𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀅𑀪𑀺𑀥𑀫𑁆𑀫𑀧𑀺𑀝𑀓𑁂

𑀧𑀜𑁆𑀘𑀧𑀓𑀭𑀡-𑀫𑀽𑀮𑀝𑀻𑀓𑀸

𑀥𑀸𑀢𑀼𑀓𑀣𑀸𑀧𑀓𑀭𑀡-𑀫𑀽𑀮𑀝𑀻𑀓𑀸

𑀕𑀦𑁆𑀣𑀸𑀭𑀫𑁆𑀪𑀯𑀡𑁆𑀡𑀦𑀸

𑀥𑀸𑀢𑀼𑀓𑀣𑀸𑀧𑀓𑀭𑀡𑀁 𑀤𑁂𑀲𑁂𑀦𑁆𑀢𑁄 𑀪𑀕𑀯𑀸 𑀬𑀲𑁆𑀫𑀺𑀁 𑀲𑀫𑀬𑁂 𑀤𑁂𑀲𑁂𑀲𑀺, 𑀢𑀁 𑀲𑀫𑀬𑀁 𑀤𑀲𑁆𑀲𑁂𑀢𑀼𑀁, 𑀯𑀺𑀪𑀗𑁆𑀕𑀸𑀦𑀦𑁆𑀢𑀭𑀁 𑀤𑁂𑀲𑀺𑀢𑀲𑁆𑀲 𑀧𑀓𑀭𑀡𑀲𑁆𑀲 𑀥𑀸𑀢𑀼𑀓𑀣𑀸𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀸 ‘‘𑀅𑀝𑁆𑀞𑀸𑀭𑀲𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑀮𑀯𑀺𑀥𑀫𑀦𑀯𑀺𑀲𑀬𑀸𑀢𑀺𑀓𑁆𑀓𑀫𑀦𑀯𑀲𑁂𑀦 𑀤𑁂𑀯𑀧𑀼𑀢𑁆𑀢𑀫𑀸𑀭𑀲𑁆𑀲, 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑀯𑀲𑁂𑀦 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀫𑀸𑀭𑀸𑀦𑀁, 𑀲𑀫𑀼𑀤𑀬𑀧𑁆𑀧𑀳𑀸𑀦𑀧𑀭𑀺𑀜𑁆𑀜𑀸𑀯𑀲𑁂𑀦 𑀔𑀦𑁆𑀥𑀫𑀸𑀭𑀲𑁆𑀲, 𑀫𑀘𑁆𑀘𑀼𑀫𑀸𑀭𑀲𑁆𑀲 𑀘 𑀩𑁄𑀥𑀺𑀫𑀽𑀮𑁂 𑀏𑀯 𑀪𑀜𑁆𑀚𑀺𑀢𑀢𑁆𑀢𑀸 𑀧𑀭𑀽𑀧𑀦𑀺𑀲𑁆𑀲𑀬𑀭𑀳𑀺𑀢𑀁 𑀦𑀺𑀭𑀢𑀺𑀲𑀬𑀁 𑀢𑀁 𑀪𑀜𑁆𑀚𑀦𑀁 𑀉𑀧𑀸𑀤𑀸𑀬 𑀪𑀕𑀯𑀸 𑀏𑀯 ‘‘𑀫𑀸𑀭𑀪𑀜𑁆𑀚𑀦𑁄’’𑀢𑀺 𑀣𑁄𑀫𑀺𑀢𑁄. 𑀢𑀢𑁆𑀣 𑀫𑀸𑀭𑁂 𑀅𑀪𑀜𑁆𑀚𑁂𑀲𑀺, 𑀫𑀸𑀭𑀪𑀜𑁆𑀚𑀦𑀁 𑀯𑀸 𑀏𑀢𑀲𑁆𑀲, 𑀦 𑀧𑀭𑀭𑀸𑀚𑀸𑀤𑀺𑀪𑀜𑁆𑀚𑀦𑀦𑁆𑀢𑀺 𑀫𑀸𑀭𑀪𑀜𑁆𑀚𑀦𑁄. 𑀫𑀳𑀸𑀯𑀺𑀓𑁆𑀓𑀦𑁆𑀢𑁄 𑀫𑀳𑀸𑀯𑀻𑀭𑀺𑀬𑁄𑀢𑀺 𑀫𑀳𑀸𑀯𑀻𑀭𑁄.

𑀔𑀦𑁆𑀥𑀸𑀤𑀬𑁄 𑀅𑀭𑀡𑀦𑁆𑀢𑀸 𑀥𑀫𑁆𑀫𑀸 𑀲𑀪𑀸𑀯𑀝𑁆𑀞𑁂𑀦 𑀥𑀸𑀢𑀼𑀬𑁄, 𑀅𑀪𑀺𑀥𑀫𑁆𑀫𑀓𑀣𑀸𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀯𑀸𑀢𑀺 𑀓𑀢𑁆𑀯𑀸 𑀢𑁂𑀲𑀁 𑀓𑀣𑀦𑀢𑁄 𑀇𑀫𑀲𑁆𑀲 𑀧𑀓𑀭𑀡𑀲𑁆𑀲 𑀥𑀸𑀢𑀼𑀓𑀣𑀸𑀢𑀺 𑀅𑀥𑀺𑀯𑀘𑀦𑀁. 𑀬𑀤𑀺𑀧𑀺 𑀅𑀜𑁆𑀜𑁂𑀲𑀼 𑀘 𑀧𑀓𑀭𑀡𑁂𑀲𑀼 𑀢𑁂 𑀲𑀪𑀸𑀯𑀸 𑀓𑀣𑀺𑀢𑀸, 𑀏𑀢𑁆𑀣 𑀧𑀦 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀲𑀗𑁆𑀕𑀳𑀸𑀲𑀗𑁆𑀕𑀳𑀸𑀤𑀻𑀲𑀼 𑀘𑀼𑀤𑁆𑀤𑀲𑀲𑀼 𑀦𑀬𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀓𑀣𑀺𑀢𑀢𑁆𑀢𑀸 𑀲𑀸𑀢𑀺𑀲𑀬𑀁 𑀓𑀣𑀦𑀦𑁆𑀢𑀺 𑀇𑀤𑀫𑁂𑀯 𑀏𑀯𑀁𑀦𑀸𑀫𑀓𑀁. 𑀏𑀓𑀤𑁂𑀲𑀓𑀣𑀦𑀫𑁂𑀯 𑀳𑀺 𑀅𑀜𑁆𑀜𑀢𑁆𑀣 𑀓𑀢𑀦𑁆𑀢𑀺. 𑀔𑀦𑁆𑀥𑀸𑀬𑀢𑀦𑀥𑀸𑀢𑀽𑀳𑀺 𑀯𑀸 𑀔𑀦𑁆𑀥𑀸𑀤𑀻𑀦𑀁 𑀅𑀭𑀡𑀦𑁆𑀢𑀸𑀦𑀁 𑀲𑀗𑁆𑀕𑀳𑀸𑀲𑀗𑁆𑀕𑀳𑀸𑀤𑀬𑁄 𑀦𑀬𑀸 𑀯𑀼𑀢𑁆𑀢𑀸𑀢𑀺 𑀢𑀢𑁆𑀣 𑀫𑀳𑀸𑀯𑀺𑀲𑀬𑀸𑀦𑀁 𑀥𑀸𑀢𑀽𑀦𑀁 𑀯𑀲𑁂𑀦 𑀥𑀸𑀢𑀽𑀳𑀺 𑀓𑀣𑀸 𑀥𑀸𑀢𑀼𑀓𑀣𑀸𑀢𑀺 𑀏𑀯𑀁 𑀅𑀲𑁆𑀲 𑀦𑀸𑀫𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀤𑁆𑀯𑀺𑀥𑀸 𑀢𑀺𑀥𑀸 𑀙𑀥𑀸 𑀅𑀝𑁆𑀞𑀸𑀭𑀲𑀥𑀸𑀢𑀺 𑀅𑀦𑁂𑀓𑀥𑀸 𑀥𑀸𑀢𑀼𑀪𑁂𑀤𑀁 𑀧𑀓𑀸𑀲𑁂𑀲𑀻𑀢𑀺 𑀥𑀸𑀢𑀼𑀪𑁂𑀤𑀧𑁆𑀧𑀓𑀸𑀲𑀦𑁄𑀢𑀺. 𑀢𑀲𑁆𑀲𑀢𑁆𑀣𑀦𑁆𑀢𑀺 𑀢𑀲𑁆𑀲𑀸 𑀥𑀸𑀢𑀼𑀓𑀣𑀸𑀬 𑀅𑀢𑁆𑀣𑀁. 𑀅-𑀓𑀸𑀭𑁂 𑀆-𑀓𑀸𑀭𑀲𑁆𑀲 𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. ‘‘𑀬𑀁 𑀥𑀸𑀢𑀼𑀓𑀣’’𑀦𑁆𑀢𑀺 𑀯𑀸 𑀏𑀢𑁆𑀣 𑀧𑀓𑀭𑀡𑀦𑁆𑀢𑀺 𑀯𑀘𑀦𑀲𑁂𑀲𑁄 𑀲𑀢𑁆𑀢𑀦𑁆𑀦𑀁 𑀧𑀓𑀭𑀡𑀸𑀦𑀁 𑀓𑀫𑁂𑀦 𑀯𑀡𑁆𑀡𑀦𑀸𑀬 𑀧𑀯𑀢𑁆𑀢𑀢𑁆𑀢𑀸𑀢𑀺 𑀢𑁂𑀦 𑀬𑁄𑀚𑀦𑀁 𑀓𑀢𑁆𑀯𑀸 𑀢𑀲𑁆𑀲 𑀧𑀓𑀭𑀡𑀲𑁆𑀲 𑀅𑀢𑁆𑀣𑀁 𑀢𑀲𑁆𑀲𑀢𑁆𑀣𑀦𑁆𑀢𑀺 𑀅-𑀓𑀸𑀭𑀮𑁄𑀧𑁄 𑀯𑀸. 𑀢𑀦𑁆𑀢𑀺 𑀢𑀁 𑀤𑀻𑀧𑀦𑀁 𑀲𑀼𑀡𑀸𑀣, 𑀢𑀁 𑀯𑀸 𑀅𑀢𑁆𑀣𑀁 𑀢𑀁𑀤𑀻𑀧𑀦𑀯𑀘𑀦𑀲𑀯𑀦𑁂𑀦 𑀉𑀧𑀥𑀸𑀭𑁂𑀣𑀸𑀢𑀺 𑀅𑀢𑁆𑀣𑁄. 𑀲𑀫𑀸𑀳𑀺𑀢𑀸𑀢𑀺 𑀦𑀸𑀦𑀸𑀓𑀺𑀘𑁆𑀘𑁂𑀳𑀺 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸, 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂 𑀆𑀳𑀺𑀢𑀸𑀢𑀺 𑀯𑀸 𑀅𑀢𑁆𑀣𑁄.

𑀕𑀦𑁆𑀣𑀸𑀭𑀫𑁆𑀪𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁧. 𑀦𑀬𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁧. 𑀓𑁄 𑀧𑀦𑁂𑀢𑀲𑁆𑀲 𑀧𑀓𑀭𑀡𑀲𑁆𑀲 𑀧𑀭𑀺𑀘𑁆𑀙𑁂𑀤𑁄𑀢𑀺? 𑀦 𑀲𑁄 𑀇𑀥 𑀯𑀢𑁆𑀢𑀩𑁆𑀩𑁄, 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸) 𑀧𑀓𑀭𑀡𑀧𑀭𑀺𑀘𑁆𑀙𑁂𑀤𑁄 𑀯𑀼𑀢𑁆𑀢𑁄 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑀼𑀤𑁆𑀤𑀲𑀯𑀺𑀥𑁂𑀦 𑀯𑀺𑀪𑀢𑁆𑀢𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺. 𑀔𑀦𑁆𑀥𑀸𑀤𑀻𑀦𑀁 𑀤𑁂𑀲𑀦𑀸 𑀦𑀻𑀬𑀢𑀺 𑀧𑀯𑀢𑁆𑀢𑀻𑀬𑀢𑀺 𑀏𑀢𑁂𑀳𑀺, 𑀔𑀦𑁆𑀥𑀸𑀤𑀬𑁄 𑀏𑀯 𑀯𑀸 𑀦𑀻𑀬𑀦𑁆𑀢𑀺 𑀜𑀸𑀬𑀦𑁆𑀢𑀺 𑀏𑀢𑁂𑀳𑀺 𑀧𑀓𑀸𑀭𑁂𑀳𑀻𑀢𑀺 𑀦𑀬𑀸, 𑀦𑀬𑀸𑀦𑀁 𑀫𑀸𑀢𑀺𑀓𑀸 𑀉𑀤𑁆𑀤𑁂𑀲𑁄, 𑀦𑀬𑀸 𑀏𑀯 𑀯𑀸 𑀫𑀸𑀢𑀺𑀓𑀸𑀢𑀺 𑀦𑀬𑀫𑀸𑀢𑀺𑀓𑀸. 𑀏𑀢𑁂𑀲𑀁 𑀧𑀤𑀸𑀦𑀁 𑀫𑀽𑀮𑀪𑀽𑀢𑀢𑁆𑀢𑀸𑀢𑀺 ‘‘𑀫𑀽𑀮𑀫𑀸𑀢𑀺𑀓𑀸’’𑀢𑀺 𑀯𑀢𑁆𑀢𑀩𑁆𑀩𑀸𑀦𑀁 𑀲𑀗𑁆𑀕𑀳𑀸𑀲𑀗𑁆𑀕𑀳𑀸𑀤𑀻𑀦𑀁 𑀘𑀼𑀤𑁆𑀤𑀲𑀦𑁆𑀦𑀁 𑀧𑀤𑀸𑀦𑀁 𑀔𑀦𑁆𑀥𑀸𑀤𑀺𑀥𑀫𑁆𑀫𑀯𑀺𑀪𑀚𑀦𑀲𑁆𑀲 𑀇𑀫𑀲𑁆𑀲 𑀧𑀓𑀭𑀡𑀲𑁆𑀲 𑀫𑀽𑀮𑀪𑀽𑀢𑀢𑁆𑀢𑀸 𑀦𑀺𑀲𑁆𑀲𑀬𑀪𑀽𑀢𑀢𑁆𑀢𑀸𑀢𑀺 𑀅𑀢𑁆𑀣𑁄.

𑁨. 𑀅𑀩𑁆𑀪𑀦𑁆𑀢𑀭𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁨. ‘‘𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺𑀆𑀤𑀻𑀳𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀧𑀤𑀸𑀦𑀺 𑀤𑀲𑁆𑀲𑀺𑀢𑀸𑀦𑀺, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀘𑀦𑁂𑀦 𑀘 𑀬𑁂𑀲𑀼 𑀤𑁆𑀯𑀸𑀤𑀲𑀲𑀼 𑀅𑀗𑁆𑀕𑁂𑀲𑀼 𑀧𑀘𑁆𑀘𑁂𑀓𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀤𑁆𑀤𑁄 𑀯𑀢𑁆𑀢𑀢𑀺, 𑀢𑀤𑀢𑁆𑀣𑀸𑀦𑀺 𑀤𑁆𑀯𑀸𑀤𑀲 𑀧𑀤𑀸𑀦𑀺 𑀤𑀲𑁆𑀲𑀺𑀢𑀸𑀦𑀻𑀢𑀺 𑀢𑁂𑀲𑀁 𑀢𑀣𑀸𑀤𑀲𑁆𑀲𑀺𑀢𑀸𑀦𑀁 𑀲𑀭𑀽𑀧𑁂𑀦𑁂𑀯 𑀤𑀲𑁆𑀲𑀺𑀢𑀸𑀦𑀁 𑀨𑀲𑁆𑀲𑀸𑀤𑀻𑀦𑀜𑁆𑀘 𑀧𑀤𑀸𑀦𑀁 𑀯𑀲𑁂𑀦 𑀆𑀳 ‘‘𑀧𑀜𑁆𑀘𑀯𑀻𑀲𑀸𑀥𑀺𑀓𑁂𑀦 𑀧𑀤𑀲𑀢𑁂𑀦𑀸’’𑀢𑀺. 𑀢𑀢𑁆𑀣 𑀓𑀫𑁆𑀫𑀼𑀧𑀧𑀢𑁆𑀢𑀺𑀓𑀸𑀫𑀪𑀯𑀸𑀤𑀻𑀦𑀁 𑀇𑀥 𑀯𑀺𑀪𑀢𑁆𑀢𑀸𑀦𑀁 𑀪𑀸𑀯𑀦𑀪𑀯𑀦𑀪𑀸𑀯𑁂𑀦 𑀪𑀯𑁂 𑀯𑀺𑀬 𑀲𑁄𑀓𑀸𑀤𑀻𑀦𑀁 𑀚𑀭𑀸𑀫𑀭𑀡𑀲𑁆𑀲 𑀯𑀺𑀬 𑀅𑀦𑀺𑀝𑁆𑀞𑀢𑁆𑀢𑀸 𑀢𑀦𑁆𑀦𑀺𑀤𑀸𑀦𑀤𑀼𑀓𑁆𑀔𑀪𑀸𑀯𑁂𑀦 𑀘 𑀚𑀭𑀸𑀫𑀭𑀡𑁂 𑀅𑀦𑁆𑀢𑁄𑀕𑀥𑀢𑀸𑀬 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀤𑁆𑀯𑀸𑀤𑀲𑀧𑀤𑀢𑀸 𑀤𑀝𑁆𑀞𑀩𑁆𑀩𑀸. 𑀏𑀢𑁆𑀣 𑀘 𑀧𑀸𑀴𑀺𑀬𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀯𑀺𑀲𑁆𑀲𑀚𑁆𑀚𑀺𑀢𑀸𑀦𑀫𑁆𑀧𑀺 𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀕𑀳𑀡𑀁 𑀓𑀭𑁄𑀦𑁆𑀢𑁄 𑀢𑁂𑀲𑀁 𑀪𑀺𑀦𑁆𑀤𑀺𑀢𑁆𑀯𑀸𑀧𑀺 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀦𑀬𑀫𑀸𑀢𑀺𑀓𑀸𑀤𑀺𑀓𑀸 𑀮𑀓𑁆𑀔𑀡𑀫𑀸𑀢𑀺𑀓𑀦𑁆𑀢𑀸 𑀫𑀸𑀢𑀺𑀓𑀸 𑀧𑀓𑀭𑀡𑀦𑁆𑀢𑀭𑀸𑀲𑀸𑀥𑀸𑀭𑀡𑀢𑀸𑀬 𑀥𑀸𑀢𑀼𑀓𑀣𑀸𑀬 𑀫𑀸𑀢𑀺𑀓𑀸 𑀦𑀸𑀫, 𑀢𑀲𑁆𑀲𑀸 𑀅𑀩𑁆𑀪𑀦𑁆𑀢𑀭𑁂 𑀯𑀼𑀢𑁆𑀢𑁄 𑀯𑀺𑀪𑀚𑀺𑀢𑀩𑁆𑀩𑀸𑀦𑀁 𑀉𑀤𑁆𑀤𑁂𑀲𑁄 𑀅𑀩𑁆𑀪𑀦𑁆𑀢𑀭𑀫𑀸𑀢𑀺𑀓𑀸 𑀦𑀸𑀫𑀸𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀯𑀁 𑀅𑀯𑀢𑁆𑀯𑀸𑀢𑀺 𑀬𑀣𑀸 ‘‘𑀲𑀩𑁆𑀩𑀸𑀧𑀺…𑀧𑁂… 𑀫𑀸𑀢𑀺𑀓𑀸’’𑀢𑀺 𑀅𑀬𑀁 𑀥𑀸𑀢𑀼𑀓𑀣𑀸𑀫𑀸𑀢𑀺𑀓𑀢𑁄 𑀩𑀳𑀺𑀤𑁆𑀥𑀸 𑀯𑀼𑀢𑁆𑀢𑀸, 𑀏𑀯𑀁 𑀅𑀯𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀥𑀸𑀢𑀼𑀓𑀣𑀸𑀬 𑀅𑀩𑁆𑀪𑀦𑁆𑀢𑀭𑁂𑀬𑁂𑀯𑀸𑀢𑀺 𑀘 𑀥𑀸𑀢𑀼𑀓𑀣𑀸𑀫𑀸𑀢𑀺𑀓𑀸𑀬 𑀅𑀩𑁆𑀪𑀦𑁆𑀢𑀭𑁂𑀬𑁂𑀯𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀤𑀸𑀯𑁂𑀡𑀺𑀓𑀫𑀸𑀢𑀺𑀓𑀸𑀅𑀩𑁆𑀪𑀦𑁆𑀢𑀭𑁂 𑀳𑀺 𑀞𑀧𑀺𑀢𑀸 𑀢𑀲𑁆𑀲𑀸𑀬𑁂𑀯 𑀅𑀩𑁆𑀪𑀦𑁆𑀢𑀭𑁂 𑀞𑀧𑀺𑀢𑀸𑀢𑀺 𑀯𑀼𑀢𑁆𑀢𑀸. 𑀅𑀣 𑀯𑀸 𑀏𑀯𑀁 𑀅𑀯𑀢𑁆𑀯𑀸𑀢𑀺 𑀬𑀣𑀸 ‘‘𑀲𑀩𑁆𑀩𑀸𑀧𑀺…𑀧𑁂… 𑀫𑀸𑀢𑀺𑀓𑀸’’𑀢𑀺 𑀏𑀢𑁂𑀦 𑀯𑀘𑀦𑁂𑀦 𑀥𑀸𑀢𑀼𑀓𑀣𑀸𑀢𑁄 𑀩𑀳𑀺𑀪𑀽𑀢𑀸 𑀓𑀼𑀲𑀮𑀸𑀤𑀺𑀅𑀭𑀡𑀦𑁆𑀢𑀸 𑀫𑀸𑀢𑀺𑀓𑀸 𑀧𑀓𑀭𑀡𑀦𑁆𑀢𑀭𑀕𑀢𑀸 𑀯𑀼𑀢𑁆𑀢𑀸, 𑀏𑀯𑀁 𑀅𑀯𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀥𑀸𑀢𑀼𑀓𑀣𑀸𑀬 𑀅𑀩𑁆𑀪𑀦𑁆𑀢𑀭𑁂𑀬𑁂𑀯𑀸𑀢𑀺 𑀘 𑀇𑀫𑀲𑁆𑀲 𑀧𑀓𑀭𑀡𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀏𑀯 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑁆𑀯𑀸 𑀞𑀧𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀲𑁆𑀲 𑀅𑀪𑀺𑀥𑀫𑁆𑀫𑀲𑁆𑀲 𑀫𑀸𑀢𑀺𑀓𑀸𑀬 𑀅𑀲𑀗𑁆𑀕𑀳𑀺𑀢𑀢𑁆𑀢𑀸 𑀯𑀺𑀓𑀺𑀡𑁆𑀡𑀪𑀸𑀯𑁂𑀦 𑀧𑀓𑀺𑀡𑁆𑀡𑀓𑀢𑀸 𑀯𑁂𑀤𑀺𑀢𑀩𑁆𑀩𑀸.

𑁩. 𑀦𑀬𑀫𑀼𑀔𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁩. 𑀦𑀬𑀸𑀦𑀁 𑀧𑀯𑀢𑁆𑀢𑀺𑀤𑁆𑀯𑀸𑀭𑀪𑀽𑀢𑀸 𑀲𑀗𑁆𑀕𑀳𑀸𑀲𑀗𑁆𑀕𑀳𑀯𑀺𑀬𑁄𑀕𑀻𑀲𑀳𑀬𑁄𑀕𑀻𑀥𑀫𑁆𑀫𑀸 𑀦𑀬𑀫𑀼𑀔𑀸𑀦𑀻𑀢𑀺 𑀢𑁂𑀲𑀁 𑀉𑀤𑁆𑀤𑁂𑀲𑁄 𑀦𑀬𑀫𑀼𑀔𑀫𑀸𑀢𑀺𑀓𑀸. 𑀘𑀼𑀤𑁆𑀤𑀲𑀧𑀺 𑀳𑀺 𑀲𑀗𑁆𑀕𑀳𑀸𑀲𑀗𑁆𑀕𑀳𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀸𑀦𑀁 𑀯𑁄𑀫𑀺𑀲𑁆𑀲𑀓𑀢𑀸𑀯𑀲𑁂𑀦 𑀧𑀯𑀢𑁆𑀢𑀸𑀢𑀺 𑀬𑁂𑀳𑀺 𑀢𑁂 𑀘𑀢𑁆𑀢𑀸𑀭𑁄𑀧𑀺 𑀳𑁄𑀦𑁆𑀢𑀺, 𑀢𑁂 𑀥𑀫𑁆𑀫𑀸 𑀘𑀼𑀤𑁆𑀤𑀲𑀦𑁆𑀦𑀫𑁆𑀧𑀺 𑀦𑀬𑀸𑀦𑀁 𑀫𑀼𑀔𑀸𑀦𑀺 𑀳𑁄𑀦𑁆𑀢𑀻𑀢𑀺. 𑀢𑀢𑁆𑀣 𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀸𑀤𑀻𑀲𑀼 𑀲𑀘𑁆𑀘𑀸𑀤𑀻𑀳𑀺𑀧𑀺 𑀬𑀣𑀸𑀲𑀫𑁆𑀪𑀯𑀁 𑀲𑀗𑁆𑀕𑀳𑀸𑀲𑀗𑁆𑀕𑀳𑁄 𑀬𑀤𑀺𑀧𑀺 𑀯𑀼𑀢𑁆𑀢𑁄, 𑀲𑁄 𑀧𑀦 𑀲𑀗𑁆𑀕𑀸𑀳𑀓𑀪𑀽𑀢𑁂𑀳𑀺 𑀢𑁂𑀳𑀺 𑀯𑀼𑀢𑁆𑀢𑁄, 𑀦 𑀲𑀗𑁆𑀕𑀳𑀪𑀽𑀢𑁂𑀳𑀺, 𑀲𑁄𑀧𑀺 ‘‘𑀘𑀓𑁆𑀔𑀸𑀬𑀢𑀦𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸 𑀆𑀬𑀢𑀦𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸’’𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀥𑀫𑁆𑀫𑀼𑀤𑁆𑀥𑀸𑀭𑁂 𑀢𑀢𑁆𑀣𑀸𑀧𑀺 𑀔𑀦𑁆𑀥𑀸𑀤𑀻𑀳𑁂𑀯 𑀲𑀗𑁆𑀕𑀳𑁂𑀳𑀺 𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑁄, 𑀢𑀲𑁆𑀫𑀸 ‘‘𑀢𑀻𑀳𑀺 𑀲𑀗𑁆𑀕𑀳𑁄, 𑀢𑀻𑀳𑀺 𑀅𑀲𑀗𑁆𑀕𑀳𑁄’’𑀢𑀺 𑀯𑀼𑀢𑁆𑀢𑀁. 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀥𑀫𑁆𑀫𑀼𑀤𑁆𑀥𑀸𑀭𑁂𑀧𑀺 𑀧𑀦 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀘 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀁 𑀅𑀭𑀡𑀦𑁆𑀢𑀸𑀦𑀁 𑀬𑀣𑀸𑀲𑀫𑁆𑀪𑀯𑀁 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀸 𑀘𑀢𑀽𑀳𑁂𑀯 𑀔𑀦𑁆𑀥𑁂𑀳𑀺 𑀳𑁄𑀦𑁆𑀢𑀻𑀢𑀺 ‘‘𑀘𑀢𑀽𑀳𑀺 𑀲𑀫𑁆𑀧𑀬𑁄𑀕𑁄,𑀘𑀢𑀽𑀳𑀺 𑀯𑀺𑀧𑁆𑀧𑀬𑁄𑀕𑁄’’𑀢𑀺 𑀯𑀼𑀢𑁆𑀢𑀁.

𑀦𑀦𑀼 𑀘 𑀯𑀺𑀧𑁆𑀧𑀬𑁄𑀕𑁄 𑀭𑀽𑀧𑀦𑀺𑀩𑁆𑀩𑀸𑀦𑁂𑀳𑀺𑀧𑀺 𑀳𑁄𑀢𑀺, 𑀓𑀲𑁆𑀫𑀸 ‘‘𑀘𑀢𑀽𑀳𑀺 𑀯𑀺𑀧𑁆𑀧𑀬𑁄𑀕𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀭𑀽𑀧𑀦𑀺𑀩𑁆𑀩𑀸𑀦𑁂𑀳𑀺 𑀪𑀯𑀦𑁆𑀢𑀲𑁆𑀲𑀧𑀺 𑀘𑀢𑀽𑀳𑁂𑀯 𑀪𑀸𑀯𑀢𑁄. 𑀦 𑀳𑀺 𑀭𑀽𑀧𑀁 𑀭𑀽𑀧𑁂𑀦 𑀦𑀺𑀩𑁆𑀩𑀸𑀦𑁂𑀦 𑀯𑀸 𑀯𑀺𑀧𑁆𑀧𑀬𑀼𑀢𑁆𑀢𑀁 𑀳𑁄𑀢𑀺, 𑀦𑀺𑀩𑁆𑀩𑀸𑀦𑀁 𑀯𑀸 𑀭𑀽𑀧𑁂𑀦, 𑀘𑀢𑀽𑀳𑁂𑀯 𑀧𑀦 𑀔𑀦𑁆𑀥𑁂𑀳𑀺 𑀳𑁄𑀢𑀻𑀢𑀺 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀭𑀽𑀧𑀦𑀺𑀩𑁆𑀩𑀸𑀦𑁂𑀳𑀺 𑀯𑀺𑀧𑁆𑀧𑀬𑁄𑀕𑁄𑀧𑀺 𑀯𑀺𑀧𑁆𑀧𑀬𑀼𑀚𑁆𑀚𑀫𑀸𑀦𑁂𑀳𑀺 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀦𑀺𑀬𑀫𑀺𑀢𑁄 𑀢𑁂𑀳𑀺 𑀯𑀺𑀦𑀸 𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑀢𑁄. 𑀲𑁄 𑀘𑀸𑀬𑀁 𑀯𑀺𑀧𑁆𑀧𑀬𑁄𑀕𑁄 𑀅𑀦𑀸𑀭𑀫𑁆𑀫𑀡𑀲𑁆𑀲, 𑀅𑀦𑀸𑀭𑀫𑁆𑀫𑀡𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑁂𑀳𑀺 𑀫𑀺𑀲𑁆𑀲𑀓𑀲𑁆𑀲 𑀘 𑀦 𑀳𑁄𑀢𑀺, 𑀅𑀦𑀸𑀭𑀫𑁆𑀫𑀡𑀲𑁆𑀲 𑀧𑀦 𑀫𑀺𑀲𑁆𑀲𑀓𑀲𑁆𑀲 𑀘 𑀲𑀸𑀭𑀫𑁆𑀫𑀡𑁂𑀦, 𑀲𑀸𑀭𑀫𑁆𑀫𑀡𑀲𑁆𑀲 𑀲𑀸𑀭𑀫𑁆𑀫𑀡𑁂𑀦 𑀅𑀦𑀸𑀭𑀫𑁆𑀫𑀡𑁂𑀦 𑀫𑀺𑀲𑁆𑀲𑀓𑁂𑀦 𑀘 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁪. 𑀮𑀓𑁆𑀔𑀡𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁪. 𑀲𑀗𑁆𑀕𑀳𑁄𑀬𑁂𑀯 𑀲𑀗𑁆𑀕𑀳𑀦𑀬𑁄. 𑀲𑀪𑀸𑀕𑁄. 𑀯𑀺𑀲𑀪𑀸𑀕𑁄𑀢𑀺 𑀏𑀢𑀲𑁆𑀲 ‘‘𑀢𑀻𑀳𑀺 𑀲𑀗𑁆𑀕𑀳𑁄, 𑀢𑀻𑀳𑀺 𑀅𑀲𑀗𑁆𑀕𑀳𑁄’’𑀢𑀺 𑀏𑀢𑁂𑀦, ‘‘𑀘𑀢𑀽𑀳𑀺 𑀲𑀫𑁆𑀧𑀬𑁄𑀕𑁄, 𑀘𑀢𑀽𑀳𑀺 𑀯𑀺𑀧𑁆𑀧𑀬𑁄𑀕𑁄’’𑀢𑀺 𑀏𑀢𑁂𑀦𑀧𑀺 𑀯𑀺𑀲𑀼𑀁 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀢𑁂𑀦 𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄 𑀘 𑀲𑀪𑀸𑀕𑁄 𑀯𑀺𑀲𑀪𑀸𑀕𑁄 𑀘 𑀪𑀸𑀯𑁄, 𑀢𑀣𑀸 𑀲𑀫𑁆𑀧𑀬𑁄𑀕𑁄 𑀯𑀺𑀧𑁆𑀧𑀬𑁄𑀕𑁄 𑀘𑀸𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀬𑀲𑁆𑀲 𑀯𑀸 𑀲𑀗𑁆𑀕𑀳𑁄 𑀘 𑀅𑀲𑀗𑁆𑀕𑀳𑁄 𑀘, 𑀲𑁄 𑀥𑀫𑁆𑀫𑁄 𑀲𑀪𑀸𑀕𑁄 𑀯𑀺𑀲𑀪𑀸𑀕𑁄 𑀘, 𑀢𑀣𑀸 𑀬𑀲𑁆𑀲 𑀲𑀫𑁆𑀧𑀬𑁄𑀕𑁄 𑀯𑀺𑀧𑁆𑀧𑀬𑁄𑀕𑁄 𑀘, 𑀲𑁄𑀧𑀺 𑀲𑀪𑀸𑀕𑁄 𑀯𑀺𑀲𑀪𑀸𑀕𑁄 𑀘𑀸𑀢𑀺. 𑀢𑀢𑁆𑀣 𑀬𑁂𑀦 𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀥𑀫𑁆𑀫𑀸 𑀕𑀡𑀦𑀁 𑀕𑀘𑁆𑀙𑀦𑁆𑀢𑀺, 𑀲𑁄 𑀭𑀼𑀧𑁆𑀧𑀦𑀸𑀤𑀺𑀓𑁄 𑀲𑀫𑀸𑀦𑀪𑀸𑀯𑁄 𑀲𑀗𑁆𑀕𑀳𑁂 𑀲𑀪𑀸𑀕𑀢𑀸, 𑀏𑀓𑀼𑀧𑁆𑀧𑀸𑀤𑀸𑀤𑀺𑀓𑁄 𑀲𑀫𑁆𑀧𑀬𑁄𑀕𑁂 𑀯𑁂𑀤𑀺𑀢𑀩𑁆𑀩𑁄.

𑁫. 𑀩𑀸𑀳𑀺𑀭𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁫. 𑀏𑀯𑀁 𑀥𑀸𑀢𑀼𑀓𑀣𑀸𑀬 𑀫𑀸𑀢𑀺𑀓𑀢𑁄 𑀩𑀳𑀺 𑀞𑀧𑀺𑀢𑀢𑁆𑀢𑀸𑀢𑀺 ‘‘𑀲𑀩𑁆𑀩𑀸𑀧𑀺…𑀧𑁂… 𑀫𑀸𑀢𑀺𑀓𑀸’’𑀢𑀺 𑀏𑀢𑁂𑀦 𑀞𑀧𑀦𑀸𑀓𑀸𑀭𑁂𑀦 𑀩𑀳𑀺 𑀧𑀺𑀝𑁆𑀞𑀺𑀢𑁄 𑀞𑀧𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀯𑀸 𑀞𑀧𑀦𑀸𑀓𑀸𑀭𑁂𑀦 𑀓𑀼𑀲𑀮𑀸𑀤𑀻𑀦𑀁 𑀅𑀭𑀡𑀦𑁆𑀢𑀸𑀦𑀁 𑀇𑀥 𑀅𑀝𑁆𑀞𑀧𑁂𑀢𑁆𑀯𑀸 𑀥𑀸𑀢𑀼𑀓𑀣𑀸𑀬 𑀫𑀸𑀢𑀺𑀓𑀢𑁄 𑀩𑀳𑀺 𑀧𑀓𑀭𑀡𑀦𑁆𑀢𑀭𑀫𑀸𑀢𑀺𑀓𑀸𑀬 𑀇𑀫𑀲𑁆𑀲 𑀧𑀓𑀭𑀡𑀲𑁆𑀲 𑀫𑀸𑀢𑀺𑀓𑀸𑀪𑀸𑀯𑁂𑀦 𑀞𑀧𑀺𑀢𑀢𑁆𑀢𑀸 𑀢𑀣𑀸 𑀧𑀓𑀸𑀲𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄𑀢𑀺𑀆𑀤𑀻𑀲𑀼 𑀲𑀗𑁆𑀕𑀳𑁄 𑀏𑀓𑀯𑀺𑀥𑁄𑀯, 𑀲𑁄 𑀓𑀲𑁆𑀫𑀸 ‘‘𑀘𑀢𑀼𑀩𑁆𑀩𑀺𑀥𑁄’’𑀢𑀺 𑀯𑀼𑀢𑁆𑀢𑁄𑀢𑀺? 𑀲𑀗𑁆𑀕𑀳𑁄𑀢𑀺 𑀅𑀢𑁆𑀣𑀁 𑀅𑀯𑀢𑁆𑀯𑀸 𑀅𑀦𑀺𑀤𑁆𑀥𑀸𑀭𑀺𑀢𑀢𑁆𑀣𑀲𑁆𑀲 𑀲𑀤𑁆𑀤𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸. 𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄𑀢𑀺𑀆𑀤𑀻𑀲𑀼 𑀲𑀤𑁆𑀤𑁂𑀲𑀼 𑀲𑀗𑁆𑀕𑀳𑀲𑀤𑁆𑀤𑁄 𑀢𑀸𑀯 𑀅𑀢𑁆𑀢𑀦𑁄 𑀅𑀢𑁆𑀣𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄𑀢𑀺 𑀅𑀬𑀜𑁆𑀳𑁂𑀢𑁆𑀣𑀢𑁆𑀣𑁄. 𑀅𑀢𑁆𑀣𑁄𑀧𑀺 𑀯𑀸 𑀅𑀦𑀺𑀤𑁆𑀥𑀸𑀭𑀺𑀢𑀯𑀺𑀲𑁂𑀲𑁄 𑀲𑀸𑀫𑀜𑁆𑀜𑁂𑀦 𑀕𑀳𑁂𑀢𑀩𑁆𑀩𑀢𑀁 𑀧𑀢𑁆𑀢𑁄 ‘‘𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄’’𑀢𑀺𑀆𑀤𑀻𑀲𑀼 ‘‘𑀲𑀗𑁆𑀕𑀳𑁄’’𑀢𑀺 𑀯𑀼𑀢𑁆𑀢𑁄𑀢𑀺 𑀦 𑀓𑁄𑀘𑀺 𑀤𑁄𑀲𑁄. 𑀦𑀺𑀤𑁆𑀥𑀸𑀭𑀺𑀢𑁂 𑀳𑀺 𑀯𑀺𑀲𑁂𑀲𑁂 𑀢𑀲𑁆𑀲 𑀏𑀓𑀯𑀺𑀥𑀢𑀸 𑀲𑀺𑀬𑀸, 𑀦 𑀢𑀢𑁄 𑀧𑀼𑀩𑁆𑀩𑁂𑀢𑀺. 𑀚𑀸𑀢𑀺𑀲𑀤𑁆𑀤𑀲𑁆𑀲 𑀲𑀸𑀧𑁂𑀓𑁆𑀔𑀲𑀤𑁆𑀤𑀢𑁆𑀢𑀸 ‘‘𑀚𑀸𑀢𑀺𑀬𑀸 𑀲𑀗𑁆𑀕𑀳𑁄’’𑀢𑀺 𑀯𑀼𑀢𑁆𑀢𑁂 ‘‘𑀅𑀢𑁆𑀢𑀦𑁄 𑀚𑀸𑀢𑀺𑀬𑀸’’𑀢𑀺 𑀯𑀺𑀜𑁆𑀜𑀸𑀬𑀢𑀺 𑀲𑀫𑁆𑀩𑀦𑁆𑀥𑀸𑀭𑀳𑀲𑁆𑀲 𑀅𑀜𑁆𑀜𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸𑀢𑀺 𑀚𑀸𑀢𑀺𑀲𑀗𑁆𑀕𑀳𑁄𑀢𑀺 𑀭𑀽𑀧𑀓𑀡𑁆𑀟𑁂 𑀯𑀼𑀢𑁆𑀢𑁄 𑀲𑀚𑀸𑀢𑀺𑀲𑀗𑁆𑀕𑀳𑁄 𑀯𑀼𑀢𑁆𑀢𑁄 𑀳𑁄𑀢𑀺.

𑀏𑀢𑁆𑀣 𑀦𑀬𑀫𑀸𑀢𑀺𑀓𑀸𑀬 ‘‘𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄, 𑀲𑀫𑁆𑀧𑀬𑁄𑀕𑁄 𑀯𑀺𑀧𑁆𑀧𑀬𑁄𑀕𑁄’’𑀢𑀺 𑀇𑀫𑁂 𑀤𑁆𑀯𑁂 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀥𑀫𑁆𑀫𑀯𑀺𑀲𑁂𑀲𑀁 𑀅𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀲𑀸𑀫𑀜𑁆𑀜𑁂𑀦 𑀥𑀫𑁆𑀫𑀸𑀦𑀁 𑀧𑀼𑀘𑁆𑀙𑀦𑀯𑀺𑀲𑁆𑀲𑀚𑁆𑀚𑀦𑀦𑀬𑀉𑀤𑁆𑀤𑁂𑀲𑀸, 𑀅𑀯𑀲𑁂𑀲𑀸 𑀦𑀺𑀤𑁆𑀥𑀸𑀭𑁂𑀢𑁆𑀯𑀸. ‘‘𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀳𑀺 ‘‘𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀁 𑀅𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀏𑀓𑀲𑁆𑀲 𑀅𑀲𑀗𑁆𑀕𑀳𑀺𑀢𑀲𑀤𑁆𑀤𑀲𑁆𑀲 𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀲𑀗𑁆𑀕𑀳𑀺𑀢𑀯𑀺𑀲𑁂𑀲𑀯𑀺𑀲𑀺𑀝𑁆𑀞𑁄 𑀬𑁄 𑀅𑀲𑀗𑁆𑀕𑀳𑀺𑀢𑁄 𑀥𑀫𑁆𑀫𑀯𑀺𑀲𑁂𑀲𑁄, 𑀢𑀦𑁆𑀦𑀺𑀲𑁆𑀲𑀺𑀢𑁄 𑀅𑀲𑀗𑁆𑀕𑀳𑀺𑀢𑀢𑀸𑀲𑀗𑁆𑀔𑀸𑀢𑁄 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀦𑀬𑁄 𑀉𑀤𑁆𑀤𑀺𑀝𑁆𑀞𑁄 𑀳𑁄𑀢𑀺, ‘‘𑀲𑀗𑁆𑀕𑀳𑀺𑀢𑁂𑀦𑀸’’𑀢𑀺 𑀘 𑀯𑀺𑀲𑁂𑀲𑀦𑁂 𑀓𑀭𑀡𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀏𑀲 𑀦𑀬𑁄 𑀢𑀢𑀺𑀬𑀸𑀤𑀻𑀲𑀼 𑀤𑀲𑀫𑀸𑀯𑀲𑀸𑀦𑁂𑀲𑀼 𑀦𑀬𑀼𑀤𑁆𑀤𑁂𑀲𑁂𑀲𑀼 𑀙𑀝𑁆𑀞𑀯𑀚𑁆𑀚𑁂𑀲𑀼. 𑀢𑁂𑀲𑀼𑀧𑀺 𑀳𑀺 𑀯𑀼𑀢𑁆𑀢𑀦𑀬𑁂𑀦 𑀤𑁆𑀯𑀻𑀳𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀥𑀫𑁆𑀫𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀁 𑀓𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀅𑀦𑁆𑀢𑀺𑀫𑀧𑀤𑀲𑀤𑀺𑀲𑁂𑀦 𑀢𑀢𑀺𑀬𑀧𑀤𑁂𑀦 𑀧𑀼𑀘𑁆𑀙𑀦𑀯𑀺𑀲𑁆𑀲𑀚𑁆𑀚𑀦𑀦𑀬𑀸 𑀉𑀤𑁆𑀤𑀺𑀝𑁆𑀞𑀸𑀢𑀺. 𑀢𑀢𑁆𑀣 𑀘𑀢𑀼𑀢𑁆𑀣𑀧𑀜𑁆𑀘𑀫𑁂𑀲𑀼 𑀓𑀢𑁆𑀢𑀼𑀅𑀢𑁆𑀣𑁂 𑀓𑀭𑀡𑀦𑀺𑀤𑁆𑀤𑁂𑀲𑁄, 𑀲𑀢𑁆𑀢𑀫𑀸𑀤𑀻𑀲𑀼 𑀘 𑀘𑀢𑀽𑀲𑀼 𑀲𑀳𑀬𑁄𑀕𑁂 𑀤𑀝𑁆𑀞𑀩𑁆𑀩𑁄, 𑀦 𑀤𑀼𑀢𑀺𑀬𑀢𑀢𑀺𑀬𑁂𑀲𑀼 𑀯𑀺𑀬 𑀲𑀫𑀸𑀦𑀸𑀥𑀺𑀓𑀭𑀡𑁂 𑀯𑀺𑀲𑁂𑀲𑀦𑁂. 𑀢𑀢𑁆𑀣 𑀳𑀺 𑀲𑀪𑀸𑀯𑀦𑁆𑀢𑀭𑁂𑀦 𑀲𑀪𑀸𑀯𑀦𑁆𑀢𑀭𑀲𑁆𑀲 𑀯𑀺𑀲𑁂𑀲𑀦𑀁 𑀓𑀢𑀁, 𑀏𑀢𑁂𑀲𑀼 𑀥𑀫𑁆𑀫𑀦𑁆𑀢𑀭𑁂𑀦 𑀥𑀫𑁆𑀫𑀦𑁆𑀢𑀭𑀲𑁆𑀲𑀸𑀢𑀺. 𑀏𑀓𑀸𑀤𑀲𑀫𑀸𑀤𑀻𑀲𑀼 𑀧𑀦 𑀘𑀢𑀽𑀲𑀼 𑀆𑀤𑀺𑀧𑀤𑁂𑀦𑁂𑀯 𑀥𑀫𑁆𑀫𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀁 𑀓𑀢𑁆𑀯𑀸 𑀇𑀢𑀭𑁂𑀳𑀺 𑀧𑀼𑀘𑁆𑀙𑀦𑀯𑀺𑀲𑁆𑀲𑀚𑁆𑀚𑀦𑀦𑀬𑀸 𑀉𑀤𑁆𑀤𑀺𑀝𑁆𑀞𑀸. 𑀯𑀺𑀲𑁂𑀲𑀦𑁂 𑀏𑀯 𑀘𑁂𑀢𑁆𑀣 𑀓𑀭𑀡𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀜𑁆𑀳𑀺 𑀦𑀺𑀲𑁆𑀲𑀬𑀪𑀽𑀢𑀸 𑀥𑀫𑁆𑀫𑀸 𑀲𑀗𑁆𑀕𑀳𑀺𑀢𑀢𑀸𑀤𑀺𑀯𑀺𑀲𑁂𑀲𑁂𑀦 𑀓𑀭𑀡𑀪𑀽𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀸𑀤𑀺𑀪𑀸𑀯𑀁 𑀅𑀢𑁆𑀢𑀦𑁄 𑀯𑀺𑀲𑁂𑀲𑁂𑀦𑁆𑀢𑀻𑀢𑀺.

𑀯𑀺𑀓𑀧𑁆𑀧𑀢𑁄𑀢𑀺 𑀯𑀺𑀯𑀺𑀥𑀓𑀧𑁆𑀧𑀦𑀢𑁄, 𑀯𑀺𑀪𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦𑀸𑀢𑀺 𑀅𑀥𑀺𑀫𑁄𑀓𑁆𑀔𑀲𑀫𑁆𑀧𑀬𑁄𑀕𑀯𑀲𑁂𑀦. 𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀸 𑀘 𑀲𑀩𑁆𑀩𑁂 𑀘 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀸, 𑀢𑁂𑀲𑀁 𑀲𑀸𑀥𑀸𑀭𑀡𑀯𑀲𑁂𑀦𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀥𑀺𑀫𑁄𑀓𑁆𑀔𑁄 𑀳𑀺 𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀸𑀦𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀲𑀸𑀥𑀸𑀭𑀡𑀯𑀲𑁂𑀦 𑀯𑀼𑀢𑁆𑀢𑁄, 𑀇𑀢𑀭𑁂 𑀲𑀩𑁆𑀩𑁂𑀲𑀦𑁆𑀢𑀺. 𑀢𑀢𑁆𑀣 𑀲𑀸𑀥𑀸𑀭𑀡𑀸 𑀧𑀲𑀝𑀸 𑀧𑀸𑀓𑀝𑀸 𑀘𑀸𑀢𑀺 𑀆𑀤𑀺𑀢𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀸, 𑀢𑀲𑁆𑀫𑀸 𑀢𑁂𑀲𑀁 𑀲𑀗𑁆𑀕𑀳𑀸𑀤𑀺𑀧𑀭𑀺𑀕𑁆𑀕𑀳𑀢𑁆𑀣𑀁 𑀉𑀤𑁆𑀤𑁂𑀲𑁄 𑀓𑀢𑁄, 𑀅𑀲𑀸𑀥𑀸𑀭𑀡𑀸𑀧𑀺 𑀧𑀦 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀸𑀯𑀸𑀢𑀺 𑀢𑁂𑀲𑀼 𑀫𑀳𑀸𑀯𑀺𑀲𑀬𑁂𑀦 𑀅𑀜𑁆𑀜𑁂𑀲𑀫𑁆𑀧𑀺 𑀲𑀗𑁆𑀕𑀳𑀸𑀤𑀺𑀧𑀭𑀺𑀕𑁆𑀕𑀳𑀁 𑀤𑀲𑁆𑀲𑁂𑀢𑀼𑀁 𑀅𑀥𑀺𑀫𑁄𑀓𑁆𑀔𑁄 𑀉𑀤𑁆𑀤𑀺𑀝𑁆𑀞𑁄. ‘‘𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀸’’𑀢𑀺 𑀘 𑀥𑀫𑁆𑀫𑀲𑀗𑁆𑀕𑀳𑀯𑀡𑁆𑀡𑀦𑀸𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑁂 𑀘 𑀯𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀬𑁂 𑀯𑀼𑀢𑁆𑀢𑀸, 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀲𑀸𑀥𑀸𑀭𑀡𑀢𑁄𑀢𑀺 𑀧𑀦 𑀅𑀢𑁆𑀣𑁂 𑀲𑀢𑀺 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑁂𑀲𑀼 𑀯𑀢𑁆𑀢𑀩𑁆𑀩𑁂𑀲𑀼 𑀬𑁄 𑀅𑀲𑀸𑀥𑀸𑀭𑀡𑁂𑀲𑀼 𑀫𑀳𑀸𑀯𑀺𑀲𑀬𑁄 𑀅𑀥𑀺𑀫𑁄𑀓𑁆𑀔𑁄, 𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀸𑀥𑀸𑀭𑀡𑀢𑁄 𑀨𑀲𑁆𑀲𑀸𑀤𑀬𑁄 𑀲𑀩𑁆𑀩𑀲𑀸𑀥𑀸𑀭𑀡𑀸𑀢𑀺 𑀅𑀥𑀺𑀫𑁄𑀓𑁆𑀔𑁄 𑀘 𑀅𑀲𑀸𑀥𑀸𑀭𑀡𑁂𑀲𑀼 𑀫𑀳𑀸𑀯𑀺𑀲𑀬𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑁄 𑀅𑀜𑁆𑀜𑀲𑁆𑀲 𑀢𑀸𑀤𑀺𑀲𑀲𑁆𑀲 𑀅𑀪𑀸𑀯𑀸𑀢𑀺 𑀅𑀬𑀫𑀥𑀺𑀧𑁆𑀧𑀸𑀬𑁄 𑀤𑀝𑁆𑀞𑀩𑁆𑀩𑁄.

𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀧𑀦𑁂𑀢𑁆𑀣 𑀭𑀽𑀧𑀫𑀺𑀲𑁆𑀲𑀓𑀢𑁆𑀢𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀧𑀦 𑀅𑀲𑀫𑀸𑀥𑀺𑀲𑀪𑀸𑀯𑀸 𑀲𑀸𑀫𑀜𑁆𑀜𑀲𑀤𑁆𑀤𑁂𑀦𑁂𑀯 𑀲𑀸𑀫𑀜𑁆𑀜𑀯𑀺𑀲𑁂𑀲𑀲𑀤𑁆𑀤𑁂𑀳𑀺 𑀘 𑀲𑀫𑀸𑀥𑀺𑀲𑀪𑀸𑀯𑀸 𑀯𑀺𑀲𑁂𑀲𑀲𑀤𑁆𑀤𑀯𑀘𑀦𑀻𑀬𑀁 𑀅𑀜𑁆𑀜𑀁 𑀩𑁆𑀬𑀸𑀧𑁂𑀢𑀩𑁆𑀩𑀁 𑀦𑀺𑀯𑀢𑁆𑀢𑁂𑀢𑀩𑁆𑀩𑀜𑁆𑀘 𑀦𑀢𑁆𑀣𑀻𑀢𑀺 𑀅𑀦𑀜𑁆𑀜𑀩𑁆𑀬𑀸𑀧𑀓𑀦𑀺𑀯𑀢𑁆𑀢𑀓𑀲𑀸𑀫𑀜𑁆𑀜𑀯𑀺𑀲𑁂𑀲𑀤𑀻𑀧𑀦𑀢𑁄 𑀢𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀪𑁂𑀤𑀤𑀻𑀧𑀓𑁂𑀳𑀺 𑀯𑀢𑁆𑀢𑀩𑁆𑀩𑀸, 𑀦 𑀲𑀼𑀔𑀸𑀤𑀺𑀲𑀪𑀸𑀯𑀸 𑀯𑁂𑀤𑀦𑀸 𑀯𑀺𑀬 𑀯𑀼𑀢𑁆𑀢𑀮𑀓𑁆𑀔𑀡𑀯𑀺𑀧𑀭𑀻𑀢𑁂𑀳𑀺 𑀲𑀸𑀫𑀜𑁆𑀜𑀯𑀺𑀲𑁂𑀲𑀲𑀤𑁆𑀤𑁂𑀳𑁂𑀯, 𑀢𑀲𑁆𑀫𑀸 ‘‘𑀘𑀺𑀢𑁆𑀢𑁂𑀓𑀕𑁆𑀕𑀢𑀸’’𑀢𑀺 𑀅𑀬𑀁 𑀲𑀸𑀫𑀜𑁆𑀜𑀲𑀤𑁆𑀤𑁄 𑀲𑀫𑀸𑀥𑀺𑀲𑀪𑀸𑀯𑁂 𑀯𑀺𑀲𑁂𑀲𑀲𑀤𑁆𑀤𑀦𑀺𑀭𑀧𑁂𑀓𑁆𑀔𑁄 𑀧𑀯𑀢𑁆𑀢𑀫𑀸𑀦𑁄 𑀲𑀬𑀫𑁂𑀯 𑀯𑀺𑀲𑁂𑀲𑀲𑀤𑁆𑀤𑀫𑀸𑀧𑀚𑁆𑀚𑀺𑀢𑁆𑀯𑀸 𑀅𑀲𑀫𑀸𑀥𑀺𑀲𑀪𑀸𑀯𑀫𑁂𑀯 𑀧𑀓𑀸𑀲𑁂𑀬𑁆𑀬, 𑀇𑀢𑀭𑁄 𑀘 𑀲𑀫𑀸𑀥𑀺𑀲𑀪𑀸𑀯𑀫𑁂𑀯𑀸𑀢𑀺 𑀤𑁆𑀯𑀺𑀥𑀸 𑀪𑀺𑀦𑁆𑀦𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀅𑀲𑀸𑀥𑀸𑀭𑀡𑀸 𑀘𑁂𑀯 𑀅𑀧𑁆𑀧𑀯𑀺𑀲𑀬𑀸 𑀘𑀸𑀢𑀺 𑀇𑀥 𑀉𑀤𑁆𑀤𑁂𑀲𑀁 𑀦 𑀅𑀭𑀳𑀢𑀺. 𑀅𑀪𑀺𑀦𑁆𑀦𑀸𑀧𑀺 𑀯𑀸 𑀨𑀲𑁆𑀲𑀸𑀤𑀻𑀦𑀁 𑀯𑀺𑀬 𑀧𑀸𑀓𑀝𑀢𑁆𑀢𑀸𑀪𑀸𑀯𑀢𑁄 𑀅𑀜𑁆𑀜𑀥𑀫𑁆𑀫𑀦𑀺𑀲𑁆𑀲𑀬𑁂𑀦 𑀯𑀢𑁆𑀢𑀩𑁆𑀩𑀢𑁄 𑀘 𑀲𑀸 𑀚𑀻𑀯𑀺𑀢𑀜𑁆𑀘 𑀦 𑀅𑀭𑀳𑀢𑀻𑀢𑀺 𑀦 𑀉𑀤𑁆𑀤𑀺𑀝𑁆𑀞𑀸𑀢𑀺.

𑀫𑀸𑀢𑀺𑀓𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧. 𑀧𑀞𑀫𑀦𑀬𑁄 𑀲𑀗𑁆𑀕𑀳𑀸𑀲𑀗𑁆𑀕𑀳𑀧𑀤𑀯𑀡𑁆𑀡𑀦𑀸

𑁧. 𑀔𑀦𑁆𑀥𑀧𑀤𑀯𑀡𑁆𑀡𑀦𑀸

𑁬. 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄𑀫𑀳𑀦𑁆𑀢𑀭𑁂 𑀅𑀪𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀢𑁂𑀲𑀁 𑀧𑀦 𑀲𑀪𑀸𑀯𑀢𑁄 𑀅𑀪𑀺𑀜𑁆𑀜𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀧𑀭𑀺𑀜𑁆𑀜𑁂𑀬𑁆𑀬𑀢𑀸𑀤𑀺𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀲𑀘𑁆𑀘𑀸𑀦𑀺, 𑀅𑀥𑀺𑀧𑀢𑀺𑀬𑀸𑀤𑀺𑀓𑀺𑀘𑁆𑀘𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀇𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀘 𑀯𑀼𑀢𑁆𑀢𑀸𑀦𑀻𑀢𑀺 𑀲𑀘𑁆𑀘𑀸𑀤𑀺𑀯𑀺𑀲𑁂𑀲𑁄 𑀯𑀺𑀬 𑀲𑀗𑁆𑀕𑀳𑀸𑀲𑀗𑁆𑀕𑀳𑀯𑀺𑀲𑁂𑀲𑁄 𑀘 𑀅𑀪𑀺𑀜𑁆𑀜𑁂𑀬𑁆𑀬𑀦𑀺𑀲𑁆𑀲𑀺𑀢𑁄 𑀯𑀼𑀘𑁆𑀘𑀫𑀸𑀦𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑁄 𑀳𑁄𑀢𑀻𑀢𑀺 ‘‘𑀢𑀻𑀳𑀺 𑀲𑀗𑁆𑀕𑀳𑁄. 𑀢𑀻𑀳𑀺 𑀅𑀲𑀗𑁆𑀕𑀳𑁄’’𑀢𑀺 𑀦𑀬𑀫𑀼𑀔𑀫𑀸𑀢𑀺𑀓𑀸 𑀞𑀧𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀘𑀢𑀽𑀳𑀻’’𑀢𑀺 𑀯𑀼𑀢𑁆𑀢𑀸 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀸 𑀘 𑀅𑀪𑀺𑀜𑁆𑀜𑁂𑀬𑁆𑀬𑀦𑀺𑀲𑁆𑀲𑀬𑁂𑀦 𑀔𑀦𑁆𑀥𑀸𑀤𑀻𑀳𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀺𑀢𑀸𑀢𑀺. 𑀭𑀽𑀧𑀓𑁆𑀔𑀦𑁆𑀥𑁄 𑀏𑀓𑁂𑀦 𑀔𑀦𑁆𑀥𑁂𑀦𑀸𑀢𑀺 𑀬𑁂 𑀥𑀫𑁆𑀫𑀸 ‘‘𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀲𑀁 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀭𑀽𑀧𑀓𑁆𑀔𑀦𑁆𑀥𑀪𑀸𑀯𑁂𑀦 𑀲𑀪𑀸𑀕𑀢𑀸 𑀳𑁄𑀢𑀻𑀢𑀺 𑀭𑀽𑀧𑀓𑁆𑀔𑀦𑁆𑀥𑀪𑀸𑀯𑀲𑀗𑁆𑀔𑀸𑀢𑁂𑀦, 𑀭𑀽𑀧𑀓𑁆𑀔𑀦𑁆𑀥𑀯𑀘𑀦𑀲𑀗𑁆𑀔𑀸𑀢𑁂𑀦 𑀯𑀸 𑀕𑀡𑀦𑁂𑀦 𑀲𑀗𑁆𑀕𑀳𑀁 𑀕𑀡𑀦𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀬𑀜𑁆𑀳𑀺 𑀓𑀺𑀜𑁆𑀘𑀻’’𑀢𑀺𑀆𑀤𑀺. 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀳𑀺 𑀲𑀗𑁆𑀕𑀳𑀺𑀢𑀩𑁆𑀩𑀥𑀫𑁆𑀫𑁄 𑀤𑀲𑁆𑀲𑀺𑀢𑁄. 𑀬𑁂𑀦 𑀲𑀗𑁆𑀕𑀳𑁂𑀦 𑀲𑀗𑁆𑀕𑀬𑁆𑀳𑀢𑀺, 𑀢𑀲𑁆𑀲 𑀲𑀗𑁆𑀕𑀳𑀲𑁆𑀲 𑀤𑀲𑁆𑀲𑀦𑀁 ‘‘𑀏𑀓𑁂𑀦 𑀔𑀦𑁆𑀥𑁂𑀦𑀸’’𑀢𑀺 𑀯𑀘𑀦𑀁. 𑀧𑀜𑁆𑀘𑀲𑀼 𑀔𑀦𑁆𑀥𑀕𑀡𑀦𑁂𑀲𑀼 𑀏𑀓𑁂𑀦 𑀔𑀦𑁆𑀥𑀕𑀡𑀦𑁂𑀦 𑀕𑀡𑀺𑀢𑁄𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀬𑀲𑁆𑀫𑀸 𑀘 𑀔𑀦𑁆𑀥𑀸𑀤𑀺𑀯𑀘𑀦𑁂𑀳𑀺 𑀲𑀗𑁆𑀕𑀳𑁄 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀉𑀧𑀭𑀺 ‘‘𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸’’𑀢𑀺𑀆𑀤𑀺𑀁 𑀯𑀓𑁆𑀔𑀢𑀻𑀢𑀺.

𑀅𑀲𑀗𑁆𑀕𑀳𑀦𑀬𑀦𑀺𑀤𑁆𑀤𑁂𑀲𑁂𑀢𑀺 𑀇𑀤𑀁 ‘‘𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄’’𑀢𑀺 𑀏𑀢𑀲𑁆𑀲𑁂𑀯 𑀦𑀬𑀲𑁆𑀲 𑀏𑀓𑀤𑁂𑀲𑀦𑀬𑀪𑀸𑀯𑁂𑀦 𑀯𑀼𑀢𑁆𑀢𑀁, 𑀦 𑀦𑀬𑀦𑁆𑀢𑀭𑀢𑀸𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀭𑀽𑀧𑀓𑁆𑀔𑀦𑁆𑀥𑀫𑀽𑀮𑀓𑀸𑀬𑁂𑀯 𑀘𑁂𑀢𑁆𑀣 𑀤𑀼𑀓𑀢𑀺𑀓𑀘𑀢𑀼𑀓𑁆𑀓𑀸 𑀤𑀲𑁆𑀲𑀺𑀢𑀸𑀢𑀺 𑀏𑀢𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀫𑀽𑀮𑀓𑀸 𑀧𑀼𑀭𑀺𑀫𑁂𑀦 𑀬𑁄𑀚𑀺𑀬𑀫𑀸𑀦𑁂 𑀯𑀺𑀲𑁂𑀲𑁄 𑀦𑀢𑁆𑀣𑀻𑀢𑀺 𑀧𑀘𑁆𑀙𑀺𑀫𑁂𑀳𑁂𑀯 𑀬𑁄𑀚𑁂𑀢𑁆𑀯𑀸 𑀢𑀬𑁄 𑀤𑀼𑀓𑀸 𑀤𑁆𑀯𑁂 𑀢𑀺𑀓𑀸 𑀏𑀓𑁄 𑀘𑀢𑀼𑀓𑁆𑀓𑁄, 𑀲𑀜𑁆𑀜𑀸𑀓𑁆𑀔𑀦𑁆𑀥𑀫𑀽𑀮𑀓𑀸 𑀤𑁆𑀯𑁂 𑀤𑀼𑀓𑀸 𑀏𑀓𑁄 𑀢𑀺𑀓𑁄, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀫𑀽𑀮𑀓𑁄 𑀏𑀓𑁄 𑀤𑀼𑀓𑁄𑀢𑀺 𑀏𑀢𑁂 𑀮𑀩𑁆𑀪𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀲𑀁 𑀧𑀦 𑀪𑁂𑀤𑀢𑁄 𑀧𑀜𑁆𑀘𑀓𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀦𑁆𑀢𑀭𑀁 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀁 𑀓𑀸𑀢𑀩𑁆𑀩𑀁 𑀲𑀁𑀔𑀺𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀯𑀼𑀢𑁆𑀢𑀦𑀬𑁂𑀦 𑀯𑀸 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺 𑀧𑀸𑀴𑀺𑀁 𑀦 𑀆𑀭𑁄𑀧𑀺𑀢𑀦𑁆𑀢𑀺.

𑀆𑀬𑀢𑀦𑀧𑀤𑀸𑀤𑀺𑀯𑀡𑁆𑀡𑀦𑀸

𑁪𑁦. 𑀬𑀲𑁆𑀫𑀸 𑀘 𑀤𑀼𑀓𑀢𑀺𑀓𑁂𑀲𑀽𑀢𑀺 𑀬𑀤𑀺𑀧𑀺 𑀏𑀓𑀓𑁂𑀧𑀺 𑀲𑀤𑀺𑀲𑀁 𑀯𑀺𑀲𑁆𑀲𑀚𑁆𑀚𑀦𑀁, 𑀏𑀓𑀓𑁂 𑀧𑀦 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑁄𑀢𑀺𑀦𑁆𑀤𑁆𑀭𑀺𑀬𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀤𑀼𑀓𑀸𑀤𑀻𑀲𑀼 𑀅𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀁 𑀤𑀺𑀝𑁆𑀞𑀁. 𑀦 𑀳𑁂𑀢𑁆𑀣 𑀘𑀓𑁆𑀔𑀼𑀲𑁄𑀢𑀘𑀓𑁆𑀔𑀼𑀲𑀼𑀔𑀺𑀦𑁆𑀤𑁆𑀭𑀺𑀬𑀤𑀼𑀓𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀁, 𑀦𑀸𑀧𑀺 𑀤𑀼𑀓𑁂𑀳𑀺 𑀢𑀺𑀓𑀲𑁆𑀲, 𑀇𑀥 𑀧𑀦 𑀤𑀼𑀓𑁆𑀔𑀲𑀫𑀼𑀤𑀬𑀤𑀼𑀓𑁆𑀔𑀫𑀕𑁆𑀕𑀤𑀼𑀓𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀢𑀺𑀓𑁂𑀦 𑀘 𑀲𑀤𑀺𑀲𑀁 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀤𑀼𑀓𑀢𑀺𑀓𑁂𑀲𑁆𑀯𑁂𑀯 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑀁 𑀲𑀫𑀼𑀤𑀬𑀸𑀦𑀦𑁆𑀢𑀭𑀁 𑀫𑀕𑁆𑀕𑀲𑀘𑁆𑀘𑀲𑁆𑀲 𑀯𑀘𑀦𑁂 𑀓𑀸𑀭𑀡𑀁 𑀯𑀤𑀢𑀺.

𑁬. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀡𑁆𑀡𑀦𑀸

𑁬𑁧. ‘‘𑀧𑀼𑀘𑁆𑀙𑀁 𑀅𑀦𑀸𑀭𑀪𑀺𑀢𑁆𑀯𑀸 𑀅𑀯𑀺𑀚𑁆𑀚𑀸 𑀏𑀓𑁂𑀦 𑀔𑀦𑁆𑀥𑁂𑀦, 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀏𑀓𑁂𑀦 𑀔𑀦𑁆𑀥𑁂𑀦𑀸’’𑀢𑀺 𑀮𑀺𑀔𑀺𑀢𑀩𑁆𑀩𑁂𑀧𑀺 𑀧𑀫𑀸𑀤𑀯𑀲𑁂𑀦 ‘‘𑀅𑀯𑀺𑀚𑁆𑀚𑀸 𑀏𑀓𑁂𑀦 𑀔𑀦𑁆𑀥𑁂𑀦𑀸’’𑀢𑀺 𑀇𑀤𑀁 𑀦 𑀮𑀺𑀔𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀭𑀽𑀧𑁂𑀓𑀲𑁂𑀲𑀁 𑀯𑀸 𑀓𑀢𑁆𑀯𑀸 𑀅𑀯𑀺𑀚𑁆𑀚𑀸𑀯𑀘𑀦𑁂𑀦 𑀅𑀯𑀺𑀚𑁆𑀚𑀸𑀯𑀺𑀲𑁆𑀲𑀚𑁆𑀚𑀦𑀁 𑀤𑀲𑁆𑀲𑀺𑀢𑀦𑁆𑀢𑀺. 𑀲𑀩𑁆𑀩𑀫𑁆𑀧𑀺 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀦𑁆𑀢𑀺 𑀏𑀢𑁆𑀣 𑀯𑀺𑀧𑀸𑀓𑀕𑁆𑀕𑀳𑀡𑁂𑀦 𑀯𑀺𑀲𑁂𑀲𑀦𑀁 𑀦 𑀓𑀸𑀢𑀩𑁆𑀩𑀁. 𑀓𑀼𑀲𑀮𑀸𑀤𑀻𑀦𑀫𑁆𑀧𑀺 𑀳𑀺 𑀯𑀺𑀜𑁆𑀜𑀸𑀡𑀸𑀦𑀁 𑀥𑀸𑀢𑀼𑀓𑀣𑀸𑀬𑀁 𑀲𑀗𑁆𑀔𑀸𑀭𑀧𑀘𑁆𑀘𑀬𑀸𑀯𑀺𑀜𑁆𑀜𑀸𑀡𑀸𑀤𑀺𑀧𑀤𑁂𑀳𑀺 𑀲𑀗𑁆𑀕𑀳𑀺𑀢𑀢𑀸 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀦𑀺𑀤𑁆𑀤𑁂𑀲𑁂 ‘‘𑀯𑀺𑀧𑀸𑀓𑀸 𑀥𑀫𑁆𑀫𑀸’’𑀢𑀺 𑀇𑀫𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀸𑀲𑀤𑀺𑀲𑁂𑀦 𑀢𑁂𑀲𑀁 𑀯𑀺𑀲𑁆𑀲𑀚𑁆𑀚𑀦𑁂𑀦 𑀤𑀲𑁆𑀲𑀺𑀢𑀸, 𑀇𑀥 𑀘 𑀦𑀸𑀫𑀭𑀽𑀧𑀲𑁆𑀲 𑀏𑀓𑀸𑀤𑀲𑀳𑀸𑀬𑀢𑀦𑁂𑀳𑀺 𑀲𑀗𑁆𑀕𑀳𑀯𑀘𑀦𑁂𑀦 𑀅𑀓𑀫𑁆𑀫𑀚𑀸𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀢𑀸 𑀯𑀺𑀜𑁆𑀜𑀸𑀬𑀢𑀻𑀢𑀺.

𑁭𑁧. 𑀚𑀸𑀬𑀫𑀸𑀦𑀧𑀭𑀺𑀧𑀘𑁆𑀘𑀫𑀸𑀦𑀪𑀺𑀚𑁆𑀚𑀫𑀸𑀦𑀸𑀦𑀁 𑀚𑀸𑀬𑀫𑀸𑀦𑀸𑀤𑀺𑀪𑀸𑀯𑀫𑀢𑁆𑀢𑀢𑁆𑀢𑀸 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 𑀧𑀭𑀫𑀢𑁆𑀣𑀢𑁄 𑀯𑀺𑀦𑀺𑀩𑁆𑀪𑀼𑀚𑁆𑀚𑀺𑀢𑁆𑀯𑀸 𑀅𑀦𑀼𑀧𑀮𑀩𑁆𑀪𑀫𑀸𑀦𑀸𑀦𑀺 𑀧𑀭𑀫𑀢𑁆𑀣𑀸𑀦𑀁 𑀲𑀪𑀸𑀯𑀫𑀢𑁆𑀢𑀪𑀽𑀢𑀸𑀦𑀺, 𑀢𑀸𑀦𑀺 𑀭𑀽𑀧𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀧𑀸𑀓𑀪𑁂𑀤𑀪𑀽𑀢𑀸𑀦𑀺 𑀭𑀼𑀧𑁆𑀧𑀦𑀪𑀸𑀯𑁂𑀦 𑀕𑀬𑁆𑀳𑀦𑁆𑀢𑀻𑀢𑀺 𑀭𑀽𑀧𑀓𑁆𑀔𑀦𑁆𑀥𑀥𑀫𑁆𑀫𑀲𑀪𑀸𑀕𑀸𑀦𑀺, 𑀅𑀭𑀽𑀧𑀸𑀦𑀁 𑀧𑀦 𑀦𑀺𑀩𑁆𑀩𑀢𑁆𑀢𑀺𑀆𑀤𑀺𑀪𑀽𑀢𑀸𑀦𑀺 𑀭𑀽𑀧𑀓𑀮𑀸𑀧𑀚𑀸𑀢𑀺𑀆𑀤𑀻𑀦𑀺 𑀯𑀺𑀬 𑀲𑀳𑀼𑀧𑁆𑀧𑀚𑁆𑀚𑀫𑀸𑀦𑀘𑀢𑀼𑀓𑁆𑀔𑀦𑁆𑀥𑀓𑀮𑀸𑀧𑀦𑀺𑀩𑁆𑀩𑀢𑁆𑀢𑀺𑀆𑀤𑀺𑀪𑀸𑀯𑀢𑁄 𑀏𑀓𑁂𑀓𑀪𑀽𑀢𑀸𑀦𑀺 𑀯𑁂𑀤𑀺𑀬𑀦𑀲𑀜𑁆𑀚𑀸𑀦𑀦𑀯𑀺𑀚𑀸𑀦𑀦𑁂𑀳𑀺 𑀏𑀓𑀦𑁆𑀢𑀧𑀭𑀫𑀢𑁆𑀣𑀓𑀺𑀘𑁆𑀘𑁂𑀳𑀺 𑀅𑀕𑀬𑁆𑀳𑀫𑀸𑀦𑀸𑀦𑀺 𑀲𑀗𑁆𑀔𑀢𑀸𑀪𑀺𑀲𑀗𑁆𑀔𑀭𑀡𑁂𑀦 𑀅𑀦𑁂𑀓𑀦𑁆𑀢𑀧𑀭𑀫𑀢𑁆𑀣𑀓𑀺𑀘𑁆𑀘𑁂𑀦 𑀕𑀬𑁆𑀳𑀦𑁆𑀢𑀻𑀢𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀲𑀪𑀸𑀕𑀸𑀦𑀺, 𑀢𑀣𑀸 𑀤𑀼𑀯𑀺𑀥𑀸𑀦𑀺𑀧𑀺 𑀢𑀸𑀦𑀺 𑀘𑀓𑁆𑀔𑀸𑀬𑀢𑀦𑀸𑀤𑀻𑀳𑀺 𑀏𑀓𑀦𑁆𑀢𑀧𑀭𑀫𑀢𑁆𑀣𑀓𑀺𑀘𑁆𑀘𑁂𑀳𑀺 𑀅𑀕𑀬𑁆𑀳𑀫𑀸𑀦𑀸𑀦𑀺 𑀦𑀺𑀲𑁆𑀲𑀢𑁆𑀢𑀝𑁆𑀞𑁂𑀦 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀼𑀥𑀫𑁆𑀫𑁂𑀳𑀺 𑀲𑀪𑀸𑀕𑀸𑀦𑀺, 𑀢𑁂𑀦 𑀢𑁂𑀳𑀺 𑀔𑀦𑁆𑀥𑀸𑀤𑀻𑀳𑀺 𑀲𑀗𑁆𑀕𑀬𑁆𑀳𑀦𑁆𑀢𑀻𑀢𑀺 ‘‘𑀚𑀸𑀢𑀺 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀻’’𑀢𑀺𑀆𑀤𑀺𑀫𑀸𑀳.

𑀧𑀞𑀫𑀦𑀬𑀲𑀗𑁆𑀕𑀳𑀸𑀲𑀗𑁆𑀕𑀳𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀦𑀬𑁄 𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁧𑁭𑁧. 𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀦𑀺𑀤𑁆𑀤𑁂𑀲𑁂 𑀬𑀁 𑀢𑀁 𑀉𑀤𑁆𑀤𑁂𑀲𑁂 𑀅𑀲𑀗𑁆𑀕𑀳𑀺𑀢𑀢𑀸𑀬 𑀧𑀼𑀘𑁆𑀙𑀺𑀢𑀩𑁆𑀩𑀁 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀜𑁆𑀘 𑀲𑀗𑁆𑀕𑀳𑀺𑀢𑀢𑀸𑀯𑀺𑀲𑀺𑀝𑁆𑀞𑀁 𑀅𑀲𑀗𑁆𑀕𑀳𑀺𑀢𑀁 𑀥𑀫𑁆𑀫𑀚𑀸𑀢𑀁 𑀦𑀺𑀤𑁆𑀥𑀸𑀭𑀺𑀢𑀁, 𑀢𑀤𑁂𑀯 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀓𑁆𑀔𑀸𑀬𑀢𑀦𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸’’𑀢𑀺 𑀆𑀳. 𑀲𑀩𑁆𑀩𑀢𑁆𑀣 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑀲𑀸𑀫𑀜𑁆𑀜𑀸𑀦𑀁 𑀦𑀺𑀘𑁆𑀘𑀁 𑀯𑀺𑀲𑁂𑀲𑀸𑀧𑁂𑀓𑁆𑀔𑀢𑁆𑀢𑀸 𑀪𑁂𑀤𑀦𑀺𑀲𑁆𑀲𑀺𑀢𑀢𑁆𑀢𑀸 𑀘 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀁 𑀲𑀯𑀺𑀲𑁂𑀲𑀸𑀯 𑀔𑀦𑁆𑀥𑀸𑀤𑀺𑀕𑀡𑀦𑀸 𑀲𑀼𑀤𑁆𑀥𑀸. 𑀢𑀢𑁆𑀣 𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀯𑀘𑀦𑀫𑀢𑁆𑀢𑁂𑀦 𑀥𑀫𑁆𑀫𑀯𑀺𑀲𑁂𑀲𑀲𑁆𑀲 𑀦𑀺𑀤𑁆𑀥𑀸𑀭𑀺𑀢𑀢𑁆𑀢𑀸 𑀢𑀻𑀲𑀼 𑀲𑀗𑁆𑀕𑀳𑁂𑀲𑀼 𑀏𑀓𑁂𑀦 𑀤𑁆𑀯𑀻𑀳𑀺 𑀯𑀸 𑀬𑁂 𑀲𑀗𑁆𑀕𑀳𑀺𑀢𑀸 𑀳𑀼𑀢𑁆𑀯𑀸 𑀅𑀜𑁆𑀜𑁂𑀳𑀺 𑀅𑀲𑀗𑁆𑀕𑀳𑀺𑀢𑀸, 𑀢𑁂𑀬𑁂𑀯 𑀥𑀫𑁆𑀫𑀸 ‘‘𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸’’𑀢𑀺 𑀏𑀢𑁆𑀢𑀓𑁂𑀦𑁂𑀯 𑀤𑀲𑁆𑀲𑁂𑀢𑀩𑁆𑀩𑀸 𑀲𑀺𑀬𑀼𑀁, 𑀢𑁂𑀲𑀁 𑀧𑀦 𑀏𑀯𑀁𑀯𑀺𑀥𑀸𑀦𑀁 𑀅𑀲𑀫𑁆𑀪𑀯𑀸 𑀦𑀬𑀫𑀸𑀢𑀺𑀓𑀸𑀬 𑀘 𑀅𑀩𑁆𑀪𑀦𑁆𑀢𑀭𑀩𑀸𑀳𑀺𑀭𑀫𑀸𑀢𑀺𑀓𑀸𑀧𑁂𑀓𑁆𑀔𑀢𑁆𑀢𑀸 𑀉𑀤𑁆𑀤𑁂𑀲𑁂𑀧𑀺 𑀬𑀁 𑀬𑀁 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀲𑀼 𑀅𑀭𑀡𑀦𑁆𑀢𑁂𑀲𑀼 𑀲𑀗𑁆𑀕𑀸𑀳𑀓𑀁, 𑀢𑀁 𑀢𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀁 𑀦𑀺𑀤𑁆𑀥𑀸𑀭𑀺𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀢𑁂𑀦 𑀢𑁂𑀦 𑀲𑀗𑁆𑀕𑀸𑀳𑀓𑁂𑀦 𑀬𑀣𑀸𑀦𑀺𑀤𑁆𑀥𑀸𑀭𑀺𑀢𑀁 𑀥𑀫𑁆𑀫𑀁 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀘𑀓𑁆𑀔𑀸𑀬𑀢𑀦𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀬𑀢𑁆𑀣 𑀳𑀺 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀥𑀫𑁆𑀫𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀁 𑀦𑀢𑁆𑀣𑀺, 𑀢𑀲𑁆𑀫𑀺𑀁 𑀧𑀞𑀫𑀦𑀬𑁂 𑀙𑀝𑁆𑀞𑀦𑀬𑁂 𑀘 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀪𑀸𑀯𑁂𑀦, 𑀇𑀢𑀭𑁂𑀲𑀼 𑀘 𑀬𑀁 𑀬𑀁 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁 𑀦𑀺𑀤𑁆𑀥𑀸𑀭𑀺𑀢𑀁, 𑀢𑀲𑁆𑀲 𑀢𑀲𑁆𑀲 𑀦𑀺𑀬𑀸𑀫𑀓𑀪𑀸𑀯𑁂𑀦 𑀭𑀽𑀧𑀓𑁆𑀔𑀦𑁆𑀥𑀸𑀤𑀬𑁄 𑀅𑀭𑀡𑀦𑁆𑀢𑀸 𑀉𑀤𑁆𑀤𑀺𑀝𑁆𑀞𑀸𑀢𑀺.

𑀢𑀢𑁆𑀣 ‘‘𑀘𑀓𑁆𑀔𑀸𑀬𑀢𑀦𑁂𑀦…𑀧𑁂… 𑀨𑁄𑀝𑁆𑀞𑀩𑁆𑀩𑀥𑀸𑀢𑀼𑀬𑀸’’𑀢𑀺 𑀓𑀢𑁆𑀢𑀼𑀅𑀢𑁆𑀣𑁂 𑀓𑀭𑀡𑀦𑀺𑀤𑁆𑀤𑁂𑀲𑁄 𑀤𑀝𑁆𑀞𑀩𑁆𑀩𑁄, ‘‘𑀔𑀦𑁆𑀥𑀲𑀗𑁆𑀕𑀳𑁂𑀦 𑀆𑀬𑀢𑀦𑀲𑀗𑁆𑀕𑀳𑁂𑀦 𑀥𑀸𑀢𑀼𑀲𑀗𑁆𑀕𑀳𑁂𑀦𑀸’’𑀢𑀺 𑀓𑀭𑀡𑀢𑁆𑀣𑁂. 𑀏𑀢𑁆𑀣 𑀘 𑀬𑁂𑀦 𑀬𑁂𑀦 𑀲𑀗𑁆𑀕𑀸𑀳𑀓𑁂𑀦 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑁂𑀲𑀼 𑀢𑁂𑀦 𑀢𑁂𑀦 𑀲𑀗𑁆𑀕𑀳𑁂𑀢𑀩𑁆𑀩𑀸𑀲𑀗𑁆𑀕𑀳𑁂𑀢𑀩𑁆𑀩𑀁 𑀅𑀜𑁆𑀜𑀁 𑀅𑀢𑁆𑀣𑀺, 𑀢𑀁 𑀢𑀤𑁂𑀯 𑀲𑀗𑁆𑀕𑀸𑀳𑀓𑀸𑀲𑀗𑁆𑀕𑀸𑀳𑀓𑀪𑀸𑀯𑁂𑀦 𑀉𑀤𑁆𑀥𑀝𑀁. 𑀭𑀽𑀧𑀓𑁆𑀔𑀦𑁆𑀥𑁂𑀦 𑀧𑀦 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑁂𑀢𑀩𑁆𑀩𑁄 𑀅𑀜𑁆𑀜𑁄 𑀥𑀫𑁆𑀫𑁄 𑀦𑀢𑁆𑀣𑀺, 𑀢𑀣𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀳𑀺, 𑀦 𑀘 𑀲𑁄 𑀏𑀯 𑀢𑀲𑁆𑀲 𑀲𑀗𑁆𑀕𑀸𑀳𑀓𑁄 𑀅𑀲𑀗𑁆𑀕𑀸𑀳𑀓𑁄 𑀯𑀸 𑀳𑁄𑀢𑀺. 𑀬𑀜𑁆𑀘 ‘‘𑀭𑀽𑀧𑀓𑁆𑀔𑀦𑁆𑀥𑁄 𑀏𑀓𑁂𑀦 𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑁄’’𑀢𑀺 𑀯𑀼𑀢𑁆𑀢𑀁, 𑀢𑀜𑁆𑀘 𑀦 𑀢𑀲𑁆𑀲𑁂𑀯 𑀢𑁂𑀦 𑀲𑀗𑁆𑀕𑀳𑀺𑀢𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀭𑀽𑀧𑀓𑁆𑀔𑀦𑁆𑀥𑀪𑀸𑀯𑁂𑀦 𑀧𑀦 𑀭𑀽𑀧𑀓𑁆𑀔𑀦𑁆𑀥𑀯𑀘𑀦𑁂𑀦 𑀯𑀸 𑀕𑀳𑀺𑀢𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀧𑀓𑀸𑀲𑀺𑀢𑁄𑀬𑀫𑀢𑁆𑀣𑁄.

𑀬𑀤𑀺 𑀘 𑀲𑁄 𑀏𑀯 𑀢𑁂𑀦 𑀲𑀗𑁆𑀕𑀬𑁆𑀳𑁂𑀬𑁆𑀬, 𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀦𑀺𑀤𑁆𑀤𑁂𑀲𑁂 𑁋 ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸 𑀆𑀬𑀢𑀦𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸 𑀥𑀸𑀢𑀼𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸, 𑀢𑁂 𑀥𑀫𑁆𑀫𑀸 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺𑀆𑀤𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀘 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀬𑀣𑀸 𑀘𑀺𑀢𑁆𑀢𑀁 𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀯𑀺𑀧𑁆𑀧𑀬𑀼𑀢𑁆𑀢𑀜𑁆𑀘 𑀦 𑀳𑁄𑀢𑀺, 𑀏𑀯𑀁 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑁄 𑀅𑀲𑀗𑁆𑀕𑀳𑀺𑀢𑁄 𑀘 𑀦 𑀳𑁄𑀢𑀺, 𑀢𑀣𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀳𑀺. 𑀦 𑀳𑀺 𑀲𑁄 𑀏𑀯 𑀢𑀲𑁆𑀲 𑀲𑀪𑀸𑀕𑁄 𑀯𑀺𑀲𑀪𑀸𑀕𑁄 𑀘𑀸𑀢𑀺. 𑀢𑁂𑀦𑁂𑀯 𑀦 𑀏𑀓𑀤𑁂𑀲𑀸 𑀯𑀺𑀬 𑀲𑀫𑀼𑀤𑀸𑀬𑀲𑁆𑀲, 𑀲𑀫𑀼𑀤𑀸𑀬𑁄 𑀏𑀓𑀤𑁂𑀲𑀸𑀦𑀁 𑀲𑀗𑁆𑀕𑀸𑀳𑀓𑁄 𑀅𑀲𑀗𑁆𑀕𑀸𑀳𑀓𑁄 𑀘. 𑀬𑀣𑀸 𑀭𑀽𑀧𑀓𑁆𑀔𑀦𑁆𑀥𑁄 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁, 𑀥𑀫𑁆𑀫𑀸𑀬𑀢𑀦𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀦𑀁, 𑀲𑀭𑀡𑀸 𑀥𑀫𑁆𑀫𑀸 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁. 𑀲𑀫𑀼𑀤𑀸𑀬𑀦𑁆𑀢𑁄𑀕𑀥𑀸𑀦𑀜𑁆𑀳𑀺 𑀏𑀓𑀤𑁂𑀲𑀸𑀦𑀁 𑀦 𑀯𑀺𑀪𑀸𑀕𑁄 𑀅𑀢𑁆𑀣𑀺, 𑀬𑁂𑀦 𑀢𑁂 𑀲𑀫𑀼𑀤𑀸𑀬𑀲𑁆𑀲 𑀲𑀫𑀼𑀤𑀸𑀬𑁄 𑀘 𑀢𑁂𑀲𑀁 𑀲𑀪𑀸𑀕𑁄 𑀯𑀺𑀲𑀪𑀸𑀕𑁄 𑀘 𑀲𑀺𑀬𑀸𑀢𑀺, 𑀢𑀣𑀸 𑀦 𑀲𑀫𑀼𑀤𑀸𑀬𑁄 𑀏𑀓𑀤𑁂𑀲𑀲𑀪𑀸𑀕𑀯𑀺𑀲𑀪𑀸𑀕𑀸𑀦𑀁 𑀲𑀗𑁆𑀕𑀸𑀳𑀓𑁄 𑀅𑀲𑀗𑁆𑀕𑀸𑀳𑀓𑁄 𑀘. 𑀬𑀣𑀸 𑀥𑀫𑁆𑀫𑀸𑀬𑀢𑀦𑀁 𑀲𑀼𑀔𑀼𑀫𑀭𑀽𑀧𑀲𑀪𑀸𑀕𑀲𑁆𑀲 𑀯𑁂𑀤𑀦𑀸𑀤𑀺𑀯𑀺𑀲𑀪𑀸𑀕𑀲𑁆𑀲 𑀘 𑀭𑀽𑀧𑀓𑁆𑀔𑀦𑁆𑀥𑁂𑀓𑀤𑁂𑀲𑀲𑁆𑀲 𑀔𑀦𑁆𑀥𑀲𑀗𑁆𑀕𑀳𑁂𑀦, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀭𑀽𑀧𑀸𑀭𑀽𑀧𑀚𑀻𑀯𑀺𑀢𑀲𑀪𑀸𑀕𑀯𑀺𑀲𑀪𑀸𑀕𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁂𑀓𑀤𑁂𑀲𑀲𑁆𑀲 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀓𑀤𑁂𑀲𑀲𑁆𑀲 𑀘 𑀚𑀻𑀯𑀺𑀢𑀯𑀚𑁆𑀚𑀲𑁆𑀲 𑀔𑀦𑁆𑀥𑀲𑀗𑁆𑀕𑀳𑁂𑀦𑁂𑀯. 𑀦 𑀳𑀺 𑀏𑀓𑀤𑁂𑀲𑀲𑀪𑀸𑀕𑀁 𑀲𑀫𑀼𑀤𑀸𑀬𑀲𑀪𑀸𑀕𑀁, 𑀦𑀸𑀧𑀺 𑀏𑀓𑀤𑁂𑀲𑀯𑀺𑀲𑀪𑀸𑀕𑀁 𑀲𑀫𑀼𑀤𑀸𑀬𑀯𑀺𑀲𑀪𑀸𑀕𑀦𑁆𑀢𑀺, 𑀢𑀲𑁆𑀫𑀸 𑀲𑀢𑀺𑀧𑀺 𑀅𑀢𑁆𑀢𑀢𑁄 𑀅𑀢𑁆𑀢𑀦𑀺 𑀅𑀦𑁆𑀢𑁄𑀕𑀥𑀢𑁄 𑀅𑀢𑁆𑀢𑁂𑀓𑀤𑁂𑀲𑀲𑀪𑀸𑀕𑀢𑁄 𑀘 𑀅𑀜𑁆𑀜𑀲𑁆𑀲 𑀅𑀲𑀗𑁆𑀕𑀸𑀳𑀓𑀢𑁆𑀢𑁂 𑀲𑀗𑁆𑀕𑀸𑀳𑀓𑀢𑁆𑀢𑀫𑁂𑀯 𑀏𑀢𑁂𑀲𑀁 𑀦𑀢𑁆𑀣𑀺, 𑀬𑁂𑀦 𑀲𑀗𑁆𑀕𑀳𑀺𑀢𑀲𑁆𑀲 𑀅𑀲𑀗𑁆𑀕𑀸𑀳𑀓𑀸 𑀲𑀺𑀬𑀼𑀦𑁆𑀢𑀺 𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄 𑀏𑀯 𑀏𑀯𑀭𑀽𑀧𑀸𑀦𑀁 𑀅𑀕𑁆𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁.

𑀬𑀁 𑀧𑀦 ‘‘𑀥𑀫𑁆𑀫𑀸𑀬𑀢𑀦𑀁 𑀅𑀲𑀗𑁆𑀔𑀢𑀁 𑀔𑀦𑁆𑀥𑀢𑁄 𑀞𑀧𑁂𑀢𑁆𑀯𑀸 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢’’𑀦𑁆𑀢𑀺 (𑀥𑀸𑀢𑀼. 𑁨𑁫), ‘‘𑀘𑀓𑁆𑀔𑀸𑀬𑀢𑀦𑀜𑁆𑀘 𑀲𑁄𑀢𑀸𑀬𑀢𑀦𑀜𑁆𑀘 𑀏𑀓𑁂𑀦 𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢’’𑀦𑁆𑀢𑀺 (𑀥𑀸𑀢𑀼. 𑁨𑁬) 𑀘 𑀯𑀼𑀢𑁆𑀢𑀁, 𑀦 𑀢𑁂𑀦 𑀏𑀓𑀤𑁂𑀲𑀸𑀦𑀁 𑀲𑀫𑀼𑀤𑀸𑀬𑀲𑀗𑁆𑀕𑀸𑀳𑀓𑀢𑁆𑀢𑀁, 𑀲𑀫𑀼𑀤𑀸𑀬𑀲𑁆𑀲 𑀘 𑀏𑀓𑀤𑁂𑀲𑀲𑀗𑁆𑀕𑀸𑀳𑀓𑀢𑁆𑀢𑀁 𑀤𑀲𑁆𑀲𑁂𑀢𑀺, 𑀘𑀢𑀼𑀓𑁆𑀔𑀦𑁆𑀥𑀕𑀡𑀦𑀪𑁂𑀤𑁂𑀳𑀺 𑀧𑀦 𑀥𑀫𑁆𑀫𑀸𑀬𑀢𑀦𑀲𑁆𑀲 𑀕𑀡𑁂𑀢𑀩𑁆𑀩𑀸𑀕𑀡𑁂𑀢𑀩𑁆𑀩𑀪𑀸𑀯𑁂𑀦 𑀧𑀜𑁆𑀘𑀥𑀸 𑀪𑀺𑀦𑁆𑀦𑀢𑀁, 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀏𑀓𑀓𑁆𑀔𑀦𑁆𑀥𑀕𑀡𑀦𑁂𑀦 𑀕𑀡𑁂𑀢𑀩𑁆𑀩𑀢𑀸𑀬 𑀏𑀓𑀯𑀺𑀥𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀲𑀗𑁆𑀕𑀸𑀳𑀓𑀸𑀲𑀗𑁆𑀕𑀸𑀳𑀓𑀦𑀺𑀭𑀧𑁂𑀓𑁆𑀔𑀸𑀦𑀁 𑀕𑀡𑁂𑀢𑀩𑁆𑀩𑀸𑀕𑀡𑁂𑀢𑀩𑁆𑀩𑀸𑀦𑀁 𑀢𑀁𑀢𑀁𑀕𑀡𑀦𑁂𑀳𑀺 𑀕𑀡𑀦𑀤𑀲𑁆𑀲𑀦𑀫𑀢𑁆𑀢𑀫𑁂𑀯 𑀳𑀺 𑀧𑀞𑀫𑀦𑀬𑁄 𑀓𑀫𑁆𑀫𑀓𑀭𑀡𑀫𑀢𑁆𑀢𑀲𑀩𑁆𑀪𑀸𑀯𑀸, 𑀤𑀼𑀢𑀺𑀬𑀸𑀤𑀬𑁄 𑀧𑀦 𑀲𑀗𑁆𑀕𑀸𑀳𑀓𑀸𑀲𑀗𑁆𑀕𑀸𑀳𑀓𑁂𑀳𑀺 𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀸𑀦𑀁 𑀅𑀕𑀡𑀦𑀸𑀤𑀺𑀤𑀲𑁆𑀲𑀦𑀸𑀦𑀺 𑀓𑀢𑁆𑀢𑀼𑀓𑀭𑀡𑀓𑀫𑁆𑀫𑀢𑁆𑀢𑀬𑀲𑀩𑁆𑀪𑀸𑀯𑀸. 𑀢𑀣𑀸 𑀧𑀞𑀫𑀦𑀬𑁂 𑀢𑀣𑀸 𑀢𑀣𑀸 𑀕𑀡𑁂𑀢𑀩𑁆𑀩𑀸𑀕𑀡𑁂𑀢𑀩𑁆𑀩𑀪𑀸𑀯𑀲𑀗𑁆𑀔𑀸𑀢𑁄 𑀢𑀁𑀢𑀁𑀔𑀦𑁆𑀥𑀸𑀤𑀺𑀪𑀸𑀯𑀸𑀪𑀸𑀯𑁄 𑀲𑀪𑀸𑀕𑀯𑀺𑀲𑀪𑀸𑀕𑀢𑀸, 𑀤𑀼𑀢𑀺𑀬𑀸𑀤𑀻𑀲𑀼 𑀬𑀣𑀸𑀦𑀺𑀤𑁆𑀥𑀸𑀭𑀺𑀢𑀥𑀫𑁆𑀫𑀤𑀲𑁆𑀲𑀦𑁂 𑀲𑀗𑁆𑀕𑀸𑀳𑀓𑀲𑀗𑁆𑀕𑀳𑁂𑀢𑀩𑁆𑀩𑀸𑀦𑀁 𑀲𑀫𑀸𑀦𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑁄 𑀲𑀪𑀸𑀕𑀢𑀸, 𑀢𑀤𑀪𑀸𑀯𑁄 𑀘 𑀯𑀺𑀲𑀪𑀸𑀕𑀢𑀸. 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀢𑀁𑀢𑀁𑀔𑀦𑁆𑀥𑀸𑀤𑀺𑀪𑀸𑀯𑀸𑀪𑀸𑀯𑁄 𑀏𑀯𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄𑀢𑀺.

𑀲𑀫𑀼𑀤𑀬𑀲𑀘𑁆𑀘𑀲𑀼𑀔𑀺𑀦𑁆𑀤𑁆𑀭𑀺𑀬𑀲𑀤𑀺𑀲𑀸𑀦𑀺 𑀧𑀦 𑀢𑁂𑀳𑀺 𑀲𑀗𑁆𑀕𑀳𑁂𑀢𑀩𑁆𑀩𑀫𑁂𑀯 𑀅𑀢𑁆𑀣𑀺, 𑀦 𑀲𑀗𑁆𑀕𑀳𑀺𑀢𑀁 𑀅𑀲𑀗𑁆𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄 𑀦 𑀉𑀤𑁆𑀥𑀝𑀸𑀦𑀺. 𑀤𑀼𑀓𑁆𑀔𑀲𑀘𑁆𑀘𑀲𑀤𑀺𑀲𑀸𑀦𑀺 𑀢𑁂𑀳𑀺 𑀯𑀺𑀲𑀪𑀸𑀕𑀲𑀫𑀼𑀤𑀸𑀬𑀪𑀽𑀢𑁂𑀳𑀺 𑀅𑀦𑁂𑀓𑀓𑁆𑀔𑀦𑁆𑀥𑁂𑀳𑀺 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑁂𑀢𑀩𑁆𑀩𑀁, 𑀇𑀢𑀭𑁂𑀳𑀺 𑀅𑀲𑀗𑁆𑀕𑀳𑁂𑀢𑀩𑁆𑀩𑀜𑁆𑀘 𑀦𑀢𑁆𑀣𑀻𑀢𑀺 𑀲𑀗𑁆𑀕𑀸𑀳𑀓𑀢𑁆𑀢𑀸𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄. 𑀏𑀯𑀁 𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄 𑀅𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄 𑀉𑀪𑀬𑀸𑀪𑀸𑀯𑀢𑁄 𑀘 𑀬𑀣𑀸𑀯𑀼𑀢𑁆𑀢𑀲𑀤𑀺𑀲𑀸𑀦𑀺 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀲𑀗𑁆𑀕𑀸𑀳𑀓𑀢𑁆𑀢𑀸𑀲𑀗𑁆𑀕𑀸𑀳𑀓𑀢𑁆𑀢𑀪𑀸𑀯𑀢𑁄 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑁂𑀯 𑀉𑀤𑁆𑀥𑀝𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀢𑁆𑀣 ‘‘𑀘𑀓𑁆𑀔𑀸𑀬𑀢𑀦𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸’’𑀢𑀺 𑀘𑀓𑁆𑀔𑀸𑀬𑀢𑀦𑀯𑀚𑁆𑀚𑀸 𑀭𑀽𑀧𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀦 𑀭𑀽𑀧𑀓𑁆𑀔𑀦𑁆𑀥𑁄𑀢𑀺. 𑀦 𑀳𑀺 𑀏𑀓𑀤𑁂𑀲𑁄 𑀲𑀫𑀼𑀤𑀸𑀬𑀲𑀗𑁆𑀕𑀸𑀳𑀓𑁄𑀢𑀺 𑀤𑀲𑁆𑀲𑀺𑀢𑀫𑁂𑀢𑀦𑁆𑀢𑀺.

𑀅𑀝𑁆𑀞𑀓𑀣𑀸𑀬𑀁 𑀧𑀦 𑀔𑀦𑁆𑀥𑀧𑀤𑁂𑀦𑀸𑀢𑀺 𑀔𑀦𑁆𑀥𑀧𑀤𑀲𑀗𑁆𑀕𑀳𑁂𑀦𑀸𑀢𑀺 𑀅𑀢𑁆𑀣𑁄, 𑀦 𑀲𑀗𑁆𑀕𑀸𑀳𑀓𑁂𑀦𑀸𑀢𑀺. ‘‘𑀓𑁂𑀦𑀘𑀺 𑀲𑀗𑁆𑀕𑀸𑀳𑀓𑁂𑀦𑀸’’𑀢𑀺 𑀇𑀤𑀁 𑀧𑀦 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀁. 𑀢𑀁 𑀧𑀦 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀲𑀼 𑀦 𑀬𑀼𑀚𑁆𑀚𑀢𑀻𑀢𑀺 𑀢𑀁 𑀯𑀺𑀲𑁆𑀲𑀚𑁆𑀚𑀦𑀁 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀲𑀼 𑀲𑀗𑁆𑀕𑀸𑀳𑀓𑁂𑀲𑀼 𑀦 𑀬𑀼𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀭𑀽𑀧𑀓𑁆𑀔𑀦𑁆𑀥𑁂𑀦 𑀳𑀺…𑀧𑁂… 𑀲𑀗𑁆𑀕𑀳𑀺𑀢𑁄𑀢𑀺 𑀏𑀢𑁂𑀦 𑀦𑀬𑁂𑀦 𑀘𑀓𑁆𑀔𑀸𑀬𑀢𑀦𑁂𑀦 𑀭𑀽𑀧𑀓𑁆𑀔𑀦𑁆𑀥𑁄𑀯 𑀲𑀗𑁆𑀕𑀳𑀺𑀢𑁄, 𑀲𑁄 𑀘 𑀅𑀟𑁆𑀠𑁂𑀓𑀸𑀤𑀲𑀳𑀺 𑀆𑀬𑀢𑀦𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀏𑀯𑀁 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺𑀧𑀺 𑀦 𑀕𑀳𑁂𑀢𑀩𑁆𑀩𑀸𑀦𑀻𑀢𑀺 𑀆𑀧𑀚𑁆𑀚𑀢𑀻𑀢𑀺 𑀘𑁂? 𑀦𑀸𑀧𑀚𑁆𑀚𑀢𑀺. 𑀦 𑀳𑀺 𑀅𑀜𑁆𑀜𑀫𑀢𑁆𑀢𑀦𑀺𑀯𑀸𑀭𑀡𑀁 𑀏𑀯𑀲𑀤𑁆𑀤𑀲𑁆𑀲 𑀅𑀢𑁆𑀣𑁄, 𑀅𑀣 𑀔𑁄 𑀲𑀗𑁆𑀕𑀸𑀳𑀓𑀢𑁄 𑀅𑀜𑁆𑀜𑀦𑀺𑀯𑀸𑀭𑀡𑀁. 𑀲𑁄 𑀘𑀸𑀢𑀺𑀆𑀤𑀺 𑀘 𑀦 𑀦𑀺𑀭𑀧𑁂𑀓𑁆𑀔𑀯𑀘𑀦𑀁, 𑀅𑀣 𑀔𑁄 𑀲𑀗𑁆𑀕𑀸𑀳𑀓𑀸𑀧𑁂𑀓𑁆𑀔𑀦𑁆𑀢𑀺. 𑀓𑀣𑀁? 𑀭𑀽𑀧𑀓𑁆𑀔𑀦𑁆𑀥𑁂𑀦 𑀳𑀺 𑀭𑀽𑀧𑀓𑁆𑀔𑀦𑁆𑀥𑁄𑀯 𑀲𑀗𑁆𑀕𑀳𑀺𑀢𑁄𑀢𑀺 𑀬𑀣𑀸 𑀘𑀓𑁆𑀔𑀸𑀬𑀢𑀦𑁂𑀦 𑀘𑀓𑁆𑀔𑀸𑀬𑀢𑀦𑀢𑁄 𑀅𑀜𑁆𑀜𑀫𑁆𑀧𑀺 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀁 𑀅𑀢𑁆𑀣𑀺, 𑀬𑀁 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑀁 𑀳𑁄𑀢𑀺, 𑀦 𑀏𑀯𑀁 𑀭𑀽𑀧𑀓𑁆𑀔𑀦𑁆𑀥𑁂𑀦 𑀭𑀽𑀧𑀓𑁆𑀔𑀦𑁆𑀥𑀢𑁄 𑀅𑀜𑁆𑀜𑀁 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀁 𑀅𑀢𑁆𑀣𑀺, 𑀬𑀁 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑀁 𑀲𑀺𑀬𑀸, 𑀭𑀽𑀧𑀓𑁆𑀔𑀦𑁆𑀥𑁂𑀦 𑀧𑀦 𑀭𑀽𑀧𑀓𑁆𑀔𑀦𑁆𑀥𑁄𑀯 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑁄𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀬𑀼𑀢𑁆𑀢𑁄. 𑀲𑀺𑀬𑀸 𑀧𑀦𑁂𑀢𑀁 ‘‘𑀲𑁄 𑀏𑀯 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀓𑁆𑀔𑀦𑁆𑀥𑁂𑀦 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑁄 𑀳𑁄𑀢𑀽’’𑀢𑀺, 𑀢𑀁 𑀦𑀺𑀯𑀸𑀭𑁂𑀦𑁆𑀢𑁄 𑀆𑀳 ‘‘𑀲𑁄 𑀘 𑀅𑀟𑁆𑀠𑁂𑀓𑀸𑀤𑀲𑀳𑀺 𑀆𑀬𑀢𑀦𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑁄 𑀦𑀸𑀫 𑀦𑀢𑁆𑀣𑀻’’𑀢𑀺. 𑀏𑀢𑁆𑀣 𑀘 ‘‘𑀭𑀽𑀧𑀓𑁆𑀔𑀦𑁆𑀥𑁂𑀦𑀸’’𑀢𑀺 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀁. 𑀢𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀯𑀸 𑀢𑀤𑁂𑀓𑀤𑁂𑀲𑀸𑀦𑀁 𑀯𑀸 𑀘𑀓𑁆𑀔𑀸𑀤𑀻𑀦𑀁 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀸𑀳𑀓𑁄 𑀅𑀲𑀗𑁆𑀕𑀸𑀳𑀓𑁄 𑀘 𑀦 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀅𑀲𑀗𑁆𑀕𑀳𑀺𑀢𑀢𑀸𑀬 𑀅𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀬𑀼𑀚𑁆𑀚𑀢𑀺, 𑀦 𑀭𑀽𑀧𑀓𑁆𑀔𑀦𑁆𑀥𑁂𑀦 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀢𑀤𑁂𑀓𑀤𑁂𑀲𑀸𑀦𑀁 𑀯𑀸 𑀅𑀟𑁆𑀠𑁂𑀓𑀸𑀤𑀲𑀳𑀺 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀳𑀺𑀢𑀢𑀸𑀬. 𑀦 𑀳𑀺 𑀲𑀸 𑀲𑀗𑁆𑀕𑀳𑀺𑀢𑀢𑀸 𑀅𑀢𑁆𑀣𑀺. 𑀬𑀤𑀺 𑀲𑀺𑀬𑀸, 𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀦𑀺𑀤𑁆𑀤𑁂𑀲𑁂 𑀭𑀽𑀧𑀓𑁆𑀔𑀦𑁆𑀥𑁄𑀧𑀺 𑀉𑀤𑁆𑀥𑀭𑀺𑀢𑀩𑁆𑀩𑁄 𑀲𑀺𑀬𑀸. 𑀢𑁂𑀦 𑀳𑀺 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺 𑀭𑀽𑀧𑀓𑁆𑀔𑀦𑁆𑀥𑁄 𑀢𑀤𑁂𑀓𑀤𑁂𑀲𑁄 𑀯𑀸 𑀲𑀗𑁆𑀕𑀳𑀺𑀢𑀸 𑀲𑀺𑀬𑀼𑀁, 𑀅𑀢𑁆𑀣𑀺 𑀘 𑀢𑁂𑀲𑀁 𑀯𑀺𑀧𑁆𑀧𑀬𑀼𑀢𑁆𑀢𑀢𑀸𑀢𑀺.

𑀏𑀯𑀁 𑀅𑀲𑀗𑁆𑀕𑀳𑀺𑀢𑀢𑀸𑀬 𑀅𑀪𑀸𑀯𑀢𑁄 𑀏𑀢𑀸𑀦𑀺, 𑀅𑀜𑁆𑀜𑀸𑀦𑀺 𑀘𑀸𑀢𑀺 𑀏𑀢𑁆𑀣𑀸𑀧𑀺 𑀘𑀓𑁆𑀔𑀸𑀬𑀢𑀦𑀸𑀤𑀻𑀳𑀺 𑀯𑀺𑀬 𑀏𑀢𑁂𑀳𑀺 𑀅𑀜𑁆𑀜𑁂𑀳𑀺 𑀘 𑀲𑀗𑁆𑀕𑀳𑀺𑀢𑀸𑀦𑀁 𑀅𑀲𑀗𑁆𑀕𑀳𑀺𑀢𑀢𑀸𑀬 𑀅𑀪𑀸𑀯𑀢𑁄 𑀏𑀢𑀸𑀦𑀺 𑀅𑀜𑁆𑀜𑀸𑀦𑀺 𑀘 𑀬𑀣𑀸 𑀯𑀸 𑀢𑀣𑀸 𑀯𑀸 𑀏𑀢𑀸𑀦𑀺 𑀯𑀺𑀬 𑀅𑀬𑀼𑀚𑁆𑀚𑀫𑀸𑀦𑀯𑀺𑀲𑁆𑀲𑀚𑁆𑀚𑀦𑀢𑁆𑀢𑀸 𑀏𑀯𑀭𑀽𑀧𑀸𑀦𑀺 𑀧𑀤𑀸𑀦𑀺 𑀲𑀗𑁆𑀕𑀸𑀳𑀓𑀪𑀸𑀯𑁂𑀦 𑀦 𑀕𑀳𑀺𑀢𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑀢𑁆𑀣 𑀬𑀁 𑀯𑀼𑀢𑁆𑀢𑀁 ‘‘𑀭𑀽𑀧𑀓𑁆𑀔𑀦𑁆𑀥𑁂𑀦 𑀳𑀺 𑀭𑀽𑀧𑀓𑁆𑀔𑀦𑁆𑀥𑁄𑀯 𑀲𑀗𑁆𑀕𑀳𑀺𑀢𑁄’’𑀢𑀺, 𑀢𑀁 𑀢𑁂𑀦𑁂𑀯 𑀢𑀲𑁆𑀲 𑀲𑀗𑁆𑀕𑀳𑀺𑀢𑀢𑁆𑀢𑀸𑀲𑀗𑁆𑀕𑀳𑀺𑀢𑀢𑁆𑀢𑀸𑀪𑀸𑀯𑀤𑀲𑁆𑀲𑀦𑁂𑀦 𑀦𑀺𑀯𑀸𑀭𑀺𑀢𑀁. 𑀬𑀜𑁆𑀳𑁂𑀢𑁆𑀣 𑀅𑀕𑁆𑀕𑀳𑀡𑁂 𑀓𑀸𑀭𑀡𑀁 𑀯𑀼𑀢𑁆𑀢𑀁, 𑀢𑀜𑁆𑀘 𑀲𑀢𑀺𑀧𑀺 𑀲𑀗𑁆𑀕𑀳𑀺𑀢𑀢𑁆𑀢𑁂 𑀅𑀲𑀗𑁆𑀕𑀳𑀺𑀢𑀢𑀸𑀬 𑀅𑀪𑀸𑀯𑀢𑁄𑀢𑀺 𑀯𑀺𑀜𑁆𑀜𑀸𑀬𑀫𑀸𑀦𑀁 𑀲𑀫𑀼𑀤𑀬𑀲𑀘𑁆𑀘𑀸𑀤𑀻𑀲𑀼 𑀬𑀼𑀚𑁆𑀚𑁂𑀬𑁆𑀬 𑀲𑀢𑀺 𑀢𑁂𑀳𑀺 𑀲𑀗𑁆𑀕𑀳𑀺𑀢𑁂 𑀢𑀤𑀲𑀗𑁆𑀕𑀳𑀺𑀢𑀢𑁆𑀢𑀸𑀪𑀸𑀯𑀢𑁄. 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀳𑀺 𑀧𑀦 𑀲𑀗𑁆𑀕𑀳𑀺𑀢𑀫𑁂𑀯 𑀦𑀢𑁆𑀣𑀺, 𑀓𑀼𑀢𑁄 𑀢𑀲𑁆𑀲 𑀅𑀲𑀗𑁆𑀕𑀳𑀺𑀢𑀢𑀸 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑁄 𑀏𑀯𑁂𑀢𑁆𑀣 𑀅𑀕𑁆𑀕𑀳𑀡𑁂 𑀓𑀸𑀭𑀡𑀦𑁆𑀢𑀺 𑀬𑀼𑀢𑁆𑀢𑀁. 𑀲𑀗𑁆𑀕𑀳𑀺𑀢𑀢𑁆𑀢𑀸𑀪𑀸𑀯𑁂𑀦 𑀅𑀲𑀗𑁆𑀕𑀳𑀺𑀢𑀢𑁆𑀢𑀁 𑀬𑀤𑀺𑀧𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀦𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑀺 𑀅𑀦𑁆𑀢𑁄𑀕𑀥𑀲𑁆𑀲 𑀅𑀢𑁆𑀢𑁂𑀓𑀤𑁂𑀲𑀲𑀪𑀸𑀕𑀲𑁆𑀲 𑀘 𑀦𑀢𑁆𑀣𑀺, 𑀅𑀜𑁆𑀜𑀲𑁆𑀲 𑀧𑀦 𑀅𑀢𑁆𑀣𑀻𑀢𑀺 𑀦 𑀤𑀼𑀓𑁆𑀔𑀲𑀘𑁆𑀘𑀸𑀤𑀻𑀲𑀼 𑀯𑀺𑀬 𑀉𑀪𑀬𑀸𑀪𑀸𑀯𑁄 𑀘𑁂𑀢𑁆𑀣 𑀅𑀕𑁆𑀕𑀳𑀡𑁂 𑀓𑀸𑀭𑀡𑀁 𑀪𑀯𑀺𑀢𑀼𑀁 𑀬𑀼𑀢𑁆𑀢𑁄𑀢𑀺. 𑀥𑀫𑁆𑀫𑀸𑀬𑀢𑀦𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀜𑁆𑀘 𑀔𑀦𑁆𑀥𑀘𑀢𑀼𑀓𑁆𑀓𑀤𑀼𑀓𑀸𑀤𑀺𑀲𑀗𑁆𑀕𑀸𑀳𑀓𑀢𑁆𑀢𑁂 𑀲𑀢𑀺 𑀦 𑀢𑁂𑀲𑀁 𑀲𑀗𑁆𑀕𑀳𑀺𑀢𑀸𑀦𑀁 𑀢𑁂𑀳𑀺 𑀥𑀫𑁆𑀫𑀸𑀬𑀢𑀦𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀳𑀺 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑀢𑀸 𑀦𑀢𑁆𑀣𑀻𑀢𑀺 𑀅𑀲𑀗𑁆𑀕𑀳𑀺𑀢𑀢𑀸𑀬 𑀅𑀪𑀸𑀯𑁄 𑀅𑀦𑁂𑀓𑀦𑁆𑀢𑀺𑀓𑁄, 𑀢𑀲𑁆𑀫𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀕𑁆𑀕𑀳𑀺𑀢𑀸𑀦𑀁 𑀅𑀕𑁆𑀕𑀳𑀡𑁂, 𑀕𑀳𑀺𑀢𑀸𑀦𑀜𑁆𑀘 𑀕𑀳𑀡𑁂 𑀓𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀅𑀦𑀺𑀤𑀲𑁆𑀲𑀦𑀁 𑀧𑀼𑀦𑀤𑁂𑀯 𑀲𑀧𑁆𑀧𑀝𑀺𑀖𑀦𑁆𑀢𑀺 𑀏𑀢𑁆𑀣 𑀅𑀦𑀺𑀤𑀲𑁆𑀲𑀦𑀦𑁆𑀢𑀺 𑀏𑀢𑁂𑀦 ‘‘𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖’’𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑁂𑀦 𑀲𑀧𑁆𑀧𑀝𑀺𑀖𑀲𑀤𑁆𑀤𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸 𑀤𑀲𑁆𑀲𑀺𑀢𑀸. 𑀧𑀼𑀦𑀤𑁂𑀯𑀸𑀢𑀺 𑀏𑀢𑁂𑀦 𑀢𑀢𑁆𑀣𑁂𑀯 𑀅𑀯𑀺𑀲𑀺𑀝𑁆𑀞𑀁 𑀲𑀦𑀺𑀤𑀲𑁆𑀲𑀦𑀧𑀤𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀲𑀦𑀺𑀤𑀲𑁆𑀲𑀦𑀤𑀼𑀓𑀧𑀤𑀁 𑀤𑀲𑁆𑀲𑁂𑀢𑀺. ‘‘𑀘𑀓𑁆𑀔𑀸𑀬𑀢𑀦𑁂𑀦 𑀘𑀓𑁆𑀔𑀸𑀬𑀢𑀦𑀫𑁂𑀯𑁂𑀓𑀁 𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀇𑀤𑀁 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀦 𑀳𑀺 ‘‘𑀘𑀓𑁆𑀔𑀸𑀬𑀢𑀦𑁂𑀦 𑀘𑀓𑁆𑀔𑀸𑀬𑀢𑀦𑀁 𑀆𑀬𑀢𑀦𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀘 ‘‘𑀅𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀘 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑀺𑀢𑁄𑀬𑀁 𑀦𑀬𑁄𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣 𑀢𑀲𑁆𑀲𑁂𑀯 𑀲𑀫𑀼𑀤𑀸𑀬𑁂𑀓𑀤𑁂𑀲𑀸𑀦𑀜𑁆𑀘 𑀲𑀗𑁆𑀕𑀸𑀳𑀓𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑀘𑀦𑁂𑀲𑀼 𑀅𑀲𑀗𑁆𑀕𑀸𑀳𑀓𑀅𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑀘𑀦𑁂𑀲𑀼 𑀘 𑀢𑀤𑀯𑀢𑁆𑀢𑀩𑁆𑀩𑀢𑀸 𑀬𑁄𑀚𑁂𑀢𑀩𑁆𑀩𑀸. 𑀅𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄 𑀏𑀯 𑀳𑀺 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀘𑀓𑁆𑀔𑀸𑀬𑀢𑀦𑀸𑀤𑀻𑀳𑀺 𑀅𑀲𑀗𑁆𑀕𑀳𑀺𑀢𑀸𑀦𑀻𑀢𑀺 𑀦 𑀯𑀼𑀘𑁆𑀘𑀦𑁆𑀢𑀺, 𑀦 𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄𑀢𑀺.

𑀤𑀼𑀢𑀺𑀬𑀦𑀬𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀢𑀺𑀬𑀦𑀬𑁄 𑀅𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁧𑁭𑁯. 𑀅𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀦𑀺𑀤𑁆𑀤𑁂𑀲𑁂 𑀭𑀽𑀧𑀓𑁆𑀔𑀦𑁆𑀥𑁂𑀦 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑁂𑀲𑀼 𑀯𑁂𑀤𑀦𑀸𑀤𑀻𑀦𑀁 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁 𑀦𑀺𑀩𑁆𑀩𑀸𑀦𑀲𑁆𑀲 𑀘 𑀲𑀼𑀔𑀼𑀫𑀭𑀽𑀧𑁂𑀦 𑀲𑀳 𑀆𑀬𑀢𑀦𑀥𑀸𑀢𑀼𑀲𑀪𑀸𑀕𑀢𑁆𑀢𑁂 𑀲𑀢𑀺𑀧𑀺 𑀦 𑀲𑀼𑀔𑀼𑀫𑀭𑀽𑀧𑀫𑁂𑀯 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀭𑀽𑀧𑀓𑁆𑀔𑀦𑁆𑀥𑁂𑀦 𑀆𑀬𑀢𑀦𑀥𑀸𑀢𑀼𑀲𑀪𑀸𑀕𑀢𑁆𑀢𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀦 𑀢𑁂𑀦 𑀢𑀸𑀦𑀺 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀳𑀺𑀢𑀸𑀦𑀺. 𑀦 𑀓𑁂𑀯𑀮𑀁 𑀲𑀗𑁆𑀕𑀳𑀺𑀢𑀸𑀦𑁂𑀯, 𑀅𑀲𑀗𑁆𑀕𑀳𑀺𑀢𑀸𑀦𑀺𑀧𑀺 𑀢𑁂𑀦 𑀢𑀸𑀦𑀺 𑀢𑁂𑀳𑀺 𑀲𑀗𑁆𑀕𑀳𑁂𑀳𑀺 𑀦 𑀳𑁄𑀦𑁆𑀢𑁂𑀯 𑀢𑀤𑁂𑀓𑀤𑁂𑀲𑁂𑀦 𑀲𑀼𑀔𑀼𑀫𑀭𑀽𑀧𑁂𑀦 𑀆𑀬𑀢𑀦𑀥𑀸𑀢𑀼𑀲𑀪𑀸𑀕𑀢𑁆𑀢𑀸, 𑀲𑀗𑁆𑀕𑀳𑀺𑀢𑀸𑀪𑀸𑀯𑁄 𑀏𑀯 𑀧𑀦 𑀇𑀥𑀸𑀥𑀺𑀧𑁆𑀧𑁂𑀢𑁄, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀘𑀓𑁆𑀔𑀸𑀬𑀢𑀦𑀸𑀤𑀻𑀳𑀺 𑀧𑀦 𑀅𑀲𑀗𑁆𑀕𑀳𑀺𑀢𑀸 𑀦 𑀢𑁂 𑀢𑁂𑀳𑀺 𑀓𑀣𑀜𑁆𑀘𑀺 𑀲𑀫𑁆𑀫𑀺𑀲𑁆𑀲𑀸𑀢𑀺 𑀲𑀩𑁆𑀩𑀣𑀸 𑀢𑁂 𑀢𑁂𑀳𑀺 𑀦 𑀲𑀗𑁆𑀕𑀳𑀺𑀢𑀸. 𑀤𑀼𑀓𑁆𑀔𑀲𑀘𑁆𑀘𑀸𑀤𑀻𑀳𑀺 𑀘 𑀧𑀜𑁆𑀘𑀓𑁆𑀔𑀦𑁆𑀥𑀲𑀫𑀼𑀤𑀸𑀬𑀪𑀽𑀢𑁂𑀳𑀺 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀁 𑀦𑀺𑀩𑁆𑀩𑀸𑀦𑀁 𑀭𑀽𑀧𑀓𑁆𑀔𑀦𑁆𑀥𑁂𑀦 𑀯𑀺𑀬 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀳𑀺𑀢𑀁 𑀢𑁂𑀳𑀺 𑀦 𑀳𑁄𑀢𑀺, 𑀢𑀲𑁆𑀫𑀸 𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄 𑀏𑀯 𑀏𑀯𑀭𑀽𑀧𑀸𑀦𑀁 𑀅𑀲𑀗𑁆𑀕𑀸𑀳𑀓𑀪𑀸𑀯𑁂𑀦 𑀅𑀕𑁆𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀲𑀦𑀺𑀩𑁆𑀩𑀸𑀦𑀧𑀜𑁆𑀘𑀓𑁆𑀔𑀦𑁆𑀥𑀲𑀫𑀼𑀤𑀸𑀬𑀪𑀽𑀢𑀸𑀦𑀁 𑀧𑀦 𑀅𑀩𑁆𑀬𑀸𑀓𑀢𑀥𑀫𑁆𑀫𑀸𑀤𑀻𑀦𑀁 𑀅𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄𑀯. 𑀦 𑀳𑀺 𑀢𑀁 𑀓𑀜𑁆𑀘𑀺 𑀅𑀢𑁆𑀣𑀺, 𑀬𑀲𑁆𑀲 𑀢𑁂 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀸𑀳𑀓𑀸 𑀲𑀺𑀬𑀼𑀁, 𑀦 𑀘 𑀅𑀢𑁆𑀢𑀦𑁄 𑀏𑀓𑀤𑁂𑀲𑁄 𑀅𑀢𑁆𑀢𑁂𑀓𑀤𑁂𑀲𑀲𑀪𑀸𑀕𑁄 𑀘 𑀅𑀢𑁆𑀢𑀦𑀸 𑀅𑀲𑀗𑁆𑀕𑀳𑀺𑀢𑁄 𑀳𑁄𑀢𑀻𑀢𑀺 𑀅𑀢𑁆𑀢𑀦𑀸 𑀅𑀲𑀗𑁆𑀕𑀳𑀺𑀢𑀲𑀗𑁆𑀕𑀸𑀳𑀓𑀢𑁆𑀢𑀸 𑀧𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀦𑀁 𑀕𑀳𑀡𑀁 𑀓𑀢𑀦𑁆𑀢𑀺.

𑀬𑀁 𑀧𑀦 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘‘𑀬𑁂 𑀥𑀫𑁆𑀫𑀸𑀬𑀢𑀦𑁂𑀦 𑀲𑀗𑁆𑀕𑀳𑀺𑀢𑀸’’𑀢𑀺, 𑀢𑀁 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀥𑀫𑁆𑀫𑀸𑀬𑀢𑀦𑁂𑀦 𑀳𑀺 𑀦 𑀓𑁄𑀘𑀺 𑀥𑀫𑁆𑀫𑁄 𑀓𑁂𑀦𑀘𑀺 𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑁄 𑀅𑀢𑁆𑀣𑀺 𑀯𑀺𑀲𑀪𑀸𑀕𑀓𑁆𑀔𑀦𑁆𑀥𑀦𑀺𑀩𑁆𑀩𑀸𑀦𑀲𑀫𑀼𑀤𑀸𑀬𑀢𑁆𑀢𑀸, 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀲𑀗𑁆𑀕𑀸𑀳𑀓𑀁 𑀦 𑀳𑁄𑀢𑀻𑀢𑀺 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀘 𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄𑀢𑀺 𑀤𑀲𑁆𑀲𑀺𑀢𑁄𑀬𑀁 𑀦𑀬𑁄𑀢𑀺 𑀏𑀢𑀲𑁆𑀲 𑀥𑀫𑁆𑀫𑀸𑀬𑀢𑀦𑀕𑀡𑀦𑁂𑀦 𑀕𑀡𑀺𑀢𑀸𑀢𑀺 𑀅𑀢𑁆𑀣𑁄. 𑀬𑀸𑀦𑀺…𑀧𑁂… 𑀕𑀳𑀺𑀢𑀸𑀦𑀻𑀢𑀺 𑀏𑀢𑁂𑀦 𑀯𑀺𑀜𑁆𑀜𑀸𑀡𑀲𑀫𑁆𑀫𑀺𑀲𑁆𑀲𑀁 𑀥𑀫𑁆𑀫𑀸𑀬𑀢𑀦𑁂𑀓𑀤𑁂𑀲𑀁 𑀤𑀻𑀧𑁂𑀦𑁆𑀢𑀸𑀦𑀺 𑀇𑀤𑁆𑀥𑀺𑀧𑀸𑀤𑀸𑀤𑀺𑀧𑀤𑀸𑀦𑀺, 𑀑𑀴𑀸𑀭𑀺𑀓𑀭𑀽𑀧𑀲𑀫𑁆𑀫𑀺𑀲𑁆𑀲𑀁 𑀤𑀻𑀧𑁂𑀦𑁆𑀢𑀸𑀦𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀧𑀤𑀸𑀦𑀺, 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀥𑀫𑁆𑀫𑀸𑀬𑀢𑀦𑀁 𑀅𑀤𑀻𑀧𑁂𑀦𑁆𑀢𑀸𑀦𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀘𑀓𑁆𑀔𑀸𑀬𑀢𑀦𑀸𑀤𑀺𑀧𑀤𑀸𑀦𑀺, 𑀲𑀓𑀮𑀥𑀫𑁆𑀫𑀸𑀬𑀢𑀦𑀤𑀻𑀧𑀓𑀸𑀦𑀺 𑀥𑀫𑁆𑀫𑀸𑀬𑀢𑀦𑀸𑀤𑀺𑀧𑀤𑀸𑀦𑀺 𑀘 𑀯𑀚𑁆𑀚𑁂𑀢𑁆𑀯𑀸 𑀥𑀫𑁆𑀫𑀸𑀬𑀢𑀦𑁂𑀓𑀤𑁂𑀲𑀁 𑀅𑀜𑁆𑀜𑀸𑀬𑀢𑀦𑁂𑀦 𑀅𑀲𑀫𑁆𑀫𑀺𑀲𑁆𑀲𑀁 𑀤𑀻𑀧𑁂𑀦𑁆𑀢𑀸𑀦𑀺 𑀕𑀳𑀺𑀢𑀸𑀦𑀻𑀢𑀺 𑀤𑀲𑁆𑀲𑁂𑀢𑀺.

𑀢𑀢𑀺𑀬𑀦𑀬𑀅𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀢𑀼𑀢𑁆𑀣𑀦𑀬𑁄 𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁧𑁯𑁧. 𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀦𑀺𑀤𑁆𑀤𑁂𑀲𑁂 𑀬𑀲𑁆𑀫𑀸 𑀬𑀣𑀸 𑀤𑀼𑀢𑀺𑀬𑀢𑀢𑀺𑀬𑀦𑀬𑀸 𑀢𑀺𑀡𑁆𑀡𑀁 𑀲𑀗𑁆𑀕𑀳𑀸𑀦𑀁 𑀲𑀗𑁆𑀕𑀳𑀡𑀸𑀲𑀗𑁆𑀕𑀳𑀡𑀧𑁆𑀧𑀯𑀢𑁆𑀢𑀺𑀯𑀺𑀲𑁂𑀲𑁂𑀦 ‘‘𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀁, 𑀅𑀲𑀗𑁆𑀕𑀳𑀺𑀢𑁂𑀦 𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀘 𑀉𑀤𑁆𑀤𑀺𑀝𑁆𑀞𑀸, 𑀦𑁂𑀯𑀁 𑀘𑀢𑀼𑀢𑁆𑀣𑀧𑀜𑁆𑀘𑀫𑀸. 𑀲𑀗𑁆𑀕𑀳𑀡𑀧𑁆𑀧𑀯𑀢𑁆𑀢𑀺𑀬𑀸 𑀏𑀯 𑀳𑀺 𑀲𑀗𑁆𑀕𑀳𑀺𑀢𑁂𑀦 𑀲𑀗𑁆𑀕𑀳𑀺𑀢𑀁 𑀉𑀤𑁆𑀤𑀺𑀝𑁆𑀞𑀁, 𑀅𑀲𑀗𑁆𑀕𑀳𑀡𑀧𑁆𑀧𑀯𑀢𑁆𑀢𑀺𑀬𑀸 𑀏𑀯 𑀘 𑀅𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀦𑁆𑀢𑀺, 𑀢𑀲𑁆𑀫𑀸 𑀲𑀗𑁆𑀕𑀳𑀡𑀧𑁆𑀧𑀯𑀢𑁆𑀢𑀺𑀯𑀺𑀲𑁂𑀲𑀯𑀺𑀭𑀳𑁂 𑀲𑀗𑁆𑀕𑀳𑀺𑀢𑀥𑀫𑁆𑀫𑀸𑀲𑀗𑁆𑀕𑀳𑀺𑀢𑀥𑀫𑁆𑀫𑀯𑀺𑀲𑁂𑀲𑁂 𑀦𑀺𑀲𑁆𑀲𑀺𑀢𑀸 𑀏𑀢𑁂 𑀤𑁆𑀯𑁂 𑀦𑀬𑀸𑀢𑀺 𑀏𑀢𑁆𑀣 𑀓𑁂𑀦𑀘𑀺 𑀲𑀗𑁆𑀕𑀳𑀺𑀢𑁂𑀦 𑀥𑀫𑁆𑀫𑀯𑀺𑀲𑁂𑀲𑁂𑀦 𑀧𑀼𑀦 𑀲𑀗𑁆𑀕𑀳𑀺𑀢𑁄 𑀥𑀫𑁆𑀫𑀯𑀺𑀲𑁂𑀲𑁄 𑀲𑀗𑁆𑀕𑀳𑀺𑀢𑁂𑀦 𑀲𑀗𑁆𑀕𑀳𑀺𑀢𑁄 𑀲𑀗𑁆𑀕𑀳𑀺𑀢𑀢𑀸𑀬 𑀧𑀼𑀘𑁆𑀙𑀺𑀢𑀩𑁆𑀩𑁄 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑁄 𑀘, 𑀢𑀫𑁂𑀯 𑀢𑀸𑀯 𑀬𑀣𑀸𑀦𑀺𑀤𑁆𑀥𑀸𑀭𑀺𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑀼𑀤𑀬𑀲𑀘𑁆𑀘𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥…𑀧𑁂… 𑀲𑀗𑁆𑀕𑀳𑀺𑀢𑀸, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀔𑀦𑁆𑀥…𑀧𑁂… 𑀲𑀗𑁆𑀕𑀳𑀺𑀢𑀸’’𑀢𑀺 𑀆𑀳. 𑀏𑀢𑁆𑀣 𑀘 𑀬𑁂 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺 𑀦 𑀲𑀗𑁆𑀕𑀸𑀳𑀓𑀸 𑀭𑀽𑀧𑀓𑁆𑀔𑀦𑁆𑀥𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀥𑀫𑁆𑀫𑀸𑀬𑀢𑀦𑀤𑀼𑀓𑁆𑀔𑀲𑀘𑁆𑀘𑀸𑀤𑀻𑀦𑀺 𑀯𑀺𑀬, 𑀬𑁂 𑀘 𑀤𑁆𑀯𑀻𑀳𑀸𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀸𑀳𑀓𑀸 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀯𑀺𑀬, 𑀬𑁂 𑀘 𑀏𑀓𑁂𑀦 𑀔𑀦𑁆𑀥𑀲𑀗𑁆𑀕𑀳𑁂𑀦𑁂𑀯 𑀥𑀸𑀢𑀼𑀲𑀗𑁆𑀕𑀳𑁂𑀦𑁂𑀯 𑀘 𑀦 𑀲𑀗𑁆𑀕𑀸𑀳𑀓𑀸 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀦𑀺𑀭𑁄𑀥𑀲𑀘𑁆𑀘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀸𑀤𑀬𑁄 𑀯𑀺𑀬 𑀘, 𑀢𑁂 𑀥𑀫𑁆𑀫𑀸 𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀲𑀩𑁆𑀪𑀸𑀯𑀸 𑀲𑀗𑁆𑀕𑀸𑀳𑀓𑀪𑀸𑀯𑁂𑀦 𑀦 𑀉𑀤𑁆𑀥𑀝𑀸, 𑀢𑀻𑀳𑀺𑀧𑀺 𑀧𑀦 𑀲𑀗𑁆𑀕𑀳𑁂𑀳𑀺 𑀬𑁂 𑀲𑀗𑁆𑀕𑀸𑀳𑀓𑀸, 𑀢𑁂 𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀸𑀪𑀸𑀯𑀢𑁄 𑀇𑀥 𑀉𑀤𑁆𑀥𑀝𑀸. 𑀢𑁂𑀳𑀺 𑀲𑀗𑁆𑀕𑀳𑀺𑀢𑀸𑀧𑀺 𑀳𑀺 𑀏𑀓𑀦𑁆𑀢𑁂𑀦 𑀅𑀢𑁆𑀢𑀦𑁄 𑀲𑀗𑁆𑀕𑀸𑀳𑀓𑀲𑁆𑀲 𑀲𑀗𑁆𑀕𑀸𑀳𑀓𑀸 𑀳𑁄𑀦𑁆𑀢𑀺, 𑀬𑀲𑁆𑀲 𑀧𑀼𑀦 𑀲𑀗𑁆𑀕𑀳𑁄 𑀧𑀼𑀘𑁆𑀙𑀺𑀢𑀩𑁆𑀩𑁄 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑁄 𑀘𑀸𑀢𑀺.

𑀅𑀝𑁆𑀞𑀓𑀣𑀸𑀬𑀁 𑀧𑀦 𑀲𑀓𑀮𑁂𑀦 𑀳𑀺 𑀔𑀦𑁆𑀥𑀸𑀤𑀺𑀧𑀤𑁂𑀦𑀸𑀢𑀺 𑀲𑀓𑀮𑀯𑀸𑀘𑀓𑁂𑀦 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀧𑀤𑁂𑀦𑀸𑀢𑀺 𑀅𑀢𑁆𑀣𑁄. 𑀬𑀁 𑀧𑀦𑁂𑀢𑀁 𑀯𑀼𑀢𑁆𑀢𑀁 ‘‘𑀬𑀁 𑀅𑀢𑁆𑀢𑀦𑁄 𑀲𑀗𑁆𑀕𑀸𑀳𑀓𑀁 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀧𑀼𑀦 𑀢𑁂𑀦𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑁂𑀬𑁆𑀬𑀸’’𑀢𑀺, 𑀢𑀁 𑀢𑁂𑀦 𑀔𑀦𑁆𑀥𑀸𑀤𑀺𑀧𑀤𑁂𑀦𑀸𑀢𑀺 𑀏𑀯𑀁 𑀅𑀬𑁄𑀚𑁂𑀢𑁆𑀯𑀸 𑀢𑀁 𑀅𑀜𑁆𑀜𑀁 𑀲𑀗𑁆𑀕𑀳𑀺𑀢𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀏𑀯𑀁 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀦 𑀳𑀺 𑀬𑁂𑀦 𑀬𑀁 𑀲𑀗𑁆𑀕𑀳𑀺𑀢𑀁, 𑀢𑁂𑀦𑁂𑀯 𑀢𑀲𑁆𑀲 𑀲𑀗𑁆𑀕𑀳𑁄 𑀧𑀼𑀘𑁆𑀙𑀺𑀢𑁄 𑀯𑀺𑀲𑁆𑀲𑀚𑁆𑀚𑀺𑀢𑁄, 𑀦 𑀘 𑀢𑀲𑁆𑀲𑁂𑀯, 𑀅𑀣 𑀔𑁄 𑀢𑁂𑀦 𑀲𑀗𑁆𑀕𑀳𑀺𑀢𑀲𑁆𑀲𑀸𑀢𑀺. 𑀬𑀣𑀸 𑀯𑁂𑀤𑀦𑀸 𑀲𑀤𑁆𑀤𑁄 𑀘 𑀔𑀦𑁆𑀥𑁄 𑀆𑀬𑀢𑀦𑀜𑁆𑀘, 𑀦 𑀏𑀯𑀁 𑀲𑀼𑀔𑀼𑀫𑀭𑀽𑀧𑀁, 𑀢𑀁 𑀧𑀦 𑀔𑀦𑁆𑀥𑀸𑀬𑀢𑀦𑀸𑀦𑀁 𑀏𑀓𑀤𑁂𑀲𑁄𑀯, 𑀢𑀲𑁆𑀫𑀸 ‘‘𑀲𑀼𑀔𑀼𑀫𑀭𑀽𑀧𑁂𑀓𑀤𑁂𑀲𑀁 𑀯𑀸’’𑀢𑀺 𑀅𑀯𑀢𑁆𑀯𑀸 ‘‘𑀲𑀼𑀔𑀼𑀫𑀭𑀽𑀧𑀁 𑀯𑀸’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀢𑁆𑀣 𑀘 𑀅𑀜𑁆𑀜𑁂𑀦 𑀅𑀲𑀫𑁆𑀫𑀺𑀲𑁆𑀲𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀬𑀫𑁆𑀧𑀺 𑀘𑁂𑀢𑀁 𑀯𑀼𑀢𑁆𑀢𑀁 ‘‘𑀢𑀤𑁂𑀯 𑀬𑁂𑀳𑀺 𑀥𑀫𑁆𑀫𑁂𑀳𑀺 𑀔𑀦𑁆𑀥𑀸𑀤𑀺𑀯𑀲𑁂𑀦 𑀲𑀗𑁆𑀕𑀳𑀺𑀢𑀁, 𑀢𑁂 𑀥𑀫𑁆𑀫𑁂 𑀲𑀦𑁆𑀥𑀸𑀬𑀸’’𑀢𑀺, 𑀢𑀫𑁆𑀧𑀺 𑀢𑀣𑀸 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀦 𑀳𑀺 𑀲𑀗𑁆𑀕𑀳𑀺𑀢𑁂𑀦 𑀲𑀗𑁆𑀕𑀳𑀺𑀢𑀲𑁆𑀲 𑀲𑀗𑁆𑀕𑀳𑀺𑀢𑁂𑀦 𑀲𑀗𑁆𑀕𑀳𑁄 𑀏𑀢𑁆𑀣 𑀧𑀼𑀘𑁆𑀙𑀺𑀢𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀘, 𑀅𑀣 𑀔𑁄 𑀲𑀗𑁆𑀕𑀳𑁄𑀯, 𑀢𑀲𑁆𑀫𑀸 𑀏𑀓𑁂𑀦 𑀔𑀦𑁆𑀥𑁂𑀦𑀸𑀢𑀺 𑀏𑀓𑁂𑀦 𑀔𑀦𑁆𑀥𑀕𑀡𑀦𑁂𑀦𑀸𑀢𑀺 𑀅𑀬𑀫𑁂𑀯𑁂𑀢𑁆𑀣 𑀅𑀢𑁆𑀣𑁄, 𑀦 𑀲𑀗𑁆𑀕𑀸𑀳𑀓𑁂𑀦𑀸𑀢𑀺. 𑀦 𑀳𑀺 𑀏𑀓𑁄 𑀔𑀦𑁆𑀥𑁄 𑀅𑀢𑁆𑀢𑀦𑁄 𑀏𑀓𑀤𑁂𑀲𑀲𑁆𑀲 𑀲𑀗𑁆𑀕𑀸𑀳𑀓𑁄𑀢𑀺.

𑀘𑀢𑀼𑀢𑁆𑀣𑀦𑀬𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀜𑁆𑀘𑀫𑀦𑀬𑁄 𑀅𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁧𑁯𑁩. 𑀅𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀦𑀺𑀤𑁆𑀤𑁂𑀲𑁂𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑀣𑀸𑀦𑀺𑀤𑁆𑀥𑀸𑀭𑀺𑀢𑀥𑀫𑁆𑀫𑀤𑀲𑁆𑀲𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀘 𑀲𑀲𑀼𑀔𑀼𑀫𑀭𑀽𑀧𑀯𑀺𑀜𑁆𑀜𑀸𑀡𑀲𑀳𑀺𑀢𑀥𑀫𑁆𑀫𑀲𑀫𑀼𑀤𑀸𑀬𑀸 𑀬𑁂 𑀢𑁂 𑀤𑀼𑀓𑁆𑀔𑀲𑀘𑁆𑀘𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀅𑀘𑁂𑀢𑀲𑀺𑀓𑀸𑀦𑀼𑀧𑀸𑀤𑀸𑀲𑀤𑀺𑀲𑀸 𑀲𑀢𑀺𑀧𑀺 𑀏𑀓𑁂𑀦 𑀤𑁆𑀯𑀻𑀳𑀺 𑀯𑀸 𑀲𑀗𑁆𑀕𑀳𑁂𑀳𑀺 𑀓𑁂𑀲𑀜𑁆𑀘𑀺 𑀅𑀲𑀗𑁆𑀕𑀸𑀳𑀓𑀢𑁆𑀢𑁂 𑀢𑀻𑀳𑀺𑀧𑀺 𑀅𑀲𑀗𑁆𑀕𑀳𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄 𑀧𑀭𑀺𑀧𑀼𑀡𑁆𑀡𑀲𑀗𑁆𑀕𑀳𑀸𑀲𑀗𑁆𑀕𑀸𑀳𑀓𑀸 𑀦 𑀳𑁄𑀦𑁆𑀢𑀺, 𑀅𑀩𑁆𑀬𑀸𑀓𑀢𑀥𑀫𑁆𑀫𑀲𑀤𑀺𑀲𑀸 𑀓𑁂𑀦𑀘𑀺 𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑁂𑀢𑀩𑁆𑀩𑀪𑀸𑀯𑀢𑁄 𑀅𑀲𑀗𑁆𑀕𑀸𑀳𑀓𑀸 𑀏𑀯 𑀦 𑀳𑁄𑀦𑁆𑀢𑀺, 𑀢𑁂𑀦 𑀢𑁂 𑀅𑀲𑀗𑁆𑀕𑀸𑀳𑀓𑀪𑀸𑀯𑁂𑀦 𑀦 𑀉𑀤𑁆𑀥𑀝𑀸, 𑀇𑀢𑀭𑁂 𑀧𑀦 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀉𑀤𑁆𑀥𑀝𑀸𑀢𑀺.

𑀬𑀁 𑀧𑀦 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀸𑀤𑀺𑀲𑁂𑀦 𑀳𑀺 𑀧𑀤𑁂𑀦 𑀦𑀺𑀩𑁆𑀩𑀸𑀦𑀁 𑀔𑀦𑁆𑀥𑀲𑀗𑁆𑀕𑀳𑀫𑀢𑁆𑀢𑀁 𑀦 𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀤𑀼𑀓𑁆𑀔𑀲𑀘𑁆𑀘𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑁂𑀲𑀼 𑀧𑀦 𑀅𑀲𑀗𑁆𑀕𑀸𑀳𑀓𑁂𑀲𑀼 𑀦𑀺𑀩𑁆𑀩𑀸𑀦𑀁 𑀅𑀦𑁆𑀢𑁄𑀕𑀥𑀁, 𑀦 𑀘 𑀢𑀤𑁂𑀯 𑀢𑀲𑁆𑀲 𑀅𑀲𑀗𑁆𑀕𑀸𑀳𑀓𑀦𑁆𑀢𑀺. 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸𑀦𑀁 𑀯𑀲𑁂𑀦 𑀲𑀫𑁄𑀥𑀸𑀦𑁂𑀢𑁆𑀯𑀸 𑀓𑀢𑁂𑀳𑀺 𑀲𑀤𑁆𑀥𑀺𑀦𑁆𑀢𑀺 𑀏𑀯𑀁 𑀓𑀢𑁂𑀳𑀺 𑀤𑀼𑀢𑀺𑀬𑀧𑀜𑁆𑀳𑀸𑀤𑀻𑀳𑀺 𑀲𑀤𑁆𑀥𑀺𑀁 𑀧𑀞𑀫𑀧𑀜𑁆𑀳𑀦𑀸𑀫𑀭𑀽𑀧𑀧𑀜𑁆𑀳𑀸𑀤𑀬𑁄 𑀲𑀩𑁆𑀩𑁂𑀧𑀺 𑀘𑀢𑀼𑀢𑁆𑀢𑀺𑀁𑀲 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀬𑀁 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀁 𑀧𑀤𑀁, 𑀢𑀤𑁂𑀯𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀯𑀺𑀲𑁂𑀲𑀓𑀧𑀤𑀁 𑀯𑀤𑀢𑀺, 𑀦 𑀦𑀺𑀤𑁆𑀥𑀸𑀭𑀺𑀢𑁂 𑀧𑀼𑀘𑁆𑀙𑀺𑀢𑀩𑁆𑀩𑀥𑀫𑁆𑀫𑁂. 𑀢𑁂 𑀳𑀺 𑀮𑀓𑁆𑀔𑀡𑀢𑁄 𑀤𑀲𑁆𑀲𑀺𑀢𑀸, 𑀦 𑀧𑀤𑁂𑀦 𑀲𑀭𑀽𑀧𑀢𑁄𑀢𑀺. 𑀢𑀢𑁆𑀣 𑀢𑀤𑁂𑀯𑀸𑀢𑀺 𑀏𑀯-𑀲𑀤𑁆𑀤𑁂𑀦 𑀦 𑀢𑀁 𑀓𑀤𑀸𑀘𑀺 𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀁 𑀦 𑀳𑁄𑀢𑀻𑀢𑀺 𑀉𑀤𑁆𑀥𑀝𑀲𑁆𑀲𑁂𑀯 𑀅𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀪𑀸𑀯𑁂 𑀦𑀺𑀬𑀢𑀢𑀁 𑀅𑀜𑁆𑀜𑀲𑁆𑀲 𑀘 𑀅𑀦𑀺𑀬𑀢𑀢𑀁 𑀤𑀲𑁆𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀢𑀤𑁂𑀯 𑀬𑁂𑀳𑀺 𑀅𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀏𑀢𑁆𑀣 𑀳𑀺 ‘‘𑀦𑀺𑀬𑀫𑀢𑁄’’𑀢𑀺 𑀲𑀓𑁆𑀓𑀸 𑀯𑀘𑀦𑀲𑁂𑀲𑁄 𑀬𑁄𑀚𑁂𑀢𑀼𑀦𑁆𑀢𑀺. 𑀅𑀣 𑀯𑀸 𑀢𑀤𑁂𑀯𑀸𑀢𑀺 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀫𑁂𑀯 𑀏𑀯𑀁𑀧𑀓𑀸𑀭𑀫𑁂𑀯 𑀳𑀼𑀢𑁆𑀯𑀸 𑀬𑁂𑀳𑀺 𑀅𑀲𑀗𑁆𑀕𑀳𑀺𑀢𑀦𑁆𑀢𑀺 𑀢𑀲𑁆𑀲 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀪𑀸𑀯𑁂𑀦 𑀏𑀯𑀁 𑀅𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀪𑀸𑀯𑀦𑀺𑀬𑀫𑀦𑀢𑁆𑀣𑁄 𑀏𑀯-𑀲𑀤𑁆𑀤𑁄, 𑀦 𑀅𑀜𑁆𑀜𑀲𑁆𑀲 𑀅𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀢𑀸𑀦𑀺𑀯𑀸𑀭𑀡𑀢𑁆𑀣𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀜𑁆𑀳𑀺 𑀅𑀜𑁆𑀜𑀲𑀳𑀺𑀢𑀁 𑀅𑀲𑀳𑀺𑀢𑀜𑁆𑀘 𑀅𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀁 𑀳𑁄𑀢𑀺. 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀺 𑀳𑀺 𑀅𑀜𑁆𑀜𑀲𑀳𑀺𑀢𑀸𑀦𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀸𑀤𑀻𑀦𑀺 𑀅𑀲𑀳𑀺𑀢𑀸𑀦𑀻𑀢𑀺.

𑀅𑀯𑀲𑁂𑀲𑀸 𑀲𑀗𑁆𑀕𑀳𑀺𑀢𑀸𑀢𑀺 𑀇𑀤𑀁 𑀅𑀯𑀲𑁂𑀲𑀸 𑀅𑀲𑀗𑁆𑀕𑀳𑀺𑀢𑀸 𑀦 𑀳𑁄𑀦𑁆𑀢𑀻𑀢𑀺 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀢𑁂𑀳𑀺𑀧𑀺 𑀯𑀺𑀜𑁆𑀜𑀸𑀡𑀥𑀫𑁆𑀫𑁂𑀳𑀺 𑀢𑁂 𑀭𑀽𑀧𑀥𑀫𑁆𑀫𑀸𑀯 𑀢𑀻𑀳𑀺 𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑀸𑀢𑀺 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀸 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀸𑀳𑀓𑀸 𑀳𑀼𑀢𑁆𑀯𑀸 𑀅𑀲𑀗𑁆𑀕𑀳𑀺𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀼𑀤𑁆𑀥𑀝𑀸 𑀯𑁂𑀤𑀦𑀸𑀤𑀬𑁄𑀧𑀺 𑀳𑀺 𑀅𑀲𑀗𑁆𑀕𑀳𑀺𑀢𑀸 𑀏𑀯𑀸𑀢𑀺. 𑀏𑀢𑁆𑀣 𑀘 𑀧𑀞𑀫𑁂 𑀦𑀬𑁂 𑀯𑁂𑀤𑀦𑀸𑀤𑀬𑁄𑀧𑀺 𑀯𑀺𑀜𑁆𑀜𑀸𑀡𑁂𑀦 𑀅𑀲𑀗𑁆𑀕𑀳𑀺𑀢𑀸𑀢𑀺 𑀯𑀼𑀢𑁆𑀢𑀸, 𑀤𑀼𑀢𑀺𑀬𑁂 𑀭𑀽𑀧𑀥𑀫𑁆𑀫𑀸𑀯𑀸𑀢𑀺 𑀅𑀬𑀁 𑀯𑀺𑀲𑁂𑀲𑁄. 𑀯𑁂𑀤𑀦𑀸𑀤𑀬𑁄 𑀳𑀺 𑀭𑀽𑀧𑀯𑀺𑀜𑁆𑀜𑀸𑀡𑁂𑀳𑁂𑀯 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸𑀢𑀺 𑀑𑀴𑀸𑀭𑀺𑀓𑀭𑀽𑀧𑁂𑀳𑀺 𑀯𑀺𑀜𑁆𑀜𑀸𑀡𑁂𑀦 𑀘 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀭𑀽𑀧𑁂𑀓𑀤𑁂𑀲𑁄 𑀳𑀺 𑀏𑀢𑁆𑀣 𑀭𑀽𑀧𑀕𑁆𑀕𑀳𑀡𑁂𑀦 𑀕𑀳𑀺𑀢𑁄𑀢𑀺.

𑁧𑁯𑁬. 𑀘𑀢𑀼𑀢𑁆𑀣𑀧𑀜𑁆𑀳𑁂 𑀘𑀓𑁆𑀔𑀸𑀬𑀢𑀦𑀁 𑀯𑁂𑀤𑀦𑀸𑀤𑀻𑀳𑀺 𑀘𑀢𑀽𑀳𑀻𑀢𑀺 𑀏𑀢𑁆𑀣 𑀘𑀓𑁆𑀔𑀸𑀬𑀢𑀦𑀦𑁆𑀢𑀺 𑀏𑀢𑁂𑀦 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀁 𑀅𑀲𑀗𑁆𑀕𑀸𑀳𑀓𑀁 𑀤𑀲𑁆𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀘𑀓𑁆𑀔𑀸𑀬𑀢𑀦𑁂𑀦 𑀧𑀦 𑀅𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀸𑀦𑀺 𑀤𑀲 𑀑𑀴𑀸𑀭𑀺𑀓𑀸𑀬𑀢𑀦𑀸𑀦𑀺 𑀦 𑀘𑀓𑁆𑀔𑀸𑀬𑀢𑀦𑀫𑁂𑀯𑀸𑀢𑀺. ‘‘𑀭𑀽𑀧𑀜𑁆𑀘 𑀥𑀫𑁆𑀫𑀸𑀬𑀢𑀦’’𑀦𑁆𑀢𑀺𑀆𑀤𑀺𑀦𑀸 𑀬𑁂𑀳𑀺 𑀥𑀫𑁆𑀫𑁂𑀳𑀺 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑀁 𑀢𑀁 𑀯𑀺𑀜𑁆𑀜𑀸𑀡𑀫𑁂𑀯 𑀳𑁄𑀢𑀺, 𑀅𑀲𑀗𑁆𑀕𑀳𑀺𑀢𑁂𑀦 𑀢𑁂𑀦 𑀅𑀲𑀗𑁆𑀕𑀳𑀺𑀢𑀜𑁆𑀘 𑀯𑀺𑀜𑁆𑀜𑀸𑀡𑀯𑀚𑁆𑀚𑀁 𑀲𑀩𑁆𑀩𑀁 𑀢𑁂𑀯 𑀥𑀫𑁆𑀫𑁂 𑀉𑀤𑀸𑀦𑁂𑀢𑀺. 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸 𑀳𑀺 𑀏𑀓𑀢𑁄 𑀉𑀤𑀸𑀦𑁂𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀸. 𑀢𑀢𑁆𑀣 𑀧𑀞𑀫𑁂𑀦 𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀏𑀓𑀢𑁄 𑀉𑀤𑀸𑀦𑁂𑀢𑁆𑀯𑀸 𑀤𑀲𑁆𑀲𑀺𑀢𑁂𑀲𑀼 𑀅𑀜𑁆𑀜𑁂 𑀯𑀺𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸 𑀦𑀬𑀤𑀸𑀦𑁂𑀦 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀭𑀽𑀧𑀜𑁆𑀘 𑀥𑀫𑁆𑀫𑀸𑀬𑀢𑀦𑀦𑁆𑀢𑀺…𑀧𑁂… 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀲𑀗𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑀺𑀢𑀸’’𑀢𑀺. 𑀢𑀢𑁆𑀣 𑀤𑁆𑀯𑁂 𑀪𑀯𑀸𑀢𑀺 𑀅𑀲𑀜𑁆𑀜𑁂𑀓𑀯𑁄𑀓𑀸𑀭𑀪𑀯𑀸. 𑀤𑁆𑀯𑁂𑀢𑀺 𑀩𑀸𑀳𑀺𑀭𑀼𑀧𑀸𑀤𑀸𑀥𑀫𑁆𑀫𑁂 𑀏𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑁂𑀦 𑀅𑀲𑀗𑁆𑀕𑀸𑀳𑀓𑁂𑀦 𑀅𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀁 𑀧𑀼𑀘𑁆𑀙𑀺𑀢𑀩𑁆𑀩𑀁 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀜𑁆𑀘 𑀧𑀭𑀺𑀘𑁆𑀙𑀺𑀚𑁆𑀚𑀢𑀺, 𑀲𑁄 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀓𑁄 𑀢𑀲𑁆𑀲 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀜𑁆𑀘 𑀦𑀺𑀲𑁆𑀲𑀬𑀪𑀸𑀯𑀢𑁄 ‘‘𑀯𑀺𑀲𑀬𑁄’’𑀢𑀺 𑀯𑀼𑀢𑁆𑀢𑁄, 𑀬𑀣𑀸𑀤𑀲𑁆𑀲𑀺𑀢𑀲𑁆𑀲 𑀧𑀦 𑀉𑀤𑁆𑀤𑀸𑀦𑀲𑁆𑀲 𑀦𑀬𑀤𑀸𑀦𑀫𑀢𑁆𑀢𑀢𑁆𑀢𑀸 ‘‘𑀦𑀬𑁄’’𑀢𑀺 𑀯𑀼𑀢𑁆𑀢𑀁. ‘‘𑀤𑁆𑀯𑁂𑀯𑀻𑀲𑀦𑀬𑁄 𑀘𑀸’’𑀢𑀺𑀧𑀺 𑀧𑀸𑀞𑁄, 𑀤𑁆𑀯𑁂𑀯𑀻𑀲𑀧𑀤𑀺𑀓𑁄 𑀏𑀲 𑀦𑀬𑁄 𑀘𑀸𑀢𑀺 𑀅𑀢𑁆𑀣𑁄.

𑀧𑀜𑁆𑀘𑀫𑀦𑀬𑀅𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀙𑀝𑁆𑀞𑀦𑀬𑁄 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑀯𑀡𑁆𑀡𑀦𑀸

𑁨𑁨𑁮. 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑁂 𑀬𑀁 𑀮𑀩𑁆𑀪𑀢𑀺, 𑀬𑀜𑁆𑀘 𑀦 𑀮𑀩𑁆𑀪𑀢𑀺, 𑀢𑀁 𑀲𑀩𑁆𑀩𑀁 𑀧𑀼𑀘𑁆𑀙𑀸𑀬 𑀕𑀳𑀺𑀢𑀦𑁆𑀢𑀺 𑀇𑀤𑀁 𑀦 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀺 𑀧𑀤𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀣 𑀔𑁄 𑀲𑀫𑁆𑀧𑀬𑁄𑀕𑀧𑀤𑀁 𑀯𑀺𑀧𑁆𑀧𑀬𑁄𑀕𑀧𑀤𑀜𑁆𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀲𑀼 𑀳𑀺 𑀬𑀁 𑀥𑀫𑁆𑀫𑀸𑀬𑀢𑀦𑀸𑀤𑀺𑀧𑀤𑀁 𑀦 𑀮𑀩𑁆𑀪𑀢𑀺, 𑀢𑀁 𑀧𑀼𑀘𑁆𑀙𑀸𑀬𑀧𑀺 𑀦 𑀕𑀳𑀺𑀢𑀁. 𑀲𑀫𑁆𑀧𑀬𑁄𑀕𑀧𑀤𑀁 𑀧𑀦 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀲𑀼 𑀅𑀮𑀩𑁆𑀪𑀫𑀸𑀦𑀫𑁆𑀧𑀺 ‘‘𑀭𑀽𑀧𑀓𑁆𑀔𑀦𑁆𑀥𑁄 𑀓𑀢𑀺𑀳𑀺…𑀧𑁂… 𑀲𑀫𑁆𑀧𑀬𑀼𑀢𑁆𑀢𑁄’’𑀢𑀺 𑀏𑀯𑀁 𑀧𑀼𑀘𑁆𑀙𑀸𑀬 𑀕𑀳𑀺𑀢𑀁, 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀲𑀼 𑀮𑀩𑁆𑀪𑀫𑀸𑀦𑀁, 𑀯𑀺𑀧𑁆𑀧𑀬𑁄𑀕𑀧𑀤𑀁 𑀧𑀦 𑀲𑀩𑁆𑀩𑀢𑁆𑀣 𑀮𑀩𑁆𑀪𑀫𑀸𑀦𑀫𑁂𑀯𑀸𑀢𑀺. 𑀭𑀽𑀧𑀥𑀫𑁆𑀫𑀸𑀦𑀁 𑀧𑀦 𑀭𑀽𑀧𑁂𑀦 𑀦𑀺𑀩𑁆𑀩𑀸𑀦𑁂𑀦 𑀯𑀸, 𑀦𑀺𑀩𑁆𑀩𑀸𑀦𑀲𑁆𑀲 𑀘 𑀭𑀽𑀧𑁂𑀦 𑀲𑀤𑁆𑀥𑀺𑀁 𑀲𑀫𑁆𑀧𑀬𑁄𑀕𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀏𑀓𑀼𑀧𑁆𑀧𑀸𑀤𑀸𑀤𑀺𑀲𑀪𑀸𑀕𑀢𑀸𑀬 𑀅𑀪𑀸𑀯𑀢𑁄 𑀲𑀫𑁆𑀧𑀬𑁄𑀕𑀁 𑀦𑀺𑀯𑀸𑀭𑁂𑀦𑁆𑀢𑁂𑀦 𑀲𑀸 𑀏𑀯 𑀏𑀓𑀼𑀧𑁆𑀧𑀸𑀤𑀸𑀤𑀺𑀢𑀸 𑀏𑀢𑁂𑀲𑀁 𑀯𑀺𑀲𑀪𑀸𑀕𑀢𑀸𑀢𑀺 𑀢𑀤𑀪𑀸𑀯𑀢𑁄 𑀯𑀺𑀧𑁆𑀧𑀬𑁄𑀕𑁄𑀧𑀺 𑀦𑀺𑀯𑀸𑀭𑀺𑀢𑁄 𑀏𑀯 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀘𑀢𑀽𑀲𑀼 𑀳𑀺 𑀔𑀦𑁆𑀥𑁂𑀲𑀼 𑀯𑀺𑀚𑁆𑀚𑀫𑀸𑀦𑀸 𑀏𑀓𑀼𑀧𑁆𑀧𑀸𑀤𑀸𑀤𑀺𑀢𑀸 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀲𑀪𑀸𑀕𑀢𑀸 𑀳𑁄𑀢𑀺 𑀭𑀽𑀧𑀦𑀺𑀩𑁆𑀩𑀸𑀦𑁂𑀳𑀺 𑀢𑁂𑀲𑀁 𑀢𑁂𑀳𑀺 𑀘 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀁 𑀯𑀺𑀲𑀪𑀸𑀕𑀢𑀸 𑀘, 𑀦 𑀘 𑀭𑀽𑀧𑁂𑀓𑀤𑁂𑀲𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀯𑀸 𑀲𑀸 𑀏𑀓𑀼𑀧𑁆𑀧𑀸𑀤𑀸𑀤𑀺𑀢𑀸 𑀅𑀢𑁆𑀣𑀺, 𑀬𑀸 𑀭𑀽𑀧𑁂𑀓𑀤𑁂𑀲𑁂𑀦 𑀭𑀽𑀧𑁂𑀓𑀤𑁂𑀲𑀦𑀺𑀩𑁆𑀩𑀸𑀦𑀸𑀦𑀁 𑀦𑀺𑀩𑁆𑀩𑀸𑀦𑁂𑀦 𑀘 𑀭𑀽𑀧𑀲𑁆𑀲 𑀯𑀺𑀲𑀪𑀸𑀕𑀢𑀸 𑀲𑀺𑀬𑀸. 𑀢𑁂𑀦𑁂𑀯 ‘‘𑀘𑀢𑀽𑀳𑀺 𑀯𑀺𑀧𑁆𑀧𑀬𑁄𑀕𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺.

𑀲𑀢𑁆𑀢𑀲𑀼 𑀯𑀺𑀜𑁆𑀜𑀸𑀡𑀥𑀸𑀢𑀽𑀲𑀼 𑀏𑀓𑀸𑀬𑀧𑀺 𑀅𑀯𑀺𑀧𑁆𑀧𑀬𑀼𑀢𑁆𑀢𑁂𑀢𑀺 𑀬𑀣𑀸 𑀭𑀽𑀧𑀪𑀯𑁄 𑀢𑀻𑀳𑀺 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺, 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸 𑀧𑀜𑁆𑀘𑀳𑀺, 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸 𑀏𑀓𑀸𑀬 𑀯𑀺𑀧𑁆𑀧𑀬𑀼𑀢𑁆𑀢𑁂 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑁂 𑀥𑀫𑁆𑀫𑁂 𑀤𑀻𑀧𑁂𑀦𑁆𑀢𑀺, 𑀏𑀯𑀁 𑀅𑀤𑀻𑀧𑁂𑀢𑁆𑀯𑀸 𑀏𑀓𑀸𑀬𑀧𑀺 𑀯𑀺𑀧𑁆𑀧𑀬𑀼𑀢𑁆𑀢𑁂 𑀅𑀳𑁄𑀦𑁆𑀢𑁂 𑀲𑀢𑁆𑀢𑀳𑀺𑀧𑀺 𑀲𑀫𑁆𑀧𑀬𑀼𑀢𑁆𑀢𑁂 𑀲𑀢𑁆𑀢𑀧𑀺 𑀯𑀸 𑀢𑀸 𑀤𑀻𑀧𑁂𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀯𑀺𑀧𑁆𑀧𑀬𑀼𑀢𑁆𑀢𑁂𑀢𑀺 𑀳𑀺 𑀬𑁂 𑀯𑀺𑀧𑁆𑀧𑀬𑀼𑀢𑁆𑀢𑀸 𑀦 𑀳𑁄𑀦𑁆𑀢𑀺, 𑀢𑁂 𑀥𑀫𑁆𑀫𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀦 𑀲𑀫𑁆𑀧𑀬𑀼𑀢𑁆𑀢𑁂𑀢𑀺. 𑀢𑁂𑀦 𑀬𑀸𑀦𑀺 𑀢𑀸𑀳𑀺 𑀲𑀫𑁆𑀧𑀬𑀼𑀢𑁆𑀢𑁂 𑀤𑀻𑀧𑁂𑀦𑁆𑀢𑀺 𑀥𑀫𑁆𑀫𑀸𑀬𑀢𑀦𑀸𑀤𑀺𑀧𑀤𑀸𑀦𑀺, 𑀬𑀸𑀦𑀺 𑀘 𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀪𑀸𑀯𑁂𑀳𑀺 𑀦𑀯𑀢𑁆𑀢𑀩𑁆𑀩𑀁 𑀤𑀻𑀧𑁂𑀦𑁆𑀢𑀺 𑀅𑀘𑁂𑀢𑀲𑀺𑀓𑀸𑀤𑀺𑀧𑀤𑀸𑀦𑀺, 𑀬𑀸𑀦𑀺 𑀘 𑀲𑀫𑁆𑀧𑀬𑀼𑀢𑁆𑀢𑀦𑀯𑀢𑁆𑀢𑀩𑁆𑀩𑀸𑀦𑀺 𑀤𑀻𑀧𑁂𑀦𑁆𑀢𑀺 𑀤𑀼𑀓𑁆𑀔𑀲𑀘𑁆𑀘𑀸𑀤𑀺𑀧𑀤𑀸𑀦𑀺, 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑀥𑀫𑁆𑀫𑀤𑀻𑀧𑀓𑀸𑀦𑀁 𑀅𑀕𑁆𑀕𑀳𑀡𑀁 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀳𑀺 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑀲𑀩𑁆𑀩𑀯𑀺𑀜𑁆𑀜𑀸𑀡𑀥𑀸𑀢𑀼𑀢𑀁𑀲𑀫𑁆𑀧𑀬𑀼𑀢𑁆𑀢𑀢𑀤𑀼𑀪𑀬𑀲𑀫𑀼𑀤𑀸𑀬𑀸𑀦𑀁 𑀔𑀦𑁆𑀥𑀸𑀬𑀢𑀦𑀥𑀸𑀢𑀽𑀲𑀼 𑀓𑁂𑀦𑀘𑀺 𑀲𑀫𑁆𑀧𑀬𑁄𑀕𑁄 𑀯𑀺𑀧𑁆𑀧𑀬𑁄𑀕𑁄 𑀯𑀸 𑀅𑀢𑁆𑀣𑀻𑀢𑀺.

𑀬𑀤𑀺 𑀏𑀯𑀁 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀦𑀺𑀤𑁆𑀤𑁂𑀲𑁂 ‘‘𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀳𑀺 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑁄𑀪𑀬𑀥𑀫𑁆𑀫𑀸𑀢𑀺? 𑀦, 𑀬𑀣𑀸𑀯𑀼𑀢𑁆𑀢𑀲𑀫𑀼𑀤𑀸𑀬𑀸𑀦𑀁 𑀔𑀦𑁆𑀥𑀸𑀤𑀻𑀳𑁂𑀯 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑀯𑀘𑀦𑀢𑁄. 𑀔𑀦𑁆𑀥𑀸𑀤𑀬𑁄 𑀳𑀺 𑀢𑀤𑁂𑀓𑀤𑁂𑀲𑀸 𑀢𑀤𑁂𑀓𑀤𑁂𑀲𑀜𑁆𑀜𑀲𑀫𑀼𑀤𑀸𑀬𑀸 𑀘, 𑀲𑀫𑀼𑀤𑀸𑀬𑁂𑀓𑀤𑁂𑀲𑀸𑀦𑀜𑁆𑀘 𑀯𑀺𑀪𑀸𑀕𑀸𑀪𑀸𑀯𑀢𑁄 𑀦 𑀲𑀪𑀸𑀕𑀯𑀺𑀲𑀪𑀸𑀕𑀢𑀸 𑀅𑀢𑁆𑀣𑀺, 𑀢𑁂𑀦 𑀢𑁂𑀲𑀁 𑀔𑀦𑁆𑀥𑀸𑀤𑀻𑀳𑀺 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑁄 𑀳𑁄𑀢𑀺. 𑀓𑀼𑀲𑀮𑀸 𑀧𑀦 𑀥𑀫𑁆𑀫𑀸 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀳𑀺 𑀯𑀺𑀪𑀢𑁆𑀢𑀸, 𑀢𑁂 𑀘 𑀓𑀼𑀲𑀮𑁂𑀳𑀺, 𑀦 𑀢𑁂𑀲𑀁 𑀲𑀫𑀼𑀤𑀸𑀬𑁂𑀓𑀤𑁂𑀲𑀪𑀸𑀯𑁄 𑀢𑀤𑁂𑀓𑀤𑁂𑀲𑀜𑁆𑀜𑀲𑀫𑀼𑀤𑀸𑀬𑀪𑀸𑀯𑁄 𑀯𑀸, 𑀢𑀲𑁆𑀫𑀸 𑀔𑀦𑁆𑀥𑀸𑀤𑀻𑀦𑀺 𑀅𑀦𑀸𑀫𑀲𑀺𑀢𑁆𑀯𑀸 𑀯𑀺𑀧𑁆𑀧𑀬𑀼𑀢𑁆𑀢𑀢𑀸𑀫𑀢𑁆𑀢𑁂𑀦 𑀬𑀣𑀸𑀦𑀺𑀤𑁆𑀥𑀸𑀭𑀺𑀢𑀥𑀫𑁆𑀫𑀤𑀲𑁆𑀲𑀦𑁂 𑀓𑀼𑀲𑀮𑁂𑀳𑀺 𑀇𑀢𑀭𑁂𑀲𑀁, 𑀇𑀢𑀭𑁂𑀳𑀺 𑀘 𑀓𑀼𑀲𑀮𑀸𑀦𑀁 𑀯𑀺𑀧𑁆𑀧𑀬𑁄𑀕𑁄 𑀦 𑀦 𑀳𑁄𑀢𑀺 𑀯𑀺𑀲𑀪𑀸𑀕𑀢𑀸𑀲𑀩𑁆𑀪𑀸𑀯𑀢𑁄𑀢𑀺 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀯𑀺𑀧𑁆𑀧𑀬𑀼𑀢𑁆𑀢𑀢𑀸 𑀯𑀼𑀢𑁆𑀢𑀸. 𑀏𑀲 𑀦𑀬𑁄 𑀲𑀩𑁆𑀩𑁂𑀲𑀼 𑀏𑀯𑀭𑀽𑀧𑁂𑀲𑀼.

𑀉𑀤𑁆𑀤𑀸𑀦𑁂 𑀧𑀦 𑀅𑀝𑁆𑀞𑀸𑀭𑀲 𑀢𑀢𑁄 𑀧𑀭𑁂𑀢𑀺 𑀇𑀤𑀁 ‘‘𑀲𑁄𑀴𑀲𑀸’’𑀢𑀺 𑀯𑀢𑁆𑀢𑀩𑁆𑀩𑀁, 𑀢𑁂𑀯𑀻𑀲𑀦𑁆𑀢𑀺 𑀇𑀤𑀜𑁆𑀘 ‘‘𑀏𑀓𑀯𑀻𑀲’’𑀦𑁆𑀢𑀺. 𑀲𑀩𑁆𑀩𑀢𑁆𑀣 𑀘 𑀓𑀸𑀮𑀲𑀦𑁆𑀢𑀸𑀦𑀪𑁂𑀤𑀭𑀳𑀺𑀢𑀸𑀭𑀳𑀺𑀢𑀩𑀳𑀼𑀥𑀫𑁆𑀫𑀲𑀫𑁄𑀥𑀸𑀦𑀸𑀦𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀦𑀁 𑀏𑀓𑀤𑁂𑀲𑀸 𑀲𑀫𑀼𑀤𑀬𑀲𑀘𑁆𑀘𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄 𑀏𑀓𑀤𑁂𑀲𑀲𑀫𑁆𑀫𑀺𑀲𑁆𑀲𑀸 𑀘 𑀇𑀤𑁆𑀥𑀺𑀧𑀸𑀤𑀸𑀤𑀬𑁄 𑀅𑀦𑀸𑀭𑀫𑁆𑀫𑀡𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑀸 𑀭𑀽𑀧𑀓𑁆𑀔𑀦𑁆𑀥𑀸𑀤𑀬𑁄 𑀘 𑀲𑀸𑀭𑀫𑁆𑀫𑀡𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑀸 𑀲𑀫𑁆𑀧𑀬𑁄𑀕𑀻𑀯𑀺𑀧𑁆𑀧𑀬𑁄𑀕𑀻𑀪𑀸𑀯𑁂𑀦 𑀲𑀫𑀸𑀦𑀓𑀸𑀮𑀲𑀦𑁆𑀢𑀸𑀦𑁂𑀳𑀺 𑀘 𑀏𑀓𑀤𑁂𑀲𑀦𑁆𑀢𑀭𑁂𑀳𑀺 𑀯𑀺𑀪𑀢𑁆𑀢𑀸 𑀏𑀯 𑀕𑀳𑀺𑀢𑀸𑀢𑀺 𑀢𑁂𑀳𑀺 𑀢𑁂 𑀓𑁂𑀳𑀺𑀘𑀺 𑀏𑀓𑀤𑁂𑀲𑀦𑁆𑀢𑀭𑁂𑀳𑀺 𑀯𑀺𑀪𑀢𑁆𑀢𑁂𑀳𑀺 𑀬𑀣𑀸𑀬𑁄𑀕𑀁 𑀲𑀫𑁆𑀧𑀬𑁄𑀕𑀁 𑀯𑀺𑀧𑁆𑀧𑀬𑁄𑀕𑀜𑁆𑀘 𑀮𑀪𑀦𑁆𑀢𑀺. 𑀅𑀢𑁆𑀣𑀺 𑀳𑀺 𑀢𑁂𑀲𑀁 𑀏𑀓𑀼𑀧𑁆𑀧𑀸𑀤𑀸𑀤𑀺𑀢𑀸 𑀲𑀪𑀸𑀕𑀢𑀸 𑀯𑀺𑀲𑀪𑀸𑀕𑀢𑀸 𑀘𑀸𑀢𑀺. 𑀢𑁂𑀦 𑀢𑀢𑁆𑀣 𑀢𑀢𑁆𑀣 ‘‘𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺 𑀘, ‘‘𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢’’𑀦𑁆𑀢𑀺 𑀘 𑀯𑀼𑀢𑁆𑀢𑀁. 𑀪𑀺𑀦𑁆𑀦𑀓𑀸𑀮𑀲𑀫𑀼𑀤𑀸𑀬𑀸 𑀏𑀯 𑀧𑀦 𑀯𑁂𑀤𑀦𑀸𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀸 𑀯𑀢𑁆𑀢𑀫𑀸𑀦𑀸 𑀘 𑀏𑀓𑁂𑀓𑀥𑀫𑁆𑀫𑀸 𑀏𑀯, 𑀢𑀲𑁆𑀫𑀸 𑀢𑁂𑀲𑀁 𑀲𑀫𑀸𑀦𑀓𑀸𑀮𑀲𑁆𑀲 𑀯𑀺𑀪𑀚𑀺𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄 𑀦 𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀯𑀺𑀪𑀸𑀕𑀁 𑀓𑀭𑁄𑀦𑁆𑀢𑀺, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀸𑀤𑀬𑁄 𑀘 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀫𑀦𑀸𑀬𑀢𑀦𑀲𑁆𑀲 𑀘. 𑀢𑁂𑀦 ‘‘𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀏𑀓𑁂𑀦 𑀔𑀦𑁆𑀥𑁂𑀦 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢’’𑀦𑁆𑀢𑀺, ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀸’’𑀢𑀺 𑀘 𑀏𑀯𑀫𑀸𑀤𑀺 𑀦 𑀯𑀼𑀢𑁆𑀢𑀁, 𑀔𑀦𑁆𑀥𑀸𑀬𑀢𑀦𑀯𑀺𑀪𑀸𑀕𑀯𑀺𑀭𑀳𑀺𑀢𑀫𑁆𑀧𑀺 𑀧𑀦 𑀯𑀺𑀜𑁆𑀜𑀸𑀡𑀁 𑀥𑀸𑀢𑀼𑀯𑀺𑀪𑀸𑀕𑁂𑀦 𑀯𑀺𑀪𑀢𑁆𑀢𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁, 𑀏𑀯𑀫𑁂𑀯𑀁 𑀇𑀦𑁆𑀤𑁆𑀭𑀺𑀬𑀯𑀺𑀪𑀸𑀕𑁂𑀦 𑀯𑀺𑀪𑀢𑁆𑀢𑀸𑀦𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 ‘‘𑀲𑀼𑀔𑀺𑀦𑁆𑀤𑁆𑀭𑀺𑀬𑁂𑀦 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸’’𑀢𑀺𑀆𑀤𑀻𑀲𑀼 𑀬𑀣𑀸𑀬𑁄𑀕𑀁 𑀯𑀺𑀧𑁆𑀧𑀬𑁄𑀕𑁄 𑀤𑀝𑁆𑀞𑀩𑁆𑀩𑁄, 𑀦𑀸𑀯𑀺𑀪𑀢𑁆𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲𑀸𑀢𑀺.

𑁨𑁩𑁫. 𑀬𑀣𑀸 𑀢𑀁𑀲𑀫𑁆𑀧𑀬𑁄𑀕𑀻𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀲𑀫𑀼𑀤𑀬𑀲𑀘𑁆𑀘𑀁 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀢𑀁𑀯𑀺𑀧𑁆𑀧𑀬𑁄𑀕𑀻𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀢𑀻𑀳𑀺 𑀔𑀦𑁆𑀥𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢’’𑀦𑁆𑀢𑀺 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀅𑀯𑀺𑀪𑀸𑀕𑁂𑀳𑀺 𑀢𑁂𑀳𑀺 𑀯𑀺𑀧𑁆𑀧𑀬𑁄𑀕𑀯𑀘𑀦𑀲𑁆𑀲 𑀅𑀬𑀼𑀢𑁆𑀢𑀢𑁆𑀢𑀸. 𑀯𑀺𑀪𑀸𑀕𑁂 𑀳𑀺 𑀲𑀢𑀺 𑀲𑀫𑀼𑀤𑀬𑀲𑀘𑁆𑀘𑀁 𑀲𑀼𑀔𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑁂𑀳𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀢𑁄 𑀅𑀜𑁆𑀜𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺 𑀬𑀼𑀢𑁆𑀢𑀁 𑀯𑀢𑁆𑀢𑀼𑀁 𑀯𑀺𑀪𑀸𑀕𑁂𑀦𑁂𑀯 𑀯𑀺𑀲𑀪𑀸𑀕𑀢𑀸𑀬 𑀲𑀗𑁆𑀕𑀳𑀺𑀢𑀢𑁆𑀢𑀸, 𑀯𑀺𑀪𑀸𑀕𑀭𑀳𑀺𑀢𑁂𑀳𑀺 𑀧𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀳𑀺 𑀦 𑀬𑀼𑀢𑁆𑀢𑀁, 𑀢𑁂𑀳𑀺 𑀯𑀺𑀚𑁆𑀚𑀫𑀸𑀦𑁂𑀳𑀺 𑀯𑀺𑀚𑁆𑀚𑀫𑀸𑀦𑀲𑁆𑀲 𑀲𑀫𑀼𑀤𑀬𑀲𑁆𑀲 𑀯𑀺𑀲𑀪𑀸𑀕𑀪𑀸𑀯𑀸𑀪𑀸𑀯𑀢𑁄. 𑀬𑀜𑁆𑀳𑀺 𑀅𑀦𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸 𑀯𑀺𑀬 𑀆𑀫𑀝𑁆𑀞𑀓𑀸𑀮𑀪𑁂𑀤𑀁 𑀦 𑀳𑁄𑀢𑀺 𑀲𑀗𑁆𑀔𑀢𑀁 𑀉𑀤𑁆𑀥𑀭𑀺𑀢𑀩𑁆𑀩𑀁, 𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀁 𑀦𑀺𑀲𑁆𑀲𑀸𑀬 𑀲𑀫𑁆𑀧𑀬𑁄𑀕𑀻𑀯𑀺𑀧𑁆𑀧𑀬𑁄𑀕𑀻𑀪𑀸𑀯𑁂𑀦 𑀉𑀤𑁆𑀥𑀭𑀻𑀬𑀢𑀺, 𑀢𑀜𑁆𑀘 𑀯𑀺𑀪𑀸𑀕𑀭𑀳𑀺𑀢𑁂𑀳𑀺 𑀔𑀦𑁆𑀥𑀸𑀤𑀻𑀳𑀺 𑀲𑀗𑁆𑀔𑀢𑁂𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀫𑁂𑀯 𑀦𑀺𑀲𑁆𑀲𑀸𑀬 𑀅𑀦𑀸𑀫𑀝𑁆𑀞𑀓𑀸𑀮𑀪𑁂𑀤𑁂 𑀅𑀢𑁆𑀣𑀺𑀢𑀸𑀬 𑀏𑀯 𑀦𑀺𑀲𑁆𑀲𑀺𑀢𑀩𑁆𑀩𑀢𑁆𑀢𑀸. 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀳𑀺 𑀅𑀯𑀺𑀚𑁆𑀚𑀫𑀸𑀦𑁂𑀦, 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀘 𑀯𑀺𑀚𑁆𑀚𑀫𑀸𑀦𑁂𑀦, 𑀯𑀺𑀚𑁆𑀚𑀫𑀸𑀦𑀲𑁆𑀲 𑀘 𑀅𑀯𑀺𑀚𑁆𑀚𑀫𑀸𑀦𑁂𑀦 𑀲𑀫𑁆𑀧𑀬𑁄𑀕𑁄 𑀦𑀢𑁆𑀣𑀺, 𑀯𑀺𑀧𑁆𑀧𑀬𑁄𑀕𑁄 𑀧𑀦 𑀅𑀯𑀺𑀚𑁆𑀚𑀫𑀸𑀦𑀢𑀸𑀤𑀻𑀧𑀓𑁂 𑀪𑁂𑀤𑁂 𑀕𑀳𑀺𑀢𑁂 𑀢𑁂𑀦𑁂𑀯 𑀯𑀺𑀲𑀪𑀸𑀕𑀢𑀸𑀧𑀺 𑀕𑀳𑀺𑀢𑀸 𑀏𑀯𑀸𑀢𑀺 𑀳𑁄𑀢𑀺. 𑀪𑁂𑀤𑁂 𑀧𑀦 𑀅𑀕𑁆𑀕𑀳𑀺𑀢𑁂 𑀢𑁂𑀦 𑀢𑁂𑀦 𑀕𑀳𑀡𑁂𑀦 𑀯𑀺𑀲𑀪𑀸𑀕𑀢𑀸𑀬 𑀅𑀕𑁆𑀕𑀳𑀺𑀢𑀢𑁆𑀢𑀸 𑀲𑀢𑀺 𑀲𑀪𑀸𑀕𑀢𑁆𑀢𑁂 𑀯𑀺𑀚𑁆𑀚𑀫𑀸𑀦𑀢𑀸𑀬 𑀏𑀯 𑀥𑀫𑁆𑀫𑀸𑀦𑀁 𑀲𑀪𑀸𑀕𑀲𑁆𑀲 𑀧𑀭𑀺𑀘𑁆𑀙𑀺𑀦𑁆𑀤𑀦𑀢𑁄 𑀯𑀺𑀚𑁆𑀚𑀫𑀸𑀦𑀢𑀸 𑀤𑀲𑁆𑀲𑀺𑀢𑀸𑀢𑀺 𑀏𑀓𑀼𑀧𑁆𑀧𑀸𑀤𑀸𑀤𑀺𑀪𑀸𑀯𑀲𑀗𑁆𑀔𑀸𑀢𑀸 𑀲𑀪𑀸𑀕𑀢𑀸𑀧𑀺 𑀕𑀳𑀺𑀢𑀸 𑀏𑀯 𑀳𑁄𑀢𑀺. 𑀢𑀲𑁆𑀲𑀸 𑀘 𑀕𑀳𑀺𑀢𑀢𑁆𑀢𑀸 𑀲𑀫𑁆𑀧𑀬𑁄𑀕𑁄𑀯 𑀮𑀩𑁆𑀪𑀢𑀺, 𑀦 𑀯𑀺𑀧𑁆𑀧𑀬𑁄𑀕𑁄, 𑀢𑀲𑁆𑀫𑀸 𑀲𑀫𑀼𑀤𑀬𑀲𑀘𑁆𑀘𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀳𑀺 𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑁂𑀦 𑀯𑀼𑀢𑁆𑀢𑀁, 𑀦 𑀯𑀺𑀧𑁆𑀧𑀬𑀼𑀢𑁆𑀢𑀢𑁆𑀢𑁂𑀦𑀸𑀢𑀺. 𑀏𑀲 𑀦𑀬𑁄 𑀫𑀕𑁆𑀕𑀲𑀘𑁆𑀘𑀸𑀤𑀻𑀲𑀼𑀧𑀻𑀢𑀺.

𑁨𑁬𑁨. ‘‘𑀤𑀼𑀢𑀺𑀬𑀚𑁆𑀛𑀸𑀦𑀯𑀺𑀘𑀸𑀭𑀜𑁆𑀳𑀺 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀁 𑀬𑁂 𑀧𑀥𑀸𑀦𑀸 𑀯𑀺𑀢𑀓𑁆𑀓𑁄 𑀯𑀺𑀬 𑀓𑁄𑀝𑁆𑀞𑀸𑀲𑀦𑁆𑀢𑀭𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀅𑀮𑀻𑀦𑀸, 𑀢𑁂 𑀏𑀯 𑀇𑀥 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯 𑀳𑀺 𑀅𑀦𑀦𑁆𑀢𑀭𑀦𑀬𑁂 𑀲𑀫𑀼𑀤𑀬𑀲𑀘𑁆𑀘𑁂𑀦 𑀲𑀫𑀸𑀦𑀕𑀢𑀺𑀓𑀸 𑀦 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁂𑀳𑀻𑀢𑀺 𑀢𑁂 𑀦 𑀕𑀳𑀺𑀢𑀸. 𑀤𑀲𑀫𑁄𑀲𑀸𑀦𑀦𑀬𑁂𑀲𑀼 𑀘 𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀜𑁆𑀘 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑁄𑀕𑁄 𑀅𑀝𑁆𑀞𑀸𑀭𑀲𑀲𑀗𑁆𑀕𑀳𑀺𑀢𑁄 𑀘 𑀯𑀼𑀢𑁆𑀢𑁄. 𑀯𑀺𑀢𑀓𑁆𑀓𑀲𑀳𑀺𑀢𑁂𑀲𑀼𑀧𑀺 𑀧𑀦 𑀢𑁂𑀲𑀼 𑀕𑀳𑀺𑀢𑁂𑀲𑀼 𑀲𑀩𑁆𑀩𑁂𑀧𑀺 𑀢𑁂 𑀯𑀺𑀘𑀸𑀭𑁂𑀦 𑀲𑀫𑁆𑀧𑀬𑀼𑀢𑁆𑀢𑀸𑀢𑀺 ‘‘𑀏𑀓𑁂𑀦 𑀔𑀦𑁆𑀥𑁂𑀦 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀲𑁄 𑀳𑀺 𑀲𑀫𑀼𑀤𑀸𑀬𑁄 𑀯𑀺𑀘𑀸𑀭𑀁 𑀯𑀚𑁆𑀚𑁂𑀢𑁆𑀯𑀸 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀲𑀫𑁆𑀧𑀬𑀼𑀢𑁆𑀢𑁄 𑀦 𑀳𑁄𑀢𑀺. 𑀦 𑀳𑀺 𑀢𑀤𑁂𑀓𑀤𑁂𑀲𑀲𑁆𑀲 𑀯𑀺𑀢𑀓𑁆𑀓𑀲𑁆𑀲 𑀯𑀺𑀘𑀸𑀭𑀢𑁄 𑀅𑀜𑁆𑀜𑁂𑀦 𑀲𑀫𑁆𑀧𑀬𑁄𑀕𑁄 𑀲𑀫𑀼𑀤𑀸𑀬𑀲𑁆𑀲 𑀳𑁄𑀢𑀺. 𑀬𑀣𑀸 𑀦𑀸𑀦𑀸𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀲𑀫𑀼𑀤𑀸𑀬𑀲𑁆𑀲 𑀇𑀤𑁆𑀥𑀺𑀧𑀸𑀤𑀲𑁆𑀲 𑀏𑀓𑀤𑁂𑀲𑀸𑀦𑀁 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑁄𑀕𑁄 𑀲𑀫𑀼𑀤𑀸𑀬𑀲𑁆𑀲 𑀦 𑀳𑁄𑀢𑀺, 𑀏𑀯𑀫𑀺𑀥𑀸𑀧𑀺 𑀤𑀝𑁆𑀞𑀩𑁆𑀩𑀁. 𑀬𑀣𑀸 𑀧𑀦 𑀢𑁂𑀲𑀼 𑀏𑀓𑁄𑀧𑀺 𑀯𑁂𑀤𑀦𑀸𑀲𑀜𑁆𑀜𑀸𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀓𑀤𑁂𑀲𑁂𑀦 𑀘 𑀅𑀲𑀫𑁆𑀧𑀬𑀼𑀢𑁆𑀢𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀲𑀫𑀼𑀤𑀸𑀬𑀲𑁆𑀲 𑀢𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀢𑀸 𑀯𑀼𑀢𑁆𑀢𑀸, 𑀏𑀯𑀫𑀺𑀥𑀸𑀧𑀺 𑀯𑀺𑀘𑀸𑀭𑁂𑀦 𑀅𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑀢𑁄 𑀲𑀫𑀼𑀤𑀸𑀬𑀲𑁆𑀲 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀢𑀸 𑀦 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀦 𑀳𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸𑀦𑀁 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸𑀤𑀻𑀦𑀁 𑀯𑀺𑀬 𑀲𑀫𑁆𑀧𑀬𑀼𑀢𑁆𑀢𑀢𑀸 𑀦 𑀯𑀢𑁆𑀢𑀩𑁆𑀩𑀸. 𑀬𑀣𑀸 𑀳𑀺 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑁂𑀲𑀼 𑀓𑁂𑀘𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀓𑀤𑁂𑀲𑁂𑀦 𑀫𑁄𑀳𑁂𑀦 𑀲𑀫𑁆𑀧𑀬𑀼𑀢𑁆𑀢𑀸, 𑀓𑁂𑀘𑀺 𑀅𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀦 𑀲𑀫𑀼𑀤𑀸𑀬𑁄 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑁄, 𑀦𑀸𑀧𑀺 𑀅𑀜𑁆𑀜𑁄 𑀓𑁄𑀘𑀺 𑀥𑀫𑁆𑀫𑁄 𑀅𑀢𑁆𑀣𑀺, 𑀬𑁂𑀦 𑀲𑁄 𑀲𑀫𑀼𑀤𑀸𑀬𑁄 𑀲𑀫𑁆𑀧𑀬𑀼𑀢𑁆𑀢𑁄 𑀲𑀺𑀬𑀸𑀢𑀺 ‘‘𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀲𑀳𑁂𑀢𑀼𑀓𑀸𑀤𑀬𑁄𑀧𑀺. 𑀦 𑀧𑀦𑁂𑀯𑀁 𑀬𑁂𑀦 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀲𑀫𑀼𑀤𑀸𑀬𑁄 𑀲𑀫𑁆𑀧𑀬𑀼𑀢𑁆𑀢𑁄 𑀲𑀺𑀬𑀸, 𑀢𑀁 𑀦𑀢𑁆𑀣𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁂𑀲𑀼 𑀓𑀲𑁆𑀲𑀘𑀺 𑀯𑀺𑀘𑀸𑀭𑁂𑀦 𑀅𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀅𑀪𑀸𑀯𑀸, 𑀢𑀲𑁆𑀫𑀸 𑀢𑁂 ‘‘𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀦 𑀦 𑀯𑀢𑁆𑀢𑀩𑁆𑀩𑀸𑀢𑀺. 𑀲𑀩𑁆𑀩𑀢𑁆𑀣 𑀘 𑀏𑀓𑀥𑀫𑁆𑀫𑁂𑀧𑀺 𑀓𑁂𑀳𑀺𑀘𑀻𑀢𑀺 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀲𑀗𑁆𑀔𑀸𑀬 𑀅𑀦𑀺𑀬𑀫𑀺𑀢𑀢𑁆𑀢𑀸 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀙𑀝𑁆𑀞𑀦𑀬𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀢𑁆𑀢𑀫𑀦𑀬𑁄 𑀲𑀫𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁩𑁦𑁬. 𑀲𑀫𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀦𑀺𑀤𑁆𑀤𑁂𑀲𑁂 𑀭𑀽𑀧𑀓𑁆𑀔𑀦𑁆𑀥𑀸𑀤𑀬𑁄 𑀢𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸𑀪𑀸𑀯𑀢𑁄 𑀦 𑀕𑀳𑀺𑀢𑀸. 𑀲𑀫𑀼𑀤𑀬𑀲𑀘𑁆𑀘𑀸𑀤𑀻𑀦𑀺 𑀲𑀢𑀺𑀧𑀺 𑀢𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑁂, 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀘 𑀯𑀺𑀧𑁆𑀧𑀬𑀼𑀢𑁆𑀢𑁂 𑀲𑀫𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀔𑀦𑁆𑀥𑀸𑀤𑀻𑀳𑀺 𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑀢𑁄. 𑀦 𑀳𑀺 𑀲𑀫𑀼𑀤𑀬𑀲𑀘𑁆𑀘𑁂𑀦 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀢𑀢𑁄 𑀅𑀜𑁆𑀜𑀥𑀫𑁆𑀫𑀸𑀦𑀁 𑀔𑀦𑁆𑀥𑀸𑀤𑀻𑀲𑀼 𑀓𑁂𑀦𑀘𑀺 𑀯𑀺𑀧𑁆𑀧𑀬𑁄𑀕𑁄 𑀅𑀢𑁆𑀣𑀺. 𑀦𑀦𑀼 𑀘 𑀢𑁂 𑀏𑀯 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀟𑁆𑀠𑀤𑀼𑀢𑀺𑀬𑀸𑀦𑀺 𑀆𑀬𑀢𑀦𑀸𑀦𑀺 𑀅𑀟𑁆𑀠𑀤𑀼𑀢𑀺𑀬𑀸 𑀥𑀸𑀢𑀼𑀬𑁄 𑀘 𑀳𑁄𑀦𑁆𑀢𑀻𑀢𑀺 𑀢𑁂𑀳𑀺 𑀯𑀺𑀧𑁆𑀧𑀬𑁄𑀕𑁄 𑀯𑀢𑁆𑀢𑀩𑁆𑀩𑁄𑀢𑀺? 𑀦, 𑀢𑀤𑀜𑁆𑀜𑀥𑀫𑁆𑀫𑀸𑀦𑀁 𑀔𑀦𑁆𑀥𑀸𑀤𑀺𑀪𑀸𑀯𑀢𑁄. 𑀦 𑀳𑀺 𑀢𑁂 𑀏𑀯 𑀥𑀫𑁆𑀫𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸, 𑀅𑀣 𑀔𑁄 𑀢𑁂 𑀘 𑀢𑀢𑁄 𑀅𑀜𑁆𑀜𑁂 𑀘, 𑀢𑀣𑀸 𑀅𑀟𑁆𑀠𑀤𑀼𑀢𑀺𑀬𑀸𑀬𑀢𑀦𑀥𑀸𑀢𑀼𑀬𑁄𑀧𑀺. 𑀦 𑀘 𑀢𑀤𑀜𑁆𑀜𑀲𑀫𑀼𑀤𑀸𑀬𑁂𑀳𑀺 𑀅𑀜𑁆𑀜𑁂 𑀯𑀺𑀧𑁆𑀧𑀬𑀼𑀢𑁆𑀢𑀸 𑀳𑁄𑀦𑁆𑀢𑀺 𑀲𑀫𑀼𑀤𑀸𑀬𑁂𑀓𑀤𑁂𑀲𑀸𑀦𑀁 𑀏𑀓𑀤𑁂𑀲𑀜𑁆𑀜𑀲𑀫𑀼𑀤𑀸𑀬𑀸𑀦𑀜𑁆𑀘 𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑀢𑁄. 𑀏𑀲 𑀦𑀬𑁄 𑀫𑀕𑁆𑀕𑀲𑀘𑁆𑀘𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀲𑀼. 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁂𑀲𑀼𑀧𑀺 𑀦𑀺𑀭𑀯𑀲𑁂𑀲𑁂𑀲𑀼 𑀅𑀥𑀺𑀧𑁆𑀧𑁂𑀢𑁂𑀲𑀼 𑀢𑁂𑀲𑀁 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀲𑀫𑀸𑀦𑀕𑀢𑀺𑀓𑀢𑁆𑀢𑀸 𑀅𑀕𑁆𑀕𑀳𑀡𑁂 𑀓𑀸𑀭𑀡𑀁 𑀦 𑀤𑀺𑀲𑁆𑀲𑀢𑀺.

𑀅𑀝𑁆𑀞𑀓𑀣𑀸𑀬𑀁 𑀧𑀦 𑀏𑀯𑀭𑀽𑀧𑀸𑀦𑀻𑀢𑀺 𑀬𑀣𑀸 𑀭𑀽𑀧𑀓𑁆𑀔𑀦𑁆𑀥𑁂 𑀯𑀺𑀲𑁆𑀲𑀚𑁆𑀚𑀦𑀁 𑀦 𑀬𑀼𑀚𑁆𑀚𑀢𑀺, 𑀏𑀯𑀁 𑀬𑁂𑀲𑀼 𑀅𑀜𑁆𑀜𑁂𑀲𑀼𑀧𑀺 𑀦 𑀬𑀼𑀚𑁆𑀚𑀢𑀺, 𑀢𑀸𑀦𑀺 𑀯𑀺𑀲𑁆𑀲𑀚𑁆𑀚𑀦𑀲𑁆𑀲 𑀅𑀬𑁄𑀕𑁂𑀦 ‘‘𑀏𑀯𑀭𑀽𑀧𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺, 𑀦 𑀲𑀫𑁆𑀧𑀬𑀼𑀢𑁆𑀢𑀸𑀪𑀸𑀯𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀸𑀦𑀺 𑀧𑀦 𑀧𑀤𑀸𑀦𑀺 𑀥𑀫𑁆𑀫𑀥𑀸𑀢𑀼𑀬𑀸 𑀲𑀫𑁆𑀧𑀬𑀼𑀢𑁆𑀢𑁂 𑀥𑀫𑁆𑀫𑁂 𑀤𑀻𑀧𑁂𑀦𑁆𑀢𑀻𑀢𑀺 𑀏𑀢𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀧𑀤𑀸𑀦𑀺 𑀤𑀲𑁆𑀲𑁂𑀢𑀺, 𑀯𑀺𑀜𑁆𑀜𑀸𑀡𑀜𑁆𑀘 𑀅𑀜𑁆𑀜𑁂𑀦 𑀅𑀲𑀫𑁆𑀫𑀺𑀲𑁆𑀲𑀦𑁆𑀢𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀫𑀦𑀸𑀬𑀢𑀦𑀸𑀤𑀺𑀧𑀤𑀸𑀦𑀺. 𑀢𑀢𑁆𑀣 𑀅𑀜𑁆𑀜𑁂𑀦 𑀅𑀲𑀫𑁆𑀫𑀺𑀲𑁆𑀲𑀦𑁆𑀢𑀺 𑀅𑀲𑀫𑁆𑀧𑀬𑀼𑀢𑁆𑀢𑁂𑀦 𑀅𑀲𑀫𑁆𑀫𑀺𑀲𑁆𑀲𑀦𑁆𑀢𑀺 𑀅𑀢𑁆𑀣𑁄. 𑀅𑀤𑀼𑀓𑁆𑀔𑀫𑀲𑀼𑀔𑀸𑀬𑀯𑁂𑀤𑀦𑀸𑀬𑀲𑀫𑁆𑀧𑀬𑀼𑀢𑁆𑀢𑀧𑀤𑀸𑀦𑀺𑀧𑀺 𑀳𑀺 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀲𑀫𑁆𑀫𑀺𑀲𑁆𑀲𑀯𑀺𑀜𑁆𑀜𑀸𑀡𑀤𑀻𑀧𑀓𑀸𑀦𑀺 𑀇𑀥 𑀕𑀳𑀺𑀢𑀸𑀦𑀻𑀢𑀺. 𑀏𑀢𑁂𑀦 𑀘 𑀮𑀓𑁆𑀔𑀡𑁂𑀦 𑀏𑀯𑀭𑀽𑀧𑀸𑀦𑁂𑀯 𑀕𑀳𑀺𑀢𑀸𑀦𑀻𑀢𑀺 𑀤𑀲𑁆𑀲𑁂𑀢𑀺, 𑀦 𑀏𑀯𑀭𑀽𑀧𑀸𑀦𑀺 𑀕𑀳𑀺𑀢𑀸𑀦𑁂𑀯𑀸𑀢𑀺 𑀲𑀫𑀼𑀤𑀬𑀲𑀘𑁆𑀘𑀸𑀤𑀺𑀇𑀤𑁆𑀥𑀺𑀧𑀸𑀤𑀸𑀤𑀺𑀧𑀤𑀸𑀦𑀁 𑀅𑀲𑀗𑁆𑀕𑀳𑀺𑀢𑀢𑁆𑀢𑀸. ‘‘𑀅𑀣 𑀨𑀲𑁆𑀲𑀲𑀢𑁆𑀢𑀓𑀁 𑀘𑀺𑀢𑁆𑀢𑀁 𑀲𑀳 𑀬𑀼𑀢𑁆𑀢𑀧𑀤𑁂𑀳𑀺 𑀲𑀢𑁆𑀢𑀸’’𑀢𑀺 𑀧𑀼𑀭𑀸𑀡𑀧𑀸𑀞𑁄, 𑀅𑀬𑀁 𑀧𑀦 𑀊𑀦𑁄𑀢𑀺 𑀓𑀢𑁆𑀯𑀸 ‘‘𑀅𑀣 𑀨𑀲𑁆𑀲𑀲𑀢𑁆𑀢𑀓𑀁, 𑀢𑀺𑀓𑁂 𑀢𑀬𑁄 𑀲𑀢𑁆𑀢 𑀫𑀳𑀦𑁆𑀢𑀭𑁂 𑀘𑀸’’𑀢𑀺 𑀧𑀸𑀞𑁄 𑀓𑀢𑁄.

𑁩𑁦𑁯. 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀧𑀤𑁂𑀦𑁂𑀯 𑀲𑀤𑁆𑀥𑀺𑀁 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀯𑀲𑁂𑀦𑀸𑀢𑀺 𑀇𑀤𑀁 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀧𑀤𑁂𑀦 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸 𑀢𑁂𑀦 𑀲𑀤𑁆𑀥𑀺𑀁 𑀯𑀺𑀧𑁆𑀧𑀬𑀼𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀧𑀸𑀴𑀺𑀉𑀤𑁆𑀤𑀸𑀦𑀕𑀸𑀣𑀸𑀬𑀁 𑀤𑁆𑀯𑁂 𑀘 𑀫𑀦𑁂𑀦 𑀬𑀼𑀢𑁆𑀢𑀸, 𑀯𑀺𑀢𑀓𑁆𑀓𑀯𑀺𑀘𑀸𑀭𑀡𑀸𑀢𑀺 𑀫𑀦𑁄𑀥𑀸𑀢𑀼𑀬𑀸 𑀏𑀓𑀦𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀤𑁆𑀯𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀢𑀺 𑀲𑀯𑀺𑀢𑀓𑁆𑀓𑀧𑀤𑀁 𑀲𑀯𑀺𑀘𑀸𑀭𑀧𑀤𑀜𑁆𑀘 𑀤𑀲𑁆𑀲𑁂𑀢𑀺.

𑀲𑀢𑁆𑀢𑀫𑀦𑀬𑀲𑀫𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀝𑁆𑀞𑀫𑀦𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁩𑁧𑁭. 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀦𑀺𑀤𑁆𑀤𑁂𑀲𑁂 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀬𑀣𑀸𑀦𑀺𑀤𑁆𑀥𑀸𑀭𑀺𑀢𑀁 𑀦𑀢𑁆𑀣𑀻𑀢𑀺 ‘‘𑀭𑀽𑀧𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀅𑀯𑀢𑁆𑀯𑀸 ‘‘𑀭𑀽𑀧𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀸 𑀓𑀢𑀺𑀳𑀺 𑀔𑀦𑁆𑀥𑁂𑀳𑀺…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀭𑀽𑀧𑀓𑁆𑀔𑀦𑁆𑀥𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀓𑁂𑀦𑀘𑀺 𑀔𑀦𑁆𑀥𑀸𑀤𑀺𑀦𑀸 𑀲𑀫𑁆𑀧𑀬𑁄𑀕𑀸𑀪𑀸𑀯𑀢𑁄 𑀬𑀣𑀸𑀦𑀺𑀤𑁆𑀥𑀸𑀭𑀺𑀢𑀁 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀦𑀢𑁆𑀣𑀺, 𑀓𑀼𑀢𑁄 𑀢𑀲𑁆𑀲 𑀧𑀼𑀦 𑀔𑀦𑁆𑀥𑀸𑀤𑀻𑀳𑀺 𑀲𑀫𑁆𑀧𑀬𑀼𑀢𑁆𑀢𑀢𑀸𑀢𑀺 𑀤𑀲𑁆𑀲𑁂𑀢𑀺.

𑀅𑀝𑁆𑀞𑀫𑀦𑀬𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀦𑀯𑀫𑀦𑀬𑁄 𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁩𑁧𑁯. 𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸𑀬𑀁 𑀬𑀁𑀔𑀦𑁆𑀥𑀸𑀤𑀺𑀯𑀲𑁂𑀦𑀸𑀢𑀺 𑀲𑀫𑀸𑀲𑀧𑀤𑀁 𑀇𑀤𑀁 𑀤𑀝𑁆𑀞𑀩𑁆𑀩𑀁, 𑀬𑀲𑁆𑀲 𑀔𑀦𑁆𑀥𑀸𑀤𑀺𑀦𑁄 𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀲𑁂𑀯𑀸𑀢𑀺 𑀘 𑀢𑀲𑁆𑀲𑁂𑀯 𑀔𑀦𑁆𑀥𑀸𑀤𑀺𑀦𑁄𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀁 𑀇𑀥 𑀲𑀫𑁆𑀧𑀬𑀼𑀢𑁆𑀢𑀁 𑀯𑀼𑀢𑁆𑀢𑀁, 𑀢𑀁 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀲𑀼 𑀅𑀭𑀡𑀦𑁆𑀢𑁂𑀲𑀼 𑀬𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀦𑀸 𑀲𑀫𑁆𑀧𑀬𑀼𑀢𑁆𑀢𑀁, 𑀧𑀼𑀦 𑀢𑀲𑁆𑀲𑁂𑀯 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀦𑁄 𑀔𑀦𑁆𑀥𑀸𑀤𑀻𑀳𑀺 𑀲𑀫𑁆𑀧𑀬𑁄𑀕𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁. 𑀢𑀜𑁆𑀳𑀺 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 ‘‘𑀲𑀫𑁆𑀧𑀬𑀼𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺 𑀦𑀺𑀤𑁆𑀥𑀸𑀭𑀺𑀢𑀦𑁆𑀢𑀺. 𑀭𑀽𑀧𑁂𑀦 𑀯𑀸𑀢𑀺 𑀏𑀢𑁂𑀦 𑀦𑀺𑀭𑁄𑀥𑀲𑀘𑁆𑀘𑀅𑀧𑁆𑀧𑀘𑁆𑀘𑀬𑀅𑀲𑀗𑁆𑀔𑀢𑁂𑀳𑀺𑀧𑀺 𑀅𑀬𑁄𑀕𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑁄, 𑀢𑀣𑀸 𑀭𑀽𑀧𑀫𑀺𑀲𑁆𑀲𑀓𑁂𑀳𑀺 𑀯𑀸𑀢𑀺 𑀏𑀢𑁂𑀦 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑀸𑀤𑀻𑀳𑀺 𑀦𑀺𑀩𑁆𑀩𑀸𑀦𑀫𑀺𑀲𑁆𑀲𑀓𑁂𑀳𑀺𑀧𑀺. 𑀯𑀓𑁆𑀔𑀢𑀺 𑀳𑀺 ‘‘𑀦𑀺𑀩𑁆𑀩𑀸𑀦𑀁 𑀧𑀦 𑀲𑀼𑀔𑀼𑀫𑀭𑀽𑀧𑀕𑀢𑀺𑀓𑀫𑁂𑀯𑀸’’𑀢𑀺. 𑀲𑀩𑁆𑀩𑀸𑀭𑀽𑀧𑀓𑁆𑀔𑀦𑁆𑀥𑀲𑀗𑁆𑀕𑀸𑀳𑀓𑁂𑀳𑀻𑀢𑀺 𑀯𑀢𑁆𑀢𑀫𑀸𑀦𑀸𑀦𑀫𑁂𑀯 𑀲𑀫𑁆𑀧𑀬𑁄𑀕𑁄 𑀮𑀩𑁆𑀪𑀢𑀻𑀢𑀺 𑀯𑀢𑁆𑀢𑀫𑀸𑀦𑁂𑀲𑀼 𑀏𑀓𑀫𑁆𑀧𑀺 𑀥𑀫𑁆𑀫𑀁 𑀅𑀦𑀧𑀦𑁂𑀢𑁆𑀯𑀸 𑀅𑀯𑀺𑀓𑀮𑀘𑀢𑀼𑀓𑁆𑀔𑀦𑁆𑀥𑀲𑀗𑁆𑀕𑀸𑀳𑀓𑁂𑀳𑀺 𑀅𑀭𑀽𑀧𑀪𑀯𑀸𑀤𑀻𑀳𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄 𑁋 𑀬𑁂 𑀲𑀫𑁆𑀧𑀬𑁄𑀕𑀁 𑀦 𑀮𑀪𑀦𑁆𑀢𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀬𑁄, 𑀢𑁂 𑀲𑀩𑁆𑀩𑁂 𑀦 𑀕𑀳𑀺𑀢𑀸, 𑀇𑀢𑀭𑁂 𑀘 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄 𑀲𑀩𑁆𑀩𑁂 𑀕𑀳𑀺𑀢𑀸𑀢𑀺.

𑀦𑀯𑀫𑀦𑀬𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀲𑀫𑀦𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁩𑁫𑁩. 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀦𑀺𑀤𑁆𑀤𑁂𑀲𑁂 𑀅𑀕𑁆𑀕𑀳𑀺𑀢𑁂𑀲𑀼 𑀥𑀫𑁆𑀫𑀸𑀬𑀢𑀦𑀸𑀤𑀺𑀥𑀫𑁆𑀫𑀸 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀕𑀢𑀥𑀫𑁆𑀫𑀪𑀸𑀯𑀢𑁄 𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀲𑁆𑀲 𑀅𑀪𑀸𑀯𑀸 𑀦 𑀕𑀳𑀺𑀢𑀸, 𑀤𑀼𑀓𑁆𑀔𑀲𑀘𑁆𑀘𑀘𑀢𑀼𑀫𑀳𑀸𑀪𑀯𑀅𑀩𑁆𑀬𑀸𑀓𑀢𑀸𑀤𑀺𑀥𑀫𑁆𑀫𑀸 𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀔𑀦𑁆𑀥𑀸𑀤𑀻𑀳𑀺 𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑀢𑁄𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀤𑀲𑀫𑀦𑀬𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀏𑀓𑀸𑀤𑀲𑀫𑀦𑀬𑁄 𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁪𑁦𑁯. 𑀏𑀓𑀸𑀤𑀲𑀫𑀦𑀬𑀯𑀡𑁆𑀡𑀦𑀸𑀬𑀁 ‘‘𑀢𑁂 𑀘 𑀲𑁂𑀲𑁂𑀳𑀺 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦 𑀫𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀻’’𑀢𑀺 𑀏𑀢𑁂𑀲𑀁 𑀧𑀤𑀸𑀦𑀁 ‘‘𑀲𑀫𑁆𑀧𑀬𑀼𑀢𑁆𑀢𑀸 𑀦𑀸𑀫𑀸’’𑀢𑀺 𑀏𑀢𑁂𑀦 𑀲𑀳 𑀲𑀫𑁆𑀩𑀦𑁆𑀥𑁄. ‘‘𑀓𑁂𑀳𑀺𑀘𑀻’’𑀢𑀺 𑀏𑀢𑀲𑁆𑀲 𑀧𑀦𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀲𑀼 𑀘 𑀞𑀧𑁂𑀢𑁆𑀯𑀸 𑀢𑀡𑁆𑀳’’𑀦𑁆𑀢𑀺 𑀏𑀢𑁂𑀦 ‘‘𑀢𑁂 𑀘𑀸’’𑀢𑀺 𑀯𑀼𑀢𑁆𑀢𑁂 𑀲𑀫𑀼𑀤𑀬𑀲𑀘𑁆𑀘𑁂𑀦 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀥𑀫𑁆𑀫𑁂 𑀯𑀺𑀲𑁂𑀲𑁂𑀢𑁆𑀯𑀸 𑀢𑁂𑀲𑀁 𑀏𑀯 𑀯𑀺𑀲𑁂𑀲𑀺𑀢𑀸𑀦𑀁 𑀅𑀢𑁆𑀢𑀯𑀚𑁆𑀚𑁂𑀳𑀺 𑀲𑁂𑀲𑁂𑀳𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂 𑀢𑀡𑁆𑀳𑀸𑀬 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀲𑀼 𑀘 𑀢𑀡𑁆𑀳𑀸𑀬 𑀯𑁂𑀤𑀦𑀸𑀲𑀜𑁆𑀜𑀸𑀓𑁆𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑁄𑀕𑀸𑀭𑀳𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀲𑁂𑀲𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸 𑀦𑀸𑀫𑀸’’𑀢𑀺.

𑀏𑀓𑀸𑀤𑀲𑀫𑀦𑀬𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀤𑁆𑀯𑀸𑀤𑀲𑀫𑀦𑀬𑁄 𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁪𑁧𑁭. 𑀤𑁆𑀯𑀸𑀤𑀲𑀫𑀦𑀬𑁂 𑀘 𑀦𑀯𑀫𑀦𑀬𑁂 𑀯𑀺𑀬 𑀲𑀫𑁆𑀧𑀬𑁄𑀕𑀸𑀭𑀳𑀸𑀯 𑀮𑀩𑁆𑀪𑀦𑁆𑀢𑀻𑀢𑀺 𑀆𑀳 ‘‘𑀢𑁂𑀬𑁂𑀯 𑀉𑀤𑁆𑀥𑀝𑀸’’𑀢𑀺.

𑀤𑁆𑀯𑀸𑀤𑀲𑀫𑀦𑀬𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀢𑁂𑀭𑀲𑀫𑀦𑀬𑁄 𑀅𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁪𑁪𑁮. 𑀢𑁂𑀭𑀲𑀫𑀦𑀬𑀯𑀡𑁆𑀡𑀦𑀸𑀬𑀁 𑀬𑁂𑀳𑀺 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑀁 𑀯𑀺𑀜𑁆𑀜𑀸𑀡𑀫𑁂𑀯 𑀳𑁄𑀢𑀺, 𑀢𑁂 𑀧𑀸𑀴𑀺𑀬𑀁 ‘‘𑀭𑀽𑀧𑀜𑁆𑀘 𑀥𑀫𑁆𑀫𑀸𑀬𑀢𑀦’’𑀦𑁆𑀢𑀺𑀆𑀤𑀺𑀉𑀤𑁆𑀤𑀸𑀦𑀕𑀸𑀣𑀸𑀬 𑀤𑀲𑁆𑀲𑀺𑀢𑀸 𑀩𑀸𑀯𑀻𑀲 𑀥𑀫𑁆𑀫𑀸 ‘‘𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀤𑀺𑀲𑀧𑀜𑁆𑀳𑀸 𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀸. 𑀬𑁂𑀳𑀺 𑀧𑀦 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑀸𑀦𑀺 𑀅𑀭𑀽𑀧𑀪𑀯𑁂𑀦 𑀯𑀺𑀬 𑀑𑀴𑀸𑀭𑀺𑀓𑀸𑀬𑀢𑀦𑀸𑀦𑁂𑀯 𑀳𑁄𑀦𑁆𑀢𑀺, 𑀢𑁂 𑀯𑀼𑀢𑁆𑀢𑀸𑀯𑀲𑁂𑀲𑀸 𑀲𑀩𑁆𑀩𑁂 𑀇𑀥 𑀉𑀤𑁆𑀥𑀝𑀸 ‘‘𑀅𑀭𑀽𑀧𑀪𑀯𑁂𑀦 𑀲𑀤𑀺𑀲𑀸’’𑀢𑀺 𑀯𑀼𑀢𑁆𑀢𑀸. 𑀲𑁂𑀲𑀸𑀢𑀺 𑀲𑁂𑀲𑀸 𑀧𑀜𑁆𑀘𑀫𑀦𑀬𑁂 𑀆𑀕𑀢𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄 𑀲𑀢𑀺𑀧𑀺 𑀅𑀲𑀗𑁆𑀕𑀸𑀳𑀓𑀢𑁆𑀢𑁂 𑀇𑀥 𑀯𑀺𑀲𑁆𑀲𑀚𑁆𑀚𑀦𑀁 𑀦 𑀭𑀼𑀳𑀦𑁆𑀢𑀻𑀢𑀺 𑀦 𑀉𑀤𑁆𑀥𑀝𑀸. 𑀬𑁂 𑀧𑀦 𑀅𑀲𑀗𑁆𑀕𑀸𑀳𑀓𑀸 𑀏𑀯 𑀦 𑀳𑁄𑀦𑁆𑀢𑀺 𑀤𑀼𑀓𑁆𑀔𑀲𑀘𑁆𑀘𑀸𑀤𑀺𑀥𑀫𑁆𑀫𑀸, 𑀢𑁂𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀬𑀣𑀸 𑀧𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄 𑀦 𑀭𑀼𑀳𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑁂𑀲𑀜𑁆𑀘 𑀲𑀫𑁆𑀧𑀬𑁄𑀕𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀅𑀲𑀫𑁆𑀧𑀬𑁄𑀕𑁂𑀳𑀺 𑀯𑁄𑀫𑀺𑀲𑁆𑀲𑀢𑀸𑀬 𑀲𑀫𑁆𑀧𑀬𑁄𑀕𑁄 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀬𑀤𑀺 𑀧𑀦 𑀢𑁂 𑀓𑀤𑀸𑀘𑀺 𑀅𑀲𑀩𑁆𑀩𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀧𑀬𑀼𑀢𑁆𑀢𑀸 𑀅𑀭𑀽𑀧𑀥𑀫𑁆𑀫𑀸 𑀭𑀽𑀧𑀥𑀫𑁆𑀫𑀸 𑀘 𑀲𑀺𑀬𑀼𑀁, 𑀦 𑀢𑁂𑀲𑀁 𑀯𑀺𑀧𑁆𑀧𑀬𑁄𑀕𑁄 𑀦𑀢𑁆𑀣𑀻𑀢𑀺 ‘‘𑀯𑀺𑀧𑁆𑀧𑀬𑁄𑀕𑁄 𑀘 𑀦𑀢𑁆𑀣𑀻’’𑀢𑀺 𑀦 𑀯𑀼𑀢𑁆𑀢𑀁, 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀅𑀲𑀗𑁆𑀕𑀳𑀺𑀢𑀸𑀦𑀁 𑀯𑀺𑀧𑁆𑀧𑀬𑁄𑀕𑀲𑁆𑀲 𑀅𑀢𑁆𑀣𑀺𑀢𑀸𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀉𑀪𑀬𑀸𑀪𑀸𑀯𑀢𑁄 𑀳𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄 𑀇𑀥 𑀦 𑀭𑀼𑀳𑀦𑁆𑀢𑀻𑀢𑀺. 𑀏𑀯𑀁 𑀧𑀦𑁂𑀢𑁆𑀣 𑀲𑀺𑀬𑀸 ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀳𑀺 𑀔𑀦𑁆𑀥𑀸𑀤𑀺𑀯𑀲𑁂𑀦 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑀸 𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀥𑀫𑁆𑀫𑀸 𑀅𑀲𑀗𑁆𑀕𑀳𑀺𑀢𑀸 𑀳𑁄𑀦𑁆𑀢𑀺, 𑀢𑁂𑀲𑀜𑁆𑀘 𑀲𑀫𑁆𑀧𑀬𑁄𑀕𑁄 𑀯𑀺𑀧𑁆𑀧𑀬𑁄𑀕𑁄 𑀘 𑀦𑀢𑁆𑀣𑀻’’𑀢𑀺. 𑀅𑀦𑀸𑀭𑀫𑁆𑀫𑀡𑀲𑀳𑀺𑀢𑀸𑀦𑀜𑁆𑀳𑀺 𑀲𑀩𑁆𑀩𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀲𑀩𑁆𑀩𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀢𑀤𑀼𑀪𑀬𑀥𑀫𑁆𑀫𑀸𑀦𑀜𑁆𑀘 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀸𑀤𑀺𑀘𑀓𑁆𑀔𑀸𑀬𑀢𑀦𑀸𑀤𑀻𑀳𑀺 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑀸𑀦𑀁 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑁄 𑀅𑀭𑀼𑀳𑀡𑁂 𑀓𑀸𑀭𑀡𑀁. 𑀚𑀸𑀢𑀺𑀯𑀺𑀧𑁆𑀧𑀬𑁄𑀕𑀪𑀽𑀫𑀺𑀓𑀸𑀮𑀲𑀦𑁆𑀢𑀸𑀦𑀯𑀺𑀧𑁆𑀧𑀬𑁄𑀕𑀢𑁄 𑀘𑀢𑀼𑀩𑁆𑀩𑀺𑀥𑁄 𑀯𑀺𑀧𑁆𑀧𑀬𑁄𑀕𑁄. 𑀢𑀢𑁆𑀣 𑀚𑀸𑀢𑀺𑀯𑀺𑀧𑁆𑀧𑀬𑁄𑀕𑁄 ‘‘𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺𑀆𑀤𑀺, 𑀪𑀽𑀫𑀺𑀯𑀺𑀧𑁆𑀧𑀬𑁄𑀕𑁄 ‘‘𑀓𑀸𑀫𑀸𑀯𑀘𑀭𑀸, 𑀭𑀽𑀧𑀸𑀯𑀘𑀭𑀸’’𑀢𑀺𑀆𑀤𑀺, 𑀓𑀸𑀮𑀯𑀺𑀧𑁆𑀧𑀬𑁄𑀕𑁄 ‘‘𑀅𑀢𑀻𑀢𑀸 𑀥𑀫𑁆𑀫𑀸, 𑀅𑀦𑀸𑀕𑀢𑀸 𑀥𑀫𑁆𑀫𑀸’’𑀢𑀺𑀆𑀤𑀺, 𑀲𑀦𑁆𑀢𑀸𑀦𑀯𑀺𑀧𑁆𑀧𑀬𑁄𑀕𑁄 ‘‘𑀅𑀚𑁆𑀛𑀢𑁆𑀢𑀸 𑀥𑀫𑁆𑀫𑀸, 𑀩𑀳𑀺𑀤𑁆𑀥𑀸 𑀥𑀫𑁆𑀫𑀸’’𑀢𑀺𑀆𑀤𑀺. 𑀏𑀯𑀁 𑀯𑀺𑀧𑁆𑀧𑀬𑁄𑀕𑁄 𑀘𑀢𑀼𑀥𑀸 𑀯𑁂𑀤𑀺𑀢𑀩𑁆𑀩𑁄.

𑀢𑁂𑀭𑀲𑀫𑀦𑀬𑀅𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀘𑀼𑀤𑁆𑀤𑀲𑀫𑀦𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁪𑁫𑁬. 𑀘𑀼𑀤𑁆𑀤𑀲𑀫𑀦𑀬𑁂 𑀥𑀫𑁆𑀫𑀸𑀬𑀢𑀦𑀸𑀤𑀻𑀦𑀁 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀕𑀢𑀥𑀫𑁆𑀫𑀪𑀸𑀯𑀢𑁄 𑀯𑀺𑀧𑁆𑀧𑀬𑁄𑀕𑀲𑁆𑀲 𑀅𑀭𑀼𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀚𑀸𑀢𑀺𑀆𑀤𑀺𑀢𑁆𑀢𑀬𑀲𑁆𑀲 𑀘𑁂𑀢𑁆𑀣 𑀥𑀫𑁆𑀫𑀲𑀪𑀸𑀯𑀫𑀢𑁆𑀢𑀢𑁆𑀢𑀸 𑀦 𑀓𑀣𑀜𑁆𑀘𑀺 𑀲𑀫𑁆𑀧𑀬𑁄𑀕𑁄 𑀯𑀺𑀧𑁆𑀧𑀬𑁄𑀕𑁄 𑀘 𑀭𑀼𑀳𑀢𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀥𑀫𑁆𑀫𑀸𑀦𑀁 𑀲𑀩𑁆𑀩𑀥𑀫𑁆𑀫𑀲𑀫𑁄𑀥𑀸𑀦𑀢𑁆𑀢𑀸, 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸𑀤𑀻𑀦𑀁 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀢𑁆𑀢𑀸. 𑀤𑀼𑀓𑁆𑀔𑀲𑀘𑁆𑀘𑀸𑀤𑀺𑀥𑀫𑁆𑀫𑀸𑀯 𑀇𑀥 𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀲𑀗𑁆𑀕𑀳𑀸𑀲𑀗𑁆𑀕𑀳𑀲𑀩𑁆𑀪𑀸𑀯𑀸 𑀕𑀳𑀺𑀢𑀸𑀢𑀺.

𑀧𑀸𑀴𑀺𑀉𑀤𑁆𑀤𑀸𑀦𑀕𑀸𑀣𑀸𑀬𑀁 𑀲𑀫𑀼𑀘𑁆𑀙𑁂𑀤𑁂 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀧𑀭𑀺𑀬𑁄𑀲𑀸𑀦𑁂 𑀦𑀬𑁂 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀫𑁄𑀖𑀧𑀼𑀘𑁆𑀙𑀓𑁂𑀦 𑀘𑀸𑀢𑀺 𑀅𑀮𑀩𑁆𑀪𑀫𑀸𑀦𑀸 𑀘 𑀢𑁂 𑀫𑁄𑀖𑀧𑀼𑀘𑁆𑀙𑀓𑁂𑀦 𑀳𑁂𑀢𑀼𑀦𑀸 𑀦 𑀮𑀩𑁆𑀪𑀦𑁆𑀢𑀺 𑀢𑁂𑀲𑀁 𑀧𑀼𑀘𑁆𑀙𑀸𑀬 𑀫𑁄𑀖𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀫𑁄𑀖𑀧𑀼𑀘𑁆𑀙𑀓𑁄 𑀅𑀝𑁆𑀞𑀫𑁄 𑀦𑀬𑁄, 𑀢𑁂𑀦 𑀘 𑀲𑀳 𑀑𑀲𑀸𑀦𑀦𑀬𑁂 𑀏𑀢𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑁄𑀕𑀲𑁆𑀲𑀧𑀺 𑀅𑀪𑀸𑀯𑀸 𑀲𑀩𑁆𑀩𑀣𑀸𑀧𑀺 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀘𑀼𑀤𑁆𑀤𑀲𑀫𑀦𑀬𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀥𑀸𑀢𑀼𑀓𑀣𑀸𑀧𑀓𑀭𑀡-𑀫𑀽𑀮𑀝𑀻𑀓𑀸 𑀲𑀫𑀢𑁆𑀢𑀸.

𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀧𑀓𑀭𑀡-𑀫𑀽𑀮𑀝𑀻𑀓𑀸

𑁧. 𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁧. 𑀥𑀫𑁆𑀫𑀲𑀗𑁆𑀕𑀳𑁂 𑀢𑀺𑀓𑀤𑀼𑀓𑀯𑀲𑁂𑀦 𑀲𑀗𑁆𑀕𑀳𑀺𑀢𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀪𑀗𑁆𑀕𑁂 𑀔𑀦𑁆𑀥𑀸𑀤𑀺𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸 𑀢𑀣𑀸𑀲𑀗𑁆𑀕𑀳𑀺𑀢𑀯𑀺𑀪𑀢𑁆𑀢𑀸𑀦𑀁 𑀥𑀸𑀢𑀼𑀓𑀣𑀸𑀬 𑀲𑀗𑁆𑀕𑀳𑀸𑀲𑀗𑁆𑀕𑀳𑀸𑀤𑀺𑀧𑁆𑀧𑀪𑁂𑀤𑀁 𑀯𑀢𑁆𑀯𑀸 𑀬𑀸𑀬 𑀧𑀜𑁆𑀜𑀢𑁆𑀢𑀺𑀬𑀸 𑀢𑁂𑀲𑀁 𑀲𑀪𑀸𑀯𑀢𑁄 𑀉𑀧𑀸𑀤𑀸𑀬 𑀘 𑀧𑀜𑁆𑀜𑀸𑀧𑀦𑀁 𑀳𑁄𑀢𑀺, 𑀢𑀁 𑀧𑀪𑁂𑀤𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀙 𑀧𑀜𑁆𑀜𑀢𑁆𑀢𑀺𑀬𑁄’’𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺 𑀆𑀭𑀤𑁆𑀥𑀸. 𑀢𑀢𑁆𑀣 𑀬𑁂 𑀥𑀫𑁆𑀫𑁂 𑀧𑀼𑀩𑁆𑀩𑀸𑀧𑀭𑀺𑀬𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑁂 𑀅𑀲𑀪𑀸𑀯𑀲𑀫𑀽𑀳𑀯𑀲𑁂𑀦 𑀉𑀧𑀸𑀤𑀸𑀬 ‘‘𑀧𑀼𑀕𑁆𑀕𑀮𑁄, 𑀇𑀢𑁆𑀣𑀻, 𑀧𑀼𑀭𑀺𑀲𑁄, 𑀤𑁂𑀯𑁄, 𑀫𑀦𑀼𑀲𑁆𑀲𑁄’’𑀢𑀺𑀆𑀤𑀺𑀓𑀸 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺 𑀳𑁄𑀢𑀺, 𑀢𑁂𑀲𑀁 𑀅𑀜𑁆𑀜𑁂𑀲𑀜𑁆𑀘 𑀩𑀸𑀳𑀺𑀭𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀁 𑀲𑀲𑀪𑀸𑀯𑀲𑀫𑀽𑀳𑀲𑀲𑀪𑀸𑀯𑀪𑁂𑀤𑀯𑀲𑁂𑀦 𑀧𑀜𑁆𑀜𑀸𑀧𑀦𑀸 𑀲𑀪𑀸𑀯𑀧𑀜𑁆𑀜𑀢𑁆𑀢𑀻𑀢𑀺 𑀔𑀦𑁆𑀥𑀧𑀜𑁆𑀜𑀢𑁆𑀢𑀺𑀆𑀤𑀺𑀓𑀸 𑀧𑀜𑁆𑀘𑀯𑀺𑀥𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀸𑀬 𑀥𑀫𑁆𑀫𑀲𑀗𑁆𑀕𑀳𑀸𑀤𑀻𑀲𑀼 𑀯𑀺𑀪𑀢𑁆𑀢𑀸 𑀲𑀪𑀸𑀯𑀧𑀜𑁆𑀜𑀢𑁆𑀢𑀺 𑀲𑀩𑁆𑀩𑀸𑀧𑀺 𑀲𑀗𑁆𑀕𑀳𑀺𑀢𑀸 𑀳𑁄𑀢𑀺. 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺 𑀧𑀦 𑀅𑀲𑀪𑀸𑀯𑀧𑀜𑁆𑀜𑀢𑁆𑀢𑀺. 𑀢𑀸𑀬 𑀘 𑀲𑀫𑀬𑀯𑀺𑀫𑀼𑀢𑁆𑀢𑀸𑀤𑀺𑀧𑁆𑀧𑀪𑁂𑀤𑀸𑀬 𑀲𑀢𑁆𑀢𑀲𑀦𑁆𑀢𑀸𑀦𑀕𑀢𑁂 𑀧𑀭𑀺𑀜𑁆𑀜𑁂𑀬𑁆𑀬𑀸𑀤𑀺𑀲𑀪𑀸𑀯𑀥𑀫𑁆𑀫𑁂 𑀉𑀧𑀸𑀤𑀸𑀬 𑀧𑀯𑀢𑁆𑀢𑀺𑀢𑁄 𑀧𑀥𑀸𑀦𑀸𑀬 ‘‘𑀯𑀺𑀳𑀸𑀭𑁄 𑀫𑀜𑁆𑀘𑁄’’𑀢𑀺𑀆𑀤𑀺𑀓𑀸 𑀘 𑀲𑀩𑁆𑀩𑀸 𑀅𑀲𑀪𑀸𑀯𑀧𑀜𑁆𑀜𑀢𑁆𑀢𑀺 𑀲𑀗𑁆𑀕𑀳𑀺𑀢𑀸 𑀳𑁄𑀢𑀺.

𑀏𑀢𑁆𑀢𑀸𑀯𑀢𑀸 𑀘 𑀧𑀜𑁆𑀜𑀢𑁆𑀢𑀺 𑀦𑀸𑀫 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀘. 𑀢𑀸 𑀏𑀯 𑀳𑀺 𑀯𑁄𑀫𑀺𑀲𑁆𑀲𑀸 𑀇𑀢𑀭𑀸 𑀘𑀢𑀲𑁆𑀲𑁄𑀢𑀺. 𑀢𑀲𑁆𑀫𑀸 𑀢𑀸𑀲𑀁 𑀤𑀲𑁆𑀲𑀦𑁂𑀦 𑀇𑀫𑀲𑁆𑀫𑀺𑀁 𑀧𑀓𑀭𑀡𑁂 𑀲𑀩𑁆𑀩𑀸 𑀧𑀜𑁆𑀜𑀢𑁆𑀢𑀺𑀬𑁄 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀔𑀦𑁆𑀥𑀸𑀤𑀺𑀧𑀜𑁆𑀜𑀢𑁆𑀢𑀻𑀲𑀼 𑀧𑀦 𑀙𑀲𑀼 𑀅𑀜𑁆𑀜𑀢𑁆𑀣 𑀅𑀤𑀲𑁆𑀲𑀺𑀢𑀧𑁆𑀧𑀪𑁂𑀤𑀁 𑀇𑀥𑁂𑀯 𑀘 𑀤𑀲𑁆𑀲𑀺𑀢𑀧𑁆𑀧𑀪𑁂𑀤𑀁 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀁 𑀉𑀧𑀸𑀤𑀸𑀬 𑀇𑀫𑀲𑁆𑀲 𑀧𑀓𑀭𑀡𑀲𑁆𑀲 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀻𑀢𑀺 𑀦𑀸𑀫𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑁂 𑀥𑀫𑁆𑀫𑁂 𑀇𑀥 𑀧𑀜𑁆𑀜𑀧𑁂𑀢𑀼𑀓𑀸𑀫𑁄𑀢𑀺 𑀧𑀜𑁆𑀜𑀢𑁆𑀢𑀺𑀬𑀸 𑀯𑀢𑁆𑀣𑀼𑀪𑀸𑀯𑁂𑀦 𑀤𑀲𑁆𑀲𑁂𑀢𑀼𑀓𑀸𑀫𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀧𑀜𑁆𑀜𑀸𑀧𑀦𑀁 𑀓𑀭𑁄𑀢𑀺, 𑀯𑀢𑁆𑀣𑀽𑀳𑀺 𑀧𑀦 𑀧𑀜𑁆𑀜𑀢𑁆𑀢𑀺𑀬𑁄 𑀤𑀲𑁆𑀲𑁂𑀢𑀻𑀢𑀺.

𑀔𑀦𑁆𑀥𑀸𑀢𑀺 𑀧𑀜𑁆𑀜𑀸𑀧𑀦𑀸𑀢𑀺 𑀇𑀤𑀁 𑀔𑀦𑁆𑀥𑀸𑀢𑀺 𑀭𑀽𑀧𑀁 𑀧𑀣𑀯𑀻𑀢𑀺𑀆𑀤𑀺𑀓𑀸 𑀲𑀩𑁆𑀩𑀸𑀧𑀺 𑀲𑀸𑀫𑀜𑁆𑀜𑀧𑁆𑀧𑀪𑁂𑀤𑀧𑀜𑁆𑀜𑀸𑀧𑀦𑀸 𑀦𑀸𑀫 𑀳𑁄𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀜𑁆𑀜𑀸𑀧𑀦𑀸𑀢𑀺 𑀏𑀢𑀲𑁆𑀲 𑀧𑀦 𑀤𑀲𑁆𑀲𑀦𑀸 𑀞𑀧𑀦𑀸𑀢𑀺 𑀏𑀢𑁂 𑀤𑁆𑀯𑁂 𑀅𑀢𑁆𑀣𑀸, 𑀢𑁂𑀲𑀁 𑀧𑀓𑀸𑀲𑀦𑀸 𑀦𑀺𑀓𑁆𑀔𑀺𑀧𑀦𑀸𑀢𑀺. 𑀢𑀢𑁆𑀣 ‘‘𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀲𑀫𑀬𑀯𑀺𑀫𑀼𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀇𑀤𑀫𑁂𑀯𑀁𑀦𑀸𑀫𑀓𑀁 𑀇𑀤𑀫𑁂𑀯𑀁𑀦𑀸𑀫𑀓𑀦𑁆𑀢𑀺 𑀢𑀁𑀢𑀁𑀓𑁄𑀝𑁆𑀞𑀸𑀲𑀺𑀓𑀓𑀭𑀡𑀁 𑀩𑁄𑀥𑀦𑀫𑁂𑀯 𑀦𑀺𑀓𑁆𑀔𑀺𑀧𑀦𑀸, 𑀦 𑀧𑀜𑁆𑀜𑀧𑁂𑀢𑀩𑁆𑀩𑀸𑀦𑀁 𑀫𑀜𑁆𑀘𑀸𑀤𑀻𑀦𑀁 𑀯𑀺𑀬 𑀞𑀸𑀦𑀲𑀫𑁆𑀩𑀦𑁆𑀥𑀓𑀭𑀡𑀁. 𑀬𑁄 𑀧𑀦𑀸𑀬𑀁 ‘‘𑀦𑀸𑀫𑀧𑀜𑁆𑀜𑀢𑁆𑀢𑀺 𑀳𑀺 𑀤𑀲𑁆𑀲𑁂𑀢𑀺 𑀘 𑀞𑀧𑁂𑀢𑀺 𑀘𑀸’’𑀢𑀺 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀲𑁄 𑀪𑀸𑀯𑀪𑀽𑀢𑀸𑀬 𑀓𑀭𑀡𑀪𑀽𑀢𑀸𑀬 𑀯𑀸 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑀸 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀤𑀺𑀝𑁆𑀞𑀢𑀸𑀬 𑀞𑀧𑀺𑀢𑀢𑀸𑀬 𑀘 𑀢𑀁𑀦𑀺𑀫𑀺𑀢𑁆𑀢𑀢𑀁 𑀲𑀦𑁆𑀥𑀸𑀬 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻𑀢𑀺𑀆𑀤𑀺𑀦𑀸 𑀯𑀘𑀦𑁂𑀦 𑀧𑀸𑀴𑀺𑀬𑀁 𑀅𑀦𑀸𑀕𑀢𑀢𑀁 𑀲𑀦𑁆𑀥𑀸𑀬 ‘‘𑀧𑀸𑀴𑀺𑀫𑀼𑀢𑁆𑀢𑀓𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀓𑀼𑀲𑀮𑀸𑀓𑀼𑀲𑀮𑀲𑁆𑀲𑁂𑀯𑀸𑀢𑀺 𑀓𑀼𑀲𑀮𑀸𑀓𑀼𑀲𑀮𑀲𑁆𑀲 𑀯𑀺𑀬. 𑀯𑀺𑀚𑁆𑀚𑀫𑀸𑀦𑀲𑁆𑀲𑀸𑀢𑀺 𑀏𑀢𑀲𑁆𑀲 𑀅𑀢𑁆𑀣𑁄 𑀲𑀢𑁄𑀢𑀺, 𑀢𑀲𑁆𑀲 𑀅𑀢𑁆𑀣𑁄 𑀲𑀫𑁆𑀪𑀽𑀢𑀲𑁆𑀲𑀸𑀢𑀺. 𑀯𑀺𑀚𑁆𑀚𑀫𑀸𑀦𑀲𑁆𑀲 𑀲𑀢𑁄𑀢𑀺 𑀯𑀸 𑀯𑀺𑀚𑁆𑀚𑀫𑀸𑀦𑀪𑀽𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀫𑁆𑀪𑀽𑀢𑀲𑁆𑀲𑀸’’𑀢𑀺. 𑀢𑁂𑀦 𑀅𑀯𑀺𑀚𑁆𑀚𑀫𑀸𑀦𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀢𑀣𑀸 𑀅𑀯𑀺𑀚𑁆𑀚𑀫𑀸𑀦𑀲𑁆𑀲𑀸𑀢𑀺 𑀬𑀣𑀸 𑀓𑀼𑀲𑀮𑀸𑀤𑀻𑀦𑀺 𑀅𑀓𑀼𑀲𑀮𑀸𑀤𑀺𑀲𑀪𑀸𑀯𑀢𑁄, 𑀨𑀲𑁆𑀲𑀸𑀤𑀬𑁄 𑀘 𑀯𑁂𑀤𑀦𑀸𑀤𑀺𑀲𑀪𑀸𑀯𑀢𑁄 𑀯𑀺𑀦𑀺𑀯𑀢𑁆𑀢𑀲𑀪𑀸𑀯𑀸𑀦𑀺 𑀯𑀺𑀚𑁆𑀚𑀦𑁆𑀢𑀺, 𑀢𑀣𑀸 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀬𑁂 𑀥𑀫𑁆𑀫𑁂 𑀉𑀧𑀸𑀤𑀸𑀬 ‘‘𑀇𑀢𑁆𑀣𑀻, 𑀧𑀼𑀭𑀺𑀲𑁄’’𑀢𑀺 𑀉𑀧𑀮𑀤𑁆𑀥𑀺 𑀳𑁄𑀢𑀺, 𑀢𑁂 𑀅𑀧𑀦𑁂𑀢𑁆𑀯𑀸 𑀢𑁂𑀳𑀺 𑀯𑀺𑀦𑀺𑀯𑀢𑁆𑀢𑀲𑁆𑀲 𑀇𑀢𑁆𑀣𑀺𑀆𑀤𑀺𑀲𑀪𑀸𑀯𑀲𑁆𑀲 𑀅𑀪𑀸𑀯𑀢𑁄 𑀅𑀲𑀫𑁆𑀪𑀽𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀬𑀁 𑀧𑀦𑁂𑀢𑀲𑁆𑀲 ‘‘𑀢𑁂𑀦𑀸𑀓𑀸𑀭𑁂𑀦 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀯𑀺𑀚𑁆𑀚𑀫𑀸𑀦𑀲𑁆𑀲𑀸’’𑀢𑀺 𑀅𑀢𑁆𑀣𑀁 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀜𑁆𑀜𑀢𑁆𑀢𑀺𑀤𑀼𑀓𑁂 𑀯𑀼𑀢𑁆𑀢𑀫𑁂𑀯. 𑀅𑀯𑀺𑀚𑁆𑀚𑀫𑀸𑀦𑁂𑀧𑀺 𑀲𑀪𑀸𑀯𑁂 𑀮𑁄𑀓𑀦𑀺𑀭𑀼𑀢𑁆𑀢𑀺𑀁 𑀅𑀦𑀼𑀕𑀦𑁆𑀢𑁆𑀯𑀸 𑀅𑀦𑀪𑀺𑀦𑀺𑀯𑁂𑀲𑁂𑀦 𑀘𑀺𑀢𑁆𑀢𑁂𑀦 ‘‘𑀇𑀢𑁆𑀣𑀻, 𑀧𑀼𑀭𑀺𑀲𑁄’’𑀢𑀺 𑀕𑀳𑀡𑀲𑀩𑁆𑀪𑀸𑀯𑀸 ‘‘𑀮𑁄𑀓𑀦𑀺𑀭𑀼𑀢𑁆𑀢𑀺𑀫𑀢𑁆𑀢𑀲𑀺𑀤𑁆𑀥𑀲𑁆𑀲𑀸’’𑀢𑀺 𑀆𑀳. 𑀲𑀸𑀪𑀺𑀦𑀺𑀯𑁂𑀲𑁂𑀦 𑀧𑀦 𑀘𑀺𑀢𑁆𑀢𑁂𑀦 𑀕𑀬𑁆𑀳𑀫𑀸𑀦𑀁 𑀧𑀜𑁆𑀘𑀫𑀲𑀘𑁆𑀘𑀸𑀤𑀺𑀓𑀁 𑀦 𑀲𑀪𑀸𑀯𑀢𑁄, 𑀦𑀸𑀧𑀺 𑀲𑀗𑁆𑀓𑁂𑀢𑁂𑀦 𑀲𑀺𑀤𑁆𑀥𑀦𑁆𑀢𑀺 ‘‘𑀲𑀩𑁆𑀩𑀸𑀓𑀸𑀭𑁂𑀦𑀧𑀺 𑀅𑀦𑀼𑀧𑀮𑀩𑁆𑀪𑀦𑁂𑀬𑁆𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀸𑀲𑀼 𑀇𑀫𑀲𑁆𑀫𑀺𑀁…𑀧𑁂… 𑀮𑀩𑁆𑀪𑀦𑁆𑀢𑀻𑀢𑀺 𑀇𑀫𑀲𑁆𑀫𑀺𑀁 𑀧𑀓𑀭𑀡𑁂 𑀲𑀭𑀽𑀧𑀢𑁄 𑀢𑀺𑀲𑁆𑀲𑀦𑁆𑀦𑀁 𑀆𑀕𑀢𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀬𑀣𑀸𑀯𑀼𑀢𑁆𑀢𑀲𑁆𑀲 𑀧𑀦 𑀅𑀝𑁆𑀞𑀓𑀣𑀸𑀦𑀬𑀲𑁆𑀲 𑀅𑀯𑀺𑀭𑁄𑀥𑁂𑀦 𑀆𑀘𑀭𑀺𑀬𑀯𑀸𑀤𑀸 𑀬𑁄𑀚𑁂𑀢𑀩𑁆𑀩𑀸, 𑀢𑀲𑁆𑀫𑀸 𑀧𑀜𑁆𑀜𑀧𑁂𑀢𑀩𑁆𑀩𑀝𑁆𑀞𑁂𑀦 𑀘𑁂𑀲𑀸 𑀧𑀜𑁆𑀜𑀢𑁆𑀢𑀻𑀢𑀺 𑀏𑀢𑀲𑁆𑀲 𑀲𑀪𑀸𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀧𑀜𑁆𑀜𑀧𑁂𑀢𑀩𑁆𑀩𑀫𑀢𑁆𑀢𑀝𑁆𑀞𑁂𑀦 𑀧𑀜𑁆𑀜𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀧𑁂𑀢𑀩𑁆𑀩𑀫𑁆𑀧𑀺 𑀳𑀺 𑀲𑀲𑀪𑀸𑀯𑀁 𑀢𑀚𑁆𑀚𑀧𑀭𑀫𑀢𑁆𑀣𑀦𑀸𑀫𑀮𑀸𑀪𑀢𑁄 𑀦 𑀧𑀭𑀢𑁄 𑀮𑀪𑀺𑀢𑀩𑁆𑀩𑀁 𑀧𑀜𑁆𑀜𑀢𑁆𑀢𑀺𑀦𑀸𑀫𑀁 𑀮𑀪𑀢𑀺, 𑀦𑀺𑀲𑀪𑀸𑀯𑀁 𑀧𑀦 𑀲𑀪𑀸𑀯𑀸𑀪𑀸𑀯𑀢𑁄 𑀦 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀦𑀸𑀫𑀁 𑀮𑀪𑀢𑀻𑀢𑀺. 𑀲𑀢𑁆𑀢𑁄𑀢𑀺𑀆𑀤𑀺𑀓𑁂𑀦 𑀦𑀸𑀫𑁂𑀦 𑀧𑀜𑁆𑀜𑀧𑀺𑀢𑀩𑁆𑀩𑀫𑀢𑁆𑀢𑀝𑁆𑀞𑁂𑀦 𑀧𑀜𑁆𑀜𑀢𑁆𑀢𑀻𑀢𑀺 𑀦𑀸𑀫𑀁 𑀮𑀪𑀢𑀺, 𑀦𑀺𑀲𑀪𑀸𑀯𑀸 𑀘 𑀲𑀢𑁆𑀢𑀸𑀤𑀬𑁄. 𑀦 𑀳𑀺 𑀲𑀲𑀪𑀸𑀯𑀲𑁆𑀲 𑀭𑀽𑀧𑀸𑀤𑀻𑀳𑀺 𑀏𑀓𑀢𑁆𑀢𑁂𑀦 𑀅𑀜𑁆𑀜𑀢𑁆𑀢𑁂𑀦 𑀯𑀸 𑀅𑀦𑀼𑀧𑀮𑀩𑁆𑀪𑀲𑀪𑀸𑀯𑀢𑀸 𑀅𑀢𑁆𑀣𑀻𑀢𑀺.

𑀓𑀺𑀭𑀻𑀝𑀁 𑀫𑀓𑀼𑀝𑀁, 𑀢𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀓𑀺𑀭𑀻𑀝𑀻. 𑀏𑀢𑀲𑁆𑀫𑀺𑀜𑁆𑀘 𑀆𑀘𑀭𑀺𑀬𑀯𑀸𑀤𑁂 𑀅𑀦𑀽𑀦𑁂𑀦 𑀮𑀓𑁆𑀔𑀡𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀲𑀩𑁆𑀩𑀲𑀫𑁄𑀭𑁄𑀥𑁄 𑀓𑀸𑀢𑀩𑁆𑀩𑁄. 𑀤𑀼𑀢𑀺𑀬𑀁 𑀢𑀢𑀺𑀬𑀦𑁆𑀢𑀺 𑀏𑀯𑀁𑀧𑀓𑀸𑀭𑀸 𑀳𑀺 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺 𑀉𑀧𑀦𑀺𑀓𑁆𑀔𑀺𑀢𑁆𑀢𑀓𑀧𑀜𑁆𑀜𑀢𑁆𑀢𑀺 𑀘 𑀲𑀗𑁆𑀔𑀸𑀢𑀩𑁆𑀩𑀧𑁆𑀧𑀥𑀸𑀦𑀢𑁆𑀢𑀸 𑀙𑀧𑀺 𑀧𑀜𑁆𑀜𑀢𑁆𑀢𑀺𑀬𑁄 𑀪𑀚𑀢𑀻𑀢𑀺 𑀬𑀼𑀢𑁆𑀢𑀁 𑀯𑀢𑁆𑀢𑀼𑀁, 𑀇𑀢𑀭𑀸 𑀘 𑀬𑀣𑀸𑀬𑁄𑀕𑀁 𑀢𑀁 𑀢𑀁 𑀧𑀜𑁆𑀜𑀢𑁆𑀢𑀺𑀦𑁆𑀢𑀺. 𑀤𑀼𑀢𑀺𑀬𑀁 𑀢𑀢𑀺𑀬𑀁 𑀤𑁆𑀯𑁂 𑀢𑀻𑀡𑀻𑀢𑀺𑀆𑀤𑀺 𑀧𑀦 𑀲𑀗𑁆𑀔𑀸 𑀦𑀸𑀫 𑀓𑀸𑀘𑀺 𑀦𑀢𑁆𑀣𑀻𑀢𑀺 𑀢𑀸𑀲𑀁 𑀉𑀧𑀸𑀤𑀸𑀲𑀦𑁆𑀢𑀢𑀺𑀧𑀜𑁆𑀜𑀢𑁆𑀢𑀻𑀦𑀁 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑀁, 𑀇𑀢𑀭𑀸𑀲𑀜𑁆𑀘 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀻𑀦𑀁 𑀬𑀣𑀸𑀦𑀺𑀤𑀲𑁆𑀲𑀺𑀢𑀸𑀦𑀁 𑀅𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑀁 𑀫𑀜𑁆𑀜𑀫𑀸𑀦𑁄 𑀆𑀳 ‘‘𑀲𑁂𑀲𑀸 𑀅𑀯𑀺𑀚𑁆𑀚𑀫𑀸𑀦𑀧𑀓𑁆𑀔𑀜𑁆𑀘𑁂𑀯 𑀅𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀓𑁆𑀔𑀜𑁆𑀘 𑀪𑀚𑀦𑁆𑀢𑀻’’𑀢𑀺. 𑀤𑀼𑀢𑀺𑀬𑀁 𑀢𑀢𑀺𑀬𑀁 𑀤𑁆𑀯𑁂 𑀢𑀻𑀡𑀻𑀢𑀺𑀆𑀤𑀻𑀦𑀁 𑀉𑀧𑀦𑀺𑀥𑀸𑀉𑀧𑀦𑀺𑀓𑁆𑀔𑀺𑀢𑁆𑀢𑀓𑀧𑀜𑁆𑀜𑀢𑁆𑀢𑀻𑀦𑀁 𑀅𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑀫𑁂𑀯 𑀫𑀜𑁆𑀜𑀢𑀺. 𑀬𑀜𑁆𑀳𑀺 𑀧𑀞𑀫𑀸𑀤𑀺𑀓𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀬𑀲𑁆𑀲 𑀘𑁂𑀓𑀸𑀤𑀺𑀓𑀲𑁆𑀲 𑀉𑀧𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀜𑁆𑀜𑀸𑀧𑀻𑀬𑀢𑀺, 𑀢𑀜𑁆𑀘 𑀲𑀗𑁆𑀔𑀸𑀦𑀁 𑀓𑀺𑀜𑁆𑀘𑀺 𑀦𑀢𑁆𑀣𑀻𑀢𑀺. 𑀢𑀣𑀸 𑀲𑀦𑁆𑀢𑀢𑀺𑀧𑀜𑁆𑀜𑀢𑁆𑀢𑀺𑀬𑀸 𑀘. 𑀦 𑀳𑀺 𑀅𑀲𑀻𑀢𑀺 𑀆𑀲𑀻𑀢𑀺𑀓𑁄 𑀘 𑀯𑀺𑀚𑁆𑀚𑀫𑀸𑀦𑁄𑀢𑀺.

𑀏𑀓𑀘𑁆𑀘𑀸 𑀪𑀽𑀫𑀺𑀧𑀜𑁆𑀜𑀢𑁆𑀢𑀻𑀢𑀺 𑀓𑀸𑀫𑀸𑀯𑀘𑀭𑀸𑀤𑀺𑀧𑀜𑁆𑀜𑀢𑁆𑀢𑀺𑀁 𑀲𑀦𑁆𑀥𑀸𑀬𑀸𑀳. 𑀓𑀸𑀫𑀸𑀯𑀘𑀭𑀸𑀤𑀻 𑀳𑀺 𑀲𑀪𑀸𑀯𑀥𑀫𑁆𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀸𑀫𑁄𑀢𑀺 𑀧𑀦 𑀑𑀓𑀸𑀲𑁂 𑀕𑀳𑀺𑀢𑁂 𑀅𑀯𑀺𑀚𑁆𑀚𑀫𑀸𑀦𑁂𑀦𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀏𑀲𑀸 𑀪𑀯𑀺𑀢𑀼𑀁 𑀅𑀭𑀳𑀢𑀺, 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑁂𑀲𑀼 𑀕𑀳𑀺𑀢𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀦𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀬𑀣𑀸 𑀧𑀦 𑀯𑀘𑀦𑀲𑀗𑁆𑀔𑀸𑀢𑀸𑀬 𑀯𑀘𑀦𑀲𑀫𑀼𑀝𑁆𑀞𑀸𑀧𑀓𑀘𑁂𑀢𑀦𑀸𑀲𑀗𑁆𑀔𑀸𑀢𑀸𑀬 𑀯𑀸 𑀓𑀺𑀭𑀺𑀬𑀸𑀬 𑀪𑀸𑀡𑀓𑁄𑀢𑀺 𑀧𑀼𑀕𑁆𑀕𑀮𑀲𑁆𑀲 𑀧𑀜𑁆𑀜𑀢𑁆𑀢𑀺 𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀧𑀓𑁆𑀔𑀁 𑀪𑀚𑀢𑀺, 𑀏𑀯𑀁 𑀓𑀺𑀲𑁄 𑀣𑀽𑀮𑁄𑀢𑀺 𑀭𑀽𑀧𑀸𑀬𑀢𑀦𑀲𑀗𑁆𑀔𑀸𑀢𑁂𑀦 𑀲𑀡𑁆𑀞𑀸𑀦𑁂𑀦 𑀧𑀼𑀕𑁆𑀕𑀮𑀸𑀤𑀻𑀦𑀁 𑀧𑀜𑁆𑀜𑀸𑀧𑀦𑀸 𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀪𑀯𑀺𑀢𑀼𑀁 𑀅𑀭𑀳𑀢𑀺. 𑀲𑀡𑁆𑀞𑀸𑀦𑀦𑁆𑀢𑀺 𑀯𑀸 𑀭𑀽𑀧𑀸𑀬𑀢𑀦𑁂 𑀅𑀕𑁆𑀕𑀳𑀺𑀢𑁂 𑀅𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀭𑀽𑀧𑀁 𑀨𑀲𑁆𑀲𑁄𑀢𑀺𑀆𑀤𑀺𑀓𑀸 𑀧𑀦 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀭𑀼𑀧𑁆𑀧𑀦𑀸𑀤𑀺𑀓𑀺𑀘𑁆𑀘𑀯𑀲𑁂𑀦 𑀓𑀺𑀘𑁆𑀘𑀧𑀜𑁆𑀜𑀢𑁆𑀢𑀺𑀬𑀁, 𑀧𑀘𑁆𑀘𑀢𑁆𑀢𑀥𑀫𑁆𑀫𑀦𑀸𑀫𑀯𑀲𑁂𑀦 𑀧𑀘𑁆𑀘𑀢𑁆𑀢𑀧𑀜𑁆𑀜𑀢𑁆𑀢𑀺𑀬𑀁 𑀯𑀸 𑀅𑀯𑀭𑁄𑀥𑁂𑀢𑀩𑁆𑀩𑀸. 𑀯𑀺𑀚𑁆𑀚𑀫𑀸𑀦𑀸𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻𑀲𑀼 𑀘 𑀯𑀼𑀢𑁆𑀢𑀸𑀲𑀼 𑀢𑀸𑀲𑀁 𑀯𑁄𑀫𑀺𑀲𑁆𑀲𑀢𑀸𑀯𑀲𑁂𑀦 𑀧𑀯𑀢𑁆𑀢𑀸 𑀇𑀢𑀭𑀸𑀧𑀺 𑀯𑀼𑀢𑁆𑀢𑀸𑀬𑁂𑀯 𑀳𑁄𑀦𑁆𑀢𑀻𑀢𑀺 𑀅𑀬𑀫𑁆𑀧𑀺 𑀆𑀘𑀭𑀺𑀬𑀯𑀸𑀤𑁄 𑀲𑀩𑁆𑀩𑀲𑀗𑁆𑀕𑀸𑀳𑀓𑁄𑀢𑀺 𑀤𑀝𑁆𑀞𑀩𑁆𑀩𑁄.

𑁨. ‘‘𑀬𑀸𑀯𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺𑀆𑀤𑀺𑀓𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀢𑁆𑀢𑀓𑁂𑀦 𑀧𑀜𑁆𑀜𑀸𑀧𑀦𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀸𑀯𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺 𑀬𑀸𑀯𑀢𑀸 𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺 𑀔𑀦𑁆𑀥𑀸𑀦𑀁 𑀔𑀦𑁆𑀥𑀧𑀜𑁆𑀜𑀢𑁆𑀢𑀺, 𑀏𑀢𑁆𑀢𑀸𑀯𑀢𑀸 𑀔𑀦𑁆𑀥𑀸𑀦𑀁 𑀔𑀦𑁆𑀥𑀧𑀜𑁆𑀜𑀢𑁆𑀢𑀺, 𑀏𑀯𑀁 𑀧𑀸𑀴𑀺𑀬𑁄𑀚𑀦𑀁 𑀓𑀢𑁆𑀯𑀸 𑀲𑀗𑁆𑀔𑁂𑀧𑀧𑁆𑀧𑀪𑁂𑀤𑀯𑀲𑁂𑀦 𑀅𑀬𑀁 𑀅𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. ‘‘𑀬𑀸𑀯𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺, ‘‘𑀔𑀦𑁆𑀥𑀸𑀦𑀁 𑀔𑀦𑁆𑀥𑀧𑀜𑁆𑀜𑀢𑁆𑀢𑀻’’𑀢𑀺 𑀳𑀺 𑀇𑀫𑀲𑁆𑀲 𑀅𑀢𑁆𑀣𑁄 ‘‘𑀬𑀢𑁆𑀢𑀓𑁂𑀦 𑀧𑀜𑁆𑀜𑀸𑀧𑀦𑁂𑀦 𑀲𑀗𑁆𑀔𑁂𑀧𑀢𑁄 𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺 𑀯𑀸’’𑀢𑀺 𑀏𑀢𑁂𑀦 𑀤𑀲𑁆𑀲𑀺𑀢𑁄, ‘‘𑀬𑀸𑀯𑀢𑀸 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀓𑀲𑁆𑀲 𑀧𑀦 ‘‘𑀧𑀪𑁂𑀤𑀢𑁄 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀓𑁂𑀦𑀸𑀢𑀺. 𑀢𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺 𑀧𑀪𑁂𑀤𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁. 𑀢𑁂𑀦 𑀅𑀯𑀼𑀢𑁆𑀢𑁄𑀧𑀺 𑀲𑀩𑁆𑀩𑁄 𑀲𑀗𑁆𑀕𑀳𑀺𑀢𑁄 𑀳𑁄𑀢𑀻𑀢𑀺 ‘‘𑀢𑀢𑁆𑀭𑀸𑀧𑀺 𑀭𑀽𑀧𑀓𑁆𑀔𑀦𑁆𑀥𑁄 𑀓𑀸𑀫𑀸𑀯𑀘𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀬𑀁 𑀯𑀸 𑀏𑀢𑁆𑀣 𑀧𑀸𑀴𑀺𑀬𑀸 𑀅𑀢𑁆𑀣𑀬𑁄𑀚𑀦𑀸 𑁋 ‘‘𑀬𑀸𑀯𑀢𑀸’’𑀢𑀺 𑀇𑀤𑀁 𑀲𑀩𑁆𑀩𑁂𑀳𑀺 𑀧𑀤𑁂𑀳𑀺 𑀬𑁄𑀚𑁂𑀢𑁆𑀯𑀸 𑀬𑀢𑁆𑀢𑀓𑀸 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀢𑀢𑁆𑀢𑀓𑀸 𑀔𑀦𑁆𑀥𑀸𑀦𑀁 𑀔𑀦𑁆𑀥𑀧𑀜𑁆𑀜𑀢𑁆𑀢𑀺. 𑀬𑀢𑁆𑀢𑀓𑁄 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀢𑀧𑁆𑀧𑀪𑁂𑀤𑀸𑀦𑀜𑁆𑀘 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀁 𑀧𑀪𑁂𑀤𑁄, 𑀢𑀢𑁆𑀢𑀓𑁄 𑀔𑀦𑁆𑀥𑀸𑀦𑀁 𑀔𑀦𑁆𑀥𑀧𑀜𑁆𑀜𑀢𑁆𑀢𑀺𑀬𑀸 𑀧𑀪𑁂𑀤𑁄𑀢𑀺 𑀧𑀓𑀭𑀡𑀦𑁆𑀢𑀭𑁂 𑀯𑀼𑀢𑁆𑀢𑁂𑀦 𑀯𑀢𑁆𑀣𑀼𑀪𑁂𑀤𑁂𑀦 𑀔𑀦𑁆𑀥𑀧𑀜𑁆𑀜𑀢𑁆𑀢𑀺𑀬𑀸 𑀧𑀪𑁂𑀤𑀁 𑀤𑀲𑁆𑀲𑁂𑀢𑀺. 𑀏𑀲 𑀦𑀬𑁄 ‘‘𑀬𑀸𑀯𑀢𑀸 𑀆𑀬𑀢𑀦𑀸𑀦’’𑀦𑁆𑀢𑀺𑀆𑀤𑀻𑀲𑀼𑀧𑀺.

𑁭. 𑀏𑀓𑀤𑁂𑀲𑁂𑀦𑁂𑀯𑀸𑀢𑀺 𑀉𑀤𑁆𑀤𑁂𑀲𑀫𑀢𑁆𑀢𑁂𑀦𑁂𑀯𑀸𑀢𑀺 𑀅𑀢𑁆𑀣𑁄.

𑀫𑀸𑀢𑀺𑀓𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧. 𑀏𑀓𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧. 𑀛𑀸𑀦𑀗𑁆𑀕𑀸𑀦𑁂𑀯 𑀯𑀺𑀫𑁄𑀓𑁆𑀔𑁄𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀯𑀺𑀫𑁄𑀓𑁆𑀔𑀲𑀳𑀚𑀸𑀢𑁂𑀦 𑀦𑀸𑀫𑀓𑀸𑀬𑁂𑀦𑀸’’𑀢𑀺. 𑀬𑁂𑀦 𑀳𑀺 𑀲𑀤𑁆𑀥𑀺𑀦𑁆𑀢𑀺𑀆𑀤𑀺𑀦𑀸 𑀧𑀞𑀫𑀁 𑀲𑀫𑀗𑁆𑀕𑀺𑀪𑀸𑀯𑀢𑁆𑀣𑀁 𑀯𑀺𑀯𑀭𑀢𑀺. 𑀨𑀲𑁆𑀲𑁂𑀦𑀧𑀺 𑀨𑀼𑀝𑁆𑀞𑀸𑀬𑁂𑀯 𑀦𑀸𑀫𑀸𑀢𑀺 𑀏𑀢𑁂𑀦 ‘‘𑀅𑀧𑀺𑀘𑁂𑀲𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀤𑀼𑀢𑀺𑀬𑀁 𑀲𑀫𑁆𑀨𑀲𑁆𑀲𑁂𑀦 𑀨𑀼𑀲𑀦𑀢𑁆𑀣𑀁, 𑀇𑀢𑀭𑁂𑀳𑀺 𑀇𑀢𑀭𑁂 𑀓𑀸𑀭𑀡𑀢𑁆𑀣𑁂. 𑀲𑀫𑀗𑁆𑀕𑀺𑀪𑀸𑀯𑀨𑀼𑀲𑀦𑀓𑀸𑀭𑀡𑀪𑀸𑀯𑀸 𑀳𑀺 𑀨𑀼𑀲𑀦𑀸𑀢𑀺 𑀯𑀼𑀢𑁆𑀢𑀸𑀢𑀺. 𑀧𑀼𑀦𑀧𑀺 𑀧𑀞𑀫𑀢𑁆𑀣𑀫𑁂𑀯 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀯𑀺𑀯𑀭𑀦𑁆𑀢𑁄 ‘‘𑀢𑀢𑁆𑀭𑀸𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀞𑀧𑁂𑀢𑁆𑀯𑀸 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀲𑁂𑀲𑀸 𑀅𑀢𑀺𑀭𑁂𑀓𑀧𑀡𑁆𑀡𑀸𑀲𑀥𑀫𑁆𑀫𑀸𑀢𑀺 𑀏𑀢𑁆𑀣 𑀯𑁂𑀤𑀦𑀸𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀗𑁆𑀕𑀳𑀺𑀢𑀸𑀦𑀻𑀢𑀺 𑀆𑀳 ‘‘𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀳𑁄𑀦𑁆𑀢𑀻’’𑀢𑀺. 𑀏𑀯𑀁 𑀲𑀢𑀺 𑀯𑁂𑀤𑀦𑀸𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑁂𑀳𑀺 𑀲𑀼𑀔𑀲𑁆𑀲 𑀨𑀼𑀲𑀺𑀢𑀩𑁆𑀩𑀢𑁆𑀢𑀸 𑀢𑀺𑀡𑁆𑀡𑀜𑁆𑀘 𑀢𑁂𑀲𑀁 𑀅𑀦𑀜𑁆𑀜𑀢𑁆𑀢𑀸 𑀢𑁂𑀦𑁂𑀯 𑀢𑀲𑁆𑀲 𑀨𑀼𑀲𑀦𑀸 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺, 𑀯𑁂𑀤𑀬𑀺𑀢𑀸𑀥𑀺𑀧𑀢𑀺𑀬𑀝𑁆𑀞𑁂𑀳𑀺 𑀉𑀧𑀦𑀺𑀚𑁆𑀛𑀸𑀬𑀦𑀪𑀸𑀯𑀧𑀝𑀺𑀮𑀸𑀪𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀅𑀣 𑀯𑀸 𑀞𑀧𑁂𑀢𑁆𑀯𑀸 𑀢𑀸𑀦𑀺 𑀅𑀗𑁆𑀕𑀸𑀦𑀻𑀢𑀺 𑀅𑀗𑁆𑀕𑀸𑀦𑀁 𑀩𑀳𑀼𑀢𑁆𑀢𑀸 𑀩𑀳𑀼𑀯𑀘𑀦𑀁. 𑀢𑁂𑀲𑀼 𑀧𑀦 𑀧𑀘𑁆𑀘𑁂𑀓𑀫𑁆𑀧𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸 ‘‘𑀯𑀺𑀢𑀓𑁆𑀓𑀁 𑀞𑀧𑁂𑀢𑁆𑀯𑀸’’𑀢𑀺𑀆𑀤𑀺𑀦𑀸. 𑀢𑀢𑁆𑀣 ‘‘𑀲𑀼𑀔𑀁 𑀞𑀧𑁂𑀢𑁆𑀯𑀸’’𑀢𑀺 𑀇𑀫𑀺𑀲𑁆𑀲𑀸 𑀬𑁄𑀚𑀦𑀸𑀬 𑀲𑁂𑀲𑀸 𑀢𑀬𑁄 𑀔𑀦𑁆𑀥𑀸 𑀳𑁄𑀦𑁆𑀢𑀺, 𑀇𑀢𑀭𑀸𑀲𑀼 𑀘𑀢𑁆𑀢𑀸𑀭𑁄𑀢𑀺. 𑀲𑀩𑁆𑀩𑀬𑁄𑀚𑀦𑀸𑀲𑀼 𑀘 𑀢𑀬𑁄 𑀅𑀦𑁆𑀢𑁄 𑀓𑀢𑁆𑀯𑀸 ‘‘𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑁨. 𑀬𑁄 𑀅𑀲𑀫𑀬𑀯𑀺𑀫𑁄𑀓𑁆𑀔𑁂𑀦 𑀏𑀓𑀘𑁆𑀘𑁂𑀳𑀺 𑀆𑀲𑀯𑁂𑀳𑀺 𑀯𑀺𑀫𑀼𑀢𑁆𑀢𑁄 𑀅𑀲𑀫𑀬𑀯𑀺𑀫𑁄𑀓𑁆𑀔𑀽𑀧𑀦𑀺𑀲𑁆𑀲𑀬𑀮𑀸𑀪𑁂𑀦 𑀘 𑀲𑀸𑀢𑀺𑀲𑀬𑁂𑀦 𑀲𑀫𑀬𑀯𑀺𑀫𑁄𑀓𑁆𑀔𑁂𑀦, 𑀲𑁄 𑀏𑀯 𑀲𑀫𑀬𑀯𑀺𑀫𑀼𑀢𑁆𑀢𑁄. 𑀲𑁄 𑀳𑀺 𑀢𑁂𑀦 𑀯𑀺𑀫𑀼𑀢𑁆𑀢𑁄 𑀛𑀸𑀦𑀮𑀸𑀪𑀻 𑀲𑁂𑀓𑁆𑀔𑁄 𑀭𑀽𑀧𑀸𑀭𑀽𑀧𑀪𑀯𑀢𑁄 𑀅𑀧𑀼𑀦𑀭𑀸𑀯𑀝𑁆𑀝𑀓𑁄 𑀓𑀸𑀫𑀭𑀸𑀕𑀸𑀤𑀻𑀳𑀺 𑀢𑀣𑀸𑀯𑀺𑀫𑀼𑀢𑁆𑀢𑁄𑀯 𑀳𑁄𑀢𑀻𑀢𑀺 𑀲𑀫𑀬𑀯𑀺𑀫𑀼𑀢𑁆𑀢𑀧𑀜𑁆𑀜𑀢𑁆𑀢𑀺𑀁 𑀮𑀤𑁆𑀥𑀼𑀁 𑀅𑀭𑀳𑀢𑀺. 𑀧𑀼𑀣𑀼𑀚𑁆𑀚𑀦𑁄 𑀧𑀦 𑀛𑀸𑀦𑀮𑀸𑀪𑀻 𑀧𑀼𑀦𑀭𑀸𑀯𑀝𑁆𑀝𑀓𑀥𑀫𑁆𑀫𑁄 𑀧𑀼𑀦 𑀓𑀸𑀫𑀭𑀸𑀕𑀸𑀤𑀺𑀲𑀫𑀼𑀤𑀸𑀘𑀸𑀭𑀪𑀸𑀯𑀢𑁄 𑀯𑀺𑀫𑀼𑀢𑁆𑀢𑁄 𑀦𑀸𑀫 𑀦 𑀳𑁄𑀢𑀻𑀢𑀺 𑀲𑀫𑀬𑀯𑀺𑀫𑀼𑀢𑁆𑀢𑀧𑀜𑁆𑀜𑀢𑁆𑀢𑀺𑀁 𑀦𑀸𑀭𑀳𑀢𑀺, 𑀢𑁂𑀦 𑀲𑁄 ‘‘𑀲𑀫𑀬𑀯𑀺𑀫𑀼𑀢𑁆𑀢𑁄’’𑀢𑀺 𑀦 𑀯𑀼𑀢𑁆𑀢𑁄. 𑀅𑀭𑀳𑀢𑁄 𑀧𑀦 𑀅𑀧𑀭𑀺𑀓𑁆𑀔𑀻𑀡𑀸 𑀆𑀲𑀯𑀸 𑀦𑀢𑁆𑀣𑀺, 𑀬𑀢𑁄 𑀯𑀺𑀫𑀼𑀘𑁆𑀘𑁂𑀬𑁆𑀬. 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀫𑀢𑁆𑀢𑀸 𑀳𑀺 𑀢𑀲𑁆𑀲 𑀅𑀝𑁆𑀞 𑀯𑀺𑀫𑁄𑀓𑁆𑀔𑀸𑀢𑀺. 𑀢𑀲𑁆𑀫𑀸 𑀢𑀲𑁆𑀲 𑀦 𑀅𑀝𑁆𑀞 𑀯𑀺𑀫𑁄𑀓𑁆𑀔𑀸 𑀲𑀫𑀬𑀯𑀺𑀫𑀼𑀢𑁆𑀢𑀧𑀜𑁆𑀜𑀢𑁆𑀢𑀺𑀪𑀸𑀯𑀲𑁆𑀲 𑀅𑀲𑀫𑀬𑀯𑀺𑀫𑀼𑀢𑁆𑀢𑀧𑀜𑁆𑀜𑀢𑁆𑀢𑀺𑀪𑀸𑀯𑀲𑁆𑀲 𑀯𑀸 𑀓𑀸𑀭𑀡𑀁. 𑀢𑀤𑀓𑀸𑀭𑀡𑀪𑀸𑀯𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀦 𑀳𑁂𑀯 𑀔𑁄…𑀧𑁂… 𑀯𑀺𑀳𑀭𑀢𑀻’’𑀢𑀺 𑀯𑀼𑀢𑁆𑀢𑀁, 𑀦 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲𑁂𑀯 𑀅𑀲𑀫𑀬𑀯𑀺𑀫𑀼𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀩𑁆𑀩𑁄𑀧𑀺 𑀳𑀺 𑀅𑀭𑀳𑀸 𑀅𑀲𑀫𑀬𑀯𑀺𑀫𑀼𑀢𑁆𑀢𑁄𑀢𑀺. 𑀩𑀸𑀳𑀺𑀭𑀸𑀦𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀢𑁄 𑀩𑀳𑀺𑀪𑀽𑀢𑀸𑀦𑀁, 𑀮𑁄𑀓𑀺𑀬𑀸𑀦𑀦𑁆𑀢𑀺 𑀅𑀢𑁆𑀣𑁄.

𑁩. 𑀅𑀭𑀽𑀧𑀓𑁆𑀔𑀦𑁆𑀥𑀦𑀺𑀩𑁆𑀩𑀸𑀦𑀫𑀢𑁆𑀢𑀯𑀸𑀘𑀓𑁄 𑀅𑀭𑀽𑀧𑀲𑀤𑁆𑀤𑁄 𑀦 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀭𑀽𑀧𑀢𑁄 𑀅𑀜𑁆𑀜’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀫𑀜𑁆𑀚𑀽𑀲𑀦𑁆𑀢𑀺 𑀲𑀫𑀸𑀥𑀺𑀁. 𑀅𑀪𑀺𑀜𑁆𑀜𑀸𑀤𑀻𑀦𑀜𑁆𑀳𑀺 𑀥𑀫𑁆𑀫𑀸𑀦𑀁 𑀧𑀸𑀤𑀓𑀪𑀸𑀯𑁂𑀦 𑀲𑀫𑀸𑀥𑀺 𑀫𑀜𑁆𑀚𑀽𑀲𑀸𑀲𑀤𑀺𑀲𑁄 𑀳𑁄𑀢𑀺. 𑀅𑀤𑁆𑀥𑀸𑀦𑀁 𑀨𑀭𑀺𑀢𑀼𑀦𑁆𑀢𑀺 𑀤𑀻𑀖𑀓𑀸𑀮𑀁 𑀩𑁆𑀬𑀸𑀧𑁂𑀢𑀼𑀁, 𑀧𑀯𑀢𑁆𑀢𑁂𑀢𑀼𑀦𑁆𑀢𑀺 𑀅𑀢𑁆𑀣𑁄. ‘‘𑀲𑀫𑁆𑀫𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑁆𑀣 𑀆𑀤𑀭𑀲𑁆𑀲 𑀅𑀓𑀢𑀢𑁆𑀢𑀸 𑀯𑀢𑁆𑀢𑀪𑁂𑀤𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀯𑀢𑁆𑀢𑀪𑁂𑀤𑀫𑀢𑁆𑀢𑁂𑀦 𑀦𑀝𑁆𑀞𑀸 𑀧𑀦 𑀲𑀫𑀸𑀧𑀢𑁆𑀢𑀺 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀳𑀺 𑀦𑀝𑁆𑀞𑀸 𑀯𑀺𑀬 𑀦 𑀓𑀺𑀜𑁆𑀘𑁂𑀦 𑀧𑀘𑁆𑀘𑀸𑀳𑀭𑀺𑀢𑀩𑁆𑀩𑀸 𑀳𑁄𑀢𑀺 𑀫𑀦𑁆𑀤𑀧𑀸𑀭𑀺𑀧𑀦𑁆𑀣𑀓𑀢𑁆𑀢𑀸, 𑀢𑀲𑁆𑀫𑀸 𑀯𑀢𑁆𑀢𑀲𑀫𑀺𑀢𑀓𑀭𑀡𑀫𑀢𑁆𑀢𑁂𑀦𑁂𑀯 𑀧𑀘𑁆𑀘𑀸𑀳𑀭𑀺𑀢𑀩𑁆𑀩𑀢𑁆𑀢𑀸 ‘‘𑀅𑀧𑁆𑀧𑁂𑀦𑁆𑀢𑁄𑀯 𑀦𑀺𑀲𑀻𑀤𑀻’’𑀢𑀺 𑀆𑀳.

𑁪. 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑁂𑀦 𑀧𑀫𑀸𑀤𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑀸𑀦𑀫𑁆𑀧𑀺 𑀲𑀫𑀸𑀧𑀢𑁆𑀢𑀺 𑀦 𑀓𑀼𑀧𑁆𑀧𑀢𑀻𑀢𑀺 𑀧𑀭𑀺𑀳𑀻𑀦𑁄 𑀦𑀸𑀫 𑀦 𑀳𑁄𑀢𑀺, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀩𑁆𑀬𑀸𑀲𑀗𑁆𑀕𑁂 𑀧𑀝𑀺𑀲𑀁𑀳𑀝𑀫𑀢𑁆𑀢𑁂 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀫𑀢𑁆𑀣𑀢𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀓𑀺𑀲𑁆𑀲 𑀧𑀦, 𑀪𑀦𑁆𑀢𑁂, 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀅𑀦𑁆𑀢𑀭𑀸𑀬𑀸𑀬𑀸𑀢𑀺? 𑀬𑀸 𑀳𑀺𑀲𑁆𑀲 𑀲𑀸, 𑀆𑀦𑀦𑁆𑀤, 𑀅𑀓𑀼𑀧𑁆𑀧𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀦𑀸𑀳𑀁 𑀢𑀲𑁆𑀲𑀸 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀅𑀦𑁆𑀢𑀭𑀸𑀬𑀸𑀬 𑀯𑀤𑀸𑀫𑀺. 𑀬𑁂 𑀘 𑀔𑁆𑀯𑀲𑁆𑀲, 𑀆𑀦𑀦𑁆𑀤, 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸 𑀅𑀥𑀺𑀕𑀢𑀸, 𑀢𑁂𑀲𑀸𑀳𑀫𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀅𑀦𑁆𑀢𑀭𑀸𑀬𑀸𑀬 𑀯𑀤𑀸𑀫𑀻’’𑀢𑀺 𑀲𑀼𑀢𑁆𑀢𑁂 (𑀲𑀁. 𑀦𑀺. 𑁨.𑁧𑁭𑁯) 𑀧𑀦 𑀲𑀫𑀬𑁂𑀦 𑀲𑀫𑀬𑀁 𑀆𑀧𑀚𑁆𑀚𑀦𑁂𑀦 𑀧𑀭𑀺𑀳𑀭𑀺𑀢𑀩𑁆𑀩𑀸𑀦𑀁 𑀲𑀫𑀸𑀧𑀢𑁆𑀢𑀺𑀲𑀼𑀔𑀯𑀺𑀳𑀸𑀭𑀸𑀦𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀩𑁆𑀬𑀸𑀲𑀗𑁆𑀕𑀓𑀸𑀮𑁂 𑀅𑀦𑀺𑀧𑁆𑀨𑀢𑁆𑀢𑀺𑀢𑁄 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀅𑀦𑁆𑀢𑀭𑀸𑀬𑁄𑀢𑀺 𑀯𑀼𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀲𑁆𑀲 𑀢𑁂𑀦 𑀅𑀯𑀺𑀭𑁄𑀥𑁄 𑀯𑁂𑀤𑀺𑀢𑀩𑁆𑀩𑁄.

𑁫. 𑀥𑀫𑁆𑀫𑀸𑀦𑀁…𑀧𑁂… 𑀧𑀻𑀢𑀺 𑀏𑀢𑁆𑀣 ‘‘𑀥𑀫𑁆𑀫𑁂𑀳𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀇𑀥 𑀳𑀺 𑀢𑀸𑀳𑀺 𑀲𑀫𑀸𑀧𑀢𑁆𑀢𑀻𑀳𑀺 𑀧𑀭𑀺𑀳𑀸𑀬𑁂𑀬𑁆𑀬𑀸𑀢𑀺 𑀥𑀫𑁆𑀫𑁂𑀳𑀺 𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀳𑀸𑀦𑀫𑁆𑀧𑀺 𑀅𑀧𑀭𑀺𑀳𑀸𑀦𑀫𑁆𑀧𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀘 𑀧𑀼𑀕𑁆𑀕𑀮𑀲𑁆𑀲 𑀧𑀫𑀸𑀤𑀫𑀸𑀕𑀫𑁆𑀫 𑀢𑀸 𑀲𑀫𑀸𑀧𑀢𑁆𑀢𑀺𑀬𑁄 𑀓𑀼𑀧𑁆𑀧𑁂𑀬𑁆𑀬𑀼𑀦𑁆𑀢𑀺 𑀥𑀫𑁆𑀫𑀸𑀦𑀁 𑀓𑀼𑀧𑁆𑀧𑀦𑀁 𑀅𑀓𑀼𑀧𑁆𑀧𑀦𑀜𑁆𑀘 𑀯𑀼𑀢𑁆𑀢𑀁, 𑀧𑀼𑀕𑁆𑀕𑀮𑀲𑁆𑀲 𑀧𑀦 𑀧𑀭𑀺𑀳𑀸𑀦𑀥𑀫𑁆𑀫𑀸𑀦𑀫𑁂𑀯 𑀯𑀺𑀦𑀸𑀲𑁄𑀢𑀺 𑀯𑀘𑀦𑀦𑀸𑀦𑀢𑁆𑀢𑀫𑀢𑁆𑀢𑁂𑀦 𑀯𑀘𑀦𑀢𑁆𑀣𑀦𑀸𑀦𑀢𑁆𑀢𑀫𑀢𑁆𑀢𑁂𑀦 𑀯𑀸 𑀧𑀭𑀺𑀬𑀸𑀬𑀦𑁆𑀢𑀭𑀢𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑁭-𑁮. 𑀘𑁂𑀢𑀦𑀸 𑀲𑀫𑀸𑀧𑀢𑁆𑀢𑀺𑀘𑁂𑀢𑀦𑀸 𑀢𑀤𑀸𑀬𑀽𑀳𑀦𑀸 𑀘. 𑀅𑀦𑀼𑀭𑀓𑁆𑀔𑀡𑀸 𑀲𑀫𑀸𑀧𑀢𑁆𑀢𑀺𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑀧𑀭𑀺𑀕𑁆𑀕𑀸𑀳𑀺𑀓𑀸 𑀧𑀜𑁆𑀜𑀸𑀲𑀳𑀺𑀢𑀸 𑀲𑀢𑀺. 𑀢𑀸𑀳𑀺 𑀘𑁂𑀢𑀺𑀬𑀫𑀸𑀦𑀅𑀦𑀼𑀭𑀓𑁆𑀔𑀺𑀬𑀫𑀸𑀦𑀲𑀫𑀸𑀧𑀢𑁆𑀢𑀻𑀦𑀁 𑀪𑀩𑁆𑀩𑀸 𑀘𑁂𑀢𑀦𑀸𑀪𑀩𑁆𑀩𑀸 𑀅𑀦𑀼𑀭𑀓𑁆𑀔𑀡𑀸𑀪𑀩𑁆𑀩𑀸.

𑁧𑁦. 𑀧𑀼𑀣𑀼𑀚𑁆𑀚𑀦𑀕𑁄𑀢𑁆𑀢𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀲𑀺𑀓𑁆𑀔𑀁, 𑀧𑀼𑀣𑀼𑀚𑁆𑀚𑀦𑀕𑀢𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀅𑀢𑀺𑀓𑁆𑀓𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀢𑀸 𑀳𑀺 𑀲𑀁𑀬𑁄𑀚𑀦𑀢𑁆𑀢𑀬𑀸𑀦𑀼𑀧𑀘𑁆𑀙𑁂𑀤𑁂𑀦 ‘‘𑀧𑀼𑀣𑀼𑀚𑁆𑀚𑀦𑀲𑀺𑀓𑁆𑀔𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺.

𑁧𑁧. 𑀅𑀭𑀳𑀢𑁆𑀢𑀫𑀕𑁆𑀕𑀝𑁆𑀞𑁄 𑀘 𑀯𑀝𑁆𑀝𑀪𑀬𑀢𑁄 𑀧𑀜𑁆𑀜𑀼𑀩𑁆𑀩𑁂𑀕𑁂𑀦 𑀉𑀩𑁆𑀩𑀺𑀚𑁆𑀚𑀦𑁆𑀢𑁄 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑁂𑀳𑀺 𑀉𑀧𑀭𑀢𑁄𑀢𑀺 𑀪𑀬𑀽𑀧𑀭𑀢𑁄 𑀦𑀸𑀫𑀸𑀢𑀺 𑀆𑀳 ‘‘𑀲𑀢𑁆𑀢 𑀲𑁂𑀓𑁆𑀔𑀸 𑀪𑀬𑀽𑀧𑀭𑀢𑀸’’𑀢𑀺.

𑁧𑁨. 𑀪𑀯𑀗𑁆𑀕𑀧𑀜𑁆𑀜𑀸𑀯𑀺𑀭𑀳𑀺𑀢𑀸 ‘‘𑀯𑀺𑀧𑀸𑀓𑀸𑀯𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑀸’’𑀢𑀺 𑀇𑀫𑀺𑀦𑀸 𑀕𑀳𑀺𑀢𑀸𑀢𑀺 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸 𑀓𑁂𑀘𑀺 ‘‘𑀤𑀼𑀧𑁆𑀧𑀜𑁆𑀜𑀸’’𑀢𑀺 𑀇𑀫𑀺𑀦𑀸 𑀕𑀬𑁆𑀳𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀧𑁆𑀧𑀝𑀺𑀮𑀤𑁆𑀥𑀫𑀕𑁆𑀕𑀨𑀮𑀽𑀧𑀦𑀺𑀲𑁆𑀲𑀬𑀸’’𑀢𑀺. 𑀧𑀜𑁆𑀜𑀸𑀬 𑀳𑀺 𑀯𑀺𑀦𑀸 𑀦 𑀢𑀤𑀼𑀧𑀦𑀺𑀲𑁆𑀲𑀬𑁄 𑀅𑀢𑁆𑀣𑀻𑀢𑀺.

𑁧𑁪. 𑀬𑀢𑁆𑀣 𑀦𑀺𑀬𑀢𑀸𑀦𑀺𑀬𑀢𑀯𑁄𑀫𑀺𑀲𑁆𑀲𑀸 𑀧𑀯𑀢𑁆𑀢𑀺 𑀅𑀢𑁆𑀣𑀺, 𑀢𑀢𑁆𑀣𑁂𑀯 𑀦𑀺𑀬𑀢𑀥𑀫𑁆𑀫𑀸 𑀳𑁄𑀦𑁆𑀢𑀻𑀢𑀺 𑀉𑀢𑁆𑀢𑀭𑀓𑀼𑀭𑀽𑀲𑀼 𑀢𑀤𑀪𑀸𑀯𑀸 𑀦𑀺𑀬𑀢𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀸 𑀧𑀦 𑀉𑀢𑁆𑀢𑀭𑀓𑀼𑀭𑀼𑀓𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳.

𑁧𑁬. 𑀢𑁂𑀭𑀲𑀲𑀼 𑀲𑀻𑀲𑁂𑀲𑀼 𑀧𑀮𑀺𑀩𑁄𑀥𑀲𑀻𑀲𑀸𑀤𑀻𑀦𑀺 𑀧𑀯𑀢𑁆𑀢𑀲𑀻𑀲𑀜𑁆𑀘 𑀧𑀭𑀺𑀬𑀸𑀤𑀺𑀬𑀺𑀢𑀩𑁆𑀩𑀸𑀦𑀺, 𑀅𑀥𑀺𑀫𑁄𑀓𑁆𑀔𑀲𑀻𑀲𑀸𑀤𑀻𑀦𑀺 𑀧𑀭𑀺𑀬𑀸𑀤𑀓𑀸𑀦𑀺, 𑀧𑀭𑀺𑀬𑀸𑀤𑀓𑀨𑀮𑀁 𑀕𑁄𑀘𑀭𑀲𑀻𑀲𑀁. 𑀢𑀜𑁆𑀳𑀺 𑀯𑀺𑀲𑀬𑀚𑁆𑀛𑀢𑁆𑀢𑀨𑀮𑀯𑀺𑀫𑁄𑀓𑁆𑀔𑁄𑀢𑀺. 𑀧𑀭𑀺𑀬𑀸𑀤𑀓𑀲𑁆𑀲 𑀫𑀕𑁆𑀕𑀲𑁆𑀲 𑀨𑀮𑀲𑁆𑀲 𑀘 𑀆𑀭𑀫𑁆𑀫𑀡𑀁 𑀲𑀗𑁆𑀔𑀸𑀭𑀲𑀻𑀲𑀁 𑀲𑀗𑁆𑀔𑀸𑀭𑀯𑀺𑀯𑁂𑀓𑀪𑀽𑀢𑁄 𑀦𑀺𑀭𑁄𑀥𑁄𑀢𑀺 𑀧𑀭𑀺𑀬𑀸𑀤𑀺𑀬𑀺𑀢𑀩𑁆𑀩𑀸𑀦𑀁 𑀧𑀭𑀺𑀬𑀸𑀤𑀓𑀨𑀮𑀸𑀭𑀫𑁆𑀫𑀡𑀸𑀦𑀁 𑀲𑀳 𑀯𑀺𑀬 𑀲𑀁𑀲𑀺𑀤𑁆𑀥𑀺𑀤𑀲𑁆𑀲𑀦𑁂𑀦 𑀲𑀫𑀲𑀻𑀲𑀺𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁧.𑁮𑁭) 𑀢𑁂𑀭𑀲 𑀲𑀻𑀲𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀇𑀥 𑀧𑀦 ‘‘𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀆𑀲𑀯𑀧𑀭𑀺𑀬𑀸𑀤𑀸𑀦𑀜𑁆𑀘 𑀳𑁄𑀢𑀺 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀜𑁆𑀘𑀸’’𑀢𑀺 𑀯𑀘𑀦𑀢𑁄 𑀢𑁂𑀲𑀼 𑀓𑀺𑀮𑁂𑀲𑀧𑀯𑀢𑁆𑀢𑀲𑀻𑀲𑀸𑀦𑀫𑁂𑀯 𑀯𑀲𑁂𑀦 𑀬𑁄𑀚𑀦𑀁 𑀓𑀭𑁄𑀦𑁆𑀢𑁄 ‘‘𑀢𑀢𑁆𑀣 𑀓𑀺𑀮𑁂𑀲𑀲𑀻𑀲’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀯𑀢𑁆𑀢𑀲𑀻𑀲𑀫𑁆𑀧𑀺 𑀯𑀝𑁆𑀝𑀢𑁄 𑀯𑀼𑀝𑁆𑀞𑀳𑀦𑁆𑀢𑁄 𑀫𑀕𑁆𑀕𑁄 𑀘𑀼𑀢𑀺𑀢𑁄 𑀉𑀤𑁆𑀥𑀁 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑀯𑀲𑁂𑀦 𑀬𑀤𑀺𑀧𑀺 𑀧𑀭𑀺𑀬𑀸𑀤𑀺𑀬𑀢𑀺, 𑀬𑀸𑀯 𑀧𑀦 𑀘𑀼𑀢𑀺, 𑀢𑀸𑀯 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄 ‘‘𑀧𑀯𑀢𑁆𑀢𑀲𑀻𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀘𑀼𑀢𑀺𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀢𑀻’’𑀢𑀺 𑀆𑀳. 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑁂𑀦 𑀧𑀦 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀁 𑀯𑀺𑀬 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀸 𑀧𑀘𑁆𑀘𑀯𑁂𑀓𑁆𑀔𑀡𑀯𑀸𑀭𑀸 𑀘 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑀲𑁆𑀲𑁂𑀯 𑀯𑀸𑀭𑀸𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀦𑁆𑀢𑀺. ‘‘𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀻’’𑀢𑀺 (𑀫. 𑀦𑀺. 𑁧.𑁭𑁮; 𑀲𑀁. 𑀦𑀺. 𑁩.𑁧𑁨, 𑁧𑁪) 𑀯𑀘𑀦𑀢𑁄 𑀳𑀺 𑀧𑀘𑁆𑀘𑀯𑁂𑀓𑁆𑀔𑀡𑀧𑀭𑀺𑀲𑀫𑀸𑀧𑀦𑁂𑀦 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑀁 𑀲𑀫𑀸𑀧𑀺𑀢𑀁 𑀦𑀸𑀫 𑀳𑁄𑀢𑀺. 𑀢𑀁 𑀧𑀦 𑀧𑀭𑀺𑀲𑀫𑀸𑀧𑀦𑀁 𑀬𑀤𑀺 𑀘𑀼𑀢𑀺𑀘𑀺𑀢𑁆𑀢𑁂𑀦 𑀳𑁄𑀢𑀺, 𑀢𑁂𑀦𑁂𑀯 𑀚𑀻𑀯𑀺𑀢𑀧𑀭𑀺𑀲𑀫𑀸𑀧𑀦𑀜𑁆𑀘 𑀳𑁄𑀢𑀻𑀢𑀺 𑀇𑀫𑀸𑀬 𑀯𑀸𑀭𑀘𑀼𑀢𑀺𑀲𑀫𑀢𑀸𑀬 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸𑀦𑀁 𑀅𑀧𑀼𑀩𑁆𑀩𑀸𑀘𑀭𑀺𑀫𑀢𑀸 𑀳𑁄𑀢𑀻𑀢𑀺 𑀆𑀳 ‘‘𑀯𑀸𑀭𑀲𑀫𑀢𑀸𑀬𑀸’’𑀢𑀺. 𑀪𑀯𑀗𑁆𑀕𑀁 𑀑𑀢𑀭𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺 𑀏𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀦𑀘𑀺𑀢𑁆𑀢𑀫𑁂𑀯 𑀪𑀯𑀗𑁆𑀕𑁄𑀢𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁭. 𑀫𑀳𑀸𑀧𑀬𑁄𑀕𑁄𑀢𑀺 𑀫𑀳𑀸𑀓𑀺𑀭𑀺𑀬𑁄 𑀯𑀺𑀧𑀢𑁆𑀢𑀺𑀓𑀭𑀡𑀫𑀳𑀸𑀫𑁂𑀖𑀼𑀝𑁆𑀞𑀸𑀦𑀸𑀓𑀸𑀭𑀯𑀺𑀦𑀸𑀲𑁄. 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀯𑀺𑀦𑀸𑀲𑁄 𑀦𑀧𑁆𑀧𑀯𑀢𑁆𑀢𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁧𑁮. 𑀅𑀭𑀡𑀻𑀬𑀢𑁆𑀢𑀸𑀢𑀺 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑀢𑁆𑀢𑀸.

𑁨𑁦. 𑀬𑀸𑀬 𑀓𑀢𑀓𑀺𑀘𑁆𑀘𑀢𑀸 𑀳𑁄𑀢𑀺, 𑀢𑀸𑀬 𑀅𑀕𑁆𑀕𑀯𑀺𑀚𑁆𑀚𑀸𑀬 𑀅𑀥𑀺𑀕𑀢𑀸𑀬 𑀢𑁂𑀯𑀺𑀚𑁆𑀚𑀢𑀸𑀪𑀸𑀯𑁄 𑀦𑀺𑀧𑁆𑀧𑀭𑀺𑀬𑀸𑀬𑀢𑀸, 𑀲𑀸 𑀘 𑀆𑀕𑀫𑀦𑀯𑀲𑁂𑀦 𑀲𑀺𑀤𑁆𑀥𑀸 𑀲𑀸𑀢𑀺𑀲𑀬𑀸 𑀢𑁂𑀯𑀺𑀚𑁆𑀚𑀢𑀸𑀢𑀺 𑀆𑀳 ‘‘𑀆𑀕𑀫𑀦𑀻𑀬𑀫𑁂𑀯 𑀥𑀼𑀭’’𑀦𑁆𑀢𑀺.

𑁨𑁨. 𑀢𑀢𑁆𑀣 𑀘𑀸𑀢𑀺 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑁆𑀧𑀢𑁆𑀢𑀺𑀬𑀸 𑀆𑀥𑀸𑀭𑀪𑀸𑀯𑁂 𑀯𑀸. 𑀢𑀢𑁆𑀣𑁂𑀯 𑀳𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺.

𑁨𑁩. 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀘 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀲𑀘𑁆𑀘𑁂𑀲𑀽𑀢𑀺 𑀅𑀢𑁆𑀣𑁄.

𑁨𑁪. ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀓𑁂 (𑀫. 𑀦𑀺. 𑁨.𑁨𑁪𑁮; 𑁩.𑁩𑁧𑁨; 𑀧𑀝𑀺. 𑀫. 𑁧.𑁨𑁦𑁯; 𑀥. 𑀲. 𑁨𑁪𑁮) 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀅𑀦𑁆𑀢𑁂 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀯𑀢𑁆𑀯𑀸 ‘‘𑀬𑀢𑁄 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀇𑀫𑁂 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄’’𑀢𑀺 𑀬𑀤𑀺𑀧𑀺 𑀫𑀳𑀸𑀦𑀺𑀤𑀸𑀦𑀲𑀼𑀢𑁆𑀢𑁂 𑀯𑀼𑀢𑁆𑀢𑀁, 𑀢𑀁 𑀧𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀲𑁂𑀝𑁆𑀞𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀇𑀥 𑀓𑀻𑀝𑀸𑀕𑀺𑀭𑀺𑀲𑀼𑀢𑁆𑀢𑀯𑀲𑁂𑀦 𑀲𑀩𑁆𑀩𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀲𑀗𑁆𑀕𑀳𑀢𑁆𑀣𑀁 ‘‘𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀲𑀳𑀚𑀸𑀢𑀦𑀸𑀫𑀓𑀸𑀬𑁂𑀦 𑀧𑀝𑀺𑀮𑀪𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺 𑀆𑀳. 𑀓𑀻𑀝𑀸𑀕𑀺𑀭𑀺𑀲𑀼𑀢𑁆𑀢𑁂 𑀳𑀺 ‘‘𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀬𑁂 𑀢𑁂 𑀲𑀦𑁆𑀢𑀸 𑀯𑀺𑀫𑁄𑀓𑁆𑀔𑀸 𑀅𑀢𑀺𑀓𑁆𑀓𑀫𑁆𑀫 𑀭𑀽𑀧𑁂 𑀆𑀭𑀼𑀧𑁆𑀧𑀸, 𑀢𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄’’𑀢𑀺 (𑀫. 𑀦𑀺. 𑁨.𑁧𑁮𑁨) 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀘𑀢𑁆𑀢𑀸𑀭𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸 𑀯𑀼𑀢𑁆𑀢𑀸, 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀲𑁂𑀝𑁆𑀞𑁄 𑀘 𑀯𑀼𑀢𑁆𑀢𑀮𑀓𑁆𑀔𑀡𑁄𑀧𑀧𑀢𑁆𑀢𑀺𑀢𑁄𑀢𑀺. 𑀓𑀸𑀬𑀲𑀓𑁆𑀔𑀺𑀫𑁆𑀳𑀺𑀧𑀺 𑀏𑀲𑁂𑀯 𑀦𑀬𑁄.

𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀻𑀢𑀺 𑀦 𑀆𑀲𑀯𑀸 𑀧𑀜𑁆𑀜𑀸𑀬 𑀧𑀲𑁆𑀲𑀦𑁆𑀢𑀺, 𑀤𑀲𑁆𑀲𑀦𑀓𑀸𑀭𑀡𑀸 𑀧𑀦 𑀧𑀭𑀺𑀓𑁆𑀔𑀻𑀡𑀸 𑀤𑀺𑀲𑁆𑀯𑀸 𑀧𑀭𑀺𑀓𑁆𑀔𑀻𑀡𑀸𑀢𑀺 𑀯𑀼𑀢𑁆𑀢𑀸. 𑀤𑀲𑁆𑀲𑀦𑀸𑀬𑀢𑁆𑀢𑀧𑀭𑀺𑀓𑁆𑀔𑀬𑀢𑁆𑀢𑀸 𑀏𑀯 𑀳𑀺 𑀤𑀲𑁆𑀲𑀦𑀁 𑀧𑀼𑀭𑀺𑀫𑀓𑀺𑀭𑀺𑀬𑀸 𑀳𑁄𑀢𑀻𑀢𑀺. 𑀦𑀸𑀫𑀦𑀺𑀲𑁆𑀲𑀺𑀢𑀓𑁄 𑀏𑀲𑁄𑀢𑀺 𑀏𑀲𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀭𑀽𑀧𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀦𑀸𑀫𑀁 𑀦𑀺𑀲𑁆𑀲𑀸𑀬 𑀞𑀺𑀢𑁄 𑀧𑀼𑀦 𑀢𑀢𑁄 𑀫𑀼𑀘𑁆𑀘𑀦𑀢𑁄 ‘‘𑀦𑀸𑀫𑀦𑀺𑀲𑁆𑀲𑀺𑀢𑀓𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀘 𑀲𑀸𑀥𑀓𑀁 𑀲𑀼𑀢𑁆𑀢𑀁 𑀯𑀢𑁆𑀯𑀸 ‘‘𑀓𑀸𑀬𑀤𑁆𑀯𑀬𑀢𑁄 𑀲𑀼𑀯𑀺𑀫𑀼𑀢𑁆𑀢𑀢𑁆𑀢𑀸 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄’’𑀢𑀺 𑀆𑀳𑀸𑀢𑀺 𑀅𑀢𑁆𑀣𑁄. 𑀲𑀼𑀢𑁆𑀢𑁂 𑀳𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀮𑀸𑀪𑀺𑀦𑁄 𑀉𑀧𑀲𑀻𑀯𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑀕𑀯𑀢𑀸 𑀦𑀸𑀫𑀓𑀸𑀬𑀸 𑀯𑀺𑀫𑀼𑀢𑁆𑀢𑁄𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀢𑀺 𑀫𑀼𑀦𑀺 𑀅𑀓𑁆𑀔𑀸𑀢𑁄𑀢𑀺.

𑀧𑀞𑀫𑀢𑁆𑀣𑁂𑀭𑀯𑀸𑀤𑁂 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀯𑀺𑀫𑀼𑀢𑁆𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄, 𑀤𑀼𑀢𑀺𑀬𑀢𑁆𑀣𑁂𑀭𑀯𑀸𑀤𑁂 𑀉𑀪𑀢𑁄 𑀪𑀸𑀕𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀢𑀺, 𑀢𑀢𑀺𑀬𑀢𑁆𑀣𑁂𑀭𑀯𑀸𑀤𑁂 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀤𑁆𑀯𑁂 𑀯𑀸𑀭𑁂 𑀯𑀺𑀫𑀼𑀢𑁆𑀢𑁄𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀢𑀢𑁆𑀣 𑀯𑀺𑀫𑀼𑀢𑁆𑀢𑁄𑀢𑀺 𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑁄, 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀦𑁂𑀳𑀺 𑀯𑀸 𑀓𑀸𑀬𑀤𑁆𑀯𑀬𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀭𑀽𑀧𑀸𑀯𑀘𑀭𑀁 𑀧𑀦 𑀦𑀸𑀫𑀓𑀸𑀬𑀢𑁄 𑀘 𑀯𑀺𑀫𑀼𑀢𑁆𑀢𑀦𑁆𑀢𑀺 𑀦𑀻𑀯𑀭𑀡𑀲𑀗𑁆𑀔𑀸𑀢𑀦𑀸𑀫𑀓𑀸𑀬𑀢𑁄 𑀯𑀺𑀫𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀜𑁆𑀳𑀺 𑀦𑀻𑀯𑀭𑀡𑀤𑀽𑀭𑀻𑀪𑀸𑀯𑁂𑀦 𑀦𑀸𑀫𑀓𑀸𑀬𑀢𑁄 𑀭𑀽𑀧𑀢𑀡𑁆𑀳𑀸𑀯𑀺𑀓𑁆𑀔𑀫𑁆𑀪𑀦𑁂𑀦 𑀭𑀽𑀧𑀓𑀸𑀬𑀢𑁄 𑀘 𑀯𑀺𑀫𑀼𑀢𑁆𑀢𑀢𑁆𑀢𑀸 𑀏𑀓𑀤𑁂𑀲𑁂𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀧𑀸𑀤𑀓𑀪𑀽𑀢𑀁 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀦𑀸𑀫𑀮𑀸𑀪𑀲𑁆𑀲 𑀓𑀸𑀭𑀡𑀁 𑀪𑀯𑀺𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁫. 𑀏𑀢𑁂𑀲𑀼 𑀳𑀺 𑀏𑀓𑁄𑀧𑀺 𑀅𑀝𑁆𑀞𑀯𑀺𑀫𑁄𑀓𑁆𑀔𑀮𑀸𑀪𑀻 𑀦 𑀳𑁄𑀢𑀻𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀪𑀸𑀯𑀲𑁆𑀲 𑀓𑀸𑀭𑀡𑀪𑀽𑀢𑀁 𑀭𑀽𑀧𑀓𑀸𑀬𑀢𑁄 𑀯𑀺𑀫𑀼𑀢𑁆𑀢𑀁 𑀏𑀓𑀫𑁆𑀧𑀺 𑀯𑀺𑀫𑁄𑀓𑁆𑀔𑀁 𑀅𑀦𑀥𑀺𑀕𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀭𑀽𑀧𑀸𑀯𑀘𑀭𑁂𑀲𑀼 𑀳𑀺 𑀏𑀓𑀫𑁆𑀧𑀺 𑀅𑀥𑀺𑀕𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀪𑀸𑀯𑀓𑀸𑀭𑀡𑀧𑀝𑀺𑀮𑀸𑀪𑀢𑁄 𑀅𑀝𑁆𑀞𑀯𑀺𑀫𑁄𑀓𑁆𑀔𑁂𑀓𑀤𑁂𑀲𑁂𑀦 𑀢𑁂𑀦 𑀢𑀁𑀦𑀸𑀫𑀤𑀸𑀦𑁂 𑀲𑀫𑀢𑁆𑀣𑁂𑀦 ‘‘𑀅𑀝𑁆𑀞𑀯𑀺𑀫𑁄𑀓𑁆𑀔𑀮𑀸𑀪𑀻’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂𑀲𑀼 𑀧𑀦𑀸’’𑀢𑀺𑀆𑀤𑀺.

𑁨𑁬. 𑀨𑀼𑀝𑁆𑀞𑀦𑁆𑀢𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀨𑀼𑀝𑁆𑀞𑀸𑀦𑀁 𑀅𑀦𑁆𑀢𑁄 𑀨𑀼𑀝𑁆𑀞𑀦𑁆𑀢𑁄, 𑀨𑀼𑀝𑁆𑀞𑀸𑀦𑀁 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀁 𑀅𑀦𑀦𑁆𑀢𑀭𑁄 𑀓𑀸𑀮𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀘𑁂𑀢𑁆𑀣 𑀉𑀧𑀬𑁄𑀕𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀨𑀼𑀝𑁆𑀞𑀸𑀦𑀦𑁆𑀢𑀭𑀓𑀸𑀮𑀫𑁂𑀯 𑀲𑀘𑁆𑀙𑀺𑀓𑀭𑁄𑀢𑀺 𑀲𑀘𑁆𑀙𑀺𑀓𑀸𑀢𑀩𑁆𑀩𑁄𑀧𑀸𑀬𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁧𑁬𑁫) 𑀯𑀺𑀬 𑀪𑀸𑀯𑀦𑀧𑀼𑀁𑀲𑀓𑀁 𑀯𑀸 𑀏𑀢𑀁. 𑀬𑁄 𑀳𑀺 𑀅𑀭𑀽𑀧𑀚𑁆𑀛𑀸𑀦𑁂𑀦 𑀭𑀽𑀧𑀓𑀸𑀬𑀢𑁄 𑀦𑀸𑀫𑀓𑀸𑀬𑁂𑀓𑀤𑁂𑀲𑀢𑁄 𑀘 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑁄, 𑀢𑁂𑀦 𑀦𑀺𑀭𑁄𑀥𑀲𑀗𑁆𑀔𑀸𑀢𑁄 𑀯𑀺𑀫𑁄𑀓𑁆𑀔𑁄 𑀆𑀮𑁄𑀘𑀺𑀢𑁄 𑀧𑀓𑀸𑀲𑀺𑀢𑁄 𑀯𑀺𑀬 𑀳𑁄𑀢𑀺, 𑀦 𑀧𑀦 𑀓𑀸𑀬𑁂𑀦 𑀲𑀘𑁆𑀙𑀺𑀓𑀢𑁄. 𑀦𑀺𑀭𑁄𑀥𑀁 𑀧𑀦 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀏𑀓𑀘𑁆𑀘𑁂𑀲𑀼 𑀆𑀲𑀯𑁂𑀲𑀼 𑀔𑁂𑀧𑀺𑀢𑁂𑀲𑀼 𑀢𑁂𑀦 𑀲𑁄 𑀲𑀘𑁆𑀙𑀺𑀓𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀲𑁄 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀦𑀺𑀭𑁄𑀥𑀁 𑀬𑀣𑀸𑀆𑀮𑁄𑀘𑀺𑀢𑀁 𑀦𑀸𑀫𑀓𑀸𑀬𑁂𑀦 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀓𑀸𑀬𑀲𑀓𑁆𑀔𑀻𑀢𑀺 𑀯𑀼𑀘𑁆𑀘𑀢𑀺, 𑀦 𑀢𑀼 𑀯𑀺𑀫𑀼𑀢𑁆𑀢𑁄𑀢𑀺 𑀏𑀓𑀘𑁆𑀘𑀸𑀦𑀁 𑀆𑀲𑀯𑀸𑀦𑀁 𑀅𑀧𑀭𑀺𑀓𑁆𑀔𑀻𑀡𑀢𑁆𑀢𑀸.

𑁨𑁭. 𑀤𑀺𑀝𑁆𑀞𑀢𑁆𑀢𑀸 𑀧𑀢𑁆𑀢𑁄𑀢𑀺 𑀏𑀢𑁂𑀦 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑀲𑀗𑁆𑀔𑀸𑀢𑀸𑀬 𑀤𑀺𑀝𑁆𑀞𑀺𑀬𑀸 𑀦𑀺𑀭𑁄𑀥𑀲𑁆𑀲 𑀧𑀢𑁆𑀢𑀢𑀁 𑀤𑀻𑀧𑁂𑀢𑀺. ‘‘𑀤𑀺𑀝𑁆𑀞𑀦𑁆𑀢𑀁 𑀧𑀢𑁆𑀢𑁄’’𑀢𑀺 𑀯𑀸 𑀧𑀸𑀞𑁄, 𑀤𑀲𑁆𑀲𑀦𑀲𑀗𑁆𑀔𑀸𑀢𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀁 𑀧𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀞𑀫𑀨𑀮𑀢𑁄 𑀧𑀝𑁆𑀞𑀸𑀬 𑀳𑀺 𑀬𑀸𑀯 𑀅𑀕𑁆𑀕𑀫𑀕𑁆𑀕𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄𑀢𑀺.

𑁨𑁮. 𑀇𑀫𑀁 𑀧𑀦 𑀦𑀬𑀁 ‘‘𑀦𑁄’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀏𑀢𑁆𑀣 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀪𑀸𑀯𑀧𑁆𑀧𑀢𑁆𑀢𑀸𑀦𑀁 𑀧𑀜𑁆𑀜𑀸𑀦𑀸𑀦𑀢𑁆𑀢𑀁 𑀯𑀼𑀢𑁆𑀢𑀁, 𑀦 𑀧𑀦 𑀬𑁂𑀦 𑀯𑀺𑀲𑁂𑀲𑁂𑀦 𑀲𑁄 𑀯𑀺𑀲𑁂𑀲𑁄 𑀧𑀢𑁆𑀢𑁄, 𑀲𑁄 𑀯𑀼𑀢𑁆𑀢𑁄𑀢𑀺 𑀇𑀫𑀁 𑀤𑁄𑀲𑀁 𑀤𑀺𑀲𑁆𑀯𑀸 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀆𑀕𑀫𑀝𑁆𑀞𑀓𑀣𑀸𑀲𑀽𑀢𑀺 𑀘 𑀯𑀘𑀦𑁂𑀦 𑀆𑀕𑀫𑀦𑀻𑀬𑀦𑀸𑀦𑀢𑁆𑀢𑀲𑀦𑁆𑀦𑀺𑀝𑁆𑀞𑀸𑀦𑀫𑁂𑀯 𑀣𑀺𑀭𑀁 𑀓𑀭𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀤𑁆𑀤𑀳𑀦𑁆𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀏𑀢𑁂𑀦 𑀲𑀩𑁆𑀩𑀣𑀸 𑀅𑀯𑀺𑀫𑀼𑀢𑁆𑀢𑀲𑁆𑀲𑀧𑀺 𑀲𑀤𑁆𑀥𑀸𑀫𑀢𑁆𑀢𑁂𑀦 𑀯𑀺𑀫𑀼𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄𑀢𑀺 𑀯𑀸 𑀲𑀤𑁆𑀥𑀸𑀬 𑀅𑀥𑀺𑀫𑀼𑀢𑁆𑀢𑁄𑀢𑀺 𑀅𑀢𑁆𑀣𑁄.

𑁨𑁯. 𑀧𑀜𑁆𑀜𑀁 𑀯𑀸𑀳𑁂𑀢𑀻𑀢𑀺 𑀧𑀜𑁆𑀜𑀁 𑀲𑀸𑀢𑀺𑀲𑀬𑀁 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀸 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀳𑀢𑀻𑀢𑀺 𑀦𑀺𑀩𑁆𑀩𑀸𑀦𑀸𑀪𑀺𑀫𑀼𑀔𑀁 𑀕𑀫𑁂𑀢𑀻𑀢𑀺 𑀅𑀢𑁆𑀣𑁄.

𑁩𑁧. 𑀏𑀯𑀁 𑀫𑀕𑁆𑀕𑀓𑁆𑀔𑀡𑁂𑀧𑀻𑀢𑀺 𑀅𑀬𑀁 𑀅𑀧𑀺-𑀲𑀤𑁆𑀤𑁄 𑀓𑀲𑁆𑀫𑀸 𑀯𑀼𑀢𑁆𑀢𑁄, 𑀦𑀦𑀼 𑀅𑀭𑀺𑀬𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑁄 𑀫𑀕𑁆𑀕𑀓𑁆𑀔𑀡𑁂 𑀏𑀯 𑀳𑁄𑀢𑀻𑀢𑀺 𑀢𑀤𑀸 𑀏𑀯 𑀲𑁄𑀢𑀸𑀧𑀦𑁆𑀦𑁄 𑀦𑀸𑀫𑀸𑀢𑀺 𑀆𑀧𑀦𑁆𑀦𑀦𑁆𑀢𑀺? 𑀦𑀸𑀧𑀦𑁆𑀦𑀁. 𑀫𑀕𑁆𑀕𑁂𑀦 𑀳𑀺 𑀅𑀢𑁆𑀢𑀦𑀸 𑀲𑀤𑀺𑀲𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀯𑀸 𑀲𑀢𑁆𑀢𑀗𑁆𑀕𑀺𑀓𑀲𑁆𑀲 𑀯𑀸 𑀨𑀮𑀲𑁆𑀲 𑀲𑁄𑀢𑁄𑀢𑀺 𑀦𑀸𑀫𑀁 𑀤𑀺𑀦𑁆𑀦𑀦𑁆𑀢𑀺 𑀢𑁂𑀦𑀧𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀲𑁄𑀢𑀸𑀧𑀦𑁆𑀦𑀪𑀸𑀯𑀢𑁄, 𑀲𑁄𑀢𑁂𑀦 𑀯𑀸 𑀫𑀕𑁆𑀕𑁂𑀦 𑀧𑀯𑀢𑁆𑀢𑁂𑀢𑀼𑀁 𑀅𑀧𑀭𑀺𑀳𑀻𑀦𑁂𑀦 𑀨𑀮𑀝𑁆𑀞𑁄𑀧𑀺 𑀲𑀫𑀦𑁆𑀦𑀸𑀕𑀢𑁄 𑀏𑀯 𑀦𑀸𑀫, 𑀦 𑀘 𑀢𑁂𑀦 𑀧𑀞𑀫𑀫𑀕𑁆𑀕𑀓𑁆𑀔𑀡𑁂 𑀯𑀺𑀬 𑀲𑁄𑀢𑁄 𑀲𑀫𑀸𑀧𑀚𑁆𑀚𑀺𑀬𑀫𑀸𑀦𑁄, 𑀢𑀲𑁆𑀫𑀸 𑀲𑀫𑀸𑀧𑀦𑁆𑀦𑀲𑁄𑀢𑀢𑁆𑀢𑀸 𑀧𑀞𑀫𑀨𑀮𑀢𑁄 𑀧𑀝𑁆𑀞𑀸𑀬 ‘‘𑀲𑁄𑀢𑀸𑀧𑀦𑁆𑀦𑁄’’𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑁄. 𑀯𑀼𑀢𑁆𑀢𑀜𑁆𑀳𑀺 ‘‘𑀬𑁂 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀫𑀬𑀺 𑀅𑀯𑁂𑀘𑁆𑀘𑀧𑁆𑀧𑀲𑀦𑁆𑀦𑀸, 𑀲𑀩𑁆𑀩𑁂 𑀢𑁂 𑀲𑁄𑀢𑀸𑀧𑀦𑁆𑀦𑀸. 𑀢𑁂𑀲𑀁 𑀲𑁄𑀢𑀸𑀧𑀦𑁆𑀦𑀸𑀦𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸, 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸’’𑀢𑀺 (𑀅. 𑀦𑀺. 𑁧𑁦.𑁬𑁪). 𑀢𑀢𑁆𑀣 𑀤𑀼𑀢𑀺𑀬𑀨𑀮𑀝𑁆𑀞𑀸𑀤𑀻𑀦𑀁 𑀯𑀺𑀲𑀼𑀁 𑀦𑀸𑀫𑀁 𑀅𑀢𑁆𑀣𑀻𑀢𑀺 𑀧𑀞𑀫𑀨𑀮𑀝𑁆𑀞𑁄 𑀏𑀯 𑀇𑀢𑀭𑁂𑀳𑀺 𑀯𑀺𑀲𑁂𑀲𑀺𑀬𑀫𑀸𑀦𑁄 ‘‘𑀲𑁄𑀢𑀸𑀧𑀦𑁆𑀦𑁄’’𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑁄𑀢𑀺 𑀲𑁄 𑀏𑀯 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀧𑀝𑀺𑀮𑀤𑁆𑀥𑀫𑀕𑁆𑀕𑁂𑀦 𑀩𑀼𑀚𑁆𑀛𑀢𑀻𑀢𑀺 𑀏𑀢𑁂𑀦 𑀧𑀝𑀺𑀮𑀤𑁆𑀥𑀫𑀕𑁆𑀕𑀲𑁆𑀲 𑀘𑀢𑀼𑀲𑀘𑁆𑀘𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀻𑀦𑀁 𑀉𑀧𑀦𑀺𑀲𑁆𑀲𑀬𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀫𑁆𑀩𑁄𑀥𑀺 𑀧𑀭𑀁 𑀅𑀬𑀦𑀁 𑀦𑀺𑀲𑁆𑀲𑀬𑁄 𑀏𑀢𑀲𑁆𑀲𑀸𑀢𑀺 𑀳𑀺 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄𑀢𑀺. 𑀤𑀼𑀢𑀺𑀬𑁂𑀦𑀢𑁆𑀣𑁂𑀦 𑀲𑀫𑁆𑀩𑁄𑀥𑀺 𑀧𑀭𑀁 𑀅𑀬𑀦𑀁 𑀕𑀢𑀺 𑀏𑀢𑀲𑁆𑀲𑀸𑀢𑀺 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄.

𑁩𑁨. 𑀓𑁂𑀯𑀮𑁂𑀦 𑀓𑀼𑀮𑀲𑀤𑁆𑀤𑁂𑀦 𑀫𑀳𑀸𑀓𑀼𑀮𑀫𑁂𑀯 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀫𑀳𑀸𑀪𑁄𑀕𑀓𑀼𑀮𑁂𑀲𑀼𑀬𑁂𑀯 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀅𑀢𑁆𑀣𑁄’’𑀢𑀺.

𑁩𑁩. 𑀔𑀦𑁆𑀥𑀩𑀻𑀚𑀁 𑀦𑀸𑀫 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁. 𑀇𑀳𑀝𑁆𑀞𑀓𑀦𑀺𑀚𑁆𑀛𑀸𑀦𑀺𑀓𑀯𑀲𑁂𑀦𑁂𑀯 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑀣𑀺𑀢𑀸𑀢𑀺 𑀲𑀚𑁆𑀛𑀸𑀦𑀓𑁄 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑀲𑀫𑀼𑀘𑁆𑀙𑁂𑀤𑁂 𑀅𑀓𑀢𑁂𑀧𑀺 𑀅𑀦𑀸𑀕𑀸𑀫𑀺𑀲𑀪𑀸𑀕𑁄 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄 𑀇𑀥 𑀕𑀡𑀦𑀽𑀧𑀕𑁄 𑀦 𑀳𑁄𑀢𑀺, 𑀳𑁂𑀝𑁆𑀞𑀸 𑀉𑀧𑀭𑀺 𑀘 𑀲𑀁𑀲𑀭𑀡𑀓𑁄 𑀓𑀸𑀫𑀪𑀯𑀕𑀢𑁄 𑀳𑀻𑀦𑀚𑁆𑀛𑀸𑀦𑀓𑁄 𑀇𑀥 𑀕𑀡𑀦𑀽𑀧𑀕𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁪. 𑀬𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 ‘‘𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀢𑀦𑀼𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺𑀆𑀤𑀺 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄.

𑁩𑁬. 𑀉𑀧𑀧𑀦𑁆𑀦𑀁 𑀯𑀸 𑀲𑀫𑀦𑀦𑁆𑀢𑀭𑀸𑀢𑀺 𑀉𑀧𑀧𑀦𑁆𑀦𑀁 𑀯𑀸 𑀏𑀢𑁂𑀦 𑀧𑀼𑀕𑁆𑀕𑀮𑁂𑀦 𑀳𑁄𑀢𑀺, 𑀅𑀣 𑀲𑀫𑀦𑀦𑁆𑀢𑀭𑀸 𑀅𑀭𑀺𑀬𑀫𑀕𑁆𑀕𑀁 𑀲𑀜𑁆𑀚𑀦𑁂𑀢𑀺. 𑀅𑀧𑁆𑀧𑀢𑁆𑀢𑀁 𑀯𑀸 𑀯𑁂𑀫𑀚𑁆𑀛𑀁 𑀆𑀬𑀼𑀧𑁆𑀧𑀫𑀸𑀡𑀦𑁆𑀢𑀺 𑀆𑀬𑀼𑀧𑁆𑀧𑀫𑀸𑀡𑀁 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑁂𑀫𑀚𑁆𑀛𑀁 𑀅𑀧𑁆𑀧𑀢𑁆𑀢𑀁 𑀳𑁄𑀢𑀺, 𑀏𑀢𑁆𑀣𑀦𑁆𑀢𑀭𑁂 𑀅𑀭𑀺𑀬𑀫𑀕𑁆𑀕𑀁 𑀲𑀜𑁆𑀚𑀦𑁂𑀢𑀻𑀢𑀺 𑀅𑀬𑀫𑁂𑀢𑁆𑀣 𑀧𑀸𑀴𑀺𑀅𑀢𑁆𑀣𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀅𑀧𑁆𑀧𑀢𑁆𑀯𑀸 𑀧𑀩𑁆𑀩𑀢𑀁 𑀦𑀤𑀻’’𑀢𑀺 𑀯𑀺𑀬 𑀆𑀬𑀼𑀧𑁆𑀧𑀫𑀸𑀡𑀁 𑀯𑁂𑀫𑀚𑁆𑀛𑀁 𑀅𑀧𑁆𑀧𑀢𑁆𑀢𑀁 𑀯𑀸 𑀳𑀼𑀢𑁆𑀯𑀸𑀢𑀺 𑀧𑀭𑀲𑀤𑁆𑀤𑀬𑁄𑀕𑁂 𑀧𑀭𑀢𑁄 𑀪𑀽𑀢𑁄 𑀳𑀼𑀢𑁆𑀯𑀸 𑀲𑀤𑁆𑀤𑁄 𑀯𑀘𑀦𑀲𑁂𑀲𑀪𑀽𑀢𑁄 𑀧𑀬𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁩𑁭. 𑀉𑀧𑀳𑀘𑁆𑀘𑀸𑀢𑀺 𑀏𑀢𑀲𑁆𑀲 𑀉𑀧𑀕𑀦𑁆𑀢𑁆𑀯𑀸𑀢𑀺 𑀅𑀢𑁆𑀣𑁄, 𑀢𑁂𑀦 𑀯𑁂𑀫𑀚𑁆𑀛𑀸𑀢𑀺𑀓𑁆𑀓𑀫𑁄 𑀓𑀸𑀮𑀓𑀺𑀭𑀺𑀬𑁄𑀧𑀕𑀫𑀦𑀜𑁆𑀘 𑀲𑀗𑁆𑀕𑀳𑀺𑀢𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑁂𑀫𑀚𑁆𑀛’’𑀦𑁆𑀢𑀺𑀆𑀤𑀺.

𑁪𑁦. 𑀉𑀤𑁆𑀥𑀁𑀯𑀸𑀳𑀺𑀪𑀸𑀯𑁂𑀦𑀸𑀢𑀺 𑀉𑀤𑁆𑀥𑀁 𑀯𑀳𑀢𑀻𑀢𑀺 𑀉𑀤𑁆𑀥𑀁𑀯𑀸𑀳𑀻, 𑀢𑀡𑁆𑀳𑀸𑀲𑁄𑀢𑀁 𑀯𑀝𑁆𑀝𑀲𑁄𑀢𑀁 𑀯𑀸, 𑀢𑀲𑁆𑀲 𑀪𑀸𑀯𑁄, 𑀢𑁂𑀦 𑀉𑀤𑁆𑀥𑀁𑀯𑀸𑀳𑀺𑀪𑀸𑀯𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀯𑀺𑀳𑁂𑀲𑀼 𑀉𑀤𑁆𑀥𑀁𑀲𑁄𑀢𑁄 𑀬𑀤𑀺𑀧𑀺 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻 𑀦 𑀳𑁄𑀢𑀺, 𑀬𑀢𑁆𑀣 𑀯𑀸 𑀢𑀢𑁆𑀣 𑀯𑀸 𑀕𑀦𑁆𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀼, 𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀧𑀦 𑀢𑀲𑁆𑀲 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑀸 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑀸 𑀘 𑀅𑀢𑁆𑀣𑀻𑀢𑀺 𑀢𑀢𑁆𑀣 𑀤𑀲 𑀅𑀦𑀸𑀕𑀸𑀫𑀺𑀦𑁄 𑀯𑀼𑀢𑁆𑀢𑀸, 𑀏𑀯𑀁 𑀅𑀢𑀧𑁆𑀧𑀸𑀤𑀻𑀲𑀼𑀧𑀺. 𑀅𑀦𑀼𑀧𑀳𑀘𑁆𑀘𑀢𑀮𑀸𑀢𑀺 𑀅𑀧𑁆𑀧𑀢𑁆𑀢𑀢𑀮𑀸. 𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻𑀦𑀁 𑀮𑀳𑀼𑀲𑀸𑀮𑀳𑀼𑀲𑀕𑀢𑀺𑀓𑀸 𑀏𑀯 𑀧𑀭𑀺𑀢𑁆𑀢𑀯𑀺𑀧𑀼𑀮𑀢𑀺𑀡𑀓𑀝𑁆𑀞𑀛𑀸𑀧𑀓𑀧𑀧𑁆𑀧𑀝𑀺𑀓𑀸𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸𑀯 𑀦𑀺𑀩𑁆𑀩𑀸𑀬𑀦𑀓𑀸𑀤𑀻𑀳𑀺 𑀅𑀥𑀺𑀫𑀢𑁆𑀢𑀢𑀸 𑀯𑀺𑀬 𑀲𑀫𑀼𑀤𑁆𑀤𑀁 𑀧𑀢𑁆𑀯𑀸 𑀦𑀺𑀩𑁆𑀩𑀸𑀬𑀦𑀓𑀢𑁄 𑀅𑀦𑀥𑀺𑀫𑀢𑁆𑀢𑀢𑀸 𑀯𑀺𑀬 𑀘 𑀅𑀦𑁆𑀢𑀭𑀸 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻𑀳𑀺 𑀉𑀤𑁆𑀥𑀁𑀲𑁄𑀢𑀢𑁄 𑀘 𑀅𑀥𑀺𑀫𑀢𑁆𑀢𑀸𑀦𑀥𑀺𑀫𑀢𑁆𑀢𑀢𑀸. 𑀢𑁂 𑀏𑀯 𑀳𑀺 𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄𑀢𑀺. 𑀢𑀢𑁄 𑀫𑀳𑀦𑁆𑀢𑀢𑀭𑁂𑀢𑀺 𑀯𑀘𑀦𑀁 𑀢𑀺𑀡𑀓𑀝𑁆𑀞𑀛𑀸𑀧𑀦𑀲𑀫𑀢𑁆𑀣𑀧𑀧𑁆𑀧𑀝𑀺𑀓𑀸𑀤𑀲𑁆𑀲𑀦𑀢𑁆𑀣𑀁, 𑀦 𑀅𑀥𑀺𑀫𑀢𑁆𑀢 𑀦𑀸𑀥𑀺𑀫𑀢𑁆𑀢𑀤𑀲𑁆𑀲𑀦𑀢𑁆𑀣𑀦𑁆𑀢𑀺.

𑀦𑁄 𑀘𑀲𑁆𑀲 𑀦𑁄 𑀘 𑀫𑁂 𑀲𑀺𑀬𑀸𑀢𑀺 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀤𑀺𑀓𑀁 𑀳𑁂𑀢𑀼𑀧𑀜𑁆𑀘𑀓𑀁 𑀦𑁄 𑀘 𑀅𑀲𑁆𑀲, 𑀯𑀺𑀜𑁆𑀜𑀸𑀡𑀸𑀤𑀺𑀓𑀁 𑀇𑀤𑀁 𑀨𑀮𑀧𑀜𑁆𑀘𑀓𑀁 𑀯𑀢𑁆𑀢𑀫𑀸𑀦𑀁 𑀦𑁄 𑀘 𑀫𑁂 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀅𑀢𑀻𑀢𑀪𑀯𑀲𑀁𑀲𑀺𑀤𑁆𑀥𑀺𑀢𑁄 𑀤𑀼𑀓𑁆𑀔𑀲𑀫𑀼𑀤𑀬𑀢𑁄 𑀇𑀫𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁄 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦 𑀔𑀦𑁆𑀥𑀸𑀦𑀁 𑀉𑀤𑀬𑀤𑀲𑁆𑀲𑀦𑀧𑀝𑀺𑀧𑀢𑁆𑀢𑀺 𑀯𑀼𑀢𑁆𑀢𑀸 𑀳𑁄𑀢𑀺. 𑀦 𑀪𑀯𑀺𑀲𑁆𑀲𑀢𑀺, 𑀦 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺 𑀬𑀤𑀺 𑀏𑀢𑀭𑀳𑀺 𑀳𑁂𑀢𑀼𑀧𑀜𑁆𑀘𑀓𑀁 𑀦 𑀪𑀯𑀺𑀲𑁆𑀲𑀢𑀺, 𑀅𑀦𑀸𑀕𑀢𑁂 𑀨𑀮𑀧𑀜𑁆𑀘𑀓𑀁 𑀦 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀧𑀘𑁆𑀘𑀬𑀦𑀺𑀭𑁄𑀥𑀝𑁆𑀞𑁂𑀦 𑀯𑀬𑀤𑀲𑁆𑀲𑀦𑀧𑀝𑀺𑀧𑀢𑁆𑀢𑀺 𑀯𑀼𑀢𑁆𑀢𑀸 𑀳𑁄𑀢𑀺, 𑀏𑀢𑀭𑀳𑀺 𑀅𑀦𑀸𑀕𑀢𑁂 𑀘 𑀅𑀢𑁆𑀢𑀢𑁆𑀢𑀦𑀺𑀬𑀦𑀺𑀯𑀸𑀭𑀡𑀯𑀲𑁂𑀦 𑀲𑀼𑀜𑁆𑀜𑀢𑀸𑀧𑀝𑀺𑀧𑀢𑁆𑀢𑀺 𑀯𑀸 𑀘𑀢𑀽𑀳𑀺𑀧𑀺 𑀯𑀼𑀢𑁆𑀢𑀸. 𑀬𑀤𑀢𑁆𑀣𑀻𑀢𑀺 𑀬𑀁 𑀅𑀢𑁆𑀣𑀺. 𑀪𑀽𑀢𑀦𑁆𑀢𑀺 𑀲𑀲𑀪𑀸𑀯𑀁 𑀦𑀺𑀩𑁆𑀩𑀢𑁆𑀢𑀁 𑀯𑀸 𑀬𑀣𑀸𑀤𑀺𑀝𑁆𑀞𑀉𑀤𑀬𑀩𑁆𑀩𑀬𑀁 𑀬𑀣𑀸𑀤𑀺𑀝𑁆𑀞𑀲𑀼𑀜𑁆𑀜𑀢𑀁 𑀯𑀸 𑀔𑀦𑁆𑀥𑀧𑀜𑁆𑀘𑀓𑀁 𑀧𑀭𑀺𑀓𑀧𑁆𑀧𑀺𑀢𑀇𑀢𑁆𑀣𑀺𑀧𑀼𑀭𑀺𑀲𑀲𑀢𑁆𑀢𑀸𑀤𑀺𑀪𑀸𑀯𑀭𑀳𑀺𑀢𑀁 𑀦𑀸𑀫𑀭𑀽𑀧𑀫𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀯𑀝𑁆𑀝𑀸𑀦𑀼𑀧𑀲𑁆𑀲𑀦𑀸𑀬 𑀯𑀺𑀯𑀝𑁆𑀝𑀫𑀸𑀦𑀲𑁄 𑀢𑀁 𑀪𑀽𑀢𑀁 𑀧𑀚𑀳𑀸𑀫𑀻𑀢𑀺 𑀉𑀧𑁂𑀓𑁆𑀔𑀁 𑀧𑀝𑀺𑀮𑀪𑀢𑀺, 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑁂𑀦 𑀉𑀧𑁂𑀓𑁆𑀔𑀓𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀪𑀯𑁂 𑀦 𑀭𑀚𑁆𑀚𑀢𑀺, 𑀲𑀫𑁆𑀪𑀯𑁂 𑀦 𑀭𑀚𑁆𑀚𑀢𑀻𑀢𑀺 𑀅𑀯𑀺𑀲𑀺𑀝𑁆𑀞𑁂 𑀯𑀺𑀲𑀺𑀝𑁆𑀞𑁂 𑀘 𑀪𑀯𑁂 𑀦 𑀭𑀚𑁆𑀚𑀢𑀻𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀧𑀦 𑀪𑀯𑁄 𑀪𑀯𑁄, 𑀅𑀦𑀸𑀕𑀢𑁄 𑀚𑀸𑀢𑀺𑀬𑀸 𑀕𑀳𑀡𑁂𑀦 𑀕𑀳𑀺𑀢𑁄 𑀲𑀫𑁆𑀪𑀯𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 𑀪𑀯𑁄𑀢𑀺 𑀪𑀽𑀢𑀫𑁂𑀯 𑀯𑀼𑀘𑁆𑀘𑀢𑀺, 𑀲𑀫𑁆𑀪𑀯𑁄 𑀢𑀤𑀸𑀳𑀸𑀭𑁄, 𑀢𑀲𑁆𑀫𑀺𑀁 𑀤𑁆𑀯𑀬𑁂 𑀦 𑀭𑀚𑁆𑀚𑀢𑀻𑀢𑀺 𑀲𑁂𑀓𑁆𑀔𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀪𑀽𑀢𑁂 𑀳𑀺 𑀲𑀲𑀫𑁆𑀪𑀯𑁂 𑀘 𑀯𑀺𑀭𑀸𑀕𑁄 𑀲𑁂𑀓𑁆𑀔𑀧𑀝𑀺𑀧𑀢𑁆𑀢𑀺. 𑀬𑀣𑀸𑀳 ‘‘𑀪𑀽𑀢𑀫𑀺𑀤𑀦𑁆𑀢𑀺, 𑀪𑀦𑁆𑀢𑁂, 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺, 𑀪𑀽𑀢𑀫𑀺𑀤𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀪𑀽𑀢𑀲𑁆𑀲 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀢𑀤𑀸𑀳𑀸𑀭𑀲𑀫𑁆𑀪𑀯𑀦𑁆𑀢𑀺 𑀬𑀣𑀸𑀪𑀽𑀢𑀁…𑀧𑁂… 𑀤𑀺𑀲𑁆𑀯𑀸 𑀢𑀤𑀸𑀳𑀸𑀭𑀲𑀫𑁆𑀪𑀯𑀲𑁆𑀲 𑀦𑀺𑀩𑁆𑀩𑀺𑀤𑀸𑀬…𑀧𑁂… 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀢𑀤𑀸𑀳𑀸𑀭𑀦𑀺𑀭𑁄𑀥𑀸𑀬 𑀬𑀁 𑀪𑀽𑀢𑀁, 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀬𑀣𑀸𑀪𑀽𑀢𑀁…𑀧𑁂… 𑀤𑀺𑀲𑁆𑀯𑀸 𑀦𑀺𑀭𑁄𑀥𑀥𑀫𑁆𑀫𑀲𑁆𑀲 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀏𑀯𑀁 𑀔𑁄, 𑀪𑀦𑁆𑀢𑁂, 𑀲𑁂𑀓𑁆𑀔𑁄 𑀳𑁄𑀢𑀻’’𑀢𑀺 (𑀲𑀁. 𑀦𑀺. 𑁨.𑁩𑁧). 𑀅𑀣𑀼𑀢𑁆𑀢𑀭𑀻𑀢𑀺 𑀅𑀣 𑀏𑀯𑀁 𑀅𑀭𑀚𑁆𑀚𑀫𑀸𑀦𑁄 𑀉𑀢𑁆𑀢𑀭𑀺 𑀲𑀦𑁆𑀢𑀁 𑀧𑀤𑀁 𑀦𑀺𑀩𑁆𑀩𑀸𑀦𑀁 𑀅𑀦𑀼𑀓𑁆𑀓𑀫𑁂𑀦 𑀫𑀕𑁆𑀕𑀧𑀜𑁆𑀜𑀸𑀬 𑀲𑀫𑁆𑀫𑀸 𑀧𑀲𑁆𑀲𑀢𑀺, 𑀢𑀜𑁆𑀘 𑀔𑁆𑀯𑀲𑁆𑀲 𑀧𑀤𑀁 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀘𑁆𑀙𑀺𑀓𑀢𑀁 𑀘𑀢𑀼𑀢𑁆𑀣𑀫𑀕𑁆𑀕𑁂𑀦𑁂𑀯 𑀲𑀘𑁆𑀙𑀺𑀓𑀸𑀢𑀩𑁆𑀩𑀲𑁆𑀲 𑀢𑀲𑁆𑀲 𑀢𑁂𑀦 𑀅𑀲𑀘𑁆𑀙𑀺𑀓𑀢𑀢𑁆𑀢𑀸.

𑀏𑀓𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁬𑁩. 𑀓𑀲𑁆𑀲𑀘𑀺 𑀓𑀺𑀮𑁂𑀲𑀲𑁆𑀲 𑀅𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸 𑀓𑀲𑁆𑀲𑀘𑀺 𑀓𑀣𑀜𑁆𑀘𑀺 𑀅𑀯𑀺𑀫𑀼𑀢𑁆𑀢𑁄 𑀓𑀸𑀫𑀪𑀯𑁄 𑀅𑀚𑁆𑀛𑀢𑁆𑀢𑀕𑁆𑀕𑀳𑀡𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄𑀢𑀺 𑀅𑀚𑁆𑀛𑀢𑁆𑀢𑀁 𑀦𑀸𑀫. 𑀢𑀢𑁆𑀣 𑀩𑀦𑁆𑀥𑀦𑀁 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑀁, 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑁄.

𑁮𑁩. 𑀓𑀸𑀭𑀡𑁂𑀦 𑀯𑀺𑀦𑀸 𑀧𑀯𑀢𑁆𑀢𑀳𑀺𑀢𑀘𑀺𑀢𑁆𑀢𑁄 𑀅𑀓𑀸𑀭𑀡𑀯𑀘𑁆𑀙𑀮𑁄. 𑀅𑀦𑀸𑀕𑀢𑀫𑁆𑀧𑀺 𑀧𑀬𑁄𑀚𑀦𑀁 𑀅𑀧𑁂𑀓𑁆𑀔𑀫𑀸𑀦𑁄 𑀧𑀼𑀭𑀺𑀫𑀕𑁆𑀕𑀳𑀺𑀢𑀁 𑀢𑀁 𑀓𑀢𑀁 𑀉𑀧𑀸𑀤𑀸𑀬 𑀓𑀢𑀜𑁆𑀜𑀽 𑀏𑀯 𑀦𑀸𑀫 𑀳𑁄𑀢𑀺, 𑀦 𑀧𑀼𑀩𑁆𑀩𑀓𑀸𑀭𑀻𑀢𑀺 𑀆𑀳 ‘‘𑀓𑀭𑀺𑀲𑁆𑀲𑀢𑀺 𑀫𑁂’’𑀢𑀺𑀆𑀤𑀺. 𑀢𑀫𑁄𑀚𑁄𑀢𑀺𑀧𑀭𑀸𑀬𑀡𑁄 𑀧𑀼𑀜𑁆𑀜𑀨𑀮𑀁 𑀅𑀦𑀼𑀧𑀚𑀻𑀯𑀦𑁆𑀢𑁄 𑀏𑀯 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀻𑀢𑀺 ‘‘𑀧𑀼𑀩𑁆𑀩𑀓𑀸𑀭𑀻’’𑀢𑀺 𑀯𑀼𑀢𑁆𑀢𑁄. ‘‘𑀇𑀡𑀁 𑀤𑁂𑀫𑀻’’𑀢𑀺 𑀲𑀜𑁆𑀜𑀁 𑀓𑀭𑁄𑀢𑀻𑀢𑀺 𑀏𑀯𑀁𑀲𑀜𑁆𑀜𑀁 𑀅𑀓𑀭𑁄𑀦𑁆𑀢𑁄𑀧𑀺 𑀓𑀭𑁄𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀅𑀢𑁆𑀣𑁄.