𑀓𑀸𑀫𑀸𑀯𑀘𑀭𑀓𑀼𑀲𑀮𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧. ‘‘𑀬𑁂 𑀯𑀸 𑀧𑀦…𑀧𑁂… 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸’’𑀢𑀺 𑀇𑀤𑀁 ‘‘𑀨𑀲𑁆𑀲𑁄 𑀳𑁄𑀢𑀻’’𑀢𑀺 𑀏𑀯𑀫𑀸𑀤𑀺𑀓𑀁 𑀯𑀺𑀬 𑀦 𑀯𑀺𑀲𑀼𑀁 ‘‘𑀢𑁂𑀧𑀺 𑀳𑁄𑀦𑁆𑀢𑀻’’𑀢𑀺 𑀳𑁄𑀢𑀺-𑀲𑀤𑁆𑀤𑁂𑀦 𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀉𑀤𑁆𑀤𑀺𑀝𑁆𑀞𑀸𑀯𑀲𑁂𑀲𑁂 𑀘 𑀧𑀦 𑀕𑀳𑁂𑀢𑁆𑀯𑀸 ‘‘𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸’’𑀢𑀺 𑀅𑀧𑁆𑀧𑁂𑀢𑀼𑀁 𑀯𑀼𑀢𑁆𑀢𑀦𑁆𑀢𑀺 𑀅𑀧𑁆𑀧𑀦𑀸𑀬 𑀅𑀯𑀭𑁄𑀥𑀺𑀢𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁂𑀧𑀺 𑀏𑀢𑀲𑁆𑀲 𑀧𑀤𑀪𑀸𑀚𑀦𑀻𑀬𑀁 𑀦 𑀯𑀼𑀢𑁆𑀢𑀦𑁆𑀢𑀺. 𑀲𑀭𑀽𑀧𑁂𑀦 𑀧𑀦 𑀅𑀤𑀲𑁆𑀲𑀺𑀢𑀢𑁆𑀢𑀸 ‘‘𑀅𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑁂𑀦 𑀳𑁄𑀢𑀺-𑀲𑀤𑁆𑀤𑁂𑀦 𑀲𑀫𑁆𑀩𑀦𑁆𑀥𑁄 𑀦𑀺𑀤𑁆𑀤𑁂𑀲𑁄 𑀘 𑀦 𑀓𑀢𑁄, 𑀲𑀗𑁆𑀔𑁂𑀧𑁂𑀦 𑀧𑀦 𑀉𑀤𑁆𑀤𑀺𑀲𑀺𑀢𑁆𑀯𑀸 𑀲𑀗𑁆𑀔𑁂𑀧𑁂𑀦𑁂𑀯 𑀬𑁂 𑀯𑀸 𑀧𑀦 𑀥𑀫𑁆𑀫𑀸 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀏𑀢𑀲𑁆𑀲 𑀥𑀫𑁆𑀫𑀲𑁆𑀲 𑀉𑀤𑁆𑀤𑁂𑀲𑁂 𑀅𑀯𑀭𑁄𑀥𑁄 𑀬𑀼𑀢𑁆𑀢𑁄. 𑀥𑀫𑁆𑀫𑀦𑀺𑀤𑁆𑀤𑁂𑀲𑁂 𑀘 𑀦𑀺𑀤𑁆𑀤𑁂𑀲𑀸𑀯𑀲𑀸𑀦𑁂 𑀯𑀼𑀢𑁆𑀢𑀲𑁆𑀲𑀸𑀢𑀺.

𑀧𑀼𑀘𑁆𑀙𑀸𑀧𑀭𑀺𑀘𑁆𑀙𑁂𑀤𑀯𑀘𑀦𑁂𑀦𑁂𑀯 𑀧𑀼𑀘𑁆𑀙𑀸𑀪𑀸𑀯𑁂 𑀯𑀺𑀜𑁆𑀜𑀸𑀢𑁂 𑀧𑀼𑀘𑁆𑀙𑀸𑀯𑀺𑀲𑁂𑀲𑀜𑀸𑀧𑀦𑀢𑁆𑀣𑀁 𑀆𑀳 ‘‘𑀅𑀬𑀁 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸’’𑀢𑀺. 𑀧𑀜𑁆𑀘𑀯𑀺𑀥𑀸 𑀳𑀻𑀢𑀺 𑀫𑀳𑀸𑀦𑀺𑀤𑁆𑀤𑁂𑀲𑁂 (𑀫𑀳𑀸𑀦𑀺. 𑁧𑁫𑁦; 𑀘𑀽𑀴𑀦𑀺. 𑀧𑀼𑀡𑁆𑀡𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁧𑁨; 𑀫𑁂𑀢𑁆𑀢𑀕𑀽𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁧𑁮) 𑀆𑀕𑀢𑀸 𑀧𑀼𑀘𑁆𑀙𑀸 𑀤𑀲𑁆𑀲𑁂𑀢𑀺. 𑀮𑀓𑁆𑀔𑀡𑀦𑁆𑀢𑀺 𑀜𑀸𑀢𑀼𑀁 𑀇𑀘𑁆𑀙𑀺𑀢𑁄 𑀬𑁄 𑀓𑁄𑀘𑀺 𑀲𑀪𑀸𑀯𑁄. 𑀅𑀜𑁆𑀜𑀸𑀢𑀦𑁆𑀢𑀺 𑀬𑁂𑀦 𑀓𑁂𑀦𑀘𑀺 𑀜𑀸𑀡𑁂𑀦 𑀅𑀜𑁆𑀜𑀸𑀢𑀪𑀸𑀯𑀁 𑀆𑀳. 𑀅𑀤𑀺𑀝𑁆𑀞𑀦𑁆𑀢𑀺 𑀤𑀲𑁆𑀲𑀦𑀪𑀽𑀢𑁂𑀦 𑀜𑀸𑀡𑁂𑀦 𑀧𑀘𑁆𑀘𑀓𑁆𑀔𑀁 𑀯𑀺𑀬 𑀅𑀤𑀺𑀝𑁆𑀞𑀢𑀁. 𑀅𑀢𑀼𑀮𑀺𑀢𑀦𑁆𑀢𑀺 ‘‘𑀏𑀢𑁆𑀢𑀓𑀁 𑀇𑀤’’𑀦𑁆𑀢𑀺 𑀢𑀼𑀮𑀸𑀪𑀽𑀢𑀸𑀬 𑀧𑀜𑁆𑀜𑀸𑀬 𑀅𑀢𑀼𑀮𑀺𑀢𑀢𑀁. 𑀅𑀢𑀻𑀭𑀺𑀢𑀦𑁆𑀢𑀺 𑀢𑀻𑀭𑀡𑀪𑀽𑀢𑀸𑀬 𑀧𑀜𑁆𑀜𑀸𑀬 𑀅𑀓𑀢𑀜𑀸𑀡𑀓𑀺𑀭𑀺𑀬𑀸𑀲𑀫𑀸𑀧𑀦𑀢𑀁. 𑀅𑀯𑀺𑀪𑀽𑀢𑀦𑁆𑀢𑀺 𑀜𑀸𑀡𑀲𑁆𑀲 𑀅𑀧𑀸𑀓𑀝𑀪𑀸𑀯𑀁. 𑀅𑀯𑀺𑀪𑀸𑀯𑀺𑀢𑀦𑁆𑀢𑀺 𑀜𑀸𑀡𑁂𑀦 𑀅𑀧𑀸𑀓𑀝𑀻𑀓𑀢𑀪𑀸𑀯𑀁. 𑀅𑀤𑀺𑀝𑁆𑀞𑀁 𑀚𑁄𑀢𑀻𑀬𑀢𑀺 𑀏𑀢𑀸𑀬𑀸𑀢𑀺 𑀅𑀤𑀺𑀝𑁆𑀞𑀚𑁄𑀢𑀦𑀸. 𑀅𑀦𑀼𑀫𑀢𑀺𑀬𑀸 𑀧𑀼𑀘𑁆𑀙𑀸 𑀅𑀦𑀼𑀫𑀢𑀺𑀧𑀼𑀘𑁆𑀙𑀸. ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀧𑀼𑀘𑁆𑀙𑀸𑀬 𑀳𑀺 ‘‘𑀓𑀸 𑀢𑀼𑀫𑁆𑀳𑀸𑀓𑀁 𑀅𑀦𑀼𑀫𑀢𑀻’’𑀢𑀺 𑀅𑀦𑀼𑀫𑀢𑀺 𑀧𑀼𑀘𑁆𑀙𑀺𑀢𑀸 𑀳𑁄𑀢𑀺. 𑀓𑀣𑁂𑀢𑀼𑀓𑀫𑁆𑀬𑀢𑀸𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸𑀬.

𑀧𑀪𑁂𑀤𑀢𑁄 𑀥𑀫𑁆𑀫𑀸𑀦𑀁 𑀤𑁂𑀲𑀦𑀦𑁆𑀢𑀺 𑀫𑀸𑀢𑀺𑀓𑀸𑀤𑁂𑀲𑀦𑀁 𑀆𑀳. 𑀢𑀢𑁆𑀣 𑀳𑀺 𑀧𑀼𑀭𑀢𑁄 𑀓𑀼𑀲𑀮𑀸𑀤𑀺𑀓𑁂 𑀧𑀪𑁂𑀤𑁂 𑀯𑀢𑁆𑀯𑀸 𑀧𑀘𑁆𑀙𑀢𑁄 𑀥𑀫𑁆𑀫𑀸 𑀯𑀼𑀢𑁆𑀢𑀸𑀢𑀺 ‘‘𑀧𑀪𑁂𑀤𑀯𑀦𑁆𑀢𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺 𑀦𑀺𑀤𑁆𑀤𑁂𑀲𑀁 𑀆𑀳. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀫𑀸𑀢𑀺𑀓𑀸𑀬 𑀲𑀯𑀺𑀲𑁂𑀲𑀦𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸, 𑀢𑁂 𑀘 𑀯𑀺𑀲𑁂𑀲𑀺𑀢𑀩𑁆𑀩𑀢𑁆𑀢𑀸 𑀧𑀥𑀸𑀦𑀸, 𑀧𑀥𑀸𑀦𑀜𑁆𑀘 𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀬 𑀬𑀼𑀚𑁆𑀚𑀢𑀻𑀢𑀺 𑀥𑀫𑁆𑀫𑀸𑀦𑀫𑁂𑀯 𑀧𑀥𑀸𑀦𑀸𑀦𑀁 𑀧𑀼𑀘𑁆𑀙𑀺𑀢𑀩𑁆𑀩𑀢𑀸 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀢𑀸 𑀘 𑀳𑁄𑀢𑀺, 𑀢𑀲𑁆𑀫𑀸 𑀢𑁂 𑀧𑀼𑀘𑁆𑀙𑀺𑀢𑀩𑁆𑀩𑁂 𑀤𑀲𑁆𑀲𑁂𑀢𑀼𑀁 ‘‘𑀓𑀢𑀫𑁂 𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀁, 𑀢𑁂 𑀧𑀦 𑀯𑀺𑀲𑁂𑀲𑀯𑀦𑁆𑀢𑁄 𑀧𑀼𑀘𑁆𑀙𑀺𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 𑀧𑀼𑀦 ‘‘𑀓𑀼𑀲𑀮𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀏𑀯𑀁 𑀧𑀪𑁂𑀤𑀯𑀦𑁆𑀢𑀤𑀲𑁆𑀲𑀦𑀢𑁆𑀣𑀁 𑀅𑀬𑀁 𑀧𑀤𑀸𑀦𑀼𑀓𑁆𑀓𑀫𑁄 𑀓𑀢𑁄𑀢𑀺. ‘‘𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀦𑁂𑀧𑀺 𑀏𑀯𑀫𑁂𑀯 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. ‘‘𑀧𑀪𑁂𑀤𑀢𑁄 𑀥𑀫𑁆𑀫𑀸𑀦𑀁 𑀤𑁂𑀲𑀦𑀁 𑀤𑀻𑀧𑁂𑀢𑁆𑀯𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀇𑀫𑀲𑁆𑀫𑀺𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀅𑀦𑁂𑀓𑀧𑁆𑀧𑀪𑁂𑀤𑀸 𑀤𑁂𑀲𑁂𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀸𑀢𑀺 𑀅𑀯𑁄𑀳𑀸𑀭𑀤𑁂𑀲𑀦𑀢𑁄 𑀥𑀫𑁆𑀫𑀸𑀦𑀫𑁂𑀯 𑀤𑁂𑀲𑁂𑀢𑀩𑁆𑀩𑀢𑁆𑀢𑀸 𑀢𑁂𑀲𑀜𑁆𑀘 𑀖𑀦𑀯𑀺𑀦𑀺𑀩𑁆𑀪𑁄𑀕𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀸𑀯𑀳𑀦𑀢𑁄 𑀧𑀪𑁂𑀤𑀯𑀦𑁆𑀢𑀸𑀦𑀁 𑀤𑁂𑀲𑁂𑀢𑀩𑁆𑀩𑀢𑁆𑀢𑀸 ‘‘𑀓𑀼𑀲𑀮𑀸…𑀧𑁂… 𑀤𑀻𑀧𑁂𑀢𑁆𑀯𑀸’’𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀏𑀯𑀫𑁂𑀯 𑀳𑀺 𑀬𑀣𑀸𑀯𑀼𑀢𑁆𑀢𑀤𑀻𑀧𑀦𑀲𑁆𑀲 𑀳𑁂𑀢𑀼𑀁 𑀲𑀓𑀸𑀭𑀡𑀁 𑀧𑀓𑀸𑀲𑁂𑀢𑀼𑀁 𑀧𑀼𑀦 ‘‘𑀥𑀫𑁆𑀫𑀸𑀬𑁂𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺. 𑀥𑀫𑁆𑀫𑀸𑀢𑀺 𑀲𑀸𑀫𑀜𑁆𑀜𑀫𑀢𑁆𑀢𑀯𑀘𑀦𑁂𑀦 𑀲𑀫𑀽𑀳𑀸𑀤𑀺𑀖𑀦𑀯𑀲𑁂𑀦 𑀏𑀓𑀢𑁆𑀢𑀕𑁆𑀕𑀳𑀡𑀁 𑀳𑁄𑀢𑀻𑀢𑀺 𑀏𑀓𑀢𑁆𑀢𑀯𑀺𑀦𑀺𑀩𑁆𑀪𑁄𑀕𑀓𑀭𑀡𑀁 𑀖𑀦𑀯𑀺𑀦𑀺𑀩𑁆𑀪𑁄𑀕𑀜𑀸𑀡𑀁 𑀆𑀯𑀳𑀢𑀺 𑀧𑀪𑁂𑀤𑀤𑁂𑀲𑀦𑀸, 𑀢𑀣𑀸 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁 𑀅𑀩𑁆𑀬𑀸𑀓𑀢𑀸𑀤𑀺𑀅𑀢𑁆𑀣𑀸𑀦𑀜𑁆𑀘 𑀤𑀻𑀧𑀦𑀢𑁄 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸𑀤𑀺𑀜𑀸𑀡𑀜𑁆𑀘 𑀆𑀯𑀳𑀢𑀺. ‘‘𑀧𑀪𑁂𑀤𑀯𑀦𑁆𑀢𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺 𑀏𑀢𑀁 𑀯𑀺𑀯𑀭𑀺𑀢𑀼𑀁 ‘‘𑀇𑀤𑀸𑀦𑀺 𑀬𑁂 𑀢𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀧𑀪𑁂𑀤…𑀧𑁂… 𑀬𑀼𑀚𑁆𑀚𑀢𑀺 𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀬𑀼𑀢𑁆𑀢𑀲𑁆𑀲 𑀯𑀺𑀲𑁂𑀲𑀦𑀢𑁆𑀢𑀸. 𑀅𑀣 𑀯𑀸 𑀉𑀤𑁆𑀤𑁂𑀲𑁄 𑀥𑀫𑁆𑀫𑀧𑁆𑀧𑀥𑀸𑀦𑁄, 𑀧𑀼𑀘𑁆𑀙𑀸 𑀲𑀁𑀲𑀬𑀺𑀢𑀧𑁆𑀧𑀥𑀸𑀦𑀸, 𑀦 𑀘 𑀥𑀫𑁆𑀫𑀪𑀸𑀯𑁄 𑀲𑀁𑀲𑀬𑀺𑀢𑁄, 𑀓𑀼𑀲𑀮𑀸𑀤𑀺𑀪𑁂𑀤𑁄 𑀧𑀦 𑀲𑀁𑀲𑀬𑀺𑀢𑁄𑀢𑀺 𑀦𑀺𑀘𑁆𑀙𑀺𑀢𑀲𑀁𑀲𑀬𑀺𑀢𑀯𑀲𑁂𑀦𑀸𑀬𑀁 𑀧𑀤𑀸𑀦𑀼𑀓𑁆𑀓𑀫𑁄 𑀓𑀢𑁄.

𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀯𑀘𑀦𑁂. 𑀓𑀺𑀫𑀢𑁆𑀣𑀫𑀸𑀳 𑀪𑀕𑀯𑀸𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 𑀆𑀳 ‘‘𑀲𑀫𑀬𑁂 𑀦𑀺𑀤𑁆𑀤𑀺𑀲𑀺 𑀘𑀺𑀢𑁆𑀢’’𑀦𑁆𑀢𑀺. 𑀧𑀭𑀺𑀬𑁄𑀲𑀸𑀦𑁂𑀢𑀺 𑀲𑀫𑀬𑁂 𑀘𑀺𑀢𑁆𑀢𑀦𑀺𑀤𑁆𑀤𑁂𑀲𑀲𑁆𑀲 ‘‘𑀬𑀲𑁆𑀫𑀺𑀁…𑀧𑁂… 𑀆𑀭𑀩𑁆𑀪𑀸’’𑀢𑀺 𑀏𑀢𑀲𑁆𑀲 𑀧𑀭𑀺𑀬𑁄𑀲𑀸𑀦𑁂. 𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀢𑀲𑁆𑀫𑀺𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀫𑀬𑁂. 𑀘𑀺𑀢𑁆𑀢𑁂𑀦 𑀲𑀫𑀬𑀁 𑀦𑀺𑀬𑀫𑁂𑀢𑁆𑀯𑀸𑀦 𑀅𑀣 𑀧𑀘𑁆𑀙𑀸 𑀩𑁄𑀥𑁂𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀚𑁆𑀚𑀫𑀸𑀦𑁂𑀧𑀺 𑀪𑁄𑀚𑀦𑀕𑀫𑀦𑀸𑀤𑀺𑀲𑀫𑀬𑀦𑀸𑀦𑀢𑁆𑀢𑁂 𑀲𑀫𑀯𑀸𑀬𑀸𑀤𑀺𑀦𑀸𑀦𑀢𑁆𑀢𑁂 𑀘 𑀬𑀣𑀸𑀯𑀼𑀢𑁆𑀢𑀘𑀺𑀢𑁆𑀢𑀦𑀺𑀬𑀫𑀺𑀢𑀸 𑀯𑀺𑀲𑁂𑀲𑀺𑀢𑀸 𑀅𑀜𑁆𑀜𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀥𑀺𑀧𑁆𑀧𑁂𑀢𑀸𑀦𑀁 𑀨𑀲𑁆𑀲𑀸𑀤𑀻𑀦𑀁 𑀅𑀪𑀸𑀯𑀸 𑀘𑀺𑀢𑁆𑀢𑀦𑀺𑀬𑀫𑀺𑀢𑁂 𑀲𑀫𑀬𑁂 𑀨𑀲𑁆𑀲𑀸𑀤𑀬𑁄 𑀩𑁄𑀥𑁂𑀢𑀼𑀁 𑀯𑀺𑀲𑁂𑀲𑀦𑀫𑁂𑀯 𑀢𑀸𑀯 𑀘𑀺𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀦𑀺𑀤𑁆𑀤𑀺𑀲𑀻𑀢𑀺 𑀅𑀢𑁆𑀣𑁄. 𑀯𑀺𑀲𑁂𑀲𑀺𑀢𑀩𑁆𑀩𑁄𑀧𑀺 𑀳𑀺 𑀲𑀫𑀬𑁄 𑀅𑀢𑁆𑀢𑀦𑁄 𑀉𑀧𑀓𑀸𑀭𑀢𑁆𑀣𑀁 𑀯𑀺𑀲𑁂𑀲𑀦𑀪𑀸𑀯𑀁 𑀆𑀧𑀚𑁆𑀚𑀢𑀺, 𑀯𑀺𑀲𑁂𑀲𑀦𑀪𑀽𑀢𑀜𑁆𑀘 𑀘𑀺𑀢𑁆𑀢𑀁 𑀢𑀤𑀼𑀧𑀓𑀸𑀭𑀢𑁆𑀣𑀁 𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑀦𑁆𑀢𑀺. 𑀲𑀦𑁆𑀢𑀢𑀺𑀖𑀦𑀸𑀤𑀻𑀦𑀁 𑀅𑀬𑀁 𑀯𑀺𑀲𑁂𑀲𑁄 𑁋 𑀧𑀼𑀭𑀺𑀫𑀧𑀘𑁆𑀙𑀺𑀫𑀸𑀦𑀁 𑀦𑀺𑀭𑀦𑁆𑀢𑀭𑀢𑀸𑀬 𑀏𑀓𑀻𑀪𑀽𑀢𑀸𑀦𑀫𑀺𑀯 𑀧𑀯𑀢𑁆𑀢𑀺 𑀲𑀦𑁆𑀢𑀢𑀺𑀖𑀦𑀢𑀸, 𑀢𑀣𑀸 𑀨𑀲𑁆𑀲𑀸𑀤𑀻𑀦𑀁 𑀏𑀓𑀲𑀫𑀽𑀳𑀯𑀲𑁂𑀦 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀓𑀺𑀘𑁆𑀘𑀪𑁂𑀤𑀯𑀲𑁂𑀦 𑀏𑀓𑀸𑀭𑀫𑁆𑀫𑀡𑀢𑀸𑀯𑀲𑁂𑀦 𑀘 𑀏𑀓𑀻𑀪𑀽𑀢𑀸𑀦𑀫𑀺𑀯 𑀧𑀯𑀢𑁆𑀢𑀺 𑀲𑀫𑀽𑀳𑀸𑀤𑀺𑀖𑀦𑀢𑀸𑀢𑀺.

𑀓𑀸𑀮𑀜𑁆𑀘 𑀲𑀫𑀬𑀜𑁆𑀘𑀸𑀢𑀺 𑀬𑀼𑀢𑁆𑀢𑀓𑀸𑀮𑀜𑁆𑀘 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀜𑁆𑀘. 𑀔𑀡𑁄𑀢𑀺 𑀑𑀓𑀸𑀲𑁄. 𑀢𑀣𑀸𑀕𑀢𑀼𑀧𑁆𑀧𑀸𑀤𑀸𑀤𑀺𑀓𑁄 𑀳𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀑𑀓𑀸𑀲𑁄 𑀢𑀧𑁆𑀧𑀘𑁆𑀘𑀬𑀧𑀝𑀺𑀮𑀸𑀪𑀳𑁂𑀢𑀼𑀢𑁆𑀢𑀸. 𑀔𑀡𑁄 𑀏𑀯 𑀘 𑀲𑀫𑀬𑁄. 𑀬𑁄 ‘‘𑀔𑀡𑁄’’𑀢𑀺 𑀘 ‘‘𑀲𑀫𑀬𑁄’’𑀢𑀺 𑀘 𑀯𑀼𑀘𑁆𑀘𑀢𑀺, 𑀲𑁄 𑀏𑀓𑁄𑀯𑀸𑀢𑀺 𑀅𑀢𑁆𑀣𑁄. 𑀫𑀳𑀸𑀲𑀫𑀬𑁄𑀢𑀺 𑀫𑀳𑀸𑀲𑀫𑀽𑀳𑁄. 𑀲𑀫𑀬𑁄𑀧𑀺 𑀔𑁄𑀢𑀺 𑀲𑀺𑀓𑁆𑀔𑀸𑀧𑀭𑀺𑀧𑀽𑀭𑀡𑀲𑁆𑀲 𑀳𑁂𑀢𑀼𑀧𑀺. 𑀲𑀫𑀬𑀧𑁆𑀧𑀯𑀸𑀤𑀓𑁂𑀢𑀺 𑀤𑀺𑀝𑁆𑀞𑀺𑀧𑁆𑀧𑀯𑀸𑀤𑀓𑁂. 𑀢𑀢𑁆𑀣 𑀳𑀺 𑀦𑀺𑀲𑀺𑀦𑁆𑀦𑀸 𑀢𑀺𑀢𑁆𑀣𑀺𑀬𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀫𑀬𑀁 𑀧𑀯𑀤𑀦𑁆𑀢𑀻𑀢𑀺. 𑀅𑀢𑁆𑀣𑀸𑀪𑀺𑀲𑀫𑀬𑀸𑀢𑀺 𑀳𑀺𑀢𑀧𑀝𑀺𑀮𑀸𑀪𑀸. 𑀅𑀪𑀺𑀲𑀫𑁂𑀢𑀩𑁆𑀩𑁄𑀢𑀺 𑀅𑀪𑀺𑀲𑀫𑀬𑁄, 𑀅𑀪𑀺𑀲𑀫𑀬𑁄 𑀅𑀢𑁆𑀣𑁄 𑀅𑀪𑀺𑀲𑀫𑀬𑀝𑁆𑀞𑁄𑀢𑀺 𑀧𑀻𑀴𑀦𑀸𑀤𑀻𑀦𑀺 𑀅𑀪𑀺𑀲𑀫𑀺𑀢𑀩𑁆𑀩𑀪𑀸𑀯𑁂𑀦 𑀏𑀓𑀻𑀪𑀸𑀯𑀁 𑀉𑀧𑀦𑁂𑀢𑁆𑀯𑀸 𑀯𑀼𑀢𑁆𑀢𑀸𑀦𑀺, 𑀅𑀪𑀺𑀲𑀫𑀬𑀲𑁆𑀲 𑀯𑀸 𑀧𑀝𑀺𑀯𑁂𑀥𑀲𑁆𑀲 𑀯𑀺𑀲𑀬𑀪𑀽𑀢𑁄 𑀅𑀢𑁆𑀣𑁄 𑀅𑀪𑀺𑀲𑀫𑀬𑀝𑁆𑀞𑁄𑀢𑀺 𑀢𑀸𑀦𑁂𑀯 𑀢𑀣𑀸 𑀏𑀓𑀢𑁆𑀢𑁂𑀦 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀧𑀻𑀴𑀦𑀁 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀢𑀁𑀲𑀫𑀗𑁆𑀕𑀺𑀦𑁄 𑀳𑀺𑀁 𑀲𑀦𑀁 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀓𑀭𑀡𑀁. 𑀲𑀦𑁆𑀢𑀸𑀧𑁄 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀤𑀺𑀪𑀸𑀯𑁂𑀦 𑀲𑀦𑁆𑀢𑀸𑀧𑀦𑀁 𑀧𑀭𑀺𑀤𑀳𑀦𑀁.

‘‘𑀇𑀥𑀸’’𑀢𑀺 𑀯𑀘𑀦𑀁 𑀅𑀓𑀼𑀲𑀮𑁂𑀲𑀼 𑀅𑀩𑁆𑀬𑀸𑀓𑀢𑁂𑀲𑀼 𑀘 𑀓𑁂𑀲𑀼𑀘𑀺 𑀔𑀡𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀦𑀦𑀼 𑀓𑀼𑀲𑀮𑀸𑀦𑀜𑁆𑀘 𑀦𑀯𑀫𑁂𑀦 𑀔𑀡𑁂𑀦 𑀯𑀺𑀦𑀸 𑀉𑀧𑁆𑀧𑀢𑁆𑀢𑀺 𑀳𑁄𑀢𑀻𑀢𑀺? 𑀦𑁄 𑀦 𑀳𑁄𑀢𑀺, 𑀦 𑀧𑀦 𑀦𑀯𑀫𑁄 𑀏𑀯 𑀔𑀡𑁄, 𑀘𑀢𑀼𑀘𑀓𑁆𑀓𑀸𑀦𑀺𑀧𑀺 𑀔𑀡𑁄𑀢𑀺 𑀯𑀼𑀢𑁆𑀢𑀸𑀦𑀺. 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺𑀔𑀡𑀫𑀦𑁆𑀢𑀭𑁂𑀦 𑀦𑀢𑁆𑀣𑀺 𑀓𑀼𑀲𑀮𑀲𑁆𑀲 𑀉𑀧𑁆𑀧𑀢𑁆𑀢𑀻𑀢𑀺 𑀔𑀡𑁄 𑀇𑀥 𑀕𑀳𑀺𑀢𑁄. 𑀇𑀦𑁆𑀤𑁆𑀭𑀺𑀬𑀯𑀺𑀲𑀬𑀫𑀦𑀲𑀺𑀓𑀸𑀭𑀸𑀥𑀻𑀦𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀏𑀯𑀫𑀸𑀤𑀺 𑀲𑀸𑀥𑀸𑀭𑀡𑀨𑀮𑀁 𑀤𑀝𑁆𑀞𑀩𑁆𑀩𑀁. 𑀦𑀯𑀫𑁄𑀢𑀺 𑀅𑀝𑁆𑀞𑀓𑁆𑀔𑀡𑁂 𑀉𑀧𑀸𑀤𑀸𑀬 𑀯𑀼𑀢𑁆𑀢𑀁. 𑀘𑀢𑀼𑀘𑀓𑁆𑀓𑀁 𑀯𑀢𑁆𑀢𑀢𑀻𑀢𑀺 𑀧𑀼𑀦 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑀸𑀤𑀺𑀲𑀫𑁆𑀧𑀢𑁆𑀢𑀺 𑀘𑀢𑀼𑀘𑀓𑁆𑀓𑀁 𑀯𑀺𑀧𑀭𑀺𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀑𑀓𑀸𑀲𑀪𑀽𑀢𑀸𑀦𑀻𑀢𑀺 𑀅𑀢𑁆𑀢𑀦𑁄 𑀦𑀺𑀩𑁆𑀩𑀢𑁆𑀢𑀺𑀬𑀸 ‘‘𑀇𑀤𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀼 𑀓𑀼𑀲𑀮𑀸𑀦𑀻’’𑀢𑀺 𑀅𑀦𑀼𑀫𑀢𑀺𑀤𑀸𑀦𑀁 𑀯𑀺𑀬 𑀪𑀽𑀢𑀸𑀦𑀺.

𑀘𑀺𑀢𑁆𑀢𑀓𑀸𑀮𑁄𑀢𑀺 𑀥𑀫𑁆𑀫𑁂𑀦𑁂𑀯 𑀲𑀢𑀸 𑀓𑀸𑀮𑁄 𑀯𑀺𑀲𑁂𑀲𑀺𑀢𑁄, 𑀦 𑀢𑀲𑁆𑀲 𑀧𑀯𑀢𑁆𑀢𑀺𑀢𑁆𑀣 𑀧𑀯𑀢𑁆𑀢𑀺𑀲𑁆𑀲𑀢𑀺 𑀧𑀯𑀢𑁆𑀢𑀢𑀻𑀢𑀺 𑀏𑀢𑁂𑀦 𑀅𑀯𑀢𑁆𑀣𑀸𑀯𑀺𑀲𑁂𑀲𑁂𑀦, 𑀦𑀸𑀧𑀺 𑀢𑀲𑁆𑀲 𑀯𑀺𑀚𑀸𑀦𑀦𑀓𑀺𑀘𑁆𑀘𑁂𑀦, 𑀢𑀲𑁆𑀫𑀸 𑀏𑀯𑀁𑀯𑀺𑀥𑁂 𑀥𑀫𑁆𑀫𑁂 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑁄𑀢𑀺 𑀯𑀼𑀢𑁆𑀢𑁄. 𑀓𑀫𑀧𑁆𑀧𑀯𑀢𑁆𑀢𑀸 𑀯𑀺𑀲𑁂𑀲𑀸 𑀏𑀯 𑀧𑀝𑀺𑀧𑀸𑀝𑀻𑀢𑀺 𑀩𑀻𑀚𑀪𑀸𑀯𑁄 𑀘 𑀧𑀝𑀺𑀧𑀸𑀝𑀻𑀢𑀺 𑀯𑀢𑁆𑀢𑀼𑀫𑀭𑀳𑀢𑀻𑀢𑀺 𑀇𑀫𑀺𑀦𑀸𑀥𑀺𑀧𑁆𑀧𑀸𑀬𑁂𑀦 ‘‘𑀩𑀻𑀚𑀓𑀸𑀮𑁄𑀢𑀺 𑀥𑀫𑁆𑀫𑀧𑀝𑀺𑀧𑀸𑀝𑀺𑀁 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑁄’’𑀢𑀺 𑀆𑀳. 𑀥𑀫𑁆𑀫𑀧𑀝𑀺𑀧𑀸𑀝𑀺𑀁 𑀯𑀸𑀢𑀺 𑀅𑀝𑁆𑀞𑀓𑀮𑀸𑀧𑀥𑀫𑁆𑀫𑁂 𑀲𑀦𑁆𑀥𑀸𑀬𑀸𑀳. 𑀲𑀜𑁆𑀘𑀺𑀢𑀸 𑀯𑀺𑀬 𑀕𑀬𑁆𑀳𑀫𑀸𑀦𑀓𑀸𑀮𑀸 𑀏𑀯 𑀓𑀸𑀮𑀲𑀜𑁆𑀘𑀬𑁄, 𑀬𑀣𑀸 𑀯𑀸 𑀢𑀣𑀸 𑀯𑀸 𑀓𑀸𑀮𑁄𑀢𑀺 𑀏𑀓𑀁 𑀲𑀪𑀸𑀯𑀁 𑀕𑀳𑁂𑀢𑁆𑀯𑀸 𑀅𑀪𑀺𑀦𑀺𑀯𑁂𑀲𑀁 𑀓𑀭𑁄𑀦𑁆𑀢𑀲𑁆𑀲 𑀢𑀤𑀪𑀺𑀦𑀺𑀯𑁂𑀲𑀦𑀺𑀲𑁂𑀥𑀦𑀢𑁆𑀣𑀁 ‘‘𑀲𑁄 𑀧𑀦𑁂𑀲 𑀲𑀪𑀸𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀓𑁄’’𑀢𑀺 𑀆𑀳. 𑀜𑀢𑁆𑀯𑀸 𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑀭𑁄 𑀧𑀦 𑀳𑁂𑀢𑀽𑀢𑀺 𑀏𑀲 𑀲𑀫𑀬𑁄 𑀧𑀘𑁆𑀘𑀬𑁄𑀯 𑀯𑀺𑀜𑁆𑀜𑁂𑀬𑁆𑀬𑁄. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀅𑀥𑀺𑀓𑀸𑀭𑁂 𑀦 𑀳𑁂𑀢𑀼𑀳𑁂𑀢𑀼 𑀲𑀸𑀥𑀸𑀭𑀡𑀳𑁂𑀢𑀼 𑀘𑀸𑀢𑀺 𑀅𑀢𑁆𑀣𑁄. 𑀲𑀫𑀯𑀸𑀬𑁄 𑀧𑀘𑁆𑀘𑀬𑀲𑀸𑀫𑀕𑁆𑀕𑀻, 𑀳𑁂𑀢𑀼 𑀧𑀦 𑀏𑀓𑁂𑀓𑁄 𑀧𑀘𑁆𑀘𑀬𑁄𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀅𑀦𑁂𑀓𑀧𑀘𑁆𑀘𑀬𑀤𑀲𑁆𑀲𑀦𑁂𑀦 𑀢𑀁𑀢𑀁𑀤𑁆𑀯𑀸𑀭𑀺𑀓𑀸𑀦𑀁 𑀓𑀼𑀲𑀮𑀸𑀦𑀜𑁆𑀘 𑀢𑀧𑁆𑀧𑀘𑁆𑀘𑀬𑀢𑀁 𑀤𑀲𑁆𑀲𑁂𑀢𑀺.

𑀧𑀭𑀺𑀕𑁆𑀕𑀳𑁄 𑀓𑀢𑁄 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺. 𑀏𑀓𑀓𑀸𑀭𑀡𑀯𑀸𑀤𑁄𑀢𑀺 𑀧𑀓𑀢𑀺𑀓𑀸𑀭𑀡𑀯𑀸𑀤𑁄, 𑀇𑀲𑁆𑀲𑀭𑀓𑀸𑀭𑀡𑀯𑀸𑀤𑁄 𑀯𑀸. 𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑁄𑀢𑀺 𑀅𑀯𑀬𑀯𑀸𑀦𑀁 𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑀢𑀸𑀬 𑀲𑀫𑀼𑀤𑀸𑀬𑁄 𑀯𑀼𑀢𑁆𑀢𑁄. 𑀅𑀧𑁂𑀓𑁆𑀔𑀸 𑀘 𑀬𑀸𑀯 𑀲𑀳𑀸𑀬𑀓𑀸𑀭𑀡𑀲𑀫𑀸𑀕𑀫𑁄 𑀦 𑀳𑁄𑀢𑀺, 𑀢𑀸𑀯 𑀨𑀮𑀲𑁆𑀲 𑀅𑀦𑀺𑀧𑁆𑀨𑀸𑀤𑀦𑀁 𑀲𑀫𑀸𑀕𑀫𑁂 𑀦𑀺𑀧𑁆𑀨𑀸𑀤𑀦𑀲𑀫𑀢𑁆𑀣𑀲𑁆𑀲 𑀦𑀺𑀧𑁆𑀨𑀸𑀤𑀦𑀜𑁆𑀘. 𑀲𑀫𑀸𑀕𑀫𑁄 𑀘 𑀬𑁂𑀲𑀼 𑀬𑀼𑀚𑁆𑀚𑀫𑀸𑀦𑁂𑀲𑀼 𑀦𑀺𑀩𑁆𑀬𑀸𑀧𑀸𑀭𑁂𑀲𑀼𑀧𑀺 𑀨𑀮𑀲𑁆𑀲 𑀧𑀯𑀢𑁆𑀢𑀺, 𑀢𑁂𑀲𑀁 𑀲𑀩𑁆𑀪𑀸𑀯𑁄𑀢𑀺.

𑀅𑀲𑀸𑀫𑀕𑁆𑀕𑀻…𑀧𑁂… 𑀧𑀢𑁆𑀢𑀺𑀢𑁄𑀢𑀺 𑀘𑀓𑁆𑀔𑀼𑀭𑀽𑀧𑀸𑀮𑁄𑀓𑀫𑀦𑀲𑀺𑀓𑀸𑀭𑀸𑀦𑀁 𑀅𑀲𑀫𑀯𑁂𑀢𑀸𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀅𑀳𑁂𑀢𑀼𑀪𑀸𑀯𑁂 𑀲𑀢𑀺 𑀲𑀫𑀯𑁂𑀢𑀸𑀦𑀜𑁆𑀘 𑀢𑀁𑀲𑀪𑀸𑀯𑀸𑀯𑀺𑀦𑀺𑀯𑀢𑁆𑀢𑀺𑀢𑁄 𑀳𑁂𑀢𑀼𑀪𑀸𑀯𑀸𑀦𑀸𑀧𑀢𑁆𑀢𑀺𑀢𑁄𑀢𑀺 𑀅𑀢𑁆𑀣𑁄. 𑀦 𑀳𑀺 𑀲𑀪𑀸𑀯𑀦𑁆𑀢𑀭𑀁 𑀅𑀜𑁆𑀜𑁂𑀦 𑀲𑀳𑀺𑀢𑀁 𑀲𑀪𑀸𑀯𑀦𑁆𑀢𑀭𑀁 𑀳𑁄𑀢𑀻𑀢𑀺. 𑀏𑀓𑀲𑁆𑀫𑀺𑀦𑁆𑀢𑀺 𑀅𑀦𑁆𑀥𑀲𑀢𑁂 𑀏𑀓𑁂𑀓𑀲𑁆𑀫𑀺𑀁 𑀅𑀦𑁆𑀥𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀜𑁆𑀜𑀣𑀸 𑀬𑀣𑀸𑀭𑀼𑀢𑀯𑀲𑁂𑀦 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀏𑀓𑀲𑁆𑀲 𑀅𑀦𑁆𑀥𑀲𑁆𑀲 𑀤𑀲𑁆𑀲𑀦𑀸𑀲𑀫𑀢𑁆𑀣𑀢𑀸 𑀲𑀩𑁆𑀩𑁂𑀲𑀫𑁆𑀧𑀺 𑀦 𑀳𑁄𑀢𑀺, 𑀦𑀸𑀧𑀺 𑀏𑀓𑀲𑁆𑀲 𑀅𑀲𑀫𑀢𑁆𑀣𑀢𑀸𑀬 𑀲𑀩𑁆𑀩𑁂𑀲𑀫𑁆𑀧𑀺 𑀅𑀲𑀫𑀢𑁆𑀣𑀢𑀸 𑀯𑀼𑀢𑁆𑀢𑀸, 𑀓𑀺𑀦𑁆𑀢𑀼 𑀲𑀩𑁆𑀩𑁂𑀲𑀁 𑀯𑀺𑀲𑀼𑀁 𑀅𑀲𑀫𑀢𑁆𑀣𑀢𑀸𑀬 𑀏𑀯𑀸𑀢𑀺 𑀉𑀧𑀫𑀸𑀯𑀘𑀦𑀁 𑀦 𑀬𑀼𑀚𑁆𑀚𑁂𑀬𑁆𑀬, 𑀦𑀸𑀧𑀺 𑀉𑀧𑀫𑁄𑀧𑀫𑀺𑀢𑀩𑁆𑀩𑀲𑀫𑁆𑀩𑀦𑁆𑀥𑁄. 𑀦 𑀳𑀺 𑀉𑀧𑀫𑀺𑀢𑀩𑁆𑀩𑁂𑀲𑀼 𑀘𑀓𑁆𑀔𑀸𑀤𑀻𑀲𑀼 𑀏𑀓𑀲𑁆𑀲 𑀅𑀲𑀫𑀢𑁆𑀣𑀢𑀸𑀬 𑀲𑀩𑁆𑀩𑁂𑀲𑀫𑁆𑀧𑀺 𑀅𑀲𑀫𑀢𑁆𑀣𑀢𑀸 𑀯𑀼𑀢𑁆𑀢𑀸, 𑀓𑀺𑀦𑁆𑀢𑀼 𑀲𑀩𑁆𑀩𑁂𑀲𑀁 𑀯𑀺𑀲𑀼𑀁 𑀅𑀲𑀫𑀢𑁆𑀣𑀢𑀸𑀬 𑀲𑀳𑀺𑀢𑀸𑀦𑀁 𑀅𑀲𑀫𑀢𑁆𑀣𑀢𑀸𑀢𑀺. 𑀅𑀦𑁆𑀥𑀲𑀢𑀁 𑀧𑀲𑁆𑀲𑀢𑀻𑀢𑀺 𑀘 𑀅𑀦𑁆𑀥𑀲𑀢𑀁 𑀲𑀳𑀺𑀢𑀁 𑀧𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 𑀅𑀜𑁆𑀜𑀣𑀸 𑀯𑀼𑀢𑁆𑀢𑀦𑀬𑁂𑀦 𑀉𑀧𑀫𑀺𑀢𑀩𑁆𑀩𑀸𑀲𑀫𑀸𑀦𑀢𑀸𑀧𑀢𑁆𑀢𑀺𑀢𑁄. 𑀲𑀸𑀥𑀸…𑀧𑁂… 𑀞𑀺𑀢𑀪𑀸𑀯𑁄𑀢𑀺 𑀬𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀨𑀮𑀧𑁆𑀧𑀯𑀢𑁆𑀢𑀺 𑀢𑁂𑀲𑀁 𑀲𑀫𑁄𑀥𑀸𑀦𑁂, 𑀬𑀣𑀸 𑀧𑀯𑀢𑁆𑀢𑀫𑀸𑀦𑁂𑀲𑀼 𑀢𑁂𑀲𑀼 𑀨𑀮𑀧𑁆𑀧𑀯𑀢𑁆𑀢𑀺, 𑀢𑀣𑀸 𑀧𑀯𑀢𑁆𑀢𑀺𑀫𑀸𑀳. 𑀦 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀅𑀦𑁂𑀓𑁂𑀲𑀁 𑀲𑀫𑁄𑀥𑀸𑀦𑀫𑀢𑁆𑀢𑀁 𑀲𑀸𑀫𑀕𑁆𑀕𑀻. 𑀦 𑀳𑀺 𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀲𑀫𑁄𑀥𑀸𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲, 𑀓𑀝𑁆𑀞𑀓𑀧𑀸𑀮𑀧𑀸𑀲𑀸𑀡𑀲𑀫𑁄𑀥𑀸𑀦𑀁 𑀯𑀸 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀳𑁂𑀢𑀽𑀢𑀺. 𑀢𑀦𑁆𑀢𑀺 𑀢𑀁 𑀤𑀲𑁆𑀲𑀦𑀁. 𑀅𑀲𑀸…𑀧𑁂… 𑀲𑀺𑀤𑁆𑀥𑁄𑀢𑀺 𑀦𑀸𑀬𑀫𑀢𑁆𑀣𑁄 𑀲𑀸𑀥𑁂𑀢𑀩𑁆𑀩𑁄 𑀯𑀺𑀲𑀼𑀁 𑀅𑀳𑁂𑀢𑀽𑀦𑀁 𑀘𑀓𑁆𑀔𑀸𑀤𑀻𑀦𑀁 𑀲𑀳𑀺𑀢𑀸𑀦𑀁 𑀳𑁂𑀢𑀼𑀪𑀸𑀯𑀲𑁆𑀲 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀦 𑀳𑀺 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑁂 𑀬𑀼𑀢𑁆𑀢𑀺𑀫𑀕𑁆𑀕𑀦𑀁 𑀬𑀼𑀢𑁆𑀢𑀦𑁆𑀢𑀺.

𑀫𑀦𑀼𑀲𑁆𑀲𑀢𑁆𑀢𑀸𑀤𑀻𑀦𑀁 𑀔𑀡𑀸𑀯𑀬𑀯𑀸𑀦𑀁 𑀲𑀸𑀫𑀕𑁆𑀕𑀻 𑀔𑀡𑀲𑀸𑀫𑀕𑁆𑀕𑀻, 𑀢𑀁 𑀯𑀺𑀦𑀸 𑀲𑁄 𑀦𑀯𑀫𑀘𑀓𑁆𑀓𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑁄 𑀔𑀡𑁄 𑀦𑀢𑁆𑀣𑀺. 𑀲𑀸 𑀏𑀯 𑀳𑀺 𑀔𑀡𑀲𑀸𑀫𑀕𑁆𑀕𑀻 𑀲𑁄 𑀔𑀡𑁄𑀢𑀺 𑀅𑀢𑁆𑀣𑁄. 𑀔𑀡…𑀧𑁂… 𑀤𑀻𑀧𑁂𑀢𑀺 𑀅𑀢𑁆𑀢𑀦𑁄 𑀤𑀼𑀮𑁆𑀮𑀪𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀔𑀡𑀢𑁆𑀣𑁄 𑀯𑀸 𑀲𑀫𑀬𑀲𑀤𑁆𑀤𑁄 𑀔𑀡𑀲𑀗𑁆𑀔𑀸𑀢𑁄 𑀲𑀫𑀬𑁄𑀢𑀺 𑀯𑀼𑀢𑁆𑀢𑁄. 𑀲𑁄 𑀬𑀲𑁆𑀫𑀺𑀁 𑀤𑀼𑀮𑁆𑀮𑀪𑁂 𑀔𑀡𑁂 𑀲𑀢𑀻𑀢𑀺 𑀇𑀫𑀲𑁆𑀲𑀢𑁆𑀣𑀲𑁆𑀲 𑀯𑀺𑀪𑀸𑀯𑀦𑀯𑀲𑁂𑀦 𑀢𑀤𑀸𑀬𑀢𑁆𑀢𑀸𑀬 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀬𑀸 𑀤𑀼𑀮𑁆𑀮𑀪𑀪𑀸𑀯𑀁 𑀤𑀻𑀧𑁂𑀢𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀲𑀫𑀯𑀸𑀬…𑀧𑁂… 𑀯𑀼𑀢𑁆𑀢𑀺𑀁 𑀤𑀻𑀧𑁂𑀢𑀻𑀢𑀺 𑀏𑀢𑁆𑀣 𑀇𑀢𑁄 𑀧𑀭𑁂𑀲𑀼 𑀘 𑀬𑁄𑀚𑀦𑀸 𑀢𑀲𑁆𑀲 𑀢𑀲𑁆𑀲 𑀢𑀁𑀢𑀁𑀤𑀻𑀧𑀦𑁂 𑀓𑀸𑀢𑀩𑁆𑀩𑀸.

𑀢𑀲𑁆𑀲 𑀧𑀼𑀭𑀺𑀲𑀲𑁆𑀲𑀸𑀢𑀺 ‘‘𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀯𑁂 𑀘𑀢𑁆𑀢𑀸𑀭𑁄 𑀤𑀴𑁆𑀳𑀥𑀫𑁆𑀫𑀸 𑀥𑀦𑀼𑀕𑁆𑀕𑀳𑀸 𑀲𑀺𑀓𑁆𑀔𑀺𑀢𑀸 𑀓𑀢𑀳𑀢𑁆𑀣𑀸 𑀓𑀢𑀼𑀧𑀸𑀲𑀦𑀸 𑀘𑀢𑀼𑀤𑁆𑀤𑀺𑀲𑀸 𑀞𑀺𑀢𑀸 𑀅𑀲𑁆𑀲𑀼, 𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 ‘𑀅𑀳𑀁 𑀇𑀫𑁂𑀲𑀁…𑀧𑁂… 𑀓𑀢𑀼𑀧𑀸𑀲𑀦𑀸𑀦𑀁 𑀓𑀡𑁆𑀟𑁂 𑀔𑀺𑀢𑁆𑀢𑁂 𑀔𑀺𑀢𑁆𑀢𑁂 𑀅𑀧𑁆𑀧𑀢𑀺𑀝𑁆𑀞𑀺𑀢𑁂 𑀧𑀣𑀯𑀺𑀬𑀁 𑀕𑀳𑁂𑀢𑁆𑀯𑀸 𑀆𑀳𑀭𑀺𑀲𑁆𑀲𑀸𑀫𑀻’’’𑀢𑀺 (𑀲𑀁. 𑀦𑀺. 𑁨.𑁨𑁨𑁮) 𑀏𑀯𑀁 𑀯𑀼𑀢𑁆𑀢𑀚𑀯𑀦𑀧𑀼𑀭𑀺𑀲𑀲𑁆𑀲. 𑀢𑀸𑀯 𑀧𑀭𑀺𑀢𑁆𑀢𑀓𑁄𑀢𑀺 𑀕𑀫𑀦𑀲𑁆𑀲𑀸𑀤𑀸𑀦𑀁 𑀤𑁂𑀯𑀧𑀼𑀢𑁆𑀢𑀸𑀦𑀁 𑀳𑁂𑀝𑁆𑀞𑀼𑀧𑀭𑀺𑀬𑀸𑀬𑁂𑀦 𑀧𑀝𑀺𑀫𑀼𑀔𑀁 𑀥𑀸𑀯𑀦𑁆𑀢𑀸𑀦𑀁 𑀲𑀺𑀭𑀲𑀺 𑀧𑀸𑀤𑁂 𑀘 𑀩𑀤𑁆𑀥𑀔𑀼𑀭𑀥𑀸𑀭𑀸𑀲𑀦𑁆𑀦𑀺𑀧𑀸𑀢𑀢𑁄 𑀘 𑀧𑀭𑀺𑀢𑁆𑀢𑀢𑀭𑁄 𑀓𑀸𑀮𑁄. 𑀓𑀸𑀮𑀲𑀗𑁆𑀔𑀸𑀢𑁄 𑀲𑀫𑀬𑁄 𑀘𑀺𑀢𑁆𑀢𑀧𑀭𑀺𑀘𑁆𑀙𑀺𑀦𑁆𑀦𑁄 𑀯𑀼𑀘𑁆𑀘𑀫𑀸𑀦𑁄 𑀢𑁂𑀦𑁂𑀯 𑀧𑀭𑀺𑀘𑁆𑀙𑁂𑀤𑀓𑀘𑀺𑀢𑁆𑀢𑁂𑀦 ‘‘𑀏𑀯𑀁 𑀧𑀭𑀺𑀢𑁆𑀢𑁄 𑀅𑀳’’𑀦𑁆𑀢𑀺 𑀅𑀢𑁆𑀢𑀦𑁄 𑀧𑀭𑀺𑀢𑁆𑀢𑀢𑀁 𑀤𑀻𑀧𑁂𑀢𑀺. 𑀬𑀣𑀸 𑀘𑀸𑀳𑀁, 𑀏𑀯𑀁 𑀲𑀩𑁆𑀩𑁄 𑀓𑀼𑀲𑀮𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀓𑀸𑀮𑁄𑀢𑀺 𑀢𑀲𑁆𑀲 𑀧𑀭𑀺𑀢𑁆𑀢𑀢𑀁 𑀤𑀻𑀧𑁂𑀢𑀺. 𑀲𑀤𑁆𑀤𑀲𑁆𑀲 𑀤𑀻𑀧𑀦𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀧𑀓𑀢𑀺𑀯𑀸𑀤𑀻𑀦𑀁 𑀫𑀳𑀢𑁄 𑀯𑀺𑀬 𑀅𑀡𑀼𑀯𑀸𑀤𑀻𑀦𑀁 𑀤𑁆𑀯𑀺𑀅𑀡𑀼𑀓𑀲𑁆𑀲 𑀯𑀺𑀬 𑀘 𑀏𑀓𑀲𑁆𑀲𑁂𑀯. 𑀳𑁂𑀢𑀼…𑀧𑁂… 𑀯𑀼𑀢𑁆𑀢𑀺𑀢𑀁 𑀤𑀻𑀧𑁂𑀢𑀻𑀢𑀺 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀤𑀻𑀧𑀦𑀢𑁄 𑀢𑀧𑁆𑀧𑀭𑀪𑀸𑀯𑀸 𑀳𑁂𑀢𑀼𑀲𑀗𑁆𑀔𑀸𑀢𑀲𑁆𑀲 𑀧𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀤𑀻𑀧𑀦𑀢𑀸 𑀯𑀼𑀢𑁆𑀢𑀸. 𑀲𑀢𑀺 𑀧𑀦 𑀧𑀘𑁆𑀘𑀬𑀸𑀬𑀢𑁆𑀢𑀪𑀸𑀯𑁂 𑀧𑀘𑁆𑀘𑀬𑀲𑀸𑀫𑀕𑁆𑀕𑀻𑀆𑀬𑀢𑁆𑀢𑀢𑀸 𑀲𑀫𑀯𑀸𑀬𑀲𑀗𑁆𑀔𑀸𑀢𑁂𑀦 𑀤𑀻𑀧𑀺𑀬𑀢𑀻𑀢𑀺 𑀅𑀢𑀧𑁆𑀧𑀭𑀪𑀸𑀯𑀢𑁄 𑀢𑀲𑁆𑀲 𑀢𑀁𑀤𑀻𑀧𑀦𑀢𑀸 𑀦 𑀯𑀼𑀢𑁆𑀢𑀸. 𑀅𑀦𑁂𑀦 𑀲𑀫𑀬𑁂𑀦 𑀓𑀢𑁆𑀢𑀼𑀪𑀽𑀢𑁂𑀦, 𑀅𑀦𑁂𑀦 𑀲𑀫𑀬𑁂𑀦 𑀯𑀸 𑀓𑀭𑀡𑀪𑀽𑀢𑁂𑀦 𑀪𑀕𑀯𑀢𑀸 𑀧𑀝𑀺𑀲𑁂𑀥𑀺𑀢𑁄𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀧𑀼𑀭𑀺𑀫𑀸𑀲𑀼 𑀤𑀻𑀧𑀦𑀸𑀲𑀼.

𑀅𑀥𑀺𑀓𑀭𑀡𑀯𑀲𑁂𑀦𑀸𑀢𑀺 𑀆𑀥𑀸𑀭𑀯𑀲𑁂𑀦. 𑀏𑀢𑁆𑀣𑀸𑀢𑀺 𑀓𑀸𑀮𑀲𑀫𑀽𑀳𑀲𑀗𑁆𑀔𑀸𑀢𑁂 𑀲𑀫𑀬𑁂 𑀕𑀳𑀺𑀢𑁂𑀢𑀺 𑀅𑀢𑁆𑀣𑁄. 𑀓𑀸𑀮𑁄𑀧𑀺 𑀳𑀺 𑀘𑀺𑀢𑁆𑀢𑀧𑀭𑀺𑀘𑁆𑀙𑀺𑀦𑁆𑀦𑁄 𑀲𑀪𑀸𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑁄𑀧𑀺 𑀆𑀥𑀸𑀭𑀪𑀸𑀯𑁂𑀦𑁂𑀯 𑀲𑀜𑁆𑀜𑀸𑀢𑁄 ‘‘𑀅𑀥𑀺𑀓𑀭𑀡’’𑀦𑁆𑀢𑀺 𑀯𑀼𑀢𑁆𑀢𑁄 𑀢𑀁𑀔𑀡𑀧𑁆𑀧𑀯𑀢𑁆𑀢𑀸𑀦𑀁 𑀢𑀢𑁄 𑀧𑀼𑀩𑁆𑀩𑁂 𑀧𑀭𑀢𑁄 𑀘 𑀅𑀪𑀸𑀯𑀸. 𑀪𑀸𑀯𑁄𑀢𑀺 𑀓𑀺𑀭𑀺𑀬𑀸. 𑀓𑀺𑀭𑀺𑀬𑀸𑀬 𑀓𑀺𑀭𑀺𑀬𑀦𑁆𑀢𑀭𑀮𑀓𑁆𑀔𑀡𑀁 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀁. 𑀬𑀣𑀸 𑀕𑀸𑀯𑀻𑀲𑀼 𑀤𑀼𑀬𑁆𑀳𑀫𑀸𑀦𑀸𑀲𑀼 𑀕𑀢𑁄, 𑀤𑀼𑀤𑁆𑀥𑀸𑀲𑀼 𑀆𑀕𑀢𑁄𑀢𑀺 𑀤𑁄𑀳𑀦𑀓𑀺𑀭𑀺𑀬𑀸 𑀕𑀫𑀦𑀓𑀺𑀭𑀺𑀬𑀸𑀬 𑀮𑀓𑁆𑀔𑀡𑀁 𑀳𑁄𑀢𑀺, 𑀏𑀯𑀫𑀺𑀳𑀸𑀧𑀺 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀢𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀘 𑀯𑀼𑀢𑁆𑀢𑁂 𑀲𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀫𑀸𑀦𑁄 𑀏𑀯 𑀳𑁄𑀢𑀺 𑀅𑀜𑁆𑀜𑀓𑀺𑀭𑀺𑀬𑀸𑀲𑀫𑁆𑀩𑀦𑁆𑀥𑀸𑀪𑀸𑀯𑁂𑀦 𑀧𑀤𑀢𑁆𑀣𑀲𑁆𑀲 𑀲𑀢𑁆𑀢𑀸𑀯𑀺𑀭𑀳𑀸𑀪𑀸𑀯𑀢𑁄𑀢𑀺 𑀲𑀫𑀬𑀲𑁆𑀲 𑀲𑀢𑁆𑀢𑀸𑀓𑀺𑀭𑀺𑀬𑀸𑀬 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀺𑀭𑀺𑀬𑀸 𑀨𑀲𑁆𑀲𑀸𑀤𑀺𑀪𑀯𑀦𑀓𑀺𑀭𑀺𑀬𑀸 𑀘 𑀮𑀓𑁆𑀔𑀻𑀬𑀢𑀻𑀢𑀺 𑀉𑀪𑀬𑀢𑁆𑀣 𑀲𑀫𑀬𑀲𑀤𑁆𑀤𑁂 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑁄 𑀓𑀢𑁄 𑀮𑀓𑁆𑀔𑀡𑀪𑀽𑀢𑀪𑀸𑀯𑀬𑀼𑀢𑁆𑀢𑁄𑀢𑀺.

𑀉𑀤𑁆𑀤𑀸𑀦𑀢𑁄𑀢𑀺 𑀉𑀤𑁆𑀤𑁂𑀲𑀢𑁄 𑀲𑀗𑁆𑀔𑁂𑀧𑀢𑁄. 𑀓𑀺𑀮𑁂𑀲𑀓𑀸𑀫𑁄 𑀯𑀢𑁆𑀣𑀼𑀓𑀸𑀫𑀪𑀸𑀯𑀁 𑀪𑀚𑀦𑁆𑀢𑁄 𑀓𑀸𑀫𑀦𑀻𑀬𑀯𑀲𑁂𑀦 𑀪𑀚𑀢𑀺, 𑀦 𑀓𑀸𑀫𑀦𑀯𑀲𑁂𑀦𑀸𑀢𑀺 𑀓𑀸𑀫𑀦𑀯𑀲𑁂𑀦 𑀓𑀺𑀮𑁂𑀲𑀓𑀸𑀫𑁄 𑀏𑀯 𑀳𑁄𑀢𑀺, 𑀦 𑀯𑀢𑁆𑀣𑀼𑀓𑀸𑀫𑁄. 𑀤𑀼𑀯𑀺𑀥𑁄𑀧𑁂𑀲𑁄𑀢𑀺 𑀯𑀘𑀦𑁂𑀦 𑀤𑀼𑀯𑀺𑀥𑀲𑁆𑀲𑀧𑀺 𑀲𑀳𑀺𑀢𑀲𑁆𑀲 𑀅𑀯𑀘𑀭𑀡𑀧𑁆𑀧𑀤𑁂𑀲𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀦 𑀯𑀢𑁆𑀣𑀼𑀓𑀸𑀫𑀲𑁆𑀲𑁂𑀯 𑀧𑀯𑀢𑁆𑀢𑀺𑀤𑁂𑀲𑁄 𑀭𑀽𑀧𑀸𑀭𑀽𑀧𑀥𑀸𑀢𑀼𑀤𑁆𑀯𑀬𑀁 𑀅𑀧𑀦𑀻𑀢𑀁 𑀳𑁄𑀢𑀺. 𑀦𑀦𑀼 𑀘 𑀤𑀼𑀯𑀺𑀥𑁄𑀧𑀺 𑀲𑀳𑀺𑀢𑁄 𑀭𑀽𑀧𑀸𑀭𑀽𑀧𑀥𑀸𑀢𑀽𑀲𑀼 𑀧𑀯𑀢𑁆𑀢𑀢𑀺 𑀭𑀽𑀧𑀸𑀭𑀽𑀧𑀸𑀯𑀘𑀭𑀥𑀫𑁆𑀫𑀸𑀦𑀁 𑀯𑀢𑁆𑀣𑀼𑀓𑀸𑀫𑀢𑁆𑀢𑀸 𑀢𑀤𑀸𑀭𑀫𑁆𑀫𑀡𑀸𑀦𑀁 𑀭𑀽𑀧𑀸𑀭𑀽𑀧𑀭𑀸𑀕𑀸𑀦𑀜𑁆𑀘 𑀓𑀺𑀮𑁂𑀲𑀓𑀸𑀫𑀪𑀸𑀯𑀲𑀺𑀤𑁆𑀥𑀺𑀢𑁄𑀢𑀺? 𑀢𑀁 𑀦, 𑀩𑀳𑀮𑀓𑀺𑀮𑁂𑀲𑀲𑁆𑀲 𑀓𑀸𑀫𑀭𑀸𑀕𑀲𑁆𑀲 𑀓𑀺𑀮𑁂𑀲𑀓𑀸𑀫𑀪𑀸𑀯𑁂𑀦 𑀇𑀥 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀏𑀯𑀜𑁆𑀘 𑀓𑀢𑁆𑀯𑀸 𑀭𑀽𑀧𑀸𑀭𑀽𑀧𑀥𑀸𑀢𑀽𑀲𑀼 𑀧𑀯𑀢𑁆𑀢𑀫𑀸𑀦𑁂𑀲𑀼 𑀓𑀸𑀫𑀸𑀯𑀘𑀭𑀥𑀫𑁆𑀫𑁂𑀲𑀼 𑀦𑀺𑀓𑀦𑁆𑀢𑀺 𑀇𑀥 𑀦 𑀲𑀗𑁆𑀕𑀳𑀺𑀢𑀸 𑀲𑀼𑀔𑀼𑀫𑀢𑁆𑀢𑀸. ‘‘𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸’’𑀢𑀺 𑀲𑀩𑁆𑀩𑀓𑀸𑀫𑁂 𑀉𑀤𑁆𑀤𑀺𑀲𑀺𑀢𑁆𑀯𑀸𑀧𑀺 𑀳𑀺 ‘‘𑀤𑀼𑀯𑀺𑀥𑁄𑀧𑁂𑀲𑁄’’𑀢𑀺 𑀏𑀢𑁆𑀣 𑀢𑀤𑁂𑀓𑀤𑁂𑀲𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀲𑀳𑀺𑀢𑀢𑀸𑀧𑀭𑀺𑀘𑁆𑀙𑀺𑀦𑁆𑀦𑀸 𑀓𑀸𑀫𑀭𑀸𑀕𑀢𑀩𑁆𑀩𑀢𑁆𑀣𑀼𑀓𑀥𑀫𑁆𑀫𑀸𑀯 𑀲𑀗𑁆𑀕𑀳𑀺𑀢𑀸𑀢𑀺, 𑀦𑀺𑀭𑀯𑀲𑁂𑀲𑁄 𑀯𑀸 𑀓𑀺𑀮𑁂𑀲𑀓𑀸𑀫𑁄 𑀓𑀸𑀫𑀭𑀸𑀕𑁄 𑀓𑀸𑀫𑀢𑀡𑁆𑀳𑀸𑀭𑀽𑀧𑀢𑀡𑁆𑀳𑀸𑀅𑀭𑀽𑀧𑀢𑀡𑁆𑀳𑀸𑀦𑀺𑀭𑁄𑀥𑀢𑀡𑁆𑀳𑀸𑀪𑁂𑀤𑁄 𑀇𑀥 𑀧𑀯𑀢𑁆𑀢𑀢𑀻𑀢𑀺 𑀅𑀦𑀯𑀲𑁂𑀲𑀧𑁆𑀧𑀯𑀢𑁆𑀢𑀺𑀢𑀁 𑀲𑀦𑁆𑀥𑀸𑀬 ‘‘𑀤𑀼𑀯𑀺𑀥𑁄𑀧𑁂𑀲𑁄’’𑀢𑀺 𑀯𑀼𑀢𑁆𑀢𑀁, 𑀯𑀢𑁆𑀣𑀼𑀓𑀸𑀫𑁄𑀧𑀺 𑀘 𑀅𑀧𑁆𑀧𑀓𑁄 𑀇𑀥𑀸𑀧𑀺 𑀦 𑀯𑀢𑁆𑀢𑀢𑀺 𑀭𑀽𑀧𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀫𑀢𑁆𑀢𑁄, 𑀢𑀣𑀸𑀧𑀺 𑀧𑀭𑀺𑀧𑀼𑀡𑁆𑀡𑀯𑀢𑁆𑀣𑀼𑀓𑀸𑀫𑀢𑁆𑀢𑀸 𑀓𑀸𑀫𑀸𑀯𑀘𑀭𑀥𑀫𑁆𑀫𑀸𑀯 𑀇𑀥 𑀕𑀳𑀺𑀢𑀸. 𑀏𑀯𑀜𑁆𑀘 𑀓𑀢𑁆𑀯𑀸 𑀲𑀲𑀢𑁆𑀣𑀸𑀯𑀘𑀭𑁄𑀧𑀫𑀸 𑀬𑀼𑀢𑁆𑀢𑀸 𑀳𑁄𑀢𑀺. ‘‘𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀻’’𑀢𑀺 (𑀥. 𑀲. 𑁧𑁬𑁩; 𑀯𑀺𑀪. 𑁬𑁨𑁫) 𑀏𑀢𑁆𑀣 𑀭𑀽𑀧𑀪𑀯𑁄 𑀉𑀢𑁆𑀢𑀭𑀧𑀤𑀮𑁄𑀧𑀁 𑀓𑀢𑁆𑀯𑀸 ‘‘𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑁄, 𑀏𑀯𑀫𑀺𑀥𑀸𑀧𑀺 𑀉𑀢𑁆𑀢𑀭𑀧𑀤𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀅𑀜𑁆𑀜𑀣𑀸 𑀳𑀺 𑀘𑀺𑀢𑁆𑀢𑀁 𑀓𑀸𑀫𑀸𑀯𑀘𑀭𑀸𑀯𑀘𑀭𑀦𑁆𑀢𑀺 𑀯𑀼𑀘𑁆𑀘𑁂𑀬𑁆𑀬𑀸𑀢𑀺. 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦𑀸𑀢𑀺𑀆𑀤𑀺𑀓𑁂 ‘‘𑀓𑀸𑀫𑁄’’𑀢𑀺 𑀲𑀩𑁆𑀩𑀁 𑀢𑀡𑁆𑀳𑀫𑀸𑀳, 𑀢𑀲𑁆𑀫𑀸 ‘‘𑀓𑀸𑀫𑀜𑁆𑀘𑁂𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, ‘‘𑀓𑀸𑀫𑁂 𑀅𑀯𑀘𑀸𑀭𑁂𑀢𑀻𑀢𑀺 𑀓𑀸𑀫𑀸𑀯𑀘𑀸𑀭’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀘𑀸-𑀲𑀤𑁆𑀤𑀲𑁆𑀲 𑀭𑀲𑁆𑀲𑀢𑁆𑀢𑀁 𑀓𑀢𑀁.

𑀭𑀼𑀴𑁆𑀳𑀺𑀲𑀤𑁆𑀤𑁂𑀦𑀸𑀢𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀭𑀼𑀴𑁆𑀳𑁂𑀦 𑀲𑀤𑁆𑀤𑁂𑀦, 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀯𑀸 𑀧𑀯𑀢𑁆𑀢𑀺𑀢𑁆𑀯𑀸 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀢𑀸𑀬 𑀢𑀁𑀲𑀤𑀺𑀲𑁂𑀲𑀼 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼 𑀭𑀼𑀴𑁆𑀳𑁂𑀦 𑀲𑀤𑁆𑀤𑁂𑀦. 𑀅𑀣 𑀯𑀸 𑀓𑀺𑀜𑁆𑀘𑀺 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀢𑀺𑀧𑀺 𑀅𑀜𑁆𑀜𑀲𑁆𑀫𑀺𑀁 𑀢𑀁𑀦𑀺𑀫𑀺𑀢𑁆𑀢𑀬𑀼𑀢𑁆𑀢𑁂 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀯𑀺𑀲𑀬𑁂 𑀲𑀫𑁆𑀫𑀼𑀢𑀺𑀬𑀸 𑀘𑀺𑀭𑀓𑀸𑀮𑀢𑀸𑀯𑀲𑁂𑀦 𑀦𑀺𑀫𑀺𑀢𑁆𑀢𑀯𑀺𑀭𑀳𑁂𑀧𑀺 𑀧𑀯𑀢𑁆𑀢𑀺 𑀭𑀼𑀴𑁆𑀳𑀺 𑀦𑀸𑀫 𑀬𑀣𑀸 ‘‘𑀫𑀳𑀺𑀬𑀁 𑀲𑁂𑀢𑀻𑀢𑀺 𑀫𑀳𑀺𑀁𑀲𑁄, 𑀕𑀘𑁆𑀙𑀦𑁆𑀢𑀻𑀢𑀺 𑀕𑀸𑀯𑁄’’𑀢𑀺, 𑀏𑀯𑀁 𑀓𑀼𑀲𑀮𑀲𑀤𑁆𑀤𑀲𑁆𑀲𑀧𑀺 𑀭𑀼𑀴𑁆𑀳𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀜𑁆𑀜𑀸𑀦𑀺𑀤𑁆𑀤𑁂𑀲𑁂 ‘‘𑀓𑁄𑀲𑀮𑁆𑀮’’𑀦𑁆𑀢𑀺 𑀅𑀪𑀺𑀥𑀫𑁆𑀫𑁂 (𑀥. 𑀲. 𑁧𑁬) 𑀯𑀼𑀢𑁆𑀢𑀁, 𑀢𑀲𑁆𑀲 𑀘 𑀪𑀸𑀯𑀸 𑀓𑀼𑀲𑀮𑀲𑀤𑁆𑀤𑀧𑁆𑀧𑀯𑀢𑁆𑀢𑀻𑀢𑀺 𑀓𑁄𑀲𑀮𑁆𑀮𑀬𑁄𑀕𑀸 𑀓𑀼𑀲𑀮𑀦𑁆𑀢𑀺 𑀅𑀬𑀁 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁄 𑀳𑁄𑀢𑀺. 𑀓𑀼𑀲𑀮𑀦𑁆𑀢𑀺 𑀓𑀼𑀲𑀮𑀪𑀸𑀯𑀁 𑀆𑀳.

𑀯𑀺𑀧𑀸𑀓𑀸𑀤𑀻𑀦𑀁 𑀅𑀯𑀚𑁆𑀚𑀧𑀝𑀺𑀧𑀓𑁆𑀔𑀢𑀸 𑀦𑀢𑁆𑀣𑀻𑀢𑀺 𑀓𑀼𑀲𑀮𑀫𑁂𑀯 𑀅𑀦𑀯𑀚𑁆𑀚𑀮𑀓𑁆𑀔𑀡𑀁 𑀯𑀼𑀢𑁆𑀢𑀁. 𑀅𑀦𑀯𑀚𑁆𑀚𑀮𑀓𑁆𑀔𑀡𑀫𑁂𑀯𑀸𑀢𑀺 𑀲𑀼𑀔𑀯𑀺𑀧𑀸𑀓𑀲𑀪𑀸𑀯𑀲𑁆𑀲 𑀮𑀓𑁆𑀔𑀡𑀪𑀸𑀯𑀦𑀺𑀯𑀸𑀭𑀡𑀢𑁆𑀣𑀁 𑀅𑀯𑀥𑀸𑀭𑀡𑀁 𑀓𑀢𑀁, 𑀢𑀁𑀦𑀺𑀯𑀸𑀭𑀡𑀜𑁆𑀘 𑀢𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀁 𑀯𑀢𑁆𑀣𑀼𑀓𑀸𑀫𑀢𑀸𑀬 𑀓𑀢𑀁. 𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑁂𑀦 𑀭𑀲𑁂𑀦 𑀯𑁄𑀤𑀸𑀦𑀪𑀸𑀯𑀭𑀲𑀁. 𑀨𑀮𑀝𑁆𑀞𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀦𑁂𑀦 𑀇𑀝𑁆𑀞𑀯𑀺𑀧𑀸𑀓𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀲𑀪𑀸𑀯𑁄 𑀓𑀓𑁆𑀔𑀴𑀸𑀤𑀺𑀨𑀼𑀲𑀦𑀸𑀤𑀺𑀓𑁄 𑀅𑀲𑀸𑀥𑀸𑀭𑀡𑁄. 𑀲𑀸𑀫𑀜𑁆𑀜𑀁 𑀲𑀸𑀥𑀸𑀭𑀡𑁄 𑀅𑀦𑀺𑀘𑁆𑀘𑀸𑀤𑀺𑀲𑀪𑀸𑀯𑁄. 𑀇𑀥 𑀘 𑀓𑀼𑀲𑀮𑀮𑀓𑁆𑀔𑀡𑀁 𑀲𑀩𑁆𑀩𑀓𑀼𑀲𑀮𑀲𑀸𑀥𑀸𑀭𑀡𑀲𑀪𑀸𑀯𑀢𑁆𑀢𑀸 𑀲𑀸𑀫𑀜𑁆𑀜𑀁 𑀤𑀝𑁆𑀞𑀩𑁆𑀩𑀁, 𑀅𑀓𑀼𑀲𑀮𑀸𑀤𑀻𑀳𑀺 𑀅𑀲𑀸𑀥𑀸𑀭𑀡𑀢𑀸𑀬 𑀲𑀪𑀸𑀯𑁄 𑀯𑀸. 𑀉𑀧𑀝𑁆𑀞𑀸𑀦𑀸𑀓𑀸𑀭𑁄𑀢𑀺 𑀕𑀳𑁂𑀢𑀩𑁆𑀩𑀪𑀸𑀯𑁂𑀦 𑀜𑀸𑀡𑀲𑁆𑀲 𑀉𑀧𑀝𑁆𑀞𑀳𑀦𑀸𑀓𑀸𑀭𑁄. 𑀨𑀮𑀁 𑀧𑀦 𑀅𑀢𑁆𑀢𑀦𑁄 𑀓𑀸𑀭𑀡𑀁 𑀧𑀝𑀺𑀘𑁆𑀘 𑀢𑀧𑁆𑀧𑀝𑀺𑀩𑀺𑀫𑁆𑀩𑀪𑀸𑀯𑁂𑀦, 𑀧𑀝𑀺𑀫𑀼𑀔𑀁 𑀯𑀸 𑀉𑀧𑀝𑁆𑀞𑀸𑀢𑀻𑀢𑀺 𑀧𑀘𑁆𑀘𑀼𑀧𑀝𑁆𑀞𑀸𑀦𑀁.

𑀯𑀺𑀚𑀸𑀦𑀸𑀢𑀻𑀢𑀺 𑀲𑀜𑁆𑀜𑀸𑀧𑀜𑁆𑀜𑀸𑀓𑀺𑀘𑁆𑀘𑀯𑀺𑀲𑀺𑀝𑁆𑀞𑀁 𑀯𑀺𑀲𑀬𑀕𑁆𑀕𑀳𑀡𑀁 𑀆𑀳. 𑀲𑀩𑁆𑀩𑀘𑀺𑀢𑁆𑀢𑀲𑀸𑀥𑀸𑀭𑀡𑀢𑁆𑀢𑀸 𑀬𑀢𑁆𑀣 𑀬𑀢𑁆𑀣 𑀬𑀣𑀸 𑀬𑀣𑀸 𑀅𑀢𑁆𑀣𑁄 𑀮𑀩𑁆𑀪𑀢𑀺, 𑀢𑀢𑁆𑀣 𑀢𑀢𑁆𑀣 𑀢𑀣𑀸 𑀢𑀣𑀸 𑀕𑀳𑁂𑀢𑀩𑁆𑀩𑁄𑀢𑀺. 𑀬𑀁 𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑁂𑀦 𑀘𑀺𑀦𑁄𑀢𑀺, 𑀬𑀜𑁆𑀘 𑀓𑀫𑁆𑀫𑀼𑀦𑀸 𑀅𑀪𑀺𑀲𑀗𑁆𑀔𑀢𑀢𑁆𑀢𑀸 𑀘𑀺𑀢𑀁, 𑀢𑀁 𑀢𑀣𑀸 ‘‘𑀘𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦 𑀢𑀣𑀸 𑀦 𑀳𑁄𑀢𑀺, 𑀢𑀁 𑀧𑀭𑀺𑀢𑁆𑀢𑀓𑀺𑀭𑀺𑀬𑀤𑁆𑀯𑀬𑀁 𑀅𑀦𑁆𑀢𑀺𑀫𑀚𑀯𑀦𑀜𑁆𑀘 𑀮𑀩𑁆𑀪𑀫𑀸𑀦𑀘𑀺𑀦𑁆𑀢𑀦𑀯𑀺𑀘𑀺𑀢𑁆𑀢𑀢𑀸𑀤𑀺𑀯𑀲𑁂𑀦 ‘‘𑀘𑀺𑀢𑁆𑀢’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀳𑀲𑀺𑀢𑀼𑀧𑁆𑀧𑀸𑀤𑁄 𑀧𑀦 𑀅𑀜𑁆𑀜𑀚𑀯𑀦𑀕𑀢𑀺𑀓𑁄𑀯. 𑀘𑀺𑀢𑁆𑀢𑀸𑀦𑀁 𑀧𑀦𑀸𑀢𑀺 𑀯𑀺𑀘𑀺𑀢𑁆𑀭𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀤𑀦𑁆𑀢𑁄𑀕𑀥𑀢𑁆𑀢𑀸 𑀳𑀺 𑀲𑀫𑀼𑀤𑀸𑀬𑀯𑁄𑀳𑀸𑀭𑁂𑀦 𑀅𑀯𑀬𑀯𑁄𑀧𑀺 ‘‘𑀘𑀺𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀬𑀣𑀸 𑀧𑀩𑁆𑀩𑀢𑀦𑀤𑀻𑀲𑀫𑀼𑀤𑁆𑀤𑀸𑀤𑀺𑀏𑀓𑀤𑁂𑀲𑁂𑀲𑀼 𑀤𑀺𑀝𑁆𑀞𑁂𑀲𑀼 𑀧𑀩𑁆𑀩𑀢𑀸𑀤𑀬𑁄 𑀤𑀺𑀝𑁆𑀞𑀸𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺. 𑀘𑀭𑀡𑀁 𑀦𑀸𑀫 𑀕𑀳𑁂𑀢𑁆𑀯𑀸 𑀘𑀭𑀺𑀢𑀩𑁆𑀩𑀘𑀺𑀢𑁆𑀢𑀧𑀝𑁄. 𑀭𑀽𑀧𑀸𑀦𑀻𑀢𑀺 𑀩𑀺𑀫𑁆𑀩𑀸𑀦𑀺.

𑀅𑀚𑁆𑀛𑀢𑁆𑀢𑀺𑀓𑀦𑁆𑀢𑀺 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀁 𑀯𑀤𑀢𑀺. 𑀘𑀺𑀢𑁆𑀢𑀓𑀢𑀫𑁂𑀯𑀸𑀢𑀺 𑀘𑀺𑀢𑁆𑀢𑀲𑁆𑀲 𑀫𑀽𑀮𑀓𑀸𑀭𑀡𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀫𑁆𑀫𑀲𑁆𑀲 𑀳𑁂𑀢𑀁 𑀘𑀺𑀢𑁆𑀢𑀁 𑀓𑀸𑀭𑀡𑀦𑁆𑀢𑀺. 𑀢𑀁 𑀧𑀦 𑀅𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀓𑀸𑀬𑀓𑀫𑁆𑀫𑀸𑀤𑀺𑀪𑁂𑀤’’𑀦𑁆𑀢𑀺𑀆𑀤𑀺𑀫𑀸𑀳. 𑀮𑀺𑀗𑁆𑀕𑀦𑀸𑀦𑀢𑁆𑀢𑀦𑁆𑀢𑀺 𑀲𑀡𑁆𑀞𑀸𑀦𑀦𑀸𑀦𑀢𑁆𑀢𑀁, 𑀪𑀺𑀦𑁆𑀦𑀲𑀡𑁆𑀞𑀸𑀦𑀗𑁆𑀕𑀧𑀘𑁆𑀘𑀗𑁆𑀕𑀯𑀢𑁄 𑀲𑀭𑀻𑀭𑀲𑁆𑀲 𑀯𑀸 𑀦𑀸𑀦𑀢𑁆𑀢𑀁. 𑀯𑁄𑀳𑀸𑀭𑀯𑀲𑁂𑀦 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀪𑀸𑀯𑁂𑀦 𑀯𑁄𑀳𑀭𑀺𑀢𑀩𑁆𑀩𑁂𑀲𑀼 𑀧𑀢𑁆𑀣𑀦𑀸𑀯𑀺𑀲𑁂𑀲𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁄 𑀓𑀫𑁆𑀫𑀯𑀺𑀲𑁂𑀲𑀸. 𑀏𑀯𑀫𑀺𑀤𑀁 𑀓𑀫𑁆𑀫𑀦𑀸𑀦𑀢𑁆𑀢𑀁 𑀯𑁄𑀳𑀸𑀭𑀦𑀸𑀦𑀢𑁆𑀢𑀢𑁄 𑀳𑁄𑀢𑀺. 𑀅𑀧𑀸…𑀧𑁂… 𑀓𑀸𑀤𑀺𑀢𑀸𑀢𑀺 𑀏𑀯𑀫𑀸𑀤𑀻𑀲𑀼 𑀆𑀤𑀺-𑀲𑀤𑁆𑀤𑁂𑀳𑀺 𑀕𑀢𑀺𑀬𑀸 𑀉𑀧𑀧𑀢𑁆𑀢𑀺𑀬𑀸 𑀅𑀢𑁆𑀢𑀪𑀸𑀯𑁂 𑀮𑁄𑀓𑀥𑀫𑁆𑀫𑁂𑀲𑀼 𑀘 𑀦𑀸𑀦𑀸𑀓𑀭𑀡𑀸𑀦𑀺 𑀲𑀼𑀢𑁆𑀢𑀸𑀕𑀢𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺.

𑀓𑀫𑁆𑀫𑀦𑀸𑀦𑀢𑁆𑀢𑀸𑀤𑀺𑀯𑀲𑁂𑀦𑀸𑀢𑀺 𑀏𑀢𑁆𑀣 𑀓𑀼𑀲𑀮𑀸𑀓𑀼𑀲𑀮𑀯𑀲𑁂𑀦 𑀓𑀫𑁆𑀫𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀲𑀤𑀺𑀲𑀲𑀪𑀸𑀯𑀢𑀸 𑀳𑀺 𑀦𑀸𑀦𑀢𑁆𑀢𑀦𑁆𑀢𑀺. 𑀓𑀼𑀲𑀮𑀓𑀫𑁆𑀫𑀲𑁆𑀲 𑀤𑀸𑀦𑀸𑀤𑀺𑀯𑀲𑁂𑀦 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀪𑀸𑀯𑁂𑀦 𑀘 𑀧𑀼𑀣𑀼𑀢𑁆𑀢𑀁, 𑀅𑀓𑀼𑀲𑀮𑀓𑀫𑁆𑀫𑀲𑁆𑀲 𑀘 𑀫𑀘𑁆𑀙𑀭𑀺𑀬𑀸𑀤𑀻𑀳𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀘 𑀧𑀼𑀣𑀼𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀩𑀳𑀼𑀧𑁆𑀧𑀓𑀸𑀭𑀢𑀸 𑀳𑀺 𑀧𑀼𑀣𑀼𑀢𑁆𑀢𑀦𑁆𑀢𑀺. 𑀅𑀦𑁆𑀦𑀤𑀸𑀦𑀸𑀤𑀺𑀯𑀲𑁂𑀦 𑀤𑀸𑀦𑀸𑀤𑀻𑀦𑀁 𑀧𑀸𑀡𑀸𑀢𑀺𑀧𑀸𑀢𑀸𑀯𑀺𑀭𑀢𑀺𑀆𑀤𑀺𑀯𑀲𑁂𑀦 𑀓𑀸𑀬𑀲𑀼𑀘𑀭𑀺𑀢𑀸𑀤𑀻𑀦𑀁 𑀆𑀯𑀸𑀲𑀫𑀘𑁆𑀙𑀭𑀺𑀬𑀸𑀤𑀺𑀯𑀲𑁂𑀦 𑀫𑀘𑁆𑀙𑀭𑀺𑀬𑀸𑀤𑀻𑀦𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀲𑁂𑀦 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀜𑁆𑀘 𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀓𑁂𑀓𑀲𑁆𑀲 𑀳𑀺 𑀧𑀓𑀸𑀭𑀲𑁆𑀲 𑀪𑁂𑀤𑁄 𑀧𑀪𑁂𑀤𑁄𑀢𑀺. 𑀦𑀸𑀦𑀢𑁆𑀢𑀸𑀤𑀻𑀦𑀁 𑀯𑀯𑀢𑁆𑀣𑀸𑀦𑀁 𑀢𑀣𑀸 𑀢𑀣𑀸 𑀯𑀯𑀢𑁆𑀣𑀺𑀢𑀢𑀸 𑀦𑀺𑀘𑁆𑀙𑀺𑀢𑀢𑀸. 𑀏𑀢𑁂𑀦𑀼𑀧𑀸𑀬𑁂𑀦 𑀮𑀺𑀗𑁆𑀕𑀦𑀸𑀦𑀢𑁆𑀢𑀸𑀤𑀻𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀓𑀫𑁆𑀫𑀦𑀸𑀦𑀢𑁆𑀢𑀸𑀤𑀻𑀳𑀺 𑀦𑀺𑀩𑁆𑀩𑀢𑁆𑀢𑀸𑀦𑀺 𑀳𑀺 𑀢𑀸𑀦𑀻𑀢𑀺.

𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀮𑀺𑀗𑁆𑀕𑀲𑁆𑀲 𑀓𑀫𑁆𑀫𑀢𑁄 𑀧𑀯𑀢𑁆𑀢𑀺𑀁 𑀢𑀤𑀦𑀼𑀓𑁆𑀓𑀫𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀫𑁆𑀫𑀲𑁆𑀲 𑀦𑀺𑀧𑁆𑀨𑀢𑁆𑀢𑀺𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀢𑀢𑁄 𑀅𑀦𑀸𑀕𑀢𑀮𑀺𑀗𑁆𑀕𑀦𑀸𑀦𑀢𑁆𑀢𑀸𑀤𑀺𑀦𑀺𑀧𑁆𑀨𑀢𑁆𑀢𑀺𑀤𑀲𑁆𑀲𑀦𑁂𑀦 𑀲𑀁𑀲𑀸𑀭𑀁 𑀖𑀝𑁂𑀦𑁆𑀢𑁄 ‘‘𑀓𑀫𑁆𑀫𑀦𑀸𑀦𑀸𑀓𑀭𑀡𑀁 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀼𑀭𑀺𑀫𑁂𑀦 𑀓𑀫𑁆𑀫𑀯𑀘𑀦𑁂𑀦 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸, 𑀮𑀺𑀗𑁆𑀕𑀸𑀤𑀺𑀯𑀘𑀦𑁂𑀦 𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀪𑀯𑀧𑀭𑀺𑀬𑁄𑀲𑀸𑀦𑀸𑀦𑀺, 𑀕𑀢𑀺𑀆𑀤𑀺𑀯𑀘𑀦𑁂𑀦 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 𑀕𑀳𑀺𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀢𑀢𑁆𑀣 𑀕𑀢𑀻𑀢𑀺 𑀦𑀺𑀭𑀬𑀸𑀤𑀬𑁄 𑀧𑀜𑁆𑀘 𑀕𑀢𑀺𑀬𑁄 𑀯𑀼𑀘𑁆𑀘𑀦𑁆𑀢𑀺, 𑀢𑀸𑀲𑀁 𑀦𑀸𑀦𑀸𑀓𑀭𑀡𑀁 𑀅𑀧𑀤𑀸𑀤𑀺𑀪𑀸𑀯𑁄. 𑀢𑀸 𑀳𑀺 𑀢𑀣𑀸 𑀪𑀺𑀦𑁆𑀦𑀸𑀢𑀺. 𑀉𑀧𑀧𑀢𑁆𑀢𑀻𑀢𑀺 𑀕𑁄𑀫𑀳𑀺𑀁𑀲𑀸𑀤𑀺𑀔𑀢𑁆𑀢𑀺𑀬𑀸𑀤𑀺𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀺𑀉𑀧𑀧𑀢𑁆𑀢𑀺𑀬𑁄, 𑀢𑀸𑀲𑀁 𑀦𑀸𑀦𑀸𑀓𑀭𑀡𑀁 𑀉𑀘𑁆𑀘𑀸𑀤𑀺𑀢𑀸. 𑀔𑀢𑁆𑀢𑀺𑀬𑁄 𑀏𑀯 𑀳𑀺 𑀏𑀓𑀘𑁆𑀘𑁄 𑀓𑀼𑀮𑀪𑁄𑀕𑀇𑀲𑁆𑀲𑀭𑀺𑀬𑀸𑀤𑀻𑀳𑀺 𑀉𑀘𑁆𑀘𑁄 𑀳𑁄𑀢𑀺, 𑀏𑀓𑀘𑁆𑀘𑁄 𑀦𑀻𑀘𑁄. 𑀢𑁂𑀳𑀺 𑀏𑀯 𑀳𑀻𑀦𑀢𑀸𑀬 𑀳𑀻𑀦𑁄, 𑀧𑀥𑀸𑀦𑀪𑀸𑀯𑀁 𑀦𑀻𑀢𑀢𑀸𑀬 𑀧𑀡𑀻𑀢𑁄, 𑀅𑀟𑁆𑀠𑀢𑀸𑀬 𑀲𑀼𑀕𑀢𑁄, 𑀤𑀮𑀺𑀤𑁆𑀤𑀢𑀸𑀬 𑀤𑀼𑀕𑁆𑀕𑀢𑁄. 𑀓𑀼𑀮𑀯𑀲𑁂𑀦 𑀯𑀸 𑀉𑀘𑁆𑀘𑀦𑀻𑀘𑀢𑀸, 𑀇𑀲𑁆𑀲𑀭𑀺𑀬𑀯𑀲𑁂𑀦 𑀳𑀻𑀦𑀧𑀡𑀻𑀢𑀢𑀸, 𑀪𑁄𑀕𑀯𑀲𑁂𑀦 𑀲𑀼𑀕𑀢𑀤𑀼𑀕𑁆𑀕𑀢𑀢𑀸 𑀬𑁄𑀚𑁂𑀢𑀩𑁆𑀩𑀸. 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀢𑀸𑀢𑀺 𑀑𑀤𑀸𑀢𑀲𑀸𑀫𑀸𑀤𑀺𑀯𑀡𑁆𑀡𑀲𑀼𑀤𑁆𑀥𑀺𑀅𑀲𑀼𑀤𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀼𑀚𑀸𑀢𑀤𑀼𑀚𑁆𑀚𑀸𑀢𑀢𑀸𑀢𑀺 𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑀸𑀤𑀺𑀆𑀭𑁄𑀳𑀧𑀭𑀺𑀡𑀸𑀳𑁂𑀳𑀺 𑀮𑀓𑁆𑀔𑀡𑁂𑀳𑀺 𑀯𑀸 𑀅𑀢𑁆𑀢𑀪𑀸𑀯𑀧𑀭𑀺𑀧𑀼𑀡𑁆𑀡𑀸𑀧𑀭𑀺𑀧𑀼𑀡𑁆𑀡𑀚𑀸𑀢𑀢𑀸𑀯𑀲𑁂𑀦. 𑀲𑀼𑀲𑀡𑁆𑀞𑀺𑀢𑀤𑀼𑀲𑁆𑀲𑀡𑁆𑀞𑀺𑀢𑀢𑀸𑀢𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀲𑀡𑁆𑀞𑀸𑀦𑀯𑀲𑁂𑀦.

𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 𑀅𑀚𑁆𑀛𑀢𑁆𑀢𑀺𑀓𑀘𑀺𑀢𑁆𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑁆𑀲 𑀘𑀺𑀢𑁆𑀢𑀓𑀢𑀪𑀸𑀯𑀲𑀸𑀥𑀓𑀁 𑀲𑀼𑀢𑁆𑀢𑀁 ‘‘𑀓𑀫𑁆𑀫𑀢𑁄’’𑀢𑀺𑀆𑀤𑀺. 𑀓𑀫𑁆𑀫𑀜𑁆𑀳𑀺 𑀘𑀺𑀢𑁆𑀢𑀢𑁄 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀢𑀢𑁄 𑀦𑀺𑀧𑁆𑀨𑀚𑁆𑀚𑀫𑀸𑀦𑀁 𑀲𑀩𑁆𑀩𑀫𑁆𑀧𑀺 𑀘𑀺𑀢𑁆𑀢𑀁 𑀘𑀺𑀢𑁆𑀢𑀓𑀢𑀫𑁂𑀯𑀸𑀢𑀺 𑀲𑀸𑀥𑁂𑀢𑀺. 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀢𑁄 𑀮𑀺𑀗𑁆𑀕𑀢𑁄 𑀧𑀯𑀢𑁆𑀢𑀫𑀸𑀦𑀮𑀺𑀗𑁆𑀕𑀲𑀜𑁆𑀜𑀸 𑀫𑀽𑀮𑀓𑀸𑀭𑀡𑀢𑁄 𑀓𑀫𑁆𑀫𑀢𑁄 𑀆𑀲𑀦𑁆𑀦𑀓𑀸𑀭𑀡𑀢𑁄 𑀮𑀺𑀗𑁆𑀕𑀢𑁄 𑀘 𑀧𑀯𑀢𑁆𑀢𑀸 𑀳𑁄𑀢𑀻𑀢𑀺 ‘‘𑀓𑀫𑁆𑀫𑀢𑁄…𑀧𑁂… 𑀧𑀯𑀢𑁆𑀢𑀭𑁂’’𑀢𑀺 𑀆𑀳. 𑀅𑀣 𑀯𑀸 𑀮𑀺𑀗𑁆𑀕𑀜𑁆𑀘 𑀲𑀜𑁆𑀜𑀸 𑀘 𑀮𑀺𑀗𑁆𑀕𑀲𑀜𑁆𑀜𑀸, 𑀢𑀸 𑀬𑀣𑀸𑀲𑀗𑁆𑀔𑁆𑀬𑀁 𑀓𑀫𑁆𑀫𑀢𑁄 𑀮𑀺𑀗𑁆𑀕𑀢𑁄 𑀘 𑀧𑀯𑀢𑁆𑀢𑀭𑁂𑀢𑀺 𑀅𑀢𑁆𑀣𑁄. 𑀲𑀜𑁆𑀜𑀸𑀢𑁄 𑀪𑁂𑀤𑀁 𑀕𑀘𑁆𑀙𑀦𑁆𑀢𑀻𑀢𑀺 𑀢𑁂 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀮𑀺𑀗𑁆𑀕𑀲𑀜𑁆𑀜𑀸𑀢𑁄 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀯𑁄𑀳𑀸𑀭𑀪𑁂𑀤𑀁 𑀥𑀫𑁆𑀫𑀸 𑀕𑀘𑁆𑀙𑀦𑁆𑀢𑀺, 𑀢𑀣𑀸 𑀢𑀣𑀸 𑀯𑁄𑀳𑀭𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀇𑀫𑀸𑀬 𑀕𑀸𑀣𑀸𑀬 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑁆𑀥𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀲𑁂𑀦 𑀘𑀺𑀢𑁆𑀢𑀓𑀢𑀁 𑀘𑀺𑀢𑁆𑀢𑀁 𑀤𑀲𑁆𑀲𑀺𑀢𑀁.

𑀮𑁄𑀓𑁄 𑀏𑀯 𑀧𑀚𑀸𑀢𑀢𑁆𑀢𑀸 𑀧𑀚𑀸𑀢𑀺 𑀧𑀼𑀭𑀺𑀫𑀧𑀸𑀤𑀲𑁆𑀲 𑀯𑀺𑀯𑀭𑀡𑀁 𑀧𑀘𑁆𑀙𑀺𑀫𑀧𑀸𑀤𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀭𑀣𑀲𑁆𑀲 𑀆𑀡𑀺 𑀦𑀺𑀩𑀦𑁆𑀥𑀦𑀸, 𑀏𑀯𑀁 𑀲𑀢𑁆𑀢𑀮𑁄𑀓𑀭𑀣𑀲𑁆𑀲 𑀓𑀫𑁆𑀫𑀁 𑀦𑀺𑀩𑀦𑁆𑀥𑀦𑀦𑁆𑀢𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀸𑀬 𑀘 𑀕𑀸𑀣𑀸𑀬 𑀅𑀤𑁆𑀥𑀤𑁆𑀯𑀬𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀓𑀫𑁆𑀫𑀯𑀺𑀜𑁆𑀜𑀸𑀡𑀓𑀢𑀢𑀸 𑀤𑀲𑁆𑀲𑀺𑀢𑀸. 𑀓𑀺𑀢𑁆𑀢𑀺𑀦𑁆𑀢𑀺 𑀧𑀭𑀫𑁆𑀫𑀼𑀔𑀸 𑀓𑀺𑀢𑁆𑀢𑀦𑀁 𑀧𑀢𑁆𑀣𑀝𑀬𑀲𑀢𑀁. 𑀧𑀲𑀁𑀲𑀦𑁆𑀢𑀺 𑀲𑀫𑁆𑀫𑀼𑀔𑀸 𑀧𑀲𑀁𑀲𑀦𑀁 𑀣𑀼𑀢𑀺𑀁. 𑀓𑀫𑁆𑀫𑀦𑀸𑀦𑀸𑀓𑀭𑀡𑀦𑁆𑀢𑀺 𑀓𑀫𑁆𑀫𑀢𑁄 𑀦𑀺𑀩𑁆𑀩𑀢𑁆𑀢𑀦𑀸𑀦𑀸𑀓𑀭𑀡𑀁 𑀓𑀫𑁆𑀫𑀚𑁂𑀳𑀺 𑀅𑀦𑀼𑀫𑀺𑀬𑀫𑀸𑀦𑀁 𑀓𑀫𑁆𑀫𑀲𑁆𑀲𑁂𑀯 𑀯𑀸 𑀦𑀸𑀦𑀸𑀓𑀭𑀡𑀁.

𑀓𑀫𑁆𑀫𑀲𑁆𑀲𑀓𑀸𑀢𑀺 𑀓𑀫𑁆𑀫𑀲𑀬𑀸. 𑀓𑀫𑁆𑀫𑀲𑁆𑀲 𑀤𑀸𑀬𑀁 𑀢𑁂𑀦 𑀤𑀸𑀢𑀩𑁆𑀩𑀁 𑀆𑀤𑀺𑀬𑀦𑁆𑀢𑀻𑀢𑀺 𑀓𑀫𑁆𑀫𑀤𑀸𑀬𑀸𑀤𑀸. 𑀅𑀡𑁆𑀟𑀚𑀸𑀤𑀻𑀦𑀜𑁆𑀘 𑀬𑁄𑀦𑀻𑀦𑀁 𑀓𑀫𑁆𑀫𑀢𑁄 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀓𑀫𑁆𑀫𑀫𑁂𑀯 𑀬𑁄𑀦𑀺 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑀦𑀺𑀫𑀺𑀢𑁆𑀢𑀁 𑀏𑀢𑁂𑀲𑀦𑁆𑀢𑀺 𑀓𑀫𑁆𑀫𑀬𑁄𑀦𑀻. 𑀩𑀦𑁆𑀥𑀦𑀝𑁆𑀞𑁂𑀦 𑀓𑀫𑁆𑀫𑀁 𑀩𑀦𑁆𑀥𑀼 𑀏𑀢𑁂𑀲𑀦𑁆𑀢𑀺 𑀓𑀫𑁆𑀫𑀩𑀦𑁆𑀥𑀽.

𑀘𑀺𑀢𑁆𑀢𑀲𑁆𑀲𑀸𑀢𑀺 𑀓𑀫𑁆𑀫𑀯𑀺𑀜𑁆𑀜𑀸𑀡𑀲𑁆𑀲. 𑀢𑀲𑁆𑀲 𑀧𑀦 𑀅𑀮𑀤𑁆𑀥𑁄𑀓𑀸𑀲𑀢𑀸 𑀅𑀜𑁆𑀜𑁂𑀦 𑀓𑀫𑁆𑀫𑁂𑀦 𑀧𑀝𑀺𑀩𑀸𑀳𑀺𑀢𑀢𑁆𑀢𑀸 𑀢𑀤𑀯𑀺𑀧𑀘𑁆𑀘𑀦𑁄𑀓𑀸𑀲𑁂 𑀧𑀼𑀕𑁆𑀕𑀮𑀲𑁆𑀲 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀓𑀫𑁆𑀫𑀯𑀺𑀜𑁆𑀜𑀸𑀡𑀁 𑀓𑀸𑀮𑀕𑀢𑀺𑀧𑀬𑁄𑀕𑀸𑀤𑀺𑀲𑀳𑀓𑀸𑀭𑀻𑀧𑀘𑁆𑀘𑀬𑀯𑀺𑀓𑀮𑀢𑀸𑀬 𑀅𑀯𑀲𑁂𑀲𑀧𑀘𑁆𑀘𑀬𑀯𑁂𑀓𑀮𑁆𑀮𑀁 𑀤𑀝𑁆𑀞𑀩𑁆𑀩𑀁. 𑀏𑀓𑀘𑁆𑀘𑀘𑀺𑀢𑁆𑀢𑀦𑁆𑀢𑀺 𑀘𑀺𑀢𑁆𑀢𑁂𑀦 𑀓𑀢𑁆𑀢𑀩𑁆𑀩𑀘𑀺𑀢𑁆𑀭𑁂𑀦 𑀏𑀓𑀘𑁆𑀘𑀪𑀽𑀢𑀁 𑀢𑁂𑀦 𑀓𑀢𑁆𑀢𑀩𑁆𑀩𑀘𑀺𑀢𑁆𑀭𑀫𑀸𑀳.

𑀅𑀦𑀼𑀪𑀯𑀺𑀢𑁆𑀯𑀸 𑀪𑀯𑀺𑀢𑁆𑀯𑀸 𑀘 𑀅𑀧𑀕𑀢𑀁 𑀪𑀽𑀢𑀸𑀧𑀕𑀢𑀁. 𑀅𑀦𑀼𑀪𑀽𑀢𑀪𑀽𑀢𑀢𑀸 𑀳𑀺 𑀪𑀽𑀢𑀢𑀸𑀲𑀸𑀫𑀜𑁆𑀜𑁂𑀦 𑀪𑀽𑀢𑀲𑀤𑁆𑀤𑁂𑀦 𑀯𑀼𑀢𑁆𑀢𑀸. 𑀲𑀸𑀫𑀜𑁆𑀜𑀫𑁂𑀯 𑀳𑀺 𑀉𑀧𑀲𑀕𑁆𑀕𑁂𑀦 𑀯𑀺𑀲𑁂𑀲𑀻𑀬𑀢𑀻𑀢𑀺. 𑀅𑀦𑀼𑀪𑀽𑀢𑀲𑀤𑁆𑀤𑁄 𑀘 𑀓𑀫𑁆𑀫𑀯𑀘𑀦𑀺𑀘𑁆𑀙𑀸𑀪𑀸𑀯𑀢𑁄 𑀅𑀦𑀼𑀪𑀯𑀓𑀯𑀸𑀘𑀓𑁄 𑀤𑀝𑁆𑀞𑀩𑁆𑀩𑁄. 𑀯𑀺𑀓𑀧𑁆𑀧𑀕𑀸𑀳𑀯𑀲𑁂𑀦 𑀭𑀸𑀕𑀸𑀤𑀻𑀳𑀺 𑀢𑀩𑁆𑀩𑀺𑀧𑀓𑁆𑀔𑁂𑀳𑀺 𑀘 𑀅𑀓𑀼𑀲𑀮𑀁 𑀓𑀼𑀲𑀮𑀜𑁆𑀘 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀢𑀺, 𑀦 𑀯𑀺𑀧𑀸𑀓𑁄 𑀓𑀫𑁆𑀫𑀯𑁂𑀕𑀓𑁆𑀔𑀺𑀢𑁆𑀢𑀢𑁆𑀢𑀸, 𑀦𑀸𑀧𑀺 𑀓𑀺𑀭𑀺𑀬𑀸 𑀅𑀳𑁂𑀢𑀼𑀓𑀸𑀦𑀁 𑀅𑀢𑀺𑀤𑀼𑀩𑁆𑀩𑀮𑀢𑀸𑀬 𑀲𑀳𑁂𑀢𑀼𑀓𑀸𑀦𑀜𑁆𑀘 𑀔𑀻𑀡𑀓𑀺𑀮𑁂𑀲𑀲𑁆𑀲 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀯𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀅𑀢𑀺𑀲𑀦𑁆𑀢𑀯𑀼𑀢𑁆𑀢𑀺𑀢𑁆𑀢𑀸. 𑀏𑀢𑁆𑀣 𑀘 𑀧𑀼𑀭𑀺𑀫𑀦𑀬𑁂 𑀓𑀼𑀲𑀮𑀸𑀓𑀼𑀲𑀮𑀫𑁂𑀯 𑀯𑀢𑁆𑀢𑀼𑀁 𑀅𑀥𑀺𑀧𑁆𑀧𑀸𑀬𑀯𑀲𑁂𑀦 ‘‘𑀪𑀽𑀢𑀸𑀧𑀕𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀁 ‘‘𑀉𑀧𑁆𑀧𑀦𑁆𑀦𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀉𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀞𑀺𑀢𑀺𑀬𑀸’’𑀢𑀺 (𑀲𑀁. 𑀦𑀺. 𑁫.𑁬𑁫𑁧-𑁬𑁬𑁨; 𑀯𑀺𑀪. 𑁩𑁯𑁦-𑁩𑁯𑁧) 𑀏𑀢𑁆𑀣 𑀉𑀧𑁆𑀧𑀦𑁆𑀦𑀦𑁆𑀢𑀺 𑀕𑀳𑁂𑀢𑁆𑀯𑀸 𑀢𑀁𑀲𑀤𑀺𑀲𑀸𑀦𑀁 𑀧𑀳𑀸𑀦𑀁, 𑀯𑀼𑀤𑁆𑀥𑀺 𑀘 𑀯𑀼𑀢𑁆𑀢𑀸, 𑀧𑀘𑁆𑀙𑀺𑀫𑀦𑀬𑁂 𑀧𑀦 𑀘-𑀲𑀤𑁆𑀤𑁂𑀦 𑀓𑀼𑀲𑀮𑀸𑀓𑀼𑀲𑀮𑀜𑁆𑀘 𑀆𑀓𑀟𑁆𑀠𑀺𑀢𑁆𑀯𑀸 𑀲𑀩𑁆𑀩𑀁 𑀲𑀗𑁆𑀔𑀢𑀁 𑀯𑀼𑀢𑁆𑀢𑀁 𑀪𑀽𑀢𑀸𑀧𑀕𑀢𑀪𑀸𑀯𑀸𑀪𑀺𑀥𑀸𑀦𑀸𑀥𑀺𑀧𑁆𑀧𑀸𑀬𑁂𑀦.

𑀯𑀺𑀧𑀘𑁆𑀘𑀺𑀢𑀼𑀁 𑀑𑀓𑀸𑀲𑀓𑀭𑀡𑀯𑀲𑁂𑀦 𑀉𑀧𑁆𑀧𑀢𑀺𑀢𑀁 𑀅𑀢𑀻𑀢𑀓𑀫𑁆𑀫𑀜𑁆𑀘 𑀢𑀢𑁄 𑀉𑀧𑁆𑀧𑀚𑁆𑀚𑀺𑀢𑀼𑀁 𑀆𑀭𑀤𑁆𑀥𑁄 𑀅𑀦𑀸𑀕𑀢𑁄 𑀯𑀺𑀧𑀸𑀓𑁄 𑀘 ‘‘𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑁄. 𑀬𑀁 𑀉𑀧𑁆𑀧𑀦𑁆𑀦𑀲𑀤𑁆𑀤𑁂𑀦 𑀯𑀺𑀦𑀸𑀧𑀺 𑀯𑀺𑀜𑁆𑀜𑀸𑀬𑀫𑀸𑀦𑀁 𑀉𑀧𑁆𑀧𑀦𑁆𑀦𑀁, 𑀢𑀁 𑀲𑀦𑁆𑀥𑀸𑀬 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀜𑁆𑀘𑁂𑀢𑀦𑀺𑀓𑀸𑀦’’𑀦𑁆𑀢𑀺𑀆𑀤𑀺 (𑀅. 𑀦𑀺. 𑁧𑁦.𑁨𑁧𑁭, 𑁨𑁧𑁯) 𑀯𑀼𑀢𑁆𑀢𑀁. 𑀢𑀸𑀲𑀼 𑀢𑀸𑀲𑀼 𑀪𑀽𑀫𑀻𑀲𑀽𑀢𑀺 𑀫𑀦𑀼𑀲𑁆𑀲𑀤𑁂𑀯𑀸𑀤𑀺𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑁂𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀅𑀦𑀼𑀧𑁆𑀧𑀢𑁆𑀢𑀺𑀅𑀦𑀸𑀧𑀸𑀤𑀺𑀢𑀢𑀸𑀬 𑀅𑀲𑀫𑀽𑀳𑀢𑀁. 𑀏𑀢𑁆𑀣 𑀘 𑀮𑀤𑁆𑀥𑀪𑀽𑀫𑀺𑀓𑀁 ‘‘𑀪𑀽𑀫𑀺𑀮𑀤𑁆𑀥’’𑀦𑁆𑀢𑀺 𑀯𑀼𑀢𑁆𑀢𑀁 𑀅𑀕𑁆𑀕𑀺𑀆𑀳𑀺𑀢𑁄 𑀯𑀺𑀬. 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀲𑀤𑁆𑀤𑁂𑀧𑀺 𑀘 𑀑𑀓𑀸𑀲𑁄 𑀓𑀢𑁄 𑀏𑀢𑁂𑀦𑀸𑀢𑀺, 𑀑𑀓𑀸𑀲𑁄 𑀓𑀢𑁄 𑀏𑀢𑀲𑁆𑀲𑀸𑀢𑀺 𑀘 𑀤𑀼𑀯𑀺𑀥𑀢𑁆𑀣𑁂𑀧𑀺 𑀏𑀯𑀫𑁂𑀯 𑀓𑀢𑀲𑀤𑁆𑀤𑀲𑁆𑀲 𑀧𑀭𑀦𑀺𑀧𑀸𑀢𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀩𑁆𑀩𑀤𑀸 𑀅𑀯𑀢𑁆𑀢𑀫𑀸𑀦𑀫𑁆𑀧𑀺 𑀕𑀫𑀺𑀬𑀘𑀺𑀢𑁆𑀢𑀁 𑀧𑀝𑀺𑀧𑀓𑁆𑀔𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀅𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸 ‘‘𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀦𑁆𑀢𑀭𑀥𑀸𑀧𑁂𑀢𑀻𑀢𑀺 𑀯𑀺𑀓𑁆𑀔𑀫𑁆𑀪𑀺𑀓𑀸 𑀆𑀦𑀸𑀧𑀸𑀦𑀲𑁆𑀲𑀢𑀺 𑀯𑀺𑀓𑁆𑀔𑀫𑁆𑀪𑁂𑀢𑀺. 𑀅𑀦𑁆𑀢𑀭𑀸𑀬𑁂𑀯𑀸𑀢𑀺 𑀪𑀽𑀫𑀺𑀮𑀤𑁆𑀥𑁂 𑀲𑀪𑀽𑀫𑀺𑀬𑀁 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑁂 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀦𑀢𑀻𑀢𑀁 𑀅𑀦𑀦𑀸𑀕𑀢𑀜𑁆𑀘 𑀔𑀡𑀢𑁆𑀢𑀬𑁂𑀓𑀤𑁂𑀲𑀕𑀢𑀫𑁆𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑀁 ‘‘𑀔𑀡𑀢𑁆𑀢𑀬𑀕𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀤𑁂𑀲𑀦𑀸𑀬 𑀧𑀥𑀸𑀦𑁂𑀦 𑀕𑀳𑀺𑀢𑁄 𑀅𑀢𑁆𑀣𑁄 ‘‘𑀲𑀻𑀲’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀮𑁄𑀓𑀺𑀬𑀥𑀫𑁆𑀫𑀜𑁆𑀳𑀺 𑀤𑁂𑀲𑁂𑀢𑀩𑁆𑀩𑀁 𑀧𑀢𑁆𑀯𑀸 𑀤𑁂𑀲𑀦𑀸𑀬 𑀘𑀺𑀢𑁆𑀢𑀁 𑀧𑀼𑀩𑁆𑀩𑀗𑁆𑀕𑀫𑀁 𑀳𑁄𑀢𑀺, 𑀥𑀫𑁆𑀫𑀲𑀪𑀸𑀯𑀁 𑀯𑀸 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀅𑀓𑀼𑀲𑀮𑀸𑀢𑀺 𑀲𑀩𑁆𑀩𑁂𑀧𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸. 𑀘𑁂𑀢𑀦𑀸𑀢𑀺 𑀓𑁂𑀘𑀺. 𑀅𑀓𑀼𑀲𑀮𑀪𑀸𑀕𑀺𑀬𑀸𑀢𑀺 𑀭𑀸𑀕𑀸𑀤𑀬𑁄 𑀏𑀓𑀦𑁆𑀢𑀅𑀓𑀼𑀲𑀮𑀸. 𑀅𑀓𑀼𑀲𑀮𑀧𑀓𑁆𑀔𑀺𑀓𑀸𑀢𑀺 𑀨𑀲𑁆𑀲𑀸𑀤𑀬𑁄𑀧𑀺 𑀢𑀧𑁆𑀧𑀓𑁆𑀔𑀺𑀓𑀸. 𑀫𑀦𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀲𑀳𑀚𑀸𑀢𑁄𑀧𑀺 𑀫𑀦𑁄 𑀲𑀫𑁆𑀧𑀬𑀼𑀢𑁆𑀢𑁂 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀅𑀥𑀺𑀧𑀢𑀺𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑁄 𑀧𑀞𑀫𑀁 𑀉𑀧𑁆𑀧𑀦𑁆𑀦𑁄 𑀯𑀺𑀬 𑀳𑁄𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑁄. 𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀢𑀤𑀦𑀼𑀯𑀢𑁆𑀢𑀦𑀢𑀸𑀬 𑀅𑀦𑁆𑀯𑀤𑁂𑀯 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀯𑀼𑀢𑁆𑀢𑀸, 𑀅𑀦𑀦𑁆𑀢𑀭𑀧𑀘𑁆𑀘𑀬𑀫𑀦𑀁 𑀯𑀸 𑀲𑀦𑁆𑀥𑀸𑀬 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀢𑀸 𑀯𑀼𑀢𑁆𑀢𑀸. 𑀘𑀺𑀢𑁆𑀢𑁂𑀦 𑀦𑀻𑀬𑀢𑀻𑀢𑀺 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀬𑀸𑀳, 𑀢𑀡𑁆𑀳𑀸𑀲𑀫𑁆𑀧𑀬𑀼𑀢𑁆𑀢𑀁 𑀯𑀸. 𑀧𑀪𑀲𑁆𑀲𑀭𑀦𑁆𑀢𑀺 𑀲𑀪𑀸𑀯𑀧𑀡𑁆𑀟𑀭𑀢𑀁 𑀲𑀦𑁆𑀥𑀸𑀬𑀸𑀳. 𑀅𑀭𑀓𑁆𑀔𑀺𑀢𑁂𑀢𑀺 𑀲𑀢𑀺𑀬𑀸 𑀅𑀦𑀼𑀦𑀬𑀧𑀝𑀺𑀖𑀸𑀤𑀻𑀳𑀺 𑀅𑀭𑀓𑁆𑀔𑀺𑀢𑁂, 𑀭𑀸𑀕𑀸𑀤𑀻𑀳𑀺 𑀩𑁆𑀬𑀸𑀧𑀦𑁆𑀦𑁂, 𑀢𑁂𑀳𑀺 𑀏𑀯 𑀅𑀯𑀲𑁆𑀲𑀼𑀢𑁂. 𑀘𑀺𑀢𑁆𑀢𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑀪𑀸𑀯𑀲𑀸𑀥𑀦𑁂 𑀅𑀜𑁆𑀜𑀫𑀜𑁆𑀜𑀁 𑀩𑀮𑀤𑀸𑀦𑀯𑀲𑁂𑀦 𑀲𑀼𑀢𑁆𑀢𑀸𑀦𑀼𑀭𑀓𑁆𑀔𑀡𑀁, 𑀇𑀥 𑀯𑀸 𑀉𑀧𑀲𑀁𑀳𑀢𑀸𑀦𑀁 𑀆𑀪𑀺𑀥𑀫𑁆𑀫𑀺𑀓𑁂𑀳𑀺 𑀯𑀺𑀜𑁆𑀜𑀸𑀢𑀸𑀦𑀁 𑀘𑀺𑀭𑀓𑀸𑀮𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀓𑀢𑀭𑀧𑀜𑁆𑀜𑀁 𑀢𑁆𑀯𑀦𑁆𑀢𑀺𑀆𑀤𑀺 𑀦 𑀧𑀸𑀴𑀺𑀆𑀭𑀼𑀴𑁆𑀳𑀁, 𑀏𑀯𑀁 𑀪𑀕𑀯𑀸 𑀧𑀼𑀘𑁆𑀙𑀢𑀻𑀢𑀺 𑀅𑀝𑁆𑀞𑀓𑀣𑀸𑀬𑀫𑁂𑀯 𑀯𑀼𑀢𑁆𑀢𑀁. 𑀧𑀜𑁆𑀜𑀸 𑀧𑀦 𑀓𑀺𑀫𑀢𑁆𑀣𑀺𑀬𑀸𑀢𑀺 𑀇𑀤𑀫𑁆𑀧𑀺 𑀏𑀓𑀁 𑀲𑀼𑀢𑁆𑀢𑀁. ‘‘𑀅𑀪𑀺𑀜𑁆𑀜𑀢𑁆𑀣𑀸 𑀧𑀭𑀺𑀜𑁆𑀜𑀢𑁆𑀣𑀸 𑀧𑀳𑀸𑀦𑀢𑁆𑀣𑀸’’𑀢𑀺 𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀁.

𑀲𑀸𑀢𑀦𑁆𑀢𑀺 𑀲𑀪𑀸𑀯𑀯𑀲𑁂𑀦 𑀯𑀼𑀢𑁆𑀢𑀁, 𑀫𑀥𑀼𑀭𑀦𑁆𑀢𑀺 𑀫𑀥𑀼𑀭𑀁 𑀯𑀺𑀬𑀸𑀢𑀺 𑀉𑀧𑀫𑀸𑀯𑀲𑁂𑀦. 𑀧𑁄𑀦𑁄𑀩𑁆𑀪𑀯𑀺𑀓𑀸𑀢𑀺 𑀧𑀼𑀦𑀩𑁆𑀪𑀯𑀓𑀭𑀡𑀲𑀻𑀮𑀸. 𑀢𑀢𑁆𑀭𑀢𑀢𑁆𑀭𑀸𑀪𑀺𑀦𑀦𑁆𑀤𑀦𑀢𑁄 𑀦𑀦𑁆𑀤𑀻, 𑀦𑀦𑁆𑀤𑀺𑀪𑀽𑀢𑁄 𑀭𑀸𑀕𑁄 𑀦𑀦𑁆𑀤𑀺𑀭𑀸𑀕𑁄, 𑀦𑀦𑁆𑀤𑀺𑀭𑀸𑀕𑀪𑀸𑀯𑁂𑀦 𑀲𑀳𑀕𑀢𑀸𑀢𑀺 𑀦𑀦𑁆𑀤𑀺𑀭𑀸𑀕𑀲𑀳𑀕𑀢𑀸𑀢𑀺 𑀦 𑀏𑀢𑁆𑀣 𑀲𑀫𑁆𑀧𑀬𑁄𑀕𑀯𑀲𑁂𑀦 𑀲𑀳𑀕𑀢𑀪𑀸𑀯𑁄 𑀅𑀢𑁆𑀣𑀻𑀢𑀺 𑀲𑀳𑀕𑀢𑀲𑀤𑁆𑀤𑁄 𑀢𑀡𑁆𑀳𑀸𑀬 𑀦𑀦𑁆𑀤𑀺𑀭𑀸𑀕𑀪𑀸𑀯𑀁 𑀚𑁄𑀢𑁂𑀢𑀺. 𑀦𑀦𑁆𑀤𑀺𑀭𑀸𑀕𑀪𑀽𑀢𑀸𑀢𑀺 𑀘𑀲𑁆𑀲 𑀅𑀢𑁆𑀣𑁄. 𑀦𑀺𑀲𑁆𑀲𑀬𑁂𑀢𑀺 𑀧𑀸𑀤𑀓𑁂. 𑀭𑀽𑀧𑀸𑀭𑀽𑀧𑀸𑀭𑀫𑁆𑀫𑀡𑀸𑀦𑀦𑁆𑀢𑀺 𑀧𑀣𑀯𑀻𑀓𑀲𑀺𑀡𑀸𑀤𑀺𑀆𑀓𑀸𑀲𑀸𑀤𑀺𑀆𑀭𑀫𑁆𑀫𑀡𑀸𑀦𑀁. 𑀲𑀁𑀲𑀝𑁆𑀞𑁂𑀢𑀺 𑀔𑀻𑀭𑁄𑀤𑀓𑀁 𑀯𑀺𑀬 𑀲𑀫𑁄𑀤𑀺𑀢𑁂 𑀏𑀓𑀻𑀪𑀸𑀯𑀫𑀺𑀯 𑀕𑀢𑁂. 𑀲𑀳𑀚𑀸𑀢𑁂𑀢𑀺 𑀲𑀫𑁆𑀧𑀬𑀼𑀢𑁆𑀢𑀲𑀳𑀚𑀸𑀢𑁂, 𑀦 𑀲𑀳𑀚𑀸𑀢𑀫𑀢𑁆𑀢𑁂. 𑀇𑀥𑀸𑀧𑀻𑀢𑀺 ‘‘𑀇𑀫𑀲𑁆𑀫𑀺𑀫𑁆𑀧𑀺 𑀧𑀤𑁂 𑀅𑀬𑀫𑁂𑀯 𑀅𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄’’𑀢𑀺 𑀇𑀫𑀺𑀲𑁆𑀲𑀸 𑀅𑀝𑁆𑀞𑀓𑀣𑀸𑀬 𑀬𑀣𑀸𑀤𑀲𑁆𑀲𑀺𑀢𑀲𑀁𑀲𑀝𑁆𑀞𑀲𑀤𑁆𑀤𑁄 𑀲𑀳𑀚𑀸𑀢𑁂 𑀅𑀥𑀺𑀧𑁆𑀧𑁂𑀢𑁄𑀢𑀺. 𑀅𑀭𑀽𑀧𑀁 𑀭𑀽𑀧𑁂𑀦𑀸𑀢𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀢𑁆𑀣𑀼𑀦𑀸. 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁄𑀢𑀺 𑀅𑀦𑀯𑀲𑁂𑀲𑀲𑀗𑁆𑀕𑀳𑁂𑀦 𑀓𑀢𑁄 𑀅𑀢𑀺𑀲𑀬𑀦𑀺𑀤𑁆𑀤𑁂𑀲𑁄.

𑀅𑀦𑀸𑀪𑀝𑁆𑀞𑀢𑀸𑀬𑁂𑀯𑀸𑀢𑀺 ‘‘𑀤𑀺𑀝𑁆𑀞𑀁 𑀲𑀼𑀢’’𑀦𑁆𑀢𑀺𑀆𑀤𑀻𑀲𑀼 𑀤𑀺𑀝𑁆𑀞𑀢𑀸𑀤𑀬𑁄 𑀯𑀺𑀬 𑀅𑀪𑀸𑀲𑀺𑀢𑀩𑁆𑀩𑀢𑀸 𑀅𑀦𑀸𑀪𑀝𑁆𑀞𑀢𑀸. 𑀲𑀩𑁆𑀩𑀸𑀓𑀸𑀭𑁂𑀦 𑀲𑀤𑀺𑀲𑀲𑁆𑀲 𑀤𑀼𑀢𑀺𑀬𑀘𑀺𑀢𑁆𑀢𑀲𑁆𑀲 𑀲𑀲𑀗𑁆𑀔𑀸𑀭𑀺𑀓𑀢𑀸𑀯𑀘𑀦𑁂𑀦 𑀇𑀫𑀲𑁆𑀲 𑀅𑀲𑀗𑁆𑀔𑀸𑀭𑀺𑀓𑀢𑀸 𑀯𑀺𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀅𑀪𑀸𑀲𑀺𑀢𑀩𑁆𑀩𑀢𑀸𑀬 𑀦 𑀕𑀳𑀺𑀢𑁄𑀢𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀅𑀥𑀺𑀧𑁆𑀧𑀸𑀬𑁄 𑀧𑀦 𑀧𑀸𑀴𑀺𑀬𑀁 𑀅𑀪𑀸𑀲𑀺𑀢𑀢𑁆𑀢𑀸 𑀏𑀯 𑀢𑀢𑁆𑀣 𑀤𑁂𑀲𑁂𑀢𑀩𑁆𑀩𑀪𑀸𑀯𑁂𑀦 𑀦 𑀕𑀳𑀺𑀢𑁄 𑀦 𑀲𑀗𑁆𑀕𑀳𑀺𑀢𑁄 𑀦 𑀢𑀲𑁆𑀲𑀢𑁆𑀣𑀲𑁆𑀲 𑀅𑀪𑀸𑀯𑀸𑀢𑀺. 𑀅𑀣 𑀯𑀸 𑀧𑀸𑀴𑀺𑀬𑀁 𑀅𑀦𑀸𑀪𑀝𑁆𑀞𑀢𑀸𑀬 𑀏𑀯 𑀅𑀝𑁆𑀞𑀓𑀣𑀸𑀬𑀁 𑀦 𑀕𑀳𑀺𑀢𑁄 𑀦 𑀢𑀲𑁆𑀲𑀢𑁆𑀣𑁄 𑀯𑀼𑀢𑁆𑀢𑁄. 𑀦𑀺𑀬𑀫𑁂𑀢𑁆𑀯𑀸𑀯𑀸𑀢𑀺 𑀧𑀭𑀢𑁄 𑀏𑀯𑀁𑀯𑀺𑀥𑀲𑁆𑀲𑁂𑀯 𑀲𑀲𑀗𑁆𑀔𑀸𑀭𑀺𑀓𑀪𑀸𑀯𑀯𑀘𑀦𑀢𑁄 𑀇𑀥 𑀢𑀤𑀯𑀘𑀦𑁂𑀦𑁂𑀯 𑀅𑀲𑀗𑁆𑀔𑀸𑀭𑀺𑀓𑀪𑀸𑀯𑀁 𑀦𑀺𑀬𑀫𑁂𑀢𑁆𑀯𑀸.

𑀫𑀦𑁄𑀯𑀺𑀜𑁆𑀜𑀸𑀡𑀦𑁆𑀢𑀺 𑀏𑀢𑁆𑀣 𑀤𑁆𑀯𑀸𑀭𑀁 𑀯𑀢𑁆𑀣𑀽𑀢𑀺 𑀯𑀼𑀢𑁆𑀢𑀁, 𑀤𑁆𑀯𑀸𑀭𑁂𑀦 𑀯𑀸 𑀢𑀁𑀲𑀳𑀸𑀬𑀪𑀽𑀢𑀁 𑀳𑀤𑀬𑀯𑀢𑁆𑀣𑀼 𑀯𑀼𑀢𑁆𑀢𑀁. 𑀲𑀭𑀲𑀪𑀸𑀯𑁂𑀦𑀸𑀢𑀺 𑀲𑀓𑀺𑀘𑁆𑀘𑀪𑀸𑀯𑁂𑀦. 𑀅𑀯𑀺𑀚𑁆𑀚𑀸 𑀳𑀺 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀪𑀸𑀯𑀓𑀺𑀘𑁆𑀘𑀸, 𑀅𑀜𑁆𑀜𑀸𑀲𑀸𑀥𑀸𑀭𑀡𑁄 𑀯𑀸 𑀭𑀲𑀺𑀢𑀩𑁆𑀩𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀪𑀸𑀯𑁄 𑀲𑀭𑀲𑀪𑀸𑀯𑁄, 𑀅𑀯𑀺𑀚𑁆𑀚𑀸𑀲𑀪𑀸𑀯𑁄 𑀲𑀗𑁆𑀔𑀸𑀭𑀲𑀪𑀸𑀯𑁄𑀢𑀺 𑀏𑀯𑀫𑀸𑀤𑀺𑀓𑁄. ‘‘𑀲𑀭𑀲𑀲𑀪𑀸𑀯𑁂𑀦𑀸’’𑀢𑀺𑀧𑀺 𑀧𑀸𑀞𑁄, 𑀲𑁄𑀬𑁂𑀯 𑀅𑀢𑁆𑀣𑁄. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸𑀢𑀺 𑀯𑀸 𑀲𑀭𑀲𑁂𑀦, 𑀲𑀗𑁆𑀔𑀸𑀭𑀸𑀢𑀺 𑀲𑀪𑀸𑀯𑁂𑀦.

𑀏𑀓𑀲𑀫𑀼𑀝𑁆𑀞𑀸𑀦𑀸𑀤𑀺𑀢𑀸 𑀭𑀽𑀧𑀥𑀫𑁆𑀫𑁂𑀲𑀼 𑀏𑀯 𑀬𑁄𑀚𑁂𑀢𑀩𑁆𑀩𑀸 𑀢𑁂𑀲𑀼 𑀢𑀩𑁆𑀩𑁄𑀳𑀸𑀭𑀩𑀸𑀳𑀼𑀮𑁆𑀮𑀢𑁄. 𑀅𑀢𑀻𑀢𑀸𑀤𑀺𑀪𑀸𑀯𑁄 𑀭𑀽𑀧𑀸𑀭𑀽𑀧𑀥𑀫𑁆𑀫𑁂𑀲𑀼, 𑀘𑀺𑀢𑁆𑀢𑀘𑁂𑀢𑀲𑀺𑀓𑀦𑀺𑀩𑁆𑀩𑀸𑀦𑀸𑀦𑀫𑁆𑀧𑀺 𑀯𑀸 𑀬𑀣𑀸𑀲𑀪𑀸𑀯𑀁 𑀏𑀓𑀤𑁆𑀯𑀺𑀦𑀓𑀼𑀢𑁄𑀘𑀺𑀲𑀫𑀼𑀝𑁆𑀞𑀸𑀦𑀢𑀸 𑀬𑁄𑀚𑁂𑀢𑀩𑁆𑀩𑀸. 𑀅𑀦𑀸𑀧𑀸𑀣𑀕𑀢𑀸𑀢𑀺 𑀘𑀓𑁆𑀔𑀸𑀤𑀻𑀦𑀁 𑀅𑀕𑁄𑀘𑀭𑀕𑀢𑀸 𑀲𑀼𑀔𑀼𑀫𑀭𑀚𑀸𑀤𑀺𑀭𑀽𑀧𑀁 𑀯𑀺𑀬 𑀯𑀢𑁆𑀣𑀼𑀧𑀭𑀺𑀢𑁆𑀢𑀢𑀸𑀬 𑀢𑀢𑁆𑀢𑀸𑀬𑁄𑀕𑀼𑀴𑁂 𑀧𑀢𑀺𑀢𑁄𑀤𑀓𑀩𑀺𑀦𑁆𑀤𑀼𑀭𑀽𑀧𑀁 𑀯𑀺𑀬 𑀔𑀡𑀧𑀭𑀺𑀢𑁆𑀢𑀢𑀸𑀬 𑀅𑀢𑀺𑀤𑀽𑀭𑀢𑀸𑀬 𑀅𑀘𑁆𑀘𑀸𑀲𑀦𑁆𑀦𑀸𑀤𑀺𑀢𑀸𑀬 𑀅𑀢𑀻𑀢𑀸𑀦𑀸𑀕𑀢𑀢𑀸𑀬 𑀘. 𑀯𑀺𑀲𑀬𑁄 𑀅𑀦𑀜𑁆𑀜𑀢𑁆𑀣𑀪𑀸𑀯𑁂𑀦, 𑀕𑁄𑀘𑀭𑁄 𑀘 𑀢𑀢𑁆𑀣 𑀘𑀭𑀡𑁂𑀦 𑀯𑀼𑀢𑁆𑀢𑁄, 𑀢𑀩𑁆𑀩𑀺𑀲𑀬𑀦𑀺𑀘𑁆𑀙𑀬𑁂𑀦 𑀫𑀦𑁄 𑀧𑀝𑀺𑀲𑀭𑀡𑀁. 𑀅𑀬𑀫𑀢𑁆𑀣𑁄 𑀲𑀺𑀤𑁆𑀥𑁄 𑀳𑁄𑀢𑀺 𑀅𑀜𑁆𑀜𑀣𑀸 𑀢𑁂𑀲𑀁 𑀥𑀫𑁆𑀫𑀸𑀭𑀫𑁆𑀫𑀡𑀪𑀸𑀯𑁂𑀦 ‘‘𑀦𑁂𑀲𑀁 𑀕𑁄𑀘𑀭𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀢𑀻’’𑀢𑀺 𑀯𑀘𑀦𑀲𑁆𑀲 𑀅𑀦𑀼𑀧𑀧𑀢𑁆𑀢𑀺𑀢𑁄. 𑀤𑀺𑀩𑁆𑀩𑀘𑀓𑁆𑀔𑀼𑀤𑀺𑀩𑁆𑀩𑀲𑁄𑀢𑀇𑀤𑁆𑀥𑀺𑀯𑀺𑀥𑀜𑀸𑀡𑁂𑀳𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀅𑀦𑀸𑀧𑀸𑀣𑀕𑀢𑀸𑀦𑀺 𑀭𑀽𑀧𑀸𑀤𑀻𑀦𑀺 𑀆𑀮𑀫𑁆𑀩𑀺𑀬𑀫𑀸𑀦𑀸𑀦𑀺 𑀦 𑀥𑀫𑁆𑀫𑀸𑀭𑀫𑁆𑀫𑀡𑀦𑁆𑀢𑀺 𑀓𑀢𑁆𑀣𑀘𑀺 𑀯𑀼𑀘𑁆𑀘𑀫𑀸𑀦𑀸𑀦𑀺 𑀤𑀺𑀝𑁆𑀞𑀸𑀦𑀺, 𑀇𑀢𑀭𑀣𑀸 𑀘 𑀤𑀺𑀝𑁆𑀞𑀸𑀦𑀺 ‘‘𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀻’’𑀢𑀺𑀆𑀤𑀻𑀲𑀽𑀢𑀺.

𑀆𑀧𑀸𑀣𑀫𑀸𑀕𑀘𑁆𑀙𑀢𑀺 𑀫𑀦𑀲𑀸 𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀳𑀺 𑀘 𑀕𑀳𑁂𑀢𑀩𑁆𑀩𑀪𑀸𑀯𑀽𑀧𑀕𑀫𑀦𑁂𑀦. 𑀖𑀝𑁆𑀝𑁂𑀢𑁆𑀯𑀸𑀢𑀺 𑀧𑀝𑀺𑀫𑀼𑀔𑀪𑀸𑀯𑀸𑀧𑀸𑀣𑀁 𑀕𑀦𑁆𑀢𑁆𑀯𑀸. 𑀲𑀭𑀪𑀸𑀡𑀓𑀲𑁆𑀲 𑀑𑀲𑀸𑀭𑀓𑀲𑁆𑀲. 𑀧𑀓𑀢𑀺𑀬𑀸 𑀤𑀺𑀝𑁆𑀞𑀸𑀤𑀺𑀯𑀲𑁂𑀦 𑀆𑀧𑀸𑀣𑀕𑀫𑀦𑀜𑁆𑀘 𑀪𑁄𑀚𑀦𑀧𑀭𑀺𑀡𑀸𑀫𑀉𑀢𑀼𑀪𑁄𑀚𑀦𑀯𑀺𑀲𑁂𑀲𑀉𑀲𑁆𑀲𑀸𑀳𑀸𑀤𑀻𑀳𑀺 𑀓𑀮𑁆𑀬𑀁, 𑀭𑁄𑀕𑀺𑀦𑁄 𑀯𑀸𑀢𑀸𑀤𑀻𑀳𑀺 𑀘 𑀉𑀧𑀤𑁆𑀤𑀼𑀢𑀁 𑀯𑀸 𑀓𑀸𑀬𑀁 𑀅𑀦𑀼𑀯𑀢𑁆𑀢𑀦𑁆𑀢𑀲𑁆𑀲 𑀚𑀸𑀕𑀭𑀲𑁆𑀲 𑀪𑀯𑀗𑁆𑀕𑀲𑁆𑀲 𑀘𑀮𑀦𑀧𑀘𑁆𑀘𑀬𑀸𑀦𑀁 𑀓𑀸𑀬𑀺𑀓𑀲𑀼𑀔𑀤𑀼𑀓𑁆𑀔𑀉𑀢𑀼𑀪𑁄𑀚𑀦𑀸𑀤𑀺𑀉𑀧𑀦𑀺𑀲𑁆𑀲𑀬𑀸𑀦𑀁 𑀘𑀺𑀢𑁆𑀢𑀧𑀡𑀺𑀤𑀳𑀦𑀲𑀤𑀺𑀲𑀸𑀲𑀤𑀺𑀲𑀲𑀫𑁆𑀩𑀦𑁆𑀥𑀤𑀲𑁆𑀲𑀦𑀸𑀤𑀺𑀧𑀘𑁆𑀘𑀬𑀸𑀦𑀁, 𑀲𑀼𑀢𑁆𑀢𑀲𑁆𑀲 𑀘 𑀲𑀼𑀧𑀺𑀦𑀤𑀲𑁆𑀲𑀦𑁂 𑀥𑀸𑀢𑀼𑀓𑁆𑀔𑁄𑀪𑀸𑀤𑀺𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀤𑀺𑀝𑁆𑀞𑀲𑁆𑀲 𑀅𑀲𑀼𑀢𑀲𑁆𑀲 𑀅𑀦𑀸𑀕𑀢𑀩𑀼𑀤𑁆𑀥𑀭𑀽𑀧𑀸𑀤𑀺𑀦𑁄 𑀧𑀲𑀸𑀤𑀤𑀸𑀢𑀼𑀓𑀸𑀫𑀢𑀸𑀯𑀢𑁆𑀣𑀼𑀲𑁆𑀲 𑀢𑀁𑀲𑀤𑀺𑀲𑀢𑀸𑀲𑀗𑁆𑀔𑀸𑀢𑁂𑀦 𑀤𑀺𑀝𑁆𑀞𑀲𑀼𑀢𑀲𑀫𑁆𑀩𑀦𑁆𑀥𑁂𑀦𑁂𑀯. 𑀦 𑀓𑁂𑀯𑀮𑀁 𑀢𑀁𑀲𑀤𑀺𑀲𑀢𑀸𑀯 𑀉𑀪𑀬𑀲𑀫𑁆𑀩𑀦𑁆𑀥𑁄, 𑀓𑀺𑀦𑁆𑀢𑀼 𑀢𑀩𑁆𑀩𑀺𑀧𑀓𑁆𑀔𑀢𑀸 𑀢𑀤𑁂𑀓𑀤𑁂𑀲𑀢𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀢𑀸𑀤𑀺𑀓𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀦𑀘𑀺 𑀯𑀼𑀢𑁆𑀢𑁂 𑀓𑀺𑀲𑁆𑀫𑀺𑀜𑁆𑀘𑀺 𑀲𑀼𑀢𑁂 𑀅𑀯𑀺𑀘𑀸𑀭𑁂𑀢𑁆𑀯𑀸 𑀲𑀤𑁆𑀤𑀳𑀦𑀁 𑀲𑀤𑁆𑀥𑀸, 𑀲𑀬𑀫𑁂𑀯 𑀢𑀁 𑀯𑀺𑀘𑀸𑀭𑁂𑀢𑁆𑀯𑀸 𑀭𑁄𑀘𑀦𑀁 𑀭𑀼𑀘𑀺, ‘‘𑀏𑀯𑀁 𑀯𑀸 𑀏𑀯𑀁 𑀯𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀓𑀸𑀭𑀯𑀺𑀘𑀸𑀭𑀡𑀁 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁄, 𑀯𑀺𑀘𑀸𑀭𑁂𑀦𑁆𑀢𑀲𑁆𑀲 𑀓𑀢𑁆𑀣𑀘𑀺 𑀤𑀺𑀝𑁆𑀞𑀺𑀬𑀸 𑀦𑀺𑀚𑁆𑀛𑀸𑀦𑀓𑁆𑀔𑀫𑀦𑀁 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺.

𑀕𑁂𑀭𑀼𑀓𑀳𑀭𑀺𑀢𑀸𑀮𑀜𑁆𑀚𑀦𑀸𑀤𑀺𑀥𑀸𑀢𑀽𑀲𑀼. 𑀲𑀼𑀪𑀦𑀺𑀫𑀺𑀢𑁆𑀢𑀁 𑀲𑀼𑀪𑀕𑁆𑀕𑀳𑀡𑀲𑁆𑀲 𑀦𑀺𑀫𑀺𑀢𑁆𑀢𑀁. 𑀢𑀁 𑀲𑀼𑀪𑀦𑀺𑀫𑀺𑀢𑁆𑀢𑀢𑁆𑀢𑀸 𑀭𑀜𑁆𑀚𑀦𑀻𑀬𑀢𑁆𑀢𑀸 𑀘 𑀮𑁄𑀪𑀲𑁆𑀲 𑀯𑀢𑁆𑀣𑀼. 𑀦𑀺𑀬𑀫𑀺𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀦𑀺𑀬𑀫𑀺𑀢𑀯𑀲𑁂𑀦. 𑀏𑀯𑀫𑀺𑀢𑀭𑁂𑀲𑀼 𑀤𑁆𑀯𑀻𑀲𑀼. 𑀆𑀪𑁄𑀕𑁄 𑀆𑀪𑀼𑀚𑀺𑀢𑀁. 𑀮𑀽𑀔𑀧𑀼𑀕𑁆𑀕𑀮𑀸 𑀤𑁄𑀲𑀩𑀳𑀼𑀮𑀸. 𑀅𑀤𑁄𑀲𑀩𑀳𑀼𑀮𑀸 𑀲𑀺𑀦𑀺𑀤𑁆𑀥𑀧𑀼𑀕𑁆𑀕𑀮𑀸. 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺 𑀧𑀻𑀢𑀺𑀦𑀺𑀦𑁆𑀦𑀘𑀺𑀢𑁆𑀢𑀢𑀸. 𑀇𑀫𑁂𑀳𑀺…𑀧𑁂… 𑀯𑁂𑀤𑀺𑀢𑀩𑁆𑀩𑁄 𑀧𑀻𑀢𑀺𑀬𑀸 𑀲𑁄𑀫𑀦𑀲𑁆𑀲𑀯𑀺𑀧𑁆𑀧𑀬𑁄𑀕𑀸𑀲𑀫𑁆𑀪𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀚𑀻𑀯𑀺𑀢𑀯𑀼𑀢𑁆𑀢𑀺𑀬𑀸 𑀆𑀬𑀢𑀦𑀪𑀸𑀯𑀢𑁄 𑀳𑀢𑁆𑀣𑀸𑀭𑁄𑀳𑀸𑀤𑀺𑀲𑀺𑀧𑁆𑀧𑀫𑁂𑀯 𑀲𑀺𑀧𑁆𑀧𑀸𑀬𑀢𑀦𑀁. 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀫𑁂𑀯 𑀓𑀫𑁆𑀫𑀸𑀬𑀢𑀦𑀁. 𑀆𑀬𑀼𑀯𑁂𑀤𑀸𑀤𑀺𑀯𑀺𑀚𑁆𑀚𑀸 𑀏𑀯 𑀯𑀺𑀚𑁆𑀚𑀸𑀝𑁆𑀞𑀸𑀦𑀁. 𑀅𑀩𑁆𑀬𑀸𑀧𑀚𑁆𑀚𑁂𑀢𑀺 𑀤𑁄𑀫𑀦𑀲𑁆𑀲𑀩𑁆𑀬𑀸𑀧𑀸𑀤𑀭𑀳𑀺𑀢𑁂 𑀭𑀽𑀧𑀪𑀯𑁂. 𑀥𑀫𑁆𑀫𑀧𑀤𑀸𑀢𑀺 𑀥𑀫𑁆𑀫𑀓𑁄𑀝𑁆𑀞𑀸𑀲𑀸. 𑀧𑀺𑀮𑀯𑀦𑁆𑀢𑀻𑀢𑀺 𑀉𑀧𑀝𑁆𑀞𑀳𑀦𑁆𑀢𑀺 𑀧𑀤𑀺𑀲𑁆𑀲𑀦𑁆𑀢𑀺. 𑀬𑁄𑀕𑀸𑀢𑀺 𑀪𑀸𑀯𑀦𑀸𑀪𑀺𑀬𑁄𑀕𑀸 𑀲𑀫𑀸𑀥𑀺𑀢𑁄. 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸𑀢𑀺 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀁 𑀯𑀢𑁆𑀣𑀽𑀦𑀁 𑀦𑀺𑀫𑁆𑀫𑀮𑀪𑀸𑀯𑀓𑀺𑀭𑀺𑀬𑀸. 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀜𑁆𑀜𑀫𑀜𑁆𑀜𑀸𑀦𑀢𑀺𑀯𑀢𑁆𑀢𑀦𑀁 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀢𑀸. 𑀕𑀫𑁆𑀪𑀻𑀭𑀸𑀦𑀁 𑀜𑀸𑀡𑁂𑀦 𑀘𑀭𑀺𑀢𑀩𑁆𑀩𑀸𑀦𑀁, 𑀕𑀫𑁆𑀪𑀻𑀭𑀜𑀸𑀡𑁂𑀦 𑀯𑀸 𑀘𑀭𑀺𑀢𑀩𑁆𑀩𑀸𑀦𑀁 𑀲𑀼𑀢𑁆𑀢𑀦𑁆𑀢𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀸 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀧𑀘𑁆𑀘𑀯𑁂𑀓𑁆𑀔𑀡𑀸.

𑀯𑀁𑀲𑁄𑀢𑀺 𑀅𑀦𑀼𑀓𑁆𑀓𑀫𑁄. 𑀢𑀦𑁆𑀢𑀻𑀢𑀺 𑀲𑀦𑁆𑀢𑀢𑀺. 𑀧𑀯𑁂𑀡𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀫𑁂𑀢𑀁 𑀘𑀸𑀭𑀺𑀢𑁆𑀢𑀓𑀺𑀭𑀺𑀬𑀸𑀧𑀩𑀦𑁆𑀥𑀲𑁆𑀲 𑀯𑀘𑀦𑀁. 𑀘𑀸𑀭𑀺𑀢𑁆𑀢𑀲𑀻𑀮𑀢𑁆𑀢𑀸 𑀲𑀻𑀮𑀫𑀬𑀁. ‘‘𑀤𑀲𑁆𑀲𑀸𑀫𑀻’’𑀢𑀺 𑀯𑀘𑀻𑀪𑁂𑀤𑁂𑀦 𑀯𑀢𑁆𑀣𑀼𑀲𑁆𑀲 𑀧𑀭𑀺𑀡𑀢𑀢𑁆𑀢𑀸 𑀢𑀢𑁄 𑀧𑀝𑁆𑀞𑀸𑀬 𑀤𑀸𑀦𑀁 𑀆𑀭𑀤𑁆𑀥𑀁 𑀦𑀸𑀫 𑀳𑁄𑀢𑀺, 𑀬𑀢𑁄 𑀢𑀲𑁆𑀲 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀦𑀸𑀤𑀻𑀲𑀼 𑀆𑀧𑀢𑁆𑀢𑀺 𑀳𑁄𑀢𑀺. 𑀯𑀺𑀚𑁆𑀚𑀫𑀸𑀦𑀯𑀢𑁆𑀣𑀼𑀲𑁆𑀫𑀺𑀁 𑀘𑀺𑀦𑁆𑀢𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀤𑀸𑀦𑀁 𑀆𑀭𑀤𑁆𑀥𑀦𑁆𑀢𑀺 𑀢𑀢𑁆𑀣 𑀤𑀸𑀦𑀫𑀬𑀁 𑀓𑀼𑀲𑀮𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀤𑀸𑀦𑀯𑀢𑁆𑀣𑀼𑀁 𑀅𑀯𑀺𑀚𑁆𑀚𑀫𑀸𑀦𑀓𑀫𑁆𑀧𑀺 𑀲𑀗𑁆𑀔𑀭𑁄𑀦𑁆𑀢𑀲𑁆𑀲 𑀓𑀼𑀲𑀮𑀁 𑀦 𑀳𑁄𑀢𑀻𑀢𑀺. 𑀢𑀁 𑀧𑀦 𑀤𑀸𑀦𑀫𑀬𑀲𑁆𑀲 𑀧𑀼𑀩𑁆𑀩𑀪𑀸𑀕𑁄𑀢𑀺 𑀢𑀤𑁂𑀯 𑀪𑀚𑁂𑀬𑁆𑀬, 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁. 𑀓𑀼𑀮𑀯𑀁𑀲𑀸𑀤𑀺𑀯𑀲𑁂𑀦𑀸𑀢𑀺 𑀉𑀤𑀸𑀳𑀭𑀡𑀫𑀢𑁆𑀢𑀫𑁂𑀯𑁂𑀢𑀁. 𑀅𑀢𑁆𑀢𑀦𑀸 𑀲𑀫𑀸𑀤𑀺𑀦𑁆𑀦𑀯𑀢𑁆𑀢𑀯𑀲𑁂𑀦 𑀲𑀧𑁆𑀧𑀼𑀭𑀺𑀲𑀯𑀢𑁆𑀢𑀕𑀸𑀫𑀚𑀦𑀧𑀤𑀯𑀢𑁆𑀢𑀸𑀤𑀺𑀯𑀲𑁂𑀦 𑀘 𑀘𑀸𑀭𑀺𑀢𑁆𑀢𑀲𑀻𑀮𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀲𑀯𑀢𑁆𑀣𑀼𑀓𑀦𑁆𑀢𑀺 𑀪𑁂𑀭𑀺𑀆𑀤𑀺𑀯𑀢𑁆𑀣𑀼𑀲𑀳𑀺𑀢𑀁 𑀓𑀢𑁆𑀯𑀸. 𑀯𑀺𑀚𑁆𑀚𑀫𑀸𑀦𑀓𑀯𑀢𑁆𑀣𑀼𑀦𑁆𑀢𑀺 𑀪𑁂𑀭𑀺𑀆𑀤𑀺𑀯𑀢𑁆𑀣𑀼𑀁. 𑀥𑀫𑁆𑀫𑀲𑁆𑀲𑀯𑀦𑀖𑁄𑀲𑀦𑀸𑀤𑀻𑀲𑀼 𑀘 𑀲𑀯𑀢𑁆𑀣𑀼𑀓𑀁 𑀓𑀢𑁆𑀯𑀸 𑀲𑀤𑁆𑀤𑀲𑁆𑀲 𑀤𑀸𑀦𑀁 𑀲𑀤𑁆𑀤𑀯𑀢𑁆𑀣𑀽𑀦𑀁 𑀞𑀸𑀦𑀓𑀭𑀡𑀸𑀦𑀁 𑀲𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀓𑀭𑀡𑀫𑁂𑀯𑀸𑀢𑀺 𑀢𑀲𑁆𑀲 𑀘𑀺𑀦𑁆𑀢𑀦𑀁 𑀯𑀺𑀚𑁆𑀚𑀫𑀸𑀦𑀯𑀢𑁆𑀣𑀼𑀧𑀭𑀺𑀘𑁆𑀘𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀲𑀺 𑀥𑀫𑁆𑀫𑀭𑀸𑀚𑀸 𑀇𑀥 𑀘 𑀭𑀽𑀧𑀸𑀭𑀫𑁆𑀫𑀡𑀸𑀤𑀺𑀪𑀸𑀯𑀁, 𑀅𑀜𑁆𑀜𑀢𑁆𑀣 𑀘 ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀻’’𑀢𑀺 (𑀤𑀻. 𑀦𑀺. 𑁩.𑁩𑁦𑁫) 𑀤𑀸𑀦𑀫𑀬𑀸𑀤𑀺𑀪𑀸𑀯𑀁, 𑀅𑀧𑀭𑀢𑁆𑀣 𑀘 ‘‘𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸? 𑀢𑀻𑀡𑀺…𑀧𑁂… 𑀢𑀁𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀓𑀫𑁆𑀫’’𑀦𑁆𑀢𑀺𑀆𑀤𑀺𑀦𑀸 𑀓𑀸𑀬𑀓𑀫𑁆𑀫𑀸𑀤𑀺𑀪𑀸𑀯𑀜𑁆𑀘 𑀯𑀤𑀦𑁆𑀢𑁄. 𑀅𑀧𑀭𑀺𑀬𑀸𑀧𑀦𑁆𑀦𑀸 𑀘𑀸𑀢𑀺 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀅𑀜𑁆𑀜𑀸𑀬𑀢𑀦𑀢𑁆𑀢𑀸 𑀘 𑀅𑀲𑀗𑁆𑀕𑀳𑀺𑀢𑀸.

𑀧𑀭𑀺𑀪𑁄𑀕𑀭𑀲𑁄 𑀧𑀭𑀺𑀪𑁄𑀕𑀧𑀘𑁆𑀘𑀬𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁. 𑀅𑀬𑀁 𑀧𑀦 𑀭𑀲𑀲𑀫𑀸𑀦𑀢𑀸𑀯𑀲𑁂𑀦 𑀕𑀳𑀡𑀁 𑀉𑀧𑀸𑀤𑀸𑀬 𑀭𑀲𑀸𑀭𑀫𑁆𑀫𑀡𑀦𑁆𑀢𑀺 𑀯𑀼𑀢𑁆𑀢𑁄, 𑀦 𑀲𑀪𑀸𑀯𑀢𑁄. 𑀲𑀪𑀸𑀯𑁂𑀦 𑀧𑀦 𑀕𑀳𑀡𑀁 𑀉𑀧𑀸𑀤𑀸𑀬 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀥𑀫𑁆𑀫𑀸𑀭𑀫𑁆𑀫𑀡𑀫𑁂𑀯 𑀳𑁄𑀢𑀻𑀢𑀺 ‘‘𑀲𑀼𑀔𑀸 𑀯𑁂𑀤𑀦𑀸 𑀥𑀫𑁆𑀫𑀸𑀭𑀫𑁆𑀫𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀭𑀫𑁆𑀫𑀡𑀫𑁂𑀯 𑀦𑀺𑀩𑀤𑁆𑀥𑀦𑁆𑀢𑀺 𑀭𑀽𑀧𑀸𑀭𑀫𑁆𑀫𑀡𑀁…𑀧𑁂… 𑀥𑀫𑁆𑀫𑀸𑀭𑀫𑁆𑀫𑀡𑀦𑁆𑀢𑀺 𑀏𑀯𑀁 𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀓𑀫𑁆𑀫𑀲𑁆𑀲 𑀅𑀦𑀺𑀩𑀤𑁆𑀥𑀢𑁆𑀢𑀸𑀢𑀺 𑀓𑀫𑁆𑀫𑀲𑁆𑀲 𑀅𑀦𑀺𑀬𑀢𑀢𑁆𑀢𑀸. 𑀬𑀣𑀸 𑀳𑀺 𑀭𑀽𑀧𑀸𑀤𑀻𑀲𑀼 𑀏𑀓𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁 𑀅𑀦𑀜𑁆𑀜𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀦 𑀏𑀯𑀁 𑀓𑀸𑀬𑀤𑁆𑀯𑀸𑀭𑀸𑀤𑀻𑀲𑀼 𑀏𑀓𑀤𑁆𑀯𑀸𑀭𑀺𑀓𑀓𑀫𑁆𑀫𑀁 𑀅𑀜𑁆𑀜𑀲𑁆𑀫𑀺𑀁 𑀤𑁆𑀯𑀸𑀭𑁂 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀓𑀫𑁆𑀫𑀲𑁆𑀲 𑀤𑁆𑀯𑀸𑀭𑀦𑀺𑀬𑀫𑀭𑀳𑀺𑀢𑀢𑁆𑀢𑀸 𑀤𑁆𑀯𑀸𑀭𑀫𑁆𑀧𑀺 𑀓𑀫𑁆𑀫𑀦𑀺𑀬𑀫𑀭𑀳𑀺𑀢𑀦𑁆𑀢𑀺 𑀇𑀥 𑀆𑀭𑀫𑁆𑀫𑀡𑀁 𑀯𑀺𑀬 𑀦𑀺𑀬𑀫𑁂𑀢𑁆𑀯𑀸 𑀦 𑀯𑀼𑀢𑁆𑀢𑀁. 𑀯𑀺𑀦𑀸 𑀆𑀭𑀫𑁆𑀫𑀡𑁂𑀦 𑀅𑀦𑀼𑀧𑁆𑀧𑀚𑁆𑀚𑀦𑀢𑁄𑀢𑀺 𑀏𑀢𑀲𑁆𑀲𑀧𑀺 𑀘𑀢𑁆𑀣𑁄 ‘‘𑀬𑀣𑀸 𑀓𑀸𑀬𑀓𑀫𑁆𑀫𑀸𑀤𑀻𑀲𑀼 𑀏𑀓𑀁 𑀓𑀫𑁆𑀫𑀁 𑀢𑁂𑀦 𑀤𑁆𑀯𑀸𑀭𑁂𑀦 𑀯𑀺𑀦𑀸 𑀅𑀜𑁆𑀜𑀲𑁆𑀫𑀺𑀁 𑀤𑁆𑀯𑀸𑀭𑁂 𑀘𑀭𑀢𑀺, 𑀦 𑀏𑀯𑀁 𑀭𑀽𑀧𑀸𑀤𑀻𑀲𑀼 𑀏𑀓𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁 𑀢𑁂𑀦𑀸𑀭𑀫𑁆𑀫𑀡𑁂𑀦 𑀯𑀺𑀦𑀸 𑀆𑀭𑀫𑁆𑀫𑀡𑀦𑁆𑀢𑀭𑁂 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀦 𑀳𑀺 𑀬𑀣𑀸 𑀯𑀘𑀻𑀤𑁆𑀯𑀸𑀭𑁂 𑀉𑀧𑁆𑀧𑀚𑁆𑀚𑀫𑀸𑀦𑀫𑁆𑀧𑀺 ‘‘𑀓𑀸𑀬𑀓𑀫𑁆𑀫’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀲𑀤𑁆𑀤𑀸𑀭𑀫𑁆𑀫𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀁 ‘‘𑀭𑀽𑀧𑀸𑀭𑀫𑁆𑀫𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀓𑀸𑀫𑀸𑀯𑀘𑀭𑀓𑀼𑀲𑀮𑀁

𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲𑀸𑀢𑀺 𑀓𑀫𑁆𑀫𑀤𑁆𑀯𑀸𑀭𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑁆𑀫𑀺𑀁 𑀅𑀦𑀺𑀬𑀢𑀢𑀸𑀬 ‘‘𑀤𑁆𑀯𑀸𑀭𑁂 𑀘𑀭𑀦𑁆𑀢𑀺 𑀓𑀫𑁆𑀫𑀸𑀦𑀻’’𑀢𑀺𑀆𑀤𑀺𑀦𑀸 𑀧𑀓𑀸𑀲𑀦𑀢𑁆𑀣𑀁. 𑀧𑀜𑁆𑀘 𑀯𑀺𑀜𑁆𑀜𑀸𑀡𑀸𑀦𑀻𑀢𑀺 𑀏𑀢𑁆𑀣 𑀙𑀝𑁆𑀞𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀢𑀲𑁆𑀲 𑀘 𑀤𑁆𑀯𑀸𑀭𑀲𑁆𑀲 𑀅𑀦𑀼𑀤𑁆𑀤𑁂𑀲𑁄 𑀤𑁆𑀯𑀸𑀭𑀤𑁆𑀯𑀸𑀭𑀯𑀦𑁆𑀢𑀸𑀦𑀁 𑀲𑀳𑀸𑀪𑀸𑀯𑀸. 𑀦𑀺𑀬𑀢𑀭𑀽𑀧𑀭𑀽𑀧𑀯𑀲𑁂𑀦 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑀸 𑀯𑀼𑀢𑁆𑀢𑀸𑀢𑀺 𑀲𑀤𑁆𑀤𑀲𑁆𑀲 𑀯𑀺𑀓𑀸𑀭𑀭𑀽𑀧𑀸𑀤𑀻𑀦𑀜𑁆𑀘 𑀅𑀲𑀗𑁆𑀕𑀳𑁄.

𑀧𑀞𑀫𑀚𑀯𑀦𑀲𑀫𑀼𑀝𑁆𑀞𑀺𑀢𑀸 𑀯𑀸𑀬𑁄𑀥𑀸𑀢𑀼 𑀬𑀤𑀺𑀧𑀺 𑀢𑀲𑁆𑀫𑀺𑀁 𑀔𑀡𑁂 𑀭𑀽𑀧𑀸𑀦𑀁 𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑁂𑀦 𑀘𑀸𑀮𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀣𑀸𑀧𑀺 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀲𑀳𑀺𑀢𑀸𑀯 𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀤𑀲𑀲𑀼 𑀳𑀺 𑀤𑀺𑀲𑀸𑀲𑀼 𑀬𑀁 𑀤𑀺𑀲𑀁 𑀕𑀦𑁆𑀢𑀼𑀓𑀸𑀫𑁄 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀯𑀸 𑀔𑀺𑀧𑀺𑀢𑀼𑀓𑀸𑀫𑁄, 𑀢𑀁𑀤𑀺𑀲𑀸𑀪𑀺𑀫𑀼𑀔𑀸𑀦𑁂𑀯 𑀭𑀽𑀧𑀸𑀦𑀺 𑀲𑀸 𑀲𑀦𑁆𑀣𑀫𑁆𑀪𑁂𑀢𑀺 𑀲𑀦𑁆𑀥𑀸𑀭𑁂𑀢𑀺 𑀘𑀸𑀢𑀺 𑀢𑀤𑀪𑀺𑀫𑀼𑀔𑀪𑀸𑀯𑀯𑀺𑀓𑀸𑀭𑀯𑀢𑀻 𑀳𑁄𑀢𑀺, 𑀅𑀥𑀺𑀧𑁆𑀧𑀸𑀬𑀲𑀳𑀪𑀸𑀯𑀻 𑀘 𑀯𑀺𑀓𑀸𑀭𑁄 𑀯𑀺𑀜𑁆𑀜𑀢𑁆𑀢𑀻𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀆𑀯𑀚𑁆𑀚𑀦𑀲𑁆𑀲𑀧𑀺 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀪𑀸𑀯𑁄 𑀬𑀣𑀸𑀥𑀺𑀧𑁆𑀧𑀸𑀬𑀯𑀺𑀓𑀸𑀭𑀭𑀽𑀧𑀼𑀧𑁆𑀧𑀸𑀤𑀦𑁂𑀦 𑀉𑀧𑀧𑀦𑁆𑀦𑁄 𑀳𑁄𑀢𑀺, 𑀬𑀢𑁄 𑀩𑀸𑀢𑁆𑀢𑀺𑀁𑀲 𑀘𑀺𑀢𑁆𑀢𑀸𑀦𑀺 𑀭𑀽𑀧𑀺𑀭𑀺𑀬𑀸𑀧𑀣𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺. 𑀬𑁄𑀚𑀦𑀁 𑀕𑀢𑁄, 𑀤𑀲𑀬𑁄𑀚𑀦𑀁 𑀕𑀢𑁄𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀸𑀧𑁂𑀢𑀺 𑀅𑀦𑁂𑀓𑀲𑀳𑀲𑁆𑀲𑀯𑀸𑀭𑀁 𑀉𑀧𑁆𑀧𑀦𑁆𑀦𑀸.

𑀯𑀸𑀬𑁄𑀥𑀸𑀢𑀼𑀬𑀸…𑀧𑁂… 𑀧𑀘𑁆𑀘𑀬𑁄 𑀪𑀯𑀺𑀢𑀼𑀦𑁆𑀢𑀺 𑀣𑀫𑁆𑀪𑀦𑀘𑀮𑀦𑁂𑀲𑀼 𑀯𑀸𑀬𑁄𑀥𑀸𑀢𑀼𑀬𑀸 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀫𑀢𑁆𑀣𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀫𑀳𑀸𑀪𑀽𑀢𑀸𑀦𑀁 𑀏𑀓𑁄 𑀆𑀓𑀸𑀭𑀯𑀺𑀲𑁂𑀲𑁄 𑀅𑀢𑁆𑀣𑀺, 𑀅𑀬𑀁 𑀯𑀺𑀜𑁆𑀜𑀢𑁆𑀢𑀺 𑀦𑀸𑀫. 𑀢𑁂𑀲𑀜𑁆𑀳𑀺 𑀢𑀤𑀸𑀓𑀸𑀭𑀢𑁆𑀢𑀸 𑀯𑀸𑀬𑁄𑀥𑀸𑀢𑀼 𑀣𑀫𑁆𑀪𑁂𑀢𑀺 𑀘𑀸𑀮𑁂𑀢𑀺 𑀘𑀸𑀢𑀺. 𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀢𑀺 𑀏𑀢𑁂𑀦 𑀧𑀭𑀫𑀢𑁆𑀣𑀢𑁄 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀦 𑀳𑀺 𑀭𑀽𑀧𑀁 𑀅𑀧𑁆𑀧𑀘𑁆𑀘𑀬𑀁 𑀅𑀢𑁆𑀣𑀺, 𑀦 𑀘 𑀦𑀺𑀩𑁆𑀩𑀸𑀦𑀯𑀚𑁆𑀚𑁄 𑀅𑀢𑁆𑀣𑁄 𑀦𑀺𑀘𑁆𑀘𑁄 𑀅𑀢𑁆𑀣𑀻𑀢𑀺. 𑀯𑀺𑀜𑁆𑀜𑀢𑁆𑀢𑀺𑀢𑀸𑀬𑀸𑀢𑀺 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀢𑀸𑀬. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀪𑀸𑀯𑁄 𑀯𑀺𑀬 𑀫𑀳𑀸𑀪𑀽𑀢𑀯𑀺𑀓𑀸𑀭𑀢𑀸𑀬 𑀉𑀧𑀸𑀤𑀸𑀭𑀽𑀧𑀪𑀸𑀯𑁄 𑀘 𑀅𑀥𑀺𑀧𑁆𑀧𑁂𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀓𑀸𑀬𑀺𑀓𑀓𑀭𑀡𑀦𑁆𑀢𑀺 𑀓𑀸𑀬𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀁 𑀘𑀺𑀢𑁆𑀢𑀓𑀺𑀭𑀺𑀬𑀁, 𑀅𑀥𑀺𑀧𑁆𑀧𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀓𑀸𑀭𑁂𑀢𑀺 𑀫𑀜𑁆𑀜𑁂𑀢𑀺 𑀏𑀢𑁂𑀦 𑀯𑀡𑁆𑀡𑀕𑁆𑀕𑀳𑀡𑀸𑀦𑀼𑀲𑀸𑀭𑁂𑀦 𑀕𑀳𑀺𑀢𑀸𑀬 𑀯𑀺𑀜𑁆𑀜𑀢𑁆𑀢𑀺𑀬𑀸 𑀬𑀁 𑀓𑀭𑀡𑀁 𑀯𑀺𑀜𑁆𑀜𑀸𑀢𑀩𑁆𑀩𑀁, 𑀢𑀲𑁆𑀲 𑀯𑀺𑀚𑀸𑀦𑀦𑁂𑀦 𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑀺𑀜𑁆𑀜𑀸𑀢𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀦 𑀳𑀺 𑀯𑀺𑀜𑁆𑀜𑀢𑁆𑀢𑀺𑀭𑀳𑀺𑀢𑁂𑀲𑀼 𑀭𑀼𑀓𑁆𑀔𑀘𑀮𑀦𑀸𑀤𑀻𑀲𑀼 ‘‘𑀇𑀤𑀫𑁂𑀲 𑀓𑀸𑀭𑁂𑀢𑀻’’𑀢𑀺 𑀯𑀺𑀚𑀸𑀦𑀦𑀁 𑀳𑁄𑀢𑀻𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀳𑀺 𑀭𑀽𑀧𑁂 𑀅𑀪𑀺𑀦𑀺𑀧𑀸𑀢𑀫𑀢𑁆𑀢𑀁 𑀓𑀺𑀘𑁆𑀘𑀁, 𑀦 𑀅𑀥𑀺𑀧𑁆𑀧𑀸𑀬𑀲𑀳𑀪𑀼𑀦𑁄 𑀘𑀮𑀦𑀯𑀺𑀓𑀸𑀭𑀲𑁆𑀲 𑀕𑀳𑀡𑀁. 𑀘𑀺𑀢𑁆𑀢𑀲𑁆𑀲 𑀧𑀦 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀅𑀦𑀦𑁆𑀢𑀭𑀁 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀢𑀫𑁆𑀧𑀺 𑀘𑀮𑀦𑀁 𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑀁 𑀯𑀺𑀬 𑀫𑀜𑁆𑀜𑀦𑁆𑀢𑀺 𑀅𑀯𑀺𑀲𑁂𑀲𑀯𑀺𑀤𑀼𑀦𑁄, 𑀢𑀲𑁆𑀫𑀸 𑀬𑀣𑀸 𑀦𑀻𑀮𑀸𑀪𑀺𑀦𑀺𑀧𑀸𑀢𑀯𑀲𑀧𑁆𑀧𑀯𑀢𑁆𑀢𑀸𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀦𑀻𑀮𑀦𑁆𑀢𑀺 𑀧𑀯𑀢𑁆𑀢𑀸𑀬 𑀫𑀦𑁄𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀘 𑀅𑀦𑁆𑀢𑀭𑀁 𑀦 𑀯𑀺𑀜𑁆𑀜𑀸𑀬𑀢𑀺, 𑀏𑀯𑀁 𑀅𑀯𑀺𑀜𑁆𑀜𑀸𑀬𑀫𑀸𑀦𑀦𑁆𑀢𑀭𑁂𑀦 𑀫𑀦𑁄𑀤𑁆𑀯𑀸𑀭𑀯𑀺𑀜𑁆𑀜𑀸𑀡𑁂𑀦 𑀕𑀳𑀺𑀢𑁂 𑀢𑀲𑁆𑀫𑀺𑀁 𑀘𑀺𑀢𑁆𑀢𑁂𑀦 𑀲𑀳𑁂𑀯 𑀅𑀦𑀼𑀧𑀭𑀺𑀯𑀢𑁆𑀢𑁂 𑀓𑀸𑀬𑀣𑀫𑁆𑀪𑀦𑀯𑀺𑀓𑀸𑀭𑀘𑁄𑀧𑀦𑀲𑀗𑁆𑀔𑀸𑀢𑁂 ‘‘𑀇𑀤𑀫𑁂𑀲 𑀓𑀸𑀭𑁂𑀢𑀺, 𑀅𑀬𑀫𑀲𑁆𑀲 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀯𑀺𑀚𑀸𑀦𑀦𑀁 𑀳𑁄𑀢𑀺.

𑀢𑀸𑀮𑀧𑀡𑁆𑀡𑀸𑀤𑀺𑀭𑀽𑀧𑀸𑀦𑀺 𑀤𑀺𑀲𑁆𑀯𑀸 𑀢𑀤𑀦𑀦𑁆𑀢𑀭𑀧𑁆𑀧𑀯𑀢𑁆𑀢𑀸𑀬 𑀫𑀦𑁄𑀤𑁆𑀯𑀸𑀭𑀯𑀻𑀣𑀺𑀬𑀸 𑀅𑀯𑀺𑀜𑁆𑀜𑀸𑀬𑀫𑀸𑀦𑀦𑁆𑀢𑀭𑀸𑀬 𑀢𑀸𑀮𑀧𑀡𑁆𑀡𑀸𑀤𑀻𑀦𑀁 𑀉𑀤𑀓𑀸𑀤𑀺𑀲𑀳𑀘𑀸𑀭𑀺𑀧𑁆𑀧𑀓𑀸𑀭𑀢𑀁 𑀲𑀜𑁆𑀜𑀸𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀉𑀤𑀓𑀸𑀤𑀺𑀕𑁆𑀕𑀳𑀡𑀁 𑀯𑀺𑀬. 𑀏𑀢𑁆𑀣 𑀉𑀤𑀓𑀁 𑀪𑀯𑀺𑀲𑁆𑀲𑀢𑀻𑀢𑀺𑀆𑀤𑀺𑀦𑀸 𑀘 𑀉𑀤𑀓𑀸𑀤𑀺𑀲𑀫𑁆𑀩𑀦𑁆𑀥𑀦𑀸𑀓𑀸𑀭𑁂𑀦 𑀭𑀽𑀧𑀕𑁆𑀕𑀳𑀡𑀸𑀦𑀼𑀲𑀸𑀭𑀯𑀺𑀜𑁆𑀜𑀸𑀡𑁂𑀦 𑀬𑀁 𑀉𑀤𑀓𑀸𑀤𑀺 𑀯𑀺𑀜𑁆𑀜𑀸𑀢𑀩𑁆𑀩𑀁, 𑀢𑀲𑁆𑀲 𑀯𑀺𑀚𑀸𑀦𑀦𑁂𑀦 𑀢𑀤𑀸𑀓𑀸𑀭𑀲𑁆𑀲 𑀯𑀺𑀜𑁆𑀜𑀸𑀢𑀢𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀏𑀢𑀲𑁆𑀲 𑀧𑀦 𑀓𑀸𑀬𑀺𑀓𑀓𑀭𑀡𑀕𑁆𑀕𑀳𑀡𑀲𑁆𑀲 𑀉𑀤𑀓𑀸𑀤𑀺𑀕𑁆𑀕𑀳𑀡𑀲𑁆𑀲 𑀘 𑀧𑀼𑀭𑀺𑀫𑀲𑀺𑀤𑁆𑀥𑀲𑀫𑁆𑀩𑀦𑁆𑀥𑀕𑁆𑀕𑀳𑀡𑀁 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀧𑀦 𑀦𑀸𑀮𑀫𑁆𑀩𑀺𑀢𑀸𑀧𑀺 𑀯𑀺𑀜𑁆𑀜𑀢𑁆𑀢𑀺 𑀓𑀸𑀬𑀺𑀓𑀓𑀭𑀡𑀕𑁆𑀕𑀳𑀡𑀲𑁆𑀲 𑀘 𑀧𑀘𑁆𑀘𑀬𑁄 𑀧𑀼𑀭𑀺𑀫𑀲𑀺𑀤𑁆𑀥𑀲𑀫𑁆𑀩𑀦𑁆𑀥𑀕𑁆𑀕𑀳𑀡𑁄𑀧𑀦𑀺𑀲𑁆𑀲𑀬𑀯𑀲𑁂𑀦 𑀲𑀸𑀥𑀺𑀧𑁆𑀧𑀸𑀬𑀯𑀺𑀓𑀸𑀭𑀪𑀽𑀢𑀯𑀡𑁆𑀡𑀕𑁆𑀕𑀳𑀡𑀸𑀦𑀦𑁆𑀢𑀭𑀁 𑀧𑀯𑀢𑁆𑀢𑀫𑀸𑀦𑀲𑁆𑀲 𑀅𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑀲𑁆𑀲 𑀅𑀥𑀺𑀧𑁆𑀧𑀸𑀬𑀲𑀳𑀪𑀽𑀯𑀺𑀓𑀸𑀭𑀸𑀪𑀸𑀯𑁂 𑀅𑀪𑀸𑀯𑀢𑁄, 𑀏𑀯𑀁 𑀲𑀢𑀺 𑀯𑀡𑁆𑀡𑀕𑁆𑀕𑀳𑀡𑀸𑀦𑀦𑁆𑀢𑀭𑁂𑀦 𑀉𑀤𑀓𑀸𑀤𑀺𑀕𑁆𑀕𑀳𑀡𑁂𑀦𑁂𑀯 𑀢𑀸𑀮𑀧𑀡𑁆𑀡𑀸𑀤𑀺𑀲𑀜𑁆𑀜𑀸𑀡𑀸𑀓𑀸𑀭𑁄 𑀯𑀺𑀬 𑀯𑀡𑁆𑀡𑀕𑁆𑀕𑀳𑀡𑀸𑀦𑀦𑁆𑀢𑀭𑁂𑀦 𑀅𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑁂𑀦𑁂𑀯 𑀯𑀺𑀜𑁆𑀜𑀢𑁆𑀢𑀺 𑀧𑀸𑀓𑀝𑀸 𑀳𑁄𑀢𑀻𑀢𑀺 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀏𑀲 𑀓𑀸𑀭𑁂𑀢𑀺 𑀫𑀜𑁆𑀜𑁂’’𑀢𑀺 𑀅𑀥𑀺𑀧𑁆𑀧𑀸𑀬𑀯𑀺𑀚𑀸𑀦𑀦𑁂𑀦𑁂𑀯 𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑀺𑀜𑁆𑀜𑀸𑀢𑀢𑀸 𑀯𑀼𑀢𑁆𑀢𑀸.

𑀅𑀬𑀁 𑀦𑁄 𑀧𑀳𑀭𑀺𑀢𑀼𑀓𑀸𑀫𑁄𑀢𑀺 𑀅𑀥𑀺𑀧𑁆𑀧𑀸𑀬𑀯𑀺𑀚𑀸𑀦𑀦𑁂𑀦 𑀯𑀺𑀜𑁆𑀜𑀢𑁆𑀢𑀺𑀬𑀸 𑀧𑀸𑀓𑀝𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀦 𑀳𑀺 𑀢𑀤𑀧𑀸𑀓𑀝𑀪𑀸𑀯𑁂 𑀅𑀥𑀺𑀧𑁆𑀧𑀸𑀬𑀯𑀺𑀚𑀸𑀦𑀦𑀁 𑀳𑁄𑀢𑀻𑀢𑀺. 𑀲𑀫𑁆𑀫𑀼𑀔𑀻…𑀧𑁂… 𑀬𑁂𑀯 𑀦𑀸𑀫 𑀳𑁄𑀢𑀻𑀢𑀺 𑀅𑀲𑀫𑁆𑀫𑀼𑀔𑀻𑀪𑀽𑀢𑀢𑀸𑀬 𑀅𑀦𑀸𑀧𑀸𑀣𑀕𑀢𑀸𑀦𑀁 𑀭𑀽𑀧𑀸𑀤𑀻𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀤𑀺𑀪𑀸𑀯𑁄 𑀯𑀺𑀬 𑀲𑀪𑀸𑀯𑀪𑀽𑀢𑀁 𑀢𑀁 𑀤𑁆𑀯𑀺𑀥𑀸 𑀯𑀺𑀜𑁆𑀜𑀢𑁆𑀢𑀺𑀪𑀸𑀯𑀁 𑀲𑀸𑀥𑁂𑀢𑀺. 𑀧𑀭𑀁 𑀩𑁄𑀥𑁂𑀢𑀼𑀓𑀸𑀫𑀢𑀸𑀬 𑀯𑀺𑀦𑀸𑀧𑀺 𑀅𑀪𑀺𑀓𑁆𑀓𑀫𑀦𑀸𑀤𑀺𑀧𑁆𑀧𑀯𑀢𑁆𑀢𑀦𑁂𑀦 𑀲𑁄 𑀘𑀺𑀢𑁆𑀢𑀲𑀳𑀪𑀽𑀯𑀺𑀓𑀸𑀭𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀲𑀬𑀜𑁆𑀘 𑀯𑀺𑀜𑁆𑀜𑀸𑀬𑀢𑀻𑀢𑀺 𑀤𑁆𑀯𑀺𑀥𑀸𑀧𑀺 𑀯𑀺𑀜𑁆𑀜𑀢𑁆𑀢𑀺𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀲𑁆𑀫𑀺𑀁 𑀤𑁆𑀯𑀸𑀭𑁂 𑀲𑀺𑀤𑁆𑀥𑀸𑀢𑀺 𑀢𑁂𑀦 𑀤𑁆𑀯𑀸𑀭𑁂𑀦 𑀯𑀺𑀜𑁆𑀜𑀸𑀢𑀩𑁆𑀩𑀪𑀸𑀯𑀢𑁄 𑀢𑁂𑀦𑁂𑀯 𑀤𑁆𑀯𑀸𑀭𑁂𑀦 𑀦𑀸𑀫𑀮𑀸𑀪𑀢𑁄 𑀢𑀲𑁆𑀫𑀺𑀁 𑀤𑁆𑀯𑀸𑀭𑁂 𑀧𑀸𑀓𑀝𑀪𑀸𑀯𑀯𑀲𑁂𑀦 𑀲𑀺𑀤𑁆𑀥𑀸. 𑀓𑀼𑀲𑀮𑀁 𑀯𑀸 𑀅𑀓𑀼𑀲𑀮𑀁 𑀯𑀸𑀢𑀺 𑀞𑀧𑁂𑀢𑀩𑁆𑀩𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀧𑀭𑀯𑀸𑀤𑀺𑀦𑁄 𑀅𑀯𑀺𑀧𑀸𑀓𑀲𑁆𑀲 𑀓𑀫𑁆𑀫𑀪𑀸𑀯𑁄 𑀦 𑀲𑀺𑀤𑁆𑀥𑁄, 𑀇𑀢𑀭𑀲𑁆𑀲 𑀧𑀦 𑀲𑀺𑀤𑁆𑀥𑁄𑀢𑀺 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀸𑀦𑀁 𑀏𑀓𑀸𑀤𑀲𑀦𑁆𑀦𑀁 𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀁 𑀯𑀲𑁂𑀦 𑀢𑀺𑀓𑀁 𑀧𑀽𑀭𑁂𑀢𑁆𑀯𑀸 𑀞𑀧𑁂𑀢𑀩𑁆𑀩𑀁.

𑀤𑁆𑀯𑀸𑀭𑁂 𑀘𑀭𑀦𑁆𑀢𑀺 𑀓𑀫𑁆𑀫𑀸𑀦𑀻𑀢𑀺 𑀏𑀢𑁆𑀣 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀤𑀺 𑀤𑁆𑀯𑀸𑀭𑀸 𑀤𑁆𑀯𑀸𑀭𑀦𑁆𑀢𑀭𑀘𑀸𑀭𑀺𑀦𑁄 𑀳𑁄𑀦𑁆𑀢𑀺, 𑀤𑁆𑀯𑀸𑀭𑀲𑀫𑁆𑀪𑁂𑀤𑀸 𑀓𑀫𑁆𑀫𑀲𑀫𑁆𑀪𑁂𑀤𑁄𑀧𑀻𑀢𑀺 𑀓𑀸𑀬𑀓𑀫𑁆𑀫𑀁 𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀯𑀯𑀢𑁆𑀣𑀸𑀦𑀁 𑀦 𑀲𑀺𑀬𑀸, 𑀓𑀫𑁆𑀫𑀸𑀦𑀫𑁆𑀧𑀺 𑀓𑀫𑁆𑀫𑀦𑁆𑀢𑀭𑀘𑀭𑀡𑁂 𑀏𑀲𑁂𑀯 𑀦𑀬𑁄. 𑀬𑀤𑀺 𑀧𑀦 𑀤𑁆𑀯𑀸𑀭𑀸𑀦𑀫𑁆𑀧𑀺 𑀤𑁆𑀯𑀸𑀭𑀪𑀸𑀯𑁂𑀦 𑀓𑀫𑁆𑀫𑀦𑁆𑀢𑀭𑀘𑀭𑀡𑀁 𑀓𑀫𑁆𑀫𑀸𑀦𑀜𑁆𑀘 𑀤𑁆𑀯𑀸𑀭𑀦𑁆𑀢𑀭𑀘𑀭𑀡𑀁 𑀦 𑀲𑀺𑀬𑀸, 𑀲𑀼𑀝𑁆𑀞𑀼𑀢𑀭𑀁 𑀓𑀫𑁆𑀫𑀤𑁆𑀯𑀸𑀭𑀯𑀯𑀢𑁆𑀣𑀸𑀦𑀁 𑀲𑀺𑀬𑀸. 𑀦 𑀧𑀦 𑀓𑀫𑁆𑀫𑀸𑀦𑀁 𑀤𑁆𑀯𑀸𑀭𑀦𑁆𑀢𑀭𑁂 𑀅𑀘𑀭𑀡𑀁 𑀅𑀢𑁆𑀣𑀺, 𑀓𑀺𑀦𑁆𑀢𑀼 𑀤𑁆𑀯𑀸𑀭𑁂 𑀅𑀜𑁆𑀜𑀲𑁆𑀫𑀺𑀜𑁆𑀘 𑀘𑀭𑀦𑁆𑀢𑀺 𑀓𑀫𑁆𑀫𑀸𑀦𑀺 𑀅𑀜𑁆𑀜𑀸𑀦𑀺𑀧𑀺. 𑀬𑀲𑁆𑀫𑀸 𑀧𑀦 𑀤𑁆𑀯𑀸𑀭𑁂 𑀤𑁆𑀯𑀸𑀭𑀸𑀦𑀺 𑀦 𑀘𑀭𑀦𑁆𑀢𑀺, 𑀢𑀲𑁆𑀫𑀸 𑀅𑀤𑁆𑀯𑀸𑀭𑀘𑀸𑀭𑀻𑀳𑀺 𑀤𑁆𑀯𑀸𑀭𑁂𑀳𑀺 𑀓𑀸𑀭𑀡𑀪𑀽𑀢𑁂𑀳𑀺 𑀓𑀫𑁆𑀫𑀸𑀦𑀺 𑀤𑁆𑀯𑀸𑀭𑀦𑁆𑀢𑀭𑁂 𑀘𑀭𑀦𑁆𑀢𑀸𑀦𑀺𑀧𑀺 𑀯𑀯𑀢𑁆𑀣𑀺𑀢𑀸𑀦𑀺. 𑀦 𑀓𑁂𑀯𑀮𑀁 𑀓𑀫𑁆𑀫𑀸𑀦𑁂𑀯, 𑀢𑁂𑀳𑀺 𑀧𑀦 𑀤𑁆𑀯𑀸𑀭𑀸𑀦𑀺𑀧𑀻𑀢𑀺 𑀏𑀯𑀁 𑀓𑀫𑁆𑀫𑀤𑁆𑀯𑀸𑀭𑀸𑀦𑀺 𑀅𑀜𑁆𑀜𑀫𑀜𑁆𑀜𑀁 𑀯𑀯𑀢𑁆𑀣𑀺𑀢𑀸𑀦𑀺 ‘‘𑀬𑁂𑀪𑀼𑀬𑁆𑀬𑁂𑀦𑀯𑀼𑀢𑁆𑀢𑀺𑀢𑀸𑀬 𑀢𑀩𑁆𑀩𑀳𑀼𑀮𑀯𑀼𑀢𑁆𑀢𑀺𑀢𑀸𑀬 𑀘𑀸’’𑀢𑀺 𑀯𑀼𑀘𑁆𑀘𑀫𑀸𑀦𑀸𑀬 𑀯𑀯𑀢𑁆𑀣𑀸𑀦𑀬𑀼𑀢𑁆𑀢𑀺𑀬𑀸. 𑀢𑀢𑁆𑀣 𑀤𑁆𑀯𑀸𑀭𑀸𑀧𑁂𑀓𑁆𑀔𑀢𑁆𑀢𑀸 𑀓𑀫𑁆𑀫𑀸𑀦𑀁 𑀓𑀸𑀬𑀓𑀫𑁆𑀫𑀸𑀤𑀺𑀪𑀸𑀯𑀲𑁆𑀲 𑀅𑀤𑁆𑀯𑀸𑀭𑀘𑀸𑀭𑀻𑀳𑀺 𑀤𑁆𑀯𑀸𑀭𑁂𑀳𑀺 𑀯𑀯𑀢𑁆𑀣𑀸𑀦𑀁 𑀳𑁄𑀢𑀺, 𑀦 𑀧𑀦 𑀤𑁆𑀯𑀸𑀭𑀦𑁆𑀢𑀭𑀘𑀸𑀭𑀻𑀳𑀺 𑀓𑀫𑁆𑀫𑁂𑀳𑀺 𑀤𑁆𑀯𑀸𑀭𑀸𑀦𑀁 𑀅𑀯𑀯𑀢𑁆𑀣𑀸𑀦𑀁 𑀓𑀫𑁆𑀫𑀸𑀦𑀧𑁂𑀓𑁆𑀔𑀓𑀸𑀬𑀤𑁆𑀯𑀸𑀭𑀸𑀤𑀺𑀪𑀸𑀯𑁂𑀳𑀺 𑀤𑁆𑀯𑀸𑀭𑁂𑀳𑀺 𑀯𑀯𑀢𑁆𑀣𑀺𑀢𑀸𑀦𑀁 𑀓𑀸𑀬𑀓𑀫𑁆𑀫𑀸𑀤𑀻𑀦𑀁 𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀸𑀤𑀺𑀯𑀯𑀢𑁆𑀣𑀸𑀦𑀓𑀭𑀢𑁆𑀢𑀸. 𑀅𑀣 𑀯𑀸 𑀤𑁆𑀯𑀸𑀭𑀦𑁆𑀢𑀭𑁂 𑀘𑀭𑀦𑁆𑀢𑀸𑀦𑀺𑀧𑀺 𑀓𑀸𑀬𑀸𑀤𑀻𑀳𑀺 𑀉𑀧𑀮𑀓𑁆𑀔𑀺𑀢𑀸𑀦𑁂𑀯 𑀘𑀭𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀏𑀯𑀁𑀲𑀪𑀸𑀯𑀢𑁆𑀢𑀸 𑀆𑀡𑀢𑁆𑀢𑀺𑀳𑀢𑁆𑀣𑀯𑀺𑀓𑀸𑀭𑀸𑀤𑀻𑀳𑀺 𑀯𑀼𑀘𑁆𑀘𑀫𑀸𑀦𑀲𑁆𑀲𑀧𑀺 𑀓𑀸𑀬𑀸𑀤𑀻𑀳𑀺 𑀲𑀸𑀥𑁂𑀢𑀩𑁆𑀩𑀲𑀪𑀸𑀯𑀸𑀯𑀩𑁄𑀥𑀢𑁄, 𑀢𑀲𑁆𑀫𑀸 𑀦 𑀓𑀫𑁆𑀫𑀦𑁆𑀢𑀭𑀲𑁆𑀲 𑀅𑀢𑁆𑀢𑀦𑀺 𑀘𑀭𑀦𑁆𑀢𑀲𑁆𑀲𑀧𑀺 𑀤𑁆𑀯𑀸𑀭𑀦𑁆𑀢𑀭𑀁 𑀲𑀦𑀸𑀫𑀁 𑀤𑁂𑀢𑀺, 𑀦𑀸𑀧𑀺 𑀓𑀫𑁆𑀫𑀁 𑀤𑁆𑀯𑀸𑀭𑀲𑁆𑀲, 𑀢𑀁𑀢𑀁𑀤𑁆𑀯𑀸𑀭𑀫𑁂𑀯 𑀧𑀦 𑀓𑀫𑁆𑀫𑀲𑁆𑀲 𑀓𑀫𑁆𑀫𑀜𑁆𑀘 𑀤𑁆𑀯𑀸𑀭𑀦𑁆𑀢𑀭𑁂 𑀘𑀭𑀦𑁆𑀢𑀫𑁆𑀧𑀺 𑀅𑀢𑁆𑀢𑀦𑁄𑀬𑁂𑀯 𑀤𑁆𑀯𑀸𑀭𑀲𑁆𑀲 𑀦𑀸𑀫𑀁 𑀤𑁂𑀢𑀻𑀢𑀺 𑀲𑀺𑀤𑁆𑀥𑀁 𑀅𑀜𑁆𑀜𑀫𑀜𑁆𑀜𑀯𑀯𑀢𑁆𑀣𑀸𑀦𑀁. 𑀧𑀼𑀩𑁆𑀩𑁂 𑀧𑀦 𑀤𑁆𑀯𑀸𑀭𑁂𑀲𑀼 𑀅𑀦𑀺𑀩𑀤𑁆𑀥𑀢𑀸 𑀓𑀫𑁆𑀫𑀸𑀦𑀁 𑀤𑁆𑀯𑀸𑀭𑀦𑁆𑀢𑀭𑀘𑀭𑀡𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸, 𑀦 𑀏𑀢𑀁 𑀯𑀯𑀢𑁆𑀣𑀸𑀦𑀦𑁆𑀢𑀺.

𑀢𑀢𑁆𑀣𑀸𑀢𑀺 𑀢𑁂𑀲𑀼 𑀤𑁆𑀯𑀸𑀭𑀓𑀫𑁆𑀫𑁂𑀲𑀼. 𑀓𑀸𑀬𑀓𑀫𑁆𑀫𑀲𑁆𑀲 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑀦𑁆𑀢𑀺 𑀢𑀁𑀲𑀳𑀚𑀸𑀢𑀸 𑀯𑀺𑀜𑁆𑀜𑀢𑁆𑀢𑀺𑀬𑁂𑀯 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀲𑀸 𑀢𑀲𑁆𑀲 𑀓𑁂𑀦𑀘𑀺 𑀧𑀓𑀸𑀭𑁂𑀦 𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀢𑀣𑀸𑀧𑀺 𑀓𑀫𑁆𑀫𑀲𑁆𑀲 𑀯𑀺𑀲𑁂𑀲𑀺𑀓𑀸 𑀯𑀺𑀜𑁆𑀜𑀢𑁆𑀢𑀺 𑀢𑀁𑀲𑀳𑀚𑀸𑀢𑀸 𑀳𑁄𑀢𑀻𑀢𑀺 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑁂𑀦 𑀯𑀼𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀦𑀺𑀬𑀫𑁂𑀦 𑀅𑀜𑁆𑀜𑀯𑀺𑀲𑁂𑀲𑀦𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀲𑁂𑀲𑀦𑀦𑁆𑀢𑀭𑁂 𑀉𑀧𑁆𑀧𑀢𑁆𑀢𑀺𑀅𑀪𑀸𑀯𑀸. 𑀓𑀸𑀬𑁂𑀦 𑀧𑀦 𑀓𑀢𑀢𑁆𑀢𑀸𑀢𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀁 𑀚𑀦𑁂𑀢𑁆𑀯𑀸 𑀢𑀸𑀬 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀸𑀤𑀺𑀦𑀺𑀧𑁆𑀨𑀸𑀤𑀦𑀢𑁄 𑀅𑀢𑁆𑀢𑀦𑁄 𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦 ‘‘𑀓𑀸𑀬𑁂𑀦 𑀓𑀢𑀁 𑀓𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀸𑀭𑀡𑀪𑀽𑀢𑁄 𑀳𑀺 𑀧𑀦𑁂𑀢𑁆𑀣 𑀓𑀸𑀬𑁄𑀢𑀺.

𑀅𑀜𑁆𑀜𑀫𑀜𑁆𑀜𑀁 𑀯𑀯𑀢𑁆𑀣𑀺𑀢𑀸𑀢𑀺 𑀏𑀢𑁆𑀣 𑀓𑀫𑁆𑀫𑀼𑀦𑀸 𑀓𑀸𑀬𑁄 𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀦𑁆𑀢𑀺 𑀏𑀯𑀁 𑀯𑀯𑀢𑁆𑀣𑀺𑀢𑁄, 𑀦 𑀓𑀸𑀬𑁄 𑀇𑀘𑁆𑀘𑁂𑀯. 𑀬𑀣𑀸 𑀲𑀽𑀘𑀺𑀓𑀫𑁆𑀫𑀼𑀦𑀸 𑀲𑀽𑀘𑀺𑀓𑀫𑁆𑀫𑀓𑀭𑀡𑀦𑁆𑀢𑀺 𑀯𑀯𑀢𑁆𑀣𑀺𑀢𑀸, 𑀦 𑀲𑀽𑀘𑀺 𑀇𑀘𑁆𑀘𑁂𑀯, 𑀢𑀣𑀸 𑀇𑀤𑀫𑁆𑀧𑀺 𑀤𑀝𑁆𑀞𑀩𑁆𑀩𑀁. 𑀅𑀜𑁆𑀜𑀫𑀜𑁆𑀜𑀁 𑀯𑀯𑀢𑁆𑀣𑀺𑀢𑀸𑀢𑀺 𑀘 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑁂𑀲𑀺𑀢𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀦𑁆𑀢𑁂𑀢𑀺 𑀬𑀣𑀸𑀯𑀼𑀢𑁆𑀢𑀁 𑀯𑀯𑀢𑁆𑀣𑀸𑀦𑀦𑀺𑀬𑀫𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀤𑁆𑀯𑀸𑀭𑁂 𑀘𑀭𑀦𑁆𑀢𑀺 𑀓𑀫𑁆𑀫𑀸𑀦𑀻’’𑀢𑀺𑀆𑀤𑀺𑀯𑀘𑀦𑀫𑁂𑀯 𑀕𑀳𑁂𑀢𑁆𑀯𑀸 𑀘𑁄𑀤𑁂𑀢𑀺. 𑀢𑀢𑁆𑀣 𑀏𑀯𑀁 𑀲𑀦𑁆𑀢𑁂𑀢𑀺 𑀓𑀫𑁆𑀫𑀸𑀦𑀁 𑀤𑁆𑀯𑀸𑀭𑀘𑀭𑀡𑁂 𑀅𑀜𑁆𑀜𑀫𑀜𑁆𑀜𑁂𑀦 𑀘 𑀯𑀯𑀢𑁆𑀣𑀸𑀦𑁂 𑀦𑀸𑀫𑀮𑀸𑀪𑁂 𑀯𑀺𑀲𑁂𑀲𑀦𑁂 𑀲𑀢𑀻𑀢𑀺 𑀅𑀢𑁆𑀣𑁄.

𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀘𑀻𑀓𑀫𑁆𑀫𑀤𑁆𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀢𑀺 𑀏𑀢𑁆𑀣 𑀲𑀼𑀪𑀸𑀲𑀺𑀢𑀪𑀸𑀲𑀦𑀲𑀗𑁆𑀔𑀸𑀢𑀸 𑀅𑀧𑀺𑀲𑀼𑀡𑀯𑀸𑀘𑀸, 𑀥𑀫𑁆𑀫𑀪𑀸𑀲𑀦𑀲𑀗𑁆𑀔𑀸𑀢𑁄 𑀅𑀲𑀫𑁆𑀨𑀧𑁆𑀧𑀮𑀸𑀧𑁄, 𑀧𑀺𑀬𑀪𑀸𑀲𑀦𑀲𑀗𑁆𑀔𑀸𑀢𑀸 𑀅𑀨𑀭𑀼𑀲𑀯𑀸𑀘𑀸, 𑀲𑀘𑁆𑀘𑀪𑀸𑀲𑀦𑀲𑀗𑁆𑀔𑀸𑀢𑁄 𑀅𑀫𑀼𑀲𑀸𑀯𑀸𑀤𑁄 𑀘𑀸𑀢𑀺 𑀏𑀢𑀸 𑀯𑀸𑀘𑀸 𑀢𑀣𑀸𑀧𑀯𑀢𑁆𑀢𑀸 𑀘𑁂𑀢𑀦𑀸 𑀤𑀝𑁆𑀞𑀩𑁆𑀩𑀸. 𑀲𑀳𑀲𑀤𑁆𑀤𑀸 𑀧𑀦𑀸𑀢𑀺 𑀢𑀲𑁆𑀲 𑀯𑀺𑀓𑀸𑀭𑀲𑁆𑀲 𑀲𑀤𑁆𑀤𑁂𑀦 𑀲𑀳 𑀲𑀫𑁆𑀪𑀽𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀢𑀸𑀬 𑀧𑀦 𑀲𑁄 𑀦 𑀬𑀸𑀯 𑀲𑀤𑁆𑀤𑀪𑀸𑀯𑀻𑀢𑀺 𑀤𑀝𑁆𑀞𑀩𑁆𑀩𑁄, 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑁄 𑀦 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀧𑀯𑀢𑁆𑀢𑁂𑀦 𑀫𑀳𑀸𑀅𑀝𑁆𑀞𑀓𑀣𑀸𑀯𑀸𑀤𑁂𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑀤𑁆𑀤𑁄 𑀯𑀺𑀦𑀸𑀧𑀺 𑀯𑀺𑀜𑁆𑀜𑀢𑁆𑀢𑀺𑀖𑀝𑁆𑀝𑀦𑁂𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀆𑀧𑀚𑁆𑀚𑀢𑀺. ‘‘𑀬𑀸 𑀢𑀸𑀬 𑀯𑀸𑀘𑀸𑀬 𑀯𑀺𑀜𑁆𑀜𑀢𑁆𑀢𑀻’’𑀢𑀺 (𑀥. 𑀲. 𑁬𑁩𑁬) 𑀳𑀺 𑀯𑀘𑀦𑀢𑁄 𑀅𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀲𑀤𑁆𑀤𑁂𑀦 𑀲𑀳 𑀯𑀺𑀜𑁆𑀜𑀢𑁆𑀢𑀺𑀬𑀸 𑀉𑀧𑁆𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺.

𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀲𑀤𑁆𑀤𑀸𑀬𑀢𑀦𑀦𑁆𑀢𑀺 𑀏𑀢𑁆𑀣 𑀘 𑀦 𑀓𑁄𑀘𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁄 𑀲𑀤𑁆𑀤𑁄 𑀅𑀲𑀗𑁆𑀕𑀳𑀺𑀢𑁄 𑀦𑀸𑀫 𑀅𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀫𑀳𑀸𑀅𑀝𑁆𑀞𑀓𑀣𑀸𑀯𑀸𑀤𑀁 𑀧𑀝𑀺𑀲𑁂𑀥𑁂𑀢𑀺. 𑀙𑀩𑁆𑀩𑀺𑀥𑁂𑀦 𑀭𑀽𑀧𑀲𑀗𑁆𑀕𑀳𑀸𑀤𑀻𑀲𑀼 𑀳𑀺 ‘‘𑀲𑁄𑀢𑀯𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺 ‘‘𑀤𑀺𑀝𑁆𑀞𑀁 𑀲𑀼𑀢’’𑀦𑁆𑀢𑀺 𑀏𑀢𑁆𑀣 ‘‘𑀲𑀼𑀢’’𑀦𑁆𑀢𑀺 𑀘 𑀦 𑀓𑁄𑀘𑀺 𑀲𑀤𑁆𑀤𑁄 𑀦 𑀲𑀗𑁆𑀕𑀬𑁆𑀳𑀢𑀻𑀢𑀺. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀺𑀜𑁆𑀜𑀢𑁆𑀢𑀺𑀲𑀳𑀚𑀫𑁂𑀯 𑀚𑀺𑀯𑁆𑀳𑀸𑀢𑀸𑀮𑀼𑀘𑀮𑀦𑀸𑀤𑀺𑀓𑀭𑀯𑀺𑀢𑀓𑁆𑀓𑀲𑀫𑀼𑀝𑁆𑀞𑀺𑀢𑀁 𑀲𑀼𑀔𑀼𑀫𑀲𑀤𑁆𑀤𑀁 ‘‘𑀤𑀺𑀩𑁆𑀩𑀲𑁄𑀢𑁂𑀦 𑀲𑀼𑀢𑁆𑀯𑀸 𑀆𑀤𑀺𑀲𑀢𑀻’’𑀢𑀺 𑀲𑀼𑀢𑁆𑀢𑁂 𑀧𑀝𑁆𑀞𑀸𑀦𑁂 𑀘 𑀑𑀴𑀸𑀭𑀺𑀓𑀲𑀤𑁆𑀤𑀁 𑀲𑀦𑁆𑀥𑀸𑀬 ‘‘𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀅𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀢𑀸 𑀯𑀼𑀢𑁆𑀢𑀸 𑀲𑀺𑀬𑀸. 𑀲𑀤𑁆𑀤𑁄 𑀘 𑀅𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁄 𑀘𑀸𑀢𑀺 𑀯𑀺𑀭𑀼𑀤𑁆𑀥𑀫𑁂𑀢𑀦𑁆𑀢𑀺 𑀧𑀦 𑀧𑀝𑀺𑀓𑁆𑀔𑁂𑀧𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀜𑁆𑀜𑀢𑁆𑀢𑀺𑀧𑀘𑁆𑀘𑀬𑀸 𑀖𑀝𑁆𑀝𑀦𑀸 𑀯𑀺𑀜𑁆𑀜𑀢𑁆𑀢𑀺𑀖𑀝𑁆𑀝𑀦𑀸. 𑀯𑀺𑀜𑁆𑀜𑀢𑁆𑀢𑀺 𑀏𑀯 𑀯𑀸. 𑀖𑀝𑁆𑀝𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀪𑀽𑀢𑀯𑀺𑀓𑀸𑀭𑁄 𑀳𑀺 ‘‘𑀖𑀝𑁆𑀝𑀦𑀸’’𑀢𑀺 𑀯𑀼𑀢𑁆𑀢𑁄. 𑀲𑀗𑁆𑀖𑀝𑁆𑀝𑀦𑁂𑀦 𑀲𑀳𑁂𑀯 𑀲𑀤𑁆𑀤𑁄 𑀉𑀧𑁆𑀧𑀚𑁆𑀚𑀢𑀺, 𑀦 𑀧𑀼𑀩𑁆𑀩𑀸𑀧𑀭𑀪𑀸𑀯𑁂𑀦. 𑀧𑀣𑀯𑀻𑀥𑀸𑀢𑀼𑀬𑀸𑀢𑀺 𑀇𑀤𑀁 𑀯𑀸𑀬𑁄𑀥𑀸𑀢𑀼𑀬𑀸 𑀯𑀺𑀬 𑀘𑀸𑀮𑀦𑀁 𑀧𑀣𑀯𑀻𑀥𑀸𑀢𑀼𑀬𑀸 𑀲𑀗𑁆𑀖𑀝𑁆𑀝𑀦𑀁 𑀓𑀺𑀘𑁆𑀘𑀁 𑀅𑀥𑀺𑀓𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀯𑀺𑀓𑀸𑀭𑀲𑁆𑀲 𑀘 𑀢𑀧𑁆𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀢𑀩𑁆𑀩𑀺𑀓𑀸𑀭𑀸𑀦𑀜𑁆𑀳𑀺 𑀪𑀽𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀘𑁆𑀘𑀬𑀪𑀸𑀯𑁄𑀢𑀺. 𑀅𑀜𑁆𑀜𑀫𑁆𑀧𑀺 𑀲𑀩𑁆𑀩𑀁 𑀯𑀺𑀥𑀸𑀦𑀁 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀁 𑀯𑀺𑀬 𑀯𑁂𑀤𑀺𑀢𑀩𑁆𑀩𑀁.

𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑀁…𑀧𑁂… 𑀦 𑀮𑀩𑁆𑀪𑀢𑀺. 𑀦 𑀳𑀺 𑀘𑀸𑀮𑀦𑀁 𑀉𑀧𑀸𑀤𑀺𑀦𑁆𑀦𑀖𑀝𑁆𑀝𑀦𑀦𑁆𑀢𑀺. 𑀘𑀸𑀮𑀦𑀜𑁆𑀳𑀺 𑀤𑁂𑀲𑀦𑁆𑀢𑀭𑀼𑀧𑁆𑀧𑀸𑀤𑀦𑀧𑀭𑀫𑁆𑀧𑀭𑀢𑀸, 𑀖𑀝𑁆𑀝𑀦𑀁 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀪𑀽𑀢𑀓𑀮𑀸𑀧𑀸𑀦𑀁 𑀆𑀲𑀦𑁆𑀦𑀢𑀭𑀼𑀧𑁆𑀧𑀸𑀤𑁄𑀢𑀺. 𑀉𑀧𑀢𑁆𑀣𑀫𑁆𑀪𑀦𑀓𑀺𑀘𑁆𑀘𑀫𑁆𑀧𑀺 𑀦𑀢𑁆𑀣𑀻𑀢𑀺 𑀉𑀧𑀢𑁆𑀣𑀫𑁆𑀪𑀦𑁂𑀦 𑀯𑀺𑀦𑀸 𑀧𑀞𑀫𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀧𑀺 𑀖𑀝𑁆𑀝𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀢𑀻𑀢𑀺 𑀖𑀝𑁆𑀝𑀦𑀢𑁆𑀣𑀁 𑀉𑀧𑀢𑁆𑀣𑀫𑁆𑀪𑀦𑁂𑀦 𑀧𑀬𑁄𑀚𑀦𑀁 𑀦𑀢𑁆𑀣𑀺, 𑀮𑀤𑁆𑀥𑀸𑀲𑁂𑀯𑀦𑁂𑀦 𑀘𑀺𑀢𑁆𑀢𑁂𑀦𑁂𑀯 𑀖𑀝𑁆𑀝𑀦𑀲𑁆𑀲 𑀩𑀮𑀯𑀪𑀸𑀯𑀢𑁄 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀧𑀢𑁆𑀣𑀫𑁆𑀪𑀦𑀁 𑀦𑀢𑁆𑀣𑀺 𑀅𑀢𑁆𑀣𑀻𑀢𑀺 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀯𑀘𑀻𑀓𑀫𑁆𑀫𑀤𑁆𑀯𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀦𑁄𑀓𑀫𑁆𑀫𑀤𑁆𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑀅𑀬𑀁 𑀦𑀸𑀫 𑀘𑁂𑀢𑀦𑀸 𑀓𑀫𑁆𑀫𑀁 𑀦 𑀳𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸𑀢𑀺 𑀇𑀤𑀁 𑀬𑀲𑁆𑀲 𑀤𑁆𑀯𑀸𑀭𑀁 𑀫𑀦𑁄, 𑀢𑀁𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀓𑀧𑁆𑀧𑁂𑀢𑀻𑀢𑀺 ‘‘𑀢𑁆𑀯𑀁 𑀨𑀼𑀲𑀦𑀁 𑀓𑀭𑁄𑀳𑀺, 𑀢𑁆𑀯𑀁 𑀯𑁂𑀤𑀬𑀺𑀢’’𑀦𑁆𑀢𑀺 𑀏𑀯𑀁 𑀓𑀧𑁆𑀧𑁂𑀦𑁆𑀢𑀁 𑀯𑀺𑀬 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀧𑀓𑀧𑁆𑀧𑀦𑀜𑁆𑀘 𑀢𑀤𑁂𑀯. 𑀓𑀺𑀁 𑀧𑀺𑀡𑁆𑀟𑀁 𑀓𑀭𑁄𑀢𑀻𑀢𑀺 𑀆𑀬𑀽𑀳𑀦𑀢𑁆𑀣𑀯𑀲𑁂𑀦 𑀧𑀼𑀘𑁆𑀙𑀢𑀺. 𑀨𑀲𑁆𑀲𑀸𑀤𑀺𑀥𑀫𑁆𑀫𑁂 𑀳𑀺 𑀅𑀯𑀺𑀧𑁆𑀧𑀓𑀺𑀡𑁆𑀡𑁂 𑀓𑀢𑁆𑀯𑀸 𑀲𑀓𑀺𑀘𑁆𑀘𑁂𑀲𑀼 𑀧𑀯𑀢𑁆𑀢𑀦𑀁 𑀆𑀬𑀽𑀳𑀦𑀁, 𑀢𑀢𑁆𑀣𑁂𑀯 𑀩𑁆𑀬𑀸𑀧𑀸𑀭𑀡𑀁 𑀘𑁂𑀢𑀬𑀦𑀁, 𑀢𑀣𑀸𑀓𑀭𑀡𑀁 𑀅𑀪𑀺𑀲𑀗𑁆𑀔𑀭𑀡𑀦𑁆𑀢𑀺. 𑀢𑁂𑀪𑀽𑀫𑀓𑀲𑁆𑀲𑁂𑀯 𑀕𑀳𑀡𑀁 𑀮𑁄𑀓𑀼𑀢𑁆𑀢𑀭𑀓𑀫𑁆𑀫𑀲𑁆𑀲 𑀓𑀫𑁆𑀫𑀓𑁆𑀔𑀬𑀓𑀭𑀢𑁆𑀢𑀸.

𑀫𑀦𑁄𑀓𑀫𑁆𑀫𑀤𑁆𑀯𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸

𑀘𑁂𑀢𑀬𑀺𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀢𑀻𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀧𑀼𑀭𑀺𑀫𑀘𑁂𑀢𑀦𑀸𑀬 𑀘𑁂𑀢𑀬𑀺𑀢𑁆𑀯𑀸 𑀲𑀦𑁆𑀦𑀺𑀝𑁆𑀞𑀸𑀦𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀫𑀸 𑀘𑁂𑀢𑀦𑀸𑀧𑀼𑀩𑁆𑀩𑀓𑀁 𑀓𑀫𑁆𑀫𑀁 𑀢𑀁𑀘𑁂𑀢𑀦𑀸𑀲𑀪𑀸𑀯𑀫𑁂𑀯𑀸𑀢𑀺 𑀘𑁂𑀢𑀦𑀁 𑀅𑀳𑀁 𑀓𑀫𑁆𑀫𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀫𑀸𑀦𑀓𑀸𑀮𑀢𑁆𑀢𑁂𑀧𑀺 𑀓𑀸𑀭𑀡𑀓𑀺𑀭𑀺𑀬𑀸 𑀧𑀼𑀩𑁆𑀩𑀓𑀸𑀮𑀸 𑀯𑀺𑀬 𑀯𑀢𑁆𑀢𑀼𑀁 𑀬𑀼𑀢𑁆𑀢𑀸, 𑀨𑀮𑀓𑀺𑀭𑀺𑀬𑀸 𑀘 𑀅𑀧𑀭𑀓𑀸𑀮𑀸 𑀯𑀺𑀬. 𑀬𑀲𑁆𑀫𑀸 𑀘 𑀘𑁂𑀢𑀦𑀸𑀬 𑀘𑁂𑀢𑀬𑀺𑀢𑁆𑀯𑀸 𑀓𑀸𑀬𑀯𑀸𑀘𑀸𑀳𑀺 𑀘𑁄𑀧𑀦𑀓𑀺𑀭𑀺𑀬𑀁 𑀫𑀦𑀲𑀸 𑀘 𑀅𑀪𑀺𑀚𑁆𑀛𑀸𑀤𑀺𑀓𑀺𑀭𑀺𑀬𑀁 𑀓𑀭𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀲𑀸 𑀓𑀺𑀭𑀺𑀬𑀸𑀬 𑀓𑀸𑀭𑀺𑀓𑀁 𑀘𑁂𑀢𑀦𑀁 𑀅𑀳𑀁 𑀓𑀫𑁆𑀫𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀓𑀸𑀬𑁂 𑀯𑀸𑀢𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑁂 𑀓𑀸𑀬𑁂 𑀯𑀸. 𑀲𑀢𑀻𑀢𑀺 𑀥𑀭𑀫𑀸𑀦𑁂, 𑀅𑀦𑀺𑀭𑁄𑀥𑀺𑀢𑁂 𑀯𑀸. 𑀓𑀸𑀬𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀓𑀸𑀬𑀲𑀜𑁆𑀘𑁂𑀢𑀦𑀸. 𑀏𑀢𑁆𑀣 𑀘 𑀲𑀼𑀔𑀤𑀼𑀓𑁆𑀔𑀼𑀧𑁆𑀧𑀸𑀤𑀓𑁂𑀦 𑀓𑀫𑁆𑀫𑁂𑀦 𑀪𑀯𑀺𑀢𑀩𑁆𑀩𑀁, 𑀘𑁂𑀢𑀦𑀸 𑀘 𑀲𑀼𑀔𑀤𑀼𑀓𑁆𑀔𑀼𑀧𑁆𑀧𑀸𑀤𑀺𑀓𑀸 𑀯𑀼𑀢𑁆𑀢𑀸𑀢𑀺 𑀢𑀲𑁆𑀲𑀸 𑀓𑀫𑁆𑀫𑀪𑀸𑀯𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀲𑀜𑁆𑀘𑁂𑀢𑀦𑀺𑀬𑀦𑁆𑀢𑀺 𑀲𑀜𑁆𑀘𑁂𑀢𑀦𑀲𑀪𑀸𑀯𑀯𑀦𑁆𑀢𑀁. 𑀲𑀫𑀺𑀤𑁆𑀥𑀺𑀢𑁆𑀣𑁂𑀭𑁂𑀦 ‘‘𑀲𑀜𑁆𑀘𑁂𑀢𑀦𑀺𑀬𑀁, 𑀆𑀯𑀼𑀲𑁄…𑀧𑁂… 𑀫𑀦𑀲𑀸 𑀲𑀼𑀔𑀁 𑀲𑁄 𑀯𑁂𑀤𑀬𑀢𑀻’’𑀢𑀺 (𑀫. 𑀦𑀺. 𑁩.𑁩𑁦𑁦; 𑀓𑀣𑀸. 𑁫𑁩𑁯) 𑀅𑀯𑀺𑀪𑀚𑀺𑀢𑁆𑀯𑀸 𑀩𑁆𑀬𑀸𑀓𑀢𑁄. 𑀲𑀼𑀔𑀯𑁂𑀤𑀦𑀻𑀬𑀦𑁆𑀢𑀺𑀆𑀤𑀺𑀦𑀸 𑀧𑀦 𑀯𑀺𑀪𑀚𑀺𑀢𑁆𑀯𑀸 𑀩𑁆𑀬𑀸𑀓𑀸𑀢𑀩𑁆𑀩𑁄 𑀲𑁄 𑀧𑀜𑁆𑀳𑁄, 𑀢𑀲𑁆𑀫𑀸 𑀲𑀫𑁆𑀫𑀸 𑀩𑁆𑀬𑀸𑀓𑀢𑁄 𑀦𑀸𑀫 𑀦 𑀳𑁄𑀢𑀺. 𑀇𑀢𑀭𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑀣𑀸 𑀧𑀦 𑀲𑀼𑀢𑁆𑀢𑀸𑀦𑀺 𑀞𑀺𑀢𑀸𑀦𑀺, 𑀢𑀣𑀸 𑀘𑁄𑀧𑀦𑀓𑀺𑀭𑀺𑀬𑀸𑀦𑀺𑀲𑁆𑀲𑀬𑀪𑀽𑀢𑀸 𑀓𑀸𑀬𑀯𑀸𑀘𑀸 𑀅𑀪𑀺𑀚𑁆𑀛𑀸𑀤𑀺𑀓𑀺𑀭𑀺𑀬𑀸𑀦𑀺𑀲𑁆𑀲𑀬𑁄 𑀘 𑀫𑀦𑁄𑀤𑁆𑀯𑀸𑀭𑀸𑀦𑀺, 𑀬𑀸𑀬 𑀧𑀦 𑀘𑁂𑀢𑀦𑀸𑀬 𑀢𑁂𑀳𑀺 𑀓𑀸𑀬𑀸𑀤𑀻𑀳𑀺 𑀓𑀭𑀡𑀪𑀽𑀢𑁂𑀳𑀺 𑀘𑁄𑀧𑀦𑀸𑀪𑀺𑀚𑁆𑀛𑀸𑀤𑀺𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑀺 𑀯𑀸𑀲𑀺𑀆𑀤𑀻𑀳𑀺 𑀯𑀺𑀬 𑀙𑁂𑀤𑀦𑀸𑀤𑀺𑀁, 𑀲𑀸 𑀘𑁂𑀢𑀦𑀸 𑀓𑀫𑁆𑀫𑀦𑁆𑀢𑀺 𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀺𑀬𑀫𑁆𑀧𑀺 𑀓𑀫𑁆𑀫𑀤𑁆𑀯𑀸𑀭𑀸𑀪𑁂𑀤𑀦𑀜𑁆𑀘 𑀓𑀫𑁆𑀫𑀤𑁆𑀯𑀸𑀭𑀯𑀯𑀢𑁆𑀣𑀸𑀦𑀜𑁆𑀘 𑀤𑀺𑀲𑁆𑀲𑀢𑀺, 𑀏𑀯𑀜𑁆𑀘 𑀲𑀢𑀺 ‘‘𑀓𑀸𑀬𑁂𑀦 𑀘𑁂 𑀓𑀢𑀁 𑀓𑀫𑁆𑀫’’𑀦𑁆𑀢𑀺𑀆𑀤𑀺𑀕𑀸𑀣𑀸𑀬𑁄 (𑀥. 𑀲. 𑀅𑀝𑁆𑀞. 𑁧 𑀓𑀸𑀬𑀓𑀫𑁆𑀫𑀤𑁆𑀯𑀸𑀭) 𑀅𑀢𑀺𑀯𑀺𑀬 𑀬𑀼𑀚𑁆𑀚𑀦𑁆𑀢𑀺.

𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀇𑀥 𑀮𑁄𑀓𑀺𑀬𑀓𑀫𑁆𑀫𑀓𑀣𑀸𑀬𑀁 𑀅𑀦𑀥𑀺𑀧𑁆𑀧𑁂𑀢𑁄𑀧𑀺 𑀪𑀚𑀸𑀧𑀺𑀬𑀫𑀸𑀦𑁄 𑀢𑀻𑀡𑀺 𑀓𑀫𑁆𑀫𑀸𑀦𑀺 𑀪𑀚𑀢𑀺. 𑀫𑀦𑁂𑀦 𑀤𑀼𑀲𑁆𑀲𑀻𑀮𑁆𑀬𑀦𑁆𑀢𑀺 𑀓𑀸𑀬𑀺𑀓𑀯𑀸𑀘𑀲𑀺𑀓𑀯𑀻𑀢𑀺𑀓𑁆𑀓𑀫𑀯𑀚𑁆𑀚𑀁 𑀲𑀩𑁆𑀩𑀁 𑀅𑀓𑀼𑀲𑀮𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀗𑁆𑀓𑀧𑁆𑀧𑀯𑀸𑀬𑀸𑀫𑀲𑀢𑀺𑀲𑀫𑀸𑀥𑀺𑀁 𑀯𑀸. 𑀢𑀫𑁆𑀧𑀺 𑀘𑁂𑀢𑀁 ‘‘𑀫𑀦𑀲𑀸 𑀲𑀁𑀯𑀭𑁄 𑀲𑀸𑀥𑀽’’𑀢𑀺 (𑀲𑀁. 𑀦𑀺. 𑁧.𑁧𑁧𑁬; 𑀥. 𑀧. 𑁩𑁬𑁧) 𑀯𑀼𑀢𑁆𑀢𑀲𑁆𑀲 𑀲𑀁𑀯𑀭𑀲𑁆𑀲 𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀲𑀻𑀮𑀯𑀺𑀧𑀢𑁆𑀢𑀺𑀯𑀲𑁂𑀦. 𑀦 𑀳𑀺 𑀲𑀸 𑀫𑀸𑀦𑀲𑀺𑀓𑀸 𑀅𑀢𑁆𑀣𑀻𑀢𑀺 𑀫𑀕𑁆𑀕𑀲𑁆𑀲𑁂𑀯 𑀪𑀚𑀸𑀧𑀦𑀁 𑀫𑀳𑀸𑀯𑀺𑀲𑀬𑀢𑁆𑀢𑀸. 𑀩𑁄𑀚𑁆𑀛𑀗𑁆𑀕𑀸 𑀳𑀺 𑀫𑀦𑁄𑀓𑀫𑁆𑀫𑀫𑁂𑀯 𑀪𑀚𑁂𑀬𑁆𑀬𑀼𑀁, 𑀦 𑀘 𑀦 𑀲𑀓𑁆𑀓𑀸 𑀫𑀕𑁆𑀕𑀪𑀚𑀸𑀧𑀦𑁂𑀦𑁂𑀯 𑀢𑁂𑀲𑀁 𑀪𑀚𑀸𑀧𑀦𑀁 𑀯𑀺𑀜𑁆𑀜𑀸𑀢𑀼𑀦𑁆𑀢𑀺.

𑀓𑀫𑁆𑀫𑀧𑀣𑀁 𑀅𑀧𑁆𑀧𑀢𑁆𑀢𑀸𑀦𑀫𑁆𑀧𑀺 𑀢𑀁𑀢𑀁𑀤𑁆𑀯𑀸𑀭𑁂 𑀲𑀁𑀲𑀦𑁆𑀤𑀦𑀁 𑀅𑀯𑀭𑁄𑀥𑀦𑀁 𑀤𑁆𑀯𑀸𑀭𑀦𑁆𑀢𑀭𑁂 𑀓𑀫𑁆𑀫𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀬𑀫𑁆𑀧𑀺 𑀓𑀫𑁆𑀫𑀤𑁆𑀯𑀸𑀭𑀸𑀪𑁂𑀤𑀦𑀜𑁆𑀘 𑀤𑁆𑀯𑀸𑀭𑀲𑀁𑀲𑀦𑁆𑀤𑀦𑀁 𑀦𑀸𑀫. ‘‘𑀢𑀺𑀯𑀺𑀥𑀸, 𑀪𑀺𑀓𑁆𑀔𑀯𑁂, 𑀓𑀸𑀬𑀲𑀜𑁆𑀘𑁂𑀢𑀦𑀸 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫’’𑀦𑁆𑀢𑀺𑀆𑀤𑀺𑀦𑀸 (𑀓𑀣𑀸. 𑁫𑁩𑁯) 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀸𑀯 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸 𑀓𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑀸𑀢𑀺 𑀧𑀼𑀭𑀺𑀫𑀘𑁂𑀢𑀦𑀸 𑀲𑀩𑁆𑀩𑀸 𑀓𑀸𑀬𑀓𑀫𑁆𑀫𑀁 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀆𑀡𑀸𑀧𑁂𑀢𑁆𑀯𑀸…𑀧𑁂… 𑀅𑀮𑀪𑀦𑁆𑀢𑀲𑁆𑀲𑀸𑀢𑀺 𑀆𑀡𑀢𑁆𑀢𑁂𑀳𑀺 𑀅𑀫𑀸𑀭𑀺𑀢𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀦𑀸𑀫 𑀳𑁄𑀢𑀺 𑀅𑀓𑀫𑁆𑀫𑀧𑀣𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀇𑀫𑁂 𑀲𑀢𑁆𑀢𑀸 𑀳𑀜𑁆𑀜𑀦𑁆𑀢𑀽’’𑀢𑀺 𑀧𑀯𑀢𑁆𑀢𑀩𑁆𑀬𑀸𑀧𑀸𑀤𑀯𑀲𑁂𑀦 𑀘𑁂𑀢𑀦𑀸𑀧𑀓𑁆𑀔𑀺𑀓𑀸 𑀯𑀸 𑀪𑀯𑀦𑁆𑀢𑀺 𑀓𑀸𑀬𑀓𑀫𑁆𑀫𑀯𑁄𑀳𑀸𑀭𑀮𑀸𑀪𑀸. 𑀅𑀩𑁆𑀩𑁄𑀳𑀸𑀭𑀺𑀓𑀸 𑀯𑀸 𑀫𑀦𑁄𑀓𑀫𑁆𑀫𑀯𑁄𑀳𑀸𑀭𑀯𑀺𑀭𑀳𑀸. 𑀲𑀲𑀫𑁆𑀪𑀸𑀭𑀧𑀣𑀯𑀻𑀆𑀤𑀻𑀲𑀼 𑀆𑀧𑀸𑀤𑀬𑁄 𑀏𑀢𑁆𑀣 𑀦𑀺𑀤𑀲𑁆𑀲𑀦𑀁.

𑀓𑀼𑀮𑀼𑀫𑁆𑀩𑀲𑁆𑀲𑀸𑀢𑀺 𑀕𑀩𑁆𑀪𑀲𑁆𑀲, 𑀓𑀼𑀮𑀲𑁆𑀲𑁂𑀯 𑀯𑀸. 𑀢𑀺𑀲𑁆𑀲𑁄𑀧𑀺 𑀲𑀗𑁆𑀕𑀻𑀢𑀺𑀬𑁄 𑀆𑀭𑀼𑀴𑁆𑀳𑀢𑀸𑀬 𑀅𑀦𑀦𑀼𑀚𑀸𑀦𑀦𑀢𑁄 ‘‘𑀢𑀯 𑀲𑀼𑀢𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀤𑀲𑀯𑀺𑀥𑀸 𑀇𑀤𑁆𑀥𑀺 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀇𑀤𑁆𑀥𑀺𑀓𑀣𑀸𑀬 𑀕𑀳𑁂𑀢𑀩𑁆𑀩𑀸. 𑀪𑀸𑀯𑀦𑀸𑀫𑀬𑀦𑁆𑀢𑀺 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀖𑀝𑀪𑁂𑀤𑁄 𑀯𑀺𑀬 𑀧𑀭𑀽𑀧𑀖𑀸𑀢𑁄, 𑀉𑀤𑀓𑀯𑀺𑀦𑀸𑀲𑁄 𑀯𑀺𑀬 𑀇𑀤𑁆𑀥𑀺𑀯𑀺𑀦𑀸𑀲𑁄 𑀘 𑀳𑁄𑀢𑀻𑀢𑀺 𑀉𑀧𑀫𑀸 𑀲𑀁𑀲𑀦𑁆𑀤𑀢𑀺. 𑀢𑀯 𑀧𑀜𑁆𑀳𑁄𑀢𑀺 𑀪𑀸𑀯𑀦𑀸𑀫𑀬𑀸𑀬 𑀧𑀭𑀽𑀧𑀖𑀸𑀢𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑁄 𑀜𑀸𑀧𑁂𑀢𑀼𑀁 𑀇𑀘𑁆𑀙𑀺𑀢𑁄 𑀅𑀢𑁆𑀣𑁄. 𑀆𑀣𑀩𑁆𑀩𑀡𑀺𑀤𑁆𑀥𑀺 𑀯𑀺𑀚𑁆𑀚𑀸𑀫𑀬𑀺𑀤𑁆𑀥𑀺 𑀳𑁄𑀢𑀺. 𑀲𑀢𑁆𑀢𑀫𑁂 𑀧𑀤𑁂𑀢𑀺 𑀫𑀡𑁆𑀟𑀮𑀸𑀤𑀺𑀢𑁄 𑀲𑀢𑁆𑀢𑀫𑁂 𑀧𑀤𑁂.

𑀯𑀘𑀦𑀦𑁆𑀢𑀭𑁂𑀦 𑀕𑀫𑁂𑀢𑀩𑁆𑀩𑀢𑁆𑀣𑀁 𑀦𑁂𑀬𑁆𑀬𑀢𑁆𑀣𑀁, 𑀲𑀬𑀫𑁂𑀯 𑀕𑀫𑀺𑀢𑀩𑁆𑀩𑀢𑁆𑀣𑀁 𑀦𑀻𑀢𑀢𑁆𑀣𑀁. 𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀉𑀤𑀸𑀳𑀼 𑀅𑀓𑀺𑀭𑀺𑀬𑀢𑁄𑀢𑀺 𑀢𑁂𑀦𑀸𑀥𑀺𑀧𑁆𑀧𑁂𑀢𑀁 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀁 𑀲𑀦𑁆𑀥𑀸𑀬 𑀧𑀼𑀘𑁆𑀙𑀢𑀺, 𑀦 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀯𑀼𑀢𑁆𑀢𑀫𑁂𑀯 𑀳𑀺 𑀲𑁄 𑀅𑀦𑀭𑀺𑀬𑀯𑁄𑀳𑀸𑀭𑀁 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑁆𑀯𑀸 𑀯𑁄𑀳𑀭𑀢𑀻𑀢𑀺. 𑀯𑀸𑀘𑀸𑀕𑀺𑀭𑀦𑁆𑀢𑀺 𑀯𑀸𑀘𑀸𑀲𑀗𑁆𑀔𑀸𑀢𑀁 𑀕𑀺𑀭𑀁, 𑀯𑀸𑀘𑀸𑀦𑀼𑀘𑁆𑀘𑀸𑀭𑀡𑀁 𑀯𑀸.

𑀔𑀦𑁆𑀤𑀲𑀺𑀯𑀸𑀤𑀬𑁄 𑀲𑁂𑀝𑁆𑀞𑀸𑀢𑀺 𑀔𑀦𑁆𑀤𑀸𑀢𑀺 𑀓𑀼𑀫𑀸𑀭𑀸. 𑀲𑀺𑀯𑀸𑀢𑀺 𑀫𑀳𑁂𑀲𑁆𑀲𑀭𑀸, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀦𑀺𑀤𑀲𑁆𑀲𑀦𑀢𑁆𑀣𑀫𑀺𑀤𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀢𑁆𑀣𑀺𑀓𑀤𑀺𑀝𑁆𑀞𑀸𑀤𑀬𑁄 𑀏𑀯 𑀳𑀺 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀸 𑀓𑀫𑁆𑀫𑀦𑁆𑀢𑀺. 𑀘𑁂𑀢𑀦𑀸 𑀧𑀦𑁂𑀢𑁆𑀣 𑀅𑀩𑁆𑀩𑁄𑀳𑀸𑀭𑀺𑀓𑀸𑀢𑀺 𑀓𑀸𑀬𑀤𑁆𑀯𑀸𑀭𑁂 𑀯𑀘𑀻𑀤𑁆𑀯𑀸𑀭𑁂 𑀘 𑀲𑀫𑀼𑀝𑁆𑀞𑀺𑀢𑀸𑀧𑀺 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀦𑁆𑀢𑀺 𑀘 𑀯𑁄𑀳𑀸𑀭𑀁 𑀦 𑀮𑀪𑀢𑀺 𑀅𑀪𑀺𑀚𑁆𑀛𑀸𑀤𑀺𑀧𑁆𑀧𑀥𑀸𑀦𑀢𑁆𑀢𑀸. ‘‘𑀢𑀺𑀯𑀺𑀥𑀸, 𑀪𑀺𑀓𑁆𑀔𑀯𑁂, 𑀫𑀦𑁄𑀲𑀜𑁆𑀘𑁂𑀢𑀦𑀸 𑀅𑀓𑀼𑀲𑀮𑀁 𑀫𑀦𑁄𑀓𑀫𑁆𑀫’’𑀦𑁆𑀢𑀺 𑀧𑀦 𑀯𑀘𑀦𑀢𑁄 𑀲𑀪𑀸𑀯𑁂𑀦𑁂𑀯 𑀲𑀸 𑀫𑀦𑁄𑀓𑀫𑁆𑀫𑀁, 𑀦 𑀅𑀪𑀺𑀚𑁆𑀛𑀸𑀤𑀺𑀧𑀓𑁆𑀔𑀺𑀓𑀢𑁆𑀢𑀸𑀢𑀺 ‘‘𑀅𑀪𑀺𑀚𑁆𑀛𑀸𑀤𑀺𑀧𑀓𑁆𑀔𑀺𑀓𑀸𑀯𑀸’’𑀢𑀺 𑀦 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀸𑀦𑀺 𑀅𑀘𑁄𑀧𑁂𑀢𑁆𑀯𑀸 𑀘𑀺𑀦𑁆𑀢𑀦𑀓𑀸𑀮𑁂 𑀘𑁂𑀢𑀦𑀸𑀧𑀺 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀫𑀦𑁄𑀤𑁆𑀯𑀸𑀭𑁂 𑀏𑀯 𑀲𑀫𑀼𑀝𑁆𑀞𑀳𑀦𑁆𑀢𑀺, 𑀢𑀲𑁆𑀫𑀸 𑀘𑁂𑀢𑀦𑀸𑀬 𑀅𑀩𑁆𑀩𑁄𑀳𑀸𑀭𑀺𑀓𑀪𑀸𑀯𑁄 𑀓𑀣𑀜𑁆𑀘𑀺 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀢𑀺𑀯𑀺𑀥𑀸, 𑀪𑀺𑀓𑁆𑀔𑀯𑁂, 𑀓𑀸𑀬𑀲𑀜𑁆𑀘𑁂𑀢𑀦𑀸 𑀓𑀼𑀲𑀮𑀁 𑀓𑀸𑀬𑀓𑀫𑁆𑀫’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀓𑀣𑀸. 𑁫𑁩𑁯) 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀝𑀺𑀧𑀓𑁆𑀔𑀪𑀽𑀢𑀸 𑀢𑀩𑁆𑀩𑀺𑀭𑀢𑀺𑀯𑀺𑀲𑀺𑀝𑁆𑀞𑀸 𑀘𑁂𑀢𑀦𑀸𑀯 𑀧𑀸𑀡𑀸𑀢𑀺𑀧𑀸𑀢𑀯𑀺𑀭𑀢𑀺𑀆𑀤𑀺𑀓𑀸 𑀳𑁄𑀦𑁆𑀢𑀻𑀢𑀺 ‘‘𑀘𑁂𑀢𑀦𑀸𑀧𑀓𑁆𑀔𑀺𑀓𑀸 𑀯𑀸’’𑀢𑀺 𑀯𑀼𑀢𑁆𑀢𑀁, 𑀦 ‘‘𑀯𑀺𑀭𑀢𑀺𑀧𑀓𑁆𑀔𑀺𑀓𑀸’’𑀢𑀺. 𑀭𑀓𑁆𑀔𑀢𑀻𑀢𑀺 𑀅𑀯𑀺𑀦𑀸𑀲𑁂𑀢𑁆𑀯𑀸 𑀓𑀣𑁂𑀢𑀺. 𑀪𑀺𑀦𑁆𑀤𑀢𑀻𑀢𑀺 𑀯𑀺𑀦𑀸𑀲𑁂𑀢𑁆𑀯𑀸 𑀓𑀣𑁂𑀢𑀺.

𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀤𑁆𑀯𑀸𑀭𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀤𑁆𑀯𑀸𑀭𑀁. 𑀘𑀓𑁆𑀔𑀼 𑀘 𑀢𑀁 𑀯𑀺𑀜𑁆𑀜𑀸𑀡𑀤𑁆𑀯𑀸𑀭𑀜𑁆𑀘𑀸𑀢𑀺 𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀤𑁆𑀯𑀸𑀭𑀁. 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑀤𑁆𑀯𑀸𑀭𑀦𑁆𑀢𑀺 𑀯𑀸 𑀅𑀲𑀫𑀸𑀲𑀦𑀺𑀤𑁆𑀤𑁂𑀲𑁄. 𑀢𑀁 𑀧𑀦 𑀘𑀓𑁆𑀔𑀼𑀫𑁂𑀯. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. ‘‘𑀘𑀓𑁆𑀔𑀼𑀦𑀸 𑀲𑀁𑀯𑀭𑁄 𑀲𑀸𑀥𑀽’’𑀢𑀺𑀆𑀤𑀺𑀓𑀸𑀬 (𑀥. 𑀧. 𑁩𑁬𑁦) 𑀕𑀸𑀣𑀸𑀬 𑀧𑀲𑀸𑀤𑀓𑀸𑀬𑀘𑁄𑀧𑀦𑀓𑀸𑀬𑀲𑀁𑀯𑀭𑁂 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀓𑀸𑀬𑁂𑀦 𑀲𑀁𑀯𑀭𑁄 𑀯𑀼𑀢𑁆𑀢𑁄, 𑀢𑀁 𑀇𑀥 𑀪𑀺𑀦𑁆𑀤𑀺𑀢𑁆𑀯𑀸 𑀅𑀝𑁆𑀞 𑀲𑀁𑀯𑀭𑀸, 𑀢𑀧𑁆𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀅𑀲𑀁𑀯𑀭𑀸 𑀅𑀝𑁆𑀞 𑀓𑀣𑀺𑀢𑀸. 𑀲𑀻𑀮𑀲𑀁𑀯𑀭𑀸𑀤𑀬𑁄𑀧𑀺 𑀧𑀜𑁆𑀘𑁂𑀯 𑀲𑀁𑀯𑀭𑀸 𑀲𑀩𑁆𑀩𑀤𑁆𑀯𑀸𑀭𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀸𑀧𑀺, 𑀢𑀧𑁆𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀤𑀼𑀲𑁆𑀲𑀻𑀮𑁆𑀬𑀸𑀤𑀻𑀦𑀺 𑀅𑀲𑀁𑀯𑀭𑀸𑀢𑀺 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀤𑀼𑀲𑁆𑀲𑀻𑀮𑁆𑀬𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀘𑁂𑀢𑀦𑀸. 𑀫𑀼𑀝𑁆𑀞𑀲𑁆𑀲𑀘𑁆𑀘𑀁 𑀲𑀢𑀺𑀧𑀝𑀺𑀧𑀓𑁆𑀔𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀧𑀫𑀸𑀤𑀦𑁆𑀢𑀺 𑀓𑁂𑀘𑀺. 𑀲𑀻𑀢𑀸𑀤𑀻𑀲𑀼 𑀧𑀝𑀺𑀖𑁄 𑀅𑀓𑁆𑀔𑀦𑁆𑀢𑀺. 𑀣𑀺𑀦𑀫𑀺𑀤𑁆𑀥𑀁 𑀓𑁄𑀲𑀚𑁆𑀚𑀁.

𑀯𑀺𑀦𑀸 𑀯𑀘𑀻𑀤𑁆𑀯𑀸𑀭𑁂𑀦 𑀲𑀼𑀤𑁆𑀥𑀁 𑀓𑀸𑀬𑀤𑁆𑀯𑀸𑀭𑀲𑀗𑁆𑀔𑀸𑀢𑀦𑁆𑀢𑀺 𑀇𑀤𑀁 𑀯𑀘𑀻𑀤𑁆𑀯𑀸𑀭𑀲𑀮𑁆𑀮𑀓𑁆𑀔𑀺𑀢𑀲𑁆𑀲 𑀫𑀼𑀲𑀸𑀯𑀸𑀤𑀸𑀤𑀺𑀦𑁄𑀧𑀺 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀸 𑀅𑀲𑀼𑀤𑁆𑀥𑀢𑀸 𑀅𑀢𑁆𑀣𑀻𑀢𑀺 𑀢𑀁𑀦𑀺𑀯𑀸𑀭𑀡𑀢𑁆𑀣𑀁 𑀯𑀼𑀢𑁆𑀢𑀁. 𑀦 𑀳𑀺 𑀢𑀁 𑀓𑀸𑀬𑀓𑀫𑁆𑀫𑀁 𑀳𑁄𑀢𑀺. 𑀲𑀼𑀤𑁆𑀥𑀯𑀘𑀻𑀤𑁆𑀯𑀸𑀭𑁄𑀧𑀮𑀓𑁆𑀔𑀺𑀢𑀁 𑀧𑀦 𑀯𑀘𑀻𑀓𑀫𑁆𑀫𑀫𑁂𑀯 𑀳𑁄𑀢𑀻𑀢𑀺. 𑀏𑀢𑁆𑀣 𑀅𑀲𑀁𑀯𑀭𑁄𑀢𑀺 𑀏𑀢𑁂𑀦 𑀲𑀼𑀤𑁆𑀥𑀓𑀸𑀬𑀤𑁆𑀯𑀸𑀭𑁂𑀦 𑀉𑀧𑀮𑀓𑁆𑀔𑀺𑀢𑁄 𑀅𑀲𑀁𑀯𑀭𑁄 𑀤𑁆𑀯𑀸𑀭𑀦𑁆𑀢𑀭𑁂 𑀉𑀧𑁆𑀧𑀚𑁆𑀚𑀫𑀸𑀦𑁄𑀧𑀺 𑀯𑀼𑀢𑁆𑀢𑁄. 𑀤𑁆𑀯𑀸𑀭𑀦𑁆𑀢𑀭𑀸𑀦𑀼𑀧𑀮𑀓𑁆𑀔𑀺𑀢𑀁 𑀲𑀩𑁆𑀩𑀁 𑀢𑀁𑀤𑁆𑀯𑀸𑀭𑀺𑀓𑀸𑀓𑀼𑀲𑀮𑀜𑁆𑀘𑁂𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀓𑀫𑁆𑀫𑀧𑀣𑀲𑀁𑀲𑀦𑁆𑀤𑀦𑁂 ‘‘𑀘𑁄𑀧𑀦𑀓𑀸𑀬𑀅𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑁄 𑀅𑀲𑀁𑀯𑀭𑁄 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀫𑁂𑀯 𑀳𑁄𑀢𑀻’’𑀢𑀺𑀆𑀤𑀺 ‘‘𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀘𑁄𑀧𑀦𑀓𑀸𑀬𑀅𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀯𑀘𑀻𑀅𑀲𑀁𑀯𑀭𑀯𑀲𑁂𑀦 𑀘 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀲𑀳 𑀅𑀯𑀺𑀭𑀼𑀤𑁆𑀥𑀁 𑀳𑁄𑀢𑀺. 𑀅𑀲𑀁𑀯𑀭𑁄 𑀳𑀺 𑀤𑁆𑀯𑀸𑀭𑀦𑁆𑀢𑀭𑁂 𑀉𑀧𑁆𑀧𑀚𑁆𑀚𑀫𑀸𑀦𑁄𑀧𑀺 𑀲𑀤𑁆𑀯𑀸𑀭𑁂 𑀏𑀯𑀸𑀢𑀺 𑀯𑀼𑀘𑁆𑀘𑀢𑀺, 𑀲𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀦𑁆𑀦𑁄𑀢𑀺 𑀘, 𑀓𑀫𑁆𑀫𑀁 𑀅𑀜𑁆𑀜𑀤𑁆𑀯𑀸𑀭𑁂 𑀅𑀜𑁆𑀜𑀤𑁆𑀯𑀸𑀭𑀯𑀲𑁂𑀦 𑀘𑀸𑀢𑀺 𑀏𑀯𑀁 𑀅𑀯𑀺𑀭𑀼𑀤𑁆𑀥𑀁.

𑀅𑀣 𑀯𑀸 𑀏𑀢𑁆𑀣𑀸𑀢𑀺 𑀲𑀼𑀤𑁆𑀥𑀁 𑀅𑀲𑀼𑀤𑁆𑀥𑀦𑁆𑀢𑀺 𑀏𑀢𑀁 𑀅𑀯𑀺𑀘𑀸𑀭𑁂𑀢𑁆𑀯𑀸 𑀏𑀢𑀲𑁆𑀫𑀺𑀁 𑀘𑁄𑀧𑀦𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀲𑀢𑀺 𑀤𑁆𑀯𑀸𑀭𑀦𑁆𑀢𑀭𑁄𑀧𑀮𑀓𑁆𑀔𑀺𑀢𑀁 𑀓𑀫𑁆𑀫𑀧𑀣𑀪𑀸𑀯𑀧𑁆𑀧𑀢𑁆𑀢𑀢𑀸𑀬 𑀯𑀘𑀻𑀫𑀦𑁄𑀓𑀫𑁆𑀫𑀁 𑀘𑁄𑀧𑀦𑀓𑀸𑀬𑀅𑀲𑀁𑀯𑀭𑀤𑁆𑀯𑀸𑀭𑁂 𑀉𑀧𑁆𑀧𑀦𑁆𑀦𑀁, 𑀲𑁂𑀲𑀁 𑀲𑀩𑁆𑀩𑀁 𑀢𑀁𑀤𑁆𑀯𑀸𑀭𑀼𑀧𑁆𑀧𑀦𑁆𑀦𑀸𑀓𑀼𑀲𑀮𑀁 𑀯𑀺𑀬 ‘‘𑀘𑁄𑀧𑀦𑀓𑀸𑀬𑀅𑀲𑀁𑀯𑀭𑁄’’𑀢𑀺 𑀯𑀼𑀘𑁆𑀘𑀢𑀺. 𑀓𑀫𑁆𑀫𑀧𑀣𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀤𑁆𑀯𑀸𑀭𑀦𑁆𑀢𑀭𑀼𑀧𑁆𑀧𑀦𑁆𑀦𑀁 𑀓𑀸𑀬𑀓𑀫𑁆𑀫𑀜𑁆𑀘 𑀢𑀣𑀸 𑀦 𑀯𑀼𑀘𑁆𑀘𑀢𑀻𑀢𑀺 𑀓𑀫𑁆𑀫𑀧𑀣𑀲𑀁𑀲𑀦𑁆𑀤𑀦𑀯𑀺𑀭𑁄𑀥𑁄 𑀲𑀺𑀬𑀸, 𑀢𑀤𑀯𑀺𑀭𑁄𑀥𑀁 𑀢𑀢𑁆𑀣𑁂𑀯 𑀯𑀓𑁆𑀔𑀸𑀫. 𑀲𑀻𑀮𑀲𑀁𑀯𑀭𑀸𑀤𑀬𑁄 𑀧𑀜𑁆𑀘 𑀦𑀺𑀓𑁆𑀔𑁂𑀧𑀓𑀡𑁆𑀟𑁂 𑀆𑀯𑀺 𑀪𑀯𑀺𑀲𑁆𑀲𑀦𑁆𑀢𑀺. 𑀢𑀢𑁆𑀣 𑀜𑀸𑀡𑀲𑀁𑀯𑀭𑁂 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀲𑁆𑀲, 𑀯𑀻𑀭𑀺𑀬𑀲𑀁𑀯𑀭𑁂 𑀘 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀅𑀦𑁆𑀢𑁄𑀕𑀥𑀢𑀸 𑀤𑀝𑁆𑀞𑀩𑁆𑀩𑀸.

𑀅𑀓𑀼𑀲𑀮𑀓𑀫𑁆𑀫𑀧𑀣𑀓𑀣𑀸𑀯𑀡𑁆𑀡𑀦𑀸

𑀲𑀭𑀲𑁂𑀦𑁂𑀯 𑀘 𑀧𑀢𑀦𑀲𑀪𑀸𑀯𑀲𑁆𑀲 𑀧𑀸𑀡𑀲𑁆𑀲 𑀅𑀦𑁆𑀢𑀭𑀸 𑀏𑀯 𑀅𑀢𑀻𑀯 𑀧𑀸𑀢𑀦𑀁 𑀅𑀢𑀺𑀧𑀸𑀢𑁄, 𑀲𑀡𑀺𑀓𑀁 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸𑀯 𑀲𑀻𑀖𑀁 𑀧𑀸𑀢𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀢𑀺𑀓𑁆𑀓𑀫𑁆𑀫 𑀯𑀸 𑀲𑀢𑁆𑀣𑀸𑀤𑀻𑀳𑀺 𑀅𑀪𑀺𑀪𑀯𑀺𑀢𑁆𑀯𑀸 𑀧𑀸𑀢𑀦𑀁 𑀅𑀢𑀺𑀧𑀸𑀢𑁄. 𑀧𑀬𑁄𑀕𑀯𑀢𑁆𑀣𑀼𑀫𑀳𑀦𑁆𑀢𑀢𑀸𑀤𑀻𑀳𑀺 𑀫𑀳𑀸𑀲𑀸𑀯𑀚𑁆𑀚𑀢𑀸 𑀢𑁂𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸𑀬 𑀘𑁂𑀢𑀦𑀸𑀬 𑀩𑀮𑀯𑀪𑀸𑀯𑀢𑁄. 𑀬𑀣𑀸𑀯𑀼𑀢𑁆𑀢𑀧𑀘𑁆𑀘𑀬𑀯𑀺𑀧𑀭𑀺𑀬𑀸𑀬𑁂𑀧𑀺 𑀢𑀁𑀢𑀁𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸𑀬 𑀘𑁂𑀢𑀦𑀸𑀬 𑀩𑀮𑀯𑀸𑀩𑀮𑀯𑀯𑀲𑁂𑀦𑁂𑀯 𑀅𑀧𑁆𑀧𑀲𑀸𑀯𑀚𑁆𑀚𑀫𑀳𑀸𑀲𑀸𑀯𑀚𑁆𑀚𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀤𑁆𑀥𑀺𑀫𑀬𑁄 𑀓𑀫𑁆𑀫𑀯𑀺𑀧𑀸𑀓𑀚𑀺𑀤𑁆𑀥𑀺𑀫𑀬𑁄 𑀤𑀸𑀞𑀸𑀓𑁄𑀝𑀺𑀓𑀸𑀤𑀻𑀦𑀁 𑀯𑀺𑀬.

𑀕𑁄𑀢𑁆𑀢𑀭𑀓𑁆𑀔𑀺𑀢𑀸 𑀲𑀕𑁄𑀢𑁆𑀢𑁂𑀳𑀺 𑀭𑀓𑁆𑀔𑀺𑀢𑀸. 𑀥𑀫𑁆𑀫𑀭𑀓𑁆𑀔𑀺𑀢𑀸 𑀲𑀳𑀥𑀫𑁆𑀫𑀺𑀓𑁂𑀳𑀺 𑀭𑀓𑁆𑀔𑀺𑀢𑀸. 𑀲𑀲𑀸𑀫𑀺𑀓𑀸 𑀲𑀸𑀭𑀓𑁆𑀔𑀸. 𑀬𑀲𑁆𑀲𑀸 𑀕𑀫𑀦𑁂 𑀭𑀜𑁆𑀜𑀸 𑀤𑀡𑁆𑀟𑁄 𑀞𑀧𑀺𑀢𑁄, 𑀲𑀸 𑀲𑀧𑀭𑀺𑀤𑀡𑁆𑀟𑀸. 𑀅𑀢𑁆𑀣𑀪𑀜𑁆𑀚𑀓𑁄𑀢𑀺 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀁 𑀯𑀼𑀢𑁆𑀢𑀁. 𑀓𑀫𑁆𑀫𑀧𑀣𑀓𑀣𑀸 𑀳𑁂𑀲𑀸𑀢𑀺. 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀅𑀤𑀸𑀢𑀼𑀓𑀸𑀫𑀢𑀸𑀬𑀸𑀢𑀺𑀆𑀤𑀺 𑀫𑀼𑀲𑀸𑀯𑀸𑀤𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀁. 𑀳𑀲𑀸𑀥𑀺𑀧𑁆𑀧𑀸𑀬𑁂𑀦 𑀯𑀺𑀲𑀁𑀯𑀸𑀤𑀦𑀧𑀼𑀭𑁂𑀓𑁆𑀔𑀸𑀭𑀲𑁆𑀲𑁂𑀯 𑀫𑀼𑀲𑀸𑀯𑀸𑀤𑁄. 𑀲𑀼𑀜𑁆𑀜𑀪𑀸𑀯𑀦𑁆𑀢𑀺 𑀧𑀻𑀢𑀺𑀯𑀺𑀭𑀳𑀺𑀢𑀢𑀸𑀬 𑀭𑀺𑀢𑁆𑀢𑀢𑀁. 𑀅𑀢𑁆𑀣𑀯𑀺𑀧𑀦𑁆𑀦𑀢𑀸𑀬 𑀦 𑀳𑀤𑀬𑀗𑁆𑀕𑀫𑀸. 𑀅𑀕𑁆𑀕𑀡𑁆𑀳𑀦𑁆𑀢𑁂𑀢𑀺 𑀅𑀲𑀤𑁆𑀤𑀳𑀦𑁆𑀢𑁂 𑀓𑀫𑁆𑀫𑀧𑀣𑀪𑁂𑀤𑁄 𑀦 𑀳𑁄𑀢𑀺. 𑀬𑁄 𑀓𑁄𑀘𑀺 𑀧𑀦 𑀲𑀫𑁆𑀨𑀧𑁆𑀧𑀮𑀸𑀧𑁄 𑀤𑁆𑀯𑀻𑀳𑀺 𑀲𑀫𑁆𑀪𑀸𑀭𑁂𑀳𑀺 𑀲𑀺𑀚𑁆𑀛𑀢𑀻𑀢𑀺. 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀦𑀁 𑀘𑀺𑀢𑁆𑀢𑁂𑀦𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀺𑀘𑁆𑀙𑀸 𑀧𑀲𑁆𑀲𑀢𑀻𑀢𑀺 𑀯𑀺𑀢𑀣𑀁 𑀧𑀲𑁆𑀲𑀢𑀺.

𑀓𑁄𑀝𑁆𑀞𑀸𑀲𑀢𑁄𑀢𑀺 𑀨𑀲𑁆𑀲𑀧𑀜𑁆𑀘𑀫𑀓𑀸𑀤𑀻𑀲𑀼 𑀘𑀺𑀢𑁆𑀢𑀗𑁆𑀕𑀓𑁄𑀝𑁆𑀞𑀸𑀲𑁂𑀲𑀼 𑀬𑁂 𑀓𑁄𑀝𑁆𑀞𑀸𑀲𑀸 𑀳𑁄𑀦𑁆𑀢𑀺, 𑀢𑀢𑁄𑀢𑀺 𑀅𑀢𑁆𑀣𑁄. 𑀦𑀦𑀼 𑀘 𑀘𑁂𑀢𑀦𑀸 𑀓𑀫𑁆𑀫𑀧𑀣𑁂𑀲𑀼 𑀦 𑀯𑀼𑀢𑁆𑀢𑀸𑀢𑀺 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢𑀦𑁆𑀦𑀁 𑀓𑀫𑁆𑀫𑀧𑀣𑀪𑀸𑀯𑁄 𑀦 𑀬𑀼𑀢𑁆𑀢𑁄𑀢𑀺? 𑀦, 𑀅𑀯𑀘𑀦𑀲𑁆𑀲 𑀅𑀜𑁆𑀜𑀳𑁂𑀢𑀼𑀢𑁆𑀢𑀸. 𑀦 𑀳𑀺 𑀘𑁂𑀢𑀦𑀸𑀬 𑀅𑀓𑀫𑁆𑀫𑀧𑀣𑀢𑁆𑀢𑀸 𑀓𑀫𑁆𑀫𑀧𑀣𑀭𑀸𑀲𑀺𑀫𑁆𑀳𑀺 𑀅𑀯𑀘𑀦𑀁, 𑀓𑀤𑀸𑀘𑀺 𑀧𑀦 𑀓𑀫𑁆𑀫𑀧𑀣𑁄 𑀳𑁄𑀢𑀺, 𑀦 𑀲𑀩𑁆𑀩𑀤𑀸𑀢𑀺 𑀓𑀫𑁆𑀫𑀧𑀣𑀪𑀸𑀯𑀲𑁆𑀲 𑀅𑀦𑀺𑀬𑀢𑀢𑁆𑀢𑀸 𑀅𑀯𑀘𑀦𑀁. 𑀬𑀤𑀸 𑀧𑀦 𑀓𑀫𑁆𑀫𑀧𑀣𑁄 𑀳𑁄𑀢𑀺, 𑀢𑀤𑀸 𑀓𑀫𑁆𑀫𑀧𑀣𑀭𑀸𑀲𑀺𑀲𑀗𑁆𑀕𑀳𑁄 𑀦 𑀦𑀺𑀯𑀸𑀭𑀺𑀢𑁄𑀢𑀺. ‘‘𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸 𑀏𑀯𑀸’’𑀢𑀺 𑀏𑀢𑁂𑀦 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀦𑀁 𑀲𑀢𑁆𑀢𑀸𑀭𑀫𑁆𑀫𑀡𑀪𑀸𑀯𑀯𑀺𑀭𑁄𑀥𑀁 ‘‘𑀲𑀢𑁆𑀢𑀲𑀗𑁆𑀔𑀸𑀢𑁂 𑀲𑀗𑁆𑀔𑀸𑀭𑁂 𑀏𑀯 𑀆𑀭𑀩𑁆𑀪 𑀧𑀯𑀢𑁆𑀢𑀺𑀢𑁄’’𑀢𑀺 𑀲𑀬𑀫𑁂𑀯 𑀧𑀭𑀺𑀳𑀭𑀺𑀲𑁆𑀲𑀢𑀺. ‘‘𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸’’𑀢𑀺 𑀧𑀯𑀢𑁆𑀢𑀫𑀸𑀦𑀸 𑀤𑀺𑀝𑁆𑀞𑀺 𑀢𑁂𑀪𑀽𑀫𑀓𑀥𑀫𑁆𑀫𑀯𑀺𑀲𑀬𑀸𑀯𑀸𑀢𑀺 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀢𑀸 𑀯𑀼𑀢𑁆𑀢𑀸. 𑀯𑀺𑀧𑀸𑀓𑀦𑀺𑀲𑁆𑀲𑀦𑁆𑀤𑀨𑀮𑀸𑀦𑀺 𑀬𑀣𑀸𑀓𑁆𑀓𑀫𑀁 𑀦𑀺𑀭𑀬𑀸𑀤𑀺𑀯𑀺𑀧𑀸𑀓𑀤𑀼𑀕𑁆𑀕𑀢𑀢𑀸𑀤𑀻𑀦𑀺.

𑀅𑀓𑀼𑀲𑀮𑀓𑀫𑁆𑀫𑀧𑀣𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀼𑀲𑀮𑀓𑀫𑁆𑀫𑀧𑀣𑀓𑀣𑀸𑀯𑀡𑁆𑀡𑀦𑀸

𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀧𑀦 𑀯𑀺𑀭𑀢𑀺𑀬𑁄𑀢𑀺 𑀏𑀢𑀁 𑀬𑀸𑀳𑀺 𑀯𑀺𑀭𑀢𑀻𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀢𑀦𑀸 ‘‘𑀓𑀸𑀬𑀯𑀘𑀻𑀓𑀫𑁆𑀫𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀸𑀲𑀜𑁆𑀘 𑀓𑀫𑁆𑀫𑀧𑀣𑀪𑀸𑀯𑁄 𑀬𑀼𑀢𑁆𑀢𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀘𑁂𑀢𑀦𑀸𑀧𑀺 𑀯𑀝𑁆𑀝𑀦𑁆𑀢𑀺 𑀯𑀺𑀭𑀢𑀺𑀬𑁄𑀧𑀻’’𑀢𑀺. 𑀅𑀮𑁆𑀮𑀲𑀲𑀫𑀁𑀲𑀦𑁆𑀢𑀺 𑀚𑀻𑀯𑀫𑀸𑀦𑀓𑀲𑀲𑀫𑀁𑀲𑀁. 𑀯𑁄𑀭𑁄𑀧𑁂𑀢𑀸 𑀳𑀼𑀢𑁆𑀯𑀸 𑀦𑀸𑀪𑀺𑀚𑀸𑀦𑀸𑀫𑀺. 𑀤𑀼𑀲𑁆𑀲𑀻𑀮𑁆𑀬𑀸𑀤𑀸𑀭𑀫𑁆𑀫𑀡𑀸 𑀢𑀤𑀸𑀭𑀫𑁆𑀫𑀡𑀸. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀺𑀆𑀭𑀫𑁆𑀫𑀡𑀸 𑀓𑀣𑀁 𑀤𑀼𑀲𑁆𑀲𑀻𑀮𑁆𑀬𑀸𑀤𑀻𑀦𑀺 𑀧𑀚𑀳𑀦𑁆𑀢𑀻𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑀪𑀺𑀚𑁆𑀛𑀸…𑀧𑁂… 𑀯𑀺𑀭𑀫𑀦𑁆𑀢𑀲𑁆𑀲𑀸𑀢𑀺 𑀅𑀪𑀺𑀚𑁆𑀛𑀁 𑀧𑀚𑀳𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀦 𑀳𑀺 𑀫𑀦𑁄𑀤𑀼𑀘𑁆𑀘𑀭𑀺𑀢𑀸 𑀯𑀺𑀭𑀢𑀺 𑀅𑀢𑁆𑀣𑀺 𑀅𑀦𑀪𑀺𑀚𑁆𑀛𑀸𑀤𑀻𑀳𑁂𑀯 𑀢𑀧𑁆𑀧𑀳𑀸𑀦𑀢𑁄.

𑀓𑀫𑁆𑀫𑀧𑀣𑀲𑀁𑀲𑀦𑁆𑀤𑀦𑀓𑀣𑀸𑀯𑀡𑁆𑀡𑀦𑀸

𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀸𑀦𑀁 𑀤𑀼𑀲𑁆𑀲𑀻𑀮𑁆𑀬𑀸𑀤𑀻𑀦𑀁 𑀅𑀲𑀁𑀯𑀭𑀸𑀦𑀁 𑀢𑀣𑀸 𑀤𑀼𑀘𑁆𑀘𑀭𑀺𑀢𑀸𑀦𑀜𑁆𑀘 𑀅𑀓𑀼𑀲𑀮𑀓𑀫𑁆𑀫𑀧𑀣𑁂𑀳𑀺 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀸𑀦𑀫𑁂𑀯 𑀘 𑀲𑀼𑀲𑀻𑀮𑁆𑀬𑀸𑀤𑀻𑀦𑀁 𑀲𑀁𑀯𑀭𑀸𑀦𑀁 𑀢𑀣𑀸 𑀲𑀼𑀘𑀭𑀺𑀢𑀸𑀦𑀜𑁆𑀘 𑀓𑀼𑀲𑀮𑀓𑀫𑁆𑀫𑀧𑀣𑁂𑀳𑀺 𑀅𑀢𑁆𑀣𑀢𑁄 𑀦𑀸𑀦𑀢𑁆𑀢𑀸𑀪𑀸𑀯𑀤𑀲𑁆𑀲𑀦𑀁. 𑀅𑀣 𑀯𑀸 𑀢𑁂𑀲𑀁 𑀨𑀲𑁆𑀲𑀤𑁆𑀯𑀸𑀭𑀸𑀤𑀻𑀳𑀺 𑀅𑀯𑀺𑀭𑁄𑀥𑀪𑀸𑀯𑁂𑀦 𑀤𑀻𑀧𑀦𑀁 𑀓𑀫𑁆𑀫𑀧𑀣𑀲𑀁𑀲𑀦𑁆𑀤𑀦𑀦𑁆𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑀤𑁂𑀢𑀁 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀦 𑀳𑀺 𑀧𑀜𑁆𑀘𑀨𑀲𑁆𑀲𑀤𑁆𑀯𑀸𑀭𑀧𑀜𑁆𑀘𑀅𑀲𑀁𑀯𑀭𑀤𑁆𑀯𑀸𑀭𑀧𑀜𑁆𑀘𑀲𑀁𑀯𑀭𑀤𑁆𑀯𑀸𑀭𑁂𑀲𑀼 𑀉𑀧𑁆𑀧𑀦𑁆𑀦𑀸𑀦𑀁 𑀅𑀲𑀁𑀯𑀭𑀸𑀦𑀁 𑀲𑀁𑀯𑀭𑀸𑀦𑀜𑁆𑀘 𑀓𑀫𑁆𑀫𑀧𑀣𑀢𑀸 𑀅𑀢𑁆𑀣𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀧𑀭𑀲𑀦𑁆𑀢𑀓𑀯𑀢𑁆𑀣𑀼𑀮𑁄𑀪𑀧𑀭𑀲𑀢𑁆𑀢𑀸𑀭𑀫𑁆𑀫𑀡𑀩𑁆𑀬𑀸𑀧𑀸𑀤𑀅𑀳𑁂𑀢𑀼𑀓𑀤𑀺𑀝𑁆𑀞𑀺𑀆𑀤𑀻𑀦𑀜𑁆𑀘 𑀢𑁂𑀲𑀼 𑀤𑁆𑀯𑀸𑀭𑁂𑀲𑀼 𑀅𑀦𑀼𑀧𑁆𑀧𑀢𑁆𑀢𑀺𑀢𑁄. 𑀢𑀺𑀯𑀺𑀥𑀓𑀆𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺 𑀘 𑀓𑀫𑁆𑀫𑀧𑀣𑀸𑀢𑀺 𑀧𑀸𑀓𑀝𑀸 𑀏𑀯𑀸𑀢𑀺 𑀓𑀺𑀁 𑀢𑁂𑀲𑀁 𑀓𑀫𑁆𑀫𑀧𑀣𑁂𑀳𑀺 𑀦𑀸𑀦𑀢𑁆𑀢𑀸𑀪𑀸𑀯𑀤𑀲𑁆𑀲𑀦𑁂𑀦, 𑀦 𑀘 𑀤𑀼𑀘𑁆𑀘𑀭𑀺𑀢𑀸𑀦𑀁 𑀲𑀼𑀘𑀭𑀺𑀢𑀸𑀦𑀜𑁆𑀘 𑀨𑀲𑁆𑀲𑀤𑁆𑀯𑀸𑀭𑀸𑀤𑀺𑀯𑀲𑁂𑀦 𑀉𑀧𑁆𑀧𑀢𑁆𑀢𑀺 𑀤𑀻𑀧𑀺𑀢𑀸, 𑀦𑀸𑀧𑀺 𑀅𑀲𑀁𑀯𑀭𑀸𑀦𑀁 𑀲𑀁𑀯𑀭𑀸𑀦𑀜𑁆𑀘 𑀬𑀢𑁄 𑀢𑁂𑀲𑀁 𑀨𑀲𑁆𑀲𑀤𑁆𑀯𑀸𑀭𑀸𑀤𑀻𑀳𑀺 𑀅𑀯𑀺𑀭𑁄𑀥𑀪𑀸𑀯𑁂𑀦 𑀤𑀻𑀧𑀦𑀸 𑀲𑀺𑀬𑀸, 𑀓𑁂𑀯𑀮𑀁 𑀧𑀦 𑀨𑀲𑁆𑀲𑀤𑁆𑀯𑀸𑀭𑀸𑀤𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀸𑀦𑀁 𑀅𑀲𑀁𑀯𑀭𑀸𑀦𑀁 𑀲𑀁𑀯𑀭𑀸𑀦𑀜𑁆𑀘 𑀓𑀸𑀬𑀓𑀫𑁆𑀫𑀸𑀤𑀺𑀢𑀸 𑀤𑀻𑀧𑀺𑀢𑀸. 𑀬𑀤𑀺 𑀘 𑀏𑀢𑁆𑀢𑀓𑀁 𑀓𑀫𑁆𑀫𑀧𑀣𑀲𑀁𑀲𑀦𑁆𑀤𑀦𑀁, ‘‘𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀧𑀜𑁆𑀘𑀨𑀲𑁆𑀲𑀤𑁆𑀯𑀸𑀭𑀯𑀲𑁂𑀦 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺 𑀓𑀫𑁆𑀫𑀧𑀣𑀲𑀁𑀲𑀦𑁆𑀤𑀦𑀁 𑀦 𑀲𑀺𑀬𑀸. 𑀏𑀲𑀸𑀧𑀺 𑀙𑀨𑀲𑁆𑀲𑀤𑁆𑀯𑀸𑀭𑀸𑀤𑀻𑀳𑀺 𑀅𑀯𑀺𑀭𑁄𑀥𑀤𑀻𑀧𑀦𑀸𑀢𑀺 𑀘𑁂, 𑀯𑀼𑀢𑁆𑀢𑀫𑁂𑀯 𑀧𑀓𑀸𑀭𑀦𑁆𑀢𑀭𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀲𑀫𑀼𑀘𑁆𑀘𑀬𑀢𑁆𑀣𑁂 𑀘 𑀅𑀣 𑀯𑀸-𑀲𑀤𑁆𑀤𑁂 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀸𑀦𑁂𑀯 𑀤𑀼𑀲𑁆𑀲𑀻𑀮𑁆𑀬𑀸𑀤𑀻𑀦𑀺 𑀓𑀸𑀬𑀓𑀫𑁆𑀫𑀸𑀤𑀺𑀦𑀸𑀫𑁂𑀳𑀺 𑀯𑀤𑀦𑁆𑀢𑁂𑀳𑀺 𑀫𑀦𑁄𑀓𑀫𑁆𑀫𑀲𑁆𑀲 𑀙𑀨𑀲𑁆𑀲𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀢𑁆𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀦 𑀳𑀺 𑀢𑀁 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀬𑀤𑀺 𑀘 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀸 𑀏𑀯 𑀅𑀲𑀁𑀯𑀭𑀸𑀤𑀬𑁄 𑀕𑀳𑀺𑀢𑀸, 𑀤𑀼𑀘𑁆𑀘𑀭𑀺𑀢𑁂𑀳𑀺 𑀅𑀜𑁆𑀜𑁂𑀲𑀁 𑀅𑀲𑀁𑀯𑀭𑀸𑀦𑀁 𑀅𑀪𑀸𑀯𑀸 𑀢𑁂𑀲𑀜𑁆𑀘 𑀢𑀁𑀢𑀁𑀓𑀫𑁆𑀫𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 ‘‘𑀘𑁄𑀧𑀦𑀓𑀸𑀬𑀅𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀅𑀲𑀁𑀯𑀭𑁄 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀫𑁂𑀯 𑀳𑁄𑀢𑀻’’𑀢𑀺𑀆𑀤𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀯𑀼𑀘𑁆𑀘𑀫𑀸𑀦𑁂 𑀳𑀺 𑀢𑀲𑁆𑀫𑀺𑀁 𑀲𑀗𑁆𑀓𑀭𑁄 𑀲𑀺𑀬𑀸, 𑀯𑀘𑀻𑀫𑀦𑁄𑀓𑀫𑁆𑀫𑀸𑀦𑀺𑀧𑀺 𑀳𑀺 𑀓𑀸𑀬𑀤𑁆𑀯𑀸𑀭𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀣𑀸 𑀲𑁂𑀲𑀤𑁆𑀯𑀸𑀭𑁂𑀲𑀼𑀧𑀺 𑀓𑀫𑁆𑀫𑀦𑁆𑀢𑀭𑀸𑀦𑀻𑀢𑀺.

𑀅𑀣 𑀧𑀦 𑀤𑁆𑀯𑀸𑀭𑀦𑁆𑀢𑀭𑁂 𑀉𑀧𑁆𑀧𑀚𑁆𑀚𑀫𑀸𑀦𑀁 𑀓𑀫𑁆𑀫𑀦𑁆𑀢𑀭𑀫𑁆𑀧𑀺 𑀢𑀁𑀤𑁆𑀯𑀸𑀭𑀺𑀓𑀓𑀫𑁆𑀫𑀫𑁂𑀯 𑀲𑀺𑀬𑀸, ‘‘𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀫𑁂𑀯𑀸’’𑀢𑀺𑀆𑀤𑀺, ‘‘𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀘𑁄𑀧𑀦𑀓𑀸𑀬𑀅𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀯𑀸𑀘𑀸𑀅𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀘 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺 𑀘 𑀯𑀺𑀭𑀼𑀚𑁆𑀛𑁂𑀬𑁆𑀬. 𑀤𑀼𑀘𑁆𑀘𑀭𑀺𑀢𑀸𑀦𑀜𑁆𑀳𑀺 𑀅𑀜𑁆𑀜𑀤𑁆𑀯𑀸𑀭𑀘𑀭𑀡𑀁 𑀅𑀢𑁆𑀣𑀺, 𑀦 𑀘𑀲𑁆𑀲 𑀤𑁆𑀯𑀸𑀭𑀦𑁆𑀢𑀭𑀼𑀧𑁆𑀧𑀦𑁆𑀦𑀁 𑀓𑀫𑁆𑀫𑀦𑁆𑀢𑀭𑀁 𑀳𑁄𑀢𑀻𑀢𑀺. 𑀢𑀲𑁆𑀫𑀸 𑀳𑁂𑀝𑁆𑀞𑀸 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀸𑀦𑀁 𑀏𑀯 𑀓𑀸𑀬𑀓𑀫𑁆𑀫𑀸𑀤𑀺𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀲𑁂𑀲𑀸𑀦𑀜𑁆𑀘 𑀢𑀁𑀢𑀁𑀤𑁆𑀯𑀸𑀭𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀤𑁆𑀯𑀸𑀭𑀲𑀁𑀲𑀦𑁆𑀤𑀦𑁂 𑀢𑀁𑀢𑀁𑀤𑁆𑀯𑀸𑀭𑀧𑀓𑁆𑀔𑀺𑀓𑀪𑀸𑀯𑀲𑁆𑀲 𑀓𑀢𑀢𑁆𑀢𑀸 𑀇𑀥 𑀓𑀫𑁆𑀫𑀧𑀣𑀁 𑀅𑀧𑁆𑀧𑀢𑁆𑀢𑀸𑀦𑀜𑁆𑀘 𑀘𑁂𑀢𑀦𑀸𑀪𑀸𑀯𑀢𑁄 𑀅𑀓𑀫𑁆𑀫𑀸𑀦𑀜𑁆𑀘 𑀅𑀲𑀁𑀯𑀭𑀸𑀦𑀁 𑀲𑀁𑀯𑀭𑀸𑀦𑀜𑁆𑀘 𑀪𑀚𑀸𑀧𑀺𑀬𑀫𑀸𑀦𑀸𑀦𑀁 𑀓𑀫𑁆𑀫𑀧𑀣𑀸𑀦𑀁 𑀯𑀺𑀬 𑀓𑀸𑀬𑀓𑀫𑁆𑀫𑀸𑀤𑀺𑀢𑀸𑀤𑀻𑀧𑀦𑀁, 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀸𑀦𑀁 𑀢𑀺𑀯𑀺𑀥𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀢𑀺𑀯𑀺𑀥𑀓𑀸𑀬𑀲𑀼𑀘𑀭𑀺𑀢𑀸𑀤𑀻𑀦𑀜𑁆𑀘 𑀤𑁆𑀯𑀸𑀭𑀦𑁆𑀢𑀭𑀘𑀭𑀡𑁂𑀧𑀺 𑀓𑀸𑀬𑀓𑀫𑁆𑀫𑀸𑀤𑀺𑀪𑀸𑀯𑀸𑀯𑀺𑀚𑀳𑀦𑀤𑀻𑀧𑀦𑀁, 𑀬𑀣𑀸𑀧𑀓𑀸𑀲𑀺𑀢𑀸𑀦𑀜𑁆𑀘 𑀓𑀫𑁆𑀫𑀧𑀣𑀪𑀸𑀯𑀁 𑀧𑀢𑁆𑀢𑀸𑀦𑀁 𑀅𑀧𑀢𑁆𑀢𑀸𑀦𑀜𑁆𑀘 𑀅𑀓𑀼𑀲𑀮𑀓𑀸𑀬𑀓𑀫𑁆𑀫𑀸𑀤𑀻𑀦𑀜𑁆𑀘 𑀓𑀼𑀲𑀮𑀓𑀸𑀬𑀓𑀫𑁆𑀫𑀸𑀤𑀻𑀦𑀜𑁆𑀘 𑀨𑀲𑁆𑀲𑀤𑁆𑀯𑀸𑀭𑀸𑀤𑀻𑀳𑀺 𑀉𑀧𑁆𑀧𑀢𑁆𑀢𑀺𑀧𑀓𑀸𑀲𑀦𑀜𑁆𑀘 𑀓𑀫𑁆𑀫𑀧𑀣𑀲𑀁𑀲𑀦𑁆𑀤𑀦𑀁 𑀦𑀸𑀫. 𑀓𑀲𑁆𑀫𑀸? 𑀅𑀓𑀫𑁆𑀫𑀧𑀣𑀸𑀦𑀁 𑀓𑀫𑁆𑀫𑀧𑀣𑁂𑀲𑀼 𑀓𑀫𑁆𑀫𑀧𑀣𑀸𑀦𑀜𑁆𑀘 𑀅𑀓𑀫𑁆𑀫𑀧𑀣𑁂𑀲𑀼 𑀲𑀫𑀸𑀦𑀦𑀸𑀫𑀢𑀸𑀯𑀲𑁂𑀦, 𑀓𑀫𑁆𑀫𑀧𑀣𑀸𑀦𑀁 𑀓𑀫𑁆𑀫𑀧𑀣𑁂𑀲𑀼 𑀲𑀸𑀫𑀜𑁆𑀜𑀦𑀸𑀫𑀸𑀯𑀺𑀚𑀳𑀦𑀯𑀲𑁂𑀦, 𑀉𑀪𑀬𑁂𑀲𑀜𑁆𑀘 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀤𑁆𑀯𑀸𑀭𑁂𑀲𑀼 𑀏𑀢𑁆𑀣 𑀲𑀁𑀲𑀦𑁆𑀤𑀺𑀢𑀢𑁆𑀢𑀸.

𑀢𑀢𑁆𑀣 𑀢𑀺𑀯𑀺𑀥𑀓𑀫𑁆𑀫𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀦𑁆𑀦𑀸𑀦𑀁 𑀓𑀫𑁆𑀫𑀸𑀦𑀁 𑀜𑀸𑀢𑀓𑀫𑁆𑀫𑀪𑀸𑀯𑀢𑀸𑀬 𑀢𑀁𑀢𑀁𑀓𑀫𑁆𑀫𑀪𑀸𑀯𑀲𑁆𑀲 𑀅𑀯𑀘𑀦𑀻𑀬𑀢𑁆𑀢𑀸 𑀓𑀫𑁆𑀫𑀤𑁆𑀯𑀸𑀭𑁂𑀲𑀼 𑀢𑁂𑀲𑀁 𑀉𑀧𑁆𑀧𑀢𑁆𑀢𑀺𑀬𑀸 𑀘 𑀯𑀼𑀢𑁆𑀢𑀢𑁆𑀢𑀸 𑀧𑀜𑁆𑀘𑀯𑀺𑀜𑁆𑀜𑀸𑀡𑀤𑁆𑀯𑀸𑀭𑀯𑀲𑁂𑀦 𑀅𑀲𑀁𑀯𑀭𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀧𑀭𑀺𑀬𑀸𑀬𑀯𑀘𑀦𑀸𑀪𑀸𑀯𑀢𑁄 𑀘 𑀓𑀫𑁆𑀫𑀤𑁆𑀯𑀸𑀭𑀯𑀺𑀜𑁆𑀜𑀸𑀡𑀤𑁆𑀯𑀸𑀭𑀸𑀦𑀺 𑀯𑀺𑀭𑀚𑁆𑀛𑀺𑀢𑁆𑀯𑀸 ‘‘𑀧𑀜𑁆𑀘𑀨𑀲𑁆𑀲𑀤𑁆𑀯𑀸𑀭𑀯𑀲𑁂𑀦 𑀳𑀺 𑀉𑀧𑁆𑀧𑀦𑁆𑀦𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀬𑀫𑁆𑀧𑀺𑀤𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀯𑀸’’𑀢𑀺𑀆𑀤𑀺𑀦𑀸 ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀅𑀢𑁆𑀣𑀺 𑀓𑀼𑀲𑀮𑁄’’𑀢𑀺𑀆𑀤𑀺𑀦𑀸 𑀘 𑀧𑀜𑁆𑀘𑀨𑀲𑁆𑀲𑀤𑁆𑀯𑀸𑀭𑀯𑀲𑁂𑀦 𑀅𑀲𑀁𑀯𑀭𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀧𑀭𑀺𑀬𑀸𑀬𑁄 𑀯𑀼𑀢𑁆𑀢𑁄, 𑀦 𑀘 ‘‘𑀬𑀫𑀺𑀤𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸’’𑀢𑀺𑀆𑀤𑀺𑀯𑀘𑀦𑀁 𑀅𑀢𑁆𑀣𑀻𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀳𑀚𑀸𑀢𑁄 𑀳𑀺 𑀨𑀲𑁆𑀲𑁄 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄’’𑀢𑀺𑀆𑀤𑀺 (𑀥. 𑀲. 𑁧 𑀓𑀫𑁆𑀫𑀓𑀣𑀸; 𑀫𑀳𑀸𑀦𑀺. 𑀅𑀝𑁆𑀞. 𑁮𑁬). 𑀢𑁂𑀦 𑀳𑀺 𑀅𑀲𑀁𑀯𑀭𑀸𑀦𑀁 𑀲𑀁𑀯𑀭𑀸𑀦𑀜𑁆𑀘 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀻𑀳𑀺 𑀅𑀲𑀳𑀚𑀸𑀢𑀢𑁆𑀢𑀸 𑀫𑀦𑁄𑀲𑀫𑁆𑀨𑀲𑁆𑀲𑀲𑀳𑀚𑀸𑀢𑀸𑀦𑀜𑁆𑀘 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀤𑁆𑀯𑀸𑀭𑀸𑀤𑀺𑀯𑀲𑁂𑀦 𑀉𑀧𑁆𑀧𑀢𑁆𑀢𑀺 𑀤𑀻𑀧𑀺𑀢𑀸𑀢𑀺. ‘‘𑀲𑁄 𑀳𑀺 𑀓𑀸𑀬𑀤𑁆𑀯𑀸𑀭𑁂 𑀘𑁄𑀧𑀦𑀁 𑀧𑀢𑁆𑀢𑁄 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 ‘‘𑀘𑁄𑀧𑀦𑀓𑀸𑀬𑀅𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀫𑁂𑀯 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀘 𑀯𑀘𑀻𑀓𑀫𑁆𑀫𑀸𑀤𑀻𑀦𑀜𑁆𑀘 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀸𑀦𑀁 𑀅𑀲𑀁𑀯𑀭𑀪𑀽𑀢𑀸𑀦𑀁 𑀓𑀸𑀬𑀓𑀫𑁆𑀫𑀸𑀤𑀺𑀪𑀸𑀯𑁂 𑀆𑀧𑀦𑁆𑀦𑁂 ‘‘𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀅𑀓𑀼𑀲𑀮𑀁 𑀯𑀘𑀻𑀓𑀫𑁆𑀫𑀫𑁂𑀯 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀅𑀧𑀯𑀸𑀤𑁂𑀦 𑀦𑀺𑀯𑀢𑁆𑀢𑀺 𑀤𑀝𑁆𑀞𑀩𑁆𑀩𑀸. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀼𑀩𑁆𑀩𑁂 𑀤𑀲𑁆𑀲𑀺𑀢𑁂𑀲𑀼 𑀅𑀲𑀁𑀯𑀭𑀯𑀺𑀦𑀺𑀘𑁆𑀙𑀬𑁂𑀲𑀼 𑀤𑀼𑀢𑀺𑀬𑀯𑀺𑀦𑀺𑀘𑁆𑀙𑀬𑁂𑀲𑀼 𑀘 𑀦 𑀓𑁄𑀘𑀺 𑀯𑀺𑀭𑁄𑀥𑁄. 𑀦 𑀳𑀺 𑀯𑀘𑀻𑀓𑀫𑁆𑀫𑀸𑀤𑀺𑀪𑀽𑀢𑁄 𑀘𑁄𑀧𑀦𑀓𑀸𑀬𑀅𑀲𑀁𑀯𑀭𑁄 𑀓𑀸𑀬𑀓𑀫𑁆𑀫𑀸𑀤𑀺 𑀳𑁄𑀢𑀻𑀢𑀺.

𑀅𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀁 𑀧𑀦 𑀙𑀨𑀲𑁆𑀲𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀘𑁄𑀧𑀦𑀁 𑀧𑀢𑁆𑀢𑀁 𑀅𑀓𑀼𑀲𑀮𑀁 𑀓𑀸𑀬𑀯𑀘𑀻𑀓𑀫𑁆𑀫𑀁 𑀳𑁄𑀢𑀻𑀢𑀺 𑀏𑀢𑁆𑀣 𑀓𑀺𑀁 𑀢𑀁 𑀅𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫, 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑀦𑀬𑁂𑀦 𑀘 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀉𑀧𑁆𑀧𑀦𑁆𑀦𑀁 𑀢𑀺𑀯𑀺𑀥𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀘𑁄𑀧𑀦𑀁 𑀅𑀧𑁆𑀧𑀢𑁆𑀢𑀁 𑀲𑀩𑁆𑀩𑀸𑀓𑀼𑀲𑀮𑀜𑁆𑀘. 𑀬𑀤𑀺 𑀏𑀯𑀁 𑀢𑀲𑁆𑀲 𑀓𑀸𑀬𑀯𑀘𑀻𑀓𑀫𑁆𑀫𑀪𑀸𑀯𑁄 𑀦𑀢𑁆𑀣𑀻𑀢𑀺 ‘‘𑀘𑁄𑀧𑀦𑀧𑁆𑀧𑀢𑁆𑀢𑀁 𑀓𑀸𑀬𑀯𑀘𑀻𑀓𑀫𑁆𑀫𑀁 𑀳𑁄𑀢𑀻’’𑀢𑀺 𑀦 𑀬𑀼𑀚𑁆𑀚𑀢𑀻𑀢𑀺? 𑀦𑁄 𑀦 𑀬𑀼𑀚𑁆𑀚𑀢𑀺 𑀘𑁄𑀧𑀦𑀧𑁆𑀧𑀢𑁆𑀢𑀁 𑀓𑀸𑀬𑁂 𑀯𑀸𑀘𑀸𑀬 𑀘 𑀅𑀓𑀼𑀲𑀮𑀁 𑀓𑀫𑁆𑀫𑀁 𑀳𑁄𑀢𑀻𑀢𑀺 𑀅𑀢𑁆𑀣𑀲𑀺𑀤𑁆𑀥𑀺𑀢𑁄. 𑀓𑀫𑁆𑀫𑀁 𑀧𑀦 𑀳𑁄𑀦𑁆𑀢𑀁 𑀓𑀺𑀁 𑀓𑀫𑁆𑀫𑀁 𑀳𑁄𑀢𑀻𑀢𑀺? 𑀫𑀦𑁄𑀓𑀫𑁆𑀫𑀫𑁂𑀯 𑀳𑁄𑀢𑀻𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀘𑁄𑀧𑀦𑀧𑁆𑀧𑀢𑁆𑀢𑀁 𑀅𑀓𑀼𑀲𑀮𑀁 𑀓𑀸𑀬𑀤𑁆𑀯𑀸𑀭𑁂 𑀯𑀘𑀻𑀤𑁆𑀯𑀸𑀭𑁂 𑀘 𑀫𑀦𑁄𑀓𑀫𑁆𑀫𑀁 𑀳𑁄𑀢𑀻𑀢𑀺. 𑀅𑀣 𑀯𑀸 𑀢𑀁-𑀲𑀤𑁆𑀤𑀲𑁆𑀲 𑀫𑀦𑁄𑀓𑀫𑁆𑀫𑁂𑀦 𑀲𑀫𑁆𑀩𑀦𑁆𑀥𑀁 𑀅𑀓𑀢𑁆𑀯𑀸 𑀙𑀨𑀲𑁆𑀲𑀤𑁆𑀯𑀸𑀭𑀯𑀲𑁂𑀦 𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀉𑀧𑁆𑀧𑀸𑀤𑀫𑀢𑁆𑀢𑀧𑀭𑀺𑀘𑁆𑀙𑀺𑀦𑁆𑀦𑁂𑀦 𑀲𑀫𑁆𑀩𑀦𑁆𑀥𑁄 𑀓𑀸𑀢𑀩𑁆𑀩𑁄. 𑀓𑀺𑀁 𑀧𑀦 𑀢𑀦𑁆𑀢𑀺? 𑀓𑀫𑁆𑀫𑀓𑀣𑀸𑀬 𑀧𑀯𑀢𑁆𑀢𑀫𑀸𑀦𑀢𑁆𑀢𑀸 𑀓𑀫𑁆𑀫𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀢𑀜𑁆𑀘 𑀫𑀦𑁄𑀲𑀫𑁆𑀨𑀲𑁆𑀲𑀤𑁆𑀯𑀸𑀭𑁂 𑀉𑀧𑁆𑀧𑀚𑁆𑀚𑀫𑀸𑀦𑀫𑁆𑀧𑀺 𑀢𑀺𑀯𑀺𑀥𑀁 𑀓𑀫𑁆𑀫𑀁 𑀳𑁄𑀢𑀻𑀢𑀺. 𑀬𑀣𑀸 𑀢𑀁 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀘𑁄𑀧𑀦𑀁 𑀧𑀢𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀺𑀬𑀫𑀲𑁆𑀲 𑀅𑀓𑀢𑀢𑁆𑀢𑀸 𑀘𑁄𑀧𑀦𑀧𑁆𑀧𑀢𑁆𑀢𑀺 𑀉𑀧𑀮𑀓𑁆𑀔𑀡𑀪𑀸𑀯𑁂𑀦 𑀓𑀸𑀬𑀯𑀘𑀻𑀓𑀫𑁆𑀫𑀦𑀸𑀫𑀲𑀸𑀥𑀺𑀓𑀸𑀯, 𑀦 𑀧𑀦 𑀲𑀩𑁆𑀩𑀫𑁆𑀧𑀺 𑀘𑁄𑀧𑀦𑀧𑁆𑀧𑀢𑁆𑀢𑀁 𑀓𑀸𑀬𑀯𑀘𑀻𑀓𑀫𑁆𑀫𑀫𑁂𑀯, 𑀦𑀸𑀧𑀺 𑀓𑀼𑀲𑀮𑀧𑀓𑁆𑀔𑁂 𑀘𑁄𑀧𑀦𑀁 𑀅𑀧𑁆𑀧𑀢𑁆𑀢𑀁 𑀓𑀸𑀬𑀯𑀘𑀻𑀓𑀫𑁆𑀫𑀁 𑀦 𑀳𑁄𑀢𑀻𑀢𑀺 𑀅𑀬𑀫𑀢𑁆𑀣𑁄 𑀲𑀺𑀤𑁆𑀥𑁄𑀯 𑀳𑁄𑀢𑀻𑀢𑀺.

𑀅𑀣 𑀯𑀸 𑀢𑀦𑁆𑀢𑀺 𑀢𑀁 𑀙𑀨𑀲𑁆𑀲𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀫𑀦𑁄𑀓𑀫𑁆𑀫𑀦𑁆𑀢𑀺 𑀲𑀩𑁆𑀩𑀁 𑀫𑀦𑀲𑀸𑀧𑀺 𑀦𑀺𑀧𑁆𑀨𑀚𑁆𑀚𑀫𑀸𑀦𑀁 𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀦𑁆𑀢𑀺 𑀘𑁄𑀤𑀓𑀸𑀥𑀺𑀧𑁆𑀧𑀸𑀬𑁂𑀦 𑀕𑀳𑁂𑀢𑁆𑀯𑀸 𑀯𑀤𑀢𑀺, 𑀦 𑀧𑀼𑀩𑁆𑀩𑁂 𑀤𑀲𑁆𑀲𑀺𑀢𑀫𑀦𑁄𑀓𑀫𑁆𑀫𑀦𑁆𑀢𑀺. 𑀬𑁄 𑀳𑀺 𑀧𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 ‘‘𑀫𑀦𑀲𑀸 𑀦𑀺𑀧𑁆𑀨𑀢𑁆𑀢𑀺𑀢𑁄 𑀲𑀩𑁆𑀩𑁂𑀦 𑀫𑀦𑁄𑀓𑀫𑁆𑀫𑁂𑀦𑁂𑀯 𑀪𑀯𑀺𑀢𑀩𑁆𑀩𑀁, 𑀦 𑀓𑀸𑀬𑀯𑀘𑀻𑀓𑀫𑁆𑀫𑁂𑀦𑀸’’𑀢𑀺, 𑀢𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀓𑀫𑁆𑀫𑀢𑁆𑀢𑀬𑀦𑀺𑀬𑀫𑀁 𑀤𑀲𑁆𑀲𑁂𑀢𑀼𑀁 𑀇𑀤𑀫𑀸𑀭𑀤𑁆𑀥𑀁 ‘‘𑀢𑀁 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀘𑁄𑀧𑀦𑀁 𑀧𑀢𑁆𑀢’’𑀦𑁆𑀢𑀺𑀆𑀤𑀺. 𑀏𑀢𑁆𑀣 𑀘 𑀲𑀗𑁆𑀓𑀭𑀸𑀪𑀸𑀯𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 𑀓𑀫𑁆𑀫𑀦𑁆𑀢𑀺 𑀅𑀯𑀺𑀲𑁂𑀲𑁂𑀦 𑀓𑀫𑁆𑀫𑀲𑀤𑁆𑀤𑀫𑀢𑁆𑀢𑁂𑀦 𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑁄 𑀓𑀫𑁆𑀫𑀧𑁆𑀧𑀪𑁂𑀤𑁄 𑀬𑀣𑀸 𑀳𑁄𑀢𑀺, 𑀢𑀁 𑀧𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀅𑀲𑀗𑁆𑀓𑀭𑁄 𑀘 𑀯𑀼𑀢𑁆𑀢𑀦𑀬𑁄𑀯. 𑀬𑀁 𑀧𑀦 𑀯𑀤𑀦𑁆𑀢𑀺 ‘‘𑀓𑀸𑀬𑀯𑀘𑀻𑀓𑀫𑁆𑀫𑀲𑀳𑀚𑀸𑀢𑀸 𑀅𑀪𑀺𑀚𑁆𑀛𑀸𑀤𑀬𑁄 𑀬𑀤𑀸 𑀘𑁂𑀢𑀦𑀸𑀧𑀓𑁆𑀔𑀺𑀓𑀸 𑀳𑁄𑀦𑁆𑀢𑀺, 𑀢𑀤𑀸 𑀢𑀸𑀦𑀺 𑀫𑀦𑁄𑀓𑀫𑁆𑀫𑀸𑀦𑀺 𑀓𑀸𑀬𑀯𑀘𑀻𑀓𑀫𑁆𑀫𑀸𑀦𑀺 𑀳𑁄𑀦𑁆𑀢𑀻’’𑀢𑀺, 𑀢𑀜𑁆𑀘 𑀦, 𑀘𑁂𑀢𑀦𑀸𑀧𑀓𑁆𑀔𑀺𑀓𑀸𑀦𑀁 𑀫𑀦𑁄𑀓𑀫𑁆𑀫𑀢𑁆𑀢𑀸𑀪𑀸𑀯𑀸. 𑀅𑀩𑁆𑀩𑁄𑀳𑀸𑀭𑀺𑀓𑀢𑁆𑀢𑁂 𑀘 𑀫𑀦𑁄𑀓𑀫𑁆𑀫𑀢𑀸 𑀲𑀼𑀝𑁆𑀞𑀼𑀢𑀭𑀁 𑀦𑀢𑁆𑀣𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀅𑀩𑁆𑀩𑁄𑀳𑀸𑀭𑀺𑀓𑀸 𑀯𑀸’’𑀢𑀺. 𑀢𑀲𑁆𑀫𑀸 𑀫𑀦𑁄𑀓𑀫𑁆𑀫𑀲𑁆𑀲 𑀓𑀸𑀬𑀯𑀘𑀻𑀓𑀫𑁆𑀫𑀢𑀸 𑀦 𑀯𑀢𑁆𑀢𑀩𑁆𑀩𑀸. 𑀅𑀪𑀺𑀚𑁆𑀛𑀸𑀤𑀺𑀓𑀺𑀭𑀺𑀬𑀸𑀓𑀸𑀭𑀺𑀓𑀸𑀬 𑀏𑀯 𑀘𑁂𑀢𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀅𑀪𑀺𑀚𑁆𑀛𑀸𑀤𑀬𑁄 𑀫𑀦𑁄𑀓𑀫𑁆𑀫𑀁, 𑀦 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑀸𑀬𑀯𑀘𑀻𑀓𑀺𑀭𑀺𑀬𑀸𑀓𑀸𑀭𑀺𑀓𑀸𑀬𑀸𑀢𑀺 𑀪𑀺𑀬𑁆𑀬𑁄𑀧𑀺 𑀢𑁂𑀲𑀁 𑀫𑀦𑁄𑀓𑀫𑁆𑀫𑀢𑀸𑀢𑀺 𑀦 𑀢𑁂𑀲𑀁 𑀫𑀦𑁄𑀓𑀫𑁆𑀫𑀸𑀦𑀁 𑀲𑀢𑀁 𑀓𑀸𑀬𑀯𑀘𑀻𑀓𑀫𑁆𑀫𑀢𑀸 𑀯𑀢𑁆𑀢𑀩𑁆𑀩𑀸𑀢𑀺. 𑀏𑀯𑀁 𑀓𑀫𑁆𑀫𑀸𑀦𑀁 𑀤𑁆𑀯𑀸𑀭𑁂𑀲𑀼 𑀤𑁆𑀯𑀸𑀭𑀸𑀦𑀜𑁆𑀘 𑀓𑀫𑁆𑀫𑁂𑀲𑀼 𑀅𑀦𑀺𑀬𑀢𑀢𑁆𑀢𑀸 𑀤𑁆𑀯𑀸𑀭𑀦𑀺𑀩𑀦𑁆𑀥𑀦𑀁 𑀦 𑀓𑀢𑀁. 𑀇𑀤𑀸𑀦𑀺 𑀅𑀓𑀢𑁂𑀧𑀺 𑀘 𑀤𑁆𑀯𑀸𑀭𑀦𑀺𑀩𑀦𑁆𑀥𑀦𑁂 𑀬𑁂𑀲𑀁 𑀤𑁆𑀯𑀸𑀭𑀸𑀦𑀁 𑀯𑀲𑁂𑀦 𑀇𑀤𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀲𑀁 𑀢𑀁𑀢𑀁𑀤𑁆𑀯𑀸𑀭𑀓𑀫𑁆𑀫𑀧𑀣𑀸𑀦𑀜𑁆𑀘 𑀯𑀲𑁂𑀦 𑀉𑀧𑁆𑀧𑀢𑁆𑀢𑀺𑀬𑀸 𑀬𑀣𑀸𑀪𑀝𑁆𑀞𑀧𑀸𑀴𑀺𑀬𑀸 𑀯𑀼𑀢𑁆𑀢𑀸𑀬 𑀘 𑀤𑀻𑀧𑀦𑀢𑁆𑀣𑀁 ‘‘𑀢𑀢𑁆𑀣 𑀓𑀸𑀫𑀸𑀯𑀘𑀭’’𑀦𑁆𑀢𑀺𑀆𑀤𑀺𑀫𑀸𑀳. 𑀘𑀺𑀢𑁆𑀢𑀁 𑀢𑀺𑀯𑀺𑀥𑀓𑀫𑁆𑀫𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀇𑀤𑀁 𑀫𑀦𑁄𑀓𑀫𑁆𑀫𑀤𑁆𑀯𑀸𑀭𑀪𑀽𑀢𑀲𑁆𑀲 𑀢𑁂𑀦 𑀲𑀪𑀸𑀯𑁂𑀦 𑀉𑀧𑁆𑀧𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀬𑀣𑀸 𑀯𑀸 𑀘𑀺𑀢𑁆𑀢𑀁 𑀘𑀺𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀦𑁆𑀢𑀺 𑀲𑀫𑁆𑀧𑀬𑀼𑀢𑁆𑀢𑀯𑀲𑁂𑀦 𑀯𑀼𑀘𑁆𑀘𑀢𑀺, 𑀏𑀯𑀫𑀺𑀥𑀸𑀧𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀘𑁄𑀧𑀦𑀤𑁆𑀯𑀬𑀭𑀳𑀺𑀢𑀲𑁆𑀲 𑀫𑀦𑁄𑀧𑀩𑀦𑁆𑀥𑀲𑁆𑀲 𑀫𑀦𑁄𑀓𑀫𑁆𑀫𑀤𑁆𑀯𑀸𑀭𑀪𑀸𑀯𑁂 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺.

𑀓𑀫𑁆𑀫𑀧𑀣𑀲𑀁𑀲𑀦𑁆𑀤𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑁆𑀯𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀬𑀁 𑀬𑁄𑀚𑀦𑀸𑀢𑀺 ‘‘𑀭𑀽𑀧𑀸𑀭𑀫𑁆𑀫𑀡𑀁 𑀯𑀸…𑀧𑁂… 𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀸’’𑀢𑀺 𑀏𑀢𑁂𑀦 𑀲𑀳 ‘‘𑀬𑀁 𑀬𑀁 𑀯𑀸 𑀧𑀦𑀸’’𑀢𑀺 𑀏𑀢𑀲𑁆𑀲 𑀅𑀬𑀁 𑀲𑀫𑁆𑀩𑀦𑁆𑀥𑁄𑀢𑀺 𑀅𑀢𑁆𑀣𑁄. 𑀓𑁄 𑀧𑀦𑀸𑀬𑀁 𑀲𑀫𑁆𑀩𑀦𑁆𑀥𑁄𑀢𑀺? 𑀬𑁂𑀦 𑀯𑀘𑀦𑀸𑀦𑀺 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀩𑀚𑁆𑀛𑀦𑁆𑀢𑀺, 𑀢𑀁 𑀧𑀼𑀩𑁆𑀩𑀸𑀧𑀭𑀯𑀘𑀦𑁂 𑀧𑀬𑁄𑀚𑀦𑀁 𑀲𑀫𑁆𑀩𑀦𑁆𑀥𑁄. 𑀇𑀥 𑀘 𑀲𑀩𑁆𑀩𑀸𑀭𑀫𑁆𑀫𑀡𑀢𑀸𑀤𑀺𑀤𑀲𑁆𑀲𑀦𑀁 ‘‘𑀭𑀽𑀧𑀸𑀭𑀫𑁆𑀫𑀡𑀁 𑀯𑀸…𑀧𑁂… 𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀸’’𑀢𑀺 𑀏𑀢𑀲𑁆𑀲 𑀅𑀦𑀦𑁆𑀢𑀭𑀁 ‘‘𑀬𑀁 𑀬𑀁 𑀯𑀸 𑀧𑀦𑀸’’𑀢𑀺 𑀏𑀢𑀲𑁆𑀲 𑀯𑀘𑀦𑁂 𑀧𑀬𑁄𑀚𑀦𑀁 𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 ‘‘𑀭𑀽𑀧𑀸𑀭𑀫𑁆𑀫𑀡𑀁 𑀯𑀸…𑀧𑁂… 𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀸 𑀆𑀭𑀩𑁆𑀪𑀸’’𑀢𑀺 𑀏𑀢𑁆𑀢𑀓𑁂𑀦 𑀆𑀧𑀦𑁆𑀦𑀁 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀢𑀦𑁆𑀦𑀺𑀯𑀢𑁆𑀢𑀦𑀯𑀲𑁂𑀦 ‘‘𑀬𑀁 𑀬𑀁 𑀯𑀸 𑀧𑀦𑀸’’𑀢𑀺 𑀏𑀢𑀲𑁆𑀲 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀳𑁂𑀝𑁆𑀞𑀸’’𑀢𑀺𑀆𑀤𑀺𑀫𑀸𑀳. 𑀤𑀼𑀢𑀺𑀬𑁂 𑀅𑀢𑁆𑀣𑀯𑀺𑀓𑀧𑁆𑀧𑁂 ‘‘𑀬𑀁 𑀬𑀁 𑀯𑀸𑀧𑀦𑀸’’𑀢𑀺 𑀏𑀢𑁂𑀦 𑀅𑀧𑁆𑀧𑀥𑀸𑀦𑀫𑁆𑀧𑀺 𑀭𑀽𑀧𑀸𑀤𑀺𑀁 𑀆𑀓𑀟𑁆𑀠𑀢𑀺. 𑀦 𑀳𑀺 𑀧𑀥𑀸𑀦𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀢𑁆𑀢𑀦𑁄𑀬𑁂𑀯 𑀆𑀭𑀫𑁆𑀫𑀡𑀪𑀸𑀯𑁄 𑀅𑀢𑁆𑀣𑀻𑀢𑀺. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀲𑀩𑁆𑀩𑀸𑀭𑀫𑁆𑀫𑀡𑀢𑀸𑀤𑀺𑀦𑀬𑁂𑀦. ‘‘𑀳𑁂𑀝𑁆𑀞𑀸 𑀕𑀳𑀺𑀢𑀫𑁂𑀯 𑀕𑀳𑀺𑀢𑀦𑁆𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀯𑀘𑀦𑁂 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 ‘𑀭𑀽𑀧𑀁 𑀯𑀸…𑀧𑁂… 𑀇𑀤𑀁 𑀯𑀸 𑀇𑀤𑀁 𑀯𑀸 𑀆𑀭𑀩𑁆𑀪𑀸’𑀢𑀺 𑀓𑀣𑁂𑀢𑀼𑀁 𑀇𑀤𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀤𑀁 𑀯𑀸 𑀇𑀤𑀁 𑀯𑀸𑀢𑀺 𑀏𑀢𑀁 𑀲𑀩𑁆𑀩𑀸𑀭𑀫𑁆𑀫𑀡𑀢𑀸𑀤𑀺𑀁 𑀲𑀦𑁆𑀥𑀸𑀬 𑀓𑀣𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭𑀓𑀣𑀸

𑀨𑀲𑁆𑀲𑀧𑀜𑁆𑀘𑀫𑀓𑀭𑀸𑀲𑀺𑀯𑀡𑁆𑀡𑀦𑀸

𑀆𑀘𑀭𑀺𑀬𑀸𑀦𑀦𑁆𑀢𑀺 𑀭𑁂𑀯𑀢𑀸𑀘𑀭𑀺𑀬𑀲𑁆𑀲. 𑀦 𑀧𑀦𑁂𑀢𑀁 𑀲𑀸𑀭𑀢𑁄 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀨𑀲𑁆𑀲𑀸𑀤𑀻𑀦𑀁 𑀓𑀸𑀫𑀸𑀯𑀘𑀭𑀸𑀤𑀺𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀇𑀤𑀫𑀸𑀭𑀤𑁆𑀥𑀁, 𑀓𑀺𑀦𑁆𑀢𑀼 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑀸𑀤𑀺𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀦𑁆𑀢𑀺.

𑀘𑀺𑀢𑁆𑀢𑀲𑁆𑀲 𑀧𑀞𑀫𑀸𑀪𑀺𑀦𑀺𑀧𑀸𑀢𑀢𑁆𑀢𑀸𑀢𑀺 𑀲𑀩𑁆𑀩𑁂 𑀘𑁂𑀢𑀲𑀺𑀓𑀸 𑀘𑀺𑀢𑁆𑀢𑀸𑀬𑀢𑁆𑀢𑀸 𑀘𑀺𑀢𑁆𑀢𑀓𑀺𑀭𑀺𑀬𑀸𑀪𑀸𑀯𑁂𑀦 𑀯𑀼𑀘𑁆𑀘𑀦𑁆𑀢𑀻𑀢𑀺 𑀨𑀲𑁆𑀲𑁄 ‘‘𑀘𑀺𑀢𑁆𑀢𑀲𑁆𑀲 𑀧𑀞𑀫𑀸𑀪𑀺𑀦𑀺𑀧𑀸𑀢𑁄’’𑀢𑀺 𑀯𑀼𑀢𑁆𑀢𑁄. 𑀓𑀸𑀫𑀁 𑀉𑀧𑁆𑀧𑀦𑁆𑀦𑀨𑀲𑁆𑀲𑁄 𑀧𑀼𑀕𑁆𑀕𑀮𑁄 𑀘𑀺𑀢𑁆𑀢𑀘𑁂𑀢𑀲𑀺𑀓𑀭𑀸𑀲𑀺 𑀯𑀸 𑀆𑀭𑀫𑁆𑀫𑀡𑁂𑀦 𑀨𑀼𑀝𑁆𑀞𑁄 𑀨𑀲𑁆𑀲𑀲𑀳𑀚𑀸𑀢𑀸𑀬 𑀯𑁂𑀤𑀦𑀸𑀬 𑀢𑀁𑀲𑀫𑀓𑀸𑀮𑀫𑁂𑀯 𑀯𑁂𑀤𑁂𑀢𑀺, 𑀨𑀲𑁆𑀲𑁄 𑀧𑀦 𑀑𑀪𑀸𑀲𑀲𑁆𑀲 𑀧𑀤𑀻𑀧𑁄 𑀯𑀺𑀬 𑀯𑁂𑀤𑀦𑀸𑀤𑀻𑀦𑀁 𑀧𑀘𑁆𑀘𑀬𑀯𑀺𑀲𑁂𑀲𑁄 𑀳𑁄𑀢𑀻𑀢𑀺 𑀧𑀼𑀭𑀺𑀫𑀓𑀸𑀮𑁄 𑀯𑀺𑀬 𑀯𑀼𑀢𑁆𑀢𑁄. 𑀕𑁄𑀧𑀸𑀦𑀲𑀻𑀦𑀁 𑀉𑀧𑀭𑀺 𑀢𑀺𑀭𑀺𑀬𑀁 𑀞𑀧𑀺𑀢𑀓𑀝𑁆𑀞𑀁 𑀧𑀓𑁆𑀔𑀧𑀸𑀲𑁄. 𑀓𑀝𑁆𑀞𑀤𑁆𑀯𑀬𑀸𑀤𑀺 𑀯𑀺𑀬 𑀏𑀓𑀤𑁂𑀲𑁂𑀦 𑀏𑀓𑀧𑀲𑁆𑀲𑁂𑀦 𑀅𑀦𑀮𑁆𑀮𑀻𑀬𑀫𑀸𑀦𑁄𑀧𑀺 𑀭𑀽𑀧𑁂𑀦 𑀲𑀳 𑀨𑀲𑁆𑀲𑀲𑁆𑀲 𑀲𑀸𑀫𑀜𑁆𑀜𑀁 𑀅𑀦𑀮𑁆𑀮𑀻𑀬𑀫𑀸𑀦𑀁 𑀲𑀗𑁆𑀖𑀝𑁆𑀝𑀦𑀫𑁂𑀯, 𑀦 𑀯𑀺𑀲𑀬𑀪𑀸𑀯𑁄, 𑀲𑀗𑁆𑀖𑀝𑁆𑀝𑀦𑀜𑁆𑀘 𑀨𑀲𑁆𑀲𑀲𑁆𑀲 𑀘𑀺𑀢𑁆𑀢𑀸𑀭𑀫𑁆𑀫𑀡𑀸𑀦𑀁 𑀲𑀦𑁆𑀦𑀺𑀧𑀢𑀦𑀪𑀸𑀯𑁄 𑀏𑀯. 𑀯𑀢𑁆𑀣𑀸𑀭𑀫𑁆𑀫𑀡𑀲𑀦𑁆𑀦𑀺𑀧𑀸𑀢𑁂𑀦 𑀲𑀫𑁆𑀧𑀚𑁆𑀚𑀢𑀻𑀢𑀺 𑀲𑀗𑁆𑀖𑀝𑁆𑀝𑀦𑀲𑀫𑁆𑀧𑀢𑁆𑀢𑀺𑀓𑁄 𑀨𑀲𑁆𑀲𑁄. 𑀧𑀸𑀡𑀺𑀤𑁆𑀯𑀬𑀲𑁆𑀲 𑀲𑀦𑁆𑀦𑀺𑀧𑀸𑀢𑁄 𑀯𑀺𑀬 𑀘𑀺𑀢𑁆𑀢𑀸𑀭𑀫𑁆𑀫𑀡𑀲𑀦𑁆𑀦𑀺𑀧𑀸𑀢𑁄 𑀨𑀲𑁆𑀲𑁄 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑁂 𑀲𑀦𑁆𑀦𑀺𑀧𑀢𑀺𑀢𑀧𑁆𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀓𑀺𑀘𑁆𑀘𑀝𑁆𑀞𑁂𑀦𑁂𑀯 𑀭𑀲𑁂𑀦 𑀲𑀗𑁆𑀖𑀝𑁆𑀝𑀦𑀭𑀲𑁄. 𑀢𑀣𑀸 𑀧𑀘𑁆𑀘𑀬𑀪𑀸𑀯𑁄 𑀳𑀺 𑀢𑀲𑁆𑀲 𑀨𑀲𑁆𑀲𑀲𑁆𑀲 𑀲𑀗𑁆𑀖𑀝𑁆𑀝𑀦𑀓𑀺𑀘𑁆𑀘𑀦𑁆𑀢𑀺. 𑀬𑀣𑀸 𑀳𑀺 𑀧𑀸𑀡𑀺𑀬𑀸 𑀧𑀸𑀡𑀺𑀫𑁆𑀳𑀺 𑀲𑀗𑁆𑀖𑀝𑁆𑀝𑀦𑀁 𑀢𑀩𑁆𑀩𑀺𑀲𑁂𑀲𑀪𑀽𑀢𑀸 𑀭𑀽𑀧𑀥𑀫𑁆𑀫𑀸, 𑀏𑀯𑀁 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑁂 𑀲𑀗𑁆𑀖𑀝𑁆𑀝𑀦𑀁 𑀢𑀩𑁆𑀩𑀺𑀲𑁂𑀲𑀪𑀽𑀢𑁄 𑀏𑀓𑁄 𑀘𑁂𑀢𑀲𑀺𑀓𑀥𑀫𑁆𑀫𑁄 𑀤𑀝𑁆𑀞𑀩𑁆𑀩𑁄. 𑀘𑀺𑀢𑁆𑀢𑁂𑀬𑁂𑀯𑀸𑀢𑀺 𑀏𑀢𑁂𑀦 𑀘𑁂𑀢𑀲𑀺𑀓𑀲𑀪𑀸𑀯𑀢𑀁 𑀯𑀢𑁆𑀣𑀸𑀭𑀫𑁆𑀫𑀡𑁂𑀳𑀺 𑀅𑀲𑀁𑀲𑀝𑁆𑀞𑀁 𑀲𑀗𑁆𑀖𑀝𑁆𑀝𑀦𑀁 𑀯𑁂𑀤𑀦𑀸𑀬 𑀤𑀲𑁆𑀲𑁂𑀢𑀺, 𑀦 𑀧𑀦 𑀯𑀢𑁆𑀣𑀼𑀦𑀺𑀲𑁆𑀲𑀬𑀢𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀢𑀲𑁆𑀲 𑀨𑀲𑁆𑀲𑀲𑁆𑀲 𑀓𑀸𑀭𑀡𑀪𑀽𑀢𑁄 𑀢𑀤𑀦𑀼𑀭𑀽𑀧𑁄 𑀲𑀫𑀦𑁆𑀦𑀸𑀳𑀸𑀭𑁄 𑀢𑀚𑁆𑀚𑀸𑀲𑀫𑀦𑁆𑀦𑀸𑀳𑀸𑀭𑁄. 𑀇𑀦𑁆𑀤𑁆𑀭𑀺𑀬𑀲𑁆𑀲 𑀢𑀤𑀪𑀺𑀫𑀼𑀔𑀪𑀸𑀯𑁄 𑀆𑀯𑀚𑁆𑀚𑀦𑀸𑀬 𑀘 𑀆𑀭𑀫𑁆𑀫𑀡𑀓𑀭𑀡𑀁 𑀯𑀺𑀲𑀬𑀲𑁆𑀲 𑀧𑀭𑀺𑀓𑁆𑀔𑀢𑀢𑀸 𑀅𑀪𑀺𑀲𑀗𑁆𑀔𑀢𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑀓𑀭𑀡𑀦𑁆𑀢𑀺 𑀅𑀢𑁆𑀣𑁄.

𑀲𑀼𑀔𑀯𑁂𑀤𑀦𑀸𑀬𑀫𑁂𑀯 𑀮𑀩𑁆𑀪𑀢𑀺 𑀅𑀲𑁆𑀲𑀸𑀤𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀲𑁆𑀲𑀯𑀺𑀢𑀸𑀬𑀸𑀢𑀺 𑀅𑀭𑀳𑀢𑀸𑀬. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀳𑀺 𑀥𑀸𑀢𑀽𑀦𑀁 𑀅𑀭𑀳𑀢𑁆𑀣𑁄 𑀯𑀺𑀧𑀼𑀩𑁆𑀩𑁄 𑀲𑀼𑀲𑀤𑁆𑀤𑁄. 𑀯𑀺𑀲𑁆𑀲𑀯𑀁 𑀯𑀸 𑀲𑀚𑀦𑀁 𑀯𑀲𑀺𑀢𑀸 𑀓𑀸𑀫𑀓𑀸𑀭𑀺𑀢𑀸 𑀯𑀺𑀲𑁆𑀲𑀯𑀺𑀢𑀸. 𑀆𑀭𑀫𑁆𑀫𑀡𑀭𑀲𑁂𑀓𑀤𑁂𑀲𑀫𑁂𑀯 𑀅𑀦𑀼𑀪𑀯𑀦𑁆𑀢𑀻𑀢𑀺 𑀇𑀤𑀁 𑀨𑀼𑀲𑀦𑀸𑀤𑀺𑀓𑀺𑀘𑁆𑀘𑀁 𑀏𑀓𑀤𑁂𑀲𑀸𑀦𑀼𑀪𑀯𑀦𑀫𑀺𑀯 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀯𑁂𑀤𑀬𑀺𑀢𑀲𑀪𑀸𑀯𑁄 𑀏𑀯 𑀳𑀺 𑀅𑀦𑀼𑀪𑀯𑀦𑀦𑁆𑀢𑀺. 𑀨𑀼𑀲𑀦𑀸𑀤𑀺𑀪𑀸𑀯𑁂𑀦 𑀯𑀸 𑀆𑀭𑀫𑁆𑀫𑀡𑀕𑁆𑀕𑀳𑀡𑀁 𑀏𑀓𑀤𑁂𑀲𑀸𑀦𑀼𑀪𑀯𑀦𑀁, 𑀯𑁂𑀤𑀬𑀺𑀢𑀪𑀸𑀯𑁂𑀦 𑀕𑀳𑀡𑀁 𑀬𑀣𑀸𑀓𑀸𑀫𑀁 𑀲𑀩𑁆𑀩𑀸𑀦𑀼𑀪𑀯𑀦𑀁. 𑀏𑀯𑀁 𑀲𑀪𑀸𑀯𑀸𑀦𑁂𑀯 𑀢𑀸𑀦𑀺 𑀕𑀳𑀡𑀸𑀦𑀻𑀢𑀺 𑀦 𑀯𑁂𑀤𑀦𑀸𑀬 𑀯𑀺𑀬 𑀨𑀲𑁆𑀲𑀸𑀤𑀻𑀦𑀫𑁆𑀧𑀺 𑀬𑀣𑀸𑀲𑀓𑀓𑀺𑀘𑁆𑀘𑀓𑀭𑀡𑁂𑀦 𑀲𑀸𑀫𑀺𑀪𑀸𑀯𑀸𑀦𑀼𑀪𑀯𑀦𑀁 𑀘𑁄𑀤𑁂𑀢𑀩𑁆𑀩𑀁. 𑀅𑀬𑀁 𑀇𑀥𑀸𑀢𑀺 𑀏𑀢𑁂𑀦 𑀧𑀜𑁆𑀘𑀲𑀼 𑀯𑁂𑀤𑀦𑀸𑀲𑀼 𑀇𑀫𑀲𑁆𑀫𑀺𑀁 𑀘𑀺𑀢𑁆𑀢𑁂 𑀅𑀥𑀺𑀧𑁆𑀧𑁂𑀢𑀁 𑀲𑁄𑀫𑀦𑀲𑁆𑀲𑀯𑁂𑀤𑀦𑀁 𑀯𑀤𑀢𑀺, 𑀢𑀲𑁆𑀫𑀸 𑀅𑀲𑁄𑀫𑀦𑀲𑁆𑀲𑀯𑁂𑀤𑀦𑀁 𑀅𑀧𑀦𑁂𑀢𑁆𑀯𑀸 𑀕𑀳𑀺𑀢𑀸𑀬 𑀲𑁄𑀫𑀦𑀲𑁆𑀲𑀯𑁂𑀤𑀦𑀸𑀬 𑀲𑀫𑀸𑀦𑀸 𑀇𑀝𑁆𑀞𑀸𑀓𑀸𑀭𑀲𑀫𑁆𑀪𑁄𑀕𑀭𑀲𑀢𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀦𑀺𑀫𑀺𑀢𑁆𑀢𑁂𑀦 𑀧𑀼𑀦𑀲𑀜𑁆𑀚𑀸𑀦𑀦𑀓𑀺𑀘𑁆𑀘𑀸 𑀧𑀘𑁆𑀘𑀸𑀪𑀺𑀜𑁆𑀜𑀸𑀡𑀭𑀲𑀸. 𑀧𑀼𑀦𑀲𑀜𑁆𑀚𑀸𑀦𑀦𑀲𑁆𑀲 𑀧𑀘𑁆𑀘𑀬𑁄 𑀧𑀼𑀦𑀲𑀜𑁆𑀚𑀸𑀦𑀦𑀧𑀘𑁆𑀘𑀬𑁄, 𑀢𑀤𑁂𑀯 𑀦𑀺𑀫𑀺𑀢𑁆𑀢𑀁 𑀧𑀼𑀦…𑀧𑁂… 𑀦𑀺𑀫𑀺𑀢𑁆𑀢𑀁, 𑀢𑀲𑁆𑀲 𑀓𑀭𑀡𑀁 𑀧𑀼𑀦…𑀧𑁂… 𑀓𑀭𑀡𑀁. 𑀧𑀼𑀦𑀲𑀜𑁆𑀚𑀸𑀦𑀦𑀧𑀘𑁆𑀘𑀬𑀪𑀽𑀢𑀁 𑀯𑀸 𑀦𑀺𑀫𑀺𑀢𑁆𑀢𑀓𑀭𑀡𑀁 𑀧𑀼𑀦…𑀧𑁂… 𑀓𑀭𑀡𑀁, 𑀢𑀤𑀲𑁆𑀲𑀸 𑀓𑀺𑀘𑁆𑀘𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀦𑀲𑀜𑁆𑀚𑀸𑀦𑀦𑀧𑀘𑁆𑀘𑀬𑀦𑀺𑀫𑀺𑀢𑁆𑀢𑀓𑀭𑀡𑀁 𑀦𑀺𑀫𑀺𑀢𑁆𑀢𑀓𑀸𑀭𑀺𑀓𑀸𑀬 𑀦𑀺𑀫𑀺𑀢𑁆𑀢𑁂𑀦 𑀲𑀜𑁆𑀚𑀸𑀦𑀦𑁆𑀢𑀺𑀬𑀸 𑀘 𑀲𑀩𑁆𑀩𑀸𑀬 𑀲𑀜𑁆𑀜𑀸𑀬 𑀲𑀫𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀜𑀸𑀡𑀫𑁂𑀯 𑀅𑀦𑀼𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀅𑀪𑀺𑀦𑀺𑀯𑁂𑀲𑀓𑀸𑀭𑀺𑀓𑀸 𑀯𑀺𑀧𑀭𑀻𑀢𑀕𑁆𑀕𑀸𑀳𑀺𑀓𑀸 𑀘 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁂𑀦𑀼𑀧𑀸𑀬𑁂𑀦 𑀲𑀫𑀸𑀥𑀺𑀲𑀫𑁆𑀧𑀬𑀼𑀢𑁆𑀢𑀸𑀬 𑀅𑀘𑀺𑀭𑀝𑁆𑀞𑀸𑀦𑀢𑀸 𑀘 𑀦 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀸.

𑀅𑀪𑀺𑀲𑀦𑁆𑀤𑀳𑀢𑀻𑀢𑀺 𑀧𑀩𑀦𑁆𑀥𑀢𑀺 𑀧𑀯𑀢𑁆𑀢𑁂𑀢𑀺. 𑀘𑁂𑀢𑀦𑀸𑀪𑀸𑀯𑁄 𑀩𑁆𑀬𑀸𑀧𑀸𑀭𑀪𑀸𑀯𑁄. 𑀤𑀺𑀕𑀼𑀡𑀼𑀲𑁆𑀲𑀸𑀳𑀸𑀢𑀺 𑀦 𑀤𑀺𑀕𑀼𑀡𑀁 𑀯𑀻𑀭𑀺𑀬𑀬𑁄𑀕𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀢𑁆𑀢𑀦𑁄 𑀏𑀯 𑀧𑀦 𑀩𑁆𑀬𑀸𑀧𑀸𑀭𑀓𑀺𑀘𑁆𑀘𑀲𑁆𑀲 𑀫𑀳𑀦𑁆𑀢𑀪𑀸𑀯𑀁 𑀤𑀻𑀧𑁂𑀢𑀺. 𑀉𑀲𑁆𑀲𑀸𑀳𑀦𑀪𑀸𑀯𑁂𑀦𑀸𑀢𑀺 𑀆𑀤𑀭𑀪𑀸𑀯𑁂𑀦. 𑀲𑀸 𑀳𑀺 𑀲𑀬𑀁 𑀆𑀤𑀭𑀪𑀽𑀢𑀸 𑀲𑀫𑁆𑀧𑀬𑀼𑀢𑁆𑀢𑁂 𑀆𑀤𑀭𑀬𑀢𑀻𑀢𑀺.

𑀯𑀺𑀚𑀸𑀦𑀦𑀁 𑀆𑀭𑀫𑁆𑀫𑀡𑀲𑁆𑀲 𑀉𑀧𑀮𑀤𑁆𑀥𑀺. 𑀲𑀦𑁆𑀤𑀳𑀦𑀁 𑀘𑀺𑀢𑁆𑀢𑀦𑁆𑀢𑀭𑀲𑁆𑀲 𑀅𑀦𑀼𑀧𑁆𑀧𑀩𑀦𑁆𑀥𑀦𑀁. 𑀘𑀓𑁆𑀔𑀼𑀦𑀸 𑀳𑀺 𑀤𑀺𑀝𑁆𑀞𑀦𑁆𑀢𑀺 𑀘𑀓𑁆𑀔𑀼𑀦𑀸 𑀤𑀝𑁆𑀞𑀩𑁆𑀩𑀁. 𑀬𑀣𑀸 ‘‘𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢’’𑀦𑁆𑀢𑀺 𑀤𑀝𑁆𑀞𑀩𑁆𑀩𑀸𑀤𑀺 𑀯𑀼𑀘𑁆𑀘𑀢𑀺, 𑀏𑀯𑀫𑀺𑀥𑀸𑀧𑀺 𑀯𑁂𑀤𑀺𑀢𑀩𑁆𑀩𑀁. 𑀘𑀓𑁆𑀔𑀼𑀦𑀸 𑀳𑀻𑀢𑀺𑀆𑀤𑀻𑀲𑀼 𑀘𑀓𑁆𑀔𑀼𑀦𑀸…𑀧𑁂… 𑀫𑀦𑀲𑀸 𑀤𑁆𑀯𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀦𑀕𑀭𑀕𑀼𑀢𑁆𑀢𑀺𑀓𑀲𑁆𑀲 𑀯𑀺𑀬 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀯𑀺𑀪𑀸𑀯𑀦𑀫𑀢𑁆𑀢𑀁 𑀉𑀧𑀥𑀸𑀭𑀡𑀫𑀢𑁆𑀢𑀁 𑀉𑀧𑀮𑀤𑁆𑀥𑀺𑀫𑀢𑁆𑀢𑀁 𑀓𑀺𑀘𑁆𑀘𑀁, 𑀆𑀭𑀫𑁆𑀫𑀡𑀧𑀝𑀺𑀯𑁂𑀥𑀦𑀧𑀘𑁆𑀘𑀸𑀪𑀺𑀜𑁆𑀜𑀸𑀡𑀸𑀤𑀺 𑀧𑀦 𑀓𑀺𑀘𑁆𑀘𑀁 𑀧𑀜𑁆𑀜𑀸𑀲𑀜𑁆𑀜𑀸𑀤𑀻𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀼𑀭𑀺𑀫𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀲𑀫𑀬𑀯𑀯𑀢𑁆𑀣𑀸𑀦𑁂 𑀦𑀺𑀤𑁆𑀤𑀺𑀝𑁆𑀞𑀁. 𑀪𑀸𑀯𑁂𑀦𑁆𑀢𑁄 𑀯𑀺𑀬 𑀦 𑀦 𑀉𑀧𑁆𑀧𑀚𑁆𑀚𑀢𑀺, 𑀓𑀺𑀦𑁆𑀢𑀼 𑀉𑀧𑁆𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀘𑀺𑀢𑁆𑀢𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀏𑀢𑀁 𑀳𑁄𑀢𑀺-𑀲𑀤𑁆𑀤𑀲𑁆𑀲 𑀉𑀧𑁆𑀧𑀚𑁆𑀚𑀢𑀺-𑀲𑀤𑁆𑀤𑀲𑁆𑀲 𑀘 𑀲𑀫𑀸𑀦𑀢𑁆𑀣𑀢𑁆𑀢𑁂 𑀲𑀢𑀺 𑀬𑀼𑀚𑁆𑀚𑁂𑀬𑁆𑀬, 𑀢𑀤𑀢𑁆𑀣𑀢𑁆𑀢𑁂 𑀘 𑀢𑀢𑁆𑀣 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻𑀢𑀺 𑀦 𑀯𑀼𑀘𑁆𑀘𑁂𑀬𑁆𑀬. 𑀦 𑀳𑀺 𑀬𑀼𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀢𑁆𑀢𑀼𑀁. 𑀘𑀺𑀢𑁆𑀢𑀲𑁆𑀲 𑀘 𑀉𑀧𑁆𑀧𑀦𑁆𑀦𑀢𑀸 𑀲𑀫𑀬𑀯𑀯𑀢𑁆𑀣𑀸𑀦𑁂 𑀯𑀼𑀢𑁆𑀢𑀸 𑀏𑀯𑀸𑀢𑀺 𑀓𑀺𑀁 𑀢𑀲𑁆𑀲 𑀧𑀼𑀦 𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑁂𑀦. 𑀬𑁂𑀦 𑀘 𑀲𑀫𑀬𑀯𑀯𑀢𑁆𑀣𑀸𑀦𑀁 𑀓𑀢𑀁, 𑀢𑀲𑁆𑀲 𑀦𑀺𑀤𑁆𑀤𑁂𑀲𑁄 𑀦 𑀦 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀓𑀺𑀁 𑀢𑀁 𑀦𑀺𑀤𑁆𑀤𑁂𑀲𑀢𑁆𑀣𑀁 𑀉𑀤𑁆𑀤𑁂𑀲𑁂𑀦 𑀤𑀼𑀢𑀺𑀬𑁂𑀦, 𑀦𑀺𑀤𑁆𑀤𑁂𑀲𑁂𑀦𑁂𑀯 𑀘 𑀨𑀲𑁆𑀲𑀸𑀤𑀻𑀳𑀺 𑀘 𑀅𑀜𑁆𑀜𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀲𑀺𑀚𑁆𑀛𑀢𑀻𑀢𑀺 𑀓𑀺𑀁 𑀢𑀤𑀢𑁆𑀣𑁂𑀦 𑀧𑀼𑀦 𑀯𑀘𑀦𑁂𑀦, 𑀅𑀜𑁆𑀜𑀧𑁆𑀧𑀬𑁄𑀚𑀦𑀢𑁆𑀢𑀸 𑀧𑀦 𑀧𑀼𑀭𑀺𑀫𑀲𑁆𑀲 𑀘𑀺𑀢𑁆𑀢𑀯𑀘𑀦𑀲𑁆𑀲 𑀧𑀘𑁆𑀙𑀺𑀫𑀁 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀜𑁆𑀳𑀺 𑀲𑀫𑀬𑀯𑀯𑀢𑁆𑀣𑀸𑀦𑀢𑁆𑀣𑀫𑁂𑀯 𑀯𑀼𑀢𑁆𑀢𑀁, 𑀦 𑀯𑀯𑀢𑁆𑀣𑀺𑀢𑀲𑀫𑀬𑁂 𑀯𑀺𑀚𑁆𑀚𑀫𑀸𑀦𑀥𑀫𑁆𑀫𑀤𑀲𑁆𑀲𑀦𑀢𑁆𑀣𑀁, 𑀇𑀢𑀭𑀜𑁆𑀘 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀺𑀚𑁆𑀚𑀫𑀸𑀦𑀥𑀫𑁆𑀫𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀲𑀫𑀬𑀯𑀯𑀢𑁆𑀣𑀸𑀦𑀢𑁆𑀣𑀁, 𑀦 𑀘 𑀅𑀜𑁆𑀜𑀤𑀢𑁆𑀣𑀁 𑀯𑀘𑀦𑀁 𑀅𑀜𑁆𑀜𑀤𑀢𑁆𑀣𑀁 𑀯𑀤𑀢𑀺, 𑀦 𑀘 𑀮𑁂𑀲𑁂𑀦 𑀯𑀼𑀢𑁆𑀢𑁄𑀢𑀺 𑀓𑀢𑁆𑀯𑀸 𑀫𑀳𑀸𑀓𑀸𑀭𑀼𑀡𑀺𑀓𑁄 𑀅𑀢𑁆𑀣𑀁 𑀧𑀸𑀓𑀝𑀁 𑀦 𑀓𑀭𑁄𑀢𑀻𑀢𑀺.

𑀨𑀲𑁆𑀲𑀧𑀜𑁆𑀘𑀫𑀓𑀭𑀸𑀲𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀛𑀸𑀦𑀗𑁆𑀕𑀭𑀸𑀲𑀺𑀯𑀡𑁆𑀡𑀦𑀸

𑀯𑀺𑀢𑀓𑁆𑀓𑁂𑀢𑀻𑀢𑀺 𑀥𑀫𑁆𑀫𑀢𑁄 𑀅𑀜𑁆𑀜𑀲𑁆𑀲 𑀓𑀢𑁆𑀢𑀼𑀦𑀺𑀯𑀢𑁆𑀢𑀦𑀢𑁆𑀣𑀁 𑀥𑀫𑁆𑀫𑀫𑁂𑀯 𑀓𑀢𑁆𑀢𑀸𑀭𑀁 𑀦𑀺𑀤𑁆𑀤𑀺𑀲𑀢𑀺. 𑀢𑀲𑁆𑀲 𑀧𑀦 𑀯𑀲𑀯𑀢𑁆𑀢𑀺𑀪𑀸𑀯𑀦𑀺𑀯𑀸𑀭𑀡𑀢𑁆𑀣𑀁 ‘‘𑀯𑀺𑀢𑀓𑁆𑀓𑀦𑀁 𑀯𑀸’’𑀢𑀺 𑀪𑀸𑀯𑀦𑀺𑀤𑁆𑀤𑁂𑀲𑁄. 𑀭𑀽𑀧𑀁 𑀭𑀽𑀧𑀦𑁆𑀢𑀺 𑀧𑀣𑀯𑀻 𑀧𑀣𑀯𑀻𑀢𑀺 𑀯𑀸 𑀆𑀓𑁄𑀝𑁂𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀆𑀓𑁄𑀝𑀦𑀮𑀓𑁆𑀔𑀡𑁄. 𑀆𑀤𑀺𑀢𑁄, 𑀅𑀪𑀺𑀫𑀼𑀔𑀁 𑀯𑀸 𑀳𑀦𑀦𑀁 𑀆𑀳𑀦𑀦𑀁, 𑀧𑀭𑀺𑀢𑁄, 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀯𑀸 𑀆𑀳𑀦𑀦𑀁 𑀧𑀭𑀺𑀬𑀸𑀳𑀦𑀦𑀁. 𑀯𑀺𑀘𑀸𑀭𑀢𑁄 𑀑𑀴𑀸𑀭𑀺𑀓𑀝𑁆𑀞𑁂𑀦 𑀯𑀺𑀘𑀸𑀭𑀲𑁆𑀲𑁂𑀯 𑀧𑀼𑀩𑁆𑀩𑀗𑁆𑀕𑀫𑀝𑁆𑀞𑁂𑀦 𑀅𑀦𑀼𑀭𑀯𑀢𑁄 𑀑𑀴𑀸𑀭𑀺𑀓𑁄 𑀢𑀲𑁆𑀲 𑀘 𑀧𑀼𑀩𑁆𑀩𑀗𑁆𑀕𑀫𑁄 𑀖𑀡𑁆𑀝𑀸𑀪𑀺𑀖𑀸𑀢𑁄 𑀯𑀺𑀬 𑀳𑁄𑀢𑀺 𑀯𑀺𑀢𑀓𑁆𑀓𑁄. 𑀲𑁄 𑀬𑀣𑀸 𑀖𑀡𑁆𑀝𑀸𑀪𑀺𑀖𑀸𑀢𑁄 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀳𑁄𑀢𑀺, 𑀏𑀯𑀁 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀦𑀺𑀭𑁄𑀧𑀦𑀝𑁆𑀞𑁂𑀦 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀳𑁄𑀢𑀺. 𑀯𑀺𑀧𑁆𑀨𑀸𑀭𑀯𑀸𑀢𑀺 𑀯𑀺𑀘𑀮𑀦𑀬𑀼𑀢𑁆𑀢𑁄. 𑀅𑀦𑀼𑀧𑁆𑀧𑀩𑀦𑁆𑀥𑁂𑀦 𑀧𑀯𑀢𑁆𑀢𑀺𑀬𑀦𑁆𑀢𑀺 𑀉𑀧𑀘𑀸𑀭𑁂 𑀯𑀸 𑀅𑀧𑁆𑀧𑀦𑀸𑀬𑀁 𑀯𑀸 𑀲𑀦𑁆𑀢𑀸𑀦𑁂𑀦 𑀧𑀯𑀢𑁆𑀢𑀺𑀬𑀁. 𑀢𑀢𑁆𑀣 𑀳𑀺 𑀯𑀺𑀢𑀓𑁆𑀓𑁄 𑀦𑀺𑀘𑁆𑀘𑀮𑁄 𑀳𑀼𑀢𑁆𑀯𑀸 𑀆𑀭𑀫𑁆𑀫𑀡𑀁 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀫𑀡𑁆𑀟𑀮𑀦𑁆𑀢𑀺 𑀔𑀮𑀫𑀡𑁆𑀟𑀮𑀁.

𑀧𑀺𑀡𑀬𑀢𑀻𑀢𑀺 𑀢𑀧𑁆𑀧𑁂𑀢𑀺, 𑀯𑀟𑁆𑀠𑁂𑀢𑀺 𑀯𑀸. 𑀨𑀭𑀡𑀭𑀲𑀸𑀢𑀺 𑀧𑀡𑀻𑀢𑀭𑀽𑀧𑁂𑀳𑀺 𑀓𑀸𑀬𑀲𑁆𑀲 𑀩𑁆𑀬𑀸𑀧𑀦𑀭𑀲𑀸. 𑀉𑀤𑀕𑁆𑀕𑀪𑀸𑀯𑁄 𑀑𑀤𑀕𑁆𑀬𑀁. 𑀔𑀼𑀤𑁆𑀤𑀺𑀓𑀸 𑀮𑀳𑀼𑀁 𑀮𑁄𑀫𑀳𑀁𑀲𑀦𑀫𑀢𑁆𑀢𑀁 𑀓𑀢𑁆𑀯𑀸 𑀪𑀺𑀦𑁆𑀦𑀸 𑀦 𑀧𑀼𑀦 𑀉𑀧𑁆𑀧𑀚𑁆𑀚𑀢𑀺. 𑀔𑀡𑀺𑀓𑀸 𑀩𑀳𑀼𑀮𑀁 𑀉𑀧𑁆𑀧𑀚𑁆𑀚𑀢𑀺. 𑀉𑀩𑁆𑀩𑁂𑀕𑀢𑁄 𑀨𑀭𑀡𑀸 𑀦𑀺𑀘𑁆𑀘𑀮𑀢𑁆𑀢𑀸 𑀘𑀺𑀭𑀝𑁆𑀞𑀺𑀢𑀺𑀓𑀢𑁆𑀢𑀸 𑀘 𑀧𑀡𑀻𑀢𑀢𑀭𑀸. 𑀧𑀲𑁆𑀲𑀤𑁆𑀥𑀺𑀬𑀸 𑀦𑀺𑀫𑀺𑀢𑁆𑀢𑀪𑀸𑀯𑁂𑀦 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀻. 𑀅𑀧𑁆𑀧𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀯 𑀧𑀻𑀢𑀺 𑀅𑀧𑁆𑀧𑀦𑀸𑀲𑀫𑀸𑀥𑀺𑀧𑀽𑀭𑀺𑀓𑀸𑀢𑀺 𑀓𑀢𑁆𑀯𑀸 𑀲𑀸 𑀞𑀧𑀺𑀢𑀸. 𑀇𑀢𑀭𑀸 𑀤𑁆𑀯𑁂 𑀔𑀡𑀺𑀓𑁄𑀧𑀘𑀸𑀭𑀲𑀫𑀸𑀥𑀺𑀧𑀽𑀭𑀺𑀓𑀸 𑀧𑀻𑀢𑀻.

𑀲𑀫𑀸𑀥𑀺𑀘𑀺𑀢𑁆𑀢𑁂𑀦𑀸𑀢𑀺 𑀲𑀫𑀸𑀥𑀺𑀲𑀳𑀺𑀢𑀘𑀺𑀢𑁆𑀢𑁂𑀦. 𑀅𑀯𑀺𑀲𑀸𑀭𑁄 𑀅𑀢𑁆𑀢𑀦𑁄 𑀏𑀯 𑀅𑀯𑀺𑀲𑀭𑀡𑀲𑀪𑀸𑀯𑁄. 𑀅𑀯𑀺𑀓𑁆𑀔𑁂𑀧𑁄 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀅𑀯𑀺𑀓𑁆𑀔𑀺𑀢𑁆𑀢𑀢𑀸. 𑀬𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀅𑀯𑀺𑀓𑁆𑀔𑀺𑀢𑁆𑀢𑀸 𑀳𑁄𑀦𑁆𑀢𑀺, 𑀲𑁄 𑀥𑀫𑁆𑀫𑁄 𑀅𑀯𑀺𑀓𑁆𑀔𑁂𑀧𑁄𑀢𑀺. 𑀯𑀺𑀲𑁂𑀲𑀢𑁄𑀢𑀺 𑀬𑁂𑀪𑀼𑀬𑁆𑀬𑁂𑀦. 𑀲𑀼𑀔𑀯𑀺𑀭𑀳𑀺𑀢𑁄𑀧𑀺 𑀳𑀺 𑀅𑀢𑁆𑀣𑀺 𑀲𑀫𑀸𑀥𑀻𑀢𑀺. 𑀧𑀤𑀻𑀧𑀦𑀺𑀤𑀲𑁆𑀲𑀦𑁂𑀦 𑀲𑀦𑁆𑀢𑀸𑀦𑀝𑁆𑀞𑀺𑀢𑀺𑀪𑀸𑀯𑀁 𑀲𑀫𑀸𑀥𑀺𑀲𑁆𑀲 𑀤𑀲𑁆𑀲𑁂𑀢𑀺.

𑀛𑀸𑀦𑀗𑁆𑀕𑀭𑀸𑀲𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀦𑁆𑀤𑁆𑀭𑀺𑀬𑀭𑀸𑀲𑀺𑀯𑀡𑁆𑀡𑀦𑀸

𑀲𑀤𑁆𑀤𑀳𑀦𑁆𑀢𑀺 𑀏𑀢𑀸𑀬𑀸𑀢𑀺 𑀲𑀤𑁆𑀤𑀳𑀦𑀓𑀺𑀭𑀺𑀬𑀸𑀬 𑀧𑀯𑀢𑁆𑀢𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀢𑀢𑁆𑀣 𑀆𑀥𑀺𑀧𑀘𑁆𑀘𑀪𑀸𑀯𑁂𑀦 𑀲𑀤𑁆𑀥𑀸𑀬 𑀧𑀘𑁆𑀘𑀬𑀢𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀲𑀸 𑀳𑀺 𑀥𑀫𑁆𑀫𑀸𑀦𑀁 𑀢𑀣𑀸𑀧𑀘𑁆𑀘𑀬𑀪𑀸𑀯𑁂 𑀲𑀢𑀺 ‘‘𑀧𑀼𑀕𑁆𑀕𑀮𑁄 𑀲𑀤𑁆𑀤𑀳𑀢𑀻’’𑀢𑀺 𑀯𑁄𑀳𑀸𑀭𑁄 𑀳𑁄𑀢𑀺. 𑀧𑀲𑀸𑀤𑀦𑀻𑀬𑀝𑁆𑀞𑀸𑀦𑁂𑀲𑀼 𑀧𑀲𑀸𑀤𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀁 𑀅𑀓𑀼𑀲𑀮𑀁 𑀅𑀲𑁆𑀲𑀤𑁆𑀥𑀺𑀬𑀁 𑀫𑀺𑀘𑁆𑀙𑀸𑀥𑀺𑀫𑁄𑀓𑁆𑀔𑁄 𑀘. 𑀧𑀲𑀸𑀤𑀪𑀽𑀢𑁄 𑀦𑀺𑀘𑁆𑀙𑀬𑁄 𑀯𑀢𑁆𑀣𑀼𑀕𑀢𑁄 𑀅𑀥𑀺𑀫𑁄𑀓𑁆𑀔𑀮𑀓𑁆𑀔𑀡𑀁, 𑀦 𑀬𑁂𑀯𑀸𑀧𑀦𑀓𑀸𑀥𑀺𑀫𑁄𑀓𑁆𑀔𑁄𑀢𑀺. 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 ‘‘𑀫𑀁 𑀅𑀦𑁆𑀢𑀭𑁂𑀦 𑀢𑀼𑀫𑁆𑀳𑀸𑀓𑀁 𑀅𑀥𑀺𑀫𑀼𑀘𑁆𑀘𑀦𑀁 𑀦𑀢𑁆𑀣𑀺, 𑀫𑀬𑀸 𑀲𑀤𑁆𑀤𑀳𑀣𑀸’’𑀢𑀺 𑀯𑀺𑀬 𑀅𑀢𑁆𑀢𑀸𑀦𑀁 𑀅𑀦𑀼𑀯𑀢𑁆𑀢𑁂𑀢𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀧𑀓𑁆𑀔𑀦𑁆𑀤𑀦𑀦𑁆𑀢𑀺 𑀲𑀁𑀲𑀻𑀤𑀦𑀁. 𑀧𑀗𑁆𑀓𑁄 𑀓𑀤𑁆𑀤𑀫𑀢𑁄 𑀖𑀦𑀻𑀪𑀽𑀢𑁄 𑀳𑁄𑀢𑀺. 𑀧𑀡𑀓𑀁 𑀧𑀺𑀘𑁆𑀙𑀺𑀮𑀁 𑀉𑀤𑀓𑀫𑀮𑀁. 𑀧𑀻𑀢𑀁 𑀉𑀤𑀓𑀁. 𑀑𑀓𑀧𑁆𑀧𑀦𑀮𑀓𑁆𑀔𑀡𑀸𑀢𑀺 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀏𑀯𑀫𑁂𑀢𑀦𑁆𑀢𑀺 𑀓𑀧𑁆𑀧𑀦𑀮𑀓𑁆𑀔𑀡𑀸. 𑀅𑀓𑀮𑀼𑀲𑀪𑀸𑀯𑁄 𑀅𑀓𑀸𑀮𑀼𑀲𑀺𑀬𑀁, 𑀅𑀦𑀸𑀯𑀺𑀮𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀩𑀼𑀤𑁆𑀥𑀸𑀤𑀺𑀯𑀢𑁆𑀣𑀽𑀦𑀺 𑀲𑀤𑁆𑀥𑁂𑀬𑁆𑀬𑀸𑀦𑀺. 𑀲𑀧𑁆𑀧𑀼𑀭𑀺𑀲𑀽𑀧𑀲𑁂𑀯𑀦𑀲𑀤𑁆𑀥𑀫𑁆𑀫𑀲𑀯𑀦𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀬𑁄 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀸𑀦𑀺. 𑀓𑀼𑀲𑀮𑀥𑀫𑁆𑀫𑀸𑀦𑀁 𑀆𑀤𑀸𑀦𑁂 𑀳𑀢𑁆𑀣𑁄 𑀯𑀺𑀬, 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀦𑁂 𑀯𑀺𑀢𑁆𑀢𑀁 𑀯𑀺𑀬, 𑀅𑀫𑀢𑀓𑀲𑀺𑀨𑀮𑀨𑀮𑀦𑁂 𑀩𑀻𑀚𑀁 𑀯𑀺𑀬 𑀤𑀝𑁆𑀞𑀩𑁆𑀩𑀸.

𑀯𑀻𑀭𑀪𑀸𑀯𑁄𑀢𑀺 𑀬𑁂𑀦 𑀯𑀻𑀭𑁄 𑀦𑀸𑀫 𑀳𑁄𑀢𑀺, 𑀲𑁄 𑀥𑀫𑁆𑀫𑁄𑀢𑀺 𑀅𑀢𑁆𑀣𑁄. 𑀅𑀦𑀼𑀩𑀮𑀧𑁆𑀧𑀤𑀸𑀦𑀁 𑀧𑀕𑁆𑀕𑀳𑁄. 𑀫𑀕𑁆𑀕𑁄 𑀕𑀦𑁆𑀢𑀩𑁆𑀩𑁄 𑀳𑁄𑀢𑀺, 𑀫𑀕𑁆𑀕𑁄 𑀕𑀢𑁄, 𑀓𑀫𑁆𑀫𑀁 𑀓𑀢𑁆𑀢𑀩𑁆𑀩𑀁, 𑀓𑀫𑁆𑀫𑀁 𑀓𑀢𑀁, 𑀅𑀧𑁆𑀧𑀫𑀢𑁆𑀢𑀓𑁄 𑀆𑀩𑀸𑀥𑁄 𑀉𑀧𑁆𑀧𑀦𑁆𑀦𑁄, 𑀕𑀺𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀳𑁄𑀢𑀺 𑀅𑀘𑀺𑀭𑀯𑀼𑀝𑁆𑀞𑀺𑀢𑁄 𑀕𑁂𑀮𑀜𑁆𑀜𑀸, 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀦 𑀮𑀪𑀢𑀺 𑀮𑀽𑀔𑀲𑁆𑀲 𑀯𑀸 𑀧𑀡𑀻𑀢𑀲𑁆𑀲 𑀯𑀸 𑀪𑁄𑀚𑀦𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀸𑀭𑀺𑀧𑀽𑀭𑀺𑀁, 𑀮𑀪𑀢𑀺…𑀧𑁂… 𑀧𑀸𑀭𑀺𑀧𑀽𑀭𑀺𑀦𑁆𑀢𑀺 𑀏𑀢𑀸𑀦𑀺 𑀅𑀦𑀼𑀭𑀽𑀧𑀧𑀘𑁆𑀘𑀯𑁂𑀓𑁆𑀔𑀡𑀸𑀲𑀳𑀺𑀢𑀸𑀦𑀺 𑀅𑀝𑁆𑀞 𑀯𑀻𑀭𑀺𑀬𑀸𑀭𑀫𑁆𑀪𑀯𑀢𑁆𑀣𑀽𑀦𑀺 𑀢𑀁𑀫𑀽𑀮𑀓𑀸𑀦𑀺 𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺.

𑀘𑀺𑀭𑀓𑀢𑀸𑀤𑀺𑀆𑀭𑀫𑁆𑀫𑀡𑀁 𑀉𑀧𑀕𑀦𑁆𑀢𑁆𑀯𑀸 𑀞𑀸𑀦𑀁, 𑀅𑀦𑀺𑀲𑁆𑀲𑀚𑁆𑀚𑀦𑀁 𑀯𑀸 𑀆𑀭𑀫𑁆𑀫𑀡𑀲𑁆𑀲 𑀉𑀧𑀝𑁆𑀞𑀸𑀦𑀁. 𑀉𑀤𑀓𑁂 𑀅𑀮𑀸𑀩𑀼 𑀯𑀺𑀬 𑀆𑀭𑀫𑁆𑀫𑀡𑀁 𑀧𑀺𑀮𑀯𑀺𑀢𑁆𑀯𑀸 𑀕𑀦𑁆𑀢𑀼𑀁 𑀅𑀧𑁆𑀧𑀤𑀸𑀦𑀁 𑀧𑀸𑀲𑀸𑀡𑀲𑁆𑀲 𑀯𑀺𑀬 𑀦𑀺𑀘𑁆𑀘𑀮𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀞𑀧𑀦𑀁 𑀲𑀸𑀭𑀡𑀁 𑀅𑀲𑀫𑁆𑀫𑀼𑀝𑁆𑀞𑀢𑀸𑀓𑀭𑀡𑀁 𑀅𑀧𑀺𑀮𑀸𑀧𑀦𑀁. 𑀅𑀧𑀺𑀮𑀸𑀧𑁂 𑀓𑀭𑁄𑀢𑀺 𑀅𑀧𑀺𑀮𑀸𑀧𑁂𑀢𑀺. 𑀕𑀢𑀺𑀬𑁄𑀢𑀺 𑀦𑀺𑀧𑁆𑀨𑀢𑁆𑀢𑀺𑀬𑁄 𑀲𑀫𑁆𑀪𑀯𑀢𑁄 𑀨𑀮𑀢𑁄 𑀘. 𑀅𑀧𑀭𑁄 𑀦𑀬𑁄𑀢𑀺 𑀭𑀲𑀸𑀤𑀺𑀤𑀲𑁆𑀲𑀦𑀢𑁆𑀣𑀁 𑀆𑀭𑀤𑁆𑀥𑀁. 𑀲𑀫𑁆𑀫𑁄𑀲𑀧𑀘𑁆𑀘𑀦𑀻𑀓𑀁 𑀓𑀺𑀘𑁆𑀘𑀁 𑀅𑀲𑀫𑁆𑀫𑁄𑀲𑁄, 𑀦 𑀲𑀫𑁆𑀫𑁄𑀲𑀸𑀪𑀸𑀯𑀫𑀢𑁆𑀢𑀁. 𑀲𑀢𑀺𑀬𑀸 𑀯𑀢𑁆𑀣𑀼𑀪𑀽𑀢𑀸 𑀓𑀸𑀬𑀸𑀤𑀬𑁄 𑀓𑀸𑀬𑀸𑀤𑀺𑀲𑀢𑀺𑀧𑀝𑁆𑀞𑀸𑀦𑀸, 𑀲𑀢𑀺𑀬𑁄𑀬𑁂𑀯 𑀯𑀸 𑀧𑀼𑀭𑀺𑀫𑀸 𑀧𑀘𑁆𑀙𑀺𑀫𑀸𑀦𑀁 𑀧𑀤𑀝𑁆𑀞𑀸𑀦𑀁.

𑀯𑀺𑀓𑁆𑀔𑁂𑀧𑀲𑁆𑀲 𑀉𑀤𑁆𑀥𑀘𑁆𑀘𑀲𑁆𑀲. 𑀧𑀜𑁆𑀜𑀸𑀧𑁂𑀢𑀻𑀢𑀺 𑀧𑀓𑀸𑀭𑁂𑀳𑀺 𑀚𑀸𑀦𑀸𑀧𑁂𑀢𑀺. 𑀏𑀓𑀸𑀮𑁄𑀓𑀸 𑀳𑁄𑀢𑀻𑀢𑀺 𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑁄𑀪𑀸𑀲𑀁 𑀲𑀦𑁆𑀥𑀸𑀬𑀸𑀳. 𑀫𑀦𑀢𑁂 𑀯𑀺𑀚𑀸𑀦𑀸𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀫𑀦𑁄, 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀫𑀦𑀜𑁆𑀘 𑀧𑀝𑀺𑀘𑁆𑀘 𑀥𑀫𑁆𑀫𑁂 𑀘𑀸’’𑀢𑀺 (𑀫. 𑀦𑀺. 𑁧.𑁨𑁦𑁪, 𑁪𑁦𑁦; 𑁩.𑁪𑁨𑁧, 𑁪𑁨𑁫) 𑀓𑀸𑀭𑀡𑀪𑀸𑀯𑁂𑀦 𑀫𑀦𑁄 𑀯𑀼𑀢𑁆𑀢𑁄. 𑀲𑀩𑁆𑀩𑁄 𑀳𑀺 𑀫𑀦𑁄 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀓𑀸𑀭𑀡𑀦𑁆𑀢𑀺. 𑀯𑀺𑀚𑀸𑀦𑀸𑀢𑀻𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑁄𑀧𑀮𑀤𑁆𑀥𑀺𑀯𑀲𑁂𑀦 𑀚𑀸𑀦𑀸𑀢𑀺, 𑀦 𑀲𑀜𑁆𑀜𑀸𑀧𑀜𑁆𑀜𑀸 𑀯𑀺𑀬 𑀲𑀜𑁆𑀚𑀸𑀦𑀦𑀧𑀝𑀺𑀯𑀺𑀚𑁆𑀛𑀦𑀯𑀲𑁂𑀦.

𑀧𑀻𑀢𑀺𑀲𑁄𑀫𑀦𑀲𑁆𑀲𑀲𑀫𑁆𑀧𑀬𑁄𑀕𑀢𑁄𑀢𑀺 𑀯𑀼𑀢𑁆𑀢𑁂 𑀬𑁂𑀦 𑀬𑁄𑀕𑀸 𑀲𑀼𑀫𑀦𑁄 𑀳𑁄𑀢𑀺, 𑀢𑀁 𑀲𑁄𑀫𑀦𑀲𑁆𑀲𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀧𑀻𑀢𑀺𑀬𑀸 𑀘 𑀲𑁄𑀫𑀦𑀲𑁆𑀲𑀪𑀸𑀯𑁄 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀯𑀺𑀦𑀸𑀧𑀺 𑀓𑀸𑀬𑁂𑀦 𑀯𑀢𑁆𑀣𑀼𑀦𑀸 𑀲𑀸𑀢𑀯𑁂𑀤𑀦𑀸𑀲𑀫𑁆𑀧𑀬𑁄𑀕𑀢𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀜𑁆𑀘 𑀦𑀺𑀧𑁆𑀧𑀻𑀢𑀺𑀓𑀁 𑀲𑁄𑀫𑀦𑀲𑁆𑀲𑀜𑁆𑀘 𑀲𑀗𑁆𑀕𑀳𑀺𑀢𑀁 𑀳𑁄𑀢𑀺, 𑀧𑀻𑀢𑀺𑀉𑀧𑀮𑀓𑁆𑀔𑀺𑀢𑀁 𑀯𑀸 𑀲𑁄𑀫𑀦𑀲𑁆𑀲𑀁 𑀲𑀧𑁆𑀧𑀻𑀢𑀺𑀓𑀁 𑀦𑀺𑀧𑁆𑀧𑀻𑀢𑀺𑀓𑀜𑁆𑀘 𑀲𑁄𑀫𑀦𑀲𑁆𑀲𑀦𑁆𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀧𑀯𑀢𑁆𑀢𑀲𑀦𑁆𑀢𑀢𑀸𑀥𑀺𑀧𑀢𑁂𑀬𑁆𑀬𑀦𑁆𑀢𑀺 𑀧𑀯𑀢𑁆𑀢𑀲𑀗𑁆𑀔𑀸𑀢𑀸𑀬 𑀲𑀦𑁆𑀢𑀢𑀺𑀬𑀸 𑀅𑀥𑀺𑀧𑀢𑀺𑀪𑀽𑀢𑀁. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀳𑀺 𑀅𑀢𑁆𑀢𑀦𑁄 𑀯𑀺𑀚𑁆𑀚𑀫𑀸𑀦𑀓𑁆𑀔𑀡𑁂 𑀅𑀦𑀼𑀧𑀸𑀮𑁂𑀦𑁆𑀢𑀲𑁆𑀲 𑀅𑀦𑀦𑁆𑀢𑀭𑀜𑁆𑀘 𑀲𑀸𑀦𑀼𑀧𑀸𑀮𑀦𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀳𑁂𑀢𑀼𑀪𑀽𑀢𑀲𑁆𑀲 𑀯𑀲𑁂𑀦 𑀧𑀯𑀢𑁆𑀢𑀁 𑀘𑀺𑀭𑀝𑁆𑀞𑀺𑀢𑀺𑀓𑀁 𑀳𑁄𑀢𑀺, 𑀢𑀁𑀢𑀁𑀓𑀫𑁆𑀫𑀯𑀺𑀲𑁂𑀲𑁂𑀦 𑀯𑀺𑀲𑁂𑀲𑀬𑀼𑀢𑁆𑀢𑀁 𑀬𑀸𑀯 𑀘𑀼𑀢𑀺 𑀅𑀯𑀺𑀲𑁂𑀲𑁂𑀦 𑀯𑀸 𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀦𑀁 𑀅𑀯𑀺𑀘𑁆𑀙𑀺𑀦𑁆𑀦𑀁 𑀧𑀯𑀢𑁆𑀢𑀢𑀺 𑀚𑀻𑀯𑀫𑀸𑀦𑀢𑀸𑀯𑀺𑀲𑁂𑀲𑀬𑀼𑀢𑁆𑀢𑀜𑁆𑀘𑀸𑀢𑀺 𑀭𑀽𑀧𑀸𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀁 𑀲𑀫𑀸𑀦𑀮𑀓𑁆𑀔𑀡𑀸𑀤𑀺𑀁 𑀯𑀢𑁆𑀢𑀼𑀁 ‘‘𑀅𑀢𑁆𑀢𑀦𑀸 𑀅𑀯𑀺𑀦𑀺𑀪𑀼𑀢𑁆𑀢𑀥𑀫𑁆𑀫𑀸𑀦’’𑀦𑁆𑀢𑀺 𑀆𑀳. 𑀅𑀦𑀼𑀧𑀸𑀮𑁂𑀢𑀩𑁆𑀩𑀸𑀦𑀁 𑀅𑀢𑁆𑀣𑀺𑀓𑁆𑀔𑀡𑁂𑀬𑁂𑀯. 𑀅𑀲𑀢𑀺 𑀳𑀺 𑀅𑀦𑀼𑀧𑀸𑀮𑁂𑀢𑀩𑁆𑀩𑁂 𑀉𑀧𑁆𑀧𑀮𑀸𑀤𑀺𑀫𑁆𑀳𑀺 𑀓𑀺𑀁 𑀉𑀤𑀓𑀁 𑀅𑀦𑀼𑀧𑀸𑀮𑁂𑀬𑁆𑀬𑀸𑀢𑀺. 𑀢𑀲𑁆𑀲 𑀢𑀲𑁆𑀲𑀸𑀢𑀺 𑀅𑀦𑀼𑀧𑀸𑀮𑀦𑀸𑀤𑀺𑀓𑀲𑁆𑀲. 𑀲𑀸𑀥𑀦𑀢𑁄𑀢𑀺 𑀲𑀸𑀥𑀦𑁂𑀦. 𑀢𑀁𑀲𑀸𑀥𑀦𑀜𑁆𑀘 𑀚𑀻𑀯𑀫𑀸𑀦𑀯𑀺𑀲𑁂𑀲𑀧𑀘𑁆𑀘𑀬𑀪𑀸𑀯𑀢𑁄.

𑀇𑀦𑁆𑀤𑁆𑀭𑀺𑀬𑀭𑀸𑀲𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀕𑁆𑀕𑀗𑁆𑀕𑀭𑀸𑀲𑀺𑀯𑀡𑁆𑀡𑀦𑀸

𑀲𑀫𑁆𑀫𑀸𑀢𑀺 𑀅𑀯𑀺𑀧𑀭𑀻𑀢𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑁂𑀦. 𑀧𑀲𑀢𑁆𑀣𑀢𑀸 𑀘 𑀏𑀯𑀫𑁂𑀯 𑀤𑀝𑁆𑀞𑀩𑁆𑀩𑀸.

𑀩𑀮𑀭𑀸𑀲𑀺𑀯𑀡𑁆𑀡𑀦𑀸

𑀅𑀲𑁆𑀲𑀤𑁆𑀥𑀺𑀬𑁂𑀢𑀺 𑀅𑀲𑁆𑀲𑀤𑁆𑀥𑀺𑀬𑀓𑀸𑀭𑀡𑀸. 𑀉𑀪𑀬𑀧𑀤𑀯𑀲𑁂𑀦𑀸𑀢𑀺 𑀲𑀤𑁆𑀥𑀸𑀧𑀤𑀁 𑀩𑀮𑀧𑀤𑀦𑁆𑀢𑀺 𑀏𑀯𑀫𑀸𑀤𑀺𑀧𑀤𑀤𑁆𑀯𑀬𑀯𑀲𑁂𑀦. 𑀦𑀺𑀬𑀓𑀚𑁆𑀛𑀢𑁆𑀢𑀁 𑀚𑀸𑀢𑀺𑀆𑀤𑀺𑀲𑀫𑀼𑀝𑁆𑀞𑀸𑀦𑀁 𑀏𑀢𑀺𑀲𑁆𑀲𑀸𑀢𑀺 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀸. 𑀕𑀭𑀼𑀦𑀸 𑀓𑀺𑀲𑁆𑀫𑀺𑀜𑁆𑀘𑀺 𑀯𑀼𑀢𑁆𑀢𑁂 𑀕𑀸𑀭𑀯𑀯𑀲𑁂𑀦 𑀧𑀢𑀺𑀲𑁆𑀲𑀯𑀦𑀁 𑀧𑀢𑀺𑀲𑁆𑀲𑀯𑁄, 𑀲𑀳 𑀧𑀢𑀺𑀲𑁆𑀲𑀯𑁂𑀦 𑀲𑀧𑁆𑀧𑀢𑀺𑀲𑁆𑀲𑀯𑀁, 𑀧𑀢𑀺𑀲𑁆𑀲𑀯𑀪𑀽𑀢𑀁 𑀢𑀁𑀲𑀪𑀸𑀕𑀜𑁆𑀘 𑀬𑀁𑀓𑀺𑀜𑁆𑀘𑀺 𑀕𑀸𑀭𑀯𑀦𑁆𑀢𑀺 𑀅𑀢𑁆𑀣𑁄. 𑀚𑀸𑀢𑀺𑀆𑀤𑀺𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀸 𑀘 𑀳𑀺𑀭𑀻 𑀢𑀢𑁆𑀣 𑀕𑀸𑀭𑀯𑀯𑀲𑁂𑀦 𑀧𑀯𑀢𑁆𑀢𑀢𑀻𑀢𑀺 ‘‘𑀲𑀧𑁆𑀧𑀢𑀺𑀲𑁆𑀲𑀯𑀮𑀓𑁆𑀔𑀡𑀸’’𑀢𑀺 𑀯𑀼𑀘𑁆𑀘𑀢𑀺. 𑀯𑀚𑁆𑀚𑀁 𑀪𑀸𑀬𑀢𑀺 𑀢𑀜𑁆𑀘 𑀪𑀬𑀢𑁄 𑀧𑀲𑁆𑀲𑀢𑀻𑀢𑀺 𑀯𑀚𑁆𑀚𑀪𑀻𑀭𑀼𑀓𑀪𑀬𑀤𑀲𑁆𑀲𑀸𑀯𑀻. 𑀏𑀯𑀁𑀲𑀪𑀸𑀯𑀁 𑀑𑀢𑁆𑀢𑀧𑁆𑀧𑀁. 𑀳𑀺𑀭𑀻 𑀧𑀸𑀧𑀥𑀫𑁆𑀫𑁂 𑀕𑀽𑀣𑀁 𑀯𑀺𑀬 𑀧𑀲𑁆𑀲𑀢𑀺, 𑀑𑀢𑁆𑀢𑀧𑁆𑀧𑀁 𑀉𑀡𑁆𑀳𑀁 𑀯𑀺𑀬. 𑀤𑀸𑀬𑀚𑁆𑀚𑀁 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀤𑀺. 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀤𑀺𑀢𑀸 𑀘 𑀳𑀺𑀭𑀻𑀑𑀢𑁆𑀢𑀧𑁆𑀧𑀸𑀦𑀁 𑀢𑀢𑁆𑀣 𑀢𑀢𑁆𑀣 𑀧𑀸𑀓𑀝𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀦 𑀧𑀦 𑀢𑁂𑀲𑀁 𑀓𑀤𑀸𑀘𑀺 𑀅𑀜𑁆𑀜𑀫𑀜𑁆𑀜𑀁 𑀯𑀺𑀧𑁆𑀧𑀬𑁄𑀕𑀸. 𑀦 𑀳𑀺 𑀮𑀚𑁆𑀚𑀦𑀁 𑀦𑀺𑀩𑁆𑀪𑀬𑀁 𑀧𑀸𑀧𑀪𑀬𑀁 𑀯𑀸 𑀅𑀮𑀚𑁆𑀚𑀦𑀁 𑀳𑁄𑀢𑀻𑀢𑀺.

𑀫𑀽𑀮𑀭𑀸𑀲𑀺𑀯𑀡𑁆𑀡𑀦𑀸

𑀅𑀕𑁂𑀥𑁄 𑀅𑀦𑀪𑀺𑀚𑁆𑀛𑀦𑀁 𑀅𑀦𑀪𑀺𑀓𑀗𑁆𑀔𑀦𑀁. 𑀅𑀦𑀮𑁆𑀮𑀻𑀦𑁄 𑀪𑀸𑀯𑁄 𑀅𑀥𑀺𑀧𑁆𑀧𑀸𑀬𑁄 𑀏𑀢𑀲𑁆𑀲𑀸𑀢𑀺 𑀅𑀦𑀮𑁆𑀮𑀻𑀦𑀪𑀸𑀯𑁄, 𑀏𑀯𑀜𑁆𑀳𑀺 𑀉𑀧𑀫𑀸𑀬 𑀲𑀫𑁂𑀢𑀺. 𑀅𑀦𑀼𑀓𑀽𑀮𑀫𑀺𑀢𑁆𑀢𑁄 𑀅𑀦𑀼𑀯𑀢𑁆𑀢𑀓𑁄. 𑀯𑀺𑀦𑀬𑀭𑀲𑁄𑀢𑀺 𑀯𑀺𑀦𑀬𑀦𑀭𑀲𑁄. 𑀅𑀤𑁄𑀲𑁄 𑀤𑀼𑀲𑁆𑀲𑀻𑀮𑁆𑀬𑀫𑀮𑀲𑁆𑀲𑀸𑀢𑀺 𑀇𑀤𑀁 𑀤𑀼𑀲𑁆𑀲𑀻𑀮𑁆𑀬𑀲𑁆𑀲 𑀤𑁄𑀲𑀲𑀫𑀼𑀝𑁆𑀞𑀸𑀦𑀢𑀁 𑀤𑁄𑀲𑀽𑀧𑀦𑀺𑀲𑁆𑀲𑀬𑀢𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀪𑀸𑀯𑀦𑀸𑀬𑀸𑀢𑀺 ‘‘𑀢𑀢𑁆𑀣 𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀪𑀸𑀯𑀦𑀸𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀭𑀲𑀝𑁆𑀞𑁂𑀦 𑀪𑀸𑀯𑀦𑀸 𑀢𑀤𑀼𑀧𑀕𑀯𑀻𑀭𑀺𑀬𑀯𑀸𑀳𑀦𑀝𑁆𑀞𑁂𑀦 𑀪𑀸𑀯𑀦𑀸 𑀆𑀲𑁂𑀯𑀦𑀝𑁆𑀞𑁂𑀦 𑀪𑀸𑀯𑀦𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀸𑀬 𑀧𑀜𑁆𑀜𑀸𑀲𑀸𑀥𑀦𑀸𑀬 𑀪𑀸𑀯𑀦𑀸𑀬 𑀅𑀧𑁆𑀧𑀯𑀢𑁆𑀢𑀺, 𑀢𑀧𑁆𑀧𑀝𑀺𑀧𑀓𑁆𑀔𑀪𑀽𑀢𑀸 𑀯𑀸 𑀅𑀓𑀼𑀲𑀮𑀸 𑀅𑀪𑀸𑀯𑀦𑀸. 𑀦𑀺𑀕𑁆𑀕𑀼𑀡𑁂𑀧𑀺 𑀕𑀼𑀡𑀕𑁆𑀕𑀳𑀡𑀁 𑀅𑀥𑀺𑀓𑀕𑁆𑀕𑀳𑀡𑀁. 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀕𑀼𑀡𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀕𑀳𑀡𑀁 𑀊𑀦𑀕𑁆𑀕𑀳𑀡𑀁. 𑀘𑀢𑀼𑀯𑀺𑀧𑀮𑁆𑀮𑀸𑀲𑀕𑁆𑀕𑀳𑀡𑀁 𑀯𑀺𑀧𑀭𑀻𑀢𑀕𑁆𑀕𑀳𑀡𑀁.

𑀬𑀸𑀣𑀸𑀯𑀲𑀪𑀸𑀯𑁂𑀢𑀺 ‘‘𑀏𑀢𑁆𑀢𑀓𑁄 𑀏𑀢𑀲𑁆𑀲 𑀕𑀼𑀡𑁄, 𑀏𑀢𑁆𑀢𑀓𑁄 𑀤𑁄𑀲𑁄’’𑀢𑀺 𑀕𑀼𑀡𑀤𑁄𑀲𑀸𑀦𑀁 𑀲𑀪𑀸𑀯𑁂 ‘‘𑀚𑀭𑀸𑀥𑀫𑁆𑀫𑁄 𑀚𑀻𑀭𑀢𑀺, 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸 𑀫𑀸 𑀚𑀻𑀭𑀻’’𑀢𑀺 𑀏𑀯𑀫𑀸𑀤𑀺𑀧𑀘𑁆𑀘𑀯𑁂𑀓𑁆𑀔𑀡𑀲𑀫𑁆𑀪𑀯𑀢𑁄. 𑀅𑀮𑁄𑀪𑁂𑀦 𑀘 𑀕𑀳𑀝𑁆𑀞𑀸𑀦𑀁 𑀔𑁂𑀢𑁆𑀢𑀯𑀢𑁆𑀣𑀸𑀤𑀻𑀲𑀼 𑀯𑀺𑀯𑀸𑀤𑀸𑀪𑀸𑀯𑀢𑁄. 𑀅𑀫𑁄𑀳𑁂𑀦 𑀧𑀩𑁆𑀩𑀚𑀺𑀢𑀸𑀦𑀁 𑀤𑀺𑀝𑁆𑀞𑀺𑀕𑀢𑀯𑀺𑀯𑀸𑀤𑀸𑀪𑀸𑀯𑀢𑁄. 𑀓𑀸𑀫𑀭𑀸𑀕𑀸𑀪𑀺𑀦𑀺𑀯𑁂𑀲𑀯𑀺𑀦𑀺𑀩𑀦𑁆𑀥𑀸 𑀳𑀺 𑀕𑀳𑀝𑁆𑀞𑀸 𑀕𑀳𑀝𑁆𑀞𑁂𑀳𑀺 𑀯𑀺𑀯𑀤𑀦𑁆𑀢𑀺, 𑀤𑀺𑀝𑁆𑀞𑀺𑀭𑀸𑀕𑀸𑀪𑀺𑀦𑀺𑀯𑁂𑀲𑀯𑀺𑀦𑀺𑀩𑀦𑁆𑀥𑀸 𑀲𑀫𑀡𑀸 𑀲𑀫𑀡𑁂𑀳𑀻𑀢𑀺. 𑀭𑀸𑀕𑀯𑀲𑁂𑀦 𑀫𑀺𑀢𑁆𑀢𑀲𑀦𑁆𑀣𑀯𑁄 𑀤𑁄𑀲𑀯𑀲𑁂𑀦 𑀯𑀺𑀭𑁄𑀥𑁄 𑀘 𑀢𑀩𑁆𑀩𑀺𑀲𑁂𑀲𑁂𑀦 𑀉𑀧𑀕𑀫𑀸𑀧𑀕𑀫𑀸, 𑀆𑀭𑀫𑁆𑀫𑀡𑁂 𑀯𑀸 𑀭𑀽𑀧𑀸𑀤𑀺𑀫𑁆𑀳𑀺 𑀅𑀦𑀼𑀭𑁄𑀥𑀯𑀺𑀭𑁄𑀥𑀸. 𑀅𑀫𑀚𑁆𑀛𑀢𑁆𑀢𑀪𑀸𑀯𑀲𑁆𑀲 𑀧𑀝𑀺𑀖𑀸𑀦𑀼𑀦𑀬𑀲𑀗𑁆𑀔𑀸𑀢𑀲𑁆𑀲 𑀫𑁄𑀳𑁂𑀦 𑀧𑀯𑀢𑁆𑀢𑀺. 𑀲𑀼𑀔𑀯𑀺𑀧𑀭𑀺𑀡𑀸𑀫𑁂 𑀤𑀼𑀓𑁆𑀔𑀲𑀫𑀸𑀬𑁄𑀕𑁂 𑀘 𑀧𑀝𑀺𑀖𑀧𑀯𑀢𑁆𑀢𑀺𑀬𑀁 𑀯𑁂𑀤𑀦𑀸𑀧𑀭𑀺𑀕𑁆𑀕𑀳𑁄 𑀦 𑀲𑀺𑀚𑁆𑀛𑀢𑀻𑀢𑀺 𑀅𑀤𑁄𑀲𑀸𑀦𑀼𑀪𑀸𑀯𑁂𑀦 𑀯𑁂𑀤𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀲𑀺𑀚𑁆𑀛𑀢𑀺. 𑀤𑀺𑀩𑁆𑀩𑀯𑀺𑀳𑀸𑀭𑀲𑁆𑀲𑀸𑀢𑀺 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁. 𑀅𑀭𑀺𑀬𑀯𑀺𑀳𑀸𑀭𑁄 𑀨𑀮𑀲𑀫𑀸𑀧𑀢𑁆𑀢𑀺. 𑀫𑁄𑀳𑁂𑀦 𑀅𑀯𑀺𑀘𑀸𑀭𑁂𑀦𑁆𑀢𑁄 𑀉𑀤𑀸𑀲𑀻𑀦𑀧𑀓𑁆𑀔𑁂𑀲𑀼𑀧𑀺 𑀲𑀢𑁆𑀢𑀲𑀗𑁆𑀔𑀸𑀭𑁂𑀲𑀼 𑀲𑀩𑁆𑀩𑁂𑀲𑀼 𑀅𑀪𑀺𑀲𑀗𑁆𑀕𑀁 𑀓𑀭𑁄𑀢𑀻𑀢𑀺 𑀅𑀫𑀽𑀴𑁆𑀳𑀲𑁆𑀲 𑀢𑀤𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀼𑀓𑁆𑀔𑀤𑀲𑁆𑀲𑀦𑀲𑁆𑀲 𑀆𑀲𑀦𑁆𑀦𑀧𑀝𑀺𑀧𑀓𑁆𑀔𑀢𑁆𑀢𑀸 𑀤𑁄𑀲𑀲𑁆𑀲 𑀢𑀧𑁆𑀧𑀝𑀺𑀧𑀓𑁆𑀔𑁂𑀦 𑀅𑀤𑁄𑀲𑁂𑀦 𑀤𑀼𑀓𑁆𑀔𑀤𑀲𑁆𑀲𑀦𑀁 𑀳𑁄𑀢𑀺.

𑀓𑀫𑁆𑀫𑀧𑀣𑀭𑀸𑀲𑀺𑀯𑀡𑁆𑀡𑀦𑀸

𑀲𑀼𑀔𑀸𑀤𑀻𑀦𑀺 𑀅𑀢𑁆𑀢𑀦𑁄 𑀦 𑀩𑁆𑀬𑀸𑀧𑀸𑀤𑁂𑀢𑀺 𑀦 𑀯𑀺𑀦𑀸𑀲𑁂𑀢𑀺 𑀧𑀭𑀲𑁆𑀲 𑀘𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀫𑁆𑀫𑀧𑀣𑀢𑀸𑀢𑀁𑀲𑀪𑀸𑀕𑀢𑀸𑀳𑀺 𑀓𑀫𑁆𑀫𑀧𑀣𑀯𑀲𑁂𑀦.

𑀧𑀲𑁆𑀲𑀤𑁆𑀥𑀸𑀤𑀺𑀬𑀼𑀕𑀮𑀯𑀡𑁆𑀡𑀦𑀸

𑀤𑀭𑀣𑁄 𑀲𑀸𑀭𑀫𑁆𑀪𑁄, 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀧𑀘𑁆𑀘𑀬𑀸𑀦𑀁 𑀉𑀤𑁆𑀥𑀘𑁆𑀘𑀸𑀤𑀺𑀓𑀸𑀦𑀁 𑀓𑀺𑀮𑁂𑀲𑀸𑀦𑀁 𑀘𑀢𑀼𑀦𑁆𑀦𑀁 𑀯𑀸 𑀔𑀦𑁆𑀥𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀉𑀤𑁆𑀥𑀘𑁆𑀘𑀧𑁆𑀧𑀥𑀸𑀦𑀸 𑀓𑀺𑀮𑁂𑀲𑀸 𑀉𑀤𑁆𑀥𑀘𑁆𑀘𑀸𑀤𑀺𑀓𑀺𑀮𑁂𑀲𑀸, 𑀉𑀤𑁆𑀥𑀘𑁆𑀘𑀁 𑀯𑀸 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀓𑀺𑀮𑁂𑀲𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀼𑀯𑀡𑁆𑀡𑀯𑀺𑀲𑀼𑀤𑁆𑀥𑀺 𑀯𑀺𑀬𑀸𑀢𑀺 𑀬𑀣𑀸 𑀲𑀼𑀯𑀡𑁆𑀡𑀯𑀺𑀲𑀼𑀤𑁆𑀥𑀺 𑀅𑀮𑀗𑁆𑀓𑀸𑀭𑀯𑀺𑀓𑀢𑀺𑀯𑀺𑀦𑀺𑀬𑁄𑀕𑀓𑁆𑀔𑀫𑀸, 𑀏𑀯𑀁 𑀅𑀬𑀫𑁆𑀧𑀺 𑀳𑀺𑀢𑀓𑀺𑀭𑀺𑀬𑀸𑀯𑀺𑀦𑀺𑀬𑁄𑀕𑀓𑁆𑀔𑀫𑀸.

𑀲𑀫𑀁, 𑀲𑀫𑀦𑁆𑀢𑀢𑁄 𑀯𑀸 𑀧𑀓𑀸𑀭𑁂𑀳𑀺 𑀚𑀸𑀦𑀦𑀁 𑀲𑀫𑁆𑀧𑀚𑀜𑁆𑀜𑀁. 𑀘𑁂𑀢𑀺𑀬𑀯𑀦𑁆𑀤𑀦𑀸𑀤𑀺𑀅𑀢𑁆𑀣𑀁 𑀅𑀪𑀺𑀓𑁆𑀓𑀫𑀸𑀤𑀻𑀲𑀼 𑀅𑀢𑁆𑀣𑀸𑀦𑀢𑁆𑀣𑀧𑀭𑀺𑀕𑁆𑀕𑀡𑁆𑀳𑀦𑀁 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁. 𑀲𑀢𑀺 𑀘 𑀅𑀢𑁆𑀣𑁂 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀭𑀽𑀧𑀸𑀤𑀺𑀧𑀭𑀺𑀕𑁆𑀕𑀡𑁆𑀳𑀦𑀁 𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁. 𑀕𑁄𑀘𑀭𑀕𑀸𑀫𑀸𑀪𑀺𑀓𑁆𑀓𑀫𑀦𑀸𑀤𑀻𑀲𑀼 𑀓𑀫𑁆𑀫𑀝𑁆𑀞𑀸𑀦𑀸𑀯𑀺𑀚𑀳𑀦𑀁 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁. 𑀅𑀪𑀺𑀓𑁆𑀓𑀫𑀦𑀸𑀤𑀻𑀦𑀁 𑀥𑀸𑀢𑀼𑀆𑀤𑀺𑀯𑀲𑁂𑀦 𑀧𑀯𑀺𑀘𑀬𑁄 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁. 𑀲𑀩𑁆𑀩𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀦𑀼𑀬𑀼𑀢𑁆𑀢𑀸𑀦𑀁 𑀲𑀩𑁆𑀩𑀬𑁄𑀕𑀻𑀦𑀁 𑀲𑀩𑁆𑀩𑀤𑀸 𑀉𑀧𑀓𑀸𑀭𑀓𑀸 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸 𑀧𑀸𑀭𑀺𑀧𑀦𑁆𑀣𑀓𑀳𑀭𑀡𑀢𑁄 𑀪𑀸𑀯𑀦𑀸𑀯𑀟𑁆𑀠𑀦𑀢𑁄 𑀘. 𑀬𑀣𑀸𑀳 ‘‘𑀤𑁆𑀯𑁂 𑀥𑀫𑁆𑀫𑀸 𑀩𑀳𑀼𑀓𑀸𑀭𑀸 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘𑀸’’𑀢𑀺 (𑀤𑀻. 𑀦𑀺. 𑁩.𑁩𑁫𑁨). 𑀬𑀼𑀕𑁂 𑀦𑀤𑁆𑀥𑀸 𑀯𑀺𑀬𑀸𑀢𑀺 𑀬𑀼𑀕𑀦𑀤𑁆𑀥𑀸, 𑀅𑀜𑁆𑀜𑀫𑀜𑁆𑀜𑀁 𑀦𑀺𑀫𑀺𑀢𑁆𑀢𑀪𑀸𑀯𑁂𑀦 𑀲𑀫𑀁 𑀧𑀯𑀢𑁆𑀢𑀸𑀢𑀺 𑀅𑀢𑁆𑀣𑁄. ‘‘𑀧𑀼𑀦 𑀘𑀧𑀭𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀻’’𑀢𑀺 (𑀅. 𑀦𑀺. 𑁪.𑁧𑁭𑁦; 𑀧𑀝𑀺. 𑀫. 𑁨.𑁧) 𑀳𑀺 𑀲𑀼𑀢𑁆𑀢𑁂 𑀏𑀢𑁂𑀲𑀁 𑀬𑀼𑀕𑀦𑀤𑁆𑀥𑀢𑀸 𑀯𑀼𑀢𑁆𑀢𑀸. 𑀲𑀩𑁆𑀩𑀓𑀼𑀲𑀮𑀥𑀫𑁆𑀫𑁂𑀲𑀼 𑀮𑀻𑀦𑀼𑀤𑁆𑀥𑀘𑁆𑀘𑀸𑀪𑀸𑀯𑁄 𑀏𑀢𑁂𑀳𑀺 𑀤𑁆𑀯𑀻𑀳𑀺 𑀲𑀫𑀁 𑀬𑀼𑀢𑁆𑀢𑁂𑀳𑀻𑀢𑀺 ‘‘𑀯𑀻𑀭𑀺𑀬𑀲𑀫𑀸𑀥𑀺𑀬𑁄𑀚𑀦𑀢𑁆𑀣𑀸𑀬𑀸’’𑀢𑀺 𑀆𑀳, 𑀬𑁄𑀕𑀯𑀘𑀦𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄.

𑀬𑁂𑀯𑀸𑀧𑀦𑀓𑀯𑀡𑁆𑀡𑀦𑀸

𑀭𑀽𑀧𑀸𑀪𑀸𑀯𑁂𑀦𑀸𑀢𑀺 𑀭𑀼𑀧𑁆𑀧𑀦𑀸𑀪𑀸𑀯𑁂𑀦. 𑀥𑀫𑁆𑀫𑀸𑀢𑀺 𑀏𑀢𑀲𑁆𑀲 𑀅𑀢𑁆𑀣𑁄 𑀲𑀪𑀸𑀯𑀢𑁄 𑀉𑀧𑀮𑀩𑁆𑀪𑀫𑀸𑀦𑀸𑀢𑀺. 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑁄𑀢𑀺 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸𑀬 𑀫𑁂𑀢𑁆𑀢𑀸𑀬 𑀧𑀼𑀩𑁆𑀩𑀪𑀸𑀕𑁄, 𑀧𑀭𑀺𑀓𑀫𑁆𑀫𑀫𑁂𑀢𑁆𑀢𑀸 𑀏𑀢𑀲𑁆𑀫𑀺𑀁 𑀘𑀺𑀢𑁆𑀢𑁂 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀯𑀺𑀭𑀢𑀺𑀯𑀲𑁂𑀦𑀸𑀢𑀺 𑀯𑀘𑀻𑀧𑀯𑀢𑁆𑀢𑀺𑀬𑀸 𑀦 𑀧𑀽𑀭𑁂𑀢𑀺, 𑀓𑀺𑀦𑁆𑀢𑀼 𑀯𑀺𑀭𑀢𑀺𑀬𑁄𑀕𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀧𑀡𑁆𑀡𑀓𑀗𑁆𑀕𑀸𑀦𑀻𑀢𑀺 𑀅𑀯𑀺𑀭𑀤𑁆𑀥𑀗𑁆𑀕𑀸𑀦𑀺. 𑀬𑀣𑀸 𑀢𑀣𑀸 𑀯𑀸 𑀆𑀭𑀫𑁆𑀫𑀡𑁂 𑀯𑀺𑀦𑀺𑀘𑁆𑀙𑀬𑀦𑀁 𑀅𑀥𑀺𑀫𑀼𑀘𑁆𑀘𑀦𑀁. 𑀦 𑀳𑀺 𑀅𑀦𑀥𑀺𑀫𑀼𑀘𑁆𑀘𑀦𑁆𑀢𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼 𑀤𑀸𑀦𑀸𑀤𑀻𑀲𑀼 𑀯𑀸 𑀧𑀯𑀢𑁆𑀢𑀢𑀺, 𑀲𑀤𑁆𑀥𑀸 𑀧𑀦 𑀧𑀲𑀸𑀤𑀦𑀻𑀬𑁂𑀲𑀼 𑀧𑀲𑀸𑀤𑀸𑀥𑀺𑀫𑁄𑀓𑁆𑀔𑁄𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀤𑀸𑀭𑀓𑀲𑁆𑀲 𑀯𑀺𑀬 𑀇𑀢𑁄 𑀘𑀺𑀢𑁄 𑀘 𑀲𑀁𑀲𑀧𑁆𑀧𑀦𑀲𑁆𑀲 𑀓𑀭𑀺𑀲𑁆𑀲𑀸𑀫𑀺 𑀦 𑀓𑀭𑀺𑀲𑁆𑀲𑀸𑀫𑀻𑀢𑀺 𑀅𑀯𑀺𑀦𑀺𑀘𑁆𑀙𑀬𑀲𑁆𑀲 𑀧𑀝𑀺𑀧𑀓𑁆𑀔𑀓𑀺𑀭𑀺𑀬𑀸 𑀅𑀲𑀁𑀲𑀧𑁆𑀧𑀦𑀁. 𑀧𑀼𑀭𑀺𑀫𑀫𑀦𑀢𑁄𑀢𑀺 𑀪𑀯𑀗𑁆𑀕𑀢𑁄. 𑀯𑀺𑀲𑀤𑀺𑀲𑀁 𑀯𑀻𑀣𑀺𑀚𑀯𑀦𑀁 𑀫𑀦𑀁 𑀓𑀭𑁄𑀢𑀻𑀢𑀺 𑀫𑀦𑀲𑀺𑀓𑀸𑀭𑀲𑀸𑀫𑀜𑁆𑀜𑁂𑀦 𑀯𑀻𑀣𑀺𑀚𑀯𑀦𑀧𑀝𑀺𑀧𑀸𑀤𑀓𑁂 𑀤𑀲𑁆𑀲𑁂𑀢𑀺. 𑀢𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀥𑀫𑁆𑀫𑁂𑀲𑀼. 𑀅𑀢𑀤𑀸𑀭𑀫𑁆𑀫𑀡𑀢𑁆𑀢𑁂𑀧𑀺 𑀳𑀺 𑀢𑁂𑀲𑀼 𑀲𑀫𑀧𑁆𑀧𑀯𑀢𑁆𑀢𑁂𑀲𑀼 𑀉𑀤𑀸𑀲𑀻𑀦𑀪𑀸𑀯𑀢𑁄 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀢𑀺 𑀯𑀼𑀘𑁆𑀘𑀢𑀺. 𑀅𑀮𑀻𑀦𑀸𑀦𑀼𑀤𑁆𑀥𑀢𑀧𑁆𑀧𑀯𑀢𑁆𑀢𑀺𑀧𑀘𑁆𑀘𑀬𑀢𑁆𑀢𑀸 𑀊𑀦𑀸𑀥𑀺𑀓𑀦𑀺𑀯𑀸𑀭𑀡𑀭𑀲𑀸. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀯𑀢𑁆𑀣𑀽𑀦𑀦𑁆𑀢𑀺 𑀧𑀸𑀡𑀸𑀤𑀻𑀦𑀁. 𑀅𑀫𑀤𑁆𑀤𑀦𑀸 𑀫𑀤𑁆𑀤𑀦𑀧𑀝𑀺𑀧𑀓𑁆𑀔𑀪𑀸𑀯𑁄𑀯.

𑀢𑀁𑀢𑀁𑀭𑀸𑀲𑀺𑀓𑀺𑀘𑁆𑀘𑀯𑀲𑁂𑀦 𑀯𑀺𑀪𑀸𑀕𑀭𑀳𑀺𑀢𑀸 𑀅𑀯𑀺𑀪𑀢𑁆𑀢𑀺𑀓𑀸. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀲𑀯𑀺𑀪𑀢𑁆𑀢𑀺𑀓𑁂𑀲𑀼 𑀤𑀼𑀢𑀺𑀬𑀝𑁆𑀞𑀸𑀦𑀸𑀤𑀻𑀲𑀼𑀧𑀺 𑀪𑀸𑀚𑀺𑀬𑀫𑀸𑀦𑁂𑀲𑀼 𑀅𑀧𑀼𑀩𑁆𑀩𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀧𑀤𑀁 𑀧𑀽𑀭𑀺𑀢𑀦𑁆𑀢𑀺 𑀛𑀸𑀦𑀸𑀤𑀺𑀧𑀤𑀁 𑀧𑀜𑁆𑀘𑀓𑀸𑀤𑀺𑀯𑀲𑁂𑀦 𑀧𑀽𑀭𑀺𑀢𑀁. 𑀧𑀜𑁆𑀘 𑀳𑀺 𑀅𑀗𑁆𑀕𑀸𑀦𑀺 𑀛𑀸𑀦𑀧𑀤𑀲𑁆𑀲 𑀅𑀢𑁆𑀣𑁄, 𑀢𑁂𑀲𑀼 𑀏𑀓𑀲𑁆𑀫𑀺𑀜𑁆𑀘 𑀊𑀦𑁂 𑀛𑀸𑀦𑀧𑀤𑀁 𑀊𑀦𑀁 𑀳𑁄𑀢𑀻𑀢𑀺. 𑀧𑀤𑀲𑀫𑀽𑀳𑁄 𑀧𑀤𑀓𑁄𑀝𑁆𑀞𑀸𑀲𑁄 𑀯𑀸 𑀢𑀁 𑀢𑀫𑁂𑀯 𑀯𑀸 𑀧𑀤𑀁, 𑀅𑀯𑀼𑀢𑁆𑀢𑀁 𑀳𑀸𑀧𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀽𑀭𑀺𑀢’’𑀦𑁆𑀢𑀺. 𑀯𑀼𑀢𑁆𑀢𑀲𑁆𑀫𑀺𑀜𑁆𑀜𑁂𑀯 𑀯𑀼𑀘𑁆𑀘𑀫𑀸𑀦𑁂 𑀅𑀦𑁂𑀓𑁂𑀲𑀁 𑀧𑀼𑀭𑀺𑀲𑀲𑀤𑁆𑀤𑀸𑀦𑀁 𑀯𑀺𑀬 𑀓𑁄𑀘𑀺 𑀲𑀫𑁆𑀩𑀦𑁆𑀥𑁄 𑀦𑀢𑁆𑀣𑀻𑀢𑀺 𑀫𑀜𑁆𑀜𑀫𑀸𑀦𑁄 𑀆𑀳 ‘‘𑀅𑀦𑀦𑀼𑀲𑀦𑁆𑀥𑀺𑀓𑀸 𑀓𑀣𑀸’’𑀢𑀺. 𑀅𑀦𑁆𑀢𑀭𑀦𑁆𑀢𑀭𑀸 𑀯𑀼𑀢𑁆𑀢𑀲𑁆𑀫𑀺𑀜𑁆𑀜𑁂𑀯 𑀯𑀼𑀘𑁆𑀘𑀫𑀸𑀦𑁂 𑀅𑀦𑀼𑀓𑁆𑀓𑀫𑁂𑀦 𑀥𑀫𑁆𑀫𑀸 𑀓𑀣𑀺𑀢𑀸 𑀦 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀉𑀧𑁆𑀧𑀝𑀺𑀧𑀸𑀝𑀺𑀬𑀸’’𑀢𑀺. 𑀨𑀲𑁆𑀲𑀧𑀜𑁆𑀘𑀫𑀓𑀭𑀸𑀲𑀺 𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀸𑀥𑀸𑀭𑀡𑀯𑀲𑁂𑀦 𑀘𑀢𑀼𑀓𑁆𑀔𑀦𑁆𑀥𑀢𑀧𑁆𑀧𑀘𑁆𑀘𑀬𑀲𑀗𑁆𑀕𑀳𑀯𑀲𑁂𑀦 𑀘 𑀯𑀼𑀢𑁆𑀢𑁄. 𑀬𑀣𑀸𑀯𑀼𑀢𑁆𑀢𑁂𑀲𑀼 𑀧𑀦 𑀭𑀸𑀲𑀻𑀲𑀼 𑀏𑀓𑀭𑀸𑀲𑀺𑀓𑀺𑀘𑁆𑀘𑀲𑁆𑀲𑀧𑀺 𑀅𑀪𑀸𑀯𑀸 𑀙𑀦𑁆𑀤𑀸𑀤𑀬𑁄 𑀬𑁂𑀯𑀸𑀧𑀦𑀓𑀯𑀲𑁂𑀦 𑀯𑀼𑀢𑁆𑀢𑀸. 𑀯𑀼𑀢𑁆𑀢𑀸𑀦𑀫𑁆𑀧𑀺 𑀘 𑀥𑀫𑁆𑀫𑀸𑀦𑀁 𑀬𑀣𑀸 𑀯𑁂𑀤𑀦𑀸𑀤𑀻𑀦𑀁 𑀛𑀸𑀦𑀗𑁆𑀕𑀸𑀤𑀺𑀪𑀸𑀯𑁄 𑀯𑀼𑀢𑁆𑀢𑁄, 𑀦 𑀏𑀯𑀁 𑀲𑁄𑀯𑀘𑀲𑁆𑀲𑀢𑀸𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀤𑀺𑀯𑀺𑀲𑁂𑀲𑁄 𑀯𑀼𑀢𑁆𑀢𑁄𑀢𑀺 𑀢𑀲𑁆𑀲 𑀲𑀗𑁆𑀕𑀡𑁆𑀳𑀦𑀢𑁆𑀣𑀁 𑀓𑁂𑀘𑀺 𑀥𑀫𑁆𑀫𑁂 𑀯𑀺𑀲𑀼𑀁 𑀞𑀧𑁂𑀢𑁆𑀯𑀸 𑀢𑁂 𑀘 𑀢𑀜𑁆𑀘 𑀯𑀺𑀲𑁂𑀲𑀁 ‘‘𑀬𑁂 𑀯𑀸 𑀧𑀦𑀸’’𑀢𑀺 𑀆𑀳. 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 𑀯𑀸 𑀲𑀸𑀯𑀲𑁂𑀲𑁂 𑀥𑀫𑁆𑀫𑁂 𑀯𑀢𑁆𑀯𑀸 ‘‘𑀬𑁂 𑀯𑀸 𑀧𑀦𑀸’’𑀢𑀺 𑀯𑀼𑀢𑁆𑀢𑀁.

𑀬𑁂𑀯𑀸𑀧𑀦𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.