𑁧. 𑀇𑀦𑁆𑀤𑀓𑀲𑀼𑀢𑁆𑀢𑀁

𑁨𑁩𑁫. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀇𑀦𑁆𑀤𑀓𑀽𑀝𑁂 𑀧𑀩𑁆𑀩𑀢𑁂, 𑀇𑀦𑁆𑀤𑀓𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑁂. 𑀅𑀣 𑀔𑁄 𑀇𑀦𑁆𑀤𑀓𑁄 𑀬𑀓𑁆𑀔𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀭𑀽𑀧𑀁 𑀦 𑀚𑀻𑀯𑀦𑁆𑀢𑀺 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸, 𑀓𑀣𑀁 𑀦𑁆𑀯𑀬𑀁 𑀯𑀺𑀦𑁆𑀤𑀢𑀺𑀫𑀁 𑀲𑀭𑀻𑀭𑀁;

𑀓𑀼𑀢𑀲𑁆𑀲 𑀅𑀝𑁆𑀞𑀻𑀬𑀓𑀧𑀺𑀡𑁆𑀟𑀫𑁂𑀢𑀺, 𑀓𑀣𑀁 𑀦𑁆𑀯𑀬𑀁 𑀲𑀚𑁆𑀚𑀢𑀺 𑀕𑀩𑁆𑀪𑀭𑀲𑁆𑀫𑀺’’𑀦𑁆𑀢𑀺.

‘‘𑀧𑀞𑀫𑀁 𑀓𑀮𑀮𑀁 𑀳𑁄𑀢𑀺, 𑀓𑀮𑀮𑀸 𑀳𑁄𑀢𑀺 𑀅𑀩𑁆𑀩𑀼𑀤𑀁;

𑀅𑀩𑁆𑀩𑀼𑀤𑀸 𑀚𑀸𑀬𑀢𑁂 𑀧𑁂𑀲𑀺, 𑀧𑁂𑀲𑀺 𑀦𑀺𑀩𑁆𑀩𑀢𑁆𑀢𑀢𑀻 𑀖𑀦𑁄;

𑀖𑀦𑀸 𑀧𑀲𑀸𑀔𑀸 𑀚𑀸𑀬𑀦𑁆𑀢𑀺, 𑀓𑁂𑀲𑀸 𑀮𑁄𑀫𑀸 𑀦𑀔𑀸𑀧𑀺 𑀘.

‘‘𑀬𑀜𑁆𑀘𑀲𑁆𑀲 𑀪𑀼𑀜𑁆𑀚𑀢𑀻 𑀫𑀸𑀢𑀸, 𑀅𑀦𑁆𑀦𑀁 𑀧𑀸𑀦𑀜𑁆𑀘 𑀪𑁄𑀚𑀦𑀁;

𑀢𑁂𑀦 𑀲𑁄 𑀢𑀢𑁆𑀣 𑀬𑀸𑀧𑁂𑀢𑀺, 𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑁄 𑀦𑀭𑁄’’𑀢𑀺.