀣𑀸𑀲𑀼 𑀅𑀢𑁆𑀣𑀲𑀸𑀭𑀁. 𑀢𑁂𑀦𑁂𑀢𑀁 𑀤𑀲𑁆𑀲𑁂𑀢𑀺 𑁋 𑀲𑀻𑀳𑀴𑀫𑀸𑀢𑀺𑀓𑀝𑁆𑀞𑀓𑀣𑀸𑀬𑀁 𑀅𑀢𑁆𑀣𑀲𑀸𑀭𑀁 𑀆𑀤𑀸𑀬 𑀇𑀫𑀁 𑀓𑀗𑁆𑀔𑀸𑀯𑀺𑀢𑀭𑀡𑀺𑀁 𑀓𑀭𑁄𑀦𑁆𑀢𑁄 𑀯𑀺𑀦𑀬𑀝𑁆𑀞𑀓𑀣𑀸𑀲𑀼𑀧𑀺 𑀇𑀥 𑀯𑀺𑀦𑀺𑀘𑁆𑀙𑀬𑁂 𑀬𑁄𑀕𑀓𑁆𑀔𑀫𑀁 𑀅𑀢𑁆𑀣𑀲𑀸𑀭𑀁 𑀆𑀤𑀸𑀬𑁂𑀯 𑀅𑀓𑀸𑀲𑀺𑀦𑁆𑀢𑀺.

𑀇𑀤𑀸𑀦𑀺 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀘𑁆𑀘𑀦𑁆𑀢𑀲𑀼𑀔𑀸𑀥𑀺𑀕𑀫𑀸𑀬 𑀅𑀢𑁆𑀢𑀦𑁄 𑀧𑀼𑀜𑁆𑀜𑀁 𑀧𑀭𑀺𑀡𑀸𑀫𑁂𑀦𑁆𑀢𑁄 ‘‘𑀬𑀣𑀸 𑀘 𑀦𑀺𑀝𑁆𑀞𑀁 𑀲𑀫𑁆𑀧𑀢𑁆𑀢𑀸’’𑀢𑀺𑀆𑀤𑀺𑀕𑀸𑀣𑀸𑀤𑁆𑀯𑀬𑀫𑀸𑀳. 𑀓𑀮𑁆𑀬𑀸𑀡𑀦𑀺𑀲𑁆𑀲𑀺𑀢𑀸𑀢𑀺 𑀓𑀼𑀲𑀮𑀦𑀺𑀲𑁆𑀲𑀺𑀢𑀸. 𑀲𑀩𑁆𑀩𑀲𑀢𑁆𑀢𑀸𑀦𑀦𑁆𑀢𑀺 𑀓𑀸𑀫𑀸𑀯𑀘𑀭𑀸𑀤𑀺𑀪𑁂𑀤𑀸𑀦𑀁 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁.

𑀦𑀺𑀕𑀫𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀓𑀣𑀸

𑀏𑀢𑁆𑀢𑀸𑀯𑀢𑀸 𑀘 𑁋

𑁧. 𑀮𑀗𑁆𑀓𑀺𑀲𑁆𑀲𑀭𑁄 𑀬𑁄 𑀯𑀺𑀚𑀺𑀢𑀸𑀭𑀺𑀭𑀸𑀚𑁄;

𑀭𑀸𑀚𑀸 𑀧𑀭𑀓𑁆𑀓𑀦𑁆𑀢𑀪𑀼𑀚𑁄 𑀬𑀲𑀲𑁆𑀲𑀻;

𑀢𑀺𑀥𑀸𑀕𑀢𑀁 𑀲𑀻𑀳𑀴𑀫𑁂𑀓𑀭𑀚𑁆𑀚𑀁;

𑀅𑀓𑀸 𑀦𑀺𑀓𑀸𑀬𑀜𑁆𑀘 𑀢𑀣𑀸 𑀲𑀫𑀕𑁆𑀕𑀁.

𑁨. 𑀧𑀼𑀭𑁂 𑀧𑀼𑀮𑀢𑁆𑀣𑀺𑀫𑁆𑀳𑀺 𑀯𑀭𑁂 𑀧𑀼𑀭𑀸𑀦𑀁;

𑀫𑀚𑁆𑀛𑀫𑁆𑀳𑀺 𑀦𑀸𑀦𑀸𑀭𑀢𑀦𑀸𑀓𑀭𑀸𑀦𑀁;

𑀅𑀦𑀦𑁆𑀢𑀲𑀫𑁆𑀧𑀢𑁆𑀢𑀺𑀪𑀭𑀸𑀪𑀺𑀭𑀸𑀫𑁂;

𑀯𑀭𑀸𑀘𑀮𑀼𑀢𑁆𑀢𑀗𑁆𑀕𑀖𑀭𑀸𑀪𑀺𑀭𑀸𑀫𑁂.

𑁩. 𑀅𑀪𑁂𑀚𑁆𑀚𑀧𑀸𑀓𑀸𑀭𑀲𑀼𑀕𑁄𑀧𑀼𑀭𑀲𑁆𑀫𑀺𑀁;

𑀦𑀺𑀭𑀸𑀓𑀼𑀮𑀸𑀦𑁂𑀓𑀓𑀼𑀮𑀸𑀓𑀼𑀮𑀲𑁆𑀫𑀺𑀁;

𑀫𑀼𑀦𑀺𑀦𑁆𑀤𑀤𑀸𑀞𑀗𑁆𑀓𑀼𑀭𑀯𑀸𑀲𑀪𑀽𑀢𑁂;

𑀬𑁄 𑀮𑁄𑀘𑀦𑀸𑀦𑀦𑁆𑀤𑀯𑀳𑁂 𑀯𑀲𑀦𑁆𑀢𑁄.

𑁪. 𑀲𑀼𑀨𑀼𑀮𑁆𑀮𑀺𑀢𑀩𑁆𑀪𑁄𑀭𑀼𑀳𑀲𑀸𑀤𑀼𑀲𑀻𑀢

𑀧𑀲𑀦𑁆𑀦𑀦𑀻𑀭𑁂𑀳𑀺 𑀚𑀮𑀸𑀲𑀬𑁂𑀳𑀺;

𑀲𑀼𑀧𑀼𑀧𑁆𑀨𑀺𑀢𑀸𑀦𑁂𑀓𑀓𑀤𑀫𑁆𑀩𑀚𑀫𑁆𑀩𑀼-

𑀧𑀼𑀦𑁆𑀦𑀸𑀕𑀦𑀸𑀕𑀸𑀤𑀺𑀳𑀺 𑀯𑀸𑀪𑀺𑀭𑀫𑁆𑀫𑁂.

𑁫. 𑀲𑀼𑀥𑀸𑀯𑀤𑀸𑀢𑁂𑀳𑀺 𑀫𑀦𑁄𑀳𑀭𑁂𑀳𑀺;

𑀧𑀸𑀓𑀸𑀭𑀧𑀦𑁆𑀢𑀻𑀳𑀺 𑀘 𑀕𑁄𑀧𑀼𑀭𑁂𑀳𑀺;

𑀯𑀺𑀓𑀺𑀡𑁆𑀡𑀫𑀼𑀢𑁆𑀢𑀸𑀨𑀮𑀲𑀦𑁆𑀦𑀺𑀪𑁂𑀳𑀺;

𑀯𑀺𑀮𑁄𑀓𑀦𑀻𑀬𑁂𑀳𑀺 𑀲𑀼𑀥𑀸𑀢𑀮𑁂𑀳𑀺.

𑁬. 𑀓𑀢𑁆𑀯𑀸𑀦 𑀧𑀸𑀲𑀸𑀤𑀲𑀳𑀲𑁆𑀲𑀭𑀫𑁆𑀫𑁂;

𑀢𑀳𑀺𑀁 𑀢𑀳𑀺𑀁 𑀧𑀻𑀢𑀺𑀓𑀭𑁂 𑀯𑀺𑀳𑀸𑀭𑁂;

𑀫𑀳𑀸𑀤𑀬𑁄 𑀚𑁂𑀢𑀯𑀦𑀸𑀤𑀬𑁄𑀧𑀺;

𑀲𑀼𑀲𑀁𑀬𑀫𑀸𑀦𑀁 𑀬𑀢𑀺𑀦𑀁 𑀅𑀤𑀸𑀲𑀺.

𑁭. 𑀬𑁄 𑀲𑀸𑀤𑀼𑀪𑀽𑀢𑀁 𑀘𑀢𑀼𑀧𑀘𑁆𑀘𑀬𑀜𑁆𑀘;

𑀕𑀼𑀡𑀧𑁆𑀧𑀲𑀦𑁆𑀦𑁄 𑀲𑀫𑀡𑁂𑀲𑀼 𑀢𑁂𑀲𑀼;

𑀦𑀺𑀘𑁆𑀘𑀁 𑀫𑀳𑁄𑀖𑀁 𑀯𑀺𑀬 𑀯𑀢𑁆𑀢𑀬𑀦𑁆𑀢𑁄;

𑀬𑁄𑀚𑁂𑀢𑀺 𑀢𑁂 𑀕𑀦𑁆𑀣𑀯𑀺𑀧𑀲𑁆𑀲𑀦𑀸𑀲𑀼.

𑁮. 𑀓𑀸𑀭𑀺𑀢𑁂𑀲𑀼 𑀯𑀺𑀳𑀸𑀭𑁂𑀲𑀼, 𑀢𑁂𑀦 𑀢𑁂𑀲𑀼 𑀬𑀲𑀲𑁆𑀲𑀺𑀦𑀸;

𑀭𑀫𑁆𑀫𑁄 𑀬𑁄 𑀧𑀘𑁆𑀙𑀺𑀫𑀸𑀭𑀸𑀫𑁄, 𑀧𑀼𑀧𑁆𑀨𑀸𑀭𑀸𑀫𑀸𑀤𑀺𑀲𑁄𑀪𑀺𑀢𑁄.

𑁯. 𑀧𑀭𑀺𑀯𑁂𑀡𑀫𑁆𑀳𑀺 𑀦𑀸𑀫𑁂𑀦, 𑀢𑀳𑀺𑀁 𑀘𑁄𑀴𑀓𑀼𑀮𑀦𑁆𑀢𑀺𑀓𑁂;

𑀧𑀸𑀲𑀸𑀤𑁂 𑀤𑀲𑁆𑀲𑀦𑀻𑀬𑀫𑁆𑀳𑀺, 𑀯𑀲𑀦𑁆𑀢𑁄 𑀓𑀭𑀼𑀡𑀸𑀧𑀭𑁄.

𑁧𑁦. 𑀲𑀺𑀲𑁆𑀲𑁄 𑀲𑀲𑀻𑀓𑀭𑀲𑁆𑀯𑀘𑁆𑀙-𑀲𑀻𑀮𑀸𑀘𑀸𑀭𑀲𑁆𑀲 𑀥𑀻𑀫𑀢𑁄;

𑀲𑀸𑀭𑀺𑀧𑀼𑀢𑁆𑀢𑀫𑀳𑀸𑀣𑁂𑀭-𑀫𑀳𑀸𑀲𑀸𑀫𑀺𑀲𑁆𑀲 𑀢𑀸𑀤𑀺𑀦𑁄.

𑁧𑁧. 𑀥𑀻𑀭𑀸𑀦𑁂𑀓𑀕𑀼𑀡𑁄𑀖𑁂𑀦, 𑀣𑁂𑀭𑁂𑀦 𑀲𑀼𑀘𑀺𑀯𑀼𑀢𑁆𑀢𑀺𑀦𑀸;

𑀯𑀺𑀦𑀬𑀝𑁆𑀞𑀺𑀢𑀺𑀓𑀸𑀫𑁂𑀦, 𑀲𑀼𑀫𑁂𑀥𑁂𑀦𑀸𑀪𑀺𑀬𑀸𑀘𑀺𑀢𑁄.

𑁧𑁨. 𑀲𑁄 𑀩𑀼𑀤𑁆𑀥𑀦𑀸𑀕𑀢𑁆𑀣𑁂𑀭𑁄𑀳𑀁, 𑀪𑀺𑀓𑁆𑀔𑀽𑀦𑀁 𑀧𑀭𑀫𑀁 𑀳𑀺𑀢𑀁;

𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀬𑀢𑀻𑀦𑀁 𑀲𑀫𑀬𑀸𑀦𑀼𑀕𑀁.

𑁧𑁩. 𑀯𑀺𑀦𑀬𑀢𑁆𑀣𑀸𑀤𑀺𑀫𑀜𑁆𑀚𑀽𑀲𑀁, 𑀮𑀻𑀦𑀢𑁆𑀣𑀲𑁆𑀲 𑀧𑀓𑀸𑀲𑀦𑀺𑀁;

𑀫𑀸𑀢𑀺𑀓𑀝𑁆𑀞𑀓𑀣𑀸𑀬𑁂𑀫𑀁, 𑀅𑀓𑀸𑀲𑀺𑀁 𑀲𑀸𑀥𑀼 𑀯𑀡𑁆𑀡𑀦𑀁.

𑁧𑁪. 𑀲𑀸𑀬𑀁 𑀲𑀼𑀩𑁄𑀥𑀸 𑀩𑀼𑀥𑀯𑀡𑁆𑀡𑀦𑀻𑀬𑀸;

𑀲𑀁𑀯𑀡𑁆𑀡𑀦𑀸 𑀲𑀢𑁆𑀢𑀲𑀳𑀲𑁆𑀲𑀫𑀢𑁆𑀢𑀸;

𑀦𑀺𑀭𑀸𑀓𑀭𑁄𑀦𑁆𑀢𑀻 𑀯𑀺𑀦𑀬𑀫𑁆𑀳𑀺 𑀫𑁄𑀳𑀁;

𑀢𑀫𑀁 𑀘𑀭𑀦𑁆𑀢𑀻 𑀲𑀲𑀺 𑀔𑁂𑀯 𑀪𑀸𑀢𑀼.

𑁧𑁫. 𑀆𑀓𑀗𑁆𑀔𑀫𑀸𑀦𑁂𑀦 𑀧𑀭𑀢𑁆𑀣𑀫𑀺𑀝𑁆𑀞𑀁;

𑀫𑀳𑀢𑁆𑀣𑀲𑀸𑀭𑀁 𑀲𑀼𑀯𑀺𑀦𑀺𑀘𑁆𑀙𑀬𑀜𑁆𑀘;

𑀲𑀁𑀯𑀡𑁆𑀡𑀦𑀁 𑀲𑀸𑀥𑀼 𑀧𑀓𑀼𑀩𑁆𑀩𑀢𑀸 𑀬𑀁;

𑀘𑀺𑀢𑀁 𑀫𑀬𑀸 𑀧𑀼𑀜𑁆𑀜𑀫𑀦𑀧𑁆𑀧𑀪𑀽𑀢𑀁.

𑁧𑁬. 𑀧𑀼𑀜𑁆𑀜𑁂𑀦 𑀢𑁂𑀦𑀸𑀘𑀺𑀢𑀤𑀸𑀦𑀲𑀻𑀮-

𑀫𑀬𑀸𑀤𑀺𑀦𑀸𑀦𑁂𑀓𑀯𑀺𑀥𑁂𑀦 𑀘𑁂𑀯;

𑀲𑀢𑁆𑀢𑀸 𑀅𑀦𑀻𑀖𑀸 𑀲𑀼𑀔𑀺𑀦𑁄 𑀅𑀯𑁂𑀭𑀸;

𑀧𑀧𑁆𑀧𑁄𑀦𑁆𑀢𑀼 𑀲𑀩𑁆𑀩𑁂 𑀲𑀼𑀕𑀢𑀺𑀁 𑀲𑀺𑀯𑀜𑁆𑀘.

𑁧𑁭. 𑀲𑀤𑁆𑀥𑀺𑀁 𑀬𑀣𑁄𑀧𑀤𑁆𑀤𑀯𑀫𑀦𑁆𑀢𑀭𑁂𑀦;

𑀕𑀢𑀸 𑀳𑀺 𑀮𑀻𑀦𑀢𑁆𑀣𑀧𑀤𑀻𑀧𑀦𑀻𑀬𑀁;

𑀢𑀣𑀸 𑀚𑀦𑀸𑀦𑀁 𑀅𑀧𑀺 𑀥𑀫𑁆𑀫𑀬𑀼𑀢𑁆𑀢𑀸;

𑀫𑀦𑁄𑀭𑀣𑀸 𑀲𑀺𑀤𑁆𑀥𑀺𑀫𑀼𑀧𑁂𑀦𑁆𑀢𑀼 𑀦𑀺𑀘𑁆𑀘𑀁.

𑁧𑁮. 𑀓𑀸𑀮𑁂 𑀧𑀯𑀲𑁆𑀲𑀦𑁆𑀢𑀼 𑀲𑀤𑀸 𑀧𑀬𑁄𑀤𑀸;

𑀥𑀫𑁆𑀫𑁂𑀦 𑀧𑀸𑀮𑁂𑀦𑁆𑀢𑀼 𑀫𑀳𑀺𑀁 𑀫𑀳𑀺𑀦𑁆𑀤𑀸;

𑀲𑀢𑁆𑀢𑀸 𑀧𑀲𑀦𑁆𑀦𑀸 𑀭𑀢𑀦𑀢𑁆𑀢𑀬𑀲𑁆𑀫𑀺𑀁;

𑀤𑀸𑀦𑀸𑀤𑀺𑀧𑀼𑀜𑁆𑀜𑀸𑀪𑀺𑀭𑀢𑀸 𑀪𑀯𑀦𑁆𑀢𑀽𑀢𑀺.

𑀯𑀺𑀦𑀬𑀢𑁆𑀣𑀫𑀜𑁆𑀚𑀽𑀲𑀸 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀻𑀦𑀸𑀫𑀺𑀓𑀸𑀓𑀗𑁆𑀔𑀸𑀯𑀺𑀢𑀭𑀡𑀻𑀅𑀪𑀺𑀦𑀯𑀝𑀻𑀓𑀸 𑀦𑀺𑀝𑁆𑀞𑀺𑀢𑀸.