𑀅𑀓𑀼𑀲𑀮𑀧𑀤𑀁

𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭𑁄

𑀧𑀞𑀫𑀘𑀺𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁩𑁬𑁫. 𑀓𑀼𑀲𑀮𑁂 𑀯𑀼𑀢𑁆𑀢𑀦𑀬𑀁 𑀅𑀦𑀼𑀕𑀦𑁆𑀢𑁆𑀯𑀸 𑀬𑀣𑀸𑀦𑀼𑀭𑀽𑀧𑀁 𑀯𑁂𑀤𑀺𑀢𑀩𑁆𑀩𑀢𑀸𑀬 ‘‘𑀯𑀼𑀢𑁆𑀢𑀦𑀬𑁂𑀦𑀸’’𑀢𑀺 𑀆𑀳. 𑀕𑀦𑁆𑀢𑀩𑁆𑀩𑀸𑀪𑀸𑀯𑀢𑁄𑀢𑀺 𑀩𑀼𑀚𑁆𑀛𑀺𑀢𑀩𑁆𑀩𑀸𑀪𑀸𑀯𑀢𑁄. 𑀤𑀺𑀝𑁆𑀞𑀺𑀬𑀸 𑀕𑀢𑀫𑀢𑁆𑀢𑀦𑁆𑀢𑀺 𑀤𑀺𑀝𑁆𑀞𑀺𑀬𑀸 𑀕𑀢𑀺𑀫𑀢𑁆𑀢𑀁 𑀕𑀳𑀡𑀫𑀢𑁆𑀢𑀁. 𑀆𑀲𑀦𑁆𑀦𑀓𑀸𑀭𑀡𑀢𑁆𑀢𑀸 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲 𑀯𑀺𑀲𑀼𑀁 𑀕𑀳𑀡𑀁 𑀏𑀓𑀦𑁆𑀢𑀓𑀸𑀭𑀡𑀢𑁆𑀢𑀸 𑀘. 𑀲𑀢𑀺𑀲𑀁𑀯𑀭𑁄𑀢𑀺 𑀇𑀥 𑀲𑀻𑀢𑀸𑀤𑀻𑀳𑀺 𑀨𑀼𑀝𑁆𑀞𑀲𑁆𑀲 𑀅𑀧𑁆𑀧𑀫𑀚𑁆𑀚𑀦𑀁 𑀔𑀫𑀦𑀁 𑀤𑀝𑁆𑀞𑀩𑁆𑀩𑀁. 𑀧𑀳𑀸𑀦𑀲𑀁𑀯𑀭𑁄𑀢𑀺 𑀯𑀻𑀭𑀺𑀬𑀲𑀁𑀯𑀭𑁄.

𑀅𑀲𑁆𑀲𑀸𑀤𑀤𑀲𑁆𑀲𑀦𑀦𑁆𑀢𑀺 𑀅𑀲𑁆𑀲𑀸𑀤𑀤𑀺𑀝𑁆𑀞𑀺. 𑀨𑀮𑀝𑁆𑀞𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀦𑁂𑀦 𑀅𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑁄𑀫𑁄𑀳𑁄, 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀧𑀝𑀺𑀧𑀓𑁆𑀔𑀪𑀸𑀯𑀕𑁆𑀕𑀳𑀡𑀸𑀓𑀸𑀭𑁄 𑀯𑀸. 𑀲𑀩𑁆𑀩𑀲𑁆𑀲 𑀮𑁄𑀪𑀲𑁆𑀲 𑀅𑀪𑀺𑀚𑁆𑀛𑀸𑀪𑀸𑀯𑁂 𑀲𑀢𑀺𑀧𑀺 𑀯𑀺𑀲𑁂𑀲𑀬𑀼𑀢𑁆𑀢𑀸𑀬 𑀅𑀪𑀺𑀚𑁆𑀛𑀸𑀬 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀸𑀬 𑀇𑀥𑀼𑀧𑁆𑀧𑀚𑁆𑀚𑀫𑀸𑀦𑀸𑀬 𑀮𑀓𑁆𑀔𑀡𑀸𑀤𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀸 𑀧𑀭𑀲𑀫𑁆𑀧𑀢𑁆𑀢𑀻𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀦𑀲𑁆𑀲 𑀧𑀼𑀭𑁂𑀘𑀸𑀭𑀺𑀓𑀸 𑀢𑀡𑁆𑀳𑀸𑀪𑀺𑀭𑀢𑀺 𑀅𑀪𑀺𑀭𑀢𑀺.

𑀅𑀦𑀼𑀧𑀧𑀭𑀺𑀓𑁆𑀔𑀸 𑀫𑁄𑀳𑁄. 𑀫𑁄𑀳𑀯𑀲𑁂𑀦 𑀳𑀺 𑀤𑀺𑀝𑁆𑀞𑀺𑀯𑀲𑁂𑀦 𑀯𑀸 𑀅𑀯𑀢𑁆𑀣𑀼𑀲𑁆𑀫𑀺𑀁 𑀲𑀸𑀦𑀼𑀦𑀬𑁄 𑀅𑀥𑀺𑀫𑁄𑀓𑁆𑀔𑁄 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀅𑀲𑀢𑀺𑀬𑀘𑀺𑀢𑁆𑀢𑁂𑀢𑀺 𑀅𑀳𑀺𑀭𑀺𑀓𑀸𑀤𑀻𑀳𑀺 𑀆𑀭𑀓𑁆𑀔𑀭𑀳𑀺𑀢𑀘𑀺𑀢𑁆𑀢𑁂. 𑀲𑀢𑀺𑀭𑀳𑀺𑀢𑀢𑁆𑀢𑀸 𑀲𑀢𑀺𑀧𑀝𑀺𑀧𑀓𑁆𑀔𑀢𑁆𑀢𑀸 𑀘𑀸𑀢𑀺 𑀏𑀢𑁂𑀦 𑀲𑀢𑀺𑀭𑀳𑀺𑀢𑀸 𑀲𑀢𑀺𑀧𑀝𑀺𑀧𑀓𑁆𑀔𑀸 𑀘 𑀅𑀓𑀼𑀲𑀮𑀸 𑀔𑀦𑁆𑀥𑀸 𑀏𑀯 𑀫𑀺𑀘𑁆𑀙𑀸𑀲𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂 𑀧𑀦 𑀉𑀧𑀦𑀸𑀳𑀸𑀤𑀺𑀧𑁆𑀧𑀯𑀢𑁆𑀢𑀺𑀬𑀁 𑀘𑀺𑀭𑀓𑀢𑀸𑀤𑀺𑀲𑀮𑁆𑀮𑀓𑁆𑀔𑀡𑁂 𑀧𑀝𑀼𑀲𑀜𑁆𑀜𑀸𑀲𑀫𑁆𑀧𑀬𑀼𑀢𑁆𑀢𑀸 𑀤𑀝𑁆𑀞𑀩𑁆𑀩𑀸. 𑀲𑀤𑀭𑀣𑀸𑀤𑀺𑀪𑀸𑀯𑁄 𑀅𑀯𑀺𑀲𑁂𑀲𑁂𑀦 𑀓𑀺𑀮𑁂𑀲𑀲𑀫𑁆𑀧𑀬𑁄𑀕𑀢𑁄 𑀯𑀼𑀢𑁆𑀢𑁄 𑀮𑀳𑀼𑀢𑀸𑀤𑀺𑀏𑀓𑀦𑁆𑀢𑀧𑀝𑀺𑀧𑀓𑁆𑀔𑀸𑀦𑀁 𑀣𑀺𑀦𑀫𑀺𑀤𑁆𑀥𑀸𑀤𑀻𑀦𑀁 𑀓𑁂𑀲𑀜𑁆𑀘𑀺 𑀇𑀥 𑀅𑀪𑀸𑀯𑀸. 𑀅𑀯𑀽𑀧𑀲𑀫𑁄𑀢𑀺 𑀅𑀲𑀦𑁆𑀦𑀺𑀲𑀺𑀦𑁆𑀦𑀲𑀩𑁆𑀪𑀸𑀯𑀫𑀸𑀳. 𑀅𑀦𑀯𑀝𑁆𑀞𑀸𑀦𑀭𑀲𑀦𑁆𑀢𑀺 𑀘𑀮𑀦𑀓𑀺𑀘𑁆𑀘𑀁. 𑀘𑁂𑀢𑀲𑁄 𑀅𑀯𑀽𑀧𑀲𑀫𑁂𑀢𑀺 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂 𑀧𑀬𑁄𑀚𑀦𑁂 𑀪𑀼𑀫𑁆𑀫𑀁, 𑀅𑀯𑀽𑀧𑀲𑀫𑀧𑀘𑁆𑀘𑀬𑀪𑀽𑀢𑀁 𑀆𑀭𑀫𑁆𑀫𑀡𑀁 𑀯𑀸 ‘‘𑀅𑀯𑀽𑀧𑀲𑀫𑁄’’𑀢𑀺 𑀯𑀼𑀢𑁆𑀢𑀁.

𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑁆𑀤𑁂𑀲𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑁩𑁭𑁭. 𑀲𑀳𑀚𑀸𑀢𑀥𑀫𑁆𑀫𑁂𑀲𑀼 𑀅𑀓𑀫𑁆𑀧𑀦𑀁 𑀦 𑀓𑁄𑀲𑀚𑁆𑀚𑁂𑀲𑀼 𑀅𑀓𑀫𑁆𑀧𑀦𑀁 𑀯𑀺𑀬 𑀢𑀧𑁆𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀤𑀝𑁆𑀞𑀩𑁆𑀩𑀁, 𑀢𑀁𑀢𑀁𑀧𑀸𑀧𑀓𑀺𑀭𑀺𑀬𑀸𑀬 𑀉𑀲𑁆𑀲𑀳𑀦𑀯𑀲𑁂𑀦 𑀧𑀦 𑀣𑀺𑀭𑀢𑀸 𑀢𑀢𑁆𑀣 𑀅𑀓𑀫𑁆𑀧𑀦𑀁.

𑁩𑁮𑁧. 𑀤𑀺𑀝𑁆𑀞𑀺𑀬𑀸 𑀯𑀺𑀭𑀽𑀧𑀁 𑀨𑀦𑁆𑀤𑀺𑀢𑀦𑁆𑀢𑀺 𑀢𑀣𑀸 𑀢𑀣𑀸 𑀲𑀲𑁆𑀲𑀢𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺 𑀏𑀯 𑀯𑀼𑀘𑁆𑀘𑀢𑀺. 𑀢𑀭𑀦𑁆𑀢𑀻𑀢𑀺 𑀢𑀺𑀢𑁆𑀣𑁂 𑀯𑀺𑀬 𑀧𑀺𑀮𑀯𑀦𑁆𑀢𑀺. 𑀯𑀺𑀧𑀭𑀺𑀬𑁂𑀲𑀢𑁄𑀢𑀺 𑀯𑀢𑁆𑀣𑀼𑀲𑁆𑀲 𑀯𑀺𑀧𑀭𑀻𑀢𑀢𑁄.

𑁩𑁯𑁦. 𑀲𑀪𑀸𑀯𑀧𑀝𑀺𑀘𑁆𑀙𑀸𑀤𑀦𑀯𑀲𑁂𑀦 𑀧𑀓𑀢𑀺𑀅𑀢𑁆𑀢𑀸𑀤𑀺𑀅𑀲𑀦𑁆𑀢𑀕𑀳𑀡𑀲𑁆𑀲 𑀅𑀦𑀺𑀘𑁆𑀘𑀸𑀤𑀻𑀦𑀁 𑀦𑀺𑀘𑁆𑀘𑀸𑀤𑀺𑀯𑀺𑀲𑀫𑀕𑀳𑀡𑀲𑁆𑀲 𑀘 𑀲𑀜𑁆𑀜𑀸𑀤𑀺𑀯𑀺𑀧𑀭𑀺𑀬𑁂𑀲𑀲𑁆𑀲 𑀦𑀺𑀲𑁆𑀲𑀬𑀢𑁆𑀢𑀸 ‘‘𑀅𑀲𑀦𑁆𑀢𑀁 𑀅𑀲𑀫𑀜𑁆𑀘 𑀩𑀼𑀚𑁆𑀛𑀢𑀻’’𑀢𑀺 𑀯𑀼𑀢𑁆𑀢𑀁.

𑀤𑀼𑀢𑀺𑀬𑀘𑀺𑀢𑁆𑀢𑀯𑀡𑁆𑀡𑀦𑀸

𑁩𑁯𑁯. 𑀓𑀺𑀜𑁆𑀘𑀸𑀧𑀺…𑀧𑁂… 𑀧𑀭𑀸𑀫𑀲𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀻𑀢𑀺 𑀧𑀼𑀭𑀺𑀫𑀘𑀺𑀢𑁆𑀢𑁂𑀦 𑀅𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀅𑀦𑀼𑀲𑁆𑀲𑀸𑀳𑀦𑀸𑀯𑀲𑀻𑀤𑀦𑀪𑀸𑀯𑁂𑀦 𑀲𑀁𑀳𑀢𑀪𑀸𑀯𑁄 𑀣𑀺𑀦𑀁.

𑀢𑀢𑀺𑀬𑀘𑀺𑀢𑁆𑀢𑀯𑀡𑁆𑀡𑀦𑀸

𑁪𑁦𑁦. 𑀇𑀥 𑀫𑀸𑀦𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘 𑀅𑀧𑀡𑁆𑀡𑀓𑀗𑁆𑀕𑀸𑀦𑀻𑀢𑀺 𑀅𑀯𑀺𑀭𑀚𑁆𑀛𑀦𑀓𑀗𑁆𑀕𑀸𑀦𑀺 𑀉𑀧𑁆𑀧𑀢𑁆𑀢𑀺𑀅𑀭𑀳𑀗𑁆𑀕𑀸𑀦𑀺 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀫𑀸𑀦𑀲𑁆𑀲 𑀅𑀦𑀺𑀬𑀢𑀢𑁆𑀢𑀸 𑀦 𑀦𑀺𑀬𑀢𑀬𑁂𑀯𑀸𑀧𑀦𑀓𑀸𑀢𑀺. 𑀧𑀝𑁆𑀞𑀸𑀦𑁂 𑀳𑀺 ‘‘𑀲𑀁𑀬𑁄𑀚𑀦𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀲𑀁𑀬𑁄𑀚𑀦𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 (𑀧𑀝𑁆𑀞𑀸. 𑁩.𑁪.𑁧) 𑀏𑀢𑁆𑀣 ‘‘𑀘𑀢𑀼𑀓𑁆𑀔𑀢𑁆𑀢𑀼𑀁 𑀓𑀸𑀫𑀭𑀸𑀕𑁂𑀦 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀖𑁂𑀦 𑀘 𑀫𑀸𑀦𑁄 𑀯𑀺𑀘𑀺𑀓𑀺𑀘𑁆𑀙𑀸 𑀪𑀯𑀭𑀸𑀕𑁄 𑀢𑀬𑁄𑀧𑁂𑀢𑁂 𑀲𑀓𑀤𑀸𑀕𑀸𑀫𑀺𑀦𑁄 𑀲𑀁𑀬𑁄𑀚𑀦𑀸𑀦𑀁 𑀲𑀁𑀬𑁄𑀚𑀦𑁂𑀳𑀺 𑀤𑀲𑀯𑀺𑀥𑀸 𑀬𑁄𑀚𑀦𑀸’’𑀢𑀺 𑀤𑀲𑁆𑀲𑀺𑀢𑀸𑀬 𑀤𑀲𑀯𑀺𑀥𑀸𑀬 𑀬𑁄𑀚𑀦𑀸𑀬 ‘‘𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀁 𑀧𑀝𑀺𑀘𑁆𑀘 𑀫𑀸𑀦𑀲𑀁𑀬𑁄𑀚𑀦𑀁 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦’’𑀦𑁆𑀢𑀺 𑀯𑀢𑁆𑀯𑀸 ‘‘𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀁 𑀧𑀝𑀺𑀘𑁆𑀘 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦’’𑀦𑁆𑀢𑀺 ‘‘𑀫𑀸𑀦𑀲𑀁𑀬𑁄𑀚𑀦𑀁 𑀧𑀝𑀺𑀘𑁆𑀘 𑀪𑀯𑀭𑀸𑀕𑀲𑀁𑀬𑁄𑀚𑀦𑀁 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦’’𑀦𑁆𑀢𑀺 𑀘 𑀯𑀢𑁆𑀯𑀸 ‘‘𑀪𑀯𑀭𑀸𑀕𑀲𑀁𑀬𑁄𑀚𑀦𑀁 𑀧𑀝𑀺𑀘𑁆𑀘 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦’’𑀦𑁆𑀢𑀺 𑀯𑀼𑀢𑁆𑀢𑀸𑀳𑀺 𑀬𑁄𑀚𑀦𑀸𑀳𑀺 𑀫𑀸𑀦𑀲𑁆𑀲 𑀅𑀦𑀺𑀬𑀢𑀪𑀸𑀯𑁄 𑀧𑀓𑀸𑀲𑀺𑀢𑁄, 𑀢𑀣𑀸 𑀓𑀺𑀮𑁂𑀲𑀤𑀼𑀓𑁂𑀧𑀺. 𑀇𑀥 𑀘 𑀯𑀓𑁆𑀔𑀢𑀺 ‘‘𑀤𑀲𑀯𑀺𑀥𑀸 𑀲𑀁𑀬𑁄𑀚𑀦𑀸𑀦𑀁 𑀬𑁄𑀚𑀦𑀸, 𑀢𑀣𑀸 𑀤𑀲𑀯𑀺𑀥𑀸 𑀓𑀺𑀮𑁂𑀲𑀸𑀦’’𑀦𑁆𑀢𑀺 𑀘. 𑀉𑀦𑁆𑀦𑀫𑀦𑀯𑀲𑁂𑀦𑁂𑀯 𑀲𑀫𑁆𑀧𑀕𑁆𑀕𑀳𑀭𑀲𑁄, 𑀦 𑀯𑀻𑀭𑀺𑀬𑀁 𑀯𑀺𑀬 𑀢𑀁𑀢𑀁𑀓𑀺𑀘𑁆𑀘𑀲𑀸𑀥𑀦𑁂 𑀅𑀩𑁆𑀪𑀼𑀲𑁆𑀲𑀸𑀳𑀦𑀯𑀲𑁂𑀦. 𑀑𑀫𑀸𑀦𑀲𑁆𑀲𑀧𑀺 𑀅𑀢𑁆𑀢𑀸𑀦𑀁 𑀅𑀯𑀁𑀓𑀢𑁆𑀯𑀸 𑀕𑀳𑀡𑀁 𑀲𑀫𑁆𑀧𑀕𑁆𑀕𑀳𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀘𑀢𑀼𑀢𑁆𑀣𑀘𑀺𑀢𑁆𑀢𑀯𑀡𑁆𑀡𑀦𑀸

𑁪𑁦𑁨. 𑀧𑀭𑀺𑀳𑀭𑀡𑀢𑁆𑀣𑀁 𑀯𑀺𑀓𑁆𑀔𑀺𑀢𑁆𑀢𑀸 𑀳𑀼𑀢𑁆𑀯𑀸 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑀸 ‘‘𑀧𑀭𑀺𑀳𑀭𑀡𑀢𑁆𑀣𑀁 𑀲𑀉𑀲𑁆𑀲𑀸𑀳𑀸’’𑀢𑀺 𑀯𑀼𑀢𑁆𑀢𑀸, 𑀢𑁂𑀲𑀁.

𑀦𑀯𑀫𑀘𑀺𑀢𑁆𑀢𑀯𑀡𑁆𑀡𑀦𑀸

𑁪𑁧𑁩. 𑀯𑀺𑀲𑀧𑁆𑀧𑀦𑀅𑀦𑀺𑀝𑁆𑀞𑀭𑀽𑀧𑀲𑀫𑀼𑀝𑁆𑀞𑀸𑀦𑀯𑀲𑁂𑀦 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀆𑀓𑀸𑀭𑀯𑀲𑁂𑀦 𑀘 𑀯𑀺𑀲𑀧𑁆𑀧𑀦𑀭𑀲𑁄. 𑀤𑁄𑀲𑁄 𑀉𑀧𑀬𑁄𑀕𑀨𑀮𑁂𑀲𑀼 𑀅𑀦𑀺𑀝𑁆𑀞𑀢𑁆𑀢𑀸 𑀯𑀺𑀲𑀲𑀁𑀲𑀝𑁆𑀞𑀧𑀽𑀢𑀺𑀫𑀼𑀢𑁆𑀢𑀁 𑀯𑀺𑀬 𑀤𑀝𑁆𑀞𑀩𑁆𑀩𑁄. 𑀅𑀦𑀪𑀺𑀭𑀢𑀺𑀭𑀲𑀸𑀢𑀺 𑀏𑀯𑀁𑀧𑀓𑀸𑀭𑁂𑀲𑀼 𑀧𑀝𑀺𑀓𑁆𑀔𑁂𑀧𑁂𑀦 𑀭𑀲𑀯𑀘𑀦𑁂𑀲𑀼 𑀢𑀁𑀢𑀁𑀧𑀝𑀺𑀧𑀓𑁆𑀔𑀓𑀺𑀘𑁆𑀘𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀓𑀝𑀼𑀓𑀸𑀓𑀸𑀭𑀕𑀢𑀺 𑀓𑀝𑀼𑀓𑀜𑁆𑀘𑀼𑀓𑀢𑀸, 𑀅𑀢𑁆𑀢𑀲𑀫𑁆𑀧𑀢𑁆𑀢𑀺 𑀆𑀯𑀸𑀲𑀸𑀤𑀺, 𑀧𑀭𑀸𑀬𑀢𑁆𑀢𑀢𑀸𑀬 𑀤𑀸𑀲𑀩𑁆𑀬𑀁 𑀯𑀺𑀬 𑀤𑀝𑁆𑀞𑀩𑁆𑀩𑀁. 𑀬𑀣𑀸 𑀳𑀺 𑀤𑀸𑀲𑀩𑁆𑀬𑁂 𑀲𑀢𑀺 𑀤𑀸𑀲𑁄 𑀧𑀭𑀸𑀬𑀢𑁆𑀢𑁄 𑀳𑁄𑀢𑀺, 𑀏𑀯𑀁 𑀓𑀼𑀓𑁆𑀓𑀼𑀘𑁆𑀘𑁂 𑀲𑀢𑀺 𑀢𑀁𑀲𑀫𑀗𑁆𑀕𑀻. 𑀦 𑀳𑀺 𑀲𑁄 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀧𑀯𑀢𑁆𑀢𑀺𑀢𑀼𑀁 𑀲𑀓𑁆𑀓𑁄𑀢𑀺 𑀓𑀼𑀲𑀮𑁂𑀢𑀺. 𑀅𑀣 𑀯𑀸 𑀓𑀢𑀸𑀓𑀢𑀸𑀓𑀼𑀲𑀮𑀓𑀼𑀲𑀮𑀸𑀦𑀼𑀲𑁄𑀘𑀦𑁂 𑀆𑀬𑀢𑁆𑀢𑀢𑀸𑀬 𑀢𑀤𑀼𑀪𑀬𑀯𑀲𑁂𑀦 𑀓𑀼𑀓𑁆𑀓𑀼𑀘𑁆𑀘𑁂𑀦 𑀢𑀁𑀲𑀫𑀗𑁆𑀕𑀻 𑀳𑁄𑀢𑀻𑀢𑀺 𑀤𑀸𑀲𑀩𑁆𑀬𑀁 𑀯𑀺𑀬 𑀢𑀁 𑀳𑁄𑀢𑀺.

𑁪𑁧𑁮. 𑀯𑀺𑀭𑀼𑀤𑁆𑀥𑀸𑀓𑀸𑀭𑁄𑀢𑀺 𑀯𑀺𑀭𑀼𑀤𑁆𑀥𑀲𑁆𑀲 𑀧𑀼𑀕𑁆𑀕𑀮𑀲𑁆𑀲, 𑀘𑀺𑀢𑁆𑀢𑀲𑁆𑀲 𑀯𑀸 𑀆𑀓𑀸𑀭𑁄 𑀯𑀺𑀭𑀼𑀤𑁆𑀥𑀪𑀸𑀯𑁄. 𑀢𑁂𑀦 𑀯𑀺𑀭𑀼𑀚𑁆𑀛𑀦𑀁 𑀯𑀺𑀭𑁄𑀥𑁄𑀢𑀺 𑀤𑀲𑁆𑀲𑁂𑀢𑀺. 𑀯𑀘𑀦𑀦𑁆𑀢𑀺 𑀏𑀢𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀲𑀩𑁆𑀩𑀫𑁂𑀯 𑀳𑀺 𑀓𑀺𑀘𑁆𑀘𑀁 𑀏𑀢𑁂𑀦 𑀓𑀭𑀺𑀬𑀫𑀸𑀦𑀁 𑀲𑀼𑀭𑁄𑀧𑀺𑀢𑀁 𑀲𑀼𑀚𑀦𑀺𑀢𑀁 𑀦 𑀳𑁄𑀢𑀻𑀢𑀺. 𑀭𑁄𑀧𑀲𑀤𑁆𑀤𑀯𑀘𑀦𑀢𑁆𑀣𑀫𑁂𑀯 𑀓𑁂𑀘𑀺 𑀯𑀡𑁆𑀡𑁂𑀦𑁆𑀢𑀺. 𑀢𑀁 𑀅𑀧𑁆𑀧𑀫𑀸𑀡𑀦𑁆𑀢𑀺 𑀓𑁄𑀥𑀲𑁆𑀲 𑀢𑀣𑀸𑀧𑀯𑀢𑁆𑀢𑀦𑀲𑀪𑀸𑀯𑀸𑀪𑀸𑀯𑀸 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀧𑀭𑀺𑀧𑀼𑀡𑁆𑀡𑀢𑀸 𑀲𑀺𑀬𑀸𑀢𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀏𑀓𑀸𑀤𑀲𑀫𑀘𑀺𑀢𑁆𑀢𑀯𑀡𑁆𑀡𑀦𑀸

𑁪𑁨𑁨. 𑀯𑀺𑀕𑀢𑀸 𑀘𑀺𑀓𑀺𑀘𑁆𑀙𑀸𑀢𑀺 𑀘𑀺𑀓𑀺𑀘𑁆𑀙𑀺𑀢𑀼𑀁 𑀤𑀼𑀓𑁆𑀓𑀭𑀢𑀸𑀬 𑀯𑀼𑀢𑁆𑀢𑀁, 𑀦 𑀲𑀩𑁆𑀩𑀣𑀸 𑀘𑀺𑀓𑀺𑀘𑁆𑀙𑀸𑀪𑀸𑀯𑀸 𑀯𑀺𑀘𑀺𑀓𑀺𑀘𑁆𑀙𑀸𑀬𑀸𑀢𑀺 𑀢𑀤𑀢𑁆𑀣𑀁 𑀤𑀲𑁆𑀲𑁂𑀢𑀺.

𑁪𑁨𑁪. 𑀦𑀺𑀘𑁆𑀙𑀬𑀸𑀪𑀸𑀯𑀸 𑀅𑀲𑀡𑁆𑀞𑀳𑀦𑀢𑁄 𑀘𑁂𑀢𑀲𑁄 𑀧𑀯𑀢𑁆𑀢𑀺𑀧𑀘𑁆𑀘𑀬𑀫𑀢𑁆𑀢𑀢𑀸𑀬 ‘‘𑀧𑀯𑀢𑁆𑀢𑀺𑀝𑁆𑀞𑀺𑀢𑀺𑀫𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑁪𑁨𑁫. 𑀏𑀓𑀁 𑀆𑀓𑀸𑀭𑀁 𑀕𑀦𑁆𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀅𑀢𑁆𑀢𑀦𑁄 𑀆𑀫𑀼𑀔𑀁 𑀲𑀧𑁆𑀧𑀦𑀢𑁄 𑀑𑀲𑀓𑁆𑀓𑀢𑀺.

𑀤𑁆𑀯𑀸𑀤𑀲𑀫𑀘𑀺𑀢𑁆𑀢𑀯𑀡𑁆𑀡𑀦𑀸

𑁪𑁨𑁯. 𑀉𑀤𑁆𑀥𑀘𑁆𑀘𑀁 𑀅𑀢𑁆𑀢𑀦𑁄 𑀕𑀳𑀺𑀢𑀸𑀓𑀸𑀭𑁂 𑀏𑀯 𑀞𑀢𑁆𑀯𑀸 𑀪𑀫𑀢𑀻𑀢𑀺 𑀏𑀓𑀸𑀭𑀫𑁆𑀫𑀡𑀲𑁆𑀫𑀺𑀁𑀬𑁂𑀯 𑀯𑀺𑀧𑁆𑀨𑀦𑁆𑀤𑀦𑀁 𑀳𑁄𑀢𑀺. 𑀯𑀺𑀘𑀺𑀓𑀺𑀘𑁆𑀙𑀸 𑀧𑀦 𑀬𑀤𑀺𑀧𑀺 𑀭𑀽𑀧𑀸𑀤𑀻𑀲𑀼 𑀏𑀓𑀲𑁆𑀫𑀺𑀜𑁆𑀜𑁂𑀯𑀸𑀭𑀫𑁆𑀫𑀡𑁂 𑀉𑀧𑁆𑀧𑀚𑁆𑀚𑀢𑀺, 𑀢𑀣𑀸𑀧𑀺 ‘‘𑀏𑀯𑀁 𑀦𑀼 𑀔𑁄, 𑀇𑀤𑀁 𑀦𑀼 𑀔𑁄’’𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 ‘‘𑀦𑀦𑀼 𑀔𑁄, 𑀅𑀜𑁆𑀜𑀁 𑀦𑀼 𑀔𑁄’’𑀢𑀺 𑀅𑀜𑁆𑀜𑀁 𑀕𑀳𑁂𑀢𑀩𑁆𑀩𑀸𑀓𑀸𑀭𑀁 𑀅𑀧𑁂𑀓𑁆𑀔𑀢𑀻𑀢𑀺 𑀦𑀸𑀦𑀸𑀭𑀫𑁆𑀫𑀡𑁂 𑀘𑀮𑀦𑀁 𑀳𑁄𑀢𑀺.

‘‘𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀏𑀢𑁆𑀢𑀸𑀯𑀢𑀸 𑀇𑀫𑀲𑁆𑀫𑀺𑀁 𑀘𑀺𑀢𑁆𑀢𑀤𑁆𑀯𑀬𑁂 𑀯𑀼𑀢𑁆𑀢𑀧𑀓𑀺𑀡𑁆𑀡𑀓𑀁 𑀤𑀲𑁆𑀲𑁂𑀢𑁆𑀯𑀸 𑀤𑁆𑀯𑀸𑀤𑀲𑀲𑀼 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑁂𑀲𑀼𑀧𑀻’’𑀢𑀺𑀆𑀤𑀺𑀫𑀸𑀳. 𑀓𑀼𑀲𑀮𑁂𑀲𑀼𑀧𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀁 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀲𑀳𑀚𑀸𑀢𑀸𑀥𑀺𑀧𑀢𑀺𑀦𑁄 𑀏𑀯 𑀉𑀤𑁆𑀥𑀝𑀢𑁆𑀢𑀸 𑀇𑀥𑀸𑀧𑀺 𑀲𑁄 𑀏𑀯 𑀉𑀤𑁆𑀥𑀭𑀺𑀢𑀩𑁆𑀩𑁄 𑀲𑀺𑀬𑀸𑀢𑀺 ‘‘𑀲𑀳𑀚𑀸𑀢𑀸𑀥𑀺𑀧𑀢𑀺 𑀮𑀩𑁆𑀪𑀫𑀸𑀦𑁄𑀧𑀺 𑀦 𑀉𑀤𑁆𑀥𑀝𑁄’’𑀢𑀺 𑀯𑀼𑀢𑁆𑀢𑀁 𑀦𑀸𑀭𑀫𑁆𑀫𑀡𑀸𑀥𑀺𑀧𑀢𑀺𑀦𑁄 𑀅𑀮𑀩𑁆𑀪𑀫𑀸𑀦𑀢𑁆𑀢𑀸. 𑀲𑁄𑀧𑀺 𑀳𑀺 𑀅𑀝𑁆𑀞𑀲𑀼 𑀮𑁄𑀪𑀲𑀳𑀕𑀢𑁂𑀲𑀼 𑀮𑀩𑁆𑀪𑀢𑀻𑀢𑀺. 𑀲𑁂𑀲𑁄𑀧𑀻𑀢𑀺 𑀯𑀻𑀫𑀁𑀲𑀢𑁄 𑀅𑀜𑁆𑀜𑁄𑀧𑀺 𑀲𑀳𑀚𑀸𑀢𑀸𑀥𑀺𑀧𑀢𑀺 𑀦𑀢𑁆𑀣𑀺, 𑀬𑁄 𑀉𑀤𑁆𑀥𑀭𑀺𑀢𑀩𑁆𑀩𑁄 𑀲𑀺𑀬𑀸. 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀫𑁆𑀳𑀺 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀓𑀜𑁆𑀘𑀺 𑀥𑀫𑁆𑀫𑀦𑁆𑀢𑀺 𑀙𑀦𑁆𑀤𑀸𑀤𑀻𑀲𑀼 𑀏𑀓𑀫𑁆𑀧𑀺 𑀲𑀳𑀚𑀸𑀢𑀁. 𑀓𑀼𑀲𑀮𑀢𑁆𑀢𑀺𑀓𑁂 𑀢𑀸𑀯 𑀧𑀝𑀺𑀘𑁆𑀘𑀯𑀸𑀭𑀸𑀤𑀻𑀲𑀼 ‘‘𑀦 𑀳𑁂𑀢𑀼𑀧𑀘𑁆𑀘𑀬𑀸 𑀅𑀥𑀺𑀧𑀢𑀺𑀧𑀘𑁆𑀘𑀬𑀸’’𑀢𑀺 𑀏𑀓𑀲𑁆𑀲𑀧𑀺 𑀧𑀜𑁆𑀳𑀲𑁆𑀲 𑀅𑀦𑀼𑀤𑁆𑀥𑀝𑀢𑁆𑀢𑀸 𑀧𑀝𑁆𑀞𑀸𑀦𑁂 𑀧𑀝𑀺𑀲𑀺𑀤𑁆𑀥𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀜𑁆𑀜𑀣𑀸 𑀳𑀺 ‘‘𑀅𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦 𑀳𑁂𑀢𑀼𑀧𑀘𑁆𑀘𑀬𑀸 𑀅𑀥𑀺𑀧𑀢𑀺𑀧𑀘𑁆𑀘𑀬𑀸’’𑀢𑀺 (𑀧𑀝𑁆𑀞𑀸. 𑁧.𑁧.𑁮𑁬) 𑀏𑀢𑀲𑁆𑀲 𑀯𑀲𑁂𑀦 ‘‘𑀏𑀓’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸.

𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸𑀪𑀸𑀯𑀢𑁄𑀢𑀺 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄, 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑁂𑀲𑀼 𑀯𑀸 𑀅𑀪𑀸𑀯𑀢𑁄. 𑀏𑀢𑁂𑀦 𑀧𑀝𑀺𑀲𑀦𑁆𑀥𑀺𑀅𑀦𑀸𑀓𑀟𑁆𑀠𑀦𑀢𑁄 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑁂𑀲𑀼 𑀅𑀦𑀸𑀕𑀫𑀦𑀦𑁆𑀢𑀺 𑀢𑀢𑁆𑀣 𑀅𑀦𑀸𑀕𑀫𑀦𑁂𑀦 𑀧𑀝𑀺𑀲𑀦𑁆𑀥𑀺𑀅𑀦𑀸𑀓𑀟𑁆𑀠𑀦𑀁 𑀲𑀸𑀥𑁂𑀢𑀺. 𑀅𑀦𑀸𑀓𑀟𑁆𑀠𑀦𑀢𑁄 𑀅𑀦𑀸𑀕𑀫𑀦𑀁 𑀧𑀦 𑀲𑀸𑀥𑁂𑀢𑀼𑀁 ‘‘𑀢𑁂𑀲𑀼 𑀳𑀻’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣𑁂𑀯 𑀧𑀝𑀺𑀲𑀦𑁆𑀥𑀺𑀤𑀸𑀦𑀁 𑀪𑀯𑁂𑀬𑁆𑀬. 𑀢𑀣𑀸 𑀘 𑀲𑀢𑀺 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀁 𑀲𑀺𑀬𑀸 𑀅𑀧𑀸𑀬𑀕𑀫𑀦𑀻𑀬𑀲𑁆𑀲 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀪𑀸𑀯𑀢𑁄. 𑀦 𑀘𑁂𑀢𑀁 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀁 𑀲𑀺𑀬𑀸, 𑀢𑀲𑁆𑀫𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀯𑀺𑀪𑀗𑁆𑀕𑁂 𑀦𑀸𑀕𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀓𑀣𑀁 𑀧𑀦𑁂𑀢𑀁 𑀜𑀸𑀬𑀢𑀺 ‘‘𑀧𑀝𑀺𑀲𑀦𑁆𑀥𑀺𑀅𑀦𑀸𑀓𑀟𑁆𑀠𑀦𑀢𑁄 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑁂𑀲𑀼 𑀅𑀦𑀸𑀕𑀫𑀦’’𑀦𑁆𑀢𑀺? 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸𑀦𑀜𑁆𑀜𑁂𑀯 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀤𑀼𑀯𑀺𑀥𑀸 𑀳𑀺 𑀅𑀓𑀼𑀲𑀮𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀢𑀺. 𑀢𑀢𑁆𑀣 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀘𑁂𑀢𑀦𑀸𑀦𑀁 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄 𑀦 𑀯𑀼𑀢𑁆𑀢𑁄, 𑀇𑀢𑀭𑀸𑀲𑀜𑁆𑀜𑁂𑀯 𑀯𑀼𑀢𑁆𑀢𑁄. ‘‘𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑁄 𑀥𑀫𑁆𑀫𑁄 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀲𑁆𑀲 𑀥𑀫𑁆𑀫𑀲𑁆𑀲 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀢𑁆𑀣 𑀳𑀺 𑀲𑀳𑀚𑀸𑀢𑀫𑁂𑀯 𑀯𑀺𑀪𑀢𑁆𑀢𑀁, 𑀦 𑀦𑀸𑀦𑀸𑀓𑁆𑀔𑀡𑀺𑀓𑀦𑁆𑀢𑀺. 𑀢𑀣𑀸 𑀧𑀘𑁆𑀘𑀦𑀻𑀬𑁂𑀧𑀺 ‘‘𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑁄 𑀥𑀫𑁆𑀫𑁄 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄…𑀧𑁂… 𑀲𑀳𑀚𑀸𑀢𑀧𑀘𑁆𑀘𑀬𑁂𑀦…𑀧𑁂… 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦…𑀧𑁂…. 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 ‘‘𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺. 𑀇𑀢𑀭𑀢𑁆𑀣 𑀘 𑀯𑀼𑀢𑁆𑀢𑀁. 𑀉𑀤𑁆𑀥𑀘𑁆𑀘𑀲𑀳𑀕𑀢𑀸 𑀘 𑀘𑁂𑀢𑀦𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑁂𑀲𑀼 𑀏𑀯 𑀆𑀕𑀢𑀸𑀢𑀺 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁄 𑀦 𑀲𑀺𑀬𑀸𑀢𑀺. 𑀬𑀤𑀺 𑀲𑀺𑀬𑀸, 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀘𑁂𑀢𑀦𑀸𑀬 𑀘 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄 𑀯𑀼𑀘𑁆𑀘𑁂𑀬𑁆𑀬, 𑀦 𑀢𑀼 𑀯𑀼𑀢𑁆𑀢𑁄. 𑀢𑀲𑁆𑀫𑀸 𑀉𑀤𑁆𑀥𑀘𑁆𑀘𑀲𑀳𑀕𑀢𑀸 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁂 𑀲𑀢𑀺 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑁂𑀲𑀼 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸, 𑀢𑀤𑀪𑀸𑀯𑀸 𑀦 𑀯𑀼𑀢𑁆𑀢𑀸𑀢𑀺. 𑀧𑀝𑀺𑀲𑀦𑁆𑀥𑀺𑀅𑀦𑀸𑀓𑀟𑁆𑀠𑀦𑀢𑁄 𑀢𑀢𑁆𑀣 𑀅𑀦𑀸𑀕𑀢𑀸𑀢𑀺 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄. 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀸𑀯𑀘𑀦𑁂𑀦 𑀧𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀦𑀁 𑀧𑀯𑀢𑁆𑀢𑀺𑀯𑀺𑀧𑀸𑀓𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀧𑀯𑀢𑁆𑀢𑀺𑀯𑀺𑀧𑀸𑀓𑀲𑁆𑀲𑀧𑀺 𑀳𑀺 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀢𑀸 𑀦 𑀲𑀓𑁆𑀓𑀸 𑀦𑀺𑀯𑀸𑀭𑁂𑀢𑀼𑀁. 𑀯𑀼𑀢𑁆𑀢𑀜𑁆𑀘 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀥𑀫𑁆𑀫𑁄 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀥𑀫𑁆𑀫𑀲𑁆𑀲 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀦𑀸𑀦𑀸𑀓𑁆𑀔𑀡𑀺𑀓𑀸’’𑀢𑀺𑀆𑀤𑀺 (𑀧𑀝𑁆𑀞𑀸. 𑁧.𑁩.𑁫𑁬-𑁫𑁭). 𑀬𑀤𑀺 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀦𑀁 𑀯𑀺𑀧𑀸𑀓𑀤𑀸𑀦𑀁 𑀦𑀢𑁆𑀣𑀺, 𑀓𑀣𑀁 𑀢𑁂 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸 𑀳𑁄𑀦𑁆𑀢𑀻𑀢𑀺? 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀸𑀤𑀻𑀦𑀁 𑀯𑀺𑀬 𑀯𑀺𑀧𑀸𑀓𑀸𑀭𑀳𑀲𑀪𑀸𑀯𑀢𑁆𑀢𑀸. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀅𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀉𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑀁…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺, 𑀇𑀫𑁂𑀲𑀼 𑀥𑀫𑁆𑀫𑁂𑀲𑀼 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸, 𑀢𑁂𑀲𑀁 𑀯𑀺𑀧𑀸𑀓𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁩𑁦-𑁭𑁩𑁧) 𑀇𑀤𑀫𑁆𑀧𑀺 𑀢𑁂𑀲𑀁 𑀯𑀺𑀧𑀸𑀓𑀸𑀭𑀳𑀢𑀜𑁆𑀜𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀲𑀺𑀬𑀸. 𑀇𑀤𑀁 𑀧𑀦 𑀞𑀸𑀦𑀁 𑀲𑀼𑀝𑁆𑀞𑀼 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀅𑀢𑁆𑀣𑀺 𑀳𑀺 𑀏𑀢𑁆𑀣 𑀯𑀘𑀦𑁄𑀓𑀸𑀲𑁄. 𑀦 𑀳𑀺 𑀯𑀺𑀧𑀸𑀓𑁂𑀢𑀺 𑀯𑀘𑀦𑀁 𑀯𑀺𑀧𑀸𑀓𑀥𑀫𑁆𑀫𑀯𑀘𑀦𑀁 𑀯𑀺𑀬 𑀯𑀺𑀧𑀸𑀓𑀸𑀭𑀳𑀢𑀁 𑀯𑀤𑀢𑀻𑀢𑀺.

𑀅𑀓𑀼𑀲𑀮𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀩𑁆𑀬𑀸𑀓𑀢𑀧𑀤𑀁

𑀅𑀳𑁂𑀢𑀼𑀓𑀓𑀼𑀲𑀮𑀯𑀺𑀧𑀸𑀓𑀯𑀡𑁆𑀡𑀦𑀸

𑁪𑁩𑁧. 𑀢𑁂𑀲𑀼 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀦𑁆𑀢𑀺𑀆𑀤𑀻𑀦𑀁 ‘‘𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸𑀢𑀺𑀆𑀤𑀺 𑀆𑀭𑀤𑁆𑀥’’𑀦𑁆𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀧𑀻𑀢𑀺 𑀏𑀢𑀲𑁆𑀲 ‘‘𑀉𑀧𑁆𑀧𑀢𑁆𑀢𑀺𑀁 𑀤𑀻𑀧𑁂𑀢𑀼𑀁 𑀓𑀸𑀫𑀸…𑀧𑁂… 𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀉𑀧𑀘𑀺𑀢𑀢𑁆𑀢𑀸𑀢𑀺 𑀬𑀣𑀸 𑀅𑀜𑁆𑀜𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀸𑀪𑀺𑀫𑀼𑀔𑀁 𑀳𑁄𑀢𑀺 𑀢𑀣𑀸 𑀯𑀟𑁆𑀠𑀺𑀢𑀢𑁆𑀢𑀸. 𑀭𑀽𑀧𑀸𑀤𑀻𑀦𑀁 𑀧𑀘𑁆𑀘𑀬𑀸𑀦𑀁 𑀅𑀜𑁆𑀜𑀯𑀺𑀜𑁆𑀜𑀸𑀡𑀲𑀸𑀥𑀸𑀭𑀡𑀢𑁆𑀢𑀸 𑀅𑀲𑀸𑀥𑀸𑀭𑀡𑁂𑀦 𑀯𑀢𑁆𑀣𑀼𑀦𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀲𑁄𑀢𑀯𑀺𑀜𑁆𑀜𑀸𑀡𑀦𑁆𑀢𑀺 𑀦𑀸𑀫𑀁 𑀉𑀤𑁆𑀥𑀝𑀁. 𑀘𑀓𑁆𑀔𑀸𑀤𑀻𑀦𑀁 𑀢𑀺𑀓𑁆𑀔𑀫𑀦𑁆𑀤𑀪𑀸𑀯𑁂 𑀯𑀺𑀜𑁆𑀜𑀸𑀡𑀸𑀦𑀁 𑀢𑀺𑀓𑁆𑀔𑀫𑀦𑁆𑀤𑀪𑀸𑀯𑀸 𑀯𑀺𑀲𑁂𑀲𑀧𑀘𑁆𑀘𑀬𑀢𑁆𑀢𑀸 𑀘.

𑀘𑀓𑁆𑀔𑀼𑀲𑀦𑁆𑀦𑀺𑀲𑁆𑀲𑀺𑀢𑀜𑁆𑀘 𑀢𑀁 𑀭𑀽𑀧𑀯𑀺𑀚𑀸𑀦𑀦𑀜𑁆𑀘𑀸𑀢𑀺 𑀘𑀓𑁆𑀔𑀼𑀲𑀦𑁆𑀦𑀺𑀲𑁆𑀲𑀺𑀢𑀭𑀽𑀧𑀯𑀺𑀚𑀸𑀦𑀦𑀁. 𑀏𑀯𑀁𑀮𑀓𑁆𑀔𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁. 𑀢𑀢𑁆𑀣 𑀘𑀓𑁆𑀔𑀼𑀲𑀦𑁆𑀦𑀺𑀲𑁆𑀲𑀺𑀢𑀯𑀘𑀦𑁂𑀦 𑀭𑀽𑀧𑀸𑀭𑀫𑁆𑀫𑀡𑀁 𑀅𑀜𑁆𑀜𑀯𑀺𑀜𑁆𑀜𑀸𑀡𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀭𑀽𑀧𑀯𑀺𑀚𑀸𑀦𑀦𑀯𑀘𑀦𑁂𑀦 𑀘𑀓𑁆𑀔𑀼𑀦𑀺𑀲𑁆𑀲𑀬𑁂 𑀨𑀲𑁆𑀲𑀸𑀤𑀬𑁄 𑀦𑀺𑀯𑀢𑁆𑀢𑁂𑀢𑀺. 𑀘𑀓𑁆𑀔𑀼𑀭𑀽𑀧𑀯𑀘𑀦𑁂𑀳𑀺 𑀘 𑀦𑀺𑀲𑁆𑀲𑀬𑀢𑁄 𑀆𑀭𑀫𑁆𑀫𑀡𑀢𑁄 𑀘 𑀯𑀺𑀚𑀸𑀦𑀦𑀁 𑀯𑀺𑀪𑀸𑀯𑁂𑀢𑀺. 𑀭𑀽𑀧𑀫𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀕𑀳𑀡𑀁 𑀓𑀺𑀘𑁆𑀘𑀫𑁂𑀢𑀲𑁆𑀲𑀸𑀢𑀺 𑀭𑀽𑀧𑀫𑀢𑁆𑀢𑀸𑀭𑀫𑁆𑀫𑀡𑀭𑀲𑀁. 𑀛𑀸𑀦𑀗𑁆𑀕𑀯𑀲𑁂𑀦𑀸𑀢𑀺 𑀇𑀤𑀁 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀚𑁆𑀚𑁂𑀲𑀼 𑀯𑀺𑀚𑁆𑀚𑀫𑀸𑀦𑀸𑀦𑀁 𑀉𑀧𑁂𑀓𑁆𑀔𑀸𑀲𑀼𑀔𑀤𑀼𑀓𑁆𑀔𑁂𑀓𑀕𑁆𑀕𑀢𑀸𑀦𑀁 𑀛𑀸𑀦𑀗𑁆𑀕𑀺𑀓𑀢𑁆𑀢𑀸 𑀇𑀥𑀸𑀧𑀺 𑀢𑀁𑀲𑀤𑀺𑀲𑀸𑀦𑀁 𑀢𑀤𑀼𑀧𑀘𑀸𑀭𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀦 𑀳𑀺 𑀛𑀸𑀦𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑁂 𑀛𑀸𑀦𑀗𑁆𑀕𑀢𑀸 𑀅𑀢𑁆𑀣𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀛𑀸𑀦𑀗𑁆𑀕𑀸𑀦𑀺 𑀛𑀸𑀦𑀲𑀫𑁆𑀧𑀬𑀼𑀢𑁆𑀢…𑀧𑁂… 𑀭𑀽𑀧𑀸𑀦𑀁 𑀛𑀸𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁩.𑁧𑁧𑁨). 𑀏𑀢𑁂𑀲𑀜𑁆𑀘 𑀛𑀸𑀦𑀧𑀘𑁆𑀘𑀬𑀪𑀸𑀯𑁄 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀬𑀣𑀸𑀳 ‘‘𑀅𑀩𑁆𑀬𑀸𑀓𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦 𑀛𑀸𑀦𑀧𑀘𑁆𑀘𑀬𑀸. 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀳𑀕𑀢𑀁 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀢𑀬𑁄 𑀔𑀦𑁆𑀥𑀸’’𑀢𑀺𑀆𑀤𑀺 (𑀧𑀝𑁆𑀞𑀸. 𑁧.𑁧.𑁯𑁮). 𑀛𑀸𑀦𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑁂𑀧𑀺 𑀯𑁂𑀤𑀦𑀸𑀘𑀺𑀢𑁆𑀢𑀝𑁆𑀞𑀺𑀢𑀻𑀦𑀁 𑀉𑀧𑁂𑀓𑁆𑀔𑀸𑀤𑀺𑀪𑀸𑀯𑀢𑁄 𑀢𑀣𑀸𑀪𑀽𑀢𑀸𑀦𑀁 𑀯𑀘𑀦𑁂 𑀅𑀜𑁆𑀜𑀝𑁆𑀞𑀸𑀦𑀸𑀪𑀸𑀯𑀢𑁄 𑀘 𑀤𑀼𑀢𑀺𑀬𑀭𑀸𑀲𑀺𑀦𑀺𑀤𑁆𑀤𑁂𑀲𑁄.

𑁪𑁩𑁬. 𑀯𑀢𑁆𑀣𑀼𑀧𑀡𑁆𑀟𑀭𑀢𑁆𑀢𑀸𑀢𑀺 𑀲𑀬𑀁 𑀓𑀡𑁆𑀳𑀥𑀫𑁆𑀫𑀸𑀦𑀁 𑀅𑀧𑁆𑀧𑀝𑀺𑀧𑀓𑁆𑀔𑀢𑁆𑀢𑀸 𑀲𑀪𑀸𑀯𑀧𑀭𑀺𑀲𑀼𑀤𑁆𑀥𑀸𑀦𑀁 𑀧𑀲𑀸𑀤𑀳𑀤𑀬𑀯𑀢𑁆𑀣𑀼𑀦𑀺𑀲𑁆𑀲𑀬𑀸𑀦𑀁 𑀯𑀲𑁂𑀦 𑀧𑀡𑁆𑀟𑀭𑀲𑀪𑀸𑀯𑀁 𑀚𑀸𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀬𑀁 𑀧𑀦 𑀦𑀬𑁄 𑀘𑀢𑀼𑀯𑁄𑀓𑀸𑀭𑁂 𑀦 𑀮𑀩𑁆𑀪𑀢𑀻𑀢𑀺 𑀢𑀢𑁆𑀣 𑀪𑀯𑀗𑁆𑀕𑀲𑁆𑀲 𑀢𑀢𑁄 𑀦𑀺𑀓𑁆𑀔𑀦𑁆𑀢𑀸𑀓𑀼𑀲𑀮𑀲𑁆𑀲 𑀘 𑀧𑀡𑁆𑀟𑀭𑀢𑀸 𑀦 𑀲𑀺𑀬𑀸, 𑀢𑀲𑁆𑀫𑀸 𑀢𑀢𑁆𑀣 𑀧𑀡𑁆𑀟𑀭𑀢𑀸𑀬 𑀓𑀸𑀭𑀡𑀁 𑀯𑀢𑁆𑀢𑀩𑁆𑀩𑀁. 𑀲𑀪𑀸𑀯𑁄 𑀯𑀸𑀬𑀁 𑀘𑀺𑀢𑁆𑀢𑀲𑁆𑀲 𑀧𑀡𑁆𑀟𑀭𑀢𑀸𑀢𑀺.

𑁪𑁩𑁯. 𑀇𑀤𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁄 𑀞𑀺𑀢𑀺𑀫𑀢𑁆𑀢𑀲𑀳𑀺𑀢𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀼𑀢𑁆𑀢𑁄. 𑀧𑀓𑀢𑀺𑀬𑀸𑀢𑀺 𑀅𑀦𑀢𑀺𑀓𑁆𑀓𑀫𑀦𑁂𑀦. 𑀲𑁄𑀧𑀺 𑀯𑀺𑀲𑁂𑀲𑁄. 𑀓𑀸𑀬𑀧𑁆𑀧𑀲𑀸𑀤𑀁 𑀖𑀝𑁆𑀝𑁂𑀢𑁆𑀯𑀸 𑀧𑀲𑀸𑀤𑀧𑀘𑁆𑀘𑀬𑁂𑀲𑀼 𑀫𑀳𑀸𑀪𑀽𑀢𑁂𑀲𑀼 𑀧𑀝𑀺𑀳𑀜𑁆𑀜𑀢𑀻𑀢𑀺 𑀆𑀧𑀸𑀣𑀁 𑀕𑀦𑁆𑀢𑁆𑀯𑀸 𑀧𑀝𑀺𑀳𑀜𑁆𑀜𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸 𑀘 ‘‘𑀭𑀽𑀧𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑁂 𑀦 𑀆𑀭𑀫𑁆𑀫𑀡𑀼𑀧𑁆𑀧𑀸𑀤𑀸𑀦𑀁 𑀧𑀼𑀩𑁆𑀩𑀸𑀧𑀭𑀓𑀸𑀮𑀢𑀸 𑀳𑁄𑀢𑀺, 𑀏𑀯𑀫𑀺𑀥𑀸𑀧𑀺 𑀖𑀝𑁆𑀝𑀦𑀧𑀝𑀺𑀳𑀦𑀦𑁂𑀲𑀼 𑀤𑀝𑁆𑀞𑀩𑁆𑀩𑀁. 𑀉𑀧𑀫𑀸𑀧𑀺 𑀉𑀪𑀬𑀖𑀝𑁆𑀝𑀦𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸, 𑀦 𑀦𑀺𑀲𑁆𑀲𑀺𑀢𑀦𑀺𑀲𑁆𑀲𑀬𑀖𑀝𑁆𑀝𑀦𑀸𑀦𑀁 𑀧𑀼𑀩𑁆𑀩𑀸𑀧𑀭𑀢𑀸𑀤𑀲𑁆𑀲𑀦𑀢𑁆𑀣𑀁. 𑀏𑀢𑁆𑀣 𑀘 𑀩𑀳𑀺𑀤𑁆𑀥𑀸𑀢𑀺 𑀏𑀢𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. 𑀅𑀚𑁆𑀛𑀢𑁆𑀢𑀫𑁆𑀧𑀺 𑀳𑀺 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺. 𑀯𑀺𑀜𑁆𑀜𑀸𑀡𑀥𑀸𑀢𑀼𑀦𑀺𑀲𑁆𑀲𑀬𑀪𑀽𑀢𑁂𑀳𑀺 𑀯𑀸 𑀅𑀜𑁆𑀜𑀁 ‘‘𑀩𑀳𑀺𑀤𑁆𑀥𑀸’’𑀢𑀺 𑀯𑀼𑀢𑁆𑀢𑀁. 𑀧𑀝𑀺𑀖𑀝𑁆𑀝𑀦𑀸𑀦𑀺𑀖𑀁𑀲𑁄 𑀩𑀮𑀯𑀸 𑀳𑁄𑀢𑀺, 𑀢𑀢𑁄 𑀏𑀯 𑀇𑀝𑁆𑀞𑀸𑀦𑀺𑀝𑁆𑀞𑀨𑁄𑀝𑁆𑀞𑀩𑁆𑀩𑀲𑀫𑀸𑀬𑁄𑀕𑁂 𑀲𑀼𑀔𑀤𑀼𑀓𑁆𑀔𑀧𑀘𑁆𑀘𑀬𑀸 𑀥𑀸𑀢𑀼𑀅𑀦𑀼𑀕𑁆𑀕𑀳𑀥𑀸𑀢𑀼𑀓𑁆𑀔𑁄𑀪𑀸 𑀘𑀺𑀭𑀁 𑀅𑀦𑀼𑀯𑀢𑁆𑀢𑀦𑁆𑀢𑀺.

𑁪𑁫𑁫. 𑀅𑀜𑁆𑀜𑁂𑀲𑀁 𑀘𑀺𑀢𑁆𑀢𑀸𑀦𑀁 𑀲𑀪𑀸𑀯𑀲𑀼𑀜𑁆𑀜𑀢𑀲𑀩𑁆𑀪𑀸𑀯𑀸 𑀫𑀦𑁄𑀥𑀸𑀢𑀼𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀘𑁂? 𑀦, 𑀯𑀺𑀲𑁂𑀲𑀲𑀩𑁆𑀪𑀸𑀯𑀸. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀜𑁆𑀳𑀺 𑀘𑀓𑁆𑀔𑀸𑀤𑀺𑀦𑀺𑀲𑁆𑀲𑀺𑀢𑀢𑀸 𑀘𑀓𑁆𑀔𑀸𑀤𑀻𑀦𑀁 𑀲𑀯𑀺𑀲𑀬𑁂𑀲𑀼 𑀤𑀲𑁆𑀲𑀦𑀸𑀤𑀺𑀧𑁆𑀧𑀯𑀢𑁆𑀢𑀺𑀪𑀸𑀯𑀢𑀸 𑀘 𑀯𑀺𑀲𑁂𑀲𑁄. 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀧𑀦 𑀅𑀦𑀜𑁆𑀜𑀦𑀺𑀲𑁆𑀲𑀬𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀢𑀸𑀬 𑀅𑀜𑁆𑀜𑀦𑀺𑀲𑁆𑀲𑀬𑀯𑀺𑀜𑁆𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑁂𑀦 𑀫𑀦𑁄𑀤𑁆𑀯𑀸𑀭𑀦𑀺𑀕𑁆𑀕𑀫𑀦𑀫𑀼𑀔𑀪𑀸𑀯𑀸𑀪𑀸𑀯𑀢𑁄 𑀘 𑀲𑀸𑀢𑀺𑀲𑀬𑀯𑀺𑀚𑀸𑀦𑀦𑀓𑀺𑀘𑁆𑀘𑀢𑀸 𑀯𑀺𑀲𑁂𑀲𑁄. 𑀢𑀩𑁆𑀩𑀺𑀲𑁂𑀲𑀯𑀺𑀭𑀳𑀸 𑀫𑀦𑁄𑀫𑀢𑁆𑀢𑀸 𑀥𑀸𑀢𑀼 𑀫𑀦𑁄𑀥𑀸𑀢𑀽𑀢𑀺 𑀢𑀺𑀯𑀺𑀥𑀸 𑀫𑀦𑁄𑀥𑀸𑀢𑀼 𑀏𑀯 𑀯𑀼𑀘𑁆𑀘𑀢𑀺, 𑀦 𑀯𑀺𑀲𑁂𑀲𑀫𑀦𑁄. 𑀢𑀲𑁆𑀫𑀸 𑀏𑀢𑁆𑀣 𑀫𑀦𑁄 𑀏𑀯 𑀥𑀸𑀢𑀼 𑀫𑀦𑁄𑀥𑀸𑀢𑀽𑀢𑀺 𑀏𑀯-𑀲𑀤𑁆𑀤𑁄 𑀫𑀢𑁆𑀢𑀲𑀤𑁆𑀤𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀯𑀺𑀲𑁂𑀲𑀦𑀺𑀯𑀢𑁆𑀢𑀦𑀢𑁆𑀣𑁄 𑀳𑀺 𑀲𑁄 𑀯𑀺𑀜𑁆𑀜𑀸𑀡𑀲𑁆𑀲𑀸𑀢𑀺. 𑀫𑀦𑁄𑀤𑁆𑀯𑀸𑀭𑀦𑀺𑀕𑁆𑀕𑀫𑀦𑀧𑀯𑁂𑀲𑀫𑀼𑀔𑀪𑀸𑀯𑀢𑁄 𑀧𑀦 𑀫𑀦𑁄𑀥𑀸𑀢𑀼𑀬𑀸 𑀯𑀺𑀚𑀸𑀦𑀦𑀯𑀺𑀲𑁂𑀲𑀯𑀺𑀭𑀳𑁄 𑀤𑀝𑁆𑀞𑀩𑁆𑀩𑁄, 𑀢𑀢𑁄 𑀏𑀯 𑀫𑀦𑁄𑀯𑀺𑀜𑁆𑀜𑀸𑀡𑀦𑁆𑀢𑀺𑀧𑀺 𑀦 𑀯𑀼𑀘𑁆𑀘𑀢𑀺. 𑀦 𑀳𑀺 𑀢𑀁 𑀯𑀺𑀜𑁆𑀜𑀸𑀡𑀁 𑀫𑀦𑀢𑁄 𑀧𑀯𑀢𑁆𑀢𑀁 𑀫𑀦𑀲𑁄 𑀧𑀘𑁆𑀘𑀬𑁄, 𑀦𑀸𑀧𑀺 𑀫𑀦𑀲𑁄 𑀧𑀘𑁆𑀘𑀬𑀪𑀽𑀢𑀁 𑀫𑀦𑀢𑁄 𑀧𑀯𑀢𑁆𑀢𑀁, 𑀤𑀲𑁆𑀲𑀦𑀸𑀤𑀻𑀦𑀁 𑀧𑀦 𑀧𑀘𑁆𑀘𑀬𑁄, 𑀢𑁂𑀳𑀺 𑀘 𑀧𑀯𑀢𑁆𑀢𑀁 𑀢𑁂𑀲𑀁 𑀧𑀼𑀭𑁂𑀘𑀭𑀁 𑀅𑀦𑀼𑀘𑀭𑀜𑁆𑀘𑀸𑀢𑀺. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄𑀢𑀺 𑀅𑀯𑀘𑀦𑀁 𑀫𑀳𑀸𑀯𑀺𑀧𑀸𑀓𑀸𑀦𑀁 𑀯𑀺𑀬 𑀚𑀦𑀓𑀲𑀤𑀺𑀲𑀢𑁆𑀢𑀸𑀪𑀸𑀯𑀢𑁄. 𑀢𑀢𑁆𑀣 𑀳𑀺 𑀢𑀺𑀳𑁂𑀢𑀼𑀓𑀢𑁄 𑀤𑀼𑀳𑁂𑀢𑀼𑀓𑀫𑁆𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑀁 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀢𑀸𑀤𑀻𑀳𑀺 𑀲𑀤𑀺𑀲𑀁 𑀲𑀳𑁂𑀢𑀼𑀓𑀢𑀸𑀬𑀸𑀢𑀺. 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑁄𑀢𑁂𑀢𑀺 𑀏𑀢𑁆𑀣 𑀬𑀣𑀸 𑀧𑀕𑀼𑀡𑀁 𑀕𑀦𑁆𑀣𑀁 𑀲𑀚𑁆𑀛𑀸𑀬𑀦𑁆𑀢𑁄 𑀲𑀚𑁆𑀛𑀸𑀬𑀲𑁄𑀢𑁂 𑀧𑀢𑀺𑀢𑀁 𑀓𑀜𑁆𑀘𑀺 𑀓𑀜𑁆𑀘𑀺 𑀯𑀸𑀘𑀦𑀸𑀫𑀕𑁆𑀕𑀁 𑀦 𑀲𑀮𑁆𑀮𑀓𑁆𑀔𑁂𑀢𑀺, 𑀏𑀯𑀁 𑀢𑀣𑀸𑀕𑀢𑀲𑁆𑀲 𑀅𑀲𑀮𑁆𑀮𑀓𑁆𑀔𑀡𑀸 𑀦𑀸𑀫 𑀦𑀢𑁆𑀣𑀺, 𑀦 𑀘 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑁄𑀢𑁂 𑀛𑀸𑀦𑀗𑁆𑀕𑀸𑀪𑀸𑀯𑁄 𑀇𑀥 𑀅𑀯𑀘𑀦𑀲𑁆𑀲 𑀓𑀸𑀭𑀡𑀁. 𑀬𑀤𑀺 𑀢𑀤𑀦𑀦𑁆𑀢𑀭𑀁 𑀦𑀺𑀤𑁆𑀤𑁂𑀲𑁄 𑀢𑀁𑀲𑁄𑀢𑀧𑀢𑀺𑀢𑀢𑀸, 𑀇𑀢𑁄 𑀧𑀭𑁂𑀲𑀁 𑀤𑁆𑀯𑀺𑀦𑁆𑀦𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀢𑀁𑀲𑁄𑀢𑀧𑀢𑀺𑀢𑀢𑀸 𑀦 𑀲𑀺𑀬𑀸. 𑀢𑀲𑁆𑀫𑀸 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀁 𑀯𑀺𑀬 𑀅𑀳𑁂𑀢𑀼𑀓𑀢𑀸𑀬 𑀫𑀕𑁆𑀕𑀧𑀘𑁆𑀘𑀬𑀯𑀺𑀭𑀳𑀸 𑀘 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀲𑀼 𑀛𑀸𑀦𑀗𑁆𑀕𑀥𑀫𑁆𑀫𑀸𑀦𑀁 𑀤𑀼𑀩𑁆𑀩𑀮𑀢𑁆𑀢𑀸 𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀲𑀼 𑀯𑀺𑀬 𑀅𑀕𑀡𑀦𑀼𑀧𑀕𑀪𑀸𑀯𑀸 𑀘 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑁄𑀢𑀧𑀢𑀺𑀢𑀢𑀸. 𑀢𑀢𑁄 𑀏𑀯 𑀳𑀺 𑀅𑀳𑁂𑀢𑀼𑀓𑀓𑀺𑀭𑀺𑀬𑀢𑁆𑀢𑀬𑁂𑀧𑀺 𑀛𑀸𑀦𑀗𑁆𑀕𑀸𑀦𑀺 𑀩𑀮𑀸𑀦𑀺 𑀘 𑀲𑀗𑁆𑀕𑀳𑀯𑀸𑀭𑁂 𑀦 𑀉𑀤𑁆𑀥𑀝𑀸𑀦𑀺, 𑀛𑀸𑀦𑀧𑀘𑁆𑀘𑀬𑀓𑀺𑀘𑁆𑀘𑀫𑀢𑁆𑀢𑀢𑁄 𑀧𑀦 𑀧𑀝𑁆𑀞𑀸𑀦𑁂 𑀤𑀼𑀩𑁆𑀩𑀮𑀸𑀦𑀁 𑀏𑀢𑁆𑀣 𑀯𑀺𑀢𑀓𑁆𑀓𑀸𑀤𑀻𑀦𑀁 𑀛𑀸𑀦𑀧𑀘𑁆𑀘𑀬𑀢𑀸 𑀯𑀼𑀢𑁆𑀢𑀸.

𑁪𑁬𑁯. 𑀲𑀫𑀸𑀦𑀯𑀢𑁆𑀣𑀼𑀓𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀲𑀦𑁆𑀢𑀻𑀭𑀡𑀁 𑀫𑀦𑁄𑀥𑀸𑀢𑀼𑀢𑁄 𑀩𑀮𑀯𑀢𑀭𑀁 𑀳𑁄𑀢𑀻𑀢𑀺 𑀢𑀁 𑀬𑀣𑀸𑀭𑀫𑁆𑀫𑀡𑀁 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀦𑁆𑀢𑀁 𑀇𑀝𑁆𑀞𑁂 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀳𑁄𑀢𑀺, 𑀇𑀝𑁆𑀞𑀫𑀚𑁆𑀛𑀢𑁆𑀢𑁂 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀲𑀸𑀢𑀺𑀲𑀬𑀸𑀦𑀼𑀪𑀯𑀢𑁆𑀢𑀸, 𑀢𑀲𑁆𑀫𑀸 ‘‘𑀅𑀬𑀜𑁆𑀳𑀺 𑀇𑀝𑁆𑀞𑀸𑀭𑀫𑁆𑀫𑀡𑀲𑁆𑀫𑀺𑀁 𑀬𑁂𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑁄𑀝𑁆𑀞𑀩𑁆𑀩𑀦𑀁 𑀧𑀦 𑀲𑀢𑀺𑀧𑀺 𑀩𑀮𑀯𑀪𑀸𑀯𑁂 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀯𑀺𑀲𑀤𑀺𑀲𑀁 𑀫𑀦𑀁 𑀓𑀭𑁄𑀦𑁆𑀢𑀁 𑀫𑀦𑀲𑀺𑀓𑀸𑀭𑀓𑀺𑀘𑁆𑀘𑀦𑁆𑀢𑀭𑀬𑁄𑀕𑀢𑁄 𑀯𑀺𑀧𑀸𑀓𑁄 𑀯𑀺𑀬 𑀅𑀦𑀼𑀪𑀯𑀦𑀫𑁂𑀯 𑀦 𑀳𑁄𑀢𑀻𑀢𑀺 𑀲𑀩𑁆𑀩𑀢𑁆𑀣 𑀉𑀧𑁂𑀓𑁆𑀔𑀸𑀲𑀳𑀕𑀢𑀫𑁂𑀯 𑀳𑁄𑀢𑀺, 𑀢𑀣𑀸 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀜𑁆𑀘 𑀓𑀺𑀘𑁆𑀘𑀯𑀲𑁂𑀦 𑀅𑀧𑀼𑀩𑁆𑀩𑀢𑁆𑀢𑀸.

𑀅𑀳𑁂𑀢𑀼𑀓𑀓𑀼𑀲𑀮𑀯𑀺𑀧𑀸𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀝𑁆𑀞𑀫𑀳𑀸𑀯𑀺𑀧𑀸𑀓𑀘𑀺𑀢𑁆𑀢𑀯𑀡𑁆𑀡𑀦𑀸

𑁪𑁯𑁮. 𑀅𑀮𑁄𑀪𑁄 𑀅𑀩𑁆𑀬𑀸𑀓𑀢𑀫𑀽𑀮𑀦𑁆𑀢𑀺𑀆𑀤𑀻𑀲𑀼 𑀓𑀼𑀲𑀮𑀧𑀓𑁆𑀔𑁂 𑀢𑀸𑀯 𑀅𑀮𑁄𑀪𑀸𑀤𑁄𑀲𑀸𑀦𑀁 𑀦𑀺𑀤𑁆𑀤𑁂𑀲𑁂𑀲𑀼 ‘‘𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀮𑁄𑀪𑁄 𑀅𑀮𑀼𑀩𑁆𑀪𑀦𑀸…𑀧𑁂… 𑀅𑀮𑁄𑀪𑁄 𑀓𑀼𑀲𑀮𑀫𑀽𑀮’’𑀦𑁆𑀢𑀺 (𑀥. 𑀲. 𑁩𑁨), ‘‘𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀤𑁄𑀲𑁄 𑀅𑀤𑀼𑀲𑁆𑀲𑀦𑀸…𑀧𑁂… 𑀅𑀤𑁄𑀲𑁄 𑀓𑀼𑀲𑀮𑀫𑀽𑀮’’𑀦𑁆𑀢𑀺 (𑀥. 𑀲. 𑁩𑁩) 𑀘 𑀯𑀼𑀢𑁆𑀢𑀢𑁆𑀢𑀸 𑀇𑀥𑀸𑀧𑀺 𑀢𑀁𑀦𑀺𑀤𑁆𑀤𑁂𑀲𑁂𑀲𑀼 ‘‘𑀅𑀮𑁄𑀪𑁄 𑀅𑀩𑁆𑀬𑀸𑀓𑀢𑀫𑀽𑀮’’𑀦𑁆𑀢𑀺 ‘‘𑀅𑀤𑁄𑀲𑁄 𑀅𑀩𑁆𑀬𑀸𑀓𑀢𑀫𑀽𑀮’’𑀦𑁆𑀢𑀺 𑀯𑀘𑀦𑀁 𑀬𑀼𑀚𑁆𑀚𑁂𑀬𑁆𑀬. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀤𑀺𑀦𑀺𑀤𑁆𑀤𑁂𑀲𑁂𑀲𑀼 𑀧𑀦 ‘‘𑀧𑀜𑁆𑀜𑀸𑀭𑀢𑀦𑀁 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺 (𑀥. 𑀲. 𑁩𑁪, 𑁩𑁭) 𑀏𑀯𑀁 𑀢𑀢𑁆𑀣𑀧𑀺 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 ‘‘𑀅𑀫𑁄𑀳𑁄 𑀓𑀼𑀲𑀮𑀫𑀽𑀮’’𑀦𑁆𑀢𑀺. 𑀢𑀲𑁆𑀫𑀸 𑀇𑀥𑀸𑀧𑀺 ‘‘𑀅𑀫𑁄𑀳𑁄 𑀅𑀩𑁆𑀬𑀸𑀓𑀢𑀫𑀽𑀮’’𑀦𑁆𑀢𑀺 𑀧𑀸𑀞𑁂𑀦 𑀦 𑀪𑀯𑀺𑀢𑀩𑁆𑀩𑀁 𑀲𑀺𑀬𑀸. 𑀅𑀮𑁄𑀪𑀸𑀤𑁄𑀲𑀸𑀦𑀁 𑀯𑀺𑀬 𑀅𑀫𑁄𑀳𑀲𑁆𑀲𑀧𑀺 𑀅𑀩𑁆𑀬𑀸𑀓𑀢𑀫𑀽𑀮𑀤𑀲𑁆𑀲𑀦𑀢𑁆𑀣𑀁 𑀧𑀦𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑀢𑁄𑀢𑀺 𑀓𑀸𑀬𑀯𑀘𑀻𑀓𑀫𑁆𑀫𑀤𑁆𑀯𑀸𑀭𑀦𑀺𑀯𑀸𑀭𑀡𑀁 𑀓𑀭𑁄𑀢𑀺. 𑀅𑀯𑀺𑀧𑀸𑀓𑀥𑀫𑁆𑀫𑀢𑁄𑀢𑀺 𑀫𑀦𑁄𑀓𑀫𑁆𑀫𑀤𑁆𑀯𑀸𑀭𑀦𑀺𑀯𑀸𑀭𑀡𑀜𑁆𑀘. 𑀯𑀺𑀧𑀸𑀓𑀥𑀫𑁆𑀫𑀸𑀦𑀜𑁆𑀳𑀺 𑀓𑀫𑁆𑀫𑀤𑁆𑀯𑀸𑀭𑀁 𑀯𑀼𑀢𑁆𑀢𑀦𑁆𑀢𑀺. 𑀢𑀣𑀸 𑀅𑀧𑁆𑀧𑀯𑀢𑁆𑀢𑀺𑀢𑁄𑀢𑀺 𑀤𑀸𑀦𑀸𑀤𑀺𑀧𑀼𑀜𑁆𑀜𑀓𑀺𑀭𑀺𑀬𑀪𑀸𑀯𑁂𑀦 𑀅𑀧𑁆𑀧𑀯𑀢𑁆𑀢𑀺𑀢𑁄. 𑀏𑀢𑁂𑀦 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀪𑁂𑀤𑀫𑁂𑀯 𑀦𑀺𑀯𑀸𑀭𑁂𑀢𑀺.

𑀩𑀮𑀯𑀧𑀘𑁆𑀘𑀬𑁂𑀳𑀻𑀢𑀺 𑀧𑀬𑁄𑀕𑁂𑀦 𑀯𑀺𑀦𑀸 𑀦𑀺𑀧𑁆𑀨𑀦𑁆𑀦𑁂𑀳𑀺 𑀆𑀭𑀫𑁆𑀫𑀡𑀸𑀤𑀺𑀧𑀘𑁆𑀘𑀬𑁂𑀳𑀺. 𑀅𑀲𑀗𑁆𑀔𑀸𑀭𑀺𑀓𑀸𑀤𑀻𑀲𑀼 𑀳𑀺 𑀬𑁂𑀦 𑀓𑁂𑀦𑀘𑀺 𑀘𑀺𑀢𑁆𑀢𑁂𑀦 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀅𑀲𑀗𑁆𑀔𑀸𑀭𑁂𑀦 𑀅𑀧𑁆𑀧𑀬𑁄𑀕𑁂𑀦 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑁂 𑀧𑀝𑀺𑀲𑀦𑁆𑀥𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀲𑀗𑁆𑀔𑀸𑀭𑀺𑀓𑀸 𑀳𑁄𑀢𑀺, 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀓𑀫𑁆𑀫𑀸𑀤𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑁂 𑀲𑀲𑀗𑁆𑀔𑀸𑀭𑀺𑀓𑀸. 𑀪𑀯𑀗𑁆𑀕𑀘𑀼𑀢𑀺𑀬𑁄 𑀧𑀦 𑀧𑀝𑀺𑀲𑀦𑁆𑀥𑀺𑀲𑀤𑀺𑀲𑀸𑀯. 𑀢𑀤𑀸𑀭𑀫𑁆𑀫𑀡𑀜𑁆𑀘 𑀓𑀼𑀲𑀮𑀸𑀓𑀼𑀲𑀮𑀸𑀦𑀺 𑀯𑀺𑀬 𑀅𑀲𑀗𑁆𑀔𑀸𑀭𑀺𑀓𑀁 𑀲𑀲𑀗𑁆𑀔𑀸𑀭𑀺𑀓𑀜𑁆𑀘 𑀤𑀝𑁆𑀞𑀩𑁆𑀩𑀦𑁆𑀢𑀺. 𑀏𑀢𑁂𑀲𑀼 𑀩𑀮𑀯𑀁 𑀤𑀼𑀩𑁆𑀩𑀮𑀜𑁆𑀘 𑀯𑀺𑀘𑀸𑀭𑁂𑀢𑀼𑀁 ‘‘𑀢𑀢𑁆𑀣 𑀲𑀩𑁆𑀩𑁂𑀧𑀺 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀸’’𑀢𑀺𑀆𑀤𑀺𑀫𑀸𑀳. 𑀓𑀸𑀮𑀯𑀲𑁂𑀦 𑀧𑀦 𑀧𑀭𑀺𑀡𑀫𑀢𑀻𑀢𑀺 𑀅𑀧𑁆𑀧𑀸𑀬𑀼𑀓𑀲𑀁𑀯𑀢𑁆𑀢𑀦𑀺𑀓𑀓𑀫𑁆𑀫𑀩𑀳𑀼𑀮𑁂 𑀓𑀸𑀮𑁂 𑀢𑀁𑀓𑀫𑁆𑀫𑀲𑀳𑀺𑀢𑀲𑀦𑁆𑀢𑀸𑀦𑀚𑀦𑀺𑀢𑀲𑀼𑀓𑁆𑀓𑀲𑁄𑀡𑀺𑀢𑀧𑀘𑁆𑀘𑀬𑀸𑀦𑀁 𑀢𑀁𑀫𑀽𑀮𑀓𑀸𑀦𑀁 𑀘𑀦𑁆𑀤𑀲𑀽𑀭𑀺𑀬𑀯𑀺𑀲𑀫𑀧𑀭𑀺𑀯𑀢𑁆𑀢𑀸𑀤𑀺𑀚𑀦𑀺𑀢𑀉𑀢𑀸𑀳𑀸𑀭𑀸𑀤𑀺𑀯𑀺𑀲𑀫𑀧𑀘𑁆𑀘𑀬𑀸𑀦𑀜𑁆𑀘 𑀯𑀲𑁂𑀦 𑀧𑀭𑀺𑀡𑀫𑀢𑀺.

𑀯𑀺𑀧𑀸𑀓𑀼𑀤𑁆𑀥𑀸𑀭𑀓𑀣𑀸𑀯𑀡𑁆𑀡𑀦𑀸

𑀬𑀢𑁄 𑀬𑀢𑁆𑀢𑀓𑁄 𑀘 𑀯𑀺𑀧𑀸𑀓𑁄 𑀳𑁄𑀢𑀺, 𑀬𑀲𑁆𑀫𑀺𑀜𑁆𑀘 𑀞𑀸𑀦𑁂 𑀯𑀺𑀧𑀘𑁆𑀘𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀯𑀺𑀧𑀸𑀓𑀼𑀤𑁆𑀥𑀸𑀭𑀓𑀣𑀸 𑀆𑀭𑀤𑁆𑀥𑀸. 𑀏𑀢𑁆𑀣𑁂𑀯𑀸𑀢𑀺 𑀏𑀓𑀸𑀬 𑀘𑁂𑀢𑀦𑀸𑀬 𑀓𑀫𑁆𑀫𑁂 𑀆𑀬𑀽𑀳𑀺𑀢𑁂𑀬𑁂𑀯. 𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀤𑁆𑀯𑀸𑀤𑀲𑀓𑀫𑀕𑁆𑀕𑁄𑀧𑀺 𑀳𑁄𑀢𑀺, 𑀤𑁆𑀯𑀸𑀤𑀲𑀓𑀧𑁆𑀧𑀓𑀸𑀭𑁄𑀧𑀻𑀢𑀺 𑀅𑀢𑁆𑀣𑁄. 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀅𑀳𑁂𑀢𑀼𑀓𑀝𑁆𑀞𑀓𑀫𑁆𑀧𑀺. 𑀅𑀲𑀗𑁆𑀔𑀸𑀭𑀺𑀓𑀲𑀲𑀗𑁆𑀔𑀸𑀭𑀺𑀓𑀸𑀦𑀁 𑀲𑀲𑀗𑁆𑀔𑀸𑀭𑀺𑀓𑀅𑀲𑀗𑁆𑀔𑀸𑀭𑀺𑀓𑀯𑀺𑀧𑀸𑀓𑀲𑀗𑁆𑀓𑀭𑀁 𑀅𑀦𑀺𑀘𑁆𑀙𑀦𑁆𑀢𑁄 𑀤𑀼𑀢𑀺𑀬𑀢𑁆𑀣𑁂𑀭𑁄 ‘‘𑀤𑁆𑀯𑀸𑀤𑀲𑀸’’𑀢𑀺𑀆𑀤𑀺𑀫𑀸𑀳. 𑀧𑀼𑀭𑀺𑀫𑀲𑁆𑀲 𑀳𑀺 𑀧𑀘𑁆𑀘𑀬𑀢𑁄𑀲𑀲𑀗𑁆𑀔𑀸𑀭𑀺𑀓𑀅𑀲𑀗𑁆𑀔𑀸𑀭𑀺𑀓𑀪𑀸𑀯𑁄, 𑀇𑀢𑀭𑁂𑀲𑀁 𑀓𑀫𑁆𑀫𑀢𑁄. 𑀢𑀢𑀺𑀬𑁄 𑀢𑀺𑀳𑁂𑀢𑀼𑀓𑀢𑁄 𑀤𑀼𑀳𑁂𑀢𑀼𑀓𑀫𑁆𑀧𑀺 𑀅𑀦𑀺𑀘𑁆𑀙𑀦𑁆𑀢𑁄 ‘‘𑀤𑀲𑀸’’𑀢𑀺𑀆𑀤𑀺𑀫𑀸𑀳.

𑀇𑀫𑀲𑁆𑀫𑀺𑀁 𑀯𑀺𑀧𑀸𑀓𑀼𑀤𑁆𑀥𑀸𑀭𑀝𑁆𑀞𑀸𑀦𑁂 𑀓𑀫𑁆𑀫𑀧𑀝𑀺𑀲𑀦𑁆𑀥𑀺𑀯𑀯𑀢𑁆𑀣𑀸𑀦𑀢𑁆𑀣𑀁 𑀲𑀸𑀓𑁂𑀢𑀧𑀜𑁆𑀳𑀁 𑀕𑀡𑁆𑀳𑀺𑀁𑀲𑀼. 𑀓𑀫𑁆𑀫𑀯𑀲𑁂𑀦 𑀯𑀺𑀧𑀸𑀓𑀲𑁆𑀲 𑀢𑀁𑀢𑀁𑀕𑀼𑀡𑀤𑁄𑀲𑀼𑀲𑁆𑀲𑀤𑀦𑀺𑀫𑀺𑀢𑁆𑀢𑀢𑀁 𑀤𑀲𑁆𑀲𑁂𑀢𑀼𑀁 𑀉𑀲𑁆𑀲𑀤𑀓𑀺𑀢𑁆𑀢𑀦𑀁 𑀕𑀡𑁆𑀳𑀺𑀁𑀲𑀼. 𑀳𑁂𑀢𑀼𑀓𑀺𑀢𑁆𑀢𑀦𑀁 𑀇𑀥 𑀧𑀞𑀫𑀢𑁆𑀣𑁂𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀢𑁆𑀣𑁂𑀭𑀯𑀸𑀤𑀸𑀤𑀻𑀲𑀼 𑀯𑀺𑀲𑁂𑀲𑀁 𑀢𑀢𑁆𑀣 𑀢𑀢𑁆𑀣𑁂𑀯 𑀯𑀓𑁆𑀔𑀸𑀫𑀺. 𑀜𑀸𑀡𑀲𑁆𑀲 𑀚𑀘𑁆𑀘𑀦𑁆𑀥𑀸𑀤𑀺𑀯𑀺𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀢𑀺𑀳𑁂𑀢𑀼𑀓𑀁 𑀅𑀢𑀺𑀤𑀼𑀩𑁆𑀩𑀮𑀫𑁆𑀧𑀺 𑀲𑀫𑀸𑀦𑀁 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀦𑁆𑀢𑀁 𑀤𑀼𑀳𑁂𑀢𑀼𑀓𑀁 𑀆𑀓𑀟𑁆𑀠𑁂𑀬𑁆𑀬𑀸𑀢𑀺 ‘‘𑀅𑀳𑁂𑀢𑀼𑀓𑀸 𑀦 𑀳𑁄𑀢𑀻’’𑀢𑀺 𑀆𑀳. 𑀬𑀁 𑀧𑀦 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀲𑀼𑀕𑀢𑀺𑀬𑀁 𑀚𑀘𑁆𑀘𑀦𑁆𑀥𑀩𑀥𑀺𑀭𑀸𑀤𑀺𑀯𑀺𑀧𑀢𑁆𑀢𑀺𑀬𑀸 𑀅𑀳𑁂𑀢𑀼𑀓𑀉𑀧𑀧𑀢𑁆𑀢𑀺𑀁 𑀯𑀚𑁆𑀚𑁂𑀢𑁆𑀯𑀸 𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀲𑀳𑁂𑀢𑀼𑀓𑁄𑀧𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂 𑀓𑀢𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸 𑀉𑀧𑀧𑀢𑁆𑀢𑀺 𑀳𑁄𑀢𑀺’’𑀘𑁆𑀘𑁂𑀯 (𑀧𑀝𑀺. 𑀫. 𑁧.𑁨𑁩𑁨) 𑀯𑀼𑀢𑁆𑀢𑀁. 𑀢𑁂𑀦 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀓𑀫𑁆𑀫𑀼𑀦𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀧𑀝𑀺𑀲𑀦𑁆𑀥𑀺 𑀦 𑀳𑁄𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀅𑀜𑁆𑀜𑀣𑀸 ‘‘𑀲𑀢𑁆𑀢𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸 𑀉𑀧𑀧𑀢𑁆𑀢𑀺 𑀳𑁄𑀢𑀻’’𑀢𑀺 𑀇𑀤𑀫𑁆𑀧𑀺 𑀯𑀼𑀘𑁆𑀘𑁂𑀬𑁆𑀬. 𑀢𑀣𑀸 𑀳𑀺 ‘‘𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂 𑀓𑀢𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸 𑀉𑀧𑀧𑀢𑁆𑀢𑀺 𑀳𑁄𑀢𑀺? 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀚𑀯𑀦𑀓𑁆𑀔𑀡𑁂 𑀢𑀬𑁄 𑀳𑁂𑀢𑀽 𑀓𑀼𑀲𑀮𑀸 𑀢𑀲𑁆𑀫𑀺𑀁 𑀔𑀡𑁂 𑀚𑀸𑀢𑀘𑁂𑀢𑀦𑀸𑀬 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑀓𑀼𑀲𑀮𑀫𑀽𑀮𑀧𑀘𑁆𑀘𑀬𑀸𑀧𑀺 𑀲𑀗𑁆𑀔𑀸𑀭𑀸. 𑀦𑀺𑀓𑀦𑁆𑀢𑀺𑀓𑁆𑀔𑀡𑁂 𑀤𑁆𑀯𑁂 𑀳𑁂𑀢𑀽 𑀅𑀓𑀼𑀲𑀮𑀸 𑀢𑀲𑁆𑀫𑀺𑀁 𑀔𑀡𑁂 𑀚𑀸𑀢𑀘𑁂𑀢𑀦𑀸𑀬 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑀅𑀓𑀼𑀲𑀮𑀫𑀽𑀮𑀧𑀘𑁆𑀘𑀬𑀸𑀧𑀺 𑀲𑀗𑁆𑀔𑀸𑀭𑀸. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀢𑀬𑁄 𑀳𑁂𑀢𑀽 𑀅𑀩𑁆𑀬𑀸𑀓𑀢𑀸 𑀢𑀲𑁆𑀫𑀺𑀁 𑀔𑀡𑁂 𑀚𑀸𑀢𑀘𑁂𑀢𑀦𑀸𑀬 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑀦𑀸𑀫𑀭𑀽𑀧𑀧𑀘𑁆𑀘𑀬𑀸𑀧𑀺 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸𑀧𑀺 𑀦𑀸𑀫𑀭𑀽𑀧’’𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀺𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁄𑀧𑀧𑀢𑁆𑀢𑀺𑀬𑀁.

𑀏𑀯𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀢𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀼𑀧𑀧𑀢𑁆𑀢𑀺𑀬𑀸 𑀘 𑀯𑀺𑀚𑁆𑀚𑀫𑀸𑀦𑀸𑀬 ‘‘𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂 𑀓𑀢𑀫𑁂𑀲𑀁 𑀲𑀢𑁆𑀢𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸 𑀉𑀧𑀧𑀢𑁆𑀢𑀺 𑀳𑁄𑀢𑀺? 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀚𑀯𑀦𑀓𑁆𑀔𑀡𑁂 𑀤𑁆𑀯𑁂 𑀳𑁂𑀢𑀽 𑀓𑀼𑀲𑀮𑀸’’𑀢𑀺 𑀯𑀢𑁆𑀯𑀸 𑀅𑀜𑁆𑀜𑀢𑁆𑀣 𑀘 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀓𑁆𑀓𑀸 𑀯𑀺𑀲𑁆𑀲𑀚𑁆𑀚𑀦𑀁 𑀓𑀸𑀢𑀼𑀦𑁆𑀢𑀺. 𑀬𑀣𑀸 𑀧𑀦 ‘‘𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂 𑀲𑀢𑁆𑀢𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸’’𑀢𑀺 𑀅𑀯𑀘𑀦𑀢𑁄 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀢𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀧𑀝𑀺𑀲𑀦𑁆𑀥𑀺 𑀦 𑀳𑁄𑀢𑀺, 𑀏𑀯𑀁 ‘‘𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑁂 𑀙𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸 𑀉𑀧𑀧𑀢𑁆𑀢𑀺 𑀳𑁄𑀢𑀺’’𑀘𑁆𑀘𑁂𑀯 (𑀧𑀝𑀺. 𑀫. 𑁧.𑁨𑁩𑁩) 𑀯𑀢𑁆𑀯𑀸 ‘‘𑀲𑀢𑁆𑀢𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸’’𑀢𑀺 𑀅𑀯𑀘𑀦𑀢𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀢𑁄 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀧𑀺 𑀧𑀝𑀺𑀲𑀦𑁆𑀥𑀺 𑀦 𑀳𑁄𑀢𑀻𑀢𑀺 𑀆𑀧𑀦𑁆𑀦𑀁. 𑀏𑀢𑁆𑀣𑀸𑀧𑀺 𑀳𑀺 𑀦 𑀦 𑀲𑀓𑁆𑀓𑀸 𑀓𑀫𑁆𑀫𑀦𑀺𑀓𑀦𑁆𑀢𑀺𑀓𑁆𑀔𑀡𑁂𑀲𑀼 𑀢𑀬𑁄 𑀘 𑀤𑁆𑀯𑁂 𑀘 𑀳𑁂𑀢𑀽 𑀬𑁄𑀚𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀤𑁆𑀯𑁂 𑀬𑁄𑀚𑁂𑀢𑀼𑀦𑁆𑀢𑀺. 𑀇𑀫𑀲𑁆𑀲 𑀧𑀦 𑀣𑁂𑀭𑀲𑁆𑀲 𑀅𑀬𑀫𑀥𑀺𑀧𑁆𑀧𑀸𑀬𑁄 𑀲𑀺𑀬𑀸 ‘‘𑀓𑀫𑁆𑀫𑀲𑀭𑀺𑀓𑁆𑀔𑀓𑀯𑀺𑀧𑀸𑀓𑀤𑀲𑁆𑀲𑀦𑀯𑀲𑁂𑀦 𑀇𑀥 𑀧𑀸𑀞𑁄 𑀲𑀸𑀯𑀲𑁂𑀲𑁄 𑀓𑀣𑀺𑀢𑁄’’𑀢𑀺. ‘‘𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂 𑀅𑀝𑁆𑀞𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸’’𑀢𑀺 𑀏𑀢𑁆𑀣𑀸𑀧𑀺 𑀧𑀸𑀞𑀲𑁆𑀲 𑀲𑀸𑀯𑀲𑁂𑀲𑀢𑀸𑀧𑀢𑁆𑀢𑀻𑀢𑀺 𑀘𑁂? 𑀦, 𑀤𑀼𑀩𑁆𑀩𑀮𑀲𑁆𑀲 𑀤𑀼𑀳𑁂𑀢𑀼𑀓𑀓𑀫𑁆𑀫𑀲𑁆𑀲 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑀸𑀓𑀤𑀸𑀦𑁂 𑀅𑀲𑀫𑀢𑁆𑀣𑀢𑁆𑀢𑀸. 𑀢𑀺𑀳𑁂𑀢𑀼𑀓𑀲𑁆𑀲 𑀧𑀦 𑀅𑀳𑁂𑀢𑀼𑀓𑀯𑀺𑀧𑀘𑁆𑀘𑀦𑁂 𑀯𑀺𑀬 𑀤𑀼𑀳𑁂𑀢𑀼𑀓𑀯𑀺𑀧𑀘𑁆𑀘𑀦𑁂𑀧𑀺 𑀦𑀢𑁆𑀣𑀺 𑀲𑀫𑀢𑁆𑀣𑀢𑀸𑀯𑀺𑀖𑀸𑀢𑁄𑀢𑀺. 𑀆𑀭𑀫𑁆𑀫𑀡𑁂𑀦 𑀯𑁂𑀤𑀦𑀸 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀸𑀢𑀺 𑀲𑀦𑁆𑀢𑀻𑀭𑀡𑀢𑀤𑀸𑀭𑀫𑁆𑀫𑀡𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀺𑀪𑀸𑀕𑀕𑁆𑀕𑀳𑀡𑀲𑀫𑀢𑁆𑀣𑀢𑀸𑀪𑀸𑀯𑀢𑁄 𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀇𑀝𑁆𑀞𑀇𑀝𑁆𑀞𑀫𑀚𑁆𑀛𑀢𑁆𑀢𑁂𑀲𑀼 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑁂𑀯 𑀳𑁄𑀦𑁆𑀢𑀺, 𑀓𑀸𑀬𑀯𑀺𑀜𑁆𑀜𑀸𑀡𑀜𑁆𑀘 𑀲𑀼𑀔𑀲𑀳𑀕𑀢𑀫𑁂𑀯 𑀧𑀝𑀺𑀖𑀝𑁆𑀝𑀦𑀸𑀯𑀺𑀲𑁂𑀲𑁂𑀦𑀸𑀢𑀺.

𑀯𑀺𑀲𑁂𑀲𑀯𑀢𑀸 𑀓𑀸𑀮𑁂𑀦 𑀢𑀤𑀸𑀭𑀫𑁆𑀫𑀡𑀧𑀘𑁆𑀘𑀬𑀲𑀩𑁆𑀩𑀚𑀯𑀦𑀯𑀢𑀸 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀁𑀯𑀭𑀸𑀲𑀁𑀯𑀭𑁂…𑀧𑁂… 𑀉𑀧𑀕𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁 𑀅𑀜𑁆𑀜𑀓𑀸𑀮𑁂 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀤𑀺𑀧𑀭𑀺𑀧𑀼𑀡𑁆𑀡𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺𑀅𑀪𑀸𑀯𑀸. 𑀓𑀓𑁆𑀓𑀝𑀓…𑀧𑁂… 𑀪𑀯𑀗𑁆𑀕𑁄𑀢𑀭𑀡𑀦𑁆𑀢𑀺 𑀏𑀢𑁂𑀦 𑀇𑀤𑀁 𑀤𑀲𑁆𑀲𑁂𑀢𑀺 𑁋 𑀓𑁂𑀤𑀸𑀭𑁂 𑀧𑀽𑀭𑁂𑀢𑁆𑀯𑀸 𑀦𑀤𑀻𑀧𑀯𑁂𑀲𑀦𑀫𑀕𑁆𑀕𑀪𑀽𑀢𑀁 𑀫𑀸𑀢𑀺𑀓𑀁 𑀅𑀧𑁆𑀧𑀯𑀺𑀲𑀺𑀢𑁆𑀯𑀸 𑀓𑀓𑁆𑀓𑀝𑀓𑀫𑀕𑁆𑀕𑀸𑀤𑀺𑀦𑀸 𑀅𑀫𑀕𑁆𑀕𑁂𑀦 𑀦𑀤𑀻𑀑𑀢𑀭𑀡𑀁 𑀯𑀺𑀬 𑀘𑀺𑀢𑁆𑀢𑀲𑁆𑀲 𑀚𑀯𑀺𑀢𑁆𑀯𑀸 𑀪𑀯𑀗𑁆𑀕𑀧𑁆𑀧𑀯𑁂𑀲𑀦𑀫𑀕𑁆𑀕𑀪𑀽𑀢𑁂 𑀢𑀤𑀸𑀭𑀫𑁆𑀫𑀡𑁂 𑀅𑀦𑀼𑀧𑁆𑀧𑀦𑁆𑀦𑁂 𑀫𑀕𑁆𑀕𑁂𑀦 𑀯𑀺𑀦𑀸 𑀪𑀯𑀗𑁆𑀕𑁄𑀢𑀭𑀡𑀦𑁆𑀢𑀺.

𑀏𑀢𑁂𑀲𑀼 𑀢𑀻𑀲𑀼 𑀫𑁄𑀖𑀯𑀸𑀭𑁂𑀲𑀼 𑀤𑀼𑀢𑀺𑀬𑁄 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄. 𑀬𑀤𑀺 𑀳𑀺 𑀅𑀦𑀼𑀮𑁄𑀫𑁂 𑀯𑁂𑀤𑀦𑀸𑀢𑁆𑀢𑀺𑀓𑁂 𑀧𑀝𑀺𑀘𑁆𑀘𑀯𑀸𑀭𑀸𑀤𑀻𑀲𑀼 ‘‘𑀆𑀲𑁂𑀯𑀦𑀧𑀘𑁆𑀘𑀬𑀸 𑀦 𑀫𑀕𑁆𑀕𑁂 𑀤𑁆𑀯𑁂’’𑀢𑀺 ‘‘𑀦 𑀫𑀕𑁆𑀕𑀧𑀘𑁆𑀘𑀬𑀸 𑀆𑀲𑁂𑀯𑀦𑁂 𑀤𑁆𑀯𑁂’’𑀢𑀺 𑀘 𑀯𑀼𑀢𑁆𑀢𑀁 𑀲𑀺𑀬𑀸, 𑀲𑁄𑀧𑀺 𑀫𑁄𑀖𑀯𑀸𑀭𑁄 𑀮𑀩𑁆𑀪𑁂𑀬𑁆𑀬. 𑀬𑀤𑀺 𑀧𑀦 𑀯𑁄𑀝𑁆𑀞𑀩𑁆𑀩𑀦𑀫𑁆𑀧𑀺 𑀆𑀲𑁂𑀯𑀦𑀧𑀘𑁆𑀘𑀬𑁄 𑀲𑀺𑀬𑀸, 𑀓𑀼𑀲𑀮𑀸𑀓𑀼𑀲𑀮𑀸𑀦𑀫𑁆𑀧𑀺 𑀲𑀺𑀬𑀸. 𑀦 𑀳𑀺 𑀆𑀲𑁂𑀯𑀦𑀧𑀘𑁆𑀘𑀬𑀁 𑀮𑀤𑁆𑀥𑀼𑀁 𑀬𑀼𑀢𑁆𑀢𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑀻 𑀥𑀫𑁆𑀫𑁄 𑀆𑀲𑁂𑀯𑀦𑀧𑀘𑁆𑀘𑀬𑁄𑀢𑀺 𑀅𑀯𑀼𑀢𑁆𑀢𑁄 𑀅𑀢𑁆𑀣𑀺. 𑀯𑁄𑀝𑁆𑀞𑀩𑁆𑀩𑀦𑀲𑁆𑀲 𑀧𑀦 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑁄 𑀅𑀯𑀼𑀢𑁆𑀢𑁄. ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀸𑀲𑁂𑀯𑀦𑀧𑀘𑁆𑀘𑀬𑀸. 𑀅𑀓𑀼𑀲𑀮𑀁 𑀥𑀫𑁆𑀫𑀁…𑀧𑁂… 𑀦𑀸𑀲𑁂𑀯𑀦𑀧𑀘𑁆𑀘𑀬𑀸’’𑀢𑀺 (𑀧𑀝𑁆𑀞𑀸. 𑁧.𑁧.𑁯𑁩) 𑀯𑀘𑀦𑀢𑁄 𑀧𑀝𑀺𑀓𑁆𑀔𑀺𑀢𑁆𑀢𑁄𑀯. 𑀅𑀣𑀸𑀧𑀺 𑀲𑀺𑀬𑀸 ‘‘𑀅𑀲𑀫𑀸𑀦𑀯𑁂𑀤𑀦𑀸𑀦𑀁 𑀯𑀲𑁂𑀦 𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺, 𑀏𑀯𑀫𑀧𑀺 𑀬𑀣𑀸 ‘‘𑀆𑀯𑀚𑁆𑀚𑀦𑀸 𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀅𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁧𑁭) 𑀯𑀼𑀢𑁆𑀢𑀁, 𑀏𑀯𑀁 ‘‘𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺’’𑀧𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀚𑀸𑀢𑀺𑀪𑁂𑀤𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀪𑀽𑀫𑀺𑀪𑀺𑀦𑁆𑀦𑀲𑁆𑀲 𑀓𑀸𑀫𑀸𑀯𑀘𑀭𑀲𑁆𑀲 𑀭𑀽𑀧𑀸𑀯𑀘𑀭𑀸𑀤𑀻𑀦𑀁 𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑁄 𑀯𑀺𑀬 𑀚𑀸𑀢𑀺𑀪𑀺𑀦𑁆𑀦𑀲𑁆𑀲𑀧𑀺 𑀪𑀯𑁂𑀬𑁆𑀬𑀸𑀢𑀺 𑀯𑀢𑁆𑀢𑀩𑁆𑀩𑁄 𑀏𑀯 𑀲𑀺𑀬𑀸. 𑀅𑀪𑀺𑀦𑁆𑀦𑀚𑀸𑀢𑀺𑀓𑀲𑁆𑀲 𑀘 𑀯𑀲𑁂𑀦 𑀬𑀣𑀸 ‘‘𑀆𑀯𑀚𑁆𑀚𑀦𑀸 𑀲𑀳𑁂𑀢𑀼𑀓𑀸𑀦𑀁 𑀔𑀦𑁆𑀥𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 ‘‘𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀧𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀢𑀼 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀯𑁂𑀤𑀦𑀸𑀢𑁆𑀢𑀺𑀓𑁂𑀧𑀺 𑀲𑀗𑁆𑀔𑀺𑀢𑁆𑀢𑀸𑀬 𑀕𑀡𑀦𑀸𑀬 ‘‘𑀆𑀲𑁂𑀯𑀦𑀧𑀘𑁆𑀘𑀬𑀸 𑀦 𑀫𑀕𑁆𑀕𑁂 𑀏𑀓𑀁, 𑀦 𑀫𑀕𑁆𑀕𑀧𑀘𑁆𑀘𑀬𑀸 𑀆𑀲𑁂𑀯𑀦𑁂 𑀏𑀓’’𑀦𑁆𑀢𑀺 𑀏𑀯𑀁 𑀕𑀡𑀦𑀸𑀬 𑀦𑀺𑀤𑁆𑀥𑀸𑀭𑀺𑀬𑀫𑀸𑀦𑀸𑀬 𑀯𑁄𑀝𑁆𑀞𑀩𑁆𑀩𑀦𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑀢𑁆𑀢𑀲𑁆𑀲 𑀅𑀪𑀸𑀯𑀸 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀤𑀼𑀢𑀺𑀬𑁄 𑀫𑁄𑀖𑀯𑀸𑀭𑁄 𑀯𑀻𑀫𑀁𑀲𑀺𑀢𑀩𑁆𑀩𑁄.

𑀯𑁄𑀝𑁆𑀞𑀩𑁆𑀩𑀦𑀁 𑀧𑀦 𑀯𑀻𑀣𑀺𑀯𑀺𑀧𑀸𑀓𑀲𑀦𑁆𑀢𑀢𑀺𑀬𑀸 𑀆𑀯𑀝𑁆𑀝𑀦𑀢𑁄 𑀆𑀯𑀚𑁆𑀚𑀦𑀸, 𑀢𑀢𑁄 𑀯𑀺𑀲𑀤𑀺𑀲𑀲𑁆𑀲 𑀚𑀯𑀦𑀲𑁆𑀲 𑀓𑀭𑀡𑀢𑁄 𑀫𑀦𑀲𑀺𑀓𑀸𑀭𑁄 𑀘. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀝𑁆𑀞𑀸𑀦𑁂 ‘‘𑀯𑁄𑀝𑁆𑀞𑀩𑁆𑀩𑀦𑀁 𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺 𑀦 𑀯𑀼𑀢𑁆𑀢𑀁, ‘‘𑀆𑀯𑀚𑁆𑀚𑀦𑀸’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀯𑁄𑀝𑁆𑀞𑀩𑁆𑀩𑀦𑀢𑁄 𑀘𑀢𑀼𑀦𑁆𑀦𑀁 𑀯𑀸 𑀧𑀜𑁆𑀘𑀦𑁆𑀦𑀁 𑀯𑀸 𑀚𑀯𑀦𑀸𑀦𑀁 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁 𑀪𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁 𑀭𑀽𑀧𑀸𑀤𑀺𑀆𑀯𑀚𑁆𑀚𑀦𑀸𑀤𑀻𑀦𑀁 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀬𑀫𑁂𑀢𑀲𑁆𑀲 𑀲𑀪𑀸𑀯𑁄𑀢𑀺 𑀚𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸 𑀤𑀼𑀢𑀺𑀬𑁄 𑀫𑁄𑀖𑀯𑀸𑀭𑁄 𑀤𑀲𑁆𑀲𑁂𑀢𑀼𑀁 𑀬𑀼𑀢𑁆𑀢𑁄 𑀲𑀺𑀬𑀸, 𑀅𑀬𑀫𑁆𑀧𑀺 𑀅𑀝𑁆𑀞𑀓𑀣𑀸𑀬𑀁 𑀅𑀦𑀸𑀕𑀢𑀢𑁆𑀢𑀸 𑀲𑀼𑀝𑁆𑀞𑀼 𑀯𑀺𑀘𑀸𑀭𑁂𑀢𑀩𑁆𑀩𑁄. 𑀪𑀯𑀗𑁆𑀕𑀲𑁆𑀲 𑀚𑀯𑀦𑀸𑀦𑀼𑀩𑀦𑁆𑀥𑀦𑀪𑀽𑀢𑀢𑁆𑀢𑀸 ‘‘𑀢𑀤𑀸𑀭𑀫𑁆𑀫𑀡𑀁 𑀪𑀯𑀗𑁆𑀕’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀝𑁆𑀞𑀸𑀦𑁂 (𑀧𑀝𑁆𑀞𑀸. 𑁩.𑁧.𑁧𑁦𑁨) 𑀘 𑀯𑀼𑀢𑁆𑀢𑀁 ‘‘𑀲𑀳𑁂𑀢𑀼𑀓𑀁 𑀪𑀯𑀗𑁆𑀕𑀁 𑀅𑀳𑁂𑀢𑀼𑀓𑀲𑁆𑀲 𑀪𑀯𑀗𑁆𑀕𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺, ‘‘𑀅𑀳𑁂𑀢𑀼𑀓𑀁 𑀪𑀯𑀗𑁆𑀕𑀁 𑀲𑀳𑁂𑀢𑀼𑀓𑀲𑁆𑀲 𑀪𑀯𑀗𑁆𑀕𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀘. 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀲𑀼𑀔𑀤𑀼𑀓𑁆𑀔𑀯𑀺𑀧𑀸𑀓𑀫𑀢𑁆𑀢𑁄 𑀯𑀺𑀧𑀸𑀓𑁄 𑀦 𑀇𑀝𑁆𑀞𑀸𑀦𑀺𑀝𑁆𑀞𑀸𑀦𑀁 𑀯𑀺𑀪𑀸𑀕𑀁 𑀓𑀭𑁄𑀢𑀺, 𑀚𑀯𑀦𑀁 𑀧𑀦 𑀭𑀚𑁆𑀚𑀦𑀯𑀺𑀭𑀚𑁆𑀚𑀦𑀸𑀤𑀺𑀯𑀲𑁂𑀦 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀪𑀸𑀕𑀁 𑀓𑀭𑁄𑀢𑀻𑀢𑀺 ‘‘𑀆𑀭𑀫𑁆𑀫𑀡𑀭𑀲𑀁 𑀚𑀯𑀦𑀫𑁂𑀯 𑀅𑀦𑀼𑀪𑀯𑀢𑀻’’𑀢𑀺 𑀯𑀼𑀢𑁆𑀢𑀁.

𑀅𑀯𑀺𑀚𑁆𑀚𑀫𑀸𑀦𑁂 𑀓𑀸𑀭𑀓𑁂 𑀓𑀣𑀁 𑀆𑀯𑀚𑁆𑀚𑀦𑀸𑀤𑀺𑀪𑀸𑀯𑁂𑀦 𑀧𑀯𑀢𑁆𑀢𑀺 𑀳𑁄𑀢𑀻𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 𑀧𑀜𑁆𑀘𑀯𑀺𑀥𑀁 𑀦𑀺𑀬𑀸𑀫𑀁 𑀦𑀸𑀫 𑀕𑀡𑁆𑀳𑀺𑀁𑀲𑀼. 𑀦𑀺𑀬𑀸𑀫𑁄 𑀘 𑀥𑀫𑁆𑀫𑀸𑀦𑀁 𑀲𑀪𑀸𑀯𑀓𑀺𑀘𑁆𑀘𑀧𑀘𑁆𑀘𑀬𑀪𑀸𑀯𑀯𑀺𑀲𑁂𑀲𑁄𑀯. 𑀢𑀁𑀢𑀁𑀲𑀤𑀺𑀲𑀨𑀮𑀤𑀸𑀦𑀦𑁆𑀢𑀺 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀨𑀮𑀲𑁆𑀲 𑀤𑀸𑀦𑀁. 𑀲𑀤𑀺𑀲𑀯𑀺𑀧𑀸𑀓𑀤𑀸𑀦𑀦𑁆𑀢𑀺 𑀘 𑀅𑀦𑀼𑀭𑀽𑀧𑀯𑀺𑀧𑀸𑀓𑀤𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀢𑁆𑀣𑀼𑀦𑁆𑀢𑀺 𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁄 𑀏𑀓𑀕𑀸𑀣𑀸𑀯𑀢𑁆𑀣𑀼𑀪𑀸𑀯𑁂𑀦 𑀓𑀢𑁄. 𑀚𑀕𑀢𑀺𑀧𑁆𑀧𑀤𑁂𑀲𑁄𑀢𑀺 𑀬𑀣𑀸𑀯𑀼𑀢𑁆𑀢𑀢𑁄 𑀅𑀜𑁆𑀜𑁄𑀧𑀺 𑀮𑁄𑀓𑀧𑁆𑀧𑀤𑁂𑀲𑁄. 𑀓𑀸𑀮𑀕𑀢𑀺𑀉𑀧𑀥𑀺𑀧𑀬𑁄𑀕𑀧𑀝𑀺𑀩𑀸𑀴𑁆𑀳𑀜𑁆𑀳𑀺 𑀧𑀸𑀧𑀁 𑀦 𑀯𑀺𑀧𑀘𑁆𑀘𑁂𑀬𑁆𑀬, 𑀦 𑀧𑀤𑁂𑀲𑀧𑀝𑀺𑀩𑀸𑀴𑁆𑀳𑀦𑁆𑀢𑀺. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀧𑀝𑀺𑀲𑀦𑁆𑀥𑀺𑀬𑀸𑀤𑀺𑀥𑀫𑁆𑀫𑀸𑀦𑀁 𑀦𑀺𑀬𑀸𑀫𑁄 𑀤𑀲𑀲𑀳𑀲𑁆𑀲𑀺𑀓𑀫𑁆𑀧𑀦𑀧𑀘𑁆𑀘𑀬𑀪𑀸𑀯𑁄 𑀥𑀫𑁆𑀫𑀦𑀺𑀬𑀸𑀫𑁄. 𑀅𑀬𑀁 𑀇𑀥 𑀅𑀥𑀺𑀧𑁆𑀧𑁂𑀢𑁄𑀢𑀺 𑀏𑀢𑁂𑀦 𑀦𑀺𑀬𑀸𑀫𑀯𑀲𑁂𑀦 𑀆𑀯𑀚𑁆𑀚𑀦𑀸𑀤𑀺𑀪𑀸𑀯𑁄, 𑀦 𑀓𑀸𑀭𑀓𑀯𑀲𑁂𑀦𑀸𑀢𑀺 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀇𑀫𑀲𑁆𑀫𑀺𑀁 𑀞𑀸𑀦𑁂𑀢𑀺 𑀲𑁄𑀴𑀲𑀯𑀺𑀧𑀸𑀓𑀓𑀣𑀸𑀞𑀸𑀦𑁂. 𑀤𑁆𑀯𑀸𑀤𑀲𑀳𑀺 𑀯𑀸𑀳𑁂𑀢𑀩𑁆𑀩𑀸 𑀦𑀸𑀴𑀺𑀬𑀦𑁆𑀢𑁄𑀧𑀫𑀸 𑀦 𑀤𑁆𑀯𑀸𑀤𑀲𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀏𑀓𑀲𑁆𑀫𑀺𑀁 𑀤𑁆𑀯𑀸𑀭𑁂 𑀏𑀓𑀸𑀭𑀫𑁆𑀫𑀡𑁂 𑀲𑀳 𑀓𑀺𑀘𑁆𑀘𑀓𑀭𑀡𑀯𑀲𑁂𑀦 𑀯𑀼𑀢𑁆𑀢𑀸, 𑀅𑀣 𑀔𑁄 𑀤𑁆𑀯𑀸𑀤𑀲𑀦𑁆𑀦𑀁 𑀏𑀓𑀲𑁆𑀫𑀺𑀁 𑀤𑁆𑀯𑀸𑀭𑁂 𑀲𑀓𑀺𑀘𑁆𑀘𑀓𑀭𑀡𑀫𑀢𑁆𑀢𑀯𑀲𑁂𑀦. 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀚𑀦𑀓𑀲𑀤𑀺𑀲𑀚𑀯𑀦𑀸𑀦𑀦𑁆𑀢𑀭𑀁 𑀅𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀢𑀼𑀦𑁆𑀦𑀁 𑀧𑀦 𑀤𑀼𑀳𑁂𑀢𑀼𑀓𑀓𑀼𑀲𑀮𑀘𑀺𑀢𑁆𑀢𑀸𑀦𑀁 𑀅𑀜𑁆𑀜𑀢𑀭𑀚𑀯𑀦𑀲𑁆𑀲…𑀧𑁂… 𑀧𑀢𑀺𑀝𑁆𑀞𑀸𑀢𑀻’’𑀢𑀺 𑀆𑀳. 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀧𑀦 𑀢𑀺𑀳𑁂𑀢𑀼𑀓𑀚𑀯𑀦𑁂 𑀚𑀯𑀺𑀢𑁂 𑀧𑀝𑀺𑀲𑀦𑁆𑀥𑀺𑀤𑀸𑀬𑀓𑁂𑀦 𑀓𑀫𑁆𑀫𑁂𑀦 𑀅𑀳𑁂𑀢𑀼𑀓𑀲𑁆𑀲 𑀢𑀤𑀸𑀭𑀫𑁆𑀫𑀡𑀲𑁆𑀲 𑀦𑀺𑀩𑁆𑀩𑀢𑁆𑀢𑀺 𑀦 𑀧𑀝𑀺𑀲𑁂𑀥𑀺𑀢𑀸. 𑀏𑀯𑀁 𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀲𑁆𑀲𑀧𑀺 𑀢𑀺𑀳𑁂𑀢𑀼𑀓𑀸𑀦𑀦𑁆𑀢𑀭𑀁 𑀤𑀼𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀁 𑀅𑀧𑁆𑀧𑀝𑀺𑀲𑀺𑀤𑁆𑀥𑀁 𑀤𑀝𑁆𑀞𑀩𑁆𑀩𑀁. 𑀧𑀭𑀺𑀧𑀼𑀡𑁆𑀡𑀯𑀺𑀧𑀸𑀓𑀲𑁆𑀲 𑀘 𑀧𑀝𑀺𑀲𑀦𑁆𑀥𑀺𑀚𑀦𑀓𑀓𑀫𑁆𑀫𑀲𑁆𑀲 𑀯𑀲𑁂𑀦𑀸𑀬𑀁 𑀯𑀺𑀧𑀸𑀓𑀯𑀺𑀪𑀸𑀯𑀦𑀸 𑀢𑀲𑁆𑀲𑀸 𑀫𑀼𑀔𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀯𑀸𑀢𑀺 𑀧𑀯𑀢𑁆𑀢𑀺𑀯𑀺𑀧𑀸𑀓𑀲𑁆𑀲 𑀘 𑀏𑀓𑀲𑁆𑀲 𑀢𑀺𑀳𑁂𑀢𑀼𑀓𑀸𑀤𑀺𑀓𑀫𑁆𑀫𑀲𑁆𑀲 𑀲𑁄𑀴𑀲𑀯𑀺𑀧𑀸𑀓𑀘𑀺𑀢𑁆𑀢𑀸𑀤𑀻𑀦𑀺 𑀯𑀼𑀢𑁆𑀢𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀢𑀲𑁆𑀫𑀸 𑀬𑁂𑀦 𑀓𑁂𑀦𑀘𑀺 𑀓𑀫𑁆𑀫𑀼𑀦𑀸 𑀏𑀓𑁂𑀦 𑀅𑀦𑁂𑀓𑀁 𑀢𑀤𑀸𑀭𑀫𑁆𑀫𑀡𑀁 𑀧𑀯𑀢𑁆𑀢𑀫𑀸𑀦𑀁 𑀓𑀫𑁆𑀫𑀯𑀺𑀲𑁂𑀲𑀸𑀪𑀸𑀯𑀸 𑀬𑁂𑀲𑀁 𑀢𑀁 𑀅𑀦𑀼𑀩𑀦𑁆𑀥𑀪𑀽𑀢𑀁, 𑀢𑁂𑀲𑀁 𑀚𑀯𑀦𑀲𑀗𑁆𑀔𑀸𑀢𑀸𑀦𑀁 𑀧𑀘𑁆𑀘𑀬𑀸𑀦𑀁 𑀯𑀺𑀲𑁂𑀲𑁂𑀦 𑀯𑀺𑀲𑀺𑀝𑁆𑀞𑀁 𑀳𑁄𑀢𑀻𑀢𑀺 𑀚𑀯𑀦𑁂𑀦𑀸𑀬𑀁 𑀢𑀤𑀸𑀭𑀫𑁆𑀫𑀡𑀦𑀺𑀬𑀸𑀫𑁄 𑀯𑀼𑀢𑁆𑀢𑁄, 𑀦 𑀦𑀸𑀦𑀸𑀓𑀫𑁆𑀫𑀼𑀦𑀸 𑀦𑀺𑀩𑁆𑀩𑀢𑁆𑀢𑀫𑀸𑀦𑀲𑁆𑀲 𑀯𑀲𑁂𑀦. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀝𑁆𑀞𑀸𑀦𑁂 (𑀧𑀝𑁆𑀞𑀸. 𑁩.𑁧.𑁯𑁮) ‘‘𑀲𑀳𑁂𑀢𑀼𑀓𑁂 𑀔𑀦𑁆𑀥𑁂 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀢𑀺. 𑀓𑀼𑀲𑀮𑀸𑀓𑀼𑀲𑀮𑁂 𑀦𑀺𑀭𑀼𑀤𑁆𑀥𑁂 𑀅𑀳𑁂𑀢𑀼𑀓𑁄 𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀢𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀜𑀸𑀡𑀸𑀦𑀦𑁆𑀢𑀭𑀁 𑀅𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀁, ‘‘𑀓𑀼𑀲𑀮𑀸𑀓𑀼𑀲𑀮𑁂 𑀦𑀺𑀭𑀼𑀤𑁆𑀥𑁂 𑀲𑀳𑁂𑀢𑀼𑀓𑁄 𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀢𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀅𑀓𑀼𑀲𑀮𑀸𑀦𑀦𑁆𑀢𑀭𑀜𑁆𑀘 𑀲𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀁 𑀯𑀼𑀢𑁆𑀢𑀁, 𑀦 𑀘 ‘‘𑀢𑀁 𑀏𑀢𑁂𑀦 𑀣𑁂𑀭𑁂𑀦 𑀅𑀤𑀲𑁆𑀲𑀺𑀢’’𑀦𑁆𑀢𑀺 𑀓𑀢𑁆𑀯𑀸 𑀢𑀲𑁆𑀲 𑀧𑀝𑀺𑀲𑁂𑀥𑁄 𑀓𑀢𑁄 𑀳𑁄𑀢𑀻𑀢𑀺.

𑀬𑀁 𑀧𑀦 𑀚𑀯𑀦𑁂𑀦…𑀧𑁂… 𑀢𑀁 𑀓𑀼𑀲𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀇𑀤𑀁 𑀓𑀼𑀲𑀮𑀲𑁆𑀲 𑀯𑀺𑀬 𑀅𑀓𑀼𑀲𑀮𑀲𑁆𑀲 𑀲𑀤𑀺𑀲𑁄 𑀯𑀺𑀧𑀸𑀓𑁄 𑀦𑀢𑁆𑀣𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀲𑀗𑁆𑀔𑀸𑀭𑀺𑀓𑀸𑀲𑀗𑁆𑀔𑀸𑀭𑀺𑀓𑀦𑀺𑀬𑀫𑀦𑀁 𑀧𑀦 𑀲𑀦𑁆𑀥𑀸𑀬 𑀢𑀲𑁆𑀫𑀺𑀁 𑀯𑀼𑀢𑁆𑀢𑁂 𑀅𑀓𑀼𑀲𑀮𑁂𑀧𑀺 𑀦 𑀢𑀁 𑀦 𑀬𑀼𑀚𑁆𑀚𑀢𑀻𑀢𑀺. 𑀅𑀝𑁆𑀞𑀸𑀦𑀫𑁂𑀢𑀦𑁆𑀢𑀺 𑀇𑀤𑀁 𑀦𑀺𑀬𑀫𑀺𑀢𑀸𑀤𑀺𑀯𑀲𑁂𑀦 𑀬𑁄𑀦𑀺𑀲𑁄 𑀅𑀬𑁄𑀦𑀺𑀲𑁄 𑀯𑀸 𑀆𑀯𑀝𑁆𑀝𑀺𑀢𑁂 𑀅𑀬𑁄𑀦𑀺𑀲𑁄 𑀬𑁄𑀦𑀺𑀲𑁄 𑀯𑀸 𑀯𑀯𑀢𑁆𑀣𑀸𑀧𑀦𑀲𑁆𑀲 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀧𑀝𑀺𑀲𑀺𑀤𑁆𑀥𑀦𑁆𑀢𑀺 𑀅𑀯𑀘𑀦𑀫𑁂𑀯 𑀧𑀝𑀺𑀲𑁂𑀥𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀓𑀸𑀫𑀢𑀡𑁆𑀳𑀸𑀦𑀺𑀩𑁆𑀩𑀢𑁆𑀢𑁂𑀦 𑀓𑀫𑁆𑀫𑀼𑀦𑀸 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀸𑀦𑀼𑀪𑀯𑀦𑀯𑀺𑀧𑀸𑀓𑁄 𑀦 𑀳𑁄𑀢𑀻𑀢𑀺 𑀢𑀢𑁆𑀣 𑀢𑀤𑀸𑀭𑀫𑁆𑀫𑀡𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀧𑀸𑀣𑀕𑀢𑁂 𑀯𑀺𑀲𑀬𑁂 𑀢𑀦𑁆𑀦𑀺𑀦𑁆𑀦𑀁 𑀪𑀯𑀗𑁆𑀕𑀁 𑀆𑀯𑀚𑁆𑀚𑀦𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀆𑀯𑀚𑁆𑀚𑀦𑀁 𑀯𑀺𑀲𑀬𑁂 𑀦𑀺𑀦𑁆𑀦𑀢𑁆𑀢𑀸 𑀉𑀧𑁆𑀧𑀚𑁆𑀚𑀢𑀺. 𑀪𑀯𑀗𑁆𑀕𑀁 𑀧𑀦 𑀲𑀩𑁆𑀩𑀤𑀸 𑀲𑀯𑀺𑀲𑀬𑁂 𑀦𑀺𑀦𑁆𑀦𑀫𑁂𑀯𑀸𑀢𑀺 𑀯𑀺𑀲𑀬𑀦𑁆𑀢𑀭𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀳𑀼𑀢𑁆𑀯𑀸𑀧𑀺 𑀢𑀤𑀪𑀸𑀯𑀸 𑀯𑀺𑀦𑀸 𑀆𑀯𑀚𑁆𑀚𑀦𑁂𑀦 𑀲𑀯𑀺𑀲𑀬𑁂 𑀦𑀺𑀦𑁆𑀦𑀢𑁆𑀢𑀸𑀯 𑀉𑀧𑁆𑀧𑀚𑁆𑀚𑀢𑀺. 𑀘𑀺𑀡𑁆𑀡𑀢𑁆𑀢𑀸𑀢𑀺 𑀆𑀯𑀚𑁆𑀚𑀦𑁂𑀦 𑀯𑀺𑀦𑀸 𑀩𑀳𑀼𑀮𑀁 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀢𑁆𑀢𑀸. 𑀲𑀫𑀼𑀤𑀸𑀘𑀸𑀭𑀢𑁆𑀢𑀸𑀢𑀺 𑀆𑀧𑀸𑀣𑀕𑀢𑁂 𑀯𑀺𑀲𑀬𑁂 𑀧𑀝𑀺𑀲𑀦𑁆𑀥𑀺𑀯𑀺𑀲𑀬𑁂 𑀘 𑀩𑀳𑀼𑀮𑀁 𑀉𑀧𑁆𑀧𑀸𑀤𑀺𑀢𑀧𑀼𑀩𑁆𑀩𑀢𑁆𑀢𑀸. 𑀘𑀺𑀡𑁆𑀡𑀢𑁆𑀢𑀸𑀢𑀺 𑀯𑀸 𑀧𑀼𑀕𑁆𑀕𑀮𑁂𑀦 𑀆𑀲𑁂𑀯𑀺𑀢𑀪𑀸𑀯𑁄 𑀯𑀼𑀢𑁆𑀢𑁄. 𑀲𑀫𑀼𑀤𑀸𑀘𑀸𑀭𑀢𑁆𑀢𑀸𑀢𑀺 𑀲𑀬𑀁 𑀩𑀳𑀼𑀮𑀁 𑀧𑀯𑀢𑁆𑀢𑀪𑀸𑀯𑁄. 𑀦𑀺𑀭𑁄𑀥𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑁆𑀢𑀺 𑀇𑀤𑀁 𑀢𑀤𑀦𑀦𑁆𑀢𑀭𑀫𑁂𑀯 𑀦𑀺𑀭𑁄𑀥𑀨𑀼𑀲𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀯𑀺𑀬 𑀦𑀺𑀭𑁄𑀥𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑀁. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀧𑀦 𑀓𑀺𑀜𑁆𑀘𑀺 𑀧𑀭𑀺𑀓𑀫𑁆𑀫𑁂𑀦 𑀯𑀺𑀦𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀦𑀢𑁆𑀣𑀺. 𑀧𑀭𑀺𑀓𑀫𑁆𑀫𑀸𑀯𑀚𑁆𑀚𑀦𑀫𑁂𑀯 𑀢𑀲𑁆𑀲 𑀆𑀯𑀚𑁆𑀚𑀦𑀦𑁆𑀢𑀺 𑀅𑀜𑁆𑀜𑀲𑁆𑀲 𑀯𑀺𑀬 𑀏𑀢𑀲𑁆𑀲𑀧𑀺 𑀲𑀸𑀯𑀚𑁆𑀚𑀦𑀢𑀸𑀬 𑀪𑀯𑀺𑀢𑀩𑁆𑀩𑀁.

𑀅𑀬𑀁 𑀧𑀦𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑀤𑀝𑁆𑀞𑀩𑁆𑀩𑁄 𑁋 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑁆𑀲 𑀦 𑀦𑀺𑀭𑁄𑀥𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁂 𑀦𑀺𑀦𑁆𑀦𑀸𑀤𑀺𑀢𑀸 𑀅𑀜𑁆𑀜𑀢𑁆𑀣 𑀤𑀺𑀝𑁆𑀞𑀸 𑀅𑀢𑀤𑀢𑁆𑀣𑀧𑀭𑀺𑀓𑀫𑁆𑀫𑀪𑀸𑀯𑁂 𑀘 𑀉𑀧𑁆𑀧𑀢𑁆𑀢𑀺𑀬𑀸, 𑀅𑀣 𑀘 𑀢𑀁 𑀢𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀣𑀸 𑀘 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀬𑀣𑀸𑀯𑀼𑀢𑁆𑀢𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀅𑀲𑀢𑀺𑀧𑀺 𑀦𑀺𑀭𑀸𑀯𑀚𑁆𑀚𑀦𑀼𑀧𑁆𑀧𑀢𑁆𑀢𑀺𑀬𑀁 𑀦𑀺𑀦𑁆𑀦𑀸𑀤𑀺𑀪𑀸𑀯𑁂 𑀦𑀺𑀭𑀸𑀯𑀚𑁆𑀚𑀦𑀸 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀅𑀭𑀺𑀬𑀫𑀕𑁆𑀕𑀘𑀺𑀢𑁆𑀢𑀁 𑀫𑀕𑁆𑀕𑀸𑀦𑀦𑁆𑀢𑀭𑀸𑀦𑀺 𑀨𑀮𑀘𑀺𑀢𑁆𑀢𑀸𑀦𑀻’’𑀢𑀺 𑀇𑀤𑀁 𑀯𑀼𑀢𑁆𑀢𑀁. 𑀬𑀤𑀺 𑀳𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀯𑀚𑁆𑀚𑀦𑀸𑀪𑀸𑀯𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 𑀲𑀺𑀬𑀸, 𑀕𑁄𑀢𑁆𑀭𑀪𑀼𑀯𑁄𑀤𑀸𑀦𑀸𑀦𑀺 𑀦𑀺𑀤𑀲𑁆𑀲𑀦𑀸𑀦𑀺 𑀲𑀺𑀬𑀼𑀁 𑀢𑁂𑀳𑁂𑀯 𑀏𑀢𑁂𑀲𑀁 𑀦𑀺𑀭𑀸𑀯𑀚𑁆𑀚𑀦𑀢𑀸𑀲𑀺𑀤𑁆𑀥𑀺𑀢𑁄. 𑀨𑀮𑀲𑀫𑀸𑀧𑀢𑁆𑀢𑀺𑀓𑀸𑀮𑁂 𑀘 ‘‘𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀁 𑀅𑀦𑀼𑀮𑁄𑀫𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀘𑀦𑀢𑁄 𑀲𑀫𑀸𑀦𑀸𑀭𑀫𑁆𑀫𑀡𑀸𑀯𑀚𑁆𑀚𑀦𑀭𑀳𑀺𑀢𑀢𑁆𑀢𑀸 ‘‘𑀫𑀕𑁆𑀕𑀸𑀦𑀦𑁆𑀢𑀭𑀸𑀦𑀺 𑀨𑀮𑀘𑀺𑀢𑁆𑀢𑀸𑀦𑀻’’𑀢𑀺 𑀏𑀯𑀁 𑀨𑀮𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀸𑀦𑀺 𑀦 𑀯𑀚𑁆𑀚𑁂𑀢𑀩𑁆𑀩𑀸𑀦𑀺 𑀲𑀺𑀬𑀼𑀁, 𑀕𑁄𑀢𑁆𑀭𑀪𑀼𑀯𑁄𑀤𑀸𑀦𑀸𑀦𑀺 𑀧𑀦 𑀬𑀤𑀺𑀧𑀺 𑀦𑀺𑀩𑁆𑀩𑀸𑀦𑁂 𑀘𑀺𑀡𑁆𑀡𑀸𑀦𑀺 𑀲𑀫𑀼𑀤𑀸𑀘𑀸𑀭𑀸𑀦𑀺 𑀘 𑀦 𑀳𑁄𑀦𑁆𑀢𑀺, 𑀆𑀭𑀫𑁆𑀫𑀡𑀦𑁆𑀢𑀭𑁂 𑀘𑀺𑀡𑁆𑀡𑀲𑀫𑀼𑀤𑀸𑀘𑀸𑀭𑀸𑀦𑁂𑀯. 𑀨𑀮𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀸𑀦𑀺 𑀘 𑀫𑀕𑁆𑀕𑀯𑀻𑀣𑀺𑀢𑁄 𑀉𑀤𑁆𑀥𑀁 𑀢𑀤𑀢𑁆𑀣𑀧𑀭𑀺𑀓𑀫𑁆𑀫𑀲𑀩𑁆𑀪𑀸𑀯𑀸𑀢𑀺 𑀢𑁂𑀲𑀁 𑀕𑀳𑀡𑀁 𑀦 𑀓𑀢𑀁, 𑀅𑀦𑀼𑀮𑁄𑀫𑀸𑀦𑀦𑁆𑀢𑀭𑀜𑁆𑀘 𑀨𑀮𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀁 𑀘𑀺𑀡𑁆𑀡𑀁 𑀲𑀫𑀼𑀤𑀸𑀘𑀸𑀭𑀁, 𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀸𑀦𑀦𑁆𑀢𑀭𑀁 𑀫𑀕𑁆𑀕𑀸𑀦𑀦𑁆𑀢𑀭𑀲𑁆𑀲 𑀯𑀺𑀬 𑀢𑀤𑀢𑁆𑀣𑀧𑀭𑀺𑀓𑀫𑁆𑀫𑀸𑀪𑀸𑀯𑀸𑀢𑀺 ‘‘𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲𑀸’’𑀢𑀺 𑀢𑀜𑁆𑀘 𑀦𑀺𑀤𑀲𑁆𑀲𑀦𑀁. 𑀆𑀭𑀫𑁆𑀫𑀡𑁂𑀦 𑀧𑀦 𑀯𑀺𑀦𑀸 𑀦𑀼𑀧𑁆𑀧𑀚𑁆𑀚𑀢𑀻𑀢𑀺 𑀇𑀤𑀁 𑀏𑀢𑀲𑁆𑀲 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀢𑁆𑀢𑀸𑀪𑀸𑀯𑀸 𑀧𑀼𑀘𑁆𑀙𑀁 𑀓𑀸𑀭𑁂𑀢𑁆𑀯𑀸 𑀆𑀭𑀫𑁆𑀫𑀡𑀦𑀺𑀤𑁆𑀥𑀸𑀭𑀡𑀢𑁆𑀣𑀁 𑀯𑀼𑀢𑁆𑀢𑀁.

𑀢𑀢𑁆𑀣𑀸𑀢𑀺 𑀯𑀺𑀧𑀸𑀓𑀓𑀣𑀸𑀬𑀁. 𑀚𑀘𑁆𑀘𑀦𑁆𑀥𑀧𑀻𑀞𑀲𑀧𑁆𑀧𑀺𑀉𑀧𑀫𑀸𑀦𑀺𑀤𑀲𑁆𑀲𑀦𑀁 𑀯𑀺𑀧𑀸𑀓𑀲𑁆𑀲 𑀦𑀺𑀲𑁆𑀲𑀬𑁂𑀦 𑀯𑀺𑀦𑀸 𑀅𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁. 𑀯𑀺𑀲𑀬𑀕𑁆𑀕𑀸𑀳𑁄𑀢𑀺 𑀇𑀤𑀁 𑀘𑀓𑁆𑀔𑀸𑀤𑀻𑀦𑀁 𑀲𑀯𑀺𑀲𑀬𑀕𑁆𑀕𑀳𑀡𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀯𑀺𑀧𑀸𑀓𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀉𑀧𑀦𑀺𑀲𑁆𑀲𑀬𑀢𑁄 𑀘𑀓𑁆𑀔𑀸𑀤𑀻𑀦𑀁 𑀤𑀲𑁆𑀲𑀦𑀸𑀤𑀺𑀅𑀢𑁆𑀣𑀢𑁄 𑀘 𑀢𑀲𑁆𑀲𑁂𑀯 𑀯𑀺𑀧𑀸𑀓𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 ‘‘𑀉𑀧𑀦𑀺𑀲𑁆𑀲𑀬𑀫𑀢𑁆𑀣𑀲𑁄’’𑀢𑀺 𑀯𑀼𑀢𑁆𑀢𑀁. 𑀳𑀤𑀬𑀯𑀢𑁆𑀣𑀼𑀫𑁂𑀯𑀸𑀢𑀺 𑀬𑀣𑀸 𑀧𑀼𑀭𑀺𑀫𑀘𑀺𑀢𑁆𑀢𑀸𑀦𑀺 𑀳𑀤𑀬𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀸𑀦𑀺 𑀘 𑀧𑀲𑀸𑀤𑀯𑀢𑁆𑀣𑀼𑀅𑀦𑀼𑀕𑀢𑀸𑀦𑀺 𑀘 𑀅𑀜𑁆𑀜𑀸𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺, 𑀦 𑀏𑀯𑀁 𑀪𑀯𑀗𑁆𑀕𑀁, 𑀢𑀁 𑀧𑀦𑁂𑀢𑀁 𑀯𑀢𑁆𑀣𑀸𑀭𑀫𑁆𑀫𑀡𑀦𑁆𑀢𑀭𑀭𑀳𑀺𑀢𑀁 𑀓𑁂𑀯𑀮𑀁 𑀳𑀤𑀬𑀯𑀢𑁆𑀣𑀼𑀫𑁂𑀯 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀳𑀤𑀬𑀭𑀽𑀧𑀯𑀢𑁆𑀣𑀼𑀓𑀦𑁆𑀢𑀺 𑀇𑀥𑀸𑀧𑀺 𑀅𑀜𑁆𑀜𑀯𑀢𑁆𑀣𑀸𑀦𑀼𑀕𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀓𑁆𑀓𑀝𑀓𑀲𑁆𑀲 𑀳𑀺 𑀲𑀼𑀢𑁆𑀢𑀸𑀭𑁄𑀳𑀡𑀁 𑀯𑀺𑀬 𑀧𑀲𑀸𑀤𑀯𑀢𑁆𑀣𑀼𑀓𑀁 𑀘𑀺𑀢𑁆𑀢𑀁, 𑀲𑀼𑀢𑁆𑀢𑁂𑀦 𑀕𑀫𑀦𑀸𑀤𑀻𑀦𑀺 𑀯𑀺𑀬 𑀢𑀤𑀦𑀼𑀕𑀢𑀸𑀦𑀺 𑀲𑁂𑀲𑀘𑀺𑀢𑁆𑀢𑀸𑀦𑀻𑀢𑀺. 𑀲𑀼𑀢𑁆𑀢𑀖𑀝𑁆𑀝𑀦𑀫𑀓𑁆𑀓𑀝𑀓𑀘𑀮𑀦𑀸𑀦𑀺 𑀯𑀺𑀬 𑀧𑀲𑀸𑀤𑀖𑀝𑁆𑀝𑀦𑀪𑀯𑀗𑁆𑀕𑀘𑀮𑀦𑀸𑀦𑀺 𑀲𑀳 𑀳𑁄𑀦𑁆𑀢𑀻𑀢𑀺 𑀤𑀻𑀧𑀦𑀢𑁄 ‘‘𑀏𑀓𑁂𑀓𑀁…𑀧𑁂… 𑀆𑀕𑀘𑁆𑀙𑀢𑀻’’𑀢𑀺𑀧𑀺 𑀤𑀻𑀧𑁂𑀢𑀺.

𑀪𑀯𑀗𑁆𑀕𑀲𑁆𑀲 𑀆𑀯𑀝𑁆𑀝𑀺𑀢𑀓𑀸𑀮𑁄𑀢𑀺 𑀇𑀤𑀁 𑀤𑁄𑀯𑀸𑀭𑀺𑀓𑀲𑀤𑀺𑀲𑀸𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀧𑀸𑀤𑀧𑀭𑀺𑀫𑀚𑁆𑀚𑀓𑀲𑀤𑀺𑀲𑀲𑁆𑀲 𑀆𑀯𑀚𑁆𑀚𑀦𑀲𑁆𑀲 𑀲𑀜𑁆𑀜𑀸𑀤𑀸𑀦𑀲𑀤𑀺𑀲𑁄 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁄 𑀏𑀯 𑀪𑀯𑀗𑁆𑀕𑀸𑀯𑀝𑁆𑀝𑀦𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀆𑀤𑀻𑀦𑀁 𑀅𑀤𑀺𑀲𑁆𑀯𑀸𑀯 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀺𑀓𑀭𑀡𑀁 𑀕𑀸𑀴𑁆𑀳𑀕𑁆𑀕𑀳𑀡𑀫𑀢𑁆𑀢𑀧𑀼𑀣𑀼𑀮𑀘𑀢𑀼𑀭𑀲𑁆𑀲𑀪𑀸𑀯𑀯𑀺𑀚𑀸𑀦𑀦𑀫𑀢𑁆𑀢𑀓𑀳𑀸𑀧𑀡𑀪𑀸𑀯𑀯𑀺𑀚𑀸𑀦𑀦𑀫𑀢𑁆𑀢𑀓𑀫𑁆𑀫𑁄𑀧𑀦𑀬𑀦𑀫𑀢𑁆𑀢𑀲𑀸𑀫𑀜𑁆𑀜𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀕𑀸𑀴𑁆𑀳𑀕𑁆𑀕𑀸𑀳𑀓𑀸𑀤𑀻𑀦𑀁 𑀓𑀳𑀸𑀧𑀡𑀤𑀲𑁆𑀲𑀦𑀲𑁆𑀲 𑀅𑀪𑀸𑀯𑁄 𑀢𑀁𑀲𑀫𑀸𑀦𑀪𑀸𑀯𑁄 𑀘 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀦𑀁 𑀅𑀥𑀺𑀧𑁆𑀧𑁂𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀧𑀡𑁆𑀟𑀭𑀁 𑀏𑀢𑀦𑁆𑀢𑀺 𑀧𑀡𑁆𑀟𑀭𑀭𑀽𑀧𑀤𑀲𑁆𑀲𑀦𑀲𑀸𑀫𑀜𑁆𑀜𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀫𑁂𑀯 𑀤𑀲𑁆𑀲𑀦𑀓𑀺𑀘𑁆𑀘𑀁 𑀲𑀸𑀥𑁂𑀢𑀻𑀢𑀺 𑀤𑀻𑀧𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼𑀧𑀺 𑀬𑁄𑀚𑁂𑀢𑀩𑁆𑀩𑀁 𑀲𑀯𑀦𑀸𑀤𑀺𑀯𑀲𑁂𑀦. 𑀲𑀦𑁆𑀢𑀸𑀧𑀦𑀯𑀲𑁂𑀦 𑀕𑀼𑀴𑀲𑀻𑀮𑁄 𑀕𑀼𑀴𑀧𑁆𑀧𑀬𑁄𑀚𑀦𑁄 𑀯𑀸 𑀕𑁄𑀴𑀺𑀬𑀓𑁄. 𑀉𑀧𑀦𑀺𑀲𑁆𑀲𑀬𑀢𑁄𑀢𑀺 𑀦 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀲𑁆𑀫𑀺𑀁 𑀧𑀦 𑀅𑀲𑀢𑀺 𑀬𑁄 𑀦 𑀳𑁄𑀢𑀺, 𑀲𑁄 𑀇𑀥 ‘‘𑀉𑀧𑀦𑀺𑀲𑁆𑀲𑀬𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀆𑀮𑁄𑀓𑀲𑀦𑁆𑀦𑀺𑀲𑁆𑀲𑀺𑀢𑀦𑁆𑀢𑀺 𑀇𑀤𑀫𑁆𑀧𑀺 𑀆𑀮𑁄𑀓𑁂 𑀲𑀢𑀺 𑀲𑀩𑁆𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑀁. 𑀫𑀦𑁆𑀤𑀣𑀸𑀫𑀕𑀢𑀁 𑀦𑀸𑀫 𑀓𑀺𑀭𑀺𑀬𑀘𑀺𑀢𑁆𑀢𑀲𑁆𑀲 𑀧𑀘𑁆𑀘𑀬𑀪𑀸𑀯𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀲𑀬𑀫𑁂𑀯 𑀧𑀯𑀢𑁆𑀢𑀫𑀸𑀦𑀁.

𑀅𑀲𑀗𑁆𑀔𑀸𑀭𑀺𑀓𑀲𑀲𑀗𑁆𑀔𑀸𑀭𑀺𑀓𑁂𑀲𑀼 𑀤𑁄𑀲𑀁 𑀤𑀺𑀲𑁆𑀯𑀸𑀢𑀺 𑀦 𑀓𑀫𑁆𑀫𑀲𑁆𑀲 𑀯𑀺𑀭𑀼𑀤𑁆𑀥𑀲𑀪𑀸𑀯𑁂𑀦 𑀯𑀺𑀧𑀸𑀓𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀲𑀗𑁆𑀔𑀸𑀭𑀺𑀓𑀓𑀫𑁆𑀫𑀲𑁆𑀲 𑀲𑀲𑀗𑁆𑀔𑀸𑀭𑀺𑀓𑀯𑀺𑀧𑀸𑀓𑁂𑀲𑀼, 𑀲𑀲𑀗𑁆𑀔𑀸𑀭𑀺𑀓𑀓𑀫𑁆𑀫𑀲𑁆𑀲 𑀘 𑀅𑀲𑀗𑁆𑀔𑀸𑀭𑀺𑀓𑀯𑀺𑀧𑀸𑀓𑁂𑀲𑀼 𑀤𑁄𑀲𑀁 𑀤𑀺𑀲𑁆𑀯𑀸. 𑀅𑀳𑁂𑀢𑀼𑀓𑀸𑀦𑀁 𑀧𑀦 𑀭𑀽𑀧𑀸𑀤𑀻𑀲𑀼 𑀅𑀪𑀺𑀦𑀺𑀧𑀸𑀢𑀫𑀢𑁆𑀢𑀸𑀤𑀺𑀓𑀺𑀘𑁆𑀘𑀸𑀦𑀁 𑀦 𑀲𑀲𑀗𑁆𑀔𑀸𑀭𑀺𑀓𑀯𑀺𑀭𑀼𑀤𑁆𑀥𑁄 𑀲𑀪𑀸𑀯𑁄𑀢𑀺 𑀅𑀲𑀗𑁆𑀔𑀸𑀭𑀺𑀓𑀢𑀸 𑀦𑀢𑁆𑀣𑀺, 𑀅𑀲𑀗𑁆𑀔𑀸𑀭𑀺𑀓𑀯𑀺𑀭𑀼𑀤𑁆𑀥𑀲𑀪𑀸𑀯𑀸𑀪𑀸𑀯𑀸 𑀦𑀸𑀧𑀺 𑀲𑀲𑀗𑁆𑀔𑀸𑀭𑀺𑀓𑀢𑀸𑀢𑀺 𑀉𑀪𑀬𑀸𑀯𑀺𑀭𑁄𑀥𑀸 𑀉𑀪𑀬𑁂𑀦𑀧𑀺 𑀢𑁂𑀲𑀁 𑀦𑀺𑀩𑁆𑀩𑀢𑁆𑀢𑀺𑀁 𑀅𑀦𑀼𑀚𑀸𑀦𑀸𑀢𑀺. 𑀘𑀺𑀢𑁆𑀢𑀦𑀺𑀬𑀸𑀫𑀦𑁆𑀢𑀺 𑀢𑀤𑀸𑀭𑀫𑁆𑀫𑀡𑀦𑀺𑀬𑀸𑀫𑀁. 𑀓𑀺𑀭𑀺𑀬𑀢𑁄 𑀧𑀜𑁆𑀘𑀸𑀢𑀺 𑀇𑀫𑁂𑀲𑀁…𑀧𑁂… 𑀧𑀢𑀺𑀝𑁆𑀞𑀸𑀢𑀻𑀢𑀺 𑀓𑀺𑀭𑀺𑀬𑀚𑀯𑀦𑀸𑀦𑀦𑁆𑀢𑀭𑀜𑁆𑀘 𑀢𑀤𑀸𑀭𑀫𑁆𑀫𑀡𑀁 𑀯𑀼𑀢𑁆𑀢𑀁. 𑀧𑀝𑁆𑀞𑀸𑀦𑁂 (𑀧𑀝𑁆𑀞𑀸. 𑁧.𑁩.𑁯𑁪) 𑀧𑀦 ‘‘𑀓𑀼𑀲𑀮𑀸𑀓𑀼𑀲𑀮𑁂 𑀦𑀺𑀭𑀼𑀤𑁆𑀥𑁂 𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀢𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸𑀦𑀫𑁂𑀯 𑀅𑀦𑀦𑁆𑀢𑀭𑀸 𑀢𑀤𑀸𑀭𑀫𑁆𑀫𑀡𑀁 𑀯𑀼𑀢𑁆𑀢𑀁. 𑀓𑀼𑀲𑀮𑀢𑁆𑀢𑀺𑀓𑁂 𑀘 ‘‘𑀲𑁂𑀓𑁆𑀔𑀸 𑀯𑀸 𑀧𑀼𑀣𑀼𑀚𑁆𑀚𑀦𑀸 𑀯𑀸 𑀓𑀼𑀲𑀮𑀁 𑀅𑀦𑀺𑀘𑁆𑀘𑀢𑁄’’𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁪𑁦𑁬) 𑀓𑀼𑀲𑀮𑀸𑀓𑀼𑀲𑀮𑀚𑀯𑀦𑀫𑁂𑀯 𑀯𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀁 𑀯𑀼𑀢𑁆𑀢𑀁, 𑀦 𑀅𑀩𑁆𑀬𑀸𑀓𑀢𑀸𑀦𑀦𑁆𑀢𑀭𑀁, 𑀦 𑀘 𑀓𑀢𑁆𑀣𑀘𑀺 𑀓𑀺𑀭𑀺𑀬𑀸𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀲𑁆𑀲 𑀯𑀼𑀢𑁆𑀢𑀝𑁆𑀞𑀸𑀦𑀁 𑀤𑀺𑀲𑁆𑀲𑀢𑀺. 𑀯𑀺𑀚𑁆𑀚𑀫𑀸𑀦𑁂 𑀘 𑀢𑀲𑁆𑀫𑀺𑀁 𑀅𑀯𑀘𑀦𑁂 𑀓𑀸𑀭𑀡𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑁄 𑀏𑀲𑁄 𑀣𑁂𑀭𑀯𑀸𑀤𑁄. 𑀯𑀺𑀧𑁆𑀨𑀸𑀭𑀺𑀓𑀜𑁆𑀳𑀺 𑀚𑀯𑀦𑀁 𑀦𑀸𑀯𑀁 𑀯𑀺𑀬 𑀦𑀤𑀻𑀲𑁄𑀢𑁄 𑀪𑀯𑀗𑁆𑀕𑀁 𑀅𑀦𑀼𑀩𑀦𑁆𑀥𑀢𑀻𑀢𑀺 𑀬𑀼𑀢𑁆𑀢𑀁, 𑀦 𑀧𑀦 𑀙𑀴𑀗𑁆𑀕𑀼𑀧𑁂𑀓𑁆𑀔𑀯𑀢𑁄 𑀲𑀦𑁆𑀢𑀯𑀼𑀢𑁆𑀢𑀺𑀁 𑀓𑀺𑀭𑀺𑀬𑀚𑀯𑀦𑀁 𑀧𑀡𑁆𑀡𑀧𑀼𑀝𑀁 𑀯𑀺𑀬 𑀦𑀤𑀻𑀲𑁄𑀢𑁄𑀢𑀺.

𑀧𑀺𑀡𑁆𑀟𑀚𑀯𑀦𑀁 𑀚𑀯𑀢𑀻𑀢𑀺 𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀚𑀯𑀦𑀸𑀦𑀺 𑀧𑀺𑀡𑁆𑀟𑁂𑀢𑁆𑀯𑀸 𑀓𑀣𑀺𑀢𑀸𑀦𑀻𑀢𑀺 𑀢𑀣𑀸 𑀓𑀣𑀺𑀢𑀸𑀦𑀺 𑀚𑀯𑀦𑀸𑀦𑀺 𑀧𑀺𑀡𑁆𑀟𑀺𑀢𑀸𑀦𑀺 𑀯𑀺𑀬 𑀯𑀼𑀢𑁆𑀢𑀸𑀦𑀺, 𑀏𑀓𑀲𑁆𑀫𑀺𑀁 𑀯𑀸 𑀢𑀤𑀸𑀭𑀫𑁆𑀫𑀡𑁂 𑀧𑀺𑀡𑁆𑀟𑁂𑀢𑁆𑀯𑀸 𑀤𑀲𑁆𑀲𑀺𑀢𑀸𑀦𑀺 𑀳𑀼𑀢𑁆𑀯𑀸 𑀚𑀯𑀺𑀢𑀸𑀦𑁂𑀯 𑀯𑀼𑀢𑁆𑀢𑀸𑀦𑀺. 𑀇𑀫𑀜𑁆𑀘 𑀧𑀦 𑀧𑀺𑀡𑁆𑀟𑀚𑀯𑀦𑀁 𑀯𑀤𑀦𑁆𑀢𑁂𑀦 𑀅𑀓𑀼𑀲𑀮𑀢𑁄 𑀘𑀢𑁆𑀢𑀸𑀭𑀺𑀬𑁂𑀯 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺 𑀕𑀳𑁂𑀢𑁆𑀯𑀸 𑀤𑁆𑀯𑀸𑀤𑀲𑀼𑀧𑁂𑀓𑁆𑀔𑀸𑀲𑀳𑀕𑀢𑀚𑀯𑀦𑀸𑀦𑀺 𑀧𑀺𑀡𑁆𑀟𑀺𑀢𑀸𑀦𑀺 𑀯𑀺𑀬 𑀯𑀼𑀢𑁆𑀢𑀸𑀦𑀺. 𑀧𑀝𑁆𑀞𑀸𑀦𑁂 𑀧𑀦 ‘‘𑀓𑀼𑀲𑀮𑀁 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀆𑀭𑀩𑁆𑀪 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺. 𑀤𑀺𑀝𑁆𑀞𑀺, 𑀯𑀺𑀘𑀺𑀓𑀺𑀘𑁆𑀙𑀸, 𑀉𑀤𑁆𑀥𑀘𑁆𑀘𑀁, 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀓𑀼𑀲𑀮𑁂 𑀦𑀺𑀭𑀼𑀤𑁆𑀥𑁂 𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀢𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀇𑀢𑀭𑀸𑀦𑀺 𑀤𑁆𑀯𑁂 𑀇𑀝𑁆𑀞𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀳𑀕𑀢𑀸𑀦𑀺𑀧𑀺 𑀓𑀼𑀲𑀮𑀯𑀺𑀧𑀸𑀓𑁂 𑀢𑀤𑀸𑀭𑀫𑁆𑀫𑀡𑁂 𑀧𑀺𑀡𑁆𑀟𑁂𑀢𑀩𑁆𑀩𑀸𑀦𑀺 𑀲𑀺𑀬𑀼𑀁. 𑀢𑁂𑀲𑀁 𑀧𑀦 𑀅𑀦𑀦𑁆𑀢𑀭𑀁 𑀅𑀳𑁂𑀢𑀼𑀓𑀯𑀺𑀧𑀸𑀓𑁂𑀦𑁂𑀯 𑀢𑀤𑀸𑀭𑀫𑁆𑀫𑀡𑁂𑀦 𑀪𑀯𑀺𑀢𑀩𑁆𑀩𑀁, 𑀲𑁄 𑀘 𑀲𑀦𑁆𑀢𑀻𑀭𑀡𑀪𑀸𑀯𑁂𑀦𑁂𑀯 𑀕𑀳𑀺𑀢𑁄𑀢𑀺 𑀅𑀧𑀼𑀩𑁆𑀩𑀁 𑀕𑀳𑁂𑀢𑀩𑁆𑀩𑀁 𑀦𑀢𑁆𑀣𑀺. 𑀅𑀳𑁂𑀢𑀼𑀓𑁂 𑀘 𑀧𑀺𑀡𑁆𑀟𑁂𑀢𑀩𑁆𑀩𑀁 𑀦𑀸𑀭𑀳𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀦 𑀧𑀺𑀡𑁆𑀟𑁂𑀢𑀻𑀢𑀺.

𑀢𑀺𑀳𑁂𑀢𑀼𑀓𑀚𑀯𑀦𑀸𑀯𑀲𑀸𑀦𑁂 𑀧𑀦𑁂𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀤𑀼𑀢𑀺𑀬𑀯𑀸𑀤𑁂 𑀢𑀺𑀳𑁂𑀢𑀼𑀓𑀚𑀯𑀦𑀸𑀯𑀲𑀸𑀦𑁂 𑀢𑀺𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀁 𑀬𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀬𑀼𑀢𑁆𑀢𑀁 𑀯𑀤𑀢𑀺 𑀚𑀯𑀦𑀲𑀫𑀸𑀦𑀢𑁆𑀢𑀸, 𑀦𑀸𑀮𑀩𑁆𑀪𑀫𑀸𑀦𑀢𑁆𑀢𑀸 𑀅𑀜𑁆𑀜𑀲𑁆𑀲. 𑀧𑀞𑀫𑀢𑁆𑀣𑁂𑀭𑁂𑀦 𑀅𑀓𑀼𑀲𑀮𑀸𑀦𑀦𑁆𑀢𑀭𑀁 𑀯𑀼𑀢𑁆𑀢𑀲𑁆𑀲 𑀅𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀲𑁆𑀲, 𑀓𑀼𑀲𑀮𑀸𑀦𑀦𑁆𑀢𑀭𑀁 𑀯𑀼𑀢𑁆𑀢𑀲𑁆𑀲 𑀘 𑀲𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀲𑁆𑀲 𑀅𑀓𑀼𑀲𑀮𑀸𑀦𑀦𑁆𑀢𑀭𑀁 𑀉𑀧𑁆𑀧𑀢𑁆𑀢𑀺𑀁 𑀯𑀤𑀦𑁆𑀢𑀲𑁆𑀲 𑀳𑀺 𑀧𑀝𑀺𑀲𑀦𑁆𑀥𑀺𑀚𑀦𑀓𑀁 𑀢𑀺𑀳𑁂𑀢𑀼𑀓𑀓𑀫𑁆𑀫𑀁 𑀤𑀼𑀳𑁂𑀢𑀼𑀓𑀸𑀳𑁂𑀢𑀼𑀓𑀁 𑀯𑀺𑀧𑀸𑀓𑀁 𑀚𑀦𑀬𑀦𑁆𑀢𑀫𑁆𑀧𑀺 𑀢𑀺𑀳𑁂𑀢𑀼𑀓𑀚𑀯𑀦𑀸𑀦𑀦𑁆𑀢𑀭𑀁 𑀦 𑀚𑀦𑁂𑀢𑀻𑀢𑀺 𑀦 𑀏𑀢𑁆𑀣 𑀓𑀸𑀭𑀡𑀁 𑀤𑀺𑀲𑁆𑀲𑀢𑀻𑀢𑀺 𑀏𑀯𑀁 𑀬𑀼𑀢𑁆𑀢𑀁 𑀕𑀳𑁂𑀢𑀩𑁆𑀩𑀁 𑀅𑀯𑀼𑀢𑁆𑀢𑀫𑁆𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀯𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀣𑁂𑀭𑀯𑀸𑀤𑁂 𑀬𑁂𑀦 𑀅𑀥𑀺𑀧𑁆𑀧𑀸𑀬𑁂𑀦 𑀲𑀲𑀗𑁆𑀔𑀸𑀭𑀸𑀲𑀗𑁆𑀔𑀸𑀭𑀯𑀺𑀥𑀸𑀦𑀸𑀤𑀺 𑀯𑀼𑀢𑁆𑀢𑀁, 𑀢𑀁 𑀢𑁂𑀦𑁂𑀯 𑀅𑀥𑀺𑀧𑁆𑀧𑀸𑀬𑁂𑀦 𑀬𑀼𑀢𑁆𑀢𑀁 𑀕𑀳𑁂𑀢𑀩𑁆𑀩𑀁, 𑀦 𑀅𑀥𑀺𑀧𑁆𑀧𑀸𑀬𑀦𑁆𑀢𑀭𑀁 𑀅𑀥𑀺𑀧𑁆𑀧𑀸𑀬𑀦𑁆𑀢𑀭𑁂𑀦 𑀆𑀮𑁄𑀴𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀳𑁂𑀢𑀼𑀲𑀤𑀺𑀲𑀫𑁂𑀯𑀸𑀢𑀺 𑀚𑀦𑀓𑀓𑀫𑁆𑀫𑀳𑁂𑀢𑀼𑀲𑀤𑀺𑀲𑀫𑁂𑀯. 𑀫𑀳𑀸𑀧𑀓𑀭𑀡𑁂 𑀆𑀯𑀺 𑀪𑀯𑀺𑀲𑁆𑀲𑀢𑀻𑀢𑀺 𑀫𑀳𑀸𑀧𑀓𑀭𑀡𑁂 𑀆𑀕𑀢𑀧𑀸𑀴𑀺𑀬𑀸 𑀧𑀸𑀓𑀝𑀁 𑀉𑀧𑁆𑀧𑀢𑁆𑀢𑀺𑀯𑀺𑀥𑀸𑀦𑀁 𑀆𑀯𑀺 𑀪𑀯𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺.

𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀓𑀣𑀸𑀯𑀡𑁆𑀡𑀦𑀸

𑁪𑁯𑁯. 𑀅𑀦𑀦𑁆𑀢𑀭𑀸𑀬𑁂𑀦𑀸𑀢𑀺 𑀧𑀭𑀺𑀳𑀸𑀦𑀺𑀧𑀘𑁆𑀘𑀬𑀯𑀺𑀭𑀳𑁂𑀦. 𑀧𑀝𑀺𑀧𑀤𑀸𑀤𑀺𑀪𑁂𑀤𑁄𑀢𑀺 𑀧𑀝𑀺𑀧𑀤𑀸𑀭𑀫𑁆𑀫𑀡𑀪𑁂𑀤𑁄. 𑀢𑀣𑀸 𑀳𑀺 𑀤𑀼𑀓𑁆𑀔𑀧𑀝𑀺𑀧𑀤𑀁 𑀤𑀦𑁆𑀥𑀸𑀪𑀺𑀜𑁆𑀜𑀁 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀢𑀁 𑀛𑀸𑀦𑀁 𑀢𑀁𑀧𑀝𑀺𑀧𑀤𑀫𑁂𑀯 𑀳𑁄𑀢𑀺. 𑀏𑀢𑀲𑁆𑀫𑀺𑀁 𑀅𑀧𑀭𑀺𑀳𑀻𑀦𑁂 𑀢𑀲𑁆𑀲 𑀯𑀺𑀧𑀸𑀓𑁄 𑀦𑀺𑀩𑁆𑀩𑀢𑁆𑀢𑀫𑀸𑀦𑁄 𑀢𑀧𑁆𑀧𑀝𑀺𑀧𑀤𑁄𑀯 𑀪𑀯𑀺𑀢𑀼𑀁 𑀅𑀭𑀳𑀢𑀻𑀢𑀺. 𑀙𑀦𑁆𑀤𑀸𑀥𑀺𑀧𑀢𑁂𑀬𑁆𑀬𑀸𑀤𑀺𑀪𑀸𑀯𑁄 𑀧𑀦 𑀢𑀲𑁆𑀫𑀺𑀁 𑀔𑀡𑁂 𑀯𑀺𑀚𑁆𑀚𑀫𑀸𑀦𑀸𑀦𑀁 𑀙𑀦𑁆𑀤𑀸𑀤𑀻𑀦𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑀪𑀸𑀯𑁂𑀦 𑀳𑁄𑀢𑀺, 𑀦 𑀆𑀕𑀫𑀦𑀯𑀲𑁂𑀦. 𑀢𑀣𑀸 𑀳𑀺 𑀏𑀓𑀫𑁂𑀯 𑀛𑀸𑀦𑀁 𑀦𑀸𑀦𑀸𑀓𑁆𑀔𑀡𑁂𑀲𑀼 𑀦𑀸𑀦𑀸𑀥𑀺𑀧𑀢𑁂𑀬𑁆𑀬𑀁 𑀳𑁄𑀢𑀺. 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲𑁂𑀯 𑀳𑀺 𑀘𑀢𑀼𑀭𑀺𑀤𑁆𑀥𑀺𑀧𑀸𑀤𑀪𑀸𑀯𑁂𑀦 𑀪𑀸𑀯𑀦𑀸 𑀳𑁄𑀢𑀺, 𑀢𑀲𑁆𑀫𑀸 𑀯𑀺𑀧𑀸𑀓𑀲𑁆𑀲 𑀆𑀕𑀫𑀦𑀯𑀲𑁂𑀦 𑀙𑀦𑁆𑀤𑀸𑀥𑀺𑀧𑀢𑁂𑀬𑁆𑀬𑀸𑀤𑀺𑀢𑀸 𑀦 𑀯𑀼𑀢𑁆𑀢𑀸.

𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀓𑀣𑀸𑀯𑀡𑁆𑀡𑀦𑀸

𑁫𑁦𑁫. 𑀬𑀣𑀸 𑀯𑀝𑁆𑀝𑀁 𑀆𑀘𑀺𑀦𑀢𑀺, 𑀢𑀣𑀸 𑀢𑀡𑁆𑀳𑀸𑀤𑀻𑀳𑀺 𑀅𑀪𑀺𑀲𑀗𑁆𑀔𑀢𑀁 𑀮𑁄𑀓𑀺𑀬𑀓𑀫𑁆𑀫𑀁 𑀉𑀧𑀘𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀮𑁄𑀓𑀼𑀢𑁆𑀢𑀭𑀁 𑀧𑀦 𑀏𑀯𑀁 𑀦 𑀳𑁄𑀢𑀻𑀢𑀺 𑀢𑀣𑀸 𑀦 𑀯𑀼𑀢𑁆𑀢𑀁. 𑀲𑀼𑀤𑁆𑀥𑀸𑀕𑀫𑀦𑀯𑀲𑁂𑀦𑀸𑀢𑀺 𑀅𑀦𑀺𑀫𑀺𑀢𑁆𑀢𑀸𑀧𑁆𑀧𑀡𑀺𑀳𑀺𑀢𑀦𑀸𑀫𑀤𑀸𑀬𑀓𑁂𑀳𑀺 𑀲𑀕𑀼𑀡𑀸𑀭𑀫𑁆𑀫𑀡𑁂𑀳𑀺 𑀯𑀺𑀚𑁆𑀚𑀫𑀸𑀦𑁂𑀳𑀺𑀧𑀺 𑀨𑀮𑀲𑁆𑀲 𑀲𑀼𑀜𑁆𑀜𑀢𑀦𑀸𑀫𑀤𑀸𑀦𑀤𑀻𑀧𑀦𑁂 𑀅𑀕𑁆𑀕𑀳𑀺𑀢𑀪𑀸𑀯𑁂𑀦𑁂𑀯 𑀅𑀯𑁄𑀫𑀺𑀲𑁆𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀆𑀕𑀫𑀦𑀢𑁄 𑀲𑀼𑀜𑁆𑀜𑀢𑀸𑀧𑁆𑀧𑀡𑀺𑀳𑀺𑀢𑀦𑀸𑀫𑀯𑀢𑁄 𑀫𑀕𑁆𑀕𑀲𑁆𑀲 𑀆𑀕𑀫𑀦𑀻𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀦𑀸𑀫𑀢𑁆𑀢𑀬𑀤𑀸𑀦𑀁 𑀬𑁄𑀚𑀺𑀢𑀁, 𑀇𑀢𑀭𑀲𑁆𑀲𑀧𑀺 𑀧𑀦 𑀢𑀣𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀦𑀬𑀫𑀢𑁆𑀢𑀤𑀲𑁆𑀲𑀦𑀜𑁆𑀳𑁂𑀢𑀁. 𑀲𑀕𑀼𑀡𑀸𑀭𑀫𑁆𑀫𑀡𑁂𑀳𑀺 𑀧𑀦 𑀦𑀸𑀫𑀢𑁆𑀢𑀬𑀯𑀢𑁄 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀦𑀦𑁆𑀢𑀭𑀲𑁆𑀲𑀧𑀺 𑀫𑀕𑁆𑀕𑀲𑁆𑀲 𑀆𑀕𑀫𑀦𑀻𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀦𑀸𑀫𑀢𑁆𑀢𑀬𑀤𑀸𑀦𑀁 𑀦 𑀦𑀺𑀯𑀸𑀭𑀺𑀢𑀦𑁆𑀢𑀺. 𑀯𑀴𑀜𑁆𑀚𑀦𑀓𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀘 𑀯𑀺𑀧𑀲𑁆𑀲𑀦𑀸𑀕𑀫𑀦𑀯𑀲𑁂𑀦 𑀦𑀸𑀫𑀮𑀸𑀪𑁂 𑀫𑀕𑁆𑀕𑀲𑁆𑀲 𑀯𑀺𑀬 𑀅𑀦𑀺𑀫𑀺𑀢𑁆𑀢𑀦𑀸𑀫𑀮𑀸𑀪𑁄 𑀦 𑀲𑀺𑀬𑀸. 𑀬𑀣𑀸 𑀧𑀦 𑀫𑀕𑁆𑀕𑀸𑀦𑀦𑁆𑀢𑀭𑀲𑁆𑀲 𑀯𑀺𑀬 𑀯𑀴𑀜𑁆𑀚𑀦𑀓𑀨𑀮𑀲𑀫𑀸𑀧𑀢𑁆𑀢𑀺𑀬𑀸𑀧𑀺 𑀛𑀸𑀦𑀧𑀝𑀺𑀧𑀤𑀸𑀪𑁂𑀤𑁄 𑀳𑁄𑀢𑀺, 𑀏𑀯𑀁 𑀲𑀼𑀜𑁆𑀜𑀢𑀸𑀤𑀺𑀦𑀸𑀫𑀮𑀸𑀪𑁂 𑀲𑀢𑀺 𑀅𑀦𑀺𑀫𑀺𑀢𑁆𑀢𑀦𑀸𑀫𑀜𑁆𑀘 𑀮𑀪𑀢𑀻𑀢𑀺. 𑀅𑀯𑀽𑀧𑀲𑀦𑁆𑀢𑀸𑀬𑀸𑀢𑀺 𑀇𑀤𑀁 𑀓𑁂𑀦𑀘𑀺 𑀅𑀜𑁆𑀜𑁂𑀦 𑀅𑀦𑀦𑁆𑀢𑀭𑀺𑀢𑀢𑁆𑀢𑀸 𑀢𑀸𑀤𑀺𑀲𑀸𑀬 𑀏𑀯 𑀲𑀤𑁆𑀥𑀸𑀬…𑀧𑁂… 𑀧𑀜𑁆𑀜𑀸𑀬 𑀘 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦 𑀙𑀦𑁆𑀤𑀸𑀤𑀬𑁄𑀧𑀺 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀲𑀤𑀺𑀲𑀸𑀦𑀁 𑀙𑀦𑁆𑀤𑀸𑀤𑀻𑀦𑀁 𑀉𑀧𑁆𑀧𑀸𑀤𑀓𑀸 𑀅𑀥𑀺𑀧𑀢𑀺𑀪𑀽𑀢𑀸 𑀅𑀥𑀺𑀧𑀢𑀺𑀪𑀽𑀢𑁂 𑀏𑀯 𑀉𑀧𑁆𑀧𑀸𑀤𑁂𑀦𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺.

𑁫𑁫𑁫. 𑀓𑀺𑀮𑁂𑀲𑀲𑀫𑀼𑀘𑁆𑀙𑁂𑀤𑀓𑀲𑁆𑀲 𑀫𑀕𑁆𑀕𑀲𑁆𑀲 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀓𑀲𑁆𑀲 𑀦𑀺𑀬𑁆𑀬𑀸𑀦𑀺𑀓𑀲𑀪𑀸𑀯𑀲𑁆𑀲 𑀨𑀮𑁂𑀦𑀧𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀓𑀺𑀮𑁂𑀲𑁂𑀦 𑀦𑀺𑀬𑁆𑀬𑀸𑀦𑀲𑀪𑀸𑀯𑁂𑀦𑁂𑀯 𑀪𑀯𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀨𑀮𑁂𑀧𑀺 ‘‘𑀫𑀕𑁆𑀕𑀗𑁆𑀕𑀁 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀫𑀕𑁆𑀕𑀯𑀺𑀪𑀗𑁆𑀕𑁂 𑀨𑀮𑁂𑀲𑀼 𑀘 𑀅𑀝𑁆𑀞𑀗𑁆𑀕𑀺𑀓𑁄 𑀧𑀜𑁆𑀘𑀗𑁆𑀕𑀺𑀓𑁄 𑀘 𑀫𑀕𑁆𑀕𑁄 𑀉𑀤𑁆𑀥𑀝𑁄, 𑀏𑀯𑀁 𑀩𑁄𑀚𑁆𑀛𑀗𑁆𑀕𑀸𑀧𑀻𑀢𑀺. 𑀫𑀕𑁆𑀕𑀁 𑀉𑀧𑀸𑀤𑀸𑀬𑀸𑀢𑀺 𑀫𑀕𑁆𑀕𑀲𑀤𑀺𑀲𑀢𑀸𑀬 𑀫𑀕𑁆𑀕𑁄𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀳.

𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀓𑀼𑀲𑀮𑀯𑀺𑀧𑀸𑀓𑀓𑀣𑀸𑀯𑀡𑁆𑀡𑀦𑀸

𑁫𑁫𑁬. 𑀇𑀝𑁆𑀞𑀇𑀝𑁆𑀞𑀫𑀚𑁆𑀛𑀢𑁆𑀢𑁂𑀲𑀼 𑀯𑀺𑀬 𑀦 𑀅𑀦𑀺𑀝𑁆𑀞𑀅𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑁂𑀲𑀼 𑀲𑀦𑁆𑀢𑀻𑀭𑀡𑀯𑀺𑀲𑁂𑀲𑁄 𑀅𑀢𑁆𑀣𑀺, 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀫𑁂𑀯 𑀧𑀦 𑀅𑀥𑀺𑀫𑀢𑁆𑀢𑀁 𑀫𑀦𑁆𑀤𑀜𑁆𑀘 𑀏𑀯𑀁 𑀤𑁆𑀯𑀺𑀥𑀸 𑀯𑀼𑀢𑁆𑀢𑀁.

𑀅𑀓𑀼𑀲𑀮𑀯𑀺𑀧𑀸𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.