𑁧𑁬. 𑀧𑀺𑀗𑁆𑀕𑀺𑀬𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄

𑁮𑁯. 𑀚𑀺𑀡𑁆𑀡𑁄𑀳𑀫𑀲𑁆𑀫𑀺 𑀅𑀩𑀮𑁄 𑀯𑀻𑀢𑀯𑀡𑁆𑀡𑁄 [𑀯𑀺𑀯𑀡𑁆𑀡𑁄 (𑀲𑁆𑀬𑀸.)], [𑀇𑀘𑁆𑀘𑀸𑀬𑀲𑁆𑀫𑀸 𑀧𑀺𑀗𑁆𑀕𑀺𑀬𑁄]

𑀦𑁂𑀢𑁆𑀢𑀸 𑀦 𑀲𑀼𑀤𑁆𑀥𑀸 𑀲𑀯𑀦𑀁 𑀦 𑀨𑀸𑀲𑀼;

𑀫𑀸𑀳𑀁 𑀦𑀲𑁆𑀲𑀁 𑀫𑁄𑀫𑀼𑀳𑁄 𑀅𑀦𑁆𑀢𑀭𑀸𑀯 [𑀅𑀦𑁆𑀢𑀭𑀸𑀬 (𑀲𑁆𑀬𑀸. 𑀓.)], 𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁;

𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀁.

𑀚𑀺𑀡𑁆𑀡𑁄𑀳𑀫𑀲𑁆𑀫𑀺 𑀅𑀩𑀮𑁄 𑀯𑀻𑀢𑀯𑀡𑁆𑀡𑁄𑀢𑀺. 𑀚𑀺𑀡𑁆𑀡𑁄𑀳𑀫𑀲𑁆𑀫𑀻𑀢𑀺 𑀚𑀺𑀡𑁆𑀡𑁄 𑀯𑀼𑀟𑁆𑀠𑁄 𑀫𑀳𑀮𑁆𑀮𑀓𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄 𑀯𑀻𑀲𑀯𑀲𑁆𑀲𑀲𑀢𑀺𑀓𑁄 𑀚𑀸𑀢𑀺𑀬𑀸. 𑀅𑀩𑀮𑁄𑀢𑀺 𑀤𑀼𑀩𑁆𑀩𑀮𑁄 𑀅𑀧𑁆𑀧𑀩𑀮𑁄 𑀅𑀧𑁆𑀧𑀣𑀸𑀫𑁄. 𑀯𑀻𑀢𑀯𑀡𑁆𑀡𑁄𑀢𑀺 𑀯𑀻𑀢𑀯𑀡𑁆𑀡𑁄 𑀯𑀺𑀕𑀢𑀯𑀡𑁆𑀡𑁄 𑀯𑀺𑀕𑀘𑁆𑀙𑀺𑀢𑀯𑀡𑁆𑀡𑁄. 𑀬𑀸 𑀲𑀸 𑀧𑀼𑀭𑀺𑀫𑀸 𑀲𑀼𑀪𑀸 𑀯𑀡𑁆𑀡𑀦𑀺𑀪𑀸 𑀲𑀸 𑀅𑀦𑁆𑀢𑀭𑀳𑀺𑀢𑀸, 𑀆𑀤𑀻𑀦𑀯𑁄 𑀧𑀸𑀢𑀼𑀪𑀽𑀢𑁄𑀢𑀺 𑁋 𑀚𑀺𑀡𑁆𑀡𑁄𑀳𑀫𑀲𑁆𑀫𑀺 𑀅𑀩𑀮𑁄 𑀯𑀻𑀢𑀯𑀡𑁆𑀡𑁄.

𑀇𑀘𑁆𑀘𑀸𑀬𑀲𑁆𑀫𑀸 𑀧𑀺𑀗𑁆𑀕𑀺𑀬𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂…. 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁…𑀧𑁂…. 𑀧𑀺𑀗𑁆𑀕𑀺𑀬𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁…𑀧𑁂… 𑀅𑀪𑀺𑀮𑀸𑀧𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀧𑀺𑀗𑁆𑀕𑀺𑀬𑁄.

𑀦𑁂𑀢𑁆𑀢𑀸 𑀦 𑀲𑀼𑀤𑁆𑀥𑀸 𑀲𑀯𑀦𑀁 𑀦 𑀨𑀸𑀲𑀽𑀢𑀺 𑀦𑁂𑀢𑁆𑀢𑀸 𑀅𑀲𑀼𑀤𑁆𑀥𑀸 𑀅𑀯𑀺𑀲𑀼𑀤𑁆𑀥𑀸 𑀅𑀧𑀭𑀺𑀲𑀼𑀤𑁆𑀥𑀸 𑀅𑀯𑁄𑀤𑀸𑀢𑀸. 𑀦𑁄 𑀢𑀣𑀸 𑀘𑀓𑁆𑀔𑀼𑀦𑀸 𑀭𑀽𑀧𑁂 𑀧𑀲𑁆𑀲𑀸𑀫𑀻𑀢𑀺 𑁋 𑀦𑁂𑀢𑁆𑀢𑀸 𑀦 𑀲𑀼𑀤𑁆𑀥𑀸. 𑀲𑀯𑀦𑀁 𑀦 𑀨𑀸𑀲𑀽𑀢𑀺 𑀲𑁄𑀢𑀁 𑀅𑀲𑀼𑀤𑁆𑀥𑀁 𑀅𑀯𑀺𑀲𑀼𑀤𑁆𑀥𑀁 𑀅𑀧𑀭𑀺𑀲𑀼𑀤𑁆𑀥𑀁 𑀅𑀯𑁄𑀤𑀸𑀢𑀁. 𑀦𑁄 𑀢𑀣𑀸 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀡𑁄𑀫𑀻𑀢𑀺 𑁋 𑀦𑁂𑀢𑁆𑀢𑀸 𑀦 𑀲𑀼𑀤𑁆𑀥𑀸 𑀲𑀯𑀦𑀁 𑀦 𑀨𑀸𑀲𑀼.

𑀫𑀸𑀳𑀁 𑀦𑀲𑁆𑀲𑀁 𑀫𑁄𑀫𑀼𑀳𑁄 𑀅𑀦𑁆𑀢𑀭𑀸𑀯𑀸𑀢𑀺. 𑀫𑀸𑀳𑀁 𑀦𑀲𑁆𑀲𑀦𑁆𑀢𑀺 𑀫𑀸𑀳𑀁 𑀦𑀲𑁆𑀲 𑀫𑀸𑀳𑀁 𑀯𑀺𑀦𑀲𑁆𑀲𑀁 𑀫𑀸𑀳𑀁 𑀧𑀦𑀲𑁆𑀲𑀁. 𑀫𑁄𑀫𑀼𑀳𑁄𑀢𑀺 𑀫𑁄𑀳𑀫𑀼𑀳𑁄 𑀅𑀯𑀺𑀚𑁆𑀚𑀸𑀕𑀢𑁄 𑀅𑀜𑁆𑀜𑀸𑀡𑀻 𑀅𑀯𑀺𑀪𑀸𑀯𑀻 𑀤𑀼𑀧𑁆𑀧𑀜𑁆𑀜𑁄. 𑀅𑀦𑁆𑀢𑀭𑀸𑀯𑀸𑀢𑀺 𑀢𑀼𑀬𑁆𑀳𑀁 𑀥𑀫𑁆𑀫𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀅𑀦𑀜𑁆𑀜𑀸𑀬 𑀅𑀦𑀥𑀺𑀕𑀦𑁆𑀢𑁆𑀯𑀸 𑀅𑀯𑀺𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀮𑀪𑀺𑀢𑁆𑀯𑀸 𑀅𑀨𑀲𑁆𑀲𑀬𑀺𑀢𑁆𑀯𑀸 𑀅𑀲𑀘𑁆𑀙𑀺𑀓𑀭𑀺𑀢𑁆𑀯𑀸 𑀅𑀦𑁆𑀢𑀭𑀸𑀬𑁂𑀯 𑀓𑀸𑀮𑀗𑁆𑀓𑀭𑁂𑀬𑁆𑀬𑀦𑁆𑀢𑀺 𑁋 𑀫𑀸𑀳𑀁 𑀦𑀲𑁆𑀲𑀁 𑀫𑁄𑀫𑀼𑀳𑁄 𑀅𑀦𑁆𑀢𑀭𑀸𑀯.

𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀦𑁆𑀢𑀺. 𑀥𑀫𑁆𑀫𑀦𑁆𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑁂, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑁂, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂, 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀦𑀺𑀩𑁆𑀩𑀸𑀦𑀜𑁆𑀘 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀆𑀘𑀺𑀓𑁆𑀔 𑀥𑀫𑁆𑀫𑀁. 𑀬𑀫𑀳𑀁 𑀯𑀺𑀚𑀜𑁆𑀜𑀦𑁆𑀢𑀺 𑀬𑀫𑀳𑀁 𑀚𑀸𑀦𑁂𑀬𑁆𑀬𑀁 𑀆𑀚𑀸𑀦𑁂𑀬𑁆𑀬𑀁 𑀯𑀺𑀚𑀸𑀦𑁂𑀬𑁆𑀬𑀁 𑀧𑀝𑀺𑀯𑀺𑀚𑀸𑀦𑁂𑀬𑁆𑀬𑀁 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀁 𑀅𑀥𑀺𑀕𑀘𑁆𑀙𑁂𑀬𑁆𑀬𑀁 𑀨𑀲𑁆𑀲𑁂𑀬𑁆𑀬𑀁 𑀲𑀘𑁆𑀙𑀺𑀓𑀭𑁂𑀬𑁆𑀬𑀦𑁆𑀢𑀺 𑁋 𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁.

𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀦𑁆𑀢𑀺 𑀇𑀥𑁂𑀯 𑀚𑀸𑀢𑀺𑀚𑀭𑀸𑀫𑀭𑀡𑀲𑁆𑀲 𑀧𑀳𑀸𑀦𑀁 𑀯𑀽𑀧𑀲𑀫𑀁 𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀚𑀺𑀡𑁆𑀡𑁄𑀳𑀫𑀲𑁆𑀫𑀺 𑀅𑀩𑀮𑁄 𑀯𑀻𑀢𑀯𑀡𑁆𑀡𑁄, [𑀇𑀘𑁆𑀘𑀸𑀬𑀲𑁆𑀫𑀸 𑀧𑀺𑀗𑁆𑀕𑀺𑀬𑁄]

𑀦𑁂𑀢𑁆𑀢𑀸 𑀦 𑀲𑀼𑀤𑁆𑀥𑀸 𑀲𑀯𑀦𑀁 𑀦 𑀨𑀸𑀲𑀼;

𑀫𑀸𑀳𑀁 𑀦𑀲𑁆𑀲𑀁 𑀫𑁄𑀫𑀼𑀳𑁄 𑀅𑀦𑁆𑀢𑀭𑀸𑀯, 𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁;

𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦’’𑀦𑁆𑀢𑀺.

𑁯𑁦. 𑀤𑀺𑀲𑁆𑀯𑀸𑀦 𑀭𑀽𑀧𑁂𑀲𑀼 𑀯𑀺𑀳𑀜𑁆𑀜𑀫𑀸𑀦𑁂, [𑀧𑀺𑀗𑁆𑀕𑀺𑀬𑀸𑀢𑀺 𑀪𑀕𑀯𑀸]

𑀭𑀼𑀧𑁆𑀧𑀦𑁆𑀢𑀺 𑀭𑀽𑀧𑁂𑀲𑀼 𑀚𑀦𑀸 𑀧𑀫𑀢𑁆𑀢𑀸;

𑀢𑀲𑁆𑀫𑀸 𑀢𑀼𑀯𑀁 𑀧𑀺𑀗𑁆𑀕𑀺𑀬 𑀅𑀧𑁆𑀧𑀫𑀢𑁆𑀢𑁄, 𑀚𑀳𑀲𑁆𑀲𑀼 𑀭𑀽𑀧𑀁 𑀅𑀧𑀼𑀦𑀩𑁆𑀪𑀯𑀸𑀬.

𑀤𑀺𑀲𑁆𑀯𑀸𑀦 𑀭𑀽𑀧𑁂𑀲𑀼 𑀯𑀺𑀳𑀜𑁆𑀜𑀫𑀸𑀦𑁂𑀢𑀺. 𑀭𑀽𑀧𑀦𑁆𑀢𑀺 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀭𑀽𑀧𑀁. 𑀲𑀢𑁆𑀢𑀸 𑀭𑀽𑀧𑀳𑁂𑀢𑀼 𑀭𑀽𑀧𑀧𑁆𑀧𑀘𑁆𑀘𑀬𑀸 𑀭𑀽𑀧𑀓𑀸𑀭𑀡𑀸 𑀳𑀜𑁆𑀜𑀦𑁆𑀢𑀺 𑀯𑀺𑀳𑀜𑁆𑀜𑀦𑁆𑀢𑀺 𑀉𑀧𑀳𑀜𑁆𑀜𑀦𑁆𑀢𑀺 𑀉𑀧𑀖𑀸𑀢𑀺𑀬𑀦𑁆𑀢𑀺 [𑀉𑀧𑀖𑀸𑀢𑀬𑀦𑁆𑀢𑀺 (𑀲𑁆𑀬𑀸. 𑀓.)]. 𑀭𑀽𑀧𑁂 𑀲𑀢𑀺 𑀯𑀺𑀯𑀺𑀥𑀓𑀫𑁆𑀫𑀓𑀸𑀭𑀡𑀸 [𑀯𑀺𑀯𑀺𑀥𑀓𑀫𑁆𑀫𑀓𑀭𑀡𑀸𑀦𑀺 (𑀓.)] 𑀓𑀸𑀭𑁂𑀦𑁆𑀢𑀺. 𑀓𑀲𑀸𑀳𑀺𑀧𑀺 𑀢𑀸𑀴𑁂𑀦𑁆𑀢𑀺, 𑀯𑁂𑀢𑁆𑀢𑁂𑀳𑀺𑀧𑀺 𑀢𑀸𑀴𑁂𑀦𑁆𑀢𑀺, 𑀅𑀟𑁆𑀠𑀤𑀡𑁆𑀟𑀓𑁂𑀳𑀺𑀧𑀺 𑀢𑀸𑀴𑁂𑀦𑁆𑀢𑀺, 𑀳𑀢𑁆𑀣𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀧𑀸𑀤𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀳𑀢𑁆𑀣𑀧𑀸𑀤𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀓𑀡𑁆𑀡𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀦𑀸𑀲𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀓𑀡𑁆𑀡𑀦𑀸𑀲𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀩𑀺𑀮𑀗𑁆𑀕𑀣𑀸𑀮𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀲𑀗𑁆𑀔𑀫𑀼𑀡𑁆𑀟𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀭𑀸𑀳𑀼𑀫𑀼𑀔𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀚𑁄𑀢𑀺𑀫𑀸𑀮𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀳𑀢𑁆𑀣𑀧𑀚𑁆𑀚𑁄𑀢𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀏𑀭𑀓𑀯𑀢𑁆𑀢𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀘𑀻𑀭𑀓𑀯𑀸𑀲𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀏𑀡𑁂𑀬𑁆𑀬𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀩𑀴𑀺𑀲𑀫𑀁𑀲𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀓𑀳𑀸𑀧𑀡𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀔𑀸𑀭𑀸𑀧𑀢𑀘𑁆𑀙𑀺𑀓𑀫𑁆𑀧𑀺 [𑀔𑀸𑀭𑀸𑀧𑀝𑀺𑀘𑁆𑀙𑀺𑀓𑀫𑁆𑀧𑀺 (𑀓.)] 𑀓𑀭𑁄𑀦𑁆𑀢𑀺, 𑀧𑀮𑀺𑀖𑀧𑀭𑀺𑀯𑀢𑁆𑀢𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀧𑀮𑀸𑀮𑀧𑀻𑀞𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀢𑀢𑁆𑀢𑁂𑀦𑀧𑀺 𑀢𑁂𑀮𑁂𑀦 𑀑𑀲𑀺𑀜𑁆𑀘𑀦𑁆𑀢𑀺, 𑀲𑀼𑀦𑀔𑁂𑀳𑀺𑀧𑀺 𑀔𑀸𑀤𑀸𑀧𑁂𑀦𑁆𑀢𑀺, 𑀚𑀻𑀯𑀦𑁆𑀢𑀫𑁆𑀧𑀺 𑀲𑀽𑀮𑁂 𑀉𑀢𑁆𑀢𑀸𑀲𑁂𑀦𑁆𑀢𑀺, 𑀅𑀲𑀺𑀦𑀸𑀧𑀺 𑀲𑀻𑀲𑀁 𑀙𑀺𑀦𑁆𑀤𑀦𑁆𑀢𑀺. 𑀏𑀯𑀁 𑀲𑀢𑁆𑀢𑀸 𑀭𑀽𑀧𑀳𑁂𑀢𑀼 𑀭𑀽𑀧𑀧𑁆𑀧𑀘𑁆𑀘𑀬𑀸 𑀭𑀽𑀧𑀓𑀸𑀭𑀡𑀸 𑀳𑀜𑁆𑀜𑀦𑁆𑀢𑀺 𑀯𑀺𑀳𑀜𑁆𑀜𑀦𑁆𑀢𑀺 𑀉𑀧𑀳𑀜𑁆𑀜𑀦𑁆𑀢𑀺 𑀉𑀧𑀖𑀸𑀢𑀺𑀬𑀦𑁆𑀢𑀺. 𑀏𑀯𑀁 𑀳𑀜𑁆𑀜𑀫𑀸𑀦𑁂 𑀯𑀺𑀳𑀜𑁆𑀜𑀫𑀸𑀦𑁂 𑀉𑀧𑀳𑀜𑁆𑀜𑀫𑀸𑀦𑁂 𑀉𑀧𑀖𑀸𑀢𑀺𑀬𑀫𑀸𑀦𑁂 𑀤𑀺𑀲𑁆𑀯𑀸 𑀧𑀲𑁆𑀲𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀤𑀺𑀲𑁆𑀯𑀸𑀦 𑀭𑀽𑀧𑁂𑀲𑀼 𑀯𑀺𑀳𑀜𑁆𑀜𑀫𑀸𑀦𑁂.

𑀧𑀺𑀗𑁆𑀕𑀺𑀬𑀸𑀢𑀺 𑀪𑀕𑀯𑀸𑀢𑀺. 𑀧𑀺𑀗𑁆𑀕𑀺𑀬𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀧𑀺𑀗𑁆𑀕𑀺𑀬𑀸𑀢𑀺 𑀪𑀕𑀯𑀸.

𑀭𑀼𑀧𑁆𑀧𑀦𑁆𑀢𑀺 𑀭𑀽𑀧𑁂𑀲𑀼 𑀚𑀦𑀸 𑀧𑀫𑀢𑁆𑀢𑀸𑀢𑀺. 𑀭𑀼𑀧𑁆𑀧𑀦𑁆𑀢𑀻𑀢𑀺 𑀭𑀼𑀧𑁆𑀧𑀦𑁆𑀢𑀺 𑀓𑀼𑀧𑁆𑀧𑀦𑁆𑀢𑀺 𑀧𑀻𑀴𑀬𑀦𑁆𑀢𑀺 [𑀧𑀻𑀴𑀺𑀬𑀦𑁆𑀢𑀺 (𑀲𑁆𑀬𑀸. 𑀓.)] 𑀖𑀝𑁆𑀝𑀬𑀦𑁆𑀢𑀺, 𑀩𑁆𑀬𑀸𑀥𑀺𑀢𑀸 𑀤𑁄𑀫𑀦𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀘𑀓𑁆𑀔𑀼𑀭𑁄𑀕𑁂𑀦 𑀭𑀼𑀧𑁆𑀧𑀦𑁆𑀢𑀺 𑀓𑀼𑀧𑁆𑀧𑀦𑁆𑀢𑀺 𑀧𑀻𑀴𑀬𑀦𑁆𑀢𑀺 𑀖𑀝𑁆𑀝𑀬𑀦𑁆𑀢𑀺, 𑀩𑁆𑀬𑀸𑀥𑀺𑀢𑀸 𑀤𑁄𑀫𑀦𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀲𑁄𑀢𑀭𑁄𑀕𑁂𑀦…𑀧𑁂… 𑀓𑀸𑀬𑀭𑁄𑀕𑁂𑀦…𑀧𑁂… 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑁂𑀳𑀺 𑀭𑀼𑀧𑁆𑀧𑀦𑁆𑀢𑀺 𑀓𑀼𑀧𑁆𑀧𑀦𑁆𑀢𑀺 𑀧𑀻𑀴𑀬𑀦𑁆𑀢𑀺 𑀖𑀝𑁆𑀝𑀬𑀦𑁆𑀢𑀺, 𑀩𑁆𑀬𑀸𑀥𑀺𑀢𑀸 𑀤𑁄𑀫𑀦𑀲𑁆𑀲𑀺𑀢𑀸 𑀳𑁄𑀦𑁆𑀢𑀻𑀢𑀺 𑁋 𑀭𑀼𑀧𑁆𑀧𑀦𑁆𑀢𑀺 𑀭𑀽𑀧𑁂𑀲𑀼.

𑀅𑀣 𑀯𑀸, 𑀘𑀓𑁆𑀔𑀼𑀲𑁆𑀫𑀺𑀁 𑀳𑀻𑀬𑀫𑀸𑀦𑁂 𑀳𑀸𑀬𑀫𑀸𑀦𑁂 𑀧𑀭𑀺𑀳𑀸𑀬𑀫𑀸𑀦𑁂 𑀯𑁂𑀫𑀸𑀦𑁂 [𑀯𑀺𑀳𑀸𑀬𑀫𑀸𑀦𑁂 (𑀓.)] 𑀯𑀺𑀕𑀘𑁆𑀙𑀫𑀸𑀦𑁂 𑀅𑀦𑁆𑀢𑀭𑀥𑀸𑀬𑀫𑀸𑀦𑁂 𑀭𑀼𑀧𑁆𑀧𑀦𑁆𑀢𑀺…𑀧𑁂… 𑀤𑁄𑀫𑀦𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀲𑁄𑀢𑀲𑁆𑀫𑀺𑀁…𑀧𑁂… 𑀖𑀸𑀦𑀲𑁆𑀫𑀺𑀁… 𑀚𑀺𑀯𑁆𑀳𑀸𑀬… 𑀓𑀸𑀬𑀲𑁆𑀫𑀺𑀁… 𑀭𑀽𑀧𑀲𑁆𑀫𑀺𑀁… 𑀲𑀤𑁆𑀤𑀲𑁆𑀫𑀺𑀁… 𑀕𑀦𑁆𑀥𑀲𑁆𑀫𑀺𑀁… 𑀭𑀲𑀲𑁆𑀫𑀺𑀁… 𑀨𑁄𑀝𑁆𑀞𑀩𑁆𑀩𑀲𑁆𑀫𑀺𑀁… 𑀓𑀼𑀮𑀲𑁆𑀫𑀺𑀁… 𑀕𑀡𑀲𑁆𑀫𑀺𑀁… 𑀆𑀯𑀸𑀲𑀲𑁆𑀫𑀺𑀁… 𑀮𑀸𑀪𑀲𑁆𑀫𑀺𑀁… 𑀬𑀲𑀲𑁆𑀫𑀺𑀁… 𑀧𑀲𑀁𑀲𑀸𑀬… 𑀲𑀼𑀔𑀲𑁆𑀫𑀺𑀁… 𑀘𑀻𑀯𑀭𑀲𑁆𑀫𑀺𑀁… 𑀧𑀺𑀡𑁆𑀟𑀧𑀸𑀢𑀲𑁆𑀫𑀺𑀁… 𑀲𑁂𑀦𑀸𑀲𑀦𑀲𑁆𑀫𑀺𑀁… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀲𑁆𑀫𑀺𑀁 𑀳𑀻𑀬𑀫𑀸𑀦𑁂 𑀳𑀸𑀬𑀫𑀸𑀦𑁂 𑀧𑀭𑀺𑀳𑀸𑀬𑀫𑀸𑀦𑁂 𑀯𑁂𑀫𑀸𑀦𑁂 𑀯𑀺𑀕𑀘𑁆𑀙𑀫𑀸𑀦𑁂 𑀅𑀦𑁆𑀢𑀭𑀥𑀸𑀬𑀫𑀸𑀦𑁂 𑀭𑀼𑀧𑁆𑀧𑀦𑁆𑀢𑀺 𑀓𑀼𑀧𑁆𑀧𑀦𑁆𑀢𑀺 𑀧𑀻𑀴𑀬𑀦𑁆𑀢𑀺 𑀖𑀝𑁆𑀝𑀬𑀦𑁆𑀢𑀺, 𑀩𑁆𑀬𑀸𑀥𑀺𑀢𑀸 𑀤𑁄𑀫𑀦𑀲𑁆𑀲𑀺𑀢𑀸 𑀳𑁄𑀦𑁆𑀢𑀻𑀢𑀺 𑁋 𑀏𑀯𑀫𑁆𑀧𑀺 𑀭𑀼𑀧𑁆𑀧𑀦𑁆𑀢𑀺 𑀭𑀽𑀧𑁂𑀲𑀼.

𑀚𑀦𑀸𑀢𑀺 𑀔𑀢𑁆𑀢𑀺𑀬𑀸 𑀘 𑀩𑁆𑀭𑀸𑀳𑁆𑀫𑀡𑀸 𑀘 𑀯𑁂𑀲𑁆𑀲𑀸 𑀘 𑀲𑀼𑀤𑁆𑀤𑀸 𑀘 𑀕𑀳𑀝𑁆𑀞𑀸 𑀘 𑀧𑀩𑁆𑀩𑀚𑀺𑀢𑀸 𑀘 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 𑀘. 𑀧𑀫𑀢𑁆𑀢𑀸𑀢𑀺 𑀧𑀫𑀸𑀤𑁄 𑀯𑀢𑁆𑀢𑀩𑁆𑀩𑁄 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀯𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀯𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀯𑀸 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀘𑀺𑀢𑁆𑀢𑀲𑁆𑀲 𑀯𑁄𑀲𑀕𑁆𑀕𑁄 𑀯𑁄𑀲𑀕𑁆𑀕𑀸𑀦𑀼𑀧𑁆𑀧𑀤𑀸𑀦𑀁 𑀓𑀼𑀲𑀮𑀸𑀦𑀁 𑀯𑀸 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀬 𑀅𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀢𑀸 𑀅𑀲𑀸𑀢𑀘𑁆𑀘𑀓𑀺𑀭𑀺𑀬𑀢𑀸 𑀅𑀦𑀝𑁆𑀞𑀺𑀢𑀓𑀺𑀭𑀺𑀬𑀢𑀸 𑀑𑀮𑀻𑀦𑀯𑀼𑀢𑁆𑀢𑀺𑀢𑀸 𑀦𑀺𑀓𑁆𑀔𑀺𑀢𑁆𑀢𑀘𑁆𑀙𑀦𑁆𑀤𑀢𑀸 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸 𑀅𑀦𑀸𑀲𑁂𑀯𑀦𑀸 𑀅𑀪𑀸𑀯𑀦𑀸 𑀅𑀩𑀳𑀼𑀮𑀻𑀓𑀫𑁆𑀫𑀁 [𑀅𑀩𑀳𑀼𑀮𑀺𑀓𑀫𑁆𑀫𑀁 (𑀓.)] 𑀅𑀦𑀥𑀺𑀝𑁆𑀞𑀸𑀦𑀁 𑀅𑀦𑀦𑀼𑀬𑁄𑀕𑁄 𑀧𑀫𑀸𑀤𑁄. 𑀬𑁄 𑀏𑀯𑀭𑀽𑀧𑁄 𑀧𑀫𑀸𑀤𑁄 𑀧𑀫𑀚𑁆𑀚𑀦𑀸 𑀧𑀫𑀚𑁆𑀚𑀺𑀢𑀢𑁆𑀢𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀫𑀸𑀤𑁄. 𑀇𑀫𑀺𑀦𑀸 𑀧𑀫𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸 𑀚𑀦𑀸 𑀧𑀫𑀢𑁆𑀢𑀸𑀢𑀺 𑁋 𑀭𑀼𑀧𑁆𑀧𑀦𑁆𑀢𑀺 𑀭𑀽𑀧𑁂𑀲𑀼 𑀚𑀦𑀸 𑀧𑀫𑀢𑁆𑀢𑀸.

𑀢𑀲𑁆𑀫𑀸 𑀢𑀼𑀯𑀁 𑀧𑀺𑀗𑁆𑀕𑀺𑀬 𑀅𑀧𑁆𑀧𑀫𑀢𑁆𑀢𑁄𑀢𑀺. 𑀢𑀲𑁆𑀫𑀸𑀢𑀺 𑀢𑀲𑁆𑀫𑀸 𑀢𑀁𑀓𑀸𑀭𑀡𑀸 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀁𑀦𑀺𑀤𑀸𑀦𑀸 𑀏𑀯𑀁 𑀆𑀤𑀻𑀦𑀯𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀭𑀽𑀧𑁂𑀲𑀽𑀢𑀺 𑁋 𑀢𑀲𑁆𑀫𑀸 𑀢𑀼𑀯𑀁 𑀧𑀺𑀗𑁆𑀕𑀺𑀬. 𑀅𑀧𑁆𑀧𑀫𑀢𑁆𑀢𑁄𑀢𑀺 𑀲𑀓𑁆𑀓𑀘𑁆𑀘𑀓𑀸𑀭𑀻 𑀲𑀸𑀢𑀘𑁆𑀘𑀓𑀸𑀭𑀻…𑀧𑁂… 𑀅𑀧𑁆𑀧𑀫𑀸𑀤𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑁋 𑀢𑀲𑁆𑀫𑀸 𑀢𑀼𑀯𑀁 𑀧𑀺𑀗𑁆𑀕𑀺𑀬 𑀅𑀧𑁆𑀧𑀫𑀢𑁆𑀢𑁄.

𑀚𑀳𑀲𑁆𑀲𑀼 𑀭𑀽𑀧𑀁 𑀅𑀧𑀼𑀦𑀩𑁆𑀪𑀯𑀸𑀬𑀸𑀢𑀺. 𑀭𑀽𑀧𑀦𑁆𑀢𑀺 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀭𑀽𑀧𑀁. 𑀚𑀳𑀲𑁆𑀲𑀼 𑀭𑀽𑀧𑀦𑁆𑀢𑀺 𑀚𑀳𑀲𑁆𑀲𑀼 𑀭𑀽𑀧𑀁, 𑀧𑀚𑀳𑀲𑁆𑀲𑀼 𑀭𑀽𑀧𑀁, 𑀯𑀺𑀦𑁄𑀤𑁂𑀳𑀺 𑀭𑀽𑀧𑀁, 𑀩𑁆𑀬𑀦𑁆𑀢𑀻𑀓𑀭𑁄𑀳𑀺 𑀭𑀽𑀧𑀁, 𑀅𑀦𑀪𑀸𑀯𑀁 𑀕𑀫𑁂𑀳𑀺 𑀭𑀽𑀧𑀁. 𑀅𑀧𑀼𑀦𑀩𑁆𑀪𑀯𑀸𑀬𑀸𑀢𑀺 𑀬𑀣𑀸 𑀢𑁂 𑀭𑀽𑀧𑀁 𑀇𑀥𑁂𑀯 𑀦𑀺𑀭𑀼𑀚𑁆𑀛𑁂𑀬𑁆𑀬, 𑀧𑀼𑀦𑀧𑀝𑀺𑀲𑀦𑁆𑀥𑀺𑀓𑁄 𑀪𑀯𑁄 𑀦 𑀦𑀺𑀩𑁆𑀩𑀢𑁆𑀢𑁂𑀬𑁆𑀬 𑀓𑀸𑀫𑀥𑀸𑀢𑀼𑀬𑀸 𑀯𑀸 𑀭𑀽𑀧𑀥𑀸𑀢𑀼𑀬𑀸 𑀯𑀸 𑀅𑀭𑀽𑀧𑀥𑀸𑀢𑀼𑀬𑀸 𑀯𑀸, 𑀓𑀸𑀫𑀪𑀯𑁂 𑀯𑀸 𑀭𑀽𑀧𑀪𑀯𑁂 𑀯𑀸 𑀅𑀭𑀽𑀧𑀪𑀯𑁂 𑀯𑀸, 𑀲𑀜𑁆𑀜𑀸𑀪𑀯𑁂 𑀯𑀸 𑀅𑀲𑀜𑁆𑀜𑀸𑀪𑀯𑁂 𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑁂 𑀯𑀸, 𑀏𑀓𑀯𑁄𑀓𑀸𑀭𑀪𑀯𑁂 𑀯𑀸 𑀘𑀢𑀼𑀯𑁄𑀓𑀸𑀭𑀪𑀯𑁂 𑀯𑀸 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀯𑀸, 𑀧𑀼𑀦 𑀕𑀢𑀺𑀬𑀸 𑀯𑀸 𑀉𑀧𑀧𑀢𑁆𑀢𑀺𑀬𑀸 𑀯𑀸 𑀧𑀝𑀺𑀲𑀦𑁆𑀥𑀺𑀬𑀸 𑀯𑀸 𑀪𑀯𑁂 𑀯𑀸 𑀲𑀁𑀲𑀸𑀭𑁂 𑀯𑀸 𑀯𑀝𑁆𑀝𑁂 𑀯𑀸 𑀦 𑀚𑀦𑁂𑀬𑁆𑀬 𑀦 𑀲𑀜𑁆𑀚𑀦𑁂𑀬𑁆𑀬 𑀦 𑀦𑀺𑀩𑁆𑀩𑀢𑁆𑀢𑁂𑀬𑁆𑀬 𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀇𑀥𑁂𑀯 𑀦𑀺𑀭𑀼𑀚𑁆𑀛𑁂𑀬𑁆𑀬 𑀯𑀽𑀧𑀲𑀫𑁂𑀬𑁆𑀬 𑀅𑀢𑁆𑀣𑀁 𑀕𑀘𑁆𑀙𑁂𑀬𑁆𑀬 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬𑀸𑀢𑀺 𑁋 𑀚𑀳𑀲𑁆𑀲𑀼 𑀭𑀽𑀧𑀁 𑀅𑀧𑀼𑀦𑀩𑁆𑀪𑀯𑀸𑀬. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀤𑀺𑀲𑁆𑀯𑀸𑀦 𑀭𑀽𑀧𑁂𑀲𑀼 𑀯𑀺𑀳𑀜𑁆𑀜𑀫𑀸𑀦𑁂, [𑀧𑀺𑀗𑁆𑀕𑀺𑀬𑀸𑀢𑀺 𑀪𑀕𑀯𑀸]

𑀭𑀼𑀧𑁆𑀧𑀦𑁆𑀢𑀺 𑀭𑀽𑀧𑁂𑀲𑀼 𑀚𑀦𑀸 𑀧𑀫𑀢𑁆𑀢𑀸;

𑀢𑀲𑁆𑀫𑀸 𑀢𑀼𑀯𑀁 𑀧𑀺𑀗𑁆𑀕𑀺𑀬 𑀅𑀧𑁆𑀧𑀫𑀢𑁆𑀢𑁄, 𑀚𑀳𑀲𑁆𑀲𑀼 𑀭𑀽𑀧𑀁 𑀅𑀧𑀼𑀦𑀩𑁆𑀪𑀯𑀸𑀬𑀸’’𑀢𑀺.

𑁯𑁧. 𑀤𑀺𑀲𑀸 𑀘𑀢𑀲𑁆𑀲𑁄 𑀯𑀺𑀤𑀺𑀲𑀸 𑀘𑀢𑀲𑁆𑀲𑁄, 𑀉𑀤𑁆𑀥𑀁 𑀅𑀥𑁄 𑀤𑀲 𑀤𑀺𑀲𑀸 𑀇𑀫𑀸𑀬𑁄;

𑀦 𑀢𑀼𑀬𑁆𑀳𑀁 𑀅𑀤𑀺𑀝𑁆𑀞𑀁 𑀅𑀲𑁆𑀲𑀼𑀢𑀁 𑀅𑀫𑀼𑀢𑀁, 𑀅𑀣𑁄 𑀅𑀯𑀺𑀜𑁆𑀜𑀸𑀢𑀁 𑀓𑀺𑀜𑁆𑀘𑀺 𑀦𑀫𑀢𑁆𑀣𑀺 𑀮𑁄𑀓𑁂;

𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁, 𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀁.

𑀤𑀺𑀲𑀸 𑀘𑀢𑀲𑁆𑀲𑁄 𑀯𑀺𑀤𑀺𑀲𑀸 𑀘𑀢𑀲𑁆𑀲𑁄, 𑀉𑀤𑁆𑀥𑀁 𑀅𑀥𑁄 𑀤𑀲 𑀤𑀺𑀲𑀸 𑀇𑀫𑀸𑀬𑁄𑀢𑀺 𑀤𑀲 𑀤𑀺𑀲𑀸.

𑀦 𑀢𑀼𑀬𑁆𑀳𑀁 𑀅𑀤𑀺𑀝𑁆𑀞𑀁 𑀅𑀲𑁆𑀲𑀼𑀢𑀁 𑀅𑀫𑀼𑀢𑀁, 𑀅𑀣𑁄 𑀅𑀯𑀺𑀜𑁆𑀜𑀸𑀢𑀁 𑀓𑀺𑀜𑁆𑀘𑀺 𑀦𑀫𑀢𑁆𑀣𑀺 𑀮𑁄𑀓𑁂𑀢𑀺 𑀦 𑀢𑀼𑀬𑁆𑀳𑀁 𑀅𑀤𑀺𑀝𑁆𑀞𑀁 𑀅𑀲𑁆𑀲𑀼𑀢𑀁 𑀅𑀫𑀼𑀢𑀁 𑀅𑀯𑀺𑀜𑁆𑀜𑀸𑀢𑀁 𑀓𑀺𑀜𑁆𑀘𑀺 𑀅𑀢𑁆𑀢𑀢𑁆𑀣𑁄 𑀯𑀸 𑀧𑀭𑀢𑁆𑀣𑁄 𑀯𑀸 𑀉𑀪𑀬𑀢𑁆𑀣𑁄 𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀯𑀸 𑀅𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄 𑀯𑀸 𑀅𑀢𑁆𑀣𑁄 𑀉𑀢𑁆𑀢𑀸𑀦𑁄 𑀯𑀸 𑀅𑀢𑁆𑀣𑁄 𑀕𑀫𑁆𑀪𑀻𑀭𑁄 𑀯𑀸 𑀅𑀢𑁆𑀣𑁄 𑀕𑀽𑀴𑁆𑀳𑁄 𑀯𑀸 𑀅𑀢𑁆𑀣𑁄 𑀧𑀝𑀺𑀘𑁆𑀙𑀦𑁆𑀦𑁄 𑀯𑀸 𑀅𑀢𑁆𑀣𑁄 𑀦𑁂𑀬𑁆𑀬𑁄 𑀯𑀸 𑀅𑀢𑁆𑀣𑁄 𑀦𑀻𑀢𑁄 𑀯𑀸 𑀅𑀢𑁆𑀣𑁄 𑀅𑀦𑀯𑀚𑁆𑀚𑁄 𑀯𑀸 𑀅𑀢𑁆𑀣𑁄 𑀦𑀺𑀓𑁆𑀓𑀺𑀮𑁂𑀲𑁄 𑀯𑀸 𑀅𑀢𑁆𑀣𑁄 𑀯𑁄𑀤𑀸𑀦𑁄 𑀯𑀸 𑀅𑀢𑁆𑀣𑁄 𑀧𑀭𑀫𑀢𑁆𑀣𑁄 𑀯𑀸 𑀦𑀢𑁆𑀣𑀺 𑀦 𑀲𑀢𑀺 𑀦 𑀲𑀁𑀯𑀺𑀚𑁆𑀚𑀢𑀺 𑀦𑀼𑀧𑀮𑀩𑁆𑀪𑀢𑀻𑀢𑀺 𑁋 𑀦 𑀢𑀼𑀬𑁆𑀳𑀁 𑀅𑀤𑀺𑀝𑁆𑀞𑀁 𑀅𑀲𑁆𑀲𑀼𑀢𑀁 𑀅𑀫𑀼𑀢𑀁, 𑀅𑀣𑁄 𑀅𑀯𑀺𑀜𑁆𑀜𑀸𑀢𑀁 𑀓𑀺𑀜𑁆𑀘𑀺 𑀦𑀫𑀢𑁆𑀣𑀺 𑀮𑁄𑀓𑁂.

𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀦𑁆𑀢𑀺. 𑀥𑀫𑁆𑀫𑀦𑁆𑀢𑀺 𑀆𑀤𑀺𑀓𑀮𑁆𑀬𑀸𑀡𑀁…𑀧𑁂… 𑀦𑀺𑀩𑁆𑀩𑀸𑀦𑀜𑁆𑀘 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀺. 𑀬𑀫𑀳𑀁 𑀯𑀺𑀚𑀜𑁆𑀜𑀦𑁆𑀢𑀺 𑀬𑀫𑀳𑀁 𑀚𑀸𑀦𑁂𑀬𑁆𑀬𑀁 𑀆𑀚𑀸𑀦𑁂𑀬𑁆𑀬𑀁 𑀯𑀺𑀚𑀸𑀦𑁂𑀬𑁆𑀬𑀁 𑀧𑀝𑀺𑀯𑀺𑀚𑀸𑀦𑁂𑀬𑁆𑀬𑀁 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀁 𑀅𑀥𑀺𑀕𑀘𑁆𑀙𑁂𑀬𑁆𑀬𑀁 𑀨𑀲𑁆𑀲𑁂𑀬𑁆𑀬𑀁 𑀲𑀘𑁆𑀙𑀺𑀓𑀭𑁂𑀬𑁆𑀬𑀦𑁆𑀢𑀺 𑁋 𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁.

𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀦𑁆𑀢𑀺 𑀇𑀥𑁂𑀯 𑀚𑀸𑀢𑀺𑀚𑀭𑀸𑀫𑀭𑀡𑀲𑁆𑀲 𑀧𑀳𑀸𑀦𑀁 𑀯𑀽𑀧𑀲𑀫𑀁 𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀤𑀺𑀲𑀸 𑀘𑀢𑀲𑁆𑀲𑁄 𑀯𑀺𑀤𑀺𑀲𑀸 𑀘𑀢𑀲𑁆𑀲𑁄, 𑀉𑀤𑁆𑀥𑀁 𑀅𑀥𑁄 𑀤𑀲 𑀤𑀺𑀲𑀸 𑀇𑀫𑀸𑀬𑁄;

𑀦 𑀢𑀼𑀬𑁆𑀳𑀁 𑀅𑀤𑀺𑀝𑁆𑀞𑀁 𑀅𑀲𑁆𑀲𑀼𑀢𑀁 𑀅𑀫𑀼𑀢𑀁, 𑀅𑀣𑁄 𑀅𑀯𑀺𑀜𑁆𑀜𑀸𑀢𑀁 𑀓𑀺𑀜𑁆𑀘𑀺 𑀦𑀫𑀢𑁆𑀣𑀺 𑀮𑁄𑀓𑁂;

𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁, 𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦’’𑀦𑁆𑀢𑀺.

𑁯𑁨. 𑀢𑀡𑁆𑀳𑀸𑀥𑀺𑀧𑀦𑁆𑀦𑁂 𑀫𑀦𑀼𑀚𑁂 𑀧𑁂𑀓𑁆𑀔𑀫𑀸𑀦𑁄, [𑀧𑀺𑀗𑁆𑀕𑀺𑀬𑀸𑀢𑀺 𑀪𑀕𑀯𑀸]

𑀲𑀦𑁆𑀢𑀸𑀧𑀚𑀸𑀢𑁂 𑀚𑀭𑀲𑀸 𑀧𑀭𑁂𑀢𑁂;

𑀢𑀲𑁆𑀫𑀸 𑀢𑀼𑀯𑀁 𑀧𑀺𑀗𑁆𑀕𑀺𑀬 𑀅𑀧𑁆𑀧𑀫𑀢𑁆𑀢𑁄, 𑀚𑀳𑀲𑁆𑀲𑀼 𑀢𑀡𑁆𑀳𑀁 𑀅𑀧𑀼𑀦𑀩𑁆𑀪𑀯𑀸𑀬.

𑀢𑀡𑁆𑀳𑀸𑀥𑀺𑀧𑀦𑁆𑀦𑁂 𑀫𑀦𑀼𑀚𑁂 𑀧𑁂𑀓𑁆𑀔𑀫𑀸𑀦𑁄𑀢𑀺. 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸. 𑀢𑀡𑁆𑀳𑀸𑀥𑀺𑀧𑀦𑁆𑀦𑁂𑀢𑀺 𑀢𑀡𑁆𑀳𑀸𑀥𑀺𑀧𑀦𑁆𑀦𑁂 [𑀢𑀡𑁆𑀳𑀸𑀬 𑀅𑀥𑀺𑀧𑀦𑁆𑀦𑁂 (𑀓.)] 𑀢𑀡𑁆𑀳𑀸𑀦𑀼𑀕𑁂 𑀢𑀡𑁆𑀳𑀸𑀦𑀼𑀕𑀢𑁂 𑀢𑀡𑁆𑀳𑀸𑀦𑀼𑀲𑀝𑁂 𑀢𑀡𑁆𑀳𑀸𑀬 𑀧𑀦𑁆𑀦𑁂 𑀧𑀝𑀺𑀧𑀦𑁆𑀦𑁂 𑀅𑀪𑀺𑀪𑀽𑀢𑁂 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁂. 𑀫𑀦𑀼𑀚𑁂𑀢𑀺 𑀲𑀢𑁆𑀢𑀸𑀥𑀺𑀯𑀘𑀦𑀁. 𑀧𑁂𑀓𑁆𑀔𑀫𑀸𑀦𑁄𑀢𑀺 𑀧𑁂𑀓𑁆𑀔𑀫𑀸𑀦𑁄 𑀤𑀓𑁆𑀔𑀫𑀸𑀦𑁄 𑀑𑀮𑁄𑀓𑀬𑀫𑀸𑀦𑁄 𑀦𑀺𑀚𑁆𑀛𑀸𑀬𑀫𑀸𑀦𑁄 𑀉𑀧𑀧𑀭𑀺𑀓𑁆𑀔𑀫𑀸𑀦𑁄𑀢𑀺 𑁋 𑀢𑀡𑁆𑀳𑀸𑀥𑀺𑀧𑀦𑁆𑀦𑁂 𑀫𑀦𑀼𑀚𑁂 𑀧𑁂𑀓𑁆𑀔𑀫𑀸𑀦𑁄. 𑀧𑀺𑀗𑁆𑀕𑀺𑀬𑀸𑀢𑀺 𑀪𑀕𑀯𑀸𑀢𑀺. 𑀧𑀺𑀗𑁆𑀕𑀺𑀬𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀧𑀺𑀗𑁆𑀕𑀺𑀬𑀸𑀢𑀺 𑀪𑀕𑀯𑀸.

𑀲𑀦𑁆𑀢𑀸𑀧𑀚𑀸𑀢𑁂 𑀚𑀭𑀲𑀸 𑀧𑀭𑁂𑀢𑁂𑀢𑀺. 𑀲𑀦𑁆𑀢𑀸𑀧𑀚𑀸𑀢𑁂𑀢𑀺 𑀚𑀸𑀢𑀺𑀬𑀸 𑀲𑀦𑁆𑀢𑀸𑀧𑀚𑀸𑀢𑁂, 𑀚𑀭𑀸𑀬 𑀲𑀦𑁆𑀢𑀸𑀧𑀚𑀸𑀢𑁂, 𑀩𑁆𑀬𑀸𑀥𑀺𑀦𑀸 𑀲𑀦𑁆𑀢𑀸𑀧𑀚𑀸𑀢𑁂, 𑀫𑀭𑀡𑁂𑀦 𑀲𑀦𑁆𑀢𑀸𑀧𑀚𑀸𑀢𑁂, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑁂𑀳𑀺 𑀲𑀦𑁆𑀢𑀸𑀧𑀚𑀸𑀢𑁂, 𑀦𑁂𑀭𑀬𑀺𑀓𑁂𑀦 𑀤𑀼𑀓𑁆𑀔𑁂𑀦 𑀲𑀦𑁆𑀢𑀸𑀧𑀚𑀸𑀢𑁂…𑀧𑁂… 𑀤𑀺𑀝𑁆𑀞𑀺𑀩𑁆𑀬𑀲𑀦𑁂𑀦 𑀤𑀼𑀓𑁆𑀔𑁂𑀦 𑀲𑀦𑁆𑀢𑀸𑀧𑀚𑀸𑀢𑁂 𑀈𑀢𑀺𑀚𑀸𑀢𑁂 𑀉𑀧𑀤𑁆𑀤𑀯𑀚𑀸𑀢𑁂 𑀉𑀧𑀲𑀕𑁆𑀕𑀚𑀸𑀢𑁂𑀢𑀺 𑁋 𑀲𑀦𑁆𑀢𑀸𑀧𑀚𑀸𑀢𑁂. 𑀚𑀭𑀲𑀸 𑀧𑀭𑁂𑀢𑁂𑀢𑀺 𑀚𑀭𑀸𑀬 𑀨𑀼𑀝𑁆𑀞𑁂 𑀧𑀭𑁂𑀢𑁂 𑀲𑀫𑁄𑀳𑀺𑀢𑁂 𑀲𑀫𑀦𑁆𑀦𑀸𑀕𑀢𑁂. 𑀚𑀸𑀢𑀺𑀬𑀸 𑀅𑀦𑀼𑀕𑀢𑁂 𑀚𑀭𑀸𑀬 𑀅𑀦𑀼𑀲𑀝𑁂 𑀩𑁆𑀬𑀸𑀥𑀺𑀦𑀸 𑀅𑀪𑀺𑀪𑀽𑀢𑁂 𑀫𑀭𑀡𑁂𑀦 𑀅𑀩𑁆𑀪𑀸𑀳𑀢𑁂 𑀅𑀢𑀸𑀡𑁂 𑀅𑀮𑁂𑀡𑁂 𑀅𑀲𑀭𑀡𑁂 𑀅𑀲𑀭𑀡𑀻𑀪𑀽𑀢𑁂𑀢𑀺 𑁋 𑀲𑀦𑁆𑀢𑀸𑀧𑀚𑀸𑀢𑁂 𑀚𑀭𑀲𑀸 𑀧𑀭𑁂𑀢𑁂.

𑀢𑀲𑁆𑀫𑀸 𑀢𑀼𑀯𑀁 𑀧𑀺𑀗𑁆𑀕𑀺𑀬 𑀅𑀧𑁆𑀧𑀫𑀢𑁆𑀢𑁄𑀢𑀺. 𑀢𑀲𑁆𑀫𑀸𑀢𑀺 𑀢𑀲𑁆𑀫𑀸 𑀢𑀁𑀓𑀸𑀭𑀡𑀸 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀁𑀦𑀺𑀤𑀸𑀦𑀸 𑀏𑀯𑀁 𑀆𑀤𑀻𑀦𑀯𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀢𑀡𑁆𑀳𑀸𑀬𑀸𑀢𑀺 𑁋 𑀢𑀲𑁆𑀫𑀸 𑀢𑀼𑀯𑀁 𑀧𑀺𑀗𑁆𑀕𑀺𑀬. 𑀅𑀧𑁆𑀧𑀫𑀢𑁆𑀢𑁄𑀢𑀺 𑀲𑀓𑁆𑀓𑀘𑁆𑀘𑀓𑀸𑀭𑀻…𑀧𑁂… 𑀅𑀧𑁆𑀧𑀫𑀸𑀤𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑁋 𑀢𑀲𑁆𑀫𑀸 𑀢𑀼𑀯𑀁 𑀧𑀺𑀗𑁆𑀕𑀺𑀬 𑀅𑀧𑁆𑀧𑀫𑀢𑁆𑀢𑁄.

𑀚𑀳𑀲𑁆𑀲𑀼 𑀢𑀡𑁆𑀳𑀁 𑀅𑀧𑀼𑀦𑀩𑁆𑀪𑀯𑀸𑀬𑀸𑀢𑀺. 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸. 𑀚𑀳𑀲𑁆𑀲𑀼 𑀢𑀡𑁆𑀳𑀦𑁆𑀢𑀺 𑀚𑀳𑀲𑁆𑀲𑀼 𑀢𑀡𑁆𑀳𑀁 𑀧𑀚𑀳𑀲𑁆𑀲𑀼 𑀢𑀡𑁆𑀳𑀁 𑀯𑀺𑀦𑁄𑀤𑁂𑀳𑀺 𑀢𑀡𑁆𑀳𑀁 𑀩𑁆𑀬𑀦𑁆𑀢𑀻𑀓𑀭𑁄𑀳𑀺 𑀢𑀡𑁆𑀳𑀁 𑀅𑀦𑀪𑀸𑀯𑀁 𑀕𑀫𑁂𑀳𑀺 𑀢𑀡𑁆𑀳𑀁. 𑀅𑀧𑀼𑀦𑀩𑁆𑀪𑀯𑀸𑀬𑀸𑀢𑀺 𑀬𑀣𑀸 𑀢𑁂…𑀧𑁂… 𑀧𑀼𑀦𑀧𑀝𑀺𑀲𑀦𑁆𑀥𑀺𑀓𑁄 𑀪𑀯𑁄 𑀦 𑀦𑀺𑀩𑁆𑀩𑀢𑁆𑀢𑁂𑀬𑁆𑀬 𑀓𑀸𑀫𑀥𑀸𑀢𑀼𑀬𑀸 𑀯𑀸 𑀭𑀽𑀧𑀥𑀸𑀢𑀼𑀬𑀸 𑀯𑀸 𑀅𑀭𑀽𑀧𑀥𑀸𑀢𑀼𑀬𑀸 𑀯𑀸, 𑀓𑀸𑀫𑀪𑀯𑁂 𑀯𑀸 𑀭𑀽𑀧𑀪𑀯𑁂 𑀯𑀸 𑀅𑀭𑀽𑀧𑀪𑀯𑁂 𑀯𑀸, 𑀲𑀜𑁆𑀜𑀸𑀪𑀯𑁂 𑀯𑀸 𑀅𑀲𑀜𑁆𑀜𑀸𑀪𑀯𑁂 𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑁂 𑀯𑀸, 𑀏𑀓𑀯𑁄𑀓𑀸𑀭𑀪𑀯𑁂 𑀯𑀸 𑀘𑀢𑀼𑀯𑁄𑀓𑀸𑀭𑀪𑀯𑁂 𑀯𑀸 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀯𑀸, 𑀧𑀼𑀦𑀕𑀢𑀺𑀬𑀸 𑀯𑀸 𑀉𑀧𑀧𑀢𑁆𑀢𑀺𑀬𑀸 𑀯𑀸 𑀧𑀝𑀺𑀲𑀦𑁆𑀥𑀺𑀬𑀸 𑀯𑀸 𑀪𑀯𑁂 𑀯𑀸 𑀲𑀁𑀲𑀸𑀭𑁂 𑀯𑀸 𑀯𑀝𑁆𑀝𑁂 𑀯𑀸 𑀦 𑀚𑀦𑁂𑀬𑁆𑀬 𑀦 𑀲𑀜𑁆𑀚𑀦𑁂𑀬𑁆𑀬 𑀦 𑀦𑀺𑀩𑁆𑀩𑀢𑁆𑀢𑁂𑀬𑁆𑀬 𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀇𑀥𑁂𑀯 𑀦𑀺𑀭𑀼𑀚𑁆𑀛𑁂𑀬𑁆𑀬 𑀯𑀽𑀧𑀲𑀫𑁂𑀬𑁆𑀬 𑀅𑀢𑁆𑀣𑀁 𑀕𑀘𑁆𑀙𑁂𑀬𑁆𑀬 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬𑀸𑀢𑀺 𑁋 𑀚𑀳𑀲𑁆𑀲𑀼 𑀢𑀡𑁆𑀳𑀁 𑀅𑀧𑀼𑀦𑀩𑁆𑀪𑀯𑀸𑀬. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀢𑀡𑁆𑀳𑀸𑀥𑀺𑀧𑀦𑁆𑀦𑁂 𑀫𑀦𑀼𑀚𑁂 𑀧𑁂𑀓𑁆𑀔𑀫𑀸𑀦𑁄, [𑀧𑀺𑀗𑁆𑀕𑀺𑀬𑀸𑀢𑀺 𑀪𑀕𑀯𑀸]

𑀲𑀦𑁆𑀢𑀸𑀧𑀚𑀸𑀢𑁂 𑀚𑀭𑀲𑀸 𑀧𑀭𑁂𑀢𑁂;

𑀢𑀲𑁆𑀫𑀸 𑀢𑀼𑀯𑀁 𑀧𑀺𑀗𑁆𑀕𑀺𑀬 𑀅𑀧𑁆𑀧𑀫𑀢𑁆𑀢𑁄, 𑀚𑀳𑀲𑁆𑀲𑀼 𑀢𑀡𑁆𑀳𑀁 𑀅𑀧𑀼𑀦𑀩𑁆𑀪𑀯𑀸𑀬𑀸’’𑀢𑀺.

𑀲𑀳 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑀸 𑀬𑁂 𑀢𑁂 𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀤𑀸 𑀏𑀓𑀧𑀬𑁄𑀕𑀸 𑀏𑀓𑀸𑀥𑀺𑀧𑁆𑀧𑀸𑀬𑀸 𑀏𑀓𑀯𑀸𑀲𑀦𑀯𑀸𑀲𑀺𑀢𑀸, 𑀢𑁂𑀲𑀁 𑀅𑀦𑁂𑀓𑀧𑀸𑀡𑀲𑀳𑀲𑁆𑀲𑀸𑀦𑀁 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺. 𑀢𑀲𑁆𑀲 𑀘 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺. 𑀲𑀳 𑀥𑀫𑁆𑀫𑀘𑀓𑁆𑀔𑀼𑀲𑁆𑀲 𑀧𑀝𑀺𑀮𑀸𑀪𑀸 𑀅𑀚𑀺𑀦𑀚𑀝𑀸𑀯𑀸𑀓𑀘𑀻𑀭𑀢𑀺𑀤𑀡𑁆𑀟𑀓𑀫𑀡𑁆𑀟𑀮𑀼𑀓𑁂𑀲𑀸 𑀘 𑀫𑀲𑁆𑀲𑀽 𑀘 𑀅𑀦𑁆𑀢𑀭𑀳𑀺𑀢𑀸 𑀪𑀡𑁆𑀟𑀼𑀓𑀸𑀲𑀸𑀬𑀯𑀢𑁆𑀣𑀯𑀲𑀦𑁄 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀭𑁄 𑀅𑀦𑁆𑀯𑀢𑁆𑀣𑀧𑀝𑀺𑀧𑀢𑁆𑀢𑀺𑀬𑀸 𑀧𑀜𑁆𑀚𑀮𑀺𑀓𑁄 𑀪𑀕𑀯𑀦𑁆𑀢𑀁 𑀦𑀫𑀲𑁆𑀲𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑁋 ‘‘𑀲𑀢𑁆𑀣𑀸 𑀫𑁂 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻’’𑀢𑀺.

𑀧𑀺𑀗𑁆𑀕𑀺𑀬𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 [𑀲𑀺𑀗𑁆𑀕𑀺𑀬𑀧𑀜𑁆𑀳𑀁 (𑀓.)] 𑀲𑁄𑀴𑀲𑀫𑁄.