𑁧𑁭. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲𑁄

𑁯𑁩. 𑀇𑀤𑀫𑀯𑁄𑀘 𑀪𑀕𑀯𑀸 𑀫𑀕𑀥𑁂𑀲𑀼 𑀯𑀺𑀳𑀭𑀦𑁆𑀢𑁄 𑀧𑀸𑀲𑀸𑀡𑀓𑁂 𑀘𑁂𑀢𑀺𑀬𑁂, 𑀧𑀭𑀺𑀘𑀸𑀭𑀓𑀲𑁄𑀴𑀲𑀸𑀦𑀁 [𑀧𑀭𑀺𑀘𑀸𑀭𑀺𑀢𑀲𑁄𑀴𑀲𑀦𑁆𑀦𑀁 (𑀲𑁆𑀬𑀸. 𑀓.)] 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀚𑁆𑀛𑀺𑀝𑁆𑀞𑁄 𑀧𑀼𑀝𑁆𑀞𑁄 𑀧𑀼𑀝𑁆𑀞𑁄 𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀺.

𑀇𑀤𑀫𑀯𑁄𑀘 𑀪𑀕𑀯𑀸𑀢𑀺 𑀇𑀤𑀁 𑀧𑀸𑀭𑀸𑀬𑀦𑀁 𑀅𑀯𑁄𑀘. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀇𑀤𑀫𑀯𑁄𑀘 𑀪𑀕𑀯𑀸. 𑀫𑀕𑀥𑁂𑀲𑀼 𑀯𑀺𑀳𑀭𑀦𑁆𑀢𑁄𑀢𑀺 𑀫𑀕𑀥𑀦𑀸𑀫𑀓𑁂 𑀚𑀦𑀧𑀤𑁂 𑀯𑀺𑀳𑀭𑀦𑁆𑀢𑁄 𑀇𑀭𑀺𑀬𑀦𑁆𑀢𑁄 𑀯𑀢𑁆𑀢𑁂𑀦𑁆𑀢𑁄 𑀧𑀸𑀮𑁂𑀦𑁆𑀢𑁄 𑀬𑀧𑁂𑀦𑁆𑀢𑁄 𑀬𑀸𑀧𑁂𑀦𑁆𑀢𑁄. 𑀧𑀸𑀲𑀸𑀡𑀓𑁂 𑀘𑁂𑀢𑀺𑀬𑁂𑀢𑀺 𑀧𑀸𑀲𑀸𑀡𑀓𑀘𑁂𑀢𑀺𑀬𑀁 𑀯𑀼𑀘𑁆𑀘𑀢𑀺 𑀩𑀼𑀤𑁆𑀥𑀸𑀲𑀦𑀦𑁆𑀢𑀺 𑁋 𑀫𑀕𑀥𑁂𑀲𑀼 𑀯𑀺𑀳𑀭𑀦𑁆𑀢𑁄 𑀧𑀸𑀲𑀸𑀡𑀓𑁂 𑀘𑁂𑀢𑀺𑀬𑁂. 𑀧𑀭𑀺𑀘𑀸𑀭𑀓𑀲𑁄𑀴𑀲𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀦𑁆𑀢𑀺 𑀧𑀺𑀗𑁆𑀕𑀺𑀬𑁄 [𑀲𑀺𑀗𑁆𑀕𑀺𑀬𑁄 (𑀓.)] 𑀩𑁆𑀭𑀸𑀳𑁆𑀫𑀡𑁄 𑀩𑀸𑀯𑀭𑀺𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀤𑁆𑀥𑁄 𑀧𑀤𑁆𑀥𑀘𑀭𑁄 𑀧𑀭𑀺𑀘𑀸𑀭𑀓𑁄 [𑀧𑀭𑀺𑀘𑀸𑀭𑀺𑀓𑁄 (𑀲𑁆𑀬𑀸. 𑀓.)] 𑀲𑀺𑀲𑁆𑀲𑁄. 𑀧𑀺𑀗𑁆𑀕𑀺𑀬𑁂𑀦 [𑀢𑁂𑀦 (𑀓.)] 𑀢𑁂 𑀲𑁄𑀴𑀲𑀸𑀢𑀺 𑁋 𑀏𑀯𑀫𑁆𑀧𑀺 𑀧𑀭𑀺𑀘𑀸𑀭𑀓𑀲𑁄𑀴𑀲𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁. 𑀅𑀣 𑀯𑀸, 𑀢𑁂 𑀲𑁄𑀴𑀲 𑀩𑁆𑀭𑀸𑀳𑁆𑀫𑀡𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀤𑁆𑀥𑀸 𑀧𑀤𑁆𑀥𑀘𑀭𑀸 𑀧𑀭𑀺𑀘𑀸𑀭𑀓𑀸 𑀲𑀺𑀲𑁆𑀲𑀸𑀢𑀺 𑁋 𑀏𑀯𑀫𑁆𑀧𑀺 𑀧𑀭𑀺𑀘𑀸𑀭𑀓𑀲𑁄𑀴𑀲𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁.

𑀅𑀚𑁆𑀛𑀺𑀝𑁆𑀞𑁄 𑀧𑀼𑀝𑁆𑀞𑁄 𑀧𑀼𑀝𑁆𑀞𑁄 𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀻𑀢𑀺. 𑀅𑀚𑁆𑀛𑀺𑀝𑁆𑀞𑁄𑀢𑀺 𑀅𑀚𑁆𑀛𑀺𑀝𑁆𑀞𑁄 𑀅𑀚𑁆𑀛𑁂𑀲𑀺𑀢𑁄. 𑀧𑀼𑀝𑁆𑀞𑁄 𑀧𑀼𑀝𑁆𑀞𑁄𑀢𑀺 𑀧𑀼𑀝𑁆𑀞𑁄 𑀧𑀼𑀝𑁆𑀞𑁄 𑀧𑀼𑀘𑁆𑀙𑀺𑀢𑁄 𑀧𑀼𑀘𑁆𑀙𑀺𑀢𑁄 𑀬𑀸𑀘𑀺𑀢𑁄 𑀬𑀸𑀘𑀺𑀢𑁄 𑀅𑀚𑁆𑀛𑁂𑀲𑀺𑀢𑁄 𑀅𑀚𑁆𑀛𑁂𑀲𑀺𑀢𑁄 𑀧𑀲𑀸𑀤𑀺𑀢𑁄 𑀧𑀲𑀸𑀤𑀺𑀢𑁄. 𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀻𑀢𑀺 𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀺 𑀆𑀘𑀺𑀓𑁆𑀔𑀺 𑀤𑁂𑀲𑁂𑀲𑀺 𑀧𑀜𑁆𑀜𑀧𑁂𑀲𑀺 𑀧𑀝𑁆𑀞𑀧𑁂𑀲𑀺 𑀯𑀺𑀯𑀭𑀺 𑀯𑀺𑀪𑀚𑀺 𑀉𑀢𑁆𑀢𑀸𑀦𑀻𑀆𑀓𑀸𑀲𑀺 𑀧𑀓𑀸𑀲𑁂𑀲𑀻𑀢𑀺 𑁋 𑀅𑀚𑁆𑀛𑀺𑀝𑁆𑀞𑁄 𑀧𑀼𑀝𑁆𑀞𑁄 𑀧𑀼𑀝𑁆𑀞𑁄 𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀇𑀤𑀫𑀯𑁄𑀘 𑀪𑀕𑀯𑀸 𑀫𑀕𑀥𑁂𑀲𑀼 𑀯𑀺𑀳𑀭𑀦𑁆𑀢𑁄 𑀧𑀸𑀲𑀸𑀡𑀓𑁂 𑀘𑁂𑀢𑀺𑀬𑁂, 𑀧𑀭𑀺𑀘𑀸𑀭𑀓𑀲𑁄𑀴𑀲𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀚𑁆𑀛𑀺𑀝𑁆𑀞𑁄 𑀧𑀼𑀝𑁆𑀞𑁄 𑀧𑀼𑀝𑁆𑀞𑁄 𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀻’’𑀢𑀺.

𑁯𑁪. 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀧𑀜𑁆𑀳𑀲𑁆𑀲 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑁂𑀬𑁆𑀬, 𑀕𑀘𑁆𑀙𑁂𑀬𑁆𑀬𑁂𑀯 𑀚𑀭𑀸𑀫𑀭𑀡𑀲𑁆𑀲 𑀧𑀸𑀭𑀁. 𑀧𑀸𑀭𑀗𑁆𑀕𑀫𑀦𑀻𑀬𑀸 𑀇𑀫𑁂 𑀥𑀫𑁆𑀫𑀸𑀢𑀺. 𑀢𑀲𑁆𑀫𑀸 𑀇𑀫𑀲𑁆𑀲 𑀥𑀫𑁆𑀫𑀧𑀭𑀺𑀬𑀸𑀬𑀲𑁆𑀲 ‘‘𑀧𑀸𑀭𑀸𑀬𑀦’’𑀦𑁆𑀢𑁂𑀯 𑀅𑀥𑀺𑀯𑀘𑀦𑀁.

𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀧𑀜𑁆𑀳𑀲𑁆𑀲𑀸𑀢𑀺 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀅𑀚𑀺𑀢𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀧𑀼𑀡𑁆𑀡𑀓𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀫𑁂𑀢𑁆𑀢𑀕𑀽𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀥𑁄𑀢𑀓𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀉𑀧𑀲𑀻𑀯𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀦𑀦𑁆𑀤𑀓𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀳𑁂𑀫𑀓𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀢𑁄𑀤𑁂𑀬𑁆𑀬𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀓𑀧𑁆𑀧𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀚𑀢𑀼𑀓𑀡𑁆𑀡𑀺𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀪𑀤𑁆𑀭𑀸𑀯𑀼𑀥𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀉𑀤𑀬𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀧𑁄𑀲𑀸𑀮𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀫𑁄𑀖𑀭𑀸𑀚𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀧𑀺𑀗𑁆𑀕𑀺𑀬𑀧𑀜𑁆𑀳𑀲𑁆𑀲𑀸𑀢𑀺 𑁋 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀧𑀜𑁆𑀳𑀲𑁆𑀲.

𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬𑀸𑀢𑀺 𑀲𑁆𑀯𑁂𑀯 𑀧𑀜𑁆𑀳𑁄 𑀥𑀫𑁆𑀫𑁄, 𑀯𑀺𑀲𑀚𑁆𑀚𑀦𑀁 [𑀯𑀺𑀲𑁆𑀲𑀚𑁆𑀚𑀦𑀁 (𑀓.)] 𑀅𑀢𑁆𑀣𑁄𑀢𑀺 𑀅𑀢𑁆𑀣𑀁 𑀅𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀅𑀢𑁆𑀣𑀫𑀜𑁆𑀜𑀸𑀬. 𑀥𑀫𑁆𑀫𑀫𑀜𑁆𑀜𑀸𑀬𑀸𑀢𑀺 𑀥𑀫𑁆𑀫𑀁 𑀅𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀥𑀫𑁆𑀫𑀫𑀜𑁆𑀜𑀸𑀬𑀸𑀢𑀺 𑁋 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬. 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑁂𑀬𑁆𑀬𑀸𑀢𑀺 𑀲𑀫𑁆𑀫𑀸𑀧𑀝𑀺𑀧𑀤𑀁 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀁 𑀅𑀦𑁆𑀯𑀢𑁆𑀣𑀧𑀝𑀺𑀧𑀤𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑁂𑀬𑁆𑀬𑀸𑀢𑀺 𑁋 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑁂𑀬𑁆𑀬. 𑀕𑀘𑁆𑀙𑁂𑀬𑁆𑀬𑁂𑀯 𑀚𑀭𑀸𑀫𑀭𑀡𑀲𑁆𑀲 𑀧𑀸𑀭𑀦𑁆𑀢𑀺 𑀚𑀭𑀸𑀫𑀭𑀡𑀲𑁆𑀲 𑀧𑀸𑀭𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀕𑀘𑁆𑀙𑁂𑀬𑁆𑀬𑁂𑀯 𑀚𑀭𑀸𑀫𑀭𑀡𑀲𑁆𑀲 𑀧𑀸𑀭𑀦𑁆𑀢𑀺 𑀚𑀭𑀸𑀫𑀭𑀡𑀲𑁆𑀲 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬, 𑀧𑀸𑀭𑀁 𑀅𑀥𑀺𑀕𑀘𑁆𑀙𑁂𑀬𑁆𑀬, 𑀧𑀸𑀭𑀁 𑀅𑀥𑀺𑀨𑀲𑁆𑀲𑁂𑀬𑁆𑀬, 𑀧𑀸𑀭𑀁 𑀲𑀘𑁆𑀙𑀺𑀓𑀭𑁂𑀬𑁆𑀬𑀸𑀢𑀺 𑁋 𑀕𑀘𑁆𑀙𑁂𑀬𑁆𑀬𑁂𑀯 𑀚𑀭𑀸𑀫𑀭𑀡𑀲𑁆𑀲 𑀧𑀸𑀭𑀁. 𑀧𑀸𑀭𑀗𑁆𑀕𑀫𑀦𑀻𑀬𑀸 𑀇𑀫𑁂 𑀥𑀫𑁆𑀫𑀸𑀢𑀺 𑀇𑀫𑁂 𑀥𑀫𑁆𑀫𑀸 𑀧𑀸𑀭𑀗𑁆𑀕𑀫𑀦𑀻𑀬𑀸. 𑀧𑀸𑀭𑀁 𑀧𑀸𑀧𑁂𑀦𑁆𑀢𑀺 𑀧𑀸𑀭𑀁 𑀲𑀫𑁆𑀧𑀸𑀧𑁂𑀦𑁆𑀢𑀺 𑀧𑀸𑀭𑀁 𑀲𑀫𑀦𑀼𑀧𑀸𑀧𑁂𑀦𑁆𑀢𑀺, 𑀚𑀭𑀸𑀫𑀡𑀲𑁆𑀲 𑀢𑀭𑀡𑀸𑀬 [𑀢𑀸𑀭𑀡𑀸𑀬 (𑀲𑁆𑀬𑀸.)] 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑁋 𑀧𑀸𑀭𑀗𑁆𑀕𑀫𑀦𑀻𑀬𑀸 𑀇𑀫𑁂 𑀥𑀫𑁆𑀫𑀸𑀢𑀺.

𑀢𑀲𑁆𑀫𑀸 𑀇𑀫𑀲𑁆𑀲 𑀥𑀫𑁆𑀫𑀧𑀭𑀺𑀬𑀸𑀬𑀲𑁆𑀲𑀸𑀢𑀺. 𑀢𑀲𑁆𑀫𑀸𑀢𑀺 𑀢𑀲𑁆𑀫𑀸 𑀢𑀁𑀓𑀸𑀭𑀡𑀸 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀁𑀦𑀺𑀤𑀸𑀦𑀸𑀢𑀺 𑁋 𑀢𑀲𑁆𑀫𑀸. 𑀇𑀫𑀲𑁆𑀲 𑀥𑀫𑁆𑀫𑀧𑀭𑀺𑀬𑀸𑀬𑀲𑁆𑀲𑀸𑀢𑀺 𑀇𑀫𑀲𑁆𑀲 𑀧𑀸𑀭𑀸𑀬𑀦𑀲𑁆𑀲𑀸𑀢𑀺 𑁋 𑀢𑀲𑁆𑀫𑀸 𑀇𑀫𑀲𑁆𑀲 𑀥𑀫𑁆𑀫𑀧𑀭𑀺𑀬𑀸𑀬𑀲𑁆𑀲. 𑀧𑀸𑀭𑀸𑀬𑀦𑀦𑁆𑀢𑁂𑀯 𑀅𑀥𑀺𑀯𑀘𑀦𑀦𑁆𑀢𑀺 𑀧𑀸𑀭𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁…𑀧𑁂… 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀅𑀬𑀦𑀁 𑀯𑀼𑀘𑁆𑀘𑀢𑀺 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺. 𑀅𑀥𑀺𑀯𑀘𑀦𑀦𑁆𑀢𑀺 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀺 𑀩𑁆𑀬𑀜𑁆𑀚𑀦𑀁 𑀅𑀪𑀺𑀮𑀸𑀧𑁄𑀢𑀺 𑁋 𑀧𑀸𑀭𑀸𑀬𑀦𑀦𑁆𑀢𑁂𑀯 𑀅𑀥𑀺𑀯𑀘𑀦𑀁. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀧𑀜𑁆𑀳𑀲𑁆𑀲 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑁂𑀬𑁆𑀬, 𑀕𑀘𑁆𑀙𑁂𑀬𑁆𑀬𑁂𑀯 𑀚𑀭𑀸𑀫𑀭𑀡𑀲𑁆𑀲 𑀧𑀸𑀭𑀁. 𑀧𑀸𑀭𑀗𑁆𑀕𑀫𑀦𑀻𑀬𑀸 𑀇𑀫𑁂 𑀥𑀫𑁆𑀫𑀸𑀢𑀺. 𑀢𑀲𑁆𑀫𑀸 𑀇𑀫𑀲𑁆𑀲 𑀥𑀫𑁆𑀫𑀧𑀭𑀺𑀬𑀸𑀬𑀲𑁆𑀲 ‘𑀧𑀸𑀭𑀸𑀬𑀦’𑀦𑁆𑀢𑁂𑀯 𑀅𑀥𑀺𑀯𑀘𑀦’’𑀦𑁆𑀢𑀺.

𑁯𑁫. 𑀅𑀚𑀺𑀢𑁄 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑁄, 𑀧𑀼𑀡𑁆𑀡𑀓𑁄 𑀅𑀣 𑀫𑁂𑀢𑁆𑀢𑀕𑀽;

𑀥𑁄𑀢𑀓𑁄 𑀉𑀧𑀲𑀻𑀯𑁄 𑀘, 𑀦𑀦𑁆𑀤𑁄 𑀘 𑀅𑀣 𑀳𑁂𑀫𑀓𑁄.

𑁯𑁬. 𑀢𑁄𑀤𑁂𑀬𑁆𑀬𑀓𑀧𑁆𑀧𑀸 𑀤𑀼𑀪𑀬𑁄, 𑀚𑀢𑀼𑀓𑀡𑁆𑀡𑀻 𑀘 𑀧𑀡𑁆𑀟𑀺𑀢𑁄;

𑀪𑀤𑁆𑀭𑀸𑀯𑀼𑀥𑁄 𑀉𑀤𑀬𑁄 𑀘, 𑀧𑁄𑀲𑀸𑀮𑁄 𑀘𑀸𑀧𑀺 𑀩𑁆𑀭𑀸𑀳𑁆𑀫𑀡𑁄;

𑀫𑁄𑀖𑀭𑀸𑀚𑀸 𑀘 𑀫𑁂𑀥𑀸𑀯𑀻, 𑀧𑀺𑀗𑁆𑀕𑀺𑀬𑁄 𑀘 𑀫𑀳𑀸𑀇𑀲𑀺.

𑁯𑁭. 𑀏𑀢𑁂 𑀩𑀼𑀤𑁆𑀥𑀁 𑀉𑀧𑀸𑀕𑀘𑁆𑀙𑀼𑀁, 𑀲𑀫𑁆𑀧𑀦𑁆𑀦𑀘𑀭𑀡𑀁 𑀇𑀲𑀺𑀁;

𑀧𑀼𑀘𑁆𑀙𑀦𑁆𑀢𑀸 𑀦𑀺𑀧𑀼𑀡𑁂 𑀧𑀜𑁆𑀳𑁂, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀉𑀧𑀸𑀕𑀫𑀼𑀁.

𑀏𑀢𑁂 𑀩𑀼𑀤𑁆𑀥𑀁 𑀉𑀧𑀸𑀕𑀘𑁆𑀙𑀼𑀦𑁆𑀢𑀺. 𑀏𑀢𑁂𑀢𑀺 𑀲𑁄𑀴𑀲 𑀧𑀸𑀭𑀸𑀬𑀦𑀺𑀬𑀸 𑀩𑁆𑀭𑀸𑀳𑁆𑀫𑀡𑀸. 𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸 𑀲𑀬𑀫𑁆𑀪𑀽 𑀅𑀦𑀸𑀘𑀭𑀺𑀬𑀓𑁄 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀸𑀫𑀁 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀺, 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯𑀁. 𑀩𑀼𑀤𑁆𑀥𑁄𑀢𑀺 𑀓𑁂𑀦𑀝𑁆𑀞𑁂𑀦 𑀩𑀼𑀤𑁆𑀥𑁄? 𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄, 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀩𑀼𑀤𑁆𑀥𑁄, 𑀲𑀩𑁆𑀩𑀜𑁆𑀜𑀼𑀢𑀸𑀬 𑀩𑀼𑀤𑁆𑀥𑁄, 𑀲𑀩𑁆𑀩𑀤𑀲𑁆𑀲𑀸𑀯𑀺𑀢𑀸𑀬 𑀩𑀼𑀤𑁆𑀥𑁄, 𑀅𑀪𑀺𑀜𑁆𑀜𑁂𑀬𑁆𑀬𑀢𑀸𑀬 𑀩𑀼𑀤𑁆𑀥𑁄, 𑀯𑀺𑀲𑀯𑀺𑀢𑀸𑀬 𑀩𑀼𑀤𑁆𑀥𑁄, 𑀔𑀻𑀡𑀸𑀲𑀯𑀲𑀗𑁆𑀔𑀸𑀢𑁂𑀦 𑀩𑀼𑀤𑁆𑀥𑁄, 𑀦𑀺𑀭𑀼𑀧𑀮𑁂𑀧𑀲𑀗𑁆𑀔𑀸𑀢𑁂𑀦 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀯𑀻𑀢𑀤𑁄𑀲𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀯𑀻𑀢𑀫𑁄𑀳𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀦𑀺𑀓𑁆𑀓𑀺𑀮𑁂𑀲𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀩𑀼𑀤𑁆𑀥𑁄, 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀩𑀼𑀤𑁆𑀥𑁄, 𑀅𑀩𑀼𑀤𑁆𑀥𑀺𑀯𑀺𑀳𑀢𑀢𑁆𑀢𑀸 𑀩𑀼𑀤𑁆𑀥𑀺𑀧𑀝𑀺𑀮𑀸𑀪𑀸𑀢𑀺 𑀩𑀼𑀤𑁆𑀥𑁄. 𑀩𑀼𑀤𑁆𑀥𑁄𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢𑀁 𑀦 𑀧𑀺𑀢𑀭𑀸 𑀓𑀢𑀁 𑀦 𑀪𑀸𑀢𑀭𑀸 𑀓𑀢𑀁 𑀦 𑀪𑀕𑀺𑀦𑀺𑀬𑀸 𑀓𑀢𑀁 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀓𑀢𑀁 𑀦 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 𑀓𑀢𑀁 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀁 𑀦 𑀤𑁂𑀯𑀢𑀸𑀳𑀺 𑀓𑀢𑀁. 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁄𑀥𑀺𑀬𑀸 𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀩𑀼𑀤𑁆𑀥𑁄𑀢𑀺. 𑀏𑀢𑁂 𑀩𑀼𑀤𑁆𑀥𑀁 𑀉𑀧𑀸𑀕𑀘𑁆𑀙𑀼𑀦𑁆𑀢𑀺 𑀏𑀢𑁂 𑀩𑀼𑀤𑁆𑀥𑀁 𑀉𑀧𑀸𑀕𑀫𑀺𑀁𑀲𑀼 𑀉𑀧𑀲𑀗𑁆𑀓𑀫𑀺𑀁𑀲𑀼 𑀧𑀬𑀺𑀭𑀼𑀧𑀸𑀲𑀺𑀁𑀲𑀼 𑀧𑀭𑀺𑀧𑀼𑀘𑁆𑀙𑀺𑀁𑀲𑀼 𑀧𑀭𑀺𑀧𑀜𑁆𑀳𑀺𑀁𑀲𑀽𑀢𑀺 𑁋 𑀏𑀢𑁂 𑀩𑀼𑀤𑁆𑀥𑀁 𑀉𑀧𑀸𑀕𑀘𑁆𑀙𑀼𑀁.

𑀲𑀫𑁆𑀧𑀦𑁆𑀦𑀘𑀭𑀡𑀁 𑀇𑀲𑀺𑀦𑁆𑀢𑀺 𑀘𑀭𑀡𑀁 𑀯𑀼𑀘𑁆𑀘𑀢𑀺 𑀲𑀻𑀮𑀸𑀘𑀸𑀭𑀦𑀺𑀩𑁆𑀩𑀢𑁆𑀢𑀺. 𑀲𑀻𑀮𑀲𑀁𑀯𑀭𑁄𑀧𑀺 𑀘𑀭𑀡𑀁, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄𑀧𑀺 𑀘𑀭𑀡𑀁, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸𑀧𑀺 𑀘𑀭𑀡𑀁, 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄𑀧𑀺 𑀘𑀭𑀡𑀁, 𑀲𑀢𑁆𑀢𑀧𑀺 𑀲𑀤𑁆𑀥𑀫𑁆𑀫𑀸 𑀘𑀭𑀡𑀁, 𑀘𑀢𑁆𑀢𑀸𑀭𑀺𑀧𑀺 𑀛𑀸𑀦𑀸𑀦𑀺 𑀘𑀭𑀡𑀁. 𑀲𑀫𑁆𑀧𑀦𑁆𑀦𑀘𑀭𑀡𑀦𑁆𑀢𑀺 𑀲𑀫𑁆𑀧𑀦𑁆𑀦𑀘𑀭𑀡𑀁 𑀲𑁂𑀝𑁆𑀞𑀘𑀭𑀡𑀁 𑀯𑀺𑀲𑁂𑀝𑁆𑀞𑀘𑀭𑀡𑀁 [𑀯𑀺𑀲𑀺𑀝𑁆𑀞𑀘𑀭𑀡𑀁 (𑀓.)] 𑀧𑀸𑀫𑁄𑀓𑁆𑀔𑀘𑀭𑀡𑀁 𑀉𑀢𑁆𑀢𑀫𑀘𑀭𑀡𑀁 𑀧𑀯𑀭𑀘𑀭𑀡𑀁. 𑀇𑀲𑀻𑀢𑀺 𑀇𑀲𑀺 𑀪𑀕𑀯𑀸 𑀫𑀳𑀦𑁆𑀢𑀁 𑀲𑀻𑀮𑀓𑁆𑀔𑀦𑁆𑀥𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀇𑀲𑀺…𑀧𑁂… 𑀫𑀳𑁂𑀲𑀓𑁆𑀔𑁂𑀳𑀺 𑀯𑀸 𑀲𑀢𑁆𑀢𑁂𑀳𑀺 𑀏𑀲𑀺𑀢𑁄 𑀕𑀯𑁂𑀲𑀺𑀢𑁄 𑀧𑀭𑀺𑀬𑁂𑀲𑀺𑀢𑁄 𑁋 ‘‘𑀓𑀳𑀁 𑀩𑀼𑀤𑁆𑀥𑁄, 𑀓𑀳𑀁 𑀪𑀕𑀯𑀸, 𑀓𑀳𑀁 𑀤𑁂𑀯𑀤𑁂𑀯𑁄 𑀓𑀳𑀁 𑀦𑀭𑀸𑀲𑀪𑁄’’𑀢𑀺 𑁋 𑀇𑀲𑀻𑀢𑀺 𑁋 𑀲𑀫𑁆𑀧𑀦𑁆𑀦𑀘𑀭𑀡𑀁 𑀇𑀲𑀺𑀁.

𑀧𑀼𑀘𑁆𑀙𑀦𑁆𑀢𑀸 𑀦𑀺𑀧𑀼𑀡𑁂 𑀧𑀜𑁆𑀳𑁂𑀢𑀺. 𑀧𑀼𑀘𑁆𑀙𑀦𑁆𑀢𑀸𑀢𑀺 𑀧𑀼𑀘𑁆𑀙𑀦𑁆𑀢𑀸 𑀬𑀸𑀘𑀦𑁆𑀢𑀸 𑀅𑀚𑁆𑀛𑁂𑀲𑀦𑁆𑀢𑀸 𑀧𑀲𑀸𑀤𑁂𑀦𑁆𑀢𑀸. 𑀦𑀺𑀧𑀼𑀡𑁂 𑀧𑀜𑁆𑀳𑁂𑀢𑀺 𑀕𑀫𑁆𑀪𑀻𑀭𑁂 𑀤𑀼𑀤𑁆𑀤𑀲𑁂 𑀤𑀼𑀭𑀦𑀼𑀩𑁄𑀥𑁂 𑀲𑀦𑁆𑀢𑁂 𑀧𑀡𑀻𑀢𑁂 𑀅𑀢𑀓𑁆𑀓𑀸𑀯𑀘𑀭𑁂 𑀦𑀺𑀧𑀼𑀡𑁂 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑁂 𑀧𑀜𑁆𑀳𑁂𑀢𑀺 𑁋 𑀧𑀼𑀘𑁆𑀙𑀦𑁆𑀢𑀸 𑀦𑀺𑀧𑀼𑀡𑁂 𑀧𑀜𑁆𑀳𑁂.

𑀩𑀼𑀤𑁆𑀥𑀲𑁂𑀝𑁆𑀞𑀁 𑀉𑀧𑀸𑀕𑀫𑀼𑀦𑁆𑀢𑀺. 𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀩𑀼𑀤𑁆𑀥𑁄𑀢𑀺. 𑀲𑁂𑀝𑁆𑀞𑀦𑁆𑀢𑀺 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑁂𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀁 𑀩𑀼𑀤𑁆𑀥𑀁 𑀉𑀧𑀸𑀕𑀫𑀼𑀁 𑀉𑀧𑀸𑀕𑀫𑀺𑀁𑀲𑀼 𑀉𑀧𑀲𑀗𑁆𑀓𑀫𑀺𑀁𑀲𑀼 𑀧𑀬𑀺𑀭𑀼𑀧𑀸𑀲𑀺𑀁𑀲𑀼 𑀧𑀭𑀺𑀧𑀼𑀘𑁆𑀙𑀺𑀁𑀲𑀼 𑀧𑀭𑀺𑀧𑀜𑁆𑀳𑀺𑀁𑀲𑀽𑀢𑀺 𑁋 𑀩𑀼𑀤𑁆𑀥𑀲𑁂𑀝𑁆𑀞𑀁 𑀉𑀧𑀸𑀕𑀫𑀼𑀁. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀏𑀢𑁂 𑀩𑀼𑀤𑁆𑀥𑀁 𑀉𑀧𑀸𑀕𑀘𑁆𑀙𑀼𑀁, 𑀲𑀫𑁆𑀧𑀦𑁆𑀦𑀘𑀭𑀡𑀁 𑀇𑀲𑀺𑀁;

𑀧𑀼𑀘𑁆𑀙𑀦𑁆𑀢𑀸 𑀦𑀺𑀧𑀼𑀡𑁂 𑀧𑀜𑁆𑀳𑁂, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀉𑀧𑀸𑀕𑀫𑀼’’𑀦𑁆𑀢𑀺.

𑁯𑁮. 𑀢𑁂𑀲𑀁 𑀩𑀼𑀤𑁆𑀥𑁄 𑀧𑀩𑁆𑀬𑀸𑀓𑀸𑀲𑀺, 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀬𑀣𑀸𑀢𑀣𑀁;

𑀧𑀜𑁆𑀳𑀸𑀦𑀁 𑀯𑁂𑀬𑁆𑀬𑀸𑀓𑀭𑀡𑁂𑀦, 𑀢𑁄𑀲𑁂𑀲𑀺 𑀩𑁆𑀭𑀸𑀳𑁆𑀫𑀡𑁂 𑀫𑀼𑀦𑀺.

𑀢𑁂𑀲𑀁 𑀩𑀼𑀤𑁆𑀥𑁄 𑀧𑀩𑁆𑀬𑀸𑀓𑀸𑀲𑀻𑀢𑀺. 𑀢𑁂𑀲𑀦𑁆𑀢𑀺 𑀲𑁄𑀴𑀲𑀸𑀦𑀁 𑀧𑀸𑀭𑀸𑀬𑀦𑀺𑀬𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁. 𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀩𑀼𑀤𑁆𑀥𑁄𑀢𑀺. 𑀧𑀩𑁆𑀬𑀸𑀓𑀸𑀲𑀻𑀢𑀺 𑀢𑁂𑀲𑀁 𑀩𑀼𑀤𑁆𑀥𑁄 𑀧𑀩𑁆𑀬𑀸𑀓𑀸𑀲𑀺 𑀆𑀘𑀺𑀓𑁆𑀔𑀺 𑀤𑁂𑀲𑁂𑀲𑀺 𑀧𑀜𑁆𑀜𑀧𑁂𑀲𑀺 𑀧𑀝𑁆𑀞𑀧𑁂𑀲𑀺 𑀯𑀺𑀯𑀭𑀺 𑀯𑀺𑀪𑀚𑀺 𑀉𑀢𑁆𑀢𑀸𑀦𑀻𑀅𑀓𑀸𑀲𑀺 𑀧𑀓𑀸𑀲𑁂𑀲𑀻𑀢𑀺 𑁋 𑀢𑁂𑀲𑀁 𑀩𑀼𑀤𑁆𑀥𑁄 𑀧𑀩𑁆𑀬𑀸𑀓𑀸𑀲𑀺.

𑀧𑀜𑁆𑀳𑀁 𑀧𑀼𑀝𑁆𑀞𑁄 𑀬𑀣𑀸𑀢𑀣𑀦𑁆𑀢𑀺. 𑀧𑀜𑁆𑀳𑀁 𑀧𑀼𑀝𑁆𑀞𑁄𑀢𑀺 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀧𑀼𑀘𑁆𑀙𑀺𑀢𑁄 𑀬𑀸𑀘𑀺𑀢𑁄 𑀅𑀚𑁆𑀛𑁂𑀲𑀺𑀢𑁄 𑀧𑀲𑀸𑀤𑀺𑀢𑁄. 𑀬𑀣𑀸𑀢𑀣𑀦𑁆𑀢𑀺 𑀬𑀣𑀸 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 𑀢𑀣𑀸 𑀆𑀘𑀺𑀓𑁆𑀔𑀺, 𑀬𑀣𑀸 𑀤𑁂𑀲𑀺𑀢𑀩𑁆𑀩𑀁 𑀢𑀣𑀸 𑀤𑁂𑀲𑁂𑀲𑀺, 𑀬𑀣𑀸 𑀧𑀜𑁆𑀜𑀧𑁂𑀢𑀩𑁆𑀩𑀁 𑀢𑀣𑀸 𑀧𑀜𑁆𑀜𑀧𑁂𑀲𑀺, 𑀬𑀣𑀸 𑀧𑀝𑁆𑀞𑀧𑁂𑀢𑀩𑁆𑀩𑀁 𑀢𑀣𑀸 𑀧𑀝𑁆𑀞𑀧𑁂𑀲𑀺, 𑀬𑀣𑀸 𑀯𑀺𑀯𑀭𑀺𑀢𑀩𑁆𑀩𑀁 𑀢𑀣𑀸 𑀯𑀺𑀯𑀭𑀺, 𑀬𑀣𑀸 𑀯𑀺𑀪𑀚𑀺𑀢𑀩𑁆𑀩𑀁 𑀢𑀣𑀸 𑀯𑀺𑀪𑀚𑀺, 𑀬𑀣𑀸 𑀉𑀢𑁆𑀢𑀸𑀦𑀻𑀓𑀸𑀢𑀩𑁆𑀩𑀁 𑀢𑀣𑀸 𑀉𑀢𑁆𑀢𑀸𑀦𑀻𑀅𑀓𑀸𑀲𑀺, 𑀬𑀣𑀸 𑀧𑀓𑀸𑀲𑀺𑀢𑀩𑁆𑀩𑀁 𑀢𑀣𑀸 𑀧𑀓𑀸𑀲𑁂𑀲𑀻𑀢𑀺 𑁋 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀬𑀣𑀸𑀢𑀣𑀁.

𑀧𑀜𑁆𑀳𑀸𑀦𑀁 𑀯𑁂𑀬𑁆𑀬𑀸𑀓𑀭𑀡𑁂𑀦𑀸𑀢𑀺 𑀧𑀜𑁆𑀳𑀸𑀦𑀁 𑀯𑁂𑀬𑁆𑀬𑀸𑀓𑀭𑀡𑁂𑀦 𑀆𑀘𑀺𑀓𑁆𑀔𑀦𑁂𑀦 𑀤𑁂𑀲𑀦𑁂𑀦 𑀧𑀜𑁆𑀜𑀧𑀦𑁂𑀦 𑀧𑀝𑁆𑀞𑀧𑀦𑁂𑀦 𑀯𑀺𑀯𑀭𑀡𑁂𑀦 𑀯𑀺𑀪𑀚𑀦𑁂𑀦 𑀉𑀢𑁆𑀢𑀸𑀦𑀻𑀓𑀫𑁆𑀫𑁂𑀦 𑀧𑀓𑀸𑀲𑀦𑁂𑀦𑀸𑀢𑀺 𑁋 𑀧𑀜𑁆𑀳𑀸𑀦𑀁 𑀯𑁂𑀬𑁆𑀬𑀸𑀓𑀭𑀡𑁂𑀦.

𑀢𑁄𑀲𑁂𑀲𑀺 𑀩𑁆𑀭𑀸𑀳𑁆𑀫𑀡𑁂 𑀫𑀼𑀦𑀻𑀢𑀺. 𑀢𑁄𑀲𑁂𑀲𑀻𑀢𑀺 𑀢𑁄𑀲𑁂𑀲𑀺 𑀯𑀺𑀢𑁄𑀲𑁂𑀲𑀺 𑀧𑀲𑀸𑀤𑁂𑀲𑀺 𑀆𑀭𑀸𑀥𑁂𑀲𑀺 𑀅𑀢𑁆𑀢𑀫𑀦𑁂 𑀅𑀓𑀸𑀲𑀺. 𑀩𑁆𑀭𑀸𑀳𑁆𑀫𑀡𑁂𑀢𑀺 𑀲𑁄𑀴𑀲 𑀧𑀸𑀭𑀸𑀬𑀦𑀺𑀬𑁂 𑀩𑁆𑀭𑀸𑀳𑁆𑀫𑀡𑁂. 𑀫𑀼𑀦𑀻𑀢𑀺 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀻𑀢𑀺 𑁋 𑀢𑁄𑀲𑁂𑀲𑀺 𑀩𑁆𑀭𑀸𑀳𑁆𑀫𑀡𑁂 𑀫𑀼𑀦𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀢𑁂𑀲𑀁 𑀩𑀼𑀤𑁆𑀥𑁄 𑀧𑀩𑁆𑀬𑀸𑀓𑀸𑀲𑀺, 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀬𑀣𑀸𑀢𑀣𑀁;

𑀧𑀜𑁆𑀳𑀸𑀦𑀁 𑀯𑁂𑀬𑁆𑀬𑀸𑀓𑀭𑀡𑁂𑀦, 𑀢𑁄𑀲𑁂𑀲𑀺 𑀩𑁆𑀭𑀸𑀳𑁆𑀫𑀡𑁂 𑀫𑀼𑀦𑀻’’𑀢𑀺.

𑁯𑁯. 𑀢𑁂 𑀢𑁄𑀲𑀺𑀢𑀸 𑀘𑀓𑁆𑀔𑀼𑀫𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀩𑁆𑀭𑀳𑁆𑀫𑀘𑀭𑀺𑀬𑀫𑀘𑀭𑀺𑀁𑀲𑀼, 𑀯𑀭𑀧𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂.

𑀢𑁂 𑀢𑁄𑀲𑀺𑀢𑀸 𑀘𑀓𑁆𑀔𑀼𑀫𑀢𑀸𑀢𑀺. 𑀢𑁂𑀢𑀺 𑀲𑁄𑀴𑀲 𑀧𑀸𑀭𑀸𑀬𑀦𑀺𑀬𑀸 𑀩𑁆𑀭𑀸𑀳𑁆𑀫𑀡𑀸. 𑀢𑁄𑀲𑀺𑀢𑀸𑀢𑀺 𑀢𑁄𑀲𑀺𑀢𑀸 𑀯𑀺𑀢𑁄𑀲𑀺𑀢𑀸 𑀧𑀲𑀸𑀤𑀺𑀢𑀸 𑀆𑀭𑀸𑀥𑀺𑀢𑀸 𑀅𑀢𑁆𑀢𑀫𑀦𑀸 𑀓𑀢𑀸𑀢𑀺 𑁋 𑀢𑁂 𑀢𑁄𑀲𑀺𑀢𑀸. 𑀘𑀓𑁆𑀔𑀼𑀫𑀢𑀸𑀢𑀺 𑀪𑀕𑀯𑀸 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀸 𑁋 𑀫𑀁𑀲𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸, 𑀤𑀺𑀩𑁆𑀩𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸, 𑀧𑀜𑁆𑀜𑀸𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸, 𑀩𑀼𑀤𑁆𑀥𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸, 𑀲𑀫𑀦𑁆𑀢𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸. 𑀓𑀣𑀁 𑀪𑀕𑀯𑀸 𑀫𑀁𑀲𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸…𑀧𑁂… 𑀏𑀯𑀁 𑀪𑀕𑀯𑀸 𑀲𑀫𑀦𑁆𑀢𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸𑀢𑀺 𑁋 𑀢𑁂 𑀢𑁄𑀲𑀺𑀢𑀸 𑀘𑀓𑁆𑀔𑀼𑀫𑀢𑀸.

𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸𑀢𑀺. 𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀩𑀼𑀤𑁆𑀥𑁄𑀢𑀺. 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸𑀢𑀺 𑀆𑀤𑀺𑀘𑁆𑀘𑁄 𑀯𑀼𑀘𑁆𑀘𑀢𑀺 𑀲𑀽𑀭𑀺𑀬𑁄. 𑀲𑁄 𑀕𑁄𑀢𑀫𑁄 𑀕𑁄𑀢𑁆𑀢𑁂𑀦, 𑀪𑀕𑀯𑀸𑀧𑀺 𑀕𑁄𑀢𑀫𑁄 𑀕𑁄𑀢𑁆𑀢𑁂𑀦, 𑀪𑀕𑀯𑀸 𑀲𑀽𑀭𑀺𑀬𑀲𑁆𑀲 𑀕𑁄𑀢𑁆𑀢𑀜𑀸𑀢𑀓𑁄 𑀕𑁄𑀢𑁆𑀢𑀩𑀦𑁆𑀥𑀼. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀆𑀤𑀺𑀘𑁆𑀘𑀩𑀦𑁆𑀥𑀽𑀢𑀺 𑁋 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸.

𑀩𑁆𑀭𑀳𑁆𑀫𑀘𑀭𑀺𑀬𑀫𑀘𑀭𑀺𑀁𑀲𑀽𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀘𑁆𑀘𑀢𑀺 𑀅𑀲𑀤𑁆𑀥𑀫𑁆𑀫𑀲𑀫𑀸𑀧𑀢𑁆𑀢𑀺𑀬𑀸 𑀆𑀭𑀢𑀺 𑀯𑀺𑀭𑀢𑀺 𑀧𑀝𑀺𑀯𑀺𑀭𑀢𑀺 𑀯𑁂𑀭𑀫𑀡𑀻 𑀯𑀺𑀭𑀫𑀡𑀁 𑀅𑀓𑀺𑀭𑀺𑀬𑀸 𑀅𑀓𑀭𑀡𑀁 𑀅𑀦𑀚𑁆𑀛𑀸𑀧𑀢𑁆𑀢𑀺 𑀯𑁂𑀮𑀸𑀅𑀦𑀢𑀺𑀓𑁆𑀓𑀫𑁄 𑀲𑁂𑀢𑀼𑀖𑀸𑀢𑁄. 𑀅𑀧𑀺 𑀘, 𑀦𑀺𑀧𑁆𑀧𑀭𑀺𑀬𑀸𑀬𑀯𑀲𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀘𑁆𑀘𑀢𑀺 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀲𑀫𑁆𑀫𑀸𑀯𑀸𑀘𑀸, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀲𑀫𑁆𑀫𑀸𑀆𑀚𑀻𑀯𑁄, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀲𑀫𑁆𑀫𑀸𑀲𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺. 𑀩𑁆𑀭𑀳𑁆𑀫𑀘𑀭𑀺𑀬𑀫𑀘𑀭𑀺𑀁𑀲𑀽𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀁𑀲𑀼 𑀅𑀘𑀭𑀺𑀁𑀲𑀼 𑀲𑀫𑀸𑀤𑀸𑀬 𑀯𑀢𑁆𑀢𑀺𑀁𑀲𑀽𑀢𑀺 𑁋 𑀩𑁆𑀭𑀳𑁆𑀫𑀘𑀭𑀺𑀬𑀫𑀘𑀭𑀺𑀁𑀲𑀼.

𑀯𑀭𑀧𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂𑀢𑀺 𑀯𑀭𑀧𑀜𑁆𑀜𑀲𑁆𑀲 𑀅𑀕𑁆𑀕𑀧𑀜𑁆𑀜𑀲𑁆𑀲 𑀲𑁂𑀝𑁆𑀞𑀧𑀜𑁆𑀜𑀲𑁆𑀲 𑀯𑀺𑀲𑁂𑀝𑁆𑀞𑀧𑀜𑁆𑀜𑀲𑁆𑀲 𑀧𑀸𑀫𑁄𑀓𑁆𑀔𑀧𑀜𑁆𑀜𑀲𑁆𑀲 𑀉𑀢𑁆𑀢𑀫𑀧𑀜𑁆𑀜𑀲𑁆𑀲 𑀧𑀯𑀭𑀧𑀜𑁆𑀜𑀲𑁆𑀲. 𑀲𑀦𑁆𑀢𑀺𑀓𑁂𑀢𑀺 𑀲𑀦𑁆𑀢𑀺𑀓𑁂 𑀲𑀸𑀫𑀦𑁆𑀢𑀸 𑀆𑀲𑀦𑁆𑀦𑁂 𑀅𑀯𑀺𑀤𑀽𑀭𑁂 𑀉𑀧𑀓𑀝𑁆𑀞𑁂𑀢𑀺 𑁋 𑀯𑀭𑀧𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀢𑁂 𑀢𑁄𑀲𑀺𑀢𑀸 𑀘𑀓𑁆𑀔𑀼𑀫𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀩𑁆𑀭𑀳𑁆𑀫𑀘𑀭𑀺𑀬𑀫𑀘𑀭𑀺𑀁𑀲𑀼, 𑀯𑀭𑀧𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂’’𑀢𑀺.

𑁧𑁦𑁦. 𑀏𑀓𑀫𑁂𑀓𑀲𑁆𑀲 𑀧𑀜𑁆𑀳𑀲𑁆𑀲, 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀁;

𑀢𑀣𑀸 𑀬𑁄 𑀧𑀝𑀺𑀧𑀚𑁆𑀚𑁂𑀬𑁆𑀬, 𑀕𑀘𑁆𑀙𑁂 𑀧𑀸𑀭𑀁 𑀅𑀧𑀸𑀭𑀢𑁄.

𑀏𑀓𑀫𑁂𑀓𑀲𑁆𑀲 𑀧𑀜𑁆𑀳𑀲𑁆𑀲𑀸𑀢𑀺 𑀏𑀓𑀫𑁂𑀓𑀲𑁆𑀲 𑀅𑀚𑀺𑀢𑀧𑀜𑁆𑀳𑀲𑁆𑀲, 𑀏𑀓𑀫𑁂𑀓𑀲𑁆𑀲 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀧𑀜𑁆𑀳𑀲𑁆𑀲…𑀧𑁂… 𑀏𑀓𑀫𑁂𑀓𑀲𑁆𑀲 𑀧𑀺𑀗𑁆𑀕𑀺𑀬𑀧𑀜𑁆𑀳𑀲𑁆𑀲𑀸𑀢𑀺 𑁋 𑀏𑀓𑀫𑁂𑀓𑀲𑁆𑀲 𑀧𑀜𑁆𑀳𑀲𑁆𑀲.

𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀦𑁆𑀢𑀺. 𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸 𑀲𑀬𑀫𑁆𑀪𑀽…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀩𑀼𑀤𑁆𑀥𑁄𑀢𑀺. 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀦𑁆𑀢𑀺 𑀬𑀣𑀸 𑀩𑀼𑀤𑁆𑀥𑁂𑀦 𑀆𑀘𑀺𑀓𑁆𑀔𑀺𑀢𑀁 𑀤𑁂𑀲𑀺𑀢𑀁 𑀧𑀜𑁆𑀜𑀧𑀺𑀢𑀁 𑀧𑀝𑁆𑀞𑀧𑀺𑀢𑀁 𑀯𑀺𑀯𑀭𑀺𑀢𑀁 𑀯𑀺𑀪𑀚𑀺𑀢𑀁 [𑀯𑀺𑀪𑀢𑁆𑀢𑀁 (𑀲𑁆𑀬𑀸.)] 𑀉𑀢𑁆𑀢𑀸𑀦𑀻𑀓𑀢𑀁 𑀧𑀓𑀸𑀲𑀺𑀢𑀦𑁆𑀢𑀺 𑁋 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀁.

𑀢𑀣𑀸 𑀬𑁄 𑀧𑀝𑀺𑀧𑀚𑁆𑀚𑁂𑀬𑁆𑀬𑀸𑀢𑀺 𑀲𑀫𑁆𑀫𑀸𑀧𑀝𑀺𑀧𑀤𑀁 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀁 𑀅𑀦𑁆𑀯𑀢𑁆𑀣𑀧𑀝𑀺𑀧𑀤𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑁂𑀬𑁆𑀬𑀸𑀢𑀺 𑁋 𑀢𑀣𑀸 𑀬𑁄 𑀧𑀝𑀺𑀧𑀚𑁆𑀚𑁂𑀬𑁆𑀬.

𑀕𑀘𑁆𑀙𑁂 𑀧𑀸𑀭𑀁 𑀅𑀧𑀸𑀭𑀢𑁄𑀢𑀺 𑀧𑀸𑀭𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁…𑀧𑁂… 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁; 𑀅𑀧𑀸𑀭𑀁 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀸 𑀘 𑀔𑀦𑁆𑀥𑀸 𑀘 𑀅𑀪𑀺𑀲𑀗𑁆𑀔𑀸𑀭𑀸 𑀘. 𑀕𑀘𑁆𑀙𑁂 𑀧𑀸𑀭𑀁 𑀅𑀧𑀸𑀭𑀢𑁄𑀢𑀺 𑀅𑀧𑀸𑀭𑀢𑁄 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬, 𑀧𑀸𑀭𑀁 𑀅𑀥𑀺𑀕𑀘𑁆𑀙𑁂𑀬𑁆𑀬, 𑀧𑀸𑀭𑀁 𑀨𑀲𑁆𑀲𑁂𑀬𑁆𑀬, 𑀧𑀸𑀭𑀁 𑀲𑀘𑁆𑀙𑀺𑀓𑀭𑁂𑀬𑁆𑀬𑀸𑀢𑀺 𑁋 𑀕𑀘𑁆𑀙𑁂 𑀧𑀸𑀭𑀁 𑀅𑀧𑀸𑀭𑀢𑁄. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀏𑀓𑀫𑁂𑀓𑀲𑁆𑀲 𑀧𑀜𑁆𑀳𑀲𑁆𑀲, 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀁;

𑀢𑀣𑀸 𑀬𑁄 𑀧𑀝𑀺𑀧𑀚𑁆𑀚𑁂𑀬𑁆𑀬, 𑀕𑀘𑁆𑀙𑁂 𑀧𑀸𑀭𑀁 𑀅𑀧𑀸𑀭𑀢𑁄’’𑀢𑀺.

𑁧𑁦𑁧. 𑀅𑀧𑀸𑀭𑀸 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬, 𑀪𑀸𑀯𑁂𑀦𑁆𑀢𑁄 𑀫𑀕𑁆𑀕𑀫𑀼𑀢𑁆𑀢𑀫𑀁;

𑀫𑀕𑁆𑀕𑁄 𑀲𑁄 𑀧𑀸𑀭𑀁 𑀕𑀫𑀦𑀸𑀬, 𑀢𑀲𑁆𑀫𑀸 𑀧𑀸𑀭𑀸𑀬𑀦𑀁 𑀇𑀢𑀺.

𑀅𑀧𑀸𑀭𑀸 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬𑀸𑀢𑀺 𑀅𑀧𑀸𑀭𑀁 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀸 𑀘 𑀔𑀦𑁆𑀥𑀸 𑀘 𑀅𑀪𑀺𑀲𑀗𑁆𑀔𑀸𑀭𑀸 𑀘; 𑀧𑀸𑀭𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁…𑀧𑁂… 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀅𑀧𑀸𑀭𑀸 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬𑀸𑀢𑀺 𑀅𑀧𑀸𑀭𑀸 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬, 𑀧𑀸𑀭𑀁 𑀅𑀥𑀺𑀕𑀘𑁆𑀙𑁂𑀬𑁆𑀬, 𑀧𑀸𑀭𑀁 𑀨𑀲𑁆𑀲𑁂𑀬𑁆𑀬, 𑀧𑀸𑀭𑀁 𑀲𑀘𑁆𑀙𑀺𑀓𑀭𑁂𑀬𑁆𑀬𑀸𑀢𑀺 𑁋 𑀅𑀧𑀸𑀭𑀸 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬.

𑀪𑀸𑀯𑁂𑀦𑁆𑀢𑁄 𑀫𑀕𑁆𑀕𑀫𑀼𑀢𑁆𑀢𑀫𑀦𑁆𑀢𑀺 𑀫𑀕𑁆𑀕𑀫𑀼𑀢𑁆𑀢𑀫𑀁 𑀯𑀼𑀘𑁆𑀘𑀢𑀺 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺. 𑀫𑀕𑁆𑀕𑀫𑀼𑀢𑁆𑀢𑀫𑀦𑁆𑀢𑀺 𑀫𑀕𑁆𑀕𑀁 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑁂𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀁. 𑀪𑀸𑀯𑁂𑀦𑁆𑀢𑁄𑀢𑀺 𑀪𑀸𑀯𑁂𑀦𑁆𑀢𑁄 𑀆𑀲𑁂𑀯𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀦𑁆𑀢𑁄𑀢𑀺 𑁋 𑀪𑀸𑀯𑁂𑀦𑁆𑀢𑁄 𑀫𑀕𑁆𑀕𑀫𑀼𑀢𑁆𑀢𑀫𑀁.

𑀫𑀕𑁆𑀕𑁄 𑀲𑁄 𑀧𑀸𑀭𑀁 𑀕𑀫𑀦𑀸𑀬𑀸𑀢𑀺 𑁋

𑀫𑀕𑁆𑀕𑁄 𑀧𑀦𑁆𑀣𑁄 𑀧𑀣𑁄 𑀧𑀚𑁆𑀚𑁄 [𑀅𑀤𑁆𑀥𑁄 (𑀓.)], 𑀅𑀜𑁆𑀚𑀲𑀁 𑀯𑀝𑀼𑀫𑀸𑀬𑀦𑀁;

𑀦𑀸𑀯𑀸 𑀉𑀢𑁆𑀢𑀭𑀲𑁂𑀢𑀼 𑀘, 𑀓𑀼𑀮𑁆𑀮𑁄 𑀘 𑀪𑀺𑀲𑀺 𑀲𑀗𑁆𑀓𑀫𑁄 [𑀲𑀗𑁆𑀕𑀫𑁄 (𑀲𑁆𑀬𑀸. 𑀓.) 𑀧𑀲𑁆𑀲-𑀥𑀸𑀢𑀼𑀫𑀸𑀮𑀸𑀬𑀁 𑀫𑀕𑁆𑀕𑀥𑀸𑀢𑀼𑀯𑀡𑁆𑀡𑀦𑀸𑀬𑀁].

𑀧𑀸𑀭𑀁 𑀕𑀫𑀦𑀸𑀬𑀸𑀢𑀺 𑀧𑀸𑀭𑀁 𑀕𑀫𑀦𑀸𑀬 𑀧𑀸𑀭𑀁 𑀲𑀫𑁆𑀧𑀸𑀧𑀦𑀸𑀬 𑀧𑀸𑀭𑀁 𑀲𑀫𑀦𑀼𑀧𑀸𑀧𑀦𑀸𑀬 𑀚𑀭𑀸𑀫𑀭𑀡𑀲𑁆𑀲 𑀢𑀭𑀡𑀸𑀬𑀸𑀢𑀺 𑁋 𑀫𑀕𑁆𑀕𑁄 𑀲𑁄 𑀧𑀸𑀭𑀁 𑀕𑀫𑀦𑀸𑀬.

𑀢𑀲𑁆𑀫𑀸 𑀧𑀸𑀭𑀸𑀬𑀦𑀁 𑀇𑀢𑀻𑀢𑀺. 𑀢𑀲𑁆𑀫𑀸𑀢𑀺 𑀢𑀲𑁆𑀫𑀸 𑀢𑀁𑀓𑀸𑀭𑀡𑀸 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀁𑀦𑀺𑀤𑀸𑀦𑀸. 𑀧𑀸𑀭𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁…𑀧𑁂… 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀅𑀬𑀦𑀁 𑀯𑀼𑀘𑁆𑀘𑀢𑀺 𑀫𑀕𑁆𑀕𑁄. 𑀇𑀢𑀻𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑀇𑀢𑀻𑀢𑀺 𑁋 𑀢𑀲𑁆𑀫𑀸 𑀧𑀸𑀭𑀸𑀬𑀦𑀁 𑀇𑀢𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀅𑀧𑀸𑀭𑀸 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬, 𑀪𑀸𑀯𑁂𑀦𑁆𑀢𑁄 𑀫𑀕𑁆𑀕𑀫𑀼𑀢𑁆𑀢𑀫𑀁;

𑀫𑀕𑁆𑀕𑁄 𑀲𑁄 𑀧𑀸𑀭𑀁 𑀕𑀫𑀦𑀸𑀬, 𑀢𑀲𑁆𑀫𑀸 𑀧𑀸𑀭𑀸𑀬𑀦𑀁 𑀇𑀢𑀻’’𑀢𑀺.

𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲𑁄 𑀲𑀢𑁆𑀢𑀭𑀲𑀫𑁄.