𑁯. 𑀢𑁄𑀤𑁂𑀬𑁆𑀬𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄

𑁫𑁭. 𑀬𑀲𑁆𑀫𑀺𑀁 𑀓𑀸𑀫𑀸 𑀦 𑀯𑀲𑀦𑁆𑀢𑀺, [𑀇𑀘𑁆𑀘𑀸𑀬𑀲𑁆𑀫𑀸 𑀢𑁄𑀤𑁂𑀬𑁆𑀬𑁄]

𑀢𑀡𑁆𑀳𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀺;

𑀓𑀣𑀁𑀓𑀣𑀸 𑀘 𑀬𑁄 𑀢𑀺𑀡𑁆𑀡𑁄, 𑀯𑀺𑀫𑁄𑀓𑁆𑀔𑁄 𑀢𑀲𑁆𑀲 𑀓𑀻𑀤𑀺𑀲𑁄.

𑀬𑀲𑁆𑀫𑀺𑀁 𑀓𑀸𑀫𑀸 𑀦 𑀯𑀲𑀦𑁆𑀢𑀻𑀢𑀺 𑀬𑀲𑁆𑀫𑀺𑀁 𑀓𑀸𑀫𑀸 𑀦 𑀯𑀲𑀦𑁆𑀢𑀺 𑀦 𑀲𑀁𑀯𑀲𑀦𑁆𑀢𑀺 𑀦 𑀆𑀯𑀲𑀦𑁆𑀢𑀺 𑀦 𑀧𑀭𑀺𑀯𑀲𑀦𑁆𑀢𑀻𑀢𑀺 𑁋 𑀬𑀲𑁆𑀫𑀺𑀁 𑀓𑀸𑀫𑀸 𑀦 𑀯𑀲𑀦𑁆𑀢𑀺. 𑀇𑀘𑁆𑀘𑀸𑀬𑀲𑁆𑀫𑀸 𑀢𑁄𑀤𑁂𑀬𑁆𑀬𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀇𑀘𑁆𑀘𑀸𑀢𑀺. 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁…𑀧𑁂…. 𑀢𑁄𑀤𑁂𑀬𑁆𑀬𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁…𑀧𑁂… 𑀅𑀪𑀺𑀮𑀸𑀧𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀢𑁄𑀤𑁂𑀬𑁆𑀬𑁄.

𑀢𑀡𑁆𑀳𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀻𑀢𑀺 𑀢𑀡𑁆𑀳𑀸 𑀬𑀲𑁆𑀲 𑀦𑀢𑁆𑀣𑀺 𑀦 𑀲𑀢𑀺 𑀦 𑀲𑀁𑀯𑀺𑀚𑁆𑀚𑀢𑀺 𑀦𑀼𑀧𑀮𑀩𑁆𑀪𑀢𑀺 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀢𑀡𑁆𑀳𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀺.

𑀓𑀣𑀁𑀓𑀣𑀸 𑀘 𑀬𑁄 𑀢𑀺𑀡𑁆𑀡𑁄𑀢𑀺 𑀓𑀣𑀁𑀓𑀣𑀸 𑀘 𑀬𑁄 𑀢𑀺𑀡𑁆𑀡𑁄 𑀉𑀢𑁆𑀢𑀺𑀡𑁆𑀡𑁄 𑀦𑀺𑀢𑁆𑀣𑀺𑀡𑁆𑀡𑁄 𑀅𑀢𑀺𑀓𑁆𑀓𑀦𑁆𑀢𑁄 𑀲𑀫𑀢𑀺𑀓𑁆𑀓𑀦𑁆𑀢𑁄 𑀯𑀻𑀢𑀺𑀯𑀢𑁆𑀢𑁄𑀢𑀺 𑁋 𑀓𑀣𑀁𑀓𑀣𑀸 𑀘 𑀬𑁄 𑀢𑀺𑀡𑁆𑀡𑁄.

𑀯𑀺𑀫𑁄𑀓𑁆𑀔𑁄 𑀢𑀲𑁆𑀲 𑀓𑀻𑀤𑀺𑀲𑁄𑀢𑀺 𑀯𑀺𑀫𑁄𑀓𑁆𑀔𑁄 𑀢𑀲𑁆𑀲 𑀓𑀻𑀤𑀺𑀲𑁄 𑀓𑀺𑀁𑀲𑀡𑁆𑀞𑀺𑀢𑁄 𑀓𑀺𑀁𑀧𑀓𑀸𑀭𑁄 𑀓𑀺𑀁𑀧𑀝𑀺𑀪𑀸𑀕𑁄 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀯𑀺𑀫𑁄𑀓𑁆𑀔𑀁 𑀧𑀼𑀘𑁆𑀙𑀢𑀻𑀢𑀺 𑁋 𑀯𑀺𑀫𑁄𑀓𑁆𑀔𑁄 𑀢𑀲𑁆𑀲 𑀓𑀻𑀤𑀺𑀲𑁄. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀬𑀲𑁆𑀫𑀺𑀁 𑀓𑀸𑀫𑀸 𑀦 𑀯𑀲𑀦𑁆𑀢𑀺, [𑀇𑀘𑁆𑀘𑀸𑀬𑀲𑁆𑀫𑀸 𑀢𑁄𑀤𑁂𑀬𑁆𑀬𑁄]

𑀢𑀡𑁆𑀳𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀺;

𑀓𑀣𑀁𑀓𑀣𑀸 𑀘 𑀬𑁄 𑀢𑀺𑀡𑁆𑀡𑁄, 𑀯𑀺𑀫𑁄𑀓𑁆𑀔𑁄 𑀢𑀲𑁆𑀲 𑀓𑀻𑀤𑀺𑀲𑁄’’𑀢𑀺.

𑁫𑁮. 𑀬𑀲𑁆𑀫𑀺𑀁 𑀓𑀸𑀫𑀸 𑀦 𑀯𑀲𑀦𑁆𑀢𑀺, [𑀢𑁄𑀤𑁂𑀬𑁆𑀬𑀸𑀢𑀺 𑀪𑀕𑀯𑀸]

𑀢𑀡𑁆𑀳𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀺;

𑀓𑀣𑀁𑀓𑀣𑀸 𑀘 𑀬𑁄 𑀢𑀺𑀡𑁆𑀡𑁄, 𑀯𑀺𑀫𑁄𑀓𑁆𑀔𑁄 𑀢𑀲𑁆𑀲 𑀦𑀸𑀧𑀭𑁄.

𑀬𑀲𑁆𑀫𑀺𑀁 𑀓𑀸𑀫𑀸 𑀦 𑀯𑀲𑀦𑁆𑀢𑀻𑀢𑀺. 𑀬𑀲𑁆𑀫𑀺𑀦𑁆𑀢𑀺 𑀬𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀅𑀭𑀳𑀦𑁆𑀢𑁂 𑀔𑀻𑀡𑀸𑀲𑀯𑁂. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀬𑀲𑁆𑀫𑀺𑀁 𑀓𑀸𑀫𑀸 𑀦 𑀯𑀲𑀦𑁆𑀢𑀻𑀢𑀺 𑀬𑀲𑁆𑀫𑀺𑀁 𑀓𑀸𑀫𑀸 𑀦 𑀯𑀲𑀦𑁆𑀢𑀺 𑀦 𑀲𑀁𑀯𑀲𑀦𑁆𑀢𑀺 𑀦 𑀆𑀯𑀲𑀦𑁆𑀢𑀺 𑀦 𑀧𑀭𑀺𑀯𑀲𑀦𑁆𑀢𑀻𑀢𑀺 𑁋 𑀬𑀲𑁆𑀫𑀺𑀁 𑀓𑀸𑀫𑀸 𑀦 𑀯𑀲𑀦𑁆𑀢𑀺.

𑀢𑁄𑀤𑁂𑀬𑁆𑀬𑀸𑀢𑀺 𑀪𑀕𑀯𑀸𑀢𑀺. 𑀢𑁄𑀤𑁂𑀬𑁆𑀬𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀢𑁄𑀤𑁂𑀬𑁆𑀬𑀸𑀢𑀺 𑀪𑀕𑀯𑀸.

𑀢𑀡𑁆𑀳𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀻𑀢𑀺. 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸 𑀲𑀤𑁆𑀤𑀢𑀡𑁆𑀳𑀸 𑀕𑀦𑁆𑀥𑀢𑀡𑁆𑀳𑀸 𑀭𑀲𑀢𑀡𑁆𑀳𑀸 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀥𑀫𑁆𑀫𑀢𑀡𑁆𑀳𑀸. 𑀬𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀢𑀡𑁆𑀳𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀻𑀢𑀺 𑀢𑀡𑁆𑀳𑀸 𑀬𑀲𑁆𑀲 𑀦𑀢𑁆𑀣𑀺 𑀦 𑀲𑀢𑀺 𑀦 𑀲𑀁𑀯𑀺𑀚𑁆𑀚𑀢𑀺 𑀦𑀼𑀧𑀮𑀩𑁆𑀪𑀢𑀺, 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀢𑀡𑁆𑀳𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀺.

𑀓𑀣𑀁𑀓𑀣𑀸 𑀘 𑀬𑁄 𑀢𑀺𑀡𑁆𑀡𑁄𑀢𑀺 𑀓𑀣𑀁𑀓𑀣𑀸 𑀯𑀼𑀘𑁆𑀘𑀢𑀺 𑀯𑀺𑀘𑀺𑀓𑀺𑀘𑁆𑀙𑀸. 𑀤𑀼𑀓𑁆𑀔𑁂 𑀓𑀗𑁆𑀔𑀸…𑀧𑁂… 𑀙𑀫𑁆𑀪𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀫𑀦𑁄𑀯𑀺𑀮𑁂𑀔𑁄. 𑀬𑁄𑀢𑀺 𑀬𑁄 𑀲𑁄 𑀅𑀭𑀳𑀁 𑀔𑀻𑀡𑀸𑀲𑀯𑁄. 𑀓𑀣𑀁𑀓𑀣𑀸 𑀘 𑀬𑁄 𑀢𑀺𑀡𑁆𑀡𑁄𑀢𑀺 𑀓𑀣𑀁𑀓𑀣𑀸 𑀘 𑀬𑁄 𑀢𑀺𑀡𑁆𑀡𑁄 𑀉𑀢𑁆𑀢𑀺𑀡𑁆𑀡𑁄 𑀦𑀺𑀢𑁆𑀣𑀺𑀡𑁆𑀡𑁄 𑀅𑀢𑀺𑀓𑁆𑀓𑀦𑁆𑀢𑁄 𑀲𑀫𑀢𑀺𑀓𑁆𑀓𑀦𑁆𑀢𑁄 𑀯𑀻𑀢𑀺𑀯𑀢𑁆𑀢𑁄𑀢𑀺 𑁋 𑀓𑀣𑀁𑀓𑀣𑀸 𑀘 𑀬𑁄 𑀢𑀺𑀡𑁆𑀡𑁄.

𑀯𑀺𑀫𑁄𑀓𑁆𑀔𑁄 𑀢𑀲𑁆𑀲 𑀦𑀸𑀧𑀭𑁄𑀢𑀺 𑀦𑀢𑁆𑀣𑀺 𑀢𑀲𑁆𑀲 𑀅𑀧𑀭𑁄 𑀯𑀺𑀫𑁄𑀓𑁆𑀔𑁄. 𑀬𑁂𑀦 𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀘𑁆𑀘𑁂𑀬𑁆𑀬 𑀯𑀺𑀫𑀼𑀢𑁆𑀢𑁄 𑀲𑁄. 𑀓𑀢𑀁 𑀢𑀲𑁆𑀲 𑀯𑀺𑀫𑁄𑀓𑁆𑀔𑁂𑀦 𑀓𑀭𑀡𑀻𑀬𑀦𑁆𑀢𑀺 𑁋 𑀯𑀺𑀫𑁄𑀓𑁆𑀔𑁄 𑀢𑀲𑁆𑀲 𑀦𑀸𑀧𑀭𑁄. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀲𑁆𑀫𑀺𑀁 𑀓𑀸𑀫𑀸 𑀦 𑀯𑀲𑀦𑁆𑀢𑀺, [𑀢𑁄𑀤𑁂𑀬𑁆𑀬𑀸𑀢𑀺 𑀪𑀕𑀯𑀸]

𑀢𑀡𑁆𑀳𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀺;

𑀓𑀣𑀁𑀓𑀣𑀸 𑀘 𑀬𑁄 𑀢𑀺𑀡𑁆𑀡𑁄, 𑀯𑀺𑀫𑁄𑀓𑁆𑀔𑁄 𑀢𑀲𑁆𑀲 𑀦𑀸𑀧𑀭𑁄’’𑀢𑀺.

𑁫𑁯. 𑀦𑀺𑀭𑀸𑀲𑀲𑁄 𑀲𑁄 𑀉𑀤 𑀆𑀲𑀲𑀸𑀦𑁄, 𑀧𑀜𑁆𑀜𑀸𑀡𑀯𑀸 𑀲𑁄 𑀉𑀤 𑀧𑀜𑁆𑀜𑀓𑀧𑁆𑀧𑀻;

𑀫𑀼𑀦𑀺𑀁 𑀅𑀳𑀁 𑀲𑀓𑁆𑀓 𑀬𑀣𑀸 𑀯𑀺𑀚𑀜𑁆𑀜𑀁, 𑀢𑀁 𑀫𑁂 𑀯𑀺𑀬𑀸𑀘𑀺𑀓𑁆𑀔 𑀲𑀫𑀦𑁆𑀢𑀘𑀓𑁆𑀔𑀼.

𑀦𑀺𑀭𑀸𑀲𑀲𑁄 𑀲𑁄 𑀉𑀤 𑀆𑀲𑀲𑀸𑀦𑁄𑀢𑀺 𑀦𑀺𑀢𑁆𑀢𑀡𑁆𑀳𑁄 𑀲𑁄, 𑀉𑀤𑀸𑀳𑀼 𑀲𑀢𑀡𑁆𑀳𑁄 𑀭𑀽𑀧𑁂 𑀆𑀲𑀻𑀲𑀢𑀺 [𑀆𑀲𑀺𑀁𑀲𑀢𑀺 (𑀲𑁆𑀬𑀸.)], 𑀲𑀤𑁆𑀤𑁂…𑀧𑁂… 𑀕𑀦𑁆𑀥𑁂… 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂… 𑀓𑀼𑀮𑀁… 𑀕𑀡𑀁… 𑀆𑀯𑀸𑀲𑀁… 𑀮𑀸𑀪𑀁… 𑀬𑀲𑀁… 𑀧𑀲𑀁𑀲𑀁… 𑀲𑀼𑀔𑀁… 𑀘𑀻𑀯𑀭𑀁… 𑀧𑀺𑀡𑁆𑀟𑀧𑀸𑀢𑀁… 𑀲𑁂𑀦𑀸𑀲𑀦𑀁… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁… 𑀓𑀸𑀫𑀥𑀸𑀢𑀼𑀁 … 𑀭𑀽𑀧𑀥𑀸𑀢𑀼𑀁… 𑀅𑀭𑀽𑀧𑀥𑀸𑀢𑀼𑀁… 𑀓𑀸𑀫𑀪𑀯𑀁… 𑀭𑀽𑀧𑀪𑀯𑀁… 𑀅𑀭𑀽𑀧𑀪𑀯𑀁… 𑀲𑀜𑁆𑀜𑀸𑀪𑀯𑀁… 𑀅𑀲𑀜𑁆𑀜𑀸𑀪𑀯𑀁… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑀁… 𑀏𑀓𑀯𑁄𑀓𑀸𑀭𑀪𑀯𑀁… 𑀘𑀢𑀼𑀯𑁄𑀓𑀸𑀭𑀪𑀯𑀁… 𑀧𑀜𑁆𑀘𑀯𑁄𑀓𑀸𑀭𑀪𑀯𑀁… 𑀅𑀢𑀻𑀢𑀁… 𑀅𑀦𑀸𑀕𑀢𑀁… 𑀧𑀘𑁆𑀘𑀼𑀧𑁆𑀧𑀦𑁆𑀦𑀁… 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂 𑀥𑀫𑁆𑀫𑁂 𑀆𑀲𑀻𑀲𑀢𑀺 𑀲𑀸𑀤𑀺𑀬𑀢𑀺 𑀧𑀢𑁆𑀣𑁂𑀢𑀺 𑀧𑀺𑀳𑁂𑀢𑀺 𑀅𑀪𑀺𑀚𑀧𑁆𑀧𑀢𑀻𑀢𑀺 𑁋 𑀦𑀺𑀭𑀸𑀲𑀲𑁄 𑀲𑁄 𑀉𑀤 𑀆𑀲𑀲𑀸𑀦𑁄.

𑀧𑀜𑁆𑀜𑀸𑀡𑀯𑀸 𑀲𑁄 𑀉𑀤 𑀧𑀜𑁆𑀜𑀓𑀧𑁆𑀧𑀻𑀢𑀺. 𑀧𑀜𑁆𑀜𑀸𑀡𑀯𑀸 𑀲𑁄𑀢𑀺 𑀧𑀡𑁆𑀟𑀺𑀢𑁄 𑀧𑀜𑁆𑀜𑀯𑀸 𑀩𑀼𑀤𑁆𑀥𑀺𑀫𑀸 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻. 𑀉𑀤 𑀧𑀜𑁆𑀜𑀓𑀧𑁆𑀧𑀻𑀢𑀺 𑀉𑀤𑀸𑀳𑀼 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀜𑀸𑀡𑁂𑀦 𑀯𑀸 𑀧𑀜𑁆𑀘𑀸𑀪𑀺𑀜𑁆𑀜𑀸𑀜𑀸𑀡𑁂𑀦 𑀯𑀸 𑀫𑀺𑀘𑁆𑀙𑀸𑀜𑀸𑀡𑁂𑀦 𑀯𑀸 𑀢𑀡𑁆𑀳𑀸𑀓𑀧𑁆𑀧𑀁 𑀯𑀸 𑀤𑀺𑀝𑁆𑀞𑀺𑀓𑀧𑁆𑀧𑀁 𑀯𑀸 𑀓𑀧𑁆𑀧𑁂𑀢𑀺 𑀚𑀦𑁂𑀢𑀺 𑀲𑀜𑁆𑀚𑀦𑁂𑀢𑀺 𑀦𑀺𑀩𑁆𑀩𑀢𑁆𑀢𑁂𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑁋 𑀧𑀜𑁆𑀜𑀸𑀡𑀯𑀸 𑀲𑁄 𑀉𑀤 𑀧𑀜𑁆𑀜𑀓𑀧𑁆𑀧𑀻.

𑀫𑀼𑀦𑀺𑀁 𑀅𑀳𑀁 𑀲𑀓𑁆𑀓 𑀬𑀣𑀸 𑀯𑀺𑀚𑀜𑁆𑀜𑀦𑁆𑀢𑀺. 𑀲𑀓𑁆𑀓𑀸𑀢𑀺 𑀲𑀓𑁆𑀓𑁄 𑀪𑀕𑀯𑀸. 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺𑀧𑀺 𑀲𑀓𑁆𑀓𑁄. 𑀅𑀣 𑀯𑀸, 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀥𑀦𑀯𑀸𑀢𑀺𑀧𑀺 𑀲𑀓𑁆𑀓𑁄. 𑀢𑀲𑁆𑀲𑀺𑀫𑀸𑀦𑀺 𑀥𑀦𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀤𑁆𑀥𑀸𑀥𑀦𑀁 𑀲𑀻𑀮𑀥𑀦𑀁 𑀳𑀺𑀭𑀺𑀥𑀦𑀁 𑀑𑀢𑁆𑀢𑀧𑁆𑀧𑀥𑀦𑀁 𑀲𑀼𑀢𑀥𑀦𑀁 𑀘𑀸𑀕𑀥𑀦𑀁 𑀧𑀜𑁆𑀜𑀸𑀥𑀦𑀁 𑀲𑀢𑀺𑀧𑀝𑁆𑀞𑀸𑀦𑀥𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀥𑀦𑀁 𑀇𑀤𑁆𑀥𑀺𑀧𑀸𑀤𑀥𑀦𑀁 𑀇𑀦𑁆𑀤𑁆𑀭𑀺𑀬𑀥𑀦𑀁 𑀩𑀮𑀥𑀦𑀁 𑀩𑁄𑀚𑁆𑀛𑀗𑁆𑀕𑀥𑀦𑀁 𑀫𑀕𑁆𑀕𑀥𑀦𑀁 𑀨𑀮𑀥𑀦𑀁 𑀦𑀺𑀩𑁆𑀩𑀸𑀦𑀥𑀦𑀦𑁆𑀢𑀺. 𑀢𑁂𑀳𑀺 𑀅𑀦𑁂𑀓𑀯𑀺𑀥𑁂𑀳𑀺 𑀥𑀦𑀭𑀢𑀦𑁂𑀳𑀺 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀥𑀦𑀯𑀸𑀢𑀺𑀧𑀺 𑀲𑀓𑁆𑀓𑁄. 𑀅𑀣 𑀯𑀸, 𑀧𑀳𑀼 𑀯𑀺𑀲𑀯𑀻 𑀅𑀮𑀫𑀢𑁆𑀢𑁄 𑀲𑀽𑀭𑁄 𑀯𑀻𑀭𑁄 𑀯𑀺𑀓𑁆𑀓𑀦𑁆𑀢𑁄 𑀅𑀪𑀻𑀭𑀽 𑀅𑀘𑁆𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀅𑀧𑀮𑀸𑀬𑀻 𑀧𑀳𑀻𑀦𑀪𑀬𑀪𑁂𑀭𑀯𑁄 𑀯𑀺𑀕𑀢𑀮𑁄𑀫𑀳𑀁𑀲𑁄𑀢𑀺𑀧𑀺 𑀲𑀓𑁆𑀓𑁄. 𑀫𑀼𑀦𑀺𑀁 𑀅𑀳𑀁 𑀲𑀓𑁆𑀓 𑀬𑀣𑀸 𑀯𑀺𑀚𑀜𑁆𑀜𑀦𑁆𑀢𑀺 𑀲𑀓𑁆𑀓 𑀬𑀣𑀸𑀳𑀁 𑀫𑀼𑀦𑀺𑀁 𑀚𑀸𑀦𑁂𑀬𑁆𑀬𑀁 𑀆𑀚𑀸𑀦𑁂𑀬𑁆𑀬𑀁 𑀯𑀺𑀚𑀸𑀦𑁂𑀬𑁆𑀬𑀁 𑀧𑀝𑀺𑀯𑀺𑀚𑀸𑀦𑁂𑀬𑁆𑀬𑀁 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀦𑁆𑀢𑀺 𑁋 𑀫𑀼𑀦𑀺𑀁 𑀅𑀳𑀁 𑀲𑀓𑁆𑀓 𑀬𑀣𑀸 𑀯𑀺𑀚𑀜𑁆𑀜𑀁.

𑀢𑀁 𑀫𑁂 𑀯𑀺𑀬𑀸𑀘𑀺𑀓𑁆𑀔 𑀲𑀫𑀦𑁆𑀢𑀘𑀓𑁆𑀔𑀽𑀢𑀺. 𑀢𑀦𑁆𑀢𑀺 𑀬𑀁 𑀧𑀼𑀘𑁆𑀙𑀸𑀫𑀺 𑀬𑀁 𑀬𑀸𑀘𑀸𑀫𑀺 𑀬𑀁 𑀅𑀚𑁆𑀛𑁂𑀲𑀸𑀫𑀺 𑀬𑀁 𑀧𑀲𑀸𑀤𑁂𑀫𑀺. 𑀯𑀺𑀬𑀸𑀘𑀺𑀓𑁆𑀔𑀸𑀢𑀺 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀺. 𑀲𑀫𑀦𑁆𑀢𑀘𑀓𑁆𑀔𑀽𑀢𑀺 𑀲𑀫𑀦𑁆𑀢𑀘𑀓𑁆𑀔𑀼 𑀯𑀼𑀘𑁆𑀘𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁…𑀧𑁂… 𑀢𑀣𑀸𑀕𑀢𑁄 𑀢𑁂𑀦 𑀲𑀫𑀦𑁆𑀢𑀘𑀓𑁆𑀔𑀽𑀢𑀺 𑁋 𑀢𑀁 𑀫𑁂 𑀯𑀺𑀬𑀸𑀘𑀺𑀓𑁆𑀔 𑀲𑀫𑀦𑁆𑀢𑀘𑀓𑁆𑀔𑀼. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀦𑀺𑀭𑀸𑀲𑀲𑁄 𑀲𑁄 𑀉𑀤 𑀆𑀲𑀲𑀸𑀦𑁄, 𑀧𑀜𑁆𑀜𑀸𑀡𑀯𑀸 𑀲𑁄 𑀉𑀤 𑀧𑀜𑁆𑀜𑀓𑀧𑁆𑀧𑀻;

𑀫𑀼𑀦𑀺𑀁 𑀅𑀳𑀁 𑀲𑀓𑁆𑀓 𑀬𑀣𑀸 𑀯𑀺𑀚𑀜𑁆𑀜𑀁, 𑀢𑀁 𑀫𑁂 𑀯𑀺𑀬𑀸𑀘𑀺𑀓𑁆𑀔 𑀲𑀫𑀦𑁆𑀢𑀘𑀓𑁆𑀔𑀽’’𑀢𑀺.

𑁬𑁦. 𑀦𑀺𑀭𑀸𑀲𑀲𑁄 𑀲𑁄 𑀦 𑀘 𑀆𑀲𑀲𑀸𑀦𑁄, 𑀧𑀜𑁆𑀜𑀸𑀡𑀯𑀸 𑀲𑁄 𑀦 𑀘 𑀧𑀜𑁆𑀜𑀓𑀧𑁆𑀧𑀻;

𑀏𑀯𑀫𑁆𑀧𑀺 𑀢𑁄𑀤𑁂𑀬𑁆𑀬 𑀫𑀼𑀦𑀺𑀁 𑀯𑀺𑀚𑀸𑀦, 𑀅𑀓𑀺𑀜𑁆𑀘𑀦𑀁 𑀓𑀸𑀫𑀪𑀯𑁂 𑀅𑀲𑀢𑁆𑀢𑀁.

𑀦𑀺𑀭𑀸𑀲𑀲𑁄 𑀲𑁄 𑀦 𑀘 𑀆𑀲𑀲𑀸𑀦𑁄𑀢𑀺 𑀦𑀺𑀢𑁆𑀢𑀡𑁆𑀳𑁄 𑀲𑁄. 𑀦 𑀲𑁄 𑀲𑀢𑀡𑁆𑀳𑁄 𑀭𑀽𑀧𑁂 𑀦𑀸𑀲𑀻𑀲𑀢𑀺. 𑀲𑀤𑁆𑀤𑁂…𑀧𑁂… 𑀕𑀦𑁆𑀥𑁂… 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂 𑀥𑀫𑁆𑀫𑁂 𑀦𑀸𑀲𑀻𑀲𑀢𑀺 𑀦 𑀇𑀘𑁆𑀙𑀢𑀺 𑀦 𑀲𑀸𑀤𑀺𑀬𑀢𑀺 𑀦 𑀧𑀢𑁆𑀣𑁂𑀢𑀺 𑀦 𑀧𑀺𑀳𑁂𑀢𑀺 𑀦𑀸𑀪𑀺𑀚𑀧𑁆𑀧𑀢𑀻𑀢𑀺 𑁋 𑀦𑀺𑀭𑀸𑀲𑀲𑁄 𑀲𑁄 𑀦 𑀘 𑀆𑀲𑀲𑀸𑀦𑁄.

𑀧𑀜𑁆𑀜𑀸𑀡𑀯𑀸 𑀲𑁄 𑀦 𑀘 𑀧𑀜𑁆𑀜𑀓𑀧𑁆𑀧𑀻𑀢𑀺. 𑀧𑀜𑁆𑀜𑀸𑀡𑀯𑀸𑀢𑀺 𑀧𑀡𑁆𑀟𑀺𑀢𑁄 𑀧𑀜𑁆𑀜𑀯𑀸 𑀩𑀼𑀤𑁆𑀥𑀺𑀫𑀸 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻. 𑀦 𑀘 𑀧𑀜𑁆𑀜𑀓𑀧𑁆𑀧𑀻𑀢𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀜𑀸𑀡𑁂𑀦 𑀯𑀸 𑀧𑀜𑁆𑀘𑀸𑀪𑀺𑀜𑁆𑀜𑀸𑀜𑀸𑀡𑁂𑀦 𑀯𑀸 𑀫𑀺𑀘𑁆𑀙𑀸𑀜𑀸𑀡𑁂𑀦 𑀯𑀸 𑀢𑀡𑁆𑀳𑀸𑀓𑀧𑁆𑀧𑀁 𑀯𑀸 𑀦 𑀓𑀧𑁆𑀧𑁂𑀢𑀺 𑀤𑀺𑀝𑁆𑀞𑀺𑀓𑀧𑁆𑀧𑀁 𑀯𑀸 𑀦 𑀓𑀧𑁆𑀧𑁂𑀢𑀺 𑀦 𑀚𑀦𑁂𑀢𑀺 𑀦 𑀲𑀜𑁆𑀚𑀦𑁂𑀢𑀺 𑀦 𑀦𑀺𑀩𑁆𑀩𑀢𑁆𑀢𑁂𑀢𑀺 𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑁋 𑀧𑀜𑁆𑀜𑀸𑀡𑀯𑀸 𑀲𑁄 𑀦 𑀘 𑀧𑀜𑁆𑀜𑀓𑀧𑁆𑀧𑀻.

𑀏𑀯𑀫𑁆𑀧𑀺 𑀢𑁄𑀤𑁂𑀬𑁆𑀬 𑀫𑀼𑀦𑀺𑀁 𑀯𑀺𑀚𑀸𑀦𑀸𑀢𑀺. 𑀫𑀼𑀦𑀻𑀢𑀺 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀺. 𑀏𑀯𑀫𑁆𑀧𑀺 𑀢𑁄𑀤𑁂𑀬𑁆𑀬 𑀫𑀼𑀦𑀺𑀁 𑀯𑀺𑀚𑀸𑀦𑀸𑀢𑀺 𑀢𑁄𑀤𑁂𑀬𑁆𑀬, 𑀏𑀯𑀁 𑀫𑀼𑀦𑀺𑀁 𑀚𑀸𑀦 𑀧𑀝𑀺𑀚𑀸𑀦 𑀧𑀝𑀺𑀯𑀺𑀚𑀸𑀦 𑀧𑀝𑀺𑀯𑀺𑀚𑁆𑀛𑀸𑀢𑀺 𑁋 𑀏𑀯𑀫𑁆𑀧𑀺 𑀢𑁄𑀤𑁂𑀬𑁆𑀬 𑀫𑀼𑀦𑀺𑀁 𑀯𑀺𑀚𑀸𑀦.

𑀅𑀓𑀺𑀜𑁆𑀘𑀦𑀁 𑀓𑀸𑀫𑀪𑀯𑁂 𑀅𑀲𑀢𑁆𑀢𑀦𑁆𑀢𑀺. 𑀅𑀓𑀺𑀜𑁆𑀘𑀦𑀦𑁆𑀢𑀺 𑀭𑀸𑀕𑀓𑀺𑀜𑁆𑀘𑀦𑀁 𑀤𑁄𑀲𑀓𑀺𑀜𑁆𑀘𑀦𑀁 𑀫𑁄𑀳𑀓𑀺𑀜𑁆𑀘𑀦𑀁 𑀫𑀸𑀦𑀓𑀺𑀜𑁆𑀘𑀦𑀁 𑀤𑀺𑀝𑁆𑀞𑀺𑀓𑀺𑀜𑁆𑀘𑀦𑀁 𑀓𑀺𑀮𑁂𑀲𑀓𑀺𑀜𑁆𑀘𑀦𑀁 𑀤𑀼𑀘𑁆𑀘𑀭𑀺𑀢𑀓𑀺𑀜𑁆𑀘𑀦𑀁. 𑀬𑀲𑁆𑀲𑁂𑀢𑀸𑀦𑀺 [𑀬𑀲𑁆𑀲𑁂𑀢𑁂 (𑀲𑁆𑀬𑀸.)] 𑀓𑀺𑀜𑁆𑀘𑀦𑀸𑀦𑀺 [𑀓𑀺𑀜𑁆𑀘𑀦𑀸 (𑀲𑁆𑀬𑀸.)] 𑀧𑀳𑀻𑀦𑀸𑀦𑀺 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀺 𑀯𑀽𑀧𑀲𑀦𑁆𑀢𑀸𑀦𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸𑀦𑀺 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸𑀦𑀺 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀦𑀺, 𑀲𑁄 𑀯𑀼𑀘𑁆𑀘𑀢𑀺 𑀅𑀓𑀺𑀜𑁆𑀘𑀦𑁄. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀪𑀯𑀸𑀢𑀺 𑀤𑁆𑀯𑁂 𑀪𑀯𑀸 𑁋 𑀓𑀫𑁆𑀫𑀪𑀯𑁄 𑀘 𑀧𑀝𑀺𑀲𑀦𑁆𑀥𑀺𑀓𑁄 𑀘 𑀧𑀼𑀦𑀩𑁆𑀪𑀯𑁄…𑀧𑁂… 𑀅𑀬𑀁 𑀧𑀝𑀺𑀲𑀦𑁆𑀥𑀺𑀓𑁄 𑀧𑀼𑀦𑀩𑁆𑀪𑀯𑁄.

𑀅𑀓𑀺𑀜𑁆𑀘𑀦𑀁 𑀓𑀸𑀫𑀪𑀯𑁂 𑀅𑀲𑀢𑁆𑀢𑀦𑁆𑀢𑀺 𑀅𑀓𑀺𑀜𑁆𑀘𑀦𑀁 𑀧𑀼𑀕𑁆𑀕𑀮𑀁 𑀓𑀸𑀫𑁂 𑀘 𑀪𑀯𑁂 𑀘 𑀅𑀲𑀢𑁆𑀢𑀁 𑀅𑀮𑀕𑁆𑀕𑀁 𑀅𑀮𑀕𑁆𑀕𑀺𑀢𑀁 𑀅𑀧𑀮𑀺𑀩𑀼𑀤𑁆𑀥𑀁 𑀦𑀺𑀓𑁆𑀔𑀦𑁆𑀢𑀁 𑀦𑀺𑀲𑁆𑀲𑀝𑀁 𑀯𑀺𑀧𑁆𑀧𑀫𑀼𑀢𑁆𑀢𑀁 𑀯𑀺𑀲𑀜𑁆𑀜𑀼𑀢𑁆𑀢𑀁 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀦𑁆𑀢𑀦𑁆𑀢𑀺 𑁋 𑀅𑀓𑀺𑀜𑁆𑀘𑀦𑀁 𑀓𑀸𑀫𑀪𑀯𑁂 𑀅𑀲𑀢𑁆𑀢𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀦𑀺𑀭𑀸𑀲𑀲𑁄 𑀲𑁄 𑀦 𑀘 𑀆𑀲𑀲𑀸𑀦𑁄, 𑀧𑀜𑁆𑀜𑀸𑀡𑀯𑀸 𑀲𑁄 𑀦 𑀘 𑀧𑀜𑁆𑀜𑀓𑀧𑁆𑀧𑀻;

𑀏𑀯𑀫𑁆𑀧𑀺 𑀢𑁄𑀤𑁂𑀬𑁆𑀬 𑀫𑀼𑀦𑀺𑀁 𑀯𑀺𑀚𑀸𑀦, 𑀅𑀓𑀺𑀜𑁆𑀘𑀦𑀁 𑀓𑀸𑀫𑀪𑀯𑁂 𑀅𑀲𑀢𑁆𑀢𑀦𑁆𑀢𑀺.

𑀲𑀳 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑀸…𑀧𑁂… 𑀲𑀢𑁆𑀣𑀸 𑀫𑁂 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻𑀢𑀺.

𑀢𑁄𑀤𑁂𑀬𑁆𑀬𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑀦𑀯𑀫𑁄.