𑁧. 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑀁

𑀢𑀺𑀓𑀫𑀸𑀢𑀺𑀓𑀸𑀧𑀤𑀯𑀡𑁆𑀡𑀦𑀸

𑀇𑀤𑀸𑀦𑀺 𑀧𑀝𑀺𑀜𑁆𑀜𑀸𑀢𑀓𑀣𑀁 𑀓𑀸𑀢𑀼𑀁 ‘‘𑀇𑀤𑀸𑀦𑀺 𑀇𑀢𑀺 𑀫𑁂…𑀧𑁂… 𑀓𑀣𑀦𑁄𑀓𑀸𑀲𑁄 𑀲𑀫𑁆𑀧𑀢𑁆𑀢𑁄’’𑀢𑀺𑀆𑀤𑀺𑀫𑀸𑀳. 𑀇𑀢𑁄 𑀧𑀝𑁆𑀞𑀸𑀬𑀸𑀢𑀺 𑀓𑀼𑀲𑀮𑀥𑀫𑁆𑀫𑀧𑀤𑀢𑁄 𑀧𑀝𑁆𑀞𑀸𑀬.

𑁧. 𑀲𑀩𑁆𑀩𑀧𑀤𑁂𑀳𑀺 𑀮𑀤𑁆𑀥𑀦𑀸𑀫𑁄𑀢𑀺 𑀢𑀻𑀲𑀼𑀧𑀺 𑀧𑀤𑁂𑀲𑀼 𑀯𑁂𑀤𑀦𑀸𑀲𑀤𑁆𑀤𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀢𑁂𑀦 𑀮𑀤𑁆𑀥𑀦𑀸𑀫𑁄 𑀲𑀩𑁆𑀩𑀧𑀤𑁂𑀳𑀺 𑀮𑀤𑁆𑀥𑀦𑀸𑀫𑁄 𑀳𑁄𑀢𑀺. 𑀦𑀦𑀼 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸𑀢𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺, 𑀏𑀯𑀁 𑀲𑁂𑀲𑁂𑀲𑀼𑀧𑀻𑀢𑀺 𑀤𑁆𑀯𑀸𑀤𑀲𑁂𑀢𑀸𑀦𑀺 𑀧𑀤𑀸𑀦𑀺, 𑀦 𑀢𑀻𑀡𑀻𑀢𑀺 𑀯𑁂𑀤𑀦𑀸𑀲𑀤𑁆𑀤𑀲𑁆𑀲 𑀧𑀤𑀢𑁆𑀢𑀬𑀸𑀯𑀬𑀯𑀢𑁆𑀢𑀁 𑀲𑀦𑁆𑀥𑀸𑀬 ‘‘𑀲𑀩𑁆𑀩𑀧𑀤𑁂𑀳𑀻’’𑀢𑀺 𑀯𑀼𑀘𑁆𑀘𑁂𑀬𑁆𑀬, 𑀦 𑀬𑀼𑀢𑁆𑀢𑀁. ‘‘𑀯𑁂𑀤𑀦𑀸𑀬𑀸’’𑀢𑀺 𑀳𑀺 𑀯𑀺𑀲𑀼𑀁 𑀧𑀤𑀁 𑀦 𑀓𑀲𑁆𑀲𑀘𑀺 𑀧𑀤𑀲𑁆𑀲 𑀅𑀯𑀬𑀯𑁄 𑀳𑁄𑀢𑀺, 𑀦𑀸𑀧𑀺 𑀲𑀼𑀔𑀸𑀤𑀺𑀧𑀤𑀪𑀸𑀯𑀁 𑀪𑀚𑀢𑀻𑀢𑀺 𑀢𑁂𑀦 𑀮𑀤𑁆𑀥𑀦𑀸𑀫𑁄 𑀓𑀣𑀁 𑀲𑀩𑁆𑀩𑀧𑀤𑁂𑀳𑀺 𑀮𑀤𑁆𑀥𑀦𑀸𑀫𑁄 𑀲𑀺𑀬𑀸𑀢𑀺? 𑀅𑀥𑀺𑀧𑁆𑀧𑁂𑀢𑀧𑁆𑀧𑀓𑀸𑀭𑀢𑁆𑀣𑀕𑀫𑀓𑀲𑁆𑀲 𑀧𑀤𑀲𑀫𑀼𑀤𑀸𑀬𑀲𑁆𑀲 𑀧𑀤𑀢𑁆𑀢𑀸. 𑀧𑀚𑁆𑀚𑀢𑀺 𑀅𑀯𑀩𑀼𑀚𑁆𑀛𑀻𑀬𑀢𑀺 𑀏𑀢𑁂𑀦𑀸𑀢𑀺 𑀳𑀺 𑀧𑀤𑀁, ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸’’𑀢𑀺 𑀏𑀢𑁂𑀦 𑀘 𑀧𑀤𑀲𑀫𑀼𑀤𑀸𑀬𑁂𑀦 𑀬𑀣𑀸𑀥𑀺𑀧𑁆𑀧𑁂𑀢𑁄 𑀅𑀢𑁆𑀣𑁄 𑀲𑀫𑀢𑁆𑀢𑁄 𑀯𑀺𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀲𑁄 𑀧𑀤𑀲𑀫𑀼𑀤𑀸𑀬𑁄 ‘‘𑀧𑀤’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀇𑀢𑀭𑁂𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀲𑁆𑀫𑀸 𑀢𑁂𑀲𑀁 𑀢𑀺𑀡𑁆𑀡𑀁 𑀲𑀫𑀼𑀤𑀸𑀬𑀸𑀦𑀁 𑀅𑀯𑀬𑀯𑁂𑀦 𑀮𑀤𑁆𑀥𑀦𑀸𑀫𑁄 𑀲𑀩𑁆𑀩𑀧𑀤𑁂𑀳𑀺 𑀮𑀤𑁆𑀥𑀦𑀸𑀫𑁄𑀢𑀺 𑀬𑀼𑀢𑁆𑀢𑁄.

𑀕𑀦𑁆𑀣𑀢𑁄 𑀘 𑀅𑀢𑁆𑀣𑀢𑁄 𑀘𑀸𑀢𑀺 𑀏𑀢𑁆𑀣 𑀳𑁂𑀢𑀼𑀧𑀤𑀲𑀳𑁂𑀢𑀼𑀓𑀧𑀤𑀸𑀤𑀻𑀳𑀺 𑀲𑀫𑁆𑀩𑀦𑁆𑀥𑀢𑁆𑀢𑀸 𑀕𑀦𑁆𑀣𑀢𑁄 𑀘 𑀳𑁂𑀢𑀼𑀅𑀢𑁆𑀣𑀲𑀳𑁂𑀢𑀼𑀓𑀢𑁆𑀣𑀸𑀤𑀻𑀳𑀺 𑀲𑀫𑁆𑀩𑀦𑁆𑀥𑀢𑁆𑀢𑀸 𑀅𑀢𑁆𑀣𑀢𑁄 𑀘 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀳𑁂𑀢𑀼𑀓𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑀸 𑀳𑀺 𑀳𑁂𑀢𑀼𑀤𑀼𑀓𑁂 𑀳𑁂𑀢𑀽𑀳𑀺 𑀲𑀫𑁆𑀩𑀦𑁆𑀥𑀢𑁆𑀢𑀸 𑀳𑁂𑀢𑀼𑀤𑀼𑀓𑀲𑀫𑁆𑀩𑀦𑁆𑀥𑀸, 𑀳𑁂𑀢𑀼𑀲𑀳𑁂𑀢𑀼𑀓𑀤𑀼𑀓𑁄 𑀳𑁂𑀢𑀼𑀤𑀼𑀓𑀲𑀳𑁂𑀢𑀼𑀓𑀤𑀼𑀓𑀲𑀫𑁆𑀩𑀦𑁆𑀥𑁄 𑀉𑀪𑀬𑁂𑀓𑀧𑀤𑀯𑀲𑁂𑀦. 𑀢𑀣𑀸 𑀳𑁂𑀢𑀼𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑁄 𑀳𑁂𑀢𑀼𑀤𑀼𑀓𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑀲𑀫𑁆𑀩𑀦𑁆𑀥𑁄, 𑀦𑀳𑁂𑀢𑀼𑀲𑀳𑁂𑀢𑀼𑀓𑀤𑀼𑀓𑁄 𑀏𑀓𑀤𑁆𑀯𑀺𑀧𑀤𑀯𑀲𑁂𑀦 𑀳𑁂𑀢𑀼𑀤𑀼𑀓𑀲𑀳𑁂𑀢𑀼𑀓𑀤𑀼𑀓𑀲𑀫𑁆𑀩𑀦𑁆𑀥𑁄𑀢𑀺. 𑀓𑀡𑁆𑀡𑀺𑀓𑀸 𑀯𑀺𑀬𑀸𑀢𑀺 𑀧𑀼𑀧𑁆𑀨𑀫𑀬𑀓𑀡𑁆𑀡𑀺𑀓𑀸 𑀯𑀺𑀬. 𑀖𑀝𑀸 𑀯𑀺𑀬𑀸𑀢𑀺 𑀧𑀼𑀧𑁆𑀨𑀳𑀢𑁆𑀣𑀓𑀸𑀤𑀻𑀲𑀼 𑀧𑀼𑀧𑁆𑀨𑀸𑀤𑀻𑀦𑀁 𑀲𑀫𑀽𑀳𑁄 𑀯𑀺𑀬. 𑀓𑀡𑁆𑀡𑀺𑀓𑀸𑀖𑀝𑀸𑀤𑀻𑀲𑀼 𑀳𑀺 𑀧𑀼𑀧𑁆𑀨𑀸𑀤𑀻𑀦𑀺 𑀯𑀡𑁆𑀝𑀸𑀤𑀻𑀳𑀺 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑀸𑀦𑀺 𑀳𑁄𑀦𑁆𑀢𑀻𑀢𑀺 𑀢𑀣𑀸𑀲𑀫𑁆𑀩𑀦𑁆𑀥𑀢𑀸 𑀏𑀢𑁂𑀲𑀁 𑀤𑀼𑀓𑀸𑀦𑀁 𑀯𑀼𑀢𑁆𑀢𑀸. 𑀤𑀼𑀓𑀲𑀸𑀫𑀜𑁆𑀜𑀢𑁄𑀢𑀺 𑀅𑀜𑁆𑀜𑁂𑀳𑀺 𑀳𑁂𑀢𑀼𑀤𑀼𑀓𑀸𑀤𑀻𑀳𑀺 𑀤𑀼𑀓𑀯𑀲𑁂𑀦 𑀲𑀫𑀸𑀦𑀪𑀸𑀯𑀸. 𑀅𑀜𑁆𑀜𑁂𑀳𑀻𑀢𑀺 𑀲𑀸𑀭𑀫𑁆𑀫𑀡𑀤𑀼𑀓𑀸𑀤𑀻𑀳𑀺. 𑀅𑀲𑀗𑁆𑀕𑀳𑀺𑀢𑁄 𑀧𑀤𑁂𑀲𑁄 𑀬𑁂𑀲𑀁 𑀅𑀢𑁆𑀣𑀺, 𑀢𑁂 𑀲𑀧𑁆𑀧𑀤𑁂𑀲𑀸. 𑀬𑁂𑀲𑀁 𑀧𑀦 𑀦𑀢𑁆𑀣𑀺, 𑀢𑁂 𑀦𑀺𑀧𑁆𑀧𑀤𑁂𑀲𑀸.

‘‘𑀓𑀘𑁆𑀘𑀺 𑀦𑀼 𑀪𑁄𑀢𑁄 𑀓𑀼𑀲𑀮’’𑀦𑁆𑀢𑀺 𑀏𑀯𑀁 𑀧𑀼𑀘𑁆𑀙𑀺𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀧𑀼𑀘𑁆𑀙𑀺𑀢𑀼𑀁 ‘‘𑀓𑀘𑁆𑀘𑀺 𑀪𑁄𑀢𑁄 𑀅𑀦𑀸𑀫𑀬’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀓𑀼𑀲𑀮𑀲𑀤𑁆𑀤𑁄 𑀅𑀦𑀸𑀫𑀬𑀢𑁆𑀣𑁄 𑀳𑁄𑀢𑀺. 𑀩𑀸𑀳𑀺𑀢𑀺𑀓𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁩𑁬𑁧) 𑀪𑀕𑀯𑀢𑁄 𑀓𑀸𑀬𑀲𑀫𑀸𑀘𑀸𑀭𑀸𑀤𑀬𑁄 𑀯𑀡𑁆𑀡𑁂𑀦𑁆𑀢𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 ‘‘𑀬𑁄 𑀔𑁄, 𑀫𑀳𑀸𑀭𑀸𑀚, 𑀓𑀸𑀬𑀲𑀫𑀸𑀘𑀸𑀭𑁄 𑀅𑀦𑀯𑀚𑁆𑀚𑁄’’𑀢𑀺 𑀓𑀼𑀲𑀮𑁄 𑀓𑀸𑀬𑀲𑀫𑀸𑀘𑀸𑀭𑁄 𑀯𑀼𑀢𑁆𑀢𑁄. 𑀦 𑀳𑀺 𑀪𑀕𑀯𑀢𑁄 𑀲𑀼𑀔𑀯𑀺𑀧𑀸𑀓𑀁 𑀓𑀫𑁆𑀫𑀁 𑀅𑀢𑁆𑀣𑀻𑀢𑀺 𑀲𑀩𑁆𑀩𑀲𑀸𑀯𑀚𑁆𑀚𑀭𑀳𑀺𑀢𑀸 𑀓𑀸𑀬𑀲𑀫𑀸𑀘𑀸𑀭𑀸𑀤𑀬𑁄 𑀓𑀼𑀲𑀮𑀸𑀢𑀺 𑀯𑀼𑀢𑁆𑀢𑀸. 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀘 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 ‘‘𑀓𑀼𑀲𑀮𑀸’’𑀢𑀺 𑀯𑀼𑀢𑁆𑀢𑀸. 𑀢𑁂 𑀘 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀲𑀫𑁆𑀧𑀬𑀼𑀢𑁆𑀢𑀸 𑀦 𑀏𑀓𑀦𑁆𑀢𑁂𑀦 𑀲𑀼𑀔𑀯𑀺𑀧𑀸𑀓𑀸𑀬𑁂𑀯𑀸𑀢𑀺 𑀅𑀦𑀯𑀚𑁆𑀚𑀢𑁆𑀣𑁄 𑀓𑀼𑀲𑀮𑀲𑀤𑁆𑀤𑁄. 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀦𑁆𑀢𑀺 𑀓𑀼𑀲𑀮𑀲𑀤𑁆𑀤𑀬𑁄𑀕𑁂𑀦 𑀪𑀼𑀫𑁆𑀫𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀯𑀸 𑀦𑀸𑀫𑀓𑀺𑀭𑀺𑀬𑀸𑀧𑀬𑁄𑀚𑀦𑀸𑀤𑀻𑀲𑀽𑀢𑀺 𑀅𑀢𑁆𑀣𑁄. 𑀦𑀘𑁆𑀘𑀕𑀻𑀢𑀲𑁆𑀲𑀸𑀢𑀺 𑀘 𑀲𑀸𑀫𑀺𑀯𑀘𑀦𑀁 𑀪𑀼𑀫𑁆𑀫𑀢𑁆𑀣𑁂, 𑀦𑀘𑁆𑀘𑀕𑀻𑀢𑀲𑁆𑀲 𑀯𑀺𑀲𑁂𑀲𑁂𑀲𑀽𑀢𑀺 𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀤𑀸𑀦𑀳𑁂𑀢𑀼 𑀏𑀯𑀫𑀺𑀤𑀁 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀧𑀼𑀜𑁆𑀜𑀯𑀺𑀧𑀸𑀓𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀁 ‘‘𑀓𑀼𑀲𑀮’’𑀦𑁆𑀢𑀺 𑀯𑀼𑀢𑁆𑀢𑀁. 𑀥𑀫𑁆𑀫𑀸 𑀳𑁄𑀦𑁆𑀢𑀻𑀢𑀺 𑀲𑀼𑀜𑁆𑀜𑀥𑀫𑁆𑀫𑀢𑁆𑀢𑀸 𑀲𑀪𑀸𑀯𑀫𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻𑀢𑀺 𑀏𑀢𑁆𑀣𑀸𑀧𑀺 𑀲𑀼𑀜𑁆𑀜𑀢𑀢𑁆𑀣𑁄 𑀥𑀫𑁆𑀫𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄.

𑀲𑀮𑀬𑀦𑁆𑀢𑀺…𑀧𑁂… 𑀯𑀺𑀤𑁆𑀥𑀁𑀲𑁂𑀦𑁆𑀢𑀻𑀢𑀺 𑀏𑀢𑁆𑀣 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀅𑀢𑁆𑀣𑀯𑀘𑀦𑀁. 𑀅𑀣 𑀯𑀸 𑀲𑀮𑀦𑀲𑁆𑀲 𑀅𑀢𑁆𑀣𑀤𑀻𑀧𑀦𑀸𑀦𑀺 𑀘𑀮𑀦𑀸𑀤𑀻𑀦𑀺 𑀢𑀻𑀡𑀺 𑀢𑀤𑀗𑁆𑀕𑀧𑁆𑀧𑀳𑀸𑀦𑀸𑀤𑀻𑀳𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀅𑀧𑁆𑀧𑀳𑀻𑀦𑀪𑀸𑀯𑁂𑀦 𑀲𑀦𑁆𑀢𑀸𑀦𑁂 𑀲𑀬𑀫𑀸𑀦𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀭𑀸𑀕𑀸𑀤𑀺𑀅𑀲𑀼𑀘𑀺𑀲𑀫𑁆𑀧𑀬𑁄𑀕𑀢𑁄 𑀦𑀸𑀦𑀸𑀯𑀺𑀥𑀤𑀼𑀓𑁆𑀔𑀳𑁂𑀢𑀼𑀢𑁄 𑀘 𑀓𑀼𑀘𑁆𑀙𑀺𑀢𑁂𑀦 𑀆𑀓𑀸𑀭𑁂𑀦 𑀲𑀬𑀦𑁆𑀢𑀺. 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀫𑁆𑀧𑀺 𑀜𑀸𑀡𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀲𑀩𑁆𑀩𑁂𑀧𑀺 𑀓𑀼𑀲𑀮𑀸 𑀥𑀫𑁆𑀫𑀸 𑀓𑀼𑀲𑁂𑀦 𑀜𑀸𑀡𑁂𑀦 𑀧𑀯𑀢𑁆𑀢𑁂𑀢𑀩𑁆𑀩𑀸𑀢𑀺 𑀓𑀼𑀲𑀮𑀸. 𑀉𑀧𑁆𑀧𑀦𑁆𑀦𑀁𑀲𑀸𑀦𑀼𑀧𑁆𑀧𑀦𑁆𑀦𑀁𑀲𑀪𑀸𑀕𑁂𑀲𑀼 𑀲𑀗𑁆𑀕𑀳𑀺𑀢𑀢𑁆𑀢𑀸 𑀉𑀪𑀬𑀪𑀸𑀕𑀕𑀢𑀁 𑀲𑀁𑀓𑀺𑀮𑁂𑀲𑀧𑀓𑁆𑀔𑀁 𑀧𑀳𑀸𑀦𑀸𑀦𑀼𑀧𑁆𑀧𑀸𑀤𑀦𑁂𑀳𑀺 𑀮𑀼𑀦𑀦𑁆𑀢𑀺 𑀲𑀫𑁆𑀫𑀧𑁆𑀧𑀥𑀸𑀦𑀤𑁆𑀯𑀬𑀁 𑀯𑀺𑀬.

𑀲𑀢𑁆𑀢𑀸𑀤𑀺𑀕𑀸𑀳𑀓𑀸𑀦𑀁 𑀘𑀺𑀢𑁆𑀢𑀸𑀦𑀁 𑀕𑁄𑀘𑀭𑀸 𑀲𑀢𑁆𑀢𑀸𑀤𑀬𑁄 𑀯𑀺𑀬 𑀧𑀜𑁆𑀜𑀸𑀬 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑀸 𑀦 𑀦𑀺𑀲𑁆𑀲𑀪𑀸𑀯𑀸, 𑀓𑀺𑀦𑁆𑀢𑀼 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀫𑁆𑀫𑀸. 𑀦 𑀘 𑀥𑀸𑀭𑀺𑀬𑀫𑀸𑀦𑀲𑀪𑀸𑀯𑀸 𑀅𑀜𑁆𑀜𑁄 𑀥𑀫𑁆𑀫𑁄 𑀦𑀸𑀫 𑀅𑀢𑁆𑀣𑀺. 𑀦 𑀳𑀺 𑀭𑀼𑀧𑁆𑀧𑀦𑀸𑀤𑀻𑀳𑀺 𑀅𑀜𑁆𑀜𑁂 𑀭𑀽𑀧𑀸𑀤𑀬𑁄, 𑀓𑀓𑁆𑀔𑀴𑀸𑀤𑀻𑀳𑀺 𑀘 𑀅𑀜𑁆𑀜𑁂 𑀧𑀣𑀯𑀻𑀆𑀤𑀬𑁄 𑀥𑀫𑁆𑀫𑀸 𑀯𑀺𑀚𑁆𑀚𑀦𑁆𑀢𑀻𑀢𑀺. 𑀅𑀜𑁆𑀜𑀣𑀸 𑀧𑀦 𑀅𑀯𑀩𑁄𑀥𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀦𑀸𑀫𑀯𑀲𑁂𑀦 𑀯𑀺𑀜𑁆𑀜𑀸𑀢𑀸𑀯𑀺𑀜𑁆𑀜𑀸𑀢𑁂 𑀲𑀪𑀸𑀯𑀥𑀫𑁆𑀫𑁂 𑀅𑀜𑁆𑀜𑁂 𑀯𑀺𑀬 𑀓𑀢𑁆𑀯𑀸 ‘‘𑀅𑀢𑁆𑀢𑀦𑁄 𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀧𑁆𑀧𑀘𑁆𑀘𑀬𑀥𑀫𑁆𑀫𑁂𑀲𑀼 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀥𑀸𑀭𑀻𑀬𑀦𑁆𑀢𑀺 𑀯𑀸 𑀧𑀘𑁆𑀘𑀬𑁂𑀳𑀻’’𑀢𑀺 𑀆𑀳. 𑀥𑀸𑀭𑀻𑀬𑀦𑁆𑀢𑀻𑀢𑀺 𑀉𑀧𑀥𑀸𑀭𑀻𑀬𑀦𑁆𑀢𑀺, 𑀮𑀓𑁆𑀔𑀻𑀬𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀅𑀓𑀼𑀲𑀮𑀸𑀢𑀺 𑀓𑀼𑀲𑀮𑀧𑀝𑀺𑀲𑁂𑀥𑀦𑀫𑀢𑁆𑀢𑀁 𑀓𑀼𑀲𑀮𑀸𑀪𑀸𑀯𑀫𑀢𑁆𑀢𑀯𑀘𑀦𑀁 𑀢𑀤𑀜𑁆𑀜𑀫𑀢𑁆𑀢𑀯𑀘𑀦𑀁 𑀯𑀸 𑀏𑀢𑀁 𑀦 𑀳𑁄𑀢𑀺, 𑀓𑀺𑀦𑁆𑀢𑀼 𑀢𑀧𑁆𑀧𑀝𑀺𑀧𑀓𑁆𑀔𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀫𑀺𑀢𑁆𑀢𑀧𑀝𑀺𑀧𑀓𑁆𑀔𑀸 𑀅𑀫𑀺𑀢𑁆𑀢𑀸 𑀯𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀧𑁆𑀧𑀝𑀺𑀧𑀓𑁆𑀔𑀯𑀘𑀦𑀢𑀸 𑀘 𑀅𑀩𑁆𑀬𑀸𑀓𑀢𑀢𑀢𑀺𑀬𑀭𑀸𑀲𑀺𑀯𑀘𑀦𑁂𑀦 𑀯𑀺𑀜𑁆𑀜𑀸𑀬𑀢𑀺. 𑀬𑀤𑀺 𑀳𑀺 𑀓𑀼𑀲𑀮𑀸𑀪𑀸𑀯𑀫𑀢𑁆𑀢𑀯𑀘𑀦𑀁 𑀅𑀓𑀼𑀲𑀮𑀲𑀤𑁆𑀤𑁄, 𑀢𑁂𑀦 𑀦 𑀓𑁄𑀘𑀺 𑀥𑀫𑁆𑀫𑁄 𑀯𑀼𑀢𑁆𑀢𑁄𑀢𑀺 𑀅𑀩𑁆𑀬𑀸𑀓𑀢𑀯𑀘𑀦𑁂𑀦𑁂𑀯 𑀘 𑀢𑀢𑀺𑀬𑁄 𑀭𑀸𑀲𑀺 𑀯𑀼𑀢𑁆𑀢𑁄 𑀦 𑀲𑀺𑀬𑀸, 𑀓𑀼𑀲𑀮𑀸 𑀘𑁂𑀯 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸 𑀘𑀸𑀢𑀺 𑀤𑀼𑀓𑁄𑀯𑀸𑀬𑀁 𑀆𑀧𑀚𑁆𑀚𑀢𑀺, 𑀦 𑀢𑀺𑀓𑁄, 𑀏𑀯𑀜𑁆𑀘 𑀲𑀢𑀺 𑀅𑀓𑀼𑀲𑀮𑀯𑀘𑀦𑁂𑀦 𑀦 𑀓𑁄𑀘𑀺 𑀅𑀢𑁆𑀣𑁄. 𑀅𑀣 𑀲𑀺𑀬𑀸, ‘‘𑀅𑀦𑀩𑁆𑀬𑀸𑀓𑀢𑀸’’𑀢𑀺 𑀘 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸 𑀓𑀼𑀲𑀮𑀸𑀦𑀁 𑀯𑀺𑀬 𑀅𑀩𑁆𑀬𑀸𑀓𑀢𑀸𑀦𑀜𑁆𑀘 𑀅𑀪𑀸𑀯𑀫𑀢𑁆𑀢𑀲𑀫𑁆𑀪𑀯𑀸, 𑀢𑀲𑁆𑀫𑀸 𑀅𑀪𑀸𑀯𑀫𑀢𑁆𑀢𑀯𑀘𑀦𑁂 𑀅𑀩𑁆𑀬𑀸𑀓𑀢𑀪𑀸𑀯𑀫𑀢𑁆𑀢𑀁 𑀯𑀺𑀬 𑀓𑀼𑀲𑀮𑀸𑀪𑀸𑀯𑀫𑀢𑁆𑀢𑀁 𑀅𑀓𑀼𑀲𑀮𑀁 𑀦 𑀓𑁄𑀘𑀺 𑀭𑀸𑀲𑀻𑀢𑀺 ‘‘𑀅𑀩𑁆𑀬𑀸𑀓𑀢𑀸’’𑀢𑀺 𑀢𑀢𑀺𑀬𑁄 𑀭𑀸𑀲𑀺 𑀦 𑀲𑀺𑀬𑀸. 𑀢𑀢𑀺𑀬𑀭𑀸𑀲𑀺𑀪𑀸𑀯𑁂𑀦 𑀘 𑀅𑀩𑁆𑀬𑀸𑀓𑀢𑀸 𑀯𑀼𑀢𑁆𑀢𑀸𑀢𑀺 𑀅𑀓𑀼𑀲𑀮𑁄 𑀘 𑀏𑀓𑁄 𑀭𑀸𑀲𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀢𑀲𑁆𑀫𑀸 𑀦𑀸𑀪𑀸𑀯𑀯𑀘𑀦𑀢𑀸, 𑀲𑀪𑀸𑀯𑀥𑀸𑀭𑀡𑀸𑀤𑀺𑀅𑀢𑁆𑀣𑁂𑀦 𑀥𑀫𑁆𑀫𑀲𑀤𑁆𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑀢𑁄 𑀘 𑀅𑀓𑀼𑀲𑀮𑀲𑀤𑁆𑀤𑀲𑁆𑀲 𑀓𑀼𑀲𑀮𑀸𑀪𑀸𑀯𑀫𑀢𑁆𑀢𑀯𑀘𑀦𑀢𑀸 𑀦 𑀳𑁄𑀢𑀺, 𑀦𑀸𑀧𑀺 𑀢𑀤𑀜𑁆𑀜𑀫𑀢𑁆𑀢𑀯𑀘𑀦𑀢𑀸 𑀢𑀢𑀺𑀬𑀭𑀸𑀲𑀺𑀯𑀘𑀦𑀢𑁄 𑀏𑀯. 𑀬𑀤𑀺 𑀳𑀺 𑀓𑀼𑀲𑀮𑁂𑀳𑀺 𑀅𑀜𑁆𑀜𑁂 𑀅𑀓𑀼𑀲𑀮𑀸 𑀘𑁂𑀢𑀲𑀺𑀓𑁂𑀳𑀺 𑀅𑀜𑁆𑀜𑁂 𑀅𑀘𑁂𑀢𑀲𑀺𑀓𑀸 𑀯𑀺𑀬, 𑀓𑀼𑀲𑀮𑀸𑀓𑀼𑀲𑀮𑀯𑀘𑀦𑁂𑀳𑀺 𑀲𑀩𑁆𑀩𑁂𑀲𑀁 𑀥𑀫𑁆𑀫𑀸𑀦𑀁 𑀲𑀗𑁆𑀕𑀳𑀺𑀢𑀢𑁆𑀢𑀸 𑀅𑀲𑀗𑁆𑀕𑀳𑀺𑀢𑀲𑁆𑀲 𑀢𑀢𑀺𑀬𑀭𑀸𑀲𑀺𑀲𑁆𑀲 𑀅𑀪𑀸𑀯𑀸 𑀘𑁂𑀢𑀲𑀺𑀓𑀤𑀼𑀓𑁄 𑀯𑀺𑀬 𑀅𑀬𑀜𑁆𑀘 𑀤𑀼𑀓𑁄 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸 ‘‘𑀓𑀼𑀲𑀮𑀸 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺, 𑀦 ‘‘𑀅𑀩𑁆𑀬𑀸𑀓𑀢𑀸’’𑀢𑀺 𑀢𑀢𑀺𑀬𑁄 𑀭𑀸𑀲𑀺 𑀯𑀢𑁆𑀢𑀩𑁆𑀩𑁄, 𑀯𑀼𑀢𑁆𑀢𑁄 𑀘 𑀲𑁄, 𑀢𑀲𑁆𑀫𑀸 𑀦 𑀢𑀤𑀜𑁆𑀜𑀫𑀢𑁆𑀢𑀯𑀘𑀦𑀁 𑀅𑀓𑀼𑀲𑀮𑀲𑀤𑁆𑀤𑁄, 𑀧𑀸𑀭𑀺𑀲𑁂𑀲𑁂𑀦 𑀢𑀧𑁆𑀧𑀝𑀺𑀧𑀓𑁆𑀔𑁂𑀲𑀼 𑀅-𑀓𑀸𑀭𑀲𑁆𑀲 𑀧𑀬𑁄𑀕𑀤𑀲𑁆𑀲𑀦𑀢𑁄 𑀮𑁄𑀓𑁂 ‘‘𑀅𑀫𑀺𑀢𑁆𑀢𑀸’’𑀢𑀺 𑀲𑀸𑀲𑀦𑁂 ‘‘𑀅𑀮𑁄𑀪𑁄’’𑀢𑀺 𑀇𑀥𑀸𑀧𑀺 𑀢𑀧𑁆𑀧𑀝𑀺𑀧𑀓𑁆𑀔𑀯𑀘𑀦𑀢𑀸 𑀅𑀓𑀼𑀲𑀮𑀲𑀤𑁆𑀤𑀲𑁆𑀲 𑀲𑀺𑀤𑁆𑀥𑀸, 𑀢𑀢𑁆𑀣 𑀦𑀺𑀭𑀼𑀴𑁆𑀳𑀢𑁆𑀢𑀸 𑀘 𑀦 𑀇𑀢𑀭𑀯𑀘𑀦𑀢𑀸, 𑀢𑀧𑁆𑀧𑀝𑀺𑀧𑀓𑁆𑀔𑀪𑀸𑀯𑁄 𑀘 𑀯𑀺𑀭𑀼𑀤𑁆𑀥𑀲𑀪𑀸𑀯𑀢𑁆𑀢𑀸 𑀢𑀧𑁆𑀧𑀳𑁂𑀬𑁆𑀬𑀪𑀸𑀯𑀢𑁄 𑀘 𑀯𑁂𑀤𑀺𑀢𑀩𑁆𑀩𑁄, 𑀦 𑀓𑀼𑀲𑀮𑀯𑀺𑀦𑀸𑀲𑀦𑀢𑁄. 𑀦 𑀳𑀺 𑀓𑀼𑀲𑀮𑀸 𑀅𑀓𑀼𑀲𑀮𑁂𑀳𑀺 𑀧𑀳𑀸𑀢𑀩𑁆𑀩𑀸, 𑀫𑀳𑀸𑀩𑀮𑀯𑀢𑀸𑀬 𑀧𑀦 𑀓𑀼𑀲𑀮𑀸𑀬𑁂𑀯 𑀧𑀬𑁄𑀕𑀦𑀺𑀧𑁆𑀨𑀸𑀤𑀺𑀢𑀸 𑀲𑀤𑀸𑀦𑀼𑀲𑀬𑀺𑀢𑁂 𑀅𑀓𑀼𑀲𑀮𑁂 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀚𑀳𑀦𑁆𑀢𑀻𑀢𑀺.

𑀦 𑀩𑁆𑀬𑀸𑀓𑀢𑀸𑀢𑀺 𑀅𑀓𑀣𑀺𑀢𑀸. 𑀓𑀣𑀁 𑀧𑀦𑁂𑀢𑁂 𑀅𑀓𑀣𑀺𑀢𑀸 𑀳𑁄𑀦𑁆𑀢𑀺, 𑀦𑀦𑀼 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺𑀆𑀤𑀻𑀳𑀺 𑀢𑀺𑀓𑀤𑀼𑀓𑀧𑀤𑁂𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀯𑀘𑀦𑁂𑀳𑀺 𑀨𑀲𑁆𑀲𑀸𑀤𑀺𑀯𑀘𑀦𑁂𑀳𑀺 𑀘 𑀓𑀣𑀺𑀢𑀸𑀢𑀺? 𑀦𑁄 𑀦 𑀓𑀣𑀺𑀢𑀸, 𑀢𑀸𑀦𑀺 𑀧𑀦 𑀯𑀘𑀦𑀸𑀦𑀺 𑀇𑀥 𑀅𑀦𑀥𑀺𑀧𑁆𑀧𑁂𑀢𑀸𑀦𑀺 𑀅𑀯𑀼𑀢𑁆𑀢𑀢𑁆𑀢𑀸 𑀅𑀦𑀦𑀼𑀯𑀢𑁆𑀢𑀦𑀢𑁄. 𑀦 𑀳𑀺 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸 ‘‘𑀅𑀩𑁆𑀬𑀸𑀓𑀢𑀸’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀦 𑀢𑀸𑀦𑀺 𑀇𑀥 𑀅𑀦𑀼𑀯𑀢𑁆𑀢𑀦𑁆𑀢𑀻𑀢𑀺 𑀢𑀩𑁆𑀩𑀘𑀦𑀻𑀬𑀪𑀸𑀯𑁂𑀦 𑀅𑀓𑀣𑀺𑀢𑀢𑀸 𑀦 𑀳𑁄𑀢𑀺, 𑀓𑀼𑀲𑀮𑀸𑀓𑀼𑀲𑀮𑀯𑀘𑀦𑀸𑀦𑀺 𑀧𑀦 𑀇𑀥 𑀯𑀼𑀢𑁆𑀢𑀢𑁆𑀢𑀸 𑀅𑀦𑀼𑀯𑀢𑁆𑀢𑀦𑁆𑀢𑀻𑀢𑀺 𑀢𑀩𑁆𑀩𑀘𑀦𑀻𑀬𑀪𑀸𑀯𑁂𑀦 𑀅𑀓𑀣𑀺𑀢𑀢𑀸 𑀜𑀸𑀬𑀢𑀻𑀢𑀺 ‘‘𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑁂𑀦 𑀅𑀓𑀣𑀺𑀢𑀸𑀢𑀺 𑀅𑀢𑁆𑀣𑁄’’𑀢𑀺 𑀆𑀳. 𑀦 𑀩𑁆𑀬𑀸𑀓𑀢𑀸𑀢𑀺 𑀯𑀸 𑀅𑀯𑀺𑀧𑀸𑀓𑀸, 𑀅𑀩𑁆𑀬𑀸𑀓𑀢𑀯𑀘𑀦𑁂𑀦𑁂𑀯 𑀘 𑀅𑀯𑀺𑀧𑀸𑀓𑀢𑁆𑀣𑀸 𑀜𑀸𑀬𑀦𑁆𑀢𑀺. 𑀦 𑀳𑀺 𑀪𑀕𑀯𑀢𑁄 𑀯𑀘𑀦𑀁 𑀜𑀸𑀧𑀓𑀲𑀸𑀥𑀦𑀻𑀬𑀁, 𑀆𑀲𑀬𑀸𑀦𑀼𑀲𑀬𑀘𑀭𑀺𑀬𑀸𑀤𑀺𑀓𑀼𑀲𑀮𑁂𑀦 𑀪𑀕𑀯𑀢𑀸 𑀬𑁂𑀲𑀁 𑀅𑀯𑀩𑁄𑀥𑀦𑀢𑁆𑀣𑀁 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀢𑁂𑀲𑀁 𑀯𑀘𑀦𑀸𑀦𑀦𑁆𑀢𑀭𑀁 𑀢𑀤𑀢𑁆𑀣𑀧𑀝𑀺𑀯𑁂𑀥𑀢𑁄, 𑀧𑀘𑁆𑀙𑀺𑀫𑁂𑀳𑀺 𑀧𑀦 𑀬𑀣𑀸 𑀢𑁂𑀲𑀁 𑀅𑀯𑀩𑁄𑀥𑀦𑀢𑁆𑀣𑀁 𑀪𑀕𑀯𑀢𑀸 𑀢𑀁 𑀢𑀁 𑀯𑀘𑀦𑀁 𑀯𑀼𑀢𑁆𑀢𑀁, 𑀬𑀣𑀸 𑀘 𑀢𑁂𑀳𑀺 𑀢𑀤𑀢𑁆𑀣𑁄 𑀧𑀝𑀺𑀯𑀺𑀤𑁆𑀥𑁄, 𑀢𑀁 𑀲𑀩𑁆𑀩𑀁 𑀆𑀘𑀭𑀺𑀬𑁂 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀲𑀼𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁 𑀳𑁄𑀢𑀺, 𑀢𑀲𑁆𑀫𑀸 𑀓𑀸𑀭𑀡𑀁 𑀅𑀯𑀢𑁆𑀯𑀸 ‘‘𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑁂𑀦 𑀅𑀓𑀣𑀺𑀢𑀸𑀢𑀺 𑀅𑀢𑁆𑀣𑁄’’𑀢𑀺 𑀆𑀳. 𑀬𑁄 𑀘 𑀯𑀤𑁂𑀬𑁆𑀬 ‘‘𑀅𑀓𑀼𑀲𑀮𑀯𑀺𑀧𑀸𑀓𑀪𑀸𑀯𑁂𑀦 𑀅𑀓𑀣𑀺𑀢𑀢𑁆𑀢𑀸, 𑀓𑀼𑀲𑀮𑀸 𑀅𑀩𑁆𑀬𑀸𑀓𑀢𑀸𑀢𑀺 𑀆𑀧𑀚𑁆𑀚𑀦𑁆𑀢𑀺, 𑀓𑀼𑀲𑀮𑀯𑀺𑀧𑀸𑀓𑀪𑀸𑀯𑁂𑀦 𑀅𑀓𑀣𑀺𑀢𑀢𑁆𑀢𑀸 𑀅𑀓𑀼𑀲𑀮𑀸𑀧𑀻’’𑀢𑀺, 𑀲𑁄𑀧𑀺 ‘‘𑀅𑀜𑁆𑀜𑀸𑀧𑀓𑀲𑀸𑀥𑀦𑀻𑀬𑀯𑀘𑀦𑁄 𑀪𑀕𑀯𑀸’’𑀢𑀺 𑀦𑀺𑀯𑀸𑀭𑁂𑀢𑀩𑁆𑀩𑁄 𑀅𑀦𑀼𑀯𑀢𑁆𑀢𑀫𑀸𑀦𑀯𑀘𑀦𑀯𑀘𑀦𑀻𑀬𑀪𑀸𑀯𑁂𑀦 𑀅𑀓𑀣𑀺𑀢𑀲𑁆𑀲 𑀘 𑀅𑀩𑁆𑀬𑀸𑀓𑀢𑀪𑀸𑀯𑀢𑁄. 𑀦 𑀳𑀺 𑀅𑀯𑀺𑀧𑀸𑀓𑀯𑀘𑀦𑀁 𑀯𑀼𑀢𑁆𑀢𑀁 𑀓𑀼𑀲𑀮𑀯𑀘𑀦𑀜𑁆𑀘 𑀅𑀯𑀼𑀢𑁆𑀢𑀁, 𑀬𑀢𑁄 𑀅𑀯𑀺𑀧𑀸𑀓𑀯𑀘𑀦𑀲𑁆𑀲 𑀅𑀥𑀺𑀓𑀢𑀪𑀸𑀯𑁄 𑀓𑀼𑀲𑀮𑀲𑁆𑀲 𑀘 𑀢𑀩𑁆𑀩𑀘𑀦𑀻𑀬𑀪𑀸𑀯𑁂𑀦 𑀅𑀓𑀣𑀺𑀢𑀪𑀸𑀯𑁄 𑀲𑀺𑀬𑀸, 𑀢𑀲𑁆𑀫𑀸 𑀦 𑀓𑀼𑀲𑀮𑀸𑀦𑀁 𑀅𑀩𑁆𑀬𑀸𑀓𑀢𑀢𑀸, 𑀏𑀯𑀁 𑀅𑀓𑀼𑀲𑀮𑀸𑀦𑀜𑁆𑀘 𑀅𑀦𑀩𑁆𑀬𑀸𑀓𑀢𑀪𑀸𑀯𑁂 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀅𑀣 𑀯𑀸 𑀯𑀺-𑀲𑀤𑁆𑀤𑁄 𑀯𑀺𑀭𑁄𑀥𑀯𑀘𑀦𑁄, 𑀆-𑀲𑀤𑁆𑀤𑁄 𑀅𑀪𑀺𑀫𑀼𑀔𑀪𑀸𑀯𑀧𑁆𑀧𑀓𑀸𑀲𑀦𑁄, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀅𑀜𑁆𑀜𑀫𑀜𑁆𑀜𑀯𑀺𑀭𑁄𑀥𑀸𑀪𑀺𑀫𑀼𑀔𑀸 𑀓𑀢𑀸, 𑀮𑀓𑁆𑀔𑀡𑀯𑀺𑀭𑁄𑀥𑀢𑁄 𑀯𑀺𑀦𑀸𑀲𑀓𑀯𑀺𑀦𑀸𑀲𑀺𑀢𑀩𑁆𑀩𑀢𑁄 𑀘𑀸𑀢𑀺 𑀩𑁆𑀬𑀸𑀓𑀢𑀸, 𑀓𑀼𑀲𑀮𑀸𑀓𑀼𑀲𑀮𑀸. 𑀦 𑀩𑁆𑀬𑀸𑀓𑀢𑀸𑀢𑀺 𑀅𑀩𑁆𑀬𑀸𑀓𑀢𑀸. 𑀢𑁂 𑀳𑀺 𑀮𑀓𑁆𑀔𑀡𑀢𑁄 𑀓𑀼𑀲𑀮𑀸𑀓𑀼𑀲𑀮𑀸 𑀯𑀺𑀬 𑀯𑀺𑀭𑀼𑀤𑁆𑀥𑀸 𑀦 𑀳𑁄𑀦𑁆𑀢𑀺. 𑀦 𑀳𑀺 𑀅𑀯𑀺𑀧𑀸𑀓𑀢𑀸 𑀤𑀼𑀓𑁆𑀔𑀯𑀺𑀧𑀸𑀓𑀢𑀸 𑀯𑀺𑀬 𑀲𑀼𑀔𑀯𑀺𑀧𑀸𑀓𑀢𑀸𑀬 𑀲𑀼𑀔𑀯𑀺𑀧𑀸𑀓𑀢𑀸 𑀯𑀺𑀬 𑀘 𑀤𑀼𑀓𑁆𑀔𑀯𑀺𑀧𑀸𑀓𑀢𑀸𑀬 𑀲𑀼𑀔𑀤𑀼𑀓𑁆𑀔𑀯𑀺𑀧𑀸𑀓𑀢𑀸𑀳𑀺 𑀯𑀺𑀭𑀼𑀚𑁆𑀛𑀢𑀻𑀢𑀺 𑀦𑀸𑀧𑀺 𑀢𑁂 𑀓𑀺𑀜𑁆𑀘𑀺 𑀧𑀚𑀳𑀦𑁆𑀢𑀺, 𑀦 𑀘 𑀢𑁂 𑀓𑁂𑀦𑀘𑀺 𑀧𑀳𑀸𑀢𑀩𑁆𑀩𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀢𑀦𑁄𑀫𑀢𑀺.

𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀮𑀓𑁆𑀔𑀡𑀸𑀢𑀺 𑀏𑀢𑁆𑀣 𑀦𑀢𑁆𑀣𑀺 𑀏𑀢𑁂𑀲𑀁 𑀅𑀯𑀚𑁆𑀚𑀦𑁆𑀢𑀺 𑀅𑀦𑀯𑀚𑁆𑀚𑀸, 𑀕𑀭𑀳𑀺𑀢𑀩𑁆𑀩𑀪𑀸𑀯𑀭𑀳𑀺𑀢𑀸 𑀦𑀺𑀤𑁆𑀤𑁄𑀲𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀦𑁂𑀲𑀁 𑀅𑀕𑀭𑀳𑀺𑀢𑀩𑁆𑀩𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀦 𑀕𑀸𑀭𑀬𑁆𑀳𑀯𑀺𑀭𑀳𑀫𑀢𑁆𑀢𑀁. 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀦𑀺𑀤𑁆𑀤𑁄𑀲𑀸 𑀅𑀩𑁆𑀬𑀸𑀓𑀢𑀸𑀢𑀺 𑀅𑀦𑀯𑀚𑁆𑀚𑀯𑀘𑀦𑀫𑀢𑁆𑀢𑁂𑀦 𑀢𑁂𑀲𑀫𑁆𑀧𑀺 𑀓𑀼𑀲𑀮𑀢𑀸𑀧𑀢𑁆𑀢𑀺𑀤𑁄𑀲𑀁 𑀤𑀺𑀲𑁆𑀯𑀸 𑀢𑀁 𑀧𑀭𑀺𑀳𑀭𑀺𑀢𑀼𑀁 𑀲𑀼𑀔𑀯𑀺𑀧𑀸𑀓𑀯𑀘𑀦𑀁 𑀆𑀳. 𑀅𑀯𑀚𑁆𑀚𑀧𑀝𑀺𑀧𑀓𑁆𑀔𑀸 𑀯𑀸 𑀇𑀥 𑀅𑀦𑀯𑀚𑁆𑀚𑀸𑀢𑀺 𑀯𑀼𑀢𑁆𑀢𑀸, 𑀦 𑀩𑀸𑀳𑀺𑀢𑀺𑀓𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁩𑁬𑁧) 𑀯𑀺𑀬 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸𑀯𑀚𑁆𑀚𑀸 𑀯𑀺𑀭𑀳𑀺𑀢𑀸𑀯𑀚𑁆𑀚𑀫𑀢𑁆𑀢𑀸 𑀯𑀸, 𑀢𑀲𑁆𑀫𑀸 𑀅𑀦𑀯𑀚𑁆𑀚𑀯𑀘𑀦𑁂𑀦 𑀅𑀯𑀚𑁆𑀚𑀯𑀺𑀦𑀸𑀲𑀦𑀪𑀸𑀯𑁄 𑀤𑀲𑁆𑀲𑀺𑀢𑁄. 𑀅𑀩𑁆𑀬𑀸𑀓𑀢𑁂𑀳𑀺 𑀧𑀦 𑀯𑀺𑀲𑀺𑀝𑁆𑀞𑀁 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀲𑀸𑀥𑀸𑀭𑀡𑀁 𑀲𑀯𑀺𑀧𑀸𑀓𑀢𑀸𑀮𑀓𑁆𑀔𑀡𑀦𑁆𑀢𑀺 𑀢𑀲𑁆𑀫𑀺𑀁 𑀮𑀓𑁆𑀔𑀡𑁂 𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀢𑀁 𑀲𑀼𑀔𑀯𑀺𑀧𑀸𑀓𑀯𑀘𑀦𑀁 𑀅𑀯𑁄𑀘. 𑀲𑀺𑀤𑁆𑀥𑁄 𑀳𑀺 𑀧𑀼𑀭𑀺𑀫𑁂𑀦𑁂𑀯 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀳𑀺 𑀓𑀼𑀲𑀮𑀸𑀦𑀁 𑀯𑀺𑀲𑁂𑀲𑁄𑀢𑀺. 𑀲𑀼𑀔𑁄 𑀯𑀺𑀧𑀸𑀓𑁄 𑀏𑀢𑁂𑀲𑀦𑁆𑀢𑀺 𑀲𑀼𑀔𑀯𑀺𑀧𑀸𑀓𑀸. 𑀢𑁂𑀦 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀲𑀸𑀫𑀜𑁆𑀜𑁂 𑀯𑀺𑀧𑀸𑀓𑀥𑀫𑁆𑀫𑀪𑀸𑀯𑁂 𑀲𑀼𑀔𑀯𑀺𑀧𑀸𑀓𑀯𑀺𑀧𑀘𑁆𑀘𑀦𑀲𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀦 𑀢𑁂𑀲𑀁 𑀲𑀼𑀔𑀯𑀺𑀧𑀸𑀓𑀲𑀩𑁆𑀪𑀸𑀯𑀫𑁂𑀯. 𑀅𑀦𑀯𑀚𑁆𑀚𑀸 𑀘 𑀢𑁂 𑀲𑀼𑀔𑀯𑀺𑀧𑀸𑀓𑀸 𑀘𑀸𑀢𑀺 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀸. 𑀓𑀼𑀲𑀮𑀸 𑀮𑀓𑁆𑀔𑀻𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀮𑀓𑁆𑀔𑀡𑀁, 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀮𑀓𑁆𑀔𑀡𑀁 𑀏𑀢𑁂𑀲𑀦𑁆𑀢𑀺 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀮𑀓𑁆𑀔𑀡𑀸. 𑀦𑀦𑀼 𑀢𑁂 𑀏𑀯 𑀓𑀼𑀲𑀮𑀸 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀸, 𑀓𑀣𑀁 𑀢𑁂 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀮𑀓𑁆𑀔𑀡𑀁 𑀳𑁄𑀦𑁆𑀢𑀻𑀢𑀺? 𑀯𑀺𑀜𑁆𑀜𑀸𑀢𑀸𑀯𑀺𑀜𑁆𑀜𑀸𑀢𑀲𑀤𑁆𑀤𑀢𑁆𑀣𑀪𑀸𑀯𑁂𑀦 𑀮𑀓𑁆𑀔𑀡𑀮𑀓𑁆𑀔𑀺𑀢𑀩𑁆𑀩𑀪𑀸𑀯𑀬𑀼𑀢𑁆𑀢𑀺𑀢𑁄. 𑀓𑀼𑀲𑀮𑀲𑀤𑁆𑀤𑀢𑁆𑀣𑀯𑀲𑁂𑀦 𑀳𑀺 𑀅𑀯𑀺𑀜𑁆𑀜𑀸𑀢𑀸 𑀓𑀼𑀲𑀮𑀸 𑀮𑀓𑁆𑀔𑀺𑀢𑀩𑁆𑀩𑀸 𑀳𑁄𑀦𑁆𑀢𑀺, 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀲𑀤𑁆𑀤𑀢𑁆𑀣𑀪𑀸𑀯𑁂𑀦 𑀯𑀺𑀜𑁆𑀜𑀸𑀢𑀸 𑀮𑀓𑁆𑀔𑀡𑀦𑁆𑀢𑀺 𑀬𑀼𑀢𑁆𑀢𑀫𑁂𑀢𑀁. 𑀅𑀣 𑀯𑀸 𑀮𑀓𑁆𑀔𑀻𑀬𑀢𑀻𑀢𑀺 𑀮𑀓𑁆𑀔𑀡𑀁, 𑀲𑀪𑀸𑀯𑁄. 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀸 𑀘 𑀢𑁂 𑀮𑀓𑁆𑀔𑀡𑀜𑁆𑀘𑀸𑀢𑀺 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀮𑀓𑁆𑀔𑀡𑀸, 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀸 𑀳𑀼𑀢𑁆𑀯𑀸 𑀮𑀓𑁆𑀔𑀺𑀬𑀫𑀸𑀦𑀸 𑀲𑀪𑀸𑀯𑀸 𑀓𑀼𑀲𑀮𑀸 𑀦𑀸𑀫𑀸𑀢𑀺 𑀅𑀢𑁆𑀣𑁄.

𑀅𑀣 𑀯𑀸 𑀅𑀦𑀯𑀚𑁆𑀚𑀯𑀘𑀦𑁂𑀦 𑀅𑀦𑀯𑀚𑁆𑀚𑀢𑁆𑀢𑀁 𑀆𑀳, 𑀲𑀼𑀔𑀯𑀺𑀧𑀸𑀓𑀯𑀘𑀦𑁂𑀦 𑀲𑀼𑀔𑀯𑀺𑀧𑀸𑀓𑀢𑁆𑀢𑀁, 𑀢𑀲𑁆𑀫𑀸 𑀅𑀦𑀯𑀚𑁆𑀚𑀜𑁆𑀘 𑀲𑀼𑀔𑀯𑀺𑀧𑀸𑀓𑁄 𑀘 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀁, 𑀢𑀁 𑀮𑀓𑁆𑀔𑀡𑀁 𑀏𑀢𑁂𑀲𑀁 𑀓𑀭𑀡𑀢𑁆𑀣𑁂 𑀘 𑀓𑀫𑁆𑀫𑀢𑁆𑀣𑁂 𑀘 𑀮𑀓𑁆𑀔𑀡𑀲𑀤𑁆𑀤𑁂 𑀲𑀪𑀸𑀯𑀪𑀽𑀢𑀦𑁆𑀢𑀺 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀮𑀓𑁆𑀔𑀡𑀸, 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀲𑀪𑀸𑀯𑁂𑀦 𑀮𑀓𑁆𑀔𑀺𑀬𑀫𑀸𑀦𑀸 𑀢𑀁𑀲𑀪𑀸𑀯𑀯𑀦𑁆𑀢𑁄 𑀘 𑀓𑀼𑀲𑀮𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀅𑀦𑀯𑀚𑁆𑀚𑀯𑀘𑀦𑁂𑀦 𑀧𑀯𑀢𑁆𑀢𑀺𑀲𑀼𑀔𑀢𑀁 𑀓𑀼𑀲𑀮𑀸𑀦𑀁 𑀤𑀲𑁆𑀲𑁂𑀢𑀺, 𑀲𑀼𑀔𑀯𑀺𑀧𑀸𑀓𑀯𑀘𑀦𑁂𑀦 𑀯𑀺𑀧𑀸𑀓𑀲𑀼𑀔𑀢𑀁. 𑀧𑀼𑀭𑀺𑀫𑀜𑁆𑀳𑀺 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀲𑀪𑀸𑀯𑀯𑀲𑁂𑀦 𑀮𑀓𑁆𑀔𑀡𑀢𑀸𑀯𑀘𑀦𑀁, 𑀧𑀘𑁆𑀙𑀺𑀫𑀁 𑀓𑀸𑀮𑀦𑁆𑀢𑀭𑁂 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀬𑀸𑀢𑀺. 𑀢𑀣𑀸 𑀧𑀼𑀭𑀺𑀫𑁂𑀦 𑀓𑀼𑀲𑀮𑀸𑀦𑀁 𑀅𑀢𑁆𑀢𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑀺, 𑀧𑀘𑁆𑀙𑀺𑀫𑁂𑀦 𑀯𑀺𑀲𑀼𑀤𑁆𑀥𑀯𑀺𑀧𑀸𑀓𑀢𑀁. 𑀧𑀼𑀭𑀺𑀫𑁂𑀦 𑀘 𑀓𑀼𑀲𑀮𑀁 𑀅𑀓𑀼𑀲𑀮𑀲𑀪𑀸𑀯𑀢𑁄 𑀦𑀺𑀯𑀢𑁆𑀢𑁂𑀢𑀺, 𑀧𑀘𑁆𑀙𑀺𑀫𑁂𑀦 𑀅𑀩𑁆𑀬𑀸𑀓𑀢𑀲𑀪𑀸𑀯𑀢𑁄 𑀲𑀯𑀺𑀧𑀸𑀓𑀢𑁆𑀢𑀤𑀻𑀧𑀓𑀢𑁆𑀢𑀸 𑀧𑀘𑁆𑀙𑀺𑀫𑀲𑁆𑀲. 𑀧𑀼𑀭𑀺𑀫𑁂𑀦 𑀯𑀸 𑀯𑀚𑁆𑀚𑀧𑀝𑀺𑀧𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁄 𑀓𑀺𑀘𑁆𑀘𑀝𑁆𑀞𑁂𑀦 𑀭𑀲𑁂𑀦 𑀅𑀓𑀼𑀲𑀮𑀯𑀺𑀤𑁆𑀥𑀁𑀲𑀦𑀭𑀲𑀢𑀁 𑀤𑀻𑀧𑁂𑀢𑀺, 𑀧𑀘𑁆𑀙𑀺𑀫𑁂𑀦 𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑁂𑀦 𑀇𑀝𑁆𑀞𑀯𑀺𑀧𑀸𑀓𑀭𑀲𑀢𑀁. 𑀧𑀼𑀭𑀺𑀫𑁂𑀦 𑀘 𑀉𑀧𑀝𑁆𑀞𑀸𑀦𑀸𑀓𑀸𑀭𑀝𑁆𑀞𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀦𑁂𑀦 𑀯𑁄𑀤𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀁 𑀤𑀲𑁆𑀲𑁂𑀢𑀺, 𑀧𑀘𑁆𑀙𑀺𑀫𑁂𑀦 𑀨𑀮𑀢𑁆𑀣𑁂𑀦 𑀲𑀼𑀔𑀯𑀺𑀧𑀸𑀓𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀁. 𑀧𑀼𑀭𑀺𑀫𑁂𑀦 𑀘 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀓𑀼𑀲𑀮𑀸𑀦𑀁 𑀧𑀤𑀝𑁆𑀞𑀸𑀦𑀁 𑀯𑀺𑀪𑀸𑀯𑁂𑀢𑀺. 𑀢𑀢𑁄 𑀳𑀺 𑀢𑁂 𑀅𑀦𑀯𑀚𑁆𑀚𑀸 𑀚𑀸𑀢𑀸𑀢𑀺. 𑀧𑀘𑁆𑀙𑀺𑀫𑁂𑀦 𑀓𑀼𑀲𑀮𑀸𑀦𑀁 𑀅𑀜𑁆𑀜𑁂𑀲𑀁 𑀧𑀤𑀝𑁆𑀞𑀸𑀦𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂 𑀳𑀺 𑀲𑀼𑀔𑀯𑀺𑀧𑀸𑀓𑀲𑁆𑀲 𑀓𑀸𑀭𑀡𑀁 𑀳𑁄𑀦𑁆𑀢𑀻𑀢𑀺. 𑀏𑀢𑁆𑀣 𑀘 𑀲𑀼𑀔𑀯𑀺𑀧𑀸𑀓𑀲𑀤𑁆𑀤𑁂 𑀲𑀼𑀔𑀲𑀤𑁆𑀤𑁄 𑀇𑀝𑁆𑀞𑀧𑀭𑀺𑀬𑀸𑀬𑀯𑀘𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑁄. 𑀇𑀝𑁆𑀞𑀘𑀢𑀼𑀓𑁆𑀔𑀦𑁆𑀥𑀯𑀺𑀧𑀸𑀓𑀸 𑀳𑀺 𑀓𑀼𑀲𑀮𑀸, 𑀦 𑀲𑀼𑀔𑀯𑁂𑀤𑀦𑀸𑀯𑀺𑀧𑀸𑀓𑀸𑀯. 𑀲𑀗𑁆𑀔𑀸𑀭𑀤𑀼𑀓𑁆𑀔𑁄𑀧𑀲𑀫𑀲𑀼𑀔𑀯𑀺𑀧𑀸𑀓𑀢𑀸𑀬 𑀘 𑀲𑀫𑁆𑀪𑀯𑁄 𑀏𑀯 𑀦𑀢𑁆𑀣𑀺. 𑀦 𑀳𑀺 𑀢𑀁𑀯𑀺𑀧𑀸𑀓𑁄𑀢𑀺. 𑀬𑀤𑀺 𑀧𑀦 𑀯𑀺𑀧𑀸𑀓𑀲𑀤𑁆𑀤𑁄 𑀨𑀮𑀧𑀭𑀺𑀬𑀸𑀬𑀯𑀘𑀦𑀁, 𑀦𑀺𑀲𑁆𑀲𑀦𑁆𑀤𑀯𑀺𑀧𑀸𑀓𑁂𑀦 𑀇𑀝𑁆𑀞𑀭𑀽𑀧𑁂𑀦𑀸𑀧𑀺 𑀲𑀼𑀔𑀯𑀺𑀧𑀸𑀓𑀢𑀸 𑀬𑁄𑀚𑁂𑀢𑀩𑁆𑀩𑀸.

𑀲𑀸𑀯𑀚𑁆𑀚𑀤𑀼𑀓𑁆𑀔𑀯𑀺𑀧𑀸𑀓𑀮𑀓𑁆𑀔𑀡𑀸𑀢𑀺 𑀏𑀢𑁆𑀣 𑀘 𑀯𑀼𑀢𑁆𑀢𑀯𑀺𑀥𑀺𑀅𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀘 𑀬𑁄𑀚𑀦𑀸 𑀘 𑀬𑀣𑀸𑀲𑀫𑁆𑀪𑀯𑀁 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀧𑀸𑀓𑀸𑀭𑀳𑀢𑀸 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀮𑀓𑁆𑀔𑀡𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀢𑀩𑁆𑀪𑀸𑀯𑁂𑀦 𑀅𑀓𑀣𑀺𑀢𑀸 𑀅𑀩𑁆𑀬𑀸𑀓𑀢𑀸 𑀅𑀯𑀺𑀧𑀸𑀓𑀸𑀭𑀳𑀲𑀪𑀸𑀯𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀅𑀯𑀺𑀧𑀸𑀓𑀮𑀓𑁆𑀔𑀡𑀸 𑀅𑀩𑁆𑀬𑀸𑀓𑀢𑀸’’𑀢𑀺. 𑀬𑀣𑁂𑀯 𑀳𑀺 𑀲𑀼𑀔𑀤𑀼𑀓𑁆𑀔𑀯𑀺𑀧𑀸𑀓𑀸𑀭𑀳𑀸 𑀲𑀼𑀔𑀤𑀼𑀓𑁆𑀔𑀯𑀺𑀧𑀸𑀓𑀸𑀢𑀺 𑀏𑀯𑀁𑀮𑀓𑁆𑀔𑀡𑀢𑀸 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀯𑀼𑀢𑁆𑀢𑀸, 𑀏𑀯𑀫𑀺𑀥𑀸𑀧𑀺 𑀅𑀯𑀺𑀧𑀸𑀓𑀸𑀭𑀳𑀸 𑀅𑀯𑀺𑀧𑀸𑀓𑀸𑀢𑀺 𑀏𑀯𑀁𑀮𑀓𑁆𑀔𑀡𑀢𑀸 𑀅𑀩𑁆𑀬𑀸𑀓𑀢𑀸𑀦𑀁 𑀯𑀼𑀢𑁆𑀢𑀸. 𑀢𑀲𑁆𑀫𑀸 ‘‘𑀅𑀳𑁄𑀲𑀺 𑀓𑀫𑁆𑀫𑀁 𑀦𑀸𑀳𑁄𑀲𑀺 𑀓𑀫𑁆𑀫𑀯𑀺𑀧𑀸𑀓𑁄 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄 𑀦𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀅𑀢𑁆𑀣𑀺 𑀓𑀫𑁆𑀫𑀁 𑀦𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀁 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 (𑀧𑀝𑀺. 𑀫. 𑁧.𑁨𑁩𑁪) 𑀏𑀯𑀁𑀧𑀓𑀸𑀭𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑀸𑀦𑀸𑀧𑀢𑁆𑀢𑀺 𑀅𑀩𑁆𑀬𑀸𑀓𑀢𑀪𑀸𑀯𑀸𑀧𑀢𑁆𑀢𑀺 𑀯𑀸 𑀦 𑀳𑁄𑀢𑀺. 𑀦 𑀳𑀺 𑀢𑁂 𑀲𑀼𑀔𑀤𑀼𑀓𑁆𑀔𑀯𑀺𑀧𑀸𑀓𑀸𑀭𑀳𑀸 𑀦 𑀳𑁄𑀦𑁆𑀢𑀺 𑀯𑀺𑀧𑀸𑀓𑀥𑀫𑁆𑀫𑀢𑁆𑀢𑀸, 𑀅𑀯𑀺𑀧𑀸𑀓𑀸𑀭𑀳𑀸 𑀯𑀸 𑀦 𑀳𑁄𑀦𑁆𑀢𑀺 𑀅𑀯𑀺𑀧𑀸𑀓𑀥𑀫𑁆𑀫𑀢𑁆𑀢𑀸𑀪𑀸𑀯𑀸𑀢𑀺.

𑀓𑀼𑀲𑀮𑀸𑀢𑀺 𑀯𑀸 𑀥𑀫𑁆𑀫𑀸𑀢𑀺 𑀯𑀸𑀢𑀺𑀆𑀤𑀻𑀦𑀻𑀢𑀺 𑀓𑀼𑀲𑀮𑀥𑀫𑁆𑀫𑀧𑀤𑀸𑀦𑀺 𑀤𑁆𑀯𑁂, 𑀅𑀓𑀼𑀲𑀮𑀥𑀫𑁆𑀫𑀧𑀤𑀸𑀦𑀺 𑀤𑁆𑀯𑁂, 𑀅𑀩𑁆𑀬𑀸𑀓𑀢𑀥𑀫𑁆𑀫𑀧𑀤𑀸𑀦𑀺 𑀤𑁆𑀯𑁂𑀢𑀺. 𑀏𑀓𑀢𑁆𑀣𑀦𑀸𑀦𑀢𑁆𑀣𑀸𑀦𑀻𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑀁 𑀏𑀓𑀢𑁆𑀣𑀦𑀸𑀦𑀢𑁆𑀣𑀢𑀁 𑀘𑁄𑀤𑁂𑀢𑀺, 𑀦 𑀙𑀦𑁆𑀦𑀁. 𑀤𑁄𑀲𑀫𑁂𑀢𑁆𑀣 𑀯𑀢𑁆𑀢𑀼𑀓𑀸𑀫𑁄 𑀘𑁄𑀤𑀓𑁄 𑀧𑀼𑀘𑁆𑀙𑀢𑀻𑀢𑀺 𑀜𑀢𑁆𑀯𑀸 𑀆𑀘𑀭𑀺𑀬𑁄 𑀆𑀳 ‘‘𑀓𑀺𑀜𑁆𑀘𑁂𑀢𑁆𑀣𑀸’’𑀢𑀺. 𑀏𑀢𑁆𑀣 𑀏𑀓𑀢𑁆𑀣𑀦𑀸𑀦𑀢𑁆𑀣𑀢𑀸𑀬𑀁 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁 𑀅𑀲𑀫𑀢𑁆𑀢𑀸 𑀢𑁂 𑀘𑁄𑀤𑀦𑀸, 𑀅𑀯𑀲𑀺𑀝𑁆𑀞𑀁 𑀢𑀸𑀯 𑀩𑁆𑀭𑀽𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀤𑀺 𑀏𑀓𑀢𑁆𑀣𑀸𑀦𑀺 𑀇𑀦𑁆𑀤𑀲𑀓𑁆𑀓𑀲𑀤𑁆𑀤𑀸𑀦𑀁 𑀯𑀺𑀬 𑀲𑀤𑁆𑀤𑀫𑀢𑁆𑀢𑁂 𑀏𑀯 𑀪𑁂𑀤𑁄, 𑀏𑀯𑀁 𑀓𑀼𑀲𑀮𑀥𑀫𑁆𑀫𑀲𑀤𑁆𑀤𑀸𑀦𑀁, 𑀦 𑀅𑀢𑁆𑀣𑁂𑀢𑀺. 𑀬𑀣𑀸 ‘‘𑀇𑀦𑁆𑀤𑁄 𑀲𑀓𑁆𑀓𑁄’’𑀢𑀺 𑀯𑀼𑀢𑁆𑀢𑁂 ‘‘𑀇𑀦𑁆𑀤𑁄 𑀇𑀦𑁆𑀤𑁄’’𑀢𑀺 𑀯𑀼𑀢𑁆𑀢𑀲𑀤𑀺𑀲𑀁 𑀳𑁄𑀢𑀺, 𑀏𑀯𑀁 ‘‘𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 𑀇𑀤𑀁 𑀯𑀘𑀦𑀁 ‘‘𑀓𑀼𑀲𑀮𑀸 𑀓𑀼𑀲𑀮𑀸’’𑀢𑀺 𑀯𑀼𑀢𑁆𑀢𑀲𑀤𑀺𑀲𑀁 𑀳𑁄𑀢𑀺. 𑀏𑀯𑀁 𑀇𑀢𑀭𑁂𑀲𑀼𑀧𑀺 ‘‘𑀅𑀓𑀼𑀲𑀮𑀸 𑀅𑀓𑀼𑀲𑀮𑀸’’𑀢𑀺 𑀯𑀼𑀢𑁆𑀢𑀲𑀤𑀺𑀲𑀢𑀸 ‘‘𑀅𑀩𑁆𑀬𑀸𑀓𑀢𑀸 𑀅𑀩𑁆𑀬𑀸𑀓𑀢𑀸’’𑀢𑀺 𑀯𑀼𑀢𑁆𑀢𑀲𑀤𑀺𑀲𑀢𑀸 𑀘 𑀬𑁄𑀚𑁂𑀢𑀩𑁆𑀩𑀸. 𑀅𑀣 𑀦𑀸𑀦𑀢𑁆𑀣𑀸𑀦𑀺, 𑀇𑀦𑁆𑀤𑀓𑀼𑀯𑁂𑀭𑀲𑀤𑁆𑀤𑀸𑀦𑀁 𑀯𑀺𑀬 𑀲𑀤𑁆𑀤𑀢𑁄 𑀅𑀢𑁆𑀣𑀢𑁄 𑀘 𑀓𑀼𑀲𑀮𑀥𑀫𑁆𑀫𑀲𑀤𑁆𑀤𑀸𑀦𑀁 𑀪𑁂𑀤𑁄, 𑀢𑀣𑀸 𑀅𑀓𑀼𑀲𑀮𑀥𑀫𑁆𑀫𑀲𑀤𑁆𑀤𑀸𑀤𑀻𑀦𑀦𑁆𑀢𑀺 𑀙𑀳𑀺 𑀧𑀤𑁂𑀳𑀺 𑀘𑀢𑀽𑀳𑀺 𑀧𑀤𑁂𑀳𑀺 𑀘 𑀙 𑀘𑀢𑁆𑀢𑀸𑀭𑁄 𑀘 𑀅𑀢𑁆𑀣𑀸 𑀪𑀺𑀦𑁆𑀦𑀸 𑀯𑀼𑀢𑁆𑀢𑀸𑀢𑀺 𑀓𑀼𑀲𑀮𑀢𑁆𑀢𑀺𑀓𑀸𑀤𑀻𑀦𑀁 𑀓𑀼𑀲𑀮𑀙𑀓𑁆𑀓𑀸𑀤𑀺𑀪𑀸𑀯𑁄, 𑀳𑁂𑀢𑀼𑀤𑀼𑀓𑀸𑀤𑀻𑀦𑀜𑁆𑀘 𑀳𑁂𑀢𑀼𑀘𑀢𑀼𑀓𑁆𑀓𑀸𑀤𑀺𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺.

𑀦𑀦𑀼 𑀢𑀺𑀡𑁆𑀡𑀁 𑀥𑀫𑁆𑀫𑀲𑀤𑁆𑀤𑀸𑀦𑀁 𑀢𑀺𑀡𑁆𑀡𑀁 𑀇𑀦𑁆𑀤𑀲𑀤𑁆𑀤𑀸𑀦𑀁 𑀯𑀺𑀬 𑀭𑀽𑀧𑀸𑀪𑁂𑀤𑀸 𑀅𑀢𑁆𑀣𑀸𑀪𑁂𑀤𑁄𑀢𑀺 𑀙𑀓𑁆𑀓𑀪𑀸𑀯𑁄 𑀦 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀏𑀯𑀫𑀺𑀤𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸 ‘‘𑀢𑀺𑀓𑀤𑀼𑀓𑀸𑀦𑀁 𑀘𑀢𑀼𑀓𑁆𑀓𑀢𑀺𑀓𑀪𑀸𑀯𑁄 𑀆𑀧𑀚𑁆𑀚𑀢𑀻’’𑀢𑀺, 𑀦 𑀯𑀢𑁆𑀢𑀩𑁆𑀩𑀁, 𑀢𑀺𑀡𑁆𑀡𑀁 𑀥𑀫𑁆𑀫𑀲𑀤𑁆𑀤𑀸𑀦𑀁 𑀏𑀓𑀢𑁆𑀣𑀸𑀦𑀁 𑀢𑀺𑀡𑁆𑀡𑀁 𑀇𑀦𑁆𑀤𑀲𑀤𑁆𑀤𑀸𑀦𑀁 𑀯𑀺𑀬 𑀯𑀘𑀦𑁂 𑀧𑀬𑁄𑀚𑀦𑀸𑀪𑀸𑀯𑀸 𑀯𑀼𑀢𑁆𑀢𑀸𑀦𑀁 𑀢𑁂𑀲𑀁 𑀫𑀸𑀲𑀲𑀤𑁆𑀤𑀸𑀦𑀁 𑀯𑀺𑀬 𑀅𑀪𑀺𑀦𑁆𑀦𑀭𑀽𑀧𑀸𑀦𑀜𑁆𑀘 𑀅𑀢𑁆𑀣𑀪𑁂𑀤𑁄 𑀉𑀧𑀧𑀚𑁆𑀚𑀢𑀻𑀢𑀺, 𑀏𑀯𑀫𑀧𑀺 𑀬𑀣𑀸 𑀏𑀓𑁄 𑀫𑀸𑀲𑀲𑀤𑁆𑀤𑁄 𑀅𑀪𑀺𑀦𑁆𑀦𑀭𑀽𑀧𑁄 𑀓𑀸𑀮𑀁 𑀅𑀧𑀭𑀡𑁆𑀡𑀯𑀺𑀲𑁂𑀲𑀁 𑀲𑀼𑀯𑀡𑁆𑀡𑀫𑀸𑀲𑀜𑁆𑀘 𑀯𑀤𑀢𑀺, 𑀏𑀯𑀁 𑀥𑀫𑁆𑀫𑀲𑀤𑁆𑀤𑁄𑀧𑀺 𑀏𑀓𑁄 𑀪𑀺𑀦𑁆𑀦𑁂 𑀅𑀢𑁆𑀣𑁂 𑀯𑀢𑁆𑀢𑀼𑀫𑀭𑀳𑀢𑀻𑀢𑀺 𑀓𑀸𑀮𑀸𑀤𑀻𑀦𑀁 𑀫𑀸𑀲𑀧𑀤𑀢𑁆𑀣𑀢𑀸𑀬 𑀯𑀺𑀬 𑀢𑀩𑁆𑀩𑀘𑀦𑀻𑀬𑀪𑀺𑀦𑁆𑀦𑀢𑁆𑀣𑀸𑀦𑀁 𑀥𑀫𑁆𑀫𑀧𑀤𑀢𑁆𑀣𑀢𑀸𑀬 𑀅𑀪𑁂𑀤𑁄𑀢𑀺 𑀘𑀢𑀼𑀓𑁆𑀓𑀢𑀺𑀓𑀪𑀸𑀯𑁄 𑀏𑀯 𑀆𑀧𑀚𑁆𑀚𑀢𑀻𑀢𑀺, 𑀦𑀸𑀧𑀚𑁆𑀚𑀢𑀺 𑀏𑀓𑀲𑁆𑀲 𑀲𑀤𑁆𑀤𑀲𑁆𑀲 𑀚𑀸𑀢𑀺𑀕𑀼𑀡𑀓𑀺𑀭𑀺𑀬𑀸𑀪𑀺𑀦𑁆𑀦𑀸𑀦𑀁 𑀅𑀦𑀪𑀺𑀥𑀸𑀦𑀢𑁄. 𑀦 𑀳𑀺 𑀫𑀸𑀲-𑀲𑀤𑁆𑀤𑁄 𑀏𑀓𑁄 𑀚𑀸𑀢𑀺𑀪𑀺𑀦𑁆𑀦𑀸𑀦𑀁 𑀓𑀸𑀮𑀸𑀤𑀻𑀦𑀁 𑀅𑀦𑁆𑀢𑀭𑁂𑀦 𑀲𑀭𑀽𑀧𑁂𑀓𑀲𑁂𑀲𑀁 𑀯𑀸𑀘𑀓𑁄 𑀳𑁄𑀢𑀺. 𑀇𑀥 𑀘 𑀬𑀤𑀺 𑀲𑀭𑀽𑀧𑁂𑀓𑀲𑁂𑀲𑁄 𑀓𑀢𑁄 𑀲𑀺𑀬𑀸, 𑀤𑀼𑀢𑀺𑀬𑁄 𑀢𑀢𑀺𑀬𑁄 𑀘 𑀥𑀫𑁆𑀫-𑀲𑀤𑁆𑀤𑁄 𑀦 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸, 𑀯𑀼𑀢𑁆𑀢𑁄 𑀘 𑀲𑁄, 𑀢𑀲𑁆𑀫𑀸 𑀓𑀼𑀲𑀮𑀸𑀤𑀺-𑀲𑀤𑁆𑀤𑀸 𑀯𑀺𑀬 𑀅𑀪𑀺𑀦𑁆𑀦𑀓𑀼𑀲𑀮𑀸𑀤𑀺𑀚𑀸𑀢𑀻𑀲𑀼 𑀭𑀽𑀧𑀲𑀸𑀫𑀜𑁆𑀜𑁂𑀧𑀺 𑀫𑀸𑀲-𑀲𑀤𑁆𑀤𑀸 𑀯𑀺𑀬 𑀢𑀬𑁄 𑀯𑀺𑀦𑀺𑀯𑀢𑁆𑀢𑀅𑀜𑁆𑀜𑀚𑀸𑀢𑀻𑀲𑀼 𑀯𑀢𑁆𑀢𑀫𑀸𑀦𑀸 𑀢𑀬𑁄 𑀤𑁆𑀯𑁂 𑀘 𑀥𑀫𑁆𑀫-𑀲𑀤𑁆𑀤𑀸 𑀆𑀧𑀦𑁆𑀦𑀸𑀢𑀺 𑀢𑀺𑀓𑀤𑀼𑀓𑀸𑀦𑀁 𑀙𑀓𑁆𑀓𑀘𑀢𑀼𑀓𑁆𑀓𑀪𑀸𑀯𑁄 𑀏𑀯 𑀆𑀧𑀚𑁆𑀚𑀢𑀻𑀢𑀺.

𑀧𑀤𑀸𑀦𑀜𑁆𑀘 𑀅𑀲𑀫𑁆𑀩𑀦𑁆𑀥𑁄𑀢𑀺 𑀓𑀼𑀲𑀮𑀥𑀫𑁆𑀫𑀧𑀤𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀢𑀣𑀸 𑀅𑀓𑀼𑀲𑀮𑀥𑀫𑁆𑀫𑀧𑀤𑀸𑀦𑀁 𑀅𑀩𑁆𑀬𑀸𑀓𑀢𑀥𑀫𑁆𑀫𑀧𑀤𑀸𑀦𑀜𑁆𑀘 𑀅𑀲𑀫𑁆𑀩𑀦𑁆𑀥𑁄 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀜𑁆𑀳𑀺 𑀇𑀘𑁆𑀙𑀺𑀢𑁄 𑀲𑀫𑁆𑀩𑀦𑁆𑀥𑁄, 𑀦 𑀲𑀩𑁆𑀩𑁂𑀲𑀁 𑀙𑀦𑁆𑀦𑀁 𑀘𑀢𑀼𑀦𑁆𑀦𑀁 𑀯𑀸 𑀅𑀜𑁆𑀜𑀫𑀜𑁆𑀜𑀦𑁆𑀢𑀺. 𑀇𑀤𑀁 𑀧𑀦 𑀓𑀲𑁆𑀫𑀸 𑀘𑁄𑀤𑁂𑀢𑀺, 𑀦𑀦𑀼 𑀦𑀸𑀦𑀢𑁆𑀣𑀢𑁆𑀢𑁂 𑀲𑀢𑀺 𑀅𑀢𑁆𑀣𑀦𑁆𑀢𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀘𑁆𑀘𑀫𑀸𑀦𑁂𑀲𑀼 𑀥𑀫𑁆𑀫-𑀲𑀤𑁆𑀤𑁂𑀲𑀼 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢-𑀲𑀤𑁆𑀤𑀸𑀦𑀁 𑀯𑀺𑀬 𑀅𑀲𑀫𑁆𑀩𑀦𑁆𑀥𑁄 𑀯𑀼𑀢𑁆𑀢𑁄 𑀬𑀼𑀢𑁆𑀢𑁄 𑀏𑀯𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀅𑀲𑀫𑁆𑀩𑀦𑁆𑀥𑀁 𑀧𑀦 𑀲𑀺𑀤𑁆𑀥𑀁 𑀓𑀢𑁆𑀯𑀸 𑀧𑀼𑀭𑀺𑀫𑀘𑁄𑀤𑀦𑀸 𑀓𑀢𑀸 ‘‘𑀢𑀺𑀓𑀤𑀼𑀓𑀸𑀦𑀁 𑀙𑀓𑁆𑀓𑀘𑀢𑀼𑀓𑁆𑀓𑀪𑀸𑀯𑁄 𑀆𑀧𑀚𑁆𑀚𑀢𑀻’’𑀢𑀺, 𑀇𑀥 𑀧𑀦 𑀢𑀁 𑀅𑀲𑀫𑁆𑀩𑀦𑁆𑀥𑀁 𑀲𑀸𑀥𑁂𑀢𑀼𑀁 𑀇𑀤𑀁 𑀘𑁄𑀤𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸 𑁋 𑀬𑀤𑀺 𑀧𑀦 𑀙𑀓𑁆𑀓𑀘𑀢𑀼𑀓𑁆𑀓𑀪𑀸𑀯𑀁 𑀦 𑀇𑀘𑁆𑀙𑀲𑀺, 𑀧𑀤𑀸𑀦𑀁 𑀲𑀫𑁆𑀩𑀦𑁆𑀥𑁂𑀦 𑀪𑀯𑀺𑀢𑀩𑁆𑀩𑀁 𑀬𑀣𑀸𑀯𑀼𑀢𑁆𑀢𑀦𑀬𑁂𑀦, 𑀲𑁄 𑀘 𑀲𑀫𑀸𑀦𑀯𑀺𑀪𑀢𑁆𑀢𑀻𑀦𑀁 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀲𑀫𑁆𑀩𑀦𑁆𑀥𑁄 𑀏𑀓𑀢𑁆𑀣𑀢𑁆𑀢𑁂 𑀲𑀢𑀺 𑀬𑀼𑀚𑁆𑀚𑁂𑀬𑁆𑀬, 𑀢𑁆𑀯𑀁 𑀧𑀦 𑀦𑀸𑀦𑀢𑁆𑀣𑀢𑀁 𑀯𑀤𑀲𑀻𑀢𑀺 𑀧𑀤𑀸𑀦𑀜𑁆𑀘 𑀢𑁂 𑀅𑀲𑀫𑁆𑀩𑀦𑁆𑀥𑁄 𑀆𑀧𑀚𑁆𑀚𑀢𑀺, 𑀦𑁂𑀯 𑀦𑀸𑀧𑀚𑁆𑀚𑀢𑀻𑀢𑀺. 𑀦𑀺𑀬𑀫𑀦𑀢𑁆𑀣𑁄 𑀘-𑀲𑀤𑁆𑀤𑁄. 𑀧𑀼𑀩𑁆𑀩𑀸𑀧𑀭…𑀧𑁂… 𑀦𑀺𑀧𑁆𑀧𑀬𑁄𑀚𑀦𑀸𑀦𑀺 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀙𑀓𑁆𑀓𑀘𑀢𑀼𑀓𑁆𑀓𑀪𑀸𑀯𑀁 𑀅𑀦𑀺𑀘𑁆𑀙𑀦𑁆𑀢𑀲𑁆𑀲, 𑀦𑀸𑀦𑀢𑁆𑀣𑀢𑀁 𑀧𑀦 𑀇𑀘𑁆𑀙𑀦𑁆𑀢𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀯𑀲𑁆𑀲𑀜𑁆𑀘 𑀲𑀫𑁆𑀩𑀦𑁆𑀥𑁄 𑀇𑀘𑁆𑀙𑀺𑀢𑀩𑁆𑀩𑁄 𑀧𑀼𑀩𑁆𑀩𑀸𑀧𑀭𑀯𑀺𑀭𑁄𑀥𑀸𑀧𑀢𑁆𑀢𑀺𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀸𑀧𑀺 𑀘𑁂𑀲𑀸’’𑀢𑀺𑀆𑀤𑀺𑀫𑀸𑀳. 𑀧𑀼𑀘𑁆𑀙𑀸 𑀳𑀺 𑀧𑀤𑀯𑀺𑀧𑀮𑁆𑀮𑀸𑀲𑀓𑀭𑀡𑁂𑀦 𑀥𑀫𑁆𑀫𑀸 𑀏𑀯 𑀓𑀼𑀲𑀮𑀸𑀢𑀺 𑀓𑀼𑀲𑀮𑀥𑀫𑁆𑀫-𑀲𑀤𑁆𑀤𑀸𑀦𑀁 𑀇𑀥 𑀉𑀤𑁆𑀤𑀺𑀝𑁆𑀞𑀸𑀦𑀁 𑀏𑀓𑀢𑁆𑀣𑀢𑀁 𑀤𑀻𑀧𑁂𑀢𑀺, 𑀢𑀯 𑀘 𑀦𑀸𑀦𑀢𑁆𑀣𑀢𑀁 𑀯𑀤𑀦𑁆𑀢𑀲𑁆𑀲 𑀦𑁂𑀯 𑀳𑀺 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺 𑀓𑀢𑁆𑀯𑀸 𑀢𑀸𑀬𑀧𑀺 𑀧𑀼𑀘𑁆𑀙𑀸𑀬 𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀺, 𑀯𑀼𑀘𑁆𑀘𑀢𑀺 𑀘 𑀢𑀣𑀸 𑀲𑀸 𑀧𑀼𑀘𑁆𑀙𑀸𑀢𑀺 𑀦 𑀦𑀸𑀦𑀢𑁆𑀣𑀢𑀸 𑀬𑀼𑀚𑁆𑀚𑀢𑀺.

𑀅𑀧𑀭𑁄 𑀦𑀬𑁄𑀢𑀺 ‘‘𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀦𑀁 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀏𑀓𑀢𑁆𑀣𑀢𑁆𑀢𑀫𑁂𑀯 𑀢𑀺𑀡𑁆𑀡𑀁 𑀥𑀫𑁆𑀫𑀲𑀤𑁆𑀤𑀸𑀦𑀁 𑀏𑀓𑀢𑁆𑀣𑀦𑀸𑀦𑀢𑁆𑀣𑀢𑁆𑀢𑁂𑀳𑀺 𑀘𑁄𑀤𑁂𑀢𑀺. 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀏𑀓𑀢𑁆𑀢𑀸𑀢𑀺𑀆𑀤𑀺𑀫𑁆𑀳𑀺 𑀬𑀣𑀸 𑀢𑀻𑀳𑀺 𑀇𑀦𑁆𑀤-𑀲𑀤𑁆𑀤𑁂𑀳𑀺 𑀯𑀼𑀘𑁆𑀘𑀫𑀸𑀦𑀸𑀦𑀁 𑀇𑀦𑁆𑀤𑀢𑁆𑀣𑀸𑀦𑀁 𑀇𑀦𑁆𑀤𑀪𑀸𑀯𑁂𑀦 𑀏𑀓𑀢𑁆𑀢𑀸 𑀢𑀢𑁄 𑀅𑀦𑀜𑁆𑀜𑁂𑀲𑀁 𑀲𑀓𑁆𑀓𑀧𑀼𑀭𑀺𑀦𑁆𑀤𑀤𑀲𑀳𑀲𑁆𑀲𑀓𑁆𑀔𑀲𑀤𑁆𑀤𑀢𑁆𑀣𑀸𑀦𑀁 𑀏𑀓𑀢𑁆𑀢𑀁, 𑀏𑀯𑀁 𑀢𑀺𑀡𑁆𑀡𑀁 𑀥𑀫𑁆𑀫-𑀲𑀤𑁆𑀤𑀢𑁆𑀣𑀸𑀦𑀁 𑀥𑀫𑁆𑀫𑀪𑀸𑀯𑁂𑀦 𑀏𑀓𑀢𑁆𑀢𑀸 𑀢𑀢𑁄 𑀅𑀦𑀜𑁆𑀜𑁂𑀲𑀁 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢-𑀲𑀤𑁆𑀤𑀢𑁆𑀣𑀸𑀦𑀁 𑀏𑀓𑀢𑁆𑀢𑀁 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀥𑀫𑁆𑀫𑁄 𑀦𑀸𑀫 𑀪𑀸𑀯𑁄𑀢𑀺 𑀲𑀪𑀸𑀯𑀥𑀸𑀭𑀡𑀸𑀤𑀺𑀦𑀸 𑀅𑀢𑁆𑀣𑁂𑀦 𑀥𑀫𑁆𑀫𑁄𑀢𑀺 𑀯𑀼𑀢𑁆𑀢𑁄, 𑀲𑁄 𑀘 𑀲𑀪𑀸𑀯𑀲𑁆𑀲𑁂𑀯 𑀳𑁄𑀢𑀺, 𑀦𑀸𑀲𑀪𑀸𑀯𑀲𑁆𑀲𑀸𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺. 𑀳𑁄𑀢𑀼 𑀪𑀸𑀯𑁄, 𑀢𑀢𑁄 𑀓𑀺𑀦𑁆𑀢𑀺? 𑀬𑀤𑀺 𑀢𑀺𑀡𑁆𑀡𑀁 𑀥𑀫𑁆𑀫𑀲𑀤𑁆𑀤𑀸𑀦𑀁 𑀦𑀸𑀦𑀢𑁆𑀣𑀢𑀸, 𑀢𑀻𑀲𑀼 𑀥𑀫𑁆𑀫𑁂𑀲𑀼 𑀬𑁄 𑀓𑁄𑀘𑀺 𑀏𑀓𑁄 𑀥𑀫𑁆𑀫𑁄 𑀪𑀸𑀯𑁄, 𑀢𑀢𑁄 𑀅𑀦𑀜𑁆𑀜𑀁 𑀓𑀼𑀲𑀮𑀁 𑀅𑀓𑀼𑀲𑀮𑀁 𑀅𑀩𑁆𑀬𑀸𑀓𑀢𑀁 𑀯𑀸 𑀏𑀓𑁂𑀓𑀫𑁂𑀯 𑀪𑀸𑀯𑁄. 𑀪𑀸𑀯𑀪𑀽𑀢𑀸 𑀧𑀦 𑀥𑀫𑁆𑀫𑀸 𑀅𑀜𑁆𑀜𑁂 𑀤𑁆𑀯𑁂 𑀅𑀪𑀸𑀯𑀸 𑀳𑁄𑀦𑁆𑀢𑀻𑀢𑀺 𑀢𑁂𑀳𑀺 𑀅𑀦𑀜𑁆𑀜𑁂 𑀓𑀼𑀲𑀮𑀸𑀤𑀻𑀲𑀼 𑀤𑁆𑀯𑁂 𑀬𑁂 𑀓𑁂𑀘𑀺 𑀅𑀪𑀸𑀯𑀸. 𑀬𑁄𑀧𑀺 𑀘 𑀲𑁄 𑀏𑀓𑁄 𑀥𑀫𑁆𑀫𑁄 𑀪𑀸𑀯𑁄𑀢𑀺 𑀕𑀳𑀺𑀢𑁄, 𑀲𑁄𑀧𑀺 𑀲𑀫𑀸𑀦𑀭𑀽𑀧𑁂𑀲𑀼 𑀢𑀻𑀲𑀼 𑀥𑀫𑁆𑀫𑀲𑀤𑁆𑀤𑁂𑀲𑀼 𑀅𑀬𑀫𑁂𑀯 𑀪𑀸𑀯𑀢𑁆𑀣𑁄 𑀳𑁄𑀢𑀻𑀢𑀺 𑀦𑀺𑀬𑀫𑀲𑁆𑀲 𑀅𑀪𑀸𑀯𑀸 𑀅𑀜𑁆𑀜𑀲𑁆𑀲 𑀪𑀸𑀯𑀢𑁆𑀣𑀢𑁆𑀢𑁂 𑀲𑀢𑀺 𑀅𑀪𑀸𑀯𑁄 𑀳𑁄𑀢𑀻𑀢𑀺 𑀢𑀢𑁄 𑀅𑀦𑀜𑁆𑀜𑀲𑁆𑀲𑀧𑀺 𑀅𑀪𑀸𑀯𑀢𑁆𑀢𑀁 𑀆𑀧𑀦𑁆𑀦𑀦𑁆𑀢𑀺 𑀓𑀼𑀲𑀮𑀸𑀤𑀻𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀅𑀪𑀸𑀯𑀢𑁆𑀢𑀸𑀧𑀢𑁆𑀢𑀺 𑀳𑁄𑀢𑀺. 𑀦 𑀳𑀺 𑀇𑀦𑁆𑀤𑀲𑁆𑀲 𑀅𑀫𑀦𑀼𑀲𑁆𑀲𑀢𑁆𑀢𑁂 𑀢𑀢𑁄 𑀅𑀦𑀜𑁆𑀜𑁂𑀲𑀁 𑀲𑀓𑁆𑀓𑀸𑀤𑀻𑀦𑀁 𑀫𑀦𑀼𑀲𑁆𑀲𑀢𑁆𑀢𑀁 𑀅𑀢𑁆𑀣𑀻𑀢𑀺.

𑀦𑀦𑀼 𑀏𑀯𑀫𑀧𑀺 𑀏𑀓𑀲𑁆𑀲 𑀪𑀸𑀯𑀢𑁆𑀢𑀁 𑀯𑀺𑀦𑀸 𑀅𑀜𑁆𑀜𑁂𑀲𑀁 𑀅𑀪𑀸𑀯𑀢𑁆𑀢𑀁 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀢𑀢𑁆𑀣 𑀘 𑀏𑀓𑁂𑀦𑁂𑀯 𑀪𑀸𑀯𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀦𑀺𑀬𑀫𑀸𑀪𑀸𑀯𑀢𑁄 𑀢𑀺𑀡𑁆𑀡𑀫𑁆𑀧𑀺 𑀪𑀸𑀯𑀢𑁆𑀢𑁂 𑀲𑀺𑀤𑁆𑀥𑁂 𑀢𑁂𑀳𑀺 𑀅𑀦𑀜𑁆𑀜𑁂𑀲𑀁 𑀓𑀼𑀲𑀮𑀸𑀤𑀻𑀦𑀫𑁆𑀧𑀺 𑀪𑀸𑀯𑀢𑁆𑀢𑀁 𑀲𑀺𑀤𑁆𑀥𑀁 𑀳𑁄𑀢𑀻𑀢𑀺? 𑀦 𑀳𑁄𑀢𑀺 𑀢𑀺𑀡𑁆𑀡𑀁 𑀥𑀫𑁆𑀫-𑀲𑀤𑁆𑀤𑀸𑀦𑀁 𑀦𑀸𑀦𑀢𑁆𑀣𑀪𑀸𑀯𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸. 𑀦 𑀳𑀺 𑀢𑀺𑀡𑁆𑀡𑀁 𑀪𑀸𑀯𑀢𑁆𑀢𑁂 𑀦𑀸𑀦𑀢𑁆𑀣𑀢𑀸 𑀅𑀢𑁆𑀣𑀺, 𑀅𑀦𑀼𑀜𑁆𑀜𑀸𑀢𑀸 𑀘 𑀲𑀸 𑀢𑀬𑀸𑀢𑀺. 𑀦𑀦𑀼 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀅𑀪𑀸𑀯𑀢𑁆𑀢𑁂𑀧𑀺 𑀦𑀸𑀦𑀢𑁆𑀣𑀢𑀸 𑀦 𑀲𑀺𑀬𑀸𑀢𑀺? 𑀫𑀸 𑀳𑁄𑀢𑀼 𑀦𑀸𑀦𑀢𑁆𑀣𑀢𑀸, 𑀢𑀯 𑀧𑀦 𑀦𑀸𑀦𑀢𑁆𑀣𑀢𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲 ‘‘𑀏𑀲𑁄 𑀤𑁄𑀲𑁄’’𑀢𑀺 𑀯𑀤𑀸𑀫𑀺, 𑀦 𑀧𑀦 𑀫𑀬𑀸 𑀦𑀸𑀦𑀢𑁆𑀣𑀢𑀸 𑀏𑀓𑀢𑁆𑀣𑀢𑀸 𑀯𑀸 𑀅𑀦𑀼𑀜𑁆𑀜𑀸𑀢𑀸𑀢𑀺 𑀓𑀼𑀢𑁄 𑀫𑁂 𑀯𑀺𑀭𑁄𑀥𑁄 𑀲𑀺𑀬𑀸𑀢𑀺. 𑀅𑀣 𑀯𑀸 𑀅𑀪𑀸𑀯𑀢𑁆𑀢𑀁 𑀆𑀧𑀦𑁆𑀦𑁂𑀳𑀺 𑀥𑀫𑁆𑀫𑁂𑀳𑀺 𑀅𑀦𑀜𑁆𑀜𑁂 𑀓𑀼𑀲𑀮𑀸𑀤𑀬𑁄𑀧𑀺 𑀅𑀪𑀸𑀯𑀸 𑀏𑀯 𑀲𑀺𑀬𑀼𑀦𑁆𑀢𑀺 𑀇𑀤𑀁 𑀯𑀘𑀦𑀁 𑀅𑀦𑀺𑀬𑀫𑁂𑀦 𑀬𑁂 𑀓𑁂𑀘𑀺 𑀤𑁆𑀯𑁂 𑀥𑀫𑁆𑀫𑀸 𑀅𑀪𑀸𑀯𑀢𑁆𑀢𑀁 𑀆𑀧𑀦𑁆𑀦𑀸, 𑀢𑁂𑀳𑀺 𑀅𑀦𑀜𑁆𑀜𑁂𑀲𑀁 𑀓𑀼𑀲𑀮𑀸𑀤𑀻𑀲𑀼 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀤𑁆𑀯𑀺𑀦𑁆𑀦𑀁 𑀓𑀼𑀲𑀮𑀸𑀤𑀻𑀦𑀁 𑀅𑀪𑀸𑀯𑀢𑁆𑀢𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀏𑀓𑀲𑁆𑀲 𑀪𑀸𑀯𑀢𑁆𑀢𑀸. 𑀬𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀢𑁂𑀳𑀺 𑀘 𑀅𑀜𑁆𑀜𑁄 𑀓𑀼𑀲𑀮𑀧𑀭𑁄𑀧𑀺 𑀅𑀪𑀸𑀯𑁄 𑀲𑀺𑀬𑀸’’𑀢𑀺, 𑀢𑀁 𑀅𑀦𑀺𑀬𑀫𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀲𑀩𑁆𑀩𑁂𑀲𑀁 𑀅𑀪𑀸𑀯𑀲𑀸𑀥𑀦𑀢𑁆𑀣𑀁. 𑀅𑀬𑀜𑁆𑀳𑀺 𑀢𑀢𑁆𑀣 𑀅𑀢𑁆𑀣𑁄 𑀅𑀓𑀼𑀲𑀮𑀧𑀭𑀲𑁆𑀲 𑀯𑀸 𑀅𑀩𑁆𑀬𑀸𑀓𑀢𑀧𑀭𑀲𑁆𑀲 𑀯𑀸 𑀥𑀫𑁆𑀫𑀲𑁆𑀲 𑀪𑀸𑀯𑀢𑁆𑀢𑁂 𑀲𑀢𑀺 𑀢𑁂𑀳𑀺 𑀅𑀜𑁆𑀜𑁄 𑀓𑀼𑀲𑀮𑀧𑀭𑁄𑀧𑀺 𑀅𑀪𑀸𑀯𑁄 𑀲𑀺𑀬𑀸𑀢𑀺.

𑀲𑀩𑁆𑀩𑀫𑁂𑀢𑀁 𑀅𑀓𑀸𑀭𑀡𑀦𑁆𑀢𑀺 𑀏𑀢𑁆𑀣 𑀓𑀸𑀭𑀡𑀁 𑀦𑀸𑀫 𑀬𑀼𑀢𑁆𑀢𑀺. 𑀓𑀼𑀲𑀮𑀓𑀼𑀲𑀮𑀲𑀤𑁆𑀤𑀸𑀦𑀁 𑀯𑀺𑀬 𑀏𑀓𑀦𑁆𑀢𑀏𑀓𑀢𑁆𑀣𑀢𑀁, 𑀓𑀼𑀲𑀮𑀭𑀽𑀧𑀘𑀓𑁆𑀔𑀼𑀫-𑀲𑀤𑁆𑀤𑀸𑀦𑀁 𑀯𑀺𑀬 𑀏𑀓𑀦𑁆𑀢𑀦𑀸𑀦𑀢𑁆𑀣𑀢𑀜𑁆𑀘 𑀯𑀺𑀓𑀧𑁆𑀧𑁂𑀢𑁆𑀯𑀸 𑀬𑀸𑀬𑀁 𑀧𑀼𑀦𑀭𑀼𑀢𑁆𑀢𑀺 𑀙𑀓𑁆𑀓𑀘𑀢𑀼𑀓𑁆𑀓𑀸𑀧𑀢𑁆𑀢𑀺 𑀅𑀲𑀫𑁆𑀩𑀦𑁆𑀥𑀯𑀺𑀭𑁄𑀥𑀸𑀪𑀸𑀯𑀸𑀧𑀢𑁆𑀢𑀺 𑀤𑁄𑀲𑀸𑀭𑁄𑀧𑀦𑀬𑀼𑀢𑁆𑀢𑀺 𑀯𑀼𑀢𑁆𑀢𑀸, 𑀲𑀩𑁆𑀩𑀸 𑀲𑀸 𑀅𑀬𑀼𑀢𑁆𑀢𑀺, 𑀢𑀣𑀸 𑀏𑀓𑀢𑁆𑀣𑀦𑀸𑀦𑀢𑁆𑀣𑀢𑀸𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀸 𑀬𑀸 𑀅𑀦𑀼𑀫𑀢𑀺 𑀬𑀣𑀸𑀦𑀼𑀫𑀢𑀺 𑀅𑀦𑀼𑀫𑀢𑀺𑀬𑀸 𑀅𑀦𑀼𑀫𑀢𑀺𑀬𑀸 𑀯𑁄𑀳𑀸𑀭𑀲𑀺𑀤𑁆𑀥𑀺𑀢𑁄. 𑀅𑀦𑀼𑀫𑀢𑀺𑀬𑀸 𑀅𑀦𑀼𑀭𑀽𑀧𑀁 𑀯𑀸 𑀬𑀣𑀸𑀦𑀼𑀫𑀢𑀺, 𑀬𑀣𑀸 𑀅𑀦𑀼𑀫𑀢𑀺 𑀧𑀯𑀢𑁆𑀢𑀸, 𑀢𑀣𑀸 𑀢𑀤𑀦𑀼𑀭𑀽𑀧𑀁 𑀯𑁄𑀳𑀸𑀭𑀲𑀺𑀤𑁆𑀥𑀺𑀢𑁄𑀢𑀺 𑀅𑀢𑁆𑀣𑁄. 𑀅𑀦𑀼𑀫𑀢𑀺 𑀳𑀺 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀸𑀪𑀸𑀯𑀢𑁄 𑀅𑀘𑁆𑀘𑀦𑁆𑀢𑀫𑀪𑀺𑀦𑁆𑀦𑁂𑀲𑀼 𑀓𑀢𑁆𑀣𑀘𑀺 𑀓𑀺𑀭𑀺𑀬𑀸𑀕𑀼𑀡𑀸𑀤𑀺𑀧𑀭𑀺𑀕𑁆𑀕𑀳𑀯𑀺𑀲𑁂𑀲𑁂𑀦 𑀅𑀯𑀺𑀯𑀝𑀲𑀤𑁆𑀤𑀢𑁆𑀣𑀯𑀺𑀯𑀭𑀡𑀢𑁆𑀣𑀁 𑀧𑀯𑀢𑁆𑀢𑀸 𑀬𑀣𑀸 ‘‘𑀲𑀓𑁆𑀓𑁄 𑀇𑀦𑁆𑀤𑁄 𑀧𑀼𑀭𑀺𑀦𑁆𑀤𑀤𑁄’’𑀢𑀺. 𑀓𑀢𑁆𑀣𑀘𑀺 𑀅𑀘𑁆𑀘𑀦𑁆𑀢𑀁 𑀪𑀺𑀦𑁆𑀦𑁂𑀲𑀼 𑀬𑀣𑀸 ‘‘𑀥𑀯𑁄 𑀔𑀤𑀺𑀭𑁄 𑀧𑀮𑀸𑀲𑁄 𑀘 𑀆𑀦𑀻𑀬𑀦𑁆𑀢𑀽’’𑀢𑀺. 𑀓𑀢𑁆𑀣𑀘𑀺 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑀢𑁄 𑀪𑁂𑀤𑀸𑀪𑁂𑀤𑀯𑀦𑁆𑀢𑁂𑀲𑀼 𑀲𑁂𑀬𑁆𑀬𑀣𑀸𑀧𑀺 ‘‘𑀦𑀻𑀮𑀼𑀧𑁆𑀧𑀮𑀁 𑀧𑀡𑁆𑀟𑀺𑀢𑀧𑀼𑀭𑀺𑀲𑁄’’𑀢𑀺, 𑀢𑀸𑀬 𑀢𑀸𑀬 𑀅𑀦𑀼𑀫𑀢𑀺𑀬𑀸 𑀢𑀤𑀦𑀼𑀭𑀽𑀧𑀜𑁆𑀘 𑀢𑁂 𑀢𑁂 𑀯𑁄𑀳𑀸𑀭𑀸 𑀲𑀺𑀤𑁆𑀥𑀸. 𑀢𑀲𑁆𑀫𑀸 𑀇𑀳𑀸𑀧𑀺 𑀓𑀼𑀲𑀮𑀥𑀫𑁆𑀫-𑀲𑀤𑁆𑀤𑀸𑀦𑀁 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑀢𑁄 𑀯𑀺𑀲𑁂𑀲𑀢𑁆𑀣𑀲𑀸𑀫𑀜𑁆𑀜𑀢𑁆𑀣𑀧𑀭𑀺𑀕𑁆𑀕𑀳𑁂𑀦 𑀲𑀫𑀸𑀦𑁂 𑀅𑀢𑁆𑀣𑁂 𑀪𑁂𑀤𑀸𑀪𑁂𑀤𑀬𑀼𑀢𑁆𑀢𑁂 𑀧𑀯𑀢𑁆𑀢𑀺 𑀅𑀦𑀼𑀫𑀢𑀸𑀢𑀺 𑀢𑀸𑀬 𑀢𑀸𑀬 𑀅𑀦𑀼𑀫𑀢𑀺𑀬𑀸 𑀢𑀤𑀦𑀼𑀭𑀽𑀧𑀜𑁆𑀘 𑀲𑀺𑀤𑁆𑀥𑁄 𑀏𑀲𑁄 𑀯𑁄𑀳𑀸𑀭𑁄. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀫𑁂𑀢𑀁 𑀅𑀓𑀸𑀭𑀡’’𑀦𑁆𑀢𑀺.

𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀯𑀺𑀲𑁂𑀲𑀁 𑀢𑀲𑁆𑀲 𑀤𑀻𑀧𑁂𑀦𑁆𑀢𑀻𑀢𑀺 𑀅𑀢𑁆𑀢𑀦𑀸 𑀧𑀭𑀺𑀕𑁆𑀕𑀳𑀺𑀢𑀁 𑀅𑀢𑁆𑀢𑀦𑀸 𑀯𑀼𑀘𑁆𑀘𑀫𑀸𑀦𑀁 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀸𑀤𑀺𑀓𑀼𑀲𑀮𑀸𑀤𑀺𑀪𑀸𑀯𑀁 𑀥𑀫𑁆𑀫-𑀲𑀤𑁆𑀤𑀲𑁆𑀲 𑀤𑀻𑀧𑁂𑀦𑁆𑀢𑀺 𑀢𑀤𑀢𑁆𑀣𑀲𑁆𑀲 𑀢𑀩𑁆𑀪𑀸𑀯𑀤𑀻𑀧𑀦𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀥𑀫𑁆𑀫-𑀲𑀤𑁆𑀤𑁄 𑀓𑀼𑀲𑀮𑀸𑀤𑀺𑀪𑀸𑀯𑁄 𑀳𑁄𑀢𑀻𑀢𑀺. 𑀇𑀫𑀺𑀦𑀸𑀯𑀸𑀢𑀺 ‘‘𑀥𑀫𑁆𑀫-𑀲𑀤𑁆𑀤𑁄 𑀧𑀭𑀺𑀬𑀢𑁆𑀢𑀺𑀆𑀤𑀻𑀲𑀼 𑀤𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 ‘‘𑀅𑀢𑁆𑀢𑀦𑁄 𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀘 𑀦𑀬𑁂𑀦. 𑀲𑁄 𑀳𑀺 𑀲𑀩𑁆𑀩𑀢𑁆𑀣 𑀲𑀫𑀸𑀦𑁄, 𑀦 𑀓𑀼𑀲𑀮-𑀲𑀤𑁆𑀤𑁄 𑀆𑀭𑁄𑀕𑁆𑀬𑀸𑀤𑀻𑀲𑀼 𑀤𑀺𑀲𑁆𑀲𑀢𑀻𑀢𑀺 ‘‘𑀓𑀼𑀘𑁆𑀙𑀺𑀢𑁂 𑀲𑀮𑀬𑀦𑁆𑀢𑀻’’𑀢𑀺𑀆𑀤𑀺𑀓𑁄, 𑀲𑁄 𑀘 𑀯𑀺𑀲𑁂𑀲𑀦𑀬𑁄 ‘‘𑀇𑀢𑁄 𑀧𑀭𑀁 𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀯𑀓𑁆𑀔𑀸𑀫𑀸’’𑀢𑀺 𑀏𑀢𑁂𑀦 𑀅𑀧𑀦𑀻𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀦 𑀳𑀺 𑀓𑀼𑀲𑀮𑀸𑀤𑀺𑀯𑀺𑀲𑁂𑀲𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸𑀢𑀺𑀆𑀤𑀬𑁄 𑀯𑀺𑀲𑁂𑀲𑀸𑀢𑀺.

𑁨. 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸𑀢𑀺 𑀏𑀢𑁆𑀣 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 ‘‘𑀲𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀜𑁆𑀘 𑀲𑀼𑀔𑀯𑁂𑀤𑀦𑀸𑀯 𑀳𑁄𑀢𑀻𑀢𑀺 ‘‘𑀲𑀼𑀔𑀯𑁂𑀤𑀦𑀸𑀬𑀁 𑀤𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁, 𑀦 𑀧𑀦 ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸 𑀲𑀼𑀔𑀸 𑀯𑁂𑀤𑀦𑀸’’𑀢𑀺𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁪.𑁨𑁪𑁯 𑀆𑀤𑀬𑁄) 𑀲𑀼𑀔-𑀲𑀤𑁆𑀤𑁄 𑀯𑀺𑀬 𑀲𑀼𑀔𑀯𑁂𑀤𑀦𑀸𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀢𑁆𑀢𑀸. 𑀅𑀬𑀜𑁆𑀳𑀺 𑀲𑀼𑀔𑀺𑀦𑁆𑀤𑁆𑀭𑀺𑀬𑀢𑁆𑀣𑁄 𑀲𑀼𑀔-𑀲𑀤𑁆𑀤𑁄 𑀓𑀸𑀬𑀲𑀼𑀔𑀦𑀁 𑀓𑀸𑀬𑀸𑀦𑀼𑀕𑁆𑀕𑀳𑀁 𑀲𑀸𑀢𑀯𑀺𑀲𑁂𑀲𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑁄, 𑀦 𑀧𑀦 𑀲𑀼𑀔𑀸 𑀯𑁂𑀤𑀦𑀸 ‘‘𑀬𑀁 𑀓𑀺𑀜𑁆𑀘𑀺 𑀯𑁂𑀤𑀦𑀁 𑀯𑁂𑀤𑁂𑀢𑀺 𑀲𑀼𑀔𑀁 𑀯𑀸 (𑀫. 𑀦𑀺. 𑁧.𑁪𑁦𑁯), 𑀬𑁄 𑀲𑀼𑀔𑀁 𑀤𑀼𑀓𑁆𑀔𑀢𑁄’’𑀢𑀺𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁪.𑁨𑁫𑁩) 𑀲𑀼𑀔-𑀲𑀤𑁆𑀤𑁄 𑀯𑀺𑀬 𑀲𑀸𑀢𑀲𑀸𑀫𑀜𑁆𑀜𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑁄𑀢𑀺. 𑀬𑀲𑁆𑀫𑀺𑀁 𑀲𑀢𑀺 𑀲𑀼𑀔𑀳𑁂𑀢𑀽𑀦𑀁 𑀧𑀯𑀢𑁆𑀢𑀺, 𑀢𑀁 𑀲𑀼𑀔𑀫𑀽𑀮𑀁. 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀘 𑀓𑀸𑀫𑀲𑀫𑀢𑀺𑀓𑁆𑀓𑀫𑀸𑀤𑀺𑀓𑁂 𑀯𑀺𑀭𑀸𑀕𑁂 𑀘 𑀲𑀢𑀺 𑀲𑀼𑀔𑀳𑁂𑀢𑀽𑀦𑀁 𑀧𑀼𑀜𑁆𑀜𑀧𑀲𑁆𑀲𑀤𑁆𑀥𑀺𑀆𑀤𑀻𑀦𑀁 𑀧𑀯𑀢𑁆𑀢𑀺 𑀳𑁄𑀢𑀻𑀢𑀺 𑀢𑀁 ‘‘𑀲𑀼𑀔𑀫𑀽𑀮𑀁 𑀲𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀼𑀔𑀲𑁆𑀲 𑀘 𑀆𑀭𑀫𑁆𑀫𑀡𑀢𑁆𑀢𑀸 ‘‘𑀭𑀽𑀧𑀁 𑀲𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀼𑀜𑁆𑀜𑀸𑀦𑀻𑀢𑀺 𑀬𑀤𑀺𑀤𑀁 𑀯𑀘𑀦𑀁, 𑀢𑀁 𑀲𑀼𑀔𑀲𑁆𑀲 𑀘 𑀅𑀥𑀺𑀯𑀘𑀦𑀁 𑀇𑀝𑁆𑀞𑀯𑀺𑀧𑀸𑀓𑀲𑁆𑀲 𑀅𑀥𑀺𑀯𑀘𑀦𑀁 𑀢𑀤𑀢𑁆𑀣𑀲𑁆𑀲 𑀇𑀝𑁆𑀞𑀯𑀺𑀧𑀸𑀓𑀯𑀺𑀧𑀘𑁆𑀘𑀦𑀢𑁄𑀢𑀺 𑀅𑀢𑁆𑀣𑁄. 𑀲𑀼𑀔𑀧𑀘𑁆𑀘𑀬𑀸𑀦𑀁 𑀭𑀽𑀧𑀸𑀤𑀻𑀦𑀁 𑀇𑀝𑁆𑀞𑀸𑀦𑀁 𑀞𑀸𑀦𑀁 𑀑𑀓𑀸𑀲𑁄 𑀲𑀕𑁆𑀕𑀸 𑀦𑀦𑁆𑀤𑀦𑀜𑁆𑀘𑀸𑀢𑀺 ‘‘𑀲𑀼𑀔𑀸 𑀲𑀕𑁆𑀕𑀸 𑀲𑀼𑀔𑀁 𑀦𑀦𑁆𑀤𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀥𑀫𑁆𑀫𑁂𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂. 𑀲𑀼𑀔𑀯𑀺𑀳𑀸𑀭𑀸𑀢𑀺 𑀧𑀞𑀫𑀚𑁆𑀛𑀸𑀦𑀯𑀺𑀳𑀸𑀭𑀸𑀤𑀻. 𑀦𑀻𑀯𑀭𑀡𑀸𑀤𑀺𑀩𑁆𑀬𑀸𑀩𑀸𑀥𑀭𑀳𑀺𑀢𑀢𑁆𑀢𑀸 ‘‘𑀅𑀩𑁆𑀬𑀸𑀩𑀚𑁆𑀛𑀸’’𑀢𑀺 𑀯𑀼𑀢𑁆𑀢𑀸. 𑀲𑀩𑁆𑀩𑀲𑀗𑁆𑀔𑀸𑀭𑀤𑀼𑀓𑁆𑀔𑀦𑀺𑀩𑁆𑀩𑀸𑀧𑀦𑀢𑁄 𑀢𑀁𑀦𑀺𑀭𑁄𑀥𑀢𑁆𑀢𑀸 𑀯𑀸 ‘‘𑀦𑀺𑀩𑁆𑀩𑀸𑀦𑀁 𑀲𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀤𑀺-𑀲𑀤𑁆𑀤𑁂𑀦 ‘‘𑀅𑀤𑀼𑀓𑁆𑀔𑀫𑀲𑀼𑀔𑀁 𑀲𑀦𑁆𑀢𑀁, 𑀲𑀼𑀔𑀫𑀺𑀘𑁆𑀘𑁂𑀯 𑀪𑀸𑀲𑀺𑀢’’𑀦𑁆𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑁂. ‘‘𑀤𑁆𑀯𑁂𑀧𑀺 𑀫𑀬𑀸, 𑀆𑀦𑀦𑁆𑀤, 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀧𑀭𑀺𑀬𑀸𑀬𑁂𑀦 𑀲𑀼𑀔𑀸 𑀯𑁂𑀤𑀦𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸’’𑀢𑀺 (𑀲𑀁. 𑀦𑀺. 𑁪.𑁨𑁬𑁭) 𑀲𑀼𑀔𑁄𑀧𑁂𑀓𑁆𑀔𑀸𑀲𑀼 𑀘 𑀇𑀝𑁆𑀞𑀸𑀲𑀽𑀢𑀺 𑀏𑀯𑀫𑀸𑀤𑀻𑀲𑀼 𑀧𑀯𑀢𑁆𑀢𑀺 𑀲𑀗𑁆𑀕𑀳𑀺𑀢𑀸.

𑀤𑀼𑀓𑁆𑀔𑀯𑀢𑁆𑀣𑀽𑀢𑀺 𑀤𑀼𑀓𑁆𑀔𑀲𑁆𑀲 𑀑𑀓𑀸𑀲𑁄. 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀫𑁆𑀧𑀺 𑀳𑀺 𑀢𑀁 𑀤𑀼𑀓𑁆𑀔𑀁 𑀚𑀸𑀢𑀺𑀆𑀤𑀻𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀢𑀩𑁆𑀩𑀢𑁆𑀣𑀼𑀓𑀁 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀤𑀼𑀓𑁆𑀔𑀧𑀘𑁆𑀘𑀬𑁂𑀢𑀺 𑀤𑀼𑀓𑁆𑀔𑀳𑁂𑀢𑀼𑀫𑁆𑀳𑀺, 𑀤𑀼𑀓𑁆𑀔𑀲𑁆𑀲 𑀚𑀦𑀓𑁂𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀧𑀘𑁆𑀘𑀬𑀝𑁆𑀞𑀸𑀦𑁂𑀢𑀺 𑀤𑀼𑀓𑁆𑀔𑀚𑀦𑀓𑀓𑀫𑁆𑀫𑀲𑁆𑀲 𑀲𑀳𑀸𑀬𑀪𑀽𑀢𑀸𑀦𑀁 𑀅𑀦𑀺𑀝𑁆𑀞𑀭𑀽𑀧𑀸𑀤𑀺𑀧𑀘𑁆𑀘𑀬𑀸𑀦𑀁 𑀞𑀸𑀦𑁂. 𑀧𑀘𑁆𑀘𑀬𑀲𑀤𑁆𑀤𑁄 𑀳𑀺 𑀚𑀦𑀓𑁂 𑀚𑀦𑀓𑀲𑀳𑀸𑀬𑁂 𑀘 𑀧𑀯𑀢𑁆𑀢𑀢𑀻𑀢𑀺. 𑀆𑀤𑀺-𑀲𑀤𑁆𑀤𑁂𑀦 ‘‘𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁩.𑁧𑁫, 𑁪𑁫-𑁪𑁬, 𑁭𑁬) 𑀲𑀗𑁆𑀔𑀸𑀭𑀤𑀼𑀓𑁆𑀔𑀸𑀤𑀻𑀲𑀼 𑀧𑀯𑀢𑁆𑀢𑀺 𑀤𑀝𑁆𑀞𑀩𑁆𑀩𑀸. 𑀲𑀫𑁆𑀧𑀬𑀼𑀢𑁆𑀢𑁂 𑀯𑀢𑁆𑀣𑀼𑀜𑁆𑀘 𑀓𑀭𑀚𑀓𑀸𑀬𑀁 𑀲𑀼𑀔𑀬𑀢𑀺 𑀮𑀤𑁆𑀥𑀲𑁆𑀲𑀸𑀤𑁂 𑀅𑀦𑀼𑀕𑁆𑀕𑀳𑀺𑀢𑁂 𑀓𑀭𑁄𑀢𑀻𑀢𑀺 𑀲𑀼𑀔𑀸. 𑀲𑀼𑀔𑀸𑀢𑀺 𑀯𑁂𑀤𑀦𑀸𑀲𑀤𑁆𑀤𑀫𑀧𑁂𑀓𑁆𑀔𑀺𑀢𑁆𑀯𑀸 𑀲𑀼𑀔𑀪𑀸𑀯𑀫𑀢𑁆𑀢𑀲𑁆𑀲 𑀅𑀧𑁆𑀧𑀓𑀸𑀲𑀦𑁂𑀦 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑀸 𑀦 𑀓𑀢𑀸. 𑀲𑀪𑀸𑀯𑀢𑁄 𑀲𑀗𑁆𑀓𑀧𑁆𑀧𑀢𑁄 𑀘 𑀬𑀁 𑀇𑀝𑁆𑀞𑀁, 𑀢𑀤𑀦𑀼𑀪𑀯𑀦𑀁 𑀇𑀝𑁆𑀞𑀸𑀓𑀸𑀭𑀸𑀦𑀼𑀪𑀯𑀦𑀁 𑀯𑀸 𑀇𑀝𑁆𑀞𑀸𑀦𑀼𑀪𑀯𑀦𑀁.

𑀲𑀫𑀦𑁆𑀢𑀺 𑀅𑀯𑀺𑀲𑀫𑀁. 𑀲𑀫𑀸 𑀏𑀓𑀻𑀪𑀸𑀯𑀽𑀧𑀕𑀢𑀸 𑀯𑀺𑀬 𑀬𑀼𑀢𑁆𑀢𑀸, 𑀲𑀫𑀁 𑀯𑀸 𑀲𑀳 𑀬𑀼𑀢𑁆𑀢𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀓𑀼𑀧𑁆𑀧𑀸𑀤𑀸𑀢𑀺 𑀏𑀓𑁄 𑀲𑀫𑀸𑀦𑁄 𑀉𑀧𑁆𑀧𑀸𑀤𑁄 𑀏𑀢𑁂𑀲𑀦𑁆𑀢𑀺 𑀏𑀓𑀼𑀧𑁆𑀧𑀸𑀤𑀸, 𑀲𑀫𑀸𑀦𑀧𑀘𑁆𑀘𑀬𑁂𑀳𑀺 𑀲𑀳𑀼𑀧𑁆𑀧𑀢𑁆𑀢𑀺𑀓𑀸𑀢𑀺 𑀅𑀢𑁆𑀣𑁄. 𑀲𑀳𑀼𑀧𑁆𑀧𑀢𑁆𑀢𑀺𑀓𑀸𑀦𑀁 𑀭𑀽𑀧𑀸𑀭𑀽𑀧𑀸𑀦𑀜𑁆𑀘 𑀅𑀜𑁆𑀜𑀫𑀜𑁆𑀜𑀲𑀫𑁆𑀧𑀬𑀼𑀢𑁆𑀢𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 ‘‘𑀏𑀓𑀦𑀺𑀭𑁄𑀥𑀸’’𑀢𑀺 𑀯𑀼𑀢𑁆𑀢𑀁, 𑀬𑁂 𑀲𑀫𑀸𑀦𑀼𑀧𑁆𑀧𑀸𑀤𑀸 𑀲𑀫𑀸𑀦𑀦𑀺𑀭𑁄𑀥𑀸 𑀘, 𑀢𑁂 𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀭𑀽𑀧𑀸𑀭𑀽𑀧𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀫𑁆𑀧𑀬𑁄𑀕𑁄 𑀦𑀺𑀯𑀸𑀭𑀺𑀢𑁄 𑀳𑁄𑀢𑀺. 𑀏𑀯𑀫𑀧𑀺 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀫𑁆𑀧𑀬𑀼𑀢𑁆𑀢𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 ‘‘𑀏𑀓𑀯𑀢𑁆𑀣𑀼𑀓𑀸’’𑀢𑀺 𑀯𑀼𑀢𑁆𑀢𑀁, 𑀬𑁂 𑀏𑀓𑀼𑀧𑁆𑀧𑀸𑀤𑀸 𑀏𑀓𑀦𑀺𑀭𑁄𑀥𑀸 𑀏𑀓𑀯𑀢𑁆𑀣𑀼𑀓𑀸 𑀘, 𑀢𑁂 𑀲𑀫𑁆𑀧𑀬𑀼𑀢𑁆𑀢𑀸𑀢𑀺. 𑀏𑀯𑀫𑀧𑀺 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑁂𑀲𑀼 𑀏𑀓𑀁 𑀫𑀳𑀸𑀪𑀽𑀢𑀁 𑀲𑁂𑀲𑀫𑀳𑀸𑀪𑀽𑀢𑁄𑀧𑀸𑀤𑀸𑀭𑀽𑀧𑀸𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀢𑁂𑀦 𑀢𑀸𑀦𑀺 𑀏𑀓𑀯𑀢𑁆𑀣𑀼𑀓𑀸𑀦𑀻𑀢𑀺, 𑀘𑀓𑁆𑀔𑀸𑀤𑀺𑀦𑀺𑀲𑁆𑀲𑀬𑀪𑀽𑀢𑀸𑀦𑀺 𑀯𑀸 𑀪𑀽𑀢𑀸𑀦𑀺 𑀏𑀓𑀁 𑀯𑀢𑁆𑀣𑀼 𑀏𑀢𑁂𑀲𑀼 𑀲𑀦𑁆𑀦𑀺𑀲𑁆𑀲𑀺𑀢𑀦𑁆𑀢𑀺 𑀏𑀓𑀯𑀢𑁆𑀣𑀼𑀓𑀸𑀦𑀻𑀢𑀺 𑀓𑀧𑁆𑀧𑁂𑀦𑁆𑀢𑀲𑁆𑀲 𑀢𑁂𑀲𑀁 𑀲𑀫𑁆𑀧𑀬𑀼𑀢𑁆𑀢𑀢𑀸𑀧𑀢𑁆𑀢𑀺 𑀲𑀺𑀬𑀸𑀢𑀺 𑀢𑀦𑁆𑀦𑀺𑀯𑀸𑀭𑀡𑀢𑁆𑀣𑀁 ‘‘𑀏𑀓𑀸𑀭𑀫𑁆𑀫𑀡𑀸’’𑀢𑀺 𑀯𑀼𑀢𑁆𑀢𑀁, 𑀬𑁂 𑀏𑀓𑀼𑀧𑁆𑀧𑀸𑀤𑀸…𑀧𑁂… 𑀏𑀓𑀸𑀭𑀫𑁆𑀫𑀡𑀸 𑀘 𑀳𑁄𑀦𑁆𑀢𑀺, 𑀢𑁂 𑀲𑀫𑁆𑀧𑀬𑀼𑀢𑁆𑀢𑀸𑀢𑀺. 𑀧𑀝𑀺𑀮𑁄𑀫𑀢𑁄 𑀯𑀸 𑀏𑀓𑀸𑀭𑀫𑁆𑀫𑀡𑀸𑀢𑀺 𑀯𑀼𑀢𑁆𑀢𑁂 𑀏𑀓𑀯𑀻𑀣𑀺𑀬𑀜𑁆𑀘 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑁆𑀧𑀝𑀺𑀘𑁆𑀙𑀦𑀸𑀦𑀁 𑀦𑀸𑀦𑀸𑀯𑀻𑀣𑀺𑀬𑀁 𑀧𑀭𑀲𑀦𑁆𑀢𑀸𑀦𑁂 𑀘 𑀏𑀓𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀪𑀺𑀦𑁆𑀦𑀯𑀢𑁆𑀣𑀼𑀓𑀸𑀦𑀁 𑀲𑀫𑁆𑀧𑀬𑀼𑀢𑁆𑀢𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 ‘‘𑀏𑀓𑀯𑀢𑁆𑀣𑀼𑀓𑀸’’𑀢𑀺 𑀯𑀼𑀢𑁆𑀢𑀁, 𑀬𑁂 𑀏𑀓𑀯𑀢𑁆𑀣𑀼𑀓𑀸 𑀳𑀼𑀢𑁆𑀯𑀸 𑀏𑀓𑀸𑀭𑀫𑁆𑀫𑀡𑀸, 𑀢𑁂 𑀲𑀫𑁆𑀧𑀬𑀼𑀢𑁆𑀢𑀸𑀢𑀺. 𑀏𑀯𑀫𑀧𑀺 𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀸𑀤𑀻𑀦𑀁 𑀲𑀫𑁆𑀧𑀬𑀼𑀢𑁆𑀢𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 ‘‘𑀏𑀓𑀦𑀺𑀭𑁄𑀥𑀸’’𑀢𑀺 𑀯𑀼𑀢𑁆𑀢𑀁, 𑀬𑁂 𑀏𑀓𑀦𑀺𑀭𑁄𑀥𑀸 𑀳𑀼𑀢𑁆𑀯𑀸 𑀏𑀓𑀯𑀢𑁆𑀣𑀼𑀓𑀸 𑀏𑀓𑀸𑀭𑀫𑁆𑀫𑀡𑀸, 𑀢𑁂 𑀲𑀫𑁆𑀧𑀬𑀼𑀢𑁆𑀢𑀸𑀢𑀺. 𑀓𑀺𑀁 𑀧𑀦 𑀦𑀸𑀦𑀼𑀧𑁆𑀧𑀸𑀤𑀸𑀧𑀺 𑀏𑀯𑀁 𑀢𑀺𑀯𑀺𑀥𑀮𑀓𑁆𑀔𑀡𑀸 𑀳𑁄𑀦𑁆𑀢𑀺, 𑀅𑀣 𑀏𑀓𑀼𑀧𑁆𑀧𑀸𑀤𑀸 𑀏𑀯𑀸𑀢𑀺 𑀯𑀺𑀘𑀸𑀭𑀡𑀸𑀬 𑀏𑀓𑀼𑀧𑁆𑀧𑀸𑀤𑀸 𑀏𑀯 𑀏𑀯𑀁 𑀢𑀺𑀯𑀺𑀥𑀮𑀓𑁆𑀔𑀡𑀸 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀏𑀓𑀼𑀧𑁆𑀧𑀸𑀤𑀸’’𑀢𑀺 𑀯𑀼𑀢𑁆𑀢𑀁.

𑁩. 𑀯𑀺𑀧𑀓𑁆𑀓𑀪𑀸𑀯𑀫𑀸𑀧𑀦𑁆𑀦𑀸𑀦𑀁 𑀅𑀭𑀽𑀧𑀥𑀫𑁆𑀫𑀸𑀦𑀦𑁆𑀢𑀺 𑀬𑀣𑀸 𑀲𑀸𑀮𑀺𑀩𑀻𑀚𑀸𑀤𑀻𑀦𑀁 𑀨𑀮𑀸𑀦𑀺 𑀢𑀁𑀲𑀤𑀺𑀲𑀸𑀦𑀺 𑀦𑀺𑀩𑁆𑀩𑀢𑁆𑀢𑀸𑀦𑀺 𑀯𑀺𑀧𑀓𑁆𑀓𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺, 𑀯𑀺𑀧𑀸𑀓𑀦𑀺𑀭𑀼𑀢𑁆𑀢𑀺𑀜𑁆𑀘 𑀮𑀪𑀦𑁆𑀢𑀺, 𑀦 𑀫𑀽𑀮𑀗𑁆𑀓𑀼𑀭𑀧𑀢𑁆𑀢𑀔𑀦𑁆𑀥𑀦𑀸𑀴𑀸𑀦𑀺, 𑀏𑀯𑀁 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀨𑀮𑀸𑀦𑀺 𑀅𑀭𑀽𑀧𑀥𑀫𑁆𑀫𑀪𑀸𑀯𑁂𑀦 𑀲𑀸𑀭𑀫𑁆𑀫𑀡𑀪𑀸𑀯𑁂𑀦 𑀲𑀼𑀓𑁆𑀓𑀓𑀡𑁆𑀳𑀸𑀤𑀺𑀪𑀸𑀯𑁂𑀦 𑀘 𑀢𑀁𑀲𑀤𑀺𑀲𑀸𑀦𑀺 𑀯𑀺𑀧𑀓𑁆𑀓𑀪𑀸𑀯𑀫𑀸𑀧𑀦𑁆𑀦𑀸𑀦𑀻𑀢𑀺 𑀯𑀺𑀧𑀸𑀓𑀦𑀺𑀭𑀼𑀢𑁆𑀢𑀺𑀁 𑀮𑀪𑀦𑁆𑀢𑀺, 𑀦 𑀭𑀽𑀧𑀥𑀫𑁆𑀫𑀸 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸𑀧𑀺 𑀓𑀫𑁆𑀫𑀸𑀲𑀤𑀺𑀲𑀸𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀚𑀸𑀢𑀺𑀚𑀭𑀸𑀲𑀪𑀸𑀯𑀸𑀢𑀺 𑀚𑀸𑀬𑀦𑀚𑀻𑀭𑀡𑀲𑀪𑀸𑀯𑀸. 𑀯𑀺𑀧𑀸𑀓𑀧𑀓𑀢𑀺𑀓𑀸𑀢𑀺 𑀯𑀺𑀧𑀘𑁆𑀘𑀦𑀧𑀓𑀢𑀺𑀓𑀸. 𑀯𑀺𑀧𑀘𑁆𑀘𑀦𑀲𑀪𑀸𑀯𑀢𑀸 𑀘 𑀅𑀦𑀼𑀧𑀘𑁆𑀙𑀺𑀦𑁆𑀦𑀸𑀯𑀺𑀚𑁆𑀚𑀸𑀢𑀡𑁆𑀳𑀸𑀫𑀸𑀦𑀲𑀦𑁆𑀢𑀸𑀦𑁂 𑀲𑀩𑁆𑀬𑀸𑀧𑀸𑀭𑀢𑀸, 𑀢𑁂𑀦 𑀅𑀪𑀺𑀜𑁆𑀜𑀸𑀤𑀺𑀓𑀼𑀲𑀮𑀸𑀦𑀁 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸𑀤𑀺𑀅𑀓𑀼𑀲𑀮𑀸𑀦𑀜𑁆𑀘 𑀯𑀺𑀧𑀸𑀓𑀸𑀦𑀼𑀧𑁆𑀧𑀸𑀤𑀦𑁂𑀧𑀺 𑀯𑀺𑀧𑀸𑀓𑀥𑀫𑁆𑀫𑀢𑀸 𑀲𑀺𑀤𑁆𑀥𑀸 𑀳𑁄𑀢𑀺. 𑀯𑀺𑀧𑀓𑁆𑀓𑀪𑀸𑀯𑀦𑁆𑀢𑀺 𑀘𑁂𑀢𑁆𑀣 𑀪𑀸𑀯-𑀲𑀤𑁆𑀤𑁂𑀦 𑀲𑀪𑀸𑀯𑁄 𑀏𑀯 𑀯𑀼𑀢𑁆𑀢𑁄. 𑀢𑀁 𑀬𑀣𑀸𑀯𑀼𑀢𑁆𑀢𑀁 𑀯𑀺𑀧𑀓𑁆𑀓𑀲𑀪𑀸𑀯𑀁 𑀤𑀼𑀢𑀺𑀬𑀲𑁆𑀲 𑀯𑀼𑀢𑁆𑀢𑀁 𑀯𑀺𑀧𑀘𑁆𑀘𑀦𑀲𑀪𑀸𑀯𑀜𑁆𑀘 𑀕𑀳𑁂𑀢𑁆𑀯𑀸 ‘‘𑀉𑀪𑀬𑀲𑀪𑀸𑀯𑀧𑀝𑀺𑀓𑁆𑀔𑁂𑀧𑀯𑀲𑁂𑀦𑀸’’𑀢𑀺 𑀆𑀳.

𑁪. 𑀉𑀧𑁂𑀢𑁂𑀦 𑀆𑀤𑀺𑀦𑁆𑀦𑀸 𑀉𑀧𑀸𑀤𑀺𑀦𑁆𑀦𑀸. 𑀓𑀺𑀁 𑀧𑀦 𑀢𑀁 𑀉𑀧𑁂𑀢𑀁, 𑀓𑁂𑀦 𑀘 𑀉𑀧𑁂𑀢𑀁, 𑀓𑀣𑀜𑁆𑀘 𑀉𑀧𑁂𑀢𑀁, 𑀓𑁂 𑀘 𑀢𑁂𑀦 𑀆𑀤𑀺𑀦𑁆𑀦𑀸𑀢𑀺? 𑀲𑀢𑀺 𑀘 𑀮𑁄𑀓𑀼𑀢𑁆𑀢𑀭𑀸𑀦𑀁 𑀓𑁂𑀲𑀜𑁆𑀘𑀺 𑀆𑀭𑀫𑁆𑀫𑀡𑀪𑀸𑀯𑁂 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 𑀉𑀧𑁂𑀢𑀲𑀤𑁆𑀤𑀲𑀫𑁆𑀩𑀦𑁆𑀥𑀺𑀦𑀸 𑀉𑀧𑀬-𑀲𑀤𑁆𑀤𑁂𑀦 𑀯𑀼𑀘𑁆𑀘𑀫𑀸𑀦𑀸𑀳𑀺 𑀘𑀢𑀼𑀩𑁆𑀩𑀺𑀥𑀼𑀧𑀸𑀤𑀸𑀦𑀪𑀽𑀢𑀸𑀳𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀉𑀧𑁂𑀢𑀁, 𑀢𑁂𑀳𑀺 𑀘 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀉𑀧𑁂𑀢𑀁, 𑀦 𑀲𑀫𑀦𑁆𑀦𑀸𑀕𑀫𑀯𑀲𑁂𑀦. 𑀲𑀢𑀺 𑀘 𑀲𑀩𑁆𑀩𑀢𑁂𑀪𑀽𑀫𑀓𑀥𑀫𑁆𑀫𑀸𑀦𑀁 𑀉𑀧𑀸𑀤𑀸𑀦𑀸𑀭𑀫𑁆𑀫𑀡𑀢𑁆𑀢𑁂 𑀬𑁂𑀳𑀺 𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑀸𑀦𑀺 𑀅𑀫𑁆𑀳𑁂𑀳𑀺 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀅𑀫𑁆𑀳𑀸𑀓𑀁 𑀏𑀢𑀸𑀦𑀺 𑀨𑀮𑀸𑀦𑀻𑀢𑀺 𑀕𑀡𑁆𑀳𑀦𑁆𑀢𑁂𑀳𑀺 𑀯𑀺𑀬 𑀆𑀤𑀺𑀦𑁆𑀦𑀸𑀦𑀺, 𑀢𑀸𑀦𑀺 𑀢𑁂𑀪𑀽𑀫𑀓𑀓𑀫𑁆𑀫𑀸𑀦𑀺 𑀓𑀫𑁆𑀫𑀪𑀸𑀯𑁂𑀦 𑀏𑀓𑀢𑁆𑀢𑀁 𑀉𑀧𑀦𑁂𑀢𑁆𑀯𑀸 𑀉𑀧𑁂𑀢𑀦𑁆𑀢𑀺 𑀇𑀥 𑀕𑀳𑀺𑀢𑀸𑀦𑀺. 𑀢𑁂𑀳𑀺 𑀘 𑀦𑀺𑀩𑁆𑀩𑀢𑁆𑀢𑀸𑀦𑀺 𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑀸𑀦𑀺 𑀉𑀧𑀸𑀤𑀺𑀦𑁆𑀦𑀸 𑀥𑀫𑁆𑀫𑀸𑀢𑀺 𑀲𑀩𑁆𑀩𑀫𑁂𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀬𑀜𑁆𑀘 𑀅𑀢𑁆𑀣𑀦𑀬𑁄 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑁄, 𑀦 𑀯𑀘𑀦𑀸𑀦𑀼𑀧𑀼𑀩𑁆𑀩𑁂𑀦𑀸𑀢𑀺. 𑀏𑀢𑁆𑀣𑀸𑀳 𑁋 𑀬𑀤𑀺 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀉𑀧𑁂𑀢𑁂𑀦 𑀆𑀤𑀺𑀦𑁆𑀦𑀸 𑀉𑀧𑀸𑀤𑀺𑀦𑁆𑀦𑀸, 𑀲𑀩𑁆𑀩𑀢𑁂𑀪𑀽𑀫𑀓𑀥𑀫𑁆𑀫𑀸 𑀘 𑀢𑀡𑁆𑀳𑀸𑀤𑀻𑀦𑀁 𑀆𑀭𑀫𑁆𑀫𑀡𑀸 𑀳𑁄𑀦𑁆𑀢𑀺, 𑀦 𑀘 𑀉𑀧𑁂𑀢𑀲𑀤𑁆𑀤𑁄 𑀓𑀫𑁆𑀫𑁂 𑀏𑀯 𑀦𑀺𑀭𑀼𑀴𑁆𑀳𑁄, 𑀢𑁂𑀦 𑀓𑀫𑁆𑀫𑀲𑁆𑀲𑁂𑀯 𑀕𑀳𑀡𑁂 𑀓𑀸𑀭𑀡𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀩𑁆𑀩𑀢𑁂𑀪𑀽𑀫𑀓𑀥𑀫𑁆𑀫𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀅𑀯𑀺𑀚𑁆𑀚𑀸𑀤𑀺𑀳𑁂𑀢𑀽𑀳𑀺 𑀦𑀺𑀩𑁆𑀩𑀢𑁆𑀢𑀸𑀦𑀁 𑀲𑀗𑁆𑀔𑀸𑀭𑀸𑀤𑀺𑀨𑀮𑀸𑀦𑀁 𑀉𑀧𑀸𑀤𑀺𑀦𑁆𑀦𑀢𑁆𑀢𑀁 𑀆𑀧𑀚𑁆𑀚𑀢𑀺 𑀢𑁂𑀲𑀫𑁆𑀧𑀺 𑀢𑁂𑀳𑀺𑀨𑀮𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸. 𑀉𑀧-𑀲𑀤𑁆𑀤𑁂𑀦 𑀘 𑀉𑀧𑁂𑀢𑀢𑀸𑀫𑀢𑁆𑀢𑀁 𑀚𑁄𑀢𑀺𑀢𑀁, 𑀦 𑀆𑀭𑀫𑁆𑀫𑀡𑀓𑀭𑀡𑀁 𑀲𑀫𑀦𑁆𑀦𑀸𑀕𑀫𑀦𑀺𑀯𑀢𑁆𑀢𑀓𑀁, 𑀆𑀤𑀺𑀦𑁆𑀦-𑀲𑀤𑁆𑀤𑁂𑀦 𑀘 𑀕𑀳𑀺𑀢𑀢𑀸𑀫𑀢𑁆𑀢𑀁 𑀯𑀼𑀢𑁆𑀢𑀁, 𑀦 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀢𑀸𑀯𑀺𑀲𑁂𑀲𑁄. 𑀢𑀲𑁆𑀫𑀸 𑀲𑀩𑁆𑀩𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀉𑀧𑀸𑀤𑀺𑀦𑁆𑀦𑀢𑁆𑀢𑀁 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺 𑀩𑁄𑀥𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 𑀤𑁂𑀲𑀦𑀸𑀧𑀯𑀢𑁆𑀢𑀺𑀢𑁄. 𑀬𑁂𑀲𑀜𑁆𑀳𑀺 𑀩𑁄𑀥𑀦𑀢𑁆𑀣𑀁 ‘‘𑀉𑀧𑀸𑀤𑀺𑀦𑁆𑀦𑀸’’𑀢𑀺 𑀏𑀢𑀁 𑀯𑀼𑀢𑁆𑀢𑀁, 𑀢𑁂 𑀢𑁂𑀦𑁂𑀯 𑀯𑀘𑀦𑁂𑀦 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀥𑀫𑁆𑀫𑁂 𑀩𑀼𑀚𑁆𑀛𑀺𑀁𑀲𑀼, 𑀏𑀢𑀭𑀳𑀺 𑀧𑀦 𑀢𑀸𑀯𑀢𑀸 𑀩𑀼𑀚𑁆𑀛𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀲𑀼𑀢𑁆𑀯𑀸 𑀢𑀤𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀏𑀲𑀸 𑀅𑀢𑁆𑀣𑀯𑀺𑀪𑀸𑀯𑀦𑀸 𑀓𑀢𑀸 ‘‘𑀓𑀫𑁆𑀫𑀼𑀦𑀸’’𑀢𑀺.

𑀅𑀬𑀁 𑀧𑀦 𑀅𑀧𑀭𑁄 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 𑁋 𑀉𑀧-𑀲𑀤𑁆𑀤𑁄 𑀉𑀧𑁂𑀢𑀁 𑀤𑀻𑀧𑁂𑀢𑀺. 𑀅𑀬𑀜𑁆𑀳𑀺 𑀉𑀧-𑀲𑀤𑁆𑀤𑁄 𑀲𑀫𑀸𑀲𑁂 𑀧𑀬𑀼𑀚𑁆𑀚𑀫𑀸𑀦𑁄 ‘‘𑀅𑀢𑀺𑀫𑀸𑀮𑀸’’𑀢𑀺𑀆𑀤𑀻𑀲𑀼 𑀅𑀢𑀺-𑀲𑀤𑁆𑀤𑁄 𑀯𑀺𑀬 𑀅𑀢𑀺𑀓𑁆𑀓𑀫𑀦𑀁 𑀲𑀲𑀸𑀥𑀦𑀁 𑀉𑀧𑀕𑀫𑀦𑀁 𑀲𑀲𑀸𑀥𑀦𑀁 𑀯𑀤𑀢𑀺, 𑀉𑀧𑀕𑀫𑀦𑀜𑁆𑀘 𑀉𑀧𑀸𑀤𑀸𑀦𑀉𑀧𑀬𑁄, 𑀢𑁂𑀦 𑀉𑀧𑀕𑀢𑀁 𑀉𑀧𑁂𑀢𑀁. 𑀓𑀺𑀁 𑀧𑀦 𑀢𑀦𑁆𑀢𑀺? 𑀬𑀁 𑀅𑀲𑀢𑀺 𑀉𑀧𑀸𑀤𑀸𑀦𑁂 𑀦 𑀳𑁄𑀢𑀺, 𑀢𑀁 ‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀢𑁂𑀪𑀽𑀫𑀓𑀓𑀫𑁆𑀫𑀁 𑀧𑀘𑁆𑀘𑀬𑀪𑀸𑀯𑁂𑀦 𑀧𑀼𑀭𑀺𑀫𑀚𑀸𑀢𑀼𑀧𑁆𑀧𑀦𑁆𑀦𑁂𑀦 𑀉𑀧𑀸𑀤𑀸𑀦𑁂𑀦 𑀉𑀧𑀕𑀢𑀢𑁆𑀢𑀸 ‘‘𑀉𑀧𑁂𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀦 𑀳𑀺 𑀓𑁄𑀘𑀺 𑀅𑀦𑀼𑀧𑀕𑁆𑀕𑀫𑁆𑀫 𑀅𑀦𑀺𑀘𑁆𑀙𑀦𑁆𑀢𑁄 𑀓𑀫𑁆𑀫𑀁 𑀓𑀭𑁄𑀢𑀻𑀢𑀺. 𑀢𑁂𑀦 𑀉𑀧𑁂𑀢𑁂𑀦 𑀓𑀫𑁆𑀫𑀼𑀦𑀸 𑀧𑀼𑀦𑀩𑁆𑀪𑀯𑀲𑁆𑀲 𑀆𑀤𑀸𑀦𑀁 𑀳𑁄𑀢𑀺. 𑀓𑀫𑁆𑀫𑀼𑀦𑀸 𑀳𑀺 𑀲𑀸𑀲𑀯𑁂𑀦 𑀲𑀢𑁆𑀢𑀸 𑀆𑀤𑀺𑀬𑀦𑁆𑀢𑀺 𑀧𑀼𑀦𑀩𑁆𑀪𑀯𑀁, 𑀢𑀲𑁆𑀫𑀸 𑀆𑀤𑀸𑀢𑀩𑁆𑀩𑀪𑀸𑀯𑁂𑀦 𑀧𑀸𑀓𑀝𑁄 𑀧𑀼𑀦𑀩𑁆𑀪𑀯𑁄. 𑀲𑁄 𑀘 𑀉𑀧𑀧𑀢𑁆𑀢𑀺𑀪𑀯𑁄 𑀢𑁂𑀪𑀽𑀫𑀓𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑀲𑀗𑁆𑀕𑀳𑁄 ‘‘𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’’𑀢𑀺 𑀏𑀢𑁆𑀣 𑀚𑀸𑀢𑀺𑀯𑀘𑀦𑁂 𑀲𑀫𑀯𑀭𑀼𑀤𑁆𑀥𑁄𑀢𑀺 𑀉𑀧𑀸𑀤𑀺𑀦𑁆𑀦𑀯𑀘𑀦𑁂𑀦 𑀉𑀧𑀧𑀢𑁆𑀢𑀺𑀪𑀯𑁄 𑀯𑀼𑀘𑁆𑀘𑀢𑀺, 𑀉𑀧𑀧𑀢𑁆𑀢𑀺𑀪𑀯𑁄 𑀘 𑀢𑁂𑀪𑀽𑀫𑀓𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑀸𑀦𑀻𑀢𑀺 𑀥𑀸𑀢𑀼𑀓𑀣𑀸𑀬𑀁 𑀧𑀓𑀸𑀲𑀺𑀢𑀫𑁂𑀢𑀁. 𑀢𑀲𑁆𑀫𑀸 𑀉𑀧𑁂𑀢𑁂𑀦 𑀆𑀤𑀺𑀦𑁆𑀦𑀸𑀢𑀺 𑀢𑁂 𑀏𑀯 𑀥𑀫𑁆𑀫𑀸 𑀯𑀼𑀘𑁆𑀘𑀦𑁆𑀢𑀻𑀢𑀺 𑀲𑀺𑀤𑁆𑀥𑁄 𑀅𑀬𑀫𑀢𑁆𑀣𑁄𑀢𑀺. 𑀉𑀧𑀸𑀤𑀺𑀦𑁆𑀦-𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀯𑀢𑁆𑀯𑀸 𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀉𑀧𑀸𑀤𑀸𑀦𑀺𑀬-𑀲𑀤𑁆𑀤𑀲𑁆𑀲 𑀯𑀺𑀲𑀼𑀁 𑀉𑀧𑀸𑀤𑀺𑀦𑁆𑀦𑀲𑀤𑁆𑀤𑀸𑀦𑀧𑁂𑀓𑁆𑀔𑀁 𑀅𑀢𑁆𑀣𑀁 𑀯𑀢𑁆𑀢𑀼𑀁 ‘‘𑀆𑀭𑀫𑁆𑀫𑀡𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀫𑀸 𑀏𑀯 𑀅𑀯𑀺𑀲𑁂𑀲𑁂𑀢𑁆𑀯𑀸 ‘‘𑀉𑀧𑀸𑀤𑀸𑀦𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑀸𑀦𑀫𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀧𑀦 𑀉𑀧𑀸𑀤𑀸𑀦𑀺𑀬𑀁 𑀉𑀧𑀸𑀤𑀺𑀦𑁆𑀦𑀁 𑀅𑀦𑀼𑀧𑀸𑀤𑀺𑀦𑁆𑀦𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀲𑁆𑀫𑀸 𑀢𑀁 𑀯𑀺𑀲𑁂𑀲𑀦𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀧𑀸𑀤𑀺𑀦𑁆𑀦𑀸 𑀘 𑀢𑁂 𑀉𑀧𑀸𑀤𑀸𑀦𑀺𑀬𑀸 𑀘𑀸’’𑀢𑀺𑀆𑀤𑀺𑀫𑀸𑀳.

𑁫. 𑀲𑀁𑀓𑀺𑀮𑁂𑀲𑁄𑀢𑀺 𑀤𑀲 𑀓𑀺𑀮𑁂𑀲𑀯𑀢𑁆𑀣𑀽𑀦𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀁𑀓𑀺𑀮𑀺𑀝𑁆𑀞𑀸𑀢𑀺 𑀢𑁂𑀳𑀺 𑀯𑀺𑀩𑀸𑀥𑀺𑀢𑀸 𑀉𑀧𑀢𑀸𑀧𑀺𑀢𑀸 𑀘. 𑀢𑁂 𑀧𑀦 𑀬𑀲𑁆𑀫𑀸 𑀲𑀁𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀸 𑀏𑀓𑀼𑀧𑁆𑀧𑀸𑀤𑀸𑀤𑀻𑀳𑀺 𑀦𑀺𑀦𑁆𑀦𑀸𑀦𑀢𑁆𑀢𑀸 𑀏𑀓𑀻𑀪𑀸𑀯𑀫𑀺𑀯 𑀕𑀢𑀸 𑀯𑀺𑀲𑀸𑀤𑀻𑀳𑀺 𑀯𑀺𑀬 𑀲𑀧𑁆𑀧𑀺𑀆𑀤𑀬𑁄 𑀯𑀺𑀤𑀽𑀲𑀺𑀢𑀸 𑀫𑀮𑀻𑀦𑀸 𑀯𑀺𑀩𑀸𑀥𑀺𑀢𑀸 𑀉𑀧𑀢𑀸𑀧𑀺𑀢𑀸 𑀘 𑀦𑀸𑀫 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀆𑀳 ‘‘𑀲𑀁𑀓𑀺𑀮𑁂𑀲𑁂𑀦 𑀲𑀫𑀦𑁆𑀦𑀸𑀕𑀢𑀸 𑀲𑀁𑀓𑀺𑀮𑀺𑀝𑁆𑀞𑀸’’𑀢𑀺. 𑀲𑀁𑀓𑀺𑀮𑁂𑀲𑀁 𑀅𑀭𑀳𑀦𑁆𑀢𑀻𑀢𑀺 𑀲𑀁𑀓𑀺𑀮𑁂𑀲𑀲𑁆𑀲 𑀆𑀭𑀫𑁆𑀫𑀡𑀪𑀸𑀯𑁂𑀦 𑀢𑀁 𑀮𑀤𑁆𑀥𑀼𑀁 𑀅𑀭𑀳𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀆𑀭𑀫𑁆𑀫𑀡𑀪𑀸𑀯𑀸𑀦𑀢𑀺𑀓𑁆𑀓𑀫𑀦𑀢𑁄𑀢𑀺 𑀏𑀢𑁂𑀦 𑀲𑀁𑀓𑀺𑀮𑁂𑀲𑀸𑀦𑀢𑀺𑀓𑁆𑀓𑀫𑀦𑀫𑁂𑀯 𑀤𑀲𑁆𑀲𑁂𑀢𑀺, 𑀯𑀢𑁆𑀣𑀬𑀼𑀕𑀺𑀓𑀲𑀼𑀗𑁆𑀓𑀲𑀸𑀮𑀺𑀓𑀲𑀤𑁆𑀤𑀸𑀦𑀁 𑀯𑀺𑀬 𑀲𑀁𑀓𑀺𑀮𑁂𑀲𑀺𑀓-𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁬. 𑀲𑀳 𑀯𑀺𑀢𑀓𑁆𑀓𑁂𑀦 𑀳𑁄𑀦𑁆𑀢𑀻𑀢𑀺 𑀯𑀘𑀦𑀲𑁂𑀲𑁄 𑀬𑁄𑀚𑁂𑀢𑀩𑁆𑀩𑁄 𑀅𑀯𑀼𑀘𑁆𑀘𑀫𑀸𑀦𑀲𑁆𑀲𑀧𑀺 𑀪𑀯𑀢𑀺-𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸. 𑀫𑀢𑁆𑀢𑀸𑀢𑀺 𑀧𑀫𑀸𑀡𑀯𑀸𑀘𑀓𑀁 𑀏𑀓𑀁 𑀧𑀤𑀦𑁆𑀢𑀺 𑀕𑀳𑁂𑀢𑁆𑀯𑀸 ‘‘𑀯𑀺𑀘𑀸𑀭𑁄𑀯 𑀫𑀢𑁆𑀢𑀸 𑀏𑀢𑁂𑀲’’𑀦𑁆𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀅𑀜𑁆𑀜𑀢𑁆𑀣 𑀅𑀯𑀺𑀧𑁆𑀧𑀬𑁄𑀕𑀻𑀲𑀼 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀲𑀼 𑀯𑀺𑀘𑀸𑀭𑁄𑀯 𑀏𑀢𑁂𑀲𑀁 𑀫𑀢𑁆𑀢𑀸, 𑀢𑀢𑁄 𑀉𑀤𑁆𑀥𑀁 𑀯𑀺𑀢𑀓𑁆𑀓𑁂𑀦 𑀲𑀫𑁆𑀧𑀬𑁄𑀕𑀁 𑀦 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀫𑀧𑀭𑁄 𑀅𑀢𑁆𑀣𑁄 𑁋 𑀫𑀢𑁆𑀢-𑀲𑀤𑁆𑀤𑁄 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁄. 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸 𑀥𑀫𑁆𑀫𑀸 𑀳𑀺 𑀯𑀺𑀢𑀓𑁆𑀓𑀯𑀺𑀲𑀺𑀝𑁆𑀞𑁂𑀦 𑀯𑀺𑀘𑀸𑀭𑁂𑀦 𑀲𑀯𑀺𑀘𑀸𑀭𑀸, 𑀏𑀢𑁂 𑀧𑀦 𑀯𑀺𑀘𑀸𑀭𑀫𑀢𑁆𑀢𑁂𑀦 𑀯𑀺𑀢𑀓𑁆𑀓𑀲𑀗𑁆𑀔𑀸𑀢𑀯𑀺𑀲𑁂𑀲𑀭𑀳𑀺𑀢𑁂𑀦, 𑀢𑀲𑁆𑀫𑀸 ‘‘𑀯𑀺𑀘𑀸𑀭𑀫𑀢𑁆𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀯𑀺𑀘𑀸𑀭𑀫𑀢𑁆𑀢𑀯𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀯𑀺𑀘𑀸𑀭𑀫𑀢𑁆𑀢𑀯𑀘𑀦𑁂𑀦 𑀅𑀯𑀺𑀢𑀓𑁆𑀓𑀢𑁆𑀢𑁂 𑀲𑀺𑀤𑁆𑀥𑁂 𑀅𑀯𑀺𑀢𑀓𑁆𑀓𑀸𑀦𑀁 𑀅𑀜𑁆𑀜𑁂𑀲𑀫𑁆𑀧𑀺 𑀅𑀢𑁆𑀣𑀺𑀪𑀸𑀯𑀚𑁄𑀢𑀦𑀢𑁆𑀣𑀁 𑀅𑀯𑀺𑀢𑀓𑁆𑀓𑀯𑀘𑀦𑀁. 𑀅𑀯𑀺𑀢𑀓𑁆𑀓𑀸 𑀳𑀺 𑀯𑀺𑀘𑀸𑀭𑀫𑀢𑁆𑀢𑀸 𑀘 𑀲𑀦𑁆𑀢𑀺 𑀅𑀯𑀺𑀘𑀸𑀭𑀸 𑀘𑀸𑀢𑀺 𑀦𑀺𑀯𑀢𑁆𑀢𑁂𑀢𑀩𑁆𑀩𑀸 𑀕𑀳𑁂𑀢𑀩𑁆𑀩𑀸 𑀘 𑀳𑁄𑀦𑁆𑀢𑀺, 𑀢𑁂𑀲𑀼 𑀅𑀯𑀼𑀘𑁆𑀘𑀫𑀸𑀦𑁂𑀲𑀼 𑀦𑀺𑀯𑀢𑁆𑀢𑁂𑀢𑀩𑁆𑀩𑀕𑀳𑁂𑀢𑀩𑁆𑀩𑀲𑁆𑀲 𑀅𑀤𑀲𑁆𑀲𑀺𑀢𑀢𑁆𑀢𑀸 𑀯𑀺𑀘𑀸𑀭𑀫𑀢𑁆𑀢𑀸𑀯𑀅𑀯𑀺𑀢𑀓𑁆𑀓𑀸𑀢𑀺 𑀆𑀧𑀚𑁆𑀚𑁂𑀬𑁆𑀬𑀸𑀢𑀺. 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁄 𑀧𑀦 𑀬𑀣𑀸𑀓𑀸𑀫𑀁 𑀳𑁄𑀢𑀻𑀢𑀺 𑀲𑀸𑀫𑀜𑁆𑀜𑁂𑀦 𑀅𑀯𑀺𑀢𑀓𑁆𑀓𑀪𑀸𑀯𑁂𑀦 𑀲𑀳 𑀯𑀺𑀘𑀸𑀭𑀫𑀢𑁆𑀢𑀢𑀸𑀬 𑀥𑀫𑁆𑀫𑀯𑀺𑀲𑁂𑀲𑀦𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸’’𑀢𑀺 𑀧𑀤𑀸𑀦𑀼𑀓𑁆𑀓𑀫𑁄 𑀓𑀢𑁄.

𑀅𑀣 𑀯𑀸 𑀲𑀯𑀺𑀘𑀸𑀭𑀸 𑀤𑀼𑀯𑀺𑀥𑀸 𑀲𑀯𑀺𑀢𑀓𑁆𑀓𑀸 𑀅𑀯𑀺𑀢𑀓𑁆𑀓𑀸 𑀘, 𑀢𑁂𑀲𑀼 𑀅𑀯𑀺𑀢𑀓𑁆𑀓𑁂 𑀦𑀺𑀯𑀢𑁆𑀢𑁂𑀢𑀼𑀁 𑀆𑀤𑀺𑀧𑀤𑀁 𑀯𑀼𑀢𑁆𑀢𑀁. 𑀅𑀯𑀺𑀘𑀸𑀭𑀸 𑀘 𑀤𑀼𑀯𑀺𑀥𑀸 𑀲𑀯𑀺𑀢𑀓𑁆𑀓𑀸 𑀅𑀯𑀺𑀢𑀓𑁆𑀓𑀸 𑀘, 𑀢𑁂𑀲𑀼 𑀲𑀯𑀺𑀢𑀓𑁆𑀓𑁂 𑀦𑀺𑀯𑀢𑁆𑀢𑁂𑀢𑀼𑀁 𑀢𑀢𑀺𑀬𑀧𑀤𑀁 𑀯𑀼𑀢𑁆𑀢𑀁. 𑀬𑁂 𑀧𑀦 𑀤𑁆𑀯𑀻𑀳𑀺𑀧𑀺 𑀦𑀺𑀯𑀢𑁆𑀢𑀺𑀢𑀸 𑀅𑀯𑀺𑀢𑀓𑁆𑀓𑀸 𑀲𑀯𑀺𑀢𑀓𑁆𑀓𑀸 𑀘 𑀲𑀯𑀺𑀘𑀸𑀭𑀸 𑀅𑀯𑀺𑀘𑀸𑀭𑀸 𑀘, 𑀢𑁂𑀲𑀼 𑀅𑀜𑁆𑀜𑀢𑀭𑀤𑀲𑁆𑀲𑀦𑀁 𑀯𑀸 𑀓𑀢𑁆𑀢𑀩𑁆𑀩𑀁 𑀲𑀺𑀬𑀸 𑀉𑀪𑀬𑀤𑀲𑁆𑀲𑀦𑀁 𑀯𑀸. 𑀉𑀪𑀬𑀤𑀲𑁆𑀲𑀦𑁂 𑀓𑀭𑀺𑀬𑀫𑀸𑀦𑁂 𑀬𑀤𑀺 ‘‘𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸’’𑀢𑀺 𑀯𑀼𑀘𑁆𑀘𑁂𑀬𑁆𑀬, 𑀆𑀤𑀺𑀧𑀤𑀢𑁆𑀣𑀢𑀸𑀯 𑀆𑀧𑀚𑁆𑀚𑀢𑀺. 𑀅𑀣 ‘‘𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸’’𑀢𑀺 𑀯𑀼𑀘𑁆𑀘𑁂𑀬𑁆𑀬, 𑀅𑀦𑁆𑀢𑀧𑀤𑀢𑁆𑀣𑀢𑀸. 𑀅𑀣 𑀧𑀦 ‘‘𑀅𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸 𑀲𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸’’𑀢𑀺 𑀯𑀼𑀘𑁆𑀘𑁂𑀬𑁆𑀬, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀦𑀁 𑀯𑀺𑀬 𑀅𑀢𑁆𑀣𑀦𑁆𑀢𑀭𑀸𑀪𑀸𑀯𑁄 𑀯𑀸 𑀲𑀗𑁆𑀓𑀭𑀤𑁄𑀲𑁄 𑀯𑀸 𑀏𑀓𑀲𑁆𑀲𑁂𑀯 𑀲𑀯𑀺𑀢𑀓𑁆𑀓𑀸𑀯𑀺𑀢𑀓𑁆𑀓𑀢𑀸𑀲𑀯𑀺𑀘𑀸𑀭𑀸𑀯𑀺𑀘𑀸𑀭𑀢𑀸𑀯𑀺𑀭𑁄𑀥𑁄 𑀯𑀸 𑀆𑀧𑀚𑁆𑀚𑁂𑀬𑁆𑀬, 𑀢𑀲𑁆𑀫𑀸 𑀅𑀜𑁆𑀜𑀢𑀭𑀤𑀲𑁆𑀲𑀦𑁂𑀦 𑀇𑀢𑀭𑀫𑁆𑀧𑀺 𑀧𑀓𑀸𑀲𑁂𑀢𑀼𑀁 𑀅𑀯𑀺𑀢𑀓𑁆𑀓𑀯𑀘𑀦𑁂𑀦 𑀤𑁆𑀯𑀺𑀧𑁆𑀧𑀓𑀸𑀭𑁂𑀲𑀼 𑀯𑀢𑁆𑀢𑀩𑁆𑀩𑁂𑀲𑀼 𑀲𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁂 𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁂 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸’’𑀢𑀺. 𑀅𑀣 𑀯𑀸 𑀯𑀺𑀢𑀓𑁆𑀓𑀸𑀪𑀸𑀯𑁂𑀦 𑀏𑀢𑁂 𑀯𑀺𑀘𑀸𑀭𑀫𑀢𑁆𑀢𑀸, 𑀦 𑀯𑀺𑀘𑀸𑀭𑀢𑁄 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺 𑀥𑀫𑁆𑀫𑀲𑁆𑀲 𑀅𑀪𑀸𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 𑀅𑀯𑀺𑀢𑀓𑁆𑀓𑀯𑀘𑀦𑁂𑀦 𑀯𑀺𑀘𑀸𑀭𑀫𑀢𑁆𑀢𑀸 𑀯𑀺𑀲𑁂𑀲𑀺𑀢𑀸.

𑁭. 𑀉𑀧𑁂𑀓𑁆𑀔𑀢𑀻𑀢𑀺 𑀯𑁂𑀤𑀬𑀫𑀸𑀦𑀸𑀧𑀺 𑀫𑀚𑁆𑀛𑀢𑁆𑀢𑀯𑁂𑀤𑀦𑀸 𑀲𑀼𑀔𑀸𑀓𑀸𑀭𑁂 𑀤𑀼𑀓𑁆𑀔𑀸𑀓𑀸𑀭𑁂 𑀘 𑀉𑀤𑀸𑀲𑀺𑀦𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀉𑀧𑁂𑀢𑀸 𑀬𑀼𑀢𑁆𑀢𑀸 𑀲𑀼𑀔𑀤𑀼𑀓𑁆𑀔𑀸𑀦𑀁 𑀅𑀯𑀺𑀭𑀼𑀤𑁆𑀥𑀸 𑀇𑀓𑁆𑀔𑀸 𑀅𑀦𑀼𑀪𑀯𑀦𑀁 𑀉𑀧𑁂𑀓𑁆𑀔𑀸. 𑀯𑀺𑀲𑁂𑀲𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀦𑀸𑀦𑀢𑁆𑀢𑀤𑀲𑁆𑀲𑀦𑀯𑀲𑁂𑀦. 𑀬𑀤𑀺 𑀳𑀺 𑀧𑀻𑀢𑀺𑀲𑀳𑀕𑀢𑀸 𑀏𑀯 𑀲𑀼𑀔𑀲𑀳𑀕𑀢𑀸 𑀲𑀺𑀬𑀼𑀁, ‘‘𑀧𑀻𑀢𑀺𑀲𑀳𑀕𑀢𑀸’’𑀢𑀺 𑀏𑀢𑁂𑀦𑁂𑀯 𑀲𑀺𑀤𑁆𑀥𑀢𑁆𑀢𑀸 ‘‘𑀲𑀼𑀔𑀲𑀳𑀕𑀢𑀸’’𑀢𑀺 𑀇𑀤𑀁 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, ‘‘𑀲𑀼𑀔𑀲𑀳𑀕𑀢𑀸’’𑀢𑀺 𑀯𑀸 𑀯𑀼𑀘𑁆𑀘𑀫𑀸𑀦𑁂 ‘‘𑀧𑀻𑀢𑀺𑀲𑀳𑀕𑀢𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀢𑀢𑁄 𑀢𑀺𑀓𑀁 𑀧𑀽𑀭𑁂𑀦𑁆𑀢𑁂𑀦 𑀤𑀼𑀓𑁆𑀔𑀲𑀳𑀕𑀢𑀧𑀤𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀏𑀯𑀜𑁆𑀘 𑀲𑀢𑀺 ‘‘𑀯𑁂𑀤𑀦𑀸𑀢𑁆𑀢𑀺𑀓𑁄 𑀏𑀯𑀸𑀬’’𑀦𑁆𑀢𑀺 𑀯𑀼𑀢𑁆𑀢𑀯𑀘𑀦𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 ‘‘𑀧𑀻𑀢𑀺𑀲𑀳𑀕𑀢𑀸’’𑀢𑀺 𑀯𑀢𑁆𑀯𑀸 ‘‘𑀲𑀼𑀔𑀲𑀳𑀕𑀢𑀸’’𑀢𑀺 𑀯𑀤𑀦𑁆𑀢𑁄 𑀧𑀻𑀢𑀺𑀯𑀺𑀧𑁆𑀧𑀬𑀼𑀢𑁆𑀢𑀫𑁆𑀧𑀺 𑀲𑀼𑀔𑀁 𑀅𑀢𑁆𑀣𑀻𑀢𑀺 𑀢𑀢𑀺𑀬𑀚𑁆𑀛𑀸𑀦𑀓𑀸𑀬𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀲𑀼𑀔𑀁 𑀲𑀧𑁆𑀧𑀻𑀢𑀺𑀓𑀲𑀼𑀔𑀢𑁄 𑀪𑀺𑀦𑁆𑀦𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀯𑀸 𑀧𑀻𑀢𑀺𑀲𑀼𑀔𑀸𑀦𑀁 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀦𑀸𑀦𑀢𑁆𑀢𑀸𑀦𑀁 𑀦𑀸𑀦𑀢𑁆𑀢𑀤𑀲𑁆𑀲𑀦𑀢𑁆𑀣𑀁 𑀅𑀬𑀁 𑀢𑀺𑀓𑁄 𑀯𑀼𑀢𑁆𑀢𑁄. ‘‘𑀧𑀻𑀢𑀺𑀲𑀳𑀕𑀢𑀸’’𑀢𑀺 𑀏𑀢𑁆𑀣 𑀳𑀺 𑀲𑀼𑀔𑁂𑀓𑀤𑁂𑀲𑁄 𑀲𑀗𑁆𑀕𑀳𑀺𑀢𑁄, 𑀦 𑀧𑀻𑀢𑀺. ‘‘𑀲𑀼𑀔𑀲𑀳𑀕𑀢𑀸’’𑀢𑀺 𑀏𑀢𑁆𑀣 𑀧𑀻𑀢𑀺 𑀲𑀗𑁆𑀕𑀳𑀺𑀢𑀸, 𑀦 𑀲𑀼𑀔𑀁. 𑀧𑀻𑀢𑀺𑀯𑀺𑀧𑁆𑀧𑀬𑀼𑀢𑁆𑀢𑀲𑀼𑀔𑀲𑀳𑀕𑀢𑀸 𑀘 𑀧𑀼𑀭𑀺𑀫𑁂𑀦 𑀅𑀲𑀗𑁆𑀕𑀳𑀺𑀢𑀸 𑀧𑀘𑁆𑀙𑀺𑀫𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀲𑀺𑀤𑁆𑀥𑁄 𑀧𑀻𑀢𑀺𑀲𑀼𑀔𑀸𑀦𑀁 𑀯𑀺𑀲𑁂𑀲𑁄𑀢𑀺.

𑁮. 𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑀦𑀢𑁄𑀢𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀁 𑀲𑀦𑁆𑀥𑀸𑀬𑀸𑀳. 𑀅𑀣 𑀯𑀸 𑀥𑀫𑁆𑀫𑀘𑀓𑁆𑀔𑀼 𑀧𑀼𑀦𑀧𑁆𑀧𑀼𑀦𑀁 𑀦𑀺𑀩𑁆𑀩𑀢𑁆𑀢𑀦𑁂𑀦 𑀪𑀸𑀯𑀦𑀸𑀪𑀸𑀯𑀁 𑀅𑀧𑁆𑀧𑀢𑁆𑀢𑀁 𑀤𑀲𑁆𑀲𑀦𑀁 𑀦𑀸𑀫, 𑀥𑀫𑁆𑀫𑀘𑀓𑁆𑀔𑀼 𑀘 𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀓𑀭𑀡𑁂𑀦 𑀘𑀢𑀼𑀲𑀘𑁆𑀘𑀥𑀫𑁆𑀫𑀤𑀲𑁆𑀲𑀦𑀁 𑀢𑀤𑀢𑀺𑀲𑀬𑁄, 𑀢𑀲𑁆𑀫𑀸 𑀦𑀢𑁆𑀣𑁂𑀢𑁆𑀣 𑀕𑁄𑀢𑁆𑀭𑀪𑀼𑀲𑁆𑀲 𑀤𑀲𑁆𑀲𑀦𑀪𑀸𑀯𑀸𑀧𑀢𑁆𑀢𑀻𑀢𑀺. 𑀉𑀪𑀬𑀧𑀝𑀺𑀓𑁆𑀔𑁂𑀧𑀯𑀲𑁂𑀦𑀸𑀢𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀯𑀼𑀢𑁆𑀢𑀥𑀫𑁆𑀫𑀧𑀝𑀺𑀓𑁆𑀔𑁂𑀧𑀯𑀲𑁂𑀦, 𑀦 𑀧𑀳𑀸𑀬𑀓𑀧𑀝𑀺𑀓𑁆𑀔𑁂𑀧𑀯𑀲𑁂𑀦. 𑀢𑀣𑀸 𑀳𑀺 𑀲𑀢𑀺 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀅𑀜𑁆𑀜𑁄 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀳𑀸𑀬𑀓𑁄 𑀅𑀢𑁆𑀣𑀺, 𑀢𑁂𑀦 𑀧𑀳𑀸𑀢𑀩𑁆𑀩𑀸 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀢𑀺 𑀅𑀬𑀫𑀢𑁆𑀣𑁄 𑀆𑀧𑀚𑁆𑀚𑀢𑀺, 𑀦 𑀘 𑀅𑀜𑁆𑀜𑁄 𑀧𑀳𑀸𑀬𑀓𑁄 𑀅𑀢𑁆𑀣𑀺 𑀅𑀜𑁆𑀜𑁂𑀳𑀺 𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑀜𑁆𑀘 𑀧𑀼𑀦𑀧𑁆𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀸, 𑀦𑀸𑀧𑀺 𑀧𑀳𑀸𑀢𑀩𑁆𑀩𑀸 𑀢𑀢𑀺𑀬𑀧𑀤𑁂𑀦 𑀲𑀗𑁆𑀕𑀬𑁆𑀳𑀦𑁆𑀢𑀺, 𑀓𑀺𑀦𑁆𑀢𑀼 𑀅𑀧𑁆𑀧𑀳𑀸𑀢𑀩𑁆𑀩𑀸 𑀏𑀯𑀸𑀢𑀺. 𑀢𑀲𑁆𑀫𑀸 𑀧𑀳𑀸𑀢𑀩𑁆𑀩𑀧𑀤𑀁 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑁆𑀯𑀸 𑀦𑁂𑀯 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑀦𑁂𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑁂𑀳𑀺 𑀅𑀜𑁆𑀜𑁂 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁯. 𑀏𑀯𑀫𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑀸𑀬𑀼𑀢𑁆𑀢𑀺𑀢𑁄 𑀘 𑀲𑀤𑁆𑀤𑀸𑀬𑀼𑀢𑁆𑀢𑀺𑀢𑁄 𑀘 𑀅𑀕𑁆𑀕𑀳𑁂𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀺. 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀅𑀧𑁆𑀧𑀳𑀸𑀢𑀩𑁆𑀩𑀳𑁂𑀢𑀼𑀫𑀢𑁆𑀢𑁂𑀲𑀼 𑀳𑀺 𑀕𑀬𑁆𑀳𑀫𑀸𑀦𑁂𑀲𑀼 𑀅𑀳𑁂𑀢𑀼𑀓𑀸 𑀅𑀲𑀗𑁆𑀕𑀳𑀺𑀢𑀸𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀲𑁆𑀲 𑀅𑀢𑁆𑀣𑀲𑁆𑀲 𑀅𑀧𑀭𑀺𑀧𑀼𑀡𑁆𑀡𑀢𑁆𑀢𑀸 𑀅𑀢𑁆𑀣𑀸𑀬𑀼𑀢𑁆𑀢𑀺, 𑀧𑀳𑀸𑀢𑀩𑁆𑀩𑀲𑀤𑁆𑀤𑀲𑁆𑀲 𑀦𑀺𑀘𑁆𑀘𑀲𑀸𑀧𑁂𑀓𑁆𑀔𑀢𑁆𑀢𑁂 𑀘 𑀲𑀢𑀺 𑀦 𑀲𑀫𑁆𑀩𑀦𑁆𑀥𑀻𑀲𑀤𑁆𑀤𑀢𑁄 𑀧𑀳𑀸𑀬𑀓𑀢𑁄 𑀅𑀜𑁆𑀜𑀁 𑀧𑀝𑀺𑀲𑁂𑀥𑀁 𑀅𑀧𑁂𑀓𑁆𑀔𑀫𑀸𑀦𑀲𑁆𑀲 𑀳𑁂𑀢𑀼𑀲𑀤𑁆𑀤𑁂𑀦 𑀲𑀫𑀸𑀲𑁄 𑀉𑀧𑀧𑀚𑁆𑀚𑀢𑀻𑀢𑀺 𑀲𑀤𑁆𑀤𑀸𑀬𑀼𑀢𑁆𑀢𑀺 𑀘 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺 𑀧𑀳𑀸𑀢𑀩𑁆𑀩-𑀲𑀤𑁆𑀤𑀁 𑀧𑀝𑀺𑀲𑁂𑀥𑁂𑀦 𑀅𑀬𑁄𑀚𑁂𑀢𑁆𑀯𑀸 𑀬𑁂𑀲𑀁 𑀅𑀜𑁆𑀜𑀧𑀤𑀢𑁆𑀣𑁂 𑀲𑀫𑀸𑀲𑁄, 𑀢𑀩𑁆𑀩𑀺𑀲𑁂𑀲𑀦𑀁 𑀅𑀢𑁆𑀣𑀻𑀢𑀺 𑀇𑀤𑀁 𑀧𑀝𑀺𑀲𑁂𑀥𑁂𑀦 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀧𑀳𑀸𑀢𑀩𑁆𑀩𑁄 𑀳𑁂𑀢𑀼 𑀏𑀢𑁂𑀲𑀁 𑀦𑁂𑀯𑀢𑁆𑀣𑀻𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀜𑁆𑀘 𑀲𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑁄 𑀲𑀩𑁆𑀩𑁄 𑀲𑀗𑁆𑀕𑀳𑀺𑀢𑁄𑀢𑀺. 𑀅𑀢𑁆𑀣𑀸𑀬𑀼𑀢𑁆𑀢𑀺 𑀫𑀸 𑀳𑁄𑀢𑀼, 𑀲𑀤𑁆𑀤𑁄 𑀧𑀦 𑀇𑀥𑀸𑀧𑀺 𑀦 𑀬𑀼𑀢𑁆𑀢𑁄. 𑀏𑀓𑀦𑁆𑀢𑀬𑁄𑀕𑀻𑀦𑀁 𑀅𑀢𑁆𑀣𑀺-𑀲𑀤𑁆𑀤𑀫𑁂𑀯 𑀳𑀺 𑀅𑀧𑁂𑀓𑁆𑀔𑀫𑀸𑀦𑀸𑀦𑀁 𑀉𑀪𑀺𑀦𑁆𑀦𑀁 𑀧𑀳𑀸𑀢𑀩𑁆𑀩𑀳𑁂𑀢𑀼-𑀲𑀤𑁆𑀤𑀸𑀦𑀁 𑀲𑀫𑀸𑀲𑁄 𑀬𑀼𑀢𑁆𑀢𑁄, 𑀦 𑀧𑀝𑀺𑀲𑁂𑀥𑀁 𑀅𑀧𑁂𑀓𑁆𑀔𑀫𑀸𑀦𑀸𑀦𑀦𑁆𑀢𑀺, 𑀢𑀲𑁆𑀫𑀸 𑀕𑀳𑁂𑀢𑀩𑁆𑀩𑀢𑁆𑀣𑀤𑀲𑁆𑀲𑀦𑀫𑀢𑁆𑀢𑀁 𑀏𑀢𑀁 𑀓𑀢𑀁, 𑀲𑀤𑁆𑀤𑁄 𑀧𑀦 𑀬𑀣𑀸 𑀬𑀼𑀚𑁆𑀚𑀢𑀺, 𑀢𑀣𑀸 𑀬𑁄𑀚𑁂𑀢𑀩𑁆𑀩𑁄. 𑀏𑀯𑀁 𑀧𑀦 𑀬𑀼𑀚𑁆𑀚𑀢𑀺 𑁋 𑀧𑀳𑀸𑀢𑀩𑁆𑀩𑁄 𑀳𑁂𑀢𑀼 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸. 𑀓𑁂𑀦 𑀧𑀳𑀸𑀢𑀩𑁆𑀩𑁄𑀢𑀺? 𑀤𑀲𑁆𑀲𑀦𑁂𑀦 𑀪𑀸𑀯𑀦𑀸𑀬 𑀘. 𑀢𑀬𑀺𑀤𑀁 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀧𑀤𑀁 𑀤𑀲𑁆𑀲𑀦𑀪𑀸𑀯𑀦𑀸𑀧𑀤𑁂𑀳𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀬𑁄𑀚𑁂𑀢𑁆𑀯𑀸 𑀢𑁂𑀳𑀺 𑀬𑀼𑀢𑁆𑀢𑁂𑀦 𑀬𑁂 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸 𑀦𑁂𑀯 𑀳𑁄𑀦𑁆𑀢𑀺, 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸 𑀘 𑀦 𑀳𑁄𑀦𑁆𑀢𑀻𑀢𑀺 𑀧𑀝𑀺𑀲𑁂𑀥𑀜𑁆𑀘 𑀯𑀺𑀲𑀼𑀁 𑀯𑀺𑀲𑀼𑀁 𑀬𑁄𑀚𑁂𑀢𑁆𑀯𑀸 𑀢𑁂 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀯𑀘𑀦𑀁 𑀯𑀺𑀬 𑀳𑀺 𑀧𑀼𑀭𑀺𑀫𑀧𑀤𑀤𑁆𑀯𑀬𑀲𑀗𑁆𑀕𑀳𑀺𑀢𑀥𑀫𑁆𑀫𑀧𑀝𑀺𑀲𑁂𑀥𑀦𑁂𑀦 𑀢𑀤𑀜𑁆𑀜𑀥𑀫𑁆𑀫𑀦𑀺𑀤𑀲𑁆𑀲𑀦𑀫𑁂𑀢𑀁 𑀳𑁄𑀢𑀺, 𑀦 𑀅𑀳𑁂𑀢𑀼𑀓𑀧𑀤𑀁 𑀯𑀺𑀬 𑀳𑁂𑀢𑀼𑀯𑀺𑀭𑀳𑀧𑁆𑀧𑀓𑀸𑀲𑀦𑁂𑀦𑀸𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀤𑁆𑀯𑁂 𑀧𑀝𑀺𑀲𑁂𑀥𑀸 𑀬𑀼𑀢𑁆𑀢𑀸 𑀳𑁄𑀦𑁆𑀢𑀺.

𑀳𑁂𑀢𑀼𑀬𑁂𑀯 𑀳𑀺 𑀢𑁂𑀲𑀁 𑀦𑀢𑁆𑀣𑀺, 𑀬𑁄 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀧𑀳𑀸𑀢𑀩𑁆𑀩𑁄 𑀲𑀺𑀬𑀸𑀢𑀺 𑀧𑀼𑀭𑀺𑀫𑀲𑁆𑀫𑀺𑀜𑁆𑀳𑀺 𑀅𑀢𑁆𑀣𑁂 𑀳𑁂𑀢𑀽𑀦𑀁 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀧𑀳𑀸𑀢𑀩𑁆𑀩𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀧𑀝𑀺𑀓𑁆𑀔𑁂𑀧𑁄 𑀘 𑀧𑀳𑀸𑀢𑀩𑁆𑀩𑀸𑀲𑀗𑁆𑀓𑀸𑀲𑀩𑁆𑀪𑀸𑀯𑁂 𑀳𑁄𑀢𑀺, 𑀧𑀳𑀸𑀢𑀩𑁆𑀩𑀸𑀲𑀗𑁆𑀓𑀸 𑀘 𑀳𑁂𑀢𑀼𑀫𑁆𑀳𑀺 𑀲𑀢𑀺 𑀲𑀺𑀬𑀸, 𑀢𑁂𑀲𑀁 𑀧𑀦 𑀅𑀳𑁂𑀢𑀼𑀓𑀸𑀦𑀁 𑀳𑁂𑀢𑀼𑀬𑁂𑀯 𑀦𑀢𑁆𑀣𑀺, 𑀬𑁄 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀧𑀳𑀸𑀢𑀩𑁆𑀩𑁄 𑀲𑀺𑀬𑀸, 𑀢𑀤𑀪𑀸𑀯𑀸 𑀧𑀳𑀸𑀢𑀩𑁆𑀩𑀸𑀲𑀗𑁆𑀓𑀸 𑀦𑀢𑁆𑀣𑀻𑀢𑀺 𑀢𑀁𑀦𑀺𑀯𑀸𑀭𑀡𑀢𑁆𑀣𑁄 𑀧𑀝𑀺𑀓𑁆𑀔𑁂𑀧𑁄 𑀦 𑀲𑀫𑁆𑀪𑀯𑀢𑀺, 𑀢𑀲𑁆𑀫𑀸 ‘‘𑀦𑁂𑀯𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑁄 𑀳𑁂𑀢𑀼 𑀏𑀢𑁂𑀲’’𑀦𑁆𑀢𑀺 𑀏𑀯𑀁 𑀅𑀳𑁂𑀢𑀼𑀓𑀸𑀦𑀁 𑀕𑀳𑀡𑀁 𑀦 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀇𑀢𑀭𑀣𑀸 𑀳𑀺 𑀅𑀳𑁂𑀢𑀼𑀓𑀸𑀦𑀁 𑀅𑀕𑁆𑀕𑀳𑀡𑀁 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑀲𑁆𑀲 𑀧𑀸𑀓𑀝𑀢𑁆𑀢𑀸 𑀦 𑀓𑀸𑀭𑀡𑀲𑀸𑀥𑀦𑀻𑀬𑁄 𑀏𑀲𑁄𑀢𑀺 𑀕𑀳𑁂𑀢𑀩𑁆𑀩𑀢𑁆𑀣𑀲𑁆𑀲𑁂𑀯 𑀓𑀸𑀭𑀡𑀁 𑀯𑀤𑀦𑁆𑀢𑁄 ‘‘𑀳𑁂𑀢𑀼𑀬𑁂𑀯 𑀳𑀺 𑀢𑁂𑀲𑀁 𑀦𑀢𑁆𑀣𑀻’’𑀢𑀺𑀆𑀤𑀺𑀫𑀸𑀳. 𑀢𑁂𑀲𑀜𑁆𑀳𑀺 𑀦𑁂𑀯𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀧𑀤𑀯𑀘𑀦𑀻𑀬𑀸𑀦𑀁 𑀬𑁄 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀧𑀳𑀸𑀢𑀩𑁆𑀩𑁄 𑀲𑀺𑀬𑀸, 𑀲𑁄 𑀏𑀯𑀁𑀧𑀓𑀸𑀭𑁄 𑀳𑁂𑀢𑀼 𑀦𑀢𑁆𑀣𑀺. 𑀢𑁂 𑀳𑀺 𑀅𑀦𑁂𑀓𑀧𑁆𑀧𑀓𑀸𑀭𑀸 𑀲𑀳𑁂𑀢𑀼𑀓𑀸 𑀅𑀳𑁂𑀢𑀼𑀓𑀸 𑀘𑀸𑀢𑀺, 𑀢𑀲𑁆𑀫𑀸 𑀦𑁂𑀯𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑁄 𑀳𑁂𑀢𑀼 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀅𑀬𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑁧𑁦. 𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸𑀢𑀺 𑀇𑀤𑀁 𑀘𑀢𑀼𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀆𑀭𑀫𑁆𑀫𑀡𑀓𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀜𑁆𑀜𑀣𑀸 𑀕𑁄𑀢𑁆𑀭𑀪𑀼𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀻𑀦𑀫𑁆𑀧𑀺 𑀅𑀧𑀘𑀬𑀕𑀸𑀫𑀺𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺. 𑀅𑀣 𑀯𑀸 𑀳𑁂𑀢𑀼𑀪𑀸𑀯𑁂𑀦 𑀅𑀧𑀘𑀬𑀁 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀧𑀘𑀬𑀕𑀸𑀫𑀺𑀦𑁄. 𑀦𑀺𑀩𑁆𑀩𑀸𑀦𑀲𑁆𑀲 𑀳𑀺 𑀅𑀦𑀺𑀩𑁆𑀩𑀢𑁆𑀢𑀦𑀺𑀬𑀢𑁆𑀢𑁂𑀧𑀺 𑀲𑀫𑀼𑀤𑀬𑀧𑁆𑀧𑀳𑀸𑀦𑀲𑀫𑀼𑀤𑀬𑀦𑀺𑀭𑁄𑀥𑀸𑀦𑀁 𑀅𑀥𑀺𑀕𑀫𑀅𑀥𑀺𑀕𑀦𑁆𑀢𑀩𑁆𑀩𑀪𑀸𑀯𑀢𑁄 𑀳𑁂𑀢𑀼𑀳𑁂𑀢𑀼𑀨𑀮𑀪𑀸𑀯𑁄 𑀫𑀕𑁆𑀕𑀦𑀺𑀩𑁆𑀩𑀸𑀦𑀸𑀦𑀁 𑀬𑀼𑀚𑁆𑀚𑀢𑀺. 𑀬𑀣𑀸𑀳 ‘‘𑀤𑀼𑀓𑁆𑀔𑀦𑀺𑀭𑁄𑀥𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁧𑁯). 𑀅𑀢𑁆𑀣𑁄𑀢𑀺 𑀳𑀺 𑀳𑁂𑀢𑀼𑀨𑀮𑀁. 𑀥𑀫𑁆𑀫𑁄𑀢𑀺 𑀳𑁂𑀢𑀽𑀢𑀺. 𑀧𑀼𑀭𑀺𑀫𑀧𑀘𑁆𑀙𑀺𑀫𑀸𑀦𑀁 𑀧𑀼𑀭𑀺𑀫𑁂 𑀲𑀲𑀫𑁆𑀧𑀬𑀼𑀢𑁆𑀢𑀸 𑀯𑀼𑀢𑁆𑀢𑀸, 𑀧𑀘𑁆𑀙𑀺𑀫𑁂 𑀓𑁂𑀯𑀮𑀸. 𑀧𑀼𑀭𑀺𑀫𑁂 𑀯𑀺𑀬 𑀧𑀦 𑀧𑀘𑁆𑀙𑀺𑀫𑁂 𑀅𑀢𑁆𑀣𑁂𑀧𑀺 𑀅𑀭𑀺𑀬𑀫𑀕𑁆𑀕𑀲𑀻𑀲𑁂𑀦 𑀲𑀩𑁆𑀩𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀕𑀳𑁂𑀢𑀩𑁆𑀩𑀸. 𑀤𑀼𑀢𑀺𑀬𑁂 𑀅𑀢𑁆𑀣𑀯𑀺𑀓𑀧𑁆𑀧𑁂 ‘‘𑀆𑀘𑀬𑀁 𑀕𑀸𑀫𑀺𑀦𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀅𑀦𑀼𑀦𑀸𑀲𑀺𑀓𑀮𑁄𑀧𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀆𑀘𑀺𑀦𑀦𑁆𑀢𑀻𑀢𑀺 𑀯𑀸 𑀆𑀘𑀬𑀸, 𑀆𑀘𑀬𑀸 𑀳𑀼𑀢𑁆𑀯𑀸 𑀕𑀘𑁆𑀙𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺𑀧𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁧𑁧. 𑀲𑀢𑁆𑀢 𑀧𑀦 𑀲𑁂𑀓𑁆𑀔𑀸 𑀲𑀺𑀓𑁆𑀔𑀦𑀲𑀻𑀮𑀸𑀢𑀺 𑀲𑁂𑀓𑁆𑀔𑀸, 𑀢𑁂𑀲𑀁 𑀇𑀫𑁂𑀢𑀺 𑀲𑁂𑀓𑁆𑀔𑀸, 𑀅𑀜𑁆𑀜𑀸𑀲𑀸𑀥𑀸𑀭𑀡𑀸 𑀫𑀕𑁆𑀕𑀨𑀮𑀢𑁆𑀢𑀬𑀥𑀫𑁆𑀫𑀸. 𑀲𑀬𑀫𑁂𑀯 𑀲𑀺𑀓𑁆𑀔𑀦𑁆𑀢𑀻𑀢𑀺 𑀲𑀺𑀓𑁆𑀔𑀦𑀲𑀻𑀮𑀸𑀦𑀫𑁂𑀢𑀁 𑀦𑀺𑀤𑀲𑁆𑀲𑀦𑀁. 𑀬𑁂 𑀳𑀺 𑀥𑀫𑁆𑀫𑀸 𑀲𑀺𑀓𑁆𑀔𑀦𑁆𑀢𑀺, 𑀢𑁂 𑀲𑀺𑀓𑁆𑀔𑀦𑀲𑀻𑀮𑀸 𑀳𑁄𑀦𑁆𑀢𑀻𑀢𑀺. 𑀅𑀓𑁆𑀔𑀭𑀢𑁆𑀣𑁄 𑀧𑀦 𑀲𑀺𑀓𑁆𑀔𑀸 𑀏𑀢𑁂𑀲𑀁 𑀲𑀻𑀮𑀦𑁆𑀢𑀺 𑀲𑁂𑀓𑁆𑀔𑀸𑀢𑀺. 𑀦 𑀲𑁂𑀓𑁆𑀔𑀸𑀢𑀺 𑀬𑀢𑁆𑀣 𑀲𑁂𑀓𑁆𑀔𑀪𑀸𑀯𑀸𑀲𑀗𑁆𑀓𑀸 𑀅𑀢𑁆𑀣𑀺, 𑀢𑀢𑁆𑀣𑀸𑀬𑀁 𑀧𑀝𑀺𑀲𑁂𑀥𑁄𑀢𑀺 𑀮𑁄𑀓𑀺𑀬𑀦𑀺𑀩𑁆𑀩𑀸𑀦𑁂𑀲𑀼 𑀅𑀲𑁂𑀓𑁆𑀔𑀪𑀸𑀯𑀸𑀦𑀸𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸. 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀸 𑀳𑀺 𑀲𑀺𑀓𑁆𑀔𑀸 𑀅𑀢𑁆𑀢𑀦𑁄 𑀧𑀝𑀺𑀧𑀓𑁆𑀔𑀓𑀺𑀮𑁂𑀲𑁂𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑀸 𑀧𑀭𑀺𑀲𑀼𑀤𑁆𑀥𑀸 𑀉𑀧𑀓𑁆𑀓𑀺𑀮𑁂𑀲𑀸𑀦𑀁 𑀆𑀭𑀫𑁆𑀫𑀡𑀪𑀸𑀯𑀫𑁆𑀧𑀺 𑀅𑀦𑀼𑀧𑀕𑀫𑀦𑀢𑁄 𑀏𑀢𑀸 𑀲𑀺𑀓𑁆𑀔𑀸𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀸 𑀅𑀝𑁆𑀞𑀲𑀼 𑀫𑀕𑁆𑀕𑀨𑀮𑁂𑀲𑀼 𑀯𑀺𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀘𑀢𑀼𑀫𑀕𑁆𑀕𑀳𑁂𑀝𑁆𑀞𑀺𑀫𑀨𑀮𑀢𑁆𑀢𑀬𑀥𑀫𑁆𑀫𑀸 𑀯𑀺𑀬 𑀅𑀭𑀳𑀢𑁆𑀢𑀨𑀮𑀥𑀫𑁆𑀫𑀸𑀧𑀺 𑀢𑀸𑀲𑀼 𑀲𑀺𑀓𑁆𑀔𑀸𑀲𑀼 𑀚𑀸𑀢𑀸𑀢𑀺 𑀘, 𑀢𑀁𑀲𑀺𑀓𑁆𑀔𑀸𑀲𑀫𑀗𑁆𑀕𑀺𑀦𑁄 𑀅𑀭𑀳𑀢𑁄 𑀇𑀢𑀭𑁂𑀲𑀁 𑀯𑀺𑀬 𑀲𑁂𑀓𑁆𑀔𑀢𑁆𑀢𑁂 𑀲𑀢𑀺 𑀲𑁂𑀓𑁆𑀔𑀲𑁆𑀲 𑀏𑀢𑁂𑀢𑀺 𑀘, 𑀲𑀺𑀓𑁆𑀔𑀸 𑀲𑀻𑀮𑀁 𑀏𑀢𑁂𑀲𑀦𑁆𑀢𑀺 𑀘 𑀲𑁂𑀓𑁆𑀔𑀸𑀢𑀺 𑀆𑀲𑀗𑁆𑀓𑀺𑀢𑀩𑁆𑀩𑀸 𑀲𑀺𑀬𑀼𑀦𑁆𑀢𑀺 𑀢𑀤𑀸𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀅𑀲𑁂𑀓𑁆𑀔𑀸’’𑀢𑀺 𑀬𑀣𑀸𑀯𑀼𑀢𑁆𑀢𑀲𑁂𑀓𑁆𑀔𑀪𑀸𑀯𑀧𑀝𑀺𑀲𑁂𑀥𑁄 𑀓𑀢𑁄. 𑀅𑀭𑀳𑀢𑁆𑀢𑀨𑀮𑁂 𑀳𑀺 𑀧𑀯𑀢𑁆𑀢𑀫𑀸𑀦𑀸 𑀲𑀺𑀓𑁆𑀔𑀸 𑀧𑀭𑀺𑀦𑀺𑀝𑁆𑀞𑀺𑀢𑀲𑀺𑀓𑁆𑀔𑀸𑀓𑀺𑀘𑁆𑀘𑀢𑁆𑀢𑀸 𑀦 𑀲𑀺𑀓𑁆𑀔𑀸𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺, 𑀓𑁂𑀯𑀮𑀁 𑀲𑀺𑀓𑁆𑀔𑀸𑀨𑀮𑀪𑀸𑀯𑁂𑀦𑁂𑀯 𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀢𑀸 𑀦 𑀲𑀺𑀓𑁆𑀔𑀸𑀯𑀘𑀦𑀁 𑀅𑀭𑀳𑀦𑁆𑀢𑀺, 𑀦𑀸𑀧𑀺 𑀢𑀁𑀲𑀫𑀗𑁆𑀕𑀺𑀦𑁄 𑀲𑁂𑀓𑁆𑀔𑀯𑀘𑀦𑀁, 𑀦 𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀲𑀺𑀓𑁆𑀔𑀦𑀲𑀻𑀮𑀸𑀢𑀺 𑀲𑀺𑀓𑁆𑀔𑀸𑀲𑀼 𑀚𑀸𑀢𑀸𑀢𑀺𑀆𑀤𑀺𑀅𑀢𑁆𑀣𑁂𑀳𑀺 𑀅𑀕𑁆𑀕𑀨𑀮𑀥𑀫𑁆𑀫𑀸 𑀲𑁂𑀓𑁆𑀔𑀸 𑀦 𑀳𑁄𑀦𑁆𑀢𑀺, 𑀳𑁂𑀝𑁆𑀞𑀺𑀫𑀨𑀮𑁂𑀲𑀼 𑀧𑀦 𑀲𑀺𑀓𑁆𑀔𑀸 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀯𑀺𑀧𑀲𑁆𑀲𑀦𑀸𑀤𑀻𑀦𑀁 𑀉𑀧𑀦𑀺𑀲𑁆𑀲𑀬𑀪𑀸𑀯𑀢𑁄 𑀲𑀺𑀓𑁆𑀔𑀸𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀻𑀢𑀺 𑀲𑀺𑀓𑁆𑀔𑀸𑀯𑀘𑀦𑀁 𑀅𑀭𑀳𑀦𑁆𑀢𑀺, 𑀢𑀁𑀲𑀫𑀗𑁆𑀕𑀺𑀦𑁄 𑀘 𑀲𑁂𑀓𑁆𑀔𑀯𑀘𑀦𑀁, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘 𑀲𑀺𑀓𑁆𑀔𑀦𑀲𑀻𑀮𑀯𑀼𑀢𑁆𑀢𑀻𑀢𑀺 𑀢𑀢𑁆𑀣 𑀥𑀫𑁆𑀫𑀸 𑀬𑀣𑀸𑀯𑀼𑀢𑁆𑀢𑁂𑀳𑀺 𑀅𑀢𑁆𑀣𑁂𑀳𑀺 𑀲𑁂𑀓𑁆𑀔𑀸 𑀳𑁄𑀦𑁆𑀢𑀺 𑀏𑀯.

𑀲𑁂𑀓𑁆𑀔𑀸𑀢𑀺 𑀯𑀸 𑀅𑀧𑀭𑀺𑀬𑁄𑀲𑀺𑀢𑀲𑀺𑀓𑁆𑀔𑀸 𑀤𑀲𑁆𑀲𑀺𑀢𑀸. 𑀅𑀦𑀦𑁆𑀢𑀭𑀫𑁂𑀯 ‘‘𑀅𑀲𑁂𑀓𑁆𑀔𑀸’’𑀢𑀺 𑀯𑀘𑀦𑀁 𑀧𑀭𑀺𑀬𑁄𑀲𑀺𑀢𑀲𑀺𑀓𑁆𑀔𑀸𑀦𑀁 𑀤𑀲𑁆𑀲𑀦𑀦𑁆𑀢𑀺 𑀦 𑀮𑁄𑀓𑀺𑀬𑀦𑀺𑀩𑁆𑀩𑀸𑀦𑀸𑀦𑀁 𑀅𑀲𑁂𑀓𑁆𑀔𑀢𑀸𑀧𑀢𑁆𑀢𑀺. 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀸 𑀯𑀸 𑀲𑁂𑀓𑁆𑀔𑀸𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑁂𑀓𑁆𑀔𑀥𑀫𑁆𑀫𑁂𑀲𑀼 𑀏𑀯 𑀓𑁂𑀲𑀜𑁆𑀘𑀺 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀸𑀦𑀁 𑀅𑀲𑁂𑀓𑁆𑀔𑀢𑀸 𑀆𑀧𑀚𑁆𑀚𑀢𑀺, 𑀢𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑀥𑀫𑁆𑀫𑀸 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀸 𑀘 𑀬𑀣𑀸𑀯𑀼𑀢𑁆𑀢𑁂𑀳𑀺 𑀘 𑀅𑀢𑁆𑀣𑁂𑀳𑀺 𑀲𑁂𑀓𑁆𑀔𑀸𑀢𑀺 𑀓𑀢𑁆𑀯𑀸 𑀅𑀲𑁂𑀓𑁆𑀔𑀸 𑀆𑀧𑀦𑁆𑀦𑀸𑀢𑀺? 𑀦, 𑀢𑀁𑀲𑀤𑀺𑀲𑁂𑀲𑀼 𑀢𑀩𑁆𑀩𑁄𑀳𑀸𑀭𑀸. 𑀅𑀭𑀳𑀢𑁆𑀢𑀫𑀕𑁆𑀕𑀢𑁄 𑀳𑀺 𑀦𑀺𑀦𑁆𑀦𑀸𑀦𑀸𑀓𑀭𑀡𑀁 𑀅𑀭𑀳𑀢𑁆𑀢𑀨𑀮𑀁 𑀞𑀧𑁂𑀢𑁆𑀯𑀸 𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀓𑀭𑀡𑀁 𑀯𑀺𑀧𑀸𑀓𑀪𑀸𑀯𑀜𑁆𑀘, 𑀢𑀲𑁆𑀫𑀸 𑀢𑁂 𑀏𑀯 𑀲𑁂𑀓𑁆𑀔𑀸 𑀥𑀫𑁆𑀫𑀸 𑀅𑀭𑀳𑀢𑁆𑀢𑀨𑀮𑀪𑀸𑀯𑀁 𑀆𑀧𑀦𑁆𑀦𑀸𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀓𑀼𑀲𑀮𑀲𑀼𑀔𑀢𑁄 𑀘 𑀯𑀺𑀧𑀸𑀓𑀲𑀼𑀔𑀁 𑀲𑀦𑁆𑀢𑀢𑀭𑀢𑀸𑀬 𑀧𑀡𑀻𑀢𑀢𑀭𑀦𑁆𑀢𑀺 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀸 𑀘 𑀢𑁂 𑀥𑀫𑁆𑀫𑀸 𑀳𑁄𑀦𑁆𑀢𑀻𑀢𑀺 𑀅𑀲𑁂𑀓𑁆𑀔𑀸𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺.

𑁧𑁨. 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀸𑀲𑀫𑀢𑁆𑀣𑀢𑀸𑀤𑀻𑀳𑀺 𑀧𑀭𑀺𑀢𑁆𑀢𑀸. ‘‘𑀓𑀺𑀮𑁂𑀲…𑀧𑁂… 𑀢𑀸𑀬𑀸’’𑀢𑀺 𑀅𑀢𑁆𑀣𑀢𑁆𑀢𑀬𑀫𑁆𑀧𑀺 𑀓𑀼𑀲𑀮𑁂𑀲𑀼 𑀬𑀼𑀚𑁆𑀚𑀢𑀺, 𑀯𑀺𑀧𑀸𑀓𑀓𑀺𑀭𑀺𑀬𑁂𑀲𑀼 𑀤𑀻𑀖𑀲𑀦𑁆𑀢𑀸𑀦𑀢𑀸𑀯. 𑀧𑀫𑀸𑀡𑀓𑀭𑁂𑀳𑀺 𑀯𑀸 𑀑𑀴𑀸𑀭𑀺𑀓𑁂𑀳𑀺 𑀓𑀸𑀫𑀢𑀡𑁆𑀳𑀸𑀤𑀻𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀸 𑀧𑀭𑀺𑀢𑁆𑀢𑀸. 𑀢𑁂𑀳𑀺 𑀅𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀲𑀼𑀔𑀼𑀫𑁂𑀳𑀺 𑀭𑀽𑀧𑀢𑀡𑁆𑀳𑀸𑀤𑀻𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀸 𑀧𑀫𑀸𑀡𑀫𑀳𑀢𑁆𑀢𑀁 𑀕𑀢𑀸𑀢𑀺 𑀫𑀳𑀕𑁆𑀕𑀢𑀸. 𑀅𑀧𑀭𑀺𑀘𑁆𑀙𑀺𑀦𑁆𑀦𑀸 𑀅𑀧𑁆𑀧𑀫𑀸𑀡𑀸.

𑁧𑁪. 𑀅𑀢𑀧𑁆𑀧𑀓𑀝𑁆𑀞𑁂𑀦𑀸𑀢𑀺 𑀤𑀺𑀯𑀲𑀫𑁆𑀧𑀺 𑀧𑀘𑁆𑀘𑀯𑁂𑀓𑁆𑀔𑀺𑀬𑀫𑀸𑀦𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀢𑀺𑀢𑁆𑀢𑀺𑀁 𑀦 𑀚𑀦𑁂𑀦𑁆𑀢𑀺 𑀲𑀫𑀸𑀧𑀚𑁆𑀚𑀺𑀬𑀫𑀸𑀦𑀸𑀧𑀺 𑀨𑀮𑀥𑀫𑁆𑀫𑀸𑀢𑀺.

𑁧𑁫. 𑀫𑀸𑀢𑀼𑀖𑀸𑀢𑀸𑀤𑀻𑀲𑀼 𑀧𑀯𑀢𑁆𑀢𑀫𑀸𑀦𑀸𑀧𑀺 𑀳𑀺𑀢𑀲𑀼𑀔𑀁 𑀇𑀘𑁆𑀙𑀦𑁆𑀢𑀸𑀯 𑀧𑀯𑀢𑁆𑀢𑀦𑁆𑀢𑀻𑀢𑀺 𑀢𑁂 𑀥𑀫𑁆𑀫𑀸 𑀳𑀺𑀢𑀲𑀼𑀔𑀸𑀯𑀳𑀸 𑀫𑁂 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀆𑀲𑀻𑀲𑀺𑀢𑀸 𑀳𑁄𑀦𑁆𑀢𑀺, 𑀢𑀣𑀸 𑀅𑀲𑀼𑀪𑀸𑀲𑀼𑀔𑀸𑀦𑀺𑀘𑁆𑀘𑀸𑀦𑀢𑁆𑀢𑁂𑀲𑀼 𑀲𑀼𑀪𑀸𑀤𑀺𑀯𑀺𑀧𑀭𑀺𑀬𑀸𑀲𑀤𑀴𑁆𑀳𑀢𑀸𑀬 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀲𑀼 𑀧𑀯𑀢𑁆𑀢𑀺 𑀳𑁄𑀢𑀻𑀢𑀺 𑀢𑁂 𑀥𑀫𑁆𑀫𑀸 𑀅𑀲𑀼𑀪𑀸𑀤𑀻𑀲𑀼 𑀲𑀼𑀪𑀸𑀤𑀺𑀯𑀺𑀧𑀭𑀻𑀢𑀧𑁆𑀧𑀯𑀢𑁆𑀢𑀺𑀓𑀸 𑀳𑁄𑀦𑁆𑀢𑀺. 𑀫𑀺𑀘𑁆𑀙𑀸𑀲𑀪𑀸𑀯𑀸𑀢𑀺 𑀫𑀼𑀲𑀸𑀲𑀪𑀸𑀯𑀸. 𑀅𑀦𑁂𑀓𑁂𑀲𑀼 𑀆𑀦𑀦𑁆𑀢𑀭𑀺𑀬𑁂𑀲𑀼 𑀓𑀢𑁂𑀲𑀼 𑀬𑀁 𑀢𑀢𑁆𑀣 𑀩𑀮𑀯𑀁, 𑀢𑀁 𑀯𑀺𑀧𑀘𑁆𑀘𑀢𑀺, 𑀦 𑀇𑀢𑀭𑀸𑀦𑀻𑀢𑀺 𑀏𑀓𑀦𑁆𑀢𑀯𑀺𑀧𑀸𑀓𑀚𑀦𑀓𑀢𑀸𑀬 𑀦𑀺𑀬𑀢𑀢𑀸 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 ‘‘𑀯𑀺𑀧𑀸𑀓𑀤𑀸𑀦𑁂 𑀲𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀔𑀦𑁆𑀥𑀪𑁂𑀤𑀸𑀦𑀦𑁆𑀢𑀭𑀦𑁆𑀢𑀺 𑀘𑀼𑀢𑀺𑀅𑀦𑀦𑁆𑀢𑀭𑀁. 𑀘𑀼𑀢𑀺 𑀳𑀺 𑀫𑀭𑀡𑀦𑀺𑀤𑁆𑀤𑁂𑀲𑁂 (𑀯𑀺𑀪. 𑁧𑁯𑁩) ‘‘𑀔𑀦𑁆𑀥𑀸𑀦𑀁 𑀪𑁂𑀤𑁄’’𑀢𑀺 𑀯𑀼𑀢𑁆𑀢𑀸𑀢𑀺. 𑀏𑀢𑁂𑀦 𑀯𑀘𑀦𑁂𑀦 𑀲𑀢𑀺 𑀨𑀮𑀤𑀸𑀦𑁂 𑀘𑀼𑀢𑀺𑀅𑀦𑀦𑁆𑀢𑀭𑁄 𑀏𑀯, 𑀦 𑀅𑀜𑁆𑀜𑁄 𑀏𑀢𑁂𑀲𑀁 𑀨𑀮𑀓𑀸𑀮𑁄𑀢𑀺 𑀨𑀮𑀓𑀸𑀮𑀦𑀺𑀬𑀫𑁂𑀦𑁂𑀯 𑀦𑀺𑀬𑀢𑀢𑀸 𑀯𑀼𑀢𑁆𑀢𑀸 𑀳𑁄𑀢𑀺, 𑀦 𑀨𑀮𑀤𑀸𑀦𑀦𑀺𑀬𑀫𑁂𑀦𑀸𑀢𑀺 𑀦𑀺𑀬𑀢𑀨𑀮𑀓𑀸𑀮𑀸𑀦𑀁 𑀅𑀜𑁆𑀜𑁂𑀲𑀫𑁆𑀧𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸𑀦𑀫𑁆𑀧𑀺 𑀦𑀺𑀬𑀢𑀢𑀸 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀦𑁆𑀢𑀭𑀯𑀺𑀓𑀮𑀢𑀸𑀤𑀻𑀳𑀺 𑀅𑀯𑀺𑀧𑀘𑁆𑀘𑀫𑀸𑀦𑀸𑀦𑀫𑁆𑀧𑀺 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀯𑀺𑀧𑀸𑀓𑀥𑀫𑁆𑀫𑀢𑀸 𑀯𑀺𑀬 𑀩𑀮𑀯𑀢𑀸 𑀆𑀦𑀦𑁆𑀢𑀭𑀺𑀬𑁂𑀦 𑀯𑀺𑀧𑀸𑀓𑁂 𑀤𑀺𑀦𑁆𑀦𑁂 𑀅𑀯𑀺𑀧𑀘𑁆𑀘𑀫𑀸𑀦𑀸𑀦𑀫𑁆𑀧𑀺 𑀆𑀦𑀦𑁆𑀢𑀭𑀺𑀬𑀸𑀦𑀁 𑀨𑀮𑀤𑀸𑀦𑁂 𑀦𑀺𑀬𑀢𑀲𑀪𑀸𑀯𑀸 𑀆𑀦𑀦𑁆𑀢𑀭𑀺𑀬𑀲𑀪𑀸𑀯𑀸 𑀘 𑀧𑀯𑀢𑁆𑀢𑀻𑀢𑀺 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀨𑀮𑀤𑀸𑀦𑀦𑀺𑀬𑀫𑁂𑀦𑁂𑀯 𑀦𑀺𑀬𑀢𑀢𑀸 𑀆𑀦𑀦𑁆𑀢𑀭𑀺𑀬𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀅𑀯𑀲𑁆𑀲𑀜𑁆𑀘 𑀦𑀺𑀬𑀢𑀲𑀪𑀸𑀯𑀸 𑀆𑀦𑀦𑁆𑀢𑀭𑀺𑀬𑀲𑀪𑀸𑀯𑀸 𑀘 𑀢𑁂𑀲𑀁 𑀧𑀯𑀢𑁆𑀢𑀻𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀫𑁂𑀢𑀁 𑀅𑀜𑁆𑀜𑀲𑁆𑀲 𑀩𑀮𑀯𑀢𑁄 𑀆𑀦𑀦𑁆𑀢𑀭𑀺𑀬𑀲𑁆𑀲 𑀅𑀪𑀸𑀯𑁂 𑀘𑀼𑀢𑀺𑀅𑀦𑀦𑁆𑀢𑀭𑀁 𑀏𑀓𑀦𑁆𑀢𑁂𑀦 𑀨𑀮𑀤𑀸𑀦𑀢𑁄.

𑀦𑀦𑀼 𑀏𑀯𑀁 𑀅𑀜𑁆𑀜𑁂𑀲𑀫𑁆𑀧𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀸𑀦𑀁 𑀅𑀜𑁆𑀜𑀲𑁆𑀫𑀺𑀁 𑀯𑀺𑀧𑀸𑀓𑀤𑀸𑀬𑀓𑁂 𑀅𑀲𑀢𑀺 𑀘𑀼𑀢𑀺𑀅𑀦𑀦𑁆𑀢𑀭𑀫𑁂𑀯 𑀏𑀓𑀦𑁆𑀢𑁂𑀦 𑀨𑀮𑀤𑀸𑀦𑀢𑁄 𑀆𑀦𑀦𑁆𑀢𑀭𑀺𑀬𑀲𑀪𑀸𑀯𑀸 𑀦𑀺𑀬𑀢𑀲𑀪𑀸𑀯𑀸 𑀘 𑀧𑀯𑀢𑁆𑀢𑀺 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺 𑀅𑀲𑀫𑀸𑀦𑀚𑀸𑀢𑀺𑀓𑁂𑀦 𑀘𑁂𑀢𑁄𑀧𑀡𑀺𑀥𑀺𑀯𑀲𑁂𑀦 𑀉𑀧𑀖𑀸𑀢𑀓𑁂𑀦 𑀘 𑀦𑀺𑀯𑀢𑁆𑀢𑁂𑀢𑀩𑁆𑀩𑀯𑀺𑀧𑀸𑀓𑀢𑁆𑀢𑀸 𑀅𑀦𑀦𑁆𑀢𑀭𑁂𑀓𑀦𑁆𑀢𑀨𑀮𑀤𑀸𑀬𑀓𑀢𑁆𑀢𑀸𑀪𑀸𑀯𑀸, 𑀦 𑀧𑀦 𑀆𑀦𑀦𑁆𑀢𑀭𑀺𑀬𑀓𑀸𑀦𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀺 𑀯𑀺𑀬 𑀅𑀲𑀫𑀸𑀦𑀚𑀸𑀢𑀺𑀓𑀁 𑀨𑀮𑀦𑀺𑀯𑀢𑁆𑀢𑀓𑀁 𑀅𑀢𑁆𑀣𑀺 𑀲𑀩𑁆𑀩𑀸𑀦𑀦𑁆𑀢𑀭𑀺𑀬𑀓𑀸𑀦𑀁 𑀅𑀯𑀻𑀘𑀺𑀨𑀮𑀢𑁆𑀢𑀸, 𑀦 𑀘 𑀳𑁂𑀝𑁆𑀞𑀼𑀧𑀧𑀢𑁆𑀢𑀺𑀁 𑀇𑀘𑁆𑀙𑀢𑁄 𑀲𑀻𑀮𑀯𑀢𑁄 𑀘𑁂𑀢𑁄𑀧𑀡𑀺𑀥𑀺 𑀯𑀺𑀬 𑀉𑀧𑀭𑀽𑀧𑀧𑀢𑁆𑀢𑀺𑀚𑀦𑀓𑀓𑀫𑁆𑀫𑀨𑀮𑀁 𑀆𑀦𑀦𑁆𑀢𑀭𑀺𑀬𑀓𑀨𑀮𑀁 𑀦𑀺𑀯𑀢𑁆𑀢𑁂𑀢𑀼𑀁 𑀲𑀫𑀢𑁆𑀣𑁄 𑀘𑁂𑀢𑁄𑀧𑀡𑀺𑀥𑀺 𑀅𑀢𑁆𑀣𑀺 𑀅𑀦𑀺𑀘𑁆𑀙𑀦𑁆𑀢𑀲𑁆𑀲𑁂𑀯 𑀅𑀯𑀻𑀘𑀺𑀧𑀸𑀢𑀦𑀢𑁄, 𑀦 𑀘 𑀆𑀦𑀦𑁆𑀢𑀭𑀺𑀬𑀓𑁄𑀧𑀖𑀸𑀢𑀓𑀁 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀢𑁂𑀲𑀁𑀬𑁂𑀯 𑀅𑀦𑀦𑁆𑀢𑀭𑁂𑀓𑀦𑁆𑀢𑀯𑀺𑀧𑀸𑀓𑀚𑀦𑀓𑀲𑀪𑀸𑀯𑀸 𑀧𑀯𑀢𑁆𑀢𑀻𑀢𑀺.

𑀅𑀦𑁂𑀓𑀸𑀦𑀺 𑀘 𑀆𑀦𑀦𑁆𑀢𑀭𑀺𑀬𑀓𑀸𑀦𑀺 𑀓𑀢𑀸𑀦𑀺 𑀏𑀓𑀦𑁆𑀢𑁂 𑀯𑀺𑀧𑀸𑀓𑁂 𑀲𑀦𑁆𑀦𑀺𑀬𑀢𑀢𑁆𑀢𑀸 𑀉𑀧𑀭𑀢𑀸𑀯𑀺𑀧𑀘𑁆𑀘𑀦𑀲𑀪𑀸𑀯𑀸𑀲𑀗𑁆𑀓𑀢𑁆𑀢𑀸 𑀦𑀺𑀘𑁆𑀙𑀺𑀢𑀸𑀦𑀺 𑀲𑀪𑀸𑀯𑀢𑁄 𑀦𑀺𑀬𑀢𑀸𑀦𑁂𑀯. 𑀘𑀼𑀢𑀺𑀅𑀦𑀦𑁆𑀢𑀭𑀁 𑀧𑀦 𑀨𑀮𑀁 𑀅𑀦𑀦𑁆𑀢𑀭𑀁 𑀦𑀸𑀫 𑀢𑀲𑁆𑀫𑀺𑀁 𑀅𑀦𑀦𑁆𑀢𑀭𑁂 𑀦𑀺𑀬𑀼𑀢𑁆𑀢𑀸𑀦𑀺 𑀢𑀦𑁆𑀦𑀺𑀩𑁆𑀩𑀢𑁆𑀢𑀦𑁂𑀦 𑀅𑀦𑀦𑁆𑀢𑀭𑀓𑀭𑀡𑀲𑀻𑀮𑀸𑀦𑀺 𑀅𑀦𑀦𑁆𑀢𑀭𑀧𑁆𑀧𑀬𑁄𑀚𑀦𑀸𑀦𑀺 𑀘𑀸𑀢𑀺 𑀲𑀪𑀸𑀯𑀢𑁄 𑀆𑀦𑀦𑁆𑀢𑀭𑀺𑀬𑀓𑀸𑀦𑁂𑀯 𑀘 𑀳𑁄𑀦𑁆𑀢𑀺. 𑀢𑁂𑀲𑀼 𑀧𑀦 𑀲𑀫𑀸𑀦𑀲𑀪𑀸𑀯𑁂𑀲𑀼 𑀏𑀓𑁂𑀦 𑀯𑀺𑀧𑀸𑀓𑁂 𑀤𑀺𑀦𑁆𑀦𑁂 𑀇𑀢𑀭𑀸𑀦𑀺 𑀅𑀢𑁆𑀢𑀦𑀸 𑀓𑀢𑁆𑀢𑀩𑁆𑀩𑀲𑁆𑀲 𑀓𑀺𑀘𑁆𑀘𑀲𑁆𑀲 𑀢𑁂𑀦𑁂𑀯 𑀓𑀢𑀢𑁆𑀢𑀸 𑀦 𑀤𑀼𑀢𑀺𑀬𑀁 𑀢𑀢𑀺𑀬𑀫𑁆𑀧𑀺 𑀘 𑀧𑀝𑀺𑀲𑀦𑁆𑀥𑀺𑀁 𑀓𑀭𑁄𑀦𑁆𑀢𑀺, 𑀦 𑀲𑀫𑀢𑁆𑀣𑀢𑀸𑀯𑀺𑀖𑀸𑀢𑀢𑁆𑀢𑀸𑀢𑀺 𑀦𑀢𑁆𑀣𑀺 𑀢𑁂𑀲𑀁 𑀦𑀺𑀬𑀢𑀸𑀦𑀦𑁆𑀢𑀭𑀺𑀬𑀢𑀸𑀦𑀺𑀯𑀢𑁆𑀢𑀻𑀢𑀺. 𑀦 𑀳𑀺 𑀲𑀫𑀸𑀦𑀲𑀪𑀸𑀯𑀁 𑀲𑀫𑀸𑀦𑀲𑀪𑀸𑀯𑀲𑁆𑀲 𑀲𑀫𑀢𑁆𑀣𑀢𑀁 𑀯𑀺𑀳𑀦𑀢𑀻𑀢𑀺. 𑀏𑀓𑀲𑁆𑀲 𑀧𑀦 𑀅𑀜𑁆𑀜𑀸𑀦𑀺𑀧𑀺 𑀉𑀧𑀢𑁆𑀣𑀫𑁆𑀪𑀓𑀸𑀦𑀺 𑀳𑁄𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀻𑀢𑀺. 𑀲𑀫𑁆𑀫𑀸 𑀲𑀪𑀸𑀯𑀸𑀢𑀺 𑀲𑀘𑁆𑀘𑀲𑀪𑀸𑀯𑀸.

𑁧𑁬. 𑀧𑀭𑀺𑀧𑀼𑀡𑁆𑀡𑀫𑀕𑁆𑀕𑀓𑀺𑀘𑁆𑀘𑀢𑁆𑀢𑀸 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸𑀯 𑀇𑀥 ‘‘𑀫𑀕𑁆𑀕𑀸’’𑀢𑀺 𑀯𑀼𑀢𑁆𑀢𑀸. 𑀧𑀘𑁆𑀘𑀬𑀝𑁆𑀞𑁂𑀦𑀸𑀢𑀺 𑀫𑀕𑁆𑀕𑀧𑀘𑁆𑀘𑀬𑀝𑁆𑀞𑁂𑀦. 𑀦𑀺𑀓𑁆𑀔𑁂𑀧𑀓𑀡𑁆𑀟𑁂𑀧𑀺 𑀳𑀺 𑀬𑁂 𑀫𑀕𑁆𑀕𑀧𑀘𑁆𑀘𑀬𑀁 𑀮𑀪𑀦𑁆𑀢𑀺, 𑀦 𑀧𑀦 𑀲𑀬𑀁 𑀫𑀕𑁆𑀕𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀦𑁆𑀢𑀺, 𑀢𑁂 𑀫𑀕𑁆𑀕𑀳𑁂𑀢𑀼𑀓𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀭𑀺𑀬𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀫𑀕𑁆𑀕𑀗𑁆𑀕𑀸𑀦𑀺 𑀞𑀧𑁂𑀢𑁆𑀯𑀸’’𑀢𑀺𑀆𑀤𑀺 (𑀥. 𑀲. 𑁧𑁦𑁩𑁯) 𑀯𑀼𑀢𑁆𑀢𑀁. 𑀬𑁄 𑀧𑀦 𑀢𑀢𑁆𑀣𑁂𑀯 ‘‘𑀅𑀭𑀺𑀬𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄, 𑀇𑀫𑁂 𑀥𑀫𑁆𑀫𑀸 𑀫𑀕𑁆𑀕𑀳𑁂𑀢𑀽’’𑀢𑀺 𑀆𑀤𑀺𑀦𑀬𑁄 𑀯𑀼𑀢𑁆𑀢𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀅𑀭𑀺𑀬𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀲𑀫𑁆𑀫𑀸𑀤𑀺𑀝𑁆𑀞𑀺 𑀫𑀕𑁆𑀕𑁄 𑀘𑁂𑀯 𑀳𑁂𑀢𑀼 𑀘𑀸’’𑀢𑀺𑀆𑀤𑀺𑀦𑀸 𑀧𑀦 𑀯𑀼𑀢𑁆𑀢𑀦𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀦 𑀅𑀲𑀗𑁆𑀕𑀳𑀺𑀢𑀲𑀗𑁆𑀕𑀡𑁆𑀳𑀦𑀯𑀲𑁂𑀦 𑀧𑀝𑀺𑀧𑀸𑀝𑀺𑀬𑀸 𑀢𑀬𑁄 𑀦𑀬𑀸 𑀯𑀼𑀢𑁆𑀢𑀸, 𑀳𑁂𑀢𑀼𑀩𑀳𑀼𑀢𑀸𑀯𑀲𑁂𑀦 𑀢𑀢𑀺𑀬𑁄 𑀦𑀬𑁄 𑀇𑀥 𑀤𑀼𑀢𑀺𑀬𑁄 𑀯𑀼𑀢𑁆𑀢𑁄.

𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑀦𑀝𑁆𑀞𑁂𑀦𑀸𑀢𑀺 𑀲𑀳𑀚𑀸𑀢𑀸𑀥𑀺𑀧𑀢𑀺𑀧𑀺 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀚𑁂𑀝𑁆𑀞𑀓𑀪𑀸𑀯𑁂 𑀧𑀯𑀢𑁆𑀢𑀫𑀸𑀦𑁄 𑀲𑀳𑀚𑀸𑀢𑁂 𑀅𑀢𑁆𑀢𑀦𑁄 𑀯𑀲𑁂 𑀅𑀦𑀼𑀯𑀢𑁆𑀢𑀬𑀫𑀸𑀦𑁄 𑀢𑁂 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀺 𑀢𑀤𑀸𑀭𑀫𑁆𑀫𑀡𑁂 𑀥𑀫𑁆𑀫𑁂 𑀢𑀣𑁂𑀯 𑀅𑀢𑁆𑀢𑀸𑀦𑀁 𑀅𑀦𑀼𑀯𑀢𑁆𑀢𑀬𑀫𑀸𑀦𑁄 𑀢𑁂 𑀥𑀫𑁆𑀫𑁂 𑀅𑀪𑀺𑀪𑀯𑀺𑀢𑁆𑀯𑀸 𑀆𑀭𑀫𑁆𑀫𑀡𑀪𑀸𑀯𑁂𑀦 𑀧𑀯𑀢𑁆𑀢𑀢𑀺, 𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑁂𑀦, 𑀢𑀲𑁆𑀫𑀸 𑀅𑀥𑀺𑀧𑀢𑀺𑀤𑁆𑀯𑀬𑀫𑁆𑀧𑀺 𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀫𑀕𑁆𑀕𑁄 𑀅𑀥𑀺𑀧𑀢𑀺 𑀏𑀢𑁂𑀲’’𑀦𑁆𑀢𑀺 𑀅𑀬𑀜𑁆𑀘 𑀅𑀢𑁆𑀣𑁄 𑀦𑀺𑀓𑁆𑀔𑁂𑀧𑀓𑀡𑁆𑀟𑁂 𑀉𑀤𑀸𑀳𑀭𑀡𑀯𑀲𑁂𑀦 𑀆𑀕𑀢𑀁 𑀅𑀢𑁆𑀣𑀦𑀬𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑁄. 𑀬𑀲𑁆𑀫𑀸 𑀧𑀦 𑀧𑀝𑁆𑀞𑀸𑀦𑁂 (𑀧𑀝𑁆𑀞𑀸. 𑁨.𑁧𑁬.𑁧𑁧) ‘‘𑀫𑀕𑁆𑀕𑀸𑀥𑀺𑀧𑀢𑀺𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀫𑀕𑁆𑀕𑀸𑀥𑀺𑀧𑀢𑀺 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀸𑀥𑀺𑀧𑀢𑀺𑀧𑀘𑁆𑀘𑀬𑀸, 𑀫𑀕𑁆𑀕𑀸𑀥𑀺𑀧𑀢𑀻 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀫𑀕𑁆𑀕𑀸𑀥𑀺𑀧𑀢𑀺 𑀅𑀥𑀺𑀧𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀫𑀕𑁆𑀕𑁄 𑀅𑀥𑀺𑀧𑀢𑀺 𑀫𑀕𑁆𑀕𑀸𑀥𑀺𑀧𑀢𑀻𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀧𑀸𑀴𑀺𑀬𑀁 𑀲𑀭𑀽𑀧𑁂𑀓𑀲𑁂𑀲𑀯𑀲𑁂𑀦 𑀲𑀫𑀸𑀦𑀲𑀤𑁆𑀤𑀢𑁆𑀣𑀯𑀲𑁂𑀦 𑀯𑀸 𑀲𑀗𑁆𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁧𑁭. 𑀅𑀦𑀼𑀧𑁆𑀧𑀦𑁆𑀦𑀸𑀢𑀺 𑀏𑀢𑁂𑀦 𑀲𑀩𑁆𑀩𑁄 𑀉𑀧𑁆𑀧𑀦𑁆𑀦𑀪𑀸𑀯𑁄 𑀧𑀝𑀺𑀲𑀺𑀤𑁆𑀥𑁄, 𑀦 𑀉𑀧𑁆𑀧𑀦𑁆𑀦𑀥𑀫𑁆𑀫𑀪𑀸𑀯𑁄 𑀏𑀯𑀸𑀢𑀺 𑀢𑁂𑀦 𑀉𑀧𑁆𑀧𑀦𑁆𑀦𑀸 𑀯𑀺𑀕𑀢𑀸 𑀅𑀢𑀻𑀢𑀸𑀧𑀺 𑀦 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀬𑀤𑀺 𑀳𑀺 𑀲𑀗𑁆𑀕𑀳𑀺𑀢𑀸 𑀲𑀺𑀬𑀼𑀁, ‘‘𑀅𑀦𑀼𑀧𑁆𑀧𑀦𑁆𑀦𑁄 𑀥𑀫𑁆𑀫𑁄 𑀉𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀏𑀯𑀫𑀸𑀤𑀺 𑀯𑀼𑀘𑁆𑀘𑁂𑀬𑁆𑀬, 𑀦 𑀢𑀼 𑀯𑀼𑀢𑁆𑀢𑀦𑁆𑀢𑀺. 𑀅𑀦𑀸𑀕𑀢𑀸𑀦𑀺 𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑀸𑀦𑀺 𑀅𑀢𑀻𑀢𑁂 𑀅𑀦𑀸𑀕𑀢𑁂 𑀯𑀸 𑀓𑀫𑁆𑀫𑁂 𑀧𑀼𑀭𑀺𑀫𑀦𑀺𑀧𑁆𑀨𑀦𑁆𑀦𑁂 𑀏𑀯 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀦𑀸𑀦𑀺𑀧𑁆𑀨𑀦𑁆𑀦𑁂𑀢𑀺 𑀧𑀭𑀺𑀦𑀺𑀝𑁆𑀞𑀺𑀢𑀓𑀸𑀭𑀡𑁂𑀓𑀤𑁂𑀲𑀸𑀦𑁂𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀸𑀦𑀺 ‘‘𑀅𑀯𑀲𑁆𑀲𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀉𑀧𑁆𑀧𑀸𑀤𑀺𑀦𑁄 𑀥𑀫𑁆𑀫𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑁧𑁮. 𑀅𑀢𑁆𑀢𑀦𑁄 𑀲𑀪𑀸𑀯𑀦𑁆𑀢𑀺 𑀓𑀓𑁆𑀔𑀴𑀨𑀼𑀲𑀦𑀸𑀤𑀺𑀲𑀪𑀸𑀯𑀁.

𑁨𑁦. 𑀏𑀯𑀁 𑀧𑀯𑀢𑁆𑀢𑀫𑀸𑀦𑀸𑀢𑀺 𑀏𑀯𑀁 𑀘𑀓𑁆𑀔𑀸𑀤𑀺𑀪𑀸𑀯𑁂𑀦 𑀨𑀼𑀲𑀦𑀸𑀤𑀺𑀪𑀸𑀯𑁂𑀦 𑀘 𑀏𑀓𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑀸𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸. 𑀅𑀢𑁆𑀢𑀸𑀦𑀁 𑀅𑀥𑀺 𑀅𑀚𑁆𑀛𑀢𑁆𑀢𑀸𑀢𑀺 𑀅𑀥𑀺-𑀲𑀤𑁆𑀤𑁄 𑀲𑀫𑀸𑀲𑀯𑀺𑀲𑀬𑁂 𑀅𑀥𑀺𑀓𑀸𑀭𑀢𑁆𑀣𑀁 𑀧𑀯𑀢𑁆𑀢𑀺𑀅𑀢𑁆𑀣𑀜𑁆𑀘 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀢𑀸𑀦𑀁 𑀅𑀥𑀺𑀓𑀺𑀘𑁆𑀘 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀸 𑀅𑀚𑁆𑀛𑀢𑁆𑀢𑀸. 𑀢𑁂𑀦𑀸𑀢𑀺 𑀬𑀲𑁆𑀲 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀘 𑀲𑀼𑀜𑁆𑀜𑀢𑀁 𑀆𑀦𑁂𑀜𑁆𑀚𑀜𑁆𑀘 𑀫𑀦𑀲𑀺𑀓𑀭𑁄𑀢𑁄 𑀅𑀚𑁆𑀛𑀢𑁆𑀢𑀲𑀼𑀜𑁆𑀜𑀢𑀸𑀤𑀻𑀲𑀼 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺 𑀦 𑀧𑀲𑀻𑀤𑀢𑀺 𑀦 𑀲𑀦𑁆𑀢𑀺𑀝𑁆𑀞𑀢𑀺 𑀦𑀸𑀥𑀺𑀫𑀼𑀘𑁆𑀘𑀢𑀺, 𑀬𑁄 𑀘 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄, 𑀢𑁂𑀦 𑀪𑀺𑀓𑁆𑀔𑀼𑀦𑀸. 𑀢𑀲𑁆𑀫𑀺𑀁𑀬𑁂𑀯 𑀧𑀼𑀭𑀺𑀫𑀲𑁆𑀫𑀺𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑁂𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀺𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑁂. 𑀅𑀚𑁆𑀛𑀢𑁆𑀢𑀫𑁂𑀯𑀸𑀢𑀺 𑀛𑀸𑀦𑀕𑁄𑀘𑀭𑁂 𑀓𑀲𑀺𑀡𑀸𑀤𑀺𑀫𑁆𑀳𑀺. 𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀢𑀩𑁆𑀩𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀺𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀢𑀩𑁆𑀩𑀁. 𑀅𑀚𑁆𑀛𑀢𑁆𑀢𑀭𑀢𑁄𑀢𑀺 𑀕𑁄𑀘𑀭𑀚𑁆𑀛𑀢𑁆𑀢𑁂 𑀦𑀺𑀩𑁆𑀩𑀸𑀦𑁂 𑀭𑀢𑁄, 𑀲𑀫𑀸𑀥𑀺𑀕𑁄𑀘𑀭𑁂 𑀓𑀫𑁆𑀫𑀝𑁆𑀞𑀸𑀦𑁂 𑀯𑀸 𑀭𑀢𑁄. ‘‘𑀲𑀫𑀸𑀳𑀺𑀢𑁄 𑀏𑀓𑁄 𑀲𑀦𑁆𑀢𑀼𑀲𑀺𑀢𑁄 𑀢𑀫𑀸𑀳𑀼 𑀪𑀺𑀓𑁆𑀔𑀼’’𑀦𑁆𑀢𑀺 (𑀥. 𑀧. 𑁩𑁬𑁨) 𑀕𑀸𑀣𑀸𑀲𑁂𑀲𑁄.

𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀦𑁆𑀢𑀺 𑀏𑀢𑁆𑀣 𑀛𑀸𑀦𑀁 𑀲𑀓𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 ‘‘𑀅𑀚𑁆𑀛𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑀢𑁆𑀣𑁄 𑀅𑀚𑁆𑀛𑀢𑁆𑀢-𑀲𑀤𑁆𑀤𑁄 𑀳𑁄𑀢𑀺. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀲𑀓𑀲𑀦𑁆𑀢𑀢𑀺𑀦𑀺𑀬𑀓𑀁. 𑀅𑀚𑁆𑀛𑀢𑁆𑀢𑁂 𑀪𑀯𑀸 𑀅𑀚𑁆𑀛𑀢𑁆𑀢𑀺𑀓𑀸𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑁂𑀲𑀼𑀧𑀺 𑀅𑀩𑁆𑀪𑀦𑁆𑀢𑀭𑀸 𑀘𑀓𑁆𑀔𑀸𑀤𑀬𑁄 𑀯𑀼𑀘𑁆𑀘𑀦𑁆𑀢𑀺. 𑀏𑀢𑁆𑀣 𑀧𑀦 𑀅𑀚𑁆𑀛𑀢𑁆𑀢𑀺𑀓-𑀲𑀤𑁆𑀤𑁄 𑀘𑀓𑁆𑀔𑀸𑀤𑀻𑀲𑀼 𑀧𑀯𑀢𑁆𑀢𑀫𑀸𑀦𑁄 𑀤𑀲𑁆𑀲𑀺𑀢𑁄, 𑀦 𑀅𑀚𑁆𑀛𑀢𑁆𑀢𑀲𑀤𑁆𑀤𑁄, 𑀅𑀢𑁆𑀣𑀺 𑀘 𑀅𑀚𑁆𑀛𑀢𑁆𑀢𑀅𑀚𑁆𑀛𑀢𑁆𑀢𑀺𑀓𑀲𑀤𑁆𑀤𑀸𑀦𑀁 𑀩𑀳𑀺𑀤𑁆𑀥𑀸𑀩𑀸𑀳𑀺𑀭-𑀲𑀤𑁆𑀤𑀸𑀦𑀁 𑀯𑀺𑀬 𑀯𑀺𑀲𑁂𑀲𑁄. 𑀅𑀚𑁆𑀛𑀢𑁆𑀢𑀺𑀓𑀲𑀤𑁆𑀤𑁄 𑀳𑀺 𑀲𑀧𑀭𑀲𑀦𑁆𑀢𑀸𑀦𑀺𑀓𑁂𑀲𑀼 𑀲𑀩𑁆𑀩𑁂𑀲𑀼 𑀘𑀓𑁆𑀔𑀸𑀤𑀻𑀲𑀼 𑀭𑀽𑀧𑀸𑀤𑀻𑀲𑀼 𑀩𑀸𑀳𑀺𑀭-𑀲𑀤𑁆𑀤𑁄 𑀯𑀺𑀬 𑀧𑀯𑀢𑁆𑀢𑀢𑀺, 𑀅𑀚𑁆𑀛𑀢𑁆𑀢-𑀲𑀤𑁆𑀤𑁄 𑀧𑀦 𑀲𑀓𑀲𑀦𑁆𑀢𑀸𑀦𑀺𑀓𑁂𑀲𑁆𑀯𑁂𑀯 𑀘𑀓𑁆𑀔𑀼𑀭𑀽𑀧𑀸𑀤𑀻𑀲𑀼 𑀢𑀢𑁄 𑀅𑀜𑁆𑀜𑁂𑀲𑁆𑀯𑁂𑀯 𑀩𑀳𑀺𑀤𑁆𑀥𑀸-𑀲𑀤𑁆𑀤𑁄 𑀯𑀺𑀬 𑀧𑀯𑀢𑁆𑀢𑀢𑀻𑀢𑀺 𑀢𑀲𑁆𑀫𑀸 𑀲𑀤𑁆𑀤𑀢𑁄 𑀅𑀢𑁆𑀣𑀢𑁄 𑀘 𑀅𑀲𑀫𑀸𑀦𑀢𑁆𑀢𑀸 𑀦 𑀇𑀤𑀫𑁂𑀢𑁆𑀣 𑀉𑀤𑀸𑀳𑀭𑀡𑀁 𑀬𑀼𑀢𑁆𑀢𑀦𑁆𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀤𑀝𑁆𑀞𑀩𑁆𑀩𑁄 𑁋 𑀅𑀚𑁆𑀛𑀢𑁆𑀢𑁂 𑀪𑀯𑀸 𑀅𑀚𑁆𑀛𑀢𑁆𑀢𑀺𑀓𑀸𑀢𑀺 𑀅𑀬𑀜𑁆𑀳𑀺 𑀯𑀘𑀦𑀢𑁆𑀣𑁄. 𑀬𑀜𑁆𑀘 𑀅𑀚𑁆𑀛𑀢𑁆𑀢𑁂 𑀪𑀯𑀁, 𑀢𑁂𑀦 𑀅𑀚𑁆𑀛𑀢𑁆𑀢𑁂𑀦𑁂𑀯 𑀪𑀯𑀺𑀢𑀩𑁆𑀩𑀁, 𑀢𑁂𑀦 𑀢𑀁𑀯𑀸𑀘𑀓𑀲𑁆𑀲 𑀅𑀚𑁆𑀛𑀢𑁆𑀢-𑀲𑀤𑁆𑀤𑀲𑁆𑀲 𑀅𑀚𑁆𑀛𑀢𑁆𑀢𑀺𑀓-𑀲𑀤𑁆𑀤𑀲𑁆𑀲 𑀘 𑀲𑀫𑀸𑀦𑀢𑁆𑀣𑀢𑀸. 𑀉𑀪𑀺𑀦𑁆𑀦𑀫𑁆𑀧𑀺 𑀲𑀤𑁆𑀤𑀸𑀦𑀁 𑀲𑀫𑀸𑀦𑀢𑁆𑀣𑀪𑀸𑀯𑀢𑁄 𑀅𑀚𑁆𑀛𑀢𑁆𑀢𑀚𑁆𑀛𑀢𑁆𑀢𑁂 𑀧𑀯𑀢𑁆𑀢𑀫𑀸𑀦𑁂 𑀅𑀚𑁆𑀛𑀢𑁆𑀢𑀺𑀓-𑀲𑀤𑁆𑀤𑁂 𑀅𑀚𑁆𑀛𑀢𑁆𑀢-𑀲𑀤𑁆𑀤𑁄 𑀢𑀢𑁆𑀣 𑀧𑀯𑀢𑁆𑀢𑁄𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺.

𑀅𑀬𑀁 𑀔𑁄 𑀧𑀦𑀸𑀦𑀦𑁆𑀤, 𑀯𑀺𑀳𑀸𑀭𑁄𑀢𑀺 𑀯𑀺𑀳𑀸𑀭𑀲𑀼𑀜𑁆𑀜𑀢𑀸𑀲𑀼𑀢𑁆𑀢𑁂 (𑀫. 𑀦𑀺. 𑁩.𑁧𑁮𑁭) 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸𑀬 𑀭𑀽𑀧𑀸𑀤𑀺𑀭𑀢𑀺𑀬𑀸 𑀘 𑀆𑀤𑀻𑀦𑀯𑀁 𑀯𑀢𑁆𑀯𑀸 𑀢𑀧𑁆𑀧𑀝𑀺𑀧𑀓𑁆𑀔𑀯𑀺𑀳𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀦𑁆𑀢𑀺 𑀯𑀺𑀲𑀬𑀪𑀽𑀢𑀁 𑀇𑀲𑁆𑀲𑀭𑀺𑀬𑀝𑁆𑀞𑀸𑀦𑀪𑀽𑀢𑀁 𑀲𑀼𑀜𑁆𑀜𑀢𑀁, 𑀲𑀼𑀜𑁆𑀜𑀢𑀸𑀨𑀮𑀲𑀫𑀸𑀧𑀢𑁆𑀢𑀺𑀦𑁆𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑀺𑀲𑁆𑀲𑀭𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀸𑀧𑀺 𑀬𑀁 𑀫𑀼𑀳𑀼𑀢𑁆𑀢𑀁 𑀢𑀼𑀡𑁆𑀳𑀻 𑀪𑀯𑀺𑀢𑀩𑁆𑀩𑀁 𑀳𑁄𑀢𑀺, 𑀢𑀁 𑀫𑀼𑀳𑀼𑀢𑁆𑀢𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀧𑀕𑁂𑀯 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂, 𑀢𑀲𑁆𑀫𑀸 𑀲𑀩𑁆𑀩𑀢𑁆𑀣𑀸𑀧𑀺 𑀇𑀲𑁆𑀲𑀭𑀺𑀬𑀸𑀦𑀁 𑀩𑀳𑀼𑀮𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀁 𑀇𑀲𑁆𑀲𑀭𑀺𑀬𑀲𑁆𑀲 𑀧𑀯𑀢𑁆𑀢𑀦𑀢𑁄 𑀨𑀮𑀲𑀫𑀸𑀧𑀢𑁆𑀢𑀺 ‘‘𑀇𑀲𑁆𑀲𑀭𑀺𑀬𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀸. 𑀅𑀭𑀳𑀢𑁆𑀢𑀨𑀮𑀸𑀥𑀺𑀕𑀫𑁂𑀦 𑀯𑀸 𑀢𑀣𑀸𑀕𑀢𑀸𑀦𑀁 𑀇𑀲𑁆𑀲𑀭𑀺𑀬𑀁 𑀦𑀺𑀩𑁆𑀩𑀢𑁆𑀢𑀁 𑀢𑀁𑀚𑀦𑀓𑁂𑀦𑁂𑀯 𑀫𑀕𑁆𑀕𑁂𑀦𑀸𑀢𑀺 𑀢𑀁 𑀢𑁂𑀲𑀁 𑀇𑀲𑁆𑀲𑀭𑀺𑀬𑀝𑁆𑀞𑀸𑀦𑀁. 𑀯𑀺𑀲𑀬𑁄 𑀘 𑀅𑀦𑀜𑁆𑀜𑀢𑁆𑀣𑀪𑀸𑀯𑁄𑀯 𑀬𑀣𑀸 ‘‘𑀆𑀓𑀸𑀲𑁂 𑀲𑀓𑀼𑀡𑀸 𑀉𑀤𑀓𑁂 𑀫𑀘𑁆𑀙𑀸’’𑀢𑀺, 𑀩𑀼𑀤𑁆𑀥𑀸 𑀘 𑀅𑀜𑁆𑀜𑀢𑁆𑀣 𑀤𑀺𑀲𑁆𑀲𑀫𑀸𑀦𑀸𑀧𑀺 𑀯𑀺𑀯𑁂𑀓𑀧𑀩𑁆𑀪𑀸𑀭𑀢𑀸𑀬 𑀨𑀮𑀲𑀫𑀸𑀧𑀢𑁆𑀢𑀺𑀦𑀺𑀦𑁆𑀦𑀸𑀯, 𑀢𑁂𑀦 𑀢𑀲𑁆𑀲𑀸 𑀢𑀲𑁆𑀲𑀸 𑀓𑀺𑀭𑀺𑀬𑀸𑀬 𑀅𑀦𑀦𑁆𑀢𑀭𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀁𑀬𑁂𑀯 𑀪𑀯𑀦𑁆𑀢𑀻𑀢𑀺 𑀲𑀸 𑀢𑁂𑀲𑀁 𑀯𑀺𑀲𑀬𑁄, 𑀢𑀩𑁆𑀩𑀺𑀲𑀬𑀢𑀸 𑀘 𑀲𑀘𑁆𑀘𑀓𑀲𑀼𑀢𑁆𑀢𑁂𑀦 (𑀫. 𑀦𑀺. 𑁧.𑁩𑁬𑁪 𑀆𑀤𑀬𑁄) 𑀤𑀻𑀧𑁂𑀢𑀩𑁆𑀩𑀸.

𑁨𑁨. 𑀬𑁂𑀲𑀁 𑀤𑀝𑁆𑀞𑀩𑁆𑀩𑀪𑀸𑀯𑁄 𑀅𑀢𑁆𑀣𑀺, 𑀢𑁂 𑀲𑀦𑀺𑀤𑀲𑁆𑀲𑀦𑀸. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀕𑁄𑀘𑀭𑀪𑀸𑀯𑁄𑀯 𑀤𑀝𑁆𑀞𑀩𑁆𑀩𑀪𑀸𑀯𑁄, 𑀢𑀲𑁆𑀲 𑀭𑀽𑀧𑀸𑀬𑀢𑀦𑀸 𑀅𑀦𑀜𑁆𑀜𑀢𑁆𑀢𑁂𑀧𑀺 𑀅𑀜𑁆𑀜𑁂𑀳𑀺 𑀥𑀫𑁆𑀫𑁂𑀳𑀺 𑀭𑀽𑀧𑀸𑀬𑀢𑀦𑀁 𑀯𑀺𑀲𑁂𑀲𑁂𑀢𑀼𑀁 𑀅𑀜𑁆𑀜𑀁 𑀯𑀺𑀬 𑀓𑀢𑁆𑀯𑀸 ‘‘𑀲𑀳 𑀦𑀺𑀤𑀲𑁆𑀲𑀦𑁂𑀦𑀸𑀢𑀺 𑀲𑀦𑀺𑀤𑀲𑁆𑀲𑀦𑀸’’𑀢𑀺 𑀯𑀼𑀢𑁆𑀢𑀁. 𑀥𑀫𑁆𑀫𑀲𑀪𑀸𑀯𑀲𑀸𑀫𑀜𑁆𑀜𑁂𑀦 𑀳𑀺 𑀏𑀓𑀻𑀪𑀽𑀢𑁂𑀲𑀼 𑀥𑀫𑁆𑀫𑁂𑀲𑀼 𑀬𑁄 𑀦𑀸𑀦𑀢𑁆𑀢𑀓𑀭𑁄 𑀲𑀪𑀸𑀯𑁄, 𑀲𑁄 𑀅𑀜𑁆𑀜𑁄 𑀯𑀺𑀬 𑀓𑀢𑁆𑀯𑀸 𑀉𑀧𑀘𑀭𑀺𑀢𑀼𑀁 𑀬𑀼𑀢𑁆𑀢𑁄. 𑀏𑀯𑀜𑁆𑀳𑀺 𑀅𑀢𑁆𑀣𑀯𑀺𑀲𑁂𑀲𑀸𑀯𑀩𑁄𑀥𑁄 𑀳𑁄𑀢𑀻𑀢𑀺. 𑀲𑀬𑀜𑁆𑀘 𑀦𑀺𑀲𑁆𑀲𑀬𑀯𑀲𑁂𑀦 𑀘 𑀲𑀫𑁆𑀧𑀢𑁆𑀢𑀸𑀦𑀁 𑀅𑀲𑀫𑁆𑀧𑀢𑁆𑀢𑀸𑀦𑀜𑁆𑀘 𑀧𑀝𑀺𑀫𑀼𑀔𑀪𑀸𑀯𑁄 𑀅𑀜𑁆𑀜𑀫𑀜𑁆𑀜𑀧𑀢𑀦𑀁 𑀧𑀝𑀺𑀳𑀦𑀦𑀪𑀸𑀯𑁄, 𑀬𑁂𑀦 𑀩𑁆𑀬𑀸𑀧𑀸𑀭𑀸𑀤𑀺𑀯𑀺𑀓𑀸𑀭𑀧𑀘𑁆𑀘𑀬𑀦𑁆𑀢𑀭𑀲𑀳𑀺𑀢𑁂𑀲𑀼 𑀘𑀓𑁆𑀔𑀸𑀤𑀻𑀦𑀁 𑀯𑀺𑀲𑀬𑁂𑀲𑀼 𑀯𑀺𑀓𑀸𑀭𑀼𑀧𑁆𑀧𑀢𑁆𑀢𑀺.

𑀢𑀺𑀓𑀫𑀸𑀢𑀺𑀓𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀓𑀫𑀸𑀢𑀺𑀓𑀸𑀧𑀤𑀯𑀡𑁆𑀡𑀦𑀸

𑁧-𑁬. 𑀫𑀽𑀮𑀝𑁆𑀞𑁂𑀦𑀸𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑁂𑀦 𑀫𑀽𑀮𑀪𑀸𑀯𑁂𑀦, 𑀦 𑀧𑀘𑁆𑀘𑀬𑀫𑀢𑁆𑀢𑀝𑁆𑀞𑁂𑀦 𑀳𑁂𑀢𑀼𑀥𑀫𑁆𑀫𑀸 𑀳𑁂𑀢𑀽 𑀥𑀫𑁆𑀫𑀸𑀢𑀺 𑀲𑀫𑀸𑀲𑀸𑀲𑀫𑀸𑀲𑀦𑀺𑀤𑁆𑀤𑁂𑀲𑀪𑀸𑀯𑁄 𑀤𑁆𑀯𑀺𑀦𑁆𑀦𑀁 𑀧𑀸𑀞𑀸𑀦𑀁 𑀯𑀺𑀲𑁂𑀲𑁄. 𑀢𑀣𑁂𑀯𑀸𑀢𑀺 𑀲𑀫𑁆𑀧𑀬𑁄𑀕𑀢𑁄𑀯. 𑀲𑀳𑁂𑀢𑀼𑀓𑀸𑀦𑀁 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑀢𑁄 ‘‘𑀲𑀫𑁆𑀧𑀬𑁄𑀕𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀦 𑀲𑀳𑀲𑀤𑁆𑀤𑀲𑁆𑀲 𑀲𑀫𑁆𑀧𑀬𑁄𑀕𑀢𑁆𑀣𑀢𑁆𑀢𑀸. 𑀲𑀳-𑀲𑀤𑁆𑀤𑁄 𑀧𑀦 𑀏𑀓𑀧𑀼𑀜𑁆𑀚𑁂 𑀉𑀧𑁆𑀧𑀸𑀤𑀢𑁄 𑀬𑀸𑀯 𑀪𑀗𑁆𑀕𑀸 𑀲𑀳𑁂𑀢𑀼𑀓𑀸𑀦𑀁 𑀳𑁂𑀢𑀽𑀳𑀺 𑀲𑀫𑀸𑀦𑀤𑁂𑀲𑀕𑀳𑀡𑀸𑀦𑀁 𑀳𑁂𑀢𑀼𑀆𑀤𑀺𑀲𑀩𑁆𑀪𑀸𑀯𑀁 𑀤𑀻𑀧𑁂𑀢𑀺, 𑀲𑀫𑁆𑀧𑀬𑀼𑀢𑁆𑀢-𑀲𑀤𑁆𑀤𑁄 𑀏𑀓𑀼𑀧𑁆𑀧𑀸𑀤𑀸𑀤𑀺𑀯𑀲𑁂𑀦 𑀲𑀳 𑀳𑁂𑀢𑀽𑀳𑀺 𑀏𑀓𑀻𑀪𑀸𑀯𑀼𑀧𑀕𑀫𑀦𑀁, 𑀢𑀢𑁄 𑀏𑀯 𑀘 𑀤𑁆𑀯𑀺𑀦𑁆𑀦𑀁 𑀤𑀼𑀓𑀸𑀦𑀁 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀥𑀫𑁆𑀫𑀦𑀸𑀦𑀢𑁆𑀢𑀸𑀪𑀸𑀯𑁂𑀧𑀺 𑀳𑀺 𑀧𑀤𑀢𑁆𑀣𑀦𑀸𑀦𑀢𑁆𑀢𑁂𑀦 𑀤𑀼𑀓𑀦𑁆𑀢𑀭𑀁 𑀯𑀼𑀘𑁆𑀘𑀢𑀺. 𑀦 𑀳𑀺 𑀳𑁂𑀢𑀼𑀤𑀼𑀓𑀲𑀗𑁆𑀕𑀳𑀺𑀢𑁂𑀳𑀺 𑀥𑀫𑁆𑀫𑁂𑀳𑀺 𑀅𑀜𑁆𑀜𑁂 𑀲𑀳𑁂𑀢𑀼𑀓𑀤𑀼𑀓𑀸𑀤𑀻𑀳𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂 𑀏𑀯 𑀧𑀦 𑀲𑀳𑁂𑀢𑀼𑀓𑀸𑀳𑁂𑀢𑀼𑀓𑀸𑀤𑀺𑀪𑀸𑀯𑀢𑁄 𑀲𑀳𑁂𑀢𑀼𑀓𑀤𑀼𑀓𑀸𑀤𑀻𑀳𑀺 𑀯𑀼𑀢𑁆𑀢𑀸. 𑀏𑀯𑀁 𑀲𑀳𑁂𑀢𑀼𑀓𑀤𑀼𑀓𑀲𑀗𑁆𑀕𑀳𑀺𑀢𑀸 𑀏𑀯 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀪𑀸𑀯𑀢𑁄 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑁂𑀦 𑀯𑀼𑀢𑁆𑀢𑀸. 𑀦 𑀳𑀺 𑀥𑀫𑁆𑀫𑀸𑀦𑀁 𑀅𑀯𑀼𑀢𑁆𑀢𑀢𑀸𑀧𑁂𑀓𑁆𑀔𑀁 𑀤𑀼𑀓𑀦𑁆𑀢𑀭𑀯𑀘𑀦𑀦𑁆𑀢𑀺 𑀦𑀢𑁆𑀣𑀺 𑀧𑀼𑀦𑀭𑀼𑀢𑁆𑀢𑀺𑀤𑁄𑀲𑁄. 𑀤𑁂𑀲𑁂𑀢𑀩𑁆𑀩𑀧𑁆𑀧𑀓𑀸𑀭𑀚𑀸𑀦𑀦𑀜𑁆𑀳𑀺 𑀤𑁂𑀲𑀦𑀸𑀯𑀺𑀮𑀸𑀲𑁄 𑀢𑀣𑀸 𑀤𑁂𑀲𑀦𑀸𑀜𑀸𑀡𑀜𑁆𑀘𑀸𑀢𑀺. 𑀢𑁂𑀦 𑀥𑀫𑁆𑀫𑀸𑀦𑀁 𑀢𑀧𑁆𑀧𑀓𑀸𑀭𑀢𑀸 𑀯𑀼𑀢𑁆𑀢𑀸 𑀳𑁄𑀢𑀺. 𑀲𑀓𑀮𑁂𑀓𑀤𑁂𑀲𑀯𑀲𑁂𑀦 𑀧𑀞𑀫𑀤𑀼𑀓𑀁 𑀤𑀼𑀢𑀺𑀬𑀢𑀢𑀺𑀬𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀘𑀢𑀼𑀢𑁆𑀣𑀸𑀤𑀬𑁄 𑀢𑀬𑁄 𑀤𑀼𑀓𑀸 𑀯𑀼𑀢𑁆𑀢𑀸. 𑀲𑀓𑀮𑀜𑁆𑀳𑀺 𑀧𑀞𑀫𑀤𑀼𑀓𑀁 𑀤𑀼𑀢𑀺𑀬𑀤𑀼𑀓𑁂𑀓𑀤𑁂𑀲𑁂𑀦 𑀲𑀳𑁂𑀢𑀼𑀓𑀧𑀤𑁂𑀦 𑀢𑀢𑀺𑀬𑀤𑀼𑀓𑁂𑀓𑀤𑁂𑀲𑁂𑀦 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀧𑀤𑁂𑀦 𑀘 𑀬𑁄𑀚𑁂𑀢𑁆𑀯𑀸 𑀬𑀣𑀸𑀓𑁆𑀓𑀫𑀁 𑀘𑀢𑀼𑀢𑁆𑀣𑀧𑀜𑁆𑀘𑀫𑀤𑀼𑀓𑀸 𑀯𑀼𑀢𑁆𑀢𑀸, 𑀢𑀣𑀸 𑀧𑀞𑀫𑀤𑀼𑀓𑁂𑀓𑀤𑁂𑀲𑀁 𑀦𑀳𑁂𑀢𑀼𑀧𑀤𑀁 𑀲𑀓𑀮𑁂𑀦 𑀤𑀼𑀢𑀺𑀬𑀤𑀼𑀓𑁂𑀦 𑀬𑁄𑀚𑁂𑀢𑁆𑀯𑀸 𑀙𑀝𑁆𑀞𑀤𑀼𑀓𑁄 𑀯𑀼𑀢𑁆𑀢𑁄. 𑀇𑀤𑀫𑁆𑀧𑀺 𑀲𑀫𑁆𑀪𑀯𑀢𑀻𑀢𑀺 𑀏𑀢𑁂𑀦 𑀅𑀯𑀼𑀢𑁆𑀢𑀫𑁆𑀧𑀺 𑀲𑀫𑁆𑀪𑀯𑀯𑀲𑁂𑀦 𑀤𑀻𑀧𑀺𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀫𑁆𑀪𑀯𑁄 𑀳𑀺 𑀕𑀳𑀡𑀲𑁆𑀲 𑀓𑀸𑀭𑀡𑀦𑁆𑀢𑀺. 𑀬𑀣𑀸 𑀳𑁂𑀢𑀼𑀲𑀳𑁂𑀢𑀼𑀓𑀸𑀢𑀺 𑀇𑀤𑀁 𑀲𑀫𑁆𑀪𑀯𑀢𑀻𑀢𑀺 𑀓𑀢𑁆𑀯𑀸 𑀕𑀳𑀺𑀢𑀁, 𑀏𑀯𑀁 𑀳𑁂𑀢𑀼𑀅𑀳𑁂𑀢𑀼𑀓𑀸𑀢𑀺 𑀇𑀤𑀫𑁆𑀧𑀺 𑀲𑀫𑁆𑀪𑀯𑀢𑀻𑀢𑀺 𑀓𑀢𑁆𑀯𑀸 𑀕𑀳𑁂𑀢𑀩𑁆𑀩𑀫𑁂𑀯𑀸𑀢𑀺 𑀏𑀯𑀁 𑀅𑀜𑁆𑀜𑀢𑁆𑀣𑀸𑀧𑀺 𑀬𑁄𑀚𑁂𑀢𑀩𑁆𑀩𑀁.

𑀏𑀯𑀁 𑀧𑀞𑀫𑀤𑀼𑀓𑀁 𑀤𑀼𑀢𑀺𑀬𑀢𑀢𑀺𑀬𑀤𑀼𑀓𑁂𑀲𑀼 𑀤𑀼𑀢𑀺𑀬𑀧𑀤𑁂𑀳𑀺 𑀬𑁄𑀚𑁂𑀢𑁆𑀯𑀸 ‘‘𑀳𑁂𑀢𑀽 𑀘𑁂𑀯 𑀥𑀫𑁆𑀫𑀸 𑀅𑀳𑁂𑀢𑀼𑀓𑀸 𑀘, 𑀅𑀳𑁂𑀢𑀼𑀓𑀸 𑀘𑁂𑀯 𑀥𑀫𑁆𑀫𑀸 𑀦 𑀘 𑀳𑁂𑀢𑀽, 𑀳𑁂𑀢𑀽 𑀘𑁂𑀯 𑀥𑀫𑁆𑀫𑀸 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀸 𑀘, 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑁂𑀯 𑀥𑀫𑁆𑀫𑀸 𑀦 𑀘 𑀳𑁂𑀢𑀽’’𑀢𑀺 𑀬𑁂 𑀤𑁆𑀯𑁂 𑀤𑀼𑀓𑀸 𑀓𑀸𑀢𑀩𑁆𑀩𑀸, 𑀢𑁂𑀲𑀁 𑀲𑀫𑁆𑀪𑀯𑀯𑀲𑁂𑀦𑁂𑀯 𑀲𑀗𑁆𑀕𑀳𑀁 𑀤𑀲𑁆𑀲𑁂𑀢𑁆𑀯𑀸 𑀔𑁄 𑀧𑀦-𑀧𑀤𑁂𑀦 𑀅𑀧𑀭𑁂𑀲𑀫𑁆𑀧𑀺 𑀤𑀼𑀓𑀸𑀦𑀁 𑀲𑀗𑁆𑀕𑀳𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀭 𑀬𑀤𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀢𑀺 𑀧𑀸𑀴𑀺𑀬𑀁. 𑀅𑀬𑀁 𑀅𑀢𑀺𑀭𑁂𑀓𑀢𑁆𑀣𑁄𑀢𑀺 𑀇𑀤𑀸𑀦𑀺 𑀬𑀁 𑀯𑀓𑁆𑀔𑀢𑀺, 𑀢𑀫𑀢𑁆𑀣𑀫𑀸𑀳. 𑀢𑀢𑁆𑀣 𑀧𑀦 𑀅𑀜𑁆𑀜𑁂𑀧𑀺 𑀅𑀜𑁆𑀜𑀣𑀸𑀧𑀻𑀢𑀺 𑀏𑀢𑁂𑀲𑀁 𑀯𑀺𑀲𑀼𑀁 𑀧𑀯𑀢𑁆𑀢𑀺𑀬𑀸 𑀤𑁆𑀯𑁂 𑀤𑀼𑀓𑀸 𑀤𑀲𑁆𑀲𑀺𑀢𑀸, 𑀲𑀳 𑀧𑀯𑀢𑁆𑀢𑀺𑀬𑀸 𑀧𑀦 𑀅𑀬𑀫𑁆𑀧𑀺 𑀤𑀼𑀓𑁄 𑀯𑁂𑀤𑀺𑀢𑀩𑁆𑀩𑁄 ‘‘𑀳𑁂𑀢𑀽 𑀘𑁂𑀯 𑀥𑀫𑁆𑀫𑀸 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀸𑀧𑀻’’𑀢𑀺, 𑀏𑀢𑁂𑀲𑀼 𑀧𑀦 𑀧𑀜𑁆𑀘𑀲𑀼 𑀤𑀼𑀓𑁂𑀲𑀼 𑀤𑀼𑀢𑀺𑀬𑀤𑀼𑀓𑁂𑀦 𑀢𑀢𑀺𑀬𑀤𑀼𑀓𑁄 𑀯𑀺𑀬, 𑀘𑀢𑀼𑀢𑁆𑀣𑀤𑀼𑀓𑁂𑀦 𑀧𑀜𑁆𑀘𑀫𑀤𑀼𑀓𑁄 𑀯𑀺𑀬 𑀘 𑀙𑀝𑁆𑀞𑀤𑀼𑀓𑁂𑀦 𑀦𑀺𑀦𑁆𑀦𑀸𑀦𑀢𑁆𑀣𑀢𑁆𑀢𑀸 ‘‘𑀦 𑀳𑁂𑀢𑀼 𑀔𑁄 𑀧𑀦 𑀥𑀫𑁆𑀫𑀸 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀸𑀧𑀻’’𑀢𑀺 𑀅𑀬𑀁 𑀤𑀼𑀓𑁄 𑀦 𑀯𑀼𑀢𑁆𑀢𑁄. 𑀤𑀲𑁆𑀲𑀺𑀢𑀦𑀺𑀦𑁆𑀦𑀸𑀦𑀢𑁆𑀣𑀦𑀬𑁄 𑀳𑀺 𑀲𑁄 𑀧𑀼𑀭𑀺𑀫𑀤𑀼𑀓𑁂𑀳𑀻𑀢𑀺. 𑀇𑀢𑀭𑁂𑀲𑀼 𑀘𑀢𑀽𑀲𑀼 𑀳𑁂𑀢𑀽 𑀘𑁂𑀯 𑀅𑀳𑁂𑀢𑀼𑀓𑀤𑀼𑀓𑁂𑀦 𑀲𑀫𑀸𑀦𑀢𑁆𑀣𑀢𑁆𑀢𑀸 𑀳𑁂𑀢𑀽 𑀘𑁂𑀯 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀤𑀼𑀓𑁄, 𑀳𑁂𑀢𑀼𑀲𑀳𑁂𑀢𑀼𑀓𑀤𑀼𑀓𑁂𑀦 𑀲𑀫𑀸𑀦𑀢𑁆𑀣𑀢𑁆𑀢𑀸 𑀳𑁂𑀢𑀼𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑁄 𑀘 𑀦𑀳𑁂𑀢𑀼𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑁄 𑀯𑀺𑀬 𑀦 𑀯𑀢𑁆𑀢𑀩𑁆𑀩𑁄. 𑀢𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀧𑀘𑁆𑀙𑀺𑀫𑀤𑀼𑀓𑁂 ‘‘𑀳𑁂𑀢𑀽 𑀔𑁄 𑀧𑀦 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸’’𑀢𑀺 𑀧𑀤𑀁 𑀘𑀢𑀼𑀢𑁆𑀣𑀤𑀼𑀓𑁂 𑀧𑀞𑀫𑀧𑀤𑁂𑀦 𑀦𑀺𑀦𑁆𑀦𑀸𑀦𑀸𑀓𑀭𑀡𑀢𑁆𑀢𑀸 𑀦 𑀯𑀢𑁆𑀢𑀩𑁆𑀩𑀁, ‘‘𑀳𑁂𑀢𑀽 𑀔𑁄 𑀧𑀦 𑀥𑀫𑁆𑀫𑀸 𑀅𑀳𑁂𑀢𑀼𑀓𑀸’’𑀢𑀺 𑀧𑀤𑀁 ‘‘𑀳𑁂𑀢𑀽 𑀘𑁂𑀯 𑀥𑀫𑁆𑀫𑀸 𑀅𑀳𑁂𑀢𑀼𑀓𑀸’’𑀢𑀺 𑀏𑀢𑁂𑀦 𑀦𑀺𑀦𑁆𑀦𑀸𑀦𑀢𑁆𑀢𑀸 𑀦 𑀯𑀢𑁆𑀢𑀩𑁆𑀩𑀁. 𑀅𑀯𑀲𑀺𑀝𑁆𑀞𑁂 𑀧𑀦 𑀏𑀓𑀲𑁆𑀫𑀺𑀁 𑀤𑀼𑀓𑁂 ‘‘𑀅𑀳𑁂𑀢𑀼𑀓𑀸 𑀘𑁂𑀯 𑀥𑀫𑁆𑀫𑀸 𑀦 𑀘 𑀳𑁂𑀢𑀽’’𑀢𑀺 𑀧𑀤𑀁 𑀙𑀝𑁆𑀞𑀤𑀼𑀓𑁂 𑀤𑀼𑀢𑀺𑀬𑀧𑀤𑁂𑀦 𑀏𑀓𑀢𑁆𑀣𑀢𑁆𑀢𑀸 𑀦 𑀯𑀢𑁆𑀢𑀩𑁆𑀩𑀁. 𑀇𑀤𑀸𑀦𑀺 ‘‘𑀳𑁂𑀢𑀽 𑀘𑁂𑀯 𑀥𑀫𑁆𑀫𑀸 𑀅𑀳𑁂𑀢𑀼𑀓𑀸 𑀘𑀸’’𑀢𑀺 𑀇𑀤𑀫𑁂𑀯𑁂𑀓𑀁 𑀧𑀤𑀁 𑀅𑀯𑀲𑀺𑀝𑁆𑀞𑀁, 𑀦 𑀘 𑀏𑀓𑁂𑀦 𑀧𑀤𑁂𑀦 𑀤𑀼𑀓𑁄 𑀳𑁄𑀢𑀻𑀢𑀺 𑀢𑀜𑁆𑀘 𑀦 𑀯𑀼𑀢𑁆𑀢𑀦𑁆𑀢𑀺. 𑀘𑀢𑀼𑀢𑁆𑀣𑀤𑀼𑀓𑁂 𑀤𑀼𑀢𑀺𑀬𑀧𑀤𑁂𑀦 𑀧𑀦 𑀲𑀫𑀸𑀦𑀢𑁆𑀣𑀲𑁆𑀲 𑀙𑀝𑁆𑀞𑀤𑀼𑀓𑁂 𑀧𑀞𑀫𑀧𑀤𑀲𑁆𑀲 𑀯𑀘𑀦𑀁 𑀤𑀼𑀓𑀧𑀽𑀭𑀡𑀢𑁆𑀣𑀁, 𑀏𑀢𑁂𑀦 𑀯𑀸 𑀕𑀢𑀺𑀤𑀲𑁆𑀲𑀦𑁂𑀦 𑀲𑀩𑁆𑀩𑀲𑁆𑀲 𑀲𑀫𑁆𑀪𑀯𑀦𑁆𑀢𑀲𑁆𑀲 𑀲𑀗𑁆𑀕𑀳𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑀺 𑀲𑀩𑁆𑀩𑁄 𑀲𑀫𑁆𑀪𑀯𑀤𑀼𑀓𑁄 𑀧𑀞𑀫𑀤𑀼𑀓𑁂 𑀤𑀼𑀢𑀺𑀬𑀢𑀢𑀺𑀬𑀤𑀼𑀓𑀧𑀓𑁆𑀔𑁂𑀧𑁂𑀦 𑀤𑀲𑁆𑀲𑀺𑀢𑁄, 𑀢𑁂𑀲𑀼 𑀘 𑀧𑀞𑀫𑀤𑀼𑀓𑀧𑀓𑁆𑀔𑁂𑀧𑁂𑀦𑀸𑀢𑀺.

𑁭-𑁧𑁩. 𑀲𑀫𑀸𑀦𑀓𑀸𑀮𑁂𑀦 𑀅𑀲𑀫𑀸𑀦𑀓𑀸𑀮𑁂𑀦 𑀓𑀸𑀮𑀯𑀺𑀫𑀼𑀢𑁆𑀢𑁂𑀦 𑀘 𑀧𑀘𑁆𑀘𑀬𑁂𑀦 𑀦𑀺𑀧𑁆𑀨𑀦𑁆𑀦𑀸𑀦𑀁 𑀧𑀘𑁆𑀘𑀬𑀸𑀬𑀢𑁆𑀢𑀸𑀦𑀁 𑀧𑀘𑁆𑀘𑀬𑀪𑀸𑀯𑀫𑀢𑁆𑀢𑁂𑀦 𑀢𑁂𑀲𑀁 𑀧𑀘𑁆𑀘𑀬𑀸𑀦𑀁 𑀅𑀢𑁆𑀣𑀺𑀢𑀁 𑀤𑀻𑀧𑁂𑀢𑀼𑀁 𑀲𑀧𑁆𑀧𑀘𑁆𑀘𑀬𑀯𑀘𑀦𑀁, 𑀦 𑀲𑀳𑁂𑀢𑀼𑀓𑀯𑀘𑀦𑀁 𑀯𑀺𑀬 𑀲𑀫𑀸𑀦𑀓𑀸𑀮𑀸𑀦𑀫𑁂𑀯, 𑀦𑀸𑀧𑀺 𑀲𑀦𑀺𑀤𑀲𑁆𑀲𑀦𑀁 𑀯𑀺𑀬 𑀢𑀁𑀲𑀪𑀸𑀯𑀲𑁆𑀲 𑀅𑀦𑀢𑁆𑀣𑀦𑁆𑀢𑀭𑀪𑀽𑀢𑀲𑁆𑀲. 𑀲𑀗𑁆𑀔𑀢-𑀲𑀤𑁆𑀤𑁄 𑀧𑀦 𑀲𑀫𑁂𑀢𑁂𑀳𑀺 𑀦𑀺𑀧𑁆𑀨𑀸𑀤𑀺𑀢𑀪𑀸𑀯𑀁 𑀤𑀻𑀧𑁂𑀢𑀻𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄 𑀤𑀼𑀓𑀦𑁆𑀢𑀭𑀯𑀘𑀦𑁂 𑀓𑀸𑀭𑀡𑀁. 𑀏𑀢𑁆𑀣 𑀘 𑀅𑀧𑁆𑀧𑀘𑁆𑀘𑀬𑀸 𑀅𑀲𑀗𑁆𑀔𑀢𑀸𑀢𑀺 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀅𑀯𑀺𑀦𑀺𑀘𑁆𑀙𑀺𑀢𑀢𑁆𑀣𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀯𑀲𑁂𑀦 𑀫𑀸𑀢𑀺𑀓𑀸𑀞𑀧𑀦𑀢𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀉𑀤𑁆𑀤𑁂𑀲𑁂𑀦 𑀳𑀺 𑀓𑀼𑀲𑀮𑀸𑀤𑀺𑀲𑀪𑀸𑀯𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀺𑀢𑀸𑀫𑀢𑁆𑀢𑀁 𑀯𑀼𑀘𑁆𑀘𑀢𑀺, 𑀦 𑀧𑀭𑀺𑀘𑁆𑀙𑁂𑀤𑁄𑀢𑀺 𑀅𑀧𑀭𑀺𑀘𑁆𑀙𑁂𑀤𑁂𑀦 𑀩𑀳𑀼𑀯𑀘𑀦𑁂𑀦 𑀉𑀤𑁆𑀤𑁂𑀲𑁄 𑀯𑀼𑀢𑁆𑀢𑁄𑀢𑀺. 𑀭𑀽𑀧𑀦𑁆𑀢𑀺 𑀭𑀽𑀧𑀸𑀬𑀢𑀦𑀁 𑀧𑀣𑀯𑀺𑀬𑀸𑀤𑀺 𑀯𑀸. 𑀧𑀼𑀭𑀺𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀭𑀽𑀧𑀸𑀬𑀢𑀦𑀲𑁆𑀲 𑀅𑀲𑀗𑁆𑀕𑀳𑀺𑀢𑀢𑀸 𑀆𑀧𑀚𑁆𑀚𑀢𑀻𑀢𑀺 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀯𑀸 𑀭𑀽𑀧𑀦𑁆𑀢𑀺 𑀅𑀬𑀁 𑀅𑀢𑁆𑀣𑀦𑀬𑁄 𑀯𑀼𑀢𑁆𑀢𑁄. 𑀢𑀢𑁆𑀣 𑀭𑀽𑀧𑀦𑁆𑀢𑀺 𑀭𑀼𑀧𑁆𑀧𑀦𑀲𑀪𑀸𑀯𑁄. 𑀦 𑀮𑀼𑀚𑁆𑀚𑀢𑀺 𑀦 𑀧𑀮𑀼𑀚𑁆𑀚𑀢𑀻𑀢𑀺 𑀬𑁄 𑀕𑀳𑀺𑀢𑁄 𑀢𑀣𑀸 𑀦 𑀳𑁄𑀢𑀺, 𑀲𑁄 𑀮𑁄𑀓𑁄𑀢𑀺 𑀢𑀁𑀕𑀳𑀡𑀭𑀳𑀺𑀢𑀸𑀦𑀁 𑀮𑁄𑀓𑀼𑀢𑁆𑀢𑀭𑀸𑀦𑀁 𑀦𑀢𑁆𑀣𑀺 𑀮𑁄𑀓𑀢𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀯𑀸 𑀮𑁄𑀓𑁄, 𑀢𑀢𑁆𑀣 𑀢𑁂𑀦𑁂𑀯 𑀮𑁄𑀓𑀲𑀪𑀸𑀯𑁂𑀦 𑀯𑀺𑀤𑀺𑀢𑀸𑀢𑀺 𑀮𑁄𑀓𑀺𑀬𑀸.

𑀏𑀯𑀁 𑀲𑀦𑁆𑀢𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀯𑀺𑀚𑀸𑀦𑀺𑀢𑀩𑁆𑀩𑀲𑁆𑀲 𑀭𑀽𑀧𑀸𑀬𑀢𑀦𑀲𑁆𑀲 𑀢𑁂𑀦𑁂𑀯 𑀦𑀯𑀺𑀚𑀸𑀦𑀺𑀢𑀩𑁆𑀩𑀲𑁆𑀲 𑀲𑀤𑁆𑀤𑀸𑀬𑀢𑀦𑀸𑀤𑀺𑀓𑀲𑁆𑀲 𑀘 𑀦𑀸𑀦𑀢𑁆𑀢𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀧𑀤𑀸𑀦𑀁 𑀅𑀢𑁆𑀣𑀦𑀸𑀦𑀢𑁆𑀢𑀢𑁄 𑀤𑀼𑀓𑁄 𑀳𑁄𑀢𑀺. 𑀏𑀯𑀁 𑀧𑀦 𑀤𑀼𑀓𑁂 𑀯𑀼𑀘𑁆𑀘𑀫𑀸𑀦𑁂 𑀤𑀼𑀓𑀩𑀳𑀼𑀢𑀸 𑀆𑀧𑀚𑁆𑀚𑀢𑀺, 𑀬𑀢𑁆𑀢𑀓𑀸𑀦𑀺 𑀯𑀺𑀜𑁆𑀜𑀸𑀡𑀸𑀦𑀺, 𑀢𑀢𑁆𑀢𑀓𑀸 𑀤𑀼𑀓𑀸 𑀯𑀼𑀢𑁆𑀢𑀸 𑀲𑀫𑀢𑁆𑀢𑀸 𑀞𑀧𑁂𑀢𑁆𑀯𑀸 𑀲𑀩𑁆𑀩𑀥𑀫𑁆𑀫𑀸𑀭𑀫𑁆𑀫𑀡𑀸𑀦𑀺 𑀯𑀺𑀜𑁆𑀜𑀸𑀡𑀸𑀦𑀺. 𑀢𑁂𑀲𑀼 𑀘 𑀤𑀼𑀓𑀲𑁆𑀲 𑀧𑀘𑁆𑀙𑁂𑀤𑁄 𑀆𑀧𑀚𑁆𑀚𑀢𑀺, 𑀢𑀣𑀸 𑀘 𑀲𑀢𑀺 ‘‘𑀓𑁂𑀦𑀘𑀻’’𑀢𑀺 𑀧𑀤𑀁 𑀲𑀩𑁆𑀩𑀯𑀺𑀜𑁆𑀜𑀸𑀡𑀲𑀗𑁆𑀕𑀸𑀳𑀓𑀁 𑀦 𑀲𑀺𑀬𑀸, 𑀦𑀺𑀤𑁆𑀤𑁂𑀲𑁂𑀦 𑀘 𑀯𑀺𑀭𑀼𑀤𑁆𑀥𑀁 𑀇𑀤𑀁 𑀯𑀘𑀦𑀁. 𑀬𑁄 𑀘 𑀢𑀢𑁆𑀣 ‘‘𑀬𑁂 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀅𑀬𑀁 𑀤𑀼𑀓𑁄 𑀦 𑀳𑁄𑀢𑀻’’𑀢𑀺 𑀧𑀝𑀺𑀲𑁂𑀥𑁄 𑀓𑀢𑁄, 𑀲𑁄 𑀘 𑀓𑀣𑀁 𑀬𑀼𑀚𑁆𑀚𑁂𑀬𑁆𑀬. 𑀦 𑀳𑀺 𑀲𑀫𑀢𑁆𑀣𑀸 𑀅𑀝𑁆𑀞𑀓𑀣𑀸 𑀧𑀸𑀴𑀺𑀁 𑀧𑀝𑀺𑀲𑁂𑀥𑁂𑀢𑀼𑀦𑁆𑀢𑀺, 𑀦 𑀘 𑀓𑁂𑀦𑀘𑀺-𑀲𑀤𑁆𑀤𑀲𑁆𑀲 𑀢𑁂𑀦𑁂𑀯𑀸𑀢𑀺 𑀅𑀬𑀁 𑀧𑀤𑀢𑁆𑀣𑁄 𑀲𑀫𑁆𑀪𑀯𑀢𑀺, ‘‘𑀓𑁂𑀦𑀘𑀻’’𑀢𑀺 𑀏𑀢𑀲𑁆𑀲 𑀆𑀤𑀺𑀧𑀤𑀲𑁆𑀲 𑀅𑀦𑀺𑀬𑀫𑀺𑀢𑀁 𑀬𑀁 𑀓𑀺𑀜𑁆𑀘𑀺 𑀏𑀓𑀁 𑀧𑀤𑀢𑁆𑀣𑁄, 𑀢𑀁 𑀯𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀲𑁆𑀲 ‘‘𑀓𑁂𑀦𑀘𑀻’’𑀢𑀺 𑀤𑀼𑀢𑀺𑀬𑀧𑀤𑀲𑁆𑀲 𑀬𑀁 𑀓𑀺𑀜𑁆𑀘𑀺 𑀅𑀧𑀭𑀁 𑀅𑀦𑀺𑀬𑀫𑀺𑀢𑀁 𑀧𑀤𑀢𑁆𑀣𑁄𑀢𑀺 𑀮𑁄𑀓𑀲𑀺𑀤𑁆𑀥𑀫𑁂𑀢𑀁, 𑀢𑀣𑁂𑀯 𑀘 𑀦𑀺𑀤𑁆𑀤𑁂𑀲𑁄 𑀧𑀯𑀢𑁆𑀢𑁄, 𑀦 𑀘𑁂𑀢𑁆𑀣 𑀯𑀺𑀜𑁆𑀜𑀸𑀢𑀩𑁆𑀩𑀥𑀫𑁆𑀫𑀪𑁂𑀤𑁂𑀦 𑀤𑀼𑀓𑀪𑁂𑀤𑁄 𑀲𑀫𑀢𑁆𑀢𑁄 𑀆𑀧𑀚𑁆𑀚𑀢𑀺 𑀬𑀢𑁆𑀢𑀓𑀸 𑀯𑀺𑀜𑁆𑀜𑀸𑀢𑀩𑁆𑀩𑀸, 𑀢𑀢𑁆𑀢𑀓𑀸 𑀤𑀼𑀓𑀸𑀢𑀺, 𑀢𑀲𑁆𑀫𑀸 𑀦𑀢𑁆𑀣𑀺 𑀤𑀼𑀓𑀩𑀳𑀼𑀢𑀸. 𑀦 𑀳𑀺 𑀏𑀓𑀁𑀬𑁂𑀯 𑀯𑀺𑀜𑁆𑀜𑀸𑀢𑀩𑁆𑀩𑀁 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀁 𑀓𑁂𑀦𑀘𑀺 𑀦 𑀯𑀺𑀜𑁆𑀜𑁂𑀬𑁆𑀬𑀜𑁆𑀘, 𑀓𑀺𑀦𑁆𑀢𑀼 𑀅𑀧𑀭𑀫𑁆𑀧𑀺 𑀅𑀧𑀭𑀫𑁆𑀧𑀻𑀢𑀺 𑀲𑀩𑁆𑀩𑀯𑀺𑀜𑁆𑀜𑀸𑀢𑀩𑁆𑀩𑀲𑀗𑁆𑀕𑀳𑁂 𑀤𑀼𑀓𑁄 𑀲𑀫𑀢𑁆𑀢𑁄 𑀳𑁄𑀢𑀺, 𑀏𑀯𑀜𑁆𑀘 𑀲𑀢𑀺 ‘‘𑀓𑁂𑀦𑀘𑀻’’𑀢𑀺 𑀧𑀤𑀁 𑀅𑀦𑀺𑀬𑀫𑁂𑀦 𑀲𑀩𑁆𑀩𑀯𑀺𑀜𑁆𑀜𑀸𑀡𑀲𑀗𑁆𑀕𑀸𑀳𑀓𑀦𑁆𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺, 𑀯𑀺𑀜𑁆𑀜𑀸𑀡𑀦𑀸𑀦𑀢𑁆𑀢𑁂𑀦 𑀘 𑀯𑀺𑀜𑁆𑀜𑀸𑀢𑀩𑁆𑀩𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀬𑀁 𑀤𑀼𑀓𑁄 𑀯𑀼𑀢𑁆𑀢𑁄, 𑀦 𑀯𑀺𑀜𑁆𑀜𑀸𑀢𑀩𑁆𑀩𑀸𑀦𑀁 𑀅𑀢𑁆𑀣𑀦𑁆𑀢𑀭𑀢𑀸𑀬𑀸𑀢𑀺. 𑀏𑀢𑀲𑁆𑀲 𑀧𑀦 𑀤𑀼𑀓𑀲𑁆𑀲 𑀦𑀺𑀓𑁆𑀔𑁂𑀧𑀭𑀸𑀲𑀺𑀦𑀺𑀤𑁆𑀤𑁂𑀲𑁄 𑀤𑀼𑀓𑀲𑀗𑁆𑀕𑀳𑀺𑀢𑀥𑀫𑁆𑀫𑁂𑀓𑀤𑁂𑀲𑁂𑀲𑀼 𑀤𑀼𑀓𑀧𑀤𑀤𑁆𑀯𑀬𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑁄. 𑀅𑀢𑁆𑀣𑀼𑀤𑁆𑀥𑀸𑀭𑀦𑀺𑀤𑁆𑀤𑁂𑀲𑁄 𑀦𑀺𑀭𑀯𑀲𑁂𑀲𑀤𑀼𑀓𑀲𑀗𑁆𑀕𑀳𑀺𑀢𑀥𑀫𑁆𑀫𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁧𑁪-𑁧𑁯. 𑀘𑀓𑁆𑀔𑀼𑀢𑁄𑀧𑀺…𑀧𑁂… 𑀫𑀦𑀢𑁄𑀧𑀻𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀯𑀻𑀣𑀻𑀲𑀼 𑀢𑀤𑀦𑀼𑀕𑀢𑀫𑀦𑁄𑀯𑀺𑀜𑁆𑀜𑀸𑀡𑀯𑀻𑀣𑀻𑀲𑀼 𑀘 𑀓𑀺𑀜𑁆𑀘𑀸𑀧𑀺 𑀓𑀼𑀲𑀮𑀸𑀤𑀻𑀦𑀫𑁆𑀧𑀺 𑀧𑀯𑀢𑁆𑀢𑀺 𑀅𑀢𑁆𑀣𑀺, 𑀓𑀸𑀫𑀸𑀲𑀯𑀸𑀤𑀬𑁄 𑀏𑀯 𑀧𑀦 𑀯𑀡𑀢𑁄 𑀬𑀽𑀲𑀁 𑀯𑀺𑀬 𑀧𑀕𑁆𑀖𑀭𑀡𑀓𑀅𑀲𑀼𑀘𑀺𑀪𑀸𑀯𑁂𑀦 𑀲𑀦𑁆𑀤𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀏𑀯 ‘‘𑀆𑀲𑀯𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀣 𑀳𑀺 𑀧𑀕𑁆𑀖𑀭𑀡𑀓𑀅𑀲𑀼𑀘𑀺𑀫𑁆𑀳𑀺 𑀦𑀺𑀭𑀼𑀴𑁆𑀳𑁄 𑀆𑀲𑀯𑀲𑀤𑁆𑀤𑁄𑀢𑀺. 𑀥𑀫𑁆𑀫𑀢𑁄 𑀬𑀸𑀯 𑀕𑁄𑀢𑁆𑀭𑀪𑀼𑀦𑁆𑀢𑀺 𑀢𑀢𑁄 𑀧𑀭𑀁 𑀫𑀕𑁆𑀕𑀨𑀮𑁂𑀲𑀼 𑀅𑀧𑁆𑀧𑀯𑀢𑁆𑀢𑀺𑀢𑁄 𑀯𑀼𑀢𑁆𑀢𑀁. 𑀏𑀢𑁂 𑀳𑀺 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀥𑀫𑁆𑀫𑁂 𑀕𑀘𑁆𑀙𑀦𑁆𑀢𑀸 𑀢𑀢𑁄 𑀧𑀭𑀁 𑀦 𑀕𑀘𑁆𑀙𑀦𑁆𑀢𑀻𑀢𑀺. 𑀦𑀦𑀼 𑀢𑀢𑁄 𑀧𑀭𑀁 𑀪𑀯𑀗𑁆𑀕𑀸𑀤𑀻𑀦𑀺𑀧𑀺 𑀕𑀘𑁆𑀙𑀦𑁆𑀢𑀻𑀢𑀺 𑀘𑁂? 𑀦, 𑀢𑁂𑀲𑀫𑁆𑀧𑀺 𑀧𑀼𑀩𑁆𑀩𑁂 𑀆𑀮𑀫𑁆𑀩𑀺𑀢𑁂𑀲𑀼 𑀮𑁄𑀓𑀺𑀬𑀥𑀫𑁆𑀫𑁂𑀲𑀼 𑀲𑀸𑀲𑀯𑀪𑀸𑀯𑁂𑀦 𑀅𑀦𑁆𑀢𑁄𑀕𑀥𑀢𑁆𑀢𑀸 𑀢𑀢𑁄 𑀧𑀭𑀢𑀸𑀪𑀸𑀯𑀢𑁄. 𑀏𑀢𑁆𑀣 𑀘 𑀕𑁄𑀢𑁆𑀭𑀪𑀼𑀯𑀘𑀦𑁂𑀦 𑀕𑁄𑀢𑁆𑀭𑀪𑀼𑀯𑁄𑀤𑀸𑀦𑀨𑀮𑀲𑀫𑀸𑀧𑀢𑁆𑀢𑀺𑀧𑀼𑀭𑁂𑀘𑀸𑀭𑀺𑀓𑀧𑀭𑀺𑀓𑀫𑁆𑀫𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺, 𑀧𑀞𑀫𑀫𑀕𑁆𑀕𑀧𑀼𑀭𑁂𑀘𑀸𑀭𑀺𑀓𑀫𑁂𑀯 𑀯𑀸 𑀕𑁄𑀢𑁆𑀭𑀪𑀼 𑀅𑀯𑀥𑀺𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀕𑀳𑀺𑀢𑀁, 𑀢𑀢𑁄 𑀧𑀭𑀁 𑀫𑀕𑁆𑀕𑀨𑀮𑀲𑀫𑀸𑀦𑀢𑀸𑀬 𑀧𑀦 𑀅𑀜𑁆𑀜𑁂𑀲𑀼 𑀫𑀕𑁆𑀕𑁂𑀲𑀼 𑀫𑀕𑁆𑀕𑀯𑀻𑀣𑀺𑀬𑀁 𑀨𑀮𑀲𑀫𑀸𑀧𑀢𑁆𑀢𑀺𑀯𑀻𑀣𑀺𑀬𑀁 𑀦𑀺𑀭𑁄𑀥𑀸𑀦𑀦𑁆𑀢𑀭𑀜𑁆𑀘 𑀧𑀯𑀢𑁆𑀢𑀫𑀸𑀦𑁂𑀲𑀼 𑀨𑀮𑁂𑀲𑀼 𑀦𑀺𑀩𑁆𑀩𑀸𑀦𑁂 𑀘 𑀧𑀯𑀢𑁆𑀢𑀺 𑀦𑀺𑀯𑀸𑀭𑀺𑀢𑀸 𑀆𑀲𑀯𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀯𑀦𑁆𑀢𑀻𑀢𑀺 𑀕𑀘𑁆𑀙𑀦𑁆𑀢𑀺. 𑀤𑀼𑀯𑀺𑀥𑁄 𑀳𑀺 𑀅𑀯𑀥𑀺 𑀅𑀪𑀺𑀯𑀺𑀥𑀺𑀯𑀺𑀲𑀬𑁄 𑀅𑀦𑀪𑀺𑀯𑀺𑀥𑀺𑀯𑀺𑀲𑀬𑁄 𑀘. 𑀅𑀪𑀺𑀯𑀺𑀥𑀺𑀯𑀺𑀲𑀬𑀁 𑀓𑀺𑀭𑀺𑀬𑀸 𑀩𑁆𑀬𑀸𑀧𑁂𑀢𑁆𑀯𑀸 𑀧𑀯𑀢𑁆𑀢𑀢𑀺 ‘‘𑀆𑀪𑀯𑀕𑁆𑀕𑀸 𑀪𑀕𑀯𑀢𑁄 𑀬𑀲𑁄 𑀕𑀢𑁄’’𑀢𑀺, 𑀇𑀢𑀭𑀁 𑀩𑀳𑀺 𑀓𑀢𑁆𑀯𑀸 ‘‘𑀆𑀧𑀸𑀝𑀮𑀺𑀧𑀼𑀢𑁆𑀢𑀸 𑀯𑀼𑀝𑁆𑀞𑁄 𑀤𑁂𑀯𑁄’’𑀢𑀺. 𑀅𑀬𑀜𑁆𑀘 𑀆-𑀓𑀸𑀭𑁄 𑀅𑀪𑀺𑀯𑀺𑀥𑀺𑀅𑀢𑁆𑀣𑁄 𑀇𑀥 𑀕𑀳𑀺𑀢𑁄𑀢𑀺 ‘‘𑀅𑀦𑁆𑀢𑁄𑀓𑀭𑀡𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁.

𑀘𑀺𑀭𑀧𑀸𑀭𑀺𑀯𑀸𑀲𑀺𑀬𑀝𑁆𑀞𑁄 𑀘𑀺𑀭𑀧𑀭𑀺𑀯𑀼𑀢𑁆𑀣𑀢𑀸 𑀧𑀼𑀭𑀸𑀡𑀪𑀸𑀯𑁄. 𑀆𑀤𑀺-𑀲𑀤𑁆𑀤𑁂𑀦 ‘‘𑀧𑀼𑀭𑀺𑀫𑀸, 𑀪𑀺𑀓𑁆𑀔𑀯𑁂, 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀪𑀯𑀢𑀡𑁆𑀳𑀸𑀬𑀸’’𑀢𑀺 (𑀅. 𑀦𑀺. 𑁧𑁦.𑁬𑁨) 𑀇𑀤𑀁 𑀲𑀼𑀢𑁆𑀢𑀁 𑀲𑀗𑁆𑀕𑀳𑀺𑀢𑀁. 𑀅𑀯𑀺𑀚𑁆𑀚𑀸𑀲𑀯𑀪𑀯𑀸𑀲𑀯𑀸𑀦𑀜𑁆𑀘 𑀘𑀺𑀭𑀧𑀭𑀺𑀯𑀼𑀢𑁆𑀣𑀢𑀸𑀬 𑀤𑀲𑁆𑀲𑀺𑀢𑀸𑀬 𑀢𑀩𑁆𑀪𑀸𑀯𑀪𑀸𑀯𑀻𑀦𑀁 𑀓𑀸𑀫𑀸𑀲𑀯𑀤𑀺𑀝𑁆𑀞𑀸𑀲𑀯𑀸𑀦𑀜𑁆𑀘 𑀘𑀺𑀭𑀧𑀭𑀺𑀯𑀼𑀢𑁆𑀣𑀢𑀸 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀅𑀜𑁆𑀜𑁂𑀲𑀼𑀧𑀺 𑀬𑀣𑀸𑀯𑀼𑀢𑁆𑀢𑁂 𑀥𑀫𑁆𑀫𑁂 𑀑𑀓𑀸𑀲𑀜𑁆𑀘 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁂𑀲𑀼 𑀫𑀸𑀦𑀸𑀤𑀻𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀅𑀢𑁆𑀢𑀢𑁆𑀢𑀦𑀺𑀬𑀸𑀤𑀺𑀕𑁆𑀕𑀸𑀳𑀯𑀲𑁂𑀦 𑀅𑀪𑀺𑀩𑁆𑀬𑀸𑀧𑀦𑀁 𑀫𑀤𑀓𑀭𑀡𑀯𑀲𑁂𑀦 𑀆𑀲𑀯𑀲𑀤𑀺𑀲𑀢𑀸 𑀘 𑀏𑀢𑁂𑀲𑀁𑀬𑁂𑀯, 𑀦𑀸𑀜𑁆𑀜𑁂𑀲𑀦𑁆𑀢𑀺 𑀏𑀢𑁂𑀲𑁆𑀯𑁂𑀯 𑀆𑀲𑀯𑀲𑀤𑁆𑀤𑁄 𑀦𑀺𑀭𑀼𑀴𑁆𑀳𑁄 𑀤𑀝𑁆𑀞𑀩𑁆𑀩𑁄. 𑀆𑀬𑀢𑀁 𑀯𑀸 𑀲𑀯𑀦𑁆𑀢𑀺 𑀨𑀮𑀦𑁆𑀢𑀻𑀢𑀺 𑀆𑀲𑀯𑀸. 𑀦 𑀳𑀺 𑀓𑀺𑀜𑁆𑀘𑀺 𑀲𑀁𑀲𑀸𑀭𑀤𑀼𑀓𑁆𑀔𑀁 𑀆𑀲𑀯𑁂𑀳𑀺 𑀯𑀺𑀦𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀅𑀢𑁆𑀣𑀻𑀢𑀺. 𑀆𑀭𑀫𑁆𑀫𑀡𑀪𑀸𑀯𑁂𑀦 𑀬𑁂 𑀥𑀫𑁆𑀫𑀸 𑀯𑀡𑁄 𑀯𑀺𑀬 𑀆𑀲𑀯𑁂 𑀧𑀕𑁆𑀖𑀭𑀦𑁆𑀢𑀺, 𑀢𑁂 𑀅𑀲𑀫𑁆𑀧𑀬𑁄𑀕𑁂 𑀅𑀢𑀩𑁆𑀪𑀸𑀯𑁂𑀧𑀺 𑀲𑀳 𑀆𑀲𑀯𑁂𑀳𑀻𑀢𑀺 𑀲𑀸𑀲𑀯𑀸, 𑀆𑀲𑀯𑀯𑀦𑁆𑀢𑁄𑀢𑀺 𑀅𑀢𑁆𑀣𑁄.

𑀑𑀲𑀸𑀦𑀤𑀼𑀓𑁂 ‘‘𑀦𑁄 𑀆𑀲𑀯𑀸 𑀔𑁄 𑀧𑀦𑀸’’𑀢𑀺 𑀅𑀯𑀢𑁆𑀯𑀸 ‘‘𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀔𑁄 𑀧𑀦𑀸’’𑀢𑀺 𑀯𑀘𑀦𑀁 𑀲𑀸𑀲𑀯𑀸𑀦𑀁 𑀲𑀳𑁂𑀢𑀼𑀓𑀸𑀦𑀁 𑀯𑀺𑀬 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀢𑀁𑀲𑀳𑀺𑀢𑀢𑀸 𑀦 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀏𑀯𑀁 𑀲𑁂𑀲𑀕𑁄𑀘𑁆𑀙𑀓𑁂𑀲𑀼𑀧𑀺 𑀬𑀣𑀸𑀲𑀫𑁆𑀪𑀯𑀁 𑀯𑀺𑀧𑁆𑀧𑀬𑀼𑀢𑁆𑀢𑀕𑁆𑀕𑀳𑀡𑁂 𑀧𑀬𑁄𑀚𑀦𑀁 𑀤𑀝𑁆𑀞𑀩𑁆𑀩𑀁. 𑀅𑀧𑀺𑀘 ‘‘𑀦𑁄 𑀆𑀲𑀯𑀸 𑀔𑁄 𑀧𑀦 𑀥𑀫𑁆𑀫𑀸 𑀲𑀸𑀲𑀯𑀸’’𑀢𑀺 𑀇𑀤𑀁 𑀧𑀤𑀁 𑀘𑀢𑀼𑀢𑁆𑀣𑀤𑀼𑀓𑁂 𑀤𑀼𑀢𑀺𑀬𑀧𑀤𑁂𑀦 𑀦𑀺𑀦𑁆𑀦𑀸𑀦𑀁, 𑀦 𑀘 𑀏𑀓𑁂𑀦 𑀤𑀼𑀓𑁄 𑀳𑁄𑀢𑀺, 𑀢𑀲𑁆𑀫𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀫𑁂𑀯 𑀕𑀳𑁂𑀢𑁆𑀯𑀸 𑀑𑀲𑀸𑀦𑀤𑀼𑀓𑀬𑁄𑀚𑀦𑀸 𑀜𑀸𑀬𑀸𑀕𑀢𑀸𑀢𑀺 𑀓𑀢𑀸. 𑀳𑁂𑀢𑀼𑀕𑁄𑀘𑁆𑀙𑀓𑁂 𑀧𑀦 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀲𑀳𑁂𑀢𑀼𑀓𑀢𑀸 𑀦𑀢𑁆𑀣𑀻𑀢𑀺 𑀢𑁂 𑀕𑀳𑁂𑀢𑁆𑀯𑀸 𑀤𑀼𑀓𑀬𑁄𑀚𑀦𑀸𑀬 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀦𑀳𑁂𑀢𑀼𑀧𑀤𑀁 𑀕𑀳𑁂𑀢𑁆𑀯𑀸 𑀑𑀲𑀸𑀦𑀤𑀼𑀓𑀬𑁄𑀚𑀦𑀸 𑀓𑀢𑀸. 𑀬𑁂 𑀯𑀸 𑀧𑀦 𑀧𑀞𑀫𑁂 𑀤𑀼𑀓𑁂 𑀤𑀼𑀢𑀺𑀬𑀲𑁆𑀲 𑀧𑀓𑁆𑀔𑁂𑀧𑁂 𑀏𑀓𑁄, 𑀢𑀢𑀺𑀬𑀲𑁆𑀲 𑀤𑁆𑀯𑁂, 𑀧𑀞𑀫𑀲𑁆𑀲 𑀤𑀼𑀢𑀺𑀬𑁂 𑀏𑀓𑁄, 𑀢𑀢𑀺𑀬𑁂 𑀤𑁆𑀯𑁂, 𑀤𑀼𑀢𑀺𑀬𑀲𑁆𑀲 𑀢𑀢𑀺𑀬𑁂 𑀏𑀓𑁄, 𑀤𑀼𑀢𑀺𑀬𑁂 𑀘 𑀢𑀢𑀺𑀬𑀲𑁆𑀲 𑀏𑀓𑁄𑀢𑀺 𑀅𑀝𑁆𑀞 𑀤𑀼𑀓𑀸 𑀮𑀩𑁆𑀪𑀦𑁆𑀢𑀺, 𑀢𑁂𑀲𑀼 𑀢𑀻𑀳𑀺 𑀇𑀢𑀭𑁂 𑀘 𑀦𑀬𑀢𑁄 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀲 𑀦𑀬𑁄 𑀲𑁂𑀲𑀕𑁄𑀘𑁆𑀙𑀓𑁂𑀲𑀼𑀧𑀺.

𑁨𑁦-𑁨𑁫. 𑀓𑀺𑀮𑁂𑀲𑀓𑀫𑁆𑀫𑀯𑀺𑀧𑀸𑀓𑀯𑀝𑁆𑀝𑀸𑀦𑀁 𑀧𑀘𑁆𑀘𑀬𑀪𑀸𑀯𑁂𑀦 𑀢𑀢𑁆𑀣 𑀲𑀁𑀬𑁄𑀚𑁂𑀦𑁆𑀢𑀺, 𑀲𑀢𑀺𑀧𑀺 𑀅𑀜𑁆𑀜𑁂𑀲𑀁 𑀢𑀧𑁆𑀧𑀘𑁆𑀘𑀬𑀪𑀸𑀯𑁂 𑀦 𑀯𑀺𑀦𑀸 𑀲𑀁𑀬𑁄𑀚𑀦𑀸𑀦𑀺 𑀢𑁂𑀲𑀁 𑀢𑀧𑁆𑀧𑀘𑁆𑀘𑀬𑀪𑀸𑀯𑁄 𑀅𑀢𑁆𑀣𑀺, 𑀑𑀭𑀫𑁆𑀪𑀸𑀕𑀺𑀬𑀼𑀤𑁆𑀥𑀫𑁆𑀪𑀸𑀕𑀺𑀬𑀲𑀗𑁆𑀕𑀳𑀺𑀢𑁂𑀳𑀺 𑀘 𑀢𑀁𑀢𑀁𑀪𑀯𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀦𑀺𑀬𑀫𑁄 𑀪𑀯𑀦𑀺𑀬𑀫𑁄 𑀘 𑀳𑁄𑀢𑀺, 𑀦 𑀘 𑀉𑀧𑀘𑁆𑀙𑀺𑀦𑁆𑀦𑀲𑀁𑀬𑁄𑀚𑀦𑀲𑁆𑀲 𑀓𑀢𑀸𑀦𑀺𑀧𑀺 𑀓𑀫𑁆𑀫𑀸𑀦𑀺 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻𑀢𑀺. 𑀲𑀁𑀬𑁄𑀚𑁂𑀢𑀩𑁆𑀩𑀸𑀢𑀺 𑀯𑀸 𑀲𑀁𑀬𑁄𑀚𑀦𑀺𑀬𑀸, 𑀲𑀁𑀬𑁄𑀚𑀦𑁂 𑀦𑀺𑀬𑀼𑀢𑁆𑀢𑀸𑀢𑀺 𑀯𑀸. 𑀤𑀽𑀭𑀕𑀢𑀲𑁆𑀲𑀧𑀺 𑀆𑀓𑀟𑁆𑀠𑀦𑀢𑁄 𑀦𑀺𑀲𑁆𑀲𑀭𑀺𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦 𑀩𑀦𑁆𑀥𑀦𑀁 𑀲𑀁𑀬𑁄𑀚𑀦𑀁, 𑀕𑀦𑁆𑀣𑀓𑀭𑀡𑀁 𑀲𑀗𑁆𑀔𑀮𑀺𑀓𑀘𑀓𑁆𑀓𑀮𑀓𑀸𑀦𑀁 𑀯𑀺𑀬 𑀧𑀝𑀺𑀩𑀤𑁆𑀥𑀢𑀸𑀓𑀭𑀡𑀁 𑀯𑀸 𑀕𑀦𑁆𑀣𑀦𑀁 𑀕𑀦𑁆𑀣𑁄, 𑀲𑀁𑀲𑀺𑀮𑀺𑀲𑀓𑀭𑀡𑀁 𑀬𑁄𑀚𑀦𑀁 𑀬𑁄𑀕𑁄𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀥𑀫𑁆𑀫𑀸𑀦𑀁 𑀲𑀪𑀸𑀯𑀓𑀺𑀘𑁆𑀘𑀯𑀺𑀲𑁂𑀲𑀜𑁆𑀜𑀼𑀦𑀸 𑀧𑀦 𑀪𑀕𑀯𑀢𑀸 𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀢𑀧𑁆𑀧𑀘𑁆𑀘𑀬𑁂𑀲𑀼 𑀘 𑀢𑁂𑀳𑀺 𑀢𑁂𑀳𑀺 𑀦𑀺𑀧𑁆𑀨𑀸𑀤𑀺𑀬𑀫𑀸𑀦𑀁 𑀢𑀁 𑀢𑀁 𑀓𑀺𑀘𑁆𑀘𑀯𑀺𑀲𑁂𑀲𑀁 𑀧𑀲𑁆𑀲𑀦𑁆𑀢𑁂𑀦 𑀢𑁂 𑀢𑁂 𑀥𑀫𑁆𑀫𑀸 𑀢𑀣𑀸 𑀢𑀣𑀸 𑀆𑀲𑀯𑀲𑀁𑀬𑁄𑀚𑀦𑀕𑀦𑁆𑀣𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀸𑀢𑀺 ‘‘𑀓𑀺𑀫𑀢𑁆𑀣𑀁 𑀏𑀢𑁂𑀬𑁂𑀯 𑀥𑀫𑁆𑀫𑀸 𑀏𑀯𑀁 𑀯𑀼𑀢𑁆𑀢𑀸, 𑀓𑀲𑁆𑀫𑀸 𑀘 𑀯𑀼𑀢𑁆𑀢𑀸 𑀏𑀯 𑀧𑀼𑀦 𑀯𑀼𑀢𑁆𑀢𑀸’’𑀢𑀺 𑀦 𑀘𑁄𑀤𑁂𑀢𑀩𑁆𑀩𑀫𑁂𑀢𑀁.

𑁨𑁬-𑁩𑁭. 𑀕𑀦𑁆𑀣𑀦𑀺𑀬𑀸𑀢𑀺 𑀏𑀢𑁆𑀣 𑀅𑀬𑀫𑀜𑁆𑀜𑁄 𑀅𑀢𑁆𑀣𑁄 ‘‘𑀕𑀦𑁆𑀣𑀓𑀭𑀡𑀁 𑀕𑀦𑁆𑀣𑀦𑀁, 𑀕𑀦𑁆𑀣𑀦𑁂 𑀦𑀺𑀬𑀼𑀢𑁆𑀢𑀸𑀢𑀺 𑀕𑀦𑁆𑀣𑀦𑀺𑀬𑀸, 𑀕𑀦𑁆𑀣𑀬𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸, 𑀕𑀦𑁆𑀣𑀬𑀺𑀢𑀼𑀁 𑀅𑀭𑀳𑀦𑁆𑀢𑀻𑀢𑀺 𑀯𑀸 𑀕𑀦𑁆𑀣𑀦𑀺𑀬𑀸’’𑀢𑀺. 𑀏𑀯𑀁 𑀑𑀖𑀦𑀺𑀬𑀸𑀤𑀻𑀲𑀼𑀧𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀢𑀺𑀓𑁆𑀓𑀫𑀢𑀻𑀢𑀺 𑀏𑀢𑀁 𑀥𑀸𑀢𑁆𑀯𑀢𑁆𑀣𑀁 𑀕𑀳𑁂𑀢𑁆𑀯𑀸 𑀑𑀖𑀦𑀺𑀬𑀸𑀢𑀺 𑀧𑀤𑀲𑀺𑀤𑁆𑀥𑀺 𑀓𑀢𑀸.

𑁫𑁦-𑁫𑁪. 𑀥𑀫𑁆𑀫𑀲𑀪𑀸𑀯𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀭𑀢𑁄 𑀆𑀫𑀲𑀦𑁆𑀢𑀻𑀢𑀺 𑀧𑀭𑀸𑀫𑀸𑀲𑀸. 𑀧𑀭𑀢𑁄𑀢𑀺 𑀦𑀺𑀘𑁆𑀘𑀸𑀤𑀺𑀢𑁄. 𑀆𑀫𑀲𑀦𑁆𑀢𑀻𑀢𑀺 𑀲𑀪𑀸𑀯𑀧𑀝𑀺𑀲𑁂𑀥𑁂𑀦 𑀧𑀭𑀺𑀫𑀚𑁆𑀚𑀦𑁆𑀢𑀺.

𑁫𑁫-𑁬𑁮. 𑀲𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀁 𑀅𑀯𑀺𑀚𑁆𑀚𑀫𑀸𑀦𑀁 𑀯𑀸 𑀯𑀺𑀘𑀺𑀢𑁆𑀢𑀲𑀜𑁆𑀜𑀸𑀬 𑀲𑀜𑁆𑀜𑀺𑀢𑀁 𑀆𑀭𑀫𑁆𑀫𑀡𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀧𑁆𑀧𑀯𑀢𑁆𑀢𑀺𑀢𑁄 𑀆𑀮𑀫𑁆𑀩𑀫𑀸𑀦𑀸 𑀥𑀫𑁆𑀫𑀸 𑀲𑀸𑀭𑀫𑁆𑀫𑀡𑀸. 𑀘𑀺𑀦𑁆𑀢𑀦𑀁 𑀕𑀳𑀡𑀁 𑀆𑀭𑀫𑁆𑀫𑀡𑀽𑀧𑀮𑀤𑁆𑀥𑀺. 𑀘𑁂𑀢𑀲𑀺 𑀦𑀺𑀬𑀼𑀢𑁆𑀢𑀸, 𑀘𑁂𑀢𑀲𑀸 𑀲𑀁𑀲𑀝𑁆𑀞𑀸 𑀯𑀸 𑀘𑁂𑀢𑀲𑀺𑀓𑀸. 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀦𑀸𑀦𑀢𑁆𑀢𑀢𑀸𑀬 𑀏𑀓𑀻𑀪𑀸𑀯𑀫𑀺𑀯𑀼𑀧𑀕𑀫𑀦𑀁 𑀦𑀺𑀭𑀦𑁆𑀢𑀭𑀪𑀸𑀯𑀼𑀧𑀕𑀫𑀦𑀁. 𑀬𑁂𑀲𑀁 𑀭𑀽𑀧𑀸𑀦𑀁 𑀘𑀺𑀢𑁆𑀢𑀁 𑀲𑀳𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀺, 𑀢𑁂𑀲𑀁 𑀘𑀺𑀢𑁆𑀢𑀲𑁆𑀲 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀦𑀸𑀦𑀢𑁆𑀢𑀦𑁆𑀢𑀺 𑀦𑀺𑀭𑀦𑁆𑀢𑀭𑀪𑀸𑀯𑀸𑀦𑀼𑀧𑀕𑀫𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀓𑀢𑁄 𑀯𑀢𑁆𑀢𑀫𑀸𑀦𑀸𑀧𑀻𑀢𑀺 𑀅𑀧𑀺-𑀲𑀤𑁆𑀤𑁄 𑀓𑁄 𑀧𑀦 𑀯𑀸𑀤𑁄 𑀏𑀓𑀢𑁄 𑀅𑀯𑀢𑁆𑀢𑀫𑀸𑀦𑀸𑀢𑀺 𑀏𑀢𑀫𑀢𑁆𑀣𑀁 𑀤𑀻𑀧𑁂𑀢𑀺. 𑀇𑀤𑀫𑁂𑀢𑁆𑀣 𑀯𑀺𑀘𑀸𑀭𑁂𑀢𑀩𑁆𑀩𑀁 𑁋 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀸𑀦𑀁 𑀓𑀺𑀁 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀝𑁆𑀞𑀢𑀸, 𑀉𑀤𑀸𑀳𑀼 𑀯𑀺𑀲𑀁𑀲𑀝𑁆𑀞𑀢𑀸𑀢𑀺? 𑀯𑀺𑀲𑀼𑀁 𑀆𑀭𑀫𑁆𑀫𑀡𑀪𑀸𑀯𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀦𑀸𑀦𑀢𑁆𑀢𑀢𑁆𑀢𑀸 𑀦 𑀲𑀁𑀲𑀝𑁆𑀞𑀢𑀸, 𑀦𑀸𑀧𑀺 𑀯𑀺𑀲𑀁𑀲𑀝𑁆𑀞𑀢𑀸 𑀲𑀁𑀲𑀝𑁆𑀞𑀸𑀢𑀺 𑀅𑀦𑀸𑀲𑀗𑁆𑀓𑀦𑀻𑀬𑀲𑀪𑀸𑀯𑀢𑁆𑀢𑀸. 𑀘𑀢𑀼𑀦𑁆𑀦𑀜𑁆𑀳𑀺 𑀔𑀦𑁆𑀥𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀝𑁆𑀞𑀲𑀪𑀸𑀯𑀢𑁆𑀢𑀸 𑀭𑀽𑀧𑀦𑀺𑀩𑁆𑀩𑀸𑀦𑁂𑀳𑀺𑀧𑀺 𑀲𑁄 𑀲𑀁𑀲𑀝𑁆𑀞𑀪𑀸𑀯𑁄 𑀅𑀢𑁆𑀣𑀺 𑀦𑀢𑁆𑀣𑀻𑀢𑀺 𑀲𑀺𑀬𑀸 𑀆𑀲𑀗𑁆𑀓𑀸, 𑀢𑀲𑁆𑀫𑀸 𑀢𑁂𑀲𑀁 𑀇𑀢𑀭𑁂𑀳𑀺, 𑀇𑀢𑀭𑁂𑀲𑀜𑁆𑀘 𑀢𑁂𑀳𑀺 𑀯𑀺𑀲𑀁𑀲𑀝𑁆𑀞𑀲𑀪𑀸𑀯𑀢𑀸 𑀯𑀼𑀘𑁆𑀘𑀢𑀺, 𑀦 𑀧𑀦 𑀭𑀽𑀧𑀸𑀦𑀁 𑀭𑀽𑀧𑁂𑀳𑀺 𑀓𑀢𑁆𑀣𑀘𑀺 𑀲𑀁𑀲𑀝𑁆𑀞𑀢𑀸 𑀅𑀢𑁆𑀣𑀻𑀢𑀺 𑀢𑀤𑀸𑀲𑀗𑁆𑀓𑀸𑀪𑀸𑀯𑀢𑁄 𑀯𑀺𑀲𑀁𑀲𑀝𑁆𑀞𑀢𑀸 𑀘 𑀭𑀽𑀧𑀸𑀦𑀁 𑀭𑀽𑀧𑁂𑀳𑀺 𑀦 𑀯𑀼𑀘𑁆𑀘𑀢𑀻𑀢𑀺. 𑀏𑀲 𑀳𑀺 𑀢𑁂𑀲𑀁 𑀲𑀪𑀸𑀯𑁄𑀢𑀺. 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸𑀤𑀺𑀧𑀤𑁂𑀲𑀼 𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸𑀤𑀺𑀲𑀤𑁆𑀤𑀸 𑀘𑀺𑀢𑁆𑀢𑀲𑀤𑁆𑀤𑀸𑀧𑁂𑀓𑁆𑀔𑀸𑀢𑀺 𑀧𑀘𑁆𑀘𑁂𑀓𑀁 𑀘𑀺𑀢𑁆𑀢𑀲𑀤𑁆𑀤𑀲𑀫𑁆𑀩𑀦𑁆𑀥𑀢𑁆𑀢𑀸 𑀘𑀺𑀢𑁆𑀢𑀲𑀁𑀲𑀝𑁆𑀞𑀸 𑀘 𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀘𑀸𑀢𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀉𑀧𑀸𑀤𑀺𑀬𑀦𑁆𑀢𑁂𑀯𑀸𑀢𑀺 𑀪𑀽𑀢𑀸𑀦𑀺 𑀕𑀡𑁆𑀳𑀦𑁆𑀢𑀺 𑀏𑀯, 𑀦𑀺𑀲𑁆𑀲𑀬𑀦𑁆𑀢𑀺 𑀏𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸 𑀪𑀽𑀢𑀸𑀦𑀺 𑀉𑀧𑀸𑀤𑀺𑀬𑀦𑁆𑀢𑀺 𑀕𑀬𑁆𑀳𑀦𑁆𑀢𑀺 𑀦𑀺𑀲𑁆𑀲𑀻𑀬𑀦𑁆𑀢𑀺, 𑀦 𑀢𑀣𑀸 𑀏𑀢𑀸𑀦𑀺 𑀕𑀬𑁆𑀳𑀦𑁆𑀢𑀺 𑀦𑀺𑀲𑁆𑀲𑀻𑀬𑀦𑁆𑀢𑀺, 𑀢𑀲𑁆𑀫𑀸 𑀉𑀧𑀸𑀤𑀸. 𑀅𑀣 𑀯𑀸 𑀪𑀽𑀢𑀸𑀦𑀺 𑀅𑀫𑀼𑀜𑁆𑀘𑀺𑀢𑁆𑀯𑀸 𑀢𑁂𑀲𑀁 𑀯𑀡𑁆𑀡𑀦𑀺𑀪𑀸𑀤𑀺𑀪𑀸𑀯𑁂𑀦 𑀕𑀳𑁂𑀢𑀩𑁆𑀩𑀢𑁄 𑀉𑀧𑀸𑀤𑀸.

𑁭𑁫-𑁮𑁨. 𑀲𑀁𑀓𑀺𑀮𑀺𑀝𑁆𑀞𑀢𑁆𑀢𑀺𑀓𑁂 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀲𑀁-𑀲𑀤𑁆𑀤𑀁 𑀅𑀧𑀦𑁂𑀢𑁆𑀯𑀸 𑀓𑀺𑀮𑀺𑀲𑀦𑁆𑀢𑀻𑀢𑀺 𑀓𑀺𑀮𑁂𑀲𑀸𑀢𑀺𑀆𑀤𑀺𑀦𑀸 𑀦𑀬𑁂𑀦.

𑁮𑁩-𑁧𑁦𑁦. 𑀓𑀸𑀫𑀸𑀯𑀘𑀭𑀸𑀤𑀻𑀲𑀼 𑀅𑀬𑀫𑀧𑀭𑁄 𑀅𑀢𑁆𑀣𑁄 𑁋 𑀓𑀸𑀫𑀢𑀡𑁆𑀳𑀸 𑀓𑀸𑀫𑁄, 𑀏𑀯𑀁 𑀭𑀽𑀧𑀸𑀭𑀽𑀧𑀢𑀡𑁆𑀳𑀸 𑀭𑀽𑀧𑀁 𑀅𑀭𑀽𑀧𑀜𑁆𑀘. 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀢𑀸𑀦𑀺 𑀬𑀢𑁆𑀣 𑀅𑀯𑀘𑀭𑀦𑁆𑀢𑀺, 𑀢𑁂 𑀓𑀸𑀫𑀸𑀯𑀘𑀭𑀸𑀤𑀬𑁄𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀅𑀜𑁆𑀜𑀪𑀽𑀫𑀻𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀅𑀓𑀸𑀫𑀸𑀯𑀘𑀭𑀸𑀤𑀺𑀢𑀸 𑀓𑀸𑀫𑀸𑀯𑀘𑀭𑀸𑀤𑀺𑀢𑀸 𑀘 𑀦𑀸𑀧𑀚𑁆𑀚𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀦𑀺𑀓𑁆𑀔𑁂𑀧𑀓𑀡𑁆𑀟𑁂𑀧𑀺 ‘‘𑀏𑀢𑁆𑀣𑀸𑀯𑀘𑀭𑀸’’𑀢𑀺 𑀯𑀘𑀦𑀁 𑀅𑀯𑀻𑀘𑀺𑀧𑀭𑀦𑀺𑀫𑁆𑀫𑀺𑀢𑀧𑀭𑀺𑀘𑁆𑀙𑀺𑀦𑁆𑀦𑁄𑀓𑀸𑀲𑀸𑀬 𑀓𑀸𑀫𑀢𑀡𑁆𑀳𑀸𑀬 𑀆𑀭𑀫𑁆𑀫𑀡𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀢𑀤𑁄𑀓𑀸𑀲𑀢𑀸 𑀘 𑀢𑀡𑁆𑀳𑀸𑀬 𑀢𑀦𑁆𑀦𑀺𑀦𑁆𑀦𑀢𑀸𑀬 𑀯𑁂𑀤𑀺𑀢𑀩𑁆𑀩𑀸. 𑀬𑀤𑀺 𑀧𑀭𑀺𑀬𑀸𑀧𑀦𑁆𑀦𑀲𑀤𑁆𑀤𑀲𑁆𑀲 𑀅𑀦𑁆𑀢𑁄𑀕𑀥𑀸𑀢𑀺 𑀅𑀬𑀫𑀢𑁆𑀣𑁄, 𑀫𑀕𑁆𑀕𑀸𑀤𑀺𑀥𑀫𑁆𑀫𑀸𑀦𑀜𑁆𑀘 𑀮𑁄𑀓𑀼𑀢𑁆𑀢𑀭𑀦𑁆𑀢𑁄𑀕𑀥𑀢𑁆𑀢𑀸 𑀧𑀭𑀺𑀬𑀸𑀧𑀦𑁆𑀦𑀢𑀸 𑀆𑀧𑀚𑁆𑀚𑀢𑀺. 𑀦 𑀳𑀺 ‘‘𑀧𑀭𑀺𑀬𑀸𑀧𑀦𑁆𑀦𑀸’’𑀢𑀺 𑀏𑀢𑁆𑀣 𑀢𑁂𑀪𑀽𑀫𑀓𑀕𑀳𑀡𑀁 𑀅𑀢𑁆𑀣𑀻𑀢𑀺? 𑀦𑀸𑀧𑀚𑁆𑀚𑀢𑀺 𑀲𑀩𑁆𑀩𑀤𑀸 𑀧𑀯𑀢𑁆𑀢𑀫𑀸𑀦𑀲𑁆𑀲 𑀧𑀘𑁆𑀘𑀓𑁆𑀔𑀲𑁆𑀲 𑀮𑁄𑀓𑀲𑁆𑀲 𑀯𑀲𑁂𑀦 𑀧𑀭𑀺𑀬𑀸𑀧𑀦𑁆𑀦𑀦𑀺𑀘𑁆𑀙𑀬𑀢𑁄. 𑀅𑀣 𑀯𑀸 𑀧𑀭𑀺𑀘𑁆𑀙𑁂𑀤𑀓𑀸𑀭𑀺𑀓𑀸𑀬 𑀢𑀡𑁆𑀳𑀸𑀬 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀆𑀧𑀦𑁆𑀦𑀸 𑀧𑀝𑀺𑀧𑀦𑁆𑀦𑀸 𑀕𑀳𑀺𑀢𑀸𑀢𑀺 𑀧𑀭𑀺𑀬𑀸𑀧𑀦𑁆𑀦𑀸.

𑀅𑀦𑀻𑀬-𑀲𑀤𑁆𑀤𑁄 𑀩𑀳𑀼𑀮𑀸 𑀓𑀢𑁆𑀢𑀼𑀅𑀪𑀺𑀥𑀸𑀬𑀓𑁄𑀢𑀺 𑀯𑀝𑁆𑀝𑀘𑀸𑀭𑀓𑀢𑁄 𑀦𑀺𑀬𑁆𑀬𑀦𑁆𑀢𑀻𑀢𑀺 𑀦𑀺𑀬𑁆𑀬𑀸𑀦𑀻𑀬𑀸, 𑀦𑀻-𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁 𑀬-𑀓𑀸𑀭𑀲𑁆𑀲 𑀘 𑀓-𑀓𑀸𑀭𑀢𑁆𑀢𑀁 𑀓𑀢𑁆𑀯𑀸 ‘‘𑀦𑀺𑀬𑁆𑀬𑀸𑀦𑀺𑀓𑀸’’𑀢𑀺 𑀯𑀼𑀢𑁆𑀢𑀁, 𑀦𑀺𑀬𑁆𑀬𑀸𑀦𑀓𑀭𑀡𑀲𑀻𑀮𑀸 𑀯𑀸 𑀦𑀺𑀬𑁆𑀬𑀸𑀦𑀺𑀓𑀸. 𑀉𑀢𑁆𑀢𑀭𑀺𑀢𑀩𑁆𑀩𑀲𑁆𑀲 𑀅𑀜𑁆𑀜𑀲𑁆𑀲 𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀅𑀪𑀸𑀯𑀸 𑀦𑀺𑀤𑁆𑀤𑀺𑀲𑀺𑀬𑀫𑀸𑀦𑀸 𑀲𑀉𑀢𑁆𑀢𑀭𑀸 𑀥𑀫𑁆𑀫𑀸𑀯 𑀉𑀢𑁆𑀢𑀭𑀺𑀢𑀩𑁆𑀩𑀸𑀢𑀺 ‘‘𑀅𑀢𑁆𑀢𑀸𑀦’’𑀦𑁆𑀢𑀺 𑀆𑀳. 𑀭𑀸𑀕𑀸𑀤𑀻𑀦𑀦𑁆𑀢𑀺 𑀭𑀸𑀕𑀸𑀤𑀻𑀦𑀁 𑀤𑀲𑀦𑁆𑀦𑀁 𑀓𑀺𑀮𑁂𑀲𑀸𑀦𑀁 𑀲𑀩𑁆𑀩𑀦𑀺𑀬𑀢𑀸𑀓𑀼𑀲𑀮𑀸𑀦𑀁 𑀯𑀸. 𑀢𑁂𑀳𑀺 𑀦𑀸𑀦𑀧𑁆𑀧𑀓𑀸𑀭𑀤𑀼𑀓𑁆𑀔𑀦𑀺𑀩𑁆𑀩𑀢𑁆𑀢𑀓𑁂𑀳𑀺 𑀅𑀪𑀺𑀪𑀽𑀢𑀸 𑀲𑀢𑁆𑀢𑀸 𑀓𑀦𑁆𑀤𑀦𑁆𑀢𑀺 𑀅𑀓𑀦𑁆𑀤𑀦𑁆𑀢𑀸𑀧𑀺 𑀓𑀦𑁆𑀤𑀦𑀓𑀸𑀭𑀡𑀪𑀸𑀯𑀢𑁄. 𑀬𑀲𑁆𑀫𑀸 𑀧𑀦 𑀧𑀳𑀸𑀦𑁂𑀓𑀝𑁆𑀞𑀢𑀸𑀯𑀲𑁂𑀦 𑀘 ‘‘𑀲𑀭𑀡𑀸’’𑀢𑀺 𑀆𑀳, 𑀢𑀲𑁆𑀫𑀸 ‘‘𑀭𑀸𑀕𑀸𑀤𑀻𑀦’’𑀦𑁆𑀢𑀺 𑀯𑀘𑀦𑁂𑀦 𑀭𑀸𑀕𑀤𑁄𑀲𑀫𑁄𑀳𑀸𑀯 𑀕𑀳𑀺𑀢𑀸𑀢𑀺 𑀜𑀸𑀬𑀢𑀺. 𑀭𑀡-𑀲𑀤𑁆𑀤𑁄 𑀯𑀸 𑀭𑀸𑀕𑀸𑀤𑀺𑀭𑁂𑀡𑀽𑀲𑀼 𑀦𑀺𑀭𑀼𑀴𑁆𑀳𑁄 𑀤𑀝𑁆𑀞𑀩𑁆𑀩𑁄, 𑀭𑀡𑀁 𑀯𑀸 𑀬𑀼𑀤𑁆𑀥𑀁, ‘‘𑀓𑀸𑀫𑀸 𑀢𑁂 𑀧𑀞𑀫𑀸 𑀲𑁂𑀦𑀸’’𑀢𑀺 (𑀲𑀼. 𑀦𑀺. 𑁪𑁩𑁮; 𑀫𑀳𑀸𑀦𑀺. 𑁨𑁮, 𑁬𑁮, 𑁧𑁪𑁯; 𑀘𑀽𑀴𑀦𑀺. 𑀦𑀦𑁆𑀤𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁪𑁭) 𑀏𑀯𑀫𑀸𑀤𑀺𑀓𑀸 𑀘 𑀅𑀓𑀼𑀲𑀮𑀸 𑀲𑁂𑀦𑀸 𑀅𑀭𑀺𑀬𑀫𑀕𑁆𑀕𑀬𑀼𑀤𑁆𑀥𑁂𑀦 𑀚𑁂𑀢𑀩𑁆𑀩𑀢𑁆𑀢𑀸 𑀲𑀬𑀼𑀤𑁆𑀥𑀢𑁆𑀢𑀸 ‘‘𑀲𑀭𑀡𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺. 𑀅𑀭𑀡𑀯𑀺𑀪𑀗𑁆𑀕𑀲𑀼𑀢𑁆𑀢𑁂 (𑀫. 𑀦𑀺. 𑁩.𑁩𑁨𑁩 𑀆𑀤𑀬𑁄) 𑀧𑀦 𑀲𑀤𑀼𑀓𑁆𑀔𑀸 𑀲𑀉𑀧𑀖𑀸𑀢𑀸 𑀲𑀉𑀧𑀸𑀬𑀸𑀲𑀸 𑀲𑀧𑀭𑀺𑀴𑀸𑀳𑀸 𑀫𑀺𑀘𑁆𑀙𑀸𑀧𑀝𑀺𑀧𑀤𑀸𑀪𑀽𑀢𑀸 𑀓𑀸𑀫𑀲𑀼𑀔𑀸𑀦𑀼𑀬𑁄𑀕𑀸𑀤𑀬𑁄 ‘‘𑀲𑀭𑀡𑀸’’𑀢𑀺 𑀯𑀼𑀢𑁆𑀢𑀸𑀢𑀺 𑀤𑀼𑀓𑁆𑀔𑀸𑀤𑀻𑀦𑀁 𑀭𑀡𑀪𑀸𑀯𑁄 𑀢𑀦𑁆𑀦𑀺𑀩𑁆𑀩𑀢𑁆𑀢𑀓𑀲𑀪𑀸𑀯𑀸𑀦𑀁 𑀅𑀓𑀼𑀲𑀮𑀸𑀦𑀁 𑀲𑀭𑀡𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸.

𑀧𑀺𑀝𑁆𑀞𑀺𑀤𑀼𑀓𑀸 𑀲𑀫𑀢𑁆𑀢𑀸.

𑀲𑀼𑀢𑁆𑀢𑀦𑁆𑀢𑀺𑀓𑀤𑀼𑀓𑀫𑀸𑀢𑀺𑀓𑀸𑀧𑀤𑀯𑀡𑁆𑀡𑀦𑀸

𑁧𑁦𑁧-𑁧𑁦𑁮. 𑀯𑀺𑀚𑁆𑀚𑀸𑀭𑀸𑀲𑀦𑁆𑀢𑁄𑀕𑀥𑀥𑀫𑁆𑀫𑀸 𑀯𑀺𑀚𑁆𑀚𑀸𑀲𑀪𑀸𑀕𑀢𑀸𑀬 𑀢𑀤𑁂𑀓𑀤𑁂𑀲𑁂 𑀯𑀺𑀚𑁆𑀚𑀸𑀓𑁄𑀝𑁆𑀞𑀸𑀲𑁂 𑀯𑀢𑁆𑀢𑀦𑁆𑀢𑀻𑀢𑀺 𑀯𑀼𑀢𑁆𑀢𑀸. 𑀯𑀚𑀺𑀭𑀲𑁆𑀲 𑀬𑀢𑁆𑀣 𑀢𑀁 𑀧𑀢𑀢𑀺, 𑀢𑀢𑁆𑀣 𑀅𑀪𑁂𑀚𑁆𑀚𑀁 𑀦𑀸𑀫 𑀓𑀺𑀜𑁆𑀘𑀺 𑀫𑀡𑀺𑀧𑀸𑀲𑀸𑀡𑀸𑀤𑀺 𑀦𑀢𑁆𑀣𑀺, 𑀦 𑀘 𑀢𑁂𑀦 𑀕𑀫𑀦𑀫𑀕𑁆𑀕𑁄 𑀯𑀺𑀭𑀼𑀳𑀢𑀺, 𑀏𑀯𑀫𑁂𑀯 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀬𑀢𑁆𑀣 𑀲𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀅𑀪𑁂𑀚𑁆𑀚𑁄 𑀓𑀺𑀮𑁂𑀲𑁄 𑀦𑀸𑀫 𑀦𑀢𑁆𑀣𑀺, 𑀦 𑀘 𑀪𑀺𑀦𑁆𑀦𑁄 𑀧𑀼𑀦 𑀯𑀺𑀭𑀼𑀳𑀢𑀻𑀢𑀺 𑀯𑀚𑀺𑀭𑀼𑀧𑀫𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀤𑀼𑀧𑀘𑀸𑀭𑁂𑀦 𑀩𑀸𑀮𑀸 𑀬𑀣𑀸 ‘‘𑀫𑀜𑁆𑀘𑀸 𑀖𑁄𑀲𑀦𑁆𑀢𑀻’’𑀢𑀺. 𑀓𑀡𑁆𑀳𑀸𑀪𑀺𑀚𑀸𑀢𑀻𑀢𑀺 𑀅𑀧𑀸𑀬𑀸 𑀯𑀼𑀘𑁆𑀘𑀦𑁆𑀢𑀺 𑀫𑀦𑀼𑀲𑁆𑀲𑁂𑀲𑀼 𑀘 𑀤𑁄𑀪𑀕𑁆𑀕𑀺𑀬𑀁. 𑀢𑀧𑀦𑀲𑁆𑀲 𑀯𑀸 𑀤𑀼𑀓𑁆𑀔𑀲𑁆𑀲 𑀳𑀺𑀢𑀸𑀢𑀺 𑀢𑀧𑀦𑀺𑀬𑀸.

𑀤𑀸𑀲𑀸𑀤𑀻𑀲𑀼𑀧𑀺 𑀲𑀺𑀭𑀺𑀯𑀟𑁆𑀠𑀓𑀸𑀤𑀺𑀲𑀤𑁆𑀤𑀸 𑀯𑀺𑀬 𑀅𑀢𑀣𑀢𑁆𑀢𑀸 𑀯𑀘𑀦𑀫𑀢𑁆𑀢𑀫𑁂𑀯 𑀅𑀥𑀺𑀓𑀸𑀭𑀁 𑀓𑀢𑁆𑀯𑀸 𑀧𑀯𑀢𑁆𑀢𑀸 𑀅𑀥𑀺𑀯𑀘𑀦𑀸. 𑀬𑀲𑁆𑀫𑀸 𑀧𑀦 𑀅𑀥𑀺𑀯𑀘𑀦𑀦𑀺𑀭𑀼𑀢𑁆𑀢𑀺𑀧𑀜𑁆𑀜𑀢𑁆𑀢𑀺𑀧𑀤𑀸𑀦𑀺 𑀲𑀫𑀸𑀦𑀢𑁆𑀣𑀸𑀦𑀺, 𑀲𑀩𑁆𑀩𑀜𑁆𑀘 𑀯𑀘𑀦𑀁 𑀅𑀥𑀺𑀯𑀘𑀦𑀸𑀤𑀺𑀪𑀸𑀯𑀁 𑀪𑀚𑀢𑀺, 𑀢𑀲𑁆𑀫𑀸 𑀢𑁂𑀲𑀼𑀧𑀺 𑀯𑀘𑀦𑀯𑀺𑀲𑁂𑀲𑁂𑀲𑀼 𑀯𑀺𑀲𑁂𑀲𑁂𑀦 𑀧𑀯𑀢𑁆𑀢𑁂𑀳𑀺 𑀅𑀥𑀺𑀯𑀘𑀦𑀸𑀤𑀺𑀲𑀤𑁆𑀤𑁂𑀳𑀺 𑀲𑀩𑁆𑀩𑀸𑀦𑀺 𑀯𑀘𑀦𑀸𑀦𑀺 𑀅𑀢𑁆𑀣𑀧𑁆𑀧𑀓𑀸𑀲𑀦𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 𑀏𑀢𑁂𑀦𑀸𑀥𑀺𑀧𑁆𑀧𑀸𑀬𑁂𑀦 𑀅𑀬𑀁 𑀅𑀢𑁆𑀣𑀬𑁄𑀚𑀦𑀸 𑀓𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀣 𑀯𑀸 𑀅𑀥𑀺-𑀲𑀤𑁆𑀤𑁄 𑀉𑀧𑀭𑀺𑀪𑀸𑀕𑁂, 𑀉𑀧𑀭𑀺 𑀯𑀘𑀦𑀁 𑀅𑀥𑀺𑀯𑀘𑀦𑀁. 𑀓𑀲𑁆𑀲 𑀉𑀧𑀭𑀺? 𑀧𑀓𑀸𑀲𑁂𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲𑀸𑀢𑀺 𑀯𑀺𑀤𑀺𑀢𑁄𑀯𑀸𑀬𑀫𑀢𑁆𑀣𑁄. 𑀅𑀥𑀻𑀦𑀁 𑀯𑀸 𑀯𑀘𑀦𑀁 𑀅𑀥𑀺𑀯𑀘𑀦𑀁. 𑀓𑁂𑀦 𑀅𑀥𑀻𑀦𑀁? 𑀅𑀢𑁆𑀣𑁂𑀦. 𑀢𑀣𑀸 𑀢𑀁𑀢𑀁𑀅𑀢𑁆𑀣𑀧𑁆𑀧𑀓𑀸𑀲𑀦𑁂 𑀦𑀺𑀘𑁆𑀙𑀺𑀢𑀁, 𑀦𑀺𑀬𑀢𑀁 𑀯𑀸 𑀯𑀘𑀦𑀁 𑀦𑀺𑀭𑀼𑀢𑁆𑀢𑀺. 𑀧𑀣𑀯𑀻𑀥𑀸𑀢𑀼𑀧𑀼𑀭𑀺𑀲𑀸𑀤𑀺𑀢𑀁𑀢𑀁𑀧𑀓𑀸𑀭𑁂𑀦 𑀜𑀸𑀧𑀦𑀢𑁄 𑀧𑀜𑁆𑀜𑀢𑁆𑀢𑀻𑀢𑀺 𑀏𑀯𑀁 𑀅𑀥𑀺𑀯𑀘𑀦𑀸𑀤𑀺𑀧𑀤𑀸𑀦𑀁 𑀲𑀩𑁆𑀩𑀯𑀘𑀦𑁂𑀲𑀼 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀜𑁆𑀜𑀣𑀸 𑀲𑀺𑀭𑀺𑀯𑀟𑁆𑀠𑀓𑀥𑀦𑀯𑀟𑁆𑀠𑀓𑀧𑁆𑀧𑀓𑀸𑀭𑀸𑀦𑀫𑁂𑀯 𑀅𑀪𑀺𑀮𑀸𑀧𑀸𑀦𑀁 𑀅𑀥𑀺𑀯𑀘𑀦𑀢𑀸, 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀏𑀯𑀁𑀧𑀓𑀸𑀭𑀸𑀦𑀫𑁂𑀯 𑀦𑀺𑀤𑁆𑀥𑀸𑀭𑀡𑀯𑀘𑀦𑀸𑀦𑀁 𑀦𑀺𑀭𑀼𑀢𑁆𑀢𑀺𑀢𑀸, 𑀢𑀓𑁆𑀓𑁄 𑀯𑀺𑀢𑀓𑁆𑀓𑁄𑀢𑀺 𑀏𑀯𑀁𑀧𑀓𑀸𑀭𑀸𑀦𑀫𑁂𑀯 𑀏𑀓𑀫𑁂𑀯𑀢𑁆𑀣𑀁 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦 𑀜𑀸𑀧𑁂𑀦𑁆𑀢𑀸𑀦𑀁 𑀧𑀜𑁆𑀜𑀢𑁆𑀢𑀺𑀢𑀸 𑀘 𑀆𑀧𑀚𑁆𑀚𑁂𑀬𑁆𑀬𑀸𑀢𑀺.

𑁧𑁦𑁯-𑁧𑁧𑁮. 𑀨𑀲𑁆𑀲𑁄 𑀯𑁂𑀤𑀦𑀸𑀢𑀺 𑀲𑀩𑁆𑀩𑀤𑀸𑀧𑀺 𑀅𑀭𑀽𑀧𑀥𑀫𑁆𑀫𑀸𑀦𑀁 𑀨𑀲𑁆𑀲𑀸𑀤𑀺𑀦𑀸𑀫𑀓𑀢𑁆𑀢𑀸 𑀧𑀣𑀯𑀺𑀬𑀸𑀤𑀻𑀦𑀁 𑀓𑁂𑀲𑀓𑀼𑀫𑁆𑀪𑀸𑀤𑀺𑀦𑀸𑀫𑀦𑁆𑀢𑀭𑀸𑀧𑀢𑁆𑀢𑀺 𑀯𑀺𑀬 𑀦𑀸𑀫𑀦𑁆𑀢𑀭𑀸𑀦𑀸𑀧𑀚𑁆𑀚𑀦𑀢𑁄 𑀘 𑀲𑀤𑀸 𑀅𑀢𑁆𑀢𑀦𑀸𑀯 𑀓𑀢𑀦𑀸𑀫𑀢𑀸𑀬 𑀘𑀢𑀼𑀓𑁆𑀔𑀦𑁆𑀥𑀦𑀺𑀩𑁆𑀩𑀸𑀦𑀸𑀦𑀺 𑀦𑀸𑀫𑀓𑀭𑀡𑀝𑁆𑀞𑁂𑀦 𑀦𑀸𑀫𑀁. 𑀦𑀫𑀦𑀁 𑀅𑀯𑀺𑀦𑀸𑀪𑀸𑀯𑀢𑁄 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀢𑀸, 𑀦𑀫𑀦𑀳𑁂𑀢𑀼𑀪𑀽𑀢𑀢𑀸 𑀦𑀸𑀫𑀦𑀁. 𑀅𑀣 𑀯𑀸 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑁄 𑀯𑀺𑀬 𑀅𑀥𑀺𑀯𑀘𑀦𑀁 𑀦𑀸𑀫𑀫𑀦𑁆𑀢𑀭𑁂𑀦 𑀬𑁂 𑀅𑀦𑀼𑀧𑀘𑀺𑀢𑀩𑁄𑀥𑀺𑀲𑀫𑁆𑀪𑀸𑀭𑀸𑀦𑀁 𑀕𑀳𑀡𑀁 𑀦 𑀕𑀘𑁆𑀙𑀦𑁆𑀢𑀺, 𑀢𑁂 𑀦𑀸𑀫𑀸𑀬𑀢𑁆𑀢𑀕𑁆𑀕𑀳𑀡𑀸 𑀦𑀸𑀫𑀁. 𑀭𑀽𑀧𑀁 𑀧𑀦 𑀯𑀺𑀦𑀸𑀧𑀺 𑀦𑀸𑀫𑀲𑀸𑀥𑀦𑀁 𑀅𑀢𑁆𑀢𑀦𑁄 𑀭𑀼𑀧𑁆𑀧𑀦𑀲𑀪𑀸𑀯𑁂𑀦 𑀕𑀳𑀡𑀁 𑀉𑀧𑀬𑀸𑀢𑀻𑀢𑀺 𑀭𑀽𑀧𑀁.

𑁧𑁧𑁯-𑁧𑁨𑁩. 𑀇𑀢𑁄 𑀧𑀼𑀩𑁆𑀩𑁂 𑀧𑀭𑀺𑀓𑀫𑁆𑀫𑀁 𑀧𑀯𑀢𑁆𑀢𑀁, 𑀇𑀢𑁄 𑀧𑀭𑀁 𑀪𑀯𑀗𑁆𑀕𑀁, 𑀫𑀚𑁆𑀛𑁂 𑀲𑀫𑀸𑀧𑀢𑁆𑀢𑀻𑀢𑀺 𑀏𑀯𑀁 𑀲𑀫𑀸𑀧𑀢𑁆𑀢𑀻𑀦𑀁 𑀅𑀧𑁆𑀧𑀦𑀸𑀧𑀭𑀺𑀘𑁆𑀙𑁂𑀤𑀧𑀜𑁆𑀜𑀸 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑀢𑀸. 𑀯𑀼𑀝𑁆𑀞𑀸𑀦𑁂 𑀓𑀼𑀲𑀮𑀪𑀸𑀯𑁄 𑀧𑀼𑀩𑁆𑀩𑁂 𑀯𑀼𑀝𑁆𑀞𑀸𑀦𑁂 𑀧𑀭𑀺𑀘𑁆𑀙𑁂𑀤𑀓𑀭𑀡𑀜𑀸𑀡𑀁. 𑀮𑀓𑁆𑀔𑀡𑀸𑀤𑀺𑀯𑀲𑁂𑀦 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀘 𑀫𑀦𑀲𑀺 𑀓𑀭𑀡𑀁 𑀫𑀦𑀲𑀺𑀓𑀸𑀭𑁄.

𑁧𑁨𑁪-𑁧𑁩𑁪. 𑀲𑀼𑀘𑀺𑀲𑀻𑀮𑀢𑀸 𑀲𑁄𑀭𑀘𑁆𑀘𑀁. 𑀲𑀸 𑀳𑀺 𑀲𑁄𑀪𑀦𑀓𑀫𑁆𑀫𑀭𑀢𑀢𑀸𑀢𑀺. 𑀲𑀫𑁆𑀫𑁄𑀤𑀓𑀲𑁆𑀲, 𑀲𑀫𑁆𑀫𑁄𑀤𑀓𑁄 𑀯𑀸 𑀫𑀼𑀤𑀼𑀪𑀸𑀯𑁄 𑀲𑀫𑁆𑀫𑁄𑀤𑀓𑀫𑀼𑀤𑀼𑀪𑀸𑀯𑁄, 𑀲𑀡𑁆𑀳𑀯𑀸𑀘𑀢𑀸. ‘‘𑀅𑀕𑀼𑀢𑁆𑀢𑀤𑁆𑀯𑀸𑀭𑀢𑀸’’𑀢𑀺 𑀯𑀼𑀢𑁆𑀢𑁂 𑀓𑁂𑀲𑀼 𑀤𑁆𑀯𑀸𑀭𑁂𑀲𑀽𑀢𑀺 𑀦 𑀧𑀜𑁆𑀜𑀸𑀬𑀢𑀻𑀢𑀺 ‘‘𑀇𑀦𑁆𑀤𑁆𑀭𑀺𑀬𑁂𑀲𑀽’’𑀢𑀺 𑀯𑀼𑀢𑁆𑀢𑀁. 𑀲𑀫𑁆𑀧𑀚𑀸𑀦𑀸𑀢𑀻𑀢𑀺 𑀲𑀫𑁆𑀧𑀚𑀸𑀦𑁄, 𑀢𑀲𑁆𑀲 𑀪𑀸𑀯𑁄 𑀲𑀫𑁆𑀧𑀚𑀜𑁆𑀜𑀁. 𑀢𑀤𑀧𑀺 𑀜𑀸𑀡𑀁 𑀬𑀲𑁆𑀫𑀸 𑀲𑀫𑁆𑀧𑀚𑀸𑀦𑀸𑀢𑀺, 𑀢𑀲𑁆𑀫𑀸 ‘‘𑀲𑀫𑁆𑀧𑀚𑀸𑀦𑀸𑀢𑀻𑀢𑀺 𑀲𑀫𑁆𑀧𑀚𑀜𑁆𑀜’’𑀦𑁆𑀢𑀺 𑀆𑀳. 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑁂 𑀦𑀺𑀫𑀺𑀢𑁆𑀢𑁂 𑀯𑀺𑀲𑀬𑁂 𑀯𑀸. 𑀯𑀻𑀭𑀺𑀬𑀲𑀻𑀲𑁂𑀦𑀸𑀢𑀺 𑀯𑀻𑀭𑀺𑀬𑀧𑀸𑀫𑁄𑀓𑁆𑀔𑁂𑀦. 𑀉𑀧𑁆𑀧𑀦𑁆𑀦𑀁 𑀩𑀮𑀦𑁆𑀢𑀺 𑀯𑀻𑀭𑀺𑀬𑁄𑀧𑀢𑁆𑀣𑀫𑁆𑀪𑁂𑀦 𑀳𑀺 𑀓𑀼𑀲𑀮𑀪𑀸𑀯𑀦𑀸 𑀩𑀮𑀯𑀢𑀻 𑀣𑀺𑀭𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀢𑀣𑀸 𑀉𑀧𑁆𑀧𑀦𑁆𑀦𑀸 𑀩𑀮𑀯𑀢𑀻 𑀓𑀼𑀲𑀮𑀪𑀸𑀯𑀦𑀸 𑀩𑀮𑀯𑀦𑁆𑀢𑁄 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺. 𑀓𑀲𑀺𑀡𑀦𑀺𑀫𑀺𑀢𑁆𑀢𑀁 𑀯𑀺𑀬 𑀲𑀜𑁆𑀜𑀸𑀡𑀁 𑀯𑀺𑀬 𑀲𑀯𑀺𑀕𑁆𑀕𑀳𑀁 𑀯𑀺𑀬 𑀘 𑀲𑀼𑀝𑁆𑀞𑀼 𑀉𑀧𑀮𑀓𑁆𑀔𑁂𑀢𑀩𑁆𑀩𑀸𑀓𑀸𑀭𑀁 ‘‘𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀣𑁄 𑀘 𑀏𑀯𑀁 𑀆𑀓𑀸𑀭𑁄𑀢𑀺 ‘‘𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑁄. 𑀢𑀣𑀸 𑀳𑀺 𑀲𑁄 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀢𑁄 𑀕𑀬𑁆𑀳𑀢𑀻𑀢𑀺. 𑀉𑀤𑁆𑀥𑀘𑁆𑀘𑀫𑀺𑀯 𑀘𑀺𑀢𑁆𑀢𑀁 𑀦 𑀯𑀺𑀓𑁆𑀔𑀺𑀧𑀢𑀻𑀢𑀺, 𑀯𑀺𑀓𑁆𑀔𑁂𑀧𑀧𑀝𑀺𑀓𑁆𑀔𑁂𑀧𑁄 𑀯𑀸 𑀅𑀯𑀺𑀓𑁆𑀔𑁂𑀧𑁄.

𑁧𑁩𑁫-𑁧𑁪𑁨. 𑀲𑀻𑀮𑀫𑁂𑀯 𑀧𑀼𑀦𑀧𑁆𑀧𑀼𑀦𑀁 𑀆𑀲𑁂𑀯𑀺𑀬𑀫𑀸𑀦𑀁 𑀮𑁄𑀓𑀺𑀬𑀁 𑀮𑁄𑀓𑀼𑀢𑁆𑀢𑀭𑀫𑁆𑀧𑀺 𑀲𑀻𑀮𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 ‘‘𑀲𑀻𑀮𑀧𑀭𑀺𑀧𑀽𑀭𑀡𑀢𑁄’’𑀢𑀺 𑀯𑀼𑀢𑁆𑀢𑀁. 𑀲𑀻𑀮𑀲𑁆𑀲 𑀲𑀫𑁆𑀧𑀤𑀸𑀢𑀺 𑀓𑀸𑀭𑀡𑀲𑀻𑀮𑀫𑁆𑀧𑀺 𑀨𑀮𑀲𑀻𑀮𑀫𑁆𑀧𑀺 𑀲𑀫𑁆𑀧𑀦𑁆𑀦𑀲𑀫𑀼𑀤𑀸𑀬𑀲𑁆𑀲 𑀏𑀓𑀤𑁂𑀲𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀣 𑀯𑀸 ‘‘𑀓𑀢𑀫𑁂 𑀘 𑀣𑀧𑀢𑀺 𑀅𑀓𑀼𑀲𑀮𑀸 𑀲𑀻𑀮𑀸? 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀅𑀓𑀼𑀲𑀮𑀁 𑀯𑀘𑀻𑀓𑀫𑁆𑀫𑀁 𑀧𑀸𑀧𑀓𑁄 𑀆𑀚𑀻𑀯𑁄’’𑀢𑀺 (𑀫. 𑀦𑀺. 𑁨.𑁨𑁬𑁪) 𑀯𑀼𑀢𑁆𑀢𑀢𑁆𑀢𑀸 𑀲𑀩𑁆𑀩𑀫𑁆𑀧𑀺 𑀓𑀼𑀲𑀮𑀸𑀓𑀼𑀲𑀮𑀁 ‘‘𑀲𑀻𑀮’’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀓𑀼𑀲𑀮𑀲𑀻𑀮𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 ‘‘𑀲𑀻𑀮𑀲𑀫𑁆𑀧𑀤𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀤𑀺𑀝𑁆𑀞𑀺𑀲𑀫𑁆𑀧𑀤𑀸𑀧𑀺 𑀯𑁂𑀤𑀺𑀢𑀩𑁆𑀩𑀸.

𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀔𑁄 𑀧𑀦 𑀬𑀣𑀸𑀤𑀺𑀝𑁆𑀞𑀺𑀲𑁆𑀲 𑀘 𑀧𑀥𑀸𑀦𑀦𑁆𑀢𑀺 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀸𑀤𑀺𑀲𑀗𑁆𑀔𑀸𑀢𑀸 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀘𑁂𑀯𑀸𑀢𑀺 𑀧𑀝𑀺𑀧𑀸𑀝𑀺𑀬𑀸 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀔𑁄 𑀧𑀦𑀸𑀢𑀺 𑀘 𑀧𑀤𑀤𑁆𑀯𑀬𑀲𑁆𑀲 𑀲𑀫𑀸𑀦𑀢𑁆𑀢𑀸 𑀧𑀜𑁆𑀜𑀸. 𑀬𑀣𑀸𑀤𑀺𑀝𑁆𑀞𑀺𑀲𑁆𑀲𑀸𑀢𑀺 𑀦𑀺𑀩𑁆𑀩𑀢𑁆𑀢𑀺𑀢𑀧𑁆𑀧𑀓𑀸𑀭𑀤𑀺𑀝𑁆𑀞𑀺𑀲𑁆𑀲 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀧𑀥𑀸𑀦𑀸𑀦𑀼𑀭𑀽𑀧𑀤𑀺𑀝𑁆𑀞𑀺𑀲𑁆𑀲 𑀯𑀸 𑀬𑀣𑀸𑀤𑀺𑀝𑁆𑀞𑀺𑀧𑀯𑀢𑁆𑀢𑀓𑀺𑀭𑀺𑀬𑀲𑁆𑀲 𑀯𑀸. 𑀲𑀁𑀯𑁂𑀕𑁄𑀢𑀺 𑀲𑀳𑁄𑀢𑁆𑀢𑀧𑁆𑀧𑀁 𑀜𑀸𑀡𑀁, 𑀑𑀢𑁆𑀢𑀧𑁆𑀧𑀫𑁂𑀯 𑀯𑀸. 𑀲𑀫𑀢𑁆𑀢𑀁 𑀢𑀼𑀲𑁆𑀲𑀦𑀁 𑀢𑀺𑀢𑁆𑀢𑀺 𑀲𑀦𑁆𑀢𑀼𑀝𑁆𑀞𑀺, 𑀦𑀢𑁆𑀣𑀺 𑀏𑀢𑀲𑁆𑀲 𑀲𑀦𑁆𑀢𑀼𑀝𑁆𑀞𑀻𑀢𑀺 𑀅𑀲𑀦𑁆𑀢𑀼𑀝𑁆𑀞𑀺, 𑀅𑀲𑀦𑁆𑀢𑀼𑀝𑁆𑀞𑀺𑀲𑁆𑀲 𑀪𑀸𑀯𑁄 𑀅𑀲𑀦𑁆𑀢𑀼𑀝𑁆𑀞𑀺𑀢𑀸. 𑀯𑀻𑀭𑀺𑀬𑀧𑁆𑀧𑀯𑀸𑀳𑁂 𑀧𑀯𑀢𑁆𑀢𑀫𑀸𑀦𑁂 𑀅𑀦𑁆𑀢𑀭𑀸 𑀏𑀯 𑀧𑀝𑀺𑀕𑀫𑀦𑀁 𑀦𑀺𑀯𑀢𑁆𑀢𑀦𑀁 𑀧𑀝𑀺𑀯𑀸𑀦𑀁, 𑀢𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀧𑀝𑀺𑀯𑀸𑀦𑀻, 𑀦 𑀧𑀝𑀺𑀯𑀸𑀦𑀻 𑀅𑀧𑁆𑀧𑀝𑀺𑀯𑀸𑀦𑀻, 𑀢𑀲𑁆𑀲 𑀪𑀸𑀯𑁄 𑀅𑀧𑁆𑀧𑀝𑀺𑀯𑀸𑀦𑀺𑀢𑀸. 𑀯𑀺𑀫𑀼𑀘𑁆𑀘𑀦𑀁 𑀦𑀸𑀫 𑀆𑀭𑀫𑁆𑀫𑀡𑁂 𑀅𑀥𑀺𑀫𑀼𑀢𑁆𑀢𑀢𑀸 𑀓𑀺𑀮𑁂𑀲𑁂𑀳𑀺 𑀲𑀩𑁆𑀩𑀲𑀗𑁆𑀔𑀸𑀭𑁂𑀳𑀺 𑀘 𑀦𑀺𑀲𑁆𑀲𑀝𑀢𑀸 𑀘. 𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑀸𑀢𑀺 𑀓𑀺𑀮𑁂𑀲𑀸𑀦𑀁 𑀢𑀁𑀢𑀁𑀫𑀕𑁆𑀕𑀯𑀚𑁆𑀛𑀸𑀦𑀁 𑀉𑀧𑁆𑀧𑀦𑁆𑀦𑀫𑀕𑁆𑀕𑁂 𑀔𑀦𑁆𑀥𑀲𑀦𑁆𑀢𑀸𑀦𑁂 𑀧𑀼𑀦 𑀲𑀁𑀤𑀳𑀦𑀯𑀲𑁂𑀦. 𑀅𑀦𑀼𑀧𑁆𑀧𑀸𑀤𑀪𑀽𑀢𑁂𑀢𑀺 𑀢𑀁𑀢𑀁𑀨𑀮𑁂. 𑀅𑀦𑀼𑀧𑁆𑀧𑀸𑀤𑀧𑀭𑀺𑀬𑁄𑀲𑀸𑀦𑁂𑀢𑀺 𑀅𑀦𑀼𑀧𑁆𑀧𑀸𑀤𑀓𑀭𑁄 𑀫𑀕𑁆𑀕𑁄 𑀅𑀦𑀼𑀧𑁆𑀧𑀸𑀤𑁄, 𑀢𑀲𑁆𑀲 𑀧𑀭𑀺𑀬𑁄𑀲𑀸𑀦𑁂.

𑀲𑀼𑀢𑁆𑀢𑀦𑁆𑀢𑀺𑀓𑀤𑀼𑀓𑀫𑀸𑀢𑀺𑀓𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀓𑀫𑀸𑀢𑀺𑀓𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀸𑀫𑀸𑀯𑀘𑀭𑀓𑀼𑀲𑀮𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧. ‘‘𑀬𑁂 𑀯𑀸 𑀧𑀦…𑀧𑁂… 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸’’𑀢𑀺 𑀇𑀤𑀁 ‘‘𑀨𑀲𑁆𑀲𑁄 𑀳𑁄𑀢𑀻’’𑀢𑀺 𑀏𑀯𑀫𑀸𑀤𑀺𑀓𑀁 𑀯𑀺𑀬 𑀦 𑀯𑀺𑀲𑀼𑀁 ‘‘𑀢𑁂𑀧𑀺 𑀳𑁄𑀦𑁆𑀢𑀻’’𑀢𑀺 𑀳𑁄𑀢𑀺-𑀲𑀤𑁆𑀤𑁂𑀦 𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀉𑀤𑁆𑀤𑀺𑀝𑁆𑀞𑀸𑀯𑀲𑁂𑀲𑁂 𑀘 𑀧𑀦 𑀕𑀳𑁂𑀢𑁆𑀯𑀸 ‘‘𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸’’𑀢𑀺 𑀅𑀧𑁆𑀧𑁂𑀢𑀼𑀁 𑀯𑀼𑀢𑁆𑀢𑀦𑁆𑀢𑀺 𑀅𑀧𑁆𑀧𑀦𑀸𑀬 𑀅𑀯𑀭𑁄𑀥𑀺𑀢𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁂𑀧𑀺 𑀏𑀢𑀲𑁆𑀲 𑀧𑀤𑀪𑀸𑀚𑀦𑀻𑀬𑀁 𑀦 𑀯𑀼𑀢𑁆𑀢𑀦𑁆𑀢𑀺. 𑀲𑀭𑀽𑀧𑁂𑀦 𑀧𑀦 𑀅𑀤𑀲𑁆𑀲𑀺𑀢𑀢𑁆𑀢𑀸 ‘‘𑀅𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑁂𑀦 𑀳𑁄𑀢𑀺-𑀲𑀤𑁆𑀤𑁂𑀦 𑀲𑀫𑁆𑀩𑀦𑁆𑀥𑁄 𑀦𑀺𑀤𑁆𑀤𑁂𑀲𑁄 𑀘 𑀦 𑀓𑀢𑁄, 𑀲𑀗𑁆𑀔𑁂𑀧𑁂𑀦 𑀧𑀦 𑀉𑀤𑁆𑀤𑀺𑀲𑀺𑀢𑁆𑀯𑀸 𑀲𑀗𑁆𑀔𑁂𑀧𑁂𑀦𑁂𑀯 𑀬𑁂 𑀯𑀸 𑀧𑀦 𑀥𑀫𑁆𑀫𑀸 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀏𑀢𑀲𑁆𑀲 𑀥𑀫𑁆𑀫𑀲𑁆𑀲 𑀉𑀤𑁆𑀤𑁂𑀲𑁂 𑀅𑀯𑀭𑁄𑀥𑁄 𑀬𑀼𑀢𑁆𑀢𑁄. 𑀥𑀫𑁆𑀫𑀦𑀺𑀤𑁆𑀤𑁂𑀲𑁂 𑀘 𑀦𑀺𑀤𑁆𑀤𑁂𑀲𑀸𑀯𑀲𑀸𑀦𑁂 𑀯𑀼𑀢𑁆𑀢𑀲𑁆𑀲𑀸𑀢𑀺.

𑀧𑀼𑀘𑁆𑀙𑀸𑀧𑀭𑀺𑀘𑁆𑀙𑁂𑀤𑀯𑀘𑀦𑁂𑀦𑁂𑀯 𑀧𑀼𑀘𑁆𑀙𑀸𑀪𑀸𑀯𑁂 𑀯𑀺𑀜𑁆𑀜𑀸𑀢𑁂 𑀧𑀼𑀘𑁆𑀙𑀸𑀯𑀺𑀲𑁂𑀲𑀜𑀸𑀧𑀦𑀢𑁆𑀣𑀁 𑀆𑀳 ‘‘𑀅𑀬𑀁 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸’’𑀢𑀺. 𑀧𑀜𑁆𑀘𑀯𑀺𑀥𑀸 𑀳𑀻𑀢𑀺 𑀫𑀳𑀸𑀦𑀺𑀤𑁆𑀤𑁂𑀲𑁂 (𑀫𑀳𑀸𑀦𑀺. 𑁧𑁫𑁦; 𑀘𑀽𑀴𑀦𑀺. 𑀧𑀼𑀡𑁆𑀡𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁧𑁨; 𑀫𑁂𑀢𑁆𑀢𑀕𑀽𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁧𑁮) 𑀆𑀕𑀢𑀸 𑀧𑀼𑀘𑁆𑀙𑀸 𑀤𑀲𑁆𑀲𑁂𑀢𑀺. 𑀮𑀓𑁆𑀔𑀡𑀦𑁆𑀢𑀺 𑀜𑀸𑀢𑀼𑀁 𑀇𑀘𑁆𑀙𑀺𑀢𑁄 𑀬𑁄 𑀓𑁄𑀘𑀺 𑀲𑀪𑀸𑀯𑁄. 𑀅𑀜𑁆𑀜𑀸𑀢𑀦𑁆𑀢𑀺 𑀬𑁂𑀦 𑀓𑁂𑀦𑀘𑀺 𑀜𑀸𑀡𑁂𑀦 𑀅𑀜𑁆𑀜𑀸𑀢𑀪𑀸𑀯𑀁 𑀆𑀳. 𑀅𑀤𑀺𑀝𑁆𑀞𑀦𑁆𑀢𑀺 𑀤𑀲𑁆𑀲𑀦𑀪𑀽𑀢𑁂𑀦 𑀜𑀸𑀡𑁂𑀦 𑀧𑀘𑁆𑀘𑀓𑁆𑀔𑀁 𑀯𑀺𑀬 𑀅𑀤𑀺𑀝𑁆𑀞𑀢𑀁. 𑀅𑀢𑀼𑀮𑀺𑀢𑀦𑁆𑀢𑀺 ‘‘𑀏𑀢𑁆𑀢𑀓𑀁 𑀇𑀤’’𑀦𑁆𑀢𑀺 𑀢𑀼𑀮𑀸𑀪𑀽𑀢𑀸𑀬 𑀧𑀜𑁆𑀜𑀸𑀬 𑀅𑀢𑀼𑀮𑀺𑀢𑀢𑀁. 𑀅𑀢𑀻𑀭𑀺𑀢𑀦𑁆𑀢𑀺 𑀢𑀻𑀭𑀡𑀪𑀽𑀢𑀸𑀬 𑀧𑀜𑁆𑀜𑀸𑀬 𑀅𑀓𑀢𑀜𑀸𑀡𑀓𑀺𑀭𑀺𑀬𑀸𑀲𑀫𑀸𑀧𑀦𑀢𑀁. 𑀅𑀯𑀺𑀪𑀽𑀢𑀦𑁆𑀢𑀺 𑀜𑀸𑀡𑀲𑁆𑀲 𑀅𑀧𑀸𑀓𑀝𑀪𑀸𑀯𑀁. 𑀅𑀯𑀺𑀪𑀸𑀯𑀺𑀢𑀦𑁆𑀢𑀺 𑀜𑀸𑀡𑁂𑀦 𑀅𑀧𑀸𑀓𑀝𑀻𑀓𑀢𑀪𑀸𑀯𑀁. 𑀅𑀤𑀺𑀝𑁆𑀞𑀁 𑀚𑁄𑀢𑀻𑀬𑀢𑀺 𑀏𑀢𑀸𑀬𑀸𑀢𑀺 𑀅𑀤𑀺𑀝𑁆𑀞𑀚𑁄𑀢𑀦𑀸. 𑀅𑀦𑀼𑀫𑀢𑀺𑀬𑀸 𑀧𑀼𑀘𑁆𑀙𑀸 𑀅𑀦𑀼𑀫𑀢𑀺𑀧𑀼𑀘𑁆𑀙𑀸. ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀧𑀼𑀘𑁆𑀙𑀸𑀬 𑀳𑀺 ‘‘𑀓𑀸 𑀢𑀼𑀫𑁆𑀳𑀸𑀓𑀁 𑀅𑀦𑀼𑀫𑀢𑀻’’𑀢𑀺 𑀅𑀦𑀼𑀫𑀢𑀺 𑀧𑀼𑀘𑁆𑀙𑀺𑀢𑀸 𑀳𑁄𑀢𑀺. 𑀓𑀣𑁂𑀢𑀼𑀓𑀫𑁆𑀬𑀢𑀸𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸𑀬.

𑀧𑀪𑁂𑀤𑀢𑁄 𑀥𑀫𑁆𑀫𑀸𑀦𑀁 𑀤𑁂𑀲𑀦𑀦𑁆𑀢𑀺 𑀫𑀸𑀢𑀺𑀓𑀸𑀤𑁂𑀲𑀦𑀁 𑀆𑀳. 𑀢𑀢𑁆𑀣 𑀳𑀺 𑀧𑀼𑀭𑀢𑁄 𑀓𑀼𑀲𑀮𑀸𑀤𑀺𑀓𑁂 𑀧𑀪𑁂𑀤𑁂 𑀯𑀢𑁆𑀯𑀸 𑀧𑀘𑁆𑀙𑀢𑁄 𑀥𑀫𑁆𑀫𑀸 𑀯𑀼𑀢𑁆𑀢𑀸𑀢𑀺 ‘‘𑀧𑀪𑁂𑀤𑀯𑀦𑁆𑀢𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺 𑀦𑀺𑀤𑁆𑀤𑁂𑀲𑀁 𑀆𑀳. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀫𑀸𑀢𑀺𑀓𑀸𑀬 𑀲𑀯𑀺𑀲𑁂𑀲𑀦𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸, 𑀢𑁂 𑀘 𑀯𑀺𑀲𑁂𑀲𑀺𑀢𑀩𑁆𑀩𑀢𑁆𑀢𑀸 𑀧𑀥𑀸𑀦𑀸, 𑀧𑀥𑀸𑀦𑀜𑁆𑀘 𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀬 𑀬𑀼𑀚𑁆𑀚𑀢𑀻𑀢𑀺 𑀥𑀫𑁆𑀫𑀸𑀦𑀫𑁂𑀯 𑀧𑀥𑀸𑀦𑀸𑀦𑀁 𑀧𑀼𑀘𑁆𑀙𑀺𑀢𑀩𑁆𑀩𑀢𑀸 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀢𑀸 𑀘 𑀳𑁄𑀢𑀺, 𑀢𑀲𑁆𑀫𑀸 𑀢𑁂 𑀧𑀼𑀘𑁆𑀙𑀺𑀢𑀩𑁆𑀩𑁂 𑀤𑀲𑁆𑀲𑁂𑀢𑀼𑀁 ‘‘𑀓𑀢𑀫𑁂 𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀁, 𑀢𑁂 𑀧𑀦 𑀯𑀺𑀲𑁂𑀲𑀯𑀦𑁆𑀢𑁄 𑀧𑀼𑀘𑁆𑀙𑀺𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 𑀧𑀼𑀦 ‘‘𑀓𑀼𑀲𑀮𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀏𑀯𑀁 𑀧𑀪𑁂𑀤𑀯𑀦𑁆𑀢𑀤𑀲𑁆𑀲𑀦𑀢𑁆𑀣𑀁 𑀅𑀬𑀁 𑀧𑀤𑀸𑀦𑀼𑀓𑁆𑀓𑀫𑁄 𑀓𑀢𑁄𑀢𑀺. ‘‘𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑁂𑀧𑀺 𑀏𑀯𑀫𑁂𑀯 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. ‘‘𑀧𑀪𑁂𑀤𑀢𑁄 𑀥𑀫𑁆𑀫𑀸𑀦𑀁 𑀤𑁂𑀲𑀦𑀁 𑀤𑀻𑀧𑁂𑀢𑁆𑀯𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀇𑀫𑀲𑁆𑀫𑀺𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀅𑀦𑁂𑀓𑀧𑁆𑀧𑀪𑁂𑀤𑀸 𑀤𑁂𑀲𑁂𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀸𑀢𑀺 𑀅𑀯𑁄𑀳𑀸𑀭𑀤𑁂𑀲𑀦𑀢𑁄 𑀥𑀫𑁆𑀫𑀸𑀦𑀫𑁂𑀯 𑀤𑁂𑀲𑁂𑀢𑀩𑁆𑀩𑀢𑁆𑀢𑀸 𑀢𑁂𑀲𑀜𑁆𑀘 𑀖𑀦𑀯𑀺𑀦𑀺𑀩𑁆𑀪𑁄𑀕𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀸𑀯𑀳𑀦𑀢𑁄 𑀧𑀪𑁂𑀤𑀯𑀦𑁆𑀢𑀸𑀦𑀁 𑀤𑁂𑀲𑁂𑀢𑀩𑁆𑀩𑀢𑁆𑀢𑀸 ‘‘𑀓𑀼𑀲𑀮𑀸…𑀧𑁂… 𑀤𑀻𑀧𑁂𑀢𑁆𑀯𑀸’’𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀏𑀯𑀫𑁂𑀯 𑀳𑀺 𑀬𑀣𑀸𑀯𑀼𑀢𑁆𑀢𑀤𑀻𑀧𑀦𑀲𑁆𑀲 𑀳𑁂𑀢𑀼𑀁 𑀲𑀓𑀸𑀭𑀡𑀁 𑀧𑀓𑀸𑀲𑁂𑀢𑀼𑀁 𑀧𑀼𑀦 ‘‘𑀥𑀫𑁆𑀫𑀸𑀬𑁂𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺. 𑀥𑀫𑁆𑀫𑀸𑀢𑀺 𑀲𑀸𑀫𑀜𑁆𑀜𑀫𑀢𑁆𑀢𑀯𑀘𑀦𑁂𑀦 𑀲𑀫𑀽𑀳𑀸𑀤𑀺𑀖𑀦𑀯𑀲𑁂𑀦 𑀏𑀓𑀢𑁆𑀢𑀕𑁆𑀕𑀳𑀡𑀁 𑀳𑁄𑀢𑀻𑀢𑀺 𑀏𑀓𑀢𑁆𑀢𑀯𑀺𑀦𑀺𑀩𑁆𑀪𑁄𑀕𑀓𑀭𑀡𑀁 𑀖𑀦𑀯𑀺𑀦𑀺𑀩𑁆𑀪𑁄𑀕𑀜𑀸𑀡𑀁 𑀆𑀯𑀳𑀢𑀺 𑀧𑀪𑁂𑀤𑀤𑁂𑀲𑀦𑀸, 𑀢𑀣𑀸 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁 𑀅𑀩𑁆𑀬𑀸𑀓𑀢𑀸𑀤𑀺𑀅𑀢𑁆𑀣𑀸𑀦𑀜𑁆𑀘 𑀤𑀻𑀧𑀦𑀢𑁄 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸𑀤𑀺𑀜𑀸𑀡𑀜𑁆𑀘 𑀆𑀯𑀳𑀢𑀺. ‘‘𑀧𑀪𑁂𑀤𑀯𑀦𑁆𑀢𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺 𑀏𑀢𑀁 𑀯𑀺𑀯𑀭𑀺𑀢𑀼𑀁 ‘‘𑀇𑀤𑀸𑀦𑀺 𑀬𑁂 𑀢𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀧𑀪𑁂𑀤…𑀧𑁂… 𑀬𑀼𑀚𑁆𑀚𑀢𑀺 𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀬𑀼𑀢𑁆𑀢𑀲𑁆𑀲 𑀯𑀺𑀲𑁂𑀲𑀦𑀢𑁆𑀢𑀸. 𑀅𑀣 𑀯𑀸 𑀉𑀤𑁆𑀤𑁂𑀲𑁄 𑀥𑀫𑁆𑀫𑀧𑁆𑀧𑀥𑀸𑀦𑁄, 𑀧𑀼𑀘𑁆𑀙𑀸 𑀲𑀁𑀲𑀬𑀺𑀢𑀧𑁆𑀧𑀥𑀸𑀦𑀸, 𑀦 𑀘 𑀥𑀫𑁆𑀫𑀪𑀸𑀯𑁄 𑀲𑀁𑀲𑀬𑀺𑀢𑁄, 𑀓𑀼𑀲𑀮𑀸𑀤𑀺𑀪𑁂𑀤𑁄 𑀧𑀦 𑀲𑀁𑀲𑀬𑀺𑀢𑁄𑀢𑀺 𑀦𑀺𑀘𑁆𑀙𑀺𑀢𑀲𑀁𑀲𑀬𑀺𑀢𑀯𑀲𑁂𑀦𑀸𑀬𑀁 𑀧𑀤𑀸𑀦𑀼𑀓𑁆𑀓𑀫𑁄 𑀓𑀢𑁄.

𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀯𑀘𑀦𑁂. 𑀓𑀺𑀫𑀢𑁆𑀣𑀫𑀸𑀳 𑀪𑀕𑀯𑀸𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 𑀆𑀳 ‘‘𑀲𑀫𑀬𑁂 𑀦𑀺𑀤𑁆𑀤𑀺𑀲𑀺 𑀘𑀺𑀢𑁆𑀢’’𑀦𑁆𑀢𑀺. 𑀧𑀭𑀺𑀬𑁄𑀲𑀸𑀦𑁂𑀢𑀺 𑀲𑀫𑀬𑁂 𑀘𑀺𑀢𑁆𑀢𑀦𑀺𑀤𑁆𑀤𑁂𑀲𑀲𑁆𑀲 ‘‘𑀬𑀲𑁆𑀫𑀺𑀁…𑀧𑁂… 𑀆𑀭𑀩𑁆𑀪𑀸’’𑀢𑀺 𑀏𑀢𑀲𑁆𑀲 𑀧𑀭𑀺𑀬𑁄𑀲𑀸𑀦𑁂. 𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀢𑀲𑁆𑀫𑀺𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀫𑀬𑁂. 𑀘𑀺𑀢𑁆𑀢𑁂𑀦 𑀲𑀫𑀬𑀁 𑀦𑀺𑀬𑀫𑁂𑀢𑁆𑀯𑀸𑀦 𑀅𑀣 𑀧𑀘𑁆𑀙𑀸 𑀩𑁄𑀥𑁂𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀚𑁆𑀚𑀫𑀸𑀦𑁂𑀧𑀺 𑀪𑁄𑀚𑀦𑀕𑀫𑀦𑀸𑀤𑀺𑀲𑀫𑀬𑀦𑀸𑀦𑀢𑁆𑀢𑁂 𑀲𑀫𑀯𑀸𑀬𑀸𑀤𑀺𑀦𑀸𑀦𑀢𑁆𑀢𑁂 𑀘 𑀬𑀣𑀸𑀯𑀼𑀢𑁆𑀢𑀘𑀺𑀢𑁆𑀢𑀦𑀺𑀬𑀫𑀺𑀢𑀸 𑀯𑀺𑀲𑁂𑀲𑀺𑀢𑀸 𑀅𑀜𑁆𑀜𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀥𑀺𑀧𑁆𑀧𑁂𑀢𑀸𑀦𑀁 𑀨𑀲𑁆𑀲𑀸𑀤𑀻𑀦𑀁 𑀅𑀪𑀸𑀯𑀸 𑀘𑀺𑀢𑁆𑀢𑀦𑀺𑀬𑀫𑀺𑀢𑁂 𑀲𑀫𑀬𑁂 𑀨𑀲𑁆𑀲𑀸𑀤𑀬𑁄 𑀩𑁄𑀥𑁂𑀢𑀼𑀁 𑀯𑀺𑀲𑁂𑀲𑀦𑀫𑁂𑀯 𑀢𑀸𑀯 𑀘𑀺𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀦𑀺𑀤𑁆𑀤𑀺𑀲𑀻𑀢𑀺 𑀅𑀢𑁆𑀣𑁄. 𑀯𑀺𑀲𑁂𑀲𑀺𑀢𑀩𑁆𑀩𑁄𑀧𑀺 𑀳𑀺 𑀲𑀫𑀬𑁄 𑀅𑀢𑁆𑀢𑀦𑁄 𑀉𑀧𑀓𑀸𑀭𑀢𑁆𑀣𑀁 𑀯𑀺𑀲𑁂𑀲𑀦𑀪𑀸𑀯𑀁 𑀆𑀧𑀚𑁆𑀚𑀢𑀺, 𑀯𑀺𑀲𑁂𑀲𑀦𑀪𑀽𑀢𑀜𑁆𑀘 𑀘𑀺𑀢𑁆𑀢𑀁 𑀢𑀤𑀼𑀧𑀓𑀸𑀭𑀢𑁆𑀣𑀁 𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑀦𑁆𑀢𑀺. 𑀲𑀦𑁆𑀢𑀢𑀺𑀖𑀦𑀸𑀤𑀻𑀦𑀁 𑀅𑀬𑀁 𑀯𑀺𑀲𑁂𑀲𑁄 𑁋 𑀧𑀼𑀭𑀺𑀫𑀧𑀘𑁆𑀙𑀺𑀫𑀸𑀦𑀁 𑀦𑀺𑀭𑀦𑁆𑀢𑀭𑀢𑀸𑀬 𑀏𑀓𑀻𑀪𑀽𑀢𑀸𑀦𑀫𑀺𑀯 𑀧𑀯𑀢𑁆𑀢𑀺 𑀲𑀦𑁆𑀢𑀢𑀺𑀖𑀦𑀢𑀸, 𑀢𑀣𑀸 𑀨𑀲𑁆𑀲𑀸𑀤𑀻𑀦𑀁 𑀏𑀓𑀲𑀫𑀽𑀳𑀯𑀲𑁂𑀦 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀓𑀺𑀘𑁆𑀘𑀪𑁂𑀤𑀯𑀲𑁂𑀦 𑀏𑀓𑀸𑀭𑀫𑁆𑀫𑀡𑀢𑀸𑀯𑀲𑁂𑀦 𑀘 𑀏𑀓𑀻𑀪𑀽𑀢𑀸𑀦𑀫𑀺𑀯 𑀧𑀯𑀢𑁆𑀢𑀺 𑀲𑀫𑀽𑀳𑀸𑀤𑀺𑀖𑀦𑀢𑀸𑀢𑀺.

𑀓𑀸𑀮𑀜𑁆𑀘 𑀲𑀫𑀬𑀜𑁆𑀘𑀸𑀢𑀺 𑀬𑀼𑀢𑁆𑀢𑀓𑀸𑀮𑀜𑁆𑀘 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀜𑁆𑀘. 𑀔𑀡𑁄𑀢𑀺 𑀑𑀓𑀸𑀲𑁄. 𑀢𑀣𑀸𑀕𑀢𑀼𑀧𑁆𑀧𑀸𑀤𑀸𑀤𑀺𑀓𑁄 𑀳𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀑𑀓𑀸𑀲𑁄 𑀢𑀧𑁆𑀧𑀘𑁆𑀘𑀬𑀧𑀝𑀺𑀮𑀸𑀪𑀳𑁂𑀢𑀼𑀢𑁆𑀢𑀸. 𑀔𑀡𑁄 𑀏𑀯 𑀘 𑀲𑀫𑀬𑁄. 𑀬𑁄 ‘‘𑀔𑀡𑁄’’𑀢𑀺 𑀘 ‘‘𑀲𑀫𑀬𑁄’’𑀢𑀺 𑀘 𑀯𑀼𑀘𑁆𑀘𑀢𑀺, 𑀲𑁄 𑀏𑀓𑁄𑀯𑀸𑀢𑀺 𑀅𑀢𑁆𑀣𑁄. 𑀫𑀳𑀸𑀲𑀫𑀬𑁄𑀢𑀺 𑀫𑀳𑀸𑀲𑀫𑀽𑀳𑁄. 𑀲𑀫𑀬𑁄𑀧𑀺 𑀔𑁄𑀢𑀺 𑀲𑀺𑀓𑁆𑀔𑀸𑀧𑀭𑀺𑀧𑀽𑀭𑀡𑀲𑁆𑀲 𑀳𑁂𑀢𑀼𑀧𑀺. 𑀲𑀫𑀬𑀧𑁆𑀧𑀯𑀸𑀤𑀓𑁂𑀢𑀺 𑀤𑀺𑀝𑁆𑀞𑀺𑀧𑁆𑀧𑀯𑀸𑀤𑀓𑁂. 𑀢𑀢𑁆𑀣 𑀳𑀺 𑀦𑀺𑀲𑀺𑀦𑁆𑀦𑀸 𑀢𑀺𑀢𑁆𑀣𑀺𑀬𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀫𑀬𑀁 𑀧𑀯𑀤𑀦𑁆𑀢𑀻𑀢𑀺. 𑀅𑀢𑁆𑀣𑀸𑀪𑀺𑀲𑀫𑀬𑀸𑀢𑀺 𑀳𑀺𑀢𑀧𑀝𑀺𑀮𑀸𑀪𑀸. 𑀅𑀪𑀺𑀲𑀫𑁂𑀢𑀩𑁆𑀩𑁄𑀢𑀺 𑀅𑀪𑀺𑀲𑀫𑀬𑁄, 𑀅𑀪𑀺𑀲𑀫𑀬𑁄 𑀅𑀢𑁆𑀣𑁄 𑀅𑀪𑀺𑀲𑀫𑀬𑀝𑁆𑀞𑁄𑀢𑀺 𑀧𑀻𑀴𑀦𑀸𑀤𑀻𑀦𑀺 𑀅𑀪𑀺𑀲𑀫𑀺𑀢𑀩𑁆𑀩𑀪𑀸𑀯𑁂𑀦 𑀏𑀓𑀻𑀪𑀸𑀯𑀁 𑀉𑀧𑀦𑁂𑀢𑁆𑀯𑀸 𑀯𑀼𑀢𑁆𑀢𑀸𑀦𑀺, 𑀅𑀪𑀺𑀲𑀫𑀬𑀲𑁆𑀲 𑀯𑀸 𑀧𑀝𑀺𑀯𑁂𑀥𑀲𑁆𑀲 𑀯𑀺𑀲𑀬𑀪𑀽𑀢𑁄 𑀅𑀢𑁆𑀣𑁄 𑀅𑀪𑀺𑀲𑀫𑀬𑀝𑁆𑀞𑁄𑀢𑀺 𑀢𑀸𑀦𑁂𑀯 𑀢𑀣𑀸 𑀏𑀓𑀢𑁆𑀢𑁂𑀦 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀧𑀻𑀴𑀦𑀁 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀢𑀁𑀲𑀫𑀗𑁆𑀕𑀺𑀦𑁄 𑀳𑀺𑀁 𑀲𑀦𑀁 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀓𑀭𑀡𑀁. 𑀲𑀦𑁆𑀢𑀸𑀧𑁄 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀤𑀺𑀪𑀸𑀯𑁂𑀦 𑀲𑀦𑁆𑀢𑀸𑀧𑀦𑀁 𑀧𑀭𑀺𑀤𑀳𑀦𑀁.

‘‘𑀇𑀥𑀸’’𑀢𑀺 𑀯𑀘𑀦𑀁 𑀅𑀓𑀼𑀲𑀮𑁂𑀲𑀼 𑀅𑀩𑁆𑀬𑀸𑀓𑀢𑁂𑀲𑀼 𑀘 𑀓𑁂𑀲𑀼𑀘𑀺 𑀔𑀡𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀦𑀦𑀼 𑀓𑀼𑀲𑀮𑀸𑀦𑀜𑁆𑀘 𑀦𑀯𑀫𑁂𑀦 𑀔𑀡𑁂𑀦 𑀯𑀺𑀦𑀸 𑀉𑀧𑁆𑀧𑀢𑁆𑀢𑀺 𑀳𑁄𑀢𑀻𑀢𑀺? 𑀦𑁄 𑀦 𑀳𑁄𑀢𑀺, 𑀦 𑀧𑀦 𑀦𑀯𑀫𑁄 𑀏𑀯 𑀔𑀡𑁄, 𑀘𑀢𑀼𑀘𑀓𑁆𑀓𑀸𑀦𑀺𑀧𑀺 𑀔𑀡𑁄𑀢𑀺 𑀯𑀼𑀢𑁆𑀢𑀸𑀦𑀺. 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺𑀔𑀡𑀫𑀦𑁆𑀢𑀭𑁂𑀦 𑀦𑀢𑁆𑀣𑀺 𑀓𑀼𑀲𑀮𑀲𑁆𑀲 𑀉𑀧𑁆𑀧𑀢𑁆𑀢𑀻𑀢𑀺 𑀔𑀡𑁄 𑀇𑀥 𑀕𑀳𑀺𑀢𑁄. 𑀇𑀦𑁆𑀤𑁆𑀭𑀺𑀬𑀯𑀺𑀲𑀬𑀫𑀦𑀲𑀺𑀓𑀸𑀭𑀸𑀥𑀻𑀦𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀏𑀯𑀫𑀸𑀤𑀺 𑀲𑀸𑀥𑀸𑀭𑀡𑀨𑀮𑀁 𑀤𑀝𑁆𑀞𑀩𑁆𑀩𑀁. 𑀦𑀯𑀫𑁄𑀢𑀺 𑀅𑀝𑁆𑀞𑀓𑁆𑀔𑀡𑁂 𑀉𑀧𑀸𑀤𑀸𑀬 𑀯𑀼𑀢𑁆𑀢𑀁. 𑀘𑀢𑀼𑀘𑀓𑁆𑀓𑀁 𑀯𑀢𑁆𑀢𑀢𑀻𑀢𑀺 𑀧𑀼𑀦 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑀸𑀤𑀺𑀲𑀫𑁆𑀧𑀢𑁆𑀢𑀺 𑀘𑀢𑀼𑀘𑀓𑁆𑀓𑀁 𑀯𑀺𑀧𑀭𑀺𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀑𑀓𑀸𑀲𑀪𑀽𑀢𑀸𑀦𑀻𑀢𑀺 𑀅𑀢𑁆𑀢𑀦𑁄 𑀦𑀺𑀩𑁆𑀩𑀢𑁆𑀢𑀺𑀬𑀸 ‘‘𑀇𑀤𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀼 𑀓𑀼𑀲𑀮𑀸𑀦𑀻’’𑀢𑀺 𑀅𑀦𑀼𑀫𑀢𑀺𑀤𑀸𑀦𑀁 𑀯𑀺𑀬 𑀪𑀽𑀢𑀸𑀦𑀺.

𑀘𑀺𑀢𑁆𑀢𑀓𑀸𑀮𑁄𑀢𑀺 𑀥𑀫𑁆𑀫𑁂𑀦𑁂𑀯 𑀲𑀢𑀸 𑀓𑀸𑀮𑁄 𑀯𑀺𑀲𑁂𑀲𑀺𑀢𑁄, 𑀦 𑀢𑀲𑁆𑀲 𑀧𑀯𑀢𑁆𑀢𑀺𑀢𑁆𑀣 𑀧𑀯𑀢𑁆𑀢𑀺𑀲𑁆𑀲𑀢𑀺 𑀧𑀯𑀢𑁆𑀢𑀢𑀻𑀢𑀺 𑀏𑀢𑁂𑀦 𑀅𑀯𑀢𑁆𑀣𑀸𑀯𑀺𑀲𑁂𑀲𑁂𑀦, 𑀦𑀸𑀧𑀺 𑀢𑀲𑁆𑀲 𑀯𑀺𑀚𑀸𑀦𑀦𑀓𑀺𑀘𑁆𑀘𑁂𑀦, 𑀢𑀲𑁆𑀫𑀸 𑀏𑀯𑀁𑀯𑀺𑀥𑁂 𑀥𑀫𑁆𑀫𑁂 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑁄𑀢𑀺 𑀯𑀼𑀢𑁆𑀢𑁄. 𑀓𑀫𑀧𑁆𑀧𑀯𑀢𑁆𑀢𑀸 𑀯𑀺𑀲𑁂𑀲𑀸 𑀏𑀯 𑀧𑀝𑀺𑀧𑀸𑀝𑀻𑀢𑀺 𑀩𑀻𑀚𑀪𑀸𑀯𑁄 𑀘 𑀧𑀝𑀺𑀧𑀸𑀝𑀻𑀢𑀺 𑀯𑀢𑁆𑀢𑀼𑀫𑀭𑀳𑀢𑀻𑀢𑀺 𑀇𑀫𑀺𑀦𑀸𑀥𑀺𑀧𑁆𑀧𑀸𑀬𑁂𑀦 ‘‘𑀩𑀻𑀚𑀓𑀸𑀮𑁄𑀢𑀺 𑀥𑀫𑁆𑀫𑀧𑀝𑀺𑀧𑀸𑀝𑀺𑀁 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑁄’’𑀢𑀺 𑀆𑀳. 𑀥𑀫𑁆𑀫𑀧𑀝𑀺𑀧𑀸𑀝𑀺𑀁 𑀯𑀸𑀢𑀺 𑀅𑀝𑁆𑀞𑀓𑀮𑀸𑀧𑀥𑀫𑁆𑀫𑁂 𑀲𑀦𑁆𑀥𑀸𑀬𑀸𑀳. 𑀲𑀜𑁆𑀘𑀺𑀢𑀸 𑀯𑀺𑀬 𑀕𑀬𑁆𑀳𑀫𑀸𑀦𑀓𑀸𑀮𑀸 𑀏𑀯 𑀓𑀸𑀮𑀲𑀜𑁆𑀘𑀬𑁄, 𑀬𑀣𑀸 𑀯𑀸 𑀢𑀣𑀸 𑀯𑀸 𑀓𑀸𑀮𑁄𑀢𑀺 𑀏𑀓𑀁 𑀲𑀪𑀸𑀯𑀁 𑀕𑀳𑁂𑀢𑁆𑀯𑀸 𑀅𑀪𑀺𑀦𑀺𑀯𑁂𑀲𑀁 𑀓𑀭𑁄𑀦𑁆𑀢𑀲𑁆𑀲 𑀢𑀤𑀪𑀺𑀦𑀺𑀯𑁂𑀲𑀦𑀺𑀲𑁂𑀥𑀦𑀢𑁆𑀣𑀁 ‘‘𑀲𑁄 𑀧𑀦𑁂𑀲 𑀲𑀪𑀸𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀓𑁄’’𑀢𑀺 𑀆𑀳. 𑀜𑀢𑁆𑀯𑀸 𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑀭𑁄 𑀧𑀦 𑀳𑁂𑀢𑀽𑀢𑀺 𑀏𑀲 𑀲𑀫𑀬𑁄 𑀧𑀘𑁆𑀘𑀬𑁄𑀯 𑀯𑀺𑀜𑁆𑀜𑁂𑀬𑁆𑀬𑁄. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀅𑀥𑀺𑀓𑀸𑀭𑁂 𑀦 𑀳𑁂𑀢𑀼𑀳𑁂𑀢𑀼 𑀲𑀸𑀥𑀸𑀭𑀡𑀳𑁂𑀢𑀼 𑀘𑀸𑀢𑀺 𑀅𑀢𑁆𑀣𑁄. 𑀲𑀫𑀯𑀸𑀬𑁄 𑀧𑀘𑁆𑀘𑀬𑀲𑀸𑀫𑀕𑁆𑀕𑀻, 𑀳𑁂𑀢𑀼 𑀧𑀦 𑀏𑀓𑁂𑀓𑁄 𑀧𑀘𑁆𑀘𑀬𑁄𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀅𑀦𑁂𑀓𑀧𑀘𑁆𑀘𑀬𑀤𑀲𑁆𑀲𑀦𑁂𑀦 𑀢𑀁𑀢𑀁𑀤𑁆𑀯𑀸𑀭𑀺𑀓𑀸𑀦𑀁 𑀓𑀼𑀲𑀮𑀸𑀦𑀜𑁆𑀘 𑀢𑀧𑁆𑀧𑀘𑁆𑀘𑀬𑀢𑀁 𑀤𑀲𑁆𑀲𑁂𑀢𑀺.

𑀧𑀭𑀺𑀕𑁆𑀕𑀳𑁄 𑀓𑀢𑁄 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺. 𑀏𑀓𑀓𑀸𑀭𑀡𑀯𑀸𑀤𑁄𑀢𑀺 𑀧𑀓𑀢𑀺𑀓𑀸𑀭𑀡𑀯𑀸𑀤𑁄, 𑀇𑀲𑁆𑀲𑀭𑀓𑀸𑀭𑀡𑀯𑀸𑀤𑁄 𑀯𑀸. 𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑁄𑀢𑀺 𑀅𑀯𑀬𑀯𑀸𑀦𑀁 𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑀢𑀸𑀬 𑀲𑀫𑀼𑀤𑀸𑀬𑁄 𑀯𑀼𑀢𑁆𑀢𑁄. 𑀅𑀧𑁂𑀓𑁆𑀔𑀸 𑀘 𑀬𑀸𑀯 𑀲𑀳𑀸𑀬𑀓𑀸𑀭𑀡𑀲𑀫𑀸𑀕𑀫𑁄 𑀦 𑀳𑁄𑀢𑀺, 𑀢𑀸𑀯 𑀨𑀮𑀲𑁆𑀲 𑀅𑀦𑀺𑀧𑁆𑀨𑀸𑀤𑀦𑀁 𑀲𑀫𑀸𑀕𑀫𑁂 𑀦𑀺𑀧𑁆𑀨𑀸𑀤𑀦𑀲𑀫𑀢𑁆𑀣𑀲𑁆𑀲 𑀦𑀺𑀧𑁆𑀨𑀸𑀤𑀦𑀜𑁆𑀘. 𑀲𑀫𑀸𑀕𑀫𑁄 𑀘 𑀬𑁂𑀲𑀼 𑀬𑀼𑀚𑁆𑀚𑀫𑀸𑀦𑁂𑀲𑀼 𑀦𑀺𑀩𑁆𑀬𑀸𑀧𑀸𑀭𑁂𑀲𑀼𑀧𑀺 𑀨𑀮𑀲𑁆𑀲 𑀧𑀯𑀢𑁆𑀢𑀺, 𑀢𑁂𑀲𑀁 𑀲𑀩𑁆𑀪𑀸𑀯𑁄𑀢𑀺.

𑀅𑀲𑀸𑀫𑀕𑁆𑀕𑀻…𑀧𑁂… 𑀧𑀢𑁆𑀢𑀺𑀢𑁄𑀢𑀺 𑀘𑀓𑁆𑀔𑀼𑀭𑀽𑀧𑀸𑀮𑁄𑀓𑀫𑀦𑀲𑀺𑀓𑀸𑀭𑀸𑀦𑀁 𑀅𑀲𑀫𑀯𑁂𑀢𑀸𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀅𑀳𑁂𑀢𑀼𑀪𑀸𑀯𑁂 𑀲𑀢𑀺 𑀲𑀫𑀯𑁂𑀢𑀸𑀦𑀜𑁆𑀘 𑀢𑀁𑀲𑀪𑀸𑀯𑀸𑀯𑀺𑀦𑀺𑀯𑀢𑁆𑀢𑀺𑀢𑁄 𑀳𑁂𑀢𑀼𑀪𑀸𑀯𑀸𑀦𑀸𑀧𑀢𑁆𑀢𑀺𑀢𑁄𑀢𑀺 𑀅𑀢𑁆𑀣𑁄. 𑀦 𑀳𑀺 𑀲𑀪𑀸𑀯𑀦𑁆𑀢𑀭𑀁 𑀅𑀜𑁆𑀜𑁂𑀦 𑀲𑀳𑀺𑀢𑀁 𑀲𑀪𑀸𑀯𑀦𑁆𑀢𑀭𑀁 𑀳𑁄𑀢𑀻𑀢𑀺. 𑀏𑀓𑀲𑁆𑀫𑀺𑀦𑁆𑀢𑀺 𑀅𑀦𑁆𑀥𑀲𑀢𑁂 𑀏𑀓𑁂𑀓𑀲𑁆𑀫𑀺𑀁 𑀅𑀦𑁆𑀥𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀜𑁆𑀜𑀣𑀸 𑀬𑀣𑀸𑀭𑀼𑀢𑀯𑀲𑁂𑀦 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀏𑀓𑀲𑁆𑀲 𑀅𑀦𑁆𑀥𑀲𑁆𑀲 𑀤𑀲𑁆𑀲𑀦𑀸𑀲𑀫𑀢𑁆𑀣𑀢𑀸 𑀲𑀩𑁆𑀩𑁂𑀲𑀫𑁆𑀧𑀺 𑀦 𑀳𑁄𑀢𑀺, 𑀦𑀸𑀧𑀺 𑀏𑀓𑀲𑁆𑀲 𑀅𑀲𑀫𑀢𑁆𑀣𑀢𑀸𑀬 𑀲𑀩𑁆𑀩𑁂𑀲𑀫𑁆𑀧𑀺 𑀅𑀲𑀫𑀢𑁆𑀣𑀢𑀸 𑀯𑀼𑀢𑁆𑀢𑀸, 𑀓𑀺𑀦𑁆𑀢𑀼 𑀲𑀩𑁆𑀩𑁂𑀲𑀁 𑀯𑀺𑀲𑀼𑀁 𑀅𑀲𑀫𑀢𑁆𑀣𑀢𑀸𑀬 𑀏𑀯𑀸𑀢𑀺 𑀉𑀧𑀫𑀸𑀯𑀘𑀦𑀁 𑀦 𑀬𑀼𑀚𑁆𑀚𑁂𑀬𑁆𑀬, 𑀦𑀸𑀧𑀺 𑀉𑀧𑀫𑁄𑀧𑀫𑀺𑀢𑀩𑁆𑀩𑀲𑀫𑁆𑀩𑀦𑁆𑀥𑁄. 𑀦 𑀳𑀺 𑀉𑀧𑀫𑀺𑀢𑀩𑁆𑀩𑁂𑀲𑀼 𑀘𑀓𑁆𑀔𑀸𑀤𑀻𑀲𑀼 𑀏𑀓𑀲𑁆𑀲 𑀅𑀲𑀫𑀢𑁆𑀣𑀢𑀸𑀬 𑀲𑀩𑁆𑀩𑁂𑀲𑀫𑁆𑀧𑀺 𑀅𑀲𑀫𑀢𑁆𑀣𑀢𑀸 𑀯𑀼𑀢𑁆𑀢𑀸, 𑀓𑀺𑀦𑁆𑀢𑀼 𑀲𑀩𑁆𑀩𑁂𑀲𑀁 𑀯𑀺𑀲𑀼𑀁 𑀅𑀲𑀫𑀢𑁆𑀣𑀢𑀸𑀬 𑀲𑀳𑀺𑀢𑀸𑀦𑀁 𑀅𑀲𑀫𑀢𑁆𑀣𑀢𑀸𑀢𑀺. 𑀅𑀦𑁆𑀥𑀲𑀢𑀁 𑀧𑀲𑁆𑀲𑀢𑀻𑀢𑀺 𑀘 𑀅𑀦𑁆𑀥𑀲𑀢𑀁 𑀲𑀳𑀺𑀢𑀁 𑀧𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 𑀅𑀜𑁆𑀜𑀣𑀸 𑀯𑀼𑀢𑁆𑀢𑀦𑀬𑁂𑀦 𑀉𑀧𑀫𑀺𑀢𑀩𑁆𑀩𑀸𑀲𑀫𑀸𑀦𑀢𑀸𑀧𑀢𑁆𑀢𑀺𑀢𑁄. 𑀲𑀸𑀥𑀸…𑀧𑁂… 𑀞𑀺𑀢𑀪𑀸𑀯𑁄𑀢𑀺 𑀬𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀨𑀮𑀧𑁆𑀧𑀯𑀢𑁆𑀢𑀺 𑀢𑁂𑀲𑀁 𑀲𑀫𑁄𑀥𑀸𑀦𑁂, 𑀬𑀣𑀸 𑀧𑀯𑀢𑁆𑀢𑀫𑀸𑀦𑁂𑀲𑀼 𑀢𑁂𑀲𑀼 𑀨𑀮𑀧𑁆𑀧𑀯𑀢𑁆𑀢𑀺, 𑀢𑀣𑀸 𑀧𑀯𑀢𑁆𑀢𑀺𑀫𑀸𑀳. 𑀦 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀅𑀦𑁂𑀓𑁂𑀲𑀁 𑀲𑀫𑁄𑀥𑀸𑀦𑀫𑀢𑁆𑀢𑀁 𑀲𑀸𑀫𑀕𑁆𑀕𑀻. 𑀦 𑀳𑀺 𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀲𑀫𑁄𑀥𑀸𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲, 𑀓𑀝𑁆𑀞𑀓𑀧𑀸𑀮𑀧𑀸𑀲𑀸𑀡𑀲𑀫𑁄𑀥𑀸𑀦𑀁 𑀯𑀸 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀳𑁂𑀢𑀽𑀢𑀺. 𑀢𑀦𑁆𑀢𑀺 𑀢𑀁 𑀤𑀲𑁆𑀲𑀦𑀁. 𑀅𑀲𑀸…𑀧𑁂… 𑀲𑀺𑀤𑁆𑀥𑁄𑀢𑀺 𑀦𑀸𑀬𑀫𑀢𑁆𑀣𑁄 𑀲𑀸𑀥𑁂𑀢𑀩𑁆𑀩𑁄 𑀯𑀺𑀲𑀼𑀁 𑀅𑀳𑁂𑀢𑀽𑀦𑀁 𑀘𑀓𑁆𑀔𑀸𑀤𑀻𑀦𑀁 𑀲𑀳𑀺𑀢𑀸𑀦𑀁 𑀳𑁂𑀢𑀼𑀪𑀸𑀯𑀲𑁆𑀲 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀦 𑀳𑀺 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑁂 𑀬𑀼𑀢𑁆𑀢𑀺𑀫𑀕𑁆𑀕𑀦𑀁 𑀬𑀼𑀢𑁆𑀢𑀦𑁆𑀢𑀺.

𑀫𑀦𑀼𑀲𑁆𑀲𑀢𑁆𑀢𑀸𑀤𑀻𑀦𑀁 𑀔𑀡𑀸𑀯𑀬𑀯𑀸𑀦𑀁 𑀲𑀸𑀫𑀕𑁆𑀕𑀻 𑀔𑀡𑀲𑀸𑀫𑀕𑁆𑀕𑀻, 𑀢𑀁 𑀯𑀺𑀦𑀸 𑀲𑁄 𑀦𑀯𑀫𑀘𑀓𑁆𑀓𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑁄 𑀔𑀡𑁄 𑀦𑀢𑁆𑀣𑀺. 𑀲𑀸 𑀏𑀯 𑀳𑀺 𑀔𑀡𑀲𑀸𑀫𑀕𑁆𑀕𑀻 𑀲𑁄 𑀔𑀡𑁄𑀢𑀺 𑀅𑀢𑁆𑀣𑁄. 𑀔𑀡…𑀧𑁂… 𑀤𑀻𑀧𑁂𑀢𑀺 𑀅𑀢𑁆𑀢𑀦𑁄 𑀤𑀼𑀮𑁆𑀮𑀪𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀔𑀡𑀢𑁆𑀣𑁄 𑀯𑀸 𑀲𑀫𑀬𑀲𑀤𑁆𑀤𑁄 𑀔𑀡𑀲𑀗𑁆𑀔𑀸𑀢𑁄 𑀲𑀫𑀬𑁄𑀢𑀺 𑀯𑀼𑀢𑁆𑀢𑁄. 𑀲𑁄 𑀬𑀲𑁆𑀫𑀺𑀁 𑀤𑀼𑀮𑁆𑀮𑀪𑁂 𑀔𑀡𑁂 𑀲𑀢𑀻𑀢𑀺 𑀇𑀫𑀲𑁆𑀲𑀢𑁆𑀣𑀲𑁆𑀲 𑀯𑀺𑀪𑀸𑀯𑀦𑀯𑀲𑁂𑀦 𑀢𑀤𑀸𑀬𑀢𑁆𑀢𑀸𑀬 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀬𑀸 𑀤𑀼𑀮𑁆𑀮𑀪𑀪𑀸𑀯𑀁 𑀤𑀻𑀧𑁂𑀢𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀲𑀫𑀯𑀸𑀬…𑀧𑁂… 𑀯𑀼𑀢𑁆𑀢𑀺𑀁 𑀤𑀻𑀧𑁂𑀢𑀻𑀢𑀺 𑀏𑀢𑁆𑀣 𑀇𑀢𑁄 𑀧𑀭𑁂𑀲𑀼 𑀘 𑀬𑁄𑀚𑀦𑀸 𑀢𑀲𑁆𑀲 𑀢𑀲𑁆𑀲 𑀢𑀁𑀢𑀁𑀤𑀻𑀧𑀦𑁂 𑀓𑀸𑀢𑀩𑁆𑀩𑀸.

𑀢𑀲𑁆𑀲 𑀧𑀼𑀭𑀺𑀲𑀲𑁆𑀲𑀸𑀢𑀺 ‘‘𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀯𑁂 𑀘𑀢𑁆𑀢𑀸𑀭𑁄 𑀤𑀴𑁆𑀳𑀥𑀫𑁆𑀫𑀸 𑀥𑀦𑀼𑀕𑁆𑀕𑀳𑀸 𑀲𑀺𑀓𑁆𑀔𑀺𑀢𑀸 𑀓𑀢𑀳𑀢𑁆𑀣𑀸 𑀓𑀢𑀼𑀧𑀸𑀲𑀦𑀸 𑀘𑀢𑀼𑀤𑁆𑀤𑀺𑀲𑀸 𑀞𑀺𑀢𑀸 𑀅𑀲𑁆𑀲𑀼, 𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 ‘𑀅𑀳𑀁 𑀇𑀫𑁂𑀲𑀁…𑀧𑁂… 𑀓𑀢𑀼𑀧𑀸𑀲𑀦𑀸𑀦𑀁 𑀓𑀡𑁆𑀟𑁂 𑀔𑀺𑀢𑁆𑀢𑁂 𑀔𑀺𑀢𑁆𑀢𑁂 𑀅𑀧𑁆𑀧𑀢𑀺𑀝𑁆𑀞𑀺𑀢𑁂 𑀧𑀣𑀯𑀺𑀬𑀁 𑀕𑀳𑁂𑀢𑁆𑀯𑀸 𑀆𑀳𑀭𑀺𑀲𑁆𑀲𑀸𑀫𑀻’’’𑀢𑀺 (𑀲𑀁. 𑀦𑀺. 𑁨.𑁨𑁨𑁮) 𑀏𑀯𑀁 𑀯𑀼𑀢𑁆𑀢𑀚𑀯𑀦𑀧𑀼𑀭𑀺𑀲𑀲𑁆𑀲. 𑀢𑀸𑀯 𑀧𑀭𑀺𑀢𑁆𑀢𑀓𑁄𑀢𑀺 𑀕𑀫𑀦𑀲𑁆𑀲𑀸𑀤𑀸𑀦𑀁 𑀤𑁂𑀯𑀧𑀼𑀢𑁆𑀢𑀸𑀦𑀁 𑀳𑁂𑀝𑁆𑀞𑀼𑀧𑀭𑀺𑀬𑀸𑀬𑁂𑀦 𑀧𑀝𑀺𑀫𑀼𑀔𑀁 𑀥𑀸𑀯𑀦𑁆𑀢𑀸𑀦𑀁 𑀲𑀺𑀭𑀲𑀺 𑀧𑀸𑀤𑁂 𑀘 𑀩𑀤𑁆𑀥𑀔𑀼𑀭𑀥𑀸𑀭𑀸𑀲𑀦𑁆𑀦𑀺𑀧𑀸𑀢𑀢𑁄 𑀘 𑀧𑀭𑀺𑀢𑁆𑀢𑀢𑀭𑁄 𑀓𑀸𑀮𑁄. 𑀓𑀸𑀮𑀲𑀗𑁆𑀔𑀸𑀢𑁄 𑀲𑀫𑀬𑁄 𑀘𑀺𑀢𑁆𑀢𑀧𑀭𑀺𑀘𑁆𑀙𑀺𑀦𑁆𑀦𑁄 𑀯𑀼𑀘𑁆𑀘𑀫𑀸𑀦𑁄 𑀢𑁂𑀦𑁂𑀯 𑀧𑀭𑀺𑀘𑁆𑀙𑁂𑀤𑀓𑀘𑀺𑀢𑁆𑀢𑁂𑀦 ‘‘𑀏𑀯𑀁 𑀧𑀭𑀺𑀢𑁆𑀢𑁄 𑀅𑀳’’𑀦𑁆𑀢𑀺 𑀅𑀢𑁆𑀢𑀦𑁄 𑀧𑀭𑀺𑀢𑁆𑀢𑀢𑀁 𑀤𑀻𑀧𑁂𑀢𑀺. 𑀬𑀣𑀸 𑀘𑀸𑀳𑀁, 𑀏𑀯𑀁 𑀲𑀩𑁆𑀩𑁄 𑀓𑀼𑀲𑀮𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀓𑀸𑀮𑁄𑀢𑀺 𑀢𑀲𑁆𑀲 𑀧𑀭𑀺𑀢𑁆𑀢𑀢𑀁 𑀤𑀻𑀧𑁂𑀢𑀺. 𑀲𑀤𑁆𑀤𑀲𑁆𑀲 𑀤𑀻𑀧𑀦𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀧𑀓𑀢𑀺𑀯𑀸𑀤𑀻𑀦𑀁 𑀫𑀳𑀢𑁄 𑀯𑀺𑀬 𑀅𑀡𑀼𑀯𑀸𑀤𑀻𑀦𑀁 𑀤𑁆𑀯𑀺𑀅𑀡𑀼𑀓𑀲𑁆𑀲 𑀯𑀺𑀬 𑀘 𑀏𑀓𑀲𑁆𑀲𑁂𑀯. 𑀳𑁂𑀢𑀼…𑀧𑁂… 𑀯𑀼𑀢𑁆𑀢𑀺𑀢𑀁 𑀤𑀻𑀧𑁂𑀢𑀻𑀢𑀺 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀤𑀻𑀧𑀦𑀢𑁄 𑀢𑀧𑁆𑀧𑀭𑀪𑀸𑀯𑀸 𑀳𑁂𑀢𑀼𑀲𑀗𑁆𑀔𑀸𑀢𑀲𑁆𑀲 𑀧𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀤𑀻𑀧𑀦𑀢𑀸 𑀯𑀼𑀢𑁆𑀢𑀸. 𑀲𑀢𑀺 𑀧𑀦 𑀧𑀘𑁆𑀘𑀬𑀸𑀬𑀢𑁆𑀢𑀪𑀸𑀯𑁂 𑀧𑀘𑁆𑀘𑀬𑀲𑀸𑀫𑀕𑁆𑀕𑀻𑀆𑀬𑀢𑁆𑀢𑀢𑀸 𑀲𑀫𑀯𑀸𑀬𑀲𑀗𑁆𑀔𑀸𑀢𑁂𑀦 𑀤𑀻𑀧𑀺𑀬𑀢𑀻𑀢𑀺 𑀅𑀢𑀧𑁆𑀧𑀭𑀪𑀸𑀯𑀢𑁄 𑀢𑀲𑁆𑀲 𑀢𑀁𑀤𑀻𑀧𑀦𑀢𑀸 𑀦 𑀯𑀼𑀢𑁆𑀢𑀸. 𑀅𑀦𑁂𑀦 𑀲𑀫𑀬𑁂𑀦 𑀓𑀢𑁆𑀢𑀼𑀪𑀽𑀢𑁂𑀦, 𑀅𑀦𑁂𑀦 𑀲𑀫𑀬𑁂𑀦 𑀯𑀸 𑀓𑀭𑀡𑀪𑀽𑀢𑁂𑀦 𑀪𑀕𑀯𑀢𑀸 𑀧𑀝𑀺𑀲𑁂𑀥𑀺𑀢𑁄𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀧𑀼𑀭𑀺𑀫𑀸𑀲𑀼 𑀤𑀻𑀧𑀦𑀸𑀲𑀼.

𑀅𑀥𑀺𑀓𑀭𑀡𑀯𑀲𑁂𑀦𑀸𑀢𑀺 𑀆𑀥𑀸𑀭𑀯𑀲𑁂𑀦. 𑀏𑀢𑁆𑀣𑀸𑀢𑀺 𑀓𑀸𑀮𑀲𑀫𑀽𑀳𑀲𑀗𑁆𑀔𑀸𑀢𑁂 𑀲𑀫𑀬𑁂 𑀕𑀳𑀺𑀢𑁂𑀢𑀺 𑀅𑀢𑁆𑀣𑁄. 𑀓𑀸𑀮𑁄𑀧𑀺 𑀳𑀺 𑀘𑀺𑀢𑁆𑀢𑀧𑀭𑀺𑀘𑁆𑀙𑀺𑀦𑁆𑀦𑁄 𑀲𑀪𑀸𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑁄𑀧𑀺 𑀆𑀥𑀸𑀭𑀪𑀸𑀯𑁂𑀦𑁂𑀯 𑀲𑀜𑁆𑀜𑀸𑀢𑁄 ‘‘𑀅𑀥𑀺𑀓𑀭𑀡’’𑀦𑁆𑀢𑀺 𑀯𑀼𑀢𑁆𑀢𑁄 𑀢𑀁𑀔𑀡𑀧𑁆𑀧𑀯𑀢𑁆𑀢𑀸𑀦𑀁 𑀢𑀢𑁄 𑀧𑀼𑀩𑁆𑀩𑁂 𑀧𑀭𑀢𑁄 𑀘 𑀅𑀪𑀸𑀯𑀸. 𑀪𑀸𑀯𑁄𑀢𑀺 𑀓𑀺𑀭𑀺𑀬𑀸. 𑀓𑀺𑀭𑀺𑀬𑀸𑀬 𑀓𑀺𑀭𑀺𑀬𑀦𑁆𑀢𑀭𑀮𑀓𑁆𑀔𑀡𑀁 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀁. 𑀬𑀣𑀸 𑀕𑀸𑀯𑀻𑀲𑀼 𑀤𑀼𑀬𑁆𑀳𑀫𑀸𑀦𑀸𑀲𑀼 𑀕𑀢𑁄, 𑀤𑀼𑀤𑁆𑀥𑀸𑀲𑀼 𑀆𑀕𑀢𑁄𑀢𑀺 𑀤𑁄𑀳𑀦𑀓𑀺𑀭𑀺𑀬𑀸 𑀕𑀫𑀦𑀓𑀺𑀭𑀺𑀬𑀸𑀬 𑀮𑀓𑁆𑀔𑀡𑀁 𑀳𑁄𑀢𑀺, 𑀏𑀯𑀫𑀺𑀳𑀸𑀧𑀺 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀢𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀘 𑀯𑀼𑀢𑁆𑀢𑁂 𑀲𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀫𑀸𑀦𑁄 𑀏𑀯 𑀳𑁄𑀢𑀺 𑀅𑀜𑁆𑀜𑀓𑀺𑀭𑀺𑀬𑀸𑀲𑀫𑁆𑀩𑀦𑁆𑀥𑀸𑀪𑀸𑀯𑁂𑀦 𑀧𑀤𑀢𑁆𑀣𑀲𑁆𑀲 𑀲𑀢𑁆𑀢𑀸𑀯𑀺𑀭𑀳𑀸𑀪𑀸𑀯𑀢𑁄𑀢𑀺 𑀲𑀫𑀬𑀲𑁆𑀲 𑀲𑀢𑁆𑀢𑀸𑀓𑀺𑀭𑀺𑀬𑀸𑀬 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀺𑀭𑀺𑀬𑀸 𑀨𑀲𑁆𑀲𑀸𑀤𑀺𑀪𑀯𑀦𑀓𑀺𑀭𑀺𑀬𑀸 𑀘 𑀮𑀓𑁆𑀔𑀻𑀬𑀢𑀻𑀢𑀺 𑀉𑀪𑀬𑀢𑁆𑀣 𑀲𑀫𑀬𑀲𑀤𑁆𑀤𑁂 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑁄 𑀓𑀢𑁄 𑀮𑀓𑁆𑀔𑀡𑀪𑀽𑀢𑀪𑀸𑀯𑀬𑀼𑀢𑁆𑀢𑁄𑀢𑀺.

𑀉𑀤𑁆𑀤𑀸𑀦𑀢𑁄𑀢𑀺 𑀉𑀤𑁆𑀤𑁂𑀲𑀢𑁄 𑀲𑀗𑁆𑀔𑁂𑀧𑀢𑁄. 𑀓𑀺𑀮𑁂𑀲𑀓𑀸𑀫𑁄 𑀯𑀢𑁆𑀣𑀼𑀓𑀸𑀫𑀪𑀸𑀯𑀁 𑀪𑀚𑀦𑁆𑀢𑁄 𑀓𑀸𑀫𑀦𑀻𑀬𑀯𑀲𑁂𑀦 𑀪𑀚𑀢𑀺, 𑀦 𑀓𑀸𑀫𑀦𑀯𑀲𑁂𑀦𑀸𑀢𑀺 𑀓𑀸𑀫𑀦𑀯𑀲𑁂𑀦 𑀓𑀺𑀮𑁂𑀲𑀓𑀸𑀫𑁄 𑀏𑀯 𑀳𑁄𑀢𑀺, 𑀦 𑀯𑀢𑁆𑀣𑀼𑀓𑀸𑀫𑁄. 𑀤𑀼𑀯𑀺𑀥𑁄𑀧𑁂𑀲𑁄𑀢𑀺 𑀯𑀘𑀦𑁂𑀦 𑀤𑀼𑀯𑀺𑀥𑀲𑁆𑀲𑀧𑀺 𑀲𑀳𑀺𑀢𑀲𑁆𑀲 𑀅𑀯𑀘𑀭𑀡𑀧𑁆𑀧𑀤𑁂𑀲𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀦 𑀯𑀢𑁆𑀣𑀼𑀓𑀸𑀫𑀲𑁆𑀲𑁂𑀯 𑀧𑀯𑀢𑁆𑀢𑀺𑀤𑁂𑀲𑁄 𑀭𑀽𑀧𑀸𑀭𑀽𑀧𑀥𑀸𑀢𑀼𑀤𑁆𑀯𑀬𑀁 𑀅𑀧𑀦𑀻𑀢𑀁 𑀳𑁄𑀢𑀺. 𑀦𑀦𑀼 𑀘 𑀤𑀼𑀯𑀺𑀥𑁄𑀧𑀺 𑀲𑀳𑀺𑀢𑁄 𑀭𑀽𑀧𑀸𑀭𑀽𑀧𑀥𑀸𑀢𑀽𑀲𑀼 𑀧𑀯𑀢𑁆𑀢𑀢𑀺 𑀭𑀽𑀧𑀸𑀭𑀽𑀧𑀸𑀯𑀘𑀭𑀥𑀫𑁆𑀫𑀸𑀦𑀁 𑀯𑀢𑁆𑀣𑀼𑀓𑀸𑀫𑀢𑁆𑀢𑀸 𑀢𑀤𑀸𑀭𑀫𑁆𑀫𑀡𑀸𑀦𑀁 𑀭𑀽𑀧𑀸𑀭𑀽𑀧𑀭𑀸𑀕𑀸𑀦𑀜𑁆𑀘 𑀓𑀺𑀮𑁂𑀲𑀓𑀸𑀫𑀪𑀸𑀯𑀲𑀺𑀤𑁆𑀥𑀺𑀢𑁄𑀢𑀺? 𑀢𑀁 𑀦, 𑀩𑀳𑀮𑀓𑀺𑀮𑁂𑀲𑀲𑁆𑀲 𑀓𑀸𑀫𑀭𑀸𑀕𑀲𑁆𑀲 𑀓𑀺𑀮𑁂𑀲𑀓𑀸𑀫𑀪𑀸𑀯𑁂𑀦 𑀇𑀥 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀏𑀯𑀜𑁆𑀘 𑀓𑀢𑁆𑀯𑀸 𑀭𑀽𑀧𑀸𑀭𑀽𑀧𑀥𑀸𑀢𑀽𑀲𑀼 𑀧𑀯𑀢𑁆𑀢𑀫𑀸𑀦𑁂𑀲𑀼 𑀓𑀸𑀫𑀸𑀯𑀘𑀭𑀥𑀫𑁆𑀫𑁂𑀲𑀼 𑀦𑀺𑀓𑀦𑁆𑀢𑀺 𑀇𑀥 𑀦 𑀲𑀗𑁆𑀕𑀳𑀺𑀢𑀸 𑀲𑀼𑀔𑀼𑀫𑀢𑁆𑀢𑀸. ‘‘𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸’’𑀢𑀺 𑀲𑀩𑁆𑀩𑀓𑀸𑀫𑁂 𑀉𑀤𑁆𑀤𑀺𑀲𑀺𑀢𑁆𑀯𑀸𑀧𑀺 𑀳𑀺 ‘‘𑀤𑀼𑀯𑀺𑀥𑁄𑀧𑁂𑀲𑁄’’𑀢𑀺 𑀏𑀢𑁆𑀣 𑀢𑀤𑁂𑀓𑀤𑁂𑀲𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀲𑀳𑀺𑀢𑀢𑀸𑀧𑀭𑀺𑀘𑁆𑀙𑀺𑀦𑁆𑀦𑀸 𑀓𑀸𑀫𑀭𑀸𑀕𑀢𑀩𑁆𑀩𑀢𑁆𑀣𑀼𑀓𑀥𑀫𑁆𑀫𑀸𑀯 𑀲𑀗𑁆𑀕𑀳𑀺𑀢𑀸𑀢𑀺, 𑀦𑀺𑀭𑀯𑀲𑁂𑀲𑁄 𑀯𑀸 𑀓𑀺𑀮𑁂𑀲𑀓𑀸𑀫𑁄 𑀓𑀸𑀫𑀭𑀸𑀕𑁄 𑀓𑀸𑀫𑀢𑀡𑁆𑀳𑀸𑀭𑀽𑀧𑀢𑀡𑁆𑀳𑀸𑀅𑀭𑀽𑀧𑀢𑀡𑁆𑀳𑀸𑀦𑀺𑀭𑁄𑀥𑀢𑀡𑁆𑀳𑀸𑀪𑁂𑀤𑁄 𑀇𑀥 𑀧𑀯𑀢𑁆𑀢𑀢𑀻𑀢𑀺 𑀅𑀦𑀯𑀲𑁂𑀲𑀧𑁆𑀧𑀯𑀢𑁆𑀢𑀺𑀢𑀁 𑀲𑀦𑁆𑀥𑀸𑀬 ‘‘𑀤𑀼𑀯𑀺𑀥𑁄𑀧𑁂𑀲𑁄’’𑀢𑀺 𑀯𑀼𑀢𑁆𑀢𑀁, 𑀯𑀢𑁆𑀣𑀼𑀓𑀸𑀫𑁄𑀧𑀺 𑀘 𑀅𑀧𑁆𑀧𑀓𑁄 𑀇𑀥𑀸𑀧𑀺 𑀦 𑀯𑀢𑁆𑀢𑀢𑀺 𑀭𑀽𑀧𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀫𑀢𑁆𑀢𑁄, 𑀢𑀣𑀸𑀧𑀺 𑀧𑀭𑀺𑀧𑀼𑀡𑁆𑀡𑀯𑀢𑁆𑀣𑀼𑀓𑀸𑀫𑀢𑁆𑀢𑀸 𑀓𑀸𑀫𑀸𑀯𑀘𑀭𑀥𑀫𑁆𑀫𑀸𑀯 𑀇𑀥 𑀕𑀳𑀺𑀢𑀸. 𑀏𑀯𑀜𑁆𑀘 𑀓𑀢𑁆𑀯𑀸 𑀲𑀲𑀢𑁆𑀣𑀸𑀯𑀘𑀭𑁄𑀧𑀫𑀸 𑀬𑀼𑀢𑁆𑀢𑀸 𑀳𑁄𑀢𑀺. ‘‘𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀻’’𑀢𑀺 (𑀥. 𑀲. 𑁧𑁬𑁩; 𑀯𑀺𑀪. 𑁬𑁨𑁫) 𑀏𑀢𑁆𑀣 𑀭𑀽𑀧𑀪𑀯𑁄 𑀉𑀢𑁆𑀢𑀭𑀧𑀤𑀮𑁄𑀧𑀁 𑀓𑀢𑁆𑀯𑀸 ‘‘𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑁄, 𑀏𑀯𑀫𑀺𑀥𑀸𑀧𑀺 𑀉𑀢𑁆𑀢𑀭𑀧𑀤𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀅𑀜𑁆𑀜𑀣𑀸 𑀳𑀺 𑀘𑀺𑀢𑁆𑀢𑀁 𑀓𑀸𑀫𑀸𑀯𑀘𑀭𑀸𑀯𑀘𑀭𑀦𑁆𑀢𑀺 𑀯𑀼𑀘𑁆𑀘𑁂𑀬𑁆𑀬𑀸𑀢𑀺. 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦𑀸𑀢𑀺𑀆𑀤𑀺𑀓𑁂 ‘‘𑀓𑀸𑀫𑁄’’𑀢𑀺 𑀲𑀩𑁆𑀩𑀁 𑀢𑀡𑁆𑀳𑀫𑀸𑀳, 𑀢𑀲𑁆𑀫𑀸 ‘‘𑀓𑀸𑀫𑀜𑁆𑀘𑁂𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, ‘‘𑀓𑀸𑀫𑁂 𑀅𑀯𑀘𑀸𑀭𑁂𑀢𑀻𑀢𑀺 𑀓𑀸𑀫𑀸𑀯𑀘𑀸𑀭’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀘𑀸-𑀲𑀤𑁆𑀤𑀲𑁆𑀲 𑀭𑀲𑁆𑀲𑀢𑁆𑀢𑀁 𑀓𑀢𑀁.

𑀭𑀼𑀴𑁆𑀳𑀺𑀲𑀤𑁆𑀤𑁂𑀦𑀸𑀢𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀭𑀼𑀴𑁆𑀳𑁂𑀦 𑀲𑀤𑁆𑀤𑁂𑀦, 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀯𑀸 𑀧𑀯𑀢𑁆𑀢𑀺𑀢𑁆𑀯𑀸 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀢𑀸𑀬 𑀢𑀁𑀲𑀤𑀺𑀲𑁂𑀲𑀼 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼 𑀭𑀼𑀴𑁆𑀳𑁂𑀦 𑀲𑀤𑁆𑀤𑁂𑀦. 𑀅𑀣 𑀯𑀸 𑀓𑀺𑀜𑁆𑀘𑀺 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀢𑀺𑀧𑀺 𑀅𑀜𑁆𑀜𑀲𑁆𑀫𑀺𑀁 𑀢𑀁𑀦𑀺𑀫𑀺𑀢𑁆𑀢𑀬𑀼𑀢𑁆𑀢𑁂 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀯𑀺𑀲𑀬𑁂 𑀲𑀫𑁆𑀫𑀼𑀢𑀺𑀬𑀸 𑀘𑀺𑀭𑀓𑀸𑀮𑀢𑀸𑀯𑀲𑁂𑀦 𑀦𑀺𑀫𑀺𑀢𑁆𑀢𑀯𑀺𑀭𑀳𑁂𑀧𑀺 𑀧𑀯𑀢𑁆𑀢𑀺 𑀭𑀼𑀴𑁆𑀳𑀺 𑀦𑀸𑀫 𑀬𑀣𑀸 ‘‘𑀫𑀳𑀺𑀬𑀁 𑀲𑁂𑀢𑀻𑀢𑀺 𑀫𑀳𑀺𑀁𑀲𑁄, 𑀕𑀘𑁆𑀙𑀦𑁆𑀢𑀻𑀢𑀺 𑀕𑀸𑀯𑁄’’𑀢𑀺, 𑀏𑀯𑀁 𑀓𑀼𑀲𑀮𑀲𑀤𑁆𑀤𑀲𑁆𑀲𑀧𑀺 𑀭𑀼𑀴𑁆𑀳𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀜𑁆𑀜𑀸𑀦𑀺𑀤𑁆𑀤𑁂𑀲𑁂 ‘‘𑀓𑁄𑀲𑀮𑁆𑀮’’𑀦𑁆𑀢𑀺 𑀅𑀪𑀺𑀥𑀫𑁆𑀫𑁂 (𑀥. 𑀲. 𑁧𑁬) 𑀯𑀼𑀢𑁆𑀢𑀁, 𑀢𑀲𑁆𑀲 𑀘 𑀪𑀸𑀯𑀸 𑀓𑀼𑀲𑀮𑀲𑀤𑁆𑀤𑀧𑁆𑀧𑀯𑀢𑁆𑀢𑀻𑀢𑀺 𑀓𑁄𑀲𑀮𑁆𑀮𑀬𑁄𑀕𑀸 𑀓𑀼𑀲𑀮𑀦𑁆𑀢𑀺 𑀅𑀬𑀁 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁄 𑀳𑁄𑀢𑀺. 𑀓𑀼𑀲𑀮𑀦𑁆𑀢𑀺 𑀓𑀼𑀲𑀮𑀪𑀸𑀯𑀁 𑀆𑀳.

𑀯𑀺𑀧𑀸𑀓𑀸𑀤𑀻𑀦𑀁 𑀅𑀯𑀚𑁆𑀚𑀧𑀝𑀺𑀧𑀓𑁆𑀔𑀢𑀸 𑀦𑀢𑁆𑀣𑀻𑀢𑀺 𑀓𑀼𑀲𑀮𑀫𑁂𑀯 𑀅𑀦𑀯𑀚𑁆𑀚𑀮𑀓𑁆𑀔𑀡𑀁 𑀯𑀼𑀢𑁆𑀢𑀁. 𑀅𑀦𑀯𑀚𑁆𑀚𑀮𑀓𑁆𑀔𑀡𑀫𑁂𑀯𑀸𑀢𑀺 𑀲𑀼𑀔𑀯𑀺𑀧𑀸𑀓𑀲𑀪𑀸𑀯𑀲𑁆𑀲 𑀮𑀓𑁆𑀔𑀡𑀪𑀸𑀯𑀦𑀺𑀯𑀸𑀭𑀡𑀢𑁆𑀣𑀁 𑀅𑀯𑀥𑀸𑀭𑀡𑀁 𑀓𑀢𑀁, 𑀢𑀁𑀦𑀺𑀯𑀸𑀭𑀡𑀜𑁆𑀘 𑀢𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀁 𑀯𑀢𑁆𑀣𑀼𑀓𑀸𑀫𑀢𑀸𑀬 𑀓𑀢𑀁. 𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑁂𑀦 𑀭𑀲𑁂𑀦 𑀯𑁄𑀤𑀸𑀦𑀪𑀸𑀯𑀭𑀲𑀁. 𑀨𑀮𑀝𑁆𑀞𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀦𑁂𑀦 𑀇𑀝𑁆𑀞𑀯𑀺𑀧𑀸𑀓𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀲𑀪𑀸𑀯𑁄 𑀓𑀓𑁆𑀔𑀴𑀸𑀤𑀺𑀨𑀼𑀲𑀦𑀸𑀤𑀺𑀓𑁄 𑀅𑀲𑀸𑀥𑀸𑀭𑀡𑁄. 𑀲𑀸𑀫𑀜𑁆𑀜𑀁 𑀲𑀸𑀥𑀸𑀭𑀡𑁄 𑀅𑀦𑀺𑀘𑁆𑀘𑀸𑀤𑀺𑀲𑀪𑀸𑀯𑁄. 𑀇𑀥 𑀘 𑀓𑀼𑀲𑀮𑀮𑀓𑁆𑀔𑀡𑀁 𑀲𑀩𑁆𑀩𑀓𑀼𑀲𑀮𑀲𑀸𑀥𑀸𑀭𑀡𑀲𑀪𑀸𑀯𑀢𑁆𑀢𑀸 𑀲𑀸𑀫𑀜𑁆𑀜𑀁 𑀤𑀝𑁆𑀞𑀩𑁆𑀩𑀁, 𑀅𑀓𑀼𑀲𑀮𑀸𑀤𑀻𑀳𑀺 𑀅𑀲𑀸𑀥𑀸𑀭𑀡𑀢𑀸𑀬 𑀲𑀪𑀸𑀯𑁄 𑀯𑀸. 𑀉𑀧𑀝𑁆𑀞𑀸𑀦𑀸𑀓𑀸𑀭𑁄𑀢𑀺 𑀕𑀳𑁂𑀢𑀩𑁆𑀩𑀪𑀸𑀯𑁂𑀦 𑀜𑀸𑀡𑀲𑁆𑀲 𑀉𑀧𑀝𑁆𑀞𑀳𑀦𑀸𑀓𑀸𑀭𑁄. 𑀨𑀮𑀁 𑀧𑀦 𑀅𑀢𑁆𑀢𑀦𑁄 𑀓𑀸𑀭𑀡𑀁 𑀧𑀝𑀺𑀘𑁆𑀘 𑀢𑀧𑁆𑀧𑀝𑀺𑀩𑀺𑀫𑁆𑀩𑀪𑀸𑀯𑁂𑀦, 𑀧𑀝𑀺𑀫𑀼𑀔𑀁 𑀯𑀸 𑀉𑀧𑀝𑁆𑀞𑀸𑀢𑀻𑀢𑀺 𑀧𑀘𑁆𑀘𑀼𑀧𑀝𑁆𑀞𑀸𑀦𑀁.

𑀯𑀺𑀚𑀸𑀦𑀸𑀢𑀻𑀢𑀺 𑀲𑀜𑁆𑀜𑀸𑀧𑀜𑁆𑀜𑀸𑀓𑀺𑀘𑁆𑀘𑀯𑀺𑀲𑀺𑀝𑁆𑀞𑀁 𑀯𑀺𑀲𑀬𑀕𑁆𑀕𑀳𑀡𑀁 𑀆𑀳. 𑀲𑀩𑁆𑀩𑀘𑀺𑀢𑁆𑀢𑀲𑀸𑀥𑀸𑀭𑀡𑀢𑁆𑀢𑀸 𑀬𑀢𑁆𑀣 𑀬𑀢𑁆𑀣 𑀬𑀣𑀸 𑀬𑀣𑀸 𑀅𑀢𑁆𑀣𑁄 𑀮𑀩𑁆𑀪𑀢𑀺, 𑀢𑀢𑁆𑀣 𑀢𑀢𑁆𑀣 𑀢𑀣𑀸 𑀢𑀣𑀸 𑀕𑀳𑁂𑀢𑀩𑁆𑀩𑁄𑀢𑀺. 𑀬𑀁 𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑁂𑀦 𑀘𑀺𑀦𑁄𑀢𑀺, 𑀬𑀜𑁆𑀘 𑀓𑀫𑁆𑀫𑀼𑀦𑀸 𑀅𑀪𑀺𑀲𑀗𑁆𑀔𑀢𑀢𑁆𑀢𑀸 𑀘𑀺𑀢𑀁, 𑀢𑀁 𑀢𑀣𑀸 ‘‘𑀘𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦 𑀢𑀣𑀸 𑀦 𑀳𑁄𑀢𑀺, 𑀢𑀁 𑀧𑀭𑀺𑀢𑁆𑀢𑀓𑀺𑀭𑀺𑀬𑀤𑁆𑀯𑀬𑀁 𑀅𑀦𑁆𑀢𑀺𑀫𑀚𑀯𑀦𑀜𑁆𑀘 𑀮𑀩𑁆𑀪𑀫𑀸𑀦𑀘𑀺𑀦𑁆𑀢𑀦𑀯𑀺𑀘𑀺𑀢𑁆𑀢𑀢𑀸𑀤𑀺𑀯𑀲𑁂𑀦 ‘‘𑀘𑀺𑀢𑁆𑀢’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀳𑀲𑀺𑀢𑀼𑀧𑁆𑀧𑀸𑀤𑁄 𑀧𑀦 𑀅𑀜𑁆𑀜𑀚𑀯𑀦𑀕𑀢𑀺𑀓𑁄𑀯. 𑀘𑀺𑀢𑁆𑀢𑀸𑀦𑀁 𑀧𑀦𑀸𑀢𑀺 𑀯𑀺𑀘𑀺𑀢𑁆𑀭𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀤𑀦𑁆𑀢𑁄𑀕𑀥𑀢𑁆𑀢𑀸 𑀳𑀺 𑀲𑀫𑀼𑀤𑀸𑀬𑀯𑁄𑀳𑀸𑀭𑁂𑀦 𑀅𑀯𑀬𑀯𑁄𑀧𑀺 ‘‘𑀘𑀺𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀬𑀣𑀸 𑀧𑀩𑁆𑀩𑀢𑀦𑀤𑀻𑀲𑀫𑀼𑀤𑁆𑀤𑀸𑀤𑀺𑀏𑀓𑀤𑁂𑀲𑁂𑀲𑀼 𑀤𑀺𑀝𑁆𑀞𑁂𑀲𑀼 𑀧𑀩𑁆𑀩𑀢𑀸𑀤𑀬𑁄 𑀤𑀺𑀝𑁆𑀞𑀸𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺. 𑀘𑀭𑀡𑀁 𑀦𑀸𑀫 𑀕𑀳𑁂𑀢𑁆𑀯𑀸 𑀘𑀭𑀺𑀢𑀩𑁆𑀩𑀘𑀺𑀢𑁆𑀢𑀧𑀝𑁄. 𑀭𑀽𑀧𑀸𑀦𑀻𑀢𑀺 𑀩𑀺𑀫𑁆𑀩𑀸𑀦𑀺.

𑀅𑀚𑁆𑀛𑀢𑁆𑀢𑀺𑀓𑀦𑁆𑀢𑀺 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀁 𑀯𑀤𑀢𑀺. 𑀘𑀺𑀢𑁆𑀢𑀓𑀢𑀫𑁂𑀯𑀸𑀢𑀺 𑀘𑀺𑀢𑁆𑀢𑀲𑁆𑀲 𑀫𑀽𑀮𑀓𑀸𑀭𑀡𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀫𑁆𑀫𑀲𑁆𑀲 𑀳𑁂𑀢𑀁 𑀘𑀺𑀢𑁆𑀢𑀁 𑀓𑀸𑀭𑀡𑀦𑁆𑀢𑀺. 𑀢𑀁 𑀧𑀦 𑀅𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀓𑀸𑀬𑀓𑀫𑁆𑀫𑀸𑀤𑀺𑀪𑁂𑀤’’𑀦𑁆𑀢𑀺𑀆𑀤𑀺𑀫𑀸𑀳. 𑀮𑀺𑀗𑁆𑀕𑀦𑀸𑀦𑀢𑁆𑀢𑀦𑁆𑀢𑀺 𑀲𑀡𑁆𑀞𑀸𑀦𑀦𑀸𑀦𑀢𑁆𑀢𑀁, 𑀪𑀺𑀦𑁆𑀦𑀲𑀡𑁆𑀞𑀸𑀦𑀗𑁆𑀕𑀧𑀘𑁆𑀘𑀗𑁆𑀕𑀯𑀢𑁄 𑀲𑀭𑀻𑀭𑀲𑁆𑀲 𑀯𑀸 𑀦𑀸𑀦𑀢𑁆𑀢𑀁. 𑀯𑁄𑀳𑀸𑀭𑀯𑀲𑁂𑀦 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀪𑀸𑀯𑁂𑀦 𑀯𑁄𑀳𑀭𑀺𑀢𑀩𑁆𑀩𑁂𑀲𑀼 𑀧𑀢𑁆𑀣𑀦𑀸𑀯𑀺𑀲𑁂𑀲𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁄 𑀓𑀫𑁆𑀫𑀯𑀺𑀲𑁂𑀲𑀸. 𑀏𑀯𑀫𑀺𑀤𑀁 𑀓𑀫𑁆𑀫𑀦𑀸𑀦𑀢𑁆𑀢𑀁 𑀯𑁄𑀳𑀸𑀭𑀦𑀸𑀦𑀢𑁆𑀢𑀢𑁄 𑀳𑁄𑀢𑀺. 𑀅𑀧𑀸…𑀧𑁂… 𑀓𑀸𑀤𑀺𑀢𑀸𑀢𑀺 𑀏𑀯𑀫𑀸𑀤𑀻𑀲𑀼 𑀆𑀤𑀺-𑀲𑀤𑁆𑀤𑁂𑀳𑀺 𑀕𑀢𑀺𑀬𑀸 𑀉𑀧𑀧𑀢𑁆𑀢𑀺𑀬𑀸 𑀅𑀢𑁆𑀢𑀪𑀸𑀯𑁂 𑀮𑁄𑀓𑀥𑀫𑁆𑀫𑁂𑀲𑀼 𑀘 𑀦𑀸𑀦𑀸𑀓𑀭𑀡𑀸𑀦𑀺 𑀲𑀼𑀢𑁆𑀢𑀸𑀕𑀢𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺.

𑀓𑀫𑁆𑀫𑀦𑀸𑀦𑀢𑁆𑀢𑀸𑀤𑀺𑀯𑀲𑁂𑀦𑀸𑀢𑀺 𑀏𑀢𑁆𑀣 𑀓𑀼𑀲𑀮𑀸𑀓𑀼𑀲𑀮𑀯𑀲𑁂𑀦 𑀓𑀫𑁆𑀫𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀲𑀤𑀺𑀲𑀲𑀪𑀸𑀯𑀢𑀸 𑀳𑀺 𑀦𑀸𑀦𑀢𑁆𑀢𑀦𑁆𑀢𑀺. 𑀓𑀼𑀲𑀮𑀓𑀫𑁆𑀫𑀲𑁆𑀲 𑀤𑀸𑀦𑀸𑀤𑀺𑀯𑀲𑁂𑀦 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀪𑀸𑀯𑁂𑀦 𑀘 𑀧𑀼𑀣𑀼𑀢𑁆𑀢𑀁, 𑀅𑀓𑀼𑀲𑀮𑀓𑀫𑁆𑀫𑀲𑁆𑀲 𑀘 𑀫𑀘𑁆𑀙𑀭𑀺𑀬𑀸𑀤𑀻𑀳𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀘 𑀧𑀼𑀣𑀼𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀩𑀳𑀼𑀧𑁆𑀧𑀓𑀸𑀭𑀢𑀸 𑀳𑀺 𑀧𑀼𑀣𑀼𑀢𑁆𑀢𑀦𑁆𑀢𑀺. 𑀅𑀦𑁆𑀦𑀤𑀸𑀦𑀸𑀤𑀺𑀯𑀲𑁂𑀦 𑀤𑀸𑀦𑀸𑀤𑀻𑀦𑀁 𑀧𑀸𑀡𑀸𑀢𑀺𑀧𑀸𑀢𑀸𑀯𑀺𑀭𑀢𑀺𑀆𑀤𑀺𑀯𑀲𑁂𑀦 𑀓𑀸𑀬𑀲𑀼𑀘𑀭𑀺𑀢𑀸𑀤𑀻𑀦𑀁 𑀆𑀯𑀸𑀲𑀫𑀘𑁆𑀙𑀭𑀺𑀬𑀸𑀤𑀺𑀯𑀲𑁂𑀦 𑀫𑀘𑁆𑀙𑀭𑀺𑀬𑀸𑀤𑀻𑀦𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀲𑁂𑀦 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀜𑁆𑀘 𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀓𑁂𑀓𑀲𑁆𑀲 𑀳𑀺 𑀧𑀓𑀸𑀭𑀲𑁆𑀲 𑀪𑁂𑀤𑁄 𑀧𑀪𑁂𑀤𑁄𑀢𑀺. 𑀦𑀸𑀦𑀢𑁆𑀢𑀸𑀤𑀻𑀦𑀁 𑀯𑀯𑀢𑁆𑀣𑀸𑀦𑀁 𑀢𑀣𑀸 𑀢𑀣𑀸 𑀯𑀯𑀢𑁆𑀣𑀺𑀢𑀢𑀸 𑀦𑀺𑀘𑁆𑀙𑀺𑀢𑀢𑀸. 𑀏𑀢𑁂𑀦𑀼𑀧𑀸𑀬𑁂𑀦 𑀮𑀺𑀗𑁆𑀕𑀦𑀸𑀦𑀢𑁆𑀢𑀸𑀤𑀻𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀓𑀫𑁆𑀫𑀦𑀸𑀦𑀢𑁆𑀢𑀸𑀤𑀻𑀳𑀺 𑀦𑀺𑀩𑁆𑀩𑀢𑁆𑀢𑀸𑀦𑀺 𑀳𑀺 𑀢𑀸𑀦𑀻𑀢𑀺.

𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀮𑀺𑀗𑁆𑀕𑀲𑁆𑀲 𑀓𑀫𑁆𑀫𑀢𑁄 𑀧𑀯𑀢𑁆𑀢𑀺𑀁 𑀢𑀤𑀦𑀼𑀓𑁆𑀓𑀫𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀫𑁆𑀫𑀲𑁆𑀲 𑀦𑀺𑀧𑁆𑀨𑀢𑁆𑀢𑀺𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀢𑀢𑁄 𑀅𑀦𑀸𑀕𑀢𑀮𑀺𑀗𑁆𑀕𑀦𑀸𑀦𑀢𑁆𑀢𑀸𑀤𑀺𑀦𑀺𑀧𑁆𑀨𑀢𑁆𑀢𑀺𑀤𑀲𑁆𑀲𑀦𑁂𑀦 𑀲𑀁𑀲𑀸𑀭𑀁 𑀖𑀝𑁂𑀦𑁆𑀢𑁄 ‘‘𑀓𑀫𑁆𑀫𑀦𑀸𑀦𑀸𑀓𑀭𑀡𑀁 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀼𑀭𑀺𑀫𑁂𑀦 𑀓𑀫𑁆𑀫𑀯𑀘𑀦𑁂𑀦 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸, 𑀮𑀺𑀗𑁆𑀕𑀸𑀤𑀺𑀯𑀘𑀦𑁂𑀦 𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀪𑀯𑀧𑀭𑀺𑀬𑁄𑀲𑀸𑀦𑀸𑀦𑀺, 𑀕𑀢𑀺𑀆𑀤𑀺𑀯𑀘𑀦𑁂𑀦 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 𑀕𑀳𑀺𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀢𑀢𑁆𑀣 𑀕𑀢𑀻𑀢𑀺 𑀦𑀺𑀭𑀬𑀸𑀤𑀬𑁄 𑀧𑀜𑁆𑀘 𑀕𑀢𑀺𑀬𑁄 𑀯𑀼𑀘𑁆𑀘𑀦𑁆𑀢𑀺, 𑀢𑀸𑀲𑀁 𑀦𑀸𑀦𑀸𑀓𑀭𑀡𑀁 𑀅𑀧𑀤𑀸𑀤𑀺𑀪𑀸𑀯𑁄. 𑀢𑀸 𑀳𑀺 𑀢𑀣𑀸 𑀪𑀺𑀦𑁆𑀦𑀸𑀢𑀺. 𑀉𑀧𑀧𑀢𑁆𑀢𑀻𑀢𑀺 𑀕𑁄𑀫𑀳𑀺𑀁𑀲𑀸𑀤𑀺𑀔𑀢𑁆𑀢𑀺𑀬𑀸𑀤𑀺𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀺𑀉𑀧𑀧𑀢𑁆𑀢𑀺𑀬𑁄, 𑀢𑀸𑀲𑀁 𑀦𑀸𑀦𑀸𑀓𑀭𑀡𑀁 𑀉𑀘𑁆𑀘𑀸𑀤𑀺𑀢𑀸. 𑀔𑀢𑁆𑀢𑀺𑀬𑁄 𑀏𑀯 𑀳𑀺 𑀏𑀓𑀘𑁆𑀘𑁄 𑀓𑀼𑀮𑀪𑁄𑀕𑀇𑀲𑁆𑀲𑀭𑀺𑀬𑀸𑀤𑀻𑀳𑀺 𑀉𑀘𑁆𑀘𑁄 𑀳𑁄𑀢𑀺, 𑀏𑀓𑀘𑁆𑀘𑁄 𑀦𑀻𑀘𑁄. 𑀢𑁂𑀳𑀺 𑀏𑀯 𑀳𑀻𑀦𑀢𑀸𑀬 𑀳𑀻𑀦𑁄, 𑀧𑀥𑀸𑀦𑀪𑀸𑀯𑀁 𑀦𑀻𑀢𑀢𑀸𑀬 𑀧𑀡𑀻𑀢𑁄, 𑀅𑀟𑁆𑀠𑀢𑀸𑀬 𑀲𑀼𑀕𑀢𑁄, 𑀤𑀮𑀺𑀤𑁆𑀤𑀢𑀸𑀬 𑀤𑀼𑀕𑁆𑀕𑀢𑁄. 𑀓𑀼𑀮𑀯𑀲𑁂𑀦 𑀯𑀸 𑀉𑀘𑁆𑀘𑀦𑀻𑀘𑀢𑀸, 𑀇𑀲𑁆𑀲𑀭𑀺𑀬𑀯𑀲𑁂𑀦 𑀳𑀻𑀦𑀧𑀡𑀻𑀢𑀢𑀸, 𑀪𑁄𑀕𑀯𑀲𑁂𑀦 𑀲𑀼𑀕𑀢𑀤𑀼𑀕𑁆𑀕𑀢𑀢𑀸 𑀬𑁄𑀚𑁂𑀢𑀩𑁆𑀩𑀸. 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀢𑀸𑀢𑀺 𑀑𑀤𑀸𑀢𑀲𑀸𑀫𑀸𑀤𑀺𑀯𑀡𑁆𑀡𑀲𑀼𑀤𑁆𑀥𑀺𑀅𑀲𑀼𑀤𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀼𑀚𑀸𑀢𑀤𑀼𑀚𑁆𑀚𑀸𑀢𑀢𑀸𑀢𑀺 𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑀸𑀤𑀺𑀆𑀭𑁄𑀳𑀧𑀭𑀺𑀡𑀸𑀳𑁂𑀳𑀺 𑀮𑀓𑁆𑀔𑀡𑁂𑀳𑀺 𑀯𑀸 𑀅𑀢𑁆𑀢𑀪𑀸𑀯𑀧𑀭𑀺𑀧𑀼𑀡𑁆𑀡𑀸𑀧𑀭𑀺𑀧𑀼𑀡𑁆𑀡𑀚𑀸𑀢𑀢𑀸𑀯𑀲𑁂𑀦. 𑀲𑀼𑀲𑀡𑁆𑀞𑀺𑀢𑀤𑀼𑀲𑁆𑀲𑀡𑁆𑀞𑀺𑀢𑀢𑀸𑀢𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀲𑀡𑁆𑀞𑀸𑀦𑀯𑀲𑁂𑀦.

𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 𑀅𑀚𑁆𑀛𑀢𑁆𑀢𑀺𑀓𑀘𑀺𑀢𑁆𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑁆𑀲 𑀘𑀺𑀢𑁆𑀢𑀓𑀢𑀪𑀸𑀯𑀲𑀸𑀥𑀓𑀁 𑀲𑀼𑀢𑁆𑀢𑀁 ‘‘𑀓𑀫𑁆𑀫𑀢𑁄’’𑀢𑀺𑀆𑀤𑀺. 𑀓𑀫𑁆𑀫𑀜𑁆𑀳𑀺 𑀘𑀺𑀢𑁆𑀢𑀢𑁄 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀢𑀢𑁄 𑀦𑀺𑀧𑁆𑀨𑀚𑁆𑀚𑀫𑀸𑀦𑀁 𑀲𑀩𑁆𑀩𑀫𑁆𑀧𑀺 𑀘𑀺𑀢𑁆𑀢𑀁 𑀘𑀺𑀢𑁆𑀢𑀓𑀢𑀫𑁂𑀯𑀸𑀢𑀺 𑀲𑀸𑀥𑁂𑀢𑀺. 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀢𑁄 𑀮𑀺𑀗𑁆𑀕𑀢𑁄 𑀧𑀯𑀢𑁆𑀢𑀫𑀸𑀦𑀮𑀺𑀗𑁆𑀕𑀲𑀜𑁆𑀜𑀸 𑀫𑀽𑀮𑀓𑀸𑀭𑀡𑀢𑁄 𑀓𑀫𑁆𑀫𑀢𑁄 𑀆𑀲𑀦𑁆𑀦𑀓𑀸𑀭𑀡𑀢𑁄 𑀮𑀺𑀗𑁆𑀕𑀢𑁄 𑀘 𑀧𑀯𑀢𑁆𑀢𑀸 𑀳𑁄𑀢𑀻𑀢𑀺 ‘‘𑀓𑀫𑁆𑀫𑀢𑁄…𑀧𑁂… 𑀧𑀯𑀢𑁆𑀢𑀭𑁂’’𑀢𑀺 𑀆𑀳. 𑀅𑀣 𑀯𑀸 𑀮𑀺𑀗𑁆𑀕𑀜𑁆𑀘 𑀲𑀜𑁆𑀜𑀸 𑀘 𑀮𑀺𑀗𑁆𑀕𑀲𑀜𑁆𑀜𑀸, 𑀢𑀸 𑀬𑀣𑀸𑀲𑀗𑁆𑀔𑁆𑀬𑀁 𑀓𑀫𑁆𑀫𑀢𑁄 𑀮𑀺𑀗𑁆𑀕𑀢𑁄 𑀘 𑀧𑀯𑀢𑁆𑀢𑀭𑁂𑀢𑀺 𑀅𑀢𑁆𑀣𑁄. 𑀲𑀜𑁆𑀜𑀸𑀢𑁄 𑀪𑁂𑀤𑀁 𑀕𑀘𑁆𑀙𑀦𑁆𑀢𑀻𑀢𑀺 𑀢𑁂 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀮𑀺𑀗𑁆𑀕𑀲𑀜𑁆𑀜𑀸𑀢𑁄 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀯𑁄𑀳𑀸𑀭𑀪𑁂𑀤𑀁 𑀥𑀫𑁆𑀫𑀸 𑀕𑀘𑁆𑀙𑀦𑁆𑀢𑀺, 𑀢𑀣𑀸 𑀢𑀣𑀸 𑀯𑁄𑀳𑀭𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀇𑀫𑀸𑀬 𑀕𑀸𑀣𑀸𑀬 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑁆𑀥𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀲𑁂𑀦 𑀘𑀺𑀢𑁆𑀢𑀓𑀢𑀁 𑀘𑀺𑀢𑁆𑀢𑀁 𑀤𑀲𑁆𑀲𑀺𑀢𑀁.

𑀮𑁄𑀓𑁄 𑀏𑀯 𑀧𑀚𑀸𑀢𑀢𑁆𑀢𑀸 𑀧𑀚𑀸𑀢𑀺 𑀧𑀼𑀭𑀺𑀫𑀧𑀸𑀤𑀲𑁆𑀲 𑀯𑀺𑀯𑀭𑀡𑀁 𑀧𑀘𑁆𑀙𑀺𑀫𑀧𑀸𑀤𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀭𑀣𑀲𑁆𑀲 𑀆𑀡𑀺 𑀦𑀺𑀩𑀦𑁆𑀥𑀦𑀸, 𑀏𑀯𑀁 𑀲𑀢𑁆𑀢𑀮𑁄𑀓𑀭𑀣𑀲𑁆𑀲 𑀓𑀫𑁆𑀫𑀁 𑀦𑀺𑀩𑀦𑁆𑀥𑀦𑀦𑁆𑀢𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀸𑀬 𑀘 𑀕𑀸𑀣𑀸𑀬 𑀅𑀤𑁆𑀥𑀤𑁆𑀯𑀬𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀓𑀫𑁆𑀫𑀯𑀺𑀜𑁆𑀜𑀸𑀡𑀓𑀢𑀢𑀸 𑀤𑀲𑁆𑀲𑀺𑀢𑀸. 𑀓𑀺𑀢𑁆𑀢𑀺𑀦𑁆𑀢𑀺 𑀧𑀭𑀫𑁆𑀫𑀼𑀔𑀸 𑀓𑀺𑀢𑁆𑀢𑀦𑀁 𑀧𑀢𑁆𑀣𑀝𑀬𑀲𑀢𑀁. 𑀧𑀲𑀁𑀲𑀦𑁆𑀢𑀺 𑀲𑀫𑁆𑀫𑀼𑀔𑀸 𑀧𑀲𑀁𑀲𑀦𑀁 𑀣𑀼𑀢𑀺𑀁. 𑀓𑀫𑁆𑀫𑀦𑀸𑀦𑀸𑀓𑀭𑀡𑀦𑁆𑀢𑀺 𑀓𑀫𑁆𑀫𑀢𑁄 𑀦𑀺𑀩𑁆𑀩𑀢𑁆𑀢𑀦𑀸𑀦𑀸𑀓𑀭𑀡𑀁 𑀓𑀫𑁆𑀫𑀚𑁂𑀳𑀺 𑀅𑀦𑀼𑀫𑀺𑀬𑀫𑀸𑀦𑀁 𑀓𑀫𑁆𑀫𑀲𑁆𑀲𑁂𑀯 𑀯𑀸 𑀦𑀸𑀦𑀸𑀓𑀭𑀡𑀁.

𑀓𑀫𑁆𑀫𑀲𑁆𑀲𑀓𑀸𑀢𑀺 𑀓𑀫𑁆𑀫𑀲𑀬𑀸. 𑀓𑀫𑁆𑀫𑀲𑁆𑀲 𑀤𑀸𑀬𑀁 𑀢𑁂𑀦 𑀤𑀸𑀢𑀩𑁆𑀩𑀁 𑀆𑀤𑀺𑀬𑀦𑁆𑀢𑀻𑀢𑀺 𑀓𑀫𑁆𑀫𑀤𑀸𑀬𑀸𑀤𑀸. 𑀅𑀡𑁆𑀟𑀚𑀸𑀤𑀻𑀦𑀜𑁆𑀘 𑀬𑁄𑀦𑀻𑀦𑀁 𑀓𑀫𑁆𑀫𑀢𑁄 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀓𑀫𑁆𑀫𑀫𑁂𑀯 𑀬𑁄𑀦𑀺 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑀦𑀺𑀫𑀺𑀢𑁆𑀢𑀁 𑀏𑀢𑁂𑀲𑀦𑁆𑀢𑀺 𑀓𑀫𑁆𑀫𑀬𑁄𑀦𑀻. 𑀩𑀦𑁆𑀥𑀦𑀝𑁆𑀞𑁂𑀦 𑀓𑀫𑁆𑀫𑀁 𑀩𑀦𑁆𑀥𑀼 𑀏𑀢𑁂𑀲𑀦𑁆𑀢𑀺 𑀓𑀫𑁆𑀫𑀩𑀦𑁆𑀥𑀽.

𑀘𑀺𑀢𑁆𑀢𑀲𑁆𑀲𑀸𑀢𑀺 𑀓𑀫𑁆𑀫𑀯𑀺𑀜𑁆𑀜𑀸𑀡𑀲𑁆𑀲. 𑀢𑀲𑁆𑀲 𑀧𑀦 𑀅𑀮𑀤𑁆𑀥𑁄𑀓𑀸𑀲𑀢𑀸 𑀅𑀜𑁆𑀜𑁂𑀦 𑀓𑀫𑁆𑀫𑁂𑀦 𑀧𑀝𑀺𑀩𑀸𑀳𑀺𑀢𑀢𑁆𑀢𑀸 𑀢𑀤𑀯𑀺𑀧𑀘𑁆𑀘𑀦𑁄𑀓𑀸𑀲𑁂 𑀧𑀼𑀕𑁆𑀕𑀮𑀲𑁆𑀲 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀓𑀫𑁆𑀫𑀯𑀺𑀜𑁆𑀜𑀸𑀡𑀁 𑀓𑀸𑀮𑀕𑀢𑀺𑀧𑀬𑁄𑀕𑀸𑀤𑀺𑀲𑀳𑀓𑀸𑀭𑀻𑀧𑀘𑁆𑀘𑀬𑀯𑀺𑀓𑀮𑀢𑀸𑀬 𑀅𑀯𑀲𑁂𑀲𑀧𑀘𑁆𑀘𑀬𑀯𑁂𑀓𑀮𑁆𑀮𑀁 𑀤𑀝𑁆𑀞𑀩𑁆𑀩𑀁. 𑀏𑀓𑀘𑁆𑀘𑀘𑀺𑀢𑁆𑀢𑀦𑁆𑀢𑀺 𑀘𑀺𑀢𑁆𑀢𑁂𑀦 𑀓𑀢𑁆𑀢𑀩𑁆𑀩𑀘𑀺𑀢𑁆𑀭𑁂𑀦 𑀏𑀓𑀘𑁆𑀘𑀪𑀽𑀢𑀁 𑀢𑁂𑀦 𑀓𑀢𑁆𑀢𑀩𑁆𑀩𑀘𑀺𑀢𑁆𑀭𑀫𑀸𑀳.

𑀅𑀦𑀼𑀪𑀯𑀺𑀢𑁆𑀯𑀸 𑀪𑀯𑀺𑀢𑁆𑀯𑀸 𑀘 𑀅𑀧𑀕𑀢𑀁 𑀪𑀽𑀢𑀸𑀧𑀕𑀢𑀁. 𑀅𑀦𑀼𑀪𑀽𑀢𑀪𑀽𑀢𑀢𑀸 𑀳𑀺 𑀪𑀽𑀢𑀢𑀸𑀲𑀸𑀫𑀜𑁆𑀜𑁂𑀦 𑀪𑀽𑀢𑀲𑀤𑁆𑀤𑁂𑀦 𑀯𑀼𑀢𑁆𑀢𑀸. 𑀲𑀸𑀫𑀜𑁆𑀜𑀫𑁂𑀯 𑀳𑀺 𑀉𑀧𑀲𑀕𑁆𑀕𑁂𑀦 𑀯𑀺𑀲𑁂𑀲𑀻𑀬𑀢𑀻𑀢𑀺. 𑀅𑀦𑀼𑀪𑀽𑀢𑀲𑀤𑁆𑀤𑁄 𑀘 𑀓𑀫𑁆𑀫𑀯𑀘𑀦𑀺𑀘𑁆𑀙𑀸𑀪𑀸𑀯𑀢𑁄 𑀅𑀦𑀼𑀪𑀯𑀓𑀯𑀸𑀘𑀓𑁄 𑀤𑀝𑁆𑀞𑀩𑁆𑀩𑁄. 𑀯𑀺𑀓𑀧𑁆𑀧𑀕𑀸𑀳𑀯𑀲𑁂𑀦 𑀭𑀸𑀕𑀸𑀤𑀻𑀳𑀺 𑀢𑀩𑁆𑀩𑀺𑀧𑀓𑁆𑀔𑁂𑀳𑀺 𑀘 𑀅𑀓𑀼𑀲𑀮𑀁 𑀓𑀼𑀲𑀮𑀜𑁆𑀘 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀢𑀺, 𑀦 𑀯𑀺𑀧𑀸𑀓𑁄 𑀓𑀫𑁆𑀫𑀯𑁂𑀕𑀓𑁆𑀔𑀺𑀢𑁆𑀢𑀢𑁆𑀢𑀸, 𑀦𑀸𑀧𑀺 𑀓𑀺𑀭𑀺𑀬𑀸 𑀅𑀳𑁂𑀢𑀼𑀓𑀸𑀦𑀁 𑀅𑀢𑀺𑀤𑀼𑀩𑁆𑀩𑀮𑀢𑀸𑀬 𑀲𑀳𑁂𑀢𑀼𑀓𑀸𑀦𑀜𑁆𑀘 𑀔𑀻𑀡𑀓𑀺𑀮𑁂𑀲𑀲𑁆𑀲 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀯𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀅𑀢𑀺𑀲𑀦𑁆𑀢𑀯𑀼𑀢𑁆𑀢𑀺𑀢𑁆𑀢𑀸. 𑀏𑀢𑁆𑀣 𑀘 𑀧𑀼𑀭𑀺𑀫𑀦𑀬𑁂 𑀓𑀼𑀲𑀮𑀸𑀓𑀼𑀲𑀮𑀫𑁂𑀯 𑀯𑀢𑁆𑀢𑀼𑀁 𑀅𑀥𑀺𑀧𑁆𑀧𑀸𑀬𑀯𑀲𑁂𑀦 ‘‘𑀪𑀽𑀢𑀸𑀧𑀕𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀁 ‘‘𑀉𑀧𑁆𑀧𑀦𑁆𑀦𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀉𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀞𑀺𑀢𑀺𑀬𑀸’’𑀢𑀺 (𑀲𑀁. 𑀦𑀺. 𑁫.𑁬𑁫𑁧-𑁬𑁬𑁨; 𑀯𑀺𑀪. 𑁩𑁯𑁦-𑁩𑁯𑁧) 𑀏𑀢𑁆𑀣 𑀉𑀧𑁆𑀧𑀦𑁆𑀦𑀦𑁆𑀢𑀺 𑀕𑀳𑁂𑀢𑁆𑀯𑀸 𑀢𑀁𑀲𑀤𑀺𑀲𑀸𑀦𑀁 𑀧𑀳𑀸𑀦𑀁, 𑀯𑀼𑀤𑁆𑀥𑀺 𑀘 𑀯𑀼𑀢𑁆𑀢𑀸, 𑀧𑀘𑁆𑀙𑀺𑀫𑀦𑀬𑁂 𑀧𑀦 𑀘-𑀲𑀤𑁆𑀤𑁂𑀦 𑀓𑀼𑀲𑀮𑀸𑀓𑀼𑀲𑀮𑀜𑁆𑀘 𑀆𑀓𑀟𑁆𑀠𑀺𑀢𑁆𑀯𑀸 𑀲𑀩𑁆𑀩𑀁 𑀲𑀗𑁆𑀔𑀢𑀁 𑀯𑀼𑀢𑁆𑀢𑀁 𑀪𑀽𑀢𑀸𑀧𑀕𑀢𑀪𑀸𑀯𑀸𑀪𑀺𑀥𑀸𑀦𑀸𑀥𑀺𑀧𑁆𑀧𑀸𑀬𑁂𑀦.

𑀯𑀺𑀧𑀘𑁆𑀘𑀺𑀢𑀼𑀁 𑀑𑀓𑀸𑀲𑀓𑀭𑀡𑀯𑀲𑁂𑀦 𑀉𑀧𑁆𑀧𑀢𑀺𑀢𑀁 𑀅𑀢𑀻𑀢𑀓𑀫𑁆𑀫𑀜𑁆𑀘 𑀢𑀢𑁄 𑀉𑀧𑁆𑀧𑀚𑁆𑀚𑀺𑀢𑀼𑀁 𑀆𑀭𑀤𑁆𑀥𑁄 𑀅𑀦𑀸𑀕𑀢𑁄 𑀯𑀺𑀧𑀸𑀓𑁄 𑀘 ‘‘𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑁄. 𑀬𑀁 𑀉𑀧𑁆𑀧𑀦𑁆𑀦𑀲𑀤𑁆𑀤𑁂𑀦 𑀯𑀺𑀦𑀸𑀧𑀺 𑀯𑀺𑀜𑁆𑀜𑀸𑀬𑀫𑀸𑀦𑀁 𑀉𑀧𑁆𑀧𑀦𑁆𑀦𑀁, 𑀢𑀁 𑀲𑀦𑁆𑀥𑀸𑀬 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀜𑁆𑀘𑁂𑀢𑀦𑀺𑀓𑀸𑀦’’𑀦𑁆𑀢𑀺𑀆𑀤𑀺 (𑀅. 𑀦𑀺. 𑁧𑁦.𑁨𑁧𑁭, 𑁨𑁧𑁯) 𑀯𑀼𑀢𑁆𑀢𑀁. 𑀢𑀸𑀲𑀼 𑀢𑀸𑀲𑀼 𑀪𑀽𑀫𑀻𑀲𑀽𑀢𑀺 𑀫𑀦𑀼𑀲𑁆𑀲𑀤𑁂𑀯𑀸𑀤𑀺𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑁂𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀅𑀦𑀼𑀧𑁆𑀧𑀢𑁆𑀢𑀺𑀅𑀦𑀸𑀧𑀸𑀤𑀺𑀢𑀢𑀸𑀬 𑀅𑀲𑀫𑀽𑀳𑀢𑀁. 𑀏𑀢𑁆𑀣 𑀘 𑀮𑀤𑁆𑀥𑀪𑀽𑀫𑀺𑀓𑀁 ‘‘𑀪𑀽𑀫𑀺𑀮𑀤𑁆𑀥’’𑀦𑁆𑀢𑀺 𑀯𑀼𑀢𑁆𑀢𑀁 𑀅𑀕𑁆𑀕𑀺𑀆𑀳𑀺𑀢𑁄 𑀯𑀺𑀬. 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀲𑀤𑁆𑀤𑁂𑀧𑀺 𑀘 𑀑𑀓𑀸𑀲𑁄 𑀓𑀢𑁄 𑀏𑀢𑁂𑀦𑀸𑀢𑀺, 𑀑𑀓𑀸𑀲𑁄 𑀓𑀢𑁄 𑀏𑀢𑀲𑁆𑀲𑀸𑀢𑀺 𑀘 𑀤𑀼𑀯𑀺𑀥𑀢𑁆𑀣𑁂𑀧𑀺 𑀏𑀯𑀫𑁂𑀯 𑀓𑀢𑀲𑀤𑁆𑀤𑀲𑁆𑀲 𑀧𑀭𑀦𑀺𑀧𑀸𑀢𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀩𑁆𑀩𑀤𑀸 𑀅𑀯𑀢𑁆𑀢𑀫𑀸𑀦𑀫𑁆𑀧𑀺 𑀕𑀫𑀺𑀬𑀘𑀺𑀢𑁆𑀢𑀁 𑀧𑀝𑀺𑀧𑀓𑁆𑀔𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀅𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸 ‘‘𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀦𑁆𑀢𑀭𑀥𑀸𑀧𑁂𑀢𑀻𑀢𑀺 𑀯𑀺𑀓𑁆𑀔𑀫𑁆𑀪𑀺𑀓𑀸 𑀆𑀦𑀸𑀧𑀸𑀦𑀲𑁆𑀲𑀢𑀺 𑀯𑀺𑀓𑁆𑀔𑀫𑁆𑀪𑁂𑀢𑀺. 𑀅𑀦𑁆𑀢𑀭𑀸𑀬𑁂𑀯𑀸𑀢𑀺 𑀪𑀽𑀫𑀺𑀮𑀤𑁆𑀥𑁂 𑀲𑀪𑀽𑀫𑀺𑀬𑀁 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑁂 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀦𑀢𑀻𑀢𑀁 𑀅𑀦𑀦𑀸𑀕𑀢𑀜𑁆𑀘 𑀔𑀡𑀢𑁆𑀢𑀬𑁂𑀓𑀤𑁂𑀲𑀕𑀢𑀫𑁆𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑀁 ‘‘𑀔𑀡𑀢𑁆𑀢𑀬𑀕𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀤𑁂𑀲𑀦𑀸𑀬 𑀧𑀥𑀸𑀦𑁂𑀦 𑀕𑀳𑀺𑀢𑁄 𑀅𑀢𑁆𑀣𑁄 ‘‘𑀲𑀻𑀲’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀮𑁄𑀓𑀺𑀬𑀥𑀫𑁆𑀫𑀜𑁆𑀳𑀺 𑀤𑁂𑀲𑁂𑀢𑀩𑁆𑀩𑀁 𑀧𑀢𑁆𑀯𑀸 𑀤𑁂𑀲𑀦𑀸𑀬 𑀘𑀺𑀢𑁆𑀢𑀁 𑀧𑀼𑀩𑁆𑀩𑀗𑁆𑀕𑀫𑀁 𑀳𑁄𑀢𑀺, 𑀥𑀫𑁆𑀫𑀲𑀪𑀸𑀯𑀁 𑀯𑀸 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀅𑀓𑀼𑀲𑀮𑀸𑀢𑀺 𑀲𑀩𑁆𑀩𑁂𑀧𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸. 𑀘𑁂𑀢𑀦𑀸𑀢𑀺 𑀓𑁂𑀘𑀺. 𑀅𑀓𑀼𑀲𑀮𑀪𑀸𑀕𑀺𑀬𑀸𑀢𑀺 𑀭𑀸𑀕𑀸𑀤𑀬𑁄 𑀏𑀓𑀦𑁆𑀢𑀅𑀓𑀼𑀲𑀮𑀸. 𑀅𑀓𑀼𑀲𑀮𑀧𑀓𑁆𑀔𑀺𑀓𑀸𑀢𑀺 𑀨𑀲𑁆𑀲𑀸𑀤𑀬𑁄𑀧𑀺 𑀢𑀧𑁆𑀧𑀓𑁆𑀔𑀺𑀓𑀸. 𑀫𑀦𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀲𑀳𑀚𑀸𑀢𑁄𑀧𑀺 𑀫𑀦𑁄 𑀲𑀫𑁆𑀧𑀬𑀼𑀢𑁆𑀢𑁂 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀅𑀥𑀺𑀧𑀢𑀺𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑁄 𑀧𑀞𑀫𑀁 𑀉𑀧𑁆𑀧𑀦𑁆𑀦𑁄 𑀯𑀺𑀬 𑀳𑁄𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑁄. 𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀢𑀤𑀦𑀼𑀯𑀢𑁆𑀢𑀦𑀢𑀸𑀬 𑀅𑀦𑁆𑀯𑀤𑁂𑀯 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀯𑀼𑀢𑁆𑀢𑀸, 𑀅𑀦𑀦𑁆𑀢𑀭𑀧𑀘𑁆𑀘𑀬𑀫𑀦𑀁 𑀯𑀸 𑀲𑀦𑁆𑀥𑀸𑀬 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀢𑀸 𑀯𑀼𑀢𑁆𑀢𑀸. 𑀘𑀺𑀢𑁆𑀢𑁂𑀦 𑀦𑀻𑀬𑀢𑀻𑀢𑀺 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀬𑀸𑀳, 𑀢𑀡𑁆𑀳𑀸𑀲𑀫𑁆𑀧𑀬𑀼𑀢𑁆𑀢𑀁 𑀯𑀸. 𑀧𑀪𑀲𑁆𑀲𑀭𑀦𑁆𑀢𑀺 𑀲𑀪𑀸𑀯𑀧𑀡𑁆𑀟𑀭𑀢𑀁 𑀲𑀦𑁆𑀥𑀸𑀬𑀸𑀳. 𑀅𑀭𑀓𑁆𑀔𑀺𑀢𑁂𑀢𑀺 𑀲𑀢𑀺𑀬𑀸 𑀅𑀦𑀼𑀦𑀬𑀧𑀝𑀺𑀖𑀸𑀤𑀻𑀳𑀺 𑀅𑀭𑀓𑁆𑀔𑀺𑀢𑁂, 𑀭𑀸𑀕𑀸𑀤𑀻𑀳𑀺 𑀩𑁆𑀬𑀸𑀧𑀦𑁆𑀦𑁂, 𑀢𑁂𑀳𑀺 𑀏𑀯 𑀅𑀯𑀲𑁆𑀲𑀼𑀢𑁂. 𑀘𑀺𑀢𑁆𑀢𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑀪𑀸𑀯𑀲𑀸𑀥𑀦𑁂 𑀅𑀜𑁆𑀜𑀫𑀜𑁆𑀜𑀁 𑀩𑀮𑀤𑀸𑀦𑀯𑀲𑁂𑀦 𑀲𑀼𑀢𑁆𑀢𑀸𑀦𑀼𑀭𑀓𑁆𑀔𑀡𑀁, 𑀇𑀥 𑀯𑀸 𑀉𑀧𑀲𑀁𑀳𑀢𑀸𑀦𑀁 𑀆𑀪𑀺𑀥𑀫𑁆𑀫𑀺𑀓𑁂𑀳𑀺 𑀯𑀺𑀜𑁆𑀜𑀸𑀢𑀸𑀦𑀁 𑀘𑀺𑀭𑀓𑀸𑀮𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀓𑀢𑀭𑀧𑀜𑁆𑀜𑀁 𑀢𑁆𑀯𑀦𑁆𑀢𑀺𑀆𑀤𑀺 𑀦 𑀧𑀸𑀴𑀺𑀆𑀭𑀼𑀴𑁆𑀳𑀁, 𑀏𑀯𑀁 𑀪𑀕𑀯𑀸 𑀧𑀼𑀘𑁆𑀙𑀢𑀻𑀢𑀺 𑀅𑀝𑁆𑀞𑀓𑀣𑀸𑀬𑀫𑁂𑀯 𑀯𑀼𑀢𑁆𑀢𑀁. 𑀧𑀜𑁆𑀜𑀸 𑀧𑀦 𑀓𑀺𑀫𑀢𑁆𑀣𑀺𑀬𑀸𑀢𑀺 𑀇𑀤𑀫𑁆𑀧𑀺 𑀏𑀓𑀁 𑀲𑀼𑀢𑁆𑀢𑀁. ‘‘𑀅𑀪𑀺𑀜𑁆𑀜𑀢𑁆𑀣𑀸 𑀧𑀭𑀺𑀜𑁆𑀜𑀢𑁆𑀣𑀸 𑀧𑀳𑀸𑀦𑀢𑁆𑀣𑀸’’𑀢𑀺 𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀁.

𑀲𑀸𑀢𑀦𑁆𑀢𑀺 𑀲𑀪𑀸𑀯𑀯𑀲𑁂𑀦 𑀯𑀼𑀢𑁆𑀢𑀁, 𑀫𑀥𑀼𑀭𑀦𑁆𑀢𑀺 𑀫𑀥𑀼𑀭𑀁 𑀯𑀺𑀬𑀸𑀢𑀺 𑀉𑀧𑀫𑀸𑀯𑀲𑁂𑀦. 𑀧𑁄𑀦𑁄𑀩𑁆𑀪𑀯𑀺𑀓𑀸𑀢𑀺 𑀧𑀼𑀦𑀩𑁆𑀪𑀯𑀓𑀭𑀡𑀲𑀻𑀮𑀸. 𑀢𑀢𑁆𑀭𑀢𑀢𑁆𑀭𑀸𑀪𑀺𑀦𑀦𑁆𑀤𑀦𑀢𑁄 𑀦𑀦𑁆𑀤𑀻, 𑀦𑀦𑁆𑀤𑀺𑀪𑀽𑀢𑁄 𑀭𑀸𑀕𑁄 𑀦𑀦𑁆𑀤𑀺𑀭𑀸𑀕𑁄, 𑀦𑀦𑁆𑀤𑀺𑀭𑀸𑀕𑀪𑀸𑀯𑁂𑀦 𑀲𑀳𑀕𑀢𑀸𑀢𑀺 𑀦𑀦𑁆𑀤𑀺𑀭𑀸𑀕𑀲𑀳𑀕𑀢𑀸𑀢𑀺 𑀦 𑀏𑀢𑁆𑀣 𑀲𑀫𑁆𑀧𑀬𑁄𑀕𑀯𑀲𑁂𑀦 𑀲𑀳𑀕𑀢𑀪𑀸𑀯𑁄 𑀅𑀢𑁆𑀣𑀻𑀢𑀺 𑀲𑀳𑀕𑀢𑀲𑀤𑁆𑀤𑁄 𑀢𑀡𑁆𑀳𑀸𑀬 𑀦𑀦𑁆𑀤𑀺𑀭𑀸𑀕𑀪𑀸𑀯𑀁 𑀚𑁄𑀢𑁂𑀢𑀺. 𑀦𑀦𑁆𑀤𑀺𑀭𑀸𑀕𑀪𑀽𑀢𑀸𑀢𑀺 𑀘𑀲𑁆𑀲 𑀅𑀢𑁆𑀣𑁄. 𑀦𑀺𑀲𑁆𑀲𑀬𑁂𑀢𑀺 𑀧𑀸𑀤𑀓𑁂. 𑀭𑀽𑀧𑀸𑀭𑀽𑀧𑀸𑀭𑀫𑁆𑀫𑀡𑀸𑀦𑀦𑁆𑀢𑀺 𑀧𑀣𑀯𑀻𑀓𑀲𑀺𑀡𑀸𑀤𑀺𑀆𑀓𑀸𑀲𑀸𑀤𑀺𑀆𑀭𑀫𑁆𑀫𑀡𑀸𑀦𑀁. 𑀲𑀁𑀲𑀝𑁆𑀞𑁂𑀢𑀺 𑀔𑀻𑀭𑁄𑀤𑀓𑀁 𑀯𑀺𑀬 𑀲𑀫𑁄𑀤𑀺𑀢𑁂 𑀏𑀓𑀻𑀪𑀸𑀯𑀫𑀺𑀯 𑀕𑀢𑁂. 𑀲𑀳𑀚𑀸𑀢𑁂𑀢𑀺 𑀲𑀫𑁆𑀧𑀬𑀼𑀢𑁆𑀢𑀲𑀳𑀚𑀸𑀢𑁂, 𑀦 𑀲𑀳𑀚𑀸𑀢𑀫𑀢𑁆𑀢𑁂. 𑀇𑀥𑀸𑀧𑀻𑀢𑀺 ‘‘𑀇𑀫𑀲𑁆𑀫𑀺𑀫𑁆𑀧𑀺 𑀧𑀤𑁂 𑀅𑀬𑀫𑁂𑀯 𑀅𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄’’𑀢𑀺 𑀇𑀫𑀺𑀲𑁆𑀲𑀸 𑀅𑀝𑁆𑀞𑀓𑀣𑀸𑀬 𑀬𑀣𑀸𑀤𑀲𑁆𑀲𑀺𑀢𑀲𑀁𑀲𑀝𑁆𑀞𑀲𑀤𑁆𑀤𑁄 𑀲𑀳𑀚𑀸𑀢𑁂 𑀅𑀥𑀺𑀧𑁆𑀧𑁂𑀢𑁄𑀢𑀺. 𑀅𑀭𑀽𑀧𑀁 𑀭𑀽𑀧𑁂𑀦𑀸𑀢𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀢𑁆𑀣𑀼𑀦𑀸. 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁄𑀢𑀺 𑀅𑀦𑀯𑀲𑁂𑀲𑀲𑀗𑁆𑀕𑀳𑁂𑀦 𑀓𑀢𑁄 𑀅𑀢𑀺𑀲𑀬𑀦𑀺𑀤𑁆𑀤𑁂𑀲𑁄.

𑀅𑀦𑀸𑀪𑀝𑁆𑀞𑀢𑀸𑀬𑁂𑀯𑀸𑀢𑀺 ‘‘𑀤𑀺𑀝𑁆𑀞𑀁 𑀲𑀼𑀢’’𑀦𑁆𑀢𑀺𑀆𑀤𑀻𑀲𑀼 𑀤𑀺𑀝𑁆𑀞𑀢𑀸𑀤𑀬𑁄 𑀯𑀺𑀬 𑀅𑀪𑀸𑀲𑀺𑀢𑀩𑁆𑀩𑀢𑀸 𑀅𑀦𑀸𑀪𑀝𑁆𑀞𑀢𑀸. 𑀲𑀩𑁆𑀩𑀸𑀓𑀸𑀭𑁂𑀦 𑀲𑀤𑀺𑀲𑀲𑁆𑀲 𑀤𑀼𑀢𑀺𑀬𑀘𑀺𑀢𑁆𑀢𑀲𑁆𑀲 𑀲𑀲𑀗𑁆𑀔𑀸𑀭𑀺𑀓𑀢𑀸𑀯𑀘𑀦𑁂𑀦 𑀇𑀫𑀲𑁆𑀲 𑀅𑀲𑀗𑁆𑀔𑀸𑀭𑀺𑀓𑀢𑀸 𑀯𑀺𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀅𑀪𑀸𑀲𑀺𑀢𑀩𑁆𑀩𑀢𑀸𑀬 𑀦 𑀕𑀳𑀺𑀢𑁄𑀢𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀅𑀥𑀺𑀧𑁆𑀧𑀸𑀬𑁄 𑀧𑀦 𑀧𑀸𑀴𑀺𑀬𑀁 𑀅𑀪𑀸𑀲𑀺𑀢𑀢𑁆𑀢𑀸 𑀏𑀯 𑀢𑀢𑁆𑀣 𑀤𑁂𑀲𑁂𑀢𑀩𑁆𑀩𑀪𑀸𑀯𑁂𑀦 𑀦 𑀕𑀳𑀺𑀢𑁄 𑀦 𑀲𑀗𑁆𑀕𑀳𑀺𑀢𑁄 𑀦 𑀢𑀲𑁆𑀲𑀢𑁆𑀣𑀲𑁆𑀲 𑀅𑀪𑀸𑀯𑀸𑀢𑀺. 𑀅𑀣 𑀯𑀸 𑀧𑀸𑀴𑀺𑀬𑀁 𑀅𑀦𑀸𑀪𑀝𑁆𑀞𑀢𑀸𑀬 𑀏𑀯 𑀅𑀝𑁆𑀞𑀓𑀣𑀸𑀬𑀁 𑀦 𑀕𑀳𑀺𑀢𑁄 𑀦 𑀢𑀲𑁆𑀲𑀢𑁆𑀣𑁄 𑀯𑀼𑀢𑁆𑀢𑁄. 𑀦𑀺𑀬𑀫𑁂𑀢𑁆𑀯𑀸𑀯𑀸𑀢𑀺 𑀧𑀭𑀢𑁄 𑀏𑀯𑀁𑀯𑀺𑀥𑀲𑁆𑀲𑁂𑀯 𑀲𑀲𑀗𑁆𑀔𑀸𑀭𑀺𑀓𑀪𑀸𑀯𑀯𑀘𑀦𑀢𑁄 𑀇𑀥 𑀢𑀤𑀯𑀘𑀦𑁂𑀦𑁂𑀯 𑀅𑀲𑀗𑁆𑀔𑀸𑀭𑀺𑀓𑀪𑀸𑀯𑀁 𑀦𑀺𑀬𑀫𑁂𑀢𑁆𑀯𑀸.

𑀫𑀦𑁄𑀯𑀺𑀜𑁆𑀜𑀸𑀡𑀦𑁆𑀢𑀺 𑀏𑀢𑁆𑀣 𑀤𑁆𑀯𑀸𑀭𑀁 𑀯𑀢𑁆𑀣𑀽𑀢𑀺 𑀯𑀼𑀢𑁆𑀢𑀁, 𑀤𑁆𑀯𑀸𑀭𑁂𑀦 𑀯𑀸 𑀢𑀁𑀲𑀳𑀸𑀬𑀪𑀽𑀢𑀁 𑀳𑀤𑀬𑀯𑀢𑁆𑀣𑀼 𑀯𑀼𑀢𑁆𑀢𑀁. 𑀲𑀭𑀲𑀪𑀸𑀯𑁂𑀦𑀸𑀢𑀺 𑀲𑀓𑀺𑀘𑁆𑀘𑀪𑀸𑀯𑁂𑀦. 𑀅𑀯𑀺𑀚𑁆𑀚𑀸 𑀳𑀺 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀪𑀸𑀯𑀓𑀺𑀘𑁆𑀘𑀸, 𑀅𑀜𑁆𑀜𑀸𑀲𑀸𑀥𑀸𑀭𑀡𑁄 𑀯𑀸 𑀭𑀲𑀺𑀢𑀩𑁆𑀩𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀪𑀸𑀯𑁄 𑀲𑀭𑀲𑀪𑀸𑀯𑁄, 𑀅𑀯𑀺𑀚𑁆𑀚𑀸𑀲𑀪𑀸𑀯𑁄 𑀲𑀗𑁆𑀔𑀸𑀭𑀲𑀪𑀸𑀯𑁄𑀢𑀺 𑀏𑀯𑀫𑀸𑀤𑀺𑀓𑁄. ‘‘𑀲𑀭𑀲𑀲𑀪𑀸𑀯𑁂𑀦𑀸’’𑀢𑀺𑀧𑀺 𑀧𑀸𑀞𑁄, 𑀲𑁄𑀬𑁂𑀯 𑀅𑀢𑁆𑀣𑁄. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸𑀢𑀺 𑀯𑀸 𑀲𑀭𑀲𑁂𑀦, 𑀲𑀗𑁆𑀔𑀸𑀭𑀸𑀢𑀺 𑀲𑀪𑀸𑀯𑁂𑀦.

𑀏𑀓𑀲𑀫𑀼𑀝𑁆𑀞𑀸𑀦𑀸𑀤𑀺𑀢𑀸 𑀭𑀽𑀧𑀥𑀫𑁆𑀫𑁂𑀲𑀼 𑀏𑀯 𑀬𑁄𑀚𑁂𑀢𑀩𑁆𑀩𑀸 𑀢𑁂𑀲𑀼 𑀢𑀩𑁆𑀩𑁄𑀳𑀸𑀭𑀩𑀸𑀳𑀼𑀮𑁆𑀮𑀢𑁄. 𑀅𑀢𑀻𑀢𑀸𑀤𑀺𑀪𑀸𑀯𑁄 𑀭𑀽𑀧𑀸𑀭𑀽𑀧𑀥𑀫𑁆𑀫𑁂𑀲𑀼, 𑀘𑀺𑀢𑁆𑀢𑀘𑁂𑀢𑀲𑀺𑀓𑀦𑀺𑀩𑁆𑀩𑀸𑀦𑀸𑀦𑀫𑁆𑀧𑀺 𑀯𑀸 𑀬𑀣𑀸𑀲𑀪𑀸𑀯𑀁 𑀏𑀓𑀤𑁆𑀯𑀺𑀦𑀓𑀼𑀢𑁄𑀘𑀺𑀲𑀫𑀼𑀝𑁆𑀞𑀸𑀦𑀢𑀸 𑀬𑁄𑀚𑁂𑀢𑀩𑁆𑀩𑀸. 𑀅𑀦𑀸𑀧𑀸𑀣𑀕𑀢𑀸𑀢𑀺 𑀘𑀓𑁆𑀔𑀸𑀤𑀻𑀦𑀁 𑀅𑀕𑁄𑀘𑀭𑀕𑀢𑀸 𑀲𑀼𑀔𑀼𑀫𑀭𑀚𑀸𑀤𑀺𑀭𑀽𑀧𑀁 𑀯𑀺𑀬 𑀯𑀢𑁆𑀣𑀼𑀧𑀭𑀺𑀢𑁆𑀢𑀢𑀸𑀬 𑀢𑀢𑁆𑀢𑀸𑀬𑁄𑀕𑀼𑀴𑁂 𑀧𑀢𑀺𑀢𑁄𑀤𑀓𑀩𑀺𑀦𑁆𑀤𑀼𑀭𑀽𑀧𑀁 𑀯𑀺𑀬 𑀔𑀡𑀧𑀭𑀺𑀢𑁆𑀢𑀢𑀸𑀬 𑀅𑀢𑀺𑀤𑀽𑀭𑀢𑀸𑀬 𑀅𑀘𑁆𑀘𑀸𑀲𑀦𑁆𑀦𑀸𑀤𑀺𑀢𑀸𑀬 𑀅𑀢𑀻𑀢𑀸𑀦𑀸𑀕𑀢𑀢𑀸𑀬 𑀘. 𑀯𑀺𑀲𑀬𑁄 𑀅𑀦𑀜𑁆𑀜𑀢𑁆𑀣𑀪𑀸𑀯𑁂𑀦, 𑀕𑁄𑀘𑀭𑁄 𑀘 𑀢𑀢𑁆𑀣 𑀘𑀭𑀡𑁂𑀦 𑀯𑀼𑀢𑁆𑀢𑁄, 𑀢𑀩𑁆𑀩𑀺𑀲𑀬𑀦𑀺𑀘𑁆𑀙𑀬𑁂𑀦 𑀫𑀦𑁄 𑀧𑀝𑀺𑀲𑀭𑀡𑀁. 𑀅𑀬𑀫𑀢𑁆𑀣𑁄 𑀲𑀺𑀤𑁆𑀥𑁄 𑀳𑁄𑀢𑀺 𑀅𑀜𑁆𑀜𑀣𑀸 𑀢𑁂𑀲𑀁 𑀥𑀫𑁆𑀫𑀸𑀭𑀫𑁆𑀫𑀡𑀪𑀸𑀯𑁂𑀦 ‘‘𑀦𑁂𑀲𑀁 𑀕𑁄𑀘𑀭𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀢𑀻’’𑀢𑀺 𑀯𑀘𑀦𑀲𑁆𑀲 𑀅𑀦𑀼𑀧𑀧𑀢𑁆𑀢𑀺𑀢𑁄. 𑀤𑀺𑀩𑁆𑀩𑀘𑀓𑁆𑀔𑀼𑀤𑀺𑀩𑁆𑀩𑀲𑁄𑀢𑀇𑀤𑁆𑀥𑀺𑀯𑀺𑀥𑀜𑀸𑀡𑁂𑀳𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀅𑀦𑀸𑀧𑀸𑀣𑀕𑀢𑀸𑀦𑀺 𑀭𑀽𑀧𑀸𑀤𑀻𑀦𑀺 𑀆𑀮𑀫𑁆𑀩𑀺𑀬𑀫𑀸𑀦𑀸𑀦𑀺 𑀦 𑀥𑀫𑁆𑀫𑀸𑀭𑀫𑁆𑀫𑀡𑀦𑁆𑀢𑀺 𑀓𑀢𑁆𑀣𑀘𑀺 𑀯𑀼𑀘𑁆𑀘𑀫𑀸𑀦𑀸𑀦𑀺 𑀤𑀺𑀝𑁆𑀞𑀸𑀦𑀺, 𑀇𑀢𑀭𑀣𑀸 𑀘 𑀤𑀺𑀝𑁆𑀞𑀸𑀦𑀺 ‘‘𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀻’’𑀢𑀺𑀆𑀤𑀻𑀲𑀽𑀢𑀺.

𑀆𑀧𑀸𑀣𑀫𑀸𑀕𑀘𑁆𑀙𑀢𑀺 𑀫𑀦𑀲𑀸 𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀳𑀺 𑀘 𑀕𑀳𑁂𑀢𑀩𑁆𑀩𑀪𑀸𑀯𑀽𑀧𑀕𑀫𑀦𑁂𑀦. 𑀖𑀝𑁆𑀝𑁂𑀢𑁆𑀯𑀸𑀢𑀺 𑀧𑀝𑀺𑀫𑀼𑀔𑀪𑀸𑀯𑀸𑀧𑀸𑀣𑀁 𑀕𑀦𑁆𑀢𑁆𑀯𑀸. 𑀲𑀭𑀪𑀸𑀡𑀓𑀲𑁆𑀲 𑀑𑀲𑀸𑀭𑀓𑀲𑁆𑀲. 𑀧𑀓𑀢𑀺𑀬𑀸 𑀤𑀺𑀝𑁆𑀞𑀸𑀤𑀺𑀯𑀲𑁂𑀦 𑀆𑀧𑀸𑀣𑀕𑀫𑀦𑀜𑁆𑀘 𑀪𑁄𑀚𑀦𑀧𑀭𑀺𑀡𑀸𑀫𑀉𑀢𑀼𑀪𑁄𑀚𑀦𑀯𑀺𑀲𑁂𑀲𑀉𑀲𑁆𑀲𑀸𑀳𑀸𑀤𑀻𑀳𑀺 𑀓𑀮𑁆𑀬𑀁, 𑀭𑁄𑀕𑀺𑀦𑁄 𑀯𑀸𑀢𑀸𑀤𑀻𑀳𑀺 𑀘 𑀉𑀧𑀤𑁆𑀤𑀼𑀢𑀁 𑀯𑀸 𑀓𑀸𑀬𑀁 𑀅𑀦𑀼𑀯𑀢𑁆𑀢𑀦𑁆𑀢𑀲𑁆𑀲 𑀚𑀸𑀕𑀭𑀲𑁆𑀲 𑀪𑀯𑀗𑁆𑀕𑀲𑁆𑀲 𑀘𑀮𑀦𑀧𑀘𑁆𑀘𑀬𑀸𑀦𑀁 𑀓𑀸𑀬𑀺𑀓𑀲𑀼𑀔𑀤𑀼𑀓𑁆𑀔𑀉𑀢𑀼𑀪𑁄𑀚𑀦𑀸𑀤𑀺𑀉𑀧𑀦𑀺𑀲𑁆𑀲𑀬𑀸𑀦𑀁 𑀘𑀺𑀢𑁆𑀢𑀧𑀡𑀺𑀤𑀳𑀦𑀲𑀤𑀺𑀲𑀸𑀲𑀤𑀺𑀲𑀲𑀫𑁆𑀩𑀦𑁆𑀥𑀤𑀲𑁆𑀲𑀦𑀸𑀤𑀺𑀧𑀘𑁆𑀘𑀬𑀸𑀦𑀁, 𑀲𑀼𑀢𑁆𑀢𑀲𑁆𑀲 𑀘 𑀲𑀼𑀧𑀺𑀦𑀤𑀲𑁆𑀲𑀦𑁂 𑀥𑀸𑀢𑀼𑀓𑁆𑀔𑁄𑀪𑀸𑀤𑀺𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀤𑀺𑀝𑁆𑀞𑀲𑁆𑀲 𑀅𑀲𑀼𑀢𑀲𑁆𑀲 𑀅𑀦𑀸𑀕𑀢𑀩𑀼𑀤𑁆𑀥𑀭𑀽𑀧𑀸𑀤𑀺𑀦𑁄 𑀧𑀲𑀸𑀤𑀤𑀸𑀢𑀼𑀓𑀸𑀫𑀢𑀸𑀯𑀢𑁆𑀣𑀼𑀲𑁆𑀲 𑀢𑀁𑀲𑀤𑀺𑀲𑀢𑀸𑀲𑀗𑁆𑀔𑀸𑀢𑁂𑀦 𑀤𑀺𑀝𑁆𑀞𑀲𑀼𑀢𑀲𑀫𑁆𑀩𑀦𑁆𑀥𑁂𑀦𑁂𑀯. 𑀦 𑀓𑁂𑀯𑀮𑀁 𑀢𑀁𑀲𑀤𑀺𑀲𑀢𑀸𑀯 𑀉𑀪𑀬𑀲𑀫𑁆𑀩𑀦𑁆𑀥𑁄, 𑀓𑀺𑀦𑁆𑀢𑀼 𑀢𑀩𑁆𑀩𑀺𑀧𑀓𑁆𑀔𑀢𑀸 𑀢𑀤𑁂𑀓𑀤𑁂𑀲𑀢𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀢𑀸𑀤𑀺𑀓𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀦𑀘𑀺 𑀯𑀼𑀢𑁆𑀢𑁂 𑀓𑀺𑀲𑁆𑀫𑀺𑀜𑁆𑀘𑀺 𑀲𑀼𑀢𑁂 𑀅𑀯𑀺𑀘𑀸𑀭𑁂𑀢𑁆𑀯𑀸 𑀲𑀤𑁆𑀤𑀳𑀦𑀁 𑀲𑀤𑁆𑀥𑀸, 𑀲𑀬𑀫𑁂𑀯 𑀢𑀁 𑀯𑀺𑀘𑀸𑀭𑁂𑀢𑁆𑀯𑀸 𑀭𑁄𑀘𑀦𑀁 𑀭𑀼𑀘𑀺, ‘‘𑀏𑀯𑀁 𑀯𑀸 𑀏𑀯𑀁 𑀯𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀓𑀸𑀭𑀯𑀺𑀘𑀸𑀭𑀡𑀁 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁄, 𑀯𑀺𑀘𑀸𑀭𑁂𑀦𑁆𑀢𑀲𑁆𑀲 𑀓𑀢𑁆𑀣𑀘𑀺 𑀤𑀺𑀝𑁆𑀞𑀺𑀬𑀸 𑀦𑀺𑀚𑁆𑀛𑀸𑀦𑀓𑁆𑀔𑀫𑀦𑀁 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺.

𑀕𑁂𑀭𑀼𑀓𑀳𑀭𑀺𑀢𑀸𑀮𑀜𑁆𑀚𑀦𑀸𑀤𑀺𑀥𑀸𑀢𑀽𑀲𑀼. 𑀲𑀼𑀪𑀦𑀺𑀫𑀺𑀢𑁆𑀢𑀁 𑀲𑀼𑀪𑀕𑁆𑀕𑀳𑀡𑀲𑁆𑀲 𑀦𑀺𑀫𑀺𑀢𑁆𑀢𑀁. 𑀢𑀁 𑀲𑀼𑀪𑀦𑀺𑀫𑀺𑀢𑁆𑀢𑀢𑁆𑀢𑀸 𑀭𑀜𑁆𑀚𑀦𑀻𑀬𑀢𑁆𑀢𑀸 𑀘 𑀮𑁄𑀪𑀲𑁆𑀲 𑀯𑀢𑁆𑀣𑀼. 𑀦𑀺𑀬𑀫𑀺𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀦𑀺𑀬𑀫𑀺𑀢𑀯𑀲𑁂𑀦. 𑀏𑀯𑀫𑀺𑀢𑀭𑁂𑀲𑀼 𑀤𑁆𑀯𑀻𑀲𑀼. 𑀆𑀪𑁄𑀕𑁄 𑀆𑀪𑀼𑀚𑀺𑀢𑀁. 𑀮𑀽𑀔𑀧𑀼𑀕𑁆𑀕𑀮𑀸 𑀤𑁄𑀲𑀩𑀳𑀼𑀮𑀸. 𑀅𑀤𑁄𑀲𑀩𑀳𑀼𑀮𑀸 𑀲𑀺𑀦𑀺𑀤𑁆𑀥𑀧𑀼𑀕𑁆𑀕𑀮𑀸. 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺 𑀧𑀻𑀢𑀺𑀦𑀺𑀦𑁆𑀦𑀘𑀺𑀢𑁆𑀢𑀢𑀸. 𑀇𑀫𑁂𑀳𑀺…𑀧𑁂… 𑀯𑁂𑀤𑀺𑀢𑀩𑁆𑀩𑁄 𑀧𑀻𑀢𑀺𑀬𑀸 𑀲𑁄𑀫𑀦𑀲𑁆𑀲𑀯𑀺𑀧𑁆𑀧𑀬𑁄𑀕𑀸𑀲𑀫𑁆𑀪𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀚𑀻𑀯𑀺𑀢𑀯𑀼𑀢𑁆𑀢𑀺𑀬𑀸 𑀆𑀬𑀢𑀦𑀪𑀸𑀯𑀢𑁄 𑀳𑀢𑁆𑀣𑀸𑀭𑁄𑀳𑀸𑀤𑀺𑀲𑀺𑀧𑁆𑀧𑀫𑁂𑀯 𑀲𑀺𑀧𑁆𑀧𑀸𑀬𑀢𑀦𑀁. 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀫𑁂𑀯 𑀓𑀫𑁆𑀫𑀸𑀬𑀢𑀦𑀁. 𑀆𑀬𑀼𑀯𑁂𑀤𑀸𑀤𑀺𑀯𑀺𑀚𑁆𑀚𑀸 𑀏𑀯 𑀯𑀺𑀚𑁆𑀚𑀸𑀝𑁆𑀞𑀸𑀦𑀁. 𑀅𑀩𑁆𑀬𑀸𑀧𑀚𑁆𑀚𑁂𑀢𑀺 𑀤𑁄𑀫𑀦𑀲𑁆𑀲𑀩𑁆𑀬𑀸𑀧𑀸𑀤𑀭𑀳𑀺𑀢𑁂 𑀭𑀽𑀧𑀪𑀯𑁂. 𑀥𑀫𑁆𑀫𑀧𑀤𑀸𑀢𑀺 𑀥𑀫𑁆𑀫𑀓𑁄𑀝𑁆𑀞𑀸𑀲𑀸. 𑀧𑀺𑀮𑀯𑀦𑁆𑀢𑀻𑀢𑀺 𑀉𑀧𑀝𑁆𑀞𑀳𑀦𑁆𑀢𑀺 𑀧𑀤𑀺𑀲𑁆𑀲𑀦𑁆𑀢𑀺. 𑀬𑁄𑀕𑀸𑀢𑀺 𑀪𑀸𑀯𑀦𑀸𑀪𑀺𑀬𑁄𑀕𑀸 𑀲𑀫𑀸𑀥𑀺𑀢𑁄. 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸𑀢𑀺 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀁 𑀯𑀢𑁆𑀣𑀽𑀦𑀁 𑀦𑀺𑀫𑁆𑀫𑀮𑀪𑀸𑀯𑀓𑀺𑀭𑀺𑀬𑀸. 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀜𑁆𑀜𑀫𑀜𑁆𑀜𑀸𑀦𑀢𑀺𑀯𑀢𑁆𑀢𑀦𑀁 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀢𑀸. 𑀕𑀫𑁆𑀪𑀻𑀭𑀸𑀦𑀁 𑀜𑀸𑀡𑁂𑀦 𑀘𑀭𑀺𑀢𑀩𑁆𑀩𑀸𑀦𑀁, 𑀕𑀫𑁆𑀪𑀻𑀭𑀜𑀸𑀡𑁂𑀦 𑀯𑀸 𑀘𑀭𑀺𑀢𑀩𑁆𑀩𑀸𑀦𑀁 𑀲𑀼𑀢𑁆𑀢𑀦𑁆𑀢𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀸 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀧𑀘𑁆𑀘𑀯𑁂𑀓𑁆𑀔𑀡𑀸.

𑀯𑀁𑀲𑁄𑀢𑀺 𑀅𑀦𑀼𑀓𑁆𑀓𑀫𑁄. 𑀢𑀦𑁆𑀢𑀻𑀢𑀺 𑀲𑀦𑁆𑀢𑀢𑀺. 𑀧𑀯𑁂𑀡𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀫𑁂𑀢𑀁 𑀘𑀸𑀭𑀺𑀢𑁆𑀢𑀓𑀺𑀭𑀺𑀬𑀸𑀧𑀩𑀦𑁆𑀥𑀲𑁆𑀲 𑀯𑀘𑀦𑀁. 𑀘𑀸𑀭𑀺𑀢𑁆𑀢𑀲𑀻𑀮𑀢𑁆𑀢𑀸 𑀲𑀻𑀮𑀫𑀬𑀁. ‘‘𑀤𑀲𑁆𑀲𑀸𑀫𑀻’’𑀢𑀺 𑀯𑀘𑀻𑀪𑁂𑀤𑁂𑀦 𑀯𑀢𑁆𑀣𑀼𑀲𑁆𑀲 𑀧𑀭𑀺𑀡𑀢𑀢𑁆𑀢𑀸 𑀢𑀢𑁄 𑀧𑀝𑁆𑀞𑀸𑀬 𑀤𑀸𑀦𑀁 𑀆𑀭𑀤𑁆𑀥𑀁 𑀦𑀸𑀫 𑀳𑁄𑀢𑀺, 𑀬𑀢𑁄 𑀢𑀲𑁆𑀲 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀦𑀸𑀤𑀻𑀲𑀼 𑀆𑀧𑀢𑁆𑀢𑀺 𑀳𑁄𑀢𑀺. 𑀯𑀺𑀚𑁆𑀚𑀫𑀸𑀦𑀯𑀢𑁆𑀣𑀼𑀲𑁆𑀫𑀺𑀁 𑀘𑀺𑀦𑁆𑀢𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀤𑀸𑀦𑀁 𑀆𑀭𑀤𑁆𑀥𑀦𑁆𑀢𑀺 𑀢𑀢𑁆𑀣 𑀤𑀸𑀦𑀫𑀬𑀁 𑀓𑀼𑀲𑀮𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀤𑀸𑀦𑀯𑀢𑁆𑀣𑀼𑀁 𑀅𑀯𑀺𑀚𑁆𑀚𑀫𑀸𑀦𑀓𑀫𑁆𑀧𑀺 𑀲𑀗𑁆𑀔𑀭𑁄𑀦𑁆𑀢𑀲𑁆𑀲 𑀓𑀼𑀲𑀮𑀁 𑀦 𑀳𑁄𑀢𑀻𑀢𑀺. 𑀢𑀁 𑀧𑀦 𑀤𑀸𑀦𑀫𑀬𑀲𑁆𑀲 𑀧𑀼𑀩𑁆𑀩𑀪𑀸𑀕𑁄𑀢𑀺 𑀢𑀤𑁂𑀯 𑀪𑀚𑁂𑀬𑁆𑀬, 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁. 𑀓𑀼𑀮𑀯𑀁𑀲𑀸𑀤𑀺𑀯𑀲𑁂𑀦𑀸𑀢𑀺 𑀉𑀤𑀸𑀳𑀭𑀡𑀫𑀢𑁆𑀢𑀫𑁂𑀯𑁂𑀢𑀁. 𑀅𑀢𑁆𑀢𑀦𑀸 𑀲𑀫𑀸𑀤𑀺𑀦𑁆𑀦𑀯𑀢𑁆𑀢𑀯𑀲𑁂𑀦 𑀲𑀧𑁆𑀧𑀼𑀭𑀺𑀲𑀯𑀢𑁆𑀢𑀕𑀸𑀫𑀚𑀦𑀧𑀤𑀯𑀢𑁆𑀢𑀸𑀤𑀺𑀯𑀲𑁂𑀦 𑀘 𑀘𑀸𑀭𑀺𑀢𑁆𑀢𑀲𑀻𑀮𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀲𑀯𑀢𑁆𑀣𑀼𑀓𑀦𑁆𑀢𑀺 𑀪𑁂𑀭𑀺𑀆𑀤𑀺𑀯𑀢𑁆𑀣𑀼𑀲𑀳𑀺𑀢𑀁 𑀓𑀢𑁆𑀯𑀸. 𑀯𑀺𑀚𑁆𑀚𑀫𑀸𑀦𑀓𑀯𑀢𑁆𑀣𑀼𑀦𑁆𑀢𑀺 𑀪𑁂𑀭𑀺𑀆𑀤𑀺𑀯𑀢𑁆𑀣𑀼𑀁. 𑀥𑀫𑁆𑀫𑀲𑁆𑀲𑀯𑀦𑀖𑁄𑀲𑀦𑀸𑀤𑀻𑀲𑀼 𑀘 𑀲𑀯𑀢𑁆𑀣𑀼𑀓𑀁 𑀓𑀢𑁆𑀯𑀸 𑀲𑀤𑁆𑀤𑀲𑁆𑀲 𑀤𑀸𑀦𑀁 𑀲𑀤𑁆𑀤𑀯𑀢𑁆𑀣𑀽𑀦𑀁 𑀞𑀸𑀦𑀓𑀭𑀡𑀸𑀦𑀁 𑀲𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀓𑀭𑀡𑀫𑁂𑀯𑀸𑀢𑀺 𑀢𑀲𑁆𑀲 𑀘𑀺𑀦𑁆𑀢𑀦𑀁 𑀯𑀺𑀚𑁆𑀚𑀫𑀸𑀦𑀯𑀢𑁆𑀣𑀼𑀧𑀭𑀺𑀘𑁆𑀘𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀲𑀺 𑀥𑀫𑁆𑀫𑀭𑀸𑀚𑀸 𑀇𑀥 𑀘 𑀭𑀽𑀧𑀸𑀭𑀫𑁆𑀫𑀡𑀸𑀤𑀺𑀪𑀸𑀯𑀁, 𑀅𑀜𑁆𑀜𑀢𑁆𑀣 𑀘 ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀻’’𑀢𑀺 (𑀤𑀻. 𑀦𑀺. 𑁩.𑁩𑁦𑁫) 𑀤𑀸𑀦𑀫𑀬𑀸𑀤𑀺𑀪𑀸𑀯𑀁, 𑀅𑀧𑀭𑀢𑁆𑀣 𑀘 ‘‘𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸? 𑀢𑀻𑀡𑀺…𑀧𑁂… 𑀢𑀁𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀓𑀫𑁆𑀫’’𑀦𑁆𑀢𑀺𑀆𑀤𑀺𑀦𑀸 𑀓𑀸𑀬𑀓𑀫𑁆𑀫𑀸𑀤𑀺𑀪𑀸𑀯𑀜𑁆𑀘 𑀯𑀤𑀦𑁆𑀢𑁄. 𑀅𑀧𑀭𑀺𑀬𑀸𑀧𑀦𑁆𑀦𑀸 𑀘𑀸𑀢𑀺 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀅𑀜𑁆𑀜𑀸𑀬𑀢𑀦𑀢𑁆𑀢𑀸 𑀘 𑀅𑀲𑀗𑁆𑀕𑀳𑀺𑀢𑀸.

𑀧𑀭𑀺𑀪𑁄𑀕𑀭𑀲𑁄 𑀧𑀭𑀺𑀪𑁄𑀕𑀧𑀘𑁆𑀘𑀬𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁. 𑀅𑀬𑀁 𑀧𑀦 𑀭𑀲𑀲𑀫𑀸𑀦𑀢𑀸𑀯𑀲𑁂𑀦 𑀕𑀳𑀡𑀁 𑀉𑀧𑀸𑀤𑀸𑀬 𑀭𑀲𑀸𑀭𑀫𑁆𑀫𑀡𑀦𑁆𑀢𑀺 𑀯𑀼𑀢𑁆𑀢𑁄, 𑀦 𑀲𑀪𑀸𑀯𑀢𑁄. 𑀲𑀪𑀸𑀯𑁂𑀦 𑀧𑀦 𑀕𑀳𑀡𑀁 𑀉𑀧𑀸𑀤𑀸𑀬 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀥𑀫𑁆𑀫𑀸𑀭𑀫𑁆𑀫𑀡𑀫𑁂𑀯 𑀳𑁄𑀢𑀻𑀢𑀺 ‘‘𑀲𑀼𑀔𑀸 𑀯𑁂𑀤𑀦𑀸 𑀥𑀫𑁆𑀫𑀸𑀭𑀫𑁆𑀫𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀭𑀫𑁆𑀫𑀡𑀫𑁂𑀯 𑀦𑀺𑀩𑀤𑁆𑀥𑀦𑁆𑀢𑀺 𑀭𑀽𑀧𑀸𑀭𑀫𑁆𑀫𑀡𑀁…𑀧𑁂… 𑀥𑀫𑁆𑀫𑀸𑀭𑀫𑁆𑀫𑀡𑀦𑁆𑀢𑀺 𑀏𑀯𑀁 𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀓𑀫𑁆𑀫𑀲𑁆𑀲 𑀅𑀦𑀺𑀩𑀤𑁆𑀥𑀢𑁆𑀢𑀸𑀢𑀺 𑀓𑀫𑁆𑀫𑀲𑁆𑀲 𑀅𑀦𑀺𑀬𑀢𑀢𑁆𑀢𑀸. 𑀬𑀣𑀸 𑀳𑀺 𑀭𑀽𑀧𑀸𑀤𑀻𑀲𑀼 𑀏𑀓𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁 𑀅𑀦𑀜𑁆𑀜𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀦 𑀏𑀯𑀁 𑀓𑀸𑀬𑀤𑁆𑀯𑀸𑀭𑀸𑀤𑀻𑀲𑀼 𑀏𑀓𑀤𑁆𑀯𑀸𑀭𑀺𑀓𑀓𑀫𑁆𑀫𑀁 𑀅𑀜𑁆𑀜𑀲𑁆𑀫𑀺𑀁 𑀤𑁆𑀯𑀸𑀭𑁂 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀓𑀫𑁆𑀫𑀲𑁆𑀲 𑀤𑁆𑀯𑀸𑀭𑀦𑀺𑀬𑀫𑀭𑀳𑀺𑀢𑀢𑁆𑀢𑀸 𑀤𑁆𑀯𑀸𑀭𑀫𑁆𑀧𑀺 𑀓𑀫𑁆𑀫𑀦𑀺𑀬𑀫𑀭𑀳𑀺𑀢𑀦𑁆𑀢𑀺 𑀇𑀥 𑀆𑀭𑀫𑁆𑀫𑀡𑀁 𑀯𑀺𑀬 𑀦𑀺𑀬𑀫𑁂𑀢𑁆𑀯𑀸 𑀦 𑀯𑀼𑀢𑁆𑀢𑀁. 𑀯𑀺𑀦𑀸 𑀆𑀭𑀫𑁆𑀫𑀡𑁂𑀦 𑀅𑀦𑀼𑀧𑁆𑀧𑀚𑁆𑀚𑀦𑀢𑁄𑀢𑀺 𑀏𑀢𑀲𑁆𑀲𑀧𑀺 𑀘𑀢𑁆𑀣𑁄 ‘‘𑀬𑀣𑀸 𑀓𑀸𑀬𑀓𑀫𑁆𑀫𑀸𑀤𑀻𑀲𑀼 𑀏𑀓𑀁 𑀓𑀫𑁆𑀫𑀁 𑀢𑁂𑀦 𑀤𑁆𑀯𑀸𑀭𑁂𑀦 𑀯𑀺𑀦𑀸 𑀅𑀜𑁆𑀜𑀲𑁆𑀫𑀺𑀁 𑀤𑁆𑀯𑀸𑀭𑁂 𑀘𑀭𑀢𑀺, 𑀦 𑀏𑀯𑀁 𑀭𑀽𑀧𑀸𑀤𑀻𑀲𑀼 𑀏𑀓𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁 𑀢𑁂𑀦𑀸𑀭𑀫𑁆𑀫𑀡𑁂𑀦 𑀯𑀺𑀦𑀸 𑀆𑀭𑀫𑁆𑀫𑀡𑀦𑁆𑀢𑀭𑁂 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀦 𑀳𑀺 𑀬𑀣𑀸 𑀯𑀘𑀻𑀤𑁆𑀯𑀸𑀭𑁂 𑀉𑀧𑁆𑀧𑀚𑁆𑀚𑀫𑀸𑀦𑀫𑁆𑀧𑀺 ‘‘𑀓𑀸𑀬𑀓𑀫𑁆𑀫’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀲𑀤𑁆𑀤𑀸𑀭𑀫𑁆𑀫𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀁 ‘‘𑀭𑀽𑀧𑀸𑀭𑀫𑁆𑀫𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀓𑀸𑀫𑀸𑀯𑀘𑀭𑀓𑀼𑀲𑀮𑀁

𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲𑀸𑀢𑀺 𑀓𑀫𑁆𑀫𑀤𑁆𑀯𑀸𑀭𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑁆𑀫𑀺𑀁 𑀅𑀦𑀺𑀬𑀢𑀢𑀸𑀬 ‘‘𑀤𑁆𑀯𑀸𑀭𑁂 𑀘𑀭𑀦𑁆𑀢𑀺 𑀓𑀫𑁆𑀫𑀸𑀦𑀻’’𑀢𑀺𑀆𑀤𑀺𑀦𑀸 𑀧𑀓𑀸𑀲𑀦𑀢𑁆𑀣𑀁. 𑀧𑀜𑁆𑀘 𑀯𑀺𑀜𑁆𑀜𑀸𑀡𑀸𑀦𑀻𑀢𑀺 𑀏𑀢𑁆𑀣 𑀙𑀝𑁆𑀞𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀢𑀲𑁆𑀲 𑀘 𑀤𑁆𑀯𑀸𑀭𑀲𑁆𑀲 𑀅𑀦𑀼𑀤𑁆𑀤𑁂𑀲𑁄 𑀤𑁆𑀯𑀸𑀭𑀤𑁆𑀯𑀸𑀭𑀯𑀦𑁆𑀢𑀸𑀦𑀁 𑀲𑀳𑀸𑀪𑀸𑀯𑀸. 𑀦𑀺𑀬𑀢𑀭𑀽𑀧𑀭𑀽𑀧𑀯𑀲𑁂𑀦 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑀸 𑀯𑀼𑀢𑁆𑀢𑀸𑀢𑀺 𑀲𑀤𑁆𑀤𑀲𑁆𑀲 𑀯𑀺𑀓𑀸𑀭𑀭𑀽𑀧𑀸𑀤𑀻𑀦𑀜𑁆𑀘 𑀅𑀲𑀗𑁆𑀕𑀳𑁄.

𑀧𑀞𑀫𑀚𑀯𑀦𑀲𑀫𑀼𑀝𑁆𑀞𑀺𑀢𑀸 𑀯𑀸𑀬𑁄𑀥𑀸𑀢𑀼 𑀬𑀤𑀺𑀧𑀺 𑀢𑀲𑁆𑀫𑀺𑀁 𑀔𑀡𑁂 𑀭𑀽𑀧𑀸𑀦𑀁 𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑁂𑀦 𑀘𑀸𑀮𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀣𑀸𑀧𑀺 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀲𑀳𑀺𑀢𑀸𑀯 𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀤𑀲𑀲𑀼 𑀳𑀺 𑀤𑀺𑀲𑀸𑀲𑀼 𑀬𑀁 𑀤𑀺𑀲𑀁 𑀕𑀦𑁆𑀢𑀼𑀓𑀸𑀫𑁄 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀯𑀸 𑀔𑀺𑀧𑀺𑀢𑀼𑀓𑀸𑀫𑁄, 𑀢𑀁𑀤𑀺𑀲𑀸𑀪𑀺𑀫𑀼𑀔𑀸𑀦𑁂𑀯 𑀭𑀽𑀧𑀸𑀦𑀺 𑀲𑀸 𑀲𑀦𑁆𑀣𑀫𑁆𑀪𑁂𑀢𑀺 𑀲𑀦𑁆𑀥𑀸𑀭𑁂𑀢𑀺 𑀘𑀸𑀢𑀺 𑀢𑀤𑀪𑀺𑀫𑀼𑀔𑀪𑀸𑀯𑀯𑀺𑀓𑀸𑀭𑀯𑀢𑀻 𑀳𑁄𑀢𑀺, 𑀅𑀥𑀺𑀧𑁆𑀧𑀸𑀬𑀲𑀳𑀪𑀸𑀯𑀻 𑀘 𑀯𑀺𑀓𑀸𑀭𑁄 𑀯𑀺𑀜𑁆𑀜𑀢𑁆𑀢𑀻𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀆𑀯𑀚𑁆𑀚𑀦𑀲𑁆𑀲𑀧𑀺 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀪𑀸𑀯𑁄 𑀬𑀣𑀸𑀥𑀺𑀧𑁆𑀧𑀸𑀬𑀯𑀺𑀓𑀸𑀭𑀭𑀽𑀧𑀼𑀧𑁆𑀧𑀸𑀤𑀦𑁂𑀦 𑀉𑀧𑀧𑀦𑁆𑀦𑁄 𑀳𑁄𑀢𑀺, 𑀬𑀢𑁄 𑀩𑀸𑀢𑁆𑀢𑀺𑀁𑀲 𑀘𑀺𑀢𑁆𑀢𑀸𑀦𑀺 𑀭𑀽𑀧𑀺𑀭𑀺𑀬𑀸𑀧𑀣𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺. 𑀬𑁄𑀚𑀦𑀁 𑀕𑀢𑁄, 𑀤𑀲𑀬𑁄𑀚𑀦𑀁 𑀕𑀢𑁄𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀸𑀧𑁂𑀢𑀺 𑀅𑀦𑁂𑀓𑀲𑀳𑀲𑁆𑀲𑀯𑀸𑀭𑀁 𑀉𑀧𑁆𑀧𑀦𑁆𑀦𑀸.

𑀯𑀸𑀬𑁄𑀥𑀸𑀢𑀼𑀬𑀸…𑀧𑁂… 𑀧𑀘𑁆𑀘𑀬𑁄 𑀪𑀯𑀺𑀢𑀼𑀦𑁆𑀢𑀺 𑀣𑀫𑁆𑀪𑀦𑀘𑀮𑀦𑁂𑀲𑀼 𑀯𑀸𑀬𑁄𑀥𑀸𑀢𑀼𑀬𑀸 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀫𑀢𑁆𑀣𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀫𑀳𑀸𑀪𑀽𑀢𑀸𑀦𑀁 𑀏𑀓𑁄 𑀆𑀓𑀸𑀭𑀯𑀺𑀲𑁂𑀲𑁄 𑀅𑀢𑁆𑀣𑀺, 𑀅𑀬𑀁 𑀯𑀺𑀜𑁆𑀜𑀢𑁆𑀢𑀺 𑀦𑀸𑀫. 𑀢𑁂𑀲𑀜𑁆𑀳𑀺 𑀢𑀤𑀸𑀓𑀸𑀭𑀢𑁆𑀢𑀸 𑀯𑀸𑀬𑁄𑀥𑀸𑀢𑀼 𑀣𑀫𑁆𑀪𑁂𑀢𑀺 𑀘𑀸𑀮𑁂𑀢𑀺 𑀘𑀸𑀢𑀺. 𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀢𑀺 𑀏𑀢𑁂𑀦 𑀧𑀭𑀫𑀢𑁆𑀣𑀢𑁄 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀦 𑀳𑀺 𑀭𑀽𑀧𑀁 𑀅𑀧𑁆𑀧𑀘𑁆𑀘𑀬𑀁 𑀅𑀢𑁆𑀣𑀺, 𑀦 𑀘 𑀦𑀺𑀩𑁆𑀩𑀸𑀦𑀯𑀚𑁆𑀚𑁄 𑀅𑀢𑁆𑀣𑁄 𑀦𑀺𑀘𑁆𑀘𑁄 𑀅𑀢𑁆𑀣𑀻𑀢𑀺. 𑀯𑀺𑀜𑁆𑀜𑀢𑁆𑀢𑀺𑀢𑀸𑀬𑀸𑀢𑀺 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀢𑀸𑀬. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀪𑀸𑀯𑁄 𑀯𑀺𑀬 𑀫𑀳𑀸𑀪𑀽𑀢𑀯𑀺𑀓𑀸𑀭𑀢𑀸𑀬 𑀉𑀧𑀸𑀤𑀸𑀭𑀽𑀧𑀪𑀸𑀯𑁄 𑀘 𑀅𑀥𑀺𑀧𑁆𑀧𑁂𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀓𑀸𑀬𑀺𑀓𑀓𑀭𑀡𑀦𑁆𑀢𑀺 𑀓𑀸𑀬𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀁 𑀘𑀺𑀢𑁆𑀢𑀓𑀺𑀭𑀺𑀬𑀁, 𑀅𑀥𑀺𑀧𑁆𑀧𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀓𑀸𑀭𑁂𑀢𑀺 𑀫𑀜𑁆𑀜𑁂𑀢𑀺 𑀏𑀢𑁂𑀦 𑀯𑀡𑁆𑀡𑀕𑁆𑀕𑀳𑀡𑀸𑀦𑀼𑀲𑀸𑀭𑁂𑀦 𑀕𑀳𑀺𑀢𑀸𑀬 𑀯𑀺𑀜𑁆𑀜𑀢𑁆𑀢𑀺𑀬𑀸 𑀬𑀁 𑀓𑀭𑀡𑀁 𑀯𑀺𑀜𑁆𑀜𑀸𑀢𑀩𑁆𑀩𑀁, 𑀢𑀲𑁆𑀲 𑀯𑀺𑀚𑀸𑀦𑀦𑁂𑀦 𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑀺𑀜𑁆𑀜𑀸𑀢𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀦 𑀳𑀺 𑀯𑀺𑀜𑁆𑀜𑀢𑁆𑀢𑀺𑀭𑀳𑀺𑀢𑁂𑀲𑀼 𑀭𑀼𑀓𑁆𑀔𑀘𑀮𑀦𑀸𑀤𑀻𑀲𑀼 ‘‘𑀇𑀤𑀫𑁂𑀲 𑀓𑀸𑀭𑁂𑀢𑀻’’𑀢𑀺 𑀯𑀺𑀚𑀸𑀦𑀦𑀁 𑀳𑁄𑀢𑀻𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀳𑀺 𑀭𑀽𑀧𑁂 𑀅𑀪𑀺𑀦𑀺𑀧𑀸𑀢𑀫𑀢𑁆𑀢𑀁 𑀓𑀺𑀘𑁆𑀘𑀁, 𑀦 𑀅𑀥𑀺𑀧𑁆𑀧𑀸𑀬𑀲𑀳𑀪𑀼𑀦𑁄 𑀘𑀮𑀦𑀯𑀺𑀓𑀸𑀭𑀲𑁆𑀲 𑀕𑀳𑀡𑀁. 𑀘𑀺𑀢𑁆𑀢𑀲𑁆𑀲 𑀧𑀦 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀅𑀦𑀦𑁆𑀢𑀭𑀁 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀢𑀫𑁆𑀧𑀺 𑀘𑀮𑀦𑀁 𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑀁 𑀯𑀺𑀬 𑀫𑀜𑁆𑀜𑀦𑁆𑀢𑀺 𑀅𑀯𑀺𑀲𑁂𑀲𑀯𑀺𑀤𑀼𑀦𑁄, 𑀢𑀲𑁆𑀫𑀸 𑀬𑀣𑀸 𑀦𑀻𑀮𑀸𑀪𑀺𑀦𑀺𑀧𑀸𑀢𑀯𑀲𑀧𑁆𑀧𑀯𑀢𑁆𑀢𑀸𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀦𑀻𑀮𑀦𑁆𑀢𑀺 𑀧𑀯𑀢𑁆𑀢𑀸𑀬 𑀫𑀦𑁄𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀘 𑀅𑀦𑁆𑀢𑀭𑀁 𑀦 𑀯𑀺𑀜𑁆𑀜𑀸𑀬𑀢𑀺, 𑀏𑀯𑀁 𑀅𑀯𑀺𑀜𑁆𑀜𑀸𑀬𑀫𑀸𑀦𑀦𑁆𑀢𑀭𑁂𑀦 𑀫𑀦𑁄𑀤𑁆𑀯𑀸𑀭𑀯𑀺𑀜𑁆𑀜𑀸𑀡𑁂𑀦 𑀕𑀳𑀺𑀢𑁂 𑀢𑀲𑁆𑀫𑀺𑀁 𑀘𑀺𑀢𑁆𑀢𑁂𑀦 𑀲𑀳𑁂𑀯 𑀅𑀦𑀼𑀧𑀭𑀺𑀯𑀢𑁆𑀢𑁂 𑀓𑀸𑀬𑀣𑀫𑁆𑀪𑀦𑀯𑀺𑀓𑀸𑀭𑀘𑁄𑀧𑀦𑀲𑀗𑁆𑀔𑀸𑀢𑁂 ‘‘𑀇𑀤𑀫𑁂𑀲 𑀓𑀸𑀭𑁂𑀢𑀺, 𑀅𑀬𑀫𑀲𑁆𑀲 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀯𑀺𑀚𑀸𑀦𑀦𑀁 𑀳𑁄𑀢𑀺.

𑀢𑀸𑀮𑀧𑀡𑁆𑀡𑀸𑀤𑀺𑀭𑀽𑀧𑀸𑀦𑀺 𑀤𑀺𑀲𑁆𑀯𑀸 𑀢𑀤𑀦𑀦𑁆𑀢𑀭𑀧𑁆𑀧𑀯𑀢𑁆𑀢𑀸𑀬 𑀫𑀦𑁄𑀤𑁆𑀯𑀸𑀭𑀯𑀻𑀣𑀺𑀬𑀸 𑀅𑀯𑀺𑀜𑁆𑀜𑀸𑀬𑀫𑀸𑀦𑀦𑁆𑀢𑀭𑀸𑀬 𑀢𑀸𑀮𑀧𑀡𑁆𑀡𑀸𑀤𑀻𑀦𑀁 𑀉𑀤𑀓𑀸𑀤𑀺𑀲𑀳𑀘𑀸𑀭𑀺𑀧𑁆𑀧𑀓𑀸𑀭𑀢𑀁 𑀲𑀜𑁆𑀜𑀸𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀉𑀤𑀓𑀸𑀤𑀺𑀕𑁆𑀕𑀳𑀡𑀁 𑀯𑀺𑀬. 𑀏𑀢𑁆𑀣 𑀉𑀤𑀓𑀁 𑀪𑀯𑀺𑀲𑁆𑀲𑀢𑀻𑀢𑀺𑀆𑀤𑀺𑀦𑀸 𑀘 𑀉𑀤𑀓𑀸𑀤𑀺𑀲𑀫𑁆𑀩𑀦𑁆𑀥𑀦𑀸𑀓𑀸𑀭𑁂𑀦 𑀭𑀽𑀧𑀕𑁆𑀕𑀳𑀡𑀸𑀦𑀼𑀲𑀸𑀭𑀯𑀺𑀜𑁆𑀜𑀸𑀡𑁂𑀦 𑀬𑀁 𑀉𑀤𑀓𑀸𑀤𑀺 𑀯𑀺𑀜𑁆𑀜𑀸𑀢𑀩𑁆𑀩𑀁, 𑀢𑀲𑁆𑀲 𑀯𑀺𑀚𑀸𑀦𑀦𑁂𑀦 𑀢𑀤𑀸𑀓𑀸𑀭𑀲𑁆𑀲 𑀯𑀺𑀜𑁆𑀜𑀸𑀢𑀢𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀏𑀢𑀲𑁆𑀲 𑀧𑀦 𑀓𑀸𑀬𑀺𑀓𑀓𑀭𑀡𑀕𑁆𑀕𑀳𑀡𑀲𑁆𑀲 𑀉𑀤𑀓𑀸𑀤𑀺𑀕𑁆𑀕𑀳𑀡𑀲𑁆𑀲 𑀘 𑀧𑀼𑀭𑀺𑀫𑀲𑀺𑀤𑁆𑀥𑀲𑀫𑁆𑀩𑀦𑁆𑀥𑀕𑁆𑀕𑀳𑀡𑀁 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀧𑀦 𑀦𑀸𑀮𑀫𑁆𑀩𑀺𑀢𑀸𑀧𑀺 𑀯𑀺𑀜𑁆𑀜𑀢𑁆𑀢𑀺 𑀓𑀸𑀬𑀺𑀓𑀓𑀭𑀡𑀕𑁆𑀕𑀳𑀡𑀲𑁆𑀲 𑀘 𑀧𑀘𑁆𑀘𑀬𑁄 𑀧𑀼𑀭𑀺𑀫𑀲𑀺𑀤𑁆𑀥𑀲𑀫𑁆𑀩𑀦𑁆𑀥𑀕𑁆𑀕𑀳𑀡𑁄𑀧𑀦𑀺𑀲𑁆𑀲𑀬𑀯𑀲𑁂𑀦 𑀲𑀸𑀥𑀺𑀧𑁆𑀧𑀸𑀬𑀯𑀺𑀓𑀸𑀭𑀪𑀽𑀢𑀯𑀡𑁆𑀡𑀕𑁆𑀕𑀳𑀡𑀸𑀦𑀦𑁆𑀢𑀭𑀁 𑀧𑀯𑀢𑁆𑀢𑀫𑀸𑀦𑀲𑁆𑀲 𑀅𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑀲𑁆𑀲 𑀅𑀥𑀺𑀧𑁆𑀧𑀸𑀬𑀲𑀳𑀪𑀽𑀯𑀺𑀓𑀸𑀭𑀸𑀪𑀸𑀯𑁂 𑀅𑀪𑀸𑀯𑀢𑁄, 𑀏𑀯𑀁 𑀲𑀢𑀺 𑀯𑀡𑁆𑀡𑀕𑁆𑀕𑀳𑀡𑀸𑀦𑀦𑁆𑀢𑀭𑁂𑀦 𑀉𑀤𑀓𑀸𑀤𑀺𑀕𑁆𑀕𑀳𑀡𑁂𑀦𑁂𑀯 𑀢𑀸𑀮𑀧𑀡𑁆𑀡𑀸𑀤𑀺𑀲𑀜𑁆𑀜𑀸𑀡𑀸𑀓𑀸𑀭𑁄 𑀯𑀺𑀬 𑀯𑀡𑁆𑀡𑀕𑁆𑀕𑀳𑀡𑀸𑀦𑀦𑁆𑀢𑀭𑁂𑀦 𑀅𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑁂𑀦𑁂𑀯 𑀯𑀺𑀜𑁆𑀜𑀢𑁆𑀢𑀺 𑀧𑀸𑀓𑀝𑀸 𑀳𑁄𑀢𑀻𑀢𑀺 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀏𑀲 𑀓𑀸𑀭𑁂𑀢𑀺 𑀫𑀜𑁆𑀜𑁂’’𑀢𑀺 𑀅𑀥𑀺𑀧𑁆𑀧𑀸𑀬𑀯𑀺𑀚𑀸𑀦𑀦𑁂𑀦𑁂𑀯 𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑀺𑀜𑁆𑀜𑀸𑀢𑀢𑀸 𑀯𑀼𑀢𑁆𑀢𑀸.

𑀅𑀬𑀁 𑀦𑁄 𑀧𑀳𑀭𑀺𑀢𑀼𑀓𑀸𑀫𑁄𑀢𑀺 𑀅𑀥𑀺𑀧𑁆𑀧𑀸𑀬𑀯𑀺𑀚𑀸𑀦𑀦𑁂𑀦 𑀯𑀺𑀜𑁆𑀜𑀢𑁆𑀢𑀺𑀬𑀸 𑀧𑀸𑀓𑀝𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀦 𑀳𑀺 𑀢𑀤𑀧𑀸𑀓𑀝𑀪𑀸𑀯𑁂 𑀅𑀥𑀺𑀧𑁆𑀧𑀸𑀬𑀯𑀺𑀚𑀸𑀦𑀦𑀁 𑀳𑁄𑀢𑀻𑀢𑀺. 𑀲𑀫𑁆𑀫𑀼𑀔𑀻…𑀧𑁂… 𑀬𑁂𑀯 𑀦𑀸𑀫 𑀳𑁄𑀢𑀻𑀢𑀺 𑀅𑀲𑀫𑁆𑀫𑀼𑀔𑀻𑀪𑀽𑀢𑀢𑀸𑀬 𑀅𑀦𑀸𑀧𑀸𑀣𑀕𑀢𑀸𑀦𑀁 𑀭𑀽𑀧𑀸𑀤𑀻𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀤𑀺𑀪𑀸𑀯𑁄 𑀯𑀺𑀬 𑀲𑀪𑀸𑀯𑀪𑀽𑀢𑀁 𑀢𑀁 𑀤𑁆𑀯𑀺𑀥𑀸 𑀯𑀺𑀜𑁆𑀜𑀢𑁆𑀢𑀺𑀪𑀸𑀯𑀁 𑀲𑀸𑀥𑁂𑀢𑀺. 𑀧𑀭𑀁 𑀩𑁄𑀥𑁂𑀢𑀼𑀓𑀸𑀫𑀢𑀸𑀬 𑀯𑀺𑀦𑀸𑀧𑀺 𑀅𑀪𑀺𑀓𑁆𑀓𑀫𑀦𑀸𑀤𑀺𑀧𑁆𑀧𑀯𑀢𑁆𑀢𑀦𑁂𑀦 𑀲𑁄 𑀘𑀺𑀢𑁆𑀢𑀲𑀳𑀪𑀽𑀯𑀺𑀓𑀸𑀭𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀲𑀬𑀜𑁆𑀘 𑀯𑀺𑀜𑁆𑀜𑀸𑀬𑀢𑀻𑀢𑀺 𑀤𑁆𑀯𑀺𑀥𑀸𑀧𑀺 𑀯𑀺𑀜𑁆𑀜𑀢𑁆𑀢𑀺𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀲𑁆𑀫𑀺𑀁 𑀤𑁆𑀯𑀸𑀭𑁂 𑀲𑀺𑀤𑁆𑀥𑀸𑀢𑀺 𑀢𑁂𑀦 𑀤𑁆𑀯𑀸𑀭𑁂𑀦 𑀯𑀺𑀜𑁆𑀜𑀸𑀢𑀩𑁆𑀩𑀪𑀸𑀯𑀢𑁄 𑀢𑁂𑀦𑁂𑀯 𑀤𑁆𑀯𑀸𑀭𑁂𑀦 𑀦𑀸𑀫𑀮𑀸𑀪𑀢𑁄 𑀢𑀲𑁆𑀫𑀺𑀁 𑀤𑁆𑀯𑀸𑀭𑁂 𑀧𑀸𑀓𑀝𑀪𑀸𑀯𑀯𑀲𑁂𑀦 𑀲𑀺𑀤𑁆𑀥𑀸. 𑀓𑀼𑀲𑀮𑀁 𑀯𑀸 𑀅𑀓𑀼𑀲𑀮𑀁 𑀯𑀸𑀢𑀺 𑀞𑀧𑁂𑀢𑀩𑁆𑀩𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀧𑀭𑀯𑀸𑀤𑀺𑀦𑁄 𑀅𑀯𑀺𑀧𑀸𑀓𑀲𑁆𑀲 𑀓𑀫𑁆𑀫𑀪𑀸𑀯𑁄 𑀦 𑀲𑀺𑀤𑁆𑀥𑁄, 𑀇𑀢𑀭𑀲𑁆𑀲 𑀧𑀦 𑀲𑀺𑀤𑁆𑀥𑁄𑀢𑀺 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀸𑀦𑀁 𑀏𑀓𑀸𑀤𑀲𑀦𑁆𑀦𑀁 𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀁 𑀯𑀲𑁂𑀦 𑀢𑀺𑀓𑀁 𑀧𑀽𑀭𑁂𑀢𑁆𑀯𑀸 𑀞𑀧𑁂𑀢𑀩𑁆𑀩𑀁.

𑀤𑁆𑀯𑀸𑀭𑁂 𑀘𑀭𑀦𑁆𑀢𑀺 𑀓𑀫𑁆𑀫𑀸𑀦𑀻𑀢𑀺 𑀏𑀢𑁆𑀣 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀤𑀺 𑀤𑁆𑀯𑀸𑀭𑀸 𑀤𑁆𑀯𑀸𑀭𑀦𑁆𑀢𑀭𑀘𑀸𑀭𑀺𑀦𑁄 𑀳𑁄𑀦𑁆𑀢𑀺, 𑀤𑁆𑀯𑀸𑀭𑀲𑀫𑁆𑀪𑁂𑀤𑀸 𑀓𑀫𑁆𑀫𑀲𑀫𑁆𑀪𑁂𑀤𑁄𑀧𑀻𑀢𑀺 𑀓𑀸𑀬𑀓𑀫𑁆𑀫𑀁 𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀯𑀯𑀢𑁆𑀣𑀸𑀦𑀁 𑀦 𑀲𑀺𑀬𑀸, 𑀓𑀫𑁆𑀫𑀸𑀦𑀫𑁆𑀧𑀺 𑀓𑀫𑁆𑀫𑀦𑁆𑀢𑀭𑀘𑀭𑀡𑁂 𑀏𑀲𑁂𑀯 𑀦𑀬𑁄. 𑀬𑀤𑀺 𑀧𑀦 𑀤𑁆𑀯𑀸𑀭𑀸𑀦𑀫𑁆𑀧𑀺 𑀤𑁆𑀯𑀸𑀭𑀪𑀸𑀯𑁂𑀦 𑀓𑀫𑁆𑀫𑀦𑁆𑀢𑀭𑀘𑀭𑀡𑀁 𑀓𑀫𑁆𑀫𑀸𑀦𑀜𑁆𑀘 𑀤𑁆𑀯𑀸𑀭𑀦𑁆𑀢𑀭𑀘𑀭𑀡𑀁 𑀦 𑀲𑀺𑀬𑀸, 𑀲𑀼𑀝𑁆𑀞𑀼𑀢𑀭𑀁 𑀓𑀫𑁆𑀫𑀤𑁆𑀯𑀸𑀭𑀯𑀯𑀢𑁆𑀣𑀸𑀦𑀁 𑀲𑀺𑀬𑀸. 𑀦 𑀧𑀦 𑀓𑀫𑁆𑀫𑀸𑀦𑀁 𑀤𑁆𑀯𑀸𑀭𑀦𑁆𑀢𑀭𑁂 𑀅𑀘𑀭𑀡𑀁 𑀅𑀢𑁆𑀣𑀺, 𑀓𑀺𑀦𑁆𑀢𑀼 𑀤𑁆𑀯𑀸𑀭𑁂 𑀅𑀜𑁆𑀜𑀲𑁆𑀫𑀺𑀜𑁆𑀘 𑀘𑀭𑀦𑁆𑀢𑀺 𑀓𑀫𑁆𑀫𑀸𑀦𑀺 𑀅𑀜𑁆𑀜𑀸𑀦𑀺𑀧𑀺. 𑀬𑀲𑁆𑀫𑀸 𑀧𑀦 𑀤𑁆𑀯𑀸𑀭𑁂 𑀤𑁆𑀯𑀸𑀭𑀸𑀦𑀺 𑀦 𑀘𑀭𑀦𑁆𑀢𑀺, 𑀢𑀲𑁆𑀫𑀸 𑀅𑀤𑁆𑀯𑀸𑀭𑀘𑀸𑀭𑀻𑀳𑀺 𑀤𑁆𑀯𑀸𑀭𑁂𑀳𑀺 𑀓𑀸𑀭𑀡𑀪𑀽𑀢𑁂𑀳𑀺 𑀓𑀫𑁆𑀫𑀸𑀦𑀺 𑀤𑁆𑀯𑀸𑀭𑀦𑁆𑀢𑀭𑁂 𑀘𑀭𑀦𑁆𑀢𑀸𑀦𑀺𑀧𑀺 𑀯𑀯𑀢𑁆𑀣𑀺𑀢𑀸𑀦𑀺. 𑀦 𑀓𑁂𑀯𑀮𑀁 𑀓𑀫𑁆𑀫𑀸𑀦𑁂𑀯, 𑀢𑁂𑀳𑀺 𑀧𑀦 𑀤𑁆𑀯𑀸𑀭𑀸𑀦𑀺𑀧𑀻𑀢𑀺 𑀏𑀯𑀁 𑀓𑀫𑁆𑀫𑀤𑁆𑀯𑀸𑀭𑀸𑀦𑀺 𑀅𑀜𑁆𑀜𑀫𑀜𑁆𑀜𑀁 𑀯𑀯𑀢𑁆𑀣𑀺𑀢𑀸𑀦𑀺 ‘‘𑀬𑁂𑀪𑀼𑀬𑁆𑀬𑁂𑀦𑀯𑀼𑀢𑁆𑀢𑀺𑀢𑀸𑀬 𑀢𑀩𑁆𑀩𑀳𑀼𑀮𑀯𑀼𑀢𑁆𑀢𑀺𑀢𑀸𑀬 𑀘𑀸’’𑀢𑀺 𑀯𑀼𑀘𑁆𑀘𑀫𑀸𑀦𑀸𑀬 𑀯𑀯𑀢𑁆𑀣𑀸𑀦𑀬𑀼𑀢𑁆𑀢𑀺𑀬𑀸. 𑀢𑀢𑁆𑀣 𑀤𑁆𑀯𑀸𑀭𑀸𑀧𑁂𑀓𑁆𑀔𑀢𑁆𑀢𑀸 𑀓𑀫𑁆𑀫𑀸𑀦𑀁 𑀓𑀸𑀬𑀓𑀫𑁆𑀫𑀸𑀤𑀺𑀪𑀸𑀯𑀲𑁆𑀲 𑀅𑀤𑁆𑀯𑀸𑀭𑀘𑀸𑀭𑀻𑀳𑀺 𑀤𑁆𑀯𑀸𑀭𑁂𑀳𑀺 𑀯𑀯𑀢𑁆𑀣𑀸𑀦𑀁 𑀳𑁄𑀢𑀺, 𑀦 𑀧𑀦 𑀤𑁆𑀯𑀸𑀭𑀦𑁆𑀢𑀭𑀘𑀸𑀭𑀻𑀳𑀺 𑀓𑀫𑁆𑀫𑁂𑀳𑀺 𑀤𑁆𑀯𑀸𑀭𑀸𑀦𑀁 𑀅𑀯𑀯𑀢𑁆𑀣𑀸𑀦𑀁 𑀓𑀫𑁆𑀫𑀸𑀦𑀧𑁂𑀓𑁆𑀔𑀓𑀸𑀬𑀤𑁆𑀯𑀸𑀭𑀸𑀤𑀺𑀪𑀸𑀯𑁂𑀳𑀺 𑀤𑁆𑀯𑀸𑀭𑁂𑀳𑀺 𑀯𑀯𑀢𑁆𑀣𑀺𑀢𑀸𑀦𑀁 𑀓𑀸𑀬𑀓𑀫𑁆𑀫𑀸𑀤𑀻𑀦𑀁 𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀸𑀤𑀺𑀯𑀯𑀢𑁆𑀣𑀸𑀦𑀓𑀭𑀢𑁆𑀢𑀸. 𑀅𑀣 𑀯𑀸 𑀤𑁆𑀯𑀸𑀭𑀦𑁆𑀢𑀭𑁂 𑀘𑀭𑀦𑁆𑀢𑀸𑀦𑀺𑀧𑀺 𑀓𑀸𑀬𑀸𑀤𑀻𑀳𑀺 𑀉𑀧𑀮𑀓𑁆𑀔𑀺𑀢𑀸𑀦𑁂𑀯 𑀘𑀭𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀏𑀯𑀁𑀲𑀪𑀸𑀯𑀢𑁆𑀢𑀸 𑀆𑀡𑀢𑁆𑀢𑀺𑀳𑀢𑁆𑀣𑀯𑀺𑀓𑀸𑀭𑀸𑀤𑀻𑀳𑀺 𑀯𑀼𑀘𑁆𑀘𑀫𑀸𑀦𑀲𑁆𑀲𑀧𑀺 𑀓𑀸𑀬𑀸𑀤𑀻𑀳𑀺 𑀲𑀸𑀥𑁂𑀢𑀩𑁆𑀩𑀲𑀪𑀸𑀯𑀸𑀯𑀩𑁄𑀥𑀢𑁄, 𑀢𑀲𑁆𑀫𑀸 𑀦 𑀓𑀫𑁆𑀫𑀦𑁆𑀢𑀭𑀲𑁆𑀲 𑀅𑀢𑁆𑀢𑀦𑀺 𑀘𑀭𑀦𑁆𑀢𑀲𑁆𑀲𑀧𑀺 𑀤𑁆𑀯𑀸𑀭𑀦𑁆𑀢𑀭𑀁 𑀲𑀦𑀸𑀫𑀁 𑀤𑁂𑀢𑀺, 𑀦𑀸𑀧𑀺 𑀓𑀫𑁆𑀫𑀁 𑀤𑁆𑀯𑀸𑀭𑀲𑁆𑀲, 𑀢𑀁𑀢𑀁𑀤𑁆𑀯𑀸𑀭𑀫𑁂𑀯 𑀧𑀦 𑀓𑀫𑁆𑀫𑀲𑁆𑀲 𑀓𑀫𑁆𑀫𑀜𑁆𑀘 𑀤𑁆𑀯𑀸𑀭𑀦𑁆𑀢𑀭𑁂 𑀘𑀭𑀦𑁆𑀢𑀫𑁆𑀧𑀺 𑀅𑀢𑁆𑀢𑀦𑁄𑀬𑁂𑀯 𑀤𑁆𑀯𑀸𑀭𑀲𑁆𑀲 𑀦𑀸𑀫𑀁 𑀤𑁂𑀢𑀻𑀢𑀺 𑀲𑀺𑀤𑁆𑀥𑀁 𑀅𑀜𑁆𑀜𑀫𑀜𑁆𑀜𑀯𑀯𑀢𑁆𑀣𑀸𑀦𑀁. 𑀧𑀼𑀩𑁆𑀩𑁂 𑀧𑀦 𑀤𑁆𑀯𑀸𑀭𑁂𑀲𑀼 𑀅𑀦𑀺𑀩𑀤𑁆𑀥𑀢𑀸 𑀓𑀫𑁆𑀫𑀸𑀦𑀁 𑀤𑁆𑀯𑀸𑀭𑀦𑁆𑀢𑀭𑀘𑀭𑀡𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸, 𑀦 𑀏𑀢𑀁 𑀯𑀯𑀢𑁆𑀣𑀸𑀦𑀦𑁆𑀢𑀺.

𑀢𑀢𑁆𑀣𑀸𑀢𑀺 𑀢𑁂𑀲𑀼 𑀤𑁆𑀯𑀸𑀭𑀓𑀫𑁆𑀫𑁂𑀲𑀼. 𑀓𑀸𑀬𑀓𑀫𑁆𑀫𑀲𑁆𑀲 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑀦𑁆𑀢𑀺 𑀢𑀁𑀲𑀳𑀚𑀸𑀢𑀸 𑀯𑀺𑀜𑁆𑀜𑀢𑁆𑀢𑀺𑀬𑁂𑀯 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀲𑀸 𑀢𑀲𑁆𑀲 𑀓𑁂𑀦𑀘𑀺 𑀧𑀓𑀸𑀭𑁂𑀦 𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀢𑀣𑀸𑀧𑀺 𑀓𑀫𑁆𑀫𑀲𑁆𑀲 𑀯𑀺𑀲𑁂𑀲𑀺𑀓𑀸 𑀯𑀺𑀜𑁆𑀜𑀢𑁆𑀢𑀺 𑀢𑀁𑀲𑀳𑀚𑀸𑀢𑀸 𑀳𑁄𑀢𑀻𑀢𑀺 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑁂𑀦 𑀯𑀼𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀦𑀺𑀬𑀫𑁂𑀦 𑀅𑀜𑁆𑀜𑀯𑀺𑀲𑁂𑀲𑀦𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀲𑁂𑀲𑀦𑀦𑁆𑀢𑀭𑁂 𑀉𑀧𑁆𑀧𑀢𑁆𑀢𑀺𑀅𑀪𑀸𑀯𑀸. 𑀓𑀸𑀬𑁂𑀦 𑀧𑀦 𑀓𑀢𑀢𑁆𑀢𑀸𑀢𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀁 𑀚𑀦𑁂𑀢𑁆𑀯𑀸 𑀢𑀸𑀬 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀸𑀤𑀺𑀦𑀺𑀧𑁆𑀨𑀸𑀤𑀦𑀢𑁄 𑀅𑀢𑁆𑀢𑀦𑁄 𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦 ‘‘𑀓𑀸𑀬𑁂𑀦 𑀓𑀢𑀁 𑀓𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀸𑀭𑀡𑀪𑀽𑀢𑁄 𑀳𑀺 𑀧𑀦𑁂𑀢𑁆𑀣 𑀓𑀸𑀬𑁄𑀢𑀺.

𑀅𑀜𑁆𑀜𑀫𑀜𑁆𑀜𑀁 𑀯𑀯𑀢𑁆𑀣𑀺𑀢𑀸𑀢𑀺 𑀏𑀢𑁆𑀣 𑀓𑀫𑁆𑀫𑀼𑀦𑀸 𑀓𑀸𑀬𑁄 𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀦𑁆𑀢𑀺 𑀏𑀯𑀁 𑀯𑀯𑀢𑁆𑀣𑀺𑀢𑁄, 𑀦 𑀓𑀸𑀬𑁄 𑀇𑀘𑁆𑀘𑁂𑀯. 𑀬𑀣𑀸 𑀲𑀽𑀘𑀺𑀓𑀫𑁆𑀫𑀼𑀦𑀸 𑀲𑀽𑀘𑀺𑀓𑀫𑁆𑀫𑀓𑀭𑀡𑀦𑁆𑀢𑀺 𑀯𑀯𑀢𑁆𑀣𑀺𑀢𑀸, 𑀦 𑀲𑀽𑀘𑀺 𑀇𑀘𑁆𑀘𑁂𑀯, 𑀢𑀣𑀸 𑀇𑀤𑀫𑁆𑀧𑀺 𑀤𑀝𑁆𑀞𑀩𑁆𑀩𑀁. 𑀅𑀜𑁆𑀜𑀫𑀜𑁆𑀜𑀁 𑀯𑀯𑀢𑁆𑀣𑀺𑀢𑀸𑀢𑀺 𑀘 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑁂𑀲𑀺𑀢𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀦𑁆𑀢𑁂𑀢𑀺 𑀬𑀣𑀸𑀯𑀼𑀢𑁆𑀢𑀁 𑀯𑀯𑀢𑁆𑀣𑀸𑀦𑀦𑀺𑀬𑀫𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀤𑁆𑀯𑀸𑀭𑁂 𑀘𑀭𑀦𑁆𑀢𑀺 𑀓𑀫𑁆𑀫𑀸𑀦𑀻’’𑀢𑀺𑀆𑀤𑀺𑀯𑀘𑀦𑀫𑁂𑀯 𑀕𑀳𑁂𑀢𑁆𑀯𑀸 𑀘𑁄𑀤𑁂𑀢𑀺. 𑀢𑀢𑁆𑀣 𑀏𑀯𑀁 𑀲𑀦𑁆𑀢𑁂𑀢𑀺 𑀓𑀫𑁆𑀫𑀸𑀦𑀁 𑀤𑁆𑀯𑀸𑀭𑀘𑀭𑀡𑁂 𑀅𑀜𑁆𑀜𑀫𑀜𑁆𑀜𑁂𑀦 𑀘 𑀯𑀯𑀢𑁆𑀣𑀸𑀦𑁂 𑀦𑀸𑀫𑀮𑀸𑀪𑁂 𑀯𑀺𑀲𑁂𑀲𑀦𑁂 𑀲𑀢𑀻𑀢𑀺 𑀅𑀢𑁆𑀣𑁄.

𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀘𑀻𑀓𑀫𑁆𑀫𑀤𑁆𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀢𑀺 𑀏𑀢𑁆𑀣 𑀲𑀼𑀪𑀸𑀲𑀺𑀢𑀪𑀸𑀲𑀦𑀲𑀗𑁆𑀔𑀸𑀢𑀸 𑀅𑀧𑀺𑀲𑀼𑀡𑀯𑀸𑀘𑀸, 𑀥𑀫𑁆𑀫𑀪𑀸𑀲𑀦𑀲𑀗𑁆𑀔𑀸𑀢𑁄 𑀅𑀲𑀫𑁆𑀨𑀧𑁆𑀧𑀮𑀸𑀧𑁄, 𑀧𑀺𑀬𑀪𑀸𑀲𑀦𑀲𑀗𑁆𑀔𑀸𑀢𑀸 𑀅𑀨𑀭𑀼𑀲𑀯𑀸𑀘𑀸, 𑀲𑀘𑁆𑀘𑀪𑀸𑀲𑀦𑀲𑀗𑁆𑀔𑀸𑀢𑁄 𑀅𑀫𑀼𑀲𑀸𑀯𑀸𑀤𑁄 𑀘𑀸𑀢𑀺 𑀏𑀢𑀸 𑀯𑀸𑀘𑀸 𑀢𑀣𑀸𑀧𑀯𑀢𑁆𑀢𑀸 𑀘𑁂𑀢𑀦𑀸 𑀤𑀝𑁆𑀞𑀩𑁆𑀩𑀸. 𑀲𑀳𑀲𑀤𑁆𑀤𑀸 𑀧𑀦𑀸𑀢𑀺 𑀢𑀲𑁆𑀲 𑀯𑀺𑀓𑀸𑀭𑀲𑁆𑀲 𑀲𑀤𑁆𑀤𑁂𑀦 𑀲𑀳 𑀲𑀫𑁆𑀪𑀽𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀢𑀸𑀬 𑀧𑀦 𑀲𑁄 𑀦 𑀬𑀸𑀯 𑀲𑀤𑁆𑀤𑀪𑀸𑀯𑀻𑀢𑀺 𑀤𑀝𑁆𑀞𑀩𑁆𑀩𑁄, 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑁄 𑀦 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀧𑀯𑀢𑁆𑀢𑁂𑀦 𑀫𑀳𑀸𑀅𑀝𑁆𑀞𑀓𑀣𑀸𑀯𑀸𑀤𑁂𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑀤𑁆𑀤𑁄 𑀯𑀺𑀦𑀸𑀧𑀺 𑀯𑀺𑀜𑁆𑀜𑀢𑁆𑀢𑀺𑀖𑀝𑁆𑀝𑀦𑁂𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀆𑀧𑀚𑁆𑀚𑀢𑀺. ‘‘𑀬𑀸 𑀢𑀸𑀬 𑀯𑀸𑀘𑀸𑀬 𑀯𑀺𑀜𑁆𑀜𑀢𑁆𑀢𑀻’’𑀢𑀺 (𑀥. 𑀲. 𑁬𑁩𑁬) 𑀳𑀺 𑀯𑀘𑀦𑀢𑁄 𑀅𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀲𑀤𑁆𑀤𑁂𑀦 𑀲𑀳 𑀯𑀺𑀜𑁆𑀜𑀢𑁆𑀢𑀺𑀬𑀸 𑀉𑀧𑁆𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺.

𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀲𑀤𑁆𑀤𑀸𑀬𑀢𑀦𑀦𑁆𑀢𑀺 𑀏𑀢𑁆𑀣 𑀘 𑀦 𑀓𑁄𑀘𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁄 𑀲𑀤𑁆𑀤𑁄 𑀅𑀲𑀗𑁆𑀕𑀳𑀺𑀢𑁄 𑀦𑀸𑀫 𑀅𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀫𑀳𑀸𑀅𑀝𑁆𑀞𑀓𑀣𑀸𑀯𑀸𑀤𑀁 𑀧𑀝𑀺𑀲𑁂𑀥𑁂𑀢𑀺. 𑀙𑀩𑁆𑀩𑀺𑀥𑁂𑀦 𑀭𑀽𑀧𑀲𑀗𑁆𑀕𑀳𑀸𑀤𑀻𑀲𑀼 𑀳𑀺 ‘‘𑀲𑁄𑀢𑀯𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺 ‘‘𑀤𑀺𑀝𑁆𑀞𑀁 𑀲𑀼𑀢’’𑀦𑁆𑀢𑀺 𑀏𑀢𑁆𑀣 ‘‘𑀲𑀼𑀢’’𑀦𑁆𑀢𑀺 𑀘 𑀦 𑀓𑁄𑀘𑀺 𑀲𑀤𑁆𑀤𑁄 𑀦 𑀲𑀗𑁆𑀕𑀬𑁆𑀳𑀢𑀻𑀢𑀺. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀺𑀜𑁆𑀜𑀢𑁆𑀢𑀺𑀲𑀳𑀚𑀫𑁂𑀯 𑀚𑀺𑀯𑁆𑀳𑀸𑀢𑀸𑀮𑀼𑀘𑀮𑀦𑀸𑀤𑀺𑀓𑀭𑀯𑀺𑀢𑀓𑁆𑀓𑀲𑀫𑀼𑀝𑁆𑀞𑀺𑀢𑀁 𑀲𑀼𑀔𑀼𑀫𑀲𑀤𑁆𑀤𑀁 ‘‘𑀤𑀺𑀩𑁆𑀩𑀲𑁄𑀢𑁂𑀦 𑀲𑀼𑀢𑁆𑀯𑀸 𑀆𑀤𑀺𑀲𑀢𑀻’’𑀢𑀺 𑀲𑀼𑀢𑁆𑀢𑁂 𑀧𑀝𑁆𑀞𑀸𑀦𑁂 𑀘 𑀑𑀴𑀸𑀭𑀺𑀓𑀲𑀤𑁆𑀤𑀁 𑀲𑀦𑁆𑀥𑀸𑀬 ‘‘𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀅𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀢𑀸 𑀯𑀼𑀢𑁆𑀢𑀸 𑀲𑀺𑀬𑀸. 𑀲𑀤𑁆𑀤𑁄 𑀘 𑀅𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁄 𑀘𑀸𑀢𑀺 𑀯𑀺𑀭𑀼𑀤𑁆𑀥𑀫𑁂𑀢𑀦𑁆𑀢𑀺 𑀧𑀦 𑀧𑀝𑀺𑀓𑁆𑀔𑁂𑀧𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀜𑁆𑀜𑀢𑁆𑀢𑀺𑀧𑀘𑁆𑀘𑀬𑀸 𑀖𑀝𑁆𑀝𑀦𑀸 𑀯𑀺𑀜𑁆𑀜𑀢𑁆𑀢𑀺𑀖𑀝𑁆𑀝𑀦𑀸. 𑀯𑀺𑀜𑁆𑀜𑀢𑁆𑀢𑀺 𑀏𑀯 𑀯𑀸. 𑀖𑀝𑁆𑀝𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀪𑀽𑀢𑀯𑀺𑀓𑀸𑀭𑁄 𑀳𑀺 ‘‘𑀖𑀝𑁆𑀝𑀦𑀸’’𑀢𑀺 𑀯𑀼𑀢𑁆𑀢𑁄. 𑀲𑀗𑁆𑀖𑀝𑁆𑀝𑀦𑁂𑀦 𑀲𑀳𑁂𑀯 𑀲𑀤𑁆𑀤𑁄 𑀉𑀧𑁆𑀧𑀚𑁆𑀚𑀢𑀺, 𑀦 𑀧𑀼𑀩𑁆𑀩𑀸𑀧𑀭𑀪𑀸𑀯𑁂𑀦. 𑀧𑀣𑀯𑀻𑀥𑀸𑀢𑀼𑀬𑀸𑀢𑀺 𑀇𑀤𑀁 𑀯𑀸𑀬𑁄𑀥𑀸𑀢𑀼𑀬𑀸 𑀯𑀺𑀬 𑀘𑀸𑀮𑀦𑀁 𑀧𑀣𑀯𑀻𑀥𑀸𑀢𑀼𑀬𑀸 𑀲𑀗𑁆𑀖𑀝𑁆𑀝𑀦𑀁 𑀓𑀺𑀘𑁆𑀘𑀁 𑀅𑀥𑀺𑀓𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀯𑀺𑀓𑀸𑀭𑀲𑁆𑀲 𑀘 𑀢𑀧𑁆𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀢𑀩𑁆𑀩𑀺𑀓𑀸𑀭𑀸𑀦𑀜𑁆𑀳𑀺 𑀪𑀽𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀘𑁆𑀘𑀬𑀪𑀸𑀯𑁄𑀢𑀺. 𑀅𑀜𑁆𑀜𑀫𑁆𑀧𑀺 𑀲𑀩𑁆𑀩𑀁 𑀯𑀺𑀥𑀸𑀦𑀁 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀁 𑀯𑀺𑀬 𑀯𑁂𑀤𑀺𑀢𑀩𑁆𑀩𑀁.

𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑀁…𑀧𑁂… 𑀦 𑀮𑀩𑁆𑀪𑀢𑀺. 𑀦 𑀳𑀺 𑀘𑀸𑀮𑀦𑀁 𑀉𑀧𑀸𑀤𑀺𑀦𑁆𑀦𑀖𑀝𑁆𑀝𑀦𑀦𑁆𑀢𑀺. 𑀘𑀸𑀮𑀦𑀜𑁆𑀳𑀺 𑀤𑁂𑀲𑀦𑁆𑀢𑀭𑀼𑀧𑁆𑀧𑀸𑀤𑀦𑀧𑀭𑀫𑁆𑀧𑀭𑀢𑀸, 𑀖𑀝𑁆𑀝𑀦𑀁 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀪𑀽𑀢𑀓𑀮𑀸𑀧𑀸𑀦𑀁 𑀆𑀲𑀦𑁆𑀦𑀢𑀭𑀼𑀧𑁆𑀧𑀸𑀤𑁄𑀢𑀺. 𑀉𑀧𑀢𑁆𑀣𑀫𑁆𑀪𑀦𑀓𑀺𑀘𑁆𑀘𑀫𑁆𑀧𑀺 𑀦𑀢𑁆𑀣𑀻𑀢𑀺 𑀉𑀧𑀢𑁆𑀣𑀫𑁆𑀪𑀦𑁂𑀦 𑀯𑀺𑀦𑀸 𑀧𑀞𑀫𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀧𑀺 𑀖𑀝𑁆𑀝𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀢𑀻𑀢𑀺 𑀖𑀝𑁆𑀝𑀦𑀢𑁆𑀣𑀁 𑀉𑀧𑀢𑁆𑀣𑀫𑁆𑀪𑀦𑁂𑀦 𑀧𑀬𑁄𑀚𑀦𑀁 𑀦𑀢𑁆𑀣𑀺, 𑀮𑀤𑁆𑀥𑀸𑀲𑁂𑀯𑀦𑁂𑀦 𑀘𑀺𑀢𑁆𑀢𑁂𑀦𑁂𑀯 𑀖𑀝𑁆𑀝𑀦𑀲𑁆𑀲 𑀩𑀮𑀯𑀪𑀸𑀯𑀢𑁄 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀧𑀢𑁆𑀣𑀫𑁆𑀪𑀦𑀁 𑀦𑀢𑁆𑀣𑀺 𑀅𑀢𑁆𑀣𑀻𑀢𑀺 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀯𑀘𑀻𑀓𑀫𑁆𑀫𑀤𑁆𑀯𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀦𑁄𑀓𑀫𑁆𑀫𑀤𑁆𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑀅𑀬𑀁 𑀦𑀸𑀫 𑀘𑁂𑀢𑀦𑀸 𑀓𑀫𑁆𑀫𑀁 𑀦 𑀳𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸𑀢𑀺 𑀇𑀤𑀁 𑀬𑀲𑁆𑀲 𑀤𑁆𑀯𑀸𑀭𑀁 𑀫𑀦𑁄, 𑀢𑀁𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀓𑀧𑁆𑀧𑁂𑀢𑀻𑀢𑀺 ‘‘𑀢𑁆𑀯𑀁 𑀨𑀼𑀲𑀦𑀁 𑀓𑀭𑁄𑀳𑀺, 𑀢𑁆𑀯𑀁 𑀯𑁂𑀤𑀬𑀺𑀢’’𑀦𑁆𑀢𑀺 𑀏𑀯𑀁 𑀓𑀧𑁆𑀧𑁂𑀦𑁆𑀢𑀁 𑀯𑀺𑀬 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀧𑀓𑀧𑁆𑀧𑀦𑀜𑁆𑀘 𑀢𑀤𑁂𑀯. 𑀓𑀺𑀁 𑀧𑀺𑀡𑁆𑀟𑀁 𑀓𑀭𑁄𑀢𑀻𑀢𑀺 𑀆𑀬𑀽𑀳𑀦𑀢𑁆𑀣𑀯𑀲𑁂𑀦 𑀧𑀼𑀘𑁆𑀙𑀢𑀺. 𑀨𑀲𑁆𑀲𑀸𑀤𑀺𑀥𑀫𑁆𑀫𑁂 𑀳𑀺 𑀅𑀯𑀺𑀧𑁆𑀧𑀓𑀺𑀡𑁆𑀡𑁂 𑀓𑀢𑁆𑀯𑀸 𑀲𑀓𑀺𑀘𑁆𑀘𑁂𑀲𑀼 𑀧𑀯𑀢𑁆𑀢𑀦𑀁 𑀆𑀬𑀽𑀳𑀦𑀁, 𑀢𑀢𑁆𑀣𑁂𑀯 𑀩𑁆𑀬𑀸𑀧𑀸𑀭𑀡𑀁 𑀘𑁂𑀢𑀬𑀦𑀁, 𑀢𑀣𑀸𑀓𑀭𑀡𑀁 𑀅𑀪𑀺𑀲𑀗𑁆𑀔𑀭𑀡𑀦𑁆𑀢𑀺. 𑀢𑁂𑀪𑀽𑀫𑀓𑀲𑁆𑀲𑁂𑀯 𑀕𑀳𑀡𑀁 𑀮𑁄𑀓𑀼𑀢𑁆𑀢𑀭𑀓𑀫𑁆𑀫𑀲𑁆𑀲 𑀓𑀫𑁆𑀫𑀓𑁆𑀔𑀬𑀓𑀭𑀢𑁆𑀢𑀸.

𑀫𑀦𑁄𑀓𑀫𑁆𑀫𑀤𑁆𑀯𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸

𑀘𑁂𑀢𑀬𑀺𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀢𑀻𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀧𑀼𑀭𑀺𑀫𑀘𑁂𑀢𑀦𑀸𑀬 𑀘𑁂𑀢𑀬𑀺𑀢𑁆𑀯𑀸 𑀲𑀦𑁆𑀦𑀺𑀝𑁆𑀞𑀸𑀦𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀫𑀸 𑀘𑁂𑀢𑀦𑀸𑀧𑀼𑀩𑁆𑀩𑀓𑀁 𑀓𑀫𑁆𑀫𑀁 𑀢𑀁𑀘𑁂𑀢𑀦𑀸𑀲𑀪𑀸𑀯𑀫𑁂𑀯𑀸𑀢𑀺 𑀘𑁂𑀢𑀦𑀁 𑀅𑀳𑀁 𑀓𑀫𑁆𑀫𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀫𑀸𑀦𑀓𑀸𑀮𑀢𑁆𑀢𑁂𑀧𑀺 𑀓𑀸𑀭𑀡𑀓𑀺𑀭𑀺𑀬𑀸 𑀧𑀼𑀩𑁆𑀩𑀓𑀸𑀮𑀸 𑀯𑀺𑀬 𑀯𑀢𑁆𑀢𑀼𑀁 𑀬𑀼𑀢𑁆𑀢𑀸, 𑀨𑀮𑀓𑀺𑀭𑀺𑀬𑀸 𑀘 𑀅𑀧𑀭𑀓𑀸𑀮𑀸 𑀯𑀺𑀬. 𑀬𑀲𑁆𑀫𑀸 𑀘 𑀘𑁂𑀢𑀦𑀸𑀬 𑀘𑁂𑀢𑀬𑀺𑀢𑁆𑀯𑀸 𑀓𑀸𑀬𑀯𑀸𑀘𑀸𑀳𑀺 𑀘𑁄𑀧𑀦𑀓𑀺𑀭𑀺𑀬𑀁 𑀫𑀦𑀲𑀸 𑀘 𑀅𑀪𑀺𑀚𑁆𑀛𑀸𑀤𑀺𑀓𑀺𑀭𑀺𑀬𑀁 𑀓𑀭𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀲𑀸 𑀓𑀺𑀭𑀺𑀬𑀸𑀬 𑀓𑀸𑀭𑀺𑀓𑀁 𑀘𑁂𑀢𑀦𑀁 𑀅𑀳𑀁 𑀓𑀫𑁆𑀫𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀓𑀸𑀬𑁂 𑀯𑀸𑀢𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑁂 𑀓𑀸𑀬𑁂 𑀯𑀸. 𑀲𑀢𑀻𑀢𑀺 𑀥𑀭𑀫𑀸𑀦𑁂, 𑀅𑀦𑀺𑀭𑁄𑀥𑀺𑀢𑁂 𑀯𑀸. 𑀓𑀸𑀬𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀓𑀸𑀬𑀲𑀜𑁆𑀘𑁂𑀢𑀦𑀸. 𑀏𑀢𑁆𑀣 𑀘 𑀲𑀼𑀔𑀤𑀼𑀓𑁆𑀔𑀼𑀧𑁆𑀧𑀸𑀤𑀓𑁂𑀦 𑀓𑀫𑁆𑀫𑁂𑀦 𑀪𑀯𑀺𑀢𑀩𑁆𑀩𑀁, 𑀘𑁂𑀢𑀦𑀸 𑀘 𑀲𑀼𑀔𑀤𑀼𑀓𑁆𑀔𑀼𑀧𑁆𑀧𑀸𑀤𑀺𑀓𑀸 𑀯𑀼𑀢𑁆𑀢𑀸𑀢𑀺 𑀢𑀲𑁆𑀲𑀸 𑀓𑀫𑁆𑀫𑀪𑀸𑀯𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀲𑀜𑁆𑀘𑁂𑀢𑀦𑀺𑀬𑀦𑁆𑀢𑀺 𑀲𑀜𑁆𑀘𑁂𑀢𑀦𑀲𑀪𑀸𑀯𑀯𑀦𑁆𑀢𑀁. 𑀲𑀫𑀺𑀤𑁆𑀥𑀺𑀢𑁆𑀣𑁂𑀭𑁂𑀦 ‘‘𑀲𑀜𑁆𑀘𑁂𑀢𑀦𑀺𑀬𑀁, 𑀆𑀯𑀼𑀲𑁄…𑀧𑁂… 𑀫𑀦𑀲𑀸 𑀲𑀼𑀔𑀁 𑀲𑁄 𑀯𑁂𑀤𑀬𑀢𑀻’’𑀢𑀺 (𑀫. 𑀦𑀺. 𑁩.𑁩𑁦𑁦; 𑀓𑀣𑀸. 𑁫𑁩𑁯) 𑀅𑀯𑀺𑀪𑀚𑀺𑀢𑁆𑀯𑀸 𑀩𑁆𑀬𑀸𑀓𑀢𑁄. 𑀲𑀼𑀔𑀯𑁂𑀤𑀦𑀻𑀬𑀦𑁆𑀢𑀺𑀆𑀤𑀺𑀦𑀸 𑀧𑀦 𑀯𑀺𑀪𑀚𑀺𑀢𑁆𑀯𑀸 𑀩𑁆𑀬𑀸𑀓𑀸𑀢𑀩𑁆𑀩𑁄 𑀲𑁄 𑀧𑀜𑁆𑀳𑁄, 𑀢𑀲𑁆𑀫𑀸 𑀲𑀫𑁆𑀫𑀸 𑀩𑁆𑀬𑀸𑀓𑀢𑁄 𑀦𑀸𑀫 𑀦 𑀳𑁄𑀢𑀺. 𑀇𑀢𑀭𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑀣𑀸 𑀧𑀦 𑀲𑀼𑀢𑁆𑀢𑀸𑀦𑀺 𑀞𑀺𑀢𑀸𑀦𑀺, 𑀢𑀣𑀸 𑀘𑁄𑀧𑀦𑀓𑀺𑀭𑀺𑀬𑀸𑀦𑀺𑀲𑁆𑀲𑀬𑀪𑀽𑀢𑀸 𑀓𑀸𑀬𑀯𑀸𑀘𑀸 𑀅𑀪𑀺𑀚𑁆𑀛𑀸𑀤𑀺𑀓𑀺𑀭𑀺𑀬𑀸𑀦𑀺𑀲𑁆𑀲𑀬𑁄 𑀘 𑀫𑀦𑁄𑀤𑁆𑀯𑀸𑀭𑀸𑀦𑀺, 𑀬𑀸𑀬 𑀧𑀦 𑀘𑁂𑀢𑀦𑀸𑀬 𑀢𑁂𑀳𑀺 𑀓𑀸𑀬𑀸𑀤𑀻𑀳𑀺 𑀓𑀭𑀡𑀪𑀽𑀢𑁂𑀳𑀺 𑀘𑁄𑀧𑀦𑀸𑀪𑀺𑀚𑁆𑀛𑀸𑀤𑀺𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑀺 𑀯𑀸𑀲𑀺𑀆𑀤𑀻𑀳𑀺 𑀯𑀺𑀬 𑀙𑁂𑀤𑀦𑀸𑀤𑀺𑀁, 𑀲𑀸 𑀘𑁂𑀢𑀦𑀸 𑀓𑀫𑁆𑀫𑀦𑁆𑀢𑀺 𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀺𑀬𑀫𑁆𑀧𑀺 𑀓𑀫𑁆𑀫𑀤𑁆𑀯𑀸𑀭𑀸𑀪𑁂𑀤𑀦𑀜𑁆𑀘 𑀓𑀫𑁆𑀫𑀤𑁆𑀯𑀸𑀭𑀯𑀯𑀢𑁆𑀣𑀸𑀦𑀜𑁆𑀘 𑀤𑀺𑀲𑁆𑀲𑀢𑀺, 𑀏𑀯𑀜𑁆𑀘 𑀲𑀢𑀺 ‘‘𑀓𑀸𑀬𑁂𑀦 𑀘𑁂 𑀓𑀢𑀁 𑀓𑀫𑁆𑀫’’𑀦𑁆𑀢𑀺𑀆𑀤𑀺𑀕𑀸𑀣𑀸𑀬𑁄 (𑀥. 𑀲. 𑀅𑀝𑁆𑀞. 𑁧 𑀓𑀸𑀬𑀓𑀫𑁆𑀫𑀤𑁆𑀯𑀸𑀭) 𑀅𑀢𑀺𑀯𑀺𑀬 𑀬𑀼𑀚𑁆𑀚𑀦𑁆𑀢𑀺.

𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀇𑀥 𑀮𑁄𑀓𑀺𑀬𑀓𑀫𑁆𑀫𑀓𑀣𑀸𑀬𑀁 𑀅𑀦𑀥𑀺𑀧𑁆𑀧𑁂𑀢𑁄𑀧𑀺 𑀪𑀚𑀸𑀧𑀺𑀬𑀫𑀸𑀦𑁄 𑀢𑀻𑀡𑀺 𑀓𑀫𑁆𑀫𑀸𑀦𑀺 𑀪𑀚𑀢𑀺. 𑀫𑀦𑁂𑀦 𑀤𑀼𑀲𑁆𑀲𑀻𑀮𑁆𑀬𑀦𑁆𑀢𑀺 𑀓𑀸𑀬𑀺𑀓𑀯𑀸𑀘𑀲𑀺𑀓𑀯𑀻𑀢𑀺𑀓𑁆𑀓𑀫𑀯𑀚𑁆𑀚𑀁 𑀲𑀩𑁆𑀩𑀁 𑀅𑀓𑀼𑀲𑀮𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀗𑁆𑀓𑀧𑁆𑀧𑀯𑀸𑀬𑀸𑀫𑀲𑀢𑀺𑀲𑀫𑀸𑀥𑀺𑀁 𑀯𑀸. 𑀢𑀫𑁆𑀧𑀺 𑀘𑁂𑀢𑀁 ‘‘𑀫𑀦𑀲𑀸 𑀲𑀁𑀯𑀭𑁄 𑀲𑀸𑀥𑀽’’𑀢𑀺 (𑀲𑀁. 𑀦𑀺. 𑁧.𑁧𑁧𑁬; 𑀥. 𑀧. 𑁩𑁬𑁧) 𑀯𑀼𑀢𑁆𑀢𑀲𑁆𑀲 𑀲𑀁𑀯𑀭𑀲𑁆𑀲 𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀲𑀻𑀮𑀯𑀺𑀧𑀢𑁆𑀢𑀺𑀯𑀲𑁂𑀦. 𑀦 𑀳𑀺 𑀲𑀸 𑀫𑀸𑀦𑀲𑀺𑀓𑀸 𑀅𑀢𑁆𑀣𑀻𑀢𑀺 𑀫𑀕𑁆𑀕𑀲𑁆𑀲𑁂𑀯 𑀪𑀚𑀸𑀧𑀦𑀁 𑀫𑀳𑀸𑀯𑀺𑀲𑀬𑀢𑁆𑀢𑀸. 𑀩𑁄𑀚𑁆𑀛𑀗𑁆𑀕𑀸 𑀳𑀺 𑀫𑀦𑁄𑀓𑀫𑁆𑀫𑀫𑁂𑀯 𑀪𑀚𑁂𑀬𑁆𑀬𑀼𑀁, 𑀦 𑀘 𑀦 𑀲𑀓𑁆𑀓𑀸 𑀫𑀕𑁆𑀕𑀪𑀚𑀸𑀧𑀦𑁂𑀦𑁂𑀯 𑀢𑁂𑀲𑀁 𑀪𑀚𑀸𑀧𑀦𑀁 𑀯𑀺𑀜𑁆𑀜𑀸𑀢𑀼𑀦𑁆𑀢𑀺.

𑀓𑀫𑁆𑀫𑀧𑀣𑀁 𑀅𑀧𑁆𑀧𑀢𑁆𑀢𑀸𑀦𑀫𑁆𑀧𑀺 𑀢𑀁𑀢𑀁𑀤𑁆𑀯𑀸𑀭𑁂 𑀲𑀁𑀲𑀦𑁆𑀤𑀦𑀁 𑀅𑀯𑀭𑁄𑀥𑀦𑀁 𑀤𑁆𑀯𑀸𑀭𑀦𑁆𑀢𑀭𑁂 𑀓𑀫𑁆𑀫𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀬𑀫𑁆𑀧𑀺 𑀓𑀫𑁆𑀫𑀤𑁆𑀯𑀸𑀭𑀸𑀪𑁂𑀤𑀦𑀜𑁆𑀘 𑀤𑁆𑀯𑀸𑀭𑀲𑀁𑀲𑀦𑁆𑀤𑀦𑀁 𑀦𑀸𑀫. ‘‘𑀢𑀺𑀯𑀺𑀥𑀸, 𑀪𑀺𑀓𑁆𑀔𑀯𑁂, 𑀓𑀸𑀬𑀲𑀜𑁆𑀘𑁂𑀢𑀦𑀸 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫’’𑀦𑁆𑀢𑀺𑀆𑀤𑀺𑀦𑀸 (𑀓𑀣𑀸. 𑁫𑁩𑁯) 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀸𑀯 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸 𑀓𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑀸𑀢𑀺 𑀧𑀼𑀭𑀺𑀫𑀘𑁂𑀢𑀦𑀸 𑀲𑀩𑁆𑀩𑀸 𑀓𑀸𑀬𑀓𑀫𑁆𑀫𑀁 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀆𑀡𑀸𑀧𑁂𑀢𑁆𑀯𑀸…𑀧𑁂… 𑀅𑀮𑀪𑀦𑁆𑀢𑀲𑁆𑀲𑀸𑀢𑀺 𑀆𑀡𑀢𑁆𑀢𑁂𑀳𑀺 𑀅𑀫𑀸𑀭𑀺𑀢𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀦𑀸𑀫 𑀳𑁄𑀢𑀺 𑀅𑀓𑀫𑁆𑀫𑀧𑀣𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀇𑀫𑁂 𑀲𑀢𑁆𑀢𑀸 𑀳𑀜𑁆𑀜𑀦𑁆𑀢𑀽’’𑀢𑀺 𑀧𑀯𑀢𑁆𑀢𑀩𑁆𑀬𑀸𑀧𑀸𑀤𑀯𑀲𑁂𑀦 𑀘𑁂𑀢𑀦𑀸𑀧𑀓𑁆𑀔𑀺𑀓𑀸 𑀯𑀸 𑀪𑀯𑀦𑁆𑀢𑀺 𑀓𑀸𑀬𑀓𑀫𑁆𑀫𑀯𑁄𑀳𑀸𑀭𑀮𑀸𑀪𑀸. 𑀅𑀩𑁆𑀩𑁄𑀳𑀸𑀭𑀺𑀓𑀸 𑀯𑀸 𑀫𑀦𑁄𑀓𑀫𑁆𑀫𑀯𑁄𑀳𑀸𑀭𑀯𑀺𑀭𑀳𑀸. 𑀲𑀲𑀫𑁆𑀪𑀸𑀭𑀧𑀣𑀯𑀻𑀆𑀤𑀻𑀲𑀼 𑀆𑀧𑀸𑀤𑀬𑁄 𑀏𑀢𑁆𑀣 𑀦𑀺𑀤𑀲𑁆𑀲𑀦𑀁.

𑀓𑀼𑀮𑀼𑀫𑁆𑀩𑀲𑁆𑀲𑀸𑀢𑀺 𑀕𑀩𑁆𑀪𑀲𑁆𑀲, 𑀓𑀼𑀮𑀲𑁆𑀲𑁂𑀯 𑀯𑀸. 𑀢𑀺𑀲𑁆𑀲𑁄𑀧𑀺 𑀲𑀗𑁆𑀕𑀻𑀢𑀺𑀬𑁄 𑀆𑀭𑀼𑀴𑁆𑀳𑀢𑀸𑀬 𑀅𑀦𑀦𑀼𑀚𑀸𑀦𑀦𑀢𑁄 ‘‘𑀢𑀯 𑀲𑀼𑀢𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀤𑀲𑀯𑀺𑀥𑀸 𑀇𑀤𑁆𑀥𑀺 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀇𑀤𑁆𑀥𑀺𑀓𑀣𑀸𑀬 𑀕𑀳𑁂𑀢𑀩𑁆𑀩𑀸. 𑀪𑀸𑀯𑀦𑀸𑀫𑀬𑀦𑁆𑀢𑀺 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀖𑀝𑀪𑁂𑀤𑁄 𑀯𑀺𑀬 𑀧𑀭𑀽𑀧𑀖𑀸𑀢𑁄, 𑀉𑀤𑀓𑀯𑀺𑀦𑀸𑀲𑁄 𑀯𑀺𑀬 𑀇𑀤𑁆𑀥𑀺𑀯𑀺𑀦𑀸𑀲𑁄 𑀘 𑀳𑁄𑀢𑀻𑀢𑀺 𑀉𑀧𑀫𑀸 𑀲𑀁𑀲𑀦𑁆𑀤𑀢𑀺. 𑀢𑀯 𑀧𑀜𑁆𑀳𑁄𑀢𑀺 𑀪𑀸𑀯𑀦𑀸𑀫𑀬𑀸𑀬 𑀧𑀭𑀽𑀧𑀖𑀸𑀢𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑁄 𑀜𑀸𑀧𑁂𑀢𑀼𑀁 𑀇𑀘𑁆𑀙𑀺𑀢𑁄 𑀅𑀢𑁆𑀣𑁄. 𑀆𑀣𑀩𑁆𑀩𑀡𑀺𑀤𑁆𑀥𑀺 𑀯𑀺𑀚𑁆𑀚𑀸𑀫𑀬𑀺𑀤𑁆𑀥𑀺 𑀳𑁄𑀢𑀺. 𑀲𑀢𑁆𑀢𑀫𑁂 𑀧𑀤𑁂𑀢𑀺 𑀫𑀡𑁆𑀟𑀮𑀸𑀤𑀺𑀢𑁄 𑀲𑀢𑁆𑀢𑀫𑁂 𑀧𑀤𑁂.

𑀯𑀘𑀦𑀦𑁆𑀢𑀭𑁂𑀦 𑀕𑀫𑁂𑀢𑀩𑁆𑀩𑀢𑁆𑀣𑀁 𑀦𑁂𑀬𑁆𑀬𑀢𑁆𑀣𑀁, 𑀲𑀬𑀫𑁂𑀯 𑀕𑀫𑀺𑀢𑀩𑁆𑀩𑀢𑁆𑀣𑀁 𑀦𑀻𑀢𑀢𑁆𑀣𑀁. 𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀉𑀤𑀸𑀳𑀼 𑀅𑀓𑀺𑀭𑀺𑀬𑀢𑁄𑀢𑀺 𑀢𑁂𑀦𑀸𑀥𑀺𑀧𑁆𑀧𑁂𑀢𑀁 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀁 𑀲𑀦𑁆𑀥𑀸𑀬 𑀧𑀼𑀘𑁆𑀙𑀢𑀺, 𑀦 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀯𑀼𑀢𑁆𑀢𑀫𑁂𑀯 𑀳𑀺 𑀲𑁄 𑀅𑀦𑀭𑀺𑀬𑀯𑁄𑀳𑀸𑀭𑀁 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑁆𑀯𑀸 𑀯𑁄𑀳𑀭𑀢𑀻𑀢𑀺. 𑀯𑀸𑀘𑀸𑀕𑀺𑀭𑀦𑁆𑀢𑀺 𑀯𑀸𑀘𑀸𑀲𑀗𑁆𑀔𑀸𑀢𑀁 𑀕𑀺𑀭𑀁, 𑀯𑀸𑀘𑀸𑀦𑀼𑀘𑁆𑀘𑀸𑀭𑀡𑀁 𑀯𑀸.

𑀔𑀦𑁆𑀤𑀲𑀺𑀯𑀸𑀤𑀬𑁄 𑀲𑁂𑀝𑁆𑀞𑀸𑀢𑀺 𑀔𑀦𑁆𑀤𑀸𑀢𑀺 𑀓𑀼𑀫𑀸𑀭𑀸. 𑀲𑀺𑀯𑀸𑀢𑀺 𑀫𑀳𑁂𑀲𑁆𑀲𑀭𑀸, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀦𑀺𑀤𑀲𑁆𑀲𑀦𑀢𑁆𑀣𑀫𑀺𑀤𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀢𑁆𑀣𑀺𑀓𑀤𑀺𑀝𑁆𑀞𑀸𑀤𑀬𑁄 𑀏𑀯 𑀳𑀺 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀸 𑀓𑀫𑁆𑀫𑀦𑁆𑀢𑀺. 𑀘𑁂𑀢𑀦𑀸 𑀧𑀦𑁂𑀢𑁆𑀣 𑀅𑀩𑁆𑀩𑁄𑀳𑀸𑀭𑀺𑀓𑀸𑀢𑀺 𑀓𑀸𑀬𑀤𑁆𑀯𑀸𑀭𑁂 𑀯𑀘𑀻𑀤𑁆𑀯𑀸𑀭𑁂 𑀘 𑀲𑀫𑀼𑀝𑁆𑀞𑀺𑀢𑀸𑀧𑀺 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀦𑁆𑀢𑀺 𑀘 𑀯𑁄𑀳𑀸𑀭𑀁 𑀦 𑀮𑀪𑀢𑀺 𑀅𑀪𑀺𑀚𑁆𑀛𑀸𑀤𑀺𑀧𑁆𑀧𑀥𑀸𑀦𑀢𑁆𑀢𑀸. ‘‘𑀢𑀺𑀯𑀺𑀥𑀸, 𑀪𑀺𑀓𑁆𑀔𑀯𑁂, 𑀫𑀦𑁄𑀲𑀜𑁆𑀘𑁂𑀢𑀦𑀸 𑀅𑀓𑀼𑀲𑀮𑀁 𑀫𑀦𑁄𑀓𑀫𑁆𑀫’’𑀦𑁆𑀢𑀺 𑀧𑀦 𑀯𑀘𑀦𑀢𑁄 𑀲𑀪𑀸𑀯𑁂𑀦𑁂𑀯 𑀲𑀸 𑀫𑀦𑁄𑀓𑀫𑁆𑀫𑀁, 𑀦 𑀅𑀪𑀺𑀚𑁆𑀛𑀸𑀤𑀺𑀧𑀓𑁆𑀔𑀺𑀓𑀢𑁆𑀢𑀸𑀢𑀺 ‘‘𑀅𑀪𑀺𑀚𑁆𑀛𑀸𑀤𑀺𑀧𑀓𑁆𑀔𑀺𑀓𑀸𑀯𑀸’’𑀢𑀺 𑀦 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀸𑀦𑀺 𑀅𑀘𑁄𑀧𑁂𑀢𑁆𑀯𑀸 𑀘𑀺𑀦𑁆𑀢𑀦𑀓𑀸𑀮𑁂 𑀘𑁂𑀢𑀦𑀸𑀧𑀺 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀫𑀦𑁄𑀤𑁆𑀯𑀸𑀭𑁂 𑀏𑀯 𑀲𑀫𑀼𑀝𑁆𑀞𑀳𑀦𑁆𑀢𑀺, 𑀢𑀲𑁆𑀫𑀸 𑀘𑁂𑀢𑀦𑀸𑀬 𑀅𑀩𑁆𑀩𑁄𑀳𑀸𑀭𑀺𑀓𑀪𑀸𑀯𑁄 𑀓𑀣𑀜𑁆𑀘𑀺 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀢𑀺𑀯𑀺𑀥𑀸, 𑀪𑀺𑀓𑁆𑀔𑀯𑁂, 𑀓𑀸𑀬𑀲𑀜𑁆𑀘𑁂𑀢𑀦𑀸 𑀓𑀼𑀲𑀮𑀁 𑀓𑀸𑀬𑀓𑀫𑁆𑀫’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀓𑀣𑀸. 𑁫𑁩𑁯) 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀝𑀺𑀧𑀓𑁆𑀔𑀪𑀽𑀢𑀸 𑀢𑀩𑁆𑀩𑀺𑀭𑀢𑀺𑀯𑀺𑀲𑀺𑀝𑁆𑀞𑀸 𑀘𑁂𑀢𑀦𑀸𑀯 𑀧𑀸𑀡𑀸𑀢𑀺𑀧𑀸𑀢𑀯𑀺𑀭𑀢𑀺𑀆𑀤𑀺𑀓𑀸 𑀳𑁄𑀦𑁆𑀢𑀻𑀢𑀺 ‘‘𑀘𑁂𑀢𑀦𑀸𑀧𑀓𑁆𑀔𑀺𑀓𑀸 𑀯𑀸’’𑀢𑀺 𑀯𑀼𑀢𑁆𑀢𑀁, 𑀦 ‘‘𑀯𑀺𑀭𑀢𑀺𑀧𑀓𑁆𑀔𑀺𑀓𑀸’’𑀢𑀺. 𑀭𑀓𑁆𑀔𑀢𑀻𑀢𑀺 𑀅𑀯𑀺𑀦𑀸𑀲𑁂𑀢𑁆𑀯𑀸 𑀓𑀣𑁂𑀢𑀺. 𑀪𑀺𑀦𑁆𑀤𑀢𑀻𑀢𑀺 𑀯𑀺𑀦𑀸𑀲𑁂𑀢𑁆𑀯𑀸 𑀓𑀣𑁂𑀢𑀺.

𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀤𑁆𑀯𑀸𑀭𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀤𑁆𑀯𑀸𑀭𑀁. 𑀘𑀓𑁆𑀔𑀼 𑀘 𑀢𑀁 𑀯𑀺𑀜𑁆𑀜𑀸𑀡𑀤𑁆𑀯𑀸𑀭𑀜𑁆𑀘𑀸𑀢𑀺 𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀤𑁆𑀯𑀸𑀭𑀁. 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑀤𑁆𑀯𑀸𑀭𑀦𑁆𑀢𑀺 𑀯𑀸 𑀅𑀲𑀫𑀸𑀲𑀦𑀺𑀤𑁆𑀤𑁂𑀲𑁄. 𑀢𑀁 𑀧𑀦 𑀘𑀓𑁆𑀔𑀼𑀫𑁂𑀯. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. ‘‘𑀘𑀓𑁆𑀔𑀼𑀦𑀸 𑀲𑀁𑀯𑀭𑁄 𑀲𑀸𑀥𑀽’’𑀢𑀺𑀆𑀤𑀺𑀓𑀸𑀬 (𑀥. 𑀧. 𑁩𑁬𑁦) 𑀕𑀸𑀣𑀸𑀬 𑀧𑀲𑀸𑀤𑀓𑀸𑀬𑀘𑁄𑀧𑀦𑀓𑀸𑀬𑀲𑀁𑀯𑀭𑁂 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀓𑀸𑀬𑁂𑀦 𑀲𑀁𑀯𑀭𑁄 𑀯𑀼𑀢𑁆𑀢𑁄, 𑀢𑀁 𑀇𑀥 𑀪𑀺𑀦𑁆𑀤𑀺𑀢𑁆𑀯𑀸 𑀅𑀝𑁆𑀞 𑀲𑀁𑀯𑀭𑀸, 𑀢𑀧𑁆𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀅𑀲𑀁𑀯𑀭𑀸 𑀅𑀝𑁆𑀞 𑀓𑀣𑀺𑀢𑀸. 𑀲𑀻𑀮𑀲𑀁𑀯𑀭𑀸𑀤𑀬𑁄𑀧𑀺 𑀧𑀜𑁆𑀘𑁂𑀯 𑀲𑀁𑀯𑀭𑀸 𑀲𑀩𑁆𑀩𑀤𑁆𑀯𑀸𑀭𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀸𑀧𑀺, 𑀢𑀧𑁆𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀤𑀼𑀲𑁆𑀲𑀻𑀮𑁆𑀬𑀸𑀤𑀻𑀦𑀺 𑀅𑀲𑀁𑀯𑀭𑀸𑀢𑀺 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀤𑀼𑀲𑁆𑀲𑀻𑀮𑁆𑀬𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀘𑁂𑀢𑀦𑀸. 𑀫𑀼𑀝𑁆𑀞𑀲𑁆𑀲𑀘𑁆𑀘𑀁 𑀲𑀢𑀺𑀧𑀝𑀺𑀧𑀓𑁆𑀔𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀧𑀫𑀸𑀤𑀦𑁆𑀢𑀺 𑀓𑁂𑀘𑀺. 𑀲𑀻𑀢𑀸𑀤𑀻𑀲𑀼 𑀧𑀝𑀺𑀖𑁄 𑀅𑀓𑁆𑀔𑀦𑁆𑀢𑀺. 𑀣𑀺𑀦𑀫𑀺𑀤𑁆𑀥𑀁 𑀓𑁄𑀲𑀚𑁆𑀚𑀁.

𑀯𑀺𑀦𑀸 𑀯𑀘𑀻𑀤𑁆𑀯𑀸𑀭𑁂𑀦 𑀲𑀼𑀤𑁆𑀥𑀁 𑀓𑀸𑀬𑀤𑁆𑀯𑀸𑀭𑀲𑀗𑁆𑀔𑀸𑀢𑀦𑁆𑀢𑀺 𑀇𑀤𑀁 𑀯𑀘𑀻𑀤𑁆𑀯𑀸𑀭𑀲𑀮𑁆𑀮𑀓𑁆𑀔𑀺𑀢𑀲𑁆𑀲 𑀫𑀼𑀲𑀸𑀯𑀸𑀤𑀸𑀤𑀺𑀦𑁄𑀧𑀺 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀸 𑀅𑀲𑀼𑀤𑁆𑀥𑀢𑀸 𑀅𑀢𑁆𑀣𑀻𑀢𑀺 𑀢𑀁𑀦𑀺𑀯𑀸𑀭𑀡𑀢𑁆𑀣𑀁 𑀯𑀼𑀢𑁆𑀢𑀁. 𑀦 𑀳𑀺 𑀢𑀁 𑀓𑀸𑀬𑀓𑀫𑁆𑀫𑀁 𑀳𑁄𑀢𑀺. 𑀲𑀼𑀤𑁆𑀥𑀯𑀘𑀻𑀤𑁆𑀯𑀸𑀭𑁄𑀧𑀮𑀓𑁆𑀔𑀺𑀢𑀁 𑀧𑀦 𑀯𑀘𑀻𑀓𑀫𑁆𑀫𑀫𑁂𑀯 𑀳𑁄𑀢𑀻𑀢𑀺. 𑀏𑀢𑁆𑀣 𑀅𑀲𑀁𑀯𑀭𑁄𑀢𑀺 𑀏𑀢𑁂𑀦 𑀲𑀼𑀤𑁆𑀥𑀓𑀸𑀬𑀤𑁆𑀯𑀸𑀭𑁂𑀦 𑀉𑀧𑀮𑀓𑁆𑀔𑀺𑀢𑁄 𑀅𑀲𑀁𑀯𑀭𑁄 𑀤𑁆𑀯𑀸𑀭𑀦𑁆𑀢𑀭𑁂 𑀉𑀧𑁆𑀧𑀚𑁆𑀚𑀫𑀸𑀦𑁄𑀧𑀺 𑀯𑀼𑀢𑁆𑀢𑁄. 𑀤𑁆𑀯𑀸𑀭𑀦𑁆𑀢𑀭𑀸𑀦𑀼𑀧𑀮𑀓𑁆𑀔𑀺𑀢𑀁 𑀲𑀩𑁆𑀩𑀁 𑀢𑀁𑀤𑁆𑀯𑀸𑀭𑀺𑀓𑀸𑀓𑀼𑀲𑀮𑀜𑁆𑀘𑁂𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀓𑀫𑁆𑀫𑀧𑀣𑀲𑀁𑀲𑀦𑁆𑀤𑀦𑁂 ‘‘𑀘𑁄𑀧𑀦𑀓𑀸𑀬𑀅𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑁄 𑀅𑀲𑀁𑀯𑀭𑁄 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀫𑁂𑀯 𑀳𑁄𑀢𑀻’’𑀢𑀺𑀆𑀤𑀺 ‘‘𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀘𑁄𑀧𑀦𑀓𑀸𑀬𑀅𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀯𑀘𑀻𑀅𑀲𑀁𑀯𑀭𑀯𑀲𑁂𑀦 𑀘 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀲𑀳 𑀅𑀯𑀺𑀭𑀼𑀤𑁆𑀥𑀁 𑀳𑁄𑀢𑀺. 𑀅𑀲𑀁𑀯𑀭𑁄 𑀳𑀺 𑀤𑁆𑀯𑀸𑀭𑀦𑁆𑀢𑀭𑁂 𑀉𑀧𑁆𑀧𑀚𑁆𑀚𑀫𑀸𑀦𑁄𑀧𑀺 𑀲𑀤𑁆𑀯𑀸𑀭𑁂 𑀏𑀯𑀸𑀢𑀺 𑀯𑀼𑀘𑁆𑀘𑀢𑀺, 𑀲𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀦𑁆𑀦𑁄𑀢𑀺 𑀘, 𑀓𑀫𑁆𑀫𑀁 𑀅𑀜𑁆𑀜𑀤𑁆𑀯𑀸𑀭𑁂 𑀅𑀜𑁆𑀜𑀤𑁆𑀯𑀸𑀭𑀯𑀲𑁂𑀦 𑀘𑀸𑀢𑀺 𑀏𑀯𑀁 𑀅𑀯𑀺𑀭𑀼𑀤𑁆𑀥𑀁.

𑀅𑀣 𑀯𑀸 𑀏𑀢𑁆𑀣𑀸𑀢𑀺 𑀲𑀼𑀤𑁆𑀥𑀁 𑀅𑀲𑀼𑀤𑁆𑀥𑀦𑁆𑀢𑀺 𑀏𑀢𑀁 𑀅𑀯𑀺𑀘𑀸𑀭𑁂𑀢𑁆𑀯𑀸 𑀏𑀢𑀲𑁆𑀫𑀺𑀁 𑀘𑁄𑀧𑀦𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀲𑀢𑀺 𑀤𑁆𑀯𑀸𑀭𑀦𑁆𑀢𑀭𑁄𑀧𑀮𑀓𑁆𑀔𑀺𑀢𑀁 𑀓𑀫𑁆𑀫𑀧𑀣𑀪𑀸𑀯𑀧𑁆𑀧𑀢𑁆𑀢𑀢𑀸𑀬 𑀯𑀘𑀻𑀫𑀦𑁄𑀓𑀫𑁆𑀫𑀁 𑀘𑁄𑀧𑀦𑀓𑀸𑀬𑀅𑀲𑀁𑀯𑀭𑀤𑁆𑀯𑀸𑀭𑁂 𑀉𑀧𑁆𑀧𑀦𑁆𑀦𑀁, 𑀲𑁂𑀲𑀁 𑀲𑀩𑁆𑀩𑀁 𑀢𑀁𑀤𑁆𑀯𑀸𑀭𑀼𑀧𑁆𑀧𑀦𑁆𑀦𑀸𑀓𑀼𑀲𑀮𑀁 𑀯𑀺𑀬 ‘‘𑀘𑁄𑀧𑀦𑀓𑀸𑀬𑀅𑀲𑀁𑀯𑀭𑁄’’𑀢𑀺 𑀯𑀼𑀘𑁆𑀘𑀢𑀺. 𑀓𑀫𑁆𑀫𑀧𑀣𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀤𑁆𑀯𑀸𑀭𑀦𑁆𑀢𑀭𑀼𑀧𑁆𑀧𑀦𑁆𑀦𑀁 𑀓𑀸𑀬𑀓𑀫𑁆𑀫𑀜𑁆𑀘 𑀢𑀣𑀸 𑀦 𑀯𑀼𑀘𑁆𑀘𑀢𑀻𑀢𑀺 𑀓𑀫𑁆𑀫𑀧𑀣𑀲𑀁𑀲𑀦𑁆𑀤𑀦𑀯𑀺𑀭𑁄𑀥𑁄 𑀲𑀺𑀬𑀸, 𑀢𑀤𑀯𑀺𑀭𑁄𑀥𑀁 𑀢𑀢𑁆𑀣𑁂𑀯 𑀯𑀓𑁆𑀔𑀸𑀫. 𑀲𑀻𑀮𑀲𑀁𑀯𑀭𑀸𑀤𑀬𑁄 𑀧𑀜𑁆𑀘 𑀦𑀺𑀓𑁆𑀔𑁂𑀧𑀓𑀡𑁆𑀟𑁂 𑀆𑀯𑀺 𑀪𑀯𑀺𑀲𑁆𑀲𑀦𑁆𑀢𑀺. 𑀢𑀢𑁆𑀣 𑀜𑀸𑀡𑀲𑀁𑀯𑀭𑁂 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀲𑁆𑀲, 𑀯𑀻𑀭𑀺𑀬𑀲𑀁𑀯𑀭𑁂 𑀘 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀅𑀦𑁆𑀢𑁄𑀕𑀥𑀢𑀸 𑀤𑀝𑁆𑀞𑀩𑁆𑀩𑀸.

𑀅𑀓𑀼𑀲𑀮𑀓𑀫𑁆𑀫𑀧𑀣𑀓𑀣𑀸𑀯𑀡𑁆𑀡𑀦𑀸