𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀧𑀸𑀲𑀸𑀡𑀲𑀼𑀢𑁆𑀢𑀁

𑁧𑁪𑁭. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀭𑀢𑁆𑀢𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀬𑀁 𑀅𑀩𑁆𑀪𑁄𑀓𑀸𑀲𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀤𑁂𑀯𑁄 𑀘 𑀏𑀓𑀫𑁂𑀓𑀁 𑀨𑀼𑀲𑀸𑀬𑀢𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀪𑀕𑀯𑀢𑁄 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀫𑀳𑀦𑁆𑀢𑁂 𑀧𑀸𑀲𑀸𑀡𑁂 𑀧𑀤𑀸𑀮𑁂𑀲𑀺.

𑀅𑀣 𑀔𑁄 𑀪𑀕𑀯𑀸 ‘‘𑀫𑀸𑀭𑁄 𑀅𑀬𑀁 𑀧𑀸𑀧𑀺𑀫𑀸’’ 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀲𑀘𑁂𑀧𑀺 𑀓𑁂𑀯𑀮𑀁 𑀲𑀩𑁆𑀩𑀁, 𑀕𑀺𑀚𑁆𑀛𑀓𑀽𑀝𑀁 𑀘𑀮𑁂𑀲𑁆𑀲𑀲𑀺 [𑀕𑀴𑁂𑀬𑁆𑀬𑀲𑀺 (𑀲𑁆𑀬𑀸. 𑀓𑀁.), 𑀘𑀮𑁂𑀬𑁆𑀬𑀸𑀲𑀺 (𑀓.)];

𑀦𑁂𑀯 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀸𑀦𑀁, 𑀩𑀼𑀤𑁆𑀥𑀸𑀦𑀁 𑀅𑀢𑁆𑀣𑀺 𑀇𑀜𑁆𑀚𑀺𑀢’’𑀦𑁆𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀪𑀕𑀯𑀸, 𑀚𑀸𑀦𑀸𑀢𑀺 𑀫𑀁 𑀲𑀼𑀕𑀢𑁄’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁨. 𑀓𑀺𑀦𑁆𑀦𑀼𑀲𑀻𑀳𑀲𑀼𑀢𑁆𑀢𑀁

𑁧𑁪𑁮. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺.

𑀅𑀣 𑀔𑁄 𑀫𑀸𑀭𑀲𑁆𑀲 𑀧𑀸𑀧𑀺𑀫𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀲𑀫𑀡𑁄 𑀕𑁄𑀢𑀫𑁄 𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀬𑀁𑀦𑀽𑀦𑀸𑀳𑀁 𑀬𑁂𑀦 𑀲𑀫𑀡𑁄 𑀕𑁄𑀢𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀁 𑀯𑀺𑀘𑀓𑁆𑀔𑀼𑀓𑀫𑁆𑀫𑀸𑀬𑀸’’𑀢𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀓𑀺𑀦𑁆𑀦𑀼 𑀲𑀻𑀳𑁄𑀯 𑀦𑀤𑀲𑀺, 𑀧𑀭𑀺𑀲𑀸𑀬𑀁 𑀯𑀺𑀲𑀸𑀭𑀤𑁄;

𑀧𑀝𑀺𑀫𑀮𑁆𑀮𑁄 𑀳𑀺 𑀢𑁂 𑀅𑀢𑁆𑀣𑀺, 𑀯𑀺𑀚𑀺𑀢𑀸𑀯𑀻 𑀦𑀼 𑀫𑀜𑁆𑀜𑀲𑀻’’𑀢𑀺.

‘‘𑀦𑀤𑀦𑁆𑀢𑀺 𑀯𑁂 𑀫𑀳𑀸𑀯𑀻𑀭𑀸, 𑀧𑀭𑀺𑀲𑀸𑀲𑀼 𑀯𑀺𑀲𑀸𑀭𑀤𑀸;

𑀢𑀣𑀸𑀕𑀢𑀸 𑀩𑀮𑀧𑁆𑀧𑀢𑁆𑀢𑀸, 𑀢𑀺𑀡𑁆𑀡𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓’’𑀦𑁆𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀪𑀕𑀯𑀸, 𑀚𑀸𑀦𑀸𑀢𑀺 𑀫𑀁 𑀲𑀼𑀕𑀢𑁄’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁩. 𑀲𑀓𑀮𑀺𑀓𑀲𑀼𑀢𑁆𑀢𑀁

𑁧𑁪𑁯. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀫𑀤𑁆𑀤𑀓𑀼𑀘𑁆𑀙𑀺𑀲𑁆𑀫𑀺𑀁 𑀫𑀺𑀕𑀤𑀸𑀬𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀢𑁄 𑀧𑀸𑀤𑁄 𑀲𑀓𑀮𑀺𑀓𑀸𑀬 𑀔𑀢𑁄 𑀳𑁄𑀢𑀺, 𑀪𑀼𑀲𑀸 𑀲𑀼𑀤𑀁 𑀪𑀕𑀯𑀢𑁄 𑀯𑁂𑀤𑀦𑀸 𑀯𑀢𑁆𑀢𑀦𑁆𑀢𑀺 𑀲𑀸𑀭𑀻𑀭𑀺𑀓𑀸 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀅𑀲𑀸𑀢𑀸 𑀅𑀫𑀦𑀸𑀧𑀸. 𑀢𑀸 𑀲𑀼𑀤𑀁 𑀪𑀕𑀯𑀸 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀅𑀥𑀺𑀯𑀸𑀲𑁂𑀢𑀺 𑀅𑀯𑀺𑀳𑀜𑁆𑀜𑀫𑀸𑀦𑁄. 𑀅𑀣 𑀔𑁄 𑀪𑀕𑀯𑀸 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺 𑀧𑀸𑀤𑁂 𑀧𑀸𑀤𑀁 𑀅𑀘𑁆𑀘𑀸𑀥𑀸𑀬 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀫𑀦𑁆𑀤𑀺𑀬𑀸 𑀦𑀼 𑀔𑁄 𑀲𑁂𑀲𑀺 𑀉𑀤𑀸𑀳𑀼 𑀓𑀸𑀯𑁂𑀬𑁆𑀬𑀫𑀢𑁆𑀢𑁄,

𑀅𑀢𑁆𑀣𑀸 𑀦𑀼 𑀢𑁂 𑀲𑀫𑁆𑀧𑀘𑀼𑀭𑀸 𑀦 𑀲𑀦𑁆𑀢𑀺;

𑀏𑀓𑁄 𑀯𑀺𑀯𑀺𑀢𑁆𑀢𑁂 𑀲𑀬𑀦𑀸𑀲𑀦𑀫𑁆𑀳𑀺,

𑀦𑀺𑀤𑁆𑀤𑀸𑀫𑀼𑀔𑁄 𑀓𑀺𑀫𑀺𑀤𑀁 𑀲𑁄𑀧𑁆𑀧𑀲𑁂 𑀯𑀸’’𑀢𑀺.

‘‘𑀦 𑀫𑀦𑁆𑀤𑀺𑀬𑀸 𑀲𑀬𑀸𑀫𑀺 𑀦𑀸𑀧𑀺 𑀓𑀸𑀯𑁂𑀬𑁆𑀬𑀫𑀢𑁆𑀢𑁄,

𑀅𑀢𑁆𑀣𑀁 𑀲𑀫𑁂𑀘𑁆𑀘𑀸𑀳𑀫𑀧𑁂𑀢𑀲𑁄𑀓𑁄;

𑀏𑀓𑁄 𑀯𑀺𑀯𑀺𑀢𑁆𑀢𑁂 𑀲𑀬𑀦𑀸𑀲𑀦𑀫𑁆𑀳𑀺,

𑀲𑀬𑀸𑀫𑀳𑀁 𑀲𑀩𑁆𑀩𑀪𑀽𑀢𑀸𑀦𑀼𑀓𑀫𑁆𑀧𑀻.

‘‘𑀬𑁂𑀲𑀫𑁆𑀧𑀺 𑀲𑀮𑁆𑀮𑀁 𑀉𑀭𑀲𑀺 𑀧𑀯𑀺𑀝𑁆𑀞𑀁,

𑀫𑀼𑀳𑀼𑀁 𑀫𑀼𑀳𑀼𑀁 𑀳𑀤𑀬𑀁 𑀯𑁂𑀥𑀫𑀸𑀦𑀁;

𑀢𑁂𑀧𑀻𑀥 𑀲𑁄𑀧𑁆𑀧𑀁 𑀮𑀪𑀭𑁂 𑀲𑀲𑀮𑁆𑀮𑀸,

𑀢𑀲𑁆𑀫𑀸 𑀅𑀳𑀁 𑀦 𑀲𑀼𑀧𑁂 𑀯𑀻𑀢𑀲𑀮𑁆𑀮𑁄.

‘‘𑀚𑀕𑁆𑀕𑀁 𑀦 𑀲𑀗𑁆𑀓𑁂 𑀦𑀧𑀺 𑀪𑁂𑀫𑀺 𑀲𑁄𑀢𑁆𑀢𑀼𑀁,

𑀭𑀢𑁆𑀢𑀺𑀦𑁆𑀤𑀺𑀯𑀸 𑀦𑀸𑀦𑀼𑀢𑀧𑀦𑁆𑀢𑀺 𑀫𑀸𑀫𑀁;

𑀳𑀸𑀦𑀺𑀁 𑀦 𑀧𑀲𑁆𑀲𑀸𑀫𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂,

𑀢𑀲𑁆𑀫𑀸 𑀲𑀼𑀧𑁂 𑀲𑀩𑁆𑀩𑀪𑀽𑀢𑀸𑀦𑀼𑀓𑀫𑁆𑀧𑀻’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀪𑀕𑀯𑀸, 𑀚𑀸𑀦𑀸𑀢𑀺 𑀫𑀁 𑀲𑀼𑀕𑀢𑁄’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁪. 𑀧𑀢𑀺𑀭𑀽𑀧𑀲𑀼𑀢𑁆𑀢𑀁

𑁧𑁫𑁦. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀮𑁂𑀲𑀼 𑀯𑀺𑀳𑀭𑀢𑀺 𑀏𑀓𑀲𑀸𑀮𑀸𑀬𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀫𑀳𑀢𑀺𑀬𑀸 𑀕𑀺𑀳𑀺𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺.

𑀅𑀣 𑀔𑁄 𑀫𑀸𑀭𑀲𑁆𑀲 𑀧𑀸𑀧𑀺𑀫𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀲𑀫𑀡𑁄 𑀕𑁄𑀢𑀫𑁄 𑀫𑀳𑀢𑀺𑀬𑀸 𑀕𑀺𑀳𑀺𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀬𑀁𑀦𑀽𑀦𑀸𑀳𑀁 𑀬𑁂𑀦 𑀲𑀫𑀡𑁄 𑀕𑁄𑀢𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀁 𑀯𑀺𑀘𑀓𑁆𑀔𑀼𑀓𑀫𑁆𑀫𑀸𑀬𑀸’’𑀢𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀦𑁂𑀢𑀁 𑀢𑀯 𑀧𑀢𑀺𑀭𑀽𑀧𑀁, 𑀬𑀤𑀜𑁆𑀜𑀫𑀦𑀼𑀲𑀸𑀲𑀲𑀺;

𑀅𑀦𑀼𑀭𑁄𑀥𑀯𑀺𑀭𑁄𑀥𑁂𑀲𑀼, 𑀫𑀸 𑀲𑀚𑁆𑀚𑀺𑀢𑁆𑀣𑁄 𑀢𑀤𑀸𑀘𑀭’’𑀦𑁆𑀢𑀺.

‘‘𑀳𑀺𑀢𑀸𑀦𑀼𑀓𑀫𑁆𑀧𑀻 𑀲𑀫𑁆𑀩𑀼𑀤𑁆𑀥𑁄, 𑀬𑀤𑀜𑁆𑀜𑀫𑀦𑀼𑀲𑀸𑀲𑀢𑀺;

𑀅𑀦𑀼𑀭𑁄𑀥𑀯𑀺𑀭𑁄𑀥𑁂𑀳𑀺, 𑀯𑀺𑀧𑁆𑀧𑀫𑀼𑀢𑁆𑀢𑁄 𑀢𑀣𑀸𑀕𑀢𑁄’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀪𑀕𑀯𑀸, 𑀚𑀸𑀦𑀸𑀢𑀺 𑀫𑀁 𑀲𑀼𑀕𑀢𑁄’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁫. 𑀫𑀸𑀦𑀲𑀲𑀼𑀢𑁆𑀢𑀁

𑁧𑁫𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀧𑀸𑀲𑁄, 𑀬𑁆𑀯𑀸𑀬𑀁 𑀘𑀭𑀢𑀺 𑀫𑀸𑀦𑀲𑁄;

𑀢𑁂𑀦 𑀢𑀁 𑀩𑀸𑀥𑀬𑀺𑀲𑁆𑀲𑀸𑀫𑀺, 𑀦 𑀫𑁂 𑀲𑀫𑀡 𑀫𑁄𑀓𑁆𑀔𑀲𑀻’’𑀢𑀺.

‘‘𑀭𑀽𑀧𑀸 𑀲𑀤𑁆𑀤𑀸 𑀭𑀲𑀸 𑀕𑀦𑁆𑀥𑀸, 𑀨𑁄𑀝𑁆𑀞𑀩𑁆𑀩𑀸 𑀘 𑀫𑀦𑁄𑀭𑀫𑀸;

𑀏𑀢𑁆𑀣 𑀫𑁂 𑀯𑀺𑀕𑀢𑁄 𑀙𑀦𑁆𑀤𑁄, 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓𑀸’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀪𑀕𑀯𑀸, 𑀚𑀸𑀦𑀸𑀢𑀺 𑀫𑀁 𑀲𑀼𑀕𑀢𑁄’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁬. 𑀧𑀢𑁆𑀢𑀲𑀼𑀢𑁆𑀢𑀁

𑁧𑁫𑁨. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀉𑀧𑀸𑀤𑀸𑀬 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀺 𑀲𑀫𑀸𑀤𑀧𑁂𑀢𑀺 [𑀲𑀫𑀸𑀤𑀸𑀧𑁂𑀢𑀺 (?)] 𑀲𑀫𑀼𑀢𑁆𑀢𑁂𑀚𑁂𑀢𑀺 𑀲𑀫𑁆𑀧𑀳𑀁𑀲𑁂𑀢𑀺. 𑀢𑁂 𑀘 𑀪𑀺𑀓𑁆𑀔𑀽 𑀅𑀝𑁆𑀞𑀺𑀁 𑀓𑀢𑁆𑀯𑀸 [𑀅𑀝𑁆𑀞𑀺𑀓𑀢𑁆𑀯𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀫𑀦𑀲𑀺 𑀓𑀢𑁆𑀯𑀸 𑀲𑀩𑁆𑀩𑀘𑁂𑀢𑀲𑀸 [𑀲𑀩𑁆𑀩𑀘𑁂𑀢𑀲𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.), 𑀲𑀩𑁆𑀩𑀁 𑀘𑁂𑀢𑀲𑀸 (𑀓.)] 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺.

𑀅𑀣 𑀔𑁄 𑀫𑀸𑀭𑀲𑁆𑀲 𑀧𑀸𑀧𑀺𑀫𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀲𑀫𑀡𑁄 𑀕𑁄𑀢𑀫𑁄 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀉𑀧𑀸𑀤𑀸𑀬 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀺 𑀲𑀫𑀸𑀤𑀧𑁂𑀢𑀺 𑀲𑀫𑀼𑀢𑁆𑀢𑁂𑀚𑁂𑀢𑀺 𑀲𑀫𑁆𑀧𑀳𑀁𑀲𑁂𑀢𑀺. 𑀢𑁂 𑀘 𑀪𑀺𑀓𑁆𑀔𑀽 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺 𑀓𑀢𑁆𑀯𑀸 𑀲𑀩𑁆𑀩𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺. 𑀬𑀁𑀦𑀽𑀦𑀸𑀳𑀁 𑀬𑁂𑀦 𑀲𑀫𑀡𑁄 𑀕𑁄𑀢𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀁 𑀯𑀺𑀘𑀓𑁆𑀔𑀼𑀓𑀫𑁆𑀫𑀸𑀬𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀧𑀢𑁆𑀢𑀸 𑀅𑀩𑁆𑀪𑁄𑀓𑀸𑀲𑁂 𑀦𑀺𑀓𑁆𑀔𑀺𑀢𑁆𑀢𑀸 𑀳𑁄𑀦𑁆𑀢𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀩𑀮𑀻𑀩𑀤𑁆𑀤𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀬𑁂𑀦 𑀢𑁂 𑀧𑀢𑁆𑀢𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼, 𑀏𑀲𑁄 𑀩𑀮𑀻𑀩𑀤𑁆𑀤𑁄 𑀧𑀢𑁆𑀢𑁂 𑀪𑀺𑀦𑁆𑀤𑁂𑀬𑁆𑀬𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀦 𑀲𑁄, 𑀪𑀺𑀓𑁆𑀔𑀼, 𑀩𑀮𑀻𑀩𑀤𑁆𑀤𑁄. 𑀫𑀸𑀭𑁄 𑀏𑀲𑁄 𑀧𑀸𑀧𑀺𑀫𑀸 𑀢𑀼𑀫𑁆𑀳𑀸𑀓𑀁 𑀯𑀺𑀘𑀓𑁆𑀔𑀼𑀓𑀫𑁆𑀫𑀸𑀬 𑀆𑀕𑀢𑁄’’𑀢𑀺. 𑀅𑀣 𑀔𑁄 𑀪𑀕𑀯𑀸 ‘‘𑀫𑀸𑀭𑁄 𑀅𑀬𑀁 𑀧𑀸𑀧𑀺𑀫𑀸’’ 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀭𑀽𑀧𑀁 𑀯𑁂𑀤𑀬𑀺𑀢𑀁 𑀲𑀜𑁆𑀜𑀸, 𑀯𑀺𑀜𑁆𑀜𑀸𑀡𑀁 𑀬𑀜𑁆𑀘 𑀲𑀗𑁆𑀔𑀢𑀁;

𑀦𑁂𑀲𑁄𑀳𑀫𑀲𑁆𑀫𑀺 𑀦𑁂𑀢𑀁 𑀫𑁂, 𑀏𑀯𑀁 𑀢𑀢𑁆𑀣 𑀯𑀺𑀭𑀚𑁆𑀚𑀢𑀺.

‘‘𑀏𑀯𑀁 𑀯𑀺𑀭𑀢𑁆𑀢𑀁 𑀔𑁂𑀫𑀢𑁆𑀢𑀁, 𑀲𑀩𑁆𑀩𑀲𑀁𑀬𑁄𑀚𑀦𑀸𑀢𑀺𑀕𑀁;

𑀅𑀦𑁆𑀯𑁂𑀲𑀁 𑀲𑀩𑁆𑀩𑀝𑁆𑀞𑀸𑀦𑁂𑀲𑀼, 𑀫𑀸𑀭𑀲𑁂𑀦𑀸𑀧𑀺 𑀦𑀸𑀚𑁆𑀛𑀕𑀸’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸…𑀧𑁂… 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁭. 𑀙𑀨𑀲𑁆𑀲𑀸𑀬𑀢𑀦𑀲𑀼𑀢𑁆𑀢𑀁

𑁧𑁫𑁩. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀉𑀧𑀸𑀤𑀸𑀬 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀺 𑀲𑀫𑀸𑀤𑀧𑁂𑀢𑀺 𑀲𑀫𑀼𑀢𑁆𑀢𑁂𑀚𑁂𑀢𑀺 𑀲𑀫𑁆𑀧𑀳𑀁𑀲𑁂𑀢𑀺. 𑀢𑁂 𑀘 𑀪𑀺𑀓𑁆𑀔𑀽 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺 𑀓𑀢𑁆𑀯𑀸 𑀲𑀩𑁆𑀩𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺.

𑀅𑀣 𑀔𑁄 𑀫𑀸𑀭𑀲𑁆𑀲 𑀧𑀸𑀧𑀺𑀫𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀲𑀫𑀡𑁄 𑀕𑁄𑀢𑀫𑁄 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀉𑀧𑀸𑀤𑀸𑀬 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀺 𑀲𑀫𑀸𑀤𑀧𑁂𑀢𑀺 𑀲𑀫𑀼𑀢𑁆𑀢𑁂𑀚𑁂𑀢𑀺 𑀲𑀧𑁆𑀧𑀳𑀁𑀲𑁂𑀢𑀺. 𑀢𑁂 𑀘 𑀪𑀺𑀓𑁆𑀔𑀽 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺 𑀓𑀢𑁆𑀯𑀸 𑀲𑀩𑁆𑀩𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺. 𑀬𑀁𑀦𑀽𑀦𑀸𑀳𑀁 𑀬𑁂𑀦 𑀲𑀫𑀡𑁄 𑀕𑁄𑀢𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀁 𑀯𑀺𑀘𑀓𑁆𑀔𑀼𑀓𑀫𑁆𑀫𑀸𑀬𑀸’’𑀢𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀫𑀳𑀦𑁆𑀢𑀁 𑀪𑀬𑀪𑁂𑀭𑀯𑀁 𑀲𑀤𑁆𑀤𑀫𑀓𑀸𑀲𑀺, 𑀅𑀧𑀺𑀲𑁆𑀲𑀼𑀤𑀁 𑀧𑀣𑀯𑀻 𑀫𑀜𑁆𑀜𑁂 𑀉𑀦𑁆𑀤𑁆𑀭𑀻𑀬𑀢𑀺 [𑀉𑀤𑁆𑀭𑀻𑀬𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻) 𑀉 + 𑀤𑀭 + 𑀬 + 𑀢𑀺 = 𑀉𑀤𑁆𑀭𑀻𑀬𑀢𑀺]. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼, 𑀏𑀲𑀸 𑀧𑀣𑀯𑀻 𑀫𑀜𑁆𑀜𑁂 𑀉𑀦𑁆𑀤𑁆𑀭𑀻𑀬𑀢𑀻’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀪𑀕𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀦𑁂𑀲𑀸 𑀪𑀺𑀓𑁆𑀔𑀼 𑀧𑀣𑀯𑀻 𑀉𑀦𑁆𑀤𑁆𑀭𑀻𑀬𑀢𑀺. 𑀫𑀸𑀭𑁄 𑀏𑀲𑁄 𑀧𑀸𑀧𑀺𑀫𑀸 𑀢𑀼𑀫𑁆𑀳𑀸𑀓𑀁 𑀯𑀺𑀘𑀓𑁆𑀔𑀼𑀓𑀫𑁆𑀫𑀸𑀬 𑀆𑀕𑀢𑁄’’𑀢𑀺. 𑀅𑀣 𑀔𑁄 𑀪𑀕𑀯𑀸 ‘‘𑀫𑀸𑀭𑁄 𑀅𑀬𑀁 𑀧𑀸𑀧𑀺𑀫𑀸’’ 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀭𑀽𑀧𑀸 𑀲𑀤𑁆𑀤𑀸 𑀭𑀲𑀸 𑀕𑀦𑁆𑀥𑀸, 𑀨𑀲𑁆𑀲𑀸 𑀥𑀫𑁆𑀫𑀸 𑀘 𑀓𑁂𑀯𑀮𑀸;

𑀏𑀢𑀁 𑀮𑁄𑀓𑀸𑀫𑀺𑀲𑀁 𑀖𑁄𑀭𑀁, 𑀏𑀢𑁆𑀣 𑀮𑁄𑀓𑁄 𑀯𑀺𑀫𑀼𑀘𑁆𑀙𑀺𑀢𑁄.

‘‘𑀏𑀢𑀜𑁆𑀘 𑀲𑀫𑀢𑀺𑀓𑁆𑀓𑀫𑁆𑀫, 𑀲𑀢𑁄 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑁄;

𑀫𑀸𑀭𑀥𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑁆𑀫, 𑀆𑀤𑀺𑀘𑁆𑀘𑁄𑀯 𑀯𑀺𑀭𑁄𑀘𑀢𑀻’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸…𑀧𑁂… 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁮. 𑀧𑀺𑀡𑁆𑀟𑀲𑀼𑀢𑁆𑀢𑀁

𑁧𑁫𑁪. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀫𑀕𑀥𑁂𑀲𑀼 𑀯𑀺𑀳𑀭𑀢𑀺 𑀧𑀜𑁆𑀘𑀲𑀸𑀮𑀸𑀬𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀧𑀜𑁆𑀘𑀲𑀸𑀮𑀸𑀬𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀓𑀼𑀫𑀸𑀭𑀺𑀓𑀸𑀦𑀁 𑀧𑀸𑀳𑀼𑀦𑀓𑀸𑀦𑀺 𑀪𑀯𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀧𑀜𑁆𑀘𑀲𑀸𑀮𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀧𑀜𑁆𑀘𑀲𑀸𑀮𑁂𑀬𑁆𑀬𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀫𑀸𑀭𑁂𑀦 𑀧𑀸𑀧𑀺𑀫𑀢𑀸 𑀅𑀦𑁆𑀯𑀸𑀯𑀺𑀝𑁆𑀞𑀸 𑀪𑀯𑀦𑁆𑀢𑀺 𑁋 𑀫𑀸 𑀲𑀫𑀡𑁄 𑀕𑁄𑀢𑀫𑁄 𑀧𑀺𑀡𑁆𑀟𑀫𑀮𑀢𑁆𑀣𑀸𑀢𑀺.

𑀅𑀣 𑀔𑁄 𑀪𑀕𑀯𑀸 𑀬𑀣𑀸𑀥𑁄𑀢𑁂𑀦 𑀧𑀢𑁆𑀢𑁂𑀦 𑀧𑀜𑁆𑀘𑀲𑀸𑀮𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺 𑀢𑀣𑀸𑀥𑁄𑀢𑁂𑀦 [𑀬𑀣𑀸𑀥𑁄𑀢𑁂𑀦 (?)] 𑀧𑀢𑁆𑀢𑁂𑀦 𑀧𑀝𑀺𑀓𑁆𑀓𑀫𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀧𑀺 𑀢𑁆𑀯𑀁, 𑀲𑀫𑀡, 𑀧𑀺𑀡𑁆𑀟𑀫𑀮𑀢𑁆𑀣𑀸’’𑀢𑀺? ‘‘𑀢𑀣𑀸 𑀦𑀼 𑀢𑁆𑀯𑀁, 𑀧𑀸𑀧𑀺𑀫, 𑀅𑀓𑀸𑀲𑀺 𑀬𑀣𑀸𑀳𑀁 𑀧𑀺𑀡𑁆𑀟𑀁 𑀦 𑀮𑀪𑁂𑀬𑁆𑀬’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀪𑀕𑀯𑀸 𑀤𑀼𑀢𑀺𑀬𑀫𑁆𑀧𑀺 𑀧𑀜𑁆𑀘𑀲𑀸𑀮𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀼. 𑀢𑀣𑀸𑀳𑀁 𑀓𑀭𑀺𑀲𑁆𑀲𑀸𑀫𑀺 𑀬𑀣𑀸 𑀪𑀕𑀯𑀸 𑀧𑀺𑀡𑁆𑀟𑀁 𑀮𑀘𑁆𑀙𑀢𑀻’’𑀢𑀺.

‘‘𑀅𑀧𑀼𑀜𑁆𑀜𑀁 𑀧𑀲𑀯𑀺 𑀫𑀸𑀭𑁄, 𑀆𑀲𑀚𑁆𑀚 𑀦𑀁 𑀢𑀣𑀸𑀕𑀢𑀁;

𑀓𑀺𑀁 𑀦𑀼 𑀫𑀜𑁆𑀜𑀲𑀺 𑀧𑀸𑀧𑀺𑀫, 𑀦 𑀫𑁂 𑀧𑀸𑀧𑀁 𑀯𑀺𑀧𑀘𑁆𑀘𑀢𑀺.

‘‘𑀲𑀼𑀲𑀼𑀔𑀁 𑀯𑀢 𑀚𑀻𑀯𑀸𑀫, 𑀬𑁂𑀲𑀁 𑀦𑁄 𑀦𑀢𑁆𑀣𑀺 𑀓𑀺𑀜𑁆𑀘𑀦𑀁;

𑀧𑀻𑀢𑀺𑀪𑀓𑁆𑀔𑀸 𑀪𑀯𑀺𑀲𑁆𑀲𑀸𑀫, 𑀤𑁂𑀯𑀸 𑀆𑀪𑀲𑁆𑀲𑀭𑀸 𑀬𑀣𑀸’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀪𑀕𑀯𑀸, 𑀚𑀸𑀦𑀸𑀢𑀺 𑀫𑀁 𑀲𑀼𑀕𑀢𑁄’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁯. 𑀓𑀲𑁆𑀲𑀓𑀲𑀼𑀢𑁆𑀢𑀁

𑁧𑁫𑁫. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀺 𑀲𑀫𑀸𑀤𑀧𑁂𑀢𑀺 𑀲𑀫𑀼𑀢𑁆𑀢𑁂𑀚𑁂𑀢𑀺 𑀲𑀫𑁆𑀧𑀳𑀁𑀲𑁂𑀢𑀺. 𑀢𑁂 𑀘 𑀪𑀺𑀓𑁆𑀔𑀽 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺 𑀓𑀢𑁆𑀯𑀸 𑀲𑀩𑁆𑀩𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺.

𑀅𑀣 𑀔𑁄 𑀫𑀸𑀭𑀲𑁆𑀲 𑀧𑀸𑀧𑀺𑀫𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀲𑀫𑀡𑁄 𑀕𑁄𑀢𑀫𑁄 𑀪𑀺𑀓𑁆𑀔𑀽𑀦𑀁 𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀥𑀫𑁆𑀫𑀺𑀬𑀸 𑀓𑀣𑀸𑀬…𑀧𑁂… 𑀬𑀁𑀦𑀽𑀦𑀸𑀳𑀁 𑀬𑁂𑀦 𑀲𑀫𑀡𑁄 𑀕𑁄𑀢𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀁 𑀯𑀺𑀘𑀓𑁆𑀔𑀼𑀓𑀫𑁆𑀫𑀸𑀬𑀸’’𑀢𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀓𑀲𑁆𑀲𑀓𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀫𑀳𑀦𑁆𑀢𑀁 𑀦𑀗𑁆𑀕𑀮𑀁 𑀔𑀦𑁆𑀥𑁂 𑀓𑀭𑀺𑀢𑁆𑀯𑀸 𑀤𑀻𑀖𑀧𑀸𑀘𑀦𑀬𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀳𑀝𑀳𑀝𑀓𑁂𑀲𑁄 𑀲𑀸𑀡𑀲𑀸𑀝𑀺𑀦𑀺𑀯𑀢𑁆𑀣𑁄 𑀓𑀤𑁆𑀤𑀫𑀫𑀓𑁆𑀔𑀺𑀢𑁂𑀳𑀺 𑀧𑀸𑀤𑁂𑀳𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀧𑀺, 𑀲𑀫𑀡, 𑀩𑀮𑀻𑀩𑀤𑁆𑀤𑁂 𑀅𑀤𑁆𑀤𑀲𑀸’’𑀢𑀺? ‘‘𑀓𑀺𑀁 𑀧𑀦, 𑀧𑀸𑀧𑀺𑀫, 𑀢𑁂 𑀩𑀮𑀻𑀩𑀤𑁆𑀤𑁂𑀳𑀻’’𑀢𑀺? ‘‘𑀫𑀫𑁂𑀯, 𑀲𑀫𑀡, 𑀘𑀓𑁆𑀔𑀼, 𑀫𑀫 𑀭𑀽𑀧𑀸, 𑀫𑀫 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀯𑀺𑀜𑁆𑀜𑀸𑀡𑀸𑀬𑀢𑀦𑀁. 𑀓𑀼𑀳𑀺𑀁 𑀫𑁂, 𑀲𑀫𑀡, 𑀕𑀦𑁆𑀢𑁆𑀯𑀸 𑀫𑁄𑀓𑁆𑀔𑀲𑀺? 𑀫𑀫𑁂𑀯, 𑀲𑀫𑀡, 𑀲𑁄𑀢𑀁, 𑀫𑀫 𑀲𑀤𑁆𑀤𑀸…𑀧𑁂… 𑀫𑀫𑁂𑀯, 𑀲𑀫𑀡, 𑀖𑀸𑀦𑀁, 𑀫𑀫 𑀕𑀦𑁆𑀥𑀸; 𑀫𑀫𑁂𑀯, 𑀲𑀫𑀡, 𑀚𑀺𑀯𑁆𑀳𑀸, 𑀫𑀫 𑀭𑀲𑀸; 𑀫𑀫𑁂𑀯, 𑀲𑀫𑀡, 𑀓𑀸𑀬𑁄, 𑀫𑀫 𑀨𑁄𑀝𑁆𑀞𑀩𑁆𑀩𑀸; 𑀫𑀫𑁂𑀯, 𑀲𑀫𑀡, 𑀫𑀦𑁄, 𑀫𑀫 𑀥𑀫𑁆𑀫𑀸, 𑀫𑀫 𑀫𑀦𑁄𑀲𑀫𑁆𑀨𑀲𑁆𑀲𑀯𑀺𑀜𑁆𑀜𑀸𑀡𑀸𑀬𑀢𑀦𑀁. 𑀓𑀼𑀳𑀺𑀁 𑀫𑁂, 𑀲𑀫𑀡, 𑀕𑀦𑁆𑀢𑁆𑀯𑀸 𑀫𑁄𑀓𑁆𑀔𑀲𑀻’’𑀢𑀺?

‘‘𑀢𑀯𑁂𑀯, 𑀧𑀸𑀧𑀺𑀫, 𑀘𑀓𑁆𑀔𑀼, 𑀢𑀯 𑀭𑀽𑀧𑀸, 𑀢𑀯 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀯𑀺𑀜𑁆𑀜𑀸𑀡𑀸𑀬𑀢𑀦𑀁. 𑀬𑀢𑁆𑀣 𑀘 𑀔𑁄, 𑀧𑀸𑀧𑀺𑀫, 𑀦𑀢𑁆𑀣𑀺 𑀘𑀓𑁆𑀔𑀼, 𑀦𑀢𑁆𑀣𑀺 𑀭𑀽𑀧𑀸, 𑀦𑀢𑁆𑀣𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀯𑀺𑀜𑁆𑀜𑀸𑀡𑀸𑀬𑀢𑀦𑀁, 𑀅𑀕𑀢𑀺 𑀢𑀯 𑀢𑀢𑁆𑀣, 𑀧𑀸𑀧𑀺𑀫. 𑀢𑀯𑁂𑀯, 𑀧𑀸𑀧𑀺𑀫, 𑀲𑁄𑀢𑀁, 𑀢𑀯 𑀲𑀤𑁆𑀤𑀸, 𑀢𑀯 𑀲𑁄𑀢𑀲𑀫𑁆𑀨𑀲𑁆𑀲𑀯𑀺𑀜𑁆𑀜𑀸𑀡𑀸𑀬𑀢𑀦𑀁. 𑀬𑀢𑁆𑀣 𑀘 𑀔𑁄, 𑀧𑀸𑀧𑀺𑀫, 𑀦𑀢𑁆𑀣𑀺 𑀲𑁄𑀢𑀁, 𑀦𑀢𑁆𑀣𑀺 𑀲𑀤𑁆𑀤𑀸, 𑀦𑀢𑁆𑀣𑀺 𑀲𑁄𑀢𑀲𑀫𑁆𑀨𑀲𑁆𑀲𑀯𑀺𑀜𑁆𑀜𑀸𑀡𑀸𑀬𑀢𑀦𑀁, 𑀅𑀕𑀢𑀺 𑀢𑀯 𑀢𑀢𑁆𑀣, 𑀧𑀸𑀧𑀺𑀫. 𑀢𑀯𑁂𑀯, 𑀧𑀸𑀧𑀺𑀫, 𑀖𑀸𑀦𑀁, 𑀢𑀯 𑀕𑀦𑁆𑀥𑀸, 𑀢𑀯 𑀖𑀸𑀦𑀲𑀫𑁆𑀨𑀲𑁆𑀲𑀯𑀺𑀜𑁆𑀜𑀸𑀡𑀸𑀬𑀢𑀦𑀁. 𑀬𑀢𑁆𑀣 𑀘 𑀔𑁄, 𑀧𑀸𑀧𑀺𑀫, 𑀦𑀢𑁆𑀣𑀺 𑀖𑀸𑀦𑀁, 𑀦𑀢𑁆𑀣𑀺 𑀕𑀦𑁆𑀥𑀸, 𑀦𑀢𑁆𑀣𑀺 𑀖𑀸𑀦𑀲𑀫𑁆𑀨𑀲𑁆𑀲𑀯𑀺𑀜𑁆𑀜𑀸𑀡𑀸𑀬𑀢𑀦𑀁, 𑀅𑀕𑀢𑀺 𑀢𑀯 𑀢𑀢𑁆𑀣, 𑀧𑀸𑀧𑀺𑀫. 𑀢𑀯𑁂𑀯, 𑀧𑀸𑀧𑀺𑀫, 𑀚𑀺𑀯𑁆𑀳𑀸, 𑀢𑀯 𑀭𑀲𑀸, 𑀢𑀯 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀯𑀺𑀜𑁆𑀜𑀸𑀡𑀸𑀬𑀢𑀦𑀁…𑀧𑁂… 𑀢𑀯𑁂𑀯, 𑀧𑀸𑀧𑀺𑀫, 𑀓𑀸𑀬𑁄, 𑀢𑀯 𑀨𑁄𑀝𑁆𑀞𑀩𑁆𑀩𑀸, 𑀢𑀯 𑀓𑀸𑀬𑀲𑀫𑁆𑀨𑀲𑁆𑀲𑀯𑀺𑀜𑁆𑀜𑀸𑀡𑀸𑀬𑀢𑀦𑀁…𑀧𑁂… 𑀢𑀯𑁂𑀯, 𑀧𑀸𑀧𑀺𑀫, 𑀫𑀦𑁄, 𑀢𑀯 𑀥𑀫𑁆𑀫𑀸, 𑀢𑀯 𑀫𑀦𑁄𑀲𑀫𑁆𑀨𑀲𑁆𑀲𑀯𑀺𑀜𑁆𑀜𑀸𑀡𑀸𑀬𑀢𑀦𑀁. 𑀬𑀢𑁆𑀣 𑀘 𑀔𑁄, 𑀧𑀸𑀧𑀺𑀫, 𑀦𑀢𑁆𑀣𑀺 𑀫𑀦𑁄, 𑀦𑀢𑁆𑀣𑀺 𑀥𑀫𑁆𑀫𑀸, 𑀦𑀢𑁆𑀣𑀺 𑀫𑀦𑁄𑀲𑀫𑁆𑀨𑀲𑁆𑀲𑀯𑀺𑀜𑁆𑀜𑀸𑀡𑀸𑀬𑀢𑀦𑀁, 𑀅𑀕𑀢𑀺 𑀢𑀯 𑀢𑀢𑁆𑀣, 𑀧𑀸𑀧𑀺𑀫𑀸’’𑀢𑀺.

‘‘𑀬𑀁 𑀯𑀤𑀦𑁆𑀢𑀺 𑀫𑀫 𑀬𑀺𑀤𑀦𑁆𑀢𑀺, 𑀬𑁂 𑀯𑀤𑀦𑁆𑀢𑀺 𑀫𑀫𑀦𑁆𑀢𑀺 𑀘;

𑀏𑀢𑁆𑀣 𑀘𑁂 𑀢𑁂 𑀫𑀦𑁄 𑀅𑀢𑁆𑀣𑀺, 𑀦 𑀫𑁂 𑀲𑀫𑀡 𑀫𑁄𑀓𑁆𑀔𑀲𑀻’’𑀢𑀺.

‘‘𑀬𑀁 𑀯𑀤𑀦𑁆𑀢𑀺 𑀦 𑀢𑀁 𑀫𑀬𑁆𑀳𑀁, 𑀬𑁂 𑀯𑀤𑀦𑁆𑀢𑀺 𑀦 𑀢𑁂 𑀅𑀳𑀁;

𑀏𑀯𑀁 𑀧𑀸𑀧𑀺𑀫 𑀚𑀸𑀦𑀸𑀳𑀺, 𑀦 𑀫𑁂 𑀫𑀕𑁆𑀕𑀫𑁆𑀧𑀺 𑀤𑀓𑁆𑀔𑀲𑀻’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸…𑀧𑁂… 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑁧𑁦. 𑀭𑀚𑁆𑀚𑀲𑀼𑀢𑁆𑀢𑀁

𑁧𑁫𑁬. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀮𑁂𑀲𑀼 𑀯𑀺𑀳𑀭𑀢𑀺 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 [𑀳𑀺𑀫𑀯𑀦𑁆𑀢𑀧𑀲𑁆𑀲𑁂 (𑀲𑀻.)] 𑀅𑀭𑀜𑁆𑀜𑀓𑀼𑀝𑀺𑀓𑀸𑀬𑀁. 𑀅𑀣 𑀔𑁄 𑀪𑀕𑀯𑀢𑁄 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀲𑀓𑁆𑀓𑀸 𑀦𑀼 𑀔𑁄 𑀭𑀚𑁆𑀚𑀁 𑀓𑀸𑀭𑁂𑀢𑀼𑀁 𑀅𑀳𑀦𑀁 𑀅𑀖𑀸𑀢𑀬𑀁 𑀅𑀚𑀺𑀦𑀁 𑀅𑀚𑀸𑀧𑀬𑀁 𑀅𑀲𑁄𑀘𑀁 𑀅𑀲𑁄𑀘𑀸𑀧𑀬𑀁 𑀥𑀫𑁆𑀫𑁂𑀦𑀸’’𑀢𑀺?

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀪𑀕𑀯𑀢𑁄 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀸𑀭𑁂𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀭𑀚𑁆𑀚𑀁, 𑀓𑀸𑀭𑁂𑀢𑀼, 𑀲𑀼𑀕𑀢𑁄, 𑀭𑀚𑁆𑀚𑀁 𑀅𑀳𑀦𑀁 𑀅𑀖𑀸𑀢𑀬𑀁 𑀅𑀚𑀺𑀦𑀁 𑀅𑀚𑀸𑀧𑀬𑀁 𑀅𑀲𑁄𑀘𑀁 𑀅𑀲𑁄𑀘𑀸𑀧𑀬𑀁 𑀥𑀫𑁆𑀫𑁂𑀦𑀸’’𑀢𑀺. ‘‘𑀓𑀺𑀁 𑀧𑀦 𑀫𑁂 𑀢𑁆𑀯𑀁, 𑀧𑀸𑀧𑀺𑀫, 𑀧𑀲𑁆𑀲𑀲𑀺 𑀬𑀁 𑀫𑀁 𑀢𑁆𑀯𑀁 𑀏𑀯𑀁 𑀯𑀤𑁂𑀲𑀺 𑁋 ‘𑀓𑀸𑀭𑁂𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀭𑀚𑁆𑀚𑀁, 𑀓𑀸𑀭𑁂𑀢𑀼 𑀲𑀼𑀕𑀢𑁄, 𑀭𑀚𑁆𑀚𑀁 𑀅𑀳𑀦𑀁 𑀅𑀖𑀸𑀢𑀬𑀁 𑀅𑀚𑀺𑀦𑀁 𑀅𑀚𑀸𑀧𑀬𑀁 𑀅𑀲𑁄𑀘𑀁 𑀅𑀲𑁄𑀘𑀸𑀧𑀬𑀁 𑀥𑀫𑁆𑀫𑁂𑀦𑀸’’’𑀢𑀺? ‘‘𑀪𑀕𑀯𑀢𑀸 𑀔𑁄, 𑀪𑀦𑁆𑀢𑁂, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸. 𑀆𑀓𑀗𑁆𑀔𑀫𑀸𑀦𑁄 𑀘, 𑀪𑀦𑁆𑀢𑁂, 𑀪𑀕𑀯𑀸 𑀳𑀺𑀫𑀯𑀦𑁆𑀢𑀁 𑀧𑀩𑁆𑀩𑀢𑀭𑀸𑀚𑀁 𑀲𑀼𑀯𑀡𑁆𑀡𑀁 𑀢𑁆𑀯𑁂𑀯 𑀅𑀥𑀺𑀫𑀼𑀘𑁆𑀘𑁂𑀬𑁆𑀬 𑀲𑀼𑀯𑀡𑁆𑀡𑀜𑁆𑀘 𑀧𑀦𑀲𑁆𑀲𑀸’’𑀢𑀺 [𑀲𑀼𑀯𑀡𑁆𑀡𑀧𑀩𑁆𑀩𑀢𑀲𑁆𑀲𑀸𑀢𑀺 (𑀲𑀻. 𑀲𑁆𑀬𑀸. 𑀓𑀁.), 𑀲𑀼𑀯𑀡𑁆𑀡𑀜𑁆𑀘 𑀧𑀩𑁆𑀩𑀢𑀲𑁆𑀲𑀸𑀢𑀺 (𑀧𑀻.)].

‘‘𑀧𑀩𑁆𑀩𑀢𑀲𑁆𑀲 𑀲𑀼𑀯𑀡𑁆𑀡𑀲𑁆𑀲, 𑀚𑀸𑀢𑀭𑀽𑀧𑀲𑁆𑀲 𑀓𑁂𑀯𑀮𑁄;

𑀤𑁆𑀯𑀺𑀢𑁆𑀢𑀸𑀯 𑀦𑀸𑀮𑀫𑁂𑀓𑀲𑁆𑀲, 𑀇𑀢𑀺 𑀯𑀺𑀤𑁆𑀯𑀸 𑀲𑀫𑀜𑁆𑀘𑀭𑁂.

‘‘𑀬𑁄 𑀤𑀼𑀓𑁆𑀔𑀫𑀤𑁆𑀤𑀓𑁆𑀔𑀺 𑀬𑀢𑁄𑀦𑀺𑀤𑀸𑀦𑀁,

𑀓𑀸𑀫𑁂𑀲𑀼 𑀲𑁄 𑀚𑀦𑁆𑀢𑀼 𑀓𑀣𑀁 𑀦𑀫𑁂𑀬𑁆𑀬;

𑀉𑀧𑀥𑀺𑀁 𑀯𑀺𑀤𑀺𑀢𑁆𑀯𑀸 𑀲𑀗𑁆𑀕𑁄𑀢𑀺 𑀮𑁄𑀓𑁂,

𑀢𑀲𑁆𑀲𑁂𑀯 𑀚𑀦𑁆𑀢𑀼 𑀯𑀺𑀦𑀬𑀸𑀬 𑀲𑀺𑀓𑁆𑀔𑁂’’𑀢𑀺.

𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀚𑀸𑀦𑀸𑀢𑀺 𑀫𑀁 𑀪𑀕𑀯𑀸, 𑀚𑀸𑀦𑀸𑀢𑀺 𑀫𑀁 𑀲𑀼𑀕𑀢𑁄’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑀤𑀼𑀢𑀺𑀬𑁄 𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀧𑀸𑀲𑀸𑀡𑁄 𑀲𑀻𑀳𑁄 𑀲𑀓𑀮𑀺𑀓𑀁 [𑀲𑀓𑁆𑀔𑀮𑀺𑀓𑀁 (𑀓.)], 𑀧𑀢𑀺𑀭𑀽𑀧𑀜𑁆𑀘 𑀫𑀸𑀦𑀲𑀁;

𑀧𑀢𑁆𑀢𑀁 𑀆𑀬𑀢𑀦𑀁 𑀧𑀺𑀡𑁆𑀟𑀁, 𑀓𑀲𑁆𑀲𑀓𑀁 𑀭𑀚𑁆𑀚𑁂𑀦 𑀢𑁂 𑀤𑀲𑀸𑀢𑀺.