𑁯. 𑀯𑀘𑀦𑀲𑁄𑀥𑀦𑀯𑀡𑁆𑀡𑀦𑀸

𑁫𑁫-𑁫𑁯. 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺 𑀧𑀤𑀤𑁆𑀯𑀬𑀲𑁆𑀲 𑀅𑀢𑁆𑀣𑀢𑁄 𑀏𑀓𑀢𑁆𑀢𑁂𑀢𑀺 𑀏𑀢𑁆𑀣 𑀢𑀤𑁂𑀯 𑀏𑀓𑀢𑁆𑀢𑀁 𑀧𑀭𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀁 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑀦𑁆𑀢𑀺 𑀯𑀺𑀘𑀸𑀭𑁂𑀢𑀩𑁆𑀩𑀫𑁂𑀢𑀁. 𑀧𑀼𑀕𑁆𑀕𑀮𑀲𑁆𑀲 𑀳𑀺 𑀅𑀯𑀺𑀪𑀚𑀺𑀢𑀩𑁆𑀩𑀢𑀁, 𑀉𑀧𑀮𑀩𑁆𑀪𑀢𑀻𑀢𑀺 𑀏𑀢𑀲𑁆𑀲 𑀯𑀺𑀪𑀚𑀺𑀢𑀩𑁆𑀩𑀢𑀁 𑀯𑀤𑀦𑁆𑀢𑁄 𑀯𑀺𑀪𑀚𑀺𑀢𑀩𑁆𑀩𑀸𑀯𑀺𑀪𑀚𑀺𑀢𑀩𑁆𑀩𑀢𑁆𑀣𑀸𑀦𑀁 𑀉𑀧𑀮𑀩𑁆𑀪𑀢𑀺𑀧𑀼𑀕𑁆𑀕𑀮-𑀲𑀤𑁆𑀤𑀸𑀦𑀁 𑀓𑀣𑀁 𑀅𑀢𑁆𑀣𑀢𑁄 𑀏𑀓𑀢𑁆𑀢𑀁 𑀲𑀫𑁆𑀧𑀝𑀺𑀘𑁆𑀙𑁂𑀬𑁆𑀬𑀸𑀢𑀺? 𑀬𑀣𑀸 𑀘 𑀯𑀺𑀪𑀚𑀺𑀢𑀩𑁆𑀩𑀸𑀯𑀺𑀪𑀚𑀺𑀢𑀩𑁆𑀩𑀢𑁆𑀣𑀸𑀦𑀁 𑀉𑀧𑀮𑀩𑁆𑀪𑀢𑀺-𑀭𑀽𑀧-𑀲𑀤𑁆𑀤𑀸𑀦𑀁 𑀢𑀁 𑀯𑀺𑀪𑀸𑀕𑀁 𑀯𑀤𑀢𑁄 𑀭𑀽𑀧𑀁 𑀓𑀺𑀜𑁆𑀘𑀺 𑀉𑀧𑀮𑀩𑁆𑀪𑀢𑀺, 𑀓𑀺𑀜𑁆𑀘𑀺 𑀦 𑀉𑀧𑀮𑀩𑁆𑀪𑀢𑀻𑀢𑀺 𑀅𑀬𑀁 𑀧𑀲𑀗𑁆𑀕𑁄 𑀦𑀸𑀧𑀚𑁆𑀚𑀢𑀺, 𑀏𑀯𑀁 𑀏𑀢𑀲𑁆𑀲𑀧𑀺 𑀬𑀣𑀸𑀯𑀼𑀢𑁆𑀢𑀯𑀺𑀪𑀸𑀕𑀁 𑀯𑀤𑀢𑁄 𑀬𑀣𑀸𑀆𑀧𑀸𑀤𑀺𑀢𑁂𑀦 𑀧𑀲𑀗𑁆𑀕𑁂𑀦 𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀫𑀕𑁆𑀕𑀺𑀢𑀩𑁆𑀩𑁄 𑀏𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑁬𑁦. ‘‘𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀽’’𑀢𑀺 (𑀲𑀼. 𑀦𑀺. 𑁧𑁧𑁨𑁫) 𑀏𑀢𑁂𑀦 𑀅𑀢𑁆𑀣𑀢𑁄 𑀧𑀼𑀕𑁆𑀕𑀮𑁄 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀦𑀢𑁆𑀣𑀻𑀢𑀺𑀧𑀺 𑀯𑀼𑀢𑁆𑀢’’𑀦𑁆𑀢𑀺.

𑀯𑀘𑀦𑀲𑁄𑀥𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.