𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄

𑀲𑀕𑀸𑀣𑀸𑀯𑀕𑁆𑀕𑁄

𑁧. 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑀁

𑁧. 𑀦𑀴𑀯𑀕𑁆𑀕𑁄

𑁧. 𑀑𑀖𑀢𑀭𑀡𑀲𑀼𑀢𑁆𑀢𑀁

𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀓𑀣𑀁 𑀦𑀼 𑀢𑁆𑀯𑀁, 𑀫𑀸𑀭𑀺𑀲, 𑀑𑀖𑀫𑀢𑀭𑀻’𑀢𑀺? ‘𑀅𑀧𑁆𑀧𑀢𑀺𑀝𑁆𑀞𑀁 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀅𑀦𑀸𑀬𑀽𑀳𑀁 𑀑𑀖𑀫𑀢𑀭𑀺’𑀦𑁆𑀢𑀺. ‘𑀬𑀣𑀸 𑀓𑀣𑀁 𑀧𑀦 𑀢𑁆𑀯𑀁, 𑀫𑀸𑀭𑀺𑀲, 𑀅𑀧𑁆𑀧𑀢𑀺𑀝𑁆𑀞𑀁 𑀅𑀦𑀸𑀬𑀽𑀳𑀁 𑀑𑀖𑀫𑀢𑀭𑀻’𑀢𑀺? ‘𑀬𑀤𑀸𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀲𑀦𑁆𑀢𑀺𑀝𑁆𑀞𑀸𑀫𑀺 𑀢𑀤𑀸𑀲𑁆𑀲𑀼 𑀲𑀁𑀲𑀻𑀤𑀸𑀫𑀺; 𑀬𑀤𑀸𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀆𑀬𑀽𑀳𑀸𑀫𑀺 𑀢𑀤𑀸𑀲𑁆𑀲𑀼 𑀦𑀺𑀩𑁆𑀩𑀼𑀬𑁆𑀳𑀸𑀫𑀺 [𑀦𑀺𑀯𑀼𑀬𑁆𑀳𑀸𑀫𑀺 (𑀲𑁆𑀬𑀸. 𑀓𑀁. 𑀓.)]. 𑀏𑀯𑀁 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀅𑀧𑁆𑀧𑀢𑀺𑀝𑁆𑀞𑀁 𑀅𑀦𑀸𑀬𑀽𑀳𑀁 𑀑𑀖𑀫𑀢𑀭𑀺’’’𑀦𑁆𑀢𑀺.

‘‘𑀘𑀺𑀭𑀲𑁆𑀲𑀁 𑀯𑀢 𑀧𑀲𑁆𑀲𑀸𑀫𑀺, 𑀩𑁆𑀭𑀸𑀳𑁆𑀫𑀡𑀁 𑀧𑀭𑀺𑀦𑀺𑀩𑁆𑀩𑀼𑀢𑀁;

𑀅𑀧𑁆𑀧𑀢𑀺𑀝𑁆𑀞𑀁 𑀅𑀦𑀸𑀬𑀽𑀳𑀁, 𑀢𑀺𑀡𑁆𑀡𑀁 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓’’𑀦𑁆𑀢𑀺. 𑁋

𑀇𑀤𑀫𑀯𑁄𑀘 𑀲𑀸 𑀤𑁂𑀯𑀢𑀸. 𑀲𑀫𑀦𑀼𑀜𑁆𑀜𑁄 𑀲𑀢𑁆𑀣𑀸 𑀅𑀳𑁄𑀲𑀺. 𑀅𑀣 𑀔𑁄 𑀲𑀸 𑀤𑁂𑀯𑀢𑀸 𑁋 ‘‘𑀲𑀫𑀦𑀼𑀜𑁆𑀜𑁄 𑀫𑁂 𑀲𑀢𑁆𑀣𑀸’’𑀢𑀺 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁨. 𑀦𑀺𑀫𑁄𑀓𑁆𑀔𑀲𑀼𑀢𑁆𑀢𑀁

𑁨. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀚𑀸𑀦𑀸𑀲𑀺 𑀦𑁄 𑀢𑁆𑀯𑀁, 𑀫𑀸𑀭𑀺𑀲, 𑀲𑀢𑁆𑀢𑀸𑀦𑀁 𑀦𑀺𑀫𑁄𑀓𑁆𑀔𑀁 𑀧𑀫𑁄𑀓𑁆𑀔𑀁 𑀯𑀺𑀯𑁂𑀓’’𑀦𑁆𑀢𑀺?

‘‘𑀚𑀸𑀦𑀸𑀫𑀺 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀲𑀢𑁆𑀢𑀸𑀦𑀁 𑀦𑀺𑀫𑁄𑀓𑁆𑀔𑀁 𑀧𑀫𑁄𑀓𑁆𑀔𑀁 𑀯𑀺𑀯𑁂𑀓’’𑀦𑁆𑀢𑀺.

‘‘𑀬𑀣𑀸 𑀓𑀣𑀁 𑀧𑀦 𑀢𑁆𑀯𑀁, 𑀫𑀸𑀭𑀺𑀲, 𑀚𑀸𑀦𑀸𑀲𑀺 𑀲𑀢𑁆𑀢𑀸𑀦𑀁 𑀦𑀺𑀫𑁄𑀓𑁆𑀔𑀁 𑀧𑀫𑁄𑀓𑁆𑀔𑀁 𑀯𑀺𑀯𑁂𑀓’’𑀦𑁆𑀢𑀺?

‘‘𑀦𑀦𑁆𑀤𑀻𑀪𑀯𑀧𑀭𑀺𑀓𑁆𑀔𑀬𑀸 [𑀦𑀦𑁆𑀤𑀺𑀪𑀯𑀧𑀭𑀺𑀓𑁆𑀔𑀬𑀸 (𑀲𑁆𑀬𑀸. 𑀓𑀁.)], 𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀲𑀗𑁆𑀔𑀬𑀸, 𑀯𑁂𑀤𑀦𑀸𑀦𑀁 𑀦𑀺𑀭𑁄𑀥𑀸 𑀉𑀧𑀲𑀫𑀸 𑁋 𑀏𑀯𑀁 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀚𑀸𑀦𑀸𑀫𑀺 𑀲𑀢𑁆𑀢𑀸𑀦𑀁 𑀦𑀺𑀫𑁄𑀓𑁆𑀔𑀁 𑀧𑀫𑁄𑀓𑁆𑀔𑀁 𑀯𑀺𑀯𑁂𑀓’’𑀦𑁆𑀢𑀺.

𑁩. 𑀉𑀧𑀦𑀻𑀬𑀲𑀼𑀢𑁆𑀢𑀁

𑁩. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀉𑀧𑀦𑀻𑀬𑀢𑀺 𑀚𑀻𑀯𑀺𑀢𑀫𑀧𑁆𑀧𑀫𑀸𑀬𑀼,

𑀚𑀭𑀽𑀧𑀦𑀻𑀢𑀲𑁆𑀲 𑀦 𑀲𑀦𑁆𑀢𑀺 𑀢𑀸𑀡𑀸;

𑀏𑀢𑀁 𑀪𑀬𑀁 𑀫𑀭𑀡𑁂 𑀧𑁂𑀓𑁆𑀔𑀫𑀸𑀦𑁄,

𑀧𑀼𑀜𑁆𑀜𑀸𑀦𑀺 𑀓𑀬𑀺𑀭𑀸𑀣 𑀲𑀼𑀔𑀸𑀯𑀳𑀸𑀦𑀻’’𑀢𑀺.

‘‘𑀉𑀧𑀦𑀻𑀬𑀢𑀺 𑀚𑀻𑀯𑀺𑀢𑀫𑀧𑁆𑀧𑀫𑀸𑀬𑀼,

𑀚𑀭𑀽𑀧𑀦𑀻𑀢𑀲𑁆𑀲 𑀦 𑀲𑀦𑁆𑀢𑀺 𑀢𑀸𑀡𑀸;

𑀏𑀢𑀁 𑀪𑀬𑀁 𑀫𑀭𑀡𑁂 𑀧𑁂𑀓𑁆𑀔𑀫𑀸𑀦𑁄,

𑀮𑁄𑀓𑀸𑀫𑀺𑀲𑀁 𑀧𑀚𑀳𑁂 𑀲𑀦𑁆𑀢𑀺𑀧𑁂𑀓𑁆𑀔𑁄’’𑀢𑀺.

𑁪. 𑀅𑀘𑁆𑀘𑁂𑀦𑁆𑀢𑀺𑀲𑀼𑀢𑁆𑀢𑀁

𑁪. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀅𑀘𑁆𑀘𑁂𑀦𑁆𑀢𑀺 𑀓𑀸𑀮𑀸 𑀢𑀭𑀬𑀦𑁆𑀢𑀺 𑀭𑀢𑁆𑀢𑀺𑀬𑁄,

𑀯𑀬𑁄𑀕𑀼𑀡𑀸 𑀅𑀦𑀼𑀧𑀼𑀩𑁆𑀩𑀁 𑀚𑀳𑀦𑁆𑀢𑀺;

𑀏𑀢𑀁 𑀪𑀬𑀁 𑀫𑀭𑀡𑁂 𑀧𑁂𑀓𑁆𑀔𑀫𑀸𑀦𑁄,

𑀧𑀼𑀜𑁆𑀜𑀸𑀦𑀺 𑀓𑀬𑀺𑀭𑀸𑀣 𑀲𑀼𑀔𑀸𑀯𑀳𑀸𑀦𑀻’’𑀢𑀺.

‘‘𑀅𑀘𑁆𑀘𑁂𑀦𑁆𑀢𑀺 𑀓𑀸𑀮𑀸 𑀢𑀭𑀬𑀦𑁆𑀢𑀺 𑀭𑀢𑁆𑀢𑀺𑀬𑁄,

𑀯𑀬𑁄𑀕𑀼𑀡𑀸 𑀅𑀦𑀼𑀧𑀼𑀩𑁆𑀩𑀁 𑀚𑀳𑀦𑁆𑀢𑀺;

𑀏𑀢𑀁 𑀪𑀬𑀁 𑀫𑀭𑀡𑁂 𑀧𑁂𑀓𑁆𑀔𑀫𑀸𑀦𑁄,

𑀮𑁄𑀓𑀸𑀫𑀺𑀲𑀁 𑀧𑀚𑀳𑁂 𑀲𑀦𑁆𑀢𑀺𑀧𑁂𑀓𑁆𑀔𑁄’’𑀢𑀺.

𑁫. 𑀓𑀢𑀺𑀙𑀺𑀦𑁆𑀤𑀲𑀼𑀢𑁆𑀢𑀁

𑁫. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀓𑀢𑀺 𑀙𑀺𑀦𑁆𑀤𑁂 𑀓𑀢𑀺 𑀚𑀳𑁂, 𑀓𑀢𑀺 𑀘𑀼𑀢𑁆𑀢𑀭𑀺 𑀪𑀸𑀯𑀬𑁂;

𑀓𑀢𑀺 𑀲𑀗𑁆𑀕𑀸𑀢𑀺𑀕𑁄 𑀪𑀺𑀓𑁆𑀔𑀼, 𑀑𑀖𑀢𑀺𑀡𑁆𑀡𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺.

‘‘𑀧𑀜𑁆𑀘 𑀙𑀺𑀦𑁆𑀤𑁂 𑀧𑀜𑁆𑀘 𑀚𑀳𑁂, 𑀧𑀜𑁆𑀘 𑀘𑀼𑀢𑁆𑀢𑀭𑀺 𑀪𑀸𑀯𑀬𑁂;

𑀧𑀜𑁆𑀘 𑀲𑀗𑁆𑀕𑀸𑀢𑀺𑀕𑁄 𑀪𑀺𑀓𑁆𑀔𑀼, 𑀑𑀖𑀢𑀺𑀡𑁆𑀡𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑁬. 𑀚𑀸𑀕𑀭𑀲𑀼𑀢𑁆𑀢𑀁

𑁬. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀓𑀢𑀺 𑀚𑀸𑀕𑀭𑀢𑀁 𑀲𑀼𑀢𑁆𑀢𑀸, 𑀓𑀢𑀺 𑀲𑀼𑀢𑁆𑀢𑁂𑀲𑀼 𑀚𑀸𑀕𑀭𑀸;

𑀓𑀢𑀺𑀪𑀺 [𑀓𑀢𑀻𑀳𑀺 (𑀲𑀻.)] 𑀭𑀚𑀫𑀸𑀤𑁂𑀢𑀺, 𑀓𑀢𑀺𑀪𑀺 [𑀓𑀢𑀻𑀳𑀺 (𑀲𑀻.)] 𑀧𑀭𑀺𑀲𑀼𑀚𑁆𑀛𑀢𑀻’’𑀢𑀺.

‘‘𑀧𑀜𑁆𑀘 𑀚𑀸𑀕𑀭𑀢𑀁 𑀲𑀼𑀢𑁆𑀢𑀸, 𑀧𑀜𑁆𑀘 𑀲𑀼𑀢𑁆𑀢𑁂𑀲𑀼 𑀚𑀸𑀕𑀭𑀸;

𑀧𑀜𑁆𑀘𑀪𑀺 [𑀧𑀜𑁆𑀘𑀳𑀺 (𑀲𑀻.)] 𑀭𑀚𑀫𑀸𑀤𑁂𑀢𑀺, 𑀧𑀜𑁆𑀘𑀪𑀺 [𑀧𑀜𑁆𑀘𑀳𑀺 (𑀲𑀻.)] 𑀧𑀭𑀺𑀲𑀼𑀚𑁆𑀛𑀢𑀻’’𑀢𑀺.

𑁭. 𑀅𑀧𑁆𑀧𑀝𑀺𑀯𑀺𑀤𑀺𑀢𑀲𑀼𑀢𑁆𑀢𑀁

𑁭. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀬𑁂𑀲𑀁 𑀥𑀫𑁆𑀫𑀸 𑀅𑀧𑁆𑀧𑀝𑀺𑀯𑀺𑀤𑀺𑀢𑀸, 𑀧𑀭𑀯𑀸𑀤𑁂𑀲𑀼 𑀦𑀻𑀬𑀭𑁂 [𑀦𑀺𑀬𑁆𑀬𑀭𑁂 (𑀓.)];

𑀲𑀼𑀢𑁆𑀢𑀸 𑀢𑁂 𑀦𑀧𑁆𑀧𑀩𑀼𑀚𑁆𑀛𑀦𑁆𑀢𑀺, 𑀓𑀸𑀮𑁄 𑀢𑁂𑀲𑀁 𑀧𑀩𑀼𑀚𑁆𑀛𑀺𑀢𑀼’’𑀦𑁆𑀢𑀺.

‘‘𑀬𑁂𑀲𑀁 𑀥𑀫𑁆𑀫𑀸 𑀲𑀼𑀧𑁆𑀧𑀝𑀺𑀯𑀺𑀤𑀺𑀢𑀸, 𑀧𑀭𑀯𑀸𑀤𑁂𑀲𑀼 𑀦 𑀦𑀻𑀬𑀭𑁂;

𑀢𑁂 𑀲𑀫𑁆𑀩𑀼𑀤𑁆𑀥𑀸 𑀲𑀫𑁆𑀫𑀤𑀜𑁆𑀜𑀸, 𑀘𑀭𑀦𑁆𑀢𑀺 𑀯𑀺𑀲𑀫𑁂 𑀲𑀫’’𑀦𑁆𑀢𑀺.

𑁮. 𑀲𑀼𑀲𑀫𑁆𑀫𑀼𑀝𑁆𑀞𑀲𑀼𑀢𑁆𑀢𑀁

𑁮. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀬𑁂𑀲𑀁 𑀥𑀫𑁆𑀫𑀸 𑀲𑀼𑀲𑀫𑁆𑀫𑀼𑀝𑁆𑀞𑀸, 𑀧𑀭𑀯𑀸𑀤𑁂𑀲𑀼 𑀦𑀻𑀬𑀭𑁂;

𑀲𑀼𑀢𑁆𑀢𑀸 𑀢𑁂 𑀦𑀧𑁆𑀧𑀩𑀼𑀚𑁆𑀛𑀦𑁆𑀢𑀺, 𑀓𑀸𑀮𑁄 𑀢𑁂𑀲𑀁 𑀧𑀩𑀼𑀚𑁆𑀛𑀺𑀢𑀼’’𑀦𑁆𑀢𑀺.

‘‘𑀬𑁂𑀲𑀁 𑀥𑀫𑁆𑀫𑀸 𑀅𑀲𑀫𑁆𑀫𑀼𑀝𑁆𑀞𑀸, 𑀧𑀭𑀯𑀸𑀤𑁂𑀲𑀼 𑀦 𑀦𑀻𑀬𑀭𑁂;

𑀢𑁂 𑀲𑀫𑁆𑀩𑀼𑀤𑁆𑀥𑀸 𑀲𑀫𑁆𑀫𑀤𑀜𑁆𑀜𑀸, 𑀘𑀭𑀦𑁆𑀢𑀺 𑀯𑀺𑀲𑀫𑁂 𑀲𑀫’’𑀦𑁆𑀢𑀺.

𑁯. 𑀫𑀸𑀦𑀓𑀸𑀫𑀲𑀼𑀢𑁆𑀢𑀁

𑁯. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀦 𑀫𑀸𑀦𑀓𑀸𑀫𑀲𑁆𑀲 𑀤𑀫𑁄 𑀇𑀥𑀢𑁆𑀣𑀺,

𑀦 𑀫𑁄𑀦𑀫𑀢𑁆𑀣𑀺 𑀅𑀲𑀫𑀸𑀳𑀺𑀢𑀲𑁆𑀲;

𑀏𑀓𑁄 𑀅𑀭𑀜𑁆𑀜𑁂 𑀯𑀺𑀳𑀭𑀁 𑀧𑀫𑀢𑁆𑀢𑁄,

𑀦 𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲 𑀢𑀭𑁂𑀬𑁆𑀬 𑀧𑀸𑀭’’𑀦𑁆𑀢𑀺.

‘‘𑀫𑀸𑀦𑀁 𑀧𑀳𑀸𑀬 𑀲𑀼𑀲𑀫𑀸𑀳𑀺𑀢𑀢𑁆𑀢𑁄,

𑀲𑀼𑀘𑁂𑀢𑀲𑁄 𑀲𑀩𑁆𑀩𑀥𑀺 𑀯𑀺𑀧𑁆𑀧𑀫𑀼𑀢𑁆𑀢𑁄;

𑀏𑀓𑁄 𑀅𑀭𑀜𑁆𑀜𑁂 𑀯𑀺𑀳𑀭𑀁 𑀅𑀧𑁆𑀧𑀫𑀢𑁆𑀢𑁄,

𑀲 𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲 𑀢𑀭𑁂𑀬𑁆𑀬 𑀧𑀸𑀭’’𑀦𑁆𑀢𑀺.

𑁧𑁦. 𑀅𑀭𑀜𑁆𑀜𑀲𑀼𑀢𑁆𑀢𑀁

𑁧𑁦. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑀸𑀦𑀁, 𑀲𑀦𑁆𑀢𑀸𑀦𑀁 𑀩𑁆𑀭𑀳𑁆𑀫𑀘𑀸𑀭𑀺𑀦𑀁;

𑀏𑀓𑀪𑀢𑁆𑀢𑀁 𑀪𑀼𑀜𑁆𑀚𑀫𑀸𑀦𑀸𑀦𑀁, 𑀓𑁂𑀦 𑀯𑀡𑁆𑀡𑁄 𑀧𑀲𑀻𑀤𑀢𑀻’’𑀢𑀺.

‘‘𑀅𑀢𑀻𑀢𑀁 𑀦𑀸𑀦𑀼𑀲𑁄𑀘𑀦𑁆𑀢𑀺, 𑀦𑀧𑁆𑀧𑀚𑀧𑁆𑀧𑀦𑁆𑀢𑀺 𑀦𑀸𑀕𑀢𑀁;

𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀬𑀸𑀧𑁂𑀦𑁆𑀢𑀺, 𑀢𑁂𑀦 𑀯𑀡𑁆𑀡𑁄 𑀧𑀲𑀻𑀤𑀢𑀺’’.

‘‘𑀅𑀦𑀸𑀕𑀢𑀧𑁆𑀧𑀚𑀧𑁆𑀧𑀸𑀬, 𑀅𑀢𑀻𑀢𑀲𑁆𑀲𑀸𑀦𑀼𑀲𑁄𑀘𑀦𑀸;

𑀏𑀢𑁂𑀦 𑀩𑀸𑀮𑀸 𑀲𑀼𑀲𑁆𑀲𑀦𑁆𑀢𑀺, 𑀦𑀴𑁄𑀯 𑀳𑀭𑀺𑀢𑁄 𑀮𑀼𑀢𑁄’’𑀢𑀺.

𑀦𑀴𑀯𑀕𑁆𑀕𑁄 𑀧𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀑𑀖𑀁 𑀦𑀺𑀫𑁄𑀓𑁆𑀔𑀁 𑀉𑀧𑀦𑁂𑀬𑁆𑀬𑀁, 𑀅𑀘𑁆𑀘𑁂𑀦𑁆𑀢𑀺 𑀓𑀢𑀺𑀙𑀺𑀦𑁆𑀤𑀺 𑀘;

𑀚𑀸𑀕𑀭𑀁 𑀅𑀧𑁆𑀧𑀝𑀺𑀯𑀺𑀤𑀺𑀢𑀸, 𑀲𑀼𑀲𑀫𑁆𑀫𑀼𑀝𑁆𑀞𑀸 𑀫𑀸𑀦𑀓𑀸𑀫𑀺𑀦𑀸;

𑀅𑀭𑀜𑁆𑀜𑁂 𑀤𑀲𑀫𑁄 𑀯𑀼𑀢𑁆𑀢𑁄, 𑀯𑀕𑁆𑀕𑁄 𑀢𑁂𑀦 𑀧𑀯𑀼𑀘𑁆𑀘𑀢𑀺.

𑁨. 𑀦𑀦𑁆𑀤𑀦𑀯𑀕𑁆𑀕𑁄

𑁧. 𑀦𑀦𑁆𑀤𑀦𑀲𑀼𑀢𑁆𑀢𑀁

𑁧𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀸 𑀢𑀸𑀯𑀢𑀺𑀁𑀲𑀓𑀸𑀬𑀺𑀓𑀸 𑀤𑁂𑀯𑀢𑀸 𑀦𑀦𑁆𑀤𑀦𑁂 𑀯𑀦𑁂 𑀅𑀘𑁆𑀙𑀭𑀸𑀲𑀗𑁆𑀖𑀧𑀭𑀺𑀯𑀼𑀢𑀸 𑀤𑀺𑀩𑁆𑀩𑁂𑀳𑀺 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀸 𑀲𑀫𑀗𑁆𑀕𑀻𑀪𑀽𑀢𑀸 𑀧𑀭𑀺𑀘𑀸𑀭𑀺𑀬𑀫𑀸𑀦𑀸 [𑀧𑀭𑀺𑀘𑀸𑀭𑀺𑀬𑀫𑀸𑀦𑀸 (𑀲𑁆𑀬𑀸. 𑀓𑀁. 𑀓.)] 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀦 𑀢𑁂 𑀲𑀼𑀔𑀁 𑀧𑀚𑀸𑀦𑀦𑁆𑀢𑀺, 𑀬𑁂 𑀦 𑀧𑀲𑁆𑀲𑀦𑁆𑀢𑀺 𑀦𑀦𑁆𑀤𑀦𑀁;

𑀆𑀯𑀸𑀲𑀁 𑀦𑀭𑀤𑁂𑀯𑀸𑀦𑀁, 𑀢𑀺𑀤𑀲𑀸𑀦𑀁 𑀬𑀲𑀲𑁆𑀲𑀺𑀦’’𑀦𑁆𑀢𑀺.

‘‘𑀏𑀯𑀁 𑀯𑀼𑀢𑁆𑀢𑁂, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸 𑀢𑀁 𑀤𑁂𑀯𑀢𑀁 𑀕𑀸𑀣𑀸𑀬 𑀧𑀘𑁆𑀘𑀪𑀸𑀲𑀺 𑁋

‘‘𑀦 𑀢𑁆𑀯𑀁 𑀩𑀸𑀮𑁂 𑀧𑀚𑀸𑀦𑀸𑀲𑀺, 𑀬𑀣𑀸 𑀅𑀭𑀳𑀢𑀁 𑀯𑀘𑁄;

𑀅𑀦𑀺𑀘𑁆𑀘𑀸 𑀲𑀩𑁆𑀩𑀲𑀗𑁆𑀔𑀸𑀭𑀸 [𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 (𑀲𑀻. 𑀲𑁆𑀬𑀸. 𑀓𑀁.)], 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄;

𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄’’𑀢𑀺.

𑁨. 𑀦𑀦𑁆𑀤𑀢𑀺𑀲𑀼𑀢𑁆𑀢𑀁

𑁧𑁨. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀦𑀦𑁆𑀤𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸,

𑀕𑁄𑀫𑀸 [𑀕𑁄𑀫𑀺𑀓𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀕𑁄𑀳𑀺 𑀢𑀣𑁂𑀯 𑀦𑀦𑁆𑀤𑀢𑀺;

𑀉𑀧𑀥𑀻𑀳𑀺 𑀦𑀭𑀲𑁆𑀲 𑀦𑀦𑁆𑀤𑀦𑀸,

𑀦 𑀳𑀺 𑀲𑁄 𑀦𑀦𑁆𑀤𑀢𑀺 𑀬𑁄 𑀦𑀺𑀭𑀽𑀧𑀥𑀻’’𑀢𑀺.

‘‘𑀲𑁄𑀘𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸,

𑀕𑁄𑀫𑀸 𑀕𑁄𑀳𑀺 𑀢𑀣𑁂𑀯 𑀲𑁄𑀘𑀢𑀺;

𑀉𑀧𑀥𑀻𑀳𑀺 𑀦𑀭𑀲𑁆𑀲 𑀲𑁄𑀘𑀦𑀸,

𑀦 𑀳𑀺 𑀲𑁄 𑀲𑁄𑀘𑀢𑀺 𑀬𑁄 𑀦𑀺𑀭𑀽𑀧𑀥𑀻’’𑀢𑀺.

𑁩. 𑀦𑀢𑁆𑀣𑀺𑀧𑀼𑀢𑁆𑀢𑀲𑀫𑀲𑀼𑀢𑁆𑀢𑀁

𑁧𑁩. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀦𑀢𑁆𑀣𑀺 𑀧𑀼𑀢𑁆𑀢𑀲𑀫𑀁 𑀧𑁂𑀫𑀁, 𑀦𑀢𑁆𑀣𑀺 𑀕𑁄𑀲𑀫𑀺𑀢𑀁 𑀥𑀦𑀁;

𑀦𑀢𑁆𑀣𑀺 𑀲𑀽𑀭𑀺𑀬𑀲𑀫𑀸 [𑀲𑀼𑀭𑀺𑀬𑀲𑀫𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀆𑀪𑀸, 𑀲𑀫𑀼𑀤𑁆𑀤𑀧𑀭𑀫𑀸 𑀲𑀭𑀸’’𑀢𑀺.

‘‘𑀦𑀢𑁆𑀣𑀺 𑀅𑀢𑁆𑀢𑀲𑀫𑀁 𑀧𑁂𑀫𑀁, 𑀦𑀢𑁆𑀣𑀺 𑀥𑀜𑁆𑀜𑀲𑀫𑀁 𑀥𑀦𑀁;

𑀦𑀢𑁆𑀣𑀺 𑀧𑀜𑁆𑀜𑀸𑀲𑀫𑀸 𑀆𑀪𑀸, 𑀯𑀼𑀝𑁆𑀞𑀺 𑀯𑁂 𑀧𑀭𑀫𑀸 𑀲𑀭𑀸’’𑀢𑀺.

𑁪. 𑀔𑀢𑁆𑀢𑀺𑀬𑀲𑀼𑀢𑁆𑀢𑀁

𑁧𑁪. ‘‘𑀔𑀢𑁆𑀢𑀺𑀬𑁄 𑀤𑁆𑀯𑀺𑀧𑀤𑀁 𑀲𑁂𑀝𑁆𑀞𑁄, 𑀩𑀮𑀻𑀩𑀤𑁆𑀤𑁄 [𑀩𑀮𑀺𑀯𑀤𑁆𑀤𑁄 (𑀲𑀻. 𑀧𑀻.), 𑀩𑀮𑀺𑀩𑀤𑁆𑀤𑁄 (𑀲𑁆𑀬𑀸. 𑀓𑀁. 𑀓.)] 𑀘𑀢𑀼𑀧𑁆𑀧𑀤𑀁.

𑀓𑁄𑀫𑀸𑀭𑀻 𑀲𑁂𑀝𑁆𑀞𑀸 𑀪𑀭𑀺𑀬𑀸𑀦𑀁, 𑀬𑁄 𑀘 𑀧𑀼𑀢𑁆𑀢𑀸𑀦 𑀧𑀼𑀩𑁆𑀩𑀚𑁄’’𑀢𑀺.

‘‘𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀁 𑀲𑁂𑀝𑁆𑀞𑁄, 𑀆𑀚𑀸𑀦𑀻𑀬𑁄 𑀘𑀢𑀼𑀧𑁆𑀧𑀤𑀁;

𑀲𑀼𑀲𑁆𑀲𑀽𑀲𑀸 𑀲𑁂𑀝𑁆𑀞𑀸 𑀪𑀭𑀺𑀬𑀸𑀦𑀁, 𑀬𑁄 𑀘 𑀧𑀼𑀢𑁆𑀢𑀸𑀦𑀫𑀲𑁆𑀲𑀯𑁄’’𑀢𑀺.

𑁫. 𑀲𑀡𑀫𑀸𑀦𑀲𑀼𑀢𑁆𑀢𑀁

𑁧𑁫. ‘‘𑀞𑀺𑀢𑁂 𑀫𑀚𑁆𑀛𑀦𑁆𑀳𑀺𑀓𑁂 [𑀫𑀚𑁆𑀛𑀦𑁆𑀢𑀺𑀓𑁂 (𑀲𑀩𑁆𑀩𑀢𑁆𑀣)] 𑀓𑀸𑀮𑁂, 𑀲𑀦𑁆𑀦𑀺𑀲𑀻𑀯𑁂𑀲𑀼 𑀧𑀓𑁆𑀔𑀺𑀲𑀼.

𑀲𑀡𑀢𑁂𑀯 𑀩𑁆𑀭𑀳𑀸𑀭𑀜𑁆𑀜𑀁 [𑀫𑀳𑀸𑀭𑀜𑁆𑀜𑀁 (𑀓. 𑀲𑀻. 𑀲𑁆𑀬𑀸. 𑀓𑀁. 𑀓.)], 𑀢𑀁 𑀪𑀬𑀁 𑀧𑀝𑀺𑀪𑀸𑀢𑀺 𑀫’’𑀦𑁆𑀢𑀺.

‘‘𑀞𑀺𑀢𑁂 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂, 𑀲𑀦𑁆𑀦𑀺𑀲𑀻𑀯𑁂𑀲𑀼 𑀧𑀓𑁆𑀔𑀺𑀲𑀼;

𑀲𑀡𑀢𑁂𑀯 𑀩𑁆𑀭𑀳𑀸𑀭𑀜𑁆𑀜𑀁, 𑀲𑀸 𑀭𑀢𑀺 𑀧𑀝𑀺𑀪𑀸𑀢𑀺 𑀫’’𑀦𑁆𑀢𑀺.

𑁬. 𑀦𑀺𑀤𑁆𑀤𑀸𑀢𑀦𑁆𑀤𑀻𑀲𑀼𑀢𑁆𑀢𑀁

𑁧𑁬. ‘‘𑀦𑀺𑀤𑁆𑀤𑀸 𑀢𑀦𑁆𑀤𑀻 𑀯𑀺𑀚𑀫𑁆𑀪𑀺𑀢𑀸 [𑀢𑀦𑁆𑀤𑀺 𑀯𑀺𑀚𑀫𑁆𑀪𑀺𑀓𑀸 (𑀲𑀻. 𑀧𑀻.)], 𑀅𑀭𑀢𑀻 𑀪𑀢𑁆𑀢𑀲𑀫𑁆𑀫𑀤𑁄.

𑀏𑀢𑁂𑀦 𑀦𑀧𑁆𑀧𑀓𑀸𑀲𑀢𑀺, 𑀅𑀭𑀺𑀬𑀫𑀕𑁆𑀕𑁄 𑀇𑀥 𑀧𑀸𑀡𑀺𑀦’’𑀦𑁆𑀢𑀺.

‘‘𑀦𑀺𑀤𑁆𑀤𑀁 𑀢𑀦𑁆𑀤𑀺𑀁 𑀯𑀺𑀚𑀫𑁆𑀪𑀺𑀢𑀁, 𑀅𑀭𑀢𑀺𑀁 𑀪𑀢𑁆𑀢𑀲𑀫𑁆𑀫𑀤𑀁;

𑀯𑀻𑀭𑀺𑀬𑁂𑀦 [𑀯𑀺𑀭𑀺𑀬𑁂𑀦 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀦𑀁 𑀧𑀡𑀸𑀫𑁂𑀢𑁆𑀯𑀸, 𑀅𑀭𑀺𑀬𑀫𑀕𑁆𑀕𑁄 𑀯𑀺𑀲𑀼𑀚𑁆𑀛𑀢𑀻’’𑀢𑀺.

𑁭. 𑀤𑀼𑀓𑁆𑀓𑀭𑀲𑀼𑀢𑁆𑀢𑀁

𑁧𑁭. ‘‘𑀤𑀼𑀓𑁆𑀓𑀭𑀁 𑀤𑀼𑀢𑁆𑀢𑀺𑀢𑀺𑀓𑁆𑀔𑀜𑁆𑀘, 𑀅𑀩𑁆𑀬𑀢𑁆𑀢𑁂𑀦 𑀘 𑀲𑀸𑀫𑀜𑁆𑀜𑀁.

𑀩𑀳𑀽𑀳𑀺 𑀢𑀢𑁆𑀣 𑀲𑀫𑁆𑀩𑀸𑀥𑀸, 𑀬𑀢𑁆𑀣 𑀩𑀸𑀮𑁄 𑀯𑀺𑀲𑀻𑀤𑀢𑀻’’𑀢𑀺.

‘‘𑀓𑀢𑀺𑀳𑀁 𑀘𑀭𑁂𑀬𑁆𑀬 𑀲𑀸𑀫𑀜𑁆𑀜𑀁, 𑀘𑀺𑀢𑁆𑀢𑀁 𑀘𑁂 𑀦 𑀦𑀺𑀯𑀸𑀭𑀬𑁂;

𑀧𑀤𑁂 𑀧𑀤𑁂 𑀯𑀺𑀲𑀻𑀤𑁂𑀬𑁆𑀬, 𑀲𑀗𑁆𑀓𑀧𑁆𑀧𑀸𑀦𑀁 𑀯𑀲𑀸𑀦𑀼𑀕𑁄’’𑀢𑀺.

‘‘𑀓𑀼𑀫𑁆𑀫𑁄𑀯 𑀅𑀗𑁆𑀕𑀸𑀦𑀺 𑀲𑀓𑁂 𑀓𑀧𑀸𑀮𑁂,

𑀲𑀫𑁄𑀤𑀳𑀁 𑀪𑀺𑀓𑁆𑀔𑀼 𑀫𑀦𑁄𑀯𑀺𑀢𑀓𑁆𑀓𑁂;

𑀅𑀦𑀺𑀲𑁆𑀲𑀺𑀢𑁄 𑀅𑀜𑁆𑀜𑀫𑀳𑁂𑀞𑀬𑀸𑀦𑁄,

𑀧𑀭𑀺𑀦𑀺𑀩𑁆𑀩𑀼𑀢𑁄 𑀦𑀽𑀧𑀯𑀤𑁂𑀬𑁆𑀬 𑀓𑀜𑁆𑀘𑀻’’𑀢𑀺.

𑁮. 𑀳𑀺𑀭𑀻𑀲𑀼𑀢𑁆𑀢𑀁

𑁧𑁮. ‘‘𑀳𑀺𑀭𑀻𑀦𑀺𑀲𑁂𑀥𑁄 𑀧𑀼𑀭𑀺𑀲𑁄, 𑀓𑁄𑀘𑀺 𑀮𑁄𑀓𑀲𑁆𑀫𑀺𑀁 𑀯𑀺𑀚𑁆𑀚𑀢𑀺.

𑀬𑁄 𑀦𑀺𑀦𑁆𑀤𑀁 𑀅𑀧𑀩𑁄𑀥𑀢𑀺 [𑀅𑀧𑀩𑁄𑀥𑁂𑀢𑀺 (𑀲𑁆𑀬𑀸. 𑀓𑀁. 𑀓.)], 𑀅𑀲𑁆𑀲𑁄 𑀪𑀤𑁆𑀭𑁄 𑀓𑀲𑀸𑀫𑀺𑀯𑀸’’𑀢𑀺.

‘‘𑀳𑀺𑀭𑀻𑀦𑀺𑀲𑁂𑀥𑀸 𑀢𑀦𑀼𑀬𑀸, 𑀬𑁂 𑀘𑀭𑀦𑁆𑀢𑀺 𑀲𑀤𑀸 𑀲𑀢𑀸;

𑀅𑀦𑁆𑀢𑀁 𑀤𑀼𑀓𑁆𑀔𑀲𑁆𑀲 𑀧𑀧𑁆𑀧𑀼𑀬𑁆𑀬, 𑀘𑀭𑀦𑁆𑀢𑀺 𑀯𑀺𑀲𑀫𑁂 𑀲𑀫’’𑀦𑁆𑀢𑀺.

𑁯. 𑀓𑀼𑀝𑀺𑀓𑀸𑀲𑀼𑀢𑁆𑀢𑀁

𑁧𑁯. ‘‘𑀓𑀘𑁆𑀘𑀺 𑀢𑁂 𑀓𑀼𑀝𑀺𑀓𑀸 𑀦𑀢𑁆𑀣𑀺, 𑀓𑀘𑁆𑀘𑀺 𑀦𑀢𑁆𑀣𑀺 𑀓𑀼𑀮𑀸𑀯𑀓𑀸;

𑀓𑀘𑁆𑀘𑀺 𑀲𑀦𑁆𑀢𑀸𑀦𑀓𑀸 𑀦𑀢𑁆𑀣𑀺, 𑀓𑀘𑁆𑀘𑀺 𑀫𑀼𑀢𑁆𑀢𑁄𑀲𑀺 𑀩𑀦𑁆𑀥𑀦𑀸’’𑀢𑀺.

‘‘𑀢𑀕𑁆𑀖 𑀫𑁂 𑀓𑀼𑀝𑀺𑀓𑀸 𑀦𑀢𑁆𑀣𑀺, 𑀢𑀕𑁆𑀖 𑀦𑀢𑁆𑀣𑀺 𑀓𑀼𑀮𑀸𑀯𑀓𑀸;

𑀢𑀕𑁆𑀖 𑀲𑀦𑁆𑀢𑀸𑀦𑀓𑀸 𑀦𑀢𑁆𑀣𑀺, 𑀢𑀕𑁆𑀖 𑀫𑀼𑀢𑁆𑀢𑁄𑀫𑁆𑀳𑀺 𑀩𑀦𑁆𑀥𑀦𑀸’’𑀢𑀺.

‘‘𑀓𑀺𑀦𑁆𑀢𑀸𑀳𑀁 𑀓𑀼𑀝𑀺𑀓𑀁 𑀩𑁆𑀭𑀽𑀫𑀺, 𑀓𑀺𑀁 𑀢𑁂 𑀩𑁆𑀭𑀽𑀫𑀺 𑀓𑀼𑀮𑀸𑀯𑀓𑀁;

𑀓𑀺𑀁 𑀢𑁂 𑀲𑀦𑁆𑀢𑀸𑀦𑀓𑀁 𑀩𑁆𑀭𑀽𑀫𑀺, 𑀓𑀺𑀦𑁆𑀢𑀸𑀳𑀁 𑀩𑁆𑀭𑀽𑀫𑀺 𑀩𑀦𑁆𑀥𑀦’’𑀦𑁆𑀢𑀺.

‘‘𑀫𑀸𑀢𑀭𑀁 𑀓𑀼𑀝𑀺𑀓𑀁 𑀩𑁆𑀭𑀽𑀲𑀺, 𑀪𑀭𑀺𑀬𑀁 𑀩𑁆𑀭𑀽𑀲𑀺 𑀓𑀼𑀮𑀸𑀯𑀓𑀁;

𑀧𑀼𑀢𑁆𑀢𑁂 𑀲𑀦𑁆𑀢𑀸𑀦𑀓𑁂 𑀩𑁆𑀭𑀽𑀲𑀺, 𑀢𑀡𑁆𑀳𑀁 𑀫𑁂 𑀩𑁆𑀭𑀽𑀲𑀺 𑀩𑀦𑁆𑀥𑀦’’𑀦𑁆𑀢𑀺.

‘‘𑀲𑀸𑀳𑀼 𑀢𑁂 𑀓𑀼𑀝𑀺𑀓𑀸 𑀦𑀢𑁆𑀣𑀺, 𑀲𑀸𑀳𑀼 𑀦𑀢𑁆𑀣𑀺 𑀓𑀼𑀮𑀸𑀯𑀓𑀸;

𑀲𑀸𑀳𑀼 𑀲𑀦𑁆𑀢𑀸𑀦𑀓𑀸 𑀦𑀢𑁆𑀣𑀺, 𑀲𑀸𑀳𑀼 𑀫𑀼𑀢𑁆𑀢𑁄𑀲𑀺 𑀩𑀦𑁆𑀥𑀦𑀸’’𑀢𑀺.

𑁧𑁦. 𑀲𑀫𑀺𑀤𑁆𑀥𑀺𑀲𑀼𑀢𑁆𑀢𑀁