𑁧𑁦. 𑀦𑀺𑀩𑁆𑀩𑀸𑀦𑀭𑀽𑀧𑀲𑀡𑁆𑀞𑀸𑀦𑀧𑀜𑁆𑀳𑁄

𑁧𑁦. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦’𑀦𑁆𑀢𑀺 𑀬𑀁 𑀯𑀤𑁂𑀲𑀺, 𑀲𑀓𑁆𑀓𑀸 𑀧𑀦 𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀭𑀽𑀧𑀁 𑀯𑀸 𑀲𑀡𑁆𑀞𑀸𑀦𑀁 𑀯𑀸 𑀯𑀬𑀁 𑀯𑀸 𑀧𑀫𑀸𑀡𑀁 𑀯𑀸 𑀑𑀧𑀫𑁆𑀫𑁂𑀦 𑀯𑀸 𑀓𑀸𑀭𑀡𑁂𑀦 𑀯𑀸 𑀳𑁂𑀢𑀼𑀦𑀸 𑀯𑀸 𑀦𑀬𑁂𑀦 𑀯𑀸 𑀉𑀧𑀤𑀲𑁆𑀲𑀬𑀺𑀢𑀼’’𑀦𑁆𑀢𑀺? ‘‘𑀅𑀧𑁆𑀧𑀝𑀺𑀪𑀸𑀕𑀁, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁, 𑀦 𑀲𑀓𑁆𑀓𑀸 𑀦𑀺𑀩𑁆𑀩𑀸𑀦𑀲𑁆𑀲 𑀭𑀽𑀧𑀁 𑀯𑀸 𑀲𑀡𑁆𑀞𑀸𑀦𑀁 𑀯𑀸 𑀯𑀬𑀁 𑀯𑀸 𑀧𑀫𑀸𑀡𑀁 𑀯𑀸 𑀑𑀧𑀫𑁆𑀫𑁂𑀦 𑀯𑀸 𑀓𑀸𑀭𑀡𑁂𑀦 𑀯𑀸 𑀳𑁂𑀢𑀼𑀦𑀸 𑀯𑀸 𑀦𑀬𑁂𑀦 𑀯𑀸 𑀉𑀧𑀤𑀲𑁆𑀲𑀬𑀺𑀢𑀼’’𑀦𑁆𑀢𑀺. ‘‘𑀏𑀢𑀫𑁆𑀧𑀸𑀳𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀦 𑀲𑀫𑁆𑀧𑀝𑀺𑀘𑁆𑀙𑀸𑀫𑀺, 𑀬𑀁 𑀅𑀢𑁆𑀣𑀺𑀥𑀫𑁆𑀫𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀭𑀽𑀧𑀁 𑀯𑀸 𑀲𑀡𑁆𑀞𑀸𑀦𑀁 𑀯𑀸 𑀯𑀬𑀁 𑀯𑀸 𑀧𑀫𑀸𑀡𑀁 𑀯𑀸 𑀑𑀧𑀫𑁆𑀫𑁂𑀦 𑀯𑀸 𑀓𑀸𑀭𑀡𑁂𑀦 𑀯𑀸 𑀳𑁂𑀢𑀼𑀦𑀸 𑀯𑀸 𑀦𑀬𑁂𑀦 𑀯𑀸 𑀅𑀧𑀜𑁆𑀜𑀸𑀧𑀦𑀁, 𑀓𑀸𑀭𑀡𑁂𑀦 𑀫𑀁 𑀲𑀜𑁆𑀜𑀸𑀧𑁂𑀳𑀻’’𑀢𑀺. ‘‘𑀳𑁄𑀢𑀼, 𑀫𑀳𑀸𑀭𑀸𑀚, 𑀓𑀸𑀭𑀡𑁂𑀦 𑀢𑀁 𑀲𑀜𑁆𑀜𑀸𑀧𑁂𑀲𑁆𑀲𑀸𑀫𑀺. 𑀅𑀢𑁆𑀣𑀺, 𑀫𑀳𑀸𑀭𑀸𑀚, 𑀫𑀳𑀸𑀲𑀫𑀼𑀤𑁆𑀤𑁄 𑀦𑀸𑀫𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀅𑀢𑁆𑀣𑁂𑀲𑁄 𑀫𑀳𑀸𑀲𑀫𑀼𑀤𑁆𑀤𑁄’’𑀢𑀺. ‘‘𑀲𑀘𑁂 𑀢𑀁, 𑀫𑀳𑀸𑀭𑀸𑀚, 𑀓𑁄𑀘𑀺 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬 ‘𑀓𑀺𑀢𑁆𑀢𑀓𑀁, 𑀫𑀳𑀸𑀭𑀸𑀚, 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁, 𑀓𑀢𑀺 𑀧𑀦 𑀢𑁂 𑀲𑀢𑁆𑀢𑀸, 𑀬𑁂 𑀫𑀳𑀸𑀲𑀫𑀼𑀤𑁆𑀤𑁂 𑀧𑀝𑀺𑀯𑀲𑀦𑁆𑀢𑀻’𑀢𑀺, 𑀏𑀯𑀁 𑀧𑀼𑀝𑁆𑀞𑁄 𑀢𑁆𑀯𑀁, 𑀫𑀳𑀸𑀭𑀸𑀚, 𑀓𑀺𑀦𑁆𑀢𑀺 𑀢𑀲𑁆𑀲 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀻’’𑀢𑀺? ‘‘𑀲𑀘𑁂 𑀫𑀁, 𑀪𑀦𑁆𑀢𑁂, 𑀓𑁄𑀘𑀺 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬 ‘𑀓𑀺𑀢𑁆𑀢𑀓𑀁, 𑀫𑀳𑀸𑀭𑀸𑀚, 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁, 𑀓𑀢𑀺 𑀧𑀦 𑀢𑁂 𑀲𑀢𑁆𑀢𑀸, 𑀬𑁂 𑀫𑀳𑀸𑀲𑀫𑀼𑀤𑁆𑀤𑁂 𑀧𑀝𑀺𑀯𑀲𑀦𑁆𑀢𑀻’𑀢𑀺, 𑀢𑀫𑀳𑀁, 𑀪𑀦𑁆𑀢𑁂, 𑀏𑀯𑀁 𑀯𑀤𑁂𑀬𑁆𑀬𑀁 ‘𑀅𑀧𑀼𑀘𑁆𑀙𑀺𑀢𑀩𑁆𑀩𑀁 𑀫𑀁 𑀢𑁆𑀯𑀁 𑀅𑀫𑁆𑀪𑁄 𑀧𑀼𑀭𑀺𑀲 𑀧𑀼𑀘𑁆𑀙𑀲𑀺, 𑀦𑁂𑀲𑀸 𑀧𑀼𑀘𑁆𑀙𑀸 𑀓𑁂𑀦𑀘𑀺 𑀧𑀼𑀘𑁆𑀙𑀺𑀢𑀩𑁆𑀩𑀸, 𑀞𑀧𑀦𑀻𑀬𑁄 𑀏𑀲𑁄 𑀧𑀜𑁆𑀳𑁄. 𑀅𑀯𑀺𑀪𑀢𑁆𑀢𑁄 𑀮𑁄𑀓𑀓𑁆𑀔𑀸𑀬𑀺𑀓𑁂𑀳𑀺 𑀫𑀳𑀸𑀲𑀫𑀼𑀤𑁆𑀤𑁄, 𑀦 𑀲𑀓𑁆𑀓𑀸 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀧𑀭𑀺𑀫𑀺𑀦𑀺𑀢𑀼𑀁 𑀲𑀢𑁆𑀢𑀸 𑀯𑀸 𑀬𑁂 𑀢𑀢𑁆𑀣 𑀯𑀸𑀲𑀫𑀼𑀧𑀕𑀢𑀸𑀢𑀺 𑀏𑀯𑀸𑀳𑀁 𑀪𑀦𑁆𑀢𑁂 𑀢𑀲𑁆𑀲 𑀧𑀝𑀺𑀯𑀘𑀦𑀁 𑀤𑀤𑁂𑀬𑁆𑀬’’’𑀦𑁆𑀢𑀺.

‘‘𑀓𑀺𑀲𑁆𑀲 𑀧𑀦, 𑀢𑁆𑀯𑀁 𑀫𑀳𑀸𑀭𑀸𑀚, 𑀅𑀢𑁆𑀣𑀺𑀥𑀫𑁆𑀫𑁂 𑀫𑀳𑀸𑀲𑀫𑀼𑀤𑁆𑀤𑁂 𑀏𑀯𑀁 𑀧𑀝𑀺𑀯𑀘𑀦𑀁 𑀤𑀤𑁂𑀬𑁆𑀬𑀸𑀲𑀺, 𑀦𑀦𑀼 𑀯𑀺𑀕𑀡𑁂𑀢𑁆𑀯𑀸 [𑀫𑀺𑀦𑀺𑀢𑁆𑀯𑀸 (𑀓.)] 𑀢𑀲𑁆𑀲 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 ‘𑀏𑀢𑁆𑀢𑀓𑀁 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁, 𑀏𑀢𑁆𑀢𑀓𑀸 𑀘 𑀲𑀢𑁆𑀢𑀸 𑀫𑀳𑀸𑀲𑀫𑀼𑀤𑁆𑀤𑁂 𑀧𑀝𑀺𑀯𑀲𑀦𑁆𑀢𑀻’’𑀢𑀺? ‘‘𑀦 𑀲𑀓𑁆𑀓𑀸, 𑀪𑀦𑁆𑀢𑁂, 𑀅𑀯𑀺𑀲𑀬𑁄 𑀏𑀲𑁄 𑀧𑀜𑁆𑀳𑁄’’𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀅𑀢𑁆𑀣𑀺𑀥𑀫𑁆𑀫𑁂 𑀬𑁂𑀯 𑀫𑀳𑀸𑀲𑀫𑀼𑀤𑁆𑀤𑁂 𑀦 𑀲𑀓𑁆𑀓𑀸 𑀉𑀤𑀓𑀁 𑀧𑀭𑀺𑀕𑀡𑁂𑀢𑀼𑀁 [𑀧𑀭𑀺𑀫𑀺𑀦𑀺𑀢𑀼𑀁 (𑀓.)] 𑀲𑀢𑁆𑀢𑀸 𑀯𑀸 𑀬𑁂 𑀢𑀢𑁆𑀣 𑀯𑀸𑀲𑀫𑀼𑀧𑀕𑀢𑀸, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀢𑁆𑀣𑀺𑀥𑀫𑁆𑀫𑀲𑁆𑀲𑁂𑀯 𑀦𑀺𑀩𑁆𑀩𑀸𑀦𑀲𑁆𑀲 𑀦 𑀲𑀓𑁆𑀓𑀸 𑀭𑀽𑀧𑀁 𑀯𑀸 𑀲𑀡𑁆𑀞𑀸𑀦𑀁 𑀯𑀸 𑀯𑀬𑀁 𑀯𑀸 𑀧𑀫𑀸𑀡𑀁 𑀯𑀸 𑀑𑀧𑀫𑁆𑀫𑁂𑀦 𑀯𑀸 𑀓𑀸𑀭𑀡𑁂𑀦 𑀯𑀸 𑀳𑁂𑀢𑀼𑀦𑀸 𑀯𑀸 𑀦𑀬𑁂𑀦 𑀯𑀸 𑀉𑀧𑀤𑀲𑁆𑀲𑀬𑀺𑀢𑀼𑀁, 𑀯𑀺𑀕𑀡𑁂𑀬𑁆𑀬, 𑀫𑀳𑀸𑀭𑀸𑀚, 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀢𑀢𑁆𑀭𑀸𑀲𑀬𑁂 𑀘 𑀲𑀢𑁆𑀢𑁂, 𑀦 𑀢𑁆𑀯𑁂𑀯 𑀲𑁄 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀲𑀓𑁆𑀓𑀼𑀡𑁂𑀬𑁆𑀬 𑀦𑀺𑀩𑁆𑀩𑀸𑀦𑀲𑁆𑀲 𑀭𑀽𑀧𑀁 𑀯𑀸 𑀲𑀡𑁆𑀞𑀸𑀦𑀁 𑀯𑀸 𑀯𑀬𑀁 𑀯𑀸 𑀧𑀫𑀸𑀡𑀁 𑀯𑀸 𑀑𑀧𑀫𑁆𑀫𑁂𑀦 𑀯𑀸 𑀓𑀸𑀭𑀡𑁂𑀦 𑀯𑀸 𑀳𑁂𑀢𑀼𑀦𑀸 𑀯𑀸 𑀦𑀬𑁂𑀦 𑀯𑀸 𑀉𑀧𑀤𑀲𑁆𑀲𑀬𑀺𑀢𑀼𑀁.

‘‘𑀅𑀧𑀭𑀫𑁆𑀧𑀺, 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀺𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺, 𑀅𑀢𑁆𑀣𑀺𑀥𑀫𑁆𑀫𑀲𑁆𑀲𑁂𑀯 𑀦𑀺𑀩𑁆𑀩𑀸𑀦𑀲𑁆𑀲 𑀦 𑀲𑀓𑁆𑀓𑀸 𑀭𑀽𑀧𑀁 𑀯𑀸 𑀲𑀡𑁆𑀞𑀸𑀦𑀁 𑀯𑀸 𑀯𑀬𑀁 𑀯𑀸 𑀧𑀫𑀸𑀡𑀁 𑀯𑀸 𑀑𑀧𑀫𑁆𑀫𑁂𑀦 𑀯𑀸 𑀓𑀸𑀭𑀡𑁂𑀦 𑀯𑀸 𑀳𑁂𑀢𑀼𑀦𑀸 𑀯𑀸 𑀦𑀬𑁂𑀦 𑀯𑀸 𑀉𑀧𑀤𑀲𑁆𑀲𑀬𑀺𑀢𑀼𑀦𑁆𑀢𑀺. 𑀅𑀢𑁆𑀣𑀺, 𑀫𑀳𑀸𑀭𑀸𑀚, 𑀤𑁂𑀯𑁂𑀲𑀼 𑀅𑀭𑀽𑀧𑀓𑀸𑀬𑀺𑀓𑀸 𑀦𑀸𑀫 𑀤𑁂𑀯𑀸’’𑀢𑀺. ‘‘𑀆𑀫, 𑀪𑀦𑁆𑀢𑁂, 𑀲𑀼𑀬𑁆𑀬𑀢𑀺 ‘𑀅𑀢𑁆𑀣𑀺 𑀤𑁂𑀯𑁂𑀲𑀼 𑀅𑀭𑀽𑀧𑀓𑀸𑀬𑀺𑀓𑀸 𑀦𑀸𑀫 𑀤𑁂𑀯𑀸’’’𑀢𑀺. ‘‘𑀲𑀓𑁆𑀓𑀸 𑀧𑀦, 𑀫𑀳𑀸𑀭𑀸𑀚, 𑀢𑁂𑀲𑀁 𑀅𑀭𑀽𑀧𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀁 𑀭𑀽𑀧𑀁 𑀯𑀸 𑀲𑀡𑁆𑀞𑀸𑀦𑀁 𑀯𑀸 𑀯𑀬𑀁 𑀯𑀸 𑀧𑀫𑀸𑀡𑀁 𑀯𑀸 𑀑𑀧𑀫𑁆𑀫𑁂𑀦 𑀯𑀸 𑀓𑀸𑀭𑀡𑁂𑀦 𑀯𑀸 𑀳𑁂𑀢𑀼𑀦𑀸 𑀯𑀸 𑀦𑀬𑁂𑀦 𑀯𑀸 𑀉𑀧𑀤𑀲𑁆𑀲𑀬𑀺𑀢𑀼’’𑀦𑁆𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀦𑀢𑁆𑀣𑀺 𑀅𑀭𑀽𑀧𑀓𑀸𑀬𑀺𑀓𑀸 𑀤𑁂𑀯𑀸’’𑀢𑀺? ‘‘𑀅𑀢𑁆𑀣𑀺, 𑀪𑀦𑁆𑀢𑁂, 𑀅𑀭𑀽𑀧𑀓𑀸𑀬𑀺𑀓𑀸 𑀤𑁂𑀯𑀸, 𑀦 𑀘 𑀲𑀓𑁆𑀓𑀸 𑀢𑁂𑀲𑀁 𑀭𑀽𑀧𑀁 𑀯𑀸 𑀲𑀡𑁆𑀞𑀸𑀦𑀁 𑀯𑀸 𑀯𑀬𑀁 𑀯𑀸 𑀧𑀫𑀸𑀡𑀁 𑀯𑀸 𑀑𑀧𑀫𑁆𑀫𑁂𑀦 𑀯𑀸 𑀓𑀸𑀭𑀡𑁂𑀦 𑀯𑀸 𑀳𑁂𑀢𑀼𑀦𑀸 𑀯𑀸 𑀦𑀬𑁂𑀦 𑀯𑀸 𑀉𑀧𑀤𑀲𑁆𑀲𑀬𑀺𑀢𑀼’’𑀦𑁆𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀅𑀢𑁆𑀣𑀺𑀲𑀢𑁆𑀢𑀸𑀦𑀁 𑀬𑁂𑀯 𑀅𑀭𑀽𑀧𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀁 𑀦 𑀲𑀓𑁆𑀓𑀸 𑀭𑀽𑀧𑀁 𑀯𑀸 𑀲𑀡𑁆𑀞𑀸𑀦𑀁 𑀯𑀸 𑀯𑀬𑀁 𑀯𑀸 𑀧𑀫𑀸𑀡𑀁 𑀯𑀸 𑀑𑀧𑀫𑁆𑀫𑁂𑀦 𑀯𑀸 𑀓𑀸𑀭𑀡𑁂𑀦 𑀯𑀸 𑀳𑁂𑀢𑀼𑀦𑀸 𑀯𑀸 𑀦𑀬𑁂𑀦 𑀯𑀸 𑀉𑀧𑀤𑀲𑁆𑀲𑀬𑀺𑀢𑀼𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀢𑁆𑀣𑀺𑀥𑀫𑁆𑀫𑀲𑁆𑀲𑁂𑀯 𑀦𑀺𑀩𑁆𑀩𑀸𑀦𑀲𑁆𑀲 𑀦 𑀲𑀓𑁆𑀓𑀸 𑀭𑀽𑀧𑀁 𑀯𑀸 𑀲𑀡𑁆𑀞𑀸𑀦𑀁 𑀯𑀸 𑀯𑀬𑀁 𑀯𑀸 𑀧𑀫𑀸𑀡𑀁 𑀯𑀸 𑀑𑀧𑀫𑁆𑀫𑁂𑀦 𑀯𑀸 𑀓𑀸𑀭𑀡𑁂𑀦 𑀯𑀸 𑀳𑁂𑀢𑀼𑀦𑀸 𑀯𑀸 𑀦𑀬𑁂𑀦 𑀯𑀸 𑀉𑀧𑀤𑀲𑁆𑀲𑀬𑀺𑀢𑀼’’𑀦𑁆𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀳𑁄𑀢𑀼 𑀏𑀓𑀦𑁆𑀢𑀲𑀼𑀔𑀁 𑀦𑀺𑀩𑁆𑀩𑀸𑀦𑀁, 𑀦 𑀘 𑀲𑀓𑁆𑀓𑀸 𑀢𑀲𑁆𑀲 𑀭𑀽𑀧𑀁 𑀯𑀸 𑀲𑀡𑁆𑀞𑀸𑀦𑀁 𑀯𑀸 𑀯𑀬𑀁 𑀯𑀸 𑀧𑀫𑀸𑀡𑀁 𑀯𑀸 𑀑𑀧𑀫𑁆𑀫𑁂𑀦 𑀯𑀸 𑀓𑀸𑀭𑀡𑁂𑀦 𑀯𑀸 𑀳𑁂𑀢𑀼𑀦𑀸 𑀯𑀸 𑀦𑀬𑁂𑀦 𑀯𑀸 𑀉𑀧𑀤𑀲𑁆𑀲𑀬𑀺𑀢𑀼𑀁. 𑀅𑀢𑁆𑀣𑀺 𑀧𑀦, 𑀪𑀦𑁆𑀢𑁂, 𑀦𑀺𑀩𑁆𑀩𑀸𑀦𑀲𑁆𑀲 𑀕𑀼𑀡𑀁 𑀅𑀜𑁆𑀜𑁂𑀳𑀺 𑀅𑀦𑀼𑀧𑀯𑀺𑀝𑁆𑀞𑀁 𑀓𑀺𑀜𑁆𑀘𑀺 𑀑𑀧𑀫𑁆𑀫𑀦𑀺𑀤𑀲𑁆𑀲𑀦𑀫𑀢𑁆𑀢’’𑀦𑁆𑀢𑀺? ‘‘𑀲𑀭𑀽𑀧𑀢𑁄, 𑀫𑀳𑀸𑀭𑀸𑀚, 𑀦𑀢𑁆𑀣𑀺, 𑀕𑀼𑀡𑀢𑁄 𑀧𑀦 𑀲𑀓𑁆𑀓𑀸 𑀓𑀺𑀜𑁆𑀘𑀺 𑀑𑀧𑀫𑁆𑀫𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀉𑀧𑀤𑀲𑁆𑀲𑀬𑀺𑀢𑀼’’𑀦𑁆𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀣𑀸𑀳𑀁 𑀮𑀪𑀸𑀫𑀺 𑀦𑀺𑀩𑁆𑀩𑀸𑀦𑀲𑁆𑀲 𑀕𑀼𑀡𑀢𑁄𑀧𑀺 𑀏𑀓𑀤𑁂𑀲𑀧𑀭𑀺𑀤𑀻𑀧𑀦𑀫𑀢𑁆𑀢𑀁, 𑀢𑀣𑀸 𑀲𑀻𑀖𑀁 𑀩𑁆𑀭𑀽𑀳𑀺, 𑀦𑀺𑀩𑁆𑀩𑀸𑀧𑁂𑀳𑀺 𑀫𑁂 𑀳𑀤𑀬𑀧𑀭𑀺𑀴𑀸𑀳𑀁 𑀯𑀺𑀦𑀬 𑀲𑀻𑀢𑀮𑀫𑀥𑀼𑀭𑀯𑀘𑀦𑀫𑀸𑀮𑀼𑀢𑁂𑀦𑀸’’𑀢𑀺.

‘‘𑀧𑀤𑀼𑀫𑀲𑁆𑀲, 𑀫𑀳𑀸𑀭𑀸𑀚, 𑀏𑀓𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄, 𑀉𑀤𑀓𑀲𑁆𑀲 𑀤𑁆𑀯𑁂 𑀕𑀼𑀡𑀸, 𑀅𑀕𑀤𑀲𑁆𑀲 𑀢𑀬𑁄 𑀕𑀼𑀡𑀸, 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀘𑀢𑁆𑀢𑀸𑀭𑁄 𑀕𑀼𑀡𑀸, 𑀪𑁄𑀚𑀦𑀲𑁆𑀲 𑀧𑀜𑁆𑀘 𑀕𑀼𑀡𑀸, 𑀆𑀓𑀸𑀲𑀲𑁆𑀲 𑀤𑀲 𑀕𑀼𑀡𑀸, 𑀫𑀡𑀺𑀭𑀢𑀦𑀲𑁆𑀲 𑀢𑀬𑁄 𑀕𑀼𑀡𑀸, 𑀮𑁄𑀳𑀺𑀢𑀘𑀦𑁆𑀤𑀦𑀲𑁆𑀲 𑀢𑀬𑁄 𑀕𑀼𑀡𑀸, 𑀲𑀧𑁆𑀧𑀺𑀫𑀡𑁆𑀟𑀲𑁆𑀲 𑀢𑀬𑁄 𑀕𑀼𑀡𑀸, 𑀕𑀺𑀭𑀺𑀲𑀺𑀔𑀭𑀲𑁆𑀲 𑀧𑀜𑁆𑀘 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀧𑀤𑀼𑀫𑀲𑁆𑀲 𑀏𑀓𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑁄 𑀧𑀤𑀼𑀫𑀲𑁆𑀲 𑀏𑀓𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀤𑀼𑀫𑀁 𑀅𑀦𑀼𑀧𑀮𑀺𑀢𑁆𑀢𑀁 𑀉𑀤𑀓𑁂𑀦, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀅𑀦𑀼𑀧𑀮𑀺𑀢𑁆𑀢𑀁. 𑀅𑀬𑀁, 𑀫𑀳𑀸𑀭𑀸𑀚, 𑀧𑀤𑀼𑀫𑀲𑁆𑀲 𑀏𑀓𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀉𑀤𑀓𑀲𑁆𑀲 𑀤𑁆𑀯𑁂 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑁂 𑀉𑀤𑀓𑀲𑁆𑀲 𑀤𑁆𑀯𑁂 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀉𑀤𑀓𑀁 𑀲𑀻𑀢𑀮𑀁 𑀧𑀭𑀺𑀴𑀸𑀳𑀦𑀺𑀩𑁆𑀩𑀸𑀧𑀦𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀲𑀻𑀢𑀮𑀁 𑀲𑀩𑁆𑀩𑀓𑀺𑀮𑁂𑀲𑀧𑀭𑀺𑀴𑀸𑀳𑀦𑀺𑀩𑁆𑀩𑀸𑀧𑀦𑀁. 𑀅𑀬𑀁, 𑀫𑀳𑀸𑀭𑀸𑀚, 𑀉𑀤𑀓𑀲𑁆𑀲 𑀧𑀞𑀫𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀉𑀤𑀓𑀁 𑀓𑀺𑀮𑀦𑁆𑀢𑀢𑀲𑀺𑀢𑀧𑀺𑀧𑀸𑀲𑀺𑀢𑀖𑀫𑁆𑀫𑀸𑀪𑀺𑀢𑀢𑁆𑀢𑀸𑀦𑀁 𑀚𑀦𑀧𑀲𑀼𑀧𑀚𑀸𑀦𑀁 𑀧𑀺𑀧𑀸𑀲𑀸𑀯𑀺𑀦𑀬𑀦𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀓𑀸𑀫𑀢𑀡𑁆𑀳𑀸𑀪𑀯𑀢𑀡𑁆𑀳𑀸𑀯𑀺𑀪𑀯𑀢𑀡𑁆𑀳𑀸𑀧𑀺𑀧𑀸𑀲𑀸𑀯𑀺𑀦𑀬𑀦𑀁. 𑀅𑀬𑀁, 𑀫𑀳𑀸𑀭𑀸𑀚, 𑀉𑀤𑀓𑀲𑁆𑀲 𑀤𑀼𑀢𑀺𑀬𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀉𑀤𑀓𑀲𑁆𑀲 𑀤𑁆𑀯𑁂 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀅𑀕𑀤𑀲𑁆𑀲 𑀢𑀬𑁄 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑁂 𑀅𑀕𑀤𑀲𑁆𑀲 𑀢𑀬𑁄 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀅𑀕𑀤𑁄 𑀯𑀺𑀲𑀧𑀻𑀴𑀺𑀢𑀸𑀦𑀁 𑀲𑀢𑁆𑀢𑀸𑀦𑀁 𑀧𑀝𑀺𑀲𑀭𑀡𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀓𑀺𑀮𑁂𑀲𑀯𑀺𑀲𑀧𑀻𑀴𑀺𑀢𑀸𑀦𑀁 𑀲𑀢𑁆𑀢𑀸𑀦𑀁 𑀧𑀝𑀺𑀲𑀭𑀡𑀁. 𑀅𑀬𑀁, 𑀫𑀳𑀸𑀭𑀸𑀚, 𑀅𑀕𑀤𑀲𑁆𑀲 𑀧𑀞𑀫𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀅𑀕𑀤𑁄 𑀭𑁄𑀕𑀸𑀦𑀁 𑀅𑀦𑁆𑀢𑀓𑀭𑁄, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀲𑀩𑁆𑀩𑀤𑀼𑀓𑁆𑀔𑀸𑀦𑀁 𑀅𑀦𑁆𑀢𑀓𑀭𑀁. 𑀅𑀬𑀁, 𑀫𑀳𑀸𑀭𑀸𑀚, 𑀅𑀕𑀤𑀲𑁆𑀲 𑀤𑀼𑀢𑀺𑀬𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀅𑀕𑀤𑁄 𑀅𑀫𑀢𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀅𑀫𑀢𑀁. 𑀅𑀬𑀁, 𑀫𑀳𑀸𑀭𑀸𑀚, 𑀅𑀕𑀤𑀲𑁆𑀲 𑀢𑀢𑀺𑀬𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀅𑀕𑀤𑀲𑁆𑀲 𑀢𑀬𑁄 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀘𑀢𑁆𑀢𑀸𑀭𑁄 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑁂 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀘𑀢𑁆𑀢𑀸𑀭𑁄 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀫𑀳𑀸𑀲𑀫𑀼𑀤𑁆𑀤𑁄 𑀲𑀼𑀜𑁆𑀜𑁄 𑀲𑀩𑁆𑀩𑀓𑀼𑀡𑀧𑁂𑀳𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀲𑀼𑀜𑁆𑀜𑀁 𑀲𑀩𑁆𑀩𑀓𑀺𑀮𑁂𑀲𑀓𑀼𑀡𑀧𑁂𑀳𑀺. 𑀅𑀬𑀁, 𑀫𑀳𑀸𑀭𑀸𑀚, 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀧𑀞𑀫𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀫𑀳𑀸𑀲𑀫𑀼𑀤𑁆𑀤𑁄 𑀫𑀳𑀦𑁆𑀢𑁄 𑀅𑀦𑁄𑀭𑀧𑀸𑀭𑁄, 𑀦 𑀧𑀭𑀺𑀧𑀽𑀭𑀢𑀺 𑀲𑀩𑁆𑀩𑀲𑀯𑀦𑁆𑀢𑀻𑀳𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀫𑀳𑀦𑁆𑀢𑀁 𑀅𑀦𑁄𑀭𑀧𑀸𑀭𑀁, 𑀦 𑀧𑀽𑀭𑀢𑀺 𑀲𑀩𑁆𑀩𑀲𑀢𑁆𑀢𑁂𑀳𑀺. 𑀅𑀬𑀁, 𑀫𑀳𑀸𑀭𑀸𑀚, 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀤𑀼𑀢𑀺𑀬𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀫𑀳𑀸𑀲𑀫𑀼𑀤𑁆𑀤𑁄 𑀫𑀳𑀦𑁆𑀢𑀸𑀦𑀁 𑀪𑀽𑀢𑀸𑀦𑀁 𑀆𑀯𑀸𑀲𑁄, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀫𑀳𑀦𑁆𑀢𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀯𑀺𑀫𑀮𑀔𑀻𑀡𑀸𑀲𑀯𑀩𑀮𑀧𑁆𑀧𑀢𑁆𑀢𑀯𑀲𑀻𑀪𑀽𑀢𑀫𑀳𑀸𑀪𑀽𑀢𑀸𑀦𑀁 𑀆𑀯𑀸𑀲𑁄. 𑀅𑀬𑀁, 𑀫𑀳𑀸𑀭𑀸𑀚, 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀢𑀢𑀺𑀬𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀫𑀳𑀸𑀲𑀫𑀼𑀤𑁆𑀤𑁄 𑀅𑀧𑀭𑀺𑀫𑀺𑀢𑀯𑀺𑀯𑀺𑀥𑀯𑀺𑀧𑀼𑀮𑀯𑀻𑀘𑀺𑀧𑀼𑀧𑁆𑀨𑀲𑀁𑀓𑀼𑀲𑀼𑀫𑀺𑀢𑁄, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀅𑀧𑀭𑀺𑀫𑀺𑀢𑀯𑀺𑀯𑀺𑀥𑀯𑀺𑀧𑀼𑀮𑀧𑀭𑀺𑀲𑀼𑀤𑁆𑀥𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀧𑀼𑀧𑁆𑀨𑀲𑀁𑀓𑀼𑀲𑀼𑀫𑀺𑀢𑀁. 𑀅𑀬𑀁, 𑀫𑀳𑀸𑀭𑀸𑀚, 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀘𑀢𑀼𑀢𑁆𑀣𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀘𑀢𑁆𑀢𑀸𑀭𑁄 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀪𑁄𑀚𑀦𑀲𑁆𑀲 𑀧𑀜𑁆𑀘 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑁂 𑀪𑁄𑀚𑀦𑀲𑁆𑀲 𑀧𑀜𑁆𑀘 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀪𑁄𑀚𑀦𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀆𑀬𑀼𑀥𑀸𑀭𑀡𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀢𑀁 𑀚𑀭𑀸𑀫𑀭𑀡𑀦𑀸𑀲𑀦𑀢𑁄 𑀆𑀬𑀼𑀥𑀸𑀭𑀡𑀁. 𑀅𑀬𑀁, 𑀫𑀳𑀸𑀭𑀸𑀚, 𑀪𑁄𑀚𑀦𑀲𑁆𑀲 𑀧𑀞𑀫𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀪𑁄𑀚𑀦𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀩𑀮𑀯𑀟𑁆𑀠𑀦𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀢𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀇𑀤𑁆𑀥𑀺𑀩𑀮𑀯𑀟𑁆𑀠𑀦𑀁. 𑀅𑀬𑀁, 𑀫𑀳𑀸𑀭𑀸𑀚, 𑀪𑁄𑀚𑀦𑀲𑁆𑀲 𑀤𑀼𑀢𑀺𑀬𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀪𑁄𑀚𑀦𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀯𑀡𑁆𑀡𑀚𑀦𑀦𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀢𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀕𑀼𑀡𑀯𑀡𑁆𑀡𑀚𑀦𑀦𑀁. 𑀅𑀬𑀁, 𑀫𑀳𑀸𑀭𑀸𑀚, 𑀪𑁄𑀚𑀦𑀲𑁆𑀲 𑀢𑀢𑀺𑀬𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀪𑁄𑀚𑀦𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀤𑀭𑀣𑀯𑀽𑀧𑀲𑀫𑀦𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀢𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑀯𑀽𑀧𑀲𑀫𑀦𑀁. 𑀅𑀬𑀁, 𑀫𑀳𑀸𑀭𑀸𑀚, 𑀪𑁄𑀚𑀦𑀲𑁆𑀲 𑀘𑀢𑀼𑀢𑁆𑀣𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀪𑁄𑀚𑀦𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀚𑀺𑀖𑀘𑁆𑀙𑀸𑀤𑀼𑀩𑁆𑀩𑀮𑁆𑀬𑀧𑀝𑀺𑀯𑀺𑀦𑁄𑀤𑀦𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀢𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑀩𑁆𑀩𑀤𑀼𑀓𑁆𑀔𑀚𑀺𑀖𑀘𑁆𑀙𑀸𑀤𑀼𑀩𑁆𑀩𑀮𑁆𑀬𑀧𑀝𑀺𑀯𑀺𑀦𑁄𑀤𑀦𑀁. 𑀅𑀬𑀁, 𑀫𑀳𑀸𑀭𑀸𑀚, 𑀪𑁄𑀚𑀦𑀲𑁆𑀲 𑀧𑀜𑁆𑀘𑀫𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀪𑁄𑀚𑀦𑀲𑁆𑀲 𑀧𑀜𑁆𑀘 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀆𑀓𑀸𑀲𑀲𑁆𑀲 𑀤𑀲 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑁂 𑀆𑀓𑀸𑀲𑀲𑁆𑀲 𑀤𑀲 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀆𑀓𑀸𑀲𑁄 𑀦 𑀚𑀸𑀬𑀢𑀺, 𑀦 𑀚𑀻𑀬𑀢𑀺, 𑀦 𑀫𑀻𑀬𑀢𑀺, 𑀦 𑀘𑀯𑀢𑀺, 𑀦 𑀉𑀧𑁆𑀧𑀚𑁆𑀚𑀢𑀺, 𑀤𑀼𑀧𑁆𑀧𑀲𑀳𑁄, 𑀅𑀘𑁄𑀭𑀸𑀳𑀭𑀡𑁄, 𑀅𑀦𑀺𑀲𑁆𑀲𑀺𑀢𑁄, 𑀯𑀺𑀳𑀕𑀕𑀫𑀦𑁄, 𑀦𑀺𑀭𑀸𑀯𑀭𑀡𑁄, 𑀅𑀦𑀦𑁆𑀢𑁄. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀦 𑀚𑀸𑀬𑀢𑀺, 𑀦 𑀚𑀻𑀬𑀢𑀺, 𑀦 𑀫𑀻𑀬𑀢𑀺, 𑀦 𑀘𑀯𑀢𑀺, 𑀦 𑀉𑀧𑁆𑀧𑀚𑁆𑀚𑀢𑀺, 𑀤𑀼𑀧𑁆𑀧𑀲𑀳𑀁, 𑀅𑀘𑁄𑀭𑀸𑀳𑀭𑀡𑀁, 𑀅𑀦𑀺𑀲𑁆𑀲𑀺𑀢𑀁, 𑀅𑀭𑀺𑀬𑀕𑀫𑀦𑀁, 𑀦𑀺𑀭𑀸𑀯𑀭𑀡𑀁, 𑀅𑀦𑀦𑁆𑀢𑀁. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀆𑀓𑀸𑀲𑀲𑁆𑀲 𑀤𑀲 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀫𑀡𑀺𑀭𑀢𑀦𑀲𑁆𑀲 𑀢𑀬𑁄 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑁂 𑀫𑀡𑀺𑀭𑀢𑀦𑀲𑁆𑀲 𑀢𑀬𑁄 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀫𑀡𑀺𑀭𑀢𑀦𑀁 𑀓𑀸𑀫𑀤𑀤𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀓𑀸𑀫𑀤𑀤𑀁. 𑀅𑀬𑀁, 𑀫𑀳𑀸𑀭𑀸𑀚, 𑀫𑀡𑀺𑀭𑀢𑀦𑀲𑁆𑀲 𑀧𑀞𑀫𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀫𑀡𑀺𑀭𑀢𑀦𑀁 𑀳𑀸𑀲𑀓𑀭𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀳𑀸𑀲𑀓𑀭𑀁. 𑀅𑀬𑀁, 𑀫𑀳𑀸𑀭𑀸𑀚, 𑀫𑀡𑀺𑀭𑀢𑀦𑀲𑁆𑀲 𑀤𑀼𑀢𑀺𑀬𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀫𑀡𑀺𑀭𑀢𑀦𑀁 𑀉𑀚𑁆𑀚𑁄𑀢𑀢𑁆𑀢𑀓𑀭𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀉𑀚𑁆𑀚𑁄𑀢𑀢𑁆𑀢𑀓𑀭𑀁 [𑀉𑀚𑁆𑀚𑁄𑀢𑀢𑁆𑀣𑀓𑀭𑀁 (𑀲𑀻. 𑀧𑀻.), 𑀉𑀚𑁆𑀚𑁄𑀢𑀺𑀢𑀢𑁆𑀣𑀓𑀭𑀁 (𑀲𑁆𑀬𑀸.)]. 𑀅𑀬𑀁, 𑀫𑀳𑀸𑀭𑀸𑀚, 𑀫𑀡𑀺𑀭𑀢𑀦𑀲𑁆𑀲 𑀢𑀢𑀺𑀬𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀫𑀡𑀺𑀭𑀢𑀦𑀲𑁆𑀲 𑀢𑀬𑁄 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀮𑁄𑀳𑀺𑀢𑀘𑀦𑁆𑀤𑀦𑀲𑁆𑀲 𑀢𑀬𑁄 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑁂 𑀮𑁄𑀳𑀺𑀢𑀘𑀦𑁆𑀤𑀦𑀲𑁆𑀲 𑀢𑀬𑁄 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀮𑁄𑀳𑀺𑀢𑀘𑀦𑁆𑀤𑀦𑀁 𑀤𑀼𑀮𑁆𑀮𑀪𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀤𑀼𑀮𑁆𑀮𑀪𑀁. 𑀅𑀬𑀁, 𑀫𑀳𑀸𑀭𑀸𑀚, 𑀮𑁄𑀳𑀺𑀢𑀘𑀦𑁆𑀤𑀦𑀲𑁆𑀲 𑀧𑀞𑀫𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀮𑁄𑀳𑀺𑀢𑀘𑀦𑁆𑀤𑀦𑀁 𑀅𑀲𑀫𑀲𑀼𑀕𑀦𑁆𑀥𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀅𑀲𑀫𑀲𑀼𑀕𑀦𑁆𑀥𑀁. 𑀅𑀬𑀁, 𑀫𑀳𑀸𑀭𑀸𑀚, 𑀮𑁄𑀳𑀺𑀢𑀘𑀦𑁆𑀤𑀦𑀲𑁆𑀲 𑀤𑀼𑀢𑀺𑀬𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀮𑁄𑀳𑀺𑀢𑀘𑀦𑁆𑀤𑀦𑀁 𑀲𑀚𑁆𑀚𑀦𑀧𑀲𑀢𑁆𑀣𑀁 [𑀲𑀩𑁆𑀩𑀚𑀦𑀧𑀲𑀢𑁆𑀣𑀁 (𑀲𑁆𑀬𑀸.)], 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀅𑀭𑀺𑀬𑀲𑀚𑁆𑀚𑀦𑀧𑀲𑀢𑁆𑀣𑀁. 𑀅𑀬𑀁, 𑀫𑀳𑀸𑀭𑀸𑀚, 𑀮𑁄𑀳𑀺𑀢𑀘𑀦𑁆𑀤𑀦𑀲𑁆𑀲 𑀢𑀢𑀺𑀬𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀮𑁄𑀳𑀺𑀢𑀘𑀦𑁆𑀤𑀦𑀲𑁆𑀲 𑀢𑀬𑁄 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀲𑀧𑁆𑀧𑀺𑀫𑀡𑁆𑀟𑀲𑁆𑀲 𑀢𑀬𑁄 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑁂 𑀲𑀧𑁆𑀧𑀺𑀫𑀡𑁆𑀟𑀲𑁆𑀲 𑀢𑀬𑁄 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀲𑀧𑁆𑀧𑀺𑀫𑀡𑁆𑀟𑁄 𑀯𑀡𑁆𑀡𑀲𑀫𑁆𑀧𑀦𑁆𑀦𑁄, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀕𑀼𑀡𑀯𑀡𑁆𑀡𑀲𑀫𑁆𑀧𑀦𑁆𑀦𑀁. 𑀅𑀬𑀁, 𑀫𑀳𑀸𑀭𑀸𑀚, 𑀲𑀧𑁆𑀧𑀺𑀫𑀡𑁆𑀟𑀲𑁆𑀲 𑀧𑀞𑀫𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀲𑀧𑁆𑀧𑀺𑀫𑀡𑁆𑀟𑁄 𑀕𑀦𑁆𑀥𑀲𑀫𑁆𑀧𑀦𑁆𑀦𑁄, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀲𑀻𑀮𑀕𑀦𑁆𑀥𑀲𑀫𑁆𑀧𑀦𑁆𑀦𑀁. 𑀅𑀬𑀁, 𑀫𑀳𑀸𑀭𑀸𑀚, 𑀲𑀧𑁆𑀧𑀺𑀫𑀡𑁆𑀟𑀲𑁆𑀲 𑀤𑀼𑀢𑀺𑀬𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀲𑀧𑁆𑀧𑀺𑀫𑀡𑁆𑀟𑁄 𑀭𑀲𑀲𑀫𑁆𑀧𑀦𑁆𑀦𑁄, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀭𑀲𑀲𑀫𑁆𑀧𑀦𑁆𑀦𑀁. 𑀅𑀬𑀁, 𑀫𑀳𑀸𑀭𑀸𑀚, 𑀲𑀧𑁆𑀧𑀺𑀫𑀡𑁆𑀟𑀲𑁆𑀲 𑀢𑀢𑀺𑀬𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀲𑀧𑁆𑀧𑀺𑀫𑀡𑁆𑀟𑀲𑁆𑀲 𑀢𑀬𑁄 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀕𑀺𑀭𑀺𑀲𑀺𑀔𑀭𑀲𑁆𑀲 𑀧𑀜𑁆𑀘 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑁂 𑀕𑀺𑀭𑀺𑀲𑀺𑀔𑀭𑀲𑁆𑀲 𑀧𑀜𑁆𑀘 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀕𑀺𑀭𑀺𑀲𑀺𑀔𑀭𑀁 𑀅𑀘𑁆𑀘𑀼𑀕𑁆𑀕𑀢𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀅𑀘𑁆𑀘𑀼𑀕𑀢𑀁. 𑀅𑀬𑀁, 𑀫𑀳𑀸𑀭𑀸𑀚, 𑀕𑀺𑀭𑀺𑀲𑀺𑀔𑀭𑀲𑁆𑀲 𑀧𑀞𑀫𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀕𑀺𑀭𑀺𑀲𑀺𑀔𑀭𑀁 𑀅𑀘𑀮𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀅𑀘𑀮𑀁. 𑀅𑀬𑀁, 𑀫𑀳𑀸𑀭𑀸𑀚, 𑀕𑀺𑀭𑀺𑀲𑀺𑀔𑀭𑀲𑁆𑀲 𑀤𑀼𑀢𑀺𑀬𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀕𑀺𑀭𑀺𑀲𑀺𑀔𑀭𑀁 𑀤𑀼𑀭𑀥𑀺𑀭𑁄𑀳𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀤𑀼𑀭𑀥𑀺𑀭𑁄𑀳𑀁 𑀲𑀩𑁆𑀩𑀓𑀺𑀮𑁂𑀲𑀸𑀦𑀁. 𑀅𑀬𑀁, 𑀫𑀳𑀸𑀭𑀸𑀚, 𑀕𑀺𑀭𑀺𑀲𑀺𑀔𑀭𑀲𑁆𑀲 𑀢𑀢𑀺𑀬𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀕𑀺𑀭𑀺𑀲𑀺𑀔𑀭𑀁 𑀲𑀩𑁆𑀩𑀩𑀻𑀚𑀸𑀦𑀁 𑀅𑀯𑀺𑀭𑀽𑀳𑀦𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀅𑀯𑀺𑀭𑀽𑀳𑀦𑀁. 𑀅𑀬𑀁, 𑀫𑀳𑀸𑀭𑀸𑀚, 𑀕𑀺𑀭𑀺𑀲𑀺𑀔𑀭𑀲𑁆𑀲 𑀘𑀢𑀼𑀢𑁆𑀣𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀕𑀺𑀭𑀺𑀲𑀺𑀔𑀭𑀁 𑀅𑀦𑀼𑀦𑀬𑀧𑁆𑀧𑀝𑀺𑀖𑀯𑀺𑀧𑁆𑀧𑀫𑀼𑀢𑁆𑀢𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀅𑀦𑀼𑀦𑀬𑀧𑁆𑀧𑀝𑀺𑀖𑀯𑀺𑀧𑁆𑀧𑀫𑀼𑀢𑁆𑀢𑀁. 𑀅𑀬𑀁, 𑀫𑀳𑀸𑀭𑀸𑀚, 𑀕𑀺𑀭𑀺𑀲𑀺𑀔𑀭𑀲𑁆𑀲 𑀧𑀜𑁆𑀘𑀫𑁄 𑀕𑀼𑀡𑁄 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀕𑀺𑀭𑀺𑀲𑀺𑀔𑀭𑀲𑁆𑀲 𑀧𑀜𑁆𑀘 𑀕𑀼𑀡𑀸 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀦𑀺𑀩𑁆𑀩𑀸𑀦𑀭𑀽𑀧𑀲𑀡𑁆𑀞𑀸𑀦𑀧𑀜𑁆𑀳𑁄 𑀤𑀲𑀫𑁄.