𑁧𑁧. 𑀚𑀢𑀼𑀓𑀡𑁆𑀡𑀺𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄

𑁬𑁫. 𑀲𑀼𑀢𑁆𑀯𑀸𑀦𑀳𑀁 𑀯𑀻𑀭 𑀅𑀓𑀸𑀫𑀓𑀸𑀫𑀺𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀚𑀢𑀼𑀓𑀡𑁆𑀡𑀺]

𑀑𑀖𑀸𑀢𑀺𑀕𑀁 𑀧𑀼𑀝𑁆𑀞𑀼𑀫𑀓𑀸𑀫𑀫𑀸𑀕𑀫𑀁;

𑀲𑀦𑁆𑀢𑀺𑀧𑀤𑀁 𑀩𑁆𑀭𑀽𑀳𑀺 𑀲𑀳𑀚𑀦𑁂𑀢𑁆𑀢, 𑀬𑀣𑀸𑀢𑀘𑁆𑀙𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁.

𑀲𑀼𑀢𑁆𑀯𑀸𑀦𑀳𑀁 𑀯𑀻𑀭 𑀅𑀓𑀸𑀫𑀓𑀸𑀫𑀺𑀦𑁆𑀢𑀺 𑀲𑀼𑀢𑁆𑀯𑀸 𑀲𑀼𑀡𑀺𑀢𑁆𑀯𑀸 𑀉𑀕𑁆𑀕𑀳𑁂𑀢𑁆𑀯𑀸 𑀉𑀧𑀥𑀸𑀭𑁂𑀢𑁆𑀯𑀸 𑀉𑀧𑀮𑀓𑁆𑀔𑀬𑀺𑀢𑁆𑀯𑀸. 𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁…𑀧𑁂… 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺 𑁋 𑀲𑀼𑀢𑁆𑀯𑀸𑀦𑀳𑀁. 𑀯𑀻𑀭𑀸𑀢𑀺 𑀯𑀻𑀭𑁄 𑀪𑀕𑀯𑀸. 𑀯𑀻𑀭𑀺𑀬𑀯𑀸𑀢𑀺 𑀯𑀻𑀭𑁄, 𑀧𑀳𑀽𑀢𑀺 𑀯𑀻𑀭𑁄, 𑀯𑀺𑀲𑀯𑀻𑀢𑀺 𑀯𑀻𑀭𑁄, 𑀅𑀮𑀫𑀢𑁆𑀢𑁄𑀢𑀺 𑀯𑀻𑀭𑁄, 𑀲𑀽𑀭𑁄𑀢𑀺 𑀯𑀻𑀭𑁄, 𑀯𑀺𑀓𑁆𑀓𑀦𑁆𑀢𑁄 𑀅𑀪𑀻𑀭𑀽 𑀅𑀘𑁆𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀅𑀧𑀮𑀸𑀬𑀻 𑀧𑀳𑀻𑀦𑀪𑀬𑀪𑁂𑀭𑀯𑁄 𑀯𑀺𑀕𑀢𑀮𑁄𑀫𑀳𑀁𑀲𑁄𑀢𑀺 𑀯𑀻𑀭𑁄.

𑀯𑀺𑀭𑀢𑁄 𑀇𑀥 𑀲𑀩𑁆𑀩𑀧𑀸𑀧𑀓𑁂𑀳𑀺, 𑀦𑀺𑀭𑀬𑀤𑀼𑀓𑁆𑀔𑀁 𑀅𑀢𑀺𑀘𑁆𑀘 𑀯𑀻𑀭𑀺𑀬𑀯𑀸 [𑀯𑀺𑀭𑀺𑀬𑀯𑀸 (𑀲𑁆𑀬𑀸.) 𑀲𑀼. 𑀦𑀺. 𑁫𑁩𑁬] 𑀲𑁄;

𑀲𑁄 𑀯𑀻𑀭𑀺𑀬𑀯𑀸 𑀧𑀥𑀸𑀦𑀯𑀸, 𑀯𑀻𑀭𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀢𑀣𑀢𑁆𑀢𑀸𑀢𑀺.

𑀲𑀼𑀢𑁆𑀯𑀸𑀦𑀳𑀁 𑀯𑀻𑀭. 𑀅𑀓𑀸𑀫𑀓𑀸𑀫𑀺𑀦𑁆𑀢𑀺. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑀢𑁆𑀣𑀼𑀓𑀸𑀫𑀸 𑀧𑀭𑀺𑀜𑁆𑀜𑀸𑀢𑀸, 𑀓𑀺𑀮𑁂𑀲𑀓𑀸𑀫𑀸 𑀧𑀳𑀻𑀦𑀸. 𑀯𑀢𑁆𑀣𑀼𑀓𑀸𑀫𑀸𑀦𑀁 𑀧𑀭𑀺𑀜𑁆𑀜𑀸𑀢𑀢𑁆𑀢𑀸 𑀓𑀺𑀮𑁂𑀲𑀓𑀸𑀫𑀸𑀦𑀁 𑀧𑀳𑀻𑀦𑀢𑁆𑀢𑀸 𑀪𑀕𑀯𑀸 𑀦 𑀓𑀸𑀫𑁂 𑀓𑀸𑀫𑁂𑀢𑀺, 𑀦 𑀓𑀸𑀫𑁂 𑀧𑀢𑁆𑀣𑁂𑀢𑀺, 𑀦 𑀓𑀸𑀫𑁂 𑀧𑀺𑀳𑁂𑀢𑀺, 𑀦 𑀓𑀸𑀫𑁂 𑀅𑀪𑀺𑀚𑀧𑁆𑀧𑀢𑀺. 𑀬𑁂 𑀓𑀸𑀫𑁂 𑀓𑀸𑀫𑁂𑀦𑁆𑀢𑀺, 𑀓𑀸𑀫𑁂 𑀧𑀢𑁆𑀣𑁂𑀦𑁆𑀢𑀺, 𑀓𑀸𑀫𑁂 𑀧𑀺𑀳𑁂𑀦𑁆𑀢𑀺, 𑀓𑀸𑀫𑁂 𑀅𑀪𑀺𑀚𑀧𑁆𑀧𑀦𑁆𑀢𑀺, 𑀢𑁂 𑀓𑀸𑀫𑀓𑀸𑀫𑀺𑀦𑁄 𑀭𑀸𑀕𑀭𑀸𑀕𑀺𑀦𑁄 𑀲𑀜𑁆𑀜𑀸𑀲𑀜𑁆𑀜𑀺𑀦𑁄. 𑀪𑀕𑀯𑀸 𑀦 𑀓𑀸𑀫𑁂 𑀓𑀸𑀫𑁂𑀢𑀺, 𑀦 𑀓𑀸𑀫𑁂 𑀧𑀢𑁆𑀣𑁂𑀢𑀺, 𑀦 𑀓𑀸𑀫𑁂 𑀧𑀺𑀳𑁂𑀢𑀺, 𑀦 𑀓𑀸𑀫𑁂 𑀅𑀪𑀺𑀚𑀧𑁆𑀧𑀢𑀺. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀅𑀓𑀸𑀫𑁄 𑀦𑀺𑀓𑁆𑀓𑀸𑀫𑁄 𑀘𑀢𑁆𑀢𑀓𑀸𑀫𑁄 𑀯𑀦𑁆𑀢𑀓𑀸𑀫𑁄 𑀫𑀼𑀢𑁆𑀢𑀓𑀸𑀫𑁄 𑀧𑀳𑀻𑀦𑀓𑀸𑀫𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀓𑀸𑀫𑁄 𑀯𑀻𑀢𑀭𑀸𑀕𑁄 𑀯𑀺𑀕𑀢𑀭𑀸𑀕𑁄 𑀘𑀢𑁆𑀢𑀭𑀸𑀕𑁄 𑀯𑀦𑁆𑀢𑀭𑀸𑀕𑁄 𑀫𑀼𑀢𑁆𑀢𑀭𑀸𑀕𑁄 𑀧𑀳𑀻𑀦𑀭𑀸𑀕𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀭𑀸𑀕𑁄 𑀦𑀺𑀘𑁆𑀙𑀸𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀺𑀪𑀽𑀢𑁄 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀻𑀢𑀺 𑁋 𑀲𑀼𑀢𑁆𑀯𑀸𑀦𑀳𑀁 𑀯𑀻𑀭 𑀅𑀫𑀓𑀸𑀫𑀓𑀸𑀫𑀺𑀁.

𑀇𑀘𑁆𑀘𑀸𑀬𑀲𑁆𑀫𑀸 𑀚𑀢𑀼𑀓𑀡𑁆𑀡𑀻𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀇𑀘𑁆𑀘𑀸𑀢𑀺. 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀸𑀥𑀺𑀯𑀘𑀦𑀫𑁂𑀢𑀁 𑀆𑀬𑀲𑁆𑀫𑀸𑀢𑀺. 𑀚𑀢𑀼𑀓𑀡𑁆𑀡𑀻𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁄𑀢𑁆𑀢𑀁 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀚𑀢𑀼𑀓𑀡𑁆𑀡𑀺.

𑀑𑀖𑀸𑀢𑀺𑀕𑀁 𑀧𑀼𑀝𑁆𑀞𑀼𑀫𑀓𑀸𑀫𑀫𑀸𑀕𑀫𑀦𑁆𑀢𑀺. 𑀑𑀖𑀸𑀢𑀺𑀕𑀦𑁆𑀢𑀺 𑀑𑀖𑀸𑀢𑀺𑀕𑀁 𑀑𑀖𑀁 𑀅𑀢𑀺𑀓𑁆𑀓𑀦𑁆𑀢𑀁 𑀲𑀫𑀢𑀺𑀓𑁆𑀓𑀦𑁆𑀢𑀁 𑀯𑀻𑀢𑀺𑀯𑀢𑁆𑀢𑀦𑁆𑀢𑀺 𑁋 𑀑𑀖𑀸𑀢𑀺𑀕𑀁. 𑀧𑀼𑀝𑁆𑀞𑀼𑀦𑁆𑀢𑀺 𑀧𑀼𑀝𑁆𑀞𑀼𑀁 𑀧𑀼𑀘𑁆𑀙𑀺𑀢𑀼𑀁 𑀬𑀸𑀘𑀺𑀢𑀼𑀁 𑀅𑀚𑁆𑀛𑁂𑀲𑀺𑀢𑀼𑀁 𑀧𑀲𑀸𑀤𑁂𑀢𑀼𑀁. 𑀅𑀓𑀸𑀫𑀫𑀸𑀕𑀫𑀦𑁆𑀢𑀺 𑀅𑀓𑀸𑀫𑀁 𑀧𑀼𑀝𑁆𑀞𑀼𑀁 𑀦𑀺𑀓𑁆𑀓𑀸𑀫𑀁 𑀘𑀢𑁆𑀢𑀓𑀸𑀫𑀁 𑀯𑀦𑁆𑀢𑀓𑀸𑀫𑀁 𑀫𑀼𑀢𑁆𑀢𑀓𑀸𑀫𑀁 𑀧𑀳𑀻𑀦𑀓𑀸𑀫𑀁 𑀧𑀝𑀺𑀦𑀺𑀲𑁆𑀲𑀝𑁆𑀞𑀓𑀸𑀫𑀁 𑀯𑀻𑀢𑀭𑀸𑀕𑀁 𑀯𑀺𑀕𑀢𑀭𑀸𑀕𑀁 𑀘𑀢𑁆𑀢𑀭𑀸𑀕𑀁 𑀯𑀦𑁆𑀢𑀭𑀸𑀕𑀁 𑀫𑀼𑀢𑁆𑀢𑀭𑀸𑀕𑀁 𑀧𑀳𑀻𑀦𑀭𑀸𑀕𑀁 𑀧𑀝𑀺𑀦𑀺𑀲𑁆𑀲𑀝𑁆𑀞𑀭𑀸𑀕𑀁 𑀆𑀕𑀫𑁆𑀳𑀸 𑀆𑀕𑀢𑀫𑁆𑀳𑀸 𑀉𑀧𑀸𑀕𑀢𑀫𑁆𑀳𑀸 𑀲𑀫𑁆𑀧𑀢𑁆𑀢𑀫𑁆𑀳𑀸 𑀢𑀬𑀸 𑀲𑀤𑁆𑀥𑀺𑀁 𑀲𑀫𑀸𑀕𑀢𑀫𑁆𑀳𑀸𑀢𑀺 𑁋 𑀑𑀖𑀸𑀢𑀺𑀕𑀁 𑀧𑀼𑀝𑁆𑀞𑀼𑀫𑀓𑀸𑀫𑀫𑀸𑀕𑀫𑀁.

𑀲𑀦𑁆𑀢𑀺𑀧𑀤𑀁 𑀩𑁆𑀭𑀽𑀳𑀺 𑀲𑀳𑀚𑀦𑁂𑀢𑁆𑀢𑀸𑀢𑀺. 𑀲𑀦𑁆𑀢𑀻𑀢𑀺 𑀏𑀓𑁂𑀦 𑀆𑀓𑀸𑀭𑁂𑀦 𑀲𑀦𑁆𑀢𑀺𑀧𑀺 𑀲𑀦𑁆𑀢𑀺𑀧𑀤𑀫𑁆𑀧𑀺 [𑀲𑀦𑁆𑀢𑀺𑀧𑀤𑀦𑁆𑀢𑀺 (𑀓.)] 𑀢𑀁𑀬𑁂𑀯 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀲𑀦𑁆𑀢𑀫𑁂𑀢𑀁 𑀧𑀤𑀁, 𑀧𑀡𑀻𑀢𑀫𑁂𑀢𑀁 𑀧𑀤𑀁, 𑀬𑀤𑀺𑀤𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺. 𑀅𑀣𑀸𑀧𑀭𑁂𑀦𑀸𑀓𑀸𑀭𑁂𑀦 𑀬𑁂 𑀥𑀫𑁆𑀫𑀸 𑀲𑀦𑁆𑀢𑀸𑀥𑀺𑀕𑀫𑀸𑀬 𑀲𑀦𑁆𑀢𑀺𑀨𑀼𑀲𑀦𑀸𑀬 𑀲𑀦𑁆𑀢𑀺𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀲𑀦𑁆𑀢𑀺𑀧𑀤𑀸. 𑀲𑀦𑁆𑀢𑀺𑀧𑀤𑀁 𑀢𑀸𑀡𑀧𑀤𑀁 𑀮𑁂𑀡𑀧𑀤𑀁 𑀲𑀭𑀡𑀧𑀤𑀁 𑀅𑀪𑀬𑀧𑀤𑀁 𑀅𑀘𑁆𑀘𑀼𑀢𑀧𑀤𑀁 𑀅𑀫𑀢𑀧𑀤𑀁 𑀦𑀺𑀩𑁆𑀩𑀸𑀦𑀧𑀤𑀁 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀺. 𑀲𑀳𑀚𑀦𑁂𑀢𑁆𑀢𑀸𑀢𑀺 𑀦𑁂𑀢𑁆𑀢𑀁 𑀯𑀼𑀘𑁆𑀘𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁. 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀦𑁂𑀢𑁆𑀢𑀜𑁆𑀘 𑀚𑀺𑀦𑀪𑀸𑀯𑁄 𑀘 𑀩𑁄𑀥𑀺𑀬𑀸 𑀫𑀽𑀮𑁂 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀏𑀓𑀲𑁆𑀫𑀺𑀁 𑀔𑀡𑁂 𑀉𑀧𑁆𑀧𑀦𑁆𑀦𑁄, 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀲𑀳𑀚𑀦𑁂𑀢𑁆𑀢𑁄𑀢𑀺 𑁋 𑀲𑀦𑁆𑀢𑀺𑀧𑀤𑀁 𑀩𑁆𑀭𑀽𑀳𑀺 𑀲𑀳𑀚𑀦𑁂𑀢𑁆𑀢.

𑀬𑀣𑀸𑀢𑀘𑁆𑀙𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺 𑀬𑀣𑀸𑀢𑀘𑁆𑀙𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁…𑀧𑁂… 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺. 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔𑀸𑀳𑀺…𑀧𑁂… 𑀧𑀓𑀸𑀲𑁂𑀳𑀻𑀢𑀺 𑁋 𑀬𑀣𑀸𑀢𑀘𑁆𑀙𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀲𑀼𑀢𑁆𑀯𑀸𑀦𑀳𑀁 𑀯𑀻𑀭 𑀅𑀓𑀸𑀫𑀓𑀸𑀫𑀺𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀚𑀢𑀼𑀓𑀡𑁆𑀡𑀺]

𑀑𑀖𑀸𑀢𑀺𑀕𑀁 𑀧𑀼𑀝𑁆𑀞𑀼𑀫𑀓𑀸𑀫𑀫𑀸𑀕𑀫𑀁;

𑀲𑀦𑁆𑀢𑀺𑀧𑀤𑀁 𑀩𑁆𑀭𑀽𑀳𑀺 𑀲𑀳𑀚𑀦𑁂𑀢𑁆𑀢, 𑀬𑀣𑀸𑀢𑀘𑁆𑀙𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢’’𑀦𑁆𑀢𑀺.

𑁬𑁬. 𑀪𑀕𑀯𑀸 𑀳𑀺 𑀓𑀸𑀫𑁂 𑀅𑀪𑀺𑀪𑀼𑀬𑁆𑀬 𑀇𑀭𑀺𑀬𑀢𑀺, 𑀆𑀤𑀺𑀘𑁆𑀘𑁄𑀯 𑀧𑀣𑀯𑀺𑀁 𑀢𑁂𑀚𑀻 𑀢𑁂𑀚𑀲𑀸;

𑀧𑀭𑀺𑀢𑁆𑀢𑀧𑀜𑁆𑀜𑀲𑁆𑀲 𑀫𑁂 𑀪𑀽𑀭𑀺𑀧𑀜𑁆𑀜𑁄, 𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁;

𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀁.

𑀪𑀕𑀯𑀸 𑀳𑀺 𑀓𑀸𑀫𑁂 𑀅𑀪𑀺𑀪𑀼𑀬𑁆𑀬 𑀇𑀭𑀺𑀬𑀢𑀻𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀪𑀕𑀯𑀸 𑀯𑀢𑁆𑀣𑀼𑀓𑀸𑀫𑁂 𑀧𑀭𑀺𑀚𑀸𑀦𑀺𑀢𑁆𑀯𑀸 𑀓𑀺𑀮𑁂𑀲𑀓𑀸𑀫𑁂 𑀧𑀳𑀸𑀬 𑀅𑀪𑀺𑀪𑀼𑀬𑁆𑀬 𑀅𑀪𑀺𑀪𑀯𑀺𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑁂𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀻𑀢𑀺 𑁋 𑀪𑀕𑀯𑀸 𑀳𑀺 𑀓𑀸𑀫𑁂 𑀅𑀪𑀺𑀪𑀼𑀬𑁆𑀬 𑀇𑀭𑀺𑀬𑀢𑀺.

𑀆𑀤𑀺𑀘𑁆𑀘𑁄𑀯 𑀧𑀣𑀯𑀺𑀁 𑀢𑁂𑀚𑀻 𑀢𑁂𑀚𑀲𑀸𑀢𑀺 𑀆𑀤𑀺𑀘𑁆𑀘𑁄 𑀯𑀼𑀘𑁆𑀘𑀢𑀺 𑀲𑀽𑀭𑀺𑀬𑁄 [𑀲𑀼𑀭𑀺𑀬𑁄 (𑀲𑁆𑀬𑀸.)]. 𑀧𑀣𑀯𑀻 𑀯𑀼𑀘𑁆𑀘𑀢𑀺 𑀚𑀕𑀢𑀻 [𑀚𑀭𑀸 (𑀲𑁆𑀬𑀸.)]. 𑀬𑀣𑀸 𑀲𑀽𑀭𑀺𑀬𑁄 𑀢𑁂𑀚𑀻 𑀢𑁂𑀚𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀣𑀯𑀺𑀁 𑀅𑀪𑀺𑀪𑀼𑀬𑁆𑀬 𑀅𑀪𑀺𑀪𑀯𑀺𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀲𑀦𑁆𑀢𑀸𑀧𑀬𑀺𑀢𑁆𑀯𑀸 𑀲𑀩𑁆𑀩𑀁 𑀆𑀓𑀸𑀲𑀕𑀢𑀁 𑀢𑀫𑀕𑀢𑀁 𑀅𑀪𑀺𑀯𑀺𑀳𑀘𑁆𑀘 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀆𑀮𑁄𑀓𑀁 𑀤𑀲𑁆𑀲𑀬𑀺𑀢𑁆𑀯𑀸 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀕𑀕𑀦𑀧𑀣𑁂 [𑀕𑀫𑀦𑀧𑀣𑁂 (𑀲𑁆𑀬𑀸.) 𑀅𑀝𑁆𑀞𑀓𑀣𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀪𑀕𑀯𑀸 𑀜𑀸𑀡𑀢𑁂𑀚𑀻 𑀜𑀸𑀡𑀢𑁂𑀚𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀩𑁆𑀩𑀁 𑀅𑀪𑀺𑀲𑀗𑁆𑀔𑀸𑀭𑀲𑀫𑀼𑀤𑀬𑀁…𑀧𑁂… 𑀓𑀺𑀮𑁂𑀲𑀢𑀫𑀁 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀜𑀸𑀡𑀸𑀮𑁄𑀓𑀁 𑀤𑀲𑁆𑀲𑁂𑀢𑁆𑀯𑀸 𑀯𑀢𑁆𑀣𑀼𑀓𑀸𑀫𑁂 𑀧𑀭𑀺𑀚𑀸𑀦𑀺𑀢𑁆𑀯𑀸 𑀓𑀺𑀮𑁂𑀲𑀓𑀸𑀫𑁂 𑀧𑀳𑀸𑀬 𑀅𑀪𑀺𑀪𑀼𑀬𑁆𑀬 𑀅𑀪𑀺𑀪𑀯𑀺𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑁂𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀻𑀢𑀺 𑁋 𑀆𑀤𑀺𑀘𑁆𑀘𑁄𑀯 𑀧𑀣𑀯𑀺𑀁 𑀢𑁂𑀚𑀻 𑀢𑁂𑀚𑀲𑀸.

𑀧𑀭𑀺𑀢𑁆𑀢𑀧𑀜𑁆𑀜𑀲𑁆𑀲 𑀫𑁂 𑀪𑀽𑀭𑀺𑀧𑀜𑁆𑀜𑁄𑀢𑀺 𑀅𑀳𑀫𑀲𑁆𑀫𑀺 𑀧𑀭𑀺𑀢𑁆𑀢𑀧𑀜𑁆𑀜𑁄 𑀑𑀫𑀓𑀧𑀜𑁆𑀜𑁄 𑀮𑀸𑀫𑀓𑀧𑀜𑁆𑀜𑁄 𑀙𑀢𑀼𑀓𑁆𑀓𑀧𑀜𑁆𑀜𑁄. 𑀢𑁆𑀯𑀫𑁆𑀧𑀺 𑀫𑀳𑀸𑀧𑀜𑁆𑀜𑁄 𑀧𑀼𑀣𑀼𑀧𑀜𑁆𑀜𑁄 𑀳𑀸𑀲𑀧𑀜𑁆𑀜𑁄 𑀚𑀯𑀦𑀧𑀜𑁆𑀜𑁄 𑀢𑀺𑀓𑁆𑀔𑀧𑀜𑁆𑀜𑁄 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄. 𑀪𑀽𑀭𑀺 𑀯𑀼𑀘𑁆𑀘𑀢𑀺 𑀧𑀣𑀯𑀻. 𑀪𑀕𑀯𑀸 𑀢𑀸𑀬 𑀧𑀣𑀯𑀺𑀲𑀫𑀸𑀬 𑀧𑀜𑁆𑀜𑀸𑀬 𑀯𑀺𑀧𑀼𑀮𑀸𑀬 𑀯𑀺𑀢𑁆𑀣𑀢𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑁋 𑀧𑀭𑀺𑀢𑁆𑀢𑀧𑀜𑁆𑀜𑀲𑁆𑀲 𑀫𑁂 𑀪𑀽𑀭𑀺𑀧𑀜𑁆𑀜𑁄.

𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀦𑁆𑀢𑀺. 𑀥𑀫𑁆𑀫𑀦𑁆𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂…𑀧𑁂… 𑀦𑀺𑀩𑁆𑀩𑀸𑀦𑀜𑁆𑀘 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀺. 𑀬𑀫𑀳𑀁 𑀯𑀺𑀚𑀜𑁆𑀜𑀦𑁆𑀢𑀺 𑀬𑀫𑀳𑀁 𑀚𑀸𑀦𑁂𑀬𑁆𑀬𑀁 𑀆𑀚𑀸𑀦𑁂𑀬𑁆𑀬𑀁 𑀯𑀺𑀚𑀸𑀦𑁂𑀬𑁆𑀬𑀁 𑀧𑀝𑀺𑀚𑀸𑀦𑁂𑀬𑁆𑀬𑀁 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀁 𑀅𑀥𑀺𑀕𑀘𑁆𑀙𑁂𑀬𑁆𑀬𑀁 𑀨𑀲𑁆𑀲𑁂𑀬𑁆𑀬𑀁 𑀲𑀘𑁆𑀙𑀺𑀓𑀭𑁂𑀬𑁆𑀬𑀦𑁆𑀢𑀺 𑁋 𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁.

𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀦𑁆𑀢𑀺 𑀇𑀥𑁂𑀯 𑀚𑀸𑀢𑀺𑀚𑀭𑀸𑀬 𑀫𑀭𑀡𑀲𑁆𑀲 𑀧𑀳𑀸𑀦𑀁 𑀯𑀽𑀧𑀲𑀫𑀁 𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑁋 𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀪𑀕𑀯𑀸 𑀳𑀺 𑀓𑀸𑀫𑁂 𑀅𑀪𑀺𑀪𑀼𑀬𑁆𑀬 𑀇𑀭𑀺𑀬𑀢𑀺, 𑀆𑀤𑀺𑀘𑁆𑀘𑁄𑀯 𑀧𑀣𑀯𑀺𑀁 𑀢𑁂𑀚𑀻 𑀢𑁂𑀚𑀲𑀸;

𑀧𑀭𑀺𑀢𑁆𑀢𑀧𑀜𑁆𑀜𑀲𑁆𑀲 𑀫𑁂 𑀪𑀽𑀭𑀺𑀧𑀜𑁆𑀜𑁄, 𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁;

𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦’’𑀦𑁆𑀢𑀺.

𑁬𑁭. 𑀓𑀸𑀫𑁂𑀲𑀼 𑀯𑀺𑀦𑀬 𑀕𑁂𑀥𑀁, [𑀚𑀢𑀼𑀓𑀡𑁆𑀡𑀻𑀢𑀺 𑀪𑀕𑀯𑀸]

𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄;

𑀉𑀕𑁆𑀕𑀳𑀺𑀢𑀁 𑀦𑀺𑀭𑀢𑁆𑀢𑀁 𑀯𑀸, 𑀫𑀸 𑀢𑁂 𑀯𑀺𑀚𑁆𑀚𑀺𑀢𑁆𑀣 𑀓𑀺𑀜𑁆𑀘𑀦𑀁.

𑀓𑀸𑀫𑁂𑀲𑀼 𑀯𑀺𑀦𑀬 𑀕𑁂𑀥𑀦𑁆𑀢𑀺. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀕𑁂𑀥𑀦𑁆𑀢𑀺 𑀕𑁂𑀥𑁄 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀓𑀸𑀫𑁂𑀲𑀼 𑀯𑀺𑀦𑀬 𑀕𑁂𑀥𑀦𑁆𑀢𑀺 𑀓𑀸𑀫𑁂𑀲𑀼 𑀕𑁂𑀥𑀁 𑀯𑀺𑀦𑀬 𑀧𑀝𑀺𑀯𑀺𑀦𑀬 𑀧𑀚𑀳 𑀯𑀺𑀦𑁄𑀤𑁂𑀳𑀺 𑀩𑁆𑀬𑀦𑁆𑀢𑀻𑀓𑀭𑁄𑀳𑀺 𑀅𑀦𑀪𑀸𑀯𑀁 𑀕𑀫𑁂𑀳𑀻𑀢𑀺 𑁋 𑀓𑀸𑀫𑁂𑀲𑀼 𑀯𑀺𑀦𑀬 𑀕𑁂𑀥𑀁. 𑀚𑀢𑀼𑀓𑀡𑁆𑀡𑀻𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀕𑁄𑀢𑁆𑀢𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀚𑀢𑀼𑀓𑀡𑁆𑀡𑀻𑀢𑀺 𑀪𑀕𑀯𑀸.

𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄𑀢𑀺. 𑀦𑁂𑀓𑁆𑀔𑀫𑁆𑀫𑀦𑁆𑀢𑀺 𑀲𑀫𑁆𑀫𑀸𑀧𑀝𑀺𑀧𑀤𑀁 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀁 𑀅𑀦𑁆𑀯𑀢𑁆𑀣𑀧𑀝𑀺𑀧𑀤𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀁 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀁 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀁 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑁂 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑁂 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀦𑀺𑀩𑁆𑀩𑀸𑀦𑀜𑁆𑀘 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁 𑀔𑁂𑀫𑀢𑁄 𑀢𑀸𑀡𑀢𑁄 𑀮𑁂𑀡𑀢𑁄 𑀲𑀭𑀡𑀢𑁄 𑀲𑀭𑀡𑀻𑀪𑀽𑀢𑀢𑁄 𑀅𑀪𑀬𑀢𑁄 𑀅𑀘𑁆𑀘𑀼𑀢𑀢𑁄 𑀅𑀫𑀢𑀢𑁄 𑀦𑀺𑀩𑁆𑀩𑀸𑀦𑀢𑁄 𑀤𑀝𑁆𑀞𑀼𑀁 𑀧𑀲𑁆𑀲𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄.

𑀉𑀕𑁆𑀕𑀳𑀺𑀢𑀁 𑀦𑀺𑀭𑀢𑁆𑀢𑀁 𑀯𑀸𑀢𑀺. 𑀉𑀕𑁆𑀕𑀳𑀺𑀢𑀦𑁆𑀢𑀺 𑀢𑀡𑁆𑀳𑀸𑀯𑀲𑁂𑀦 𑀤𑀺𑀝𑁆𑀞𑀺𑀯𑀲𑁂𑀦 𑀕𑀳𑀺𑀢𑀁 𑀧𑀭𑀸𑀫𑀝𑁆𑀞𑀁 𑀅𑀪𑀺𑀦𑀺𑀯𑀺𑀝𑁆𑀞𑀁 𑀅𑀚𑁆𑀛𑁄𑀲𑀺𑀢𑀁 𑀅𑀥𑀺𑀫𑀼𑀢𑁆𑀢𑀁. 𑀦𑀺𑀭𑀢𑁆𑀢𑀁 𑀯𑀸𑀢𑀺 𑀦𑀺𑀭𑀢𑁆𑀢𑀁 𑀯𑀸 𑀫𑀼𑀜𑁆𑀘𑀺𑀢𑀩𑁆𑀩𑀁 𑀯𑀺𑀚𑀳𑀺𑀢𑀩𑁆𑀩𑀁 𑀯𑀺𑀦𑁄𑀤𑀺𑀢𑀩𑁆𑀩𑀁 𑀩𑁆𑀬𑀦𑁆𑀢𑀻𑀓𑀸𑀢𑀩𑁆𑀩𑀁 𑀅𑀦𑀪𑀸𑀯𑀁 𑀕𑀫𑁂𑀢𑀩𑁆𑀩𑀦𑁆𑀢𑀺 𑁋 𑀉𑀕𑁆𑀕𑀳𑀺𑀢𑀁 𑀦𑀺𑀭𑀢𑁆𑀢𑀁 𑀯𑀸.

𑀫𑀸 𑀢𑁂 𑀯𑀺𑀚𑁆𑀚𑀺𑀢𑁆𑀣 𑀓𑀺𑀜𑁆𑀘𑀦𑀦𑁆𑀢𑀺 𑀭𑀸𑀕𑀓𑀺𑀜𑁆𑀘𑀦𑀁 𑀤𑁄𑀲𑀓𑀺𑀜𑁆𑀘𑀦𑀁 𑀫𑁄𑀳𑀓𑀺𑀜𑁆𑀘𑀦𑀁 𑀫𑀸𑀦𑀓𑀺𑀜𑁆𑀘𑀦𑀁 𑀤𑀺𑀝𑁆𑀞𑀺𑀓𑀺𑀜𑁆𑀘𑀦𑀁 𑀓𑀺𑀮𑁂𑀲𑀓𑀺𑀜𑁆𑀘𑀦𑀁 𑀤𑀼𑀘𑁆𑀘𑀭𑀺𑀢𑀓𑀺𑀜𑁆𑀘𑀦𑀁. 𑀇𑀤𑀁 𑀓𑀺𑀜𑁆𑀘𑀦𑀁 [𑀇𑀫𑁂 𑀓𑀺𑀜𑁆𑀘𑀦𑀸 (𑀓.)] 𑀢𑀼𑀬𑁆𑀳𑀁 𑀫𑀸 𑀯𑀺𑀚𑁆𑀚𑀺𑀢𑁆𑀣 𑀫𑀸 𑀧𑀯𑀺𑀚𑁆𑀚𑀺𑀢𑁆𑀣 𑀫𑀸 𑀲𑀁𑀯𑀺𑀚𑁆𑀚𑀺𑀢𑁆𑀣 𑀧𑀚𑀳 𑀯𑀺𑀦𑁄𑀤𑁂𑀳𑀺 𑀩𑁆𑀬𑀦𑁆𑀢𑀻𑀓𑀭𑁄𑀳𑀺 𑀅𑀦𑀪𑀸𑀯𑀁 𑀕𑀫𑁂𑀳𑀻𑀢𑀺 𑁋 𑀫𑀸 𑀢𑁂 𑀯𑀺𑀚𑁆𑀚𑀺𑀢𑁆𑀣 𑀓𑀺𑀜𑁆𑀘𑀦𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀓𑀸𑀫𑁂𑀲𑀼 𑀯𑀺𑀦𑀬 𑀕𑁂𑀥𑀁, [𑀚𑀢𑀼𑀓𑀡𑁆𑀡𑀻𑀢𑀺 𑀪𑀕𑀯𑀸]

𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄;

𑀉𑀕𑁆𑀕𑀳𑀺𑀢𑀁 𑀦𑀺𑀭𑀢𑁆𑀢𑀁 𑀯𑀸, 𑀫𑀸 𑀢𑁂 𑀯𑀺𑀚𑁆𑀚𑀺𑀢𑁆𑀣 𑀓𑀺𑀜𑁆𑀘𑀦’’𑀦𑁆𑀢𑀺.

𑁬𑁮. 𑀬𑀁 𑀧𑀼𑀩𑁆𑀩𑁂 𑀢𑀁 𑀯𑀺𑀲𑁄𑀲𑁂𑀳𑀺, 𑀧𑀘𑁆𑀙𑀸 𑀢𑁂 𑀫𑀸𑀳𑀼 𑀓𑀺𑀜𑁆𑀘𑀦𑀁;

𑀫𑀚𑁆𑀛𑁂 𑀘𑁂 𑀦𑁄 𑀕𑀳𑁂𑀲𑁆𑀲𑀲𑀺, 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀺.

𑀬𑀁 𑀧𑀼𑀩𑁆𑀩𑁂 𑀢𑀁 𑀯𑀺𑀲𑁄𑀲𑁂𑀳𑀻𑀢𑀺 𑀅𑀢𑀻𑀢𑁂 𑀲𑀗𑁆𑀔𑀸𑀭𑁂 𑀆𑀭𑀩𑁆𑀪 𑀬𑁂 𑀓𑀺𑀮𑁂𑀲𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀢𑁂 𑀓𑀺𑀮𑁂𑀲𑁂 𑀲𑁄𑀲𑁂𑀳𑀺 𑀯𑀺𑀲𑁄𑀲𑁂𑀳𑀺 𑀲𑀼𑀓𑁆𑀔𑀸𑀧𑁂𑀳𑀺 𑀯𑀺𑀲𑀼𑀓𑁆𑀔𑀸𑀧𑁂𑀳𑀺 𑀅𑀩𑀻𑀚𑀁 𑀓𑀭𑁄𑀳𑀺 𑀧𑀚𑀳 𑀯𑀺𑀦𑁄𑀤𑁂𑀳𑀺 𑀩𑁆𑀬𑀦𑁆𑀢𑀻𑀓𑀭𑁄𑀳𑀺 𑀅𑀦𑀪𑀸𑀯𑀁 𑀕𑀫𑁂𑀳𑀻𑀢𑀺 𑁋 𑀏𑀯𑀫𑁆𑀧𑀺 𑀬𑀁 𑀧𑀼𑀩𑁆𑀩𑁂 𑀢𑀁 𑀯𑀺𑀲𑁄𑀲𑁂𑀳𑀺. 𑀅𑀣 𑀯𑀸, 𑀬𑁂 𑀅𑀢𑀻𑀢𑀸 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀸 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀢𑁂 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑁂 𑀲𑁄𑀲𑁂𑀳𑀺 𑀯𑀺𑀲𑁄𑀲𑁂𑀳𑀺 𑀲𑀼𑀓𑁆𑀔𑀸𑀧𑁂𑀳𑀺 𑀯𑀺𑀲𑀼𑀓𑁆𑀔𑀸𑀧𑁂𑀳𑀺 𑀅𑀩𑀻𑀚𑀁 [𑀅𑀯𑀻𑀚𑀁 (𑀲𑁆𑀬𑀸.)] 𑀓𑀭𑁄𑀳𑀺 𑀧𑀚𑀳 𑀯𑀺𑀦𑁄𑀤𑁂𑀳𑀺 𑀩𑁆𑀬𑀦𑁆𑀢𑀻𑀓𑀭𑁄𑀳𑀺 𑀅𑀦𑀪𑀸𑀯𑀁 𑀕𑀫𑁂𑀳𑀻𑀢𑀺 𑁋 𑀏𑀯𑀫𑁆𑀧𑀺 𑀬𑀁 𑀧𑀼𑀩𑁆𑀩𑁂 𑀢𑀁 𑀯𑀺𑀲𑁄𑀲𑁂𑀳𑀺.

𑀧𑀘𑁆𑀙𑀸 𑀢𑁂 𑀫𑀸𑀳𑀼 𑀓𑀺𑀜𑁆𑀘𑀦𑀦𑁆𑀢𑀺 𑀧𑀘𑁆𑀙𑀸 𑀯𑀼𑀘𑁆𑀘𑀢𑀺 𑀅𑀦𑀸𑀕𑀢𑁂 𑀲𑀗𑁆𑀔𑀸𑀭𑁂 𑀆𑀭𑀩𑁆𑀪 𑀭𑀸𑀕𑀓𑀺𑀜𑁆𑀘𑀦𑀁 𑀤𑁄𑀲𑀓𑀺𑀜𑁆𑀘𑀦𑀁 𑀫𑁄𑀳𑀓𑀺𑀜𑁆𑀘𑀦𑀁 𑀫𑀸𑀦𑀓𑀺𑀜𑁆𑀘𑀦𑀁 𑀤𑀺𑀝𑁆𑀞𑀺𑀓𑀺𑀜𑁆𑀘𑀦𑀁 𑀓𑀺𑀮𑁂𑀲𑀓𑀺𑀜𑁆𑀘𑀦𑀁 𑀤𑀼𑀘𑁆𑀘𑀭𑀺𑀢𑀓𑀺𑀜𑁆𑀘𑀦𑀁. 𑀇𑀤𑀁 𑀓𑀺𑀜𑁆𑀘𑀦𑀁 𑀢𑀼𑀬𑁆𑀳𑀁 𑀫𑀸 𑀅𑀳𑀼 𑀫𑀸 𑀅𑀳𑁄𑀲𑀺 𑀫𑀸 𑀚𑀦𑁂𑀲𑀺 [𑀫𑀸 𑀚𑀦𑁂𑀳𑀺 (𑀲𑁆𑀬𑀸.) 𑀢𑀣𑀸𑀯𑀲𑁂𑀲𑁂𑀲𑀼 𑀤𑁆𑀯𑀻𑀲𑀼 𑀧𑀤𑁂𑀲𑀼𑀧𑀺] 𑀫𑀸 𑀲𑀜𑁆𑀚𑀦𑁂𑀲𑀺 𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀲𑀺 𑀧𑀚𑀳 𑀯𑀺𑀦𑁄𑀤𑁂𑀳𑀺 𑀩𑁆𑀬𑀦𑁆𑀢𑀻𑀓𑀭𑁄𑀳𑀺 𑀅𑀦𑀪𑀸𑀯𑀁 𑀕𑀫𑁂𑀳𑀻𑀢𑀺 𑁋 𑀧𑀘𑁆𑀙𑀸 𑀢𑁂 𑀫𑀸𑀳𑀼 𑀓𑀺𑀜𑁆𑀘𑀦𑀁.

𑀫𑀚𑁆𑀛𑁂 𑀘𑁂 𑀦𑁄 𑀕𑀳𑁂𑀲𑁆𑀲𑀲𑀻𑀢𑀺 𑀫𑀚𑁆𑀛𑁂 𑀯𑀼𑀘𑁆𑀘𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀭𑀽𑀧𑀁 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀁. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀲𑀗𑁆𑀔𑀸𑀭𑁂 𑀢𑀡𑁆𑀳𑀸𑀯𑀲𑁂𑀦 𑀤𑀺𑀝𑁆𑀞𑀺𑀯𑀲𑁂𑀦 𑀦 𑀕𑀳𑁂𑀲𑁆𑀲𑀲𑀺 𑀦 𑀢𑀡𑁆𑀳𑀺𑀲𑁆𑀲𑀲𑀺 𑀦 𑀧𑀭𑀸𑀫𑀲𑀺𑀲𑁆𑀲𑀲𑀺 𑀦 𑀦𑀦𑁆𑀤𑀺𑀲𑁆𑀲𑀲𑀺 𑀦𑀸𑀪𑀺𑀦𑀦𑁆𑀤𑀺𑀲𑁆𑀲𑀲𑀺 𑀦 𑀅𑀚𑁆𑀛𑁄𑀲𑀺𑀲𑁆𑀲𑀲𑀺. 𑀅𑀪𑀺𑀦𑀦𑁆𑀤𑀦𑀁 𑀅𑀪𑀺𑀯𑀤𑀦𑀁 𑀅𑀚𑁆𑀛𑁄𑀲𑀸𑀦𑀁 𑀕𑀸𑀳𑀁 𑀧𑀭𑀸𑀫𑀸𑀲𑀁 𑀅𑀪𑀺𑀦𑀺𑀯𑁂𑀲𑀁 𑀧𑀚𑀳𑀺𑀲𑁆𑀲𑀲𑀺 𑀯𑀺𑀦𑁄𑀤𑁂𑀲𑁆𑀲𑀲𑀺 𑀩𑁆𑀬𑀦𑁆𑀢𑀻𑀓𑀭𑀺𑀲𑁆𑀲𑀲𑀺 𑀅𑀦𑀪𑀸𑀯𑀁 𑀕𑀫𑁂𑀲𑁆𑀲𑀲𑀻𑀢𑀺 𑁋 𑀫𑀚𑁆𑀛𑁂 𑀘𑁂 𑀦𑁄 𑀕𑀳𑁂𑀲𑁆𑀲𑀲𑀺.

𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀻𑀢𑀺 𑀭𑀸𑀕𑀲𑁆𑀲 𑀉𑀧𑀲𑀫𑀺𑀢𑀢𑁆𑀢𑀸 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀺, 𑀤𑁄𑀲𑀲𑁆𑀲…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀲𑀦𑁆𑀢𑀢𑁆𑀢𑀸 𑀲𑀫𑀺𑀢𑀢𑁆𑀢𑀸 𑀉𑀧𑀲𑀫𑀺𑀢𑀢𑁆𑀢𑀸 𑀯𑀽𑀧𑀲𑀫𑀺𑀢𑀢𑁆𑀢𑀸 𑀦𑀺𑀚𑁆𑀛𑀸𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑀢𑁆𑀢𑀸 𑀯𑀺𑀕𑀢𑀢𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸 𑀲𑀦𑁆𑀢𑁄 𑀉𑀧𑀲𑀦𑁆𑀢𑁄 𑀯𑀽𑀧𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄 𑀘𑀭𑀺𑀲𑁆𑀲𑀲𑀺 𑀯𑀺𑀳𑀭𑀺𑀲𑁆𑀲𑀲𑀺 𑀇𑀭𑀺𑀬𑀺𑀲𑁆𑀲𑀲𑀺 𑀯𑀢𑁆𑀢𑀺𑀲𑁆𑀲𑀲𑀺 𑀧𑀸𑀮𑁂𑀲𑁆𑀲𑀲𑀺 𑀬𑀧𑁂𑀲𑁆𑀲𑀲𑀺 𑀬𑀸𑀧𑁂𑀲𑁆𑀲𑀲𑀻𑀢𑀺 𑁋 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀁 𑀧𑀼𑀩𑁆𑀩𑁂 𑀢𑀁 𑀯𑀺𑀲𑁄𑀲𑁂𑀳𑀺, 𑀧𑀘𑁆𑀙𑀸 𑀢𑁂 𑀫𑀸𑀳𑀼 𑀓𑀺𑀜𑁆𑀘𑀦𑀁;

𑀫𑀚𑁆𑀛𑁂 𑀘𑁂 𑀦𑁄 𑀕𑀳𑁂𑀲𑁆𑀲𑀲𑀺, 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀻’’𑀢𑀺.

𑁬𑁯. 𑀲𑀩𑁆𑀩𑀲𑁄 𑀦𑀸𑀫𑀭𑀽𑀧𑀲𑁆𑀫𑀺𑀁, 𑀯𑀻𑀢𑀕𑁂𑀥𑀲𑁆𑀲 𑀩𑁆𑀭𑀸𑀳𑁆𑀫𑀡;

𑀆𑀲𑀯𑀸𑀲𑁆𑀲 𑀦 𑀯𑀺𑀚𑁆𑀚𑀦𑁆𑀢𑀺, 𑀬𑁂𑀳𑀺 𑀫𑀘𑁆𑀘𑀼𑀯𑀲𑀁 𑀯𑀚𑁂.

𑀲𑀩𑁆𑀩𑀲𑁄 𑀦𑀸𑀫𑀭𑀽𑀧𑀲𑁆𑀫𑀺𑀁 𑀯𑀻𑀢𑀕𑁂𑀥𑀲𑁆𑀲 𑀩𑁆𑀭𑀸𑀳𑁆𑀫𑀡𑀸𑀢𑀺. 𑀲𑀩𑁆𑀩𑀲𑁄𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁 𑀧𑀭𑀺𑀬𑀸𑀤𑀺𑀬𑀦𑀯𑀘𑀦𑀫𑁂𑀢𑀁 𑀲𑀩𑁆𑀩𑀲𑁄𑀢𑀺. 𑀦𑀸𑀫𑀦𑁆𑀢𑀺 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸. 𑀭𑀽𑀧𑀦𑁆𑀢𑀺 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀭𑀽𑀧𑀁. 𑀕𑁂𑀥𑁄 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀲𑀩𑁆𑀩𑀲𑁄 𑀦𑀸𑀫𑀭𑀽𑀧𑀲𑁆𑀫𑀺𑀁 𑀯𑀻𑀢𑀕𑁂𑀥𑀲𑁆𑀲 𑀩𑁆𑀭𑀸𑀳𑁆𑀫𑀡𑀸𑀢𑀺 𑀲𑀩𑁆𑀩𑀲𑁄 𑀦𑀸𑀫𑀭𑀽𑀧𑀲𑁆𑀫𑀺𑀁 𑀯𑀻𑀢𑀕𑁂𑀥𑀲𑁆𑀲 𑀯𑀺𑀕𑀢𑀕𑁂𑀥𑀲𑁆𑀲 𑀘𑀢𑁆𑀢𑀕𑁂𑀥𑀲𑁆𑀲 𑀯𑀦𑁆𑀢𑀕𑁂𑀥𑀲𑁆𑀲 𑀫𑀼𑀢𑁆𑀢𑀕𑁂𑀥𑀲𑁆𑀲 𑀧𑀳𑀻𑀦𑀕𑁂𑀥𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀕𑁂𑀥𑀲𑁆𑀲 𑀯𑀻𑀢𑀭𑀸𑀕𑀲𑁆𑀲 𑀯𑀺𑀕𑀢𑀭𑀸𑀕𑀲𑁆𑀲 𑀘𑀢𑁆𑀢𑀭𑀸𑀕𑀲𑁆𑀲 𑀯𑀦𑁆𑀢𑀭𑀸𑀕𑀲𑁆𑀲 𑀫𑀼𑀢𑁆𑀢𑀭𑀸𑀕𑀲𑁆𑀲 𑀧𑀳𑀻𑀦𑀭𑀸𑀕𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀭𑀸𑀕𑀲𑁆𑀲𑀸𑀢𑀺 𑁋 𑀲𑀩𑁆𑀩𑀲𑁄 𑀦𑀸𑀫𑀭𑀽𑀧𑀲𑁆𑀫𑀺𑀁 𑀯𑀻𑀢𑀕𑁂𑀥𑀲𑁆𑀲 𑀩𑁆𑀭𑀸𑀳𑁆𑀫𑀡.

𑀆𑀲𑀯𑀸𑀲𑁆𑀲 𑀦 𑀯𑀺𑀚𑁆𑀚𑀦𑁆𑀢𑀻𑀢𑀺. 𑀆𑀲𑀯𑀸𑀢𑀺 𑀘𑀢𑁆𑀢𑀸𑀭𑁄 𑀆𑀲𑀯𑀸 𑁋 𑀓𑀸𑀫𑀸𑀲𑀯𑁄, 𑀪𑀯𑀸𑀲𑀯𑁄, 𑀤𑀺𑀝𑁆𑀞𑀸𑀲𑀯𑁄, 𑀅𑀯𑀺𑀚𑁆𑀚𑀸𑀲𑀯𑁄. 𑀅𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀦 𑀯𑀺𑀚𑁆𑀚𑀦𑁆𑀢𑀻𑀢𑀺 𑀇𑀫𑁂 𑀆𑀲𑀯𑀸 𑀢𑀲𑁆𑀲 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀆𑀲𑀯𑀸𑀲𑁆𑀲 𑀦 𑀯𑀺𑀚𑁆𑀚𑀦𑁆𑀢𑀺.

𑀬𑁂𑀳𑀺 𑀫𑀘𑁆𑀘𑀼𑀯𑀲𑀁 𑀯𑀚𑁂𑀢𑀺 𑀬𑁂𑀳𑀺 𑀆𑀲𑀯𑁂𑀳𑀺 𑀫𑀘𑁆𑀘𑀼𑀦𑁄 𑀯𑀸 𑀯𑀲𑀁 𑀕𑀘𑁆𑀙𑁂𑀬𑁆𑀬, 𑀫𑀭𑀡𑀲𑁆𑀲 𑀯𑀸 𑀯𑀲𑀁 𑀕𑀘𑁆𑀙𑁂𑀬𑁆𑀬, 𑀫𑀸𑀭𑀧𑀓𑁆𑀔𑀲𑁆𑀲 𑀯𑀸 𑀯𑀲𑀁 𑀕𑀘𑁆𑀙𑁂𑀬𑁆𑀬; 𑀢𑁂 𑀆𑀲𑀯𑀸 𑀢𑀲𑁆𑀲 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀬𑁂𑀳𑀺 𑀫𑀘𑁆𑀘𑀼𑀯𑀲𑀁 𑀯𑀚𑁂. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀲𑀩𑁆𑀩𑀲𑁄 𑀦𑀸𑀫𑀭𑀽𑀧𑀲𑁆𑀫𑀺𑀁, 𑀯𑀻𑀢𑀕𑁂𑀥𑀲𑁆𑀲 𑀩𑁆𑀭𑀸𑀳𑁆𑀫𑀡;

𑀆𑀲𑀯𑀸𑀲𑁆𑀲 𑀦 𑀯𑀺𑀚𑁆𑀚𑀦𑁆𑀢𑀺, 𑀬𑁂𑀳𑀺 𑀫𑀘𑁆𑀘𑀼𑀯𑀲𑀁 𑀯𑀚𑁂’’𑀢𑀺.

𑀲𑀳 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑀸…𑀧𑁂… 𑀲𑀢𑁆𑀣𑀸 𑀫𑁂 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻𑀢𑀺.

𑀚𑀢𑀼𑀓𑀡𑁆𑀡𑀺𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑀏𑀓𑀸𑀤𑀲𑀫𑁄.