𑀓𑀣𑀸𑀯𑀢𑁆𑀣𑀼𑀧𑀓𑀭𑀡-𑀫𑀽𑀮𑀝𑀻𑀓𑀸

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸

𑀓𑀣𑀸𑀦𑀁 𑀯𑀢𑁆𑀣𑀼𑀪𑀸𑀯𑀢𑁄𑀢𑀺 𑀓𑀣𑀸𑀲𑀫𑀼𑀤𑀸𑀬𑀲𑁆𑀲 𑀧𑀓𑀭𑀡𑀲𑁆𑀲 𑀅𑀢𑁆𑀢𑀦𑁄 𑀏𑀓𑀤𑁂𑀲𑀸𑀦𑀁 𑀑𑀓𑀸𑀲𑀪𑀸𑀯𑀁 𑀯𑀤𑀢𑀺. 𑀲𑀫𑀼𑀤𑀸𑀬𑁂 𑀳𑀺 𑀏𑀓𑀤𑁂𑀲𑀸 𑀅𑀦𑁆𑀢𑁄𑀕𑀥𑀸𑀢𑀺. 𑀬𑁂𑀦 𑀧𑀓𑀸𑀭𑁂𑀦 𑀲𑀗𑁆𑀔𑁂𑀧𑁂𑀦 𑀅𑀤𑁂𑀲𑀬𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀸𑀢𑀺𑀓𑀸𑀞𑀧𑀦𑁂𑀦𑁂𑀯 𑀞𑀧𑀺𑀢𑀲𑁆𑀲𑀸’’𑀢𑀺 𑀆𑀳.

𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸

𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀧𑀭𑀺𑀦𑀺𑀩𑁆𑀩𑀸𑀦𑀫𑁂𑀯 𑀧𑀭𑀺𑀦𑀺𑀩𑁆𑀩𑀸𑀦𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀭𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 𑀓𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀁. 𑀬𑀸𑀬 𑀯𑀸 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀅𑀥𑀺𑀕𑀢𑀸𑀬 𑀧𑀘𑁆𑀙𑀺𑀫𑀘𑀺𑀢𑁆𑀢𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀁 𑀚𑀸𑀢𑀁, 𑀲𑀸 𑀢𑀲𑁆𑀲 𑀅𑀧𑁆𑀧𑀝𑀺𑀲𑀦𑁆𑀥𑀺𑀯𑀽𑀧𑀲𑀫𑀲𑁆𑀲 𑀓𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀸𑀢𑀺. 𑀤𑀼𑀩𑁆𑀩𑀮𑀧𑀓𑁆𑀔𑀦𑁆𑀢𑀺 𑀦 𑀓𑀸𑀴𑀸𑀲𑁄𑀓𑀁 𑀯𑀺𑀬 𑀩𑀮𑀯𑀦𑁆𑀢𑀁, 𑀅𑀣 𑀔𑁄 𑀏𑀓𑀫𑀡𑁆𑀟𑀮𑀺𑀓𑀦𑁆𑀢𑀺 𑀯𑀤𑀦𑁆𑀢𑀺. 𑀥𑀫𑁆𑀫𑀯𑀸𑀤𑀻𑀅𑀥𑀫𑁆𑀫𑀯𑀸𑀤𑀻𑀯𑀺𑀲𑁂𑀲𑀚𑀦𑀦𑀲𑀫𑀢𑁆𑀣𑀸𑀬 𑀧𑀦 𑀧𑀜𑁆𑀜𑀸𑀬 𑀅𑀪𑀸𑀯𑀢𑁄 𑀤𑀼𑀩𑁆𑀩𑀮𑀢𑀸 𑀯𑀼𑀢𑁆𑀢𑀸. 𑀢𑁂𑀲𑀁𑀬𑁂𑀯𑀸𑀢𑀺 𑀩𑀸𑀳𑀼𑀮𑀺𑀬𑀸𑀦𑀫𑁂𑀯, 𑀩𑀳𑀼𑀲𑁆𑀲𑀼𑀢𑀺𑀓𑀸𑀢𑀺𑀧𑀺 𑀦𑀸𑀫𑀁. 𑀪𑀺𑀦𑁆𑀦𑀓𑀸𑀢𑀺 𑀫𑀽𑀮𑀲𑀗𑁆𑀕𑀻𑀢𑀺𑀢𑁄 𑀫𑀽𑀮𑀦𑀺𑀓𑀸𑀬𑀢𑁄 𑀯𑀸 𑀪𑀺𑀦𑁆𑀦𑀸, 𑀮𑀤𑁆𑀥𑀺𑀬𑀸 𑀲𑀼𑀢𑁆𑀢𑀦𑁆𑀢𑁂𑀳𑀺 𑀮𑀺𑀗𑁆𑀕𑀸𑀓𑀧𑁆𑀧𑁂𑀳𑀺 𑀘 𑀯𑀺𑀲𑀤𑀺𑀲𑀪𑀸𑀯𑀁 𑀕𑀢𑀸𑀢𑀺 𑀅𑀢𑁆𑀣𑁄.

𑀫𑀽𑀮𑀲𑀗𑁆𑀕𑀳𑀦𑁆𑀢𑀺 𑀧𑀜𑁆𑀘𑀲𑀢𑀺𑀓𑀲𑀗𑁆𑀕𑀻𑀢𑀺𑀁. 𑀅𑀜𑁆𑀜𑀢𑁆𑀭 𑀲𑀗𑁆𑀕𑀳𑀺𑀢𑀸𑀢𑀺𑀆𑀤𑀻𑀲𑀼 𑀤𑀻𑀖𑀸𑀤𑀻𑀲𑀼 𑀅𑀜𑁆𑀜𑀢𑁆𑀭 𑀲𑀗𑁆𑀕𑀳𑀺𑀢𑀢𑁄 𑀲𑀼𑀢𑁆𑀢𑀦𑁆𑀢𑀭𑀸𑀲𑀺𑀢𑁄 𑀢𑀁 𑀢𑀁 𑀲𑀼𑀢𑁆𑀢𑀁 𑀦𑀺𑀓𑁆𑀓𑀟𑁆𑀠𑀺𑀢𑁆𑀯𑀸 𑀅𑀜𑁆𑀜𑀢𑁆𑀭 𑀅𑀓𑀭𑀺𑀁𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀗𑁆𑀕𑀳𑀺𑀢𑀢𑁄 𑀯𑀸 𑀅𑀜𑁆𑀜𑀢𑁆𑀭 𑀅𑀲𑀗𑁆𑀕𑀳𑀺𑀢𑀁 𑀲𑀼𑀢𑁆𑀢𑀁 𑀅𑀜𑁆𑀜𑀢𑁆𑀭 𑀓𑀢𑁆𑀣𑀘𑀺 𑀅𑀓𑀭𑀺𑀁𑀲𑀼, 𑀅𑀜𑁆𑀜𑀁 𑀯𑀸 𑀅𑀓𑀭𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀁 𑀥𑀫𑁆𑀫𑀜𑁆𑀘𑀸𑀢𑀺 𑀧𑀸𑀴𑀺𑀬𑀸 𑀅𑀢𑁆𑀣𑀁 𑀧𑀸𑀴𑀺𑀜𑁆𑀘. 𑀯𑀺𑀦𑀬𑁂 𑀦𑀺𑀓𑀸𑀬𑁂𑀲𑀼 𑀘 𑀧𑀜𑁆𑀘𑀲𑀽𑀢𑀺 𑀯𑀺𑀦𑀬𑁂 𑀘 𑀅𑀯𑀲𑁂𑀲𑀧𑀜𑁆𑀘𑀦𑀺𑀓𑀸𑀬𑁂𑀲𑀼 𑀘.

‘‘𑀤𑁆𑀯𑁂𑀧𑀸𑀦𑀦𑁆𑀤, 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀫𑀬𑀸 𑀧𑀭𑀺𑀬𑀸𑀬𑁂𑀦𑀸’’𑀢𑀺𑀆𑀤𑀺 (𑀫. 𑀦𑀺. 𑁨.𑁮𑁯) 𑀧𑀭𑀺𑀬𑀸𑀬𑀤𑁂𑀲𑀺𑀢𑀁. 𑀉𑀧𑁂𑀓𑁆𑀔𑀸𑀯𑁂𑀤𑀦𑀸 𑀳𑀺 𑀲𑀦𑁆𑀢𑀲𑁆𑀫𑀺𑀁 𑀧𑀡𑀻𑀢𑁂 𑀲𑀼𑀔𑁂 𑀯𑀼𑀢𑁆𑀢𑀸 𑀪𑀕𑀯𑀢𑀸𑀢𑀺 𑀅𑀬𑀜𑁆𑀳𑁂𑀢𑁆𑀣 𑀧𑀭𑀺𑀬𑀸𑀬𑁄. ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸 𑀲𑀼𑀔𑀸 𑀤𑀼𑀓𑁆𑀔𑀸 𑀉𑀧𑁂𑀓𑁆𑀔𑀸 𑀯𑁂𑀤𑀦𑀸’’𑀢𑀺𑀆𑀤𑀺 (𑀲𑀁. 𑀦𑀺. 𑁪.𑁨𑁪𑁯-𑁨𑁫𑁧) 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀺𑀢𑀁. 𑀯𑁂𑀤𑀦𑀸𑀲𑀪𑀸𑀯𑁄 𑀳𑀺 𑀢𑀺𑀯𑀺𑀥𑁄𑀢𑀺 𑀅𑀬𑀫𑁂𑀢𑁆𑀣 𑀦𑀺𑀧𑁆𑀧𑀭𑀺𑀬𑀸𑀬𑀢𑀸. ‘‘𑀲𑀼𑀔𑀸𑀧𑀺 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸’’𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁧𑁨𑁩) 𑀦𑀻𑀢𑀢𑁆𑀣𑀁. ‘‘𑀬𑀁 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁, 𑀲𑀩𑁆𑀩𑀁 𑀢𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺 (𑀲𑀁. 𑀦𑀺. 𑁨.𑁩𑁨) 𑀦𑁂𑀬𑁆𑀬𑀢𑁆𑀣𑀁. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀞𑀸𑀦𑁂𑀳𑀺 𑀚𑀫𑁆𑀩𑀼𑀤𑀻𑀧𑀓𑀸 𑀫𑀦𑀼𑀲𑁆𑀲𑀸 𑀉𑀢𑁆𑀢𑀭𑀓𑀼𑀭𑀼𑀓𑁂 𑀘 𑀫𑀦𑀼𑀲𑁆𑀲𑁂 𑀅𑀥𑀺𑀕𑁆𑀕𑀡𑁆𑀳𑀦𑁆𑀢𑀺 𑀤𑁂𑀯𑁂 𑀘 𑀢𑀸𑀯𑀢𑀺𑀁𑀲𑁂’’𑀢𑀺𑀆𑀤𑀺𑀓𑀁 (𑀅. 𑀦𑀺. 𑁯.𑁨𑁧) 𑀅𑀜𑁆𑀜𑀁 𑀲𑀦𑁆𑀥𑀸𑀬 𑀪𑀡𑀺𑀢𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀁 𑀅𑀢𑁆𑀣𑀁 𑀞𑀧𑀬𑀺𑀁𑀲𑀼. ‘‘𑀦𑀢𑁆𑀣𑀺 𑀤𑁂𑀯𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺𑀆𑀤𑀺𑀓𑀁 (𑀓𑀣𑀸. 𑁨𑁭𑁦) 𑀲𑀼𑀢𑁆𑀢𑀜𑁆𑀘 𑀅𑀜𑁆𑀜𑀁 𑀲𑀦𑁆𑀥𑀸𑀬 𑀪𑀡𑀺𑀢𑀁 𑀅𑀢𑁆𑀣𑀜𑁆𑀘 𑀅𑀜𑁆𑀜𑀁 𑀞𑀧𑀬𑀺𑀁𑀲𑀽𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. ‘‘𑀅𑀢𑁆𑀣𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺𑀆𑀤𑀺 (𑀧𑀼. 𑀧. 𑀫𑀸𑀢𑀺𑀓𑀸 𑁪.𑁨𑁪) 𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀸𑀬 𑀲𑀡𑁆𑀳𑀲𑀼𑀔𑀼𑀫𑀁 𑀲𑀼𑀜𑁆𑀜𑀢𑀸𑀤𑀺𑀅𑀢𑁆𑀣𑀁 𑀩𑀳𑀼𑀁 𑀯𑀺𑀦𑀸𑀲𑀬𑀼𑀁.

𑀯𑀺𑀦𑀬𑀕𑀫𑁆𑀪𑀻𑀭𑀦𑁆𑀢𑀺 𑀯𑀺𑀦𑀬𑁂 𑀕𑀫𑁆𑀪𑀻𑀭𑀜𑁆𑀘 𑀏𑀓𑀤𑁂𑀲𑀁 𑀙𑀟𑁆𑀟𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀺𑀮𑁂𑀲𑀯𑀺𑀦𑀬𑁂𑀦 𑀯𑀸 𑀕𑀫𑁆𑀪𑀻𑀭𑀁 𑀏𑀓𑀤𑁂𑀲𑀁 𑀲𑀼𑀢𑁆𑀢𑀁 𑀙𑀟𑁆𑀟𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀢𑀺𑀭𑀽𑀧𑀦𑁆𑀢𑀺 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀸𑀦𑀼𑀭𑀽𑀧𑀁 𑀲𑀼𑀢𑁆𑀢𑀁, 𑀲𑀼𑀢𑁆𑀢𑀧𑀢𑀺𑀭𑀽𑀧𑀓𑀁 𑀯𑀸 𑀅𑀲𑀼𑀢𑁆𑀢𑀁. 𑀏𑀓𑀘𑁆𑀘𑁂 𑀅𑀝𑁆𑀞𑀓𑀣𑀸𑀓𑀡𑁆𑀟𑀫𑁂𑀯 𑀯𑀺𑀲𑁆𑀲𑀚𑁆𑀚𑀺𑀁𑀲𑀼, 𑀏𑀓𑀘𑁆𑀘𑁂 𑀲𑀓𑀮𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀦𑁆𑀢𑀺 𑀆𑀳 ‘‘𑀅𑀢𑁆𑀣𑀼𑀤𑁆𑀥𑀸𑀭𑀁 𑀅𑀪𑀺𑀥𑀫𑁆𑀫𑀁 𑀙𑀧𑁆𑀧𑀓𑀭𑀡’’𑀦𑁆𑀢𑀺. 𑀓𑀣𑀸𑀯𑀢𑁆𑀣𑀼𑀲𑁆𑀲 𑀲𑀯𑀺𑀯𑀸𑀤𑀢𑁆𑀢𑁂𑀧𑀺 𑀅𑀯𑀺𑀯𑀸𑀤𑀸𑀦𑀺 𑀙𑀧𑁆𑀧𑀓𑀭𑀡𑀸𑀦𑀺 𑀧𑀞𑀺𑀢𑀩𑁆𑀩𑀸𑀦𑀺 𑀲𑀺𑀬𑀼𑀁, 𑀢𑀸𑀦𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀻𑀢𑀺 𑀳𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀙𑀧𑁆𑀧𑀓𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀢𑀢𑀺𑀬𑀲𑀗𑁆𑀕𑀻𑀢𑀺𑀢𑁄 𑀯𑀸 𑀧𑀼𑀩𑁆𑀩𑁂 𑀧𑀯𑀢𑁆𑀢𑀫𑀸𑀦𑀸𑀦𑀁 𑀯𑀲𑁂𑀦 ‘‘𑀙𑀧𑁆𑀧𑀓𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀸𑀦𑀻𑀢𑀺 𑀅𑀜𑁆𑀜𑀸𑀦𑀺 𑀅𑀪𑀺𑀥𑀫𑁆𑀫𑀧𑀓𑀭𑀡𑀸𑀤𑀻𑀦𑀺. 𑀦𑀸𑀫𑀦𑁆𑀢𑀺 𑀬𑀁 𑀩𑀼𑀤𑁆𑀥𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀁 𑀦 𑀳𑁄𑀢𑀺 𑀫𑀜𑁆𑀚𑀼𑀲𑀺𑀭𑀻𑀢𑀺𑀆𑀤𑀺𑀓𑀁, 𑀢𑀁 𑀦𑀺𑀓𑀸𑀬𑀦𑀸𑀫𑀁. 𑀮𑀺𑀗𑁆𑀕𑀦𑁆𑀢𑀺 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀸𑀤𑀺𑀯𑀺𑀲𑁂𑀲𑀓𑀢𑀁 𑀲𑀡𑁆𑀞𑀸𑀦𑀯𑀺𑀲𑁂𑀲𑀁. 𑀲𑀺𑀓𑁆𑀓𑀸𑀤𑀺𑀓𑀁 𑀧𑀭𑀺𑀓𑁆𑀔𑀸𑀭𑀁. 𑀆𑀓𑀧𑁆𑀧𑁄 𑀞𑀸𑀦𑀸𑀤𑀻𑀲𑀼 𑀅𑀗𑁆𑀕𑀝𑁆𑀞𑀧𑀦𑀯𑀺𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀓𑀭𑀡𑀦𑁆𑀢𑀺 𑀘𑀻𑀯𑀭𑀲𑀺𑀩𑁆𑀩𑀦𑀸𑀤𑀺𑀓𑀺𑀘𑁆𑀘𑀯𑀺𑀲𑁂𑀲𑁄.

𑀲𑀗𑁆𑀓𑀦𑁆𑀢𑀺𑀓𑀲𑁆𑀲𑀧𑀺𑀓𑁂𑀦 𑀦𑀺𑀓𑀸𑀬𑁂𑀦 𑀯𑀸𑀤𑁂𑀦 𑀯𑀸 𑀪𑀺𑀦𑁆𑀦𑀸 𑀲𑀗𑁆𑀓𑀦𑁆𑀢𑀺𑀓𑀸𑀢𑀺 𑀅𑀢𑁆𑀣𑁄. 𑀲𑀗𑁆𑀓𑀦𑁆𑀢𑀺𑀓𑀸𑀦𑀁 𑀪𑁂𑀤𑀸 𑀲𑀼𑀢𑁆𑀢𑀯𑀸𑀤𑀻 𑀅𑀦𑀼𑀧𑀼𑀩𑁆𑀩𑁂𑀦 𑀪𑀺𑀚𑁆𑀚𑀣 𑀪𑀺𑀚𑁆𑀚𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀪𑀺𑀦𑁆𑀦𑀯𑀸𑀤𑁂𑀦𑀸𑀢𑀺 𑀪𑀺𑀦𑁆𑀦𑀸 𑀯𑀸𑀤𑀸 𑀏𑀢𑀲𑁆𑀫𑀺𑀦𑁆𑀢𑀺 𑀪𑀺𑀦𑁆𑀦𑀯𑀸𑀤𑁄, 𑀢𑁂𑀦 𑀅𑀪𑀺𑀦𑁆𑀦𑁂𑀦 𑀣𑁂𑀭𑀯𑀸𑀤𑁂𑀦 𑀲𑀳 𑀅𑀝𑁆𑀞𑀸𑀭𑀲 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀺𑀦𑁆𑀦𑀯𑀸𑀤𑁂𑀦𑀸𑀢𑀺 𑀯𑀸 𑀪𑀺𑀦𑁆𑀦𑀸𑀬 𑀮𑀤𑁆𑀥𑀺𑀬𑀸 𑀅𑀝𑁆𑀞𑀸𑀭𑀲 𑀳𑁄𑀦𑁆𑀢𑀺, 𑀢𑁂 𑀲𑀩𑁆𑀩𑁂𑀧𑀺 𑀲𑀳𑀸𑀢𑀺 𑀅𑀢𑁆𑀣𑁄. 𑀣𑁂𑀭𑀯𑀸𑀤𑀸𑀦𑀫𑀼𑀢𑁆𑀢𑀫𑁄𑀢𑀺 𑀏𑀢𑁆𑀣 𑀣𑁂𑀭-𑀇𑀢𑀺 𑀅𑀯𑀺𑀪𑀢𑁆𑀢𑀺𑀓𑁄 𑀦𑀺𑀤𑁆𑀤𑁂𑀲𑁄. 𑀣𑁂𑀭𑀸𑀦𑀁 𑀅𑀬𑀦𑁆𑀢𑀺 𑀣𑁂𑀭𑁄. 𑀓𑁄 𑀲𑁄? 𑀯𑀸𑀤𑁄. 𑀣𑁂𑀭𑁄 𑀯𑀸𑀤𑀸𑀦𑀫𑀼𑀢𑁆𑀢𑀫𑁄𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑀉𑀧𑁆𑀧𑀦𑁆𑀦𑁂 𑀯𑀸𑀤𑁂 𑀲𑀦𑁆𑀥𑀸𑀬 ‘‘𑀧𑀭𑀧𑁆𑀧𑀯𑀸𑀤𑀫𑀣𑀦’’𑀦𑁆𑀢𑀺 𑀆𑀳. 𑀆𑀬𑀢𑀺𑀁 𑀉𑀧𑁆𑀧𑀚𑁆𑀚𑀦𑀓𑀯𑀸𑀤𑀸𑀦𑀁 𑀧𑀝𑀺𑀲𑁂𑀥𑀦𑀮𑀓𑁆𑀔𑀡𑀪𑀸𑀯𑀢𑁄 ‘‘𑀆𑀬𑀢𑀺𑀮𑀓𑁆𑀔𑀡’’𑀦𑁆𑀢𑀺 𑀯𑀼𑀢𑁆𑀢𑀁.

𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀳𑀸𑀯𑀕𑁆𑀕𑁄

𑁧. 𑀧𑀼𑀕𑁆𑀕𑀮𑀓𑀣𑀸

𑁧. 𑀲𑀼𑀤𑁆𑀥𑀲𑀘𑁆𑀘𑀺𑀓𑀝𑁆𑀞𑁄

𑁧. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀯𑀡𑁆𑀡𑀦𑀸

𑁧. 𑀫𑀸𑀬𑀸𑀬 𑀅𑀫𑀡𑀺𑀆𑀤𑀬𑁄 𑀫𑀡𑀺𑀆𑀤𑀺𑀆𑀓𑀸𑀭𑁂𑀦 𑀤𑀺𑀲𑁆𑀲𑀫𑀸𑀦𑀸 ‘‘𑀫𑀸𑀬𑀸’’𑀢𑀺 𑀯𑀼𑀢𑁆𑀢𑀸. 𑀅𑀪𑀽𑀢𑁂𑀦 𑀫𑀡𑀺𑀉𑀤𑀓𑀸𑀤𑀺𑀆𑀓𑀸𑀭𑁂𑀦 𑀕𑀬𑁆𑀳𑀫𑀸𑀦𑀸 𑀫𑀸𑀬𑀸𑀫𑀭𑀻𑀘𑀺𑀆𑀤𑀬𑁄 𑀅𑀪𑀽𑀢𑀜𑁆𑀜𑁂𑀬𑁆𑀬𑀸𑀓𑀸𑀭𑀢𑁆𑀢𑀸 𑀅𑀲𑀘𑁆𑀘𑀺𑀓𑀝𑁆𑀞𑀸. 𑀬𑁄 𑀢𑀣𑀸 𑀦 𑀳𑁄𑀢𑀺, 𑀲𑁄 𑀲𑀘𑁆𑀘𑀺𑀓𑀝𑁆𑀞𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀸𑀬𑀸…𑀧𑁂… 𑀪𑀽𑀢𑀢𑁆𑀣𑁄’’𑀢𑀺. 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦 𑀕𑀬𑁆𑀳𑀫𑀸𑀦𑁄 𑀢𑀣𑀸𑀧𑀺 𑀳𑁄𑀢𑀺 𑀅𑀜𑁆𑀜𑀣𑀸𑀧𑀻𑀢𑀺 𑀢𑀸𑀤𑀺𑀲𑁄 𑀜𑁂𑀬𑁆𑀬𑁄 𑀦 𑀧𑀭𑀫𑀢𑁆𑀣𑁄, 𑀅𑀢𑁆𑀢𑀧𑀘𑁆𑀘𑀓𑁆𑀔𑁄 𑀧𑀦 𑀧𑀭𑀫𑀢𑁆𑀣𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑀼𑀲𑁆𑀲𑀯𑀸…𑀧𑁂… 𑀉𑀢𑁆𑀢𑀫𑀢𑁆𑀣𑁄’’𑀢𑀺.

𑀙𑀮𑀯𑀸𑀤𑀲𑁆𑀲𑀸𑀢𑀺 𑀅𑀢𑁆𑀣𑀻𑀢𑀺 𑀯𑀘𑀦𑀲𑀸𑀫𑀜𑁆𑀜𑁂𑀦 𑀅𑀢𑁆𑀣𑀻𑀢𑀺 𑀯𑀼𑀢𑁆𑀢𑁂𑀳𑀺 𑀭𑀽𑀧𑀸𑀤𑀻𑀳𑀺 𑀲𑀸𑀫𑀜𑁆𑀜𑀯𑀘𑀦𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀲𑁄 𑀲𑀘𑁆𑀘𑀺…𑀧𑁂… 𑀮𑀤𑁆𑀥𑀺𑀁 𑀕𑀳𑁂𑀢𑁆𑀯𑀸 𑀆𑀫𑀦𑁆𑀢𑀸𑀢𑀺 𑀧𑀝𑀺𑀚𑀸𑀦𑀸𑀢𑀻’’𑀢𑀺 𑀯𑀘𑀦𑀢𑁄 𑀧𑀦 ‘‘𑀙𑀮𑀯𑀸𑀤𑀲𑁆𑀲𑀸’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀦 𑀳𑀺 𑀮𑀤𑁆𑀥𑀺 𑀙𑀮𑀦𑁆𑀢𑀺. 𑀑𑀓𑀸𑀲𑀁 𑀅𑀤𑀤𑀫𑀸𑀦𑁄𑀢𑀺 𑀧𑀢𑀺𑀝𑁆𑀞𑀁 𑀧𑀘𑁆𑀙𑀺𑀦𑁆𑀤𑀦𑁆𑀢𑁄. 𑀬𑀤𑀺 𑀲𑀘𑁆𑀘𑀺𑀓𑀝𑁆𑀞𑁂𑀦 𑀉𑀧𑀮𑀩𑁆𑀪𑀢𑀺, 𑀭𑀽𑀧𑀸𑀤𑀬𑁄 𑀯𑀺𑀬 𑀉𑀧𑀮𑀩𑁆𑀪𑁂𑀬𑁆𑀬, 𑀢𑀣𑀸 𑀅𑀦𑀼𑀧𑀮𑀩𑁆𑀪𑀦𑀻𑀬𑀢𑁄 𑀦 𑀢𑀯 𑀯𑀸𑀤𑁄 𑀢𑀺𑀝𑁆𑀞𑀢𑀻𑀢𑀺 𑀦𑀺𑀯𑀢𑁆𑀢𑁂𑀦𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀁 𑀲𑀦𑁆𑀥𑀸𑀬𑀸𑀢𑀺 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑁄 𑀬𑁄 𑀲𑀘𑁆𑀘𑀺𑀓𑀝𑁆𑀞𑁄, 𑀲𑁄 𑀲𑀧𑁆𑀧𑀘𑁆𑀘𑀬𑀸𑀤𑀺𑀪𑀸𑀯𑁂𑀦 𑀤𑀻𑀧𑀺𑀢𑁄 ‘‘𑀭𑀽𑀧𑀜𑁆𑀘 𑀉𑀧𑀮𑀩𑁆𑀪𑀢𑀻’’𑀢𑀺𑀆𑀤𑀻𑀲𑀼 𑀆𑀕𑀢𑁄 𑀥𑀫𑁆𑀫𑀧𑁆𑀧𑀪𑁂𑀤𑁄𑀢𑀺 𑀤𑀲𑁆𑀲𑁂𑀢𑀺.

‘‘𑀢𑁂𑀦 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺 𑀯𑀢𑁆𑀯𑀸 ‘‘𑀢𑁂𑀦𑀸𑀓𑀸𑀭𑁂𑀦𑀸’’𑀢𑀺 𑀯𑀤𑀢𑁄 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀸𑀓𑀸𑀭𑁂𑀦 𑀉𑀧𑀮𑀩𑁆𑀪𑀫𑀸𑀦𑀁 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦 𑀉𑀧𑀮𑀩𑁆𑀪𑀫𑀸𑀦𑀁 𑀦𑀸𑀫 𑀳𑁄𑀢𑀻𑀢𑀺. 𑀅𑀜𑁆𑀜𑀣𑀸 𑀢𑀢𑁄𑀢𑀺 𑀢𑀲𑁆𑀲 𑀢𑁂𑀦𑀸𑀓𑀸𑀭𑁂𑀦𑀸𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀓𑁄 𑀧𑀦𑁂𑀢𑀺𑀲𑁆𑀲𑀸 𑀧𑀼𑀭𑀺𑀫𑀧𑀼𑀘𑁆𑀙𑀸𑀬 𑀘 𑀯𑀺𑀲𑁂𑀲𑁄𑀢𑀺? 𑀧𑀼𑀭𑀺𑀫𑀧𑀼𑀘𑁆𑀙𑀸𑀬 𑀲𑀢𑁆𑀢𑀧𑀜𑁆𑀜𑀸𑀲𑀯𑀺𑀥𑁄 𑀥𑀫𑁆𑀫𑀧𑁆𑀧𑀪𑁂𑀤𑁄 𑀬𑀣𑀸 𑀪𑀽𑀢𑁂𑀦 𑀲𑀪𑀸𑀯𑀢𑁆𑀣𑁂𑀦 𑀉𑀧𑀮𑀩𑁆𑀪𑀢𑀺, 𑀏𑀯𑀁 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺 𑀯𑀼𑀢𑁆𑀢𑀁. 𑀇𑀥 𑀧𑀦 𑀪𑀽𑀢𑀲𑀪𑀸𑀯𑀢𑁆𑀣𑁂𑀦 𑀉𑀧𑀮𑀩𑁆𑀪𑀫𑀸𑀦𑁄 𑀲𑁄 𑀥𑀫𑁆𑀫𑀧𑁆𑀧𑀪𑁂𑀤𑁄 𑀬𑁂𑀦 𑀭𑀼𑀧𑁆𑀧𑀦𑀸𑀤𑀺𑀲𑀧𑁆𑀧𑀘𑁆𑀘𑀬𑀸𑀤𑀺𑀆𑀓𑀸𑀭𑁂𑀦 𑀉𑀧𑀮𑀩𑁆𑀪𑀢𑀺, 𑀓𑀺𑀁 𑀢𑁂𑀦𑀸𑀓𑀸𑀭𑁂𑀦 𑀧𑀼𑀕𑁆𑀕𑀮𑁄𑀧𑀺 𑀉𑀧𑀮𑀩𑁆𑀪𑀢𑀻𑀢𑀺 𑀏𑀲 𑀯𑀺𑀲𑁂𑀲𑁄. 𑀬𑀣𑀸 𑀧𑀦 𑀭𑀽𑀧𑀁 𑀯𑀺𑀬 𑀪𑀽𑀢𑀲𑀪𑀸𑀯𑀢𑁆𑀣𑁂𑀦 𑀉𑀧𑀮𑀩𑁆𑀪𑀫𑀸𑀦𑀸 𑀯𑁂𑀤𑀦𑀸 𑀦 𑀭𑀼𑀧𑁆𑀧𑀦𑀸𑀓𑀸𑀭𑁂𑀦 𑀉𑀧𑀮𑀩𑁆𑀪𑀢𑀺, 𑀏𑀯𑀁 𑀥𑀫𑁆𑀫𑀧𑁆𑀧𑀪𑁂𑀤𑁄 𑀯𑀺𑀬 𑀪𑀽𑀢𑀲𑀪𑀸𑀯𑀢𑁆𑀣𑁂𑀦 𑀉𑀧𑀮𑀩𑁆𑀪𑀫𑀸𑀦𑁄 𑀧𑀼𑀕𑁆𑀕𑀮𑁄 𑀦 𑀭𑀼𑀧𑁆𑀧𑀦𑀸𑀤𑀺𑀲𑀧𑁆𑀧𑀘𑁆𑀘𑀬𑀸𑀤𑀺𑀆𑀓𑀸𑀭𑁂𑀦 𑀉𑀧𑀮𑀩𑁆𑀪𑀢𑀻𑀢𑀺 𑀲𑀓𑁆𑀓𑀸 𑀧𑀭𑀯𑀸𑀤𑀺𑀦𑀸 𑀯𑀢𑁆𑀢𑀼𑀦𑁆𑀢𑀺 𑀅𑀘𑁄𑀤𑀦𑀻𑀬𑀁 𑀏𑀢𑀁 𑀲𑀺𑀬𑀸. 𑀅𑀯𑀚𑀸𑀦𑀦𑀜𑁆𑀘 𑀢𑀲𑁆𑀲 𑀬𑀼𑀢𑁆𑀢𑀦𑁆𑀢𑀺 𑀦𑀺𑀕𑁆𑀕𑀳𑁄 𑀘 𑀦 𑀓𑀸𑀢𑀩𑁆𑀩𑁄. 𑀥𑀫𑁆𑀫𑀧𑁆𑀧𑀪𑁂𑀤𑀢𑁄 𑀧𑀦 𑀅𑀜𑁆𑀜𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀅𑀲𑀺𑀤𑁆𑀥𑀢𑁆𑀢𑀸 𑀥𑀫𑁆𑀫𑀧𑁆𑀧𑀪𑁂𑀤𑀸𑀓𑀸𑀭𑁂𑀦𑁂𑀯 𑀘𑁄𑀤𑁂𑀢𑀺. 𑀅𑀯𑀚𑀸𑀦𑀦𑁂𑀦𑁂𑀯 𑀦𑀺𑀕𑁆𑀕𑀳𑀁 𑀤𑀲𑁆𑀲𑁂𑀢𑀺. 𑀅𑀦𑀼𑀚𑀸𑀦𑀦𑀸𑀯𑀚𑀸𑀦𑀦𑀧𑀓𑁆𑀔𑀸 𑀲𑀸𑀫𑀜𑁆𑀜𑀯𑀺𑀲𑁂𑀲𑁂𑀳𑀺 𑀧𑀝𑀺𑀜𑁆𑀜𑀸𑀧𑀝𑀺𑀓𑁆𑀔𑁂𑀧𑀧𑀓𑁆𑀔𑀸 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀧𑀓𑁆𑀔𑀸 𑀧𑀞𑀫𑀤𑀼𑀢𑀺𑀬𑀦𑀬𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄.

‘‘𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂’’𑀢𑀺 𑀯𑀤𑀦𑁆𑀢𑁄 𑀯𑀢𑁆𑀢𑀩𑁆𑀩𑀲𑁆𑀲 𑀅𑀯𑀘𑀦𑁂 𑀤𑁄𑀲𑀁 𑀧𑀸𑀧𑁂𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀦𑀺𑀕𑁆𑀕𑀳𑀲𑁆𑀲 𑀧𑀸𑀧𑀺𑀢𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀏𑀯𑀫𑁂𑀢𑀁 𑀦𑀺𑀕𑁆𑀕𑀳𑀲𑁆𑀲 𑀘 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀘𑀢𑀼𑀦𑁆𑀦𑀁 𑀧𑀸𑀧𑀦𑀸𑀭𑁄𑀧𑀦𑀜𑁆𑀘 𑀯𑀼𑀢𑁆𑀢𑀢𑁆𑀢𑀸 𑀉𑀧𑀮𑀩𑁆𑀪𑀢𑀻𑀢𑀺𑀆𑀤𑀺𑀓𑀁 𑀅𑀦𑀼𑀮𑁄𑀫𑀧𑀜𑁆𑀘𑀓𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁, 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀧𑀦 𑀤𑁆𑀯𑀻𑀳𑀺 𑀞𑀧𑀦𑀸𑀳𑀺 𑀲𑀳 𑀲𑀢𑁆𑀢𑀓𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀁𑀯𑀚𑁆𑀚𑀦𑁂 𑀯𑀸 𑀓𑀸𑀭𑀡𑀁 𑀯𑀢𑁆𑀢𑀩𑁆𑀩𑀁. 𑀬𑀁 𑀧𑀦 𑀯𑀓𑁆𑀔𑀢𑀺 ‘‘𑀞𑀧𑀦𑀸 𑀦𑀸𑀫 𑀧𑀭𑀯𑀸𑀤𑀻𑀧𑀓𑁆𑀔𑀲𑁆𑀲 𑀞𑀧𑀦𑀢𑁄 ‘𑀅𑀬𑀁 𑀢𑀯 𑀤𑁄𑀲𑁄’𑀢𑀺 𑀤𑀲𑁆𑀲𑁂𑀢𑀼𑀁 𑀞𑀧𑀦𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀦 𑀦𑀺𑀕𑁆𑀕𑀳𑀲𑁆𑀲 𑀯𑀸 𑀧𑀝𑀺𑀓𑀫𑁆𑀫𑀲𑁆𑀲 𑀯𑀸 𑀧𑀸𑀓𑀝𑀪𑀸𑀯𑀓𑀭𑀡’’𑀦𑁆𑀢𑀺 (𑀓𑀣𑀸. 𑀅𑀝𑁆𑀞. 𑁨). 𑀢𑁂𑀦𑀸𑀥𑀺𑀧𑁆𑀧𑀸𑀬𑁂𑀦 𑀇𑀥𑀸𑀧𑀺 𑀞𑀧𑀦𑀸𑀤𑁆𑀯𑀬𑀁 𑀯𑀚𑁆𑀚𑁂𑀢𑀺. 𑀬𑀣𑀸 𑀧𑀦 𑀢𑀢𑁆𑀣 𑀧𑀝𑀺𑀓𑀫𑁆𑀫𑀧𑀜𑁆𑀘𑀓𑀪𑀸𑀯𑀁 𑀅𑀯𑀢𑁆𑀯𑀸 𑀧𑀝𑀺𑀓𑀫𑁆𑀫𑀘𑀢𑀼𑀓𑁆𑀓𑀪𑀸𑀯𑀁 𑀯𑀓𑁆𑀔𑀢𑀺, 𑀏𑀯𑀫𑀺𑀥𑀸𑀧𑀺 𑀦𑀺𑀕𑁆𑀕𑀳𑀘𑀢𑀼𑀓𑁆𑀓𑀪𑀸𑀯𑁄 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸. 𑀲𑀼𑀤𑁆𑀥𑀺𑀓𑀦𑀺𑀕𑁆𑀕𑀳𑀲𑁆𑀲 𑀧𑀦 𑀦𑀺𑀕𑁆𑀕𑀳𑀧𑁆𑀧𑀥𑀸𑀦𑀢𑁆𑀢𑀸 𑀉𑀤𑁆𑀤𑁂𑀲𑀪𑀸𑀯𑁂𑀦 𑀯𑀼𑀢𑁆𑀢𑁄 𑀦𑀺𑀕𑁆𑀕𑀳𑁄𑀯 𑀯𑀺𑀲𑀼𑀁 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀬𑁂 𑀧𑀦 ‘‘𑀅𑀬𑀣𑀸𑀪𑀽𑀢𑀦𑀺𑀕𑁆𑀕𑀳𑀢𑁆𑀢𑀸 𑀢𑀢𑁆𑀣 𑀧𑀝𑀺𑀓𑀫𑁆𑀫𑀁 𑀯𑀺𑀲𑀼𑀁 𑀦 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀤𑀼𑀢𑀺𑀬𑁂 𑀯𑀸𑀤𑀫𑀼𑀔𑁂 𑀦𑀺𑀕𑁆𑀕𑀳𑀘𑀢𑀼𑀓𑁆𑀓𑀪𑀸𑀯𑁄 𑀧𑀝𑀺𑀓𑀫𑁆𑀫𑀧𑀜𑁆𑀘𑀓𑀪𑀸𑀯𑁄 𑀘 𑀆𑀧𑀚𑁆𑀚𑀢𑀺.

𑁨. 𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀁 𑀲𑀘𑁆𑀘𑀺𑀓𑀝𑁆𑀞𑀫𑁂𑀯𑀸𑀢𑀺 𑀲𑀫𑁆𑀫𑀼𑀢𑀺𑀲𑀘𑁆𑀘𑀁 𑀲𑀦𑁆𑀥𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀓𑁆𑀔𑀢𑀺 𑀳𑀺 ‘‘𑀲𑀼𑀤𑁆𑀥𑀲𑀫𑁆𑀫𑀼𑀢𑀺𑀲𑀘𑁆𑀘𑀁 𑀯𑀸 𑀧𑀭𑀫𑀢𑁆𑀣𑀫𑀺𑀲𑁆𑀲𑀓𑀁 𑀯𑀸 𑀲𑀫𑁆𑀫𑀼𑀢𑀺𑀲𑀘𑁆𑀘𑀁 𑀲𑀦𑁆𑀥𑀸𑀬 ‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄’𑀢𑀺 𑀧𑀼𑀦 𑀅𑀦𑀼𑀬𑁄𑀕𑁄 𑀧𑀭𑀯𑀸𑀤𑀺𑀲𑁆𑀲𑀸’’𑀢𑀺 (𑀓𑀣𑀸. 𑀅𑀝𑁆𑀞. 𑁬). 𑀢𑀢𑁆𑀣 𑀬𑀤𑀺 𑀧𑀭𑀯𑀸𑀤𑀺𑀦𑀸 𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀲𑀘𑁆𑀘𑀺𑀓𑀝𑁆𑀞𑁄 𑀲𑀫𑁆𑀫𑀼𑀢𑀺𑀲𑀘𑁆𑀘𑀁, 𑀲𑀫𑁆𑀫𑀼𑀢𑀺𑀲𑀘𑁆𑀘𑀸𑀓𑀸𑀭𑁂𑀦 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺 𑀯𑀤𑀦𑁆𑀢𑁂𑀦 𑀲𑀫𑀸𑀦𑀮𑀤𑁆𑀥𑀺𑀓𑁄 𑀦𑀧𑁆𑀧𑀝𑀺𑀲𑁂𑀥𑀺𑀢𑀩𑁆𑀩𑁄, 𑀓𑀣𑀸 𑀏𑀯𑀸𑀬𑀁 𑀦𑀸𑀭𑀪𑀺𑀢𑀩𑁆𑀩𑀸. 𑀅𑀣 𑀲𑀓𑀯𑀸𑀤𑀺𑀦𑀸 𑀅𑀢𑁆𑀢𑀦𑀸 𑀘 𑀅𑀥𑀺𑀧𑁆𑀧𑁂𑀢𑀲𑀘𑁆𑀘𑀺𑀓𑀝𑁆𑀞𑀁𑀬𑁂𑀯 𑀲𑀦𑁆𑀥𑀸𑀬 𑀧𑀭𑀯𑀸𑀤𑀻 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄’’𑀢𑀺𑀆𑀤𑀺𑀫𑀸𑀳𑀸𑀢𑀺 𑀅𑀬𑀫𑀢𑁆𑀣𑁄. 𑀲𑀓𑀯𑀸𑀤𑀺𑀦𑀸 𑀲𑀫𑁆𑀫𑀼𑀢𑀺𑀲𑀘𑁆𑀘𑀁𑀬𑁂𑀯 𑀲𑀘𑁆𑀘𑀺𑀓𑀝𑁆𑀞𑁄𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀧𑀚𑁆𑀚𑀢𑀺. 𑀬𑀤𑀺 𑀉𑀪𑀬𑀁 𑀅𑀥𑀺𑀧𑁆𑀧𑁂𑀢𑀁, 𑀧𑀼𑀦 ‘‘𑀲𑀫𑁆𑀫𑀼𑀢𑀺𑀲𑀘𑁆𑀘𑀧𑀭𑀫𑀢𑁆𑀣𑀲𑀘𑁆𑀘𑀸𑀦𑀺 𑀯𑀸 𑀏𑀓𑀢𑁄 𑀓𑀢𑁆𑀯𑀸𑀧𑀺 𑀏𑀯𑀫𑀸𑀳𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺. 𑀬𑀤𑀺 𑀘 𑀤𑁆𑀯𑁂𑀧𑀺 𑀲𑀘𑁆𑀘𑀸𑀦𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀸, 𑀲𑀘𑁆𑀘𑀺𑀓𑀝𑁆𑀞𑁂𑀓𑀤𑁂𑀲𑁂𑀦 𑀉𑀧𑀮𑀤𑁆𑀥𑀺𑀁 𑀇𑀘𑁆𑀙𑀦𑁆𑀢𑁂𑀦 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸’’𑀢𑀺𑀆𑀤𑀺 𑀅𑀦𑀼𑀬𑁄𑀕𑁄 𑀦 𑀓𑀸𑀢𑀩𑁆𑀩𑁄, 𑀦 𑀘 𑀲𑀘𑁆𑀘𑀺𑀓𑀝𑁆𑀞𑁂𑀓𑀤𑁂𑀲𑁂𑀦 𑀅𑀦𑀼𑀬𑁄𑀕𑁄 𑀬𑀼𑀢𑁆𑀢𑁄. 𑀦 𑀳𑀺 𑀯𑁂𑀤𑀬𑀺𑀢𑀸𑀓𑀸𑀭𑁂𑀦 𑀉𑀧𑀮𑀩𑁆𑀪𑀫𑀸𑀦𑀸 𑀯𑁂𑀤𑀦𑀸 𑀭𑀼𑀧𑁆𑀧𑀦𑀸𑀓𑀸𑀭𑁂𑀦 𑀉𑀧𑀮𑀩𑁆𑀪𑀢𑀻𑀢𑀺 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀸, 𑀦 𑀘 𑀧𑀭𑀯𑀸𑀤𑀻 𑀭𑀼𑀧𑁆𑀧𑀦𑀸𑀤𑀺𑀲𑀪𑀸𑀯𑀁 𑀧𑀼𑀕𑁆𑀕𑀮𑀁 𑀇𑀘𑁆𑀙𑀢𑀺, 𑀅𑀣 𑀔𑁄 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀫𑁂𑀯𑀸𑀢𑀺. 𑀧𑀭𑀫𑀢𑁆𑀣𑀲𑀘𑁆𑀘𑀢𑁄 𑀅𑀜𑁆𑀜𑀲𑁆𑀫𑀺𑀁 𑀲𑀘𑁆𑀘𑀺𑀓𑀝𑁆𑀞𑁂 𑀯𑀺𑀚𑁆𑀚𑀫𑀸𑀦𑁂 𑀦𑀸𑀲𑁆𑀲 𑀧𑀭𑀫𑀢𑁆𑀣𑀲𑀘𑁆𑀘𑀢𑀸 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀸. 𑀅𑀲𑀘𑁆𑀘𑀺𑀓𑀝𑁆𑀞𑁂 𑀲𑀘𑁆𑀘𑀺𑀓𑀝𑁆𑀞𑀯𑁄𑀳𑀸𑀭𑀁 𑀆𑀭𑁄𑀧𑁂𑀢𑁆𑀯𑀸 𑀢𑀁 𑀲𑀦𑁆𑀥𑀸𑀬 𑀧𑀼𑀘𑁆𑀙𑀢𑀻𑀢𑀺 𑀯𑀤𑀦𑁆𑀢𑀸𑀦𑀁 𑀯𑁄𑀳𑀭𑀺𑀢𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀲𑀘𑁆𑀘𑀺𑀓𑀝𑁆𑀞𑀢𑀸 𑀦 𑀬𑀼𑀢𑁆𑀢𑀸. 𑀯𑁄𑀳𑀭𑀺𑀢𑀧𑀭𑀫𑀢𑁆𑀣𑀲𑀘𑁆𑀘𑀺𑀓𑀝𑁆𑀞𑀸𑀦𑀜𑁆𑀘 𑀤𑁆𑀯𑀺𑀦𑁆𑀦𑀁 𑀲𑀘𑁆𑀘𑀺𑀓𑀝𑁆𑀞𑀪𑀸𑀯𑁂 𑀯𑀼𑀢𑁆𑀢𑀦𑀬𑁄𑀯 𑀤𑁄𑀲𑁄. 𑀲𑀫𑁆𑀫𑀼𑀢𑀺𑀲𑀘𑁆𑀘𑀸𑀓𑀸𑀭𑁂𑀦 𑀉𑀧𑀮𑀩𑁆𑀪𑀫𑀸𑀦𑀜𑁆𑀘 𑀪𑀽𑀢𑀲𑀪𑀸𑀯𑀢𑁆𑀣𑁂𑀦 𑀉𑀧𑀮𑀩𑁆𑀪𑁂𑀬𑁆𑀬 𑀯𑀸 𑀦 𑀯𑀸. 𑀬𑀤𑀺 𑀪𑀽𑀢𑀲𑀪𑀸𑀯𑀢𑁆𑀣𑁂𑀦 𑀉𑀧𑀮𑀩𑁆𑀪𑀢𑀺, 𑀧𑀼𑀕𑁆𑀕𑀮𑁄𑀧𑀺 𑀉𑀧𑀮𑀩𑁆𑀪𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦𑀸𑀢𑀺 𑀅𑀦𑀼𑀚𑀸𑀦𑀦𑁆𑀢𑁄 𑀦𑀸𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑁄. 𑀅𑀣 𑀦 𑀪𑀽𑀢𑀲𑀪𑀸𑀯𑀢𑁆𑀣𑁂𑀦, 𑀢𑀁𑀯𑀺𑀦𑀺𑀫𑀼𑀢𑁆𑀢𑁄 𑀲𑀫𑁆𑀫𑀼𑀢𑀺𑀲𑀘𑁆𑀘𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀸𑀓𑀸𑀭𑁄 𑀦 𑀯𑀢𑁆𑀢𑀩𑁆𑀩𑁄 𑀅𑀲𑀺𑀤𑁆𑀥𑀢𑁆𑀢𑀸. 𑀯𑀓𑁆𑀔𑀢𑀺 𑀘 ‘‘𑀬𑀣𑀸 𑀭𑀽𑀧𑀸𑀤𑀬𑁄 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀲𑀸𑀫𑀜𑁆𑀜𑀮𑀓𑁆𑀔𑀡𑀯𑀲𑁂𑀦 𑀅𑀢𑁆𑀣𑀺, 𑀦 𑀏𑀯𑀁 𑀧𑀼𑀕𑁆𑀕𑀮𑁄’’𑀢𑀺. 𑀢𑀲𑁆𑀫𑀸 𑀫𑀕𑁆𑀕𑀺𑀢𑀩𑁆𑀩𑁄 𑀏𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑀤𑁆𑀯𑀺𑀦𑁆𑀦𑀁 𑀲𑀘𑁆𑀘𑀸𑀦𑀦𑁆𑀢𑀺 𑀏𑀢𑁆𑀣 𑀲𑀘𑁆𑀘𑀤𑁆𑀯𑀬𑀸𑀓𑀸𑀭𑁂𑀦 𑀅𑀦𑀼𑀧𑀮𑀩𑁆𑀪𑀦𑀻𑀬𑀢𑁄 𑀅𑀦𑀼𑀜𑁆𑀜𑁂𑀬𑁆𑀬𑀫𑁂𑀢𑀁 𑀲𑀺𑀬𑀸, 𑀦 𑀯𑀸 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁. 𑀬𑀣𑀸 𑀳𑀺 𑀏𑀓𑀤𑁂𑀲𑁂𑀦 𑀧𑀭𑀫𑀢𑁆𑀣𑀸𑀓𑀸𑀭𑁂𑀦 𑀅𑀦𑀼𑀧𑀮𑀩𑁆𑀪𑀦𑀻𑀬𑀢𑀸 𑀅𑀦𑀼𑀚𑀸𑀦𑀦𑀲𑁆𑀲 𑀦 𑀓𑀸𑀭𑀡𑀁, 𑀏𑀯𑀁 𑀏𑀓𑀤𑁂𑀲𑁂𑀦 𑀲𑀫𑁆𑀫𑀼𑀢𑀺𑀬𑀸𑀓𑀸𑀭𑁂𑀦 𑀉𑀧𑀮𑀩𑁆𑀪𑀦𑀻𑀬𑀢𑀸 𑀧𑀝𑀺𑀓𑁆𑀔𑁂𑀧𑀲𑁆𑀲 𑀘𑀸𑀢𑀺 𑀫𑀕𑁆𑀕𑀺𑀢𑀩𑁆𑀩𑁄 𑀏𑀢𑁆𑀣𑀸𑀧𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀼𑀧𑀮𑀩𑁆𑀪𑀢𑀻𑀢𑀺 𑀯𑀘𑀦𑀲𑀸𑀫𑀜𑁆𑀜𑀫𑀢𑁆𑀢𑀦𑁆𑀢𑀺 𑀦𑀼𑀧𑀮𑀩𑁆𑀪𑀢𑀻𑀢𑀺 𑀇𑀤𑀫𑁂𑀯 𑀯𑀘𑀦𑀁 𑀅𑀦𑀼𑀜𑁆𑀜𑀸𑀢𑀁 𑀧𑀝𑀺𑀓𑁆𑀔𑀺𑀢𑁆𑀢𑀜𑁆𑀘𑀸𑀢𑀺 𑀏𑀢𑀁 𑀙𑀮𑀯𑀸𑀤𑀁 𑀦𑀺𑀲𑁆𑀲𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀉𑀧𑀮𑀩𑁆𑀪𑀢𑀻𑀢𑀺 𑀏𑀢𑀲𑁆𑀲𑁂𑀯 𑀅𑀦𑀼𑀚𑀸𑀦𑀦𑀧𑀝𑀺𑀓𑁆𑀔𑁂𑀧𑁂𑀳𑀺 𑀅𑀳𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑁄, 𑀏𑀯𑀁 𑀦𑀼𑀧𑀮𑀩𑁆𑀪𑀢𑀻𑀢𑀺 𑀏𑀢𑀲𑁆𑀲𑁂𑀯 𑀅𑀦𑀼𑀚𑀸𑀦𑀦𑀧𑀝𑀺𑀓𑁆𑀔𑁂𑀧𑁂𑀳𑀺 𑀢𑁆𑀯𑀦𑁆𑀢𑀺 𑀏𑀯𑀁 𑀲𑀫𑁆𑀪𑀯𑀦𑁆𑀢𑀲𑁆𑀲 𑀲𑀸𑀫𑀜𑁆𑀜𑁂𑀦 𑀅𑀲𑀫𑁆𑀪𑀯𑀦𑁆𑀢𑀲𑁆𑀲 𑀓𑀧𑁆𑀧𑀦𑀁 𑀧𑀦𑁂𑀢𑁆𑀣 𑀙𑀮𑀯𑀸𑀤𑁄 𑀪𑀯𑀺𑀢𑀼𑀁 𑀅𑀭𑀳𑀢𑀺. 𑀢𑁂𑀦 𑀦𑀼𑀧𑀮𑀩𑁆𑀪𑀢𑀻𑀢𑀺 𑀯𑀘𑀦𑀲𑀸𑀫𑀜𑁆𑀜𑀫𑀢𑁆𑀢𑀁 𑀙𑀮𑀯𑀸𑀤𑀲𑁆𑀲 𑀓𑀸𑀭𑀡𑀢𑁆𑀢𑀸 ‘‘𑀙𑀮𑀯𑀸𑀤𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀘𑀦𑀲𑀸𑀫𑀜𑁆𑀜𑀫𑀢𑁆𑀢𑀜𑁆𑀘 𑀙𑀮𑀯𑀸𑀤𑀜𑁆𑀘 𑀦𑀺𑀲𑁆𑀲𑀸𑀬𑀸𑀢𑀺 𑀯𑀸 𑀅𑀢𑁆𑀣𑁄. 𑀞𑀧𑀦𑀸 𑀦𑀺𑀕𑁆𑀕𑀳𑀧𑁆𑀧𑀝𑀺𑀓𑀫𑁆𑀫𑀸𑀦𑀁 𑀧𑀸𑀓𑀝𑀪𑀸𑀯𑀓𑀭𑀡𑀁 𑀦 𑀳𑁄𑀢𑀻𑀢𑀺 𑀇𑀤𑀁 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀦 𑀳𑀺 𑀧𑀓𑁆𑀔𑀝𑁆𑀞𑀧𑀦𑁂𑀦 𑀯𑀺𑀦𑀸 𑀧𑀼𑀭𑀺𑀫𑀁 𑀅𑀦𑀼𑀚𑀸𑀦𑀺𑀢𑁆𑀯𑀸 𑀧𑀘𑁆𑀙𑀺𑀫𑀲𑁆𑀲 𑀅𑀯𑀚𑀸𑀦𑀦𑀁, 𑀧𑀘𑁆𑀙𑀺𑀫𑀁 𑀯𑀸 𑀅𑀯𑀚𑀸𑀦𑀦𑁆𑀢𑀲𑁆𑀲 𑀧𑀼𑀭𑀺𑀫𑀸𑀦𑀼𑀚𑀸𑀦𑀦𑀁 𑀫𑀺𑀘𑁆𑀙𑀸𑀢𑀺 𑀲𑀓𑁆𑀓𑀸 𑀆𑀭𑁄𑀧𑁂𑀢𑀼𑀦𑁆𑀢𑀺.

𑁩. 𑀢𑀯𑀸𑀢𑀺, 𑀧𑀝𑀺𑀚𑀸𑀦𑀦𑁆𑀢𑀦𑁆𑀢𑀺 𑀘 𑀧𑀘𑁆𑀘𑀢𑁆𑀢𑁂 𑀲𑀸𑀫𑀺𑀉𑀧𑀬𑁄𑀕𑀯𑀘𑀦𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀢𑁆𑀯𑀁𑀬𑁂𑀯 𑀧𑀝𑀺𑀚𑀸𑀦𑀦𑁆𑀢𑁄’’𑀢𑀺 𑀆𑀳.

𑁪-𑁫. 𑀘𑀢𑀽𑀳𑀺 𑀧𑀸𑀧𑀦𑀸𑀭𑁄𑀧𑀦𑀸𑀳𑀺 𑀦𑀺𑀕𑁆𑀕𑀳𑀲𑁆𑀲 𑀉𑀧𑀦𑀻𑀢𑀢𑁆𑀢𑀸𑀢𑀺 ‘‘𑀤𑀼𑀦𑁆𑀦𑀺𑀕𑁆𑀕𑀳𑀺𑀢𑀸 𑀘 𑀳𑁄𑀫, 𑀳𑀜𑁆𑀘𑀻’’𑀢𑀺𑀆𑀤𑀺𑀦𑀸 𑀢𑀬𑀸 𑀫𑀫 𑀓𑀢𑁄 𑀦𑀺𑀕𑁆𑀕𑀳𑁄, 𑀫𑀬𑀸 𑀢𑀯 𑀓𑀢𑁄 𑀦𑀺𑀕𑁆𑀕𑀳𑁄 𑀯𑀺𑀬 𑀫𑀺𑀘𑁆𑀙𑀸𑀢𑀺 𑀏𑀯𑀁 𑀢𑁂𑀦 𑀅𑀦𑀼𑀮𑁄𑀫𑀧𑀜𑁆𑀘𑀓𑁂 𑀘𑀢𑀽𑀳𑀺 𑀧𑀸𑀧𑀦𑀸𑀭𑁄𑀧𑀦𑀸𑀳𑀺 𑀓𑀢𑀲𑁆𑀲 𑀦𑀺𑀕𑁆𑀕𑀳𑀲𑁆𑀲 𑀢𑁂𑀦 𑀦𑀺𑀬𑀸𑀫𑁂𑀦 𑀤𑀼𑀓𑁆𑀓𑀝𑀪𑀸𑀯𑀲𑁆𑀲 𑀅𑀢𑁆𑀢𑀦𑀸 𑀓𑀢𑀦𑀺𑀕𑁆𑀕𑀳𑁂𑀦 𑀲𑀳 𑀉𑀧𑀦𑀻𑀢𑀢𑁆𑀢𑀸 𑀅𑀦𑀺𑀕𑁆𑀕𑀳𑀪𑀸𑀯𑀲𑁆𑀲 𑀯𑀸 𑀉𑀧𑀕𑀫𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀫𑁂𑀯 𑀢𑁂𑀦 𑀳𑀺 𑀬𑀁 𑀦𑀺𑀕𑁆𑀕𑀡𑁆𑀳𑀸𑀲𑀺 𑀳𑀜𑁆𑀘𑀺…𑀧𑁂… 𑀇𑀤𑀁 𑀢𑁂 𑀫𑀺𑀘𑁆𑀙𑀸𑀢𑀺 𑀏𑀢𑀲𑁆𑀲 𑀅𑀦𑀺𑀕𑁆𑀕𑀳𑀪𑀸𑀯𑀦𑀺𑀕𑀫𑀦𑀲𑁆𑀲𑁂𑀯 𑀦𑀺𑀕𑁆𑀕𑀫𑀦𑀘𑀢𑀼𑀓𑁆𑀓𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀯𑀡𑁆𑀡𑀦𑀸

𑁭-𑁧𑁦. ‘‘𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀦𑀺𑀲𑁆𑀲𑀸𑀬 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲𑀸’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀧𑀭𑀫𑀢𑁆𑀣𑀯𑀲𑁂𑀦 𑀧𑀼𑀕𑁆𑀕𑀮𑀲𑁆𑀲 𑀅𑀪𑀸𑀯𑀢𑁄 𑀧𑀝𑀺𑀓𑁆𑀔𑁂𑀧𑁄 𑀧𑀭𑀯𑀸𑀤𑀺𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀧𑀝𑀺𑀓𑁆𑀔𑁂𑀧𑁄 𑀅𑀢𑁆𑀢𑀦𑁄 𑀮𑀤𑁆𑀥𑀺𑀬𑀸 𑀬𑀤𑀺 𑀓𑀢𑁄, 𑀧𑀭𑀫𑀢𑁆𑀣𑀢𑁄 𑀅𑀜𑁆𑀜𑁂𑀦 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺 𑀅𑀬𑀫𑀲𑁆𑀲 𑀮𑀤𑁆𑀥𑀻𑀢𑀺 𑀆𑀧𑀚𑁆𑀚𑀢𑀺. 𑀢𑀣𑀸 𑀘 𑀲𑀢𑀺 𑀦𑀸𑀬𑀁 𑀲𑀫𑁆𑀫𑀼𑀢𑀺𑀲𑀘𑁆𑀘𑀯𑀲𑁂𑀦 𑀉𑀧𑀮𑀤𑁆𑀥𑀺𑀁 𑀇𑀘𑁆𑀙𑀦𑁆𑀢𑁂𑀦 𑀦𑀺𑀕𑁆𑀕𑀳𑁂𑀢𑀩𑁆𑀩𑁄. 𑀅𑀣 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀦𑀺𑀕𑁆𑀕𑀽𑀳𑀺𑀢𑁆𑀯𑀸 𑀧𑀭𑀲𑁆𑀲 𑀮𑀤𑁆𑀥𑀺𑀯𑀲𑁂𑀦 𑀧𑀝𑀺𑀓𑁆𑀔𑀺𑀧𑀢𑀺, 𑀧𑀼𑀭𑀺𑀫𑀧𑀝𑀺𑀜𑁆𑀜𑀸𑀬 𑀅𑀯𑀺𑀭𑁄𑀥𑀺𑀢𑀢𑁆𑀢𑀸 𑀦 𑀦𑀺𑀕𑁆𑀕𑀳𑁂𑀢𑀩𑁆𑀩𑁄. 𑀦 𑀳𑀺 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀮𑀤𑁆𑀥𑀺𑀁 𑀯𑀤𑀦𑁆𑀢𑀲𑁆𑀲 𑀤𑁄𑀲𑁄 𑀆𑀧𑀚𑁆𑀚𑀢𑀻𑀢𑀺. 𑀅𑀢𑁆𑀢𑀦𑁄 𑀧𑀦 𑀮𑀤𑁆𑀥𑀺𑀬𑀸 𑀧𑀝𑀺𑀚𑀸𑀦𑀺𑀢𑁆𑀯𑀸 𑀧𑀭𑀮𑀤𑁆𑀥𑀺𑀬𑀸 𑀧𑀝𑀺𑀓𑁆𑀔𑀺𑀧𑀦𑁆𑀢𑁂𑀦 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀙𑀟𑁆𑀟𑁂𑀢𑁆𑀯𑀸 𑀧𑀭𑀮𑀤𑁆𑀥𑀺 𑀕𑀳𑀺𑀢𑀸 𑀳𑁄𑀢𑀻𑀢𑀺 𑀦𑀺𑀕𑁆𑀕𑀳𑁂𑀢𑀩𑁆𑀩𑁄𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀲𑀺𑀬𑀸.

𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀤𑁆𑀥𑀲𑀘𑁆𑀘𑀺𑀓𑀝𑁆𑀞𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀑𑀓𑀸𑀲𑀲𑀘𑁆𑀘𑀺𑀓𑀝𑁆𑀞𑁄

𑁧. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀯𑀡𑁆𑀡𑀦𑀸

𑁧𑁧. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀲𑀭𑀻𑀭𑁂𑀢𑀺 𑀅𑀬𑀫𑀢𑁆𑀣𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀭𑀻𑀭𑀁 𑀲𑀦𑁆𑀥𑀸𑀬𑀸’’𑀢𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀲𑀁𑀔𑀺𑀢𑁆𑀢𑀧𑀸𑀞𑁂. 𑀬𑀲𑁆𑀫𑀸 𑀲𑀭𑀻𑀭𑀁 𑀲𑀦𑁆𑀥𑀸𑀬 ‘‘𑀲𑀩𑁆𑀩𑀢𑁆𑀣 𑀦 𑀉𑀧𑀮𑀩𑁆𑀪𑀢𑀻’’𑀢𑀺 𑀯𑀼𑀢𑁆𑀢𑁂 𑀲𑀭𑀻𑀭𑀢𑁄 𑀩𑀳𑀺 𑀉𑀧𑀮𑀩𑁆𑀪𑀢𑀻𑀢𑀺 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀧𑀘𑁆𑀘𑀦𑀻𑀓𑁂 𑀧𑀝𑀺𑀓𑁆𑀔𑁂𑀧𑁄 𑀲𑀓𑀯𑀸𑀤𑀺𑀲𑁆𑀲𑀸𑀢𑀺 𑀏𑀢𑁂𑀦 𑀦 𑀓𑁂𑀦𑀘𑀺 𑀲𑀪𑀸𑀯𑁂𑀦 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀦 𑀳𑀺 𑀓𑁂𑀦𑀘𑀺 𑀲𑀪𑀸𑀯𑁂𑀦 𑀉𑀧𑀮𑀩𑁆𑀪𑀫𑀸𑀦𑀲𑁆𑀲 𑀲𑀭𑀻𑀭𑀢𑀤𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀉𑀧𑀮𑀤𑁆𑀥𑀺𑀑𑀓𑀸𑀲𑁄 𑀅𑀢𑁆𑀣𑀻𑀢𑀺.

𑁩. 𑀓𑀸𑀮𑀲𑀘𑁆𑀘𑀺𑀓𑀝𑁆𑀞𑁄

𑁧. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀯𑀡𑁆𑀡𑀦𑀸

𑁧𑁨. 𑀧𑀼𑀭𑀺𑀫𑀧𑀘𑁆𑀙𑀺𑀫𑀚𑀸𑀢𑀺𑀓𑀸𑀮𑀜𑁆𑀘𑀸𑀢𑀺 𑀫𑀚𑁆𑀛𑀺𑀫𑀚𑀸𑀢𑀺𑀓𑀸𑀮𑁂 𑀉𑀧𑀮𑀩𑁆𑀪𑀫𑀸𑀦𑀲𑁆𑀲 𑀢𑀲𑁆𑀲𑁂𑀯 𑀧𑀼𑀭𑀺𑀫𑀧𑀘𑁆𑀙𑀺𑀫𑀚𑀸𑀢𑀺𑀓𑀸𑀮𑁂𑀲𑀼 𑀉𑀧𑀮𑀤𑁆𑀥𑀺𑀁 𑀲𑀦𑁆𑀥𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀲𑀁 𑀧𑀞𑀫𑀦𑀬𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯𑀸𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀧𑀞𑀫𑁂 ‘‘𑀲𑀩𑁆𑀩𑀢𑁆𑀣𑀸’’𑀢𑀺 𑀏𑀢𑀲𑁆𑀫𑀺𑀁 𑀦𑀬𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯, 𑀓𑀺𑀁 𑀢𑀁? 𑀧𑀸𑀞𑀲𑁆𑀲 𑀲𑀁𑀔𑀺𑀢𑁆𑀢𑀢𑀸𑀢𑀺 𑀅𑀢𑁆𑀣𑁄. 𑀇𑀥𑀸𑀧𑀺 𑀳𑀺 𑀬𑀲𑁆𑀫𑀸 ‘‘𑀲𑀩𑁆𑀩𑀤𑀸 𑀦 𑀉𑀧𑀮𑀩𑁆𑀪𑀢𑀻’’𑀢𑀺 𑀯𑀼𑀢𑁆𑀢𑁂 𑀏𑀓𑀤𑀸 𑀉𑀧𑀮𑀩𑁆𑀪𑀢𑀻𑀢𑀺 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀧𑀘𑁆𑀘𑀦𑀻𑀓𑁂 𑀧𑀝𑀺𑀓𑁆𑀔𑁂𑀧𑁄 𑀲𑀓𑀯𑀸𑀤𑀺𑀲𑁆𑀲𑀸𑀢𑀺 𑀬𑁄𑀚𑁂𑀢𑀩𑁆𑀩𑀦𑁆𑀢𑀺.

𑁪. 𑀅𑀯𑀬𑀯𑀲𑀘𑁆𑀘𑀺𑀓𑀝𑁆𑀞𑁄

𑁧. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀯𑀡𑁆𑀡𑀦𑀸

𑁧𑁩. 𑀢𑀢𑀺𑀬𑀦𑀬𑁂 𑀘 𑀬𑀲𑁆𑀫𑀸 ‘‘𑀲𑀩𑁆𑀩𑁂𑀲𑀼 𑀦 𑀉𑀧𑀮𑀩𑁆𑀪𑀢𑀻’’𑀢𑀺 𑀯𑀼𑀢𑁆𑀢𑁂 𑀏𑀓𑀲𑁆𑀫𑀺𑀁 𑀉𑀧𑀮𑀩𑁆𑀪𑀢𑀻𑀢𑀺 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀧𑀘𑁆𑀘𑀦𑀻𑀓𑁂 𑀧𑀝𑀺𑀓𑁆𑀔𑁂𑀧𑁄 𑀲𑀓𑀯𑀸𑀤𑀺𑀲𑁆𑀲𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀢𑀸𑀤𑀺𑀲𑀫𑁂𑀯𑀸’’𑀢𑀺.

𑀑𑀓𑀸𑀲𑀸𑀤𑀺𑀲𑀘𑁆𑀘𑀺𑀓𑀝𑁆𑀞𑁄

𑁨. 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀯𑀡𑁆𑀡𑀦𑀸

𑁧𑁪. 𑀢𑀢𑁆𑀣 𑀅𑀦𑀼𑀮𑁄𑀫𑀧𑀜𑁆𑀘𑀓𑀲𑁆𑀲𑀸𑀢𑀺𑀆𑀤𑀺𑀫𑁆𑀳𑀺 𑀅𑀦𑀼𑀮𑁄𑀫𑀧𑀜𑁆𑀘𑀓𑀦𑁆𑀢𑀺 𑀦𑀺𑀕𑁆𑀕𑀳𑀧𑀜𑁆𑀘𑀓𑀁, 𑀧𑀘𑁆𑀘𑀦𑀻𑀓𑀦𑁆𑀢𑀺 𑀘 𑀧𑀝𑀺𑀓𑀫𑁆𑀫𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀅𑀦𑀼𑀮𑁄𑀫𑀧𑀜𑁆𑀘𑀓𑀲𑁆𑀲 ‘‘𑀲𑀩𑁆𑀩𑀢𑁆𑀣 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺𑀓𑀲𑁆𑀲 𑀅𑀢𑁆𑀣𑁄 ‘‘𑀲𑀩𑁆𑀩𑀢𑁆𑀣 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺𑀧𑀸𑀴𑀺𑀁 𑀲𑀁𑀔𑀺𑀧𑀺𑀢𑁆𑀯𑀸 𑀆𑀕𑀢𑁂 𑀲𑀭𑀽𑀧𑁂𑀦 𑀅𑀯𑀼𑀢𑁆𑀢𑁂 ‘‘𑀬𑀲𑁆𑀫𑀸 𑀲𑀭𑀻𑀭𑀁 𑀲𑀦𑁆𑀥𑀸𑀬𑀸’’𑀢𑀺𑀆𑀤𑀺𑀦𑀸 (𑀓𑀣𑀸. 𑀅𑀝𑁆𑀞. 𑁧𑁧) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄, 𑀧𑀘𑁆𑀘𑀦𑀻𑀓𑀲𑁆𑀲 𑀘 ‘‘𑀲𑀩𑁆𑀩𑀢𑁆𑀣 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺𑀓𑀲𑁆𑀲 𑀧𑀝𑀺𑀓𑀫𑁆𑀫𑀓𑀭𑀡𑀯𑀲𑁂𑀦 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑁄 𑀧𑀝𑀺𑀓𑀫𑁆𑀫𑀸𑀤𑀺𑀧𑀸𑀴𑀺𑀁 𑀲𑀁𑀔𑀺𑀧𑀺𑀢𑁆𑀯𑀸 𑀆𑀤𑀺𑀫𑀢𑁆𑀢𑀤𑀲𑁆𑀲𑀦𑁂𑀦 𑀆𑀕𑀢𑁂 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺𑀫𑁆𑀳𑀺 𑀅𑀦𑀼𑀮𑁄𑀫𑁂 ‘‘𑀲𑀩𑁆𑀩𑀢𑁆𑀣𑀸𑀢𑀺 𑀲𑀭𑀻𑀭𑀁 𑀲𑀦𑁆𑀥𑀸𑀬 𑀅𑀦𑀼𑀬𑁄𑀕𑁄 𑀲𑀓𑀯𑀸𑀤𑀺𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀓𑀣𑀸. 𑀅𑀝𑁆𑀞. 𑁧𑁧) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀣 𑀯𑀸 𑀢𑀢𑁆𑀣𑀸𑀢𑀺 𑀬𑀁 𑀆𑀭𑀤𑁆𑀥𑀁, 𑀢𑀲𑁆𑀫𑀺𑀦𑁆𑀢𑀺 𑀏𑀯𑀁 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀢𑀢𑁆𑀣 𑀢𑁂𑀲𑀼 𑀢𑀻𑀲𑀼 𑀫𑀼𑀔𑁂𑀲𑀽𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀦𑀼𑀮𑁄𑀫𑀧𑀜𑁆𑀘𑀓𑀫𑀽𑀮𑀓𑀸 𑀘𑁂𑀢𑁆𑀣 𑀲𑀩𑁆𑀩𑀸𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀧𑀜𑁆𑀘𑀓𑀧𑀸𑀴𑀺 𑀅𑀦𑀼𑀮𑁄𑀫𑀧𑀜𑁆𑀘𑀓𑀲𑁆𑀲 𑀧𑀸𑀴𑀻𑀢𑀺 𑀯𑀼𑀢𑁆𑀢𑀸, 𑀢𑀣𑀸 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑀧𑀜𑁆𑀘𑀓𑀧𑀸𑀴𑀺 𑀘 𑀧𑀘𑁆𑀘𑀦𑀻𑀓𑀲𑁆𑀲 𑀧𑀸𑀴𑀻𑀢𑀺. 𑀢𑀁 𑀲𑀁𑀔𑀺𑀧𑀺𑀢𑁆𑀯𑀸 𑀧𑀝𑀺𑀓𑀫𑁆𑀫𑀯𑀲𑁂𑀦 𑀆𑀕𑀢𑁂 𑀲𑀭𑀽𑀧𑁂𑀦 𑀅𑀯𑀼𑀢𑁆𑀢𑁂 ‘‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺𑀓𑁂 𑀧𑀘𑁆𑀘𑀦𑀻𑀓𑁂 ‘‘𑀉𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺𑀓𑁂 𑀅𑀦𑀼𑀮𑁄𑀫𑁂 𑀘 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀲𑀼𑀤𑁆𑀥𑀺𑀓𑀲𑀘𑁆𑀘𑀺𑀓𑀝𑁆𑀞𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀘𑁆𑀘𑀺𑀓𑀝𑁆𑀞𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀼𑀤𑁆𑀥𑀺𑀓𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸

𑁧𑁭-𑁨𑁭. 𑀭𑀽𑀧𑀸𑀤𑀻𑀳𑀺 𑀲𑀤𑁆𑀥𑀺𑀁 𑀲𑀘𑁆𑀘𑀺𑀓𑀝𑁆𑀞𑀲𑀁𑀲𑀦𑁆𑀤𑀦𑀦𑁆𑀢𑀺 𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀭𑀽𑀧𑀸𑀤𑀻𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑀁, 𑀲𑀘𑁆𑀘𑀺𑀓𑀝𑁆𑀞𑁂 𑀯𑀸 𑀭𑀽𑀧𑀸𑀤𑀻𑀳𑀺 𑀲𑀤𑁆𑀥𑀺𑀁 𑀧𑀼𑀕𑁆𑀕𑀮𑀲𑁆𑀲 𑀲𑀁𑀲𑀦𑁆𑀤𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀕𑁆𑀕𑀮𑁄 𑀭𑀽𑀧𑀜𑁆𑀘𑀸𑀢𑀺 𑀘-𑀓𑀸𑀭𑀲𑁆𑀲 𑀲𑀫𑀼𑀘𑁆𑀘𑀬𑀢𑁆𑀣𑀢𑁆𑀢𑀸 𑀬𑀣𑀸 𑀭𑀽𑀧𑀦𑁆𑀢𑀺 𑀏𑀯𑀁 𑀦𑀺𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑁄 𑀅𑀢𑁆𑀣𑁄 𑀯𑀺𑀘𑀸𑀭𑁂𑀢𑀩𑁆𑀩𑁄. 𑀭𑀽𑀧𑀸𑀤𑀻𑀳𑀺 𑀅𑀜𑁆𑀜𑁄 𑀅𑀦𑀜𑁆𑀜𑁄 𑀘 𑀧𑀼𑀕𑁆𑀕𑀮𑁄 𑀦 𑀯𑀢𑁆𑀢𑀩𑁆𑀩𑁄𑀢𑀺 𑀮𑀤𑁆𑀥𑀺 𑀲𑀫𑀬𑁄. ‘‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑀅𑀩𑁆𑀬𑀸𑀓𑀢𑀫𑁂𑀢𑀁 𑀪𑀕𑀯𑀢𑀸’’𑀢𑀺𑀆𑀤𑀺𑀓𑀁 (𑀲𑀁. 𑀦𑀺. 𑁪.𑁪𑁧𑁬) 𑀲𑀼𑀢𑁆𑀢𑀁. 𑀅𑀦𑀼𑀜𑁆𑀜𑀸𑀬𑀫𑀸𑀦𑁂 𑀢𑀤𑀼𑀪𑀬𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀻𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀫𑀬𑀲𑀼𑀢𑁆𑀢𑀯𑀺𑀭𑁄𑀥𑀁 𑀤𑀺𑀲𑁆𑀯𑀸’’𑀢𑀺.

𑀥𑀫𑁆𑀫𑀢𑁄𑀢𑀺 𑀧𑀸𑀴𑀺𑀢𑁄. ‘‘𑀧𑀝𑀺𑀓𑀫𑁆𑀫𑀘𑀢𑀼𑀓𑁆𑀓𑀸𑀤𑀻𑀦𑀺 𑀲𑀁𑀔𑀺𑀢𑁆𑀢𑀸𑀦𑀺. 𑀧𑀭𑀯𑀸𑀤𑀻…𑀧𑁂… 𑀤𑀲𑁆𑀲𑀺𑀢𑀸𑀦𑀻’’𑀢𑀺 𑀯𑀤𑀦𑁆𑀢𑁂𑀳𑀺 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺…𑀧𑁂… 𑀆𑀚𑀸𑀦𑀸𑀳𑀺 𑀧𑀝𑀺𑀓𑀫𑁆𑀫𑀦𑁆𑀢𑀺 𑀏𑀢𑁆𑀣 𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳𑀦𑁆𑀢𑀺 𑀧𑀸𑀞𑁄 𑀤𑀺𑀝𑁆𑀞𑁄 𑀪𑀯𑀺𑀲𑁆𑀲𑀢𑀺. 𑀅𑀜𑁆𑀜𑀢𑁆𑀢𑀁 𑀧𑀝𑀺𑀚𑀸𑀦𑀸𑀧𑀦𑀢𑁆𑀣𑀦𑁆𑀢𑀺 𑀬𑀣𑀸 𑀫𑀬𑀸 𑀅𑀜𑁆𑀜𑀢𑁆𑀢𑀁 𑀯𑀢𑁆𑀢𑀩𑁆𑀩𑀁, 𑀢𑀣𑀸 𑀘 𑀢𑀬𑀸𑀧𑀺 𑀢𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀜𑁆𑀜𑀢𑁆𑀢𑀧𑀝𑀺𑀜𑁆𑀜𑀸𑀬 𑀘𑁄𑀤𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀸𑀦𑀁 𑀏𑀓𑀢𑁆𑀢𑀦𑀸𑀦𑀢𑁆𑀢𑀧𑀜𑁆𑀳𑀲𑁆𑀲 𑀞𑀧𑀦𑀻𑀬𑀢𑁆𑀢𑀸𑀢𑀺 𑀅𑀩𑁆𑀬𑀸𑀓𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀬𑀤𑀺 𑀞𑀧𑀦𑀻𑀬𑀢𑁆𑀢𑀸 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀧𑀭𑁂𑀦𑀧𑀺 𑀞𑀧𑀦𑀻𑀬𑀢𑁆𑀢𑀸 𑀮𑀤𑁆𑀥𑀺𑀫𑁂𑀯 𑀦𑀺𑀲𑁆𑀲𑀸𑀬 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄𑀢𑀺 𑀲𑁄𑀧𑀺 𑀦 𑀦𑀺𑀕𑁆𑀕𑀳𑁂𑀢𑀩𑁆𑀩𑁄 𑀲𑀺𑀬𑀸. 𑀧𑀭𑁄 𑀧𑀦 𑀧𑀼𑀕𑁆𑀕𑀮𑁄𑀢𑀺 𑀓𑀜𑁆𑀘𑀺 𑀲𑀪𑀸𑀯𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀞𑀧𑀦𑀻𑀬𑀢𑁆𑀢𑀁 𑀇𑀘𑁆𑀙𑀢𑀺, 𑀲𑀢𑀺 𑀘 𑀲𑀪𑀸𑀯𑁂 𑀞𑀧𑀦𑀻𑀬𑀢𑀸 𑀦 𑀬𑀼𑀢𑁆𑀢𑀸𑀢𑀺 𑀦𑀺𑀕𑁆𑀕𑀳𑁂𑀢𑀩𑁆𑀩𑁄. 𑀲𑀫𑁆𑀫𑀼𑀢𑀺 𑀧𑀦 𑀓𑁄𑀘𑀺 𑀲𑀪𑀸𑀯𑁄 𑀦𑀢𑁆𑀣𑀺. 𑀢𑁂𑀦𑁂𑀯𑀲𑁆𑀲 𑀏𑀓𑀢𑁆𑀢𑀦𑀸𑀦𑀢𑁆𑀢𑀧𑀜𑁆𑀳𑀲𑁆𑀲 𑀞𑀧𑀦𑀻𑀬𑀢𑀁 𑀯𑀤𑀦𑁆𑀢𑁄 𑀦 𑀦𑀺𑀕𑁆𑀕𑀳𑁂𑀢𑀩𑁆𑀩𑁄𑀢𑀺 𑀲𑀓𑀯𑀸𑀤𑀺𑀦𑀸 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀬𑀼𑀢𑁆𑀢𑁄.

𑀲𑀼𑀤𑁆𑀥𑀺𑀓𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸

𑁨𑁮-𑁩𑁬. 𑀉𑀧𑀮𑀤𑁆𑀥𑀺𑀲𑀸𑀫𑀜𑁆𑀜𑁂𑀦 𑀅𑀜𑁆𑀜𑀢𑁆𑀢𑀧𑀼𑀘𑁆𑀙𑀸 𑀘𑀸𑀢𑀺 𑀇𑀤𑀜𑁆𑀘 𑀤𑁆𑀯𑀺𑀦𑁆𑀦𑀁 𑀲𑀫𑀸𑀦𑀢𑀸 𑀦𑁄 𑀅𑀜𑁆𑀜𑀢𑁆𑀢𑀲𑁆𑀲 𑀓𑀸𑀭𑀡𑀁 𑀬𑀼𑀢𑁆𑀢𑀁, 𑀅𑀣 𑀔𑁄 𑀯𑀺𑀲𑀼𑀁 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦 𑀉𑀧𑀮𑀩𑁆𑀪𑀦𑀻𑀬𑀢𑀸𑀢𑀺 𑀯𑀺𑀘𑀸𑀭𑁂𑀢𑀩𑁆𑀩𑀁. ‘‘𑀏𑀓𑀯𑀻𑀲𑀸𑀥𑀺𑀓𑀸𑀦𑀻’’𑀢𑀺 𑀧𑀼𑀭𑀺𑀫𑀧𑀸𑀞𑁄, 𑀯𑀻𑀲𑀸𑀥𑀺𑀓𑀸𑀦𑀻𑀢𑀺 𑀧𑀦 𑀧𑀞𑀺𑀢𑀩𑁆𑀩𑀁.

𑁩𑁭-𑁪𑁫. ‘‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄’’𑀢𑀺 𑀲𑀼𑀢𑁆𑀢𑀁 𑀅𑀦𑀼𑀚𑀸𑀦𑀸𑀧𑁂𑀦𑁆𑀢𑁂𑀦 𑀉𑀧𑀮𑀤𑁆𑀥𑀺 𑀅𑀦𑀼𑀚𑀸𑀦𑀺𑀢𑀸 𑀳𑁄𑀢𑀻𑀢𑀺 𑀫𑀜𑁆𑀜𑀫𑀸𑀦𑁄 𑀆𑀳 ‘‘𑀉𑀧𑀮𑀤𑁆𑀥𑀺𑀲𑀸𑀫𑀜𑁆𑀜𑀁 𑀆𑀭𑁄𑀧𑁂𑀢𑁆𑀯𑀸’’𑀢𑀺. 𑀯𑀻𑀲𑀸𑀥𑀺𑀓𑀸𑀦𑀺 𑀦𑀯 𑀧𑀝𑀺𑀓𑀫𑁆𑀫𑀧𑀜𑁆𑀘𑀓𑀲𑀢𑀸𑀦𑀺 𑀤𑀲𑁆𑀲𑀺𑀢𑀸𑀦𑀻𑀢𑀺 𑀏𑀢𑁂𑀦 𑀲𑀼𑀤𑁆𑀥𑀺𑀓𑀲𑀁𑀲𑀦𑁆𑀤𑀦𑁂𑀧𑀺 ‘‘𑀆𑀚𑀸𑀦𑀸𑀳𑀺 𑀧𑀝𑀺𑀓𑀫𑁆𑀫’’𑀫𑀺𑀘𑁆𑀘𑁂𑀯 𑀧𑀸𑀞𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀬𑀜𑁆𑀘 𑀯𑀸𑀤𑀫𑀼𑀔𑁂𑀲𑀼 𑀲𑀼𑀤𑁆𑀥𑀺𑀓𑀲𑀘𑁆𑀘𑀺𑀓𑀝𑁆𑀞𑁂 ‘‘𑀧𑀝𑀺𑀓𑀫𑁆𑀫𑀘𑀢𑀼𑀓𑁆𑀓’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 ‘‘𑀧𑀝𑀺𑀓𑀫𑁆𑀫𑀧𑀜𑁆𑀘𑀓’’𑀦𑁆𑀢𑀺.

𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀘𑀢𑀼𑀓𑁆𑀓𑀦𑀬𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸

𑁪𑁬-𑁫𑁨. 𑀏𑀓𑀥𑀫𑁆𑀫𑀢𑁄𑀧𑀺 𑀅𑀜𑁆𑀜𑀢𑁆𑀢𑀁 𑀅𑀦𑀺𑀘𑁆𑀙𑀦𑁆𑀢𑁄 𑀭𑀽𑀧𑀸𑀤𑀺𑀏𑀓𑁂𑀓𑀥𑀫𑁆𑀫𑀯𑀲𑁂𑀦 𑀦𑀸𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑁄. 𑀲𑀫𑀼𑀤𑀸𑀬𑀢𑁄 𑀳𑀺 𑀅𑀬𑀁 𑀅𑀜𑁆𑀜𑀢𑁆𑀢𑀁 𑀅𑀦𑀺𑀘𑁆𑀙𑀦𑁆𑀢𑁄 𑀏𑀓𑀤𑁂𑀲𑀢𑁄 𑀅𑀦𑀜𑁆𑀜𑀢𑁆𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀦 𑀦𑀺𑀕𑁆𑀕𑀳𑀸𑀭𑀳𑁄 𑀲𑀺𑀬𑀸𑀢𑀺 𑀏𑀢𑀁 𑀯𑀘𑀦𑁄𑀓𑀸𑀲𑀁 𑀦𑀺𑀯𑀢𑁆𑀢𑁂𑀢𑀼𑀁 ‘‘𑀅𑀬𑀜𑁆𑀘 𑀅𑀦𑀼𑀬𑁄𑀕𑁄’’𑀢𑀺𑀆𑀤𑀺𑀫𑀸𑀳. 𑀲𑀓𑀮𑀦𑁆𑀢𑀺 𑀲𑀢𑁆𑀢𑀧𑀜𑁆𑀜𑀸𑀲𑀯𑀺𑀥𑁄 𑀥𑀫𑁆𑀫𑀧𑁆𑀧𑀪𑁂𑀤𑁄 𑀧𑀼𑀕𑁆𑀕𑀮𑁄𑀢𑀺 𑀯𑀸 𑀧𑀭𑀫𑀢𑁆𑀣𑀲𑀘𑁆𑀘𑀁 𑀧𑀼𑀕𑁆𑀕𑀮𑁄𑀢𑀺 𑀯𑀸 𑀏𑀯𑀁 𑀲𑀓𑀮𑀁 𑀲𑀦𑁆𑀥𑀸𑀬𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀓𑀮𑀁 𑀧𑀭𑀫𑀢𑁆𑀣𑀁 𑀘𑀺𑀦𑁆𑀢𑁂𑀢𑁆𑀯𑀸 𑀢𑀦𑁆𑀢𑀺𑀯𑀲𑁂𑀦 𑀅𑀦𑀼𑀬𑁄𑀕𑀮𑀓𑁆𑀔𑀡𑀲𑁆𑀲 𑀞𑀧𑀺𑀢𑀢𑁆𑀢𑀸 𑀲𑀓𑀮𑀧𑀭𑀫𑀢𑁆𑀣𑀢𑁄 𑀘 𑀅𑀜𑁆𑀜𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀅𑀪𑀸𑀯𑀸 𑀲𑀘𑁆𑀘𑀺𑀓𑀝𑁆𑀞𑁂𑀦 𑀧𑀼𑀕𑁆𑀕𑀮𑁂𑀦 𑀢𑀢𑁄 𑀅𑀜𑁆𑀜𑁂𑀦 𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 ‘‘𑀭𑀽𑀧𑀁 𑀧𑀼𑀕𑁆𑀕𑀮𑁄’’𑀢𑀺 𑀇𑀫𑀁 𑀧𑀜𑁆𑀳𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑀲𑁆𑀲 𑀦𑀺𑀕𑁆𑀕𑀳𑀸𑀭𑁄𑀧𑀦𑀁 𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀲𑀪𑀸𑀕𑀯𑀺𑀦𑀺𑀩𑁆𑀪𑁄𑀕𑀢𑁄𑀢𑀺 𑀭𑀽𑀧𑀢𑁄 𑀅𑀜𑁆𑀜𑀲𑀪𑀸𑀕𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀩𑁆𑀩𑀥𑀫𑁆𑀫𑀸𑀢𑀺 𑀭𑀽𑀧𑀯𑀚𑁆𑀚𑁂 𑀲𑀩𑁆𑀩𑀥𑀫𑁆𑀫𑁂 𑀯𑀤𑀢𑀺. ‘‘𑀭𑀽𑀧𑀲𑁆𑀫𑀺𑀁 𑀧𑀼𑀕𑁆𑀕𑀮𑁄’’𑀢𑀺 𑀏𑀢𑁆𑀣 𑀦𑀺𑀲𑁆𑀲𑀬𑀯𑀺𑀦𑀸𑀲𑁂 𑀯𑀺𑀦𑀸𑀲𑀸𑀧𑀢𑁆𑀢𑀺𑀪𑀬𑁂𑀦 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀪𑀬𑁂𑀦 𑀘𑁂𑀯𑀸’’𑀢𑀺. 𑀢𑀻𑀲𑀼 𑀧𑀦 𑀲𑀫𑀬𑀯𑀺𑀭𑁄𑀥𑁂𑀦 𑀧𑀝𑀺𑀓𑁆𑀔𑁂𑀧𑁄 𑀅𑀥𑀺𑀧𑁆𑀧𑁂𑀢𑁄. 𑀦 𑀳𑀺 𑀲𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀇𑀘𑁆𑀙𑀢𑀺, 𑀅𑀧𑀺𑀘 𑀲𑀲𑁆𑀲𑀢𑀤𑀺𑀝𑁆𑀞𑀺𑀪𑀬𑁂𑀦 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀬𑀼𑀢𑁆𑀢𑀁 𑀯𑀢𑁆𑀢𑀼𑀁. 𑀲𑀓𑁆𑀓𑀸𑀬𑀤𑀺𑀝𑁆𑀞𑀻𑀲𑀼 𑀳𑀺 𑀧𑀜𑁆𑀘𑁂𑀯 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄, 𑀲𑁂𑀲𑀸𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑁄𑀢𑀺. 𑀅𑀜𑁆𑀜𑀢𑁆𑀭 𑀭𑀽𑀧𑀸𑀢𑀺 𑀏𑀢𑁆𑀣 𑀘 𑀭𑀽𑀧𑀯𑀸 𑀧𑀼𑀕𑁆𑀕𑀮𑁄𑀢𑀺 𑀅𑀬𑀫𑀢𑁆𑀣𑁄 𑀲𑀗𑁆𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀘𑀢𑀼𑀓𑁆𑀓𑀦𑀬𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀲𑀁𑀲𑀦𑁆𑀤𑀦𑀓𑀣𑀸𑀯𑀡𑁆𑀡𑀦𑀸.

𑁮. 𑀮𑀓𑁆𑀔𑀡𑀬𑀼𑀢𑁆𑀢𑀺𑀯𑀡𑁆𑀡𑀦𑀸

𑁫𑁪. 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑁂𑀢𑀺 𑀇𑀤𑀁 𑀬𑀁 𑀯𑀓𑁆𑀔𑀢𑀺 ‘‘𑀙𑀮𑀯𑀲𑁂𑀦 𑀧𑀦 𑀯𑀢𑁆𑀢𑀩𑁆𑀩𑀁 ‘𑀆𑀚𑀸𑀦𑀸𑀳𑀺 𑀧𑀝𑀺𑀓𑀫𑁆𑀫’𑀦𑁆𑀢𑀺𑀆𑀤𑀻’’𑀢𑀺 (𑀓𑀣𑀸. 𑀅𑀝𑁆𑀞. 𑁫𑁪), 𑀢𑁂𑀦 𑀧𑀦 𑀦 𑀲𑀫𑁂𑀢𑀺. 𑀧𑀘𑁆𑀘𑀦𑀻𑀓𑀸𑀦𑀼𑀮𑁄𑀫𑁂 𑀳𑀺 𑀧𑀘𑁆𑀘𑀦𑀻𑀓𑁂 ‘‘𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁, 𑀦 𑀧𑀦 ‘‘𑀧𑀝𑀺𑀓𑀫𑁆𑀫’’𑀦𑁆𑀢𑀺.

𑀮𑀓𑁆𑀔𑀡𑀬𑀼𑀢𑁆𑀢𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀯𑀘𑀦𑀲𑁄𑀥𑀦𑀯𑀡𑁆𑀡𑀦𑀸

𑁫𑁫-𑁫𑁯. 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺 𑀧𑀤𑀤𑁆𑀯𑀬𑀲𑁆𑀲 𑀅𑀢𑁆𑀣𑀢𑁄 𑀏𑀓𑀢𑁆𑀢𑁂𑀢𑀺 𑀏𑀢𑁆𑀣 𑀢𑀤𑁂𑀯 𑀏𑀓𑀢𑁆𑀢𑀁 𑀧𑀭𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀁 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑀦𑁆𑀢𑀺 𑀯𑀺𑀘𑀸𑀭𑁂𑀢𑀩𑁆𑀩𑀫𑁂𑀢𑀁. 𑀧𑀼𑀕𑁆𑀕𑀮𑀲𑁆𑀲 𑀳𑀺 𑀅𑀯𑀺𑀪𑀚𑀺𑀢𑀩𑁆𑀩𑀢𑀁, 𑀉𑀧𑀮𑀩𑁆𑀪𑀢𑀻𑀢𑀺 𑀏𑀢𑀲𑁆𑀲 𑀯𑀺𑀪𑀚𑀺𑀢𑀩𑁆𑀩𑀢𑀁 𑀯𑀤𑀦𑁆𑀢𑁄 𑀯𑀺𑀪𑀚𑀺𑀢𑀩𑁆𑀩𑀸𑀯𑀺𑀪𑀚𑀺𑀢𑀩𑁆𑀩𑀢𑁆𑀣𑀸𑀦𑀁 𑀉𑀧𑀮𑀩𑁆𑀪𑀢𑀺𑀧𑀼𑀕𑁆𑀕𑀮-𑀲𑀤𑁆𑀤𑀸𑀦𑀁 𑀓𑀣𑀁 𑀅𑀢𑁆𑀣𑀢𑁄 𑀏𑀓𑀢𑁆𑀢𑀁 𑀲𑀫𑁆𑀧𑀝𑀺𑀘𑁆𑀙𑁂𑀬𑁆𑀬𑀸𑀢𑀺? 𑀬𑀣𑀸 𑀘 𑀯𑀺𑀪𑀚𑀺𑀢𑀩𑁆𑀩𑀸𑀯𑀺𑀪𑀚𑀺𑀢𑀩𑁆𑀩𑀢𑁆𑀣𑀸𑀦𑀁 𑀉𑀧𑀮𑀩𑁆𑀪𑀢𑀺-𑀭𑀽𑀧-𑀲𑀤𑁆𑀤𑀸𑀦𑀁 𑀢𑀁 𑀯𑀺𑀪𑀸𑀕𑀁 𑀯𑀤𑀢𑁄 𑀭𑀽𑀧𑀁 𑀓𑀺𑀜𑁆𑀘𑀺 𑀉𑀧𑀮𑀩𑁆𑀪𑀢𑀺, 𑀓𑀺𑀜𑁆𑀘𑀺 𑀦 𑀉𑀧𑀮𑀩𑁆𑀪𑀢𑀻𑀢𑀺 𑀅𑀬𑀁 𑀧𑀲𑀗𑁆𑀕𑁄 𑀦𑀸𑀧𑀚𑁆𑀚𑀢𑀺, 𑀏𑀯𑀁 𑀏𑀢𑀲𑁆𑀲𑀧𑀺 𑀬𑀣𑀸𑀯𑀼𑀢𑁆𑀢𑀯𑀺𑀪𑀸𑀕𑀁 𑀯𑀤𑀢𑁄 𑀬𑀣𑀸𑀆𑀧𑀸𑀤𑀺𑀢𑁂𑀦 𑀧𑀲𑀗𑁆𑀕𑁂𑀦 𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀫𑀕𑁆𑀕𑀺𑀢𑀩𑁆𑀩𑁄 𑀏𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑁬𑁦. ‘‘𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀽’’𑀢𑀺 (𑀲𑀼. 𑀦𑀺. 𑁧𑁧𑁨𑁫) 𑀏𑀢𑁂𑀦 𑀅𑀢𑁆𑀣𑀢𑁄 𑀧𑀼𑀕𑁆𑀕𑀮𑁄 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀦𑀢𑁆𑀣𑀻𑀢𑀺𑀧𑀺 𑀯𑀼𑀢𑁆𑀢’’𑀦𑁆𑀢𑀺.

𑀯𑀘𑀦𑀲𑁄𑀥𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑀯𑀡𑁆𑀡𑀦𑀸

𑁬𑁧-𑁬𑁬. 𑀭𑀽𑀧𑀓𑀸𑀬𑀸𑀯𑀺𑀭𑀳𑀁 𑀲𑀦𑁆𑀥𑀸𑀬 ‘‘𑀭𑀽𑀧𑀓𑀸𑀬𑀲𑀩𑁆𑀪𑀸𑀯𑀢𑁄’’𑀢𑀺 𑀆𑀳. ‘‘𑀭𑀽𑀧𑀺𑀦𑁄 𑀯𑀸 𑀅𑀭𑀽𑀧𑀺𑀦𑁄 𑀯𑀸’’𑀢𑀺 (𑀇𑀢𑀺𑀯𑀼. 𑁯𑁦) 𑀲𑀼𑀢𑁆𑀢𑁂 𑀆𑀕𑀢𑀧𑀜𑁆𑀜𑀢𑁆𑀢𑀺𑀁 𑀲𑀦𑁆𑀥𑀸𑀬 ‘‘𑀢𑀣𑀸𑀭𑀽𑀧𑀸𑀬 𑀘 𑀧𑀜𑁆𑀜𑀢𑁆𑀢𑀺𑀬𑀸 𑀅𑀢𑁆𑀣𑀺𑀢𑀸𑀬𑀸’’𑀢𑀺. 𑀯𑀻𑀢𑀭𑀸𑀕𑀲𑀩𑁆𑀪𑀸𑀯𑀢𑁄𑀢𑀺 𑀓𑀸𑀫𑀻𑀪𑀸𑀯𑀲𑁆𑀲 𑀅𑀦𑁂𑀓𑀦𑁆𑀢𑀺𑀓𑀢𑁆𑀢𑀸 𑀓𑀸𑀫𑀥𑀸𑀢𑀼𑀬𑀸 𑀆𑀬𑀢𑁆𑀢𑀢𑁆𑀢𑀸𑀪𑀸𑀯𑀢𑁄 𑀘 ‘‘𑀓𑀸𑀫𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑁄𑀢𑀺 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁬𑁭. 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬𑀸𑀢𑀺 𑀓𑀸𑀭𑀡𑀯𑀘𑀦𑀫𑁂𑀢𑀁, 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬 𑀓𑀸𑀭𑀡𑀪𑀽𑀢𑀸𑀬 𑀏𑀯𑀁𑀮𑀤𑁆𑀥𑀺𑀓𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀆𑀳𑀘𑁆𑀘 𑀪𑀸𑀲𑀺𑀢𑀦𑁆𑀢𑀺 ‘‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑀅𑀩𑁆𑀬𑀸𑀓𑀢𑀫𑁂𑀢𑀁 𑀫𑀬𑀸’’𑀢𑀺 (𑀫. 𑀦𑀺. 𑁨.𑁧𑁨𑁮) 𑀆𑀳𑀘𑁆𑀘 𑀪𑀸𑀲𑀺𑀢𑀁.

𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀕𑀢𑀺𑀅𑀦𑀼𑀬𑁄𑀕𑀯𑀡𑁆𑀡𑀦𑀸

𑁬𑁯-𑁭𑁨. ‘‘𑀤𑀲𑁆𑀲𑁂𑀦𑁆𑀢𑁄 ‘𑀢𑁂𑀦 𑀳𑀺 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀻’𑀢𑀺𑀆𑀤𑀺𑀫𑀸𑀳𑀸’’𑀢𑀺 𑀯𑀼𑀢𑁆𑀢𑀁, ‘‘𑀤𑀲𑁆𑀲𑁂𑀦𑁆𑀢𑁄 ‘𑀦 𑀯𑀢𑁆𑀢𑀩𑁆𑀩𑀁 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀻’𑀢𑀺𑀆𑀤𑀺𑀫𑀸𑀳𑀸’’𑀢𑀺 𑀧𑀦 𑀪𑀯𑀺𑀢𑀩𑁆𑀩𑀁, 𑀤𑀲𑁆𑀲𑁂𑀢𑁆𑀯𑀸𑀢𑀺 𑀯𑀸 𑀯𑀢𑁆𑀢𑀩𑁆𑀩𑀁.

𑁯𑁧. 𑀬𑁂𑀦 𑀭𑀽𑀧𑀲𑀗𑁆𑀔𑀸𑀢𑁂𑀦 𑀲𑀭𑀻𑀭𑁂𑀦 𑀲𑀤𑁆𑀥𑀺𑀁 𑀕𑀘𑁆𑀙𑀢𑀻𑀢𑀺 𑀏𑀢𑁆𑀣 ‘‘𑀭𑀽𑀧𑁂𑀦 𑀲𑀤𑁆𑀥𑀺𑀁 𑀕𑀘𑁆𑀙𑀢𑀻’’𑀢𑀺 𑀯𑀤𑀦𑁆𑀢𑁂𑀦 ‘‘𑀭𑀽𑀧𑀁 𑀧𑀼𑀕𑁆𑀕𑀮𑁄’’𑀢𑀺 𑀅𑀦𑀦𑀼𑀜𑁆𑀜𑀸𑀢𑀢𑁆𑀢𑀸 𑀬𑁂𑀦𑀸𑀓𑀸𑀭𑁂𑀦 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀇𑀤𑀁 𑀆𑀧𑀚𑁆𑀚𑀢𑀺, 𑀲𑁄 𑀯𑀢𑁆𑀢𑀩𑁆𑀩𑁄. 𑀅𑀲𑀜𑁆𑀜𑀽𑀧𑀧𑀢𑁆𑀢𑀺𑀁 𑀲𑀦𑁆𑀥𑀸𑀬𑀸𑀢𑀺 𑀦𑀺𑀭𑀬𑀽𑀧𑀕𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀲𑀜𑁆𑀜𑀽𑀧𑀕𑀲𑁆𑀲 𑀅𑀭𑀽𑀧𑀽𑀧𑀕𑀲𑁆𑀲 𑀘 𑀅𑀦𑁆𑀢𑀭𑀸𑀪𑀯𑀁 𑀦 𑀇𑀘𑁆𑀙𑀢𑀻𑀢𑀺 𑀘𑀼𑀢𑀺𑀢𑁄 𑀅𑀦𑀦𑁆𑀢𑀭𑀁 𑀉𑀧𑀧𑀢𑁆𑀢𑀺𑀁 𑀲𑀦𑁆𑀥𑀸𑀬𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑁂 𑀧𑀦 𑀘𑀼𑀢𑀺𑀓𑀸𑀮𑁂 𑀉𑀧𑀧𑀢𑁆𑀢𑀺𑀓𑀸𑀮𑁂 𑀘 𑀅𑀲𑀜𑁆𑀜𑀽𑀧𑀧𑀢𑁆𑀢𑀺𑀓𑀸𑀮𑁂 𑀘 𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀲𑀜𑁆𑀜𑀸 𑀅𑀢𑁆𑀣𑀻𑀢𑀺 𑀕𑀳𑁂𑀢𑁆𑀯𑀸 𑀅𑀲𑀜𑁆𑀜𑀽𑀧𑀕𑀲𑁆𑀲 𑀘 𑀅𑀦𑁆𑀢𑀭𑀸𑀪𑀯𑀁 𑀇𑀘𑁆𑀙𑁂𑀬𑁆𑀬𑀼𑀁, 𑀢𑁂𑀲𑀁 𑀅𑀦𑁆𑀢𑀭𑀸𑀪𑀯𑀪𑀸𑀯𑀢𑁄 ‘‘𑀅𑀲𑀜𑁆𑀜𑀽𑀧𑀧𑀢𑁆𑀢𑀺 𑀅𑀯𑁂𑀤𑀦𑀸’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺.

𑁯𑁨. 𑀅𑀯𑁂𑀤𑀦𑁄𑀢𑀺𑀆𑀤𑀻𑀲𑀼 𑀢𑀤𑀜𑁆𑀜𑀦𑁆𑀢𑀺 𑀲𑀜𑁆𑀜𑀪𑀯𑀢𑁄 𑀅𑀜𑁆𑀜𑀁 𑀅𑀲𑀜𑁆𑀜𑀸𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀼𑀧𑀧𑀢𑁆𑀢𑀺𑀁. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂𑀧𑀺 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀜𑁆𑀜𑀸 𑀅𑀢𑁆𑀣𑀻𑀢𑀺 𑀇𑀘𑁆𑀙𑀦𑁆𑀢𑀺.

𑁯𑁩. 𑀬𑀲𑁆𑀫𑀸 𑀭𑀽𑀧𑀸𑀤𑀺𑀥𑀫𑁆𑀫𑁂 𑀯𑀺𑀦𑀸 𑀧𑀼𑀕𑁆𑀕𑀮𑁄 𑀦𑀢𑁆𑀣𑀻𑀢𑀺 𑀇𑀦𑁆𑀥𑀦𑀼𑀧𑀸𑀤𑀸𑀦𑁄 𑀅𑀕𑁆𑀕𑀺 𑀯𑀺𑀬 𑀇𑀦𑁆𑀥𑀦𑁂𑀦 𑀭𑀽𑀧𑀸𑀤𑀺𑀉𑀧𑀸𑀤𑀸𑀦𑁄 𑀧𑀼𑀕𑁆𑀕𑀮𑁄 𑀭𑀽𑀧𑀸𑀤𑀺𑀦𑀸 𑀯𑀺𑀦𑀸 𑀦𑀢𑁆𑀣𑀻𑀢𑀺 𑀮𑀤𑁆𑀥𑀺𑀯𑀲𑁂𑀦 𑀯𑀤𑀢𑀺.

𑀕𑀢𑀺𑀅𑀦𑀼𑀬𑁄𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑀯𑀡𑁆𑀡𑀦𑀸

𑁯𑁭. 𑀦𑀻𑀮𑀁 𑀭𑀽𑀧𑀁 𑀉𑀧𑀸𑀤𑀸𑀬 𑀦𑀻𑀮𑁄𑀢𑀺𑀆𑀤𑀻𑀲𑀽𑀢𑀺 ‘‘𑀦𑀻𑀮𑀁 𑀭𑀽𑀧𑀁 𑀉𑀧𑀸𑀤𑀸𑀬 𑀦𑀻𑀮𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀜𑁆𑀜𑀢𑁆𑀢𑀻’’𑀢𑀺 𑀏𑀢𑁆𑀣 𑀬𑁄 𑀧𑀼𑀝𑁆𑀞𑁄 𑀦𑀻𑀮𑀁 𑀉𑀧𑀸𑀤𑀸𑀬 𑀦𑀻𑀮𑁄𑀢𑀺, 𑀢𑀤𑀸𑀤𑀻𑀲𑀽𑀢𑀺 𑀅𑀢𑁆𑀣𑁄.

𑁯𑁮. 𑀙𑁂𑀓𑀝𑁆𑀞𑀁 𑀲𑀦𑁆𑀥𑀸𑀬𑀸𑀢𑀺 𑀙𑁂𑀓𑀝𑁆𑀞𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀓𑀼𑀲𑀮𑀧𑀜𑁆𑀜𑀢𑁆𑀢𑀺𑀁. ‘‘𑀓𑀼𑀲𑀮𑀁 𑀯𑁂𑀤𑀦𑀁 𑀉𑀧𑀸𑀤𑀸𑀬𑀸’’𑀢𑀺 𑀫𑀜𑁆𑀜𑀫𑀸𑀦𑁄 𑀧𑀝𑀺𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁧𑁧𑁨. 𑀇𑀤𑀸𑀦𑀺 …𑀧𑁂… 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀭𑀼𑀓𑁆𑀔’’𑀦𑁆𑀢𑀺𑀆𑀤𑀺𑀫𑀸𑀳𑀸𑀢𑀺 𑀧𑀼𑀩𑁆𑀩𑀧𑀓𑁆𑀔𑀁 𑀤𑀲𑁆𑀲𑁂𑀢𑁆𑀯𑀸 𑀉𑀢𑁆𑀢𑀭𑀫𑀸𑀳𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁧𑁫. ‘‘𑀬𑀲𑁆𑀲 𑀭𑀽𑀧𑀁 𑀲𑁄 𑀭𑀽𑀧𑀯𑀸’’𑀢𑀺 𑀉𑀢𑁆𑀢𑀭𑀧𑀓𑁆𑀔𑁂 𑀯𑀼𑀢𑁆𑀢𑀁 𑀯𑀘𑀦𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀬𑀲𑁆𑀫𑀸’’𑀢𑀺𑀆𑀤𑀺𑀫𑀸𑀳.

𑁧𑁧𑁬. 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦𑀸𑀢𑀺 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀧𑀭𑀺𑀤𑀻𑀧𑀺𑀢𑀲𑁆𑀲 𑀲𑀭𑀸𑀕𑀸𑀤𑀺𑀘𑀺𑀢𑁆𑀢𑀬𑁄𑀕𑀲𑁆𑀲 𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁧𑁮. 𑀬𑁂𑀦𑀸𑀢𑀺 𑀘𑀓𑁆𑀔𑀼𑀦𑁆𑀢𑀺 ‘‘𑀬𑁂𑀦𑀸’’𑀢𑀺 𑀯𑀼𑀢𑁆𑀢𑀁 𑀓𑀭𑀡𑀁 𑀘𑀓𑁆𑀔𑀼𑀦𑁆𑀢𑀺 𑀅𑀢𑁆𑀣𑁄. 𑀘𑀓𑁆𑀔𑀼𑀫𑁂𑀯 𑀭𑀽𑀧𑀁 𑀧𑀲𑁆𑀲𑀢𑀻𑀢𑀺 𑀯𑀺𑀜𑁆𑀜𑀸𑀡𑀦𑀺𑀲𑁆𑀲𑀬𑀪𑀸𑀯𑀽𑀧𑀕𑀫𑀦𑀫𑁂𑀯 𑀘𑀓𑁆𑀔𑀼𑀲𑁆𑀲 𑀤𑀲𑁆𑀲𑀦𑀁 𑀦𑀸𑀫 𑀳𑁄𑀢𑀻𑀢𑀺 𑀲𑀦𑁆𑀥𑀸𑀬 𑀯𑀤𑀢𑀺.

𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀧𑀼𑀭𑀺𑀲𑀓𑀸𑀭𑀸𑀦𑀼𑀬𑁄𑀕𑀯𑀡𑁆𑀡𑀦𑀸

𑁧𑁨𑁩. 𑀓𑀭𑀡𑀫𑀢𑁆𑀢𑀦𑁆𑀢𑀺 𑀓𑀫𑁆𑀫𑀸𑀦𑀁 𑀦𑀺𑀧𑁆𑀨𑀸𑀤𑀓𑀧𑁆𑀧𑀬𑁄𑀚𑀓𑀪𑀸𑀯𑁂𑀦 𑀧𑀯𑀢𑁆𑀢𑀸 𑀔𑀦𑁆𑀥𑀸.

𑁧𑁨𑁪. 𑀧𑀼𑀭𑀺𑀫𑀓𑀫𑁆𑀫𑁂𑀦 𑀯𑀺𑀦𑀸 𑀧𑀼𑀕𑁆𑀕𑀮𑀲𑁆𑀲 𑀚𑀸𑀢𑀺, 𑀚𑀸𑀢𑀲𑁆𑀲 𑀘 𑀯𑀺𑀚𑁆𑀚𑀝𑁆𑀞𑀸𑀦𑀸𑀤𑀻𑀲𑀼 𑀲𑀫𑁆𑀫𑀸 𑀫𑀺𑀘𑁆𑀙𑀸 𑀯𑀸 𑀧𑀯𑀢𑁆𑀢𑀺 𑀦𑀢𑁆𑀣𑀻𑀢𑀺 𑀲𑀦𑁆𑀥𑀸𑀬 ‘‘𑀧𑀼𑀭𑀺𑀫𑀓𑀫𑁆𑀫𑀫𑁂𑀯 𑀢𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳.

𑁧𑁨𑁫. 𑀓𑀫𑁆𑀫𑀯𑀝𑁆𑀝𑀲𑁆𑀲𑀸𑀢𑀺 𑀏𑀢𑁆𑀣 𑀓𑀫𑁆𑀫𑀓𑀸𑀭𑀓𑀲𑁆𑀲 𑀬𑁄 𑀓𑀸𑀭𑀓𑁄, 𑀢𑁂𑀦𑀧𑀺 𑀅𑀜𑁆𑀜𑀁 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, 𑀢𑀲𑁆𑀲 𑀓𑀸𑀭𑀓𑁂𑀦𑀧𑀺 𑀅𑀜𑁆𑀜𑀦𑁆𑀢𑀺 𑀏𑀯𑀁 𑀓𑀫𑁆𑀫𑀯𑀝𑁆𑀝𑀲𑁆𑀲 𑀅𑀦𑀼𑀧𑀘𑁆𑀙𑁂𑀤𑀁 𑀯𑀤𑀦𑁆𑀢𑀺. 𑀧𑀼𑀕𑁆𑀕𑀮𑀲𑁆𑀲 𑀓𑀸𑀭𑀓𑁄 𑀓𑀫𑁆𑀫𑀲𑁆𑀲 𑀓𑀸𑀭𑀓𑁄 𑀆𑀧𑀚𑁆𑀚𑀢𑀻𑀢𑀺 𑀯𑀺𑀘𑀸𑀭𑁂𑀢𑀩𑁆𑀩𑀫𑁂𑀢𑀁. 𑀫𑀸𑀢𑀸𑀧𑀺𑀢𑀽𑀳𑀺 𑀚𑀦𑀺𑀢𑀢𑀸𑀤𑀺𑀦𑀸 𑀢𑀲𑁆𑀲 𑀓𑀸𑀭𑀓𑀁 𑀇𑀘𑁆𑀙𑀦𑁆𑀢𑀲𑁆𑀲 𑀓𑀫𑁆𑀫𑀓𑀸𑀭𑀓𑀸𑀦𑀁 𑀓𑀸𑀭𑀓𑀧𑀭𑀫𑁆𑀧𑀭𑀸 𑀆𑀧𑀚𑁆𑀚𑀢𑀻𑀢𑀺 𑀇𑀤𑀜𑁆𑀘 𑀯𑀺𑀘𑀸𑀭𑁂𑀢𑀩𑁆𑀩𑀁.

𑁧𑁭𑁦. 𑀲𑀼𑀢𑁆𑀢𑀯𑀺𑀭𑁄𑀥𑀪𑀬𑁂𑀦𑀸𑀢𑀺 ‘‘𑀲𑁄 𑀓𑀭𑁄𑀢𑀺 𑀲𑁄 𑀧𑀝𑀺𑀲𑀁𑀯𑁂𑀤𑀬𑀢𑀻𑀢𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀬𑀫𑁂𑀓𑁄 𑀅𑀦𑁆𑀢𑁄’’𑀢𑀺𑀆𑀤𑀻𑀳𑀺 (𑀲𑀁. 𑀦𑀺. 𑁨.𑁪𑁬) 𑀯𑀺𑀭𑁄𑀥𑀪𑀬𑀸.

𑁧𑁭𑁧. ‘‘𑀇𑀥 𑀦𑀦𑁆𑀤𑀢𑀺 𑀧𑁂𑀘𑁆𑀘 𑀦𑀦𑁆𑀤𑀢𑀻’’𑀢𑀺 (𑀥. 𑀧. 𑁧𑁮) 𑀯𑀘𑀦𑀢𑁄 𑀓𑀫𑁆𑀫𑀓𑀭𑀡𑀓𑀸𑀮𑁂 𑀯𑀺𑀧𑀸𑀓𑀧𑀝𑀺𑀲𑀁𑀯𑁂𑀤𑀦𑀓𑀸𑀮𑁂 𑀘 𑀲𑁄𑀬𑁂𑀯𑀸𑀢𑀺 𑀧𑀝𑀺𑀚𑀸𑀦𑀸𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀬𑀁𑀓𑀢𑀁 𑀲𑀼𑀔𑀤𑀼𑀓𑁆𑀔𑀦𑁆𑀢𑀺 𑀘 𑀧𑀼𑀝𑁆𑀞𑁄 ‘‘𑀓𑀺𑀁 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀲𑀬𑀁𑀓𑀢𑀁 𑀲𑀼𑀔𑀁 𑀤𑀼𑀓𑁆𑀔𑀦𑁆𑀢𑀺? 𑀫𑀸 𑀳𑁂𑀯𑀁 𑀓𑀲𑁆𑀲𑀧𑀸’’𑀢𑀺𑀆𑀤𑀺𑀲𑀼𑀢𑁆𑀢𑀯𑀺𑀭𑁄𑀥𑀸 (𑀲𑀁. 𑀦𑀺. 𑁨.𑁧𑁮) 𑀧𑀝𑀺𑀓𑁆𑀔𑀺𑀧𑀢𑀺.

𑁧𑁭𑁬. 𑀮𑀤𑁆𑀥𑀺𑀫𑀢𑁆𑀢𑀫𑁂𑀯𑁂𑀢𑀦𑁆𑀢𑀺 𑀲𑁄𑀬𑁂𑀯𑁂𑀓𑁄 𑀦𑁂𑀯 𑀲𑁄 𑀳𑁄𑀢𑀺 𑀦 𑀅𑀜𑁆𑀜𑁄𑀢𑀺 𑀇𑀤𑀁 𑀧𑀦 𑀦𑀢𑁆𑀣𑁂𑀯, 𑀢𑀲𑁆𑀫𑀸 𑀏𑀯𑀁𑀯𑀸𑀤𑀺𑀦𑁄 𑀅𑀲𑀬𑀁𑀓𑀸𑀭𑀦𑁆𑀢𑀺𑀆𑀤𑀺 𑀆𑀧𑀚𑁆𑀚𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀧𑀺𑀘𑀸𑀢𑀺𑀆𑀤𑀺𑀦𑀸 𑀇𑀤𑀁 𑀤𑀲𑁆𑀲𑁂𑀢𑀺 𑁋 𑀦 𑀧𑀭𑀲𑁆𑀲 𑀇𑀘𑁆𑀙𑀸𑀯𑀲𑁂𑀦𑁂𑀯 ‘‘𑀲𑁄 𑀓𑀭𑁄𑀢𑀻’’𑀢𑀺𑀆𑀤𑀺 𑀅𑀦𑀼𑀬𑁄𑀕𑁄 𑀯𑀼𑀢𑁆𑀢𑁄, 𑀅𑀣 𑀔𑁄 ‘‘𑀲𑁄 𑀓𑀭𑁄𑀢𑀻’’𑀢𑀺𑀆𑀤𑀻𑀲𑀼 𑀏𑀓𑀁 𑀅𑀦𑀺𑀘𑁆𑀙𑀦𑁆𑀢𑀲𑁆𑀲 𑀇𑀢𑀭𑀁, 𑀢𑀜𑁆𑀘 𑀅𑀦𑀺𑀘𑁆𑀙𑀦𑁆𑀢𑀲𑁆𑀲 𑀅𑀜𑁆𑀜𑀁 𑀆𑀧𑀦𑁆𑀦𑀦𑁆𑀢𑀺 𑀏𑀯𑀁 𑀓𑀸𑀭𑀓𑀯𑁂𑀤𑀓𑀺𑀘𑁆𑀙𑀸𑀬 𑀞𑀢𑁆𑀯𑀸 ‘‘𑀲𑁄 𑀓𑀭𑁄𑀢𑀻’’𑀢𑀺𑀆𑀤𑀻𑀲𑀼 𑀢𑀁 𑀢𑀁 𑀅𑀦𑀺𑀘𑁆𑀙𑀸𑀬 𑀆𑀧𑀦𑁆𑀦𑀯𑀲𑁂𑀦𑀸𑀧𑀻𑀢𑀺. 𑀅𑀣 𑀯𑀸 𑀦 𑀓𑁂𑀯𑀮𑀁 ‘‘𑀲𑁄 𑀓𑀭𑁄𑀢𑀻’’𑀢𑀺𑀆𑀤𑀻𑀦𑀁 𑀲𑀩𑁆𑀩𑁂𑀲𑀁 𑀆𑀧𑀦𑁆𑀦𑀢𑁆𑀢𑀸, 𑀅𑀣 𑀔𑁄 𑀏𑀓𑁂𑀓𑀲𑁆𑀲𑁂𑀯 𑀘 𑀆𑀧𑀦𑁆𑀦𑀢𑁆𑀢𑀸 𑀅𑀬𑀁 𑀅𑀦𑀼𑀬𑁄𑀕𑁄 𑀓𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 𑀏𑀢𑁂𑀦 ‘‘𑀇𑀥 𑀦𑀦𑁆𑀤𑀢𑀻’’𑀢𑀺𑀆𑀤𑀺 𑀲𑀩𑁆𑀩𑀁 𑀧𑀝𑀺𑀚𑀸𑀦𑀦𑀸𑀤𑀺𑀓𑀸𑀭𑀡𑀁 𑀏𑀓𑀢𑁄 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀧𑀼𑀭𑀺𑀲𑀓𑀸𑀭𑀸𑀦𑀼𑀬𑁄𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀮𑁆𑀬𑀸𑀡𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄.

𑁧𑁪. 𑀅𑀪𑀺𑀜𑁆𑀜𑀸𑀦𑀼𑀬𑁄𑀕𑀯𑀡𑁆𑀡𑀦𑀸

𑁧𑁯𑁩. 𑀅𑀪𑀺𑀜𑁆𑀜𑀸𑀦𑀼𑀬𑁄𑀕𑀸𑀤𑀺𑀯𑀲𑁂𑀦 𑀅𑀭𑀳𑀢𑁆𑀢𑀲𑀸𑀥𑀦𑀸𑀢𑀺 𑀏𑀢𑁆𑀣 ‘‘𑀦𑀦𑀼 𑀅𑀢𑁆𑀣𑀺 𑀓𑁄𑀘𑀺 𑀇𑀤𑁆𑀥𑀺𑀁 𑀯𑀺𑀓𑀼𑀩𑁆𑀩𑀢𑀻’’𑀢𑀺 𑀅𑀪𑀺𑀜𑁆𑀜𑀸𑀅𑀦𑀼𑀬𑁄𑀕𑁄 𑀘 ‘‘𑀳𑀜𑁆𑀘𑀺 𑀅𑀢𑁆𑀣𑀺 𑀓𑁄𑀘𑀺 𑀇𑀤𑁆𑀥𑀺𑀁 𑀯𑀺𑀓𑀼𑀩𑁆𑀩𑀢𑀻’’𑀢𑀺 𑀞𑀧𑀦𑀸 𑀘 ‘‘𑀢𑁂𑀦 𑀯𑀢 𑀭𑁂’’𑀢𑀺𑀆𑀤𑀺 𑀧𑀸𑀧𑀦𑀸 𑀘 𑀆𑀤𑀺𑀲𑀤𑁆𑀤𑀲𑀗𑁆𑀕𑀳𑀺𑀢𑁄 𑀅𑀢𑁆𑀣𑁄𑀯 𑀤𑀝𑁆𑀞𑀩𑁆𑀩𑁄. 𑀆𑀲𑀯𑀓𑁆𑀔𑀬𑀜𑀸𑀡𑀁 𑀧𑀦𑁂𑀢𑁆𑀣 𑀅𑀪𑀺𑀜𑁆𑀜𑀸 𑀯𑀼𑀢𑁆𑀢𑀸𑀢𑀺 𑀢𑀤𑀪𑀺𑀜𑁆𑀜𑀸𑀯𑀢𑁄 𑀅𑀭𑀳𑀢𑁄 𑀲𑀸𑀥𑀦𑀁 ‘‘𑀅𑀭𑀳𑀢𑁆𑀢𑀲𑀸𑀥𑀦𑀸’’𑀢𑀺 𑀆𑀳. 𑀅𑀭𑀳𑀢𑁄 𑀳𑀺 𑀲𑀸𑀥𑀦𑀸 𑀢𑀩𑁆𑀪𑀸𑀯𑀲𑁆𑀲 𑀘 𑀲𑀸𑀥𑀦𑀸 𑀳𑁄𑀢𑀺𑀬𑁂𑀯𑀸𑀢𑀺.

𑀅𑀪𑀺𑀜𑁆𑀜𑀸𑀦𑀼𑀬𑁄𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁫-𑁧𑁮. 𑀜𑀸𑀢𑀓𑀸𑀦𑀼𑀬𑁄𑀕𑀸𑀤𑀺𑀯𑀡𑁆𑀡𑀦𑀸

𑁨𑁦𑁯. 𑀢𑀣𑀸𑀭𑀽𑀧𑀲𑁆𑀲𑀸𑀢𑀺 𑀢𑀢𑀺𑀬𑀓𑁄𑀝𑀺𑀪𑀽𑀢𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀅𑀪𑀸𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀧𑀦 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀅𑀲𑀘𑁆𑀘𑀺𑀓𑀝𑁆𑀞𑀁 𑀢𑀢𑀺𑀬𑀓𑁄𑀝𑀺𑀪𑀽𑀢𑀁 𑀧𑀼𑀕𑁆𑀕𑀮𑀁 𑀯𑀤𑁂𑀬𑁆𑀬𑀸𑀢𑀺 𑀢𑀸𑀤𑀺𑀲𑀁 𑀧𑀼𑀕𑁆𑀕𑀮𑀁 𑀇𑀘𑁆𑀙𑀦𑁆𑀢𑁄 𑀳𑀺 𑀲𑀼𑀢𑁆𑀢𑁂𑀦 𑀦𑀺𑀕𑁆𑀕𑀳𑁂𑀢𑀩𑁆𑀩𑁄 𑀲𑀺𑀬𑀸. 𑀓𑀲𑁆𑀫𑀸? 𑀢𑀣𑀸𑀭𑀽𑀧𑀲𑁆𑀲 𑀲𑀘𑁆𑀘𑀺𑀓𑀝𑁆𑀞𑀲𑁆𑀲 𑀅𑀪𑀸𑀯𑀢𑁄𑀢𑀺, 𑀢𑀣𑀸𑀭𑀽𑀧𑀲𑁆𑀲 𑀓𑀲𑁆𑀲𑀘𑀺 𑀲𑀪𑀸𑀯𑀲𑁆𑀲 𑀅𑀪𑀸𑀯𑀢𑁄 𑀧𑀝𑀺𑀓𑁆𑀔𑁂𑀧𑀸𑀭𑀳𑀢𑁆𑀢𑀸 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀦𑀺𑀕𑀽𑀳𑀺𑀢𑁆𑀯𑀸 𑀧𑀝𑀺𑀓𑁆𑀔𑁂𑀧𑁄 𑀧𑀭𑀯𑀸𑀤𑀺𑀲𑁆𑀲𑀸𑀢𑀺 𑀅𑀬𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀜𑀸𑀢𑀓𑀸𑀦𑀼𑀬𑁄𑀕𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁯. 𑀧𑀝𑀺𑀯𑁂𑀥𑀸𑀦𑀼𑀬𑁄𑀕𑀸𑀤𑀺𑀯𑀡𑁆𑀡𑀦𑀸

𑁨𑁧𑁮. 𑀧𑀭𑀺𑀕𑁆𑀕𑀳𑀺𑀢𑀯𑁂𑀤𑀦𑁄𑀢𑀺 𑀯𑀘𑀦𑁂𑀦 𑀅𑀧𑀭𑀺𑀕𑁆𑀕𑀳𑀺𑀢𑀯𑁂𑀤𑀦𑀲𑁆𑀲 ‘‘𑀲𑀼𑀔𑀺𑀢𑁄𑀲𑁆𑀫𑀺, 𑀤𑀼𑀓𑁆𑀔𑀺𑀢𑁄𑀲𑁆𑀫𑀻’’𑀢𑀺 𑀚𑀸𑀦𑀦𑀁 𑀧𑀚𑀸𑀦𑀦𑀁 𑀦𑀸𑀫 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺 𑀬𑁄𑀕𑀸𑀯𑀘𑀭𑀲𑁆𑀲 𑀲𑀼𑀔𑀼𑀫𑀸𑀦𑀫𑁆𑀧𑀺 𑀯𑁂𑀤𑀦𑀸𑀦𑀁 𑀧𑀭𑀺𑀘𑁆𑀙𑁂𑀤𑀦𑀲𑀫𑀢𑁆𑀣𑀢𑀜𑁆𑀘.

𑁨𑁨𑁮. 𑀮𑀓𑁆𑀔𑀡𑀯𑀘𑀦𑀦𑁆𑀢𑀺 𑀭𑀽𑀧𑀩𑁆𑀪𑀦𑁆𑀢𑀭𑀕𑀫𑀦𑀁 𑀲𑀳𑀭𑀽𑀧𑀪𑀸𑀯𑁄, 𑀩𑀳𑀺𑀤𑁆𑀥𑀸 𑀦𑀺𑀓𑁆𑀔𑀫𑀦𑀁 𑀯𑀺𑀦𑀸𑀭𑀽𑀧𑀪𑀸𑀯𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁩𑁭. 𑀇𑀫𑀸 𑀔𑁄𑀢𑀺 𑀑𑀴𑀸𑀭𑀺𑀓𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀫𑀦𑁄𑀫𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀅𑀭𑀽𑀧𑁄 𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑀺 𑀇𑀫𑀸 𑀮𑁄𑀓𑀲𑁆𑀲 𑀲𑀫𑀜𑁆𑀜𑀸, 𑀬𑀸𑀳𑀺 𑀢𑀣𑀸𑀕𑀢𑁄 𑀯𑁄𑀳𑀭𑀢𑀺 𑀅𑀧𑀭𑀸𑀫𑀲𑀁, 𑀬𑁄 𑀲𑀘𑁆𑀘𑁄 𑀫𑁄𑀖𑁄 𑀯𑀸 𑀲𑀺𑀬𑀸, 𑀢𑀲𑁆𑀫𑀺𑀁 𑀅𑀦𑀼𑀧𑀮𑀩𑁆𑀪𑀫𑀸𑀦𑁂𑀧𑀺 𑀅𑀢𑁆𑀢𑀦𑀺 𑀢𑀤𑀦𑀼𑀧𑀮𑀩𑁆𑀪𑀢𑁄𑀬𑁂𑀯 𑀧𑀭𑀸𑀫𑀸𑀲𑀁 𑀅𑀢𑁆𑀢𑀤𑀺𑀝𑁆𑀞𑀺𑀁 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑁄 𑀮𑁄𑀓𑁂 𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑀺 𑀧𑀯𑀢𑁆𑀢𑀯𑁄𑀳𑀸𑀭𑀯𑀲𑁂𑀦𑁂𑀯 𑀯𑁄𑀳𑀭𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀏𑀢𑁆𑀣 𑀘 𑀧𑀘𑁆𑀘𑀢𑁆𑀢𑀲𑀸𑀫𑀜𑁆𑀜𑀮𑀓𑁆𑀔𑀡𑀯𑀲𑁂𑀦 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀣𑀺𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀮𑁄𑀓𑀯𑁄𑀳𑀸𑀭𑁂𑀦 𑀅𑀢𑁆𑀣𑀺𑀢𑀁 𑀯𑀤𑀦𑁆𑀢𑁂𑀦 𑀧𑀼𑀕𑁆𑀕𑀮𑁄𑀢𑀺 𑀓𑁄𑀘𑀺 𑀲𑀪𑀸𑀯𑁄 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀢𑀺 𑀳𑀺 𑀢𑀲𑁆𑀫𑀺𑀁 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯 𑀅𑀢𑁆𑀣𑀺𑀢𑀸 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸, 𑀦 𑀮𑁄𑀓𑀯𑁄𑀳𑀸𑀭𑁂𑀦𑀸𑀢𑀺. 𑀇𑀫𑀺𑀦𑀸 𑀧𑀦 𑀬𑀣𑀸 𑀲𑀫𑁂𑀢𑀺, 𑀬𑀣𑀸 𑀘 𑀧𑀭𑀸𑀫𑀸𑀲𑁄 𑀦 𑀳𑁄𑀢𑀺, 𑀏𑀯𑀁 𑀇𑀢𑁄 𑀧𑀼𑀭𑀺𑀫𑀸 𑀘 𑀅𑀢𑁆𑀣𑀯𑀡𑁆𑀡𑀦𑀸 𑀬𑁄𑀚𑁂𑀢𑀩𑁆𑀩𑀸.

𑀮𑁄𑀓𑀲𑀫𑁆𑀫𑀼𑀢𑀺𑀓𑀸𑀭𑀡𑀦𑁆𑀢𑀺 𑀬𑀲𑁆𑀫𑀸 𑀮𑁄𑀓𑀲𑀫𑁆𑀫𑀼𑀢𑀺𑀯𑀲𑁂𑀦 𑀧𑀯𑀢𑁆𑀢𑀁, 𑀢𑀲𑁆𑀫𑀸 𑀲𑀘𑁆𑀘𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀮𑀓𑁆𑀔𑀡𑀦𑁆𑀢𑀺 𑀢𑀣𑀓𑀸𑀭𑀡𑀁. 𑀬𑀲𑁆𑀫𑀸 𑀥𑀫𑁆𑀫𑀸𑀦𑀁 𑀢𑀣𑀢𑀸𑀬 𑀧𑀯𑀢𑁆𑀢𑀁, 𑀢𑀲𑁆𑀫𑀸 𑀲𑀘𑁆𑀘𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀧𑀝𑀺𑀯𑁂𑀥𑀸𑀦𑀼𑀬𑁄𑀕𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀕𑁆𑀕𑀮𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀭𑀺𑀳𑀸𑀦𑀺𑀓𑀣𑀸

𑁧. 𑀯𑀸𑀤𑀬𑀼𑀢𑁆𑀢𑀺𑀧𑀭𑀺𑀳𑀸𑀦𑀺𑀓𑀣𑀸𑀯𑀡𑁆𑀡𑀦𑀸

𑁨𑁩𑁯. ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑁂𑀓𑁆𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 (𑀅. 𑀦𑀺. 𑁨.𑁧𑁮𑁫) 𑀇𑀤𑀁 𑀲𑀼𑀢𑁆𑀢𑀁 𑀅𑀭𑀳𑀢𑁄 𑀧𑀭𑀺𑀳𑀸𑀦𑀺𑀮𑀤𑁆𑀥𑀺𑀬𑀸 𑀦 𑀦𑀺𑀲𑁆𑀲𑀬𑁄, 𑀅𑀣 𑀔𑁄 𑀅𑀦𑀸𑀕𑀸𑀫𑀺𑀆𑀤𑀻𑀦𑀁 𑀧𑀭𑀺𑀳𑀸𑀦𑀺𑀮𑀤𑁆𑀥𑀺𑀬𑀸, 𑀢𑀲𑁆𑀫𑀸 𑀅𑀭𑀳𑀢𑁄𑀧𑀺 𑀧𑀭𑀺𑀳𑀸𑀦𑀺𑀁 𑀇𑀘𑁆𑀙𑀦𑁆𑀢𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁂𑀦 𑀅𑀦𑀸𑀕𑀸𑀫𑀺𑀲𑁆𑀲𑀧𑀺 𑀲𑀓𑀤𑀸𑀕𑀸𑀫𑀺𑀲𑁆𑀲𑀧𑀻𑀢𑀺 𑀬𑁄𑀚𑁂𑀢𑀩𑁆𑀩𑀁.

‘‘𑀢𑀢𑀺𑀬𑀲𑁆𑀫𑀺𑀫𑁆𑀧𑀺 𑀫𑀼𑀤𑀺𑀦𑁆𑀤𑁆𑀭𑀺𑀬𑀸𑀯 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀲𑀜𑁆𑀳𑀺 𑀲𑀩𑁆𑀩𑁂𑀲𑀫𑁆𑀧𑀺 𑀧𑀭𑀺𑀳𑀸𑀦𑀺 𑀦 𑀳𑁄𑀢𑀻𑀢𑀺 𑀢𑀲𑁆𑀲 𑀮𑀤𑁆𑀥𑀻’’𑀢𑀺 𑀧𑀼𑀭𑀺𑀫𑀧𑀸𑀞𑁄, 𑀫𑀼𑀤𑀺𑀦𑁆𑀤𑁆𑀭𑀺𑀬𑁂𑀲𑁆𑀯𑁂𑀯 𑀧𑀦 𑀅𑀥𑀺𑀧𑁆𑀧𑁂𑀢𑁂𑀲𑀼 𑀧𑀭𑀺𑀓𑁆𑀔𑁂𑀧𑁄 𑀦 𑀓𑀸𑀢𑀩𑁆𑀩𑁄 𑀲𑀺𑀬𑀸, 𑀓𑀢𑁄 𑀘, 𑀢𑀲𑁆𑀫𑀸 ‘‘𑀢𑀢𑀺𑀬𑀲𑁆𑀫𑀺𑀫𑁆𑀧𑀺 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀯 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀲𑀜𑁆𑀳𑀺 𑀲𑀩𑁆𑀩𑁂𑀲𑀫𑁆𑀧𑀺 𑀧𑀭𑀺𑀳𑀸𑀦𑀺 𑀦 𑀳𑁄𑀢𑀻𑀢𑀺 𑀢𑀲𑁆𑀲 𑀮𑀤𑁆𑀥𑀻’’𑀢𑀺 𑀧𑀞𑀦𑁆𑀢𑀺.

𑀅𑀬𑁄𑀦𑀺𑀲𑁄 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸𑀢𑀺 𑀲𑁄𑀢𑀸𑀧𑀦𑁆𑀦𑁄𑀬𑁂𑀯 𑀦𑀺𑀬𑀢𑁄𑀢𑀺 𑀯𑀼𑀢𑁆𑀢𑁄𑀢𑀺 𑀲𑁄𑀬𑁂𑀯 𑀦 𑀧𑀭𑀺𑀳𑀸𑀬𑀢𑀺, 𑀦 𑀇𑀢𑀭𑁂𑀢𑀺 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸. ‘‘𑀉𑀧𑀭𑀺𑀫𑀕𑁆𑀕𑀢𑁆𑀣𑀸𑀬𑀸’’𑀢𑀺 𑀯𑀼𑀢𑁆𑀢𑀁 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀦𑀺𑀬𑀢𑁄𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀸 𑀦 𑀧𑀭𑀺𑀳𑀸𑀬𑀢𑀻𑀢𑀺 𑀏𑀢𑀫𑀢𑁆𑀣𑀁 𑀕𑀡𑁆𑀳𑀻𑀢𑀺 𑀧𑀦 𑀯𑀤𑀦𑁆𑀢𑀺.

𑀯𑀸𑀤𑀬𑀼𑀢𑁆𑀢𑀺𑀧𑀭𑀺𑀳𑀸𑀦𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀭𑀺𑀬𑀧𑀼𑀕𑁆𑀕𑀮𑀲𑀁𑀲𑀦𑁆𑀤𑀦𑀧𑀭𑀺𑀳𑀸𑀦𑀺𑀯𑀡𑁆𑀡𑀦𑀸

𑁨𑁪𑁧. 𑀬𑀁 𑀧𑀦𑁂𑀢𑁆𑀣𑀸𑀢𑀺𑀆𑀤𑀺𑀫𑁆𑀳𑀺 𑀤𑀲𑁆𑀲𑀦𑀫𑀕𑁆𑀕𑀨𑀮𑁂 𑀞𑀺𑀢𑀲𑁆𑀲 𑀅𑀦𑀦𑁆𑀢𑀭𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁, 𑀢𑀢𑁄 𑀧𑀭𑀺𑀳𑀸𑀬𑀺𑀢𑁆𑀯𑀸 𑀢𑀢𑁆𑀣 𑀘 𑀞𑀸𑀦𑀁 𑀇𑀘𑁆𑀙𑀦𑁆𑀢𑁄 𑀧𑀼𑀦 𑀯𑀸𑀬𑀸𑀫𑁂𑀦 𑀢𑀤𑀦𑀦𑁆𑀢𑀭𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁 𑀦 𑀇𑀘𑁆𑀙𑀢𑀻𑀢𑀺 𑀯𑀺𑀘𑀸𑀭𑁂𑀢𑀩𑁆𑀩𑀫𑁂𑀢𑀁.

𑁨𑁬𑁨. 𑀅𑀯𑀲𑀺𑀧𑁆𑀧𑀢𑁆𑀢𑁄 𑀛𑀸𑀦𑀮𑀸𑀪𑀻𑀢𑀺 𑀲𑁂𑀓𑁆𑀔𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀧𑀼𑀣𑀼𑀚𑁆𑀚𑀦𑁄 𑀧𑀦 𑀯𑀲𑀺𑀧𑁆𑀧𑀢𑁆𑀢𑁄 𑀅𑀯𑀲𑀺𑀧𑁆𑀧𑀢𑁆𑀢𑁄 𑀘 𑀲𑀫𑀬𑀯𑀺𑀫𑀼𑀢𑁆𑀢𑀅𑀲𑀫𑀬𑀯𑀺𑀫𑀼𑀢𑁆𑀢𑀢𑀦𑁆𑀢𑀺𑀬𑀸 𑀅𑀕𑁆𑀕𑀳𑀺𑀢𑁄, 𑀪𑀚𑀸𑀧𑀺𑀬𑀫𑀸𑀦𑁄 𑀧𑀦 𑀲𑀫𑀸𑀧𑀢𑁆𑀢𑀺𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑀁 𑀓𑀺𑀮𑁂𑀲𑀸𑀦𑀁 𑀯𑀲𑁂𑀦 𑀲𑀫𑀬𑀯𑀺𑀫𑀼𑀢𑁆𑀢𑀪𑀸𑀯𑀁 𑀪𑀚𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑁄𑀢𑀺.

𑀅𑀭𑀺𑀬𑀧𑀼𑀕𑁆𑀕𑀮𑀲𑀁𑀲𑀦𑁆𑀤𑀦𑀧𑀭𑀺𑀳𑀸𑀦𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀼𑀢𑁆𑀢𑀲𑀸𑀥𑀦𑀧𑀭𑀺𑀳𑀸𑀦𑀺𑀯𑀡𑁆𑀡𑀦𑀸

𑁨𑁬𑁫. 𑀉𑀢𑁆𑀢𑀫𑀳𑀻𑀦𑀪𑁂𑀤𑁄 ‘‘𑀢𑀢𑁆𑀭 𑀬𑀸𑀬𑀁 𑀧𑀝𑀺𑀧𑀤𑀸 𑀲𑀼𑀔𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸, 𑀲𑀸 𑀉𑀪𑀬𑁂𑀦𑁂𑀯 𑀧𑀡𑀻𑀢𑀸 𑀅𑀓𑁆𑀔𑀸𑀬𑀢𑀻’’𑀢𑀺𑀆𑀤𑀺𑀲𑀼𑀢𑁆𑀢𑀯𑀲𑁂𑀦 (𑀤𑀻. 𑀦𑀺. 𑁩.𑁧𑁫𑁨) 𑀯𑀼𑀢𑁆𑀢𑁄. ‘‘𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢’’𑀦𑁆𑀢𑀺 𑀏𑀢𑁆𑀣 𑀯𑀺𑀬 𑀫𑀼𑀢𑀲𑀤𑁆𑀤𑁄 𑀧𑀢𑁆𑀢𑀩𑁆𑀩𑀁 𑀯𑀤𑀢𑀻𑀢𑀺 𑀆𑀳 ‘‘𑀨𑀼𑀲𑀦𑀸𑀭𑀳’’𑀦𑁆𑀢𑀺.

𑁨𑁬𑁭. 𑀅𑀧𑁆𑀧𑀢𑁆𑀢𑀧𑀭𑀺𑀳𑀸𑀦𑀸𑀬 𑀘𑁂𑀯 𑀲𑀁𑀯𑀢𑁆𑀢𑀦𑁆𑀢𑀺 𑀬𑀣𑀸𑀓𑀢𑀲𑀦𑁆𑀦𑀺𑀝𑁆𑀞𑀸𑀦𑀲𑁆𑀲 𑀲𑀫𑀬𑀯𑀺𑀫𑀼𑀢𑁆𑀢𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀼𑀢𑁆𑀢𑀲𑀸𑀥𑀦𑀧𑀭𑀺𑀳𑀸𑀦𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀭𑀺𑀳𑀸𑀦𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸

𑁧. 𑀲𑀼𑀤𑁆𑀥𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸𑀯𑀡𑁆𑀡𑀦𑀸

𑁨𑁬𑁯. ‘‘𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀤𑁂𑀯𑁂 𑀉𑀧𑀸𑀤𑀸𑀬 𑀢𑀤𑀼𑀧𑀭𑀻’’𑀢𑀺 𑀯𑀼𑀢𑁆𑀢𑀁, ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀞𑀸𑀦𑁂𑀳𑀻’’𑀢𑀺 (𑀅. 𑀦𑀺. 𑁯.𑁨𑁧) 𑀧𑀦 𑀲𑀼𑀢𑁆𑀢𑀲𑁆𑀲 𑀯𑀘𑀦𑁂𑀦 𑀳𑁂𑀝𑁆𑀞𑀸𑀧𑀺 𑀫𑀕𑁆𑀕𑀪𑀸𑀯𑀦𑀫𑁆𑀧𑀺 𑀦 𑀇𑀘𑁆𑀙𑀦𑁆𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺.

𑁨𑁭𑁦. ‘‘𑀕𑀺𑀳𑀻𑀦𑀜𑁆𑀘𑁂𑀯 𑀏𑀓𑀘𑁆𑀘𑀸𑀦𑀜𑁆𑀘 𑀤𑁂𑀯𑀸𑀦𑀁 𑀫𑀕𑁆𑀕𑀧𑀝𑀺𑀮𑀸𑀪𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑁂𑀧𑁄 𑀢𑀲𑁆𑀲𑁂𑀯𑀸’’𑀢𑀺 𑀯𑀼𑀢𑁆𑀢𑀁, ‘‘𑀬𑀢𑁆𑀣 𑀦𑀢𑁆𑀣𑀻’’𑀢𑀺 𑀧𑀦 𑀑𑀓𑀸𑀲𑀯𑀲𑁂𑀦 𑀧𑀼𑀝𑁆𑀞𑁄 𑀧𑀼𑀕𑁆𑀕𑀮𑀯𑀲𑁂𑀦 𑀢𑀲𑁆𑀲 𑀧𑀝𑀺𑀓𑁆𑀔𑁂𑀧𑁄 𑀦 𑀬𑀼𑀢𑁆𑀢𑁄. 𑀬𑀤𑀺 𑀘 𑀢𑀲𑁆𑀲𑀸𑀬𑀁 𑀅𑀥𑀺𑀧𑁆𑀧𑀸𑀬𑁄, 𑀲𑀓𑀯𑀸𑀤𑀺𑀦𑀸 𑀲𑀫𑀸𑀦𑀸𑀥𑀺𑀧𑁆𑀧𑀸𑀬𑀢𑁆𑀢𑀸 𑀦 𑀦𑀺𑀕𑁆𑀕𑀳𑁂𑀢𑀩𑁆𑀩𑁄.

𑁨𑁭𑁧. 𑀏𑀓𑀦𑁆𑀢𑀭𑀺𑀓𑀧𑀜𑁆𑀳𑀸𑀢𑀺 𑀧𑀭𑀯𑀸𑀤𑀻𑀲𑀓𑀯𑀸𑀤𑀻𑀦𑀁 𑀅𑀜𑁆𑀜𑀫𑀜𑁆𑀜𑀁 𑀧𑀜𑁆𑀳𑀦𑁆𑀢𑀭𑀺𑀓𑀸 𑀧𑀜𑁆𑀳𑀸.

𑀲𑀼𑀤𑁆𑀥𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀁𑀲𑀦𑁆𑀤𑀦𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸𑀯𑀡𑁆𑀡𑀦𑀸

𑁨𑁭𑁩. 𑀭𑀽𑀧𑀸𑀯𑀘𑀭𑀫𑀕𑁆𑀕𑁂𑀦 𑀳𑀺 𑀲𑁄 𑀇𑀥𑀯𑀺𑀳𑀸𑀬𑀦𑀺𑀝𑁆𑀞𑁄 𑀦𑀸𑀫 𑀚𑀸𑀢𑁄𑀢𑀺 𑀇𑀤𑀁 ‘‘𑀇𑀥 𑀪𑀸𑀯𑀺𑀢𑀫𑀕𑁆𑀕𑁄 𑀳𑀺 𑀅𑀦𑀸𑀕𑀸𑀫𑀻 𑀇𑀥𑀯𑀺𑀳𑀸𑀬𑀦𑀺𑀝𑁆𑀞𑁄 𑀦𑀸𑀫 𑀳𑁄𑀢𑀻’’𑀢𑀺𑀆𑀤𑀺𑀓𑁂𑀦 𑀮𑀤𑁆𑀥𑀺𑀓𑀺𑀢𑁆𑀢𑀦𑁂𑀦 𑀓𑀣𑀁 𑀲𑀫𑁂𑀢𑀻𑀢𑀺 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀧𑀼𑀩𑁆𑀩𑁂 𑀧𑀦 𑀅𑀦𑀸𑀕𑀸𑀫𑀻 𑀏𑀯 𑀅𑀦𑀸𑀕𑀸𑀫𑀻𑀢𑀺 𑀯𑀼𑀢𑁆𑀢𑁄, 𑀇𑀥 𑀛𑀸𑀦𑀸𑀦𑀸𑀕𑀸𑀫𑀺𑀲𑁄𑀢𑀸𑀧𑀦𑁆𑀦𑀸𑀤𑀺𑀓𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀥 𑀅𑀭𑀳𑀢𑁆𑀢𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸 𑀇𑀥𑁂𑀯 𑀨𑀮𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑀁 ‘‘𑀇𑀥𑀧𑀭𑀺𑀦𑀺𑀩𑁆𑀩𑀸𑀬𑀻’’𑀢𑀺 𑀯𑀤𑀢𑀺, 𑀇𑀥 𑀧𑀦 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸 𑀢𑀢𑁆𑀣 𑀨𑀮𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑀁 ‘‘𑀢𑀢𑁆𑀣𑀧𑀭𑀺𑀦𑀺𑀩𑁆𑀩𑀸𑀬𑀻 𑀅𑀭𑀳𑀸’’𑀢𑀺.

𑀲𑀁𑀲𑀦𑁆𑀤𑀦𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀩𑁆𑀭𑀳𑁆𑀫𑀘𑀭𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀑𑀥𑀺𑀲𑁄𑀓𑀣𑀸𑀯𑀡𑁆𑀡𑀦𑀸

𑁨𑁭𑁪. 𑀑𑀥𑀺𑀲𑁄 𑀑𑀥𑀺𑀲𑁄𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑀤𑁂𑀲𑁂𑀦 𑀏𑀓𑀤𑁂𑀲𑁂𑀦𑀸’’𑀢𑀺 𑀆𑀳.

𑀑𑀥𑀺𑀲𑁄𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀚𑀳𑀢𑀺𑀓𑀣𑀸𑀯𑀡𑁆𑀡𑀦𑀸

𑁧. 𑀦𑀲𑀼𑀢𑁆𑀢𑀸𑀳𑀭𑀡𑀓𑀣𑀸𑀯𑀡𑁆𑀡𑀦𑀸

𑁨𑁮𑁦. 𑀓𑀺𑀘𑁆𑀘𑀲𑀩𑁆𑀪𑀸𑀯𑀦𑁆𑀢𑀺 𑀢𑀻𑀳𑀺 𑀧𑀳𑀸𑀢𑀩𑁆𑀩𑀲𑁆𑀲 𑀧𑀳𑀻𑀦𑀢𑀁. 𑀢𑀁 𑀧𑀦 𑀓𑀺𑀘𑁆𑀘𑀁 𑀬𑀤𑀺 𑀢𑁂𑀦𑁂𑀯 𑀫𑀕𑁆𑀕𑁂𑀦 𑀲𑀺𑀚𑁆𑀛𑀢𑀻𑀢𑀺 𑀮𑀤𑁆𑀥𑀺, 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀏𑀯 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀧𑀳𑀻𑀦𑀸𑀢𑀺 𑀮𑀤𑁆𑀥𑀻𑀢𑀺 𑀏𑀢𑀁 𑀦 𑀲𑀫𑁂𑀢𑀺, 𑀢𑀲𑁆𑀫𑀸 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀧𑀳𑀻𑀦𑀸𑀦𑀫𑁆𑀧𑀺 𑀤𑀲𑁆𑀲𑀦𑀫𑀕𑁆𑀕𑁂 𑀉𑀧𑁆𑀧𑀦𑁆𑀦𑁂 𑀧𑀼𑀦 𑀓𑀤𑀸𑀘𑀺 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀓𑀺𑀘𑁆𑀘𑀁 𑀲𑀫𑁆𑀪𑀯𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦𑀲𑀼𑀢𑁆𑀢𑀸𑀳𑀭𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀚𑀳𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀩𑁆𑀩𑀫𑀢𑁆𑀣𑀻𑀢𑀺𑀓𑀣𑀸

𑁧. 𑀯𑀸𑀤𑀬𑀼𑀢𑁆𑀢𑀺𑀯𑀡𑁆𑀡𑀦𑀸

𑁨𑁮𑁨. 𑀲𑀩𑁆𑀩𑀲𑁆𑀫𑀺𑀁 𑀲𑀭𑀻𑀭𑁂 𑀲𑀩𑁆𑀩𑀦𑁆𑀢𑀺 𑀲𑀺𑀭𑀲𑀺 𑀧𑀸𑀤𑀸 𑀧𑀘𑁆𑀙𑀢𑁄 𑀘𑀓𑁆𑀔𑀽𑀦𑀻𑀢𑀺 𑀏𑀯𑀁 𑀲𑀩𑁆𑀩𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀲𑁆𑀫𑀺𑀁 𑀓𑀸𑀮𑁂𑀢𑀺 𑀩𑀸𑀮𑀓𑀸𑀮𑁂 𑀬𑀼𑀯𑀢𑀸, 𑀯𑀼𑀟𑁆𑀠𑀓𑀸𑀮𑁂 𑀩𑀸𑀮𑀢𑀸, 𑀏𑀯𑀁 𑀲𑀩𑁆𑀩𑀲𑁆𑀫𑀺𑀁 𑀓𑀸𑀮𑁂 𑀲𑀩𑁆𑀩𑀁. 𑀲𑀩𑁆𑀩𑁂𑀦𑀸𑀓𑀸𑀭𑁂𑀦𑀸𑀢𑀺 𑀦𑀻𑀮𑀸𑀓𑀸𑀭𑁂𑀦 𑀧𑀻𑀢𑀁, 𑀧𑀻𑀢𑀸𑀓𑀸𑀭𑁂𑀦 𑀮𑁄𑀳𑀺𑀢𑀦𑁆𑀢𑀺 𑀏𑀯𑀁. 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀘𑀓𑁆𑀔𑀼𑀲𑁆𑀫𑀺𑀁 𑀲𑁄𑀢𑀁, 𑀲𑁄𑀢𑀲𑁆𑀫𑀺𑀁 𑀖𑀸𑀦𑀦𑁆𑀢𑀺 𑀏𑀯𑀁. 𑀅𑀬𑀼𑀢𑁆𑀢𑀦𑁆𑀢𑀺 𑀬𑁄𑀕𑀭𑀳𑀺𑀢𑀁 𑀯𑀤𑀢𑀺, 𑀢𑀁 𑀧𑀦 𑀏𑀓𑀲𑀪𑀸𑀯𑀁. 𑀓𑀣𑀁 𑀧𑀦 𑀏𑀓𑀲𑀪𑀸𑀯𑀲𑁆𑀲 𑀬𑁄𑀕𑀭𑀳𑀺𑀢𑀢𑀸𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀸𑀦𑀸𑀲𑀪𑀸𑀯𑀸𑀦𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀤𑁆𑀯𑀺𑀦𑁆𑀦𑀜𑁆𑀳𑀺 𑀦𑀸𑀦𑀸𑀲𑀪𑀸𑀯𑀸𑀦𑀁 𑀅𑀗𑁆𑀕𑀼𑀮𑀻𑀦𑀁 𑀫𑁂𑀡𑁆𑀟𑀓𑀸𑀦𑀁 𑀯𑀸 𑀅𑀜𑁆𑀜𑀫𑀜𑁆𑀜𑀬𑁄𑀕𑁄 𑀳𑁄𑀢𑀺, 𑀦 𑀏𑀓𑀲𑁆𑀲𑁂𑀯 𑀲𑀢𑁄, 𑀢𑀲𑁆𑀫𑀸 𑀬𑁄 𑀦𑀸𑀦𑀸𑀲𑀪𑀸𑀯𑁂𑀲𑀼 𑀳𑁄𑀢𑀺 𑀬𑁄𑀕𑁄, 𑀢𑁂𑀦 𑀭𑀳𑀺𑀢𑀁 𑀏𑀓𑀲𑀪𑀸𑀯𑀁 𑀅𑀬𑁄𑀕𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀤𑀁 𑀧𑀼𑀘𑁆𑀙𑀢𑀻𑀢𑀺 𑀧𑀭𑀯𑀸𑀤𑀻𑀤𑀺𑀝𑁆𑀞𑀺𑀬𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀪𑀸𑀯𑀁 𑀕𑀳𑁂𑀢𑁆𑀯𑀸 𑀉𑀧𑁆𑀧𑀦𑁆𑀦𑀸𑀬 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀪𑀸𑀯𑁄 𑀅𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀯𑀸𑀤𑀬𑀼𑀢𑁆𑀢𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀓𑀸𑀮𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸

𑁨𑁮𑁫. 𑀅𑀢𑀻𑀢𑀸𑀦𑀸𑀕𑀢𑀁 𑀧𑀳𑀸𑀬 𑀧𑀘𑁆𑀘𑀼𑀧𑁆𑀧𑀦𑁆𑀦𑀭𑀽𑀧𑀫𑁂𑀯 𑀅𑀧𑁆𑀧𑀺𑀬𑀁 𑀅𑀯𑀺𑀪𑀚𑀺𑀢𑀩𑁆𑀩𑀁 𑀓𑀭𑀺𑀢𑁆𑀯𑀸𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀤𑁆𑀤𑁂𑀦 𑀭𑀽𑀧𑀲𑀤𑁆𑀤𑁂𑀦 𑀘𑀸𑀢𑀺 𑀉𑀪𑁄𑀳𑀺𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀭𑀽𑀧𑀫𑁂𑀯 𑀯𑀢𑁆𑀢𑀩𑁆𑀩𑀁 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀜𑁆𑀜𑀢𑁆𑀢𑀺𑀬𑀸 𑀅𑀯𑀺𑀕𑀢𑀢𑁆𑀢𑀸𑀢𑀺 𑀏𑀢𑁂𑀦 𑀇𑀤𑀁 𑀯𑀺𑀜𑁆𑀜𑀸𑀬𑀢𑀺 ‘‘𑀦 𑀭𑀽𑀧𑀧𑀜𑁆𑀜𑀢𑁆𑀢𑀺 𑀯𑀺𑀬 𑀯𑀢𑁆𑀣𑀧𑀜𑁆𑀜𑀢𑁆𑀢𑀺 𑀲𑀪𑀸𑀯𑀧𑀭𑀺𑀘𑁆𑀙𑀺𑀦𑁆𑀦𑁂 𑀧𑀯𑀢𑁆𑀢𑀸 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀅𑀣 𑀔𑁄 𑀧𑀼𑀩𑁆𑀩𑀸𑀧𑀭𑀺𑀬𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀭𑀽𑀧𑀲𑀫𑀽𑀳𑀁 𑀉𑀧𑀸𑀤𑀸𑀬 𑀧𑀯𑀢𑁆𑀢𑀸 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀢𑀲𑁆𑀫𑀸 𑀯𑀢𑁆𑀣𑀪𑀸𑀯𑀲𑁆𑀲 𑀑𑀤𑀸𑀢𑀪𑀸𑀯𑀯𑀺𑀕𑀫𑁂 𑀯𑀺𑀕𑀫𑀸𑀯𑀢𑁆𑀢𑀩𑁆𑀩𑀢𑀸 𑀬𑀼𑀢𑁆𑀢𑀸, 𑀦 𑀧𑀦 𑀭𑀽𑀧𑀪𑀸𑀯𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀯𑀺𑀕𑀫𑁂’’𑀢𑀺.

𑀓𑀸𑀮𑀲𑀁𑀲𑀦𑁆𑀤𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀘𑀦𑀲𑁄𑀥𑀦𑀯𑀡𑁆𑀡𑀦𑀸

𑁨𑁮𑁮. 𑀅𑀦𑀸𑀕𑀢𑀁 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀸 𑀳𑀼𑀢𑁆𑀯𑀸 𑀳𑁄𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀏𑀢𑁆𑀣 𑀅𑀦𑀸𑀕𑀢𑀁 𑀅𑀦𑀸𑀕𑀢𑀁 𑀳𑀼𑀢𑁆𑀯𑀸 𑀧𑀼𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀳𑁄𑀦𑁆𑀢𑀁 𑀳𑀼𑀢𑁆𑀯𑀸 𑀳𑁄𑀢𑀻𑀢𑀺, 𑀢𑀣𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀳𑁄𑀦𑁆𑀢𑀁 𑀧𑀼𑀩𑁆𑀩𑁂 𑀅𑀦𑀸𑀕𑀢𑀁 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀳𑁄𑀢𑀻𑀢𑀺 𑀳𑀼𑀢𑁆𑀯𑀸 𑀳𑁄𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀺𑀁 𑀢𑁂 𑀢𑀫𑁆𑀧𑀺 𑀳𑀼𑀢𑁆𑀯𑀸 𑀳𑁄𑀢𑀻𑀢𑀺 𑀢𑀩𑁆𑀪𑀸𑀯𑀸𑀯𑀺𑀕𑀫𑀢𑁄 𑀳𑀼𑀢𑁆𑀯𑀸𑀳𑁄𑀢𑀺𑀪𑀸𑀯𑀸𑀦𑀼𑀧𑀭𑀫𑀁 𑀅𑀦𑀼𑀧𑀘𑁆𑀙𑁂𑀤𑀁 𑀧𑀼𑀘𑁆𑀙𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 𑀬𑀼𑀢𑁆𑀢𑁄. 𑀳𑀼𑀢𑁆𑀯𑀸 𑀪𑀽𑀢𑀲𑁆𑀲 𑀧𑀼𑀦 𑀳𑀼𑀢𑁆𑀯𑀸 𑀅𑀪𑀸𑀯𑀢𑁄𑀢𑀺 𑀅𑀦𑀸𑀕𑀢𑀁 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀽𑀢𑀲𑁆𑀲 𑀧𑀼𑀦 𑀅𑀦𑀸𑀕𑀢𑀁 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀪𑀸𑀯𑀢𑁄.

𑀬𑀲𑁆𑀫𑀸 𑀢𑀦𑁆𑀢𑀺 𑀢𑀁 𑀳𑀼𑀢𑁆𑀯𑀸 𑀪𑀽𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀬𑀲𑁆𑀫𑀸 𑀅𑀦𑀸𑀕𑀢𑀁 𑀳𑀼𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀳𑁄𑀦𑁆𑀢𑀁 ‘‘𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺 𑀲𑀗𑁆𑀔𑁆𑀬𑀁 𑀕𑀢𑀁, 𑀢𑀲𑁆𑀫𑀸 𑀤𑀼𑀢𑀺𑀬𑀫𑁆𑀧𑀺 ‘‘𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺 𑀯𑀘𑀦𑀁 𑀅𑀭𑀳𑀢𑀻𑀢𑀺 𑀧𑀝𑀺𑀚𑀸𑀦𑀸𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀧𑀦 𑀥𑀫𑁆𑀫𑁂 𑀳𑀼𑀢𑁆𑀯𑀸𑀳𑁄𑀢𑀺𑀪𑀸𑀯𑀸𑀦𑀼𑀧𑀭𑀫𑀁 𑀯𑀤𑀦𑁆𑀢𑀲𑁆𑀲 𑀅𑀥𑀫𑁆𑀫𑁂 𑀲𑀲𑀯𑀺𑀲𑀸𑀡𑁂 𑀦𑀳𑀼𑀢𑁆𑀯𑀸𑀦 𑀳𑁄𑀢𑀺𑀪𑀸𑀯𑀸𑀦𑀼𑀧𑀭𑀫𑁄 𑀆𑀧𑀚𑁆𑀚𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀅𑀣 𑀦’’𑀦𑁆𑀢𑀺𑀆𑀤𑀺𑀫𑀸𑀳.

𑀧𑀝𑀺𑀓𑁆𑀔𑀺𑀢𑁆𑀢𑀦𑀬𑁂𑀦𑀸𑀢𑀺 𑀓𑀸𑀮𑀦𑀸𑀦𑀢𑁆𑀢𑁂𑀦. 𑀧𑀝𑀺𑀜𑁆𑀜𑀸𑀢𑀦𑀬𑁂𑀦𑀸𑀢𑀺 𑀅𑀢𑁆𑀣𑀸𑀦𑀸𑀦𑀢𑁆𑀢𑁂𑀦. 𑀅𑀢𑁆𑀣𑀸𑀦𑀸𑀦𑀢𑁆𑀢𑀁 𑀇𑀘𑁆𑀙𑀦𑁆𑀢𑁄𑀧𑀺 𑀧𑀦 𑀅𑀦𑀸𑀕𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀯𑀼𑀢𑁆𑀢𑀁 𑀳𑁄𑀢𑀺𑀪𑀸𑀯𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀘 𑀅𑀦𑀸𑀕𑀢𑁂 𑀯𑀼𑀢𑁆𑀢𑀁 𑀳𑀼𑀢𑁆𑀯𑀸𑀪𑀸𑀯𑀁 𑀓𑀣𑀁 𑀧𑀝𑀺𑀚𑀸𑀦𑀸𑀢𑀻𑀢𑀺 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀅𑀢𑁆𑀣𑀸𑀦𑀸𑀦𑀢𑁆𑀢𑀫𑁂𑀯 𑀳𑀺 𑀢𑁂𑀦 𑀅𑀦𑀼𑀜𑁆𑀜𑀸𑀬𑀢𑀺, 𑀦 𑀅𑀦𑀸𑀕𑀢𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀯𑀸 𑀅𑀦𑀸𑀕𑀢𑀪𑀸𑀯𑁄𑀢𑀺. 𑀧𑀼𑀭𑀺𑀫𑀁 𑀧𑀝𑀺𑀓𑁆𑀔𑀺𑀢𑁆𑀢𑀧𑀜𑁆𑀳𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸𑀢𑀺 𑀅𑀦𑀼𑀜𑁆𑀜𑀸𑀢𑀧𑀜𑁆𑀳𑀲𑁆𑀲 𑀳𑀼𑀢𑁆𑀯𑀸 𑀳𑁄𑀢𑀺 𑀳𑀼𑀢𑁆𑀯𑀸 𑀳𑁄𑀢𑀻𑀢𑀺 𑀤𑁄𑀲𑁄 𑀯𑀼𑀢𑁆𑀢𑁄𑀢𑀺 𑀅𑀯𑀼𑀢𑁆𑀢𑀤𑁄𑀲𑀁 𑀅𑀢𑀺𑀓𑁆𑀓𑀫𑁆𑀫 𑀧𑀝𑀺𑀓𑁆𑀔𑀺𑀢𑁆𑀢𑀧𑀜𑁆𑀳𑀁 𑀧𑀼𑀦 𑀕𑀳𑁂𑀢𑁆𑀯𑀸 𑀢𑁂𑀦 𑀘𑁄𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀅𑀢𑁆𑀣𑀸𑀦𑀸𑀦𑀢𑁆𑀢𑁂𑀦 𑀳𑀼𑀢𑁆𑀯𑀸𑀳𑁄𑀢𑀻𑀢𑀺 𑀅𑀦𑀼𑀚𑀸𑀦𑀦𑁆𑀢𑀲𑁆𑀲 𑀤𑁄𑀲𑁄 𑀓𑀸𑀮𑀦𑀸𑀦𑀢𑁆𑀢𑀸𑀬𑁂𑀯 𑀅𑀦𑀸𑀕𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀧𑀝𑀺𑀓𑁆𑀔𑁂𑀧𑁂𑀦 𑀓𑀣𑀁 𑀳𑁄𑀢𑀻𑀢𑀺? 𑀢𑀲𑁆𑀲𑁂𑀯 𑀅𑀦𑀼𑀚𑀸𑀦𑀦𑀧𑀝𑀺𑀓𑁆𑀔𑁂𑀧𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀓𑁂𑀓𑀦𑁆𑀢𑀺 𑀅𑀦𑀸𑀕𑀢𑀫𑁆𑀧𑀺 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀧𑀻𑀢𑀺 𑀢𑀤𑀼𑀪𑀬𑀁 𑀕𑀳𑁂𑀢𑁆𑀯𑀸 ‘‘𑀏𑀓𑁂𑀓𑀁 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀺 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀦 𑀏𑀓𑁂𑀓𑀫𑁂𑀯 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀺 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀻𑀢𑀺. 𑀏𑀲 𑀦𑀬𑁄 𑀧𑀼𑀭𑀺𑀫𑀲𑁆𑀫𑀺𑀁 ‘‘𑀏𑀓𑁂𑀓𑀁 𑀳𑀼𑀢𑁆𑀯𑀸 𑀳𑁄𑀢𑀺 𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺 𑀯𑀘𑀦𑁂𑀧𑀺. 𑀅𑀦𑀸𑀕𑀢𑀲𑁆𑀲 𑀳𑀺 ‘‘𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺 𑀦𑀸𑀫𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀘𑀸𑀢𑀺 𑀤𑁆𑀯𑁂𑀧𑀺 𑀦𑀸𑀫𑀸𑀦𑀺 𑀲𑀗𑁆𑀕𑀳𑁂𑀢𑁆𑀯𑀸 ‘‘𑀳𑀼𑀢𑁆𑀯𑀸 𑀳𑁄𑀢𑀺 𑀳𑀼𑀢𑁆𑀯𑀸 𑀳𑁄𑀢𑀻’’𑀢𑀺 𑀘𑁄𑀤𑀺𑀢𑀁, 𑀢𑀣𑀸 ‘‘𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀺 𑀦 𑀳𑀼𑀢𑁆𑀯𑀸 𑀦 𑀳𑁄𑀢𑀻’’𑀢𑀺 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀩𑁆𑀩𑀢𑁄 𑀅𑀦𑁆𑀥𑀓𑀸𑀭𑁂𑀦 𑀧𑀭𑀺𑀬𑁄𑀦𑀤𑁆𑀥𑁄 𑀯𑀺𑀬𑀸𑀢𑀺 𑀏𑀢𑁂𑀦 𑀅𑀧𑀭𑀺𑀬𑁄𑀦𑀤𑁆𑀥𑁂𑀦 𑀧𑀝𑀺𑀚𑀸𑀦𑀺𑀢𑀩𑁆𑀩𑀁 𑀲𑀺𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀘 𑀧𑀼𑀭𑀺𑀫𑀦𑀬𑁂 𑀳𑀼𑀢𑁆𑀯𑀸 𑀪𑀽𑀢𑀲𑁆𑀲 𑀧𑀼𑀦 𑀳𑀼𑀢𑁆𑀯𑀸𑀳𑁄𑀢𑀺𑀪𑀸𑀯𑁄 𑀘𑁄𑀤𑀺𑀢𑁄, 𑀤𑀼𑀢𑀺𑀬𑀦𑀬𑁂 𑀅𑀦𑀸𑀕𑀢𑀸𑀤𑀻𑀲𑀼 𑀏𑀓𑁂𑀓𑀲𑁆𑀲 𑀳𑀼𑀢𑁆𑀯𑀸𑀳𑁄𑀢𑀺𑀦𑀸𑀫𑀢𑀸𑀢𑀺 𑀅𑀬𑀁 𑀯𑀺𑀲𑁂𑀲𑁄.

𑀯𑀘𑀦𑀲𑁄𑀥𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀢𑀻𑀢𑀜𑀸𑀡𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁨𑁯𑁦. 𑀧𑀼𑀦 𑀧𑀼𑀝𑁆𑀞𑁄…𑀧𑁂… 𑀅𑀢𑁆𑀣𑀺𑀢𑀸𑀬 𑀧𑀝𑀺𑀚𑀸𑀦𑀸𑀢𑀻𑀢𑀺 𑀏𑀢𑁆𑀣 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀜𑀸𑀡𑀁 𑀢𑁂𑀦𑀸𑀢𑀺 𑀏𑀢𑁂𑀦 𑀅𑀦𑀼𑀯𑀢𑁆𑀢𑀫𑀸𑀦𑀸𑀧𑁂𑀓𑁆𑀔𑀦𑀯𑀘𑀦𑁂𑀦 𑀓𑀣𑀁 𑀯𑀼𑀘𑁆𑀘𑀢𑀻𑀢𑀺 𑀯𑀺𑀘𑀸𑀭𑁂𑀢𑀩𑁆𑀩𑀁.

𑀅𑀢𑀻𑀢𑀜𑀸𑀡𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.