𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀅𑀪𑀺𑀥𑀫𑁆𑀫𑀧𑀺𑀝𑀓𑁂

𑀥𑀫𑁆𑀫𑀲𑀗𑁆𑀕𑀡𑀻-𑀫𑀽𑀮𑀝𑀻𑀓𑀸

𑀯𑀻𑀲𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁧. 𑀥𑀫𑁆𑀫𑀲𑀁𑀯𑀡𑁆𑀡𑀦𑀸𑀬𑀁 𑀲𑀢𑁆𑀣𑀭𑀺 𑀧𑀡𑀸𑀫𑀓𑀭𑀡𑀁 𑀥𑀫𑁆𑀫𑀲𑁆𑀲 𑀲𑁆𑀯𑀸𑀓𑁆𑀔𑀸𑀢𑀪𑀸𑀯𑁂𑀦 𑀲𑀢𑁆𑀣𑀭𑀺 𑀧𑀲𑀸𑀤𑀚𑀦𑀦𑀢𑁆𑀣𑀁, 𑀲𑀢𑁆𑀣𑀼 𑀘 𑀅𑀯𑀺𑀢𑀣𑀤𑁂𑀲𑀦𑀪𑀸𑀯𑀧𑁆𑀧𑀓𑀸𑀲𑀦𑁂𑀦 𑀥𑀫𑁆𑀫𑁂 𑀧𑀲𑀸𑀤𑀚𑀦𑀦𑀢𑁆𑀣𑀁. 𑀢𑀤𑀼𑀪𑀬𑀧𑁆𑀧𑀲𑀸𑀤𑀸 𑀳𑀺 𑀥𑀫𑁆𑀫𑀲𑀫𑁆𑀧𑀝𑀺𑀧𑀢𑁆𑀢𑀺 𑀫𑀳𑀢𑁄 𑀘 𑀅𑀢𑁆𑀣𑀲𑁆𑀲 𑀲𑀺𑀤𑁆𑀥𑀺 𑀳𑁄𑀢𑀻𑀢𑀺. 𑀅𑀣 𑀯𑀸 𑀭𑀢𑀦𑀢𑁆𑀢𑀬𑀧𑀡𑀸𑀫𑀯𑀘𑀦𑀁 𑀅𑀢𑁆𑀢𑀦𑁄 𑀭𑀢𑀦𑀢𑁆𑀢𑀬𑀧𑀲𑀸𑀤𑀲𑁆𑀲 𑀯𑀺𑀜𑁆𑀜𑀸𑀧𑀦𑀢𑁆𑀣𑀁, 𑀢𑀁 𑀧𑀦 𑀯𑀺𑀜𑁆𑀜𑀽𑀦𑀁 𑀘𑀺𑀢𑁆𑀢𑀸𑀭𑀸𑀥𑀦𑀢𑁆𑀣𑀁, 𑀢𑀁 𑀅𑀝𑁆𑀞𑀓𑀣𑀸𑀬 𑀕𑀸𑀳𑀡𑀢𑁆𑀣𑀁, 𑀢𑀁 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀦𑀢𑁆𑀣𑀦𑁆𑀢𑀺. 𑀇𑀤𑀁 𑀧𑀦 𑀆𑀘𑀭𑀺𑀬𑁂𑀦 𑀅𑀥𑀺𑀧𑁆𑀧𑁂𑀢𑀧𑁆𑀧𑀬𑁄𑀚𑀦𑀁 𑀅𑀦𑁆𑀢𑀭𑀸𑀬𑀯𑀺𑀲𑁄𑀲𑀦𑀁. 𑀯𑀓𑁆𑀔𑀢𑀺 𑀳𑀺 ‘‘𑀦𑀺𑀧𑀘𑁆𑀘𑀓𑀸𑀭𑀲𑁆𑀲𑁂𑀢𑀲𑁆𑀲…𑀧𑁂… 𑀅𑀲𑁂𑀲𑀢𑁄’’𑀢𑀺. 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀭𑀡𑀜𑁆𑀳𑀺 𑀅𑀦𑁆𑀢𑀭𑀸𑀬𑀓𑀭𑀸𑀧𑀼𑀜𑁆𑀜𑀯𑀺𑀖𑀸𑀢𑀓𑀭𑀧𑀼𑀜𑁆𑀜𑀯𑀺𑀲𑁂𑀲𑀪𑀸𑀯𑀢𑁄 𑀫𑀗𑁆𑀕𑀮𑀪𑀸𑀯𑀢𑁄 𑀪𑀬𑀸𑀤𑀺𑀉𑀧𑀤𑁆𑀤𑀯𑀦𑀺𑀯𑀸𑀭𑀡𑀢𑁄 𑀘 𑀅𑀦𑁆𑀢𑀭𑀸𑀬𑀯𑀺𑀲𑁄𑀲𑀦𑁂 𑀲𑀫𑀢𑁆𑀣𑀁 𑀳𑁄𑀢𑀺. 𑀓𑀣𑀁 𑀧𑀦𑁂𑀢𑀲𑁆𑀲𑀸𑀧𑀼𑀜𑁆𑀜𑀯𑀺𑀖𑀸𑀢𑀓𑀭𑀸𑀤𑀺𑀪𑀸𑀯𑁄 𑀯𑀺𑀚𑀸𑀦𑀺𑀢𑀩𑁆𑀩𑁄𑀢𑀺? ‘‘𑀬𑀲𑁆𑀫𑀺𑀁 𑀫𑀳𑀸𑀦𑀸𑀫 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑀺, 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀅. 𑀦𑀺. 𑁬.𑁧𑁦; 𑁧𑁧.𑁧𑁧), ‘‘𑀧𑀽𑀚𑀸 𑀘 𑀧𑀽𑀚𑀦𑁂𑀬𑁆𑀬𑀸𑀦𑀁, 𑀏𑀢𑀁 𑀫𑀗𑁆𑀕𑀮𑀫𑀼𑀢𑁆𑀢𑀫’’𑀦𑁆𑀢𑀺 (𑀔𑀼. 𑀧𑀸. 𑁫.𑁩; 𑀲𑀼. 𑀦𑀺. 𑁨𑁬𑁨) 𑀘, ‘‘𑀏𑀯𑀁 𑀩𑀼𑀤𑁆𑀥𑀁 𑀲𑀭𑀦𑁆𑀢𑀸𑀦𑀁, 𑀥𑀫𑁆𑀫𑀁 𑀲𑀗𑁆𑀖𑀜𑁆𑀘 𑀪𑀺𑀓𑁆𑀔𑀯𑁄. 𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸, 𑀮𑁄𑀫𑀳𑀁𑀲𑁄 𑀦 𑀳𑁂𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁧.𑁨𑁪𑁯) 𑀘 𑀯𑀘𑀦𑀢𑁄𑀢𑀺.

𑀢𑀢𑁆𑀣 𑀬𑀲𑁆𑀲 𑀲𑀢𑁆𑀣𑀼𑀦𑁄 𑀧𑀡𑀸𑀫𑀁 𑀓𑀢𑁆𑀢𑀼𑀓𑀸𑀫𑁄, 𑀢𑀲𑁆𑀲 𑀕𑀼𑀡𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 ‘‘𑀓𑀭𑀼𑀡𑀸 𑀯𑀺𑀬𑀸’’𑀢𑀺𑀆𑀤𑀺𑀫𑀸𑀳. 𑀕𑀼𑀡𑀯𑀺𑀲𑁂𑀲𑀯𑀸 𑀳𑀺 𑀧𑀡𑀸𑀫𑀸𑀭𑀳𑁄 𑀳𑁄𑀢𑀺, 𑀧𑀡𑀸𑀫𑀸𑀭𑀳𑁂 𑀘 𑀓𑀢𑁄 𑀧𑀡𑀸𑀫𑁄 𑀯𑀼𑀢𑁆𑀢𑀧𑁆𑀧𑀬𑁄𑀚𑀦𑀲𑀺𑀤𑁆𑀥𑀺𑀓𑀭𑁄𑀯 𑀳𑁄𑀢𑀻𑀢𑀺. 𑀪𑀕𑀯𑀢𑁄 𑀘 𑀤𑁂𑀲𑀦𑀸 𑀯𑀺𑀦𑀬𑀧𑀺𑀝𑀓𑁂 𑀓𑀭𑀼𑀡𑀸𑀧𑁆𑀧𑀥𑀸𑀦𑀸, 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂 𑀧𑀜𑁆𑀜𑀸𑀓𑀭𑀼𑀡𑀸𑀧𑁆𑀧𑀥𑀸𑀦𑀸. 𑀢𑁂𑀦𑁂𑀯 𑀘 𑀓𑀸𑀭𑀡𑁂𑀦 𑀯𑀺𑀦𑀬𑀧𑀺𑀝𑀓𑀲𑁆𑀲 𑀲𑀁𑀯𑀡𑁆𑀡𑀦𑀁 𑀓𑀭𑁄𑀦𑁆𑀢𑁂𑀦 𑀓𑀭𑀼𑀡𑀸𑀧𑁆𑀧𑀥𑀸𑀦𑀸 𑀪𑀕𑀯𑀢𑁄 𑀣𑁄𑀫𑀦𑀸 𑀓𑀢𑀸, 𑀆𑀕𑀫𑀲𑀁𑀯𑀡𑁆𑀡𑀦𑀜𑁆𑀘 𑀓𑀭𑁄𑀦𑁆𑀢𑁂𑀦 𑀉𑀪𑀬𑀧𑁆𑀧𑀥𑀸𑀦𑀸, 𑀅𑀪𑀺𑀥𑀫𑁆𑀫𑀤𑁂𑀲𑀦𑀸 𑀧𑀦 𑀧𑀜𑁆𑀜𑀸𑀧𑁆𑀧𑀥𑀸𑀦𑀸𑀢𑀺 𑀓𑀢𑁆𑀯𑀸 𑀧𑀜𑁆𑀜𑀸𑀧𑁆𑀧𑀥𑀸𑀦𑀫𑁂𑀯 𑀣𑁄𑀫𑀦𑀁 𑀓𑀭𑁄𑀦𑁆𑀢𑁄 ‘‘𑀓𑀭𑀼𑀡𑀸 𑀯𑀺𑀬 𑀲𑀢𑁆𑀢𑁂𑀲𑀽’’𑀢𑀺 𑀓𑀭𑀼𑀡𑀁 𑀉𑀧𑀫𑀸𑀪𑀸𑀯𑁂𑀦 𑀕𑀳𑁂𑀢𑁆𑀯𑀸 𑀧𑀜𑁆𑀜𑀸𑀬 𑀣𑁄𑀫𑁂𑀢𑀺.

𑀢𑀢𑁆𑀣 𑀓𑀭𑀼𑀡𑀸 𑀯𑀺𑀬𑀸𑀢𑀺 𑀦𑀺𑀤𑀲𑁆𑀲𑀦𑀯𑀘𑀦𑀫𑁂𑀢𑀁, 𑀬𑀲𑁆𑀲 𑀬𑀣𑀸 𑀓𑀭𑀼𑀡𑀸 𑀲𑀩𑁆𑀩𑁂𑀲𑀼 𑀲𑀢𑁆𑀢𑁂𑀲𑀼 𑀧𑀯𑀢𑁆𑀢𑀺𑀢𑁆𑀣, 𑀏𑀯𑀁 𑀲𑀩𑁆𑀩𑁂𑀲𑀼 𑀜𑁂𑀬𑁆𑀬𑀥𑀫𑁆𑀫𑁂𑀲𑀼 𑀧𑀜𑁆𑀜𑀸𑀧𑀺 𑀧𑀯𑀢𑁆𑀢𑀺𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀲𑀢𑁆𑀢𑁂𑀲𑀽𑀢𑀺 𑀯𑀺𑀲𑀬𑀦𑀺𑀤𑀲𑁆𑀲𑀦𑀫𑁂𑀢𑀁. 𑀧𑀜𑁆𑀜𑀸𑀢𑀺 𑀦𑀺𑀤𑀲𑁆𑀲𑁂𑀢𑀩𑁆𑀩𑀥𑀫𑁆𑀫𑀦𑀺𑀤𑀲𑁆𑀲𑀦𑀁. 𑀬𑀲𑁆𑀲𑀸𑀢𑀺 𑀢𑀤𑀥𑀺𑀝𑁆𑀞𑀸𑀦𑀧𑀼𑀕𑁆𑀕𑀮𑀦𑀺𑀤𑀲𑁆𑀲𑀦𑀁. 𑀫𑀳𑁂𑀲𑀺𑀦𑁄𑀢𑀺 𑀢𑀩𑁆𑀩𑀺𑀲𑁂𑀲𑀦𑀁. 𑀜𑁂𑀬𑁆𑀬𑀥𑀫𑁆𑀫𑁂𑀲𑀽𑀢𑀺 𑀧𑀜𑁆𑀜𑀸𑀯𑀺𑀲𑀬𑀦𑀺𑀤𑀲𑁆𑀲𑀦𑀁. 𑀲𑀩𑁆𑀩𑁂𑀲𑀽𑀢𑀺 𑀢𑀩𑁆𑀩𑀺𑀲𑁂𑀲𑀦𑀁. 𑀧𑀯𑀢𑁆𑀢𑀺𑀢𑁆𑀣𑀸𑀢𑀺 𑀓𑀺𑀭𑀺𑀬𑀸𑀦𑀺𑀤𑀲𑁆𑀲𑀦𑀁. 𑀬𑀣𑀸𑀭𑀼𑀘𑀻𑀢𑀺 𑀯𑀲𑀻𑀪𑀸𑀯𑀦𑀺𑀤𑀲𑁆𑀲𑀦𑀁.

𑀢𑀢𑁆𑀣 𑀓𑀺𑀭𑀢𑀻𑀢𑀺 𑀓𑀭𑀼𑀡𑀸, 𑀧𑀭𑀤𑀼𑀓𑁆𑀔𑀁 𑀯𑀺𑀓𑁆𑀔𑀺𑀧𑀢𑀺 𑀅𑀧𑀦𑁂𑀢𑀻𑀢𑀺 𑀅𑀢𑁆𑀣𑁄. 𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑀸 𑀯𑀺𑀲𑀢𑁆𑀢𑀸𑀢𑀺 𑀲𑀢𑁆𑀢𑀸. 𑀢𑀲𑁆𑀲𑀸 𑀧𑀦 𑀧𑀜𑁆𑀜𑀢𑁆𑀢𑀺𑀬𑀸 𑀔𑀦𑁆𑀥𑀲𑀦𑁆𑀢𑀸𑀦𑁂 𑀦𑀺𑀭𑀼𑀴𑁆𑀳𑀪𑀸𑀯𑀢𑁄 𑀦𑀺𑀘𑁆𑀙𑀦𑁆𑀤𑀭𑀸𑀕𑀸𑀧𑀺 ‘‘𑀲𑀢𑁆𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀚𑀸𑀦𑀸𑀢𑀻𑀢𑀺 𑀧𑀜𑁆𑀜𑀸, 𑀬𑀣𑀸𑀲𑀪𑀸𑀯𑀁 𑀧𑀓𑀸𑀭𑁂𑀳𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀬𑀲𑁆𑀲𑀸𑀢𑀺 𑀅𑀦𑀺𑀬𑀫𑀦𑀁. ‘‘𑀢𑀲𑁆𑀲 𑀧𑀸𑀤𑁂 𑀦𑀫𑀲𑁆𑀲𑀺𑀢𑁆𑀯𑀸’’𑀢𑀺 𑀏𑀢𑁂𑀦 𑀦𑀺𑀬𑀫𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀫𑀳𑁂𑀲𑀻𑀢𑀺 𑀫𑀳𑀦𑁆𑀢𑁂 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 𑀏𑀲𑀺 𑀕𑀯𑁂𑀲𑀻𑀢𑀺 𑀫𑀳𑁂𑀲𑀺. 𑀜𑀸𑀢𑀩𑁆𑀩𑀸𑀢𑀺 𑀜𑁂𑀬𑁆𑀬𑀸, 𑀲𑀪𑀸𑀯𑀥𑀸𑀭𑀡𑀸𑀤𑀺𑀦𑀸 𑀅𑀢𑁆𑀣𑁂𑀦 𑀥𑀫𑁆𑀫𑀸. 𑀢𑀢𑁆𑀣 ‘‘𑀜𑁂𑀬𑁆𑀬𑀸’’𑀢𑀺 𑀯𑀘𑀦𑁂𑀦 𑀥𑀫𑁆𑀫𑀸𑀦𑀁 𑀅𑀜𑁂𑀬𑁆𑀬𑀢𑁆𑀢𑀁 𑀧𑀝𑀺𑀓𑁆𑀔𑀺𑀧𑀢𑀺. ‘‘𑀥𑀫𑁆𑀫𑀸’’𑀢𑀺 𑀯𑀘𑀦𑁂𑀦 𑀜𑁂𑀬𑁆𑀬𑀸𑀦𑀁 𑀲𑀢𑁆𑀢𑀚𑀻𑀯𑀸𑀤𑀺𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀜𑁂𑀬𑁆𑀬𑀸 𑀘 𑀢𑁂 𑀥𑀫𑁆𑀫𑀸 𑀘𑀸𑀢𑀺 𑀜𑁂𑀬𑁆𑀬𑀥𑀫𑁆𑀫𑀸. 𑀲𑀩𑁆𑀩𑁂𑀲𑀽𑀢𑀺 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀁. 𑀢𑁂𑀦 𑀅𑀜𑁆𑀜𑀸𑀢𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀧𑀯𑀢𑁆𑀢𑀺𑀢𑁆𑀣𑀸𑀢𑀺 𑀉𑀧𑁆𑀧𑀚𑁆𑀚𑀺𑀢𑁆𑀣. 𑀬𑀣𑀸𑀭𑀼𑀘𑀻𑀢𑀺 𑀬𑀸 𑀬𑀸 𑀭𑀼𑀘𑀺 𑀬𑀣𑀸𑀭𑀼𑀘𑀺, 𑀭𑀼𑀘𑀻𑀢𑀺 𑀘 𑀇𑀘𑁆𑀙𑀸, 𑀓𑀢𑁆𑀢𑀼𑀓𑀸𑀫𑀢𑀸 𑀲𑀸. 𑀬𑀸 𑀬𑀸 𑀧𑀯𑀢𑁆𑀢𑀸 𑀢𑀧𑁆𑀧𑀪𑁂𑀤𑀸, 𑀬𑀣𑀸 𑀯𑀸 𑀭𑀼𑀘𑀺 𑀢𑀣𑀸, 𑀭𑀼𑀘𑀺𑀅𑀦𑀼𑀭𑀽𑀧𑀁 𑀧𑀯𑀢𑁆𑀢𑀸 ‘‘𑀬𑀣𑀸𑀭𑀼𑀘𑀺 𑀧𑀯𑀢𑁆𑀢𑀺𑀢𑁆𑀣𑀸’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀬𑀣𑀸 𑀯𑀸 𑀭𑀼𑀘𑀺 𑀧𑀯𑀢𑁆𑀢𑀸, 𑀢𑀣𑀸 𑀢𑀣𑀸 𑀧𑀯𑀢𑁆𑀢𑀸 𑀧𑀜𑁆𑀜𑀸 ‘‘𑀬𑀣𑀸𑀭𑀼𑀘𑀺 𑀧𑀯𑀢𑁆𑀢𑀺𑀢𑁆𑀣𑀸’’𑀢𑀺 𑀯𑀼𑀘𑁆𑀘𑀢𑀺.

𑀢𑀢𑁆𑀣 𑀪𑀕𑀯𑀢𑀺 𑀧𑀯𑀢𑁆𑀢𑀸𑀯 𑀓𑀭𑀼𑀡𑀸 𑀪𑀕𑀯𑀢𑁄 𑀧𑀜𑁆𑀜𑀸𑀬 𑀦𑀺𑀤𑀲𑁆𑀲𑀦𑀦𑁆𑀢𑀺 𑀕𑀳𑁂𑀢𑀩𑁆𑀩𑀸. 𑀲𑀸 𑀳𑀺 𑀅𑀲𑀸𑀥𑀸𑀭𑀡𑀸 𑀫𑀳𑀸𑀓𑀭𑀼𑀡𑀸, 𑀦 𑀅𑀜𑁆𑀜𑀸. 𑀬𑀲𑁆𑀲𑀸𑀢𑀺 𑀘 𑀓𑀭𑀼𑀡𑀸𑀧𑀜𑁆𑀜𑀸𑀦𑀁 𑀉𑀪𑀺𑀦𑁆𑀦𑀫𑁆𑀧𑀺 𑀆𑀥𑀸𑀭𑀧𑀼𑀕𑁆𑀕𑀮𑀦𑀺𑀤𑀲𑁆𑀲𑀦𑀁. 𑀦 𑀳𑀺 𑀦𑀺𑀭𑀸𑀥𑀸𑀭𑀸 𑀓𑀭𑀼𑀡𑀸 𑀅𑀢𑁆𑀣𑀻𑀢𑀺 ‘‘𑀓𑀭𑀼𑀡𑀸’’𑀢𑀺 𑀯𑀼𑀢𑁆𑀢𑁂 𑀢𑀤𑀸𑀥𑀸𑀭𑀪𑀽𑀢𑁄 𑀧𑀼𑀕𑁆𑀕𑀮𑁄 𑀦𑀺𑀤𑀲𑁆𑀲𑁂𑀢𑀩𑁆𑀩𑁄 𑀳𑁄𑀢𑀺, 𑀲𑁄 𑀘 𑀇𑀥 𑀅𑀜𑁆𑀜𑁄 𑀯𑀼𑀢𑁆𑀢𑁄 𑀦𑀢𑁆𑀣𑀺, 𑀦 𑀘 𑀆𑀲𑀦𑁆𑀦𑀁 𑀯𑀚𑁆𑀚𑁂𑀢𑁆𑀯𑀸 𑀤𑀽𑀭𑀲𑁆𑀲 𑀕𑀳𑀡𑁂 𑀧𑀬𑁄𑀚𑀦𑀁 𑀅𑀢𑁆𑀣𑀻𑀢𑀺 ‘‘𑀬𑀲𑁆𑀲𑀸’’𑀢𑀺 𑀦𑀺𑀤𑀲𑁆𑀲𑀺𑀢𑀧𑀼𑀕𑁆𑀕𑀮𑁄𑀯 𑀓𑀭𑀼𑀡𑀸𑀬 𑀆𑀥𑀸𑀭𑁄. 𑀢𑁂𑀦 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀬𑀲𑁆𑀲 𑀅𑀢𑁆𑀢𑀦𑁄 𑀓𑀭𑀼𑀡𑀸 𑀯𑀺𑀬 𑀧𑀜𑁆𑀜𑀸𑀧𑀺 𑀧𑀯𑀢𑁆𑀢𑀺𑀢𑁆𑀣𑀸’’𑀢𑀺. 𑀓𑀣𑀁 𑀧𑀦 𑀓𑀭𑀼𑀡𑀸 𑀲𑀢𑁆𑀢𑁂𑀲𑀼 𑀧𑀯𑀢𑁆𑀢𑀺𑀢𑁆𑀣 𑀬𑀣𑀸 𑀧𑀜𑁆𑀜𑀸𑀧𑀺 𑀥𑀫𑁆𑀫𑁂𑀲𑀼 𑀧𑀯𑀢𑁆𑀢𑀺𑀢𑁆𑀣𑀸𑀢𑀺? 𑀦𑀺𑀭𑀯𑀲𑁂𑀲𑀢𑁄 𑀬𑀣𑀸𑀭𑀼𑀘𑀺 𑀘. 𑀪𑀕𑀯𑀢𑁄 𑀳𑀺 𑀓𑀭𑀼𑀡𑀸 𑀓𑀜𑁆𑀘𑀺 𑀲𑀢𑁆𑀢𑀁 𑀅𑀯𑀚𑁆𑀚𑁂𑀢𑁆𑀯𑀸 𑀲𑀩𑁆𑀩𑁂𑀲𑀼 𑀲𑀢𑁆𑀢𑁂𑀲𑀼 𑀦𑀺𑀭𑀯𑀲𑁂𑀲𑁂𑀲𑀼 𑀧𑀯𑀢𑁆𑀢𑀢𑀺, 𑀧𑀯𑀢𑁆𑀢𑀫𑀸𑀦𑀸 𑀘 𑀭𑀼𑀘𑀺𑀯𑀲𑁂𑀦 𑀏𑀓𑀲𑁆𑀫𑀺𑀁 𑀅𑀦𑁂𑀓𑁂𑀲𑀼 𑀘 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀸 𑀧𑀯𑀢𑁆𑀢𑀢𑀺. 𑀦 𑀳𑀺 𑀅𑀜𑁆𑀜𑁂𑀲𑀁 ‘‘𑀫𑀳𑁄𑀖𑀧𑀓𑁆𑀔𑀦𑁆𑀤𑀸𑀦𑀁 𑀲𑀢𑁆𑀢𑀸𑀦𑀁 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀑𑀖𑀸 𑀉𑀤𑁆𑀥𑀢𑀸 𑀅𑀜𑁆𑀜𑀢𑁆𑀭 𑀫𑀬𑀸’’𑀢𑀺 𑀧𑀲𑁆𑀲𑀦𑁆𑀢𑀸𑀦𑀁 𑀓𑀭𑀼𑀡𑁄𑀓𑁆𑀓𑀫𑀦𑀁 𑀳𑁄𑀢𑀺 𑀬𑀣𑀸 𑀪𑀕𑀯𑀢𑁄𑀢𑀺. 𑀧𑀜𑁆𑀜𑀸𑀧𑀺 𑀪𑀕𑀯𑀢𑁄 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀦𑀺𑀭𑀯𑀲𑁂𑀲𑁂𑀲𑀼 𑀧𑀯𑀢𑁆𑀢𑀢𑀺, 𑀧𑀯𑀢𑁆𑀢𑀫𑀸𑀦𑀸 𑀘 𑀏𑀓𑀲𑁆𑀫𑀺𑀁 𑀅𑀦𑁂𑀓𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀲𑀪𑀸𑀯𑀓𑀺𑀘𑁆𑀘𑀸𑀤𑀺𑀚𑀸𑀦𑀦𑁂𑀦 𑀅𑀦𑀸𑀯𑀭𑀡𑀸 𑀅𑀲𑀸𑀥𑀸𑀭𑀡𑀸 𑀧𑀯𑀢𑁆𑀢𑀢𑀺 𑀬𑀣𑀸𑀭𑀼𑀘𑀺, 𑀬𑀣𑀸 𑀘 𑀧𑀲𑁆𑀲𑀦𑁆𑀢𑀲𑁆𑀲 𑀪𑀕𑀯𑀢𑁄 𑀓𑀭𑀼𑀡𑀸 𑀬𑀣𑀸𑀭𑀼𑀘𑀺 𑀧𑀯𑀢𑁆𑀢𑀢𑀺. 𑀢𑀁 𑀲𑀩𑁆𑀩𑀁 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀫𑀳𑀸𑀓𑀭𑀼𑀡𑀸𑀜𑀸𑀡𑀯𑀺𑀪𑀗𑁆𑀕𑀯𑀲𑁂𑀦 𑀚𑀸𑀦𑀺𑀢𑀩𑁆𑀩𑀁, 𑀧𑀜𑁆𑀜𑀸𑀬 𑀘 𑀬𑀣𑀸𑀭𑀼𑀘𑀺 𑀧𑀯𑀢𑁆𑀢𑀺 𑀲𑁂𑀲𑀸𑀲𑀸𑀥𑀸𑀭𑀡𑀜𑀸𑀡𑀯𑀺𑀪𑀗𑁆𑀕𑀸𑀤𑀺𑀯𑀲𑁂𑀦. 𑀧𑀜𑁆𑀜𑀸𑀕𑀳𑀡𑁂𑀦 𑀘 𑀢𑀻𑀲𑀼 𑀓𑀸𑀮𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀁 𑀘𑀢𑀼𑀲𑀘𑁆𑀘𑀜𑀸𑀡𑀁 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀁, 𑀓𑀭𑀼𑀡𑀸𑀕𑀳𑀡𑁂𑀦 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀜𑀸𑀡𑀲𑁆𑀲 𑀕𑀳𑀺𑀢𑀢𑁆𑀢𑀸 𑀢𑀁 𑀯𑀚𑁆𑀚𑁂𑀢𑁆𑀯𑀸 𑀅𑀜𑁆𑀜𑀸𑀦𑀺 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀺 𑀘𑀢𑀼𑀯𑁂𑀲𑀸𑀭𑀚𑁆𑀚𑀜𑀸𑀡𑀁 𑀤𑀲𑀩𑀮𑀸𑀦𑀺 𑀙 𑀅𑀪𑀺𑀜𑁆𑀜𑀸 𑀘𑀢𑀼𑀘𑀢𑁆𑀢𑀸𑀮𑀻𑀲 𑀜𑀸𑀡𑀯𑀢𑁆𑀣𑀽𑀦𑀺 𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀯𑀢𑁆𑀣𑀽𑀦𑀻𑀢𑀺 𑀏𑀯𑀫𑀸𑀤𑀬𑁄 𑀅𑀦𑁂𑀓𑁂 𑀧𑀜𑁆𑀜𑀸𑀧𑁆𑀧𑀪𑁂𑀤𑀸 𑀲𑀗𑁆𑀕𑀬𑁆𑀳𑀦𑁆𑀢𑀺, 𑀢𑀲𑁆𑀫𑀸 𑀢𑀲𑁆𑀲𑀸 𑀢𑀲𑁆𑀲𑀸 𑀧𑀜𑁆𑀜𑀸𑀬 𑀧𑀯𑀢𑁆𑀢𑀺𑀯𑀲𑁂𑀦 𑀬𑀣𑀸𑀭𑀼𑀘𑀺 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀓𑀭𑀼𑀡𑀸 𑀯𑀺𑀬…𑀧𑁂… 𑀬𑀣𑀸𑀭𑀼𑀘𑀻’’𑀢𑀺.

𑀢𑀢𑁆𑀣 𑀓𑀭𑀼𑀡𑀸𑀕𑀳𑀡𑁂𑀦 𑀫𑀳𑀸𑀩𑁄𑀥𑀺𑀬𑀸 𑀫𑀽𑀮𑀁 𑀤𑀲𑁆𑀲𑁂𑀢𑀺. 𑀫𑀳𑀸𑀤𑀼𑀓𑁆𑀔𑀲𑀫𑁆𑀩𑀸𑀥𑀧𑁆𑀧𑀝𑀺𑀧𑀦𑁆𑀦𑀜𑁆𑀳𑀺 𑀲𑀢𑁆𑀢𑀦𑀺𑀓𑀸𑀬𑀁 𑀤𑀺𑀲𑁆𑀯𑀸 ‘‘𑀢𑀲𑁆𑀲 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀲𑀭𑀡𑀁, 𑀅𑀳𑀫𑁂𑀢𑀁 𑀫𑀼𑀢𑁆𑀢𑁄 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀓𑀭𑀼𑀡𑀸𑀬 𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑁄 𑀅𑀪𑀺𑀦𑀻𑀳𑀸𑀭𑀁 𑀤𑀻𑀧𑀗𑁆𑀓𑀭𑀲𑁆𑀲 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀓𑀢𑁆𑀯𑀸 𑀩𑁄𑀥𑀺𑀲𑀫𑁆𑀪𑀸𑀭𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀲𑀫𑁆𑀩𑁄𑀥𑀺𑀁 𑀧𑀢𑁆𑀢𑁄𑀢𑀺 𑀓𑀭𑀼𑀡𑀸 𑀫𑀳𑀸𑀩𑁄𑀥𑀺𑀬𑀸 𑀫𑀽𑀮𑀦𑁆𑀢𑀺. 𑀲𑀢𑁆𑀢𑁂𑀲𑀽𑀢𑀺 𑀏𑀢𑁂𑀦 𑀫𑀳𑀸𑀩𑁄𑀥𑀺𑀬𑀸 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀺. 𑀲𑀢𑁆𑀢𑀸 𑀳𑀺 𑀫𑀳𑀸𑀩𑁄𑀥𑀺𑀁 𑀧𑀬𑁄𑀚𑁂𑀦𑁆𑀢𑀺. 𑀲𑀢𑁆𑀢𑀲𑀦𑁆𑀢𑀸𑀭𑀡𑀢𑁆𑀣𑀜𑁆𑀳𑀺 𑀲𑀩𑁆𑀩𑀜𑁆𑀜𑀼𑀢𑀸 𑀅𑀪𑀺𑀧𑀢𑁆𑀣𑀺𑀢𑀸. 𑀬𑀣𑀸𑀳 𑁋

‘‘𑀓𑀺𑀁 𑀫𑁂 𑀏𑀓𑁂𑀦 𑀢𑀺𑀡𑁆𑀡𑁂𑀦, 𑀧𑀼𑀭𑀺𑀲𑁂𑀦 𑀣𑀸𑀫𑀤𑀲𑁆𑀲𑀺𑀦𑀸;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀺𑀢𑁆𑀯𑀸, 𑀲𑀦𑁆𑀢𑀸𑀭𑁂𑀲𑁆𑀲𑀁 𑀲𑀤𑁂𑀯𑀓’’𑀦𑁆𑀢𑀺. (𑀩𑀼. 𑀯𑀁. 𑁨. 𑁫𑁬);

𑀧𑀜𑁆𑀜𑀸𑀕𑀳𑀡𑁂𑀦 𑀫𑀳𑀸𑀩𑁄𑀥𑀺𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀜𑁆𑀜𑀼𑀢𑀸𑀬 𑀳𑀺 𑀧𑀤𑀝𑁆𑀞𑀸𑀦𑀪𑀽𑀢𑀁 𑀫𑀕𑁆𑀕𑀜𑀸𑀡𑀁, 𑀫𑀕𑁆𑀕𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 ‘‘𑀫𑀳𑀸𑀩𑁄𑀥𑀻’’𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀜𑁂𑀬𑁆𑀬𑀥𑀫𑁆𑀫𑁂𑀲𑀼 𑀲𑀩𑁆𑀩𑁂𑀲𑀽𑀢𑀺 𑀏𑀢𑁂𑀦 𑀲𑀦𑁆𑀢𑀸𑀭𑁂𑀢𑀩𑁆𑀩𑀸𑀦𑀁 𑀲𑀢𑁆𑀢𑀸𑀦𑀁 𑀅𑀪𑀺𑀜𑁆𑀜𑁂𑀬𑁆𑀬𑀧𑀭𑀺𑀜𑁆𑀜𑁂𑀬𑁆𑀬𑀧𑀳𑀸𑀢𑀩𑁆𑀩𑀪𑀸𑀯𑁂𑀢𑀩𑁆𑀩𑀲𑀘𑁆𑀙𑀺𑀓𑀸𑀢𑀩𑁆𑀩𑁂 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀲𑀘𑁆𑀘𑀺𑀦𑁆𑀤𑁆𑀭𑀺𑀬𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀪𑁂𑀤𑁂 𑀓𑀼𑀲𑀮𑀸𑀤𑀺𑀪𑁂𑀤𑁂 𑀘 𑀲𑀩𑁆𑀩𑀥𑀫𑁆𑀫𑁂 𑀤𑀲𑁆𑀲𑁂𑀢𑀺. 𑀧𑀯𑀢𑁆𑀢𑀺𑀢𑁆𑀣 𑀬𑀣𑀸𑀭𑀼𑀘𑀻𑀢𑀺 𑀏𑀢𑁂𑀦 𑀧𑀝𑀺𑀯𑁂𑀥𑀧𑀘𑁆𑀘𑀯𑁂𑀓𑁆𑀔𑀡𑀧𑀼𑀩𑁆𑀩𑀗𑁆𑀕𑀫𑀤𑁂𑀲𑀦𑀸𑀜𑀸𑀡𑀧𑁆𑀧𑀯𑀢𑁆𑀢𑀺𑀤𑀻𑀧𑀦𑁂𑀦 𑀧𑀬𑁄𑀚𑀦𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀥𑀫𑁆𑀫𑀸𑀦𑀜𑁆𑀳𑀺 𑀧𑀝𑀺𑀯𑁂𑀥𑀜𑀸𑀡𑀁 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀅𑀳𑁄𑀲𑀺. 𑀫𑀕𑁆𑀕𑀜𑀸𑀡𑀫𑁂𑀯 𑀳𑀺 𑀢𑀦𑁆𑀢𑀺. 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀜𑁆𑀘 𑀯𑀺𑀲𑁂𑀲𑁂𑀦 𑀭𑀢𑀦𑀖𑀭𑀲𑀢𑁆𑀢𑀸𑀳𑁂 𑀅𑀳𑁄𑀲𑀺. 𑀏𑀯𑀁 𑀧𑀝𑀺𑀯𑀺𑀤𑁆𑀥𑀧𑀘𑁆𑀘𑀯𑁂𑀓𑁆𑀔𑀺𑀢𑀸𑀦𑀁 𑀥𑀫𑁆𑀫𑀸𑀦𑀁 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀸𑀤𑀻𑀲𑀼 𑀤𑁂𑀲𑀦𑀸𑀜𑀸𑀡𑀁 𑀅𑀳𑁄𑀲𑀺, 𑀯𑀺𑀲𑁂𑀲𑁂𑀦 𑀘 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀁 𑀲𑀢𑁆𑀢𑀧𑁆𑀧𑀓𑀭𑀡𑀤𑁂𑀲𑀦𑀸𑀬𑀦𑁆𑀢𑀺. 𑀤𑁂𑀲𑀦𑀸𑀜𑀸𑀡𑁂𑀦 𑀘 𑀤𑁂𑀲𑁂𑀦𑁆𑀢𑁄 𑀪𑀕𑀯𑀸 𑀲𑀢𑁆𑀢𑁂𑀲𑀼 𑀳𑀺𑀢𑀧𑀝𑀺𑀧𑀢𑁆𑀢𑀺𑀁 𑀧𑀝𑀺𑀧𑀚𑁆𑀚𑀢𑀻𑀢𑀺. 𑀏𑀢𑁂𑀦 𑀲𑀩𑁆𑀩𑁂𑀦 𑀅𑀢𑁆𑀢𑀳𑀺𑀢𑀧𑀝𑀺𑀧𑀢𑁆𑀢𑀺𑀁 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀜𑁆𑀘 𑀤𑀲𑁆𑀲𑁂𑀢𑀺. 𑀫𑀳𑀸𑀩𑁄𑀥𑀺𑀤𑀲𑁆𑀲𑀦𑁂𑀦 𑀳𑀺 𑀅𑀢𑁆𑀢𑀳𑀺𑀢𑀧𑀝𑀺𑀧𑀢𑁆𑀢𑀺, 𑀇𑀢𑀭𑁂𑀳𑀺𑀧𑀺 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀤𑀲𑁆𑀲𑀺𑀢𑀸𑀢𑀺. 𑀢𑁂𑀦 𑀅𑀢𑁆𑀢𑀳𑀺𑀢𑀧𑀝𑀺𑀧𑀦𑁆𑀦𑀸𑀤𑀻𑀲𑀼 𑀘𑀢𑀽𑀲𑀼 𑀧𑀼𑀕𑁆𑀕𑀮𑁂𑀲𑀼 𑀪𑀕𑀯𑀢𑁄 𑀘𑀢𑀼𑀢𑁆𑀣𑀧𑀼𑀕𑁆𑀕𑀮𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀢𑁂𑀦 𑀘 𑀅𑀦𑀼𑀢𑁆𑀢𑀭𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀁 𑀦𑀺𑀭𑀢𑀺𑀲𑀬𑀧𑀡𑀸𑀫𑀸𑀭𑀳𑀪𑀸𑀯𑀜𑁆𑀘 𑀅𑀢𑁆𑀢𑀦𑁄 𑀘 𑀓𑀺𑀭𑀺𑀬𑀸𑀬 𑀔𑁂𑀢𑁆𑀢𑀗𑁆𑀕𑀢𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀏𑀢𑁆𑀣 𑀘 𑀓𑀭𑀼𑀡𑀸𑀕𑀳𑀡𑁂𑀦 𑀮𑁄𑀓𑀺𑀬𑁂𑀲𑀼 𑀫𑀳𑀕𑁆𑀕𑀢𑀪𑀸𑀯𑀧𑁆𑀧𑀢𑁆𑀢𑀸𑀲𑀸𑀥𑀸𑀭𑀡𑀕𑀼𑀡𑀤𑀻𑀧𑀦𑀢𑁄 𑀲𑀩𑁆𑀩𑀮𑁄𑀓𑀺𑀬𑀕𑀼𑀡𑀲𑀫𑁆𑀧𑀢𑁆𑀢𑀺 𑀪𑀕𑀯𑀢𑁄 𑀤𑀲𑁆𑀲𑀺𑀢𑀸 𑀳𑁄𑀢𑀺, 𑀧𑀜𑁆𑀜𑀸𑀕𑀳𑀡𑁂𑀦𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀫𑀕𑁆𑀕𑀜𑀸𑀡𑀤𑀻𑀧𑀦𑀢𑁄 𑀲𑀩𑁆𑀩𑀮𑁄𑀓𑀼𑀢𑁆𑀢𑀭𑀕𑀼𑀡𑀲𑀫𑁆𑀧𑀢𑁆𑀢𑀺. 𑀓𑀭𑀼𑀡𑀸𑀯𑀘𑀦𑁂𑀦 𑀘 𑀉𑀧𑀕𑀫𑀦𑀁 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁, 𑀧𑀜𑁆𑀜𑀸𑀯𑀘𑀦𑁂𑀦 𑀅𑀧𑀕𑀫𑀦𑀁 𑀤𑀲𑁆𑀲𑁂𑀢𑀺. 𑀉𑀧𑀕𑀫𑀦𑀁 𑀤𑀲𑁆𑀲𑁂𑀦𑁆𑀢𑁄 𑀘 𑀮𑁄𑀓𑁂 𑀲𑀜𑁆𑀚𑀸𑀢𑀲𑀁𑀯𑀟𑁆𑀠𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀅𑀧𑀕𑀫𑀦𑀁 𑀤𑀲𑁆𑀲𑁂𑀦𑁆𑀢𑁄 𑀮𑁄𑀓𑁂𑀦 𑀅𑀦𑀼𑀧𑀮𑀺𑀢𑁆𑀢𑀢𑀁. ‘‘𑀓𑀭𑀼𑀡𑀸 𑀯𑀺𑀬 𑀲𑀢𑁆𑀢𑁂𑀲𑀽’’𑀢𑀺 𑀘 𑀮𑁄𑀓𑀲𑀫𑀜𑁆𑀜𑀸𑀦𑀼𑀭𑀽𑀧𑀁 𑀪𑀕𑀯𑀢𑁄 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀺, ‘‘𑀜𑁂𑀬𑁆𑀬𑀥𑀫𑁆𑀫𑁂𑀲𑀼 𑀲𑀩𑁆𑀩𑁂𑀲𑀼 𑀬𑀣𑀸𑀭𑀼𑀘𑀺 𑀧𑀜𑁆𑀜𑀸 𑀧𑀯𑀢𑁆𑀢𑀺𑀢𑁆𑀣𑀸’’𑀢𑀺 𑀏𑀢𑁂𑀦 𑀲𑀫𑀜𑁆𑀜𑀸𑀬 𑀅𑀦𑀢𑀺𑀥𑀸𑀯𑀦𑀁. 𑀲𑀩𑁆𑀩𑀥𑀫𑁆𑀫𑀲𑀪𑀸𑀯𑀸𑀦𑀯𑀩𑁄𑀥𑁂 𑀳𑀺 𑀲𑀢𑀺 𑀲𑀫𑀜𑁆𑀜𑀁 𑀅𑀢𑀺𑀥𑀸𑀯𑀺𑀢𑁆𑀯𑀸 ‘‘𑀲𑀢𑁆𑀢𑁄 𑀚𑀻𑀯𑁄 𑀅𑀢𑁆𑀣𑀻’’𑀢𑀺 𑀧𑀭𑀸𑀫𑀲𑀦𑀁 𑀳𑁄𑀢𑀻𑀢𑀺. 𑀲𑀩𑁆𑀩𑁂𑀲𑀜𑁆𑀘 𑀩𑀼𑀤𑁆𑀥𑀕𑀼𑀡𑀸𑀦𑀁 𑀓𑀭𑀼𑀡𑀸 𑀆𑀤𑀺 𑀢𑀦𑁆𑀦𑀺𑀤𑀸𑀦𑀪𑀸𑀯𑀢𑁄, 𑀧𑀜𑁆𑀜𑀸 𑀧𑀭𑀺𑀬𑁄𑀲𑀸𑀦𑀁 𑀢𑀢𑁄 𑀉𑀢𑁆𑀢𑀭𑀺𑀓𑀭𑀡𑀻𑀬𑀸𑀪𑀸𑀯𑀢𑁄. 𑀆𑀤𑀺𑀧𑀭𑀺𑀬𑁄𑀲𑀸𑀦𑀤𑀲𑁆𑀲𑀦𑁂𑀦 𑀘 𑀲𑀩𑁆𑀩𑁂 𑀩𑀼𑀤𑁆𑀥𑀕𑀼𑀡𑀸 𑀤𑀲𑁆𑀲𑀺𑀢𑀸𑀯 𑀳𑁄𑀦𑁆𑀢𑀺. 𑀓𑀭𑀼𑀡𑀸𑀕𑀳𑀡𑁂𑀦 𑀘 𑀲𑀻𑀮𑀓𑁆𑀔𑀦𑁆𑀥𑀧𑀼𑀩𑁆𑀩𑀗𑁆𑀕𑀫𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀓𑀭𑀼𑀡𑀸𑀦𑀺𑀤𑀸𑀦𑀜𑁆𑀳𑀺 𑀲𑀻𑀮𑀁 𑀢𑀢𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀺𑀭𑀢𑀺𑀧𑁆𑀧𑀯𑀢𑁆𑀢𑀺𑀢𑁄 𑀢𑀲𑁆𑀲𑀸 𑀘 𑀛𑀸𑀦𑀢𑁆𑀢𑀬𑀲𑀫𑁆𑀧𑀬𑁄𑀕𑀢𑁄. 𑀧𑀜𑁆𑀜𑀸𑀯𑀘𑀦𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁄. 𑀲𑀻𑀮𑀜𑁆𑀘 𑀲𑀩𑁆𑀩𑀩𑀼𑀤𑁆𑀥𑀕𑀼𑀡𑀸𑀦𑀁 𑀆𑀤𑀺, 𑀲𑀫𑀸𑀥𑀺 𑀫𑀚𑁆𑀛𑀁, 𑀧𑀜𑁆𑀜𑀸 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀏𑀯𑀫𑁆𑀧𑀺 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸 𑀲𑀩𑁆𑀩𑁂 𑀩𑀼𑀤𑁆𑀥𑀕𑀼𑀡𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺.

𑁨. 𑀏𑀯𑀁 𑀲𑀗𑁆𑀔𑁂𑀧𑁂𑀦 𑀲𑀩𑁆𑀩𑀩𑀼𑀤𑁆𑀥𑀕𑀼𑀡𑁂𑀳𑀺 𑀪𑀕𑀯𑀦𑁆𑀢𑀁 𑀣𑁄𑀫𑁂𑀢𑁆𑀯𑀸 𑀬𑀲𑁆𑀲𑀸 𑀲𑀁𑀯𑀡𑁆𑀡𑀦𑀁 𑀓𑀢𑁆𑀢𑀼𑀓𑀸𑀫𑁄, 𑀢𑀸𑀬 𑀅𑀪𑀺𑀥𑀫𑁆𑀫𑀤𑁂𑀲𑀦𑀸𑀬 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀸𑀬 𑀣𑁄𑀫𑁂𑀢𑀼𑀁 ‘‘𑀤𑀬𑀸𑀬 𑀢𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀸 𑀧𑀦 𑀤𑁂𑀲𑀦𑀸𑀬 𑀦𑀺𑀤𑀸𑀦𑀜𑁆𑀘 𑀲𑀫𑀼𑀝𑁆𑀞𑀸𑀦𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀤𑀬𑀸𑀬 𑀢𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀺𑀤𑀸𑀦𑀜𑁆𑀘 𑀤𑀼𑀯𑀺𑀥𑀁 𑀅𑀩𑁆𑀪𑀦𑁆𑀢𑀭𑀁 𑀩𑀸𑀳𑀺𑀭𑀜𑁆𑀘𑀸𑀢𑀺. 𑀅𑀩𑁆𑀪𑀦𑁆𑀢𑀭𑀁 𑀓𑀭𑀼𑀡𑀸, 𑀩𑀸𑀳𑀺𑀭𑀁 𑀤𑁂𑀲𑀓𑀸𑀮𑀸𑀤𑀺. 𑀲𑀫𑀼𑀝𑁆𑀞𑀸𑀦𑀁 𑀤𑁂𑀲𑀦𑀸𑀧𑀜𑁆𑀜𑀸. 𑀢𑀢𑁆𑀣 𑀅𑀩𑁆𑀪𑀦𑁆𑀢𑀭𑀦𑀺𑀤𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀬𑀸𑀬 𑀢𑀸𑀬 𑀲𑀢𑁆𑀢𑁂𑀲𑀼, 𑀲𑀫𑀼𑀲𑁆𑀲𑀸𑀳𑀺𑀢𑀫𑀸𑀦𑀲𑁄’’𑀢𑀺 𑀆𑀳. 𑀢𑀢𑁆𑀣 𑀤𑀬𑀸𑀢𑀺 𑀓𑀭𑀼𑀡𑀸 𑀅𑀥𑀺𑀧𑁆𑀧𑁂𑀢𑀸. 𑀢𑀸𑀬 𑀳𑀺 𑀲𑀫𑀼𑀲𑁆𑀲𑀸𑀳𑀺𑀢𑁄 𑀅𑀪𑀺𑀥𑀫𑁆𑀫𑀓𑀣𑀸𑀫𑀕𑁆𑀕𑀁 𑀲𑀫𑁆𑀧𑀯𑀢𑁆𑀢𑀬𑀻𑀢𑀺. 𑀢𑀸𑀬𑀸𑀢𑀺 𑀅𑀬𑀁 𑀢-𑀲𑀤𑁆𑀤𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑁆𑀲 𑀧𑀝𑀺𑀦𑀺𑀤𑁆𑀤𑁂𑀲𑁄 𑀳𑁄𑀢𑀺.

𑀧𑀼𑀭𑀺𑀫𑀕𑀸𑀣𑀸𑀬 𑀘 𑀧𑀥𑀸𑀦𑀪𑀸𑀯𑁂𑀦 𑀧𑀜𑁆𑀜𑀸 𑀦𑀺𑀤𑁆𑀤𑀺𑀝𑁆𑀞𑀸, 𑀢𑀩𑁆𑀩𑀺𑀲𑁂𑀲𑀦𑀪𑀸𑀯𑁂𑀦 𑀓𑀭𑀼𑀡𑀸. 𑀲𑀸 𑀳𑀺 𑀢𑀲𑁆𑀲𑀸 𑀦𑀺𑀤𑀲𑁆𑀲𑀦𑀪𑀽𑀢𑀸 𑀅𑀧𑁆𑀧𑀥𑀸𑀦𑀸 𑀢𑀁 𑀯𑀺𑀲𑁂𑀲𑁂𑀢𑁆𑀯𑀸 𑀯𑀺𑀦𑀺𑀯𑀢𑁆𑀢𑀸, 𑀢𑀲𑁆𑀫𑀸 ‘‘𑀢𑀸𑀬𑀸’’𑀢𑀺 𑀧𑀝𑀺𑀦𑀺𑀤𑁆𑀤𑁂𑀲𑀁 𑀦𑀸𑀭𑀳𑀢𑀺. 𑀬𑀸 𑀘 𑀧𑀥𑀸𑀦𑀪𑀽𑀢𑀸 𑀧𑀜𑁆𑀜𑀸, 𑀲𑀸 𑀤𑁂𑀲𑀦𑀸𑀬 𑀲𑀫𑀼𑀝𑁆𑀞𑀸𑀦𑀁, 𑀦 𑀲𑀫𑀼𑀲𑁆𑀲𑀸𑀳𑀺𑀦𑀻𑀢𑀺 𑀢𑀲𑁆𑀲𑀸 𑀘 𑀧𑀝𑀺𑀦𑀺𑀤𑁆𑀤𑁂𑀲𑁄 𑀦 𑀬𑀼𑀢𑁆𑀢𑁄𑀢𑀺? 𑀧𑀜𑁆𑀜𑀸𑀬 𑀢𑀸𑀯 𑀧𑀝𑀺𑀦𑀺𑀤𑁆𑀤𑁂𑀲𑁄 𑀦 𑀬𑀼𑀢𑁆𑀢𑁄𑀢𑀺 𑀲𑀼𑀯𑀼𑀢𑁆𑀢𑀫𑁂𑀢𑀁, 𑀓𑀭𑀼𑀡𑀸𑀬 𑀧𑀦 𑀧𑀝𑀺𑀦𑀺𑀤𑁆𑀤𑁂𑀲𑁄 𑀦𑁄 𑀦 𑀬𑀼𑀢𑁆𑀢𑁄 ‘‘𑀤𑀬𑀸𑀬 𑀢𑀸𑀬𑀸’’𑀢𑀺 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑀢𑁄. 𑀲𑀫𑀸𑀦𑀸𑀥𑀺𑀓𑀭𑀡𑀸𑀦𑀜𑁆𑀳𑀺 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀁 𑀯𑀺𑀬 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁄 𑀳𑁄𑀢𑀺. 𑀭𑀽𑀧-𑀲𑀤𑁆𑀤𑁄 𑀳𑀺 𑀅𑀜𑁆𑀜𑀓𑁆𑀔𑀦𑁆𑀥𑀦𑀺𑀯𑀢𑁆𑀢𑀦𑀢𑁆𑀣𑀁 𑀯𑀼𑀘𑁆𑀘𑀫𑀸𑀦𑁄 𑀯𑀺𑀲𑁂𑀲𑀦𑀁 𑀳𑁄𑀢𑀺, 𑀔𑀦𑁆𑀥-𑀲𑀤𑁆𑀤𑁄 𑀘 𑀦𑀺𑀯𑀢𑁆𑀢𑁂𑀢𑀩𑁆𑀩𑀕𑀳𑁂𑀢𑀩𑁆𑀩𑀲𑀸𑀥𑀸𑀭𑀡𑀯𑀘𑀦𑀪𑀸𑀯𑀢𑁄 𑀯𑀺𑀲𑁂𑀲𑀺𑀢𑀩𑁆𑀩𑁄, 𑀏𑀯𑀫𑀺𑀥𑀸𑀧𑀺 ‘‘𑀤𑀬𑀸𑀬 𑀢𑀸𑀬𑀸’’𑀢𑀺 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀏𑀓𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑀢𑁄 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁄 𑀳𑁄𑀢𑀺. 𑀢𑀢𑁆𑀣 𑀤𑀬𑀸 𑀲𑀫𑀼𑀲𑁆𑀲𑀸𑀳𑀺𑀦𑀻𑀢𑀺 𑀧𑀥𑀸𑀦𑀸, 𑀦𑀺𑀯𑀢𑁆𑀢𑁂𑀢𑀩𑁆𑀩𑀕𑀳𑁂𑀢𑀩𑁆𑀩𑀲𑀸𑀥𑀸𑀭𑀡𑀯𑀘𑀦𑀜𑁆𑀘𑀺𑀤𑀁. 𑀢𑀲𑁆𑀫𑀸 ‘‘𑀤𑀬𑀸𑀬𑀸’’𑀢𑀺 𑀯𑀺𑀲𑁂𑀲𑀺𑀢𑀩𑁆𑀩𑀯𑀘𑀦𑀫𑁂𑀢𑀁, 𑀢𑀲𑁆𑀲 𑀘 𑀬𑀣𑀸 𑀯𑀺𑀲𑁂𑀲𑀦𑀁 𑀳𑁄𑀢𑀺 ‘‘𑀢𑀸𑀬𑀸’’𑀢𑀺 𑀇𑀤𑀁 𑀯𑀘𑀦𑀁, 𑀢𑀣𑀸 𑀢𑀲𑁆𑀲 𑀧𑀝𑀺𑀦𑀺𑀤𑁆𑀤𑁂𑀲𑀪𑀸𑀯𑁄 𑀬𑁄𑀚𑁂𑀢𑀩𑁆𑀩𑁄. 𑀦 𑀳𑀺 𑀧𑀜𑁆𑀜𑀸𑀧𑀝𑀺𑀦𑀺𑀤𑁆𑀤𑁂𑀲𑀪𑀸𑀯𑁂 𑀤𑀬𑀸𑀯𑀺𑀲𑁂𑀲𑀦𑀁 𑀢-𑀲𑀤𑁆𑀤𑁄 𑀳𑁄𑀢𑀺, 𑀓𑀭𑀼𑀡𑀸𑀧𑀝𑀺𑀦𑀺𑀤𑁆𑀤𑁂𑀲𑀪𑀸𑀯𑁂 𑀘 𑀳𑁄𑀢𑀻𑀢𑀺. 𑀧𑀥𑀸𑀦𑀜𑁆𑀘 𑀧𑀜𑁆𑀜𑀁 𑀯𑀚𑁆𑀚𑁂𑀢𑁆𑀯𑀸 ‘‘𑀤𑀬𑀸𑀬𑀸’’𑀢𑀺 𑀏𑀢𑁂𑀦 𑀲𑀫𑁆𑀩𑀚𑁆𑀛𑀫𑀸𑀦𑁄 ‘‘𑀢𑀸𑀬𑀸’’𑀢𑀺 𑀅𑀬𑀁 𑀢-𑀲𑀤𑁆𑀤𑁄 𑀅𑀧𑁆𑀧𑀥𑀸𑀦𑀸𑀬 𑀓𑀭𑀼𑀡𑀸𑀬 𑀧𑀝𑀺𑀦𑀺𑀤𑁆𑀤𑁂𑀲𑁄 𑀪𑀯𑀺𑀢𑀼𑀫𑀭𑀳𑀢𑀺. 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑁋 𑀬𑀸𑀬 𑀤𑀬𑀸𑀬 𑀲𑀫𑀼𑀲𑁆𑀲𑀸𑀳𑀺𑀢𑁄, 𑀦 𑀲𑀸 𑀬𑀸 𑀓𑀸𑀘𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀦 𑀦𑀺𑀤𑀲𑁆𑀲𑀦𑀪𑀽𑀢𑀸 𑀫𑀳𑀸𑀓𑀭𑀼𑀡𑀸, 𑀢𑀸𑀬 𑀲𑀫𑀼𑀲𑁆𑀲𑀸𑀳𑀺𑀢𑁄𑀢𑀺.

𑀓𑀣𑀁 𑀧𑀦 𑀓𑀭𑀼𑀡𑀸 ‘‘𑀤𑀬𑀸’’𑀢𑀺 𑀜𑀸𑀢𑀩𑁆𑀩𑀸, 𑀦𑀦𑀼 𑀯𑀼𑀢𑁆𑀢𑀁 ‘‘𑀤𑀬𑀸𑀧𑀦𑁆𑀦𑁄’’𑀢𑀺 𑀏𑀢𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁮) ‘‘𑀫𑁂𑀢𑁆𑀢𑀘𑀺𑀢𑁆𑀢𑀢𑀁 𑀆𑀧𑀦𑁆𑀦𑁄’’𑀢𑀺, 𑀢𑀲𑁆𑀫𑀸 𑀤𑀬𑀸 𑀫𑁂𑀢𑁆𑀢𑀸𑀢𑀺 𑀬𑀼𑀚𑁆𑀚𑁂𑀬𑁆𑀬, 𑀦 𑀓𑀭𑀼𑀡𑀸𑀢𑀺? 𑀬𑀤𑀺 𑀏𑀯𑀁 ‘‘𑀅𑀤𑀬𑀸𑀧𑀦𑁆𑀦𑁄’’𑀢𑀺 𑀏𑀢𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 ‘‘𑀦𑀺𑀓𑁆𑀓𑀭𑀼𑀡𑀢𑀁 𑀆𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀬𑀸 𑀫𑁂𑀢𑁆𑀢𑀸𑀢𑀺 𑀘 𑀦 𑀬𑀼𑀚𑁆𑀚𑁂𑀬𑁆𑀬, 𑀢𑀲𑁆𑀫𑀸 𑀤𑀬𑀸-𑀲𑀤𑁆𑀤𑁄 𑀬𑀢𑁆𑀣 𑀬𑀢𑁆𑀣 𑀧𑀯𑀢𑁆𑀢𑀢𑀺, 𑀢𑀢𑁆𑀣 𑀢𑀢𑁆𑀣 𑀅𑀥𑀺𑀧𑁆𑀧𑀸𑀬𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑁄. 𑀤𑀬𑀸-𑀲𑀤𑁆𑀤𑁄 𑀳𑀺 𑀅𑀦𑀼𑀭𑀓𑁆𑀔𑀡𑀢𑁆𑀣𑀁 𑀅𑀦𑁆𑀢𑁄𑀦𑀻𑀢𑀁 𑀓𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁄 𑀫𑁂𑀢𑁆𑀢𑀸𑀬 𑀘 𑀓𑀭𑀼𑀡𑀸𑀬 𑀘 𑀧𑀯𑀢𑁆𑀢𑀢𑀻𑀢𑀺 𑀦𑁄 𑀦 𑀬𑀼𑀚𑁆𑀚𑀢𑀺. 𑀏𑀯𑀜𑁆𑀳𑀺 𑀅𑀝𑁆𑀞𑀓𑀣𑀸𑀦𑀁 𑀅𑀯𑀺𑀭𑁄𑀥𑁄 𑀳𑁄𑀢𑀻𑀢𑀺. 𑀓𑀭𑀼𑀡𑀸 𑀘 𑀤𑁂𑀲𑀦𑀸𑀬 𑀦𑀺𑀤𑀸𑀦𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀦 𑀫𑁂𑀢𑁆𑀢𑀸 ‘‘𑀅𑀘𑁆𑀘𑀦𑁆𑀢𑀫𑁂𑀯 𑀳𑀺 𑀢𑀁 𑀲𑀫𑀬𑀁 𑀪𑀕𑀯𑀸 𑀓𑀭𑀼𑀡𑀸𑀯𑀺𑀳𑀸𑀭𑁂𑀦 𑀯𑀺𑀳𑀸𑀲𑀻’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁧; 𑀫. 𑀦𑀺. 𑀅𑀝𑁆𑀞. 𑁧.𑁧 𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸; 𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁧; 𑀅. 𑀦𑀺. 𑀅𑀝𑁆𑀞. 𑁧.𑁧.𑁧) 𑀏𑀯𑀫𑀸𑀤𑀻𑀲𑀼, 𑀢𑀲𑁆𑀫𑀸 𑀇𑀥 𑀓𑀭𑀼𑀡𑀸𑀯 𑀤𑀬𑀸𑀯𑀘𑀦𑁂𑀦 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀳𑀺 𑀲𑀫𑀼𑀲𑁆𑀲𑀸𑀳𑀺𑀦𑀻, 𑀦 𑀫𑁂𑀢𑁆𑀢𑀸, 𑀫𑁂𑀢𑁆𑀢𑀸 𑀧𑀦 𑀧𑀜𑁆𑀜𑀸𑀕𑀢𑀺𑀓𑀧𑀯𑀢𑁆𑀢𑀺𑀦𑀻 𑀳𑁄𑀢𑀻𑀢𑀺.

‘‘𑀲𑀢𑁆𑀢𑁂𑀲𑀽’’𑀢𑀺 𑀓𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀁, 𑀦𑀦𑀼 ‘‘𑀢𑀸𑀬𑀸’’𑀢𑀺 𑀏𑀢𑁂𑀦 𑀯𑀘𑀦𑁂𑀦 𑀲𑀢𑁆𑀢𑀯𑀺𑀲𑀬𑀸 𑀓𑀭𑀼𑀡𑀸 𑀕𑀳𑀺𑀢𑀸𑀢𑀺? 𑀦𑁄 𑀦 𑀕𑀳𑀺𑀢𑀸, 𑀧𑀼𑀭𑀺𑀫𑀕𑀸𑀣𑀸𑀬 𑀧𑀦 ‘‘𑀲𑀢𑁆𑀢𑁂𑀲𑀼 𑀓𑀭𑀼𑀡𑀸 𑀬𑀣𑀸𑀭𑀼𑀘𑀺 𑀧𑀯𑀢𑁆𑀢𑀺𑀢𑁆𑀣𑀸’’𑀢𑀺 𑀲𑀧𑁆𑀧𑀤𑁂𑀲𑀲𑀢𑁆𑀢𑀯𑀺𑀲𑀬𑀸 𑀦𑀺𑀧𑁆𑀧𑀤𑁂𑀲𑀲𑀢𑁆𑀢𑀯𑀺𑀲𑀬𑀸 𑀘 𑀲𑀩𑁆𑀩𑀸 𑀯𑀼𑀢𑁆𑀢𑀸, 𑀇𑀥 𑀧𑀦 𑀦𑀺𑀧𑁆𑀧𑀤𑁂𑀲𑀲𑀢𑁆𑀢𑀯𑀺𑀲𑀬𑀢𑀁 𑀕𑀳𑁂𑀢𑀼𑀁 ‘‘𑀲𑀢𑁆𑀢𑁂𑀲𑀽’’𑀢𑀺 𑀦𑀺𑀧𑁆𑀧𑀤𑁂𑀲𑀲𑀢𑁆𑀢𑀯𑀺𑀲𑀬𑀪𑀽𑀢𑀸 𑀤𑀲𑁆𑀲𑀺𑀢𑀸. 𑀢𑁂𑀦 𑀲𑀩𑁆𑀩𑀲𑀢𑁆𑀢𑀯𑀺𑀲𑀬𑀸𑀬 𑀓𑀭𑀼𑀡𑀸𑀬 𑀲𑀫𑀼𑀲𑁆𑀲𑀸𑀳𑀺𑀢𑁄 𑀅𑀪𑀺𑀥𑀫𑁆𑀫𑀓𑀣𑀸𑀫𑀕𑁆𑀕𑀁 𑀤𑁂𑀯𑀸𑀦𑀁 𑀲𑀫𑁆𑀧𑀯𑀢𑁆𑀢𑀬𑀺, 𑀦 𑀤𑁂𑀯𑀯𑀺𑀲𑀬𑀸𑀬 𑀏𑀯, 𑀢𑀲𑁆𑀫𑀸 𑀲𑀩𑁆𑀩𑀲𑀢𑁆𑀢𑀳𑀺𑀢𑀢𑁆𑀣𑀁 𑀅𑀪𑀺𑀥𑀫𑁆𑀫𑀓𑀣𑀸𑀫𑀕𑁆𑀕𑀁 𑀤𑁂𑀯𑀸𑀦𑀁 𑀲𑀫𑁆𑀧𑀯𑀢𑁆𑀢𑀬𑀺, 𑀦 𑀤𑁂𑀯𑀸𑀦𑀁𑀬𑁂𑀯 𑀅𑀢𑁆𑀣𑀸𑀬𑀸𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄𑀯 𑀳𑁄𑀢𑀺. 𑀅𑀣 𑀯𑀸 ‘‘𑀲𑀢𑁆𑀢𑁂𑀲𑀽’’𑀢𑀺 𑀇𑀤𑀁 𑀦 𑀤𑀬𑀸𑀬 𑀆𑀮𑀫𑁆𑀩𑀦𑀦𑀺𑀤𑀲𑁆𑀲𑀦𑀁, 𑀲𑀫𑀼𑀲𑁆𑀲𑀸𑀳𑀦𑀯𑀺𑀲𑀬𑁄 𑀧𑀦 𑀏𑀢𑁂𑀦 𑀤𑀲𑁆𑀲𑀺𑀢𑁄. 𑀅𑀪𑀺𑀥𑀫𑁆𑀫𑀓𑀣𑀸𑀫𑀕𑁆𑀕𑀧𑁆𑀧𑀯𑀢𑁆𑀢𑀦𑀢𑁆𑀣𑀜𑁆𑀳𑀺 𑀪𑀕𑀯𑀸 𑀓𑀭𑀼𑀡𑀸𑀬 𑀦 𑀤𑁂𑀯𑁂𑀲𑀼𑀬𑁂𑀯 𑀲𑀫𑀼𑀲𑁆𑀲𑀸𑀳𑀺𑀢𑁄, 𑀲𑀩𑁆𑀩𑀩𑁄𑀥𑀦𑁂𑀬𑁆𑀬𑁂𑀲𑀼 𑀧𑀦 𑀲𑀢𑁆𑀢𑁂𑀲𑀼 𑀲𑀫𑀼𑀲𑁆𑀲𑀸𑀳𑀺𑀢𑁄 𑀲𑀩𑁆𑀩𑁂𑀲𑀁 𑀅𑀢𑁆𑀣𑀸𑀬 𑀧𑀯𑀢𑁆𑀢𑀢𑁆𑀢𑀸, 𑀢𑀲𑁆𑀫𑀸 𑀲𑀢𑁆𑀢𑁂𑀲𑀼 𑀲𑀫𑀼𑀲𑁆𑀲𑀸𑀳𑀺𑀢𑀫𑀸𑀦𑀲𑁄𑀢𑀺 𑀲𑀢𑁆𑀢𑁂𑀲𑀼 𑀯𑀺𑀲𑀬𑀪𑀽𑀢𑁂𑀲𑀼 𑀦𑀺𑀫𑀺𑀢𑁆𑀢𑀪𑀽𑀢𑁂𑀲𑀼 𑀯𑀸 𑀲𑀫𑀼𑀲𑁆𑀲𑀸𑀳𑀺𑀢𑀫𑀸𑀦𑀲𑁄 𑀉𑀬𑁆𑀬𑁄𑀚𑀺𑀢𑀘𑀺𑀢𑁆𑀢𑁄𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀏𑀯𑀁 𑀅𑀩𑁆𑀪𑀦𑁆𑀢𑀭𑀦𑀺𑀤𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀩𑀸𑀳𑀺𑀭𑀦𑀺𑀤𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀸𑀝𑀺𑀳𑀻𑀭𑀸𑀯𑀲𑀸𑀦𑀫𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀲𑁆𑀫𑀺𑀁 𑀓𑀸𑀮𑁂 𑀪𑀕𑀯𑀢𑀸 𑀅𑀪𑀺𑀥𑀫𑁆𑀫𑀓𑀣𑀸𑀫𑀕𑁆𑀕𑁄 𑀧𑀯𑀢𑁆𑀢𑀺𑀢𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀸𑀝𑀺𑀳𑀻𑀭𑀸𑀯𑀲𑀸𑀦𑀫𑁆𑀳𑀺 𑀯𑀲𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀁. ‘‘𑀅𑀯𑀲𑀸𑀦𑀫𑁆𑀳𑀺 𑀯𑀲𑀦𑁆𑀢𑁄 𑀢𑀺𑀤𑀲𑀸𑀮𑀬𑁂’’𑀢𑀺 𑀯𑀘𑀦𑀢𑁄 𑀬𑀲𑁆𑀲𑀸𑀯𑀲𑀸𑀦𑀫𑁆𑀳𑀺 𑀢𑀺𑀤𑀲𑀸𑀮𑀬𑁂 𑀯𑀲𑀺, 𑀢𑀁 𑀓𑀡𑁆𑀟𑀫𑁆𑀩𑀫𑀽𑀮𑁂 𑀓𑀢𑀁 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀇𑀥 ‘‘𑀧𑀸𑀝𑀺𑀳𑀻𑀭’’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀩𑁄𑀥𑀺𑀫𑀽𑀮𑀸𑀤𑀻𑀲𑀼 𑀓𑀢𑀁 𑀧𑀸𑀝𑀺𑀳𑀸𑀭𑀺𑀬𑀁, 𑀦𑀸𑀧𑀺 𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀺𑀬𑁄𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀧𑀸𑀓𑀝𑀢𑁆𑀢𑀸 𑀘 𑀆𑀲𑀦𑁆𑀦𑀢𑁆𑀢𑀸 𑀘 𑀢𑀤𑁂𑀯 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀸𑀝𑀺𑀳𑀸𑀭𑀺𑀬𑀧𑀤𑀲𑁆𑀲 𑀯𑀘𑀦𑀢𑁆𑀣𑀁 (𑀉𑀤𑀸. 𑀅𑀝𑁆𑀞. 𑁧; 𑀇𑀢𑀺𑀯𑀼. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) ‘‘𑀧𑀝𑀺𑀧𑀓𑁆𑀔𑀳𑀭𑀡𑀢𑁄 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀧𑀦𑀬𑀦𑀢𑁄 𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀤𑀦𑁆𑀢𑀺, 𑀪𑀕𑀯𑀢𑁄 𑀧𑀦 𑀧𑀝𑀺𑀧𑀓𑁆𑀔𑀸 𑀭𑀸𑀕𑀸𑀤𑀬𑁄 𑀦 𑀲𑀦𑁆𑀢𑀺 𑀬𑁂 𑀳𑀭𑀺𑀢𑀩𑁆𑀩𑀸. 𑀧𑀼𑀣𑀼𑀚𑁆𑀚𑀦𑀸𑀦𑀫𑁆𑀧𑀺 𑀳𑀺 𑀯𑀺𑀕𑀢𑀼𑀧𑀓𑁆𑀓𑀺𑀮𑁂𑀲𑁂 𑀅𑀝𑁆𑀞𑀗𑁆𑀕𑀕𑀼𑀡𑀲𑀫𑀦𑁆𑀦𑀸𑀕𑀢𑁂 𑀘𑀺𑀢𑁆𑀢𑁂 𑀳𑀢𑀧𑀝𑀺𑀧𑀓𑁆𑀔𑁂 𑀇𑀤𑁆𑀥𑀺𑀯𑀺𑀥𑀁 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀧𑀯𑀢𑁆𑀢𑀯𑁄𑀳𑀸𑀭𑁂𑀦 𑀘 𑀦 𑀲𑀓𑁆𑀓𑀸 𑀇𑀥 ‘‘𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀢𑁆𑀢𑀼𑀁. 𑀲𑀘𑁂 𑀧𑀦 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲 𑀪𑀕𑀯𑀢𑁄 𑀯𑁂𑀦𑁂𑀬𑁆𑀬𑀕𑀢𑀸 𑀘 𑀓𑀺𑀮𑁂𑀲𑀸 𑀧𑀝𑀺𑀧𑀓𑁆𑀔𑀸, 𑀢𑁂𑀲𑀁 𑀳𑀭𑀡𑀢𑁄 ‘‘𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀲𑀢𑀺 𑀬𑀼𑀢𑁆𑀢𑀫𑁂𑀢𑀁. 𑀅𑀣 𑀯𑀸 𑀪𑀕𑀯𑀢𑁄 𑀘 𑀲𑀸𑀲𑀦𑀲𑁆𑀲 𑀘 𑀧𑀝𑀺𑀧𑀓𑁆𑀔𑀸 𑀢𑀺𑀢𑁆𑀣𑀺𑀬𑀸, 𑀢𑁂𑀲𑀁 𑀳𑀭𑀡𑀢𑁄 𑀧𑀸𑀝𑀺𑀳𑀸𑀭𑀺𑀬𑀁. 𑀢𑁂 𑀳𑀺 𑀤𑀺𑀝𑁆𑀞𑀺𑀳𑀭𑀡𑀯𑀲𑁂𑀦 𑀤𑀺𑀝𑁆𑀞𑀺𑀧𑁆𑀧𑀓𑀸𑀲𑀦𑁂 𑀅𑀲𑀫𑀢𑁆𑀣𑀪𑀸𑀯𑁂𑀦 𑀘 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀻𑀳𑀺 𑀳𑀭𑀺𑀢𑀸 𑀅𑀧𑀦𑀻𑀢𑀸 𑀳𑁄𑀦𑁆𑀢𑀻𑀢𑀺. 𑀅𑀣 𑀯𑀸 𑀧𑀝𑀻𑀢𑀺 𑀅𑀬𑀁 𑀲𑀤𑁆𑀤𑁄 ‘‘𑀧𑀘𑁆𑀙𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀩𑁄𑀥𑁂𑀢𑀺 ‘‘𑀢𑀲𑁆𑀫𑀺𑀁 𑀧𑀝𑀺𑀧𑀯𑀺𑀝𑁆𑀞𑀫𑁆𑀳𑀺, 𑀅𑀜𑁆𑀜𑁄 𑀆𑀕𑀜𑁆𑀙𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁯𑁮𑁫; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀯𑀕𑁆𑀕, 𑀯𑀢𑁆𑀣𑀼𑀕𑀸𑀣𑀸 𑁪) 𑀯𑀺𑀬, 𑀢𑀲𑁆𑀫𑀸 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀯𑀺𑀕𑀢𑀼𑀧𑀓𑁆𑀓𑀺𑀮𑁂𑀲𑁂 𑀘 𑀓𑀢𑀓𑀺𑀘𑁆𑀘𑁂𑀦 𑀧𑀘𑁆𑀙𑀸 𑀳𑀭𑀺𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀧𑀝𑀺𑀳𑀸𑀭𑀺𑀬𑀁, 𑀅𑀢𑁆𑀢𑀦𑁄 𑀯𑀸 𑀉𑀧𑀓𑁆𑀓𑀺𑀮𑁂𑀲𑁂𑀲𑀼 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑀕𑁆𑀕𑁂𑀳𑀺 𑀳𑀭𑀺𑀢𑁂𑀲𑀼 𑀧𑀘𑁆𑀙𑀸 𑀳𑀭𑀡𑀁 𑀧𑀝𑀺𑀳𑀸𑀭𑀺𑀬𑀁, 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀺𑀬𑁄 𑀘 𑀯𑀺𑀕𑀢𑀼𑀧𑀓𑁆𑀓𑀺𑀮𑁂𑀲𑁂𑀦 𑀓𑀢𑀓𑀺𑀘𑁆𑀘𑁂𑀦 𑀘 𑀲𑀢𑁆𑀢𑀳𑀺𑀢𑀢𑁆𑀣𑀁 𑀧𑀼𑀦 𑀧𑀯𑀢𑁆𑀢𑁂𑀢𑀩𑁆𑀩𑀸, 𑀳𑀭𑀺𑀢𑁂𑀲𑀼 𑀘 𑀅𑀢𑁆𑀢𑀦𑁄 𑀉𑀧𑀓𑁆𑀓𑀺𑀮𑁂𑀲𑁂𑀲𑀼 𑀧𑀭𑀲𑀢𑁆𑀢𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑀳𑀭𑀡𑀸𑀦𑀺 𑀳𑁄𑀦𑁆𑀢𑀻𑀢𑀺 𑀧𑀝𑀺𑀳𑀸𑀭𑀺𑀬𑀸𑀦𑀺 𑀪𑀯𑀦𑁆𑀢𑀺, 𑀧𑀝𑀺𑀳𑀸𑀭𑀺𑀬𑀫𑁂𑀯 𑀧𑀸𑀝𑀺𑀳𑀸𑀭𑀺𑀬𑀁. 𑀧𑀝𑀺𑀳𑀸𑀭𑀺𑀬𑁂 𑀯𑀸 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀺𑀲𑀫𑀼𑀤𑀸𑀬𑁂 𑀪𑀯𑀁 𑀏𑀓𑁂𑀓𑀁 𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀝𑀺𑀳𑀸𑀭𑀺𑀬𑀁 𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀫𑀕𑁆𑀕𑁄 𑀘 𑀧𑀝𑀺𑀧𑀓𑁆𑀔𑀳𑀭𑀡𑀢𑁄, 𑀢𑀢𑁆𑀣 𑀚𑀸𑀢𑀁, 𑀢𑀲𑁆𑀫𑀺𑀁 𑀯𑀸 𑀦𑀺𑀫𑀺𑀢𑁆𑀢𑀪𑀽𑀢𑁂, 𑀢𑀢𑁄 𑀯𑀸 𑀆𑀕𑀢𑀦𑁆𑀢𑀺 𑀧𑀸𑀝𑀺𑀳𑀸𑀭𑀺𑀬𑀁. 𑀧𑀸𑀝𑀺𑀳𑀸𑀭𑀺𑀬𑀫𑁂𑀯 𑀇𑀥 ‘‘𑀧𑀸𑀝𑀺𑀳𑀻𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀯𑀲𑀸𑀦𑀫𑁆𑀳𑀺 𑀯𑀲𑀦𑁆𑀢𑁄𑀢𑀺 𑀏𑀢𑁂𑀳𑀺 𑀓𑀸𑀮𑀁 𑀦𑀺𑀤𑀲𑁆𑀲𑁂𑀢𑀺. 𑀧𑀸𑀝𑀺𑀳𑀻𑀭𑀓𑀭𑀡𑀸𑀯𑀲𑀸𑀦𑁂𑀦 𑀳𑀺 𑀢𑀺𑀤𑀲𑀸𑀮𑀬𑀯𑀸𑀲𑁂𑀦 𑀘 𑀧𑀭𑀺𑀘𑁆𑀙𑀺𑀦𑁆𑀦𑁄 𑀅𑀪𑀺𑀥𑀫𑁆𑀫𑀓𑀣𑀸𑀫𑀕𑁆𑀕𑀧𑁆𑀧𑀯𑀢𑁆𑀢𑀦𑀲𑁆𑀲 𑀓𑀸𑀮𑁄𑀢𑀺. 𑀢𑀺𑀤𑀲𑀸𑀮𑀬𑁂𑀢𑀺 𑀤𑁂𑀲𑀁 𑀦𑀺𑀤𑀲𑁆𑀲𑁂𑀢𑀺. 𑀲𑁄 𑀳𑀺 𑀅𑀪𑀺𑀥𑀫𑁆𑀫𑀓𑀣𑀸𑀫𑀕𑁆𑀕𑀧𑁆𑀧𑀯𑀢𑁆𑀢𑀦𑀲𑁆𑀲 𑀤𑁂𑀲𑁄 𑀢𑀢𑁆𑀣 𑀯𑀲𑀦𑁆𑀢𑁂𑀦 𑀧𑀯𑀢𑁆𑀢𑀺𑀢𑀢𑁆𑀢𑀸𑀢𑀺.

𑁩. 𑀢𑀢𑁆𑀣𑀸𑀧𑀺 𑀤𑁂𑀲𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 ‘‘𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑀫𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀼𑀕𑀦𑁆𑀥𑀭𑁂𑀢𑀺 𑀲𑀻𑀢𑀧𑀩𑁆𑀩𑀢𑁂𑀲𑁆𑀯𑁂𑀓𑁄 𑀤𑁆𑀯𑁂𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀲𑀳𑀲𑁆𑀲𑀼𑀩𑁆𑀩𑁂𑀥𑁄, 𑀆𑀤𑀺𑀘𑁆𑀘𑁄 𑀘 𑀢𑀤𑀼𑀩𑁆𑀩𑁂𑀥𑀫𑀕𑁆𑀕𑀘𑀸𑀭𑀻, 𑀲𑁄 𑀲𑀢𑀺 𑀲𑀫𑁆𑀪𑀯𑁂 𑀬𑀣𑀸 𑀬𑀼𑀕𑀦𑁆𑀥𑀭𑁂 𑀲𑁄𑀪𑁂𑀬𑁆𑀬, 𑀏𑀯𑀁 𑀲𑁄𑀪𑀫𑀸𑀦𑁄 𑀦𑀺𑀲𑀺𑀦𑁆𑀦𑁄𑀢𑀺 𑀅𑀢𑁆𑀣𑁄.

𑁪-𑁫. 𑀇𑀤𑀸𑀦𑀺 𑀧𑀼𑀕𑁆𑀕𑀮𑁂 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑁂 𑀅𑀧𑀤𑀺𑀲𑀦𑁆𑀢𑁄 ‘‘𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀳𑀻’’𑀢𑀺𑀆𑀤𑀺𑀫𑀸𑀳. 𑀲𑀩𑁆𑀩𑀲𑁄𑀢𑀺 𑀲𑀫𑀦𑁆𑀢𑀢𑁄 𑀆𑀕𑀫𑁆𑀫 𑀲𑀩𑁆𑀩𑁂𑀳𑀺 𑀤𑀺𑀲𑀸𑀪𑀸𑀕𑁂𑀳𑀺, 𑀲𑀦𑁆𑀦𑀺𑀯𑁂𑀲𑀯𑀲𑁂𑀦 𑀯𑀸 𑀲𑀫𑀦𑁆𑀢𑀢𑁄 𑀲𑀦𑁆𑀦𑀺𑀯𑀺𑀝𑁆𑀞𑁂𑀳𑀺 𑀤𑀲𑀳𑀺 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀦 𑀲𑀩𑁆𑀩𑀲𑁄 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀳𑀺 𑀤𑀲𑀳𑀺 𑀤𑀲𑀳𑀻𑀢𑀺. 𑀏𑀯𑀁 𑀲𑀢𑀺 𑀘𑀢𑁆𑀢𑀸𑀮𑀻𑀲𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀳𑀺 𑀅𑀥𑀺𑀓𑁂𑀳𑀺 𑀯𑀸 𑀆𑀕𑀫𑀦𑀁 𑀯𑀼𑀢𑁆𑀢𑀁 𑀲𑀺𑀬𑀸, 𑀦 𑀘𑁂𑀢𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺. 𑀲𑀫𑀦𑁆𑀢𑀢𑁄 𑀲𑀦𑁆𑀦𑀺𑀲𑀺𑀦𑁆𑀦𑁂𑀦𑀸𑀢𑀺 𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀲𑀫𑀁, 𑀲𑀫𑁆𑀫𑀸 𑀯𑀸 𑀦𑀺𑀲𑀺𑀦𑁆𑀦𑁂𑀦 𑀲𑀦𑁆𑀦𑀺𑀲𑀺𑀦𑁆𑀦𑁂𑀦, 𑀅𑀜𑁆𑀜𑀫𑀜𑁆𑀜𑀁 𑀅𑀩𑁆𑀬𑀸𑀩𑀸𑀥𑁂𑀢𑁆𑀯𑀸 𑀪𑀕𑀯𑀢𑀺 𑀕𑀸𑀭𑀯𑀁 𑀓𑀢𑁆𑀯𑀸 𑀲𑁄𑀢𑀁 𑀑𑀤𑀳𑀺𑀢𑁆𑀯𑀸 𑀦𑀺𑀲𑀚𑁆𑀚𑀤𑁄𑀲𑁂 𑀯𑀚𑁆𑀚𑀺𑀢𑀩𑁆𑀩𑁂 𑀯𑀚𑁆𑀚𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀫𑀸𑀢𑀭𑀁 𑀧𑀫𑀼𑀔𑀁 𑀓𑀢𑁆𑀯𑀸 𑀲𑀦𑁆𑀦𑀺𑀲𑀺𑀦𑁆𑀦𑁂𑀦 𑀤𑁂𑀯𑀸𑀦𑀁 𑀕𑀡𑁂𑀦 𑀧𑀭𑀺𑀯𑀸𑀭𑀺𑀢𑁄𑀢𑀺 𑀯𑀸, 𑀫𑀸𑀢𑀭𑀁 𑀧𑀫𑀼𑀔𑀁 𑀓𑀢𑁆𑀯𑀸 𑀅𑀪𑀺𑀥𑀫𑁆𑀫𑀓𑀣𑀸𑀫𑀕𑁆𑀕𑀁 𑀲𑀫𑁆𑀧𑀯𑀢𑁆𑀢𑀬𑀻𑀢𑀺 𑀯𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀇𑀤𑀸𑀦𑀺 𑀤𑁂𑀲𑀦𑀸𑀬 𑀲𑀫𑀼𑀝𑁆𑀞𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀲𑁆𑀲𑀸 𑀧𑀜𑁆𑀜𑀸𑀬 𑀢𑁂𑀚𑀲𑀸’’𑀢𑀺 𑀆𑀳. 𑀬𑀸 𑀲𑀸 𑀆𑀤𑀺𑀫𑁆𑀳𑀺 𑀓𑀭𑀼𑀡𑀸𑀬 𑀉𑀧𑀫𑀺𑀢𑀸 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑀸𑀦𑀁 𑀬𑀣𑀸𑀲𑀪𑀸𑀯𑀚𑀸𑀦𑀦𑀲𑀫𑀢𑁆𑀣𑀸, 𑀢𑁂𑀲𑀁 𑀤𑁂𑀲𑁂𑀢𑀩𑁆𑀩𑀧𑁆𑀧𑀓𑀸𑀭𑀚𑀸𑀦𑀦𑀲𑀫𑀢𑁆𑀣𑀸, 𑀩𑁄𑀥𑁂𑀢𑀩𑁆𑀩𑀧𑀼𑀕𑁆𑀕𑀮𑀸𑀦𑀁 𑀆𑀲𑀬𑀸𑀥𑀺𑀫𑀼𑀢𑁆𑀢𑀺𑀬𑀸𑀤𑀺𑀯𑀺𑀪𑀸𑀯𑀦𑀲𑀫𑀢𑁆𑀣𑀸 𑀘 𑀧𑀜𑁆𑀜𑀸, 𑀢𑀲𑁆𑀲𑀸 𑀘 𑀬𑀣𑀸𑀯𑀼𑀢𑁆𑀢𑀩𑀮𑀬𑁄𑀕𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯 𑀅𑀪𑀺𑀥𑀫𑁆𑀫𑀓𑀣𑀸𑀬 𑀲𑀫𑀼𑀝𑁆𑀞𑀸𑀦𑀪𑀸𑀯𑁂 𑀲𑀫𑀢𑁆𑀣𑀁, 𑀦𑀸𑀜𑁆𑀜𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀦𑁆𑀢𑁄 𑀅𑀪𑀺𑀥𑀫𑁆𑀫𑀓𑀣𑀸𑀬 𑀅𑀲𑀸𑀥𑀸𑀭𑀡𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀫𑀕𑁆𑀕𑁄𑀢𑀺 𑀉𑀧𑀸𑀬𑁄. 𑀔𑀦𑁆𑀥𑀸𑀬𑀢𑀦𑀸𑀤𑀻𑀦𑀁 𑀓𑀼𑀲𑀮𑀸𑀤𑀻𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀯𑀩𑁄𑀥𑀲𑁆𑀲, 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀲𑁆𑀲𑁂𑀯 𑀯𑀸 𑀉𑀧𑀸𑀬𑀪𑀸𑀯𑀢𑁄 ‘‘𑀅𑀪𑀺𑀥𑀫𑁆𑀫𑀓𑀣𑀸𑀫𑀕𑁆𑀕𑁄’’𑀢𑀺 𑀯𑀼𑀢𑁆𑀢𑁄. 𑀧𑀩𑀦𑁆𑀥𑁄 𑀯𑀸 ‘‘𑀫𑀕𑁆𑀕𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀳𑀺 𑀤𑀻𑀖𑀢𑁆𑀢𑀸 𑀫𑀕𑁆𑀕𑁄 𑀯𑀺𑀬𑀸𑀢𑀺 𑀫𑀕𑁆𑀕𑁄, 𑀢𑀲𑁆𑀫𑀸 𑀅𑀪𑀺𑀥𑀫𑁆𑀫𑀓𑀣𑀸𑀧𑀩𑀦𑁆𑀥𑁄 ‘‘𑀅𑀪𑀺𑀥𑀫𑁆𑀫𑀓𑀣𑀸𑀫𑀕𑁆𑀕𑁄’’𑀢𑀺 𑀯𑀼𑀢𑁆𑀢𑁄. 𑀤𑁂𑀯𑀸𑀦𑀁 𑀕𑀡𑁂𑀦 𑀧𑀭𑀺𑀯𑀸𑀭𑀺𑀢𑁄𑀢𑀺 𑀯𑀢𑁆𑀯𑀸 𑀧𑀼𑀦 𑀤𑁂𑀯𑀸𑀦𑀦𑁆𑀢𑀺 𑀯𑀘𑀦𑀁 𑀢𑁂𑀲𑀁 𑀕𑀳𑀡𑀲𑀫𑀢𑁆𑀣𑀢𑀁 𑀤𑀻𑀧𑁂𑀢𑀺. 𑀦 𑀳𑀺 𑀅𑀲𑀫𑀢𑁆𑀣𑀸𑀦𑀁 𑀪𑀕𑀯𑀸 𑀤𑁂𑀲𑁂𑀢𑀻𑀢𑀺.

𑁬. 𑀏𑀯𑀁 𑀓𑀭𑀼𑀡𑀸𑀧𑀜𑁆𑀜𑀸𑀫𑀼𑀔𑁂𑀳𑀺 𑀕𑀼𑀡𑁂𑀳𑀺 𑀪𑀕𑀯𑀢𑁄 𑀅𑀪𑀺𑀥𑀫𑁆𑀫𑀓𑀣𑀸𑀫𑀕𑁆𑀕𑀧𑁆𑀧𑀯𑀢𑁆𑀢𑀦𑁂𑀦 𑀘 𑀳𑀺𑀢𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀧𑀭𑀫𑀧𑀡𑀸𑀫𑀸𑀭𑀳𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀥𑀺𑀧𑁆𑀧𑁂𑀢𑀁 𑀧𑀡𑀸𑀫𑀁 𑀓𑀭𑁄𑀦𑁆𑀢𑁄 𑀆𑀳 ‘‘𑀢𑀲𑁆𑀲 𑀧𑀸𑀤𑁂 𑀦𑀫𑀲𑁆𑀲𑀺𑀢𑁆𑀯𑀸’’𑀢𑀺. 𑀪𑀕𑀯𑀢𑁄 𑀣𑁄𑀫𑀦𑁂𑀦𑁂𑀯 𑀘 𑀥𑀫𑁆𑀫𑀲𑁆𑀲 𑀲𑁆𑀯𑀸𑀓𑁆𑀔𑀸𑀢𑀢𑀸 𑀲𑀗𑁆𑀖𑀲𑁆𑀲 𑀘 𑀲𑀼𑀧𑁆𑀧𑀝𑀺𑀧𑀦𑁆𑀦𑀢𑀸 𑀤𑀲𑁆𑀲𑀺𑀢𑀸 𑀳𑁄𑀢𑀺 𑀢𑀧𑁆𑀧𑀪𑀯𑀲𑁆𑀲 𑀅𑀦𑀜𑁆𑀜𑀣𑀸𑀪𑀸𑀯𑀢𑁄, 𑀢𑀲𑁆𑀫𑀸 𑀧𑀡𑀸𑀫𑀸𑀭𑀳𑀁 𑀢𑀜𑁆𑀘 𑀭𑀢𑀦𑀤𑁆𑀯𑀬𑀁 𑀧𑀡𑀫𑀦𑁆𑀢𑁄 ‘‘𑀲𑀤𑁆𑀥𑀫𑁆𑀫𑀜𑁆𑀘𑀲𑁆𑀲…𑀧𑁂… 𑀘𑀜𑁆𑀚𑀮𑀺’’𑀦𑁆𑀢𑀺 𑀆𑀳. 𑀢𑀢𑁆𑀣 𑀬𑀲𑁆𑀫𑀸 𑀩𑀼𑀤𑁆𑀥𑁄 ‘‘𑀲𑀤𑁂𑀯𑀓𑁂 𑀮𑁄𑀓𑁂 𑀢𑀣𑀸𑀕𑀢𑁄 𑀯𑀦𑁆𑀤𑀦𑀻𑀬𑁄’’𑀢𑀺, 𑀲𑀗𑁆𑀖𑁄 𑀘 ‘‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄…𑀧𑁂… 𑀅𑀜𑁆𑀚𑀮𑀺𑀓𑀭𑀡𑀻𑀬𑁄’’𑀢𑀺 (𑀅. 𑀦𑀺. 𑁬.𑁧𑁦) 𑀯𑀼𑀢𑁆𑀢𑁄, 𑀢𑀲𑁆𑀫𑀸 ‘‘𑀢𑀲𑁆𑀲 𑀧𑀸𑀤𑁂 𑀦𑀫𑀲𑁆𑀲𑀺𑀢𑁆𑀯𑀸, 𑀓𑀢𑁆𑀯𑀸 𑀲𑀗𑁆𑀖𑀲𑁆𑀲 𑀘𑀜𑁆𑀚𑀮𑀺’’𑀦𑁆𑀢𑀺 𑀯𑀼𑀢𑁆𑀢𑀁. 𑀥𑀫𑁆𑀫𑁄 𑀧𑀦 𑀲𑁆𑀯𑀸𑀓𑁆𑀔𑀸𑀢𑀢𑀸𑀤𑀺𑀕𑀼𑀡𑀬𑀼𑀢𑁆𑀢𑁄 𑀢𑀣𑀸𑀦𑀼𑀲𑁆𑀲𑀭𑀡𑁂𑀦 𑀧𑀽𑀚𑁂𑀢𑀩𑁆𑀩𑁄 𑀳𑁄𑀢𑀺 ‘‘𑀢𑀫𑁂𑀯 𑀥𑀫𑁆𑀫𑀁 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺 (𑀲𑀁. 𑀦𑀺. 𑁧.𑁧𑁭𑁩; 𑀅. 𑀦𑀺. 𑁪.𑁨𑁧) 𑀯𑀘𑀦𑀢𑁄, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀲𑀩𑁆𑀩𑀣𑀸 𑀧𑀽𑀚𑁂𑀢𑀩𑁆𑀩𑁄, 𑀢𑀲𑁆𑀫𑀸 ‘‘𑀲𑀤𑁆𑀥𑀫𑁆𑀫𑀜𑁆𑀘𑀲𑁆𑀲 𑀧𑀽𑀚𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀲𑀺𑀭𑀻𑀫𑀢𑁄𑀢𑀺 𑀏𑀢𑁆𑀣 𑀲𑀺𑀭𑀻𑀢𑀺 𑀧𑀜𑁆𑀜𑀸𑀧𑀼𑀜𑁆𑀜𑀸𑀦𑀁 𑀅𑀥𑀺𑀯𑀘𑀦𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀣 𑀯𑀸 𑀧𑀼𑀜𑁆𑀜𑀦𑀺𑀩𑁆𑀩𑀢𑁆𑀢𑀸 𑀲𑀭𑀻𑀭𑀲𑁄𑀪𑀕𑁆𑀕𑀸𑀤𑀺𑀲𑀫𑁆𑀧𑀢𑁆𑀢𑀺 𑀓𑀢𑀧𑀼𑀜𑁆𑀜𑁂 𑀦𑀺𑀲𑁆𑀲𑀬𑀢𑀺, 𑀓𑀢𑀧𑀼𑀜𑁆𑀜𑁂𑀳𑀺 𑀯𑀸 𑀦𑀺𑀲𑁆𑀲𑀻𑀬𑀢𑀻𑀢𑀺 ‘‘𑀲𑀺𑀭𑀻’’𑀢𑀺 𑀯𑀼𑀘𑁆𑀘𑀢𑀺, 𑀲𑀸 𑀘 𑀅𑀢𑀺𑀲𑀬𑀯𑀢𑀻 𑀪𑀕𑀯𑀢𑁄 𑀅𑀢𑁆𑀣𑀻𑀢𑀺 𑀲𑀺𑀭𑀻𑀫𑀸, 𑀪𑀕𑀯𑀸, 𑀢𑀲𑁆𑀲 𑀲𑀺𑀭𑀻𑀫𑀢𑁄.

𑁭. 𑀦𑀺𑀧𑀘𑁆𑀘𑀓𑀸𑀭𑀲𑁆𑀲𑀸𑀢𑀺 𑀧𑀡𑀸𑀫𑀓𑀺𑀭𑀺𑀬𑀸𑀬. 𑀆𑀦𑀼𑀪𑀸𑀯𑁂𑀦𑀸𑀢𑀺 𑀩𑀮𑁂𑀦. 𑀲𑁄𑀲𑁂𑀢𑁆𑀯𑀸𑀢𑀺 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀅𑀦𑁆𑀢𑀭𑀥𑀸𑀧𑁂𑀢𑁆𑀯𑀸 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑁆𑀢𑀭𑀸𑀬𑁂𑀢𑀺 𑀅𑀢𑁆𑀣𑀧𑁆𑀧𑀓𑀸𑀲𑀦𑀲𑁆𑀲 𑀉𑀧𑀖𑀸𑀢𑀓𑁂. 𑀅𑀲𑁂𑀲𑀢𑁄𑀢𑀺 𑀦𑀺𑀲𑁆𑀲𑁂𑀲𑁂 𑀲𑀓𑀮𑁂.

𑁮. 𑀇𑀤𑀸𑀦𑀺 𑀅𑀪𑀺𑀥𑀫𑁆𑀫𑀲𑁆𑀲 𑀕𑀫𑁆𑀪𑀻𑀭𑀢𑁆𑀣𑀢𑁆𑀢𑀸 𑀅𑀢𑁆𑀣𑀧𑁆𑀧𑀓𑀸𑀲𑀦𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀁 𑀤𑀻𑀧𑁂𑀢𑀼𑀁 ‘‘𑀯𑀺𑀲𑀼𑀤𑁆𑀥𑀸𑀘𑀸𑀭𑀲𑀻𑀮𑁂𑀦𑀸’’𑀢𑀺𑀆𑀤𑀺𑀦𑀸 𑀅𑀪𑀺𑀬𑀸𑀘𑀦𑀁 𑀤𑀲𑁆𑀲𑁂𑀢𑀺. 𑀣𑀼𑀮𑁆𑀮𑀘𑁆𑀘𑀬𑀸𑀤𑀺𑀯𑀺𑀲𑀼𑀤𑁆𑀥𑀺𑀬𑀸 𑀯𑀺𑀲𑀼𑀤𑁆𑀥𑀸𑀘𑀸𑀭𑁄, 𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀯𑀺𑀲𑀼𑀤𑁆𑀥𑀺𑀬𑀸 𑀯𑀺𑀲𑀼𑀤𑁆𑀥𑀲𑀻𑀮𑁄. 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀬𑀸 𑀯𑀸 𑀯𑀺𑀲𑀼𑀤𑁆𑀥𑀸𑀘𑀸𑀭𑀲𑀻𑀮𑁄, 𑀢𑁂𑀦. 𑀲𑀓𑁆𑀓𑀘𑁆𑀘𑀦𑁆𑀢𑀺 𑀘𑀺𑀢𑁆𑀢𑀺𑀁 𑀓𑀢𑁆𑀯𑀸. 𑀅𑀪𑀺𑀬𑀸𑀘𑀺𑀢𑁄𑀢𑀺 𑀅𑀪𑀺𑀫𑀼𑀔𑀁 𑀬𑀸𑀘𑀺𑀢𑁄. 𑀢𑁂𑀦 𑀅𑀦𑀸𑀤𑀭𑀺𑀬𑀁 𑀅𑀢𑁆𑀣𑀧𑁆𑀧𑀓𑀸𑀲𑀦𑁂 𑀓𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀤𑀲𑁆𑀲𑁂𑀢𑀺.

𑁯. 𑀇𑀤𑀸𑀦𑀺 𑀬𑀲𑁆𑀲 𑀅𑀢𑁆𑀣𑀁 𑀧𑀓𑀸𑀲𑁂𑀢𑀼𑀓𑀸𑀫𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀤𑁂𑀯𑀤𑁂𑀯𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀦𑁆𑀢𑀺 𑀅𑀪𑀺𑀥𑀫𑁆𑀫𑀁. 𑀤𑁂𑀯𑀤𑁂𑀯𑁄𑀢𑀺 𑀯𑀺𑀲𑀼𑀤𑁆𑀥𑀺𑀲𑀫𑁆𑀫𑀼𑀢𑀺𑀉𑀧𑀧𑀢𑁆𑀢𑀺𑀤𑁂𑀯𑀸𑀦𑀁 𑀤𑁂𑀯𑁄. 𑀮𑁄𑀓𑁂 𑀳𑀺 𑀬𑁂 ‘‘𑀲𑀭𑀡𑀁 𑀧𑀭𑀸𑀬𑀡’’𑀦𑁆𑀢𑀺 𑀕𑀦𑁆𑀢𑀩𑁆𑀩𑀸 𑀕𑀢𑀺𑀪𑀽𑀢𑀸, 𑀢𑁂 ‘‘𑀤𑁂𑀯𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀪𑀕𑀯𑀸 𑀘 𑀲𑀩𑁆𑀩𑀤𑁂𑀯𑀸𑀦𑀁 𑀕𑀢𑀺𑀪𑀽𑀢𑁄𑀢𑀺. 𑀦𑀬𑀢𑁄𑀢𑀺 𑀲𑀗𑁆𑀔𑁂𑀧𑀢𑁄. 𑀲𑀫𑀸𑀘𑀺𑀓𑁆𑀔𑀻𑀢𑀺 𑀲𑀫𑁆𑀫𑀸 𑀆𑀘𑀺𑀓𑁆𑀔𑀺 𑀬𑀣𑀸 𑀣𑁂𑀭𑁄 𑀩𑀼𑀚𑁆𑀛𑀢𑀺. 𑀯𑁂𑀦𑁂𑀬𑁆𑀬𑀲𑀢𑁆𑀢𑁂 𑀯𑀺𑀦𑁂𑀢𑀻𑀢𑀺 𑀯𑀺𑀦𑀸𑀬𑀓𑁄, 𑀦𑀸𑀬𑀓𑀯𑀺𑀭𑀳𑀺𑀢𑁄 𑀯𑀸, 𑀲𑀬𑀫𑁆𑀪𑀽𑀢𑀺 𑀅𑀢𑁆𑀣𑁄.

𑁧𑁦-𑁧𑁨. 𑀬𑀜𑁆𑀘𑀸𑀢𑀺 𑀬𑀜𑁆𑀘 𑀅𑀪𑀺𑀥𑀫𑁆𑀫𑀁 𑀪𑀺𑀓𑁆𑀔𑀽𑀦𑀁 𑀧𑀬𑀺𑀭𑀼𑀤𑀸𑀳𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀬𑀺𑀭𑀼𑀤𑀸𑀳𑀸𑀲𑀻𑀢𑀺 𑀓𑀣𑁂𑀲𑀺. 𑀇𑀢𑀻𑀢𑀺 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦. ‘‘𑀬𑁄 𑀥𑀸𑀭𑀺𑀢𑁄’’𑀢𑀺 𑀬𑀦𑁆𑀢𑀺 𑀉𑀧𑀬𑁄𑀕𑀯𑀲𑁂𑀦 𑀯𑀼𑀢𑁆𑀢𑁄 𑀬𑀁-𑀲𑀤𑁆𑀤𑁄 𑀥𑀸𑀭𑀺𑀢𑁄𑀢𑀺 𑀧𑀘𑁆𑀘𑀢𑁆𑀢𑁂𑀦 𑀲𑀫𑁆𑀩𑀚𑁆𑀛𑀫𑀸𑀦𑁄 𑀧𑀘𑁆𑀘𑀢𑁆𑀢𑀯𑀲𑁂𑀦 𑀧𑀭𑀺𑀡𑀫𑀢𑀺, 𑀢𑀲𑁆𑀫𑀸 𑀬𑁄 𑀥𑀸𑀭𑀺𑀢𑁄, 𑀬𑁄 𑀘 𑀲𑀗𑁆𑀕𑀻𑀢𑁄, 𑀢𑀲𑁆𑀲 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀯𑁂𑀤𑁂𑀦 𑀧𑀜𑁆𑀜𑀸𑀬 𑀈𑀳𑀢𑀺 𑀧𑀯𑀢𑁆𑀢𑀢𑀻𑀢𑀺 𑀯𑁂𑀤𑁂𑀳𑁄, 𑀢𑁂𑀦 𑀫𑀼𑀦𑀺𑀦𑀸. 𑀅𑀪𑀺𑀡𑁆𑀳𑀲𑁄𑀢𑀺 𑀩𑀳𑀼𑀲𑁄. 𑀅𑀪𑀺𑀥𑀫𑁆𑀫𑀲𑁆𑀲𑀸𑀢𑀺 𑀏𑀢𑀁 ‘‘𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺 𑀏𑀢𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀇𑀤𑀸𑀦𑀺 𑀬𑁄 𑀅𑀢𑁆𑀣𑀧𑁆𑀧𑀓𑀸𑀲𑀦𑀲𑁆𑀲 𑀦𑀺𑀲𑁆𑀲𑀬𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀆𑀤𑀺𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀤𑀺𑀢𑁄𑀢𑀺 𑀆𑀤𑀺𑀫𑁆𑀳𑀺 𑀧𑀞𑀫𑀲𑀗𑁆𑀕𑀻𑀢𑀺𑀬𑀁.

𑁧𑁩. 𑀬𑀸 𑀅𑀝𑁆𑀞𑀓𑀣𑀸 𑀲𑀗𑁆𑀕𑀻𑀢𑀸, 𑀓𑀲𑁆𑀲 𑀧𑀦 𑀲𑀸 𑀅𑀝𑁆𑀞𑀓𑀣𑀸𑀢𑀺? 𑀅𑀜𑁆𑀜𑀲𑁆𑀲 𑀯𑀼𑀢𑁆𑀢𑀲𑁆𑀲 𑀅𑀪𑀸𑀯𑀸 ‘‘𑀬𑀲𑁆𑀲 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀁, 𑀅𑀥𑀺𑀓𑀸𑀭𑀯𑀲𑁂𑀦 ‘‘𑀢𑀲𑁆𑀲 𑀅𑀪𑀺𑀥𑀫𑁆𑀫𑀲𑁆𑀲𑀸’’𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀲𑀗𑁆𑀕𑀻𑀢𑀸𑀢𑀺 𑀅𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂 ‘‘𑀅𑀬𑀁 𑀏𑀢𑀲𑁆𑀲 𑀅𑀢𑁆𑀣𑁄, 𑀅𑀬𑀁 𑀏𑀢𑀲𑁆𑀲 𑀅𑀢𑁆𑀣𑁄’’𑀢𑀺 𑀲𑀗𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀸, 𑀧𑀘𑁆𑀙𑀸𑀧𑀺 𑀘 𑀤𑀼𑀢𑀺𑀬𑀢𑀢𑀺𑀬𑀲𑀗𑁆𑀕𑀻𑀢𑀻𑀲𑀼 𑀅𑀦𑀼𑀲𑀗𑁆𑀕𑀻𑀢𑀸.

𑁧𑁪-𑁧𑁬. 𑀅𑀪𑀺𑀲𑀗𑁆𑀔𑀢𑀸𑀢𑀺 𑀭𑀘𑀺𑀢𑀸. 𑀢𑀢𑁄𑀢𑀺 𑀅𑀝𑁆𑀞𑀓𑀣𑀸𑀢𑁄. 𑀢𑀦𑁆𑀢𑀺𑀦𑀬𑀸𑀦𑀼𑀕𑀦𑁆𑀢𑀺 𑀢𑀦𑁆𑀢𑀺𑀕𑀢𑀺𑀁 𑀅𑀦𑀼𑀕𑀢𑀁. 𑀪𑀸𑀲𑀦𑁆𑀢𑀺 𑀫𑀸𑀕𑀥𑀪𑀸𑀲𑀁. 𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀻𑀳𑀻𑀢𑀺 𑀅𑀦𑁆𑀢𑀭𑀦𑁆𑀢𑀭𑀸 𑀅𑀦𑀼𑀧𑁆𑀧𑀯𑁂𑀲𑀺𑀢𑀸𑀳𑀺. 𑀅𑀲𑀫𑁆𑀫𑀺𑀲𑁆𑀲𑀦𑁆𑀢𑀺 𑀅𑀯𑁄𑀓𑀺𑀡𑁆𑀡𑀁. 𑀅𑀦𑀸𑀓𑀼𑀮𑀦𑁆𑀢𑀺 𑀲𑀦𑀺𑀓𑀸𑀬𑁂𑀧𑀺 𑀅𑀦𑀸𑀯𑀺𑀮𑀁 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀅𑀲𑀫𑁆𑀫𑀺𑀲𑁆𑀲𑁄 𑀅𑀦𑀸𑀓𑀼𑀮𑁄 𑀘 𑀬𑁄 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄, 𑀢𑀁 𑀤𑀻𑀧𑀬𑀦𑁆𑀢𑁄 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻𑀢𑀺. 𑀏𑀢𑁂𑀦 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑀸𑀤𑀻𑀳𑀺 𑀯𑀼𑀢𑁆𑀢𑁄 𑀣𑁂𑀭𑀯𑀸𑀤𑁄𑀧𑀺 𑀲𑀗𑁆𑀕𑀳𑀺𑀢𑁄 𑀳𑁄𑀢𑀺. 𑀅𑀣 𑀯𑀸 𑀢𑀫𑁆𑀩𑀧𑀡𑁆𑀡𑀺𑀪𑀸𑀲𑀁 𑀅𑀧𑀦𑁂𑀢𑁆𑀯𑀸 𑀫𑀸𑀕𑀥𑀪𑀸𑀲𑀜𑁆𑀘 𑀆𑀭𑁄𑀧𑁂𑀢𑁆𑀯𑀸 𑀧𑀓𑀸𑀲𑀺𑀬𑀫𑀸𑀦𑁄 𑀬𑁄 𑀅𑀪𑀺𑀥𑀫𑁆𑀫𑀲𑁆𑀲 𑀅𑀢𑁆𑀣𑁄 𑀅𑀲𑀫𑁆𑀫𑀺𑀲𑁆𑀲𑁄 𑀅𑀦𑀸𑀓𑀼𑀮𑁄𑀬𑁂𑀯 𑀘 𑀳𑁄𑀢𑀺 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀜𑁆𑀘 𑀯𑀺𑀦𑀺𑀘𑁆𑀙𑀬𑀪𑀽𑀢𑁄, 𑀢𑀁 𑀅𑀢𑁆𑀣𑀁 ‘‘𑀏𑀲𑁄 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀯𑀺𑀦𑀺𑀘𑁆𑀙𑀬𑁄’’𑀢𑀺 𑀤𑀻𑀧𑀬𑀦𑁆𑀢𑁄 𑀧𑀓𑀸𑀲𑀬𑀺𑀲𑁆𑀲𑀸𑀫𑀺. 𑀢𑀧𑁆𑀧𑀓𑀸𑀲𑀦𑁂𑀦𑁂𑀯 𑀳𑀺 𑀲𑁄 𑀢𑀣𑀸 𑀤𑀻𑀧𑀺𑀢𑁄 𑀳𑁄𑀢𑀻𑀢𑀺.

𑁧𑁭. 𑀢𑁄𑀲𑀬𑀦𑁆𑀢𑁄 𑀯𑀺𑀘𑀓𑁆𑀔𑀡𑁂𑀢𑀺 𑀯𑀺𑀘𑀓𑁆𑀔𑀡𑁂 𑀢𑁄𑀲𑀬𑀦𑁆𑀢𑁄 𑀕𑀳𑁂𑀢𑀩𑁆𑀩𑀁 𑀕𑀳𑁂𑀢𑁆𑀯𑀸𑀦𑀸𑀢𑀺 𑀏𑀯𑀁 𑀬𑁄𑀚𑁂𑀢𑁆𑀯𑀸 ‘‘𑀕𑀳𑁂𑀢𑀩𑁆𑀩𑀝𑁆𑀞𑀸𑀦𑁂𑀬𑁂𑀯 𑀕𑀳𑀺𑀢𑀁 𑀲𑀼𑀝𑁆𑀞𑀼 𑀓𑀢’’𑀦𑁆𑀢𑀺 𑀏𑀯𑀁 𑀢𑁄𑀲𑀬𑀦𑁆𑀢𑁄𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀏𑀯𑀁 𑀲𑀢𑀺 𑀕𑀳𑁂𑀢𑀩𑁆𑀩𑀕𑁆𑀕𑀳𑀡𑁂𑀦𑁂𑀯 𑀢𑁄𑀲𑀦𑀁 𑀓𑀢𑀁, 𑀦 𑀅𑀜𑁆𑀜𑁂𑀦 𑀅𑀢𑁆𑀣𑀧𑁆𑀧𑀓𑀸𑀲𑀦𑁂𑀦𑀸𑀢𑀺 𑀏𑀢𑀁 𑀆𑀧𑀚𑁆𑀚𑁂𑀬𑁆𑀬. 𑀢𑁄𑀲𑀬𑀦𑁆𑀢𑁄 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀧𑀦 𑀬𑁄𑀚𑀦𑀸𑀬 𑀲𑀢𑀺 𑀕𑀳𑁂𑀢𑀩𑁆𑀩𑀕𑁆𑀕𑀳𑀡𑀁 𑀅𑀜𑁆𑀜𑀜𑁆𑀘 𑀲𑀩𑁆𑀩𑀁 𑀅𑀢𑁆𑀣𑀧𑁆𑀧𑀓𑀸𑀲𑀦𑀁 𑀳𑁄𑀢𑀻𑀢𑀺 𑀲𑀩𑁆𑀩𑁂𑀦 𑀢𑁂𑀦 𑀢𑁄𑀲𑀦𑀁 𑀓𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀢𑁄𑀲𑀬𑀦𑁆𑀢𑁄 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻𑀢𑀺 𑀬𑀼𑀢𑁆𑀢𑀭𑀽𑀧𑀸.

𑁧𑁮-𑁨𑁦. 𑀇𑀤𑀸𑀦𑀺 𑀬𑀁 𑀅𑀢𑁆𑀣𑀧𑁆𑀧𑀓𑀸𑀲𑀦𑀁 𑀓𑀢𑁆𑀢𑀼𑀓𑀸𑀫𑁄, 𑀢𑀲𑁆𑀲 𑀫𑀳𑀢𑁆𑀢𑀁 𑀧𑀭𑀺𑀳𑀭𑀺𑀢𑀼𑀁 ‘‘𑀓𑀫𑁆𑀫𑀝𑁆𑀞𑀸𑀦𑀸𑀦𑀻’’𑀢𑀺𑀆𑀤𑀺𑀫𑀸𑀳. 𑀅𑀢𑁆𑀣𑀯𑀡𑁆𑀡𑀦𑀦𑁆𑀢𑀺 𑀏𑀢𑁆𑀣 𑀯𑀡𑁆𑀡𑀦𑀸 𑀦𑀸𑀫 𑀯𑀺𑀯𑀭𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀯𑀘𑀦𑀁. 𑀇𑀢𑀻𑀢𑀺 ‘‘𑀅𑀧𑀦𑁂𑀢𑁆𑀯𑀸 𑀢𑀢𑁄 𑀪𑀸𑀲’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀬𑀣𑀸𑀤𑀲𑁆𑀲𑀺𑀢𑀧𑁆𑀧𑀓𑀸𑀭𑁂𑀦. 𑀇𑀢𑀺 𑀲𑁄𑀢𑀽𑀦𑀁 𑀉𑀲𑁆𑀲𑀸𑀳𑀼𑀧𑁆𑀧𑀸𑀤𑀦𑀲𑁆𑀲 𑀳𑁂𑀢𑀼𑀁 𑀤𑀲𑁆𑀲𑁂𑀢𑀺. 𑀅𑀪𑀺𑀥𑀫𑁆𑀫𑀓𑀣𑀦𑁆𑀢𑀺 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀁. 𑀦𑀺𑀲𑀸𑀫𑁂𑀣𑀸𑀢𑀺 𑀲𑀼𑀡𑀸𑀣. 𑀇𑀤𑀸𑀦𑀺 𑀅𑀯𑀲𑁆𑀲𑀁 𑀅𑀬𑀁 𑀲𑁄𑀢𑀩𑁆𑀩𑀸𑀬𑁂𑀯𑀸𑀢𑀺 𑀤𑀴𑁆𑀳𑀁 𑀉𑀲𑁆𑀲𑀸𑀳𑁂𑀦𑁆𑀢𑁄 𑀆𑀳 ‘‘𑀤𑀼𑀮𑁆𑀮𑀪𑀸 𑀳𑀺 𑀅𑀬𑀁 𑀓𑀣𑀸’’𑀢𑀺.

𑀯𑀻𑀲𑀢𑀺𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸

𑀅𑀝𑁆𑀞𑀲𑀸𑀮𑀺𑀦𑀺𑀁 𑀢𑀸𑀯 𑀯𑀡𑁆𑀡𑁂𑀦𑁆𑀢𑁂𑀳𑀺 𑀆𑀘𑀭𑀺𑀬𑁂𑀳𑀺 𑀢𑀲𑁆𑀲𑀸 𑀲𑀦𑁆𑀦𑀺𑀯𑁂𑀲𑁄 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀢𑀲𑁆𑀫𑀸 𑀇𑀤𑀁 𑀯𑀼𑀘𑁆𑀘𑀢𑀺 𑁋

‘‘𑀯𑀘𑀦𑀢𑁆𑀣𑁄 𑀧𑀭𑀺𑀘𑁆𑀙𑁂𑀤𑁄, 𑀲𑀦𑁆𑀦𑀺𑀯𑁂𑀲𑁄 𑀘 𑀧𑀸𑀴𑀺𑀬𑀸;

𑀲𑀸𑀕𑀭𑁂𑀳𑀺 𑀢𑀣𑀸 𑀘𑀺𑀦𑁆𑀢𑀸, 𑀤𑁂𑀲𑀦𑀸𑀳𑀺 𑀕𑀫𑁆𑀪𑀻𑀭𑀢𑀸.

‘‘𑀤𑁂𑀲𑀦𑀸𑀬 𑀲𑀭𑀻𑀭𑀲𑁆𑀲, 𑀧𑀯𑀢𑁆𑀢𑀺𑀕𑁆𑀕𑀳𑀡𑀁 𑀢𑀣𑀸;

𑀣𑁂𑀭𑀲𑁆𑀲 𑀯𑀸𑀘𑀦𑀸𑀫𑀕𑁆𑀕-𑀢𑀧𑁆𑀧𑀪𑀸𑀯𑀺𑀢𑀢𑀸𑀧𑀺 𑀘.

‘‘𑀧𑀝𑀺𑀯𑁂𑀥𑀸 𑀢𑀣𑀸 𑀩𑀼𑀤𑁆𑀥-𑀯𑀘𑀦𑀸𑀤𑀻𑀳𑀺 𑀆𑀤𑀺𑀢𑁄;

𑀆𑀪𑀺𑀥𑀫𑁆𑀫𑀺𑀓𑀪𑀸𑀯𑀲𑁆𑀲, 𑀲𑀸𑀥𑀦𑀁 𑀲𑀩𑁆𑀩𑀤𑀲𑁆𑀲𑀺𑀦𑁄.

‘‘𑀯𑀺𑀦𑀬𑁂𑀦𑀸𑀣 𑀕𑁄𑀲𑀺𑀗𑁆𑀕-𑀲𑀼𑀢𑁆𑀢𑁂𑀦 𑀘 𑀫𑀳𑁂𑀲𑀺𑀦𑀸;

𑀪𑀸𑀲𑀺𑀢𑀢𑁆𑀢𑀲𑁆𑀲 𑀲𑀁𑀲𑀺𑀤𑁆𑀥𑀺, 𑀦𑀺𑀤𑀸𑀦𑁂𑀦 𑀘 𑀤𑀻𑀧𑀺𑀢𑀸.

‘‘𑀧𑀓𑀸𑀲𑁂𑀢𑁆𑀯𑀸 𑀇𑀫𑀁 𑀲𑀩𑁆𑀩𑀁, 𑀧𑀝𑀺𑀜𑁆𑀜𑀸𑀢𑀓𑀣𑀸 𑀓𑀢𑀸;

𑀅𑀝𑁆𑀞𑀲𑀸𑀮𑀺𑀦𑀺𑀬𑀸 𑀏𑀢𑀁, 𑀲𑀦𑁆𑀦𑀺𑀯𑁂𑀲𑀁 𑀯𑀺𑀪𑀸𑀯𑀬𑁂’’𑀢𑀺.

𑀯𑀘𑀦𑀢𑁆𑀣𑀯𑀺𑀚𑀸𑀦𑀦𑁂𑀦 𑀯𑀺𑀤𑀺𑀢𑀸𑀪𑀺𑀥𑀫𑁆𑀫𑀲𑀸𑀫𑀜𑁆𑀜𑀢𑁆𑀣𑀲𑁆𑀲 𑀅𑀪𑀺𑀥𑀫𑁆𑀫𑀓𑀣𑀸 𑀯𑀼𑀘𑁆𑀘𑀫𑀸𑀦𑀸 𑀲𑁄𑀪𑁂𑀬𑁆𑀬𑀸𑀢𑀺 𑀅𑀪𑀺𑀥𑀫𑁆𑀫𑀧𑀭𑀺𑀚𑀸𑀦𑀦𑀫𑁂𑀯 𑀆𑀤𑀺𑀫𑁆𑀳𑀺 𑀬𑀼𑀢𑁆𑀢𑀭𑀽𑀧𑀦𑁆𑀢𑀺 𑀢𑀤𑀢𑁆𑀣𑀁 𑀧𑀼𑀘𑁆𑀙𑀢𑀺 ‘‘𑀢𑀢𑁆𑀣 𑀓𑁂𑀦𑀝𑁆𑀞𑁂𑀦 𑀅𑀪𑀺𑀥𑀫𑁆𑀫𑁄’’𑀢𑀺. 𑀢𑀢𑁆𑀣 𑀢𑀢𑁆𑀣𑀸𑀢𑀺 ‘‘𑀅𑀪𑀺𑀥𑀫𑁆𑀫𑀲𑁆𑀲 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺 𑀬𑀤𑀺𑀤𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀺𑀁. ‘‘𑀬𑀲𑁆𑀲 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀜𑁆𑀜𑀸𑀢𑀁, 𑀲𑁄 𑀅𑀪𑀺𑀥𑀫𑁆𑀫𑁄 𑀓𑁂𑀦𑀝𑁆𑀞𑁂𑀦 𑀅𑀪𑀺𑀥𑀫𑁆𑀫𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀯𑀸 ‘‘𑀅𑀪𑀺𑀥𑀫𑁆𑀫𑀓𑀣’’𑀦𑁆𑀢𑀺 𑀏𑀢𑀲𑁆𑀫𑀺𑀁 𑀯𑀘𑀦𑁂 𑀬𑁄 𑀅𑀪𑀺𑀥𑀫𑁆𑀫𑁄 𑀯𑀼𑀢𑁆𑀢𑁄, 𑀲𑁄 𑀓𑁂𑀦𑀝𑁆𑀞𑁂𑀦 𑀅𑀪𑀺𑀥𑀫𑁆𑀫𑁄𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀸𑀢𑀺𑀭𑁂𑀓𑀥𑀫𑁆𑀫𑀯𑀺𑀲𑁂𑀲𑀝𑁆𑀞𑁂𑀦𑀸𑀢𑀺 𑀏𑀢𑁆𑀣 𑀥𑀫𑁆𑀫𑁄 𑀅𑀢𑀺𑀭𑁂𑀓𑁄 𑀥𑀫𑁆𑀫𑀸𑀢𑀺𑀭𑁂𑀓𑁄, 𑀲𑀼𑀢𑁆𑀢𑀦𑁆𑀢𑀸𑀥𑀺𑀓𑀸 𑀧𑀸𑀴𑀻𑀢𑀺 𑀅𑀢𑁆𑀣𑁄. 𑀥𑀫𑁆𑀫𑁄 𑀯𑀺𑀲𑁂𑀲𑁄 𑀥𑀫𑁆𑀫𑀯𑀺𑀲𑁂𑀲𑁄 𑀥𑀫𑁆𑀫𑀸𑀢𑀺𑀲𑀬𑁄, 𑀯𑀺𑀘𑀺𑀢𑁆𑀢𑀸 𑀧𑀸𑀴𑀻𑀢𑀺 𑀅𑀢𑁆𑀣𑁄, 𑀥𑀫𑁆𑀫𑀸𑀢𑀺𑀭𑁂𑀓𑀥𑀫𑁆𑀫𑀯𑀺𑀲𑁂𑀲𑀸 𑀏𑀯 𑀅𑀢𑁆𑀣𑁄 𑀥𑀫𑁆𑀫𑀸𑀢𑀺𑀭𑁂𑀓𑀥𑀫𑁆𑀫𑀯𑀺𑀲𑁂𑀲𑀝𑁆𑀞𑁄. 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀢𑁆𑀣𑀸𑀦𑀁 𑀅𑀪𑀺𑀥𑀫𑁆𑀫𑀲𑀤𑁆𑀤𑀲𑁆𑀲 𑀅𑀢𑁆𑀣𑀪𑀸𑀯𑁂𑀦 𑀲𑀸𑀫𑀜𑁆𑀜𑀢𑁄 𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 ‘‘𑀅𑀪𑀺𑀓𑁆𑀓𑀫𑀦𑁆𑀢𑀺, 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀅𑀢𑀺𑀭𑁂𑀓𑀯𑀺𑀲𑁂𑀲𑀝𑁆𑀞𑀤𑀻𑀧𑀓𑁄 𑀅𑀪𑀺𑀲𑀤𑁆𑀤𑁄, 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀥𑀫𑁆𑀫𑀸𑀢𑀺𑀭𑁂𑀓𑀥𑀫𑁆𑀫𑀯𑀺𑀲𑁂𑀲𑀝𑁆𑀞𑁂𑀦 ‘‘𑀅𑀪𑀺𑀥𑀫𑁆𑀫𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀢𑁆𑀣 𑀲𑀺𑀬𑀸 𑁋 ‘‘𑀅𑀪𑀺𑀓𑁆𑀓𑀫𑀦𑁆𑀢𑀺, 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸’’𑀢𑀺 𑀏𑀢𑁆𑀣 𑀥𑀸𑀢𑀼𑀲𑀤𑁆𑀤𑀲𑁆𑀲 𑀧𑀼𑀭𑀢𑁄 𑀧𑀬𑀼𑀚𑁆𑀚𑀫𑀸𑀦𑁄 𑀅𑀪𑀺𑀲𑀤𑁆𑀤𑁄 𑀓𑀺𑀭𑀺𑀬𑀸𑀬 𑀅𑀢𑀺𑀭𑁂𑀓𑀯𑀺𑀲𑁂𑀲𑀪𑀸𑀯𑀤𑀻𑀧𑀓𑁄 𑀳𑁄𑀢𑀻𑀢𑀺 𑀬𑀼𑀢𑁆𑀢𑀁 𑀉𑀧𑀲𑀕𑁆𑀕𑀪𑀸𑀯𑀢𑁄, 𑀥𑀫𑁆𑀫𑀲𑀤𑁆𑀤𑁄 𑀧𑀦 𑀦 𑀥𑀸𑀢𑀼𑀲𑀤𑁆𑀤𑁄𑀢𑀺 𑀏𑀢𑀲𑁆𑀫𑀸 𑀧𑀼𑀭𑀢𑁄 𑀅𑀪𑀺𑀲𑀤𑁆𑀤𑁄 𑀧𑀬𑁄𑀕𑀫𑁂𑀯 𑀦𑀸𑀭𑀳𑀢𑀺. 𑀅𑀣𑀸𑀧𑀺 𑀧𑀬𑀼𑀚𑁆𑀚𑁂𑀬𑁆𑀬, 𑀓𑀺𑀭𑀺𑀬𑀸𑀯𑀺𑀲𑁂𑀲𑀓𑀸 𑀉𑀧𑀲𑀕𑁆𑀕𑀸, 𑀦 𑀘 𑀥𑀫𑁆𑀫𑁄 𑀓𑀺𑀭𑀺𑀬𑀸𑀢𑀺 𑀥𑀫𑁆𑀫𑀲𑁆𑀲 𑀅𑀢𑀺𑀭𑁂𑀓𑀯𑀺𑀲𑁂𑀲𑀪𑀸𑀯𑀤𑀻𑀧𑀦𑀁 𑀦 𑀬𑀼𑀢𑁆𑀢𑀦𑁆𑀢𑀺? 𑀦𑁄 𑀦 𑀬𑀼𑀢𑁆𑀢𑀁. 𑀅𑀜𑁆𑀜𑀲𑁆𑀲𑀧𑀺 𑀳𑀺 𑀉𑀧𑀲𑀕𑁆𑀕𑀲𑁆𑀲 𑀅𑀥𑀸𑀢𑀼𑀲𑀤𑁆𑀤𑀸 𑀧𑀼𑀭𑀢𑁄 𑀧𑀬𑀼𑀚𑁆𑀚𑀫𑀸𑀦𑀲𑁆𑀲 𑀅𑀓𑀺𑀭𑀺𑀬𑀸𑀬𑀧𑀺 𑀅𑀢𑀺𑀭𑁂𑀓𑀯𑀺𑀲𑁂𑀲𑀪𑀸𑀯𑀤𑀻𑀧𑀓𑀲𑁆𑀲 𑀤𑀲𑁆𑀲𑀦𑀢𑁄𑀢𑀺 𑀏𑀢𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 𑀅𑀢𑀺𑀙𑀢𑁆𑀢𑀸𑀤𑀺𑀉𑀤𑀸𑀳𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀣𑀸’’𑀢𑀺𑀆𑀤𑀺. 𑀏𑀯𑀫𑁂𑀯𑀸𑀢𑀺 𑀬𑀣𑀸 𑀙𑀢𑁆𑀢𑀸𑀢𑀺𑀭𑁂𑀓𑀙𑀢𑁆𑀢𑀯𑀺𑀲𑁂𑀲𑀸𑀤𑀺𑀅𑀢𑁆𑀣𑁂𑀦 𑀅𑀢𑀺𑀙𑀢𑁆𑀢𑀸𑀤𑀬𑁄 𑀳𑁄𑀦𑁆𑀢𑀺 𑀅𑀢𑀺𑀲𑀤𑁆𑀤𑀲𑁆𑀲 𑀉𑀧𑀲𑀕𑁆𑀕𑀲𑁆𑀲 𑀅𑀥𑀸𑀢𑀼𑀲𑀤𑁆𑀤𑀲𑁆𑀲𑀧𑀺 𑀧𑀼𑀭𑀢𑁄 𑀧𑀬𑀼𑀚𑁆𑀚𑀫𑀸𑀦𑀲𑁆𑀲 𑀅𑀓𑀺𑀭𑀺𑀬𑀸𑀬 𑀘 𑀢𑀩𑁆𑀪𑀸𑀯𑀤𑀻𑀧𑀓𑀢𑁆𑀢𑀸, 𑀏𑀯𑀫𑀬𑀫𑁆𑀧𑀺 𑀥𑀫𑁆𑀫𑁄 𑀥𑀫𑁆𑀫𑀸𑀢𑀺𑀭𑁂𑀓𑀥𑀫𑁆𑀫𑀯𑀺𑀲𑁂𑀲𑀝𑁆𑀞𑁂𑀦 ‘‘𑀅𑀪𑀺𑀥𑀫𑁆𑀫𑁄’’𑀢𑀺 𑀯𑀼𑀘𑁆𑀘𑀢𑀺 𑀅𑀪𑀺-𑀲𑀤𑁆𑀤𑀲𑁆𑀲 𑀉𑀧𑀲𑀕𑁆𑀕𑀲𑁆𑀲 𑀅𑀥𑀸𑀢𑀼𑀲𑀤𑁆𑀤𑀲𑁆𑀲𑀧𑀺 𑀧𑀼𑀭𑀢𑁄 𑀧𑀬𑀼𑀚𑁆𑀚𑀫𑀸𑀦𑀲𑁆𑀲 𑀅𑀓𑀺𑀭𑀺𑀬𑀸𑀬 𑀘 𑀢𑀩𑁆𑀪𑀸𑀯𑀤𑀻𑀧𑀓𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀓𑀤𑁂𑀲𑁂𑀦𑁂𑀯 𑀯𑀺𑀪𑀢𑁆𑀢𑀸𑀢𑀺 ‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀓𑁆𑀔𑀦𑁆𑀥𑀸? 𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀭𑀽𑀧𑀓𑁆𑀔𑀦𑁆𑀥𑁄? 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸…𑀧𑁂… 𑀲𑀦𑁆𑀢𑀺𑀓𑁂 𑀯𑀸, 𑀅𑀬𑀁 𑀯𑀼𑀘𑁆𑀘𑀢𑀺 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀏𑀯𑀫𑀸𑀤𑀺𑀦𑀸 (𑀲𑀁. 𑀦𑀺. 𑁩.𑁪𑁮; 𑀯𑀺𑀪. 𑁨) 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀫𑀢𑁆𑀢𑁂𑀦𑁂𑀯 𑀯𑀺𑀪𑀢𑁆𑀢𑀸, ‘‘𑀢𑀢𑁆𑀣 𑀓𑀢𑀫𑀁 𑀭𑀽𑀧𑀁 𑀅𑀢𑀻𑀢’’𑀦𑁆𑀢𑀺𑀏𑀯𑀫𑀸𑀤𑀺𑀦𑀸 (𑀯𑀺𑀪. 𑁩) 𑀧𑀝𑀺𑀦𑀺𑀤𑁆𑀤𑁂𑀲𑀲𑁆𑀲 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀲𑁆𑀲 𑀧𑀜𑁆𑀳𑀧𑀼𑀘𑁆𑀙𑀓𑀲𑁆𑀲 𑀘 𑀅𑀪𑀸𑀯𑀸 𑀦 𑀦𑀺𑀧𑁆𑀧𑀤𑁂𑀲𑁂𑀦. 𑀅𑀪𑀺𑀥𑀫𑁆𑀫𑀁 𑀧𑀢𑁆𑀯𑀸 𑀧𑀦…𑀧𑁂… 𑀦𑀺𑀧𑁆𑀧𑀤𑁂𑀲𑀢𑁄𑀯 𑀯𑀺𑀪𑀢𑁆𑀢𑀸, 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀥𑀫𑁆𑀫𑀸𑀢𑀺𑀭𑁂𑀓𑀥𑀫𑁆𑀫𑀯𑀺𑀲𑁂𑀲𑀝𑁆𑀞𑁂𑀦 ‘‘𑀅𑀪𑀺𑀥𑀫𑁆𑀫𑁄’’𑀢𑀺 𑀯𑀼𑀘𑁆𑀘𑀢𑀺 𑀦𑀺𑀧𑁆𑀧𑀤𑁂𑀲𑀸𑀦𑀁 𑀢𑀺𑀡𑁆𑀡𑀫𑁆𑀧𑀺 𑀦𑀬𑀸𑀦𑀁 𑀅𑀢𑀺𑀭𑁂𑀓𑀧𑀸𑀴𑀺𑀪𑀸𑀯𑀢𑁄 𑀯𑀺𑀲𑁂𑀲𑀧𑀸𑀴𑀺𑀪𑀸𑀯𑀢𑁄 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀢𑁆𑀢𑀦𑁆𑀢𑁂 𑀩𑀸𑀯𑀻𑀲𑀢𑀺𑀬𑀸 𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀢𑁄 𑀅𑀦𑀸𑀕𑀢𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑁂 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁 𑀦𑀢𑁆𑀣𑀺. ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀲𑀫𑁆𑀪𑀯𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂 𑀢𑀲𑁆𑀲 𑀢𑀲𑁆𑀲 𑀧𑀘𑁆𑀘𑀬𑀥𑀫𑁆𑀫𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀪𑀸𑀯𑁄 𑀉𑀤𑁆𑀤𑀺𑀝𑁆𑀞𑁄, 𑀉𑀤𑁆𑀤𑀺𑀝𑁆𑀞𑀥𑀫𑁆𑀫𑀸𑀦𑀜𑁆𑀘 𑀓𑀼𑀲𑀮𑀸𑀤𑀺𑀪𑀸𑀯𑁄 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄, 𑀦 𑀘𑁂𑀢𑁆𑀣 ‘‘𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑁄 𑀉𑀤𑁆𑀤𑁂𑀲𑁄 𑀅𑀢𑁆𑀣𑀻𑀢𑀺 𑀧𑀜𑁆𑀳𑀧𑀼𑀘𑁆𑀙𑀓𑀁 𑀦𑀢𑁆𑀣𑀺. 𑀲𑀼𑀢𑁆𑀢𑀦𑁆𑀢𑁂 𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀉𑀤𑁆𑀤𑀺𑀝𑁆𑀞𑀸𑀦𑀺 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻𑀢𑀺𑀆𑀤𑀻𑀦𑀺. 𑀲𑀸 𑀧𑀦 𑀯𑁂𑀭𑀫𑀡𑀻 𑀬𑀤𑀺 𑀲𑀪𑀸𑀯𑀓𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀪𑀚𑀻𑀬𑁂𑀬𑁆𑀬, ‘‘𑀆𑀭𑀢𑀺 𑀯𑀺𑀭𑀢𑀻’’𑀢𑀺𑀆𑀤𑀺𑀦𑀸 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀫𑁂𑀯 𑀳𑁄𑀢𑀺. 𑀅𑀣𑀸𑀧𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀯𑀺𑀪𑀚𑀻𑀬𑁂𑀬𑁆𑀬, 𑀢𑀣𑀸𑀧𑀺 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀫𑁂𑀯 𑀳𑁄𑀢𑀺. 𑀅𑀜𑁆𑀜𑁄 𑀧𑀦 𑀯𑁂𑀭𑀫𑀡𑀻𑀦𑀁 𑀯𑀺𑀪𑀚𑀺𑀢𑀩𑁆𑀩𑀧𑁆𑀧𑀓𑀸𑀭𑁄 𑀦𑀢𑁆𑀣𑀺, 𑀬𑁂𑀦 𑀧𑀓𑀸𑀭𑁂𑀦 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀢𑀲𑁆𑀫𑀸 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁 𑀦𑀢𑁆𑀣𑀺.

𑀯𑀘𑀦𑀢𑁆𑀣𑀢𑁄 𑀅𑀪𑀺𑀥𑀫𑁆𑀫𑁂 𑀜𑀸𑀢𑁂 𑀧𑀭𑀺𑀘𑁆𑀙𑁂𑀤𑀢𑁄 𑀜𑀸𑀧𑁂𑀢𑀼𑀁 𑀆𑀳 ‘‘𑀧𑀓𑀭𑀡𑀧𑀭𑀺𑀘𑁆𑀙𑁂𑀤𑀢𑁄’’𑀢𑀺𑀆𑀤𑀺. 𑀓𑀢𑀺𑀧𑀬𑀸𑀯 𑀧𑀜𑁆𑀳𑀯𑀸𑀭𑀸 𑀅𑀯𑀲𑁂𑀲𑀸𑀢𑀺 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑁂 𑀅𑀦𑀸𑀕𑀢𑀸 𑀳𑀼𑀢𑁆𑀯𑀸 𑀫𑀳𑀸𑀥𑀫𑁆𑀫𑀳𑀤𑀬𑁂 𑀆𑀕𑀢𑀸 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑀯𑀘𑀦𑀯𑀲𑁂𑀦 𑀅𑀯𑀲𑁂𑀲𑀸 𑀓𑀢𑀺𑀧𑀬𑀸𑀯 𑀧𑀜𑁆𑀳𑀯𑀸𑀭𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣𑁂𑀯 𑀲𑀗𑁆𑀕𑀳𑀺𑀢𑀸𑀢𑀺 ‘‘𑀅𑀧𑀼𑀩𑁆𑀩𑀁 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. 𑀅𑀧𑁆𑀧𑀫𑀢𑁆𑀢𑀺𑀓𑀸𑀯 𑀢𑀦𑁆𑀢𑀺 𑀅𑀯𑀲𑁂𑀲𑀸𑀢𑀺 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑁂 𑀅𑀦𑀸𑀕𑀦𑁆𑀢𑁆𑀯𑀸 𑀫𑀳𑀸𑀥𑀫𑁆𑀫𑀳𑀤𑀬𑁂 𑀆𑀕𑀢𑀢𑀦𑁆𑀢𑀺𑀢𑁄 𑀬𑀤𑀺 𑀧𑀣𑀯𑀻𑀆𑀤𑀻𑀦𑀁 𑀯𑀺𑀢𑁆𑀣𑀸𑀭𑀓𑀣𑀸 𑀫𑀳𑀸𑀥𑀸𑀢𑀼𑀓𑀣𑀸 𑀭𑀽𑀧𑀓𑀡𑁆𑀟𑀥𑀸𑀢𑀼𑀯𑀺𑀪𑀗𑁆𑀕𑀸𑀤𑀻𑀲𑀼, 𑀅𑀣 𑀥𑀸𑀢𑀼𑀓𑀣𑀸𑀬 𑀯𑀺𑀢𑁆𑀣𑀸𑀭𑀓𑀣𑀸 𑀥𑀸𑀢𑀼𑀓𑀣𑀸𑀬 𑀅𑀦𑀸𑀕𑀦𑁆𑀢𑁆𑀯𑀸 𑀫𑀳𑀸𑀥𑀸𑀢𑀼𑀓𑀣𑀸𑀬 𑀆𑀕𑀢𑀢𑀦𑁆𑀢𑀺 𑀅𑀧𑁆𑀧𑀫𑀢𑁆𑀢𑀺𑀓𑀸𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀲𑀸𑀯𑀓𑀪𑀸𑀲𑀺𑀢𑀢𑁆𑀢𑀸 𑀙𑀟𑁆𑀟𑁂𑀣 𑀦’’𑀦𑁆𑀢𑀺, 𑀢𑀁 𑀩𑀼𑀤𑁆𑀥𑀪𑀸𑀲𑀺𑀢𑀪𑀸𑀯𑀤𑀲𑁆𑀲𑀦𑁂𑀦 𑀧𑀝𑀺𑀲𑁂𑀥𑁂𑀢𑀼𑀁 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀳𑀻’’𑀢𑀺𑀆𑀤𑀺𑀫𑀸𑀳. 𑀘𑀢𑀽𑀲𑀼 𑀧𑀜𑁆𑀳𑁂𑀲𑀽𑀢𑀺 ‘‘𑀉𑀧𑀮𑀩𑁆𑀪𑀢𑀺 𑀦𑀼𑀧𑀮𑀩𑁆𑀪𑀢𑀻’’𑀢𑀺 𑀧𑀝𑀺𑀜𑁆𑀜𑀸𑀬 𑀕𑀳𑀺𑀢𑀸𑀬 𑀧𑀝𑀺𑀓𑁆𑀔𑁂𑀧𑀕𑀳𑀡𑀢𑁆𑀣𑀁 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄’’𑀢𑀺 𑀯𑀼𑀢𑁆𑀢𑀁 𑀲𑀘𑁆𑀘𑀺𑀓𑀝𑁆𑀞𑀁 𑀦𑀺𑀲𑁆𑀲𑀬𑀁 𑀓𑀢𑁆𑀯𑀸 𑀉𑀧𑀸𑀤𑀸𑀬 𑀧𑀯𑀢𑁆𑀢𑀸 𑀤𑁆𑀯𑁂𑀧𑀺 𑀧𑀜𑁆𑀘𑀓𑀸 𑀏𑀓𑁄 𑀧𑀜𑁆𑀳𑁄, ‘‘𑀲𑀩𑁆𑀩𑀢𑁆𑀣𑀸’’𑀢𑀺 𑀲𑀭𑀻𑀭𑀁 𑀲𑀩𑁆𑀩𑀁 𑀯𑀸 𑀤𑁂𑀲𑀁 𑀉𑀧𑀸𑀤𑀸𑀬 𑀧𑀯𑀢𑁆𑀢𑀸 𑀏𑀓𑁄, ‘‘𑀲𑀩𑁆𑀩𑀤𑀸’’𑀢𑀺 𑀓𑀸𑀮𑀫𑀼𑀧𑀸𑀤𑀸𑀬 𑀏𑀓𑁄, ‘‘𑀲𑀩𑁆𑀩𑁂𑀲𑀽’’𑀢𑀺 𑀬𑀤𑀺 𑀔𑀦𑁆𑀥𑀸𑀬𑀢𑀦𑀸𑀤𑀬𑁄 𑀕𑀳𑀺𑀢𑀸, 𑀢𑁂 𑀉𑀧𑀸𑀤𑀸𑀬 𑀧𑀯𑀢𑁆𑀢𑀸, 𑀅𑀣 𑀧𑀦 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄 𑀲𑀩𑁆𑀩𑀢𑁆𑀣 𑀲𑀩𑁆𑀩𑀤𑀸’’𑀢𑀺 𑀏𑀢𑁂𑀳𑀺 𑀦 𑀓𑁄𑀘𑀺 𑀲𑀘𑁆𑀘𑀺𑀓𑀝𑁆𑀞𑁄 𑀤𑁂𑀲𑁄 𑀓𑀸𑀮𑁄 𑀯𑀸 𑀅𑀕𑁆𑀕𑀳𑀺𑀢𑁄 𑀅𑀢𑁆𑀣𑀺, 𑀢𑁂 𑀧𑀦 𑀲𑀸𑀫𑀜𑁆𑀜𑀯𑀲𑁂𑀦 𑀕𑀳𑁂𑀢𑁆𑀯𑀸 𑀅𑀦𑀼𑀬𑁄𑀕𑁄 𑀓𑀢𑁄, 𑀦 𑀪𑁂𑀤𑀯𑀲𑁂𑀦𑀸𑀢𑀺 𑀪𑁂𑀤𑀯𑀲𑁂𑀦 𑀕𑀳𑁂𑀢𑁆𑀯𑀸 𑀅𑀦𑀼𑀬𑀼𑀜𑁆𑀚𑀺𑀢𑀼𑀁 ‘‘𑀲𑀩𑁆𑀩𑁂𑀲𑀽’’𑀢𑀺 𑀯𑀼𑀢𑁆𑀢𑀸 𑀲𑀘𑁆𑀘𑀺𑀓𑀝𑁆𑀞𑀤𑁂𑀲𑀓𑀸𑀮𑀧𑁆𑀧𑀤𑁂𑀲𑁂 𑀉𑀧𑀸𑀤𑀸𑀬 𑀘 𑀧𑀯𑀢𑁆𑀢𑀸 𑀏𑀓𑁄𑀢𑀺 𑀏𑀢𑁂𑀲𑀼 𑀘𑀢𑀽𑀲𑀼. 𑀤𑁆𑀯𑀺𑀦𑁆𑀦𑀁 𑀧𑀜𑁆𑀘𑀓𑀸𑀦𑀦𑁆𑀢𑀺 𑀏𑀢𑁆𑀣 ‘‘𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺…𑀧𑁂… 𑀫𑀺𑀘𑁆𑀙𑀸’’𑀢𑀺 𑀏𑀓𑀁, ‘‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀺…𑀧𑁂… 𑀫𑀺𑀘𑁆𑀙𑀸’’𑀢𑀺 (𑀓𑀣𑀸. 𑁧𑁮) 𑀏𑀓𑀁, ‘‘𑀢𑁆𑀯𑀁 𑀘𑁂 𑀧𑀦 𑀫𑀜𑁆𑀜𑀲𑀺…𑀧𑁂… 𑀇𑀤𑀁 𑀢𑁂 𑀫𑀺𑀘𑁆𑀙𑀸’’𑀢𑀺 (𑀓𑀣𑀸. 𑁩) 𑀏𑀓𑀁, ‘‘𑀏𑀲𑁂 𑀘𑁂 𑀤𑀼𑀦𑁆𑀦𑀺𑀕𑁆𑀕𑀳𑀺𑀢𑁂…𑀧𑁂… 𑀇𑀤𑀁 𑀢𑁂 𑀫𑀺𑀘𑁆𑀙𑀸’’𑀢𑀺 𑀏𑀓𑀁, ‘‘𑀦 𑀳𑁂𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑁂, 𑀢𑁂𑀦 𑀳𑀺 𑀬𑀁 𑀦𑀺𑀕𑁆𑀕𑀡𑁆𑀳𑀸𑀲𑀺…𑀧𑁂… 𑀲𑀼𑀓𑀢𑀸 𑀧𑀝𑀺𑀧𑀸𑀤𑀦𑀸’’𑀢𑀺 (𑀓𑀣𑀸. 𑁧𑁦) 𑀏𑀓𑀦𑁆𑀢𑀺 𑀏𑀯𑀁 𑀦𑀺𑀕𑁆𑀕𑀳𑀓𑀭𑀡𑀁, 𑀧𑀝𑀺𑀓𑀫𑁆𑀫𑀓𑀭𑀡𑀁, 𑀦𑀺𑀕𑁆𑀕𑀳𑀲𑁆𑀲 𑀲𑀼𑀦𑀺𑀕𑁆𑀕𑀳𑀪𑀸𑀯𑀁 𑀇𑀘𑁆𑀙𑀢𑁄 𑀧𑀝𑀺𑀜𑁆𑀜𑀸𑀞𑀧𑀦𑁂𑀦 𑀧𑀝𑀺𑀓𑀫𑁆𑀫𑀯𑁂𑀞𑀦𑀁, 𑀧𑀝𑀺𑀓𑀫𑁆𑀫𑀲𑁆𑀲 𑀤𑀼𑀧𑁆𑀧𑀝𑀺𑀓𑀫𑁆𑀫𑀪𑀸𑀯𑀁 𑀇𑀘𑁆𑀙𑀢𑁄 𑀢𑀁𑀦𑀺𑀤𑀲𑁆𑀲𑀦𑁂𑀦 𑀦𑀺𑀕𑁆𑀕𑀳𑀲𑁆𑀲 𑀤𑀼𑀦𑁆𑀦𑀺𑀕𑁆𑀕𑀳𑀪𑀸𑀯𑀤𑀲𑁆𑀲𑀦𑁂𑀦 𑀦𑀺𑀕𑁆𑀕𑀳𑀦𑀺𑀩𑁆𑀩𑁂𑀞𑀦𑀁, 𑀅𑀦𑀺𑀕𑁆𑀕𑀳𑀪𑀸𑀯𑀸𑀭𑁄𑀧𑀦𑀸𑀤𑀺𑀦𑀸 𑀙𑁂𑀤𑁄𑀢𑀺 𑀅𑀬𑀁 𑀏𑀓𑁄 𑀧𑀜𑁆𑀘𑀓𑁄, 𑀬𑁄 𑀅𑀝𑁆𑀞𑀓𑀣𑀸𑀬𑀁 𑀅𑀦𑀼𑀮𑁄𑀫𑀧𑀜𑁆𑀘𑀓𑀧𑀝𑀺𑀓𑀫𑁆𑀫𑀘𑀢𑀼𑀓𑁆𑀓𑀦𑀺𑀕𑁆𑀕𑀳𑀘𑀢𑀼𑀓𑁆𑀓𑀉𑀧𑀦𑀬𑀦𑀘𑀢𑀼𑀓𑁆𑀓𑀦𑀺𑀕𑀫𑀦𑀘𑀢𑀼𑀓𑁆𑀓 𑀦𑀸𑀫𑁂𑀳𑀺 𑀲𑀓𑀯𑀸𑀤𑀺𑀧𑀼𑀩𑁆𑀩𑀧𑀓𑁆𑀔𑁂 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀧𑀜𑁆𑀘𑀓𑁄𑀢𑀺 𑀯𑀼𑀢𑁆𑀢𑁄, 𑀧𑀭𑀯𑀸𑀤𑀺𑀧𑀼𑀩𑁆𑀩𑀧𑀓𑁆𑀔𑁂 𑀘 𑀏𑀯𑀫𑁂𑀯 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀧𑀜𑁆𑀘𑀓𑁄𑀢𑀺 𑀯𑀼𑀢𑁆𑀢𑁄. 𑀏𑀯𑀁 𑀤𑁆𑀯𑁂 𑀧𑀜𑁆𑀘𑀓𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀲𑁂𑀲𑀧𑀜𑁆𑀳𑁂𑀲𑀼𑀧𑀻𑀢𑀺 𑀅𑀝𑁆𑀞 𑀧𑀜𑁆𑀘𑀓𑀸 𑀅𑀝𑁆𑀞𑀫𑀼𑀔𑀸 𑀯𑀸𑀤𑀬𑀼𑀢𑁆𑀢𑀻𑀢𑀺 𑀯𑀼𑀢𑁆𑀢𑀸. 𑀬𑀼𑀢𑁆𑀢𑀻𑀢𑀺 𑀉𑀧𑀸𑀬𑁄, 𑀯𑀸𑀤𑀲𑁆𑀲 𑀬𑀼𑀢𑁆𑀢𑀺 𑀯𑀸𑀤𑀬𑀼𑀢𑁆𑀢𑀺, 𑀯𑀸𑀤𑀧𑁆𑀧𑀯𑀢𑁆𑀢𑀦𑀲𑁆𑀲 𑀉𑀧𑀸𑀬𑁄𑀢𑀺 𑀅𑀢𑁆𑀣𑁄.

𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀧𑀜𑁆𑀘𑀓𑁂 𑀆𑀤𑀺𑀦𑀺𑀕𑁆𑀕𑀳𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀧𑀜𑁆𑀘𑀓𑁂 𑀘 𑀆𑀤𑀺𑀦𑀺𑀕𑁆𑀕𑀳𑀫𑁂𑀯 𑀤𑀲𑁆𑀲𑁂𑀢𑁆𑀯𑀸 𑀫𑀸𑀢𑀺𑀓𑀁 𑀤𑀻𑀧𑁂𑀢𑀼𑀁 ‘‘𑀲𑀸 𑀧𑀦𑁂𑀲𑀸’’𑀢𑀺𑀆𑀤𑀺𑀫𑀸𑀳. 𑀧𑀼𑀕𑁆𑀕𑀮𑁄𑀢𑀺 𑀅𑀢𑁆𑀢𑀸 𑀲𑀢𑁆𑀢𑁄 𑀚𑀻𑀯𑁄. 𑀉𑀧𑀮𑀩𑁆𑀪𑀢𑀻𑀢𑀺 𑀧𑀜𑁆𑀜𑀸𑀬 𑀉𑀧𑀕𑀦𑁆𑀢𑁆𑀯𑀸 𑀮𑀩𑁆𑀪𑀢𑀺. 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀝𑁆𑀞𑁂𑀦𑀸𑀢𑀺 𑀫𑀸𑀬𑀸𑀫𑀭𑀻𑀘𑀺𑀆𑀤𑀬𑁄 𑀯𑀺𑀬 𑀦𑀸𑀪𑀽𑀢𑀸𑀓𑀸𑀭𑁂𑀦, 𑀅𑀦𑀼𑀲𑁆𑀲𑀯𑀸𑀤𑀻𑀳𑀺 𑀕𑀳𑁂𑀢𑀩𑁆𑀩𑀸 𑀯𑀺𑀬 𑀦 𑀅𑀦𑀼𑀢𑁆𑀢𑀫𑀢𑁆𑀣𑀪𑀸𑀯𑁂𑀦, 𑀅𑀣 𑀔𑁄 𑀪𑀽𑀢𑁂𑀦 𑀉𑀢𑁆𑀢𑀫𑀢𑁆𑀣𑀪𑀸𑀯𑁂𑀦 𑀉𑀧𑀮𑀩𑁆𑀪𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀇𑀢𑀭𑁄 𑀢𑀸𑀤𑀺𑀲𑀁 𑀇𑀘𑁆𑀙𑀦𑁆𑀢𑁄 𑀧𑀝𑀺𑀚𑀸𑀦𑀸𑀢𑀺. 𑀧𑀼𑀦 𑀬𑁄 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀝𑁆𑀞𑁂𑀦 𑀉𑀧𑀮𑀩𑁆𑀪𑀢𑀺, 𑀲𑁄 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀝𑁆𑀞𑀢𑁄 𑀅𑀜𑁆𑀜𑁄 𑀢𑀤𑀸𑀥𑀸𑀭𑁄, 𑀅𑀜𑁆𑀜𑀢𑁆𑀭 𑀯𑀸 𑀢𑁂𑀳𑀺, 𑀢𑁂𑀲𑀁 𑀯𑀸 𑀆𑀥𑀸𑀭𑀪𑀽𑀢𑁄, 𑀅𑀦𑀜𑁆𑀜𑁄 𑀯𑀸 𑀢𑀢𑁄 𑀭𑀼𑀧𑁆𑀧𑀦𑀸𑀤𑀺𑀲𑀪𑀸𑀯𑀢𑁄 𑀲𑀧𑁆𑀧𑀘𑁆𑀘𑀬𑀸𑀤𑀺𑀲𑀪𑀸𑀯𑀢𑁄 𑀯𑀸 𑀉𑀧𑀮𑀩𑁆𑀪𑀫𑀸𑀦𑁄 𑀆𑀧𑀚𑁆𑀚𑀢𑀻𑀢𑀺 𑀅𑀦𑀼𑀬𑀼𑀜𑁆𑀚𑀢𑀺 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄…𑀧𑁂… 𑀧𑀭𑀫𑀝𑁆𑀞𑁂𑀦𑀸’’𑀢𑀺. 𑀇𑀢𑀭𑁄 𑀧𑀼𑀕𑁆𑀕𑀮𑀲𑁆𑀲 𑀭𑀽𑀧𑀸𑀤𑀻𑀳𑀺 𑀅𑀜𑁆𑀜𑀢𑁆𑀢𑀁 𑀅𑀦𑀜𑁆𑀜𑀢𑁆𑀢𑀜𑁆𑀘 𑀅𑀦𑀺𑀘𑁆𑀙𑀦𑁆𑀢𑁄 ‘‘𑀦 𑀳𑁂𑀯’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀼𑀦 𑀲𑀓𑀯𑀸𑀤𑀻 𑀧𑀝𑀺𑀜𑁆𑀜𑀸𑀬 𑀏𑀓𑀢𑁆𑀢𑀸𑀧𑀦𑁆𑀦𑀁 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀁 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀓𑀢𑁆𑀯𑀸 𑀦𑀺𑀕𑁆𑀕𑀳𑀁 𑀆𑀭𑁄𑀧𑁂𑀦𑁆𑀢𑁄 𑀆𑀳 ‘‘𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳’’𑀦𑁆𑀢𑀺. ‘‘𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻’’𑀢𑀺 𑀧𑀼𑀝𑁆𑀞𑁄 𑀲𑀓𑀯𑀸𑀤𑀻 𑀧𑀼𑀕𑁆𑀕𑀮𑀤𑀺𑀝𑁆𑀞𑀺𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 ‘‘𑀆𑀫𑀦𑁆𑀢𑀸’’𑀢𑀺 𑀧𑀝𑀺𑀚𑀸𑀦𑀸𑀢𑀺. 𑀧𑀼𑀦 𑀇𑀢𑀭𑁄 𑀬𑁄 𑀲𑀘𑁆𑀘𑀺𑀓𑀝𑁆𑀞𑁂𑀦 𑀦𑀼𑀧𑀮𑀩𑁆𑀪𑀢𑀺 𑀧𑀼𑀕𑁆𑀕𑀮𑁄, 𑀲𑁄 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀝𑁆𑀞𑀢𑁄 𑀅𑀜𑁆𑀜𑁄 𑀯𑀸 𑀅𑀦𑀜𑁆𑀜𑁄 𑀯𑀸 𑀦𑀼𑀧𑀮𑀩𑁆𑀪𑀢𑀻𑀢𑀺 𑀆𑀧𑀚𑁆𑀚𑀢𑀺 𑀅𑀜𑁆𑀜𑀲𑁆𑀲 𑀧𑀓𑀸𑀭𑀲𑁆𑀲 𑀅𑀪𑀸𑀯𑀸𑀢𑀺 𑀅𑀦𑀼𑀬𑀼𑀜𑁆𑀚𑀢𑀺 ‘‘𑀬𑁄 𑀲𑀘𑁆𑀘𑀺𑀓𑀝𑁆𑀞𑁄…𑀧𑁂… 𑀧𑀭𑀫𑀝𑁆𑀞𑁂𑀦𑀸’’𑀢𑀺. 𑀬𑀲𑁆𑀫𑀸 𑀧𑀦 𑀧𑀼𑀕𑁆𑀕𑀮𑁄 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦𑀼𑀧𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀅𑀜𑁆𑀜𑀢𑁆𑀢𑀸𑀦𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑁄 𑀅𑀦𑀦𑀼𑀬𑁄𑀕𑁄 𑀧𑀼𑀕𑁆𑀕𑀮𑀮𑀤𑁆𑀥𑀺𑀁 𑀧𑀝𑀺𑀲𑁂𑀥𑁂𑀦𑁆𑀢𑀲𑁆𑀲 𑀅𑀦𑀸𑀧𑀚𑁆𑀚𑀦𑀢𑁄𑀢𑀺 ‘‘𑀦 𑀳𑁂𑀯’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀇𑀢𑀭𑁄 𑀧𑀝𑀺𑀜𑁆𑀜𑀸𑀬 𑀆𑀧𑀚𑁆𑀚𑀦𑀮𑁂𑀲𑀫𑁂𑀯 𑀧𑀲𑁆𑀲𑀦𑁆𑀢𑁄 𑀅𑀯𑀺𑀧𑀭𑀻𑀢𑀁 𑀅𑀢𑁆𑀣𑀁 𑀅𑀲𑀫𑁆𑀩𑀼𑀚𑁆𑀛𑀦𑁆𑀢𑁄𑀬𑁂𑀯 𑀦𑀺𑀕𑁆𑀕𑀳𑀁 𑀆𑀭𑁄𑀧𑁂𑀢𑀺 ‘‘𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳’’𑀦𑁆𑀢𑀺.

𑀇𑀢𑀻𑀢𑀺 𑀬𑀁 𑀤𑀺𑀲𑁆𑀯𑀸 𑀫𑀸𑀢𑀺𑀓𑀸 𑀞𑀧𑀺𑀢𑀸, 𑀏𑀯𑀁 𑀤𑁂𑀲𑀺𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀓𑀺𑀦𑁆𑀢𑀺 𑀬𑁂𑀦 𑀧𑀓𑀸𑀭𑁂𑀦 𑀩𑀼𑀤𑁆𑀥𑀪𑀸𑀲𑀺𑀢𑀁 𑀦𑀸𑀫 𑀚𑀸𑀢𑀁, 𑀢𑀁 𑀦𑀺𑀤𑀲𑁆𑀲𑀦𑀁 𑀓𑀺𑀦𑁆𑀢𑀺 𑀅𑀢𑁆𑀣𑁄. 𑀬𑀢𑁄𑀦𑀺𑀤𑀸𑀦𑀦𑁆𑀢𑀺 𑀬𑀁𑀓𑀸𑀭𑀡𑀸 𑀙𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀬𑀢𑀦𑀸𑀤𑀺𑀦𑀺𑀤𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀧𑀧𑀜𑁆𑀘𑀲𑀫𑁆𑀧𑀬𑀼𑀢𑁆𑀢𑀸 𑀲𑀜𑁆𑀜𑀸𑀓𑁄𑀝𑁆𑀞𑀸𑀲𑀸. 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀅𑀚𑁆𑀛𑀸𑀘𑀭𑀦𑁆𑀢𑀺. 𑀏𑀢𑁆𑀣 𑀘𑁂𑀢𑀺 𑀏𑀢𑁂𑀲𑀼 𑀆𑀬𑀢𑀦𑀸𑀤𑀻𑀲𑀼 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀻𑀳𑀺 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁 𑀅𑀪𑀺𑀯𑀤𑀺𑀢𑀩𑁆𑀩𑀁 𑀅𑀚𑁆𑀛𑁄𑀲𑀺𑀢𑀩𑁆𑀩𑀜𑁆𑀘 𑀦𑀢𑁆𑀣𑀺 𑀘𑁂. 𑀦𑀦𑀼 𑀦𑀢𑁆𑀣𑀺𑀬𑁂𑀯, 𑀓𑀲𑁆𑀫𑀸 ‘‘𑀦𑀢𑁆𑀣𑀺 𑀘𑁂’’𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀲𑀘𑁆𑀘𑀁 𑀦𑀢𑁆𑀣𑀺, 𑀅𑀧𑁆𑀧𑀳𑀻𑀦𑀸𑀪𑀺𑀦𑀦𑁆𑀤𑀦𑀸𑀪𑀺𑀯𑀤𑀦𑀚𑁆𑀛𑁄𑀲𑀸𑀦𑀸𑀦𑀁 𑀧𑀦 𑀧𑀼𑀣𑀼𑀚𑁆𑀚𑀦𑀸𑀦𑀁 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀸𑀤𑀺𑀧𑁆𑀧𑀓𑀸𑀭𑀸𑀦𑀺 𑀆𑀬𑀢𑀦𑀸𑀤𑀻𑀦𑀺 𑀳𑁄𑀦𑁆𑀢𑀻𑀢𑀺 𑀢𑁂𑀲𑀁 𑀦 𑀲𑀓𑁆𑀓𑀸 ‘‘𑀦𑀢𑁆𑀣𑀻’’𑀢𑀺 𑀯𑀢𑁆𑀢𑀼𑀁, 𑀧𑀳𑀻𑀦𑀸𑀪𑀺𑀦𑀦𑁆𑀤𑀦𑀸𑀤𑀻𑀦𑀁 𑀧𑀦 𑀲𑀩𑁆𑀩𑀣𑀸 𑀦𑀢𑁆𑀣𑀻𑀢𑀺 ‘‘𑀦𑀢𑁆𑀣𑀺 𑀘𑁂’’𑀢𑀺 𑀯𑀼𑀢𑁆𑀢𑀁. 𑀏𑀲𑁂𑀯𑀦𑁆𑀢𑁄𑀢𑀺 𑀅𑀪𑀺𑀦𑀦𑁆𑀤𑀦𑀸𑀤𑀻𑀦𑀁 𑀦𑀢𑁆𑀣𑀺𑀪𑀸𑀯𑀓𑀭𑁄 𑀫𑀕𑁆𑀕𑁄 𑀢𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀪𑀽𑀢𑀁 𑀨𑀮𑀁 𑀯𑀸 𑀭𑀸𑀕𑀸𑀦𑀼𑀲𑀬𑀸𑀤𑀻𑀦𑀁 𑀅𑀦𑁆𑀢𑁄 𑀅𑀯𑀲𑀸𑀦𑀁, 𑀅𑀧𑁆𑀧𑀯𑀢𑁆𑀢𑀻𑀢𑀺 𑀅𑀢𑁆𑀣𑁄.

𑀚𑀸𑀦𑀁 𑀚𑀸𑀦𑀸𑀢𑀻𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀚𑀸𑀦𑀺𑀢𑀩𑁆𑀩𑀁 𑀚𑀸𑀦𑀸𑀢𑀺. 𑀦 𑀳𑀺 𑀧𑀤𑁂𑀲𑀜𑀸𑀡𑀯𑀸 𑀚𑀸𑀦𑀺𑀢𑀩𑁆𑀩𑀁 𑀲𑀩𑁆𑀩𑀁 𑀚𑀸𑀦𑀸𑀢𑀻𑀢𑀺. 𑀧𑀲𑁆𑀲𑀁 𑀧𑀲𑁆𑀲𑀢𑀻𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀧𑀜𑁆𑀜𑀸𑀘𑀓𑁆𑀔𑀼𑀥𑀫𑁆𑀫𑀘𑀓𑁆𑀔𑀼𑀩𑀼𑀤𑁆𑀥𑀘𑀓𑁆𑀔𑀼𑀲𑀫𑀦𑁆𑀢𑀘𑀓𑁆𑀔𑀼𑀲𑀗𑁆𑀔𑀸𑀢𑁂𑀳𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀧𑀲𑁆𑀲𑀺𑀢𑀩𑁆𑀩𑀁 𑀧𑀲𑁆𑀲𑀢𑀺. 𑀅𑀣 𑀯𑀸 𑀚𑀸𑀦𑀁 𑀚𑀸𑀦𑀸𑀢𑀻𑀢𑀺 𑀬𑀣𑀸 𑀅𑀜𑁆𑀜𑁂 𑀲𑀯𑀺𑀧𑀮𑁆𑀮𑀸𑀲𑀸 𑀓𑀸𑀫𑀭𑀽𑀧𑀧𑀭𑀺𑀜𑁆𑀜𑀸𑀯𑀸𑀤𑀺𑀦𑁄 𑀚𑀸𑀦𑀦𑁆𑀢𑀸𑀧𑀺 𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀚𑀸𑀦𑀦𑁆𑀢𑀺, 𑀦 𑀏𑀯𑀁 𑀪𑀕𑀯𑀸, 𑀪𑀕𑀯𑀸 𑀧𑀦 𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀢𑁆𑀢𑀸 𑀚𑀸𑀦𑀦𑁆𑀢𑁄 𑀚𑀸𑀦𑀸𑀢𑀺𑀬𑁂𑀯, 𑀤𑀺𑀝𑁆𑀞𑀺𑀤𑀲𑁆𑀲𑀦𑀲𑁆𑀲 𑀘 𑀅𑀪𑀸𑀯𑀸 𑀧𑀲𑁆𑀲𑀦𑁆𑀢𑁄 𑀧𑀲𑁆𑀲𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀘𑀓𑁆𑀔𑀼𑀪𑀽𑀢𑁄𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀫𑀬𑀢𑁆𑀢𑀸 𑀲𑀢𑁆𑀢𑁂𑀲𑀼 𑀘 𑀢𑀤𑀼𑀧𑁆𑀧𑀸𑀤𑀦𑀢𑁄 𑀮𑁄𑀓𑀲𑁆𑀲 𑀘𑀓𑁆𑀔𑀼𑀪𑀽𑀢𑁄. 𑀜𑀸𑀡𑀪𑀽𑀢𑁄𑀢𑀺 𑀏𑀢𑀲𑁆𑀲 𑀘 𑀏𑀯𑀫𑁂𑀯 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀥𑀫𑁆𑀫𑀸 𑀩𑁄𑀥𑀺𑀧𑀓𑁆𑀔𑀺𑀬𑀸. 𑀩𑁆𑀭𑀳𑁆𑀫𑀸 𑀫𑀕𑁆𑀕𑁄, 𑀢𑁂𑀳𑀺 𑀉𑀧𑁆𑀧𑀦𑁆𑀦𑀢𑁆𑀢𑀸 𑀮𑁄𑀓𑀲𑁆𑀲 𑀘 𑀢𑀤𑀼𑀧𑁆𑀧𑀸𑀤𑀦𑀢𑁄 𑀢𑀩𑁆𑀪𑀽𑀢𑁄. 𑀯𑀢𑁆𑀢𑀸𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀯𑀤𑀢𑀻𑀢𑀺 𑀯𑀢𑁆𑀢𑀸. 𑀧𑀯𑀢𑁆𑀢𑀸𑀢𑀺 𑀘𑀺𑀭𑀁 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀁 𑀧𑀯𑀢𑁆𑀢𑁂𑀦𑁆𑀢𑁄 𑀯𑀤𑀢𑀻𑀢𑀺 𑀧𑀯𑀢𑁆𑀢𑀸. 𑀅𑀢𑁆𑀣𑀲𑁆𑀲 𑀦𑀺𑀦𑁆𑀦𑁂𑀢𑀸𑀢𑀺 𑀅𑀢𑁆𑀣𑀁 𑀉𑀤𑁆𑀥𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀸, 𑀧𑀭𑀫𑀢𑁆𑀣𑀁 𑀯𑀸 𑀦𑀺𑀩𑁆𑀩𑀸𑀦𑀁 𑀧𑀸𑀧𑀬𑀺𑀢𑀸. 𑀅𑀫𑀢𑀲𑁆𑀲 𑀤𑀸𑀢𑀸𑀢𑀺 𑀅𑀫𑀢𑀲𑀘𑁆𑀙𑀺𑀓𑀺𑀭𑀺𑀬𑀁 𑀲𑀢𑁆𑀢𑁂𑀲𑀼 𑀉𑀧𑁆𑀧𑀸𑀤𑁂𑀦𑁆𑀢𑁄 𑀅𑀫𑀢𑀁 𑀤𑀤𑀸𑀢𑀻𑀢𑀺 𑀅𑀫𑀢𑀲𑁆𑀲 𑀤𑀸𑀢𑀸. 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁 𑀢𑀤𑀸𑀬𑀢𑁆𑀢𑀪𑀸𑀯𑀢𑁄 𑀥𑀫𑁆𑀫𑀲𑁆𑀲𑀸𑀫𑀻. 𑀲𑀼𑀯𑀡𑁆𑀡𑀸𑀮𑀺𑀗𑁆𑀕𑀦𑁆𑀢𑀺 𑀲𑀼𑀯𑀡𑁆𑀡𑀫𑀬𑀁 𑀆𑀮𑀺𑀗𑁆𑀕𑀁 𑀔𑀼𑀤𑁆𑀤𑀓𑀫𑀼𑀤𑀺𑀗𑁆𑀕𑀁. 𑀲𑀼𑀧𑀼𑀧𑁆𑀨𑀺𑀢𑀲𑀢𑀧𑀢𑁆𑀢𑀧𑀤𑀼𑀫𑀫𑀺𑀯 𑀲𑀲𑁆𑀲𑀺𑀭𑀺𑀓𑀁 𑀲𑀲𑁄𑀪𑀁 𑀲𑀼𑀧𑀼𑀧𑁆𑀨𑀺𑀢𑀲𑀢𑀧𑀢𑁆𑀢𑀲𑀲𑁆𑀲𑀺𑀭𑀺𑀓𑀁.

𑀅𑀦𑀼𑀫𑁄𑀤𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬…𑀧𑁂… 𑀩𑀼𑀤𑁆𑀥𑀪𑀸𑀲𑀺𑀢𑀁 𑀦𑀸𑀫 𑀚𑀸𑀢𑀦𑁆𑀢𑀺 𑀏𑀢𑁂𑀦 𑀅𑀦𑀼𑀫𑁄𑀤𑀦𑀸 𑀩𑀼𑀤𑁆𑀥𑀪𑀸𑀲𑀺𑀢𑀪𑀸𑀯𑀲𑁆𑀲 𑀓𑀸𑀭𑀡𑀦𑁆𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 𑀯𑀺𑀬 𑀤𑀺𑀲𑁆𑀲𑀢𑀺, 𑀏𑀯𑀜𑁆𑀘 𑀲𑀢𑀺 𑀓𑀣𑀸𑀯𑀢𑁆𑀣𑀼𑀲𑁆𑀲 𑀩𑀼𑀤𑁆𑀥𑀪𑀸𑀲𑀺𑀢𑀪𑀸𑀯𑁄 𑀦 𑀲𑀺𑀬𑀸 𑀅𑀦𑀦𑀼𑀫𑁄𑀤𑀺𑀢𑀢𑁆𑀢𑀸, 𑀢𑀲𑁆𑀫𑀸 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 𑁋 ‘‘𑀫𑀳𑀸𑀓𑀘𑁆𑀘𑀸𑀬𑀦𑁄 𑀏𑀯𑀁 𑀯𑀺𑀪𑀚𑀺𑀲𑁆𑀲𑀢𑀻’’𑀢𑀺 𑀤𑀺𑀲𑁆𑀯𑀸 𑀪𑀕𑀯𑀸 𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄, 𑀢𑀣𑁂𑀯 𑀘 𑀣𑁂𑀭𑁄 𑀪𑀕𑀯𑀢𑀸 𑀤𑀺𑀦𑁆𑀦𑀦𑀬𑁂𑀦 𑀞𑀧𑀺𑀢𑀫𑀸𑀢𑀺𑀓𑀸𑀬 𑀯𑀺𑀪𑀚𑀻𑀢𑀺 𑀩𑀼𑀤𑁆𑀥𑀪𑀸𑀲𑀺𑀢𑀁 𑀦𑀸𑀫 𑀚𑀸𑀢𑀁, 𑀢𑀁 𑀧𑀦 𑀅𑀦𑀼𑀫𑁄𑀤𑀦𑀸𑀬 𑀧𑀸𑀓𑀝𑀁 𑀚𑀸𑀢𑀦𑁆𑀢𑀺 𑀏𑀢𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀏𑀯𑀁 𑀲𑀢𑁆𑀣𑀸𑀭𑀸…𑀧𑁂… 𑀦𑀸𑀫 𑀚𑀸𑀢’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺.

𑀇𑀤𑀸𑀦𑀺 𑀧𑀸𑀴𑀺𑀬𑀸 𑀲𑀦𑁆𑀦𑀺𑀯𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀥𑀫𑁆𑀫𑀲𑀗𑁆𑀕𑀡𑀻𑀧𑀓𑀭𑀡𑁂’’𑀢𑀺𑀆𑀤𑀺𑀫𑀸𑀳. 𑀓𑀸𑀫𑀸𑀯𑀘𑀭𑀓𑀼𑀲𑀮𑀢𑁄 𑀅𑀝𑁆𑀞𑀸𑀢𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑁂 𑀕𑀳𑁂𑀢𑁆𑀯𑀸 𑀢𑀢𑁄 𑀅𑀝𑁆𑀞 𑀘𑀺𑀢𑁆𑀢𑀸𑀦𑀺 𑀉𑀤𑁆𑀥𑀭𑀢𑀺. 𑀧𑀞𑀫𑀸 𑀯𑀺𑀪𑀢𑁆𑀢𑀻𑀢𑀺𑀧𑀺 𑀯𑀤𑀦𑁆𑀢𑀺. 𑀏𑀓𑀽𑀦𑀦𑀯𑀼𑀢𑀺 𑀘𑀺𑀢𑁆𑀢𑀸𑀦𑀻𑀢𑀺 𑀬𑀢𑁆𑀣 𑀏𑀢𑀸𑀦𑀺 𑀘𑀺𑀢𑁆𑀢𑀸𑀦𑀺 𑀯𑀺𑀪𑀢𑁆𑀢𑀸𑀦𑀺, 𑀢𑁂 𑀧𑀸𑀴𑀺𑀧𑁆𑀧𑀤𑁂𑀲𑀸 ‘‘𑀏𑀓𑀽𑀦𑀦𑀯𑀼𑀢𑀺 𑀘𑀺𑀢𑁆𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀸. 𑀢𑁂𑀲𑀜𑁆𑀘 𑀲𑀫𑀼𑀤𑀸𑀬𑁄 𑀘𑀺𑀢𑁆𑀢𑀯𑀺𑀪𑀢𑁆𑀢𑀺, 𑀢𑀲𑁆𑀫𑀸 𑀉𑀧𑀧𑀦𑁆𑀦𑀫𑁂𑀢𑀁 ‘‘𑀏𑀓𑀽𑀦𑀦𑀯𑀼𑀢𑀺 𑀘𑀺𑀢𑁆𑀢𑀸𑀦𑀺 𑀘𑀺𑀢𑁆𑀢𑀯𑀺𑀪𑀢𑁆𑀢𑀻’’𑀢𑀺. 𑀫𑀸𑀢𑀺𑀓𑀜𑁆𑀘 𑀉𑀤𑁆𑀤𑀺𑀲𑀺𑀢𑁆𑀯𑀸 𑀢𑀢𑁆𑀣 𑀏𑀓𑁂𑀓𑀁 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀬𑀲𑁆𑀫𑀸 𑀘𑀺𑀢𑁆𑀢𑀸𑀦𑀺 𑀯𑀺𑀪𑀢𑁆𑀢𑀸𑀦𑀺, 𑀢𑀲𑁆𑀫𑀸 𑀫𑀸𑀢𑀺𑀓𑀸𑀧𑀺 𑀘𑀺𑀢𑁆𑀢𑀯𑀺𑀪𑀢𑁆𑀢𑀺𑀅𑀦𑁆𑀢𑁄𑀕𑀥𑀸𑀬𑁂𑀯𑀸𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑀁 𑀫𑀸𑀢𑀺𑀓𑀸𑀧𑀤𑀪𑀸𑀚𑀦𑀻𑀬𑀯𑀲𑁂𑀦 𑀤𑀼𑀯𑀺𑀥𑀦𑁆𑀢𑀺 𑀇𑀤𑀫𑁆𑀧𑀺 𑀯𑀘𑀦𑀁 𑀬𑀼𑀚𑁆𑀚𑀢𑀺.

𑀫𑀽𑀮𑀢𑁄𑀢𑀺 ‘‘𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁯𑁮𑁫) 𑀓𑀼𑀲𑀮𑀸𑀤𑀻𑀦𑀁 𑀫𑀽𑀮𑀯𑀲𑁂𑀦 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀘𑀦𑀁. ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 𑀔𑀦𑁆𑀥𑀢𑁄. ‘‘𑀓𑀸𑀬𑀓𑀫𑁆𑀫’’𑀦𑁆𑀢𑀺𑀆𑀤𑀺𑀦𑀸 𑀤𑁆𑀯𑀸𑀭𑀢𑁄. ‘‘𑀲𑀼𑀔𑀪𑀽𑀫𑀺𑀬𑀁 𑀓𑀸𑀫𑀸𑀯𑀘𑀭𑁂’’𑀢𑀺𑀆𑀤𑀺𑀦𑀸 (𑀥. 𑀲. 𑁯𑁮𑁮) 𑀪𑀽𑀫𑀺𑀢𑁄. 𑀅𑀢𑁆𑀣𑁄𑀢𑀺 𑀳𑁂𑀢𑀼𑀨𑀮𑀁. 𑀥𑀫𑁆𑀫𑁄𑀢𑀺 𑀳𑁂𑀢𑀼. ‘‘𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁯𑁮𑁫-𑁯𑁮𑁬) 𑀳𑁂𑀢𑀼𑀯𑀲𑁂𑀦 𑀲𑀗𑁆𑀕𑀳𑁄 𑀥𑀫𑁆𑀫𑀢𑁄 𑀦𑀺𑀓𑁆𑀔𑁂𑀧𑁄. ‘‘𑀢𑀁𑀲𑀫𑁆𑀧𑀬𑀼𑀢𑁆𑀢𑁄, 𑀢𑀁𑀲𑀫𑀼𑀝𑁆𑀞𑀸𑀦𑀸 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁯𑁮𑁫-𑁯𑁮𑁬) 𑀳𑁂𑀢𑀼𑀨𑀮𑀯𑀲𑁂𑀦 𑀲𑀗𑁆𑀕𑀳𑁄 𑀅𑀢𑁆𑀣𑀢𑁄 𑀦𑀺𑀓𑁆𑀔𑁂𑀧𑁄. 𑀅𑀣 𑀯𑀸 𑀥𑀫𑁆𑀫𑁄𑀢𑀺 𑀪𑀸𑀲𑀺𑀢𑁄. 𑀅𑀢𑁆𑀣𑁄𑀢𑀺 𑀪𑀸𑀲𑀺𑀢𑀢𑁆𑀣𑁄. ‘‘𑀢𑀬𑁄 𑀓𑀼𑀲𑀮𑀳𑁂𑀢𑀽’’𑀢𑀺 (𑀥. 𑀲. 𑁧𑁦𑁫𑁯) 𑀥𑀫𑁆𑀫𑁄. ‘‘𑀢𑀢𑁆𑀣 𑀓𑀢𑀫𑁂 𑀢𑀬𑁄 𑀓𑀼𑀲𑀮𑀳𑁂𑀢𑀽 𑀅𑀮𑁄𑀪𑁄’’𑀢𑀺𑀆𑀤𑀺 (𑀥. 𑀲. 𑁧𑁦𑁬𑁦) 𑀅𑀢𑁆𑀣𑁄, 𑀲𑁄 𑀘 𑀥𑀫𑁆𑀫𑁄. ‘‘𑀢𑀢𑁆𑀣 𑀓𑀢𑀫𑁄 𑀅𑀮𑁄𑀪𑁄’’𑀢𑀺𑀆𑀤𑀺 (𑀥. 𑀲. 𑁧𑁦𑁬𑁧) 𑀅𑀢𑁆𑀣𑁄𑀢𑀺 𑀏𑀯𑀁 𑀅𑀢𑁆𑀣𑀥𑀫𑁆𑀫𑀯𑀲𑁂𑀦 𑀦𑀺𑀓𑁆𑀔𑁂𑀧𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀸𑀫𑀢𑁄𑀢𑀺 ‘‘𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀻’’𑀢𑀺 𑀯𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀮𑁄𑀪𑁄𑀢𑀺𑀆𑀤𑀺𑀦𑀸𑀫𑀯𑀲𑁂𑀦. 𑀮𑀺𑀗𑁆𑀕𑀢𑁄𑀢𑀺 𑀉𑀤𑁆𑀤𑀺𑀝𑁆𑀞𑀲𑁆𑀲 𑀏𑀓𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 ‘‘𑀅𑀮𑁄𑀪𑁄 𑀅𑀮𑀼𑀩𑁆𑀪𑀦𑀸 𑀅𑀮𑀼𑀩𑁆𑀪𑀺𑀢𑀢𑁆𑀢’’𑀦𑁆𑀢𑀺 (𑀥. 𑀲. 𑁧𑁦𑁬𑁧) 𑀧𑀼𑀭𑀺𑀲𑀸𑀤𑀺𑀮𑀺𑀗𑁆𑀕𑀯𑀲𑁂𑀦 𑀦𑀺𑀓𑁆𑀔𑁂𑀧𑁄.

𑀕𑀡𑀦𑀘𑀸𑀭𑀦𑁆𑀢𑀺 𑀕𑀡𑀦𑀧𑁆𑀧𑀯𑀢𑁆𑀢𑀺𑀁. 𑀲𑀫𑀸𑀦𑁂𑀦𑁆𑀢𑀻𑀢𑀺 𑀲𑀫𑀸𑀦𑀁 𑀓𑀭𑁄𑀦𑁆𑀢𑀺 𑀧𑀽𑀭𑁂𑀦𑁆𑀢𑀺, 𑀢𑀣𑀸 𑀲𑀫𑀸𑀦𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣𑀸𑀧𑀺. ‘‘𑀯𑀺𑀚𑁆𑀚𑀸𑀪𑀸𑀕𑀺𑀦𑁄 𑀅𑀯𑀺𑀚𑁆𑀚𑀸𑀪𑀸𑀕𑀺𑀦𑁄’’𑀢𑀺 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁧𑁦𑁧) 𑀏𑀯𑀫𑀸𑀤𑀻𑀲𑀼 𑀏𑀢𑁆𑀣 𑀯𑀺𑀜𑁆𑀜𑀸𑀢𑁂𑀲𑀼 𑀆𑀪𑀺𑀥𑀫𑁆𑀫𑀺𑀓𑀢𑁆𑀣𑁂𑀭𑀸 𑀲𑀼𑀢𑁆𑀢𑀦𑁆𑀢𑀁 𑀲𑀼𑀡𑀦𑁆𑀢𑀸 𑀘𑀺𑀦𑁆𑀢𑁂𑀦𑁆𑀢𑀸 𑀘 𑀲𑀼𑀢𑁆𑀢𑀦𑁆𑀢𑁂𑀲𑀼 ‘‘𑀯𑀺𑀚𑁆𑀚𑀸𑀪𑀸𑀕𑀺𑀦𑁄’’𑀢𑀺𑀆𑀤𑀻𑀲𑀼 𑀆𑀕𑀢𑁂𑀲𑀼 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀢𑀢𑁆𑀢𑀸 𑀦 𑀓𑀺𑀮𑀫𑀦𑁆𑀢𑀻𑀢𑀺 𑀏𑀢𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀆𑀪𑀺𑀥𑀫𑁆𑀫𑀺𑀓𑀢𑁆𑀣𑁂𑀭𑀸𑀦𑀁…𑀧𑁂… 𑀅𑀓𑀺𑀮𑀫𑀢𑁆𑀣𑀁 𑀞𑀧𑀺𑀢𑀸’’𑀢𑀺.

𑀅𑀦𑀫𑀢𑀕𑁆𑀕𑁄𑀢𑀺 𑀅𑀜𑁆𑀜𑀸𑀢𑀕𑁆𑀕𑁄. 𑀔𑀦𑁆𑀥𑀦𑁆𑀢𑀭𑀦𑁆𑀢𑀺 𑀔𑀦𑁆𑀥𑀦𑀸𑀦𑀢𑁆𑀢𑀁, 𑀔𑀦𑁆𑀥𑀫𑁂𑀯 𑀯𑀸. 𑀕𑀳𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀲𑀡𑁆𑀳𑀁, 𑀲𑀼𑀔𑀼𑀫𑀸𑀬 𑀧𑀜𑁆𑀜𑀸𑀬 𑀕𑀳𑁂𑀢𑀩𑁆𑀩𑀢𑁄 𑀲𑀼𑀔𑀼𑀫𑀜𑁆𑀘 𑀥𑀫𑁆𑀫𑀁 𑀲𑀡𑁆𑀳𑀲𑀼𑀔𑀼𑀫𑀥𑀫𑁆𑀫𑀁. 𑀩𑀮𑀯𑀢𑀸 𑀜𑀸𑀡𑀯𑁂𑀕𑁂𑀦 𑀧𑀯𑀢𑁆𑀢𑀢𑁆𑀢𑀸 𑀩𑀮𑀯𑀢𑁄 𑀜𑀸𑀡𑀯𑁂𑀕𑀲𑁆𑀲 𑀦𑀺𑀫𑀺𑀢𑁆𑀢𑀪𑀸𑀯𑀢𑁄 𑀘 𑀩𑀮𑀯𑀁. 𑀕𑀫𑁆𑀪𑀻𑀭𑀫𑁂𑀯 𑀕𑀫𑁆𑀪𑀻𑀭𑀕𑀢𑀁, 𑀕𑀫𑁆𑀪𑀻𑀭𑀸𑀦𑀺 𑀯𑀸 𑀕𑀢𑀸𑀦𑀺 𑀕𑀫𑀦𑀸𑀦𑀺 𑀏𑀢𑀲𑁆𑀲 𑀲𑀦𑁆𑀢𑀻𑀢𑀺 𑀕𑀫𑁆𑀪𑀻𑀭𑀕𑀢𑀁. 𑀬𑀣𑀸𑀦𑀼𑀧𑀼𑀩𑁆𑀩𑀦𑁆𑀢𑀺 𑀬𑀣𑀸𑀦𑀼𑀧𑀼𑀩𑁆𑀩𑁂𑀦. 𑀦𑀺𑀔𑀺𑀮𑁂𑀦𑀸𑀢𑀺 𑀦𑀺𑀭𑀯𑀲𑁂𑀲𑁂𑀦 𑀤𑁂𑀲𑀺𑀢𑀁, 𑀧𑀜𑁆𑀘𑀔𑀺𑀮𑀭𑀳𑀺𑀢𑁂𑀦 𑀯𑀸 𑀪𑀕𑀯𑀢𑀸 𑀤𑁂𑀲𑀺𑀢𑀁. 𑀭𑀽𑀧𑀕𑀢𑀁𑀯𑀸𑀢𑀺 𑀳𑀢𑁆𑀣𑀕𑀢𑀁 𑀭𑀽𑀧𑀁 𑀯𑀺𑀬 𑀘𑀓𑁆𑀔𑀼𑀦𑀸. ‘‘𑀧𑀝𑀺𑀯𑁂𑀥𑀜𑀸𑀡𑁂𑀦 𑀲𑀫𑀦𑁆𑀢𑀧𑀝𑁆𑀞𑀸𑀦𑀁 𑀬𑁄 𑀧𑀲𑁆𑀲𑀢𑀺, 𑀲𑁄 𑀅𑀢𑁆𑀣𑁂𑀯, 𑀦𑁄 𑀦𑀢𑁆𑀣𑀻’’𑀢𑀺 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 𑀣𑁂𑀭𑁄 𑀯𑀤𑀢𑀻𑀢𑀺.

𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑁂 𑀆𑀕𑀢𑁂𑀲𑀼 𑀏𑀓𑀸𑀥𑀺𑀓𑁂𑀲𑀼 𑀅𑀝𑁆𑀞𑀲𑀼 𑀓𑀺𑀮𑁂𑀲𑀲𑀢𑁂𑀲𑀼 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀅𑀧𑀦𑁂𑀢𑁆𑀯𑀸 𑀲𑁂𑀲𑀸 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄 𑀘 𑀉𑀧𑁆𑀧𑀦𑁆𑀦𑀸𑀦𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀤𑀺𑀕𑀼𑀡𑀺𑀢𑀸𑀦𑀺 𑀤𑀺𑀬𑀟𑁆𑀠𑀓𑀺𑀮𑁂𑀲𑀲𑀳𑀲𑁆𑀲𑀸𑀦𑀺 𑀤𑀲𑀸𑀥𑀺𑀓𑀸𑀦𑀺 𑀳𑁄𑀦𑁆𑀢𑀺, 𑀅𑀧𑁆𑀧𑀓𑀁 𑀧𑀦 𑀊𑀦𑀫𑀥𑀺𑀓𑀁 𑀯𑀸 𑀦 𑀕𑀡𑀦𑀽𑀧𑀕𑀁 𑀳𑁄𑀢𑀻𑀢𑀺 ‘‘𑀤𑀺𑀬𑀟𑁆𑀠𑀓𑀺𑀮𑁂𑀲𑀲𑀳𑀲𑁆𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀢𑀭𑁂𑀲𑀁 𑀅𑀢𑀻𑀢𑀸𑀤𑀺𑀪𑀸𑀯𑀸𑀫𑀲𑀦𑀸 𑀅𑀕𑁆𑀕𑀳𑀡𑀁 𑀔𑁂𑀧𑀦𑁂 𑀤𑀝𑁆𑀞𑀩𑁆𑀩𑀁.

𑀫𑁂𑀘𑀓𑀧𑀝𑀸𑀢𑀺 𑀦𑀻𑀮𑀦𑀺𑀪𑀸 𑀧𑀝𑀸. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀯𑀡𑁆𑀡𑀥𑀸𑀢𑀽𑀢𑀺 𑀘𑀺𑀢𑁆𑀢𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀸 𑀯𑀡𑁆𑀡𑀥𑀸𑀢𑀽𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀓𑀲𑁆𑀫𑀸? 𑀦 𑀳𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀩𑀳𑀺 𑀦𑀺𑀕𑀘𑁆𑀙𑀢𑀻𑀢𑀺, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀧𑀭𑀫𑁆𑀧𑀭𑀸𑀬 𑀆𑀕𑀢𑀢𑁆𑀢𑀸 𑀧𑀦 𑀏𑀯𑀁 𑀯𑀼𑀢𑁆𑀢𑀁. 𑀅𑀣 𑀯𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀯𑀡𑁆𑀡𑀥𑀸𑀢𑀽𑀢𑀺 𑀏𑀢𑁆𑀣 𑀧𑀘𑁆𑀘𑀬𑀉𑀢𑀼𑀲𑀤𑁆𑀤𑀸𑀦𑀁 𑀮𑁄𑀧𑀁 𑀓𑀢𑁆𑀯𑀸 𑀲𑁄𑀬𑁂𑀯 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄 𑀅𑀢𑁆𑀣𑁄 𑀲𑀼𑀯𑀡𑁆𑀡𑀢𑀸 𑀲𑀼𑀲𑁆𑀲𑀭𑀢𑀸 𑀯𑀺𑀬. 𑀏𑀢𑁆𑀣 𑀳𑀺 ‘‘𑀲𑀼𑀲𑁆𑀲𑀭𑀢𑀸’’𑀢𑀺 𑀉𑀧𑀸𑀤𑀺𑀦𑁆𑀦𑀓𑀸𑀥𑀺𑀓𑀸𑀭𑁂 𑀆𑀕𑀢𑀁, 𑀦 𑀘 𑀲𑀤𑁆𑀤𑁄 𑀉𑀧𑀸𑀤𑀺𑀦𑁆𑀦𑀓𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀉𑀧𑀸𑀤𑀺𑀦𑁆𑀦𑀓𑀭𑀽𑀧𑀑𑀝𑁆𑀞𑀢𑀸𑀮𑀼𑀆𑀤𑀺𑀦𑀺𑀲𑁆𑀲𑀬𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺, 𑀏𑀯𑀫𑁂𑀢𑁆𑀣𑀸𑀧𑀺 𑀘𑀺𑀢𑁆𑀢𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀯𑀡𑁆𑀡𑀥𑀸𑀢𑀽’’𑀢𑀺 𑀯𑀤𑀢𑀺.

𑀓𑀸𑀬𑀲𑀓𑁆𑀔𑀺𑀦𑁆𑀢𑀺 𑀧𑀘𑁆𑀘𑀓𑁆𑀔𑀁. 𑀤𑀦𑁆𑀢𑀸𑀯𑀭𑀡𑀦𑁆𑀢𑀺 𑀑𑀝𑁆𑀞𑀤𑁆𑀯𑀬𑀁. 𑀫𑀼𑀔𑀸𑀤𑀸𑀦𑀦𑁆𑀢𑀺 𑀫𑀼𑀔𑀯𑀺𑀯𑀭𑀁. 𑀲𑀺𑀮𑀺𑀝𑁆𑀞𑀦𑁆𑀢𑀺 𑀲𑀁𑀕𑀢𑀁 𑀲𑀼𑀲𑀡𑁆𑀞𑀺𑀢𑀁. 𑀲𑀭𑁂 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸𑀢𑀺 ‘‘𑀥𑀫𑁆𑀫𑁄 𑀏𑀲𑁄 𑀯𑀼𑀘𑁆𑀘𑀢𑀻’’𑀢𑀺 𑀥𑀫𑁆𑀫𑀲𑁆𑀲𑀭𑀯𑀲𑁂𑀦 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸, 𑀦 𑀓𑀺𑀮𑁂𑀲𑀸𑀦𑀼𑀩𑁆𑀬𑀜𑁆𑀚𑀦𑀯𑀲𑁂𑀦. 𑀏𑀓𑀧𑁆𑀧𑀳𑀸𑀭𑁂𑀦𑀸𑀢𑀺 𑀏𑀢𑁆𑀣 𑀧𑀳𑀸𑀭𑁄𑀢𑀺 𑀤𑀺𑀯𑀲𑀲𑁆𑀲 𑀢𑀢𑀺𑀬𑁄 𑀪𑀸𑀕𑁄 𑀯𑀼𑀘𑁆𑀘𑀢𑀺. 𑀏𑀯𑀁 𑀲𑀦𑁆𑀢𑁂𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑀕𑁆𑀕𑀳𑁂𑀢𑁆𑀯𑀸 𑀯𑀸𑀘𑀦𑀸𑀫𑀕𑁆𑀕𑀲𑁆𑀲 𑀣𑁂𑀭𑀧𑁆𑀧𑀪𑀯𑀢𑁆𑀢𑀯𑀘𑀦𑀫𑁂𑀯 𑀕𑀳𑁂𑀢𑁆𑀯𑀸 𑀢𑁂𑀦 𑀧𑀼𑀭𑀺𑀫𑀯𑀘𑀦𑀜𑁆𑀘 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀘𑁄𑀤𑁂𑀢𑀺.

𑀢𑁂𑀦𑁂𑀢𑀫𑁂𑀢𑀲𑁆𑀲𑀸𑀢𑀺 𑀯𑀺𑀦𑀬𑀲𑁆𑀲. 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀸𑀤𑀺𑀪𑁂𑀤𑁂𑀢𑀺 𑀬𑁄 𑀢𑀁 𑀲𑀼𑀢𑁆𑀢𑀁 𑀲𑀚𑁆𑀛𑀸𑀬𑀢𑀺 𑀲𑀼𑀡𑀸𑀢𑀺 𑀯𑀸𑀘𑁂𑀢𑀺 𑀘𑀺𑀦𑁆𑀢𑁂𑀢𑀺 𑀤𑁂𑀲𑁂𑀢𑀺, 𑀲𑀼𑀢𑁆𑀢𑁂𑀦 𑀲𑀗𑁆𑀕𑀳𑀺𑀢𑁄 𑀲𑀻𑀮𑀸𑀤𑀺𑀅𑀢𑁆𑀣𑁄 𑀢𑀲𑁆𑀲𑀧𑀺 𑀳𑁄𑀢𑀺, 𑀢𑁂𑀦 𑀧𑀭𑀲𑁆𑀲 𑀲𑀸𑀥𑁂𑀢𑀩𑁆𑀩𑀢𑁄 𑀧𑀭𑀲𑁆𑀲𑀧𑀺 𑀳𑁄𑀢𑀻𑀢𑀺 𑀢𑀤𑀼𑀪𑀬𑀁 𑀢𑀁 𑀲𑀼𑀢𑁆𑀢𑀁 𑀲𑀽𑀘𑁂𑀢𑀺 𑀤𑀻𑀧𑁂𑀢𑀺. 𑀢𑀣𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀢𑁆𑀣𑁂𑀢𑀺 𑀏𑀯𑀫𑀸𑀤𑀺𑀪𑁂𑀤𑁂 𑀅𑀢𑁆𑀣𑁂 𑀆𑀤𑀺𑀲𑀤𑁆𑀤𑁂𑀦 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀢𑁆𑀣𑀲𑀤𑁆𑀤𑁄 𑀘𑀸𑀬𑀁 𑀳𑀺𑀢𑀧𑀭𑀺𑀬𑀸𑀬𑀯𑀘𑀦𑀁, 𑀦 𑀪𑀸𑀲𑀺𑀢𑀢𑁆𑀣𑀯𑀘𑀦𑀁. 𑀬𑀤𑀺 𑀲𑀺𑀬𑀸, 𑀲𑀼𑀢𑁆𑀢𑀁 𑀅𑀢𑁆𑀢𑀦𑁄𑀧𑀺 𑀪𑀸𑀲𑀺𑀢𑀢𑁆𑀣𑀁 𑀲𑀽𑀘𑁂𑀢𑀺 𑀧𑀭𑀲𑀼𑀢𑁆𑀢𑀲𑁆𑀲𑀧𑀻𑀢𑀺 𑀅𑀬𑀫𑀢𑁆𑀣𑁄 𑀲𑀺𑀬𑀸, 𑀲𑀼𑀢𑁆𑀢𑁂𑀦 𑀘 𑀬𑁄 𑀅𑀢𑁆𑀣𑁄 𑀧𑀓𑀸𑀲𑀺𑀢𑁄, 𑀲𑁄 𑀢𑀲𑁆𑀲𑁂𑀯 𑀳𑁄𑀢𑀻𑀢𑀺 𑀦 𑀢𑁂𑀦 𑀧𑀭𑀢𑁆𑀣𑁄 𑀲𑀽𑀘𑀺𑀢𑁄 𑀳𑁄𑀢𑀺, 𑀢𑁂𑀦 𑀘 𑀲𑀽𑀘𑁂𑀢𑀩𑁆𑀩𑀲𑁆𑀲 𑀧𑀭𑀢𑁆𑀣𑀲𑁆𑀲 𑀦𑀺𑀯𑀢𑁆𑀢𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀸 𑀅𑀢𑁆𑀢𑀕𑁆𑀕𑀳𑀡𑀁 𑀦 𑀓𑀢𑁆𑀢𑀩𑁆𑀩𑀁, 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀪𑀸𑀲𑀺𑀢𑀢𑁆𑀣𑀲𑁆𑀲 𑀅𑀪𑀸𑀯𑀸 𑀆𑀤𑀺𑀕𑁆𑀕𑀳𑀡𑀜𑁆𑀘 𑀦 𑀓𑀢𑁆𑀢𑀩𑁆𑀩𑀁, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀼𑀢𑁆𑀢𑁂 𑀅𑀲𑀫𑁆𑀪𑀯𑀢𑁄 𑀲𑀼𑀢𑁆𑀢𑀸𑀥𑀸𑀭𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀸 𑀯𑀼𑀢𑁆𑀢𑀸.

𑀅𑀣 𑀯𑀸 𑀲𑀼𑀢𑁆𑀢𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀬𑁂 𑀅𑀢𑁆𑀢𑀢𑁆𑀣𑀸𑀤𑀬𑁄𑀧𑀺 𑀅𑀢𑁆𑀣𑀧𑁆𑀧𑀪𑁂𑀤𑀸 𑀯𑀼𑀢𑁆𑀢𑀸 𑀦𑀺𑀤𑁆𑀤𑁂𑀲𑁂 (𑀫𑀳𑀸𑀦𑀺. 𑁬𑁯; 𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁫) ‘‘𑀅𑀢𑁆𑀢𑀢𑁆𑀣𑁄 𑀧𑀭𑀢𑁆𑀣𑁄 𑀉𑀪𑀬𑀢𑁆𑀣𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀅𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄 𑀅𑀢𑁆𑀣𑁄 𑀉𑀢𑁆𑀢𑀸𑀦𑁄 𑀅𑀢𑁆𑀣𑁄 𑀕𑀫𑁆𑀪𑀻𑀭𑁄 𑀅𑀢𑁆𑀣𑁄 𑀕𑀼𑀴𑁆𑀳𑁄 𑀅𑀢𑁆𑀣𑁄 𑀧𑀝𑀺𑀘𑁆𑀙𑀦𑁆𑀦𑁄 𑀅𑀢𑁆𑀣𑁄 𑀦𑁂𑀬𑁆𑀬𑁄 𑀅𑀢𑁆𑀣𑁄 𑀦𑀻𑀢𑁄 𑀅𑀢𑁆𑀣𑁄 𑀅𑀦𑀯𑀚𑁆𑀚𑁄 𑀅𑀢𑁆𑀣𑁄 𑀦𑀺𑀓𑁆𑀓𑀺𑀮𑁂𑀲𑁄 𑀅𑀢𑁆𑀣𑁄 𑀯𑁄𑀤𑀸𑀦𑁄 𑀅𑀢𑁆𑀣𑁄 𑀧𑀭𑀫𑀢𑁆𑀣𑁄 𑀅𑀢𑁆𑀣𑁄’’𑀢𑀺, 𑀢𑁂 𑀲𑀼𑀢𑁆𑀢𑀁 𑀲𑀽𑀘𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 ‘‘𑀅𑀢𑁆𑀢𑀦𑀸 𑀘 𑀅𑀧𑁆𑀧𑀺𑀘𑁆𑀙𑁄 𑀳𑁄𑀢𑀻’’𑀢𑀺 𑀅𑀢𑁆𑀢𑀢𑁆𑀣𑀁, ‘‘𑀅𑀧𑁆𑀧𑀺𑀘𑁆𑀙𑀓𑀣𑀜𑁆𑀘 𑀧𑀭𑁂𑀲𑀁 𑀓𑀢𑁆𑀢𑀸 𑀳𑁄𑀢𑀻’’𑀢𑀺 𑀧𑀭𑀢𑁆𑀣𑀁 𑀲𑀽𑀘𑁂𑀢𑀻𑀢𑀺. 𑀏𑀯𑀁 ‘‘𑀅𑀢𑁆𑀢𑀦𑀸 𑀘 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺𑀆𑀤𑀺𑀲𑀼𑀢𑁆𑀢𑀸𑀦𑀺 (𑀅. 𑀦𑀺. 𑁪.𑁯𑁯) 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀯𑀺𑀦𑀬𑀸𑀪𑀺𑀥𑀫𑁆𑀫𑁂𑀳𑀺 𑀘 𑀯𑀺𑀲𑁂𑀲𑁂𑀢𑁆𑀯𑀸 𑀲𑀼𑀢𑁆𑀢𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄, 𑀢𑀲𑁆𑀫𑀸 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑀧𑁆𑀧𑀯𑀢𑁆𑀢𑀸𑀬 𑀤𑁂𑀲𑀦𑀸𑀬 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀸𑀤𑀻𑀦𑀺 𑀲𑀸𑀢𑀺𑀲𑀬𑀁 𑀧𑀓𑀸𑀲𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀦 𑀆𑀡𑀸𑀥𑀫𑁆𑀫𑀲𑀪𑀸𑀯𑀯𑀲𑀧𑁆𑀧𑀯𑀢𑁆𑀢𑀸𑀬𑀸𑀢𑀺 𑀇𑀤𑀫𑁂𑀯 ‘‘𑀅𑀢𑁆𑀣𑀸𑀦𑀁 𑀲𑀽𑀘𑀦𑀢𑁄 𑀲𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀲𑀼𑀢𑁆𑀢𑁂 𑀘 𑀆𑀡𑀸𑀥𑀫𑁆𑀫𑀲𑀪𑀸𑀯𑀸 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀁 𑀅𑀦𑀼𑀯𑀢𑁆𑀢𑀦𑁆𑀢𑀺, 𑀦 𑀯𑀺𑀦𑀬𑀸𑀪𑀺𑀥𑀫𑁆𑀫𑁂𑀲𑀼 𑀯𑀺𑀬 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑁄 𑀆𑀡𑀸𑀥𑀫𑁆𑀫𑀲𑀪𑀸𑀯𑁂 𑀅𑀦𑀼𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀯𑁂𑀦𑁂𑀬𑁆𑀬𑀸𑀦𑀁 𑀏𑀓𑀦𑁆𑀢𑀳𑀺𑀢𑀧𑀝𑀺𑀮𑀸𑀪𑀲𑀁𑀯𑀢𑁆𑀢𑀦𑀺𑀓𑀸 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸 𑀳𑁄𑀢𑀻𑀢𑀺 ‘‘𑀲𑀼𑀯𑀼𑀢𑁆𑀢𑀸 𑀘𑁂𑀢𑁆𑀣 𑀅𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀲𑀯𑀢𑀻𑀢𑀺 𑀨𑀮𑀢𑀺. ‘‘𑀲𑀼𑀢𑁆𑀢𑀸𑀡𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 ‘‘𑀲𑀼𑀝𑁆𑀞𑀼 𑀘 𑀦𑁂 𑀢𑀸𑀬𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀸𑀤𑀺𑀯𑀺𑀥𑀸𑀦𑁂𑀲𑀼 𑀘 𑀲𑀼𑀢𑁆𑀢𑀲𑁆𑀲 𑀧𑀫𑀸𑀡𑀪𑀸𑀯𑁄 𑀢𑁂𑀲𑀜𑁆𑀘 𑀲𑀗𑁆𑀕𑀸𑀳𑀓𑀢𑁆𑀢𑀁 𑀬𑁄𑀚𑁂𑀢𑀩𑁆𑀩𑀁, 𑀢𑀤𑀢𑁆𑀣𑀧𑁆𑀧𑀓𑀸𑀲𑀦𑁂 𑀧𑀥𑀸𑀦𑀢𑁆𑀢𑀸 𑀲𑀼𑀢𑁆𑀢𑀲𑁆𑀲 𑀇𑀢𑀭𑁂𑀳𑀺 𑀯𑀺𑀲𑁂𑀲𑀦𑀜𑁆𑀘. 𑀏𑀢𑀦𑁆𑀢𑀺 ‘‘𑀅𑀢𑁆𑀣𑀸𑀦𑀁 𑀲𑀽𑀘𑀦𑀢𑁄’’𑀢𑀺𑀆𑀤𑀺𑀓𑀁 𑀅𑀢𑁆𑀣𑀯𑀘𑀦𑀁. 𑀏𑀢𑀲𑁆𑀲𑀸𑀢𑀺 𑀲𑀼𑀢𑁆𑀢𑀲𑁆𑀲.

𑀅𑀪𑀺𑀓𑁆𑀓𑀫𑀦𑁆𑀢𑀻𑀢𑀺 𑀏𑀢𑁆𑀣 𑀅𑀪𑀺-𑀲𑀤𑁆𑀤𑁄 𑀓𑀫𑀦𑀲𑁆𑀲 𑀯𑀼𑀤𑁆𑀥𑀺𑀪𑀸𑀯𑀁 𑀅𑀢𑀺𑀭𑁂𑀓𑀢𑁆𑀢𑀁 𑀤𑀻𑀧𑁂𑀢𑀺. 𑀅𑀪𑀺𑀓𑁆𑀓𑀦𑁆𑀢𑁂𑀦𑀸𑀢𑀺 𑀘 𑀏𑀢𑁆𑀣 𑀓𑀦𑁆𑀢𑀺𑀬𑀸 𑀅𑀥𑀺𑀓𑀢𑁆𑀢𑀁 𑀯𑀺𑀲𑁂𑀲𑀪𑀸𑀯𑀦𑁆𑀢𑀺 𑀬𑀼𑀢𑁆𑀢𑀁 𑀓𑀺𑀭𑀺𑀬𑀸𑀯𑀺𑀲𑁂𑀲𑀓𑀢𑁆𑀢𑀸 𑀉𑀧𑀲𑀕𑁆𑀕𑀲𑁆𑀲. 𑀅𑀪𑀺𑀜𑁆𑀜𑀸𑀢𑀸, 𑀅𑀪𑀺𑀭𑀸𑀚𑀸, 𑀅𑀪𑀺𑀯𑀺𑀦𑀬𑁂𑀢𑀺 𑀏𑀢𑁆𑀣 𑀮𑀓𑁆𑀔𑀡𑀧𑀽𑀚𑀺𑀢𑀧𑀭𑀺𑀘𑁆𑀙𑀺𑀦𑁆𑀦𑁂𑀲𑀼 𑀭𑀢𑁆𑀢𑀺𑀆𑀤𑀻𑀲𑀼 𑀅𑀪𑀺-𑀲𑀤𑁆𑀤𑁄 𑀯𑀢𑁆𑀢𑀢𑀻𑀢𑀺 𑀓𑀣𑀫𑁂𑀢𑀁 𑀬𑀼𑀚𑁆𑀚𑁂𑀬𑁆𑀬𑀸𑀢𑀺? 𑀮𑀓𑁆𑀔𑀡𑀓𑀭𑀡𑀜𑀸𑀡𑀧𑀽𑀚𑀦𑀧𑀭𑀺𑀘𑁆𑀙𑁂𑀤𑀓𑀺𑀭𑀺𑀬𑀸𑀤𑀻𑀧𑀦𑀢𑁄 𑀢𑀸𑀳𑀺 𑀘 𑀓𑀺𑀭𑀺𑀬𑀸𑀳𑀺 𑀭𑀢𑁆𑀢𑀺𑀭𑀸𑀚𑀯𑀺𑀦𑀬𑀸𑀦𑀁 𑀬𑀼𑀢𑁆𑀢𑀢𑁆𑀢𑀸. 𑀪𑀸𑀯𑀦𑀸𑀨𑀭𑀡𑀯𑀼𑀤𑁆𑀥𑀻𑀳𑀺 𑀯𑀼𑀤𑁆𑀥𑀺𑀫𑀦𑁆𑀢𑁄. 𑀆𑀭𑀫𑁆𑀫𑀡𑀸𑀤𑀻𑀳𑀻𑀢𑀺 𑀆𑀭𑀫𑁆𑀫𑀡𑀲𑀫𑁆𑀧𑀬𑀼𑀢𑁆𑀢𑀓𑀫𑁆𑀫𑀤𑁆𑀯𑀸𑀭𑀧𑀝𑀺𑀧𑀤𑀸𑀤𑀻𑀳𑀺. 𑀅𑀯𑀺𑀲𑀺𑀝𑁆𑀞𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀯𑀺𑀲𑀺𑀝𑁆𑀞𑁂𑀲𑀼 𑀯𑀺𑀦𑀬𑀲𑀼𑀢𑁆𑀢𑀦𑁆𑀢𑀸𑀪𑀺𑀥𑀫𑁆𑀫𑁂𑀲𑀼 𑀅𑀯𑀺𑀲𑀺𑀝𑁆𑀞𑀁 𑀲𑀫𑀸𑀦𑀁 𑀧𑀺𑀝𑀓𑀲𑀤𑁆𑀤𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸𑀯𑀼𑀢𑁆𑀢𑁂𑀦𑁂𑀯𑀸𑀢𑀺 ‘‘𑀏𑀯𑀁 𑀤𑀼𑀯𑀺𑀥𑀢𑁆𑀣𑁂𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦.

𑀓𑀣𑁂𑀢𑀩𑁆𑀩𑀸𑀦𑀁 𑀅𑀢𑁆𑀣𑀸𑀦𑀁 𑀤𑁂𑀲𑀓𑀸𑀬𑀢𑁆𑀢𑁂𑀦 𑀆𑀡𑀸𑀤𑀺𑀯𑀺𑀥𑀺𑀦𑀸 𑀅𑀢𑀺𑀲𑀚𑁆𑀚𑀦𑀁 𑀧𑀩𑁄𑀥𑀦𑀁 𑀤𑁂𑀲𑀦𑀸. 𑀲𑀸𑀲𑀺𑀢𑀩𑁆𑀩𑀧𑀼𑀕𑁆𑀕𑀮𑀕𑀢𑁂𑀦 𑀬𑀣𑀸𑀧𑀭𑀸𑀥𑀸𑀤𑀺𑀦𑀸 𑀲𑀸𑀲𑀺𑀢𑀩𑁆𑀩𑀪𑀸𑀯𑁂𑀦 𑀅𑀦𑀼𑀲𑀸𑀲𑀦𑀁 𑀯𑀺𑀦𑀬𑀦𑀁 𑀲𑀸𑀲𑀦𑀁. 𑀓𑀣𑁂𑀢𑀩𑁆𑀩𑀲𑁆𑀲 𑀲𑀁𑀯𑀭𑀸𑀲𑀁𑀯𑀭𑀸𑀤𑀺𑀦𑁄 𑀅𑀢𑁆𑀣𑀲𑁆𑀲 𑀓𑀣𑀦𑀁 𑀯𑀘𑀦𑀧𑀝𑀺𑀩𑀤𑁆𑀥𑀓𑀭𑀡𑀁 𑀓𑀣𑀸. 𑀪𑁂𑀤-𑀲𑀤𑁆𑀤𑁄 𑀯𑀺𑀲𑀼𑀁 𑀯𑀺𑀲𑀼𑀁 𑀬𑁄𑀚𑁂𑀢𑀩𑁆𑀩𑁄 ‘‘𑀤𑁂𑀲𑀦𑀸𑀪𑁂𑀤𑀁 𑀲𑀸𑀲𑀦𑀪𑁂𑀤𑀁 𑀓𑀣𑀸𑀪𑁂𑀤𑀜𑁆𑀘 𑀬𑀣𑀸𑀭𑀳𑀁 𑀧𑀭𑀺𑀤𑀻𑀧𑀬𑁂’’𑀢𑀺. 𑀪𑁂𑀤𑀦𑁆𑀢𑀺 𑀦𑀸𑀦𑀢𑁆𑀢𑀁, 𑀦𑀸𑀦𑀸𑀓𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀲𑀺𑀓𑁆𑀔𑀸 𑀘 𑀧𑀳𑀸𑀦𑀸𑀦𑀺 𑀘 𑀕𑀫𑁆𑀪𑀻𑀭𑀪𑀸𑀯𑁄 𑀘 𑀲𑀺𑀓𑁆𑀔𑀸𑀧𑀳𑀸𑀦𑀕𑀫𑁆𑀪𑀻𑀭𑀪𑀸𑀯𑀁, 𑀢𑀜𑁆𑀘 𑀧𑀭𑀺𑀤𑀻𑀧𑀬𑁂. 𑀬𑀦𑁆𑀢𑀺 𑀧𑀭𑀺𑀬𑀢𑁆𑀢𑀺𑀆𑀤𑀺𑀁. 𑀬𑀣𑀸𑀢𑀺 𑀉𑀧𑀸𑀭𑀫𑁆𑀪𑀸𑀤𑀺𑀳𑁂𑀢𑀼 𑀧𑀭𑀺𑀬𑀸𑀧𑀼𑀡𑀦𑀸𑀤𑀺𑀧𑁆𑀧𑀓𑀸𑀭𑁂𑀳𑀺.

𑀢𑀻𑀲𑀼𑀧𑀺 𑀘𑁂𑀢𑁂𑀲𑀼 𑀏𑀢𑁂 𑀥𑀫𑁆𑀫𑀢𑁆𑀣𑀤𑁂𑀲𑀦𑀸𑀧𑀝𑀺𑀯𑁂𑀥𑀸𑀢𑀺 𑀏𑀢𑁆𑀣 𑀢𑀦𑁆𑀢𑀺𑀅𑀢𑁆𑀣𑁄 𑀢𑀦𑁆𑀢𑀺𑀤𑁂𑀲𑀦𑀸 𑀢𑀦𑁆𑀢𑀺𑀅𑀢𑁆𑀣𑀧𑀝𑀺𑀯𑁂𑀥𑁄 𑀘 𑀢𑀦𑁆𑀢𑀺𑀯𑀺𑀲𑀬𑀸 𑀳𑁄𑀦𑁆𑀢𑀻𑀢𑀺 𑀯𑀺𑀦𑀬𑀧𑀺𑀝𑀓𑀸𑀤𑀻𑀦𑀁 𑀅𑀢𑁆𑀣𑀤𑁂𑀲𑀦𑀸𑀧𑀝𑀺𑀯𑁂𑀥𑀸𑀥𑀸𑀭𑀪𑀸𑀯𑁄 𑀬𑀼𑀢𑁆𑀢𑁄, 𑀧𑀺𑀝𑀓𑀸𑀦𑀺 𑀧𑀦 𑀢𑀦𑁆𑀢𑀺𑀬𑁄𑀬𑁂𑀯𑀸𑀢𑀺 𑀥𑀫𑁆𑀫𑀸𑀥𑀸𑀭𑀪𑀸𑀯𑁄 𑀓𑀣𑀁 𑀬𑀼𑀚𑁆𑀚𑁂𑀬𑁆𑀬𑀸𑀢𑀺? 𑀢𑀦𑁆𑀢𑀺𑀲𑀫𑀼𑀤𑀸𑀬𑀲𑁆𑀲 𑀅𑀯𑀬𑀯𑀢𑀦𑁆𑀢𑀺𑀬𑀸 𑀆𑀥𑀸𑀭𑀪𑀸𑀯𑀢𑁄, 𑀥𑀫𑁆𑀫𑀸𑀤𑀻𑀦𑀜𑁆𑀘 𑀤𑀼𑀓𑁆𑀔𑁄𑀕𑀸𑀳𑀪𑀸𑀯𑀢𑁄 𑀢𑁂𑀳𑀺 𑀯𑀺𑀦𑀬𑀸𑀤𑀬𑁄 𑀕𑀫𑁆𑀪𑀻𑀭𑀸𑀢𑀺 𑀯𑀺𑀦𑀬𑀸𑀤𑀻𑀦𑀜𑁆𑀘 𑀘𑀢𑀼𑀩𑁆𑀩𑀺𑀥𑁄 𑀕𑀫𑁆𑀪𑀻𑀭𑀪𑀸𑀯𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀸 ‘‘𑀥𑀫𑁆𑀫𑀸𑀤𑀬𑁄 𑀏𑀯 𑀤𑀼𑀓𑁆𑀔𑁄𑀕𑀸𑀳𑀢𑁆𑀢𑀸 𑀕𑀫𑁆𑀪𑀻𑀭𑀸, 𑀦 𑀯𑀺𑀦𑀬𑀸𑀤𑀬𑁄’’𑀢𑀺 𑀦 𑀘𑁄𑀤𑁂𑀢𑀩𑁆𑀩𑀫𑁂𑀢𑀁. 𑀢𑀢𑁆𑀣 𑀧𑀝𑀺𑀯𑁂𑀥𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀢𑁄 𑀥𑀫𑁆𑀫𑀢𑁆𑀣𑀸𑀦𑀁, 𑀤𑁂𑀲𑀦𑀸𑀜𑀸𑀡𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀢𑁄 𑀤𑁂𑀲𑀦𑀸𑀬 𑀘 𑀤𑀼𑀓𑁆𑀔𑁄𑀕𑀸𑀳𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀝𑀺𑀯𑁂𑀥𑀲𑁆𑀲 𑀧𑀦 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀢𑀩𑁆𑀩𑀺𑀲𑀬𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸 𑀘 𑀤𑀼𑀓𑁆𑀓𑀭𑀪𑀸𑀯𑀢𑁄 𑀤𑀼𑀓𑁆𑀔𑁄𑀕𑀸𑀳𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀏𑀢𑁂𑀦 𑀯𑀘𑀦𑀢𑁆𑀣𑁂𑀦 𑀥𑀫𑁆𑀫𑀲𑁆𑀲 𑀳𑁂𑀢𑀼𑀪𑀸𑀯𑁄 𑀓𑀣𑀁 𑀜𑀸𑀢𑀩𑁆𑀩𑁄𑀢𑀺? ‘‘𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀏𑀢𑀲𑁆𑀲 𑀲𑀫𑀸𑀲𑀧𑀤𑀲𑁆𑀲 𑀅𑀯𑀬𑀯𑀧𑀤𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀳𑁂𑀢𑀼𑀫𑁆𑀳𑀺 𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸. ‘‘𑀥𑀫𑁆𑀫𑁂 𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀏𑀢𑁆𑀣 𑀳𑀺 ‘‘𑀥𑀫𑁆𑀫𑁂’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀳𑁂𑀢𑀼𑀫𑁆𑀳𑀻’’𑀢𑀺 𑀯𑀼𑀢𑁆𑀢𑀁, ‘‘𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀏𑀢𑀲𑁆𑀲 𑀘 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀜𑀸𑀡’’𑀦𑁆𑀢𑀺, 𑀢𑀲𑁆𑀫𑀸 𑀳𑁂𑀢𑀼𑀥𑀫𑁆𑀫𑀲𑀤𑁆𑀤𑀸 𑀏𑀓𑀢𑁆𑀣𑀸 𑀜𑀸𑀡𑀧𑀝𑀺𑀲𑀫𑁆𑀪𑀺𑀤𑀸𑀲𑀤𑁆𑀤𑀸 𑀘𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁂𑀦 𑀲𑀸𑀥𑀺𑀢𑁄 𑀥𑀫𑁆𑀫𑀲𑁆𑀲 𑀳𑁂𑀢𑀼𑀪𑀸𑀯𑁄. 𑀅𑀢𑁆𑀣𑀲𑁆𑀲 𑀳𑁂𑀢𑀼𑀨𑀮𑀪𑀸𑀯𑁄 𑀘 𑀏𑀯𑀫𑁂𑀯 𑀤𑀝𑁆𑀞𑀩𑁆𑀩𑁄. 𑀬𑀣𑀸𑀥𑀫𑁆𑀫𑀦𑁆𑀢𑀺 𑀏𑀢𑁆𑀣 𑀥𑀫𑁆𑀫-𑀲𑀤𑁆𑀤𑁄 𑀳𑁂𑀢𑀼𑀁 𑀳𑁂𑀢𑀼𑀨𑀮𑀜𑁆𑀘 𑀲𑀩𑁆𑀩𑀁 𑀕𑀡𑁆𑀳𑀸𑀢𑀺. 𑀲𑀪𑀸𑀯𑀯𑀸𑀘𑀓𑁄 𑀳𑁂𑀲, 𑀦 𑀧𑀭𑀺𑀬𑀢𑁆𑀢𑀺𑀳𑁂𑀢𑀼𑀪𑀸𑀯𑀯𑀸𑀘𑀓𑁄, 𑀢𑀲𑁆𑀫𑀸 𑀬𑀣𑀸𑀥𑀫𑁆𑀫𑀦𑁆𑀢𑀺 𑀬𑁄 𑀬𑁄 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀤𑀺𑀥𑀫𑁆𑀫𑁄, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀦𑁆𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀸𑀪𑀺𑀮𑀸𑀧𑁄𑀢𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀓𑁄 𑀅𑀯𑀺𑀧𑀭𑀻𑀢𑀸𑀪𑀺𑀮𑀸𑀧𑁄. 𑀏𑀢𑁂𑀦 ‘‘𑀢𑀢𑁆𑀭 𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁧𑁮-𑁭𑁨𑁦) 𑀏𑀢𑁆𑀣 𑀯𑀼𑀢𑁆𑀢𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀅𑀦𑀼𑀮𑁄𑀫𑀸𑀤𑀺𑀯𑀲𑁂𑀦 𑀯𑀸 𑀓𑀣𑀦𑀦𑁆𑀢𑀺 𑀏𑀢𑁂𑀦 𑀢𑀲𑁆𑀲𑀸 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀬𑀸 𑀅𑀪𑀺𑀮𑀸𑀧𑀁 𑀓𑀣𑀦𑀁 𑀢𑀲𑁆𑀲 𑀯𑀘𑀦𑀲𑁆𑀲 𑀧𑀯𑀢𑁆𑀢𑀦𑀁 𑀤𑀲𑁆𑀲𑁂𑀢𑀺. 𑀅𑀥𑀺𑀧𑁆𑀧𑀸𑀬𑁄𑀢𑀺 𑀏𑀢𑁂𑀦 ‘‘𑀤𑁂𑀲𑀦𑀸𑀢𑀺 𑀧𑀜𑁆𑀜𑀢𑁆𑀢𑀻’’𑀢𑀺 𑀏𑀢𑀁 𑀯𑀘𑀦𑀁 𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀁 𑀧𑀜𑁆𑀜𑀢𑁆𑀢𑀺𑀁 𑀲𑀦𑁆𑀥𑀸𑀬𑀸𑀢𑀺 𑀤𑀲𑁆𑀲𑁂𑀢𑀺.

𑀲𑁄 𑀘 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁄𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀅𑀪𑀺𑀲𑀫𑀬𑀁 𑀬𑁂𑀦 𑀧𑀓𑀸𑀭𑁂𑀦 𑀅𑀪𑀺𑀲𑀫𑁂𑀢𑀺, 𑀬𑀜𑁆𑀘 𑀅𑀪𑀺𑀲𑀫𑁂𑀢𑀺, 𑀬𑁄 𑀘 𑀢𑀲𑁆𑀲 𑀲𑀪𑀸𑀯𑁄, 𑀢𑁂𑀳𑀺 𑀧𑀸𑀓𑀝𑀁 𑀓𑀸𑀢𑀼𑀁 ‘‘𑀯𑀺𑀲𑀬𑀢𑁄 𑀅𑀲𑀫𑁆𑀫𑁄𑀳𑀢𑁄 𑀘 𑀅𑀢𑁆𑀣𑀸𑀤𑀺𑀅𑀦𑀼𑀭𑀽𑀧𑀁 𑀥𑀫𑁆𑀫𑀸𑀤𑀻𑀲𑀼 𑀅𑀯𑀩𑁄𑀥𑁄’’𑀢𑀺 𑀆𑀳. 𑀢𑀢𑁆𑀣 𑀳𑀺 𑀯𑀺𑀲𑀬𑀢𑁄 𑀅𑀢𑁆𑀣𑀸𑀤𑀺𑀅𑀦𑀼𑀭𑀽𑀧𑀁 𑀥𑀫𑁆𑀫𑀸𑀤𑀻𑀲𑀼 𑀅𑀯𑀩𑁄𑀥𑁄 𑀅𑀯𑀺𑀚𑁆𑀚𑀸𑀤𑀺𑀥𑀫𑁆𑀫𑀲𑀗𑁆𑀔𑀸𑀭𑀸𑀤𑀺𑀅𑀢𑁆𑀣𑀢𑀤𑀼𑀪𑀬𑀧𑀜𑁆𑀜𑀸𑀧𑀦𑀸𑀭𑀫𑁆𑀫𑀡𑁄 𑀮𑁄𑀓𑀺𑀬𑁄 𑀅𑀪𑀺𑀲𑀫𑀬𑁄. 𑀅𑀲𑀫𑁆𑀫𑁄𑀳𑀢𑁄 𑀅𑀢𑁆𑀣𑀸𑀤𑀺𑀅𑀦𑀼𑀭𑀽𑀧𑀁 𑀥𑀫𑁆𑀫𑀸𑀤𑀻𑀲𑀼 𑀅𑀯𑀩𑁄𑀥𑁄 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁄 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑁄 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀢𑁆𑀣𑀧𑀜𑁆𑀜𑀢𑁆𑀢𑀻𑀲𑀼 𑀲𑀫𑁆𑀫𑁄𑀳𑀯𑀺𑀤𑁆𑀥𑀁𑀲𑀦𑁄 𑀮𑁄𑀓𑀼𑀢𑁆𑀢𑀭𑁄 𑀅𑀪𑀺𑀲𑀫𑀬𑁄𑀢𑀺. 𑀅𑀪𑀺𑀲𑀫𑀬𑀢𑁄 𑀅𑀜𑁆𑀜𑀫𑁆𑀧𑀺 𑀧𑀝𑀺𑀯𑁂𑀥𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀲𑀁 𑀢𑁂𑀲𑀁 𑀯𑀸’’𑀢𑀺𑀆𑀤𑀺𑀫𑀸𑀳. ‘‘𑀧𑀝𑀺𑀯𑁂𑀥𑀦𑀁 𑀧𑀝𑀺𑀯𑁂𑀥𑁄’’𑀢𑀺 𑀇𑀫𑀺𑀦𑀸 𑀳𑀺 𑀯𑀘𑀦𑀢𑁆𑀣𑁂𑀦 𑀅𑀪𑀺𑀲𑀫𑀬𑁄, 𑀧𑀝𑀺𑀯𑀺𑀚𑁆𑀛𑀻𑀬𑀢𑀻𑀢𑀺 𑀧𑀝𑀺𑀯𑁂𑀥𑁄𑀢𑀺 𑀇𑀫𑀺𑀦𑀸 𑀢𑀁𑀢𑀁𑀭𑀽𑀧𑀸𑀤𑀺𑀥𑀫𑁆𑀫𑀸𑀦𑀁 𑀅𑀯𑀺𑀧𑀭𑀻𑀢𑀲𑀪𑀸𑀯𑁄 𑀘 𑀧𑀝𑀺𑀯𑁂𑀥𑁄𑀢𑀺 𑀬𑀼𑀚𑁆𑀚𑀢𑀺.

𑀬𑀣𑀸𑀯𑀼𑀢𑁆𑀢𑁂𑀳𑀺 𑀥𑀫𑁆𑀫𑀸𑀤𑀻𑀳𑀺 𑀧𑀺𑀝𑀓𑀸𑀦𑀁 𑀕𑀫𑁆𑀪𑀻𑀭𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀤𑀸𑀦𑀺 𑀬𑀲𑁆𑀫𑀸 𑀏𑀢𑁂𑀲𑀼 𑀧𑀺𑀝𑀓𑁂𑀲𑀽’’𑀢𑀺𑀆𑀤𑀺𑀫𑀸𑀳. 𑀬𑁄 𑀘𑁂𑀢𑁆𑀣𑀸𑀢𑀺 𑀏𑀢𑁂𑀲𑀼 𑀢𑀁𑀢𑀁𑀧𑀺𑀝𑀓𑀕𑀢𑁂𑀲𑀼 𑀥𑀫𑁆𑀫𑀸𑀤𑀻𑀲𑀼 𑀬𑁄 𑀧𑀝𑀺𑀯𑁂𑀥𑁄 𑀏𑀢𑁂𑀲𑀼 𑀘 𑀧𑀺𑀝𑀓𑁂𑀲𑀼 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀬𑁄 𑀅𑀯𑀺𑀧𑀭𑀻𑀢𑀲𑀪𑀸𑀯𑁄𑀢𑀺 𑀬𑁄𑀚𑁂𑀢𑀩𑁆𑀩𑁄. 𑀤𑀼𑀓𑁆𑀔𑁄𑀕𑀸𑀳𑀢𑀸 𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀧𑀦𑁂𑀢𑁆𑀣 𑀯𑀺𑀲𑁂𑀲𑁄 ‘‘𑀅𑀯𑀺𑀧𑀭𑀻𑀢𑀲𑀪𑀸𑀯𑀲𑀗𑁆𑀔𑀸𑀢𑁄 𑀧𑀝𑀺𑀯𑁂𑀥𑁄 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀢𑀸𑀬 𑀏𑀯 𑀤𑀼𑀓𑁆𑀔𑁄𑀕𑀸𑀳𑁄’’𑀢𑀺.

𑀬𑀦𑁆𑀢𑀺 𑀧𑀭𑀺𑀬𑀢𑁆𑀢𑀺𑀤𑀼𑀕𑁆𑀕𑀳𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀢𑁆𑀣𑀦𑁆𑀢𑀺 𑀪𑀸𑀲𑀺𑀢𑀢𑁆𑀣𑀁 𑀧𑀬𑁄𑀚𑀦𑀢𑁆𑀣𑀜𑁆𑀘. 𑀦 𑀉𑀧𑀧𑀭𑀺𑀓𑁆𑀔𑀦𑁆𑀢𑀻𑀢𑀺 𑀦 𑀯𑀺𑀘𑀸𑀭𑁂𑀦𑁆𑀢𑀺. 𑀦 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀻𑀢𑀺 𑀦𑀺𑀚𑁆𑀛𑀸𑀦𑀧𑀜𑁆𑀜𑀁 𑀦 𑀔𑀫𑀦𑁆𑀢𑀺, 𑀦𑀺𑀚𑁆𑀛𑀸𑀬𑀺𑀢𑁆𑀯𑀸 𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀭𑁄𑀘𑁂𑀢𑁆𑀯𑀸 𑀦 𑀕𑀳𑁂𑀢𑀩𑁆𑀩𑀸 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑀻𑀢𑀺 𑀏𑀯𑀁 𑀏𑀢𑀸𑀬 𑀧𑀭𑀺𑀬𑀢𑁆𑀢𑀺𑀬𑀸 𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀦𑀺𑀲𑀁𑀲𑀸 𑀅𑀢𑁆𑀢𑀦𑁄 𑀉𑀧𑀭𑀺 𑀧𑀭𑁂𑀳𑀺 𑀆𑀭𑁄𑀧𑀺𑀢𑀯𑀸𑀤𑀲𑁆𑀲 𑀦𑀺𑀕𑁆𑀕𑀳𑀲𑁆𑀲 𑀧𑀫𑁄𑀓𑁆𑀔𑀧𑁆𑀧𑀬𑁄𑀚𑀦𑀸 𑀳𑀼𑀢𑁆𑀯𑀸 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺. 𑀯𑀸𑀤𑀧𑁆𑀧𑀫𑁄𑀓𑁆𑀔𑁄𑀢𑀺 𑀯𑀸 𑀦𑀺𑀦𑁆𑀤𑀸𑀧𑀫𑁄𑀓𑁆𑀔𑁄. 𑀬𑀲𑁆𑀲 𑀘𑀢𑁆𑀣𑀸𑀬𑀸𑀢𑀺 𑀬𑀲𑁆𑀲 𑀘 𑀲𑀻𑀮𑀸𑀤𑀺𑀧𑀭𑀺𑀧𑀽𑀭𑀡𑀲𑁆𑀲 𑀅𑀦𑀼𑀧𑀸𑀤𑀸𑀯𑀺𑀫𑁄𑀓𑁆𑀔𑀲𑁆𑀲 𑀯𑀸 𑀅𑀢𑁆𑀣𑀸𑀬. 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀻𑀢𑀺 𑀜𑀸𑀬𑁂𑀦 𑀧𑀭𑀺𑀬𑀸𑀧𑀼𑀡𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀲𑁆𑀲𑀸𑀢𑀺 𑀅𑀲𑁆𑀲 𑀥𑀫𑁆𑀫𑀲𑁆𑀲. 𑀦𑀸𑀦𑀼𑀪𑁄𑀦𑁆𑀢𑀻𑀢𑀺 𑀦 𑀯𑀺𑀦𑁆𑀤𑀦𑁆𑀢𑀺. 𑀢𑁂𑀲𑀁 𑀢𑁂 𑀥𑀫𑁆𑀫𑀸 𑀤𑀼𑀕𑁆𑀕𑀳𑀺𑀢𑀢𑁆𑀢𑀸 𑀉𑀧𑀸𑀭𑀫𑁆𑀪𑀫𑀸𑀦𑀤𑀧𑁆𑀧𑀫𑀓𑁆𑀔𑀧𑀮𑀸𑀲𑀸𑀤𑀺𑀳𑁂𑀢𑀼𑀪𑀸𑀯𑁂𑀦 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀪𑀡𑁆𑀟𑀸𑀕𑀸𑀭𑁂 𑀦𑀺𑀬𑀼𑀢𑁆𑀢𑁄 𑀪𑀡𑁆𑀟𑀸𑀕𑀸𑀭𑀺𑀓𑁄, 𑀪𑀡𑁆𑀟𑀸𑀕𑀸𑀭𑀺𑀓𑁄 𑀯𑀺𑀬𑀸𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑁄, 𑀥𑀫𑁆𑀫𑀭𑀢𑀦𑀸𑀦𑀼𑀧𑀸𑀮𑀓𑁄. 𑀅𑀜𑁆𑀜𑀁 𑀅𑀢𑁆𑀣𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲𑁂𑀯 𑀲𑀢𑁄 𑀧𑀭𑀺𑀬𑀢𑁆𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀺.

𑀢𑀸𑀲𑀁𑀬𑁂𑀯𑀸𑀢𑀺 𑀅𑀯𑀥𑀸𑀭𑀡𑀁 𑀧𑀸𑀧𑀼𑀡𑀺𑀢𑀩𑁆𑀩𑀸𑀦𑀁 𑀙𑀴𑀪𑀺𑀜𑁆𑀜𑀸𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀯𑀺𑀦𑀬𑁂 𑀧𑀪𑁂𑀤𑀯𑀘𑀦𑀸𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑁂𑀭𑀜𑁆𑀚𑀓𑀡𑁆𑀟𑁂 𑀳𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸𑀯 𑀯𑀺𑀪𑀢𑁆𑀢𑀸𑀢𑀺. 𑀤𑀼𑀢𑀺𑀬𑁂 𑀢𑀸𑀲𑀁𑀬𑁂𑀯𑀸𑀢𑀺 𑀅𑀯𑀥𑀸𑀭𑀡𑀁 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀅𑀧𑁂𑀓𑁆𑀔𑀺𑀢𑁆𑀯𑀸 𑀓𑀢𑀁, 𑀦 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸. 𑀢𑀸 𑀳𑀺 𑀙𑀲𑀼 𑀅𑀪𑀺𑀜𑁆𑀜𑀸𑀲𑀼 𑀅𑀦𑁆𑀢𑁄𑀕𑀥𑀸𑀢𑀺 𑀲𑀼𑀢𑁆𑀢𑁂 𑀯𑀺𑀪𑀢𑁆𑀢𑀸𑀬𑁂𑀯𑀸𑀢𑀺. 𑀜𑀢𑁆𑀯𑀸 𑀲𑀗𑁆𑀕𑀬𑁆𑀳𑀫𑀸𑀦𑀦𑁆𑀢𑀺 𑀬𑁄𑀚𑀦𑀸. 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀧𑀺𑀝𑀓𑀸𑀦𑀁. 𑀲𑀩𑁆𑀩𑀫𑁆𑀧𑀻𑀢𑀺 𑀲𑀩𑁆𑀩𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁.

𑀅𑀢𑁆𑀣𑀸𑀦𑀼𑀮𑁄𑀫𑀦𑀸𑀫𑀢𑁄 𑀅𑀦𑀼𑀮𑁄𑀫𑀺𑀓𑁄. 𑀅𑀦𑀼𑀮𑁄𑀫𑀺𑀓𑀢𑁆𑀢𑀁𑀬𑁂𑀯 𑀯𑀺𑀪𑀸𑀯𑁂𑀢𑀼𑀁 ‘‘𑀓𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀓𑀦𑀺𑀓𑀸𑀬𑀫𑁆𑀧𑀻𑀢𑀺 𑀏𑀓𑀲𑀫𑀽𑀳𑀫𑁆𑀧𑀺. 𑀧𑁄𑀡𑀺𑀓𑀸 𑀘 𑀘𑀺𑀓𑁆𑀔𑀮𑁆𑀮𑀺𑀓𑀸 𑀘 𑀔𑀢𑁆𑀢𑀺𑀬𑀸, 𑀢𑁂𑀲𑀁 𑀦𑀺𑀯𑀸𑀲𑁄 𑀧𑁄𑀡𑀺𑀓𑀦𑀺𑀓𑀸𑀬𑁄 𑀘𑀺𑀓𑁆𑀔𑀮𑁆𑀮𑀺𑀓𑀦𑀺𑀓𑀸𑀬𑁄 𑀘. 𑀏𑀯𑀁 𑀥𑀫𑁆𑀫𑀓𑁆𑀔𑀦𑁆𑀥𑀢𑁄 𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀻𑀢𑀺 𑀩𑀼𑀤𑁆𑀥𑀯𑀘𑀦𑀧𑀺𑀝𑀓𑀸𑀤𑀻𑀦𑀺 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀦𑁂𑀓𑀘𑁆𑀙𑀭𑀺𑀬𑀧𑀸𑀢𑀼𑀪𑀸𑀯𑀧𑀝𑀺𑀫𑀡𑁆𑀟𑀺𑀢𑀸𑀬 𑀲𑀗𑁆𑀕𑀻𑀢𑀺𑀬𑀸 𑀧𑀞𑀫𑀩𑀼𑀤𑁆𑀥𑀯𑀘𑀦𑀸𑀤𑀺𑀓𑁄 𑀲𑀩𑁆𑀩𑁄 𑀯𑀼𑀢𑁆𑀢𑀧𑁆𑀧𑀪𑁂𑀤𑁄 𑀅𑀜𑁆𑀜𑁄𑀧𑀺 𑀉𑀤𑁆𑀤𑀸𑀦𑀲𑀗𑁆𑀕𑀳𑀸𑀤𑀺𑀪𑁂𑀤𑁄 𑀲𑀗𑁆𑀕𑀻𑀢𑀺𑀬𑀸 𑀜𑀸𑀬𑀢𑀻𑀢𑀺 𑀏𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 ‘‘𑀏𑀯𑀫𑁂𑀢𑀁 𑀲𑀩𑁆𑀩𑀫𑁆𑀧𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀅𑀬𑀁 𑀅𑀪𑀺𑀥𑀫𑁆𑀫𑁄 𑀧𑀺𑀝𑀓𑀢𑁄 𑀅𑀪𑀺𑀥𑀫𑁆𑀫𑀧𑀺𑀝𑀓𑀦𑁆𑀢𑀺𑀆𑀤𑀺𑀦𑀸 𑀧𑀺𑀝𑀓𑀸𑀤𑀺𑀪𑀸𑀯𑀤𑀲𑁆𑀲𑀦𑁂𑀦𑁂𑀯 𑀫𑀚𑁆𑀛𑀺𑀫𑀩𑀼𑀤𑁆𑀥𑀯𑀘𑀦𑀪𑀸𑀯𑁄 𑀢𑀣𑀸𑀕𑀢𑀲𑁆𑀲 𑀘 𑀆𑀤𑀺𑀢𑁄 𑀆𑀪𑀺𑀥𑀫𑁆𑀫𑀺𑀓𑀪𑀸𑀯𑁄 𑀤𑀲𑁆𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣 𑀲𑀺𑀬𑀸 ‘‘𑀬𑀤𑀺 𑀢𑀣𑀸𑀕𑀢𑀪𑀸𑀲𑀺𑀢𑀪𑀸𑀯𑁄 𑀅𑀪𑀺𑀥𑀫𑁆𑀫𑀲𑁆𑀲 𑀲𑀺𑀤𑁆𑀥𑁄 𑀲𑀺𑀬𑀸, 𑀫𑀚𑁆𑀛𑀺𑀫𑀩𑀼𑀤𑁆𑀥𑀯𑀘𑀦𑀪𑀸𑀯𑁄 𑀘 𑀲𑀺𑀤𑁆𑀥𑁄 𑀪𑀯𑁂𑀬𑁆𑀬, 𑀲𑁄 𑀏𑀯 𑀘 𑀦 𑀲𑀺𑀤𑁆𑀥𑁄’’𑀢𑀺 𑀢𑀲𑁆𑀲 𑀯𑀺𑀦𑀬𑀸𑀤𑀻𑀳𑀺 𑀩𑀼𑀤𑁆𑀥𑀪𑀸𑀲𑀺𑀢𑀪𑀸𑀯𑀁 𑀲𑀸𑀥𑁂𑀢𑀼𑀁 𑀯𑀢𑁆𑀣𑀼𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀁 𑀥𑀸𑀭𑀬𑀦𑁆𑀢𑁂𑀲𑀼 𑀪𑀺𑀓𑁆𑀔𑀽𑀲𑀽’’𑀢𑀺𑀆𑀤𑀺𑀫𑀸𑀳. 𑀲𑀩𑁆𑀩𑀲𑀸𑀫𑀬𑀺𑀓𑀧𑀭𑀺𑀲𑀸𑀬𑀸𑀢𑀺 𑀲𑀩𑁆𑀩𑀦𑀺𑀓𑀸𑀬𑀺𑀓𑀧𑀭𑀺𑀲𑀸𑀬 𑀧𑀜𑁆𑀘𑀧𑀺 𑀦𑀺𑀓𑀸𑀬𑁂 𑀧𑀭𑀺𑀬𑀸𑀧𑀼𑀡𑀦𑁆𑀢𑀺𑀬𑀸. 𑀦 𑀉𑀕𑁆𑀕𑀳𑀺𑀢𑀦𑁆𑀢𑀺 𑀲𑀓𑀮𑀲𑁆𑀲 𑀯𑀺𑀦𑀬𑀧𑀺𑀝𑀓𑀲𑁆𑀲 𑀅𑀦𑀼𑀕𑁆𑀕𑀳𑀺𑀢𑀢𑁆𑀢𑀸 𑀆𑀳. 𑀯𑀺𑀦𑀬𑀫𑀢𑁆𑀢𑀁 𑀉𑀕𑁆𑀕𑀳𑀺𑀢𑀦𑁆𑀢𑀺 𑀯𑀺𑀪𑀗𑁆𑀕𑀤𑁆𑀯𑀬𑀲𑁆𑀲 𑀉𑀕𑁆𑀕𑀳𑀺𑀢𑀢𑁆𑀢𑀸 𑀆𑀳. 𑀯𑀺𑀦𑀬𑀁 𑀅𑀯𑀺𑀯𑀡𑁆𑀡𑁂𑀢𑀼𑀓𑀸𑀫𑀢𑀸𑀬 ‘‘𑀅𑀪𑀺𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀲𑁆𑀲𑀽’’𑀢𑀺 𑀪𑀡𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀁, 𑀅𑀪𑀺𑀥𑀫𑁆𑀫𑁂 𑀅𑀦𑁄𑀓𑀸𑀲𑀓𑀢𑀁 𑀪𑀺𑀓𑁆𑀔𑀼𑀁 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀯𑀤𑀦𑁆𑀢𑁂𑀦 𑀪𑀕𑀯𑀢𑀸 𑀅𑀪𑀺𑀥𑀫𑁆𑀫𑀲𑁆𑀲 𑀩𑀼𑀤𑁆𑀥𑀪𑀸𑀲𑀺𑀢𑀪𑀸𑀯𑁄 𑀤𑀻𑀧𑀺𑀢𑁄 𑀩𑀼𑀤𑁆𑀥𑀪𑀸𑀲𑀺𑀢𑁂𑀳𑀺 𑀲𑀼𑀢𑁆𑀢𑀸𑀤𑀻𑀳𑀺𑀲𑀳 𑀯𑀘𑀦𑀢𑁄, 𑀩𑀸𑀳𑀺𑀭𑀓𑀪𑀸𑀲𑀺𑀢𑁂𑀲𑀼 𑀘 𑀈𑀤𑀺𑀲𑀲𑁆𑀲 𑀯𑀘𑀦𑀲𑁆𑀲 𑀅𑀪𑀸𑀯𑀸.

𑀇𑀢𑁄𑀧𑀺 𑀩𑀮𑀯𑀢𑀭𑀁 𑀆𑀪𑀺𑀥𑀫𑁆𑀫𑀺𑀓𑀲𑁆𑀲 𑀲𑀸𑀥𑀼𑀓𑀸𑀭𑀤𑀸𑀦𑁂𑀦 𑀯𑀺𑀘𑀺𑀓𑀺𑀘𑁆𑀙𑀸𑀯𑀺𑀘𑁆𑀙𑁂𑀤𑀲𑁆𑀲 𑀓𑀢𑀢𑁆𑀢𑀸. 𑀓𑀫𑁆𑀫𑀢𑁄 𑀅𑀜𑁆𑀜𑀁 𑀓𑀫𑁆𑀫𑀁 𑀓𑀫𑁆𑀫𑀦𑁆𑀢𑀭𑀁, 𑀢𑀁 𑀓𑀸𑀫𑀸𑀯𑀘𑀭𑀸𑀤𑀺𑀁 𑀭𑀽𑀧𑀸𑀯𑀘𑀭𑀸𑀤𑀺𑀪𑀸𑀯𑁂𑀦, 𑀓𑀡𑁆𑀳𑀯𑀺𑀧𑀸𑀓𑀸𑀤𑀺𑀁 𑀲𑀼𑀓𑁆𑀓𑀯𑀺𑀧𑀸𑀓𑀸𑀤𑀺𑀪𑀸𑀯𑁂𑀦 𑀓𑀣𑁂𑀦𑁆𑀢𑁄 𑀆𑀮𑁄𑀴𑁂𑀢𑀺.

𑀚𑀺𑀦𑀘𑀓𑁆𑀓𑁂𑀢𑀺 𑀚𑀺𑀦𑀲𑀸𑀲𑀦𑁂. 𑀯𑀺𑀲𑀁𑀯𑀸𑀤𑁂𑀢𑀻𑀢𑀺 𑀯𑀺𑀧𑁆𑀧𑀮𑀫𑁆𑀪𑁂𑀢𑀺. 𑀪𑁂𑀤𑀓𑀭𑀯𑀢𑁆𑀣𑀽𑀲𑀼 𑀏𑀓𑀲𑁆𑀫𑀺𑀦𑁆𑀢𑀺 ‘‘𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀻’’𑀢𑀺 𑀏𑀓𑀲𑁆𑀫𑀺𑀁 𑀲𑀦𑁆𑀤𑀺𑀲𑁆𑀲𑀢𑀺. 𑀉𑀢𑁆𑀢𑀭𑀺𑀧𑀺 𑀏𑀯𑀁 𑀯𑀢𑁆𑀢𑀩𑁆𑀩𑁄…𑀧𑁂… 𑀦 𑀅𑀜𑁆𑀜𑁂𑀲𑀁 𑀯𑀺𑀲𑀬𑁄…𑀧𑁂… 𑀦𑀺𑀤𑀸𑀦𑀓𑀺𑀘𑁆𑀘𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀧𑀸𑀓𑀝𑀸𑀦𑀁 𑀓𑀸𑀮𑀤𑁂𑀲𑀤𑁂𑀲𑀓𑀧𑀭𑀺𑀲𑀸𑀦𑀁 𑀧𑀸𑀓𑀝𑀪𑀸𑀯𑀓𑀭𑀡𑀢𑁆𑀣𑀁 𑀢𑀤𑀼𑀧𑀤𑁂𑀲𑀲𑀳𑀺𑀢𑁂𑀦 𑀦𑀺𑀤𑀸𑀦𑁂𑀦 𑀪𑀯𑀺𑀢𑀩𑁆𑀩𑀁, 𑀅𑀜𑁆𑀜𑁂𑀲𑀁 𑀅𑀯𑀺𑀲𑀬𑀢𑁆𑀢𑀸 𑀤𑁂𑀲𑀓𑁄 𑀧𑀸𑀓𑀝𑁄, 𑀑𑀓𑁆𑀓𑀦𑁆𑀢𑀺𑀓𑀸𑀮𑀸𑀤𑀻𑀦𑀁 𑀧𑀸𑀓𑀝𑀢𑁆𑀢𑀸 𑀓𑀸𑀮𑁄 𑀘, 𑀤𑁂𑀯𑀮𑁄𑀓𑁂 𑀤𑁂𑀲𑀺𑀢𑀪𑀸𑀯𑀲𑁆𑀲 𑀧𑀸𑀓𑀝𑀢𑁆𑀢𑀸 𑀤𑁂𑀲𑀧𑀭𑀺𑀲𑀸 𑀘 𑀧𑀸𑀓𑀝𑀸𑀢𑀺 𑀓𑀺𑀁 𑀦𑀺𑀤𑀸𑀦𑀓𑀺𑀘𑁆𑀘𑀁 𑀲𑀺𑀬𑀸𑀢𑀺.

𑀬𑀢𑁆𑀣 𑀔𑀦𑁆𑀥𑀸𑀤𑀬𑁄 𑀦𑀺𑀧𑁆𑀧𑀤𑁂𑀲𑁂𑀦 𑀯𑀺𑀪𑀢𑁆𑀢𑀸, 𑀲𑁄 𑀅𑀪𑀺𑀥𑀫𑁆𑀫𑁄 𑀦𑀸𑀫, 𑀢𑀲𑁆𑀫𑀸 𑀢𑀲𑁆𑀲 𑀦𑀺𑀤𑀸𑀦𑁂𑀦 𑀔𑀦𑁆𑀥𑀸𑀤𑀻𑀦𑀁 𑀦𑀺𑀧𑁆𑀧𑀤𑁂𑀲𑀢𑁄𑀧𑀺 𑀧𑀝𑀺𑀯𑀺𑀤𑁆𑀥𑀝𑁆𑀞𑀸𑀦𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀣𑁂𑀭𑁄 ‘‘𑀫𑀳𑀸𑀩𑁄𑀥𑀺𑀦𑀺𑀤𑀸𑀦𑁄 𑀅𑀪𑀺𑀥𑀫𑁆𑀫𑁄’’𑀢𑀺 𑀤𑀲𑁆𑀲𑁂𑀢𑀺. ‘‘𑀲𑁄 𑀏𑀯𑀁 𑀧𑀚𑀸𑀦𑀸𑀫𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸𑀧𑀺 𑀯𑁂𑀤𑀬𑀺𑀢’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁫.𑁧𑁨) 𑀦𑀬𑁂𑀦 𑀧𑀘𑁆𑀘𑀬𑀸𑀤𑀻𑀳𑀺 𑀯𑁂𑀤𑀦𑀁 𑀉𑀧𑀧𑀭𑀺𑀓𑁆𑀔𑀦𑁆𑀢𑁄 𑀔𑀦𑁆𑀥𑀸𑀤𑀺𑀧𑀤𑁂𑀲𑀸𑀦𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀦𑀁 𑀯𑀲𑁂𑀦 𑀯𑀺𑀳𑀸𑀲𑀺. 𑀥𑀫𑁆𑀫𑁂𑀢𑀺 𑀓𑀼𑀲𑀮𑀸𑀤𑀺𑀅𑀭𑀡𑀦𑁆𑀢𑁂.

𑀥𑀫𑁆𑀫𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑁄𑀢𑀺 𑀲𑀸𑀝𑁆𑀞𑀓𑀣𑀁 𑀧𑀸𑀴𑀺𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 𑀏𑀢𑀁 𑀧𑀭𑀯𑀸𑀤𑀻𑀘𑁄𑀤𑀦𑀁 𑀧𑀢𑁆𑀯𑀸 ‘‘𑀅𑀬𑀁 𑀧𑀭𑀯𑀸𑀤𑀻’’𑀢𑀺𑀆𑀤𑀺𑀫𑀸𑀳. 𑀅𑀫𑁆𑀳𑀸𑀤𑀺𑀲𑁂𑀲𑀼 𑀦𑀺𑀤𑀸𑀦𑀁 𑀚𑀸𑀦𑀦𑁆𑀢𑁂𑀲𑀼 𑀧𑀝𑀺𑀲𑀭𑀡𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀅𑀧𑁆𑀧𑀝𑀺𑀲𑀭𑀡𑁄 𑀅𑀭𑀜𑁆𑀜𑁂 𑀓𑀦𑁆𑀤𑀦𑁆𑀢𑁄 𑀯𑀺𑀬 𑀦𑀺𑀤𑀸𑀦𑀲𑀩𑁆𑀪𑀸𑀯𑁂 𑀲𑀓𑁆𑀔𑀺𑀪𑀽𑀢𑁂𑀲𑀼𑀧𑀺 𑀅𑀫𑁆𑀳𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀅𑀲𑀓𑁆𑀔𑀺𑀓𑀁 𑀅𑀟𑁆𑀟𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀳𑁄𑀢𑀺, 𑀦𑀺𑀤𑀸𑀦𑀲𑁆𑀲 𑀅𑀢𑁆𑀣𑀺𑀪𑀸𑀯𑀫𑁆𑀧𑀺 𑀦 𑀚𑀸𑀦𑀸𑀢𑀺, 𑀦𑀦𑀼 𑀏𑀢𑀁 𑀦𑀺𑀤𑀸𑀦𑀦𑁆𑀢𑀺 𑀓𑀣𑁂𑀦𑁆𑀢𑁄 𑀏𑀯𑀫𑀸𑀳. 𑀏𑀓𑀫𑁂𑀯𑀸𑀢𑀺 𑀤𑁂𑀲𑀦𑀸𑀦𑀺𑀤𑀸𑀦𑀫𑁂𑀯 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑁂𑀦 𑀤𑁂𑀲𑀺𑀢𑀢𑁆𑀢𑀸. 𑀤𑁆𑀯𑁂 𑀦𑀺𑀤𑀸𑀦𑀸𑀦𑀻𑀢𑀺 𑀅𑀥𑀺𑀕𑀦𑁆𑀢𑀩𑁆𑀩𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑀸𑀦𑀼𑀭𑀽𑀧𑁂𑀦 𑀤𑁂𑀲𑀺𑀢𑀢𑁆𑀢𑀸. 𑀅𑀪𑀺𑀥𑀫𑁆𑀫𑀸𑀥𑀺𑀕𑀫𑀲𑁆𑀲 𑀫𑀽𑀮𑀁 𑀅𑀥𑀺𑀕𑀫𑀁 𑀦𑀺𑀤𑁂𑀢𑀻𑀢𑀺 𑀅𑀥𑀺𑀕𑀫𑀦𑀺𑀤𑀸𑀦𑀁. 𑀩𑁄𑀥𑀺𑀅𑀪𑀺𑀦𑀻𑀳𑀸𑀭𑀲𑀤𑁆𑀥𑀸𑀬𑀸𑀢𑀺 𑀬𑀸𑀬 𑀲𑀤𑁆𑀥𑀸𑀬 𑀤𑀻𑀧𑀗𑁆𑀓𑀭𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑁂 𑀩𑁄𑀥𑀺𑀬𑀸 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀺 𑀧𑀡𑀺𑀥𑀸𑀦𑀁 𑀅𑀓𑀸𑀲𑀺.

𑀲𑀼𑀫𑁂𑀥𑀓𑀣𑀸𑀯𑀡𑁆𑀡𑀦𑀸

𑀘𑀢𑀼𑀭𑁄 𑀘 𑀅𑀲𑀗𑁆𑀔𑀺𑀬𑁂𑀢𑀺 (𑀩𑀼. 𑀯𑀁. 𑀅𑀝𑁆𑀞. 𑁨.𑁧-𑁨) 𑀉𑀤𑁆𑀥𑀁 𑀆𑀭𑁄𑀳𑀦𑀯𑀲𑁂𑀦 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀫𑀭𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀻𑀢𑀺 𑀯𑀘𑀦𑀲𑁂𑀲𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀤𑀲𑀳𑀻𑀢𑀺 𑀳𑀢𑁆𑀣𑀺𑀅𑀲𑁆𑀲𑀭𑀣𑀪𑁂𑀭𑀻𑀲𑀗𑁆𑀔𑀫𑀼𑀤𑀺𑀗𑁆𑀕𑀯𑀻𑀡𑀸𑀕𑀻𑀢𑀲𑀫𑁆𑀫𑀢𑀸𑀴𑁂𑀳𑀺 ‘‘𑀅𑀲𑁆𑀦𑀸𑀣 𑀧𑀺𑀯𑀣 𑀔𑀸𑀤𑀣𑀸’’𑀢𑀺 𑀤𑀲𑀫𑁂𑀦 𑀲𑀤𑁆𑀤𑁂𑀦. 𑀢𑁂 𑀧𑀦 𑀏𑀓𑀤𑁂𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀳𑀢𑁆𑀣𑀺𑀲𑀤𑁆𑀤’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀳𑀢𑁆𑀣𑀺𑀲𑀤𑁆𑀤𑀦𑁆𑀢𑀺 𑀓𑀭𑀡𑀢𑁆𑀣𑁂 𑀉𑀧𑀬𑁄𑀕𑁄 𑀤𑀝𑁆𑀞𑀩𑁆𑀩𑁄. 𑀪𑁂𑀭𑀻𑀲𑀗𑁆𑀔𑀭𑀣𑀸𑀦𑀜𑁆𑀘 𑀲𑀤𑁆𑀤𑁂𑀳𑀺 𑀅𑀯𑀺𑀯𑀺𑀢𑁆𑀢𑀦𑁆𑀢𑀺 𑀯𑀸 𑀖𑁄𑀲𑀺𑀢𑀦𑁆𑀢𑀺 𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀳𑀢𑁆𑀣𑀺𑀲𑀤𑁆𑀤𑀦𑁆𑀢𑀺 𑀯𑀸 𑀳𑀢𑁆𑀣𑀺𑀲𑀤𑁆𑀤𑀯𑀦𑁆𑀢𑀁 𑀦𑀕𑀭𑀁. 𑀔𑀸𑀤𑀣 𑀧𑀺𑀯𑀣 𑀘𑁂𑀯𑀸𑀢𑀺 𑀇𑀢𑀺-𑀲𑀤𑁆𑀤𑁄 𑀜𑀸𑀢𑀢𑁆𑀣𑀢𑁆𑀢𑀸 𑀅𑀧𑁆𑀧𑀬𑀼𑀢𑁆𑀢𑁄 𑀤𑀝𑁆𑀞𑀩𑁆𑀩𑁄.

𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀁 𑀉𑀬𑁆𑀬𑀸𑀦𑀧𑁄𑀓𑁆𑀔𑀭𑀡𑀻𑀆𑀤𑀺𑀲𑀫𑁆𑀧𑀦𑁆𑀦𑀢𑁆𑀢𑀸. 𑀮𑀓𑁆𑀔𑀡𑁂𑀢𑀺 𑀇𑀢𑁆𑀣𑀺𑀮𑀓𑁆𑀔𑀡𑁂 𑀧𑀼𑀭𑀺𑀲𑀮𑀓𑁆𑀔𑀡𑁂 𑀘. 𑀇𑀢𑀺𑀳𑀸𑀲𑁂𑀢𑀺 𑀧𑁄𑀭𑀸𑀡𑁂. 𑀲𑀥𑀫𑁆𑀫𑁂𑀢𑀺 𑀅𑀢𑁆𑀢𑀦𑁄 𑀢𑁂𑀯𑀺𑀚𑁆𑀚𑀥𑀫𑁆𑀫𑁂 𑀘 𑀬𑀜𑁆𑀜𑀯𑀺𑀥𑀺𑀆𑀤𑀺𑀓𑁂 𑀘. 𑀧𑀸𑀭𑀫𑀺𑀦𑁆𑀢𑀺 𑀧𑀸𑀭𑀜𑀸𑀡𑀁 𑀧𑀸𑀭𑀸𑀥𑀺𑀕𑀫𑀁 𑀕𑀢𑁄. 𑀘𑀺𑀦𑁆𑀢𑁂𑀲𑀳𑀦𑁆𑀢𑀺 𑀘𑀺𑀦𑁆𑀢𑁂𑀲𑀺𑀁 𑀅𑀳𑀁 𑀲𑀼𑀫𑁂𑀥𑀪𑀽𑀢𑁄𑀢𑀺 𑀲𑀢𑁆𑀣𑀸 𑀯𑀤𑀢𑀺. 𑀅𑀢𑁆𑀣𑀺 𑀳𑁂𑀳𑀺𑀢𑀻𑀢𑀺 𑀲𑁄 𑀯𑀺𑀚𑁆𑀚𑀫𑀸𑀦𑁄 𑀪𑀯𑀺𑀲𑁆𑀲𑀢𑀺. 𑀦 𑀳𑁂𑀢𑀼𑀬𑁂𑀢𑀺 𑀅𑀪𑀯𑀺𑀢𑀼𑀁. 𑀏𑀯𑀫𑁂𑀯𑀸𑀢𑀺 𑀏𑀯𑀫𑁂𑀯𑀁. 𑀦 𑀕𑀯𑁂𑀲𑀢𑀻𑀢𑀺 𑀦 𑀕𑀦𑁆𑀢𑀼𑀁 𑀏𑀲𑀢𑀺 𑀦 𑀇𑀘𑁆𑀙𑀢𑀺 𑀦𑀸𑀦𑀼𑀕𑀘𑁆𑀙𑀢𑀺 𑀯𑀸. 𑀥𑁄𑀯𑁂𑀢𑀺 𑀥𑁄𑀯𑀦𑁆𑀢𑁂. 𑀲𑁂𑀭𑀻𑀢𑀺 𑀲𑀸𑀬𑀢𑁆𑀢𑀺𑀓𑁄. 𑀲𑀬𑀁𑀯𑀲𑀻𑀢𑀺 𑀲𑀯𑀲𑁄. 𑀫𑀳𑀸𑀘𑁄𑀭𑀲𑀫𑁄 𑀯𑀺𑀬𑀸𑀢𑀺 𑀓𑀸𑀬𑀲𑀸𑀭𑀸𑀕𑀯𑀲𑁂𑀦 𑀤𑀼𑀘𑁆𑀘𑀭𑀺𑀢𑀸𑀦𑁂𑀲𑀦𑁂𑀳𑀺 𑀓𑀼𑀲𑀮𑀪𑀡𑁆𑀟𑀘𑁆𑀙𑁂𑀤𑀦𑀸. 𑀦𑀸𑀣𑀸𑀢𑀺 𑀦𑀸𑀣𑀯𑀦𑁆𑀢𑁄. 𑀧𑀜𑁆𑀘𑀤𑁄𑀲𑀯𑀺𑀯𑀚𑁆𑀚𑀺𑀢𑀦𑁆𑀢𑀺 𑀏𑀯𑀫𑀸𑀤𑀺𑀓𑀲𑁆𑀲 𑀅𑀢𑁆𑀣𑁄 𑀓𑁂𑀲𑀼𑀘𑀺 𑀅𑀝𑁆𑀞𑀓𑀣𑀸𑀧𑁄𑀢𑁆𑀣𑀓𑁂𑀲𑀼 𑀮𑀺𑀔𑀺𑀢𑁄𑀢𑀺 𑀓𑀢𑁆𑀯𑀸 𑀦 𑀯𑀓𑁆𑀔𑀸𑀫.

𑀲𑀸𑀲𑀦𑁂𑀢𑀺 𑀏𑀢𑁆𑀣 𑀢𑀸𑀧𑀲𑀲𑀸𑀲𑀦𑀁 𑀛𑀸𑀦𑀸𑀪𑀺𑀜𑁆𑀜𑀸 𑀘. 𑀯𑀲𑀻𑀪𑀽𑀢𑀲𑁆𑀲 𑀲𑀢𑁄. 𑀫𑀬𑀺 𑀏𑀯𑀁𑀪𑀽𑀢𑁂 𑀤𑀻𑀧𑀗𑁆𑀓𑀭𑁄 𑀚𑀺𑀦𑁄 𑀉𑀧𑁆𑀧𑀚𑁆𑀚𑀺. 𑀲𑁄𑀥𑁂𑀢𑀺 𑀚𑀦𑁄. 𑀅𑀜𑁆𑀚𑀲𑀁 𑀯𑀝𑀼𑀫𑀸𑀬𑀦𑀦𑁆𑀢𑀺 𑀧𑀭𑀺𑀬𑀸𑀬𑀯𑀘𑀦𑁂𑀳𑀺 𑀫𑀕𑁆𑀕𑀫𑁂𑀯 𑀯𑀤𑀢𑀺. 𑀫𑀸 𑀦𑀁 𑀅𑀓𑁆𑀓𑀫𑀺𑀢𑁆𑀣𑀸𑀢𑀺 𑀏𑀢𑁆𑀣 𑀦𑀦𑁆𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂 𑀦𑀺𑀧𑀸𑀢𑁄. 𑀖𑀸𑀢𑀺𑀬𑀸𑀫𑀳𑀦𑁆𑀢𑀺 𑀏𑀢𑁆𑀣 𑀘 𑀅-𑀇𑀢𑀺 𑀘 𑀳𑀁-𑀇𑀢𑀺 𑀘 𑀦𑀺𑀧𑀸𑀢𑀸, 𑀅𑀳𑀁-𑀇𑀢𑀺 𑀯𑀸 𑀏𑀓𑁄 𑀦𑀺𑀧𑀸𑀢𑁄 𑀲𑀸𑀦𑀼𑀦𑀸𑀲𑀺𑀓𑁄 𑀓𑀢𑁄. 𑀆𑀳𑀼𑀢𑀻𑀦𑀦𑁆𑀢𑀺 𑀤𑀓𑁆𑀔𑀺𑀡𑀸𑀳𑀼𑀢𑀻𑀦𑀁. 𑀫𑀦𑁆𑀢𑀺 𑀫𑀫, 𑀫𑀁 𑀯𑀸 𑀅𑀩𑁆𑀭𑁆𑀯𑀺.

𑀓𑀧𑁆𑀧𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀼𑀢𑁆𑀢𑁂𑀧𑀺 𑀩𑁄𑀥𑀺𑀫𑁆𑀳𑀺 𑀫𑀸𑀢𑀸𑀤𑀺𑀲𑀁𑀓𑀺𑀢𑁆𑀢𑀦𑁂 𑀲𑀗𑁆𑀕𑀡𑁆𑀳𑀺𑀢𑀼𑀁 ‘‘𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄’’𑀢𑀺𑀆𑀤𑀺𑀫𑀸𑀳. 𑀲𑀼𑀔𑁂𑀦𑀸𑀢𑀺 𑀉𑀢𑁆𑀢𑀫𑁂𑀦 𑀲𑀼𑀔𑁂𑀦. 𑀅𑀲𑀫𑁄𑀢𑀺 𑀢𑀸𑀧𑀲𑁂𑀳𑀺 𑀅𑀲𑀫𑁄. 𑀅𑀪𑀺𑀜𑁆𑀜𑀸𑀲𑀼𑀔𑀢𑁄𑀧𑀺 𑀯𑀺𑀲𑀺𑀝𑁆𑀞𑀁 𑀈𑀤𑀺𑀲𑀁 𑀩𑀼𑀤𑁆𑀥𑀢𑁆𑀢𑀩𑁆𑀬𑀸𑀓𑀭𑀡𑀚𑀁 𑀲𑀼𑀔𑀁 𑀅𑀮𑀪𑀺𑀁. 𑀬𑀸𑀢𑀺 𑀬𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺. 𑀆𑀪𑀼𑀚𑀢𑀻𑀢𑀺 𑀆𑀯𑀢𑁆𑀢𑀢𑀺. 𑀅𑀪𑀺𑀭𑀯𑀦𑁆𑀢𑀻𑀢𑀺 𑀲𑀤𑁆𑀤𑀁 𑀓𑀭𑁄𑀦𑁆𑀢𑀺. 𑀙𑀼𑀤𑁆𑀥𑀸𑀢𑀺 𑀦𑀺𑀓𑁆𑀔𑀦𑁆𑀢𑀸. 𑀦𑀼𑀤𑁆𑀥𑀁𑀲𑀢𑀻𑀢𑀺 𑀦 𑀉𑀤𑁆𑀥𑀁 𑀕𑀘𑁆𑀙𑀢𑀺. 𑀉𑀪𑀬𑀦𑁆𑀢𑀺 𑀉𑀪𑀬𑀯𑀘𑀦𑀁. 𑀥𑀼𑀯𑀲𑀲𑁆𑀲𑀢𑀦𑁆𑀢𑀺 𑀏𑀓𑀦𑁆𑀢𑀲𑀲𑁆𑀲𑀢𑀁, 𑀅𑀯𑀺𑀧𑀭𑀻𑀢𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀆𑀧𑀦𑁆𑀦𑀲𑀢𑁆𑀢𑀸𑀦𑀦𑁆𑀢𑀺 𑀕𑀩𑁆𑀪𑀺𑀦𑀻𑀦𑀁. 𑀬𑀸𑀯𑀢𑀸𑀤𑀲 𑀤𑀺𑀲𑀸, 𑀢𑀢𑁆𑀣. 𑀥𑀫𑁆𑀫𑀥𑀸𑀢𑀼𑀬𑀸𑀢𑀺 𑀥𑀫𑁆𑀫𑀥𑀸𑀢𑀼𑀬𑀁, 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀘𑀺𑀦𑀸𑀫𑀻𑀢𑀺 𑀅𑀢𑁆𑀣𑁄.

𑀬𑀲𑁆𑀲 𑀲𑀫𑁆𑀧𑀼𑀡𑁆𑀡𑁄, 𑀢𑀁 𑀯𑀫𑀢𑁂𑀯 𑀉𑀤𑀓𑀁 𑀦𑀺𑀲𑁆𑀲𑁂𑀲𑀁. 𑀏𑀢𑁂𑀢𑀺 𑀏𑀓𑀺𑀲𑁆𑀲𑀸𑀧𑀺 𑀤𑀸𑀦𑀧𑀸𑀭𑀫𑀺𑀢𑀸𑀬 𑀅𑀦𑁂𑀓𑀧𑁆𑀧𑀓𑀸𑀭𑀢𑀸𑀬 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀧𑀝𑀺𑀮𑀕𑁆𑀕𑀺𑀢𑀁 𑀭𑀓𑁆𑀔𑀢𑀻𑀢𑀺 𑀯𑀘𑀦𑀲𑁂𑀲𑁄, 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀉𑀧𑀬𑁄𑀕𑁄. 𑀘𑀢𑀽𑀲𑀼 𑀪𑀽𑀫𑀻𑀲𑀽𑀢𑀺 𑀧𑀸𑀢𑀺𑀫𑁄𑀓𑁆𑀔𑀸𑀤𑀻𑀲𑀼 𑀲𑀁𑀯𑀭𑀪𑀽𑀫𑀻𑀲𑀼. 𑀅𑀤𑁆𑀯𑁂𑀚𑁆𑀛𑀫𑀸𑀦𑀲𑁄𑀢𑀺 𑀓𑀤𑀸𑀘𑀺 𑀔𑀫𑀦𑀁 𑀓𑀤𑀸𑀘𑀺 𑀅𑀓𑁆𑀔𑀫𑀦𑀁, 𑀓𑀲𑁆𑀲𑀘𑀺 𑀔𑀫𑀦𑀁 𑀓𑀲𑁆𑀲𑀘𑀺 𑀅𑀓𑁆𑀔𑀫𑀦𑀦𑁆𑀢𑀺 𑀏𑀯𑀁 𑀤𑁆𑀯𑁂𑀥𑀸𑀪𑀸𑀯𑀁 𑀅𑀦𑀸𑀧𑀦𑁆𑀦𑀫𑀸𑀦𑀲𑁄 𑀳𑀼𑀢𑁆𑀯𑀸. 𑀲𑀘𑁆𑀘𑀲𑁆𑀲 𑀯𑀻𑀣𑀺 𑀦𑀸𑀫 𑀤𑀺𑀝𑁆𑀞𑀸𑀤𑀺 𑀘 𑀅𑀤𑀺𑀝𑁆𑀞𑀸𑀤𑀺 𑀘 𑀬𑀣𑀸𑀪𑀽𑀢𑀁𑀯 𑀯𑀢𑁆𑀣𑀼. 𑀅𑀥𑀺𑀝𑁆𑀞𑀸𑀦𑀦𑁆𑀢𑀺 𑀓𑀼𑀲𑀮𑀲𑀫𑀸𑀤𑀸𑀦𑀸𑀥𑀺𑀝𑁆𑀞𑀸𑀦𑀁, 𑀲𑀫𑀸𑀤𑀺𑀦𑁆𑀦𑁂𑀲𑀼 𑀓𑀼𑀲𑀮𑁂𑀲𑀼 𑀅𑀘𑀮𑀢𑀸 𑀅𑀥𑀺𑀝𑁆𑀞𑀸𑀦𑀁 𑀦𑀸𑀫. 𑀧𑀣𑀯𑀺𑀬𑀸 𑀉𑀧𑁂𑀓𑁆𑀔𑀦𑀁 𑀦𑀸𑀫 𑀯𑀺𑀓𑀸𑀭𑀸𑀦𑀸𑀧𑀢𑁆𑀢𑀺. 𑀅𑀜𑁆𑀜𑀢𑁆𑀭𑀸𑀢𑀺 𑀅𑀜𑁆𑀜𑀁. 𑀲𑀪𑀸𑀯𑀭𑀲𑀮𑀓𑁆𑀔𑀡𑁂𑀢𑀺 𑀏𑀢𑁆𑀣 𑀪𑀸𑀯𑁄𑀢𑀺 𑀅𑀯𑀺𑀧𑀭𑀻𑀢𑀢𑀸 𑀯𑀺𑀚𑁆𑀚𑀫𑀸𑀦𑀢𑀸, 𑀲𑀳 𑀪𑀸𑀯𑁂𑀦 𑀲𑀪𑀸𑀯𑁄, 𑀅𑀯𑀺𑀧𑀭𑀻𑀢𑁄 𑀅𑀢𑁆𑀢𑀦𑁄 𑀩𑁄𑀥𑀺𑀧𑀭𑀺𑀧𑀸𑀘𑀦𑀓𑀺𑀘𑁆𑀘𑀲𑀗𑁆𑀔𑀸𑀢𑁄 𑀭𑀲𑁄, 𑀅𑀦𑀯𑀚𑁆𑀚𑀯𑀢𑁆𑀣𑀼𑀧𑀭𑀺𑀘𑁆𑀘𑀸𑀕𑀸𑀤𑀺𑀲𑀗𑁆𑀔𑀸𑀢𑀁 𑀮𑀓𑁆𑀔𑀡𑀜𑁆𑀘 𑀲𑀪𑀸𑀯𑀭𑀲𑀮𑀓𑁆𑀔𑀡𑀁, 𑀢𑀢𑁄 𑀲𑀫𑁆𑀫𑀲𑀢𑁄. 𑀥𑀫𑁆𑀫𑀢𑁂𑀚𑁂𑀦𑀸𑀢𑀺 𑀜𑀸𑀡𑀢𑁂𑀚𑁂𑀦. 𑀘𑀮𑀢𑀸𑀢𑀺 𑀘𑀮𑀢𑀸𑀬 𑀓𑀫𑁆𑀧𑀦𑀢𑀸𑀬. 𑀲𑁂𑀲𑀻𑀢𑀺 𑀲𑀬𑀺. 𑀫𑀸 𑀪𑀸𑀣𑀸𑀢𑀺 𑀫𑀸 𑀪𑀸𑀬𑀺𑀢𑁆𑀣. 𑀲𑀩𑁆𑀩𑀻𑀢𑀺𑀬𑁄𑀢𑀺 𑀲𑀩𑁆𑀩𑀸 𑀈𑀢𑀺𑀬𑁄 𑀉𑀧𑀤𑁆𑀤𑀯𑀸 𑀢𑀁 𑀯𑀺𑀯𑀚𑁆𑀚𑀦𑁆𑀢𑀼.

𑀲𑀼𑀫𑁂𑀥𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀯𑀘𑁆𑀙𑀢𑀻𑀢𑀺 𑀤𑁂𑀢𑀺. 𑀬𑁄𑀕𑁂𑀦𑀸𑀢𑀺 𑀉𑀧𑀸𑀬𑁂𑀦. 𑀲𑀫𑀺𑀁𑀲𑀽𑀢𑀺 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀅𑀧𑁆𑀧𑀢𑁆𑀢𑀫𑀸𑀦𑀲𑀸𑀢𑀺 𑀅𑀧𑁆𑀧𑀢𑁆𑀢𑀅𑀭𑀳𑀢𑁆𑀢𑀸 𑀪𑀺𑀓𑁆𑀔𑀽 𑀕𑀭𑀳𑀺𑀢𑀸 𑀪𑀯𑀦𑁆𑀢𑀺. 𑀭𑀺𑀢𑁆𑀢𑀸𑀢𑀺 𑀲𑀼𑀜𑁆𑀜𑀸 𑀅𑀦𑁆𑀢𑀭𑀳𑀺𑀢𑀸. 𑀲𑀸𑀮𑀓𑀮𑁆𑀬𑀸𑀡𑀻 𑀦𑀸𑀫 𑀏𑀓𑁄 𑀭𑀼𑀓𑁆𑀔𑁄. 𑀩𑀼𑀤𑁆𑀥𑀘𑀓𑁆𑀓𑀯𑀢𑁆𑀢𑀺𑀓𑀸𑀮𑁂𑀬𑁂𑀯 𑀓𑀺𑀭 𑀏𑀓𑀸𑀳𑁂𑀦𑁂𑀯 𑀉𑀧𑁆𑀧𑀚𑁆𑀚𑀢𑀺.

𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀻𑀢𑀺 𑀧𑀼𑀭𑀺𑀲𑀮𑀺𑀗𑁆𑀕𑀢𑀸. 𑀳𑁂𑀢𑀽𑀢𑀺 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀢𑀸. 𑀕𑀼𑀡𑀲𑀫𑁆𑀧𑀢𑁆𑀢𑀻𑀢𑀺 𑀅𑀪𑀺𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀢𑀸. 𑀅𑀥𑀺𑀓𑀸𑀭𑁄𑀢𑀺 𑀩𑀼𑀤𑁆𑀥𑀸𑀦𑀁 𑀲𑀓𑁆𑀓𑀸𑀭𑀓𑀭𑀡𑀁. 𑀙𑀦𑁆𑀤𑀢𑀸𑀢𑀺 𑀩𑀼𑀤𑁆𑀥𑀢𑁆𑀢𑀧𑁆𑀧𑀢𑁆𑀢𑀺𑀬𑀁 𑀙𑀦𑁆𑀤𑀲𑀫𑀸𑀬𑁄𑀕𑁄. 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀸𑀢𑀺 𑀅𑀝𑁆𑀞𑀗𑁆𑀕𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀓𑀢𑀧𑀡𑀺𑀥𑀸𑀦𑀸. 𑀧𑀓𑁆𑀔𑀺𑀓𑀸𑀢𑀺 𑀧𑀻𑀞𑀲𑀧𑁆𑀧𑀺𑀓𑀸. 𑀧𑀡𑁆𑀟𑀓𑀸𑀢𑀺 𑀉𑀪𑀬𑀮𑀺𑀗𑁆𑀕𑀭𑀳𑀺𑀢𑀸. 𑀩𑁄𑀥𑀺𑀲𑀢𑁆𑀢𑀸 𑀘 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀧𑀞𑀫𑀓𑀧𑁆𑀧𑀺𑀓𑁂𑀲𑀼 𑀓𑀸𑀮𑁂𑀲𑀼 𑀉𑀪𑀬𑀮𑀺𑀗𑁆𑀕𑀭𑀳𑀺𑀢𑀸 𑀳𑁄𑀦𑁆𑀢𑀺, 𑀦 𑀧𑀦 𑀧𑀡𑁆𑀟𑀓𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀭𑀺𑀬𑀸𑀧𑀦𑁆𑀦𑀸 𑀦 𑀪𑀯𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀬𑀣𑀸𑀯𑀼𑀢𑁆𑀢𑁂𑀲𑀼 𑀯𑀸 𑀤𑁄𑀲𑁂𑀲𑀼 𑀲𑀩𑁆𑀩𑁂𑀲𑀼 𑀧𑀭𑀺𑀬𑀸𑀧𑀦𑁆𑀦𑀸 𑀦 𑀪𑀯𑀦𑁆𑀢𑀺, 𑀩𑁄𑀥𑀺𑀲𑀢𑁆𑀢𑁂𑀲𑀼 𑀯𑀸 𑀧𑀭𑀺𑀬𑀸𑀧𑀦𑁆𑀦𑀸 𑀢𑀤𑀦𑁆𑀢𑁄𑀕𑀥𑀸, 𑀧𑀭𑀺𑀘𑁆𑀙𑀺𑀦𑁆𑀦𑀲𑀁𑀲𑀸𑀭𑀢𑁆𑀢𑀸 𑀯𑀸 𑀧𑀭𑀺𑀬𑀸𑀧𑀦𑁆𑀦𑀸 𑀩𑁄𑀥𑀺𑀲𑀢𑁆𑀢𑀸 𑀉𑀪𑀢𑁄𑀩𑁆𑀬𑀜𑁆𑀚𑀦𑀧𑀡𑁆𑀟𑀓𑀸 𑀦 𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀢𑁆𑀣 𑀲𑀼𑀤𑁆𑀥𑀕𑁄𑀘𑀭𑀸 𑀬𑀲𑁆𑀫𑀸, 𑀢𑀲𑁆𑀫𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀦 𑀲𑁂𑀯𑀦𑁆𑀢𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀦𑁆𑀢𑀺 𑀦𑀢𑁆𑀣𑀺𑀓𑀸𑀳𑁂𑀢𑀼𑀓𑀸𑀓𑀺𑀭𑀺𑀬𑀤𑀺𑀝𑁆𑀞𑀺𑀁. 𑀪𑀯𑀸𑀪𑀯𑁂𑀢𑀺 𑀔𑀼𑀤𑁆𑀤𑀓𑁂 𑀘𑁂𑀯 𑀫𑀳𑀦𑁆𑀢𑁂 𑀘 𑀪𑀯𑁂. 𑀪𑁄𑀚𑀧𑀼𑀢𑁆𑀢𑁂𑀢𑀺 𑀮𑀼𑀤𑁆𑀤𑀓𑁂. 𑀮𑀕𑀦𑀦𑁆𑀢𑀺 𑀲𑀗𑁆𑀕𑁄. 𑀅𑀜𑁆𑀜𑀣𑀸𑀢𑀺 𑀮𑀻𑀦𑀢𑀸. 𑀕𑀸𑀫𑀡𑁆𑀟𑀮𑀸𑀢𑀺 𑀕𑀸𑀫𑀤𑀸𑀭𑀓𑀸. 𑀭𑀽𑀧𑀦𑁆𑀢𑀺 𑀯𑀺𑀧𑁆𑀧𑀓𑀸𑀭𑀁. 𑀅𑀬𑀁 𑀢𑀸𑀯 𑀦𑀺𑀤𑀸𑀦𑀓𑀣𑀸 𑀬𑀸𑀬 𑀅𑀪𑀺𑀥𑀫𑁆𑀫𑀲𑁆𑀲 𑀩𑀼𑀤𑁆𑀥𑀪𑀸𑀲𑀺𑀢𑀢𑀸𑀲𑀺𑀤𑁆𑀥𑀻𑀢𑀺 𑀅𑀢𑁆𑀣𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑀁

𑀢𑀺𑀓𑀫𑀸𑀢𑀺𑀓𑀸𑀧𑀤𑀯𑀡𑁆𑀡𑀦𑀸

𑀇𑀤𑀸𑀦𑀺 𑀧𑀝𑀺𑀜𑁆𑀜𑀸𑀢𑀓𑀣𑀁 𑀓𑀸𑀢𑀼𑀁 ‘‘𑀇𑀤𑀸𑀦𑀺 𑀇𑀢𑀺 𑀫𑁂…𑀧𑁂… 𑀓𑀣𑀦𑁄𑀓𑀸𑀲𑁄 𑀲𑀫𑁆𑀧𑀢𑁆𑀢𑁄’’𑀢𑀺𑀆𑀤𑀺𑀫𑀸𑀳. 𑀇𑀢𑁄 𑀧𑀝𑁆𑀞𑀸𑀬𑀸𑀢𑀺 𑀓𑀼𑀲𑀮𑀥𑀫𑁆𑀫𑀧𑀤𑀢𑁄 𑀧𑀝𑁆𑀞𑀸𑀬.

𑁧. 𑀲𑀩𑁆𑀩𑀧𑀤𑁂𑀳𑀺 𑀮𑀤𑁆𑀥𑀦𑀸𑀫𑁄𑀢𑀺 𑀢𑀻𑀲𑀼𑀧𑀺 𑀧𑀤𑁂𑀲𑀼 𑀯𑁂𑀤𑀦𑀸𑀲𑀤𑁆𑀤𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀢𑁂𑀦 𑀮𑀤𑁆𑀥𑀦𑀸𑀫𑁄 𑀲𑀩𑁆𑀩𑀧𑀤𑁂𑀳𑀺 𑀮𑀤𑁆𑀥𑀦𑀸𑀫𑁄 𑀳𑁄𑀢𑀺. 𑀦𑀦𑀼 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸𑀢𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺, 𑀏𑀯𑀁 𑀲𑁂𑀲𑁂𑀲𑀼𑀧𑀻𑀢𑀺 𑀤𑁆𑀯𑀸𑀤𑀲𑁂𑀢𑀸𑀦𑀺 𑀧𑀤𑀸𑀦𑀺, 𑀦 𑀢𑀻𑀡𑀻𑀢𑀺 𑀯𑁂𑀤𑀦𑀸𑀲𑀤𑁆𑀤𑀲𑁆𑀲 𑀧𑀤𑀢𑁆𑀢𑀬𑀸𑀯𑀬𑀯𑀢𑁆𑀢𑀁 𑀲𑀦𑁆𑀥𑀸𑀬 ‘‘𑀲𑀩𑁆𑀩𑀧𑀤𑁂𑀳𑀻’’𑀢𑀺 𑀯𑀼𑀘𑁆𑀘𑁂𑀬𑁆𑀬, 𑀦 𑀬𑀼𑀢𑁆𑀢𑀁. ‘‘𑀯𑁂𑀤𑀦𑀸𑀬𑀸’’𑀢𑀺 𑀳𑀺 𑀯𑀺𑀲𑀼𑀁 𑀧𑀤𑀁 𑀦 𑀓𑀲𑁆𑀲𑀘𑀺 𑀧𑀤𑀲𑁆𑀲 𑀅𑀯𑀬𑀯𑁄 𑀳𑁄𑀢𑀺, 𑀦𑀸𑀧𑀺 𑀲𑀼𑀔𑀸𑀤𑀺𑀧𑀤𑀪𑀸𑀯𑀁 𑀪𑀚𑀢𑀻𑀢𑀺 𑀢𑁂𑀦 𑀮𑀤𑁆𑀥𑀦𑀸𑀫𑁄 𑀓𑀣𑀁 𑀲𑀩𑁆𑀩𑀧𑀤𑁂𑀳𑀺 𑀮𑀤𑁆𑀥𑀦𑀸𑀫𑁄 𑀲𑀺𑀬𑀸𑀢𑀺? 𑀅𑀥𑀺𑀧𑁆𑀧𑁂𑀢𑀧𑁆𑀧𑀓𑀸𑀭𑀢𑁆𑀣𑀕𑀫𑀓𑀲𑁆𑀲 𑀧𑀤𑀲𑀫𑀼𑀤𑀸𑀬𑀲𑁆𑀲 𑀧𑀤𑀢𑁆𑀢𑀸. 𑀧𑀚𑁆𑀚𑀢𑀺 𑀅𑀯𑀩𑀼𑀚𑁆𑀛𑀻𑀬𑀢𑀺 𑀏𑀢𑁂𑀦𑀸𑀢𑀺 𑀳𑀺 𑀧𑀤𑀁, ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸’’𑀢𑀺 𑀏𑀢𑁂𑀦 𑀘 𑀧𑀤𑀲𑀫𑀼𑀤𑀸𑀬𑁂𑀦 𑀬𑀣𑀸𑀥𑀺𑀧𑁆𑀧𑁂𑀢𑁄 𑀅𑀢𑁆𑀣𑁄 𑀲𑀫𑀢𑁆𑀢𑁄 𑀯𑀺𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀲𑁄 𑀧𑀤𑀲𑀫𑀼𑀤𑀸𑀬𑁄 ‘‘𑀧𑀤’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀇𑀢𑀭𑁂𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀲𑁆𑀫𑀸 𑀢𑁂𑀲𑀁 𑀢𑀺𑀡𑁆𑀡𑀁 𑀲𑀫𑀼𑀤𑀸𑀬𑀸𑀦𑀁 𑀅𑀯𑀬𑀯𑁂𑀦 𑀮𑀤𑁆𑀥𑀦𑀸𑀫𑁄 𑀲𑀩𑁆𑀩𑀧𑀤𑁂𑀳𑀺 𑀮𑀤𑁆𑀥𑀦𑀸𑀫𑁄𑀢𑀺 𑀬𑀼𑀢𑁆𑀢𑁄.

𑀕𑀦𑁆𑀣𑀢𑁄 𑀘 𑀅𑀢𑁆𑀣𑀢𑁄 𑀘𑀸𑀢𑀺 𑀏𑀢𑁆𑀣 𑀳𑁂𑀢𑀼𑀧𑀤𑀲𑀳𑁂𑀢𑀼𑀓𑀧𑀤𑀸𑀤𑀻𑀳𑀺 𑀲𑀫𑁆𑀩𑀦𑁆𑀥𑀢𑁆𑀢𑀸 𑀕𑀦𑁆𑀣𑀢𑁄 𑀘 𑀳𑁂𑀢𑀼𑀅𑀢𑁆𑀣𑀲𑀳𑁂𑀢𑀼𑀓𑀢𑁆𑀣𑀸𑀤𑀻𑀳𑀺 𑀲𑀫𑁆𑀩𑀦𑁆𑀥𑀢𑁆𑀢𑀸 𑀅𑀢𑁆𑀣𑀢𑁄 𑀘 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀳𑁂𑀢𑀼𑀓𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑀸 𑀳𑀺 𑀳𑁂𑀢𑀼𑀤𑀼𑀓𑁂 𑀳𑁂𑀢𑀽𑀳𑀺 𑀲𑀫𑁆𑀩𑀦𑁆𑀥𑀢𑁆𑀢𑀸 𑀳𑁂𑀢𑀼𑀤𑀼𑀓𑀲𑀫𑁆𑀩𑀦𑁆𑀥𑀸, 𑀳𑁂𑀢𑀼𑀲𑀳𑁂𑀢𑀼𑀓𑀤𑀼𑀓𑁄 𑀳𑁂𑀢𑀼𑀤𑀼𑀓𑀲𑀳𑁂𑀢𑀼𑀓𑀤𑀼𑀓𑀲𑀫𑁆𑀩𑀦𑁆𑀥𑁄 𑀉𑀪𑀬𑁂𑀓𑀧𑀤𑀯𑀲𑁂𑀦. 𑀢𑀣𑀸 𑀳𑁂𑀢𑀼𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑁄 𑀳𑁂𑀢𑀼𑀤𑀼𑀓𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑀲𑀫𑁆𑀩𑀦𑁆𑀥𑁄, 𑀦𑀳𑁂𑀢𑀼𑀲𑀳𑁂𑀢𑀼𑀓𑀤𑀼𑀓𑁄 𑀏𑀓𑀤𑁆𑀯𑀺𑀧𑀤𑀯𑀲𑁂𑀦 𑀳𑁂𑀢𑀼𑀤𑀼𑀓𑀲𑀳𑁂𑀢𑀼𑀓𑀤𑀼𑀓𑀲𑀫𑁆𑀩𑀦𑁆𑀥𑁄𑀢𑀺. 𑀓𑀡𑁆𑀡𑀺𑀓𑀸 𑀯𑀺𑀬𑀸𑀢𑀺 𑀧𑀼𑀧𑁆𑀨𑀫𑀬𑀓𑀡𑁆𑀡𑀺𑀓𑀸 𑀯𑀺𑀬. 𑀖𑀝𑀸 𑀯𑀺𑀬𑀸𑀢𑀺 𑀧𑀼𑀧𑁆𑀨𑀳𑀢𑁆𑀣𑀓𑀸𑀤𑀻𑀲𑀼 𑀧𑀼𑀧𑁆𑀨𑀸𑀤𑀻𑀦𑀁 𑀲𑀫𑀽𑀳𑁄 𑀯𑀺𑀬. 𑀓𑀡𑁆𑀡𑀺𑀓𑀸𑀖𑀝𑀸𑀤𑀻𑀲𑀼 𑀳𑀺 𑀧𑀼𑀧𑁆𑀨𑀸𑀤𑀻𑀦𑀺 𑀯𑀡𑁆𑀝𑀸𑀤𑀻𑀳𑀺 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑀸𑀦𑀺 𑀳𑁄𑀦𑁆𑀢𑀻𑀢𑀺 𑀢𑀣𑀸𑀲𑀫𑁆𑀩𑀦𑁆𑀥𑀢𑀸 𑀏𑀢𑁂𑀲𑀁 𑀤𑀼𑀓𑀸𑀦𑀁 𑀯𑀼𑀢𑁆𑀢𑀸. 𑀤𑀼𑀓𑀲𑀸𑀫𑀜𑁆𑀜𑀢𑁄𑀢𑀺 𑀅𑀜𑁆𑀜𑁂𑀳𑀺 𑀳𑁂𑀢𑀼𑀤𑀼𑀓𑀸𑀤𑀻𑀳𑀺 𑀤𑀼𑀓𑀯𑀲𑁂𑀦 𑀲𑀫𑀸𑀦𑀪𑀸𑀯𑀸. 𑀅𑀜𑁆𑀜𑁂𑀳𑀻𑀢𑀺 𑀲𑀸𑀭𑀫𑁆𑀫𑀡𑀤𑀼𑀓𑀸𑀤𑀻𑀳𑀺. 𑀅𑀲𑀗𑁆𑀕𑀳𑀺𑀢𑁄 𑀧𑀤𑁂𑀲𑁄 𑀬𑁂𑀲𑀁 𑀅𑀢𑁆𑀣𑀺, 𑀢𑁂 𑀲𑀧𑁆𑀧𑀤𑁂𑀲𑀸. 𑀬𑁂𑀲𑀁 𑀧𑀦 𑀦𑀢𑁆𑀣𑀺, 𑀢𑁂 𑀦𑀺𑀧𑁆𑀧𑀤𑁂𑀲𑀸.

‘‘𑀓𑀘𑁆𑀘𑀺 𑀦𑀼 𑀪𑁄𑀢𑁄 𑀓𑀼𑀲𑀮’’𑀦𑁆𑀢𑀺 𑀏𑀯𑀁 𑀧𑀼𑀘𑁆𑀙𑀺𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀧𑀼𑀘𑁆𑀙𑀺𑀢𑀼𑀁 ‘‘𑀓𑀘𑁆𑀘𑀺 𑀪𑁄𑀢𑁄 𑀅𑀦𑀸𑀫𑀬’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀓𑀼𑀲𑀮𑀲𑀤𑁆𑀤𑁄 𑀅𑀦𑀸𑀫𑀬𑀢𑁆𑀣𑁄 𑀳𑁄𑀢𑀺. 𑀩𑀸𑀳𑀺𑀢𑀺𑀓𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁩𑁬𑁧) 𑀪𑀕𑀯𑀢𑁄 𑀓𑀸𑀬𑀲𑀫𑀸𑀘𑀸𑀭𑀸𑀤𑀬𑁄 𑀯𑀡𑁆𑀡𑁂𑀦𑁆𑀢𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 ‘‘𑀬𑁄 𑀔𑁄, 𑀫𑀳𑀸𑀭𑀸𑀚, 𑀓𑀸𑀬𑀲𑀫𑀸𑀘𑀸𑀭𑁄 𑀅𑀦𑀯𑀚𑁆𑀚𑁄’’𑀢𑀺 𑀓𑀼𑀲𑀮𑁄 𑀓𑀸𑀬𑀲𑀫𑀸𑀘𑀸𑀭𑁄 𑀯𑀼𑀢𑁆𑀢𑁄. 𑀦 𑀳𑀺 𑀪𑀕𑀯𑀢𑁄 𑀲𑀼𑀔𑀯𑀺𑀧𑀸𑀓𑀁 𑀓𑀫𑁆𑀫𑀁 𑀅𑀢𑁆𑀣𑀻𑀢𑀺 𑀲𑀩𑁆𑀩𑀲𑀸𑀯𑀚𑁆𑀚𑀭𑀳𑀺𑀢𑀸 𑀓𑀸𑀬𑀲𑀫𑀸𑀘𑀸𑀭𑀸𑀤𑀬𑁄 𑀓𑀼𑀲𑀮𑀸𑀢𑀺 𑀯𑀼𑀢𑁆𑀢𑀸. 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀘 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 ‘‘𑀓𑀼𑀲𑀮𑀸’’𑀢𑀺 𑀯𑀼𑀢𑁆𑀢𑀸. 𑀢𑁂 𑀘 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀲𑀫𑁆𑀧𑀬𑀼𑀢𑁆𑀢𑀸 𑀦 𑀏𑀓𑀦𑁆𑀢𑁂𑀦 𑀲𑀼𑀔𑀯𑀺𑀧𑀸𑀓𑀸𑀬𑁂𑀯𑀸𑀢𑀺 𑀅𑀦𑀯𑀚𑁆𑀚𑀢𑁆𑀣𑁄 𑀓𑀼𑀲𑀮𑀲𑀤𑁆𑀤𑁄. 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀦𑁆𑀢𑀺 𑀓𑀼𑀲𑀮𑀲𑀤𑁆𑀤𑀬𑁄𑀕𑁂𑀦 𑀪𑀼𑀫𑁆𑀫𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀯𑀸 𑀦𑀸𑀫𑀓𑀺𑀭𑀺𑀬𑀸𑀧𑀬𑁄𑀚𑀦𑀸𑀤𑀻𑀲𑀽𑀢𑀺 𑀅𑀢𑁆𑀣𑁄. 𑀦𑀘𑁆𑀘𑀕𑀻𑀢𑀲𑁆𑀲𑀸𑀢𑀺 𑀘 𑀲𑀸𑀫𑀺𑀯𑀘𑀦𑀁 𑀪𑀼𑀫𑁆𑀫𑀢𑁆𑀣𑁂, 𑀦𑀘𑁆𑀘𑀕𑀻𑀢𑀲𑁆𑀲 𑀯𑀺𑀲𑁂𑀲𑁂𑀲𑀽𑀢𑀺 𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀤𑀸𑀦𑀳𑁂𑀢𑀼 𑀏𑀯𑀫𑀺𑀤𑀁 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀧𑀼𑀜𑁆𑀜𑀯𑀺𑀧𑀸𑀓𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀁 ‘‘𑀓𑀼𑀲𑀮’’𑀦𑁆𑀢𑀺 𑀯𑀼𑀢𑁆𑀢𑀁. 𑀥𑀫𑁆𑀫𑀸 𑀳𑁄𑀦𑁆𑀢𑀻𑀢𑀺 𑀲𑀼𑀜𑁆𑀜𑀥𑀫𑁆𑀫𑀢𑁆𑀢𑀸 𑀲𑀪𑀸𑀯𑀫𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻𑀢𑀺 𑀏𑀢𑁆𑀣𑀸𑀧𑀺 𑀲𑀼𑀜𑁆𑀜𑀢𑀢𑁆𑀣𑁄 𑀥𑀫𑁆𑀫𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄.

𑀲𑀮𑀬𑀦𑁆𑀢𑀺…𑀧𑁂… 𑀯𑀺𑀤𑁆𑀥𑀁𑀲𑁂𑀦𑁆𑀢𑀻𑀢𑀺 𑀏𑀢𑁆𑀣 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀅𑀢𑁆𑀣𑀯𑀘𑀦𑀁. 𑀅𑀣 𑀯𑀸 𑀲𑀮𑀦𑀲𑁆𑀲 𑀅𑀢𑁆𑀣𑀤𑀻𑀧𑀦𑀸𑀦𑀺 𑀘𑀮𑀦𑀸𑀤𑀻𑀦𑀺 𑀢𑀻𑀡𑀺 𑀢𑀤𑀗𑁆𑀕𑀧𑁆𑀧𑀳𑀸𑀦𑀸𑀤𑀻𑀳𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀅𑀧𑁆𑀧𑀳𑀻𑀦𑀪𑀸𑀯𑁂𑀦 𑀲𑀦𑁆𑀢𑀸𑀦𑁂 𑀲𑀬𑀫𑀸𑀦𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀭𑀸𑀕𑀸𑀤𑀺𑀅𑀲𑀼𑀘𑀺𑀲𑀫𑁆𑀧𑀬𑁄𑀕𑀢𑁄 𑀦𑀸𑀦𑀸𑀯𑀺𑀥𑀤𑀼𑀓𑁆𑀔𑀳𑁂𑀢𑀼𑀢𑁄 𑀘 𑀓𑀼𑀘𑁆𑀙𑀺𑀢𑁂𑀦 𑀆𑀓𑀸𑀭𑁂𑀦 𑀲𑀬𑀦𑁆𑀢𑀺. 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀫𑁆𑀧𑀺 𑀜𑀸𑀡𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀲𑀩𑁆𑀩𑁂𑀧𑀺 𑀓𑀼𑀲𑀮𑀸 𑀥𑀫𑁆𑀫𑀸 𑀓𑀼𑀲𑁂𑀦 𑀜𑀸𑀡𑁂𑀦 𑀧𑀯𑀢𑁆𑀢𑁂𑀢𑀩𑁆𑀩𑀸𑀢𑀺 𑀓𑀼𑀲𑀮𑀸. 𑀉𑀧𑁆𑀧𑀦𑁆𑀦𑀁𑀲𑀸𑀦𑀼𑀧𑁆𑀧𑀦𑁆𑀦𑀁𑀲𑀪𑀸𑀕𑁂𑀲𑀼 𑀲𑀗𑁆𑀕𑀳𑀺𑀢𑀢𑁆𑀢𑀸 𑀉𑀪𑀬𑀪𑀸𑀕𑀕𑀢𑀁 𑀲𑀁𑀓𑀺𑀮𑁂𑀲𑀧𑀓𑁆𑀔𑀁 𑀧𑀳𑀸𑀦𑀸𑀦𑀼𑀧𑁆𑀧𑀸𑀤𑀦𑁂𑀳𑀺 𑀮𑀼𑀦𑀦𑁆𑀢𑀺 𑀲𑀫𑁆𑀫𑀧𑁆𑀧𑀥𑀸𑀦𑀤𑁆𑀯𑀬𑀁 𑀯𑀺𑀬.

𑀲𑀢𑁆𑀢𑀸𑀤𑀺𑀕𑀸𑀳𑀓𑀸𑀦𑀁 𑀘𑀺𑀢𑁆𑀢𑀸𑀦𑀁 𑀕𑁄𑀘𑀭𑀸 𑀲𑀢𑁆𑀢𑀸𑀤𑀬𑁄 𑀯𑀺𑀬 𑀧𑀜𑁆𑀜𑀸𑀬 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑀸 𑀦 𑀦𑀺𑀲𑁆𑀲𑀪𑀸𑀯𑀸, 𑀓𑀺𑀦𑁆𑀢𑀼 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀫𑁆𑀫𑀸. 𑀦 𑀘 𑀥𑀸𑀭𑀺𑀬𑀫𑀸𑀦𑀲𑀪𑀸𑀯𑀸 𑀅𑀜𑁆𑀜𑁄 𑀥𑀫𑁆𑀫𑁄 𑀦𑀸𑀫 𑀅𑀢𑁆𑀣𑀺. 𑀦 𑀳𑀺 𑀭𑀼𑀧𑁆𑀧𑀦𑀸𑀤𑀻𑀳𑀺 𑀅𑀜𑁆𑀜𑁂 𑀭𑀽𑀧𑀸𑀤𑀬𑁄, 𑀓𑀓𑁆𑀔𑀴𑀸𑀤𑀻𑀳𑀺 𑀘 𑀅𑀜𑁆𑀜𑁂 𑀧𑀣𑀯𑀻𑀆𑀤𑀬𑁄 𑀥𑀫𑁆𑀫𑀸 𑀯𑀺𑀚𑁆𑀚𑀦𑁆𑀢𑀻𑀢𑀺. 𑀅𑀜𑁆𑀜𑀣𑀸 𑀧𑀦 𑀅𑀯𑀩𑁄𑀥𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀦𑀸𑀫𑀯𑀲𑁂𑀦 𑀯𑀺𑀜𑁆𑀜𑀸𑀢𑀸𑀯𑀺𑀜𑁆𑀜𑀸𑀢𑁂 𑀲𑀪𑀸𑀯𑀥𑀫𑁆𑀫𑁂 𑀅𑀜𑁆𑀜𑁂 𑀯𑀺𑀬 𑀓𑀢𑁆𑀯𑀸 ‘‘𑀅𑀢𑁆𑀢𑀦𑁄 𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀧𑁆𑀧𑀘𑁆𑀘𑀬𑀥𑀫𑁆𑀫𑁂𑀲𑀼 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀥𑀸𑀭𑀻𑀬𑀦𑁆𑀢𑀺 𑀯𑀸 𑀧𑀘𑁆𑀘𑀬𑁂𑀳𑀻’’𑀢𑀺 𑀆𑀳. 𑀥𑀸𑀭𑀻𑀬𑀦𑁆𑀢𑀻𑀢𑀺 𑀉𑀧𑀥𑀸𑀭𑀻𑀬𑀦𑁆𑀢𑀺, 𑀮𑀓𑁆𑀔𑀻𑀬𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀅𑀓𑀼𑀲𑀮𑀸𑀢𑀺 𑀓𑀼𑀲𑀮𑀧𑀝𑀺𑀲𑁂𑀥𑀦𑀫𑀢𑁆𑀢𑀁 𑀓𑀼𑀲𑀮𑀸𑀪𑀸𑀯𑀫𑀢𑁆𑀢𑀯𑀘𑀦𑀁 𑀢𑀤𑀜𑁆𑀜𑀫𑀢𑁆𑀢𑀯𑀘𑀦𑀁 𑀯𑀸 𑀏𑀢𑀁 𑀦 𑀳𑁄𑀢𑀺, 𑀓𑀺𑀦𑁆𑀢𑀼 𑀢𑀧𑁆𑀧𑀝𑀺𑀧𑀓𑁆𑀔𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀫𑀺𑀢𑁆𑀢𑀧𑀝𑀺𑀧𑀓𑁆𑀔𑀸 𑀅𑀫𑀺𑀢𑁆𑀢𑀸 𑀯𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀧𑁆𑀧𑀝𑀺𑀧𑀓𑁆𑀔𑀯𑀘𑀦𑀢𑀸 𑀘 𑀅𑀩𑁆𑀬𑀸𑀓𑀢𑀢𑀢𑀺𑀬𑀭𑀸𑀲𑀺𑀯𑀘𑀦𑁂𑀦 𑀯𑀺𑀜𑁆𑀜𑀸𑀬𑀢𑀺. 𑀬𑀤𑀺 𑀳𑀺 𑀓𑀼𑀲𑀮𑀸𑀪𑀸𑀯𑀫𑀢𑁆𑀢𑀯𑀘𑀦𑀁 𑀅𑀓𑀼𑀲𑀮𑀲𑀤𑁆𑀤𑁄, 𑀢𑁂𑀦 𑀦 𑀓𑁄𑀘𑀺 𑀥𑀫𑁆𑀫𑁄 𑀯𑀼𑀢𑁆𑀢𑁄𑀢𑀺 𑀅𑀩𑁆𑀬𑀸𑀓𑀢𑀯𑀘𑀦𑁂𑀦𑁂𑀯 𑀘 𑀢𑀢𑀺𑀬𑁄 𑀭𑀸𑀲𑀺 𑀯𑀼𑀢𑁆𑀢𑁄 𑀦 𑀲𑀺𑀬𑀸, 𑀓𑀼𑀲𑀮𑀸 𑀘𑁂𑀯 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸 𑀘𑀸𑀢𑀺 𑀤𑀼𑀓𑁄𑀯𑀸𑀬𑀁 𑀆𑀧𑀚𑁆𑀚𑀢𑀺, 𑀦 𑀢𑀺𑀓𑁄, 𑀏𑀯𑀜𑁆𑀘 𑀲𑀢𑀺 𑀅𑀓𑀼𑀲𑀮𑀯𑀘𑀦𑁂𑀦 𑀦 𑀓𑁄𑀘𑀺 𑀅𑀢𑁆𑀣𑁄. 𑀅𑀣 𑀲𑀺𑀬𑀸, ‘‘𑀅𑀦𑀩𑁆𑀬𑀸𑀓𑀢𑀸’’𑀢𑀺 𑀘 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸 𑀓𑀼𑀲𑀮𑀸𑀦𑀁 𑀯𑀺𑀬 𑀅𑀩𑁆𑀬𑀸𑀓𑀢𑀸𑀦𑀜𑁆𑀘 𑀅𑀪𑀸𑀯𑀫𑀢𑁆𑀢𑀲𑀫𑁆𑀪𑀯𑀸, 𑀢𑀲𑁆𑀫𑀸 𑀅𑀪𑀸𑀯𑀫𑀢𑁆𑀢𑀯𑀘𑀦𑁂 𑀅𑀩𑁆𑀬𑀸𑀓𑀢𑀪𑀸𑀯𑀫𑀢𑁆𑀢𑀁 𑀯𑀺𑀬 𑀓𑀼𑀲𑀮𑀸𑀪𑀸𑀯𑀫𑀢𑁆𑀢𑀁 𑀅𑀓𑀼𑀲𑀮𑀁 𑀦 𑀓𑁄𑀘𑀺 𑀭𑀸𑀲𑀻𑀢𑀺 ‘‘𑀅𑀩𑁆𑀬𑀸𑀓𑀢𑀸’’𑀢𑀺 𑀢𑀢𑀺𑀬𑁄 𑀭𑀸𑀲𑀺 𑀦 𑀲𑀺𑀬𑀸. 𑀢𑀢𑀺𑀬𑀭𑀸𑀲𑀺𑀪𑀸𑀯𑁂𑀦 𑀘 𑀅𑀩𑁆𑀬𑀸𑀓𑀢𑀸 𑀯𑀼𑀢𑁆𑀢𑀸𑀢𑀺 𑀅𑀓𑀼𑀲𑀮𑁄 𑀘 𑀏𑀓𑁄 𑀭𑀸𑀲𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀢𑀲𑁆𑀫𑀸 𑀦𑀸𑀪𑀸𑀯𑀯𑀘𑀦𑀢𑀸, 𑀲𑀪𑀸𑀯𑀥𑀸𑀭𑀡𑀸𑀤𑀺𑀅𑀢𑁆𑀣𑁂𑀦 𑀥𑀫𑁆𑀫𑀲𑀤𑁆𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑀢𑁄 𑀘 𑀅𑀓𑀼𑀲𑀮𑀲𑀤𑁆𑀤𑀲𑁆𑀲 𑀓𑀼𑀲𑀮𑀸𑀪𑀸𑀯𑀫𑀢𑁆𑀢𑀯𑀘𑀦𑀢𑀸 𑀦 𑀳𑁄𑀢𑀺, 𑀦𑀸𑀧𑀺 𑀢𑀤𑀜𑁆𑀜𑀫𑀢𑁆𑀢𑀯𑀘𑀦𑀢𑀸 𑀢𑀢𑀺𑀬𑀭𑀸𑀲𑀺𑀯𑀘𑀦𑀢𑁄 𑀏𑀯. 𑀬𑀤𑀺 𑀳𑀺 𑀓𑀼𑀲𑀮𑁂𑀳𑀺 𑀅𑀜𑁆𑀜𑁂 𑀅𑀓𑀼𑀲𑀮𑀸 𑀘𑁂𑀢𑀲𑀺𑀓𑁂𑀳𑀺 𑀅𑀜𑁆𑀜𑁂 𑀅𑀘𑁂𑀢𑀲𑀺𑀓𑀸 𑀯𑀺𑀬, 𑀓𑀼𑀲𑀮𑀸𑀓𑀼𑀲𑀮𑀯𑀘𑀦𑁂𑀳𑀺 𑀲𑀩𑁆𑀩𑁂𑀲𑀁 𑀥𑀫𑁆𑀫𑀸𑀦𑀁 𑀲𑀗𑁆𑀕𑀳𑀺𑀢𑀢𑁆𑀢𑀸 𑀅𑀲𑀗𑁆𑀕𑀳𑀺𑀢𑀲𑁆𑀲 𑀢𑀢𑀺𑀬𑀭𑀸𑀲𑀺𑀲𑁆𑀲 𑀅𑀪𑀸𑀯𑀸 𑀘𑁂𑀢𑀲𑀺𑀓𑀤𑀼𑀓𑁄 𑀯𑀺𑀬 𑀅𑀬𑀜𑁆𑀘 𑀤𑀼𑀓𑁄 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸 ‘‘𑀓𑀼𑀲𑀮𑀸 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺, 𑀦 ‘‘𑀅𑀩𑁆𑀬𑀸𑀓𑀢𑀸’’𑀢𑀺 𑀢𑀢𑀺𑀬𑁄 𑀭𑀸𑀲𑀺 𑀯𑀢𑁆𑀢𑀩𑁆𑀩𑁄, 𑀯𑀼𑀢𑁆𑀢𑁄 𑀘 𑀲𑁄, 𑀢𑀲𑁆𑀫𑀸 𑀦 𑀢𑀤𑀜𑁆𑀜𑀫𑀢𑁆𑀢𑀯𑀘𑀦𑀁 𑀅𑀓𑀼𑀲𑀮𑀲𑀤𑁆𑀤𑁄, 𑀧𑀸𑀭𑀺𑀲𑁂𑀲𑁂𑀦 𑀢𑀧𑁆𑀧𑀝𑀺𑀧𑀓𑁆𑀔𑁂𑀲𑀼 𑀅-𑀓𑀸𑀭𑀲𑁆𑀲 𑀧𑀬𑁄𑀕𑀤𑀲𑁆𑀲𑀦𑀢𑁄 𑀮𑁄𑀓𑁂 ‘‘𑀅𑀫𑀺𑀢𑁆𑀢𑀸’’𑀢𑀺 𑀲𑀸𑀲𑀦𑁂 ‘‘𑀅𑀮𑁄𑀪𑁄’’𑀢𑀺 𑀇𑀥𑀸𑀧𑀺 𑀢𑀧𑁆𑀧𑀝𑀺𑀧𑀓𑁆𑀔𑀯𑀘𑀦𑀢𑀸 𑀅𑀓𑀼𑀲𑀮𑀲𑀤𑁆𑀤𑀲𑁆𑀲 𑀲𑀺𑀤𑁆𑀥𑀸, 𑀢𑀢𑁆𑀣 𑀦𑀺𑀭𑀼𑀴𑁆𑀳𑀢𑁆𑀢𑀸 𑀘 𑀦 𑀇𑀢𑀭𑀯𑀘𑀦𑀢𑀸, 𑀢𑀧𑁆𑀧𑀝𑀺𑀧𑀓𑁆𑀔𑀪𑀸𑀯𑁄 𑀘 𑀯𑀺𑀭𑀼𑀤𑁆𑀥𑀲𑀪𑀸𑀯𑀢𑁆𑀢𑀸 𑀢𑀧𑁆𑀧𑀳𑁂𑀬𑁆𑀬𑀪𑀸𑀯𑀢𑁄 𑀘 𑀯𑁂𑀤𑀺𑀢𑀩𑁆𑀩𑁄, 𑀦 𑀓𑀼𑀲𑀮𑀯𑀺𑀦𑀸𑀲𑀦𑀢𑁄. 𑀦 𑀳𑀺 𑀓𑀼𑀲𑀮𑀸 𑀅𑀓𑀼𑀲𑀮𑁂𑀳𑀺 𑀧𑀳𑀸𑀢𑀩𑁆𑀩𑀸, 𑀫𑀳𑀸𑀩𑀮𑀯𑀢𑀸𑀬 𑀧𑀦 𑀓𑀼𑀲𑀮𑀸𑀬𑁂𑀯 𑀧𑀬𑁄𑀕𑀦𑀺𑀧𑁆𑀨𑀸𑀤𑀺𑀢𑀸 𑀲𑀤𑀸𑀦𑀼𑀲𑀬𑀺𑀢𑁂 𑀅𑀓𑀼𑀲𑀮𑁂 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀚𑀳𑀦𑁆𑀢𑀻𑀢𑀺.

𑀦 𑀩𑁆𑀬𑀸𑀓𑀢𑀸𑀢𑀺 𑀅𑀓𑀣𑀺𑀢𑀸. 𑀓𑀣𑀁 𑀧𑀦𑁂𑀢𑁂 𑀅𑀓𑀣𑀺𑀢𑀸 𑀳𑁄𑀦𑁆𑀢𑀺, 𑀦𑀦𑀼 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺𑀆𑀤𑀻𑀳𑀺 𑀢𑀺𑀓𑀤𑀼𑀓𑀧𑀤𑁂𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀯𑀘𑀦𑁂𑀳𑀺 𑀨𑀲𑁆𑀲𑀸𑀤𑀺𑀯𑀘𑀦𑁂𑀳𑀺 𑀘 𑀓𑀣𑀺𑀢𑀸𑀢𑀺? 𑀦𑁄 𑀦 𑀓𑀣𑀺𑀢𑀸, 𑀢𑀸𑀦𑀺 𑀧𑀦 𑀯𑀘𑀦𑀸𑀦𑀺 𑀇𑀥 𑀅𑀦𑀥𑀺𑀧𑁆𑀧𑁂𑀢𑀸𑀦𑀺 𑀅𑀯𑀼𑀢𑁆𑀢𑀢𑁆𑀢𑀸 𑀅𑀦𑀦𑀼𑀯𑀢𑁆𑀢𑀦𑀢𑁄. 𑀦 𑀳𑀺 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸 ‘‘𑀅𑀩𑁆𑀬𑀸𑀓𑀢𑀸’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀦 𑀢𑀸𑀦𑀺 𑀇𑀥 𑀅𑀦𑀼𑀯𑀢𑁆𑀢𑀦𑁆𑀢𑀻𑀢𑀺 𑀢𑀩𑁆𑀩𑀘𑀦𑀻𑀬𑀪𑀸𑀯𑁂𑀦 𑀅𑀓𑀣𑀺𑀢𑀢𑀸 𑀦 𑀳𑁄𑀢𑀺, 𑀓𑀼𑀲𑀮𑀸𑀓𑀼𑀲𑀮𑀯𑀘𑀦𑀸𑀦𑀺 𑀧𑀦 𑀇𑀥 𑀯𑀼𑀢𑁆𑀢𑀢𑁆𑀢𑀸 𑀅𑀦𑀼𑀯𑀢𑁆𑀢𑀦𑁆𑀢𑀻𑀢𑀺 𑀢𑀩𑁆𑀩𑀘𑀦𑀻𑀬𑀪𑀸𑀯𑁂𑀦 𑀅𑀓𑀣𑀺𑀢𑀢𑀸 𑀜𑀸𑀬𑀢𑀻𑀢𑀺 ‘‘𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑁂𑀦 𑀅𑀓𑀣𑀺𑀢𑀸𑀢𑀺 𑀅𑀢𑁆𑀣𑁄’’𑀢𑀺 𑀆𑀳. 𑀦 𑀩𑁆𑀬𑀸𑀓𑀢𑀸𑀢𑀺 𑀯𑀸 𑀅𑀯𑀺𑀧𑀸𑀓𑀸, 𑀅𑀩𑁆𑀬𑀸𑀓𑀢𑀯𑀘𑀦𑁂𑀦𑁂𑀯 𑀘 𑀅𑀯𑀺𑀧𑀸𑀓𑀢𑁆𑀣𑀸 𑀜𑀸𑀬𑀦𑁆𑀢𑀺. 𑀦 𑀳𑀺 𑀪𑀕𑀯𑀢𑁄 𑀯𑀘𑀦𑀁 𑀜𑀸𑀧𑀓𑀲𑀸𑀥𑀦𑀻𑀬𑀁, 𑀆𑀲𑀬𑀸𑀦𑀼𑀲𑀬𑀘𑀭𑀺𑀬𑀸𑀤𑀺𑀓𑀼𑀲𑀮𑁂𑀦 𑀪𑀕𑀯𑀢𑀸 𑀬𑁂𑀲𑀁 𑀅𑀯𑀩𑁄𑀥𑀦𑀢𑁆𑀣𑀁 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀢𑁂𑀲𑀁 𑀯𑀘𑀦𑀸𑀦𑀦𑁆𑀢𑀭𑀁 𑀢𑀤𑀢𑁆𑀣𑀧𑀝𑀺𑀯𑁂𑀥𑀢𑁄, 𑀧𑀘𑁆𑀙𑀺𑀫𑁂𑀳𑀺 𑀧𑀦 𑀬𑀣𑀸 𑀢𑁂𑀲𑀁 𑀅𑀯𑀩𑁄𑀥𑀦𑀢𑁆𑀣𑀁 𑀪𑀕𑀯𑀢𑀸 𑀢𑀁 𑀢𑀁 𑀯𑀘𑀦𑀁 𑀯𑀼𑀢𑁆𑀢𑀁, 𑀬𑀣𑀸 𑀘 𑀢𑁂𑀳𑀺 𑀢𑀤𑀢𑁆𑀣𑁄 𑀧𑀝𑀺𑀯𑀺𑀤𑁆𑀥𑁄, 𑀢𑀁 𑀲𑀩𑁆𑀩𑀁 𑀆𑀘𑀭𑀺𑀬𑁂 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀲𑀼𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁 𑀳𑁄𑀢𑀺, 𑀢𑀲𑁆𑀫𑀸 𑀓𑀸𑀭𑀡𑀁 𑀅𑀯𑀢𑁆𑀯𑀸 ‘‘𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑁂𑀦 𑀅𑀓𑀣𑀺𑀢𑀸𑀢𑀺 𑀅𑀢𑁆𑀣𑁄’’𑀢𑀺 𑀆𑀳. 𑀬𑁄 𑀘 𑀯𑀤𑁂𑀬𑁆𑀬 ‘‘𑀅𑀓𑀼𑀲𑀮𑀯𑀺𑀧𑀸𑀓𑀪𑀸𑀯𑁂𑀦 𑀅𑀓𑀣𑀺𑀢𑀢𑁆𑀢𑀸, 𑀓𑀼𑀲𑀮𑀸 𑀅𑀩𑁆𑀬𑀸𑀓𑀢𑀸𑀢𑀺 𑀆𑀧𑀚𑁆𑀚𑀦𑁆𑀢𑀺, 𑀓𑀼𑀲𑀮𑀯𑀺𑀧𑀸𑀓𑀪𑀸𑀯𑁂𑀦 𑀅𑀓𑀣𑀺𑀢𑀢𑁆𑀢𑀸 𑀅𑀓𑀼𑀲𑀮𑀸𑀧𑀻’’𑀢𑀺, 𑀲𑁄𑀧𑀺 ‘‘𑀅𑀜𑁆𑀜𑀸𑀧𑀓𑀲𑀸𑀥𑀦𑀻𑀬𑀯𑀘𑀦𑁄 𑀪𑀕𑀯𑀸’’𑀢𑀺 𑀦𑀺𑀯𑀸𑀭𑁂𑀢𑀩𑁆𑀩𑁄 𑀅𑀦𑀼𑀯𑀢𑁆𑀢𑀫𑀸𑀦𑀯𑀘𑀦𑀯𑀘𑀦𑀻𑀬𑀪𑀸𑀯𑁂𑀦 𑀅𑀓𑀣𑀺𑀢𑀲𑁆𑀲 𑀘 𑀅𑀩𑁆𑀬𑀸𑀓𑀢𑀪𑀸𑀯𑀢𑁄. 𑀦 𑀳𑀺 𑀅𑀯𑀺𑀧𑀸𑀓𑀯𑀘𑀦𑀁 𑀯𑀼𑀢𑁆𑀢𑀁 𑀓𑀼𑀲𑀮𑀯𑀘𑀦𑀜𑁆𑀘 𑀅𑀯𑀼𑀢𑁆𑀢𑀁, 𑀬𑀢𑁄 𑀅𑀯𑀺𑀧𑀸𑀓𑀯𑀘𑀦𑀲𑁆𑀲 𑀅𑀥𑀺𑀓𑀢𑀪𑀸𑀯𑁄 𑀓𑀼𑀲𑀮𑀲𑁆𑀲 𑀘 𑀢𑀩𑁆𑀩𑀘𑀦𑀻𑀬𑀪𑀸𑀯𑁂𑀦 𑀅𑀓𑀣𑀺𑀢𑀪𑀸𑀯𑁄 𑀲𑀺𑀬𑀸, 𑀢𑀲𑁆𑀫𑀸 𑀦 𑀓𑀼𑀲𑀮𑀸𑀦𑀁 𑀅𑀩𑁆𑀬𑀸𑀓𑀢𑀢𑀸, 𑀏𑀯𑀁 𑀅𑀓𑀼𑀲𑀮𑀸𑀦𑀜𑁆𑀘 𑀅𑀦𑀩𑁆𑀬𑀸𑀓𑀢𑀪𑀸𑀯𑁂 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀅𑀣 𑀯𑀸 𑀯𑀺-𑀲𑀤𑁆𑀤𑁄 𑀯𑀺𑀭𑁄𑀥𑀯𑀘𑀦𑁄, 𑀆-𑀲𑀤𑁆𑀤𑁄 𑀅𑀪𑀺𑀫𑀼𑀔𑀪𑀸𑀯𑀧𑁆𑀧𑀓𑀸𑀲𑀦𑁄, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀅𑀜𑁆𑀜𑀫𑀜𑁆𑀜𑀯𑀺𑀭𑁄𑀥𑀸𑀪𑀺𑀫𑀼𑀔𑀸 𑀓𑀢𑀸, 𑀮𑀓𑁆𑀔𑀡𑀯𑀺𑀭𑁄𑀥𑀢𑁄 𑀯𑀺𑀦𑀸𑀲𑀓𑀯𑀺𑀦𑀸𑀲𑀺𑀢𑀩𑁆𑀩𑀢𑁄 𑀘𑀸𑀢𑀺 𑀩𑁆𑀬𑀸𑀓𑀢𑀸, 𑀓𑀼𑀲𑀮𑀸𑀓𑀼𑀲𑀮𑀸. 𑀦 𑀩𑁆𑀬𑀸𑀓𑀢𑀸𑀢𑀺 𑀅𑀩𑁆𑀬𑀸𑀓𑀢𑀸. 𑀢𑁂 𑀳𑀺 𑀮𑀓𑁆𑀔𑀡𑀢𑁄 𑀓𑀼𑀲𑀮𑀸𑀓𑀼𑀲𑀮𑀸 𑀯𑀺𑀬 𑀯𑀺𑀭𑀼𑀤𑁆𑀥𑀸 𑀦 𑀳𑁄𑀦𑁆𑀢𑀺. 𑀦 𑀳𑀺 𑀅𑀯𑀺𑀧𑀸𑀓𑀢𑀸 𑀤𑀼𑀓𑁆𑀔𑀯𑀺𑀧𑀸𑀓𑀢𑀸 𑀯𑀺𑀬 𑀲𑀼𑀔𑀯𑀺𑀧𑀸𑀓𑀢𑀸𑀬 𑀲𑀼𑀔𑀯𑀺𑀧𑀸𑀓𑀢𑀸 𑀯𑀺𑀬 𑀘 𑀤𑀼𑀓𑁆𑀔𑀯𑀺𑀧𑀸𑀓𑀢𑀸𑀬 𑀲𑀼𑀔𑀤𑀼𑀓𑁆𑀔𑀯𑀺𑀧𑀸𑀓𑀢𑀸𑀳𑀺 𑀯𑀺𑀭𑀼𑀚𑁆𑀛𑀢𑀻𑀢𑀺 𑀦𑀸𑀧𑀺 𑀢𑁂 𑀓𑀺𑀜𑁆𑀘𑀺 𑀧𑀚𑀳𑀦𑁆𑀢𑀺, 𑀦 𑀘 𑀢𑁂 𑀓𑁂𑀦𑀘𑀺 𑀧𑀳𑀸𑀢𑀩𑁆𑀩𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀢𑀦𑁄𑀫𑀢𑀺.

𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀮𑀓𑁆𑀔𑀡𑀸𑀢𑀺 𑀏𑀢𑁆𑀣 𑀦𑀢𑁆𑀣𑀺 𑀏𑀢𑁂𑀲𑀁 𑀅𑀯𑀚𑁆𑀚𑀦𑁆𑀢𑀺 𑀅𑀦𑀯𑀚𑁆𑀚𑀸, 𑀕𑀭𑀳𑀺𑀢𑀩𑁆𑀩𑀪𑀸𑀯𑀭𑀳𑀺𑀢𑀸 𑀦𑀺𑀤𑁆𑀤𑁄𑀲𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀦𑁂𑀲𑀁 𑀅𑀕𑀭𑀳𑀺𑀢𑀩𑁆𑀩𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀦 𑀕𑀸𑀭𑀬𑁆𑀳𑀯𑀺𑀭𑀳𑀫𑀢𑁆𑀢𑀁. 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀦𑀺𑀤𑁆𑀤𑁄𑀲𑀸 𑀅𑀩𑁆𑀬𑀸𑀓𑀢𑀸𑀢𑀺 𑀅𑀦𑀯𑀚𑁆𑀚𑀯𑀘𑀦𑀫𑀢𑁆𑀢𑁂𑀦 𑀢𑁂𑀲𑀫𑁆𑀧𑀺 𑀓𑀼𑀲𑀮𑀢𑀸𑀧𑀢𑁆𑀢𑀺𑀤𑁄𑀲𑀁 𑀤𑀺𑀲𑁆𑀯𑀸 𑀢𑀁 𑀧𑀭𑀺𑀳𑀭𑀺𑀢𑀼𑀁 𑀲𑀼𑀔𑀯𑀺𑀧𑀸𑀓𑀯𑀘𑀦𑀁 𑀆𑀳. 𑀅𑀯𑀚𑁆𑀚𑀧𑀝𑀺𑀧𑀓𑁆𑀔𑀸 𑀯𑀸 𑀇𑀥 𑀅𑀦𑀯𑀚𑁆𑀚𑀸𑀢𑀺 𑀯𑀼𑀢𑁆𑀢𑀸, 𑀦 𑀩𑀸𑀳𑀺𑀢𑀺𑀓𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁩𑁬𑁧) 𑀯𑀺𑀬 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸𑀯𑀚𑁆𑀚𑀸 𑀯𑀺𑀭𑀳𑀺𑀢𑀸𑀯𑀚𑁆𑀚𑀫𑀢𑁆𑀢𑀸 𑀯𑀸, 𑀢𑀲𑁆𑀫𑀸 𑀅𑀦𑀯𑀚𑁆𑀚𑀯𑀘𑀦𑁂𑀦 𑀅𑀯𑀚𑁆𑀚𑀯𑀺𑀦𑀸𑀲𑀦𑀪𑀸𑀯𑁄 𑀤𑀲𑁆𑀲𑀺𑀢𑁄. 𑀅𑀩𑁆𑀬𑀸𑀓𑀢𑁂𑀳𑀺 𑀧𑀦 𑀯𑀺𑀲𑀺𑀝𑁆𑀞𑀁 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀲𑀸𑀥𑀸𑀭𑀡𑀁 𑀲𑀯𑀺𑀧𑀸𑀓𑀢𑀸𑀮𑀓𑁆𑀔𑀡𑀦𑁆𑀢𑀺 𑀢𑀲𑁆𑀫𑀺𑀁 𑀮𑀓𑁆𑀔𑀡𑁂 𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀢𑀁 𑀲𑀼𑀔𑀯𑀺𑀧𑀸𑀓𑀯𑀘𑀦𑀁 𑀅𑀯𑁄𑀘. 𑀲𑀺𑀤𑁆𑀥𑁄 𑀳𑀺 𑀧𑀼𑀭𑀺𑀫𑁂𑀦𑁂𑀯 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀳𑀺 𑀓𑀼𑀲𑀮𑀸𑀦𑀁 𑀯𑀺𑀲𑁂𑀲𑁄𑀢𑀺. 𑀲𑀼𑀔𑁄 𑀯𑀺𑀧𑀸𑀓𑁄 𑀏𑀢𑁂𑀲𑀦𑁆𑀢𑀺 𑀲𑀼𑀔𑀯𑀺𑀧𑀸𑀓𑀸. 𑀢𑁂𑀦 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀲𑀸𑀫𑀜𑁆𑀜𑁂 𑀯𑀺𑀧𑀸𑀓𑀥𑀫𑁆𑀫𑀪𑀸𑀯𑁂 𑀲𑀼𑀔𑀯𑀺𑀧𑀸𑀓𑀯𑀺𑀧𑀘𑁆𑀘𑀦𑀲𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀦 𑀢𑁂𑀲𑀁 𑀲𑀼𑀔𑀯𑀺𑀧𑀸𑀓𑀲𑀩𑁆𑀪𑀸𑀯𑀫𑁂𑀯. 𑀅𑀦𑀯𑀚𑁆𑀚𑀸 𑀘 𑀢𑁂 𑀲𑀼𑀔𑀯𑀺𑀧𑀸𑀓𑀸 𑀘𑀸𑀢𑀺 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀸. 𑀓𑀼𑀲𑀮𑀸 𑀮𑀓𑁆𑀔𑀻𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀮𑀓𑁆𑀔𑀡𑀁, 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀮𑀓𑁆𑀔𑀡𑀁 𑀏𑀢𑁂𑀲𑀦𑁆𑀢𑀺 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀮𑀓𑁆𑀔𑀡𑀸. 𑀦𑀦𑀼 𑀢𑁂 𑀏𑀯 𑀓𑀼𑀲𑀮𑀸 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀸, 𑀓𑀣𑀁 𑀢𑁂 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀮𑀓𑁆𑀔𑀡𑀁 𑀳𑁄𑀦𑁆𑀢𑀻𑀢𑀺? 𑀯𑀺𑀜𑁆𑀜𑀸𑀢𑀸𑀯𑀺𑀜𑁆𑀜𑀸𑀢𑀲𑀤𑁆𑀤𑀢𑁆𑀣𑀪𑀸𑀯𑁂𑀦 𑀮𑀓𑁆𑀔𑀡𑀮𑀓𑁆𑀔𑀺𑀢𑀩𑁆𑀩𑀪𑀸𑀯𑀬𑀼𑀢𑁆𑀢𑀺𑀢𑁄. 𑀓𑀼𑀲𑀮𑀲𑀤𑁆𑀤𑀢𑁆𑀣𑀯𑀲𑁂𑀦 𑀳𑀺 𑀅𑀯𑀺𑀜𑁆𑀜𑀸𑀢𑀸 𑀓𑀼𑀲𑀮𑀸 𑀮𑀓𑁆𑀔𑀺𑀢𑀩𑁆𑀩𑀸 𑀳𑁄𑀦𑁆𑀢𑀺, 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀲𑀤𑁆𑀤𑀢𑁆𑀣𑀪𑀸𑀯𑁂𑀦 𑀯𑀺𑀜𑁆𑀜𑀸𑀢𑀸 𑀮𑀓𑁆𑀔𑀡𑀦𑁆𑀢𑀺 𑀬𑀼𑀢𑁆𑀢𑀫𑁂𑀢𑀁. 𑀅𑀣 𑀯𑀸 𑀮𑀓𑁆𑀔𑀻𑀬𑀢𑀻𑀢𑀺 𑀮𑀓𑁆𑀔𑀡𑀁, 𑀲𑀪𑀸𑀯𑁄. 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀸 𑀘 𑀢𑁂 𑀮𑀓𑁆𑀔𑀡𑀜𑁆𑀘𑀸𑀢𑀺 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀮𑀓𑁆𑀔𑀡𑀸, 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀸 𑀳𑀼𑀢𑁆𑀯𑀸 𑀮𑀓𑁆𑀔𑀺𑀬𑀫𑀸𑀦𑀸 𑀲𑀪𑀸𑀯𑀸 𑀓𑀼𑀲𑀮𑀸 𑀦𑀸𑀫𑀸𑀢𑀺 𑀅𑀢𑁆𑀣𑁄.

𑀅𑀣 𑀯𑀸 𑀅𑀦𑀯𑀚𑁆𑀚𑀯𑀘𑀦𑁂𑀦 𑀅𑀦𑀯𑀚𑁆𑀚𑀢𑁆𑀢𑀁 𑀆𑀳, 𑀲𑀼𑀔𑀯𑀺𑀧𑀸𑀓𑀯𑀘𑀦𑁂𑀦 𑀲𑀼𑀔𑀯𑀺𑀧𑀸𑀓𑀢𑁆𑀢𑀁, 𑀢𑀲𑁆𑀫𑀸 𑀅𑀦𑀯𑀚𑁆𑀚𑀜𑁆𑀘 𑀲𑀼𑀔𑀯𑀺𑀧𑀸𑀓𑁄 𑀘 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀁, 𑀢𑀁 𑀮𑀓𑁆𑀔𑀡𑀁 𑀏𑀢𑁂𑀲𑀁 𑀓𑀭𑀡𑀢𑁆𑀣𑁂 𑀘 𑀓𑀫𑁆𑀫𑀢𑁆𑀣𑁂 𑀘 𑀮𑀓𑁆𑀔𑀡𑀲𑀤𑁆𑀤𑁂 𑀲𑀪𑀸𑀯𑀪𑀽𑀢𑀦𑁆𑀢𑀺 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀮𑀓𑁆𑀔𑀡𑀸, 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀲𑀪𑀸𑀯𑁂𑀦 𑀮𑀓𑁆𑀔𑀺𑀬𑀫𑀸𑀦𑀸 𑀢𑀁𑀲𑀪𑀸𑀯𑀯𑀦𑁆𑀢𑁄 𑀘 𑀓𑀼𑀲𑀮𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀅𑀦𑀯𑀚𑁆𑀚𑀯𑀘𑀦𑁂𑀦 𑀧𑀯𑀢𑁆𑀢𑀺𑀲𑀼𑀔𑀢𑀁 𑀓𑀼𑀲𑀮𑀸𑀦𑀁 𑀤𑀲𑁆𑀲𑁂𑀢𑀺, 𑀲𑀼𑀔𑀯𑀺𑀧𑀸𑀓𑀯𑀘𑀦𑁂𑀦 𑀯𑀺𑀧𑀸𑀓𑀲𑀼𑀔𑀢𑀁. 𑀧𑀼𑀭𑀺𑀫𑀜𑁆𑀳𑀺 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀲𑀪𑀸𑀯𑀯𑀲𑁂𑀦 𑀮𑀓𑁆𑀔𑀡𑀢𑀸𑀯𑀘𑀦𑀁, 𑀧𑀘𑁆𑀙𑀺𑀫𑀁 𑀓𑀸𑀮𑀦𑁆𑀢𑀭𑁂 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀬𑀸𑀢𑀺. 𑀢𑀣𑀸 𑀧𑀼𑀭𑀺𑀫𑁂𑀦 𑀓𑀼𑀲𑀮𑀸𑀦𑀁 𑀅𑀢𑁆𑀢𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑀺, 𑀧𑀘𑁆𑀙𑀺𑀫𑁂𑀦 𑀯𑀺𑀲𑀼𑀤𑁆𑀥𑀯𑀺𑀧𑀸𑀓𑀢𑀁. 𑀧𑀼𑀭𑀺𑀫𑁂𑀦 𑀘 𑀓𑀼𑀲𑀮𑀁 𑀅𑀓𑀼𑀲𑀮𑀲𑀪𑀸𑀯𑀢𑁄 𑀦𑀺𑀯𑀢𑁆𑀢𑁂𑀢𑀺, 𑀧𑀘𑁆𑀙𑀺𑀫𑁂𑀦 𑀅𑀩𑁆𑀬𑀸𑀓𑀢𑀲𑀪𑀸𑀯𑀢𑁄 𑀲𑀯𑀺𑀧𑀸𑀓𑀢𑁆𑀢𑀤𑀻𑀧𑀓𑀢𑁆𑀢𑀸 𑀧𑀘𑁆𑀙𑀺𑀫𑀲𑁆𑀲. 𑀧𑀼𑀭𑀺𑀫𑁂𑀦 𑀯𑀸 𑀯𑀚𑁆𑀚𑀧𑀝𑀺𑀧𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁄 𑀓𑀺𑀘𑁆𑀘𑀝𑁆𑀞𑁂𑀦 𑀭𑀲𑁂𑀦 𑀅𑀓𑀼𑀲𑀮𑀯𑀺𑀤𑁆𑀥𑀁𑀲𑀦𑀭𑀲𑀢𑀁 𑀤𑀻𑀧𑁂𑀢𑀺, 𑀧𑀘𑁆𑀙𑀺𑀫𑁂𑀦 𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑁂𑀦 𑀇𑀝𑁆𑀞𑀯𑀺𑀧𑀸𑀓𑀭𑀲𑀢𑀁. 𑀧𑀼𑀭𑀺𑀫𑁂𑀦 𑀘 𑀉𑀧𑀝𑁆𑀞𑀸𑀦𑀸𑀓𑀸𑀭𑀝𑁆𑀞𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀦𑁂𑀦 𑀯𑁄𑀤𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀁 𑀤𑀲𑁆𑀲𑁂𑀢𑀺, 𑀧𑀘𑁆𑀙𑀺𑀫𑁂𑀦 𑀨𑀮𑀢𑁆𑀣𑁂𑀦 𑀲𑀼𑀔𑀯𑀺𑀧𑀸𑀓𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀁. 𑀧𑀼𑀭𑀺𑀫𑁂𑀦 𑀘 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀓𑀼𑀲𑀮𑀸𑀦𑀁 𑀧𑀤𑀝𑁆𑀞𑀸𑀦𑀁 𑀯𑀺𑀪𑀸𑀯𑁂𑀢𑀺. 𑀢𑀢𑁄 𑀳𑀺 𑀢𑁂 𑀅𑀦𑀯𑀚𑁆𑀚𑀸 𑀚𑀸𑀢𑀸𑀢𑀺. 𑀧𑀘𑁆𑀙𑀺𑀫𑁂𑀦 𑀓𑀼𑀲𑀮𑀸𑀦𑀁 𑀅𑀜𑁆𑀜𑁂𑀲𑀁 𑀧𑀤𑀝𑁆𑀞𑀸𑀦𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂 𑀳𑀺 𑀲𑀼𑀔𑀯𑀺𑀧𑀸𑀓𑀲𑁆𑀲 𑀓𑀸𑀭𑀡𑀁 𑀳𑁄𑀦𑁆𑀢𑀻𑀢𑀺. 𑀏𑀢𑁆𑀣 𑀘 𑀲𑀼𑀔𑀯𑀺𑀧𑀸𑀓𑀲𑀤𑁆𑀤𑁂 𑀲𑀼𑀔𑀲𑀤𑁆𑀤𑁄 𑀇𑀝𑁆𑀞𑀧𑀭𑀺𑀬𑀸𑀬𑀯𑀘𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑁄. 𑀇𑀝𑁆𑀞𑀘𑀢𑀼𑀓𑁆𑀔𑀦𑁆𑀥𑀯𑀺𑀧𑀸𑀓𑀸 𑀳𑀺 𑀓𑀼𑀲𑀮𑀸, 𑀦 𑀲𑀼𑀔𑀯𑁂𑀤𑀦𑀸𑀯𑀺𑀧𑀸𑀓𑀸𑀯. 𑀲𑀗𑁆𑀔𑀸𑀭𑀤𑀼𑀓𑁆𑀔𑁄𑀧𑀲𑀫𑀲𑀼𑀔𑀯𑀺𑀧𑀸𑀓𑀢𑀸𑀬 𑀘 𑀲𑀫𑁆𑀪𑀯𑁄 𑀏𑀯 𑀦𑀢𑁆𑀣𑀺. 𑀦 𑀳𑀺 𑀢𑀁𑀯𑀺𑀧𑀸𑀓𑁄𑀢𑀺. 𑀬𑀤𑀺 𑀧𑀦 𑀯𑀺𑀧𑀸𑀓𑀲𑀤𑁆𑀤𑁄 𑀨𑀮𑀧𑀭𑀺𑀬𑀸𑀬𑀯𑀘𑀦𑀁, 𑀦𑀺𑀲𑁆𑀲𑀦𑁆𑀤𑀯𑀺𑀧𑀸𑀓𑁂𑀦 𑀇𑀝𑁆𑀞𑀭𑀽𑀧𑁂𑀦𑀸𑀧𑀺 𑀲𑀼𑀔𑀯𑀺𑀧𑀸𑀓𑀢𑀸 𑀬𑁄𑀚𑁂𑀢𑀩𑁆𑀩𑀸.

𑀲𑀸𑀯𑀚𑁆𑀚𑀤𑀼𑀓𑁆𑀔𑀯𑀺𑀧𑀸𑀓𑀮𑀓𑁆𑀔𑀡𑀸𑀢𑀺 𑀏𑀢𑁆𑀣 𑀘 𑀯𑀼𑀢𑁆𑀢𑀯𑀺𑀥𑀺𑀅𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀘 𑀬𑁄𑀚𑀦𑀸 𑀘 𑀬𑀣𑀸𑀲𑀫𑁆𑀪𑀯𑀁 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀧𑀸𑀓𑀸𑀭𑀳𑀢𑀸 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀮𑀓𑁆𑀔𑀡𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀢𑀩𑁆𑀪𑀸𑀯𑁂𑀦 𑀅𑀓𑀣𑀺𑀢𑀸 𑀅𑀩𑁆𑀬𑀸𑀓𑀢𑀸 𑀅𑀯𑀺𑀧𑀸𑀓𑀸𑀭𑀳𑀲𑀪𑀸𑀯𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀅𑀯𑀺𑀧𑀸𑀓𑀮𑀓𑁆𑀔𑀡𑀸 𑀅𑀩𑁆𑀬𑀸𑀓𑀢𑀸’’𑀢𑀺. 𑀬𑀣𑁂𑀯 𑀳𑀺 𑀲𑀼𑀔𑀤𑀼𑀓𑁆𑀔𑀯𑀺𑀧𑀸𑀓𑀸𑀭𑀳𑀸 𑀲𑀼𑀔𑀤𑀼𑀓𑁆𑀔𑀯𑀺𑀧𑀸𑀓𑀸𑀢𑀺 𑀏𑀯𑀁𑀮𑀓𑁆𑀔𑀡𑀢𑀸 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀯𑀼𑀢𑁆𑀢𑀸, 𑀏𑀯𑀫𑀺𑀥𑀸𑀧𑀺 𑀅𑀯𑀺𑀧𑀸𑀓𑀸𑀭𑀳𑀸 𑀅𑀯𑀺𑀧𑀸𑀓𑀸𑀢𑀺 𑀏𑀯𑀁𑀮𑀓𑁆𑀔𑀡𑀢𑀸 𑀅𑀩𑁆𑀬𑀸𑀓𑀢𑀸𑀦𑀁 𑀯𑀼𑀢𑁆𑀢𑀸. 𑀢𑀲𑁆𑀫𑀸 ‘‘𑀅𑀳𑁄𑀲𑀺 𑀓𑀫𑁆𑀫𑀁 𑀦𑀸𑀳𑁄𑀲𑀺 𑀓𑀫𑁆𑀫𑀯𑀺𑀧𑀸𑀓𑁄 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄 𑀦𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀅𑀢𑁆𑀣𑀺 𑀓𑀫𑁆𑀫𑀁 𑀦𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀁 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 (𑀧𑀝𑀺. 𑀫. 𑁧.𑁨𑁩𑁪) 𑀏𑀯𑀁𑀧𑀓𑀸𑀭𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑀸𑀦𑀸𑀧𑀢𑁆𑀢𑀺 𑀅𑀩𑁆𑀬𑀸𑀓𑀢𑀪𑀸𑀯𑀸𑀧𑀢𑁆𑀢𑀺 𑀯𑀸 𑀦 𑀳𑁄𑀢𑀺. 𑀦 𑀳𑀺 𑀢𑁂 𑀲𑀼𑀔𑀤𑀼𑀓𑁆𑀔𑀯𑀺𑀧𑀸𑀓𑀸𑀭𑀳𑀸 𑀦 𑀳𑁄𑀦𑁆𑀢𑀺 𑀯𑀺𑀧𑀸𑀓𑀥𑀫𑁆𑀫𑀢𑁆𑀢𑀸, 𑀅𑀯𑀺𑀧𑀸𑀓𑀸𑀭𑀳𑀸 𑀯𑀸 𑀦 𑀳𑁄𑀦𑁆𑀢𑀺 𑀅𑀯𑀺𑀧𑀸𑀓𑀥𑀫𑁆𑀫𑀢𑁆𑀢𑀸𑀪𑀸𑀯𑀸𑀢𑀺.

𑀓𑀼𑀲𑀮𑀸𑀢𑀺 𑀯𑀸 𑀥𑀫𑁆𑀫𑀸𑀢𑀺 𑀯𑀸𑀢𑀺𑀆𑀤𑀻𑀦𑀻𑀢𑀺 𑀓𑀼𑀲𑀮𑀥𑀫𑁆𑀫𑀧𑀤𑀸𑀦𑀺 𑀤𑁆𑀯𑁂, 𑀅𑀓𑀼𑀲𑀮𑀥𑀫𑁆𑀫𑀧𑀤𑀸𑀦𑀺 𑀤𑁆𑀯𑁂, 𑀅𑀩𑁆𑀬𑀸𑀓𑀢𑀥𑀫𑁆𑀫𑀧𑀤𑀸𑀦𑀺 𑀤𑁆𑀯𑁂𑀢𑀺. 𑀏𑀓𑀢𑁆𑀣𑀦𑀸𑀦𑀢𑁆𑀣𑀸𑀦𑀻𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑀁 𑀏𑀓𑀢𑁆𑀣𑀦𑀸𑀦𑀢𑁆𑀣𑀢𑀁 𑀘𑁄𑀤𑁂𑀢𑀺, 𑀦 𑀙𑀦𑁆𑀦𑀁. 𑀤𑁄𑀲𑀫𑁂𑀢𑁆𑀣 𑀯𑀢𑁆𑀢𑀼𑀓𑀸𑀫𑁄 𑀘𑁄𑀤𑀓𑁄 𑀧𑀼𑀘𑁆𑀙𑀢𑀻𑀢𑀺 𑀜𑀢𑁆𑀯𑀸 𑀆𑀘𑀭𑀺𑀬𑁄 𑀆𑀳 ‘‘𑀓𑀺𑀜𑁆𑀘𑁂𑀢𑁆𑀣𑀸’’𑀢𑀺. 𑀏𑀢𑁆𑀣 𑀏𑀓𑀢𑁆𑀣𑀦𑀸𑀦𑀢𑁆𑀣𑀢𑀸𑀬𑀁 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁 𑀅𑀲𑀫𑀢𑁆𑀢𑀸 𑀢𑁂 𑀘𑁄𑀤𑀦𑀸, 𑀅𑀯𑀲𑀺𑀝𑁆𑀞𑀁 𑀢𑀸𑀯 𑀩𑁆𑀭𑀽𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀤𑀺 𑀏𑀓𑀢𑁆𑀣𑀸𑀦𑀺 𑀇𑀦𑁆𑀤𑀲𑀓𑁆𑀓𑀲𑀤𑁆𑀤𑀸𑀦𑀁 𑀯𑀺𑀬 𑀲𑀤𑁆𑀤𑀫𑀢𑁆𑀢𑁂 𑀏𑀯 𑀪𑁂𑀤𑁄, 𑀏𑀯𑀁 𑀓𑀼𑀲𑀮𑀥𑀫𑁆𑀫𑀲𑀤𑁆𑀤𑀸𑀦𑀁, 𑀦 𑀅𑀢𑁆𑀣𑁂𑀢𑀺. 𑀬𑀣𑀸 ‘‘𑀇𑀦𑁆𑀤𑁄 𑀲𑀓𑁆𑀓𑁄’’𑀢𑀺 𑀯𑀼𑀢𑁆𑀢𑁂 ‘‘𑀇𑀦𑁆𑀤𑁄 𑀇𑀦𑁆𑀤𑁄’’𑀢𑀺 𑀯𑀼𑀢𑁆𑀢𑀲𑀤𑀺𑀲𑀁 𑀳𑁄𑀢𑀺, 𑀏𑀯𑀁 ‘‘𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 𑀇𑀤𑀁 𑀯𑀘𑀦𑀁 ‘‘𑀓𑀼𑀲𑀮𑀸 𑀓𑀼𑀲𑀮𑀸’’𑀢𑀺 𑀯𑀼𑀢𑁆𑀢𑀲𑀤𑀺𑀲𑀁 𑀳𑁄𑀢𑀺. 𑀏𑀯𑀁 𑀇𑀢𑀭𑁂𑀲𑀼𑀧𑀺 ‘‘𑀅𑀓𑀼𑀲𑀮𑀸 𑀅𑀓𑀼𑀲𑀮𑀸’’𑀢𑀺 𑀯𑀼𑀢𑁆𑀢𑀲𑀤𑀺𑀲𑀢𑀸 ‘‘𑀅𑀩𑁆𑀬𑀸𑀓𑀢𑀸 𑀅𑀩𑁆𑀬𑀸𑀓𑀢𑀸’’𑀢𑀺 𑀯𑀼𑀢𑁆𑀢𑀲𑀤𑀺𑀲𑀢𑀸 𑀘 𑀬𑁄𑀚𑁂𑀢𑀩𑁆𑀩𑀸. 𑀅𑀣 𑀦𑀸𑀦𑀢𑁆𑀣𑀸𑀦𑀺, 𑀇𑀦𑁆𑀤𑀓𑀼𑀯𑁂𑀭𑀲𑀤𑁆𑀤𑀸𑀦𑀁 𑀯𑀺𑀬 𑀲𑀤𑁆𑀤𑀢𑁄 𑀅𑀢𑁆𑀣𑀢𑁄 𑀘 𑀓𑀼𑀲𑀮𑀥𑀫𑁆𑀫𑀲𑀤𑁆𑀤𑀸𑀦𑀁 𑀪𑁂𑀤𑁄, 𑀢𑀣𑀸 𑀅𑀓𑀼𑀲𑀮𑀥𑀫𑁆𑀫𑀲𑀤𑁆𑀤𑀸𑀤𑀻𑀦𑀦𑁆𑀢𑀺 𑀙𑀳𑀺 𑀧𑀤𑁂𑀳𑀺 𑀘𑀢𑀽𑀳𑀺 𑀧𑀤𑁂𑀳𑀺 𑀘 𑀙 𑀘𑀢𑁆𑀢𑀸𑀭𑁄 𑀘 𑀅𑀢𑁆𑀣𑀸 𑀪𑀺𑀦𑁆𑀦𑀸 𑀯𑀼𑀢𑁆𑀢𑀸𑀢𑀺 𑀓𑀼𑀲𑀮𑀢𑁆𑀢𑀺𑀓𑀸𑀤𑀻𑀦𑀁 𑀓𑀼𑀲𑀮𑀙𑀓𑁆𑀓𑀸𑀤𑀺𑀪𑀸𑀯𑁄, 𑀳𑁂𑀢𑀼𑀤𑀼𑀓𑀸𑀤𑀻𑀦𑀜𑁆𑀘 𑀳𑁂𑀢𑀼𑀘𑀢𑀼𑀓𑁆𑀓𑀸𑀤𑀺𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺.

𑀦𑀦𑀼 𑀢𑀺𑀡𑁆𑀡𑀁 𑀥𑀫𑁆𑀫𑀲𑀤𑁆𑀤𑀸𑀦𑀁 𑀢𑀺𑀡𑁆𑀡𑀁 𑀇𑀦𑁆𑀤𑀲𑀤𑁆𑀤𑀸𑀦𑀁 𑀯𑀺𑀬 𑀭𑀽𑀧𑀸𑀪𑁂𑀤𑀸 𑀅𑀢𑁆𑀣𑀸𑀪𑁂𑀤𑁄𑀢𑀺 𑀙𑀓𑁆𑀓𑀪𑀸𑀯𑁄 𑀦 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀏𑀯𑀫𑀺𑀤𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸 ‘‘𑀢𑀺𑀓𑀤𑀼𑀓𑀸𑀦𑀁 𑀘𑀢𑀼𑀓𑁆𑀓𑀢𑀺𑀓𑀪𑀸𑀯𑁄 𑀆𑀧𑀚𑁆𑀚𑀢𑀻’’𑀢𑀺, 𑀦 𑀯𑀢𑁆𑀢𑀩𑁆𑀩𑀁, 𑀢𑀺𑀡𑁆𑀡𑀁 𑀥𑀫𑁆𑀫𑀲𑀤𑁆𑀤𑀸𑀦𑀁 𑀏𑀓𑀢𑁆𑀣𑀸𑀦𑀁 𑀢𑀺𑀡𑁆𑀡𑀁 𑀇𑀦𑁆𑀤𑀲𑀤𑁆𑀤𑀸𑀦𑀁 𑀯𑀺𑀬 𑀯𑀘𑀦𑁂 𑀧𑀬𑁄𑀚𑀦𑀸𑀪𑀸𑀯𑀸 𑀯𑀼𑀢𑁆𑀢𑀸𑀦𑀁 𑀢𑁂𑀲𑀁 𑀫𑀸𑀲𑀲𑀤𑁆𑀤𑀸𑀦𑀁 𑀯𑀺𑀬 𑀅𑀪𑀺𑀦𑁆𑀦𑀭𑀽𑀧𑀸𑀦𑀜𑁆𑀘 𑀅𑀢𑁆𑀣𑀪𑁂𑀤𑁄 𑀉𑀧𑀧𑀚𑁆𑀚𑀢𑀻𑀢𑀺, 𑀏𑀯𑀫𑀧𑀺 𑀬𑀣𑀸 𑀏𑀓𑁄 𑀫𑀸𑀲𑀲𑀤𑁆𑀤𑁄 𑀅𑀪𑀺𑀦𑁆𑀦𑀭𑀽𑀧𑁄 𑀓𑀸𑀮𑀁 𑀅𑀧𑀭𑀡𑁆𑀡𑀯𑀺𑀲𑁂𑀲𑀁 𑀲𑀼𑀯𑀡𑁆𑀡𑀫𑀸𑀲𑀜𑁆𑀘 𑀯𑀤𑀢𑀺, 𑀏𑀯𑀁 𑀥𑀫𑁆𑀫𑀲𑀤𑁆𑀤𑁄𑀧𑀺 𑀏𑀓𑁄 𑀪𑀺𑀦𑁆𑀦𑁂 𑀅𑀢𑁆𑀣𑁂 𑀯𑀢𑁆𑀢𑀼𑀫𑀭𑀳𑀢𑀻𑀢𑀺 𑀓𑀸𑀮𑀸𑀤𑀻𑀦𑀁 𑀫𑀸𑀲𑀧𑀤𑀢𑁆𑀣𑀢𑀸𑀬 𑀯𑀺𑀬 𑀢𑀩𑁆𑀩𑀘𑀦𑀻𑀬𑀪𑀺𑀦𑁆𑀦𑀢𑁆𑀣𑀸𑀦𑀁 𑀥𑀫𑁆𑀫𑀧𑀤𑀢𑁆𑀣𑀢𑀸𑀬 𑀅𑀪𑁂𑀤𑁄𑀢𑀺 𑀘𑀢𑀼𑀓𑁆𑀓𑀢𑀺𑀓𑀪𑀸𑀯𑁄 𑀏𑀯 𑀆𑀧𑀚𑁆𑀚𑀢𑀻𑀢𑀺, 𑀦𑀸𑀧𑀚𑁆𑀚𑀢𑀺 𑀏𑀓𑀲𑁆𑀲 𑀲𑀤𑁆𑀤𑀲𑁆𑀲 𑀚𑀸𑀢𑀺𑀕𑀼𑀡𑀓𑀺𑀭𑀺𑀬𑀸𑀪𑀺𑀦𑁆𑀦𑀸𑀦𑀁 𑀅𑀦𑀪𑀺𑀥𑀸𑀦𑀢𑁄. 𑀦 𑀳𑀺 𑀫𑀸𑀲-𑀲𑀤𑁆𑀤𑁄 𑀏𑀓𑁄 𑀚𑀸𑀢𑀺𑀪𑀺𑀦𑁆𑀦𑀸𑀦𑀁 𑀓𑀸𑀮𑀸𑀤𑀻𑀦𑀁 𑀅𑀦𑁆𑀢𑀭𑁂𑀦 𑀲𑀭𑀽𑀧𑁂𑀓𑀲𑁂𑀲𑀁 𑀯𑀸𑀘𑀓𑁄 𑀳𑁄𑀢𑀺. 𑀇𑀥 𑀘 𑀬𑀤𑀺 𑀲𑀭𑀽𑀧𑁂𑀓𑀲𑁂𑀲𑁄 𑀓𑀢𑁄 𑀲𑀺𑀬𑀸, 𑀤𑀼𑀢𑀺𑀬𑁄 𑀢𑀢𑀺𑀬𑁄 𑀘 𑀥𑀫𑁆𑀫-𑀲𑀤𑁆𑀤𑁄 𑀦 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸, 𑀯𑀼𑀢𑁆𑀢𑁄 𑀘 𑀲𑁄, 𑀢𑀲𑁆𑀫𑀸 𑀓𑀼𑀲𑀮𑀸𑀤𑀺-𑀲𑀤𑁆𑀤𑀸 𑀯𑀺𑀬 𑀅𑀪𑀺𑀦𑁆𑀦𑀓𑀼𑀲𑀮𑀸𑀤𑀺𑀚𑀸𑀢𑀻𑀲𑀼 𑀭𑀽𑀧𑀲𑀸𑀫𑀜𑁆𑀜𑁂𑀧𑀺 𑀫𑀸𑀲-𑀲𑀤𑁆𑀤𑀸 𑀯𑀺𑀬 𑀢𑀬𑁄 𑀯𑀺𑀦𑀺𑀯𑀢𑁆𑀢𑀅𑀜𑁆𑀜𑀚𑀸𑀢𑀻𑀲𑀼 𑀯𑀢𑁆𑀢𑀫𑀸𑀦𑀸 𑀢𑀬𑁄 𑀤𑁆𑀯𑁂 𑀘 𑀥𑀫𑁆𑀫-𑀲𑀤𑁆𑀤𑀸 𑀆𑀧𑀦𑁆𑀦𑀸𑀢𑀺 𑀢𑀺𑀓𑀤𑀼𑀓𑀸𑀦𑀁 𑀙𑀓𑁆𑀓𑀘𑀢𑀼𑀓𑁆𑀓𑀪𑀸𑀯𑁄 𑀏𑀯 𑀆𑀧𑀚𑁆𑀚𑀢𑀻𑀢𑀺.

𑀧𑀤𑀸𑀦𑀜𑁆𑀘 𑀅𑀲𑀫𑁆𑀩𑀦𑁆𑀥𑁄𑀢𑀺 𑀓𑀼𑀲𑀮𑀥𑀫𑁆𑀫𑀧𑀤𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀢𑀣𑀸 𑀅𑀓𑀼𑀲𑀮𑀥𑀫𑁆𑀫𑀧𑀤𑀸𑀦𑀁 𑀅𑀩𑁆𑀬𑀸𑀓𑀢𑀥𑀫𑁆𑀫𑀧𑀤𑀸𑀦𑀜𑁆𑀘 𑀅𑀲𑀫𑁆𑀩𑀦𑁆𑀥𑁄 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀜𑁆𑀳𑀺 𑀇𑀘𑁆𑀙𑀺𑀢𑁄 𑀲𑀫𑁆𑀩𑀦𑁆𑀥𑁄, 𑀦 𑀲𑀩𑁆𑀩𑁂𑀲𑀁 𑀙𑀦𑁆𑀦𑀁 𑀘𑀢𑀼𑀦𑁆𑀦𑀁 𑀯𑀸 𑀅𑀜𑁆𑀜𑀫𑀜𑁆𑀜𑀦𑁆𑀢𑀺. 𑀇𑀤𑀁 𑀧𑀦 𑀓𑀲𑁆𑀫𑀸 𑀘𑁄𑀤𑁂𑀢𑀺, 𑀦𑀦𑀼 𑀦𑀸𑀦𑀢𑁆𑀣𑀢𑁆𑀢𑁂 𑀲𑀢𑀺 𑀅𑀢𑁆𑀣𑀦𑁆𑀢𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀘𑁆𑀘𑀫𑀸𑀦𑁂𑀲𑀼 𑀥𑀫𑁆𑀫-𑀲𑀤𑁆𑀤𑁂𑀲𑀼 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢-𑀲𑀤𑁆𑀤𑀸𑀦𑀁 𑀯𑀺𑀬 𑀅𑀲𑀫𑁆𑀩𑀦𑁆𑀥𑁄 𑀯𑀼𑀢𑁆𑀢𑁄 𑀬𑀼𑀢𑁆𑀢𑁄 𑀏𑀯𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀅𑀲𑀫𑁆𑀩𑀦𑁆𑀥𑀁 𑀧𑀦 𑀲𑀺𑀤𑁆𑀥𑀁 𑀓𑀢𑁆𑀯𑀸 𑀧𑀼𑀭𑀺𑀫𑀘𑁄𑀤𑀦𑀸 𑀓𑀢𑀸 ‘‘𑀢𑀺𑀓𑀤𑀼𑀓𑀸𑀦𑀁 𑀙𑀓𑁆𑀓𑀘𑀢𑀼𑀓𑁆𑀓𑀪𑀸𑀯𑁄 𑀆𑀧𑀚𑁆𑀚𑀢𑀻’’𑀢𑀺, 𑀇𑀥 𑀧𑀦 𑀢𑀁 𑀅𑀲𑀫𑁆𑀩𑀦𑁆𑀥𑀁 𑀲𑀸𑀥𑁂𑀢𑀼𑀁 𑀇𑀤𑀁 𑀘𑁄𑀤𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸 𑁋 𑀬𑀤𑀺 𑀧𑀦 𑀙𑀓𑁆𑀓𑀘𑀢𑀼𑀓𑁆𑀓𑀪𑀸𑀯𑀁 𑀦 𑀇𑀘𑁆𑀙𑀲𑀺, 𑀧𑀤𑀸𑀦𑀁 𑀲𑀫𑁆𑀩𑀦𑁆𑀥𑁂𑀦 𑀪𑀯𑀺𑀢𑀩𑁆𑀩𑀁 𑀬𑀣𑀸𑀯𑀼𑀢𑁆𑀢𑀦𑀬𑁂𑀦, 𑀲𑁄 𑀘 𑀲𑀫𑀸𑀦𑀯𑀺𑀪𑀢𑁆𑀢𑀻𑀦𑀁 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀲𑀫𑁆𑀩𑀦𑁆𑀥𑁄 𑀏𑀓𑀢𑁆𑀣𑀢𑁆𑀢𑁂 𑀲𑀢𑀺 𑀬𑀼𑀚𑁆𑀚𑁂𑀬𑁆𑀬, 𑀢𑁆𑀯𑀁 𑀧𑀦 𑀦𑀸𑀦𑀢𑁆𑀣𑀢𑀁 𑀯𑀤𑀲𑀻𑀢𑀺 𑀧𑀤𑀸𑀦𑀜𑁆𑀘 𑀢𑁂 𑀅𑀲𑀫𑁆𑀩𑀦𑁆𑀥𑁄 𑀆𑀧𑀚𑁆𑀚𑀢𑀺, 𑀦𑁂𑀯 𑀦𑀸𑀧𑀚𑁆𑀚𑀢𑀻𑀢𑀺. 𑀦𑀺𑀬𑀫𑀦𑀢𑁆𑀣𑁄 𑀘-𑀲𑀤𑁆𑀤𑁄. 𑀧𑀼𑀩𑁆𑀩𑀸𑀧𑀭…𑀧𑁂… 𑀦𑀺𑀧𑁆𑀧𑀬𑁄𑀚𑀦𑀸𑀦𑀺 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀙𑀓𑁆𑀓𑀘𑀢𑀼𑀓𑁆𑀓𑀪𑀸𑀯𑀁 𑀅𑀦𑀺𑀘𑁆𑀙𑀦𑁆𑀢𑀲𑁆𑀲, 𑀦𑀸𑀦𑀢𑁆𑀣𑀢𑀁 𑀧𑀦 𑀇𑀘𑁆𑀙𑀦𑁆𑀢𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀯𑀲𑁆𑀲𑀜𑁆𑀘 𑀲𑀫𑁆𑀩𑀦𑁆𑀥𑁄 𑀇𑀘𑁆𑀙𑀺𑀢𑀩𑁆𑀩𑁄 𑀧𑀼𑀩𑁆𑀩𑀸𑀧𑀭𑀯𑀺𑀭𑁄𑀥𑀸𑀧𑀢𑁆𑀢𑀺𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀸𑀧𑀺 𑀘𑁂𑀲𑀸’’𑀢𑀺𑀆𑀤𑀺𑀫𑀸𑀳. 𑀧𑀼𑀘𑁆𑀙𑀸 𑀳𑀺 𑀧𑀤𑀯𑀺𑀧𑀮𑁆𑀮𑀸𑀲𑀓𑀭𑀡𑁂𑀦 𑀥𑀫𑁆𑀫𑀸 𑀏𑀯 𑀓𑀼𑀲𑀮𑀸𑀢𑀺 𑀓𑀼𑀲𑀮𑀥𑀫𑁆𑀫-𑀲𑀤𑁆𑀤𑀸𑀦𑀁 𑀇𑀥 𑀉𑀤𑁆𑀤𑀺𑀝𑁆𑀞𑀸𑀦𑀁 𑀏𑀓𑀢𑁆𑀣𑀢𑀁 𑀤𑀻𑀧𑁂𑀢𑀺, 𑀢𑀯 𑀘 𑀦𑀸𑀦𑀢𑁆𑀣𑀢𑀁 𑀯𑀤𑀦𑁆𑀢𑀲𑁆𑀲 𑀦𑁂𑀯 𑀳𑀺 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺 𑀓𑀢𑁆𑀯𑀸 𑀢𑀸𑀬𑀧𑀺 𑀧𑀼𑀘𑁆𑀙𑀸𑀬 𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀺, 𑀯𑀼𑀘𑁆𑀘𑀢𑀺 𑀘 𑀢𑀣𑀸 𑀲𑀸 𑀧𑀼𑀘𑁆𑀙𑀸𑀢𑀺 𑀦 𑀦𑀸𑀦𑀢𑁆𑀣𑀢𑀸 𑀬𑀼𑀚𑁆𑀚𑀢𑀺.

𑀅𑀧𑀭𑁄 𑀦𑀬𑁄𑀢𑀺 ‘‘𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀦𑀁 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀏𑀓𑀢𑁆𑀣𑀢𑁆𑀢𑀫𑁂𑀯 𑀢𑀺𑀡𑁆𑀡𑀁 𑀥𑀫𑁆𑀫𑀲𑀤𑁆𑀤𑀸𑀦𑀁 𑀏𑀓𑀢𑁆𑀣𑀦𑀸𑀦𑀢𑁆𑀣𑀢𑁆𑀢𑁂𑀳𑀺 𑀘𑁄𑀤𑁂𑀢𑀺. 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀏𑀓𑀢𑁆𑀢𑀸𑀢𑀺𑀆𑀤𑀺𑀫𑁆𑀳𑀺 𑀬𑀣𑀸 𑀢𑀻𑀳𑀺 𑀇𑀦𑁆𑀤-𑀲𑀤𑁆𑀤𑁂𑀳𑀺 𑀯𑀼𑀘𑁆𑀘𑀫𑀸𑀦𑀸𑀦𑀁 𑀇𑀦𑁆𑀤𑀢𑁆𑀣𑀸𑀦𑀁 𑀇𑀦𑁆𑀤𑀪𑀸𑀯𑁂𑀦 𑀏𑀓𑀢𑁆𑀢𑀸 𑀢𑀢𑁄 𑀅𑀦𑀜𑁆𑀜𑁂𑀲𑀁 𑀲𑀓𑁆𑀓𑀧𑀼𑀭𑀺𑀦𑁆𑀤𑀤𑀲𑀳𑀲𑁆𑀲𑀓𑁆𑀔𑀲𑀤𑁆𑀤𑀢𑁆𑀣𑀸𑀦𑀁 𑀏𑀓𑀢𑁆𑀢𑀁, 𑀏𑀯𑀁 𑀢𑀺𑀡𑁆𑀡𑀁 𑀥𑀫𑁆𑀫-𑀲𑀤𑁆𑀤𑀢𑁆𑀣𑀸𑀦𑀁 𑀥𑀫𑁆𑀫𑀪𑀸𑀯𑁂𑀦 𑀏𑀓𑀢𑁆𑀢𑀸 𑀢𑀢𑁄 𑀅𑀦𑀜𑁆𑀜𑁂𑀲𑀁 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢-𑀲𑀤𑁆𑀤𑀢𑁆𑀣𑀸𑀦𑀁 𑀏𑀓𑀢𑁆𑀢𑀁 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀥𑀫𑁆𑀫𑁄 𑀦𑀸𑀫 𑀪𑀸𑀯𑁄𑀢𑀺 𑀲𑀪𑀸𑀯𑀥𑀸𑀭𑀡𑀸𑀤𑀺𑀦𑀸 𑀅𑀢𑁆𑀣𑁂𑀦 𑀥𑀫𑁆𑀫𑁄𑀢𑀺 𑀯𑀼𑀢𑁆𑀢𑁄, 𑀲𑁄 𑀘 𑀲𑀪𑀸𑀯𑀲𑁆𑀲𑁂𑀯 𑀳𑁄𑀢𑀺, 𑀦𑀸𑀲𑀪𑀸𑀯𑀲𑁆𑀲𑀸𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺. 𑀳𑁄𑀢𑀼 𑀪𑀸𑀯𑁄, 𑀢𑀢𑁄 𑀓𑀺𑀦𑁆𑀢𑀺? 𑀬𑀤𑀺 𑀢𑀺𑀡𑁆𑀡𑀁 𑀥𑀫𑁆𑀫𑀲𑀤𑁆𑀤𑀸𑀦𑀁 𑀦𑀸𑀦𑀢𑁆𑀣𑀢𑀸, 𑀢𑀻𑀲𑀼 𑀥𑀫𑁆𑀫𑁂𑀲𑀼 𑀬𑁄 𑀓𑁄𑀘𑀺 𑀏𑀓𑁄 𑀥𑀫𑁆𑀫𑁄 𑀪𑀸𑀯𑁄, 𑀢𑀢𑁄 𑀅𑀦𑀜𑁆𑀜𑀁 𑀓𑀼𑀲𑀮𑀁 𑀅𑀓𑀼𑀲𑀮𑀁 𑀅𑀩𑁆𑀬𑀸𑀓𑀢𑀁 𑀯𑀸 𑀏𑀓𑁂𑀓𑀫𑁂𑀯 𑀪𑀸𑀯𑁄. 𑀪𑀸𑀯𑀪𑀽𑀢𑀸 𑀧𑀦 𑀥𑀫𑁆𑀫𑀸 𑀅𑀜𑁆𑀜𑁂 𑀤𑁆𑀯𑁂 𑀅𑀪𑀸𑀯𑀸 𑀳𑁄𑀦𑁆𑀢𑀻𑀢𑀺 𑀢𑁂𑀳𑀺 𑀅𑀦𑀜𑁆𑀜𑁂 𑀓𑀼𑀲𑀮𑀸𑀤𑀻𑀲𑀼 𑀤𑁆𑀯𑁂 𑀬𑁂 𑀓𑁂𑀘𑀺 𑀅𑀪𑀸𑀯𑀸. 𑀬𑁄𑀧𑀺 𑀘 𑀲𑁄 𑀏𑀓𑁄 𑀥𑀫𑁆𑀫𑁄 𑀪𑀸𑀯𑁄𑀢𑀺 𑀕𑀳𑀺𑀢𑁄, 𑀲𑁄𑀧𑀺 𑀲𑀫𑀸𑀦𑀭𑀽𑀧𑁂𑀲𑀼 𑀢𑀻𑀲𑀼 𑀥𑀫𑁆𑀫𑀲𑀤𑁆𑀤𑁂𑀲𑀼 𑀅𑀬𑀫𑁂𑀯 𑀪𑀸𑀯𑀢𑁆𑀣𑁄 𑀳𑁄𑀢𑀻𑀢𑀺 𑀦𑀺𑀬𑀫𑀲𑁆𑀲 𑀅𑀪𑀸𑀯𑀸 𑀅𑀜𑁆𑀜𑀲𑁆𑀲 𑀪𑀸𑀯𑀢𑁆𑀣𑀢𑁆𑀢𑁂 𑀲𑀢𑀺 𑀅𑀪𑀸𑀯𑁄 𑀳𑁄𑀢𑀻𑀢𑀺 𑀢𑀢𑁄 𑀅𑀦𑀜𑁆𑀜𑀲𑁆𑀲𑀧𑀺 𑀅𑀪𑀸𑀯𑀢𑁆𑀢𑀁 𑀆𑀧𑀦𑁆𑀦𑀦𑁆𑀢𑀺 𑀓𑀼𑀲𑀮𑀸𑀤𑀻𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀅𑀪𑀸𑀯𑀢𑁆𑀢𑀸𑀧𑀢𑁆𑀢𑀺 𑀳𑁄𑀢𑀺. 𑀦 𑀳𑀺 𑀇𑀦𑁆𑀤𑀲𑁆𑀲 𑀅𑀫𑀦𑀼𑀲𑁆𑀲𑀢𑁆𑀢𑁂 𑀢𑀢𑁄 𑀅𑀦𑀜𑁆𑀜𑁂𑀲𑀁 𑀲𑀓𑁆𑀓𑀸𑀤𑀻𑀦𑀁 𑀫𑀦𑀼𑀲𑁆𑀲𑀢𑁆𑀢𑀁 𑀅𑀢𑁆𑀣𑀻𑀢𑀺.

𑀦𑀦𑀼 𑀏𑀯𑀫𑀧𑀺 𑀏𑀓𑀲𑁆𑀲 𑀪𑀸𑀯𑀢𑁆𑀢𑀁 𑀯𑀺𑀦𑀸 𑀅𑀜𑁆𑀜𑁂𑀲𑀁 𑀅𑀪𑀸𑀯𑀢𑁆𑀢𑀁 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀢𑀢𑁆𑀣 𑀘 𑀏𑀓𑁂𑀦𑁂𑀯 𑀪𑀸𑀯𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀦𑀺𑀬𑀫𑀸𑀪𑀸𑀯𑀢𑁄 𑀢𑀺𑀡𑁆𑀡𑀫𑁆𑀧𑀺 𑀪𑀸𑀯𑀢𑁆𑀢𑁂 𑀲𑀺𑀤𑁆𑀥𑁂 𑀢𑁂𑀳𑀺 𑀅𑀦𑀜𑁆𑀜𑁂𑀲𑀁 𑀓𑀼𑀲𑀮𑀸𑀤𑀻𑀦𑀫𑁆𑀧𑀺 𑀪𑀸𑀯𑀢𑁆𑀢𑀁 𑀲𑀺𑀤𑁆𑀥𑀁 𑀳𑁄𑀢𑀻𑀢𑀺? 𑀦 𑀳𑁄𑀢𑀺 𑀢𑀺𑀡𑁆𑀡𑀁 𑀥𑀫𑁆𑀫-𑀲𑀤𑁆𑀤𑀸𑀦𑀁 𑀦𑀸𑀦𑀢𑁆𑀣𑀪𑀸𑀯𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸. 𑀦 𑀳𑀺 𑀢𑀺𑀡𑁆𑀡𑀁 𑀪𑀸𑀯𑀢𑁆𑀢𑁂 𑀦𑀸𑀦𑀢𑁆𑀣𑀢𑀸 𑀅𑀢𑁆𑀣𑀺, 𑀅𑀦𑀼𑀜𑁆𑀜𑀸𑀢𑀸 𑀘 𑀲𑀸 𑀢𑀬𑀸𑀢𑀺. 𑀦𑀦𑀼 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀅𑀪𑀸𑀯𑀢𑁆𑀢𑁂𑀧𑀺 𑀦𑀸𑀦𑀢𑁆𑀣𑀢𑀸 𑀦 𑀲𑀺𑀬𑀸𑀢𑀺? 𑀫𑀸 𑀳𑁄𑀢𑀼 𑀦𑀸𑀦𑀢𑁆𑀣𑀢𑀸, 𑀢𑀯 𑀧𑀦 𑀦𑀸𑀦𑀢𑁆𑀣𑀢𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲 ‘‘𑀏𑀲𑁄 𑀤𑁄𑀲𑁄’’𑀢𑀺 𑀯𑀤𑀸𑀫𑀺, 𑀦 𑀧𑀦 𑀫𑀬𑀸 𑀦𑀸𑀦𑀢𑁆𑀣𑀢𑀸 𑀏𑀓𑀢𑁆𑀣𑀢𑀸 𑀯𑀸 𑀅𑀦𑀼𑀜𑁆𑀜𑀸𑀢𑀸𑀢𑀺 𑀓𑀼𑀢𑁄 𑀫𑁂 𑀯𑀺𑀭𑁄𑀥𑁄 𑀲𑀺𑀬𑀸𑀢𑀺. 𑀅𑀣 𑀯𑀸 𑀅𑀪𑀸𑀯𑀢𑁆𑀢𑀁 𑀆𑀧𑀦𑁆𑀦𑁂𑀳𑀺 𑀥𑀫𑁆𑀫𑁂𑀳𑀺 𑀅𑀦𑀜𑁆𑀜𑁂 𑀓𑀼𑀲𑀮𑀸𑀤𑀬𑁄𑀧𑀺 𑀅𑀪𑀸𑀯𑀸 𑀏𑀯 𑀲𑀺𑀬𑀼𑀦𑁆𑀢𑀺 𑀇𑀤𑀁 𑀯𑀘𑀦𑀁 𑀅𑀦𑀺𑀬𑀫𑁂𑀦 𑀬𑁂 𑀓𑁂𑀘𑀺 𑀤𑁆𑀯𑁂 𑀥𑀫𑁆𑀫𑀸 𑀅𑀪𑀸𑀯𑀢𑁆𑀢𑀁 𑀆𑀧𑀦𑁆𑀦𑀸, 𑀢𑁂𑀳𑀺 𑀅𑀦𑀜𑁆𑀜𑁂𑀲𑀁 𑀓𑀼𑀲𑀮𑀸𑀤𑀻𑀲𑀼 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀤𑁆𑀯𑀺𑀦𑁆𑀦𑀁 𑀓𑀼𑀲𑀮𑀸𑀤𑀻𑀦𑀁 𑀅𑀪𑀸𑀯𑀢𑁆𑀢𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀏𑀓𑀲𑁆𑀲 𑀪𑀸𑀯𑀢𑁆𑀢𑀸. 𑀬𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀢𑁂𑀳𑀺 𑀘 𑀅𑀜𑁆𑀜𑁄 𑀓𑀼𑀲𑀮𑀧𑀭𑁄𑀧𑀺 𑀅𑀪𑀸𑀯𑁄 𑀲𑀺𑀬𑀸’’𑀢𑀺, 𑀢𑀁 𑀅𑀦𑀺𑀬𑀫𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀲𑀩𑁆𑀩𑁂𑀲𑀁 𑀅𑀪𑀸𑀯𑀲𑀸𑀥𑀦𑀢𑁆𑀣𑀁. 𑀅𑀬𑀜𑁆𑀳𑀺 𑀢𑀢𑁆𑀣 𑀅𑀢𑁆𑀣𑁄 𑀅𑀓𑀼𑀲𑀮𑀧𑀭𑀲𑁆𑀲 𑀯𑀸 𑀅𑀩𑁆𑀬𑀸𑀓𑀢𑀧𑀭𑀲𑁆𑀲 𑀯𑀸 𑀥𑀫𑁆𑀫𑀲𑁆𑀲 𑀪𑀸𑀯𑀢𑁆𑀢𑁂 𑀲𑀢𑀺 𑀢𑁂𑀳𑀺 𑀅𑀜𑁆𑀜𑁄 𑀓𑀼𑀲𑀮𑀧𑀭𑁄𑀧𑀺 𑀅𑀪𑀸𑀯𑁄 𑀲𑀺𑀬𑀸𑀢𑀺.

𑀲𑀩𑁆𑀩𑀫𑁂𑀢𑀁 𑀅𑀓𑀸𑀭𑀡𑀦𑁆𑀢𑀺 𑀏𑀢𑁆𑀣 𑀓𑀸𑀭𑀡𑀁 𑀦𑀸𑀫 𑀬𑀼𑀢𑁆𑀢𑀺. 𑀓𑀼𑀲𑀮𑀓𑀼𑀲𑀮𑀲𑀤𑁆𑀤𑀸𑀦𑀁 𑀯𑀺𑀬 𑀏𑀓𑀦𑁆𑀢𑀏𑀓𑀢𑁆𑀣𑀢𑀁, 𑀓𑀼𑀲𑀮𑀭𑀽𑀧𑀘𑀓𑁆𑀔𑀼𑀫-𑀲𑀤𑁆𑀤𑀸𑀦𑀁 𑀯𑀺𑀬 𑀏𑀓𑀦𑁆𑀢𑀦𑀸𑀦𑀢𑁆𑀣𑀢𑀜𑁆𑀘 𑀯𑀺𑀓𑀧𑁆𑀧𑁂𑀢𑁆𑀯𑀸 𑀬𑀸𑀬𑀁 𑀧𑀼𑀦𑀭𑀼𑀢𑁆𑀢𑀺 𑀙𑀓𑁆𑀓𑀘𑀢𑀼𑀓𑁆𑀓𑀸𑀧𑀢𑁆𑀢𑀺 𑀅𑀲𑀫𑁆𑀩𑀦𑁆𑀥𑀯𑀺𑀭𑁄𑀥𑀸𑀪𑀸𑀯𑀸𑀧𑀢𑁆𑀢𑀺 𑀤𑁄𑀲𑀸𑀭𑁄𑀧𑀦𑀬𑀼𑀢𑁆𑀢𑀺 𑀯𑀼𑀢𑁆𑀢𑀸, 𑀲𑀩𑁆𑀩𑀸 𑀲𑀸 𑀅𑀬𑀼𑀢𑁆𑀢𑀺, 𑀢𑀣𑀸 𑀏𑀓𑀢𑁆𑀣𑀦𑀸𑀦𑀢𑁆𑀣𑀢𑀸𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀸 𑀬𑀸 𑀅𑀦𑀼𑀫𑀢𑀺 𑀬𑀣𑀸𑀦𑀼𑀫𑀢𑀺 𑀅𑀦𑀼𑀫𑀢𑀺𑀬𑀸 𑀅𑀦𑀼𑀫𑀢𑀺𑀬𑀸 𑀯𑁄𑀳𑀸𑀭𑀲𑀺𑀤𑁆𑀥𑀺𑀢𑁄. 𑀅𑀦𑀼𑀫𑀢𑀺𑀬𑀸 𑀅𑀦𑀼𑀭𑀽𑀧𑀁 𑀯𑀸 𑀬𑀣𑀸𑀦𑀼𑀫𑀢𑀺, 𑀬𑀣𑀸 𑀅𑀦𑀼𑀫𑀢𑀺 𑀧𑀯𑀢𑁆𑀢𑀸, 𑀢𑀣𑀸 𑀢𑀤𑀦𑀼𑀭𑀽𑀧𑀁 𑀯𑁄𑀳𑀸𑀭𑀲𑀺𑀤𑁆𑀥𑀺𑀢𑁄𑀢𑀺 𑀅𑀢𑁆𑀣𑁄. 𑀅𑀦𑀼𑀫𑀢𑀺 𑀳𑀺 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀸𑀪𑀸𑀯𑀢𑁄 𑀅𑀘𑁆𑀘𑀦𑁆𑀢𑀫𑀪𑀺𑀦𑁆𑀦𑁂𑀲𑀼 𑀓𑀢𑁆𑀣𑀘𑀺 𑀓𑀺𑀭𑀺𑀬𑀸𑀕𑀼𑀡𑀸𑀤𑀺𑀧𑀭𑀺𑀕𑁆𑀕𑀳𑀯𑀺𑀲𑁂𑀲𑁂𑀦 𑀅𑀯𑀺𑀯𑀝𑀲𑀤𑁆𑀤𑀢𑁆𑀣𑀯𑀺𑀯𑀭𑀡𑀢𑁆𑀣𑀁 𑀧𑀯𑀢𑁆𑀢𑀸 𑀬𑀣𑀸 ‘‘𑀲𑀓𑁆𑀓𑁄 𑀇𑀦𑁆𑀤𑁄 𑀧𑀼𑀭𑀺𑀦𑁆𑀤𑀤𑁄’’𑀢𑀺. 𑀓𑀢𑁆𑀣𑀘𑀺 𑀅𑀘𑁆𑀘𑀦𑁆𑀢𑀁 𑀪𑀺𑀦𑁆𑀦𑁂𑀲𑀼 𑀬𑀣𑀸 ‘‘𑀥𑀯𑁄 𑀔𑀤𑀺𑀭𑁄 𑀧𑀮𑀸𑀲𑁄 𑀘 𑀆𑀦𑀻𑀬𑀦𑁆𑀢𑀽’’𑀢𑀺. 𑀓𑀢𑁆𑀣𑀘𑀺 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑀢𑁄 𑀪𑁂𑀤𑀸𑀪𑁂𑀤𑀯𑀦𑁆𑀢𑁂𑀲𑀼 𑀲𑁂𑀬𑁆𑀬𑀣𑀸𑀧𑀺 ‘‘𑀦𑀻𑀮𑀼𑀧𑁆𑀧𑀮𑀁 𑀧𑀡𑁆𑀟𑀺𑀢𑀧𑀼𑀭𑀺𑀲𑁄’’𑀢𑀺, 𑀢𑀸𑀬 𑀢𑀸𑀬 𑀅𑀦𑀼𑀫𑀢𑀺𑀬𑀸 𑀢𑀤𑀦𑀼𑀭𑀽𑀧𑀜𑁆𑀘 𑀢𑁂 𑀢𑁂 𑀯𑁄𑀳𑀸𑀭𑀸 𑀲𑀺𑀤𑁆𑀥𑀸. 𑀢𑀲𑁆𑀫𑀸 𑀇𑀳𑀸𑀧𑀺 𑀓𑀼𑀲𑀮𑀥𑀫𑁆𑀫-𑀲𑀤𑁆𑀤𑀸𑀦𑀁 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑀢𑁄 𑀯𑀺𑀲𑁂𑀲𑀢𑁆𑀣𑀲𑀸𑀫𑀜𑁆𑀜𑀢𑁆𑀣𑀧𑀭𑀺𑀕𑁆𑀕𑀳𑁂𑀦 𑀲𑀫𑀸𑀦𑁂 𑀅𑀢𑁆𑀣𑁂 𑀪𑁂𑀤𑀸𑀪𑁂𑀤𑀬𑀼𑀢𑁆𑀢𑁂 𑀧𑀯𑀢𑁆𑀢𑀺 𑀅𑀦𑀼𑀫𑀢𑀸𑀢𑀺 𑀢𑀸𑀬 𑀢𑀸𑀬 𑀅𑀦𑀼𑀫𑀢𑀺𑀬𑀸 𑀢𑀤𑀦𑀼𑀭𑀽𑀧𑀜𑁆𑀘 𑀲𑀺𑀤𑁆𑀥𑁄 𑀏𑀲𑁄 𑀯𑁄𑀳𑀸𑀭𑁄. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀫𑁂𑀢𑀁 𑀅𑀓𑀸𑀭𑀡’’𑀦𑁆𑀢𑀺.

𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀯𑀺𑀲𑁂𑀲𑀁 𑀢𑀲𑁆𑀲 𑀤𑀻𑀧𑁂𑀦𑁆𑀢𑀻𑀢𑀺 𑀅𑀢𑁆𑀢𑀦𑀸 𑀧𑀭𑀺𑀕𑁆𑀕𑀳𑀺𑀢𑀁 𑀅𑀢𑁆𑀢𑀦𑀸 𑀯𑀼𑀘𑁆𑀘𑀫𑀸𑀦𑀁 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀸𑀤𑀺𑀓𑀼𑀲𑀮𑀸𑀤𑀺𑀪𑀸𑀯𑀁 𑀥𑀫𑁆𑀫-𑀲𑀤𑁆𑀤𑀲𑁆𑀲 𑀤𑀻𑀧𑁂𑀦𑁆𑀢𑀺 𑀢𑀤𑀢𑁆𑀣𑀲𑁆𑀲 𑀢𑀩𑁆𑀪𑀸𑀯𑀤𑀻𑀧𑀦𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀥𑀫𑁆𑀫-𑀲𑀤𑁆𑀤𑁄 𑀓𑀼𑀲𑀮𑀸𑀤𑀺𑀪𑀸𑀯𑁄 𑀳𑁄𑀢𑀻𑀢𑀺. 𑀇𑀫𑀺𑀦𑀸𑀯𑀸𑀢𑀺 ‘‘𑀥𑀫𑁆𑀫-𑀲𑀤𑁆𑀤𑁄 𑀧𑀭𑀺𑀬𑀢𑁆𑀢𑀺𑀆𑀤𑀻𑀲𑀼 𑀤𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 ‘‘𑀅𑀢𑁆𑀢𑀦𑁄 𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀘 𑀦𑀬𑁂𑀦. 𑀲𑁄 𑀳𑀺 𑀲𑀩𑁆𑀩𑀢𑁆𑀣 𑀲𑀫𑀸𑀦𑁄, 𑀦 𑀓𑀼𑀲𑀮-𑀲𑀤𑁆𑀤𑁄 𑀆𑀭𑁄𑀕𑁆𑀬𑀸𑀤𑀻𑀲𑀼 𑀤𑀺𑀲𑁆𑀲𑀢𑀻𑀢𑀺 ‘‘𑀓𑀼𑀘𑁆𑀙𑀺𑀢𑁂 𑀲𑀮𑀬𑀦𑁆𑀢𑀻’’𑀢𑀺𑀆𑀤𑀺𑀓𑁄, 𑀲𑁄 𑀘 𑀯𑀺𑀲𑁂𑀲𑀦𑀬𑁄 ‘‘𑀇𑀢𑁄 𑀧𑀭𑀁 𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀯𑀓𑁆𑀔𑀸𑀫𑀸’’𑀢𑀺 𑀏𑀢𑁂𑀦 𑀅𑀧𑀦𑀻𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀦 𑀳𑀺 𑀓𑀼𑀲𑀮𑀸𑀤𑀺𑀯𑀺𑀲𑁂𑀲𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸𑀢𑀺𑀆𑀤𑀬𑁄 𑀯𑀺𑀲𑁂𑀲𑀸𑀢𑀺.

𑁨. 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸𑀢𑀺 𑀏𑀢𑁆𑀣 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 ‘‘𑀲𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀜𑁆𑀘 𑀲𑀼𑀔𑀯𑁂𑀤𑀦𑀸𑀯 𑀳𑁄𑀢𑀻𑀢𑀺 ‘‘𑀲𑀼𑀔𑀯𑁂𑀤𑀦𑀸𑀬𑀁 𑀤𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁, 𑀦 𑀧𑀦 ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸 𑀲𑀼𑀔𑀸 𑀯𑁂𑀤𑀦𑀸’’𑀢𑀺𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁪.𑁨𑁪𑁯 𑀆𑀤𑀬𑁄) 𑀲𑀼𑀔-𑀲𑀤𑁆𑀤𑁄 𑀯𑀺𑀬 𑀲𑀼𑀔𑀯𑁂𑀤𑀦𑀸𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀢𑁆𑀢𑀸. 𑀅𑀬𑀜𑁆𑀳𑀺 𑀲𑀼𑀔𑀺𑀦𑁆𑀤𑁆𑀭𑀺𑀬𑀢𑁆𑀣𑁄 𑀲𑀼𑀔-𑀲𑀤𑁆𑀤𑁄 𑀓𑀸𑀬𑀲𑀼𑀔𑀦𑀁 𑀓𑀸𑀬𑀸𑀦𑀼𑀕𑁆𑀕𑀳𑀁 𑀲𑀸𑀢𑀯𑀺𑀲𑁂𑀲𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑁄, 𑀦 𑀧𑀦 𑀲𑀼𑀔𑀸 𑀯𑁂𑀤𑀦𑀸 ‘‘𑀬𑀁 𑀓𑀺𑀜𑁆𑀘𑀺 𑀯𑁂𑀤𑀦𑀁 𑀯𑁂𑀤𑁂𑀢𑀺 𑀲𑀼𑀔𑀁 𑀯𑀸 (𑀫. 𑀦𑀺. 𑁧.𑁪𑁦𑁯), 𑀬𑁄 𑀲𑀼𑀔𑀁 𑀤𑀼𑀓𑁆𑀔𑀢𑁄’’𑀢𑀺𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁪.𑁨𑁫𑁩) 𑀲𑀼𑀔-𑀲𑀤𑁆𑀤𑁄 𑀯𑀺𑀬 𑀲𑀸𑀢𑀲𑀸𑀫𑀜𑁆𑀜𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑁄𑀢𑀺. 𑀬𑀲𑁆𑀫𑀺𑀁 𑀲𑀢𑀺 𑀲𑀼𑀔𑀳𑁂𑀢𑀽𑀦𑀁 𑀧𑀯𑀢𑁆𑀢𑀺, 𑀢𑀁 𑀲𑀼𑀔𑀫𑀽𑀮𑀁. 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀘 𑀓𑀸𑀫𑀲𑀫𑀢𑀺𑀓𑁆𑀓𑀫𑀸𑀤𑀺𑀓𑁂 𑀯𑀺𑀭𑀸𑀕𑁂 𑀘 𑀲𑀢𑀺 𑀲𑀼𑀔𑀳𑁂𑀢𑀽𑀦𑀁 𑀧𑀼𑀜𑁆𑀜𑀧𑀲𑁆𑀲𑀤𑁆𑀥𑀺𑀆𑀤𑀻𑀦𑀁 𑀧𑀯𑀢𑁆𑀢𑀺 𑀳𑁄𑀢𑀻𑀢𑀺 𑀢𑀁 ‘‘𑀲𑀼𑀔𑀫𑀽𑀮𑀁 𑀲𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀼𑀔𑀲𑁆𑀲 𑀘 𑀆𑀭𑀫𑁆𑀫𑀡𑀢𑁆𑀢𑀸 ‘‘𑀭𑀽𑀧𑀁 𑀲𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀼𑀜𑁆𑀜𑀸𑀦𑀻𑀢𑀺 𑀬𑀤𑀺𑀤𑀁 𑀯𑀘𑀦𑀁, 𑀢𑀁 𑀲𑀼𑀔𑀲𑁆𑀲 𑀘 𑀅𑀥𑀺𑀯𑀘𑀦𑀁 𑀇𑀝𑁆𑀞𑀯𑀺𑀧𑀸𑀓𑀲𑁆𑀲 𑀅𑀥𑀺𑀯𑀘𑀦𑀁 𑀢𑀤𑀢𑁆𑀣𑀲𑁆𑀲 𑀇𑀝𑁆𑀞𑀯𑀺𑀧𑀸𑀓𑀯𑀺𑀧𑀘𑁆𑀘𑀦𑀢𑁄𑀢𑀺 𑀅𑀢𑁆𑀣𑁄. 𑀲𑀼𑀔𑀧𑀘𑁆𑀘𑀬𑀸𑀦𑀁 𑀭𑀽𑀧𑀸𑀤𑀻𑀦𑀁 𑀇𑀝𑁆𑀞𑀸𑀦𑀁 𑀞𑀸𑀦𑀁 𑀑𑀓𑀸𑀲𑁄 𑀲𑀕𑁆𑀕𑀸 𑀦𑀦𑁆𑀤𑀦𑀜𑁆𑀘𑀸𑀢𑀺 ‘‘𑀲𑀼𑀔𑀸 𑀲𑀕𑁆𑀕𑀸 𑀲𑀼𑀔𑀁 𑀦𑀦𑁆𑀤𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀥𑀫𑁆𑀫𑁂𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂. 𑀲𑀼𑀔𑀯𑀺𑀳𑀸𑀭𑀸𑀢𑀺 𑀧𑀞𑀫𑀚𑁆𑀛𑀸𑀦𑀯𑀺𑀳𑀸𑀭𑀸𑀤𑀻. 𑀦𑀻𑀯𑀭𑀡𑀸𑀤𑀺𑀩𑁆𑀬𑀸𑀩𑀸𑀥𑀭𑀳𑀺𑀢𑀢𑁆𑀢𑀸 ‘‘𑀅𑀩𑁆𑀬𑀸𑀩𑀚𑁆𑀛𑀸’’𑀢𑀺 𑀯𑀼𑀢𑁆𑀢𑀸. 𑀲𑀩𑁆𑀩𑀲𑀗𑁆𑀔𑀸𑀭𑀤𑀼𑀓𑁆𑀔𑀦𑀺𑀩𑁆𑀩𑀸𑀧𑀦𑀢𑁄 𑀢𑀁𑀦𑀺𑀭𑁄𑀥𑀢𑁆𑀢𑀸 𑀯𑀸 ‘‘𑀦𑀺𑀩𑁆𑀩𑀸𑀦𑀁 𑀲𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀤𑀺-𑀲𑀤𑁆𑀤𑁂𑀦 ‘‘𑀅𑀤𑀼𑀓𑁆𑀔𑀫𑀲𑀼𑀔𑀁 𑀲𑀦𑁆𑀢𑀁, 𑀲𑀼𑀔𑀫𑀺𑀘𑁆𑀘𑁂𑀯 𑀪𑀸𑀲𑀺𑀢’’𑀦𑁆𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑁂. ‘‘𑀤𑁆𑀯𑁂𑀧𑀺 𑀫𑀬𑀸, 𑀆𑀦𑀦𑁆𑀤, 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀧𑀭𑀺𑀬𑀸𑀬𑁂𑀦 𑀲𑀼𑀔𑀸 𑀯𑁂𑀤𑀦𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸’’𑀢𑀺 (𑀲𑀁. 𑀦𑀺. 𑁪.𑁨𑁬𑁭) 𑀲𑀼𑀔𑁄𑀧𑁂𑀓𑁆𑀔𑀸𑀲𑀼 𑀘 𑀇𑀝𑁆𑀞𑀸𑀲𑀽𑀢𑀺 𑀏𑀯𑀫𑀸𑀤𑀻𑀲𑀼 𑀧𑀯𑀢𑁆𑀢𑀺 𑀲𑀗𑁆𑀕𑀳𑀺𑀢𑀸.

𑀤𑀼𑀓𑁆𑀔𑀯𑀢𑁆𑀣𑀽𑀢𑀺 𑀤𑀼𑀓𑁆𑀔𑀲𑁆𑀲 𑀑𑀓𑀸𑀲𑁄. 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀫𑁆𑀧𑀺 𑀳𑀺 𑀢𑀁 𑀤𑀼𑀓𑁆𑀔𑀁 𑀚𑀸𑀢𑀺𑀆𑀤𑀻𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀢𑀩𑁆𑀩𑀢𑁆𑀣𑀼𑀓𑀁 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀤𑀼𑀓𑁆𑀔𑀧𑀘𑁆𑀘𑀬𑁂𑀢𑀺 𑀤𑀼𑀓𑁆𑀔𑀳𑁂𑀢𑀼𑀫𑁆𑀳𑀺, 𑀤𑀼𑀓𑁆𑀔𑀲𑁆𑀲 𑀚𑀦𑀓𑁂𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀧𑀘𑁆𑀘𑀬𑀝𑁆𑀞𑀸𑀦𑁂𑀢𑀺 𑀤𑀼𑀓𑁆𑀔𑀚𑀦𑀓𑀓𑀫𑁆𑀫𑀲𑁆𑀲 𑀲𑀳𑀸𑀬𑀪𑀽𑀢𑀸𑀦𑀁 𑀅𑀦𑀺𑀝𑁆𑀞𑀭𑀽𑀧𑀸𑀤𑀺𑀧𑀘𑁆𑀘𑀬𑀸𑀦𑀁 𑀞𑀸𑀦𑁂. 𑀧𑀘𑁆𑀘𑀬𑀲𑀤𑁆𑀤𑁄 𑀳𑀺 𑀚𑀦𑀓𑁂 𑀚𑀦𑀓𑀲𑀳𑀸𑀬𑁂 𑀘 𑀧𑀯𑀢𑁆𑀢𑀢𑀻𑀢𑀺. 𑀆𑀤𑀺-𑀲𑀤𑁆𑀤𑁂𑀦 ‘‘𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁩.𑁧𑁫, 𑁪𑁫-𑁪𑁬, 𑁭𑁬) 𑀲𑀗𑁆𑀔𑀸𑀭𑀤𑀼𑀓𑁆𑀔𑀸𑀤𑀻𑀲𑀼 𑀧𑀯𑀢𑁆𑀢𑀺 𑀤𑀝𑁆𑀞𑀩𑁆𑀩𑀸. 𑀲𑀫𑁆𑀧𑀬𑀼𑀢𑁆𑀢𑁂 𑀯𑀢𑁆𑀣𑀼𑀜𑁆𑀘 𑀓𑀭𑀚𑀓𑀸𑀬𑀁 𑀲𑀼𑀔𑀬𑀢𑀺 𑀮𑀤𑁆𑀥𑀲𑁆𑀲𑀸𑀤𑁂 𑀅𑀦𑀼𑀕𑁆𑀕𑀳𑀺𑀢𑁂 𑀓𑀭𑁄𑀢𑀻𑀢𑀺 𑀲𑀼𑀔𑀸. 𑀲𑀼𑀔𑀸𑀢𑀺 𑀯𑁂𑀤𑀦𑀸𑀲𑀤𑁆𑀤𑀫𑀧𑁂𑀓𑁆𑀔𑀺𑀢𑁆𑀯𑀸 𑀲𑀼𑀔𑀪𑀸𑀯𑀫𑀢𑁆𑀢𑀲𑁆𑀲 𑀅𑀧𑁆𑀧𑀓𑀸𑀲𑀦𑁂𑀦 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑀸 𑀦 𑀓𑀢𑀸. 𑀲𑀪𑀸𑀯𑀢𑁄 𑀲𑀗𑁆𑀓𑀧𑁆𑀧𑀢𑁄 𑀘 𑀬𑀁 𑀇𑀝𑁆𑀞𑀁, 𑀢𑀤𑀦𑀼𑀪𑀯𑀦𑀁 𑀇𑀝𑁆𑀞𑀸𑀓𑀸𑀭𑀸𑀦𑀼𑀪𑀯𑀦𑀁 𑀯𑀸 𑀇𑀝𑁆𑀞𑀸𑀦𑀼𑀪𑀯𑀦𑀁.

𑀲𑀫𑀦𑁆𑀢𑀺 𑀅𑀯𑀺𑀲𑀫𑀁. 𑀲𑀫𑀸 𑀏𑀓𑀻𑀪𑀸𑀯𑀽𑀧𑀕𑀢𑀸 𑀯𑀺𑀬 𑀬𑀼𑀢𑁆𑀢𑀸, 𑀲𑀫𑀁 𑀯𑀸 𑀲𑀳 𑀬𑀼𑀢𑁆𑀢𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀓𑀼𑀧𑁆𑀧𑀸𑀤𑀸𑀢𑀺 𑀏𑀓𑁄 𑀲𑀫𑀸𑀦𑁄 𑀉𑀧𑁆𑀧𑀸𑀤𑁄 𑀏𑀢𑁂𑀲𑀦𑁆𑀢𑀺 𑀏𑀓𑀼𑀧𑁆𑀧𑀸𑀤𑀸, 𑀲𑀫𑀸𑀦𑀧𑀘𑁆𑀘𑀬𑁂𑀳𑀺 𑀲𑀳𑀼𑀧𑁆𑀧𑀢𑁆𑀢𑀺𑀓𑀸𑀢𑀺 𑀅𑀢𑁆𑀣𑁄. 𑀲𑀳𑀼𑀧𑁆𑀧𑀢𑁆𑀢𑀺𑀓𑀸𑀦𑀁 𑀭𑀽𑀧𑀸𑀭𑀽𑀧𑀸𑀦𑀜𑁆𑀘 𑀅𑀜𑁆𑀜𑀫𑀜𑁆𑀜𑀲𑀫𑁆𑀧𑀬𑀼𑀢𑁆𑀢𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 ‘‘𑀏𑀓𑀦𑀺𑀭𑁄𑀥𑀸’’𑀢𑀺 𑀯𑀼𑀢𑁆𑀢𑀁, 𑀬𑁂 𑀲𑀫𑀸𑀦𑀼𑀧𑁆𑀧𑀸𑀤𑀸 𑀲𑀫𑀸𑀦𑀦𑀺𑀭𑁄𑀥𑀸 𑀘, 𑀢𑁂 𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀭𑀽𑀧𑀸𑀭𑀽𑀧𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀫𑁆𑀧𑀬𑁄𑀕𑁄 𑀦𑀺𑀯𑀸𑀭𑀺𑀢𑁄 𑀳𑁄𑀢𑀺. 𑀏𑀯𑀫𑀧𑀺 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀫𑁆𑀧𑀬𑀼𑀢𑁆𑀢𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 ‘‘𑀏𑀓𑀯𑀢𑁆𑀣𑀼𑀓𑀸’’𑀢𑀺 𑀯𑀼𑀢𑁆𑀢𑀁, 𑀬𑁂 𑀏𑀓𑀼𑀧𑁆𑀧𑀸𑀤𑀸 𑀏𑀓𑀦𑀺𑀭𑁄𑀥𑀸 𑀏𑀓𑀯𑀢𑁆𑀣𑀼𑀓𑀸 𑀘, 𑀢𑁂 𑀲𑀫𑁆𑀧𑀬𑀼𑀢𑁆𑀢𑀸𑀢𑀺. 𑀏𑀯𑀫𑀧𑀺 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑁂𑀲𑀼 𑀏𑀓𑀁 𑀫𑀳𑀸𑀪𑀽𑀢𑀁 𑀲𑁂𑀲𑀫𑀳𑀸𑀪𑀽𑀢𑁄𑀧𑀸𑀤𑀸𑀭𑀽𑀧𑀸𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀢𑁂𑀦 𑀢𑀸𑀦𑀺 𑀏𑀓𑀯𑀢𑁆𑀣𑀼𑀓𑀸𑀦𑀻𑀢𑀺, 𑀘𑀓𑁆𑀔𑀸𑀤𑀺𑀦𑀺𑀲𑁆𑀲𑀬𑀪𑀽𑀢𑀸𑀦𑀺 𑀯𑀸 𑀪𑀽𑀢𑀸𑀦𑀺 𑀏𑀓𑀁 𑀯𑀢𑁆𑀣𑀼 𑀏𑀢𑁂𑀲𑀼 𑀲𑀦𑁆𑀦𑀺𑀲𑁆𑀲𑀺𑀢𑀦𑁆𑀢𑀺 𑀏𑀓𑀯𑀢𑁆𑀣𑀼𑀓𑀸𑀦𑀻𑀢𑀺 𑀓𑀧𑁆𑀧𑁂𑀦𑁆𑀢𑀲𑁆𑀲 𑀢𑁂𑀲𑀁 𑀲𑀫𑁆𑀧𑀬𑀼𑀢𑁆𑀢𑀢𑀸𑀧𑀢𑁆𑀢𑀺 𑀲𑀺𑀬𑀸𑀢𑀺 𑀢𑀦𑁆𑀦𑀺𑀯𑀸𑀭𑀡𑀢𑁆𑀣𑀁 ‘‘𑀏𑀓𑀸𑀭𑀫𑁆𑀫𑀡𑀸’’𑀢𑀺 𑀯𑀼𑀢𑁆𑀢𑀁, 𑀬𑁂 𑀏𑀓𑀼𑀧𑁆𑀧𑀸𑀤𑀸…𑀧𑁂… 𑀏𑀓𑀸𑀭𑀫𑁆𑀫𑀡𑀸 𑀘 𑀳𑁄𑀦𑁆𑀢𑀺, 𑀢𑁂 𑀲𑀫𑁆𑀧𑀬𑀼𑀢𑁆𑀢𑀸𑀢𑀺. 𑀧𑀝𑀺𑀮𑁄𑀫𑀢𑁄 𑀯𑀸 𑀏𑀓𑀸𑀭𑀫𑁆𑀫𑀡𑀸𑀢𑀺 𑀯𑀼𑀢𑁆𑀢𑁂 𑀏𑀓𑀯𑀻𑀣𑀺𑀬𑀜𑁆𑀘 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑁆𑀧𑀝𑀺𑀘𑁆𑀙𑀦𑀸𑀦𑀁 𑀦𑀸𑀦𑀸𑀯𑀻𑀣𑀺𑀬𑀁 𑀧𑀭𑀲𑀦𑁆𑀢𑀸𑀦𑁂 𑀘 𑀏𑀓𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀪𑀺𑀦𑁆𑀦𑀯𑀢𑁆𑀣𑀼𑀓𑀸𑀦𑀁 𑀲𑀫𑁆𑀧𑀬𑀼𑀢𑁆𑀢𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 ‘‘𑀏𑀓𑀯𑀢𑁆𑀣𑀼𑀓𑀸’’𑀢𑀺 𑀯𑀼𑀢𑁆𑀢𑀁, 𑀬𑁂 𑀏𑀓𑀯𑀢𑁆𑀣𑀼𑀓𑀸 𑀳𑀼𑀢𑁆𑀯𑀸 𑀏𑀓𑀸𑀭𑀫𑁆𑀫𑀡𑀸, 𑀢𑁂 𑀲𑀫𑁆𑀧𑀬𑀼𑀢𑁆𑀢𑀸𑀢𑀺. 𑀏𑀯𑀫𑀧𑀺 𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀸𑀤𑀻𑀦𑀁 𑀲𑀫𑁆𑀧𑀬𑀼𑀢𑁆𑀢𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 ‘‘𑀏𑀓𑀦𑀺𑀭𑁄𑀥𑀸’’𑀢𑀺 𑀯𑀼𑀢𑁆𑀢𑀁, 𑀬𑁂 𑀏𑀓𑀦𑀺𑀭𑁄𑀥𑀸 𑀳𑀼𑀢𑁆𑀯𑀸 𑀏𑀓𑀯𑀢𑁆𑀣𑀼𑀓𑀸 𑀏𑀓𑀸𑀭𑀫𑁆𑀫𑀡𑀸, 𑀢𑁂 𑀲𑀫𑁆𑀧𑀬𑀼𑀢𑁆𑀢𑀸𑀢𑀺. 𑀓𑀺𑀁 𑀧𑀦 𑀦𑀸𑀦𑀼𑀧𑁆𑀧𑀸𑀤𑀸𑀧𑀺 𑀏𑀯𑀁 𑀢𑀺𑀯𑀺𑀥𑀮𑀓𑁆𑀔𑀡𑀸 𑀳𑁄𑀦𑁆𑀢𑀺, 𑀅𑀣 𑀏𑀓𑀼𑀧𑁆𑀧𑀸𑀤𑀸 𑀏𑀯𑀸𑀢𑀺 𑀯𑀺𑀘𑀸𑀭𑀡𑀸𑀬 𑀏𑀓𑀼𑀧𑁆𑀧𑀸𑀤𑀸 𑀏𑀯 𑀏𑀯𑀁 𑀢𑀺𑀯𑀺𑀥𑀮𑀓𑁆𑀔𑀡𑀸 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀏𑀓𑀼𑀧𑁆𑀧𑀸𑀤𑀸’’𑀢𑀺 𑀯𑀼𑀢𑁆𑀢𑀁.

𑁩. 𑀯𑀺𑀧𑀓𑁆𑀓𑀪𑀸𑀯𑀫𑀸𑀧𑀦𑁆𑀦𑀸𑀦𑀁 𑀅𑀭𑀽𑀧𑀥𑀫𑁆𑀫𑀸𑀦𑀦𑁆𑀢𑀺 𑀬𑀣𑀸 𑀲𑀸𑀮𑀺𑀩𑀻𑀚𑀸𑀤𑀻𑀦𑀁 𑀨𑀮𑀸𑀦𑀺 𑀢𑀁𑀲𑀤𑀺𑀲𑀸𑀦𑀺 𑀦𑀺𑀩𑁆𑀩𑀢𑁆𑀢𑀸𑀦𑀺 𑀯𑀺𑀧𑀓𑁆𑀓𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺, 𑀯𑀺𑀧𑀸𑀓𑀦𑀺𑀭𑀼𑀢𑁆𑀢𑀺𑀜𑁆𑀘 𑀮𑀪𑀦𑁆𑀢𑀺, 𑀦 𑀫𑀽𑀮𑀗𑁆𑀓𑀼𑀭𑀧𑀢𑁆𑀢𑀔𑀦𑁆𑀥𑀦𑀸𑀴𑀸𑀦𑀺, 𑀏𑀯𑀁 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀨𑀮𑀸𑀦𑀺 𑀅𑀭𑀽𑀧𑀥𑀫𑁆𑀫𑀪𑀸𑀯𑁂𑀦 𑀲𑀸𑀭𑀫𑁆𑀫𑀡𑀪𑀸𑀯𑁂𑀦 𑀲𑀼𑀓𑁆𑀓𑀓𑀡𑁆𑀳𑀸𑀤𑀺𑀪𑀸𑀯𑁂𑀦 𑀘 𑀢𑀁𑀲𑀤𑀺𑀲𑀸𑀦𑀺 𑀯𑀺𑀧𑀓𑁆𑀓𑀪𑀸𑀯𑀫𑀸𑀧𑀦𑁆𑀦𑀸𑀦𑀻𑀢𑀺 𑀯𑀺𑀧𑀸𑀓𑀦𑀺𑀭𑀼𑀢𑁆𑀢𑀺𑀁 𑀮𑀪𑀦𑁆𑀢𑀺, 𑀦 𑀭𑀽𑀧𑀥𑀫𑁆𑀫𑀸 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸𑀧𑀺 𑀓𑀫𑁆𑀫𑀸𑀲𑀤𑀺𑀲𑀸𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀚𑀸𑀢𑀺𑀚𑀭𑀸𑀲𑀪𑀸𑀯𑀸𑀢𑀺 𑀚𑀸𑀬𑀦𑀚𑀻𑀭𑀡𑀲𑀪𑀸𑀯𑀸. 𑀯𑀺𑀧𑀸𑀓𑀧𑀓𑀢𑀺𑀓𑀸𑀢𑀺 𑀯𑀺𑀧𑀘𑁆𑀘𑀦𑀧𑀓𑀢𑀺𑀓𑀸. 𑀯𑀺𑀧𑀘𑁆𑀘𑀦𑀲𑀪𑀸𑀯𑀢𑀸 𑀘 𑀅𑀦𑀼𑀧𑀘𑁆𑀙𑀺𑀦𑁆𑀦𑀸𑀯𑀺𑀚𑁆𑀚𑀸𑀢𑀡𑁆𑀳𑀸𑀫𑀸𑀦𑀲𑀦𑁆𑀢𑀸𑀦𑁂 𑀲𑀩𑁆𑀬𑀸𑀧𑀸𑀭𑀢𑀸, 𑀢𑁂𑀦 𑀅𑀪𑀺𑀜𑁆𑀜𑀸𑀤𑀺𑀓𑀼𑀲𑀮𑀸𑀦𑀁 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀸𑀤𑀺𑀅𑀓𑀼𑀲𑀮𑀸𑀦𑀜𑁆𑀘 𑀯𑀺𑀧𑀸𑀓𑀸𑀦𑀼𑀧𑁆𑀧𑀸𑀤𑀦𑁂𑀧𑀺 𑀯𑀺𑀧𑀸𑀓𑀥𑀫𑁆𑀫𑀢𑀸 𑀲𑀺𑀤𑁆𑀥𑀸 𑀳𑁄𑀢𑀺. 𑀯𑀺𑀧𑀓𑁆𑀓𑀪𑀸𑀯𑀦𑁆𑀢𑀺 𑀘𑁂𑀢𑁆𑀣 𑀪𑀸𑀯-𑀲𑀤𑁆𑀤𑁂𑀦 𑀲𑀪𑀸𑀯𑁄 𑀏𑀯 𑀯𑀼𑀢𑁆𑀢𑁄. 𑀢𑀁 𑀬𑀣𑀸𑀯𑀼𑀢𑁆𑀢𑀁 𑀯𑀺𑀧𑀓𑁆𑀓𑀲𑀪𑀸𑀯𑀁 𑀤𑀼𑀢𑀺𑀬𑀲𑁆𑀲 𑀯𑀼𑀢𑁆𑀢𑀁 𑀯𑀺𑀧𑀘𑁆𑀘𑀦𑀲𑀪𑀸𑀯𑀜𑁆𑀘 𑀕𑀳𑁂𑀢𑁆𑀯𑀸 ‘‘𑀉𑀪𑀬𑀲𑀪𑀸𑀯𑀧𑀝𑀺𑀓𑁆𑀔𑁂𑀧𑀯𑀲𑁂𑀦𑀸’’𑀢𑀺 𑀆𑀳.

𑁪. 𑀉𑀧𑁂𑀢𑁂𑀦 𑀆𑀤𑀺𑀦𑁆𑀦𑀸 𑀉𑀧𑀸𑀤𑀺𑀦𑁆𑀦𑀸. 𑀓𑀺𑀁 𑀧𑀦 𑀢𑀁 𑀉𑀧𑁂𑀢𑀁, 𑀓𑁂𑀦 𑀘 𑀉𑀧𑁂𑀢𑀁, 𑀓𑀣𑀜𑁆𑀘 𑀉𑀧𑁂𑀢𑀁, 𑀓𑁂 𑀘 𑀢𑁂𑀦 𑀆𑀤𑀺𑀦𑁆𑀦𑀸𑀢𑀺? 𑀲𑀢𑀺 𑀘 𑀮𑁄𑀓𑀼𑀢𑁆𑀢𑀭𑀸𑀦𑀁 𑀓𑁂𑀲𑀜𑁆𑀘𑀺 𑀆𑀭𑀫𑁆𑀫𑀡𑀪𑀸𑀯𑁂 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 𑀉𑀧𑁂𑀢𑀲𑀤𑁆𑀤𑀲𑀫𑁆𑀩𑀦𑁆𑀥𑀺𑀦𑀸 𑀉𑀧𑀬-𑀲𑀤𑁆𑀤𑁂𑀦 𑀯𑀼𑀘𑁆𑀘𑀫𑀸𑀦𑀸𑀳𑀺 𑀘𑀢𑀼𑀩𑁆𑀩𑀺𑀥𑀼𑀧𑀸𑀤𑀸𑀦𑀪𑀽𑀢𑀸𑀳𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀉𑀧𑁂𑀢𑀁, 𑀢𑁂𑀳𑀺 𑀘 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀉𑀧𑁂𑀢𑀁, 𑀦 𑀲𑀫𑀦𑁆𑀦𑀸𑀕𑀫𑀯𑀲𑁂𑀦. 𑀲𑀢𑀺 𑀘 𑀲𑀩𑁆𑀩𑀢𑁂𑀪𑀽𑀫𑀓𑀥𑀫𑁆𑀫𑀸𑀦𑀁 𑀉𑀧𑀸𑀤𑀸𑀦𑀸𑀭𑀫𑁆𑀫𑀡𑀢𑁆𑀢𑁂 𑀬𑁂𑀳𑀺 𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑀸𑀦𑀺 𑀅𑀫𑁆𑀳𑁂𑀳𑀺 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀅𑀫𑁆𑀳𑀸𑀓𑀁 𑀏𑀢𑀸𑀦𑀺 𑀨𑀮𑀸𑀦𑀻𑀢𑀺 𑀕𑀡𑁆𑀳𑀦𑁆𑀢𑁂𑀳𑀺 𑀯𑀺𑀬 𑀆𑀤𑀺𑀦𑁆𑀦𑀸𑀦𑀺, 𑀢𑀸𑀦𑀺 𑀢𑁂𑀪𑀽𑀫𑀓𑀓𑀫𑁆𑀫𑀸𑀦𑀺 𑀓𑀫𑁆𑀫𑀪𑀸𑀯𑁂𑀦 𑀏𑀓𑀢𑁆𑀢𑀁 𑀉𑀧𑀦𑁂𑀢𑁆𑀯𑀸 𑀉𑀧𑁂𑀢𑀦𑁆𑀢𑀺 𑀇𑀥 𑀕𑀳𑀺𑀢𑀸𑀦𑀺. 𑀢𑁂𑀳𑀺 𑀘 𑀦𑀺𑀩𑁆𑀩𑀢𑁆𑀢𑀸𑀦𑀺 𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑀸𑀦𑀺 𑀉𑀧𑀸𑀤𑀺𑀦𑁆𑀦𑀸 𑀥𑀫𑁆𑀫𑀸𑀢𑀺 𑀲𑀩𑁆𑀩𑀫𑁂𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀬𑀜𑁆𑀘 𑀅𑀢𑁆𑀣𑀦𑀬𑁄 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑁄, 𑀦 𑀯𑀘𑀦𑀸𑀦𑀼𑀧𑀼𑀩𑁆𑀩𑁂𑀦𑀸𑀢𑀺. 𑀏𑀢𑁆𑀣𑀸𑀳 𑁋 𑀬𑀤𑀺 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀉𑀧𑁂𑀢𑁂𑀦 𑀆𑀤𑀺𑀦𑁆𑀦𑀸 𑀉𑀧𑀸𑀤𑀺𑀦𑁆𑀦𑀸, 𑀲𑀩𑁆𑀩𑀢𑁂𑀪𑀽𑀫𑀓𑀥𑀫𑁆𑀫𑀸 𑀘 𑀢𑀡𑁆𑀳𑀸𑀤𑀻𑀦𑀁 𑀆𑀭𑀫𑁆𑀫𑀡𑀸 𑀳𑁄𑀦𑁆𑀢𑀺, 𑀦 𑀘 𑀉𑀧𑁂𑀢𑀲𑀤𑁆𑀤𑁄 𑀓𑀫𑁆𑀫𑁂 𑀏𑀯 𑀦𑀺𑀭𑀼𑀴𑁆𑀳𑁄, 𑀢𑁂𑀦 𑀓𑀫𑁆𑀫𑀲𑁆𑀲𑁂𑀯 𑀕𑀳𑀡𑁂 𑀓𑀸𑀭𑀡𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀩𑁆𑀩𑀢𑁂𑀪𑀽𑀫𑀓𑀥𑀫𑁆𑀫𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀅𑀯𑀺𑀚𑁆𑀚𑀸𑀤𑀺𑀳𑁂𑀢𑀽𑀳𑀺 𑀦𑀺𑀩𑁆𑀩𑀢𑁆𑀢𑀸𑀦𑀁 𑀲𑀗𑁆𑀔𑀸𑀭𑀸𑀤𑀺𑀨𑀮𑀸𑀦𑀁 𑀉𑀧𑀸𑀤𑀺𑀦𑁆𑀦𑀢𑁆𑀢𑀁 𑀆𑀧𑀚𑁆𑀚𑀢𑀺 𑀢𑁂𑀲𑀫𑁆𑀧𑀺 𑀢𑁂𑀳𑀺𑀨𑀮𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸. 𑀉𑀧-𑀲𑀤𑁆𑀤𑁂𑀦 𑀘 𑀉𑀧𑁂𑀢𑀢𑀸𑀫𑀢𑁆𑀢𑀁 𑀚𑁄𑀢𑀺𑀢𑀁, 𑀦 𑀆𑀭𑀫𑁆𑀫𑀡𑀓𑀭𑀡𑀁 𑀲𑀫𑀦𑁆𑀦𑀸𑀕𑀫𑀦𑀺𑀯𑀢𑁆𑀢𑀓𑀁, 𑀆𑀤𑀺𑀦𑁆𑀦-𑀲𑀤𑁆𑀤𑁂𑀦 𑀘 𑀕𑀳𑀺𑀢𑀢𑀸𑀫𑀢𑁆𑀢𑀁 𑀯𑀼𑀢𑁆𑀢𑀁, 𑀦 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀢𑀸𑀯𑀺𑀲𑁂𑀲𑁄. 𑀢𑀲𑁆𑀫𑀸 𑀲𑀩𑁆𑀩𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀉𑀧𑀸𑀤𑀺𑀦𑁆𑀦𑀢𑁆𑀢𑀁 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺 𑀩𑁄𑀥𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 𑀤𑁂𑀲𑀦𑀸𑀧𑀯𑀢𑁆𑀢𑀺𑀢𑁄. 𑀬𑁂𑀲𑀜𑁆𑀳𑀺 𑀩𑁄𑀥𑀦𑀢𑁆𑀣𑀁 ‘‘𑀉𑀧𑀸𑀤𑀺𑀦𑁆𑀦𑀸’’𑀢𑀺 𑀏𑀢𑀁 𑀯𑀼𑀢𑁆𑀢𑀁, 𑀢𑁂 𑀢𑁂𑀦𑁂𑀯 𑀯𑀘𑀦𑁂𑀦 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀥𑀫𑁆𑀫𑁂 𑀩𑀼𑀚𑁆𑀛𑀺𑀁𑀲𑀼, 𑀏𑀢𑀭𑀳𑀺 𑀧𑀦 𑀢𑀸𑀯𑀢𑀸 𑀩𑀼𑀚𑁆𑀛𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀲𑀼𑀢𑁆𑀯𑀸 𑀢𑀤𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀏𑀲𑀸 𑀅𑀢𑁆𑀣𑀯𑀺𑀪𑀸𑀯𑀦𑀸 𑀓𑀢𑀸 ‘‘𑀓𑀫𑁆𑀫𑀼𑀦𑀸’’𑀢𑀺.

𑀅𑀬𑀁 𑀧𑀦 𑀅𑀧𑀭𑁄 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 𑁋 𑀉𑀧-𑀲𑀤𑁆𑀤𑁄 𑀉𑀧𑁂𑀢𑀁 𑀤𑀻𑀧𑁂𑀢𑀺. 𑀅𑀬𑀜𑁆𑀳𑀺 𑀉𑀧-𑀲𑀤𑁆𑀤𑁄 𑀲𑀫𑀸𑀲𑁂 𑀧𑀬𑀼𑀚𑁆𑀚𑀫𑀸𑀦𑁄 ‘‘𑀅𑀢𑀺𑀫𑀸𑀮𑀸’’𑀢𑀺𑀆𑀤𑀻𑀲𑀼 𑀅𑀢𑀺-𑀲𑀤𑁆𑀤𑁄 𑀯𑀺𑀬 𑀅𑀢𑀺𑀓𑁆𑀓𑀫𑀦𑀁 𑀲𑀲𑀸𑀥𑀦𑀁 𑀉𑀧𑀕𑀫𑀦𑀁 𑀲𑀲𑀸𑀥𑀦𑀁 𑀯𑀤𑀢𑀺, 𑀉𑀧𑀕𑀫𑀦𑀜𑁆𑀘 𑀉𑀧𑀸𑀤𑀸𑀦𑀉𑀧𑀬𑁄, 𑀢𑁂𑀦 𑀉𑀧𑀕𑀢𑀁 𑀉𑀧𑁂𑀢𑀁. 𑀓𑀺𑀁 𑀧𑀦 𑀢𑀦𑁆𑀢𑀺? 𑀬𑀁 𑀅𑀲𑀢𑀺 𑀉𑀧𑀸𑀤𑀸𑀦𑁂 𑀦 𑀳𑁄𑀢𑀺, 𑀢𑀁 ‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀢𑁂𑀪𑀽𑀫𑀓𑀓𑀫𑁆𑀫𑀁 𑀧𑀘𑁆𑀘𑀬𑀪𑀸𑀯𑁂𑀦 𑀧𑀼𑀭𑀺𑀫𑀚𑀸𑀢𑀼𑀧𑁆𑀧𑀦𑁆𑀦𑁂𑀦 𑀉𑀧𑀸𑀤𑀸𑀦𑁂𑀦 𑀉𑀧𑀕𑀢𑀢𑁆𑀢𑀸 ‘‘𑀉𑀧𑁂𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀦 𑀳𑀺 𑀓𑁄𑀘𑀺 𑀅𑀦𑀼𑀧𑀕𑁆𑀕𑀫𑁆𑀫 𑀅𑀦𑀺𑀘𑁆𑀙𑀦𑁆𑀢𑁄 𑀓𑀫𑁆𑀫𑀁 𑀓𑀭𑁄𑀢𑀻𑀢𑀺. 𑀢𑁂𑀦 𑀉𑀧𑁂𑀢𑁂𑀦 𑀓𑀫𑁆𑀫𑀼𑀦𑀸 𑀧𑀼𑀦𑀩𑁆𑀪𑀯𑀲𑁆𑀲 𑀆𑀤𑀸𑀦𑀁 𑀳𑁄𑀢𑀺. 𑀓𑀫𑁆𑀫𑀼𑀦𑀸 𑀳𑀺 𑀲𑀸𑀲𑀯𑁂𑀦 𑀲𑀢𑁆𑀢𑀸 𑀆𑀤𑀺𑀬𑀦𑁆𑀢𑀺 𑀧𑀼𑀦𑀩𑁆𑀪𑀯𑀁, 𑀢𑀲𑁆𑀫𑀸 𑀆𑀤𑀸𑀢𑀩𑁆𑀩𑀪𑀸𑀯𑁂𑀦 𑀧𑀸𑀓𑀝𑁄 𑀧𑀼𑀦𑀩𑁆𑀪𑀯𑁄. 𑀲𑁄 𑀘 𑀉𑀧𑀧𑀢𑁆𑀢𑀺𑀪𑀯𑁄 𑀢𑁂𑀪𑀽𑀫𑀓𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑀲𑀗𑁆𑀕𑀳𑁄 ‘‘𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’’𑀢𑀺 𑀏𑀢𑁆𑀣 𑀚𑀸𑀢𑀺𑀯𑀘𑀦𑁂 𑀲𑀫𑀯𑀭𑀼𑀤𑁆𑀥𑁄𑀢𑀺 𑀉𑀧𑀸𑀤𑀺𑀦𑁆𑀦𑀯𑀘𑀦𑁂𑀦 𑀉𑀧𑀧𑀢𑁆𑀢𑀺𑀪𑀯𑁄 𑀯𑀼𑀘𑁆𑀘𑀢𑀺, 𑀉𑀧𑀧𑀢𑁆𑀢𑀺𑀪𑀯𑁄 𑀘 𑀢𑁂𑀪𑀽𑀫𑀓𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑀸𑀦𑀻𑀢𑀺 𑀥𑀸𑀢𑀼𑀓𑀣𑀸𑀬𑀁 𑀧𑀓𑀸𑀲𑀺𑀢𑀫𑁂𑀢𑀁. 𑀢𑀲𑁆𑀫𑀸 𑀉𑀧𑁂𑀢𑁂𑀦 𑀆𑀤𑀺𑀦𑁆𑀦𑀸𑀢𑀺 𑀢𑁂 𑀏𑀯 𑀥𑀫𑁆𑀫𑀸 𑀯𑀼𑀘𑁆𑀘𑀦𑁆𑀢𑀻𑀢𑀺 𑀲𑀺𑀤𑁆𑀥𑁄 𑀅𑀬𑀫𑀢𑁆𑀣𑁄𑀢𑀺. 𑀉𑀧𑀸𑀤𑀺𑀦𑁆𑀦-𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀯𑀢𑁆𑀯𑀸 𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀉𑀧𑀸𑀤𑀸𑀦𑀺𑀬-𑀲𑀤𑁆𑀤𑀲𑁆𑀲 𑀯𑀺𑀲𑀼𑀁 𑀉𑀧𑀸𑀤𑀺𑀦𑁆𑀦𑀲𑀤𑁆𑀤𑀸𑀦𑀧𑁂𑀓𑁆𑀔𑀁 𑀅𑀢𑁆𑀣𑀁 𑀯𑀢𑁆𑀢𑀼𑀁 ‘‘𑀆𑀭𑀫𑁆𑀫𑀡𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀫𑀸 𑀏𑀯 𑀅𑀯𑀺𑀲𑁂𑀲𑁂𑀢𑁆𑀯𑀸 ‘‘𑀉𑀧𑀸𑀤𑀸𑀦𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑀸𑀦𑀫𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀧𑀦 𑀉𑀧𑀸𑀤𑀸𑀦𑀺𑀬𑀁 𑀉𑀧𑀸𑀤𑀺𑀦𑁆𑀦𑀁 𑀅𑀦𑀼𑀧𑀸𑀤𑀺𑀦𑁆𑀦𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀲𑁆𑀫𑀸 𑀢𑀁 𑀯𑀺𑀲𑁂𑀲𑀦𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀧𑀸𑀤𑀺𑀦𑁆𑀦𑀸 𑀘 𑀢𑁂 𑀉𑀧𑀸𑀤𑀸𑀦𑀺𑀬𑀸 𑀘𑀸’’𑀢𑀺𑀆𑀤𑀺𑀫𑀸𑀳.

𑁫. 𑀲𑀁𑀓𑀺𑀮𑁂𑀲𑁄𑀢𑀺 𑀤𑀲 𑀓𑀺𑀮𑁂𑀲𑀯𑀢𑁆𑀣𑀽𑀦𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀁𑀓𑀺𑀮𑀺𑀝𑁆𑀞𑀸𑀢𑀺 𑀢𑁂𑀳𑀺 𑀯𑀺𑀩𑀸𑀥𑀺𑀢𑀸 𑀉𑀧𑀢𑀸𑀧𑀺𑀢𑀸 𑀘. 𑀢𑁂 𑀧𑀦 𑀬𑀲𑁆𑀫𑀸 𑀲𑀁𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀸 𑀏𑀓𑀼𑀧𑁆𑀧𑀸𑀤𑀸𑀤𑀻𑀳𑀺 𑀦𑀺𑀦𑁆𑀦𑀸𑀦𑀢𑁆𑀢𑀸 𑀏𑀓𑀻𑀪𑀸𑀯𑀫𑀺𑀯 𑀕𑀢𑀸 𑀯𑀺𑀲𑀸𑀤𑀻𑀳𑀺 𑀯𑀺𑀬 𑀲𑀧𑁆𑀧𑀺𑀆𑀤𑀬𑁄 𑀯𑀺𑀤𑀽𑀲𑀺𑀢𑀸 𑀫𑀮𑀻𑀦𑀸 𑀯𑀺𑀩𑀸𑀥𑀺𑀢𑀸 𑀉𑀧𑀢𑀸𑀧𑀺𑀢𑀸 𑀘 𑀦𑀸𑀫 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀆𑀳 ‘‘𑀲𑀁𑀓𑀺𑀮𑁂𑀲𑁂𑀦 𑀲𑀫𑀦𑁆𑀦𑀸𑀕𑀢𑀸 𑀲𑀁𑀓𑀺𑀮𑀺𑀝𑁆𑀞𑀸’’𑀢𑀺. 𑀲𑀁𑀓𑀺𑀮𑁂𑀲𑀁 𑀅𑀭𑀳𑀦𑁆𑀢𑀻𑀢𑀺 𑀲𑀁𑀓𑀺𑀮𑁂𑀲𑀲𑁆𑀲 𑀆𑀭𑀫𑁆𑀫𑀡𑀪𑀸𑀯𑁂𑀦 𑀢𑀁 𑀮𑀤𑁆𑀥𑀼𑀁 𑀅𑀭𑀳𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀆𑀭𑀫𑁆𑀫𑀡𑀪𑀸𑀯𑀸𑀦𑀢𑀺𑀓𑁆𑀓𑀫𑀦𑀢𑁄𑀢𑀺 𑀏𑀢𑁂𑀦 𑀲𑀁𑀓𑀺𑀮𑁂𑀲𑀸𑀦𑀢𑀺𑀓𑁆𑀓𑀫𑀦𑀫𑁂𑀯 𑀤𑀲𑁆𑀲𑁂𑀢𑀺, 𑀯𑀢𑁆𑀣𑀬𑀼𑀕𑀺𑀓𑀲𑀼𑀗𑁆𑀓𑀲𑀸𑀮𑀺𑀓𑀲𑀤𑁆𑀤𑀸𑀦𑀁 𑀯𑀺𑀬 𑀲𑀁𑀓𑀺𑀮𑁂𑀲𑀺𑀓-𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁬. 𑀲𑀳 𑀯𑀺𑀢𑀓𑁆𑀓𑁂𑀦 𑀳𑁄𑀦𑁆𑀢𑀻𑀢𑀺 𑀯𑀘𑀦𑀲𑁂𑀲𑁄 𑀬𑁄𑀚𑁂𑀢𑀩𑁆𑀩𑁄 𑀅𑀯𑀼𑀘𑁆𑀘𑀫𑀸𑀦𑀲𑁆𑀲𑀧𑀺 𑀪𑀯𑀢𑀺-𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸. 𑀫𑀢𑁆𑀢𑀸𑀢𑀺 𑀧𑀫𑀸𑀡𑀯𑀸𑀘𑀓𑀁 𑀏𑀓𑀁 𑀧𑀤𑀦𑁆𑀢𑀺 𑀕𑀳𑁂𑀢𑁆𑀯𑀸 ‘‘𑀯𑀺𑀘𑀸𑀭𑁄𑀯 𑀫𑀢𑁆𑀢𑀸 𑀏𑀢𑁂𑀲’’𑀦𑁆𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀅𑀜𑁆𑀜𑀢𑁆𑀣 𑀅𑀯𑀺𑀧𑁆𑀧𑀬𑁄𑀕𑀻𑀲𑀼 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀲𑀼 𑀯𑀺𑀘𑀸𑀭𑁄𑀯 𑀏𑀢𑁂𑀲𑀁 𑀫𑀢𑁆𑀢𑀸, 𑀢𑀢𑁄 𑀉𑀤𑁆𑀥𑀁 𑀯𑀺𑀢𑀓𑁆𑀓𑁂𑀦 𑀲𑀫𑁆𑀧𑀬𑁄𑀕𑀁 𑀦 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀫𑀧𑀭𑁄 𑀅𑀢𑁆𑀣𑁄 𑁋 𑀫𑀢𑁆𑀢-𑀲𑀤𑁆𑀤𑁄 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁄. 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸 𑀥𑀫𑁆𑀫𑀸 𑀳𑀺 𑀯𑀺𑀢𑀓𑁆𑀓𑀯𑀺𑀲𑀺𑀝𑁆𑀞𑁂𑀦 𑀯𑀺𑀘𑀸𑀭𑁂𑀦 𑀲𑀯𑀺𑀘𑀸𑀭𑀸, 𑀏𑀢𑁂 𑀧𑀦 𑀯𑀺𑀘𑀸𑀭𑀫𑀢𑁆𑀢𑁂𑀦 𑀯𑀺𑀢𑀓𑁆𑀓𑀲𑀗𑁆𑀔𑀸𑀢𑀯𑀺𑀲𑁂𑀲𑀭𑀳𑀺𑀢𑁂𑀦, 𑀢𑀲𑁆𑀫𑀸 ‘‘𑀯𑀺𑀘𑀸𑀭𑀫𑀢𑁆𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀯𑀺𑀘𑀸𑀭𑀫𑀢𑁆𑀢𑀯𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀯𑀺𑀘𑀸𑀭𑀫𑀢𑁆𑀢𑀯𑀘𑀦𑁂𑀦 𑀅𑀯𑀺𑀢𑀓𑁆𑀓𑀢𑁆𑀢𑁂 𑀲𑀺𑀤𑁆𑀥𑁂 𑀅𑀯𑀺𑀢𑀓𑁆𑀓𑀸𑀦𑀁 𑀅𑀜𑁆𑀜𑁂𑀲𑀫𑁆𑀧𑀺 𑀅𑀢𑁆𑀣𑀺𑀪𑀸𑀯𑀚𑁄𑀢𑀦𑀢𑁆𑀣𑀁 𑀅𑀯𑀺𑀢𑀓𑁆𑀓𑀯𑀘𑀦𑀁. 𑀅𑀯𑀺𑀢𑀓𑁆𑀓𑀸 𑀳𑀺 𑀯𑀺𑀘𑀸𑀭𑀫𑀢𑁆𑀢𑀸 𑀘 𑀲𑀦𑁆𑀢𑀺 𑀅𑀯𑀺𑀘𑀸𑀭𑀸 𑀘𑀸𑀢𑀺 𑀦𑀺𑀯𑀢𑁆𑀢𑁂𑀢𑀩𑁆𑀩𑀸 𑀕𑀳𑁂𑀢𑀩𑁆𑀩𑀸 𑀘 𑀳𑁄𑀦𑁆𑀢𑀺, 𑀢𑁂𑀲𑀼 𑀅𑀯𑀼𑀘𑁆𑀘𑀫𑀸𑀦𑁂𑀲𑀼 𑀦𑀺𑀯𑀢𑁆𑀢𑁂𑀢𑀩𑁆𑀩𑀕𑀳𑁂𑀢𑀩𑁆𑀩𑀲𑁆𑀲 𑀅𑀤𑀲𑁆𑀲𑀺𑀢𑀢𑁆𑀢𑀸 𑀯𑀺𑀘𑀸𑀭𑀫𑀢𑁆𑀢𑀸𑀯𑀅𑀯𑀺𑀢𑀓𑁆𑀓𑀸𑀢𑀺 𑀆𑀧𑀚𑁆𑀚𑁂𑀬𑁆𑀬𑀸𑀢𑀺. 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁄 𑀧𑀦 𑀬𑀣𑀸𑀓𑀸𑀫𑀁 𑀳𑁄𑀢𑀻𑀢𑀺 𑀲𑀸𑀫𑀜𑁆𑀜𑁂𑀦 𑀅𑀯𑀺𑀢𑀓𑁆𑀓𑀪𑀸𑀯𑁂𑀦 𑀲𑀳 𑀯𑀺𑀘𑀸𑀭𑀫𑀢𑁆𑀢𑀢𑀸𑀬 𑀥𑀫𑁆𑀫𑀯𑀺𑀲𑁂𑀲𑀦𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸’’𑀢𑀺 𑀧𑀤𑀸𑀦𑀼𑀓𑁆𑀓𑀫𑁄 𑀓𑀢𑁄.

𑀅𑀣 𑀯𑀸 𑀲𑀯𑀺𑀘𑀸𑀭𑀸 𑀤𑀼𑀯𑀺𑀥𑀸 𑀲𑀯𑀺𑀢𑀓𑁆𑀓𑀸 𑀅𑀯𑀺𑀢𑀓𑁆𑀓𑀸 𑀘, 𑀢𑁂𑀲𑀼 𑀅𑀯𑀺𑀢𑀓𑁆𑀓𑁂 𑀦𑀺𑀯𑀢𑁆𑀢𑁂𑀢𑀼𑀁 𑀆𑀤𑀺𑀧𑀤𑀁 𑀯𑀼𑀢𑁆𑀢𑀁. 𑀅𑀯𑀺𑀘𑀸𑀭𑀸 𑀘 𑀤𑀼𑀯𑀺𑀥𑀸 𑀲𑀯𑀺𑀢𑀓𑁆𑀓𑀸 𑀅𑀯𑀺𑀢𑀓𑁆𑀓𑀸 𑀘, 𑀢𑁂𑀲𑀼 𑀲𑀯𑀺𑀢𑀓𑁆𑀓𑁂 𑀦𑀺𑀯𑀢𑁆𑀢𑁂𑀢𑀼𑀁 𑀢𑀢𑀺𑀬𑀧𑀤𑀁 𑀯𑀼𑀢𑁆𑀢𑀁. 𑀬𑁂 𑀧𑀦 𑀤𑁆𑀯𑀻𑀳𑀺𑀧𑀺 𑀦𑀺𑀯𑀢𑁆𑀢𑀺𑀢𑀸 𑀅𑀯𑀺𑀢𑀓𑁆𑀓𑀸 𑀲𑀯𑀺𑀢𑀓𑁆𑀓𑀸 𑀘 𑀲𑀯𑀺𑀘𑀸𑀭𑀸 𑀅𑀯𑀺𑀘𑀸𑀭𑀸 𑀘, 𑀢𑁂𑀲𑀼 𑀅𑀜𑁆𑀜𑀢𑀭𑀤𑀲𑁆𑀲𑀦𑀁 𑀯𑀸 𑀓𑀢𑁆𑀢𑀩𑁆𑀩𑀁 𑀲𑀺𑀬𑀸 𑀉𑀪𑀬𑀤𑀲𑁆𑀲𑀦𑀁 𑀯𑀸. 𑀉𑀪𑀬𑀤𑀲𑁆𑀲𑀦𑁂 𑀓𑀭𑀺𑀬𑀫𑀸𑀦𑁂 𑀬𑀤𑀺 ‘‘𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸’’𑀢𑀺 𑀯𑀼𑀘𑁆𑀘𑁂𑀬𑁆𑀬, 𑀆𑀤𑀺𑀧𑀤𑀢𑁆𑀣𑀢𑀸𑀯 𑀆𑀧𑀚𑁆𑀚𑀢𑀺. 𑀅𑀣 ‘‘𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸’’𑀢𑀺 𑀯𑀼𑀘𑁆𑀘𑁂𑀬𑁆𑀬, 𑀅𑀦𑁆𑀢𑀧𑀤𑀢𑁆𑀣𑀢𑀸. 𑀅𑀣 𑀧𑀦 ‘‘𑀅𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸 𑀲𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸’’𑀢𑀺 𑀯𑀼𑀘𑁆𑀘𑁂𑀬𑁆𑀬, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀦𑀁 𑀯𑀺𑀬 𑀅𑀢𑁆𑀣𑀦𑁆𑀢𑀭𑀸𑀪𑀸𑀯𑁄 𑀯𑀸 𑀲𑀗𑁆𑀓𑀭𑀤𑁄𑀲𑁄 𑀯𑀸 𑀏𑀓𑀲𑁆𑀲𑁂𑀯 𑀲𑀯𑀺𑀢𑀓𑁆𑀓𑀸𑀯𑀺𑀢𑀓𑁆𑀓𑀢𑀸𑀲𑀯𑀺𑀘𑀸𑀭𑀸𑀯𑀺𑀘𑀸𑀭𑀢𑀸𑀯𑀺𑀭𑁄𑀥𑁄 𑀯𑀸 𑀆𑀧𑀚𑁆𑀚𑁂𑀬𑁆𑀬, 𑀢𑀲𑁆𑀫𑀸 𑀅𑀜𑁆𑀜𑀢𑀭𑀤𑀲𑁆𑀲𑀦𑁂𑀦 𑀇𑀢𑀭𑀫𑁆𑀧𑀺 𑀧𑀓𑀸𑀲𑁂𑀢𑀼𑀁 𑀅𑀯𑀺𑀢𑀓𑁆𑀓𑀯𑀘𑀦𑁂𑀦 𑀤𑁆𑀯𑀺𑀧𑁆𑀧𑀓𑀸𑀭𑁂𑀲𑀼 𑀯𑀢𑁆𑀢𑀩𑁆𑀩𑁂𑀲𑀼 𑀲𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁂 𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁂 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸’’𑀢𑀺. 𑀅𑀣 𑀯𑀸 𑀯𑀺𑀢𑀓𑁆𑀓𑀸𑀪𑀸𑀯𑁂𑀦 𑀏𑀢𑁂 𑀯𑀺𑀘𑀸𑀭𑀫𑀢𑁆𑀢𑀸, 𑀦 𑀯𑀺𑀘𑀸𑀭𑀢𑁄 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺 𑀥𑀫𑁆𑀫𑀲𑁆𑀲 𑀅𑀪𑀸𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 𑀅𑀯𑀺𑀢𑀓𑁆𑀓𑀯𑀘𑀦𑁂𑀦 𑀯𑀺𑀘𑀸𑀭𑀫𑀢𑁆𑀢𑀸 𑀯𑀺𑀲𑁂𑀲𑀺𑀢𑀸.

𑁭. 𑀉𑀧𑁂𑀓𑁆𑀔𑀢𑀻𑀢𑀺 𑀯𑁂𑀤𑀬𑀫𑀸𑀦𑀸𑀧𑀺 𑀫𑀚𑁆𑀛𑀢𑁆𑀢𑀯𑁂𑀤𑀦𑀸 𑀲𑀼𑀔𑀸𑀓𑀸𑀭𑁂 𑀤𑀼𑀓𑁆𑀔𑀸𑀓𑀸𑀭𑁂 𑀘 𑀉𑀤𑀸𑀲𑀺𑀦𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀉𑀧𑁂𑀢𑀸 𑀬𑀼𑀢𑁆𑀢𑀸 𑀲𑀼𑀔𑀤𑀼𑀓𑁆𑀔𑀸𑀦𑀁 𑀅𑀯𑀺𑀭𑀼𑀤𑁆𑀥𑀸 𑀇𑀓𑁆𑀔𑀸 𑀅𑀦𑀼𑀪𑀯𑀦𑀁 𑀉𑀧𑁂𑀓𑁆𑀔𑀸. 𑀯𑀺𑀲𑁂𑀲𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀦𑀸𑀦𑀢𑁆𑀢𑀤𑀲𑁆𑀲𑀦𑀯𑀲𑁂𑀦. 𑀬𑀤𑀺 𑀳𑀺 𑀧𑀻𑀢𑀺𑀲𑀳𑀕𑀢𑀸 𑀏𑀯 𑀲𑀼𑀔𑀲𑀳𑀕𑀢𑀸 𑀲𑀺𑀬𑀼𑀁, ‘‘𑀧𑀻𑀢𑀺𑀲𑀳𑀕𑀢𑀸’’𑀢𑀺 𑀏𑀢𑁂𑀦𑁂𑀯 𑀲𑀺𑀤𑁆𑀥𑀢𑁆𑀢𑀸 ‘‘𑀲𑀼𑀔𑀲𑀳𑀕𑀢𑀸’’𑀢𑀺 𑀇𑀤𑀁 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, ‘‘𑀲𑀼𑀔𑀲𑀳𑀕𑀢𑀸’’𑀢𑀺 𑀯𑀸 𑀯𑀼𑀘𑁆𑀘𑀫𑀸𑀦𑁂 ‘‘𑀧𑀻𑀢𑀺𑀲𑀳𑀕𑀢𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀢𑀢𑁄 𑀢𑀺𑀓𑀁 𑀧𑀽𑀭𑁂𑀦𑁆𑀢𑁂𑀦 𑀤𑀼𑀓𑁆𑀔𑀲𑀳𑀕𑀢𑀧𑀤𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀏𑀯𑀜𑁆𑀘 𑀲𑀢𑀺 ‘‘𑀯𑁂𑀤𑀦𑀸𑀢𑁆𑀢𑀺𑀓𑁄 𑀏𑀯𑀸𑀬’’𑀦𑁆𑀢𑀺 𑀯𑀼𑀢𑁆𑀢𑀯𑀘𑀦𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 ‘‘𑀧𑀻𑀢𑀺𑀲𑀳𑀕𑀢𑀸’’𑀢𑀺 𑀯𑀢𑁆𑀯𑀸 ‘‘𑀲𑀼𑀔𑀲𑀳𑀕𑀢𑀸’’𑀢𑀺 𑀯𑀤𑀦𑁆𑀢𑁄 𑀧𑀻𑀢𑀺𑀯𑀺𑀧𑁆𑀧𑀬𑀼𑀢𑁆𑀢𑀫𑁆𑀧𑀺 𑀲𑀼𑀔𑀁 𑀅𑀢𑁆𑀣𑀻𑀢𑀺 𑀢𑀢𑀺𑀬𑀚𑁆𑀛𑀸𑀦𑀓𑀸𑀬𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀲𑀼𑀔𑀁 𑀲𑀧𑁆𑀧𑀻𑀢𑀺𑀓𑀲𑀼𑀔𑀢𑁄 𑀪𑀺𑀦𑁆𑀦𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀯𑀸 𑀧𑀻𑀢𑀺𑀲𑀼𑀔𑀸𑀦𑀁 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀦𑀸𑀦𑀢𑁆𑀢𑀸𑀦𑀁 𑀦𑀸𑀦𑀢𑁆𑀢𑀤𑀲𑁆𑀲𑀦𑀢𑁆𑀣𑀁 𑀅𑀬𑀁 𑀢𑀺𑀓𑁄 𑀯𑀼𑀢𑁆𑀢𑁄. ‘‘𑀧𑀻𑀢𑀺𑀲𑀳𑀕𑀢𑀸’’𑀢𑀺 𑀏𑀢𑁆𑀣 𑀳𑀺 𑀲𑀼𑀔𑁂𑀓𑀤𑁂𑀲𑁄 𑀲𑀗𑁆𑀕𑀳𑀺𑀢𑁄, 𑀦 𑀧𑀻𑀢𑀺. ‘‘𑀲𑀼𑀔𑀲𑀳𑀕𑀢𑀸’’𑀢𑀺 𑀏𑀢𑁆𑀣 𑀧𑀻𑀢𑀺 𑀲𑀗𑁆𑀕𑀳𑀺𑀢𑀸, 𑀦 𑀲𑀼𑀔𑀁. 𑀧𑀻𑀢𑀺𑀯𑀺𑀧𑁆𑀧𑀬𑀼𑀢𑁆𑀢𑀲𑀼𑀔𑀲𑀳𑀕𑀢𑀸 𑀘 𑀧𑀼𑀭𑀺𑀫𑁂𑀦 𑀅𑀲𑀗𑁆𑀕𑀳𑀺𑀢𑀸 𑀧𑀘𑁆𑀙𑀺𑀫𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀲𑀺𑀤𑁆𑀥𑁄 𑀧𑀻𑀢𑀺𑀲𑀼𑀔𑀸𑀦𑀁 𑀯𑀺𑀲𑁂𑀲𑁄𑀢𑀺.

𑁮. 𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑀦𑀢𑁄𑀢𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀁 𑀲𑀦𑁆𑀥𑀸𑀬𑀸𑀳. 𑀅𑀣 𑀯𑀸 𑀥𑀫𑁆𑀫𑀘𑀓𑁆𑀔𑀼 𑀧𑀼𑀦𑀧𑁆𑀧𑀼𑀦𑀁 𑀦𑀺𑀩𑁆𑀩𑀢𑁆𑀢𑀦𑁂𑀦 𑀪𑀸𑀯𑀦𑀸𑀪𑀸𑀯𑀁 𑀅𑀧𑁆𑀧𑀢𑁆𑀢𑀁 𑀤𑀲𑁆𑀲𑀦𑀁 𑀦𑀸𑀫, 𑀥𑀫𑁆𑀫𑀘𑀓𑁆𑀔𑀼 𑀘 𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀓𑀭𑀡𑁂𑀦 𑀘𑀢𑀼𑀲𑀘𑁆𑀘𑀥𑀫𑁆𑀫𑀤𑀲𑁆𑀲𑀦𑀁 𑀢𑀤𑀢𑀺𑀲𑀬𑁄, 𑀢𑀲𑁆𑀫𑀸 𑀦𑀢𑁆𑀣𑁂𑀢𑁆𑀣 𑀕𑁄𑀢𑁆𑀭𑀪𑀼𑀲𑁆𑀲 𑀤𑀲𑁆𑀲𑀦𑀪𑀸𑀯𑀸𑀧𑀢𑁆𑀢𑀻𑀢𑀺. 𑀉𑀪𑀬𑀧𑀝𑀺𑀓𑁆𑀔𑁂𑀧𑀯𑀲𑁂𑀦𑀸𑀢𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀯𑀼𑀢𑁆𑀢𑀥𑀫𑁆𑀫𑀧𑀝𑀺𑀓𑁆𑀔𑁂𑀧𑀯𑀲𑁂𑀦, 𑀦 𑀧𑀳𑀸𑀬𑀓𑀧𑀝𑀺𑀓𑁆𑀔𑁂𑀧𑀯𑀲𑁂𑀦. 𑀢𑀣𑀸 𑀳𑀺 𑀲𑀢𑀺 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀅𑀜𑁆𑀜𑁄 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀳𑀸𑀬𑀓𑁄 𑀅𑀢𑁆𑀣𑀺, 𑀢𑁂𑀦 𑀧𑀳𑀸𑀢𑀩𑁆𑀩𑀸 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀢𑀺 𑀅𑀬𑀫𑀢𑁆𑀣𑁄 𑀆𑀧𑀚𑁆𑀚𑀢𑀺, 𑀦 𑀘 𑀅𑀜𑁆𑀜𑁄 𑀧𑀳𑀸𑀬𑀓𑁄 𑀅𑀢𑁆𑀣𑀺 𑀅𑀜𑁆𑀜𑁂𑀳𑀺 𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑀜𑁆𑀘 𑀧𑀼𑀦𑀧𑁆𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀸, 𑀦𑀸𑀧𑀺 𑀧𑀳𑀸𑀢𑀩𑁆𑀩𑀸 𑀢𑀢𑀺𑀬𑀧𑀤𑁂𑀦 𑀲𑀗𑁆𑀕𑀬𑁆𑀳𑀦𑁆𑀢𑀺, 𑀓𑀺𑀦𑁆𑀢𑀼 𑀅𑀧𑁆𑀧𑀳𑀸𑀢𑀩𑁆𑀩𑀸 𑀏𑀯𑀸𑀢𑀺. 𑀢𑀲𑁆𑀫𑀸 𑀧𑀳𑀸𑀢𑀩𑁆𑀩𑀧𑀤𑀁 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑁆𑀯𑀸 𑀦𑁂𑀯 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑀦𑁂𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑁂𑀳𑀺 𑀅𑀜𑁆𑀜𑁂 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁯. 𑀏𑀯𑀫𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑀸𑀬𑀼𑀢𑁆𑀢𑀺𑀢𑁄 𑀘 𑀲𑀤𑁆𑀤𑀸𑀬𑀼𑀢𑁆𑀢𑀺𑀢𑁄 𑀘 𑀅𑀕𑁆𑀕𑀳𑁂𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀺. 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀅𑀧𑁆𑀧𑀳𑀸𑀢𑀩𑁆𑀩𑀳𑁂𑀢𑀼𑀫𑀢𑁆𑀢𑁂𑀲𑀼 𑀳𑀺 𑀕𑀬𑁆𑀳𑀫𑀸𑀦𑁂𑀲𑀼 𑀅𑀳𑁂𑀢𑀼𑀓𑀸 𑀅𑀲𑀗𑁆𑀕𑀳𑀺𑀢𑀸𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀲𑁆𑀲 𑀅𑀢𑁆𑀣𑀲𑁆𑀲 𑀅𑀧𑀭𑀺𑀧𑀼𑀡𑁆𑀡𑀢𑁆𑀢𑀸 𑀅𑀢𑁆𑀣𑀸𑀬𑀼𑀢𑁆𑀢𑀺, 𑀧𑀳𑀸𑀢𑀩𑁆𑀩𑀲𑀤𑁆𑀤𑀲𑁆𑀲 𑀦𑀺𑀘𑁆𑀘𑀲𑀸𑀧𑁂𑀓𑁆𑀔𑀢𑁆𑀢𑁂 𑀘 𑀲𑀢𑀺 𑀦 𑀲𑀫𑁆𑀩𑀦𑁆𑀥𑀻𑀲𑀤𑁆𑀤𑀢𑁄 𑀧𑀳𑀸𑀬𑀓𑀢𑁄 𑀅𑀜𑁆𑀜𑀁 𑀧𑀝𑀺𑀲𑁂𑀥𑀁 𑀅𑀧𑁂𑀓𑁆𑀔𑀫𑀸𑀦𑀲𑁆𑀲 𑀳𑁂𑀢𑀼𑀲𑀤𑁆𑀤𑁂𑀦 𑀲𑀫𑀸𑀲𑁄 𑀉𑀧𑀧𑀚𑁆𑀚𑀢𑀻𑀢𑀺 𑀲𑀤𑁆𑀤𑀸𑀬𑀼𑀢𑁆𑀢𑀺 𑀘 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺 𑀧𑀳𑀸𑀢𑀩𑁆𑀩-𑀲𑀤𑁆𑀤𑀁 𑀧𑀝𑀺𑀲𑁂𑀥𑁂𑀦 𑀅𑀬𑁄𑀚𑁂𑀢𑁆𑀯𑀸 𑀬𑁂𑀲𑀁 𑀅𑀜𑁆𑀜𑀧𑀤𑀢𑁆𑀣𑁂 𑀲𑀫𑀸𑀲𑁄, 𑀢𑀩𑁆𑀩𑀺𑀲𑁂𑀲𑀦𑀁 𑀅𑀢𑁆𑀣𑀻𑀢𑀺 𑀇𑀤𑀁 𑀧𑀝𑀺𑀲𑁂𑀥𑁂𑀦 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀧𑀳𑀸𑀢𑀩𑁆𑀩𑁄 𑀳𑁂𑀢𑀼 𑀏𑀢𑁂𑀲𑀁 𑀦𑁂𑀯𑀢𑁆𑀣𑀻𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀜𑁆𑀘 𑀲𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑁄 𑀲𑀩𑁆𑀩𑁄 𑀲𑀗𑁆𑀕𑀳𑀺𑀢𑁄𑀢𑀺. 𑀅𑀢𑁆𑀣𑀸𑀬𑀼𑀢𑁆𑀢𑀺 𑀫𑀸 𑀳𑁄𑀢𑀼, 𑀲𑀤𑁆𑀤𑁄 𑀧𑀦 𑀇𑀥𑀸𑀧𑀺 𑀦 𑀬𑀼𑀢𑁆𑀢𑁄. 𑀏𑀓𑀦𑁆𑀢𑀬𑁄𑀕𑀻𑀦𑀁 𑀅𑀢𑁆𑀣𑀺-𑀲𑀤𑁆𑀤𑀫𑁂𑀯 𑀳𑀺 𑀅𑀧𑁂𑀓𑁆𑀔𑀫𑀸𑀦𑀸𑀦𑀁 𑀉𑀪𑀺𑀦𑁆𑀦𑀁 𑀧𑀳𑀸𑀢𑀩𑁆𑀩𑀳𑁂𑀢𑀼-𑀲𑀤𑁆𑀤𑀸𑀦𑀁 𑀲𑀫𑀸𑀲𑁄 𑀬𑀼𑀢𑁆𑀢𑁄, 𑀦 𑀧𑀝𑀺𑀲𑁂𑀥𑀁 𑀅𑀧𑁂𑀓𑁆𑀔𑀫𑀸𑀦𑀸𑀦𑀦𑁆𑀢𑀺, 𑀢𑀲𑁆𑀫𑀸 𑀕𑀳𑁂𑀢𑀩𑁆𑀩𑀢𑁆𑀣𑀤𑀲𑁆𑀲𑀦𑀫𑀢𑁆𑀢𑀁 𑀏𑀢𑀁 𑀓𑀢𑀁, 𑀲𑀤𑁆𑀤𑁄 𑀧𑀦 𑀬𑀣𑀸 𑀬𑀼𑀚𑁆𑀚𑀢𑀺, 𑀢𑀣𑀸 𑀬𑁄𑀚𑁂𑀢𑀩𑁆𑀩𑁄. 𑀏𑀯𑀁 𑀧𑀦 𑀬𑀼𑀚𑁆𑀚𑀢𑀺 𑁋 𑀧𑀳𑀸𑀢𑀩𑁆𑀩𑁄 𑀳𑁂𑀢𑀼 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸. 𑀓𑁂𑀦 𑀧𑀳𑀸𑀢𑀩𑁆𑀩𑁄𑀢𑀺? 𑀤𑀲𑁆𑀲𑀦𑁂𑀦 𑀪𑀸𑀯𑀦𑀸𑀬 𑀘. 𑀢𑀬𑀺𑀤𑀁 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀧𑀤𑀁 𑀤𑀲𑁆𑀲𑀦𑀪𑀸𑀯𑀦𑀸𑀧𑀤𑁂𑀳𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀬𑁄𑀚𑁂𑀢𑁆𑀯𑀸 𑀢𑁂𑀳𑀺 𑀬𑀼𑀢𑁆𑀢𑁂𑀦 𑀬𑁂 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸 𑀦𑁂𑀯 𑀳𑁄𑀦𑁆𑀢𑀺, 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸 𑀘 𑀦 𑀳𑁄𑀦𑁆𑀢𑀻𑀢𑀺 𑀧𑀝𑀺𑀲𑁂𑀥𑀜𑁆𑀘 𑀯𑀺𑀲𑀼𑀁 𑀯𑀺𑀲𑀼𑀁 𑀬𑁄𑀚𑁂𑀢𑁆𑀯𑀸 𑀢𑁂 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀯𑀘𑀦𑀁 𑀯𑀺𑀬 𑀳𑀺 𑀧𑀼𑀭𑀺𑀫𑀧𑀤𑀤𑁆𑀯𑀬𑀲𑀗𑁆𑀕𑀳𑀺𑀢𑀥𑀫𑁆𑀫𑀧𑀝𑀺𑀲𑁂𑀥𑀦𑁂𑀦 𑀢𑀤𑀜𑁆𑀜𑀥𑀫𑁆𑀫𑀦𑀺𑀤𑀲𑁆𑀲𑀦𑀫𑁂𑀢𑀁 𑀳𑁄𑀢𑀺, 𑀦 𑀅𑀳𑁂𑀢𑀼𑀓𑀧𑀤𑀁 𑀯𑀺𑀬 𑀳𑁂𑀢𑀼𑀯𑀺𑀭𑀳𑀧𑁆𑀧𑀓𑀸𑀲𑀦𑁂𑀦𑀸𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀤𑁆𑀯𑁂 𑀧𑀝𑀺𑀲𑁂𑀥𑀸 𑀬𑀼𑀢𑁆𑀢𑀸 𑀳𑁄𑀦𑁆𑀢𑀺.

𑀳𑁂𑀢𑀼𑀬𑁂𑀯 𑀳𑀺 𑀢𑁂𑀲𑀁 𑀦𑀢𑁆𑀣𑀺, 𑀬𑁄 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀧𑀳𑀸𑀢𑀩𑁆𑀩𑁄 𑀲𑀺𑀬𑀸𑀢𑀺 𑀧𑀼𑀭𑀺𑀫𑀲𑁆𑀫𑀺𑀜𑁆𑀳𑀺 𑀅𑀢𑁆𑀣𑁂 𑀳𑁂𑀢𑀽𑀦𑀁 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀧𑀳𑀸𑀢𑀩𑁆𑀩𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀧𑀝𑀺𑀓𑁆𑀔𑁂𑀧𑁄 𑀘 𑀧𑀳𑀸𑀢𑀩𑁆𑀩𑀸𑀲𑀗𑁆𑀓𑀸𑀲𑀩𑁆𑀪𑀸𑀯𑁂 𑀳𑁄𑀢𑀺, 𑀧𑀳𑀸𑀢𑀩𑁆𑀩𑀸𑀲𑀗𑁆𑀓𑀸 𑀘 𑀳𑁂𑀢𑀼𑀫𑁆𑀳𑀺 𑀲𑀢𑀺 𑀲𑀺𑀬𑀸, 𑀢𑁂𑀲𑀁 𑀧𑀦 𑀅𑀳𑁂𑀢𑀼𑀓𑀸𑀦𑀁 𑀳𑁂𑀢𑀼𑀬𑁂𑀯 𑀦𑀢𑁆𑀣𑀺, 𑀬𑁄 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀧𑀳𑀸𑀢𑀩𑁆𑀩𑁄 𑀲𑀺𑀬𑀸, 𑀢𑀤𑀪𑀸𑀯𑀸 𑀧𑀳𑀸𑀢𑀩𑁆𑀩𑀸𑀲𑀗𑁆𑀓𑀸 𑀦𑀢𑁆𑀣𑀻𑀢𑀺 𑀢𑀁𑀦𑀺𑀯𑀸𑀭𑀡𑀢𑁆𑀣𑁄 𑀧𑀝𑀺𑀓𑁆𑀔𑁂𑀧𑁄 𑀦 𑀲𑀫𑁆𑀪𑀯𑀢𑀺, 𑀢𑀲𑁆𑀫𑀸 ‘‘𑀦𑁂𑀯𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑁄 𑀳𑁂𑀢𑀼 𑀏𑀢𑁂𑀲’’𑀦𑁆𑀢𑀺 𑀏𑀯𑀁 𑀅𑀳𑁂𑀢𑀼𑀓𑀸𑀦𑀁 𑀕𑀳𑀡𑀁 𑀦 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀇𑀢𑀭𑀣𑀸 𑀳𑀺 𑀅𑀳𑁂𑀢𑀼𑀓𑀸𑀦𑀁 𑀅𑀕𑁆𑀕𑀳𑀡𑀁 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑀲𑁆𑀲 𑀧𑀸𑀓𑀝𑀢𑁆𑀢𑀸 𑀦 𑀓𑀸𑀭𑀡𑀲𑀸𑀥𑀦𑀻𑀬𑁄 𑀏𑀲𑁄𑀢𑀺 𑀕𑀳𑁂𑀢𑀩𑁆𑀩𑀢𑁆𑀣𑀲𑁆𑀲𑁂𑀯 𑀓𑀸𑀭𑀡𑀁 𑀯𑀤𑀦𑁆𑀢𑁄 ‘‘𑀳𑁂𑀢𑀼𑀬𑁂𑀯 𑀳𑀺 𑀢𑁂𑀲𑀁 𑀦𑀢𑁆𑀣𑀻’’𑀢𑀺𑀆𑀤𑀺𑀫𑀸𑀳. 𑀢𑁂𑀲𑀜𑁆𑀳𑀺 𑀦𑁂𑀯𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀧𑀤𑀯𑀘𑀦𑀻𑀬𑀸𑀦𑀁 𑀬𑁄 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀧𑀳𑀸𑀢𑀩𑁆𑀩𑁄 𑀲𑀺𑀬𑀸, 𑀲𑁄 𑀏𑀯𑀁𑀧𑀓𑀸𑀭𑁄 𑀳𑁂𑀢𑀼 𑀦𑀢𑁆𑀣𑀺. 𑀢𑁂 𑀳𑀺 𑀅𑀦𑁂𑀓𑀧𑁆𑀧𑀓𑀸𑀭𑀸 𑀲𑀳𑁂𑀢𑀼𑀓𑀸 𑀅𑀳𑁂𑀢𑀼𑀓𑀸 𑀘𑀸𑀢𑀺, 𑀢𑀲𑁆𑀫𑀸 𑀦𑁂𑀯𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑁄 𑀳𑁂𑀢𑀼 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀅𑀬𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑁧𑁦. 𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸𑀢𑀺 𑀇𑀤𑀁 𑀘𑀢𑀼𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀆𑀭𑀫𑁆𑀫𑀡𑀓𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀜𑁆𑀜𑀣𑀸 𑀕𑁄𑀢𑁆𑀭𑀪𑀼𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀻𑀦𑀫𑁆𑀧𑀺 𑀅𑀧𑀘𑀬𑀕𑀸𑀫𑀺𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺. 𑀅𑀣 𑀯𑀸 𑀳𑁂𑀢𑀼𑀪𑀸𑀯𑁂𑀦 𑀅𑀧𑀘𑀬𑀁 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀧𑀘𑀬𑀕𑀸𑀫𑀺𑀦𑁄. 𑀦𑀺𑀩𑁆𑀩𑀸𑀦𑀲𑁆𑀲 𑀳𑀺 𑀅𑀦𑀺𑀩𑁆𑀩𑀢𑁆𑀢𑀦𑀺𑀬𑀢𑁆𑀢𑁂𑀧𑀺 𑀲𑀫𑀼𑀤𑀬𑀧𑁆𑀧𑀳𑀸𑀦𑀲𑀫𑀼𑀤𑀬𑀦𑀺𑀭𑁄𑀥𑀸𑀦𑀁 𑀅𑀥𑀺𑀕𑀫𑀅𑀥𑀺𑀕𑀦𑁆𑀢𑀩𑁆𑀩𑀪𑀸𑀯𑀢𑁄 𑀳𑁂𑀢𑀼𑀳𑁂𑀢𑀼𑀨𑀮𑀪𑀸𑀯𑁄 𑀫𑀕𑁆𑀕𑀦𑀺𑀩𑁆𑀩𑀸𑀦𑀸𑀦𑀁 𑀬𑀼𑀚𑁆𑀚𑀢𑀺. 𑀬𑀣𑀸𑀳 ‘‘𑀤𑀼𑀓𑁆𑀔𑀦𑀺𑀭𑁄𑀥𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁧𑁯). 𑀅𑀢𑁆𑀣𑁄𑀢𑀺 𑀳𑀺 𑀳𑁂𑀢𑀼𑀨𑀮𑀁. 𑀥𑀫𑁆𑀫𑁄𑀢𑀺 𑀳𑁂𑀢𑀽𑀢𑀺. 𑀧𑀼𑀭𑀺𑀫𑀧𑀘𑁆𑀙𑀺𑀫𑀸𑀦𑀁 𑀧𑀼𑀭𑀺𑀫𑁂 𑀲𑀲𑀫𑁆𑀧𑀬𑀼𑀢𑁆𑀢𑀸 𑀯𑀼𑀢𑁆𑀢𑀸, 𑀧𑀘𑁆𑀙𑀺𑀫𑁂 𑀓𑁂𑀯𑀮𑀸. 𑀧𑀼𑀭𑀺𑀫𑁂 𑀯𑀺𑀬 𑀧𑀦 𑀧𑀘𑁆𑀙𑀺𑀫𑁂 𑀅𑀢𑁆𑀣𑁂𑀧𑀺 𑀅𑀭𑀺𑀬𑀫𑀕𑁆𑀕𑀲𑀻𑀲𑁂𑀦 𑀲𑀩𑁆𑀩𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀕𑀳𑁂𑀢𑀩𑁆𑀩𑀸. 𑀤𑀼𑀢𑀺𑀬𑁂 𑀅𑀢𑁆𑀣𑀯𑀺𑀓𑀧𑁆𑀧𑁂 ‘‘𑀆𑀘𑀬𑀁 𑀕𑀸𑀫𑀺𑀦𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀅𑀦𑀼𑀦𑀸𑀲𑀺𑀓𑀮𑁄𑀧𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀆𑀘𑀺𑀦𑀦𑁆𑀢𑀻𑀢𑀺 𑀯𑀸 𑀆𑀘𑀬𑀸, 𑀆𑀘𑀬𑀸 𑀳𑀼𑀢𑁆𑀯𑀸 𑀕𑀘𑁆𑀙𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺𑀧𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁧𑁧. 𑀲𑀢𑁆𑀢 𑀧𑀦 𑀲𑁂𑀓𑁆𑀔𑀸 𑀲𑀺𑀓𑁆𑀔𑀦𑀲𑀻𑀮𑀸𑀢𑀺 𑀲𑁂𑀓𑁆𑀔𑀸, 𑀢𑁂𑀲𑀁 𑀇𑀫𑁂𑀢𑀺 𑀲𑁂𑀓𑁆𑀔𑀸, 𑀅𑀜𑁆𑀜𑀸𑀲𑀸𑀥𑀸𑀭𑀡𑀸 𑀫𑀕𑁆𑀕𑀨𑀮𑀢𑁆𑀢𑀬𑀥𑀫𑁆𑀫𑀸. 𑀲𑀬𑀫𑁂𑀯 𑀲𑀺𑀓𑁆𑀔𑀦𑁆𑀢𑀻𑀢𑀺 𑀲𑀺𑀓𑁆𑀔𑀦𑀲𑀻𑀮𑀸𑀦𑀫𑁂𑀢𑀁 𑀦𑀺𑀤𑀲𑁆𑀲𑀦𑀁. 𑀬𑁂 𑀳𑀺 𑀥𑀫𑁆𑀫𑀸 𑀲𑀺𑀓𑁆𑀔𑀦𑁆𑀢𑀺, 𑀢𑁂 𑀲𑀺𑀓𑁆𑀔𑀦𑀲𑀻𑀮𑀸 𑀳𑁄𑀦𑁆𑀢𑀻𑀢𑀺. 𑀅𑀓𑁆𑀔𑀭𑀢𑁆𑀣𑁄 𑀧𑀦 𑀲𑀺𑀓𑁆𑀔𑀸 𑀏𑀢𑁂𑀲𑀁 𑀲𑀻𑀮𑀦𑁆𑀢𑀺 𑀲𑁂𑀓𑁆𑀔𑀸𑀢𑀺. 𑀦 𑀲𑁂𑀓𑁆𑀔𑀸𑀢𑀺 𑀬𑀢𑁆𑀣 𑀲𑁂𑀓𑁆𑀔𑀪𑀸𑀯𑀸𑀲𑀗𑁆𑀓𑀸 𑀅𑀢𑁆𑀣𑀺, 𑀢𑀢𑁆𑀣𑀸𑀬𑀁 𑀧𑀝𑀺𑀲𑁂𑀥𑁄𑀢𑀺 𑀮𑁄𑀓𑀺𑀬𑀦𑀺𑀩𑁆𑀩𑀸𑀦𑁂𑀲𑀼 𑀅𑀲𑁂𑀓𑁆𑀔𑀪𑀸𑀯𑀸𑀦𑀸𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸. 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀸 𑀳𑀺 𑀲𑀺𑀓𑁆𑀔𑀸 𑀅𑀢𑁆𑀢𑀦𑁄 𑀧𑀝𑀺𑀧𑀓𑁆𑀔𑀓𑀺𑀮𑁂𑀲𑁂𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑀸 𑀧𑀭𑀺𑀲𑀼𑀤𑁆𑀥𑀸 𑀉𑀧𑀓𑁆𑀓𑀺𑀮𑁂𑀲𑀸𑀦𑀁 𑀆𑀭𑀫𑁆𑀫𑀡𑀪𑀸𑀯𑀫𑁆𑀧𑀺 𑀅𑀦𑀼𑀧𑀕𑀫𑀦𑀢𑁄 𑀏𑀢𑀸 𑀲𑀺𑀓𑁆𑀔𑀸𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀸 𑀅𑀝𑁆𑀞𑀲𑀼 𑀫𑀕𑁆𑀕𑀨𑀮𑁂𑀲𑀼 𑀯𑀺𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀘𑀢𑀼𑀫𑀕𑁆𑀕𑀳𑁂𑀝𑁆𑀞𑀺𑀫𑀨𑀮𑀢𑁆𑀢𑀬𑀥𑀫𑁆𑀫𑀸 𑀯𑀺𑀬 𑀅𑀭𑀳𑀢𑁆𑀢𑀨𑀮𑀥𑀫𑁆𑀫𑀸𑀧𑀺 𑀢𑀸𑀲𑀼 𑀲𑀺𑀓𑁆𑀔𑀸𑀲𑀼 𑀚𑀸𑀢𑀸𑀢𑀺 𑀘, 𑀢𑀁𑀲𑀺𑀓𑁆𑀔𑀸𑀲𑀫𑀗𑁆𑀕𑀺𑀦𑁄 𑀅𑀭𑀳𑀢𑁄 𑀇𑀢𑀭𑁂𑀲𑀁 𑀯𑀺𑀬 𑀲𑁂𑀓𑁆𑀔𑀢𑁆𑀢𑁂 𑀲𑀢𑀺 𑀲𑁂𑀓𑁆𑀔𑀲𑁆𑀲 𑀏𑀢𑁂𑀢𑀺 𑀘, 𑀲𑀺𑀓𑁆𑀔𑀸 𑀲𑀻𑀮𑀁 𑀏𑀢𑁂𑀲𑀦𑁆𑀢𑀺 𑀘 𑀲𑁂𑀓𑁆𑀔𑀸𑀢𑀺 𑀆𑀲𑀗𑁆𑀓𑀺𑀢𑀩𑁆𑀩𑀸 𑀲𑀺𑀬𑀼𑀦𑁆𑀢𑀺 𑀢𑀤𑀸𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀅𑀲𑁂𑀓𑁆𑀔𑀸’’𑀢𑀺 𑀬𑀣𑀸𑀯𑀼𑀢𑁆𑀢𑀲𑁂𑀓𑁆𑀔𑀪𑀸𑀯𑀧𑀝𑀺𑀲𑁂𑀥𑁄 𑀓𑀢𑁄. 𑀅𑀭𑀳𑀢𑁆𑀢𑀨𑀮𑁂 𑀳𑀺 𑀧𑀯𑀢𑁆𑀢𑀫𑀸𑀦𑀸 𑀲𑀺𑀓𑁆𑀔𑀸 𑀧𑀭𑀺𑀦𑀺𑀝𑁆𑀞𑀺𑀢𑀲𑀺𑀓𑁆𑀔𑀸𑀓𑀺𑀘𑁆𑀘𑀢𑁆𑀢𑀸 𑀦 𑀲𑀺𑀓𑁆𑀔𑀸𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺, 𑀓𑁂𑀯𑀮𑀁 𑀲𑀺𑀓𑁆𑀔𑀸𑀨𑀮𑀪𑀸𑀯𑁂𑀦𑁂𑀯 𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀢𑀸 𑀦 𑀲𑀺𑀓𑁆𑀔𑀸𑀯𑀘𑀦𑀁 𑀅𑀭𑀳𑀦𑁆𑀢𑀺, 𑀦𑀸𑀧𑀺 𑀢𑀁𑀲𑀫𑀗𑁆𑀕𑀺𑀦𑁄 𑀲𑁂𑀓𑁆𑀔𑀯𑀘𑀦𑀁, 𑀦 𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀲𑀺𑀓𑁆𑀔𑀦𑀲𑀻𑀮𑀸𑀢𑀺 𑀲𑀺𑀓𑁆𑀔𑀸𑀲𑀼 𑀚𑀸𑀢𑀸𑀢𑀺𑀆𑀤𑀺𑀅𑀢𑁆𑀣𑁂𑀳𑀺 𑀅𑀕𑁆𑀕𑀨𑀮𑀥𑀫𑁆𑀫𑀸 𑀲𑁂𑀓𑁆𑀔𑀸 𑀦 𑀳𑁄𑀦𑁆𑀢𑀺, 𑀳𑁂𑀝𑁆𑀞𑀺𑀫𑀨𑀮𑁂𑀲𑀼 𑀧𑀦 𑀲𑀺𑀓𑁆𑀔𑀸 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀯𑀺𑀧𑀲𑁆𑀲𑀦𑀸𑀤𑀻𑀦𑀁 𑀉𑀧𑀦𑀺𑀲𑁆𑀲𑀬𑀪𑀸𑀯𑀢𑁄 𑀲𑀺𑀓𑁆𑀔𑀸𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀻𑀢𑀺 𑀲𑀺𑀓𑁆𑀔𑀸𑀯𑀘𑀦𑀁 𑀅𑀭𑀳𑀦𑁆𑀢𑀺, 𑀢𑀁𑀲𑀫𑀗𑁆𑀕𑀺𑀦𑁄 𑀘 𑀲𑁂𑀓𑁆𑀔𑀯𑀘𑀦𑀁, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘 𑀲𑀺𑀓𑁆𑀔𑀦𑀲𑀻𑀮𑀯𑀼𑀢𑁆𑀢𑀻𑀢𑀺 𑀢𑀢𑁆𑀣 𑀥𑀫𑁆𑀫𑀸 𑀬𑀣𑀸𑀯𑀼𑀢𑁆𑀢𑁂𑀳𑀺 𑀅𑀢𑁆𑀣𑁂𑀳𑀺 𑀲𑁂𑀓𑁆𑀔𑀸 𑀳𑁄𑀦𑁆𑀢𑀺 𑀏𑀯.

𑀲𑁂𑀓𑁆𑀔𑀸𑀢𑀺 𑀯𑀸 𑀅𑀧𑀭𑀺𑀬𑁄𑀲𑀺𑀢𑀲𑀺𑀓𑁆𑀔𑀸 𑀤𑀲𑁆𑀲𑀺𑀢𑀸. 𑀅𑀦𑀦𑁆𑀢𑀭𑀫𑁂𑀯 ‘‘𑀅𑀲𑁂𑀓𑁆𑀔𑀸’’𑀢𑀺 𑀯𑀘𑀦𑀁 𑀧𑀭𑀺𑀬𑁄𑀲𑀺𑀢𑀲𑀺𑀓𑁆𑀔𑀸𑀦𑀁 𑀤𑀲𑁆𑀲𑀦𑀦𑁆𑀢𑀺 𑀦 𑀮𑁄𑀓𑀺𑀬𑀦𑀺𑀩𑁆𑀩𑀸𑀦𑀸𑀦𑀁 𑀅𑀲𑁂𑀓𑁆𑀔𑀢𑀸𑀧𑀢𑁆𑀢𑀺. 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀸 𑀯𑀸 𑀲𑁂𑀓𑁆𑀔𑀸𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑁂𑀓𑁆𑀔𑀥𑀫𑁆𑀫𑁂𑀲𑀼 𑀏𑀯 𑀓𑁂𑀲𑀜𑁆𑀘𑀺 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀸𑀦𑀁 𑀅𑀲𑁂𑀓𑁆𑀔𑀢𑀸 𑀆𑀧𑀚𑁆𑀚𑀢𑀺, 𑀢𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑀥𑀫𑁆𑀫𑀸 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀸 𑀘 𑀬𑀣𑀸𑀯𑀼𑀢𑁆𑀢𑁂𑀳𑀺 𑀘 𑀅𑀢𑁆𑀣𑁂𑀳𑀺 𑀲𑁂𑀓𑁆𑀔𑀸𑀢𑀺 𑀓𑀢𑁆𑀯𑀸 𑀅𑀲𑁂𑀓𑁆𑀔𑀸 𑀆𑀧𑀦𑁆𑀦𑀸𑀢𑀺? 𑀦, 𑀢𑀁𑀲𑀤𑀺𑀲𑁂𑀲𑀼 𑀢𑀩𑁆𑀩𑁄𑀳𑀸𑀭𑀸. 𑀅𑀭𑀳𑀢𑁆𑀢𑀫𑀕𑁆𑀕𑀢𑁄 𑀳𑀺 𑀦𑀺𑀦𑁆𑀦𑀸𑀦𑀸𑀓𑀭𑀡𑀁 𑀅𑀭𑀳𑀢𑁆𑀢𑀨𑀮𑀁 𑀞𑀧𑁂𑀢𑁆𑀯𑀸 𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀓𑀭𑀡𑀁 𑀯𑀺𑀧𑀸𑀓𑀪𑀸𑀯𑀜𑁆𑀘, 𑀢𑀲𑁆𑀫𑀸 𑀢𑁂 𑀏𑀯 𑀲𑁂𑀓𑁆𑀔𑀸 𑀥𑀫𑁆𑀫𑀸 𑀅𑀭𑀳𑀢𑁆𑀢𑀨𑀮𑀪𑀸𑀯𑀁 𑀆𑀧𑀦𑁆𑀦𑀸𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀓𑀼𑀲𑀮𑀲𑀼𑀔𑀢𑁄 𑀘 𑀯𑀺𑀧𑀸𑀓𑀲𑀼𑀔𑀁 𑀲𑀦𑁆𑀢𑀢𑀭𑀢𑀸𑀬 𑀧𑀡𑀻𑀢𑀢𑀭𑀦𑁆𑀢𑀺 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀸 𑀘 𑀢𑁂 𑀥𑀫𑁆𑀫𑀸 𑀳𑁄𑀦𑁆𑀢𑀻𑀢𑀺 𑀅𑀲𑁂𑀓𑁆𑀔𑀸𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺.

𑁧𑁨. 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀸𑀲𑀫𑀢𑁆𑀣𑀢𑀸𑀤𑀻𑀳𑀺 𑀧𑀭𑀺𑀢𑁆𑀢𑀸. ‘‘𑀓𑀺𑀮𑁂𑀲…𑀧𑁂… 𑀢𑀸𑀬𑀸’’𑀢𑀺 𑀅𑀢𑁆𑀣𑀢𑁆𑀢𑀬𑀫𑁆𑀧𑀺 𑀓𑀼𑀲𑀮𑁂𑀲𑀼 𑀬𑀼𑀚𑁆𑀚𑀢𑀺, 𑀯𑀺𑀧𑀸𑀓𑀓𑀺𑀭𑀺𑀬𑁂𑀲𑀼 𑀤𑀻𑀖𑀲𑀦𑁆𑀢𑀸𑀦𑀢𑀸𑀯. 𑀧𑀫𑀸𑀡𑀓𑀭𑁂𑀳𑀺 𑀯𑀸 𑀑𑀴𑀸𑀭𑀺𑀓𑁂𑀳𑀺 𑀓𑀸𑀫𑀢𑀡𑁆𑀳𑀸𑀤𑀻𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀸 𑀧𑀭𑀺𑀢𑁆𑀢𑀸. 𑀢𑁂𑀳𑀺 𑀅𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀲𑀼𑀔𑀼𑀫𑁂𑀳𑀺 𑀭𑀽𑀧𑀢𑀡𑁆𑀳𑀸𑀤𑀻𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀸 𑀧𑀫𑀸𑀡𑀫𑀳𑀢𑁆𑀢𑀁 𑀕𑀢𑀸𑀢𑀺 𑀫𑀳𑀕𑁆𑀕𑀢𑀸. 𑀅𑀧𑀭𑀺𑀘𑁆𑀙𑀺𑀦𑁆𑀦𑀸 𑀅𑀧𑁆𑀧𑀫𑀸𑀡𑀸.

𑁧𑁪. 𑀅𑀢𑀧𑁆𑀧𑀓𑀝𑁆𑀞𑁂𑀦𑀸𑀢𑀺 𑀤𑀺𑀯𑀲𑀫𑁆𑀧𑀺 𑀧𑀘𑁆𑀘𑀯𑁂𑀓𑁆𑀔𑀺𑀬𑀫𑀸𑀦𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀢𑀺𑀢𑁆𑀢𑀺𑀁 𑀦 𑀚𑀦𑁂𑀦𑁆𑀢𑀺 𑀲𑀫𑀸𑀧𑀚𑁆𑀚𑀺𑀬𑀫𑀸𑀦𑀸𑀧𑀺 𑀨𑀮𑀥𑀫𑁆𑀫𑀸𑀢𑀺.

𑁧𑁫. 𑀫𑀸𑀢𑀼𑀖𑀸𑀢𑀸𑀤𑀻𑀲𑀼 𑀧𑀯𑀢𑁆𑀢𑀫𑀸𑀦𑀸𑀧𑀺 𑀳𑀺𑀢𑀲𑀼𑀔𑀁 𑀇𑀘𑁆𑀙𑀦𑁆𑀢𑀸𑀯 𑀧𑀯𑀢𑁆𑀢𑀦𑁆𑀢𑀻𑀢𑀺 𑀢𑁂 𑀥𑀫𑁆𑀫𑀸 𑀳𑀺𑀢𑀲𑀼𑀔𑀸𑀯𑀳𑀸 𑀫𑁂 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀆𑀲𑀻𑀲𑀺𑀢𑀸 𑀳𑁄𑀦𑁆𑀢𑀺, 𑀢𑀣𑀸 𑀅𑀲𑀼𑀪𑀸𑀲𑀼𑀔𑀸𑀦𑀺𑀘𑁆𑀘𑀸𑀦𑀢𑁆𑀢𑁂𑀲𑀼 𑀲𑀼𑀪𑀸𑀤𑀺𑀯𑀺𑀧𑀭𑀺𑀬𑀸𑀲𑀤𑀴𑁆𑀳𑀢𑀸𑀬 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀲𑀼 𑀧𑀯𑀢𑁆𑀢𑀺 𑀳𑁄𑀢𑀻𑀢𑀺 𑀢𑁂 𑀥𑀫𑁆𑀫𑀸 𑀅𑀲𑀼𑀪𑀸𑀤𑀻𑀲𑀼 𑀲𑀼𑀪𑀸𑀤𑀺𑀯𑀺𑀧𑀭𑀻𑀢𑀧𑁆𑀧𑀯𑀢𑁆𑀢𑀺𑀓𑀸 𑀳𑁄𑀦𑁆𑀢𑀺. 𑀫𑀺𑀘𑁆𑀙𑀸𑀲𑀪𑀸𑀯𑀸𑀢𑀺 𑀫𑀼𑀲𑀸𑀲𑀪𑀸𑀯𑀸. 𑀅𑀦𑁂𑀓𑁂𑀲𑀼 𑀆𑀦𑀦𑁆𑀢𑀭𑀺𑀬𑁂𑀲𑀼 𑀓𑀢𑁂𑀲𑀼 𑀬𑀁 𑀢𑀢𑁆𑀣 𑀩𑀮𑀯𑀁, 𑀢𑀁 𑀯𑀺𑀧𑀘𑁆𑀘𑀢𑀺, 𑀦 𑀇𑀢𑀭𑀸𑀦𑀻𑀢𑀺 𑀏𑀓𑀦𑁆𑀢𑀯𑀺𑀧𑀸𑀓𑀚𑀦𑀓𑀢𑀸𑀬 𑀦𑀺𑀬𑀢𑀢𑀸 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 ‘‘𑀯𑀺𑀧𑀸𑀓𑀤𑀸𑀦𑁂 𑀲𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀔𑀦𑁆𑀥𑀪𑁂𑀤𑀸𑀦𑀦𑁆𑀢𑀭𑀦𑁆𑀢𑀺 𑀘𑀼𑀢𑀺𑀅𑀦𑀦𑁆𑀢𑀭𑀁. 𑀘𑀼𑀢𑀺 𑀳𑀺 𑀫𑀭𑀡𑀦𑀺𑀤𑁆𑀤𑁂𑀲𑁂 (𑀯𑀺𑀪. 𑁧𑁯𑁩) ‘‘𑀔𑀦𑁆𑀥𑀸𑀦𑀁 𑀪𑁂𑀤𑁄’’𑀢𑀺 𑀯𑀼𑀢𑁆𑀢𑀸𑀢𑀺. 𑀏𑀢𑁂𑀦 𑀯𑀘𑀦𑁂𑀦 𑀲𑀢𑀺 𑀨𑀮𑀤𑀸𑀦𑁂 𑀘𑀼𑀢𑀺𑀅𑀦𑀦𑁆𑀢𑀭𑁄 𑀏𑀯, 𑀦 𑀅𑀜𑁆𑀜𑁄 𑀏𑀢𑁂𑀲𑀁 𑀨𑀮𑀓𑀸𑀮𑁄𑀢𑀺 𑀨𑀮𑀓𑀸𑀮𑀦𑀺𑀬𑀫𑁂𑀦𑁂𑀯 𑀦𑀺𑀬𑀢𑀢𑀸 𑀯𑀼𑀢𑁆𑀢𑀸 𑀳𑁄𑀢𑀺, 𑀦 𑀨𑀮𑀤𑀸𑀦𑀦𑀺𑀬𑀫𑁂𑀦𑀸𑀢𑀺 𑀦𑀺𑀬𑀢𑀨𑀮𑀓𑀸𑀮𑀸𑀦𑀁 𑀅𑀜𑁆𑀜𑁂𑀲𑀫𑁆𑀧𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸𑀦𑀫𑁆𑀧𑀺 𑀦𑀺𑀬𑀢𑀢𑀸 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀦𑁆𑀢𑀭𑀯𑀺𑀓𑀮𑀢𑀸𑀤𑀻𑀳𑀺 𑀅𑀯𑀺𑀧𑀘𑁆𑀘𑀫𑀸𑀦𑀸𑀦𑀫𑁆𑀧𑀺 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀯𑀺𑀧𑀸𑀓𑀥𑀫𑁆𑀫𑀢𑀸 𑀯𑀺𑀬 𑀩𑀮𑀯𑀢𑀸 𑀆𑀦𑀦𑁆𑀢𑀭𑀺𑀬𑁂𑀦 𑀯𑀺𑀧𑀸𑀓𑁂 𑀤𑀺𑀦𑁆𑀦𑁂 𑀅𑀯𑀺𑀧𑀘𑁆𑀘𑀫𑀸𑀦𑀸𑀦𑀫𑁆𑀧𑀺 𑀆𑀦𑀦𑁆𑀢𑀭𑀺𑀬𑀸𑀦𑀁 𑀨𑀮𑀤𑀸𑀦𑁂 𑀦𑀺𑀬𑀢𑀲𑀪𑀸𑀯𑀸 𑀆𑀦𑀦𑁆𑀢𑀭𑀺𑀬𑀲𑀪𑀸𑀯𑀸 𑀘 𑀧𑀯𑀢𑁆𑀢𑀻𑀢𑀺 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀨𑀮𑀤𑀸𑀦𑀦𑀺𑀬𑀫𑁂𑀦𑁂𑀯 𑀦𑀺𑀬𑀢𑀢𑀸 𑀆𑀦𑀦𑁆𑀢𑀭𑀺𑀬𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀅𑀯𑀲𑁆𑀲𑀜𑁆𑀘 𑀦𑀺𑀬𑀢𑀲𑀪𑀸𑀯𑀸 𑀆𑀦𑀦𑁆𑀢𑀭𑀺𑀬𑀲𑀪𑀸𑀯𑀸 𑀘 𑀢𑁂𑀲𑀁 𑀧𑀯𑀢𑁆𑀢𑀻𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀫𑁂𑀢𑀁 𑀅𑀜𑁆𑀜𑀲𑁆𑀲 𑀩𑀮𑀯𑀢𑁄 𑀆𑀦𑀦𑁆𑀢𑀭𑀺𑀬𑀲𑁆𑀲 𑀅𑀪𑀸𑀯𑁂 𑀘𑀼𑀢𑀺𑀅𑀦𑀦𑁆𑀢𑀭𑀁 𑀏𑀓𑀦𑁆𑀢𑁂𑀦 𑀨𑀮𑀤𑀸𑀦𑀢𑁄.

𑀦𑀦𑀼 𑀏𑀯𑀁 𑀅𑀜𑁆𑀜𑁂𑀲𑀫𑁆𑀧𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀸𑀦𑀁 𑀅𑀜𑁆𑀜𑀲𑁆𑀫𑀺𑀁 𑀯𑀺𑀧𑀸𑀓𑀤𑀸𑀬𑀓𑁂 𑀅𑀲𑀢𑀺 𑀘𑀼𑀢𑀺𑀅𑀦𑀦𑁆𑀢𑀭𑀫𑁂𑀯 𑀏𑀓𑀦𑁆𑀢𑁂𑀦 𑀨𑀮𑀤𑀸𑀦𑀢𑁄 𑀆𑀦𑀦𑁆𑀢𑀭𑀺𑀬𑀲𑀪𑀸𑀯𑀸 𑀦𑀺𑀬𑀢𑀲𑀪𑀸𑀯𑀸 𑀘 𑀧𑀯𑀢𑁆𑀢𑀺 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺 𑀅𑀲𑀫𑀸𑀦𑀚𑀸𑀢𑀺𑀓𑁂𑀦 𑀘𑁂𑀢𑁄𑀧𑀡𑀺𑀥𑀺𑀯𑀲𑁂𑀦 𑀉𑀧𑀖𑀸𑀢𑀓𑁂𑀦 𑀘 𑀦𑀺𑀯𑀢𑁆𑀢𑁂𑀢𑀩𑁆𑀩𑀯𑀺𑀧𑀸𑀓𑀢𑁆𑀢𑀸 𑀅𑀦𑀦𑁆𑀢𑀭𑁂𑀓𑀦𑁆𑀢𑀨𑀮𑀤𑀸𑀬𑀓𑀢𑁆𑀢𑀸𑀪𑀸𑀯𑀸, 𑀦 𑀧𑀦 𑀆𑀦𑀦𑁆𑀢𑀭𑀺𑀬𑀓𑀸𑀦𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀺 𑀯𑀺𑀬 𑀅𑀲𑀫𑀸𑀦𑀚𑀸𑀢𑀺𑀓𑀁 𑀨𑀮𑀦𑀺𑀯𑀢𑁆𑀢𑀓𑀁 𑀅𑀢𑁆𑀣𑀺 𑀲𑀩𑁆𑀩𑀸𑀦𑀦𑁆𑀢𑀭𑀺𑀬𑀓𑀸𑀦𑀁 𑀅𑀯𑀻𑀘𑀺𑀨𑀮𑀢𑁆𑀢𑀸, 𑀦 𑀘 𑀳𑁂𑀝𑁆𑀞𑀼𑀧𑀧𑀢𑁆𑀢𑀺𑀁 𑀇𑀘𑁆𑀙𑀢𑁄 𑀲𑀻𑀮𑀯𑀢𑁄 𑀘𑁂𑀢𑁄𑀧𑀡𑀺𑀥𑀺 𑀯𑀺𑀬 𑀉𑀧𑀭𑀽𑀧𑀧𑀢𑁆𑀢𑀺𑀚𑀦𑀓𑀓𑀫𑁆𑀫𑀨𑀮𑀁 𑀆𑀦𑀦𑁆𑀢𑀭𑀺𑀬𑀓𑀨𑀮𑀁 𑀦𑀺𑀯𑀢𑁆𑀢𑁂𑀢𑀼𑀁 𑀲𑀫𑀢𑁆𑀣𑁄 𑀘𑁂𑀢𑁄𑀧𑀡𑀺𑀥𑀺 𑀅𑀢𑁆𑀣𑀺 𑀅𑀦𑀺𑀘𑁆𑀙𑀦𑁆𑀢𑀲𑁆𑀲𑁂𑀯 𑀅𑀯𑀻𑀘𑀺𑀧𑀸𑀢𑀦𑀢𑁄, 𑀦 𑀘 𑀆𑀦𑀦𑁆𑀢𑀭𑀺𑀬𑀓𑁄𑀧𑀖𑀸𑀢𑀓𑀁 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀢𑁂𑀲𑀁𑀬𑁂𑀯 𑀅𑀦𑀦𑁆𑀢𑀭𑁂𑀓𑀦𑁆𑀢𑀯𑀺𑀧𑀸𑀓𑀚𑀦𑀓𑀲𑀪𑀸𑀯𑀸 𑀧𑀯𑀢𑁆𑀢𑀻𑀢𑀺.

𑀅𑀦𑁂𑀓𑀸𑀦𑀺 𑀘 𑀆𑀦𑀦𑁆𑀢𑀭𑀺𑀬𑀓𑀸𑀦𑀺 𑀓𑀢𑀸𑀦𑀺 𑀏𑀓𑀦𑁆𑀢𑁂 𑀯𑀺𑀧𑀸𑀓𑁂 𑀲𑀦𑁆𑀦𑀺𑀬𑀢𑀢𑁆𑀢𑀸 𑀉𑀧𑀭𑀢𑀸𑀯𑀺𑀧𑀘𑁆𑀘𑀦𑀲𑀪𑀸𑀯𑀸𑀲𑀗𑁆𑀓𑀢𑁆𑀢𑀸 𑀦𑀺𑀘𑁆𑀙𑀺𑀢𑀸𑀦𑀺 𑀲𑀪𑀸𑀯𑀢𑁄 𑀦𑀺𑀬𑀢𑀸𑀦𑁂𑀯. 𑀘𑀼𑀢𑀺𑀅𑀦𑀦𑁆𑀢𑀭𑀁 𑀧𑀦 𑀨𑀮𑀁 𑀅𑀦𑀦𑁆𑀢𑀭𑀁 𑀦𑀸𑀫 𑀢𑀲𑁆𑀫𑀺𑀁 𑀅𑀦𑀦𑁆𑀢𑀭𑁂 𑀦𑀺𑀬𑀼𑀢𑁆𑀢𑀸𑀦𑀺 𑀢𑀦𑁆𑀦𑀺𑀩𑁆𑀩𑀢𑁆𑀢𑀦𑁂𑀦 𑀅𑀦𑀦𑁆𑀢𑀭𑀓𑀭𑀡𑀲𑀻𑀮𑀸𑀦𑀺 𑀅𑀦𑀦𑁆𑀢𑀭𑀧𑁆𑀧𑀬𑁄𑀚𑀦𑀸𑀦𑀺 𑀘𑀸𑀢𑀺 𑀲𑀪𑀸𑀯𑀢𑁄 𑀆𑀦𑀦𑁆𑀢𑀭𑀺𑀬𑀓𑀸𑀦𑁂𑀯 𑀘 𑀳𑁄𑀦𑁆𑀢𑀺. 𑀢𑁂𑀲𑀼 𑀧𑀦 𑀲𑀫𑀸𑀦𑀲𑀪𑀸𑀯𑁂𑀲𑀼 𑀏𑀓𑁂𑀦 𑀯𑀺𑀧𑀸𑀓𑁂 𑀤𑀺𑀦𑁆𑀦𑁂 𑀇𑀢𑀭𑀸𑀦𑀺 𑀅𑀢𑁆𑀢𑀦𑀸 𑀓𑀢𑁆𑀢𑀩𑁆𑀩𑀲𑁆𑀲 𑀓𑀺𑀘𑁆𑀘𑀲𑁆𑀲 𑀢𑁂𑀦𑁂𑀯 𑀓𑀢𑀢𑁆𑀢𑀸 𑀦 𑀤𑀼𑀢𑀺𑀬𑀁 𑀢𑀢𑀺𑀬𑀫𑁆𑀧𑀺 𑀘 𑀧𑀝𑀺𑀲𑀦𑁆𑀥𑀺𑀁 𑀓𑀭𑁄𑀦𑁆𑀢𑀺, 𑀦 𑀲𑀫𑀢𑁆𑀣𑀢𑀸𑀯𑀺𑀖𑀸𑀢𑀢𑁆𑀢𑀸𑀢𑀺 𑀦𑀢𑁆𑀣𑀺 𑀢𑁂𑀲𑀁 𑀦𑀺𑀬𑀢𑀸𑀦𑀦𑁆𑀢𑀭𑀺𑀬𑀢𑀸𑀦𑀺𑀯𑀢𑁆𑀢𑀻𑀢𑀺. 𑀦 𑀳𑀺 𑀲𑀫𑀸𑀦𑀲𑀪𑀸𑀯𑀁 𑀲𑀫𑀸𑀦𑀲𑀪𑀸𑀯𑀲𑁆𑀲 𑀲𑀫𑀢𑁆𑀣𑀢𑀁 𑀯𑀺𑀳𑀦𑀢𑀻𑀢𑀺. 𑀏𑀓𑀲𑁆𑀲 𑀧𑀦 𑀅𑀜𑁆𑀜𑀸𑀦𑀺𑀧𑀺 𑀉𑀧𑀢𑁆𑀣𑀫𑁆𑀪𑀓𑀸𑀦𑀺 𑀳𑁄𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀻𑀢𑀺. 𑀲𑀫𑁆𑀫𑀸 𑀲𑀪𑀸𑀯𑀸𑀢𑀺 𑀲𑀘𑁆𑀘𑀲𑀪𑀸𑀯𑀸.

𑁧𑁬. 𑀧𑀭𑀺𑀧𑀼𑀡𑁆𑀡𑀫𑀕𑁆𑀕𑀓𑀺𑀘𑁆𑀘𑀢𑁆𑀢𑀸 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸𑀯 𑀇𑀥 ‘‘𑀫𑀕𑁆𑀕𑀸’’𑀢𑀺 𑀯𑀼𑀢𑁆𑀢𑀸. 𑀧𑀘𑁆𑀘𑀬𑀝𑁆𑀞𑁂𑀦𑀸𑀢𑀺 𑀫𑀕𑁆𑀕𑀧𑀘𑁆𑀘𑀬𑀝𑁆𑀞𑁂𑀦. 𑀦𑀺𑀓𑁆𑀔𑁂𑀧𑀓𑀡𑁆𑀟𑁂𑀧𑀺 𑀳𑀺 𑀬𑁂 𑀫𑀕𑁆𑀕𑀧𑀘𑁆𑀘𑀬𑀁 𑀮𑀪𑀦𑁆𑀢𑀺, 𑀦 𑀧𑀦 𑀲𑀬𑀁 𑀫𑀕𑁆𑀕𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀦𑁆𑀢𑀺, 𑀢𑁂 𑀫𑀕𑁆𑀕𑀳𑁂𑀢𑀼𑀓𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀭𑀺𑀬𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀫𑀕𑁆𑀕𑀗𑁆𑀕𑀸𑀦𑀺 𑀞𑀧𑁂𑀢𑁆𑀯𑀸’’𑀢𑀺𑀆𑀤𑀺 (𑀥. 𑀲. 𑁧𑁦𑁩𑁯) 𑀯𑀼𑀢𑁆𑀢𑀁. 𑀬𑁄 𑀧𑀦 𑀢𑀢𑁆𑀣𑁂𑀯 ‘‘𑀅𑀭𑀺𑀬𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄, 𑀇𑀫𑁂 𑀥𑀫𑁆𑀫𑀸 𑀫𑀕𑁆𑀕𑀳𑁂𑀢𑀽’’𑀢𑀺 𑀆𑀤𑀺𑀦𑀬𑁄 𑀯𑀼𑀢𑁆𑀢𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀅𑀭𑀺𑀬𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀲𑀫𑁆𑀫𑀸𑀤𑀺𑀝𑁆𑀞𑀺 𑀫𑀕𑁆𑀕𑁄 𑀘𑁂𑀯 𑀳𑁂𑀢𑀼 𑀘𑀸’’𑀢𑀺𑀆𑀤𑀺𑀦𑀸 𑀧𑀦 𑀯𑀼𑀢𑁆𑀢𑀦𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀦 𑀅𑀲𑀗𑁆𑀕𑀳𑀺𑀢𑀲𑀗𑁆𑀕𑀡𑁆𑀳𑀦𑀯𑀲𑁂𑀦 𑀧𑀝𑀺𑀧𑀸𑀝𑀺𑀬𑀸 𑀢𑀬𑁄 𑀦𑀬𑀸 𑀯𑀼𑀢𑁆𑀢𑀸, 𑀳𑁂𑀢𑀼𑀩𑀳𑀼𑀢𑀸𑀯𑀲𑁂𑀦 𑀢𑀢𑀺𑀬𑁄 𑀦𑀬𑁄 𑀇𑀥 𑀤𑀼𑀢𑀺𑀬𑁄 𑀯𑀼𑀢𑁆𑀢𑁄.

𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑀦𑀝𑁆𑀞𑁂𑀦𑀸𑀢𑀺 𑀲𑀳𑀚𑀸𑀢𑀸𑀥𑀺𑀧𑀢𑀺𑀧𑀺 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀚𑁂𑀝𑁆𑀞𑀓𑀪𑀸𑀯𑁂 𑀧𑀯𑀢𑁆𑀢𑀫𑀸𑀦𑁄 𑀲𑀳𑀚𑀸𑀢𑁂 𑀅𑀢𑁆𑀢𑀦𑁄 𑀯𑀲𑁂 𑀅𑀦𑀼𑀯𑀢𑁆𑀢𑀬𑀫𑀸𑀦𑁄 𑀢𑁂 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀺 𑀢𑀤𑀸𑀭𑀫𑁆𑀫𑀡𑁂 𑀥𑀫𑁆𑀫𑁂 𑀢𑀣𑁂𑀯 𑀅𑀢𑁆𑀢𑀸𑀦𑀁 𑀅𑀦𑀼𑀯𑀢𑁆𑀢𑀬𑀫𑀸𑀦𑁄 𑀢𑁂 𑀥𑀫𑁆𑀫𑁂 𑀅𑀪𑀺𑀪𑀯𑀺𑀢𑁆𑀯𑀸 𑀆𑀭𑀫𑁆𑀫𑀡𑀪𑀸𑀯𑁂𑀦 𑀧𑀯𑀢𑁆𑀢𑀢𑀺, 𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑁂𑀦, 𑀢𑀲𑁆𑀫𑀸 𑀅𑀥𑀺𑀧𑀢𑀺𑀤𑁆𑀯𑀬𑀫𑁆𑀧𑀺 𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀫𑀕𑁆𑀕𑁄 𑀅𑀥𑀺𑀧𑀢𑀺 𑀏𑀢𑁂𑀲’’𑀦𑁆𑀢𑀺 𑀅𑀬𑀜𑁆𑀘 𑀅𑀢𑁆𑀣𑁄 𑀦𑀺𑀓𑁆𑀔𑁂𑀧𑀓𑀡𑁆𑀟𑁂 𑀉𑀤𑀸𑀳𑀭𑀡𑀯𑀲𑁂𑀦 𑀆𑀕𑀢𑀁 𑀅𑀢𑁆𑀣𑀦𑀬𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑁄. 𑀬𑀲𑁆𑀫𑀸 𑀧𑀦 𑀧𑀝𑁆𑀞𑀸𑀦𑁂 (𑀧𑀝𑁆𑀞𑀸. 𑁨.𑁧𑁬.𑁧𑁧) ‘‘𑀫𑀕𑁆𑀕𑀸𑀥𑀺𑀧𑀢𑀺𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀫𑀕𑁆𑀕𑀸𑀥𑀺𑀧𑀢𑀺 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀸𑀥𑀺𑀧𑀢𑀺𑀧𑀘𑁆𑀘𑀬𑀸, 𑀫𑀕𑁆𑀕𑀸𑀥𑀺𑀧𑀢𑀻 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀫𑀕𑁆𑀕𑀸𑀥𑀺𑀧𑀢𑀺 𑀅𑀥𑀺𑀧𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀫𑀕𑁆𑀕𑁄 𑀅𑀥𑀺𑀧𑀢𑀺 𑀫𑀕𑁆𑀕𑀸𑀥𑀺𑀧𑀢𑀻𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀧𑀸𑀴𑀺𑀬𑀁 𑀲𑀭𑀽𑀧𑁂𑀓𑀲𑁂𑀲𑀯𑀲𑁂𑀦 𑀲𑀫𑀸𑀦𑀲𑀤𑁆𑀤𑀢𑁆𑀣𑀯𑀲𑁂𑀦 𑀯𑀸 𑀲𑀗𑁆𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁧𑁭. 𑀅𑀦𑀼𑀧𑁆𑀧𑀦𑁆𑀦𑀸𑀢𑀺 𑀏𑀢𑁂𑀦 𑀲𑀩𑁆𑀩𑁄 𑀉𑀧𑁆𑀧𑀦𑁆𑀦𑀪𑀸𑀯𑁄 𑀧𑀝𑀺𑀲𑀺𑀤𑁆𑀥𑁄, 𑀦 𑀉𑀧𑁆𑀧𑀦𑁆𑀦𑀥𑀫𑁆𑀫𑀪𑀸𑀯𑁄 𑀏𑀯𑀸𑀢𑀺 𑀢𑁂𑀦 𑀉𑀧𑁆𑀧𑀦𑁆𑀦𑀸 𑀯𑀺𑀕𑀢𑀸 𑀅𑀢𑀻𑀢𑀸𑀧𑀺 𑀦 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀬𑀤𑀺 𑀳𑀺 𑀲𑀗𑁆𑀕𑀳𑀺𑀢𑀸 𑀲𑀺𑀬𑀼𑀁, ‘‘𑀅𑀦𑀼𑀧𑁆𑀧𑀦𑁆𑀦𑁄 𑀥𑀫𑁆𑀫𑁄 𑀉𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀏𑀯𑀫𑀸𑀤𑀺 𑀯𑀼𑀘𑁆𑀘𑁂𑀬𑁆𑀬, 𑀦 𑀢𑀼 𑀯𑀼𑀢𑁆𑀢𑀦𑁆𑀢𑀺. 𑀅𑀦𑀸𑀕𑀢𑀸𑀦𑀺 𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑀸𑀦𑀺 𑀅𑀢𑀻𑀢𑁂 𑀅𑀦𑀸𑀕𑀢𑁂 𑀯𑀸 𑀓𑀫𑁆𑀫𑁂 𑀧𑀼𑀭𑀺𑀫𑀦𑀺𑀧𑁆𑀨𑀦𑁆𑀦𑁂 𑀏𑀯 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀦𑀸𑀦𑀺𑀧𑁆𑀨𑀦𑁆𑀦𑁂𑀢𑀺 𑀧𑀭𑀺𑀦𑀺𑀝𑁆𑀞𑀺𑀢𑀓𑀸𑀭𑀡𑁂𑀓𑀤𑁂𑀲𑀸𑀦𑁂𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀸𑀦𑀺 ‘‘𑀅𑀯𑀲𑁆𑀲𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀉𑀧𑁆𑀧𑀸𑀤𑀺𑀦𑁄 𑀥𑀫𑁆𑀫𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑁧𑁮. 𑀅𑀢𑁆𑀢𑀦𑁄 𑀲𑀪𑀸𑀯𑀦𑁆𑀢𑀺 𑀓𑀓𑁆𑀔𑀴𑀨𑀼𑀲𑀦𑀸𑀤𑀺𑀲𑀪𑀸𑀯𑀁.

𑁨𑁦. 𑀏𑀯𑀁 𑀧𑀯𑀢𑁆𑀢𑀫𑀸𑀦𑀸𑀢𑀺 𑀏𑀯𑀁 𑀘𑀓𑁆𑀔𑀸𑀤𑀺𑀪𑀸𑀯𑁂𑀦 𑀨𑀼𑀲𑀦𑀸𑀤𑀺𑀪𑀸𑀯𑁂𑀦 𑀘 𑀏𑀓𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑀸𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸. 𑀅𑀢𑁆𑀢𑀸𑀦𑀁 𑀅𑀥𑀺 𑀅𑀚𑁆𑀛𑀢𑁆𑀢𑀸𑀢𑀺 𑀅𑀥𑀺-𑀲𑀤𑁆𑀤𑁄 𑀲𑀫𑀸𑀲𑀯𑀺𑀲𑀬𑁂 𑀅𑀥𑀺𑀓𑀸𑀭𑀢𑁆𑀣𑀁 𑀧𑀯𑀢𑁆𑀢𑀺𑀅𑀢𑁆𑀣𑀜𑁆𑀘 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀢𑀸𑀦𑀁 𑀅𑀥𑀺𑀓𑀺𑀘𑁆𑀘 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀸 𑀅𑀚𑁆𑀛𑀢𑁆𑀢𑀸. 𑀢𑁂𑀦𑀸𑀢𑀺 𑀬𑀲𑁆𑀲 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀘 𑀲𑀼𑀜𑁆𑀜𑀢𑀁 𑀆𑀦𑁂𑀜𑁆𑀚𑀜𑁆𑀘 𑀫𑀦𑀲𑀺𑀓𑀭𑁄𑀢𑁄 𑀅𑀚𑁆𑀛𑀢𑁆𑀢𑀲𑀼𑀜𑁆𑀜𑀢𑀸𑀤𑀻𑀲𑀼 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺 𑀦 𑀧𑀲𑀻𑀤𑀢𑀺 𑀦 𑀲𑀦𑁆𑀢𑀺𑀝𑁆𑀞𑀢𑀺 𑀦𑀸𑀥𑀺𑀫𑀼𑀘𑁆𑀘𑀢𑀺, 𑀬𑁄 𑀘 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄, 𑀢𑁂𑀦 𑀪𑀺𑀓𑁆𑀔𑀼𑀦𑀸. 𑀢𑀲𑁆𑀫𑀺𑀁𑀬𑁂𑀯 𑀧𑀼𑀭𑀺𑀫𑀲𑁆𑀫𑀺𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑁂𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀺𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑁂. 𑀅𑀚𑁆𑀛𑀢𑁆𑀢𑀫𑁂𑀯𑀸𑀢𑀺 𑀛𑀸𑀦𑀕𑁄𑀘𑀭𑁂 𑀓𑀲𑀺𑀡𑀸𑀤𑀺𑀫𑁆𑀳𑀺. 𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀢𑀩𑁆𑀩𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀺𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀢𑀩𑁆𑀩𑀁. 𑀅𑀚𑁆𑀛𑀢𑁆𑀢𑀭𑀢𑁄𑀢𑀺 𑀕𑁄𑀘𑀭𑀚𑁆𑀛𑀢𑁆𑀢𑁂 𑀦𑀺𑀩𑁆𑀩𑀸𑀦𑁂 𑀭𑀢𑁄, 𑀲𑀫𑀸𑀥𑀺𑀕𑁄𑀘𑀭𑁂 𑀓𑀫𑁆𑀫𑀝𑁆𑀞𑀸𑀦𑁂 𑀯𑀸 𑀭𑀢𑁄. ‘‘𑀲𑀫𑀸𑀳𑀺𑀢𑁄 𑀏𑀓𑁄 𑀲𑀦𑁆𑀢𑀼𑀲𑀺𑀢𑁄 𑀢𑀫𑀸𑀳𑀼 𑀪𑀺𑀓𑁆𑀔𑀼’’𑀦𑁆𑀢𑀺 (𑀥. 𑀧. 𑁩𑁬𑁨) 𑀕𑀸𑀣𑀸𑀲𑁂𑀲𑁄.

𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀦𑁆𑀢𑀺 𑀏𑀢𑁆𑀣 𑀛𑀸𑀦𑀁 𑀲𑀓𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 ‘‘𑀅𑀚𑁆𑀛𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑀢𑁆𑀣𑁄 𑀅𑀚𑁆𑀛𑀢𑁆𑀢-𑀲𑀤𑁆𑀤𑁄 𑀳𑁄𑀢𑀺. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀲𑀓𑀲𑀦𑁆𑀢𑀢𑀺𑀦𑀺𑀬𑀓𑀁. 𑀅𑀚𑁆𑀛𑀢𑁆𑀢𑁂 𑀪𑀯𑀸 𑀅𑀚𑁆𑀛𑀢𑁆𑀢𑀺𑀓𑀸𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑁂𑀲𑀼𑀧𑀺 𑀅𑀩𑁆𑀪𑀦𑁆𑀢𑀭𑀸 𑀘𑀓𑁆𑀔𑀸𑀤𑀬𑁄 𑀯𑀼𑀘𑁆𑀘𑀦𑁆𑀢𑀺. 𑀏𑀢𑁆𑀣 𑀧𑀦 𑀅𑀚𑁆𑀛𑀢𑁆𑀢𑀺𑀓-𑀲𑀤𑁆𑀤𑁄 𑀘𑀓𑁆𑀔𑀸𑀤𑀻𑀲𑀼 𑀧𑀯𑀢𑁆𑀢𑀫𑀸𑀦𑁄 𑀤𑀲𑁆𑀲𑀺𑀢𑁄, 𑀦 𑀅𑀚𑁆𑀛𑀢𑁆𑀢𑀲𑀤𑁆𑀤𑁄, 𑀅𑀢𑁆𑀣𑀺 𑀘 𑀅𑀚𑁆𑀛𑀢𑁆𑀢𑀅𑀚𑁆𑀛𑀢𑁆𑀢𑀺𑀓𑀲𑀤𑁆𑀤𑀸𑀦𑀁 𑀩𑀳𑀺𑀤𑁆𑀥𑀸𑀩𑀸𑀳𑀺𑀭-𑀲𑀤𑁆𑀤𑀸𑀦𑀁 𑀯𑀺𑀬 𑀯𑀺𑀲𑁂𑀲𑁄. 𑀅𑀚𑁆𑀛𑀢𑁆𑀢𑀺𑀓𑀲𑀤𑁆𑀤𑁄 𑀳𑀺 𑀲𑀧𑀭𑀲𑀦𑁆𑀢𑀸𑀦𑀺𑀓𑁂𑀲𑀼 𑀲𑀩𑁆𑀩𑁂𑀲𑀼 𑀘𑀓𑁆𑀔𑀸𑀤𑀻𑀲𑀼 𑀭𑀽𑀧𑀸𑀤𑀻𑀲𑀼 𑀩𑀸𑀳𑀺𑀭-𑀲𑀤𑁆𑀤𑁄 𑀯𑀺𑀬 𑀧𑀯𑀢𑁆𑀢𑀢𑀺, 𑀅𑀚𑁆𑀛𑀢𑁆𑀢-𑀲𑀤𑁆𑀤𑁄 𑀧𑀦 𑀲𑀓𑀲𑀦𑁆𑀢𑀸𑀦𑀺𑀓𑁂𑀲𑁆𑀯𑁂𑀯 𑀘𑀓𑁆𑀔𑀼𑀭𑀽𑀧𑀸𑀤𑀻𑀲𑀼 𑀢𑀢𑁄 𑀅𑀜𑁆𑀜𑁂𑀲𑁆𑀯𑁂𑀯 𑀩𑀳𑀺𑀤𑁆𑀥𑀸-𑀲𑀤𑁆𑀤𑁄 𑀯𑀺𑀬 𑀧𑀯𑀢𑁆𑀢𑀢𑀻𑀢𑀺 𑀢𑀲𑁆𑀫𑀸 𑀲𑀤𑁆𑀤𑀢𑁄 𑀅𑀢𑁆𑀣𑀢𑁄 𑀘 𑀅𑀲𑀫𑀸𑀦𑀢𑁆𑀢𑀸 𑀦 𑀇𑀤𑀫𑁂𑀢𑁆𑀣 𑀉𑀤𑀸𑀳𑀭𑀡𑀁 𑀬𑀼𑀢𑁆𑀢𑀦𑁆𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀤𑀝𑁆𑀞𑀩𑁆𑀩𑁄 𑁋 𑀅𑀚𑁆𑀛𑀢𑁆𑀢𑁂 𑀪𑀯𑀸 𑀅𑀚𑁆𑀛𑀢𑁆𑀢𑀺𑀓𑀸𑀢𑀺 𑀅𑀬𑀜𑁆𑀳𑀺 𑀯𑀘𑀦𑀢𑁆𑀣𑁄. 𑀬𑀜𑁆𑀘 𑀅𑀚𑁆𑀛𑀢𑁆𑀢𑁂 𑀪𑀯𑀁, 𑀢𑁂𑀦 𑀅𑀚𑁆𑀛𑀢𑁆𑀢𑁂𑀦𑁂𑀯 𑀪𑀯𑀺𑀢𑀩𑁆𑀩𑀁, 𑀢𑁂𑀦 𑀢𑀁𑀯𑀸𑀘𑀓𑀲𑁆𑀲 𑀅𑀚𑁆𑀛𑀢𑁆𑀢-𑀲𑀤𑁆𑀤𑀲𑁆𑀲 𑀅𑀚𑁆𑀛𑀢𑁆𑀢𑀺𑀓-𑀲𑀤𑁆𑀤𑀲𑁆𑀲 𑀘 𑀲𑀫𑀸𑀦𑀢𑁆𑀣𑀢𑀸. 𑀉𑀪𑀺𑀦𑁆𑀦𑀫𑁆𑀧𑀺 𑀲𑀤𑁆𑀤𑀸𑀦𑀁 𑀲𑀫𑀸𑀦𑀢𑁆𑀣𑀪𑀸𑀯𑀢𑁄 𑀅𑀚𑁆𑀛𑀢𑁆𑀢𑀚𑁆𑀛𑀢𑁆𑀢𑁂 𑀧𑀯𑀢𑁆𑀢𑀫𑀸𑀦𑁂 𑀅𑀚𑁆𑀛𑀢𑁆𑀢𑀺𑀓-𑀲𑀤𑁆𑀤𑁂 𑀅𑀚𑁆𑀛𑀢𑁆𑀢-𑀲𑀤𑁆𑀤𑁄 𑀢𑀢𑁆𑀣 𑀧𑀯𑀢𑁆𑀢𑁄𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺.

𑀅𑀬𑀁 𑀔𑁄 𑀧𑀦𑀸𑀦𑀦𑁆𑀤, 𑀯𑀺𑀳𑀸𑀭𑁄𑀢𑀺 𑀯𑀺𑀳𑀸𑀭𑀲𑀼𑀜𑁆𑀜𑀢𑀸𑀲𑀼𑀢𑁆𑀢𑁂 (𑀫. 𑀦𑀺. 𑁩.𑁧𑁮𑁭) 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸𑀬 𑀭𑀽𑀧𑀸𑀤𑀺𑀭𑀢𑀺𑀬𑀸 𑀘 𑀆𑀤𑀻𑀦𑀯𑀁 𑀯𑀢𑁆𑀯𑀸 𑀢𑀧𑁆𑀧𑀝𑀺𑀧𑀓𑁆𑀔𑀯𑀺𑀳𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀦𑁆𑀢𑀺 𑀯𑀺𑀲𑀬𑀪𑀽𑀢𑀁 𑀇𑀲𑁆𑀲𑀭𑀺𑀬𑀝𑁆𑀞𑀸𑀦𑀪𑀽𑀢𑀁 𑀲𑀼𑀜𑁆𑀜𑀢𑀁, 𑀲𑀼𑀜𑁆𑀜𑀢𑀸𑀨𑀮𑀲𑀫𑀸𑀧𑀢𑁆𑀢𑀺𑀦𑁆𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑀺𑀲𑁆𑀲𑀭𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀸𑀧𑀺 𑀬𑀁 𑀫𑀼𑀳𑀼𑀢𑁆𑀢𑀁 𑀢𑀼𑀡𑁆𑀳𑀻 𑀪𑀯𑀺𑀢𑀩𑁆𑀩𑀁 𑀳𑁄𑀢𑀺, 𑀢𑀁 𑀫𑀼𑀳𑀼𑀢𑁆𑀢𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀧𑀕𑁂𑀯 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂, 𑀢𑀲𑁆𑀫𑀸 𑀲𑀩𑁆𑀩𑀢𑁆𑀣𑀸𑀧𑀺 𑀇𑀲𑁆𑀲𑀭𑀺𑀬𑀸𑀦𑀁 𑀩𑀳𑀼𑀮𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀁 𑀇𑀲𑁆𑀲𑀭𑀺𑀬𑀲𑁆𑀲 𑀧𑀯𑀢𑁆𑀢𑀦𑀢𑁄 𑀨𑀮𑀲𑀫𑀸𑀧𑀢𑁆𑀢𑀺 ‘‘𑀇𑀲𑁆𑀲𑀭𑀺𑀬𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀸. 𑀅𑀭𑀳𑀢𑁆𑀢𑀨𑀮𑀸𑀥𑀺𑀕𑀫𑁂𑀦 𑀯𑀸 𑀢𑀣𑀸𑀕𑀢𑀸𑀦𑀁 𑀇𑀲𑁆𑀲𑀭𑀺𑀬𑀁 𑀦𑀺𑀩𑁆𑀩𑀢𑁆𑀢𑀁 𑀢𑀁𑀚𑀦𑀓𑁂𑀦𑁂𑀯 𑀫𑀕𑁆𑀕𑁂𑀦𑀸𑀢𑀺 𑀢𑀁 𑀢𑁂𑀲𑀁 𑀇𑀲𑁆𑀲𑀭𑀺𑀬𑀝𑁆𑀞𑀸𑀦𑀁. 𑀯𑀺𑀲𑀬𑁄 𑀘 𑀅𑀦𑀜𑁆𑀜𑀢𑁆𑀣𑀪𑀸𑀯𑁄𑀯 𑀬𑀣𑀸 ‘‘𑀆𑀓𑀸𑀲𑁂 𑀲𑀓𑀼𑀡𑀸 𑀉𑀤𑀓𑁂 𑀫𑀘𑁆𑀙𑀸’’𑀢𑀺, 𑀩𑀼𑀤𑁆𑀥𑀸 𑀘 𑀅𑀜𑁆𑀜𑀢𑁆𑀣 𑀤𑀺𑀲𑁆𑀲𑀫𑀸𑀦𑀸𑀧𑀺 𑀯𑀺𑀯𑁂𑀓𑀧𑀩𑁆𑀪𑀸𑀭𑀢𑀸𑀬 𑀨𑀮𑀲𑀫𑀸𑀧𑀢𑁆𑀢𑀺𑀦𑀺𑀦𑁆𑀦𑀸𑀯, 𑀢𑁂𑀦 𑀢𑀲𑁆𑀲𑀸 𑀢𑀲𑁆𑀲𑀸 𑀓𑀺𑀭𑀺𑀬𑀸𑀬 𑀅𑀦𑀦𑁆𑀢𑀭𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀁𑀬𑁂𑀯 𑀪𑀯𑀦𑁆𑀢𑀻𑀢𑀺 𑀲𑀸 𑀢𑁂𑀲𑀁 𑀯𑀺𑀲𑀬𑁄, 𑀢𑀩𑁆𑀩𑀺𑀲𑀬𑀢𑀸 𑀘 𑀲𑀘𑁆𑀘𑀓𑀲𑀼𑀢𑁆𑀢𑁂𑀦 (𑀫. 𑀦𑀺. 𑁧.𑁩𑁬𑁪 𑀆𑀤𑀬𑁄) 𑀤𑀻𑀧𑁂𑀢𑀩𑁆𑀩𑀸.

𑁨𑁨. 𑀬𑁂𑀲𑀁 𑀤𑀝𑁆𑀞𑀩𑁆𑀩𑀪𑀸𑀯𑁄 𑀅𑀢𑁆𑀣𑀺, 𑀢𑁂 𑀲𑀦𑀺𑀤𑀲𑁆𑀲𑀦𑀸. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀕𑁄𑀘𑀭𑀪𑀸𑀯𑁄𑀯 𑀤𑀝𑁆𑀞𑀩𑁆𑀩𑀪𑀸𑀯𑁄, 𑀢𑀲𑁆𑀲 𑀭𑀽𑀧𑀸𑀬𑀢𑀦𑀸 𑀅𑀦𑀜𑁆𑀜𑀢𑁆𑀢𑁂𑀧𑀺 𑀅𑀜𑁆𑀜𑁂𑀳𑀺 𑀥𑀫𑁆𑀫𑁂𑀳𑀺 𑀭𑀽𑀧𑀸𑀬𑀢𑀦𑀁 𑀯𑀺𑀲𑁂𑀲𑁂𑀢𑀼𑀁 𑀅𑀜𑁆𑀜𑀁 𑀯𑀺𑀬 𑀓𑀢𑁆𑀯𑀸 ‘‘𑀲𑀳 𑀦𑀺𑀤𑀲𑁆𑀲𑀦𑁂𑀦𑀸𑀢𑀺 𑀲𑀦𑀺𑀤𑀲𑁆𑀲𑀦𑀸’’𑀢𑀺 𑀯𑀼𑀢𑁆𑀢𑀁. 𑀥𑀫𑁆𑀫𑀲𑀪𑀸𑀯𑀲𑀸𑀫𑀜𑁆𑀜𑁂𑀦 𑀳𑀺 𑀏𑀓𑀻𑀪𑀽𑀢𑁂𑀲𑀼 𑀥𑀫𑁆𑀫𑁂𑀲𑀼 𑀬𑁄 𑀦𑀸𑀦𑀢𑁆𑀢𑀓𑀭𑁄 𑀲𑀪𑀸𑀯𑁄, 𑀲𑁄 𑀅𑀜𑁆𑀜𑁄 𑀯𑀺𑀬 𑀓𑀢𑁆𑀯𑀸 𑀉𑀧𑀘𑀭𑀺𑀢𑀼𑀁 𑀬𑀼𑀢𑁆𑀢𑁄. 𑀏𑀯𑀜𑁆𑀳𑀺 𑀅𑀢𑁆𑀣𑀯𑀺𑀲𑁂𑀲𑀸𑀯𑀩𑁄𑀥𑁄 𑀳𑁄𑀢𑀻𑀢𑀺. 𑀲𑀬𑀜𑁆𑀘 𑀦𑀺𑀲𑁆𑀲𑀬𑀯𑀲𑁂𑀦 𑀘 𑀲𑀫𑁆𑀧𑀢𑁆𑀢𑀸𑀦𑀁 𑀅𑀲𑀫𑁆𑀧𑀢𑁆𑀢𑀸𑀦𑀜𑁆𑀘 𑀧𑀝𑀺𑀫𑀼𑀔𑀪𑀸𑀯𑁄 𑀅𑀜𑁆𑀜𑀫𑀜𑁆𑀜𑀧𑀢𑀦𑀁 𑀧𑀝𑀺𑀳𑀦𑀦𑀪𑀸𑀯𑁄, 𑀬𑁂𑀦 𑀩𑁆𑀬𑀸𑀧𑀸𑀭𑀸𑀤𑀺𑀯𑀺𑀓𑀸𑀭𑀧𑀘𑁆𑀘𑀬𑀦𑁆𑀢𑀭𑀲𑀳𑀺𑀢𑁂𑀲𑀼 𑀘𑀓𑁆𑀔𑀸𑀤𑀻𑀦𑀁 𑀯𑀺𑀲𑀬𑁂𑀲𑀼 𑀯𑀺𑀓𑀸𑀭𑀼𑀧𑁆𑀧𑀢𑁆𑀢𑀺.

𑀢𑀺𑀓𑀫𑀸𑀢𑀺𑀓𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀓𑀫𑀸𑀢𑀺𑀓𑀸𑀧𑀤𑀯𑀡𑁆𑀡𑀦𑀸

𑁧-𑁬. 𑀫𑀽𑀮𑀝𑁆𑀞𑁂𑀦𑀸𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑁂𑀦 𑀫𑀽𑀮𑀪𑀸𑀯𑁂𑀦, 𑀦 𑀧𑀘𑁆𑀘𑀬𑀫𑀢𑁆𑀢𑀝𑁆𑀞𑁂𑀦 𑀳𑁂𑀢𑀼𑀥𑀫𑁆𑀫𑀸 𑀳𑁂𑀢𑀽 𑀥𑀫𑁆𑀫𑀸𑀢𑀺 𑀲𑀫𑀸𑀲𑀸𑀲𑀫𑀸𑀲𑀦𑀺𑀤𑁆𑀤𑁂𑀲𑀪𑀸𑀯𑁄 𑀤𑁆𑀯𑀺𑀦𑁆𑀦𑀁 𑀧𑀸𑀞𑀸𑀦𑀁 𑀯𑀺𑀲𑁂𑀲𑁄. 𑀢𑀣𑁂𑀯𑀸𑀢𑀺 𑀲𑀫𑁆𑀧𑀬𑁄𑀕𑀢𑁄𑀯. 𑀲𑀳𑁂𑀢𑀼𑀓𑀸𑀦𑀁 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑀢𑁄 ‘‘𑀲𑀫𑁆𑀧𑀬𑁄𑀕𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀦 𑀲𑀳𑀲𑀤𑁆𑀤𑀲𑁆𑀲 𑀲𑀫𑁆𑀧𑀬𑁄𑀕𑀢𑁆𑀣𑀢𑁆𑀢𑀸. 𑀲𑀳-𑀲𑀤𑁆𑀤𑁄 𑀧𑀦 𑀏𑀓𑀧𑀼𑀜𑁆𑀚𑁂 𑀉𑀧𑁆𑀧𑀸𑀤𑀢𑁄 𑀬𑀸𑀯 𑀪𑀗𑁆𑀕𑀸 𑀲𑀳𑁂𑀢𑀼𑀓𑀸𑀦𑀁 𑀳𑁂𑀢𑀽𑀳𑀺 𑀲𑀫𑀸𑀦𑀤𑁂𑀲𑀕𑀳𑀡𑀸𑀦𑀁 𑀳𑁂𑀢𑀼𑀆𑀤𑀺𑀲𑀩𑁆𑀪𑀸𑀯𑀁 𑀤𑀻𑀧𑁂𑀢𑀺, 𑀲𑀫𑁆𑀧𑀬𑀼𑀢𑁆𑀢-𑀲𑀤𑁆𑀤𑁄 𑀏𑀓𑀼𑀧𑁆𑀧𑀸𑀤𑀸𑀤𑀺𑀯𑀲𑁂𑀦 𑀲𑀳 𑀳𑁂𑀢𑀽𑀳𑀺 𑀏𑀓𑀻𑀪𑀸𑀯𑀼𑀧𑀕𑀫𑀦𑀁, 𑀢𑀢𑁄 𑀏𑀯 𑀘 𑀤𑁆𑀯𑀺𑀦𑁆𑀦𑀁 𑀤𑀼𑀓𑀸𑀦𑀁 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀥𑀫𑁆𑀫𑀦𑀸𑀦𑀢𑁆𑀢𑀸𑀪𑀸𑀯𑁂𑀧𑀺 𑀳𑀺 𑀧𑀤𑀢𑁆𑀣𑀦𑀸𑀦𑀢𑁆𑀢𑁂𑀦 𑀤𑀼𑀓𑀦𑁆𑀢𑀭𑀁 𑀯𑀼𑀘𑁆𑀘𑀢𑀺. 𑀦 𑀳𑀺 𑀳𑁂𑀢𑀼𑀤𑀼𑀓𑀲𑀗𑁆𑀕𑀳𑀺𑀢𑁂𑀳𑀺 𑀥𑀫𑁆𑀫𑁂𑀳𑀺 𑀅𑀜𑁆𑀜𑁂 𑀲𑀳𑁂𑀢𑀼𑀓𑀤𑀼𑀓𑀸𑀤𑀻𑀳𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂 𑀏𑀯 𑀧𑀦 𑀲𑀳𑁂𑀢𑀼𑀓𑀸𑀳𑁂𑀢𑀼𑀓𑀸𑀤𑀺𑀪𑀸𑀯𑀢𑁄 𑀲𑀳𑁂𑀢𑀼𑀓𑀤𑀼𑀓𑀸𑀤𑀻𑀳𑀺 𑀯𑀼𑀢𑁆𑀢𑀸. 𑀏𑀯𑀁 𑀲𑀳𑁂𑀢𑀼𑀓𑀤𑀼𑀓𑀲𑀗𑁆𑀕𑀳𑀺𑀢𑀸 𑀏𑀯 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀪𑀸𑀯𑀢𑁄 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑁂𑀦 𑀯𑀼𑀢𑁆𑀢𑀸. 𑀦 𑀳𑀺 𑀥𑀫𑁆𑀫𑀸𑀦𑀁 𑀅𑀯𑀼𑀢𑁆𑀢𑀢𑀸𑀧𑁂𑀓𑁆𑀔𑀁 𑀤𑀼𑀓𑀦𑁆𑀢𑀭𑀯𑀘𑀦𑀦𑁆𑀢𑀺 𑀦𑀢𑁆𑀣𑀺 𑀧𑀼𑀦𑀭𑀼𑀢𑁆𑀢𑀺𑀤𑁄𑀲𑁄. 𑀤𑁂𑀲𑁂𑀢𑀩𑁆𑀩𑀧𑁆𑀧𑀓𑀸𑀭𑀚𑀸𑀦𑀦𑀜𑁆𑀳𑀺 𑀤𑁂𑀲𑀦𑀸𑀯𑀺𑀮𑀸𑀲𑁄 𑀢𑀣𑀸 𑀤𑁂𑀲𑀦𑀸𑀜𑀸𑀡𑀜𑁆𑀘𑀸𑀢𑀺. 𑀢𑁂𑀦 𑀥𑀫𑁆𑀫𑀸𑀦𑀁 𑀢𑀧𑁆𑀧𑀓𑀸𑀭𑀢𑀸 𑀯𑀼𑀢𑁆𑀢𑀸 𑀳𑁄𑀢𑀺. 𑀲𑀓𑀮𑁂𑀓𑀤𑁂𑀲𑀯𑀲𑁂𑀦 𑀧𑀞𑀫𑀤𑀼𑀓𑀁 𑀤𑀼𑀢𑀺𑀬𑀢𑀢𑀺𑀬𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀘𑀢𑀼𑀢𑁆𑀣𑀸𑀤𑀬𑁄 𑀢𑀬𑁄 𑀤𑀼𑀓𑀸 𑀯𑀼𑀢𑁆𑀢𑀸. 𑀲𑀓𑀮𑀜𑁆𑀳𑀺 𑀧𑀞𑀫𑀤𑀼𑀓𑀁 𑀤𑀼𑀢𑀺𑀬𑀤𑀼𑀓𑁂𑀓𑀤𑁂𑀲𑁂𑀦 𑀲𑀳𑁂𑀢𑀼𑀓𑀧𑀤𑁂𑀦 𑀢𑀢𑀺𑀬𑀤𑀼𑀓𑁂𑀓𑀤𑁂𑀲𑁂𑀦 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀧𑀤𑁂𑀦 𑀘 𑀬𑁄𑀚𑁂𑀢𑁆𑀯𑀸 𑀬𑀣𑀸𑀓𑁆𑀓𑀫𑀁 𑀘𑀢𑀼𑀢𑁆𑀣𑀧𑀜𑁆𑀘𑀫𑀤𑀼𑀓𑀸 𑀯𑀼𑀢𑁆𑀢𑀸, 𑀢𑀣𑀸 𑀧𑀞𑀫𑀤𑀼𑀓𑁂𑀓𑀤𑁂𑀲𑀁 𑀦𑀳𑁂𑀢𑀼𑀧𑀤𑀁 𑀲𑀓𑀮𑁂𑀦 𑀤𑀼𑀢𑀺𑀬𑀤𑀼𑀓𑁂𑀦 𑀬𑁄𑀚𑁂𑀢𑁆𑀯𑀸 𑀙𑀝𑁆𑀞𑀤𑀼𑀓𑁄 𑀯𑀼𑀢𑁆𑀢𑁄. 𑀇𑀤𑀫𑁆𑀧𑀺 𑀲𑀫𑁆𑀪𑀯𑀢𑀻𑀢𑀺 𑀏𑀢𑁂𑀦 𑀅𑀯𑀼𑀢𑁆𑀢𑀫𑁆𑀧𑀺 𑀲𑀫𑁆𑀪𑀯𑀯𑀲𑁂𑀦 𑀤𑀻𑀧𑀺𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀫𑁆𑀪𑀯𑁄 𑀳𑀺 𑀕𑀳𑀡𑀲𑁆𑀲 𑀓𑀸𑀭𑀡𑀦𑁆𑀢𑀺. 𑀬𑀣𑀸 𑀳𑁂𑀢𑀼𑀲𑀳𑁂𑀢𑀼𑀓𑀸𑀢𑀺 𑀇𑀤𑀁 𑀲𑀫𑁆𑀪𑀯𑀢𑀻𑀢𑀺 𑀓𑀢𑁆𑀯𑀸 𑀕𑀳𑀺𑀢𑀁, 𑀏𑀯𑀁 𑀳𑁂𑀢𑀼𑀅𑀳𑁂𑀢𑀼𑀓𑀸𑀢𑀺 𑀇𑀤𑀫𑁆𑀧𑀺 𑀲𑀫𑁆𑀪𑀯𑀢𑀻𑀢𑀺 𑀓𑀢𑁆𑀯𑀸 𑀕𑀳𑁂𑀢𑀩𑁆𑀩𑀫𑁂𑀯𑀸𑀢𑀺 𑀏𑀯𑀁 𑀅𑀜𑁆𑀜𑀢𑁆𑀣𑀸𑀧𑀺 𑀬𑁄𑀚𑁂𑀢𑀩𑁆𑀩𑀁.

𑀏𑀯𑀁 𑀧𑀞𑀫𑀤𑀼𑀓𑀁 𑀤𑀼𑀢𑀺𑀬𑀢𑀢𑀺𑀬𑀤𑀼𑀓𑁂𑀲𑀼 𑀤𑀼𑀢𑀺𑀬𑀧𑀤𑁂𑀳𑀺 𑀬𑁄𑀚𑁂𑀢𑁆𑀯𑀸 ‘‘𑀳𑁂𑀢𑀽 𑀘𑁂𑀯 𑀥𑀫𑁆𑀫𑀸 𑀅𑀳𑁂𑀢𑀼𑀓𑀸 𑀘, 𑀅𑀳𑁂𑀢𑀼𑀓𑀸 𑀘𑁂𑀯 𑀥𑀫𑁆𑀫𑀸 𑀦 𑀘 𑀳𑁂𑀢𑀽, 𑀳𑁂𑀢𑀽 𑀘𑁂𑀯 𑀥𑀫𑁆𑀫𑀸 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀸 𑀘, 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑁂𑀯 𑀥𑀫𑁆𑀫𑀸 𑀦 𑀘 𑀳𑁂𑀢𑀽’’𑀢𑀺 𑀬𑁂 𑀤𑁆𑀯𑁂 𑀤𑀼𑀓𑀸 𑀓𑀸𑀢𑀩𑁆𑀩𑀸, 𑀢𑁂𑀲𑀁 𑀲𑀫𑁆𑀪𑀯𑀯𑀲𑁂𑀦𑁂𑀯 𑀲𑀗𑁆𑀕𑀳𑀁 𑀤𑀲𑁆𑀲𑁂𑀢𑁆𑀯𑀸 𑀔𑁄 𑀧𑀦-𑀧𑀤𑁂𑀦 𑀅𑀧𑀭𑁂𑀲𑀫𑁆𑀧𑀺 𑀤𑀼𑀓𑀸𑀦𑀁 𑀲𑀗𑁆𑀕𑀳𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀭 𑀬𑀤𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀢𑀺 𑀧𑀸𑀴𑀺𑀬𑀁. 𑀅𑀬𑀁 𑀅𑀢𑀺𑀭𑁂𑀓𑀢𑁆𑀣𑁄𑀢𑀺 𑀇𑀤𑀸𑀦𑀺 𑀬𑀁 𑀯𑀓𑁆𑀔𑀢𑀺, 𑀢𑀫𑀢𑁆𑀣𑀫𑀸𑀳. 𑀢𑀢𑁆𑀣 𑀧𑀦 𑀅𑀜𑁆𑀜𑁂𑀧𑀺 𑀅𑀜𑁆𑀜𑀣𑀸𑀧𑀻𑀢𑀺 𑀏𑀢𑁂𑀲𑀁 𑀯𑀺𑀲𑀼𑀁 𑀧𑀯𑀢𑁆𑀢𑀺𑀬𑀸 𑀤𑁆𑀯𑁂 𑀤𑀼𑀓𑀸 𑀤𑀲𑁆𑀲𑀺𑀢𑀸, 𑀲𑀳 𑀧𑀯𑀢𑁆𑀢𑀺𑀬𑀸 𑀧𑀦 𑀅𑀬𑀫𑁆𑀧𑀺 𑀤𑀼𑀓𑁄 𑀯𑁂𑀤𑀺𑀢𑀩𑁆𑀩𑁄 ‘‘𑀳𑁂𑀢𑀽 𑀘𑁂𑀯 𑀥𑀫𑁆𑀫𑀸 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀸𑀧𑀻’’𑀢𑀺, 𑀏𑀢𑁂𑀲𑀼 𑀧𑀦 𑀧𑀜𑁆𑀘𑀲𑀼 𑀤𑀼𑀓𑁂𑀲𑀼 𑀤𑀼𑀢𑀺𑀬𑀤𑀼𑀓𑁂𑀦 𑀢𑀢𑀺𑀬𑀤𑀼𑀓𑁄 𑀯𑀺𑀬, 𑀘𑀢𑀼𑀢𑁆𑀣𑀤𑀼𑀓𑁂𑀦 𑀧𑀜𑁆𑀘𑀫𑀤𑀼𑀓𑁄 𑀯𑀺𑀬 𑀘 𑀙𑀝𑁆𑀞𑀤𑀼𑀓𑁂𑀦 𑀦𑀺𑀦𑁆𑀦𑀸𑀦𑀢𑁆𑀣𑀢𑁆𑀢𑀸 ‘‘𑀦 𑀳𑁂𑀢𑀼 𑀔𑁄 𑀧𑀦 𑀥𑀫𑁆𑀫𑀸 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀸𑀧𑀻’’𑀢𑀺 𑀅𑀬𑀁 𑀤𑀼𑀓𑁄 𑀦 𑀯𑀼𑀢𑁆𑀢𑁄. 𑀤𑀲𑁆𑀲𑀺𑀢𑀦𑀺𑀦𑁆𑀦𑀸𑀦𑀢𑁆𑀣𑀦𑀬𑁄 𑀳𑀺 𑀲𑁄 𑀧𑀼𑀭𑀺𑀫𑀤𑀼𑀓𑁂𑀳𑀻𑀢𑀺. 𑀇𑀢𑀭𑁂𑀲𑀼 𑀘𑀢𑀽𑀲𑀼 𑀳𑁂𑀢𑀽 𑀘𑁂𑀯 𑀅𑀳𑁂𑀢𑀼𑀓𑀤𑀼𑀓𑁂𑀦 𑀲𑀫𑀸𑀦𑀢𑁆𑀣𑀢𑁆𑀢𑀸 𑀳𑁂𑀢𑀽 𑀘𑁂𑀯 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀤𑀼𑀓𑁄, 𑀳𑁂𑀢𑀼𑀲𑀳𑁂𑀢𑀼𑀓𑀤𑀼𑀓𑁂𑀦 𑀲𑀫𑀸𑀦𑀢𑁆𑀣𑀢𑁆𑀢𑀸 𑀳𑁂𑀢𑀼𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑁄 𑀘 𑀦𑀳𑁂𑀢𑀼𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑁄 𑀯𑀺𑀬 𑀦 𑀯𑀢𑁆𑀢𑀩𑁆𑀩𑁄. 𑀢𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀧𑀘𑁆𑀙𑀺𑀫𑀤𑀼𑀓𑁂 ‘‘𑀳𑁂𑀢𑀽 𑀔𑁄 𑀧𑀦 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸’’𑀢𑀺 𑀧𑀤𑀁 𑀘𑀢𑀼𑀢𑁆𑀣𑀤𑀼𑀓𑁂 𑀧𑀞𑀫𑀧𑀤𑁂𑀦 𑀦𑀺𑀦𑁆𑀦𑀸𑀦𑀸𑀓𑀭𑀡𑀢𑁆𑀢𑀸 𑀦 𑀯𑀢𑁆𑀢𑀩𑁆𑀩𑀁, ‘‘𑀳𑁂𑀢𑀽 𑀔𑁄 𑀧𑀦 𑀥𑀫𑁆𑀫𑀸 𑀅𑀳𑁂𑀢𑀼𑀓𑀸’’𑀢𑀺 𑀧𑀤𑀁 ‘‘𑀳𑁂𑀢𑀽 𑀘𑁂𑀯 𑀥𑀫𑁆𑀫𑀸 𑀅𑀳𑁂𑀢𑀼𑀓𑀸’’𑀢𑀺 𑀏𑀢𑁂𑀦 𑀦𑀺𑀦𑁆𑀦𑀸𑀦𑀢𑁆𑀢𑀸 𑀦 𑀯𑀢𑁆𑀢𑀩𑁆𑀩𑀁. 𑀅𑀯𑀲𑀺𑀝𑁆𑀞𑁂 𑀧𑀦 𑀏𑀓𑀲𑁆𑀫𑀺𑀁 𑀤𑀼𑀓𑁂 ‘‘𑀅𑀳𑁂𑀢𑀼𑀓𑀸 𑀘𑁂𑀯 𑀥𑀫𑁆𑀫𑀸 𑀦 𑀘 𑀳𑁂𑀢𑀽’’𑀢𑀺 𑀧𑀤𑀁 𑀙𑀝𑁆𑀞𑀤𑀼𑀓𑁂 𑀤𑀼𑀢𑀺𑀬𑀧𑀤𑁂𑀦 𑀏𑀓𑀢𑁆𑀣𑀢𑁆𑀢𑀸 𑀦 𑀯𑀢𑁆𑀢𑀩𑁆𑀩𑀁. 𑀇𑀤𑀸𑀦𑀺 ‘‘𑀳𑁂𑀢𑀽 𑀘𑁂𑀯 𑀥𑀫𑁆𑀫𑀸 𑀅𑀳𑁂𑀢𑀼𑀓𑀸 𑀘𑀸’’𑀢𑀺 𑀇𑀤𑀫𑁂𑀯𑁂𑀓𑀁 𑀧𑀤𑀁 𑀅𑀯𑀲𑀺𑀝𑁆𑀞𑀁, 𑀦 𑀘 𑀏𑀓𑁂𑀦 𑀧𑀤𑁂𑀦 𑀤𑀼𑀓𑁄 𑀳𑁄𑀢𑀻𑀢𑀺 𑀢𑀜𑁆𑀘 𑀦 𑀯𑀼𑀢𑁆𑀢𑀦𑁆𑀢𑀺. 𑀘𑀢𑀼𑀢𑁆𑀣𑀤𑀼𑀓𑁂 𑀤𑀼𑀢𑀺𑀬𑀧𑀤𑁂𑀦 𑀧𑀦 𑀲𑀫𑀸𑀦𑀢𑁆𑀣𑀲𑁆𑀲 𑀙𑀝𑁆𑀞𑀤𑀼𑀓𑁂 𑀧𑀞𑀫𑀧𑀤𑀲𑁆𑀲 𑀯𑀘𑀦𑀁 𑀤𑀼𑀓𑀧𑀽𑀭𑀡𑀢𑁆𑀣𑀁, 𑀏𑀢𑁂𑀦 𑀯𑀸 𑀕𑀢𑀺𑀤𑀲𑁆𑀲𑀦𑁂𑀦 𑀲𑀩𑁆𑀩𑀲𑁆𑀲 𑀲𑀫𑁆𑀪𑀯𑀦𑁆𑀢𑀲𑁆𑀲 𑀲𑀗𑁆𑀕𑀳𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑀺 𑀲𑀩𑁆𑀩𑁄 𑀲𑀫𑁆𑀪𑀯𑀤𑀼𑀓𑁄 𑀧𑀞𑀫𑀤𑀼𑀓𑁂 𑀤𑀼𑀢𑀺𑀬𑀢𑀢𑀺𑀬𑀤𑀼𑀓𑀧𑀓𑁆𑀔𑁂𑀧𑁂𑀦 𑀤𑀲𑁆𑀲𑀺𑀢𑁄, 𑀢𑁂𑀲𑀼 𑀘 𑀧𑀞𑀫𑀤𑀼𑀓𑀧𑀓𑁆𑀔𑁂𑀧𑁂𑀦𑀸𑀢𑀺.

𑁭-𑁧𑁩. 𑀲𑀫𑀸𑀦𑀓𑀸𑀮𑁂𑀦 𑀅𑀲𑀫𑀸𑀦𑀓𑀸𑀮𑁂𑀦 𑀓𑀸𑀮𑀯𑀺𑀫𑀼𑀢𑁆𑀢𑁂𑀦 𑀘 𑀧𑀘𑁆𑀘𑀬𑁂𑀦 𑀦𑀺𑀧𑁆𑀨𑀦𑁆𑀦𑀸𑀦𑀁 𑀧𑀘𑁆𑀘𑀬𑀸𑀬𑀢𑁆𑀢𑀸𑀦𑀁 𑀧𑀘𑁆𑀘𑀬𑀪𑀸𑀯𑀫𑀢𑁆𑀢𑁂𑀦 𑀢𑁂𑀲𑀁 𑀧𑀘𑁆𑀘𑀬𑀸𑀦𑀁 𑀅𑀢𑁆𑀣𑀺𑀢𑀁 𑀤𑀻𑀧𑁂𑀢𑀼𑀁 𑀲𑀧𑁆𑀧𑀘𑁆𑀘𑀬𑀯𑀘𑀦𑀁, 𑀦 𑀲𑀳𑁂𑀢𑀼𑀓𑀯𑀘𑀦𑀁 𑀯𑀺𑀬 𑀲𑀫𑀸𑀦𑀓𑀸𑀮𑀸𑀦𑀫𑁂𑀯, 𑀦𑀸𑀧𑀺 𑀲𑀦𑀺𑀤𑀲𑁆𑀲𑀦𑀁 𑀯𑀺𑀬 𑀢𑀁𑀲𑀪𑀸𑀯𑀲𑁆𑀲 𑀅𑀦𑀢𑁆𑀣𑀦𑁆𑀢𑀭𑀪𑀽𑀢𑀲𑁆𑀲. 𑀲𑀗𑁆𑀔𑀢-𑀲𑀤𑁆𑀤𑁄 𑀧𑀦 𑀲𑀫𑁂𑀢𑁂𑀳𑀺 𑀦𑀺𑀧𑁆𑀨𑀸𑀤𑀺𑀢𑀪𑀸𑀯𑀁 𑀤𑀻𑀧𑁂𑀢𑀻𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄 𑀤𑀼𑀓𑀦𑁆𑀢𑀭𑀯𑀘𑀦𑁂 𑀓𑀸𑀭𑀡𑀁. 𑀏𑀢𑁆𑀣 𑀘 𑀅𑀧𑁆𑀧𑀘𑁆𑀘𑀬𑀸 𑀅𑀲𑀗𑁆𑀔𑀢𑀸𑀢𑀺 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀅𑀯𑀺𑀦𑀺𑀘𑁆𑀙𑀺𑀢𑀢𑁆𑀣𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀯𑀲𑁂𑀦 𑀫𑀸𑀢𑀺𑀓𑀸𑀞𑀧𑀦𑀢𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀉𑀤𑁆𑀤𑁂𑀲𑁂𑀦 𑀳𑀺 𑀓𑀼𑀲𑀮𑀸𑀤𑀺𑀲𑀪𑀸𑀯𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀺𑀢𑀸𑀫𑀢𑁆𑀢𑀁 𑀯𑀼𑀘𑁆𑀘𑀢𑀺, 𑀦 𑀧𑀭𑀺𑀘𑁆𑀙𑁂𑀤𑁄𑀢𑀺 𑀅𑀧𑀭𑀺𑀘𑁆𑀙𑁂𑀤𑁂𑀦 𑀩𑀳𑀼𑀯𑀘𑀦𑁂𑀦 𑀉𑀤𑁆𑀤𑁂𑀲𑁄 𑀯𑀼𑀢𑁆𑀢𑁄𑀢𑀺. 𑀭𑀽𑀧𑀦𑁆𑀢𑀺 𑀭𑀽𑀧𑀸𑀬𑀢𑀦𑀁 𑀧𑀣𑀯𑀺𑀬𑀸𑀤𑀺 𑀯𑀸. 𑀧𑀼𑀭𑀺𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀭𑀽𑀧𑀸𑀬𑀢𑀦𑀲𑁆𑀲 𑀅𑀲𑀗𑁆𑀕𑀳𑀺𑀢𑀢𑀸 𑀆𑀧𑀚𑁆𑀚𑀢𑀻𑀢𑀺 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀯𑀸 𑀭𑀽𑀧𑀦𑁆𑀢𑀺 𑀅𑀬𑀁 𑀅𑀢𑁆𑀣𑀦𑀬𑁄 𑀯𑀼𑀢𑁆𑀢𑁄. 𑀢𑀢𑁆𑀣 𑀭𑀽𑀧𑀦𑁆𑀢𑀺 𑀭𑀼𑀧𑁆𑀧𑀦𑀲𑀪𑀸𑀯𑁄. 𑀦 𑀮𑀼𑀚𑁆𑀚𑀢𑀺 𑀦 𑀧𑀮𑀼𑀚𑁆𑀚𑀢𑀻𑀢𑀺 𑀬𑁄 𑀕𑀳𑀺𑀢𑁄 𑀢𑀣𑀸 𑀦 𑀳𑁄𑀢𑀺, 𑀲𑁄 𑀮𑁄𑀓𑁄𑀢𑀺 𑀢𑀁𑀕𑀳𑀡𑀭𑀳𑀺𑀢𑀸𑀦𑀁 𑀮𑁄𑀓𑀼𑀢𑁆𑀢𑀭𑀸𑀦𑀁 𑀦𑀢𑁆𑀣𑀺 𑀮𑁄𑀓𑀢𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀯𑀸 𑀮𑁄𑀓𑁄, 𑀢𑀢𑁆𑀣 𑀢𑁂𑀦𑁂𑀯 𑀮𑁄𑀓𑀲𑀪𑀸𑀯𑁂𑀦 𑀯𑀺𑀤𑀺𑀢𑀸𑀢𑀺 𑀮𑁄𑀓𑀺𑀬𑀸.

𑀏𑀯𑀁 𑀲𑀦𑁆𑀢𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀯𑀺𑀚𑀸𑀦𑀺𑀢𑀩𑁆𑀩𑀲𑁆𑀲 𑀭𑀽𑀧𑀸𑀬𑀢𑀦𑀲𑁆𑀲 𑀢𑁂𑀦𑁂𑀯 𑀦𑀯𑀺𑀚𑀸𑀦𑀺𑀢𑀩𑁆𑀩𑀲𑁆𑀲 𑀲𑀤𑁆𑀤𑀸𑀬𑀢𑀦𑀸𑀤𑀺𑀓𑀲𑁆𑀲 𑀘 𑀦𑀸𑀦𑀢𑁆𑀢𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀧𑀤𑀸𑀦𑀁 𑀅𑀢𑁆𑀣𑀦𑀸𑀦𑀢𑁆𑀢𑀢𑁄 𑀤𑀼𑀓𑁄 𑀳𑁄𑀢𑀺. 𑀏𑀯𑀁 𑀧𑀦 𑀤𑀼𑀓𑁂 𑀯𑀼𑀘𑁆𑀘𑀫𑀸𑀦𑁂 𑀤𑀼𑀓𑀩𑀳𑀼𑀢𑀸 𑀆𑀧𑀚𑁆𑀚𑀢𑀺, 𑀬𑀢𑁆𑀢𑀓𑀸𑀦𑀺 𑀯𑀺𑀜𑁆𑀜𑀸𑀡𑀸𑀦𑀺, 𑀢𑀢𑁆𑀢𑀓𑀸 𑀤𑀼𑀓𑀸 𑀯𑀼𑀢𑁆𑀢𑀸 𑀲𑀫𑀢𑁆𑀢𑀸 𑀞𑀧𑁂𑀢𑁆𑀯𑀸 𑀲𑀩𑁆𑀩𑀥𑀫𑁆𑀫𑀸𑀭𑀫𑁆𑀫𑀡𑀸𑀦𑀺 𑀯𑀺𑀜𑁆𑀜𑀸𑀡𑀸𑀦𑀺. 𑀢𑁂𑀲𑀼 𑀘 𑀤𑀼𑀓𑀲𑁆𑀲 𑀧𑀘𑁆𑀙𑁂𑀤𑁄 𑀆𑀧𑀚𑁆𑀚𑀢𑀺, 𑀢𑀣𑀸 𑀘 𑀲𑀢𑀺 ‘‘𑀓𑁂𑀦𑀘𑀻’’𑀢𑀺 𑀧𑀤𑀁 𑀲𑀩𑁆𑀩𑀯𑀺𑀜𑁆𑀜𑀸𑀡𑀲𑀗𑁆𑀕𑀸𑀳𑀓𑀁 𑀦 𑀲𑀺𑀬𑀸, 𑀦𑀺𑀤𑁆𑀤𑁂𑀲𑁂𑀦 𑀘 𑀯𑀺𑀭𑀼𑀤𑁆𑀥𑀁 𑀇𑀤𑀁 𑀯𑀘𑀦𑀁. 𑀬𑁄 𑀘 𑀢𑀢𑁆𑀣 ‘‘𑀬𑁂 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀅𑀬𑀁 𑀤𑀼𑀓𑁄 𑀦 𑀳𑁄𑀢𑀻’’𑀢𑀺 𑀧𑀝𑀺𑀲𑁂𑀥𑁄 𑀓𑀢𑁄, 𑀲𑁄 𑀘 𑀓𑀣𑀁 𑀬𑀼𑀚𑁆𑀚𑁂𑀬𑁆𑀬. 𑀦 𑀳𑀺 𑀲𑀫𑀢𑁆𑀣𑀸 𑀅𑀝𑁆𑀞𑀓𑀣𑀸 𑀧𑀸𑀴𑀺𑀁 𑀧𑀝𑀺𑀲𑁂𑀥𑁂𑀢𑀼𑀦𑁆𑀢𑀺, 𑀦 𑀘 𑀓𑁂𑀦𑀘𑀺-𑀲𑀤𑁆𑀤𑀲𑁆𑀲 𑀢𑁂𑀦𑁂𑀯𑀸𑀢𑀺 𑀅𑀬𑀁 𑀧𑀤𑀢𑁆𑀣𑁄 𑀲𑀫𑁆𑀪𑀯𑀢𑀺, ‘‘𑀓𑁂𑀦𑀘𑀻’’𑀢𑀺 𑀏𑀢𑀲𑁆𑀲 𑀆𑀤𑀺𑀧𑀤𑀲𑁆𑀲 𑀅𑀦𑀺𑀬𑀫𑀺𑀢𑀁 𑀬𑀁 𑀓𑀺𑀜𑁆𑀘𑀺 𑀏𑀓𑀁 𑀧𑀤𑀢𑁆𑀣𑁄, 𑀢𑀁 𑀯𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀲𑁆𑀲 ‘‘𑀓𑁂𑀦𑀘𑀻’’𑀢𑀺 𑀤𑀼𑀢𑀺𑀬𑀧𑀤𑀲𑁆𑀲 𑀬𑀁 𑀓𑀺𑀜𑁆𑀘𑀺 𑀅𑀧𑀭𑀁 𑀅𑀦𑀺𑀬𑀫𑀺𑀢𑀁 𑀧𑀤𑀢𑁆𑀣𑁄𑀢𑀺 𑀮𑁄𑀓𑀲𑀺𑀤𑁆𑀥𑀫𑁂𑀢𑀁, 𑀢𑀣𑁂𑀯 𑀘 𑀦𑀺𑀤𑁆𑀤𑁂𑀲𑁄 𑀧𑀯𑀢𑁆𑀢𑁄, 𑀦 𑀘𑁂𑀢𑁆𑀣 𑀯𑀺𑀜𑁆𑀜𑀸𑀢𑀩𑁆𑀩𑀥𑀫𑁆𑀫𑀪𑁂𑀤𑁂𑀦 𑀤𑀼𑀓𑀪𑁂𑀤𑁄 𑀲𑀫𑀢𑁆𑀢𑁄 𑀆𑀧𑀚𑁆𑀚𑀢𑀺 𑀬𑀢𑁆𑀢𑀓𑀸 𑀯𑀺𑀜𑁆𑀜𑀸𑀢𑀩𑁆𑀩𑀸, 𑀢𑀢𑁆𑀢𑀓𑀸 𑀤𑀼𑀓𑀸𑀢𑀺, 𑀢𑀲𑁆𑀫𑀸 𑀦𑀢𑁆𑀣𑀺 𑀤𑀼𑀓𑀩𑀳𑀼𑀢𑀸. 𑀦 𑀳𑀺 𑀏𑀓𑀁𑀬𑁂𑀯 𑀯𑀺𑀜𑁆𑀜𑀸𑀢𑀩𑁆𑀩𑀁 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀁 𑀓𑁂𑀦𑀘𑀺 𑀦 𑀯𑀺𑀜𑁆𑀜𑁂𑀬𑁆𑀬𑀜𑁆𑀘, 𑀓𑀺𑀦𑁆𑀢𑀼 𑀅𑀧𑀭𑀫𑁆𑀧𑀺 𑀅𑀧𑀭𑀫𑁆𑀧𑀻𑀢𑀺 𑀲𑀩𑁆𑀩𑀯𑀺𑀜𑁆𑀜𑀸𑀢𑀩𑁆𑀩𑀲𑀗𑁆𑀕𑀳𑁂 𑀤𑀼𑀓𑁄 𑀲𑀫𑀢𑁆𑀢𑁄 𑀳𑁄𑀢𑀺, 𑀏𑀯𑀜𑁆𑀘 𑀲𑀢𑀺 ‘‘𑀓𑁂𑀦𑀘𑀻’’𑀢𑀺 𑀧𑀤𑀁 𑀅𑀦𑀺𑀬𑀫𑁂𑀦 𑀲𑀩𑁆𑀩𑀯𑀺𑀜𑁆𑀜𑀸𑀡𑀲𑀗𑁆𑀕𑀸𑀳𑀓𑀦𑁆𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺, 𑀯𑀺𑀜𑁆𑀜𑀸𑀡𑀦𑀸𑀦𑀢𑁆𑀢𑁂𑀦 𑀘 𑀯𑀺𑀜𑁆𑀜𑀸𑀢𑀩𑁆𑀩𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀬𑀁 𑀤𑀼𑀓𑁄 𑀯𑀼𑀢𑁆𑀢𑁄, 𑀦 𑀯𑀺𑀜𑁆𑀜𑀸𑀢𑀩𑁆𑀩𑀸𑀦𑀁 𑀅𑀢𑁆𑀣𑀦𑁆𑀢𑀭𑀢𑀸𑀬𑀸𑀢𑀺. 𑀏𑀢𑀲𑁆𑀲 𑀧𑀦 𑀤𑀼𑀓𑀲𑁆𑀲 𑀦𑀺𑀓𑁆𑀔𑁂𑀧𑀭𑀸𑀲𑀺𑀦𑀺𑀤𑁆𑀤𑁂𑀲𑁄 𑀤𑀼𑀓𑀲𑀗𑁆𑀕𑀳𑀺𑀢𑀥𑀫𑁆𑀫𑁂𑀓𑀤𑁂𑀲𑁂𑀲𑀼 𑀤𑀼𑀓𑀧𑀤𑀤𑁆𑀯𑀬𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑁄. 𑀅𑀢𑁆𑀣𑀼𑀤𑁆𑀥𑀸𑀭𑀦𑀺𑀤𑁆𑀤𑁂𑀲𑁄 𑀦𑀺𑀭𑀯𑀲𑁂𑀲𑀤𑀼𑀓𑀲𑀗𑁆𑀕𑀳𑀺𑀢𑀥𑀫𑁆𑀫𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁧𑁪-𑁧𑁯. 𑀘𑀓𑁆𑀔𑀼𑀢𑁄𑀧𑀺…𑀧𑁂… 𑀫𑀦𑀢𑁄𑀧𑀻𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀯𑀻𑀣𑀻𑀲𑀼 𑀢𑀤𑀦𑀼𑀕𑀢𑀫𑀦𑁄𑀯𑀺𑀜𑁆𑀜𑀸𑀡𑀯𑀻𑀣𑀻𑀲𑀼 𑀘 𑀓𑀺𑀜𑁆𑀘𑀸𑀧𑀺 𑀓𑀼𑀲𑀮𑀸𑀤𑀻𑀦𑀫𑁆𑀧𑀺 𑀧𑀯𑀢𑁆𑀢𑀺 𑀅𑀢𑁆𑀣𑀺, 𑀓𑀸𑀫𑀸𑀲𑀯𑀸𑀤𑀬𑁄 𑀏𑀯 𑀧𑀦 𑀯𑀡𑀢𑁄 𑀬𑀽𑀲𑀁 𑀯𑀺𑀬 𑀧𑀕𑁆𑀖𑀭𑀡𑀓𑀅𑀲𑀼𑀘𑀺𑀪𑀸𑀯𑁂𑀦 𑀲𑀦𑁆𑀤𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀏𑀯 ‘‘𑀆𑀲𑀯𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀣 𑀳𑀺 𑀧𑀕𑁆𑀖𑀭𑀡𑀓𑀅𑀲𑀼𑀘𑀺𑀫𑁆𑀳𑀺 𑀦𑀺𑀭𑀼𑀴𑁆𑀳𑁄 𑀆𑀲𑀯𑀲𑀤𑁆𑀤𑁄𑀢𑀺. 𑀥𑀫𑁆𑀫𑀢𑁄 𑀬𑀸𑀯 𑀕𑁄𑀢𑁆𑀭𑀪𑀼𑀦𑁆𑀢𑀺 𑀢𑀢𑁄 𑀧𑀭𑀁 𑀫𑀕𑁆𑀕𑀨𑀮𑁂𑀲𑀼 𑀅𑀧𑁆𑀧𑀯𑀢𑁆𑀢𑀺𑀢𑁄 𑀯𑀼𑀢𑁆𑀢𑀁. 𑀏𑀢𑁂 𑀳𑀺 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀥𑀫𑁆𑀫𑁂 𑀕𑀘𑁆𑀙𑀦𑁆𑀢𑀸 𑀢𑀢𑁄 𑀧𑀭𑀁 𑀦 𑀕𑀘𑁆𑀙𑀦𑁆𑀢𑀻𑀢𑀺. 𑀦𑀦𑀼 𑀢𑀢𑁄 𑀧𑀭𑀁 𑀪𑀯𑀗𑁆𑀕𑀸𑀤𑀻𑀦𑀺𑀧𑀺 𑀕𑀘𑁆𑀙𑀦𑁆𑀢𑀻𑀢𑀺 𑀘𑁂? 𑀦, 𑀢𑁂𑀲𑀫𑁆𑀧𑀺 𑀧𑀼𑀩𑁆𑀩𑁂 𑀆𑀮𑀫𑁆𑀩𑀺𑀢𑁂𑀲𑀼 𑀮𑁄𑀓𑀺𑀬𑀥𑀫𑁆𑀫𑁂𑀲𑀼 𑀲𑀸𑀲𑀯𑀪𑀸𑀯𑁂𑀦 𑀅𑀦𑁆𑀢𑁄𑀕𑀥𑀢𑁆𑀢𑀸 𑀢𑀢𑁄 𑀧𑀭𑀢𑀸𑀪𑀸𑀯𑀢𑁄. 𑀏𑀢𑁆𑀣 𑀘 𑀕𑁄𑀢𑁆𑀭𑀪𑀼𑀯𑀘𑀦𑁂𑀦 𑀕𑁄𑀢𑁆𑀭𑀪𑀼𑀯𑁄𑀤𑀸𑀦𑀨𑀮𑀲𑀫𑀸𑀧𑀢𑁆𑀢𑀺𑀧𑀼𑀭𑁂𑀘𑀸𑀭𑀺𑀓𑀧𑀭𑀺𑀓𑀫𑁆𑀫𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺, 𑀧𑀞𑀫𑀫𑀕𑁆𑀕𑀧𑀼𑀭𑁂𑀘𑀸𑀭𑀺𑀓𑀫𑁂𑀯 𑀯𑀸 𑀕𑁄𑀢𑁆𑀭𑀪𑀼 𑀅𑀯𑀥𑀺𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀕𑀳𑀺𑀢𑀁, 𑀢𑀢𑁄 𑀧𑀭𑀁 𑀫𑀕𑁆𑀕𑀨𑀮𑀲𑀫𑀸𑀦𑀢𑀸𑀬 𑀧𑀦 𑀅𑀜𑁆𑀜𑁂𑀲𑀼 𑀫𑀕𑁆𑀕𑁂𑀲𑀼 𑀫𑀕𑁆𑀕𑀯𑀻𑀣𑀺𑀬𑀁 𑀨𑀮𑀲𑀫𑀸𑀧𑀢𑁆𑀢𑀺𑀯𑀻𑀣𑀺𑀬𑀁 𑀦𑀺𑀭𑁄𑀥𑀸𑀦𑀦𑁆𑀢𑀭𑀜𑁆𑀘 𑀧𑀯𑀢𑁆𑀢𑀫𑀸𑀦𑁂𑀲𑀼 𑀨𑀮𑁂𑀲𑀼 𑀦𑀺𑀩𑁆𑀩𑀸𑀦𑁂 𑀘 𑀧𑀯𑀢𑁆𑀢𑀺 𑀦𑀺𑀯𑀸𑀭𑀺𑀢𑀸 𑀆𑀲𑀯𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀯𑀦𑁆𑀢𑀻𑀢𑀺 𑀕𑀘𑁆𑀙𑀦𑁆𑀢𑀺. 𑀤𑀼𑀯𑀺𑀥𑁄 𑀳𑀺 𑀅𑀯𑀥𑀺 𑀅𑀪𑀺𑀯𑀺𑀥𑀺𑀯𑀺𑀲𑀬𑁄 𑀅𑀦𑀪𑀺𑀯𑀺𑀥𑀺𑀯𑀺𑀲𑀬𑁄 𑀘. 𑀅𑀪𑀺𑀯𑀺𑀥𑀺𑀯𑀺𑀲𑀬𑀁 𑀓𑀺𑀭𑀺𑀬𑀸 𑀩𑁆𑀬𑀸𑀧𑁂𑀢𑁆𑀯𑀸 𑀧𑀯𑀢𑁆𑀢𑀢𑀺 ‘‘𑀆𑀪𑀯𑀕𑁆𑀕𑀸 𑀪𑀕𑀯𑀢𑁄 𑀬𑀲𑁄 𑀕𑀢𑁄’’𑀢𑀺, 𑀇𑀢𑀭𑀁 𑀩𑀳𑀺 𑀓𑀢𑁆𑀯𑀸 ‘‘𑀆𑀧𑀸𑀝𑀮𑀺𑀧𑀼𑀢𑁆𑀢𑀸 𑀯𑀼𑀝𑁆𑀞𑁄 𑀤𑁂𑀯𑁄’’𑀢𑀺. 𑀅𑀬𑀜𑁆𑀘 𑀆-𑀓𑀸𑀭𑁄 𑀅𑀪𑀺𑀯𑀺𑀥𑀺𑀅𑀢𑁆𑀣𑁄 𑀇𑀥 𑀕𑀳𑀺𑀢𑁄𑀢𑀺 ‘‘𑀅𑀦𑁆𑀢𑁄𑀓𑀭𑀡𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁.

𑀘𑀺𑀭𑀧𑀸𑀭𑀺𑀯𑀸𑀲𑀺𑀬𑀝𑁆𑀞𑁄 𑀘𑀺𑀭𑀧𑀭𑀺𑀯𑀼𑀢𑁆𑀣𑀢𑀸 𑀧𑀼𑀭𑀸𑀡𑀪𑀸𑀯𑁄. 𑀆𑀤𑀺-𑀲𑀤𑁆𑀤𑁂𑀦 ‘‘𑀧𑀼𑀭𑀺𑀫𑀸, 𑀪𑀺𑀓𑁆𑀔𑀯𑁂, 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀪𑀯𑀢𑀡𑁆𑀳𑀸𑀬𑀸’’𑀢𑀺 (𑀅. 𑀦𑀺. 𑁧𑁦.𑁬𑁨) 𑀇𑀤𑀁 𑀲𑀼𑀢𑁆𑀢𑀁 𑀲𑀗𑁆𑀕𑀳𑀺𑀢𑀁. 𑀅𑀯𑀺𑀚𑁆𑀚𑀸𑀲𑀯𑀪𑀯𑀸𑀲𑀯𑀸𑀦𑀜𑁆𑀘 𑀘𑀺𑀭𑀧𑀭𑀺𑀯𑀼𑀢𑁆𑀣𑀢𑀸𑀬 𑀤𑀲𑁆𑀲𑀺𑀢𑀸𑀬 𑀢𑀩𑁆𑀪𑀸𑀯𑀪𑀸𑀯𑀻𑀦𑀁 𑀓𑀸𑀫𑀸𑀲𑀯𑀤𑀺𑀝𑁆𑀞𑀸𑀲𑀯𑀸𑀦𑀜𑁆𑀘 𑀘𑀺𑀭𑀧𑀭𑀺𑀯𑀼𑀢𑁆𑀣𑀢𑀸 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀅𑀜𑁆𑀜𑁂𑀲𑀼𑀧𑀺 𑀬𑀣𑀸𑀯𑀼𑀢𑁆𑀢𑁂 𑀥𑀫𑁆𑀫𑁂 𑀑𑀓𑀸𑀲𑀜𑁆𑀘 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁂𑀲𑀼 𑀫𑀸𑀦𑀸𑀤𑀻𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀅𑀢𑁆𑀢𑀢𑁆𑀢𑀦𑀺𑀬𑀸𑀤𑀺𑀕𑁆𑀕𑀸𑀳𑀯𑀲𑁂𑀦 𑀅𑀪𑀺𑀩𑁆𑀬𑀸𑀧𑀦𑀁 𑀫𑀤𑀓𑀭𑀡𑀯𑀲𑁂𑀦 𑀆𑀲𑀯𑀲𑀤𑀺𑀲𑀢𑀸 𑀘 𑀏𑀢𑁂𑀲𑀁𑀬𑁂𑀯, 𑀦𑀸𑀜𑁆𑀜𑁂𑀲𑀦𑁆𑀢𑀺 𑀏𑀢𑁂𑀲𑁆𑀯𑁂𑀯 𑀆𑀲𑀯𑀲𑀤𑁆𑀤𑁄 𑀦𑀺𑀭𑀼𑀴𑁆𑀳𑁄 𑀤𑀝𑁆𑀞𑀩𑁆𑀩𑁄. 𑀆𑀬𑀢𑀁 𑀯𑀸 𑀲𑀯𑀦𑁆𑀢𑀺 𑀨𑀮𑀦𑁆𑀢𑀻𑀢𑀺 𑀆𑀲𑀯𑀸. 𑀦 𑀳𑀺 𑀓𑀺𑀜𑁆𑀘𑀺 𑀲𑀁𑀲𑀸𑀭𑀤𑀼𑀓𑁆𑀔𑀁 𑀆𑀲𑀯𑁂𑀳𑀺 𑀯𑀺𑀦𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀅𑀢𑁆𑀣𑀻𑀢𑀺. 𑀆𑀭𑀫𑁆𑀫𑀡𑀪𑀸𑀯𑁂𑀦 𑀬𑁂 𑀥𑀫𑁆𑀫𑀸 𑀯𑀡𑁄 𑀯𑀺𑀬 𑀆𑀲𑀯𑁂 𑀧𑀕𑁆𑀖𑀭𑀦𑁆𑀢𑀺, 𑀢𑁂 𑀅𑀲𑀫𑁆𑀧𑀬𑁄𑀕𑁂 𑀅𑀢𑀩𑁆𑀪𑀸𑀯𑁂𑀧𑀺 𑀲𑀳 𑀆𑀲𑀯𑁂𑀳𑀻𑀢𑀺 𑀲𑀸𑀲𑀯𑀸, 𑀆𑀲𑀯𑀯𑀦𑁆𑀢𑁄𑀢𑀺 𑀅𑀢𑁆𑀣𑁄.

𑀑𑀲𑀸𑀦𑀤𑀼𑀓𑁂 ‘‘𑀦𑁄 𑀆𑀲𑀯𑀸 𑀔𑁄 𑀧𑀦𑀸’’𑀢𑀺 𑀅𑀯𑀢𑁆𑀯𑀸 ‘‘𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀔𑁄 𑀧𑀦𑀸’’𑀢𑀺 𑀯𑀘𑀦𑀁 𑀲𑀸𑀲𑀯𑀸𑀦𑀁 𑀲𑀳𑁂𑀢𑀼𑀓𑀸𑀦𑀁 𑀯𑀺𑀬 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀢𑀁𑀲𑀳𑀺𑀢𑀢𑀸 𑀦 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀏𑀯𑀁 𑀲𑁂𑀲𑀕𑁄𑀘𑁆𑀙𑀓𑁂𑀲𑀼𑀧𑀺 𑀬𑀣𑀸𑀲𑀫𑁆𑀪𑀯𑀁 𑀯𑀺𑀧𑁆𑀧𑀬𑀼𑀢𑁆𑀢𑀕𑁆𑀕𑀳𑀡𑁂 𑀧𑀬𑁄𑀚𑀦𑀁 𑀤𑀝𑁆𑀞𑀩𑁆𑀩𑀁. 𑀅𑀧𑀺𑀘 ‘‘𑀦𑁄 𑀆𑀲𑀯𑀸 𑀔𑁄 𑀧𑀦 𑀥𑀫𑁆𑀫𑀸 𑀲𑀸𑀲𑀯𑀸’’𑀢𑀺 𑀇𑀤𑀁 𑀧𑀤𑀁 𑀘𑀢𑀼𑀢𑁆𑀣𑀤𑀼𑀓𑁂 𑀤𑀼𑀢𑀺𑀬𑀧𑀤𑁂𑀦 𑀦𑀺𑀦𑁆𑀦𑀸𑀦𑀁, 𑀦 𑀘 𑀏𑀓𑁂𑀦 𑀤𑀼𑀓𑁄 𑀳𑁄𑀢𑀺, 𑀢𑀲𑁆𑀫𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀫𑁂𑀯 𑀕𑀳𑁂𑀢𑁆𑀯𑀸 𑀑𑀲𑀸𑀦𑀤𑀼𑀓𑀬𑁄𑀚𑀦𑀸 𑀜𑀸𑀬𑀸𑀕𑀢𑀸𑀢𑀺 𑀓𑀢𑀸. 𑀳𑁂𑀢𑀼𑀕𑁄𑀘𑁆𑀙𑀓𑁂 𑀧𑀦 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀲𑀳𑁂𑀢𑀼𑀓𑀢𑀸 𑀦𑀢𑁆𑀣𑀻𑀢𑀺 𑀢𑁂 𑀕𑀳𑁂𑀢𑁆𑀯𑀸 𑀤𑀼𑀓𑀬𑁄𑀚𑀦𑀸𑀬 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀦𑀳𑁂𑀢𑀼𑀧𑀤𑀁 𑀕𑀳𑁂𑀢𑁆𑀯𑀸 𑀑𑀲𑀸𑀦𑀤𑀼𑀓𑀬𑁄𑀚𑀦𑀸 𑀓𑀢𑀸. 𑀬𑁂 𑀯𑀸 𑀧𑀦 𑀧𑀞𑀫𑁂 𑀤𑀼𑀓𑁂 𑀤𑀼𑀢𑀺𑀬𑀲𑁆𑀲 𑀧𑀓𑁆𑀔𑁂𑀧𑁂 𑀏𑀓𑁄, 𑀢𑀢𑀺𑀬𑀲𑁆𑀲 𑀤𑁆𑀯𑁂, 𑀧𑀞𑀫𑀲𑁆𑀲 𑀤𑀼𑀢𑀺𑀬𑁂 𑀏𑀓𑁄, 𑀢𑀢𑀺𑀬𑁂 𑀤𑁆𑀯𑁂, 𑀤𑀼𑀢𑀺𑀬𑀲𑁆𑀲 𑀢𑀢𑀺𑀬𑁂 𑀏𑀓𑁄, 𑀤𑀼𑀢𑀺𑀬𑁂 𑀘 𑀢𑀢𑀺𑀬𑀲𑁆𑀲 𑀏𑀓𑁄𑀢𑀺 𑀅𑀝𑁆𑀞 𑀤𑀼𑀓𑀸 𑀮𑀩𑁆𑀪𑀦𑁆𑀢𑀺, 𑀢𑁂𑀲𑀼 𑀢𑀻𑀳𑀺 𑀇𑀢𑀭𑁂 𑀘 𑀦𑀬𑀢𑁄 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀲 𑀦𑀬𑁄 𑀲𑁂𑀲𑀕𑁄𑀘𑁆𑀙𑀓𑁂𑀲𑀼𑀧𑀺.

𑁨𑁦-𑁨𑁫. 𑀓𑀺𑀮𑁂𑀲𑀓𑀫𑁆𑀫𑀯𑀺𑀧𑀸𑀓𑀯𑀝𑁆𑀝𑀸𑀦𑀁 𑀧𑀘𑁆𑀘𑀬𑀪𑀸𑀯𑁂𑀦 𑀢𑀢𑁆𑀣 𑀲𑀁𑀬𑁄𑀚𑁂𑀦𑁆𑀢𑀺, 𑀲𑀢𑀺𑀧𑀺 𑀅𑀜𑁆𑀜𑁂𑀲𑀁 𑀢𑀧𑁆𑀧𑀘𑁆𑀘𑀬𑀪𑀸𑀯𑁂 𑀦 𑀯𑀺𑀦𑀸 𑀲𑀁𑀬𑁄𑀚𑀦𑀸𑀦𑀺 𑀢𑁂𑀲𑀁 𑀢𑀧𑁆𑀧𑀘𑁆𑀘𑀬𑀪𑀸𑀯𑁄 𑀅𑀢𑁆𑀣𑀺, 𑀑𑀭𑀫𑁆𑀪𑀸𑀕𑀺𑀬𑀼𑀤𑁆𑀥𑀫𑁆𑀪𑀸𑀕𑀺𑀬𑀲𑀗𑁆𑀕𑀳𑀺𑀢𑁂𑀳𑀺 𑀘 𑀢𑀁𑀢𑀁𑀪𑀯𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀦𑀺𑀬𑀫𑁄 𑀪𑀯𑀦𑀺𑀬𑀫𑁄 𑀘 𑀳𑁄𑀢𑀺, 𑀦 𑀘 𑀉𑀧𑀘𑁆𑀙𑀺𑀦𑁆𑀦𑀲𑀁𑀬𑁄𑀚𑀦𑀲𑁆𑀲 𑀓𑀢𑀸𑀦𑀺𑀧𑀺 𑀓𑀫𑁆𑀫𑀸𑀦𑀺 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻𑀢𑀺. 𑀲𑀁𑀬𑁄𑀚𑁂𑀢𑀩𑁆𑀩𑀸𑀢𑀺 𑀯𑀸 𑀲𑀁𑀬𑁄𑀚𑀦𑀺𑀬𑀸, 𑀲𑀁𑀬𑁄𑀚𑀦𑁂 𑀦𑀺𑀬𑀼𑀢𑁆𑀢𑀸𑀢𑀺 𑀯𑀸. 𑀤𑀽𑀭𑀕𑀢𑀲𑁆𑀲𑀧𑀺 𑀆𑀓𑀟𑁆𑀠𑀦𑀢𑁄 𑀦𑀺𑀲𑁆𑀲𑀭𑀺𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦 𑀩𑀦𑁆𑀥𑀦𑀁 𑀲𑀁𑀬𑁄𑀚𑀦𑀁, 𑀕𑀦𑁆𑀣𑀓𑀭𑀡𑀁 𑀲𑀗𑁆𑀔𑀮𑀺𑀓𑀘𑀓𑁆𑀓𑀮𑀓𑀸𑀦𑀁 𑀯𑀺𑀬 𑀧𑀝𑀺𑀩𑀤𑁆𑀥𑀢𑀸𑀓𑀭𑀡𑀁 𑀯𑀸 𑀕𑀦𑁆𑀣𑀦𑀁 𑀕𑀦𑁆𑀣𑁄, 𑀲𑀁𑀲𑀺𑀮𑀺𑀲𑀓𑀭𑀡𑀁 𑀬𑁄𑀚𑀦𑀁 𑀬𑁄𑀕𑁄𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀥𑀫𑁆𑀫𑀸𑀦𑀁 𑀲𑀪𑀸𑀯𑀓𑀺𑀘𑁆𑀘𑀯𑀺𑀲𑁂𑀲𑀜𑁆𑀜𑀼𑀦𑀸 𑀧𑀦 𑀪𑀕𑀯𑀢𑀸 𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀢𑀧𑁆𑀧𑀘𑁆𑀘𑀬𑁂𑀲𑀼 𑀘 𑀢𑁂𑀳𑀺 𑀢𑁂𑀳𑀺 𑀦𑀺𑀧𑁆𑀨𑀸𑀤𑀺𑀬𑀫𑀸𑀦𑀁 𑀢𑀁 𑀢𑀁 𑀓𑀺𑀘𑁆𑀘𑀯𑀺𑀲𑁂𑀲𑀁 𑀧𑀲𑁆𑀲𑀦𑁆𑀢𑁂𑀦 𑀢𑁂 𑀢𑁂 𑀥𑀫𑁆𑀫𑀸 𑀢𑀣𑀸 𑀢𑀣𑀸 𑀆𑀲𑀯𑀲𑀁𑀬𑁄𑀚𑀦𑀕𑀦𑁆𑀣𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀸𑀢𑀺 ‘‘𑀓𑀺𑀫𑀢𑁆𑀣𑀁 𑀏𑀢𑁂𑀬𑁂𑀯 𑀥𑀫𑁆𑀫𑀸 𑀏𑀯𑀁 𑀯𑀼𑀢𑁆𑀢𑀸, 𑀓𑀲𑁆𑀫𑀸 𑀘 𑀯𑀼𑀢𑁆𑀢𑀸 𑀏𑀯 𑀧𑀼𑀦 𑀯𑀼𑀢𑁆𑀢𑀸’’𑀢𑀺 𑀦 𑀘𑁄𑀤𑁂𑀢𑀩𑁆𑀩𑀫𑁂𑀢𑀁.

𑁨𑁬-𑁩𑁭. 𑀕𑀦𑁆𑀣𑀦𑀺𑀬𑀸𑀢𑀺 𑀏𑀢𑁆𑀣 𑀅𑀬𑀫𑀜𑁆𑀜𑁄 𑀅𑀢𑁆𑀣𑁄 ‘‘𑀕𑀦𑁆𑀣𑀓𑀭𑀡𑀁 𑀕𑀦𑁆𑀣𑀦𑀁, 𑀕𑀦𑁆𑀣𑀦𑁂 𑀦𑀺𑀬𑀼𑀢𑁆𑀢𑀸𑀢𑀺 𑀕𑀦𑁆𑀣𑀦𑀺𑀬𑀸, 𑀕𑀦𑁆𑀣𑀬𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸, 𑀕𑀦𑁆𑀣𑀬𑀺𑀢𑀼𑀁 𑀅𑀭𑀳𑀦𑁆𑀢𑀻𑀢𑀺 𑀯𑀸 𑀕𑀦𑁆𑀣𑀦𑀺𑀬𑀸’’𑀢𑀺. 𑀏𑀯𑀁 𑀑𑀖𑀦𑀺𑀬𑀸𑀤𑀻𑀲𑀼𑀧𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀢𑀺𑀓𑁆𑀓𑀫𑀢𑀻𑀢𑀺 𑀏𑀢𑀁 𑀥𑀸𑀢𑁆𑀯𑀢𑁆𑀣𑀁 𑀕𑀳𑁂𑀢𑁆𑀯𑀸 𑀑𑀖𑀦𑀺𑀬𑀸𑀢𑀺 𑀧𑀤𑀲𑀺𑀤𑁆𑀥𑀺 𑀓𑀢𑀸.

𑁫𑁦-𑁫𑁪. 𑀥𑀫𑁆𑀫𑀲𑀪𑀸𑀯𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀭𑀢𑁄 𑀆𑀫𑀲𑀦𑁆𑀢𑀻𑀢𑀺 𑀧𑀭𑀸𑀫𑀸𑀲𑀸. 𑀧𑀭𑀢𑁄𑀢𑀺 𑀦𑀺𑀘𑁆𑀘𑀸𑀤𑀺𑀢𑁄. 𑀆𑀫𑀲𑀦𑁆𑀢𑀻𑀢𑀺 𑀲𑀪𑀸𑀯𑀧𑀝𑀺𑀲𑁂𑀥𑁂𑀦 𑀧𑀭𑀺𑀫𑀚𑁆𑀚𑀦𑁆𑀢𑀺.

𑁫𑁫-𑁬𑁮. 𑀲𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀁 𑀅𑀯𑀺𑀚𑁆𑀚𑀫𑀸𑀦𑀁 𑀯𑀸 𑀯𑀺𑀘𑀺𑀢𑁆𑀢𑀲𑀜𑁆𑀜𑀸𑀬 𑀲𑀜𑁆𑀜𑀺𑀢𑀁 𑀆𑀭𑀫𑁆𑀫𑀡𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀧𑁆𑀧𑀯𑀢𑁆𑀢𑀺𑀢𑁄 𑀆𑀮𑀫𑁆𑀩𑀫𑀸𑀦𑀸 𑀥𑀫𑁆𑀫𑀸 𑀲𑀸𑀭𑀫𑁆𑀫𑀡𑀸. 𑀘𑀺𑀦𑁆𑀢𑀦𑀁 𑀕𑀳𑀡𑀁 𑀆𑀭𑀫𑁆𑀫𑀡𑀽𑀧𑀮𑀤𑁆𑀥𑀺. 𑀘𑁂𑀢𑀲𑀺 𑀦𑀺𑀬𑀼𑀢𑁆𑀢𑀸, 𑀘𑁂𑀢𑀲𑀸 𑀲𑀁𑀲𑀝𑁆𑀞𑀸 𑀯𑀸 𑀘𑁂𑀢𑀲𑀺𑀓𑀸. 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀦𑀸𑀦𑀢𑁆𑀢𑀢𑀸𑀬 𑀏𑀓𑀻𑀪𑀸𑀯𑀫𑀺𑀯𑀼𑀧𑀕𑀫𑀦𑀁 𑀦𑀺𑀭𑀦𑁆𑀢𑀭𑀪𑀸𑀯𑀼𑀧𑀕𑀫𑀦𑀁. 𑀬𑁂𑀲𑀁 𑀭𑀽𑀧𑀸𑀦𑀁 𑀘𑀺𑀢𑁆𑀢𑀁 𑀲𑀳𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀺, 𑀢𑁂𑀲𑀁 𑀘𑀺𑀢𑁆𑀢𑀲𑁆𑀲 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀦𑀸𑀦𑀢𑁆𑀢𑀦𑁆𑀢𑀺 𑀦𑀺𑀭𑀦𑁆𑀢𑀭𑀪𑀸𑀯𑀸𑀦𑀼𑀧𑀕𑀫𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀓𑀢𑁄 𑀯𑀢𑁆𑀢𑀫𑀸𑀦𑀸𑀧𑀻𑀢𑀺 𑀅𑀧𑀺-𑀲𑀤𑁆𑀤𑁄 𑀓𑁄 𑀧𑀦 𑀯𑀸𑀤𑁄 𑀏𑀓𑀢𑁄 𑀅𑀯𑀢𑁆𑀢𑀫𑀸𑀦𑀸𑀢𑀺 𑀏𑀢𑀫𑀢𑁆𑀣𑀁 𑀤𑀻𑀧𑁂𑀢𑀺. 𑀇𑀤𑀫𑁂𑀢𑁆𑀣 𑀯𑀺𑀘𑀸𑀭𑁂𑀢𑀩𑁆𑀩𑀁 𑁋 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀸𑀦𑀁 𑀓𑀺𑀁 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀝𑁆𑀞𑀢𑀸, 𑀉𑀤𑀸𑀳𑀼 𑀯𑀺𑀲𑀁𑀲𑀝𑁆𑀞𑀢𑀸𑀢𑀺? 𑀯𑀺𑀲𑀼𑀁 𑀆𑀭𑀫𑁆𑀫𑀡𑀪𑀸𑀯𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀦𑀸𑀦𑀢𑁆𑀢𑀢𑁆𑀢𑀸 𑀦 𑀲𑀁𑀲𑀝𑁆𑀞𑀢𑀸, 𑀦𑀸𑀧𑀺 𑀯𑀺𑀲𑀁𑀲𑀝𑁆𑀞𑀢𑀸 𑀲𑀁𑀲𑀝𑁆𑀞𑀸𑀢𑀺 𑀅𑀦𑀸𑀲𑀗𑁆𑀓𑀦𑀻𑀬𑀲𑀪𑀸𑀯𑀢𑁆𑀢𑀸. 𑀘𑀢𑀼𑀦𑁆𑀦𑀜𑁆𑀳𑀺 𑀔𑀦𑁆𑀥𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀝𑁆𑀞𑀲𑀪𑀸𑀯𑀢𑁆𑀢𑀸 𑀭𑀽𑀧𑀦𑀺𑀩𑁆𑀩𑀸𑀦𑁂𑀳𑀺𑀧𑀺 𑀲𑁄 𑀲𑀁𑀲𑀝𑁆𑀞𑀪𑀸𑀯𑁄 𑀅𑀢𑁆𑀣𑀺 𑀦𑀢𑁆𑀣𑀻𑀢𑀺 𑀲𑀺𑀬𑀸 𑀆𑀲𑀗𑁆𑀓𑀸, 𑀢𑀲𑁆𑀫𑀸 𑀢𑁂𑀲𑀁 𑀇𑀢𑀭𑁂𑀳𑀺, 𑀇𑀢𑀭𑁂𑀲𑀜𑁆𑀘 𑀢𑁂𑀳𑀺 𑀯𑀺𑀲𑀁𑀲𑀝𑁆𑀞𑀲𑀪𑀸𑀯𑀢𑀸 𑀯𑀼𑀘𑁆𑀘𑀢𑀺, 𑀦 𑀧𑀦 𑀭𑀽𑀧𑀸𑀦𑀁 𑀭𑀽𑀧𑁂𑀳𑀺 𑀓𑀢𑁆𑀣𑀘𑀺 𑀲𑀁𑀲𑀝𑁆𑀞𑀢𑀸 𑀅𑀢𑁆𑀣𑀻𑀢𑀺 𑀢𑀤𑀸𑀲𑀗𑁆𑀓𑀸𑀪𑀸𑀯𑀢𑁄 𑀯𑀺𑀲𑀁𑀲𑀝𑁆𑀞𑀢𑀸 𑀘 𑀭𑀽𑀧𑀸𑀦𑀁 𑀭𑀽𑀧𑁂𑀳𑀺 𑀦 𑀯𑀼𑀘𑁆𑀘𑀢𑀻𑀢𑀺. 𑀏𑀲 𑀳𑀺 𑀢𑁂𑀲𑀁 𑀲𑀪𑀸𑀯𑁄𑀢𑀺. 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸𑀤𑀺𑀧𑀤𑁂𑀲𑀼 𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸𑀤𑀺𑀲𑀤𑁆𑀤𑀸 𑀘𑀺𑀢𑁆𑀢𑀲𑀤𑁆𑀤𑀸𑀧𑁂𑀓𑁆𑀔𑀸𑀢𑀺 𑀧𑀘𑁆𑀘𑁂𑀓𑀁 𑀘𑀺𑀢𑁆𑀢𑀲𑀤𑁆𑀤𑀲𑀫𑁆𑀩𑀦𑁆𑀥𑀢𑁆𑀢𑀸 𑀘𑀺𑀢𑁆𑀢𑀲𑀁𑀲𑀝𑁆𑀞𑀸 𑀘 𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀘𑀸𑀢𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀉𑀧𑀸𑀤𑀺𑀬𑀦𑁆𑀢𑁂𑀯𑀸𑀢𑀺 𑀪𑀽𑀢𑀸𑀦𑀺 𑀕𑀡𑁆𑀳𑀦𑁆𑀢𑀺 𑀏𑀯, 𑀦𑀺𑀲𑁆𑀲𑀬𑀦𑁆𑀢𑀺 𑀏𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸 𑀪𑀽𑀢𑀸𑀦𑀺 𑀉𑀧𑀸𑀤𑀺𑀬𑀦𑁆𑀢𑀺 𑀕𑀬𑁆𑀳𑀦𑁆𑀢𑀺 𑀦𑀺𑀲𑁆𑀲𑀻𑀬𑀦𑁆𑀢𑀺, 𑀦 𑀢𑀣𑀸 𑀏𑀢𑀸𑀦𑀺 𑀕𑀬𑁆𑀳𑀦𑁆𑀢𑀺 𑀦𑀺𑀲𑁆𑀲𑀻𑀬𑀦𑁆𑀢𑀺, 𑀢𑀲𑁆𑀫𑀸 𑀉𑀧𑀸𑀤𑀸. 𑀅𑀣 𑀯𑀸 𑀪𑀽𑀢𑀸𑀦𑀺 𑀅𑀫𑀼𑀜𑁆𑀘𑀺𑀢𑁆𑀯𑀸 𑀢𑁂𑀲𑀁 𑀯𑀡𑁆𑀡𑀦𑀺𑀪𑀸𑀤𑀺𑀪𑀸𑀯𑁂𑀦 𑀕𑀳𑁂𑀢𑀩𑁆𑀩𑀢𑁄 𑀉𑀧𑀸𑀤𑀸.