𑁧𑁦. 𑀬𑀓𑁆𑀔𑀲𑀁𑀬𑀼𑀢𑁆𑀢𑀁

𑁧. 𑀇𑀦𑁆𑀤𑀓𑀲𑀼𑀢𑁆𑀢𑀁

𑁨𑁩𑁫. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀇𑀦𑁆𑀤𑀓𑀽𑀝𑁂 𑀧𑀩𑁆𑀩𑀢𑁂, 𑀇𑀦𑁆𑀤𑀓𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑁂. 𑀅𑀣 𑀔𑁄 𑀇𑀦𑁆𑀤𑀓𑁄 𑀬𑀓𑁆𑀔𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀭𑀽𑀧𑀁 𑀦 𑀚𑀻𑀯𑀦𑁆𑀢𑀺 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸, 𑀓𑀣𑀁 𑀦𑁆𑀯𑀬𑀁 𑀯𑀺𑀦𑁆𑀤𑀢𑀺𑀫𑀁 𑀲𑀭𑀻𑀭𑀁;

𑀓𑀼𑀢𑀲𑁆𑀲 𑀅𑀝𑁆𑀞𑀻𑀬𑀓𑀧𑀺𑀡𑁆𑀟𑀫𑁂𑀢𑀺, 𑀓𑀣𑀁 𑀦𑁆𑀯𑀬𑀁 𑀲𑀚𑁆𑀚𑀢𑀺 𑀕𑀩𑁆𑀪𑀭𑀲𑁆𑀫𑀺’’𑀦𑁆𑀢𑀺.

‘‘𑀧𑀞𑀫𑀁 𑀓𑀮𑀮𑀁 𑀳𑁄𑀢𑀺, 𑀓𑀮𑀮𑀸 𑀳𑁄𑀢𑀺 𑀅𑀩𑁆𑀩𑀼𑀤𑀁;

𑀅𑀩𑁆𑀩𑀼𑀤𑀸 𑀚𑀸𑀬𑀢𑁂 𑀧𑁂𑀲𑀺, 𑀧𑁂𑀲𑀺 𑀦𑀺𑀩𑁆𑀩𑀢𑁆𑀢𑀢𑀻 𑀖𑀦𑁄;

𑀖𑀦𑀸 𑀧𑀲𑀸𑀔𑀸 𑀚𑀸𑀬𑀦𑁆𑀢𑀺, 𑀓𑁂𑀲𑀸 𑀮𑁄𑀫𑀸 𑀦𑀔𑀸𑀧𑀺 𑀘.

‘‘𑀬𑀜𑁆𑀘𑀲𑁆𑀲 𑀪𑀼𑀜𑁆𑀚𑀢𑀻 𑀫𑀸𑀢𑀸, 𑀅𑀦𑁆𑀦𑀁 𑀧𑀸𑀦𑀜𑁆𑀘 𑀪𑁄𑀚𑀦𑀁;

𑀢𑁂𑀦 𑀲𑁄 𑀢𑀢𑁆𑀣 𑀬𑀸𑀧𑁂𑀢𑀺, 𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑁄 𑀦𑀭𑁄’’𑀢𑀺.

𑁨. 𑀲𑀓𑁆𑀓𑀦𑀸𑀫𑀲𑀼𑀢𑁆𑀢𑀁

𑁨𑁩𑁬. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀅𑀣 𑀔𑁄 𑀲𑀓𑁆𑀓𑀦𑀸𑀫𑀓𑁄 𑀬𑀓𑁆𑀔𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀲𑀩𑁆𑀩𑀕𑀦𑁆𑀣𑀧𑁆𑀧𑀳𑀻𑀦𑀲𑁆𑀲, 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲 𑀢𑁂 𑀲𑀢𑁄;

𑀲𑀫𑀡𑀲𑁆𑀲 𑀦 𑀢𑀁 𑀲𑀸𑀥𑀼, 𑀬𑀤𑀜𑁆𑀜𑀫𑀦𑀼𑀲𑀸𑀲𑀲𑀻’’𑀢𑀺 [𑀬𑀤𑀜𑁆𑀜𑀫𑀦𑀼𑀲𑀸𑀲𑀢𑀻𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)].

‘‘𑀬𑁂𑀦 𑀓𑁂𑀦𑀘𑀺 𑀯𑀡𑁆𑀡𑁂𑀦, 𑀲𑀁𑀯𑀸𑀲𑁄 𑀲𑀓𑁆𑀓 𑀚𑀸𑀬𑀢𑀺;

𑀦 𑀢𑀁 𑀅𑀭𑀳𑀢𑀺 𑀲𑀧𑁆𑀧𑀜𑁆𑀜𑁄, 𑀫𑀦𑀲𑀸 𑀅𑀦𑀼𑀓𑀫𑁆𑀧𑀺𑀢𑀼𑀁.

‘‘𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦, 𑀬𑀤𑀜𑁆𑀜𑀫𑀦𑀼𑀲𑀸𑀲𑀢𑀺;

𑀦 𑀢𑁂𑀦 𑀳𑁄𑀢𑀺 𑀲𑀁𑀬𑀼𑀢𑁆𑀢𑁄, 𑀬𑀸𑀦𑀼𑀓𑀫𑁆𑀧𑀸 [𑀲𑀸𑀦𑀼𑀓𑀫𑁆𑀧𑀸 (𑀲𑀻. 𑀧𑀻.)] 𑀅𑀦𑀼𑀤𑁆𑀤𑀬𑀸’’𑀢𑀺.

𑁩. 𑀲𑀽𑀘𑀺𑀮𑁄𑀫𑀲𑀼𑀢𑁆𑀢𑀁

𑁨𑁩𑁭. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀕𑀬𑀸𑀬𑀁 𑀯𑀺𑀳𑀭𑀢𑀺 𑀝𑀗𑁆𑀓𑀺𑀢𑀫𑀜𑁆𑀘𑁂 𑀲𑀽𑀘𑀺𑀮𑁄𑀫𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀔𑀭𑁄 𑀘 𑀬𑀓𑁆𑀔𑁄 𑀲𑀽𑀘𑀺𑀮𑁄𑀫𑁄 𑀘 𑀬𑀓𑁆𑀔𑁄 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀅𑀢𑀺𑀓𑁆𑀓𑀫𑀦𑁆𑀢𑀺. 𑀅𑀣 𑀔𑁄 𑀔𑀭𑁄 𑀬𑀓𑁆𑀔𑁄 𑀲𑀽𑀘𑀺𑀮𑁄𑀫𑀁 𑀬𑀓𑁆𑀔𑀁 𑀏𑀢𑀤𑀯𑁄𑀘 𑁋 ‘‘𑀏𑀲𑁄 𑀲𑀫𑀡𑁄’’𑀢𑀺! ‘‘𑀦𑁂𑀲𑁄 𑀲𑀫𑀡𑁄, 𑀲𑀫𑀡𑀓𑁄 𑀏𑀲𑁄’’. ‘‘𑀬𑀸𑀯 𑀚𑀸𑀦𑀸𑀫𑀺 𑀬𑀤𑀺 𑀯𑀸 𑀲𑁄 𑀲𑀫𑀡𑁄 𑀬𑀤𑀺 𑀯𑀸 𑀧𑀦 𑀲𑁄 𑀲𑀫𑀡𑀓𑁄’’𑀢𑀺.

𑀅𑀣 𑀔𑁄 𑀲𑀽𑀘𑀺𑀮𑁄𑀫𑁄 𑀬𑀓𑁆𑀔𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀓𑀸𑀬𑀁 𑀉𑀧𑀦𑀸𑀫𑁂𑀲𑀺. 𑀅𑀣 𑀔𑁄 𑀪𑀕𑀯𑀸 𑀓𑀸𑀬𑀁 𑀅𑀧𑀦𑀸𑀫𑁂𑀲𑀺. 𑀅𑀣 𑀔𑁄 𑀲𑀽𑀘𑀺𑀮𑁄𑀫𑁄 𑀬𑀓𑁆𑀔𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀪𑀸𑀬𑀲𑀺 𑀫𑀁 𑀲𑀫𑀡𑀸’’𑀢𑀺? ‘‘𑀦 𑀔𑁆𑀯𑀸𑀳𑀁 𑀢𑀁, 𑀆𑀯𑀼𑀲𑁄, 𑀪𑀸𑀬𑀸𑀫𑀺; 𑀅𑀧𑀺 𑀘 𑀢𑁂 𑀲𑀫𑁆𑀨𑀲𑁆𑀲𑁄 𑀧𑀸𑀧𑀓𑁄’’𑀢𑀺. ‘‘𑀧𑀜𑁆𑀳𑀁 𑀢𑀁, 𑀲𑀫𑀡 𑀧𑀼𑀘𑁆𑀙𑀺𑀲𑁆𑀲𑀸𑀫𑀺. 𑀲𑀘𑁂 𑀫𑁂 𑀦 𑀩𑁆𑀬𑀸𑀓𑀭𑀺𑀲𑁆𑀲𑀲𑀺, 𑀘𑀺𑀢𑁆𑀢𑀁 𑀯𑀸 𑀢𑁂 𑀔𑀺𑀧𑀺𑀲𑁆𑀲𑀸𑀫𑀺, 𑀳𑀤𑀬𑀁 𑀯𑀸 𑀢𑁂 𑀨𑀸𑀮𑁂𑀲𑁆𑀲𑀸𑀫𑀺, 𑀧𑀸𑀤𑁂𑀲𑀼 𑀯𑀸 𑀕𑀳𑁂𑀢𑁆𑀯𑀸 𑀧𑀸𑀭𑀕𑀗𑁆𑀕𑀸𑀬 [𑀧𑀸𑀭𑀁 𑀕𑀗𑁆𑀕𑀸𑀬 (𑀓.)] 𑀔𑀺𑀧𑀺𑀲𑁆𑀲𑀸𑀫𑀻’’𑀢𑀺. ‘‘𑀦 𑀔𑁆𑀯𑀸𑀳𑀁 𑀢𑀁, 𑀆𑀯𑀼𑀲𑁄, 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬, 𑀬𑁄 𑀫𑁂 𑀘𑀺𑀢𑁆𑀢𑀁 𑀯𑀸 𑀔𑀺𑀧𑁂𑀬𑁆𑀬 𑀳𑀤𑀬𑀁 𑀯𑀸 𑀨𑀸𑀮𑁂𑀬𑁆𑀬 𑀧𑀸𑀤𑁂𑀲𑀼 𑀯𑀸 𑀕𑀳𑁂𑀢𑁆𑀯𑀸 𑀧𑀸𑀭𑀕𑀗𑁆𑀕𑀸𑀬 𑀔𑀺𑀧𑁂𑀬𑁆𑀬; 𑀅𑀧𑀺 𑀘 𑀢𑁆𑀯𑀁, 𑀆𑀯𑀼𑀲𑁄, 𑀧𑀼𑀘𑁆𑀙 𑀬𑀤𑀸 𑀓𑀗𑁆𑀔𑀲𑀻’’𑀢𑀺. 𑀅𑀣 𑀔𑁄 𑀲𑀽𑀘𑀺𑀮𑁄𑀫𑁄 𑀬𑀓𑁆𑀔𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋 ( ) [(𑀅𑀣 𑀔𑁄 𑀲𑀽𑀘𑀺𑀮𑁄𑀫𑁄 𑀬𑀓𑁆𑀔𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺.) (𑀲𑀻.)]

‘‘𑀭𑀸𑀕𑁄 𑀘 𑀤𑁄𑀲𑁄 𑀘 𑀓𑀼𑀢𑁄𑀦𑀺𑀤𑀸𑀦𑀸,

𑀅𑀭𑀢𑀻 𑀭𑀢𑀻 𑀮𑁄𑀫𑀳𑀁𑀲𑁄 𑀓𑀼𑀢𑁄𑀚𑀸;

𑀓𑀼𑀢𑁄 𑀲𑀫𑀼𑀝𑁆𑀞𑀸𑀬 𑀫𑀦𑁄𑀯𑀺𑀢𑀓𑁆𑀓𑀸,

𑀓𑀼𑀫𑀸𑀭𑀓𑀸 𑀥𑀗𑁆𑀓𑀫𑀺𑀯𑁄𑀲𑁆𑀲𑀚𑀦𑁆𑀢𑀻’’𑀢𑀺.

‘‘𑀭𑀸𑀕𑁄 𑀘 𑀤𑁄𑀲𑁄 𑀘 𑀇𑀢𑁄𑀦𑀺𑀤𑀸𑀦𑀸,

𑀅𑀭𑀢𑀻 𑀭𑀢𑀻 𑀮𑁄𑀫𑀳𑀁𑀲𑁄 𑀇𑀢𑁄𑀚𑀸;

𑀇𑀢𑁄 𑀲𑀫𑀼𑀝𑁆𑀞𑀸𑀬 𑀫𑀦𑁄𑀯𑀺𑀢𑀓𑁆𑀓𑀸,

𑀓𑀼𑀫𑀸𑀭𑀓𑀸 𑀥𑀗𑁆𑀓𑀫𑀺𑀯𑁄𑀲𑁆𑀲𑀚𑀦𑁆𑀢𑀺.

‘‘𑀲𑁆𑀦𑁂𑀳𑀚𑀸 𑀅𑀢𑁆𑀢𑀲𑀫𑁆𑀪𑀽𑀢𑀸, 𑀦𑀺𑀕𑁆𑀭𑁄𑀥𑀲𑁆𑀲𑁂𑀯 𑀔𑀦𑁆𑀥𑀚𑀸;

𑀧𑀼𑀣𑀽 𑀯𑀺𑀲𑀢𑁆𑀢𑀸 𑀓𑀸𑀫𑁂𑀲𑀼, 𑀫𑀸𑀮𑀼𑀯𑀸𑀯 𑀯𑀺𑀢𑀢𑀸 [𑀯𑀺𑀢𑁆𑀣𑀢𑀸 (𑀲𑁆𑀬𑀸. 𑀓𑀁.)] 𑀯𑀦𑁂.

‘‘𑀬𑁂 𑀦𑀁 𑀧𑀚𑀸𑀦𑀦𑁆𑀢𑀺 𑀬𑀢𑁄𑀦𑀺𑀤𑀸𑀦𑀁,

𑀢𑁂 𑀦𑀁 𑀯𑀺𑀦𑁄𑀤𑁂𑀦𑁆𑀢𑀺 𑀲𑀼𑀡𑁄𑀳𑀺 𑀬𑀓𑁆𑀔;

𑀢𑁂 𑀤𑀼𑀢𑁆𑀢𑀭𑀁 𑀑𑀖𑀫𑀺𑀫𑀁 𑀢𑀭𑀦𑁆𑀢𑀺,

𑀅𑀢𑀺𑀡𑁆𑀡𑀧𑀼𑀩𑁆𑀩𑀁 𑀅𑀧𑀼𑀦𑀩𑁆𑀪𑀯𑀸𑀬𑀸’’𑀢𑀺.

𑁪. 𑀫𑀡𑀺𑀪𑀤𑁆𑀤𑀲𑀼𑀢𑁆𑀢𑀁

𑁨𑁩𑁮. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀫𑀕𑀥𑁂𑀲𑀼 𑀯𑀺𑀳𑀭𑀢𑀺 𑀫𑀡𑀺𑀫𑀸𑀮𑀺𑀓𑁂 𑀘𑁂𑀢𑀺𑀬𑁂 𑀫𑀡𑀺𑀪𑀤𑁆𑀤𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑁂. 𑀅𑀣 𑀔𑁄 𑀫𑀡𑀺𑀪𑀤𑁆𑀤𑁄 𑀬𑀓𑁆𑀔𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀲𑀢𑀻𑀫𑀢𑁄 𑀲𑀤𑀸 𑀪𑀤𑁆𑀤𑀁, 𑀲𑀢𑀺𑀫𑀸 𑀲𑀼𑀔𑀫𑁂𑀥𑀢𑀺;

𑀲𑀢𑀻𑀫𑀢𑁄 𑀲𑀼𑀯𑁂 𑀲𑁂𑀬𑁆𑀬𑁄, 𑀯𑁂𑀭𑀸 𑀘 𑀧𑀭𑀺𑀫𑀼𑀘𑁆𑀘𑀢𑀻’’𑀢𑀺.

‘‘𑀲𑀢𑀻𑀫𑀢𑁄 𑀲𑀤𑀸 𑀪𑀤𑁆𑀤𑀁, 𑀲𑀢𑀺𑀫𑀸 𑀲𑀼𑀔𑀫𑁂𑀥𑀢𑀺;

𑀲𑀢𑀻𑀫𑀢𑁄 𑀲𑀼𑀯𑁂 𑀲𑁂𑀬𑁆𑀬𑁄, 𑀯𑁂𑀭𑀸 𑀦 𑀧𑀭𑀺𑀫𑀼𑀘𑁆𑀘𑀢𑀺.

‘‘𑀬𑀲𑁆𑀲 𑀲𑀩𑁆𑀩𑀫𑀳𑁄𑀭𑀢𑁆𑀢𑀁 [𑀭𑀢𑁆𑀢𑀺𑀁 (𑀲𑁆𑀬𑀸. 𑀓𑀁. 𑀓.)], 𑀅𑀳𑀺𑀁𑀲𑀸𑀬 𑀭𑀢𑁄 𑀫𑀦𑁄;

𑀫𑁂𑀢𑁆𑀢𑀁 𑀲𑁄 𑀲𑀩𑁆𑀩𑀪𑀽𑀢𑁂𑀲𑀼, 𑀯𑁂𑀭𑀁 𑀢𑀲𑁆𑀲 𑀦 𑀓𑁂𑀦𑀘𑀻’’𑀢𑀺.

𑁫. 𑀲𑀸𑀦𑀼𑀲𑀼𑀢𑁆𑀢𑀁

𑁨𑁩𑁯. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀺𑀲𑁆𑀲𑀸 𑀉𑀧𑀸𑀲𑀺𑀓𑀸𑀬 𑀲𑀸𑀦𑀼 𑀦𑀸𑀫 𑀧𑀼𑀢𑁆𑀢𑁄 𑀬𑀓𑁆𑀔𑁂𑀦 𑀕𑀳𑀺𑀢𑁄 𑀳𑁄𑀢𑀺. 𑀅𑀣 𑀔𑁄 𑀲𑀸 𑀉𑀧𑀸𑀲𑀺𑀓𑀸 𑀧𑀭𑀺𑀤𑁂𑀯𑀫𑀸𑀦𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁, 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻;

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘, 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀁.

‘‘𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑀺, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺 𑀬𑁂;

𑀦 𑀢𑁂𑀳𑀺 𑀬𑀓𑁆𑀔𑀸 𑀓𑀻𑀴𑀦𑁆𑀢𑀺, 𑀇𑀢𑀺 𑀫𑁂 𑀅𑀭𑀳𑀢𑀁 𑀲𑀼𑀢𑀁;

𑀲𑀸 𑀤𑀸𑀦𑀺 𑀅𑀚𑁆𑀚 𑀧𑀲𑁆𑀲𑀸𑀫𑀺, 𑀬𑀓𑁆𑀔𑀸 𑀓𑀻𑀴𑀦𑁆𑀢𑀺 𑀲𑀸𑀦𑀼𑀦𑀸’’𑀢𑀺.

‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁, 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻;

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘, 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀁;

𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑀺, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺 𑀬𑁂.

‘‘𑀦 𑀢𑁂𑀳𑀺 𑀬𑀓𑁆𑀔𑀸 𑀓𑀻𑀴𑀦𑁆𑀢𑀺, 𑀲𑀸𑀳𑀼 𑀢𑁂 𑀅𑀭𑀳𑀢𑀁 𑀲𑀼𑀢𑀁;

𑀲𑀸𑀦𑀼𑀁 𑀧𑀩𑀼𑀤𑁆𑀥𑀁 𑀯𑀚𑁆𑀚𑀸𑀲𑀺, 𑀬𑀓𑁆𑀔𑀸𑀦𑀁 𑀯𑀘𑀦𑀁 𑀇𑀤𑀁;

𑀫𑀸𑀓𑀸𑀲𑀺 𑀧𑀸𑀧𑀓𑀁 𑀓𑀫𑁆𑀫𑀁, 𑀆𑀯𑀺 𑀯𑀸 𑀬𑀤𑀺 𑀯𑀸 𑀭𑀳𑁄.

‘‘𑀲𑀘𑁂 𑀘 [𑀲𑀘𑁂𑀯 (𑀲𑁆𑀬𑀸. 𑀓𑀁. 𑀧𑀻. 𑀓.), 𑀬𑀜𑁆𑀘𑁂𑀯 (𑀲𑀻.)] 𑀧𑀸𑀧𑀓𑀁 𑀓𑀫𑁆𑀫𑀁, 𑀓𑀭𑀺𑀲𑁆𑀲𑀲𑀺 𑀓𑀭𑁄𑀲𑀺 𑀯𑀸;

𑀦 𑀢𑁂 𑀤𑀼𑀓𑁆𑀔𑀸 𑀧𑀫𑀼𑀢𑁆𑀬𑀢𑁆𑀣𑀺, 𑀉𑀧𑁆𑀧𑀘𑁆𑀘𑀸𑀧𑀺 𑀧𑀮𑀸𑀬𑀢𑁄’’𑀢𑀺.

‘‘𑀫𑀢𑀁 𑀯𑀸 𑀅𑀫𑁆𑀫 𑀭𑁄𑀤𑀦𑁆𑀢𑀺, 𑀬𑁄 𑀯𑀸 𑀚𑀻𑀯𑀁 𑀦 𑀤𑀺𑀲𑁆𑀲𑀢𑀺;

𑀚𑀻𑀯𑀦𑁆𑀢𑀁 𑀅𑀫𑁆𑀫 𑀧𑀲𑁆𑀲𑀦𑁆𑀢𑀻, 𑀓𑀲𑁆𑀫𑀸 𑀫𑀁 𑀅𑀫𑁆𑀫 𑀭𑁄𑀤𑀲𑀻’’𑀢𑀺.

‘‘𑀫𑀢𑀁 𑀯𑀸 𑀧𑀼𑀢𑁆𑀢 𑀭𑁄𑀤𑀦𑁆𑀢𑀺, 𑀬𑁄 𑀯𑀸 𑀚𑀻𑀯𑀁 𑀦 𑀤𑀺𑀲𑁆𑀲𑀢𑀺;

𑀬𑁄 𑀘 𑀓𑀸𑀫𑁂 𑀘𑀚𑀺𑀢𑁆𑀯𑀸𑀦, 𑀧𑀼𑀦𑀭𑀸𑀕𑀘𑁆𑀙𑀢𑁂 𑀇𑀥;

𑀢𑀁 𑀯𑀸𑀧𑀺 𑀧𑀼𑀢𑁆𑀢 𑀭𑁄𑀤𑀦𑁆𑀢𑀺, 𑀧𑀼𑀦 𑀚𑀻𑀯𑀁 𑀫𑀢𑁄 𑀳𑀺 𑀲𑁄.

‘‘𑀓𑀼𑀓𑁆𑀓𑀼𑀴𑀸 𑀉𑀩𑁆𑀪𑀢𑁄 𑀢𑀸𑀢, 𑀓𑀼𑀓𑁆𑀓𑀼𑀴𑀁 [𑀓𑀼𑀓𑁆𑀓𑀼𑀴𑁂 (𑀲𑀻.)] 𑀧𑀢𑀺𑀢𑀼𑀫𑀺𑀘𑁆𑀙𑀲𑀺;

𑀦𑀭𑀓𑀸 𑀉𑀩𑁆𑀪𑀢𑁄 𑀢𑀸𑀢, 𑀦𑀭𑀓𑀁 𑀧𑀢𑀺𑀢𑀼𑀫𑀺𑀘𑁆𑀙𑀲𑀺.

‘‘𑀅𑀪𑀺𑀥𑀸𑀯𑀣 𑀪𑀤𑁆𑀤𑀦𑁆𑀢𑁂, 𑀓𑀲𑁆𑀲 𑀉𑀚𑁆𑀛𑀸𑀧𑀬𑀸𑀫𑀲𑁂;

𑀆𑀤𑀺𑀢𑁆𑀢𑀸 𑀦𑀻𑀳𑀢𑀁 [𑀦𑀺𑀩𑁆𑀪𑀢𑀁 (𑀲𑁆𑀬𑀸. 𑀓𑀁. 𑀓.), 𑀦𑀺𑀪𑀢𑀁 (𑀧𑀻. 𑀓.)] 𑀪𑀡𑁆𑀟𑀁, 𑀧𑀼𑀦 𑀟𑀬𑁆𑀳𑀺𑀢𑀼𑀫𑀺𑀘𑁆𑀙𑀲𑀻’’𑀢𑀺.

𑁬. 𑀧𑀺𑀬𑀗𑁆𑀓𑀭𑀲𑀼𑀢𑁆𑀢𑀁

𑁨𑁪𑁦. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀥𑀫𑁆𑀫𑀧𑀤𑀸𑀦𑀺 𑀪𑀸𑀲𑀢𑀺. 𑀅𑀣 𑀔𑁄 𑀧𑀺𑀬𑀗𑁆𑀓𑀭𑀫𑀸𑀢𑀸 𑀬𑀓𑁆𑀔𑀺𑀦𑀻 𑀧𑀼𑀢𑁆𑀢𑀓𑀁 𑀏𑀯𑀁 𑀢𑁄𑀲𑁂𑀲𑀺 𑁋

‘‘𑀫𑀸 𑀲𑀤𑁆𑀤𑀁 𑀓𑀭𑀺 𑀧𑀺𑀬𑀗𑁆𑀓𑀭, 𑀪𑀺𑀓𑁆𑀔𑀼 𑀥𑀫𑁆𑀫𑀧𑀤𑀸𑀦𑀺 𑀪𑀸𑀲𑀢𑀺;

𑀅𑀧𑀺 [𑀅𑀧𑀺 (𑀲𑀻.)] 𑀘 𑀥𑀫𑁆𑀫𑀧𑀤𑀁 𑀯𑀺𑀚𑀸𑀦𑀺𑀬, 𑀧𑀝𑀺𑀧𑀚𑁆𑀚𑁂𑀫 𑀳𑀺𑀢𑀸𑀬 𑀦𑁄 𑀲𑀺𑀬𑀸.

‘‘𑀧𑀸𑀡𑁂𑀲𑀼 𑀘 𑀲𑀁𑀬𑀫𑀸𑀫𑀲𑁂, 𑀲𑀫𑁆𑀧𑀚𑀸𑀦𑀫𑀼𑀲𑀸 𑀦 𑀪𑀡𑀸𑀫𑀲𑁂;

𑀲𑀺𑀓𑁆𑀔𑁂𑀫 𑀲𑀼𑀲𑀻𑀮𑁆𑀬𑀫𑀢𑁆𑀢𑀦𑁄 [𑀲𑀼𑀲𑀻𑀮𑀫𑀢𑁆𑀢𑀦𑁄 (𑀲𑀻. 𑀓.)], 𑀅𑀧𑀺 𑀫𑀼𑀘𑁆𑀘𑁂𑀫 𑀧𑀺𑀲𑀸𑀘𑀬𑁄𑀦𑀺𑀬𑀸’’𑀢𑀺.

𑁭. 𑀧𑀼𑀦𑀩𑁆𑀩𑀲𑀼𑀲𑀼𑀢𑁆𑀢𑀁

𑁨𑁪𑁧. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀪𑀺𑀓𑁆𑀔𑀽 𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀺 𑀲𑀫𑀸𑀤𑀧𑁂𑀢𑀺 𑀲𑀫𑀼𑀢𑁆𑀢𑁂𑀚𑁂𑀢𑀺 𑀲𑀫𑁆𑀧𑀳𑀁𑀲𑁂𑀢𑀺. 𑀢𑁂 𑀘 𑀪𑀺𑀓𑁆𑀔𑀽 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺 𑀓𑀢𑁆𑀯𑀸 𑀲𑀩𑁆𑀩𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺. 𑀅𑀣 𑀔𑁄 𑀧𑀼𑀦𑀩𑁆𑀩𑀲𑀼𑀫𑀸𑀢𑀸 𑀬𑀓𑁆𑀔𑀺𑀦𑀻 𑀧𑀼𑀢𑁆𑀢𑀓𑁂 𑀏𑀯𑀁 𑀢𑁄𑀲𑁂𑀲𑀺 𑁋

‘‘𑀢𑀼𑀡𑁆𑀳𑀻 𑀉𑀢𑁆𑀢𑀭𑀺𑀓𑁂 𑀳𑁄𑀳𑀺, 𑀢𑀼𑀡𑁆𑀳𑀻 𑀳𑁄𑀳𑀺 𑀧𑀼𑀦𑀩𑁆𑀩𑀲𑀼;

𑀬𑀸𑀯𑀸𑀳𑀁 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲, 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀺 𑀲𑀢𑁆𑀣𑀼𑀦𑁄.

‘‘𑀦𑀺𑀩𑁆𑀩𑀸𑀦𑀁 𑀪𑀕𑀯𑀸 𑀆𑀳, 𑀲𑀩𑁆𑀩𑀕𑀦𑁆𑀣𑀧𑁆𑀧𑀫𑁄𑀘𑀦𑀁;

𑀅𑀢𑀺𑀯𑁂𑀮𑀸 𑀘 𑀫𑁂 𑀳𑁄𑀢𑀺, 𑀅𑀲𑁆𑀫𑀺𑀁 𑀥𑀫𑁆𑀫𑁂 𑀧𑀺𑀬𑀸𑀬𑀦𑀸.

‘‘𑀧𑀺𑀬𑁄 𑀮𑁄𑀓𑁂 𑀲𑀓𑁄 𑀧𑀼𑀢𑁆𑀢𑁄, 𑀧𑀺𑀬𑁄 𑀮𑁄𑀓𑁂 𑀲𑀓𑁄 𑀧𑀢𑀺;

𑀢𑀢𑁄 𑀧𑀺𑀬𑀢𑀭𑀸 𑀫𑀬𑁆𑀳𑀁, 𑀅𑀲𑁆𑀲 𑀥𑀫𑁆𑀫𑀲𑁆𑀲 𑀫𑀕𑁆𑀕𑀦𑀸.

‘‘𑀦 𑀳𑀺 𑀧𑀼𑀢𑁆𑀢𑁄 𑀧𑀢𑀺 𑀯𑀸𑀧𑀺, 𑀧𑀺𑀬𑁄 𑀤𑀼𑀓𑁆𑀔𑀸 𑀧𑀫𑁄𑀘𑀬𑁂;

𑀬𑀣𑀸 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁, 𑀤𑀼𑀓𑁆𑀔𑀸 𑀫𑁄𑀘𑁂𑀢𑀺 𑀧𑀸𑀡𑀺𑀦𑀁.

‘‘𑀮𑁄𑀓𑁂 𑀤𑀼𑀓𑁆𑀔𑀧𑀭𑁂𑀢𑀲𑁆𑀫𑀺𑀁, 𑀚𑀭𑀸𑀫𑀭𑀡𑀲𑀁𑀬𑀼𑀢𑁂;

𑀚𑀭𑀸𑀫𑀭𑀡𑀫𑁄𑀓𑁆𑀔𑀸𑀬, 𑀬𑀁 𑀥𑀫𑁆𑀫𑀁 𑀅𑀪𑀺𑀲𑀫𑁆𑀩𑀼𑀥𑀁;

𑀢𑀁 𑀥𑀫𑁆𑀫𑀁 𑀲𑁄𑀢𑀼𑀫𑀺𑀘𑁆𑀙𑀸𑀫𑀺, 𑀢𑀼𑀡𑁆𑀳𑀻 𑀳𑁄𑀳𑀺 𑀧𑀼𑀦𑀩𑁆𑀩𑀲𑀽’’𑀢𑀺.

‘‘𑀅𑀫𑁆𑀫𑀸 𑀦 𑀩𑁆𑀬𑀸𑀳𑀭𑀺𑀲𑁆𑀲𑀸𑀫𑀺, 𑀢𑀼𑀡𑁆𑀳𑀻𑀪𑀽𑀢𑀸𑀬𑀫𑀼𑀢𑁆𑀢𑀭𑀸;

𑀥𑀫𑁆𑀫𑀫𑁂𑀯 𑀦𑀺𑀲𑀸𑀫𑁂𑀳𑀺, 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀲𑀼𑀔𑀁;

𑀲𑀤𑁆𑀥𑀫𑁆𑀫𑀲𑁆𑀲 𑀅𑀦𑀜𑁆𑀜𑀸𑀬, 𑀅𑀫𑁆𑀫𑀸 𑀤𑀼𑀓𑁆𑀔𑀁 𑀘𑀭𑀸𑀫𑀲𑁂.

‘‘𑀏𑀲 𑀤𑁂𑀯𑀫𑀦𑀼𑀲𑁆𑀲𑀸𑀦𑀁, 𑀲𑀫𑁆𑀫𑀽𑀴𑁆𑀳𑀸𑀦𑀁 𑀧𑀪𑀗𑁆𑀓𑀭𑁄;

𑀩𑀼𑀤𑁆𑀥𑁄 𑀅𑀦𑁆𑀢𑀺𑀫𑀲𑀸𑀭𑀻𑀭𑁄, 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀘𑀓𑁆𑀔𑀼𑀫𑀸’’𑀢𑀺.

‘‘𑀲𑀸𑀥𑀼 𑀔𑁄 𑀧𑀡𑁆𑀟𑀺𑀢𑁄 𑀦𑀸𑀫, 𑀧𑀼𑀢𑁆𑀢𑁄 𑀚𑀸𑀢𑁄 𑀉𑀭𑁂𑀲𑀬𑁄;

𑀧𑀼𑀢𑁆𑀢𑁄 𑀫𑁂 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲, 𑀥𑀫𑁆𑀫𑀁 𑀲𑀼𑀤𑁆𑀥𑀁 𑀧𑀺𑀬𑀸𑀬𑀢𑀺.

‘‘𑀧𑀼𑀦𑀩𑁆𑀩𑀲𑀼 𑀲𑀼𑀔𑀻 𑀳𑁄𑀳𑀺, 𑀅𑀚𑁆𑀚𑀸𑀳𑀫𑁆𑀳𑀺 𑀲𑀫𑀼𑀕𑁆𑀕𑀢𑀸;

𑀤𑀺𑀝𑁆𑀞𑀸𑀦𑀺 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀉𑀢𑁆𑀢𑀭𑀸𑀧𑀺 𑀲𑀼𑀡𑀸𑀢𑀼 𑀫𑁂’’𑀢𑀺.

𑁮. 𑀲𑀼𑀤𑀢𑁆𑀢𑀲𑀼𑀢𑁆𑀢𑀁

𑁨𑁪𑁨. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀲𑀻𑀢𑀯𑀦𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀭𑀸𑀚𑀕𑀳𑀁 𑀅𑀦𑀼𑀧𑁆𑀧𑀢𑁆𑀢𑁄 𑀳𑁄𑀢𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦. 𑀅𑀲𑁆𑀲𑁄𑀲𑀺 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑁋 ‘‘𑀩𑀼𑀤𑁆𑀥𑁄 𑀓𑀺𑀭 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄’’𑀢𑀺. 𑀢𑀸𑀯𑀤𑁂𑀯 𑀘 𑀧𑀦 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀓𑀸𑀫𑁄 𑀳𑁄𑀢𑀺. 𑀅𑀣𑀲𑁆𑀲 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀓𑀸𑀮𑁄 𑀔𑁄 𑀅𑀚𑁆𑀚 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁. 𑀲𑁆𑀯𑁂 𑀤𑀸𑀦𑀸𑀳𑀁 𑀓𑀸𑀮𑁂𑀦 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀩𑀼𑀤𑁆𑀥𑀕𑀢𑀸𑀬 𑀲𑀢𑀺𑀬𑀸 𑀦𑀺𑀧𑀚𑁆𑀚𑀺. 𑀭𑀢𑁆𑀢𑀺𑀬𑀸 𑀲𑀼𑀤𑀁 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀝𑁆𑀞𑀸𑀲𑀺 𑀧𑀪𑀸𑀢𑀦𑁆𑀢𑀺 𑀫𑀜𑁆𑀜𑀫𑀸𑀦𑁄. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀬𑁂𑀦 𑀲𑀺𑀯𑀣𑀺𑀓𑀤𑁆𑀯𑀸𑀭𑀁 [𑀲𑀻𑀯𑀣𑀺𑀓𑀤𑁆𑀯𑀸𑀭𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀫𑀦𑀼𑀲𑁆𑀲𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀁𑀲𑀼. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀦𑀕𑀭𑀫𑁆𑀳𑀸 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀆𑀮𑁄𑀓𑁄 𑀅𑀦𑁆𑀢𑀭𑀥𑀸𑀬𑀺, 𑀅𑀦𑁆𑀥𑀓𑀸𑀭𑁄 𑀧𑀸𑀢𑀼𑀭𑀳𑁄𑀲𑀺, 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑁄 𑀉𑀤𑀧𑀸𑀤𑀺, 𑀢𑀢𑁄𑀯 𑀧𑀼𑀦 𑀦𑀺𑀯𑀢𑁆𑀢𑀺𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀅𑀣 𑀔𑁄 𑀲𑀺𑀯𑀓𑁄 [𑀲𑀻𑀯𑀓𑁄 (𑀲𑀻. 𑀧𑀻.)] 𑀬𑀓𑁆𑀔𑁄 𑀅𑀦𑁆𑀢𑀭𑀳𑀺𑀢𑁄 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀺 𑁋

‘‘𑀲𑀢𑀁 𑀳𑀢𑁆𑀣𑀻 𑀲𑀢𑀁 𑀅𑀲𑁆𑀲𑀸, 𑀲𑀢𑀁 𑀅𑀲𑁆𑀲𑀢𑀭𑀻𑀭𑀣𑀸;

𑀲𑀢𑀁 𑀓𑀜𑁆𑀜𑀸𑀲𑀳𑀲𑁆𑀲𑀸𑀦𑀺, 𑀆𑀫𑀼𑀓𑁆𑀓𑀫𑀡𑀺𑀓𑀼𑀡𑁆𑀟𑀮𑀸;

𑀏𑀓𑀲𑁆𑀲 𑀧𑀤𑀯𑀻𑀢𑀺𑀳𑀸𑀭𑀲𑁆𑀲, 𑀓𑀮𑀁 𑀦𑀸𑀕𑁆𑀖𑀦𑁆𑀢𑀺 𑀲𑁄𑀴𑀲𑀺𑀁.

‘‘𑀅𑀪𑀺𑀓𑁆𑀓𑀫 𑀕𑀳𑀧𑀢𑀺, 𑀅𑀪𑀺𑀓𑁆𑀓𑀫 𑀕𑀳𑀧𑀢𑀺;

𑀅𑀪𑀺𑀓𑁆𑀓𑀫𑀦𑀁 𑀢𑁂 𑀲𑁂𑀬𑁆𑀬𑁄, 𑀦𑁄 𑀧𑀝𑀺𑀓𑁆𑀓𑀫𑀦’’𑀦𑁆𑀢𑀺.

𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀅𑀦𑁆𑀥𑀓𑀸𑀭𑁄 𑀅𑀦𑁆𑀢𑀭𑀥𑀸𑀬𑀺, 𑀆𑀮𑁄𑀓𑁄 𑀧𑀸𑀢𑀼𑀭𑀳𑁄𑀲𑀺, 𑀬𑀁 𑀅𑀳𑁄𑀲𑀺 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑁄, 𑀲𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀆𑀮𑁄𑀓𑁄 𑀅𑀦𑁆𑀢𑀭𑀥𑀸𑀬𑀺, 𑀅𑀦𑁆𑀥𑀓𑀸𑀭𑁄 𑀧𑀸𑀢𑀼𑀭𑀳𑁄𑀲𑀺, 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑁄 𑀉𑀤𑀧𑀸𑀤𑀺, 𑀢𑀢𑁄𑀯 𑀧𑀼𑀦 𑀦𑀺𑀯𑀢𑁆𑀢𑀺𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑀺𑀯𑀓𑁄 𑀬𑀓𑁆𑀔𑁄 𑀅𑀦𑁆𑀢𑀭𑀳𑀺𑀢𑁄 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀺 𑁋

‘‘𑀲𑀢𑀁 𑀳𑀢𑁆𑀣𑀻 𑀲𑀢𑀁 𑀅𑀲𑁆𑀲𑀸…𑀧𑁂…

𑀓𑀮𑀁 𑀦𑀸𑀕𑁆𑀖𑀦𑁆𑀢𑀺 𑀲𑁄𑀴𑀲𑀺𑀁.

‘‘𑀅𑀪𑀺𑀓𑁆𑀓𑀫 𑀕𑀳𑀧𑀢𑀺, 𑀅𑀪𑀺𑀓𑁆𑀓𑀫 𑀕𑀳𑀧𑀢𑀺;

𑀅𑀪𑀺𑀓𑁆𑀓𑀫𑀦𑀁 𑀢𑁂 𑀲𑁂𑀬𑁆𑀬𑁄, 𑀦𑁄 𑀧𑀝𑀺𑀓𑁆𑀓𑀫𑀦’’𑀦𑁆𑀢𑀺.

𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀅𑀦𑁆𑀥𑀓𑀸𑀭𑁄 𑀅𑀦𑁆𑀢𑀭𑀥𑀸𑀬𑀺, 𑀆𑀮𑁄𑀓𑁄 𑀧𑀸𑀢𑀼𑀭𑀳𑁄𑀲𑀺, 𑀬𑀁 𑀅𑀳𑁄𑀲𑀺 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑁄, 𑀲𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀆𑀮𑁄𑀓𑁄 𑀅𑀦𑁆𑀢𑀭𑀥𑀸𑀬𑀺, 𑀅𑀦𑁆𑀥𑀓𑀸𑀭𑁄 𑀧𑀸𑀢𑀼𑀭𑀳𑁄𑀲𑀺, 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑁄 𑀉𑀤𑀧𑀸𑀤𑀺, 𑀢𑀢𑁄𑀯 𑀧𑀼𑀦 𑀦𑀺𑀯𑀢𑁆𑀢𑀺𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀲𑀺𑀯𑀓𑁄 𑀬𑀓𑁆𑀔𑁄 𑀅𑀦𑁆𑀢𑀭𑀳𑀺𑀢𑁄 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀺 𑁋

‘‘𑀲𑀢𑀁 𑀳𑀢𑁆𑀣𑀻 𑀲𑀢𑀁 𑀅𑀲𑁆𑀲𑀸…𑀧𑁂…

𑀓𑀮𑀁 𑀦𑀸𑀕𑁆𑀖𑀦𑁆𑀢𑀺 𑀲𑁄𑀴𑀲𑀺𑀁.

‘‘𑀅𑀪𑀺𑀓𑁆𑀓𑀫 𑀕𑀳𑀧𑀢𑀺, 𑀅𑀪𑀺𑀓𑁆𑀓𑀫 𑀕𑀳𑀧𑀢𑀺;

𑀅𑀪𑀺𑀓𑁆𑀓𑀫𑀦𑀁 𑀢𑁂 𑀲𑁂𑀬𑁆𑀬𑁄, 𑀦𑁄 𑀧𑀝𑀺𑀓𑁆𑀓𑀫𑀦’’𑀦𑁆𑀢𑀺.

𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀅𑀦𑁆𑀥𑀓𑀸𑀭𑁄 𑀅𑀦𑁆𑀢𑀭𑀥𑀸𑀬𑀺, 𑀆𑀮𑁄𑀓𑁄 𑀧𑀸𑀢𑀼𑀭𑀳𑁄𑀲𑀺, 𑀬𑀁 𑀅𑀳𑁄𑀲𑀺 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑁄, 𑀲𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀬𑁂𑀦 𑀲𑀻𑀢𑀯𑀦𑀁 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀅𑀩𑁆𑀪𑁄𑀓𑀸𑀲𑁂 𑀘𑀗𑁆𑀓𑀫𑀢𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀕𑀳𑀧𑀢𑀺𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀘𑀗𑁆𑀓𑀫𑀸 𑀑𑀭𑁄𑀳𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀏𑀳𑀺 𑀲𑀼𑀤𑀢𑁆𑀢𑀸’’𑀢𑀺. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺, 𑀦𑀸𑀫𑁂𑀦 𑀫𑀁 𑀪𑀕𑀯𑀸 𑀆𑀮𑀧𑀢𑀻𑀢𑀺, 𑀳𑀝𑁆𑀞𑁄 𑀉𑀤𑀕𑁆𑀕𑁄 𑀢𑀢𑁆𑀣𑁂𑀯 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺, 𑀪𑀦𑁆𑀢𑁂, 𑀪𑀕𑀯𑀸 𑀲𑀼𑀔𑀫𑀲𑀬𑀺𑀢𑁆𑀣𑀸’’𑀢𑀺?

‘‘𑀲𑀩𑁆𑀩𑀤𑀸 𑀯𑁂 𑀲𑀼𑀔𑀁 𑀲𑁂𑀢𑀺, 𑀩𑁆𑀭𑀸𑀳𑁆𑀫𑀡𑁄 𑀧𑀭𑀺𑀦𑀺𑀩𑁆𑀩𑀼𑀢𑁄;

𑀬𑁄 𑀦 𑀮𑀺𑀫𑁆𑀧𑀢𑀺 𑀓𑀸𑀫𑁂𑀲𑀼, 𑀲𑀻𑀢𑀺𑀪𑀽𑀢𑁄 𑀦𑀺𑀭𑀽𑀧𑀥𑀺.

‘‘𑀲𑀩𑁆𑀩𑀸 𑀆𑀲𑀢𑁆𑀢𑀺𑀬𑁄 𑀙𑁂𑀢𑁆𑀯𑀸, 𑀯𑀺𑀦𑁂𑀬𑁆𑀬 𑀳𑀤𑀬𑁂 𑀤𑀭𑀁;

𑀉𑀧𑀲𑀦𑁆𑀢𑁄 𑀲𑀼𑀔𑀁 𑀲𑁂𑀢𑀺, 𑀲𑀦𑁆𑀢𑀺𑀁 𑀧𑀧𑁆𑀧𑀼𑀬𑁆𑀬 𑀘𑁂𑀢𑀲𑀸’’𑀢𑀺 [𑀘𑁂𑀢𑀲𑁄𑀢𑀺 (𑀲𑀻.)].

𑁯. 𑀧𑀞𑀫𑀲𑀼𑀓𑁆𑀓𑀸𑀲𑀼𑀢𑁆𑀢𑀁

𑁨𑁪𑁩. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀼𑀓𑁆𑀓𑀸 𑀪𑀺𑀓𑁆𑀔𑀼𑀦𑀻 𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀅𑀣 𑀔𑁄 𑀲𑀼𑀓𑁆𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀅𑀪𑀺𑀧𑁆𑀧𑀲𑀦𑁆𑀦𑁄 𑀬𑀓𑁆𑀔𑁄 𑀭𑀸𑀚𑀕𑀳𑁂 𑀭𑀣𑀺𑀓𑀸𑀬 𑀭𑀣𑀺𑀓𑀁 𑀲𑀺𑀗𑁆𑀖𑀸𑀝𑀓𑁂𑀦 𑀲𑀺𑀗𑁆𑀖𑀸𑀝𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀓𑀺𑀁 𑀫𑁂 𑀓𑀢𑀸 𑀭𑀸𑀚𑀕𑀳𑁂 𑀫𑀦𑀼𑀲𑁆𑀲𑀸, 𑀫𑀥𑀼𑀧𑀻𑀢𑀸𑀯 𑀲𑁂𑀬𑀭𑁂;

𑀬𑁂 𑀲𑀼𑀓𑁆𑀓𑀁 𑀦 𑀧𑀬𑀺𑀭𑀼𑀧𑀸𑀲𑀦𑁆𑀢𑀺, 𑀤𑁂𑀲𑁂𑀦𑁆𑀢𑀺𑀁 𑀅𑀫𑀢𑀁 𑀧𑀤𑀁.

‘‘𑀢𑀜𑁆𑀘 𑀧𑀦 𑀅𑀧𑁆𑀧𑀝𑀺𑀯𑀸𑀦𑀻𑀬𑀁, 𑀅𑀲𑁂𑀘𑀦𑀓𑀫𑁄𑀚𑀯𑀁;

𑀧𑀺𑀯𑀦𑁆𑀢𑀺 𑀫𑀜𑁆𑀜𑁂 𑀲𑀧𑁆𑀧𑀜𑁆𑀜𑀸, 𑀯𑀮𑀸𑀳𑀓𑀫𑀺𑀯 𑀧𑀦𑁆𑀣𑀕𑀽’’𑀢𑀺 [𑀯𑀮𑀸𑀳𑀓𑀫𑀺𑀯𑀤𑁆𑀥𑀕𑀽𑀢𑀺 (𑀲𑀻.)].

𑁧𑁦. 𑀤𑀼𑀢𑀺𑀬𑀲𑀼𑀓𑁆𑀓𑀸𑀲𑀼𑀢𑁆𑀢𑀁

𑁨𑁪𑁪. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀲𑀼𑀓𑁆𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀪𑁄𑀚𑀦𑀁 𑀅𑀤𑀸𑀲𑀺. 𑀅𑀣 𑀔𑁄 𑀲𑀼𑀓𑁆𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀅𑀪𑀺𑀧𑁆𑀧𑀲𑀦𑁆𑀦𑁄 𑀬𑀓𑁆𑀔𑁄 𑀭𑀸𑀚𑀕𑀳𑁂 𑀭𑀣𑀺𑀓𑀸𑀬 𑀭𑀣𑀺𑀓𑀁 𑀲𑀺𑀗𑁆𑀖𑀸𑀝𑀓𑁂𑀦 𑀲𑀺𑀗𑁆𑀖𑀸𑀝𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀧𑀼𑀜𑁆𑀜𑀁 𑀯𑀢 𑀧𑀲𑀯𑀺 𑀩𑀳𑀼𑀁, 𑀲𑀧𑁆𑀧𑀜𑁆𑀜𑁄 𑀯𑀢𑀸𑀬𑀁 𑀉𑀧𑀸𑀲𑀓𑁄;

𑀬𑁄 𑀲𑀼𑀓𑁆𑀓𑀸𑀬 𑀅𑀤𑀸𑀲𑀺 𑀪𑁄𑀚𑀦𑀁, 𑀲𑀩𑁆𑀩𑀕𑀦𑁆𑀣𑁂𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑀺𑀬𑀸’’𑀢𑀺 [𑀯𑀺𑀧𑁆𑀧𑀫𑀼𑀢𑁆𑀢𑀸𑀬𑀸𑀢𑀺 (𑀲𑁆𑀬𑀸. 𑀓𑀁.)].

𑁧𑁧. 𑀘𑀻𑀭𑀸𑀲𑀼𑀢𑁆𑀢𑀁

𑁨𑁪𑁫. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀘𑀻𑀭𑀸𑀬 [𑀘𑀺𑀭𑀸𑀬 (𑀓.)] 𑀪𑀺𑀓𑁆𑀔𑀼𑀦𑀺𑀬𑀸 𑀘𑀻𑀯𑀭𑀁 𑀅𑀤𑀸𑀲𑀺. 𑀅𑀣 𑀔𑁄 𑀘𑀻𑀭𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀅𑀪𑀺𑀧𑁆𑀧𑀲𑀦𑁆𑀦𑁄 𑀬𑀓𑁆𑀔𑁄 𑀭𑀸𑀚𑀕𑀳𑁂 𑀭𑀣𑀺𑀓𑀸𑀬 𑀭𑀣𑀺𑀓𑀁 𑀲𑀺𑀗𑁆𑀖𑀸𑀝𑀓𑁂𑀦 𑀲𑀺𑀗𑁆𑀖𑀸𑀝𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀧𑀼𑀜𑁆𑀜𑀁 𑀯𑀢 𑀧𑀲𑀯𑀺 𑀩𑀳𑀼𑀁, 𑀲𑀧𑁆𑀧𑀜𑁆𑀜𑁄 𑀯𑀢𑀸𑀬𑀁 𑀉𑀧𑀸𑀲𑀓𑁄;

𑀬𑁄 𑀘𑀻𑀭𑀸𑀬 𑀅𑀤𑀸𑀲𑀺 𑀘𑀻𑀯𑀭𑀁, 𑀲𑀩𑁆𑀩𑀬𑁄𑀕𑁂𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑀺𑀬𑀸’’𑀢𑀺 [𑀯𑀺𑀧𑁆𑀧𑀫𑀼𑀢𑁆𑀢𑀸𑀬𑀸𑀢𑀺 (𑀲𑁆𑀬𑀸. 𑀓𑀁.)].

𑁧𑁨. 𑀆𑀴𑀯𑀓𑀲𑀼𑀢𑁆𑀢𑀁

𑁨𑁪𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀆𑀴𑀯𑀺𑀬𑀁 𑀯𑀺𑀳𑀭𑀢𑀺 𑀆𑀴𑀯𑀓𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑁂. 𑀅𑀣 𑀔𑁄 𑀆𑀴𑀯𑀓𑁄 𑀬𑀓𑁆𑀔𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀦𑀺𑀓𑁆𑀔𑀫, 𑀲𑀫𑀡𑀸’’𑀢𑀺. ‘‘𑀲𑀸𑀥𑀸𑀯𑀼𑀲𑁄’’𑀢𑀺 𑀪𑀕𑀯𑀸 𑀦𑀺𑀓𑁆𑀔𑀫𑀺. ‘‘𑀧𑀯𑀺𑀲, 𑀲𑀫𑀡𑀸’’𑀢𑀺. ‘‘𑀲𑀸𑀥𑀸𑀯𑀼𑀲𑁄’’𑀢𑀺 𑀪𑀕𑀯𑀸 𑀧𑀸𑀯𑀺𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀆𑀴𑀯𑀓𑁄 𑀬𑀓𑁆𑀔𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀦𑀺𑀓𑁆𑀔𑀫, 𑀲𑀫𑀡𑀸’’𑀢𑀺. ‘‘𑀲𑀸𑀥𑀸𑀯𑀼𑀲𑁄’’𑀢𑀺 𑀪𑀕𑀯𑀸 𑀦𑀺𑀓𑁆𑀔𑀫𑀺. ‘‘𑀧𑀯𑀺𑀲, 𑀲𑀫𑀡𑀸’’𑀢𑀺. ‘‘𑀲𑀸𑀥𑀸𑀯𑀼𑀲𑁄’’𑀢𑀺 𑀪𑀕𑀯𑀸 𑀧𑀸𑀯𑀺𑀲𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀆𑀴𑀯𑀓𑁄 𑀬𑀓𑁆𑀔𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀦𑀺𑀓𑁆𑀔𑀫, 𑀲𑀫𑀡𑀸’’𑀢𑀺. ‘‘𑀲𑀸𑀥𑀸𑀯𑀼𑀲𑁄’’𑀢𑀺 𑀪𑀕𑀯𑀸 𑀦𑀺𑀓𑁆𑀔𑀫𑀺. ‘‘𑀧𑀯𑀺𑀲, 𑀲𑀫𑀡𑀸’’𑀢𑀺. ‘‘𑀲𑀸𑀥𑀸𑀯𑀼𑀲𑁄’’𑀢𑀺 𑀪𑀕𑀯𑀸 𑀧𑀸𑀯𑀺𑀲𑀺. 𑀘𑀢𑀼𑀢𑁆𑀣𑀫𑁆𑀧𑀺 𑀔𑁄 𑀆𑀴𑀯𑀓𑁄 𑀬𑀓𑁆𑀔𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀦𑀺𑀓𑁆𑀔𑀫, 𑀲𑀫𑀡𑀸’’𑀢𑀺. ‘‘𑀦 𑀔𑁆𑀯𑀸𑀳𑀁 𑀢𑀁, 𑀆𑀯𑀼𑀲𑁄, 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺. 𑀬𑀁 𑀢𑁂 𑀓𑀭𑀡𑀻𑀬𑀁 𑀢𑀁 𑀓𑀭𑁄𑀳𑀻’’𑀢𑀺. ‘‘𑀧𑀜𑁆𑀳𑀁 𑀢𑀁, 𑀲𑀫𑀡, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺. 𑀲𑀘𑁂 𑀫𑁂 𑀦 𑀩𑁆𑀬𑀸𑀓𑀭𑀺𑀲𑁆𑀲𑀲𑀺, 𑀘𑀺𑀢𑁆𑀢𑀁 𑀯𑀸 𑀢𑁂 𑀔𑀺𑀧𑀺𑀲𑁆𑀲𑀸𑀫𑀺, 𑀳𑀤𑀬𑀁 𑀯𑀸 𑀢𑁂 𑀨𑀸𑀮𑁂𑀲𑁆𑀲𑀸𑀫𑀺, 𑀧𑀸𑀤𑁂𑀲𑀼 𑀯𑀸 𑀕𑀳𑁂𑀢𑁆𑀯𑀸 𑀧𑀸𑀭𑀕𑀗𑁆𑀕𑀸𑀬 𑀔𑀺𑀧𑀺𑀲𑁆𑀲𑀸𑀫𑀻’’𑀢𑀺. ‘‘𑀦 𑀔𑁆𑀯𑀸𑀳𑀁 𑀢𑀁, 𑀆𑀯𑀼𑀲𑁄, 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬, 𑀬𑁂 𑀫𑁂 𑀘𑀺𑀢𑁆𑀢𑀁 𑀯𑀸 𑀔𑀺𑀧𑁂𑀬𑁆𑀬 𑀳𑀤𑀬𑀁 𑀯𑀸 𑀨𑀸𑀮𑁂𑀬𑁆𑀬, 𑀧𑀸𑀤𑁂𑀲𑀼 𑀯𑀸 𑀕𑀳𑁂𑀢𑁆𑀯𑀸 𑀧𑀸𑀭𑀕𑀗𑁆𑀕𑀸𑀬 𑀔𑀺𑀧𑁂𑀬𑁆𑀬. 𑀅𑀧𑀺 𑀘 𑀢𑁆𑀯𑀁, 𑀆𑀯𑀼𑀲𑁄, 𑀧𑀼𑀘𑁆𑀙 𑀬𑀤𑀸 𑀓𑀗𑁆𑀔𑀲𑀻’’𑀢𑀺 [(𑀅𑀣 𑀔𑁄 𑀆𑀴𑀯𑀓𑁄 𑀬𑀓𑁆𑀔𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺.) (𑀲𑀻.)].

‘‘𑀓𑀺𑀁𑀲𑀽𑀥 𑀯𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀲𑁂𑀝𑁆𑀞𑀁, 𑀓𑀺𑀁𑀲𑀼 𑀲𑀼𑀘𑀺𑀡𑁆𑀡𑀁 𑀲𑀼𑀔𑀫𑀸𑀯𑀳𑀸𑀢𑀺;

𑀓𑀺𑀁𑀲𑀼 𑀳𑀯𑁂 𑀲𑀸𑀤𑀼𑀢𑀭𑀁 𑀭𑀲𑀸𑀦𑀁, 𑀓𑀣𑀁𑀚𑀻𑀯𑀺𑀁 𑀚𑀻𑀯𑀺𑀢𑀫𑀸𑀳𑀼 𑀲𑁂𑀝𑁆𑀞’’𑀦𑁆𑀢𑀺.

‘‘𑀲𑀤𑁆𑀥𑀻𑀥 𑀯𑀺𑀢𑁆𑀢𑀁 𑀧𑀼𑀭𑀺𑀲𑁆𑀲 𑀲𑁂𑀝𑁆𑀞𑀁, 𑀥𑀫𑁆𑀫𑁄 𑀲𑀼𑀘𑀺𑀡𑁆𑀡𑁄 𑀲𑀼𑀔𑀫𑀸𑀯𑀳𑀸𑀢𑀺;

𑀲𑀘𑁆𑀘𑀁 𑀳𑀯𑁂 𑀲𑀸𑀤𑀼𑀢𑀭𑀁 𑀭𑀲𑀸𑀦𑀁, 𑀧𑀜𑁆𑀜𑀸𑀚𑀻𑀯𑀺𑀁 𑀚𑀻𑀯𑀺𑀢𑀫𑀸𑀳𑀼 𑀲𑁂𑀝𑁆𑀞’’𑀦𑁆𑀢𑀺.

‘‘𑀓𑀣𑀁𑀲𑀼 𑀢𑀭𑀢𑀺 𑀑𑀖𑀁, 𑀓𑀣𑀁𑀲𑀼 𑀢𑀭𑀢𑀺 𑀅𑀡𑁆𑀡𑀯𑀁;

𑀓𑀣𑀁𑀲𑀼 𑀤𑀼𑀓𑁆𑀔𑀫𑀘𑁆𑀘𑁂𑀢𑀺, 𑀓𑀣𑀁𑀲𑀼 𑀧𑀭𑀺𑀲𑀼𑀚𑁆𑀛𑀢𑀻’’𑀢𑀺.

‘‘𑀲𑀤𑁆𑀥𑀸𑀬 𑀢𑀭𑀢𑀺 𑀑𑀖𑀁, 𑀅𑀧𑁆𑀧𑀫𑀸𑀤𑁂𑀦 𑀅𑀡𑁆𑀡𑀯𑀁;

𑀯𑀻𑀭𑀺𑀬𑁂𑀦 𑀤𑀼𑀓𑁆𑀔𑀫𑀘𑁆𑀘𑁂𑀢𑀺, 𑀧𑀜𑁆𑀜𑀸𑀬 𑀧𑀭𑀺𑀲𑀼𑀚𑁆𑀛𑀢𑀻’’𑀢𑀺.

‘‘𑀓𑀣𑀁𑀲𑀼 𑀮𑀪𑀢𑁂 𑀧𑀜𑁆𑀜𑀁, 𑀓𑀣𑀁𑀲𑀼 𑀯𑀺𑀦𑁆𑀤𑀢𑁂 𑀥𑀦𑀁;

𑀓𑀣𑀁𑀲𑀼 𑀓𑀺𑀢𑁆𑀢𑀺𑀁 𑀧𑀧𑁆𑀧𑁄𑀢𑀺, 𑀓𑀣𑀁 𑀫𑀺𑀢𑁆𑀢𑀸𑀦𑀺 𑀕𑀦𑁆𑀣𑀢𑀺;

𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀓𑀣𑀁 𑀧𑁂𑀘𑁆𑀘 𑀦 𑀲𑁄𑀘𑀢𑀻’’𑀢𑀺.

‘‘𑀲𑀤𑁆𑀤𑀳𑀸𑀦𑁄 𑀅𑀭𑀳𑀢𑀁, 𑀥𑀫𑁆𑀫𑀁 𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀬𑀸;

𑀲𑀼𑀲𑁆𑀲𑀽𑀲𑀁 [𑀲𑀼𑀲𑁆𑀲𑀽𑀲𑀸 (𑀲𑀻. 𑀧𑀻.)] 𑀮𑀪𑀢𑁂 𑀧𑀜𑁆𑀜𑀁, 𑀅𑀧𑁆𑀧𑀫𑀢𑁆𑀢𑁄 𑀯𑀺𑀘𑀓𑁆𑀔𑀡𑁄.

‘‘𑀧𑀢𑀺𑀭𑀽𑀧𑀓𑀸𑀭𑀻 𑀥𑀼𑀭𑀯𑀸, 𑀉𑀝𑁆𑀞𑀸𑀢𑀸 𑀯𑀺𑀦𑁆𑀤𑀢𑁂 𑀥𑀦𑀁;

𑀲𑀘𑁆𑀘𑁂𑀦 𑀓𑀺𑀢𑁆𑀢𑀺𑀁 𑀧𑀧𑁆𑀧𑁄𑀢𑀺, 𑀤𑀤𑀁 𑀫𑀺𑀢𑁆𑀢𑀸𑀦𑀺 𑀕𑀦𑁆𑀣𑀢𑀺;

𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀏𑀯𑀁 𑀧𑁂𑀘𑁆𑀘 𑀦 𑀲𑁄𑀘𑀢𑀺.