𑀓𑀸𑀫𑀸𑀯𑀘𑀭𑀓𑀼𑀲𑀮𑀁

𑀦𑀺𑀤𑁆𑀤𑁂𑀲𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑁨. 𑀨𑀼𑀲𑀦𑀓𑀯𑀲𑁂𑀦𑀸𑀢𑀺 𑀲𑀦𑁆𑀢𑁂 𑀅𑀲𑀦𑁆𑀢𑁂𑀧𑀺 𑀯𑀺𑀲𑀬𑁂 𑀆𑀧𑀸𑀣𑀕𑀢𑁂 𑀘𑀺𑀢𑁆𑀢𑀲𑁆𑀲 𑀲𑀦𑁆𑀦𑀺𑀧𑀢𑀦𑀯𑀲𑁂𑀦 ‘‘𑀘𑀺𑀢𑁆𑀢𑀁 𑀫𑀦𑁄’’𑀢𑀺𑀆𑀤𑀻𑀲𑀼 (𑀥. 𑀲. 𑁬, 𑁧𑁭) 𑀯𑀺𑀬 𑀓𑀺𑀘𑁆𑀘𑀯𑀺𑀲𑁂𑀲𑀁, ‘‘𑀫𑀸𑀦𑀲’’𑀦𑁆𑀢𑀺𑀆𑀤𑀻𑀲𑀼 (𑀥. 𑀲. 𑁬, 𑁧𑁭) 𑀯𑀺𑀬 𑀲𑀫𑀸𑀦𑁂 𑀅𑀢𑁆𑀣𑁂 𑀲𑀤𑁆𑀤𑀯𑀺𑀲𑁂𑀲𑀁, ‘‘𑀧𑀡𑁆𑀟𑀭’’𑀦𑁆𑀢𑀺𑀆𑀤𑀻𑀲𑀼 (𑀥. 𑀲. 𑁬, 𑁧𑁭) 𑀯𑀺𑀬 𑀕𑀼𑀡𑀯𑀺𑀲𑁂𑀲𑀁, ‘‘𑀘𑁂𑀢𑀲𑀺𑀓𑀁 𑀲𑀸𑀢’’𑀦𑁆𑀢𑀺𑀆𑀤𑀻𑀲𑀼 (𑀥. 𑀲. 𑁨, 𑁧𑁮) 𑀯𑀺𑀬 𑀦𑀺𑀲𑁆𑀲𑀬𑀯𑀺𑀲𑁂𑀲𑀁, ‘‘𑀘𑀺𑀢𑁆𑀢𑀲𑁆𑀲 𑀞𑀺𑀢𑀻’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁫, 𑁨𑁪) 𑀯𑀺𑀬 𑀅𑀜𑁆𑀜𑀲𑁆𑀲 𑀅𑀯𑀢𑁆𑀣𑀸𑀪𑀸𑀯𑀯𑀺𑀲𑁂𑀲𑀁, ‘‘𑀅𑀮𑀼𑀩𑁆𑀪𑀦𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁩𑁨) 𑀯𑀺𑀬 𑀅𑀜𑁆𑀜𑀲𑁆𑀲 𑀓𑀺𑀭𑀺𑀬𑀸𑀪𑀸𑀯𑀯𑀺𑀲𑁂𑀲𑀁, ‘‘𑀅𑀮𑀼𑀩𑁆𑀪𑀺𑀢𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 (𑀥. 𑀲. 𑁩𑁨) 𑀯𑀺𑀬 𑀅𑀜𑁆𑀜𑀲𑁆𑀲 𑀓𑀺𑀭𑀺𑀬𑀸𑀪𑀸𑀯𑀪𑀽𑀢𑀢𑀸𑀯𑀺𑀲𑁂𑀲𑀦𑁆𑀢𑀺𑀆𑀤𑀺𑀓𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀥𑀫𑁆𑀫𑀫𑀢𑁆𑀢𑀤𑀻𑀧𑀦𑀁 𑀲𑀪𑀸𑀯𑀧𑀤𑀁. 𑀨𑀼𑀲𑀦𑁆𑀢𑀲𑁆𑀲 𑀳𑀺 𑀘𑀺𑀢𑁆𑀢𑀲𑁆𑀲 𑀨𑀼𑀲𑀦𑀓𑀺𑀭𑀺𑀬𑀸 𑀨𑀼𑀲𑀦𑀸𑀓𑀸𑀭𑁄. 𑀲𑀫𑁆𑀨𑀼𑀲𑀦𑀸𑀢𑀺 𑀆𑀭𑀫𑁆𑀫𑀡𑀲𑀫𑀸𑀕𑀫𑀨𑀼𑀲𑀦𑀸, 𑀦 𑀧𑀝𑀺𑀮𑀸𑀪𑀲𑀫𑁆𑀨𑀼𑀲𑀦𑀸. 𑀲𑀫𑁆𑀨𑀼𑀲𑀺𑀢𑀲𑁆𑀲 𑀆𑀭𑀫𑁆𑀫𑀡𑁂𑀦 𑀲𑀫𑀸𑀕𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀪𑀸𑀯𑁄 𑀲𑀫𑁆𑀨𑀼𑀲𑀺𑀢𑀢𑁆𑀢𑀁. 𑀬𑀲𑁆𑀫𑀺𑀁 𑀲𑀢𑀺 𑀘𑀺𑀢𑁆𑀢𑀁 𑀲𑀫𑁆𑀨𑀼𑀲𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀢𑀲𑁆𑀲 𑀪𑀸𑀯𑁄. 𑀏𑀯𑀁 𑀅𑀜𑁆𑀜𑁂𑀲𑀼𑀧𑀺 𑀪𑀸𑀯𑀦𑀺𑀤𑁆𑀤𑁂𑀲𑁂𑀲𑀼 𑀤𑀝𑁆𑀞𑀩𑁆𑀩𑀁.

𑀅𑀧𑀭𑀲𑁆𑀲 𑀯𑁂𑀯𑀘𑀦𑀲𑁆𑀲, 𑀅𑀧𑀭𑁂𑀦 𑀯𑀸 𑀧𑀼𑀭𑀺𑀫𑀢𑁆𑀣𑀲𑁆𑀲 𑀤𑀻𑀧𑀦𑀸 𑀅𑀧𑀭𑀤𑀻𑀧𑀦𑀸. ‘‘𑀧𑀡𑁆𑀟𑀺𑀘𑁆𑀘𑀁 𑀓𑁄𑀲𑀮𑁆𑀮’’𑀦𑁆𑀢𑀺 𑀏𑀯𑀫𑀸𑀤𑀬𑁄 𑀧𑀜𑁆𑀜𑀸𑀯𑀺𑀲𑁂𑀲𑀸 𑀦𑀸𑀦𑀸𑀓𑀸𑀮𑁂 𑀮𑀩𑁆𑀪𑀫𑀸𑀦𑀸𑀧𑀺 𑀏𑀓𑀲𑁆𑀫𑀺𑀁 𑀘𑀺𑀢𑁆𑀢𑁂 𑀮𑀩𑁆𑀪𑀦𑁆𑀢𑀺. 𑀏𑀓𑀲𑁆𑀫𑀺𑀜𑁆𑀘 𑀯𑀺𑀲𑁂𑀲𑁂 𑀇𑀢𑀭𑁂𑀧𑀺 𑀅𑀦𑀼𑀕𑀢𑀸 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀢𑀣𑀸 𑀯𑀺𑀪𑀢𑁆𑀢𑀺 𑀅𑀢𑁆𑀣𑀢𑁄 𑀯𑀺𑀪𑀢𑁆𑀢𑀺 𑀳𑁄𑀢𑀺 𑀅𑀢𑁆𑀣𑀦𑀸𑀦𑀢𑁆𑀢𑁂𑀦 𑀓𑀢𑀢𑁆𑀢𑀸. 𑀅𑀣 𑀯𑀸 𑀬𑀣𑀸 ‘‘𑀓𑁄𑀥𑁄 𑀓𑀼𑀚𑁆𑀛𑀦𑀸 𑀓𑀼𑀚𑁆𑀛𑀺𑀢𑀢𑁆𑀢’’𑀦𑁆𑀢𑀺 (𑀥. 𑀲. 𑁧𑁦𑁬𑁬) 𑀲𑀪𑀸𑀯𑀸𑀓𑀸𑀭𑀪𑀸𑀯𑀦𑀺𑀤𑁆𑀤𑁂𑀲𑁂𑀳𑀺 𑀓𑁄𑀥𑁄𑀢𑀺 𑀏𑀯𑀫𑀸𑀓𑀸𑀭𑁄𑀯 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀦 𑀏𑀯𑀫𑀺𑀥, 𑀇𑀥 𑀧𑀦 𑀧𑀡𑁆𑀟𑀺𑀢𑀸𑀤𑀺𑀪𑀸𑀯𑀸𑀓𑀸𑀭𑀪𑀺𑀦𑁆𑀦𑁄 𑀅𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀇𑀤𑀁 𑀯𑀺𑀪𑀢𑁆𑀢𑀺𑀕𑀫𑀦𑀁 𑀅𑀢𑁆𑀣𑀯𑀲𑁂𑀦 𑀳𑁄𑀢𑀺. 𑀲𑀫𑁆𑀨𑀼𑀲𑀺𑀢𑀢𑁆𑀢𑀦𑁆𑀢𑀺 𑀏𑀢𑁆𑀣𑀸𑀧𑀺 𑀦 ‘‘𑀨𑀲𑁆𑀲𑁄’’𑀢𑀺 𑀏𑀯𑀫𑀸𑀓𑀸𑀭𑁄𑀯 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀲𑀫𑁆𑀨𑀲𑁆𑀲𑁄𑀢𑀺 𑀏𑀯𑀫𑀸𑀓𑀸𑀭𑁄 𑀧𑀦 𑀯𑀼𑀢𑁆𑀢𑁄𑀢𑀺 𑀅𑀢𑁆𑀣𑀢𑁄 𑀯𑀺𑀪𑀢𑁆𑀢𑀺𑀕𑀫𑀦𑀦𑁆𑀢𑀺 𑀯𑀼𑀢𑁆𑀢𑀁.

𑀤𑁄𑀲𑁄 𑀩𑁆𑀬𑀸𑀧𑀸𑀤𑁄𑀢𑀺 𑀉𑀤𑁆𑀤𑁂𑀲𑁂𑀧𑀺 𑀦𑀸𑀫𑀦𑀸𑀦𑀢𑁆𑀢𑁂𑀦 𑀦𑀸𑀦𑀸𑀪𑀽𑀢𑁄 𑀉𑀤𑁆𑀤𑀺𑀝𑁆𑀞𑁄. 𑀦𑀺𑀤𑁆𑀤𑁂𑀲𑁂𑀧𑀺 𑀢𑁂𑀦𑁂𑀯 𑀦𑀸𑀦𑀢𑁆𑀢𑁂𑀦 𑀦𑀺𑀤𑁆𑀤𑀺𑀝𑁆𑀞𑁄. 𑀏𑀓𑁄𑀯 𑀔𑀦𑁆𑀥𑁄 𑀳𑁄𑀢𑀻𑀢𑀺 𑀏𑀓𑁂𑀦 𑀔𑀦𑁆𑀥𑀲𑀤𑁆𑀤𑁂𑀦 𑀯𑀢𑁆𑀢𑀩𑁆𑀩𑀢𑀁 𑀲𑀦𑁆𑀥𑀸𑀬𑀸𑀳. 𑀘𑁂𑀢𑀦𑀸𑀢𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀁 𑀤𑀲𑁆𑀲𑁂𑀢𑀺 𑀢𑀧𑁆𑀧𑀫𑀼𑀔𑀢𑁆𑀢𑀸. 𑀅𑀲𑀤𑁆𑀥𑀫𑁆𑀫𑀸𑀢𑀺 𑀅𑀲𑀢𑀁, 𑀅𑀲𑀦𑁆𑀢𑁄 𑀯𑀸 𑀥𑀫𑁆𑀫𑀸, 𑀦 𑀯𑀸 𑀲𑀤𑁆𑀥𑀫𑁆𑀫𑀸𑀢𑀺 𑀅𑀲𑀤𑁆𑀥𑀫𑁆𑀫𑀸𑀢𑀺 𑀅𑀲𑀤𑁆𑀥𑀫𑁆𑀫𑀯𑀘𑀦𑀻𑀬𑀪𑀸𑀯𑁂𑀦 𑀏𑀓𑀻𑀪𑀽𑀢𑁄𑀧𑀺 𑀅𑀲𑀤𑁆𑀥𑀫𑁆𑀫𑁄 𑀓𑁄𑀥𑀕𑀭𑀼𑀢𑀸𑀤𑀺𑀯𑀺𑀲𑀺𑀝𑁆𑀞𑁂𑀦 𑀲𑀤𑁆𑀥𑀫𑁆𑀫𑀕𑀭𑀼𑀢𑀸𑀧𑀝𑀺𑀓𑁆𑀔𑁂𑀧𑀦𑀸𑀦𑀢𑁆𑀢𑁂𑀦 𑀦𑀸𑀦𑀢𑁆𑀢𑀁 𑀕𑀢𑁄𑀢𑀺 ‘‘𑀘𑀢𑁆𑀢𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀦 𑀲𑀤𑁆𑀥𑀫𑁆𑀫𑀕𑀭𑀼𑀢𑀸𑀢𑀺 𑀯𑀼𑀘𑁆𑀘𑀫𑀸𑀦𑀸 𑀯𑀸 𑀅𑀲𑀤𑁆𑀥𑀫𑁆𑀫𑀕𑀭𑀼𑀢𑀸 𑀅𑀲𑀤𑁆𑀥𑀫𑁆𑀫𑀕𑀭𑀼𑀢𑀸𑀪𑀸𑀯𑁂𑀦 𑀏𑀓𑀻𑀪𑀽𑀢𑀸𑀧𑀺 𑀓𑁄𑀥𑀸𑀤𑀺𑀯𑀺𑀲𑀺𑀝𑁆𑀞𑀧𑀝𑀺𑀓𑁆𑀔𑁂𑀧𑀦𑀸𑀦𑀢𑁆𑀢𑁂𑀦 𑀦𑀸𑀦𑀢𑁆𑀢𑀁 𑀕𑀢𑀸. 𑀧𑀝𑀺𑀧𑀓𑁆𑀔𑁄 𑀯𑀸 𑀧𑀝𑀺𑀓𑁆𑀔𑀺𑀧𑀻𑀬𑀢𑀺 𑀢𑁂𑀦, 𑀲𑀬𑀁 𑀯𑀸 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀧𑀝𑀺𑀓𑁆𑀔𑁂𑀧𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀲𑀤𑁆𑀥𑀫𑁆𑀫𑀕𑀭𑀼𑀢𑀸𑀧𑀝𑀺𑀓𑁆𑀔𑁂𑀧𑀦𑀸𑀦𑀢𑁆𑀢𑁂𑀦 𑀅𑀲𑀤𑁆𑀥𑀫𑁆𑀫𑀕𑀭𑀼𑀢𑀸 𑀅𑀲𑀤𑁆𑀥𑀫𑁆𑀫𑀸 𑀯𑀸 𑀦𑀸𑀦𑀢𑁆𑀢𑀁 𑀕𑀢𑀸. 𑀅𑀮𑁄𑀪𑁄𑀢𑀺𑀆𑀤𑀻𑀦𑀁 𑀨𑀲𑁆𑀲𑀸𑀤𑀻𑀳𑀺 𑀦𑀸𑀦𑀢𑁆𑀢𑀁 𑀮𑁄𑀪𑀸𑀤𑀺𑀯𑀺𑀲𑀺𑀝𑁆𑀞𑁂𑀦 𑀧𑀝𑀺𑀓𑁆𑀔𑁂𑀧𑁂𑀦 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑁂𑀦 𑀯𑀸 𑀯𑁂𑀤𑀺𑀢𑀩𑁆𑀩𑀁. 𑀅𑀮𑁄𑀪𑀸𑀤𑁄𑀲𑀸𑀫𑁄𑀳𑀸𑀦𑀁 𑀅𑀜𑁆𑀜𑀫𑀜𑁆𑀜𑀦𑀸𑀦𑀢𑁆𑀢𑀁 𑀬𑀣𑀸𑀯𑀼𑀢𑁆𑀢𑁂𑀦 𑀧𑀝𑀺𑀓𑁆𑀔𑁂𑀧𑀦𑀸𑀦𑀢𑁆𑀢𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀧𑀤𑀢𑁆𑀣𑀲𑁆𑀲 𑀧𑀤𑀦𑁆𑀢𑀭𑁂𑀦 𑀯𑀺𑀪𑀸𑀯𑀦𑀁 𑀧𑀤𑀢𑁆𑀣𑀼𑀢𑀺. 𑀢𑁂𑀦 𑀳𑀺 𑀢𑀁 𑀧𑀤𑀁 𑀫𑀳𑀢𑁆𑀣𑀦𑁆𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺 𑀅𑀮𑀗𑁆𑀓𑀢𑀜𑁆𑀘𑀸𑀢𑀺. 𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑁂𑀧𑀺 𑀆𑀪𑀭𑀡𑀯𑀲𑁂𑀦 𑀘 𑀆𑀤𑀭𑀯𑀲𑁂𑀦 𑀘 𑀧𑀼𑀦 𑀯𑀘𑀦𑀁 𑀤𑀴𑁆𑀳𑀻𑀓𑀫𑁆𑀫𑀁.

𑁩. 𑀢𑀚𑁆𑀚𑀦𑁆𑀢𑀺 𑀢𑀲𑁆𑀲 𑀨𑀮𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁. 𑀦 𑀓𑁂𑀯𑀮𑀁 𑀦𑀺𑀤𑁆𑀤𑀺𑀲𑀺𑀬𑀫𑀸𑀦𑀁 𑀲𑀸𑀢𑀫𑁂𑀯 𑀅𑀥𑀺𑀓𑀢𑀁, 𑀅𑀣 𑀔𑁄 𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑀸𑀦𑀺 𑀆𑀭𑀫𑁆𑀫𑀡𑀸𑀦𑀺𑀧𑀻𑀢𑀺 ‘‘𑀢𑁂𑀳𑀺 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀯𑀸 𑀚𑀸𑀢𑀸 𑀓𑀸𑀭𑀡𑀪𑀸𑀯𑁂𑀦 𑀨𑀲𑁆𑀲𑀢𑁆𑀣𑀁 𑀧𑀯𑀢𑁆𑀢𑀸𑀢𑀺 𑀢𑀚𑁆𑀚𑀸. 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀁, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀯𑀸 𑀅𑀢𑁆𑀢𑀦𑀺 𑀲𑀸𑀤𑀬𑀢𑀻𑀢𑀺 𑀲𑀸𑀢𑀁 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸. 𑀲𑀼𑀝𑁆𑀞𑀼 𑀔𑀸𑀤𑀢𑀺, 𑀔𑀡𑀢𑀺 𑀯𑀸 𑀤𑀼𑀓𑁆𑀔𑀦𑁆𑀢𑀺 𑀲𑀼𑀔𑀁.

𑁫. 𑀧𑀸𑀲𑁄𑀢𑀺 𑀭𑀸𑀕𑀧𑀸𑀲𑁄. 𑀲𑁄 𑀳𑀺 𑀦𑀺𑀭𑀸𑀯𑀭𑀡𑀢𑁆𑀢𑀸 𑀅𑀦𑁆𑀢𑀮𑀺𑀓𑁆𑀔𑀘𑀭𑁄. 𑀅𑀓𑀼𑀲𑀮𑀫𑁆𑀧𑀺 𑀧𑀡𑁆𑀟𑀭𑀦𑁆𑀢𑀺 𑀯𑀼𑀢𑁆𑀢𑀁, 𑀓𑁄 𑀧𑀦 𑀯𑀸𑀤𑁄 𑀓𑀼𑀲𑀮𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀜𑁆𑀳𑀺 𑀧𑀡𑁆𑀟𑀭𑀢𑁄 𑀦𑀺𑀓𑁆𑀔𑀦𑁆𑀢𑀁 𑀲𑀬𑀜𑁆𑀘 𑀧𑀡𑁆𑀟𑀭𑀦𑁆𑀢𑀺. 𑀅𑀣 𑀯𑀸 𑀲𑀩𑁆𑀩𑀫𑁆𑀧𑀺 𑀘𑀺𑀢𑁆𑀢𑀁 𑀲𑀪𑀸𑀯𑀢𑁄 𑀧𑀡𑁆𑀟𑀭𑀫𑁂𑀯, 𑀆𑀕𑀦𑁆𑀢𑀼𑀓𑁄𑀧𑀓𑁆𑀓𑀺𑀮𑁂𑀲𑀯𑁄𑀤𑀸𑀦𑁂𑀳𑀺 𑀧𑀦 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀸𑀦𑀁 𑀉𑀧𑀓𑁆𑀓𑀺𑀮𑀺𑀝𑁆𑀞𑀯𑀺𑀲𑀼𑀤𑁆𑀥𑀢𑀭𑀢𑀸 𑀳𑁄𑀦𑁆𑀢𑀻𑀢𑀺. 𑀤𑀸𑀭𑀼𑀧𑁆𑀧𑀫𑀸𑀡𑁂𑀲𑀼 𑀲𑀺𑀮𑀸𑀤𑀻𑀲𑀼 𑀔𑀦𑁆𑀥𑀧𑀜𑁆𑀜𑀢𑁆𑀢𑀺𑀬𑀸 𑀅𑀪𑀸𑀯𑀸 𑀓𑀺𑀜𑁆𑀘𑀺 𑀦𑀺𑀫𑀺𑀢𑁆𑀢𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀤𑀸𑀭𑀼𑀫𑁆𑀳𑀺 𑀧𑀯𑀢𑁆𑀢𑀸 𑀔𑀦𑁆𑀥𑀧𑀜𑁆𑀜𑀢𑁆𑀢𑀻𑀢𑀺 ‘‘𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑀝𑁆𑀞𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑀁-𑀲𑀤𑁆𑀤𑁂𑀦 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁂𑀯 𑀯𑀼𑀘𑁆𑀘𑁂𑀬𑁆𑀬 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀢𑁆𑀢𑀸𑀢𑀺 𑀦 𑀢𑀲𑁆𑀲𑀸 𑀢𑀚𑁆𑀚𑀢𑀸. 𑀢𑁂𑀳𑀺 𑀆𑀭𑀫𑁆𑀫𑀡𑁂𑀳𑀺 𑀚𑀸𑀢𑀸 𑀢𑀚𑁆𑀚𑀸𑀢𑀺 𑀘 𑀯𑀼𑀘𑁆𑀘𑀫𑀸𑀦𑁂 𑀲𑀫𑁆𑀨𑀲𑁆𑀲𑀚𑀢𑀸 𑀦 𑀯𑀢𑁆𑀢𑀩𑁆𑀩𑀸. 𑀦 𑀳𑀺 𑀲𑁄 𑀆𑀭𑀫𑁆𑀫𑀡𑀁, 𑀦𑀸𑀧𑀺 𑀯𑀺𑀲𑁂𑀲𑀧𑀘𑁆𑀘𑀬𑁄. ‘‘𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄’’𑀢𑀺 𑀯𑀺𑀜𑁆𑀜𑀸𑀡𑀫𑁂𑀯 𑀨𑀲𑁆𑀲𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑁄𑀢𑀺 𑀢𑀲𑁆𑀫𑀸 𑀦 𑀯𑀺𑀜𑁆𑀜𑀸𑀡𑀁 𑀯𑀺𑀲𑁂𑀲𑀧𑀘𑁆𑀘𑀬𑀪𑀽𑀢𑀁 𑀲𑀫𑁆𑀨𑀲𑁆𑀲𑀚𑀢𑀸𑀬 𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀸𑀧𑀜𑁆𑀜𑀢𑁆𑀢𑀺𑀁 𑀮𑀪𑀢𑀺, 𑀦 𑀘 𑀢𑀤𑁂𑀯 𑀢𑀲𑁆𑀲 𑀓𑀸𑀭𑀡𑀪𑀸𑀯𑁂𑀦 𑀨𑀮𑀪𑀸𑀯𑁂𑀦 𑀘 𑀯𑀼𑀘𑁆𑀘𑀫𑀸𑀦𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀁 𑀳𑁄𑀢𑀻𑀢𑀺. 𑀓𑀺𑀁 𑀯𑀸 𑀏𑀢𑁂𑀦, 𑀬𑀣𑀸 𑀪𑀕𑀯𑀢𑀸 𑀯𑀼𑀢𑁆𑀢𑀸 𑀢𑀁𑀲𑀪𑀸𑀯𑀸𑀬𑁂𑀯 𑀢𑁂 𑀥𑀫𑁆𑀫𑀸𑀢𑀺 𑀦 𑀏𑀯𑀁𑀯𑀺𑀥𑁂𑀲𑀼 𑀓𑀸𑀭𑀡𑀁 𑀫𑀕𑁆𑀕𑀺𑀢𑀩𑁆𑀩𑀁.

𑁭. 𑀏𑀯𑀁 𑀢𑀓𑁆𑀓𑀦𑀯𑀲𑁂𑀦 𑀮𑁄𑀓𑀲𑀺𑀤𑁆𑀥𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀜𑁆𑀘𑁂𑀯𑀜𑁆𑀘 𑀪𑀯𑀺𑀢𑀩𑁆𑀩𑀦𑁆𑀢𑀺 𑀯𑀺𑀯𑀺𑀥𑀁 𑀢𑀓𑁆𑀓𑀦𑀁 𑀓𑀽𑀧𑁂 𑀯𑀺𑀬 𑀉𑀤𑀓𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀆𑀓𑀟𑁆𑀠𑀦𑀁 𑀯𑀺𑀢𑀓𑁆𑀓𑀦𑀁.

𑁮. 𑀲𑀫𑀦𑁆𑀢𑀢𑁄 𑀘𑀭𑀡𑀁 𑀯𑀺𑀘𑀭𑀡𑀁.

𑁯. 𑀅𑀢𑁆𑀢𑀫𑀦𑀢𑀸𑀢𑀺 𑀏𑀢𑁆𑀣 𑀅𑀢𑁆𑀢-𑀲𑀤𑁆𑀤𑁂𑀦 𑀦 𑀘𑀺𑀢𑁆𑀢𑀁 𑀯𑀼𑀢𑁆𑀢𑀁. 𑀦 𑀳𑀺 𑀘𑀺𑀢𑁆𑀢𑀲𑁆𑀲 𑀫𑀦𑁄 𑀅𑀢𑁆𑀣𑀻𑀢𑀺. 𑀅𑀢𑁆𑀢𑀫𑀦𑀲𑁆𑀲 𑀧𑀦 𑀧𑀼𑀕𑁆𑀕𑀮𑀲𑁆𑀲 𑀪𑀸𑀯𑁄 𑀅𑀢𑁆𑀢𑀫𑀦𑀢𑀸𑀢𑀺 𑀯𑀢𑁆𑀯𑀸 𑀧𑀼𑀦 𑀧𑀼𑀕𑁆𑀕𑀮𑀤𑀺𑀝𑁆𑀞𑀺𑀦𑀺𑀲𑁂𑀥𑀦𑀢𑁆𑀣𑀁 ‘‘𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁.

𑁧𑁧. 𑀦 𑀩𑀮𑀯𑀢𑀻, 𑀓𑀲𑁆𑀫𑀸 𑀅𑀯𑀝𑁆𑀞𑀺𑀢𑀺 𑀯𑀼𑀢𑁆𑀢𑀸𑀢𑀺? 𑀏𑀓𑀕𑁆𑀕𑀘𑀺𑀢𑁆𑀢𑁂𑀦 𑀧𑀸𑀡𑀯𑀥𑀸𑀤𑀺𑀓𑀭𑀡𑁂 𑀢𑀣𑀸 𑀅𑀯𑀝𑁆𑀞𑀸𑀦𑀫𑀢𑁆𑀢𑀪𑀸𑀯𑀢𑁄. 𑀯𑀺𑀭𑀽𑀧𑀁, 𑀯𑀺𑀯𑀺𑀥𑀁 𑀯𑀸 𑀲𑀁𑀳𑀭𑀡𑀁 𑀯𑀺𑀓𑀺𑀭𑀡𑀁 𑀯𑀺𑀲𑀸𑀳𑀸𑀭𑁄, 𑀲𑀁𑀳𑀭𑀡𑀁 𑀯𑀸 𑀲𑀫𑁆𑀧𑀺𑀡𑁆𑀟𑀦𑀁, 𑀢𑀤𑀪𑀸𑀯𑁄 𑀯𑀺𑀲𑀸𑀳𑀸𑀭𑁄.

𑁧𑁨. 𑀅𑀜𑁆𑀜𑀲𑁆𑀫𑀺𑀁 𑀧𑀭𑀺𑀬𑀸𑀬𑁂𑀢𑀺 𑀅𑀜𑁆𑀜𑀲𑁆𑀫𑀺𑀁 𑀓𑀸𑀭𑀡𑁂. 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁄 𑀤𑁆𑀯𑀺𑀦𑁆𑀦𑀁 𑀩𑀳𑀽𑀦𑀁 𑀯𑀸 𑀧𑀤𑀸𑀦𑀁 𑀏𑀓𑀲𑁆𑀫𑀺𑀁 𑀅𑀢𑁆𑀣𑁂 𑀧𑀯𑀢𑁆𑀢𑀺.

𑁧𑁩. 𑀆𑀭𑀫𑁆𑀪𑀢𑀺 𑀘𑀸𑀢𑀺 𑀆𑀧𑀚𑁆𑀚𑀢𑀺 𑀘. 𑀉𑀤𑁆𑀥𑀁 𑀬𑀫𑀦𑀁 𑀉𑀬𑁆𑀬𑀸𑀫𑁄. 𑀥𑀼𑀭𑀦𑁆𑀢𑀺 𑀦𑀺𑀧𑁆𑀨𑀸𑀤𑁂𑀢𑀼𑀁 𑀆𑀭𑀤𑁆𑀥𑀁 𑀓𑀼𑀲𑀮𑀁, 𑀧𑀝𑀺𑀜𑁆𑀜𑀁 𑀯𑀸.

𑁧𑁪. 𑀢𑀺𑀡𑁆𑀡𑀦𑁆𑀢𑀺 𑀩𑀼𑀤𑁆𑀥𑀸𑀤𑀻𑀦𑀁. 𑀘𑀺𑀢𑁆𑀢𑁂 𑀆𑀭𑀫𑁆𑀫𑀡𑀲𑁆𑀲 𑀉𑀧𑀝𑁆𑀞𑀸𑀦𑀁 𑀚𑁄𑀢𑀦𑀜𑁆𑀘 𑀲𑀢𑀺𑀬𑁂𑀯𑀸𑀢𑀺 𑀢𑀲𑁆𑀲𑀸 𑀏𑀢𑀁 𑀮𑀓𑁆𑀔𑀡𑀁.

𑁧𑁬. 𑀧𑀸𑀲𑀸𑀡𑀲𑀓𑁆𑀔𑀭𑀯𑀸𑀮𑀺𑀓𑀸𑀤𑀺𑀭𑀳𑀺𑀢𑀸 𑀪𑀽𑀫𑀺 𑀲𑀡𑁆𑀳𑀸𑀢𑀺 ‘‘𑀲𑀡𑁆𑀳𑀝𑁆𑀞𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑁧𑁯. 𑀅𑀬𑀦𑁆𑀢𑀻𑀢𑀺 𑀏𑀓𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀫𑀦𑀼𑀲𑁆𑀲𑀸𑀤𑀺𑀲𑀦𑁆𑀢𑀢𑀺𑀅𑀯𑀺𑀘𑁆𑀙𑁂𑀤𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀺. 𑀓𑀼𑀲𑀮𑀸𑀓𑀼𑀲𑀮𑁂𑀲𑀼𑀧𑀺 𑀳𑀺 𑀚𑀻𑀯𑀺𑀢𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀪𑀸𑀯𑁂𑀦 𑀲𑀫𑁆𑀧𑀬𑀼𑀢𑁆𑀢𑁂 𑀧𑀯𑀢𑁆𑀢𑀬𑀫𑀸𑀦𑀫𑁂𑀯 𑀢𑀤𑀯𑀺𑀘𑁆𑀙𑁂𑀤𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺.

𑁩𑁦. 𑀬𑀁 𑀳𑀺𑀭𑀻𑀬𑀢𑀻𑀢𑀺 𑀳𑀺𑀭𑀻𑀬𑀢𑀺-𑀲𑀤𑁆𑀤𑁂𑀦 𑀯𑀼𑀢𑁆𑀢𑁄 𑀪𑀸𑀯𑁄 𑀬𑀁-𑀲𑀤𑁆𑀤𑁂𑀦 𑀯𑀼𑀘𑁆𑀘𑀢𑀻𑀢𑀺 𑀬𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀁 𑀯𑀸 𑀏𑀢𑀁 𑀤𑀝𑁆𑀞𑀩𑁆𑀩𑀁. 𑀳𑀺𑀭𑀺𑀬𑀺𑀢𑀩𑁆𑀩𑁂𑀦𑀸𑀢𑀺 𑀘 𑀳𑁂𑀢𑀼𑀅𑀢𑁆𑀣𑁂 𑀓𑀭𑀡𑀯𑀘𑀦𑀁 𑀬𑀼𑀚𑁆𑀚𑀢𑀺.

𑁩𑁨. 𑀅𑀮𑀼𑀩𑁆𑀪𑀦𑀓𑀯𑀲𑁂𑀦𑀸𑀢𑀺 𑀏𑀢𑁆𑀣 𑀅𑀮𑀼𑀩𑁆𑀪𑀦𑀫𑁂𑀯 𑀅𑀮𑀼𑀩𑁆𑀪𑀦𑀓𑀦𑁆𑀢𑀺 𑀪𑀸𑀯𑀦𑀺𑀤𑁆𑀤𑁂𑀲𑁄 𑀤𑀝𑁆𑀞𑀩𑁆𑀩𑁄.

𑁩𑁩. 𑀅𑀩𑁆𑀬𑀸𑀧𑀚𑁆𑀚𑁄𑀢𑀺 𑀩𑁆𑀬𑀸𑀧𑀸𑀤𑁂𑀦 𑀤𑀼𑀓𑁆𑀔𑁂𑀦 𑀤𑁄𑀫𑀦𑀲𑁆𑀲𑀲𑀗𑁆𑀔𑀸𑀢𑁂𑀦 𑀤𑁄𑀲𑁂𑀦 𑀯𑀺𑀬 𑀦 𑀩𑁆𑀬𑀸𑀧𑀸𑀤𑁂𑀢𑀩𑁆𑀩𑁄𑀢𑀺𑀧𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺.

𑁪𑁨-𑁪𑁩. 𑀣𑀺𑀦𑀫𑀺𑀤𑁆𑀥𑀸𑀤𑀺𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀓𑀼𑀲𑀮𑀥𑀫𑁆𑀫𑁂 𑀅𑀦𑀺𑀘𑁆𑀘𑀸𑀤𑀺𑀫𑀦𑀲𑀺𑀓𑀸𑀭𑁂 𑀘 𑀲𑀻𑀖𑀁 𑀲𑀻𑀖𑀁 𑀧𑀭𑀺𑀯𑀢𑁆𑀢𑀦𑀲𑀫𑀢𑁆𑀣𑀢𑀸 𑀮𑀳𑀼𑀧𑀭𑀺𑀡𑀸𑀫𑀢𑀸, 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀜𑁆𑀳𑀺 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀢𑁆𑀢𑀸𑀦𑀁 𑀅𑀓𑀼𑀲𑀮𑀧𑁆𑀧𑀯𑀢𑁆𑀢𑀺 𑀧𑀓𑀢𑀺𑀪𑀽𑀢𑀸𑀢𑀺 𑀦 𑀢𑀢𑁆𑀣 𑀮𑀳𑀼𑀧𑀭𑀺𑀡𑀸𑀫𑀢𑀸𑀬 𑀅𑀢𑁆𑀣𑁄. 𑀢𑁂𑀲𑀜𑁆𑀘 𑀪𑀸𑀯𑁄 𑀕𑀭𑀼𑀢𑀸𑀬𑁂𑀯𑀸𑀢𑀺 𑀢𑀩𑁆𑀩𑀺𑀥𑀼𑀭𑀲𑀪𑀸𑀯𑀸𑀦𑀁 𑀮𑀳𑀼𑀢𑀸 𑀤𑀝𑁆𑀞𑀩𑁆𑀩𑀸. 𑀲𑀸 𑀳𑀺 𑀧𑀯𑀢𑁆𑀢𑀫𑀸𑀦𑀸 𑀲𑀻𑀖𑀁 𑀪𑀯𑀗𑁆𑀕𑀯𑀼𑀝𑁆𑀞𑀸𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺.

𑁪𑁪-𑁪𑁫. 𑀬𑁂 𑀘 𑀥𑀫𑁆𑀫𑀸 𑀫𑁄𑀳𑀲𑀫𑁆𑀧𑀬𑀼𑀢𑁆𑀢𑀸 𑀯𑀺𑀬 𑀅𑀯𑀺𑀧𑀦𑁆𑀦𑀮𑀳𑀼𑀢𑀸, 𑀢𑁂𑀲𑀜𑁆𑀘 𑀓𑀼𑀲𑀮𑀓𑀭𑀡𑁂 𑀅𑀧𑁆𑀧𑀝𑀺𑀖𑀸𑀢𑁄 𑀫𑀼𑀤𑀼𑀢𑀸. 𑀅𑀧𑁆𑀧𑀝𑀺𑀖𑀸𑀢𑁂𑀦 𑀫𑀼𑀤𑀼𑀢𑀸𑀤𑀺𑀭𑀽𑀧𑀲𑀤𑀺𑀲𑀢𑀸𑀬 𑀅𑀭𑀽𑀧𑀥𑀫𑁆𑀫𑀸𑀦𑀫𑁆𑀧𑀺 𑀫𑀼𑀤𑀼𑀢𑀸 𑀫𑀤𑁆𑀤𑀯𑀢𑀸𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁪𑁬-𑁪𑁭. 𑀲𑀺𑀦𑁂𑀳𑀯𑀲𑁂𑀦 𑀓𑀺𑀮𑀺𑀦𑁆𑀦𑀁 𑀅𑀢𑀺𑀫𑀼𑀤𑀼𑀓𑀁 𑀘𑀺𑀢𑁆𑀢𑀁 𑀅𑀓𑀫𑁆𑀫𑀜𑁆𑀜𑀁 𑀳𑁄𑀢𑀺 𑀯𑀺𑀮𑀻𑀦𑀁 𑀯𑀺𑀬 𑀲𑀼𑀯𑀡𑁆𑀡𑀁, 𑀫𑀸𑀦𑀸𑀤𑀺𑀯𑀲𑁂𑀦 𑀅𑀢𑀺𑀣𑀤𑁆𑀥𑀜𑁆𑀘 𑀅𑀢𑀸𑀧𑀺𑀢𑀁 𑀯𑀺𑀬 𑀲𑀼𑀯𑀡𑁆𑀡𑀁, 𑀬𑀁 𑀧𑀦𑀸𑀦𑀼𑀭𑀽𑀧𑀫𑀼𑀤𑀼𑀢𑀸𑀬𑀼𑀢𑁆𑀢𑀁, 𑀢𑀁 𑀓𑀫𑁆𑀫𑀜𑁆𑀜𑀁 𑀳𑁄𑀢𑀺 𑀬𑀼𑀢𑁆𑀢𑀫𑀤𑁆𑀤𑀯𑀁 𑀯𑀺𑀬 𑀲𑀼𑀯𑀡𑁆𑀡𑀁. 𑀢𑀲𑁆𑀲𑁂𑀯 𑀫𑀼𑀤𑀼𑀓𑀲𑁆𑀲 𑀬𑁄 𑀓𑀫𑁆𑀫𑀜𑁆𑀜𑀸𑀓𑀸𑀭𑁄, 𑀲𑀸 𑀓𑀫𑁆𑀫𑀜𑁆𑀜𑀢𑀸𑀢𑀺 𑀫𑀼𑀤𑀼𑀢𑀸𑀯𑀺𑀲𑀺𑀝𑁆𑀞𑀸 𑀓𑀫𑁆𑀫𑀜𑁆𑀜𑀢𑀸 𑀯𑁂𑀤𑀺𑀢𑀩𑁆𑀩𑀸.

𑁫𑁦-𑁫𑁧. 𑀧𑀘𑁆𑀘𑁄𑀲𑀓𑁆𑀓𑀦𑀪𑀸𑀯𑁂𑀦 𑀧𑀯𑀢𑁆𑀢𑀁 𑀅𑀓𑀼𑀲𑀮𑀫𑁂𑀯 𑀧𑀘𑁆𑀘𑁄𑀲𑀓𑁆𑀓𑀦𑀁. 𑀏𑀓𑀯𑀻𑀲𑀢𑀺 𑀅𑀦𑁂𑀲𑀦𑀸 𑀦𑀸𑀫 𑀯𑁂𑀚𑁆𑀚𑀓𑀫𑁆𑀫𑀁 𑀓𑀭𑁄𑀢𑀺, 𑀤𑀽𑀢𑀓𑀫𑁆𑀫𑀁 𑀓𑀭𑁄𑀢𑀺, 𑀧𑀳𑀺𑀡𑀓𑀫𑁆𑀫𑀁 𑀓𑀭𑁄𑀢𑀺, 𑀕𑀡𑁆𑀟𑀁 𑀨𑀸𑀮𑁂𑀢𑀺, 𑀅𑀭𑀼𑀫𑀓𑁆𑀔𑀦𑀁 𑀤𑁂𑀢𑀺, 𑀉𑀤𑁆𑀥𑀁𑀯𑀺𑀭𑁂𑀘𑀦𑀁 𑀤𑁂𑀢𑀺, 𑀅𑀥𑁄𑀯𑀺𑀭𑁂𑀘𑀦𑀁 𑀤𑁂𑀢𑀺, 𑀦𑀢𑁆𑀣𑀼𑀢𑁂𑀮𑀁 𑀧𑀘𑀢𑀺, 𑀘𑀓𑁆𑀔𑀼𑀢𑁂𑀮𑀁 𑀧𑀘𑀢𑀺, 𑀯𑁂𑀴𑀼𑀤𑀸𑀦𑀁 𑀤𑁂𑀢𑀺, 𑀧𑀡𑁆𑀡𑀤𑀸𑀦𑀁 𑀤𑁂𑀢𑀺, 𑀧𑀼𑀧𑁆𑀨𑀤𑀸𑀦𑀁 𑀤𑁂𑀢𑀺, 𑀨𑀮𑀤𑀸𑀦𑀁 𑀤𑁂𑀢𑀺, 𑀲𑀺𑀦𑀸𑀦𑀤𑀸𑀦𑀁 𑀤𑁂𑀢𑀺, 𑀤𑀦𑁆𑀢𑀓𑀝𑁆𑀞𑀤𑀸𑀦𑀁 𑀤𑁂𑀢𑀺, 𑀫𑀼𑀔𑁄𑀤𑀓𑀤𑀸𑀦𑀁 𑀤𑁂𑀢𑀺, 𑀘𑀼𑀡𑁆𑀡𑀤𑀸𑀦𑀁 𑀤𑁂𑀢𑀺, 𑀫𑀢𑁆𑀢𑀺𑀓𑀸𑀤𑀸𑀦𑀁 𑀤𑁂𑀢𑀺, 𑀘𑀸𑀝𑀼𑀓𑀓𑀫𑁆𑀫𑀁 𑀓𑀭𑁄𑀢𑀺, 𑀫𑀼𑀕𑁆𑀕𑀲𑀽𑀧𑀺𑀬𑀁, 𑀧𑀸𑀭𑀺𑀪𑀝𑁆𑀬𑀁, 𑀚𑀗𑁆𑀖𑀧𑁂𑀲𑀦𑀺𑀬𑀁 𑀤𑁆𑀯𑀸𑀯𑀻𑀲𑀢𑀺𑀫𑀁 𑀤𑀽𑀢𑀓𑀫𑁆𑀫𑁂𑀦 𑀲𑀤𑀺𑀲𑀁, 𑀢𑀲𑁆𑀫𑀸 𑀏𑀓𑀯𑀻𑀲𑀢𑀺. 𑀙 𑀅𑀕𑁄𑀘𑀭𑀸 𑀯𑁂𑀲𑀺𑀬𑀸𑀕𑁄𑀘𑀭𑁄, 𑀯𑀺𑀥𑀯𑀸, 𑀣𑀼𑀮𑁆𑀮𑀓𑀼𑀫𑀸𑀭𑀻, 𑀧𑀡𑁆𑀟𑀓, 𑀧𑀸𑀦𑀸𑀕𑀸𑀭, 𑀪𑀺𑀓𑁆𑀔𑀼𑀦𑀻𑀅𑀕𑁄𑀘𑀭𑁄𑀢𑀺. 𑀲𑀗𑁆𑀔𑁂𑀧𑀢𑁄𑀢𑀺 𑀲𑀭𑀽𑀧𑁂𑀦 𑀅𑀦𑀼𑀤𑁆𑀤𑀺𑀝𑁆𑀞𑀢𑁆𑀢𑀸 ‘‘𑀢𑀢𑁆𑀣 𑀓𑀢𑀫𑁄 𑀙𑀦𑁆𑀤𑁄’’𑀢𑀺𑀆𑀤𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 ‘‘𑀬𑁄 𑀙𑀦𑁆𑀤𑁄 𑀙𑀦𑁆𑀤𑀺𑀓𑀢𑀸’’𑀢𑀺𑀆𑀤𑀺𑀦𑀺𑀤𑁆𑀤𑁂𑀲𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 ‘‘𑀬𑁂 𑀯𑀸 𑀧𑀦𑀸’’𑀢𑀺 𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀅𑀢𑁆𑀣𑁄.

𑀦𑀺𑀤𑁆𑀤𑁂𑀲𑀯𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑁄𑀝𑁆𑀞𑀸𑀲𑀯𑀸𑀭𑀯𑀡𑁆𑀡𑀦𑀸

𑁫𑁮-𑁧𑁨𑁦. 𑀦𑀺𑀤𑁆𑀤𑁂𑀲𑀯𑀸𑀭𑁂 𑀧𑀼𑀘𑁆𑀙𑀸𑀤𑀻𑀦𑀁 𑀧𑀘𑁆𑀘𑁂𑀓𑀁 𑀅𑀦𑁂𑀓𑀢𑁆𑀢𑁂𑀧𑀺 𑀧𑀼𑀘𑁆𑀙𑀸𑀤𑀺𑀪𑀸𑀯𑁂𑀦 𑀏𑀓𑀢𑁆𑀢𑀁 𑀉𑀧𑀦𑁂𑀢𑁆𑀯𑀸 𑀘𑀢𑀼𑀧𑀭𑀺𑀘𑁆𑀙𑁂𑀤𑀢𑀸 𑀯𑀼𑀢𑁆𑀢𑀸. 𑀘𑀢𑁆𑀢𑀸𑀭𑁄 𑀤𑁆𑀯𑁂𑀢𑀺 𑀏𑀯𑀫𑀸𑀤𑀺𑀓𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀲𑀳 𑀯𑀸 𑀕𑀳𑀡𑀁 𑀲𑀗𑁆𑀕𑀳𑁄. 𑀞𑀧𑁂𑀢𑁆𑀯𑀸 𑀬𑁂𑀯𑀸𑀧𑀦𑀓𑁂𑀢𑀺 𑀲𑀗𑁆𑀕𑀳𑁂𑀢𑀩𑁆𑀩𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂 𑀳𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀉𑀤𑁆𑀤𑀺𑀝𑁆𑀞𑀢𑁆𑀢𑀸 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀘 𑀯𑀺𑀧𑁆𑀧𑀓𑀺𑀡𑁆𑀡𑀸𑀢𑀺 𑀲𑀗𑁆𑀕𑀳𑁂𑀢𑀩𑁆𑀩𑀸 𑀳𑁄𑀦𑁆𑀢𑀺, 𑀦 𑀬𑁂𑀯𑀸𑀧𑀦𑀓𑀸 𑀲𑀗𑁆𑀕𑀳𑀕𑀫𑀦𑁂𑀦𑁂𑀯 𑀢𑀣𑀸 𑀅𑀯𑀺𑀧𑁆𑀧𑀓𑀺𑀡𑁆𑀡𑀢𑁆𑀢𑀸. 𑀬𑀲𑁆𑀫𑀸 𑀧𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀁𑀦𑀺𑀤𑁆𑀤𑁂𑀲𑁂 𑀅𑀔𑀦𑁆𑀥𑀪𑀸𑀯𑀦𑀺𑀯𑀸𑀭𑀡𑀢𑁆𑀣𑀁 𑀬𑁂𑀯𑀸𑀧𑀦𑀸𑀢𑁆𑀯𑁂𑀯 𑀯𑀼𑀢𑁆𑀢𑀸𑀢𑀺 𑀦 𑀬𑁂𑀯𑀸𑀧𑀦𑀓𑀸 𑀞𑀧𑁂𑀢𑀩𑁆𑀩𑀸𑀢𑀺. 𑀧𑀘𑁆𑀘𑀬𑀲𑀗𑁆𑀔𑀸𑀢𑁂𑀦𑀸𑀢𑀺 𑀆𑀳𑀸𑀭𑀧𑀘𑁆𑀘𑀬𑀲𑀗𑁆𑀔𑀸𑀢𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 ‘‘𑀳𑁂𑀢𑀼 𑀧𑀘𑁆𑀘𑀬𑁄’’𑀢𑀺 𑀏𑀢𑁂𑀲𑀼 𑀤𑁆𑀯𑀻𑀲𑀼 𑀚𑀦𑀓𑁄 𑀳𑁂𑀢𑀼 𑀉𑀧𑀢𑁆𑀣𑀫𑁆𑀪𑀓𑁄 𑀧𑀘𑁆𑀘𑀬𑁄𑀢𑀺 𑀏𑀯𑀁 𑀯𑀺𑀲𑁂𑀲𑀯𑀦𑁆𑀢𑁂𑀲𑀼 𑀧𑀘𑁆𑀘𑀬𑀲𑀗𑁆𑀔𑀸𑀢𑁂𑀦. 𑀬𑀣𑀸 𑀳𑀺 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀑𑀚𑀝𑁆𑀞𑀫𑀓𑀭𑀽𑀧𑀸𑀳𑀭𑀡𑁂𑀦 𑀭𑀽𑀧𑀓𑀸𑀬𑀁 𑀉𑀧𑀢𑁆𑀣𑀫𑁆𑀪𑁂𑀢𑀺, 𑀏𑀯𑀫𑀺𑀫𑁂𑀧𑀺 𑀯𑁂𑀤𑀦𑀸𑀤𑀺𑀆𑀳𑀭𑀡𑁂𑀦 𑀦𑀸𑀫𑀓𑀸𑀬𑀦𑁆𑀢𑀺. 𑀢𑀣𑀸 𑀘 𑀳𑁄𑀦𑁆𑀢𑀻𑀢𑀺 𑀲𑀸𑀥𑀸𑀭𑀡𑁂 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁂 𑀲𑀦𑁆𑀥𑀸𑀬𑀸𑀳. 𑀅𑀜𑁆𑀜𑀣𑀸 𑀘𑀸𑀢𑀺 𑀅𑀜𑁆𑀜𑁂𑀦 𑀘 𑀏𑀓𑁂𑀦𑀸𑀓𑀸𑀭𑁂𑀦 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺𑀬𑁂𑀯𑀸𑀢𑀺 𑀆𑀳𑀸𑀭𑀸𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀆𑀳𑀭𑀡𑀓𑀺𑀘𑁆𑀘𑀭𑀳𑀺𑀢𑀸𑀦𑀁 𑀳𑁂𑀢𑀼𑀅𑀥𑀺𑀧𑀢𑀺𑀆𑀤𑀻𑀦𑀁 𑀦𑀢𑁆𑀣𑀺 𑀆𑀳𑀸𑀭𑀪𑀸𑀯𑀧𑁆𑀧𑀲𑀗𑁆𑀕𑁄. 𑀢𑀺𑀲𑁆𑀲𑁄 𑀘 𑀯𑁂𑀤𑀦𑀸 𑀆𑀳𑀭𑀢𑀻𑀢𑀺𑀆𑀤𑀺 𑀬𑀣𑀸𑀲𑀫𑁆𑀪𑀯𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀇𑀫𑀲𑁆𑀫𑀺𑀁𑀬𑁂𑀯 𑀘𑀺𑀢𑁆𑀢𑁂 𑀨𑀲𑁆𑀲𑀸𑀤𑀺𑀯𑀲𑁂𑀦. 𑀢𑀬𑁄 𑀘 𑀪𑀯𑁂𑀢𑀺 𑀓𑀸𑀫𑀸𑀤𑀺𑀪𑀯𑀪𑀽𑀢𑀁 𑀯𑀺𑀜𑁆𑀜𑀸𑀡𑀁 𑀯𑀺𑀲𑁂𑀲𑁂𑀦, 𑀅𑀯𑀺𑀲𑁂𑀲𑁂𑀦 𑀘 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂.

𑀆𑀭𑀫𑁆𑀫𑀡𑀁 𑀉𑀧𑀕𑀦𑁆𑀢𑁆𑀯𑀸 𑀦𑀺𑀚𑁆𑀛𑀸𑀬𑀦𑀁 𑀘𑀺𑀦𑁆𑀢𑀦𑀁 𑀉𑀧𑀦𑀺𑀚𑁆𑀛𑀸𑀬𑀦𑀁. 𑀳𑁂𑀢𑁆𑀯𑀝𑁆𑀞𑁂𑀦𑀸𑀢𑀺 𑀉𑀧𑀸𑀬𑀢𑁆𑀣𑁂𑀦, 𑀦 𑀫𑀽𑀮𑀢𑁆𑀣𑁂𑀦. 𑀧𑀼𑀩𑁆𑀩𑀪𑀸𑀕𑁂 𑀕𑀢𑁄 𑀧𑀝𑀺𑀧𑀦𑁆𑀦𑁄 𑀦𑀸𑀦𑀸𑀓𑁆𑀔𑀡𑀺𑀓𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀮𑁄𑀓𑀼𑀢𑁆𑀢𑀭𑀓𑁆𑀔𑀡𑁂𑀯 𑀲𑀳 𑀧𑀯𑀢𑁆𑀢𑁄 𑀬𑀣𑀸𑀕𑀢𑀫𑀕𑁆𑀕𑁄𑀢𑀺 𑀯𑀼𑀢𑁆𑀢𑁄. 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑀢𑁄 𑀧𑀼𑀩𑁆𑀩𑁂𑀯 𑀓𑀸𑀬𑀓𑀫𑁆𑀫𑀸𑀤𑀻𑀦𑀁 𑀲𑀼𑀧𑀭𑀺𑀲𑀼𑀤𑁆𑀥𑀢𑀸𑀬 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀼𑀧𑀦𑀺𑀲𑁆𑀲𑀬𑀲𑁆𑀲 ‘‘𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀻’’𑀢𑀺 (𑀫. 𑀦𑀺. 𑁩.𑁪𑁩𑁧) 𑀏𑀯𑀁 𑀯𑀼𑀢𑁆𑀢𑁂𑀦 𑀧𑀭𑀺𑀬𑀸𑀬𑁂𑀦 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀢𑀸 𑀬𑀣𑀸𑀕𑀢𑀯𑀘𑀦𑁂𑀦 𑀤𑀻𑀧𑀺𑀢𑀸, 𑀦 𑀏𑀓𑀓𑁆𑀔𑀡𑁂 𑀅𑀝𑁆𑀞𑀦𑁆𑀦𑀁 𑀅𑀗𑁆𑀕𑀸𑀦𑀁 𑀲𑀩𑁆𑀪𑀸𑀯𑀸𑀢𑀺 𑀏𑀯𑀫𑀲𑁆𑀲𑀧𑀺 𑀧𑀭𑀺𑀬𑀸𑀬𑀤𑁂𑀲𑀦𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀚𑀸𑀦𑀦𑀫𑁂𑀯 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀢𑀸𑀢𑀺 ‘‘𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀝𑁆𑀞𑁂𑀦 𑀏𑀓𑁄𑀯 𑀥𑀫𑁆𑀫𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺 𑀆𑀳. 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀳𑁄𑀦𑁆𑀢𑀻𑀢𑀺𑀆𑀤𑀻𑀲𑀼 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀦𑀁 𑀲𑀗𑁆𑀕𑀳𑁂 𑀓𑀢𑁂𑀧𑀺 𑀧𑀼𑀦 ‘‘𑀏𑀓𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀳𑁄𑀢𑀻’’𑀢𑀺𑀆𑀤𑀺𑀯𑀘𑀦𑀁 𑀦 𑀅𑀦𑁂𑀓𑁂 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄 𑀚𑀸𑀢𑀺𑀦𑀺𑀤𑁆𑀤𑁂𑀲𑁂𑀦 𑀇𑀥 𑀯𑀼𑀢𑁆𑀢𑀸𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀇𑀦𑁆𑀤𑁆𑀭𑀺𑀬𑁂𑀲𑀼 𑀘 𑀏𑀓𑀲𑁆𑀲 𑀚𑀸𑀢𑀺𑀦𑀺𑀤𑁆𑀤𑁂𑀲𑀪𑀸𑀯𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀅𑀜𑁆𑀜𑁂𑀲𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀆𑀳𑀸𑀭𑀸𑀤𑀻𑀦𑀜𑁆𑀘 𑀢𑀧𑁆𑀧𑀝𑀺𑀓𑁆𑀔𑁂𑀧𑁄 𑀓𑀢𑁄 𑀳𑁄𑀢𑀻𑀢𑀺 𑀧𑀼𑀩𑁆𑀩𑀗𑁆𑀕𑀫𑀲𑁆𑀲 𑀫𑀦𑀺𑀦𑁆𑀤𑁆𑀭𑀺𑀬𑀲𑁆𑀲𑁂𑀯 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀓𑁄𑀝𑁆𑀞𑀸𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀜𑁆𑀜𑀢𑀯𑀸𑀭𑀯𑀡𑁆𑀡𑀦𑀸

𑁧𑁨𑁧-𑁧𑁪𑁫. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀬𑀣𑀸𑀯𑀼𑀢𑁆𑀢𑁂 𑀲𑀫𑀬𑁂, 𑀏𑀢𑁂𑀲𑀼 𑀯𑀸 𑀥𑀫𑁆𑀫𑁂𑀲𑀼. 𑀪𑀸𑀯𑁄𑀢𑀺 𑀲𑀢𑁆𑀢𑁄, 𑀬𑁄 𑀓𑁄𑀘𑀺 𑀯𑀸 𑀅𑀢𑁆𑀣𑁄.

𑀤𑀼𑀢𑀺𑀬𑀘𑀺𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁪𑁬. 𑀲𑀧𑁆𑀧𑀬𑁄𑀕𑁂𑀦𑀸𑀢𑀺 𑀮𑀻𑀦𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀲𑁆𑀲𑀸𑀳𑀦𑀧𑀬𑁄𑀕𑀲𑀳𑀺𑀢𑁂𑀦. 𑀲𑀉𑀧𑀸𑀬𑁂𑀦𑀸𑀢𑀺 𑀓𑀼𑀲𑀮𑀲𑁆𑀲 𑀓𑀭𑀡𑀸𑀓𑀭𑀡𑁂𑀲𑀼 𑀆𑀤𑀻𑀦𑀯𑀸𑀦𑀺𑀲𑀁𑀲𑀧𑀘𑁆𑀘𑀯𑁂𑀓𑁆𑀔𑀡𑀁 𑀧𑀭𑁂𑀳𑀺 𑀉𑀲𑁆𑀲𑀸𑀳𑀦𑀦𑁆𑀢𑀺 𑀏𑀯𑀫𑀸𑀤𑀺𑀉𑀧𑀸𑀬𑀲𑀳𑀺𑀢𑁂𑀦.

𑁧𑁫𑁬-𑁧𑁫𑁯. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀅𑀦𑀼𑀜𑁆𑀜𑀸𑀢𑀸 𑀦𑀸𑀢𑀺𑀲𑀫𑀸𑀳𑀺𑀢𑀸𑀬 𑀪𑀸𑀯𑀦𑀸𑀬𑀸𑀢𑀺 𑀬𑁂𑀯𑀸𑀧𑀦𑀓𑁂𑀳𑀺𑀧𑀺 𑀦𑀺𑀩𑁆𑀩𑀺𑀲𑁂𑀲𑀢𑀁 𑀤𑀲𑁆𑀲𑁂𑀢𑀺.

𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑀅𑀧𑀘𑀺𑀢𑀺 𑀏𑀯 𑀅𑀧𑀘𑀺𑀢𑀺𑀲𑀳𑀕𑀢𑀁 𑀧𑀼𑀜𑁆𑀜𑀓𑀺𑀭𑀺𑀬𑀸𑀯𑀢𑁆𑀣𑀼 𑀬𑀣𑀸 ‘‘𑀦𑀦𑁆𑀤𑀺𑀭𑀸𑀕𑀲𑀳𑀕𑀢𑀸’’𑀢𑀺. 𑀅𑀧𑀘𑀺𑀢𑀺 𑀯𑀸 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀓𑀥𑀫𑁆𑀫𑀸 𑀓𑀸𑀬𑀯𑀘𑀻𑀓𑀺𑀭𑀺𑀬𑀸 𑀯𑀸, 𑀢𑀁𑀲𑀳𑀺𑀢𑀸 𑀘𑁂𑀢𑀦𑀸 𑀅𑀧𑀘𑀺𑀢𑀺𑀲𑀳𑀕𑀢𑀁. 𑀳𑀺𑀢𑀨𑀭𑀡𑁂𑀦𑀸𑀢𑀺 𑀤𑁂𑀲𑀓𑁂 𑀫𑁂𑀢𑁆𑀢𑀸𑀨𑀭𑀡𑁂𑀦, ‘‘𑀏𑀯𑀁 𑀫𑁂 𑀳𑀺𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀯𑀢𑁆𑀢𑁂𑀦 𑀳𑀺𑀢𑀘𑀺𑀢𑁆𑀢𑁂𑀦 𑀯𑀸. 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑀁 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀁. 𑀦𑀺𑀬𑀫𑀮𑀓𑁆𑀔𑀡𑀦𑁆𑀢𑀺 𑀫𑀳𑀧𑁆𑀨𑀮𑀢𑀸𑀦𑀺𑀬𑀫𑀲𑁆𑀲 𑀮𑀓𑁆𑀔𑀡𑀁. 𑀲𑀻𑀮𑀫𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺 𑀘𑀸𑀭𑀺𑀢𑁆𑀢𑀯𑀲𑁂𑀦. 𑀅𑀦𑀯𑀚𑁆𑀚𑀯𑀢𑁆𑀣𑀼𑀁 𑀧𑀭𑀺𑀘𑁆𑀘𑀚𑀦𑁆𑀢𑁄 𑀯𑀺𑀬 𑀅𑀩𑁆𑀪𑀦𑀼𑀫𑁄𑀤𑀫𑀸𑀦𑁄𑀧𑀺 𑀧𑀭𑀲𑁆𑀲 𑀲𑀫𑁆𑀧𑀢𑁆𑀢𑀺𑀬𑀸 𑀫𑁄𑀤𑀢𑀻𑀢𑀺 𑀅𑀩𑁆𑀪𑀦𑀼𑀫𑁄𑀤𑀦𑀸 𑀤𑀸𑀦𑀫𑀬𑁂 𑀲𑀗𑁆𑀕𑀳𑀺𑀢𑀸. 𑀪𑀸𑀯𑁂𑀦𑁆𑀢𑁄𑀧𑀻𑀢𑀺 𑀅𑀲𑀫𑀢𑁆𑀢𑀪𑀸𑀯𑀦𑀁 𑀲𑀦𑁆𑀥𑀸𑀬𑀸𑀳. 𑀲𑀫𑀢𑁆𑀢𑀸 𑀳𑀺 𑀅𑀧𑁆𑀧𑀦𑀸 𑀳𑁄𑀢𑀻𑀢𑀺. 𑀅𑀝𑁆𑀞𑁂𑀯 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸𑀢𑀺 𑀏𑀓𑀲𑁆𑀲 𑀲𑀢𑁆𑀢𑀲𑁆𑀲 𑀏𑀓𑀲𑁆𑀫𑀺𑀁 𑀔𑀡𑁂 𑀉𑀧𑁆𑀧𑀦𑁆𑀦𑀫𑁂𑀓𑀁 𑀧𑀞𑀫𑀘𑀺𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀅𑀜𑁆𑀜𑀸𑀦𑀺 𑀢𑀸𑀤𑀺𑀲𑀸𑀦𑀺 𑀅𑀤𑀲𑁆𑀲𑁂𑀦𑁆𑀢𑁂𑀦 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀲𑀭𑀺𑀓𑁆𑀔𑀝𑁆𑀞𑁂𑀦 𑀏𑀓𑀻𑀓𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀣𑀸 𑀲𑁂𑀲𑀸𑀦𑀺𑀧𑀻𑀢𑀺 𑀏𑀯𑀁 𑀅𑀝𑁆𑀞 𑀓𑀢𑁆𑀯𑀸.

𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀭𑀽𑀧𑀸𑀯𑀘𑀭𑀓𑀼𑀲𑀮𑀁

𑀘𑀢𑀼𑀓𑁆𑀓𑀦𑀬𑁄

𑀧𑀞𑀫𑀚𑁆𑀛𑀸𑀦𑀓𑀣𑀸𑀯𑀡𑁆𑀡𑀦𑀸

𑁧𑁬𑁦. 𑀉𑀢𑁆𑀢𑀭𑀧𑀤𑀮𑁄𑀧𑀁 𑀓𑀢𑁆𑀯𑀸 𑀭𑀽𑀧𑀪𑀯𑁄 𑀭𑀽𑀧𑀦𑁆𑀢𑀺 𑀯𑀼𑀢𑁆𑀢𑁄. 𑀛𑀸𑀦𑀲𑁆𑀲 𑀅𑀫𑀕𑁆𑀕𑀪𑀸𑀯𑁂𑀧𑀺 𑀲𑀢𑀺 𑀫𑀕𑁆𑀕𑀯𑀘𑀦𑀁 𑀅𑀜𑁆𑀜𑀫𑀕𑁆𑀕𑀪𑀸𑀯𑀦𑀺𑀯𑀸𑀭𑀡𑀢𑁆𑀣𑀦𑁆𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀫𑀕𑁆𑀕𑀕𑁆𑀕𑀳𑀡𑀲𑁆𑀲 𑀧𑀬𑁄𑀚𑀦𑀁 𑀯𑀼𑀢𑁆𑀢𑀁, 𑀦 𑀲𑀩𑁆𑀩𑀲𑁆𑀲 𑀓𑀼𑀲𑀮𑀚𑁆𑀛𑀸𑀦𑀲𑁆𑀲 𑀫𑀕𑁆𑀕𑀪𑀸𑀯𑁄𑀢𑀺. 𑀢𑀢𑁆𑀣 𑀫𑀕𑁆𑀕𑀲𑁆𑀲 𑀪𑀸𑀯𑀦𑀸𑀬 𑀲𑀫𑀬𑀯𑀯𑀢𑁆𑀣𑀸𑀦𑀲𑁆𑀲 𑀓𑀢𑀢𑁆𑀢𑀸 𑀅𑀫𑀕𑁆𑀕𑀪𑀸𑀯𑀦𑀸𑀲𑀫𑀬𑁂 𑀧𑀯𑀢𑁆𑀢𑀸𑀦𑀁 𑀨𑀲𑁆𑀲𑀸𑀤𑀻𑀦𑀁 𑀓𑀼𑀲𑀮𑀪𑀸𑀯𑁄 𑀦 𑀤𑀲𑁆𑀲𑀺𑀢𑁄 𑀲𑀺𑀬𑀸, 𑀢𑀲𑁆𑀫𑀸 𑀲𑀩𑁆𑀩𑀲𑁆𑀲 𑀫𑀕𑁆𑀕𑀪𑀸𑀯𑁄 𑀤𑀲𑁆𑀲𑁂𑀢𑀩𑁆𑀩𑁄𑀢𑀺. 𑀇𑀢𑁄 𑀅𑀜𑁆𑀜𑁄 𑀫𑀕𑁆𑀕𑁄 𑀦𑀢𑁆𑀣𑀻𑀢𑀺 𑀏𑀯𑀁 𑀅𑀜𑁆𑀜𑀪𑀽𑀫𑀺𑀓𑀯𑀺𑀥𑀼𑀭𑁄 𑀲𑀢𑀺 𑀧𑀘𑁆𑀘𑀬𑀦𑁆𑀢𑀭𑁂 𑀭𑀽𑀧𑀽𑀧𑀧𑀢𑁆𑀢𑀺𑀚𑀦𑀓𑀲𑀪𑀸𑀯𑁄 𑀯𑀺𑀧𑀸𑀓𑀥𑀫𑁆𑀫𑀲𑀪𑀸𑀯𑁄 𑀯𑀺𑀬 𑀯𑀺𑀧𑀸𑀓𑀥𑀫𑁆𑀫𑀯𑀲𑁂𑀦 𑀲𑀩𑁆𑀩𑀲𑀫𑀸𑀦𑁄 𑀫𑀕𑁆𑀕𑀲𑀤𑁆𑀤𑁂𑀦 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀼𑀲𑀮𑀁 𑀤𑀸𑀦𑀦𑁆𑀢𑀺 𑀅𑀮𑁄𑀪𑁄 𑀤𑀝𑁆𑀞𑀩𑁆𑀩𑁄. 𑀅𑀣 𑀯𑀸 𑀘𑁂𑀢𑀦𑀸 𑀤𑀸𑀦𑀁, 𑀢𑀁 𑀯𑀚𑁆𑀚𑁂𑀢𑁆𑀯𑀸 𑀇𑀢𑀭𑁂 𑀤𑁆𑀯𑁂 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀓𑀸𑀢𑀺 𑀯𑀼𑀢𑁆𑀢𑀸. 𑀯𑀝𑁆𑀝𑀦𑁆𑀢𑀻𑀢𑀺 𑀫𑀕𑁆𑀕𑀪𑀸𑀯𑀢𑁄 𑀛𑀸𑀦𑀯𑀘𑀦𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀫𑀕𑁆𑀕𑁄𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀑𑀓𑀧𑁆𑀧𑀦𑀸𑀢𑀺 𑀲𑀤𑁆𑀤𑀳𑀦𑀸. 𑀅𑀜𑁆𑀜𑀢𑁆𑀣 𑀤𑀺𑀝𑁆𑀞𑀁 𑀅𑀢𑁆𑀣𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 ‘‘𑀚𑀦𑁂𑀢𑀺 𑀯𑀟𑁆𑀠𑁂𑀢𑀻’’𑀢𑀺 𑀅𑀬𑀫𑀢𑁆𑀣𑁄 𑀓𑀲𑁆𑀫𑀸 𑀯𑀼𑀢𑁆𑀢𑁄𑀢𑀺 𑀦𑀺𑀭𑀼𑀧𑀲𑀕𑁆𑀕𑀲𑁆𑀲 𑀅𑀜𑁆𑀜𑀢𑁆𑀣 𑀏𑀯𑀫𑀢𑁆𑀣𑀲𑁆𑀲𑁂𑀯 𑀤𑀺𑀝𑁆𑀞𑀢𑁆𑀢𑀸𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀧𑀼𑀦 𑀘𑀧𑀭𑀁 𑀉𑀤𑀸𑀬𑀻’’𑀢𑀺 (𑀫. 𑀦𑀺. 𑁨.𑁨𑁪𑁬 𑀆𑀤𑀬𑁄) 𑀲𑀼𑀢𑁆𑀢𑀫𑀸𑀳𑀝𑀁. 𑀓𑁂𑀲𑀜𑁆𑀘𑀺 𑀅𑀭𑀺𑀬𑀸𑀦𑀁 𑀅𑀭𑀺𑀬𑀫𑀕𑁆𑀕𑁂𑀦 𑀲𑀺𑀤𑁆𑀥𑀸𑀦𑀺 𑀅𑀜𑁆𑀜𑀸𑀦𑀺 𑀘 𑀛𑀸𑀦𑀸𑀦𑀺 𑀪𑀸𑀯𑀦𑀸𑀲𑀪𑀸𑀯𑀸𑀦𑁂𑀯𑀸𑀢𑀺 𑀢𑁂𑀲𑀼𑀧𑀺 𑀪𑀸𑀯𑁂𑀦𑁆𑀢𑁂𑀦 𑀲𑀫𑀬𑀯𑀯𑀢𑁆𑀣𑀸𑀦𑀁 𑀇𑀚𑁆𑀛𑀢𑀻𑀢𑀺.

𑀦𑀺𑀲𑁆𑀲𑀭𑀦𑁆𑀢𑀺 𑀦𑀺𑀕𑁆𑀕𑀘𑁆𑀙𑀦𑁆𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸𑀢𑀺 𑀦𑀺𑀲𑁆𑀲𑀭𑀡𑀁. 𑀓𑁂 𑀦𑀺𑀕𑁆𑀕𑀘𑁆𑀙𑀦𑁆𑀢𑀺? 𑀓𑀸𑀫𑀸. 𑀢𑁂𑀲𑀁 𑀓𑀸𑀫𑀸𑀦𑀁 𑀦𑀺𑀲𑁆𑀲𑀭𑀡𑀁 𑀧𑀳𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀜𑁆𑀳𑀺 ‘‘𑀓𑀸𑀫𑀸𑀦’’𑀦𑁆𑀢𑀺 𑀓𑀢𑁆𑀢𑀭𑀺 𑀲𑀸𑀫𑀺𑀯𑀘𑀦𑀁 𑀬𑀼𑀚𑁆𑀚𑀢𑀺. 𑀯𑀢𑁆𑀣𑀼𑀓𑀸𑀫𑁂𑀳𑀺𑀧𑀻𑀢𑀺 𑀯𑀢𑁆𑀣𑀼𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘𑁂𑀯𑀸𑀢𑀺𑀧𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀻𑀢𑀺 𑀏𑀯𑀁 𑀬𑀼𑀚𑁆𑀚𑀫𑀸𑀦𑀢𑁆𑀣𑀦𑁆𑀢𑀭𑀲𑀫𑀼𑀘𑁆𑀘𑀬𑀢𑁆𑀣𑁄 𑀧𑀺-𑀲𑀤𑁆𑀤𑁄, 𑀦 𑀓𑀺𑀮𑁂𑀲𑀓𑀸𑀫𑀲𑀫𑀼𑀘𑁆𑀘𑀬𑀢𑁆𑀣𑁄. 𑀓𑀲𑁆𑀫𑀸? 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀓𑀺𑀮𑁂𑀲𑀓𑀸𑀫𑀸𑀦𑀁 𑀤𑀼𑀢𑀺𑀬𑀧𑀤𑁂𑀦 𑀯𑀺𑀯𑁂𑀓𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀅𑀓𑀼𑀲𑀮𑀲𑀤𑁆𑀤𑁂𑀦 𑀬𑀤𑀺𑀧𑀺 𑀓𑀺𑀮𑁂𑀲𑀓𑀸𑀫𑀸, 𑀅𑀣𑀸𑀧𑀺 𑀲𑀩𑁆𑀩𑀸𑀓𑀼𑀲𑀮𑀸 𑀕𑀳𑀺𑀢𑀸, 𑀲𑀩𑁆𑀩𑀣𑀸 𑀧𑀦 𑀓𑀺𑀮𑁂𑀲𑀓𑀸𑀫𑁂𑀳𑀺 𑀯𑀺𑀯𑁂𑀓𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀤𑀼𑀢𑀺𑀬𑁂𑀦 𑀓𑀺𑀮𑁂𑀲𑀓𑀸𑀫𑁂𑀳𑀺 𑀯𑀺𑀯𑁂𑀓𑀯𑀘𑀦𑀢𑁄’’𑀢𑀺. 𑀓𑀸𑀫𑀕𑀼𑀡𑀸𑀥𑀺𑀕𑀫𑀳𑁂𑀢𑀼𑀧𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀲𑀼𑀤𑁆𑀥𑀧𑁆𑀧𑀬𑁄𑀕𑁄 𑀳𑁄𑀢𑀻𑀢𑀺 𑀢𑀩𑁆𑀩𑀺𑀯𑁂𑀓𑁂𑀦 𑀧𑀬𑁄𑀕𑀲𑀼𑀤𑁆𑀥𑀺 𑀯𑀺𑀪𑀸𑀯𑀺𑀢𑀸. 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀲𑁄𑀥𑀦𑁂𑀦 𑀆𑀲𑀬𑀧𑁄𑀲𑀦𑀁.

𑀅𑀜𑁆𑀜𑁂𑀲𑀫𑁆𑀧𑀺 𑀘𑀸𑀢𑀺 𑀤𑀺𑀝𑁆𑀞𑀺𑀫𑀸𑀦𑀸𑀤𑀻𑀦𑀁 𑀨𑀲𑁆𑀲𑀸𑀤𑀻𑀦𑀜𑁆𑀘. 𑀉𑀧𑀭𑀺 𑀯𑀼𑀘𑁆𑀘𑀫𑀸𑀦𑀸𑀦𑀺 𑀛𑀸𑀦𑀗𑁆𑀕𑀸𑀦𑀺 𑀉𑀧𑀭𑀺𑀚𑁆𑀛𑀸𑀦𑀗𑁆𑀕𑀸𑀦𑀺, 𑀢𑁂𑀲𑀁 𑀅𑀢𑁆𑀢𑀦𑁄 𑀯𑀺𑀧𑀘𑁆𑀘𑀦𑀻𑀓𑀸𑀦𑀁 𑀧𑀝𑀺𑀧𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀢𑀧𑁆𑀧𑀘𑁆𑀘𑀦𑀻𑀓𑀦𑀻𑀯𑀭𑀡𑀯𑀘𑀦𑀁. 𑀩𑁆𑀬𑀸𑀧𑀸𑀤𑀯𑀺𑀯𑁂𑀓𑀯𑀘𑀦𑁂𑀦 ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻’’𑀢𑀺𑀆𑀤𑀺𑀆𑀖𑀸𑀢𑀯𑀢𑁆𑀣𑀼𑀪𑁂𑀤𑀯𑀺𑀲𑀬𑀲𑁆𑀲 𑀤𑁄𑀲𑀲𑁆𑀲 𑀫𑁄𑀳𑀸𑀥𑀺𑀓𑀸𑀦𑀁 𑀣𑀺𑀦𑀫𑀺𑀤𑁆𑀥𑀸𑀤𑀻𑀦𑀁 𑀯𑀺𑀯𑁂𑀓𑀯𑀘𑀦𑁂𑀦 𑀧𑀝𑀺𑀘𑁆𑀙𑀸𑀤𑀦𑀯𑀲𑁂𑀦 𑀤𑀼𑀓𑁆𑀔𑀸𑀤𑀺𑀧𑀼𑀩𑁆𑀩𑀦𑁆𑀢𑀸𑀤𑀺𑀪𑁂𑀤𑀯𑀺𑀲𑀬𑀲𑁆𑀲 𑀫𑁄𑀳𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄 𑀯𑀼𑀢𑁆𑀢𑁄. 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀢𑀤𑁂𑀓𑀝𑁆𑀞𑀣𑀺𑀦𑀫𑀺𑀤𑁆𑀥𑀸𑀤𑀺𑀯𑀺𑀓𑁆𑀔𑀫𑁆𑀪𑀦𑀓𑀜𑁆𑀘𑁂𑀤𑀁 𑀲𑀩𑁆𑀩𑀸𑀓𑀼𑀲𑀮𑀧𑀝𑀺𑀧𑀓𑁆𑀔𑀲𑀪𑀸𑀯𑀢𑁆𑀢𑀸 𑀲𑀩𑁆𑀩𑀓𑀼𑀲𑀮𑀸𑀦𑀁 𑀢𑁂𑀦 𑀲𑀪𑀸𑀯𑁂𑀦 𑀲𑀩𑁆𑀩𑀸𑀓𑀼𑀲𑀮𑀸𑀦𑀁 𑀧𑀳𑀸𑀦𑀁 𑀳𑁄𑀦𑁆𑀢𑀫𑁆𑀧𑀺 𑀓𑀸𑀫𑀭𑀸𑀕𑀸𑀤𑀺𑀯𑀺𑀓𑁆𑀔𑀫𑁆𑀪𑀦𑀲𑀪𑀸𑀯𑀫𑁂𑀯𑀸𑀢𑀺 𑀢𑀁𑀲𑀪𑀸𑀯𑀢𑁆𑀢𑀸 𑀅𑀯𑀺𑀲𑁂𑀲𑁂𑀢𑁆𑀯𑀸 𑀦𑀻𑀯𑀭𑀡𑀸𑀓𑀼𑀲𑀮𑀫𑀽𑀮𑀸𑀤𑀻𑀦𑀁 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺 𑀆𑀳.

𑀯𑀺𑀢𑀓𑁆𑀓𑀲𑁆𑀲 𑀓𑀺𑀘𑁆𑀘𑀯𑀺𑀲𑁂𑀲𑁂𑀦 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑁂 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺𑀫𑁆𑀳𑀺 𑀧𑀘𑁆𑀘𑀦𑀻𑀓𑀤𑀽𑀭𑀻𑀪𑀸𑀯𑀓𑀢𑁂𑀦 𑀣𑀺𑀭𑀪𑀸𑀯𑁂𑀦 𑀢𑀁𑀲𑀤𑀺𑀲𑁂𑀲𑀼 𑀯𑀺𑀢𑀓𑁆𑀓𑀭𑀳𑀺𑀢𑁂𑀲𑀼 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀲𑀫𑀸𑀥𑀻𑀲𑀼 𑀘 𑀅𑀧𑁆𑀧𑀦𑀸𑀢𑀺 𑀅𑀝𑁆𑀞𑀓𑀣𑀸𑀯𑁄𑀳𑀸𑀭𑁄𑀢𑀺 𑀯𑀺𑀢𑀓𑁆𑀓𑀲𑁆𑀲 𑀅𑀧𑁆𑀧𑀦𑀸𑀬𑁄𑀕𑁄 𑀯𑀼𑀢𑁆𑀢𑁄, 𑀅𑀜𑁆𑀜𑀣𑀸 𑀯𑀺𑀢𑀓𑁆𑀓𑁄𑀯 𑀅𑀧𑁆𑀧𑀦𑀸𑀢𑀺 𑀢𑀲𑁆𑀲 𑀢𑀁𑀲𑀫𑁆𑀧𑀬𑁄𑀕𑁄 𑀦 𑀲𑀺𑀬𑀸𑀢𑀺. 𑀅𑀢𑁆𑀣𑁄…𑀧𑁂… 𑀤𑀝𑁆𑀞𑀩𑁆𑀩𑁄 𑀛𑀸𑀦𑀲𑀫𑀗𑁆𑀕𑀺𑀦𑁄 𑀯𑀺𑀢𑀓𑁆𑀓𑀯𑀺𑀘𑀸𑀭𑀲𑀫𑀗𑁆𑀕𑀺𑀢𑀸𑀤𑀲𑁆𑀲𑀦𑁂𑀦 𑀛𑀸𑀦𑀲𑁆𑀲𑁂𑀯 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸.

𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀦𑁆𑀢𑀺 𑀏𑀢𑁆𑀣 𑀧𑀼𑀭𑀺𑀫𑀲𑁆𑀫𑀺𑀁 𑀅𑀢𑁆𑀣𑁂 𑀯𑀺𑀯𑁂𑀓𑀚𑀦𑁆𑀢𑀺 𑀛𑀸𑀦𑀁. 𑀧𑀻𑀢𑀺𑀲𑀼𑀔𑀲𑀤𑁆𑀤𑀢𑁄 𑀘 𑀅𑀢𑁆𑀣𑀺𑀅𑀢𑁆𑀣𑀯𑀺𑀲𑁂𑀲𑀯𑀢𑁄 𑀅𑀲𑁆𑀲, 𑀅𑀲𑁆𑀫𑀺𑀁 𑀯𑀸𑀢𑀺 𑀏𑀢𑁆𑀣 𑀅-𑀓𑀸𑀭𑁄 𑀯𑀼𑀢𑁆𑀢𑁄. 𑀤𑀼𑀢𑀺𑀬𑁂 𑀧𑀻𑀢𑀺𑀲𑀼𑀔𑀫𑁂𑀯 𑀯𑀺𑀯𑁂𑀓𑀚𑀁. 𑀯𑀺𑀯𑁂𑀓𑀚𑀁𑀧𑀻𑀢𑀺𑀲𑀼𑀔𑀦𑁆𑀢𑀺 𑀘 𑀅𑀜𑁆𑀜𑀧𑀤𑀢𑁆𑀣𑁂 𑀲𑀫𑀸𑀲𑁄 𑀧𑀘𑁆𑀘𑀢𑁆𑀢𑀦𑀺𑀤𑁆𑀤𑁂𑀲𑀲𑁆𑀲 𑀘 𑀅𑀮𑁄𑀧𑁄 𑀓𑀢𑁄, 𑀮𑁄𑀧𑁂 𑀯𑀸 𑀲𑀢𑀺 ‘‘𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔’’𑀦𑁆𑀢𑀺 𑀧𑀸𑀞𑁄𑀢𑀺 𑀅𑀬𑀁 𑀯𑀺𑀲𑁂𑀲𑁄. 𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑀸𑀢𑀺 𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑀸𑀬, 𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑀸𑀫𑀢𑁆𑀢𑀁 𑀯𑀸 𑀧𑀞𑀫𑀦𑁆𑀢𑀺 𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀘𑁆𑀘𑀸𑀤𑀺𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑁂𑀦 𑀫𑀕𑁆𑀕𑁄 𑀅𑀲𑀫𑁆𑀫𑁄𑀳𑀢𑁄 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀁. 𑀅𑀲𑀫𑁆𑀫𑁄𑀲𑀥𑀫𑁆𑀫𑀁 𑀦𑀺𑀩𑁆𑀩𑀸𑀦𑀁 𑀅𑀯𑀺𑀧𑀭𑀻𑀢𑀮𑀓𑁆𑀔𑀡𑀢𑁆𑀢𑀸 𑀅𑀦𑀜𑁆𑀜𑀣𑀸𑀪𑀸𑀯𑀢𑁄 𑀢𑀣𑀮𑀓𑁆𑀔𑀡𑀁.

𑀤𑀼𑀢𑀺𑀬𑀚𑁆𑀛𑀸𑀦𑀓𑀣𑀸𑀯𑀡𑁆𑀡𑀦𑀸

𑁧𑁬𑁧-𑁨. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸𑀢𑀺 𑀏𑀢𑁂𑀦 𑀬𑁂𑀳𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺 𑀧𑀞𑀫𑀚𑁆𑀛𑀸𑀦𑀲𑁆𑀲 𑀑𑀴𑀸𑀭𑀺𑀓𑀢𑀸, 𑀢𑁂𑀲𑀁 𑀲𑀫𑀢𑀺𑀓𑁆𑀓𑀫𑀸 𑀤𑀼𑀢𑀺𑀬𑀚𑁆𑀛𑀸𑀦𑀲𑁆𑀲 𑀲𑀫𑀥𑀺𑀕𑀫𑁄, 𑀦 𑀲𑀪𑀸𑀯𑀢𑁄 𑀅𑀦𑁄𑀴𑀸𑀭𑀺𑀓𑀸𑀦𑀁 𑀨𑀲𑁆𑀲𑀸𑀤𑀻𑀦𑀁 𑀲𑀫𑀢𑀺𑀓𑁆𑀓𑀫𑀸𑀢𑀺 𑀅𑀬𑀫𑀢𑁆𑀣𑁄 𑀤𑀻𑀧𑀺𑀢𑁄 𑀳𑁄𑀢𑀺. 𑀏𑀯𑀁 ‘‘𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸’’𑀢𑀺𑀆𑀤𑀻𑀲𑀼 𑀦𑀬𑁄. 𑀢𑀲𑁆𑀫𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀲𑀫𑀢𑀺𑀓𑁆𑀓𑀫𑀯𑀘𑀦𑀸𑀦𑀺 𑀑𑀴𑀸𑀭𑀺𑀓𑁄𑀴𑀸𑀭𑀺𑀓𑀗𑁆𑀕𑀲𑀫𑀢𑀺𑀓𑁆𑀓𑀫𑀸 𑀤𑀼𑀢𑀺𑀬𑀸𑀤𑀺𑀅𑀥𑀺𑀕𑀫𑀧𑀭𑀺𑀤𑀻𑀧𑀓𑀸𑀦𑀻𑀢𑀺 𑀢𑁂𑀲𑀁 𑀏𑀓𑀤𑁂𑀲𑀪𑀽𑀢𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀲𑀫𑀢𑀺𑀓𑁆𑀓𑀫𑀯𑀘𑀦𑀁 𑀢𑀁𑀤𑀻𑀧𑀓𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑀯𑀘𑀦𑁂𑀦𑁂𑀯 𑀢𑀁𑀲𑀫𑀢𑀺𑀓𑁆𑀓𑀫𑀸 𑀤𑀼𑀢𑀺𑀬𑀸𑀥𑀺𑀕𑀫𑀤𑀻𑀧𑀓𑁂𑀦 𑀧𑀻𑀢𑀺𑀯𑀺𑀭𑀸𑀕𑀸𑀤𑀺𑀯𑀘𑀦𑀸𑀦𑀁 𑀧𑀻𑀢𑀺𑀬𑀸𑀤𑀺𑀲𑀫𑀢𑀺𑀓𑁆𑀓𑀫𑀸 𑀢𑀢𑀺𑀬𑀸𑀤𑀺𑀅𑀥𑀺𑀕𑀫𑀤𑀻𑀧𑀓𑀢𑀸 𑀳𑁄𑀢𑀻𑀢𑀺 𑀢𑀲𑁆𑀲 𑀢𑀁𑀤𑀻𑀧𑀓𑀢𑀸 𑀯𑀼𑀢𑁆𑀢𑀸.

𑀦𑀻𑀮𑀯𑀡𑁆𑀡𑀬𑁄𑀕𑀢𑁄 𑀦𑀻𑀮𑀯𑀢𑁆𑀣𑀁 𑀯𑀺𑀬𑀸𑀢𑀺 𑀦𑀻𑀮𑀬𑁄𑀕𑀢𑁄 𑀯𑀢𑁆𑀣𑀁 𑀦𑀻𑀮𑀁 𑀯𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑁂𑀦 𑀲𑀫𑁆𑀧𑀲𑀸𑀤𑀦𑁂𑀦 𑀬𑁄𑀕𑀸 𑀛𑀸𑀦𑀁 𑀲𑀫𑁆𑀧𑀲𑀸𑀤𑀦𑀁, 𑀢𑀲𑁆𑀫𑀺𑀁 𑀤𑀲𑁆𑀲𑀺𑀢𑁂 ‘‘𑀲𑀫𑁆𑀧𑀲𑀸𑀤𑀦𑀁 𑀛𑀸𑀦’’𑀦𑁆𑀢𑀺 𑀲𑀫𑀸𑀦𑀸𑀥𑀺𑀓𑀭𑀡𑀦𑀺𑀤𑁆𑀤𑁂𑀲𑁂𑀦𑁂𑀯 𑀢𑀁𑀬𑁄𑀕𑀸 𑀛𑀸𑀦𑁂 𑀢𑀁𑀲𑀤𑁆𑀤𑀧𑁆𑀧𑀯𑀢𑁆𑀢𑀺 𑀤𑀲𑁆𑀲𑀺𑀢𑀸𑀢𑀺 𑀅𑀯𑀺𑀭𑁄𑀥𑁄 𑀬𑀼𑀢𑁆𑀢𑁄. 𑀏𑀓𑁄𑀤𑀺𑀪𑀸𑀯𑁂 𑀓𑀣𑀦𑁆𑀢𑀺 𑀏𑀓𑁄𑀤𑀺𑀫𑁆𑀳𑀺 𑀤𑀲𑁆𑀲𑀺𑀢𑁂 ‘‘𑀏𑀓𑁄𑀤𑀺𑀪𑀸𑀯𑀁 𑀛𑀸𑀦’’𑀦𑁆𑀢𑀺 𑀲𑀫𑀸𑀦𑀸𑀥𑀺𑀓𑀭𑀡𑀦𑀺𑀤𑁆𑀤𑁂𑀲𑁂𑀦𑁂𑀯 𑀛𑀸𑀦𑀲𑁆𑀲 𑀏𑀓𑁄𑀤𑀺𑀯𑀟𑁆𑀠𑀦𑀢𑀸 𑀯𑀼𑀢𑁆𑀢𑀸 𑀳𑁄𑀢𑀻𑀢𑀺. 𑀏𑀓𑁄𑀤𑀺𑀪𑀸𑀯𑀦𑁆𑀢𑀺 𑀧𑀦𑀺𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀏𑀓𑁄𑀤𑀺𑀲𑁆𑀲 𑀦𑀺𑀤𑁆𑀤𑁂𑀲𑁄 𑀦 𑀓𑀢𑁆𑀢𑀩𑁆𑀩𑁄 𑀲𑀺𑀬𑀸𑀢𑀺 𑀏𑀓𑁄𑀤𑀺𑀪𑀸𑀯𑀲𑀤𑁆𑀤𑁄 𑀏𑀯 𑀲𑀫𑀸𑀥𑀺𑀫𑁆𑀳𑀺 𑀧𑀯𑀢𑁆𑀢𑁄 𑀲𑀫𑁆𑀧𑀲𑀸𑀤𑀦𑀲𑀤𑁆𑀤𑁄 𑀯𑀺𑀬 𑀛𑀸𑀦𑀫𑁆𑀳𑀺 𑀧𑀯𑀢𑁆𑀢𑀢𑀻𑀢𑀺 𑀬𑀼𑀢𑁆𑀢𑀁.

𑀅𑀧𑁆𑀧𑀺𑀢𑀸𑀢𑀺 𑀕𑀫𑀺𑀢𑀸 𑀯𑀺𑀦𑀸𑀲𑀁. 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀅𑀥𑀺𑀕𑀫𑀼𑀧𑀸𑀬𑀤𑀻𑀧𑀓𑁂𑀦 𑀅𑀚𑁆𑀛𑀢𑁆𑀢𑀲𑀫𑁆𑀧𑀲𑀸𑀤𑀦𑀢𑀸𑀬 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀢𑀸𑀬 𑀘 𑀳𑁂𑀢𑀼𑀤𑀻𑀧𑀓𑁂𑀦 𑀅𑀯𑀺𑀢𑀓𑁆𑀓𑀸𑀯𑀺𑀘𑀸𑀭𑀪𑀸𑀯𑀳𑁂𑀢𑀼𑀤𑀻𑀧𑀓𑁂𑀦 𑀘 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑀯𑀘𑀦𑁂𑀦𑁂𑀯 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀪𑀸𑀯𑁄 𑀤𑀻𑀧𑀺𑀢𑁄𑀢𑀺 𑀓𑀺𑀁 𑀧𑀼𑀦 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀯𑀘𑀦𑁂𑀦 𑀓𑀢𑁂𑀦𑀸𑀢𑀺? 𑀦, 𑀅𑀤𑀻𑀧𑀺𑀢𑀢𑁆𑀢𑀸. 𑀦 𑀳𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀽𑀧𑀲𑀫𑀯𑀘𑀦𑁂𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀅𑀧𑁆𑀧𑀯𑀢𑁆𑀢𑀺 𑀯𑀼𑀢𑁆𑀢𑀸 𑀳𑁄𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀲𑀼 𑀳𑀺 𑀢𑀡𑁆𑀳𑀸𑀧𑀳𑀸𑀦𑀜𑁆𑀘 𑀏𑀢𑁂𑀲𑀁 𑀯𑀽𑀧𑀲𑀫𑀦𑀁. 𑀬𑁂 𑀘 𑀲𑀗𑁆𑀔𑀸𑀭𑁂𑀲𑀼 𑀢𑀡𑁆𑀳𑀸𑀧𑀳𑀸𑀦𑀁 𑀓𑀭𑁄𑀦𑁆𑀢𑀺, 𑀢𑁂𑀲𑀼 𑀫𑀕𑁆𑀕𑁂𑀲𑀼 𑀧𑀳𑀻𑀦𑀢𑀡𑁆𑀳𑁂𑀲𑀼 𑀨𑀮𑁂𑀲𑀼 𑀘 𑀲𑀗𑁆𑀔𑀸𑀭𑀧𑁆𑀧𑀯𑀢𑁆𑀢𑀺 𑀳𑁄𑀢𑀺, 𑀏𑀯𑀫𑀺𑀥𑀸𑀧𑀺 𑀯𑀺𑀓𑁆𑀔𑀫𑁆𑀪𑀺𑀢𑀯𑀺𑀢𑀓𑁆𑀓𑀯𑀺𑀘𑀸𑀭𑀢𑀡𑁆𑀳𑀲𑁆𑀲 𑀤𑀼𑀢𑀺𑀬𑀚𑁆𑀛𑀸𑀦𑀲𑁆𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑀲𑀫𑁆𑀧𑀬𑁄𑀕𑁄 𑀧𑀼𑀭𑀺𑀫𑁂𑀦 𑀦 𑀦𑀺𑀯𑀸𑀭𑀺𑀢𑁄 𑀲𑀺𑀬𑀸𑀢𑀺 𑀢𑀁𑀦𑀺𑀯𑀸𑀭𑀡𑀢𑁆𑀣𑀁 𑀆𑀯𑀚𑁆𑀚𑀺𑀢𑀼𑀓𑀸𑀫𑀢𑀸𑀤𑀺𑀅𑀢𑀺𑀓𑁆𑀓𑀫𑁄𑀯 𑀢𑁂𑀲𑀁 𑀯𑀽𑀧𑀲𑀫𑁄𑀢𑀺 𑀤𑀲𑁆𑀲𑀦𑀢𑁆𑀣𑀜𑁆𑀘 ‘‘𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭’’𑀦𑁆𑀢𑀺 𑀯𑀼𑀢𑁆𑀢𑀁.

𑀢𑀢𑀺𑀬𑀚𑁆𑀛𑀸𑀦𑀓𑀣𑀸𑀯𑀡𑁆𑀡𑀦𑀸

𑁧𑁬𑁩. 𑀧𑀭𑀺𑀲𑀼𑀤𑁆𑀥𑀧𑀓𑀢𑀺 𑀔𑀻𑀡𑀸𑀲𑀯𑀧𑀓𑀢𑀺 𑀦𑀺𑀓𑁆𑀓𑀺𑀮𑁂𑀲𑀢𑀸. 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀦𑁆𑀢𑀺 𑀏𑀢𑁆𑀣 𑀮𑀻𑀦𑀼𑀤𑁆𑀥𑀘𑁆𑀘𑀧𑀓𑁆𑀔𑀧𑀸𑀢𑀭𑀳𑀺𑀢𑀁 𑀫𑀚𑁆𑀛𑀢𑁆𑀢𑀁 𑀯𑀻𑀭𑀺𑀬𑀁 ‘‘𑀉𑀧𑁂𑀓𑁆𑀔𑀸’’𑀢𑀺 𑀯𑀼𑀢𑁆𑀢𑀁, 𑀢𑀤𑁂𑀯 𑀢𑀁 𑀆𑀓𑀸𑀭𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑁂𑀢𑀩𑁆𑀩𑀲𑁆𑀲 𑀢𑀸𑀤𑀺𑀲𑀲𑁆𑀲 𑀯𑀻𑀭𑀺𑀬𑀲𑁆𑀲 𑀦𑀺𑀫𑀺𑀢𑁆𑀢𑀪𑀸𑀯𑀢𑁄 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁. 𑀧𑀞𑀫𑀚𑁆𑀛𑀸𑀦𑀧𑁆𑀧𑀝𑀺𑀮𑀸𑀪𑀢𑁆𑀣𑀸𑀬 𑀦𑀻𑀯𑀭𑀡𑁂…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀧𑀝𑀺𑀮𑀸𑀪𑀢𑁆𑀣𑀸𑀬 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀁 𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸𑀧𑀜𑁆𑀜𑀸𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀦𑁆𑀢𑀺 𑀇𑀫𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀧𑀝𑀺𑀮𑀸𑀪𑀢𑁆𑀣𑀸𑀬 𑀉𑀧𑁆𑀧𑀸𑀤𑀁 𑀧𑀯𑀢𑁆𑀢𑀁 𑀦𑀺𑀫𑀺𑀢𑁆𑀢𑀁 𑀆𑀬𑀽𑀳𑀦𑀁 𑀧𑀝𑀺𑀲𑀦𑁆𑀥𑀺𑀁 𑀕𑀢𑀺𑀁 𑀦𑀺𑀩𑁆𑀩𑀢𑁆𑀢𑀺𑀁 𑀉𑀧𑀧𑀢𑁆𑀢𑀺𑀁 𑀚𑀸𑀢𑀺𑀁 𑀚𑀭𑀸𑀫𑀭𑀡𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀉𑀧𑀸𑀬𑀸𑀲𑁂. 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀸𑀬 𑀉𑀧𑁆𑀧𑀸𑀤𑀁…𑀧𑁂… 𑀉𑀧𑀸𑀬𑀸𑀲𑁂…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑀧𑀝𑀺𑀮𑀸𑀪𑀢𑁆𑀣𑀸𑀬 𑀉𑀧𑁆𑀧𑀸𑀤𑀁…𑀧𑁂… 𑀉𑀧𑀸𑀬𑀸𑀲𑁂. 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀸𑀬…𑀧𑁂… 𑀲𑀼𑀜𑁆𑀜𑀢𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀢𑁆𑀣𑀸𑀬…𑀧𑁂… 𑀅𑀦𑀺𑀫𑀺𑀢𑁆𑀢𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀢𑁆𑀣𑀸𑀬 𑀉𑀧𑁆𑀧𑀸𑀤𑀁 𑀧𑀯𑀢𑁆𑀢𑀁 𑀆𑀬𑀽𑀳𑀦𑀁 𑀧𑀝𑀺𑀲𑀦𑁆𑀥𑀺𑀁…𑀧𑁂… 𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀼 𑀜𑀸𑀡𑀦𑁆𑀢𑀺 𑀇𑀫𑀸 𑀤𑀲 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀬𑀤𑀢𑁆𑀣𑀺 𑀬𑀁 𑀪𑀽𑀢𑀦𑁆𑀢𑀺 𑀔𑀦𑁆𑀥𑀧𑀜𑁆𑀘𑀓𑀁, 𑀢𑀁 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑁂𑀦 𑀧𑀚𑀳𑀢𑀺. 𑀤𑀺𑀝𑁆𑀞𑀲𑁄𑀯𑀢𑁆𑀣𑀺𑀓𑀢𑁆𑀢𑀬𑀲𑁆𑀲 𑀲𑀧𑁆𑀧𑀮𑀓𑁆𑀔𑀡𑀯𑀺𑀘𑀺𑀦𑀦𑁂 𑀯𑀺𑀬 𑀤𑀺𑀝𑁆𑀞𑀮𑀓𑁆𑀔𑀡𑀢𑁆𑀢𑀬𑀲𑁆𑀲 𑀪𑀽𑀢𑀲𑁆𑀲 𑀲𑀗𑁆𑀔𑀸𑀭𑀮𑀓𑁆𑀔𑀡𑀯𑀺𑀘𑀺𑀦𑀦𑁂 𑀉𑀧𑁂𑀓𑁆𑀔𑀁 𑀧𑀝𑀺𑀮𑀪𑀢𑀺. 𑀅𑀦𑀸𑀪𑁄𑀕𑀭𑀲𑀸𑀢𑀺 𑀧𑀡𑀻𑀢𑀲𑀼𑀔𑁂𑀧𑀺 𑀢𑀲𑁆𑀫𑀺𑀁 𑀅𑀯𑀦𑀢𑀺 𑀧𑀝𑀺𑀧𑀓𑁆𑀔𑀓𑀺𑀘𑁆𑀘𑀸𑀢𑀺 𑀅𑀢𑁆𑀣𑁄. 𑀦𑀸𑀫𑀓𑀸𑀬𑁂𑀦 𑀘𑁂𑀢𑀲𑀺𑀓𑀲𑀼𑀔𑀁 𑀓𑀸𑀬𑀺𑀓𑀲𑀼𑀔𑀳𑁂𑀢𑀼 𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑁂𑀦 𑀓𑀸𑀬𑀺𑀓𑀲𑀼𑀔𑀜𑁆𑀘 𑀛𑀸𑀦𑀲𑀫𑀗𑁆𑀕𑀻 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀨𑀼𑀝𑀢𑁆𑀢𑀸 𑀩𑁆𑀬𑀸𑀧𑀺𑀢𑀢𑁆𑀢𑀸. 𑀬𑀣𑀸 𑀳𑀺 𑀉𑀤𑀓𑁂𑀦 𑀨𑀼𑀝𑀲𑀭𑀻𑀭𑀲𑁆𑀲 𑀢𑀸𑀤𑀺𑀲𑁂 𑀦𑀸𑀢𑀺𑀧𑀘𑁆𑀘𑀦𑀻𑀓𑁂 𑀯𑀸𑀢𑀸𑀤𑀺𑀓𑁂 𑀨𑁄𑀝𑁆𑀞𑀩𑁆𑀩𑁂 𑀨𑀼𑀝𑁆𑀞𑁂 𑀲𑀼𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀏𑀢𑁂𑀳𑀺 𑀨𑀼𑀝𑀲𑀭𑀻𑀭𑀲𑁆𑀲𑀧𑀺.

𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑀣𑀸𑀯𑀡𑁆𑀡𑀦𑀸

𑁧𑁬𑁫. 𑀅𑀯𑀺𑀪𑀽𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀢𑀺 𑀲𑀼𑀔𑀤𑀼𑀓𑁆𑀔𑀸𑀦𑀺 𑀯𑀺𑀬 𑀅𑀯𑀺𑀪𑀽𑀢𑀸𑀓𑀸𑀭𑀸 𑀧𑀺𑀝𑁆𑀞𑀺𑀧𑀸𑀲𑀸𑀡𑀕𑀢𑀫𑀺𑀕𑀫𑀕𑁆𑀕𑁄 𑀯𑀺𑀬 𑀢𑀤𑀦𑀼𑀫𑀸𑀢𑀩𑁆𑀩𑀸𑀯𑀺𑀪𑀽𑀢𑀸𑀓𑀸𑀭𑁄𑀧𑀝𑁆𑀞𑀸𑀦𑀸.

𑀘𑀢𑀼𑀓𑁆𑀓𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀓𑀦𑀬𑀯𑀡𑁆𑀡𑀦𑀸

𑁧𑁬𑁭. 𑀬𑀲𑁆𑀲𑀸 𑀧𑀦 𑀥𑀫𑁆𑀫𑀥𑀸𑀢𑀼𑀬𑀸𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲. 𑀢𑁂𑀦 𑀳𑀺 𑀥𑀫𑁆𑀫𑀸𑀦𑀁 𑀆𑀓𑀸𑀭𑀪𑁂𑀤𑀁 𑀜𑀢𑁆𑀯𑀸 𑀢𑀤𑀦𑀼𑀭𑀽𑀧𑀁 𑀤𑁂𑀲𑀦𑀁 𑀦𑀺𑀬𑀸𑀫𑁂𑀢𑀻𑀢𑀺. 𑀏𑀢𑁆𑀣 𑀘 𑀧𑀜𑁆𑀘𑀓𑀦𑀬𑁂 𑀤𑀼𑀢𑀺𑀬𑀚𑁆𑀛𑀸𑀦𑀁 𑀘𑀢𑀼𑀓𑁆𑀓𑀦𑀬𑁂 𑀤𑀼𑀢𑀺𑀬𑀚𑁆𑀛𑀸𑀦𑀧𑀓𑁆𑀔𑀺𑀓𑀁 𑀓𑀢𑁆𑀯𑀸 𑀯𑀺𑀪𑀢𑁆𑀢𑀁 ‘‘𑀬𑀲𑁆𑀫𑀺𑀁…𑀧𑁂… 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀅𑀯𑀺𑀢𑀓𑁆𑀓𑀁 𑀯𑀺𑀘𑀸𑀭𑀫𑀢𑁆𑀢𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀚𑁆𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺. 𑀓𑀲𑁆𑀫𑀸? 𑀏𑀓𑀢𑁆𑀢𑀓𑀸𑀬𑀦𑀸𑀦𑀢𑁆𑀢𑀲𑀜𑁆𑀜𑀻𑀲𑀢𑁆𑀢𑀸𑀯𑀸𑀲𑀨𑀮𑀢𑀸𑀬 𑀤𑀼𑀢𑀺𑀬𑀚𑁆𑀛𑀸𑀦𑁂𑀦 𑀲𑀫𑀸𑀦𑀨𑀮𑀢𑁆𑀢𑀸 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺𑀢𑁄 𑀚𑀸𑀢𑀢𑁆𑀢𑀸 𑀘. 𑀧𑀞𑀫𑀚𑁆𑀛𑀸𑀦𑀫𑁂𑀯 𑀳𑀺 𑀓𑀸𑀫𑁂𑀳𑀺 𑀅𑀓𑀼𑀲𑀮𑁂𑀳𑀺 𑀘 𑀯𑀺𑀯𑀺𑀢𑁆𑀢𑀦𑁆𑀢𑀺 𑀢𑀤𑀪𑀸𑀯𑀸 𑀦 𑀇𑀥 ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀻’’𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀦𑀸𑀧𑀺 ‘‘𑀯𑀺𑀯𑁂𑀓𑀚’’𑀦𑁆𑀢𑀺. 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀲𑀼 𑀘 𑀧𑀜𑁆𑀘𑀓𑀦𑀬𑁂 𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑀸𑀦𑀺 𑀤𑀼𑀢𑀺𑀬𑀚𑁆𑀛𑀸𑀦𑀫𑁂𑀯 𑀪𑀚𑀦𑁆𑀢𑀺 𑀯𑀺𑀢𑀓𑁆𑀓𑀯𑀽𑀧𑀲𑀫𑀸 𑀯𑀺𑀘𑀸𑀭𑀯𑀽𑀧𑀲𑀫𑀸 𑀅𑀯𑀺𑀢𑀓𑁆𑀓𑀢𑁆𑀢𑀸 𑀅𑀯𑀺𑀘𑀸𑀭𑀢𑁆𑀢𑀸 𑀘𑀸𑀢𑀺.

𑀧𑀝𑀺𑀧𑀤𑀸𑀘𑀢𑀼𑀓𑁆𑀓𑀯𑀡𑁆𑀡𑀦𑀸

𑁧𑁭𑁬-𑁧𑁮𑁦. 𑀢𑀲𑁆𑀲 𑀢𑀲𑁆𑀲 𑀛𑀸𑀦𑀲𑁆𑀲 𑀉𑀧𑀘𑀸𑀭𑀦𑁆𑀢𑀺 𑀦𑀻𑀯𑀭𑀡𑀯𑀺𑀢𑀓𑁆𑀓𑀯𑀺𑀘𑀸𑀭𑀦𑀺𑀓𑀦𑁆𑀢𑀺𑀬𑀸𑀤𑀻𑀦𑀁 𑀯𑀽𑀧𑀲𑀫𑀸 𑀣𑀺𑀭𑀪𑀽𑀢𑁄 𑀓𑀸𑀫𑀸𑀯𑀘𑀭𑀲𑀫𑀸𑀥𑀺. 𑀢𑀤𑀦𑀼𑀥𑀫𑁆𑀫𑀢𑀸𑀢𑀺 𑀢𑀤𑀦𑀼𑀭𑀽𑀧𑀢𑀸𑀪𑀽𑀢𑀸, 𑀲𑀸 𑀧𑀦 𑀢𑀤𑀲𑁆𑀲𑀸𑀤𑀲𑀗𑁆𑀔𑀸𑀢𑀸 𑀢𑀤𑀲𑁆𑀲𑀸𑀤𑀲𑀫𑁆𑀧𑀬𑀼𑀢𑁆𑀢𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀸 𑀯𑀸 𑀫𑀺𑀘𑁆𑀙𑀸𑀲𑀢𑀻𑀢𑀺 𑀯𑀤𑀦𑁆𑀢𑀺. 𑀅𑀯𑀺𑀕𑀢𑀦𑀺𑀓𑀦𑁆𑀢𑀺𑀓𑀸 𑀢𑀁𑀢𑀁𑀧𑀭𑀺𑀳𑀭𑀡𑀲𑀢𑀻𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀲𑀢𑀺𑀬𑀸 𑀯𑀸 𑀦𑀺𑀓𑀦𑁆𑀢𑀺𑀬𑀸 𑀯𑀸’’𑀢𑀺 𑀯𑀺𑀓𑀧𑁆𑀧𑁄 𑀓𑀢𑁄. 𑀆𑀕𑀫𑀦𑀯𑀲𑁂𑀦𑀸𑀧𑀺 𑀘 𑀧𑀝𑀺𑀧𑀤𑀸 𑀳𑁄𑀦𑁆𑀢𑀺𑀬𑁂𑀯𑀸𑀢𑀺 𑀇𑀤𑀁 𑀓𑀤𑀸𑀘𑀺 𑀤𑀼𑀢𑀺𑀬𑀸𑀤𑀻𑀦𑀁 𑀧𑀞𑀫𑀸𑀤𑀺𑀆𑀕𑀫𑀦𑀓𑀢𑀧𑀝𑀺𑀧𑀤𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀧𑀺-𑀲𑀤𑁆𑀤𑁄 𑀳𑀺 𑀅𑀦𑁂𑀓𑀦𑁆𑀢𑀺𑀓𑀢𑀁 𑀤𑀻𑀧𑁂𑀢𑀺, 𑀏𑀢𑀲𑁆𑀲 𑀅𑀦𑁂𑀓𑀦𑁆𑀢𑀺𑀓𑀢𑁆𑀢𑀸 𑀏𑀯 𑀘 𑀧𑀸𑀴𑀺𑀬𑀁 𑀏𑀓𑁂𑀓𑀲𑁆𑀫𑀺𑀁 𑀛𑀸𑀦𑁂 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸 𑀘𑀢𑁆𑀢𑀸𑀭𑀺 𑀆𑀭𑀫𑁆𑀫𑀡𑀸𑀦𑀺 𑀲𑁄𑀴𑀲𑀓𑁆𑀔𑀢𑁆𑀢𑀼𑀓𑀜𑁆𑀘 𑀯𑀺𑀲𑀼𑀁 𑀯𑀺𑀲𑀼𑀁 𑀬𑁄𑀚𑀺𑀢𑀁. 𑀅𑀜𑁆𑀜𑀣𑀸 𑀏𑀓𑁂𑀓𑀲𑁆𑀫𑀺𑀁 𑀧𑀝𑀺𑀧𑀤𑀸𑀤𑀺𑀫𑁆𑀳𑀺 𑀦𑀯 𑀦𑀯 𑀛𑀸𑀦𑀸𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺 𑀲𑀺𑀬𑀼𑀦𑁆𑀢𑀺.

𑀆𑀭𑀫𑁆𑀫𑀡𑀘𑀢𑀼𑀓𑁆𑀓𑀯𑀡𑁆𑀡𑀦𑀸

𑁧𑁮𑁧. 𑀅𑀧𑁆𑀧𑀕𑀼𑀡𑀦𑁆𑀢𑀺 𑀧𑀜𑁆𑀘𑀳𑀺 𑀯𑀲𑀺𑀢𑀸𑀳𑀺 𑀅𑀯𑀲𑀻𑀓𑀢𑀁.

𑀆𑀭𑀫𑁆𑀫𑀡𑀧𑀝𑀺𑀧𑀤𑀸𑀫𑀺𑀲𑁆𑀲𑀓𑀯𑀡𑁆𑀡𑀦𑀸

𑁧𑁮𑁬. 𑀳𑁂𑀝𑁆𑀞𑀸𑀢𑀺 𑀲𑁄𑀴𑀲𑀓𑁆𑀔𑀢𑁆𑀢𑀼𑀓𑀢𑁄 𑀧𑀼𑀩𑁆𑀩𑁂. 𑀬𑁂 𑀓𑁂𑀘𑀺 𑀛𑀸𑀦𑀁 𑀉𑀧𑁆𑀧𑀸𑀤𑁂𑀦𑁆𑀢𑀺 𑀦𑀸𑀫𑀸𑀢𑀺 𑀯𑀘𑀦𑁂𑀦 𑀬𑁂 𑀓𑀢𑀸𑀥𑀺𑀓𑀸𑀭𑀸 𑀲𑁂𑀓𑁆𑀔𑀸 𑀫𑀕𑁆𑀕𑁂𑀦𑁂𑀯 𑀉𑀧𑁆𑀧𑀸𑀤𑀺𑀢𑀚𑁆𑀛𑀸𑀦𑀸, 𑀢𑁂𑀲𑀁 𑀛𑀸𑀦𑀸𑀦𑀺 𑀫𑀕𑁆𑀕𑀧𑀝𑀺𑀩𑀤𑁆𑀥𑀢𑀸𑀬 𑀲𑀼𑀤𑁆𑀥𑀺𑀓𑀦𑀯𑀓𑀲𑀗𑁆𑀕𑀳𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀦 𑀳𑀺 𑀢𑁂 𑀉𑀧𑁆𑀧𑀸𑀤𑁂𑀦𑁆𑀢𑀺 𑀦𑀸𑀫𑀸𑀢𑀺.

𑀓𑀲𑀺𑀡𑀓𑀣𑀸𑀯𑀡𑁆𑀡𑀦𑀸

𑁨𑁦𑁩. 𑀦𑀺𑀭𑁄𑀥𑀧𑀸𑀤𑀓𑀢𑀸𑀯𑀘𑀦𑁂𑀦 𑀆𑀭𑀼𑀧𑁆𑀧𑀧𑀸𑀤𑀓𑀢𑀸 𑀘 𑀤𑀲𑁆𑀲𑀺𑀢𑀸. 𑀔𑀺𑀧𑁆𑀧𑀤𑀲𑁆𑀲𑀦𑀁 𑀔𑀺𑀧𑁆𑀧𑀸𑀪𑀺𑀜𑁆𑀜𑀢𑀸 𑀔𑀺𑀧𑁆𑀧𑀦𑀺𑀲𑀦𑁆𑀢𑀺𑀪𑀸𑀯𑁄.

𑀅𑀪𑀺𑀪𑀸𑀬𑀢𑀦𑀓𑀣𑀸𑀯𑀡𑁆𑀡𑀦𑀸

𑁨𑁦𑁪. 𑀅𑀜𑁆𑀜𑀫𑁆𑀧𑀻𑀢𑀺 𑀓𑁂𑀯𑀮𑀁 𑀓𑀲𑀺𑀡𑀸𑀬𑀢𑀦𑀲𑀗𑁆𑀔𑀸𑀢𑀫𑁂𑀯 𑀅𑀳𑀼𑀢𑁆𑀯𑀸 𑀅𑀪𑀺𑀪𑀸𑀬𑀢𑀦𑀲𑀗𑁆𑀔𑀸𑀢𑀫𑁆𑀧𑀺 𑀧𑀯𑀢𑁆𑀢𑀢𑀻𑀢𑀺 𑀲𑀢𑀺𑀧𑀺 𑀅𑀪𑀺𑀪𑀸𑀬𑀢𑀦𑀸𑀦𑀁 𑀓𑀲𑀺𑀡𑀸𑀬𑀢𑀦𑀢𑁆𑀢𑁂 𑀓𑀲𑀺𑀡𑀸𑀬𑀢𑀦𑀪𑀸𑀯𑀢𑁄 𑀅𑀜𑁆𑀜𑁄 𑀅𑀪𑀺𑀪𑀸𑀬𑀢𑀦𑀪𑀸𑀯𑁄 𑀓𑀲𑀺𑀡𑀦𑀺𑀫𑀺𑀢𑁆𑀢𑀸𑀪𑀺𑀪𑀯𑀦𑀓𑀪𑀸𑀯𑀦𑀸𑀦𑀺𑀫𑀺𑀢𑁆𑀢𑀦𑀸𑀦𑀢𑁆𑀢𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀅𑀪𑀺𑀪𑀯𑀢𑀻𑀢𑀺 𑀅𑀪𑀺𑀪𑀼, 𑀧𑀭𑀺𑀓𑀫𑁆𑀫𑀁, 𑀜𑀸𑀡𑀁 𑀯𑀸. 𑀅𑀪𑀺𑀪𑀼 𑀆𑀬𑀢𑀦𑀁 𑀏𑀢𑀲𑁆𑀲𑀸𑀢𑀺 𑀅𑀪𑀺𑀪𑀸𑀬𑀢𑀦𑀁, 𑀛𑀸𑀦𑀁. 𑀅𑀪𑀺𑀪𑀯𑀺𑀢𑀩𑁆𑀩𑀁 𑀯𑀸 𑀆𑀭𑀫𑁆𑀫𑀡𑀲𑀗𑁆𑀔𑀸𑀢𑀁 𑀆𑀬𑀢𑀦𑀁 𑀏𑀢𑀲𑁆𑀲𑀸𑀢𑀺 𑀅𑀪𑀺𑀪𑀸𑀬𑀢𑀦𑀁, 𑀛𑀸𑀦𑀁. 𑀆𑀭𑀫𑁆𑀫𑀡𑀸𑀪𑀺𑀪𑀯𑀦𑀢𑁄 𑀅𑀪𑀺𑀪𑀼 𑀘 𑀢𑀁 𑀆𑀬𑀢𑀦𑀜𑁆𑀘 𑀬𑁄𑀕𑀺𑀦𑁄 𑀲𑀼𑀔𑀯𑀺𑀲𑁂𑀲𑀸𑀦𑀁 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀪𑀸𑀯𑀢𑁄 𑀘𑀸𑀢𑀺𑀧𑀺 𑀲𑀲𑀫𑁆𑀧𑀬𑀼𑀢𑁆𑀢𑀁 𑀛𑀸𑀦𑀁 𑀅𑀪𑀺𑀪𑀸𑀬𑀢𑀦𑀁. 𑀫𑀕𑁆𑀕𑀧𑁆𑀧𑀝𑀺𑀩𑀤𑁆𑀥𑀢𑀸𑀬 𑀢𑀤𑀸 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀆𑀪𑁄𑀕𑁄 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀯𑀲𑁂𑀦 𑀛𑀸𑀦𑀓𑁆𑀔𑀡𑁂 𑀧𑀯𑀢𑁆𑀢𑀁 𑀅𑀪𑀺𑀪𑀯𑀦𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀆𑀕𑀫𑁂𑀲𑀼 𑀧𑀦 ‘‘𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀧𑀭𑀺𑀢𑁆𑀢𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀺. 𑀅𑀧𑁆𑀧𑀫𑀸𑀡𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀺. 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀏𑀓𑁄…𑀧𑁂… 𑀧𑀭𑀺𑀢𑁆𑀢𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀺. 𑀅𑀧𑁆𑀧𑀫𑀸𑀡𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻’’𑀢𑀺 (𑀤𑀻. 𑀦𑀺. 𑁨.𑁧𑁭𑁩; 𑀫. 𑀦𑀺. 𑁨.𑁨𑁪𑁯; 𑀅. 𑀦𑀺. 𑁮.𑁬𑁫) 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀅𑀪𑀺𑀪𑀸𑀬𑀢𑀦𑀸𑀦𑀁 𑀆𑀕𑀢𑀢𑁆𑀢𑀸 𑀆𑀕𑀫𑀝𑁆𑀞𑀓𑀣𑀸𑀲𑀼 (𑀤𑀻. 𑀦𑀺. 𑀅𑀝𑁆𑀞. 𑁨.𑁧𑁭𑁩; 𑀫. 𑀦𑀺. 𑀅𑀝𑁆𑀞. 𑁨. 𑁨𑁪𑁯-𑁨𑁫𑁦; 𑀅. 𑀦𑀺. 𑀅𑀝𑁆𑀞. 𑁩.𑁮.𑁬𑁫) ‘‘𑀯𑀡𑁆𑀡𑀯𑀲𑁂𑀦 𑀆𑀪𑁄𑀕𑁂 𑀯𑀺𑀚𑁆𑀚𑀫𑀸𑀦𑁂𑀧𑀺 𑀧𑀭𑀺𑀢𑁆𑀢𑀅𑀧𑁆𑀧𑀫𑀸𑀡𑀯𑀲𑁂𑀦𑁂𑀯 𑀇𑀫𑀸𑀦𑀺 𑀅𑀪𑀺𑀪𑀸𑀬𑀢𑀦𑀸𑀦𑀺 𑀤𑁂𑀲𑀺𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀢𑁆𑀢𑀅𑀧𑁆𑀧𑀫𑀸𑀡𑀢𑀸 𑀳𑀺 𑀅𑀪𑀺𑀪𑀯𑀦𑀲𑁆𑀲 𑀓𑀸𑀭𑀡𑀁 𑀯𑀡𑁆𑀡𑀸𑀪𑁄𑀕𑁂 𑀲𑀢𑀺𑀧𑀺 𑀅𑀲𑀢𑀺𑀧𑀺. 𑀢𑀢𑁆𑀣 𑀘 𑀯𑀡𑁆𑀡𑀸𑀪𑁄𑀕𑀭𑀳𑀺𑀢𑀸𑀦𑀺 𑀲𑀳𑀺𑀢𑀸𑀦𑀺 𑀘 𑀲𑀩𑁆𑀩𑀸𑀦𑀺 𑀧𑀭𑀺𑀢𑁆𑀢𑀸𑀦𑀺 ‘‘𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺, 𑀢𑀣𑀸 𑀅𑀧𑁆𑀧𑀫𑀸𑀡𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀅𑀢𑁆𑀣𑀺 𑀳𑀺 𑀏𑀲𑁄 𑀧𑀭𑀺𑀬𑀸𑀬𑁄 𑀧𑀭𑀺𑀢𑁆𑀢𑀸𑀦𑀺 𑀅𑀪𑀺𑀪𑀼𑀬𑁆𑀬 𑀢𑀸𑀦𑀺 𑀘𑁂 𑀓𑀤𑀸𑀘𑀺 𑀯𑀡𑁆𑀡𑀯𑀲𑁂𑀦 𑀆𑀪𑀼𑀚𑀺𑀢𑀸𑀦𑀺 𑀳𑁄𑀦𑁆𑀢𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀺 𑀅𑀪𑀺𑀪𑀼𑀬𑁆𑀬𑀸𑀢𑀺. 𑀇𑀥 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀦𑀢𑁆𑀢𑀸 𑀯𑀡𑁆𑀡𑀸𑀪𑁄𑀕𑀭𑀳𑀺𑀢𑀸𑀦𑀺 𑀯𑀺𑀲𑀼𑀁 𑀯𑀼𑀢𑁆𑀢𑀸𑀦𑀺 𑀲𑀳𑀺𑀢𑀸𑀦𑀺 𑀘. 𑀅𑀢𑁆𑀣𑀺 𑀳𑀺 𑀉𑀪𑀬𑀢𑁆𑀣 𑀅𑀪𑀺𑀪𑀯𑀦𑀯𑀺𑀲𑁂𑀲𑁄𑀢𑀺.

𑀢𑀢𑁆𑀣 𑀘 𑀧𑀭𑀺𑀬𑀸𑀬𑀤𑁂𑀲𑀦𑀢𑁆𑀢𑀸 𑀯𑀺𑀫𑁄𑀓𑁆𑀔𑀸𑀦𑀫𑁆𑀧𑀺 𑀅𑀪𑀺𑀪𑀯𑀦𑀧𑀭𑀺𑀬𑀸𑀬𑁄 𑀅𑀢𑁆𑀣𑀻𑀢𑀺 ‘‘𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻’’𑀢𑀺 𑀅𑀪𑀺𑀪𑀸𑀬𑀢𑀦𑀤𑁆𑀯𑀬𑀁 𑀯𑀼𑀢𑁆𑀢𑀁, 𑀢𑀢𑀺𑀬𑀘𑀢𑀼𑀢𑁆𑀣𑀅𑀪𑀺𑀪𑀸𑀬𑀢𑀦𑁂𑀲𑀼 𑀤𑀼𑀢𑀺𑀬𑀯𑀺𑀫𑁄𑀓𑁆𑀔𑁄 𑀯𑀡𑁆𑀡𑀸𑀪𑀺𑀪𑀸𑀬𑀢𑀦𑁂𑀲𑀼 𑀢𑀢𑀺𑀬𑀯𑀺𑀫𑁄𑀓𑁆𑀔𑁄 𑀘 𑀅𑀪𑀺𑀪𑀯𑀦𑀧𑁆𑀧𑀯𑀢𑁆𑀢𑀺𑀢𑁄 𑀲𑀗𑁆𑀕𑀳𑀺𑀢𑁄, 𑀇𑀥 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀦𑀢𑁆𑀢𑀸 𑀯𑀺𑀫𑁄𑀓𑁆𑀔𑀸𑀪𑀺𑀪𑀸𑀬𑀢𑀦𑀸𑀦𑀺 𑀅𑀲𑀗𑁆𑀓𑀭𑀢𑁄 𑀤𑀲𑁆𑀲𑁂𑀢𑀼𑀁 𑀯𑀺𑀫𑁄𑀓𑁆𑀔𑁂 𑀯𑀚𑁆𑀚𑁂𑀢𑁆𑀯𑀸 𑀅𑀪𑀺𑀪𑀸𑀬𑀢𑀦𑀸𑀦𑀺 𑀓𑀣𑀺𑀢𑀸𑀦𑀺. 𑀲𑀩𑁆𑀩𑀸𑀦𑀺 𑀘 𑀯𑀺𑀫𑁄𑀓𑁆𑀔𑀓𑀺𑀘𑁆𑀘𑀸𑀦𑀺 𑀯𑀺𑀫𑁄𑀓𑁆𑀔𑀤𑁂𑀲𑀦𑀸𑀬 𑀯𑀼𑀢𑁆𑀢𑀸𑀦𑀺, 𑀢𑀤𑁂𑀢𑀁 ‘‘𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻’’𑀢𑀺 𑀆𑀕𑀢𑀲𑁆𑀲 𑀅𑀪𑀺𑀪𑀸𑀬𑀢𑀦𑀤𑁆𑀯𑀬𑀲𑁆𑀲 𑀅𑀪𑀺𑀪𑀸𑀬𑀢𑀦𑁂𑀲𑀼 𑀅𑀯𑀘𑀦𑀢𑁄 ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀻𑀦𑀜𑁆𑀘 𑀲𑀩𑁆𑀩𑀯𑀺𑀫𑁄𑀓𑁆𑀔𑀓𑀺𑀘𑁆𑀘𑀲𑀸𑀥𑀸𑀭𑀡𑀯𑀘𑀦𑀪𑀸𑀯𑀢𑁄 𑀯𑀯𑀢𑁆𑀣𑀸𑀦𑀁 𑀓𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺.

𑀅𑀚𑁆𑀛𑀢𑁆𑀢𑀭𑀽𑀧𑀸𑀦𑀁 𑀅𑀦𑀪𑀺𑀪𑀯𑀦𑀻𑀬𑀢𑁄𑀢𑀺 𑀇𑀤𑀁 𑀓𑀢𑁆𑀣𑀘𑀺𑀧𑀺 ‘‘𑀅𑀚𑁆𑀛𑀢𑁆𑀢𑀁 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺 𑀅𑀯𑀢𑁆𑀯𑀸 𑀲𑀩𑁆𑀩𑀢𑁆𑀣 𑀬𑀁 𑀯𑀼𑀢𑁆𑀢𑀁 ‘‘𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺, 𑀢𑀲𑁆𑀲 𑀓𑀸𑀭𑀡𑀯𑀘𑀦𑀁. 𑀢𑁂𑀦 𑀬𑀁 𑀅𑀜𑁆𑀜𑀳𑁂𑀢𑀼𑀓𑀁, 𑀢𑀁 𑀢𑁂𑀦 𑀳𑁂𑀢𑀼𑀦𑀸 𑀯𑀼𑀢𑁆𑀢𑀁. 𑀬𑀁 𑀧𑀦 𑀤𑁂𑀲𑀦𑀸𑀯𑀺𑀮𑀸𑀲𑀳𑁂𑀢𑀼𑀓𑀁 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀺𑀢𑀸𑀬 𑀏𑀯 𑀇𑀥 𑀯𑀘𑀦𑀁, 𑀦 𑀢𑀲𑁆𑀲 𑀅𑀜𑁆𑀜𑀁 𑀓𑀸𑀭𑀡𑀁 𑀫𑀕𑁆𑀕𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀚𑁆𑀛𑀢𑁆𑀢𑀭𑀽𑀧𑀸𑀦𑀁 𑀅𑀦𑀪𑀺𑀪𑀯𑀦𑀻𑀬𑀢𑀸 𑀘 𑀩𑀳𑀺𑀤𑁆𑀥𑀸𑀭𑀽𑀧𑀸𑀦𑀁 𑀯𑀺𑀬 𑀅𑀯𑀺𑀪𑀽𑀢𑀢𑁆𑀢𑀸, 𑀤𑁂𑀲𑀦𑀸𑀯𑀺𑀮𑀸𑀲𑁄 𑀘 𑀬𑀣𑀸𑀯𑀼𑀢𑁆𑀢𑀯𑀯𑀢𑁆𑀣𑀸𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻𑀢𑀺 𑀏𑀢𑁂𑀦𑁂𑀯 𑀲𑀺𑀤𑁆𑀥𑀢𑁆𑀢𑀸 𑀦𑀻𑀮𑀸𑀤𑀺𑀅𑀪𑀺𑀪𑀸𑀬𑀢𑀦𑀸𑀦𑀺 𑀦 𑀯𑀢𑁆𑀢𑀩𑁆𑀩𑀸𑀦𑀻𑀢𑀺 𑀘𑁂? 𑀦, 𑀦𑀻𑀮𑀸𑀤𑀻𑀲𑀼 𑀓𑀢𑀸𑀥𑀺𑀓𑀸𑀭𑀸𑀦𑀁 𑀦𑀻𑀮𑀸𑀤𑀺𑀪𑀸𑀯𑀲𑁆𑀲𑁂𑀯 𑀅𑀪𑀺𑀪𑀯𑀦𑀓𑀸𑀭𑀡𑀢𑁆𑀢𑀸. 𑀦 𑀳𑀺 𑀢𑁂𑀲𑀁 𑀧𑀭𑀺𑀲𑀼𑀤𑁆𑀥𑀸𑀧𑀭𑀺𑀲𑀼𑀤𑁆𑀥𑀯𑀡𑁆𑀡𑀧𑀭𑀺𑀢𑁆𑀢𑀢𑀸 𑀢𑀤𑀧𑁆𑀧𑀫𑀸𑀡𑀢𑀸 𑀯𑀸 𑀅𑀪𑀺𑀪𑀯𑀦𑀓𑀸𑀭𑀡𑀁, 𑀅𑀣 𑀔𑁄 𑀦𑀻𑀮𑀸𑀤𑀺𑀪𑀸𑀯𑁄 𑀏𑀯𑀸𑀢𑀺.

𑀅𑀪𑀺𑀪𑀸𑀬𑀢𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀺𑀫𑁄𑀓𑁆𑀔𑀓𑀣𑀸𑀯𑀡𑁆𑀡𑀦𑀸

𑁨𑁪𑁮. 𑀭𑀽𑀧𑀻𑀢𑀺 𑀬𑁂𑀦𑀸𑀬𑀁 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑁂𑀦 𑀭𑀽𑀧𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀢𑀁 𑀬𑀲𑁆𑀲 𑀛𑀸𑀦𑀲𑁆𑀲 𑀳𑁂𑀢𑀼𑀪𑀸𑀯𑁂𑀦 𑀯𑀺𑀲𑀺𑀝𑁆𑀞𑀁 𑀭𑀽𑀧𑀁 𑀳𑁄𑀢𑀺. 𑀬𑁂𑀦 𑀯𑀺𑀲𑀺𑀝𑁆𑀞𑁂𑀦 𑀭𑀽𑀧𑀻𑀢𑀺 𑀯𑀼𑀘𑁆𑀘𑁂𑀬𑁆𑀬, 𑀢𑀤𑁂𑀯 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀭𑀽𑀧𑀦𑀺𑀫𑀺𑀢𑁆𑀢𑀁 𑀛𑀸𑀦𑀫𑀺𑀯 𑀧𑀭𑀫𑀢𑁆𑀣𑀢𑁄 𑀭𑀽𑀧𑀻𑀪𑀸𑀯𑀲𑀸𑀥𑀓𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀲𑀺𑀡𑀤𑁂𑀲𑀦𑀸 𑀛𑀸𑀦𑀸𑀦𑀫𑁂𑀯 𑀓𑀲𑀺𑀡𑀪𑀸𑀯𑁂𑀦 𑀧𑀯𑀢𑁆𑀢𑀸 𑀅𑀪𑀺𑀥𑀫𑁆𑀫𑁂, 𑀲𑀼𑀢𑁆𑀢𑁂 𑀧𑀦 𑀆𑀭𑀫𑁆𑀫𑀡𑀸𑀦𑀦𑁆𑀢𑀺 ‘‘𑀅𑀪𑀺𑀥𑀫𑁆𑀫𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑀯𑀺𑀫𑁄𑀓𑁆𑀔𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀩𑁆𑀭𑀳𑁆𑀫𑀯𑀺𑀳𑀸𑀭𑀓𑀣𑀸𑀯𑀡𑁆𑀡𑀦𑀸

𑁨𑁫𑁧. 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀭𑀳𑀺𑀢𑀁 𑀅𑀜𑁆𑀜𑀸𑀡𑀫𑁂𑀯 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸. 𑀓𑀺𑀮𑁂𑀲𑁄𑀥𑀻𑀦𑀁 𑀫𑀕𑁆𑀕𑁄𑀥𑀻𑀳𑀺 𑀅𑀚𑀺𑀢𑀢𑁆𑀢𑀸 𑀅𑀦𑁄𑀥𑀺𑀚𑀺𑀦𑀲𑁆𑀲. 𑀲𑀢𑁆𑀢𑀫𑀪𑀯𑀸𑀤𑀺𑀢𑁄 𑀉𑀤𑁆𑀥𑀁 𑀧𑀯𑀢𑁆𑀢𑀯𑀺𑀧𑀸𑀓𑀲𑁆𑀲 𑀅𑀚𑀺𑀢𑀢𑁆𑀢𑀸 𑀅𑀯𑀺𑀧𑀸𑀓𑀚𑀺𑀦𑀲𑁆𑀲. 𑀦𑀺𑀤𑁆𑀤𑁄𑀲𑀪𑀸𑀯𑁂𑀦𑀸𑀢𑀺 𑀦𑀺𑀧𑁆𑀧𑀝𑀺𑀖𑀪𑀸𑀯𑁂𑀦. 𑀏𑀓𑀲𑁆𑀲𑀧𑀺 𑀲𑀢𑁆𑀢𑀲𑁆𑀲 𑀅𑀧𑁆𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀢𑁆𑀢𑀸 𑀧𑀭𑀺𑀘𑁆𑀙𑁂𑀤𑀕𑁆𑀕𑀳𑀡𑀁 𑀦𑀢𑁆𑀣𑀺, 𑀦 𑀘 𑀲𑀫𑁆𑀫𑀼𑀢𑀺𑀲𑀘𑁆𑀘𑀯𑀲𑁂𑀦 𑀧𑀯𑀢𑁆𑀢𑀁 𑀲𑀢𑁆𑀢𑀕𑁆𑀕𑀳𑀡𑀁 𑀧𑀭𑀺𑀘𑁆𑀙𑀺𑀦𑁆𑀦𑀭𑀽𑀧𑀸𑀤𑀺𑀕𑁆𑀕𑀳𑀡𑀁 𑀳𑁄𑀢𑀻𑀢𑀺 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀺𑀬𑀸𑀧𑀺 𑀅𑀧𑀭𑀸𑀫𑀸𑀲𑀲𑀢𑁆𑀢𑀕𑁆𑀕𑀳𑀡𑀫𑀼𑀤𑁆𑀥𑀪𑀽𑀢𑀸𑀦𑀁 𑀫𑁂𑀢𑁆𑀢𑀸𑀤𑀻𑀦𑀁 𑀏𑀓𑀲𑀢𑁆𑀢𑀸𑀭𑀫𑁆𑀫𑀡𑀸𑀦𑀫𑁆𑀧𑀺 𑀅𑀧𑁆𑀧𑀫𑀸𑀡𑀕𑁄𑀘𑀭𑀢𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀩𑁆𑀭𑀳𑁆𑀫𑀯𑀺𑀳𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀲𑀼𑀪𑀓𑀣𑀸𑀯𑀡𑁆𑀡𑀦𑀸

𑁨𑁬𑁩. 𑀉𑀤𑁆𑀥𑀁 𑀥𑀼𑀫𑀸𑀢𑀢𑁆𑀢𑀸 𑀉𑀤𑁆𑀥𑀼𑀫𑀸𑀢𑀁. 𑀲𑁂𑀢𑀭𑀢𑁆𑀢𑁂𑀳𑀺 𑀧𑀭𑀺𑀪𑀺𑀦𑁆𑀦𑀁 𑀯𑀺𑀫𑀺𑀲𑁆𑀲𑀺𑀢𑀁 𑀦𑀻𑀮𑀁 𑀯𑀺𑀦𑀻𑀮𑀁, 𑀧𑀼𑀭𑀺𑀫𑀯𑀡𑁆𑀡𑀯𑀺𑀧𑀭𑀺𑀡𑀸𑀫𑀪𑀽𑀢𑀁 𑀯𑀸 𑀦𑀻𑀮𑀁 𑀯𑀺𑀦𑀻𑀮𑀁. 𑀲𑀗𑁆𑀖𑀸𑀝𑁄 𑀅𑀗𑁆𑀕𑀸𑀦𑀁 𑀲𑀼𑀲𑀫𑁆𑀩𑀤𑁆𑀥𑀢𑀸. 𑀆𑀭𑀫𑁆𑀫𑀡𑀲𑁆𑀲 𑀤𑀼𑀩𑁆𑀩𑀮𑀢𑀸 𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀘𑀺𑀢𑁆𑀢𑀁 𑀞𑀧𑁂𑀢𑀼𑀁 𑀅𑀲𑀫𑀢𑁆𑀣𑀢𑀸. 𑀅𑀢𑁆𑀢𑀦𑀺 𑀆𑀦𑀺𑀲𑀁𑀲𑀤𑀲𑁆𑀲𑀦𑀦𑀻𑀯𑀭𑀡𑀭𑁄𑀕𑀯𑀽𑀧𑀲𑀫𑀸𑀦𑀁 𑀬𑀣𑀸𑀓𑁆𑀓𑀫𑀁 𑀧𑀼𑀧𑁆𑀨𑀙𑀟𑁆𑀟𑀓𑀯𑀫𑀦𑀯𑀺𑀭𑁂𑀘𑀦𑀉𑀧𑀫𑀸 𑀬𑁄𑀚𑁂𑀢𑀩𑁆𑀩𑀸. 𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑀲𑀸𑀫𑀜𑁆𑀜𑁂𑀦 𑀅𑀲𑀼𑀪𑁂𑀳𑀺 𑀓𑁂𑀲𑀸𑀤𑀻𑀳𑀺 𑀧𑀝𑀺𑀓𑀽𑀮𑀚𑁆𑀛𑀸𑀦𑀲𑁆𑀲 𑀕𑀳𑀡𑀁 𑀲𑀺𑀯𑀣𑀺𑀓𑀸𑀯𑀡𑁆𑀡𑀚𑁆𑀛𑀸𑀦𑀲𑁆𑀲 𑀘. 𑀢𑀫𑁆𑀧𑀺 𑀳𑀺 𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑀯𑀲𑁂𑀦𑁂𑀯 𑀉𑀧𑁆𑀧𑀚𑁆𑀚𑀢𑀻𑀢𑀺, 𑀲𑀺𑀯𑀣𑀺𑀓𑀧𑁆𑀧𑀓𑀸𑀭𑀸𑀦𑀺 𑀯𑀸 𑀲𑀺𑀯𑀣𑀺𑀓𑀸𑀯𑀡𑁆𑀡𑀸𑀦𑀺.

𑀅𑀲𑀼𑀪𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀭𑀽𑀧𑀸𑀯𑀘𑀭𑀓𑀼𑀲𑀮𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀓𑀣𑀸𑀯𑀡𑁆𑀡𑀦𑀸

𑁨𑁬𑁫. 𑀲𑀩𑁆𑀩𑀸𑀓𑀸𑀭𑁂𑀦𑀸𑀢𑀺 𑀏𑀯𑀁 𑀭𑀽𑀧𑀦𑀺𑀫𑀺𑀢𑁆𑀢𑀁 𑀤𑀡𑁆𑀟𑀸𑀤𑀸𑀦𑀲𑀫𑁆𑀪𑀯𑀤𑀲𑁆𑀲𑀦𑀸𑀤𑀺𑀦𑀸 𑀲𑀩𑁆𑀩𑁂𑀦 𑀭𑀽𑀧𑀭𑀽𑀧𑀦𑀺𑀫𑀺𑀢𑁆𑀢𑁂𑀲𑀼 𑀢𑀤𑀸𑀭𑀫𑁆𑀫𑀡𑀚𑁆𑀛𑀸𑀦𑁂𑀲𑀼 𑀤𑁄𑀲𑀤𑀲𑁆𑀲𑀦𑀸𑀓𑀸𑀭𑁂𑀦, 𑀭𑀽𑀧𑀸𑀤𑀻𑀲𑀼 𑀦𑀺𑀓𑀦𑁆𑀢𑀺𑀧𑁆𑀧𑀳𑀸𑀦𑀅𑀦𑀸𑀯𑀚𑁆𑀚𑀺𑀢𑀼𑀓𑀸𑀫𑀢𑀸𑀤𑀺𑀦𑀸 𑀯𑀸. 𑀯𑀺𑀭𑀸𑀕𑀸𑀢𑀺 𑀚𑀺𑀕𑀼𑀘𑁆𑀙𑀦𑀸. 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀯𑀘𑀦𑀸𑀤𑀻𑀳𑀺 𑀆𑀦𑁂𑀜𑁆𑀚𑀢𑀸 ‘‘𑀲𑀦𑁆𑀢𑀸 𑀇𑀫𑁂 𑀘𑀼𑀦𑁆𑀤 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀯𑀺𑀫𑁄𑀓𑁆𑀔𑀸’’𑀢𑀺𑀆𑀤𑀺𑀦𑀸 𑀲𑀦𑁆𑀢𑀯𑀺𑀫𑁄𑀓𑁆𑀔𑀢𑀸 𑀘 𑀯𑀼𑀢𑁆𑀢𑀸. 𑀤𑁄𑀲𑀤𑀲𑁆𑀲𑀦𑀧𑀝𑀺𑀧𑀓𑁆𑀔𑀪𑀸𑀯𑀦𑀸𑀯𑀲𑁂𑀦 𑀧𑀝𑀺𑀖𑀲𑀜𑁆𑀜𑀸𑀦𑀁 𑀲𑀼𑀧𑁆𑀧𑀳𑀻𑀦𑀢𑁆𑀢𑀸 𑀫𑀳𑀢𑀸𑀧𑀺 𑀲𑀤𑁆𑀤𑁂𑀦 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀢𑁄 𑀦 𑀯𑀼𑀝𑁆𑀞𑀸𑀢𑀺. 𑀢𑀣𑀸 𑀧𑀦 𑀦 𑀲𑀼𑀧𑁆𑀧𑀳𑀻𑀦𑀢𑁆𑀢𑀸 𑀲𑀩𑁆𑀩𑀭𑀽𑀧𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀦𑀁 𑀲𑀺𑀬𑀸, 𑀧𑀞𑀫𑀚𑁆𑀛𑀸𑀦𑀁 𑀧𑀦 𑀅𑀧𑁆𑀧𑀓𑀫𑁆𑀧𑀺 𑀲𑀤𑁆𑀤𑀁 𑀦 𑀲𑀳𑀢𑀻𑀢𑀺 𑀢𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀤𑁆𑀤𑁄 𑀓𑀡𑁆𑀝𑀓𑁄𑀢𑀺 𑀯𑀼𑀢𑁆𑀢𑀁.

𑀆𑀭𑀼𑀧𑁆𑀧𑀪𑀸𑀯𑀦𑀸𑀬 𑀅𑀪𑀸𑀯𑁂 𑀘𑀼𑀢𑀺𑀢𑁄 𑀉𑀤𑁆𑀥𑀁 𑀉𑀧𑁆𑀧𑀢𑁆𑀢𑀺𑀭𑀳𑀸𑀦𑀁 𑀭𑀽𑀧𑀲𑀜𑁆𑀜𑀸𑀧𑀝𑀺𑀖𑀲𑀜𑁆𑀜𑀸𑀦𑀁 𑀬𑀸𑀯 𑀅𑀢𑁆𑀢𑀦𑁄 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺, 𑀢𑀸𑀯 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑁂𑀦 𑀲𑀫𑀢𑀺𑀓𑁆𑀓𑀫𑁄 𑀅𑀢𑁆𑀣𑀗𑁆𑀕𑀫𑁄 𑀘 𑀯𑀼𑀢𑁆𑀢𑁄. 𑀦𑀸𑀦𑀢𑁆𑀢𑀲𑀜𑁆𑀜𑀸𑀲𑀼 𑀧𑀦 𑀬𑀸 𑀢𑀲𑁆𑀫𑀺𑀁 𑀪𑀯𑁂 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀸 𑀅𑀦𑁄𑀓𑀸𑀲𑀢𑀸𑀬 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀆𑀭𑀼𑀧𑁆𑀧𑀪𑀸𑀯𑀦𑀸𑀬 𑀦𑀺𑀯𑀸𑀭𑀺𑀢𑀢𑁆𑀢𑀸. 𑀅𑀦𑀺𑀯𑀸𑀭𑀺𑀢𑀢𑁆𑀢𑀸 𑀘 𑀓𑀸𑀘𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀲𑁆𑀫𑀸 𑀢𑀸𑀲𑀁 𑀅𑀫𑀦𑀲𑀺𑀓𑀸𑀭𑁄 𑀅𑀦𑀸𑀯𑀚𑁆𑀚𑀦𑀁 𑀅𑀧𑀘𑁆𑀘𑀯𑁂𑀓𑁆𑀔𑀡𑀁, 𑀚𑀯𑀦𑀧𑀝𑀺𑀧𑀸𑀤𑀓𑁂𑀦 𑀯𑀸 𑀪𑀯𑀗𑁆𑀕𑀫𑀦𑀲𑁆𑀲 𑀅𑀦𑁆𑀢𑀭𑁂 𑀅𑀓𑀭𑀡𑀁 𑀅𑀧𑁆𑀧𑀯𑁂𑀲𑀦𑀁 𑀯𑀼𑀢𑁆𑀢𑀁, 𑀢𑁂𑀦 𑀘 𑀦𑀸𑀦𑀢𑁆𑀢𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀳𑁂𑀢𑀽𑀦𑀁 𑀭𑀽𑀧𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀲𑀫𑀸𑀥𑀺𑀲𑁆𑀲 𑀣𑀺𑀭𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀭𑀽𑀧𑀲𑀫𑀢𑀺𑀓𑁆𑀓𑀫𑀸𑀪𑀸𑀯𑁂𑀦𑁂𑀯 𑀳𑀺 𑀭𑀽𑀧𑀲𑀫𑀸𑀧𑀢𑁆𑀢𑀻𑀲𑀼 ‘‘𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸’’𑀢𑀺 𑀏𑀓𑀲𑁆𑀲 𑀅𑀯𑀘𑀦𑀦𑁆𑀢𑀺. 𑀓𑁄 𑀆𑀦𑀺𑀲𑀁𑀲𑁄, 𑀦 𑀳𑀺 𑀲𑀩𑁆𑀩𑀲𑁆𑀲𑀸𑀤𑀯𑀢𑁆𑀣𑀼𑀭𑀳𑀺𑀢𑁂 𑀆𑀓𑀸𑀲𑁂 𑀧𑀯𑀢𑁆𑀢𑀺𑀢𑀲𑀜𑁆𑀜𑀸𑀬 𑀆𑀦𑀺𑀲𑀁𑀲𑁄 𑀤𑀺𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀭𑀽𑀧𑀲𑀜𑁆𑀜𑀸𑀲𑀫𑀢𑀺𑀓𑁆𑀓𑀫𑀦𑀸𑀤𑀺𑀓𑀁 𑀯𑀘𑀦𑀁 𑀆𑀦𑀺𑀲𑀁𑀲𑀲𑁆𑀲 𑀧𑀓𑀸𑀲𑀦𑀁, 𑀦 𑀅𑀢𑁆𑀣𑁄.

𑀅𑀜𑁆𑀜𑀢𑁆𑀣𑀸𑀢𑀺 𑀲𑀼𑀢𑁆𑀢𑁂𑀲𑀼. 𑀢𑀢𑁆𑀣 𑀳𑀺 𑀧𑀭𑀺𑀢𑁆𑀢𑀓𑀲𑀺𑀡𑀼𑀕𑁆𑀖𑀸𑀝𑀦𑁂𑀧𑀺 𑀭𑀽𑀧𑀯𑀺𑀯𑁂𑀓𑀫𑀢𑁆𑀢𑀕𑁆𑀕𑀳𑀡𑁂𑀦 𑀧𑀭𑀺𑀘𑁆𑀙𑁂𑀤𑀲𑁆𑀲 𑀅𑀕𑁆𑀕𑀳𑀡𑀢𑁄 𑀅𑀦𑀦𑁆𑀢𑀨𑀭𑀡𑀢𑀸 𑀘 𑀯𑀼𑀢𑁆𑀢𑀸, 𑀇𑀥 𑀧𑀦 𑀅𑀦𑀦𑁆𑀢𑀨𑀭𑀡𑀢𑀸𑀲𑀩𑁆𑀪𑀸𑀯𑁂𑀧𑀺 𑀉𑀕𑁆𑀖𑀸𑀝𑀺𑀢𑀓𑀲𑀺𑀡𑀯𑀲𑁂𑀦 𑀧𑀭𑀺𑀢𑁆𑀢𑀸𑀦𑀦𑁆𑀢𑀢𑀸 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀦𑀦𑁆𑀢𑁄 𑀆𑀓𑀸𑀲𑁄’’𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀫𑀬𑀯𑀯𑀢𑁆𑀣𑀸𑀧𑀦𑀛𑀸𑀦𑀯𑀺𑀲𑁂𑀲𑀦𑁂𑀦𑁂𑀯𑁂𑀢𑁆𑀣 𑀅𑀢𑁆𑀣𑁄, 𑀦 𑀧𑀝𑀺𑀧𑀢𑁆𑀢𑀺𑀬𑀸𑀢𑀺 𑀢𑀤𑀯𑀘𑀦𑀁.

𑁨𑁬𑁬. 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀦𑁄 𑀨𑀭𑀡𑀸𑀓𑀸𑀭𑁂𑀦𑁂𑀯 𑀅𑀦𑀦𑁆𑀢𑀦𑁆𑀢𑀺 𑀫𑀦𑀲𑀺𑀓𑀸𑀢𑀩𑁆𑀩𑀢𑁆𑀢𑀸 ‘‘𑀅𑀦𑀦𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀕𑁆𑀖𑀸𑀝𑀪𑀸𑀯𑁄 𑀉𑀕𑁆𑀖𑀸𑀝𑀺𑀫𑀁.

𑁨𑁬𑁭. 𑀅𑀓𑀺𑀜𑁆𑀘𑀦𑀦𑁆𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀓𑀺𑀜𑁆𑀘𑀺 𑀧𑀓𑀸𑀭𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀯𑀺𑀪𑀸𑀯𑀦𑀁 𑀆𑀳.

𑁨𑁬𑁮. 𑀬𑀸𑀬𑀸𑀢𑀺 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀜𑁆𑀜𑀸𑀬. 𑀢𑀁 𑀢𑀸𑀯 𑀧𑀝𑀺𑀧𑀢𑁆𑀢𑀺𑀁. 𑀆𑀯𑀚𑁆𑀚𑀺𑀲𑁆𑀲𑀸𑀫𑀻𑀢𑀺𑀆𑀤𑀺𑀦𑀸 𑀢𑀦𑁆𑀦𑀺𑀦𑁆𑀦𑀸𑀯𑀚𑁆𑀚𑀦𑀸𑀤𑀺𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀦 𑀢𑀤𑀢𑀺𑀓𑁆𑀓𑀫𑀦𑀢𑁆𑀣𑀸𑀬 𑀆𑀯𑀚𑁆𑀚𑀦𑀪𑀸𑀯𑀦𑀸𑀧𑀯𑀢𑁆𑀢𑀺𑀬𑀸. 𑀦𑀸𑀲𑀜𑁆𑀜𑀸𑀢𑀺 𑀲𑀜𑁆𑀜𑀸𑀪𑀸𑀯𑁄 𑀘 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀲𑀫𑀽𑀳𑀕𑀳𑀡𑀯𑀲𑁂𑀦 𑀧𑀯𑀢𑁆𑀢𑀁 𑀓𑀮𑀸𑀧𑀲𑀫𑁆𑀫𑀲𑀦𑀁. 𑀨𑀲𑁆𑀲𑀸𑀤𑀺𑀏𑀓𑁂𑀓𑀥𑀫𑁆𑀫𑀕𑀳𑀡𑀯𑀲𑁂𑀦 𑀧𑀯𑀢𑁆𑀢𑀸 𑀅𑀦𑀼𑀧𑀤𑀥𑀫𑁆𑀫𑀯𑀺𑀧𑀲𑁆𑀲𑀦𑀸.

𑀆𑀓𑀸𑀲𑁂 𑀧𑀯𑀢𑁆𑀢𑀺𑀢𑀯𑀺𑀜𑁆𑀜𑀸𑀡𑀸𑀢𑀺𑀓𑁆𑀓𑀫𑀢𑁄 𑀢𑀢𑀺𑀬𑀸. 𑀢𑀤𑀢𑀺𑀓𑁆𑀓𑀫𑀢𑁄 𑀳𑀺 𑀢𑀲𑁆𑀲𑁂𑀯 𑀯𑀺𑀪𑀸𑀯𑀦𑀁 𑀳𑁄𑀢𑀺. 𑀤𑀼𑀢𑀺𑀬𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀯𑀺𑀪𑀸𑀯𑀦𑁂 𑀳𑀺 𑀢𑀤𑁂𑀯 𑀅𑀢𑀺𑀓𑁆𑀓𑀦𑁆𑀢𑀁 𑀲𑀺𑀬𑀸, 𑀦 𑀢𑀲𑁆𑀲 𑀆𑀭𑀫𑁆𑀫𑀡𑀁, 𑀦 𑀘𑀸𑀭𑀫𑁆𑀫𑀡𑁂 𑀤𑁄𑀲𑀁 𑀤𑀺𑀲𑁆𑀯𑀸 𑀅𑀦𑀸𑀭𑀫𑁆𑀫𑀡𑀲𑁆𑀲 𑀯𑀺𑀪𑀸𑀯𑀦𑀸𑀢𑀺𑀓𑁆𑀓𑀫𑁄 𑀬𑀼𑀚𑁆𑀚𑀢𑀺. 𑀧𑀸𑀴𑀺𑀬𑀜𑁆𑀘 ‘‘𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀲𑀢𑁄 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀢𑀜𑁆𑀜𑁂𑀯 𑀯𑀺𑀜𑁆𑀜𑀸𑀡𑀁 𑀅𑀪𑀸𑀯𑁂𑀢𑀻’’𑀢𑀺 (𑀘𑀽𑀴𑀦𑀺. 𑀉𑀧𑀲𑀻𑀯𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁩𑁯) 𑀢𑁆𑀢𑀁, 𑀦 𑀯𑀼𑀢𑁆𑀢𑀁 ‘‘𑀢𑀜𑁆𑀜𑁂𑀯 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀅𑀪𑀸𑀯𑁂𑀢𑀻’’𑀢𑀺, ‘‘𑀢𑀜𑁆𑀜𑁂𑀯 𑀅𑀪𑀸𑀯𑁂𑀢𑀻’’𑀢𑀺 𑀯𑀸. ‘‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚𑀸’’𑀢𑀺 (𑀯𑀺𑀪. 𑁫𑁦𑁮) 𑀏𑀢𑁆𑀣 𑀧𑀦 𑀤𑁆𑀯𑀬𑀁 𑀯𑀼𑀢𑁆𑀢𑀁 𑀆𑀭𑀫𑁆𑀫𑀡𑀜𑁆𑀘 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀜𑁆𑀘. 𑀢𑀲𑁆𑀫𑀺𑀁 𑀤𑁆𑀯𑀬𑁂 𑀬𑁂𑀦 𑀓𑁂𑀦𑀘𑀺 𑀬𑀢𑁄 𑀯𑀸 𑀯𑀼𑀝𑁆𑀞𑀺𑀢𑁄, 𑀢𑁂𑀦𑁂𑀯 𑀧𑀝𑁆𑀞𑀸𑀦𑀦𑀺𑀤𑁆𑀤𑀺𑀝𑁆𑀞𑁂𑀦 𑀢𑀁𑀲𑀤𑁆𑀤𑀲𑁆𑀲 𑀲𑀫𑁆𑀩𑀦𑁆𑀥𑁂 𑀆𑀧𑀦𑁆𑀦𑁂 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑁆𑀲 𑀦𑀺𑀯𑀢𑁆𑀢𑀦𑀢𑁆𑀣𑀁 𑀯𑀺𑀜𑁆𑀜𑀸𑀡𑀯𑀘𑀦𑀁, 𑀢𑀲𑁆𑀫𑀸 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀲𑁆𑀲𑁂𑀯 𑀅𑀪𑀸𑀯𑀦𑀸𑀢𑀺𑀓𑁆𑀓𑀫𑁄 𑀯𑀼𑀢𑁆𑀢𑁄. 𑀢𑀦𑁆𑀦𑀺𑀲𑁆𑀲𑀺𑀢𑀦𑁆𑀢𑀺 𑀢𑁂𑀦 𑀦𑀺𑀲𑁆𑀲𑀺𑀢𑀁. 𑀢𑀁 𑀫𑀡𑁆𑀟𑀧𑀮𑀕𑁆𑀕𑀁 𑀅𑀦𑀺𑀲𑁆𑀲𑀸𑀬 𑀢𑁂𑀦 𑀯𑀺𑀦𑀸𑀪𑀽𑀢𑁂 𑀯𑀺𑀯𑀺𑀢𑁆𑀢𑁂 𑀩𑀳𑀺 𑀑𑀓𑀸𑀲𑁂 𑀞𑀸𑀦𑀁 𑀯𑀺𑀬 𑀆𑀓𑀸𑀲𑀮𑀕𑁆𑀕𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀯𑁂𑀓𑁂 𑀢𑀤𑀧𑀕𑀫𑁂 𑀢𑀢𑀺𑀬𑀸𑀭𑀼𑀧𑁆𑀧𑀲𑁆𑀲 𑀞𑀸𑀦𑀁.

𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑁂𑀪𑀽𑀫𑀓𑀓𑀼𑀲𑀮𑀯𑀡𑁆𑀡𑀦𑀸

𑁨𑁬𑁯. 𑀇𑀫𑁂 𑀢𑀸𑀯 𑀙𑀦𑁆𑀤𑀸𑀥𑀺𑀧𑀢𑁂𑀬𑁆𑀬𑁂 𑀧𑀜𑁆𑀘 𑀦𑀬𑀸𑀢𑀺 𑀙𑀦𑁆𑀤𑀸𑀥𑀺𑀧𑀢𑁂𑀬𑁆𑀬𑀦𑀬𑁂 𑀅𑀦𑁆𑀢𑁂 𑀧𑀼𑀭𑀺𑀫𑀦𑀬𑀸𑀦𑀁 𑀢𑀁𑀦𑀬𑀸𑀪𑀺𑀫𑀼𑀔𑀧𑁆𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀬𑀁 𑀧𑀦 𑀧𑀓𑀸𑀭𑁄 𑀦 𑀧𑀸𑀴𑀺𑀅𑀦𑀼𑀕𑀢𑁄. 𑀦 𑀳𑀺 𑀧𑀸𑀴𑀺𑀬𑀁 𑀲𑀼𑀤𑁆𑀥𑀺𑀓𑀦𑀬𑀸𑀤𑀬𑁄 𑀯𑀢𑁆𑀯𑀸 𑀯𑀻𑀭𑀺𑀬𑀸𑀥𑀺𑀧𑀢𑁂𑀬𑁆𑀬𑀸𑀤𑀺𑀦𑀬𑀸 𑀯𑀼𑀢𑁆𑀢𑀸𑀢𑀺. 𑀫𑀳𑀸𑀧𑀓𑀭𑀡𑁂 𑀲𑀢𑁆𑀢𑀳𑀺 𑀫𑀳𑀸𑀯𑀸𑀭𑁂𑀳𑀺 𑀅𑀦𑀼𑀮𑁄𑀫𑀸𑀤𑀺𑀦𑀬𑀯𑀺𑀘𑀺𑀢𑁆𑀢𑁂𑀳𑀺 𑀳𑀻𑀦𑀢𑁆𑀢𑀺𑀓𑁄 𑀯𑀺𑀪𑀢𑁆𑀢𑁄. 𑀢𑀢𑁆𑀣 𑀘 𑀫𑀚𑁆𑀛𑀺𑀫𑀥𑀫𑁆𑀫𑁂𑀓𑀤𑁂𑀲𑀪𑀽𑀢𑀸 𑀇𑀫𑁂 𑀯𑀻𑀲𑀢𑀺 𑀮𑁄𑀓𑀺𑀬𑀫𑀳𑀸𑀦𑀬𑀸𑀢𑀺 𑀓𑀢𑁆𑀯𑀸 ‘‘𑀢𑀢𑁆𑀣 𑀯𑀺𑀪𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁, 𑀦 𑀏𑀢𑁂𑀦 𑀓𑀫𑁂𑀦 𑀇𑀫𑁂𑀲𑀁 𑀦𑀬𑀸𑀦𑀁 𑀢𑀢𑁆𑀣 𑀆𑀕𑀢𑀢𑁆𑀢𑀸.

𑀏𑀯𑀫𑁂𑀢𑁂𑀲𑀁 𑀯𑀺𑀪𑀢𑁆𑀢𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀏𑀢𑀲𑁆𑀫𑀺𑀁 𑀢𑁂𑀪𑀽𑀫𑀓𑀓𑀼𑀲𑀮𑀓𑀣𑀸𑀯𑀲𑀸𑀦𑀝𑁆𑀞𑀸𑀦𑁂 𑀅𑀝𑁆𑀞𑀸𑀭𑀲𑀓𑀫𑁆𑀫𑀤𑁆𑀯𑀸𑀭𑀤𑀲𑁆𑀲𑀦𑀢𑁆𑀣𑀁 ‘‘𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂’’𑀢𑀺𑀆𑀤𑀺𑀫𑀸𑀳. 𑀅𑀣 𑀯𑀸 𑀳𑀻𑀦𑀧𑀡𑀻𑀢𑁂𑀳𑀺 𑀯𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀫𑀚𑁆𑀛𑀺𑀫𑀭𑀸𑀲𑀺𑀅𑀦𑁆𑀢𑁄𑀕𑀥𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁂𑀦 𑀏𑀢𑁂𑀲𑀁 𑀢𑁂𑀪𑀽𑀫𑀓𑀓𑀼𑀲𑀮𑀦𑀬𑀸𑀦𑀁 𑀳𑀻𑀦𑀢𑁆𑀢𑀺𑀓𑁂 𑀯𑀺𑀪𑀸𑀕𑁄 𑀓𑀢𑁄. ‘‘𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂’’𑀢𑀺𑀆𑀤𑀺𑀓𑀲𑁆𑀲 𑀬𑀣𑀸𑀯𑀼𑀢𑁆𑀢𑁄𑀯 𑀲𑀫𑁆𑀩𑀦𑁆𑀥𑁄. 𑀳𑀻𑀦𑀢𑁆𑀢𑀺𑀓𑁂 𑀫𑀚𑁆𑀛𑀺𑀫𑀭𑀸𑀲𑀺𑀫𑁆𑀳𑀺 𑀬𑁂 𑀲𑀯𑀺𑀧𑀸𑀓𑀸 𑀯𑀝𑁆𑀝𑀦𑀺𑀲𑁆𑀲𑀺𑀢𑁂𑀦𑁂𑀯 𑀤𑀸𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀢𑀸, 𑀢𑁂 𑀳𑀻𑀦𑀸𑀢𑀺 𑀓𑀸𑀢𑀩𑁆𑀩𑀸. 𑀬𑁂 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑁂𑀦 𑀤𑀸𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀢𑀸, 𑀢𑁂 𑀧𑀡𑀻𑀢𑀸𑀢𑀺 𑀓𑀸𑀢𑀩𑁆𑀩𑀸. 𑀅𑀯𑀺𑀧𑀸𑀓𑀸 𑀫𑀚𑁆𑀛𑀺𑀫𑀸𑀢𑀺 𑀓𑀸𑀢𑀩𑁆𑀩𑀸. 𑀅𑀯𑀺𑀧𑀸𑀓𑀢𑁆𑀢𑀸 𑀘 𑀢𑁂𑀲𑀼 𑀫𑀚𑁆𑀛𑀺𑀫𑀭𑀸𑀲𑀺𑀁 𑀞𑀧𑁂𑀢𑁆𑀯𑀸 𑀇𑀢𑀭𑁂 𑀤𑁆𑀯𑁂 𑀏𑀓𑀦𑁆𑀢𑀯𑀝𑁆𑀝𑀦𑀺𑀲𑁆𑀲𑀺𑀢𑀸 𑀦𑀯, 𑀯𑀺𑀯𑀝𑁆𑀝𑀼𑀧𑀦𑀺𑀲𑁆𑀲𑀬𑀪𑀽𑀢𑀸 𑀘 𑀦𑀯𑀸𑀢𑀺 𑀅𑀝𑁆𑀞𑀸𑀭𑀲 𑀓𑀫𑁆𑀫𑀤𑁆𑀯𑀸𑀭𑀸𑀦𑀺, 𑀓𑀫𑁆𑀫𑀸𑀦𑀺 𑀘 𑀢𑀸𑀦𑀺 𑀢𑀲𑁆𑀲 𑀢𑀲𑁆𑀲 𑀨𑀮𑀲𑁆𑀲 𑀓𑀸𑀭𑀡𑀪𑀸𑀯𑁂𑀦 𑀤𑁆𑀯𑀸𑀭𑀸𑀦𑀺 𑀘𑀸𑀢𑀺 𑀓𑀫𑁆𑀫𑀤𑁆𑀯𑀸𑀭𑀸𑀦𑀺. 𑀢𑀢𑁆𑀣 𑀢𑀢𑁆𑀣 𑀯𑀸 𑀘𑀺𑀢𑁆𑀢𑀸𑀦𑀺 𑀓𑀫𑁆𑀫𑀤𑁆𑀯𑀸𑀭𑀸𑀦𑀻𑀢𑀺 𑀆𑀳. 𑀢𑀁𑀢𑀁𑀤𑁆𑀯𑀸𑀭𑀸𑀦𑀺 𑀯𑀸 𑀓𑀸𑀬𑀸𑀤𑀻𑀦𑀺. 𑀅𑀝𑁆𑀞𑀸𑀭𑀲 𑀔𑀢𑁆𑀢𑀺𑀬𑀸 𑀘 𑀅𑀪𑀩𑁆𑀩𑀸 𑀳𑀻𑀦𑀳𑀻𑀦𑀢𑁆𑀢𑀬𑀸𑀤𑀬𑁄 𑀦𑀯, 𑀪𑀩𑁆𑀩𑀸 𑀘 𑀧𑀡𑀻𑀢𑀧𑀡𑀻𑀢𑀢𑁆𑀢𑀬𑀸𑀤𑀬𑁄 𑀦𑀯𑀸𑀢𑀺 𑀓𑀫𑁆𑀫𑀸𑀦𑀼𑀭𑀽𑀧𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀩𑁆𑀭𑀸𑀳𑁆𑀫𑀡𑀸𑀤𑀬𑁄 𑀤𑁂𑀯𑀸 𑀘 𑀬𑁄𑀚𑁂𑀢𑀩𑁆𑀩𑀸. 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀕𑁄𑀢𑁆𑀢𑀘𑀭𑀡𑀸𑀦𑀺 𑀢𑁂𑀲𑀜𑁆𑀜𑁂𑀯 𑀔𑀢𑁆𑀢𑀺𑀬𑀸𑀤𑀻𑀦𑀁 𑀪𑁂𑀤𑀸. ‘‘𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺…𑀧𑁂… 𑀘𑀺𑀢𑁆𑀢𑀸𑀥𑀺𑀧𑀢𑁂𑀬𑁆𑀬’’𑀦𑁆𑀢𑀺 (𑀥. 𑀲. 𑁨𑁬𑁯-𑁨𑁭𑁦) 𑀏𑀯𑀁 𑀯𑀼𑀢𑁆𑀢𑁄 𑀘𑀺𑀢𑁆𑀢𑀲𑁆𑀲 𑀘𑀺𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀪𑀸𑀯𑁄, 𑀘𑀺𑀢𑁆𑀢𑀘𑁂𑀢𑀲𑀺𑀓𑀲𑀫𑀼𑀤𑀸𑀬𑁂 𑀲𑀫𑀬𑀯𑀯𑀢𑁆𑀣𑀸𑀧𑀓𑁄 𑀘𑀺𑀢𑁆𑀢𑀲𑀤𑁆𑀤𑁄 𑀧𑀯𑀢𑁆𑀢𑁄𑀢𑀺 ‘‘𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑁄’’𑀢𑀺 𑀆𑀳.

𑀢𑁂𑀪𑀽𑀫𑀓𑀓𑀼𑀲𑀮𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀯𑀡𑁆𑀡𑀦𑀸

𑁨𑁭𑁭. 𑀮𑁄𑀓𑀁 𑀢𑀭𑀢𑀻𑀢𑀺 𑀏𑀢𑁂𑀦 𑀮𑁄𑀓𑀲𑀫𑀢𑀺𑀓𑁆𑀓𑀫𑀧𑀝𑀺𑀧𑀢𑁆𑀢𑀺𑀫𑀸𑀳. 𑀉𑀢𑁆𑀢𑀭𑀢𑀻𑀢𑀺 𑀏𑀢𑁂𑀦 𑀮𑁄𑀓𑀲𑁆𑀲𑀦𑁆𑀢𑀕𑀫𑀦𑀁 𑀨𑀮𑁂 𑀧𑀢𑀺𑀝𑁆𑀞𑀸𑀦𑀁 𑀨𑀮𑀁. 𑀲𑀫𑀢𑀺𑀓𑁆𑀓𑀫𑁆𑀫𑀸𑀢𑀺𑀆𑀤𑀺𑀦𑀸 𑀦𑀺𑀩𑁆𑀩𑀸𑀦𑀁. 𑀲𑀫𑀢𑀺𑀓𑁆𑀓𑀫𑁆𑀫𑀸𑀢𑀺 𑀳𑀺 𑀦𑀺𑀲𑁆𑀲𑀭𑀺𑀢𑁆𑀯𑀸. 𑀅𑀪𑀺𑀪𑀼𑀬𑁆𑀬𑀸𑀢𑀺 𑀯𑀺𑀲𑀁𑀬𑀼𑀢𑁆𑀢𑀁 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀺𑀯𑀺𑀥𑁄𑀧𑀺 𑀘𑀢𑁆𑀣𑁄 𑀫𑀕𑁆𑀕𑀸𑀤𑀻𑀲𑀼 𑀏𑀓𑁂𑀓𑀲𑁆𑀫𑀺𑀁 𑀬𑁄𑀚𑁂𑀢𑀩𑁆𑀩𑁄, 𑀫𑀕𑁆𑀕𑁂𑀬𑁂𑀯 𑀯𑀸 𑀇𑀥 𑀢𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀦𑁆𑀢𑀺 𑀏𑀓𑀫𑀕𑁆𑀕𑀲𑁆𑀲 𑀤𑁆𑀯𑁂 𑀯𑀸𑀭𑁂 𑀅𑀦𑀼𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬𑀸𑀳. 𑀅𑀜𑁆𑀜𑀫𑀜𑁆𑀜𑀁 𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀸𑀤𑀺𑀲𑀸𑀥𑀺𑀓𑀸𑀬 𑀧𑀜𑁆𑀜𑀸𑀬 𑀯𑀟𑁆𑀠𑁂𑀢𑀺. ‘‘𑀦𑀺𑀬𑁆𑀬𑀸𑀢𑀻𑀢𑀺 𑀦𑀺𑀬𑁆𑀬𑀸𑀦𑀻𑀬’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀈-𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁 𑀬-𑀓𑀸𑀭𑀲𑁆𑀲 𑀘 𑀓-𑀓𑀸𑀭𑀁 𑀓𑀢𑁆𑀯𑀸 ‘‘𑀦𑀺𑀬𑁆𑀬𑀸𑀦𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀦𑀺𑀬𑁆𑀬𑀸𑀢𑀺 𑀏𑀢𑁂𑀦𑀸𑀢𑀺 𑀦𑀺𑀬𑁆𑀬𑀸𑀦𑀁, 𑀦𑀺𑀬𑁆𑀬𑀸𑀦𑀫𑁂𑀯 𑀦𑀺𑀬𑁆𑀬𑀸𑀦𑀺𑀓𑀁 𑀯𑁂𑀦𑀬𑀺𑀓𑁄 𑀯𑀺𑀬. 𑀏𑀢𑁆𑀣 ‘‘𑀦𑁂𑀬𑁆𑀬𑀸𑀦𑀺𑀓’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀇-𑀓𑀸𑀭𑀲𑁆𑀲 𑀏-𑀓𑀸𑀭𑀢𑁆𑀢𑀁 𑀅𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀨𑀮𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀭𑀸𑀲𑀺 𑀯𑀼𑀘𑁆𑀘𑀢𑀺, 𑀢𑀁 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀢𑀦𑁄 𑀅𑀯𑀬𑀯𑀪𑀽𑀢𑀸𑀦𑀁 𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀨𑀮𑀜𑀸𑀡𑀁 𑀯𑀸 𑀨𑀮𑀁, 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀬𑁄 𑀅𑀗𑁆𑀕𑀸𑀦𑀺 𑀯𑀸. 𑀮𑁄𑀓𑀼𑀢𑁆𑀢𑀭𑀪𑀸𑀯𑁂𑀢𑀺 𑀮𑁄𑀓𑀁 𑀉𑀢𑁆𑀢𑀺𑀡𑁆𑀡𑀪𑀸𑀯𑁂. 𑀢𑁂𑀦 𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀲𑀼 𑀬𑀁 𑀪𑀯𑀢𑀺 𑀨𑀮𑀁, 𑀢𑀁 ‘‘𑀪𑀽𑀫𑀻’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀯𑀸 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸 𑀓𑀸𑀫𑀪𑀯𑀸𑀤𑀬𑁄 𑀢𑀁𑀲𑀫𑀗𑁆𑀕𑀺𑀦𑁄 𑀦𑀺𑀲𑁆𑀲𑀬𑀪𑀸𑀯𑁂𑀦 ‘‘𑀪𑀽𑀫𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀫𑀕𑁆𑀕𑁂𑀦 𑀦𑀺𑀩𑁆𑀩𑀢𑁆𑀢𑀁 𑀨𑀮𑀁 𑀅𑀭𑀺𑀬𑀲𑀸𑀯𑀓𑀲𑁆𑀲 𑀓𑀸𑀮𑁂𑀦 𑀓𑀸𑀮𑀁 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀢𑀸𑀬 𑀦𑀺𑀲𑁆𑀲𑀬𑀪𑀸𑀯𑀢𑁄 ‘‘𑀪𑀽𑀫𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑀢𑁄𑀬𑁂𑀯 𑀅𑀭𑀺𑀬𑀸 𑀘𑀺𑀭𑀢𑀭𑀁 𑀢𑀺𑀝𑁆𑀞𑀦𑁆𑀢𑀺. 𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑀯𑀲𑁂𑀦𑀸𑀢𑀺 𑀏𑀢𑁆𑀣 𑀅𑀧𑀸𑀬𑀕𑀫𑀦𑀻𑀬𑀸𑀦𑀁 𑀅𑀘𑁆𑀘𑀦𑁆𑀢𑀲𑀫𑀼𑀘𑁆𑀙𑁂𑀤𑁄 𑀇𑀢𑀭𑁂𑀲𑀜𑁆𑀘 𑀯𑀺𑀚𑁆𑀚𑀼𑀢𑁄𑀪𑀸𑀲𑁂𑀦 𑀯𑀺𑀬 𑀢𑀫𑀲𑁆𑀲 𑀲𑀫𑀼𑀘𑁆𑀙𑁂𑀤𑁄 𑀤𑀝𑁆𑀞𑀩𑁆𑀩𑁄. 𑀮𑁄𑀓𑀺𑀬𑀚𑁆𑀛𑀸𑀦𑀫𑁆𑀧𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀭𑀺𑀬𑀲𑁆𑀲 𑀘 𑀅𑀓𑀢𑀸𑀥𑀺𑀓𑀸𑀭𑀲𑁆𑀲 𑀦 𑀯𑀺𑀦𑀸 𑀧𑀝𑀺𑀧𑀤𑀸𑀬 𑀇𑀚𑁆𑀛𑀢𑀺, 𑀓𑀢𑀸𑀥𑀺𑀓𑀸𑀭𑀲𑁆𑀲 𑀧𑀦 𑀅𑀭𑀺𑀬𑀲𑁆𑀲 𑀫𑀕𑁆𑀕𑁂𑀦𑁂𑀯 𑀲𑀫𑀺𑀚𑁆𑀛𑀦𑀢𑁄 𑀯𑀺𑀧𑀸𑀓𑀸𑀦𑀁 𑀯𑀺𑀬 𑀓𑀼𑀲𑀮𑁂𑀦 𑀢𑀣𑀸 𑀲𑀫𑀺𑀤𑁆𑀥𑀲𑁆𑀲 𑀅𑀭𑀺𑀬𑀫𑀕𑁆𑀕𑁂𑀦 𑀲𑀤𑀺𑀲𑀢𑀸𑀬 𑀅𑀪𑀸𑀯𑀢𑁄 𑀅𑀢𑀩𑁆𑀩𑀺𑀧𑀸𑀓𑀢𑁆𑀢𑀸 𑀘 𑀦 𑀫𑀕𑁆𑀕𑀧𑀝𑀺𑀧𑀤𑀸 𑀢𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀧𑀤𑀸𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀢𑀢𑁆𑀣 𑀢𑀣𑀸 𑀕𑀭𑀼𑀁 𑀓𑀢𑁆𑀯𑀸 𑀧𑀝𑀺𑀧𑀤𑀸𑀳𑀺 𑀏𑀯 𑀤𑁂𑀲𑀦𑀸 𑀦 𑀓𑀢𑀸, 𑀬𑀣𑀸𑀯𑀼𑀢𑁆𑀢𑀚𑁆𑀛𑀸𑀦𑀲𑀗𑁆𑀕𑀳𑀢𑁆𑀣𑀁 𑀲𑀼𑀤𑁆𑀥𑀺𑀓𑀤𑁂𑀲𑀦𑀸𑀧𑀺 𑀓𑀢𑀸.

𑀇𑀥 𑀧𑀦 𑀓𑀲𑁆𑀲𑀘𑀺 𑀯𑀺𑀦𑀸 𑀧𑀝𑀺𑀧𑀤𑀸𑀬 𑀅𑀲𑀺𑀤𑁆𑀥𑀺𑀢𑁄 𑀕𑀭𑀼𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀓𑁆𑀔𑀧𑀝𑀺𑀧𑀤’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑁄 𑀓𑁄𑀘𑀺 𑀯𑀸𑀭𑁄𑀢𑀺 𑀲𑀓𑀺𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀢𑀺𑀓𑁆𑀔𑀢𑁆𑀢𑀼𑀁 𑀘𑀢𑀼𑀓𑁆𑀔𑀢𑁆𑀢𑀼𑀁 𑀅𑀦𑁂𑀓𑀓𑁆𑀔𑀢𑁆𑀢𑀼𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 𑀯𑀺𑀓𑁆𑀔𑀫𑁆𑀪𑀦𑀯𑀸𑀭𑁂𑀲𑀼 𑀬𑁄 𑀓𑁄𑀘𑀺. 𑀲𑀓𑀺𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀜𑁆𑀘 𑀯𑀺𑀓𑁆𑀔𑀫𑁆𑀪𑀦𑀯𑀸𑀭𑀸 𑀲𑀼𑀔𑀸 𑀧𑀝𑀺𑀧𑀤𑀸 𑀏𑀯, 𑀦 𑀘 𑀢𑀢𑁄 𑀉𑀤𑁆𑀥𑀁 𑀲𑀼𑀔𑀸 𑀧𑀝𑀺𑀧𑀤𑀸 𑀳𑁄𑀢𑀻𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀺𑀓𑁆𑀔𑀫𑁆𑀪𑀦𑀯𑀸𑀭𑀁 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸𑀢𑀺 𑀭𑁄𑀘𑁂𑀲𑀼𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑀸. 𑀢𑀲𑁆𑀫𑀺𑀁 𑀢𑀣𑀸𑀭𑁄𑀘𑀺𑀢𑁂 𑀢𑀢𑁄 𑀧𑀭𑁂𑀲𑀼 𑀘𑀢𑀼𑀓𑁆𑀔𑀢𑁆𑀢𑀼𑀁 𑀯𑀺𑀓𑁆𑀔𑀫𑁆𑀪𑀦𑀯𑀸𑀭𑀸𑀤𑀻𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺. 𑀭𑀽𑀧𑀸𑀭𑀽𑀧𑀸𑀦𑀁 𑀮𑀓𑁆𑀔𑀡𑀸𑀤𑀻𑀳𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀡𑀁 𑀭𑀽𑀧𑀸𑀭𑀽𑀧𑀧𑀭𑀺𑀕𑁆𑀕𑀳𑁄, 𑀦𑀸𑀫𑀭𑀽𑀧𑀫𑀢𑁆𑀢𑀫𑁂𑀢𑀁, 𑀦 𑀅𑀜𑁆𑀜𑁄 𑀓𑁄𑀘𑀺 𑀲𑀢𑁆𑀢𑀸𑀤𑀺𑀓𑁄𑀢𑀺 𑀯𑀯𑀢𑁆𑀣𑀸𑀧𑀦𑀁 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀧𑀦𑀁. 𑀧𑀭𑀺𑀕𑁆𑀕𑀳𑀺𑀢𑀭𑀽𑀧𑀸𑀭𑀽𑀧𑀲𑁆𑀲 𑀫𑀕𑁆𑀕𑀧𑀸𑀢𑀼𑀪𑀸𑀯𑀤𑀦𑁆𑀥𑀢𑀸 𑀘 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀧𑀦𑀸𑀤𑀻𑀦𑀁 𑀓𑀺𑀘𑁆𑀙𑀲𑀺𑀤𑁆𑀥𑀺𑀢𑁄 𑀲𑀺𑀬𑀸𑀢𑀺 𑀦 𑀭𑀽𑀧𑀸𑀭𑀽𑀧𑀧𑀭𑀺𑀕𑁆𑀕𑀳𑀓𑀺𑀘𑁆𑀙𑀢𑀸𑀬 𑀏𑀯 𑀤𑀼𑀓𑁆𑀔𑀧𑀝𑀺𑀧𑀤𑀢𑀸 𑀯𑀢𑁆𑀢𑀩𑁆𑀩𑀸𑀢𑀺 𑀘𑁂? 𑀢𑀁 𑀦, 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀧𑀦𑀸𑀤𑀻𑀦𑀁 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑀫𑀦𑁆𑀤𑀢𑀸𑀬 𑀲𑀼𑀔𑀲𑀺𑀤𑁆𑀥𑀺𑀬𑀫𑁆𑀧𑀺 𑀢𑀣𑀸𑀲𑀺𑀤𑁆𑀥𑀯𑀺𑀧𑀲𑁆𑀲𑀦𑀸𑀲𑀳𑀕𑀢𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀫𑀦𑁆𑀤𑀢𑀸𑀬 𑀫𑀕𑁆𑀕𑀧𑀸𑀢𑀼𑀪𑀸𑀯𑀤𑀦𑁆𑀥𑀪𑀸𑀯𑀢𑁄.

𑀭𑀽𑀧𑀸𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀅𑀓𑀺𑀘𑁆𑀙𑁂𑀦𑀧𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸. 𑀓𑀺𑀘𑁆𑀙𑁂𑀦 𑀧𑀭𑀺𑀕𑁆𑀕𑀳𑀺𑀢𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀇𑀫𑀁 𑀯𑀸𑀭𑀁 𑀭𑁄𑀘𑁂𑀲𑀼𑀦𑁆𑀢𑀺 𑀓𑀮𑀸𑀧𑀲𑀫𑁆𑀫𑀲𑀦𑀸𑀯𑀲𑀸𑀦𑁂 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀬 𑀯𑀢𑁆𑀢𑀫𑀸𑀦𑀸𑀬 𑀉𑀧𑁆𑀧𑀦𑁆𑀦𑀲𑁆𑀲 𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀯𑀺𑀓𑁆𑀔𑀫𑁆𑀪𑀦𑁂𑀦 𑀓𑀺𑀘𑁆𑀙𑀢𑀸𑀯𑀸𑀭𑀁 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸𑀢𑀺 𑀭𑁄𑀘𑁂𑀲𑀼𑀁 𑀏𑀢𑀤𑀦𑁆𑀢𑀢𑁆𑀢𑀸 𑀧𑀝𑀺𑀧𑀤𑀸𑀬. 𑀏𑀢𑀲𑁆𑀲 𑀅𑀓𑀺𑀘𑁆𑀙𑀢𑁆𑀢𑁂𑀧𑀺 𑀧𑀼𑀭𑀺𑀫𑀸𑀦𑀁 𑀓𑀺𑀘𑁆𑀙𑀢𑁆𑀢𑁂 𑀤𑀼𑀓𑁆𑀔𑀧𑀝𑀺𑀧𑀤𑀢𑀸 𑀯𑀼𑀢𑁆𑀢𑀦𑀬𑀸𑀯𑀸𑀢𑀺 𑀦 𑀧𑀝𑀺𑀲𑀺𑀤𑁆𑀥𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀣𑀸𑀯𑀼𑀢𑁆𑀢𑀁 𑀯𑀸 𑀲𑀩𑁆𑀩𑀁 𑀭𑀽𑀧𑀸𑀭𑀽𑀧𑀧𑀭𑀺𑀕𑁆𑀕𑀳𑀸𑀤𑀺𑀓𑀺𑀘𑁆𑀙𑀢𑀁 𑀢𑀺𑀓𑁆𑀔𑀢𑁆𑀢𑀼𑀁 𑀯𑀺𑀓𑁆𑀔𑀫𑁆𑀪𑀦𑀯𑀸𑀭𑀢𑀸𑀯𑀲𑁂𑀦 ‘‘𑀇𑀫𑀁 𑀯𑀸𑀭’’𑀦𑁆𑀢𑀺 𑀆𑀳. 𑀬𑀲𑁆𑀲 𑀧𑀦 𑀲𑀩𑁆𑀩𑀢𑁆𑀣 𑀅𑀓𑀺𑀘𑁆𑀙𑀢𑀸, 𑀢𑀲𑁆𑀲 𑀲𑀼𑀔𑀸 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸.

𑀫𑀼𑀲𑀸𑀯𑀸𑀤𑀸𑀤𑀻𑀦𑀁 𑀯𑀺𑀲𑀁𑀯𑀸𑀤𑀦𑀸𑀤𑀺𑀓𑀺𑀘𑁆𑀘𑀢𑀸𑀬 𑀮𑀽𑀔𑀸𑀦𑀁 𑀅𑀧𑀭𑀺𑀕𑁆𑀕𑀸𑀳𑀓𑀸𑀦𑀁 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀧𑀭𑀺𑀕𑁆𑀕𑀸𑀳𑀓𑀲𑀪𑀸𑀯𑀸 𑀲𑀫𑁆𑀫𑀸𑀯𑀸𑀘𑀸. 𑀲𑀸 𑀲𑀺𑀦𑀺𑀤𑁆𑀥𑀪𑀸𑀯𑀢𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀺 𑀲𑀫𑁆𑀫𑀸𑀯𑀸𑀘𑀸𑀧𑀘𑁆𑀘𑀬𑀲𑀼𑀪𑀸𑀲𑀺𑀢𑀲𑁄𑀢𑀸𑀭𑀜𑁆𑀘 𑀚𑀦𑀁. 𑀓𑀸𑀬𑀺𑀓𑀓𑀺𑀭𑀺𑀬𑀸𑀓𑀺𑀘𑁆𑀘𑀁 𑀓𑀢𑁆𑀢𑀩𑁆𑀩𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀲𑀬𑀜𑁆𑀘 𑀲𑀫𑀼𑀝𑁆𑀞𑀳𑀦𑀁 𑀖𑀝𑀦𑀁 𑀳𑁄𑀢𑀻𑀢𑀺 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑀗𑁆𑀔𑀸𑀢𑀸 𑀯𑀺𑀭𑀢𑀺𑀧𑀺 𑀲𑀫𑀼𑀝𑁆𑀞𑀸𑀦𑀲𑀪𑀸𑀯𑀸𑀢𑀺 𑀯𑀼𑀢𑁆𑀢𑀸. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀸 𑀉𑀓𑁆𑀔𑀺𑀧𑀦𑀁 𑀲𑀫𑀼𑀝𑁆𑀞𑀳𑀦𑀁 𑀓𑀸𑀬𑀺𑀓𑀓𑀺𑀭𑀺𑀬𑀸𑀬 𑀪𑀸𑀭𑀼𑀓𑁆𑀔𑀺𑀧𑀦𑀁 𑀯𑀺𑀬, 𑀚𑀻𑀯𑀫𑀸𑀦𑀲𑁆𑀲 𑀲𑀢𑁆𑀢𑀲𑁆𑀲, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀸 𑀲𑀼𑀤𑁆𑀥𑀺 𑀯𑁄𑀤𑀸𑀦𑀁 𑀆𑀚𑀻𑀯𑀲𑁆𑀲𑁂𑀯 𑀯𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀯𑀼𑀢𑁆𑀢𑀺𑀬𑀸.

𑁨𑁮𑁩. 𑀫𑀕𑁆𑀕𑀲𑀦𑁆𑀦𑀺𑀲𑁆𑀲𑀺𑀢𑀦𑁆𑀢𑀺 𑀧𑀭𑀫𑀢𑁆𑀣𑀫𑀕𑁆𑀕𑀲𑀪𑀸𑀯𑀢𑁆𑀢𑀸 𑀫𑀕𑁆𑀕𑀸𑀯𑀬𑀯𑀪𑀸𑀯𑁂𑀦 𑀲𑀫𑀼𑀤𑀸𑀬𑀲𑀦𑁆𑀦𑀺𑀲𑁆𑀲𑀺𑀢𑀦𑁆𑀢𑀺 𑀅𑀢𑁆𑀣𑁄.

𑁨𑁮𑁫. 𑀧𑀢𑀺𑀝𑁆𑀞𑀸𑀦𑀁 𑀓𑀺𑀮𑁂𑀲𑀯𑀲𑁂𑀦, 𑀆𑀬𑀽𑀳𑀦𑀁 𑀅𑀪𑀺𑀲𑀗𑁆𑀔𑀸𑀭𑀯𑀲𑁂𑀦. 𑀢𑀡𑁆𑀳𑀸𑀯𑀲𑁂𑀦 𑀯𑀸 𑀧𑀢𑀺𑀝𑁆𑀞𑀸𑀦𑀁, 𑀤𑀺𑀝𑁆𑀞𑀺𑀯𑀲𑁂𑀦 𑀆𑀬𑀽𑀳𑀦𑀁. 𑀩𑁄𑀥𑀻𑀢𑀺 𑀬𑀸 𑀅𑀬𑀁 𑀥𑀫𑁆𑀫𑀲𑀸𑀫𑀕𑁆𑀕𑀻 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀸. 𑀲𑁂𑀦𑀗𑁆𑀕𑀭𑀣𑀗𑁆𑀕𑀸𑀤𑀬𑁄 𑀯𑀺𑀬𑀸𑀢𑀺 𑀏𑀢𑁂𑀦 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀬𑀸 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀗𑁆𑀕-𑀲𑀤𑁆𑀤𑁄 𑀓𑀸𑀭𑀡𑀢𑁆𑀣𑁄𑀧𑀺 𑀳𑁄𑀢𑀻𑀢𑀺 𑀘𑀢𑀼𑀲𑀘𑁆𑀘𑀩𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸. 𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀥𑀺𑀬𑁄, 𑀩𑁄𑀥𑀺𑀬𑁄 𑀏𑀯 𑀅𑀗𑁆𑀕𑀸𑀢𑀺 ‘‘𑀅𑀦𑀼𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸’’𑀢𑀺 𑀯𑀼𑀢𑁆𑀢𑀁. 𑀯𑀺𑀧𑀲𑁆𑀲𑀦𑀸𑀤𑀻𑀦𑀁 𑀓𑀸𑀭𑀡𑀸𑀦𑀁 𑀩𑀼𑀚𑁆𑀛𑀺𑀢𑀩𑁆𑀩𑀸𑀦𑀜𑁆𑀘 𑀲𑀘𑁆𑀘𑀸𑀦𑀁 𑀅𑀦𑀼𑀭𑀽𑀧𑀁 𑀧𑀘𑁆𑀘𑀓𑁆𑀔𑀪𑀸𑀯𑁂𑀦 𑀧𑀝𑀺𑀫𑀼𑀔𑀁 𑀅𑀯𑀺𑀧𑀭𑀻𑀢𑀢𑀸𑀬 𑀲𑀫𑁆𑀫𑀸 𑀘 𑀩𑀼𑀚𑁆𑀛𑀦𑁆𑀢𑀻𑀢𑀺 𑀏𑀯𑀫𑀢𑁆𑀣𑀯𑀺𑀲𑁂𑀲𑀤𑀻𑀧𑀓𑁂𑀳𑀺 𑀉𑀧𑀲𑀕𑁆𑀕𑁂𑀳𑀺 ‘‘𑀅𑀦𑀼𑀩𑀼𑀚𑁆𑀛𑀦𑁆𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀩𑁄𑀥𑀺-𑀲𑀤𑁆𑀤𑁄 𑀳𑀺 𑀲𑀩𑁆𑀩𑀯𑀺𑀲𑁂𑀲𑀬𑀼𑀢𑁆𑀢𑀁 𑀩𑀼𑀚𑁆𑀛𑀦𑀁 𑀲𑀸𑀫𑀜𑁆𑀜𑁂𑀦 𑀲𑀗𑁆𑀕𑀡𑁆𑀳𑀸𑀢𑀻𑀢𑀺.

𑁨𑁯𑁯. 𑀢𑀺𑀡𑁆𑀡𑀦𑁆𑀢𑀺 𑀭𑀸𑀕𑀸𑀤𑀻𑀦𑀁. 𑀓𑀭𑁄𑀢𑀺 𑀦𑀸𑀫 𑀓𑀺𑀁 𑀤𑀼𑀘𑁆𑀘𑀭𑀺𑀢𑀸𑀦𑀺 𑀅𑀦𑀼𑀯𑀢𑁆𑀢𑀫𑀸𑀦𑀸𑀦𑀺.

𑁩𑁦𑁧. 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀦𑀺𑀧𑁆𑀨𑀸𑀤𑀺𑀢𑀧𑀘𑁆𑀘𑀬𑀸𑀦𑀁 𑀦𑀺𑀘𑁆𑀘𑀲𑁂𑀯𑀦𑀁 𑀥𑀼𑀯𑀧𑀝𑀺𑀲𑁂𑀯𑀦𑀁. 𑀲𑀓𑀺𑀘𑁆𑀘𑀓𑁄𑀢𑀺 𑀯𑀺𑀲𑀼𑀁 𑀅𑀢𑁆𑀢𑀦𑁄 𑀓𑀺𑀘𑁆𑀘𑀯𑀸. 𑀦 𑀳𑁄𑀢𑀻𑀢𑀺 𑀅𑀢𑁆𑀣𑀦𑁆𑀢𑀭𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀸𑀫𑀦𑁆𑀢𑀚𑀧𑁆𑀧𑀦𑀇𑀭𑀺𑀬𑀸𑀧𑀣𑀧𑁆𑀧𑀯𑀢𑁆𑀢𑀦𑀸𑀦𑀺 𑀧𑀸𑀧𑀺𑀘𑁆𑀙𑀢𑀸𑀦𑀺𑀩𑁆𑀩𑀢𑁆𑀢𑀸𑀦𑀺 𑀢𑀻𑀡𑀺 𑀓𑀼𑀳𑀦𑀯𑀢𑁆𑀣𑀽𑀦𑀻𑀢𑀺.

𑁩𑁪𑁩. 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀯𑀺𑀧𑀲𑁆𑀲𑀦𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀲𑀸𑀦𑀼𑀮𑁄𑀫𑀸, 𑀲𑀸 𑀲𑀼𑀜𑁆𑀜𑀢𑁄 𑀧𑀲𑁆𑀲𑀦𑁆𑀢𑀻 ‘‘𑀲𑀼𑀜𑁆𑀜𑀢𑀸’’𑀢𑀺 𑀯𑀼𑀘𑁆𑀘𑀢𑀺, 𑀤𑀼𑀓𑁆𑀔𑀢𑁄 𑀧𑀲𑁆𑀲𑀦𑁆𑀢𑀻 𑀢𑀡𑁆𑀳𑀸𑀧𑀡𑀺𑀥𑀺𑀲𑁄𑀲𑀦𑀢𑁄 ‘‘𑀅𑀧𑁆𑀧𑀡𑀺𑀳𑀺𑀢’’𑀦𑁆𑀢𑀺. 𑀲𑀸 𑀆𑀕𑀫𑀦𑀻𑀬𑀝𑁆𑀞𑀸𑀦𑁂 𑀫𑀕𑁆𑀕𑀸𑀥𑀺𑀕𑀫𑀢𑁆𑀣𑀁 𑀆𑀕𑀫𑀦𑀧𑀝𑀺𑀧𑀤𑀸𑀞𑀸𑀦𑁂 𑀞𑀢𑁆𑀯𑀸 𑀲𑀼𑀜𑁆𑀜𑀢𑀸𑀧𑁆𑀧𑀡𑀺𑀳𑀺𑀢𑀦𑁆𑀢𑀺 𑀦𑀸𑀫𑀁 𑀤𑁂𑀢𑀺. 𑀆𑀕𑀫𑀦𑀢𑁄 𑀦𑀸𑀫𑁂 𑀮𑀤𑁆𑀥𑁂 𑀲𑀕𑀼𑀡𑀢𑁄 𑀆𑀭𑀫𑁆𑀫𑀡𑀢𑁄 𑀘 𑀦𑀸𑀫𑀁 𑀲𑀺𑀤𑁆𑀥𑀫𑁂𑀯 𑀳𑁄𑀢𑀺, 𑀦 𑀧𑀦 𑀲𑀕𑀼𑀡𑀸𑀭𑀫𑁆𑀫𑀡𑁂𑀳𑀺 𑀦𑀸𑀫𑀮𑀸𑀪𑁂 𑀲𑀩𑁆𑀩𑀢𑁆𑀣 𑀆𑀕𑀫𑀦𑀢𑁄 𑀦𑀸𑀫𑀁 𑀲𑀺𑀤𑁆𑀥𑀁 𑀳𑁄𑀢𑀻𑀢𑀺 𑀧𑀭𑀺𑀧𑀼𑀡𑁆𑀡𑀦𑀸𑀫𑀲𑀺𑀤𑁆𑀥𑀺𑀳𑁂𑀢𑀼𑀢𑁆𑀢𑀸 𑀲𑀕𑀼𑀡𑀸𑀭𑀫𑁆𑀫𑀡𑁂𑀳𑀺 𑀲𑀩𑁆𑀩𑁂𑀲𑀫𑁆𑀧𑀺 𑀦𑀸𑀫𑀢𑁆𑀢𑀬𑀬𑁄𑀕𑁄, 𑀦 𑀆𑀕𑀫𑀦𑀢𑁄𑀢𑀺 𑀯𑀯𑀢𑁆𑀣𑀸𑀦𑀓𑀭𑀢𑁆𑀢𑀸 𑀘 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀦𑀸𑀬 𑀆𑀕𑀫𑀦𑀢𑁄𑀯 𑀇𑀥 𑀦𑀸𑀫𑀁 𑀮𑀪𑀢𑀺, 𑀦 𑀇𑀢𑀭𑁂𑀳𑀻𑀢𑀺 𑀯𑀼𑀢𑁆𑀢𑀁.

𑁩𑁫𑁦. 𑀅𑀦𑀺𑀫𑀺𑀢𑁆𑀢𑀯𑀺𑀧𑀲𑁆𑀲𑀦𑀦𑁆𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀁. 𑀦𑀺𑀫𑀺𑀢𑁆𑀢𑀥𑀫𑁆𑀫𑁂𑀲𑀽𑀢𑀺 𑀲𑀫𑀽𑀳𑀸𑀤𑀺𑀖𑀦𑀯𑀲𑁂𑀦 𑀘 𑀲𑀓𑀺𑀘𑁆𑀘𑀧𑀭𑀺𑀘𑁆𑀙𑁂𑀤𑀢𑀸𑀬 𑀘 𑀲𑀧𑀭𑀺𑀕𑁆𑀕𑀳𑁂𑀲𑀼 𑀔𑀦𑁆𑀥𑁂𑀲𑀼. 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑁄𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀫𑀸𑀳. 𑀏𑀯𑀁𑀲𑀫𑁆𑀧𑀤𑀫𑀺𑀤𑀦𑁆𑀢𑀺 𑀓𑀣𑀫𑀺𑀥 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑀳𑁄𑀢𑀺. 𑀦 𑀳𑀺 𑀙𑀦𑁆𑀤𑀘𑀺𑀢𑁆𑀢𑀸𑀦𑀁 𑀫𑀕𑁆𑀕𑀲𑀗𑁆𑀔𑀸𑀢𑀅𑀥𑀺𑀧𑀢𑀺𑀪𑀸𑀯𑀸𑀪𑀸𑀯𑁄 𑀯𑀺𑀬 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀥𑀺𑀓𑀲𑁆𑀲 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀲𑁆𑀲 𑀅𑀦𑀺𑀫𑀺𑀢𑁆𑀢𑀪𑀸𑀯𑀸𑀪𑀸𑀯𑁄 𑀅𑀢𑁆𑀣𑀺, 𑀦 𑀘 𑀅𑀫𑀕𑁆𑀕𑀸𑀥𑀺𑀧𑀢𑀻𑀦𑀁 𑀫𑀕𑁆𑀕𑀸𑀥𑀺𑀧𑀢𑀺𑀦𑀸𑀫𑀤𑀸𑀦𑀸𑀪𑀸𑀯𑁄 𑀯𑀺𑀬 𑀅𑀦𑀺𑀫𑀺𑀢𑁆𑀢𑀲𑁆𑀲 𑀅𑀦𑀺𑀫𑀺𑀢𑁆𑀢𑀦𑀸𑀫𑀤𑀸𑀦𑀸𑀪𑀸𑀯𑁄𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀲𑁆𑀲 𑀅𑀦𑀦𑀺𑀫𑀺𑀢𑁆𑀢𑀢𑀸𑀬 𑀅𑀪𑀸𑀯𑀢𑁄. 𑀫𑀕𑁆𑀕𑁄 𑀅𑀥𑀺𑀧𑀢𑀺 𑀏𑀢𑁂𑀲𑀦𑁆𑀢𑀺 𑀘 𑀫𑀕𑁆𑀕𑀸𑀥𑀺𑀧𑀢𑀺𑀦𑁄𑀢𑀺 𑀬𑀼𑀢𑁆𑀢𑁄 𑀢𑀢𑁆𑀣 𑀙𑀦𑁆𑀤𑀘𑀺𑀢𑁆𑀢𑁂𑀳𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀫𑀕𑁆𑀕𑀸𑀥𑀺𑀧𑀢𑀺𑀪𑀸𑀯𑀸𑀪𑀸𑀯𑁄. 𑀇𑀥 𑀧𑀦 𑀫𑀕𑁆𑀕𑁄 𑀅𑀦𑀺𑀫𑀺𑀢𑁆𑀢𑀁 𑀏𑀢𑀲𑁆𑀲𑀸𑀢𑀺 𑀫𑀕𑁆𑀕𑀸𑀦𑀺𑀫𑀺𑀢𑁆𑀢𑁄𑀢𑀺 𑀅𑀬𑀫𑀢𑁆𑀣𑁄 𑀦 𑀲𑀫𑁆𑀪𑀯𑀢𑀻𑀢𑀺 𑀦 𑀢𑁂𑀦 𑀅𑀫𑀕𑁆𑀕𑁂𑀦 𑀫𑀕𑁆𑀕𑀲𑁆𑀲 𑀅𑀦𑀺𑀫𑀺𑀢𑁆𑀢𑀪𑀸𑀯𑁄 𑀦 𑀬𑀼𑀚𑁆𑀚𑀢𑀺, 𑀓𑀺𑀁 𑀯𑀸 𑀏𑀢𑁆𑀣 𑀲𑀸𑀫𑀜𑁆𑀜𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺. 𑀅𑀫𑀕𑁆𑀕𑀗𑁆𑀕𑀫𑀕𑁆𑀕𑀦𑀸𑀫𑀸𑀪𑀸𑀯𑁄. 𑀬𑀣𑀸 𑀲𑀢𑀺𑀧𑀺 𑀅𑀥𑀺𑀧𑀢𑀺𑀪𑀸𑀯𑁂 𑀙𑀦𑁆𑀤𑀘𑀺𑀢𑁆𑀢𑀸𑀦𑀁 𑀦 𑀫𑀕𑁆𑀕𑀸𑀥𑀺𑀧𑀢𑀻𑀢𑀺 𑀫𑀕𑁆𑀕𑀦𑀸𑀫𑀁, 𑀦 𑀘 𑀢𑁂𑀳𑀺 𑀫𑀕𑁆𑀕𑀲𑁆𑀲 𑀢𑁂𑀲𑀁 𑀅𑀫𑀕𑁆𑀕𑀗𑁆𑀕𑀢𑁆𑀢𑀸, 𑀢𑀣𑀸 𑀲𑀢𑀺𑀧𑀺 𑀲𑀤𑁆𑀥𑀸𑀬 𑀆𑀕𑀫𑀦𑀪𑀸𑀯𑁂𑀦 𑀢𑀲𑁆𑀲𑀸 𑀅𑀦𑀺𑀫𑀺𑀢𑁆𑀢𑀦𑁆𑀢𑀺 𑀫𑀕𑁆𑀕𑀦𑀸𑀫𑀁, 𑀦 𑀘 𑀢𑀸𑀬 𑀫𑀕𑁆𑀕𑀲𑁆𑀲 𑀢𑀲𑁆𑀲𑀸 𑀅𑀫𑀕𑁆𑀕𑀗𑁆𑀕𑀢𑁆𑀢𑀸. 𑀏𑀯𑀁 𑀅𑀦𑀺𑀫𑀺𑀢𑁆𑀢𑀯𑀺𑀧𑀲𑁆𑀲𑀦𑀸𑀬𑀧𑀺 𑀅𑀦𑀺𑀫𑀺𑀢𑁆𑀢𑀪𑀸𑀯𑁄 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀦𑀢𑁆𑀣𑀻𑀢𑀺 𑀤𑀻𑀧𑀺𑀢𑁄 𑀳𑁄𑀢𑀺.

𑀦𑀦𑀼 𑀘 𑀇𑀥 𑀛𑀸𑀦𑀁 𑀲𑀼𑀜𑁆𑀜𑀢𑀸𑀤𑀺𑀦𑀸𑀫𑁂𑀦 𑀯𑀼𑀢𑁆𑀢𑀁, 𑀦 𑀫𑀕𑁆𑀕𑁄𑀢𑀺 𑀘𑁂? 𑀦, 𑀫𑀕𑁆𑀕𑀲𑀫𑁆𑀧𑀬𑁄𑀕𑀢𑁄 𑀛𑀸𑀦𑀲𑁆𑀲 𑀲𑀼𑀜𑁆𑀜𑀢𑀸𑀤𑀺𑀦𑀸𑀫𑀓𑀢𑁆𑀢𑀸. 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀲𑀕𑀼𑀡𑀸𑀭𑀫𑁆𑀫𑀡𑁂𑀳𑀺 𑀇𑀥 𑀅𑀪𑀺𑀥𑀫𑁆𑀫𑁂𑀧𑀺 𑀦𑀸𑀫𑀁 𑀮𑀪𑀢𑀻𑀢𑀺 𑀆𑀳𑀁𑀲𑀼. 𑀢𑀲𑁆𑀫𑀸 𑀧𑀝𑀺𑀓𑁆𑀔𑀺𑀢𑁆𑀢𑀸 ‘‘𑀦 𑀧𑀦 𑀮𑀪𑀦𑁆𑀢𑀻’’𑀢𑀺. 𑀓𑀺𑀁 𑀓𑀸𑀭𑀡𑀸? 𑀅𑀪𑀺𑀥𑀫𑁆𑀫𑁂 𑀲𑀭𑀲𑀁 𑀅𑀦𑀸𑀫𑀲𑀺𑀢𑁆𑀯𑀸 𑀧𑀘𑁆𑀘𑀦𑀻𑀓𑀢𑁄𑀯 𑀦𑀸𑀫𑀮𑀸𑀪𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑁄 𑀳𑀺 𑀲𑀕𑀼𑀡𑀸𑀭𑀫𑁆𑀫𑀡𑁂𑀳𑀺 𑀦𑀸𑀫𑀮𑀸𑀪𑁄, 𑀲𑁄 𑀲𑀭𑀲𑀧𑁆𑀧𑀥𑀸𑀦𑁄 𑀳𑁄𑀢𑀺. 𑀲𑀭𑀲𑁂𑀦𑁂𑀯 𑀘 𑀦𑀸𑀫𑀮𑀸𑀪𑁂 𑀲𑀩𑁆𑀩𑀫𑀕𑁆𑀕𑀸𑀦𑀁 𑀲𑀼𑀜𑁆𑀜𑀢𑀸𑀤𑀺𑀪𑀸𑀯𑁄𑀢𑀺 𑀯𑀯𑀢𑁆𑀣𑀸𑀦𑀁 𑀦 𑀲𑀺𑀬𑀸. 𑀢𑀲𑁆𑀫𑀸 𑀅𑀪𑀺𑀥𑀫𑁆𑀫𑁂 𑀲𑀢𑀺𑀧𑀺 𑀤𑁆𑀯𑀻𑀳𑀺 𑀦𑀸𑀫𑀮𑀸𑀪𑁂 𑀧𑀘𑁆𑀘𑀦𑀻𑀓𑀢𑁄 𑀦𑀸𑀫𑀯𑀯𑀢𑁆𑀣𑀸𑀦𑀓𑀭𑀁 𑀕𑀳𑀺𑀢𑀦𑁆𑀢𑀺 𑀲𑀕𑀼𑀡𑀸𑀭𑀫𑁆𑀫𑀡𑁂𑀳𑀺 𑀲𑀼𑀜𑁆𑀜𑀢𑀸𑀧𑁆𑀧𑀡𑀺𑀳𑀺𑀢𑀫𑀕𑁆𑀕𑀸 𑀦𑀸𑀫𑀁 𑀦 𑀮𑀪𑀦𑁆𑀢𑀻𑀢𑀺 𑀆𑀳. 𑀅𑀣 𑀯𑀸 𑀦 𑀧𑀦 𑀮𑀪𑀦𑁆𑀢𑀻𑀢𑀺 𑀅𑀜𑁆𑀜𑀦𑀺𑀭𑀧𑁂𑀓𑁆𑀔𑁂𑀳𑀺 𑀲𑀕𑀼𑀡𑀸𑀭𑀫𑁆𑀫𑀡𑁂𑀳𑀺 𑀦 𑀮𑀪𑀦𑁆𑀢𑀺. 𑀓𑀺𑀁 𑀓𑀸𑀭𑀡𑀸? 𑀅𑀪𑀺𑀥𑀫𑁆𑀫𑁂 𑀲𑀭𑀲𑀧𑀘𑁆𑀘𑀦𑀻𑀓𑁂𑀳𑀺 𑀲𑀳𑀺𑀢𑁂𑀳𑀺 𑀦𑀸𑀫𑀮𑀸𑀪𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀦𑀻𑀓𑀜𑁆𑀳𑀺 𑀯𑀯𑀢𑁆𑀣𑀸𑀦𑀓𑀭𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀓𑁂𑀯𑀮𑀲𑁆𑀲 𑀲𑀭𑀲𑀲𑁆𑀲 𑀦𑀸𑀫𑀳𑁂𑀢𑀼𑀪𑀸𑀯𑁄 𑀅𑀪𑀺𑀥𑀫𑁆𑀫𑁂 𑀦𑀢𑁆𑀣𑀺 𑀅𑀯𑀯𑀢𑁆𑀣𑀸𑀦𑀸𑀧𑀢𑁆𑀢𑀺𑀢𑁄. 𑀢𑀲𑁆𑀫𑀸 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑀧𑀡𑀺𑀥𑀺𑀧𑀝𑀺𑀧𑀓𑁆𑀔𑀯𑀺𑀧𑀲𑁆𑀲𑀦𑀸𑀦𑀼𑀮𑁄𑀫𑀸 𑀫𑀕𑁆𑀕𑀸 𑀲𑀢𑀺𑀧𑀺 𑀲𑀭𑀲𑀦𑁆𑀢𑀭𑁂 𑀧𑀘𑁆𑀘𑀦𑀻𑀓𑀲𑀳𑀺𑀢𑁂𑀦 𑀲𑀭𑀲𑁂𑀦 𑀦𑀸𑀫𑀁 𑀮𑀪𑀦𑁆𑀢𑀺. 𑀅𑀦𑀺𑀫𑀺𑀢𑁆𑀢𑀫𑀕𑁆𑀕𑀲𑁆𑀲 𑀧𑀦 𑀯𑀺𑀧𑀲𑁆𑀲𑀦𑀸 𑀦𑀺𑀫𑀺𑀢𑁆𑀢𑀧𑀝𑀺𑀧𑀓𑁆𑀔𑀸 𑀦 𑀳𑁄𑀢𑀺 𑀲𑀬𑀁 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀢𑁄 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀸𑀦𑀺𑀯𑀸𑀭𑀡𑀸𑀢𑀺 𑀢𑀤𑀦𑀼𑀮𑁄𑀫𑀫𑀕𑁆𑀕𑁄𑀧𑀺 𑀦 𑀦𑀺𑀫𑀺𑀢𑁆𑀢𑀲𑁆𑀲 𑀧𑀝𑀺𑀧𑀓𑁆𑀔𑁄. 𑀬𑀤𑀺 𑀲𑀺𑀬𑀸, 𑀦𑀺𑀫𑀺𑀢𑁆𑀢𑀕𑀢𑀯𑀺𑀧𑀲𑁆𑀲𑀦𑀸𑀬𑀧𑀺 𑀧𑀝𑀺𑀧𑀓𑁆𑀔𑁄 𑀲𑀺𑀬𑀸𑀢𑀺. 𑀢𑀲𑁆𑀫𑀸 𑀯𑀺𑀚𑁆𑀚𑀫𑀸𑀦𑁄𑀧𑀺 𑀲𑀭𑀲𑁄 𑀯𑀯𑀢𑁆𑀣𑀸𑀦𑀓𑀭𑀧𑀘𑁆𑀘𑀦𑀻𑀓𑀸𑀪𑀸𑀯𑀸 𑀅𑀪𑀺𑀥𑀫𑁆𑀫𑁂 𑀅𑀦𑀺𑀫𑀺𑀢𑁆𑀢𑀦𑁆𑀢𑀺 𑀦𑀸𑀫𑀤𑀸𑀬𑀓𑁄 𑀦 𑀕𑀳𑀺𑀢𑁄. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀦𑀼𑀮𑁄𑀫𑁄 𑀧𑀦 𑀫𑀕𑁆𑀕𑁄 𑀲𑀼𑀤𑁆𑀥𑀺𑀓𑀧𑀝𑀺𑀧𑀤𑀸𑀦𑀬𑁂𑀬𑁂𑀯 𑀲𑀗𑁆𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀫𑀸 𑀏𑀯 𑀘 𑀲𑁄 𑀦𑀬𑁄 𑀯𑀼𑀢𑁆𑀢𑁄𑀢𑀺. 𑀏𑀯𑀦𑁆𑀢𑀺 𑀬𑀁 𑀯𑀓𑁆𑀔𑀢𑀺 ‘‘𑀅𑀦𑀺𑀘𑁆𑀘𑀢𑁄 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀫𑀕𑁆𑀕𑁄 𑀅𑀦𑀺𑀫𑀺𑀢𑁆𑀢𑁄 𑀳𑁄𑀢𑀻’’𑀢𑀺 (𑀥. 𑀲. 𑀅𑀝𑁆𑀞. 𑁩𑁫𑁦), 𑀏𑀯𑀁 𑀆𑀳𑀭𑀺𑀢𑁆𑀯𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀲𑁄 𑀅𑀦𑀺𑀫𑀺𑀢𑁆𑀢𑀫𑀕𑁆𑀕𑁄 𑀤𑀻𑀧𑀺𑀢𑁄𑀢𑀺 𑀅𑀢𑁆𑀣𑁄.

𑀯𑀼𑀝𑁆𑀞𑀸𑀦…𑀧𑁂… 𑀓𑀺𑀫𑀸𑀭𑀫𑁆𑀫𑀡𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀢𑁄 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀸 𑀮𑀓𑁆𑀔𑀡𑀸𑀭𑀫𑁆𑀫𑀡𑀢𑁆𑀢𑁂 𑀲𑀢𑀺 𑀲𑀗𑁆𑀔𑀸𑀭𑁂𑀳𑀺 𑀯𑀼𑀝𑁆𑀞𑀸𑀦𑀁 𑀦 𑀲𑀺𑀬𑀸, 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀢𑁆𑀢𑁂 𑀘 𑀮𑀓𑁆𑀔𑀡𑀧𑀝𑀺𑀯𑁂𑀥𑁄𑀢𑀺 𑀫𑀜𑁆𑀜𑀫𑀸𑀦𑁄 𑀧𑀼𑀘𑁆𑀙𑀢𑀺. ‘‘𑀅𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀲𑀗𑁆𑀔𑀸𑀭𑁂𑀲𑀼 𑀧𑀯𑀢𑁆𑀢𑀫𑀸𑀦𑁂𑀦 𑀜𑀸𑀡𑁂𑀦 𑀮𑀓𑁆𑀔𑀡𑀸𑀦𑀺𑀧𑀺 𑀧𑀝𑀺𑀯𑀺𑀤𑁆𑀥𑀸𑀦𑀺 𑀳𑁄𑀦𑁆𑀢𑀺 𑀢𑀤𑀸𑀓𑀸𑀭𑀲𑀗𑁆𑀔𑀸𑀭𑀕𑀳𑀡𑀢𑁄𑀢𑀺 𑀆𑀳 ‘‘𑀮𑀓𑁆𑀔𑀡𑀸𑀭𑀫𑁆𑀫𑀡𑀸’’𑀢𑀺. 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀸 𑀏𑀯 𑀬𑀣𑀸𑀯𑀼𑀢𑁆𑀢𑀸𑀥𑀺𑀧𑁆𑀧𑀸𑀬𑁂𑀦 ‘‘𑀮𑀓𑁆𑀔𑀡𑀸𑀭𑀫𑁆𑀫𑀡𑀸’’𑀢𑀺 𑀯𑀼𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀮𑀓𑁆𑀔𑀡𑀁 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀅𑀦𑀺𑀘𑁆𑀘𑀢𑀸 𑀤𑀼𑀓𑁆𑀔𑀢𑀸 𑀅𑀦𑀢𑁆𑀢𑀢𑀸𑀢𑀺 𑀳𑀺 𑀯𑀺𑀲𑀼𑀁 𑀕𑀬𑁆𑀳𑀫𑀸𑀦𑀁 𑀮𑀓𑁆𑀔𑀡𑀁 𑀧𑀜𑁆𑀜𑀢𑁆𑀢𑀺𑀕𑀢𑀺𑀓𑀁 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀁, 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀏𑀯 𑀧𑀭𑀺𑀢𑁆𑀢𑀸𑀤𑀺𑀯𑀲𑁂𑀦 𑀦𑀯𑀢𑁆𑀢𑀩𑁆𑀩𑀥𑀫𑁆𑀫𑀪𑀽𑀢𑀁. 𑀢𑀲𑁆𑀫𑀸 𑀯𑀺𑀲𑀼𑀁 𑀕𑀳𑁂𑀢𑀩𑁆𑀩𑀲𑁆𑀲 𑀮𑀓𑁆𑀔𑀡𑀲𑁆𑀲 𑀧𑀭𑀫𑀢𑁆𑀣𑀢𑁄 𑀅𑀪𑀸𑀯𑀸 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀲𑀗𑁆𑀔𑀸𑀭𑁂 𑀲𑀪𑀸𑀯𑀢𑁄 𑀲𑀮𑁆𑀮𑀓𑁆𑀔𑁂𑀦𑁆𑀢𑁄𑀯 𑀮𑀓𑁆𑀔𑀡𑀸𑀦𑀺 𑀲𑀮𑁆𑀮𑀓𑁆𑀔𑁂𑀢𑀺 𑀦𑀸𑀫𑀸𑀢𑀺 𑀆𑀳 ‘‘𑀬𑁄 𑀧𑀦 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸𑀢𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀲𑀮𑁆𑀮𑀓𑁆𑀔𑁂𑀢𑀻’’𑀢𑀺. 𑀬𑀲𑁆𑀫𑀸 𑀘 𑀅𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀦𑀸 𑀲𑀗𑁆𑀔𑀸𑀭𑀸𑀯 𑀤𑀺𑀲𑁆𑀲𑀫𑀸𑀦𑀸, 𑀢𑀲𑁆𑀫𑀸 𑀢𑁂 𑀓𑀡𑁆𑀞𑁂 𑀩𑀤𑁆𑀥𑀓𑀼𑀡𑀧𑀁 𑀯𑀺𑀬 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀻𑀬𑀸 𑀳𑁄𑀦𑁆𑀢𑀺.

𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀁

𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸

𑀢𑀢𑁆𑀭𑀸𑀢𑀺 𑀮𑁄𑀓𑀼𑀢𑁆𑀢𑀭𑀚𑁆𑀛𑀸𑀦𑁂. 𑀅𑀚𑁆𑀛𑀢𑁆𑀢𑀜𑁆𑀘𑀸𑀢𑀺 𑀉𑀧𑀟𑁆𑀠𑀕𑀸𑀣𑀸𑀬 𑀅𑀪𑀺𑀦𑀺𑀯𑀺𑀲𑀺𑀢𑀩𑁆𑀩𑀁 𑀯𑀼𑀝𑁆𑀞𑀸𑀢𑀩𑁆𑀩𑀁 𑀯𑀺𑀧𑀲𑁆𑀲𑀦𑀸𑀪𑀽𑀫𑀺𑀁 𑀧𑀜𑁆𑀘𑀥𑀸 𑀉𑀤𑁆𑀤𑀺𑀲𑀢𑀺. 𑀲𑀢𑁆𑀢𑀅𑀝𑁆𑀞𑀸𑀤𑀻𑀦𑀺 𑀅𑀗𑁆𑀕𑀸𑀦𑀺 𑀲𑀢𑁆𑀢𑀝𑁆𑀞𑀗𑁆𑀕𑀸𑀦𑀻𑀢𑀺 𑀆𑀤𑀺𑀲𑀤𑁆𑀤𑀲𑁆𑀲 𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀬𑀢𑁄 𑀯𑀼𑀝𑁆𑀞𑀸𑀦𑀁, 𑀢𑀸𑀦𑀺 𑀦𑀺𑀫𑀺𑀢𑁆𑀢𑀧𑀯𑀢𑁆𑀢𑀸𑀦𑀺 𑀦𑀺𑀫𑀺𑀢𑁆𑀢𑀯𑀘𑀦𑁂𑀦𑁂𑀯 𑀉𑀤𑁆𑀤𑀺𑀲𑀢𑀺. 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀫𑁂𑀯 𑀅𑀭𑀺𑀬𑀫𑀕𑁆𑀕𑀲𑁆𑀲 𑀩𑁄𑀚𑁆𑀛𑀗𑁆𑀕𑀸𑀤𑀺𑀯𑀺𑀲𑁂𑀲𑀁 𑀦𑀺𑀬𑀫𑁂𑀢𑀺. 𑀓𑀲𑁆𑀫𑀸? 𑀢𑀢𑁄 𑀢𑀢𑁄 𑀤𑀼𑀢𑀺𑀬𑀸𑀤𑀺𑀧𑀸𑀤𑀓𑀚𑁆𑀛𑀸𑀦𑀢𑁄 𑀉𑀧𑁆𑀧𑀦𑁆𑀦𑀲𑁆𑀲 𑀲𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀲𑁆𑀲 𑀧𑀸𑀤𑀓𑀚𑁆𑀛𑀸𑀦𑀸𑀢𑀺𑀓𑁆𑀓𑀦𑁆𑀢𑀸𑀦𑀁 𑀅𑀗𑁆𑀕𑀸𑀦𑀁 𑀅𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑀢𑀸𑀯𑀺𑀭𑀸𑀕𑀪𑀸𑀯𑀦𑀸𑀪𑀸𑀯𑀢𑁄 𑀇𑀢𑀭𑀲𑁆𑀲 𑀘 𑀅𑀢𑀩𑁆𑀪𑀸𑀯𑀢𑁄. 𑀢𑁂𑀲𑀫𑁆𑀧𑀺 𑀯𑀸𑀤𑁂𑀲𑀼…𑀧𑁂… 𑀯𑀺𑀧𑀲𑁆𑀲𑀦𑀸𑀯 𑀦𑀺𑀬𑀫𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀲𑁆𑀫𑀸? 𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁂𑀦𑁂𑀯 𑀳𑀺 𑀧𑀞𑀫𑀢𑁆𑀣𑁂𑀭𑀯𑀸𑀤𑁂𑀧𑀺 𑀅𑀧𑀸𑀤𑀓𑀧𑀞𑀫𑀚𑁆𑀛𑀸𑀦𑀧𑀸𑀤𑀓𑀫𑀕𑁆𑀕𑀸 𑀧𑀞𑀫𑀚𑁆𑀛𑀸𑀦𑀺𑀓𑀸𑀯 𑀳𑁄𑀦𑁆𑀢𑀺, 𑀇𑀢𑀭𑁂 𑀘 𑀧𑀸𑀤𑀓𑀚𑁆𑀛𑀸𑀦𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁂𑀳𑀺 𑀢𑀁𑀢𑀁𑀛𑀸𑀦𑀺𑀓𑀸. 𑀏𑀯𑀁 𑀲𑁂𑀲𑀯𑀸𑀤𑁂𑀲𑀼𑀧𑀺 𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁄 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑁄.

𑀧𑀓𑀺𑀡𑁆𑀡𑀓𑀲𑀗𑁆𑀔𑀸𑀭𑁂𑀢𑀺 𑀧𑀸𑀤𑀓𑀚𑁆𑀛𑀸𑀦𑀢𑁄 𑀅𑀜𑁆𑀜𑀲𑀗𑁆𑀔𑀸𑀭𑁂. 𑀢𑁂𑀦 𑀧𑀸𑀤𑀓𑀚𑁆𑀛𑀸𑀦𑀲𑀗𑁆𑀔𑀸𑀭𑁂𑀲𑀼 𑀲𑀫𑁆𑀫𑀲𑀺𑀢𑁂𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀭𑀸𑀧𑀻𑀢𑀺 𑀤𑀼𑀢𑀺𑀬𑀢𑁆𑀣𑁂𑀭𑀯𑀸𑀤𑁂𑀧𑀺. 𑀢𑀁𑀢𑀁𑀛𑀸𑀦𑀺𑀓𑀢𑀸 𑀢𑀁𑀢𑀁𑀲𑀫𑁆𑀫𑀲𑀺𑀢𑀲𑀗𑁆𑀔𑀸𑀭𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁂𑀳𑀺 𑀳𑁄𑀢𑀺. 𑀢𑀢𑁆𑀭𑀸𑀧𑀺 𑀳𑀺 𑀯𑀺𑀧𑀲𑁆𑀲𑀦𑀸 𑀢𑀁𑀢𑀁𑀯𑀺𑀭𑀸𑀕𑀸𑀯𑀺𑀭𑀸𑀕𑀪𑀸𑀯𑀦𑀸𑀪𑀸𑀯𑁂𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀘 𑀳𑀼𑀢𑁆𑀯𑀸 𑀛𑀸𑀦𑀗𑁆𑀕𑀸𑀤𑀺𑀦𑀺𑀬𑀫𑀁 𑀫𑀕𑁆𑀕𑀲𑁆𑀲 𑀓𑀭𑁄𑀢𑀻𑀢𑀺 𑀏𑀯𑀁 𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀢𑀦𑁆𑀢𑀺 𑀢𑀁𑀢𑀁𑀛𑀸𑀦𑀲𑀤𑀺𑀲𑀪𑀯𑀦𑀁. 𑀲𑁆𑀯𑀸𑀬𑀫𑀢𑁆𑀣𑁄 𑀧𑀸𑀤𑀓𑀚𑁆𑀛𑀸𑀦𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀼𑀧𑀦𑀺𑀲𑁆𑀲𑀬𑁂𑀳𑀺 𑀯𑀺𑀦𑀸 𑀅𑀚𑁆𑀛𑀸𑀲𑀬𑀫𑀢𑁆𑀢𑁂𑀦 𑀅𑀲𑀺𑀚𑁆𑀛𑀦𑀸 𑀉𑀧𑀦𑀺𑀲𑁆𑀲𑀬𑁂𑀦 𑀯𑀺𑀦𑀸 𑀲𑀗𑁆𑀓𑀧𑁆𑀧𑀫𑀢𑁆𑀢𑁂𑀦 𑀲𑀓𑀤𑀸𑀕𑀸𑀫𑀺𑀨𑀮𑀸𑀤𑀻𑀦𑀁 𑀅𑀲𑀺𑀚𑁆𑀛𑀦𑀤𑀻𑀧𑀓𑁂𑀦 𑀦𑀦𑁆𑀤𑀓𑁄𑀯𑀸𑀤𑁂𑀦 (𑀫. 𑀦𑀺. 𑁩.𑁩𑁯𑁮 𑀆𑀤𑀬𑁄) 𑀤𑀻𑀧𑁂𑀢𑀩𑁆𑀩𑁄. 𑀢𑀢𑁆𑀣 𑀳𑀺 𑀲𑁄𑀢𑀸𑀧𑀦𑁆𑀦𑀸𑀬𑀧𑀺 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑀪𑀸𑀯𑀁 𑀯𑀤𑀦𑁆𑀢𑁂𑀦 𑀪𑀕𑀯𑀢𑀸 𑀬𑀲𑁆𑀲 𑀬𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀅𑀢𑁆𑀣𑀺, 𑀢𑀲𑁆𑀲 𑀢𑀲𑁆𑀲𑁂𑀯 𑀅𑀚𑁆𑀛𑀸𑀲𑀬𑁄 𑀦𑀺𑀬𑀸𑀫𑀓𑁄, 𑀦𑀸𑀜𑁆𑀜𑀲𑁆𑀲𑀸𑀢𑀺 𑀢𑁂𑀦 𑀢𑁂𑀦 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑀢𑀸 𑀳𑁄𑀢𑀺, 𑀦 𑀢𑀢𑁄 𑀧𑀭𑀁 𑀲𑀗𑁆𑀓𑀧𑁆𑀧𑀲𑀩𑁆𑀪𑀸𑀯𑁂𑀧𑀺 𑀅𑀲𑀺𑀚𑁆𑀛𑀦𑀢𑁄𑀢𑀺 𑀅𑀬𑀫𑀢𑁆𑀣𑁄 𑀤𑀻𑀧𑀺𑀢𑁄 𑀳𑁄𑀢𑀺. 𑀏𑀯𑀫𑀺𑀥𑀸𑀧𑀺 𑀬𑀲𑁆𑀲 𑀬𑀲𑁆𑀲 𑀤𑀼𑀢𑀺𑀬𑀸𑀤𑀺𑀛𑀸𑀦𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀬𑀣𑀸𑀯𑀼𑀢𑁆𑀢𑁄 𑀉𑀧𑀦𑀺𑀲𑁆𑀲𑀬𑁄 𑀅𑀢𑁆𑀣𑀺, 𑀢𑀲𑁆𑀲 𑀢𑀲𑁆𑀲𑁂𑀯 𑀅𑀚𑁆𑀛𑀸𑀲𑀬𑁄 𑀦𑀺𑀬𑀸𑀫𑀓𑁄, 𑀦𑀸𑀜𑁆𑀜𑀲𑁆𑀲 𑀲𑀢𑀺𑀧𑀺 𑀢𑀲𑁆𑀫𑀺𑀁 𑀅𑀲𑀺𑀚𑁆𑀛𑀦𑀢𑁄. 𑀇𑀫𑀲𑁆𑀫𑀺𑀁 𑀧𑀦 𑀯𑀸𑀤𑁂 𑀧𑀸𑀤𑀓𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀼𑀧𑀦𑀺𑀲𑁆𑀲𑀬𑀲𑀩𑁆𑀪𑀸𑀯𑁂 𑀅𑀚𑁆𑀛𑀸𑀲𑀬𑁄 𑀏𑀓𑀦𑁆𑀢𑁂𑀦 𑀳𑁄𑀢𑀺, 𑀢𑀁𑀢𑀁𑀨𑀮𑀽𑀧𑀦𑀺𑀲𑁆𑀲𑀬𑀲𑀩𑁆𑀪𑀸𑀯𑁂 𑀢𑀁𑀢𑀁𑀲𑀗𑁆𑀓𑀧𑁆𑀧𑁄 𑀯𑀺𑀬𑀸𑀢𑀺 𑀢𑀤𑀪𑀸𑀯𑀸𑀪𑀸𑀯𑀢𑁄 𑀅𑀚𑁆𑀛𑀸𑀲𑀬𑁄 𑀦𑀺𑀬𑀫𑁂𑀢𑀻𑀢𑀺 𑀯𑀼𑀢𑁆𑀢𑀁.

𑀬𑀲𑁆𑀫𑀺𑀁 𑀧𑀦 𑀧𑀸𑀤𑀓𑀚𑁆𑀛𑀸𑀦𑀁 𑀦𑀢𑁆𑀣𑀻𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀯𑀚𑁆𑀚𑀸𑀦𑀁 𑀧𑀸𑀤𑀓𑀸𑀦𑀺 𑀮𑁄𑀓𑀺𑀬𑀚𑁆𑀛𑀸𑀦𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀺 𑀘 𑀑𑀴𑀸𑀭𑀺𑀓𑀗𑁆𑀕𑀸𑀢𑀺𑀓𑁆𑀓𑀫𑀦𑀼𑀧𑀦𑀺𑀲𑁆𑀲𑀬𑀸𑀪𑀸𑀯𑁂 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀯𑀺𑀦𑀸 𑀦 𑀳𑁄𑀢𑀻𑀢𑀺 ‘‘𑀲𑁄𑀫𑀦𑀲𑁆𑀲𑀲𑀳𑀕𑀢𑀫𑀕𑁆𑀕𑁄 𑀳𑁄𑀢𑀻’’𑀢𑀺 𑀆𑀳. 𑀉𑀧𑁂𑀓𑁆𑀔𑀸𑀲𑀳𑀕𑀢𑀫𑀕𑁆𑀕𑁄𑀢𑀺 𑀏𑀢𑁂𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀢𑀸𑀧𑀺 𑀲𑀫𑀸𑀦𑀸 𑀅𑀦𑀼𑀲𑀬𑀲𑀫𑀼𑀕𑁆𑀖𑀸𑀝𑀦𑀲𑀫𑀢𑁆𑀣𑀲𑁆𑀲 𑀦 𑀲𑀗𑁆𑀔𑀸𑀭𑀸𑀯𑀲𑁂𑀲𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀢𑁂 𑀘 𑀯𑀸𑀤𑀸 𑀦 𑀯𑀺𑀭𑀼𑀚𑁆𑀛𑀦𑁆𑀢𑀺 𑀅𑀚𑁆𑀛𑀸𑀲𑀬𑀯𑀲𑁂𑀦 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀢𑀸𑀬 𑀧𑀞𑀫𑀸𑀤𑀺𑀚𑁆𑀛𑀸𑀦𑀺𑀓𑀢𑀸𑀬 𑀘 𑀲𑀫𑁆𑀪𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀚𑁆𑀛𑀸𑀲𑀬𑁄 𑀘 𑀲𑀸𑀢𑁆𑀣𑀓𑁄 𑀳𑁄𑀢𑀺, 𑀅𑀜𑁆𑀜𑀣𑀸 𑀧𑀸𑀤𑀓𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑁂𑀳𑁂𑀯 𑀦𑀺𑀬𑀫𑀲𑁆𑀲 𑀲𑀺𑀤𑁆𑀥𑀢𑁆𑀢𑀸 𑀅𑀚𑁆𑀛𑀸𑀲𑀬𑁄 𑀦𑀺𑀬𑀸𑀫𑀓𑁄 𑀯𑀼𑀘𑁆𑀘𑀫𑀸𑀦𑁄 𑀦𑀺𑀭𑀢𑁆𑀣𑀓𑁄 𑀲𑀺𑀬𑀸𑀢𑀺. 𑀇𑀥 𑀧𑀦 𑀅𑀝𑁆𑀞𑀲𑀸𑀮𑀺𑀦𑀺𑀬𑀸 𑀦𑀺𑀬𑀸𑀫𑀦𑁂 𑀏𑀓𑀦𑁆𑀢𑀺𑀓𑀁 𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀁 𑀅𑀢𑁆𑀣𑀫𑁂𑀯 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀢𑁂𑀲𑀫𑁆𑀧𑀺 𑀯𑀸𑀤𑁂𑀲𑀼 𑀅𑀬𑀁…𑀧𑁂… 𑀯𑀺𑀧𑀲𑁆𑀲𑀦𑀸𑀯 𑀦𑀺𑀬𑀫𑁂𑀢𑀻’’𑀢𑀺 𑀯𑀤𑀦𑁆𑀢𑁂𑀦 𑀢𑀬𑁄𑀧𑁂𑀢𑁂 𑀯𑀸𑀤𑁂 𑀯𑀺𑀧𑀲𑁆𑀲𑀦𑀸𑀯 𑀦𑀺𑀬𑀫𑁂𑀢𑀻𑀢𑀺 𑀤𑀲𑁆𑀲𑀺𑀢𑀁. 𑀢𑀁𑀢𑀁𑀯𑀸𑀤𑀸𑀦𑀜𑁆𑀳𑀺 𑀯𑀺𑀧𑀲𑁆𑀲𑀦𑀸𑀲𑀳𑀺𑀢𑀸𑀦𑀫𑁂𑀯 𑀲𑀺𑀤𑁆𑀥𑀺, 𑀦𑀸𑀜𑁆𑀜𑀣𑀸𑀢𑀺 𑀤𑀲𑁆𑀲𑀺𑀢𑀦𑁆𑀢𑀺.

𑀧𑀯𑁂𑀥𑀢𑀻𑀢𑀺 𑀕𑁄𑀢𑁆𑀭𑀪𑀼𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀣𑁄. 𑀬𑀤𑀺 𑀧𑀜𑁆𑀘𑀫𑀘𑀺𑀢𑁆𑀢𑀓𑁆𑀔𑀡𑁂 𑀚𑀯𑀦𑀁 𑀧𑀢𑀺𑀢𑀁 𑀦𑀸𑀫 𑀳𑁄𑀢𑀺, 𑀓𑀣𑀁 𑀢𑀤𑀸 𑀕𑁄𑀢𑁆𑀭𑀪𑀼 𑀢𑀤𑀦𑀦𑁆𑀢𑀭𑀜𑁆𑀘 𑀫𑀕𑁆𑀕𑁄 𑀚𑀯𑀦𑀲𑁆𑀲 𑀧𑀢𑀺𑀢𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀅𑀧𑀼𑀩𑁆𑀩𑀲𑁆𑀲 𑀚𑀯𑀦𑀦𑁆𑀢𑀭𑀲𑁆𑀲 𑀧𑀢𑀺𑀢𑀢𑀸𑀪𑀸𑀯𑀢𑁄. 𑀢𑀤𑁂𑀯 𑀳𑀺 𑀚𑀯𑀦𑀁 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀫𑀸𑀦𑀁 𑀧𑀢𑀺𑀢𑀁 𑀲𑀺𑀬𑀸𑀢𑀺, 𑀕𑁄𑀢𑁆𑀭𑀪𑀼 𑀧𑀦 𑀆𑀭𑀫𑁆𑀫𑀡𑀦𑁆𑀢𑀭𑁂 𑀉𑀧𑁆𑀧𑀦𑁆𑀦𑀁 𑀅𑀧𑀼𑀩𑁆𑀩𑀁 𑀚𑀯𑀦𑀁, 𑀢𑀣𑀸 𑀫𑀕𑁆𑀕𑁄 𑀪𑀽𑀫𑀦𑁆𑀢𑀭𑀢𑁄 𑀘𑀸𑀢𑀺. 𑀦𑀦𑀼 𑀘 𑀲𑀢𑁆𑀢𑀫𑀚𑀯𑀦𑀘𑁂𑀢𑀦𑀸𑀬 𑀩𑀮𑀯𑀢𑀸𑀬 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀪𑀸𑀯𑁄 𑀳𑁄𑀢𑀺 𑀆𑀦𑀦𑁆𑀢𑀭𑀺𑀬𑀢𑀸𑀧𑀻𑀢𑀺, 𑀢𑀢𑁆𑀣𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑀲𑀺𑀬𑀸 ‘‘𑀧𑀝𑀺𑀲𑀦𑁆𑀥𑀺𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑀺𑀦𑁄 𑀯𑀺𑀧𑀸𑀓𑀲𑀦𑁆𑀢𑀸𑀦𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁂𑀦 𑀅𑀦𑁆𑀢𑀺𑀫𑀚𑀯𑀦𑀘𑁂𑀢𑀦𑀸𑀬 𑀲𑀼𑀲𑀗𑁆𑀔𑀢𑀢𑁆𑀢𑀸 𑀲𑀸 𑀲𑀢𑁆𑀢𑀫𑀚𑀯𑀦𑀘𑁂𑀢𑀦𑀸 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀸 𑀆𑀦𑀦𑁆𑀢𑀭𑀺𑀓𑀸 𑀘 𑀳𑁄𑀢𑀺, 𑀦 𑀅𑀧𑀢𑀺𑀢𑀚𑀯𑀦𑀘𑁂𑀢𑀦𑀸 𑀯𑀺𑀬 𑀩𑀮𑀯𑀢𑀸𑀬𑀸’’𑀢𑀺.

𑀧𑀼𑀦 𑀅𑀦𑀼𑀮𑁄𑀫𑀁 𑀢𑀁 𑀅𑀦𑀼𑀩𑀦𑁆𑀥𑁂𑀬𑁆𑀬𑀸𑀢𑀺 𑀕𑁄𑀢𑁆𑀭𑀪𑀼𑀲𑁆𑀲 𑀳𑀺 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀢𑁆𑀢𑁂 𑀲𑀢𑀺 𑀢𑀤𑀧𑀺 𑀅𑀦𑀼𑀮𑁄𑀫𑀫𑁂𑀯𑀸𑀢𑀺 𑀧𑀼𑀭𑀺𑀫𑀅𑀦𑀼𑀮𑁄𑀫𑀁 𑀯𑀺𑀬 𑀢𑀁 𑀢𑀤𑀧𑀺 𑀅𑀜𑁆𑀜𑀁 𑀅𑀦𑀼𑀮𑁄𑀫𑀁 𑀅𑀦𑀼𑀩𑀦𑁆𑀥𑁂𑀬𑁆𑀬, 𑀦 𑀫𑀕𑁆𑀕𑁄𑀢𑀺 𑀫𑀕𑁆𑀕𑀯𑀼𑀝𑁆𑀞𑀸𑀦𑀫𑁂𑀯 𑀘 𑀦 𑀪𑀯𑁂𑀬𑁆𑀬 𑀅𑀢𑁆𑀢𑀦𑁄 𑀲𑀤𑀺𑀲𑀸𑀮𑀫𑁆𑀩𑀦𑀲𑁆𑀲 𑀆𑀯𑀚𑁆𑀚𑀦𑀝𑁆𑀞𑀸𑀦𑀺𑀬𑀲𑁆𑀲 𑀧𑀘𑁆𑀘𑀬𑀲𑁆𑀲 𑀅𑀮𑀸𑀪𑀸. 𑀅𑀧𑁆𑀧𑀳𑀻𑀦𑀪𑀸𑀯𑁂𑀦 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀅𑀦𑀼𑀲𑀬𑀺𑀢𑀸 𑀓𑀺𑀮𑁂𑀲𑀸 𑀲𑀸 𑀪𑀽𑀫𑀺 𑀏𑀢𑁂𑀳𑀺 𑀮𑀤𑁆𑀥𑀸𑀢𑀺 𑀓𑀢𑁆𑀯𑀸 𑀪𑀽𑀫𑀺𑀮𑀤𑁆𑀥𑀸. 𑀯𑀝𑁆𑀝𑀁 𑀲𑀺𑀦𑁄𑀦𑁆𑀢𑀺 𑀩𑀦𑁆𑀥𑀦𑁆𑀢𑀻𑀢𑀺 𑀓𑀢𑁆𑀯𑀸 𑀯𑀝𑁆𑀝𑀲𑁂𑀢𑀽 𑀘, 𑀢𑁂𑀲𑀁 𑀲𑀫𑀼𑀕𑁆𑀖𑀸𑀢𑀓𑀭𑀡𑀦𑁆𑀢𑀺𑀧𑀺 𑀏𑀢𑀤𑁂𑀯𑀲𑁆𑀲 𑀮𑁄𑀪𑀓𑁆𑀔𑀦𑁆𑀥𑀸𑀤𑀺𑀧𑀤𑀸𑀮𑀦𑀁 𑀯𑀼𑀘𑁆𑀘𑀢𑀺. 𑀢𑀦𑁆𑀢𑀺 𑀧𑀯𑀢𑁆𑀢𑀁. 𑀏𑀓𑀁 𑀪𑀯𑀦𑁆𑀢𑀺 𑀅𑀦𑀸𑀕𑀸𑀫𑀺𑀦𑁄 𑀅𑀦𑁂𑀓𑀓𑁆𑀔𑀢𑁆𑀢𑀼𑀜𑁆𑀘 𑀢𑀢𑁆𑀣𑁂𑀯 𑀉𑀧𑀧𑀚𑁆𑀚𑀦𑁆𑀢𑀲𑁆𑀲 𑀳𑁂𑀝𑁆𑀞𑀸 𑀅𑀦𑀸𑀕𑀫𑀦𑀯𑀲𑁂𑀦 𑀏𑀓𑁄 𑀪𑀯𑁄𑀢𑀺 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁.

𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀉𑀧𑀸𑀤𑀺𑀦𑁆𑀦𑀓𑀧𑀯𑀢𑁆𑀢𑀢𑁄 𑀯𑀼𑀝𑁆𑀞𑀸𑀦𑀲𑁆𑀲. 𑀅𑀧𑀸𑀬𑁂𑀲𑀼 𑀲𑀢𑁆𑀢𑀫𑀪𑀯𑀢𑁄 𑀉𑀤𑁆𑀥𑀁 𑀲𑀼𑀕𑀢𑀺𑀬𑀜𑁆𑀘 𑀯𑀺𑀧𑀸𑀓𑀤𑀸𑀬𑀓𑀲𑁆𑀲 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑀖𑀸𑀢𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁄 𑀤𑀝𑁆𑀞𑀩𑁆𑀩𑁄. 𑀤𑁆𑀯𑀻𑀲𑀼 𑀪𑀯𑁂𑀲𑀽𑀢𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑁂 𑀅𑀪𑀸𑀯𑀺𑀢𑁂 𑀲𑀓𑀤𑀸𑀕𑀸𑀫𑀺𑀲𑁆𑀲 𑀓𑀸𑀫𑀥𑀸𑀢𑀼𑀬𑀁 𑀬𑁂 𑀤𑁆𑀯𑁂 𑀪𑀯𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑁂𑀲𑀽𑀢𑀺 𑀅𑀢𑁆𑀣𑁄. 𑀘𑀮𑀢𑀻𑀢𑀺 𑀏𑀢𑁂𑀦 𑀘𑀮𑀦𑀲𑀪𑀸𑀯𑀫𑁂𑀯 𑀤𑀲𑁆𑀲𑁂𑀢𑀺, 𑀦 𑀅𑀘𑀮𑀦𑀸𑀪𑀸𑀯𑀁, 𑀢𑀲𑁆𑀫𑀸 𑀅𑀘𑀮𑀦𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀘𑀮𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸𑀕𑀢𑀲𑁆𑀲 𑀳𑀻’’𑀢𑀺𑀆𑀤𑀺𑀫𑀸𑀳. 𑀬𑁂𑀧𑀺 𑀯𑀸 𑀓𑀢𑁆𑀣𑀘𑀺 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑁂 𑀲𑀫𑀸𑀦𑀧𑀝𑀺𑀧𑀤𑁂 𑀤𑀺𑀲𑁆𑀯𑀸 𑀲𑀪𑀸𑀯𑀢𑁄 𑀅𑀘𑀮𑀦𑀫𑁂𑀯 𑀕𑀡𑁆𑀳𑁂𑀬𑁆𑀬𑀼𑀁, 𑀢𑁂𑀲𑀁 𑀢𑀁𑀕𑀳𑀡𑀦𑀺𑀯𑀸𑀭𑀡𑀢𑁆𑀣𑀁 ‘‘𑀘𑀮𑀢𑀻’’𑀢𑀺 𑀯𑀼𑀢𑁆𑀢𑀁, 𑀦 𑀘𑀮𑀦𑀸𑀯𑀥𑀸𑀭𑀡𑀢𑁆𑀣𑀦𑁆𑀢𑀺 𑀬𑀼𑀢𑁆𑀢𑀁 𑀉𑀪𑀬𑀤𑀲𑁆𑀲𑀦𑀁. 𑀅𑀣 𑀯𑀸 𑀬𑀤𑀺𑀧𑀺 𑀓𑁂𑀲𑀜𑁆𑀘𑀺 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀸 𑀲𑀫𑀸𑀦𑀧𑀝𑀺𑀧𑀤𑀸, 𑀢𑀣𑀸𑀧𑀺 𑀓𑀺𑀮𑁂𑀲𑀺𑀦𑁆𑀤𑁆𑀭𑀺𑀬𑁂𑀳𑀺 𑀲𑀺𑀚𑁆𑀛𑀫𑀸𑀦𑀸 𑀧𑀝𑀺𑀧𑀤𑀸 𑀢𑁂𑀲𑀁 𑀯𑀲𑁂𑀦 𑀘𑀮𑀦𑀧𑀓𑀢𑀺𑀓𑀸 𑀏𑀯𑀸𑀢𑀺 ‘‘𑀘𑀮𑀢𑀺’’𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀦 ‘‘𑀦 𑀘𑀮𑀢𑀻’’𑀢𑀺.

𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀫𑀕𑁆𑀕𑀯𑀻𑀲𑀢𑀺𑀫𑀳𑀸𑀦𑀬𑀯𑀡𑁆𑀡𑀦𑀸

𑁩𑁫𑁭. 𑀬𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 ‘‘𑀫𑀕𑁆𑀕𑀁 𑀪𑀸𑀯𑁂𑀫𑀻’’𑀢𑀺 𑀅𑀚𑁆𑀛𑀸𑀲𑀬𑁄 𑀧𑀯𑀢𑁆𑀢𑁄, 𑀲𑁄 𑀫𑀕𑁆𑀕𑀁 𑀪𑀸𑀯𑁂𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀚𑁆𑀛𑀸𑀲𑀬𑀯𑀺𑀲𑁂𑀲𑁂𑀦 𑀢𑀁𑀢𑀁𑀪𑀸𑀯𑀦𑀸𑀯𑀺𑀲𑁂𑀲𑁄 𑀤𑀝𑁆𑀞𑀩𑁆𑀩𑁄.

𑁩𑁫𑁮. 𑀙𑀦𑁆𑀤𑀸𑀥𑀺𑀧𑀢𑁂𑀬𑁆𑀬𑀦𑁆𑀢𑀺𑀆𑀤𑀻𑀲𑀼 𑀏𑀓𑀘𑀺𑀢𑁆𑀢𑀓𑁆𑀔𑀡𑁂 𑀯𑀢𑁆𑀢𑀫𑀸𑀦𑁂𑀲𑀼 𑀥𑀫𑁆𑀫𑁂𑀲𑀼 𑀓𑀣𑀁 𑀙𑀦𑁆𑀤𑀲𑁆𑀲 𑀢𑀁𑀲𑀳𑀚𑀸𑀢𑀲𑁆𑀲 𑀅𑀥𑀺𑀧𑀢𑀺𑀪𑀸𑀯𑁄 𑀯𑀻𑀭𑀺𑀬𑀸𑀤𑀻𑀦𑀜𑁆𑀘𑀸𑀢𑀺? 𑀉𑀧𑀦𑀺𑀲𑁆𑀲𑀬𑀯𑀲𑁂𑀦. 𑀬𑀲𑁆𑀲 𑀳𑀺 𑀲𑀘𑁂 𑀙𑀦𑁆𑀤𑀯𑀢𑁄 𑀓𑀼𑀲𑀮𑀁 𑀦𑀺𑀧𑁆𑀨𑀚𑁆𑀚𑀢𑀺, ‘‘𑀅𑀳𑀁 𑀦𑀺𑀧𑁆𑀨𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀧𑀯𑀢𑁆𑀢𑀫𑀸𑀦𑀲𑁆𑀲 𑀓𑀼𑀲𑀮𑀁 𑀦𑀺𑀧𑁆𑀨𑀦𑁆𑀦𑀁, 𑀢𑀲𑁆𑀲 𑀢𑀁𑀲𑀳𑀚𑀸𑀢𑁄 𑀙𑀦𑁆𑀤𑁄 𑀢𑁂𑀦 𑀧𑀼𑀭𑀺𑀫𑀼𑀧𑀦𑀺𑀲𑁆𑀲𑀬𑁂𑀦 𑀯𑀺𑀲𑀺𑀝𑁆𑀞𑁄 𑀲𑀳𑀚𑀸𑀢𑀥𑀫𑁆𑀫𑁂 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑀺. 𑀢𑀲𑁆𑀫𑀺𑀜𑁆𑀘 𑀧𑀯𑀢𑁆𑀢𑀫𑀸𑀦𑁂 𑀢𑁂 𑀧𑀯𑀢𑁆𑀢𑀦𑁆𑀢𑀺, 𑀦𑀺𑀯𑀢𑁆𑀢𑀫𑀸𑀦𑁂 𑀦𑀺𑀯𑀢𑁆𑀢𑀦𑁆𑀢𑀺, 𑀢𑀤𑀦𑀼𑀭𑀽𑀧𑀩𑀮𑀸 𑀘 𑀳𑁄𑀦𑁆𑀢𑀺 𑀭𑀸𑀚𑀧𑀼𑀭𑀺𑀲𑀸 𑀯𑀺𑀬𑀸𑀢𑀺. 𑀏𑀯𑀁 𑀯𑀻𑀭𑀺𑀬𑀸𑀤𑀻𑀲𑀼. 𑀲𑁂𑀲𑀥𑀫𑁆𑀫𑀸𑀦𑀁 𑀧𑀦 𑀓𑀢𑁆𑀣𑀘𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑁆𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑁂𑀧𑀺 𑀅𑀢𑀁𑀲𑀪𑀸𑀯𑀢𑁆𑀢𑀸 𑀅𑀥𑀺𑀧𑀢𑀺𑀪𑀸𑀯𑁄 𑀦𑀢𑁆𑀣𑀻𑀢𑀺 𑀤𑀝𑁆𑀞𑀩𑁆𑀩𑁄.

𑀤𑀼𑀢𑀺𑀬𑀫𑀕𑁆𑀕𑀯𑀡𑁆𑀡𑀦𑀸

𑁩𑁬𑁧. 𑀆-𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁 𑀓𑀢𑁆𑀯𑀸 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀯𑀼𑀢𑁆𑀢𑀁, 𑀆-𑀓𑀸𑀭𑁄 𑀘 𑀥𑀫𑁆𑀫𑀫𑀭𑀺𑀬𑀸𑀤𑀢𑁆𑀣𑁄.

𑀢𑀢𑀺𑀬𑀘𑀢𑀼𑀢𑁆𑀣𑀫𑀕𑁆𑀕𑀯𑀡𑁆𑀡𑀦𑀸

𑁩𑁬𑁨. 𑀫𑀕𑁆𑀕𑀗𑁆𑀕𑀸𑀦𑀺 𑀦 𑀧𑀽𑀭𑁂𑀦𑁆𑀢𑀺 𑀅𑀓𑀺𑀘𑁆𑀘𑀓𑀢𑁆𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀸𑀭𑁂𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀳𑀺 𑀫𑀕𑁆𑀕𑁄, 𑀦 𑀘𑁂𑀢𑀸𑀬 𑀫𑀸𑀭𑁂𑀢𑀩𑁆𑀩𑀁 𑀅𑀢𑁆𑀣𑀻𑀢𑀺. 𑀫𑀸𑀦𑀲𑁆𑀲 𑀤𑀺𑀝𑁆𑀞𑀺𑀲𑀤𑀺𑀲𑀸 𑀧𑀯𑀢𑁆𑀢𑀺 𑀅𑀳𑀫𑀲𑁆𑀫𑀻𑀢𑀺 𑀧𑀯𑀢𑁆𑀢𑀫𑀸𑀦𑀲𑁆𑀲 𑀤𑀺𑀝𑁆𑀞𑀺𑀝𑁆𑀞𑀸𑀦𑁂 𑀞𑀸𑀦𑀁. 𑀆𑀮𑁄𑀓𑀲𑁆𑀲𑁂𑀯 𑀧𑀯𑀢𑁆𑀢𑀺𑀓𑀸𑀮𑁄 𑀯𑀺𑀬𑀸𑀢𑀺 𑀘𑀺𑀭𑀧𑁆𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬𑀸𑀳. 𑀏𑀓𑀤𑁂𑀲𑀲𑀸𑀫𑀜𑁆𑀜𑁂𑀦 𑀳𑀺 𑀬𑀣𑀸𑀥𑀺𑀧𑁆𑀧𑁂𑀢𑁂𑀦 𑀉𑀧𑀫𑀸 𑀳𑁄𑀢𑀻𑀢𑀺. 𑀔𑀸𑀭𑁂 𑀯𑀸𑀢𑀺 𑀓𑀝𑁆𑀞𑀸𑀤𑀻𑀦𑀁 𑀔𑀸𑀭𑀘𑁆𑀙𑀸𑀭𑀺𑀓𑀸𑀬𑀁. 𑀲𑀫𑁆𑀫𑀤𑁆𑀤𑀺𑀢𑁆𑀯𑀸𑀢𑀺 𑀓𑀺𑀮𑁂𑀤𑁂𑀢𑁆𑀯𑀸. 𑀙𑀦𑁆𑀤𑁄𑀢𑀺 𑀢𑀡𑁆𑀳𑀸. 𑀅𑀦𑀼𑀲𑀬𑁄𑀢𑀺 𑀢𑀡𑁆𑀳𑀸 𑀫𑀸𑀦𑀸𑀦𑀼𑀲𑀬𑁄 𑀘. 𑀏𑀢𑀲𑁆𑀫𑀺𑀜𑁆𑀘 𑀲𑀼𑀢𑁆𑀢𑁂 𑀅𑀲𑀫𑀽𑀳𑀢𑀲𑁆𑀲 𑀕𑀦𑁆𑀥𑀲𑁆𑀲 𑀲𑀫𑀼𑀕𑁆𑀖𑀸𑀝𑀦𑀁 𑀯𑀺𑀬 𑀅𑀲𑀫𑀽𑀳𑀢𑀫𑀸𑀦𑀸𑀤𑀺𑀲𑀫𑀼𑀕𑁆𑀖𑀸𑀢𑀁 𑀤𑀲𑁆𑀲𑁂𑀦𑁆𑀢𑁂𑀦 𑀅𑀜𑁆𑀜𑀫𑀜𑁆𑀜𑁂 𑀓𑀺𑀮𑁂𑀲𑁂 𑀧𑀚𑀳𑀢𑀻𑀢𑀺 𑀤𑀲𑁆𑀲𑀺𑀢𑀦𑁆𑀢𑀺 𑀆𑀦𑀻𑀢𑀁, 𑀦 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀉𑀧𑀫𑀸𑀬 𑀯𑀼𑀢𑁆𑀢𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀫𑀸𑀦𑁂 𑀘𑀺𑀢𑁆𑀢𑁂 𑀢𑀲𑁆𑀲 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀓𑀭𑀸 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀸 𑀘𑁂𑀢𑀲𑀺𑀓𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀢𑀲𑁆𑀲𑀗𑁆𑀕𑀪𑀽𑀢𑀸 𑀅𑀯𑀬𑀯𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 ‘‘𑀘𑀺𑀢𑁆𑀢𑀗𑁆𑀕𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀼𑀲𑀮𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀓𑀼𑀲𑀮𑀧𑀤𑀁

𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭𑁄

𑀧𑀞𑀫𑀘𑀺𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁩𑁬𑁫. 𑀓𑀼𑀲𑀮𑁂 𑀯𑀼𑀢𑁆𑀢𑀦𑀬𑀁 𑀅𑀦𑀼𑀕𑀦𑁆𑀢𑁆𑀯𑀸 𑀬𑀣𑀸𑀦𑀼𑀭𑀽𑀧𑀁 𑀯𑁂𑀤𑀺𑀢𑀩𑁆𑀩𑀢𑀸𑀬 ‘‘𑀯𑀼𑀢𑁆𑀢𑀦𑀬𑁂𑀦𑀸’’𑀢𑀺 𑀆𑀳. 𑀕𑀦𑁆𑀢𑀩𑁆𑀩𑀸𑀪𑀸𑀯𑀢𑁄𑀢𑀺 𑀩𑀼𑀚𑁆𑀛𑀺𑀢𑀩𑁆𑀩𑀸𑀪𑀸𑀯𑀢𑁄. 𑀤𑀺𑀝𑁆𑀞𑀺𑀬𑀸 𑀕𑀢𑀫𑀢𑁆𑀢𑀦𑁆𑀢𑀺 𑀤𑀺𑀝𑁆𑀞𑀺𑀬𑀸 𑀕𑀢𑀺𑀫𑀢𑁆𑀢𑀁 𑀕𑀳𑀡𑀫𑀢𑁆𑀢𑀁. 𑀆𑀲𑀦𑁆𑀦𑀓𑀸𑀭𑀡𑀢𑁆𑀢𑀸 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲 𑀯𑀺𑀲𑀼𑀁 𑀕𑀳𑀡𑀁 𑀏𑀓𑀦𑁆𑀢𑀓𑀸𑀭𑀡𑀢𑁆𑀢𑀸 𑀘. 𑀲𑀢𑀺𑀲𑀁𑀯𑀭𑁄𑀢𑀺 𑀇𑀥 𑀲𑀻𑀢𑀸𑀤𑀻𑀳𑀺 𑀨𑀼𑀝𑁆𑀞𑀲𑁆𑀲 𑀅𑀧𑁆𑀧𑀫𑀚𑁆𑀚𑀦𑀁 𑀔𑀫𑀦𑀁 𑀤𑀝𑁆𑀞𑀩𑁆𑀩𑀁. 𑀧𑀳𑀸𑀦𑀲𑀁𑀯𑀭𑁄𑀢𑀺 𑀯𑀻𑀭𑀺𑀬𑀲𑀁𑀯𑀭𑁄.

𑀅𑀲𑁆𑀲𑀸𑀤𑀤𑀲𑁆𑀲𑀦𑀦𑁆𑀢𑀺 𑀅𑀲𑁆𑀲𑀸𑀤𑀤𑀺𑀝𑁆𑀞𑀺. 𑀨𑀮𑀝𑁆𑀞𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀦𑁂𑀦 𑀅𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑁄𑀫𑁄𑀳𑁄, 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀧𑀝𑀺𑀧𑀓𑁆𑀔𑀪𑀸𑀯𑀕𑁆𑀕𑀳𑀡𑀸𑀓𑀸𑀭𑁄 𑀯𑀸. 𑀲𑀩𑁆𑀩𑀲𑁆𑀲 𑀮𑁄𑀪𑀲𑁆𑀲 𑀅𑀪𑀺𑀚𑁆𑀛𑀸𑀪𑀸𑀯𑁂 𑀲𑀢𑀺𑀧𑀺 𑀯𑀺𑀲𑁂𑀲𑀬𑀼𑀢𑁆𑀢𑀸𑀬 𑀅𑀪𑀺𑀚𑁆𑀛𑀸𑀬 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀸𑀬 𑀇𑀥𑀼𑀧𑁆𑀧𑀚𑁆𑀚𑀫𑀸𑀦𑀸𑀬 𑀮𑀓𑁆𑀔𑀡𑀸𑀤𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀸 𑀧𑀭𑀲𑀫𑁆𑀧𑀢𑁆𑀢𑀻𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀦𑀲𑁆𑀲 𑀧𑀼𑀭𑁂𑀘𑀸𑀭𑀺𑀓𑀸 𑀢𑀡𑁆𑀳𑀸𑀪𑀺𑀭𑀢𑀺 𑀅𑀪𑀺𑀭𑀢𑀺.

𑀅𑀦𑀼𑀧𑀧𑀭𑀺𑀓𑁆𑀔𑀸 𑀫𑁄𑀳𑁄. 𑀫𑁄𑀳𑀯𑀲𑁂𑀦 𑀳𑀺 𑀤𑀺𑀝𑁆𑀞𑀺𑀯𑀲𑁂𑀦 𑀯𑀸 𑀅𑀯𑀢𑁆𑀣𑀼𑀲𑁆𑀫𑀺𑀁 𑀲𑀸𑀦𑀼𑀦𑀬𑁄 𑀅𑀥𑀺𑀫𑁄𑀓𑁆𑀔𑁄 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀅𑀲𑀢𑀺𑀬𑀘𑀺𑀢𑁆𑀢𑁂𑀢𑀺 𑀅𑀳𑀺𑀭𑀺𑀓𑀸𑀤𑀻𑀳𑀺 𑀆𑀭𑀓𑁆𑀔𑀭𑀳𑀺𑀢𑀘𑀺𑀢𑁆𑀢𑁂. 𑀲𑀢𑀺𑀭𑀳𑀺𑀢𑀢𑁆𑀢𑀸 𑀲𑀢𑀺𑀧𑀝𑀺𑀧𑀓𑁆𑀔𑀢𑁆𑀢𑀸 𑀘𑀸𑀢𑀺 𑀏𑀢𑁂𑀦 𑀲𑀢𑀺𑀭𑀳𑀺𑀢𑀸 𑀲𑀢𑀺𑀧𑀝𑀺𑀧𑀓𑁆𑀔𑀸 𑀘 𑀅𑀓𑀼𑀲𑀮𑀸 𑀔𑀦𑁆𑀥𑀸 𑀏𑀯 𑀫𑀺𑀘𑁆𑀙𑀸𑀲𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂 𑀧𑀦 𑀉𑀧𑀦𑀸𑀳𑀸𑀤𑀺𑀧𑁆𑀧𑀯𑀢𑁆𑀢𑀺𑀬𑀁 𑀘𑀺𑀭𑀓𑀢𑀸𑀤𑀺𑀲𑀮𑁆𑀮𑀓𑁆𑀔𑀡𑁂 𑀧𑀝𑀼𑀲𑀜𑁆𑀜𑀸𑀲𑀫𑁆𑀧𑀬𑀼𑀢𑁆𑀢𑀸 𑀤𑀝𑁆𑀞𑀩𑁆𑀩𑀸. 𑀲𑀤𑀭𑀣𑀸𑀤𑀺𑀪𑀸𑀯𑁄 𑀅𑀯𑀺𑀲𑁂𑀲𑁂𑀦 𑀓𑀺𑀮𑁂𑀲𑀲𑀫𑁆𑀧𑀬𑁄𑀕𑀢𑁄 𑀯𑀼𑀢𑁆𑀢𑁄 𑀮𑀳𑀼𑀢𑀸𑀤𑀺𑀏𑀓𑀦𑁆𑀢𑀧𑀝𑀺𑀧𑀓𑁆𑀔𑀸𑀦𑀁 𑀣𑀺𑀦𑀫𑀺𑀤𑁆𑀥𑀸𑀤𑀻𑀦𑀁 𑀓𑁂𑀲𑀜𑁆𑀘𑀺 𑀇𑀥 𑀅𑀪𑀸𑀯𑀸. 𑀅𑀯𑀽𑀧𑀲𑀫𑁄𑀢𑀺 𑀅𑀲𑀦𑁆𑀦𑀺𑀲𑀺𑀦𑁆𑀦𑀲𑀩𑁆𑀪𑀸𑀯𑀫𑀸𑀳. 𑀅𑀦𑀯𑀝𑁆𑀞𑀸𑀦𑀭𑀲𑀦𑁆𑀢𑀺 𑀘𑀮𑀦𑀓𑀺𑀘𑁆𑀘𑀁. 𑀘𑁂𑀢𑀲𑁄 𑀅𑀯𑀽𑀧𑀲𑀫𑁂𑀢𑀺 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂 𑀧𑀬𑁄𑀚𑀦𑁂 𑀪𑀼𑀫𑁆𑀫𑀁, 𑀅𑀯𑀽𑀧𑀲𑀫𑀧𑀘𑁆𑀘𑀬𑀪𑀽𑀢𑀁 𑀆𑀭𑀫𑁆𑀫𑀡𑀁 𑀯𑀸 ‘‘𑀅𑀯𑀽𑀧𑀲𑀫𑁄’’𑀢𑀺 𑀯𑀼𑀢𑁆𑀢𑀁.

𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑁆𑀤𑁂𑀲𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑁩𑁭𑁭. 𑀲𑀳𑀚𑀸𑀢𑀥𑀫𑁆𑀫𑁂𑀲𑀼 𑀅𑀓𑀫𑁆𑀧𑀦𑀁 𑀦 𑀓𑁄𑀲𑀚𑁆𑀚𑁂𑀲𑀼 𑀅𑀓𑀫𑁆𑀧𑀦𑀁 𑀯𑀺𑀬 𑀢𑀧𑁆𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀤𑀝𑁆𑀞𑀩𑁆𑀩𑀁, 𑀢𑀁𑀢𑀁𑀧𑀸𑀧𑀓𑀺𑀭𑀺𑀬𑀸𑀬 𑀉𑀲𑁆𑀲𑀳𑀦𑀯𑀲𑁂𑀦 𑀧𑀦 𑀣𑀺𑀭𑀢𑀸 𑀢𑀢𑁆𑀣 𑀅𑀓𑀫𑁆𑀧𑀦𑀁.

𑁩𑁮𑁧. 𑀤𑀺𑀝𑁆𑀞𑀺𑀬𑀸 𑀯𑀺𑀭𑀽𑀧𑀁 𑀨𑀦𑁆𑀤𑀺𑀢𑀦𑁆𑀢𑀺 𑀢𑀣𑀸 𑀢𑀣𑀸 𑀲𑀲𑁆𑀲𑀢𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺 𑀏𑀯 𑀯𑀼𑀘𑁆𑀘𑀢𑀺. 𑀢𑀭𑀦𑁆𑀢𑀻𑀢𑀺 𑀢𑀺𑀢𑁆𑀣𑁂 𑀯𑀺𑀬 𑀧𑀺𑀮𑀯𑀦𑁆𑀢𑀺. 𑀯𑀺𑀧𑀭𑀺𑀬𑁂𑀲𑀢𑁄𑀢𑀺 𑀯𑀢𑁆𑀣𑀼𑀲𑁆𑀲 𑀯𑀺𑀧𑀭𑀻𑀢𑀢𑁄.

𑁩𑁯𑁦. 𑀲𑀪𑀸𑀯𑀧𑀝𑀺𑀘𑁆𑀙𑀸𑀤𑀦𑀯𑀲𑁂𑀦 𑀧𑀓𑀢𑀺𑀅𑀢𑁆𑀢𑀸𑀤𑀺𑀅𑀲𑀦𑁆𑀢𑀕𑀳𑀡𑀲𑁆𑀲 𑀅𑀦𑀺𑀘𑁆𑀘𑀸𑀤𑀻𑀦𑀁 𑀦𑀺𑀘𑁆𑀘𑀸𑀤𑀺𑀯𑀺𑀲𑀫𑀕𑀳𑀡𑀲𑁆𑀲 𑀘 𑀲𑀜𑁆𑀜𑀸𑀤𑀺𑀯𑀺𑀧𑀭𑀺𑀬𑁂𑀲𑀲𑁆𑀲 𑀦𑀺𑀲𑁆𑀲𑀬𑀢𑁆𑀢𑀸 ‘‘𑀅𑀲𑀦𑁆𑀢𑀁 𑀅𑀲𑀫𑀜𑁆𑀘 𑀩𑀼𑀚𑁆𑀛𑀢𑀻’’𑀢𑀺 𑀯𑀼𑀢𑁆𑀢𑀁.

𑀤𑀼𑀢𑀺𑀬𑀘𑀺𑀢𑁆𑀢𑀯𑀡𑁆𑀡𑀦𑀸

𑁩𑁯𑁯. 𑀓𑀺𑀜𑁆𑀘𑀸𑀧𑀺…𑀧𑁂… 𑀧𑀭𑀸𑀫𑀲𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀻𑀢𑀺 𑀧𑀼𑀭𑀺𑀫𑀘𑀺𑀢𑁆𑀢𑁂𑀦 𑀅𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀅𑀦𑀼𑀲𑁆𑀲𑀸𑀳𑀦𑀸𑀯𑀲𑀻𑀤𑀦𑀪𑀸𑀯𑁂𑀦 𑀲𑀁𑀳𑀢𑀪𑀸𑀯𑁄 𑀣𑀺𑀦𑀁.

𑀢𑀢𑀺𑀬𑀘𑀺𑀢𑁆𑀢𑀯𑀡𑁆𑀡𑀦𑀸

𑁪𑁦𑁦. 𑀇𑀥 𑀫𑀸𑀦𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘 𑀅𑀧𑀡𑁆𑀡𑀓𑀗𑁆𑀕𑀸𑀦𑀻𑀢𑀺 𑀅𑀯𑀺𑀭𑀚𑁆𑀛𑀦𑀓𑀗𑁆𑀕𑀸𑀦𑀺 𑀉𑀧𑁆𑀧𑀢𑁆𑀢𑀺𑀅𑀭𑀳𑀗𑁆𑀕𑀸𑀦𑀺 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀫𑀸𑀦𑀲𑁆𑀲 𑀅𑀦𑀺𑀬𑀢𑀢𑁆𑀢𑀸 𑀦 𑀦𑀺𑀬𑀢𑀬𑁂𑀯𑀸𑀧𑀦𑀓𑀸𑀢𑀺. 𑀧𑀝𑁆𑀞𑀸𑀦𑁂 𑀳𑀺 ‘‘𑀲𑀁𑀬𑁄𑀚𑀦𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀲𑀁𑀬𑁄𑀚𑀦𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 (𑀧𑀝𑁆𑀞𑀸. 𑁩.𑁪.𑁧) 𑀏𑀢𑁆𑀣 ‘‘𑀘𑀢𑀼𑀓𑁆𑀔𑀢𑁆𑀢𑀼𑀁 𑀓𑀸𑀫𑀭𑀸𑀕𑁂𑀦 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀖𑁂𑀦 𑀘 𑀫𑀸𑀦𑁄 𑀯𑀺𑀘𑀺𑀓𑀺𑀘𑁆𑀙𑀸 𑀪𑀯𑀭𑀸𑀕𑁄 𑀢𑀬𑁄𑀧𑁂𑀢𑁂 𑀲𑀓𑀤𑀸𑀕𑀸𑀫𑀺𑀦𑁄 𑀲𑀁𑀬𑁄𑀚𑀦𑀸𑀦𑀁 𑀲𑀁𑀬𑁄𑀚𑀦𑁂𑀳𑀺 𑀤𑀲𑀯𑀺𑀥𑀸 𑀬𑁄𑀚𑀦𑀸’’𑀢𑀺 𑀤𑀲𑁆𑀲𑀺𑀢𑀸𑀬 𑀤𑀲𑀯𑀺𑀥𑀸𑀬 𑀬𑁄𑀚𑀦𑀸𑀬 ‘‘𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀁 𑀧𑀝𑀺𑀘𑁆𑀘 𑀫𑀸𑀦𑀲𑀁𑀬𑁄𑀚𑀦𑀁 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦’’𑀦𑁆𑀢𑀺 𑀯𑀢𑁆𑀯𑀸 ‘‘𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀁 𑀧𑀝𑀺𑀘𑁆𑀘 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦’’𑀦𑁆𑀢𑀺 ‘‘𑀫𑀸𑀦𑀲𑀁𑀬𑁄𑀚𑀦𑀁 𑀧𑀝𑀺𑀘𑁆𑀘 𑀪𑀯𑀭𑀸𑀕𑀲𑀁𑀬𑁄𑀚𑀦𑀁 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦’’𑀦𑁆𑀢𑀺 𑀘 𑀯𑀢𑁆𑀯𑀸 ‘‘𑀪𑀯𑀭𑀸𑀕𑀲𑀁𑀬𑁄𑀚𑀦𑀁 𑀧𑀝𑀺𑀘𑁆𑀘 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦’’𑀦𑁆𑀢𑀺 𑀯𑀼𑀢𑁆𑀢𑀸𑀳𑀺 𑀬𑁄𑀚𑀦𑀸𑀳𑀺 𑀫𑀸𑀦𑀲𑁆𑀲 𑀅𑀦𑀺𑀬𑀢𑀪𑀸𑀯𑁄 𑀧𑀓𑀸𑀲𑀺𑀢𑁄, 𑀢𑀣𑀸 𑀓𑀺𑀮𑁂𑀲𑀤𑀼𑀓𑁂𑀧𑀺. 𑀇𑀥 𑀘 𑀯𑀓𑁆𑀔𑀢𑀺 ‘‘𑀤𑀲𑀯𑀺𑀥𑀸 𑀲𑀁𑀬𑁄𑀚𑀦𑀸𑀦𑀁 𑀬𑁄𑀚𑀦𑀸, 𑀢𑀣𑀸 𑀤𑀲𑀯𑀺𑀥𑀸 𑀓𑀺𑀮𑁂𑀲𑀸𑀦’’𑀦𑁆𑀢𑀺 𑀘. 𑀉𑀦𑁆𑀦𑀫𑀦𑀯𑀲𑁂𑀦𑁂𑀯 𑀲𑀫𑁆𑀧𑀕𑁆𑀕𑀳𑀭𑀲𑁄, 𑀦 𑀯𑀻𑀭𑀺𑀬𑀁 𑀯𑀺𑀬 𑀢𑀁𑀢𑀁𑀓𑀺𑀘𑁆𑀘𑀲𑀸𑀥𑀦𑁂 𑀅𑀩𑁆𑀪𑀼𑀲𑁆𑀲𑀸𑀳𑀦𑀯𑀲𑁂𑀦. 𑀑𑀫𑀸𑀦𑀲𑁆𑀲𑀧𑀺 𑀅𑀢𑁆𑀢𑀸𑀦𑀁 𑀅𑀯𑀁𑀓𑀢𑁆𑀯𑀸 𑀕𑀳𑀡𑀁 𑀲𑀫𑁆𑀧𑀕𑁆𑀕𑀳𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀘𑀢𑀼𑀢𑁆𑀣𑀘𑀺𑀢𑁆𑀢𑀯𑀡𑁆𑀡𑀦𑀸

𑁪𑁦𑁨. 𑀧𑀭𑀺𑀳𑀭𑀡𑀢𑁆𑀣𑀁 𑀯𑀺𑀓𑁆𑀔𑀺𑀢𑁆𑀢𑀸 𑀳𑀼𑀢𑁆𑀯𑀸 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑀸 ‘‘𑀧𑀭𑀺𑀳𑀭𑀡𑀢𑁆𑀣𑀁 𑀲𑀉𑀲𑁆𑀲𑀸𑀳𑀸’’𑀢𑀺 𑀯𑀼𑀢𑁆𑀢𑀸, 𑀢𑁂𑀲𑀁.

𑀦𑀯𑀫𑀘𑀺𑀢𑁆𑀢𑀯𑀡𑁆𑀡𑀦𑀸

𑁪𑁧𑁩. 𑀯𑀺𑀲𑀧𑁆𑀧𑀦𑀅𑀦𑀺𑀝𑁆𑀞𑀭𑀽𑀧𑀲𑀫𑀼𑀝𑁆𑀞𑀸𑀦𑀯𑀲𑁂𑀦 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀆𑀓𑀸𑀭𑀯𑀲𑁂𑀦 𑀘 𑀯𑀺𑀲𑀧𑁆𑀧𑀦𑀭𑀲𑁄. 𑀤𑁄𑀲𑁄 𑀉𑀧𑀬𑁄𑀕𑀨𑀮𑁂𑀲𑀼 𑀅𑀦𑀺𑀝𑁆𑀞𑀢𑁆𑀢𑀸 𑀯𑀺𑀲𑀲𑀁𑀲𑀝𑁆𑀞𑀧𑀽𑀢𑀺𑀫𑀼𑀢𑁆𑀢𑀁 𑀯𑀺𑀬 𑀤𑀝𑁆𑀞𑀩𑁆𑀩𑁄. 𑀅𑀦𑀪𑀺𑀭𑀢𑀺𑀭𑀲𑀸𑀢𑀺 𑀏𑀯𑀁𑀧𑀓𑀸𑀭𑁂𑀲𑀼 𑀧𑀝𑀺𑀓𑁆𑀔𑁂𑀧𑁂𑀦 𑀭𑀲𑀯𑀘𑀦𑁂𑀲𑀼 𑀢𑀁𑀢𑀁𑀧𑀝𑀺𑀧𑀓𑁆𑀔𑀓𑀺𑀘𑁆𑀘𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀓𑀝𑀼𑀓𑀸𑀓𑀸𑀭𑀕𑀢𑀺 𑀓𑀝𑀼𑀓𑀜𑁆𑀘𑀼𑀓𑀢𑀸, 𑀅𑀢𑁆𑀢𑀲𑀫𑁆𑀧𑀢𑁆𑀢𑀺 𑀆𑀯𑀸𑀲𑀸𑀤𑀺, 𑀧𑀭𑀸𑀬𑀢𑁆𑀢𑀢𑀸𑀬 𑀤𑀸𑀲𑀩𑁆𑀬𑀁 𑀯𑀺𑀬 𑀤𑀝𑁆𑀞𑀩𑁆𑀩𑀁. 𑀬𑀣𑀸 𑀳𑀺 𑀤𑀸𑀲𑀩𑁆𑀬𑁂 𑀲𑀢𑀺 𑀤𑀸𑀲𑁄 𑀧𑀭𑀸𑀬𑀢𑁆𑀢𑁄 𑀳𑁄𑀢𑀺, 𑀏𑀯𑀁 𑀓𑀼𑀓𑁆𑀓𑀼𑀘𑁆𑀘𑁂 𑀲𑀢𑀺 𑀢𑀁𑀲𑀫𑀗𑁆𑀕𑀻. 𑀦 𑀳𑀺 𑀲𑁄 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀧𑀯𑀢𑁆𑀢𑀺𑀢𑀼𑀁 𑀲𑀓𑁆𑀓𑁄𑀢𑀺 𑀓𑀼𑀲𑀮𑁂𑀢𑀺. 𑀅𑀣 𑀯𑀸 𑀓𑀢𑀸𑀓𑀢𑀸𑀓𑀼𑀲𑀮𑀓𑀼𑀲𑀮𑀸𑀦𑀼𑀲𑁄𑀘𑀦𑁂 𑀆𑀬𑀢𑁆𑀢𑀢𑀸𑀬 𑀢𑀤𑀼𑀪𑀬𑀯𑀲𑁂𑀦 𑀓𑀼𑀓𑁆𑀓𑀼𑀘𑁆𑀘𑁂𑀦 𑀢𑀁𑀲𑀫𑀗𑁆𑀕𑀻 𑀳𑁄𑀢𑀻𑀢𑀺 𑀤𑀸𑀲𑀩𑁆𑀬𑀁 𑀯𑀺𑀬 𑀢𑀁 𑀳𑁄𑀢𑀺.

𑁪𑁧𑁮. 𑀯𑀺𑀭𑀼𑀤𑁆𑀥𑀸𑀓𑀸𑀭𑁄𑀢𑀺 𑀯𑀺𑀭𑀼𑀤𑁆𑀥𑀲𑁆𑀲 𑀧𑀼𑀕𑁆𑀕𑀮𑀲𑁆𑀲, 𑀘𑀺𑀢𑁆𑀢𑀲𑁆𑀲 𑀯𑀸 𑀆𑀓𑀸𑀭𑁄 𑀯𑀺𑀭𑀼𑀤𑁆𑀥𑀪𑀸𑀯𑁄. 𑀢𑁂𑀦 𑀯𑀺𑀭𑀼𑀚𑁆𑀛𑀦𑀁 𑀯𑀺𑀭𑁄𑀥𑁄𑀢𑀺 𑀤𑀲𑁆𑀲𑁂𑀢𑀺. 𑀯𑀘𑀦𑀦𑁆𑀢𑀺 𑀏𑀢𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀲𑀩𑁆𑀩𑀫𑁂𑀯 𑀳𑀺 𑀓𑀺𑀘𑁆𑀘𑀁 𑀏𑀢𑁂𑀦 𑀓𑀭𑀺𑀬𑀫𑀸𑀦𑀁 𑀲𑀼𑀭𑁄𑀧𑀺𑀢𑀁 𑀲𑀼𑀚𑀦𑀺𑀢𑀁 𑀦 𑀳𑁄𑀢𑀻𑀢𑀺. 𑀭𑁄𑀧𑀲𑀤𑁆𑀤𑀯𑀘𑀦𑀢𑁆𑀣𑀫𑁂𑀯 𑀓𑁂𑀘𑀺 𑀯𑀡𑁆𑀡𑁂𑀦𑁆𑀢𑀺. 𑀢𑀁 𑀅𑀧𑁆𑀧𑀫𑀸𑀡𑀦𑁆𑀢𑀺 𑀓𑁄𑀥𑀲𑁆𑀲 𑀢𑀣𑀸𑀧𑀯𑀢𑁆𑀢𑀦𑀲𑀪𑀸𑀯𑀸𑀪𑀸𑀯𑀸 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀧𑀭𑀺𑀧𑀼𑀡𑁆𑀡𑀢𑀸 𑀲𑀺𑀬𑀸𑀢𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀏𑀓𑀸𑀤𑀲𑀫𑀘𑀺𑀢𑁆𑀢𑀯𑀡𑁆𑀡𑀦𑀸

𑁪𑁨𑁨. 𑀯𑀺𑀕𑀢𑀸 𑀘𑀺𑀓𑀺𑀘𑁆𑀙𑀸𑀢𑀺 𑀘𑀺𑀓𑀺𑀘𑁆𑀙𑀺𑀢𑀼𑀁 𑀤𑀼𑀓𑁆𑀓𑀭𑀢𑀸𑀬 𑀯𑀼𑀢𑁆𑀢𑀁, 𑀦 𑀲𑀩𑁆𑀩𑀣𑀸 𑀘𑀺𑀓𑀺𑀘𑁆𑀙𑀸𑀪𑀸𑀯𑀸 𑀯𑀺𑀘𑀺𑀓𑀺𑀘𑁆𑀙𑀸𑀬𑀸𑀢𑀺 𑀢𑀤𑀢𑁆𑀣𑀁 𑀤𑀲𑁆𑀲𑁂𑀢𑀺.

𑁪𑁨𑁪. 𑀦𑀺𑀘𑁆𑀙𑀬𑀸𑀪𑀸𑀯𑀸 𑀅𑀲𑀡𑁆𑀞𑀳𑀦𑀢𑁄 𑀘𑁂𑀢𑀲𑁄 𑀧𑀯𑀢𑁆𑀢𑀺𑀧𑀘𑁆𑀘𑀬𑀫𑀢𑁆𑀢𑀢𑀸𑀬 ‘‘𑀧𑀯𑀢𑁆𑀢𑀺𑀝𑁆𑀞𑀺𑀢𑀺𑀫𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑁪𑁨𑁫. 𑀏𑀓𑀁 𑀆𑀓𑀸𑀭𑀁 𑀕𑀦𑁆𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀅𑀢𑁆𑀢𑀦𑁄 𑀆𑀫𑀼𑀔𑀁 𑀲𑀧𑁆𑀧𑀦𑀢𑁄 𑀑𑀲𑀓𑁆𑀓𑀢𑀺.

𑀤𑁆𑀯𑀸𑀤𑀲𑀫𑀘𑀺𑀢𑁆𑀢𑀯𑀡𑁆𑀡𑀦𑀸