𑁫. 𑀪𑀺𑀓𑁆𑀔𑀼𑀦𑀻𑀲𑀁𑀬𑀼𑀢𑁆𑀢𑀁

𑁧. 𑀆𑀴𑀯𑀺𑀓𑀸𑀲𑀼𑀢𑁆𑀢𑀁

𑁧𑁬𑁨. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀆𑀴𑀯𑀺𑀓𑀸 𑀪𑀺𑀓𑁆𑀔𑀼𑀦𑀻 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀬𑁂𑀦 𑀅𑀦𑁆𑀥𑀯𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺 𑀯𑀺𑀯𑁂𑀓𑀢𑁆𑀣𑀺𑀦𑀻. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀆𑀴𑀯𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄 𑀯𑀺𑀯𑁂𑀓𑀫𑁆𑀳𑀸 𑀘𑀸𑀯𑁂𑀢𑀼𑀓𑀸𑀫𑁄 𑀬𑁂𑀦 𑀆𑀴𑀯𑀺𑀓𑀸 𑀪𑀺𑀓𑁆𑀔𑀼𑀦𑀻 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀴𑀯𑀺𑀓𑀁 𑀪𑀺𑀓𑁆𑀔𑀼𑀦𑀺𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀦𑀢𑁆𑀣𑀺 𑀦𑀺𑀲𑁆𑀲𑀭𑀡𑀁 𑀮𑁄𑀓𑁂, 𑀓𑀺𑀁 𑀯𑀺𑀯𑁂𑀓𑁂𑀦 𑀓𑀸𑀳𑀲𑀺;

𑀪𑀼𑀜𑁆𑀚𑀲𑁆𑀲𑀼 𑀓𑀸𑀫𑀭𑀢𑀺𑀬𑁄, 𑀫𑀸𑀳𑀼 𑀧𑀘𑁆𑀙𑀸𑀦𑀼𑀢𑀸𑀧𑀺𑀦𑀻’’𑀢𑀺.

𑀅𑀣 𑀔𑁄 𑀆𑀴𑀯𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀏𑀢𑀤𑀳𑁄𑀲𑀺 𑁋 ‘‘𑀓𑁄 𑀦𑀼 𑀔𑁆𑀯𑀸𑀬𑀁 𑀫𑀦𑀼𑀲𑁆𑀲𑁄 𑀯𑀸 𑀅𑀫𑀦𑀼𑀲𑁆𑀲𑁄 𑀯𑀸 𑀕𑀸𑀣𑀁 𑀪𑀸𑀲𑀢𑀻’’𑀢𑀺? 𑀅𑀣 𑀔𑁄 𑀆𑀴𑀯𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀏𑀢𑀤𑀳𑁄𑀲𑀺 𑁋 ‘‘𑀫𑀸𑀭𑁄 𑀔𑁄 𑀅𑀬𑀁 𑀧𑀸𑀧𑀺𑀫𑀸 𑀫𑀫 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄 𑀯𑀺𑀯𑁂𑀓𑀫𑁆𑀳𑀸 𑀘𑀸𑀯𑁂𑀢𑀼𑀓𑀸𑀫𑁄 𑀕𑀸𑀣𑀁 𑀪𑀸𑀲𑀢𑀻’’𑀢𑀺. 𑀅𑀣 𑀔𑁄 𑀆𑀴𑀯𑀺𑀓𑀸 𑀪𑀺𑀓𑁆𑀔𑀼𑀦𑀻 ‘‘𑀫𑀸𑀭𑁄 𑀅𑀬𑀁 𑀧𑀸𑀧𑀺𑀫𑀸’’ 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀕𑀸𑀣𑀸𑀳𑀺 𑀧𑀘𑁆𑀘𑀪𑀸𑀲𑀺 𑁋

‘‘𑀅𑀢𑁆𑀣𑀺 𑀦𑀺𑀲𑁆𑀲𑀭𑀡𑀁 𑀮𑁄𑀓𑁂, 𑀧𑀜𑁆𑀜𑀸𑀬 𑀫𑁂 𑀲𑀼𑀨𑀼𑀲𑁆𑀲𑀺𑀢𑀁 [𑀲𑀼𑀨𑀲𑁆𑀲𑀺𑀢𑀁 (𑀲𑀻. 𑀧𑀻.)];

𑀧𑀫𑀢𑁆𑀢𑀩𑀦𑁆𑀥𑀼 𑀧𑀸𑀧𑀺𑀫, 𑀦 𑀢𑁆𑀯𑀁 𑀚𑀸𑀦𑀸𑀲𑀺 𑀢𑀁 𑀧𑀤𑀁.

‘‘𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀓𑀸𑀫𑀸, 𑀔𑀦𑁆𑀥𑀸𑀲𑀁 𑀅𑀥𑀺𑀓𑀼𑀝𑁆𑀝𑀦𑀸;

𑀬𑀁 𑀢𑁆𑀯𑀁 𑀓𑀸𑀫𑀭𑀢𑀺𑀁 𑀩𑁆𑀭𑀽𑀲𑀺, 𑀅𑀭𑀢𑀺 𑀫𑀬𑁆𑀳 𑀲𑀸 𑀅𑀳𑀽’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀆𑀴𑀯𑀺𑀓𑀸 𑀪𑀺𑀓𑁆𑀔𑀼𑀦𑀻’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁨. 𑀲𑁄𑀫𑀸𑀲𑀼𑀢𑁆𑀢𑀁

𑁧𑁬𑁩. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀲𑁄𑀫𑀸 𑀪𑀺𑀓𑁆𑀔𑀼𑀦𑀻 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀬𑁂𑀦 𑀅𑀦𑁆𑀥𑀯𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺 𑀤𑀺𑀯𑀸𑀯𑀺𑀳𑀸𑀭𑀸𑀬. 𑀅𑀦𑁆𑀥𑀯𑀦𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀲𑁄𑀫𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄 𑀲𑀫𑀸𑀥𑀺𑀫𑁆𑀳𑀸 𑀘𑀸𑀯𑁂𑀢𑀼𑀓𑀸𑀫𑁄 𑀬𑁂𑀦 𑀲𑁄𑀫𑀸 𑀪𑀺𑀓𑁆𑀔𑀼𑀦𑀻 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑁄𑀫𑀁 𑀪𑀺𑀓𑁆𑀔𑀼𑀦𑀺𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀬𑀁 𑀢𑀁 𑀇𑀲𑀻𑀳𑀺 𑀧𑀢𑁆𑀢𑀩𑁆𑀩𑀁, 𑀞𑀸𑀦𑀁 𑀤𑀼𑀭𑀪𑀺𑀲𑀫𑁆𑀪𑀯𑀁;

𑀦 𑀢𑀁 𑀤𑁆𑀯𑀗𑁆𑀕𑀼𑀮𑀧𑀜𑁆𑀜𑀸𑀬, 𑀲𑀓𑁆𑀓𑀸 𑀧𑀧𑁆𑀧𑁄𑀢𑀼𑀫𑀺𑀢𑁆𑀣𑀺𑀬𑀸’’𑀢𑀺.

𑀅𑀣 𑀔𑁄 𑀲𑁄𑀫𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀏𑀢𑀤𑀳𑁄𑀲𑀺 𑁋 ‘‘𑀓𑁄 𑀦𑀼 𑀔𑁆𑀯𑀸𑀬𑀁 𑀫𑀦𑀼𑀲𑁆𑀲𑁄 𑀯𑀸 𑀅𑀫𑀦𑀼𑀲𑁆𑀲𑁄 𑀯𑀸 𑀕𑀸𑀣𑀁 𑀪𑀸𑀲𑀢𑀻’’𑀢𑀺? 𑀅𑀣 𑀔𑁄 𑀲𑁄𑀫𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀏𑀢𑀤𑀳𑁄𑀲𑀺 𑁋 ‘‘𑀫𑀸𑀭𑁄 𑀔𑁄 𑀅𑀬𑀁 𑀧𑀸𑀧𑀺𑀫𑀸 𑀫𑀫 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄 𑀲𑀫𑀸𑀥𑀺𑀫𑁆𑀳𑀸 𑀘𑀸𑀯𑁂𑀢𑀼𑀓𑀸𑀫𑁄 𑀕𑀸𑀣𑀁 𑀪𑀸𑀲𑀢𑀻’’𑀢𑀺. 𑀅𑀣 𑀔𑁄 𑀲𑁄𑀫𑀸 𑀪𑀺𑀓𑁆𑀔𑀼𑀦𑀻 ‘‘𑀫𑀸𑀭𑁄 𑀅𑀬𑀁 𑀧𑀸𑀧𑀺𑀫𑀸’’ 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀕𑀸𑀣𑀸𑀳𑀺 𑀧𑀘𑁆𑀘𑀪𑀸𑀲𑀺 𑁋

‘‘𑀇𑀢𑁆𑀣𑀺𑀪𑀸𑀯𑁄 𑀓𑀺𑀁 𑀓𑀬𑀺𑀭𑀸, 𑀘𑀺𑀢𑁆𑀢𑀫𑁆𑀳𑀺 𑀲𑀼𑀲𑀫𑀸𑀳𑀺𑀢𑁂;

𑀜𑀸𑀡𑀫𑁆𑀳𑀺 𑀯𑀢𑁆𑀢𑀫𑀸𑀦𑀫𑁆𑀳𑀺, 𑀲𑀫𑁆𑀫𑀸 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄.

‘‘𑀬𑀲𑁆𑀲 𑀦𑀽𑀦 𑀲𑀺𑀬𑀸 𑀏𑀯𑀁, 𑀇𑀢𑁆𑀣𑀸𑀳𑀁 𑀧𑀼𑀭𑀺𑀲𑁄𑀢𑀺 𑀯𑀸;

𑀓𑀺𑀜𑁆𑀘𑀺 𑀯𑀸 𑀧𑀦 𑀅𑀜𑁆𑀜𑀲𑁆𑀫𑀺 [𑀅𑀲𑁆𑀫𑀻𑀢𑀺 (𑀲𑁆𑀬𑀸. 𑀓𑀁. 𑀧𑀻.)], 𑀢𑀁 𑀫𑀸𑀭𑁄 𑀯𑀢𑁆𑀢𑀼𑀫𑀭𑀳𑀢𑀻’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀲𑁄𑀫𑀸 𑀪𑀺𑀓𑁆𑀔𑀼𑀦𑀻’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁩. 𑀓𑀺𑀲𑀸𑀕𑁄𑀢𑀫𑀻𑀲𑀼𑀢𑁆𑀢𑀁

𑁧𑁬𑁪. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀓𑀺𑀲𑀸𑀕𑁄𑀢𑀫𑀻 𑀪𑀺𑀓𑁆𑀔𑀼𑀦𑀻 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀬𑁂𑀦 𑀅𑀦𑁆𑀥𑀯𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀤𑀺𑀯𑀸𑀯𑀺𑀳𑀸𑀭𑀸𑀬. 𑀅𑀦𑁆𑀥𑀯𑀦𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀓𑀺𑀲𑀸𑀕𑁄𑀢𑀫𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄 𑀲𑀫𑀸𑀥𑀺𑀫𑁆𑀳𑀸 𑀘𑀸𑀯𑁂𑀢𑀼𑀓𑀸𑀫𑁄 𑀬𑁂𑀦 𑀓𑀺𑀲𑀸𑀕𑁄𑀢𑀫𑀻 𑀪𑀺𑀓𑁆𑀔𑀼𑀦𑀻 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀺𑀲𑀸𑀕𑁄𑀢𑀫𑀺𑀁 𑀪𑀺𑀓𑁆𑀔𑀼𑀦𑀺𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀓𑀺𑀁 𑀦𑀼 𑀢𑁆𑀯𑀁 𑀫𑀢𑀧𑀼𑀢𑁆𑀢𑀸𑀯, 𑀏𑀓𑀫𑀸𑀲𑀺 𑀭𑀼𑀤𑀫𑁆𑀫𑀼𑀔𑀻;

𑀯𑀦𑀫𑀚𑁆𑀛𑀕𑀢𑀸 𑀏𑀓𑀸, 𑀧𑀼𑀭𑀺𑀲𑀁 𑀦𑀼 𑀕𑀯𑁂𑀲𑀲𑀻’’𑀢𑀺.

𑀅𑀣 𑀔𑁄 𑀓𑀺𑀲𑀸𑀕𑁄𑀢𑀫𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸 𑀏𑀢𑀤𑀳𑁄𑀲𑀺 𑁋 ‘‘𑀓𑁄 𑀦𑀼 𑀔𑁆𑀯𑀸𑀬𑀁 𑀫𑀦𑀼𑀲𑁆𑀲𑁄 𑀯𑀸 𑀅𑀫𑀦𑀼𑀲𑁆𑀲𑁄 𑀯𑀸 𑀕𑀸𑀣𑀁 𑀪𑀸𑀲𑀢𑀻’’𑀢𑀺? 𑀅𑀣 𑀔𑁄 𑀓𑀺𑀲𑀸𑀕𑁄𑀢𑀫𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸 𑀏𑀢𑀤𑀳𑁄𑀲𑀺 𑁋 ‘‘𑀫𑀸𑀭𑁄 𑀔𑁄 𑀅𑀬𑀁 𑀧𑀸𑀧𑀺𑀫𑀸 𑀫𑀫 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄 𑀲𑀫𑀸𑀥𑀺𑀫𑁆𑀳𑀸 𑀘𑀸𑀯𑁂𑀢𑀼𑀓𑀸𑀫𑁄 𑀕𑀸𑀣𑀁 𑀪𑀸𑀲𑀢𑀻’’𑀢𑀺.

𑀅𑀣 𑀔𑁄 𑀓𑀺𑀲𑀸𑀕𑁄𑀢𑀫𑀻 𑀪𑀺𑀓𑁆𑀔𑀼𑀦𑀻 ‘‘𑀫𑀸𑀭𑁄 𑀅𑀬𑀁 𑀧𑀸𑀧𑀺𑀫𑀸’’ 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀕𑀸𑀣𑀸𑀳𑀺 𑀧𑀘𑁆𑀘𑀪𑀸𑀲𑀺 𑁋

‘‘𑀅𑀘𑁆𑀘𑀦𑁆𑀢𑀁 𑀫𑀢𑀧𑀼𑀢𑁆𑀢𑀸𑀫𑁆𑀳𑀺, 𑀧𑀼𑀭𑀺𑀲𑀸 𑀏𑀢𑀤𑀦𑁆𑀢𑀺𑀓𑀸;

𑀦 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺, 𑀦 𑀢𑀁 𑀪𑀸𑀬𑀸𑀫𑀺 𑀆𑀯𑀼𑀲𑁄.

‘‘𑀲𑀩𑁆𑀩𑀢𑁆𑀣 𑀯𑀺𑀳𑀢𑀸 𑀦𑀦𑁆𑀤𑀻, 𑀢𑀫𑁄𑀓𑁆𑀔𑀦𑁆𑀥𑁄 𑀧𑀤𑀸𑀮𑀺𑀢𑁄;

𑀚𑁂𑀢𑁆𑀯𑀸𑀦 𑀫𑀘𑁆𑀘𑀼𑀦𑁄 [𑀚𑁂𑀢𑁆𑀯𑀸 𑀦𑀫𑀼𑀘𑀺𑀦𑁄 (𑀲𑀻.)] 𑀲𑁂𑀦𑀁, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑀸’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀓𑀺𑀲𑀸𑀕𑁄𑀢𑀫𑀻 𑀪𑀺𑀓𑁆𑀔𑀼𑀦𑀻’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁪. 𑀯𑀺𑀚𑀬𑀸𑀲𑀼𑀢𑁆𑀢𑀁

𑁧𑁬𑁫. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀯𑀺𑀚𑀬𑀸 𑀪𑀺𑀓𑁆𑀔𑀼𑀦𑀻 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸…𑀧𑁂… 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀯𑀺𑀚𑀬𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄 𑀲𑀫𑀸𑀥𑀺𑀫𑁆𑀳𑀸 𑀘𑀸𑀯𑁂𑀢𑀼𑀓𑀸𑀫𑁄 𑀬𑁂𑀦 𑀯𑀺𑀚𑀬𑀸 𑀪𑀺𑀓𑁆𑀔𑀼𑀦𑀻 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀺𑀚𑀬𑀁 𑀪𑀺𑀓𑁆𑀔𑀼𑀦𑀺𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀤𑀳𑀭𑀸 𑀢𑁆𑀯𑀁 𑀭𑀽𑀧𑀯𑀢𑀻, 𑀅𑀳𑀜𑁆𑀘 𑀤𑀳𑀭𑁄 𑀲𑀼𑀲𑀼;

𑀧𑀜𑁆𑀘𑀗𑁆𑀕𑀺𑀓𑁂𑀦 𑀢𑀼𑀭𑀺𑀬𑁂𑀦, 𑀏𑀳𑀬𑁆𑀬𑁂𑀪𑀺𑀭𑀫𑀸𑀫𑀲𑁂’’𑀢𑀺 [𑀏𑀳𑀺 𑀅𑀬𑁆𑀬𑁂 𑀭𑀫𑀸𑀫𑀲𑁂𑀢𑀺 (𑀲𑀻.)].

𑀅𑀣 𑀔𑁄 𑀯𑀺𑀚𑀬𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀏𑀢𑀤𑀳𑁄𑀲𑀺 𑁋 ‘‘𑀓𑁄 𑀦𑀼 𑀔𑁆𑀯𑀸𑀬𑀁 𑀫𑀦𑀼𑀲𑁆𑀲𑁄 𑀯𑀸 𑀅𑀫𑀦𑀼𑀲𑁆𑀲𑁄 𑀯𑀸 𑀕𑀸𑀣𑀁 𑀪𑀸𑀲𑀢𑀻’’𑀢𑀺? 𑀅𑀣 𑀔𑁄 𑀯𑀺𑀚𑀬𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀏𑀢𑀤𑀳𑁄𑀲𑀺 𑁋 ‘‘𑀫𑀸𑀭𑁄 𑀔𑁄 𑀅𑀬𑀁 𑀧𑀸𑀧𑀺𑀫𑀸 𑀫𑀫 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄 𑀲𑀫𑀸𑀥𑀺𑀫𑁆𑀳𑀸 𑀘𑀸𑀯𑁂𑀢𑀼𑀓𑀸𑀫𑁄 𑀕𑀸𑀣𑀁 𑀪𑀸𑀲𑀢𑀻’’𑀢𑀺. 𑀅𑀣 𑀔𑁄 𑀯𑀺𑀚𑀬𑀸 𑀪𑀺𑀓𑁆𑀔𑀼𑀦𑀻 ‘‘𑀫𑀸𑀭𑁄 𑀅𑀬𑀁 𑀧𑀸𑀧𑀺𑀫𑀸’’ 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀕𑀸𑀣𑀸𑀳𑀺 𑀧𑀘𑁆𑀘𑀪𑀸𑀲𑀺 𑁋

‘‘𑀭𑀽𑀧𑀸 𑀲𑀤𑁆𑀤𑀸 𑀭𑀲𑀸 𑀕𑀦𑁆𑀥𑀸, 𑀨𑁄𑀝𑁆𑀞𑀩𑁆𑀩𑀸 𑀘 𑀫𑀦𑁄𑀭𑀫𑀸;

𑀦𑀺𑀬𑁆𑀬𑀸𑀢𑀬𑀸𑀫𑀺 𑀢𑀼𑀬𑁆𑀳𑁂𑀯, 𑀫𑀸𑀭 𑀦𑀸𑀳𑀁 𑀢𑁂𑀦𑀢𑁆𑀣𑀺𑀓𑀸.

‘‘𑀇𑀫𑀺𑀦𑀸 𑀧𑀽𑀢𑀺𑀓𑀸𑀬𑁂𑀦, 𑀪𑀺𑀦𑁆𑀤𑀦𑁂𑀦 𑀧𑀪𑀗𑁆𑀕𑀼𑀦𑀸;

𑀅𑀝𑁆𑀝𑀻𑀬𑀸𑀫𑀺 𑀳𑀭𑀸𑀬𑀸𑀫𑀺, 𑀓𑀸𑀫𑀢𑀡𑁆𑀳𑀸 𑀲𑀫𑀽𑀳𑀢𑀸.

‘‘𑀬𑁂 𑀘 𑀭𑀽𑀧𑀽𑀧𑀕𑀸 𑀲𑀢𑁆𑀢𑀸, 𑀬𑁂 𑀘 𑀅𑀭𑀽𑀧𑀝𑁆𑀞𑀸𑀬𑀺𑀦𑁄 [𑀆𑀭𑀼𑀧𑁆𑀧𑀝𑁆𑀞𑀸𑀬𑀺𑀦𑁄 (𑀲𑀻. 𑀧𑀻.)];

𑀬𑀸 𑀘 𑀲𑀦𑁆𑀢𑀸 𑀲𑀫𑀸𑀧𑀢𑁆𑀢𑀺, 𑀲𑀩𑁆𑀩𑀢𑁆𑀣 𑀯𑀺𑀳𑀢𑁄 𑀢𑀫𑁄’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀯𑀺𑀚𑀬𑀸 𑀪𑀺𑀓𑁆𑀔𑀼𑀦𑀻’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁫. 𑀉𑀧𑁆𑀧𑀮𑀯𑀡𑁆𑀡𑀸𑀲𑀼𑀢𑁆𑀢𑀁

𑁧𑁬𑁬. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀉𑀧𑁆𑀧𑀮𑀯𑀡𑁆𑀡𑀸 𑀪𑀺𑀓𑁆𑀔𑀼𑀦𑀻 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸…𑀧𑁂… 𑀅𑀜𑁆𑀜𑀢𑀭𑀲𑁆𑀫𑀺𑀁 𑀲𑀼𑀧𑀼𑀧𑁆𑀨𑀺𑀢𑀲𑀸𑀮𑀭𑀼𑀓𑁆𑀔𑀫𑀽𑀮𑁂 𑀅𑀝𑁆𑀞𑀸𑀲𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀉𑀧𑁆𑀧𑀮𑀯𑀡𑁆𑀡𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄 𑀲𑀫𑀸𑀥𑀺𑀫𑁆𑀳𑀸 𑀘𑀸𑀯𑁂𑀢𑀼𑀓𑀸𑀫𑁄 𑀬𑁂𑀦 𑀉𑀧𑁆𑀧𑀮𑀯𑀡𑁆𑀡𑀸 𑀪𑀺𑀓𑁆𑀔𑀼𑀦𑀻 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀧𑁆𑀧𑀮𑀯𑀡𑁆𑀡𑀁 𑀪𑀺𑀓𑁆𑀔𑀼𑀦𑀺𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀲𑀼𑀧𑀼𑀧𑁆𑀨𑀺𑀢𑀕𑁆𑀕𑀁 𑀉𑀧𑀕𑀫𑁆𑀫 𑀪𑀺𑀓𑁆𑀔𑀼𑀦𑀺,

𑀏𑀓𑀸 𑀢𑀼𑀯𑀁 𑀢𑀺𑀝𑁆𑀞𑀲𑀺 𑀲𑀸𑀮𑀫𑀽𑀮𑁂;

𑀦 𑀘𑀢𑁆𑀣𑀺 𑀢𑁂 𑀤𑀼𑀢𑀺𑀬𑀸 𑀯𑀡𑁆𑀡𑀥𑀸𑀢𑀼,

𑀩𑀸𑀮𑁂 𑀦 𑀢𑁆𑀯𑀁 𑀪𑀸𑀬𑀲𑀺 𑀥𑀼𑀢𑁆𑀢𑀓𑀸𑀦’’𑀦𑁆𑀢𑀺.

𑀅𑀣 𑀔𑁄 𑀉𑀧𑁆𑀧𑀮𑀯𑀡𑁆𑀡𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀏𑀢𑀤𑀳𑁄𑀲𑀺 𑁋 ‘‘𑀓𑁄 𑀦𑀼 𑀔𑁆𑀯𑀸𑀬𑀁 𑀫𑀦𑀼𑀲𑁆𑀲𑁄 𑀯𑀸 𑀅𑀫𑀦𑀼𑀲𑁆𑀲𑁄 𑀯𑀸 𑀕𑀸𑀣𑀁 𑀪𑀸𑀲𑀢𑀻’’𑀢𑀺? 𑀅𑀣 𑀔𑁄 𑀉𑀧𑁆𑀧𑀮𑀯𑀡𑁆𑀡𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀏𑀢𑀤𑀳𑁄𑀲𑀺 𑁋 ‘‘𑀫𑀸𑀭𑁄 𑀔𑁄 𑀅𑀬𑀁 𑀧𑀸𑀧𑀺𑀫𑀸 𑀫𑀫 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄 𑀲𑀫𑀸𑀥𑀺𑀫𑁆𑀳𑀸 𑀘𑀸𑀯𑁂𑀢𑀼𑀓𑀸𑀫𑁄 𑀕𑀸𑀣𑀁 𑀪𑀸𑀲𑀢𑀻’’𑀢𑀺. 𑀅𑀣 𑀔𑁄 𑀉𑀧𑁆𑀧𑀮𑀯𑀡𑁆𑀡𑀸 𑀪𑀺𑀓𑁆𑀔𑀼𑀦𑀻 ‘‘𑀫𑀸𑀭𑁄 𑀅𑀬𑀁 𑀧𑀸𑀧𑀺𑀫𑀸’’ 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀕𑀸𑀣𑀸𑀳𑀺 𑀧𑀘𑁆𑀘𑀪𑀸𑀲𑀺 𑁋

‘‘𑀲𑀢𑀁 𑀲𑀳𑀲𑁆𑀲𑀸𑀦𑀺𑀧𑀺 𑀥𑀼𑀢𑁆𑀢𑀓𑀸𑀦𑀁,

𑀇𑀥𑀸𑀕𑀢𑀸 𑀢𑀸𑀤𑀺𑀲𑀓𑀸 𑀪𑀯𑁂𑀬𑁆𑀬𑀼𑀁;

𑀮𑁄𑀫𑀁 𑀦 𑀇𑀜𑁆𑀚𑀸𑀫𑀺 𑀦 𑀲𑀦𑁆𑀢𑀲𑀸𑀫𑀺,

𑀦 𑀫𑀸𑀭 𑀪𑀸𑀬𑀸𑀫𑀺 𑀢𑀫𑁂𑀓𑀺𑀓𑀸𑀧𑀺.

‘‘𑀏𑀲𑀸 𑀅𑀦𑁆𑀢𑀭𑀥𑀸𑀬𑀸𑀫𑀺, 𑀓𑀼𑀘𑁆𑀙𑀺𑀁 𑀯𑀸 𑀧𑀯𑀺𑀲𑀸𑀫𑀺 𑀢𑁂;

𑀧𑀔𑀼𑀫𑀦𑁆𑀢𑀭𑀺𑀓𑀸𑀬𑀫𑁆𑀧𑀺, 𑀢𑀺𑀝𑁆𑀞𑀦𑁆𑀢𑀺𑀁 𑀫𑀁 𑀦 𑀤𑀓𑁆𑀔𑀲𑀺.

‘‘𑀘𑀺𑀢𑁆𑀢𑀲𑁆𑀫𑀺𑀁 𑀯𑀲𑀻𑀪𑀽𑀢𑀸𑀫𑁆𑀳𑀺, 𑀇𑀤𑁆𑀥𑀺𑀧𑀸𑀤𑀸 𑀲𑀼𑀪𑀸𑀯𑀺𑀢𑀸;

𑀲𑀩𑁆𑀩𑀩𑀦𑁆𑀥𑀦𑀫𑀼𑀢𑁆𑀢𑀸𑀫𑁆𑀳𑀺, 𑀦 𑀢𑀁 𑀪𑀸𑀬𑀸𑀫𑀺 𑀆𑀯𑀼𑀲𑁄’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀉𑀧𑁆𑀧𑀮𑀯𑀡𑁆𑀡𑀸 𑀪𑀺𑀓𑁆𑀔𑀼𑀦𑀻’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁬. 𑀘𑀸𑀮𑀸𑀲𑀼𑀢𑁆𑀢𑀁

𑁧𑁬𑁭. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀘𑀸𑀮𑀸 𑀪𑀺𑀓𑁆𑀔𑀼𑀦𑀻 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸…𑀧𑁂… 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀬𑁂𑀦 𑀘𑀸𑀮𑀸 𑀪𑀺𑀓𑁆𑀔𑀼𑀦𑀻 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘𑀸𑀮𑀁 𑀪𑀺𑀓𑁆𑀔𑀼𑀦𑀺𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀢𑁆𑀯𑀁, 𑀪𑀺𑀓𑁆𑀔𑀼𑀦𑀺, 𑀦 𑀭𑁄𑀘𑁂𑀲𑀻’’𑀢𑀺? ‘‘𑀚𑀸𑀢𑀺𑀁 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀦 𑀭𑁄𑀘𑁂𑀫𑀻’’𑀢𑀺.

‘‘𑀓𑀺𑀁 𑀦𑀼 𑀚𑀸𑀢𑀺𑀁 𑀦 𑀭𑁄𑀘𑁂𑀲𑀺, 𑀚𑀸𑀢𑁄 𑀓𑀸𑀫𑀸𑀦𑀺 𑀪𑀼𑀜𑁆𑀚𑀢𑀺;

𑀓𑁄 𑀦𑀼 𑀢𑀁 𑀇𑀤𑀫𑀸𑀤𑀧𑀬𑀺, 𑀚𑀸𑀢𑀺𑀁 𑀫𑀸 𑀭𑁄𑀘 [𑀫𑀸 𑀭𑁄𑀘𑁂𑀲𑀺 (𑀲𑀻. 𑀧𑀻.)] 𑀪𑀺𑀓𑁆𑀔𑀼𑀦𑀻’’𑀢𑀺.

‘‘𑀚𑀸𑀢𑀲𑁆𑀲 𑀫𑀭𑀡𑀁 𑀳𑁄𑀢𑀺, 𑀚𑀸𑀢𑁄 𑀤𑀼𑀓𑁆𑀔𑀸𑀦𑀺 𑀨𑀼𑀲𑁆𑀲𑀢𑀺 [𑀧𑀲𑁆𑀲𑀢𑀺 (𑀲𑀻. 𑀧𑀻.)];

𑀩𑀦𑁆𑀥𑀁 𑀯𑀥𑀁 𑀧𑀭𑀺𑀓𑁆𑀮𑁂𑀲𑀁, 𑀢𑀲𑁆𑀫𑀸 𑀚𑀸𑀢𑀺𑀁 𑀦 𑀭𑁄𑀘𑀬𑁂.

‘‘𑀩𑀼𑀤𑁆𑀥𑁄 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀚𑀸𑀢𑀺𑀬𑀸 𑀲𑀫𑀢𑀺𑀓𑁆𑀓𑀫𑀁;

𑀲𑀩𑁆𑀩𑀤𑀼𑀓𑁆𑀔𑀧𑁆𑀧𑀳𑀸𑀦𑀸𑀬, 𑀲𑁄 𑀫𑀁 𑀲𑀘𑁆𑀘𑁂 𑀦𑀺𑀯𑁂𑀲𑀬𑀺.

‘‘𑀬𑁂 𑀘 𑀭𑀽𑀧𑀽𑀧𑀕𑀸 𑀲𑀢𑁆𑀢𑀸, 𑀬𑁂 𑀘 𑀅𑀭𑀽𑀧𑀝𑁆𑀞𑀸𑀬𑀺𑀦𑁄;

𑀦𑀺𑀭𑁄𑀥𑀁 𑀅𑀧𑁆𑀧𑀚𑀸𑀦𑀦𑁆𑀢𑀸, 𑀆𑀕𑀦𑁆𑀢𑀸𑀭𑁄 𑀧𑀼𑀦𑀩𑁆𑀪𑀯’’𑀦𑁆𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀘𑀸𑀮𑀸 𑀪𑀺𑀓𑁆𑀔𑀼𑀦𑀻’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁭. 𑀉𑀧𑀘𑀸𑀮𑀸𑀲𑀼𑀢𑁆𑀢𑀁

𑁧𑁬𑁮. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀉𑀧𑀘𑀸𑀮𑀸 𑀪𑀺𑀓𑁆𑀔𑀼𑀦𑀻 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸…𑀧𑁂… 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀬𑁂𑀦 𑀉𑀧𑀘𑀸𑀮𑀸 𑀪𑀺𑀓𑁆𑀔𑀼𑀦𑀻 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀧𑀘𑀸𑀮𑀁 𑀪𑀺𑀓𑁆𑀔𑀼𑀦𑀺𑀁 𑀏𑀢𑀤𑀯𑁄𑀘 𑁋 ‘‘𑀓𑀢𑁆𑀣 𑀦𑀼 𑀢𑁆𑀯𑀁, 𑀪𑀺𑀓𑁆𑀔𑀼𑀦𑀺, 𑀉𑀧𑁆𑀧𑀚𑁆𑀚𑀺𑀢𑀼𑀓𑀸𑀫𑀸’’𑀢𑀺? ‘‘𑀦 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀓𑀢𑁆𑀣𑀘𑀺 𑀉𑀧𑁆𑀧𑀚𑁆𑀚𑀺𑀢𑀼𑀓𑀸𑀫𑀸’’𑀢𑀺.

‘‘𑀢𑀸𑀯𑀢𑀺𑀁𑀲𑀸 𑀘 𑀬𑀸𑀫𑀸 𑀘, 𑀢𑀼𑀲𑀺𑀢𑀸 𑀘𑀸𑀧𑀺 𑀤𑁂𑀯𑀢𑀸;

𑀦𑀺𑀫𑁆𑀫𑀸𑀦𑀭𑀢𑀺𑀦𑁄 𑀤𑁂𑀯𑀸, 𑀬𑁂 𑀤𑁂𑀯𑀸 𑀯𑀲𑀯𑀢𑁆𑀢𑀺𑀦𑁄;

𑀢𑀢𑁆𑀣 𑀘𑀺𑀢𑁆𑀢𑀁 𑀧𑀡𑀺𑀥𑁂𑀳𑀺, 𑀭𑀢𑀺𑀁 𑀧𑀘𑁆𑀘𑀦𑀼𑀪𑁄𑀲𑁆𑀲𑀲𑀻’’𑀢𑀺.

‘‘𑀢𑀸𑀯𑀢𑀺𑀁𑀲𑀸 𑀘 𑀬𑀸𑀫𑀸 𑀘, 𑀢𑀼𑀲𑀺𑀢𑀸 𑀘𑀸𑀧𑀺 𑀤𑁂𑀯𑀢𑀸;

𑀦𑀺𑀫𑁆𑀫𑀸𑀦𑀭𑀢𑀺𑀦𑁄 𑀤𑁂𑀯𑀸, 𑀬𑁂 𑀤𑁂𑀯𑀸 𑀯𑀲𑀯𑀢𑁆𑀢𑀺𑀦𑁄;

𑀓𑀸𑀫𑀩𑀦𑁆𑀥𑀦𑀩𑀤𑁆𑀥𑀸 𑀢𑁂, 𑀏𑀦𑁆𑀢𑀺 𑀫𑀸𑀭𑀯𑀲𑀁 𑀧𑀼𑀦.

‘‘𑀲𑀩𑁆𑀩𑁄 𑀆𑀤𑀻𑀧𑀺𑀢𑁄 [𑀲𑀩𑁆𑀩𑁄𑀯 𑀆𑀤𑀺𑀢𑁆𑀢𑁄 (𑀲𑁆𑀬𑀸. 𑀓𑀁.)] 𑀮𑁄𑀓𑁄, 𑀲𑀩𑁆𑀩𑁄 𑀮𑁄𑀓𑁄 𑀧𑀥𑀽𑀧𑀺𑀢𑁄;

𑀲𑀩𑁆𑀩𑁄 𑀧𑀚𑁆𑀚𑀮𑀺𑀢𑁄 [𑀧𑀚𑁆𑀚𑀮𑀺𑀢𑁄 (𑀲𑀩𑁆𑀩𑀢𑁆𑀣)] 𑀮𑁄𑀓𑁄, 𑀲𑀩𑁆𑀩𑁄 𑀮𑁄𑀓𑁄 𑀧𑀓𑀫𑁆𑀧𑀺𑀢𑁄.

‘‘𑀅𑀓𑀫𑁆𑀧𑀺𑀢𑀁 𑀅𑀧𑀚𑁆𑀚𑀮𑀺𑀢𑀁 [𑀅𑀘𑀮𑀺𑀢𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀅𑀧𑀼𑀣𑀼𑀚𑁆𑀚𑀦𑀲𑁂𑀯𑀺𑀢𑀁;

𑀅𑀕𑀢𑀺 𑀬𑀢𑁆𑀣 𑀫𑀸𑀭𑀲𑁆𑀲, 𑀢𑀢𑁆𑀣 𑀫𑁂 𑀦𑀺𑀭𑀢𑁄 𑀫𑀦𑁄’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀉𑀧𑀘𑀸𑀮𑀸 𑀪𑀺𑀓𑁆𑀔𑀼𑀦𑀻’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁮. 𑀲𑀻𑀲𑀼𑀧𑀘𑀸𑀮𑀸𑀲𑀼𑀢𑁆𑀢𑀁

𑁧𑁬𑁯. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀲𑀻𑀲𑀼𑀧𑀘𑀸𑀮𑀸 [𑀲𑀻𑀲𑀽𑀧𑀘𑀸𑀮𑀸 (𑀲𑀻.)] 𑀪𑀺𑀓𑁆𑀔𑀼𑀦𑀻 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 …𑀧𑁂… 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀬𑁂𑀦 𑀲𑀻𑀲𑀼𑀧𑀘𑀸𑀮𑀸 𑀪𑀺𑀓𑁆𑀔𑀼𑀦𑀻 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀻𑀲𑀼𑀧𑀘𑀸𑀮𑀁 𑀪𑀺𑀓𑁆𑀔𑀼𑀦𑀺𑀁 𑀏𑀢𑀤𑀯𑁄𑀘 𑁋 ‘‘𑀓𑀲𑁆𑀲 𑀦𑀼 𑀢𑁆𑀯𑀁, 𑀪𑀺𑀓𑁆𑀔𑀼𑀦𑀺, 𑀧𑀸𑀲𑀡𑁆𑀟𑀁 𑀭𑁄𑀘𑁂𑀲𑀻’’𑀢𑀺? ‘‘𑀦 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀓𑀲𑁆𑀲𑀘𑀺 𑀧𑀸𑀲𑀡𑁆𑀟𑀁 𑀭𑁄𑀘𑁂𑀫𑀻’’𑀢𑀺.

‘‘𑀓𑀁 𑀦𑀼 𑀉𑀤𑁆𑀤𑀺𑀲𑁆𑀲 𑀫𑀼𑀡𑁆𑀟𑀸𑀲𑀺, 𑀲𑀫𑀡𑀻 𑀯𑀺𑀬 𑀤𑀺𑀲𑁆𑀲𑀲𑀺;

𑀦 𑀘 𑀭𑁄𑀘𑁂𑀲𑀺 𑀧𑀸𑀲𑀡𑁆𑀟𑀁, 𑀓𑀺𑀫𑀺𑀯 𑀘𑀭𑀲𑀺 𑀫𑁄𑀫𑀽𑀳𑀸’’𑀢𑀺.

‘‘𑀇𑀢𑁄 𑀩𑀳𑀺𑀤𑁆𑀥𑀸 𑀧𑀸𑀲𑀡𑁆𑀟𑀸, 𑀤𑀺𑀝𑁆𑀞𑀻𑀲𑀼 𑀧𑀲𑀻𑀤𑀦𑁆𑀢𑀺 𑀢𑁂;

𑀦 𑀢𑁂𑀲𑀁 𑀥𑀫𑁆𑀫𑀁 𑀭𑁄𑀘𑁂𑀫𑀺, 𑀢𑁂 𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑀸.

‘‘𑀅𑀢𑁆𑀣𑀺 𑀲𑀓𑁆𑀬𑀓𑀼𑀮𑁂 𑀚𑀸𑀢𑁄, 𑀩𑀼𑀤𑁆𑀥𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄;

𑀲𑀩𑁆𑀩𑀸𑀪𑀺𑀪𑀽 𑀫𑀸𑀭𑀦𑀼𑀤𑁄, 𑀲𑀩𑁆𑀩𑀢𑁆𑀣𑀫𑀧𑀭𑀸𑀚𑀺𑀢𑁄.

‘‘𑀲𑀩𑁆𑀩𑀢𑁆𑀣 𑀫𑀼𑀢𑁆𑀢𑁄 𑀅𑀲𑀺𑀢𑁄, 𑀲𑀩𑁆𑀩𑀁 𑀧𑀲𑁆𑀲𑀢𑀺 𑀘𑀓𑁆𑀔𑀼𑀫𑀸;

𑀲𑀩𑁆𑀩𑀓𑀫𑁆𑀫𑀓𑁆𑀔𑀬𑀁 𑀧𑀢𑁆𑀢𑁄, 𑀯𑀺𑀫𑀼𑀢𑁆𑀢𑁄 𑀉𑀧𑀥𑀺𑀲𑀗𑁆𑀔𑀬𑁂;

𑀲𑁄 𑀫𑀬𑁆𑀳𑀁 𑀪𑀕𑀯𑀸 𑀲𑀢𑁆𑀣𑀸, 𑀢𑀲𑁆𑀲 𑀭𑁄𑀘𑁂𑀫𑀺 𑀲𑀸𑀲𑀦’’𑀦𑁆𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀲𑀻𑀲𑀼𑀧𑀘𑀸𑀮𑀸 𑀪𑀺𑀓𑁆𑀔𑀼𑀦𑀻’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁯. 𑀲𑁂𑀮𑀸𑀲𑀼𑀢𑁆𑀢𑀁

𑁧𑁭𑁦. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀲𑁂𑀮𑀸 𑀪𑀺𑀓𑁆𑀔𑀼𑀦𑀻 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸…𑀧𑁂… 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀲𑁂𑀮𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄…𑀧𑁂… 𑀲𑁂𑀮𑀁 𑀪𑀺𑀓𑁆𑀔𑀼𑀦𑀺𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀓𑁂𑀦𑀺𑀤𑀁 𑀧𑀓𑀢𑀁 𑀩𑀺𑀫𑁆𑀩𑀁, 𑀓𑁆𑀯𑀦𑀼 [𑀓𑁆𑀯𑀦𑁆𑀦𑀼 (𑀲𑀻. 𑀧𑀻.), 𑀓𑁆𑀯𑀘𑀺 (𑀲𑁆𑀬𑀸. 𑀓𑀁. 𑀓.)] 𑀩𑀺𑀫𑁆𑀩𑀲𑁆𑀲 𑀓𑀸𑀭𑀓𑁄;

𑀓𑁆𑀯𑀦𑀼 𑀩𑀺𑀫𑁆𑀩𑀁 𑀲𑀫𑀼𑀧𑁆𑀧𑀦𑁆𑀦𑀁, 𑀓𑁆𑀯𑀦𑀼 𑀩𑀺𑀫𑁆𑀩𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺.

𑀅𑀣 𑀔𑁄 𑀲𑁂𑀮𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀏𑀢𑀤𑀳𑁄𑀲𑀺 𑁋 ‘‘𑀓𑁄 𑀦𑀼 𑀔𑁆𑀯𑀸𑀬𑀁 𑀫𑀦𑀼𑀲𑁆𑀲𑁄 𑀯𑀸 𑀅𑀫𑀦𑀼𑀲𑁆𑀲𑁄 𑀯𑀸 𑀕𑀸𑀣𑀁 𑀪𑀸𑀲𑀢𑀻’’𑀢𑀺? 𑀅𑀣 𑀔𑁄 𑀲𑁂𑀮𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀏𑀢𑀤𑀳𑁄𑀲𑀺 𑁋 ‘‘𑀫𑀸𑀭𑁄 𑀔𑁄 𑀅𑀬𑀁 𑀧𑀸𑀧𑀺𑀫𑀸 𑀫𑀫 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄 𑀲𑀫𑀸𑀥𑀺𑀫𑁆𑀳𑀸 𑀘𑀸𑀯𑁂𑀢𑀼𑀓𑀸𑀫𑁄 𑀕𑀸𑀣𑀁 𑀪𑀸𑀲𑀢𑀻’’𑀢𑀺. 𑀅𑀣 𑀔𑁄 𑀲𑁂𑀮𑀸 𑀪𑀺𑀓𑁆𑀔𑀼𑀦𑀻 ‘‘𑀫𑀸𑀭𑁄 𑀅𑀬𑀁 𑀧𑀸𑀧𑀺𑀫𑀸’’ 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀕𑀸𑀣𑀸𑀳𑀺 𑀧𑀘𑁆𑀘𑀪𑀸𑀲𑀺 𑁋

‘‘𑀦𑀬𑀺𑀤𑀁 𑀅𑀢𑁆𑀢𑀓𑀢𑀁 [𑀦𑀬𑀺𑀤𑀁 𑀧𑀓𑀢𑀁 (𑀲𑁆𑀬𑀸. 𑀓𑀁.)] 𑀩𑀺𑀫𑁆𑀩𑀁, 𑀦𑀬𑀺𑀤𑀁 𑀧𑀭𑀓𑀢𑀁 [𑀦𑀬𑀺𑀤𑀁 𑀧𑀓𑀢𑀁 (𑀲𑁆𑀬𑀸. 𑀓𑀁.)] 𑀅𑀖𑀁;

𑀳𑁂𑀢𑀼𑀁 𑀧𑀝𑀺𑀘𑁆𑀘 𑀲𑀫𑁆𑀪𑀽𑀢𑀁, 𑀳𑁂𑀢𑀼𑀪𑀗𑁆𑀕𑀸 𑀦𑀺𑀭𑀼𑀚𑁆𑀛𑀢𑀺.

‘‘𑀬𑀣𑀸 𑀅𑀜𑁆𑀜𑀢𑀭𑀁 𑀩𑀻𑀚𑀁, 𑀔𑁂𑀢𑁆𑀢𑁂 𑀯𑀼𑀢𑁆𑀢𑀁 𑀯𑀺𑀭𑀽𑀳𑀢𑀺;

𑀧𑀣𑀯𑀻𑀭𑀲𑀜𑁆𑀘𑀸𑀕𑀫𑁆𑀫, 𑀲𑀺𑀦𑁂𑀳𑀜𑁆𑀘 𑀢𑀤𑀽𑀪𑀬𑀁.

‘‘𑀏𑀯𑀁 𑀔𑀦𑁆𑀥𑀸 𑀘 𑀥𑀸𑀢𑀼𑀬𑁄, 𑀙 𑀘 𑀆𑀬𑀢𑀦𑀸 𑀇𑀫𑁂;

𑀳𑁂𑀢𑀼𑀁 𑀧𑀝𑀺𑀘𑁆𑀘 𑀲𑀫𑁆𑀪𑀽𑀢𑀸, 𑀳𑁂𑀢𑀼𑀪𑀗𑁆𑀕𑀸 𑀦𑀺𑀭𑀼𑀚𑁆𑀛𑀭𑁂’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀲𑁂𑀮𑀸 𑀪𑀺𑀓𑁆𑀔𑀼𑀦𑀻’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁧𑁦. 𑀯𑀚𑀺𑀭𑀸𑀲𑀼𑀢𑁆𑀢𑀁

𑁧𑁭𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀯𑀚𑀺𑀭𑀸 𑀪𑀺𑀓𑁆𑀔𑀼𑀦𑀻 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀬𑁂𑀦 𑀅𑀦𑁆𑀥𑀯𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺 𑀤𑀺𑀯𑀸𑀯𑀺𑀳𑀸𑀭𑀸𑀬. 𑀅𑀦𑁆𑀥𑀯𑀦𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀯𑀚𑀺𑀭𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄 𑀲𑀫𑀸𑀥𑀺𑀫𑁆𑀳𑀸 𑀘𑀸𑀯𑁂𑀢𑀼𑀓𑀸𑀫𑁄 𑀬𑁂𑀦 𑀯𑀚𑀺𑀭𑀸 𑀪𑀺𑀓𑁆𑀔𑀼𑀦𑀻 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀚𑀺𑀭𑀁 𑀪𑀺𑀓𑁆𑀔𑀼𑀦𑀺𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀓𑁂𑀦𑀸𑀬𑀁 𑀧𑀓𑀢𑁄 𑀲𑀢𑁆𑀢𑁄, 𑀓𑀼𑀯𑀁 𑀲𑀢𑁆𑀢𑀲𑁆𑀲 𑀓𑀸𑀭𑀓𑁄;

𑀓𑀼𑀯𑀁 𑀲𑀢𑁆𑀢𑁄 𑀲𑀫𑀼𑀧𑁆𑀧𑀦𑁆𑀦𑁄, 𑀓𑀼𑀯𑀁 𑀲𑀢𑁆𑀢𑁄 𑀦𑀺𑀭𑀼𑀚𑁆𑀛𑀢𑀻’’𑀢𑀺.

𑀅𑀣 𑀔𑁄 𑀯𑀚𑀺𑀭𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀏𑀢𑀤𑀳𑁄𑀲𑀺 𑁋 ‘‘𑀓𑁄 𑀦𑀼 𑀔𑁆𑀯𑀸𑀬𑀁 𑀫𑀦𑀼𑀲𑁆𑀲𑁄 𑀯𑀸 𑀅𑀫𑀦𑀼𑀲𑁆𑀲𑁄 𑀯𑀸 𑀕𑀸𑀣𑀁 𑀪𑀸𑀲𑀢𑀻’’𑀢𑀺? 𑀅𑀣 𑀔𑁄 𑀯𑀚𑀺𑀭𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀏𑀢𑀤𑀳𑁄𑀲𑀺 𑁋 ‘‘𑀫𑀸𑀭𑁄 𑀔𑁄 𑀅𑀬𑀁 𑀧𑀸𑀧𑀺𑀫𑀸 𑀫𑀫 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄 𑀲𑀫𑀸𑀥𑀺𑀫𑁆𑀳𑀸 𑀘𑀸𑀯𑁂𑀢𑀼𑀓𑀸𑀫𑁄 𑀕𑀸𑀣𑀁 𑀪𑀸𑀲𑀢𑀻’’𑀢𑀺. 𑀅𑀣 𑀔𑁄 𑀯𑀚𑀺𑀭𑀸 𑀪𑀺𑀓𑁆𑀔𑀼𑀦𑀻 ‘‘𑀫𑀸𑀭𑁄 𑀅𑀬𑀁 𑀧𑀸𑀧𑀺𑀫𑀸’’ 𑀇𑀢𑀺 𑀯𑀺𑀤𑀺𑀢𑁆𑀯𑀸, 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀕𑀸𑀣𑀸𑀳𑀺 𑀧𑀘𑁆𑀘𑀪𑀸𑀲𑀺 𑁋

‘‘𑀓𑀺𑀁 𑀦𑀼 𑀲𑀢𑁆𑀢𑁄𑀢𑀺 𑀧𑀘𑁆𑀘𑁂𑀲𑀺, 𑀫𑀸𑀭 𑀤𑀺𑀝𑁆𑀞𑀺𑀕𑀢𑀁 𑀦𑀼 𑀢𑁂;

𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑁄𑀬𑀁, 𑀦𑀬𑀺𑀥 𑀲𑀢𑁆𑀢𑀼𑀧𑀮𑀩𑁆𑀪𑀢𑀺.

‘‘𑀬𑀣𑀸 𑀳𑀺 𑀅𑀗𑁆𑀕𑀲𑀫𑁆𑀪𑀸𑀭𑀸, 𑀳𑁄𑀢𑀺 𑀲𑀤𑁆𑀤𑁄 𑀭𑀣𑁄 𑀇𑀢𑀺;

𑀏𑀯𑀁 𑀔𑀦𑁆𑀥𑁂𑀲𑀼 𑀲𑀦𑁆𑀢𑁂𑀲𑀼, 𑀳𑁄𑀢𑀺 𑀲𑀢𑁆𑀢𑁄𑀢𑀺 𑀲𑀫𑁆𑀫𑀼𑀢𑀺 [𑀲𑀫𑁆𑀫𑀢𑀺 (𑀲𑁆𑀬𑀸. 𑀓𑀁.)].

‘‘𑀤𑀼𑀓𑁆𑀔𑀫𑁂𑀯 𑀳𑀺 𑀲𑀫𑁆𑀪𑁄𑀢𑀺, 𑀤𑀼𑀓𑁆𑀔𑀁 𑀢𑀺𑀝𑁆𑀞𑀢𑀺 𑀯𑁂𑀢𑀺 𑀘;

𑀦𑀸𑀜𑁆𑀜𑀢𑁆𑀭 𑀤𑀼𑀓𑁆𑀔𑀸 𑀲𑀫𑁆𑀪𑁄𑀢𑀺, 𑀦𑀸𑀜𑁆𑀜𑀁 𑀤𑀼𑀓𑁆𑀔𑀸 𑀦𑀺𑀭𑀼𑀚𑁆𑀛𑀢𑀻’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀯𑀚𑀺𑀭𑀸 𑀪𑀺𑀓𑁆𑀔𑀼𑀦𑀻’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑀪𑀺𑀓𑁆𑀔𑀼𑀦𑀻𑀲𑀁𑀬𑀼𑀢𑁆𑀢𑀁 𑀲𑀫𑀢𑁆𑀢𑀁.