𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑁄

𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄

𑀧𑀞𑀫𑀯𑀕𑁆𑀕𑁄

𑁧𑁨𑁧. 𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀁,𑀅𑀯𑀺𑀳𑁂𑀞𑀬𑀁 𑀅𑀜𑁆𑀜𑀢𑀭𑀫𑁆𑀧𑀺 𑀢𑁂𑀲𑀁;

𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀬𑁆𑀬 𑀓𑀼𑀢𑁄 𑀲𑀳𑀸𑀬𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀦𑁆𑀢𑀺. 𑀲𑀩𑁆𑀩𑁂𑀲𑀽𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁 𑀧𑀭𑀺𑀬𑀸𑀤𑀺𑀬𑀦𑀯𑀘𑀦𑀫𑁂𑀢𑀁 𑁋 𑀲𑀩𑁆𑀩𑁂𑀲𑀽𑀢𑀺. 𑀪𑀽𑀢𑁂𑀲𑀽𑀢𑀺 𑀪𑀽𑀢𑀸 𑀯𑀼𑀘𑁆𑀘𑀦𑁆𑀢𑀺 𑀢𑀲𑀸 𑀘 𑀣𑀸𑀯𑀭𑀸 𑀘. 𑀢𑀲𑀸𑀢𑀺 𑀬𑁂𑀲𑀁 𑀢𑀲𑀺𑀢𑀢𑀡𑁆𑀳𑀸 𑀅𑀧𑁆𑀧𑀳𑀻𑀦𑀸, 𑀬𑁂𑀲𑀜𑁆𑀘 𑀪𑀬𑀪𑁂𑀭𑀯𑀸 𑀅𑀧𑁆𑀧𑀳𑀻𑀦𑀸. 𑀓𑀺𑀁𑀓𑀸𑀭𑀡𑀸 𑀯𑀼𑀘𑁆𑀘𑀦𑁆𑀢𑀺 𑀢𑀲𑀸? 𑀢𑁂 𑀢𑀲𑀦𑁆𑀢𑀺 𑀉𑀢𑁆𑀢𑀲𑀦𑁆𑀢𑀺 𑀧𑀭𑀺𑀢𑀲𑀦𑁆𑀢𑀺 𑀪𑀸𑀲𑀦𑁆𑀢𑀺 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀦𑁆𑀢𑀺, 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀦𑁆𑀢𑀺 𑀢𑀲𑀸. 𑀣𑀸𑀯𑀭𑀸𑀢𑀺 𑀬𑁂𑀲𑀁 𑀢𑀲𑀺𑀢𑀢𑀡𑁆𑀳𑀸 𑀧𑀳𑀻𑀦𑀸, 𑀬𑁂𑀲𑀜𑁆𑀘 𑀪𑀬𑀪𑁂𑀭𑀯𑀸 𑀧𑀳𑀻𑀦𑀸. 𑀓𑀺𑀁𑀓𑀸𑀭𑀡𑀸 𑀯𑀼𑀘𑁆𑀘𑀦𑁆𑀢𑀺 𑀣𑀸𑀯𑀭𑀸? 𑀢𑁂 𑀦 𑀢𑀲𑀦𑁆𑀢𑀺 𑀦 𑀉𑀢𑁆𑀢𑀲𑀦𑁆𑀢𑀺 𑀦 𑀧𑀭𑀺𑀢𑀲𑀦𑁆𑀢𑀺 𑀦 𑀪𑀸𑀬𑀦𑁆𑀢𑀺 𑀦 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀦𑁆𑀢𑀺, 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀦𑁆𑀢𑀺 𑀣𑀸𑀯𑀭𑀸. 𑀤𑀡𑁆𑀟𑀦𑁆𑀢𑀺 𑀢𑀬𑁄 𑀤𑀡𑁆𑀟𑀸 𑁋 𑀓𑀸𑀬𑀤𑀡𑁆𑀟𑁄 𑀯𑀘𑀻𑀤𑀡𑁆𑀟𑁄 𑀫𑀦𑁄𑀤𑀡𑁆𑀟𑁄. 𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀓𑀸𑀬𑀤𑀡𑁆𑀟𑁄, 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀤𑀡𑁆𑀟𑁄, 𑀢𑀺𑀯𑀺𑀥𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀤𑀡𑁆𑀟𑁄. 𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀦𑁆𑀢𑀺 𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀤𑀡𑁆𑀟𑀁 𑀦𑀺𑀥𑀸𑀬 𑀦𑀺𑀤𑀳𑀺𑀢𑁆𑀯𑀸.

𑀅𑀯𑀺𑀳𑁂𑀞𑀬𑀁 𑀅𑀜𑁆𑀜𑀢𑀭𑀫𑁆𑀧𑀺 𑀢𑁂𑀲𑀦𑁆𑀢𑀺 𑀏𑀓𑀫𑁂𑀓𑀫𑁆𑀧𑀺 𑀲𑀢𑁆𑀢𑀁 𑀧𑀸𑀡𑀺𑀦𑀸 𑀯𑀸 𑀮𑁂𑀟𑁆𑀟𑀼𑀦𑀸 𑀯𑀸 𑀤𑀡𑁆𑀟𑁂𑀦 𑀯𑀸 𑀲𑀢𑁆𑀣𑁂𑀦 𑀯𑀸 𑀅𑀦𑁆𑀤𑀼𑀬𑀸 [𑀅𑀭𑀼𑀬𑀸 (𑀲𑁆𑀬𑀸.), 𑀅𑀤𑁆𑀤𑀼𑀬𑀸 (𑀓.)] 𑀯𑀸 𑀭𑀚𑁆𑀚𑀼𑀬𑀸 𑀯𑀸 𑀅𑀯𑀺𑀳𑁂𑀞𑀬𑀦𑁆𑀢𑁄, 𑀲𑀩𑁆𑀩𑁂𑀧𑀺 𑀲𑀢𑁆𑀢𑁂 𑀧𑀸𑀡𑀺𑀦𑀸 𑀯𑀸 𑀮𑁂𑀟𑁆𑀟𑀼𑀦𑀸 𑀯𑀸 𑀤𑀡𑁆𑀟𑁂𑀦 𑀯𑀸 𑀲𑀢𑁆𑀣𑁂𑀦 𑀯𑀸 𑀅𑀦𑁆𑀤𑀼𑀬𑀸 𑀯𑀸 𑀭𑀚𑁆𑀚𑀼𑀬𑀸 𑀯𑀸 𑀅𑀯𑀺𑀳𑁂𑀞𑀬𑀦𑁆𑀢𑁄𑀢𑀺 𑁋 𑀅𑀯𑀺𑀳𑁂𑀞𑀬𑀁 𑀅𑀜𑁆𑀜𑀢𑀭𑀫𑁆𑀧𑀺 𑀢𑁂𑀲𑀁.

𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀬𑁆𑀬 𑀓𑀼𑀢𑁄 𑀲𑀳𑀸𑀬𑀦𑁆𑀢𑀺. 𑀦𑀸𑀢𑀺 𑀧𑀝𑀺𑀓𑁆𑀔𑁂𑀧𑁄; 𑀧𑀼𑀢𑁆𑀢𑀸𑀢𑀺 𑀘𑀢𑁆𑀢𑀸𑀭𑁄 𑀧𑀼𑀢𑁆𑀢𑀸 𑁋 𑀅𑀢𑁆𑀭𑀚𑁄 𑀧𑀼𑀢𑁆𑀢𑁄, 𑀔𑁂𑀢𑁆𑀢𑀚𑁄 𑀧𑀼𑀢𑁆𑀢𑁄, 𑀤𑀺𑀦𑁆𑀦𑀓𑁄 𑀧𑀼𑀢𑁆𑀢𑁄, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀼𑀢𑁆𑀢𑁄. 𑀲𑀳𑀸𑀬𑀦𑁆𑀢𑀺 𑀲𑀳𑀸𑀬𑀸 𑀯𑀼𑀘𑁆𑀘𑀦𑁆𑀢𑀺 𑀬𑁂𑀳𑀺 𑀲𑀳 𑀆𑀕𑀫𑀦𑀁 𑀨𑀸𑀲𑀼, 𑀕𑀫𑀦𑀁 𑀨𑀸𑀲𑀼, 𑀕𑀫𑀦𑀸𑀕𑀫𑀦𑀁 𑀨𑀸𑀲𑀼, 𑀞𑀸𑀦𑀁 𑀨𑀸𑀲𑀼, 𑀦𑀺𑀲𑀚𑁆𑀚𑀦𑀁 𑀨𑀸𑀲𑀼, 𑀲𑀬𑀦𑀁 [𑀦𑀺𑀧𑀚𑁆𑀚𑀦𑀁 (𑀲𑁆𑀬𑀸.)] 𑀨𑀸𑀲𑀼, 𑀆𑀮𑀧𑀦𑀁 𑀨𑀸𑀲𑀼, 𑀲𑀮𑁆𑀮𑀧𑀦𑀁 𑀨𑀸𑀲𑀼, 𑀉𑀮𑁆𑀮𑀧𑀦𑀁 𑀨𑀸𑀲𑀼, 𑀲𑀫𑀼𑀮𑁆𑀮𑀧𑀦𑀁 𑀨𑀸𑀲𑀼. 𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀬𑁆𑀬 𑀓𑀼𑀢𑁄 𑀲𑀳𑀸𑀬𑀦𑁆𑀢𑀺 𑀧𑀼𑀢𑁆𑀢𑀫𑁆𑀧𑀺 𑀦 𑀇𑀘𑁆𑀙𑁂𑀬𑁆𑀬 𑀦 𑀲𑀸𑀤𑀺𑀬𑁂𑀬𑁆𑀬 𑀦 𑀧𑀢𑁆𑀣𑀬𑁂𑀬𑁆𑀬 𑀦 𑀧𑀺𑀳𑀬𑁂𑀬𑁆𑀬 𑀦𑀸𑀪𑀺𑀚𑀧𑁆𑀧𑁂𑀬𑁆𑀬, 𑀓𑀼𑀢𑁄 𑀫𑀺𑀢𑁆𑀢𑀁 𑀯𑀸 𑀲𑀦𑁆𑀤𑀺𑀝𑁆𑀞𑀁 𑀯𑀸 𑀲𑀫𑁆𑀪𑀢𑁆𑀢𑀁 𑀯𑀸 𑀲𑀳𑀸𑀬𑀁 𑀯𑀸 𑀇𑀘𑁆𑀙𑁂𑀬𑁆𑀬 [𑀇𑀘𑁆𑀙𑀺𑀲𑁆𑀲𑀢𑀺 (𑀲𑁆𑀬𑀸.) 𑀏𑀯𑀫𑀻𑀤𑀺𑀲𑁂𑀲𑀼 𑀧𑀤𑁂𑀲𑀼 𑀅𑀦𑀸𑀕𑀢𑀯𑀺𑀪𑀢𑁆𑀢𑀺𑀬𑀸] 𑀲𑀸𑀤𑀺𑀬𑁂𑀬𑁆𑀬 𑀧𑀢𑁆𑀣𑀬𑁂𑀬𑁆𑀬 𑀧𑀺𑀳𑀬𑁂𑀬𑁆𑀬 𑀅𑀪𑀺𑀚𑀧𑁆𑀧𑁂𑀬𑁆𑀬𑀸𑀢𑀺 𑁋 𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀬𑁆𑀬 𑀓𑀼𑀢𑁄 𑀲𑀳𑀸𑀬𑀁.

𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺. 𑀏𑀓𑁄𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑁄, 𑀅𑀤𑀼𑀢𑀺𑀬𑀝𑁆𑀞𑁂𑀦 𑀏𑀓𑁄, 𑀢𑀡𑁆𑀳𑀸𑀬 𑀧𑀳𑀸𑀦𑀝𑁆𑀞𑁂𑀦 [𑀢𑀡𑁆𑀳𑀸𑀧𑀳𑀸𑀦𑀝𑁆𑀞𑁂𑀦 (𑀲𑁆𑀬𑀸.) 𑀫𑀳𑀸𑀦𑀺. 𑁧𑁯𑁧] 𑀏𑀓𑁄, 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀏𑀓𑁄, 𑀏𑀓𑀦𑁆𑀢𑀯𑀻𑀢𑀤𑁄𑀲𑁄𑀢𑀺 𑀏𑀓𑁄, 𑀏𑀓𑀦𑁆𑀢𑀯𑀻𑀢𑀫𑁄𑀳𑁄𑀢𑀺 𑀏𑀓𑁄, 𑀏𑀓𑀦𑁆𑀢𑀦𑀺𑀓𑁆𑀓𑀺𑀮𑁂𑀲𑁄𑀢𑀺 𑀏𑀓𑁄, 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀏𑀓𑁄, 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀓𑁄.

𑀓𑀣𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑁄? 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀲𑀩𑁆𑀩𑀁 𑀖𑀭𑀸𑀯𑀸𑀲𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀜𑀸𑀢𑀺𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀦𑁆𑀦𑀺𑀥𑀺𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀓𑀺𑀜𑁆𑀘𑀦𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀏𑀓𑁄 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑁂𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀻𑀢𑀺 𑁋 𑀏𑀯𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑁄.

𑀓𑀣𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀅𑀤𑀼𑀢𑀺𑀬𑀝𑁆𑀞𑁂𑀦 𑀏𑀓𑁄? 𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀏𑀓𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀢𑀺 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀺. 𑀲𑁄 𑀏𑀓𑁄 𑀕𑀘𑁆𑀙𑀢𑀺, 𑀏𑀓𑁄 𑀢𑀺𑀝𑁆𑀞𑀢𑀺, 𑀏𑀓𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀏𑀓𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺, 𑀏𑀓𑁄 𑀅𑀪𑀺𑀓𑁆𑀓𑀫𑀢𑀺, 𑀏𑀓𑁄 𑀧𑀝𑀺𑀓𑁆𑀓𑀫𑀢𑀺, 𑀏𑀓𑁄 𑀭𑀳𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀸𑀢𑀺, 𑀏𑀓𑁄 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑁂𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀻𑀢𑀺 𑁋 𑀏𑀯𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀅𑀤𑀼𑀢𑀺𑀬𑀝𑁆𑀞𑁂𑀦 𑀏𑀓𑁄.

𑀓𑀣𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀢𑀡𑁆𑀳𑀸𑀬 𑀧𑀳𑀸𑀦𑀝𑁆𑀞𑁂𑀦 𑀏𑀓𑁄? 𑀲𑁄 𑀏𑀯𑀁 𑀏𑀓𑁄 𑀅𑀤𑀼𑀢𑀺𑀬𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀫𑀳𑀸𑀧𑀥𑀸𑀦𑀁 𑀧𑀤𑀳𑀦𑁆𑀢𑁄 𑀫𑀸𑀭𑀁 𑀲𑀲𑁂𑀦𑀓𑀁 𑀦𑀫𑀼𑀘𑀺𑀁 𑀓𑀡𑁆𑀳𑀁 𑀧𑀫𑀢𑁆𑀢𑀩𑀦𑁆𑀥𑀼𑀁 𑀯𑀺𑀥𑀫𑁂𑀢𑁆𑀯𑀸 𑀘 𑀢𑀡𑁆𑀳𑀸𑀚𑀸𑀮𑀺𑀦𑀺𑀁 𑀯𑀺𑀲𑀭𑀺𑀢𑀁 𑀯𑀺𑀲𑀢𑁆𑀢𑀺𑀓𑀁 𑀧𑀚𑀳𑀺 𑀯𑀺𑀦𑁄𑀤𑁂𑀲𑀺 𑀩𑁆𑀬𑀦𑁆𑀢𑀻𑀅𑀓𑀸𑀲𑀺 𑀅𑀦𑀪𑀸𑀯𑀁𑀕𑀫𑁂𑀲𑀺.

‘‘𑀢𑀡𑁆𑀳𑀸𑀤𑀼𑀢𑀺𑀬𑁄 𑀧𑀼𑀭𑀺𑀲𑁄, 𑀤𑀻𑀖𑀫𑀤𑁆𑀥𑀸𑀦 𑀲𑀁𑀲𑀭𑀁;

𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀁, 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀺.

‘‘𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀢𑀡𑁆𑀳𑀁 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑀁;

𑀯𑀻𑀢𑀢𑀡𑁆𑀳𑁄 𑀅𑀦𑀸𑀤𑀸𑀦𑁄, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺.

𑀏𑀯𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀢𑀡𑁆𑀳𑀸𑀬 𑀧𑀳𑀸𑀦𑀝𑁆𑀞𑁂𑀦 𑀏𑀓𑁄.

𑀓𑀣𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀏𑀓𑁄? 𑀭𑀸𑀕𑀲𑁆𑀲 𑀧𑀳𑀻𑀦𑀢𑁆𑀢𑀸 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀏𑀓𑁄, 𑀤𑁄𑀲𑀲𑁆𑀲 𑀧𑀳𑀻𑀦𑀢𑁆𑀢𑀸 𑀏𑀓𑀦𑁆𑀢𑀯𑀻𑀢𑀤𑁄𑀲𑁄𑀢𑀺 𑀏𑀓𑁄, 𑀫𑁄𑀳𑀲𑁆𑀲 𑀧𑀳𑀻𑀦𑀢𑁆𑀢𑀸 𑀏𑀓𑀦𑁆𑀢𑀯𑀻𑀢𑀫𑁄𑀳𑁄𑀢𑀺 𑀏𑀓𑁄, 𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸 𑀏𑀓𑀦𑁆𑀢𑀦𑀺𑀓𑁆𑀓𑀺𑀮𑁂𑀲𑁄𑀢𑀺 𑀏𑀓𑁄. 𑀏𑀯𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀏𑀓𑁄.

𑀓𑀣𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀏𑀓𑁄? 𑀏𑀓𑀸𑀬𑀦𑀫𑀕𑁆𑀕𑁄 𑀯𑀼𑀘𑁆𑀘𑀢𑀺 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄.

‘‘𑀏𑀓𑀸𑀬𑀦𑀁 𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀻, 𑀫𑀕𑁆𑀕𑀁 𑀧𑀚𑀸𑀦𑀸𑀢𑀺 𑀳𑀺𑀢𑀸𑀦𑀼𑀓𑀫𑁆𑀧𑀻;

𑀏𑀢𑁂𑀦 𑀫𑀕𑁆𑀕𑁂𑀦 𑀢𑀭𑀺𑀁𑀲𑀼 𑀧𑀼𑀩𑁆𑀩𑁂, 𑀢𑀭𑀺𑀲𑁆𑀲𑀦𑁆𑀢𑀺 𑀬𑁂 𑀘 𑀢𑀭𑀦𑁆𑀢𑀺 𑀑𑀖’’𑀦𑁆𑀢𑀺.

𑀏𑀯𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀏𑀓𑁄.

𑀓𑀣𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀓𑁄? 𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁. 𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮𑀁 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀯𑀻𑀫𑀁𑀲𑀸 𑀯𑀺𑀧𑀲𑁆𑀲𑀦𑀸 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀫𑀕𑁆𑀕𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀜𑀸𑀡𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀩𑀼𑀚𑁆𑀛𑀺, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺 𑀩𑀼𑀚𑁆𑀛𑀺, ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 𑀩𑀼𑀚𑁆𑀛𑀺, ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀩𑀼𑀚𑁆𑀛𑀺, ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀩𑀼𑀚𑁆𑀛𑀺, ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀩𑀼𑀚𑁆𑀛𑀺, ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺 𑀩𑀼𑀚𑁆𑀛𑀺, ‘‘𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄’’𑀢𑀺 𑀩𑀼𑀚𑁆𑀛𑀺, ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’𑀢𑀺 𑀩𑀼𑀚𑁆𑀛𑀺, ‘‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸’’𑀢𑀺 𑀩𑀼𑀚𑁆𑀛𑀺, ‘‘𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’’𑀦𑁆𑀢𑀺 𑀩𑀼𑀚𑁆𑀛𑀺, ‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’’𑀢𑀺 𑀩𑀼𑀚𑁆𑀛𑀺, ‘‘𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’’𑀢𑀺 𑀩𑀼𑀚𑁆𑀛𑀺, ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺 𑀩𑀼𑀚𑁆𑀛𑀺; ‘‘𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺, ‘‘𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺, ‘‘𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺, ‘‘𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀲𑀴𑀸𑀬𑀢𑀦𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺, ‘‘𑀲𑀴𑀸𑀬𑀢𑀦𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺, ‘‘𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺, ‘‘𑀯𑁂𑀤𑀦𑀸𑀦𑀺𑀭𑁄𑀥𑀸 𑀢𑀡𑁆𑀳𑀸𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺, ‘‘𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺, ‘‘𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺, ‘‘𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺, ‘‘𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺; ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀩𑀼𑀚𑁆𑀛𑀺, ‘‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺 𑀩𑀼𑀚𑁆𑀛𑀺, ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺, ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀩𑀼𑀚𑁆𑀛𑀺; ‘‘𑀇𑀫𑁂 𑀆𑀲𑀯𑀸’’𑀢𑀺 𑀩𑀼𑀚𑁆𑀛𑀺, ‘‘𑀅𑀬𑀁 𑀆𑀲𑀯𑀲𑀫𑀼𑀤𑀬𑁄’’𑀢𑀺 𑀩𑀼𑀚𑁆𑀛𑀺…𑀧𑁂… ‘‘𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀩𑀼𑀚𑁆𑀛𑀺; ‘‘𑀇𑀫𑁂 𑀥𑀫𑁆𑀫𑀸 𑀅𑀪𑀺𑀜𑁆𑀜𑁂𑀬𑁆𑀬𑀸’’𑀢𑀺 𑀩𑀼𑀚𑁆𑀛𑀺, ‘‘𑀇𑀫𑁂 𑀥𑀫𑁆𑀫𑀸 𑀧𑀳𑀸𑀢𑀩𑁆𑀩𑀸’’𑀢𑀺 𑀩𑀼𑀚𑁆𑀛𑀺, ‘‘𑀇𑀫𑁂 𑀥𑀫𑁆𑀫𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸’’𑀢𑀺 𑀩𑀼𑀚𑁆𑀛𑀺, ‘‘𑀇𑀫𑁂 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸’’𑀢𑀺 𑀩𑀼𑀚𑁆𑀛𑀺; 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀩𑀼𑀚𑁆𑀛𑀺, 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀲𑀫𑀼𑀤𑀬𑀜𑁆𑀘…𑀧𑁂… 𑀦𑀺𑀲𑁆𑀲𑀭𑀡𑀜𑁆𑀘 𑀩𑀼𑀚𑁆𑀛𑀺, 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀩𑀼𑀚𑁆𑀛𑀺, ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀩𑀼𑀚𑁆𑀛𑀺.

𑀅𑀣 𑀯𑀸, 𑀬𑀁 𑀩𑀼𑀚𑁆𑀛𑀺𑀢𑀩𑁆𑀩𑀁 𑀅𑀦𑀼𑀩𑀼𑀚𑁆𑀛𑀺𑀢𑀩𑁆𑀩𑀁 𑀧𑀝𑀺𑀩𑀼𑀚𑁆𑀛𑀺𑀢𑀩𑁆𑀩𑀁 𑀲𑀫𑁆𑀩𑀼𑀚𑁆𑀛𑀺𑀢𑀩𑁆𑀩𑀁 𑀅𑀥𑀺𑀕𑀦𑁆𑀢𑀩𑁆𑀩𑀁 𑀨𑀲𑁆𑀲𑀺𑀢𑀩𑁆𑀩𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀁, 𑀲𑀩𑁆𑀩𑀁 𑀢𑀁 𑀢𑁂𑀦 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑁂𑀦 𑀩𑀼𑀚𑁆𑀛𑀺 𑀅𑀦𑀼𑀩𑀼𑀚𑁆𑀛𑀺 𑀧𑀝𑀺𑀩𑀼𑀚𑁆𑀛𑀺 𑀲𑀫𑁆𑀩𑀼𑀚𑁆𑀛𑀺 𑀅𑀥𑀺𑀕𑀘𑁆𑀙𑀺 𑀨𑀲𑁆𑀲𑁂𑀲𑀺 𑀲𑀘𑁆𑀙𑀸𑀓𑀸𑀲𑀻𑀢𑀺 𑀏𑀯𑀁 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑁋 𑀏𑀓𑁄.

𑀘𑀭𑁂𑀢𑀺 𑀅𑀝𑁆𑀞 𑀘𑀭𑀺𑀬𑀸𑀬𑁄 𑁋 𑀇𑀭𑀺𑀬𑀸𑀧𑀣𑀘𑀭𑀺𑀬𑀸, 𑀆𑀬𑀢𑀦𑀘𑀭𑀺𑀬𑀸, 𑀲𑀢𑀺𑀘𑀭𑀺𑀬𑀸, 𑀲𑀫𑀸𑀥𑀺𑀘𑀭𑀺𑀬𑀸, 𑀜𑀸𑀡𑀘𑀭𑀺𑀬𑀸, 𑀫𑀕𑁆𑀕𑀘𑀭𑀺𑀬𑀸, 𑀧𑀢𑁆𑀢𑀺𑀘𑀭𑀺𑀬𑀸, 𑀮𑁄𑀓𑀢𑁆𑀣𑀘𑀭𑀺𑀬𑀸. 𑀇𑀭𑀺𑀬𑀸𑀧𑀣𑀘𑀭𑀺𑀬𑀸𑀢𑀺 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼. 𑀆𑀬𑀢𑀦𑀘𑀭𑀺𑀬𑀸𑀢𑀺 𑀙𑀲𑀼 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀆𑀬𑀢𑀦𑁂𑀲𑀼. 𑀲𑀢𑀺𑀘𑀭𑀺𑀬𑀸𑀢𑀺 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼. 𑀲𑀫𑀸𑀥𑀺𑀘𑀭𑀺𑀬𑀸𑀢𑀺 𑀘𑀢𑀽𑀲𑀼 𑀛𑀸𑀦𑁂𑀲𑀼. 𑀜𑀸𑀡𑀘𑀭𑀺𑀬𑀸𑀢𑀺 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼. 𑀫𑀕𑁆𑀕𑀘𑀭𑀺𑀬𑀸𑀢𑀺 𑀘𑀢𑀽𑀲𑀼 𑀅𑀭𑀺𑀬𑀫𑀕𑁆𑀕𑁂𑀲𑀼. 𑀧𑀢𑁆𑀢𑀺𑀘𑀭𑀺𑀬𑀸𑀢𑀺 𑀘𑀢𑀽𑀲𑀼 𑀲𑀸𑀫𑀜𑁆𑀜𑀨𑀮𑁂𑀲𑀼. 𑀮𑁄𑀓𑀢𑁆𑀣𑀘𑀭𑀺𑀬𑀸𑀢𑀺 𑀢𑀣𑀸𑀕𑀢𑁂𑀲𑀼 𑀅𑀭𑀳𑀦𑁆𑀢𑁂𑀲𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀲𑀼 𑀧𑀤𑁂𑀲𑀢𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁂𑀲𑀼 𑀧𑀤𑁂𑀲𑀢𑁄 𑀲𑀸𑀯𑀓𑁂𑀲𑀼. 𑀇𑀭𑀺𑀬𑀸𑀧𑀣𑀘𑀭𑀺𑀬𑀸 𑀘 𑀧𑀡𑀺𑀥𑀺𑀲𑀫𑁆𑀧𑀦𑁆𑀦𑀸𑀦𑀁, 𑀆𑀬𑀢𑀦𑀘𑀭𑀺𑀬𑀸 𑀘 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸𑀦𑀁, 𑀲𑀢𑀺𑀘𑀭𑀺𑀬𑀸 𑀘 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻𑀦𑀁, 𑀲𑀫𑀸𑀥𑀺𑀘𑀭𑀺𑀬𑀸 𑀘 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑀸𑀦𑀁, 𑀜𑀸𑀡𑀘𑀭𑀺𑀬𑀸 𑀘 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑀸𑀦𑀁, 𑀫𑀕𑁆𑀕𑀘𑀭𑀺𑀬𑀸 𑀘 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸𑀦𑀁, 𑀧𑀢𑁆𑀢𑀺𑀘𑀭𑀺𑀬𑀸 𑀘 𑀅𑀥𑀺𑀕𑀢𑀨𑀮𑀸𑀦𑀁, 𑀮𑁄𑀓𑀢𑁆𑀣𑀘𑀭𑀺𑀬𑀸 𑀘 𑀢𑀣𑀸𑀕𑀢𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀧𑀤𑁂𑀲𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀧𑀤𑁂𑀲𑀢𑁄 𑀲𑀸𑀯𑀓𑀸𑀦𑀁. 𑀇𑀫𑀸 𑀅𑀝𑁆𑀞 𑀘𑀭𑀺𑀬𑀸𑀬𑁄. 𑀅𑀧𑀭𑀸𑀧𑀺 𑀅𑀝𑁆𑀞 𑀘𑀭𑀺𑀬𑀸𑀬𑁄 𑁋 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀲𑀤𑁆𑀥𑀸𑀬 𑀘𑀭𑀢𑀺, 𑀧𑀕𑁆𑀕𑀡𑁆𑀳𑀦𑁆𑀢𑁄 𑀯𑀻𑀭𑀺𑀬𑁂𑀦 𑀘𑀭𑀢𑀺, 𑀉𑀧𑀝𑁆𑀞𑀧𑁂𑀦𑁆𑀢𑁄 𑀲𑀢𑀺𑀬𑀸 𑀘𑀭𑀢𑀺, 𑀅𑀯𑀺𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑁄 𑀲𑀫𑀸𑀥𑀺𑀦𑀸 𑀘𑀭𑀢𑀺, 𑀧𑀚𑀸𑀦𑀦𑁆𑀢𑁄 𑀧𑀜𑁆𑀜𑀸𑀬 𑀘𑀭𑀢𑀺, 𑀯𑀺𑀚𑀸𑀦𑀦𑁆𑀢𑁄 𑀯𑀺𑀜𑁆𑀜𑀸𑀡𑀘𑀭𑀺𑀬𑀸𑀬 𑀘𑀭𑀢𑀺. 𑀏𑀯𑀁 𑀧𑀝𑀺𑀧𑀦𑁆𑀦𑀲𑁆𑀲 𑀓𑀼𑀲𑀮𑀸 𑀥𑀫𑁆𑀫𑀸 𑀆𑀬𑀸𑀧𑁂𑀦𑁆𑀢𑀻𑀢𑀺 𑁋 𑀆𑀬𑀢𑀦𑀘𑀭𑀺𑀬𑀸𑀬 𑀘𑀭𑀢𑀺. 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀻𑀢𑀺 𑁋 𑀯𑀺𑀲𑁂𑀲𑀘𑀭𑀺𑀬𑀸𑀬 𑀘𑀭𑀢𑀺. 𑀇𑀫𑀸 𑀅𑀝𑁆𑀞 𑀘𑀭𑀺𑀬𑀸𑀬𑁄.

𑀅𑀧𑀭𑀸𑀧𑀺 𑀅𑀝𑁆𑀞 𑀘𑀭𑀺𑀬𑀸𑀬𑁄 𑁋 𑀤𑀲𑁆𑀲𑀦𑀘𑀭𑀺𑀬𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸, 𑀅𑀪𑀺𑀭𑁄𑀧𑀦𑀘𑀭𑀺𑀬𑀸 𑀘 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲, 𑀧𑀭𑀺𑀕𑁆𑀕𑀳𑀘𑀭𑀺𑀬𑀸 𑀘 𑀲𑀫𑁆𑀫𑀸𑀯𑀸𑀘𑀸𑀬, 𑀲𑀫𑀼𑀝𑁆𑀞𑀸𑀦𑀘𑀭𑀺𑀬𑀸 𑀘 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲, 𑀯𑁄𑀤𑀸𑀦𑀘𑀭𑀺𑀬𑀸 𑀘 𑀲𑀫𑁆𑀫𑀸𑀆𑀚𑀻𑀯𑀲𑁆𑀲, 𑀧𑀕𑁆𑀕𑀳𑀘𑀭𑀺𑀬𑀸 𑀘 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲, 𑀉𑀧𑀝𑁆𑀞𑀸𑀦𑀘𑀭𑀺𑀬𑀸 𑀘 𑀲𑀫𑁆𑀫𑀸𑀲𑀢𑀺𑀬𑀸, 𑀅𑀯𑀺𑀓𑁆𑀔𑁂𑀧𑀘𑀭𑀺𑀬𑀸 𑀘 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲. 𑀇𑀫𑀸 𑀅𑀝𑁆𑀞 𑀘𑀭𑀺𑀬𑀸𑀬𑁄.

𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺 𑀬𑀣𑀸 𑀔𑀕𑁆𑀕𑀲𑁆𑀲 𑀦𑀸𑀫 𑀯𑀺𑀲𑀸𑀡𑀁 𑀏𑀓𑀁 𑀳𑁄𑀢𑀺 𑀅𑀤𑀼𑀢𑀺𑀬𑀁, 𑀏𑀯𑀫𑁂𑀯 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀢𑀓𑁆𑀓𑀧𑁆𑀧𑁄 𑀢𑀲𑁆𑀲𑀤𑀺𑀲𑁄 𑀢𑀧𑁆𑀧𑀝𑀺𑀪𑀸𑀕𑁄. 𑀬𑀣𑀸 𑀅𑀢𑀺𑀮𑁄𑀡𑀁 𑀯𑀼𑀘𑁆𑀘𑀢𑀺 𑀮𑁄𑀡𑀓𑀧𑁆𑀧𑁄, 𑀅𑀢𑀺𑀢𑀺𑀢𑁆𑀢𑀓𑀁 𑀯𑀼𑀘𑁆𑀘𑀢𑀺 𑀢𑀺𑀢𑁆𑀢𑀓𑀧𑁆𑀧𑁄, 𑀅𑀢𑀺𑀫𑀥𑀼𑀭𑀁 𑀯𑀼𑀘𑁆𑀘𑀢𑀺 𑀫𑀥𑀼𑀭𑀓𑀧𑁆𑀧𑁄, 𑀅𑀢𑀺𑀉𑀡𑁆𑀳𑀁 𑀯𑀼𑀘𑁆𑀘𑀢𑀺 𑀅𑀕𑁆𑀕𑀺𑀓𑀧𑁆𑀧𑁄, 𑀅𑀢𑀺𑀲𑀻𑀢𑀮𑀁 𑀯𑀼𑀘𑁆𑀘𑀢𑀺 𑀳𑀺𑀫𑀓𑀧𑁆𑀧𑁄, 𑀫𑀳𑀸𑀉𑀤𑀓𑀓𑁆𑀔𑀦𑁆𑀥𑁄 𑀯𑀼𑀘𑁆𑀘𑀢𑀺 𑀲𑀫𑀼𑀤𑁆𑀤𑀓𑀧𑁆𑀧𑁄, 𑀫𑀳𑀸𑀪𑀺𑀜𑁆𑀜𑀸𑀩𑀮𑀧𑁆𑀧𑀢𑁆𑀢𑁄 𑀲𑀸𑀯𑀓𑁄 𑀯𑀼𑀘𑁆𑀘𑀢𑀺 𑀲𑀢𑁆𑀣𑀼𑀓𑀧𑁆𑀧𑁄𑀢𑀺; 𑀏𑀯𑀫𑁂𑀯 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀢𑀢𑁆𑀣 𑀢𑀓𑁆𑀓𑀧𑁆𑀧𑁄 𑀢𑀲𑁆𑀲𑀤𑀺𑀲𑁄 𑀢𑀧𑁆𑀧𑀝𑀺𑀪𑀸𑀕𑁄 𑀏𑀓𑁄 𑀅𑀤𑀼𑀢𑀺𑀬𑁄 𑀫𑀼𑀢𑁆𑀢𑀩𑀦𑁆𑀥𑀦𑁄 𑀲𑀫𑁆𑀫𑀸 𑀮𑁄𑀓𑁂 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑁂𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀻𑀢𑀺 𑁋 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀁, 𑀅𑀯𑀺𑀳𑁂𑀞𑀬𑀁 𑀅𑀜𑁆𑀜𑀢𑀭𑀫𑁆𑀧𑀺 𑀢𑁂𑀲𑀁;

𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀬𑁆𑀬 𑀓𑀼𑀢𑁄 𑀲𑀳𑀸𑀬𑀁, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁨𑁨. 𑀲𑀁𑀲𑀕𑁆𑀕𑀚𑀸𑀢𑀲𑁆𑀲 𑀪𑀯𑀦𑁆𑀢𑀺 𑀲𑁆𑀦𑁂𑀳𑀸,𑀲𑁆𑀦𑁂𑀳𑀦𑁆𑀯𑀬𑀁 𑀤𑀼𑀓𑁆𑀔𑀫𑀺𑀤𑀁 𑀧𑀳𑁄𑀢𑀺;

𑀆𑀤𑀻𑀦𑀯𑀁 𑀲𑁆𑀦𑁂𑀳𑀚𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀲𑀁𑀲𑀕𑁆𑀕𑀚𑀸𑀢𑀲𑁆𑀲 𑀪𑀯𑀦𑁆𑀢𑀺 𑀲𑁆𑀦𑁂𑀳𑀸𑀢𑀺. 𑀲𑀁𑀲𑀕𑁆𑀕𑀸𑀢𑀺 𑀤𑁆𑀯𑁂 𑀲𑀁𑀲𑀕𑁆𑀕𑀸 𑁋 𑀤𑀲𑁆𑀲𑀦𑀲𑀁𑀲𑀕𑁆𑀕𑁄 𑀘 𑀲𑀯𑀦𑀲𑀁𑀲𑀕𑁆𑀕𑁄 𑀘. 𑀓𑀢𑀫𑁄 𑀤𑀲𑁆𑀲𑀦𑀲𑀁𑀲𑀕𑁆𑀕𑁄? 𑀇𑀥𑁂𑀓𑀘𑁆𑀘𑁄 𑀧𑀲𑁆𑀲𑀢𑀺 𑀇𑀢𑁆𑀣𑀺𑀁 𑀯𑀸 𑀓𑀼𑀫𑀸𑀭𑀺𑀁 𑀯𑀸 𑀅𑀪𑀺𑀭𑀽𑀧𑀁 𑀤𑀲𑁆𑀲𑀦𑀻𑀬𑀁 𑀧𑀸𑀲𑀸𑀤𑀺𑀓𑀁 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀁. 𑀤𑀺𑀲𑁆𑀯𑀸 𑀧𑀲𑁆𑀲𑀺𑀢𑁆𑀯𑀸 𑀅𑀦𑀼𑀩𑁆𑀬𑀜𑁆𑀚𑀦𑀲𑁄 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀺 𑁋 𑀓𑁂𑀲𑀸 𑀯𑀸 𑀲𑁄𑀪𑀦𑀸 [𑀲𑁄𑀪𑀡𑀸 (𑀲𑁆𑀬𑀸.)] 𑀫𑀼𑀔𑀁 𑀯𑀸 𑀲𑁄𑀪𑀦𑀁 𑀅𑀓𑁆𑀔𑀻 𑀯𑀸 𑀲𑁄𑀪𑀦𑀸 𑀓𑀡𑁆𑀡𑀸 𑀯𑀸 𑀲𑁄𑀪𑀦𑀸 𑀦𑀸𑀲𑀸 𑀯𑀸 𑀲𑁄𑀪𑀦𑀸 𑀑𑀝𑁆𑀞𑀸 𑀯𑀸 𑀲𑁄𑀪𑀦𑀸 𑀤𑀦𑁆𑀢𑀸 𑀯𑀸 𑀲𑁄𑀪𑀦𑀸 𑀫𑀼𑀔𑀁 𑀯𑀸 𑀲𑁄𑀪𑀦𑀁 𑀕𑀻𑀯𑀸 𑀯𑀸 𑀲𑁄𑀪𑀦𑀸 𑀣𑀦𑀸 𑀯𑀸 𑀲𑁄𑀪𑀦𑀸 𑀉𑀭𑀁 𑀯𑀸 𑀲𑁄𑀪𑀦𑀁 𑀉𑀤𑀭𑀁 𑀯𑀸 𑀲𑁄𑀪𑀦𑀁 𑀓𑀝𑀺 𑀯𑀸 𑀲𑁄𑀪𑀦𑀸 𑀊𑀭𑀽 𑀯𑀸 𑀲𑁄𑀪𑀦𑀸 𑀚𑀗𑁆𑀖𑀸 𑀯𑀸 𑀲𑁄𑀪𑀦𑀸 𑀳𑀢𑁆𑀣𑀸 𑀯𑀸 𑀲𑁄𑀪𑀦𑀸 𑀧𑀸𑀤𑀸 𑀯𑀸 𑀲𑁄𑀪𑀦𑀸 𑀅𑀗𑁆𑀕𑀼𑀮𑀺𑀬𑁄 𑀯𑀸 𑀲𑁄𑀪𑀦𑀸 𑀦𑀔𑀸 𑀯𑀸 𑀲𑁄𑀪𑀦𑀸𑀢𑀺. 𑀤𑀺𑀲𑁆𑀯𑀸 𑀧𑀲𑁆𑀲𑀺𑀢𑁆𑀯𑀸 𑀅𑀪𑀺𑀦𑀦𑁆𑀤𑀢𑀺 𑀅𑀪𑀺𑀯𑀤𑀢𑀺 𑀅𑀪𑀺𑀧𑀢𑁆𑀣𑁂𑀢𑀺 𑀅𑀦𑀼𑀧𑁆𑀧𑀸𑀤𑁂𑀢𑀺 [𑀅𑀦𑀼𑀲𑁆𑀲𑀭𑀢𑀺 (𑀓.)] 𑀅𑀦𑀼𑀩𑀦𑁆𑀥𑀢𑀺 𑀭𑀸𑀕𑀩𑀦𑁆𑀥𑀦𑀁 𑁋 𑀅𑀬𑀁 𑀤𑀲𑁆𑀲𑀦𑀲𑀁𑀲𑀕𑁆𑀕𑁄.

𑀓𑀢𑀫𑁄 𑀲𑀯𑀦𑀲𑀁𑀲𑀕𑁆𑀕𑁄? 𑀇𑀥𑁂𑀓𑀘𑁆𑀘𑁄 𑀲𑀼𑀡𑀸𑀢𑀺 𑁋 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀇𑀢𑁆𑀣𑀻 𑀯𑀸 𑀓𑀼𑀫𑀸𑀭𑀻 𑀯𑀸 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀸’’𑀢𑀺. 𑀲𑀼𑀢𑁆𑀯𑀸 𑀲𑀼𑀡𑀺𑀢𑁆𑀯𑀸 𑀅𑀪𑀺𑀦𑀦𑁆𑀤𑀢𑀺 𑀅𑀪𑀺𑀯𑀤𑀢𑀺 𑀅𑀪𑀺𑀧𑀢𑁆𑀣𑁂𑀢𑀺 𑀅𑀦𑀼𑀧𑁆𑀧𑀸𑀤𑁂𑀢𑀺 𑀅𑀦𑀼𑀩𑀦𑁆𑀥𑀢𑀺 𑀭𑀸𑀕𑀩𑀦𑁆𑀥𑀦𑀁 𑁋 𑀅𑀬𑀁 𑀲𑀯𑀦𑀲𑀁𑀲𑀕𑁆𑀕𑁄.

𑀲𑁆𑀦𑁂𑀳𑀸𑀢𑀺 𑀤𑁆𑀯𑁂 𑀲𑁆𑀦𑁂𑀳𑀸 𑁋 𑀢𑀡𑁆𑀳𑀸𑀲𑁆𑀦𑁂𑀳𑁄 𑀘 𑀤𑀺𑀝𑁆𑀞𑀺𑀲𑁆𑀦𑁂𑀳𑁄 𑀘. 𑀓𑀢𑀫𑁄 𑀢𑀡𑁆𑀳𑀸𑀲𑁆𑀦𑁂𑀳𑁄? 𑀬𑀸𑀯𑀢𑀸 𑀢𑀡𑁆𑀳𑀸𑀲𑀗𑁆𑀔𑀸𑀢𑁂𑀦 𑀲𑀻𑀫𑀓𑀢𑀁 [𑀲𑀻𑀫𑀓𑀢𑀁 𑀫𑀭𑀺𑀬𑀸𑀤𑀺𑀓𑀢𑀁 (𑀲𑁆𑀬𑀸.)] 𑀑𑀥𑀺𑀓𑀢𑀁 𑀧𑀭𑀺𑀬𑀦𑁆𑀢𑀺𑀓𑀢𑀁 𑀧𑀭𑀺𑀕𑁆𑀕𑀳𑀺𑀢𑀁 𑀫𑀫𑀸𑀬𑀺𑀢𑀁 𑁋 ‘‘𑀇𑀤𑀁 𑀫𑀫, 𑀏𑀢𑀁 𑀫𑀫, 𑀏𑀢𑁆𑀢𑀓𑀁 𑀫𑀫, 𑀏𑀢𑁆𑀢𑀸𑀯𑀢𑀸 𑀫𑀫’’. 𑀭𑀽𑀧𑀸 𑀲𑀤𑁆𑀤𑀸 𑀕𑀦𑁆𑀥𑀸 𑀭𑀲𑀸 𑀨𑁄𑀝𑁆𑀞𑀩𑁆𑀩𑀸 𑀅𑀢𑁆𑀣𑀭𑀡𑀸 𑀧𑀸𑀯𑀼𑀭𑀡𑀸 𑀤𑀸𑀲𑀺𑀤𑀸𑀲𑀸 𑀅𑀚𑁂𑀴𑀓𑀸 𑀓𑀼𑀓𑁆𑀓𑀼𑀝𑀲𑀽𑀓𑀭𑀸 𑀳𑀢𑁆𑀣𑀺𑀕𑀯𑀸𑀲𑁆𑀲𑀯𑀴𑀯𑀸 𑀔𑁂𑀢𑁆𑀢𑀁 𑀯𑀢𑁆𑀣𑀼 𑀳𑀺𑀭𑀜𑁆𑀜𑀁 𑀲𑀼𑀯𑀡𑁆𑀡𑀁 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀭𑀝𑁆𑀞𑀜𑁆𑀘 𑀚𑀦𑀧𑀤𑁄 𑀘 𑀓𑁄𑀲𑁄 𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘, 𑀓𑁂𑀯𑀮𑀫𑁆𑀧𑀺 𑀫𑀳𑀸𑀧𑀣𑀯𑀺𑀁 𑀢𑀡𑁆𑀳𑀸𑀯𑀲𑁂𑀦 𑀫𑀫𑀸𑀬𑀢𑀺, 𑀬𑀸𑀯𑀢𑀸 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀁 𑁋 𑀅𑀬𑀁 𑀢𑀡𑁆𑀳𑀸𑀲𑁆𑀦𑁂𑀳𑁄.

𑀓𑀢𑀫𑁄 𑀤𑀺𑀝𑁆𑀞𑀺𑀲𑁆𑀦𑁂𑀳𑁄? 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀤𑀲𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀤𑀲𑀯𑀢𑁆𑀣𑀼𑀓𑀸 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀤𑀺𑀝𑁆𑀞𑀺. 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁 𑀤𑀺𑀝𑁆𑀞𑀺𑀕𑀳𑀦𑀁 𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑁄 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀬𑀺𑀓𑀁 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀁 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀁 𑀕𑀸𑀳𑁄 𑀧𑀝𑀺𑀕𑁆𑀕𑀸𑀳𑁄 [𑀧𑀢𑀺𑀝𑁆𑀞𑀸𑀳𑁄 (𑀓.)] 𑀅𑀪𑀺𑀦𑀺𑀯𑁂𑀲𑁄 𑀧𑀭𑀸𑀫𑀸𑀲𑁄 𑀓𑀼𑀫𑁆𑀫𑀕𑁆𑀕𑁄 𑀫𑀺𑀘𑁆𑀙𑀸𑀧𑀣𑁄 𑀫𑀺𑀘𑁆𑀙𑀢𑁆𑀢𑀁 𑀢𑀺𑀢𑁆𑀣𑀸𑀬𑀢𑀦𑀁 𑀯𑀺𑀧𑀭𑀺𑀬𑀸𑀲𑀕𑁆𑀕𑀸𑀳𑁄 𑀯𑀺𑀧𑀭𑀻𑀢𑀕𑁆𑀕𑀸𑀳𑁄 𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑁄 𑀫𑀺𑀘𑁆𑀙𑀸𑀕𑀸𑀳𑁄 𑀅𑀬𑀸𑀣𑀸𑀯𑀓𑀲𑁆𑀫𑀺𑀁 𑀬𑀸𑀣𑀸𑀯𑀓𑀦𑁆𑀢𑀺 𑀕𑀸𑀳𑁄, 𑀬𑀸𑀯𑀢𑀸 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑁋 𑀅𑀬𑀁 𑀤𑀺𑀝𑁆𑀞𑀺𑀲𑁆𑀦𑁂𑀳𑁄.

𑀲𑀁𑀲𑀕𑁆𑀕𑀚𑀸𑀢𑀲𑁆𑀲 𑀪𑀯𑀦𑁆𑀢𑀺 𑀲𑁆𑀦𑁂𑀳𑀸𑀢𑀺 𑀤𑀲𑁆𑀲𑀦𑀲𑀁𑀲𑀕𑁆𑀕𑀧𑀘𑁆𑀘𑀬𑀸 𑀘 𑀲𑀯𑀦𑀲𑀁𑀲𑀕𑁆𑀕𑀧𑀘𑁆𑀘𑀬𑀸 𑀘 𑀢𑀡𑁆𑀳𑀸𑀲𑁆𑀦𑁂𑀳𑁄 𑀘 𑀤𑀺𑀝𑁆𑀞𑀺𑀲𑁆𑀦𑁂𑀳𑁄 𑀘 𑀪𑀯𑀦𑁆𑀢𑀺 𑀲𑀫𑁆𑀪𑀯𑀦𑁆𑀢𑀺 𑀚𑀸𑀬𑀦𑁆𑀢𑀺 𑀲𑀜𑁆𑀚𑀸𑀬𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑁋 𑀲𑀁𑀲𑀕𑁆𑀕𑀚𑀸𑀢𑀲𑁆𑀲 𑀪𑀯𑀦𑁆𑀢𑀺 𑀲𑁆𑀦𑁂𑀳𑀸.

𑀲𑁆𑀦𑁂𑀳𑀦𑁆𑀯𑀬𑀁 𑀤𑀼𑀓𑁆𑀔𑀫𑀺𑀤𑀁 𑀧𑀳𑁄𑀢𑀻𑀢𑀺. 𑀲𑁆𑀦𑁂𑀳𑁄𑀢𑀺 𑀤𑁆𑀯𑁂 𑀲𑁆𑀦𑁂𑀳𑀸 𑁋 𑀢𑀡𑁆𑀳𑀸𑀲𑁆𑀦𑁂𑀳𑁄 𑀘 𑀤𑀺𑀝𑁆𑀞𑀺𑀲𑁆𑀦𑁂𑀳𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀲𑁆𑀦𑁂𑀳𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀲𑁆𑀦𑁂𑀳𑁄. 𑀤𑀼𑀓𑁆𑀔𑀫𑀺𑀤𑀁 𑀧𑀳𑁄𑀢𑀻𑀢𑀺 𑀇𑀥𑁂𑀓𑀘𑁆𑀘𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀧𑀸𑀡𑀫𑁆𑀧𑀺 𑀳𑀦𑀢𑀺, 𑀅𑀤𑀺𑀦𑁆𑀦𑀫𑁆𑀧𑀺 𑀆𑀤𑀺𑀬𑀢𑀺, 𑀲𑀦𑁆𑀥𑀺𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀦𑀺𑀮𑁆𑀮𑁄𑀧𑀫𑁆𑀧𑀺 [𑀯𑀺𑀮𑁄𑀧𑀫𑁆𑀧𑀺 (𑀲𑁆𑀬𑀸.) 𑀧𑀲𑁆𑀲 𑀫𑀳𑀸𑀦𑀺. 𑁧𑁭𑁦] 𑀳𑀭𑀢𑀺, 𑀏𑀓𑀸𑀕𑀸𑀭𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀧𑀭𑀺𑀧𑀦𑁆𑀣𑁂𑀧𑀺 𑀢𑀺𑀝𑁆𑀞𑀢𑀺, 𑀧𑀭𑀤𑀸𑀭𑀫𑁆𑀧𑀺 𑀕𑀘𑁆𑀙𑀢𑀺, 𑀫𑀼𑀲𑀸𑀧𑀺 𑀪𑀡𑀢𑀺. 𑀢𑀫𑁂𑀦𑀁 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀦𑁆𑀢𑀺 𑁋 ‘‘𑀅𑀬𑀁, 𑀤𑁂𑀯, 𑀘𑁄𑀭𑁄 𑀆𑀕𑀼𑀘𑀸𑀭𑀻. 𑀇𑀫𑀲𑁆𑀲 𑀬𑀁 𑀇𑀘𑁆𑀙𑀲𑀺 𑀢𑀁 𑀤𑀡𑁆𑀟𑀁 𑀧𑀡𑁂𑀳𑀻’’𑀢𑀺. 𑀢𑀫𑁂𑀦𑀁 𑀭𑀸𑀚𑀸 𑀢𑀁 𑀧𑀭𑀺𑀪𑀸𑀲𑀢𑀺. 𑀲𑁄 𑀧𑀭𑀺𑀪𑀸𑀲𑀧𑀘𑁆𑀘𑀬𑀸𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 [𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀁 (𑀲𑁆𑀬𑀸.)] 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀏𑀢𑀁 𑀪𑀬𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀓𑀼𑀢𑁄 𑀚𑀸𑀢𑀁? 𑀢𑀲𑁆𑀲 𑀲𑁆𑀦𑁂𑀳𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀧𑀘𑁆𑀘𑀬𑀸 𑀘 𑀭𑀸𑀕𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀭𑀸𑀕𑀧𑀘𑁆𑀘𑀬𑀸 𑀘 𑀚𑀸𑀢𑀁.

𑀏𑀢𑁆𑀢𑀓𑁂𑀦𑀧𑀺 𑀭𑀸𑀚𑀸 𑀦 𑀢𑀼𑀲𑁆𑀲𑀢𑀺. 𑀢𑀫𑁂𑀦𑀁 𑀭𑀸𑀚𑀸 𑀩𑀦𑁆𑀥𑀸𑀧𑁂𑀢𑀺 𑁋 𑀅𑀦𑁆𑀤𑀼𑀩𑀦𑁆𑀥𑀦𑁂𑀦 𑀯𑀸 𑀭𑀚𑁆𑀚𑀼𑀩𑀦𑁆𑀥𑀦𑁂𑀦 𑀯𑀸 𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑁂𑀦 𑀯𑀸 𑀯𑁂𑀢𑁆𑀢𑀩𑀦𑁆𑀥𑀦𑁂𑀦 𑀯𑀸 𑀮𑀢𑀸𑀩𑀦𑁆𑀥𑀦𑁂𑀦 𑀯𑀸 𑀧𑀓𑁆𑀔𑁂𑀧𑀩𑀦𑁆𑀥𑀦𑁂𑀦 𑀯𑀸 𑀧𑀭𑀺𑀓𑁆𑀔𑁂𑀧𑀩𑀦𑁆𑀥𑀦𑁂𑀦 𑀯𑀸 𑀕𑀸𑀫𑀩𑀦𑁆𑀥𑀦𑁂𑀦 𑀯𑀸 𑀦𑀺𑀕𑀫𑀩𑀦𑁆𑀥𑀦𑁂𑀦 𑀯𑀸 𑀭𑀝𑁆𑀞𑀩𑀦𑁆𑀥𑀦𑁂𑀦 𑀯𑀸 𑀚𑀦𑀧𑀤𑀩𑀦𑁆𑀥𑀦𑁂𑀦 𑀯𑀸, 𑀅𑀦𑁆𑀢𑀫𑀲𑁄 𑀲𑀯𑀘𑀦𑀻𑀬𑀫𑁆𑀧𑀺 𑀓𑀭𑁄𑀢𑀺 𑁋 ‘‘𑀦 𑀢𑁂 𑀮𑀩𑁆𑀪𑀸 𑀇𑀢𑁄 𑀧𑀓𑁆𑀓𑀫𑀺𑀢𑀼’’𑀦𑁆𑀢𑀺. 𑀲𑁄 𑀩𑀦𑁆𑀥𑀦𑀧𑀘𑁆𑀘𑀬𑀸𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀏𑀢𑀁 𑀪𑀬𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀓𑀼𑀢𑁄 𑀚𑀸𑀢𑀁? 𑀢𑀲𑁆𑀲 𑀲𑁆𑀦𑁂𑀳𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀧𑀘𑁆𑀘𑀬𑀸 𑀘 𑀭𑀸𑀕𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀭𑀸𑀕𑀧𑀘𑁆𑀘𑀬𑀸 𑀘 𑀚𑀸𑀢𑀁.

𑀏𑀢𑁆𑀢𑀓𑁂𑀦𑀧𑀺 𑀭𑀸𑀚𑀸 𑀦 𑀢𑀼𑀲𑁆𑀲𑀢𑀺. 𑀢𑀫𑁂𑀦𑀁 𑀭𑀸𑀚𑀸 𑀢𑀲𑁆𑀲𑁂𑀯 [𑀢𑀲𑁆𑀲 (𑀲𑁆𑀬𑀸.)] 𑀥𑀦𑀁 𑀆𑀳𑀭𑀸𑀧𑁂𑀢𑀺 𑁋 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀲𑀢𑀲𑀳𑀲𑁆𑀲𑀁 𑀯𑀸. 𑀲𑁄 𑀥𑀦𑀚𑀸𑀦𑀺𑀧𑀘𑁆𑀘𑀬𑀸𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀏𑀢𑀁 𑀪𑀬𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀓𑀼𑀢𑁄 𑀚𑀸𑀢𑀁? 𑀢𑀲𑁆𑀲 𑀲𑁆𑀦𑁂𑀳𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀧𑀘𑁆𑀘𑀬𑀸 𑀘 𑀭𑀸𑀕𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀭𑀸𑀕𑀧𑀘𑁆𑀘𑀬𑀸 𑀘 𑀚𑀸𑀢𑀁.

𑀏𑀢𑁆𑀢𑀓𑁂𑀦𑀧𑀺 𑀭𑀸𑀚𑀸 𑀦 𑀢𑀼𑀲𑁆𑀲𑀢𑀺. 𑀢𑀫𑁂𑀦𑀁 𑀭𑀸𑀚𑀸 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸 [𑀯𑀺𑀯𑀺𑀥𑀸𑀦𑀺 𑀓𑀫𑁆𑀫𑀓𑀭𑀡𑀸𑀦𑀺 (𑀓.)] 𑀓𑀸𑀭𑀸𑀧𑁂𑀢𑀺 𑁋 𑀓𑀲𑀸𑀳𑀺𑀧𑀺 𑀢𑀸𑀴𑁂𑀢𑀺, 𑀯𑁂𑀢𑁆𑀢𑁂𑀳𑀺𑀧𑀺 𑀢𑀸𑀴𑁂𑀢𑀺, 𑀅𑀟𑁆𑀠𑀤𑀡𑁆𑀟𑁂𑀳𑀺𑀧𑀺 𑀢𑀸𑀴𑁂𑀢𑀺, 𑀳𑀢𑁆𑀣𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀧𑀸𑀤𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀳𑀢𑁆𑀣𑀧𑀸𑀤𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀓𑀡𑁆𑀡𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀦𑀸𑀲𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀓𑀡𑁆𑀡𑀦𑀸𑀲𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀩𑀺𑀮𑀗𑁆𑀕𑀣𑀸𑀮𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀲𑀗𑁆𑀔𑀫𑀼𑀡𑁆𑀟𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀭𑀸𑀳𑀼𑀫𑀼𑀔𑀫𑁆𑀧𑀺 𑀓𑀭𑁄𑀢𑀺, 𑀚𑁄𑀢𑀺𑀫𑀸𑀮𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀳𑀢𑁆𑀣𑀧𑀚𑁆𑀚𑁄𑀢𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀏𑀭𑀓𑀯𑀢𑁆𑀢𑀺𑀓𑀫𑁆𑀧𑀺 [𑀏𑀭𑀓𑀯𑀝𑁆𑀝𑀺𑀓𑀫𑁆𑀧𑀺 (𑀲𑁆𑀬𑀸. 𑀓.) 𑀧𑀲𑁆𑀲 𑀫. 𑀦𑀺. 𑁧.𑁧𑁬𑁯] 𑀓𑀭𑁄𑀢𑀺, 𑀘𑀻𑀭𑀓𑀯𑀸𑀲𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀏𑀡𑁂𑀬𑁆𑀬𑀓𑀫𑁆𑀧𑀺 𑀓𑀭𑁄𑀢𑀺, 𑀩𑀴𑀺𑀲𑀫𑀁𑀲𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀓𑀳𑀸𑀧𑀡𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀔𑀸𑀭𑀸𑀧𑀢𑀘𑁆𑀙𑀺𑀓𑀫𑁆𑀧𑀺 [𑀔𑀸𑀭𑀸𑀧𑀝𑀺𑀘𑁆𑀙𑀺𑀓𑀫𑁆𑀧𑀺 (𑀓.)] 𑀓𑀭𑁄𑀢𑀺, 𑀧𑀮𑀺𑀖𑀧𑀭𑀺𑀯𑀢𑁆𑀢𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀧𑀮𑀸𑀮𑀧𑀻𑀞𑀓𑀫𑁆𑀧𑀺 𑀓𑀭𑁄𑀢𑀺, 𑀢𑀢𑁆𑀢𑁂𑀦𑀧𑀺 𑀢𑁂𑀮𑁂𑀦 𑀑𑀲𑀺𑀜𑁆𑀘𑀢𑀺, 𑀲𑀼𑀦𑀔𑁂𑀳𑀺𑀧𑀺 𑀔𑀸𑀤𑀸𑀧𑁂𑀢𑀺, 𑀚𑀻𑀯𑀦𑁆𑀢𑀫𑁆𑀧𑀺 𑀲𑀽𑀮𑁂 𑀉𑀢𑁆𑀢𑀸𑀲𑁂𑀢𑀺, 𑀅𑀲𑀺𑀦𑀸𑀧𑀺 𑀲𑀻𑀲𑀁 𑀙𑀺𑀦𑁆𑀤𑀢𑀺. 𑀲𑁄 𑀓𑀫𑁆𑀫𑀓𑀸𑀭𑀡𑀧𑀘𑁆𑀘𑀬𑀸𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀏𑀢𑀁 𑀪𑀬𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀓𑀼𑀢𑁄 𑀚𑀸𑀢𑀁? 𑀢𑀲𑁆𑀲 𑀲𑁆𑀦𑁂𑀳𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀧𑀘𑁆𑀘𑀬𑀸 𑀘 𑀭𑀸𑀕𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀭𑀸𑀕𑀧𑀘𑁆𑀘𑀬𑀸 𑀘 𑀚𑀸𑀢𑀁. 𑀭𑀸𑀚𑀸 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀤𑀡𑁆𑀟𑀸𑀦𑀁 𑀇𑀲𑁆𑀲𑀭𑁄.

𑀲𑁄 𑀲𑀓𑁂𑀦 𑀓𑀫𑁆𑀫𑁂𑀦 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀢𑀫𑁂𑀦𑀁 𑀦𑀺𑀭𑀬𑀧𑀸𑀮𑀸 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀁 𑀦𑀸𑀫 𑀓𑀫𑁆𑀫𑀓𑀸𑀭𑀡𑀁 𑀓𑀭𑁄𑀦𑁆𑀢𑀺 [𑀓𑀸𑀭𑁂𑀦𑁆𑀢𑀺 (𑀲𑁆𑀬𑀸. 𑀓.) 𑀧𑀲𑁆𑀲 𑀫. 𑀦𑀺. 𑁩.𑁨𑁬𑁭] 𑁋 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀳𑀢𑁆𑀣𑁂 𑀕𑀫𑁂𑀦𑁆𑀢𑀺, 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀤𑀼𑀢𑀺𑀬𑁂 𑀳𑀢𑁆𑀣𑁂 𑀕𑀫𑁂𑀦𑁆𑀢𑀺, 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀧𑀸𑀤𑁂 𑀕𑀫𑁂𑀦𑁆𑀢𑀺, 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀤𑀼𑀢𑀺𑀬𑁂 𑀧𑀸𑀤𑁂 𑀕𑀫𑁂𑀦𑁆𑀢𑀺, 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀫𑀚𑁆𑀛𑁂 𑀉𑀭𑀲𑁆𑀫𑀺𑀁 𑀕𑀫𑁂𑀦𑁆𑀢𑀺. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 [𑀢𑀺𑀧𑁆𑀧𑀸 (𑀲𑁆𑀬𑀸.)] 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑁂𑀢𑀺; 𑀦 𑀘 𑀢𑀸𑀯 𑀓𑀸𑀮𑀁 𑀓𑀭𑁄𑀢𑀺 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻𑀳𑁄𑀢𑀺. 𑀏𑀢𑀁 𑀪𑀬𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀓𑀼𑀢𑁄 𑀚𑀸𑀢𑀁? 𑀢𑀲𑁆𑀲 𑀲𑁆𑀦𑁂𑀳𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀧𑀘𑁆𑀘𑀬𑀸 𑀘 𑀭𑀸𑀕𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀭𑀸𑀕𑀧𑀘𑁆𑀘𑀬𑀸 𑀘 𑀚𑀸𑀢𑀁.

𑀢𑀫𑁂𑀦𑀁 𑀦𑀺𑀭𑀬𑀧𑀸𑀮𑀸 𑀲𑀁𑀯𑁂𑀲𑁂𑀢𑁆𑀯𑀸 [𑀲𑀁𑀯𑁂𑀲𑀺𑀢𑁆𑀯𑀸 (𑀲𑁆𑀬𑀸. 𑀓.) 𑀧𑀲𑁆𑀲 𑀫. 𑀦𑀺. 𑁩.𑁨𑁬𑁭] 𑀓𑀼𑀞𑀸𑀭𑀻𑀳𑀺 [𑀓𑀼𑀥𑀸𑀭𑀻𑀳𑀺 (𑀲𑁆𑀬𑀸. 𑀓.)] 𑀢𑀘𑁆𑀙𑀦𑁆𑀢𑀺…𑀧𑁂… 𑀢𑀫𑁂𑀦𑀁 𑀦𑀺𑀭𑀬𑀧𑀸𑀮𑀸 𑀉𑀤𑁆𑀥𑀁𑀧𑀸𑀤𑀁 𑀅𑀥𑁄𑀲𑀺𑀭𑀁 𑀕𑀳𑁂𑀢𑁆𑀯𑀸 𑀯𑀸𑀲𑀻𑀳𑀺 𑀢𑀘𑁆𑀙𑀦𑁆𑀢𑀺. 𑀢𑀫𑁂𑀦𑀁 𑀦𑀺𑀭𑀬𑀧𑀸𑀮𑀸 𑀭𑀣𑁂 𑀬𑁄𑀚𑁂𑀢𑁆𑀯𑀸 𑀆𑀤𑀺𑀢𑁆𑀢𑀸𑀬 𑀧𑀣𑀯𑀺𑀬𑀸 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀲𑀚𑁄𑀢𑀺𑀪𑀽𑀢𑀸𑀬 [𑀲𑀜𑁆𑀚𑁄𑀢𑀺𑀪𑀽𑀢𑀸𑀬 (𑀲𑁆𑀬𑀸.)] 𑀲𑀸𑀭𑁂𑀦𑁆𑀢𑀺𑀧𑀺 𑀧𑀘𑁆𑀘𑀸𑀲𑀸𑀭𑁂𑀦𑁆𑀢𑀺𑀧𑀺. 𑀢𑀫𑁂𑀦𑀁 𑀦𑀺𑀭𑀬𑀧𑀸𑀮𑀸 𑀫𑀳𑀦𑁆𑀢𑀁 𑀅𑀗𑁆𑀕𑀸𑀭𑀧𑀩𑁆𑀩𑀢𑀁 𑀆𑀤𑀺𑀢𑁆𑀢𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁 𑀆𑀭𑁄𑀧𑁂𑀦𑁆𑀢𑀺𑀧𑀺 𑀑𑀭𑁄𑀧𑁂𑀦𑁆𑀢𑀺𑀧𑀺. 𑀢𑀫𑁂𑀦𑀁 𑀦𑀺𑀭𑀬𑀧𑀸𑀮𑀸 𑀉𑀤𑁆𑀥𑀁𑀧𑀸𑀤𑀁 𑀅𑀥𑁄𑀲𑀺𑀭𑀁 𑀕𑀳𑁂𑀢𑁆𑀯𑀸 𑀢𑀢𑁆𑀢𑀸𑀬 𑀮𑁄𑀳𑀓𑀼𑀫𑁆𑀪𑀺𑀬𑀸 𑀧𑀓𑁆𑀔𑀺𑀧𑀦𑁆𑀢𑀺 𑀆𑀤𑀺𑀢𑁆𑀢𑀸𑀬 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀲𑀚𑁄𑀢𑀺𑀪𑀽𑀢𑀸𑀬. 𑀲𑁄 𑀢𑀢𑁆𑀣 𑀨𑁂𑀡𑀼𑀤𑁆𑀤𑁂𑀳𑀓𑀁 𑀧𑀘𑁆𑀘𑀢𑀺. 𑀲𑁄 𑀢𑀢𑁆𑀣 𑀨𑁂𑀡𑀼𑀤𑁆𑀤𑁂𑀳𑀓𑀁 𑀧𑀘𑁆𑀘𑀫𑀸𑀦𑁄 𑀲𑀓𑀺𑀫𑁆𑀧𑀺 𑀉𑀤𑁆𑀥𑀁 𑀕𑀘𑁆𑀙𑀢𑀺, 𑀲𑀓𑀺𑀫𑁆𑀧𑀺 𑀅𑀥𑁄 𑀕𑀘𑁆𑀙𑀢𑀺, 𑀲𑀓𑀺𑀫𑁆𑀧𑀺 𑀢𑀺𑀭𑀺𑀬𑀁 𑀕𑀘𑁆𑀙𑀢𑀺. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑁂𑀢𑀺; 𑀦 𑀘 𑀢𑀸𑀯 𑀓𑀸𑀮𑀗𑁆𑀓𑀭𑁄𑀢𑀺 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻𑀳𑁄𑀢𑀺. 𑀏𑀢𑀁 𑀪𑀬𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀓𑀼𑀢𑁄 𑀚𑀸𑀢𑀁? 𑀢𑀲𑁆𑀲 𑀲𑁆𑀦𑁂𑀳𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀧𑀘𑁆𑀘𑀬𑀸 𑀘 𑀭𑀸𑀕𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀭𑀸𑀕𑀧𑀘𑁆𑀘𑀬𑀸 𑀘 𑀚𑀸𑀢𑀁.

𑀢𑀫𑁂𑀦𑀁 𑀦𑀺𑀭𑀬𑀧𑀸𑀮𑀸 𑀫𑀳𑀸𑀦𑀺𑀭𑀬𑁂 𑀧𑀓𑁆𑀔𑀺𑀧𑀦𑁆𑀢𑀺. 𑀲𑁄 𑀔𑁄 𑀧𑀦 𑀫𑀳𑀸𑀦𑀺𑀭𑀬𑁄 𑁋

𑀘𑀢𑀼𑀓𑁆𑀓𑀡𑁆𑀡𑁄 𑀘𑀢𑀼𑀤𑁆𑀯𑀸𑀭𑁄, 𑀯𑀺𑀪𑀢𑁆𑀢𑁄 𑀪𑀸𑀕𑀲𑁄 𑀫𑀺𑀢𑁄;

𑀅𑀬𑁄𑀧𑀸𑀓𑀸𑀭𑀧𑀭𑀺𑀬𑀦𑁆𑀢𑁄, 𑀅𑀬𑀲𑀸 𑀧𑀝𑀺𑀓𑀼𑀚𑁆𑀚𑀺𑀢𑁄.

𑀢𑀲𑁆𑀲 𑀅𑀬𑁄𑀫𑀬𑀸 𑀪𑀽𑀫𑀺, 𑀚𑀮𑀺𑀢𑀸 𑀢𑁂𑀚𑀲𑀸 𑀬𑀼𑀢𑀸;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺 𑀲𑀩𑁆𑀩𑀤𑀸.

𑀓𑀤𑀭𑀺𑀬𑀸𑀢𑀧𑀦𑀸 [𑀓𑀤𑀭𑀺𑀬𑀸 𑀢𑀸𑀧𑀦𑀸 (𑀓.) 𑀫𑀳𑀸𑀦𑀺. 𑁧𑁭𑁦] 𑀖𑁄𑀭𑀸, 𑀅𑀘𑁆𑀘𑀺𑀫𑀦𑁆𑀢𑁄 𑀤𑀼𑀭𑀸𑀲𑀤𑀸;

𑀮𑁄𑀫𑀳𑀁𑀲𑀦𑀭𑀽𑀧𑀸 𑀘, 𑀪𑁂𑀲𑁆𑀫𑀸 𑀧𑀝𑀺𑀪𑀬𑀸 𑀤𑀼𑀔𑀸.

𑀧𑀼𑀭𑀢𑁆𑀣𑀺𑀫𑀸𑀬 𑀘 𑀪𑀺𑀢𑁆𑀢𑀺𑀬𑀸, 𑀅𑀘𑁆𑀘𑀺𑀓𑁆𑀔𑀦𑁆𑀥𑁄 𑀲𑀫𑀼𑀝𑁆𑀞𑀺𑀢𑁄;

𑀟𑀳𑀦𑁆𑀢𑁄 𑀧𑀸𑀧𑀓𑀫𑁆𑀫𑀦𑁆𑀢𑁂, 𑀧𑀘𑁆𑀙𑀺𑀫𑀸𑀬 𑀧𑀝𑀺𑀳𑀜𑁆𑀜𑀢𑀺.

𑀧𑀘𑁆𑀙𑀺𑀫𑀸𑀬 𑀘 𑀪𑀺𑀢𑁆𑀢𑀺𑀬𑀸, 𑀅𑀘𑁆𑀘𑀺𑀓𑁆𑀔𑀦𑁆𑀥𑁄 𑀲𑀫𑀼𑀝𑁆𑀞𑀺𑀢𑁄;

𑀟𑀳𑀦𑁆𑀢𑁄 𑀧𑀸𑀧𑀓𑀫𑁆𑀫𑀦𑁆𑀢𑁂, 𑀧𑀼𑀭𑀺𑀫𑀸𑀬 𑀧𑀝𑀺𑀳𑀜𑁆𑀜𑀢𑀺.

𑀤𑀓𑁆𑀔𑀺𑀡𑀸𑀬 𑀘 𑀪𑀺𑀢𑁆𑀢𑀺𑀬𑀸, 𑀅𑀘𑁆𑀘𑀺𑀓𑁆𑀔𑀦𑁆𑀥𑁄 𑀲𑀫𑀼𑀝𑁆𑀞𑀺𑀢𑁄;

𑀟𑀳𑀦𑁆𑀢𑁄 𑀧𑀸𑀧𑀓𑀫𑁆𑀫𑀦𑁆𑀢𑁂, 𑀉𑀢𑁆𑀢𑀭𑀸𑀬 𑀧𑀝𑀺𑀳𑀜𑁆𑀜𑀢𑀺.

𑀉𑀢𑁆𑀢𑀭𑀸𑀬 𑀘 𑀪𑀺𑀢𑁆𑀢𑀺𑀬𑀸, 𑀅𑀘𑁆𑀘𑀺𑀓𑁆𑀔𑀦𑁆𑀥𑁄 𑀲𑀫𑀼𑀝𑁆𑀞𑀺𑀢𑁄;

𑀟𑀳𑀦𑁆𑀢𑁄 𑀧𑀸𑀧𑀓𑀫𑁆𑀫𑀦𑁆𑀢𑁂, 𑀤𑀓𑁆𑀔𑀺𑀡𑀸𑀬 𑀧𑀝𑀺𑀳𑀜𑁆𑀜𑀢𑀺.

𑀳𑁂𑀝𑁆𑀞𑀢𑁄 𑀘 𑀲𑀫𑀼𑀝𑁆𑀞𑀸𑀬, 𑀅𑀘𑁆𑀘𑀺𑀓𑁆𑀔𑀦𑁆𑀥𑁄 𑀪𑀬𑀸𑀦𑀓𑁄;

𑀟𑀳𑀦𑁆𑀢𑁄 𑀧𑀸𑀧𑀓𑀫𑁆𑀫𑀦𑁆𑀢𑁂, 𑀙𑀤𑀦𑀲𑁆𑀫𑀺𑀁 𑀧𑀝𑀺𑀳𑀜𑁆𑀜𑀢𑀺.

𑀙𑀤𑀦𑀫𑁆𑀳𑀸 𑀲𑀫𑀼𑀝𑁆𑀞𑀸𑀬, 𑀅𑀘𑁆𑀘𑀺𑀓𑁆𑀔𑀦𑁆𑀥𑁄 𑀪𑀬𑀸𑀦𑀓𑁄;

𑀟𑀳𑀦𑁆𑀢𑁄 𑀧𑀸𑀧𑀓𑀫𑁆𑀫𑀦𑁆𑀢𑁂, 𑀪𑀽𑀫𑀺𑀬𑀁 𑀧𑀝𑀺𑀳𑀜𑁆𑀜𑀢𑀺.

𑀅𑀬𑁄𑀓𑀧𑀸𑀮𑀫𑀸𑀤𑀺𑀢𑁆𑀢𑀁, 𑀲𑀦𑁆𑀢𑀢𑁆𑀢𑀁 𑀚𑀮𑀺𑀢𑀁 𑀬𑀣𑀸;

𑀏𑀯𑀁 𑀅𑀯𑀻𑀘𑀺𑀦𑀺𑀭𑀬𑁄, 𑀳𑁂𑀝𑁆𑀞𑀸 𑀉𑀧𑀭𑀺 𑀧𑀲𑁆𑀲𑀢𑁄.

𑀢𑀢𑁆𑀣 𑀲𑀢𑁆𑀢𑀸 𑀫𑀳𑀸𑀮𑀼𑀤𑁆𑀤𑀸, 𑀫𑀳𑀸𑀓𑀺𑀩𑁆𑀩𑀺𑀲𑀓𑀸𑀭𑀺𑀦𑁄;

𑀅𑀘𑁆𑀘𑀦𑁆𑀢𑀧𑀸𑀧𑀓𑀫𑁆𑀫𑀦𑁆𑀢𑀸, 𑀧𑀘𑁆𑀘𑀦𑁆𑀢𑀺 𑀦 𑀘 𑀫𑀺𑀬𑁆𑀬𑀭𑁂 [𑀫𑀻𑀬𑀭𑁂 (𑀓.)].

𑀚𑀸𑀢𑀯𑁂𑀤𑀲𑀫𑁄 𑀓𑀸𑀬𑁄, 𑀢𑁂𑀲𑀁 𑀦𑀺𑀭𑀬𑀯𑀸𑀲𑀺𑀦𑀁;

𑀧𑀲𑁆𑀲 𑀓𑀫𑁆𑀫𑀸𑀦𑀁 𑀤𑀴𑁆𑀳𑀢𑁆𑀢𑀁, 𑀦 𑀪𑀲𑁆𑀫𑀸 𑀳𑁄𑀢𑀺 𑀦𑀧𑀺 𑀫𑀲𑀺.

𑀧𑀼𑀭𑀢𑁆𑀣𑀺𑀫𑁂𑀦𑀧𑀺 𑀥𑀸𑀯𑀦𑁆𑀢𑀺, 𑀢𑀢𑁄 𑀥𑀸𑀯𑀦𑁆𑀢𑀺 𑀧𑀘𑁆𑀙𑀺𑀫𑀁;

𑀉𑀢𑁆𑀢𑀭𑁂𑀦𑀧𑀺 𑀥𑀸𑀯𑀦𑁆𑀢𑀺, 𑀢𑀢𑁄 𑀥𑀸𑀯𑀦𑁆𑀢𑀺 𑀤𑀓𑁆𑀔𑀺𑀡𑀁.

𑀬𑀁 𑀬𑀁 𑀤𑀺𑀲𑀁 𑀧𑀥𑀸𑀯𑀦𑁆𑀢𑀺, 𑀢𑀁 𑀢𑀁 𑀤𑁆𑀯𑀸𑀭𑀁 𑀧𑀺𑀥𑀻𑀬𑀢𑀺;

𑀅𑀪𑀺𑀦𑀺𑀓𑁆𑀔𑀫𑀺𑀢𑀸𑀲𑀸 𑀢𑁂, 𑀲𑀢𑁆𑀢𑀸 𑀫𑁄𑀓𑁆𑀔𑀕𑀯𑁂𑀲𑀺𑀦𑁄.

𑀦 𑀢𑁂 𑀢𑀢𑁄 𑀦𑀺𑀓𑁆𑀔𑀫𑀺𑀢𑀼𑀁, 𑀮𑀪𑀦𑁆𑀢𑀺 𑀓𑀫𑁆𑀫𑀧𑀘𑁆𑀘𑀬𑀸;

𑀢𑁂𑀲𑀜𑁆𑀘 𑀧𑀸𑀧𑀓𑀫𑁆𑀫𑀦𑁆𑀢𑀁, 𑀅𑀯𑀺𑀧𑀓𑁆𑀓𑀁 𑀓𑀢𑀁 𑀩𑀳𑀼𑀦𑁆𑀢𑀺.

𑀏𑀢𑀁 𑀪𑀬𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀓𑀼𑀢𑁄 𑀚𑀸𑀢𑀁? 𑀢𑀲𑁆𑀲 𑀲𑁆𑀦𑁂𑀳𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀧𑀘𑁆𑀘𑀬𑀸 𑀘 𑀭𑀸𑀕𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀭𑀸𑀕𑀧𑀘𑁆𑀘𑀬𑀸 𑀘 𑀚𑀸𑀢𑀁.

𑀬𑀸𑀦𑀺 𑀘 𑀦𑁂𑀭𑀬𑀺𑀓𑀸𑀦𑀺 𑀤𑀼𑀓𑁆𑀔𑀸𑀦𑀺 𑀬𑀸𑀦𑀺 𑀘 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑀸𑀦𑀺 𑀤𑀼𑀓𑁆𑀔𑀸𑀦𑀺 𑀬𑀸𑀦𑀺 𑀘 𑀧𑁂𑀢𑁆𑀢𑀺𑀯𑀺𑀲𑀬𑀺𑀓𑀸𑀦𑀺 𑀤𑀼𑀓𑁆𑀔𑀸𑀦𑀺 𑀬𑀸𑀦𑀺 𑀘 𑀫𑀸𑀦𑀼𑀲𑀺𑀓𑀸𑀦𑀺 𑀤𑀼𑀓𑁆𑀔𑀸𑀦𑀺, 𑀢𑀸𑀦𑀺 𑀓𑀼𑀢𑁄 𑀚𑀸𑀢𑀸𑀦𑀺 𑀓𑀼𑀢𑁄 𑀲𑀜𑁆𑀚𑀸𑀢𑀸𑀦𑀺 𑀓𑀼𑀢𑁄 𑀦𑀺𑀩𑁆𑀩𑀢𑁆𑀢𑀸𑀦𑀺 𑀓𑀼𑀢𑁄 𑀅𑀪𑀺𑀦𑀺𑀩𑁆𑀩𑀢𑁆𑀢𑀸𑀦𑀺 𑀓𑀼𑀢𑁄 𑀧𑀸𑀢𑀼𑀪𑀽𑀢𑀸𑀦𑀺? 𑀢𑀲𑁆𑀲 𑀲𑁆𑀦𑁂𑀳𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀧𑀘𑁆𑀘𑀬𑀸 𑀘 𑀭𑀸𑀕𑀧𑀘𑁆𑀘𑀬𑀸 𑀘 𑀦𑀦𑁆𑀤𑀺𑀭𑀸𑀕𑀧𑀘𑁆𑀘𑀬𑀸 𑀘 𑀪𑀯𑀦𑁆𑀢𑀺 𑀲𑀫𑁆𑀪𑀯𑀦𑁆𑀢𑀺 𑀚𑀸𑀬𑀦𑁆𑀢𑀺 𑀲𑀜𑁆𑀚𑀸𑀬𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑁋 𑀲𑁆𑀦𑁂𑀳𑀦𑁆𑀯𑀬𑀁 𑀤𑀼𑀓𑁆𑀔𑀫𑀺𑀤𑀁 𑀧𑀳𑁄𑀢𑀺.

𑀆𑀤𑀻𑀦𑀯𑀁 𑀲𑁆𑀦𑁂𑀳𑀚𑀁 𑀧𑁂𑀓𑁆𑀔𑀫𑀸𑀦𑁄𑀢𑀺. 𑀲𑁆𑀦𑁂𑀳𑁄𑀢𑀺 𑀤𑁆𑀯𑁂 𑀲𑁆𑀦𑁂𑀳𑀸 𑁋 𑀢𑀡𑁆𑀳𑀸𑀲𑁆𑀦𑁂𑀳𑁄 𑀘 𑀤𑀺𑀝𑁆𑀞𑀺𑀲𑁆𑀦𑁂𑀳𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀲𑁆𑀦𑁂𑀳𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀲𑁆𑀦𑁂𑀳𑁄. 𑀆𑀤𑀻𑀦𑀯𑀁 𑀲𑁆𑀦𑁂𑀳𑀚𑀁 𑀧𑁂𑀓𑁆𑀔𑀫𑀸𑀦𑁄𑀢𑀺 𑀢𑀡𑁆𑀳𑀸𑀲𑁆𑀦𑁂𑀳𑁄 𑀘 𑀤𑀺𑀝𑁆𑀞𑀺𑀲𑁆𑀦𑁂𑀳𑁄 𑀘 𑀆𑀤𑀻𑀦𑀯𑀁 𑀲𑁆𑀦𑁂𑀳𑀚𑀁 𑀧𑁂𑀓𑁆𑀔𑀫𑀸𑀦𑁄 𑀤𑀓𑁆𑀔𑀫𑀸𑀦𑁄 𑀑𑀮𑁄𑀓𑀬𑀫𑀸𑀦𑁄 𑀦𑀺𑀚𑁆𑀛𑀸𑀬𑀫𑀸𑀦𑁄 𑀉𑀧𑀧𑀭𑀺𑀓𑁆𑀔𑀫𑀸𑀦𑁄𑀢𑀺 𑁋 𑀆𑀤𑀻𑀦𑀯𑀁 𑀲𑁆𑀦𑁂𑀳𑀚𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀲𑀁𑀲𑀕𑁆𑀕𑀚𑀸𑀢𑀲𑁆𑀲 𑀪𑀯𑀦𑁆𑀢𑀺 𑀲𑁆𑀦𑁂𑀳𑀸, 𑀲𑁆𑀦𑁂𑀳𑀦𑁆𑀯𑀬𑀁 𑀤𑀼𑀓𑁆𑀔𑀫𑀺𑀤𑀁 𑀧𑀳𑁄𑀢𑀺;

𑀆𑀤𑀻𑀦𑀯𑀁 𑀲𑁆𑀦𑁂𑀳𑀚𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁨𑁩. 𑀫𑀺𑀢𑁆𑀢𑁂 𑀲𑀼𑀳𑀚𑁆𑀚𑁂 𑀅𑀦𑀼𑀓𑀫𑁆𑀧𑀫𑀸𑀦𑁄, 𑀳𑀸𑀧𑁂𑀢𑀺 𑀅𑀢𑁆𑀣𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 [𑀧𑀝𑀺𑀩𑀦𑁆𑀥𑀘𑀺𑀢𑁆𑀢𑁄 (𑀓.)] ;

𑀏𑀢𑀁 𑀪𑀬𑀁 𑀲𑀦𑁆𑀣𑀯𑁂 [𑀲𑀦𑁆𑀥𑀯𑁂 (𑀓.)] 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀫𑀺𑀢𑁆𑀢𑁂 𑀲𑀼𑀳𑀚𑁆𑀚𑁂 𑀅𑀦𑀼𑀓𑀫𑁆𑀧𑀫𑀸𑀦𑁄, 𑀳𑀸𑀧𑁂𑀢𑀺 𑀅𑀢𑁆𑀣𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄𑀢𑀺. 𑀫𑀺𑀢𑁆𑀢𑀸𑀢𑀺 𑀤𑁆𑀯𑁂 𑀫𑀺𑀢𑁆𑀢𑀸 𑁋 𑀅𑀕𑀸𑀭𑀺𑀓𑀫𑀺𑀢𑁆𑀢𑁄 𑀘 𑀅𑀦𑀸𑀕𑀸𑀭𑀺𑀓𑀫𑀺𑀢𑁆𑀢𑁄 [𑀧𑀩𑁆𑀩𑀚𑀺𑀢𑀫𑀺𑀢𑁆𑀢𑁄 (𑀓.) 𑀏𑀯𑀫𑀼𑀧𑀭𑀺𑀧𑀺] 𑀘. 𑀓𑀢𑀫𑁄 𑀅𑀕𑀸𑀭𑀺𑀓𑀫𑀺𑀢𑁆𑀢𑁄? 𑀇𑀥𑁂𑀓𑀘𑁆𑀘𑁄 𑀤𑀼𑀤𑁆𑀤𑀤𑀁 𑀤𑀤𑀸𑀢𑀺, 𑀤𑀼𑀘𑁆𑀘𑀚𑀁 𑀘𑀚𑀢𑀺, 𑀤𑀼𑀓𑁆𑀓𑀭𑀁 𑀓𑀭𑁄𑀢𑀺, 𑀤𑀼𑀓𑁆𑀔𑀫𑀁 𑀔𑀫𑀢𑀺, 𑀕𑀼𑀬𑁆𑀳𑀫𑀲𑁆𑀲 𑀆𑀘𑀺𑀓𑁆𑀔𑀢𑀺, 𑀕𑀼𑀬𑁆𑀳𑀫𑀲𑁆𑀲 𑀧𑀭𑀺𑀕𑀽𑀳𑀢𑀺 [𑀧𑀭𑀺𑀕𑀼𑀬𑁆𑀳𑀢𑀺 (𑀲𑁆𑀬𑀸. 𑀓.)], 𑀆𑀧𑀤𑀸𑀲𑀼 𑀦 𑀯𑀺𑀚𑀳𑀢𑀺, 𑀚𑀻𑀯𑀺𑀢𑀫𑁆𑀧𑀺𑀲𑁆𑀲 𑀅𑀢𑁆𑀣𑀸𑀬 𑀧𑀭𑀺𑀘𑁆𑀘𑀢𑁆𑀢𑀁 𑀳𑁄𑀢𑀺, 𑀔𑀻𑀡𑁂 𑀦𑀸𑀢𑀺𑀫𑀜𑁆𑀜𑀢𑀺 𑁋 𑀅𑀬𑀁 𑀅𑀕𑀸𑀭𑀺𑀓𑀫𑀺𑀢𑁆𑀢𑁄.

𑀓𑀢𑀫𑁄 𑀅𑀦𑀸𑀕𑀸𑀭𑀺𑀓𑀫𑀺𑀢𑁆𑀢𑁄? 𑀇𑀥 𑀪𑀺𑀓𑁆𑀔𑀼 𑀧𑀺𑀬𑁄 𑀘 𑀳𑁄𑀢𑀺 𑀫𑀦𑀸𑀧𑁄 𑀘 𑀕𑀭𑀼 𑀘 𑀪𑀸𑀯𑀦𑀻𑀬𑁄 𑀘 𑀯𑀢𑁆𑀢𑀸 𑀘 𑀯𑀘𑀦𑀓𑁆𑀔𑀫𑁄 𑀘 𑀕𑀫𑁆𑀪𑀻𑀭𑀜𑁆𑀘 𑀓𑀣𑀁 𑀓𑀢𑁆𑀢𑀸, 𑀦𑁄 𑀘 𑀅𑀝𑁆𑀞𑀸𑀦𑁂 𑀦𑀺𑀬𑁄𑀚𑁂𑀢𑀺 𑀅𑀥𑀺𑀲𑀻𑀮𑁂 𑀲𑀫𑀸𑀤𑀧𑁂𑀢𑀺, 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑁂 𑀲𑀫𑀸𑀤𑀧𑁂𑀢𑀺, 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁…𑀧𑁂… 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁… 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁… 𑀧𑀜𑁆𑀘𑀦𑁆𑀦𑀁 𑀩𑀮𑀸𑀦𑀁… 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁… 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀪𑀸𑀯𑀦𑀸𑀦𑀼𑀬𑁄𑀕𑁂 𑀲𑀫𑀸𑀤𑀧𑁂𑀢𑀺 𑁋 𑀅𑀬𑀁 𑀅𑀦𑀸𑀕𑀸𑀭𑀺𑀓𑀫𑀺𑀢𑁆𑀢𑁄.

𑀲𑀼𑀳𑀚𑁆𑀚𑀸 𑀯𑀼𑀘𑁆𑀘𑀦𑁆𑀢𑀺 𑀬𑁂𑀳𑀺 𑀲𑀳 𑀆𑀕𑀫𑀦𑀁 𑀨𑀸𑀲𑀼 𑀕𑀫𑀦𑀁 𑀨𑀸𑀲𑀼 𑀞𑀸𑀦𑀁 𑀨𑀸𑀲𑀼 𑀦𑀺𑀲𑀚𑁆𑀚𑀦𑀁 [𑀦𑀺𑀲𑀚𑁆𑀚𑀸 (𑀓.)] 𑀨𑀸𑀲𑀼 𑀲𑀬𑀦𑀁 𑀨𑀸𑀲𑀼 𑀆𑀮𑀧𑀦𑀁 𑀨𑀸𑀲𑀼 𑀲𑀮𑁆𑀮𑀧𑀦𑀁 𑀨𑀸𑀲𑀼 𑀉𑀮𑁆𑀮𑀧𑀦𑀁 𑀨𑀸𑀲𑀼 𑀲𑀫𑀼𑀮𑁆𑀮𑀧𑀦𑀁 𑀨𑀸𑀲𑀼. 𑀫𑀺𑀢𑁆𑀢𑁂 𑀲𑀼𑀳𑀚𑁆𑀚𑁂 𑀅𑀦𑀼𑀓𑀫𑁆𑀧𑀫𑀸𑀦𑁄 𑀳𑀸𑀧𑁂𑀢𑀺 𑀅𑀢𑁆𑀣𑀦𑁆𑀢𑀺 𑀫𑀺𑀢𑁆𑀢𑁂 𑀘 𑀲𑀼𑀳𑀚𑁆𑀚𑁂 𑀘 𑀲𑀦𑁆𑀤𑀺𑀝𑁆𑀞𑁂 𑀘 𑀲𑀫𑁆𑀪𑀢𑁆𑀢𑁂 𑀘 𑀲𑀳𑀸𑀬𑁂 𑀘 𑀅𑀦𑀼𑀓𑀫𑁆𑀧𑀫𑀸𑀦𑁄 𑀅𑀦𑀼𑀧𑁂𑀓𑁆𑀔𑀫𑀸𑀦𑁄 𑀅𑀦𑀼𑀕𑀡𑁆𑀳𑀫𑀸𑀦𑁄 𑀅𑀢𑁆𑀢𑀢𑁆𑀣𑀫𑁆𑀧𑀺 𑀧𑀭𑀢𑁆𑀣𑀫𑁆𑀧𑀺 𑀉𑀪𑀬𑀢𑁆𑀣𑀫𑁆𑀧𑀺 𑀳𑀸𑀧𑁂𑀢𑀺, 𑀤𑀺𑀝𑁆𑀞𑀥𑀫𑁆𑀫𑀺𑀓𑀫𑁆𑀧𑀺 𑀅𑀢𑁆𑀣𑀁 𑀳𑀸𑀧𑁂𑀢𑀺, 𑀲𑀫𑁆𑀧𑀭𑀸𑀬𑀺𑀓𑀫𑁆𑀧𑀺 𑀅𑀢𑁆𑀣𑀁 𑀳𑀸𑀧𑁂𑀢𑀺, 𑀧𑀭𑀫𑀢𑁆𑀣𑀫𑁆𑀧𑀺 𑀳𑀸𑀧𑁂𑀢𑀺 𑀧𑀳𑀸𑀧𑁂𑀢𑀺 𑀧𑀭𑀺𑀳𑀸𑀧𑁂𑀢𑀺 𑀧𑀭𑀺𑀥𑀁𑀲𑁂𑀢𑀺 𑀧𑀭𑀺𑀯𑀚𑁆𑀚𑁂𑀢𑀺 [𑀧𑀭𑀺𑀲𑀚𑁆𑀚𑁂𑀢𑀺 (𑀲𑁆𑀬𑀸.)] 𑀅𑀦𑁆𑀢𑀭𑀥𑀸𑀧𑁂𑀢𑀻𑀢𑀺 𑁋 𑀫𑀺𑀢𑁆𑀢𑁂 𑀲𑀼𑀳𑀚𑁆𑀚𑁂 𑀅𑀦𑀼𑀓𑀫𑁆𑀧𑀫𑀸𑀦𑁄 𑀳𑀸𑀧𑁂𑀢𑀺 𑀅𑀢𑁆𑀣𑀁.

𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄𑀢𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺 𑁋 𑀅𑀢𑁆𑀢𑀸𑀦𑀁 𑀯𑀸 𑀦𑀻𑀘𑀁 𑀞𑀧𑁂𑀦𑁆𑀢𑁄 𑀧𑀭𑀁 𑀉𑀘𑁆𑀘𑀁 𑀞𑀧𑁂𑀦𑁆𑀢𑁄 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺, 𑀅𑀢𑁆𑀢𑀸𑀦𑀁 𑀯𑀸 𑀉𑀘𑁆𑀘𑀁 𑀞𑀧𑁂𑀦𑁆𑀢𑁄 𑀧𑀭𑀁 𑀦𑀻𑀘𑀁 𑀞𑀧𑁂𑀦𑁆𑀢𑁄 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺. 𑀓𑀣𑀁 𑀅𑀢𑁆𑀢𑀸𑀦𑀁 𑀦𑀻𑀘𑀁 𑀞𑀧𑁂𑀦𑁆𑀢𑁄 𑀧𑀭𑀁 𑀉𑀘𑁆𑀘𑀁 𑀞𑀧𑁂𑀦𑁆𑀢𑁄 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺? 𑀢𑀼𑀫𑁆𑀳𑁂 𑀫𑁂 𑀩𑀳𑀽𑀧𑀓𑀸𑀭𑀸, 𑀅𑀳𑀁 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀮𑀪𑀸𑀫𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁. 𑀬𑀫𑁆𑀧𑀺 [𑀬𑁂𑀧𑀺 (𑀓.) 𑀏𑀯𑀁 𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁫𑁧] 𑀫𑁂 𑀅𑀜𑁆𑀜𑁂 𑀤𑀸𑀢𑀼𑀁 𑀯𑀸 𑀓𑀸𑀢𑀼𑀁 𑀯𑀸 𑀫𑀜𑁆𑀜𑀦𑁆𑀢𑀺 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀢𑀼𑀫𑁆𑀳𑁂 𑀲𑀫𑁆𑀧𑀲𑁆𑀲𑀦𑁆𑀢𑀸. 𑀬𑀫𑁆𑀧𑀺 𑀫𑁂 𑀧𑁄𑀭𑀸𑀡𑀁 𑀫𑀸𑀢𑀸𑀧𑁂𑀢𑁆𑀢𑀺𑀓𑀁 𑀦𑀸𑀫𑀕𑁄𑀢𑁆𑀢𑀁, 𑀢𑀫𑁆𑀧𑀺 𑀫𑁂 𑀅𑀦𑁆𑀢𑀭𑀳𑀺𑀢𑀁. 𑀢𑀼𑀫𑁆𑀳𑁂𑀳𑀺 𑀅𑀳𑀁 𑀜𑀸𑀬𑀸𑀫𑀺 𑁋 𑀅𑀲𑀼𑀓𑀲𑁆𑀲 𑀓𑀼𑀮𑀼𑀧𑀓𑁄, 𑀅𑀲𑀼𑀓𑀸𑀬 𑀓𑀼𑀮𑀼𑀧𑀓𑁄𑀢𑀺. 𑀏𑀯𑀁 𑀅𑀢𑁆𑀢𑀸𑀦𑀁 𑀦𑀻𑀘𑀁 𑀞𑀧𑁂𑀦𑁆𑀢𑁄 𑀧𑀭𑀁 𑀉𑀘𑁆𑀘𑀁 𑀞𑀧𑁂𑀦𑁆𑀢𑁄 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺.

𑀓𑀣𑀁 𑀅𑀢𑁆𑀢𑀸𑀦𑀁 𑀉𑀘𑁆𑀘𑀁 𑀞𑀧𑁂𑀦𑁆𑀢𑁄 𑀧𑀭𑀁 𑀦𑀻𑀘𑀁 𑀞𑀧𑁂𑀦𑁆𑀢𑁄 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺? 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀩𑀳𑀽𑀧𑀓𑀸𑀭𑁄, 𑀢𑀼𑀫𑁆𑀳𑁂 𑀫𑀁 𑀆𑀕𑀫𑁆𑀫 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑀸, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑀸, 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀸, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑀸, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑀸, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑀸, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑀸; 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀉𑀤𑁆𑀤𑁂𑀲𑀁 𑀤𑁂𑀫𑀺, 𑀧𑀭𑀺𑀧𑀼𑀘𑁆𑀙𑀁 𑀤𑁂𑀫𑀺, 𑀉𑀧𑁄𑀲𑀣𑀁 𑀆𑀘𑀺𑀓𑁆𑀔𑀸𑀫𑀺, 𑀦𑀯𑀓𑀫𑁆𑀫𑀁 𑀅𑀥𑀺𑀝𑁆𑀞𑀸𑀫𑀺. 𑀅𑀣 𑀧𑀦 𑀢𑀼𑀫𑁆𑀳𑁂 𑀫𑀁 𑀉𑀚𑁆𑀛𑀺𑀢𑁆𑀯𑀸 [𑀧𑀭𑀺𑀘𑁆𑀘𑀚𑀺𑀢𑁆𑀯𑀸 (𑀲𑁆𑀬𑀸.)] 𑀅𑀜𑁆𑀜𑁂 𑀲𑀓𑁆𑀓𑀭𑁄𑀣 𑀕𑀭𑀼𑀁 𑀓𑀭𑁄𑀣 𑀫𑀸𑀦𑁂𑀣 𑀧𑀽𑀚𑁂𑀣𑀸𑀢𑀺. 𑀏𑀯𑀁 𑀅𑀢𑁆𑀢𑀸𑀦𑀁 𑀉𑀘𑁆𑀘𑀁 𑀞𑀧𑁂𑀦𑁆𑀢𑁄 𑀧𑀭𑀁 𑀦𑀻𑀘𑀁 𑀞𑀧𑁂𑀦𑁆𑀢𑁄 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀻𑀢𑀺 𑁋 𑀫𑀺𑀢𑁆𑀢𑁂 𑀲𑀼𑀳𑀚𑁆𑀚𑁂 𑀅𑀦𑀼𑀓𑀫𑁆𑀧𑀫𑀸𑀦𑁄, 𑀳𑀸𑀧𑁂𑀢𑀺 𑀅𑀢𑁆𑀣𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄.

𑀏𑀢𑀁 𑀪𑀬𑀁 𑀲𑀦𑁆𑀣𑀯𑁂 𑀧𑁂𑀓𑁆𑀔𑀫𑀸𑀦𑁄𑀢𑀺. 𑀪𑀬𑀦𑁆𑀢𑀺 𑀚𑀸𑀢𑀺𑀪𑀬𑀁 𑀚𑀭𑀸𑀪𑀬𑀁 𑀩𑁆𑀬𑀸𑀥𑀺𑀪𑀬𑀁 𑀫𑀭𑀡𑀪𑀬𑀁 𑀭𑀸𑀚𑀪𑀬𑀁 𑀘𑁄𑀭𑀪𑀬𑀁 𑀅𑀕𑁆𑀕𑀺𑀪𑀬𑀁 𑀉𑀤𑀓𑀪𑀬𑀁 𑀅𑀢𑁆𑀢𑀸𑀦𑀼𑀯𑀸𑀤𑀪𑀬𑀁 𑀧𑀭𑀸𑀦𑀼𑀯𑀸𑀤𑀪𑀬𑀁 𑀤𑀡𑁆𑀟𑀪𑀬𑀁 𑀤𑀼𑀕𑁆𑀕𑀢𑀺𑀪𑀬𑀁 𑀊𑀫𑀺𑀪𑀬𑀁 𑀓𑀼𑀫𑁆𑀪𑀺𑀮𑀪𑀬𑀁 𑀆𑀯𑀝𑁆𑀝𑀪𑀬𑀁 𑀲𑀼𑀲𑀼𑀫𑀸𑀭𑀪𑀬𑀁 [𑀲𑀼𑀁𑀲𑀼𑀫𑀸𑀭𑀪𑀬𑀁 (𑀲𑁆𑀬𑀸.)] 𑀆𑀚𑀻𑀯𑀺𑀓𑀪𑀬𑀁 𑀅𑀲𑀺𑀮𑁄𑀓𑀪𑀬𑀁 𑀧𑀭𑀺𑀲𑀲𑀸𑀭𑀚𑁆𑀚𑀪𑀬𑀁 𑀫𑀤𑀦𑀪𑀬𑀁 𑀪𑀬𑀸𑀦𑀓𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑁄 𑀘𑁂𑀢𑀲𑁄 𑀉𑀩𑁆𑀩𑁂𑀕𑁄 𑀉𑀢𑁆𑀭𑀸𑀲𑁄. 𑀲𑀦𑁆𑀣𑀯𑁂𑀢𑀺 𑀤𑁆𑀯𑁂 𑀲𑀦𑁆𑀣𑀯𑀸 𑁋 𑀢𑀡𑁆𑀳𑀸𑀲𑀦𑁆𑀣𑀯𑁄 𑀘 𑀤𑀺𑀝𑁆𑀞𑀺𑀲𑀦𑁆𑀣𑀯𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀲𑀦𑁆𑀣𑀯𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀲𑀦𑁆𑀣𑀯𑁄. 𑀏𑀢𑀁 𑀪𑀬𑀁 𑀲𑀦𑁆𑀣𑀯𑁂 𑀧𑁂𑀓𑁆𑀔𑀫𑀸𑀦𑁄𑀢𑀺 𑀏𑀢𑀁 𑀪𑀬𑀁 𑀲𑀦𑁆𑀣𑀯𑁂 𑀧𑁂𑀓𑁆𑀔𑀫𑀸𑀦𑁄 𑀤𑀓𑁆𑀔𑀫𑀸𑀦𑁄 𑀑𑀮𑁄𑀓𑀬𑀫𑀸𑀦𑁄 𑀦𑀺𑀚𑁆𑀛𑀸𑀬𑀫𑀸𑀦𑁄 𑀉𑀧𑀧𑀭𑀺𑀓𑁆𑀔𑀫𑀸𑀦𑁄𑀢𑀺 𑁋 𑀏𑀢𑀁 𑀪𑀬𑀁 𑀲𑀦𑁆𑀣𑀯𑁂 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀫𑀺𑀢𑁆𑀢𑁂 𑀲𑀼𑀳𑀚𑁆𑀚𑁂 𑀅𑀦𑀼𑀓𑀫𑁆𑀧𑀫𑀸𑀦𑁄, 𑀳𑀸𑀧𑁂𑀢𑀺 𑀅𑀢𑁆𑀣𑀁 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄;

𑀏𑀢𑀁 𑀪𑀬𑀁 𑀲𑀦𑁆𑀣𑀯𑁂 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁨𑁪. 𑀯𑀁𑀲𑁄 𑀯𑀺𑀲𑀸𑀮𑁄𑀯 𑀬𑀣𑀸 𑀯𑀺𑀲𑀢𑁆𑀢𑁄,𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸;

𑀯𑀁𑀲𑀓𑁆𑀓𑀴𑀻𑀭𑁄𑀯 [𑀯𑀁𑀲𑁂 𑀓𑀴𑀻𑀭𑁄𑀯 (𑀓.)] 𑀅𑀲𑀚𑁆𑀚𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀯𑀁𑀲𑁄 𑀯𑀺𑀲𑀸𑀮𑁄𑀯 𑀬𑀣𑀸 𑀯𑀺𑀲𑀢𑁆𑀢𑁄𑀢𑀺 𑀯𑀁𑀲𑁄 𑀯𑀼𑀘𑁆𑀘𑀢𑀺 𑀯𑁂𑀴𑀼𑀕𑀼𑀫𑁆𑀩𑁄. 𑀬𑀣𑀸 𑀯𑁂𑀴𑀼𑀕𑀼𑀫𑁆𑀩𑀲𑁆𑀫𑀺𑀁 𑀧𑁄𑀭𑀸𑀡𑀓𑀸 𑀯𑀁𑀲𑀸 𑀲𑀢𑁆𑀢𑀸 [𑀯𑁂𑀴𑀼𑀕𑀼𑀫𑁆𑀩𑀲𑁆𑀫𑀺𑀁 𑀓𑀡𑁆𑀝𑀓𑀸 𑀚𑀝𑀺𑀢𑀸 𑀲𑀁𑀲𑀺𑀩𑁆𑀩𑀺𑀢𑀸 (𑀲𑁆𑀬𑀸.)] 𑀯𑀺𑀲𑀢𑁆𑀢𑀸 𑀆𑀲𑀢𑁆𑀢𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸, 𑀏𑀯𑀫𑁂𑀯 𑀯𑀺𑀲𑀢𑁆𑀢𑀺𑀓𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄 𑀅𑀦𑀼𑀦𑀬𑁄 𑀅𑀦𑀼𑀭𑁄𑀥𑁄 𑀦𑀦𑁆𑀤𑀻 𑀦𑀦𑁆𑀤𑀺𑀭𑀸𑀕𑁄 𑀘𑀺𑀢𑁆𑀢𑀲𑁆𑀲 𑀲𑀸𑀭𑀸𑀕𑁄 𑀇𑀘𑁆𑀙𑀸 𑀫𑀼𑀘𑁆𑀙𑀸 𑀅𑀚𑁆𑀛𑁄𑀲𑀸𑀦𑀁 𑀕𑁂𑀥𑁄 𑀧𑀮𑀺𑀕𑁂𑀥𑁄 𑀲𑀗𑁆𑀕𑁄 𑀧𑀗𑁆𑀓𑁄 𑀏𑀚𑀸 𑀫𑀸𑀬𑀸 𑀚𑀦𑀺𑀓𑀸 𑀲𑀜𑁆𑀚𑀦𑀦𑀻 𑀲𑀺𑀩𑁆𑀩𑀺𑀦𑀻 𑀚𑀸𑀮𑀺𑀦𑀻 𑀲𑀭𑀺𑀢𑀸 𑀯𑀺𑀲𑀢𑁆𑀢𑀺𑀓𑀸 𑀲𑀼𑀢𑁆𑀢𑀁 𑀯𑀺𑀲𑀝𑀸 𑀆𑀬𑀽𑀳𑀦𑀻 𑀤𑀼𑀢𑀺𑀬𑀸 𑀧𑀡𑀺𑀥𑀺 𑀪𑀯𑀦𑁂𑀢𑁆𑀢𑀺 𑀯𑀦𑀁 𑀯𑀦𑀣𑁄 𑀲𑀦𑁆𑀣𑀯𑁄 𑀲𑀺𑀦𑁂𑀳𑁄 𑀅𑀧𑁂𑀓𑁆𑀔𑀸 𑀧𑀝𑀺𑀩𑀦𑁆𑀥𑀼 𑀆𑀲𑀸 𑀆𑀲𑀻𑀲𑀦𑀸 𑀆𑀲𑀻𑀲𑀺𑀢𑀢𑁆𑀢𑀁 𑀭𑀽𑀧𑀸𑀲𑀸 𑀲𑀤𑁆𑀤𑀸𑀲𑀸 𑀕𑀦𑁆𑀥𑀸𑀲𑀸 𑀭𑀲𑀸𑀲𑀸 𑀨𑁄𑀝𑁆𑀞𑀩𑁆𑀩𑀸𑀲𑀸 𑀮𑀸𑀪𑀸𑀲𑀸 𑀥𑀦𑀸𑀲𑀸 𑀧𑀼𑀢𑁆𑀢𑀸𑀲𑀸 𑀚𑀻𑀯𑀺𑀢𑀸𑀲𑀸 𑀚𑀧𑁆𑀧𑀸 𑀧𑀚𑀧𑁆𑀧𑀸 𑀅𑀪𑀺𑀚𑀧𑁆𑀧𑀸 𑀚𑀧𑁆𑀧𑀦𑀸 𑀚𑀧𑁆𑀧𑀺𑀢𑀢𑁆𑀢𑀁 𑀮𑁄𑀮𑀼𑀧𑁆𑀧𑀁 𑀮𑁄𑀮𑀼𑀧𑁆𑀧𑀸𑀬𑀦𑀸 𑀮𑁄𑀮𑀼𑀧𑁆𑀧𑀸𑀬𑀺𑀢𑀢𑁆𑀢𑀁 𑀧𑀼𑀘𑁆𑀙𑀜𑁆𑀚𑀺𑀓𑀢𑀸 𑀲𑀸𑀥𑀼𑀓𑀫𑁆𑀬𑀢𑀸 𑀅𑀥𑀫𑁆𑀫𑀭𑀸𑀕𑁄 𑀯𑀺𑀲𑀫𑀮𑁄𑀪𑁄 𑀦𑀺𑀓𑀦𑁆𑀢𑀺 𑀦𑀺𑀓𑀸𑀫𑀦𑀸 𑀧𑀢𑁆𑀣𑀦𑀸 𑀧𑀺𑀳𑀦𑀸 𑀲𑀫𑁆𑀧𑀢𑁆𑀣𑀦𑀸 𑀓𑀸𑀫𑀢𑀡𑁆𑀳𑀸 𑀪𑀯𑀢𑀡𑁆𑀳𑀸 𑀯𑀺𑀪𑀯𑀢𑀡𑁆𑀳𑀸 𑀭𑀽𑀧𑀢𑀡𑁆𑀳𑀸 𑀅𑀭𑀽𑀧𑀢𑀡𑁆𑀳𑀸 𑀦𑀺𑀭𑁄𑀥𑀢𑀡𑁆𑀳𑀸 𑀭𑀽𑀧𑀢𑀡𑁆𑀳𑀸 𑀲𑀤𑁆𑀤𑀢𑀡𑁆𑀳𑀸 𑀕𑀦𑁆𑀥𑀢𑀡𑁆𑀳𑀸 𑀭𑀲𑀢𑀡𑁆𑀳𑀸 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀥𑀫𑁆𑀫𑀢𑀡𑁆𑀳𑀸 𑀑𑀖𑁄 𑀬𑁄𑀕𑁄 𑀕𑀦𑁆𑀣𑁄 𑀉𑀧𑀸𑀤𑀸𑀦𑀁 𑀆𑀯𑀭𑀡𑀁 𑀦𑀻𑀯𑀭𑀡𑀁 𑀙𑀤𑀦𑀁 𑀩𑀦𑁆𑀥𑀦𑀁 𑀉𑀧𑀓𑁆𑀓𑀺𑀮𑁂𑀲𑁄 𑀅𑀦𑀼𑀲𑀬𑁄 𑀧𑀭𑀺𑀬𑀼𑀝𑁆𑀞𑀸𑀦𑀁 𑀮𑀢𑀸 𑀯𑁂𑀯𑀺𑀘𑁆𑀙𑀁 𑀤𑀼𑀓𑁆𑀔𑀫𑀽𑀮𑀁 𑀤𑀼𑀓𑁆𑀔𑀦𑀺𑀤𑀸𑀦𑀁 𑀤𑀼𑀓𑁆𑀔𑀧𑁆𑀧𑀪𑀯𑁄 𑀫𑀸𑀭𑀧𑀸𑀲𑁄 𑀫𑀸𑀭𑀩𑀴𑀺𑀲𑀁 𑀫𑀸𑀭𑀯𑀺𑀲𑀬𑁄 𑀫𑀸𑀭𑀦𑀺𑀯𑀸𑀲𑁄 𑀫𑀸𑀭𑀩𑀦𑁆𑀥𑀦𑀁 𑀢𑀡𑁆𑀳𑀸𑀦𑀤𑀻 𑀢𑀡𑁆𑀳𑀸𑀚𑀸𑀮𑀁 𑀢𑀡𑁆𑀳𑀸𑀕𑀤𑁆𑀤𑀼𑀮𑀁 𑀢𑀡𑁆𑀳𑀸𑀲𑀫𑀼𑀤𑁆𑀤𑁄 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁.

𑀯𑀺𑀲𑀢𑁆𑀢𑀺𑀓𑀸𑀢𑀺 𑀓𑁂𑀦𑀝𑁆𑀞𑁂𑀦 𑀯𑀺𑀲𑀢𑁆𑀢𑀺𑀓𑀸? 𑀯𑀺𑀲𑀸𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸 𑀯𑀺𑀲𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀝𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀫𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀓𑁆𑀓𑀢𑀻𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀁𑀳𑀭𑀢𑀻𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀁𑀯𑀸𑀤𑀺𑀓𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀫𑀽𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀨𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀧𑀭𑀺𑀪𑁄𑀕𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀯𑀺𑀲𑀸𑀮𑀸 𑀯𑀸 𑀧𑀦 𑀢𑀡𑁆𑀳𑀸 𑀭𑀽𑀧𑁂 𑀲𑀤𑁆𑀤𑁂 𑀕𑀦𑁆𑀥𑁂 𑀭𑀲𑁂 𑀨𑁄𑀝𑁆𑀞𑀩𑁆𑀩𑁂 𑀓𑀼𑀮𑁂 𑀕𑀡𑁂 𑀆𑀯𑀸𑀲𑁂 𑀮𑀸𑀪𑁂 𑀬𑀲𑁂 𑀧𑀲𑀁𑀲𑀸𑀬 𑀲𑀼𑀔𑁂 𑀘𑀻𑀯𑀭𑁂 𑀧𑀺𑀡𑁆𑀟𑀧𑀸𑀢𑁂 𑀲𑁂𑀦𑀸𑀲𑀦𑁂 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂 𑀓𑀸𑀫𑀥𑀸𑀢𑀼𑀬𑀸 𑀭𑀽𑀧𑀥𑀸𑀢𑀼𑀬𑀸 𑀅𑀭𑀽𑀧𑀥𑀸𑀢𑀼𑀬𑀸 𑀓𑀸𑀫𑀪𑀯𑁂 𑀭𑀽𑀧𑀪𑀯𑁂 𑀅𑀭𑀽𑀧𑀪𑀯𑁂 𑀲𑀜𑁆𑀜𑀸𑀪𑀯𑁂 𑀅𑀲𑀜𑁆𑀜𑀸𑀪𑀯𑁂 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑁂 𑀏𑀓𑀯𑁄𑀓𑀸𑀭𑀪𑀯𑁂 𑀘𑀢𑀼𑀯𑁄𑀓𑀸𑀭𑀪𑀯𑁂 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀅𑀢𑀻𑀢𑁂 𑀅𑀦𑀸𑀕𑀢𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀲𑀢𑀸 𑀯𑀺𑀢𑁆𑀣𑀢𑀸𑀢𑀺 𑁋 𑀯𑀺𑀲𑀢𑁆𑀢𑀺𑀓𑀸𑀢𑀺 𑁋 𑀯𑀁𑀲𑁄 𑀯𑀺𑀲𑀸𑀮𑁄𑀯 𑀬𑀣𑀸 𑀯𑀺𑀲𑀢𑁆𑀢𑁄.

𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸𑀢𑀺. 𑀧𑀼𑀢𑁆𑀢𑀸𑀢𑀺 𑀘𑀢𑁆𑀢𑀸𑀭𑁄 𑀧𑀼𑀢𑁆𑀢𑀸 𑁋 𑀅𑀢𑁆𑀭𑀚𑁄 𑀧𑀼𑀢𑁆𑀢𑁄, 𑀔𑁂𑀢𑁆𑀢𑀚𑁄 𑀧𑀼𑀢𑁆𑀢𑁄, 𑀤𑀺𑀦𑁆𑀦𑀓𑁄 𑀧𑀼𑀢𑁆𑀢𑁄, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀼𑀢𑁆𑀢𑁄. 𑀤𑀸𑀭𑀸 𑀯𑀼𑀘𑁆𑀘𑀦𑁆𑀢𑀺 𑀪𑀭𑀺𑀬𑀸𑀬𑁄. 𑀅𑀧𑁂𑀓𑁆𑀔𑀸 𑀯𑀼𑀘𑁆𑀘𑀦𑁆𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀦𑁆𑀢𑀺 𑁋 𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸.

𑀯𑀁𑀲𑀓𑁆𑀓𑀴𑀻𑀭𑁄𑀯 𑀅𑀲𑀚𑁆𑀚𑀫𑀸𑀦𑁄𑀢𑀺 𑀯𑀁𑀲𑁄 𑀯𑀼𑀘𑁆𑀘𑀢𑀺 𑀯𑁂𑀴𑀼𑀕𑀼𑀫𑁆𑀩𑁄. 𑀬𑀣𑀸 𑀯𑁂𑀴𑀼𑀕𑀼𑀫𑁆𑀩𑀲𑁆𑀫𑀺𑀁 𑀢𑀭𑀼𑀡𑀓𑀸 𑀓𑀴𑀻𑀭𑀓𑀸 [𑀢𑀭𑀼𑀡𑀓𑀴𑀻𑀭𑀸 (𑀲𑁆𑀬𑀸.)] 𑀅𑀲𑀢𑁆𑀢𑀸 𑀅𑀮𑀕𑁆𑀕𑀸 𑀅𑀕𑀥𑀺𑀢𑀸 [𑀅𑀧𑀮𑀺𑀯𑁂𑀝𑁆𑀞𑀺𑀢𑀸 (𑀲𑁆𑀬𑀸.)] 𑀅𑀧𑀮𑀺𑀩𑀼𑀤𑁆𑀥𑀸 𑀦𑀺𑀓𑁆𑀔𑀦𑁆𑀢𑀸 𑀦𑀺𑀲𑁆𑀲𑀝𑀸 𑀯𑀺𑀧𑁆𑀧𑀫𑀼𑀢𑁆𑀢𑀸 𑀏𑀯𑀫𑁂𑀯. 𑀲𑀚𑁆𑀚𑀸𑀢𑀺 𑀤𑁆𑀯𑁂 𑀲𑀚𑁆𑀚𑀦𑀸 𑁋 𑀢𑀡𑁆𑀳𑀸𑀲𑀚𑁆𑀚𑀦𑀸 𑀘 𑀤𑀺𑀝𑁆𑀞𑀺𑀲𑀚𑁆𑀚𑀦𑀸 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀲𑀚𑁆𑀚𑀦𑀸…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀲𑀚𑁆𑀚𑀦𑀸. 𑀢𑀲𑁆𑀲 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑀡𑁆𑀳𑀸𑀲𑀚𑁆𑀚𑀦𑀸 𑀧𑀳𑀻𑀦𑀸, 𑀤𑀺𑀝𑁆𑀞𑀺𑀲𑀚𑁆𑀚𑀦𑀸 𑀧𑀝𑀺𑀦𑀺𑀲𑁆𑀲𑀝𑁆𑀞𑀸. 𑀢𑀡𑁆𑀳𑀸𑀲𑀚𑁆𑀚𑀦𑀸𑀬 𑀧𑀳𑀻𑀦𑀢𑁆𑀢𑀸 𑀤𑀺𑀝𑁆𑀞𑀺𑀲𑀚𑁆𑀚𑀦𑀸𑀬 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀭𑀽𑀧𑁂 𑀦 𑀲𑀚𑁆𑀚𑀢𑀺 𑀲𑀤𑁆𑀤𑁂 𑀦 𑀲𑀚𑁆𑀚𑀢𑀺 𑀕𑀦𑁆𑀥𑁂 𑀦 𑀲𑀚𑁆𑀚𑀢𑀺 𑀭𑀲𑁂 𑀦 𑀲𑀚𑁆𑀚𑀢𑀺 𑀨𑁄𑀝𑁆𑀞𑀩𑁆𑀩𑁂 𑀦 𑀲𑀚𑁆𑀚𑀢𑀺 𑀓𑀼𑀮𑁂…𑀧𑁂… 𑀕𑀡𑁂… 𑀆𑀯𑀸𑀲𑁂… 𑀮𑀸𑀪𑁂… 𑀬𑀲𑁂… 𑀧𑀲𑀁𑀲𑀸𑀬… 𑀲𑀼𑀔𑁂… 𑀘𑀻𑀯𑀭𑁂… 𑀧𑀺𑀡𑁆𑀟𑀧𑀸𑀢𑁂… 𑀲𑁂𑀦𑀸𑀲𑀦𑁂… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂… 𑀓𑀸𑀫𑀥𑀸𑀢𑀼𑀬𑀸… 𑀭𑀽𑀧𑀥𑀸𑀢𑀼𑀬𑀸… 𑀅𑀭𑀽𑀧𑀥𑀸𑀢𑀼𑀬𑀸… 𑀓𑀸𑀫𑀪𑀯𑁂… 𑀭𑀽𑀧𑀪𑀯𑁂… 𑀅𑀭𑀽𑀧𑀪𑀯𑁂… 𑀲𑀜𑁆𑀜𑀸𑀪𑀯𑁂… 𑀅𑀲𑀜𑁆𑀜𑀸𑀪𑀯𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑁂… 𑀏𑀓𑀯𑁄𑀓𑀸𑀭𑀪𑀯𑁂… 𑀘𑀢𑀼𑀯𑁄𑀓𑀸𑀭𑀪𑀯𑁂… 𑀧𑀜𑁆𑀘𑀯𑁄𑀓𑀸𑀭𑀪𑀯𑁂… 𑀅𑀢𑀻𑀢𑁂… 𑀅𑀦𑀸𑀕𑀢𑁂… 𑀧𑀘𑁆𑀘𑀼𑀧𑁆𑀧𑀦𑁆𑀦𑁂… 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀦 𑀲𑀚𑁆𑀚𑀢𑀺 𑀦 𑀕𑀡𑁆𑀳𑀸𑀢𑀺 𑀦 𑀩𑀚𑁆𑀛𑀢𑀺 𑀦 𑀧𑀮𑀺𑀩𑀚𑁆𑀛𑀢𑀺 𑀦 𑀫𑀼𑀘𑁆𑀙𑀢𑀺; 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀯𑀁𑀲𑀓𑁆𑀓𑀴𑀻𑀭𑁄𑀯 𑀅𑀲𑀚𑁆𑀚𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀯𑀁𑀲𑁄 𑀯𑀺𑀲𑀸𑀮𑁄𑀯 𑀬𑀣𑀸 𑀯𑀺𑀲𑀢𑁆𑀢𑁄, 𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸;

𑀯𑀁𑀲𑀓𑁆𑀓𑀴𑀻𑀭𑁄𑀯 𑀅𑀲𑀚𑁆𑀚𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁨𑁫. 𑀫𑀺𑀕𑁄 𑀅𑀭𑀜𑁆𑀜𑀫𑁆𑀳𑀺 𑀬𑀣𑀸 𑀅𑀩𑀤𑁆𑀥𑁄 [𑀅𑀩𑀦𑁆𑀥𑁄 (𑀲𑁆𑀬𑀸. 𑀓.)], 𑀬𑁂𑀦𑀺𑀘𑁆𑀙𑀓𑀁 𑀕𑀘𑁆𑀙𑀢𑀺 𑀕𑁄𑀘𑀭𑀸𑀬;

𑀯𑀺𑀜𑁆𑀜𑀽 𑀦𑀭𑁄 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀫𑀺𑀕𑁄 𑀅𑀭𑀜𑁆𑀜𑀫𑁆𑀳𑀺 𑀬𑀣𑀸 𑀅𑀩𑀤𑁆𑀥𑁄, 𑀬𑁂𑀦𑀺𑀘𑁆𑀙𑀓𑀁 𑀕𑀘𑁆𑀙𑀢𑀺 𑀕𑁄𑀘𑀭𑀸𑀬𑀸𑀢𑀺. 𑀫𑀺𑀕𑁄𑀢𑀺 𑀤𑁆𑀯𑁂 𑀫𑀺𑀕𑀸 𑁋 𑀏𑀡𑀺𑀫𑀺𑀕𑁄 𑀘 𑀧𑀲𑀤𑀫𑀺𑀕𑁄 𑀘. 𑀬𑀣𑀸 𑀆𑀭𑀜𑁆𑀜𑀺𑀓𑁄 [𑀆𑀭𑀜𑁆𑀜𑀓𑁄 (𑀲𑁆𑀬𑀸. 𑀓.)] 𑀫𑀺𑀕𑁄 𑀅𑀭𑀜𑁆𑀜𑁂 𑀧𑀯𑀦𑁂 𑀘𑀭𑀫𑀸𑀦𑁄 [𑀅𑀭𑀜𑁆𑀜𑁂 𑀯𑀲𑀫𑀸𑀦𑁄 (𑀲𑁆𑀬𑀸.)] 𑀯𑀺𑀲𑁆𑀲𑀢𑁆𑀣𑁄 𑀕𑀘𑁆𑀙𑀢𑀺 𑀯𑀺𑀲𑁆𑀲𑀢𑁆𑀣𑁄 𑀢𑀺𑀝𑁆𑀞𑀢𑀺 𑀯𑀺𑀲𑁆𑀲𑀢𑁆𑀣𑁄 𑀦𑀺𑀲𑀻𑀤𑀢𑀺 𑀯𑀺𑀲𑁆𑀲𑀢𑁆𑀣𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀆𑀭𑀜𑁆𑀜𑀺𑀓𑁄 𑀫𑀺𑀕𑁄 𑀅𑀭𑀜𑁆𑀜𑁂 𑀧𑀯𑀦𑁂 𑀘𑀭𑀫𑀸𑀦𑁄 𑀯𑀺𑀲𑁆𑀲𑀢𑁆𑀣𑁄 𑀕𑀘𑁆𑀙𑀢𑀺 𑀯𑀺𑀲𑁆𑀲𑀢𑁆𑀣𑁄 𑀢𑀺𑀝𑁆𑀞𑀢𑀺 𑀯𑀺𑀲𑁆𑀲𑀢𑁆𑀣𑁄 𑀦𑀺𑀲𑀻𑀤𑀢𑀺 𑀯𑀺𑀲𑁆𑀲𑀢𑁆𑀣𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀦𑀸𑀧𑀸𑀣𑀕𑀢𑁄, 𑀪𑀺𑀓𑁆𑀔𑀯𑁂, 𑀮𑀼𑀤𑁆𑀤𑀲𑁆𑀲. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀪𑀺𑀓𑁆𑀔𑀼 𑀅𑀦𑁆𑀥𑀫𑀓𑀸𑀲𑀺 𑀫𑀸𑀭𑀁, 𑀅𑀧𑀤𑀁 [𑀧𑀭𑀁 (𑀓.) 𑀫. 𑀦𑀺. 𑁧.𑁨𑁭𑁧] 𑀯𑀥𑀺𑀢𑁆𑀯𑀸 𑀫𑀸𑀭𑀘𑀓𑁆𑀔𑀼𑀁 𑀅𑀤𑀲𑁆𑀲𑀦𑀁 𑀕𑀢𑁄 𑀧𑀸𑀧𑀺𑀫𑀢𑁄’.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀪𑀺𑀓𑁆𑀔𑀼 𑀅𑀦𑁆𑀥𑀫𑀓𑀸𑀲𑀺 𑀫𑀸𑀭𑀁, 𑀅𑀧𑀤𑀁 𑀯𑀥𑀺𑀢𑁆𑀯𑀸 𑀫𑀸𑀭𑀘𑀓𑁆𑀔𑀼𑀁 𑀅𑀤𑀲𑁆𑀲𑀦𑀁 𑀕𑀢𑁄 𑀧𑀸𑀧𑀺𑀫𑀢𑁄’.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀪𑀺𑀓𑁆𑀔𑀼 𑀅𑀦𑁆𑀥𑀫𑀓𑀸𑀲𑀺 𑀫𑀸𑀭𑀁, 𑀅𑀧𑀤𑀁 𑀯𑀥𑀺𑀢𑁆𑀯𑀸 𑀫𑀸𑀭𑀘𑀓𑁆𑀔𑀼𑀁 𑀅𑀤𑀲𑁆𑀲𑀦𑀁 𑀕𑀢𑁄 𑀧𑀸𑀧𑀺𑀫𑀢𑁄’.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀪𑀺𑀓𑁆𑀔𑀼 𑀅𑀦𑁆𑀥𑀫𑀓𑀸𑀲𑀺 𑀫𑀸𑀭𑀁, 𑀅𑀧𑀤𑀁 𑀯𑀥𑀺𑀢𑁆𑀯𑀸 𑀫𑀸𑀭𑀘𑀓𑁆𑀔𑀼𑀁 𑀅𑀤𑀲𑁆𑀲𑀦𑀁 𑀕𑀢𑁄 𑀧𑀸𑀧𑀺𑀫𑀢𑁄’.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 ‘𑀅𑀦𑀦𑁆𑀢𑁄 𑀆𑀓𑀸𑀲𑁄’𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀪𑀺𑀓𑁆𑀔𑀼 𑀅𑀦𑁆𑀥𑀫𑀓𑀸𑀲𑀺 𑀫𑀸𑀭𑀁, 𑀅𑀧𑀤𑀁 𑀯𑀥𑀺𑀢𑁆𑀯𑀸 𑀫𑀸𑀭𑀘𑀓𑁆𑀔𑀼𑀁 𑀅𑀤𑀲𑁆𑀲𑀦𑀁 𑀕𑀢𑁄 𑀧𑀸𑀧𑀺𑀫𑀢𑁄’.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺…𑀧𑁂….

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀦𑀢𑁆𑀣𑀺 𑀓𑀺𑀜𑁆𑀘𑀻’𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺…𑀧𑁂….

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀲𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺…𑀧𑁂….

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀲𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀪𑀺𑀓𑁆𑀔𑀼 𑀅𑀦𑁆𑀥𑀫𑀓𑀸𑀲𑀺 𑀫𑀸𑀭𑀁, 𑀅𑀧𑀤𑀁 𑀯𑀥𑀺𑀢𑁆𑀯𑀸 𑀫𑀸𑀭𑀘𑀓𑁆𑀔𑀼𑀁 𑀅𑀤𑀲𑁆𑀲𑀦𑀁 𑀕𑀢𑁄 𑀧𑀸𑀧𑀺𑀫𑀢𑁄’, 𑀢𑀺𑀡𑁆𑀡𑁄 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁. 𑀲𑁄 𑀯𑀺𑀲𑁆𑀲𑀢𑁆𑀣𑁄 𑀕𑀘𑁆𑀙𑀢𑀺 𑀯𑀺𑀲𑁆𑀲𑀢𑁆𑀣𑁄 𑀢𑀺𑀝𑁆𑀞𑀢𑀺 𑀯𑀺𑀲𑁆𑀲𑀢𑁆𑀣𑁄 𑀦𑀺𑀲𑀻𑀤𑀢𑀺 𑀯𑀺𑀲𑁆𑀲𑀢𑁆𑀣𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀦𑀸𑀧𑀸𑀣𑀕𑀢𑁄, 𑀪𑀺𑀓𑁆𑀔𑀯𑁂, 𑀧𑀸𑀧𑀺𑀫𑀢𑁄’’𑀢𑀺 𑁋 𑀫𑀺𑀕𑁄 𑀅𑀭𑀜𑁆𑀜𑀫𑁆𑀳𑀺 𑀬𑀣𑀸 𑀅𑀩𑀤𑁆𑀥𑁄, 𑀬𑁂𑀦𑀺𑀘𑁆𑀙𑀓𑀁 𑀕𑀘𑁆𑀙𑀢𑀺 𑀕𑁄𑀘𑀭𑀸𑀬.

𑀯𑀺𑀜𑁆𑀜𑀽 𑀦𑀭𑁄 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄𑀢𑀺. 𑀯𑀺𑀜𑁆𑀜𑀽𑀢𑀺 𑀧𑀡𑁆𑀟𑀺𑀢𑁄 𑀧𑀜𑁆𑀜𑀯𑀸 𑀩𑀼𑀤𑁆𑀥𑀺𑀫𑀸 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻. 𑀦𑀭𑁄𑀢𑀺 𑀲𑀢𑁆𑀢𑁄 𑀫𑀸𑀡𑀯𑁄 𑀧𑁄𑀲𑁄 𑀧𑀼𑀕𑁆𑀕𑀮𑁄 𑀚𑀻𑀯𑁄 𑀚𑀸𑀕𑀼 𑀚𑀦𑁆𑀢𑀼 𑀇𑀦𑁆𑀤𑀕𑀼 𑀫𑀦𑀼𑀚𑁄. 𑀲𑁂𑀭𑀻𑀢𑀺 𑀤𑁆𑀯𑁂 𑀲𑁂𑀭𑀻 𑁋 𑀥𑀫𑁆𑀫𑁄𑀧𑀺 𑀲𑁂𑀭𑀻 𑀧𑀼𑀕𑁆𑀕𑀮𑁄𑀧𑀺 𑀲𑁂𑀭𑀻. 𑀓𑀢𑀫𑁄 𑀥𑀫𑁆𑀫𑁄 𑀲𑁂𑀭𑀻? 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑁋 𑀅𑀬𑀁 𑀥𑀫𑁆𑀫𑁄 𑀲𑁂𑀭𑀻. 𑀓𑀢𑀫𑁄 𑀧𑀼𑀕𑁆𑀕𑀮𑁄 𑀲𑁂𑀭𑀻? 𑀬𑁄 𑀇𑀫𑀺𑀦𑀸 𑀲𑁂𑀭𑀺𑀦𑀸 𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀲𑁄 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀲𑁂𑀭𑀻. 𑀯𑀺𑀜𑁆𑀜𑀽 𑀦𑀭𑁄 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄𑀢𑀺 𑀯𑀺𑀜𑁆𑀜𑀽 𑀦𑀭𑁄 𑀲𑁂𑀭𑀺𑀢𑀁 𑀥𑀫𑁆𑀫𑀁 𑀧𑁂𑀓𑁆𑀔𑀫𑀸𑀦𑁄, 𑀤𑀓𑁆𑀔𑀫𑀸𑀦𑁄 𑀑𑀮𑁄𑀓𑀬𑀫𑀸𑀦𑁄 𑀦𑀺𑀚𑁆𑀛𑀸𑀬𑀫𑀸𑀦𑁄 𑀉𑀧𑀧𑀭𑀺𑀓𑁆𑀔𑀫𑀸𑀦𑁄𑀢𑀺 𑁋 𑀯𑀺𑀜𑁆𑀜𑀽 𑀦𑀭𑁄 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀫𑀺𑀕𑁄 𑀅𑀭𑀜𑁆𑀜𑀫𑁆𑀳𑀺 𑀬𑀣𑀸 𑀅𑀩𑀤𑁆𑀥𑁄, 𑀬𑁂𑀦𑀺𑀘𑁆𑀙𑀓𑀁 𑀕𑀘𑁆𑀙𑀢𑀺 𑀕𑁄𑀘𑀭𑀸𑀬;

𑀯𑀺𑀜𑁆𑀜𑀽 𑀦𑀭𑁄 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁨𑁬. 𑀆𑀫𑀦𑁆𑀢𑀦𑀸 𑀳𑁄𑀢𑀺 𑀲𑀳𑀸𑀬𑀫𑀚𑁆𑀛𑁂,𑀯𑀸𑀲𑁂 𑀞𑀸𑀦𑁂 𑀕𑀫𑀦𑁂 𑀘𑀸𑀭𑀺𑀓𑀸𑀬;

𑀅𑀦𑀪𑀺𑀚𑁆𑀛𑀺𑀢𑀁 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀆𑀫𑀦𑁆𑀢𑀦𑀸 𑀳𑁄𑀢𑀺 𑀲𑀳𑀸𑀬𑀫𑀚𑁆𑀛𑁂, 𑀯𑀸𑀲𑁂 𑀞𑀸𑀦𑁂 𑀕𑀫𑀦𑁂 𑀘𑀸𑀭𑀺𑀓𑀸𑀬𑀸𑀢𑀺 𑀲𑀳𑀸𑀬𑀸 𑀯𑀼𑀘𑁆𑀘𑀦𑁆𑀢𑀺 𑀬𑁂𑀳𑀺 𑀲𑀳 𑀆𑀕𑀫𑀦𑀁 𑀨𑀸𑀲𑀼 𑀕𑀫𑀦𑀁 𑀨𑀸𑀲𑀼 𑀕𑀫𑀦𑀸𑀕𑀫𑀦𑀁 𑀨𑀸𑀲𑀼 𑀞𑀸𑀦𑀁 𑀨𑀸𑀲𑀼 𑀦𑀺𑀲𑀚𑁆𑀚𑀦𑀁 𑀨𑀸𑀲𑀼 𑀲𑀬𑀦𑀁 𑀨𑀸𑀲𑀼 𑀆𑀮𑀧𑀦𑀁 𑀨𑀸𑀲𑀼 𑀲𑀮𑁆𑀮𑀧𑀦𑀁 𑀨𑀸𑀲𑀼 𑀉𑀮𑁆𑀮𑀧𑀦𑀁 𑀨𑀸𑀲𑀼 𑀲𑀫𑀼𑀮𑁆𑀮𑀧𑀦𑀁 𑀨𑀸𑀲𑀼. 𑀆𑀫𑀦𑁆𑀢𑀦𑀸 𑀳𑁄𑀢𑀺 𑀲𑀳𑀸𑀬𑀫𑀚𑁆𑀛𑁂, 𑀯𑀸𑀲𑁂 𑀞𑀸𑀦𑁂 𑀕𑀫𑀦𑁂 𑀘𑀸𑀭𑀺𑀓𑀸𑀬𑀸𑀢𑀺 𑀲𑀳𑀸𑀬𑀫𑀚𑁆𑀛𑁂 𑀯𑀸𑀲𑁂𑀧𑀺 𑀞𑀸𑀦𑁂𑀧𑀺 𑀕𑀫𑀦𑁂𑀧𑀺 𑀘𑀸𑀭𑀺𑀓𑀸𑀬𑀧𑀺 𑀅𑀢𑁆𑀢𑀢𑁆𑀣𑀫𑀦𑁆𑀢𑀦𑀸 𑀧𑀭𑀢𑁆𑀣𑀫𑀦𑁆𑀢𑀦𑀸 𑀉𑀪𑀬𑀢𑁆𑀣𑀫𑀦𑁆𑀢𑀦𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀢𑁆𑀣𑀫𑀦𑁆𑀢𑀦𑀸 𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑀫𑀦𑁆𑀢𑀦𑀸 𑀧𑀭𑀫𑀢𑁆𑀣𑀫𑀦𑁆𑀢𑀦𑀸 [𑀉𑀪𑀬𑀢𑁆𑀣𑀫𑀦𑁆𑀢𑀦𑀸 (𑀓.)] 𑀢𑀺 𑁋 𑀆𑀫𑀦𑁆𑀢𑀦𑀸 𑀳𑁄𑀢𑀺 𑀲𑀳𑀸𑀬𑀫𑀚𑁆𑀛𑁂, 𑀯𑀸𑀲𑁂 𑀞𑀸𑀦𑁂 𑀕𑀫𑀦𑁂 𑀘𑀸𑀭𑀺𑀓𑀸𑀬.

𑀅𑀦𑀪𑀺𑀚𑁆𑀛𑀺𑀢𑀁 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄𑀢𑀺 𑀅𑀦𑀪𑀺𑀚𑁆𑀛𑀺𑀢𑀁 𑀏𑀢𑀁 𑀯𑀢𑁆𑀣𑀼 𑀩𑀸𑀮𑀸𑀦𑀁 𑀅𑀲𑀧𑁆𑀧𑀼𑀭𑀺𑀲𑀸𑀦𑀁 𑀢𑀺𑀢𑁆𑀣𑀺𑀬𑀸𑀦𑀁 𑀢𑀺𑀢𑁆𑀣𑀬𑀲𑀸𑀯𑀓𑀸𑀦𑀁, 𑀬𑀤𑀺𑀤𑀁 𑁋 𑀪𑀡𑁆𑀟𑀼𑀓𑀸𑀲𑀸𑀬𑀯𑀢𑁆𑀣𑀯𑀲𑀦𑀢𑀸. 𑀅𑀪𑀺𑀚𑁆𑀛𑀺𑀢𑀁 𑀏𑀢𑀁 𑀯𑀢𑁆𑀣𑀼 𑀧𑀡𑁆𑀟𑀺𑀢𑀸𑀦𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁, 𑀬𑀤𑀺𑀤𑀁 𑁋 𑀪𑀡𑁆𑀟𑀼𑀓𑀸𑀲𑀸𑀬𑀯𑀢𑁆𑀣𑀯𑀲𑀦𑀢𑀸. 𑀲𑁂𑀭𑀻𑀢𑀺 𑀤𑁆𑀯𑁂 𑀲𑁂𑀭𑀻 𑁋 𑀥𑀫𑁆𑀫𑁄𑀧𑀺 𑀲𑁂𑀭𑀻 𑀧𑀼𑀕𑁆𑀕𑀮𑁄𑀧𑀺 𑀲𑁂𑀭𑀻. 𑀓𑀢𑀫𑁄 𑀥𑀫𑁆𑀫𑁄 𑀲𑁂𑀭𑀻? 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 …𑀧𑁂… 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑁋 𑀅𑀬𑀁 𑀥𑀫𑁆𑀫𑁄 𑀲𑁂𑀭𑀻. 𑀓𑀢𑀫𑁄 𑀧𑀼𑀕𑁆𑀕𑀮𑁄 𑀲𑁂𑀭𑀻? 𑀬𑁄 𑀇𑀫𑀺𑀦𑀸 𑀲𑁂𑀭𑀺𑀦𑀸 𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀲𑁄 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀲𑁂𑀭𑀻. 𑀅𑀦𑀪𑀺𑀚𑁆𑀛𑀺𑀢𑀁 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄𑀢𑀺 𑀲𑁂𑀭𑀺𑀢𑀁 𑀥𑀫𑁆𑀫𑀁 𑀧𑁂𑀓𑁆𑀔𑀫𑀸𑀦𑁄 𑀤𑀓𑁆𑀔𑀫𑀸𑀦𑁄 𑀑𑀮𑁄𑀓𑀬𑀫𑀸𑀦𑁄 𑀦𑀺𑀚𑁆𑀛𑀸𑀬𑀫𑀸𑀦𑁄 𑀉𑀧𑀧𑀭𑀺𑀓𑁆𑀔𑀫𑀸𑀦𑁄𑀢𑀺 𑁋 𑀅𑀦𑀪𑀺𑀚𑁆𑀛𑀺𑀢𑀁 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀆𑀫𑀦𑁆𑀢𑀦𑀸 𑀳𑁄𑀢𑀺 𑀲𑀳𑀸𑀬𑀫𑀚𑁆𑀛𑁂, 𑀯𑀸𑀲𑁂 𑀞𑀸𑀦𑁂 𑀕𑀫𑀦𑁂 𑀘𑀸𑀭𑀺𑀓𑀸𑀬;

𑀅𑀦𑀪𑀺𑀚𑁆𑀛𑀺𑀢𑀁 𑀲𑁂𑀭𑀺𑀢𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁨𑁭. 𑀔𑀺𑀟𑁆𑀟𑀸 [𑀔𑀺𑀝𑁆𑀝𑀸 (𑀓.)] 𑀭𑀢𑀻 𑀳𑁄𑀢𑀺 𑀲𑀳𑀸𑀬𑀫𑀚𑁆𑀛𑁂,𑀧𑀼𑀢𑁆𑀢𑁂𑀲𑀼 𑀘 𑀯𑀺𑀧𑀼𑀮𑀁 𑀳𑁄𑀢𑀺 𑀧𑁂𑀫𑀁;

𑀧𑀺𑀬𑀯𑀺𑀧𑁆𑀧𑀬𑁄𑀕𑀁 [𑀯𑀺𑀧𑁆𑀧𑀬𑁄𑀕𑀫𑁆𑀧𑀺 (𑀓.)] 𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀔𑀺𑀟𑁆𑀟𑀸 𑀭𑀢𑀻 𑀳𑁄𑀢𑀺 𑀲𑀳𑀸𑀬𑀫𑀚𑁆𑀛𑁂𑀢𑀺. 𑀔𑀺𑀟𑁆𑀟𑀸𑀢𑀺 𑀤𑁆𑀯𑁂 𑀔𑀺𑀟𑁆𑀟𑀸 𑁋 𑀓𑀸𑀬𑀺𑀓𑀸 𑀘 𑀔𑀺𑀟𑁆𑀟𑀸 𑀯𑀸𑀘𑀲𑀺𑀓𑀸 𑀘 𑀔𑀺𑀟𑁆𑀟𑀸. 𑀓𑀢𑀫𑀸 𑀓𑀸𑀬𑀺𑀓𑀸 𑀔𑀺𑀟𑁆𑀟𑀸? 𑀳𑀢𑁆𑀣𑀻𑀳𑀺𑀧𑀺 𑀓𑀻𑀴𑀦𑁆𑀢𑀺, 𑀅𑀲𑁆𑀲𑁂𑀳𑀺𑀧𑀺 𑀓𑀻𑀴𑀦𑁆𑀢𑀺, 𑀭𑀣𑁂𑀳𑀺𑀧𑀺 𑀓𑀻𑀴𑀦𑁆𑀢𑀺, 𑀥𑀦𑀽𑀳𑀺𑀧𑀺 𑀓𑀻𑀴𑀦𑁆𑀢𑀺, 𑀣𑀭𑀽𑀳𑀺𑀧𑀺 𑀓𑀻𑀴𑀦𑁆𑀢𑀺, 𑀅𑀝𑁆𑀞𑀧𑀤𑁂𑀳𑀺𑀧𑀺 𑀓𑀻𑀴𑀦𑁆𑀢𑀺, 𑀤𑀲𑀧𑀤𑁂𑀳𑀺𑀧𑀺 𑀓𑀻𑀴𑀦𑁆𑀢𑀺, 𑀆𑀓𑀸𑀲𑁂𑀧𑀺 𑀓𑀻𑀴𑀦𑁆𑀢𑀺, 𑀧𑀭𑀺𑀳𑀸𑀭𑀧𑀣𑁂𑀧𑀺 𑀓𑀻𑀴𑀦𑁆𑀢𑀺, 𑀲𑀦𑁆𑀢𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀔𑀮𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀖𑀝𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀲𑀮𑀸𑀓𑀳𑀢𑁆𑀣𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀅𑀓𑁆𑀔𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀧𑀗𑁆𑀕𑀘𑀻𑀭𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀯𑀗𑁆𑀓𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀫𑁄𑀓𑁆𑀔𑀘𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀘𑀺𑀗𑁆𑀕𑀼𑀮𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀧𑀢𑁆𑀢𑀸𑀴𑁆𑀳𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀭𑀣𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀥𑀦𑀼𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀅𑀓𑁆𑀔𑀭𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀫𑀦𑁂𑀲𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀬𑀣𑀸𑀯𑀚𑁆𑀚𑁂𑀦𑀧𑀺 𑀓𑀻𑀴𑀦𑁆𑀢𑀺. 𑀅𑀬𑀁 𑀓𑀸𑀬𑀺𑀓𑀸 𑀔𑀺𑀟𑁆𑀟𑀸.

𑀓𑀢𑀫𑀸 𑀯𑀸𑀘𑀲𑀺𑀓𑀸 𑀔𑀺𑀟𑁆𑀟𑀸? 𑀫𑀼𑀔𑀪𑁂𑀭𑀺𑀓𑀁 𑀫𑀼𑀔𑀸𑀮𑀫𑁆𑀩𑀭𑀁 𑀫𑀼𑀔𑀟𑀺𑀡𑁆𑀟𑀺𑀫𑀓𑀁 [𑀫𑀼𑀔𑀤𑁂𑀡𑁆𑀟𑀺𑀫𑀓𑀁 (𑀲𑁆𑀬𑀸.), 𑀫𑀼𑀔𑀤𑀺𑀦𑁆𑀤𑀺𑀫𑀓𑀁 (𑀓.)] 𑀫𑀼𑀔𑀘𑀮𑀺𑀫𑀓𑀁 𑀫𑀼𑀔𑀓𑁂𑀭𑀓𑀁 [𑀫𑀼𑀔𑀪𑁂𑀭𑀼𑀓𑀁 (𑀲𑁆𑀬𑀸.)] 𑀫𑀼𑀔𑀤𑀤𑁆𑀤𑀭𑀺𑀓𑀁 𑀦𑀸𑀝𑀓𑀁 𑀮𑀸𑀲𑀁 𑀕𑀻𑀢𑀁 𑀤𑀯𑀓𑀫𑁆𑀫𑀁. 𑀅𑀬𑀁 𑀯𑀸𑀘𑀲𑀺𑀓𑀸 𑀔𑀺𑀟𑁆𑀟𑀸.

𑀭𑀢𑀻𑀢𑀺 𑀅𑀦𑀼𑀓𑁆𑀓𑀡𑁆𑀞𑀺𑀢𑀸𑀥𑀺𑀯𑀘𑀦𑀫𑁂𑀢𑀁 𑀭𑀢𑀻𑀢𑀺. 𑀲𑀳𑀸𑀬𑀸 𑀯𑀼𑀘𑁆𑀘𑀦𑁆𑀢𑀺 𑀬𑁂𑀳𑀺 𑀲𑀳 𑀆𑀕𑀫𑀦𑀁 𑀨𑀸𑀲𑀼 𑀕𑀫𑀦𑀁 𑀨𑀸𑀲𑀼 𑀕𑀫𑀦𑀸𑀕𑀫𑀦𑀁 𑀨𑀸𑀲𑀼 𑀞𑀸𑀦𑀁 𑀨𑀸𑀲𑀼 𑀦𑀺𑀲𑀚𑁆𑀚𑀦𑀁 𑀨𑀸𑀲𑀼 𑀲𑀬𑀦𑀁 𑀨𑀸𑀲𑀼 𑀆𑀮𑀧𑀦𑀁 𑀨𑀸𑀲𑀼 𑀲𑀮𑁆𑀮𑀧𑀦𑀁 𑀨𑀸𑀲𑀼 𑀉𑀮𑁆𑀮𑀧𑀦𑀁 𑀨𑀸𑀲𑀼 𑀲𑀫𑀼𑀮𑁆𑀮𑀧𑀦𑀁 𑀨𑀸𑀲𑀼. 𑀔𑀺𑀟𑁆𑀟𑀸 𑀭𑀢𑀻 𑀳𑁄𑀢𑀺 𑀲𑀳𑀸𑀬𑀫𑀚𑁆𑀛𑁂𑀢𑀺 𑀔𑀺𑀟𑁆𑀟𑀸 𑀘 𑀭𑀢𑀺 𑀘 𑀲𑀳𑀸𑀬𑀫𑀚𑁆𑀛𑁂 𑀳𑁄𑀢𑀻𑀢𑀺 𑁋 𑀔𑀺𑀟𑁆𑀟𑀸 𑀭𑀢𑀻 𑀳𑁄𑀢𑀺 𑀲𑀳𑀸𑀬𑀫𑀚𑁆𑀛𑁂.

𑀧𑀼𑀢𑁆𑀢𑁂𑀲𑀼 𑀘 𑀯𑀺𑀧𑀼𑀮𑀁 𑀳𑁄𑀢𑀺 𑀧𑁂𑀫𑀦𑁆𑀢𑀺. 𑀧𑀼𑀢𑁆𑀢𑀸𑀢𑀺 𑀘𑀢𑁆𑀢𑀸𑀭𑁄 𑀧𑀼𑀢𑁆𑀢𑀸 𑁋 𑀅𑀢𑁆𑀭𑀚𑁄 𑀧𑀼𑀢𑁆𑀢𑁄, 𑀔𑁂𑀢𑁆𑀢𑀚𑁄 𑀧𑀼𑀢𑁆𑀢𑁄, 𑀤𑀺𑀦𑁆𑀦𑀓𑁄 𑀧𑀼𑀢𑁆𑀢𑁄, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀼𑀢𑁆𑀢𑁄. 𑀧𑀼𑀢𑁆𑀢𑁂𑀲𑀼 𑀘 𑀯𑀺𑀧𑀼𑀮𑀁 𑀳𑁄𑀢𑀺𑀁 𑀧𑁂𑀫𑀦𑁆𑀢𑀺 𑀧𑀼𑀢𑁆𑀢𑁂𑀲𑀼 𑀘 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺 𑀧𑁂𑀫𑀦𑁆𑀢𑀺 𑁋 𑀧𑀼𑀢𑁆𑀢𑁂𑀲𑀼 𑀘 𑀯𑀺𑀧𑀼𑀮𑀁 𑀳𑁄𑀢𑀺 𑀧𑁂𑀫𑀁.

𑀧𑀺𑀬𑀯𑀺𑀧𑁆𑀧𑀬𑁄𑀕𑀁 𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑁄𑀢𑀺 𑀤𑁆𑀯𑁂 𑀧𑀺𑀬𑀸 𑁋 𑀲𑀢𑁆𑀢𑀸 𑀯𑀸 𑀲𑀗𑁆𑀔𑀸𑀭𑀸 𑀯𑀸. 𑀓𑀢𑀫𑁂 𑀲𑀢𑁆𑀢𑀸 𑀧𑀺𑀬𑀸? 𑀇𑀥 𑀬𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀅𑀢𑁆𑀣𑀓𑀸𑀫𑀸 𑀳𑀺𑀢𑀓𑀸𑀫𑀸 𑀨𑀸𑀲𑀼𑀓𑀸𑀫𑀸 𑀬𑁄𑀕𑀓𑁆𑀔𑁂𑀫𑀓𑀸𑀫𑀸 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸 𑀪𑀸𑀢𑀸 𑀯𑀸 𑀪𑀕𑀺𑀦𑀻 𑀯𑀸 𑀧𑀼𑀢𑁆𑀢𑁄 𑀯𑀸 𑀥𑀻𑀢𑀸 𑀯𑀸 𑀫𑀺𑀢𑁆𑀢𑀸 𑀯𑀸 𑀅𑀫𑀘𑁆𑀘𑀸 𑀯𑀸 𑀜𑀸𑀢𑀻 𑀯𑀸 𑀲𑀸𑀮𑁄𑀳𑀺𑀢𑀸 𑀯𑀸, 𑀇𑀫𑁂 𑀲𑀢𑁆𑀢𑀸 𑀧𑀺𑀬𑀸.

𑀓𑀢𑀫𑁂 𑀲𑀗𑁆𑀔𑀸𑀭𑀸 𑀧𑀺𑀬𑀸? 𑀫𑀦𑀸𑀧𑀺𑀓𑀸 𑀭𑀽𑀧𑀸 𑀫𑀦𑀸𑀧𑀺𑀓𑀸 𑀲𑀤𑁆𑀤𑀸 𑀫𑀦𑀸𑀧𑀺𑀓𑀸 𑀕𑀦𑁆𑀥𑀸 𑀫𑀦𑀸𑀧𑀺𑀓𑀸 𑀭𑀲𑀸 𑀫𑀦𑀸𑀧𑀺𑀓𑀸 𑀨𑁄𑀝𑁆𑀞𑀩𑁆𑀩𑀸, 𑀇𑀫𑁂 𑀲𑀗𑁆𑀔𑀸𑀭𑀸 𑀧𑀺𑀬𑀸. 𑀧𑀺𑀬𑀯𑀺𑀧𑁆𑀧𑀬𑁄𑀕𑀁 𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑁄𑀢𑀺 𑀧𑀺𑀬𑀸𑀦𑀁 𑀯𑀺𑀧𑁆𑀧𑀬𑁄𑀕𑀁 𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑁄 𑀅𑀝𑁆𑀝𑀺𑀬𑀫𑀸𑀦𑁄 𑀳𑀭𑀸𑀬𑀫𑀸𑀦𑁄𑀢𑀺 𑁋 𑀧𑀺𑀬𑀯𑀺𑀧𑁆𑀧𑀬𑁄𑀕𑀁 𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄. 𑀢𑁂𑀦𑀸𑀳 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑁋

‘‘𑀔𑀺𑀟𑁆𑀟𑀸 𑀭𑀢𑀻 𑀳𑁄𑀢𑀺 𑀲𑀳𑀸𑀬𑀫𑀚𑁆𑀛𑁂, 𑀧𑀼𑀢𑁆𑀢𑁂𑀲𑀼 𑀘 𑀯𑀺𑀧𑀼𑀮𑀁 𑀳𑁄𑀢𑀺 𑀧𑁂𑀫𑀁;

𑀧𑀺𑀬𑀯𑀺𑀧𑁆𑀧𑀬𑁄𑀕𑀁 𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑁄, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑁧𑁨𑁮. 𑀘𑀸𑀢𑀼𑀤𑁆𑀤𑀺𑀲𑁄 𑀅𑀧𑁆𑀧𑀝𑀺𑀖𑁄 𑀘 𑀳𑁄𑀢𑀺,𑀲𑀦𑁆𑀢𑀼𑀲𑁆𑀲𑀫𑀸𑀦𑁄 𑀇𑀢𑀭𑀻𑀢𑀭𑁂𑀦;

𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸 𑀅𑀙𑀫𑁆𑀪𑀻, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄.

𑀘𑀸𑀢𑀼𑀤𑁆𑀤𑀺𑀲𑁄 𑀅𑀧𑁆𑀧𑀝𑀺𑀖𑁄 𑀘 𑀳𑁄𑀢𑀻𑀢𑀺. 𑀘𑀸𑀢𑀼𑀤𑁆𑀤𑀺𑀲𑁄𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 [𑀅𑀩𑁆𑀬𑀸𑀧𑀚𑁆𑀛𑁂𑀦 (𑀲𑁆𑀬𑀸.) 𑀧𑀲𑁆𑀲 𑀤𑀻. 𑀦𑀺. 𑁩.𑁩𑁦𑁮] 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀓𑀭𑀼𑀡𑀸𑀲𑀳𑀕𑀢𑁂𑀦…𑀧𑁂… 𑀫𑀼𑀤𑀺𑀢𑀸𑀲𑀳𑀕𑀢𑁂𑀦…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁…𑀧𑁂… 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀘𑀸𑀢𑀼𑀤𑁆𑀤𑀺𑀲𑁄 𑀅𑀧𑁆𑀧𑀝𑀺𑀖𑁄 𑀘 𑀳𑁄𑀢𑀻𑀢𑀺 𑀫𑁂𑀢𑁆𑀢𑀸𑀬 𑀪𑀸𑀯𑀺𑀢𑀢𑁆𑀢𑀸 𑀬𑁂 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 [𑀅𑀧𑁆𑀧𑀝𑀺𑀓𑀼𑀮𑀸 (𑀩𑀳𑀽𑀲𑀼)] 𑀳𑁄𑀦𑁆𑀢𑀺, 𑀬𑁂 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺, 𑀬𑁂 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺, 𑀬𑁂 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺, 𑀬𑁂 𑀧𑀼𑀭𑀢𑁆𑀣𑀺𑀫𑀸𑀬 𑀅𑀦𑀼𑀤𑀺𑀲𑀸𑀬 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺, 𑀬𑁂 𑀤𑀓𑁆𑀔𑀺𑀡𑀸𑀬 𑀅𑀦𑀼𑀤𑀺𑀲𑀸𑀬 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺, 𑀬𑁂 𑀧𑀘𑁆𑀙𑀺𑀫𑀸𑀬 𑀅𑀦𑀼𑀤𑀺𑀲𑀸𑀬 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺, 𑀬𑁂 𑀉𑀢𑁆𑀢𑀭𑀸𑀬 𑀅𑀦𑀼𑀤𑀺𑀲𑀸𑀬 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺, 𑀬𑁂 𑀳𑁂𑀝𑁆𑀞𑀺𑀫𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺, 𑀬𑁂 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺, 𑀬𑁂 𑀤𑀺𑀲𑀸𑀲𑀼 𑀯𑀺𑀤𑀺𑀲𑀸𑀲𑀼 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺; 𑀓𑀭𑀼𑀡𑀸𑀬 𑀪𑀸𑀯𑀺𑀢𑀢𑁆𑀢𑀸 𑀫𑀼𑀤𑀺𑀢𑀸𑀬 𑀪𑀸𑀯𑀺𑀢𑀢𑁆𑀢𑀸 𑀉𑀧𑁂𑀓𑁆𑀔𑀸𑀬 𑀪𑀸𑀯𑀺𑀢𑀢𑁆𑀢𑀸 𑀬𑁂 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺…𑀧𑁂… 𑀬𑁂 𑀤𑀺𑀲𑀸𑀲𑀼 𑀯𑀺𑀤𑀺𑀲𑀸𑀲𑀼 𑀲𑀢𑁆𑀢𑀸 𑀢𑁂 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀻𑀢𑀺 𑁋 𑀘𑀸𑀢𑀼𑀤𑁆𑀤𑀺𑀲𑁄 𑀅𑀧𑁆𑀧𑀝𑀺𑀖𑁄 𑀘 𑀳𑁄𑀢𑀺.

𑀲𑀦𑁆𑀢𑀼𑀲𑁆𑀲𑀫𑀸𑀦𑁄 𑀇𑀢𑀭𑀻𑀢𑀭𑁂𑀦𑀸𑀢𑀺 𑀲𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀘𑀻𑀯𑀭𑁂𑀦, 𑀇𑀢𑀭𑀻𑀢𑀭𑀘𑀻𑀯𑀭𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀯𑀡𑁆𑀡𑀯𑀸𑀤𑀻, 𑀦 𑀘 𑀘𑀻𑀯𑀭𑀳𑁂𑀢𑀼 𑀅𑀦𑁂𑀲𑀦𑀁 𑀅𑀧𑁆𑀧𑀢𑀺𑀭𑀽𑀧𑀁 [𑀅𑀧𑁆𑀧𑀝𑀺𑀭𑀽𑀧𑀁 (𑀲𑁆𑀬𑀸.)] 𑀆𑀧𑀚𑁆𑀚𑀢𑀺. 𑀅𑀮𑀤𑁆𑀥𑀸 𑀘 𑀘𑀻𑀯𑀭𑀁 𑀦 𑀧𑀭𑀺𑀢𑀲𑁆𑀲𑀢𑀺, 𑀮𑀤𑁆𑀥𑀸 𑀘 𑀘𑀻𑀯𑀭𑀁 𑀅𑀕𑀥𑀺𑀢𑁄 𑀅𑀫𑀼𑀘𑁆𑀙𑀺𑀢𑁄 𑀅𑀦𑀚𑁆𑀛𑀸𑀧𑀲𑀦𑁆𑀦𑁄 [𑀅𑀦𑀚𑁆𑀛𑁄𑀧𑀦𑁆𑀦𑁄 (𑀲𑁆𑀬𑀸.)] 𑀆𑀤𑀻𑀦𑀯𑀤𑀲𑁆𑀲𑀸𑀯𑀻 𑀦𑀺𑀲𑁆𑀲𑀭𑀡𑀧𑀜𑁆𑀜𑁄 𑀧𑀭𑀺𑀪𑀼𑀜𑁆𑀚𑀢𑀺. 𑀢𑀸𑀬 𑀘 𑀧𑀦 𑀇𑀢𑀭𑀻𑀢𑀭𑀘𑀻𑀯𑀭𑀲𑀦𑁆𑀢𑀼𑀝𑁆𑀞𑀺𑀬𑀸 𑀦𑁂𑀯𑀢𑁆𑀢𑀸𑀦𑀼𑀓𑁆𑀓𑀁𑀲𑁂𑀢𑀺 𑀦 𑀧𑀭𑀁 𑀯𑀫𑁆𑀪𑁂𑀢𑀺. 𑀬𑁄 𑀳𑀺 𑀢𑀢𑁆𑀣 𑀤𑀓𑁆𑀔𑁄 𑀅𑀦𑀮𑀲𑁄 𑀲𑀫𑁆𑀧𑀚𑀸𑀦𑁄 𑀧𑀢𑀺𑀲𑁆𑀲𑀢𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀧𑁄𑀭𑀸𑀡𑁂 𑀅𑀕𑁆𑀕𑀜𑁆𑀜𑁂 𑀅𑀭𑀺𑀬𑀯𑀁𑀲𑁂 𑀞𑀺𑀢𑁄. 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀧𑀺𑀡𑁆𑀟𑀧𑀸𑀢𑁂𑀦…𑀧𑁂…

𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀲𑁂𑀦𑀸𑀲𑀦𑁂𑀦…𑀧𑁂… 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦, 𑀇𑀢𑀭𑀻𑀢𑀭𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀯𑀡𑁆𑀡𑀯𑀸𑀤𑀻, 𑀦 𑀘 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀳𑁂𑀢𑀼 𑀅𑀦𑁂𑀲𑀦𑀁 𑀅𑀧𑁆𑀧𑀢𑀺𑀭𑀽𑀧𑀁 𑀆𑀧𑀚𑁆𑀚𑀢𑀺. 𑀅𑀮𑀤𑁆𑀥𑀸 𑀘 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁 𑀦 𑀧𑀭𑀺𑀢𑀲𑁆𑀲𑀢𑀺. 𑀮𑀤𑁆𑀥𑀸 𑀘 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀅𑀕𑀥𑀺𑀢𑁄 𑀅𑀫𑀼𑀘𑁆𑀙𑀺𑀢𑁄 𑀅𑀦𑀚𑁆𑀛𑀸𑀧𑀦𑁆𑀦𑁄 𑀆𑀤𑀻𑀦𑀯𑀤𑀲𑁆𑀲𑀸𑀯𑀻 𑀦𑀺𑀲𑁆𑀲𑀭𑀡𑀧𑀜𑁆𑀜𑁄 𑀧𑀭𑀺𑀪𑀼𑀜𑁆𑀚𑀢𑀺. 𑀢𑀸𑀬 𑀘 𑀇𑀢𑀭𑀻𑀢𑀭𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀲𑀦𑁆𑀢𑀼𑀝𑁆𑀞𑀺𑀬𑀸 𑀦𑁂𑀯𑀢𑁆𑀢𑀸𑀦𑀼𑀓𑁆𑀓𑀁𑀲𑁂𑀢𑀺 𑀦 𑀧𑀭𑀁 𑀯𑀫𑁆𑀪𑁂𑀢𑀺. 𑀬𑁄 𑀳𑀺 𑀢𑀢𑁆𑀣 𑀤𑀓𑁆𑀔𑁄 𑀅𑀦𑀮𑀲𑁄 𑀲𑀫𑁆𑀧𑀚𑀸𑀦𑁄 𑀧𑀢𑀺𑀲𑁆𑀲𑀢𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀧𑁄𑀭𑀸𑀡𑁂 𑀅𑀕𑁆𑀕𑀜𑁆𑀜𑁂 𑀅𑀭𑀺𑀬𑀯𑀁𑀲𑁂 𑀞𑀺𑀢𑁄𑀢𑀺 𑁋 𑀲𑀦𑁆𑀢𑀼𑀲𑁆𑀲𑀫𑀸𑀦𑁄 𑀇𑀢𑀭𑀻𑀢𑀭𑁂𑀦.

𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸 𑀅𑀙𑀫𑁆𑀪𑀻𑀢𑀺. 𑀧𑀭𑀺𑀲𑁆𑀲𑀬𑀸𑀢𑀺 𑀤𑁆𑀯𑁂 𑀧𑀭𑀺𑀲𑁆𑀲𑀬𑀸 𑁋 𑀧𑀸𑀓𑀝𑀧𑀭𑀺𑀲𑁆𑀲𑀬𑀸 𑀘 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑀸 𑀘. 𑀓𑀢𑀫𑁂 𑀧𑀸𑀓𑀝𑀧𑀭𑀺𑀲𑁆𑀲𑀬𑀸? 𑀲𑀻𑀳𑀸 𑀩𑁆𑀬𑀕𑁆𑀖𑀸 𑀤𑀻𑀧𑀻 𑀅𑀘𑁆𑀙𑀸 𑀢𑀭𑀘𑁆𑀙𑀸 𑀓𑁄𑀓𑀸 𑀫𑀳𑀺𑀁𑀲𑀸 [𑀕𑁄𑀫𑀳𑀺𑀲𑀸 (𑀲𑁆𑀬𑀸.) 𑀫𑀳𑀸𑀦𑀺. 𑁫] 𑀳𑀢𑁆𑀣𑀻 𑀅𑀳𑀻 𑀯𑀺𑀘𑁆𑀙𑀺𑀓𑀸 𑀲𑀢𑀧𑀤𑀻, 𑀘𑁄𑀭𑀸 𑀯𑀸 𑀅𑀲𑁆𑀲𑀼 𑀫𑀸𑀦𑀯𑀸 𑀯𑀸 𑀓𑀢𑀓𑀫𑁆𑀫𑀸 𑀯𑀸 𑀅𑀓𑀢𑀓𑀫𑁆𑀫𑀸 𑀯𑀸, 𑀘𑀓𑁆𑀔𑀼𑀭𑁄𑀕𑁄 𑀲𑁄𑀢𑀭𑁄𑀕𑁄 𑀖𑀸𑀦𑀭𑁄𑀕𑁄 𑀚𑀺𑀯𑁆𑀳𑀸𑀭𑁄𑀕𑁄 𑀓𑀸𑀬𑀭𑁄𑀕𑁄 𑀲𑀻𑀲𑀭𑁄𑀕𑁄 𑀓𑀡𑁆𑀡𑀭𑁄𑀕𑁄 𑀫𑀼𑀔𑀭𑁄𑀕𑁄 𑀤𑀦𑁆𑀢𑀭𑁄𑀕𑁄 𑀓𑀸𑀲𑁄 𑀲𑀸𑀲𑁄 𑀧𑀺𑀦𑀸𑀲𑁄 𑀟𑀸𑀳𑁄 𑀚𑀭𑁄 𑀓𑀼𑀘𑁆𑀙𑀺𑀭𑁄𑀕𑁄 𑀫𑀼𑀘𑁆𑀙𑀸 𑀧𑀓𑁆𑀔𑀦𑁆𑀤𑀺𑀓𑀸 𑀲𑀽𑀮𑀸 𑀯𑀺𑀲𑀽𑀘𑀺𑀓𑀸 𑀓𑀼𑀝𑁆𑀞𑀁 𑀕𑀡𑁆𑀟𑁄 𑀓𑀺𑀮𑀸𑀲𑁄 𑀲𑁄𑀲𑁄 𑀅𑀧𑀫𑀸𑀭𑁄 𑀤𑀤𑁆𑀤𑀼 𑀓𑀡𑁆𑀟𑀼 𑀓𑀘𑁆𑀙𑀼 𑀭𑀔𑀲𑀸 𑀯𑀺𑀢𑀘𑁆𑀙𑀺𑀓𑀸 𑀮𑁄𑀳𑀺𑀢𑀧𑀺𑀢𑁆𑀢𑀁 𑀫𑀥𑀼𑀫𑁂𑀳𑁄 𑀅𑀁𑀲𑀸 𑀧𑀺𑀴𑀓𑀸 𑀪𑀕𑀦𑁆𑀤𑀮𑀸, 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀯𑀸𑀢𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀲𑀦𑁆𑀦𑀺𑀧𑀸𑀢𑀺𑀓𑀸 𑀆𑀩𑀸𑀥𑀸 𑀉𑀢𑀼𑀧𑀭𑀺𑀡𑀸𑀫𑀚𑀸 𑀆𑀩𑀸𑀥𑀸 𑀯𑀺𑀲𑀫𑀧𑀭𑀺𑀳𑀸𑀭𑀚𑀸 𑀆𑀩𑀸𑀥𑀸 𑀑𑀧𑀓𑁆𑀓𑀫𑀺𑀓𑀸 𑀆𑀩𑀸𑀥𑀸 𑀓𑀫𑁆𑀫𑀯𑀺𑀧𑀸𑀓𑀚𑀸 𑀆𑀩𑀸𑀥𑀸, 𑀲𑀻𑀢𑀁 𑀉𑀡𑁆𑀳𑀁 𑀚𑀺𑀖𑀘𑁆𑀙𑀸 𑀧𑀺𑀧𑀸𑀲𑀸 𑀉𑀘𑁆𑀘𑀸𑀭𑁄 𑀧𑀲𑁆𑀲𑀸𑀯𑁄 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀸 𑀇𑀢𑀺 𑀯𑀸. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀧𑀸𑀓𑀝𑀧𑀭𑀺𑀲𑁆𑀲𑀬𑀸.

𑀓𑀢𑀫𑁂 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑀸? 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀁 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀁 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀁 𑀭𑀸𑀕𑁄 𑀤𑁄𑀲𑁄 𑀫𑁄𑀳𑁄 𑀓𑁄𑀥𑁄 𑀉𑀧𑀦𑀸𑀳𑁄 𑀫𑀓𑁆𑀔𑁄 𑀧𑀴𑀸𑀲𑁄 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁 𑀫𑀸𑀬𑀸 𑀲𑀸𑀞𑁂𑀬𑁆𑀬𑀁 𑀣𑀫𑁆𑀪𑁄 𑀲𑀸𑀭𑀫𑁆𑀪𑁄 𑀫𑀸𑀦𑁄 𑀅𑀢𑀺𑀫𑀸𑀦𑁄 𑀫𑀤𑁄 𑀧𑀫𑀸𑀤𑁄, 𑀲𑀩𑁆𑀩𑁂 𑀓𑀺𑀮𑁂𑀲𑀸 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸 𑀲𑀩𑁆𑀩𑁂 𑀤𑀭𑀣𑀸 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸 𑀲𑀩𑁆𑀩𑁂 𑀲𑀦𑁆𑀢𑀸𑀧𑀸 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑀸.

𑀧𑀭𑀺𑀲𑁆𑀲𑀬𑀸𑀢𑀺 𑀓𑁂𑀦𑀝𑁆𑀞𑁂𑀦 𑀧𑀭𑀺𑀲𑁆𑀲𑀬𑀸? 𑀧𑀭𑀺𑀲𑀳𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸, 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸, 𑀢𑀢𑁆𑀭𑀸𑀲𑀬𑀸𑀢𑀺 𑀧𑀭𑀺𑀲𑁆𑀲𑀬𑀸. 𑀓𑀣𑀁 𑀧𑀭𑀺𑀲𑀳𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸? 𑀢𑁂 𑀧𑀭𑀺𑀲𑁆𑀲𑀬𑀸 𑀢𑀁 𑀧𑀼𑀕𑁆𑀕𑀮𑀁 𑀲𑀳𑀦𑁆𑀢𑀺 𑀧𑀭𑀺𑀲𑀳𑀦𑁆𑀢𑀺 𑀅𑀪𑀺𑀪𑀯𑀦𑁆𑀢𑀺 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀺 𑀧𑀭𑀺𑀬𑀸𑀤𑀺𑀬𑀦𑁆𑀢𑀺 𑀫𑀤𑁆𑀤𑀦𑁆𑀢𑀺. 𑀏𑀯𑀁 𑀧𑀭𑀺𑀲𑀳𑀦𑁆𑀢𑀻𑀢𑀺 𑁋 𑀧𑀭𑀺𑀲𑁆𑀲𑀬𑀸.

𑀓𑀣𑀁 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸? 𑀢𑁂 𑀧𑀭𑀺𑀲𑁆𑀲𑀬𑀸 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑁆𑀢𑀭𑀸𑀬𑀸𑀬 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂𑀲𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁? 𑀲𑀫𑁆𑀫𑀸𑀧𑀝𑀺𑀧𑀤𑀸𑀬 𑀅𑀦𑀼𑀮𑁄𑀫𑀧𑀝𑀺𑀧𑀤𑀸𑀬 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀸𑀬 𑀅𑀦𑁆𑀯𑀢𑁆𑀣𑀧𑀝𑀺𑀧𑀤𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀸𑀬 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀬 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸𑀬 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸𑀬 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀲𑁆𑀲 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑁆𑀲 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲, 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁… 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁… 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁… 𑀧𑀜𑁆𑀘𑀦𑁆𑀦𑀁 𑀩𑀮𑀸𑀦𑀁… 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁… 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲 𑁋 𑀇𑀫𑁂𑀲𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑁆𑀢𑀭𑀸𑀬𑀸𑀬 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀏𑀯𑀁 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑁋 𑀧𑀭𑀺𑀲𑁆𑀲𑀬𑀸.

𑀓𑀣𑀁 𑀢𑀢𑁆𑀭𑀸𑀲𑀬𑀸𑀢𑀺 𑀧𑀭𑀺𑀲𑁆𑀲𑀬𑀸? 𑀢𑀢𑁆𑀣𑁂𑀢𑁂 [𑀢𑀢𑁆𑀭 𑀢𑁂 (𑀓.)] 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀢𑁆𑀢𑀪𑀸𑀯𑀲𑀦𑁆𑀦𑀺𑀲𑁆𑀲𑀬𑀸. 𑀬𑀣𑀸 𑀩𑀺𑀮𑁂 𑀩𑀺𑀮𑀸𑀲𑀬𑀸 𑀧𑀸𑀡𑀸 𑀲𑀬𑀦𑁆𑀢𑀺, 𑀤𑀓𑁂 𑀤𑀓𑀸𑀲𑀬𑀸 [𑀉𑀤𑀓𑁂 𑀉𑀤𑀓𑀸𑀲𑀬𑀸 (𑀲𑁆𑀬𑀸.)] 𑀧𑀸𑀡𑀸 𑀲𑀬𑀦𑁆𑀢𑀺, 𑀯𑀦𑁂 𑀯𑀦𑀸𑀲𑀬𑀸 𑀧𑀸𑀡𑀸 𑀲𑀬𑀦𑁆𑀢𑀺, 𑀭𑀼𑀓𑁆𑀔𑁂 𑀭𑀼𑀓𑁆𑀔𑀸𑀲𑀬𑀸 𑀧𑀸𑀡𑀸 𑀲𑀬𑀦𑁆𑀢𑀺; 𑀏𑀯𑀫𑁂𑀯 𑀢𑀢𑁆𑀣𑁂𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀢𑁆𑀢𑀪𑀸𑀯𑀲𑀦𑁆𑀦𑀺𑀲𑁆𑀲𑀬𑀸𑀢𑀺. 𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀲𑀸𑀦𑁆𑀢𑁂𑀯𑀸𑀲𑀺𑀓𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀸𑀘𑀭𑀺𑀬𑀓𑁄 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀭𑀢𑀺. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀸𑀦𑁆𑀢𑁂𑀯𑀸𑀲𑀺𑀓𑁄 𑀲𑀸𑀘𑀭𑀺𑀬𑀓𑁄 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀭𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀬𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀭𑀲𑀗𑁆𑀓𑀧𑁆𑀧𑀸 𑀲𑀁𑀜𑁆𑀜𑁄𑀚𑀦𑀻𑀬𑀸 [𑀲𑀜𑁆𑀜𑁄𑀚𑀦𑀺𑀓𑀸 (𑀓.)], 𑀢𑁆𑀬𑀲𑁆𑀲 𑀅𑀦𑁆𑀢𑁄 𑀯𑀲𑀦𑁆𑀢𑀺 𑀅𑀦𑁆𑀯𑀸𑀲𑁆𑀲𑀯𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺. 𑀢𑀲𑁆𑀫𑀸 𑀲𑀸𑀦𑁆𑀢𑁂𑀯𑀸𑀲𑀺𑀓𑁄 𑀯𑀼𑀘𑁆𑀘𑀢𑀺. 𑀢𑁂𑀦 𑀲𑀫𑀼𑀤𑀸𑀘𑀭𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺 𑀦𑀁 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺. 𑀢𑀲𑁆𑀫𑀸 𑀲𑀸𑀘𑀭𑀺𑀬𑀓𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸…𑀧𑁂… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸…𑀧𑁂… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀉𑀧𑁆𑀧𑀚𑁆𑀚𑀦𑁆𑀢𑀺 𑀬𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀭𑀲𑀗𑁆𑀓𑀧𑁆𑀧𑀸 𑀲𑀁𑀬𑁄𑀚𑀦𑀻𑀬𑀸, 𑀢𑁆𑀬𑀲𑁆𑀲 𑀅𑀦𑁆𑀢𑁄 𑀯𑀲𑀦𑁆𑀢𑀺 𑀅𑀦𑁆𑀯𑀸𑀲𑁆𑀲𑀯𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺. 𑀢𑀲𑁆𑀫𑀸 𑀲𑀸𑀦𑁆𑀢𑁂𑀯𑀸𑀲𑀺𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀲𑀫𑀼𑀤𑀸𑀘𑀭𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺 𑀦𑀁 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺. 𑀢𑀲𑁆𑀫𑀸 𑀲𑀸𑀘𑀭𑀺𑀬𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀸𑀦𑁆𑀢𑁂𑀯𑀸𑀲𑀺𑀓𑁄 𑀲𑀸𑀘𑀭𑀺𑀬𑀓𑁄 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀭𑀢𑀻’’𑀢𑀺. 𑀏𑀯𑀫𑁆𑀧𑀺, 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀭𑀸𑀫𑀮𑀸 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑀸 𑀅𑀦𑁆𑀢𑀭𑀸𑀲𑀧𑀢𑁆𑀢𑀸 𑀅𑀦𑁆𑀢𑀭𑀸𑀯𑀥𑀓𑀸 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑀸. 𑀓𑀢𑀫𑁂 𑀢𑀬𑁄? 𑀮𑁄𑀪𑁄, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀭𑀸𑀫𑀮𑁄 [𑀅𑀦𑁆𑀢𑀭𑀸𑀫𑀮𑀁 (𑀲𑁆𑀬𑀸. 𑀓.) 𑀧𑀲𑁆𑀲 𑀇𑀢𑀺𑀯𑀼. 𑁮𑁮] 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑁄 𑀅𑀦𑁆𑀢𑀭𑀸𑀲𑀧𑀢𑁆𑀢𑁄 𑀅𑀦𑁆𑀢𑀭𑀸𑀯𑀥𑀓𑁄 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑁄, 𑀤𑁄𑀲𑁄, 𑀪𑀺𑀓𑁆𑀔𑀯𑁂…𑀧𑁂… 𑀫𑁄𑀳𑁄, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀭𑀸𑀫𑀮𑁄 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑁄 𑀅𑀦𑁆𑀢𑀭𑀸𑀲𑀧𑀢𑁆𑀢𑁄 𑀅𑀦𑁆𑀢𑀭𑀸𑀯𑀥𑀓𑁄 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀅𑀦𑁆𑀢𑀭𑀸𑀫𑀮𑀸 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑀸 𑀅𑀦𑁆𑀢𑀭𑀸𑀲𑀧𑀢𑁆𑀢𑀸 𑀅𑀦𑁆𑀢𑀭𑀸𑀯𑀥𑀓𑀸 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑀸’’𑀢𑀺.

𑀅𑀦𑀢𑁆𑀣𑀚𑀦𑀦𑁄 𑀮𑁄𑀪𑁄, 𑀮𑁄𑀪𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑁄;

𑀪𑀬𑀫𑀦𑁆𑀢𑀭𑀢𑁄 𑀚𑀸𑀢𑀁, 𑀢𑀁 𑀚𑀦𑁄 𑀦𑀸𑀯𑀩𑀼𑀚𑁆𑀛𑀢𑀺.

𑀮𑀼𑀤𑁆𑀥𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀮𑀼𑀤𑁆𑀥𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;

𑀅𑀦𑁆𑀥𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀁 𑀮𑁄𑀪𑁄 𑀲𑀳𑀢𑁂 𑀦𑀭𑀁.

𑀅𑀦𑀢𑁆𑀣𑀚𑀦𑀦𑁄 𑀤𑁄𑀲𑁄, 𑀤𑁄𑀲𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑁄;

𑀪𑀬𑀫𑀦𑁆𑀢𑀭𑀢𑁄 𑀚𑀸𑀢𑀁, 𑀢𑀁 𑀚𑀦𑁄 𑀦𑀸𑀯𑀩𑀼𑀚𑁆𑀛𑀢𑀺.

𑀤𑀼𑀝𑁆𑀞𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀤𑀼𑀝𑁆𑀞𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;

𑀅𑀦𑁆𑀥𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀁 𑀤𑁄𑀲𑁄 𑀲𑀳𑀢𑁂 𑀦𑀭𑀁.

𑀅𑀦𑀢𑁆𑀣𑀚𑀦𑀦𑁄 𑀫𑁄𑀳𑁄, 𑀫𑁄𑀳𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑁄;

𑀪𑀬𑀫𑀦𑁆𑀢𑀭𑀢𑁄 𑀚𑀸𑀢𑀁, 𑀢𑀁 𑀚𑀦𑁄 𑀦𑀸𑀯𑀩𑀼𑀚𑁆𑀛𑀢𑀺.