𑀧𑀸𑀭𑀸𑀬𑀦𑀯𑀕𑁆𑀕𑀦𑀺𑀤𑁆𑀤𑁂𑀲𑁄

𑁧. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄

𑁧. 𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄]

𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀺;

𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀺 [𑀩𑁆𑀭𑀽𑀳𑀺 (𑀲𑁆𑀬𑀸.)], 𑀓𑀺𑀁𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬𑀁.

𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄𑀢𑀺. 𑀮𑁄𑀓𑁄𑀢𑀺 𑀦𑀺𑀭𑀬𑀮𑁄𑀓𑁄 𑀢𑀺𑀭𑀘𑁆𑀙𑀸𑀦𑀮𑁄𑀓𑁄 𑀧𑁂𑀢𑁆𑀢𑀺𑀯𑀺𑀲𑀬𑀮𑁄𑀓𑁄 𑀫𑀦𑀼𑀲𑁆𑀲𑀮𑁄𑀓𑁄 𑀤𑁂𑀯𑀮𑁄𑀓𑁄 𑀔𑀦𑁆𑀥𑀮𑁄𑀓𑁄 𑀥𑀸𑀢𑀼𑀮𑁄𑀓𑁄 𑀆𑀬𑀢𑀦𑀮𑁄𑀓𑁄 𑀅𑀬𑀁 𑀮𑁄𑀓𑁄 𑀧𑀭𑁄 𑀮𑁄𑀓𑁄 𑀩𑁆𑀭𑀳𑁆𑀫𑀮𑁄𑀓𑁄 𑀤𑁂𑀯𑀮𑁄𑀓𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀮𑁄𑀓𑁄. 𑀅𑀬𑀁 𑀮𑁄𑀓𑁄 𑀓𑁂𑀦 𑀆𑀯𑀼𑀢𑁄 𑀦𑀺𑀯𑀼𑀢𑁄 𑀑𑀯𑀼𑀢𑁄 [𑀑𑀨𑀼𑀢𑁄 (𑀲𑁆𑀬𑀸.)] 𑀧𑀺𑀳𑀺𑀢𑁄 𑀧𑀝𑀺𑀘𑁆𑀙𑀦𑁆𑀦𑁄 𑀧𑀝𑀺𑀓𑀼𑀚𑁆𑀚𑀺𑀢𑁄𑀢𑀺 𑁋 𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄?

𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺 𑀧𑀤𑀲𑀁𑀲𑀕𑁆𑀕𑁄 𑀧𑀤𑀧𑀸𑀭𑀺𑀧𑀽𑀭𑀻 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 [𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀫𑁂𑀢𑀁 (𑀩𑀳𑀽𑀲𑀼)] 𑀇𑀘𑁆𑀘𑀸𑀢𑀺. 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁 𑀕𑀭𑀼𑀯𑀘𑀦𑀁 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀸𑀥𑀺𑀯𑀘𑀦𑀫𑁂𑀢𑀁 𑀆𑀬𑀲𑁆𑀫𑀸𑀢𑀺. 𑀅𑀚𑀺𑀢𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀺 𑀩𑁆𑀬𑀜𑁆𑀚𑀦𑀁 𑀅𑀪𑀺𑀮𑀸𑀧𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄.

𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀻𑀢𑀺 𑀓𑁂𑀦 𑀮𑁄𑀓𑁄 𑀦𑀧𑁆𑀧𑀓𑀸𑀲𑀢𑀺 𑀦 𑀪𑀸𑀲𑀢𑀺 𑀦 𑀢𑀧𑀢𑀺 𑀦 𑀯𑀺𑀭𑁄𑀘𑀢𑀺 𑀦 𑀜𑀸𑀬𑀢𑀺 𑀦 𑀧𑀜𑁆𑀜𑀸𑀬𑀢𑀻𑀢𑀺 𑁋 𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀺.

𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀻𑀢𑀺 𑀓𑀺𑀁 𑀮𑁄𑀓𑀲𑁆𑀲 𑀮𑁂𑀧𑀦𑀁 𑀮𑀕𑁆𑀕𑀦𑀁 𑀩𑀦𑁆𑀥𑀦𑀁 𑀉𑀧𑀓𑁆𑀓𑀺𑀮𑁂𑀲𑁄. 𑀓𑁂𑀦 𑀮𑁄𑀓𑁄 𑀮𑀺𑀢𑁆𑀢𑁄 𑀲𑀁𑀮𑀺𑀢𑁆𑀢𑁄 𑀉𑀧𑀮𑀺𑀢𑁆𑀢𑁄 𑀓𑀺𑀮𑀺𑀝𑁆𑀞𑁄 𑀲𑀁𑀓𑀺𑀮𑀺𑀝𑁆𑀞𑁄 𑀫𑀓𑁆𑀔𑀺𑀢𑁄 𑀲𑀁𑀲𑀝𑁆𑀞𑁄 𑀮𑀕𑁆𑀕𑁄 𑀮𑀕𑁆𑀕𑀺𑀢𑁄 𑀧𑀮𑀺𑀩𑀼𑀤𑁆𑀥𑁄, 𑀩𑁆𑀭𑀽𑀲𑀺 𑀆𑀘𑀺𑀓𑁆𑀔𑀲𑀺 𑀤𑁂𑀲𑁂𑀲𑀺 𑀧𑀜𑁆𑀜𑀧𑁂𑀲𑀺 [𑀧𑀜𑁆𑀜𑀸𑀧𑁂𑀲𑀺 (𑀓.)] 𑀧𑀝𑁆𑀞𑀧𑁂𑀲𑀺 𑀯𑀺𑀯𑀭𑀲𑀺 𑀯𑀺𑀪𑀚𑀲𑀺 𑀉𑀢𑁆𑀢𑀸𑀦𑀻𑀓𑀭𑁄𑀲𑀺 [𑀉𑀢𑁆𑀢𑀸𑀦𑀺𑀁 𑀓𑀭𑁄𑀲𑀺 (𑀓.)] 𑀧𑀓𑀸𑀲𑁂𑀲𑀻𑀢𑀺 𑁋 𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀺.

𑀓𑀺𑀁𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬𑀦𑁆𑀢𑀺 𑀓𑀺𑀁 𑀮𑁄𑀓𑀲𑁆𑀲 𑀪𑀬𑀁 𑀫𑀳𑀩𑁆𑀪𑀬𑀁 𑀧𑀻𑀴𑀦𑀁 𑀖𑀝𑁆𑀝𑀦𑀁 𑀉𑀧𑀤𑁆𑀤𑀯𑁄 𑀉𑀧𑀲𑀕𑁆𑀕𑁄𑀢𑀺 𑁋 𑀓𑀺𑀁𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄]

𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀺;

𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀺, 𑀓𑀺𑀁𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺.

𑁨. 𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄, [𑀅𑀚𑀺𑀢𑀸𑀢𑀺 𑀪𑀕𑀯𑀸]

𑀯𑁂𑀯𑀺𑀘𑁆𑀙𑀸 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀺;

𑀚𑀧𑁆𑀧𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀫𑀺, 𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬𑀁.

𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄𑀢𑀺. 𑀅𑀯𑀺𑀚𑁆𑀚𑀸𑀢𑀺 𑀤𑀼𑀓𑁆𑀔𑁂 𑀅𑀜𑁆𑀜𑀸𑀡𑀁 𑀤𑀼𑀓𑁆𑀔𑀲𑀫𑀼𑀤𑀬𑁂 𑀅𑀜𑁆𑀜𑀸𑀡𑀁 𑀤𑀼𑀓𑁆𑀔𑀦𑀺𑀭𑁄𑀥𑁂 𑀅𑀜𑁆𑀜𑀸𑀡𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀜𑁆𑀜𑀸𑀡𑀁, 𑀧𑀼𑀩𑁆𑀩𑀦𑁆𑀢𑁂 𑀅𑀜𑁆𑀜𑀸𑀡𑀁 𑀅𑀧𑀭𑀦𑁆𑀢𑁂 𑀅𑀜𑁆𑀜𑀸𑀡𑀁 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀅𑀜𑁆𑀜𑀸𑀡𑀁, 𑀬𑀁 𑀏𑀯𑀭𑀽𑀧𑀁 𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦𑀁 𑀅𑀦𑀪𑀺𑀲𑀫𑀬𑁄 𑀅𑀦𑀦𑀼𑀩𑁄𑀥𑁄 𑀅𑀲𑀫𑁆𑀩𑁄𑀥𑁄 𑀅𑀧𑁆𑀧𑀝𑀺𑀯𑁂𑀥𑁄 𑀅𑀲𑀁𑀕𑀸𑀳𑀦𑀸 𑀅𑀧𑀭𑀺𑀬𑁄𑀕𑀸𑀳𑀦𑀸 𑀅𑀲𑀫𑀧𑁂𑀓𑁆𑀔𑀦𑀸 𑀅𑀧𑀘𑁆𑀘𑀯𑁂𑀓𑁆𑀔𑀡𑀸 [𑀅𑀧𑀘𑁆𑀘𑀯𑁂𑀓𑁆𑀔𑀦𑀸 (𑀲𑁆𑀬𑀸.)] 𑀅𑀧𑀘𑁆𑀘𑀯𑁂𑀓𑁆𑀔𑀡𑀓𑀫𑁆𑀫𑀁 𑀤𑀼𑀫𑁆𑀫𑁂𑀚𑁆𑀛𑀁 𑀩𑀸𑀮𑁆𑀬𑀁 𑀅𑀲𑀫𑁆𑀧𑀚𑀜𑁆𑀜𑀁 𑀫𑁄𑀳𑁄 𑀧𑀫𑁄𑀳𑁄 𑀲𑀫𑁆𑀫𑁄𑀳𑁄 𑀅𑀯𑀺𑀚𑁆𑀚𑀸 𑀅𑀯𑀺𑀚𑁆𑀚𑁄𑀖𑁄 𑀅𑀯𑀺𑀚𑁆𑀚𑀸𑀬𑁄𑀕𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀁 𑀅𑀯𑀺𑀚𑁆𑀚𑀸𑀮𑀗𑁆𑀕𑀻 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑁋 𑀅𑀯𑀺𑀚𑁆𑀚𑀸.

𑀮𑁄𑀓𑁄𑀢𑀺 𑀦𑀺𑀭𑀬𑀮𑁄𑀓𑁄 𑀢𑀺𑀭𑀘𑁆𑀙𑀸𑀦𑀮𑁄𑀓𑁄 𑀧𑁂𑀢𑁆𑀢𑀺𑀯𑀺𑀲𑀬𑀮𑁄𑀓𑁄 𑀫𑀦𑀼𑀲𑁆𑀲𑀮𑁄𑀓𑁄 𑀤𑁂𑀯𑀮𑁄𑀓𑁄 𑀔𑀦𑁆𑀥𑀮𑁄𑀓𑁄 𑀥𑀸𑀢𑀼𑀮𑁄𑀓𑁄 𑀆𑀬𑀢𑀦𑀮𑁄𑀓𑁄 𑀅𑀬𑀁 𑀮𑁄𑀓𑁄 𑀧𑀭𑁄 𑀮𑁄𑀓𑁄 𑀩𑁆𑀭𑀳𑁆𑀫𑀮𑁄𑀓𑁄 𑀤𑁂𑀯𑀮𑁄𑀓𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀮𑁄𑀓𑁄. 𑀅𑀬𑀁 𑀮𑁄𑀓𑁄 𑀇𑀫𑀸𑀬 𑀅𑀯𑀺𑀚𑁆𑀚𑀸𑀬 𑀆𑀯𑀼𑀢𑁄 𑀦𑀺𑀯𑀼𑀢𑁄 𑀑𑀯𑀼𑀢𑁄 𑀧𑀺𑀳𑀺𑀢𑁄 𑀧𑀝𑀺𑀘𑁆𑀙𑀦𑁆𑀦𑁄 𑀧𑀝𑀺𑀓𑀼𑀚𑁆𑀚𑀺𑀢𑁄𑀢𑀺 𑁋 𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄.

𑀅𑀚𑀺𑀢𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀁. 𑀅𑀧𑀺 𑀘, 𑀪𑀕𑁆𑀕𑀭𑀸𑀕𑁄𑀢𑀺 𑀪𑀕𑀯𑀸; 𑀪𑀕𑁆𑀕𑀤𑁄𑀲𑁄𑀢𑀺 𑀪𑀕𑀯𑀸; 𑀪𑀕𑁆𑀕𑀫𑁄𑀳𑁄𑀢𑀺 𑀪𑀕𑀯𑀸; 𑀪𑀕𑁆𑀕𑀫𑀸𑀦𑁄𑀢𑀺 𑀪𑀕𑀯𑀸; 𑀪𑀕𑁆𑀕𑀤𑀺𑀝𑁆𑀞𑀻𑀢𑀺 𑀪𑀕𑀯𑀸; 𑀪𑀕𑁆𑀕𑀓𑀡𑁆𑀝𑀓𑁄𑀢𑀺 𑀪𑀕𑀯𑀸; 𑀪𑀕𑁆𑀕𑀓𑀺𑀮𑁂𑀲𑁄𑀢𑀺 𑀪𑀕𑀯𑀸; 𑀪𑀚𑀺 𑀯𑀺𑀪𑀚𑀺 𑀧𑀯𑀺𑀪𑀚𑀺 𑀥𑀫𑁆𑀫𑀭𑀢𑀦𑀦𑁆𑀢𑀺 𑀪𑀕𑀯𑀸; 𑀪𑀯𑀸𑀦𑀁 𑀅𑀦𑁆𑀢𑀓𑀭𑁄𑀢𑀺 𑀪𑀕𑀯𑀸; 𑀪𑀸𑀯𑀺𑀢𑀓𑀸𑀬𑁄 𑀪𑀸𑀯𑀺𑀢𑀲𑀻𑀮𑁄 𑀪𑀸𑀯𑀺𑀢𑀘𑀺𑀢𑁆𑀢𑁄 [𑀪𑀸𑀯𑀺𑀢𑀓𑀸𑀬𑁄𑀢𑀺 𑀪𑀕𑀯𑀸, 𑀪𑀸𑀯𑀺𑀢𑀲𑀻𑀮𑁄𑀢𑀺 𑀪𑀸𑀯𑀺𑀢𑀘𑀺𑀢𑁆𑀢𑁄𑀢𑀺 (𑀲𑁆𑀬𑀸.)] 𑀪𑀸𑀯𑀺𑀢𑀧𑀜𑁆𑀜𑁄𑀢𑀺 𑀪𑀕𑀯𑀸; 𑀪𑀚𑀺 𑀯𑀸 𑀪𑀕𑀯𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 [𑀫𑀦𑀼𑀲𑁆𑀲𑀭𑀸𑀳𑀲𑁂𑀬𑁆𑀬𑀓𑀸𑀦𑀺 (𑀲𑁆𑀬𑀸.)] 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀻𑀢𑀺 𑀪𑀕𑀯𑀸; 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀦𑁆𑀢𑀺 𑀪𑀕𑀯𑀸; 𑀪𑀸𑀕𑀻 𑀯𑀸 𑀪𑀕𑀯𑀸 𑀅𑀢𑁆𑀣𑀭𑀲𑀲𑁆𑀲 𑀥𑀫𑁆𑀫𑀭𑀲𑀲𑁆𑀲 𑀯𑀺𑀫𑀼𑀢𑁆𑀢𑀺𑀭𑀲𑀲𑁆𑀲 𑀅𑀥𑀺𑀲𑀻𑀮𑀲𑁆𑀲 𑀅𑀥𑀺𑀘𑀺𑀢𑁆𑀢𑀲𑁆𑀲 𑀅𑀥𑀺𑀧𑀜𑁆𑀜𑀸𑀬𑀸𑀢𑀺 𑀪𑀕𑀯𑀸; 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀅𑀧𑁆𑀧𑀫𑀜𑁆𑀜𑀸𑀦𑀁 𑀘𑀢𑀼𑀦𑁆𑀦𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀪𑀕𑀯𑀸; 𑀪𑀸𑀕𑀻 𑀯𑀸 𑀪𑀕𑀯𑀸 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀁 𑀅𑀝𑁆𑀞𑀦𑁆𑀦𑀁 𑀅𑀪𑀺𑀪𑀸𑀬𑀢𑀦𑀸𑀦𑀁 𑀦𑀯𑀦𑁆𑀦𑀁 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀪𑀕𑀯𑀸; 𑀪𑀸𑀕𑀻 𑀯𑀸 𑀪𑀕𑀯𑀸 𑀤𑀲𑀦𑁆𑀦𑀁 𑀲𑀜𑁆𑀜𑀸𑀪𑀸𑀯𑀦𑀸𑀦𑀁 𑀓𑀲𑀺𑀡𑀲𑀫𑀸𑀧𑀢𑁆𑀢𑀻𑀦𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀲𑁆𑀲 𑀅𑀲𑀼𑀪𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀪𑀕𑀯𑀸; 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀜𑁆𑀘𑀦𑁆𑀦𑀁 𑀩𑀮𑀸𑀦𑀁 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲𑀸𑀢𑀺 𑀪𑀕𑀯𑀸; 𑀪𑀸𑀕𑀻 𑀯𑀸 𑀪𑀕𑀯𑀸 𑀤𑀲𑀦𑁆𑀦𑀁 𑀢𑀣𑀸𑀕𑀢𑀩𑀮𑀸𑀦𑀁 𑀘𑀢𑀼𑀦𑁆𑀦𑀁 𑀯𑁂𑀲𑀸𑀭𑀚𑁆𑀚𑀸𑀦𑀁 𑀘𑀢𑀼𑀦𑁆𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀙𑀦𑁆𑀦𑀁 𑀅𑀪𑀺𑀜𑁆𑀜𑀸𑀦𑀁 𑀙𑀦𑁆𑀦𑀁 𑀩𑀼𑀤𑁆𑀥𑀥𑀫𑁆𑀫𑀸𑀦𑀦𑁆𑀢𑀺 𑀪𑀕𑀯𑀸; 𑀪𑀕𑀯𑀸𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢𑀁 𑀦 𑀧𑀺𑀢𑀭𑀸 𑀓𑀢𑀁 𑀦 𑀪𑀸𑀢𑀭𑀸 𑀓𑀢𑀁 𑀦 𑀪𑀕𑀺𑀦𑀺𑀬𑀸 𑀓𑀢𑀁 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀓𑀢𑀁 𑀦 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 𑀓𑀢𑀁 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀁 𑀦 𑀤𑁂𑀯𑀢𑀸𑀳𑀺 𑀓𑀢𑀁. 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁄𑀥𑀺𑀬𑀸 𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀅𑀚𑀺𑀢𑀸𑀢𑀺 𑀪𑀕𑀯𑀸.

𑀯𑁂𑀯𑀺𑀘𑁆𑀙𑀸 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀻𑀢𑀺. 𑀯𑁂𑀯𑀺𑀘𑁆𑀙𑀁 𑀯𑀼𑀘𑁆𑀘𑀢𑀺 𑀧𑀜𑁆𑀘 𑀫𑀘𑁆𑀙𑀭𑀺𑀬𑀸𑀦𑀺 𑁋 𑀆𑀯𑀸𑀲𑀫𑀘𑁆𑀙𑀭𑀺𑀬𑀁, 𑀓𑀼𑀮𑀫𑀘𑁆𑀙𑀭𑀺𑀬𑀁, 𑀮𑀸𑀪𑀫𑀘𑁆𑀙𑀭𑀺𑀬𑀁, 𑀯𑀡𑁆𑀡𑀫𑀘𑁆𑀙𑀭𑀺𑀬𑀁, 𑀥𑀫𑁆𑀫𑀫𑀘𑁆𑀙𑀭𑀺𑀬𑀁. 𑀬𑀁 𑀏𑀯𑀭𑀽𑀧𑀁 𑀫𑀘𑁆𑀙𑁂𑀭𑀁 𑀫𑀘𑁆𑀙𑀭𑀸𑀬𑀦𑀸 𑀫𑀘𑁆𑀙𑀭𑀸𑀬𑀺𑀢𑀢𑁆𑀢𑀁 𑀯𑁂𑀯𑀺𑀘𑁆𑀙𑀁 𑀓𑀤𑀭𑀺𑀬𑀁 𑀓𑀝𑀼𑀓𑀜𑁆𑀘𑀼𑀓𑀢𑀸 𑀅𑀕𑁆𑀕𑀳𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀘𑁆𑀙𑀭𑀺𑀬𑀁. 𑀅𑀧𑀺 𑀘 𑀔𑀦𑁆𑀥𑀫𑀘𑁆𑀙𑀭𑀺𑀬𑀫𑁆𑀧𑀺 𑀫𑀘𑁆𑀙𑀭𑀺𑀬𑀁, 𑀥𑀸𑀢𑀼𑀫𑀘𑁆𑀙𑀭𑀺𑀬𑀫𑁆𑀧𑀺 𑀫𑀘𑁆𑀙𑀭𑀺𑀬𑀁, 𑀆𑀬𑀢𑀦𑀫𑀘𑁆𑀙𑀭𑀺𑀬𑀫𑁆𑀧𑀺 𑀫𑀘𑁆𑀙𑀭𑀺𑀬𑀁, 𑀕𑀸𑀳𑁄 𑀯𑀼𑀘𑁆𑀘𑀢𑀺 𑀫𑀘𑁆𑀙𑀭𑀺𑀬𑀁. 𑀧𑀫𑀸𑀤𑁄 𑀯𑀢𑁆𑀢𑀩𑁆𑀩𑁄 𑁋 𑀓𑀸𑀬𑀤𑀼𑀘𑁆𑀘𑀭𑀺𑀢𑁂 𑀯𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂 𑀯𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂 𑀯𑀸 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀯𑀸 𑀘𑀺𑀢𑁆𑀢𑀲𑁆𑀲 𑀯𑁄𑀲𑀕𑁆𑀕𑁄 [𑀯𑁄𑀲𑁆𑀲𑀕𑁆𑀕𑁄 (𑀩𑀳𑀽𑀲𑀼)] 𑀯𑁄𑀲𑀕𑁆𑀕𑀸𑀦𑀼𑀧𑁆𑀧𑀤𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀬 𑀅𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀢𑀸 𑀅𑀲𑀸𑀢𑀘𑁆𑀘𑀓𑀺𑀭𑀺𑀬𑀢𑀸 𑀅𑀦𑀝𑁆𑀞𑀺𑀢𑀓𑀺𑀭𑀺𑀬𑀢𑀸 [𑀅𑀦𑀺𑀝𑁆𑀞𑀺𑀢𑀓𑀺𑀭𑀺𑀬𑀢𑀸 (𑀓.) 𑀯𑀺𑀪. 𑁮𑁪𑁬] 𑀑𑀮𑀻𑀦𑀯𑀼𑀢𑁆𑀢𑀺𑀢𑀸 𑀦𑀺𑀓𑁆𑀔𑀺𑀢𑁆𑀢𑀘𑁆𑀙𑀦𑁆𑀤𑀢𑀸 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸 𑀅𑀦𑀸𑀲𑁂𑀯𑀦𑀸 𑀅𑀪𑀸𑀯𑀦𑀸 𑀅𑀩𑀳𑀼𑀮𑀻𑀓𑀫𑁆𑀫𑀁 𑀅𑀦𑀥𑀺𑀝𑁆𑀞𑀸𑀦𑀁 𑀅𑀦𑀦𑀼𑀬𑁄𑀕𑁄 𑀧𑀫𑀸𑀤𑁄. 𑀬𑁄 𑀏𑀯𑀭𑀽𑀧𑁄 𑀧𑀫𑀸𑀤𑁄 𑀧𑀫𑀚𑁆𑀚𑀦𑀸 𑀧𑀫𑀚𑁆𑀚𑀺𑀢𑀢𑁆𑀢𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀫𑀸𑀤𑁄. 𑀯𑁂𑀯𑀺𑀘𑁆𑀙𑀸 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀻𑀢𑀺 𑀇𑀫𑀺𑀦𑀸 𑀘 𑀫𑀘𑁆𑀙𑀭𑀺𑀬𑁂𑀦 𑀇𑀫𑀺𑀦𑀸 𑀘 𑀧𑀫𑀸𑀤𑁂𑀦 𑀮𑁄𑀓𑁄 𑀦𑀧𑁆𑀧𑀓𑀸𑀲𑀢𑀺 𑀦 𑀪𑀸𑀲𑀢𑀺 𑀦 𑀢𑀧𑀢𑀺 𑀦 𑀯𑀺𑀭𑁄𑀘𑀢𑀺 𑀦 𑀜𑀸𑀬𑀢𑀺 𑀦 𑀧𑀜𑁆𑀜𑀸𑀬𑀢𑀻𑀢𑀺 𑁋 𑀯𑁂𑀯𑀺𑀘𑁆𑀙𑀸 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀺.

𑀚𑀧𑁆𑀧𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀫𑀻𑀢𑀺 𑀚𑀧𑁆𑀧𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄 𑀅𑀦𑀼𑀦𑀬𑁄 𑀅𑀦𑀼𑀭𑁄𑀥𑁄 𑀦𑀦𑁆𑀤𑀻 [𑀦𑀦𑁆𑀤𑀺 (𑀲𑁆𑀬𑀸.)] 𑀦𑀦𑁆𑀤𑀺𑀭𑀸𑀕𑁄 𑀘𑀺𑀢𑁆𑀢𑀲𑁆𑀲 𑀲𑀸𑀭𑀸𑀕𑁄 𑀇𑀘𑁆𑀙𑀸 𑀫𑀼𑀘𑁆𑀙𑀸 𑀅𑀚𑁆𑀛𑁄𑀲𑀸𑀦𑀁 𑀕𑁂𑀥𑁄 𑀧𑀮𑀺𑀕𑁂𑀥𑁄 𑀲𑀗𑁆𑀕𑁄 𑀧𑀗𑁆𑀓𑁄 𑀏𑀚𑀸 𑀫𑀸𑀬𑀸 𑀚𑀦𑀺𑀓𑀸 𑀲𑀜𑁆𑀚𑀦𑀦𑀻 𑀲𑀺𑀩𑁆𑀩𑀺𑀦𑀻 𑀚𑀸𑀮𑀺𑀦𑀻 𑀲𑀭𑀺𑀢𑀸 𑀯𑀺𑀲𑀢𑁆𑀢𑀺𑀓𑀸 𑀲𑀼𑀢𑁆𑀢𑀁 𑀯𑀺𑀲𑀝𑀸 [𑀲𑁄𑀢𑁆𑀢𑀁 𑀯𑀺𑀲𑀢𑀸 (𑀲𑁆𑀬𑀸.)] 𑀆𑀬𑀽𑀳𑀦𑀻 𑀤𑀼𑀢𑀺𑀬𑀸 𑀧𑀡𑀺𑀥𑀺 𑀪𑀯𑀦𑁂𑀢𑁆𑀢𑀺 𑀯𑀦𑀁 𑀯𑀦𑀣𑁄 𑀲𑀦𑁆𑀣𑀯𑁄 [𑀲𑀦𑁆𑀥𑀯𑁄 (𑀓.) 𑀯𑀺𑀪. 𑁯𑁦𑁯] 𑀲𑀺𑀦𑁂𑀳𑁄 𑀅𑀧𑁂𑀓𑁆𑀔𑀸 𑀧𑀝𑀺𑀩𑀦𑁆𑀥𑀼 𑀆𑀲𑀸 𑀆𑀲𑀻𑀲𑀦𑀸 [𑀆𑀲𑀺𑀁𑀲𑀦𑀸 (𑀲𑁆𑀬𑀸.)] 𑀆𑀲𑀻𑀲𑀺𑀢𑀢𑁆𑀢𑀁 𑀭𑀽𑀧𑀸𑀲𑀸 𑀲𑀤𑁆𑀤𑀸𑀲𑀸 𑀕𑀦𑁆𑀥𑀸𑀲𑀸 𑀭𑀲𑀸𑀲𑀸 𑀨𑁄𑀝𑁆𑀞𑀩𑁆𑀩𑀸𑀲𑀸 𑀮𑀸𑀪𑀸𑀲𑀸 𑀥𑀦𑀸𑀲𑀸 𑀧𑀼𑀢𑁆𑀢𑀸𑀲𑀸 𑀚𑀻𑀯𑀺𑀢𑀸𑀲𑀸 𑀚𑀧𑁆𑀧𑀸 𑀧𑀚𑀧𑁆𑀧𑀸 𑀅𑀪𑀺𑀚𑀧𑁆𑀧𑀸 𑀚𑀧𑁆𑀧𑀦𑀸 𑀚𑀧𑁆𑀧𑀺𑀢𑀢𑁆𑀢𑀁 𑀮𑁄𑀮𑀼𑀧𑁆𑀧𑀁 𑀮𑁄𑀮𑀼𑀧𑁆𑀧𑀸𑀬𑀦𑀸 𑀮𑁄𑀮𑀼𑀧𑁆𑀧𑀸𑀬𑀺𑀢𑀢𑁆𑀢𑀁 𑀧𑀼𑀘𑁆𑀙𑀜𑁆𑀚𑀺𑀓𑀢𑀸 𑀲𑀸𑀥𑀼𑀓𑀫𑁆𑀬𑀢𑀸 𑀅𑀥𑀫𑁆𑀫𑀭𑀸𑀕𑁄 𑀯𑀺𑀲𑀫𑀮𑁄𑀪𑁄 𑀦𑀺𑀓𑀦𑁆𑀢𑀺 𑀦𑀺𑀓𑀸𑀫𑀦𑀸 𑀧𑀢𑁆𑀣𑀦𑀸 𑀧𑀺𑀳𑀦𑀸 𑀲𑀫𑁆𑀧𑀢𑁆𑀣𑀦𑀸 𑀓𑀸𑀫𑀢𑀡𑁆𑀳𑀸 𑀪𑀯𑀢𑀡𑁆𑀳𑀸 𑀯𑀺𑀪𑀯𑀢𑀡𑁆𑀳𑀸 𑀭𑀽𑀧𑀢𑀡𑁆𑀳𑀸 𑀅𑀭𑀽𑀧𑀢𑀡𑁆𑀳𑀸 𑀦𑀺𑀭𑁄𑀥𑀢𑀡𑁆𑀳𑀸 𑀭𑀽𑀧𑀢𑀡𑁆𑀳𑀸 𑀲𑀤𑁆𑀤𑀢𑀡𑁆𑀳𑀸 𑀕𑀦𑁆𑀥𑀢𑀡𑁆𑀳𑀸 𑀭𑀲𑀢𑀡𑁆𑀳𑀸 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀥𑀫𑁆𑀫𑀢𑀡𑁆𑀳𑀸 𑀑𑀖𑁄 𑀬𑁄𑀕𑁄 𑀕𑀦𑁆𑀣𑁄 𑀉𑀧𑀸𑀤𑀸𑀦𑀁 𑀆𑀯𑀭𑀡𑀁 𑀦𑀻𑀯𑀭𑀡𑀁 𑀙𑀤𑀦𑀁 𑀩𑀦𑁆𑀥𑀦𑀁 𑀉𑀧𑀓𑁆𑀓𑀺𑀮𑁂𑀲𑁄 𑀅𑀦𑀼𑀲𑀬𑁄 𑀧𑀭𑀺𑀬𑀼𑀝𑁆𑀞𑀸𑀦𑀁 𑀮𑀢𑀸 𑀯𑁂𑀯𑀺𑀘𑁆𑀙𑀁 𑀤𑀼𑀓𑁆𑀔𑀫𑀽𑀮𑀁 𑀤𑀼𑀓𑁆𑀔𑀦𑀺𑀤𑀸𑀦𑀁 𑀤𑀼𑀓𑁆𑀔𑀧𑁆𑀧𑀪𑀯𑁄 𑀫𑀸𑀭𑀧𑀸𑀲𑁄 𑀫𑀸𑀭𑀩𑀴𑀺𑀲𑀁 𑀫𑀸𑀭𑀸𑀫𑀺𑀲𑀁 𑀫𑀸𑀭𑀯𑀺𑀲𑀬𑁄 𑀫𑀸𑀭𑀦𑀺𑀯𑀸𑀲𑁄 𑀫𑀸𑀭𑀕𑁄𑀘𑀭𑁄 𑀫𑀸𑀭𑀩𑀦𑁆𑀥𑀦𑀁 𑀢𑀡𑁆𑀳𑀸𑀦𑀤𑀻 𑀢𑀡𑁆𑀳𑀸𑀚𑀸𑀮𑀁 𑀢𑀡𑁆𑀳𑀸𑀕𑀤𑁆𑀤𑀼𑀮𑀁 𑀢𑀡𑁆𑀳𑀸𑀲𑀫𑀼𑀤𑁆𑀤𑁄 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀚𑀧𑁆𑀧𑀸. 𑀮𑁄𑀓𑀲𑁆𑀲 𑀮𑁂𑀧𑀦𑀁 𑀮𑀕𑁆𑀕𑀦𑀁 𑀩𑀦𑁆𑀥𑀦𑀁 𑀉𑀧𑀓𑁆𑀓𑀺𑀮𑁂𑀲𑁄 𑀇𑀫𑀸𑀬 𑀚𑀧𑁆𑀧𑀸𑀬 𑀮𑁄𑀓𑁄 𑀮𑀺𑀢𑁆𑀢𑁄 𑀲𑀁𑀮𑀺𑀢𑁆𑀢𑁄 𑀉𑀧𑀮𑀺𑀢𑁆𑀢𑁄 𑀓𑀺𑀮𑀺𑀝𑁆𑀞𑁄 𑀲𑀁𑀓𑀺𑀮𑀺𑀝𑁆𑀞𑁄 𑀫𑀓𑁆𑀔𑀺𑀢𑁄 𑀲𑀁𑀲𑀝𑁆𑀞𑁄 𑀮𑀕𑁆𑀕𑁄 𑀮𑀕𑁆𑀕𑀺𑀢𑁄 𑀧𑀮𑀺𑀩𑀼𑀤𑁆𑀥𑁄𑀢𑀺 𑀩𑁆𑀭𑀽𑀫𑀺 𑀆𑀘𑀺𑀓𑁆𑀔𑀸𑀫𑀺 𑀤𑁂𑀲𑁂𑀫𑀺 𑀧𑀜𑁆𑀜𑀧𑁂𑀫𑀺 𑀧𑀝𑁆𑀞𑀧𑁂𑀫𑀺 𑀯𑀺𑀯𑀭𑀸𑀫𑀺 𑀯𑀺𑀪𑀚𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑁄𑀫𑀺 𑀧𑀓𑀸𑀲𑁂𑀫𑀻𑀢𑀺 𑁋 𑀚𑀧𑁆𑀧𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀫𑀺.

𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬𑀦𑁆𑀢𑀺. 𑀤𑀼𑀓𑁆𑀔𑀦𑁆𑀢𑀺 𑀚𑀸𑀢𑀺𑀤𑀼𑀓𑁆𑀔𑀁 𑀚𑀭𑀸𑀤𑀼𑀓𑁆𑀔𑀁 𑀩𑁆𑀬𑀸𑀥𑀺𑀤𑀼𑀓𑁆𑀔𑀁 𑀫𑀭𑀡𑀤𑀼𑀓𑁆𑀔𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀤𑀼𑀓𑁆𑀔𑀁 𑀦𑁂𑀭𑀬𑀺𑀓𑀁 𑀤𑀼𑀓𑁆𑀔𑀁 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑀁 𑀤𑀼𑀓𑁆𑀔𑀁 𑀧𑁂𑀢𑁆𑀢𑀺𑀯𑀺𑀲𑀬𑀺𑀓𑀁 𑀤𑀼𑀓𑁆𑀔𑀁 𑀫𑀸𑀦𑀼𑀲𑀺𑀓𑀁 𑀤𑀼𑀓𑁆𑀔𑀁 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀫𑀽𑀮𑀓𑀁 𑀤𑀼𑀓𑁆𑀔𑀁 𑀕𑀩𑁆𑀪𑀝𑁆𑀞𑀺𑀢𑀺𑀫𑀽𑀮𑀓𑀁 [𑀕𑀩𑁆𑀪𑁂𑀞𑀺𑀢𑀺𑀫𑀽𑀮𑀓𑀁 (𑀲𑁆𑀬𑀸. 𑀓.)] 𑀤𑀼𑀓𑁆𑀔𑀁 𑀕𑀩𑁆𑀪𑀯𑀼𑀝𑁆𑀞𑀸𑀦𑀫𑀽𑀮𑀓𑀁 𑀤𑀼𑀓𑁆𑀔𑀁 𑀚𑀸𑀢𑀲𑁆𑀲𑀽𑀧𑀦𑀺𑀩𑀦𑁆𑀥𑀓𑀁 𑀤𑀼𑀓𑁆𑀔𑀁 𑀚𑀸𑀢𑀲𑁆𑀲 𑀧𑀭𑀸𑀥𑁂𑀬𑁆𑀬𑀓𑀁 𑀤𑀼𑀓𑁆𑀔𑀁 𑀅𑀢𑁆𑀢𑀽𑀧𑀓𑁆𑀓𑀫𑀤𑀼𑀓𑁆𑀔𑀁 𑀧𑀭𑀽𑀧𑀓𑁆𑀓𑀫𑀤𑀼𑀓𑁆𑀔𑀁 𑀲𑀗𑁆𑀔𑀸𑀭𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀁 𑀘𑀓𑁆𑀔𑀼𑀭𑁄𑀕𑁄 𑀲𑁄𑀢𑀭𑁄𑀕𑁄 𑀖𑀸𑀦𑀭𑁄𑀕𑁄 𑀚𑀺𑀯𑁆𑀳𑀸𑀭𑁄𑀕𑁄 𑀓𑀸𑀬𑀭𑁄𑀕𑁄 𑀲𑀻𑀲𑀭𑁄𑀕𑁄 𑀓𑀡𑁆𑀡𑀭𑁄𑀕𑁄 𑀫𑀼𑀔𑀭𑁄𑀕𑁄 𑀤𑀦𑁆𑀢𑀭𑁄𑀕𑁄 𑀓𑀸𑀲𑁄 𑀲𑀸𑀲𑁄 𑀧𑀺𑀦𑀸𑀲𑁄 𑀟𑀸𑀳𑁄 [𑀟𑀳𑁄 (𑀲𑁆𑀬𑀸.)] 𑀚𑀭𑁄 𑀓𑀼𑀘𑁆𑀙𑀺𑀭𑁄𑀕𑁄 𑀫𑀼𑀘𑁆𑀙𑀸 𑀧𑀓𑁆𑀔𑀦𑁆𑀤𑀺𑀓𑀸 𑀲𑀽𑀮𑀸 𑀯𑀺𑀲𑀽𑀘𑀺𑀓𑀸 𑀓𑀼𑀝𑁆𑀞𑀁 𑀕𑀡𑁆𑀟𑁄 𑀓𑀺𑀮𑀸𑀲𑁄 𑀲𑁄𑀲𑁄 𑀅𑀧𑀫𑀸𑀭𑁄 𑀤𑀤𑁆𑀤𑀼 𑀓𑀡𑁆𑀟𑀼 𑀓𑀘𑁆𑀙𑀼 𑀭𑀔𑀲𑀸 [𑀭𑀓𑁆𑀔𑀲𑀸 (𑀓.)] 𑀯𑀺𑀢𑀘𑁆𑀙𑀺𑀓𑀸 𑀮𑁄𑀳𑀺𑀢𑀧𑀺𑀢𑁆𑀢𑀁 [𑀮𑁄𑀳𑀺𑀢𑀁 𑀧𑀺𑀢𑁆𑀢𑀁 (𑀩𑀳𑀽𑀲𑀼)] 𑀫𑀥𑀼𑀫𑁂𑀳𑁄 𑀅𑀁𑀲𑀸 𑀧𑀺𑀴𑀓𑀸 𑀪𑀕𑀦𑁆𑀤𑀮𑀸 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀯𑀸𑀢𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀲𑀦𑁆𑀦𑀺𑀧𑀸𑀢𑀺𑀓𑀸 𑀆𑀩𑀸𑀥𑀸 𑀉𑀢𑀼𑀧𑀭𑀺𑀡𑀸𑀫𑀚𑀸 𑀆𑀩𑀸𑀥𑀸 𑀯𑀺𑀲𑀫𑀧𑀭𑀺𑀳𑀸𑀭𑀚𑀸 𑀆𑀩𑀸𑀥𑀸 𑀑𑀧𑀓𑁆𑀓𑀫𑀺𑀓𑀸 𑀆𑀩𑀸𑀥𑀸 𑀓𑀫𑁆𑀫𑀯𑀺𑀧𑀸𑀓𑀚𑀸 𑀆𑀩𑀸𑀥𑀸 𑀲𑀻𑀢𑀁 𑀉𑀡𑁆𑀳𑀁 𑀚𑀺𑀖𑀘𑁆𑀙𑀸 𑀧𑀺𑀧𑀸𑀲𑀸 𑀉𑀘𑁆𑀘𑀸𑀭𑁄 𑀧𑀲𑁆𑀲𑀸𑀯𑁄 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀁 𑀤𑀼𑀓𑁆𑀔𑀁 𑀫𑀸𑀢𑀼𑀫𑀭𑀡𑀁 𑀤𑀼𑀓𑁆𑀔𑀁 𑀧𑀺𑀢𑀼𑀫𑀭𑀡𑀁 𑀤𑀼𑀓𑁆𑀔𑀁 𑀪𑀸𑀢𑀼𑀫𑀭𑀡𑀁 𑀤𑀼𑀓𑁆𑀔𑀁 𑀪𑀕𑀺𑀦𑀺𑀫𑀭𑀡𑀁 𑀤𑀼𑀓𑁆𑀔𑀁 𑀧𑀼𑀢𑁆𑀢𑀫𑀭𑀡𑀁 𑀤𑀼𑀓𑁆𑀔𑀁 𑀥𑀻𑀢𑀼𑀫𑀭𑀡𑀁 𑀤𑀼𑀓𑁆𑀔𑀁 𑀜𑀸𑀢𑀺𑀩𑁆𑀬𑀲𑀦𑀁 𑀤𑀼𑀓𑁆𑀔𑀁 𑀭𑁄𑀕𑀩𑁆𑀬𑀲𑀦𑀁 𑀤𑀼𑀓𑁆𑀔𑀁 𑀪𑁄𑀕𑀩𑁆𑀬𑀲𑀦𑀁 𑀤𑀼𑀓𑁆𑀔𑀁 𑀲𑀻𑀮𑀩𑁆𑀬𑀲𑀦𑀁 𑀤𑀼𑀓𑁆𑀔𑀁 𑀤𑀺𑀝𑁆𑀞𑀺𑀩𑁆𑀬𑀲𑀦𑀁 𑀤𑀼𑀓𑁆𑀔𑀁 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀆𑀤𑀺𑀢𑁄 𑀲𑀫𑀼𑀤𑀸𑀕𑀫𑀦𑀁 𑀧𑀜𑁆𑀜𑀸𑀬𑀢𑀺. 𑀅𑀢𑁆𑀣𑀗𑁆𑀕𑀫𑀢𑁄 𑀦𑀺𑀭𑁄𑀥𑁄 𑀧𑀜𑁆𑀜𑀸𑀬𑀢𑀺. 𑀓𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑁄 𑀯𑀺𑀧𑀸𑀓𑁄. 𑀯𑀺𑀧𑀸𑀓𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀫𑁆𑀫𑀁, 𑀦𑀸𑀫𑀲𑀦𑁆𑀦𑀺𑀲𑁆𑀲𑀺𑀢𑀁 𑀭𑀽𑀧𑀁 𑀭𑀽𑀧𑀲𑀦𑁆𑀦𑀺𑀲𑁆𑀲𑀺𑀢𑀁 𑀦𑀸𑀫𑀁, 𑀚𑀸𑀢𑀺𑀬𑀸 𑀅𑀦𑀼𑀕𑀢𑀁 𑀚𑀭𑀸𑀬 𑀅𑀦𑀼𑀲𑀝𑀁 𑀩𑁆𑀬𑀸𑀥𑀺𑀦𑀸 𑀅𑀪𑀺𑀪𑀽𑀢𑀁 𑀫𑀭𑀡𑁂𑀦 𑀅𑀩𑁆𑀪𑀸𑀳𑀢𑀁 𑀤𑀼𑀓𑁆𑀔𑁂 𑀧𑀢𑀺𑀝𑁆𑀞𑀺𑀢𑀁 𑀅𑀢𑀸𑀡𑀁 𑀅𑀮𑁂𑀡𑀁 𑀅𑀲𑀭𑀡𑀁 𑀅𑀲𑀭𑀡𑀻𑀪𑀽𑀢𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀤𑀼𑀓𑁆𑀔𑀁. 𑀇𑀤𑀁 𑀤𑀼𑀓𑁆𑀔𑀁 𑀮𑁄𑀓𑀲𑁆𑀲 𑀪𑀬𑀁 𑀫𑀳𑀸𑀪𑀬𑀁 𑀧𑀻𑀴𑀦𑀁 𑀖𑀝𑁆𑀝𑀦𑀁 𑀉𑀧𑀤𑁆𑀤𑀯𑁄 𑀉𑀧𑀲𑀕𑁆𑀕𑁄𑀢𑀺 𑁋 𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄, [𑀅𑀚𑀺𑀢𑀸𑀢𑀺 𑀪𑀕𑀯𑀸]

𑀯𑁂𑀯𑀺𑀘𑁆𑀙𑀸 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀺;

𑀚𑀧𑁆𑀧𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀫𑀺, 𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺.

𑁩. 𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄]

𑀲𑁄𑀢𑀸𑀦𑀁 𑀓𑀺𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀳𑀺, 𑀓𑁂𑀦 𑀲𑁄𑀢𑀸 𑀧𑀺𑀥𑀺𑀬𑁆𑀬𑀭𑁂 [𑀧𑀺𑀣𑀺𑀬𑁆𑀬𑀭𑁂 (𑀲𑁆𑀬𑀸.), 𑀧𑀺𑀣𑀻𑀬𑀭𑁂 (𑀲𑀻. 𑀅𑀝𑁆𑀞.)] .

𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸𑀢𑀺. 𑀲𑁄𑀢𑀸𑀢𑀺 𑀢𑀡𑁆𑀳𑀸𑀲𑁄𑀢𑁄 𑀤𑀺𑀝𑁆𑀞𑀺𑀲𑁄𑀢𑁄 𑀓𑀺𑀮𑁂𑀲𑀲𑁄𑀢𑁄 𑀤𑀼𑀘𑁆𑀘𑀭𑀺𑀢𑀲𑁄𑀢𑁄 𑀅𑀯𑀺𑀚𑁆𑀚𑀸𑀲𑁄𑀢𑁄. 𑀲𑀩𑁆𑀩𑀥𑀻𑀢𑀺 𑀲𑀩𑁆𑀩𑁂𑀲𑀼 𑀆𑀬𑀢𑀦𑁂𑀲𑀼. 𑀲𑀯𑀦𑁆𑀢𑀻𑀢𑀺 𑀲𑀯𑀦𑁆𑀢𑀺 𑀆𑀲𑀯𑀦𑁆𑀢𑀺 𑀲𑀦𑁆𑀤𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺. 𑀘𑀓𑁆𑀔𑀼𑀢𑁄 𑀭𑀽𑀧𑁂 𑀲𑀯𑀦𑁆𑀢𑀺 𑀆𑀲𑀯𑀦𑁆𑀢𑀺 𑀲𑀦𑁆𑀤𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺. 𑀲𑁄𑀢𑀢𑁄 𑀲𑀤𑁆𑀤𑁂 𑀲𑀯𑀦𑁆𑀢𑀺…𑀧𑁂… 𑀖𑀸𑀦𑀢𑁄 𑀕𑀦𑁆𑀥𑁂 𑀲𑀯𑀦𑁆𑀢𑀺… 𑀚𑀺𑀯𑁆𑀳𑀸𑀢𑁄 𑀭𑀲𑁂 𑀲𑀯𑀦𑁆𑀢𑀺… 𑀓𑀸𑀬𑀢𑁄 𑀨𑁄𑀝𑁆𑀞𑀩𑁆𑀩𑁂 𑀲𑀯𑀦𑁆𑀢𑀺… 𑀫𑀦𑀢𑁄 𑀥𑀫𑁆𑀫𑁂 𑀲𑀯𑀦𑁆𑀢𑀺 𑀆𑀲𑀯𑀦𑁆𑀢𑀺 𑀲𑀦𑁆𑀤𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺. 𑀘𑀓𑁆𑀔𑀼𑀢𑁄 𑀭𑀽𑀧𑀢𑀡𑁆𑀳𑀸 𑀲𑀯𑀦𑁆𑀢𑀺 𑀆𑀲𑀯𑀦𑁆𑀢𑀺 𑀲𑀦𑁆𑀤𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺. 𑀲𑁄𑀢𑀢𑁄 𑀲𑀤𑁆𑀤𑀢𑀡𑁆𑀳𑀸 𑀲𑀯𑀦𑁆𑀢𑀺 𑀆𑀲𑀯𑀦𑁆𑀢𑀺 𑀲𑀦𑁆𑀤𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺. 𑀖𑀸𑀦𑀢𑁄 𑀕𑀦𑁆𑀥𑀢𑀡𑁆𑀳𑀸 𑀲𑀯𑀦𑁆𑀢𑀺… 𑀚𑀺𑀯𑁆𑀳𑀸𑀢𑁄 𑀭𑀲𑀢𑀡𑁆𑀳𑀸 𑀲𑀯𑀦𑁆𑀢𑀺… 𑀓𑀸𑀬𑀢𑁄 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀲𑀯𑀦𑁆𑀢𑀺… 𑀫𑀦𑀢𑁄 𑀥𑀫𑁆𑀫𑀢𑀡𑁆𑀳𑀸 𑀲𑀯𑀦𑁆𑀢𑀺 𑀆𑀲𑀯𑀦𑁆𑀢𑀺 𑀲𑀦𑁆𑀤𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑁋 𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸.

𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑀇𑀘𑁆𑀘𑀸𑀢𑀺…𑀧𑁂… 𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄.

𑀲𑁄𑀢𑀸𑀦𑀁 𑀓𑀺𑀁 𑀦𑀺𑀯𑀸𑀭𑀡𑀦𑁆𑀢𑀺 𑀲𑁄𑀢𑀸𑀦𑀁 𑀓𑀺𑀁 𑀆𑀯𑀭𑀡𑀁 𑀦𑀻𑀯𑀭𑀡𑀁 𑀲𑀁𑀯𑀭𑀡𑀁 𑀭𑀓𑁆𑀔𑀦𑀁 𑀕𑁄𑀧𑀦𑀦𑁆𑀢𑀺 𑁋 𑀲𑁄𑀢𑀸𑀦𑀁 𑀓𑀺𑀁 𑀦𑀺𑀯𑀸𑀭𑀡𑀁.

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀳𑀻𑀢𑀺 𑀲𑁄𑀢𑀸𑀦𑀁 𑀆𑀯𑀭𑀡𑀁 𑀦𑀻𑀯𑀭𑀡𑀁 𑀲𑀁𑀯𑀭𑀡𑀁 𑀭𑀓𑁆𑀔𑀦𑀁 𑀕𑁄𑀧𑀦𑀁 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀳𑀺.

𑀓𑁂𑀦 𑀲𑁄𑀢𑀸 𑀧𑀺𑀥𑀺𑀬𑁆𑀬𑀭𑁂𑀢𑀺 𑀓𑁂𑀦 𑀲𑁄𑀢𑀸 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺 𑀦 𑀲𑀯𑀦𑁆𑀢𑀺 𑀦 𑀆𑀲𑀯𑀦𑁆𑀢𑀺 𑀦 𑀲𑀦𑁆𑀤𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀻𑀢𑀺 𑁋 𑀓𑁂𑀦 𑀲𑁄𑀢𑀸 𑀧𑀺𑀥𑀺𑀬𑁆𑀬𑀭𑁂. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄]

𑀲𑁄𑀢𑀸𑀦𑀁 𑀓𑀺𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀳𑀺, 𑀓𑁂𑀦 𑀲𑁄𑀢𑀸 𑀧𑀺𑀥𑀺𑀬𑁆𑀬𑀭𑁂’’.

𑁪. 𑀬𑀸𑀦𑀺 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺𑀁, [𑀅𑀚𑀺𑀢𑀸𑀢𑀺 𑀪𑀕𑀯𑀸]

𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀺, 𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀺𑀬𑁆𑀬𑀭𑁂.

𑀬𑀸𑀦𑀺 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺𑀦𑁆𑀢𑀺 𑀬𑀸𑀦𑀺 𑀏𑀢𑀸𑀦𑀺 𑀲𑁄𑀢𑀸𑀦𑀺 𑀫𑀬𑀸 𑀓𑀺𑀢𑁆𑀢𑀺𑀢𑀸𑀦𑀺 𑀧𑀓𑀺𑀢𑁆𑀢𑀺𑀢𑀸𑀦𑀺 𑀆𑀘𑀺𑀓𑁆𑀔𑀺𑀢𑀸𑀦𑀺 𑀤𑁂𑀲𑀺𑀢𑀸𑀦𑀺 𑀧𑀜𑁆𑀜𑀧𑀺𑀢𑀸𑀦𑀺 𑀧𑀝𑁆𑀞𑀧𑀺𑀢𑀸𑀦𑀺 𑀯𑀺𑀯𑀭𑀺𑀢𑀸𑀦𑀺 𑀯𑀺𑀪𑀚𑀺𑀢𑀸𑀦𑀺 [𑀯𑀺𑀪𑀢𑁆𑀢𑀸𑀦𑀺 (𑀓.)] 𑀉𑀢𑁆𑀢𑀸𑀦𑀻𑀓𑀢𑀸𑀦𑀺 𑀧𑀓𑀸𑀲𑀺𑀢𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 [𑀲𑁂𑀬𑁆𑀬𑀣𑀻𑀤𑀁 (𑀲𑁆𑀬𑀸.)] 𑁋 𑀢𑀡𑁆𑀳𑀸𑀲𑁄𑀢𑁄 𑀤𑀺𑀝𑁆𑀞𑀺𑀲𑁄𑀢𑁄 𑀓𑀺𑀮𑁂𑀲𑀲𑁄𑀢𑁄 𑀤𑀼𑀘𑁆𑀘𑀭𑀺𑀢𑀲𑁄𑀢𑁄 𑀅𑀯𑀺𑀚𑁆𑀚𑀸𑀲𑁄𑀢𑁄. 𑀮𑁄𑀓𑀲𑁆𑀫𑀺𑀦𑁆𑀢𑀺 𑀅𑀧𑀸𑀬𑀮𑁄𑀓𑁂 𑀫𑀦𑀼𑀲𑁆𑀲𑀮𑁄𑀓𑁂 𑀤𑁂𑀯𑀮𑁄𑀓𑁂 𑀔𑀦𑁆𑀥𑀮𑁄𑀓𑁂 𑀥𑀸𑀢𑀼𑀮𑁄𑀓𑁂 𑀆𑀬𑀢𑀦𑀮𑁄𑀓𑁂𑀢𑀺 𑁋 𑀬𑀸𑀦𑀺 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺𑀁. 𑀅𑀚𑀺𑀢𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺.

𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡𑀦𑁆𑀢𑀺. 𑀲𑀢𑀻𑀢𑀺 𑀬𑀸 𑀲𑀢𑀺 𑀅𑀦𑀼𑀲𑁆𑀲𑀢𑀺 𑀧𑀝𑀺𑀲𑁆𑀲𑀢𑀺 𑀲𑀢𑀺 𑀲𑀭𑀡𑀢𑀸 𑀥𑀸𑀭𑀡𑀢𑀸 𑀅𑀧𑀺𑀮𑀸𑀧𑀦𑀢𑀸 𑀅𑀲𑀫𑁆𑀫𑀼𑀲𑁆𑀲𑀦𑀢𑀸 𑀲𑀢𑀺 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀩𑀮𑀁 𑀲𑀫𑁆𑀫𑀸𑀲𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀏𑀓𑀸𑀬𑀦𑀫𑀕𑁆𑀕𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀢𑀺. 𑀦𑀺𑀯𑀸𑀭𑀡𑀦𑁆𑀢𑀺 𑀆𑀯𑀭𑀡𑀁 𑀦𑀻𑀯𑀭𑀡𑀁 𑀲𑀁𑀯𑀭𑀡𑀁 𑀭𑀓𑁆𑀔𑀦𑀁 𑀕𑁄𑀧𑀦𑀦𑁆𑀢𑀺 𑁋 𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡𑀁.

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀻𑀢𑀺 𑀲𑁄𑀢𑀸𑀦𑀁 𑀆𑀯𑀭𑀡𑀁 𑀦𑀻𑀯𑀭𑀡𑀁 𑀲𑀁𑀯𑀭𑀡𑀁 𑀭𑀓𑁆𑀔𑀦𑀁 𑀕𑁄𑀧𑀦𑀁 𑀩𑁆𑀭𑀽𑀫𑀺 𑀆𑀘𑀺𑀓𑁆𑀔𑀸𑀫𑀺…𑀧𑁂… 𑀉𑀢𑁆𑀢𑀸𑀦𑀻𑀓𑀭𑁄𑀫𑀺 𑀧𑀓𑀸𑀲𑁂𑀫𑀻𑀢𑀺 𑁋 𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀺.

𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀺𑀬𑁆𑀬𑀭𑁂𑀢𑀺. 𑀧𑀜𑁆𑀜𑀸𑀢𑀺 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀺𑀬𑁆𑀬𑀭𑁂𑀢𑀺 𑁋 𑀧𑀜𑁆𑀜𑀸𑀬𑁂𑀢𑁂 𑀲𑁄𑀢𑀸 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺 𑀦 𑀲𑀯𑀦𑁆𑀢𑀺 𑀦 𑀆𑀲𑀯𑀦𑁆𑀢𑀺 𑀦 𑀲𑀦𑁆𑀤𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀧𑀜𑁆𑀜𑀸𑀬𑁂𑀢𑁂 𑀲𑁄𑀢𑀸 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺 𑀦 𑀲𑀯𑀦𑁆𑀢𑀺 𑀦 𑀆𑀲𑀯𑀦𑁆𑀢𑀺 𑀦 𑀲𑀦𑁆𑀤𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀧𑀜𑁆𑀜𑀸𑀬𑁂𑀢𑁂 𑀲𑁄𑀢𑀸 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺 𑀦 𑀲𑀯𑀦𑁆𑀢𑀺 𑀦 𑀆𑀲𑀯𑀦𑁆𑀢𑀺 𑀦 𑀲𑀦𑁆𑀤𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀢𑁆𑀢𑀸’’𑀢𑀺 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀧𑀜𑁆𑀜𑀸𑀬𑁂𑀢𑁂 𑀲𑁄𑀢𑀸 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺 𑀦 𑀲𑀯𑀦𑁆𑀢𑀺 𑀦 𑀆𑀲𑀯𑀦𑁆𑀢𑀺 𑀦 𑀲𑀦𑁆𑀤𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀧𑀜𑁆𑀜𑀸𑀬𑁂𑀢𑁂 𑀲𑁄𑀢𑀸 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺 𑀦 𑀲𑀯𑀦𑁆𑀢𑀺 𑀦 𑀆𑀲𑀯𑀦𑁆𑀢𑀺 𑀦 𑀲𑀦𑁆𑀤𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺…𑀧𑁂… ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺… ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺… ‘‘𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺… ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’𑀢𑀺… ‘‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸’’𑀢𑀺… ‘‘𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’’𑀦𑁆𑀢𑀺… ‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’’𑀢𑀺… ‘‘𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’’𑀢𑀺… ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀧𑀜𑁆𑀜𑀸𑀬𑁂𑀢𑁂 𑀲𑁄𑀢𑀸 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺 𑀦 𑀲𑀯𑀦𑁆𑀢𑀺 𑀦 𑀆𑀲𑀯𑀦𑁆𑀢𑀺 𑀦 𑀲𑀦𑁆𑀤𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. ‘‘𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄’’𑀢𑀺… ‘‘𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄’’𑀢𑀺… ‘‘𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄’’𑀢𑀺… ‘‘𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀲𑀴𑀸𑀬𑀢𑀦𑀦𑀺𑀭𑁄𑀥𑁄’’𑀢𑀺… ‘‘𑀲𑀴𑀸𑀬𑀢𑀦𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄’’𑀢𑀺… ‘‘𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄’’𑀢𑀺… ‘‘𑀯𑁂𑀤𑀦𑀸𑀦𑀺𑀭𑁄𑀥𑀸 𑀢𑀡𑁆𑀳𑀸𑀦𑀺𑀭𑁄𑀥𑁄’’𑀢𑀺… ‘‘𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄’’𑀢𑀺… ‘‘𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄’’𑀢𑀺… ‘‘𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄’’𑀢𑀺… ‘‘𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄’’𑀢𑀺 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀧𑀜𑁆𑀜𑀸𑀬𑁂𑀢𑁂 𑀲𑁄𑀢𑀸 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺 𑀦 𑀲𑀯𑀦𑁆𑀢𑀺 𑀦 𑀆𑀲𑀯𑀦𑁆𑀢𑀺 𑀦 𑀲𑀦𑁆𑀤𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺…𑀧𑁂… ‘‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺… ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺… ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀧𑀜𑁆𑀜𑀸𑀬𑁂𑀢𑁂 𑀲𑁄𑀢𑀸 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺 𑀦 𑀲𑀯𑀦𑁆𑀢𑀺 𑀦 𑀆𑀲𑀯𑀦𑁆𑀢𑀺 𑀦 𑀲𑀦𑁆𑀤𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. ‘‘𑀇𑀫𑁂 𑀥𑀫𑁆𑀫𑀸 𑀆𑀲𑀯𑀸’’𑀢𑀺…𑀧𑁂… ‘‘𑀅𑀬𑀁 𑀆𑀲𑀯𑀲𑀫𑀼𑀤𑀬𑁄’’𑀢𑀺… ‘‘𑀅𑀬𑀁 𑀆𑀲𑀯𑀦𑀺𑀭𑁄𑀥𑁄’’𑀢𑀺… ‘‘𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀧𑀜𑁆𑀜𑀸𑀬𑁂𑀢𑁂 𑀲𑁄𑀢𑀸 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺 𑀦 𑀲𑀯𑀦𑁆𑀢𑀺 𑀦 𑀆𑀲𑀯𑀦𑁆𑀢𑀺 𑀦 𑀲𑀦𑁆𑀤𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. ‘‘𑀇𑀫𑁂 𑀥𑀫𑁆𑀫𑀸 𑀅𑀪𑀺𑀜𑁆𑀜𑁂𑀬𑁆𑀬𑀸’’𑀢𑀺…𑀧𑁂… ‘‘𑀇𑀫𑁂 𑀥𑀫𑁆𑀫𑀸 𑀧𑀭𑀺𑀜𑁆𑀜𑁂𑀬𑁆𑀬𑀸’’𑀢𑀺… ‘‘𑀇𑀫𑁂 𑀥𑀫𑁆𑀫𑀸 𑀧𑀳𑀸𑀢𑀩𑁆𑀩𑀸’’𑀢𑀺… ‘‘𑀇𑀫𑁂 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸’’𑀢𑀺… ‘‘𑀇𑀫𑁂 𑀥𑀫𑁆𑀫𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸’’𑀢𑀺 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀧𑀜𑁆𑀜𑀸𑀬𑁂𑀢𑁂 𑀲𑁄𑀢𑀸 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺 𑀦 𑀲𑀯𑀦𑁆𑀢𑀺 𑀦 𑀆𑀲𑀯𑀦𑁆𑀢𑀺 𑀦 𑀲𑀦𑁆𑀤𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀧𑀜𑁆𑀜𑀸𑀬𑁂𑀢𑁂 𑀲𑁄𑀢𑀸 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺 𑀦 𑀲𑀯𑀦𑁆𑀢𑀺 𑀦 𑀆𑀲𑀯𑀦𑁆𑀢𑀺 𑀦 𑀲𑀦𑁆𑀤𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀚𑀸𑀦𑀢𑁄 𑀧𑀲𑁆𑀲𑀢𑁄… 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀚𑀸𑀦𑀢𑁄 𑀧𑀲𑁆𑀲𑀢𑁄… 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀧𑀜𑁆𑀜𑀸𑀬𑁂𑀢𑁂 𑀲𑁄𑀢𑀸 𑀧𑀺𑀥𑀻𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀺 𑀦 𑀲𑀯𑀦𑁆𑀢𑀺 𑀦 𑀆𑀲𑀯𑀦𑁆𑀢𑀺 𑀦 𑀲𑀦𑁆𑀤𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀻𑀢𑀺 𑁋 𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀺𑀬𑁆𑀬𑀭𑁂. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀸𑀦𑀺 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺𑀁, [𑀅𑀚𑀺𑀢𑀸𑀢𑀺 𑀪𑀕𑀯𑀸]

𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀺, 𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀺𑀬𑁆𑀬𑀭𑁂’’𑀢𑀺.

𑁫. 𑀧𑀜𑁆𑀜𑀸 𑀘𑁂𑀯 𑀲𑀢𑀺 𑀘𑀸𑀧𑀺, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄]

𑀦𑀸𑀫𑀭𑀽𑀧𑀜𑁆𑀘 𑀫𑀸𑀭𑀺𑀲;

𑀏𑀢𑀁 𑀫𑁂 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺, 𑀓𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀺.

𑀧𑀜𑁆𑀜𑀸 𑀘𑁂𑀯 𑀲𑀢𑀺 𑀘𑀸𑀧𑀻𑀢𑀺. 𑀧𑀜𑁆𑀜𑀸𑀢𑀺 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸 𑀯𑀺𑀘𑀬𑁄 𑀧𑀯𑀺𑀘𑀬𑁄 𑀥𑀫𑁆𑀫𑀯𑀺𑀘𑀬𑁄 𑀲𑀮𑁆𑀮𑀓𑁆𑀔𑀡𑀸 𑀉𑀧𑀮𑀓𑁆𑀔𑀡𑀸 𑀧𑀘𑁆𑀘𑀼𑀧𑀮𑀓𑁆𑀔𑀡𑀸 𑀧𑀡𑁆𑀟𑀺𑀘𑁆𑀘𑀁 𑀓𑁄𑀲𑀮𑁆𑀮𑀁 𑀦𑁂𑀧𑀼𑀜𑁆𑀜𑀁 𑀯𑁂𑀪𑀩𑁆𑀬𑀸 𑀘𑀺𑀦𑁆𑀢𑀸 𑀉𑀧𑀧𑀭𑀺𑀓𑁆𑀔𑀸 𑀪𑀽𑀭𑀻 [𑀪𑀽𑀭𑀺 (𑀓.)] 𑀫𑁂𑀥𑀸 𑀧𑀭𑀺𑀡𑀸𑀬𑀺𑀓𑀸 𑀯𑀺𑀧𑀲𑁆𑀲𑀦𑀸 𑀲𑀫𑁆𑀧𑀚𑀜𑁆𑀜𑀁 𑀧𑀢𑁄𑀤𑁄 𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮𑀁 𑀧𑀜𑁆𑀜𑀸𑀲𑀢𑁆𑀣𑀁 𑀧𑀜𑁆𑀜𑀸𑀧𑀸𑀲𑀸𑀤𑁄 𑀧𑀜𑁆𑀜𑀸𑀆𑀮𑁄𑀓𑁄 𑀧𑀜𑁆𑀜𑀸𑀑𑀪𑀸𑀲𑁄 𑀧𑀜𑁆𑀜𑀸𑀧𑀚𑁆𑀚𑁄𑀢𑁄 𑀧𑀜𑁆𑀜𑀸𑀭𑀢𑀦𑀁 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑀢𑀻𑀢𑀺 𑀬𑀸 𑀲𑀢𑀺 𑀅𑀦𑀼𑀲𑁆𑀲𑀢𑀺…𑀧𑁂… 𑀲𑀫𑁆𑀫𑀸𑀲𑀢𑀻𑀢𑀺 𑁋 𑀧𑀜𑁆𑀜𑀸 𑀘𑁂𑀯 𑀲𑀢𑀺𑀘𑀸𑀧𑀺, 𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄.

𑀦𑀸𑀫𑀭𑀽𑀧𑀜𑁆𑀘 𑀫𑀸𑀭𑀺𑀲𑀸𑀢𑀺. 𑀦𑀸𑀫𑀦𑁆𑀢𑀺 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸. 𑀭𑀽𑀧𑀦𑁆𑀢𑀺 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧𑀁. 𑀫𑀸𑀭𑀺𑀲𑀸𑀢𑀺 𑀧𑀺𑀬𑀯𑀘𑀦𑀁 𑀕𑀭𑀼𑀯𑀘𑀦𑀁 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀸𑀥𑀺𑀯𑀘𑀦𑀫𑁂𑀢𑀁 𑀫𑀸𑀭𑀺𑀲𑀸𑀢𑀺 𑁋 𑀦𑀸𑀫𑀭𑀽𑀧𑀜𑁆𑀘 𑀫𑀸𑀭𑀺𑀲.

𑀏𑀢𑀁 𑀫𑁂 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀻𑀢𑀺. 𑀏𑀢𑀁 𑀫𑁂𑀢𑀺 𑀬𑀁 𑀧𑀼𑀘𑁆𑀙𑀸𑀫𑀺 𑀬𑀁 𑀬𑀸𑀘𑀸𑀫𑀺 𑀬𑀁 𑀅𑀚𑁆𑀛𑁂𑀲𑀸𑀫𑀺 𑀬𑀁 𑀧𑀲𑀸𑀤𑁂𑀫𑀺. 𑀧𑀼𑀝𑁆𑀞𑁄𑀢𑀺 𑀧𑀼𑀘𑁆𑀙𑀺𑀢𑁄 𑀬𑀸𑀘𑀺𑀢𑁄 𑀅𑀚𑁆𑀛𑁂𑀲𑀺𑀢𑁄 𑀧𑀲𑀸𑀤𑀺𑀢𑁄. 𑀧𑀩𑁆𑀭𑀽𑀳𑀻𑀢𑀺 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 [𑀯𑀺𑀯𑀭𑁂𑀳𑀺 𑀯𑀺𑀪𑀚𑁂𑀳𑀺 (𑀓.)] 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀏𑀢𑀁 𑀫𑁂 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺.

𑀓𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻𑀢𑀺 𑀓𑀢𑁆𑀣𑁂𑀢𑀁 𑀦𑀺𑀭𑀼𑀚𑁆𑀛𑀢𑀺 𑀯𑀽𑀧𑀲𑀫𑁆𑀫𑀢𑀺 𑀅𑀢𑁆𑀣𑀁 𑀕𑀘𑁆𑀙𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺. 𑀓𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀺. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀧𑀜𑁆𑀜𑀸 𑀘𑁂𑀯 𑀲𑀢𑀺 𑀘𑀸𑀧𑀺, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄]

𑀦𑀸𑀫𑀭𑀽𑀧𑀜𑁆𑀘 𑀫𑀸𑀭𑀺𑀲;

𑀏𑀯𑀁 𑀫𑁂 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺, 𑀓𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺.

𑁬. 𑀬𑀫𑁂𑀢𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺, 𑀅𑀚𑀺𑀢 𑀢𑀁 𑀯𑀤𑀸𑀫𑀺 𑀢𑁂;

𑀬𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀺;

𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦, 𑀏𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀺.

𑀬𑀫𑁂𑀢𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀻𑀢𑀺. 𑀬𑀫𑁂𑀢𑀦𑁆𑀢𑀺 𑀧𑀜𑁆𑀜𑀜𑁆𑀘 𑀲𑀢𑀺𑀜𑁆𑀘 𑀦𑀸𑀫𑀭𑀽𑀧𑀜𑁆𑀘. 𑀅𑀧𑀼𑀘𑁆𑀙𑀻𑀢𑀺 𑀅𑀧𑀼𑀘𑁆𑀙𑀲𑀺 𑀬𑀸𑀘𑀲𑀺 𑀅𑀚𑁆𑀛𑁂𑀲𑀢𑀺 [𑀅𑀚𑁆𑀛𑁂𑀲𑀺 (𑀓.)] 𑀧𑀲𑀸𑀤𑁂𑀲𑀻𑀢𑀺 𑁋 𑀬𑀫𑁂𑀢𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺.

𑀅𑀚𑀺𑀢 𑀢𑀁 𑀯𑀤𑀸𑀫𑀺 𑀢𑁂𑀢𑀺. 𑀅𑀚𑀺𑀢𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀢𑀦𑁆𑀢𑀺 𑀧𑀜𑁆𑀜𑀜𑁆𑀘 𑀲𑀢𑀺𑀜𑁆𑀘 𑀦𑀸𑀫𑀭𑀽𑀧𑀜𑁆𑀘. 𑀯𑀤𑀸𑀫𑀻𑀢𑀺 𑀯𑀤𑀸𑀫𑀺 𑀆𑀘𑀺𑀓𑁆𑀔𑀸𑀫𑀺 𑀤𑁂𑀲𑁂𑀫𑀺 𑀧𑀜𑁆𑀜𑀧𑁂𑀫𑀺 𑀧𑀝𑁆𑀞𑀧𑁂𑀫𑀺 𑀯𑀺𑀯𑀭𑀸𑀫𑀺 𑀯𑀺𑀪𑀚𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑁄𑀫𑀺 𑀧𑀓𑀸𑀲𑁂𑀫𑀻𑀢𑀺. 𑀅𑀚𑀺𑀢 𑀢𑀁 𑀯𑀤𑀸𑀫𑀺 𑀢𑁂.

𑀬𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀻𑀢𑀺 𑀦𑀸𑀫𑀦𑁆𑀢𑀺 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸. 𑀭𑀽𑀧𑀦𑁆𑀢𑀺 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧𑀁. 𑀅𑀲𑁂𑀲𑀦𑁆𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁 𑀧𑀭𑀺𑀬𑀸𑀤𑀺𑀬𑀦𑀯𑀘𑀦𑀫𑁂𑀢𑀁 [𑀧𑀭𑀺𑀬𑀸𑀤𑀸𑀬𑀯𑀘𑀦𑀫𑁂𑀢𑀁 (𑀲𑁆𑀬𑀸. 𑀓.)] 𑀅𑀲𑁂𑀲𑀦𑁆𑀢𑀺. 𑀉𑀧𑀭𑀼𑀚𑁆𑀛𑀢𑀻𑀢𑀺 𑀦𑀺𑀭𑀼𑀚𑁆𑀛𑀢𑀺 𑀯𑀽𑀧𑀲𑀫𑁆𑀫𑀢𑀺 𑀅𑀢𑁆𑀣𑀁 𑀕𑀘𑁆𑀙𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺. 𑀬𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀺.

𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦, 𑀏𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀲𑀢𑁆𑀢 𑀪𑀯𑁂 𑀞𑀧𑁂𑀢𑁆𑀯𑀸 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀺 𑀯𑀽𑀧𑀲𑀫𑁆𑀫𑀦𑁆𑀢𑀺 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀤𑁆𑀯𑁂 𑀪𑀯𑁂 𑀞𑀧𑁂𑀢𑁆𑀯𑀸 𑀧𑀜𑁆𑀘𑀲𑀼 𑀪𑀯𑁂𑀲𑀼 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀺 𑀯𑀽𑀧𑀲𑀫𑁆𑀫𑀦𑁆𑀢𑀺 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺. 𑀅𑀦𑀸𑀕𑀸𑀫𑀺𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀏𑀓𑀁 𑀪𑀯𑀁 𑀞𑀧𑁂𑀢𑁆𑀯𑀸 𑀭𑀽𑀧𑀥𑀸𑀢𑀼𑀬𑀸 𑀯𑀸 𑀅𑀭𑀽𑀧𑀥𑀸𑀢𑀼𑀬𑀸 𑀯𑀸 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀺 𑀯𑀽𑀧𑀲𑀫𑁆𑀫𑀦𑁆𑀢𑀺 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺. 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀺 𑀯𑀽𑀧𑀲𑀫𑁆𑀫𑀦𑁆𑀢𑀺 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺. 𑀅𑀭𑀳𑀢𑁄 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀲𑁆𑀲 𑀘𑀭𑀺𑀫𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀧𑀜𑁆𑀜𑀸 𑀘 𑀲𑀢𑀺 𑀘 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀺 𑀯𑀽𑀧𑀲𑀫𑁆𑀫𑀦𑁆𑀢𑀺 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀏𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀫𑁂𑀢𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺, 𑀅𑀚𑀺𑀢 𑀢𑀁 𑀯𑀤𑀸𑀫𑀺 𑀢𑁂;

𑀬𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀺;

𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦, 𑀏𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺.

𑁭. 𑀬𑁂 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂, 𑀬𑁂 𑀘 𑀲𑁂𑀔𑀸 [𑀲𑁂𑀓𑁆𑀔𑀸 (𑀲𑁆𑀬𑀸. 𑀓.)] 𑀧𑀼𑀣𑀽 𑀇𑀥;

𑀢𑁂𑀲𑀁 𑀫𑁂 𑀦𑀺𑀧𑀓𑁄 𑀇𑀭𑀺𑀬𑀁, 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲.

𑀬𑁂 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂𑀢𑀺 𑀲𑀗𑁆𑀔𑀸𑀢𑀥𑀫𑁆𑀫𑀸 𑀯𑀼𑀘𑁆𑀘𑀦𑁆𑀢𑀺 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸. 𑀓𑀺𑀁𑀓𑀸𑀭𑀡𑀸 𑀲𑀗𑁆𑀔𑀸𑀢𑀥𑀫𑁆𑀫𑀸 𑀯𑀼𑀘𑁆𑀘𑀦𑁆𑀢𑀺 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸? 𑀢𑁂 𑀲𑀗𑁆𑀔𑀸𑀢𑀥𑀫𑁆𑀫𑀸 𑀜𑀸𑀢𑀥𑀫𑁆𑀫𑀸 𑀢𑀼𑀮𑀺𑀢𑀥𑀫𑁆𑀫𑀸 𑀢𑀻𑀭𑀺𑀢𑀥𑀫𑁆𑀫𑀸 𑀯𑀺𑀪𑀽𑀢𑀥𑀫𑁆𑀫𑀸 𑀯𑀺𑀪𑀸𑀯𑀺𑀢𑀥𑀫𑁆𑀫𑀸. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀲𑀗𑁆𑀔𑀸𑀢𑀥𑀫𑁆𑀫𑀸 𑀜𑀸𑀢𑀥𑀫𑁆𑀫𑀸 𑀢𑀼𑀮𑀺𑀢𑀥𑀫𑁆𑀫𑀸 𑀢𑀻𑀭𑀺𑀢𑀥𑀫𑁆𑀫𑀸 𑀯𑀺𑀪𑀽𑀢𑀥𑀫𑁆𑀫𑀸 𑀯𑀺𑀪𑀸𑀯𑀺𑀢𑀥𑀫𑁆𑀫𑀸. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺 𑀲𑀗𑁆𑀔𑀸𑀢𑀥𑀫𑁆𑀫𑀸…𑀧𑁂… ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 𑀲𑀗𑁆𑀔𑀸𑀢𑀥𑀫𑁆𑀫𑀸… ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀲𑀗𑁆𑀔𑀸𑀢𑀥𑀫𑁆𑀫𑀸… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀲𑀗𑁆𑀔𑀸𑀢𑀥𑀫𑁆𑀫𑀸 𑀜𑀸𑀢𑀥𑀫𑁆𑀫𑀸 𑀢𑀼𑀮𑀺𑀢𑀥𑀫𑁆𑀫𑀸 𑀢𑀻𑀭𑀺𑀢𑀥𑀫𑁆𑀫𑀸 𑀯𑀺𑀪𑀽𑀢𑀥𑀫𑁆𑀫𑀸 𑀯𑀺𑀪𑀸𑀯𑀺𑀢𑀥𑀫𑁆𑀫𑀸. 𑀅𑀣 𑀯𑀸 𑀢𑁂𑀲𑀁 𑀔𑀦𑁆𑀥𑀸 𑀲𑀗𑁆𑀔𑀸𑀢𑀸 𑀥𑀸𑀢𑀼𑀬𑁄 𑀲𑀗𑁆𑀔𑀸𑀢𑀸 𑀆𑀬𑀢𑀦𑀸𑀦𑀺 𑀲𑀗𑁆𑀔𑀸𑀢𑀸 𑀕𑀢𑀺𑀬𑁄 𑀲𑀗𑁆𑀔𑀸𑀢𑀸 𑀉𑀧𑀧𑀢𑁆𑀢𑀺𑀬𑁄 𑀲𑀗𑁆𑀔𑀸𑀢𑀸 𑀧𑀝𑀺𑀲𑀦𑁆𑀥𑀺 𑀲𑀗𑁆𑀔𑀸𑀢𑀸 𑀪𑀯𑀸 𑀲𑀗𑁆𑀔𑀸𑀢𑀸 𑀲𑀁𑀲𑀸𑀭𑀸 𑀲𑀗𑁆𑀔𑀸𑀢𑀸 𑀯𑀝𑁆𑀝𑀸 𑀲𑀗𑁆𑀔𑀸𑀢𑀸. 𑀅𑀣 𑀯𑀸 𑀢𑁂 𑀔𑀦𑁆𑀥𑀧𑀭𑀺𑀬𑀦𑁆𑀢𑁂 𑀞𑀺𑀢𑀸 𑀥𑀸𑀢𑀼𑀧𑀭𑀺𑀬𑀦𑁆𑀢𑁂 𑀞𑀺𑀢𑀸 𑀆𑀬𑀢𑀦𑀧𑀭𑀺𑀬𑀦𑁆𑀢𑁂 𑀞𑀺𑀢𑀸 𑀕𑀢𑀺𑀧𑀭𑀺𑀬𑀦𑁆𑀢𑁂 𑀞𑀺𑀢𑀸 𑀉𑀧𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀞𑀺𑀢𑀸 𑀧𑀝𑀺𑀲𑀦𑁆𑀥𑀺𑀧𑀭𑀺𑀬𑀦𑁆𑀢𑁂 𑀞𑀺𑀢𑀸 𑀪𑀯𑀧𑀭𑀺𑀬𑀦𑁆𑀢𑁂 𑀞𑀺𑀢𑀸 𑀲𑀁𑀲𑀸𑀭𑀧𑀭𑀺𑀬𑀦𑁆𑀢𑁂 𑀞𑀺𑀢𑀸 𑀯𑀝𑁆𑀝𑀧𑀭𑀺𑀬𑀦𑁆𑀢𑁂 𑀞𑀺𑀢𑀸 𑀅𑀦𑁆𑀢𑀺𑀫𑁂 𑀪𑀯𑁂 𑀞𑀺𑀢𑀸 𑀅𑀦𑁆𑀢𑀺𑀫𑁂 𑀲𑀫𑀼𑀲𑁆𑀲𑀬𑁂 𑀞𑀺𑀢𑀸 𑀅𑀦𑁆𑀢𑀺𑀫𑀤𑁂𑀳𑀥𑀭𑀸 𑀅𑀭𑀳𑀦𑁆𑀢𑁄.

𑀢𑁂𑀲𑀁 𑀘𑀸𑀬𑀁 [𑀬𑀸𑀬𑀁 (𑀓.)] 𑀧𑀘𑁆𑀙𑀺𑀫𑀓𑁄, 𑀘𑀭𑀺𑀫𑁄𑀬𑀁 𑀲𑀫𑀼𑀲𑁆𑀲𑀬𑁄;

𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀦𑁂𑀲𑀁 𑀧𑀼𑀦𑀩𑁆𑀪𑀯𑁄𑀢𑀺.

𑀢𑀁𑀓𑀸𑀭𑀡𑀸 𑀲𑀗𑁆𑀔𑀸𑀢𑀥𑀫𑁆𑀫𑀸 𑀯𑀼𑀘𑁆𑀘𑀦𑁆𑀢𑀺 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸𑀢𑀺. 𑀬𑁂 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂, 𑀬𑁂 𑀘 𑀲𑁂𑀔𑀸 𑀧𑀼𑀣𑀽 𑀇𑀥𑀸𑀢𑀺. 𑀲𑁂𑀔𑀸𑀢𑀺 𑀓𑀺𑀁𑀓𑀸𑀭𑀡𑀸 𑀯𑀼𑀘𑁆𑀘𑀦𑁆𑀢𑀺 𑀲𑁂𑀔𑀸? 𑀲𑀺𑀓𑁆𑀔𑀦𑁆𑀢𑀻𑀢𑀺 𑀲𑁂𑀔𑀸. 𑀓𑀺𑀜𑁆𑀘 𑀲𑀺𑀓𑁆𑀔𑀦𑁆𑀢𑀺? 𑀅𑀥𑀺𑀲𑀻𑀮𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑀺, 𑀅𑀥𑀺𑀘𑀺𑀢𑁆𑀢𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑀺, 𑀅𑀥𑀺𑀧𑀜𑁆𑀜𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑀺. 𑀓𑀢𑀫𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸? 𑀇𑀥 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀔𑀼𑀤𑁆𑀤𑀓𑁄 𑀲𑀻𑀮𑀓𑁆𑀔𑀦𑁆𑀥𑁄 𑀫𑀳𑀦𑁆𑀢𑁄 𑀲𑀻𑀮𑀓𑁆𑀔𑀦𑁆𑀥𑁄 𑀲𑀻𑀮𑀁 𑀧𑀢𑀺𑀝𑁆𑀞𑀸 𑀆𑀤𑀺 𑀘𑀭𑀡𑀁 𑀲𑀁𑀬𑀫𑁄 𑀲𑀁𑀯𑀭𑁄 𑀫𑀼𑀔𑀁 𑀧𑀫𑀼𑀔𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸 𑁋 𑀅𑀬𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸.

𑀓𑀢𑀫𑀸 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸? 𑀇𑀥 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁… 𑀤𑀼𑀢𑀺𑀬𑀁 𑀛𑀸𑀦𑀁… 𑀢𑀢𑀺𑀬𑀁 𑀛𑀸𑀦𑀁… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑁋 𑀅𑀬𑀁 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸.

𑀓𑀢𑀫𑀸 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸? 𑀇𑀥 𑀪𑀺𑀓𑁆𑀔𑀼 𑀧𑀜𑁆𑀜𑀯𑀸 𑀳𑁄𑀢𑀺 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀸𑀬 𑀦𑀺𑀩𑁆𑀩𑁂𑀥𑀺𑀓𑀸𑀬 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸. 𑀲𑁄 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺…𑀧𑁂… ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺… ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. ‘‘𑀇𑀫𑁂 𑀆𑀲𑀯𑀸’’𑀢𑀺…𑀧𑁂… ‘‘𑀅𑀬𑀁 𑀆𑀲𑀯𑀲𑀫𑀼𑀤𑀬𑁄’’𑀢𑀺… ‘‘𑀅𑀬𑀁 𑀆𑀲𑀯𑀦𑀺𑀭𑁄𑀥𑁄’’𑀢𑀺… ‘‘𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. ‘‘𑀅𑀬𑀁 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸’’… 𑀇𑀫𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀬𑁄 𑀆𑀯𑀚𑁆𑀚𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀚𑀸𑀦𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀧𑀲𑁆𑀲𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀳𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀯𑀻𑀭𑀺𑀬𑀁 [𑀯𑀺𑀭𑀺𑀬𑀁 (𑀲𑁆𑀬𑀸.)] 𑀧𑀕𑁆𑀕𑀡𑁆𑀳𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀲𑀢𑀺𑀁 𑀉𑀧𑀝𑁆𑀞𑀧𑁂𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀘𑀺𑀢𑁆𑀢𑀁 𑀲𑀫𑀸𑀤𑀳𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀧𑀜𑁆𑀜𑀸𑀬 𑀧𑀚𑀸𑀦𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀧𑀳𑀸𑀢𑀩𑁆𑀩𑀁 𑀧𑀚𑀳𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑁂𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑀸 𑀲𑀺𑀓𑁆𑀔𑀦𑁆𑀢𑀺 𑀆𑀘𑀭𑀦𑁆𑀢𑀺 𑀲𑀫𑀸𑀘𑀭𑀦𑁆𑀢𑀺 𑀲𑀫𑀸𑀤𑀸𑀬 𑀯𑀢𑁆𑀢𑀦𑁆𑀢𑀺. 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀦𑁆𑀢𑀺 𑁋 𑀲𑁂𑀔𑀸. 𑀧𑀼𑀣𑀽𑀢𑀺 𑀩𑀳𑀼𑀓𑀸. 𑀏𑀢𑁂 𑀲𑁂𑀔𑀸 𑀲𑁄𑀢𑀸𑀧𑀦𑁆𑀦𑀸 𑀘 𑀧𑀝𑀺𑀧𑀦𑁆𑀦𑀸 𑀘 𑀲𑀓𑀤𑀸𑀕𑀸𑀫𑀺𑀦𑁄 𑀘 𑀧𑀝𑀺𑀧𑀦𑁆𑀦𑀸 𑀘 𑀅𑀦𑀸𑀕𑀸𑀫𑀺𑀦𑁄 𑀘 𑀧𑀝𑀺𑀧𑀦𑁆𑀦𑀸 𑀘 𑀅𑀭𑀳𑀦𑁆𑀢𑁄 𑀘 𑀧𑀝𑀺𑀧𑀦𑁆𑀦𑀸 𑀘. 𑀇𑀥𑀸𑀢𑀺 𑀇𑀫𑀺𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀇𑀫𑀺𑀲𑁆𑀲𑀸 𑀔𑀦𑁆𑀢𑀺𑀬𑀸 𑀇𑀫𑀺𑀲𑁆𑀲𑀸 𑀭𑀼𑀘𑀺𑀬𑀸 𑀇𑀫𑀲𑁆𑀫𑀺𑀁 𑀆𑀤𑀸𑀬𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑁂 𑀇𑀫𑀲𑁆𑀫𑀺𑀁 𑀯𑀺𑀦𑀬𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀇𑀫𑀲𑁆𑀫𑀺𑀁 𑀧𑀸𑀯𑀘𑀦𑁂 𑀇𑀫𑀲𑁆𑀫𑀺𑀁 𑀩𑁆𑀭𑀳𑁆𑀫𑀘𑀭𑀺𑀬𑁂 𑀇𑀫𑀲𑁆𑀫𑀺𑀁 𑀲𑀢𑁆𑀣𑀼𑀲𑀸𑀲𑀦𑁂 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀮𑁄𑀓𑁂𑀢𑀺 𑁋 𑀬𑁂 𑀘 𑀲𑁂𑀔𑀸 𑀧𑀼𑀣𑀽 𑀇𑀥.

𑀢𑁂𑀲𑀁 𑀫𑁂 𑀦𑀺𑀧𑀓𑁄 𑀇𑀭𑀺𑀬𑀁, 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲𑀸𑀢𑀺 𑀢𑁆𑀯𑀫𑁆𑀧𑀺 𑀦𑀺𑀧𑀓𑁄 𑀧𑀡𑁆𑀟𑀺𑀢𑁄 𑀧𑀜𑁆𑀜𑀯𑀸 𑀩𑀼𑀤𑁆𑀥𑀺𑀫𑀸 𑀜𑀸𑀡𑀻 𑀫𑁂𑀥𑀸𑀯𑀻. 𑀢𑁂𑀲𑀁 𑀲𑀗𑁆𑀔𑀸𑀢𑀥𑀫𑁆𑀫𑀸𑀦𑀜𑁆𑀘 𑀲𑁂𑀓𑁆𑀔𑀸𑀦𑀜𑁆𑀘 𑀇𑀭𑀺𑀬𑀁 𑀘𑀭𑀺𑀬𑀁 𑀯𑀼𑀢𑁆𑀢𑀺 𑀧𑀯𑀢𑁆𑀢𑀺 𑀆𑀘𑀭𑀁 𑀕𑁄𑀘𑀭𑀁 𑀯𑀺𑀳𑀸𑀭𑀁 𑀧𑀝𑀺𑀧𑀤𑀁. 𑀧𑀼𑀝𑁆𑀞𑁄𑀢𑀺 𑀧𑀼𑀘𑁆𑀙𑀺𑀢𑁄 𑀬𑀸𑀘𑀺𑀢𑁄 𑀅𑀚𑁆𑀛𑁂𑀲𑀺𑀢𑁄 𑀧𑀲𑀸𑀤𑀺𑀢𑁄. 𑀧𑀩𑁆𑀭𑀽𑀳𑀻𑀢𑀺 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀺. 𑀫𑀸𑀭𑀺𑀲𑀸𑀢𑀺 𑀧𑀺𑀬𑀯𑀘𑀦𑀁 𑀕𑀭𑀼𑀯𑀘𑀦𑀁 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀸𑀥𑀺𑀯𑀘𑀦𑀫𑁂𑀢𑀁 𑀫𑀸𑀭𑀺𑀲𑀸𑀢𑀺 𑁋 𑀢𑁂𑀲𑀁 𑀫𑁂 𑀦𑀺𑀧𑀓𑁄 𑀇𑀭𑀺𑀬𑀁, 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀬𑁂 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂, 𑀬𑁂 𑀘 𑀲𑁂𑀔𑀸 𑀧𑀼𑀣𑀽 𑀇𑀥;

𑀢𑁂𑀲𑀁 𑀫𑁂 𑀦𑀺𑀧𑀓𑁄 𑀇𑀭𑀺𑀬𑀁, 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲𑀸’’𑀢𑀺.

𑁮. 𑀓𑀸𑀫𑁂𑀲𑀼 𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬, 𑀫𑀦𑀲𑀸𑀦𑀸𑀯𑀺𑀮𑁄 𑀲𑀺𑀬𑀸;

𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂.

𑀓𑀸𑀫𑁂𑀲𑀼 𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬𑀸𑀢𑀺. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘. 𑀓𑀢𑀫𑁂 𑀯𑀢𑁆𑀣𑀼𑀓𑀸𑀫𑀸? 𑀫𑀦𑀸𑀧𑀺𑀓𑀸 𑀭𑀽𑀧𑀸 𑀫𑀦𑀸𑀧𑀺𑀓𑀸 𑀲𑀤𑁆𑀤𑀸 𑀫𑀦𑀸𑀧𑀺𑀓𑀸 𑀕𑀦𑁆𑀥𑀸 𑀫𑀦𑀸𑀧𑀺𑀓𑀸 𑀭𑀲𑀸 𑀫𑀦𑀸𑀧𑀺𑀓𑀸 𑀨𑁄𑀝𑁆𑀞𑀩𑁆𑀩𑀸, 𑀅𑀢𑁆𑀣𑀭𑀡𑀸 𑀧𑀸𑀯𑀼𑀭𑀡𑀸 [𑀧𑀸𑀧𑀼𑀭𑀡𑀸 (𑀲𑁆𑀬𑀸.)] 𑀤𑀸𑀲𑀺𑀤𑀸𑀲𑀸 𑀅𑀚𑁂𑀴𑀓𑀸 𑀓𑀼𑀓𑁆𑀓𑀼𑀝𑀲𑀽𑀓𑀭𑀸 𑀳𑀢𑁆𑀣𑀺𑀕𑀯𑀸𑀲𑁆𑀲𑀯𑀴𑀯𑀸 𑀔𑁂𑀢𑁆𑀢𑀁 𑀯𑀢𑁆𑀣𑀼 𑀳𑀺𑀭𑀜𑁆𑀜𑀁 𑀲𑀼𑀯𑀡𑁆𑀡𑀁 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 [𑀭𑀸𑀚𑀞𑀸𑀦𑀺𑀬𑁄 (𑀓.)] 𑀭𑀝𑁆𑀞𑀜𑁆𑀘 𑀚𑀦𑀧𑀤𑁄 𑀘 𑀓𑁄𑀲𑁄 𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘 𑁋 𑀬𑀁 𑀓𑀺𑀜𑁆𑀘𑀺 𑀭𑀚𑀦𑀻𑀬𑀯𑀢𑁆𑀣𑀼 𑀯𑀢𑁆𑀣𑀼𑀓𑀸𑀫𑀸.

𑀅𑀧𑀺 𑀘 𑀅𑀢𑀻𑀢𑀸 𑀓𑀸𑀫𑀸 𑀅𑀦𑀸𑀕𑀢𑀸 𑀓𑀸𑀫𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀓𑀸𑀫𑀸 𑀅𑀚𑁆𑀛𑀢𑁆𑀢𑀸 𑀓𑀸𑀫𑀸 𑀩𑀳𑀺𑀤𑁆𑀥𑀸 𑀓𑀸𑀫𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀓𑀸𑀫𑀸, 𑀳𑀻𑀦𑀸 𑀓𑀸𑀫𑀸 𑀫𑀚𑁆𑀛𑀺𑀫𑀸 𑀓𑀸𑀫𑀸 𑀧𑀡𑀻𑀢𑀸 𑀓𑀸𑀫𑀸, 𑀆𑀧𑀸𑀬𑀺𑀓𑀸 𑀓𑀸𑀫𑀸 𑀫𑀸𑀦𑀼𑀲𑀺𑀓𑀸 𑀓𑀸𑀫𑀸 𑀤𑀺𑀩𑁆𑀩𑀸 𑀓𑀸𑀫𑀸, 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀓𑀸𑀫𑀸, 𑀦𑀺𑀫𑁆𑀫𑀺𑀢𑀸 𑀓𑀸𑀫𑀸 𑀧𑀭𑀦𑀺𑀫𑁆𑀫𑀺𑀢𑀸 𑀓𑀸𑀫𑀸, 𑀧𑀭𑀺𑀕𑁆𑀕𑀳𑀺𑀢𑀸 𑀓𑀸𑀫𑀸 𑀅𑀧𑀭𑀺𑀕𑁆𑀕𑀳𑀺𑀢𑀸 𑀓𑀸𑀫𑀸, 𑀫𑀫𑀸𑀬𑀺𑀢𑀸 𑀓𑀸𑀫𑀸 𑀅𑀫𑀫𑀸𑀬𑀺𑀢𑀸 𑀓𑀸𑀫𑀸, 𑀲𑀩𑁆𑀩𑁂𑀧𑀺 𑀓𑀸𑀫𑀸𑀯𑀘𑀭𑀸 𑀥𑀫𑁆𑀫𑀸, 𑀲𑀩𑁆𑀩𑁂𑀧𑀺 𑀭𑀽𑀧𑀸𑀯𑀘𑀭𑀸 𑀥𑀫𑁆𑀫𑀸, 𑀲𑀩𑁆𑀩𑁂𑀧𑀺 𑀅𑀭𑀽𑀧𑀸𑀯𑀘𑀭𑀸 𑀥𑀫𑁆𑀫𑀸, 𑀢𑀡𑁆𑀳𑀸𑀯𑀢𑁆𑀣𑀼𑀓𑀸 𑀢𑀡𑁆𑀳𑀸𑀭𑀫𑁆𑀫𑀡𑀸, 𑀓𑀸𑀫𑀦𑀻𑀬𑀝𑁆𑀞𑁂𑀦 𑀭𑀚𑀦𑀻𑀬𑀝𑁆𑀞𑁂𑀦 𑀫𑀤𑀦𑀻𑀬𑀝𑁆𑀞𑁂𑀦 𑀭𑀫𑀡𑀻𑀬𑀝𑁆𑀞𑁂𑀦 [𑀦𑀢𑁆𑀣𑀺 𑀲𑁆𑀬𑀸. 𑀧𑁄𑀢𑁆𑀣𑀓𑁂 𑀫𑀳𑀸𑀦𑀺. 𑁧] 𑀓𑀸𑀫𑀸. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸.

𑀓𑀢𑀫𑁂 𑀓𑀺𑀮𑁂𑀲𑀓𑀸𑀫𑀸? 𑀙𑀦𑁆𑀤𑁄 𑀓𑀸𑀫𑁄 𑀭𑀸𑀕𑁄 𑀓𑀸𑀫𑁄 𑀙𑀦𑁆𑀤𑀭𑀸𑀕𑁄 𑀓𑀸𑀫𑁄 𑀲𑀗𑁆𑀓𑀧𑁆𑀧𑁄 𑀓𑀸𑀫𑁄 𑀭𑀸𑀕𑁄 𑀓𑀸𑀫𑁄 𑀲𑀗𑁆𑀓𑀧𑁆𑀧𑀭𑀸𑀕𑁄 𑀓𑀸𑀫𑁄, 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀭𑀸𑀕𑁄 𑀓𑀸𑀫𑀦𑀦𑁆𑀤𑀻 𑀓𑀸𑀫𑀢𑀡𑁆𑀳𑀸 𑀓𑀸𑀫𑀲𑀺𑀦𑁂𑀳𑁄 𑀓𑀸𑀫𑀧𑀺𑀧𑀸𑀲𑀸 𑀓𑀸𑀫𑀧𑀭𑀺𑀴𑀸𑀳𑁄 𑀓𑀸𑀫𑀕𑁂𑀥𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀚𑁆𑀛𑁄𑀲𑀸𑀦𑀁 𑀓𑀸𑀫𑁄𑀖𑁄 𑀓𑀸𑀫𑀬𑁄𑀕𑁄 𑀓𑀸𑀫𑀼𑀧𑀸𑀤𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑁋

𑀅𑀤𑁆𑀤𑀲𑀁 𑀓𑀸𑀫 𑀢𑁂 𑀫𑀽𑀮𑀁, 𑀲𑀗𑁆𑀓𑀧𑁆𑀧𑀸 𑀓𑀸𑀫 𑀚𑀸𑀬𑀲𑀺;

𑀦 𑀢𑀁 𑀲𑀗𑁆𑀓𑀧𑁆𑀧𑀬𑀺𑀲𑁆𑀲𑀸𑀫𑀺, 𑀏𑀯𑀁 𑀓𑀸𑀫 𑀦 𑀳𑁂𑀳𑀺𑀲𑀻𑀢𑀺.

𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀕𑁂𑀥𑁄 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸, 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀓𑀸𑀫𑁂𑀲𑀼 𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬𑀸𑀢𑀺 𑀓𑀺𑀮𑁂𑀲𑀓𑀸𑀫𑁂𑀦 𑀯𑀢𑁆𑀣𑀼𑀓𑀸𑀫𑁂𑀲𑀼 𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬 𑀦 𑀧𑀮𑀺𑀩𑀼𑀦𑁆𑀥𑁂𑀬𑁆𑀬 [𑀧𑀮𑀺𑀩𑀼𑀚𑁆𑀛𑁂𑀬𑁆𑀬 (𑀲𑁆𑀬𑀸.)] 𑀅𑀕𑀺𑀤𑁆𑀥𑁄 𑀅𑀲𑁆𑀲 𑀅𑀕𑀥𑀺𑀢𑁄 𑀅𑀫𑀼𑀘𑁆𑀙𑀺𑀢𑁄 𑀅𑀦𑀚𑁆𑀛𑀸𑀧𑀦𑁆𑀦𑁄 [𑀅𑀦𑀚𑁆𑀛𑁄𑀧𑀦𑁆𑀦𑁄 (𑀲𑁆𑀬𑀸.)] 𑀯𑀻𑀢𑀕𑁂𑀥𑁄 𑀯𑀺𑀕𑀢𑀕𑁂𑀥𑁄 𑀘𑀢𑁆𑀢𑀕𑁂𑀥𑁄 𑀯𑀦𑁆𑀢𑀕𑁂𑀥𑁄 𑀫𑀼𑀢𑁆𑀢𑀕𑁂𑀥𑁄 𑀧𑀳𑀻𑀦𑀕𑁂𑀥𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀕𑁂𑀥𑁄 𑀯𑀻𑀢𑀭𑀸𑀕𑁄 𑀯𑀺𑀕𑀢𑀭𑀸𑀕𑁄 𑀘𑀢𑁆𑀢𑀭𑀸𑀕𑁄 𑀯𑀦𑁆𑀢𑀭𑀸𑀕𑁄 𑀫𑀼𑀢𑁆𑀢𑀭𑀸𑀕𑁄 𑀧𑀳𑀻𑀦𑀭𑀸𑀕𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀭𑀸𑀕𑁄 𑀦𑀺𑀘𑁆𑀙𑀸𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀺𑀪𑀽𑀢𑁄 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀓𑀸𑀫𑁂𑀲𑀼 𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬.

𑀫𑀦𑀲𑀸𑀦𑀸𑀯𑀺𑀮𑁄 𑀲𑀺𑀬𑀸𑀢𑀺. 𑀫𑀦𑁄𑀢𑀺 𑀬𑀁 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁 𑀳𑀤𑀬𑀁 𑀧𑀡𑁆𑀟𑀭𑀁 𑀫𑀦𑁄 𑀫𑀦𑀸𑀬𑀢𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀢𑀚𑁆𑀚𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀘𑀺𑀢𑁆𑀢𑀁 𑀆𑀯𑀺𑀮𑀁 𑀳𑁄𑀢𑀺 𑀮𑀼𑀴𑀺𑀢𑀁 𑀏𑀭𑀺𑀢𑀁 𑀖𑀝𑁆𑀝𑀺𑀢𑀁 𑀘𑀮𑀺𑀢𑀁 𑀪𑀦𑁆𑀢𑀁 𑀅𑀯𑀽𑀧𑀲𑀦𑁆𑀢𑀁. 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦…𑀧𑁂… 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦… 𑀭𑀸𑀕𑁂𑀦… 𑀤𑁄𑀲𑁂𑀦… 𑀫𑁄𑀳𑁂𑀦… 𑀓𑁄𑀥𑁂𑀦… 𑀉𑀧𑀦𑀸𑀳𑁂𑀦… 𑀫𑀓𑁆𑀔𑁂𑀦… 𑀧𑀴𑀸𑀲𑁂𑀦… 𑀇𑀲𑁆𑀲𑀸𑀬… 𑀫𑀘𑁆𑀙𑀭𑀺𑀬𑁂𑀦… 𑀫𑀸𑀬𑀸𑀬… 𑀲𑀸𑀞𑁂𑀬𑁆𑀬𑁂𑀦… 𑀣𑀫𑁆𑀪𑁂𑀦… 𑀲𑀸𑀭𑀫𑁆𑀪𑁂𑀦… 𑀫𑀸𑀦𑁂𑀦… 𑀅𑀢𑀺𑀫𑀸𑀦𑁂𑀦… 𑀫𑀤𑁂𑀦… 𑀧𑀫𑀸𑀤𑁂𑀦… 𑀲𑀩𑁆𑀩𑀓𑀺𑀮𑁂𑀲𑁂𑀳𑀺… 𑀲𑀩𑁆𑀩𑀤𑀼𑀘𑁆𑀘𑀭𑀺𑀢𑁂𑀳𑀺… 𑀲𑀩𑁆𑀩𑀟𑀸𑀳𑁂𑀳𑀺… 𑀲𑀩𑁆𑀩𑀧𑀭𑀺𑀴𑀸𑀳𑁂𑀳𑀺… 𑀲𑀩𑁆𑀩𑀲𑀦𑁆𑀢𑀸𑀧𑁂𑀳𑀺… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀘𑀺𑀢𑁆𑀢𑀁 𑀆𑀯𑀺𑀮𑀁 𑀳𑁄𑀢𑀺 𑀮𑀼𑀴𑀺𑀢𑀁 𑀏𑀭𑀺𑀢𑀁 𑀖𑀝𑁆𑀝𑀺𑀢𑀁 𑀘𑀮𑀺𑀢𑀁 𑀪𑀦𑁆𑀢𑀁 𑀅𑀯𑀽𑀧𑀲𑀦𑁆𑀢𑀁. 𑀫𑀦𑀲𑀸𑀦𑀸𑀯𑀺𑀮𑁄 𑀲𑀺𑀬𑀸𑀢𑀺 𑀘𑀺𑀢𑁆𑀢𑁂𑀦 𑀅𑀦𑀸𑀯𑀺𑀮𑁄 𑀲𑀺𑀬𑀸 𑁋 𑀅𑀮𑀼𑀴𑀺𑀢𑁄 𑀅𑀦𑁂𑀭𑀺𑀢𑁄 𑀅𑀖𑀝𑁆𑀝𑀺𑀢𑁄 𑀅𑀘𑀮𑀺𑀢𑁄 𑀅𑀪𑀦𑁆𑀢𑁄 𑀯𑀽𑀧𑀲𑀦𑁆𑀢𑁄 𑀆𑀯𑀺𑀮𑀓𑀭𑁂 𑀓𑀺𑀮𑁂𑀲𑁂 𑀚𑀳𑁂𑀬𑁆𑀬 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀻𑀓𑀭𑁂𑀬𑁆𑀬 [𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 (𑀓.)] 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬, 𑀆𑀯𑀺𑀮𑀓𑀭𑁂𑀳𑀺 𑀓𑀺𑀮𑁂𑀲𑁂𑀳𑀺 𑀘 𑀆𑀭𑀢𑁄 [𑀆𑀭𑀢𑁄 𑀅𑀲𑁆𑀲 (𑀓.) 𑀫𑀳𑀸𑀦𑀺. 𑁧𑁮 𑀧𑀲𑁆𑀲] 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀫𑀦𑀲𑀸𑀦𑀸𑀯𑀺𑀮𑁄 𑀲𑀺𑀬𑀸.

𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀦𑁆𑀢𑀺 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁, ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁, ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁. 𑀏𑀯𑀫𑁆𑀧𑀺 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁.

𑀅𑀣 𑀯𑀸, 𑀅𑀦𑀺𑀘𑁆𑀘𑀢𑁄 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀤𑀼𑀓𑁆𑀔𑀢𑁄…𑀧𑁂… 𑀭𑁄𑀕𑀢𑁄… 𑀕𑀡𑁆𑀟𑀢𑁄… 𑀲𑀮𑁆𑀮𑀢𑁄… 𑀅𑀖𑀢𑁄… 𑀆𑀩𑀸𑀥𑀢𑁄… 𑀧𑀭𑀢𑁄… 𑀧𑀮𑁄𑀓𑀢𑁄… 𑀈𑀢𑀺𑀢𑁄… 𑀉𑀧𑀤𑁆𑀤𑀯𑀢𑁄… 𑀪𑀬𑀢𑁄… 𑀉𑀧𑀲𑀕𑁆𑀕𑀢𑁄… 𑀘𑀮𑀢𑁄… 𑀧𑀪𑀗𑁆𑀕𑀼𑀢𑁄… 𑀅𑀤𑁆𑀥𑀼𑀯𑀢𑁄 [𑀅𑀥𑀼𑀯𑀢𑁄 (𑀓.) 𑀫𑀳𑀸𑀦𑀺. 𑁧𑁩] … 𑀅𑀢𑀸𑀡𑀢𑁄… 𑀅𑀮𑁂𑀡𑀢𑁄… 𑀅𑀲𑀭𑀡𑀢𑁄… 𑀅𑀲𑀭𑀡𑀻𑀪𑀽𑀢𑀢𑁄… 𑀭𑀺𑀢𑁆𑀢𑀢𑁄… 𑀢𑀼𑀘𑁆𑀙𑀢𑁄… 𑀲𑀼𑀜𑁆𑀜𑀢𑁄… 𑀅𑀦𑀢𑁆𑀢𑀢𑁄… 𑀆𑀤𑀻𑀦𑀯𑀢𑁄… 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑁄… 𑀅𑀲𑀸𑀭𑀓𑀢𑁄… 𑀅𑀖𑀫𑀽𑀮𑀢𑁄… 𑀯𑀥𑀓𑀢𑁄… 𑀯𑀺𑀪𑀯𑀢𑁄… 𑀲𑀸𑀲𑀯𑀢𑁄… 𑀲𑀗𑁆𑀔𑀢𑀢𑁄… 𑀫𑀸𑀭𑀸𑀫𑀺𑀲𑀢𑁄… 𑀚𑀸𑀢𑀺𑀥𑀫𑁆𑀫𑀢𑁄… 𑀚𑀭𑀸𑀥𑀫𑁆𑀫𑀢𑁄… 𑀩𑁆𑀬𑀸𑀥𑀺𑀥𑀫𑁆𑀫𑀢𑁄… 𑀫𑀭𑀡𑀥𑀫𑁆𑀫𑀢𑁄… 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀥𑀫𑁆𑀫𑀢𑁄 … 𑀲𑀁𑀓𑀺𑀮𑁂𑀲𑀺𑀓𑀥𑀫𑁆𑀫𑀢𑁄… 𑀲𑀫𑀼𑀤𑀬𑀢𑁄… 𑀅𑀢𑁆𑀣𑀗𑁆𑀕𑀫𑀢𑁄… 𑀅𑀲𑁆𑀲𑀸𑀤𑀢𑁄… 𑀆𑀤𑀻𑀦𑀯𑀢𑁄… 𑀦𑀺𑀲𑁆𑀲𑀭𑀡𑀢𑁄 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁. 𑀏𑀯𑀫𑁆𑀧𑀺 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁.

𑀅𑀣 𑀯𑀸, 𑀔𑀦𑁆𑀥𑀓𑀼𑀲𑀮𑁄 𑀥𑀸𑀢𑀼𑀓𑀼𑀲𑀮𑁄 𑀆𑀬𑀢𑀦𑀓𑀼𑀲𑀮𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑁄 𑀲𑀢𑀺𑀧𑀝𑁆𑀞𑀸𑀦𑀓𑀼𑀲𑀮𑁄 𑀲𑀫𑁆𑀫𑀧𑁆𑀧𑀥𑀸𑀦𑀓𑀼𑀲𑀮𑁄 𑀇𑀤𑁆𑀥𑀺𑀧𑀸𑀤𑀓𑀼𑀲𑀮𑁄 𑀇𑀦𑁆𑀤𑁆𑀭𑀺𑀬𑀓𑀼𑀲𑀮𑁄 𑀩𑀮𑀓𑀼𑀲𑀮𑁄 𑀩𑁄𑀚𑁆𑀛𑀗𑁆𑀕𑀓𑀼𑀲𑀮𑁄 𑀫𑀕𑁆𑀕𑀓𑀼𑀲𑀮𑁄 𑀨𑀮𑀓𑀼𑀲𑀮𑁄 𑀦𑀺𑀩𑁆𑀩𑀸𑀦𑀓𑀼𑀲𑀮𑁄. 𑀏𑀯𑀫𑁆𑀧𑀺 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁.

𑀅𑀣 𑀯𑀸, 𑀲𑀩𑁆𑀩𑀥𑀫𑁆𑀫𑀸 𑀯𑀼𑀘𑁆𑀘𑀦𑁆𑀢𑀺 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑁋 𑀘𑀓𑁆𑀔𑀼 𑀘𑁂𑀯 [𑀘𑀓𑁆𑀔𑀼𑀜𑁆𑀘𑁂𑀯 (𑀓.)] 𑀭𑀽𑀧𑀸 𑀘, 𑀲𑁄𑀢𑀜𑁆𑀘 𑀲𑀤𑁆𑀤𑀸 𑀘, 𑀖𑀸𑀦𑀜𑁆𑀘 𑀕𑀦𑁆𑀥𑀸 𑀘, 𑀚𑀺𑀯𑁆𑀳𑀸 𑀘 𑀭𑀲𑀸 𑀘, 𑀓𑀸𑀬𑁄 𑀘 𑀨𑁄𑀝𑁆𑀞𑀩𑁆𑀩𑀸 𑀘, 𑀫𑀦𑁄 𑀘 𑀥𑀫𑁆𑀫𑀸 𑀘. 𑀬𑀢𑁄 𑀘 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀆𑀬𑀢𑀦𑁂𑀲𑀼 𑀙𑀦𑁆𑀤𑀭𑀸𑀕𑁄 𑀧𑀳𑀻𑀦𑁄 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀁𑀓𑀢𑁄 [𑀅𑀦𑀪𑀸𑀯𑀗𑁆𑀕𑀢𑁄 (𑀲𑁆𑀬𑀸.)] 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄, 𑀏𑀢𑁆𑀢𑀸𑀯𑀢𑀸𑀧𑀺 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀦𑁆𑀢𑀺 𑁋 𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁.

𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂𑀢𑀺. 𑀲𑀢𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄, 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄, 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄, 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄.

𑀅𑀧𑀭𑁂𑀳𑀺𑀧𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀅𑀲𑀢𑀺𑀧𑀭𑀺𑀯𑀚𑁆𑀚𑀦𑀸𑀬 𑀲𑀢𑁄, 𑀲𑀢𑀺𑀓𑀭𑀡𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀓𑀢𑀢𑁆𑀢𑀸 𑀲𑀢𑁄, 𑀲𑀢𑀺𑀧𑀭𑀺𑀩𑀦𑁆𑀥𑀸𑀦𑀁 [𑀲𑀢𑀺𑀧𑀝𑀺𑀧𑀓𑁆𑀔𑀸𑀦𑀁 (𑀲𑁆𑀬𑀸.) 𑀫𑀳𑀸𑀦𑀺. 𑁩] 𑀥𑀫𑁆𑀫𑀸𑀦𑀁 𑀳𑀢𑀢𑁆𑀢𑀸 𑀲𑀢𑁄, 𑀲𑀢𑀺𑀦𑀺𑀫𑀺𑀢𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀲𑀫𑁆𑀫𑀼𑀝𑁆𑀞𑀢𑁆𑀢𑀸 [𑀅𑀧𑁆𑀧𑀫𑀼𑀝𑁆𑀞𑀢𑁆𑀢𑀸 (𑀲𑁆𑀬𑀸.)] 𑀲𑀢𑁄.

𑀅𑀧𑀭𑁂𑀳𑀺𑀧𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀢𑁄, 𑀲𑀢𑀺𑀬𑀸 𑀯𑀲𑀺𑀢𑀢𑁆𑀢𑀸 𑀲𑀢𑁄, 𑀲𑀢𑀺𑀬𑀸 𑀧𑀸𑀕𑀼𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀢𑁄, 𑀲𑀢𑀺𑀬𑀸 𑀅𑀧𑀘𑁆𑀘𑁄𑀭𑁄𑀳𑀡𑀢𑀸𑀬 𑀲𑀢𑁄.

𑀅𑀧𑀭𑁂𑀳𑀺𑀧𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀢𑁄, 𑀲𑀦𑁆𑀢𑀢𑁆𑀢𑀸 𑀲𑀢𑁄, 𑀲𑀫𑀺𑀢𑀢𑁆𑀢𑀸 𑀲𑀢𑁄, 𑀲𑀦𑁆𑀢𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀢𑁄. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀲𑀻𑀮𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀘𑀸𑀕𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀤𑁂𑀯𑀢𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀆𑀦𑀸𑀧𑀸𑀦𑀲𑁆𑀲𑀢𑀺𑀬𑀸 𑀲𑀢𑁄, 𑀫𑀭𑀡𑀲𑁆𑀲𑀢𑀺𑀬𑀸 𑀲𑀢𑁄, 𑀓𑀸𑀬𑀕𑀢𑀸𑀲𑀢𑀺𑀬𑀸 𑀲𑀢𑁄, 𑀉𑀧𑀲𑀫𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄. 𑀬𑀸 𑀲𑀢𑀺 𑀅𑀦𑀼𑀲𑁆𑀲𑀢𑀺…𑀧𑁂… 𑀲𑀫𑁆𑀫𑀸𑀲𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀏𑀓𑀸𑀬𑀦𑀫𑀕𑁆𑀕𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀢𑀺. 𑀇𑀫𑀸𑀬 𑀲𑀢𑀺𑀬𑀸 𑀉𑀧𑁂𑀢𑁄 𑀳𑁄𑀢𑀺 𑀲𑀫𑀼𑀧𑁂𑀢𑁄 𑀉𑀧𑀸𑀕𑀢𑁄 𑀲𑀫𑀼𑀧𑀸𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 [𑀲𑀫𑁆𑀧𑀦𑁆𑀦𑁄 (𑀓.)] 𑀲𑀫𑀦𑁆𑀦𑀸𑀕𑀢𑁄, 𑀲𑁄 𑀯𑀼𑀘𑁆𑀘𑀢𑀺 𑀲𑀢𑁄. 𑀪𑀺𑀓𑁆𑀔𑀽𑀢𑀺 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀪𑀺𑀦𑁆𑀦𑀢𑁆𑀢𑀸 𑀪𑀺𑀓𑁆𑀔𑀼 𑁋 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀪𑀺𑀦𑁆𑀦𑀸 𑀳𑁄𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀪𑀺𑀦𑁆𑀦𑀸 𑀳𑁄𑀢𑀺, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀪𑀺𑀦𑁆𑀦𑁄 𑀳𑁄𑀢𑀺, 𑀭𑀸𑀕𑁄 𑀪𑀺𑀦𑁆𑀦𑁄 𑀳𑁄𑀢𑀺, 𑀤𑁄𑀲𑁄 𑀪𑀺𑀦𑁆𑀦𑁄 𑀳𑁄𑀢𑀺, 𑀫𑁄𑀳𑁄 𑀪𑀺𑀦𑁆𑀦𑁄 𑀳𑁄𑀢𑀺, 𑀫𑀸𑀦𑁄 𑀪𑀺𑀦𑁆𑀦𑁄 𑀳𑁄𑀢𑀺. 𑀪𑀺𑀦𑁆𑀦𑀸 𑀳𑁄𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀺𑀓𑀸 𑀧𑁄𑀦𑁄𑀪𑀯𑀺𑀓𑀸 [𑀧𑁄𑀦𑁄𑀩𑁆𑀪𑀯𑀺𑀓𑀸 (𑀲𑁆𑀬𑀸. 𑀓.)] 𑀲𑀤𑀭𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸.

𑀧𑀚𑁆𑀚𑁂𑀦 𑀓𑀢𑁂𑀦 [𑀧𑀚𑁆𑀚𑁄𑀢𑀓𑀢𑁂𑀦 (𑀓.) 𑀲𑀼. 𑀦𑀺. 𑁫𑁧𑁯] 𑀅𑀢𑁆𑀢𑀦𑀸, [𑀲𑀪𑀺𑀬𑀸𑀢𑀺 𑀪𑀕𑀯𑀸]

𑀧𑀭𑀺𑀦𑀺𑀩𑁆𑀩𑀸𑀦𑀕𑀢𑁄 𑀯𑀺𑀢𑀺𑀡𑁆𑀡𑀓𑀗𑁆𑀔𑁄;

𑀯𑀺𑀪𑀯𑀜𑁆𑀘 𑀪𑀯𑀜𑁆𑀘 𑀯𑀺𑀧𑁆𑀧𑀳𑀸𑀬, 𑀯𑀼𑀲𑀺𑀢𑀯𑀸 𑀔𑀻𑀡𑀧𑀼𑀦𑀩𑁆𑀪𑀯𑁄 𑀲 𑀪𑀺𑀓𑁆𑀔𑀽𑀢𑀺.

𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂𑀢𑀺 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂, 𑀲𑀢𑁄 𑀕𑀘𑁆𑀙𑁂𑀬𑁆𑀬, 𑀲𑀢𑁄 𑀢𑀺𑀝𑁆𑀞𑁂𑀬𑁆𑀬, 𑀲𑀢𑁄 𑀦𑀺𑀲𑀻𑀤𑁂𑀬𑁆𑀬, 𑀲𑀢𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀬𑁆𑀬, 𑀲𑀢𑁄 𑀅𑀪𑀺𑀓𑁆𑀓𑀫𑁂𑀬𑁆𑀬, 𑀲𑀢𑁄 𑀧𑀝𑀺𑀓𑁆𑀓𑀫𑁂𑀬𑁆𑀬, 𑀲𑀢𑁄 𑀆𑀮𑁄𑀓𑁂𑀬𑁆𑀬, 𑀲𑀢𑁄 𑀯𑀺𑀮𑁄𑀓𑁂𑀬𑁆𑀬, 𑀲𑀢𑁄 𑀲𑀫𑀺𑀜𑁆𑀚𑁂𑀬𑁆𑀬, 𑀲𑀢𑁄 𑀧𑀲𑀸𑀭𑁂𑀬𑁆𑀬, 𑀲𑀢𑁄 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀁 𑀥𑀸𑀭𑁂𑀬𑁆𑀬, 𑀲𑀢𑁄 𑀘𑀭𑁂𑀬𑁆𑀬 𑀯𑀺𑀳𑀭𑁂𑀬𑁆𑀬 𑀇𑀭𑀺𑀬𑁂𑀬𑁆𑀬 𑀯𑀢𑁆𑀢𑁂𑀬𑁆𑀬 𑀧𑀸𑀮𑁂𑀬𑁆𑀬 𑀬𑀧𑁂𑀬𑁆𑀬 𑀬𑀸𑀧𑁂𑀬𑁆𑀬𑀸𑀢𑀺 𑁋 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀓𑀸𑀫𑁂𑀲𑀼 𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬, 𑀫𑀦𑀲𑀸𑀦𑀸𑀯𑀺𑀮𑁄 𑀲𑀺𑀬𑀸;

𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺.

𑀲𑀳 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑀸 𑀬𑁂 𑀢𑁂 𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀤𑀸 𑀏𑀓𑀧𑀬𑁄𑀕𑀸 𑀏𑀓𑀸𑀥𑀺𑀧𑁆𑀧𑀸𑀬𑀸 𑀏𑀓𑀯𑀸𑀲𑀦𑀯𑀸𑀲𑀺𑀢𑀸, 𑀢𑁂𑀲𑀁 𑀅𑀦𑁂𑀓𑀧𑀸𑀡𑀲𑀳𑀲𑁆𑀲𑀸𑀦𑀁 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺. 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺. 𑀲𑀳 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀸 𑀅𑀚𑀺𑀦𑀚𑀝𑀸𑀯𑀸𑀓𑀘𑀻𑀭𑀢𑀺𑀤𑀡𑁆𑀟𑀓𑀫𑀡𑁆𑀟𑀮𑀼𑀓𑁂𑀲𑀸 𑀘 𑀫𑀲𑁆𑀲𑀽 𑀘 𑀅𑀦𑁆𑀢𑀭𑀳𑀺𑀢𑀸, 𑀪𑀡𑁆𑀟𑀼𑀓𑀸𑀲𑀸𑀬𑀯𑀢𑁆𑀣𑀯𑀲𑀦𑁄 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀭𑁄 𑀅𑀦𑁆𑀯𑀢𑁆𑀣𑀧𑀝𑀺𑀧𑀢𑁆𑀢𑀺𑀬𑀸 𑀧𑀜𑁆𑀚𑀮𑀺𑀓𑁄 𑀪𑀕𑀯𑀦𑁆𑀢𑀁 𑀦𑀫𑀲𑁆𑀲𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑁋 ‘‘𑀲𑀢𑁆𑀣𑀸 𑀫𑁂 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻’’𑀢𑀺.

𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑀧𑀞𑀫𑁄.

𑁨. 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄

𑁯. 𑀓𑁄𑀥 𑀲𑀦𑁆𑀢𑀼𑀲𑀺𑀢𑁄 𑀮𑁄𑀓𑁂, [𑀇𑀘𑁆𑀘𑀸𑀬𑀲𑁆𑀫𑀸 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑁄]

𑀓𑀲𑁆𑀲 𑀦𑁄 𑀲𑀦𑁆𑀢𑀺 𑀇𑀜𑁆𑀚𑀺𑀢𑀸;

𑀓𑁄 𑀉𑀪𑀦𑁆𑀢𑀫𑀪𑀺𑀜𑁆𑀜𑀸𑀬, 𑀫𑀚𑁆𑀛𑁂 𑀫𑀦𑁆𑀢𑀸 𑀦 𑀮𑀺𑀧𑁆𑀧𑀢𑀺;

𑀓𑀁 𑀩𑁆𑀭𑀽𑀲𑀺 𑀫𑀳𑀸𑀧𑀼𑀭𑀺𑀲𑁄𑀢𑀺, 𑀓𑁄 𑀇𑀥 𑀲𑀺𑀩𑁆𑀩𑀺𑀦𑀺𑀫𑀘𑁆𑀘𑀕𑀸.

𑀓𑁄𑀥 𑀲𑀦𑁆𑀢𑀼𑀲𑀺𑀢𑁄 𑀮𑁄𑀓𑁂𑀢𑀺 𑀓𑁄 𑀮𑁄𑀓𑁂 𑀢𑀼𑀝𑁆𑀞𑁄 𑀲𑀦𑁆𑀢𑀼𑀝𑁆𑀞𑁄 𑀅𑀢𑁆𑀢𑀫𑀦𑁄 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄𑀢𑀺 𑁋 𑀓𑁄𑀥 𑀲𑀦𑁆𑀢𑀼𑀲𑀺𑀢𑁄 𑀮𑁄𑀓𑁂.

𑀇𑀘𑁆𑀘𑀸𑀬𑀲𑁆𑀫𑀸 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺 𑀧𑀤𑀲𑀁𑀲𑀕𑁆𑀕𑁄 𑀧𑀤𑀧𑀸𑀭𑀺𑀧𑀽𑀭𑀻 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀇𑀘𑁆𑀘𑀸𑀢𑀺. 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁 𑀕𑀭𑀼𑀯𑀘𑀦𑀁 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀸𑀥𑀺𑀯𑀘𑀦𑀫𑁂𑀢𑀁 𑁋 𑀆𑀬𑀲𑁆𑀫𑀸𑀢𑀺. 𑀢𑀺𑀲𑁆𑀲𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀺 𑀩𑁆𑀬𑀜𑁆𑀚𑀦𑀁 𑀅𑀪𑀺𑀮𑀸𑀧𑁄. 𑀫𑁂𑀢𑁆𑀢𑁂𑀬𑁆𑀬𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁄𑀢𑁆𑀢𑀁 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑁄.

𑀓𑀲𑁆𑀲 𑀦𑁄 𑀲𑀦𑁆𑀢𑀺 𑀇𑀜𑁆𑀚𑀺𑀢𑀸𑀢𑀺 𑀢𑀡𑁆𑀳𑀺𑀜𑁆𑀚𑀺𑀢𑀁 𑀤𑀺𑀝𑁆𑀞𑀺𑀜𑁆𑀚𑀺𑀢𑀁 𑀫𑀸𑀦𑀺𑀜𑁆𑀚𑀺𑀢𑀁 𑀓𑀺𑀮𑁂𑀲𑀺𑀜𑁆𑀚𑀺𑀢𑀁 𑀓𑀸𑀫𑀺𑀜𑁆𑀚𑀺𑀢𑀁. 𑀓𑀲𑁆𑀲𑀺𑀫𑁂 𑀇𑀜𑁆𑀚𑀺𑀢𑀸 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀓𑀲𑁆𑀲 𑀦𑁄 𑀲𑀦𑁆𑀢𑀺 𑀇𑀜𑁆𑀚𑀺𑀢𑀸.

𑀓𑁄 𑀉𑀪𑀦𑁆𑀢𑀫𑀪𑀺𑀜𑁆𑀜𑀸𑀬𑀸𑀢𑀺 𑀓𑁄 𑀉𑀪𑁄 𑀅𑀦𑁆𑀢𑁂 𑀅𑀪𑀺𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀓𑁄 𑀉𑀪𑀦𑁆𑀢𑀫𑀪𑀺𑀜𑁆𑀜𑀸𑀬.

𑀫𑀚𑁆𑀛𑁂 𑀫𑀦𑁆𑀢𑀸 𑀦 𑀮𑀺𑀧𑁆𑀧𑀢𑀻𑀢𑀺 𑀫𑀚𑁆𑀛𑁂 𑀫𑀦𑁆𑀢𑀸𑀬 𑀦 𑀮𑀺𑀧𑁆𑀧𑀢𑀺, 𑀅𑀮𑀺𑀢𑁆𑀢𑁄 𑀅𑀦𑀼𑀧𑀮𑀺𑀢𑁆𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀫𑀚𑁆𑀛𑁂 𑀫𑀦𑁆𑀢𑀸 𑀦 𑀮𑀺𑀧𑁆𑀧𑀢𑀺.

𑀓𑀁 𑀩𑁆𑀭𑀽𑀲𑀺 𑀫𑀳𑀸𑀧𑀼𑀭𑀺𑀲𑁄𑀢𑀺 𑀫𑀳𑀸𑀧𑀼𑀭𑀺𑀲𑁄 𑀅𑀕𑁆𑀕𑀧𑀼𑀭𑀺𑀲𑁄 𑀲𑁂𑀝𑁆𑀞𑀧𑀼𑀭𑀺𑀲𑁄 𑀯𑀺𑀲𑁂𑀝𑁆𑀞𑀧𑀼𑀭𑀺𑀲𑁄 𑀧𑀸𑀫𑁄𑀓𑁆𑀔𑀧𑀼𑀭𑀺𑀲𑁄 𑀉𑀢𑁆𑀢𑀫𑀧𑀼𑀭𑀺𑀲𑁄 𑀧𑀥𑀸𑀦𑀧𑀼𑀭𑀺𑀲𑁄 𑀧𑀯𑀭𑀧𑀼𑀭𑀺𑀲𑁄𑀢𑀺. 𑀓𑀁 𑀩𑁆𑀭𑀽𑀲𑀺 𑀓𑀁 𑀓𑀣𑁂𑀲𑀺 𑀓𑀁 𑀫𑀜𑁆𑀜𑀲𑀺 𑀓𑀁 𑀪𑀡𑀲𑀺 𑀓𑀁 𑀧𑀲𑁆𑀲𑀢𑀺 𑀓𑀁 𑀯𑁄𑀳𑀭𑀲𑀻𑀢𑀺 𑁋 𑀓𑀁 𑀩𑁆𑀭𑀽𑀲𑀺 𑀫𑀳𑀸𑀧𑀼𑀭𑀺𑀲𑁄𑀢𑀺.

𑀓𑁄 𑀇𑀥 𑀲𑀺𑀩𑁆𑀩𑀺𑀦𑀺𑀫𑀘𑁆𑀘𑀕𑀸𑀢𑀺 𑀓𑁄 𑀇𑀥 𑀲𑀺𑀩𑁆𑀩𑀺𑀦𑀺𑀁 𑀢𑀡𑁆𑀳𑀁 𑀅𑀚𑁆𑀛𑀕𑀸 𑀉𑀧𑀘𑁆𑀘𑀕𑀸 𑀅𑀢𑀺𑀓𑁆𑀓𑀦𑁆𑀢𑁄 𑀲𑀫𑀢𑀺𑀓𑁆𑀓𑀦𑁆𑀢𑁄 𑀯𑀻𑀢𑀺𑀯𑀢𑁆𑀢𑁄𑀢𑀺 𑁋 𑀓𑁄 𑀇𑀥 𑀲𑀺𑀩𑁆𑀩𑀺𑀦𑀺𑀫𑀘𑁆𑀘𑀕𑀸. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀓𑁄𑀥 𑀲𑀦𑁆𑀢𑀼𑀲𑀺𑀢𑁄 𑀮𑁄𑀓𑁂, [𑀇𑀘𑁆𑀘𑀸𑀬𑀲𑁆𑀫𑀸 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑁄]

𑀓𑀲𑁆𑀲 𑀦𑁄 𑀲𑀦𑁆𑀢𑀺 𑀇𑀜𑁆𑀚𑀺𑀢𑀸;

𑀓𑁄 𑀉𑀪𑀦𑁆𑀢𑀫𑀪𑀺𑀜𑁆𑀜𑀸𑀬, 𑀫𑀚𑁆𑀛𑁂 𑀫𑀦𑁆𑀢𑀸 𑀦 𑀮𑀺𑀧𑁆𑀧𑀢𑀺;

𑀓𑀁 𑀩𑁆𑀭𑀽𑀲𑀺 𑀫𑀳𑀸𑀧𑀼𑀭𑀺𑀲𑁄𑀢𑀺, 𑀓𑁄 𑀇𑀥 𑀲𑀺𑀩𑁆𑀩𑀺𑀦𑀺𑀫𑀘𑁆𑀘𑀕𑀸’’𑀢𑀺.

𑁧𑁦. 𑀓𑀸𑀫𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸, [𑀫𑁂𑀢𑁆𑀢𑁂𑀬𑁆𑀬𑀸𑀢𑀺 𑀪𑀕𑀯𑀸]

𑀯𑀻𑀢𑀢𑀡𑁆𑀳𑁄 𑀲𑀤𑀸 𑀲𑀢𑁄;

𑀲𑀗𑁆𑀔𑀸𑀬 𑀦𑀺𑀩𑁆𑀩𑀼𑀢𑁄 𑀪𑀺𑀓𑁆𑀔𑀼, 𑀢𑀲𑁆𑀲 𑀦𑁄 𑀲𑀦𑁆𑀢𑀺 𑀇𑀜𑁆𑀚𑀺𑀢𑀸.

𑀓𑀸𑀫𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀢𑀺. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀘𑁆𑀘𑀢𑀺 𑀅𑀲𑀤𑁆𑀥𑀫𑁆𑀫𑀲𑀫𑀸𑀧𑀢𑁆𑀢𑀺𑀬𑀸 𑀆𑀭𑀢𑀺 𑀯𑀺𑀭𑀢𑀺 𑀧𑀝𑀺𑀯𑀺𑀭𑀢𑀺 𑀯𑁂𑀭𑀫𑀡𑀻 𑀅𑀓𑀺𑀭𑀺𑀬𑀸 𑀅𑀓𑀭𑀡𑀁 𑀅𑀦𑀚𑁆𑀛𑀸𑀧𑀢𑁆𑀢𑀺 𑀯𑁂𑀮𑀸𑀅𑀦𑀢𑀺𑀓𑁆𑀓𑀫𑁄. 𑀅𑀧𑀺 𑀘, 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀘𑁆𑀘𑀢𑀺 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀲𑀫𑁆𑀫𑀸𑀯𑀸𑀘𑀸, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀲𑀫𑁆𑀫𑀸𑀆𑀚𑀻𑀯𑁄, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀲𑀫𑁆𑀫𑀸𑀲𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺. 𑀬𑁄 𑀇𑀫𑀺𑀦𑀸 𑀅𑀭𑀺𑀬𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀸𑀕𑀢𑁄 𑀲𑀫𑀼𑀧𑀸𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄, 𑀲𑁄 𑀯𑀼𑀘𑁆𑀘𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸. 𑀬𑀣𑀸 𑀘 𑀥𑀦𑁂𑀦 𑀥𑀦𑀯𑀸𑀢𑀺 𑀯𑀼𑀘𑁆𑀘𑀢𑀺, 𑀪𑁄𑀕𑁂𑀦 𑀪𑁄𑀕𑀯𑀸𑀢𑀺 𑀯𑀼𑀘𑁆𑀘𑀢𑀺, 𑀬𑀲𑁂𑀦 𑀬𑀲𑀯𑀸𑀢𑀺 𑀯𑀼𑀘𑁆𑀘𑀢𑀺, 𑀲𑀺𑀧𑁆𑀧𑁂𑀦 𑀲𑀺𑀧𑁆𑀧𑀯𑀸𑀢𑀺 𑀯𑀼𑀘𑁆𑀘𑀢𑀺, 𑀲𑀻𑀮𑁂𑀦 𑀲𑀻𑀮𑀯𑀸𑀢𑀺 𑀯𑀼𑀘𑁆𑀘𑀢𑀺, 𑀯𑀻𑀭𑀺𑀬𑁂𑀦 𑀯𑀻𑀭𑀺𑀬𑀯𑀸𑀢𑀺 𑀯𑀼𑀘𑁆𑀘𑀢𑀺, 𑀧𑀜𑁆𑀜𑀸𑀬 𑀧𑀜𑁆𑀜𑀯𑀸𑀢𑀺 𑀯𑀼𑀘𑁆𑀘𑀢𑀺, 𑀯𑀺𑀚𑁆𑀚𑀸𑀬 𑀯𑀺𑀚𑁆𑀚𑀯𑀸𑀢𑀺 𑀯𑀼𑀘𑁆𑀘𑀢𑀺 𑁋 𑀏𑀯𑀫𑁂𑀯 𑀬𑁄 𑀇𑀫𑀺𑀦𑀸 𑀅𑀭𑀺𑀬𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀸𑀕𑀢𑁄 𑀲𑀫𑀼𑀧𑀸𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄, 𑀲𑁄 𑀯𑀼𑀘𑁆𑀘𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀢𑀺 𑁋 𑀓𑀸𑀫𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸.

𑀫𑁂𑀢𑁆𑀢𑁂𑀬𑁆𑀬𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀕𑁄𑀢𑁆𑀢𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀫𑁂𑀢𑁆𑀢𑁂𑀬𑁆𑀬𑀸𑀢𑀺 𑀪𑀕𑀯𑀸.

𑀯𑀻𑀢𑀢𑀡𑁆𑀳𑁄 𑀲𑀤𑀸 𑀲𑀢𑁄𑀢𑀺. 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸. 𑀬𑀲𑁆𑀲𑁂𑀲𑀸 𑀢𑀡𑁆𑀳𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸, 𑀲𑁄 𑀯𑀼𑀘𑁆𑀘𑀢𑀺 𑀯𑀻𑀢𑀢𑀡𑁆𑀳𑁄 𑀘𑀢𑁆𑀢𑀢𑀡𑁆𑀳𑁄 𑀯𑀦𑁆𑀢𑀢𑀡𑁆𑀳𑁄 𑀫𑀼𑀢𑁆𑀢𑀢𑀡𑁆𑀳𑁄 𑀧𑀳𑀻𑀦𑀢𑀡𑁆𑀳𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑀡𑁆𑀳𑁄 𑀯𑀻𑀢𑀭𑀸𑀕𑁄 𑀘𑀢𑁆𑀢𑀭𑀸𑀕𑁄 𑀯𑀦𑁆𑀢𑀭𑀸𑀕𑁄 𑀫𑀼𑀢𑁆𑀢𑀭𑀸𑀕𑁄 𑀧𑀳𑀻𑀦𑀭𑀸𑀕𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀭𑀸𑀕𑁄 𑀦𑀺𑀘𑁆𑀙𑀸𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀺𑀪𑀽𑀢𑁄 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀺. 𑀲𑀤𑀸𑀢𑀺 𑀲𑀤𑀸 𑀲𑀩𑁆𑀩𑀤𑀸 𑀲𑀩𑁆𑀩𑀓𑀸𑀮𑀁 𑀦𑀺𑀘𑁆𑀘𑀓𑀸𑀮𑀁 𑀥𑀼𑀯𑀓𑀸𑀮𑀁 𑀲𑀢𑀢𑀁 𑀲𑀫𑀺𑀢𑀁 𑀅𑀩𑁆𑀩𑁄𑀓𑀺𑀡𑁆𑀡𑀁 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀁 [𑀧𑁄𑀔𑀸𑀦𑀼𑀧𑁄𑀔𑀁 (𑀲𑁆𑀬𑀸.)] 𑀉𑀤𑀓𑀽𑀫𑀺𑀓𑀚𑀸𑀢𑀁 𑀅𑀯𑀻𑀘𑀺𑀲𑀦𑁆𑀢𑀢𑀺𑀲𑀳𑀺𑀢𑀁 [𑀅𑀯𑀻𑀘𑀺 𑀲𑀫𑀗𑁆𑀕𑀺𑀲𑀳𑀺𑀢𑀁 (𑀲𑁆𑀬𑀸.)] 𑀨𑀲𑁆𑀲𑀺𑀢𑀁 [𑀨𑀼𑀲𑀺𑀢𑀁 (𑀲𑁆𑀬𑀸.)] 𑀧𑀼𑀭𑁂𑀪𑀢𑁆𑀢𑀁 𑀧𑀘𑁆𑀙𑀸𑀪𑀢𑁆𑀢𑀁 𑀧𑀼𑀭𑀺𑀫𑀬𑀸𑀫𑀁 𑀫𑀚𑁆𑀛𑀺𑀫𑀬𑀸𑀫𑀁 𑀧𑀘𑁆𑀙𑀺𑀫𑀬𑀸𑀫𑀁 𑀓𑀸𑀴𑁂 𑀚𑀼𑀡𑁆𑀳𑁂 𑀯𑀲𑁆𑀲𑁂 𑀳𑁂𑀫𑀦𑁆𑀢𑁂 𑀕𑀺𑀫𑁆𑀳𑁂 𑀧𑀼𑀭𑀺𑀫𑁂 𑀯𑀬𑁄𑀔𑀦𑁆𑀥𑁂 𑀫𑀚𑁆𑀛𑀺𑀫𑁂 𑀯𑀬𑁄𑀔𑀦𑁆𑀥𑁂 𑀧𑀘𑁆𑀙𑀺𑀫𑁂 𑀯𑀬𑁄𑀔𑀦𑁆𑀥𑁂. 𑀲𑀢𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄, 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄, 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄, 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄…𑀧𑁂… 𑀲𑁄 𑀯𑀼𑀘𑁆𑀘𑀢𑀺 𑀲𑀢𑁄𑀢𑀺 𑁋 𑀯𑀻𑀢𑀢𑀡𑁆𑀳𑁄 𑀲𑀤𑀸 𑀲𑀢𑁄.

𑀲𑀗𑁆𑀔𑀸𑀬 𑀦𑀺𑀩𑁆𑀩𑀼𑀢𑁄 𑀪𑀺𑀓𑁆𑀔𑀽𑀢𑀺 𑀲𑀗𑁆𑀔𑀸 𑀯𑀼𑀘𑁆𑀘𑀢𑀺 𑀜𑀸𑀡𑀁. 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸 𑀯𑀺𑀘𑀬𑁄 𑀧𑀯𑀺𑀘𑀬𑁄…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑀗𑁆𑀔𑀸𑀬𑀸𑀢𑀺 𑀲𑀗𑁆𑀔𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀲𑀗𑁆𑀔𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺…𑀧𑁂… ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺… ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀲𑀗𑁆𑀔𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸.

𑀅𑀣 𑀯𑀸, 𑀅𑀦𑀺𑀘𑁆𑀘𑀢𑁄 𑀲𑀗𑁆𑀔𑀸𑀬 𑀚𑀸𑀦𑀺𑀢𑁆𑀯𑀸…𑀧𑁂… 𑀤𑀼𑀓𑁆𑀔𑀢𑁄… 𑀭𑁄𑀕𑀢𑁄… 𑀕𑀡𑁆𑀟𑀢𑁄… 𑀲𑀮𑁆𑀮𑀢𑁄…𑀧𑁂… 𑀦𑀺𑀲𑁆𑀲𑀭𑀡𑀢𑁄 𑀲𑀗𑁆𑀔𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. 𑀦𑀺𑀩𑁆𑀩𑀼𑀢𑁄𑀢𑀺 𑀭𑀸𑀕𑀲𑁆𑀲 𑀦𑀺𑀩𑁆𑀩𑀸𑀧𑀺𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑁄, 𑀤𑁄𑀲𑀲𑁆𑀲 𑀦𑀺𑀩𑁆𑀩𑀸𑀧𑀺𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑁄, 𑀫𑁄𑀳𑀲𑁆𑀲 𑀦𑀺𑀩𑁆𑀩𑀸𑀧𑀺𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑁄, 𑀓𑁄𑀥𑀲𑁆𑀲… 𑀉𑀧𑀦𑀸𑀳𑀲𑁆𑀲… 𑀫𑀓𑁆𑀔𑀲𑁆𑀲… 𑀧𑀴𑀸𑀲𑀲𑁆𑀲… 𑀇𑀲𑁆𑀲𑀸𑀬… 𑀫𑀘𑁆𑀙𑀭𑀺𑀬𑀲𑁆𑀲… 𑀫𑀸𑀬𑀸𑀬… 𑀲𑀸𑀞𑁂𑀬𑁆𑀬𑀲𑁆𑀲… 𑀣𑀫𑁆𑀪𑀲𑁆𑀲… 𑀲𑀸𑀭𑀫𑁆𑀪𑀲𑁆𑀲… 𑀫𑀸𑀦𑀲𑁆𑀲… 𑀅𑀢𑀺𑀫𑀸𑀦𑀲𑁆𑀲… 𑀫𑀤𑀲𑁆𑀲… 𑀧𑀫𑀸𑀤𑀲𑁆𑀲… 𑀲𑀩𑁆𑀩𑀓𑀺𑀮𑁂𑀲𑀸𑀦𑀁… 𑀲𑀩𑁆𑀩𑀤𑀼𑀘𑁆𑀘𑀭𑀺𑀢𑀸𑀦𑀁… 𑀲𑀩𑁆𑀩𑀤𑀭𑀣𑀸𑀦𑀁 … 𑀲𑀩𑁆𑀩𑀧𑀭𑀺𑀴𑀸𑀳𑀸𑀦𑀁… 𑀲𑀩𑁆𑀩𑀲𑀦𑁆𑀢𑀸𑀧𑀸𑀦𑀁… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀦𑀺𑀩𑁆𑀩𑀸𑀧𑀺𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑁄. 𑀪𑀺𑀓𑁆𑀔𑀽𑀢𑀺 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀪𑀺𑀦𑁆𑀦𑀢𑁆𑀢𑀸 𑀪𑀺𑀓𑁆𑀔𑀼…𑀧𑁂… 𑀯𑀼𑀲𑀺𑀢𑀯𑀸 𑀔𑀻𑀡𑀧𑀼𑀦𑀩𑁆𑀪𑀯𑁄 𑀲 𑀪𑀺𑀓𑁆𑀔𑀽𑀢𑀺 𑁋 𑀲𑀗𑁆𑀔𑀸𑀬 𑀦𑀺𑀩𑁆𑀩𑀼𑀢𑁄 𑀪𑀺𑀓𑁆𑀔𑀼.

𑀢𑀲𑁆𑀲 𑀦𑁄 𑀲𑀦𑁆𑀢𑀺 𑀇𑀜𑁆𑀚𑀺𑀢𑀸𑀢𑀺. 𑀢𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀇𑀜𑁆𑀚𑀺𑀢𑀸𑀢𑀺 𑀢𑀡𑁆𑀳𑀺𑀜𑁆𑀚𑀺𑀢𑀁 𑀤𑀺𑀝𑁆𑀞𑀺𑀜𑁆𑀚𑀺𑀢𑀁 𑀫𑀸𑀦𑀺𑀜𑁆𑀚𑀺𑀢𑀁 𑀓𑀺𑀮𑁂𑀲𑀺𑀜𑁆𑀚𑀺𑀢𑀁 𑀓𑀸𑀫𑀺𑀜𑁆𑀚𑀺𑀢𑀁. 𑀢𑀲𑁆𑀲𑀺𑀫𑁂 𑀇𑀜𑁆𑀚𑀺𑀢𑀸 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀢𑀲𑁆𑀲 𑀦𑁄 𑀲𑀦𑁆𑀢𑀺 𑀇𑀜𑁆𑀚𑀺𑀢𑀸. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀓𑀸𑀫𑁂𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑀯𑀸, [𑀫𑁂𑀢𑁆𑀢𑁂𑀬𑁆𑀬𑀸𑀢𑀺 𑀪𑀕𑀯𑀸]

𑀯𑀻𑀢𑀢𑀡𑁆𑀳𑁄 𑀲𑀤𑀸 𑀲𑀢𑁄;

𑀲𑀗𑁆𑀔𑀸𑀬 𑀦𑀺𑀩𑁆𑀩𑀼𑀢𑁄 𑀪𑀺𑀓𑁆𑀔𑀼, 𑀢𑀲𑁆𑀲 𑀦𑁄 𑀲𑀦𑁆𑀢𑀺 𑀇𑀜𑁆𑀚𑀺𑀢𑀸’’𑀢𑀺.

𑁧𑁧. 𑀲𑁄 𑀉𑀪𑀦𑁆𑀢𑀫𑀪𑀺𑀜𑁆𑀜𑀸𑀬, 𑀫𑀚𑁆𑀛𑁂 𑀫𑀦𑁆𑀢𑀸 𑀦 𑀮𑀺𑀧𑁆𑀧𑀢𑀺;

𑀢𑀁 𑀩𑁆𑀭𑀽𑀫𑀺 𑀫𑀳𑀸𑀧𑀼𑀭𑀺𑀲𑁄𑀢𑀺, 𑀲𑁄 𑀇𑀥 𑀲𑀺𑀩𑁆𑀩𑀺𑀦𑀺𑀫𑀘𑁆𑀘𑀕𑀸.

𑀲𑁄 𑀉𑀪𑀦𑁆𑀢𑀫𑀪𑀺𑀜𑁆𑀜𑀸𑀬, 𑀫𑀚𑁆𑀛𑁂 𑀫𑀦𑁆𑀢𑀸 𑀦 𑀮𑀺𑀧𑁆𑀧𑀢𑀻𑀢𑀺. 𑀅𑀦𑁆𑀢𑀸𑀢𑀺 𑀨𑀲𑁆𑀲𑁄 𑀏𑀓𑁄 𑀅𑀦𑁆𑀢𑁄, 𑀨𑀲𑁆𑀲𑀲𑀫𑀼𑀤𑀬𑁄 𑀤𑀼𑀢𑀺𑀬𑁄 𑀅𑀦𑁆𑀢𑁄, 𑀨𑀲𑁆𑀲𑀦𑀺𑀭𑁄𑀥𑁄 𑀫𑀚𑁆𑀛𑁂; 𑀅𑀢𑀻𑀢𑀁 𑀏𑀓𑁄 𑀅𑀦𑁆𑀢𑁄, 𑀅𑀦𑀸𑀕𑀢𑀁 𑀤𑀼𑀢𑀺𑀬𑁄 𑀅𑀦𑁆𑀢𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀫𑀚𑁆𑀛𑁂; 𑀲𑀼𑀔𑀸 𑀯𑁂𑀤𑀦𑀸 𑀏𑀓𑁄 𑀅𑀦𑁆𑀢𑁄, 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀤𑀼𑀢𑀺𑀬𑁄 𑀅𑀦𑁆𑀢𑁄, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀫𑀚𑁆𑀛𑁂; 𑀦𑀸𑀫𑀁 𑀏𑀓𑁄 𑀅𑀦𑁆𑀢𑁄, 𑀭𑀽𑀧𑀁 𑀤𑀼𑀢𑀺𑀬𑁄 𑀅𑀦𑁆𑀢𑁄, 𑀯𑀺𑀜𑁆𑀜𑀸𑀡𑀁 𑀫𑀚𑁆𑀛𑁂; 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺 𑀏𑀓𑁄 𑀅𑀦𑁆𑀢𑁄, 𑀙 𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺 𑀤𑀼𑀢𑀺𑀬𑁄 𑀅𑀦𑁆𑀢𑁄, 𑀯𑀺𑀜𑁆𑀜𑀸𑀡𑀁 𑀫𑀚𑁆𑀛𑁂; 𑀲𑀓𑁆𑀓𑀸𑀬𑁄 𑀏𑀓𑁄 𑀅𑀦𑁆𑀢𑁄, 𑀲𑀓𑁆𑀓𑀸𑀬𑀲𑀫𑀼𑀤𑀬𑁄 𑀤𑀼𑀢𑀺𑀬𑁄 𑀅𑀦𑁆𑀢𑁄, 𑀲𑀓𑁆𑀓𑀸𑀬𑀦𑀺𑀭𑁄𑀥𑁄 𑀫𑀚𑁆𑀛𑁂. 𑀫𑀦𑁆𑀢𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺.

𑀮𑁂𑀧𑀸𑀢𑀺 𑀤𑁆𑀯𑁂 𑀮𑁂𑀧𑀸 𑁋 𑀢𑀡𑁆𑀳𑀸𑀮𑁂𑀧𑁄 𑀘 𑀤𑀺𑀝𑁆𑀞𑀺𑀮𑁂𑀧𑁄 𑀘. 𑀓𑀢𑀫𑁄 𑀢𑀡𑁆𑀳𑀸𑀮𑁂𑀧𑁄? 𑀬𑀸𑀯𑀢𑀸 𑀢𑀡𑁆𑀳𑀸𑀲𑀗𑁆𑀔𑀸𑀢𑁂𑀦 𑀲𑀻𑀫𑀓𑀢𑀁 𑀑𑀥𑀺𑀓𑀢𑀁 [𑀫𑀭𑀺𑀬𑀸𑀤𑀺𑀓𑀢𑀁 𑀑𑀥𑀺𑀓𑀢𑀁 (𑀲𑁆𑀬𑀸.)] 𑀧𑀭𑀺𑀬𑀦𑁆𑀢𑀓𑀢𑀁 𑀧𑀭𑀺𑀕𑁆𑀕𑀳𑀺𑀢𑀁 𑀫𑀫𑀸𑀬𑀺𑀢𑀁 𑁋 ‘‘𑀇𑀤𑀁 𑀫𑀫, 𑀏𑀢𑀁 𑀫𑀫, 𑀏𑀢𑁆𑀢𑀓𑀁 𑀫𑀫, 𑀏𑀢𑁆𑀢𑀸𑀯𑀢𑀸 𑀫𑀫 𑀭𑀽𑀧𑀸 𑀲𑀤𑁆𑀤𑀸 𑀕𑀦𑁆𑀥𑀸 𑀭𑀲𑀸 𑀨𑁄𑀝𑁆𑀞𑀩𑁆𑀩𑀸 𑀅𑀢𑁆𑀣𑀭𑀡𑀸 𑀧𑀸𑀯𑀼𑀭𑀡𑀸 𑀤𑀸𑀲𑀺𑀤𑀸𑀲𑀸 𑀅𑀚𑁂𑀴𑀓𑀸 𑀓𑀼𑀓𑁆𑀓𑀼𑀝𑀲𑀽𑀓𑀭𑀸 𑀳𑀢𑁆𑀣𑀺𑀕𑀯𑀸𑀲𑁆𑀲𑀯𑀴𑀯𑀸 𑀔𑁂𑀢𑁆𑀢𑀁 𑀯𑀢𑁆𑀣𑀼 𑀳𑀺𑀭𑀜𑁆𑀜𑀁 𑀲𑀼𑀯𑀡𑁆𑀡𑀁 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀭𑀝𑁆𑀞𑀜𑁆𑀘 𑀚𑀦𑀧𑀤𑁄 𑀘 𑀓𑁄𑀲𑁄 𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘’’. 𑀓𑁂𑀯𑀮𑀫𑁆𑀧𑀺 𑀫𑀳𑀸𑀧𑀣𑀯𑀺𑀁 𑀢𑀡𑁆𑀳𑀸𑀯𑀲𑁂𑀦 𑀫𑀫𑀸𑀬𑀢𑀺. 𑀬𑀸𑀯𑀢𑀸 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀁 𑁋 𑀅𑀬𑀁 𑀢𑀡𑁆𑀳𑀸𑀮𑁂𑀧𑁄.

𑀓𑀢𑀫𑁄 𑀤𑀺𑀝𑁆𑀞𑀺𑀮𑁂𑀧𑁄? 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀤𑀲𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀤𑀲𑀯𑀢𑁆𑀣𑀼𑀓𑀸 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺, 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁 𑀤𑀺𑀝𑁆𑀞𑀺𑀕𑀳𑀦𑀁 𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑁄 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀬𑀺𑀓𑀁 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀁 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀁 𑀕𑀸𑀳𑁄 𑀧𑀝𑀺𑀕𑁆𑀕𑀸𑀳𑁄 𑀅𑀪𑀺𑀦𑀺𑀯𑁂𑀲𑁄 𑀧𑀭𑀸𑀫𑀸𑀲𑁄 𑀓𑀼𑀫𑁆𑀫𑀕𑁆𑀕𑁄 𑀫𑀺𑀘𑁆𑀙𑀸𑀧𑀣𑁄 𑀫𑀺𑀘𑁆𑀙𑀢𑁆𑀢𑀁 𑀢𑀺𑀢𑁆𑀣𑀸𑀬𑀢𑀦𑀁 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑁄 [𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑁄 (𑀩𑀳𑀽𑀲𑀼)] 𑀯𑀺𑀧𑀭𑀻𑀢𑀕𑁆𑀕𑀸𑀳𑁄 𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑁄 𑀫𑀺𑀘𑁆𑀙𑀸𑀕𑀸𑀳𑁄 𑀅𑀬𑀸𑀣𑀸𑀯𑀓𑀲𑁆𑀫𑀺𑀁 𑀬𑀸𑀣𑀸𑀯𑀓𑀦𑁆𑀢𑀺 𑀕𑀸𑀳𑁄, 𑀬𑀸𑀯𑀢𑀸 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑁋 𑀅𑀬𑀁 𑀤𑀺𑀝𑁆𑀞𑀺𑀮𑁂𑀧𑁄.

𑀲𑁄 𑀉𑀪𑀦𑁆𑀢𑀫𑀪𑀺𑀜𑁆𑀜𑀸𑀬, 𑀫𑀚𑁆𑀛𑁂 𑀫𑀦𑁆𑀢𑀸 𑀦 𑀮𑀺𑀧𑁆𑀧𑀢𑀻𑀢𑀺 𑀲𑁄 𑀉𑀪𑁄 𑀘 𑀅𑀦𑁆𑀢𑁂 𑀫𑀚𑁆𑀛𑀜𑁆𑀘 𑀫𑀦𑁆𑀢𑀸𑀬 𑀅𑀪𑀺𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀦 𑀮𑀺𑀧𑁆𑀧𑀢𑀺 𑀦 𑀧𑀮𑀺𑀧𑁆𑀧𑀢𑀺 𑀦 𑀉𑀧𑀮𑀺𑀧𑁆𑀧𑀢𑀺, 𑀅𑀮𑀺𑀢𑁆𑀢𑁄 𑀅𑀲𑀁𑀮𑀺𑀢𑁆𑀢𑁄 𑀅𑀦𑀼𑀧𑀮𑀺𑀢𑁆𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀲𑁄 𑀉𑀪𑀦𑁆𑀢𑀫𑀪𑀺𑀜𑁆𑀜𑀸𑀬 𑀫𑀚𑁆𑀛𑁂 𑀫𑀦𑁆𑀢𑀸 𑀦 𑀮𑀺𑀧𑁆𑀧𑀢𑀺.

𑀢𑀁 𑀩𑁆𑀭𑀽𑀫𑀺 𑀫𑀳𑀸𑀧𑀼𑀭𑀺𑀲𑁄𑀢𑀺 𑀫𑀳𑀸𑀧𑀼𑀭𑀺𑀲𑁄 𑀅𑀕𑁆𑀕𑀧𑀼𑀭𑀺𑀲𑁄 𑀲𑁂𑀝𑁆𑀞𑀧𑀼𑀭𑀺𑀲𑁄 𑀯𑀺𑀲𑁂𑀝𑁆𑀞𑀧𑀼𑀭𑀺𑀲𑁄 𑀧𑀸𑀫𑁄𑀓𑁆𑀔𑀧𑀼𑀭𑀺𑀲𑁄 𑀉𑀢𑁆𑀢𑀫𑀧𑀼𑀭𑀺𑀲𑁄 𑀧𑀯𑀭𑀧𑀼𑀭𑀺𑀲𑁄, 𑀢𑀁 𑀩𑁆𑀭𑀽𑀫𑀺 𑀢𑀁 𑀓𑀣𑁂𑀫𑀺 𑀢𑀁 𑀪𑀡𑀸𑀫𑀺 𑀢𑀁 𑀤𑀻𑀧𑁂𑀫𑀺 𑀢𑀁 𑀯𑁄𑀳𑀭𑀸𑀫𑀺.

𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 [𑀧𑀲𑁆𑀲 𑀲𑀁. 𑀦𑀺. 𑁫.𑁩𑁭𑁭] 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀳𑀸𑀧𑀼𑀭𑀺𑀲𑁄 𑀫𑀳𑀸𑀧𑀼𑀭𑀺𑀲𑁄’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀫𑀳𑀸𑀧𑀼𑀭𑀺𑀲𑁄 𑀳𑁄𑀢𑀻’’𑀢𑀺? ‘‘𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀢𑁆𑀢𑀸 𑀔𑁆𑀯𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀫𑀳𑀸𑀧𑀼𑀭𑀺𑀲𑁄𑀢𑀺 𑀯𑀤𑀸𑀫𑀺, 𑀅𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀢𑁆𑀢𑀸 𑀦𑁄 𑀫𑀳𑀸𑀧𑀼𑀭𑀺𑀲𑁄𑀢𑀺 𑀯𑀤𑀸𑀫𑀺.

‘‘𑀓𑀣𑀜𑁆𑀘, 𑀲𑀸𑀭𑀺𑀧𑀼𑀢𑁆𑀢, 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀳𑁄𑀢𑀺? 𑀇𑀥, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀅𑀚𑁆𑀛𑀢𑁆𑀢𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀢𑀲𑁆𑀲 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀘𑀺𑀢𑁆𑀢𑀁 𑀯𑀺𑀭𑀚𑁆𑀚𑀢𑀺 𑀯𑀺𑀫𑀼𑀘𑁆𑀘𑀢𑀺 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺. 𑀯𑁂𑀤𑀦𑀸𑀲𑀼…𑀧𑁂… 𑀘𑀺𑀢𑁆𑀢𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀢𑀲𑁆𑀲 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀘𑀺𑀢𑁆𑀢𑀁 𑀯𑀺𑀭𑀚𑁆𑀚𑀢𑀺 𑀯𑀺𑀫𑀼𑀘𑁆𑀘𑀢𑀺 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺. 𑀏𑀯𑀁 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀳𑁄𑀢𑀺. 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀢𑁆𑀢𑀸 𑀔𑁆𑀯𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀫𑀳𑀸𑀧𑀼𑀭𑀺𑀲𑁄𑀢𑀺 𑀯𑀤𑀸𑀫𑀺, 𑀅𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀢𑁆𑀢𑀸 𑀦𑁄 𑀫𑀳𑀸𑀧𑀼𑀭𑀺𑀲𑁄𑀢𑀺 𑀯𑀤𑀸𑀫𑀻’’𑀢𑀺 𑁋 𑀢𑀁 𑀩𑁆𑀭𑀽𑀫𑀺 𑀫𑀳𑀸𑀧𑀼𑀭𑀺𑀲𑁄𑀢𑀺.

𑀲𑁄 𑀇𑀥 𑀲𑀺𑀩𑁆𑀩𑀺𑀦𑀺𑀫𑀘𑁆𑀘𑀕𑀸𑀢𑀺 𑀲𑀺𑀩𑁆𑀩𑀺𑀦𑀻 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁, 𑀬𑀲𑁆𑀲𑁂𑀲𑀸 𑀲𑀺𑀩𑁆𑀩𑀺𑀦𑀻 𑀢𑀡𑁆𑀳𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸. 𑀲𑁄 𑀲𑀺𑀩𑁆𑀩𑀺𑀦𑀺𑀁 𑀢𑀡𑁆𑀳𑀁 𑀅𑀘𑁆𑀘𑀕𑀸 𑀉𑀧𑀘𑁆𑀘𑀕𑀸 𑀅𑀢𑀺𑀓𑁆𑀓𑀦𑁆𑀢𑁄 𑀲𑀫𑀢𑀺𑀓𑁆𑀓𑀦𑁆𑀢𑁄 𑀯𑀻𑀢𑀺𑀯𑀢𑁆𑀢𑁄𑀢𑀺 𑁋 𑀲𑁄 𑀇𑀥 𑀲𑀺𑀩𑁆𑀩𑀺𑀦𑀺𑀫𑀘𑁆𑀘𑀕𑀸. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀲𑁄 𑀉𑀪𑀦𑁆𑀢𑀫𑀪𑀺𑀜𑁆𑀜𑀸𑀬, 𑀫𑀚𑁆𑀛𑁂 𑀫𑀦𑁆𑀢𑀸 𑀦 𑀮𑀺𑀧𑁆𑀧𑀢𑀺;

𑀢𑀁 𑀩𑁆𑀭𑀽𑀫𑀺 𑀫𑀳𑀸𑀧𑀼𑀭𑀺𑀲𑁄𑀢𑀺, 𑀲𑁄 𑀇𑀥 𑀲𑀺𑀩𑁆𑀩𑀺𑀦𑀺𑀫𑀘𑁆𑀘𑀕𑀸’’𑀢𑀺.

𑀲𑀳 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑀸 𑀬𑁂 𑀢𑁂 𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀤𑀸 𑀏𑀓𑀧𑀬𑁄𑀕𑀸 𑀏𑀓𑀸𑀥𑀺𑀧𑁆𑀧𑀸𑀬𑀸 𑀏𑀓𑀯𑀸𑀲𑀦𑀯𑀸𑀲𑀺𑀢𑀸, 𑀢𑁂𑀲𑀁 𑀅𑀦𑁂𑀓𑀧𑀸𑀡𑀲𑀳𑀲𑁆𑀲𑀸𑀦𑀁 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺. 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺. 𑀲𑀳 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀸 𑀅𑀚𑀺𑀦𑀚𑀝𑀸𑀯𑀸𑀓𑀘𑀻𑀭𑀢𑀺𑀤𑀡𑁆𑀟𑀓𑀫𑀡𑁆𑀟𑀮𑀼𑀓𑁂𑀲𑀸 𑀘 𑀫𑀲𑁆𑀲𑀽 𑀘 𑀅𑀦𑁆𑀢𑀭𑀳𑀺𑀢𑀸. 𑀪𑀡𑁆𑀟𑀼𑀓𑀸𑀲𑀸𑀬𑀯𑀢𑁆𑀣𑀯𑀲𑀦𑁄 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀭𑁄 𑀅𑀦𑁆𑀯𑀢𑁆𑀣𑀧𑀝𑀺𑀧𑀢𑁆𑀢𑀺𑀬𑀸 𑀧𑀜𑁆𑀚𑀮𑀺𑀓𑁄 𑀪𑀕𑀯𑀦𑁆𑀢𑀁 𑀦𑀫𑀲𑁆𑀲𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑁋 ‘‘𑀲𑀢𑁆𑀣𑀸 𑀫𑁂 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻’’𑀢𑀺.

𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑀤𑀼𑀢𑀺𑀬𑁄.

𑁩. 𑀧𑀼𑀡𑁆𑀡𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄

𑁧𑁨. 𑀅𑀦𑁂𑀚𑀁 𑀫𑀽𑀮𑀤𑀲𑁆𑀲𑀸𑀯𑀺𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀧𑀼𑀡𑁆𑀡𑀓𑁄]

𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁;

𑀓𑀺𑀁𑀦𑀺𑀲𑁆𑀲𑀺𑀢𑀸 𑀇𑀲𑀬𑁄 𑀫𑀦𑀼𑀚𑀸, 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸𑀦𑀁;

𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑀧𑀼𑀣𑀽𑀥 𑀮𑁄𑀓𑁂, 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁.

𑀅𑀦𑁂𑀚𑀁 𑀫𑀽𑀮𑀤𑀲𑁆𑀲𑀸𑀯𑀺𑀦𑁆𑀢𑀺 𑀏𑀚𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁 𑀲𑀸 𑀏𑀚𑀸 𑀢𑀡𑁆𑀳𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀅𑀦𑁂𑀚𑁄. 𑀏𑀚𑀸𑀬 𑀧𑀳𑀻𑀦𑀢𑁆𑀢𑀸 𑀅𑀦𑁂𑀚𑁄. 𑀪𑀕𑀯𑀸 𑀮𑀸𑀪𑁂𑀧𑀺 𑀦 𑀇𑀜𑁆𑀚𑀢𑀺, 𑀅𑀮𑀸𑀪𑁂𑀧𑀺 𑀦 𑀇𑀜𑁆𑀚𑀢𑀺, 𑀬𑀲𑁂𑀧𑀺 𑀦 𑀇𑀜𑁆𑀚𑀢𑀺, 𑀅𑀬𑀲𑁂𑀧𑀺 𑀦 𑀇𑀜𑁆𑀚𑀢𑀺, 𑀧𑀲𑀁𑀲𑀸𑀬𑀧𑀺 𑀦 𑀇𑀜𑁆𑀚𑀢𑀺, 𑀦𑀺𑀦𑁆𑀤𑀸𑀬𑀧𑀺 𑀦 𑀇𑀜𑁆𑀚𑀢𑀺, 𑀲𑀼𑀔𑁂𑀧𑀺 𑀦 𑀇𑀜𑁆𑀚𑀢𑀺, 𑀤𑀼𑀓𑁆𑀔𑁂𑀧𑀺 𑀦 𑀇𑀜𑁆𑀚𑀢𑀺 𑀦 𑀘𑀮𑀢𑀺 𑀦 𑀯𑁂𑀥𑀢𑀺 𑀦𑀧𑁆𑀧𑀯𑁂𑀥𑀢𑀻𑀢𑀺 𑁋 𑀅𑀦𑁂𑀚𑀁. 𑀫𑀽𑀮𑀤𑀲𑁆𑀲𑀸𑀯𑀺𑀦𑁆𑀢𑀺 𑀪𑀕𑀯𑀸 𑀫𑀽𑀮𑀤𑀲𑁆𑀲𑀸𑀯𑀻 𑀳𑁂𑀢𑀼𑀤𑀲𑁆𑀲𑀸𑀯𑀻 𑀦𑀺𑀤𑀸𑀦𑀤𑀲𑁆𑀲𑀸𑀯𑀻 𑀲𑀫𑁆𑀪𑀯𑀤𑀲𑁆𑀲𑀸𑀯𑀻 𑀧𑀪𑀯𑀤𑀲𑁆𑀲𑀸𑀯𑀻 𑀲𑀫𑀼𑀝𑁆𑀞𑀸𑀦𑀤𑀲𑁆𑀲𑀸𑀯𑀻 𑀆𑀳𑀸𑀭𑀤𑀲𑁆𑀲𑀸𑀯𑀻 𑀆𑀭𑀫𑁆𑀫𑀡𑀤𑀲𑁆𑀲𑀸𑀯𑀻 𑀧𑀘𑁆𑀘𑀬𑀤𑀲𑁆𑀲𑀸𑀯𑀻 𑀲𑀫𑀼𑀤𑀬𑀤𑀲𑁆𑀲𑀸𑀯𑀻.