𑁨. 𑀲𑀓𑁆𑀓𑀦𑀸𑀫𑀲𑀼𑀢𑁆𑀢𑀁

𑁨𑁩𑁬. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀅𑀣 𑀔𑁄 𑀲𑀓𑁆𑀓𑀦𑀸𑀫𑀓𑁄 𑀬𑀓𑁆𑀔𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀲𑀩𑁆𑀩𑀕𑀦𑁆𑀣𑀧𑁆𑀧𑀳𑀻𑀦𑀲𑁆𑀲, 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲 𑀢𑁂 𑀲𑀢𑁄;

𑀲𑀫𑀡𑀲𑁆𑀲 𑀦 𑀢𑀁 𑀲𑀸𑀥𑀼, 𑀬𑀤𑀜𑁆𑀜𑀫𑀦𑀼𑀲𑀸𑀲𑀲𑀻’’𑀢𑀺 [𑀬𑀤𑀜𑁆𑀜𑀫𑀦𑀼𑀲𑀸𑀲𑀢𑀻𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)].

‘‘𑀬𑁂𑀦 𑀓𑁂𑀦𑀘𑀺 𑀯𑀡𑁆𑀡𑁂𑀦, 𑀲𑀁𑀯𑀸𑀲𑁄 𑀲𑀓𑁆𑀓 𑀚𑀸𑀬𑀢𑀺;

𑀦 𑀢𑀁 𑀅𑀭𑀳𑀢𑀺 𑀲𑀧𑁆𑀧𑀜𑁆𑀜𑁄, 𑀫𑀦𑀲𑀸 𑀅𑀦𑀼𑀓𑀫𑁆𑀧𑀺𑀢𑀼𑀁.

‘‘𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦, 𑀬𑀤𑀜𑁆𑀜𑀫𑀦𑀼𑀲𑀸𑀲𑀢𑀺;

𑀦 𑀢𑁂𑀦 𑀳𑁄𑀢𑀺 𑀲𑀁𑀬𑀼𑀢𑁆𑀢𑁄, 𑀬𑀸𑀦𑀼𑀓𑀫𑁆𑀧𑀸 [𑀲𑀸𑀦𑀼𑀓𑀫𑁆𑀧𑀸 (𑀲𑀻. 𑀧𑀻.)] 𑀅𑀦𑀼𑀤𑁆𑀤𑀬𑀸’’𑀢𑀺.