𑁩. 𑀢𑀢𑀺𑀬𑀯𑀕𑁆𑀕𑁄

𑁧. 𑀲𑀫𑁆𑀩𑀳𑀼𑀮𑀲𑀼𑀢𑁆𑀢𑀁

𑁧𑁫𑁭. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀲𑀺𑀮𑀸𑀯𑀢𑀺𑀬𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀅𑀧𑁆𑀧𑀫𑀢𑁆𑀢𑀸 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀫𑀳𑀦𑁆𑀢𑁂𑀦 𑀚𑀝𑀡𑁆𑀟𑀼𑀯𑁂𑀦 𑀅𑀚𑀺𑀦𑀓𑁆𑀔𑀺𑀧𑀦𑀺𑀯𑀢𑁆𑀣𑁄 𑀚𑀺𑀡𑁆𑀡𑁄 𑀕𑁄𑀧𑀸𑀦𑀲𑀺𑀯𑀗𑁆𑀓𑁄 𑀖𑀼𑀭𑀼𑀖𑀼𑀭𑀼𑀧𑀲𑁆𑀲𑀸𑀲𑀻 𑀉𑀤𑀼𑀫𑁆𑀩𑀭𑀤𑀡𑁆𑀟𑀁 𑀕𑀳𑁂𑀢𑁆𑀯𑀸 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀤𑀳𑀭𑀸 𑀪𑀯𑀦𑁆𑀢𑁄 𑀧𑀩𑁆𑀩𑀚𑀺𑀢𑀸 𑀲𑀼𑀲𑀽 𑀓𑀸𑀴𑀓𑁂𑀲𑀸 𑀪𑀤𑁆𑀭𑁂𑀦 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑀸 𑀧𑀞𑀫𑁂𑀦 𑀯𑀬𑀲𑀸 𑀅𑀦𑀺𑀓𑁆𑀓𑀻𑀴𑀺𑀢𑀸𑀯𑀺𑀦𑁄 𑀓𑀸𑀫𑁂𑀲𑀼. 𑀪𑀼𑀜𑁆𑀚𑀦𑁆𑀢𑀼 𑀪𑀯𑀦𑁆𑀢𑁄 𑀫𑀸𑀦𑀼𑀲𑀓𑁂 𑀓𑀸𑀫𑁂. 𑀫𑀸 𑀲𑀦𑁆𑀤𑀺𑀝𑁆𑀞𑀺𑀓𑀁 𑀳𑀺𑀢𑁆𑀯𑀸 𑀓𑀸𑀮𑀺𑀓𑀁 𑀅𑀦𑀼𑀥𑀸𑀯𑀺𑀢𑁆𑀣𑀸’’𑀢𑀺. ‘‘𑀦 𑀔𑁄 𑀫𑀬𑀁, 𑀩𑁆𑀭𑀸𑀳𑁆𑀫𑀡, 𑀲𑀦𑁆𑀤𑀺𑀝𑁆𑀞𑀺𑀓𑀁 𑀳𑀺𑀢𑁆𑀯𑀸 𑀓𑀸𑀮𑀺𑀓𑀁 𑀅𑀦𑀼𑀥𑀸𑀯𑀸𑀫. 𑀓𑀸𑀮𑀺𑀓𑀜𑁆𑀘 𑀔𑁄 𑀫𑀬𑀁, 𑀩𑁆𑀭𑀸𑀳𑁆𑀫𑀡, 𑀳𑀺𑀢𑁆𑀯𑀸 𑀲𑀦𑁆𑀤𑀺𑀝𑁆𑀞𑀺𑀓𑀁 𑀅𑀦𑀼𑀥𑀸𑀯𑀸𑀫. 𑀓𑀸𑀮𑀺𑀓𑀸 𑀳𑀺, 𑀩𑁆𑀭𑀸𑀳𑁆𑀫𑀡, 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀬𑀁 𑀥𑀫𑁆𑀫𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀫𑀸𑀭𑁄 𑀧𑀸𑀧𑀺𑀫𑀸 𑀲𑀻𑀲𑀁 𑀑𑀓𑀫𑁆𑀧𑁂𑀢𑁆𑀯𑀸 𑀚𑀺𑀯𑁆𑀳𑀁 𑀦𑀺𑀮𑁆𑀮𑀸𑀮𑁂𑀢𑁆𑀯𑀸 𑀢𑀺𑀯𑀺𑀲𑀸𑀔𑀁 𑀦𑀮𑀸𑀝𑁂 𑀦𑀮𑀸𑀝𑀺𑀓𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀤𑀡𑁆𑀟𑀫𑁄𑀮𑀼𑀩𑁆𑀪 𑀧𑀓𑁆𑀓𑀸𑀫𑀺.

𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀇𑀥 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀅𑀧𑁆𑀧𑀫𑀢𑁆𑀢𑀸 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀸 𑀯𑀺𑀳𑀭𑀸𑀫. 𑀅𑀣 𑀔𑁄, 𑀪𑀦𑁆𑀢𑁂, 𑀅𑀜𑁆𑀜𑀢𑀭𑁄 𑀩𑁆𑀭𑀸𑀳𑁆𑀫𑀡𑁄 𑀫𑀳𑀦𑁆𑀢𑁂𑀦 𑀚𑀝𑀡𑁆𑀟𑀼𑀯𑁂𑀦 𑀅𑀚𑀺𑀦𑀓𑁆𑀔𑀺𑀧𑀦𑀺𑀯𑀢𑁆𑀣𑁄 𑀚𑀺𑀡𑁆𑀡𑁄 𑀕𑁄𑀧𑀸𑀦𑀲𑀺𑀯𑀗𑁆𑀓𑁄 𑀖𑀼𑀭𑀼𑀖𑀼𑀭𑀼𑀧𑀲𑁆𑀲𑀸𑀲𑀻 𑀉𑀤𑀼𑀫𑁆𑀩𑀭𑀤𑀡𑁆𑀟𑀁 𑀕𑀳𑁂𑀢𑁆𑀯𑀸 𑀬𑁂𑀦 𑀫𑀬𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀫𑁆𑀳𑁂 𑀏𑀢𑀤𑀯𑁄𑀘 𑁋 ‘𑀤𑀳𑀭𑀸 𑀪𑀯𑀦𑁆𑀢𑁄 𑀧𑀩𑁆𑀩𑀚𑀺𑀢𑀸 𑀲𑀼𑀲𑀽 𑀓𑀸𑀴𑀓𑁂𑀲𑀸 𑀪𑀤𑁆𑀭𑁂𑀦 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑀸 𑀧𑀞𑀫𑁂𑀦 𑀯𑀬𑀲𑀸 𑀅𑀦𑀺𑀓𑁆𑀓𑀻𑀴𑀺𑀢𑀸𑀯𑀺𑀦𑁄 𑀓𑀸𑀫𑁂𑀲𑀼. 𑀪𑀼𑀜𑁆𑀚𑀦𑁆𑀢𑀼 𑀪𑀯𑀦𑁆𑀢𑁄 𑀫𑀸𑀦𑀼𑀲𑀓𑁂 𑀓𑀸𑀫𑁂. 𑀫𑀸 𑀲𑀦𑁆𑀤𑀺𑀝𑁆𑀞𑀺𑀓𑀁 𑀳𑀺𑀢𑁆𑀯𑀸 𑀓𑀸𑀮𑀺𑀓𑀁 𑀅𑀦𑀼𑀥𑀸𑀯𑀺𑀢𑁆𑀣𑀸’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀫𑀬𑀁, 𑀪𑀦𑁆𑀢𑁂, 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘𑀼𑀫𑁆𑀳 𑁋 ‘𑀦 𑀔𑁄 𑀫𑀬𑀁, 𑀩𑁆𑀭𑀸𑀳𑁆𑀫𑀡, 𑀲𑀦𑁆𑀤𑀺𑀝𑁆𑀞𑀺𑀓𑀁 𑀳𑀺𑀢𑁆𑀯𑀸 𑀓𑀸𑀮𑀺𑀓𑀁 𑀅𑀦𑀼𑀥𑀸𑀯𑀸𑀫. 𑀓𑀸𑀮𑀺𑀓𑀜𑁆𑀘 𑀔𑁄 𑀫𑀬𑀁, 𑀩𑁆𑀭𑀸𑀳𑁆𑀫𑀡, 𑀳𑀺𑀢𑁆𑀯𑀸 𑀲𑀦𑁆𑀤𑀺𑀝𑁆𑀞𑀺𑀓𑀁 𑀅𑀦𑀼𑀥𑀸𑀯𑀸𑀫. 𑀓𑀸𑀮𑀺𑀓𑀸 𑀳𑀺, 𑀩𑁆𑀭𑀸𑀳𑁆𑀫𑀡, 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄. 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀬𑀁 𑀥𑀫𑁆𑀫𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀲𑀻𑀲𑀁 𑀑𑀓𑀫𑁆𑀧𑁂𑀢𑁆𑀯𑀸 𑀚𑀺𑀯𑁆𑀳𑀁 𑀦𑀺𑀮𑁆𑀮𑀸𑀮𑁂𑀢𑁆𑀯𑀸 𑀢𑀺𑀯𑀺𑀲𑀸𑀔𑀁 𑀦𑀮𑀸𑀝𑁂 𑀦𑀮𑀸𑀝𑀺𑀓𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀤𑀡𑁆𑀟𑀫𑁄𑀮𑀼𑀩𑁆𑀪 𑀧𑀓𑁆𑀓𑀦𑁆𑀢𑁄’’𑀢𑀺.

‘‘𑀦𑁂𑀲𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑁄. 𑀫𑀸𑀭𑁄 𑀏𑀲𑁄 𑀧𑀸𑀧𑀺𑀫𑀸 𑀢𑀼𑀫𑁆𑀳𑀸𑀓𑀁 𑀯𑀺𑀘𑀓𑁆𑀔𑀼𑀓𑀫𑁆𑀫𑀸𑀬 𑀆𑀕𑀢𑁄’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀬𑁄 𑀤𑀼𑀓𑁆𑀔𑀫𑀤𑁆𑀤𑀓𑁆𑀔𑀺 𑀬𑀢𑁄𑀦𑀺𑀤𑀸𑀦𑀁,

𑀓𑀸𑀫𑁂𑀲𑀼 𑀲𑁄 𑀚𑀦𑁆𑀢𑀼 𑀓𑀣𑀁 𑀦𑀫𑁂𑀬𑁆𑀬;

𑀉𑀧𑀥𑀺𑀁 𑀯𑀺𑀤𑀺𑀢𑁆𑀯𑀸 𑀲𑀗𑁆𑀕𑁄𑀢𑀺 𑀮𑁄𑀓𑁂,

𑀢𑀲𑁆𑀲𑁂𑀯 𑀚𑀦𑁆𑀢𑀼 𑀯𑀺𑀦𑀬𑀸𑀬 𑀲𑀺𑀓𑁆𑀔𑁂’’𑀢𑀺.

𑁨. 𑀲𑀫𑀺𑀤𑁆𑀥𑀺𑀲𑀼𑀢𑁆𑀢𑀁

𑁧𑁫𑁮. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀲𑀺𑀮𑀸𑀯𑀢𑀺𑀬𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀲𑀫𑀺𑀤𑁆𑀥𑀺 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀫𑀺𑀤𑁆𑀥𑀺𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂, 𑀬𑀲𑁆𑀲 𑀫𑁂 𑀲𑀢𑁆𑀣𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂, 𑀬𑁆𑀯𑀸𑀳𑀁 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑁄. 𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂, 𑀬𑀲𑁆𑀲 𑀫𑁂 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸’’𑀢𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀆𑀬𑀲𑁆𑀫𑀢𑁄 𑀲𑀫𑀺𑀤𑁆𑀥𑀺𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀬𑁂𑀦𑀸𑀬𑀲𑁆𑀫𑀸 𑀲𑀫𑀺𑀤𑁆𑀥𑀺 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑁄 𑀲𑀫𑀺𑀤𑁆𑀥𑀺𑀲𑁆𑀲 𑀅𑀯𑀺𑀤𑀽𑀭𑁂 𑀫𑀳𑀦𑁆𑀢𑀁 𑀪𑀬𑀪𑁂𑀭𑀯𑀁 𑀲𑀤𑁆𑀤𑀫𑀓𑀸𑀲𑀺, 𑀅𑀧𑀺𑀲𑁆𑀲𑀼𑀤𑀁 𑀧𑀣𑀯𑀻 𑀫𑀜𑁆𑀜𑁂 𑀉𑀦𑁆𑀤𑁆𑀭𑀻𑀬𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀫𑀺𑀤𑁆𑀥𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀆𑀬𑀲𑁆𑀫𑀸 𑀲𑀫𑀺𑀤𑁆𑀥𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀸𑀫𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂, 𑀬𑀲𑁆𑀲 𑀫𑁂 𑀲𑀢𑁆𑀣𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂, 𑀬𑁆𑀯𑀸𑀳𑀁 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑁄. 𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂, 𑀬𑀲𑁆𑀲 𑀫𑁂 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸’𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀅𑀯𑀺𑀤𑀽𑀭𑁂 𑀫𑀳𑀸𑀪𑀬𑀪𑁂𑀭𑀯𑀲𑀤𑁆𑀤𑁄 𑀅𑀳𑁄𑀲𑀺, 𑀅𑀧𑀺𑀲𑁆𑀲𑀼𑀤𑀁 𑀧𑀣𑀯𑀻 𑀫𑀜𑁆𑀜𑁂 𑀉𑀦𑁆𑀤𑁆𑀭𑀻𑀬𑀢𑀻’’𑀢𑀺.

‘‘𑀦𑁂𑀲𑀸, 𑀲𑀫𑀺𑀤𑁆𑀥𑀺, 𑀧𑀣𑀯𑀻 𑀉𑀦𑁆𑀤𑁆𑀭𑀻𑀬𑀢𑀺. 𑀫𑀸𑀭𑁄 𑀏𑀲𑁄 𑀧𑀸𑀧𑀺𑀫𑀸 𑀢𑀼𑀬𑁆𑀳𑀁 𑀯𑀺𑀘𑀓𑁆𑀔𑀼𑀓𑀫𑁆𑀫𑀸𑀬 𑀆𑀕𑀢𑁄. 𑀕𑀘𑁆𑀙 𑀢𑁆𑀯𑀁, 𑀲𑀫𑀺𑀤𑁆𑀥𑀺, 𑀢𑀢𑁆𑀣𑁂𑀯 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀸𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀲𑀫𑀺𑀤𑁆𑀥𑀺 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀲𑀫𑀺𑀤𑁆𑀥𑀺 𑀢𑀢𑁆𑀣𑁂𑀯 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀸𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀢𑁄 𑀲𑀫𑀺𑀤𑁆𑀥𑀺𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲…𑀧𑁂… 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀆𑀬𑀲𑁆𑀫𑀢𑁄 𑀲𑀫𑀺𑀤𑁆𑀥𑀺𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬…𑀧𑁂… 𑀅𑀧𑀺𑀲𑁆𑀲𑀼𑀤𑀁 𑀧𑀣𑀯𑀻 𑀫𑀜𑁆𑀜𑁂 𑀉𑀦𑁆𑀤𑁆𑀭𑀻𑀬𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀫𑀺𑀤𑁆𑀥𑀺 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀲𑀤𑁆𑀥𑀸𑀬𑀸𑀳𑀁 𑀧𑀩𑁆𑀩𑀚𑀺𑀢𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁;

𑀲𑀢𑀺 𑀧𑀜𑁆𑀜𑀸 𑀘 𑀫𑁂 𑀩𑀼𑀤𑁆𑀥𑀸, 𑀘𑀺𑀢𑁆𑀢𑀜𑁆𑀘 𑀲𑀼𑀲𑀫𑀸𑀳𑀺𑀢𑀁;

𑀓𑀸𑀫𑀁 𑀓𑀭𑀲𑁆𑀲𑀼 𑀭𑀽𑀧𑀸𑀦𑀺, 𑀦𑁂𑀯 𑀫𑀁 𑀩𑁆𑀬𑀸𑀥𑀬𑀺𑀲𑁆𑀲𑀲𑀻’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀲𑀫𑀺𑀤𑁆𑀥𑀺 𑀪𑀺𑀓𑁆𑀔𑀽’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁩. 𑀕𑁄𑀥𑀺𑀓𑀲𑀼𑀢𑁆𑀢𑀁

𑁧𑁫𑁯. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀕𑁄𑀥𑀺𑀓𑁄 𑀇𑀲𑀺𑀕𑀺𑀮𑀺𑀧𑀲𑁆𑀲𑁂 𑀯𑀺𑀳𑀭𑀢𑀺 𑀓𑀸𑀴𑀲𑀺𑀮𑀸𑀬𑀁. 𑀅𑀣 𑀔𑁄 𑀆𑀬𑀲𑁆𑀫𑀸 𑀕𑁄𑀥𑀺𑀓𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀲𑀸𑀫𑀬𑀺𑀓𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀨𑀼𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀕𑁄𑀥𑀺𑀓𑁄 𑀢𑀫𑁆𑀳𑀸 𑀲𑀸𑀫𑀬𑀺𑀓𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀧𑀭𑀺𑀳𑀸𑀬𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀕𑁄𑀥𑀺𑀓𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀲𑀸𑀫𑀬𑀺𑀓𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀨𑀼𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀕𑁄𑀥𑀺𑀓𑁄 𑀢𑀫𑁆𑀳𑀸 𑀲𑀸𑀫𑀬𑀺𑀓𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀧𑀭𑀺𑀳𑀸𑀬𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀕𑁄𑀥𑀺𑀓𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀲𑀸𑀫𑀬𑀺𑀓𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀨𑀼𑀲𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀕𑁄𑀥𑀺𑀓𑁄 𑀢𑀫𑁆𑀳𑀸…𑀧𑁂… 𑀧𑀭𑀺𑀳𑀸𑀬𑀺. 𑀘𑀢𑀼𑀢𑁆𑀣𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀕𑁄𑀥𑀺𑀓𑁄 𑀅𑀧𑁆𑀧𑀫𑀢𑁆𑀢𑁄…𑀧𑁂… 𑀯𑀺𑀫𑀼𑀢𑁆𑀢𑀺𑀁 𑀨𑀼𑀲𑀺. 𑀘𑀢𑀼𑀢𑁆𑀣𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀕𑁄𑀥𑀺𑀓𑁄 𑀢𑀫𑁆𑀳𑀸…𑀧𑁂… 𑀧𑀭𑀺𑀳𑀸𑀬𑀺. 𑀧𑀜𑁆𑀘𑀫𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀕𑁄𑀥𑀺𑀓𑁄…𑀧𑁂… 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀨𑀼𑀲𑀺. 𑀧𑀜𑁆𑀘𑀫𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸…𑀧𑁂… 𑀯𑀺𑀫𑀼𑀢𑁆𑀢𑀺𑀬𑀸 𑀧𑀭𑀺𑀳𑀸𑀬𑀺. 𑀙𑀝𑁆𑀞𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀕𑁄𑀥𑀺𑀓𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀲𑀸𑀫𑀬𑀺𑀓𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀨𑀼𑀲𑀺. 𑀙𑀝𑁆𑀞𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀕𑁄𑀥𑀺𑀓𑁄 𑀢𑀫𑁆𑀳𑀸 𑀲𑀸𑀫𑀬𑀺𑀓𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀧𑀭𑀺𑀳𑀸𑀬𑀺. 𑀲𑀢𑁆𑀢𑀫𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀕𑁄𑀥𑀺𑀓𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀲𑀸𑀫𑀬𑀺𑀓𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀨𑀼𑀲𑀺.

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀕𑁄𑀥𑀺𑀓𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀬𑀸𑀯 𑀙𑀝𑁆𑀞𑀁 𑀔𑁆𑀯𑀸𑀳𑀁 𑀲𑀸𑀫𑀬𑀺𑀓𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀧𑀭𑀺𑀳𑀻𑀦𑁄. 𑀬𑀁𑀦𑀽𑀦𑀸𑀳𑀁 𑀲𑀢𑁆𑀣𑀁 𑀆𑀳𑀭𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀆𑀬𑀲𑁆𑀫𑀢𑁄 𑀕𑁄𑀥𑀺𑀓𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

‘‘𑀫𑀳𑀸𑀯𑀻𑀭 𑀫𑀳𑀸𑀧𑀜𑁆𑀜, 𑀇𑀤𑁆𑀥𑀺𑀬𑀸 𑀬𑀲𑀲𑀸 𑀚𑀮;

𑀲𑀩𑁆𑀩𑀯𑁂𑀭𑀪𑀬𑀸𑀢𑀻𑀢, 𑀧𑀸𑀤𑁂 𑀯𑀦𑁆𑀤𑀸𑀫𑀺 𑀘𑀓𑁆𑀔𑀼𑀫.

‘‘𑀲𑀸𑀯𑀓𑁄 𑀢𑁂 𑀫𑀳𑀸𑀯𑀻𑀭, 𑀫𑀭𑀡𑀁 𑀫𑀭𑀡𑀸𑀪𑀺𑀪𑀽;

𑀆𑀓𑀗𑁆𑀔𑀢𑀺 𑀘𑁂𑀢𑀬𑀢𑀺, 𑀢𑀁 𑀦𑀺𑀲𑁂𑀥 𑀚𑀼𑀢𑀺𑀦𑁆𑀥𑀭.

‘‘𑀓𑀣𑀜𑁆𑀳𑀺 𑀪𑀕𑀯𑀸 𑀢𑀼𑀬𑁆𑀳𑀁, 𑀲𑀸𑀯𑀓𑁄 𑀲𑀸𑀲𑀦𑁂 𑀭𑀢𑁄;

𑀅𑀧𑁆𑀧𑀢𑁆𑀢𑀫𑀸𑀦𑀲𑁄 𑀲𑁂𑀓𑁆𑀔𑁄, 𑀓𑀸𑀮𑀁 𑀓𑀬𑀺𑀭𑀸 𑀚𑀦𑁂𑀲𑀼𑀢𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀕𑁄𑀥𑀺𑀓𑁂𑀦 𑀲𑀢𑁆𑀣𑀁 𑀆𑀳𑀭𑀺𑀢𑀁 𑀳𑁄𑀢𑀺. 𑀅𑀣 𑀔𑁄 𑀪𑀕𑀯𑀸 ‘‘𑀫𑀸𑀭𑁄 𑀅𑀬𑀁 𑀧𑀸𑀧𑀺𑀫𑀸’’ 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀏𑀯𑀜𑁆𑀳𑀺 𑀥𑀻𑀭𑀸 𑀓𑀼𑀩𑁆𑀩𑀦𑁆𑀢𑀺, 𑀦𑀸𑀯𑀓𑀗𑁆𑀔𑀦𑁆𑀢𑀺 𑀚𑀻𑀯𑀺𑀢𑀁;

𑀲𑀫𑀽𑀮𑀁 𑀢𑀡𑁆𑀳𑀫𑀩𑁆𑀩𑀼𑀬𑁆𑀳, 𑀕𑁄𑀥𑀺𑀓𑁄 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀬𑀸𑀫, 𑀪𑀺𑀓𑁆𑀔𑀯𑁂, 𑀬𑁂𑀦 𑀇𑀲𑀺𑀕𑀺𑀮𑀺𑀧𑀲𑁆𑀲𑀁 𑀓𑀸𑀴𑀲𑀺𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫 𑀬𑀢𑁆𑀣 𑀕𑁄𑀥𑀺𑀓𑁂𑀦 𑀓𑀼𑀮𑀧𑀼𑀢𑁆𑀢𑁂𑀦 𑀲𑀢𑁆𑀣𑀁 𑀆𑀳𑀭𑀺𑀢’’𑀦𑁆𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁.

𑀅𑀣 𑀔𑁄 𑀪𑀕𑀯𑀸 𑀲𑀫𑁆𑀩𑀳𑀼𑀮𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀬𑁂𑀦 𑀇𑀲𑀺𑀕𑀺𑀮𑀺𑀧𑀲𑁆𑀲𑀁 𑀓𑀸𑀴𑀲𑀺𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀕𑁄𑀥𑀺𑀓𑀁 𑀤𑀽𑀭𑀢𑁄𑀯 𑀫𑀜𑁆𑀘𑀓𑁂 𑀯𑀺𑀯𑀢𑁆𑀢𑀓𑁆𑀔𑀦𑁆𑀥𑀁 𑀲𑁂𑀫𑀸𑀦𑀁 [𑀲𑁂𑀬𑁆𑀬𑀫𑀸𑀦𑀁 (𑀲𑁆𑀬𑀸. 𑀓𑀁.), 𑀲𑁄𑀧𑁆𑀧𑀫𑀸𑀦𑀁 (𑀓.)]. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀥𑀽𑀫𑀸𑀬𑀺𑀢𑀢𑁆𑀢𑀁 𑀢𑀺𑀫𑀺𑀭𑀸𑀬𑀺𑀢𑀢𑁆𑀢𑀁 𑀕𑀘𑁆𑀙𑀢𑁂𑀯 𑀧𑀼𑀭𑀺𑀫𑀁 𑀤𑀺𑀲𑀁, 𑀕𑀘𑁆𑀙𑀢𑀺 𑀧𑀘𑁆𑀙𑀺𑀫𑀁 𑀤𑀺𑀲𑀁, 𑀕𑀘𑁆𑀙𑀢𑀺 𑀉𑀢𑁆𑀢𑀭𑀁 𑀤𑀺𑀲𑀁, 𑀕𑀘𑁆𑀙𑀢𑀺 𑀤𑀓𑁆𑀔𑀺𑀡𑀁 𑀤𑀺𑀲𑀁, 𑀕𑀘𑁆𑀙𑀢𑀺 𑀉𑀤𑁆𑀥𑀁, 𑀕𑀘𑁆𑀙𑀢𑀺 𑀅𑀥𑁄, 𑀕𑀘𑁆𑀙𑀢𑀺 𑀅𑀦𑀼𑀤𑀺𑀲𑀁.

𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀧𑀲𑁆𑀲𑀣 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀏𑀢𑀁 𑀥𑀽𑀫𑀸𑀬𑀺𑀢𑀢𑁆𑀢𑀁 𑀢𑀺𑀫𑀺𑀭𑀸𑀬𑀺𑀢𑀢𑁆𑀢𑀁 𑀕𑀘𑁆𑀙𑀢𑁂𑀯 𑀧𑀼𑀭𑀺𑀫𑀁 𑀤𑀺𑀲𑀁, 𑀕𑀘𑁆𑀙𑀢𑀺 𑀧𑀘𑁆𑀙𑀺𑀫𑀁 𑀤𑀺𑀲𑀁, 𑀕𑀘𑁆𑀙𑀢𑀺 𑀉𑀢𑁆𑀢𑀭𑀁 𑀤𑀺𑀲𑀁, 𑀕𑀘𑁆𑀙𑀢𑀺 𑀤𑀓𑁆𑀔𑀺𑀡𑀁 𑀤𑀺𑀲𑀁, 𑀕𑀘𑁆𑀙𑀢𑀺 𑀉𑀤𑁆𑀥𑀁, 𑀕𑀘𑁆𑀙𑀢𑀺 𑀅𑀥𑁄, 𑀕𑀘𑁆𑀙𑀢𑀺 𑀅𑀦𑀼𑀤𑀺𑀲’’𑀦𑁆𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀏𑀲𑁄 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀭𑁄 𑀧𑀸𑀧𑀺𑀫𑀸 𑀕𑁄𑀥𑀺𑀓𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀯𑀺𑀜𑁆𑀜𑀸𑀡𑀁 𑀲𑀫𑀦𑁆𑀯𑁂𑀲𑀢𑀺 𑁋 ‘𑀓𑀢𑁆𑀣 𑀕𑁄𑀥𑀺𑀓𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀯𑀺𑀜𑁆𑀜𑀸𑀡𑀁 𑀧𑀢𑀺𑀝𑁆𑀞𑀺𑀢’𑀦𑁆𑀢𑀺? 𑀅𑀧𑁆𑀧𑀢𑀺𑀝𑁆𑀞𑀺𑀢𑁂𑀦 𑀘, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑁂𑀦 𑀕𑁄𑀥𑀺𑀓𑁄 𑀓𑀼𑀮𑀧𑀼𑀢𑁆𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀩𑁂𑀮𑀼𑀯𑀧𑀡𑁆𑀟𑀼𑀯𑀻𑀡𑀁 𑀆𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀉𑀤𑁆𑀥𑀁 𑀅𑀥𑁄 𑀘 𑀢𑀺𑀭𑀺𑀬𑀁, 𑀤𑀺𑀲𑀸 𑀅𑀦𑀼𑀤𑀺𑀲𑀸 𑀲𑁆𑀯𑀳𑀁;

𑀅𑀦𑁆𑀯𑁂𑀲𑀁 𑀦𑀸𑀥𑀺𑀕𑀘𑁆𑀙𑀸𑀫𑀺, 𑀕𑁄𑀥𑀺𑀓𑁄 𑀲𑁄 𑀓𑀼𑀳𑀺𑀁 𑀕𑀢𑁄’’𑀢𑀺.

‘‘𑀬𑁄 [𑀲𑁄 (𑀲𑀻. 𑀧𑀻.)] 𑀥𑀻𑀭𑁄 𑀥𑀺𑀢𑀺𑀲𑀫𑁆𑀧𑀦𑁆𑀦𑁄, 𑀛𑀸𑀬𑀻 𑀛𑀸𑀦𑀭𑀢𑁄 𑀲𑀤𑀸;

𑀅𑀳𑁄𑀭𑀢𑁆𑀢𑀁 𑀅𑀦𑀼𑀬𑀼𑀜𑁆𑀚𑀁, 𑀚𑀻𑀯𑀺𑀢𑀁 𑀅𑀦𑀺𑀓𑀸𑀫𑀬𑀁.

‘‘𑀚𑁂𑀢𑁆𑀯𑀸𑀦 𑀫𑀘𑁆𑀘𑀼𑀦𑁄 [𑀪𑁂𑀢𑁆𑀯𑀸 𑀦𑀫𑀼𑀘𑀺𑀦𑁄 (𑀲𑀻.)] 𑀲𑁂𑀦𑀁, 𑀅𑀦𑀸𑀕𑀦𑁆𑀢𑁆𑀯𑀸 𑀧𑀼𑀦𑀩𑁆𑀪𑀯𑀁;

𑀲𑀫𑀽𑀮𑀁 𑀢𑀡𑁆𑀳𑀫𑀩𑁆𑀩𑀼𑀬𑁆𑀳, 𑀕𑁄𑀥𑀺𑀓𑁄 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺.

‘‘𑀢𑀲𑁆𑀲 𑀲𑁄𑀓𑀧𑀭𑁂𑀢𑀲𑁆𑀲, 𑀯𑀻𑀡𑀸 𑀓𑀘𑁆𑀙𑀸 𑀅𑀪𑀲𑁆𑀲𑀣;

𑀢𑀢𑁄 𑀲𑁄 𑀤𑀼𑀫𑁆𑀫𑀦𑁄 𑀬𑀓𑁆𑀔𑁄, 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀣𑀸’’𑀢𑀺 [𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺𑀣𑀸𑀢𑀺 (𑀲𑁆𑀬𑀸. 𑀓𑀁.), 𑀢𑀢𑁆𑀣𑁂𑀯 𑀅𑀦𑁆𑀢𑀭𑀥𑀸𑀬𑀻𑀢𑀺 (𑀓.)].

𑁪. 𑀲𑀢𑁆𑀢𑀯𑀲𑁆𑀲𑀸𑀦𑀼𑀩𑀦𑁆𑀥𑀲𑀼𑀢𑁆𑀢𑀁

𑁧𑁬𑁦. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀉𑀭𑀼𑀯𑁂𑀮𑀸𑀬𑀁 𑀯𑀺𑀳𑀭𑀢𑀺 𑀦𑀚𑁆𑀚𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀸𑀭𑁄 𑀧𑀸𑀧𑀺𑀫𑀸 𑀲𑀢𑁆𑀢𑀯𑀲𑁆𑀲𑀸𑀦𑀺 𑀪𑀕𑀯𑀦𑁆𑀢𑀁 𑀅𑀦𑀼𑀩𑀦𑁆𑀥𑁄 𑀳𑁄𑀢𑀺 𑀑𑀢𑀸𑀭𑀸𑀧𑁂𑀓𑁆𑀔𑁄 𑀑𑀢𑀸𑀭𑀁 𑀅𑀮𑀪𑀫𑀸𑀦𑁄. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀲𑁄𑀓𑀸𑀯𑀢𑀺𑀡𑁆𑀡𑁄 𑀦𑀼 𑀯𑀦𑀫𑁆𑀳𑀺 𑀛𑀸𑀬𑀲𑀺,

𑀯𑀺𑀢𑁆𑀢𑀁 𑀦𑀼 𑀚𑀻𑀦𑁄 𑀉𑀤 𑀧𑀢𑁆𑀣𑀬𑀸𑀦𑁄;

𑀆𑀕𑀼𑀁 𑀦𑀼 𑀕𑀸𑀫𑀲𑁆𑀫𑀺𑀫𑀓𑀸𑀲𑀺 𑀓𑀺𑀜𑁆𑀘𑀺,

𑀓𑀲𑁆𑀫𑀸 𑀚𑀦𑁂𑀦 𑀦 𑀓𑀭𑁄𑀲𑀺 𑀲𑀓𑁆𑀔𑀺𑀁;

𑀲𑀓𑁆𑀔𑀻 𑀦 𑀲𑀫𑁆𑀧𑀚𑁆𑀚𑀢𑀺 𑀓𑁂𑀦𑀘𑀺 𑀢𑁂’’𑀢𑀺.

‘‘𑀲𑁄𑀓𑀲𑁆𑀲 𑀫𑀽𑀮𑀁 𑀧𑀮𑀺𑀔𑀸𑀬 𑀲𑀩𑁆𑀩𑀁,

𑀅𑀦𑀸𑀕𑀼 𑀛𑀸𑀬𑀸𑀫𑀺 𑀅𑀲𑁄𑀘𑀫𑀸𑀦𑁄;

𑀙𑁂𑀢𑁆𑀯𑀸𑀦 𑀲𑀩𑁆𑀩𑀁 𑀪𑀯𑀮𑁄𑀪𑀚𑀧𑁆𑀧𑀁,

𑀅𑀦𑀸𑀲𑀯𑁄 𑀛𑀸𑀬𑀸𑀫𑀺 𑀧𑀫𑀢𑁆𑀢𑀩𑀦𑁆𑀥𑀽’’𑀢𑀺.

‘‘𑀬𑀁 𑀯𑀤𑀦𑁆𑀢𑀺 𑀫𑀫 𑀬𑀺𑀤𑀦𑁆𑀢𑀺, 𑀬𑁂 𑀯𑀤𑀦𑁆𑀢𑀺 𑀫𑀫𑀦𑁆𑀢𑀺 𑀘;

𑀏𑀢𑁆𑀣 𑀘𑁂 𑀢𑁂 𑀫𑀦𑁄 𑀅𑀢𑁆𑀣𑀺, 𑀦 𑀫𑁂 𑀲𑀫𑀡 𑀫𑁄𑀓𑁆𑀔𑀲𑀻’’𑀢𑀺.

‘‘𑀬𑀁 𑀯𑀤𑀦𑁆𑀢𑀺 𑀦 𑀢𑀁 𑀫𑀬𑁆𑀳𑀁, 𑀬𑁂 𑀯𑀤𑀦𑁆𑀢𑀺 𑀦 𑀢𑁂 𑀅𑀳𑀁;

𑀏𑀯𑀁 𑀧𑀸𑀧𑀺𑀫 𑀚𑀸𑀦𑀸𑀳𑀺, 𑀦 𑀫𑁂 𑀫𑀕𑁆𑀕𑀫𑁆𑀧𑀺 𑀤𑀓𑁆𑀔𑀲𑀻’’𑀢𑀺.

‘‘𑀲𑀘𑁂 𑀫𑀕𑁆𑀕𑀁 𑀅𑀦𑀼𑀩𑀼𑀤𑁆𑀥𑀁, 𑀔𑁂𑀫𑀁 𑀅𑀫𑀢𑀕𑀸𑀫𑀺𑀦𑀁;

𑀅𑀧𑁂𑀳𑀺 𑀕𑀘𑁆𑀙 𑀢𑁆𑀯𑀫𑁂𑀯𑁂𑀓𑁄, 𑀓𑀺𑀫𑀜𑁆𑀜𑀫𑀦𑀼𑀲𑀸𑀲𑀲𑀻’’𑀢𑀺.

‘‘𑀅𑀫𑀘𑁆𑀘𑀼𑀥𑁂𑀬𑁆𑀬𑀁 𑀧𑀼𑀘𑁆𑀙𑀦𑁆𑀢𑀺, 𑀬𑁂 𑀚𑀦𑀸 𑀧𑀸𑀭𑀕𑀸𑀫𑀺𑀦𑁄;

𑀢𑁂𑀲𑀸𑀳𑀁 𑀧𑀼𑀝𑁆𑀞𑁄 𑀅𑀓𑁆𑀔𑀸𑀫𑀺, 𑀬𑀁 𑀲𑀘𑁆𑀘𑀁 𑀢𑀁 𑀦𑀺𑀭𑀽𑀧𑀥𑀺’’𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀕𑀸𑀫𑀲𑁆𑀲 𑀯𑀸 𑀦𑀺𑀕𑀫𑀲𑁆𑀲 𑀯𑀸 𑀅𑀯𑀺𑀤𑀽𑀭𑁂 𑀧𑁄𑀓𑁆𑀔𑀭𑀡𑀻. 𑀢𑀢𑁆𑀭𑀲𑁆𑀲 𑀓𑀓𑁆𑀓𑀝𑀓𑁄. 𑀅𑀣 𑀔𑁄, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸 𑀓𑀼𑀫𑀸𑀭𑀓𑀸 𑀯𑀸 𑀓𑀼𑀫𑀸𑀭𑀺𑀓𑀸𑀬𑁄 𑀯𑀸 𑀢𑀫𑁆𑀳𑀸 𑀕𑀸𑀫𑀸 𑀯𑀸 𑀦𑀺𑀕𑀫𑀸 𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑁂𑀦 𑀲𑀸 𑀧𑁄𑀓𑁆𑀔𑀭𑀡𑀻 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀼𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀓𑀓𑁆𑀓𑀝𑀓𑀁 𑀉𑀤𑀓𑀸 𑀉𑀤𑁆𑀥𑀭𑀺𑀢𑁆𑀯𑀸 𑀣𑀮𑁂 𑀧𑀢𑀺𑀝𑁆𑀞𑀧𑁂𑀬𑁆𑀬𑀼𑀁. 𑀬𑀁 𑀬𑀤𑁂𑀯 𑀳𑀺 𑀲𑁄, 𑀪𑀦𑁆𑀢𑁂, 𑀓𑀓𑁆𑀓𑀝𑀓𑁄 𑀅𑀴𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀬𑁆𑀬 𑀢𑀁 𑀢𑀤𑁂𑀯 𑀢𑁂 𑀓𑀼𑀫𑀸𑀭𑀓𑀸 𑀯𑀸 𑀓𑀼𑀫𑀸𑀭𑀺𑀓𑀸𑀬𑁄 𑀯𑀸 𑀓𑀝𑁆𑀞𑁂𑀦 𑀯𑀸 𑀓𑀣𑀮𑀸𑀬 𑀯𑀸 𑀲𑀜𑁆𑀙𑀺𑀦𑁆𑀤𑁂𑀬𑁆𑀬𑀼𑀁 𑀲𑀫𑁆𑀪𑀜𑁆𑀚𑁂𑀬𑁆𑀬𑀼𑀁 𑀲𑀫𑁆𑀧𑀮𑀺𑀪𑀜𑁆𑀚𑁂𑀬𑁆𑀬𑀼𑀁. 𑀏𑀯𑀜𑁆𑀳𑀺 𑀲𑁄, 𑀪𑀦𑁆𑀢𑁂, 𑀓𑀓𑁆𑀓𑀝𑀓𑁄 𑀲𑀩𑁆𑀩𑁂𑀳𑀺 𑀅𑀴𑁂𑀳𑀺 𑀲𑀜𑁆𑀙𑀺𑀦𑁆𑀦𑁂𑀳𑀺 𑀲𑀫𑁆𑀪𑀕𑁆𑀕𑁂𑀳𑀺 𑀲𑀫𑁆𑀧𑀮𑀺𑀪𑀕𑁆𑀕𑁂𑀳𑀺 𑀅𑀪𑀩𑁆𑀩𑁄 𑀢𑀁 𑀧𑁄𑀓𑁆𑀔𑀭𑀡𑀺𑀁 𑀑𑀢𑀭𑀺𑀢𑀼𑀁. 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀬𑀸𑀦𑀺 𑀓𑀸𑀦𑀺𑀘𑀺 𑀯𑀺𑀲𑀽𑀓𑀸𑀬𑀺𑀓𑀸𑀦𑀺 [𑀬𑀸𑀦𑀺 𑀯𑀺𑀲𑀼𑀓𑀸𑀬𑀺𑀓𑀸𑀦𑀺 (𑀲𑀻. 𑀧𑀻. 𑀓.)] 𑀯𑀺𑀲𑁂𑀯𑀺𑀢𑀸𑀦𑀺 𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 [𑀓𑀸𑀦𑀺𑀘𑀺 𑀓𑀸𑀦𑀺𑀘𑀺 𑀲𑀩𑁆𑀩𑀸𑀦𑀺 (𑀲𑀻. 𑀧𑀻. 𑀓.)] 𑀪𑀕𑀯𑀢𑀸 𑀲𑀜𑁆𑀙𑀺𑀦𑁆𑀦𑀸𑀦𑀺 𑀲𑀫𑁆𑀪𑀕𑁆𑀕𑀸𑀦𑀺 𑀲𑀫𑁆𑀧𑀮𑀺𑀪𑀕𑁆𑀕𑀸𑀦𑀺. 𑀅𑀪𑀩𑁆𑀩𑁄 𑀤𑀸𑀦𑀸𑀳𑀁, 𑀪𑀦𑁆𑀢𑁂, 𑀧𑀼𑀦 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 𑀬𑀤𑀺𑀤𑀁 𑀑𑀢𑀸𑀭𑀸𑀧𑁂𑀓𑁆𑀔𑁄’’𑀢𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀸 𑀦𑀺𑀩𑁆𑀩𑁂𑀚𑀦𑀻𑀬𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀫𑁂𑀤𑀯𑀡𑁆𑀡𑀜𑁆𑀘 𑀧𑀸𑀲𑀸𑀡𑀁, 𑀯𑀸𑀬𑀲𑁄 𑀅𑀦𑀼𑀧𑀭𑀺𑀬𑀕𑀸;

𑀅𑀧𑁂𑀢𑁆𑀣 𑀫𑀼𑀤𑀼𑀁 𑀯𑀺𑀦𑁆𑀤𑁂𑀫, 𑀅𑀧𑀺 𑀅𑀲𑁆𑀲𑀸𑀤𑀦𑀸 𑀲𑀺𑀬𑀸.

‘‘𑀅𑀮𑀤𑁆𑀥𑀸 𑀢𑀢𑁆𑀣 𑀅𑀲𑁆𑀲𑀸𑀤𑀁, 𑀯𑀸𑀬𑀲𑁂𑀢𑁆𑀢𑁄 𑀅𑀧𑀓𑁆𑀓𑀫𑁂;

𑀓𑀸𑀓𑁄𑀯 𑀲𑁂𑀮𑀫𑀸𑀲𑀚𑁆𑀚, 𑀦𑀺𑀩𑁆𑀩𑀺𑀚𑁆𑀚𑀸𑀧𑁂𑀫 𑀕𑁄𑀢𑀫𑀸’’𑀢𑀺.

𑁫. 𑀫𑀸𑀭𑀥𑀻𑀢𑀼𑀲𑀼𑀢𑁆𑀢𑀁

𑁧𑁬𑁧. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀸 𑀦𑀺𑀩𑁆𑀩𑁂𑀚𑀦𑀻𑀬𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀯𑀸 𑀢𑀫𑁆𑀳𑀸 𑀞𑀸𑀦𑀸 𑀅𑀧𑀓𑁆𑀓𑀫𑁆𑀫 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀧𑀣𑀯𑀺𑀬𑀁 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺 𑀢𑀼𑀡𑁆𑀳𑀻𑀪𑀽𑀢𑁄 𑀫𑀗𑁆𑀓𑀼𑀪𑀽𑀢𑁄 𑀧𑀢𑁆𑀢𑀓𑁆𑀔𑀦𑁆𑀥𑁄 𑀅𑀥𑁄𑀫𑀼𑀔𑁄 𑀧𑀚𑁆𑀛𑀸𑀬𑀦𑁆𑀢𑁄 𑀅𑀧𑁆𑀧𑀝𑀺𑀪𑀸𑀦𑁄 𑀓𑀝𑁆𑀞𑁂𑀦 𑀪𑀽𑀫𑀺𑀁 𑀯𑀺𑀮𑀺𑀔𑀦𑁆𑀢𑁄. 𑀅𑀣 𑀔𑁄 𑀢𑀡𑁆𑀳𑀸 𑀘 𑀅𑀭𑀢𑀺 𑀘 𑀭𑀕𑀸 𑀘 𑀫𑀸𑀭𑀥𑀻𑀢𑀭𑁄 𑀬𑁂𑀦 𑀫𑀸𑀭𑁄 𑀧𑀸𑀧𑀺𑀫𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺𑀁𑀲𑀼 𑁋

‘‘𑀓𑁂𑀦𑀸𑀲𑀺 𑀤𑀼𑀫𑁆𑀫𑀦𑁄 𑀢𑀸𑀢, 𑀧𑀼𑀭𑀺𑀲𑀁 𑀓𑀁 𑀦𑀼 𑀲𑁄𑀘𑀲𑀺;

𑀫𑀬𑀁 𑀢𑀁 𑀭𑀸𑀕𑀧𑀸𑀲𑁂𑀦, 𑀆𑀭𑀜𑁆𑀜𑀫𑀺𑀯 𑀓𑀼𑀜𑁆𑀚𑀭𑀁;

𑀩𑀦𑁆𑀥𑀺𑀢𑁆𑀯𑀸 𑀆𑀦𑀬𑀺𑀲𑁆𑀲𑀸𑀫, 𑀯𑀲𑀕𑁄 𑀢𑁂 𑀪𑀯𑀺𑀲𑁆𑀲𑀢𑀻’’𑀢𑀺.

‘‘𑀅𑀭𑀳𑀁 𑀲𑀼𑀕𑀢𑁄 𑀮𑁄𑀓𑁂, 𑀦 𑀭𑀸𑀕𑁂𑀦 𑀲𑀼𑀯𑀸𑀦𑀬𑁄;

𑀫𑀸𑀭𑀥𑁂𑀬𑁆𑀬𑀁 𑀅𑀢𑀺𑀓𑁆𑀓𑀦𑁆𑀢𑁄, 𑀢𑀲𑁆𑀫𑀸 𑀲𑁄𑀘𑀸𑀫𑀳𑀁 𑀪𑀼𑀲’’𑀦𑁆𑀢𑀺.

𑀅𑀣 𑀔𑁄 𑀢𑀡𑁆𑀳𑀸 𑀘 𑀅𑀭𑀢𑀺 𑀘 𑀭𑀕𑀸 𑀘 𑀫𑀸𑀭𑀥𑀻𑀢𑀭𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀧𑀸𑀤𑁂 𑀢𑁂, 𑀲𑀫𑀡, 𑀧𑀭𑀺𑀘𑀸𑀭𑁂𑀫𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀦 𑀫𑀦𑀲𑀸𑀓𑀸𑀲𑀺, 𑀬𑀣𑀸 𑀢𑀁 𑀅𑀦𑀼𑀢𑁆𑀢𑀭𑁂 𑀉𑀧𑀥𑀺𑀲𑀗𑁆𑀔𑀬𑁂 𑀯𑀺𑀫𑀼𑀢𑁆𑀢𑁄.

𑀅𑀣 𑀔𑁄 𑀢𑀡𑁆𑀳𑀸 𑀘 𑀅𑀭𑀢𑀺 𑀘 𑀭𑀕𑀸 𑀘 𑀫𑀸𑀭𑀥𑀻𑀢𑀭𑁄 𑀏𑀓𑀫𑀦𑁆𑀢𑀁 𑀅𑀧𑀓𑁆𑀓𑀫𑁆𑀫 𑀏𑀯𑀁 𑀲𑀫𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀉𑀘𑁆𑀘𑀸𑀯𑀘𑀸 𑀔𑁄 𑀧𑀼𑀭𑀺𑀲𑀸𑀦𑀁 𑀅𑀥𑀺𑀧𑁆𑀧𑀸𑀬𑀸. 𑀬𑀁𑀦𑀽𑀦 𑀫𑀬𑀁 𑀏𑀓𑀲𑀢𑀁 𑀏𑀓𑀲𑀢𑀁 𑀓𑀼𑀫𑀸𑀭𑀺𑀯𑀡𑁆𑀡𑀲𑀢𑀁 𑀅𑀪𑀺𑀦𑀺𑀫𑁆𑀫𑀺𑀦𑁂𑀬𑁆𑀬𑀸𑀫𑀸’’𑀢𑀺. 𑀅𑀣 𑀔𑁄 𑀢𑀡𑁆𑀳𑀸 𑀘 𑀅𑀭𑀢𑀺 𑀘 𑀭𑀕𑀸 𑀘 𑀫𑀸𑀭𑀥𑀻𑀢𑀭𑁄 𑀏𑀓𑀲𑀢𑀁 𑀏𑀓𑀲𑀢𑀁 𑀓𑀼𑀫𑀸𑀭𑀺𑀯𑀡𑁆𑀡𑀲𑀢𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀧𑀸𑀤𑁂 𑀢𑁂, 𑀲𑀫𑀡, 𑀧𑀭𑀺𑀘𑀸𑀭𑁂𑀫𑀸’’𑀢𑀺. 𑀢𑀫𑁆𑀧𑀺 𑀪𑀕𑀯𑀸 𑀦 𑀫𑀦𑀲𑀸𑀓𑀸𑀲𑀺, 𑀬𑀣𑀸 𑀢𑀁 𑀅𑀦𑀼𑀢𑁆𑀢𑀭𑁂 𑀉𑀧𑀥𑀺𑀲𑀗𑁆𑀔𑀬𑁂 𑀯𑀺𑀫𑀼𑀢𑁆𑀢𑁄.

𑀅𑀣 𑀔𑁄 𑀢𑀡𑁆𑀳𑀸 𑀘 𑀅𑀭𑀢𑀺 𑀘 𑀭𑀕𑀸 𑀘 𑀫𑀸𑀭𑀥𑀻𑀢𑀭𑁄 𑀏𑀓𑀫𑀦𑁆𑀢𑀁 𑀅𑀧𑀓𑁆𑀓𑀫𑁆𑀫 𑀏𑀯𑀁 𑀲𑀫𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀉𑀘𑁆𑀘𑀸𑀯𑀘𑀸 𑀔𑁄 𑀧𑀼𑀭𑀺𑀲𑀸𑀦𑀁 𑀅𑀥𑀺𑀧𑁆𑀧𑀸𑀬𑀸. 𑀬𑀁𑀦𑀽𑀦 𑀫𑀬𑀁 𑀏𑀓𑀲𑀢𑀁 𑀏𑀓𑀲𑀢𑀁 𑀅𑀯𑀺𑀚𑀸𑀢𑀯𑀡𑁆𑀡𑀲𑀢𑀁 𑀅𑀪𑀺𑀦𑀺𑀫𑁆𑀫𑀺𑀦𑁂𑀬𑁆𑀬𑀸𑀫𑀸’’𑀢𑀺. 𑀅𑀣 𑀔𑁄 𑀢𑀡𑁆𑀳𑀸 𑀘 𑀅𑀭𑀢𑀺 𑀘 𑀭𑀕𑀸 𑀘 𑀫𑀸𑀭𑀥𑀻𑀢𑀭𑁄 𑀏𑀓𑀲𑀢𑀁 𑀏𑀓𑀲𑀢𑀁 𑀅𑀯𑀺𑀚𑀸𑀢𑀯𑀡𑁆𑀡𑀲𑀢𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀧𑀸𑀤𑁂 𑀢𑁂, 𑀲𑀫𑀡, 𑀧𑀭𑀺𑀘𑀸𑀭𑁂𑀫𑀸’’𑀢𑀺. 𑀢𑀫𑁆𑀧𑀺 𑀪𑀕𑀯𑀸 𑀦 𑀫𑀦𑀲𑀸𑀓𑀸𑀲𑀺, 𑀬𑀣𑀸 𑀢𑀁 𑀅𑀦𑀼𑀢𑁆𑀢𑀭𑁂 𑀉𑀧𑀥𑀺𑀲𑀗𑁆𑀔𑀬𑁂 𑀯𑀺𑀫𑀼𑀢𑁆𑀢𑁄.

𑀅𑀣 𑀔𑁄 𑀢𑀡𑁆𑀳𑀸 𑀘…𑀧𑁂… 𑀬𑀁𑀦𑀽𑀦 𑀫𑀬𑀁 𑀏𑀓𑀲𑀢𑀁 𑀏𑀓𑀲𑀢𑀁 𑀲𑀓𑀺𑀁 𑀯𑀺𑀚𑀸𑀢𑀯𑀡𑁆𑀡𑀲𑀢𑀁 𑀅𑀪𑀺𑀦𑀺𑀫𑁆𑀫𑀺𑀦𑁂𑀬𑁆𑀬𑀸𑀫𑀸𑀢𑀺. 𑀅𑀣 𑀔𑁄 𑀢𑀡𑁆𑀳𑀸 𑀘…𑀧𑁂… 𑀲𑀓𑀺𑀁 𑀯𑀺𑀚𑀸𑀢𑀯𑀡𑁆𑀡𑀲𑀢𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀧𑀸𑀤𑁂 𑀢𑁂, 𑀲𑀫𑀡, 𑀧𑀭𑀺𑀘𑀸𑀭𑁂𑀫𑀸’’𑀢𑀺. 𑀢𑀫𑁆𑀧𑀺 𑀪𑀕𑀯𑀸 𑀦 𑀫𑀦𑀲𑀸𑀓𑀸𑀲𑀺, 𑀬𑀣𑀸 𑀢𑀁 𑀅𑀦𑀼𑀢𑁆𑀢𑀭𑁂 𑀉𑀧𑀥𑀺𑀲𑀗𑁆𑀔𑀬𑁂 𑀯𑀺𑀫𑀼𑀢𑁆𑀢𑁄.

𑀅𑀣 𑀔𑁄 𑀢𑀡𑁆𑀳𑀸 𑀘…𑀧𑁂… 𑀬𑀁𑀦𑀽𑀦 𑀫𑀬𑀁 𑀏𑀓𑀲𑀢𑀁 𑀏𑀓𑀲𑀢𑀁 𑀤𑀼𑀯𑀺𑀚𑀸𑀢𑀯𑀡𑁆𑀡𑀲𑀢𑀁 𑀅𑀪𑀺𑀦𑀺𑀫𑁆𑀫𑀺𑀦𑁂𑀬𑁆𑀬𑀸𑀫𑀸𑀢𑀺. 𑀅𑀣 𑀔𑁄 𑀢𑀡𑁆𑀳𑀸 𑀘…𑀧𑁂… 𑀤𑀼𑀯𑀺𑀚𑀸𑀢𑀯𑀡𑁆𑀡𑀲𑀢𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸…𑀧𑁂… 𑀬𑀣𑀸 𑀢𑀁 𑀅𑀦𑀼𑀢𑁆𑀢𑀭𑁂 𑀉𑀧𑀥𑀺𑀲𑀗𑁆𑀔𑀬𑁂 𑀯𑀺𑀫𑀼𑀢𑁆𑀢𑁄. 𑀅𑀣 𑀔𑁄 𑀢𑀡𑁆𑀳𑀸 𑀘…𑀧𑁂… 𑀫𑀚𑁆𑀛𑀺𑀫𑀺𑀢𑁆𑀣𑀺𑀯𑀡𑁆𑀡𑀲𑀢𑀁 𑀅𑀪𑀺𑀦𑀺𑀫𑁆𑀫𑀺𑀦𑁂𑀬𑁆𑀬𑀸𑀫𑀸𑀢𑀺. 𑀅𑀣 𑀔𑁄 𑀢𑀡𑁆𑀳𑀸 𑀘…𑀧𑁂… 𑀫𑀚𑁆𑀛𑀺𑀫𑀺𑀢𑁆𑀣𑀺𑀯𑀡𑁆𑀡𑀲𑀢𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸…𑀧𑁂… 𑀅𑀦𑀼𑀢𑁆𑀢𑀭𑁂 𑀉𑀧𑀥𑀺𑀲𑀗𑁆𑀔𑀬𑁂 𑀯𑀺𑀫𑀼𑀢𑁆𑀢𑁄.

𑀅𑀣 𑀔𑁄 𑀢𑀡𑁆𑀳𑀸 𑀘…𑀧𑁂… 𑀫𑀳𑀺𑀢𑁆𑀣𑀺𑀯𑀡𑁆𑀡𑀲𑀢𑀁 𑀅𑀪𑀺𑀦𑀺𑀫𑁆𑀫𑀺𑀦𑁂𑀬𑁆𑀬𑀸𑀫𑀸𑀢𑀺. 𑀅𑀣 𑀔𑁄 𑀢𑀡𑁆𑀳𑀸 𑀘…𑀧𑁂… 𑀫𑀳𑀺𑀢𑁆𑀣𑀺𑀯𑀡𑁆𑀡𑀲𑀢𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸…𑀧𑁂… 𑀅𑀦𑀼𑀢𑁆𑀢𑀭𑁂 𑀉𑀧𑀥𑀺𑀲𑀗𑁆𑀔𑀬𑁂 𑀯𑀺𑀫𑀼𑀢𑁆𑀢𑁄. 𑀅𑀣 𑀔𑁄 𑀢𑀡𑁆𑀳𑀸 𑀘 𑀅𑀭𑀢𑀺 𑀘 𑀭𑀕𑀸 𑀘 𑀫𑀸𑀭𑀥𑀻𑀢𑀭𑁄 𑀏𑀓𑀫𑀦𑁆𑀢𑀁 𑀅𑀧𑀓𑁆𑀓𑀫𑁆𑀫 𑀏𑀢𑀤𑀯𑁄𑀘𑀼𑀁 𑁋 𑀲𑀘𑁆𑀘𑀁 𑀓𑀺𑀭 𑀦𑁄 𑀧𑀺𑀢𑀸 𑀅𑀯𑁄𑀘 𑁋

‘‘𑀅𑀭𑀳𑀁 𑀲𑀼𑀕𑀢𑁄 𑀮𑁄𑀓𑁂, 𑀦 𑀭𑀸𑀕𑁂𑀦 𑀲𑀼𑀯𑀸𑀦𑀬𑁄;

𑀫𑀸𑀭𑀥𑁂𑀬𑁆𑀬𑀁 𑀅𑀢𑀺𑀓𑁆𑀓𑀦𑁆𑀢𑁄, 𑀢𑀲𑁆𑀫𑀸 𑀲𑁄𑀘𑀸𑀫𑀳𑀁 𑀪𑀼𑀲’’𑀦𑁆𑀢𑀺.

‘‘𑀬𑀜𑁆𑀳𑀺 𑀫𑀬𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀅𑀯𑀻𑀢𑀭𑀸𑀕𑀁 𑀇𑀫𑀺𑀦𑀸 𑀉𑀧𑀓𑁆𑀓𑀫𑁂𑀦 𑀉𑀧𑀓𑁆𑀓𑀫𑁂𑀬𑁆𑀬𑀸𑀫 𑀳𑀤𑀬𑀁 𑀯𑀸𑀲𑁆𑀲 𑀨𑀮𑁂𑀬𑁆𑀬, 𑀉𑀡𑁆𑀳𑀁 𑀮𑁄𑀳𑀺𑀢𑀁 𑀯𑀸 𑀫𑀼𑀔𑀢𑁄 𑀉𑀕𑁆𑀕𑀘𑁆𑀙𑁂𑀬𑁆𑀬, 𑀉𑀫𑁆𑀫𑀸𑀤𑀁 𑀯𑀸 𑀧𑀸𑀧𑀼𑀡𑁂𑀬𑁆𑀬 𑀘𑀺𑀢𑁆𑀢𑀓𑁆𑀔𑁂𑀧𑀁 𑀯𑀸. 𑀲𑁂𑀬𑁆𑀬𑀣𑀸 𑀯𑀸 𑀧𑀦 𑀦𑀴𑁄 𑀳𑀭𑀺𑀢𑁄 𑀮𑀼𑀢𑁄 𑀉𑀲𑁆𑀲𑀼𑀲𑁆𑀲𑀢𑀺 𑀯𑀺𑀲𑀼𑀲𑁆𑀲𑀢𑀺 𑀫𑀺𑀮𑀸𑀬𑀢𑀺; 𑀏𑀯𑀫𑁂𑀯 𑀉𑀲𑁆𑀲𑀼𑀲𑁆𑀲𑁂𑀬𑁆𑀬 𑀯𑀺𑀲𑀼𑀲𑁆𑀲𑁂𑀬𑁆𑀬 𑀫𑀺𑀮𑀸𑀬𑁂𑀬𑁆𑀬𑀸’’𑀢𑀺.

𑀅𑀣 𑀔𑁄 𑀢𑀡𑁆𑀳𑀸 𑀘 𑀅𑀭𑀢𑀺 𑀘 𑀭𑀕𑀸 𑀘 𑀫𑀸𑀭𑀥𑀻𑀢𑀭𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀢𑀡𑁆𑀳𑀸 𑀫𑀸𑀭𑀥𑀻𑀢𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀲𑁄𑀓𑀸𑀯𑀢𑀺𑀡𑁆𑀡𑁄 𑀦𑀼 𑀯𑀦𑀫𑁆𑀳𑀺 𑀛𑀸𑀬𑀲𑀺,

𑀯𑀺𑀢𑁆𑀢𑀁 𑀦𑀼 𑀚𑀻𑀦𑁄 𑀉𑀤 𑀧𑀢𑁆𑀣𑀬𑀸𑀦𑁄;

𑀆𑀕𑀼𑀁 𑀦𑀼 𑀕𑀸𑀫𑀲𑁆𑀫𑀺𑀫𑀓𑀸𑀲𑀺 𑀓𑀺𑀜𑁆𑀘𑀺,

𑀓𑀲𑁆𑀫𑀸 𑀚𑀦𑁂𑀦 𑀦 𑀓𑀭𑁄𑀲𑀺 𑀲𑀓𑁆𑀔𑀺𑀁;

𑀲𑀓𑁆𑀔𑀻 𑀦 𑀲𑀫𑁆𑀧𑀚𑁆𑀚𑀢𑀺 𑀓𑁂𑀦𑀘𑀺 𑀢𑁂’’𑀢𑀺.

‘‘𑀅𑀢𑁆𑀣𑀲𑁆𑀲 𑀧𑀢𑁆𑀢𑀺𑀁 𑀳𑀤𑀬𑀲𑁆𑀲 𑀲𑀦𑁆𑀢𑀺𑀁,

𑀚𑁂𑀢𑁆𑀯𑀸𑀦 𑀲𑁂𑀦𑀁 𑀧𑀺𑀬𑀲𑀸𑀢𑀭𑀽𑀧𑀁;

𑀏𑀓𑁄𑀳𑀁 [𑀏𑀓𑀸𑀳𑀁 (𑀲𑁆𑀬𑀸. 𑀓𑀁. 𑀧𑀻. 𑀓.)] 𑀛𑀸𑀬𑀁 𑀲𑀼𑀔𑀫𑀦𑀼𑀩𑁄𑀥𑀺𑀁,

𑀢𑀲𑁆𑀫𑀸 𑀚𑀦𑁂𑀦 𑀦 𑀓𑀭𑁄𑀫𑀺 𑀲𑀓𑁆𑀔𑀺𑀁;

𑀲𑀓𑁆𑀔𑀻 𑀦 𑀲𑀫𑁆𑀧𑀚𑁆𑀚𑀢𑀺 𑀓𑁂𑀦𑀘𑀺 𑀫𑁂’’𑀢𑀺.

𑀅𑀣 𑀔𑁄 𑀅𑀭𑀢𑀺 [𑀅𑀭𑀢𑀺 𑀘 (𑀓.)] 𑀫𑀸𑀭𑀥𑀻𑀢𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀓𑀣𑀁 𑀯𑀺𑀳𑀸𑀭𑀻𑀩𑀳𑀼𑀮𑁄𑀥 𑀪𑀺𑀓𑁆𑀔𑀼,

𑀧𑀜𑁆𑀘𑁄𑀖𑀢𑀺𑀡𑁆𑀡𑁄 𑀅𑀢𑀭𑀻𑀥 𑀙𑀝𑁆𑀞𑀁;

𑀓𑀣𑀁 𑀛𑀸𑀬𑀺𑀁 [𑀓𑀣𑀁 𑀛𑀸𑀬𑀁 (𑀲𑁆𑀬𑀸. 𑀓𑀁. 𑀧𑀻.), 𑀓𑀣𑀚𑁆𑀛𑀸𑀬𑀁 (𑀓.)] 𑀩𑀳𑀼𑀮𑀁 𑀓𑀸𑀫𑀲𑀜𑁆𑀜𑀸,

𑀧𑀭𑀺𑀩𑀸𑀳𑀺𑀭𑀸 𑀳𑁄𑀦𑁆𑀢𑀺 𑀅𑀮𑀤𑁆𑀥 𑀬𑁄 𑀢’’𑀦𑁆𑀢𑀺.

‘‘𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄,

𑀅𑀲𑀗𑁆𑀔𑀭𑀸𑀦𑁄 𑀲𑀢𑀺𑀫𑀸 𑀅𑀦𑁄𑀓𑁄;

𑀅𑀜𑁆𑀜𑀸𑀬 𑀥𑀫𑁆𑀫𑀁 𑀅𑀯𑀺𑀢𑀓𑁆𑀓𑀛𑀸𑀬𑀻,

𑀦 𑀓𑀼𑀧𑁆𑀧𑀢𑀺 𑀦 𑀲𑀭𑀢𑀺 𑀦 𑀣𑀺𑀦𑁄 [𑀦 𑀓𑀼𑀧𑁆𑀧𑀢𑀻 𑀦𑀲𑁆𑀲𑀭𑀢𑀻 𑀦 𑀣𑀻𑀦𑁄 (𑀲𑀻.)].

‘‘𑀏𑀯𑀁𑀯𑀺𑀳𑀸𑀭𑀻𑀩𑀳𑀼𑀮𑁄𑀥 𑀪𑀺𑀓𑁆𑀔𑀼,

𑀧𑀜𑁆𑀘𑁄𑀖𑀢𑀺𑀡𑁆𑀡𑁄 𑀅𑀢𑀭𑀻𑀥 𑀙𑀝𑁆𑀞𑀁;

𑀏𑀯𑀁 𑀛𑀸𑀬𑀺𑀁 𑀩𑀳𑀼𑀮𑀁 𑀓𑀸𑀫𑀲𑀜𑁆𑀜𑀸,

𑀧𑀭𑀺𑀩𑀸𑀳𑀺𑀭𑀸 𑀳𑁄𑀦𑁆𑀢𑀺 𑀅𑀮𑀤𑁆𑀥 𑀬𑁄 𑀢’’𑀦𑁆𑀢𑀺.

𑀅𑀣 𑀔𑁄 𑀭𑀕𑀸 [𑀭𑀕𑀸𑀘 (𑀓.)] 𑀫𑀸𑀭𑀥𑀻𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀅𑀘𑁆𑀙𑁂𑀚𑁆𑀚 𑀢𑀡𑁆𑀳𑀁 𑀕𑀡𑀲𑀗𑁆𑀖𑀘𑀸𑀭𑀻,

𑀅𑀤𑁆𑀥𑀸 𑀘𑀭𑀺𑀲𑁆𑀲𑀦𑁆𑀢𑀺 [𑀢𑀭𑀺𑀲𑁆𑀲𑀦𑁆𑀢𑀺 (𑀲𑀻.)] 𑀩𑀳𑀽 𑀘 𑀲𑀤𑁆𑀥𑀸;

𑀩𑀳𑀼𑀁 𑀯𑀢𑀸𑀬𑀁 𑀚𑀦𑀢𑀁 𑀅𑀦𑁄𑀓𑁄,

𑀅𑀘𑁆𑀙𑁂𑀚𑁆𑀚 𑀦𑁂𑀲𑁆𑀲𑀢𑀺 𑀫𑀘𑁆𑀘𑀼𑀭𑀸𑀚𑀲𑁆𑀲 𑀧𑀸𑀭’’𑀦𑁆𑀢𑀺.

‘‘𑀦𑀬𑀦𑁆𑀢𑀺 𑀯𑁂 𑀫𑀳𑀸𑀯𑀻𑀭𑀸, 𑀲𑀤𑁆𑀥𑀫𑁆𑀫𑁂𑀦 𑀢𑀣𑀸𑀕𑀢𑀸;

𑀥𑀫𑁆𑀫𑁂𑀦 𑀦𑀬𑀫𑀸𑀦𑀸𑀦𑀁, 𑀓𑀸 𑀉𑀲𑀽𑀬𑀸 𑀯𑀺𑀚𑀸𑀦𑀢’’𑀦𑁆𑀢𑀺.

𑀅𑀣 𑀔𑁄 𑀢𑀡𑁆𑀳𑀸 𑀘 𑀅𑀭𑀢𑀺 𑀘 𑀭𑀕𑀸 𑀘 𑀫𑀸𑀭𑀥𑀻𑀢𑀭𑁄 𑀬𑁂𑀦 𑀫𑀸𑀭𑁄 𑀧𑀸𑀧𑀺𑀫𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀅𑀤𑁆𑀤𑀲𑀸 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀢𑀡𑁆𑀳𑀜𑁆𑀘 𑀅𑀭𑀢𑀺𑀜𑁆𑀘 𑀭𑀕𑀜𑁆𑀘 𑀫𑀸𑀭𑀥𑀻𑀢𑀭𑁄 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀺𑀬𑁄. 𑀤𑀺𑀲𑁆𑀯𑀸𑀦 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

‘‘𑀩𑀸𑀮𑀸 𑀓𑀼𑀫𑀼𑀤𑀦𑀸𑀴𑁂𑀳𑀺, 𑀧𑀩𑁆𑀩𑀢𑀁 𑀅𑀪𑀺𑀫𑀢𑁆𑀣𑀣 [𑀅𑀪𑀺𑀫𑀦𑁆𑀣𑀣 (𑀲𑀻.)];

𑀕𑀺𑀭𑀺𑀁 𑀦𑀔𑁂𑀦 𑀔𑀦𑀣, 𑀅𑀬𑁄 𑀤𑀦𑁆𑀢𑁂𑀳𑀺 𑀔𑀸𑀤𑀣.

‘‘𑀲𑁂𑀮𑀁𑀯 𑀲𑀺𑀭𑀲𑀽𑀳𑀘𑁆𑀘 [𑀲𑀺𑀭𑀲𑀺 𑀊𑀳𑀘𑁆𑀘 (𑀲𑀻.), 𑀲𑀺𑀭𑀲𑀺 𑀑𑀳𑀘𑁆𑀘 (𑀲𑁆𑀬𑀸. 𑀓𑀁.)], 𑀧𑀸𑀢𑀸𑀮𑁂 𑀕𑀸𑀥𑀫𑁂𑀲𑀣;

𑀔𑀸𑀡𑀼𑀁𑀯 𑀉𑀭𑀲𑀸𑀲𑀚𑁆𑀚, 𑀦𑀺𑀩𑁆𑀩𑀺𑀚𑁆𑀚𑀸𑀧𑁂𑀣 𑀕𑁄𑀢𑀫𑀸’’𑀢𑀺.

‘‘𑀤𑀤𑁆𑀤𑀮𑁆𑀮𑀫𑀸𑀦𑀸 𑀆𑀕𑀜𑁆𑀙𑀼𑀁, 𑀢𑀡𑁆𑀳𑀸 𑀘 𑀅𑀭𑀢𑀻 𑀭𑀕𑀸;

𑀢𑀸 𑀢𑀢𑁆𑀣 𑀧𑀦𑀼𑀤𑀻 𑀲𑀢𑁆𑀣𑀸, 𑀢𑀽𑀮𑀁 𑀪𑀝𑁆𑀞𑀁𑀯 𑀫𑀸𑀮𑀼𑀢𑁄’’𑀢𑀺.

𑀢𑀢𑀺𑀬𑁄 𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀫𑁆𑀩𑀳𑀼𑀮𑀸 𑀲𑀫𑀺𑀤𑁆𑀥𑀺 𑀘, 𑀕𑁄𑀥𑀺𑀓𑀁 𑀲𑀢𑁆𑀢𑀯𑀲𑁆𑀲𑀸𑀦𑀺;

𑀥𑀻𑀢𑀭𑀁 𑀤𑁂𑀲𑀺𑀢𑀁 𑀩𑀼𑀤𑁆𑀥, 𑀲𑁂𑀝𑁆𑀞𑁂𑀦 𑀇𑀫𑀁 𑀫𑀸𑀭𑀧𑀜𑁆𑀘𑀓𑀦𑁆𑀢𑀺.

𑀫𑀸𑀭𑀲𑀁𑀬𑀼𑀢𑁆𑀢𑀁 𑀲𑀫𑀢𑁆𑀢𑀁.