𑁬. 𑀆𑀭𑀸𑀫𑀯𑀕𑁆𑀕𑁄

𑁧-𑁨. 𑀆𑀭𑀸𑀫𑀧𑀯𑀺𑀲𑀦𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀻𑀲𑀸𑀦𑀼𑀮𑁄𑀓𑀺𑀓𑀸𑀬𑀸𑀢𑀺 𑀲𑀻𑀲𑀁 𑀅𑀦𑀼𑀮𑁄𑀓𑁂𑀦𑁆𑀢𑀺𑀬𑀸. 𑀬𑀢𑁆𑀣 𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀲𑀦𑁆𑀦𑀺𑀧𑀢𑀺𑀢𑀸𑀢𑀺 𑀬𑀢𑁆𑀣 𑀪𑀺𑀓𑁆𑀔𑀼𑀦𑀺𑀬𑁄 𑀧𑀞𑀫𑀢𑀭𑀁 𑀲𑀚𑁆𑀛𑀸𑀬𑀦𑀘𑁂𑀢𑀺𑀬𑀯𑀦𑁆𑀤𑀦𑀸𑀤𑀺𑀅𑀢𑁆𑀣𑀁 𑀲𑀦𑁆𑀦𑀺𑀧𑀢𑀺𑀢𑀸. 𑀆𑀧𑀤𑀸𑀲𑀽𑀢𑀺 𑀓𑁂𑀦𑀘𑀺 𑀉𑀧𑀤𑁆𑀤𑀼𑀢𑀸 𑀳𑁄𑀢𑀺, 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀧𑀯𑀺𑀲𑀺𑀢𑀼𑀁 𑀯𑀝𑁆𑀝𑀢𑀺.

𑀤𑀼𑀢𑀺𑀬𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀆𑀭𑀸𑀫𑀧𑀯𑀺𑀲𑀦𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩-𑁪. 𑀕𑀡𑀧𑀭𑀺𑀪𑀸𑀲𑀦𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑁂𑀲𑀦𑁆𑀢𑀺 ‘‘𑀅𑀢𑁆𑀣𑀥𑀫𑁆𑀫𑀅𑀦𑀼𑀲𑀸𑀲𑀦𑀺𑀧𑀼𑀭𑁂𑀓𑁆𑀔𑀸𑀭𑀸𑀬𑀸’’𑀢𑀺𑀆𑀤𑀺𑀓𑀁 𑀅𑀯𑀲𑁂𑀲𑀁. 𑀢𑀢𑁆𑀣 𑀅𑀦𑀼𑀲𑀸𑀲𑀦𑀺𑀧𑀼𑀭𑁂𑀓𑁆𑀔𑀸𑀭𑀸𑀬𑀸𑀢𑀺 ‘‘𑀇𑀤𑀸𑀦𑀺𑀧𑀺 𑀢𑁆𑀯𑀁 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑀅𑀝𑁆𑀞. 𑁧𑁦𑁩𑁬) 𑀦𑀬𑁂𑀦 𑀅𑀦𑀼𑀲𑀸𑀲𑀦𑀺𑀧𑀓𑁆𑀔𑁂 𑀞𑀢𑁆𑀯𑀸 𑀯𑀤𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺.

𑀘𑀢𑀼𑀢𑁆𑀣𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀕𑀡𑀧𑀭𑀺𑀪𑀸𑀲𑀦𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀓𑀼𑀮𑀫𑀘𑁆𑀙𑀭𑀺𑀦𑀻𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀓𑀼𑀮𑁂 𑀫𑀘𑁆𑀙𑀭𑁄 𑀓𑀼𑀮𑀫𑀘𑁆𑀙𑀭𑁄𑀢𑀺 𑀧𑀼𑀭𑀺𑀫𑀲𑁆𑀫𑀺𑀁 𑀧𑀓𑁆𑀔𑁂 𑀲𑀓𑀢𑁆𑀣𑁂 𑀇𑀦𑀻𑀧𑀘𑁆𑀘𑀬𑁄, 𑀢𑀁 𑀓𑀼𑀮𑀁 𑀅𑀲𑁆𑀲𑀤𑁆𑀥𑀁 𑀅𑀧𑁆𑀧𑀲𑀦𑁆𑀦𑀦𑁆𑀢𑀺 𑀓𑀼𑀮𑀲𑁆𑀲 𑀅𑀕𑀼𑀡𑀁, 𑀅𑀬𑀲𑀁 𑀯𑀸 𑀪𑀸𑀲𑀦𑁆𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀼𑀦𑀻𑀦𑀁 𑀅𑀯𑀡𑁆𑀡𑀁 𑀪𑀸𑀲𑀦𑁆𑀢𑀺𑀬𑀸𑀢𑀺 ‘‘𑀪𑀺𑀓𑁆𑀔𑀼𑀦𑀺𑀬𑁄 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁧𑁦𑁪𑁩) 𑀪𑀺𑀓𑁆𑀔𑀼𑀦𑀻𑀦𑀁 𑀅𑀕𑀼𑀡𑀁, 𑀅𑀬𑀲𑀁 𑀯𑀸 𑀪𑀸𑀲𑀦𑁆𑀢𑀺𑀬𑀸.

𑀲𑀦𑁆𑀢𑀁𑀬𑁂𑀯 𑀆𑀤𑀻𑀦𑀯𑀦𑁆𑀢𑀺 𑀓𑀼𑀮𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀯𑀸 𑀲𑀦𑁆𑀢𑀁𑀬𑁂𑀯 𑀅𑀕𑀼𑀡𑀁.

𑀓𑀼𑀮𑀫𑀘𑁆𑀙𑀭𑀺𑀦𑀻𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬-𑁮. 𑀅𑀪𑀺𑀓𑁆𑀔𑀼𑀓𑀸𑀯𑀸𑀲𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀯𑀼𑀢𑁆𑀢𑁄𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀑𑀯𑀸𑀤𑀯𑀕𑁆𑀕𑀲𑁆𑀲 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 (𑀧𑀸𑀘𑀺. 𑀅𑀝𑁆𑀞. 𑁧𑁪𑁪) 𑀯𑀼𑀢𑁆𑀢𑁄.

𑀲𑀢𑁆𑀢𑀫𑀝𑁆𑀞𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀅𑀪𑀺𑀓𑁆𑀔𑀼𑀓𑀸𑀯𑀸𑀲𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯-𑁧𑁦. 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀉𑀧𑁄𑀲𑀣𑀲𑁆𑀲 𑀧𑀼𑀘𑁆𑀙𑀦𑀁 𑀉𑀧𑁄𑀲𑀣𑀧𑀼𑀘𑁆𑀙𑀸, 𑀲𑀸𑀯𑀓𑀧𑀘𑁆𑀘𑀬𑀁, 𑀭𑀲𑁆𑀲𑀢𑁆𑀢𑀜𑁆𑀘 𑀓𑀢𑁆𑀯𑀸 ‘‘𑀉𑀧𑁄𑀲𑀣𑀧𑀼𑀘𑁆𑀙𑀓’’𑀦𑁆𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀉𑀧𑁄𑀲𑀣𑀧𑀼𑀘𑁆𑀙𑀦’’𑀦𑁆𑀢𑀺. 𑀑𑀯𑀸𑀤𑀢𑁆𑀣𑀸𑀬𑀸𑀢𑀺 𑀑𑀯𑀸𑀤𑀬𑀸𑀘𑀦𑀢𑁆𑀣𑀸𑀬.

𑀤𑀲𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀭𑀸𑀫𑀯𑀕𑁆𑀕𑁄 𑀙𑀝𑁆𑀞𑁄.