𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀘𑀽𑀴𑀦𑀺𑀤𑁆𑀤𑁂𑀲𑀧𑀸𑀴𑀺

𑀧𑀸𑀭𑀸𑀬𑀦𑀯𑀕𑁆𑀕𑁄

𑀯𑀢𑁆𑀣𑀼𑀕𑀸𑀣𑀸

𑁧. 𑀓𑁄𑀲𑀮𑀸𑀦𑀁 𑀧𑀼𑀭𑀸 𑀭𑀫𑁆𑀫𑀸, 𑀅𑀕𑀫𑀸 𑀤𑀓𑁆𑀔𑀺𑀡𑀸𑀧𑀣𑀁;

𑀆𑀓𑀺𑀜𑁆𑀘𑀜𑁆𑀜𑀁 𑀧𑀢𑁆𑀣𑀬𑀸𑀦𑁄, 𑀩𑁆𑀭𑀸𑀳𑁆𑀫𑀡𑁄 𑀫𑀦𑁆𑀢𑀧𑀸𑀭𑀕𑀽.

𑁨. 𑀲𑁄 𑀅𑀲𑁆𑀲𑀓𑀲𑁆𑀲 𑀯𑀺𑀲𑀬𑁂, 𑀫𑀴𑀓𑀲𑁆𑀲 [𑀅𑀴𑀓𑀲𑁆𑀲 (𑀲𑀼. 𑀦𑀺. 𑁯𑁮𑁩) 𑀫𑀼𑀴𑀓𑀲𑁆𑀲 (𑀲𑁆𑀬𑀸.), 𑀫𑀽𑀴𑁆𑀳𑀓𑀲𑁆𑀲 (𑀓.)] 𑀲𑀫𑀸𑀲𑀦𑁂 [𑀲𑀫𑀸𑀲𑀦𑁆𑀦𑁂 (𑀓.)];

𑀯𑀲𑀺 𑀕𑁄𑀥𑀸𑀯𑀭𑀻𑀓𑀽𑀮𑁂, 𑀉𑀜𑁆𑀙𑁂𑀦 𑀘 𑀨𑀮𑁂𑀦 𑀘.

𑁩. 𑀢𑀲𑁆𑀲𑁂𑀯 [𑀢𑀁𑀬𑁂𑀯 (𑀓.) 𑀅𑀝𑁆𑀞𑀓𑀣𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀉𑀧𑀦𑀺𑀲𑁆𑀲𑀸𑀬, 𑀕𑀸𑀫𑁄 𑀘 𑀯𑀺𑀧𑀼𑀮𑁄 𑀅𑀳𑀼;

𑀢𑀢𑁄 𑀚𑀸𑀢𑁂𑀦 𑀆𑀬𑁂𑀦, 𑀫𑀳𑀸𑀬𑀜𑁆𑀜𑀫𑀓𑀧𑁆𑀧𑀬𑀺.

𑁪. 𑀫𑀳𑀸𑀬𑀜𑁆𑀜𑀁 𑀬𑀚𑀺𑀢𑁆𑀯𑀸𑀦, 𑀧𑀼𑀦 𑀧𑀸𑀯𑀺𑀲𑀺 𑀅𑀲𑁆𑀲𑀫𑀁;

𑀢𑀲𑁆𑀫𑀺𑀁 𑀧𑀝𑀺𑀧𑀯𑀺𑀝𑁆𑀞𑀫𑁆𑀳𑀺, 𑀅𑀜𑁆𑀜𑁄 𑀆𑀕𑀜𑁆𑀙𑀺 𑀩𑁆𑀭𑀸𑀳𑁆𑀫𑀡𑁄.

𑁫. 𑀉𑀕𑁆𑀖𑀝𑁆𑀝𑀧𑀸𑀤𑁄 𑀢𑀲𑀺𑀢𑁄 [𑀢𑀲𑁆𑀲𑀺𑀢𑁄 (𑀓.)], 𑀧𑀗𑁆𑀓𑀤𑀦𑁆𑀢𑁄 𑀭𑀚𑀲𑁆𑀲𑀺𑀭𑁄;

𑀲𑁄 𑀘 𑀦𑀁 𑀉𑀧𑀲𑀗𑁆𑀓𑀫𑁆𑀫, 𑀲𑀢𑀸𑀦𑀺 𑀧𑀜𑁆𑀘 𑀬𑀸𑀘𑀢𑀺.

𑁬. 𑀢𑀫𑁂𑀦𑀁 𑀩𑀸𑀯𑀭𑀻 𑀤𑀺𑀲𑁆𑀯𑀸, 𑀆𑀲𑀦𑁂𑀦 𑀦𑀺𑀫𑀦𑁆𑀢𑀬𑀺;

𑀲𑀼𑀔𑀜𑁆𑀘 𑀓𑀼𑀲𑀮𑀁 𑀧𑀼𑀘𑁆𑀙𑀺, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺 [𑀯𑀘𑀦𑀫𑀩𑁆𑀭𑀼𑀯𑀺 (𑀲𑀻.)].

𑁭. ‘‘𑀬𑀁 𑀔𑁄 𑀫𑀫 𑀤𑁂𑀬𑁆𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀯𑀺𑀲𑀚𑁆𑀚𑀺𑀢𑀁 𑀫𑀬𑀸;

𑀅𑀦𑀼𑀚𑀸𑀦𑀸𑀳𑀺 𑀫𑁂 𑀩𑁆𑀭𑀳𑁆𑀫𑁂, 𑀦𑀢𑁆𑀣𑀺 𑀧𑀜𑁆𑀘𑀲𑀢𑀸𑀦𑀺 𑀫𑁂’’.

𑁮. ‘‘𑀲𑀘𑁂 𑀫𑁂 𑀬𑀸𑀘𑀫𑀸𑀦𑀲𑁆𑀲, 𑀪𑀯𑀁 𑀦𑀸𑀦𑀼𑀧𑀤𑀲𑁆𑀲𑀢𑀺 [𑀧𑀤𑁂𑀲𑁆𑀲𑀢𑀺 (𑀓.)];

𑀲𑀢𑁆𑀢𑀫𑁂 𑀤𑀺𑀯𑀲𑁂 𑀢𑀼𑀬𑁆𑀳𑀁, 𑀫𑀼𑀤𑁆𑀥𑀸 𑀨𑀮𑀢𑀼 𑀲𑀢𑁆𑀢𑀥𑀸’’.

𑁯. 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀓𑀼𑀳𑀓𑁄, 𑀪𑁂𑀭𑀯𑀁 𑀲𑁄 𑀅𑀓𑀺𑀢𑁆𑀢𑀬𑀺;

𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀩𑀸𑀯𑀭𑀻 𑀤𑀼𑀓𑁆𑀔𑀺𑀢𑁄 𑀅𑀳𑀼.

𑁧𑁦. 𑀉𑀲𑁆𑀲𑀼𑀲𑁆𑀲𑀢𑀺 𑀅𑀦𑀸𑀳𑀸𑀭𑁄, 𑀲𑁄𑀓𑀲𑀮𑁆𑀮𑀲𑀫𑀧𑁆𑀧𑀺𑀢𑁄;

𑀅𑀣𑁄𑀧𑀺 𑀏𑀯𑀁 𑀘𑀺𑀢𑁆𑀢𑀲𑁆𑀲, 𑀛𑀸𑀦𑁂 𑀦 𑀭𑀫𑀢𑀻 𑀫𑀦𑁄.

𑁧𑁧. 𑀉𑀢𑁆𑀭𑀲𑁆𑀢𑀁 𑀤𑀼𑀓𑁆𑀔𑀺𑀢𑀁 𑀤𑀺𑀲𑁆𑀯𑀸, 𑀤𑁂𑀯𑀢𑀸 𑀅𑀢𑁆𑀣𑀓𑀸𑀫𑀺𑀦𑀻;

𑀩𑀸𑀯𑀭𑀺𑀁 𑀉𑀧𑀲𑀗𑁆𑀓𑀫𑁆𑀫, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁧𑁨. ‘‘𑀦 𑀲𑁄 𑀫𑀼𑀤𑁆𑀥𑀁 𑀧𑀚𑀸𑀦𑀸𑀢𑀺, 𑀓𑀼𑀳𑀓𑁄 𑀲𑁄 𑀥𑀦𑀢𑁆𑀣𑀺𑀓𑁄;

𑀫𑀼𑀤𑁆𑀥𑀦𑀺 𑀫𑀼𑀤𑁆𑀥𑀧𑀸𑀢𑁂 [𑀫𑀼𑀤𑁆𑀥𑀦𑀺𑀫𑁆𑀫𑀼𑀤𑁆𑀥𑀧𑀸𑀢𑁂 (𑀓.)] 𑀯𑀸, 𑀜𑀸𑀡𑀁 𑀢𑀲𑁆𑀲 𑀦 𑀯𑀺𑀚𑁆𑀚𑀢𑀺’’.

𑁧𑁩. ‘‘𑀪𑁄𑀢𑀻 [𑀪𑁄𑀢𑀺 (𑀓.)] 𑀘𑀭𑀳𑀺 𑀚𑀸𑀦𑀸𑀢𑀺, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑀸;

𑀫𑀼𑀤𑁆𑀥𑀁 𑀫𑀼𑀤𑁆𑀥𑀸𑀥𑀺𑀧𑀸𑀢𑀜𑁆𑀘 [𑀫𑀼𑀤𑁆𑀥𑀸𑀢𑀺𑀧𑀸𑀢𑀜𑁆𑀘 (𑀓.)], 𑀢𑀁 𑀲𑀼𑀡𑁄𑀫 𑀯𑀘𑁄 𑀢𑀯’’.

𑁧𑁪. ‘‘𑀅𑀳𑀫𑁆𑀧𑁂𑀢𑀁 𑀦 𑀚𑀸𑀦𑀸𑀫𑀺, 𑀜𑀸𑀡𑀁 𑀫𑁂𑀢𑁆𑀣 𑀦 𑀯𑀺𑀚𑁆𑀚𑀢𑀺;

𑀫𑀼𑀤𑁆𑀥𑀦𑀺 𑀫𑀼𑀤𑁆𑀥𑀸𑀥𑀺𑀧𑀸𑀢𑁂 𑀘, 𑀚𑀺𑀦𑀸𑀦𑀜𑁆𑀳𑁂𑀢𑁆𑀣 [𑀚𑀦𑀸𑀦𑀜𑁆𑀳𑁂𑀢𑁆𑀣 (𑀓.)] 𑀤𑀲𑁆𑀲𑀦𑀁’’.

𑁧𑁫. ‘‘𑀅𑀣 𑀓𑁄 𑀘𑀭𑀳𑀺 [𑀬𑁄 𑀘𑀭𑀢𑀺 (𑀓.)] 𑀚𑀸𑀦𑀸𑀢𑀺, 𑀅𑀲𑁆𑀫𑀺𑀁 𑀧𑀣𑀯𑀺𑀫𑀡𑁆𑀟𑀮𑁂 [𑀧𑀼𑀣𑀯𑀺𑀫𑀡𑁆𑀟𑀮𑁂 (𑀲𑀻.)];

𑀫𑀼𑀤𑁆𑀥𑀁 𑀫𑀼𑀤𑁆𑀥𑀸𑀥𑀺𑀧𑀸𑀢𑀜𑁆𑀘, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀤𑁂𑀯𑀢𑁂’’.

𑁧𑁬. ‘‘𑀧𑀼𑀭𑀸 𑀓𑀧𑀺𑀮𑀯𑀢𑁆𑀣𑀼𑀫𑁆𑀳𑀸, 𑀦𑀺𑀓𑁆𑀔𑀦𑁆𑀢𑁄 𑀮𑁄𑀓𑀦𑀸𑀬𑀓𑁄;

𑀅𑀧𑀘𑁆𑀘𑁄 𑀑𑀓𑁆𑀓𑀸𑀓𑀭𑀸𑀚𑀲𑁆𑀲, 𑀲𑀓𑁆𑀬𑀧𑀼𑀢𑁆𑀢𑁄 𑀧𑀪𑀗𑁆𑀓𑀭𑁄.

𑁧𑁭. ‘‘𑀲𑁄 𑀳𑀺 𑀩𑁆𑀭𑀸𑀳𑁆𑀫𑀡 𑀲𑀫𑁆𑀩𑀼𑀤𑁆𑀥𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀲𑀩𑁆𑀩𑀸𑀪𑀺𑀜𑁆𑀜𑀸𑀩𑀮𑀧𑁆𑀧𑀢𑁆𑀢𑁄 [𑀨𑀮𑀧𑁆𑀧𑀢𑁆𑀢𑁄 (𑀓.)], 𑀲𑀩𑁆𑀩𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀫𑀸;

𑀲𑀩𑁆𑀩𑀓𑀫𑁆𑀫𑀓𑁆𑀔𑀬𑀁 𑀧𑀢𑁆𑀢𑁄, 𑀯𑀺𑀫𑀼𑀢𑁆𑀢𑁄 𑀉𑀧𑀥𑀺𑀓𑁆𑀔𑀬𑁂.

𑁧𑁮. ‘‘𑀩𑀼𑀤𑁆𑀥𑁄 𑀲𑁄 𑀪𑀕𑀯𑀸 𑀮𑁄𑀓𑁂, 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀘𑀓𑁆𑀔𑀼𑀫𑀸;

𑀢𑀁 𑀢𑁆𑀯𑀁 𑀕𑀦𑁆𑀢𑁆𑀯𑀸𑀦 𑀧𑀼𑀘𑁆𑀙𑀲𑁆𑀲𑀼, 𑀲𑁄 𑀢𑁂 𑀢𑀁 𑀩𑁆𑀬𑀸𑀓𑀭𑀺𑀲𑁆𑀲𑀢𑀺’’.

𑁧𑁯. 𑀲𑀫𑁆𑀩𑀼𑀤𑁆𑀥𑁄𑀢𑀺 𑀯𑀘𑁄 𑀲𑀼𑀢𑁆𑀯𑀸, 𑀉𑀤𑀕𑁆𑀕𑁄 𑀩𑀸𑀯𑀭𑀻 𑀅𑀳𑀼;

𑀲𑁄𑀓𑀲𑁆𑀲 𑀢𑀦𑀼𑀓𑁄 𑀆𑀲𑀺, 𑀧𑀻𑀢𑀺𑀜𑁆𑀘 𑀯𑀺𑀧𑀼𑀮𑀁 𑀮𑀪𑀺.

𑁨𑁦. 𑀲𑁄 𑀩𑀸𑀯𑀭𑀻 𑀅𑀢𑁆𑀢𑀫𑀦𑁄 𑀉𑀤𑀕𑁆𑀕𑁄, 𑀢𑀁 𑀤𑁂𑀯𑀢𑀁 𑀧𑀼𑀘𑁆𑀙𑀢𑀺 𑀯𑁂𑀤𑀚𑀸𑀢𑁄;

‘‘𑀓𑀢𑀫𑀫𑁆𑀳𑀺 𑀕𑀸𑀫𑁂 𑀦𑀺𑀕𑀫𑀫𑁆𑀳𑀺 𑀯𑀸 𑀧𑀦, 𑀓𑀢𑀫𑀫𑁆𑀳𑀺 𑀯𑀸 𑀚𑀦𑀧𑀤𑁂 𑀮𑁄𑀓𑀦𑀸𑀣𑁄;

𑀬𑀢𑁆𑀣 𑀕𑀦𑁆𑀢𑁆𑀯𑀸𑀦 𑀧𑀲𑁆𑀲𑁂𑀫𑀼, 𑀲𑀫𑁆𑀩𑀼𑀤𑁆𑀥𑀁 𑀤𑁆𑀯𑀺𑀧𑀤𑀼𑀢𑁆𑀢𑀫𑀁’’.

𑁨𑁧. ‘‘𑀲𑀸𑀯𑀢𑁆𑀣𑀺𑀬𑀁 𑀓𑁄𑀲𑀮𑀫𑀦𑁆𑀤𑀺𑀭𑁂 𑀚𑀺𑀦𑁄, 𑀧𑀳𑀽𑀢𑀧𑀜𑁆𑀜𑁄 𑀯𑀭𑀪𑀽𑀭𑀺𑀫𑁂𑀥𑀲𑁄;

𑀲𑁄 𑀲𑀓𑁆𑀬𑀧𑀼𑀢𑁆𑀢𑁄 𑀯𑀺𑀥𑀼𑀭𑁄 𑀅𑀦𑀸𑀲𑀯𑁄, 𑀫𑀼𑀤𑁆𑀥𑀸𑀥𑀺𑀧𑀸𑀢𑀲𑁆𑀲 𑀯𑀺𑀤𑀽 𑀦𑀭𑀸𑀲𑀪𑁄’’.

𑁨𑁨. 𑀢𑀢𑁄 𑀆𑀫𑀦𑁆𑀢𑀬𑀻 𑀲𑀺𑀲𑁆𑀲𑁂, 𑀩𑁆𑀭𑀸𑀳𑁆𑀫𑀡𑁂 𑀫𑀦𑁆𑀢𑀧𑀸𑀭𑀕𑀽 [𑀧𑀸𑀭𑀕𑁂 (𑀲𑁆𑀬𑀸.)];

‘‘𑀏𑀣 𑀫𑀸𑀡𑀯𑀸 𑀅𑀓𑁆𑀔𑀺𑀲𑁆𑀲𑀁, 𑀲𑀼𑀡𑀸𑀣 𑀯𑀘𑀦𑀁 𑀫𑀫.

𑁨𑁩. ‘‘𑀬𑀲𑁆𑀲𑁂𑀲𑁄 𑀤𑀼𑀮𑁆𑀮𑀪𑁄 𑀮𑁄𑀓𑁂, 𑀧𑀸𑀢𑀼𑀪𑀸𑀯𑁄 𑀅𑀪𑀺𑀡𑁆𑀳𑀲𑁄;

𑀲𑁆𑀯𑀸𑀚𑁆𑀚 𑀮𑁄𑀓𑀫𑁆𑀳𑀺 𑀉𑀧𑁆𑀧𑀦𑁆𑀦𑁄, 𑀲𑀫𑁆𑀩𑀼𑀤𑁆𑀥𑁄 𑀇𑀢𑀺 𑀯𑀺𑀲𑁆𑀲𑀼𑀢𑁄;

𑀔𑀺𑀧𑁆𑀧𑀁 𑀕𑀦𑁆𑀢𑁆𑀯𑀸𑀦 𑀲𑀸𑀯𑀢𑁆𑀣𑀺𑀁, 𑀧𑀲𑁆𑀲𑀯𑁆𑀳𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑀁’’.

𑁨𑁪. ‘‘𑀓𑀣𑀁 𑀘𑀭𑀳𑀺 𑀚𑀸𑀦𑁂𑀫𑀼, 𑀤𑀺𑀲𑁆𑀯𑀸 𑀩𑀼𑀤𑁆𑀥𑁄𑀢𑀺 𑀩𑁆𑀭𑀸𑀳𑁆𑀫𑀡;

𑀅𑀚𑀸𑀦𑀢𑀁 𑀦𑁄 𑀧𑀩𑁆𑀭𑀽𑀳𑀺, 𑀬𑀣𑀸 𑀚𑀸𑀦𑁂𑀫𑀼 𑀢𑀁 𑀫𑀬𑀁’’.

𑁨𑁫. ‘‘𑀆𑀕𑀢𑀸𑀦𑀺 𑀳𑀺 𑀫𑀦𑁆𑀢𑁂𑀲𑀼, 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸;

𑀤𑁆𑀯𑀢𑁆𑀢𑀺𑀁𑀲𑀸𑀦𑀺 𑀘 𑀩𑁆𑀬𑀸𑀓𑁆𑀔𑀸𑀢𑀸, 𑀲𑀫𑀢𑁆𑀢𑀸 𑀅𑀦𑀼𑀧𑀼𑀩𑁆𑀩𑀲𑁄.

𑁨𑁬. ‘‘𑀬𑀲𑁆𑀲𑁂𑀢𑁂 𑀳𑁄𑀦𑁆𑀢𑀺 𑀕𑀢𑁆𑀢𑁂𑀲𑀼, 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸;

𑀤𑁆𑀯𑁂𑀬𑁂𑀯 𑀢𑀲𑁆𑀲 𑀕𑀢𑀺𑀬𑁄, 𑀢𑀢𑀺𑀬𑀸 𑀳𑀺 𑀦 𑀯𑀺𑀚𑁆𑀚𑀢𑀺.

𑁨𑁭. ‘‘𑀲𑀘𑁂 𑀅𑀕𑀸𑀭𑀁 𑀆𑀯𑀲𑀢𑀺, 𑀯𑀺𑀚𑁂𑀬𑁆𑀬 𑀧𑀣𑀯𑀺𑀁 𑀇𑀫𑀁;

𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦, 𑀥𑀫𑁆𑀫𑁂𑀦 𑀅𑀦𑀼𑀲𑀸𑀲𑀢𑀺.

𑁨𑁮. ‘‘𑀲𑀘𑁂 𑀘 𑀲𑁄 𑀧𑀩𑁆𑀩𑀚𑀢𑀺, 𑀅𑀕𑀸𑀭𑀸 𑀅𑀦𑀕𑀸𑀭𑀺𑀬𑀁;

𑀯𑀺𑀯𑀝𑁆𑀝𑀘𑁆𑀙𑀤𑁄 [𑀯𑀺𑀯𑀢𑁆𑀢𑀘𑁆𑀙𑀤𑁆𑀤𑁄 (𑀲𑀻.)] 𑀲𑀫𑁆𑀩𑀼𑀤𑁆𑀥𑁄, 𑀅𑀭𑀳𑀸 𑀪𑀯𑀢𑀺 𑀅𑀦𑀼𑀢𑁆𑀢𑀭𑁄.

𑁨𑁯. ‘‘𑀚𑀸𑀢𑀺𑀁 𑀕𑁄𑀢𑁆𑀢𑀜𑁆𑀘 𑀮𑀓𑁆𑀔𑀡𑀁, 𑀫𑀦𑁆𑀢𑁂 𑀲𑀺𑀲𑁆𑀲𑁂 𑀧𑀼𑀦𑀸𑀧𑀭𑁂;

𑀫𑀼𑀤𑁆𑀥𑀁 𑀫𑀼𑀤𑁆𑀥𑀸𑀥𑀺𑀧𑀸𑀢𑀜𑁆𑀘, 𑀫𑀦𑀲𑀸𑀬𑁂𑀯 𑀧𑀼𑀘𑁆𑀙𑀣.

𑁩𑁦. ‘‘𑀅𑀦𑀸𑀯𑀭𑀡𑀤𑀲𑁆𑀲𑀸𑀯𑀻, 𑀬𑀤𑀺 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺;

𑀫𑀦𑀲𑀸 𑀧𑀼𑀘𑁆𑀙𑀺𑀢𑁂 𑀧𑀜𑁆𑀳𑁂, 𑀯𑀸𑀘𑀸𑀬 𑀯𑀺𑀲𑀚𑁆𑀚𑀺𑀲𑁆𑀲𑀢𑀺’’ [𑀯𑀺𑀲𑁆𑀲𑀚𑀺𑀲𑁆𑀲𑀢𑀺 (𑀓.)].

𑁩𑁧. 𑀩𑀸𑀯𑀭𑀺𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀲𑀺𑀲𑁆𑀲𑀸 𑀲𑁄𑀴𑀲 𑀩𑁆𑀭𑀸𑀳𑁆𑀫𑀡𑀸;

𑀅𑀚𑀺𑀢𑁄 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑁄, 𑀧𑀼𑀡𑁆𑀡𑀓𑁄 𑀅𑀣 𑀫𑁂𑀢𑁆𑀢𑀕𑀽.

𑁩𑁨. 𑀥𑁄𑀢𑀓𑁄 𑀉𑀧𑀲𑀻𑀯𑁄 𑀘, 𑀦𑀦𑁆𑀤𑁄 𑀘 𑀅𑀣 𑀳𑁂𑀫𑀓𑁄;

𑀢𑁄𑀤𑁂𑀬𑁆𑀬-𑀓𑀧𑁆𑀧𑀸 𑀤𑀼𑀪𑀬𑁄, 𑀚𑀢𑀼𑀓𑀡𑁆𑀡𑀻 𑀘 𑀧𑀡𑁆𑀟𑀺𑀢𑁄.

𑁩𑁩. 𑀪𑀤𑁆𑀭𑀸𑀯𑀼𑀥𑁄 𑀉𑀤𑀬𑁄 𑀘, 𑀧𑁄𑀲𑀸𑀮𑁄 𑀘𑀸𑀧𑀺 𑀩𑁆𑀭𑀸𑀳𑁆𑀫𑀡𑁄;

𑀫𑁄𑀖𑀭𑀸𑀚𑀸 𑀘 𑀫𑁂𑀥𑀸𑀯𑀻, 𑀧𑀺𑀗𑁆𑀕𑀺𑀬𑁄 𑀘 𑀫𑀳𑀸𑀇𑀲𑀺.

𑁩𑁪. 𑀧𑀘𑁆𑀘𑁂𑀓𑀕𑀡𑀺𑀦𑁄 𑀲𑀩𑁆𑀩𑁂, 𑀲𑀩𑁆𑀩𑀮𑁄𑀓𑀲𑁆𑀲 𑀯𑀺𑀲𑁆𑀲𑀼𑀢𑀸;

𑀛𑀸𑀬𑀻 𑀛𑀸𑀦𑀭𑀢𑀸 𑀥𑀻𑀭𑀸, 𑀧𑀼𑀩𑁆𑀩𑀯𑀸𑀲𑀦𑀯𑀸𑀲𑀺𑀢𑀸.

𑁩𑁫. 𑀩𑀸𑀯𑀭𑀺𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀓𑀢𑁆𑀯𑀸 𑀘 𑀦𑀁 𑀧𑀤𑀓𑁆𑀔𑀺𑀡𑀁;

𑀚𑀝𑀸𑀚𑀺𑀦𑀥𑀭𑀸 𑀲𑀩𑁆𑀩𑁂, 𑀧𑀓𑁆𑀓𑀸𑀫𑀼𑀁 𑀉𑀢𑁆𑀢𑀭𑀸𑀫𑀼𑀔𑀸.

𑁩𑁬. 𑀫𑀴𑀓𑀲𑁆𑀲 𑀧𑀢𑀺𑀝𑁆𑀞𑀸𑀦𑀁, 𑀧𑀼𑀭𑀫𑀸𑀳𑀺𑀲𑁆𑀲𑀢𑀺𑀁 [𑀧𑀼𑀭𑀫𑀸𑀳𑀺𑀬𑀢𑀺 (𑀓.)] 𑀢𑀤𑀸 [𑀲𑀤𑀸 (𑀓.)];

𑀉𑀚𑁆𑀚𑁂𑀦𑀺𑀜𑁆𑀘𑀸𑀧𑀺 𑀕𑁄𑀦𑀤𑁆𑀥𑀁, 𑀯𑁂𑀤𑀺𑀲𑀁 𑀯𑀦𑀲𑀯𑁆𑀳𑀬𑀁.

𑁩𑁭. 𑀓𑁄𑀲𑀫𑁆𑀩𑀺𑀜𑁆𑀘𑀸𑀧𑀺 𑀲𑀸𑀓𑁂𑀢𑀁, 𑀲𑀸𑀯𑀢𑁆𑀣𑀺𑀜𑁆𑀘 𑀧𑀼𑀭𑀼𑀢𑁆𑀢𑀫𑀁;

𑀲𑁂𑀢𑀩𑁆𑀬𑀁 𑀓𑀧𑀺𑀮𑀯𑀢𑁆𑀣𑀼𑀁, 𑀓𑀼𑀲𑀺𑀦𑀸𑀭𑀜𑁆𑀘 𑀫𑀦𑁆𑀤𑀺𑀭𑀁.

𑁩𑁮. 𑀧𑀸𑀯𑀜𑁆𑀘 𑀪𑁄𑀕𑀦𑀕𑀭𑀁, 𑀯𑁂𑀲𑀸𑀮𑀺𑀁 𑀫𑀸𑀕𑀥𑀁 𑀧𑀼𑀭𑀁;

𑀧𑀸𑀲𑀸𑀡𑀓𑀁 𑀘𑁂𑀢𑀺𑀬𑀜𑁆𑀘, 𑀭𑀫𑀡𑀻𑀬𑀁 𑀫𑀦𑁄𑀭𑀫𑀁.

𑁩𑁯. 𑀢𑀲𑀺𑀢𑁄𑀯𑀼𑀤𑀓𑀁 𑀲𑀻𑀢𑀁, 𑀫𑀳𑀸𑀮𑀸𑀪𑀁𑀯 𑀯𑀸𑀡𑀺𑀚𑁄;

𑀙𑀸𑀬𑀁 𑀖𑀫𑁆𑀫𑀸𑀪𑀺𑀢𑀢𑁆𑀢𑁄𑀯 𑀢𑀼𑀭𑀺𑀢𑀸 𑀧𑀩𑁆𑀩𑀢𑀫𑀸𑀭𑀼𑀳𑀼𑀁.

𑁪𑁦. 𑀪𑀕𑀯𑀸 𑀢𑀫𑁆𑀳𑀺 𑀲𑀫𑀬𑁂, 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑁄;

𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀲𑀻𑀳𑁄𑀯 𑀦𑀤𑀢𑀻 𑀯𑀦𑁂.

𑁪𑁧. 𑀅𑀚𑀺𑀢𑁄 𑀅𑀤𑁆𑀤𑀲 𑀩𑀼𑀤𑁆𑀥𑀁, 𑀧𑀻𑀢𑀭𑀁𑀲𑀺𑀁𑀯 [𑀚𑀺𑀢𑀭𑀁𑀲𑀺𑀁 𑀲𑀻𑀢𑀭𑀁𑀲𑀺𑀁 (𑀓.), 𑀯𑀻𑀢𑀭𑀁𑀲𑀺𑀁 (𑀲𑀻. 𑀲𑁆𑀬𑀸.)] 𑀪𑀸𑀡𑀼𑀫𑀁;

𑀘𑀦𑁆𑀤𑀁 𑀬𑀣𑀸 𑀧𑀦𑁆𑀦𑀭𑀲𑁂, 𑀧𑀭𑀺𑀧𑀽𑀭𑀁 [𑀧𑀸𑀭𑀺𑀧𑀽𑀭𑀺𑀁 (𑀲𑀻. 𑀲𑁆𑀬𑀸.)] 𑀉𑀧𑀸𑀕𑀢𑀁.

𑁪𑁨. 𑀅𑀣𑀲𑁆𑀲 𑀕𑀢𑁆𑀢𑁂 𑀤𑀺𑀲𑁆𑀯𑀸𑀦, 𑀧𑀭𑀺𑀧𑀽𑀭𑀜𑁆𑀘 𑀩𑁆𑀬𑀜𑁆𑀚𑀦𑀁;

𑀏𑀓𑀫𑀦𑁆𑀢𑀁 𑀞𑀺𑀢𑁄 𑀳𑀝𑁆𑀞𑁄, 𑀫𑀦𑁄𑀧𑀜𑁆𑀳𑁂 𑀅𑀧𑀼𑀘𑁆𑀙𑀣.

𑁪𑁩. ‘‘𑀆𑀤𑀺𑀲𑁆𑀲 𑀚𑀫𑁆𑀫𑀦𑀁 𑀩𑁆𑀭𑀽𑀳𑀺, 𑀕𑁄𑀢𑁆𑀢𑀁 𑀩𑁆𑀭𑀽𑀳𑀺 𑀲𑀮𑀓𑁆𑀔𑀡𑀁;

𑀫𑀦𑁆𑀢𑁂𑀲𑀼 𑀧𑀸𑀭𑀫𑀺𑀁 𑀩𑁆𑀭𑀽𑀳𑀺, 𑀓𑀢𑀺 𑀯𑀸𑀘𑁂𑀢𑀺 𑀩𑁆𑀭𑀸𑀳𑁆𑀫𑀡𑁄’’.

𑁪𑁪. ‘‘𑀯𑀻𑀲𑀁 𑀯𑀲𑁆𑀲𑀲𑀢𑀁 𑀆𑀬𑀼, 𑀲𑁄 𑀘 𑀕𑁄𑀢𑁆𑀢𑁂𑀦 𑀩𑀸𑀯𑀭𑀻;

𑀢𑀻𑀡𑀺𑀲𑁆𑀲 𑀮𑀓𑁆𑀔𑀡𑀸 𑀕𑀢𑁆𑀢𑁂, 𑀢𑀺𑀡𑁆𑀡𑀁 𑀯𑁂𑀤𑀸𑀦 𑀧𑀸𑀭𑀕𑀽.

𑁪𑁫. ‘‘𑀮𑀓𑁆𑀔𑀡𑁂 𑀇𑀢𑀺𑀳𑀸𑀲𑁂 𑀘, 𑀲𑀦𑀺𑀖𑀡𑁆𑀟𑀼𑀲𑀓𑁂𑀝𑀼𑀪𑁂;

𑀧𑀜𑁆𑀘𑀲𑀢𑀸𑀦𑀺 𑀯𑀸𑀘𑁂𑀢𑀺, 𑀲𑀥𑀫𑁆𑀫𑁂 𑀧𑀸𑀭𑀫𑀺𑀁 𑀕𑀢𑁄’’.

𑁪𑁬. ‘‘𑀮𑀓𑁆𑀔𑀡𑀸𑀦𑀁 𑀧𑀯𑀺𑀘𑀬𑀁, 𑀩𑀸𑀯𑀭𑀺𑀲𑁆𑀲 𑀦𑀭𑀼𑀢𑁆𑀢𑀫;

𑀢𑀡𑁆𑀳𑀘𑁆𑀙𑀺𑀤 [𑀓𑀗𑁆𑀔𑀘𑁆𑀙𑀺𑀤 (𑀓.)] 𑀧𑀓𑀸𑀲𑁂𑀳𑀺, 𑀫𑀸 𑀦𑁄 𑀓𑀗𑁆𑀔𑀸𑀬𑀺𑀢𑀁 𑀅𑀳𑀼’’.

𑁪𑁭. ‘‘𑀫𑀼𑀔𑀁 𑀚𑀺𑀯𑁆𑀳𑀸𑀬 𑀙𑀸𑀤𑁂𑀢𑀺, 𑀉𑀡𑁆𑀡𑀲𑁆𑀲 𑀪𑀫𑀼𑀓𑀦𑁆𑀢𑀭𑁂;

𑀓𑁄𑀲𑁄𑀳𑀺𑀢𑀁 𑀯𑀢𑁆𑀣𑀕𑀼𑀬𑁆𑀳𑀁, 𑀏𑀯𑀁 𑀚𑀸𑀦𑀸𑀳𑀺 𑀫𑀸𑀡𑀯’’.

𑁪𑁮. 𑀧𑀼𑀘𑁆𑀙𑀜𑁆𑀳𑀺 𑀓𑀺𑀜𑁆𑀘𑀺 𑀅𑀲𑀼𑀡𑀦𑁆𑀢𑁄, 𑀲𑀼𑀢𑁆𑀯𑀸 𑀧𑀜𑁆𑀳𑁂 𑀯𑀺𑀬𑀸𑀓𑀢𑁂;

𑀯𑀺𑀘𑀺𑀦𑁆𑀢𑁂𑀢𑀺 𑀚𑀦𑁄 𑀲𑀩𑁆𑀩𑁄, 𑀯𑁂𑀤𑀚𑀸𑀢𑁄 𑀓𑀢𑀜𑁆𑀚𑀮𑀻.

𑁪𑁯. ‘‘𑀓𑁄 𑀦𑀼 𑀤𑁂𑀯𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸, 𑀇𑀦𑁆𑀤𑁄 𑀯𑀸𑀧𑀺 𑀲𑀼𑀚𑀫𑁆𑀧𑀢𑀺;

𑀫𑀦𑀲𑀸 𑀧𑀼𑀘𑁆𑀙𑀺𑀢𑁂 𑀧𑀜𑁆𑀳𑁂, 𑀓𑀫𑁂𑀢𑀁 𑀧𑀝𑀺𑀪𑀸𑀲𑀢𑀺.

𑁫𑁦. ‘‘𑀫𑀼𑀤𑁆𑀥𑀁 𑀫𑀼𑀤𑁆𑀥𑀸𑀥𑀺𑀧𑀸𑀢𑀜𑁆𑀘, 𑀩𑀸𑀯𑀭𑀻 𑀧𑀭𑀺𑀧𑀼𑀘𑁆𑀙𑀢𑀺;

𑀢𑀁 𑀩𑁆𑀬𑀸𑀓𑀭𑁄𑀳𑀺 𑀪𑀕𑀯𑀸, 𑀓𑀗𑁆𑀔𑀁 𑀯𑀺𑀦𑀬 𑀦𑁄 𑀇𑀲𑁂’’.

𑁫𑁧. ‘‘𑀅𑀯𑀺𑀚𑁆𑀚𑀸 𑀫𑀼𑀤𑁆𑀥𑀸𑀢𑀺 𑀚𑀸𑀦𑀸𑀳𑀺, 𑀯𑀺𑀚𑁆𑀚𑀸 𑀫𑀼𑀤𑁆𑀥𑀸𑀥𑀺𑀧𑀸𑀢𑀺𑀦𑀻;

𑀲𑀤𑁆𑀥𑀸𑀲𑀢𑀺𑀲𑀫𑀸𑀥𑀻𑀳𑀺, 𑀙𑀦𑁆𑀤𑀯𑀻𑀭𑀺𑀬𑁂𑀦 𑀲𑀁𑀬𑀼𑀢𑀸’’.

𑁫𑁨. 𑀢𑀢𑁄 𑀯𑁂𑀤𑁂𑀦 𑀫𑀳𑀢𑀸, 𑀲𑀦𑁆𑀣𑀫𑁆𑀪𑁂𑀢𑁆𑀯𑀸𑀦 𑀫𑀸𑀡𑀯𑁄;

𑀏𑀓𑀁𑀲𑀁 𑀅𑀚𑀺𑀦𑀁 𑀓𑀢𑁆𑀯𑀸, 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀧𑀢𑀺.

𑁫𑁩. ‘‘𑀩𑀸𑀯𑀭𑀻 𑀩𑁆𑀭𑀸𑀳𑁆𑀫𑀡𑁄 𑀪𑁄𑀢𑁄, 𑀲𑀳 𑀲𑀺𑀲𑁆𑀲𑁂𑀳𑀺 𑀫𑀸𑀭𑀺𑀲;

𑀉𑀤𑀕𑁆𑀕𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀧𑀸𑀤𑁂 𑀯𑀦𑁆𑀤𑀢𑀺 𑀘𑀓𑁆𑀔𑀼𑀫’’.

𑁫𑁪. ‘‘𑀲𑀼𑀔𑀺𑀢𑁄 𑀩𑀸𑀯𑀭𑀻 𑀳𑁄𑀢𑀼, 𑀲𑀳 𑀲𑀺𑀲𑁆𑀲𑁂𑀳𑀺 𑀩𑁆𑀭𑀸𑀳𑁆𑀫𑀡𑁄;

𑀢𑁆𑀯𑀜𑁆𑀘𑀸𑀧𑀺 𑀲𑀼𑀔𑀺𑀢𑁄 𑀳𑁄𑀳𑀺, 𑀘𑀺𑀭𑀁 𑀚𑀻𑀯𑀸𑀳𑀺 𑀫𑀸𑀡𑀯.

𑁫𑁫. ‘‘𑀩𑀸𑀯𑀭𑀺𑀲𑁆𑀲 𑀘 𑀢𑀼𑀬𑁆𑀳𑀁 𑀯𑀸, 𑀲𑀩𑁆𑀩𑁂𑀲𑀁 𑀲𑀩𑁆𑀩𑀲𑀁𑀲𑀬𑀁;

𑀓𑀢𑀸𑀯𑀓𑀸𑀲𑀸 𑀧𑀼𑀘𑁆𑀙𑀯𑁆𑀳𑁄, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀣’’.

𑁫𑁬. 𑀲𑀫𑁆𑀩𑀼𑀤𑁆𑀥𑁂𑀦 𑀓𑀢𑁄𑀓𑀸𑀲𑁄, 𑀦𑀺𑀲𑀻𑀤𑀺𑀢𑁆𑀯𑀸𑀦 𑀧𑀜𑁆𑀚𑀮𑀻;

𑀅𑀚𑀺𑀢𑁄 𑀧𑀞𑀫𑀁 𑀧𑀜𑁆𑀳𑀁, 𑀢𑀢𑁆𑀣 𑀧𑀼𑀘𑁆𑀙𑀺 𑀢𑀣𑀸𑀕𑀢𑀁.

𑀯𑀢𑁆𑀣𑀼𑀕𑀸𑀣𑀸 𑀦𑀺𑀝𑁆𑀞𑀺𑀢𑀸.

𑁧. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸

𑁫𑁭. ‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄]

𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀺;

𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀺, 𑀓𑀺𑀁𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬𑀁’’.

𑁫𑁮. ‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄, [𑀅𑀚𑀺𑀢𑀸𑀢𑀺 𑀪𑀕𑀯𑀸]

𑀯𑁂𑀯𑀺𑀘𑁆𑀙𑀸 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀺;

𑀚𑀧𑁆𑀧𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀫𑀺, 𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬𑀁’’.

𑁫𑁯. ‘‘𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄]

𑀲𑁄𑀢𑀸𑀦𑀁 𑀓𑀺𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀳𑀺, 𑀓𑁂𑀦 𑀲𑁄𑀢𑀸 𑀧𑀺𑀥𑀺𑀬𑁆𑀬𑀭𑁂’’.

𑁬𑁦. ‘‘𑀬𑀸𑀦𑀺 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺𑀁, [𑀅𑀚𑀺𑀢𑀸𑀢𑀺 𑀪𑀕𑀯𑀸]

𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀺, 𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀺𑀬𑁆𑀬𑀭𑁂’’.

𑁬𑁧. ‘‘𑀧𑀜𑁆𑀜𑀸 𑀘𑁂𑀯 𑀲𑀢𑀺 𑀘𑀸𑀧𑀺 [𑀲𑀢𑀻 𑀘𑁂𑀯 (𑀲𑀻.)], [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄]

𑀦𑀸𑀫𑀭𑀽𑀧𑀜𑁆𑀘 𑀫𑀸𑀭𑀺𑀲;

𑀏𑀢𑀁 𑀫𑁂 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺, 𑀓𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀺’’.

𑁬𑁨. ‘‘𑀬𑀫𑁂𑀢𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺, 𑀅𑀚𑀺𑀢 𑀢𑀁 𑀯𑀤𑀸𑀫𑀺 𑀢𑁂;

𑀬𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀺;

𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦, 𑀏𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀺’’.

𑁬𑁩. ‘‘𑀬𑁂 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂, 𑀬𑁂 𑀘 𑀲𑁂𑀔𑀸 [𑀲𑁂𑀓𑁆𑀔𑀸 (𑀓.)] 𑀧𑀼𑀣𑀽 𑀇𑀥;

𑀢𑁂𑀲𑀁 𑀫𑁂 𑀦𑀺𑀧𑀓𑁄 𑀇𑀭𑀺𑀬𑀁, 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲’’.

𑁬𑁪. ‘‘𑀓𑀸𑀫𑁂𑀲𑀼 𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬, 𑀫𑀦𑀲𑀸𑀦𑀸𑀯𑀺𑀮𑁄 𑀲𑀺𑀬𑀸;

𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺.

𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸 𑀧𑀞𑀫𑀸.

𑁨. 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀫𑀸𑀡𑀯𑀧𑀼𑀘𑁆𑀙𑀸

𑁬𑁫. ‘‘𑀓𑁄𑀥 𑀲𑀦𑁆𑀢𑀼𑀲𑀺𑀢𑁄 𑀮𑁄𑀓𑁂, [𑀇𑀘𑁆𑀘𑀸𑀬𑀲𑁆𑀫𑀸 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑁄]

𑀓𑀲𑁆𑀲 𑀦𑁄 𑀲𑀦𑁆𑀢𑀺 𑀇𑀜𑁆𑀚𑀺𑀢𑀸;

𑀓𑁄 𑀉𑀪𑀦𑁆𑀢𑀫𑀪𑀺𑀜𑁆𑀜𑀸𑀬, 𑀫𑀚𑁆𑀛𑁂 𑀫𑀦𑁆𑀢𑀸 𑀦 𑀮𑀺𑀧𑁆𑀧𑀢𑀺 [𑀦 𑀧𑀺𑀫𑁆𑀧𑀢𑀺 (𑀩𑀳𑀽𑀲𑀼)];

𑀓𑀁 𑀩𑁆𑀭𑀽𑀲𑀺 𑀫𑀳𑀸𑀧𑀼𑀭𑀺𑀲𑁄𑀢𑀺, 𑀓𑁄 𑀇𑀥 𑀲𑀺𑀩𑁆𑀩𑀺𑀦𑀺𑀫𑀘𑁆𑀘𑀕𑀸’’𑀢𑀺 [𑀲𑀺𑀩𑁆𑀩𑀦𑀺𑀫𑀘𑁆𑀘𑀕𑀸 (𑀲𑀻. 𑀲𑁆𑀬𑀸.)].