𑁬. 𑀩𑁆𑀭𑀳𑁆𑀫𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀯𑀕𑁆𑀕𑁄

𑁧. 𑀩𑁆𑀭𑀳𑁆𑀫𑀸𑀬𑀸𑀘𑀦𑀲𑀼𑀢𑁆𑀢𑀁

𑁧𑁭𑁨. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀉𑀭𑀼𑀯𑁂𑀮𑀸𑀬𑀁 𑀯𑀺𑀳𑀭𑀢𑀺 𑀦𑀚𑁆𑀚𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄. 𑀅𑀣 𑀔𑁄 𑀪𑀕𑀯𑀢𑁄 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀅𑀥𑀺𑀕𑀢𑁄 𑀔𑁄 𑀫𑁆𑀬𑀸𑀬𑀁 𑀥𑀫𑁆𑀫𑁄 𑀕𑀫𑁆𑀪𑀻𑀭𑁄 𑀤𑀼𑀤𑁆𑀤𑀲𑁄 𑀤𑀼𑀭𑀦𑀼𑀩𑁄𑀥𑁄 𑀲𑀦𑁆𑀢𑁄 𑀧𑀡𑀻𑀢𑁄 𑀅𑀢𑀓𑁆𑀓𑀸𑀯𑀘𑀭𑁄 𑀦𑀺𑀧𑀼𑀡𑁄 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑁄. 𑀆𑀮𑀬𑀭𑀸𑀫𑀸 𑀔𑁄 𑀧𑀦𑀸𑀬𑀁 𑀧𑀚𑀸 𑀆𑀮𑀬𑀭𑀢𑀸 𑀆𑀮𑀬𑀲𑀫𑁆𑀫𑀼𑀤𑀺𑀢𑀸. 𑀆𑀮𑀬𑀭𑀸𑀫𑀸𑀬 𑀔𑁄 𑀧𑀦 𑀧𑀚𑀸𑀬 𑀆𑀮𑀬𑀭𑀢𑀸𑀬 𑀆𑀮𑀬𑀲𑀫𑁆𑀫𑀼𑀤𑀺𑀢𑀸𑀬 𑀤𑀼𑀤𑁆𑀤𑀲𑀁 𑀇𑀤𑀁 𑀞𑀸𑀦𑀁 𑀬𑀤𑀺𑀤𑀁 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀇𑀤𑀫𑁆𑀧𑀺 𑀔𑁄 𑀞𑀸𑀦𑀁 𑀤𑀼𑀤𑁆𑀤𑀲𑀁 𑀬𑀤𑀺𑀤𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀸𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁; 𑀧𑀭𑁂 𑀘 𑀫𑁂 𑀦 𑀆𑀚𑀸𑀦𑁂𑀬𑁆𑀬𑀼𑀁; 𑀲𑁄 𑀫𑀫𑀲𑁆𑀲 𑀓𑀺𑀮𑀫𑀣𑁄, 𑀲𑀸 𑀫𑀫𑀲𑁆𑀲 𑀯𑀺𑀳𑁂𑀲𑀸’’𑀢𑀺. 𑀅𑀧𑀺𑀲𑁆𑀲𑀼 𑀪𑀕𑀯𑀦𑁆𑀢𑀁 𑀇𑀫𑀸 𑀅𑀦𑀘𑁆𑀙𑀭𑀺𑀬𑀸 𑀕𑀸𑀣𑀸𑀬𑁄 𑀧𑀝𑀺𑀪𑀁𑀲𑀼 𑀧𑀼𑀩𑁆𑀩𑁂 𑀅𑀲𑁆𑀲𑀼𑀢𑀧𑀼𑀩𑁆𑀩𑀸 𑁋

‘‘𑀓𑀺𑀘𑁆𑀙𑁂𑀦 𑀫𑁂 𑀅𑀥𑀺𑀕𑀢𑀁, 𑀳𑀮𑀁 𑀤𑀸𑀦𑀺 𑀧𑀓𑀸𑀲𑀺𑀢𑀼𑀁;

𑀭𑀸𑀕𑀤𑁄𑀲𑀧𑀭𑁂𑀢𑁂𑀳𑀺, 𑀦𑀸𑀬𑀁 𑀥𑀫𑁆𑀫𑁄 𑀲𑀼𑀲𑀫𑁆𑀩𑀼𑀥𑁄.

‘‘𑀧𑀝𑀺𑀲𑁄𑀢𑀕𑀸𑀫𑀺𑀁 𑀦𑀺𑀧𑀼𑀡𑀁, 𑀕𑀫𑁆𑀪𑀻𑀭𑀁 𑀤𑀼𑀤𑁆𑀤𑀲𑀁 𑀅𑀡𑀼𑀁;

𑀭𑀸𑀕𑀭𑀢𑁆𑀢𑀸 𑀦 𑀤𑀓𑁆𑀔𑀦𑁆𑀢𑀺, 𑀢𑀫𑁄𑀔𑀦𑁆𑀥𑁂𑀦 𑀆𑀯𑀼𑀝𑀸’’𑀢𑀺 [𑀢𑀫𑁄𑀓𑁆𑀔𑀦𑁆𑀥𑁂𑀦 𑀆𑀯𑀼𑀢𑀸𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)].

𑀇𑀢𑀺𑀳 𑀪𑀕𑀯𑀢𑁄 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑁄 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺, 𑀦𑁄 𑀥𑀫𑁆𑀫𑀤𑁂𑀲𑀦𑀸𑀬.

𑀅𑀣 𑀔𑁄 𑀩𑁆𑀭𑀳𑁆𑀫𑀼𑀦𑁄 𑀲𑀳𑀫𑁆𑀧𑀢𑀺𑀲𑁆𑀲 𑀪𑀕𑀯𑀢𑁄 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀏𑀢𑀤𑀳𑁄𑀲𑀺 𑁋 ‘‘𑀦𑀲𑁆𑀲𑀢𑀺 𑀯𑀢 𑀪𑁄 𑀮𑁄𑀓𑁄, 𑀯𑀺𑀦𑀲𑁆𑀲𑀢𑀺 𑀯𑀢 𑀪𑁄 𑀮𑁄𑀓𑁄, 𑀬𑀢𑁆𑀭 𑀳𑀺 𑀦𑀸𑀫 𑀢𑀣𑀸𑀕𑀢𑀲𑁆𑀲 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺 [𑀦𑀫𑀺𑀲𑁆𑀲𑀢𑀺 (?)], 𑀦𑁄 𑀥𑀫𑁆𑀫𑀤𑁂𑀲𑀦𑀸𑀬𑀸’’𑀢𑀺. 𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 [𑀲𑀫𑁆𑀫𑀺𑀜𑁆𑀚𑀺𑀢𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬 𑀏𑀯𑀫𑁂𑀯 𑁋 𑀩𑁆𑀭𑀳𑁆𑀫𑀮𑁄𑀓𑁂 𑀅𑀦𑁆𑀢𑀭𑀳𑀺𑀢𑁄 𑀪𑀕𑀯𑀢𑁄 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀤𑀓𑁆𑀔𑀺𑀡𑀚𑀸𑀡𑀼𑀫𑀡𑁆𑀟𑀮𑀁 𑀧𑀣𑀯𑀺𑀬𑀁 𑀦𑀺𑀳𑀦𑁆𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀤𑁂𑀲𑁂𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀥𑀫𑁆𑀫𑀁, 𑀤𑁂𑀲𑁂𑀢𑀼 𑀲𑀼𑀕𑀢𑁄 𑀥𑀫𑁆𑀫𑀁. 𑀲𑀦𑁆𑀢𑀺 𑀲𑀢𑁆𑀢𑀸 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸, 𑀅𑀲𑁆𑀲𑀯𑀦𑀢𑀸 𑀥𑀫𑁆𑀫𑀲𑁆𑀲 𑀧𑀭𑀺𑀳𑀸𑀬𑀦𑁆𑀢𑀺. 𑀪𑀯𑀺𑀲𑁆𑀲𑀦𑁆𑀢𑀺 𑀥𑀫𑁆𑀫𑀲𑁆𑀲 𑀅𑀜𑁆𑀜𑀸𑀢𑀸𑀭𑁄’’𑀢𑀺. 𑀇𑀤𑀫𑀯𑁄𑀘 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺, 𑀇𑀤𑀁 𑀯𑀢𑁆𑀯𑀸 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑁋

‘‘𑀧𑀸𑀢𑀼𑀭𑀳𑁄𑀲𑀺 𑀫𑀕𑀥𑁂𑀲𑀼 𑀧𑀼𑀩𑁆𑀩𑁂,

𑀥𑀫𑁆𑀫𑁄 𑀅𑀲𑀼𑀤𑁆𑀥𑁄 𑀲𑀫𑀮𑁂𑀳𑀺 𑀘𑀺𑀦𑁆𑀢𑀺𑀢𑁄;

𑀅𑀧𑀸𑀧𑀼𑀭𑁂𑀢𑀁 [𑀅𑀯𑀸𑀧𑀼𑀭𑁂𑀢𑀁 (𑀲𑀻.)] 𑀅𑀫𑀢𑀲𑁆𑀲 𑀤𑁆𑀯𑀸𑀭𑀁,

𑀲𑀼𑀡𑀦𑁆𑀢𑀼 𑀥𑀫𑁆𑀫𑀁 𑀯𑀺𑀫𑀮𑁂𑀦𑀸𑀦𑀼𑀩𑀼𑀤𑁆𑀥𑀁.

‘‘𑀲𑁂𑀮𑁂 𑀬𑀣𑀸 𑀧𑀩𑁆𑀩𑀢𑀫𑀼𑀤𑁆𑀥𑀦𑀺𑀝𑁆𑀞𑀺𑀢𑁄,

𑀬𑀣𑀸𑀧𑀺 𑀧𑀲𑁆𑀲𑁂 𑀚𑀦𑀢𑀁 𑀲𑀫𑀦𑁆𑀢𑀢𑁄;

𑀢𑀣𑀽𑀧𑀫𑀁 𑀥𑀫𑁆𑀫𑀫𑀬𑀁 𑀲𑀼𑀫𑁂𑀥,

𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀲𑀫𑀦𑁆𑀢𑀘𑀓𑁆𑀔𑀼;

𑀲𑁄𑀓𑀸𑀯𑀢𑀺𑀡𑁆𑀡𑀁 [𑀲𑁄𑀓𑀸𑀯𑀓𑀺𑀡𑁆𑀡𑀁 (𑀲𑀻.)] 𑀚𑀦𑀢𑀫𑀧𑁂𑀢𑀲𑁄𑀓𑁄,

𑀅𑀯𑁂𑀓𑁆𑀔𑀲𑁆𑀲𑀼 𑀚𑀸𑀢𑀺𑀚𑀭𑀸𑀪𑀺𑀪𑀽𑀢𑀁.

‘‘𑀉𑀝𑁆𑀞𑁂𑀳𑀺 𑀯𑀻𑀭 𑀯𑀺𑀚𑀺𑀢𑀲𑀗𑁆𑀕𑀸𑀫,

𑀲𑀢𑁆𑀣𑀯𑀸𑀳 𑀅𑀦𑀡 [𑀅𑀡𑀡 (𑀭𑀽𑀧𑀲𑀺𑀤𑁆𑀥𑀺𑀝𑀻𑀓𑀸)] 𑀯𑀺𑀘𑀭 𑀮𑁄𑀓𑁂;

𑀤𑁂𑀲𑀲𑁆𑀲𑀼 [𑀤𑁂𑀲𑁂𑀢𑀼 (𑀲𑁆𑀬𑀸. 𑀓𑀁. 𑀧𑀻. 𑀓.)] 𑀪𑀕𑀯𑀸 𑀥𑀫𑁆𑀫𑀁,

𑀅𑀜𑁆𑀜𑀸𑀢𑀸𑀭𑁄 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀩𑁆𑀭𑀳𑁆𑀫𑀼𑀦𑁄 𑀘 𑀅𑀚𑁆𑀛𑁂𑀲𑀦𑀁 𑀯𑀺𑀤𑀺𑀢𑁆𑀯𑀸 𑀲𑀢𑁆𑀢𑁂𑀲𑀼 𑀘 𑀓𑀸𑀭𑀼𑀜𑁆𑀜𑀢𑀁 𑀧𑀝𑀺𑀘𑁆𑀘 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀲𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀲𑀢𑁆𑀢𑁂 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂, 𑀅𑀧𑁆𑀧𑁂𑀓𑀘𑁆𑀘𑁂 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁂 𑀯𑀺𑀳𑀭𑀦𑁆𑀢𑁂, 𑀅𑀧𑁆𑀧𑁂𑀓𑀘𑁆𑀘𑁂 𑀦 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁂 [𑀤𑀲𑁆𑀲𑀸𑀯𑀺𑀦𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀯𑀺𑀳𑀭𑀦𑁆𑀢𑁂. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀉𑀧𑁆𑀧𑀮𑀺𑀦𑀺𑀬𑀁 𑀯𑀸 𑀧𑀤𑀼𑀫𑀺𑀦𑀺𑀬𑀁 𑀯𑀸 𑀧𑀼𑀡𑁆𑀟𑀭𑀻𑀓𑀺𑀦𑀺𑀬𑀁 𑀯𑀸 𑀅𑀧𑁆𑀧𑁂𑀓𑀘𑁆𑀘𑀸𑀦𑀺 𑀉𑀧𑁆𑀧𑀮𑀸𑀦𑀺 𑀯𑀸 𑀧𑀤𑀼𑀫𑀸𑀦𑀺 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀺 𑀯𑀸 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂 𑀲𑀁𑀯𑀟𑁆𑀠𑀸𑀦𑀺 𑀉𑀤𑀓𑀸𑀦𑀼𑀕𑁆𑀕𑀢𑀸𑀦𑀺 𑀅𑀦𑁆𑀢𑁄 𑀦𑀺𑀫𑀼𑀕𑁆𑀕𑀧𑁄𑀲𑀻𑀦𑀺, 𑀅𑀧𑁆𑀧𑁂𑀓𑀘𑁆𑀘𑀸𑀦𑀺 𑀉𑀧𑁆𑀧𑀮𑀸𑀦𑀺 𑀯𑀸 𑀧𑀤𑀼𑀫𑀸𑀦𑀺 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀺 𑀯𑀸 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂 𑀲𑀁𑀯𑀟𑁆𑀠𑀸𑀦𑀺 𑀲𑀫𑁄𑀤𑀓𑀁 𑀞𑀺𑀢𑀸𑀦𑀺, 𑀅𑀧𑁆𑀧𑁂𑀓𑀘𑁆𑀘𑀸𑀦𑀺 𑀉𑀧𑁆𑀧𑀮𑀸𑀦𑀺 𑀯𑀸 𑀧𑀤𑀼𑀫𑀸𑀦𑀺 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀺 𑀯𑀸 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂 𑀲𑀁𑀯𑀟𑁆𑀠𑀸𑀦𑀺 𑀉𑀤𑀓𑀸 𑀅𑀘𑁆𑀘𑀼𑀕𑁆𑀕𑀫𑁆𑀫 𑀞𑀺𑀢𑀸𑀦𑀺 [𑀢𑀺𑀝𑁆𑀞𑀦𑁆𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀅𑀦𑀼𑀧𑀮𑀺𑀢𑁆𑀢𑀸𑀦𑀺 𑀉𑀤𑀓𑁂𑀦; 𑀏𑀯𑀫𑁂𑀯 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲 𑀲𑀢𑁆𑀢𑁂 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂, 𑀅𑀧𑁆𑀧𑁂𑀓𑀘𑁆𑀘𑁂 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁂 𑀯𑀺𑀳𑀭𑀦𑁆𑀢𑁂, 𑀅𑀧𑁆𑀧𑁂𑀓𑀘𑁆𑀘𑁂 𑀦 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁂 𑀯𑀺𑀳𑀭𑀦𑁆𑀢𑁂. 𑀤𑀺𑀲𑁆𑀯𑀸𑀦 𑀩𑁆𑀭𑀳𑁆𑀫𑀸𑀦𑀁 𑀲𑀳𑀫𑁆𑀧𑀢𑀺𑀁 𑀕𑀸𑀣𑀸𑀬 𑀧𑀘𑁆𑀘𑀪𑀸𑀲𑀺 𑁋

‘‘𑀅𑀧𑀸𑀭𑀼𑀢𑀸 𑀢𑁂𑀲𑀁 𑀅𑀫𑀢𑀲𑁆𑀲 𑀤𑁆𑀯𑀸𑀭𑀸,

𑀬𑁂 𑀲𑁄𑀢𑀯𑀦𑁆𑀢𑁄 𑀧𑀫𑀼𑀜𑁆𑀘𑀦𑁆𑀢𑀼 𑀲𑀤𑁆𑀥𑀁;

𑀯𑀺𑀳𑀺𑀁𑀲𑀲𑀜𑁆𑀜𑀻 𑀧𑀕𑀼𑀡𑀁 𑀦 𑀪𑀸𑀲𑀺𑀁,

𑀥𑀫𑁆𑀫𑀁 𑀧𑀡𑀻𑀢𑀁 𑀫𑀦𑀼𑀚𑁂𑀲𑀼 𑀩𑁆𑀭𑀳𑁆𑀫𑁂’’𑀢𑀺.

𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 ‘‘𑀓𑀢𑀸𑀯𑀓𑀸𑀲𑁄 𑀔𑁄𑀫𑁆𑀳𑀺 𑀪𑀕𑀯𑀢𑀸 𑀥𑀫𑁆𑀫𑀤𑁂𑀲𑀦𑀸𑀬𑀸’’𑀢𑀺 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁨. 𑀕𑀸𑀭𑀯𑀲𑀼𑀢𑁆𑀢𑀁

𑁧𑁭𑁩. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀉𑀭𑀼𑀯𑁂𑀮𑀸𑀬𑀁 𑀯𑀺𑀳𑀭𑀢𑀺 𑀦𑀚𑁆𑀚𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄. 𑀅𑀣 𑀔𑁄 𑀪𑀕𑀯𑀢𑁄 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀤𑀼𑀓𑁆𑀔𑀁 𑀔𑁄 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀓𑀁 𑀦𑀼 𑀔𑁆𑀯𑀸𑀳𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 [𑀕𑀭𑀼𑀓𑀢𑁆𑀯𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺?

𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀧𑀭𑀺𑀧𑀼𑀡𑁆𑀡𑀲𑁆𑀲 𑀔𑁄 𑀲𑀻𑀮𑀓𑁆𑀔𑀦𑁆𑀥𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸 𑀅𑀜𑁆𑀜𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬𑀁. 𑀦 𑀔𑁄 𑀧𑀦𑀸𑀳𑀁 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀢𑁆𑀢𑀦𑀸 𑀲𑀻𑀮𑀲𑀫𑁆𑀧𑀦𑁆𑀦𑀢𑀭𑀁 𑀅𑀜𑁆𑀜𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸, 𑀬𑀫𑀳𑀁 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬𑀁.

‘‘𑀅𑀧𑀭𑀺𑀧𑀼𑀡𑁆𑀡𑀲𑁆𑀲 𑀔𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸 𑀅𑀜𑁆𑀜𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬𑀁. 𑀦 𑀔𑁄 𑀧𑀦𑀸𑀳𑀁 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂…𑀧𑁂… 𑀅𑀢𑁆𑀢𑀦𑀸 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀢𑀭𑀁 𑀅𑀜𑁆𑀜𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸, 𑀬𑀫𑀳𑀁 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬𑀁.

‘‘𑀅𑀧𑀭𑀺𑀧𑀼𑀡𑁆𑀡𑀲𑁆𑀲 𑀧𑀜𑁆𑀜𑀸𑀓𑁆𑀔𑀦𑁆𑀥𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸 𑀅𑀜𑁆𑀜𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬𑀁. 𑀦 𑀔𑁄 𑀧𑀦𑀸𑀳𑀁 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂…𑀧𑁂… 𑀅𑀢𑁆𑀢𑀦𑀸 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀢𑀭𑀁 𑀅𑀜𑁆𑀜𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸, 𑀬𑀫𑀳𑀁 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬𑀁.

‘‘𑀅𑀧𑀭𑀺𑀧𑀼𑀡𑁆𑀡𑀲𑁆𑀲 𑀔𑁄 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸 𑀅𑀜𑁆𑀜𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬𑀁. 𑀦 𑀔𑁄 𑀧𑀦𑀸𑀳𑀁 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂…𑀧𑁂… 𑀅𑀢𑁆𑀢𑀦𑀸 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀦𑁆𑀦𑀢𑀭𑀁 𑀅𑀜𑁆𑀜𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸, 𑀬𑀫𑀳𑀁 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬𑀁.

‘‘𑀅𑀧𑀭𑀺𑀧𑀼𑀡𑁆𑀡𑀲𑁆𑀲 𑀔𑁄 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸 𑀅𑀜𑁆𑀜𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬𑀁. 𑀦 𑀔𑁄 𑀧𑀦𑀸𑀳𑀁 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀢𑁆𑀢𑀦𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀢𑀭𑀁 𑀅𑀜𑁆𑀜𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸, 𑀬𑀫𑀳𑀁 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬𑀁. 𑀬𑀁𑀦𑀽𑀦𑀸𑀳𑀁 𑀬𑁆𑀯𑀸𑀬𑀁 𑀥𑀫𑁆𑀫𑁄 𑀫𑀬𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀢𑀫𑁂𑀯 𑀥𑀫𑁆𑀫𑀁 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀪𑀕𑀯𑀢𑁄 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬 𑀏𑀯𑀫𑁂𑀯 𑁋 𑀩𑁆𑀭𑀳𑁆𑀫𑀮𑁄𑀓𑁂 𑀅𑀦𑁆𑀢𑀭𑀳𑀺𑀢𑁄 𑀪𑀕𑀯𑀢𑁄 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀯𑀫𑁂𑀢𑀁, 𑀪𑀕𑀯𑀸, 𑀏𑀯𑀫𑁂𑀢𑀁, 𑀲𑀼𑀕𑀢! 𑀬𑁂𑀧𑀺 𑀢𑁂, 𑀪𑀦𑁆𑀢𑁂, 𑀅𑀳𑁂𑀲𑀼𑀁 𑀅𑀢𑀻𑀢𑀫𑀤𑁆𑀥𑀸𑀦𑀁 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀢𑁂𑀧𑀺 𑀪𑀕𑀯𑀦𑁆𑀢𑁄 𑀥𑀫𑁆𑀫𑀜𑁆𑀜𑁂𑀯 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀺𑀁𑀲𑀼; 𑀬𑁂𑀧𑀺 𑀢𑁂, 𑀪𑀦𑁆𑀢𑁂, 𑀪𑀯𑀺𑀲𑁆𑀲𑀦𑁆𑀢𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀢𑁂𑀧𑀺 𑀪𑀕𑀯𑀦𑁆𑀢𑁄 𑀥𑀫𑁆𑀫𑀜𑁆𑀜𑁂𑀯 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀺𑀲𑁆𑀲𑀦𑁆𑀢𑀺. 𑀪𑀕𑀯𑀸𑀧𑀺, 𑀪𑀦𑁆𑀢𑁂, 𑀏𑀢𑀭𑀳𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀥𑀫𑁆𑀫𑀜𑁆𑀜𑁂𑀯 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀽’’𑀢𑀺. 𑀇𑀤𑀫𑀯𑁄𑀘 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺, 𑀇𑀤𑀁 𑀯𑀢𑁆𑀯𑀸 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑁋

‘‘𑀬𑁂 𑀘 𑀅𑀢𑀻𑀢𑀸 𑀲𑀫𑁆𑀩𑀼𑀤𑁆𑀥𑀸, 𑀬𑁂 𑀘 𑀩𑀼𑀤𑁆𑀥𑀸 𑀅𑀦𑀸𑀕𑀢𑀸;

𑀬𑁄 𑀘𑁂𑀢𑀭𑀳𑀺 𑀲𑀫𑁆𑀩𑀼𑀤𑁆𑀥𑁄, 𑀩𑀳𑀽𑀦𑀁 [𑀩𑀳𑀼𑀦𑁆𑀦𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀲𑁄𑀓𑀦𑀸𑀲𑀦𑁄.

‘‘𑀲𑀩𑁆𑀩𑁂 𑀲𑀤𑁆𑀥𑀫𑁆𑀫𑀕𑀭𑀼𑀦𑁄, 𑀯𑀺𑀳𑀁𑀲𑀼 [𑀯𑀺𑀳𑀭𑀺𑀁𑀲𑀼 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀯𑀺𑀳𑀭𑀦𑁆𑀢𑀺 𑀘;

𑀢𑀣𑀸𑀧𑀺 𑀯𑀺𑀳𑀭𑀺𑀲𑁆𑀲𑀦𑁆𑀢𑀺, 𑀏𑀲𑀸 𑀩𑀼𑀤𑁆𑀥𑀸𑀦 𑀥𑀫𑁆𑀫𑀢𑀸.

‘‘𑀢𑀲𑁆𑀫𑀸 𑀳𑀺 𑀅𑀢𑁆𑀢𑀓𑀸𑀫𑁂𑀦 [𑀅𑀢𑁆𑀣𑀓𑀸𑀫𑁂𑀦 (𑀲𑀻. 𑀧𑀻. 𑀓.)], 𑀫𑀳𑀢𑁆𑀢𑀫𑀪𑀺𑀓𑀗𑁆𑀔𑀢𑀸;

𑀲𑀤𑁆𑀥𑀫𑁆𑀫𑁄 𑀕𑀭𑀼𑀓𑀸𑀢𑀩𑁆𑀩𑁄, 𑀲𑀭𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺.

𑁩. 𑀩𑁆𑀭𑀳𑁆𑀫𑀤𑁂𑀯𑀲𑀼𑀢𑁆𑀢𑀁

𑁧𑁭𑁪. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀺𑀲𑁆𑀲𑀸 𑀩𑁆𑀭𑀸𑀳𑁆𑀫𑀡𑀺𑀬𑀸 𑀩𑁆𑀭𑀳𑁆𑀫𑀤𑁂𑀯𑁄 𑀦𑀸𑀫 𑀧𑀼𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀩𑁆𑀭𑀳𑁆𑀫𑀤𑁂𑀯𑁄 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑁋 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺, 𑀢𑀤𑀦𑀼𑀢𑁆𑀢𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺. ‘‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’’𑀢𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄 𑀘 𑀧𑀦𑀸𑀬𑀲𑁆𑀫𑀸 𑀩𑁆𑀭𑀳𑁆𑀫𑀤𑁂𑀯𑁄 𑀅𑀭𑀳𑀢𑀁 𑀅𑀳𑁄𑀲𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀩𑁆𑀭𑀳𑁆𑀫𑀤𑁂𑀯𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀲𑀧𑀤𑀸𑀦𑀁 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑁄 𑀬𑁂𑀦 𑀲𑀓𑀫𑀸𑀢𑀼 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀩𑁆𑀭𑀳𑁆𑀫𑀤𑁂𑀯𑀲𑁆𑀲 𑀫𑀸𑀢𑀸 𑀩𑁆𑀭𑀸𑀳𑁆𑀫𑀡𑀻 𑀩𑁆𑀭𑀳𑁆𑀫𑀼𑀦𑁄 𑀆𑀳𑀼𑀢𑀺𑀁 𑀦𑀺𑀘𑁆𑀘𑀁 𑀧𑀕𑁆𑀕𑀡𑁆𑀳𑀸𑀢𑀺. 𑀅𑀣 𑀔𑁄 𑀩𑁆𑀭𑀳𑁆𑀫𑀼𑀦𑁄 𑀲𑀳𑀫𑁆𑀧𑀢𑀺𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀆𑀬𑀲𑁆𑀫𑀢𑁄 𑀩𑁆𑀭𑀳𑁆𑀫𑀤𑁂𑀯𑀲𑁆𑀲 𑀫𑀸𑀢𑀸 𑀩𑁆𑀭𑀸𑀳𑁆𑀫𑀡𑀻 𑀩𑁆𑀭𑀳𑁆𑀫𑀼𑀦𑁄 𑀆𑀳𑀼𑀢𑀺𑀁 𑀦𑀺𑀘𑁆𑀘𑀁 𑀧𑀕𑁆𑀕𑀡𑁆𑀳𑀸𑀢𑀺. 𑀬𑀁𑀦𑀽𑀦𑀸𑀳𑀁 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀁𑀯𑁂𑀚𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬 𑀏𑀯𑀫𑁂𑀯 𑁋 𑀩𑁆𑀭𑀳𑁆𑀫𑀮𑁄𑀓𑁂 𑀅𑀦𑁆𑀢𑀭𑀳𑀺𑀢𑁄 𑀆𑀬𑀲𑁆𑀫𑀢𑁄 𑀩𑁆𑀭𑀳𑁆𑀫𑀤𑁂𑀯𑀲𑁆𑀲 𑀫𑀸𑀢𑀼 𑀦𑀺𑀯𑁂𑀲𑀦𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀯𑁂𑀳𑀸𑀲𑀁 𑀞𑀺𑀢𑁄 𑀆𑀬𑀲𑁆𑀫𑀢𑁄 𑀩𑁆𑀭𑀳𑁆𑀫𑀤𑁂𑀯𑀲𑁆𑀲 𑀫𑀸𑀢𑀭𑀁 𑀩𑁆𑀭𑀸𑀳𑁆𑀫𑀡𑀺𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀤𑀽𑀭𑁂 𑀇𑀢𑁄 𑀩𑁆𑀭𑀸𑀳𑁆𑀫𑀡𑀺 𑀩𑁆𑀭𑀳𑁆𑀫𑀮𑁄𑀓𑁄,

𑀬𑀲𑁆𑀲𑀸𑀳𑀼𑀢𑀺𑀁 𑀧𑀕𑁆𑀕𑀡𑁆𑀳𑀸𑀲𑀺 𑀦𑀺𑀘𑁆𑀘𑀁;

𑀦𑁂𑀢𑀸𑀤𑀺𑀲𑁄 𑀩𑁆𑀭𑀸𑀳𑁆𑀫𑀡𑀺 𑀩𑁆𑀭𑀳𑁆𑀫𑀪𑀓𑁆𑀔𑁄,

𑀓𑀺𑀁 𑀚𑀧𑁆𑀧𑀲𑀺 𑀩𑁆𑀭𑀳𑁆𑀫𑀧𑀣𑀁 𑀅𑀚𑀸𑀦𑀁 [𑀅𑀚𑀸𑀦𑀦𑁆𑀢𑀻 (𑀲𑀻. 𑀧𑀻. 𑀓.)].

‘‘𑀏𑀲𑁄 𑀳𑀺 𑀢𑁂 𑀩𑁆𑀭𑀸𑀳𑁆𑀫𑀡𑀺 𑀩𑁆𑀭𑀳𑁆𑀫𑀤𑁂𑀯𑁄,

𑀦𑀺𑀭𑀽𑀧𑀥𑀺𑀓𑁄 𑀅𑀢𑀺𑀤𑁂𑀯𑀧𑀢𑁆𑀢𑁄;

𑀅𑀓𑀺𑀜𑁆𑀘𑀦𑁄 𑀪𑀺𑀓𑁆𑀔𑀼 𑀅𑀦𑀜𑁆𑀜𑀧𑁄𑀲𑀻,

𑀬𑁄 𑀢𑁂 𑀲𑁄 [𑀢𑁂 𑀲𑁄 (𑀲𑀻. 𑀧𑀻.), 𑀬𑁄 𑀢𑁂 𑀲 (?)] 𑀧𑀺𑀡𑁆𑀟𑀸𑀬 𑀖𑀭𑀁 𑀧𑀯𑀺𑀝𑁆𑀞𑁄.

‘‘𑀆𑀳𑀼𑀦𑁂𑀬𑁆𑀬𑁄 𑀯𑁂𑀤𑀕𑀼 𑀪𑀸𑀯𑀺𑀢𑀢𑁆𑀢𑁄,

𑀦𑀭𑀸𑀦𑀁 𑀤𑁂𑀯𑀸𑀦𑀜𑁆𑀘 𑀤𑀓𑁆𑀔𑀺𑀡𑁂𑀬𑁆𑀬𑁄;

𑀩𑀸𑀳𑀺𑀢𑁆𑀯𑀸 𑀧𑀸𑀧𑀸𑀦𑀺 𑀅𑀦𑀽𑀧𑀮𑀺𑀢𑁆𑀢𑁄,

𑀖𑀸𑀲𑁂𑀲𑀦𑀁 𑀇𑀭𑀺𑀬𑀢𑀺 𑀲𑀻𑀢𑀺𑀪𑀽𑀢𑁄.

‘‘𑀦 𑀢𑀲𑁆𑀲 𑀧𑀘𑁆𑀙𑀸 𑀦 𑀧𑀼𑀭𑀢𑁆𑀣𑀫𑀢𑁆𑀣𑀺,

𑀲𑀦𑁆𑀢𑁄 𑀯𑀺𑀥𑀽𑀫𑁄 𑀅𑀦𑀺𑀖𑁄 𑀦𑀺𑀭𑀸𑀲𑁄;

𑀦𑀺𑀓𑁆𑀔𑀺𑀢𑁆𑀢𑀤𑀡𑁆𑀟𑁄 𑀢𑀲𑀣𑀸𑀯𑀭𑁂𑀲𑀼,

𑀲𑁄 𑀢𑁆𑀬𑀸𑀳𑀼𑀢𑀺𑀁 𑀪𑀼𑀜𑁆𑀚𑀢𑀼 𑀅𑀕𑁆𑀕𑀧𑀺𑀡𑁆𑀟𑀁.

‘‘𑀯𑀺𑀲𑁂𑀦𑀺𑀪𑀽𑀢𑁄 𑀉𑀧𑀲𑀦𑁆𑀢𑀘𑀺𑀢𑁆𑀢𑁄,

𑀦𑀸𑀕𑁄𑀯 𑀤𑀦𑁆𑀢𑁄 𑀘𑀭𑀢𑀺 𑀅𑀦𑁂𑀚𑁄;

𑀪𑀺𑀓𑁆𑀔𑀼 𑀲𑀼𑀲𑀻𑀮𑁄 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄,

𑀲𑁄 𑀢𑁆𑀬𑀸𑀳𑀼𑀢𑀺𑀁 𑀪𑀼𑀜𑁆𑀚𑀢𑀼 𑀅𑀕𑁆𑀕𑀧𑀺𑀡𑁆𑀟𑀁.

‘‘𑀢𑀲𑁆𑀫𑀺𑀁 𑀧𑀲𑀦𑁆𑀦𑀸 𑀅𑀯𑀺𑀓𑀫𑁆𑀧𑀫𑀸𑀦𑀸,

𑀧𑀢𑀺𑀝𑁆𑀞𑀧𑁂𑀳𑀺 𑀤𑀓𑁆𑀔𑀺𑀡𑀁 𑀤𑀓𑁆𑀔𑀺𑀡𑁂𑀬𑁆𑀬𑁂;

𑀓𑀭𑁄𑀳𑀺 𑀧𑀼𑀜𑁆𑀜𑀁 𑀲𑀼𑀔𑀫𑀸𑀬𑀢𑀺𑀓𑀁,

𑀤𑀺𑀲𑁆𑀯𑀸 𑀫𑀼𑀦𑀺𑀁 𑀩𑁆𑀭𑀸𑀳𑁆𑀫𑀡𑀺 𑀑𑀖𑀢𑀺𑀡𑁆𑀡’’𑀦𑁆𑀢𑀺.

‘‘𑀢𑀲𑁆𑀫𑀺𑀁 𑀧𑀲𑀦𑁆𑀦𑀸 𑀅𑀯𑀺𑀓𑀫𑁆𑀧𑀫𑀸𑀦𑀸,

𑀧𑀢𑀺𑀝𑁆𑀞𑀧𑁂𑀲𑀺 𑀤𑀓𑁆𑀔𑀺𑀡𑀁 𑀤𑀓𑁆𑀔𑀺𑀡𑁂𑀬𑁆𑀬𑁂;

𑀅𑀓𑀸𑀲𑀺 𑀧𑀼𑀜𑁆𑀜𑀁 𑀲𑀼𑀔𑀫𑀸𑀬𑀢𑀺𑀓𑀁,

𑀤𑀺𑀲𑁆𑀯𑀸 𑀫𑀼𑀦𑀺𑀁 𑀩𑁆𑀭𑀸𑀳𑁆𑀫𑀡𑀻 𑀑𑀖𑀢𑀺𑀡𑁆𑀡’’𑀦𑁆𑀢𑀺.

𑁪. 𑀩𑀓𑀩𑁆𑀭𑀳𑁆𑀫𑀲𑀼𑀢𑁆𑀢𑀁

𑁧𑁭𑁫. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀩𑀓𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑁋 ‘‘𑀇𑀤𑀁 𑀦𑀺𑀘𑁆𑀘𑀁, 𑀇𑀤𑀁 𑀥𑀼𑀯𑀁, 𑀇𑀤𑀁 𑀲𑀲𑁆𑀲𑀢𑀁, 𑀇𑀤𑀁 𑀓𑁂𑀯𑀮𑀁, 𑀇𑀤𑀁 𑀅𑀘𑀯𑀦𑀥𑀫𑁆𑀫𑀁, 𑀇𑀤𑀜𑁆𑀳𑀺 𑀦 𑀚𑀸𑀬𑀢𑀺 𑀦 𑀚𑀻𑀬𑀢𑀺 𑀦 𑀫𑀻𑀬𑀢𑀺 𑀦 𑀘𑀯𑀢𑀺 𑀦 𑀉𑀧𑀧𑀚𑁆𑀚𑀢𑀺, 𑀇𑀢𑁄 𑀘 𑀧𑀦𑀜𑁆𑀜𑀁 𑀉𑀢𑁆𑀢𑀭𑀺𑀁 [𑀉𑀢𑁆𑀢𑀭𑀺𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀦𑀺𑀲𑁆𑀲𑀭𑀡𑀁 𑀦𑀢𑁆𑀣𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀩𑀓𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬 𑀏𑀯𑀫𑁂𑀯 𑁋 𑀚𑁂𑀢𑀯𑀦𑁂 𑀅𑀦𑁆𑀢𑀭𑀳𑀺𑀢𑁄 𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀮𑁄𑀓𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀤𑁆𑀤𑀲𑀸 𑀔𑁄 𑀩𑀓𑁄 𑀩𑁆𑀭𑀳𑁆𑀫𑀸 𑀪𑀕𑀯𑀦𑁆𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀳𑀺 𑀔𑁄 𑀫𑀸𑀭𑀺𑀲, 𑀲𑁆𑀯𑀸𑀕𑀢𑀁 𑀢𑁂, 𑀫𑀸𑀭𑀺𑀲! 𑀘𑀺𑀭𑀲𑁆𑀲𑀁 𑀔𑁄 𑀫𑀸𑀭𑀺𑀲! 𑀇𑀫𑀁 𑀧𑀭𑀺𑀬𑀸𑀬𑀫𑀓𑀸𑀲𑀺 𑀬𑀤𑀺𑀤𑀁 𑀇𑀥𑀸𑀕𑀫𑀦𑀸𑀬. 𑀇𑀤𑀜𑁆𑀳𑀺, 𑀫𑀸𑀭𑀺𑀲, 𑀦𑀺𑀘𑁆𑀘𑀁, 𑀇𑀤𑀁 𑀥𑀼𑀯𑀁, 𑀇𑀤𑀁 𑀲𑀲𑁆𑀲𑀢𑀁, 𑀇𑀤𑀁 𑀓𑁂𑀯𑀮𑀁, 𑀇𑀤𑀁 𑀅𑀘𑀯𑀦𑀥𑀫𑁆𑀫𑀁, 𑀇𑀤𑀜𑁆𑀳𑀺 𑀦 𑀚𑀸𑀬𑀢𑀺 𑀦 𑀚𑀻𑀬𑀢𑀺 𑀦 𑀫𑀻𑀬𑀢𑀺 𑀦 𑀘𑀯𑀢𑀺 𑀦 𑀉𑀧𑀧𑀚𑁆𑀚𑀢𑀺. 𑀇𑀢𑁄 𑀘 𑀧𑀦𑀜𑁆𑀜𑀁 𑀉𑀢𑁆𑀢𑀭𑀺 𑀦𑀺𑀲𑁆𑀲𑀭𑀡𑀁 𑀦𑀢𑁆𑀣𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀪𑀕𑀯𑀸 𑀩𑀓𑀁 𑀩𑁆𑀭𑀳𑁆𑀫𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀅𑀯𑀺𑀚𑁆𑀚𑀸𑀕𑀢𑁄 𑀯𑀢, 𑀪𑁄, 𑀩𑀓𑁄 𑀩𑁆𑀭𑀳𑁆𑀫𑀸; 𑀅𑀯𑀺𑀚𑁆𑀚𑀸𑀕𑀢𑁄 𑀯𑀢, 𑀪𑁄, 𑀩𑀓𑁄 𑀩𑁆𑀭𑀳𑁆𑀫𑀸. 𑀬𑀢𑁆𑀭 𑀳𑀺 𑀦𑀸𑀫 𑀅𑀦𑀺𑀘𑁆𑀘𑀁𑀬𑁂𑀯 𑀲𑀫𑀸𑀦𑀁 𑀦𑀺𑀘𑁆𑀘𑀦𑁆𑀢𑀺 𑀯𑀓𑁆𑀔𑀢𑀺, 𑀅𑀥𑀼𑀯𑀁𑀬𑁂𑀯 𑀲𑀫𑀸𑀦𑀁 𑀥𑀼𑀯𑀦𑁆𑀢𑀺 𑀯𑀓𑁆𑀔𑀢𑀺, 𑀅𑀲𑀲𑁆𑀲𑀢𑀁𑀬𑁂𑀯 𑀲𑀫𑀸𑀦𑀁 𑀲𑀲𑁆𑀲𑀢𑀦𑁆𑀢𑀺 𑀯𑀓𑁆𑀔𑀢𑀺, 𑀅𑀓𑁂𑀯𑀮𑀁𑀬𑁂𑀯 𑀲𑀫𑀸𑀦𑀁 𑀓𑁂𑀯𑀮𑀦𑁆𑀢𑀺 𑀯𑀓𑁆𑀔𑀢𑀺, 𑀘𑀯𑀦𑀥𑀫𑁆𑀫𑀁𑀬𑁂𑀯 𑀲𑀫𑀸𑀦𑀁 𑀅𑀘𑀯𑀦𑀥𑀫𑁆𑀫𑀦𑁆𑀢𑀺 𑀯𑀓𑁆𑀔𑀢𑀺. 𑀬𑀢𑁆𑀣 𑀘 𑀧𑀦 𑀚𑀸𑀬𑀢𑀺 𑀘 𑀚𑀻𑀬𑀢𑀺 𑀘 𑀫𑀻𑀬𑀢𑀺 𑀘 𑀘𑀯𑀢𑀺 𑀘 𑀉𑀧𑀧𑀚𑁆𑀚𑀢𑀺 𑀘, 𑀢𑀜𑁆𑀘 𑀢𑀣𑀸 𑀯𑀓𑁆𑀔𑀢𑀺 𑁋 ‘𑀇𑀤𑀜𑁆𑀳𑀺 𑀦 𑀚𑀸𑀬𑀢𑀺 𑀦 𑀚𑀻𑀬𑀢𑀺 𑀦 𑀫𑀻𑀬𑀢𑀺 𑀦 𑀘𑀯𑀢𑀺 𑀦 𑀉𑀧𑀧𑀚𑁆𑀚𑀢𑀺’. 𑀲𑀦𑁆𑀢𑀜𑁆𑀘 𑀧𑀦𑀜𑁆𑀜𑀁 𑀉𑀢𑁆𑀢𑀭𑀺 𑀦𑀺𑀲𑁆𑀲𑀭𑀡𑀁, ‘𑀦𑀢𑁆𑀣𑀜𑁆𑀜𑀁 𑀉𑀢𑁆𑀢𑀭𑀺 𑀦𑀺𑀲𑁆𑀲𑀭𑀡’𑀦𑁆𑀢𑀺 𑀯𑀓𑁆𑀔𑀢𑀻’’𑀢𑀺.

‘‘𑀤𑁆𑀯𑀸𑀲𑀢𑁆𑀢𑀢𑀺 𑀕𑁄𑀢𑀫 𑀧𑀼𑀜𑁆𑀜𑀓𑀫𑁆𑀫𑀸,

𑀯𑀲𑀯𑀢𑁆𑀢𑀺𑀦𑁄 𑀚𑀸𑀢𑀺𑀚𑀭𑀁 𑀅𑀢𑀻𑀢𑀸;

𑀅𑀬𑀫𑀦𑁆𑀢𑀺𑀫𑀸 𑀯𑁂𑀤𑀕𑀽 𑀩𑁆𑀭𑀳𑁆𑀫𑀼𑀧𑀧𑀢𑁆𑀢𑀺,

𑀅𑀲𑁆𑀫𑀸𑀪𑀺𑀚𑀧𑁆𑀧𑀦𑁆𑀢𑀺 𑀚𑀦𑀸 𑀅𑀦𑁂𑀓𑀸’’𑀢𑀺.

‘‘𑀅𑀧𑁆𑀧𑀜𑁆𑀳𑀺 𑀏𑀢𑀁 𑀦 𑀳𑀺 𑀤𑀻𑀖𑀫𑀸𑀬𑀼,

𑀬𑀁 𑀢𑁆𑀯𑀁 𑀩𑀓 𑀫𑀜𑁆𑀜𑀲𑀺 𑀤𑀻𑀖𑀫𑀸𑀬𑀼𑀁;

𑀲𑀢𑀁 𑀲𑀳𑀲𑁆𑀲𑀸𑀦𑀁 [𑀲𑀳𑀲𑁆𑀲𑀸𑀦 (𑀲𑁆𑀬𑀸. 𑀓𑀁.)] 𑀦𑀺𑀭𑀩𑁆𑀩𑀼𑀤𑀸𑀦𑀁,

𑀆𑀬𑀼𑀁 𑀧𑀚𑀸𑀦𑀸𑀫𑀺 𑀢𑀯𑀸𑀳𑀁 𑀩𑁆𑀭𑀳𑁆𑀫𑁂’’𑀢𑀺.

‘‘𑀅𑀦𑀦𑁆𑀢𑀤𑀲𑁆𑀲𑀻 𑀪𑀕𑀯𑀸𑀳𑀫𑀲𑁆𑀫𑀺,

𑀚𑀸𑀢𑀺𑀚𑀭𑀁 𑀲𑁄𑀓𑀫𑀼𑀧𑀸𑀢𑀺𑀯𑀢𑁆𑀢𑁄;

𑀓𑀺𑀁 𑀫𑁂 𑀧𑀼𑀭𑀸𑀡𑀁 𑀯𑀢𑀲𑀻𑀮𑀯𑀢𑁆𑀢𑀁,

𑀆𑀘𑀺𑀓𑁆𑀔 𑀫𑁂 𑀢𑀁 𑀬𑀫𑀳𑀁 𑀯𑀺𑀚𑀜𑁆𑀜𑀸’’𑀢𑀺.

‘‘𑀬𑀁 𑀢𑁆𑀯𑀁 𑀅𑀧𑀸𑀬𑁂𑀲𑀺 𑀩𑀳𑀽 𑀫𑀦𑀼𑀲𑁆𑀲𑁂,

𑀧𑀺𑀧𑀸𑀲𑀺𑀢𑁂 𑀖𑀫𑁆𑀫𑀦𑀺 𑀲𑀫𑁆𑀧𑀭𑁂𑀢𑁂;

𑀢𑀁 𑀢𑁂 𑀧𑀼𑀭𑀸𑀡𑀁 𑀯𑀢𑀲𑀻𑀮𑀯𑀢𑁆𑀢𑀁,

𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄𑀯 𑀅𑀦𑀼𑀲𑁆𑀲𑀭𑀸𑀫𑀺.

‘‘𑀬𑀁 𑀏𑀡𑀺𑀓𑀽𑀮𑀲𑁆𑀫𑀺𑀁 𑀚𑀦𑀁 𑀕𑀳𑀻𑀢𑀁,

𑀅𑀫𑁄𑀘𑀬𑀻 𑀕𑀬𑁆𑀳𑀓𑀁 𑀦𑀻𑀬𑀫𑀸𑀦𑀁;

𑀢𑀁 𑀢𑁂 𑀧𑀼𑀭𑀸𑀡𑀁 𑀯𑀢𑀲𑀻𑀮𑀯𑀢𑁆𑀢𑀁,

𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄𑀯 𑀅𑀦𑀼𑀲𑁆𑀲𑀭𑀸𑀫𑀺.

‘‘𑀕𑀗𑁆𑀕𑀸𑀬 𑀲𑁄𑀢𑀲𑁆𑀫𑀺𑀁 𑀕𑀳𑀻𑀢𑀦𑀸𑀯𑀁,

𑀮𑀼𑀤𑁆𑀤𑁂𑀦 𑀦𑀸𑀕𑁂𑀦 𑀫𑀦𑀼𑀲𑁆𑀲𑀓𑀫𑁆𑀬𑀸;

𑀧𑀫𑁄𑀘𑀬𑀺𑀢𑁆𑀣 𑀩𑀮𑀲𑀸 𑀧𑀲𑀬𑁆𑀳,

𑀢𑀁 𑀢𑁂 𑀧𑀼𑀭𑀸𑀡𑀁 𑀯𑀢𑀲𑀻𑀮𑀯𑀢𑁆𑀢𑀁,

𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄𑀯 𑀅𑀦𑀼𑀲𑁆𑀲𑀭𑀸𑀫𑀺.

‘‘𑀓𑀧𑁆𑀧𑁄 𑀘 𑀢𑁂 𑀩𑀤𑁆𑀥𑀘𑀭𑁄 𑀅𑀳𑁄𑀲𑀺𑀁,

𑀲𑀫𑁆𑀩𑀼𑀤𑁆𑀥𑀺𑀫𑀦𑁆𑀢𑀁 [𑀲𑀫𑁆𑀩𑀼𑀤𑁆𑀥𑀺𑀯𑀦𑁆𑀢𑀁 (𑀩𑀳𑀽𑀲𑀼)] 𑀯𑀢𑀺𑀦𑀁 𑀅𑀫𑀜𑁆𑀜𑀺;

𑀢𑀁 𑀢𑁂 𑀧𑀼𑀭𑀸𑀡𑀁 𑀯𑀢𑀲𑀻𑀮𑀯𑀢𑁆𑀢𑀁,

𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄𑀯 𑀅𑀦𑀼𑀲𑁆𑀲𑀭𑀸𑀫𑀻’’𑀢𑀺.

‘‘𑀅𑀤𑁆𑀥𑀸 𑀧𑀚𑀸𑀦𑀸𑀲𑀺 𑀫𑀫𑁂𑀢𑀫𑀸𑀬𑀼𑀁,

𑀅𑀜𑁆𑀜𑁂𑀧𑀺 [𑀅𑀜𑁆𑀜𑀫𑁆𑀧𑀺 (𑀲𑀻. 𑀧𑀻.)] 𑀚𑀸𑀦𑀸𑀲𑀺 𑀢𑀣𑀸 𑀳𑀺 𑀩𑀼𑀤𑁆𑀥𑁄;

𑀢𑀣𑀸 𑀳𑀺 𑀢𑁆𑀬𑀸𑀬𑀁 𑀚𑀮𑀺𑀢𑀸𑀦𑀼𑀪𑀸𑀯𑁄,

𑀑𑀪𑀸𑀲𑀬𑀁 𑀢𑀺𑀝𑁆𑀞𑀢𑀺 𑀩𑁆𑀭𑀳𑁆𑀫𑀮𑁄𑀓’’𑀦𑁆𑀢𑀺.

𑁫. 𑀅𑀜𑁆𑀜𑀢𑀭𑀩𑁆𑀭𑀳𑁆𑀫𑀲𑀼𑀢𑁆𑀢𑀁

𑁧𑁭𑁬. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑁋 ‘‘𑀦𑀢𑁆𑀣𑀺 𑀲𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀬𑁄 𑀇𑀥 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄…𑀧𑁂… 𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀮𑁄𑀓𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀉𑀧𑀭𑀺 𑀯𑁂𑀳𑀸𑀲𑀁 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸.

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀓𑀳𑀁 𑀦𑀼 𑀔𑁄 𑀪𑀕𑀯𑀸 𑀏𑀢𑀭𑀳𑀺 𑀯𑀺𑀳𑀭𑀢𑀻’’𑀢𑀺? 𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 [𑀫𑀳𑀸𑀫𑁄𑀕𑁆𑀕𑀮𑀸𑀦𑁄 (𑀓.)] 𑀪𑀕𑀯𑀦𑁆𑀢𑀁 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀉𑀧𑀭𑀺 𑀯𑁂𑀳𑀸𑀲𑀁 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑀁 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀦𑁆𑀦𑀁. 𑀤𑀺𑀲𑁆𑀯𑀸𑀦 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬 𑀏𑀯𑀫𑁂𑀯 𑁋 𑀚𑁂𑀢𑀯𑀦𑁂 𑀅𑀦𑁆𑀢𑀭𑀳𑀺𑀢𑁄 𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀮𑁄𑀓𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀦𑀺𑀲𑁆𑀲𑀸𑀬 [𑀉𑀧𑀦𑀺𑀲𑁆𑀲𑀸𑀬 (𑀲𑀻.)] 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀉𑀧𑀭𑀺 𑀯𑁂𑀳𑀸𑀲𑀁 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀻𑀘𑀢𑀭𑀁 𑀪𑀕𑀯𑀢𑁄.

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀓𑀳𑀁 𑀦𑀼 𑀔𑁄 𑀪𑀕𑀯𑀸 𑀏𑀢𑀭𑀳𑀺 𑀯𑀺𑀳𑀭𑀢𑀻’’𑀢𑀺? 𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀪𑀕𑀯𑀦𑁆𑀢𑀁 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸…𑀧𑁂… 𑀤𑀺𑀲𑁆𑀯𑀸𑀦 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄…𑀧𑁂… 𑀏𑀯𑀫𑁂𑀯 𑁋 𑀚𑁂𑀢𑀯𑀦𑁂 𑀅𑀦𑁆𑀢𑀭𑀳𑀺𑀢𑁄 𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀮𑁄𑀓𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀤𑀓𑁆𑀔𑀺𑀡𑀁 𑀤𑀺𑀲𑀁 𑀦𑀺𑀲𑁆𑀲𑀸𑀬 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀉𑀧𑀭𑀺 𑀯𑁂𑀳𑀸𑀲𑀁 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀻𑀘𑀢𑀭𑀁 𑀪𑀕𑀯𑀢𑁄.

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀫𑀳𑀸𑀓𑀧𑁆𑀧𑀺𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀓𑀳𑀁 𑀦𑀼 𑀔𑁄 𑀪𑀕𑀯𑀸 𑀏𑀢𑀭𑀳𑀺 𑀯𑀺𑀳𑀭𑀢𑀻’’𑀢𑀺? 𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀧𑁆𑀧𑀺𑀦𑁄 𑀪𑀕𑀯𑀦𑁆𑀢𑀁 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸…𑀧𑁂… 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀦𑁆𑀦𑀁. 𑀤𑀺𑀲𑁆𑀯𑀸𑀦 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄…𑀧𑁂… 𑀏𑀯𑀫𑁂𑀯 𑁋 𑀚𑁂𑀢𑀯𑀦𑁂 𑀅𑀦𑁆𑀢𑀭𑀳𑀺𑀢𑁄 𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀮𑁄𑀓𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀧𑁆𑀧𑀺𑀦𑁄 𑀧𑀘𑁆𑀙𑀺𑀫𑀁 𑀤𑀺𑀲𑀁 𑀦𑀺𑀲𑁆𑀲𑀸𑀬 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀉𑀧𑀭𑀺 𑀯𑁂𑀳𑀸𑀲𑀁 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀻𑀘𑀢𑀭𑀁 𑀪𑀕𑀯𑀢𑁄.

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀅𑀦𑀼𑀭𑀼𑀤𑁆𑀥𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀓𑀳𑀁 𑀦𑀼 𑀔𑁄 𑀪𑀕𑀯𑀸 𑀏𑀢𑀭𑀳𑀺 𑀯𑀺𑀳𑀭𑀢𑀻’’𑀢𑀺? 𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄…𑀧𑁂… 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀦𑁆𑀦𑀁. 𑀤𑀺𑀲𑁆𑀯𑀸𑀦 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄…𑀧𑁂… 𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀮𑁄𑀓𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀉𑀢𑁆𑀢𑀭𑀁 𑀤𑀺𑀲𑀁 𑀦𑀺𑀲𑁆𑀲𑀸𑀬 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀉𑀧𑀭𑀺 𑀯𑁂𑀳𑀸𑀲𑀁 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀻𑀘𑀢𑀭𑀁 𑀪𑀕𑀯𑀢𑁄.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀁 𑀩𑁆𑀭𑀳𑁆𑀫𑀸𑀦𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀅𑀚𑁆𑀚𑀸𑀧𑀺 𑀢𑁂 𑀆𑀯𑀼𑀲𑁄 𑀲𑀸 𑀤𑀺𑀝𑁆𑀞𑀺, 𑀬𑀸 𑀢𑁂 𑀤𑀺𑀝𑁆𑀞𑀺 𑀧𑀼𑀭𑁂 𑀅𑀳𑀼;

𑀧𑀲𑁆𑀲𑀲𑀺 𑀯𑀻𑀢𑀺𑀯𑀢𑁆𑀢𑀦𑁆𑀢𑀁, 𑀩𑁆𑀭𑀳𑁆𑀫𑀮𑁄𑀓𑁂 𑀧𑀪𑀲𑁆𑀲𑀭’’𑀦𑁆𑀢𑀺.

‘‘𑀦 𑀫𑁂 𑀫𑀸𑀭𑀺𑀲 𑀲𑀸 𑀤𑀺𑀝𑁆𑀞𑀺, 𑀬𑀸 𑀫𑁂 𑀤𑀺𑀝𑁆𑀞𑀺 𑀧𑀼𑀭𑁂 𑀅𑀳𑀼;

𑀧𑀲𑁆𑀲𑀸𑀫𑀺 𑀯𑀻𑀢𑀺𑀯𑀢𑁆𑀢𑀦𑁆𑀢𑀁, 𑀩𑁆𑀭𑀳𑁆𑀫𑀮𑁄𑀓𑁂 𑀧𑀪𑀲𑁆𑀲𑀭𑀁;

𑀲𑁆𑀯𑀸𑀳𑀁 𑀅𑀚𑁆𑀚 𑀓𑀣𑀁 𑀯𑀚𑁆𑀚𑀁, 𑀅𑀳𑀁 𑀦𑀺𑀘𑁆𑀘𑁄𑀫𑁆𑀳𑀺 𑀲𑀲𑁆𑀲𑀢𑁄’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀢𑀁 𑀩𑁆𑀭𑀳𑁆𑀫𑀸𑀦𑀁 𑀲𑀁𑀯𑁂𑀚𑁂𑀢𑁆𑀯𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬 𑀏𑀯𑀫𑁂𑀯 𑁋 𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀮𑁄𑀓𑁂 𑀅𑀦𑁆𑀢𑀭𑀳𑀺𑀢𑁄 𑀚𑁂𑀢𑀯𑀦𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀲𑁄 𑀩𑁆𑀭𑀳𑁆𑀫𑀸 𑀅𑀜𑁆𑀜𑀢𑀭𑀁 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀫𑀸𑀭𑀺𑀲, 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀏𑀯𑀁 𑀯𑀤𑁂𑀳𑀺 𑁋 ‘𑀅𑀢𑁆𑀣𑀺 𑀦𑀼 𑀔𑁄, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀅𑀜𑁆𑀜𑁂𑀧𑀺 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑀸 𑀏𑀯𑀁𑀫𑀳𑀺𑀤𑁆𑀥𑀺𑀓𑀸 𑀏𑀯𑀁𑀫𑀳𑀸𑀦𑀼𑀪𑀸𑀯𑀸; 𑀲𑁂𑀬𑁆𑀬𑀣𑀸𑀧𑀺 𑀪𑀯𑀁 𑀫𑁄𑀕𑁆𑀕𑀮𑁆𑀮𑀸𑀦𑁄 𑀓𑀲𑁆𑀲𑀧𑁄 𑀓𑀧𑁆𑀧𑀺𑀦𑁄 𑀅𑀦𑀼𑀭𑀼𑀤𑁆𑀥𑁄’’’𑀢𑀺? ‘‘𑀏𑀯𑀁, 𑀫𑀸𑀭𑀺𑀲𑀸’’𑀢𑀺 𑀔𑁄 𑀲𑁄 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑁄 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀅𑀢𑁆𑀣𑀺 𑀦𑀼 𑀔𑁄, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀅𑀜𑁆𑀜𑁂𑀧𑀺 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑀸 𑀏𑀯𑀁𑀫𑀳𑀺𑀤𑁆𑀥𑀺𑀓𑀸 𑀏𑀯𑀁𑀫𑀳𑀸𑀦𑀼𑀪𑀸𑀯𑀸; 𑀲𑁂𑀬𑁆𑀬𑀣𑀸𑀧𑀺 𑀪𑀯𑀁 𑀫𑁄𑀕𑁆𑀕𑀮𑁆𑀮𑀸𑀦𑁄 𑀓𑀲𑁆𑀲𑀧𑁄 𑀓𑀧𑁆𑀧𑀺𑀦𑁄 𑀅𑀦𑀼𑀭𑀼𑀤𑁆𑀥𑁄’’𑀢𑀺? 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀁 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀢𑁂𑀯𑀺𑀚𑁆𑀚𑀸 𑀇𑀤𑁆𑀥𑀺𑀧𑀢𑁆𑀢𑀸 𑀘, 𑀘𑁂𑀢𑁄𑀧𑀭𑀺𑀬𑀸𑀬𑀓𑁄𑀯𑀺𑀤𑀸;

𑀔𑀻𑀡𑀸𑀲𑀯𑀸 𑀅𑀭𑀳𑀦𑁆𑀢𑁄, 𑀩𑀳𑀽 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑀸’’𑀢𑀺.

𑀅𑀣 𑀔𑁄 𑀲𑁄 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑁄 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀬𑁂𑀦 𑀲𑁄 𑀩𑁆𑀭𑀳𑁆𑀫𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀩𑁆𑀭𑀳𑁆𑀫𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀆𑀬𑀲𑁆𑀫𑀸 𑀫𑀸𑀭𑀺𑀲, 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀏𑀯𑀫𑀸𑀳 𑁋

‘‘𑀢𑁂𑀯𑀺𑀚𑁆𑀚𑀸 𑀇𑀤𑁆𑀥𑀺𑀧𑀢𑁆𑀢𑀸 𑀘, 𑀘𑁂𑀢𑁄𑀧𑀭𑀺𑀬𑀸𑀬𑀓𑁄𑀯𑀺𑀤𑀸;

𑀔𑀻𑀡𑀸𑀲𑀯𑀸 𑀅𑀭𑀳𑀦𑁆𑀢𑁄, 𑀩𑀳𑀽 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑀸’’𑀢𑀺.

𑀇𑀤𑀫𑀯𑁄𑀘 𑀲𑁄 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑁄. 𑀅𑀢𑁆𑀢𑀫𑀦𑁄 𑀘 𑀲𑁄 𑀩𑁆𑀭𑀳𑁆𑀫𑀸 𑀢𑀲𑁆𑀲 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀲𑁆𑀲 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀻𑀢𑀺.

𑁬. 𑀩𑁆𑀭𑀳𑁆𑀫𑀮𑁄𑀓𑀲𑀼𑀢𑁆𑀢𑀁

𑁧𑁭𑁭. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀤𑀺𑀯𑀸𑀯𑀺𑀳𑀸𑀭𑀕𑀢𑁄 𑀳𑁄𑀢𑀺 𑀧𑀝𑀺𑀲𑀮𑁆𑀮𑀻𑀦𑁄. 𑀅𑀣 𑀔𑁄 𑀲𑀼𑀩𑁆𑀭𑀳𑁆𑀫𑀸 𑀘 𑀧𑀘𑁆𑀘𑁂𑀓𑀩𑁆𑀭𑀳𑁆𑀫𑀸 𑀲𑀼𑀤𑁆𑀥𑀸𑀯𑀸𑀲𑁄 𑀘 𑀧𑀘𑁆𑀘𑁂𑀓𑀩𑁆𑀭𑀳𑁆𑀫𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀘𑁆𑀘𑁂𑀓𑀁 𑀤𑁆𑀯𑀸𑀭𑀩𑀸𑀳𑀁 [𑀧𑀘𑁆𑀘𑁂𑀓𑀤𑁆𑀯𑀸𑀭𑀩𑀸𑀳𑀁 (𑀧𑀻. 𑀓.)] 𑀉𑀧𑀦𑀺𑀲𑁆𑀲𑀸𑀬 𑀅𑀝𑁆𑀞𑀁𑀲𑀼. 𑀅𑀣 𑀔𑁄 𑀲𑀼𑀩𑁆𑀭𑀳𑁆𑀫𑀸 𑀧𑀘𑁆𑀘𑁂𑀓𑀩𑁆𑀭𑀳𑁆𑀫𑀸 𑀲𑀼𑀤𑁆𑀥𑀸𑀯𑀸𑀲𑀁 𑀧𑀘𑁆𑀘𑁂𑀓𑀩𑁆𑀭𑀳𑁆𑀫𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀅𑀓𑀸𑀮𑁄 𑀔𑁄 𑀢𑀸𑀯, 𑀫𑀸𑀭𑀺𑀲, 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑀺𑀢𑀼𑀁; 𑀤𑀺𑀯𑀸𑀯𑀺𑀳𑀸𑀭𑀕𑀢𑁄 𑀪𑀕𑀯𑀸 𑀧𑀝𑀺𑀲𑀮𑁆𑀮𑀻𑀦𑁄 𑀘. 𑀅𑀲𑀼𑀓𑁄 𑀘 𑀩𑁆𑀭𑀳𑁆𑀫𑀮𑁄𑀓𑁄 𑀇𑀤𑁆𑀥𑁄 𑀘𑁂𑀯 𑀨𑀻𑀢𑁄 𑀘, 𑀩𑁆𑀭𑀳𑁆𑀫𑀸 𑀘 𑀢𑀢𑁆𑀭 𑀧𑀫𑀸𑀤𑀯𑀺𑀳𑀸𑀭𑀁 𑀯𑀺𑀳𑀭𑀢𑀺. 𑀆𑀬𑀸𑀫, 𑀫𑀸𑀭𑀺𑀲, 𑀬𑁂𑀦 𑀲𑁄 𑀩𑁆𑀭𑀳𑁆𑀫𑀮𑁄𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀩𑁆𑀭𑀳𑁆𑀫𑀸𑀦𑀁 𑀲𑀁𑀯𑁂𑀚𑁂𑀬𑁆𑀬𑀸𑀫𑀸’’𑀢𑀺. ‘‘𑀏𑀯𑀁, 𑀫𑀸𑀭𑀺𑀲𑀸’’𑀢𑀺 𑀔𑁄 𑀲𑀼𑀤𑁆𑀥𑀸𑀯𑀸𑀲𑁄 𑀧𑀘𑁆𑀘𑁂𑀓𑀩𑁆𑀭𑀳𑁆𑀫𑀸 𑀲𑀼𑀩𑁆𑀭𑀳𑁆𑀫𑀼𑀦𑁄 𑀧𑀘𑁆𑀘𑁂𑀓𑀩𑁆𑀭𑀳𑁆𑀫𑀼𑀦𑁄 𑀧𑀘𑁆𑀘𑀲𑁆𑀲𑁄𑀲𑀺.

𑀅𑀣 𑀔𑁄 𑀲𑀼𑀩𑁆𑀭𑀳𑁆𑀫𑀸 𑀘 𑀧𑀘𑁆𑀘𑁂𑀓𑀩𑁆𑀭𑀳𑁆𑀫𑀸 𑀲𑀼𑀤𑁆𑀥𑀸𑀯𑀸𑀲𑁄 𑀘 𑀧𑀘𑁆𑀘𑁂𑀓𑀩𑁆𑀭𑀳𑁆𑀫𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄…𑀧𑁂… 𑀏𑀯𑀫𑁂𑀯 𑁋 𑀪𑀕𑀯𑀢𑁄 𑀧𑀼𑀭𑀢𑁄 𑀅𑀦𑁆𑀢𑀭𑀳𑀺𑀢𑀸 𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀮𑁄𑀓𑁂 𑀧𑀸𑀢𑀼𑀭𑀳𑁂𑀲𑀼𑀁. 𑀅𑀤𑁆𑀤𑀲𑀸 𑀔𑁄 𑀲𑁄 𑀩𑁆𑀭𑀳𑁆𑀫𑀸 𑀢𑁂 𑀩𑁆𑀭𑀳𑁆𑀫𑀸𑀦𑁄 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑁂. 𑀤𑀺𑀲𑁆𑀯𑀸𑀦 𑀢𑁂 𑀩𑁆𑀭𑀳𑁆𑀫𑀸𑀦𑁄 𑀏𑀢𑀤𑀯𑁄𑀘 𑁋 ‘‘𑀳𑀦𑁆𑀤 𑀓𑀼𑀢𑁄 𑀦𑀼 𑀢𑀼𑀫𑁆𑀳𑁂, 𑀫𑀸𑀭𑀺𑀲𑀸, 𑀆𑀕𑀘𑁆𑀙𑀣𑀸’’𑀢𑀺? ‘‘𑀆𑀕𑀢𑀸 𑀔𑁄 𑀫𑀬𑀁, 𑀫𑀸𑀭𑀺𑀲, 𑀅𑀫𑁆𑀳 𑀢𑀲𑁆𑀲 𑀪𑀕𑀯𑀢𑁄 𑀲𑀦𑁆𑀢𑀺𑀓𑀸 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲. 𑀕𑀘𑁆𑀙𑁂𑀬𑁆𑀬𑀸𑀲𑀺 𑀧𑀦 𑀢𑁆𑀯𑀁, 𑀫𑀸𑀭𑀺𑀲, 𑀢𑀲𑁆𑀲 𑀪𑀕𑀯𑀢𑁄 𑀉𑀧𑀝𑁆𑀞𑀸𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺?

𑀏𑀯𑀁 𑀯𑀼𑀢𑁆𑀢𑁄 [𑀏𑀯𑀁 𑀯𑀼𑀢𑁆𑀢𑁂 (𑀲𑀻. 𑀲𑁆𑀬𑀸. 𑀓𑀁.)] 𑀔𑁄 𑀲𑁄 𑀩𑁆𑀭𑀳𑁆𑀫𑀸 𑀢𑀁 𑀯𑀘𑀦𑀁 𑀅𑀦𑀥𑀺𑀯𑀸𑀲𑁂𑀦𑁆𑀢𑁄 𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀅𑀢𑁆𑀢𑀸𑀦𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀲𑀼𑀩𑁆𑀭𑀳𑁆𑀫𑀸𑀦𑀁 𑀧𑀘𑁆𑀘𑁂𑀓𑀩𑁆𑀭𑀳𑁆𑀫𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀧𑀲𑁆𑀲𑀲𑀺 𑀫𑁂 𑀦𑁄 𑀢𑁆𑀯𑀁, 𑀫𑀸𑀭𑀺𑀲, 𑀏𑀯𑀭𑀽𑀧𑀁 𑀇𑀤𑁆𑀥𑀸𑀦𑀼𑀪𑀸𑀯’’𑀦𑁆𑀢𑀺? ‘‘𑀧𑀲𑁆𑀲𑀸𑀫𑀺 𑀔𑁄 𑀢𑁆𑀬𑀸𑀳𑀁, 𑀫𑀸𑀭𑀺𑀲, 𑀏𑀯𑀭𑀽𑀧𑀁 𑀇𑀤𑁆𑀥𑀸𑀦𑀼𑀪𑀸𑀯’’𑀦𑁆𑀢𑀺. ‘‘𑀲𑁄 𑀔𑁆𑀯𑀸𑀳𑀁, 𑀫𑀸𑀭𑀺𑀲, 𑀏𑀯𑀁𑀫𑀳𑀺𑀤𑁆𑀥𑀺𑀓𑁄 𑀏𑀯𑀁𑀫𑀳𑀸𑀦𑀼𑀪𑀸𑀯𑁄 𑀓𑀲𑁆𑀲 𑀅𑀜𑁆𑀜𑀲𑁆𑀲 𑀲𑀫𑀡𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀉𑀧𑀝𑁆𑀞𑀸𑀦𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺?

𑀅𑀣 𑀔𑁄 𑀲𑀼𑀩𑁆𑀭𑀳𑁆𑀫𑀸 𑀧𑀘𑁆𑀘𑁂𑀓𑀩𑁆𑀭𑀳𑁆𑀫𑀸 𑀤𑁆𑀯𑀺𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀅𑀢𑁆𑀢𑀸𑀦𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀢𑀁 𑀩𑁆𑀭𑀳𑁆𑀫𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀧𑀲𑁆𑀲𑀲𑀺 𑀫𑁂 𑀦𑁄 𑀢𑁆𑀯𑀁, 𑀫𑀸𑀭𑀺𑀲, 𑀏𑀯𑀭𑀽𑀧𑀁 𑀇𑀤𑁆𑀥𑀸𑀦𑀼𑀪𑀸𑀯’’𑀦𑁆𑀢𑀺? ‘‘𑀧𑀲𑁆𑀲𑀸𑀫𑀺 𑀔𑁄 𑀢𑁆𑀬𑀸𑀳𑀁, 𑀫𑀸𑀭𑀺𑀲, 𑀏𑀯𑀭𑀽𑀧𑀁 𑀇𑀤𑁆𑀥𑀸𑀦𑀼𑀪𑀸𑀯’’𑀦𑁆𑀢𑀺. ‘‘𑀢𑀬𑀸 𑀘 𑀔𑁄, 𑀫𑀸𑀭𑀺𑀲, 𑀫𑀬𑀸 𑀘 𑀲𑁆𑀯𑁂𑀯 𑀪𑀕𑀯𑀸 𑀫𑀳𑀺𑀤𑁆𑀥𑀺𑀓𑀢𑀭𑁄 𑀘𑁂𑀯 𑀫𑀳𑀸𑀦𑀼𑀪𑀸𑀯𑀢𑀭𑁄 𑀘. 𑀕𑀘𑁆𑀙𑁂𑀬𑁆𑀬𑀸𑀲𑀺 𑀢𑁆𑀯𑀁, 𑀫𑀸𑀭𑀺𑀲, 𑀢𑀲𑁆𑀲 𑀪𑀕𑀯𑀢𑁄 𑀉𑀧𑀝𑁆𑀞𑀸𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺? 𑀅𑀣 𑀔𑁄 𑀲𑁄 𑀩𑁆𑀭𑀳𑁆𑀫𑀸 𑀲𑀼𑀩𑁆𑀭𑀳𑁆𑀫𑀸𑀦𑀁 𑀧𑀘𑁆𑀘𑁂𑀓𑀩𑁆𑀭𑀳𑁆𑀫𑀸𑀦𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀢𑀬𑁄 𑀲𑀼𑀧𑀡𑁆𑀡𑀸 𑀘𑀢𑀼𑀭𑁄 𑀘 𑀳𑀁𑀲𑀸,

𑀩𑁆𑀬𑀕𑁆𑀖𑀻𑀦𑀺𑀲𑀸 𑀧𑀜𑁆𑀘𑀲𑀢𑀸 𑀘 𑀛𑀸𑀬𑀺𑀦𑁄;

𑀢𑀬𑀺𑀤𑀁 𑀯𑀺𑀫𑀸𑀦𑀁 𑀚𑀮𑀢𑁂 𑀘 [𑀚𑀮𑀢𑁂𑀯 (𑀧𑀻. 𑀓.)] 𑀩𑁆𑀭𑀳𑁆𑀫𑁂,

𑀑𑀪𑀸𑀲𑀬𑀁 𑀉𑀢𑁆𑀢𑀭𑀲𑁆𑀲𑀁 𑀤𑀺𑀲𑀸𑀬’’𑀦𑁆𑀢𑀺.

‘‘𑀓𑀺𑀜𑁆𑀘𑀸𑀧𑀺 𑀢𑁂 𑀢𑀁 𑀚𑀮𑀢𑁂 𑀯𑀺𑀫𑀸𑀦𑀁,

𑀑𑀪𑀸𑀲𑀬𑀁 𑀉𑀢𑁆𑀢𑀭𑀲𑁆𑀲𑀁 𑀤𑀺𑀲𑀸𑀬𑀁;

𑀭𑀽𑀧𑁂 𑀭𑀡𑀁 𑀤𑀺𑀲𑁆𑀯𑀸 𑀲𑀤𑀸 𑀧𑀯𑁂𑀥𑀺𑀢𑀁,

𑀢𑀲𑁆𑀫𑀸 𑀦 𑀭𑀽𑀧𑁂 𑀭𑀫𑀢𑀻 𑀲𑀼𑀫𑁂𑀥𑁄’’𑀢𑀺.

𑀅𑀣 𑀔𑁄 𑀲𑀼𑀩𑁆𑀭𑀳𑁆𑀫𑀸 𑀘 𑀧𑀘𑁆𑀘𑁂𑀓𑀩𑁆𑀭𑀳𑁆𑀫𑀸 𑀲𑀼𑀤𑁆𑀥𑀸𑀯𑀸𑀲𑁄 𑀘 𑀧𑀘𑁆𑀘𑁂𑀓𑀩𑁆𑀭𑀳𑁆𑀫𑀸 𑀢𑀁 𑀩𑁆𑀭𑀳𑁆𑀫𑀸𑀦𑀁 𑀲𑀁𑀯𑁂𑀚𑁂𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺𑀁𑀲𑀼. 𑀅𑀕𑀫𑀸𑀲𑀺 𑀘 𑀔𑁄 𑀲𑁄 𑀩𑁆𑀭𑀳𑁆𑀫𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀪𑀕𑀯𑀢𑁄 𑀉𑀧𑀝𑁆𑀞𑀸𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸𑀢𑀺.

𑁭. 𑀓𑁄𑀓𑀸𑀮𑀺𑀓𑀲𑀼𑀢𑁆𑀢𑀁

𑁧𑁭𑁮. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀤𑀺𑀯𑀸𑀯𑀺𑀳𑀸𑀭𑀕𑀢𑁄 𑀳𑁄𑀢𑀺 𑀧𑀝𑀺𑀲𑀮𑁆𑀮𑀻𑀦𑁄. 𑀅𑀣 𑀔𑁄 𑀲𑀼𑀩𑁆𑀭𑀳𑁆𑀫𑀸 𑀘 𑀧𑀘𑁆𑀘𑁂𑀓𑀩𑁆𑀭𑀳𑁆𑀫𑀸 𑀲𑀼𑀤𑁆𑀥𑀸𑀯𑀸𑀲𑁄 𑀘 𑀧𑀘𑁆𑀘𑁂𑀓𑀩𑁆𑀭𑀳𑁆𑀫𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀘𑁆𑀘𑁂𑀓𑀁 𑀤𑁆𑀯𑀸𑀭𑀩𑀸𑀳𑀁 𑀦𑀺𑀲𑁆𑀲𑀸𑀬 𑀅𑀝𑁆𑀞𑀁𑀲𑀼. 𑀅𑀣 𑀔𑁄 𑀲𑀼𑀩𑁆𑀭𑀳𑁆𑀫𑀸 𑀧𑀘𑁆𑀘𑁂𑀓𑀩𑁆𑀭𑀳𑁆𑀫𑀸 𑀓𑁄𑀓𑀸𑀮𑀺𑀓𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀅𑀧𑁆𑀧𑀫𑁂𑀬𑁆𑀬𑀁 𑀧𑀫𑀺𑀦𑀦𑁆𑀢𑁄, 𑀓𑁄𑀥 𑀯𑀺𑀤𑁆𑀯𑀸 𑀯𑀺𑀓𑀧𑁆𑀧𑀬𑁂;

𑀅𑀧𑁆𑀧𑀫𑁂𑀬𑁆𑀬𑀁 𑀧𑀫𑀸𑀬𑀺𑀦𑀁, 𑀦𑀺𑀯𑀼𑀢𑀁 𑀢𑀁 𑀫𑀜𑁆𑀜𑁂 𑀧𑀼𑀣𑀼𑀚𑁆𑀚𑀦’’𑀦𑁆𑀢𑀺.