𑁮. 𑀳𑁂𑀫𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄

𑁫𑁩. 𑀬𑁂 𑀫𑁂 𑀧𑀼𑀩𑁆𑀩𑁂 𑀯𑀺𑀬𑀸𑀓𑀁𑀲𑀼, [𑀇𑀘𑁆𑀘𑀸𑀬𑀲𑁆𑀫𑀸 𑀳𑁂𑀫𑀓𑁄]

𑀳𑀼𑀭𑀁 𑀕𑁄𑀢𑀫𑀲𑀸𑀲𑀦𑀸;

𑀇𑀘𑁆𑀘𑀸𑀲𑀺 𑀇𑀢𑀺 𑀪𑀯𑀺𑀲𑁆𑀲𑀢𑀺, 𑀲𑀩𑁆𑀩𑀁 𑀢𑀁 𑀇𑀢𑀺𑀳𑀻𑀢𑀺𑀳𑀁;

𑀲𑀩𑁆𑀩𑀁 𑀢𑀁 𑀢𑀓𑁆𑀓𑀯𑀟𑁆𑀠𑀦𑀁, 𑀦𑀸𑀳𑀁 𑀢𑀢𑁆𑀣 𑀅𑀪𑀺𑀭𑀫𑀺𑀁.

𑀬𑁂 𑀫𑁂 𑀧𑀼𑀩𑁆𑀩𑁂 𑀯𑀺𑀬𑀸𑀓𑀁𑀲𑀽𑀢𑀺 𑀬𑁄 𑀘 𑀩𑀸𑀯𑀭𑀻 𑀩𑁆𑀭𑀸𑀳𑁆𑀫𑀡𑁄 𑀬𑁂 𑀘𑀜𑁆𑀜𑁂 𑀢𑀲𑁆𑀲 𑀆𑀘𑀭𑀺𑀬𑀸, 𑀢𑁂 𑀲𑀓𑀁 𑀤𑀺𑀝𑁆𑀞𑀺𑀁 𑀲𑀓𑀁 𑀔𑀦𑁆𑀢𑀺𑀁 𑀲𑀓𑀁 𑀭𑀼𑀘𑀺𑀁 𑀲𑀓𑀁 𑀮𑀤𑁆𑀥𑀺𑀁 𑀲𑀓𑀁 𑀅𑀚𑁆𑀛𑀸𑀲𑀬𑀁 𑀲𑀓𑀁 𑀅𑀥𑀺𑀧𑁆𑀧𑀸𑀬𑀁 𑀩𑁆𑀬𑀸𑀓𑀁𑀲𑀼 𑀆𑀘𑀺𑀓𑁆𑀔𑀺𑀁𑀲𑀼 𑀤𑁂𑀲𑀬𑀺𑀁𑀲𑀼 𑀧𑀜𑁆𑀜𑀧𑀺𑀁𑀲𑀼 𑀧𑀝𑁆𑀞𑀧𑀺𑀁𑀲𑀼 𑀯𑀺𑀯𑀭𑀺𑀁𑀲𑀼 𑀯𑀺𑀪𑀚𑀺𑀁𑀲𑀼 𑀉𑀢𑁆𑀢𑀸𑀦𑀻𑀅𑀓𑀁𑀲𑀼 𑀧𑀓𑀸𑀲𑁂𑀲𑀼𑀦𑁆𑀢𑀺 𑁋 𑀬𑁂 𑀫𑁂 𑀧𑀼𑀩𑁆𑀩𑁂 𑀯𑀺𑀬𑀸𑀓𑀁𑀲𑀼. 𑀇𑀘𑁆𑀘𑀸𑀬𑀲𑁆𑀫𑀸 𑀳𑁂𑀫𑀓𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀇𑀘𑁆𑀘𑀸𑀢𑀺. 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁…𑀧𑁂…. 𑀳𑁂𑀫𑀓𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁…𑀧𑁂… 𑀅𑀪𑀺𑀮𑀸𑀧𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀳𑁂𑀫𑀓𑁄.

𑀳𑀼𑀭𑀁 𑀕𑁄𑀢𑀫𑀲𑀸𑀲𑀦𑀸𑀢𑀺 𑀳𑀼𑀭𑀁 𑀕𑁄𑀢𑀫𑀲𑀸𑀲𑀦𑀸 𑀧𑀭𑀁 𑀕𑁄𑀢𑀫𑀲𑀸𑀲𑀦𑀸 𑀧𑀼𑀭𑁂 𑀕𑁄𑀢𑀫𑀲𑀸𑀲𑀦𑀸 𑀧𑀞𑀫𑀢𑀭𑀁 𑀕𑁄𑀢𑀫𑀲𑀸𑀲𑀦𑀸 𑀩𑀼𑀤𑁆𑀥𑀲𑀸𑀲𑀦𑀸 𑀚𑀺𑀦𑀲𑀸𑀲𑀦𑀸 𑀢𑀣𑀸𑀕𑀢𑀲𑀸𑀲𑀦𑀸 [𑀢𑀣𑀸𑀕𑀢𑀲𑀸𑀲𑀦𑀸 𑀤𑁂𑀯𑀲𑀸𑀲𑀦𑀸 (𑀓.)] 𑀅𑀭𑀳𑀦𑁆𑀢𑀲𑀸𑀲𑀦𑀸𑀢𑀺 𑁋 𑀳𑀼𑀭𑀁 𑀕𑁄𑀢𑀫𑀲𑀸𑀲𑀦𑀸.

𑀇𑀘𑁆𑀘𑀸𑀲𑀺 𑀇𑀢𑀺 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁 𑀓𑀺𑀭 𑀆𑀲𑀺, 𑀏𑀯𑀁 𑀓𑀺𑀭 𑀪𑀯𑀺𑀲𑁆𑀲𑀢𑀻𑀢𑀺 𑁋 𑀇𑀘𑁆𑀘𑀸𑀲𑀺 𑀇𑀢𑀺 𑀪𑀯𑀺𑀲𑁆𑀲𑀢𑀺.

𑀲𑀩𑁆𑀩𑀁 𑀢𑀁 𑀇𑀢𑀺𑀳𑀻𑀢𑀺𑀳𑀦𑁆𑀢𑀺 𑀲𑀩𑁆𑀩𑀁 𑀢𑀁 𑀇𑀢𑀺𑀳𑀻𑀢𑀺𑀳𑀁 𑀇𑀢𑀺𑀓𑀺𑀭𑀸𑀬 𑀧𑀭𑀁𑀧𑀭𑀸𑀬 𑀧𑀺𑀝𑀓𑀲𑀫𑁆𑀧𑀤𑀸𑀬 𑀢𑀓𑁆𑀓𑀳𑁂𑀢𑀼 𑀦𑀬𑀳𑁂𑀢𑀼 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀦 𑀲𑀸𑀫𑀁 𑀲𑀬𑀫𑀪𑀺𑀜𑁆𑀜𑀸𑀢𑀁 𑀦 𑀅𑀢𑁆𑀢𑀧𑀘𑁆𑀘𑀓𑁆𑀔𑀥𑀫𑁆𑀫𑀁 𑀓𑀣𑀬𑀺𑀁𑀲𑀽𑀢𑀺 𑁋 𑀲𑀩𑁆𑀩𑀁 𑀢𑀁 𑀇𑀢𑀺𑀳𑀻𑀢𑀺𑀳𑀁.

𑀲𑀩𑁆𑀩𑀁 𑀢𑀁 𑀢𑀓𑁆𑀓𑀯𑀟𑁆𑀠𑀦𑀦𑁆𑀢𑀺 𑀲𑀩𑁆𑀩𑀁 𑀢𑀁 𑀢𑀓𑁆𑀓𑀯𑀟𑁆𑀠𑀦𑀁 𑀯𑀺𑀢𑀓𑁆𑀓𑀯𑀟𑁆𑀠𑀦𑀁 𑀲𑀗𑁆𑀓𑀧𑁆𑀧𑀯𑀟𑁆𑀠𑀦𑀁 𑀓𑀸𑀫𑀯𑀺𑀢𑀓𑁆𑀓𑀯𑀟𑁆𑀠𑀦𑀁 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀯𑀟𑁆𑀠𑀦𑀁 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀯𑀟𑁆𑀠𑀦𑀁 𑀜𑀸𑀢𑀺𑀯𑀺𑀢𑀓𑁆𑀓𑀯𑀟𑁆𑀠𑀦𑀁 𑀚𑀦𑀧𑀤𑀯𑀺𑀢𑀓𑁆𑀓𑀯𑀟𑁆𑀠𑀦𑀁 𑀅𑀫𑀭𑀸𑀯𑀺𑀢𑀓𑁆𑀓𑀯𑀟𑁆𑀠𑀦𑀁 𑀧𑀭𑀸𑀦𑀼𑀤𑀬𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀯𑀺𑀢𑀓𑁆𑀓𑀯𑀟𑁆𑀠𑀦𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀧𑀝𑀺𑀲𑀁𑀬𑀼𑀢𑁆𑀢𑀯𑀺𑀢𑀓𑁆𑀓𑀯𑀟𑁆𑀠𑀦𑀁 𑀅𑀦𑀯𑀜𑁆𑀜𑀢𑁆𑀢𑀺𑀧𑀝𑀺𑀲𑀁𑀬𑀼𑀢𑁆𑀢𑀯𑀺𑀢𑀓𑁆𑀓𑀯𑀟𑁆𑀠𑀦𑀦𑁆𑀢𑀺 𑁋 𑀲𑀩𑁆𑀩𑀁 𑀢𑀁 𑀢𑀓𑁆𑀓𑀯𑀟𑁆𑀠𑀦𑀁.

𑀦𑀸𑀳𑀁 𑀢𑀢𑁆𑀣 𑀅𑀪𑀺𑀭𑀫𑀺𑀦𑁆𑀢𑀺 𑀦𑀸𑀳𑀁 𑀢𑀢𑁆𑀣 𑀅𑀪𑀺𑀭𑀫𑀺𑀁 𑀦 𑀯𑀺𑀦𑁆𑀤𑀺𑀁 𑀦𑀸𑀥𑀺𑀕𑀘𑁆𑀙𑀺𑀁 𑀦 𑀧𑀝𑀺𑀮𑀪𑀺𑀦𑁆𑀢𑀺 𑁋 𑀦𑀸𑀳𑀁 𑀢𑀢𑁆𑀣 𑀅𑀪𑀺𑀭𑀫𑀺𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀬𑁂 𑀫𑁂 𑀧𑀼𑀩𑁆𑀩𑁂 𑀯𑀺𑀬𑀸𑀓𑀁𑀲𑀼, [𑀇𑀘𑁆𑀘𑀸𑀬𑀲𑁆𑀫𑀸 𑀳𑁂𑀫𑀓𑁄]

𑀳𑀼𑀭𑀁 𑀕𑁄𑀢𑀫𑀲𑀸𑀲𑀦𑀸;

𑀇𑀘𑁆𑀘𑀸𑀲𑀺 𑀇𑀢𑀺 𑀪𑀯𑀺𑀲𑁆𑀲𑀢𑀺, 𑀲𑀩𑁆𑀩𑀁 𑀢𑀁 𑀇𑀢𑀺𑀳𑀻𑀢𑀺𑀳𑀁;

𑀲𑀩𑁆𑀩𑀁 𑀢𑀁 𑀢𑀓𑁆𑀓𑀯𑀟𑁆𑀠𑀦𑀁, 𑀦𑀸𑀳𑀁 𑀢𑀢𑁆𑀣 𑀅𑀪𑀺𑀭𑀫𑀺’’𑀦𑁆𑀢𑀺.

𑁫𑁪. 𑀢𑁆𑀯𑀜𑁆𑀘 𑀫𑁂 𑀥𑀫𑁆𑀫𑀫𑀓𑁆𑀔𑀸𑀳𑀺, 𑀢𑀡𑁆𑀳𑀸𑀦𑀺𑀕𑁆𑀖𑀸𑀢𑀦𑀁 𑀫𑀼𑀦𑀺;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁.

𑀢𑁆𑀯𑀜𑁆𑀘 𑀫𑁂 𑀥𑀫𑁆𑀫𑀫𑀓𑁆𑀔𑀸𑀳𑀻𑀢𑀺. 𑀢𑁆𑀯𑀦𑁆𑀢𑀺 𑀪𑀕𑀯𑀦𑁆𑀢𑀁 𑀪𑀡𑀢𑀺. 𑀥𑀫𑁆𑀫𑀫𑀓𑁆𑀔𑀸𑀳𑀻𑀢𑀺. 𑀥𑀫𑁆𑀫𑀦𑁆𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑁂 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑁂 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀦𑀺𑀩𑁆𑀩𑀸𑀦𑀜𑁆𑀘 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁 𑀅𑀓𑁆𑀔𑀸𑀳𑀺 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀢𑁆𑀯𑀜𑁆𑀘 𑀫𑁂 𑀥𑀫𑁆𑀫𑀫𑀓𑁆𑀔𑀸𑀳𑀺.

𑀢𑀡𑁆𑀳𑀸𑀦𑀺𑀕𑁆𑀖𑀸𑀢𑀦𑀁 𑀫𑀼𑀦𑀻𑀢𑀺. 𑀢𑀡𑁆𑀳𑀸𑀢𑀺 𑁋 𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸. 𑀢𑀡𑁆𑀳𑀸𑀦𑀺𑀕𑁆𑀖𑀸𑀢𑀦𑀁 𑀢𑀡𑁆𑀳𑀸𑀧𑀳𑀸𑀦𑀁 𑀢𑀡𑁆𑀳𑀸𑀯𑀽𑀧𑀲𑀫𑀁 𑀢𑀡𑁆𑀳𑀸𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀢𑀡𑁆𑀳𑀸𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀫𑀼𑀦𑀻𑀢𑀺 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀻𑀢𑀺 𑁋 𑀢𑀡𑁆𑀳𑀸𑀦𑀺𑀕𑁆𑀖𑀸𑀢𑀦𑀁 𑀫𑀼𑀦𑀺.

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀦𑁆𑀢𑀺 𑀬𑀁 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺…𑀧𑁂… ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. 𑀲𑀢𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄…𑀧𑁂… 𑀲𑁄 𑀯𑀼𑀘𑁆𑀘𑀢𑀺 𑀲𑀢𑁄. 𑀘𑀭𑀦𑁆𑀢𑀺 𑀘𑀭𑀦𑁆𑀢𑁄 𑀯𑀺𑀳𑀭𑀦𑁆𑀢𑁄 𑀇𑀭𑀺𑀬𑀦𑁆𑀢𑁄 𑀯𑀢𑁆𑀢𑁂𑀦𑁆𑀢𑁄 𑀧𑀸𑀮𑁂𑀦𑁆𑀢𑁄 𑀬𑀧𑁂𑀦𑁆𑀢𑁄 𑀬𑀸𑀧𑁂𑀦𑁆𑀢𑁄𑀢𑀺 𑁋 𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁.

𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀦𑁆𑀢𑀺 𑀯𑀺𑀲𑀢𑁆𑀢𑀺𑀓𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀯𑀺𑀲𑀢𑁆𑀢𑀺𑀓𑀸𑀢𑀺 𑀓𑁂𑀦𑀝𑁆𑀞𑁂𑀦 𑀯𑀺𑀲𑀢𑁆𑀢𑀺𑀓𑀸…𑀧𑁂… 𑀯𑀺𑀲𑀝𑀸 𑀯𑀺𑀢𑁆𑀣𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂 𑀫𑀦𑀼𑀲𑁆𑀲𑀮𑁄𑀓𑁂 𑀤𑁂𑀯𑀮𑁄𑀓𑁂 𑀔𑀦𑁆𑀥𑀮𑁄𑀓𑁂 𑀥𑀸𑀢𑀼𑀮𑁄𑀓𑁂 𑀆𑀬𑀢𑀦𑀮𑁄𑀓𑁂. 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀦𑁆𑀢𑀺 𑀮𑁄𑀓𑁂 𑀯𑁂𑀲𑀸 𑀯𑀺𑀲𑀢𑁆𑀢𑀺𑀓𑀸 𑀮𑁄𑀓𑁂 𑀯𑁂𑀢𑀁 𑀯𑀺𑀲𑀢𑁆𑀢𑀺𑀓𑀁 𑀲𑀢𑁄 𑀢𑀭𑁂𑀬𑁆𑀬𑀁 𑀉𑀢𑁆𑀢𑀭𑁂𑀬𑁆𑀬𑀁 𑀧𑀢𑀭𑁂𑀬𑁆𑀬𑀁 𑀲𑀫𑀢𑀺𑀓𑁆𑀓𑀫𑁂𑀬𑁆𑀬𑀁 𑀯𑀻𑀢𑀺𑀯𑀢𑁆𑀢𑁂𑀬𑁆𑀬𑀦𑁆𑀢𑀺 𑁋 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀢𑁆𑀯𑀜𑁆𑀘 𑀫𑁂 𑀥𑀫𑁆𑀫𑀫𑀓𑁆𑀔𑀸𑀳𑀺, 𑀢𑀡𑁆𑀳𑀸𑀦𑀺𑀕𑁆𑀖𑀸𑀢𑀦𑀁 𑀫𑀼𑀦𑀺;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓’’𑀦𑁆𑀢𑀺.

𑁫𑁫. 𑀇𑀥 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑁂𑀲𑀼, 𑀧𑀺𑀬𑀭𑀽𑀧𑁂𑀲𑀼 𑀳𑁂𑀫𑀓;

𑀙𑀦𑁆𑀤𑀭𑀸𑀕𑀯𑀺𑀦𑁄𑀤𑀦𑀁, 𑀦𑀺𑀩𑁆𑀩𑀸𑀦𑀧𑀤𑀫𑀘𑁆𑀘𑀼𑀢𑀁.

𑀇𑀥 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑁂𑀲𑀽𑀢𑀺. 𑀤𑀺𑀝𑁆𑀞𑀦𑁆𑀢𑀺 𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑀁; 𑀲𑀼𑀢𑀦𑁆𑀢𑀺 𑀲𑁄𑀢𑁂𑀦 𑀲𑀼𑀢𑀁; 𑀫𑀼𑀢𑀦𑁆𑀢𑀺 𑀖𑀸𑀦𑁂𑀦 𑀖𑀸𑀬𑀺𑀢𑀁 𑀚𑀺𑀯𑁆𑀳𑀸𑀬 𑀲𑀸𑀬𑀺𑀢𑀁 𑀓𑀸𑀬𑁂𑀦 𑀨𑀼𑀝𑁆𑀞𑀁; 𑀯𑀺𑀜𑁆𑀜𑀸𑀢𑀦𑁆𑀢𑀺 𑀫𑀦𑀲𑀸 𑀯𑀺𑀜𑁆𑀜𑀸𑀢𑀦𑁆𑀢𑀺 𑁋 𑀇𑀥 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑁂𑀲𑀼.

𑀧𑀺𑀬𑀭𑀽𑀧𑁂𑀲𑀼 𑀳𑁂𑀫𑀓𑀸𑀢𑀺 𑀓𑀺𑀜𑁆𑀘 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁? 𑀘𑀓𑁆𑀔𑀼 [𑀘𑀓𑁆𑀔𑀼𑀁 (𑀲𑁆𑀬𑀸. 𑀓.)] 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀲𑁄𑀢𑀁 𑀮𑁄𑀓𑁂…𑀧𑁂… 𑀖𑀸𑀦𑀁 𑀮𑁄𑀓𑁂… 𑀚𑀺𑀯𑁆𑀳𑀸 𑀮𑁄𑀓𑁂… 𑀓𑀸𑀬𑁄 𑀮𑁄𑀓𑁂… 𑀫𑀦𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁; 𑀭𑀽𑀧𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀲𑀤𑁆𑀤𑀸 𑀮𑁄𑀓𑁂… 𑀕𑀦𑁆𑀥𑀸 𑀮𑁄𑀓𑁂… 𑀭𑀲𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀸 𑀮𑁄𑀓𑁂… 𑀥𑀫𑁆𑀫𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁; 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀲𑁄𑀢𑀯𑀺𑀜𑁆𑀜𑀸𑀡𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀖𑀸𑀦𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀓𑀸𑀬𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀫𑀦𑁄𑀯𑀺𑀜𑁆𑀜𑀸𑀡𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀲𑁄𑀢𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀖𑀸𑀦𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀓𑀸𑀬𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀫𑀦𑁄𑀲𑀫𑁆𑀨𑀲𑁆𑀲𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁; 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁… 𑀲𑁄𑀢𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸… 𑀖𑀸𑀦𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸… 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸… 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁; 𑀭𑀽𑀧𑀲𑀜𑁆𑀜𑀸 𑀮𑁄𑀓𑁂… 𑀲𑀤𑁆𑀤𑀲𑀜𑁆𑀜𑀸 𑀮𑁄𑀓𑁂… 𑀕𑀦𑁆𑀥𑀲𑀜𑁆𑀜𑀸 𑀮𑁄𑀓𑁂… 𑀭𑀲𑀲𑀜𑁆𑀜𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀲𑀜𑁆𑀜𑀸 𑀮𑁄𑀓𑁂… 𑀥𑀫𑁆𑀫𑀲𑀜𑁆𑀜𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀭𑀽𑀧𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀲𑀤𑁆𑀤𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀕𑀦𑁆𑀥𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀭𑀲𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀥𑀫𑁆𑀫𑀲𑀜𑁆𑀘𑁂𑀢𑀦𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁; 𑀭𑀽𑀧𑀢𑀡𑁆𑀳𑀸 𑀮𑁄𑀓𑁂… 𑀲𑀤𑁆𑀤𑀢𑀡𑁆𑀳𑀸 𑀮𑁄𑀓𑁂… 𑀕𑀦𑁆𑀥𑀢𑀡𑁆𑀳𑀸 𑀮𑁄𑀓𑁂… 𑀭𑀲𑀢𑀡𑁆𑀳𑀸 𑀮𑁄𑀓𑁂 … 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀮𑁄𑀓𑁂… 𑀥𑀫𑁆𑀫𑀢𑀡𑁆𑀳𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁; 𑀭𑀽𑀧𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀲𑀤𑁆𑀤𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀕𑀦𑁆𑀥𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀭𑀲𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀥𑀫𑁆𑀫𑀯𑀺𑀢𑀓𑁆𑀓𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁; 𑀭𑀽𑀧𑀯𑀺𑀘𑀸𑀭𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀲𑀤𑁆𑀤𑀯𑀺𑀘𑀸𑀭𑁄 𑀮𑁄𑀓𑁂… 𑀕𑀦𑁆𑀥𑀯𑀺𑀘𑀸𑀭𑁄 𑀮𑁄𑀓𑁂… 𑀭𑀲𑀯𑀺𑀘𑀸𑀭𑁄 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀯𑀺𑀘𑀸𑀭𑁄 𑀮𑁄𑀓𑁂… 𑀥𑀫𑁆𑀫𑀯𑀺𑀘𑀸𑀭𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀦𑁆𑀢𑀺 𑁋 𑀧𑀺𑀬𑀭𑀽𑀧𑁂𑀲𑀼 𑀳𑁂𑀫𑀓.

𑀙𑀦𑁆𑀤𑀭𑀸𑀕𑀯𑀺𑀦𑁄𑀤𑀦𑀦𑁆𑀢𑀺. 𑀙𑀦𑁆𑀤𑀭𑀸𑀕𑁄𑀢𑀺 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀭𑀸𑀕𑁄 𑀓𑀸𑀫𑀦𑀦𑁆𑀤𑀻 𑀓𑀸𑀫𑀢𑀡𑁆𑀳𑀸 𑀓𑀸𑀫𑀲𑀺𑀦𑁂𑀳𑁄 𑀓𑀸𑀫𑀧𑀭𑀺𑀴𑀸𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀚𑁆𑀛𑁄𑀲𑀸𑀦𑀁 𑀓𑀸𑀫𑁄𑀖𑁄 𑀓𑀸𑀫𑀬𑁄𑀕𑁄 𑀓𑀸𑀫𑀼𑀧𑀸𑀤𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁. 𑀙𑀦𑁆𑀤𑀭𑀸𑀕𑀯𑀺𑀦𑁄𑀤𑀦𑀦𑁆𑀢𑀺 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁 𑀙𑀦𑁆𑀤𑀭𑀸𑀕𑀯𑀽𑀧𑀲𑀫𑀁 𑀙𑀦𑁆𑀤𑀭𑀸𑀕𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀙𑀦𑁆𑀤𑀭𑀸𑀕𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀙𑀦𑁆𑀤𑀭𑀸𑀕𑀯𑀺𑀦𑁄𑀤𑀦𑀁.

𑀦𑀺𑀩𑁆𑀩𑀸𑀦𑀧𑀤𑀫𑀘𑁆𑀘𑀼𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀧𑀤𑀁 𑀢𑀸𑀡𑀧𑀤𑀁 𑀮𑁂𑀡𑀧𑀤𑀁 𑀲𑀭𑀡𑀧𑀤𑀁 𑀅𑀪𑀬𑀧𑀤𑀁. 𑀅𑀘𑁆𑀘𑀼𑀢𑀦𑁆𑀢𑀺 𑀦𑀺𑀘𑁆𑀘𑀁 𑀥𑀼𑀯𑀁 𑀲𑀲𑁆𑀲𑀢𑀁 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀦𑁆𑀢𑀺 𑁋 𑀦𑀺𑀩𑁆𑀩𑀸𑀦𑀧𑀤𑀫𑀘𑁆𑀘𑀼𑀢𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀇𑀥 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑁂𑀲𑀼, 𑀧𑀺𑀬𑀭𑀽𑀧𑁂𑀲𑀼 𑀳𑁂𑀫𑀓;

𑀙𑀦𑁆𑀤𑀭𑀸𑀕𑀯𑀺𑀦𑁄𑀤𑀦𑀁, 𑀦𑀺𑀩𑁆𑀩𑀸𑀦𑀧𑀤𑀫𑀘𑁆𑀘𑀼𑀢’’𑀦𑁆𑀢𑀺.

𑁫𑁬. 𑀏𑀢𑀤𑀜𑁆𑀜𑀸𑀬 𑀬𑁂 𑀲𑀢𑀸, 𑀤𑀺𑀝𑁆𑀞𑀥𑀫𑁆𑀫𑀸𑀪𑀺𑀦𑀺𑀩𑁆𑀩𑀼𑀢𑀸;

𑀉𑀧𑀲𑀦𑁆𑀢𑀸 𑀘 𑀢𑁂 𑀲𑀤𑀸, 𑀢𑀺𑀡𑁆𑀡𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁.

𑀏𑀢𑀤𑀜𑁆𑀜𑀸𑀬 𑀬𑁂 𑀲𑀢𑀸𑀢𑀺. 𑀏𑀢𑀦𑁆𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀅𑀜𑁆𑀜𑀸𑀬𑀸𑀢𑀺 𑀅𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀅𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺… ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀅𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. 𑀬𑁂𑀢𑀺 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸. 𑀲𑀢𑀸𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑀸 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀲𑀢𑀸…𑀧𑁂… 𑀢𑁂 𑀯𑀼𑀘𑁆𑀘𑀦𑁆𑀢𑀺 𑀲𑀢𑀸𑀢𑀺 𑁋 𑀏𑀢𑀤𑀜𑁆𑀜𑀸𑀬 𑀬𑁂 𑀲𑀢𑀸.

𑀤𑀺𑀝𑁆𑀞𑀥𑀫𑁆𑀫𑀸𑀪𑀺𑀦𑀺𑀩𑁆𑀩𑀼𑀢𑀸𑀢𑀺. 𑀤𑀺𑀝𑁆𑀞𑀥𑀫𑁆𑀫𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀸 𑀜𑀸𑀢𑀥𑀫𑁆𑀫𑀸 𑀢𑀼𑀮𑀺𑀢𑀥𑀫𑁆𑀫𑀸 𑀢𑀻𑀭𑀺𑀢𑀥𑀫𑁆𑀫𑀸 𑀯𑀺𑀪𑀽𑀢𑀥𑀫𑁆𑀫𑀸 𑀯𑀺𑀪𑀸𑀯𑀺𑀢𑀥𑀫𑁆𑀫𑀸. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀤𑀺𑀝𑁆𑀞𑀥𑀫𑁆𑀫𑀸…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀸 𑀜𑀸𑀢𑀥𑀫𑁆𑀫𑀸 𑀢𑀼𑀮𑀺𑀢𑀥𑀫𑁆𑀫𑀸 𑀢𑀻𑀭𑀺𑀢𑀥𑀫𑁆𑀫𑀸 𑀯𑀺𑀪𑀽𑀢𑀥𑀫𑁆𑀫𑀸 𑀯𑀺𑀪𑀸𑀯𑀺𑀢𑀥𑀫𑁆𑀫𑀸. 𑀅𑀪𑀺𑀦𑀺𑀩𑁆𑀩𑀼𑀢𑀸𑀢𑀺 𑀭𑀸𑀕𑀲𑁆𑀲 𑀦𑀺𑀩𑁆𑀩𑀸𑀧𑀺𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑀸, 𑀤𑁄𑀲𑀲𑁆𑀲 𑀦𑀺𑀩𑁆𑀩𑀸𑀧𑀺𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑀸, 𑀫𑁄𑀳𑀲𑁆𑀲 𑀦𑀺𑀩𑁆𑀩𑀸𑀧𑀺𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑀸, 𑀓𑁄𑀥𑀲𑁆𑀲…𑀧𑁂… 𑀉𑀧𑀦𑀸𑀳𑀲𑁆𑀲… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀲𑀦𑁆𑀢𑀢𑁆𑀢𑀸 𑀲𑀫𑀺𑀢𑀢𑁆𑀢𑀸 𑀯𑀽𑀧𑀲𑀫𑀺𑀢𑀢𑁆𑀢𑀸 𑀦𑀺𑀚𑁆𑀛𑀸𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑀢𑁆𑀢𑀸 𑀯𑀺𑀕𑀢𑀢𑁆𑀢𑀸 𑀧𑀝𑀺𑀧𑁆𑀧𑀲𑀤𑁆𑀥𑀢𑁆𑀢𑀸 𑀲𑀦𑁆𑀢𑀸 𑀉𑀧𑀲𑀦𑁆𑀢𑀸 𑀯𑀽𑀧𑀲𑀦𑁆𑀢𑀸 𑀦𑀺𑀩𑁆𑀩𑀼𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸𑀢𑀺 𑁋 𑀤𑀺𑀝𑁆𑀞𑀥𑀫𑁆𑀫𑀸𑀪𑀺𑀦𑀺𑀩𑁆𑀩𑀼𑀢𑀸.

𑀉𑀧𑀲𑀦𑁆𑀢𑀸 𑀘 𑀢𑁂 𑀲𑀤𑀸𑀢𑀺. 𑀉𑀧𑀲𑀦𑁆𑀢𑀸𑀢𑀺 𑀭𑀸𑀕𑀲𑁆𑀲 𑀉𑀧𑀲𑀫𑀺𑀢𑀢𑁆𑀢𑀸 𑀦𑀺𑀩𑁆𑀩𑀸𑀧𑀺𑀢𑀢𑁆𑀢𑀸 𑀉𑀧𑀲𑀦𑁆𑀢𑀸…𑀧𑁂… 𑀤𑁄𑀲𑀲𑁆𑀲… 𑀫𑁄𑀳𑀲𑁆𑀲… 𑀓𑁄𑀥𑀲𑁆𑀲… 𑀉𑀧𑀦𑀸𑀳𑀲𑁆𑀲…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀲𑀦𑁆𑀢𑀢𑁆𑀢𑀸 𑀲𑀫𑀺𑀢𑀢𑁆𑀢𑀸 𑀯𑀽𑀧𑀲𑀫𑀺𑀢𑀢𑁆𑀢𑀸 𑀦𑀺𑀚𑁆𑀛𑀸𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑀢𑁆𑀢𑀸 𑀯𑀺𑀕𑀢𑀢𑁆𑀢𑀸 𑀧𑀝𑀺𑀧𑁆𑀧𑀲𑀤𑁆𑀥𑀢𑁆𑀢𑀸 𑀲𑀦𑁆𑀢𑀸 𑀉𑀧𑀲𑀦𑁆𑀢𑀸 𑀯𑀽𑀧𑀲𑀦𑁆𑀢𑀸 𑀦𑀺𑀩𑁆𑀩𑀼𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸𑀢𑀺 𑀉𑀧𑀲𑀦𑁆𑀢𑀸. 𑀢𑁂𑀢𑀺 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸. 𑀲𑀤𑀸𑀢𑀺 𑀲𑀤𑀸 𑀲𑀩𑁆𑀩𑀓𑀸𑀮𑀁 𑀦𑀺𑀘𑁆𑀘𑀓𑀸𑀮𑀁 𑀥𑀼𑀯𑀓𑀸𑀮𑀁 𑀲𑀢𑀢𑀁 𑀲𑀫𑀺𑀢𑀁 𑀅𑀩𑁆𑀩𑁄𑀓𑀺𑀡𑁆𑀡𑀁 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀁 𑀉𑀤𑀓𑀽𑀫𑀺𑀓𑀚𑀸𑀢𑀁 𑀅𑀯𑀻𑀘𑀺𑀲𑀦𑁆𑀢𑀢𑀺𑀲𑀳𑀺𑀢𑀁 𑀨𑀲𑁆𑀲𑀺𑀢𑀁 𑀧𑀼𑀭𑁂𑀪𑀢𑁆𑀢𑀁 𑀧𑀘𑁆𑀙𑀸𑀪𑀢𑁆𑀢𑀁 𑀧𑀼𑀭𑀺𑀫𑀬𑀸𑀫𑀁 𑀫𑀚𑁆𑀛𑀺𑀫𑀬𑀸𑀫𑀁 𑀧𑀘𑁆𑀙𑀺𑀫𑀬𑀸𑀫𑀁 𑀓𑀸𑀴𑁂 𑀚𑀼𑀡𑁆𑀳𑁂 𑀯𑀲𑁆𑀲𑁂 𑀳𑁂𑀫𑀦𑁆𑀢𑁂 𑀕𑀺𑀫𑁆𑀳𑁂 𑀧𑀼𑀭𑀺𑀫𑁂 𑀯𑀬𑁄𑀔𑀦𑁆𑀥𑁂 𑀫𑀚𑁆𑀛𑀺𑀫𑁂 𑀯𑀬𑁄𑀔𑀦𑁆𑀥𑁂 𑀧𑀘𑁆𑀙𑀺𑀫𑁂 𑀯𑀬𑁄𑀔𑀦𑁆𑀥𑁂𑀢𑀺 𑁋 𑀉𑀧𑀲𑀦𑁆𑀢𑀸 𑀘 𑀢𑁂 𑀲𑀤𑀸.

𑀢𑀺𑀡𑁆𑀡𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀦𑁆𑀢𑀺 𑀯𑀺𑀲𑀢𑁆𑀢𑀺𑀓𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀯𑀺𑀲𑀢𑁆𑀢𑀺𑀓𑀸𑀢𑀺 𑀓𑁂𑀦𑀝𑁆𑀞𑁂𑀦 𑀯𑀺𑀲𑀢𑁆𑀢𑀺𑀓𑀸…𑀧𑁂… 𑀯𑀺𑀲𑀝𑀸 𑀯𑀺𑀢𑁆𑀣𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂. 𑀢𑀺𑀡𑁆𑀡𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀦𑁆𑀢𑀺 𑀮𑁄𑀓𑁂 𑀯𑁂𑀲𑀸 𑀯𑀺𑀲𑀢𑁆𑀢𑀺𑀓𑀸 𑀮𑁄𑀓𑁂 𑀯𑁂𑀢𑀁 𑀯𑀺𑀲𑀢𑁆𑀢𑀺𑀓𑀁 𑀢𑀺𑀡𑁆𑀡𑀸 𑀉𑀢𑁆𑀢𑀺𑀡𑁆𑀡𑀸 𑀦𑀺𑀢𑁆𑀣𑀺𑀡𑁆𑀡𑀸 𑀅𑀢𑀺𑀓𑁆𑀓𑀦𑁆𑀢𑀸 𑀲𑀫𑀢𑀺𑀓𑁆𑀓𑀦𑁆𑀢𑀸 𑀯𑀻𑀢𑀺𑀯𑀢𑁆𑀢𑀸𑀢𑀺 𑁋 𑀢𑀺𑀡𑁆𑀡𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀏𑀢𑀤𑀜𑁆𑀜𑀸𑀬 𑀬𑁂 𑀲𑀢𑀸, 𑀤𑀺𑀝𑁆𑀞𑀥𑀫𑁆𑀫𑀸𑀪𑀺𑀦𑀺𑀩𑁆𑀩𑀼𑀢𑀸;

𑀉𑀧𑀲𑀦𑁆𑀢𑀸 𑀘 𑀢𑁂 𑀲𑀤𑀸, 𑀢𑀺𑀡𑁆𑀡𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓’’𑀦𑁆𑀢𑀺.

𑀲𑀳 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑀸…𑀧𑁂… 𑀲𑀢𑁆𑀣𑀸 𑀫𑁂 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻𑀢𑀺.

𑀳𑁂𑀫𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑀅𑀝𑁆𑀞𑀫𑁄.