𑁪. 𑀫𑀸𑀭𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀯𑀕𑁆𑀕𑁄

𑁧. 𑀢𑀧𑁄𑀓𑀫𑁆𑀫𑀲𑀼𑀢𑁆𑀢𑀁

𑁧𑁩𑁭. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀉𑀭𑀼𑀯𑁂𑀮𑀸𑀬𑀁 𑀯𑀺𑀳𑀭𑀢𑀺 𑀦𑀚𑁆𑀚𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄. 𑀅𑀣 𑀔𑁄 𑀪𑀕𑀯𑀢𑁄 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀫𑀼𑀢𑁆𑀢𑁄 𑀯𑀢𑀫𑁆𑀳𑀺 𑀢𑀸𑀬 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬. 𑀲𑀸𑀥𑀼 𑀫𑀼𑀢𑁆𑀢𑁄 𑀯𑀢𑀫𑁆𑀳𑀺 𑀢𑀸𑀬 𑀅𑀦𑀢𑁆𑀣𑀲𑀁𑀳𑀺𑀢𑀸𑀬 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬. 𑀲𑀸𑀥𑀼 𑀯𑀢𑀫𑁆𑀳𑀺 𑀫𑀼𑀢𑁆𑀢𑁄 𑀩𑁄𑀥𑀺𑀁 𑀲𑀫𑀚𑁆𑀛𑀕’’𑀦𑁆𑀢𑀺 [𑀲𑀸𑀥𑀼 𑀞𑀺𑀢𑁄 𑀲𑀢𑁄 𑀩𑁄𑀥𑀺𑀁 𑀲𑀫𑀚𑁆𑀛𑁂𑀕𑀦𑁆𑀢𑀺 (𑀲𑀻. 𑀧𑀻.), 𑀲𑀸𑀥𑀼 𑀯𑀢𑀫𑁆𑀳𑀺 𑀲𑀢𑁆𑀢𑁄 𑀩𑁄𑀥𑀺𑀲𑀫𑀚𑁆𑀛𑀕𑀽𑀢𑀺 (𑀲𑁆𑀬𑀸. 𑀓𑀁.)].

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀪𑀕𑀯𑀢𑁄 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀢𑀧𑁄𑀓𑀫𑁆𑀫𑀸 𑀅𑀧𑀓𑁆𑀓𑀫𑁆𑀫, 𑀬𑁂𑀦 𑀦 𑀲𑀼𑀚𑁆𑀛𑀦𑁆𑀢𑀺 𑀫𑀸𑀡𑀯𑀸;

𑀅𑀲𑀼𑀤𑁆𑀥𑁄 𑀫𑀜𑁆𑀜𑀲𑀺 𑀲𑀼𑀤𑁆𑀥𑁄, 𑀲𑀼𑀤𑁆𑀥𑀺𑀫𑀕𑁆𑀕𑀸 𑀅𑀧𑀭𑀤𑁆𑀥𑁄’’ [𑀲𑀼𑀤𑁆𑀥𑀺𑀫𑀕𑁆𑀕𑀫𑀧𑀭𑀤𑁆𑀥𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀢𑀺.

𑀅𑀣 𑀔𑁄 𑀪𑀕𑀯𑀸 ‘‘𑀫𑀸𑀭𑁄 𑀅𑀬𑀁 𑀧𑀸𑀧𑀺𑀫𑀸’’ 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

‘‘𑀅𑀦𑀢𑁆𑀣𑀲𑀁𑀳𑀺𑀢𑀁 𑀜𑀢𑁆𑀯𑀸, 𑀬𑀁 𑀓𑀺𑀜𑁆𑀘𑀺 𑀅𑀫𑀭𑀁 𑀢𑀧𑀁 [𑀅𑀧𑀭𑀁 𑀢𑀧𑀁 (𑀓.)];

𑀲𑀩𑁆𑀩𑀁 𑀦𑀢𑁆𑀣𑀸𑀯𑀳𑀁 𑀳𑁄𑀢𑀺, 𑀨𑀺𑀬𑀸𑀭𑀺𑀢𑁆𑀢𑀁𑀯 𑀥𑀫𑁆𑀫𑀦𑀺 [𑀯𑀫𑁆𑀫𑀦𑀺 (𑀲𑀻.), 𑀥𑀫𑁆𑀫𑀦𑀺𑀁 (𑀧𑀻.), 𑀚𑀫𑁆𑀫𑀦𑀺𑀁 (𑀓.) 𑀏𑀢𑁆𑀣𑀸𑀬𑀁 𑀥𑀫𑁆𑀫𑀲𑀤𑁆𑀤𑁄 𑀲𑀓𑁆𑀓𑀢𑁂 𑀥𑀦𑁆𑀯𑀦𑀁-𑀲𑀤𑁆𑀤𑁂𑀦 𑀲𑀤𑀺𑀲𑁄 𑀫𑀭𑀼𑀯𑀸𑀘𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀬𑀣𑀸 𑀤𑀴𑁆𑀳𑀥𑀫𑁆𑀫𑀸𑀢𑀺𑀧𑀤𑀁].

‘‘𑀲𑀻𑀮𑀁 𑀲𑀫𑀸𑀥𑀺 𑀧𑀜𑁆𑀜𑀜𑁆𑀘, 𑀫𑀕𑁆𑀕𑀁 𑀩𑁄𑀥𑀸𑀬 𑀪𑀸𑀯𑀬𑀁;

𑀧𑀢𑁆𑀢𑁄𑀲𑁆𑀫𑀺 𑀧𑀭𑀫𑀁 𑀲𑀼𑀤𑁆𑀥𑀺𑀁, 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓𑀸’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀪𑀕𑀯𑀸, 𑀚𑀸𑀦𑀸𑀢𑀺 𑀫𑀁 𑀲𑀼𑀕𑀢𑁄’’𑀢𑀺, 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁨. 𑀳𑀢𑁆𑀣𑀺𑀭𑀸𑀚𑀯𑀡𑁆𑀡𑀲𑀼𑀢𑁆𑀢𑀁

𑁧𑁩𑁮. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀉𑀭𑀼𑀯𑁂𑀮𑀸𑀬𑀁 𑀯𑀺𑀳𑀭𑀢𑀺 𑀦𑀚𑁆𑀚𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀭𑀢𑁆𑀢𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀬𑀁 𑀅𑀩𑁆𑀪𑁄𑀓𑀸𑀲𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀤𑁂𑀯𑁄 𑀘 𑀏𑀓𑀫𑁂𑀓𑀁 𑀨𑀼𑀲𑀸𑀬𑀢𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀪𑀕𑀯𑀢𑁄 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄 𑀫𑀳𑀦𑁆𑀢𑀁 𑀳𑀢𑁆𑀣𑀺𑀭𑀸𑀚𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀫𑀳𑀸𑀅𑀭𑀺𑀝𑁆𑀞𑀓𑁄 𑀫𑀡𑀺, 𑀏𑀯𑀫𑀲𑁆𑀲 𑀲𑀻𑀲𑀁 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀼𑀤𑁆𑀥𑀁 𑀭𑀽𑀧𑀺𑀬𑀁, 𑀏𑀯𑀫𑀲𑁆𑀲 𑀤𑀦𑁆𑀢𑀸 𑀳𑁄𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀫𑀳𑀢𑀻 𑀦𑀗𑁆𑀕𑀮𑀻𑀲𑀸 [𑀦𑀗𑁆𑀕𑀮𑀲𑀻𑀲𑀸 (𑀧𑀻. 𑀓.)], 𑀏𑀯𑀫𑀲𑁆𑀲 𑀲𑁄𑀡𑁆𑀟𑁄 𑀳𑁄𑀢𑀺. 𑀅𑀣 𑀔𑁄 𑀪𑀕𑀯𑀸 ‘‘𑀫𑀸𑀭𑁄 𑀅𑀬𑀁 𑀧𑀸𑀧𑀺𑀫𑀸’’ 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀲𑀁𑀲𑀭𑀁 𑀤𑀻𑀖𑀫𑀤𑁆𑀥𑀸𑀦𑀁, 𑀯𑀡𑁆𑀡𑀁 𑀓𑀢𑁆𑀯𑀸 𑀲𑀼𑀪𑀸𑀲𑀼𑀪𑀁;

𑀅𑀮𑀁 𑀢𑁂 𑀢𑁂𑀦 𑀧𑀸𑀧𑀺𑀫, 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓𑀸’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀪𑀕𑀯𑀸, 𑀚𑀸𑀦𑀸𑀢𑀺 𑀫𑀁 𑀲𑀼𑀕𑀢𑁄’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁩. 𑀲𑀼𑀪𑀲𑀼𑀢𑁆𑀢𑀁

𑁧𑁩𑁯. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀉𑀭𑀼𑀯𑁂𑀮𑀸𑀬𑀁 𑀯𑀺𑀳𑀭𑀢𑀺 𑀦𑀚𑁆𑀚𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀭𑀢𑁆𑀢𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀬𑀁 𑀅𑀩𑁆𑀪𑁄𑀓𑀸𑀲𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀤𑁂𑀯𑁄 𑀘 𑀏𑀓𑀫𑁂𑀓𑀁 𑀨𑀼𑀲𑀸𑀬𑀢𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸, 𑀪𑀕𑀯𑀢𑁄 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄, 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀉𑀘𑁆𑀘𑀸𑀯𑀘𑀸 𑀯𑀡𑁆𑀡𑀦𑀺𑀪𑀸 𑀉𑀧𑀤𑀁𑀲𑁂𑀢𑀺, 𑀲𑀼𑀪𑀸 𑀘𑁂𑀯 𑀅𑀲𑀼𑀪𑀸 𑀘. 𑀅𑀣 𑀔𑁄 𑀪𑀕𑀯𑀸 ‘‘𑀫𑀸𑀭𑁄 𑀅𑀬𑀁 𑀧𑀸𑀧𑀺𑀫𑀸’’ 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

‘‘𑀲𑀁𑀲𑀭𑀁 𑀤𑀻𑀖𑀫𑀤𑁆𑀥𑀸𑀦𑀁, 𑀯𑀡𑁆𑀡𑀁 𑀓𑀢𑁆𑀯𑀸 𑀲𑀼𑀪𑀸𑀲𑀼𑀪𑀁;

𑀅𑀮𑀁 𑀢𑁂 𑀢𑁂𑀦 𑀧𑀸𑀧𑀺𑀫, 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓.

‘‘𑀬𑁂 𑀘 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀘 𑀲𑀼𑀲𑀁𑀯𑀼𑀢𑀸;

𑀦 𑀢𑁂 𑀫𑀸𑀭𑀯𑀲𑀸𑀦𑀼𑀕𑀸, 𑀦 𑀢𑁂 𑀫𑀸𑀭𑀲𑁆𑀲 𑀩𑀤𑁆𑀥𑀕𑀽’’ [𑀩𑀤𑁆𑀥𑀪𑀽 (𑀓.), 𑀧𑀘𑁆𑀘𑀕𑀽 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀢𑀺.

𑀅𑀣 𑀔𑁄 𑀫𑀸𑀭𑁄…𑀧𑁂… 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁪. 𑀧𑀞𑀫𑀫𑀸𑀭𑀧𑀸𑀲𑀲𑀼𑀢𑁆𑀢𑀁

𑁧𑁪𑁦. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀢𑀺 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀫𑀬𑁆𑀳𑀁 𑀔𑁄, 𑀪𑀺𑀓𑁆𑀔𑀯𑁂, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀬𑁄𑀦𑀺𑀲𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀅𑀦𑀼𑀢𑁆𑀢𑀭𑀸 𑀯𑀺𑀫𑀼𑀢𑁆𑀢𑀺 𑀅𑀦𑀼𑀧𑁆𑀧𑀢𑁆𑀢𑀸, 𑀅𑀦𑀼𑀢𑁆𑀢𑀭𑀸 𑀯𑀺𑀫𑀼𑀢𑁆𑀢𑀺 𑀲𑀘𑁆𑀙𑀺𑀓𑀢𑀸. 𑀢𑀼𑀫𑁆𑀳𑁂𑀧𑀺, 𑀪𑀺𑀓𑁆𑀔𑀯𑁂, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀬𑁄𑀦𑀺𑀲𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀅𑀦𑀼𑀢𑁆𑀢𑀭𑀁 𑀯𑀺𑀫𑀼𑀢𑁆𑀢𑀺𑀁 𑀅𑀦𑀼𑀧𑀸𑀧𑀼𑀡𑀸𑀣, 𑀅𑀦𑀼𑀢𑁆𑀢𑀭𑀁 𑀯𑀺𑀫𑀼𑀢𑁆𑀢𑀺𑀁 𑀲𑀘𑁆𑀙𑀺𑀓𑀭𑁄𑀣𑀸’’𑀢𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀩𑀤𑁆𑀥𑁄𑀲𑀺 𑀫𑀸𑀭𑀧𑀸𑀲𑁂𑀦, 𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸;

𑀫𑀸𑀭𑀩𑀦𑁆𑀥𑀦𑀩𑀤𑁆𑀥𑁄𑀲𑀺, 𑀦 𑀫𑁂 𑀲𑀫𑀡 𑀫𑁄𑀓𑁆𑀔𑀲𑀻’’𑀢𑀺.

‘‘𑀫𑀼𑀢𑁆𑀢𑀸𑀳𑀁 [𑀫𑀼𑀢𑁆𑀢𑁄𑀳𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀫𑀸𑀭𑀧𑀸𑀲𑁂𑀦, 𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸;

𑀫𑀸𑀭𑀩𑀦𑁆𑀥𑀦𑀫𑀼𑀢𑁆𑀢𑁄𑀫𑁆𑀳𑀺, 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓𑀸’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸…𑀧𑁂… 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁫. 𑀤𑀼𑀢𑀺𑀬𑀫𑀸𑀭𑀧𑀸𑀲𑀲𑀼𑀢𑁆𑀢𑀁

𑁧𑁪𑁧. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀢𑀺 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀫𑀼𑀢𑁆𑀢𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀧𑀸𑀲𑁂𑀳𑀺 𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸. 𑀢𑀼𑀫𑁆𑀳𑁂𑀧𑀺, 𑀪𑀺𑀓𑁆𑀔𑀯𑁂, 𑀫𑀼𑀢𑁆𑀢𑀸 𑀲𑀩𑁆𑀩𑀧𑀸𑀲𑁂𑀳𑀺 𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸. 𑀘𑀭𑀣, 𑀪𑀺𑀓𑁆𑀔𑀯𑁂, 𑀘𑀸𑀭𑀺𑀓𑀁 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀫𑀸 𑀏𑀓𑁂𑀦 𑀤𑁆𑀯𑁂 𑀅𑀕𑀫𑀺𑀢𑁆𑀣. 𑀤𑁂𑀲𑁂𑀣, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀣. 𑀲𑀦𑁆𑀢𑀺 𑀲𑀢𑁆𑀢𑀸 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸, 𑀅𑀲𑁆𑀲𑀯𑀦𑀢𑀸 𑀥𑀫𑁆𑀫𑀲𑁆𑀲 𑀧𑀭𑀺𑀳𑀸𑀬𑀦𑁆𑀢𑀺. 𑀪𑀯𑀺𑀲𑁆𑀲𑀦𑁆𑀢𑀺 𑀥𑀫𑁆𑀫𑀲𑁆𑀲 𑀅𑀜𑁆𑀜𑀸𑀢𑀸𑀭𑁄. 𑀅𑀳𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀬𑁂𑀦 𑀉𑀭𑀼𑀯𑁂𑀮𑀸 𑀲𑁂𑀦𑀸𑀦𑀺𑀕𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀺 𑀥𑀫𑁆𑀫𑀤𑁂𑀲𑀦𑀸𑀬𑀸’’𑀢𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀩𑀤𑁆𑀥𑁄𑀲𑀺 𑀲𑀩𑁆𑀩𑀧𑀸𑀲𑁂𑀳𑀺, 𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸;

𑀫𑀳𑀸𑀩𑀦𑁆𑀥𑀦𑀩𑀤𑁆𑀥𑁄𑀲𑀺, 𑀦 𑀫𑁂 𑀲𑀫𑀡 𑀫𑁄𑀓𑁆𑀔𑀲𑀻’’𑀢𑀺.

‘‘𑀫𑀼𑀢𑁆𑀢𑀸𑀳𑀁 𑀲𑀩𑁆𑀩𑀧𑀸𑀲𑁂𑀳𑀺, 𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸;

𑀫𑀳𑀸𑀩𑀦𑁆𑀥𑀦𑀫𑀼𑀢𑁆𑀢𑁄𑀫𑁆𑀳𑀺, 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓𑀸’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸…𑀧𑁂… 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁬. 𑀲𑀧𑁆𑀧𑀲𑀼𑀢𑁆𑀢𑀁

𑁧𑁪𑁨. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀭𑀢𑁆𑀢𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀬𑀁 𑀅𑀩𑁆𑀪𑁄𑀓𑀸𑀲𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀤𑁂𑀯𑁄 𑀘 𑀏𑀓𑀫𑁂𑀓𑀁 𑀨𑀼𑀲𑀸𑀬𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀪𑀕𑀯𑀢𑁄 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄 𑀫𑀳𑀦𑁆𑀢𑀁 𑀲𑀧𑁆𑀧𑀭𑀸𑀚𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀫𑀳𑀢𑀻 𑀏𑀓𑀭𑀼𑀓𑁆𑀔𑀺𑀓𑀸 𑀦𑀸𑀯𑀸, 𑀏𑀯𑀫𑀲𑁆𑀲 𑀓𑀸𑀬𑁄 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀫𑀳𑀦𑁆𑀢𑀁 𑀲𑁄𑀡𑁆𑀟𑀺𑀓𑀸𑀓𑀺𑀴𑀜𑁆𑀚𑀁, 𑀏𑀯𑀫𑀲𑁆𑀲 𑀨𑀡𑁄 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀫𑀳𑀢𑀻 𑀓𑁄𑀲𑀮𑀺𑀓𑀸 𑀓𑀁𑀲𑀧𑀸𑀢𑀺, 𑀏𑀯𑀫𑀲𑁆𑀲 𑀅𑀓𑁆𑀔𑀻𑀦𑀺 𑀪𑀯𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀤𑁂𑀯𑁂 𑀕𑀴𑀕𑀴𑀸𑀬𑀦𑁆𑀢𑁂 𑀯𑀺𑀚𑁆𑀚𑀼𑀮𑁆𑀮𑀢𑀸 𑀦𑀺𑀘𑁆𑀙𑀭𑀦𑁆𑀢𑀺, 𑀏𑀯𑀫𑀲𑁆𑀲 𑀫𑀼𑀔𑀢𑁄 𑀚𑀺𑀯𑁆𑀳𑀸 𑀦𑀺𑀘𑁆𑀙𑀭𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀓𑀫𑁆𑀫𑀸𑀭𑀕𑀕𑁆𑀕𑀭𑀺𑀬𑀸 𑀥𑀫𑀫𑀸𑀦𑀸𑀬 𑀲𑀤𑁆𑀤𑁄 𑀳𑁄𑀢𑀺, 𑀏𑀯𑀫𑀲𑁆𑀲 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀲𑀤𑁆𑀤𑁄 𑀳𑁄𑀢𑀺.

𑀅𑀣 𑀔𑁄 𑀪𑀕𑀯𑀸 ‘‘𑀫𑀸𑀭𑁄 𑀅𑀬𑀁 𑀧𑀸𑀧𑀺𑀫𑀸’’ 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

‘‘𑀬𑁄 𑀲𑀼𑀜𑁆𑀜𑀕𑁂𑀳𑀸𑀦𑀺 𑀲𑁂𑀯𑀢𑀺,

𑀲𑁂𑀬𑁆𑀬𑁄 𑀲𑁄 𑀫𑀼𑀦𑀺 𑀅𑀢𑁆𑀢𑀲𑀜𑁆𑀜𑀢𑁄;

𑀯𑁄𑀲𑁆𑀲𑀚𑁆𑀚 𑀘𑀭𑁂𑀬𑁆𑀬 𑀢𑀢𑁆𑀣 𑀲𑁄,

𑀧𑀢𑀺𑀭𑀽𑀧𑀜𑁆𑀳𑀺 𑀢𑀣𑀸𑀯𑀺𑀥𑀲𑁆𑀲 𑀢𑀁.

‘‘𑀘𑀭𑀓𑀸 𑀩𑀳𑀽 𑀪𑁂𑀭𑀯𑀸 𑀩𑀳𑀽,

𑀅𑀣𑁄 𑀟𑀁𑀲𑀲𑀭𑀻𑀲𑀧𑀸 [𑀟𑀁𑀲 𑀲𑀺𑀭𑀺𑀁𑀲𑀧𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀩𑀳𑀽;

𑀮𑁄𑀫𑀫𑁆𑀧𑀺 𑀦 𑀢𑀢𑁆𑀣 𑀇𑀜𑁆𑀚𑀬𑁂,

𑀲𑀼𑀜𑁆𑀜𑀸𑀕𑀸𑀭𑀕𑀢𑁄 𑀫𑀳𑀸𑀫𑀼𑀦𑀺.

‘‘𑀦𑀪𑀁 𑀨𑀮𑁂𑀬𑁆𑀬 𑀧𑀣𑀯𑀻 𑀘𑀮𑁂𑀬𑁆𑀬,

𑀲𑀩𑁆𑀩𑁂𑀧𑀺 𑀧𑀸𑀡𑀸 𑀉𑀤 𑀲𑀦𑁆𑀢𑀲𑁂𑀬𑁆𑀬𑀼𑀁;

𑀲𑀮𑁆𑀮𑀫𑁆𑀧𑀺 𑀘𑁂 𑀉𑀭𑀲𑀺 𑀧𑀓𑀧𑁆𑀧𑀬𑁂𑀬𑁆𑀬𑀼𑀁,

𑀉𑀧𑀥𑀻𑀲𑀼 𑀢𑀸𑀡𑀁 𑀦 𑀓𑀭𑁄𑀦𑁆𑀢𑀺 𑀩𑀼𑀤𑁆𑀥𑀸’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀪𑀕𑀯𑀸, 𑀚𑀸𑀦𑀸𑀢𑀺 𑀫𑀁 𑀲𑀼𑀕𑀢𑁄’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁭. 𑀲𑀼𑀧𑀢𑀺𑀲𑀼𑀢𑁆𑀢𑀁

𑁧𑁪𑁩. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀅𑀣 𑀔𑁄 𑀪𑀕𑀯𑀸 𑀩𑀳𑀼𑀤𑁂𑀯𑀭𑀢𑁆𑀢𑀺𑀁 𑀅𑀩𑁆𑀪𑁄𑀓𑀸𑀲𑁂 𑀘𑀗𑁆𑀓𑀫𑀺𑀢𑁆𑀯𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺 𑀧𑀸𑀤𑁂 𑀧𑀸𑀤𑀁 𑀅𑀘𑁆𑀘𑀸𑀥𑀸𑀬 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀉𑀝𑁆𑀞𑀸𑀦𑀲𑀜𑁆𑀜𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀓𑀺𑀁 𑀲𑁄𑀧𑁆𑀧𑀲𑀺 𑀓𑀺𑀁 𑀦𑀼 𑀲𑁄𑀧𑁆𑀧𑀲𑀺,

𑀓𑀺𑀫𑀺𑀤𑀁 𑀲𑁄𑀧𑁆𑀧𑀲𑀺 𑀤𑀼𑀩𑁆𑀪𑀕𑁄 [𑀤𑀼𑀩𑁆𑀪𑀢𑁄 (𑀲𑁆𑀬𑀸. 𑀓𑀁.), 𑀤𑀼𑀩𑁆𑀪𑀬𑁄 (𑀧𑀻.)] 𑀯𑀺𑀬;

𑀲𑀼𑀜𑁆𑀜𑀫𑀕𑀸𑀭𑀦𑁆𑀢𑀺 𑀲𑁄𑀧𑁆𑀧𑀲𑀺,

𑀓𑀺𑀫𑀺𑀤𑀁 𑀲𑁄𑀧𑁆𑀧𑀲𑀺 𑀲𑀽𑀭𑀺𑀬𑁂 𑀉𑀕𑁆𑀕𑀢𑁂’’𑀢𑀺.

‘‘𑀬𑀲𑁆𑀲 𑀚𑀸𑀮𑀺𑀦𑀻 𑀯𑀺𑀲𑀢𑁆𑀢𑀺𑀓𑀸,

𑀢𑀡𑁆𑀳𑀸 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀦𑁂𑀢𑀯𑁂;

𑀲𑀩𑁆𑀩𑀽𑀧𑀥𑀺𑀧𑀭𑀺𑀓𑁆𑀔𑀬𑀸 𑀩𑀼𑀤𑁆𑀥𑁄,

𑀲𑁄𑀧𑁆𑀧𑀢𑀺 𑀓𑀺𑀁 𑀢𑀯𑁂𑀢𑁆𑀣 𑀫𑀸𑀭𑀸’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸…𑀧𑁂… 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁮. 𑀦𑀦𑁆𑀤𑀢𑀺𑀲𑀼𑀢𑁆𑀢𑀁

𑁧𑁪𑁪. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀦𑀦𑁆𑀤𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸, 𑀕𑁄𑀫𑀸 𑀕𑁄𑀪𑀺 𑀢𑀣𑁂𑀯 𑀦𑀦𑁆𑀤𑀢𑀺;

𑀉𑀧𑀥𑀻𑀳𑀺 𑀦𑀭𑀲𑁆𑀲 𑀦𑀦𑁆𑀤𑀦𑀸, 𑀦 𑀳𑀺 𑀲𑁄 𑀦𑀦𑁆𑀤𑀢𑀺 𑀬𑁄 𑀦𑀺𑀭𑀽𑀧𑀥𑀻’’𑀢𑀺.

‘‘𑀲𑁄𑀘𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸, 𑀕𑁄𑀫𑀸 𑀕𑁄𑀪𑀺 𑀢𑀣𑁂𑀯 𑀲𑁄𑀘𑀢𑀺;

𑀉𑀧𑀥𑀻𑀳𑀺 𑀦𑀭𑀲𑁆𑀲 𑀲𑁄𑀘𑀦𑀸, 𑀦 𑀳𑀺 𑀲𑁄 𑀲𑁄𑀘𑀢𑀺 𑀬𑁄 𑀦𑀺𑀭𑀽𑀧𑀥𑀻’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀪𑀕𑀯𑀸, 𑀚𑀸𑀦𑀸𑀢𑀺 𑀫𑀁 𑀲𑀼𑀕𑀢𑁄’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁯. 𑀧𑀞𑀫𑀆𑀬𑀼𑀲𑀼𑀢𑁆𑀢𑀁

𑁧𑁪𑁫. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀅𑀧𑁆𑀧𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀸𑀦𑀁 𑀆𑀬𑀼. 𑀕𑀫𑀦𑀻𑀬𑁄 𑀲𑀫𑁆𑀧𑀭𑀸𑀬𑁄, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁, 𑀘𑀭𑀺𑀢𑀩𑁆𑀩𑀁 𑀩𑁆𑀭𑀳𑁆𑀫𑀘𑀭𑀺𑀬𑀁. 𑀦𑀢𑁆𑀣𑀺 𑀚𑀸𑀢𑀲𑁆𑀲 𑀅𑀫𑀭𑀡𑀁. 𑀬𑁄, 𑀪𑀺𑀓𑁆𑀔𑀯𑁂, 𑀘𑀺𑀭𑀁 𑀚𑀻𑀯𑀢𑀺, 𑀲𑁄 𑀯𑀲𑁆𑀲𑀲𑀢𑀁 𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀤𑀻𑀖𑀫𑀸𑀬𑀼 𑀫𑀦𑀼𑀲𑁆𑀲𑀸𑀦𑀁, 𑀦 𑀦𑀁 𑀳𑀻𑀴𑁂 𑀲𑀼𑀧𑁄𑀭𑀺𑀲𑁄;

𑀘𑀭𑁂𑀬𑁆𑀬 𑀔𑀻𑀭𑀫𑀢𑁆𑀢𑁄𑀯, 𑀦𑀢𑁆𑀣𑀺 𑀫𑀘𑁆𑀘𑀼𑀲𑁆𑀲 𑀆𑀕𑀫𑁄’’𑀢𑀺.

‘‘𑀅𑀧𑁆𑀧𑀫𑀸𑀬𑀼 𑀫𑀦𑀼𑀲𑁆𑀲𑀸𑀦𑀁, 𑀳𑀻𑀴𑁂𑀬𑁆𑀬 𑀦𑀁 𑀲𑀼𑀧𑁄𑀭𑀺𑀲𑁄;

𑀘𑀭𑁂𑀬𑁆𑀬𑀸𑀤𑀺𑀢𑁆𑀢𑀲𑀻𑀲𑁄𑀯, 𑀦𑀢𑁆𑀣𑀺 𑀫𑀘𑁆𑀘𑀼𑀲𑁆𑀲 𑀦𑀸𑀕𑀫𑁄’’𑀢𑀺.

𑀅𑀣 𑀔𑁄 𑀫𑀸𑀭𑁄…𑀧𑁂… 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁧𑁦. 𑀤𑀼𑀢𑀺𑀬𑀆𑀬𑀼𑀲𑀼𑀢𑁆𑀢𑀁

𑁧𑁪𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑀢𑁆𑀭 𑀔𑁄 𑀪𑀕𑀯𑀸…𑀧𑁂… 𑀏𑀢𑀤𑀯𑁄𑀘 𑁋

‘‘𑀅𑀧𑁆𑀧𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀸𑀦𑀁 𑀆𑀬𑀼. 𑀕𑀫𑀦𑀻𑀬𑁄 𑀲𑀫𑁆𑀧𑀭𑀸𑀬𑁄, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁, 𑀘𑀭𑀺𑀢𑀩𑁆𑀩𑀁 𑀩𑁆𑀭𑀳𑁆𑀫𑀘𑀭𑀺𑀬𑀁. 𑀦𑀢𑁆𑀣𑀺 𑀚𑀸𑀢𑀲𑁆𑀲 𑀅𑀫𑀭𑀡𑀁. 𑀬𑁄, 𑀪𑀺𑀓𑁆𑀔𑀯𑁂, 𑀘𑀺𑀭𑀁 𑀚𑀻𑀯𑀢𑀺, 𑀲𑁄 𑀯𑀲𑁆𑀲𑀲𑀢𑀁 𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀦𑀸𑀘𑁆𑀘𑀬𑀦𑁆𑀢𑀺 𑀅𑀳𑁄𑀭𑀢𑁆𑀢𑀸, 𑀚𑀻𑀯𑀺𑀢𑀁 𑀦𑀽𑀧𑀭𑀼𑀚𑁆𑀛𑀢𑀺;

𑀆𑀬𑀼 𑀅𑀦𑀼𑀧𑀭𑀺𑀬𑀸𑀬𑀢𑀺, 𑀫𑀘𑁆𑀘𑀸𑀦𑀁 𑀦𑁂𑀫𑀻𑀯 𑀭𑀣𑀓𑀼𑀩𑁆𑀩𑀭’’𑀦𑁆𑀢𑀺.

‘‘𑀅𑀘𑁆𑀘𑀬𑀦𑁆𑀢𑀺 𑀅𑀳𑁄𑀭𑀢𑁆𑀢𑀸, 𑀚𑀻𑀯𑀺𑀢𑀁 𑀉𑀧𑀭𑀼𑀚𑁆𑀛𑀢𑀺;

𑀆𑀬𑀼 𑀔𑀻𑀬𑀢𑀺 𑀫𑀘𑁆𑀘𑀸𑀦𑀁, 𑀓𑀼𑀦𑁆𑀦𑀤𑀻𑀦𑀁𑀯 𑀑𑀤𑀓’’𑀦𑁆𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀪𑀕𑀯𑀸, 𑀚𑀸𑀦𑀸𑀢𑀺 𑀫𑀁 𑀲𑀼𑀕𑀢𑁄’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑀧𑀞𑀫𑁄 𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀢𑀧𑁄𑀓𑀫𑁆𑀫𑀜𑁆𑀘 𑀦𑀸𑀕𑁄 𑀘, 𑀲𑀼𑀪𑀁 𑀧𑀸𑀲𑁂𑀦 𑀢𑁂 𑀤𑀼𑀯𑁂;

𑀲𑀧𑁆𑀧𑁄 𑀲𑀼𑀧𑀢𑀺 𑀦𑀦𑁆𑀤𑀦𑀁, 𑀆𑀬𑀼𑀦𑀸 𑀅𑀧𑀭𑁂 𑀤𑀼𑀯𑁂𑀢𑀺.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀧𑀸𑀲𑀸𑀡𑀲𑀼𑀢𑁆𑀢𑀁

𑁧𑁪𑁭. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀭𑀢𑁆𑀢𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀬𑀁 𑀅𑀩𑁆𑀪𑁄𑀓𑀸𑀲𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀤𑁂𑀯𑁄 𑀘 𑀏𑀓𑀫𑁂𑀓𑀁 𑀨𑀼𑀲𑀸𑀬𑀢𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀪𑀕𑀯𑀢𑁄 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀫𑀳𑀦𑁆𑀢𑁂 𑀧𑀸𑀲𑀸𑀡𑁂 𑀧𑀤𑀸𑀮𑁂𑀲𑀺.

𑀅𑀣 𑀔𑁄 𑀪𑀕𑀯𑀸 ‘‘𑀫𑀸𑀭𑁄 𑀅𑀬𑀁 𑀧𑀸𑀧𑀺𑀫𑀸’’ 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀲𑀘𑁂𑀧𑀺 𑀓𑁂𑀯𑀮𑀁 𑀲𑀩𑁆𑀩𑀁, 𑀕𑀺𑀚𑁆𑀛𑀓𑀽𑀝𑀁 𑀘𑀮𑁂𑀲𑁆𑀲𑀲𑀺 [𑀕𑀴𑁂𑀬𑁆𑀬𑀲𑀺 (𑀲𑁆𑀬𑀸. 𑀓𑀁.), 𑀘𑀮𑁂𑀬𑁆𑀬𑀸𑀲𑀺 (𑀓.)];

𑀦𑁂𑀯 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀸𑀦𑀁, 𑀩𑀼𑀤𑁆𑀥𑀸𑀦𑀁 𑀅𑀢𑁆𑀣𑀺 𑀇𑀜𑁆𑀚𑀺𑀢’’𑀦𑁆𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀪𑀕𑀯𑀸, 𑀚𑀸𑀦𑀸𑀢𑀺 𑀫𑀁 𑀲𑀼𑀕𑀢𑁄’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁨. 𑀓𑀺𑀦𑁆𑀦𑀼𑀲𑀻𑀳𑀲𑀼𑀢𑁆𑀢𑀁

𑁧𑁪𑁮. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺.

𑀅𑀣 𑀔𑁄 𑀫𑀸𑀭𑀲𑁆𑀲 𑀧𑀸𑀧𑀺𑀫𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀲𑀫𑀡𑁄 𑀕𑁄𑀢𑀫𑁄 𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀬𑀁𑀦𑀽𑀦𑀸𑀳𑀁 𑀬𑁂𑀦 𑀲𑀫𑀡𑁄 𑀕𑁄𑀢𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀁 𑀯𑀺𑀘𑀓𑁆𑀔𑀼𑀓𑀫𑁆𑀫𑀸𑀬𑀸’’𑀢𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀓𑀺𑀦𑁆𑀦𑀼 𑀲𑀻𑀳𑁄𑀯 𑀦𑀤𑀲𑀺, 𑀧𑀭𑀺𑀲𑀸𑀬𑀁 𑀯𑀺𑀲𑀸𑀭𑀤𑁄;

𑀧𑀝𑀺𑀫𑀮𑁆𑀮𑁄 𑀳𑀺 𑀢𑁂 𑀅𑀢𑁆𑀣𑀺, 𑀯𑀺𑀚𑀺𑀢𑀸𑀯𑀻 𑀦𑀼 𑀫𑀜𑁆𑀜𑀲𑀻’’𑀢𑀺.

‘‘𑀦𑀤𑀦𑁆𑀢𑀺 𑀯𑁂 𑀫𑀳𑀸𑀯𑀻𑀭𑀸, 𑀧𑀭𑀺𑀲𑀸𑀲𑀼 𑀯𑀺𑀲𑀸𑀭𑀤𑀸;

𑀢𑀣𑀸𑀕𑀢𑀸 𑀩𑀮𑀧𑁆𑀧𑀢𑁆𑀢𑀸, 𑀢𑀺𑀡𑁆𑀡𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓’’𑀦𑁆𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀪𑀕𑀯𑀸, 𑀚𑀸𑀦𑀸𑀢𑀺 𑀫𑀁 𑀲𑀼𑀕𑀢𑁄’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁩. 𑀲𑀓𑀮𑀺𑀓𑀲𑀼𑀢𑁆𑀢𑀁

𑁧𑁪𑁯. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀫𑀤𑁆𑀤𑀓𑀼𑀘𑁆𑀙𑀺𑀲𑁆𑀫𑀺𑀁 𑀫𑀺𑀕𑀤𑀸𑀬𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀢𑁄 𑀧𑀸𑀤𑁄 𑀲𑀓𑀮𑀺𑀓𑀸𑀬 𑀔𑀢𑁄 𑀳𑁄𑀢𑀺, 𑀪𑀼𑀲𑀸 𑀲𑀼𑀤𑀁 𑀪𑀕𑀯𑀢𑁄 𑀯𑁂𑀤𑀦𑀸 𑀯𑀢𑁆𑀢𑀦𑁆𑀢𑀺 𑀲𑀸𑀭𑀻𑀭𑀺𑀓𑀸 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀅𑀲𑀸𑀢𑀸 𑀅𑀫𑀦𑀸𑀧𑀸. 𑀢𑀸 𑀲𑀼𑀤𑀁 𑀪𑀕𑀯𑀸 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀅𑀥𑀺𑀯𑀸𑀲𑁂𑀢𑀺 𑀅𑀯𑀺𑀳𑀜𑁆𑀜𑀫𑀸𑀦𑁄. 𑀅𑀣 𑀔𑁄 𑀪𑀕𑀯𑀸 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺 𑀧𑀸𑀤𑁂 𑀧𑀸𑀤𑀁 𑀅𑀘𑁆𑀘𑀸𑀥𑀸𑀬 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀫𑀦𑁆𑀤𑀺𑀬𑀸 𑀦𑀼 𑀔𑁄 𑀲𑁂𑀲𑀺 𑀉𑀤𑀸𑀳𑀼 𑀓𑀸𑀯𑁂𑀬𑁆𑀬𑀫𑀢𑁆𑀢𑁄,

𑀅𑀢𑁆𑀣𑀸 𑀦𑀼 𑀢𑁂 𑀲𑀫𑁆𑀧𑀘𑀼𑀭𑀸 𑀦 𑀲𑀦𑁆𑀢𑀺;

𑀏𑀓𑁄 𑀯𑀺𑀯𑀺𑀢𑁆𑀢𑁂 𑀲𑀬𑀦𑀸𑀲𑀦𑀫𑁆𑀳𑀺,

𑀦𑀺𑀤𑁆𑀤𑀸𑀫𑀼𑀔𑁄 𑀓𑀺𑀫𑀺𑀤𑀁 𑀲𑁄𑀧𑁆𑀧𑀲𑁂 𑀯𑀸’’𑀢𑀺.

‘‘𑀦 𑀫𑀦𑁆𑀤𑀺𑀬𑀸 𑀲𑀬𑀸𑀫𑀺 𑀦𑀸𑀧𑀺 𑀓𑀸𑀯𑁂𑀬𑁆𑀬𑀫𑀢𑁆𑀢𑁄,

𑀅𑀢𑁆𑀣𑀁 𑀲𑀫𑁂𑀘𑁆𑀘𑀸𑀳𑀫𑀧𑁂𑀢𑀲𑁄𑀓𑁄;

𑀏𑀓𑁄 𑀯𑀺𑀯𑀺𑀢𑁆𑀢𑁂 𑀲𑀬𑀦𑀸𑀲𑀦𑀫𑁆𑀳𑀺,

𑀲𑀬𑀸𑀫𑀳𑀁 𑀲𑀩𑁆𑀩𑀪𑀽𑀢𑀸𑀦𑀼𑀓𑀫𑁆𑀧𑀻.

‘‘𑀬𑁂𑀲𑀫𑁆𑀧𑀺 𑀲𑀮𑁆𑀮𑀁 𑀉𑀭𑀲𑀺 𑀧𑀯𑀺𑀝𑁆𑀞𑀁,

𑀫𑀼𑀳𑀼𑀁 𑀫𑀼𑀳𑀼𑀁 𑀳𑀤𑀬𑀁 𑀯𑁂𑀥𑀫𑀸𑀦𑀁;

𑀢𑁂𑀧𑀻𑀥 𑀲𑁄𑀧𑁆𑀧𑀁 𑀮𑀪𑀭𑁂 𑀲𑀲𑀮𑁆𑀮𑀸,

𑀢𑀲𑁆𑀫𑀸 𑀅𑀳𑀁 𑀦 𑀲𑀼𑀧𑁂 𑀯𑀻𑀢𑀲𑀮𑁆𑀮𑁄.

‘‘𑀚𑀕𑁆𑀕𑀁 𑀦 𑀲𑀗𑁆𑀓𑁂 𑀦𑀧𑀺 𑀪𑁂𑀫𑀺 𑀲𑁄𑀢𑁆𑀢𑀼𑀁,

𑀭𑀢𑁆𑀢𑀺𑀦𑁆𑀤𑀺𑀯𑀸 𑀦𑀸𑀦𑀼𑀢𑀧𑀦𑁆𑀢𑀺 𑀫𑀸𑀫𑀁;

𑀳𑀸𑀦𑀺𑀁 𑀦 𑀧𑀲𑁆𑀲𑀸𑀫𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂,

𑀢𑀲𑁆𑀫𑀸 𑀲𑀼𑀧𑁂 𑀲𑀩𑁆𑀩𑀪𑀽𑀢𑀸𑀦𑀼𑀓𑀫𑁆𑀧𑀻’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀪𑀕𑀯𑀸, 𑀚𑀸𑀦𑀸𑀢𑀺 𑀫𑀁 𑀲𑀼𑀕𑀢𑁄’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁪. 𑀧𑀢𑀺𑀭𑀽𑀧𑀲𑀼𑀢𑁆𑀢𑀁

𑁧𑁫𑁦. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀮𑁂𑀲𑀼 𑀯𑀺𑀳𑀭𑀢𑀺 𑀏𑀓𑀲𑀸𑀮𑀸𑀬𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀫𑀳𑀢𑀺𑀬𑀸 𑀕𑀺𑀳𑀺𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺.

𑀅𑀣 𑀔𑁄 𑀫𑀸𑀭𑀲𑁆𑀲 𑀧𑀸𑀧𑀺𑀫𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀲𑀫𑀡𑁄 𑀕𑁄𑀢𑀫𑁄 𑀫𑀳𑀢𑀺𑀬𑀸 𑀕𑀺𑀳𑀺𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀬𑀁𑀦𑀽𑀦𑀸𑀳𑀁 𑀬𑁂𑀦 𑀲𑀫𑀡𑁄 𑀕𑁄𑀢𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀁 𑀯𑀺𑀘𑀓𑁆𑀔𑀼𑀓𑀫𑁆𑀫𑀸𑀬𑀸’’𑀢𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀦𑁂𑀢𑀁 𑀢𑀯 𑀧𑀢𑀺𑀭𑀽𑀧𑀁, 𑀬𑀤𑀜𑁆𑀜𑀫𑀦𑀼𑀲𑀸𑀲𑀲𑀺;

𑀅𑀦𑀼𑀭𑁄𑀥𑀯𑀺𑀭𑁄𑀥𑁂𑀲𑀼, 𑀫𑀸 𑀲𑀚𑁆𑀚𑀺𑀢𑁆𑀣𑁄 𑀢𑀤𑀸𑀘𑀭’’𑀦𑁆𑀢𑀺.

‘‘𑀳𑀺𑀢𑀸𑀦𑀼𑀓𑀫𑁆𑀧𑀻 𑀲𑀫𑁆𑀩𑀼𑀤𑁆𑀥𑁄, 𑀬𑀤𑀜𑁆𑀜𑀫𑀦𑀼𑀲𑀸𑀲𑀢𑀺;

𑀅𑀦𑀼𑀭𑁄𑀥𑀯𑀺𑀭𑁄𑀥𑁂𑀳𑀺, 𑀯𑀺𑀧𑁆𑀧𑀫𑀼𑀢𑁆𑀢𑁄 𑀢𑀣𑀸𑀕𑀢𑁄’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀪𑀕𑀯𑀸, 𑀚𑀸𑀦𑀸𑀢𑀺 𑀫𑀁 𑀲𑀼𑀕𑀢𑁄’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁫. 𑀫𑀸𑀦𑀲𑀲𑀼𑀢𑁆𑀢𑀁

𑁧𑁫𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀧𑀸𑀲𑁄, 𑀬𑁆𑀯𑀸𑀬𑀁 𑀘𑀭𑀢𑀺 𑀫𑀸𑀦𑀲𑁄;

𑀢𑁂𑀦 𑀢𑀁 𑀩𑀸𑀥𑀬𑀺𑀲𑁆𑀲𑀸𑀫𑀺, 𑀦 𑀫𑁂 𑀲𑀫𑀡 𑀫𑁄𑀓𑁆𑀔𑀲𑀻’’𑀢𑀺.

‘‘𑀭𑀽𑀧𑀸 𑀲𑀤𑁆𑀤𑀸 𑀭𑀲𑀸 𑀕𑀦𑁆𑀥𑀸, 𑀨𑁄𑀝𑁆𑀞𑀩𑁆𑀩𑀸 𑀘 𑀫𑀦𑁄𑀭𑀫𑀸;

𑀏𑀢𑁆𑀣 𑀫𑁂 𑀯𑀺𑀕𑀢𑁄 𑀙𑀦𑁆𑀤𑁄, 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓𑀸’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀪𑀕𑀯𑀸, 𑀚𑀸𑀦𑀸𑀢𑀺 𑀫𑀁 𑀲𑀼𑀕𑀢𑁄’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁬. 𑀧𑀢𑁆𑀢𑀲𑀼𑀢𑁆𑀢𑀁

𑁧𑁫𑁨. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀉𑀧𑀸𑀤𑀸𑀬 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀺 𑀲𑀫𑀸𑀤𑀧𑁂𑀢𑀺 [𑀲𑀫𑀸𑀤𑀸𑀧𑁂𑀢𑀺 (?)] 𑀲𑀫𑀼𑀢𑁆𑀢𑁂𑀚𑁂𑀢𑀺 𑀲𑀫𑁆𑀧𑀳𑀁𑀲𑁂𑀢𑀺. 𑀢𑁂 𑀘 𑀪𑀺𑀓𑁆𑀔𑀽 𑀅𑀝𑁆𑀞𑀺𑀁 𑀓𑀢𑁆𑀯𑀸 [𑀅𑀝𑁆𑀞𑀺𑀓𑀢𑁆𑀯𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀫𑀦𑀲𑀺 𑀓𑀢𑁆𑀯𑀸 𑀲𑀩𑁆𑀩𑀘𑁂𑀢𑀲𑀸 [𑀲𑀩𑁆𑀩𑀘𑁂𑀢𑀲𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.), 𑀲𑀩𑁆𑀩𑀁 𑀘𑁂𑀢𑀲𑀸 (𑀓.)] 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺.

𑀅𑀣 𑀔𑁄 𑀫𑀸𑀭𑀲𑁆𑀲 𑀧𑀸𑀧𑀺𑀫𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀲𑀫𑀡𑁄 𑀕𑁄𑀢𑀫𑁄 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀉𑀧𑀸𑀤𑀸𑀬 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀺 𑀲𑀫𑀸𑀤𑀧𑁂𑀢𑀺 𑀲𑀫𑀼𑀢𑁆𑀢𑁂𑀚𑁂𑀢𑀺 𑀲𑀫𑁆𑀧𑀳𑀁𑀲𑁂𑀢𑀺. 𑀢𑁂 𑀘 𑀪𑀺𑀓𑁆𑀔𑀽 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺 𑀓𑀢𑁆𑀯𑀸 𑀲𑀩𑁆𑀩𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺. 𑀬𑀁𑀦𑀽𑀦𑀸𑀳𑀁 𑀬𑁂𑀦 𑀲𑀫𑀡𑁄 𑀕𑁄𑀢𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀁 𑀯𑀺𑀘𑀓𑁆𑀔𑀼𑀓𑀫𑁆𑀫𑀸𑀬𑀸’’𑀢𑀺.