𑁧𑁨. 𑀪𑀤𑁆𑀭𑀸𑀯𑀼𑀥𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄

𑁭𑁦. 𑀑𑀓𑀜𑁆𑀚𑀳𑀁 𑀢𑀡𑁆𑀳𑀘𑁆𑀙𑀺𑀤𑀁 𑀅𑀦𑁂𑀚𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀪𑀤𑁆𑀭𑀸𑀯𑀼𑀥𑁄]

𑀦𑀦𑁆𑀤𑀺𑀜𑁆𑀚𑀳𑀁 𑀑𑀖𑀢𑀺𑀡𑁆𑀡𑀁 𑀯𑀺𑀫𑀼𑀢𑁆𑀢𑀁;

𑀓𑀧𑁆𑀧𑀜𑁆𑀚𑀳𑀁 𑀅𑀪𑀺𑀬𑀸𑀘𑁂 𑀲𑀼𑀫𑁂𑀥𑀁, 𑀲𑀼𑀢𑁆𑀯𑀸𑀦 𑀦𑀸𑀕𑀲𑁆𑀲 𑀅𑀧𑀦𑀫𑀺𑀲𑁆𑀲𑀦𑁆𑀢𑀺 [𑀅𑀧𑀕𑀫𑀺𑀲𑁆𑀲𑀦𑁆𑀢𑀺 (𑀓.)] 𑀇𑀢𑁄.

𑀑𑀓𑀜𑁆𑀚𑀳𑀁 𑀢𑀡𑁆𑀳𑀘𑁆𑀙𑀺𑀤𑀁 𑀅𑀦𑁂𑀚𑀦𑁆𑀢𑀺. 𑀑𑀓𑀜𑁆𑀚𑀳𑀦𑁆𑀢𑀺 𑀭𑀽𑀧𑀥𑀸𑀢𑀼𑀬𑀸 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸 𑀬𑁂 𑀉𑀧𑀸𑀬𑀼𑀧𑀸𑀤𑀸𑀦𑀸 [𑀉𑀧𑀬𑀼𑀧𑀸𑀤𑀸𑀦𑀸 (𑀓.)] 𑀘𑁂𑀢𑀲𑁄 𑀅𑀥𑀺𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀸, 𑀢𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀑𑀓𑀜𑁆𑀚𑀳𑁄. 𑀯𑁂𑀤𑀦𑀸𑀥𑀸𑀢𑀼𑀬𑀸…𑀧𑁂… 𑀲𑀜𑁆𑀜𑀸𑀥𑀸𑀢𑀼𑀬𑀸… 𑀲𑀗𑁆𑀔𑀸𑀭𑀥𑀸𑀢𑀼𑀬𑀸… 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸 𑀬𑁂 𑀉𑀧𑀸𑀬𑀼𑀧𑀸𑀤𑀸𑀦𑀸 𑀘𑁂𑀢𑀲𑁄 𑀅𑀥𑀺𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀸, 𑀢𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀑𑀓𑀜𑁆𑀚𑀳𑁄.

𑀢𑀡𑁆𑀳𑀘𑁆𑀙𑀺𑀤𑀦𑁆𑀢𑀺. 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸. 𑀲𑀸 𑀢𑀡𑁆𑀳𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀙𑀺𑀦𑁆𑀦𑀸 𑀉𑀘𑁆𑀙𑀺𑀦𑁆𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀢𑀡𑁆𑀳𑀘𑁆𑀙𑀺𑀤𑁄. 𑀅𑀦𑁂𑀚𑁄𑀢𑀺 𑀏𑀚𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄 …𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀲𑀸 𑀏𑀚𑀸 𑀢𑀡𑁆𑀳𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀅𑀦𑁂𑀚𑁄. 𑀏𑀚𑀸𑀬 𑀧𑀳𑀻𑀦𑀢𑁆𑀢𑀸 𑀅𑀦𑁂𑀚𑁄 𑀪𑀕𑀯𑀸 𑀮𑀸𑀪𑁂𑀧𑀺 𑀦 𑀇𑀜𑁆𑀚𑀢𑀺, 𑀅𑀮𑀸𑀪𑁂𑀧𑀺 𑀦 𑀇𑀜𑁆𑀚𑀢𑀺, 𑀬𑀲𑁂𑀧𑀺 𑀦 𑀇𑀜𑁆𑀚𑀢𑀺, 𑀅𑀬𑀲𑁂𑀧𑀺 𑀦 𑀇𑀜𑁆𑀚𑀢𑀺, 𑀧𑀲𑀁𑀲𑀸𑀬𑀧𑀺 𑀦 𑀇𑀜𑁆𑀚𑀢𑀺, 𑀦𑀺𑀦𑁆𑀤𑀸𑀬𑀧𑀺 𑀦 𑀇𑀜𑁆𑀚𑀢𑀺, 𑀲𑀼𑀔𑁂𑀧𑀺 𑀦 𑀇𑀜𑁆𑀚𑀢𑀺, 𑀤𑀼𑀓𑁆𑀔𑁂𑀧𑀺 𑀦 𑀇𑀜𑁆𑀚𑀢𑀺 𑀦 𑀘𑀮𑀢𑀺 𑀦 𑀯𑁂𑀥𑀢𑀺 𑀦 𑀧𑀯𑁂𑀥𑀢𑀺 𑀦 𑀲𑀫𑁆𑀧𑀯𑁂𑀥𑀢𑀻𑀢𑀺. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀅𑀦𑁂𑀚𑁄𑀢𑀺 𑁋 𑀑𑀓𑀜𑁆𑀚𑀳𑀁 𑀢𑀡𑁆𑀳𑀘𑁆𑀙𑀺𑀤𑀁 𑀅𑀦𑁂𑀚𑀁. 𑀇𑀘𑁆𑀘𑀸𑀬𑀲𑁆𑀫𑀸 𑀪𑀤𑁆𑀭𑀸𑀯𑀼𑀥𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀆𑀬𑀲𑁆𑀫𑀸𑀢𑀺, 𑀧𑀺𑀬𑀯𑀘𑀦𑀁…𑀧𑁂… 𑀪𑀤𑁆𑀭𑀸𑀯𑀼𑀥𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁…𑀧𑁂… 𑀅𑀪𑀺𑀮𑀸𑀧𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀪𑀤𑁆𑀭𑀸𑀯𑀼𑀥𑁄.

𑀦𑀦𑁆𑀤𑀺𑀜𑁆𑀚𑀳𑀁 𑀑𑀖𑀢𑀺𑀡𑁆𑀡𑀁 𑀯𑀺𑀫𑀼𑀢𑁆𑀢𑀦𑁆𑀢𑀺 𑀦𑀦𑁆𑀤𑀻 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀲𑀸 𑀦𑀦𑁆𑀤𑀻 𑀲𑀸 𑀢𑀡𑁆𑀳𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀦𑀦𑁆𑀤𑀺𑀜𑁆𑀚𑀳𑁄. 𑀑𑀖𑀢𑀺𑀡𑁆𑀡𑀦𑁆𑀢𑀺 𑀪𑀕𑀯𑀸 𑀓𑀸𑀫𑁄𑀖𑀁 𑀢𑀺𑀡𑁆𑀡𑁄 𑀪𑀯𑁄𑀖𑀁 𑀢𑀺𑀡𑁆𑀡𑁄 𑀤𑀺𑀝𑁆𑀞𑁄𑀖𑀁 𑀢𑀺𑀡𑁆𑀡𑁄 𑀅𑀯𑀺𑀚𑁆𑀚𑁄𑀖𑀁 𑀢𑀺𑀡𑁆𑀡𑁄 𑀲𑀩𑁆𑀩𑀲𑀁𑀲𑀸𑀭𑀧𑀣𑀁 𑀢𑀺𑀡𑁆𑀡𑁄 𑀉𑀢𑁆𑀢𑀺𑀡𑁆𑀡𑁄 𑀦𑀺𑀢𑁆𑀣𑀺𑀡𑁆𑀡𑁄 𑀅𑀢𑀺𑀓𑁆𑀓𑀦𑁆𑀢𑁄 𑀲𑀫𑀢𑀺𑀓𑁆𑀓𑀦𑁆𑀢𑁄 𑀯𑀻𑀢𑀺𑀯𑀢𑁆𑀢𑁄. 𑀲𑁄 𑀯𑀼𑀢𑁆𑀣𑀯𑀸𑀲𑁄 𑀘𑀺𑀡𑁆𑀡𑀘𑀭𑀡𑁄…𑀧𑁂… 𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄𑀢𑀺 𑁋 𑀦𑀦𑁆𑀤𑀺𑀜𑁆𑀚𑀳𑀁 𑀑𑀖𑀢𑀺𑀡𑁆𑀡𑀁. 𑀯𑀺𑀫𑀼𑀢𑁆𑀢𑀦𑁆𑀢𑀺 𑀪𑀕𑀯𑀢𑁄 𑀭𑀸𑀕𑀸 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁, 𑀤𑁄𑀲𑀸 𑀘𑀺𑀢𑁆𑀢𑀁… 𑀫𑁄𑀳𑀸 𑀘𑀺𑀢𑁆𑀢𑀁…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀦𑁆𑀢𑀺 𑁋 𑀦𑀦𑁆𑀤𑀺𑀜𑁆𑀚𑀳𑀁 𑀑𑀖𑀢𑀺𑀡𑁆𑀡𑀁 𑀯𑀺𑀫𑀼𑀢𑁆𑀢𑀁.

𑀓𑀧𑁆𑀧𑀜𑁆𑀚𑀳𑀁 𑀅𑀪𑀺𑀬𑀸𑀘𑁂 𑀲𑀼𑀫𑁂𑀥𑀦𑁆𑀢𑀺. 𑀓𑀧𑁆𑀧𑀸𑀢𑀺 𑀤𑁆𑀯𑁂 𑀓𑀧𑁆𑀧𑀸 𑁋 𑀢𑀡𑁆𑀳𑀸𑀓𑀧𑁆𑀧𑁄 𑀘 𑀤𑀺𑀝𑁆𑀞𑀺𑀓𑀧𑁆𑀧𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀓𑀧𑁆𑀧𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀓𑀧𑁆𑀧𑁄. 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀢𑀡𑁆𑀳𑀸𑀓𑀧𑁆𑀧𑁄 𑀧𑀳𑀻𑀦𑁄 𑀤𑀺𑀝𑁆𑀞𑀺𑀓𑀧𑁆𑀧𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄. 𑀢𑀡𑁆𑀳𑀸𑀓𑀧𑁆𑀧𑀲𑁆𑀲 𑀧𑀳𑀻𑀦𑀢𑁆𑀢𑀸 𑀤𑀺𑀝𑁆𑀞𑀺𑀓𑀧𑁆𑀧𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀓𑀧𑁆𑀧𑀜𑁆𑀚𑀳𑁄. 𑀅𑀪𑀺𑀬𑀸𑀘𑁂𑀢𑀺 𑀬𑀸𑀘𑀸𑀫𑀺 𑀅𑀪𑀺𑀬𑀸𑀘𑀸𑀫𑀺 𑀅𑀚𑁆𑀛𑁂𑀲𑀸𑀫𑀺 𑀲𑀸𑀤𑀺𑀬𑀸𑀫𑀺 𑀧𑀢𑁆𑀣𑀬𑀸𑀫𑀺 𑀧𑀺𑀳𑀬𑀸𑀫𑀺 𑀚𑀧𑁆𑀧𑀸𑀫𑀺 𑀅𑀪𑀺𑀚𑀧𑁆𑀧𑀸𑀫𑀺. 𑀲𑀼𑀫𑁂𑀥𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸. 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀪𑀕𑀯𑀸 𑀇𑀫𑀸𑀬 𑀫𑁂𑀥𑀸𑀬 𑀧𑀜𑁆𑀜𑀸𑀬 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀸𑀕𑀢𑁄 𑀲𑀫𑀼𑀧𑀸𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀲𑀼𑀫𑁂𑀥𑁄𑀢𑀺 𑁋 𑀓𑀧𑁆𑀧𑀜𑁆𑀚𑀳𑀁 𑀅𑀪𑀺𑀬𑀸𑀘𑁂 𑀲𑀼𑀫𑁂𑀥𑀁.

𑀲𑀼𑀢𑁆𑀯𑀸𑀦 𑀦𑀸𑀕𑀲𑁆𑀲 𑀅𑀧𑀦𑀫𑀺𑀲𑁆𑀲𑀦𑁆𑀢𑀺 𑀇𑀢𑁄𑀢𑀺. 𑀦𑀸𑀕𑀲𑁆𑀲𑀸𑀢𑀺 𑀦𑀸𑀕𑁄. 𑀪𑀕𑀯𑀸 𑀆𑀕𑀼𑀁 𑀦 𑀓𑀭𑁄𑀢𑀻𑀢𑀺 𑀦𑀸𑀕𑁄, 𑀦 𑀕𑀘𑁆𑀙𑀢𑀻𑀢𑀺 𑀦𑀸𑀕𑁄, 𑀦 𑀆𑀕𑀘𑁆𑀙𑀢𑀻𑀢𑀺 𑀦𑀸𑀕𑁄…𑀧𑁂… 𑀏𑀯𑀁 𑀪𑀕𑀯𑀸 𑀦 𑀕𑀘𑁆𑀙𑀢𑀻𑀢𑀺 𑀦𑀸𑀕𑁄. 𑀲𑀼𑀢𑁆𑀯𑀸𑀦 𑀦𑀸𑀕𑀲𑁆𑀲 𑀅𑀧𑀦𑀫𑀺𑀲𑁆𑀲𑀦𑁆𑀢𑀺 𑀇𑀢𑁄𑀢𑀺 𑀢𑀼𑀬𑁆𑀳𑀁 𑀯𑀘𑀦𑀁 𑀩𑁆𑀬𑀧𑁆𑀧𑀣𑀁 𑀤𑁂𑀲𑀦𑀁 𑀅𑀦𑀼𑀲𑀸𑀲𑀦𑀁 𑀅𑀦𑀼𑀲𑀺𑀝𑁆𑀞𑀁 𑀲𑀼𑀢𑁆𑀯𑀸 𑀲𑀼𑀡𑀺𑀢𑁆𑀯𑀸 𑀉𑀕𑁆𑀕𑀳𑁂𑀢𑁆𑀯𑀸 𑀉𑀧𑀥𑀸𑀭𑀬𑀺𑀢𑁆𑀯𑀸 𑀉𑀧𑀮𑀓𑁆𑀔𑀬𑀺𑀢𑁆𑀯𑀸 𑀇𑀢𑁄 𑀅𑀧𑀦𑀫𑀺𑀲𑁆𑀲𑀦𑁆𑀢𑀺 𑀯𑀚𑀺𑀲𑁆𑀲𑀦𑁆𑀢𑀺 𑀧𑀓𑁆𑀓𑀫𑀺𑀲𑁆𑀲𑀦𑁆𑀢𑀺 𑀤𑀺𑀲𑀸𑀯𑀺𑀤𑀺𑀲𑀁 𑀕𑀫𑀺𑀲𑁆𑀲𑀦𑁆𑀢𑀻𑀢𑀺 𑁋 𑀲𑀼𑀢𑁆𑀯𑀸𑀦 𑀦𑀸𑀕𑀲𑁆𑀲 𑀅𑀧𑀦𑀫𑀺𑀲𑁆𑀲𑀦𑁆𑀢𑀺 𑀇𑀢𑁄. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀑𑀓𑀜𑁆𑀚𑀳𑀁 𑀢𑀡𑁆𑀳𑀘𑁆𑀙𑀺𑀤𑀁 𑀅𑀦𑁂𑀚𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀪𑀤𑁆𑀭𑀸𑀯𑀼𑀥𑁄]

𑀦𑀦𑁆𑀤𑀺𑀜𑁆𑀚𑀳𑀁 𑀑𑀖𑀢𑀺𑀡𑁆𑀡𑀁 𑀯𑀺𑀫𑀼𑀢𑁆𑀢𑀁;

𑀓𑀧𑁆𑀧𑀜𑁆𑀚𑀳𑀁 𑀅𑀪𑀺𑀬𑀸𑀘𑁂 𑀲𑀼𑀫𑁂𑀥𑀁, 𑀲𑀼𑀢𑁆𑀯𑀸𑀦 𑀦𑀸𑀕𑀲𑁆𑀲 𑀅𑀧𑀦𑀫𑀺𑀲𑁆𑀲𑀦𑁆𑀢𑀺 𑀇𑀢𑁄’’𑀢𑀺.

𑁭𑁧. 𑀦𑀸𑀦𑀸𑀚𑀦𑀸 𑀚𑀦𑀧𑀤𑁂𑀳𑀺 𑀲𑀗𑁆𑀕𑀢𑀸, 𑀢𑀯 𑀯𑀻𑀭 𑀯𑀸𑀓𑁆𑀬𑀁 𑀅𑀪𑀺𑀓𑀗𑁆𑀔𑀫𑀸𑀦𑀸;

𑀢𑁂𑀲𑀁 𑀢𑀼𑀯𑀁 𑀲𑀸𑀥𑀼 𑀯𑀺𑀬𑀸𑀓𑀭𑁄𑀳𑀺, 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄.

𑀦𑀸𑀦𑀸𑀚𑀦𑀸 𑀚𑀦𑀧𑀤𑁂𑀳𑀺 𑀲𑀗𑁆𑀕𑀢𑀸𑀢𑀺. 𑀦𑀸𑀦𑀸𑀚𑀦𑀸𑀢𑀺 𑀔𑀢𑁆𑀢𑀺𑀬𑀸 𑀘 𑀩𑁆𑀭𑀸𑀳𑁆𑀫𑀡𑀸 𑀘 𑀯𑁂𑀲𑁆𑀲𑀸 𑀘 𑀲𑀼𑀤𑁆𑀤𑀸 𑀘 𑀕𑀳𑀝𑁆𑀞𑀸 𑀘 𑀧𑀩𑁆𑀩𑀚𑀺𑀢𑀸 𑀘 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 𑀘. 𑀚𑀦𑀧𑀤𑁂𑀳𑀺 𑀲𑀗𑁆𑀕𑀢𑀸𑀢𑀺 𑀅𑀗𑁆𑀕𑀸 𑀘 𑀫𑀕𑀥𑀸 𑀘 𑀓𑀮𑀺𑀗𑁆𑀕𑀸 𑀘 𑀓𑀸𑀲𑀺𑀬𑀸 𑀘 𑀓𑁄𑀲𑀮𑀸 𑀘 𑀯𑀚𑁆𑀚𑀺𑀬𑀸 𑀘 𑀫𑀮𑁆𑀮𑀸 𑀘 𑀘𑁂𑀢𑀺𑀬𑀫𑁆𑀳𑀸 𑀘 [𑀘𑁂𑀢𑀺𑀬𑀫𑁆𑀳𑀸 𑀘 𑀲𑀸𑀕𑀭𑀫𑁆𑀳𑀸 𑀘 (𑀲𑁆𑀬𑀸.)] 𑀯𑀁𑀲𑀸 𑀘 𑀓𑀼𑀭𑀼𑀫𑁆𑀳𑀸 𑀘 𑀧𑀜𑁆𑀘𑀸𑀮𑀸 𑀘 𑀫𑀘𑁆𑀙𑀸 𑀘 𑀲𑀼𑀭𑀲𑁂𑀦𑀸 𑀘 𑀅𑀲𑁆𑀲𑀓𑀸 𑀘 𑀅𑀯𑀦𑁆𑀢𑀺𑀬𑀸 𑀘 𑀬𑁄𑀦𑀸 [𑀬𑁄𑀦𑀓𑀸 (𑀓.) 𑀫𑀳𑀸𑀦𑀺. 𑁫𑁫] 𑀘 𑀓𑀫𑁆𑀩𑁄𑀚𑀸 𑀘. 𑀲𑀗𑁆𑀕𑀢𑀸𑀢𑀺 𑀲𑀗𑁆𑀕𑀢𑀸 𑀲𑀫𑀸𑀕𑀢𑀸 𑀲𑀫𑁄𑀳𑀺𑀢𑀸 𑀲𑀦𑁆𑀦𑀺𑀧𑀢𑀺𑀢𑀸𑀢𑀺 𑁋 𑀦𑀸𑀦𑀸𑀚𑀦𑀸 𑀚𑀦𑀧𑀤𑁂𑀳𑀺 𑀲𑀗𑁆𑀕𑀢𑀸.

𑀢𑀯 𑀯𑀻𑀭 𑀯𑀸𑀓𑁆𑀬𑀁 𑀅𑀪𑀺𑀓𑀗𑁆𑀔𑀫𑀸𑀦𑀸𑀢𑀺. 𑀯𑀻𑀭𑀸𑀢𑀺 𑀯𑀻𑀭𑁄. 𑀪𑀕𑀯𑀸 𑀯𑀻𑀭𑀺𑀬𑀯𑀸𑀢𑀺 𑀯𑀻𑀭𑁄, 𑀧𑀳𑀽𑀢𑀺 𑀯𑀻𑀭𑁄, 𑀯𑀺𑀲𑀯𑀻𑀢𑀺 𑀯𑀻𑀭𑁄, 𑀅𑀮𑀫𑀢𑁆𑀢𑁄𑀢𑀺 𑀯𑀻𑀭𑁄, 𑀯𑀺𑀕𑀢𑀮𑁄𑀫𑀳𑀁𑀲𑁄𑀢𑀺𑀧𑀺 𑀯𑀻𑀭𑁄.

𑀯𑀺𑀭𑀢𑁄 𑀇𑀥 𑀲𑀩𑁆𑀩𑀧𑀸𑀧𑀓𑁂𑀳𑀺, 𑀦𑀺𑀭𑀬𑀤𑀼𑀓𑁆𑀔𑀁 𑀅𑀢𑀺𑀘𑁆𑀘 𑀯𑀻𑀭𑀺𑀬𑀯𑀸 𑀲𑁄;

𑀲𑁄 𑀯𑀻𑀭𑀺𑀬𑀯𑀸 𑀧𑀥𑀸𑀦𑀯𑀸, 𑀯𑀻𑀭𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀢𑀣𑀢𑁆𑀢𑀸𑀢𑀺.

𑀢𑀯 𑀯𑀻𑀭 𑀯𑀸𑀓𑁆𑀬𑀁 𑀅𑀪𑀺𑀓𑀗𑁆𑀔𑀫𑀸𑀦𑀸𑀢𑀺 𑀢𑀼𑀬𑁆𑀳𑀁 𑀯𑀘𑀦𑀁 𑀩𑁆𑀬𑀧𑁆𑀧𑀣𑀁 𑀤𑁂𑀲𑀦𑀁 𑀅𑀦𑀼𑀲𑀸𑀲𑀦𑀁 𑀅𑀦𑀼𑀲𑀺𑀝𑁆𑀞𑀁. 𑀅𑀪𑀺𑀓𑀗𑁆𑀔𑀫𑀸𑀦𑀸𑀢𑀺 𑀅𑀪𑀺𑀓𑀗𑁆𑀔𑀫𑀸𑀦𑀸 𑀇𑀘𑁆𑀙𑀫𑀸𑀦𑀸 𑀲𑀸𑀤𑀺𑀬𑀫𑀸𑀦𑀸 𑀧𑀢𑁆𑀣𑀬𑀫𑀸𑀦𑀸 𑀧𑀺𑀳𑀬𑀫𑀸𑀦𑀸 𑀅𑀪𑀺𑀚𑀧𑁆𑀧𑀫𑀸𑀦𑀸𑀢𑀺 𑁋 𑀢𑀯 𑀯𑀻𑀭 𑀯𑀸𑀓𑁆𑀬𑀁 𑀅𑀪𑀺𑀓𑀗𑁆𑀔𑀫𑀸𑀦𑀸.

𑀢𑁂𑀲𑀁 𑀢𑀼𑀯𑀁 𑀲𑀸𑀥𑀼 𑀯𑀺𑀬𑀸𑀓𑀭𑁄𑀳𑀻𑀢𑀺. 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀔𑀢𑁆𑀢𑀺𑀬𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑁂𑀲𑁆𑀲𑀸𑀦𑀁 𑀲𑀼𑀤𑁆𑀤𑀸𑀦𑀁 𑀕𑀳𑀝𑁆𑀞𑀸𑀦𑀁 𑀧𑀩𑁆𑀩𑀚𑀺𑀢𑀸𑀦𑀁 𑀤𑁂𑀯𑀸𑀦𑀁 𑀫𑀦𑀼𑀲𑁆𑀲𑀸𑀦𑀁. 𑀢𑀼𑀯𑀦𑁆𑀢𑀺 𑀪𑀕𑀯𑀦𑁆𑀢𑀁 𑀪𑀡𑀢𑀺. 𑀲𑀸𑀥𑀼 𑀯𑀺𑀬𑀸𑀓𑀭𑁄𑀳𑀻𑀢𑀺 𑀲𑀸𑀥𑀼 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀢𑁂𑀲𑀁 𑀢𑀼𑀯𑀁 𑀲𑀸𑀥𑀼 𑀯𑀺𑀬𑀸𑀓𑀭𑁄𑀳𑀺.

𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄𑀢𑀺 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀢𑀼𑀮𑀺𑀢𑁄 𑀢𑀻𑀭𑀺𑀢𑁄 𑀯𑀺𑀪𑀽𑀢𑁄 𑀯𑀺𑀪𑀸𑀯𑀺𑀢𑁄 𑀏𑀲 𑀥𑀫𑁆𑀫𑁄𑀢𑀺 𑁋 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀦𑀸𑀦𑀸𑀚𑀦𑀸 𑀚𑀦𑀧𑀤𑁂𑀳𑀺 𑀲𑀗𑁆𑀕𑀢𑀸, 𑀢𑀯 𑀯𑀻𑀭 𑀯𑀸𑀓𑁆𑀬𑀁 𑀅𑀪𑀺𑀓𑀗𑁆𑀔𑀫𑀸𑀦𑀸;

𑀢𑁂𑀲𑀁 𑀢𑀼𑀯𑀁 𑀲𑀸𑀥𑀼 𑀯𑀺𑀬𑀸𑀓𑀭𑁄𑀳𑀺, 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄’’𑀢𑀺.

𑁭𑁨. 𑀆𑀤𑀸𑀦𑀢𑀡𑁆𑀳𑀁 𑀯𑀺𑀦𑀬𑁂𑀣 𑀲𑀩𑁆𑀩𑀁, [𑀪𑀤𑁆𑀭𑀸𑀯𑀼𑀥𑀸𑀢𑀺 𑀪𑀕𑀯𑀸]

𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂;

𑀬𑀁 𑀬𑀜𑁆𑀳𑀺 𑀮𑁄𑀓𑀲𑁆𑀫𑀺𑀫𑀼𑀧𑀸𑀤𑀺𑀬𑀦𑁆𑀢𑀺, 𑀢𑁂𑀦𑁂𑀯 𑀫𑀸𑀭𑁄 𑀅𑀦𑁆𑀯𑁂𑀢𑀺 𑀚𑀦𑁆𑀢𑀼𑀁.

𑀆𑀤𑀸𑀦𑀢𑀡𑁆𑀳𑀁 𑀯𑀺𑀦𑀬𑁂𑀣 𑀲𑀩𑁆𑀩𑀦𑁆𑀢𑀺 𑀆𑀤𑀸𑀦𑀢𑀡𑁆𑀳𑀁 𑀯𑀼𑀘𑁆𑀘𑀢𑀺 𑀭𑀽𑀧𑀢𑀡𑁆𑀳𑀸…𑀧𑁂… 𑀆𑀤𑀸𑀦𑀢𑀡𑁆𑀳𑀸𑀢𑀺 𑀓𑀺𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀆𑀤𑀸𑀦𑀢𑀡𑁆𑀳𑀸? 𑀢𑀸𑀬 𑀢𑀡𑁆𑀳𑀸𑀬 𑀭𑀽𑀧𑀁 𑀆𑀤𑀺𑀬𑀦𑁆𑀢𑀺 𑀉𑀧𑀸𑀤𑀺𑀬𑀦𑁆𑀢𑀺 𑀕𑀡𑁆𑀳𑀦𑁆𑀢𑀺 𑀧𑀭𑀸𑀫𑀲𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀺. 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁… 𑀕𑀢𑀺𑀁… 𑀉𑀧𑀧𑀢𑁆𑀢𑀺𑀁… 𑀧𑀝𑀺𑀲𑀦𑁆𑀥𑀺𑀁… 𑀪𑀯𑀁… 𑀲𑀁𑀲𑀸𑀭𑀁… 𑀯𑀝𑁆𑀝𑀁 𑀆𑀤𑀺𑀬𑀦𑁆𑀢𑀺 𑀉𑀧𑀸𑀤𑀺𑀬𑀦𑁆𑀢𑀺 𑀕𑀡𑁆𑀳𑀦𑁆𑀢𑀺 𑀧𑀭𑀸𑀫𑀲𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀺. 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀆𑀤𑀸𑀦𑀢𑀡𑁆𑀳𑀸. 𑀆𑀤𑀸𑀦𑀢𑀡𑁆𑀳𑀁 𑀯𑀺𑀦𑀬𑁂𑀣 𑀲𑀩𑁆𑀩𑀦𑁆𑀢𑀺 𑀲𑀩𑁆𑀩𑀁 𑀆𑀤𑀸𑀦𑀢𑀡𑁆𑀳𑀁 𑀯𑀺𑀦𑀬𑁂𑀬𑁆𑀬 𑀧𑀝𑀺𑀯𑀺𑀦𑀬𑁂𑀬𑁆𑀬 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀻𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬𑀸𑀢𑀺 𑁋 𑀆𑀤𑀸𑀦𑀢𑀡𑁆𑀳𑀁 𑀯𑀺𑀦𑀬𑁂𑀣 𑀲𑀩𑁆𑀩𑀁. 𑀪𑀤𑁆𑀭𑀸𑀯𑀼𑀥𑀸𑀢𑀺 𑀪𑀕𑀯𑀸𑀢𑀺. 𑀪𑀤𑁆𑀭𑀸𑀯𑀼𑀥𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀪𑀤𑁆𑀭𑀸𑀯𑀼𑀥𑀸𑀢𑀺 𑀪𑀕𑀯𑀸.

𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺. 𑀉𑀤𑁆𑀥𑀦𑁆𑀢𑀺 𑀅𑀦𑀸𑀕𑀢𑀁; 𑀅𑀥𑁄𑀢𑀺 𑀅𑀢𑀻𑀢𑀁; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀉𑀤𑁆𑀥𑀦𑁆𑀢𑀺 𑀤𑁂𑀯𑀮𑁄𑀓𑁄; 𑀅𑀥𑁄𑀢𑀺 𑀦𑀺𑀭𑀬𑀮𑁄𑀓𑁄; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀫𑀦𑀼𑀲𑁆𑀲𑀮𑁄𑀓𑁄. 𑀅𑀣 𑀯𑀸, 𑀉𑀤𑁆𑀥𑀦𑁆𑀢𑀺 𑀓𑀼𑀲𑀮𑀸 𑀥𑀫𑁆𑀫𑀸; 𑀅𑀥𑁄𑀢𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸. 𑀉𑀤𑁆𑀥𑀦𑁆𑀢𑀺 𑀅𑀭𑀽𑀧𑀥𑀸𑀢𑀼; 𑀅𑀥𑁄𑀢𑀺 𑀓𑀸𑀫𑀥𑀸𑀢𑀼; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀭𑀽𑀧𑀥𑀸𑀢𑀼. 𑀉𑀤𑁆𑀥𑀦𑁆𑀢𑀺 𑀲𑀼𑀔𑀸 𑀯𑁂𑀤𑀦𑀸; 𑀅𑀥𑁄𑀢𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸. 𑀉𑀤𑁆𑀥𑀦𑁆𑀢𑀺 𑀉𑀤𑁆𑀥𑀁 𑀧𑀸𑀤𑀢𑀮𑀸; 𑀅𑀥𑁄𑀢𑀺 𑀅𑀥𑁄 𑀓𑁂𑀲𑀫𑀢𑁆𑀣𑀓𑀸; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀯𑁂𑀫𑀚𑁆𑀛𑁂𑀢𑀺 𑁋 𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂.

𑀬𑀁 𑀬𑀜𑁆𑀳𑀺 𑀮𑁄𑀓𑀲𑁆𑀫𑀺𑀫𑀼𑀧𑀸𑀤𑀺𑀬𑀦𑁆𑀢𑀻𑀢𑀺 𑀬𑀁 𑀬𑀁 𑀭𑀽𑀧𑀕𑀢𑀁 𑀯𑁂𑀤𑀦𑀸𑀕𑀢𑀁 𑀲𑀜𑁆𑀜𑀸𑀕𑀢𑀁 𑀲𑀗𑁆𑀔𑀸𑀭𑀕𑀢𑀁 𑀯𑀺𑀜𑁆𑀜𑀸𑀡𑀕𑀢𑀁 𑀆𑀤𑀺𑀬𑀦𑁆𑀢𑀺 𑀉𑀧𑀸𑀤𑀺𑀬𑀦𑁆𑀢𑀺 𑀕𑀡𑁆𑀳𑀦𑁆𑀢𑀺 𑀧𑀭𑀸𑀫𑀲𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀺. 𑀮𑁄𑀓𑀲𑁆𑀫𑀺𑀦𑁆𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂𑀢𑀺 𑁋 𑀬𑀁 𑀬𑀜𑁆𑀳𑀺 𑀮𑁄𑀓𑀲𑁆𑀫𑀺𑀫𑀼𑀧𑀸𑀤𑀺𑀬𑀦𑁆𑀢𑀺.

𑀢𑁂𑀦𑁂𑀯 𑀫𑀸𑀭𑁄 𑀅𑀦𑁆𑀯𑁂𑀢𑀺 𑀚𑀦𑁆𑀢𑀼𑀦𑁆𑀢𑀺 𑀢𑁂𑀦𑁂𑀯 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀧𑀝𑀺𑀲𑀦𑁆𑀥𑀺𑀓𑁄 𑀔𑀦𑁆𑀥𑀫𑀸𑀭𑁄 𑀥𑀸𑀢𑀼𑀫𑀸𑀭𑁄 𑀆𑀬𑀢𑀦𑀫𑀸𑀭𑁄 𑀕𑀢𑀺𑀫𑀸𑀭𑁄 𑀉𑀧𑀧𑀢𑁆𑀢𑀺𑀫𑀸𑀭𑁄 𑀧𑀝𑀺𑀲𑀦𑁆𑀥𑀺𑀫𑀸𑀭𑁄 𑀪𑀯𑀫𑀸𑀭𑁄 𑀲𑀁𑀲𑀸𑀭𑀫𑀸𑀭𑁄 𑀯𑀝𑁆𑀝𑀫𑀸𑀭𑁄 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑁄 𑀳𑁄𑀢𑀺. 𑀚𑀦𑁆𑀢𑀼𑀦𑁆𑀢𑀺 𑀲𑀢𑁆𑀢𑀁 𑀚𑀦𑀁 𑀦𑀭𑀁 𑀫𑀸𑀡𑀯𑀁 [𑀫𑀸𑀦𑀯𑀁 (𑀲𑁆𑀬𑀸.)] 𑀧𑁄𑀲𑀁 𑀧𑀼𑀕𑁆𑀕𑀮𑀁 𑀚𑀻𑀯𑀁 𑀚𑀸𑀕𑀼𑀁 𑀚𑀦𑁆𑀢𑀼𑀁 𑀇𑀦𑁆𑀤𑀕𑀼𑀁 𑀫𑀦𑀼𑀚𑀦𑁆𑀢𑀺 𑁋 𑀢𑁂𑀦𑁂𑀯 𑀫𑀸𑀭𑁄 𑀅𑀦𑁆𑀯𑁂𑀢𑀺 𑀚𑀦𑁆𑀢𑀼𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀆𑀤𑀸𑀦𑀢𑀡𑁆𑀳𑀁 𑀯𑀺𑀦𑀬𑁂𑀣 𑀲𑀩𑁆𑀩𑀁, [𑀪𑀤𑁆𑀭𑀸𑀯𑀼𑀥𑀸𑀢𑀺 𑀪𑀕𑀯𑀸]

𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂;

𑀬𑀁 𑀬𑀜𑁆𑀳𑀺 𑀮𑁄𑀓𑀲𑁆𑀫𑀺𑀫𑀼𑀧𑀸𑀤𑀺𑀬𑀦𑁆𑀢𑀺, 𑀢𑁂𑀦𑁂𑀯 𑀫𑀸𑀭𑁄 𑀅𑀦𑁆𑀯𑁂𑀢𑀺 𑀚𑀦𑁆𑀢𑀼’’𑀦𑁆𑀢𑀺.

𑁭𑁩. 𑀢𑀲𑁆𑀫𑀸 𑀧𑀚𑀸𑀦𑀁 𑀦 𑀉𑀧𑀸𑀤𑀺𑀬𑁂𑀣,𑀪𑀺𑀓𑁆𑀔𑀼 𑀲𑀢𑁄 𑀓𑀺𑀜𑁆𑀘𑀦𑀁 𑀲𑀩𑁆𑀩𑀮𑁄𑀓𑁂;

𑀆𑀤𑀸𑀦𑀲𑀢𑁆𑀢𑁂 𑀇𑀢𑀺 𑀧𑁂𑀓𑁆𑀔𑀫𑀸𑀦𑁄, 𑀧𑀚𑀁 𑀇𑀫𑀁 𑀫𑀘𑁆𑀘𑀼𑀥𑁂𑀬𑁆𑀬𑁂 𑀯𑀺𑀲𑀢𑁆𑀢𑀁.

𑀢𑀲𑁆𑀫𑀸 𑀧𑀚𑀸𑀦𑀁 𑀦 𑀉𑀧𑀸𑀤𑀺𑀬𑁂𑀣𑀸𑀢𑀺. 𑀢𑀲𑁆𑀫𑀸𑀢𑀺 𑀢𑀲𑁆𑀫𑀸 𑀢𑀁𑀓𑀸𑀭𑀡𑀸 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀁𑀦𑀺𑀤𑀸𑀦𑀸, 𑀏𑀢𑀁 𑀆𑀤𑀻𑀦𑀯𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀆𑀤𑀸𑀦𑀢𑀡𑁆𑀳𑀸𑀬𑀸𑀢𑀺 𑁋 𑀢𑀲𑁆𑀫𑀸. 𑀧𑀚𑀸𑀦𑀦𑁆𑀢𑀺 𑀚𑀸𑀦𑀦𑁆𑀢𑁄 𑀧𑀚𑀸𑀦𑀦𑁆𑀢𑁄 𑀆𑀚𑀸𑀦𑀦𑁆𑀢𑁄 𑀯𑀺𑀚𑀸𑀦𑀦𑁆𑀢𑁄 𑀧𑀝𑀺𑀯𑀺𑀚𑀸𑀦𑀦𑁆𑀢𑁄 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀚𑀸𑀦𑀦𑁆𑀢𑁄 𑀧𑀚𑀸𑀦𑀦𑁆𑀢𑁄 𑀆𑀚𑀸𑀦𑀦𑁆𑀢𑁄 𑀯𑀺𑀚𑀸𑀦𑀦𑁆𑀢𑁄 𑀧𑀝𑀺𑀯𑀺𑀚𑀸𑀦𑀦𑁆𑀢𑁄 𑀧𑀝𑀺𑀯𑀺𑀚𑁆𑀛𑀦𑁆𑀢𑁄. 𑀦 𑀉𑀧𑀸𑀤𑀺𑀬𑁂𑀣𑀸𑀢𑀺 𑀭𑀽𑀧𑀁 𑀦𑀸𑀤𑀺𑀬𑁂𑀬𑁆𑀬 𑀦 𑀉𑀧𑀸𑀤𑀺𑀬𑁂𑀬𑁆𑀬 𑀦 𑀕𑀡𑁆𑀳𑁂𑀬𑁆𑀬 𑀦 𑀧𑀭𑀸𑀫𑀲𑁂𑀬𑁆𑀬 𑀦𑀸𑀪𑀺𑀦𑀺𑀯𑀺𑀲𑁂𑀬𑁆𑀬; 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁… 𑀕𑀢𑀺𑀁 … 𑀉𑀧𑀧𑀢𑁆𑀢𑀺𑀁… 𑀧𑀝𑀺𑀲𑀦𑁆𑀥𑀺𑀁… 𑀪𑀯𑀁… 𑀲𑀁𑀲𑀸𑀭𑀁… 𑀯𑀝𑁆𑀝𑀁 𑀦𑀸𑀤𑀺𑀬𑁂𑀬𑁆𑀬 𑀦 𑀉𑀧𑀸𑀤𑀺𑀬𑁂𑀬𑁆𑀬 𑀦 𑀕𑀡𑁆𑀳𑁂𑀬𑁆𑀬 𑀦 𑀧𑀭𑀸𑀫𑀲𑁂𑀬𑁆𑀬 𑀦𑀸𑀪𑀺𑀦𑀺𑀯𑀺𑀲𑁂𑀬𑁆𑀬𑀸𑀢𑀺 𑁋 𑀢𑀲𑁆𑀫𑀸 𑀧𑀚𑀸𑀦𑀁 𑀦 𑀉𑀧𑀸𑀤𑀺𑀬𑁂𑀣.

𑀪𑀺𑀓𑁆𑀔𑀼 𑀲𑀢𑁄 𑀓𑀺𑀜𑁆𑀘𑀦𑀁 𑀲𑀩𑁆𑀩𑀮𑁄𑀓𑁂𑀢𑀺. 𑀪𑀺𑀓𑁆𑀔𑀽𑀢𑀺 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁄 𑀯𑀸 𑀪𑀺𑀓𑁆𑀔𑀼, 𑀲𑁂𑀓𑁆𑀔𑁄 𑀯𑀸 𑀪𑀺𑀓𑁆𑀔𑀼. 𑀲𑀢𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄…𑀧𑁂… 𑀲𑁄 𑀯𑀼𑀘𑁆𑀘𑀢𑀺 𑀲𑀢𑁄𑀢𑀺 𑁋 𑀪𑀺𑀓𑁆𑀔𑀼 𑀲𑀢𑁄. 𑀓𑀺𑀜𑁆𑀘𑀦𑀦𑁆𑀢𑀺 𑀓𑀺𑀜𑁆𑀘𑀺 𑀭𑀽𑀧𑀕𑀢𑀁 𑀯𑁂𑀤𑀦𑀸𑀕𑀢𑀁 𑀲𑀜𑁆𑀜𑀸𑀕𑀢𑀁 𑀲𑀗𑁆𑀔𑀸𑀭𑀕𑀢𑀁 𑀯𑀺𑀜𑁆𑀜𑀸𑀡𑀕𑀢𑀁. 𑀲𑀩𑁆𑀩𑀮𑁄𑀓𑁂𑀢𑀺 𑀲𑀩𑁆𑀩𑀅𑀧𑀸𑀬𑀮𑁄𑀓𑁂 𑀲𑀩𑁆𑀩𑀫𑀦𑀼𑀲𑁆𑀲𑀮𑁄𑀓𑁂 𑀲𑀩𑁆𑀩𑀤𑁂𑀯𑀮𑁄𑀓𑁂 𑀲𑀩𑁆𑀩𑀔𑀦𑁆𑀥𑀮𑁄𑀓𑁂 𑀲𑀩𑁆𑀩𑀥𑀸𑀢𑀼𑀮𑁄𑀓𑁂 𑀲𑀩𑁆𑀩𑀆𑀬𑀢𑀦𑀮𑁄𑀓𑁂𑀢𑀺 𑁋 𑀪𑀺𑀓𑁆𑀔𑀼 𑀲𑀢𑁄 𑀓𑀺𑀜𑁆𑀘𑀦𑀁 𑀲𑀩𑁆𑀩𑀮𑁄𑀓𑁂.

𑀆𑀤𑀸𑀦𑀲𑀢𑁆𑀢𑁂 𑀇𑀢𑀺 𑀧𑁂𑀓𑁆𑀔𑀫𑀸𑀦𑁄𑀢𑀺 𑀆𑀤𑀸𑀦𑀲𑀢𑁆𑀢𑀸 𑀯𑀼𑀘𑁆𑀘𑀦𑁆𑀢𑀺 𑀬𑁂 𑀭𑀽𑀧𑀁 𑀆𑀤𑀺𑀬𑀦𑁆𑀢𑀺 𑀉𑀧𑀸𑀤𑀺𑀬𑀦𑁆𑀢𑀺 𑀕𑀡𑁆𑀳𑀦𑁆𑀢𑀺 𑀧𑀭𑀸𑀫𑀲𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀺; 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁… 𑀕𑀢𑀺𑀁… 𑀉𑀧𑀧𑀢𑁆𑀢𑀺𑀁… 𑀧𑀝𑀺𑀲𑀦𑁆𑀥𑀺𑀁… 𑀪𑀯𑀁… 𑀲𑀁𑀲𑀸𑀭𑀁… 𑀯𑀝𑁆𑀝𑀁 𑀆𑀤𑀺𑀬𑀦𑁆𑀢𑀺 𑀉𑀧𑀸𑀤𑀺𑀬𑀦𑁆𑀢𑀺 𑀕𑀡𑁆𑀳𑀦𑁆𑀢𑀺 𑀧𑀭𑀸𑀫𑀲𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀺. 𑀇𑀢𑀻𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑀇𑀢𑀻𑀢𑀺. 𑀧𑁂𑀓𑁆𑀔𑀫𑀸𑀦𑁄𑀢𑀺 𑀧𑁂𑀓𑁆𑀔𑀫𑀸𑀦𑁄 𑀤𑀓𑁆𑀔𑀫𑀸𑀦𑁄 𑀤𑀺𑀲𑁆𑀲𑀫𑀸𑀦𑁄 𑀧𑀲𑁆𑀲𑀫𑀸𑀦𑁄 𑀑𑀮𑁄𑀓𑀬𑀫𑀸𑀦𑁄 𑀦𑀺𑀚𑁆𑀛𑀸𑀬𑀫𑀸𑀦𑁄 𑀉𑀧𑀧𑀭𑀺𑀓𑁆𑀔𑀫𑀸𑀦𑁄𑀢𑀺 𑁋 𑀆𑀤𑀸𑀦𑀲𑀢𑁆𑀢𑁂 𑀇𑀢𑀺 𑀧𑁂𑀓𑁆𑀔𑀫𑀸𑀦𑁄.

𑀧𑀚𑀁 𑀇𑀫𑀁 𑀫𑀘𑁆𑀘𑀼𑀥𑁂𑀬𑁆𑀬𑁂 𑀯𑀺𑀲𑀢𑁆𑀢𑀦𑁆𑀢𑀺. 𑀧𑀚𑀸𑀢𑀺 𑀲𑀢𑁆𑀢𑀸𑀥𑀺𑀯𑀘𑀦𑀁 𑀫𑀘𑁆𑀘𑀼𑀥𑁂𑀬𑁆𑀬𑀸 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀸 𑀘 𑀔𑀦𑁆𑀥𑀸 𑀘 𑀅𑀪𑀺𑀲𑀗𑁆𑀔𑀸𑀭𑀸 𑀘. 𑀧𑀚𑀸 𑀫𑀘𑁆𑀘𑀼𑀥𑁂𑀬𑁆𑀬𑁂 𑀫𑀸𑀭𑀥𑁂𑀬𑁆𑀬𑁂 𑀫𑀭𑀡𑀥𑁂𑀬𑁆𑀬𑁂 𑀲𑀢𑁆𑀢𑀸 𑀯𑀺𑀲𑀢𑁆𑀢𑀸 𑀆𑀲𑀢𑁆𑀢𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸. 𑀬𑀣𑀸 𑀪𑀺𑀢𑁆𑀢𑀺𑀔𑀺𑀮𑁂 𑀯𑀸 𑀦𑀸𑀕𑀤𑀦𑁆𑀢𑁂 𑀯𑀸 𑀪𑀡𑁆𑀟𑀁 𑀲𑀢𑁆𑀢𑀁 𑀯𑀺𑀲𑀢𑁆𑀢𑀁 𑀆𑀲𑀢𑁆𑀢𑀁 𑀮𑀕𑁆𑀕𑀁 𑀮𑀕𑁆𑀕𑀺𑀢𑀁 𑀧𑀮𑀺𑀩𑀼𑀤𑁆𑀥𑀁, 𑀏𑀯𑀫𑁂𑀯 𑀧𑀚𑀸 𑀫𑀘𑁆𑀘𑀼𑀥𑁂𑀬𑁆𑀬𑁂 𑀫𑀸𑀭𑀥𑁂𑀬𑁆𑀬𑁂 𑀫𑀭𑀡𑀥𑁂𑀬𑁆𑀬𑁂 𑀲𑀢𑁆𑀢𑀸 𑀯𑀺𑀲𑀢𑁆𑀢𑀸 𑀆𑀲𑀢𑁆𑀢𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸𑀢𑀺 𑁋 𑀧𑀚𑀁 𑀇𑀫𑀁 𑀫𑀘𑁆𑀘𑀼𑀥𑁂𑀬𑁆𑀬𑁂 𑀯𑀺𑀲𑀢𑁆𑀢𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀢𑀲𑁆𑀫𑀸 𑀧𑀚𑀸𑀦𑀁 𑀦 𑀉𑀧𑀸𑀤𑀺𑀬𑁂𑀣, 𑀪𑀺𑀓𑁆𑀔𑀼 𑀲𑀢𑁄 𑀓𑀺𑀜𑁆𑀘𑀦𑀁 𑀲𑀩𑁆𑀩𑀮𑁄𑀓𑁂;

𑀆𑀤𑀸𑀦𑀲𑀢𑁆𑀢𑁂 𑀇𑀢𑀺 𑀧𑁂𑀓𑁆𑀔𑀫𑀸𑀦𑁄, 𑀧𑀚𑀁 𑀇𑀫𑀁 𑀫𑀘𑁆𑀘𑀼𑀥𑁂𑀬𑁆𑀬𑁂 𑀯𑀺𑀲𑀢𑁆𑀢’’𑀦𑁆𑀢𑀺.

𑀲𑀳 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑀸…𑀧𑁂… 𑀲𑀢𑁆𑀣𑀸 𑀫𑁂 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻𑀢𑀺.

𑀪𑀤𑁆𑀭𑀸𑀯𑀼𑀥𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑀤𑁆𑀯𑀸𑀤𑀲𑀫𑁄.