𑁫. 𑀅𑀦𑀼𑀫𑀸𑀦𑀧𑀜𑁆𑀳𑁄

𑁧. 𑀩𑀼𑀤𑁆𑀥𑀯𑀕𑁆𑀕𑁄

𑁧. 𑀤𑁆𑀯𑀺𑀦𑁆𑀦𑀁 𑀩𑀼𑀤𑁆𑀥𑀸𑀦𑀁 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀧𑀜𑁆𑀳𑁄

𑁧. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 ‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀤𑁆𑀯𑁂 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’𑀢𑀺. 𑀤𑁂𑀲𑁂𑀦𑁆𑀢𑀸 𑀘, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀩𑁆𑀩𑁂𑀧𑀺 𑀢𑀣𑀸𑀕𑀢𑀸 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂 𑀤𑁂𑀲𑁂𑀦𑁆𑀢𑀺, 𑀓𑀣𑀬𑀫𑀸𑀦𑀸 𑀘 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀓𑀣𑁂𑀦𑁆𑀢𑀺, 𑀲𑀺𑀓𑁆𑀔𑀸𑀧𑁂𑀦𑁆𑀢𑀸 𑀘 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀲𑀺𑀓𑁆𑀔𑀸𑀧𑁂𑀦𑁆𑀢𑀺, 𑀅𑀦𑀼𑀲𑀸𑀲𑀫𑀸𑀦𑀸 𑀘 𑀅𑀧𑁆𑀧𑀫𑀸𑀤𑀧𑁆𑀧𑀝𑀺𑀧𑀢𑁆𑀢𑀺𑀬𑀁 𑀅𑀦𑀼𑀲𑀸𑀲𑀦𑁆𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀩𑁆𑀩𑁂𑀲𑀫𑁆𑀧𑀺 𑀢𑀣𑀸𑀕𑀢𑀸𑀦𑀁 𑀏𑀓𑀸 𑀤𑁂𑀲𑀦𑀸 𑀏𑀓𑀸 𑀓𑀣𑀸 𑀏𑀓𑀸 𑀲𑀺𑀓𑁆𑀔𑀸 𑀏𑀓𑀸 𑀅𑀦𑀼𑀲𑀺𑀝𑁆𑀞𑀺, 𑀓𑁂𑀦 𑀓𑀸𑀭𑀡𑁂𑀦 𑀤𑁆𑀯𑁂 𑀢𑀣𑀸𑀕𑀢𑀸 𑀏𑀓𑀓𑁆𑀔𑀡𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀺? 𑀏𑀓𑁂𑀦𑀧𑀺 𑀢𑀸𑀯 𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀦 𑀅𑀬𑀁 𑀮𑁄𑀓𑁄 𑀑𑀪𑀸𑀲𑀚𑀸𑀢𑁄, 𑀬𑀤𑀺 𑀤𑀼𑀢𑀺𑀬𑁄 𑀩𑀼𑀤𑁆𑀥𑁄 𑀪𑀯𑁂𑀬𑁆𑀬, 𑀤𑁆𑀯𑀺𑀦𑁆𑀦𑀁 𑀧𑀪𑀸𑀬 𑀅𑀬𑀁 𑀮𑁄𑀓𑁄 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀑𑀪𑀸𑀲𑀚𑀸𑀢𑁄 𑀪𑀯𑁂𑀬𑁆𑀬, 𑀑𑀯𑀤𑀫𑀸𑀦𑀸 𑀘 𑀤𑁆𑀯𑁂 𑀢𑀣𑀸𑀕𑀢𑀸 𑀲𑀼𑀔𑀁 𑀑𑀯𑀤𑁂𑀬𑁆𑀬𑀼𑀁, 𑀅𑀦𑀼𑀲𑀸𑀲𑀫𑀸𑀦𑀸 𑀘 𑀲𑀼𑀔𑀁 𑀅𑀦𑀼𑀲𑀸𑀲𑁂𑀬𑁆𑀬𑀼𑀁, 𑀢𑀢𑁆𑀣 𑀫𑁂 𑀓𑀸𑀭𑀡𑀁 𑀩𑁆𑀭𑀽𑀳𑀺, 𑀬𑀣𑀸𑀳𑀁 𑀦𑀺𑀲𑁆𑀲𑀁𑀲𑀬𑁄 𑀪𑀯𑁂𑀬𑁆𑀬’’𑀦𑁆𑀢𑀺.

‘‘𑀅𑀬𑀁, 𑀫𑀳𑀸𑀭𑀸𑀚, 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀏𑀓𑀩𑀼𑀤𑁆𑀥𑀥𑀸𑀭𑀡𑀻, 𑀏𑀓𑀲𑁆𑀲𑁂𑀯 𑀢𑀣𑀸𑀕𑀢𑀲𑁆𑀲 𑀕𑀼𑀡𑀁 𑀥𑀸𑀭𑁂𑀢𑀺, 𑀬𑀤𑀺 𑀤𑀼𑀢𑀺𑀬𑁄 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀦𑀸𑀬𑀁 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀥𑀸𑀭𑁂𑀬𑁆𑀬, 𑀘𑀮𑁂𑀬𑁆𑀬 𑀓𑀫𑁆𑀧𑁂𑀬𑁆𑀬 𑀦𑀫𑁂𑀬𑁆𑀬 𑀑𑀦𑀫𑁂𑀬𑁆𑀬 𑀯𑀺𑀦𑀫𑁂𑀬𑁆𑀬 𑀯𑀺𑀓𑀺𑀭𑁂𑀬𑁆𑀬 𑀯𑀺𑀥𑀫𑁂𑀬𑁆𑀬 𑀯𑀺𑀤𑁆𑀥𑀁𑀲𑁂𑀬𑁆𑀬, 𑀦 𑀞𑀸𑀦𑀫𑀼𑀧𑀕𑀘𑁆𑀙𑁂𑀬𑁆𑀬.

‘‘𑀬𑀣𑀸, 𑀫𑀳𑀸𑀭𑀸𑀚, 𑀦𑀸𑀯𑀸 𑀏𑀓𑀧𑀼𑀭𑀺𑀲𑀲𑀦𑁆𑀥𑀸𑀭𑀡𑀻 [𑀏𑀓𑀧𑀼𑀭𑀺𑀲𑀲𑀦𑁆𑀢𑀸𑀭𑀡𑀻 (𑀲𑀻. 𑀧𑀻.)] 𑀪𑀯𑁂𑀬𑁆𑀬, 𑀏𑀓𑀲𑁆𑀫𑀺𑀁 𑀧𑀼𑀭𑀺𑀲𑁂 𑀅𑀪𑀺𑀭𑀽𑀴𑁆𑀳𑁂 𑀲𑀸 𑀦𑀸𑀯𑀸 𑀲𑀫𑀼𑀧𑀸𑀤𑀺𑀓𑀸 [𑀲𑀫𑀼𑀤𑀓𑀸 (𑀓.)] 𑀪𑀯𑁂𑀬𑁆𑀬. 𑀅𑀣 𑀤𑀼𑀢𑀺𑀬𑁄 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀢𑀸𑀤𑀺𑀲𑁄 𑀆𑀬𑀼𑀦𑀸 𑀯𑀡𑁆𑀡𑁂𑀦 𑀯𑀬𑁂𑀦 𑀧𑀫𑀸𑀡𑁂𑀦 𑀓𑀺𑀲𑀣𑀽𑀮𑁂𑀦 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑁂𑀦, 𑀲𑁄 𑀢𑀁 𑀦𑀸𑀯𑀁 𑀅𑀪𑀺𑀭𑀽𑀳𑁂𑀬𑁆𑀬, 𑀅𑀧𑀺 𑀦𑀼 𑀲𑀸, 𑀫𑀳𑀸𑀭𑀸𑀚, 𑀦𑀸𑀯𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀥𑀸𑀭𑁂𑀬𑁆𑀬𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀘𑀮𑁂𑀬𑁆𑀬 𑀓𑀫𑁆𑀧𑁂𑀬𑁆𑀬 𑀦𑀫𑁂𑀬𑁆𑀬 𑀑𑀦𑀫𑁂𑀬𑁆𑀬 𑀯𑀺𑀦𑀫𑁂𑀬𑁆𑀬 𑀯𑀺𑀓𑀺𑀭𑁂𑀬𑁆𑀬 𑀯𑀺𑀥𑀫𑁂𑀬𑁆𑀬 𑀯𑀺𑀤𑁆𑀥𑀁𑀲𑁂𑀬𑁆𑀬, 𑀦 𑀞𑀸𑀦𑀫𑀼𑀧𑀕𑀘𑁆𑀙𑁂𑀬𑁆𑀬, 𑀑𑀲𑀻𑀤𑁂𑀬𑁆𑀬 𑀉𑀤𑀓𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀬𑀁 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀏𑀓𑀩𑀼𑀤𑁆𑀥𑀥𑀸𑀭𑀡𑀻, 𑀏𑀓𑀲𑁆𑀲𑁂𑀯 𑀢𑀣𑀸𑀕𑀢𑀲𑁆𑀲 𑀕𑀼𑀡𑀁 𑀥𑀸𑀭𑁂𑀢𑀺, 𑀬𑀤𑀺 𑀤𑀼𑀢𑀺𑀬𑁄 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀦𑀸𑀬𑀁 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀥𑀸𑀭𑁂𑀬𑁆𑀬, 𑀘𑀮𑁂𑀬𑁆𑀬 𑀓𑀫𑁆𑀧𑁂𑀬𑁆𑀬 𑀦𑀫𑁂𑀬𑁆𑀬 𑀑𑀦𑀫𑁂𑀬𑁆𑀬 𑀯𑀺𑀦𑀫𑁂𑀬𑁆𑀬 𑀯𑀺𑀓𑀺𑀭𑁂𑀬𑁆𑀬 𑀯𑀺𑀥𑀫𑁂𑀬𑁆𑀬 𑀯𑀺𑀤𑁆𑀥𑀁𑀲𑁂𑀬𑁆𑀬, 𑀦 𑀞𑀸𑀦𑀫𑀼𑀧𑀕𑀘𑁆𑀙𑁂𑀬𑁆𑀬.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀬𑀸𑀯𑀤𑀢𑁆𑀣𑀁 𑀪𑁄𑀚𑀦𑀁 𑀪𑀼𑀜𑁆𑀚𑁂𑀬𑁆𑀬 𑀙𑀸𑀤𑁂𑀦𑁆𑀢𑀁 𑀬𑀸𑀯 𑀓𑀡𑁆𑀞𑀫𑀪𑀺𑀧𑀽𑀭𑀬𑀺𑀢𑁆𑀯𑀸, 𑀲𑁄 𑀥𑀸𑀢𑁄 𑀧𑀻𑀡𑀺𑀢𑁄 𑀧𑀭𑀺𑀧𑀼𑀡𑁆𑀡𑁄 𑀦𑀺𑀭𑀦𑁆𑀢𑀭𑁄 𑀢𑀦𑁆𑀤𑀺𑀓𑀢𑁄 𑀅𑀦𑁄𑀦𑀫𑀺𑀢𑀤𑀡𑁆𑀟𑀚𑀸𑀢𑁄 𑀧𑀼𑀦𑀤𑁂𑀯 𑀢𑀢𑁆𑀢𑀓𑀁 𑀪𑁄𑀚𑀦𑀁 𑀪𑀼𑀜𑁆𑀚𑁂𑀬𑁆𑀬, 𑀅𑀧𑀺 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀲𑀼𑀔𑀺𑀢𑁄 𑀪𑀯𑁂𑀬𑁆𑀬𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀲𑀓𑀺𑀁 𑀪𑀼𑀢𑁆𑀢𑁄𑀯 𑀫𑀭𑁂𑀬𑁆𑀬𑀸’’𑀢𑀺 [𑀪𑀼𑀢𑁆𑀢𑁄 𑀯𑀫𑁂𑀬𑁆𑀬𑀸𑀢𑀺 (𑀓.)]. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀬𑀁 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀏𑀓𑀩𑀼𑀤𑁆𑀥𑀥𑀸𑀭𑀡𑀻, 𑀏𑀓𑀲𑁆𑀲𑁂𑀯 𑀢𑀣𑀸𑀕𑀢𑀲𑁆𑀲 𑀕𑀼𑀡𑀁 𑀥𑀸𑀭𑁂𑀢𑀺, 𑀬𑀤𑀺 𑀤𑀼𑀢𑀺𑀬𑁄 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀦𑀸𑀬𑀁 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀥𑀸𑀭𑁂𑀬𑁆𑀬, 𑀘𑀮𑁂𑀬𑁆𑀬 𑀓𑀫𑁆𑀧𑁂𑀬𑁆𑀬 𑀦𑀫𑁂𑀬𑁆𑀬 𑀑𑀦𑀫𑁂𑀬𑁆𑀬 𑀯𑀺𑀦𑀫𑁂𑀬𑁆𑀬 𑀯𑀺𑀓𑀺𑀭𑁂𑀬𑁆𑀬 𑀯𑀺𑀥𑀫𑁂𑀬𑁆𑀬 𑀯𑀺𑀤𑁆𑀥𑀁𑀲𑁂𑀬𑁆𑀬, 𑀦 𑀞𑀸𑀦𑀫𑀼𑀧𑀕𑀘𑁆𑀙𑁂𑀬𑁆𑀬𑀸’’𑀢𑀺.

‘‘𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀢𑀺𑀥𑀫𑁆𑀫𑀪𑀸𑀭𑁂𑀦 𑀧𑀣𑀯𑀻 𑀘𑀮𑀢𑀻’’𑀢𑀺? ‘‘𑀇𑀥, 𑀫𑀳𑀸𑀭𑀸𑀚, 𑀤𑁆𑀯𑁂 𑀲𑀓𑀝𑀸 𑀭𑀢𑀦𑀧𑀭𑀺𑀧𑀽𑀭𑀺𑀢𑀸 𑀪𑀯𑁂𑀬𑁆𑀬𑀼𑀁 𑀬𑀸𑀯 𑀫𑀼𑀔𑀲𑀫𑀸, 𑀏𑀓𑀲𑁆𑀫𑀸 𑀲𑀓𑀝𑀢𑁄 𑀭𑀢𑀦𑀁 𑀕𑀳𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀲𑀓𑀝𑁂 𑀆𑀓𑀺𑀭𑁂𑀬𑁆𑀬𑀼𑀁, 𑀅𑀧𑀺 𑀦𑀼 𑀔𑁄 𑀢𑀁, 𑀫𑀳𑀸𑀭𑀸𑀚, 𑀲𑀓𑀝𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀓𑀝𑀸𑀦𑀁 𑀭𑀢𑀦𑀁 𑀥𑀸𑀭𑁂𑀬𑁆𑀬𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀦𑀸𑀪𑀺𑀧𑀺 𑀢𑀲𑁆𑀲 𑀨𑀮𑁂𑀬𑁆𑀬, 𑀅𑀭𑀸𑀧𑀺 𑀢𑀲𑁆𑀲 𑀪𑀺𑀚𑁆𑀚𑁂𑀬𑁆𑀬𑀼𑀁, 𑀦𑁂𑀫𑀺𑀧𑀺 𑀢𑀲𑁆𑀲 𑀑𑀧𑀢𑁂𑀬𑁆𑀬, 𑀅𑀓𑁆𑀔𑁄𑀧𑀺 𑀢𑀲𑁆𑀲 𑀪𑀺𑀚𑁆𑀚𑁂𑀬𑁆𑀬𑀸’’𑀢𑀺. ‘‘𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀅𑀢𑀺𑀭𑀢𑀦𑀪𑀸𑀭𑁂𑀦 𑀲𑀓𑀝𑀁 𑀪𑀺𑀚𑁆𑀚𑀢𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀢𑀺𑀥𑀫𑁆𑀫𑀪𑀸𑀭𑁂𑀦 𑀧𑀣𑀯𑀻 𑀘𑀮𑀢𑀺.

‘‘𑀅𑀧𑀺 𑀘, 𑀫𑀳𑀸𑀭𑀸𑀚, 𑀇𑀫𑀁 𑀓𑀸𑀭𑀡𑀁 𑀩𑀼𑀤𑁆𑀥𑀩𑀮𑀧𑀭𑀺𑀤𑀻𑀧𑀦𑀸𑀬 𑀑𑀲𑀸𑀭𑀺𑀢𑀁. 𑀅𑀜𑁆𑀜𑀫𑁆𑀧𑀺 𑀢𑀢𑁆𑀣 𑀅𑀪𑀺𑀭𑀽𑀧𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺, 𑀬𑁂𑀦 𑀓𑀸𑀭𑀡𑁂𑀦 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀏𑀓𑀓𑁆𑀔𑀡𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀬𑀤𑀺, 𑀫𑀳𑀸𑀭𑀸𑀚, 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑁂𑀲𑀁 𑀧𑀭𑀺𑀲𑀸𑀬 𑀯𑀺𑀯𑀸𑀤𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 ‘𑀢𑀼𑀫𑁆𑀳𑀸𑀓𑀁 𑀩𑀼𑀤𑁆𑀥𑁄, 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄’𑀢𑀺, 𑀉𑀪𑀢𑁄 𑀧𑀓𑁆𑀔𑀚𑀸𑀢𑀸 𑀪𑀯𑁂𑀬𑁆𑀬𑀼𑀁, 𑀬𑀣𑀸, 𑀫𑀳𑀸𑀭𑀸𑀚, 𑀤𑁆𑀯𑀺𑀦𑁆𑀦𑀁 𑀩𑀮𑀯𑀸𑀫𑀘𑁆𑀘𑀸𑀦𑀁 𑀧𑀭𑀺𑀲𑀸𑀬 𑀯𑀺𑀯𑀸𑀤𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 ‘𑀢𑀼𑀫𑁆𑀳𑀸𑀓𑀁 𑀅𑀫𑀘𑁆𑀘𑁄, 𑀅𑀫𑁆𑀳𑀸𑀓𑀁 𑀅𑀫𑀘𑁆𑀘𑁄’𑀢𑀺, 𑀉𑀪𑀢𑁄 𑀧𑀓𑁆𑀔𑀚𑀸𑀢𑀸 𑀳𑁄𑀦𑁆𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑀤𑀺 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑁂𑀲𑀁 𑀧𑀭𑀺𑀲𑀸𑀬 𑀯𑀺𑀯𑀸𑀤𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 ‘𑀢𑀼𑀫𑁆𑀳𑀸𑀓𑀁 𑀩𑀼𑀤𑁆𑀥𑁄, 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄’𑀢𑀺, 𑀉𑀪𑀢𑁄 𑀧𑀓𑁆𑀔𑀚𑀸𑀢𑀸 𑀪𑀯𑁂𑀬𑁆𑀬𑀼𑀁. 𑀇𑀤𑀁 𑀢𑀸𑀯, 𑀫𑀳𑀸𑀭𑀸𑀚, 𑀏𑀓𑀁 𑀓𑀸𑀭𑀡𑀁, 𑀬𑁂𑀦 𑀓𑀸𑀭𑀡𑁂𑀦 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀺.

‘‘𑀅𑀧𑀭𑀫𑁆𑀧𑀺, 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀺𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺, 𑀬𑁂𑀦 𑀓𑀸𑀭𑀡𑁂𑀦 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀬𑀤𑀺, 𑀫𑀳𑀸𑀭𑀸𑀚, 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, ‘𑀅𑀕𑁆𑀕𑁄 𑀩𑀼𑀤𑁆𑀥𑁄’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸 𑀪𑀯𑁂𑀬𑁆𑀬, ‘𑀚𑁂𑀝𑁆𑀞𑁄 𑀩𑀼𑀤𑁆𑀥𑁄’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸 𑀪𑀯𑁂𑀬𑁆𑀬, ‘𑀲𑁂𑀝𑁆𑀞𑁄 𑀩𑀼𑀤𑁆𑀥𑁄’𑀢𑀺, ‘𑀯𑀺𑀲𑀺𑀝𑁆𑀞𑁄 𑀩𑀼𑀤𑁆𑀥𑁄’𑀢𑀺, ‘𑀉𑀢𑁆𑀢𑀫𑁄 𑀩𑀼𑀤𑁆𑀥𑁄’𑀢𑀺, ‘𑀧𑀯𑀭𑁄 𑀩𑀼𑀤𑁆𑀥𑁄’𑀢𑀺, ‘𑀅𑀲𑀫𑁄 𑀩𑀼𑀤𑁆𑀥𑁄’𑀢𑀺, ‘𑀅𑀲𑀫𑀲𑀫𑁄 𑀩𑀼𑀤𑁆𑀥𑁄’𑀢𑀺, ‘𑀅𑀧𑁆𑀧𑀝𑀺𑀫𑁄 𑀩𑀼𑀤𑁆𑀥𑁄’𑀢𑀺, ‘𑀅𑀧𑁆𑀧𑀝𑀺𑀪𑀸𑀕𑁄 𑀩𑀼𑀤𑁆𑀥𑁄’𑀢𑀺, ‘𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄 𑀩𑀼𑀤𑁆𑀥𑁄’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸 𑀪𑀯𑁂𑀬𑁆𑀬. 𑀇𑀤𑀫𑁆𑀧𑀺 𑀔𑁄 𑀢𑁆𑀯𑀁, 𑀫𑀳𑀸𑀭𑀸𑀚, 𑀓𑀸𑀭𑀡𑀁 𑀅𑀢𑁆𑀣𑀢𑁄 𑀲𑀫𑁆𑀧𑀝𑀺𑀘𑁆𑀙, 𑀬𑁂𑀦 𑀓𑀸𑀭𑀡𑁂𑀦 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀺.

‘‘𑀅𑀧𑀺 𑀘 𑀔𑁄, 𑀫𑀳𑀸𑀭𑀸𑀚, 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀲𑀪𑀸𑀯𑀧𑀓𑀢𑀺 𑀏𑀲𑀸𑀬𑀁, 𑀏𑀓𑁄 𑀬𑁂𑀯 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺. 𑀓𑀲𑁆𑀫𑀸 𑀓𑀸𑀭𑀡𑀸? 𑀫𑀳𑀦𑁆𑀢𑀢𑀸𑀬 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀕𑀼𑀡𑀸𑀦𑀁. 𑀅𑀜𑁆𑀜𑀫𑁆𑀧𑀺, 𑀫𑀳𑀸𑀭𑀸𑀚, 𑀬𑀁 𑀮𑁄𑀓𑁂 𑀫𑀳𑀦𑁆𑀢𑀁, 𑀢𑀁 𑀏𑀓𑀁 𑀬𑁂𑀯 𑀳𑁄𑀢𑀺. 𑀧𑀣𑀯𑀻, 𑀫𑀳𑀸𑀭𑀸𑀚, 𑀫𑀳𑀦𑁆𑀢𑀻, 𑀲𑀸 𑀏𑀓𑀸 𑀬𑁂𑀯. 𑀲𑀸𑀕𑀭𑁄 𑀫𑀳𑀦𑁆𑀢𑁄, 𑀲𑁄 𑀏𑀓𑁄 𑀬𑁂𑀯. 𑀲𑀺𑀦𑁂𑀭𑀼 𑀕𑀺𑀭𑀺𑀭𑀸𑀚𑀸 𑀫𑀳𑀦𑁆𑀢𑁄, 𑀲𑁄 𑀏𑀓𑁄 𑀬𑁂𑀯. 𑀆𑀓𑀸𑀲𑁄 𑀫𑀳𑀦𑁆𑀢𑁄, 𑀲𑁄 𑀏𑀓𑁄 𑀬𑁂𑀯. 𑀲𑀓𑁆𑀓𑁄 𑀫𑀳𑀦𑁆𑀢𑁄, 𑀲𑁄 𑀏𑀓𑁄 𑀬𑁂𑀯. 𑀫𑀸𑀭𑁄 𑀫𑀳𑀦𑁆𑀢𑁄, 𑀲𑁄 𑀏𑀓𑁄 𑀬𑁂𑀯. 𑀫𑀳𑀸𑀩𑁆𑀭𑀳𑁆𑀫𑀸 𑀫𑀳𑀦𑁆𑀢𑁄, 𑀲𑁄 𑀏𑀓𑁄 𑀬𑁂𑀯. 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀫𑀳𑀦𑁆𑀢𑁄, 𑀲𑁄 𑀏𑀓𑁄 𑀬𑁂𑀯 𑀮𑁄𑀓𑀲𑁆𑀫𑀺𑀁. 𑀬𑀢𑁆𑀣 𑀢𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀅𑀜𑁆𑀜𑀲𑁆𑀲 𑀑𑀓𑀸𑀲𑁄 𑀦 𑀳𑁄𑀢𑀺, 𑀢𑀲𑁆𑀫𑀸, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀏𑀓𑁄 𑀬𑁂𑀯 𑀮𑁄𑀓𑀲𑁆𑀫𑀺𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺.

‘‘𑀲𑀼𑀓𑀣𑀺𑀢𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀜𑁆𑀳𑁄 𑀑𑀧𑀫𑁆𑀫𑁂𑀳𑀺 𑀓𑀸𑀭𑀡𑁂𑀳𑀺. 𑀅𑀦𑀺𑀧𑀼𑀡𑁄𑀧𑁂𑀢𑀁 𑀲𑀼𑀢𑁆𑀯𑀸 𑀅𑀢𑁆𑀢𑀫𑀦𑁄 𑀪𑀯𑁂𑀬𑁆𑀬, 𑀓𑀺𑀁 𑀧𑀦 𑀫𑀸𑀤𑀺𑀲𑁄 𑀫𑀳𑀸𑀧𑀜𑁆𑀜𑁄. 𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀤𑁆𑀯𑀺𑀦𑁆𑀦𑀁 𑀩𑀼𑀤𑁆𑀥𑀸𑀦𑀁 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀧𑀜𑁆𑀳𑁄 𑀧𑀞𑀫𑁄.

𑁨. 𑀕𑁄𑀢𑀫𑀺𑀯𑀢𑁆𑀣𑀤𑀸𑀦𑀧𑀜𑁆𑀳𑁄

𑁨. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 𑀫𑀸𑀢𑀼𑀘𑁆𑀙𑀸𑀬 𑀫𑀳𑀸𑀧𑀚𑀸𑀧𑀢𑀺𑀬𑀸 𑀕𑁄𑀢𑀫𑀺𑀬𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬 𑀤𑀻𑀬𑀫𑀸𑀦𑀸𑀬 ‘𑀲𑀗𑁆𑀖𑁂 𑀕𑁄𑀢𑀫𑀺 𑀤𑁂𑀳𑀺, 𑀲𑀗𑁆𑀖𑁂 𑀢𑁂 𑀤𑀺𑀦𑁆𑀦𑁂 𑀅𑀳𑀜𑁆𑀘𑁂𑀯 𑀧𑀽𑀚𑀺𑀢𑁄 𑀪𑀯𑀺𑀲𑁆𑀲𑀸𑀫𑀺 𑀲𑀗𑁆𑀖𑁄 𑀘𑀸’𑀢𑀺. 𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀣𑀸𑀕𑀢𑁄 𑀲𑀗𑁆𑀖𑀭𑀢𑀦𑀢𑁄 𑀦 𑀪𑀸𑀭𑀺𑀓𑁄 𑀦 𑀕𑀭𑀼𑀓𑁄 𑀦 𑀤𑀓𑁆𑀔𑀺𑀡𑁂𑀬𑁆𑀬𑁄, 𑀬𑀁 𑀢𑀣𑀸𑀕𑀢𑁄 𑀲𑀓𑀸𑀬 𑀫𑀸𑀢𑀼𑀘𑁆𑀙𑀸𑀬 𑀲𑀬𑀁 𑀧𑀺𑀜𑁆𑀚𑀺𑀢𑀁 [𑀧𑀺𑀘𑁆𑀙𑀺𑀢𑀁 (𑀲𑀻. 𑀧𑀻.)] 𑀲𑀬𑀁 𑀮𑀼𑀜𑁆𑀘𑀺𑀢𑀁 𑀲𑀬𑀁 𑀧𑁄𑀣𑀺𑀢𑀁 𑀲𑀬𑀁 𑀓𑀦𑁆𑀢𑀺𑀢𑀁 𑀲𑀬𑀁 𑀯𑀸𑀬𑀺𑀢𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀅𑀢𑁆𑀢𑀦𑁄 𑀤𑀻𑀬𑀫𑀸𑀦𑀁 𑀲𑀗𑁆𑀖𑀲𑁆𑀲 𑀤𑀸𑀧𑁂𑀲𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀣𑀸𑀕𑀢𑁄 𑀲𑀗𑁆𑀖𑀭𑀢𑀦𑀢𑁄 𑀉𑀢𑁆𑀢𑀭𑁄 𑀪𑀯𑁂𑀬𑁆𑀬 𑀅𑀥𑀺𑀓𑁄 𑀯𑀸 𑀯𑀺𑀲𑀺𑀝𑁆𑀞𑁄 𑀯𑀸, ‘𑀫𑀬𑀺 𑀤𑀺𑀦𑁆𑀦𑁂 𑀫𑀳𑀧𑁆𑀨𑀮𑀁 𑀪𑀯𑀺𑀲𑁆𑀲𑀢𑀻’𑀢𑀺 𑀦 𑀢𑀣𑀸𑀕𑀢𑁄 𑀫𑀸𑀢𑀼𑀘𑁆𑀙𑀸𑀬 𑀲𑀬𑀁 𑀧𑀺𑀜𑁆𑀚𑀺𑀢𑀁 𑀲𑀬𑀁 𑀮𑀼𑀜𑁆𑀘𑀺𑀢𑀁 𑀲𑀬𑀁 𑀧𑁄𑀣𑀺𑀢𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀲𑀗𑁆𑀖𑁂 𑀤𑀸𑀧𑁂𑀬𑁆𑀬, 𑀬𑀲𑁆𑀫𑀸 𑀘 𑀔𑁄 𑀪𑀦𑁆𑀢𑁂 𑀦𑀸𑀕𑀲𑁂𑀦 𑀢𑀣𑀸𑀕𑀢𑁄 𑀅𑀢𑁆𑀢𑀸𑀦𑀁 𑀦 𑀧𑀢𑁆𑀣𑀬𑀢𑀺 [𑀦 𑀧𑀢𑁆𑀣𑀻𑀬𑀢𑀺 (𑀲𑀻. 𑀧𑀻.)] 𑀦 𑀉𑀧𑀦𑀺𑀲𑁆𑀲𑀬𑀢𑀺, 𑀢𑀲𑁆𑀫𑀸 𑀢𑀣𑀸𑀕𑀢𑁄 𑀫𑀸𑀢𑀼𑀘𑁆𑀙𑀸𑀬 𑀢𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀲𑀗𑁆𑀖𑀲𑁆𑀲 𑀤𑀸𑀧𑁂𑀲𑀻’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀫𑀸𑀢𑀼𑀘𑁆𑀙𑀸𑀬 𑀫𑀳𑀸𑀧𑀚𑀸𑀧𑀢𑀺𑀬𑀸 𑀕𑁄𑀢𑀫𑀺𑀬𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬 𑀤𑀻𑀬𑀫𑀸𑀦𑀸𑀬 ‘𑀲𑀗𑁆𑀖𑁂 𑀕𑁄𑀢𑀫𑀺 𑀤𑁂𑀳𑀺, 𑀲𑀗𑁆𑀖𑁂 𑀢𑁂 𑀤𑀺𑀦𑁆𑀦𑁂 𑀅𑀳𑀜𑁆𑀘𑁂𑀯 𑀧𑀽𑀚𑀺𑀢𑁄 𑀪𑀯𑀺𑀲𑁆𑀲𑀸𑀫𑀺 𑀲𑀗𑁆𑀖𑁄 𑀘𑀸’𑀢𑀺. 𑀢𑀁 𑀧𑀦 𑀦 𑀅𑀢𑁆𑀢𑀦𑁄 𑀧𑀢𑀺𑀫𑀸𑀦𑀦𑀲𑁆𑀲 𑀅𑀯𑀺𑀧𑀸𑀓𑀢𑀸𑀬 𑀦 𑀅𑀤𑀓𑁆𑀔𑀺𑀡𑁂𑀬𑁆𑀬𑀢𑀸𑀬, 𑀅𑀧𑀺 𑀘 𑀔𑁄, 𑀫𑀳𑀸𑀭𑀸𑀚, 𑀳𑀺𑀢𑀢𑁆𑀣𑀸𑀬 𑀅𑀦𑀼𑀓𑀫𑁆𑀧𑀸𑀬 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀲𑀗𑁆𑀖𑁄 𑀫𑀫𑀘𑁆𑀘𑀬𑁂𑀦 𑀘𑀺𑀢𑁆𑀢𑀻𑀓𑀢𑁄 𑀪𑀯𑀺𑀲𑁆𑀲𑀢𑀻𑀢𑀺 𑀯𑀺𑀚𑁆𑀚𑀫𑀸𑀦𑁂 𑀬𑁂𑀯 𑀕𑀼𑀡𑁂 𑀧𑀭𑀺𑀓𑀺𑀢𑁆𑀢𑀬𑀦𑁆𑀢𑁄 𑀏𑀯𑀫𑀸𑀳 ‘𑀲𑀗𑁆𑀖𑁂 𑀕𑁄𑀢𑀫𑀺 𑀤𑁂𑀳𑀺, 𑀲𑀗𑁆𑀖𑁂 𑀢𑁂 𑀤𑀺𑀦𑁆𑀦𑁂 𑀅𑀳𑀜𑁆𑀘𑁂𑀯 𑀧𑀽𑀚𑀺𑀢𑁄 𑀪𑀯𑀺𑀲𑁆𑀲𑀸𑀫𑀺 𑀲𑀗𑁆𑀖𑁄 𑀘𑀸’𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀺𑀢𑀸 𑀥𑀭𑀫𑀸𑀦𑁄 𑀬𑁂𑀯 𑀅𑀫𑀘𑁆𑀘𑀪𑀝𑀩𑀮𑀤𑁄𑀯𑀸𑀭𑀺𑀓𑀅𑀦𑀻𑀓𑀝𑁆𑀞𑀧𑀸𑀭𑀺𑀲𑀚𑁆𑀚𑀚𑀦𑀫𑀚𑁆𑀛𑁂 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀧𑀼𑀢𑁆𑀢𑀲𑁆𑀲 𑀯𑀺𑀚𑁆𑀚𑀫𑀸𑀦𑀁 𑀬𑁂𑀯 𑀕𑀼𑀡𑀁 𑀧𑀓𑀺𑀢𑁆𑀢𑁂𑀢𑀺 [𑀧𑀭𑀺𑀓𑀺𑀢𑁆𑀢𑁂𑀢𑀺 (𑀓.)] ‘𑀇𑀥 𑀞𑀧𑀺𑀢𑁄 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀚𑀦𑀫𑀚𑁆𑀛𑁂 𑀧𑀽𑀚𑀺𑀢𑁄 𑀪𑀯𑀺𑀲𑁆𑀲𑀢𑀻’𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀳𑀺𑀢𑀢𑁆𑀣𑀸𑀬 𑀅𑀦𑀼𑀓𑀫𑁆𑀧𑀸𑀬 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀲𑀗𑁆𑀖𑁄 𑀫𑀫𑀘𑁆𑀘𑀬𑁂𑀦 𑀘𑀺𑀢𑁆𑀢𑀻𑀓𑀢𑁄 𑀪𑀯𑀺𑀲𑁆𑀲𑀢𑀻𑀢𑀺 𑀯𑀺𑀚𑁆𑀚𑀫𑀸𑀦𑁂 𑀬𑁂𑀯 𑀕𑀼𑀡𑁂 𑀧𑀓𑀺𑀢𑁆𑀢𑀬𑀦𑁆𑀢𑁄 𑀏𑀯𑀫𑀸𑀳 ‘𑀲𑀗𑁆𑀖𑁂 𑀕𑁄𑀢𑀫𑀺 𑀤𑁂𑀳𑀺, 𑀲𑀗𑁆𑀖𑁂 𑀢𑁂 𑀤𑀺𑀦𑁆𑀦𑁂 𑀅𑀳𑀜𑁆𑀘𑁂𑀯 𑀧𑀼𑀚𑀺𑀢𑁄 𑀪𑀯𑀺𑀲𑁆𑀲𑀸𑀫𑀺 𑀲𑀗𑁆𑀖𑁄 𑀘𑀸’𑀢𑀺.

‘‘𑀦 𑀔𑁄, 𑀫𑀳𑀸𑀭𑀸𑀚, 𑀢𑀸𑀯𑀢𑀓𑁂𑀦 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀦𑀼𑀧𑁆𑀧𑀤𑀸𑀦𑀫𑀢𑁆𑀢𑀓𑁂𑀦 𑀲𑀗𑁆𑀖𑁄 𑀢𑀣𑀸𑀕𑀢𑀢𑁄 𑀅𑀥𑀺𑀓𑁄 𑀦𑀸𑀫 𑀳𑁄𑀢𑀺 𑀯𑀺𑀲𑀺𑀝𑁆𑀞𑁄 𑀯𑀸. 𑀬𑀣𑀸, 𑀫𑀳𑀸𑀭𑀸𑀚, 𑀫𑀸𑀢𑀸𑀧𑀺𑀢𑀭𑁄 𑀧𑀼𑀢𑁆𑀢𑀸𑀦𑀁 𑀉𑀘𑁆𑀙𑀸𑀤𑁂𑀦𑁆𑀢𑀺 𑀧𑀭𑀺𑀫𑀤𑁆𑀤𑀦𑁆𑀢𑀺 𑀦𑀳𑀸𑀧𑁂𑀦𑁆𑀢𑀺 𑀲𑀫𑁆𑀩𑀸𑀳𑁂𑀦𑁆𑀢𑀺, 𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀢𑀸𑀯𑀢𑀓𑁂𑀦 𑀉𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀦𑀳𑀸𑀧𑀦𑀲𑀫𑁆𑀩𑀸𑀳𑀦𑀫𑀢𑁆𑀢𑀓𑁂𑀦 ‘𑀧𑀼𑀢𑁆𑀢𑁄 𑀫𑀸𑀢𑀸𑀧𑀺𑀢𑀽𑀳𑀺 𑀅𑀥𑀺𑀓𑁄 𑀦𑀸𑀫 𑀳𑁄𑀢𑀺 𑀯𑀺𑀲𑀺𑀝𑁆𑀞𑁄 𑀯𑀸’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀅𑀓𑀸𑀫𑀓𑀭𑀡𑀻𑀬𑀸 𑀪𑀦𑁆𑀢𑁂 𑀧𑀼𑀢𑁆𑀢𑀸 𑀫𑀸𑀢𑀸𑀧𑀺𑀢𑀽𑀦𑀁, 𑀢𑀲𑁆𑀫𑀸 𑀫𑀸𑀢𑀸𑀧𑀺𑀢𑀭𑁄 𑀧𑀼𑀢𑁆𑀢𑀸𑀦𑀁 𑀉𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀦𑀳𑀸𑀧𑀦𑀲𑀫𑁆𑀩𑀸𑀳𑀦𑀁 𑀓𑀭𑁄𑀦𑁆𑀢𑀻’’𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦 𑀢𑀸𑀯𑀢𑀓𑁂𑀦 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀦𑀼𑀧𑁆𑀧𑀤𑀸𑀦𑀫𑀢𑁆𑀢𑀓𑁂𑀦 𑀲𑀗𑁆𑀖𑁄 𑀢𑀣𑀸𑀕𑀢𑀢𑁄 𑀅𑀥𑀺𑀓𑁄 𑀦𑀸𑀫 𑀳𑁄𑀢𑀺 𑀯𑀺𑀲𑀺𑀝𑁆𑀞𑁄 𑀯𑀸𑀢𑀺. 𑀅𑀧𑀺 𑀘 𑀢𑀣𑀸𑀕𑀢𑁄 𑀅𑀓𑀸𑀫𑀓𑀭𑀡𑀻𑀬𑀁 𑀓𑀭𑁄𑀦𑁆𑀢𑁄 𑀫𑀸𑀢𑀼𑀘𑁆𑀙𑀸𑀬 𑀢𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀲𑀗𑁆𑀖𑀲𑁆𑀲 𑀤𑀸𑀧𑁂𑀲𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀭𑀜𑁆𑀜𑁄 𑀉𑀧𑀸𑀬𑀦𑀁 𑀆𑀳𑀭𑁂𑀬𑁆𑀬, 𑀢𑀁 𑀭𑀸𑀚𑀸 𑀉𑀧𑀸𑀬𑀦𑀁 𑀅𑀜𑁆𑀜𑀢𑀭𑀲𑁆𑀲 𑀪𑀝𑀲𑁆𑀲 𑀯𑀸 𑀩𑀮𑀲𑁆𑀲 𑀯𑀸 𑀲𑁂𑀦𑀸𑀧𑀢𑀺𑀲𑁆𑀲 𑀯𑀸 𑀧𑀼𑀭𑁄𑀳𑀺𑀢𑀲𑁆𑀲 𑀯𑀸 𑀤𑀤𑁂𑀬𑁆𑀬. 𑀅𑀧𑀺 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀢𑀸𑀯𑀢𑀓𑁂𑀦 𑀉𑀧𑀸𑀬𑀦𑀧𑀝𑀺𑀮𑀸𑀪𑀫𑀢𑁆𑀢𑀓𑁂𑀦 𑀭𑀜𑁆𑀜𑀸 𑀅𑀥𑀺𑀓𑁄 𑀦𑀸𑀫 𑀳𑁄𑀢𑀺 𑀯𑀺𑀲𑀺𑀝𑁆𑀞𑁄 𑀯𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀭𑀸𑀚𑀪𑀢𑁆𑀢𑀺𑀓𑁄, 𑀪𑀦𑁆𑀢𑁂, 𑀲𑁄 𑀧𑀼𑀭𑀺𑀲𑁄 𑀭𑀸𑀚𑀽𑀧𑀚𑀻𑀯𑀻, 𑀢𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑁄 𑀭𑀸𑀚𑀸 𑀉𑀧𑀸𑀬𑀦𑀁 𑀤𑁂𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦 𑀢𑀸𑀯𑀢𑀓𑁂𑀦 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀦𑀼𑀧𑁆𑀧𑀤𑀸𑀦𑀫𑀢𑁆𑀢𑀓𑁂𑀦 𑀲𑀗𑁆𑀖𑁄 𑀢𑀣𑀸𑀕𑀢𑀢𑁄 𑀅𑀥𑀺𑀓𑁄 𑀦𑀸𑀫 𑀳𑁄𑀢𑀺 𑀯𑀺𑀲𑀺𑀝𑁆𑀞𑁄 𑀯𑀸, 𑀅𑀣 𑀔𑁄 𑀢𑀣𑀸𑀕𑀢𑀪𑀢𑁆𑀢𑀺𑀓𑁄 𑀢𑀣𑀸𑀕𑀢𑀽𑀧𑀚𑀻𑀯𑀻. 𑀢𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑁄 𑀢𑀣𑀸𑀕𑀢𑁄 𑀲𑀗𑁆𑀖𑀲𑁆𑀲 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀤𑀸𑀧𑁂𑀲𑀺.

‘‘𑀅𑀧𑀺 𑀘, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑀲𑁆𑀲 𑀏𑀯𑀁 𑀅𑀳𑁄𑀲𑀺 ‘𑀲𑀪𑀸𑀯𑀧𑀝𑀺𑀧𑀽𑀚𑀦𑀻𑀬𑁄 𑀲𑀗𑁆𑀖𑁄, 𑀫𑀫 𑀲𑀦𑁆𑀢𑀓𑁂𑀦 𑀲𑀗𑁆𑀖𑀁 𑀧𑀝𑀺𑀧𑀽𑀚𑁂𑀲𑁆𑀲𑀸𑀫𑀻’𑀢𑀺 𑀲𑀗𑁆𑀖𑀲𑁆𑀲 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀤𑀸𑀧𑁂𑀲𑀺, 𑀦, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀅𑀢𑁆𑀢𑀦𑁄 𑀬𑁂𑀯 𑀧𑀝𑀺𑀧𑀽𑀚𑀦𑀁 𑀯𑀡𑁆𑀡𑁂𑀢𑀺, 𑀅𑀣 𑀔𑁄 𑀬𑁂 𑀮𑁄𑀓𑁂 𑀧𑀝𑀺𑀧𑀽𑀚𑀦𑀸𑀭𑀳𑀸, 𑀢𑁂𑀲𑀫𑁆𑀧𑀺 𑀢𑀣𑀸𑀕𑀢𑁄 𑀧𑀝𑀺𑀧𑀽𑀚𑀦𑀁 𑀯𑀡𑁆𑀡𑁂𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑀫𑀚𑁆𑀛𑀺𑀫𑀦𑀺𑀓𑀸𑀬𑀯𑀭𑀮𑀜𑁆𑀙𑀓𑁂 𑀥𑀫𑁆𑀫𑀤𑀸𑀬𑀸𑀤𑀥𑀫𑁆𑀫𑀧𑀭𑀺𑀬𑀸𑀬𑁂 𑀅𑀧𑁆𑀧𑀺𑀘𑁆𑀙𑀧𑁆𑀧𑀝𑀺𑀧𑀢𑁆𑀢𑀺𑀁 𑀧𑀓𑀺𑀢𑁆𑀢𑀬𑀫𑀸𑀦𑁂𑀦 ‘𑀅𑀲𑀼 𑀬𑁂𑀯 𑀫𑁂 𑀧𑀼𑀭𑀺𑀫𑁄 𑀪𑀺𑀓𑁆𑀔𑀼 𑀧𑀼𑀚𑁆𑀚𑀢𑀭𑁄 𑀘 𑀧𑀸𑀲𑀁𑀲𑀢𑀭𑁄 𑀘𑀸’𑀢𑀺. ‘‘𑀦𑀢𑁆𑀣𑀺, 𑀫𑀳𑀸𑀭𑀸𑀚, 𑀪𑀯𑁂𑀲𑀼 𑀓𑁄𑀘𑀺 𑀲𑀢𑁆𑀢𑁄 𑀢𑀣𑀸𑀕𑀢𑀢𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀯𑀸 𑀉𑀢𑁆𑀢𑀭𑁄 𑀯𑀸 𑀅𑀥𑀺𑀓𑁄 𑀯𑀸 𑀯𑀺𑀲𑀺𑀝𑁆𑀞𑁄 𑀯𑀸, 𑀢𑀣𑀸𑀕𑀢𑁄𑀯 𑀉𑀢𑁆𑀢𑀭𑁄 𑀅𑀥𑀺𑀓𑁄 𑀯𑀺𑀲𑀺𑀝𑁆𑀞𑁄.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀯𑀭𑁂 𑀫𑀸𑀡𑀯𑀕𑀸𑀫𑀺𑀓𑁂𑀦 𑀤𑁂𑀯𑀧𑀼𑀢𑁆𑀢𑁂𑀦 𑀪𑀕𑀯𑀢𑁄 𑀧𑀼𑀭𑀢𑁄 𑀞𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑀫𑀚𑁆𑀛𑁂 𑁋

‘‘‘𑀯𑀺𑀧𑀼𑀮𑁄 𑀭𑀸𑀚𑀕𑀳𑀻𑀬𑀸𑀦𑀁 [𑀭𑀸𑀚𑀕𑀳𑀺𑀓𑀸𑀦𑀁 (𑀓.) 𑀲𑀁. 𑀦𑀺. 𑁧.𑁧𑁧𑁧 𑀧𑀲𑁆𑀲𑀺𑀢𑀩𑁆𑀩𑀁], 𑀕𑀺𑀭𑀺 𑀲𑁂𑀝𑁆𑀞𑁄 𑀧𑀯𑀼𑀘𑁆𑀘𑀢𑀺;

𑀲𑁂𑀢𑁄 𑀳𑀺𑀫𑀯𑀢𑀁 𑀲𑁂𑀝𑁆𑀞𑁄, 𑀆𑀤𑀺𑀘𑁆𑀘𑁄 𑀅𑀖𑀕𑀸𑀫𑀺𑀦𑀁.

‘‘‘𑀲𑀫𑀼𑀤𑁆𑀤𑁄 𑀉𑀤𑀥𑀺𑀦𑀁 𑀲𑁂𑀝𑁆𑀞𑁄, 𑀦𑀓𑁆𑀔𑀢𑁆𑀢𑀸𑀦𑀜𑁆𑀘 𑀘𑀦𑁆𑀤𑀺𑀫𑀸;

𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲, 𑀩𑀼𑀤𑁆𑀥𑁄 𑀅𑀕𑁆𑀕𑁄 𑀧𑀯𑀼𑀘𑁆𑀘𑀢𑀻’𑀢𑀺.

‘‘𑀢𑀸 𑀔𑁄 𑀧𑀦𑁂𑀢𑀸, 𑀫𑀳𑀸𑀭𑀸𑀚, 𑀫𑀸𑀡𑀯𑀕𑀸𑀫𑀺𑀓𑁂𑀦 𑀤𑁂𑀯𑀧𑀼𑀢𑁆𑀢𑁂𑀦 𑀕𑀸𑀣𑀸 𑀲𑀼𑀕𑀻𑀢𑀸 𑀦 𑀤𑀼𑀕𑁆𑀕𑀻𑀢𑀸, 𑀲𑀼𑀪𑀸𑀲𑀺𑀢𑀸 𑀦 𑀤𑀼𑀩𑁆𑀪𑀸𑀲𑀺𑀢𑀸, 𑀅𑀦𑀼𑀫𑀢𑀸 𑀘 𑀪𑀕𑀯𑀢𑀸, 𑀦𑀦𑀼, 𑀫𑀳𑀸𑀭𑀸𑀚, 𑀣𑁂𑀭𑁂𑀦𑀧𑀺 𑀲𑀸𑀭𑀺𑀧𑀼𑀢𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀪𑀡𑀺𑀢𑀁 𑁋

‘‘‘𑀏𑀓𑁄 𑀫𑀦𑁄𑀧𑀲𑀸𑀤𑁄; 𑀲𑀭𑀡𑀕𑀫𑀦𑀫𑀜𑁆𑀚𑀮𑀺𑀧𑀡𑀸𑀫𑁄 𑀯𑀸;

𑀉𑀲𑁆𑀲𑀳𑀢𑁂 𑀢𑀸𑀭𑀬𑀺𑀢𑀼𑀁, 𑀫𑀸𑀭𑀩𑀮𑀦𑀺𑀲𑀽𑀤𑀦𑁂 𑀩𑀼𑀤𑁆𑀥𑁂’𑀢𑀺.

‘‘𑀪𑀕𑀯𑀢𑀸 𑀘 𑀪𑀡𑀺𑀢𑀁 𑀤𑁂𑀯𑀸𑀢𑀺𑀤𑁂𑀯𑁂𑀦 ‘𑀏𑀓𑀧𑀼𑀕𑁆𑀕𑀮𑁄, 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀓𑀢𑀫𑁄 𑀏𑀓𑀧𑀼𑀕𑁆𑀕𑀮𑁄? 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄…𑀧𑁂… 𑀤𑁂𑀯𑀫𑀦𑀼𑀲𑁆𑀲𑀸𑀦’’’𑀦𑁆𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀕𑁄𑀢𑀫𑀺𑀯𑀢𑁆𑀣𑀤𑀸𑀦𑀧𑀜𑁆𑀳𑁄 𑀤𑀼𑀢𑀺𑀬𑁄.

𑁩. 𑀕𑀺𑀳𑀺𑀧𑀩𑁆𑀩𑀚𑀺𑀢𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀧𑀜𑁆𑀳𑁄

[𑁩] ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 ‘𑀕𑀺𑀳𑀺𑀦𑁄 𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀯𑀡𑁆𑀡𑁂𑀫𑀺, 𑀕𑀺𑀳𑀻 𑀯𑀸 𑀪𑀺𑀓𑁆𑀔𑀯𑁂 𑀧𑀩𑁆𑀩𑀚𑀺𑀢𑁄 𑀯𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀸𑀥𑀺𑀓𑀭𑀡𑀳𑁂𑀢𑀼 𑀆𑀭𑀸𑀥𑀓𑁄 𑀳𑁄𑀢𑀺 𑀜𑀸𑀬𑀁 𑀥𑀫𑁆𑀫𑀁 𑀓𑀼𑀲𑀮’’𑀦𑁆𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀕𑀺𑀳𑀻 𑀑𑀤𑀸𑀢𑀯𑀲𑀦𑁄 𑀓𑀸𑀫𑀪𑁄𑀕𑀻 𑀧𑀼𑀢𑁆𑀢𑀤𑀸𑀭𑀲𑀫𑁆𑀩𑀸𑀥𑀲𑀬𑀦𑀁 𑀅𑀚𑁆𑀛𑀸𑀯𑀲𑀦𑁆𑀢𑁄 𑀓𑀸𑀲𑀺𑀓𑀘𑀦𑁆𑀤𑀦𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑁄 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀥𑀸𑀭𑁂𑀦𑁆𑀢𑁄 𑀚𑀸𑀢𑀭𑀽𑀧𑀭𑀚𑀢𑀁 𑀲𑀸𑀤𑀺𑀬𑀦𑁆𑀢𑁄 𑀫𑀡𑀺𑀓𑀼𑀡𑁆𑀟𑀮 [𑀫𑀡𑀺𑀓𑀦𑀓 (𑀲𑀻. 𑀧𑀻.)] 𑀯𑀺𑀘𑀺𑀢𑁆𑀢𑀫𑁄𑀴𑀺𑀩𑀤𑁆𑀥𑁄 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀆𑀭𑀸𑀥𑀓𑁄 𑀳𑁄𑀢𑀺 𑀜𑀸𑀬𑀁 𑀥𑀫𑁆𑀫𑀁 𑀓𑀼𑀲𑀮𑀁, 𑀧𑀩𑁆𑀩𑀚𑀺𑀢𑁄𑀧𑀺 𑀪𑀡𑁆𑀟𑀼𑀓𑀸𑀲𑀸𑀯𑀯𑀢𑁆𑀣𑀯𑀲𑀦𑁄 𑀧𑀭𑀧𑀺𑀡𑁆𑀟𑀫𑀚𑁆𑀛𑀼𑀧𑀕𑀢𑁄 𑀘𑀢𑀽𑀲𑀼 𑀲𑀻𑀮𑀓𑁆𑀔𑀦𑁆𑀥𑁂𑀲𑀼 𑀲𑀫𑁆𑀫𑀸𑀧𑀭𑀺𑀧𑀽𑀭𑀓𑀸𑀭𑀻 𑀤𑀺𑀬𑀟𑁆𑀠𑁂𑀲𑀼 𑀲𑀺𑀓𑁆𑀔𑀸𑀧𑀤𑀲𑀢𑁂𑀲𑀼 𑀲𑀫𑀸𑀤𑀸𑀬 𑀯𑀢𑁆𑀢𑀦𑁆𑀢𑁄 𑀢𑁂𑀭𑀲𑀲𑀼 𑀥𑀼𑀢𑀕𑀼𑀡𑁂𑀲𑀼 𑀅𑀦𑀯𑀲𑁂𑀲𑀁 𑀯𑀢𑁆𑀢𑀦𑁆𑀢𑁄 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀆𑀭𑀸𑀥𑀓𑁄 𑀳𑁄𑀢𑀺 𑀜𑀸𑀬𑀁 𑀥𑀫𑁆𑀫𑀁 𑀓𑀼𑀲𑀮𑀁. 𑀢𑀢𑁆𑀣, 𑀪𑀦𑁆𑀢𑁂, 𑀓𑁄 𑀯𑀺𑀲𑁂𑀲𑁄 𑀕𑀺𑀳𑀺𑀦𑁄 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸? 𑀅𑀨𑀮𑀁 𑀳𑁄𑀢𑀺 𑀢𑀧𑁄𑀓𑀫𑁆𑀫𑀁, 𑀦𑀺𑀭𑀢𑁆𑀣𑀓𑀸 𑀧𑀩𑁆𑀩𑀚𑁆𑀚𑀸. 𑀯𑀜𑁆𑀛𑀸 𑀲𑀺𑀓𑁆𑀔𑀸𑀧𑀤𑀕𑁄𑀧𑀦𑀸, 𑀫𑁄𑀖𑀁 𑀥𑀼𑀢𑀕𑀼𑀡𑀲𑀫𑀸𑀤𑀸𑀦𑀁, 𑀓𑀺𑀁 𑀢𑀢𑁆𑀣 𑀤𑀼𑀓𑁆𑀔𑀫𑀦𑀼𑀘𑀺𑀡𑁆𑀡𑁂𑀦, 𑀦𑀦𑀼 𑀦𑀸𑀫 𑀲𑀼𑀔𑁂𑀦𑁂𑀯 𑀲𑀼𑀔𑀁 𑀅𑀥𑀺𑀕𑀦𑁆𑀢𑀩𑁆𑀩’’𑀦𑁆𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀕𑀺𑀳𑀺𑀦𑁄 𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀯𑀡𑁆𑀡𑁂𑀫𑀺, 𑀕𑀺𑀳𑀻 𑀯𑀸, 𑀪𑀺𑀓𑁆𑀔𑀯𑁂, 𑀧𑀩𑁆𑀩𑀚𑀺𑀢𑁄 𑀯𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀸𑀥𑀺𑀓𑀭𑀡𑀳𑁂𑀢𑀼 𑀆𑀭𑀸𑀥𑀓𑁄 𑀳𑁄𑀢𑀺 𑀜𑀸𑀬𑀁 𑀥𑀫𑁆𑀫𑀁 𑀓𑀼𑀲𑀮’’𑀦𑁆𑀢𑀺. 𑀏𑀯𑀫𑁂𑀢𑀁, 𑀫𑀳𑀸𑀭𑀸𑀚, 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄𑀯 𑀲𑁂𑀝𑁆𑀞𑁄, 𑀧𑀩𑁆𑀩𑀚𑀺𑀢𑁄𑀧𑀺, 𑀫𑀳𑀸𑀭𑀸𑀚, ‘𑀧𑀩𑁆𑀩𑀚𑀺𑀢𑁄𑀫𑁆𑀳𑀻’𑀢𑀺 𑀦 𑀲𑀫𑁆𑀫𑀸 𑀧𑀝𑀺𑀧𑀚𑁆𑀚𑁂𑀬𑁆𑀬, 𑀅𑀣 𑀔𑁄 𑀲𑁄 𑀆𑀭𑀓𑀸𑀯 𑀲𑀸𑀫𑀜𑁆𑀜𑀸, 𑀆𑀭𑀓𑀸𑀯 𑀩𑁆𑀭𑀳𑁆𑀫𑀜𑁆𑀜𑀸, 𑀧𑀕𑁂𑀯 𑀕𑀺𑀳𑀻 𑀑𑀤𑀸𑀢𑀯𑀲𑀦𑁄. 𑀕𑀺𑀳𑀻𑀧𑀺, 𑀫𑀳𑀸𑀭𑀸𑀚, 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀆𑀭𑀸𑀥𑀓𑁄 𑀳𑁄𑀢𑀺 𑀜𑀸𑀬𑀁 𑀥𑀫𑁆𑀫𑀁 𑀓𑀼𑀲𑀮𑀁, 𑀧𑀩𑁆𑀩𑀚𑀺𑀢𑁄𑀧𑀺, 𑀫𑀳𑀸𑀭𑀸𑀚, 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀆𑀭𑀸𑀥𑀓𑁄 𑀳𑁄𑀢𑀺 𑀜𑀸𑀬𑀁 𑀥𑀫𑁆𑀫𑀁 𑀓𑀼𑀲𑀮𑀁.

‘‘𑀅𑀧𑀺 𑀘 𑀔𑁄, 𑀫𑀳𑀸𑀭𑀸𑀚, 𑀧𑀩𑁆𑀩𑀚𑀺𑀢𑁄𑀯 𑀲𑀸𑀫𑀜𑁆𑀜𑀲𑁆𑀲 𑀇𑀲𑁆𑀲𑀭𑁄 𑀅𑀥𑀺𑀧𑀢𑀺; 𑀧𑀩𑁆𑀩𑀚𑁆𑀚𑀸, 𑀫𑀳𑀸𑀭𑀸𑀚, 𑀩𑀳𑀼𑀕𑀼𑀡𑀸 𑀅𑀦𑁂𑀓𑀕𑀼𑀡𑀸 𑀅𑀧𑁆𑀧𑀫𑀸𑀡𑀕𑀼𑀡𑀸, 𑀦 𑀲𑀓𑁆𑀓𑀸 𑀧𑀩𑁆𑀩𑀚𑁆𑀚𑀸𑀬 𑀕𑀼𑀡𑀁 𑀧𑀭𑀺𑀫𑀸𑀡𑀁 𑀓𑀸𑀢𑀼𑀁.

‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑀸𑀫𑀤𑀤𑀲𑁆𑀲 𑀫𑀡𑀺𑀭𑀢𑀦𑀲𑁆𑀲 𑀦 𑀲𑀓𑁆𑀓𑀸 𑀥𑀦𑁂𑀦 𑀅𑀕𑁆𑀖𑁄 𑀧𑀭𑀺𑀫𑀸𑀡𑀁 𑀓𑀸𑀢𑀼𑀁 ‘𑀏𑀢𑁆𑀢𑀓𑀁 𑀫𑀡𑀺𑀭𑀢𑀦𑀲𑁆𑀲 𑀫𑀽𑀮’𑀦𑁆𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀧𑀩𑁆𑀩𑀚𑁆𑀚𑀸 𑀩𑀳𑀼𑀕𑀼𑀡𑀸 𑀅𑀦𑁂𑀓𑀕𑀼𑀡𑀸 𑀅𑀧𑁆𑀧𑀫𑀸𑀡𑀕𑀼𑀡𑀸, 𑀦 𑀲𑀓𑁆𑀓𑀸 𑀧𑀩𑁆𑀩𑀚𑁆𑀚𑀸𑀬 𑀕𑀼𑀡𑀁 𑀧𑀭𑀺𑀫𑀸𑀡𑀁 𑀓𑀸𑀢𑀼𑀁.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀫𑀳𑀸𑀲𑀫𑀼𑀤𑁆𑀤𑁂 𑀊𑀫𑀺𑀬𑁄 𑀦 𑀲𑀓𑁆𑀓𑀸 𑀧𑀭𑀺𑀫𑀸𑀡𑀁 𑀓𑀸𑀢𑀼𑀁 ‘𑀏𑀢𑁆𑀢𑀓𑀸 𑀫𑀳𑀸𑀲𑀫𑀼𑀤𑁆𑀤𑁂 𑀊𑀫𑀺𑀬𑁄’𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀧𑀩𑁆𑀩𑀚𑁆𑀚𑀸 𑀩𑀳𑀼𑀕𑀼𑀡𑀸 𑀅𑀦𑁂𑀓𑀕𑀼𑀡𑀸 𑀅𑀧𑁆𑀧𑀫𑀸𑀡𑀕𑀼𑀡𑀸, 𑀦 𑀲𑀓𑁆𑀓𑀸 𑀧𑀩𑁆𑀩𑀚𑁆𑀚𑀸𑀬 𑀕𑀼𑀡𑀁 𑀧𑀭𑀺𑀫𑀸𑀡𑀁 𑀓𑀸𑀢𑀼𑀁.

‘‘𑀧𑀩𑁆𑀩𑀚𑀺𑀢𑀲𑁆𑀲, 𑀫𑀳𑀸𑀭𑀸𑀚, 𑀬𑀁 𑀓𑀺𑀜𑁆𑀘𑀺 𑀓𑀭𑀡𑀻𑀬𑀁, 𑀲𑀩𑁆𑀩𑀁 𑀢𑀁 𑀔𑀺𑀧𑁆𑀧𑀫𑁂𑀯 𑀲𑀫𑀺𑀚𑁆𑀛𑀢𑀺 𑀦𑁄 𑀘𑀺𑀭𑀭𑀢𑁆𑀢𑀸𑀬. 𑀓𑀺𑀁 𑀓𑀸𑀭𑀡𑀸? 𑀧𑀩𑁆𑀩𑀚𑀺𑀢𑁄, 𑀫𑀳𑀸𑀭𑀸𑀚, 𑀅𑀧𑁆𑀧𑀺𑀘𑁆𑀙𑁄 𑀳𑁄𑀢𑀺 𑀲𑀦𑁆𑀢𑀼𑀝𑁆𑀞𑁄 𑀧𑀯𑀺𑀯𑀺𑀢𑁆𑀢𑁄 𑀅𑀲𑀁𑀲𑀝𑁆𑀞𑁄 𑀆𑀭𑀤𑁆𑀥𑀯𑀻𑀭𑀺𑀬𑁄 𑀦𑀺𑀭𑀸𑀮𑀬𑁄 𑀅𑀦𑀺𑀓𑁂𑀢𑁄 𑀧𑀭𑀺𑀧𑀼𑀡𑁆𑀡𑀲𑀻𑀮𑁄 𑀲𑀮𑁆𑀮𑁂𑀔𑀺𑀢𑀸𑀘𑀸𑀭𑁄 𑀥𑀼𑀢𑀧𑁆𑀧𑀝𑀺𑀧𑀢𑁆𑀢𑀺𑀓𑀼𑀲𑀮𑁄 𑀳𑁄𑀢𑀺, 𑀢𑀁 𑀓𑀸𑀭𑀡𑀸 𑀧𑀩𑁆𑀩𑀚𑀺𑀢𑀲𑁆𑀲 𑀬𑀁 𑀓𑀺𑀜𑁆𑀘𑀺 𑀓𑀭𑀡𑀻𑀬𑀁, 𑀲𑀩𑁆𑀩𑀁 𑀢𑀁 𑀔𑀺𑀧𑁆𑀧𑀫𑁂𑀯 𑀲𑀫𑀺𑀚𑁆𑀛𑀢𑀺 𑀦𑁄 𑀘𑀺𑀭𑀭𑀢𑁆𑀢𑀸𑀬. 𑀬𑀣𑀸, 𑀫𑀳𑀸𑀭𑀸𑀚, 𑀦𑀺𑀕𑁆𑀕𑀡𑁆𑀞𑀺𑀲𑀫𑀲𑀼𑀥𑁄𑀢𑀉𑀚𑀼𑀯𑀺𑀫𑀮𑀦𑀸𑀭𑀸𑀘𑁄 𑀲𑀼𑀲𑀚𑁆𑀚𑀺𑀢𑁄 𑀲𑀫𑁆𑀫𑀸 𑀯𑀳𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀧𑀩𑁆𑀩𑀚𑀺𑀢𑀲𑁆𑀲 𑀬𑀁 𑀓𑀺𑀜𑁆𑀘𑀺 𑀓𑀭𑀡𑀻𑀬𑀁, 𑀲𑀩𑁆𑀩𑀁 𑀢𑀁 𑀔𑀺𑀧𑁆𑀧𑀫𑁂𑀯 𑀲𑀫𑀺𑀚𑁆𑀛𑀢𑀺 𑀦𑁄 𑀘𑀺𑀭𑀭𑀢𑁆𑀢𑀸𑀬𑀸’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀕𑀺𑀳𑀺𑀧𑀩𑁆𑀩𑀚𑀺𑀢𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀧𑀜𑁆𑀳𑁄 𑀢𑀢𑀺𑀬𑁄.

𑁪. 𑀧𑀝𑀺𑀧𑀤𑀸𑀤𑁄𑀲𑀧𑀜𑁆𑀳𑁄

𑁪. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀅𑀓𑀸𑀲𑀺, 𑀦𑁂𑀢𑀸𑀤𑀺𑀲𑁄 𑀅𑀜𑁆𑀜𑀢𑁆𑀭 𑀆𑀭𑀫𑁆𑀪𑁄 𑀅𑀳𑁄𑀲𑀺 𑀦𑀺𑀓𑁆𑀓𑀫𑁄 𑀓𑀺𑀮𑁂𑀲𑀬𑀼𑀤𑁆𑀥𑀁 𑀫𑀘𑁆𑀘𑀼𑀲𑁂𑀦𑀁 𑀯𑀺𑀥𑀫𑀦𑀁 𑀆𑀳𑀸𑀭𑀧𑀭𑀺𑀕𑁆𑀕𑀳𑁄 𑀤𑀼𑀓𑁆𑀓𑀭𑀓𑀸𑀭𑀺𑀓𑀸, 𑀏𑀯𑀭𑀽𑀧𑁂 𑀧𑀭𑀓𑁆𑀓𑀫𑁂 𑀓𑀺𑀜𑁆𑀘𑀺 𑀅𑀲𑁆𑀲𑀸𑀤𑀁 𑀅𑀮𑀪𑀺𑀢𑁆𑀯𑀸 𑀢𑀫𑁂𑀯 𑀘𑀺𑀢𑁆𑀢𑀁 𑀧𑀭𑀺𑀳𑀸𑀧𑁂𑀢𑁆𑀯𑀸 𑀏𑀯𑀫𑀯𑁄𑀘 ‘𑀦 𑀔𑁄 𑀧𑀦𑀸𑀳𑀁 𑀇𑀫𑀸𑀬 𑀓𑀝𑀼𑀓𑀸𑀬 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬 𑀅𑀥𑀺𑀕𑀘𑁆𑀙𑀸𑀫𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁, 𑀲𑀺𑀬𑀸 𑀦𑀼 𑀔𑁄 𑀅𑀜𑁆𑀜𑁄 𑀫𑀕𑁆𑀕𑁄 𑀩𑁄𑀥𑀸𑀬𑀸’𑀢𑀺, 𑀢𑀢𑁄 𑀦𑀺𑀩𑁆𑀩𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑁂𑀦 𑀫𑀕𑁂𑀦 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄, 𑀧𑀼𑀦 𑀢𑀸𑀬 𑀧𑀝𑀺𑀧𑀤𑀸𑀬 𑀲𑀸𑀯𑀓𑁂 𑀅𑀦𑀼𑀲𑀸𑀲𑀢𑀺 𑀲𑀫𑀸𑀤𑀧𑁂𑀢𑀺.

‘‘‘𑀆𑀭𑀫𑁆𑀪𑀣 𑀦𑀺𑀓𑁆𑀔𑀫𑀣, 𑀬𑀼𑀜𑁆𑀚𑀣 𑀩𑀼𑀤𑁆𑀥𑀲𑀸𑀲𑀦𑁂;

𑀥𑀼𑀦𑀸𑀣 𑀫𑀘𑁆𑀘𑀼𑀦𑁄 𑀲𑁂𑀦𑀁, 𑀦𑀴𑀸𑀕𑀸𑀭𑀁𑀯 𑀓𑀼𑀜𑁆𑀚𑀭𑁄’𑀢𑀺 [𑀲𑀁. 𑀦𑀺. 𑁧.𑁧𑁮𑁫].

‘‘𑀓𑁂𑀦 𑀦 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀸𑀭𑀡𑁂𑀦 𑀢𑀣𑀸𑀕𑀢𑁄 𑀬𑀸𑀬 𑀧𑀝𑀺𑀧𑀤𑀸𑀬 𑀅𑀢𑁆𑀢𑀦𑀸 𑀦𑀺𑀩𑁆𑀩𑀺𑀦𑁆𑀦𑁄 𑀯𑀺𑀭𑀢𑁆𑀢𑀭𑀽𑀧𑁄, 𑀢𑀢𑁆𑀣 𑀲𑀸𑀯𑀓𑁂 𑀅𑀦𑀼𑀲𑀸𑀲𑀢𑀺 𑀲𑀫𑀸𑀤𑀧𑁂𑀢𑀻’’𑀢𑀺?

‘‘𑀢𑀤𑀸𑀧𑀺, 𑀫𑀳𑀸𑀭𑀸𑀚, 𑀏𑀢𑀭𑀳𑀺𑀧𑀺 𑀲𑀸 𑀬𑁂𑀯 𑀧𑀝𑀺𑀧𑀤𑀸, 𑀢𑀁 𑀬𑁂𑀯 𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄. 𑀅𑀧𑀺 𑀘, 𑀫𑀳𑀸𑀭𑀸𑀚, 𑀩𑁄𑀥𑀺𑀲𑀢𑁆𑀢𑁄 𑀅𑀢𑀺𑀯𑀻𑀭𑀺𑀬𑀁 𑀓𑀭𑁄𑀦𑁆𑀢𑁄 𑀦𑀺𑀭𑀯𑀲𑁂𑀲𑀢𑁄 𑀆𑀳𑀸𑀭𑀁 𑀉𑀧𑀭𑀼𑀦𑁆𑀥𑀺. 𑀢𑀲𑁆𑀲 𑀆𑀳𑀸𑀭𑀽𑀧𑀭𑁄𑀥𑁂𑀦 𑀘𑀺𑀢𑁆𑀢𑀤𑀼𑀩𑁆𑀩𑀮𑁆𑀬𑀁 𑀉𑀧𑁆𑀧𑀚𑁆𑀚𑀺. 𑀲𑁄 𑀢𑁂𑀦 𑀤𑀼𑀩𑁆𑀩𑀮𑁆𑀬𑁂𑀦 𑀦𑀸𑀲𑀓𑁆𑀔𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀺𑀢𑀼𑀁, 𑀲𑁄 𑀫𑀢𑁆𑀢𑀫𑀢𑁆𑀢𑀁 𑀓𑀩𑀴𑀻𑀓𑀸𑀭𑀸𑀳𑀸𑀭𑀁 𑀲𑁂𑀯𑀦𑁆𑀢𑁄 𑀢𑀸𑀬𑁂𑀯 𑀧𑀝𑀺𑀧𑀤𑀸𑀬 𑀦𑀘𑀺𑀭𑀲𑁆𑀲𑁂𑀯 𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀺. 𑀲𑁄 𑀬𑁂𑀯, 𑀫𑀳𑀸𑀭𑀸𑀚, 𑀧𑀝𑀺𑀧𑀤𑀸 𑀲𑀩𑁆𑀩𑁂𑀲𑀁 𑀢𑀣𑀸𑀕𑀢𑀸𑀦𑀁 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀧𑁆𑀧𑀝𑀺𑀮𑀸𑀪𑀸𑀬.

‘‘𑀬𑀣𑀸, 𑀫𑀳𑀸𑀭𑀸𑀚, 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀆𑀳𑀸𑀭𑁄 𑀉𑀧𑀢𑁆𑀣𑀫𑁆𑀪𑁄, 𑀆𑀳𑀸𑀭𑀽𑀧𑀦𑀺𑀲𑁆𑀲𑀺𑀢𑀸 𑀲𑀩𑁆𑀩𑁂 𑀲𑀢𑁆𑀢𑀸 𑀲𑀼𑀔𑀁 𑀅𑀦𑀼𑀪𑀯𑀦𑁆𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀸 𑀬𑁂𑀯 𑀧𑀝𑀺𑀧𑀤𑀸 𑀲𑀩𑁆𑀩𑁂𑀲𑀁 𑀢𑀣𑀸𑀕𑀢𑀸𑀦𑀁 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀧𑁆𑀧𑀝𑀺𑀮𑀸𑀪𑀸𑀬, 𑀦𑁂𑀲𑁄, 𑀫𑀳𑀸𑀭𑀸𑀚, 𑀤𑁄𑀲𑁄 𑀆𑀭𑀫𑁆𑀪𑀲𑁆𑀲, 𑀦 𑀦𑀺𑀓𑁆𑀓𑀫𑀲𑁆𑀲, 𑀦 𑀓𑀺𑀮𑁂𑀲𑀬𑀼𑀤𑁆𑀥𑀲𑁆𑀲, 𑀬𑁂𑀦 𑀢𑀣𑀸𑀕𑀢𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀧𑀸𑀧𑀼𑀡𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁, 𑀅𑀣 𑀔𑁄 𑀆𑀳𑀸𑀭𑀽𑀧𑀭𑁄𑀥𑀲𑁆𑀲𑁂𑀯𑁂𑀲𑁄 𑀤𑁄𑀲𑁄, 𑀲𑀤𑀸 𑀧𑀝𑀺𑀬𑀢𑁆𑀢𑀸 𑀬𑁂𑀯𑁂𑀲𑀸 𑀧𑀝𑀺𑀧𑀤𑀸.

‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀅𑀤𑁆𑀥𑀸𑀦𑀁 𑀅𑀢𑀺𑀯𑁂𑀕𑁂𑀦 𑀕𑀘𑁆𑀙𑁂𑀬𑁆𑀬, 𑀢𑁂𑀦 𑀲𑁄 𑀧𑀓𑁆𑀔𑀳𑀢𑁄 𑀯𑀸 𑀪𑀯𑁂𑀬𑁆𑀬 𑀧𑀻𑀞𑀲𑀧𑁆𑀧𑀻 𑀯𑀸 𑀅𑀲𑀜𑁆𑀘𑀭𑁄 𑀧𑀣𑀯𑀺𑀢𑀮𑁂. 𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀫𑀳𑀸𑀧𑀣𑀯𑀺𑀬𑀸 𑀤𑁄𑀲𑁄 𑀅𑀢𑁆𑀣𑀺, 𑀬𑁂𑀦 𑀲𑁄 𑀧𑀼𑀭𑀺𑀲𑁄 𑀧𑀓𑁆𑀔𑀳𑀢𑁄 𑀅𑀳𑁄𑀲𑀻’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂; 𑀲𑀤𑀸 𑀧𑀝𑀺𑀬𑀢𑁆𑀢𑀸, 𑀪𑀦𑁆𑀢𑁂, 𑀫𑀳𑀸𑀧𑀣𑀯𑀻, 𑀓𑀼𑀢𑁄 𑀢𑀲𑁆𑀲𑀸 𑀤𑁄𑀲𑁄? 𑀯𑀸𑀬𑀸𑀫𑀲𑁆𑀲𑁂𑀯𑁂𑀲𑁄 𑀤𑁄𑀲𑁄, 𑀬𑁂𑀦 𑀲𑁄 𑀧𑀼𑀭𑀺𑀲𑁄 𑀧𑀓𑁆𑀔𑀳𑀢𑁄 𑀅𑀳𑁄𑀲𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑁂𑀲𑁄 𑀤𑁄𑀲𑁄 𑀆𑀭𑀫𑁆𑀪𑀲𑁆𑀲, 𑀦 𑀦𑀺𑀓𑁆𑀓𑀫𑀲𑁆𑀲, 𑀦 𑀓𑀺𑀮𑁂𑀲𑀬𑀼𑀤𑁆𑀥𑀲𑁆𑀲, 𑀬𑁂𑀦 𑀢𑀣𑀸𑀕𑀢𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀧𑀸𑀧𑀼𑀡𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁, 𑀅𑀣 𑀔𑁄 𑀆𑀳𑀸𑀭𑀽𑀧𑀭𑁄𑀥𑀲𑁆𑀲𑁂𑀯𑁂𑀲𑁄 𑀤𑁄𑀲𑁄 𑀲𑀤𑀸 𑀧𑀝𑀺𑀬𑀢𑁆𑀢𑀸 𑀬𑁂𑀯𑁂𑀲𑀸 𑀧𑀝𑀺𑀧𑀤𑀸.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀓𑀺𑀮𑀺𑀝𑁆𑀞𑀁 𑀲𑀸𑀝𑀓𑀁 𑀦𑀺𑀯𑀸𑀲𑁂𑀬𑁆𑀬, 𑀦 𑀲𑁄 𑀢𑀁 𑀥𑁄𑀯𑀸𑀧𑁂𑀬𑁆𑀬, 𑀦𑁂𑀲𑁄 𑀤𑁄𑀲𑁄 𑀉𑀤𑀓𑀲𑁆𑀲, 𑀲𑀤𑀸 𑀧𑀝𑀺𑀬𑀢𑁆𑀢𑀁 𑀉𑀤𑀓𑀁. 𑀧𑀼𑀭𑀺𑀲𑀲𑁆𑀲𑁂𑀯𑁂𑀲𑁄 𑀤𑁄𑀲𑁄. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑁂𑀲𑁄 𑀤𑁄𑀲𑁄 𑀆𑀭𑀫𑁆𑀪𑀲𑁆𑀲, 𑀦 𑀦𑀺𑀓𑁆𑀓𑀫𑀲𑁆𑀲, 𑀦 𑀓𑀺𑀮𑁂𑀲𑀬𑀼𑀤𑁆𑀥𑀲𑁆𑀲, 𑀬𑁂𑀦 𑀢𑀣𑀸𑀕𑀢𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀧𑀸𑀧𑀼𑀡𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁, 𑀅𑀣 𑀔𑁄 𑀆𑀳𑀸𑀭𑀽𑀧𑀭𑁄𑀥𑀲𑁆𑀲𑁂𑀯𑁂𑀲𑁄 𑀤𑁄𑀲𑁄, 𑀲𑀤𑀸 𑀧𑀝𑀺𑀬𑀢𑁆𑀢𑀸 𑀬𑁂𑀯𑁂𑀲𑀸 𑀧𑀝𑀺𑀧𑀤𑀸, 𑀢𑀲𑁆𑀫𑀸 𑀢𑀣𑀸𑀕𑀢𑁄 𑀢𑀸𑀬𑁂𑀯 𑀧𑀝𑀺𑀧𑀤𑀸𑀬 𑀲𑀸𑀯𑀓𑁂 𑀅𑀦𑀼𑀲𑀸𑀲𑀢𑀺 𑀲𑀫𑀸𑀤𑀧𑁂𑀢𑀺, 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀲𑀤𑀸 𑀧𑀝𑀺𑀬𑀢𑁆𑀢𑀸 𑀅𑀦𑀯𑀚𑁆𑀚𑀸 𑀲𑀸 𑀧𑀝𑀺𑀧𑀤𑀸’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀧𑀝𑀺𑀧𑀤𑀸𑀤𑁄𑀲𑀧𑀜𑁆𑀳𑁄 𑀘𑀢𑀼𑀢𑁆𑀣𑁄.

𑁫. 𑀳𑀻𑀦𑀸𑀬𑀸𑀯𑀢𑁆𑀢𑀦𑀧𑀜𑁆𑀳𑁄

𑁫. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀫𑀳𑀦𑁆𑀢𑀁 𑀇𑀤𑀁 𑀢𑀣𑀸𑀕𑀢𑀲𑀸𑀲𑀦𑀁 𑀲𑀸𑀭𑀁 𑀯𑀭𑀁 𑀲𑁂𑀝𑁆𑀞𑀁 𑀧𑀯𑀭𑀁 𑀅𑀦𑀼𑀧𑀫𑀁 𑀧𑀭𑀺𑀲𑀼𑀤𑁆𑀥𑀁 𑀯𑀺𑀫𑀮𑀁 𑀧𑀡𑁆𑀟𑀭𑀁 𑀅𑀦𑀯𑀚𑁆𑀚𑀁, 𑀦 𑀬𑀼𑀢𑁆𑀢𑀁 𑀕𑀺𑀳𑀺𑀁 𑀢𑀸𑀯𑀢𑀓𑀁 𑀧𑀩𑁆𑀩𑀚𑁂𑀢𑀼𑀁, 𑀕𑀺𑀳𑀻 𑀬𑁂𑀯 [𑀕𑀺𑀳𑀺𑀁 𑀬𑁂𑀯 (𑀲𑀻. 𑀧𑀻.)] 𑀏𑀓𑀲𑁆𑀫𑀺𑀁 𑀨𑀮𑁂 𑀯𑀺𑀦𑁂𑀢𑁆𑀯𑀸 𑀬𑀤𑀸 𑀅𑀧𑀼𑀦𑀭𑀸𑀯𑀢𑁆𑀢𑀻 𑀳𑁄𑀢𑀺 𑀢𑀤𑀸 𑀲𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀓𑀺𑀁 𑀓𑀸𑀭𑀡𑀸? 𑀇𑀫𑁂 𑀤𑀼𑀚𑁆𑀚𑀦𑀸 𑀢𑀸𑀯 𑀢𑀢𑁆𑀣 𑀲𑀸𑀲𑀦𑁂 𑀯𑀺𑀲𑀼𑀤𑁆𑀥𑁂 𑀧𑀩𑁆𑀩𑀚𑀺𑀢𑁆𑀯𑀸 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀳𑀻𑀦𑀸𑀬𑀸𑀯𑀢𑁆𑀢𑀦𑁆𑀢𑀺, 𑀢𑁂𑀲𑀁 𑀧𑀘𑁆𑀘𑀸𑀕𑀫𑀦𑁂𑀦 𑀅𑀬𑀁 𑀫𑀳𑀸𑀚𑀦𑁄 𑀏𑀯𑀁 𑀯𑀺𑀘𑀺𑀦𑁆𑀢𑁂𑀢𑀺 ‘𑀢𑀼𑀘𑁆𑀙𑀓𑀁 𑀯𑀢 𑀪𑁄 𑀏𑀢𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀲𑀦𑀁 𑀪𑀯𑀺𑀲𑁆𑀲𑀢𑀺, 𑀬𑀁 𑀇𑀫𑁂 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑀻’𑀢𑀺, 𑀇𑀤𑀫𑁂𑀢𑁆𑀣 𑀓𑀸𑀭𑀡’’𑀦𑁆𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀢𑀴𑀸𑀓𑁄 𑀪𑀯𑁂𑀬𑁆𑀬 𑀲𑀫𑁆𑀧𑀼𑀡𑁆𑀡𑀲𑀼𑀘𑀺𑀯𑀺𑀫𑀮𑀲𑀻𑀢𑀮𑀲𑀮𑀺𑀮𑁄, 𑀅𑀣 𑀬𑁄 𑀓𑁄𑀘𑀺 𑀓𑀺𑀮𑀺𑀝𑁆𑀞𑁄 𑀫𑀮𑀓𑀤𑁆𑀤𑀫𑀕𑀢𑁄 𑀢𑀁 𑀢𑀴𑀸𑀓𑀁 𑀕𑀦𑁆𑀢𑁆𑀯𑀸 𑀅𑀦𑀳𑀸𑀬𑀺𑀢𑁆𑀯𑀸 𑀓𑀺𑀮𑀺𑀝𑁆𑀞𑁄𑀯 𑀧𑀝𑀺𑀦𑀺𑀯𑀢𑁆𑀢𑁂𑀬𑁆𑀬, 𑀢𑀢𑁆𑀣, 𑀫𑀳𑀸𑀭𑀸𑀚, 𑀓𑀢𑀫𑀁 𑀚𑀦𑁄 𑀕𑀭𑀳𑁂𑀬𑁆𑀬 𑀓𑀺𑀮𑀺𑀝𑁆𑀞𑀁 𑀯𑀸 𑀢𑀴𑀸𑀓𑀁 𑀯𑀸’’𑀢𑀺? ‘‘𑀓𑀺𑀮𑀺𑀝𑁆𑀞𑀁, 𑀪𑀦𑁆𑀢𑁂, 𑀚𑀦𑁄 𑀕𑀭𑀳𑁂𑀬𑁆𑀬 ‘𑀅𑀬𑀁 𑀢𑀴𑀸𑀓𑀁 𑀕𑀦𑁆𑀢𑁆𑀯𑀸 𑀅𑀦𑀳𑀸𑀬𑀺𑀢𑁆𑀯𑀸 𑀓𑀺𑀮𑀺𑀝𑁆𑀞𑁄𑀯 𑀧𑀝𑀺𑀦𑀺𑀯𑀢𑁆𑀢𑁄, 𑀓𑀺𑀁 𑀇𑀫𑀁 𑀅𑀦𑀳𑀸𑀬𑀺𑀢𑀼𑀓𑀸𑀫𑀁 𑀢𑀴𑀸𑀓𑁄 𑀲𑀬𑀁 𑀦𑀳𑀸𑀧𑁂𑀲𑁆𑀲𑀢𑀺, 𑀓𑁄 𑀤𑁄𑀲𑁄 𑀢𑀴𑀸𑀓𑀲𑁆𑀲𑀸’𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀯𑀺𑀫𑀼𑀢𑁆𑀢𑀺𑀯𑀭𑀲𑀮𑀺𑀮𑀲𑀫𑁆𑀧𑀼𑀡𑁆𑀡𑀁 𑀲𑀤𑁆𑀥𑀫𑁆𑀫𑀯𑀭𑀢𑀴𑀸𑀓𑀁 𑀫𑀸𑀧𑁂𑀲𑀺 ‘𑀬𑁂 𑀓𑁂𑀘𑀺 𑀓𑀺𑀮𑁂𑀲𑀫𑀮𑀓𑀺𑀮𑀺𑀝𑁆𑀞𑀸 𑀲𑀘𑁂𑀢𑀦𑀸 𑀩𑀼𑀥𑀸, 𑀢𑁂 𑀇𑀥 𑀦𑀳𑀸𑀬𑀺𑀢𑁆𑀯𑀸 𑀲𑀩𑁆𑀩𑀓𑀺𑀮𑁂𑀲𑁂 𑀧𑀯𑀸𑀳𑀬𑀺𑀲𑁆𑀲𑀦𑁆𑀢𑀻’𑀢𑀺. 𑀬𑀤𑀺 𑀓𑁄𑀘𑀺 𑀢𑀁 𑀲𑀤𑁆𑀥𑀫𑁆𑀫𑀯𑀭𑀢𑀴𑀸𑀓𑀁 𑀕𑀦𑁆𑀢𑁆𑀯𑀸 𑀅𑀦𑀳𑀸𑀬𑀺𑀢𑁆𑀯𑀸 𑀲𑀓𑀺𑀮𑁂𑀲𑁄𑀯 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀳𑀻𑀦𑀸𑀬𑀸𑀯𑀢𑁆𑀢𑀢𑀺 𑀢𑀁 𑀬𑁂𑀯 𑀚𑀦𑁄 𑀕𑀭𑀳𑀺𑀲𑁆𑀲𑀢𑀺 ‘𑀅𑀬𑀁 𑀚𑀺𑀦𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑀢𑁆𑀣 𑀧𑀢𑀺𑀝𑁆𑀞𑀁 𑀅𑀮𑀪𑀺𑀢𑁆𑀯𑀸 𑀳𑀻𑀦𑀸𑀬𑀸𑀯𑀢𑁆𑀢𑁄, 𑀓𑀺𑀁 𑀇𑀫𑀁 𑀅𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑀁 𑀚𑀺𑀦𑀲𑀸𑀲𑀦𑀁 𑀲𑀬𑀁 𑀩𑁄𑀥𑁂𑀲𑁆𑀲𑀢𑀺, 𑀓𑁄 𑀤𑁄𑀲𑁄 𑀚𑀺𑀦𑀲𑀸𑀲𑀦𑀲𑁆𑀲𑀸’𑀢𑀺?

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀧𑀭𑀫𑀩𑁆𑀬𑀸𑀥𑀺𑀢𑁄 𑀭𑁄𑀕𑀼𑀧𑁆𑀧𑀢𑁆𑀢𑀺𑀓𑀼𑀲𑀮𑀁 𑀅𑀫𑁄𑀖𑀥𑀼𑀯𑀲𑀺𑀤𑁆𑀥𑀓𑀫𑁆𑀫𑀁 𑀪𑀺𑀲𑀓𑁆𑀓𑀁 𑀲𑀮𑁆𑀮𑀓𑀢𑁆𑀢𑀁 𑀤𑀺𑀲𑁆𑀯𑀸 𑀅𑀢𑀺𑀓𑀺𑀘𑁆𑀙𑀸𑀧𑁂𑀢𑁆𑀯𑀸 𑀲𑀩𑁆𑀬𑀸𑀥𑀺𑀓𑁄𑀯 𑀧𑀝𑀺𑀦𑀺𑀯𑀢𑁆𑀢𑁂𑀬𑁆𑀬, 𑀢𑀢𑁆𑀣 𑀓𑀢𑀫𑀁 𑀚𑀦𑁄 𑀕𑀭𑀳𑁂𑀬𑁆𑀬 𑀆𑀢𑀼𑀭𑀁 𑀯𑀸 𑀪𑀺𑀲𑀓𑁆𑀓𑀁 𑀯𑀸’’𑀢𑀺? ‘‘𑀆𑀢𑀼𑀭𑀁, 𑀪𑀦𑁆𑀢𑁂, 𑀚𑀦𑁄 𑀕𑀭𑀳𑁂𑀬𑁆𑀬 ‘𑀅𑀬𑀁 𑀭𑁄𑀕𑀼𑀧𑁆𑀧𑀢𑁆𑀢𑀺𑀓𑀼𑀲𑀮𑀁 𑀅𑀫𑁄𑀖𑀥𑀼𑀯𑀲𑀺𑀤𑁆𑀥𑀓𑀫𑁆𑀫𑀁 𑀪𑀺𑀲𑀓𑁆𑀓𑀁 𑀲𑀮𑁆𑀮𑀓𑀢𑁆𑀢𑀁 𑀤𑀺𑀲𑁆𑀯𑀸 𑀅𑀢𑀺𑀓𑀺𑀘𑁆𑀙𑀸𑀧𑁂𑀢𑁆𑀯𑀸 𑀲𑀩𑁆𑀬𑀸𑀥𑀺𑀓𑁄𑀯 𑀧𑀝𑀺𑀦𑀺𑀯𑀢𑁆𑀢𑁄, 𑀓𑀺𑀁 𑀇𑀫𑀁 𑀅𑀢𑀺𑀓𑀺𑀘𑁆𑀙𑀸𑀧𑁂𑀦𑁆𑀢𑀁 𑀪𑀺𑀲𑀓𑁆𑀓𑁄 𑀲𑀬𑀁 𑀢𑀺𑀓𑀺𑀘𑁆𑀙𑀺𑀲𑁆𑀲𑀢𑀺, 𑀓𑁄 𑀤𑁄𑀲𑁄 𑀪𑀺𑀲𑀓𑁆𑀓𑀲𑁆𑀲𑀸’’’𑀢𑀺? ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀅𑀦𑁆𑀢𑁄𑀲𑀸𑀲𑀦𑀲𑀫𑀼𑀕𑁆𑀕𑁂 𑀓𑁂𑀯𑀮𑀁 𑀲𑀓𑀮𑀓𑀺𑀮𑁂𑀲𑀩𑁆𑀬𑀸𑀥𑀺𑀯𑀽𑀧𑀲𑀫𑀦𑀲𑀫𑀢𑁆𑀣𑀁 𑀅𑀫𑀢𑁄𑀲𑀥𑀁 𑀧𑀓𑁆𑀔𑀺𑀧𑀺, ‘𑀬𑁂 𑀓𑁂𑀘𑀺 𑀓𑀺𑀮𑁂𑀲𑀩𑁆𑀬𑀸𑀥𑀺𑀧𑀻𑀴𑀺𑀢𑀸 𑀲𑀘𑁂𑀢𑀦𑀸 𑀩𑀼𑀥𑀸, 𑀢𑁂 𑀇𑀫𑀁 𑀅𑀫𑀢𑁄𑀲𑀥𑀁 𑀧𑀺𑀯𑀺𑀢𑁆𑀯𑀸 𑀲𑀩𑁆𑀩𑀓𑀺𑀮𑁂𑀲𑀩𑁆𑀬𑀸𑀥𑀺𑀁 𑀯𑀽𑀧𑀲𑀫𑁂𑀲𑁆𑀲𑀦𑁆𑀢𑀻’𑀢𑀺. 𑀬𑀤𑀺 𑀓𑁄𑀘𑀺 𑀬𑀁 𑀅𑀫𑀢𑁄𑀲𑀥𑀁 𑀅𑀧𑀺𑀯𑀺𑀢𑁆𑀯𑀸 𑀲𑀓𑀺𑀮𑁂𑀲𑁄𑀯 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀳𑀻𑀦𑀸𑀬𑀸𑀯𑀢𑁆𑀢𑀢𑀺, 𑀢𑀁 𑀬𑁂𑀯 𑀚𑀦𑁄 𑀕𑀭𑀳𑀺𑀲𑁆𑀲𑀢𑀺 ‘𑀅𑀬𑀁 𑀚𑀺𑀦𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑀢𑁆𑀣 𑀧𑀢𑀺𑀝𑁆𑀞𑀁 𑀅𑀮𑀪𑀺𑀢𑁆𑀯𑀸 𑀳𑀻𑀦𑀸𑀬𑀸𑀯𑀢𑁆𑀢𑁄, 𑀓𑀺𑀁 𑀇𑀫𑀁 𑀅𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑀁 𑀚𑀺𑀦𑀲𑀸𑀲𑀦𑀁 𑀲𑀬𑀁 𑀩𑁄𑀥𑁂𑀲𑁆𑀲𑀢𑀺, 𑀓𑁄 𑀤𑁄𑀲𑁄 𑀚𑀺𑀦𑀲𑀸𑀲𑀦𑀲𑁆𑀲𑀸’𑀢𑀺?

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀙𑀸𑀢𑁄 𑀧𑀼𑀭𑀺𑀲𑁄 𑀫𑀳𑀢𑀺𑀫𑀳𑀸𑀧𑀼𑀜𑁆𑀜𑀪𑀢𑁆𑀢𑀧𑀭𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀢𑀁 𑀪𑀢𑁆𑀢𑀁 𑀅𑀪𑀼𑀜𑁆𑀚𑀺𑀢𑁆𑀯𑀸 𑀙𑀸𑀢𑁄𑀯 𑀧𑀝𑀺𑀦𑀺𑀯𑀢𑁆𑀢𑁂𑀬𑁆𑀬, 𑀢𑀢𑁆𑀣 𑀓𑀢𑀫𑀁 𑀚𑀦𑁄 𑀕𑀭𑀳𑁂𑀬𑁆𑀬 𑀙𑀸𑀢𑀁 𑀯𑀸 𑀧𑀼𑀜𑁆𑀜𑀪𑀢𑁆𑀢𑀁 𑀯𑀸’’𑀢𑀺? ‘‘𑀙𑀸𑀢𑀁, 𑀪𑀦𑁆𑀢𑁂, 𑀚𑀦𑁄 𑀕𑀭𑀳𑁂𑀬𑁆𑀬 ‘𑀅𑀬𑀁 𑀔𑀼𑀤𑀸𑀧𑀻𑀴𑀺𑀢𑁄 𑀧𑀼𑀜𑁆𑀜𑀪𑀢𑁆𑀢𑀁 𑀧𑀝𑀺𑀮𑀪𑀺𑀢𑁆𑀯𑀸 𑀅𑀪𑀼𑀜𑁆𑀚𑀺𑀢𑁆𑀯𑀸 𑀙𑀸𑀢𑁄𑀯 𑀧𑀝𑀺𑀦𑀺𑀯𑀢𑁆𑀢𑁄, 𑀓𑀺𑀁 𑀇𑀫𑀲𑁆𑀲 𑀅𑀪𑀼𑀜𑁆𑀚𑀦𑁆𑀢𑀲𑁆𑀲 𑀪𑁄𑀚𑀦𑀁 𑀲𑀬𑀁 𑀫𑀼𑀔𑀁 𑀧𑀯𑀺𑀲𑀺𑀲𑁆𑀲𑀢𑀺, 𑀓𑁄 𑀤𑁄𑀲𑁄 𑀪𑁄𑀚𑀦𑀲𑁆𑀲𑀸’’’𑀢𑀺? ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀅𑀦𑁆𑀢𑁄𑀲𑀸𑀲𑀦𑀲𑀫𑀼𑀕𑁆𑀕𑁂 𑀧𑀭𑀫𑀧𑀯𑀭𑀁 𑀲𑀦𑁆𑀢𑀁 𑀲𑀺𑀯𑀁 𑀧𑀡𑀻𑀢𑀁 𑀅𑀫𑀢𑀁 𑀧𑀭𑀫𑀫𑀥𑀼𑀭𑀁 𑀓𑀸𑀬𑀕𑀢𑀸𑀲𑀢𑀺𑀪𑁄𑀚𑀦𑀁 𑀞𑀧𑁂𑀲𑀺 ‘𑀬𑁂 𑀓𑁂𑀘𑀺 𑀓𑀺𑀮𑁂𑀲𑀙𑀸𑀢𑀚𑁆𑀛𑀢𑁆𑀢𑀸 𑀢𑀡𑁆𑀳𑀸𑀧𑀭𑁂𑀢𑀫𑀸𑀦𑀲𑀸 𑀲𑀘𑁂𑀢𑀦𑀸 𑀩𑀼𑀥𑀸, 𑀢𑁂 𑀇𑀫𑀁 𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀓𑀸𑀫𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀲𑀩𑁆𑀩𑀁 𑀢𑀡𑁆𑀳𑀫𑀧𑀦𑁂𑀲𑁆𑀲𑀦𑁆𑀢𑀻’𑀢𑀺. 𑀬𑀤𑀺 𑀓𑁄𑀘𑀺 𑀢𑀁 𑀪𑁄𑀚𑀦𑀁 𑀅𑀪𑀼𑀜𑁆𑀚𑀺𑀢𑁆𑀯𑀸 𑀢𑀡𑁆𑀳𑀸𑀲𑀺𑀢𑁄𑀯 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀳𑀻𑀦𑀸𑀬𑀸𑀯𑀢𑁆𑀢𑀢𑀺, 𑀢𑀜𑁆𑀜𑁂𑀯 𑀚𑀦𑁄 𑀕𑀭𑀳𑀺𑀲𑁆𑀲𑀢𑀺 ‘𑀅𑀬𑀁 𑀚𑀺𑀦𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑀢𑁆𑀣 𑀧𑀢𑀺𑀝𑁆𑀞𑀁 𑀅𑀮𑀪𑀺𑀢𑁆𑀯𑀸 𑀳𑀻𑀦𑀸𑀬𑀸𑀯𑀢𑁆𑀢𑁄, 𑀓𑀺𑀁 𑀇𑀫𑀁 𑀅𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑀁 𑀚𑀺𑀦𑀲𑀸𑀲𑀦𑀁 𑀲𑀬𑀁 𑀩𑁄𑀥𑁂𑀲𑁆𑀲𑀲𑀺, 𑀓𑁄 𑀤𑁄𑀲𑁄 𑀚𑀺𑀦𑀲𑀸𑀲𑀦𑀲𑁆𑀲𑀸’𑀢𑀺.

‘‘𑀬𑀤𑀺, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀕𑀺𑀳𑀺𑀁 𑀬𑁂𑀯 𑀏𑀓𑀲𑁆𑀫𑀺𑀁 𑀨𑀮𑁂 𑀯𑀺𑀦𑀻𑀢𑀁 𑀧𑀩𑁆𑀩𑀸𑀚𑁂𑀬𑁆𑀬, 𑀦 𑀦𑀸𑀫𑀸𑀬𑀁 𑀧𑀩𑁆𑀩𑀚𑁆𑀚𑀸 𑀓𑀺𑀮𑁂𑀲𑀧𑁆𑀧𑀳𑀸𑀦𑀸𑀬 𑀯𑀺𑀲𑀼𑀤𑁆𑀥𑀺𑀬𑀸 𑀯𑀸, 𑀦𑀢𑁆𑀣𑀺 𑀧𑀩𑁆𑀩𑀚𑁆𑀚𑀸𑀬 𑀓𑀭𑀡𑀻𑀬𑀁. 𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀅𑀦𑁂𑀓𑀲𑀢𑁂𑀦 𑀓𑀫𑁆𑀫𑁂𑀦 𑀢𑀴𑀸𑀓𑀁 𑀔𑀡𑀸𑀧𑁂𑀢𑁆𑀯𑀸 𑀧𑀭𑀺𑀲𑀸𑀬 𑀏𑀯𑀫𑀦𑀼𑀲𑁆𑀲𑀸𑀯𑁂𑀬𑁆𑀬 ‘𑀫𑀸 𑀫𑁂, 𑀪𑁄𑀦𑁆𑀢𑁄, 𑀓𑁂𑀘𑀺 𑀲𑀁𑀓𑀺𑀮𑀺𑀝𑁆𑀞𑀸 𑀇𑀫𑀁 𑀢𑀴𑀸𑀓𑀁 𑀑𑀢𑀭𑀣, 𑀧𑀯𑀸𑀳𑀺𑀢𑀭𑀚𑁄𑀚𑀮𑁆𑀮𑀸 𑀧𑀭𑀺𑀲𑀼𑀤𑁆𑀥𑀸 𑀯𑀺𑀫𑀮𑀫𑀝𑁆𑀞𑀸 𑀇𑀫𑀁 𑀢𑀴𑀸𑀓𑀁 𑀑𑀢𑀭𑀣𑀸’𑀢𑀺. 𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀢𑁂𑀲𑀁 𑀧𑀯𑀸𑀳𑀺𑀢𑀭𑀚𑁄𑀚𑀮𑁆𑀮𑀸𑀦𑀁 𑀧𑀭𑀺𑀲𑀼𑀤𑁆𑀥𑀸𑀦𑀁 𑀯𑀺𑀫𑀮𑀫𑀝𑁆𑀞𑀸𑀦𑀁 𑀢𑁂𑀦 𑀢𑀴𑀸𑀓𑁂𑀦 𑀓𑀭𑀡𑀻𑀬𑀁 𑀪𑀯𑁂𑀬𑁆𑀬𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀬𑀲𑁆𑀲𑀢𑁆𑀣𑀸𑀬 𑀢𑁂 𑀢𑀁 𑀢𑀴𑀸𑀓𑀁 𑀉𑀧𑀕𑀘𑁆𑀙𑁂𑀬𑁆𑀬𑀼𑀁, 𑀢𑀁 𑀅𑀜𑁆𑀜𑀢𑁆𑀭𑁂𑀯 𑀢𑁂𑀲𑀁 𑀓𑀢𑀁 𑀓𑀭𑀡𑀻𑀬𑀁, 𑀓𑀺𑀁 𑀢𑁂𑀲𑀁 𑀢𑁂𑀦 𑀢𑀴𑀸𑀓𑁂𑀦𑀸’’𑀢𑀺? ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑀤𑀺 𑀢𑀣𑀸𑀕𑀢𑁄 𑀕𑀺𑀳𑀺𑀁 𑀬𑁂𑀯 𑀏𑀓𑀲𑁆𑀫𑀺𑀁 𑀨𑀮𑁂 𑀯𑀺𑀦𑀻𑀢𑀁 𑀧𑀩𑁆𑀩𑀸𑀚𑁂𑀬𑁆𑀬, 𑀢𑀢𑁆𑀣𑁂𑀯 𑀢𑁂𑀲𑀁 𑀓𑀢𑀁 𑀓𑀭𑀡𑀻𑀬𑀁, 𑀓𑀺𑀁 𑀢𑁂𑀲𑀁 𑀧𑀩𑁆𑀩𑀚𑁆𑀚𑀸𑀬.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀲𑀪𑀸𑀯𑀇𑀲𑀺𑀪𑀢𑁆𑀢𑀺𑀓𑁄 𑀲𑀼𑀢𑀫𑀦𑁆𑀢𑀧𑀤𑀥𑀭𑁄 𑀅𑀢𑀓𑁆𑀓𑀺𑀓𑁄 𑀭𑁄𑀕𑀼𑀧𑁆𑀧𑀢𑁆𑀢𑀺𑀓𑀼𑀲𑀮𑁄 𑀅𑀫𑁄𑀖𑀥𑀼𑀯𑀲𑀺𑀤𑁆𑀥𑀓𑀫𑁆𑀫𑁄 𑀪𑀺𑀲𑀓𑁆𑀓𑁄 𑀲𑀮𑁆𑀮𑀓𑀢𑁆𑀢𑁄 𑀲𑀩𑁆𑀩𑀭𑁄𑀕𑀽𑀧𑀲𑀫𑀪𑁂𑀲𑀚𑁆𑀚𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀧𑀭𑀺𑀲𑀸𑀬 𑀏𑀯𑀫𑀦𑀼𑀲𑁆𑀲𑀸𑀯𑁂𑀬𑁆𑀬 ‘𑀫𑀸 𑀔𑁄, 𑀪𑁄𑀦𑁆𑀢𑁄, 𑀓𑁂𑀘𑀺 𑀲𑀩𑁆𑀬𑀸𑀥𑀺𑀓𑀸 𑀫𑀫 𑀲𑀦𑁆𑀢𑀺𑀓𑁂 𑀉𑀧𑀕𑀘𑁆𑀙𑀣, 𑀅𑀩𑁆𑀬𑀸𑀥𑀺𑀓𑀸 𑀅𑀭𑁄𑀕𑀸 𑀫𑀫 𑀲𑀦𑁆𑀢𑀺𑀓𑁂 𑀉𑀧𑀕𑀘𑁆𑀙𑀣𑀸’𑀢𑀺. 𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀢𑁂𑀲𑀁 𑀅𑀩𑁆𑀬𑀸𑀥𑀺𑀓𑀸𑀦𑀁 𑀅𑀭𑁄𑀕𑀸𑀦𑀁 𑀧𑀭𑀺𑀧𑀼𑀡𑁆𑀡𑀸𑀦𑀁 𑀉𑀤𑀕𑁆𑀕𑀸𑀦𑀁 𑀢𑁂𑀦 𑀪𑀺𑀲𑀓𑁆𑀓𑁂𑀦 𑀓𑀭𑀡𑀻𑀬𑀁 𑀪𑀯𑁂𑀬𑁆𑀬𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀬𑀲𑁆𑀲𑀢𑁆𑀣𑀸𑀬 𑀢𑁂 𑀢𑀁 𑀪𑀺𑀲𑀓𑁆𑀓𑀁 𑀲𑀮𑁆𑀮𑀓𑀢𑁆𑀢𑀁 𑀉𑀧𑀕𑀘𑁆𑀙𑁂𑀬𑁆𑀬𑀼𑀁, 𑀢𑀁 𑀅𑀜𑁆𑀜𑀢𑁆𑀭𑁂𑀯 𑀢𑁂𑀲𑀁 𑀓𑀢𑀁 𑀓𑀭𑀡𑀻𑀬𑀁, 𑀓𑀺𑀁 𑀢𑁂𑀲𑀁 𑀢𑁂𑀦 𑀪𑀺𑀲𑀓𑁆𑀓𑁂𑀦𑀸’’𑀢𑀺? ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑀤𑀺 𑀢𑀣𑀸𑀕𑀢𑁄 𑀕𑀺𑀳𑀺𑀁 𑀬𑁂𑀯 𑀏𑀓𑀲𑁆𑀫𑀺𑀁 𑀨𑀮𑁂 𑀯𑀺𑀦𑀻𑀢𑀁 𑀧𑀩𑁆𑀩𑀸𑀚𑁂𑀬𑁆𑀬, 𑀢𑀢𑁆𑀣𑁂𑀯 𑀢𑁂𑀲𑀁 𑀓𑀢𑀁 𑀓𑀭𑀡𑀻𑀬𑀁, 𑀓𑀺𑀁 𑀢𑁂𑀲𑀁 𑀧𑀩𑁆𑀩𑀚𑁆𑀚𑀸𑀬?

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀓𑁄𑀘𑀺 𑀧𑀼𑀭𑀺𑀲𑁄 𑀅𑀦𑁂𑀓𑀣𑀸𑀮𑀺𑀧𑀸𑀓𑀲𑀢𑀁 𑀪𑁄𑀚𑀦𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀧𑀭𑀺𑀲𑀸𑀬 𑀏𑀯𑀫𑀦𑀼𑀲𑁆𑀲𑀸𑀯𑁂𑀬𑁆𑀬 ‘𑀫𑀸 𑀫𑁂, 𑀪𑁄𑀦𑁆𑀢𑁄, 𑀓𑁂𑀘𑀺 𑀙𑀸𑀢𑀸 𑀇𑀫𑀁 𑀧𑀭𑀺𑀯𑁂𑀲𑀦𑀁 𑀉𑀧𑀕𑀘𑁆𑀙𑀣, 𑀲𑀼𑀪𑀼𑀢𑁆𑀢𑀸 𑀢𑀺𑀢𑁆𑀢𑀸 𑀲𑀼𑀳𑀺𑀢𑀸 𑀥𑀸𑀢𑀸 𑀧𑀻𑀡𑀺𑀢𑀸 𑀧𑀭𑀺𑀧𑀼𑀡𑁆𑀡𑀸 𑀇𑀫𑀁 𑀧𑀭𑀺𑀯𑁂𑀲𑀦𑀁 𑀉𑀧𑀕𑀘𑁆𑀙𑀣𑀸’’𑀢𑀺. 𑀅𑀧𑀺 𑀦𑀼 𑀔𑁄 𑀫𑀳𑀸𑀭𑀸𑀚, 𑀢𑁂𑀲𑀁 𑀪𑀼𑀢𑁆𑀢𑀸𑀯𑀻𑀦𑀁 𑀢𑀺𑀢𑁆𑀢𑀸𑀦𑀁 𑀲𑀼𑀳𑀺𑀢𑀸𑀦𑀁 𑀥𑀸𑀢𑀸𑀦𑀁 𑀧𑀻𑀡𑀺𑀢𑀸𑀦𑀁 𑀧𑀭𑀺𑀧𑀼𑀡𑁆𑀡𑀸𑀦𑀁 𑀢𑁂𑀦 𑀪𑁄𑀚𑀦𑁂𑀦 𑀓𑀭𑀡𑀻𑀬𑀁 𑀪𑀯𑁂𑀬𑁆𑀬𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀬𑀲𑁆𑀲𑀢𑁆𑀣𑀸𑀬 𑀢𑁂 𑀢𑀁 𑀧𑀭𑀺𑀯𑁂𑀲𑀦𑀁 𑀉𑀧𑀕𑀘𑁆𑀙𑁂𑀬𑁆𑀬𑀼𑀁, 𑀢𑀁 𑀅𑀜𑁆𑀜𑀢𑁆𑀭𑁂𑀯 𑀢𑁂𑀲𑀁 𑀓𑀢𑀁 𑀓𑀭𑀡𑀻𑀬𑀁, 𑀓𑀺𑀁 𑀢𑁂𑀲𑀁 𑀢𑀸𑀬 𑀧𑀭𑀺𑀯𑁂𑀲𑀦𑀸𑀬𑀸’’𑀢𑀺? ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑀤𑀺 𑀢𑀣𑀸𑀕𑀢𑁄 𑀕𑀺𑀳𑀺𑀁 𑀬𑁂𑀯 𑀏𑀓𑀲𑁆𑀫𑀺𑀁 𑀨𑀮𑁂 𑀯𑀺𑀦𑀻𑀢𑀁 𑀧𑀩𑁆𑀩𑀸𑀚𑁂𑀬𑁆𑀬, 𑀢𑀢𑁆𑀣𑁂𑀯 𑀢𑁂𑀲𑀁 𑀓𑀢𑀁 𑀓𑀭𑀡𑀻𑀬𑀁, 𑀓𑀺𑀁 𑀢𑁂𑀲𑀁 𑀧𑀩𑁆𑀩𑀚𑁆𑀚𑀸𑀬?

‘‘𑀅𑀧𑀺 𑀘, 𑀫𑀳𑀸𑀭𑀸𑀚, 𑀬𑁂 𑀳𑀻𑀦𑀸𑀬𑀸𑀯𑀢𑁆𑀢𑀦𑁆𑀢𑀺, 𑀢𑁂 𑀚𑀺𑀦𑀲𑀸𑀲𑀦𑀲𑁆𑀲 𑀧𑀜𑁆𑀘 𑀅𑀢𑀼𑀮𑀺𑀬𑁂 𑀕𑀼𑀡𑁂 𑀤𑀲𑁆𑀲𑁂𑀦𑁆𑀢𑀺. 𑀓𑀢𑀫𑁂 𑀧𑀜𑁆𑀘? 𑀪𑀽𑀫𑀺𑀫𑀳𑀦𑁆𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑀺, 𑀧𑀭𑀺𑀲𑀼𑀤𑁆𑀥𑀯𑀺𑀫𑀮𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑀺, 𑀧𑀸𑀧𑁂𑀳𑀺 𑀅𑀲𑀁𑀯𑀸𑀲𑀺𑀬𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑀺, 𑀤𑀼𑀧𑁆𑀧𑀝𑀺𑀯𑁂𑀥𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑀺, 𑀩𑀳𑀼𑀲𑀁𑀯𑀭𑀭𑀓𑁆𑀔𑀺𑀬𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑀺.

‘‘𑀓𑀣𑀁 𑀪𑀽𑀫𑀺𑀫𑀳𑀦𑁆𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑀺? 𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀅𑀥𑀦𑁄 𑀳𑀻𑀦𑀚𑀘𑁆𑀘𑁄 𑀦𑀺𑀩𑁆𑀩𑀺𑀲𑁂𑀲𑁄 𑀩𑀼𑀤𑁆𑀥𑀺𑀧𑀭𑀺𑀳𑀻𑀦𑁄 𑀫𑀳𑀸𑀭𑀚𑁆𑀚𑀁 𑀧𑀝𑀺𑀮𑀪𑀺𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀧𑀭𑀺𑀧𑀢𑀢𑀺 𑀧𑀭𑀺𑀥𑀁𑀲𑀢𑀺 𑀧𑀭𑀺𑀳𑀸𑀬𑀢𑀺 𑀬𑀲𑀢𑁄, 𑀦 𑀲𑀓𑁆𑀓𑁄𑀢𑀺 𑀇𑀲𑁆𑀲𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁. 𑀓𑀺𑀁 𑀓𑀸𑀭𑀡𑀁? 𑀫𑀳𑀦𑁆𑀢𑀢𑁆𑀢𑀸 𑀇𑀲𑁆𑀲𑀭𑀺𑀬𑀲𑁆𑀲. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀓𑁂𑀘𑀺 𑀦𑀺𑀩𑁆𑀩𑀺𑀲𑁂𑀲𑀸 𑀅𑀓𑀢𑀧𑀼𑀜𑁆𑀜𑀸 𑀩𑀼𑀤𑁆𑀥𑀺𑀧𑀭𑀺𑀳𑀻𑀦𑀸 𑀚𑀺𑀦𑀲𑀸𑀲𑀦𑁂 𑀧𑀩𑁆𑀩𑀚𑀦𑁆𑀢𑀺, 𑀢𑁂 𑀢𑀁 𑀧𑀩𑁆𑀩𑀚𑁆𑀚𑀁 𑀧𑀯𑀭𑀼𑀢𑁆𑀢𑀫𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀯𑀺𑀲𑀳𑀦𑁆𑀢𑀸 𑀦 𑀘𑀺𑀭𑀲𑁆𑀲𑁂𑀯 𑀚𑀺𑀦𑀲𑀸𑀲𑀦𑀸 𑀧𑀭𑀺𑀧𑀢𑀺𑀢𑁆𑀯𑀸 𑀧𑀭𑀺𑀥𑀁𑀲𑀺𑀢𑁆𑀯𑀸 𑀧𑀭𑀺𑀳𑀸𑀬𑀺𑀢𑁆𑀯𑀸 𑀳𑀻𑀦𑀸𑀬𑀸𑀯𑀢𑁆𑀢𑀦𑁆𑀢𑀺, 𑀦 𑀲𑀓𑁆𑀓𑁄𑀦𑁆𑀢𑀺 𑀚𑀺𑀦𑀲𑀸𑀲𑀦𑀁 𑀲𑀦𑁆𑀥𑀸𑀭𑁂𑀢𑀼𑀁. 𑀓𑀺𑀁 𑀓𑀸𑀭𑀡𑀁? 𑀫𑀳𑀦𑁆𑀢𑀢𑁆𑀢𑀸 𑀚𑀺𑀦𑀲𑀸𑀲𑀦𑀪𑀽𑀫𑀺𑀬𑀸. 𑀏𑀯𑀁 𑀪𑀽𑀫𑀺𑀫𑀳𑀦𑁆𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑀺.

‘‘𑀓𑀣𑀁 𑀧𑀭𑀺𑀲𑀼𑀤𑁆𑀥𑀯𑀺𑀫𑀮𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑀺? 𑀬𑀣𑀸, 𑀫𑀳𑀸𑀭𑀸𑀚, 𑀯𑀸𑀭𑀺 𑀧𑁄𑀓𑁆𑀔𑀭𑀧𑀢𑁆𑀢𑁂 𑀯𑀺𑀓𑀺𑀭𑀢𑀺 𑀯𑀺𑀥𑀫𑀢𑀺 𑀯𑀺𑀥𑀁𑀲𑁂𑀢𑀺, 𑀦 𑀞𑀸𑀦𑀫𑀼𑀧𑀕𑀘𑁆𑀙𑀢𑀺 𑀦𑀽𑀧𑀮𑀺𑀫𑁆𑀧𑀢𑀺. 𑀓𑀺𑀁 𑀓𑀸𑀭𑀡𑀁? 𑀧𑀭𑀺𑀲𑀼𑀤𑁆𑀥𑀯𑀺𑀫𑀮𑀢𑁆𑀢𑀸 𑀧𑀤𑀼𑀫𑀲𑁆𑀲. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀓𑁂𑀘𑀺 𑀲𑀞𑀸 𑀓𑀽𑀝𑀸 𑀯𑀗𑁆𑀓𑀸 𑀓𑀼𑀝𑀺𑀮𑀸 𑀯𑀺𑀲𑀫𑀤𑀺𑀝𑁆𑀞𑀺𑀦𑁄 𑀚𑀺𑀦𑀲𑀸𑀲𑀦𑁂 𑀧𑀩𑁆𑀩𑀚𑀦𑁆𑀢𑀺, 𑀢𑁂 𑀧𑀭𑀺𑀲𑀼𑀤𑁆𑀥𑀯𑀺𑀫𑀮𑀦𑀺𑀓𑁆𑀓𑀡𑁆𑀝𑀓𑀧𑀡𑁆𑀟𑀭𑀯𑀭𑀧𑁆𑀧𑀯𑀭𑀲𑀸𑀲𑀦𑀢𑁄 𑀦 𑀘𑀺𑀭𑀲𑁆𑀲𑁂𑀯 𑀯𑀺𑀓𑀺𑀭𑀺𑀢𑁆𑀯𑀸 𑀯𑀺𑀥𑀫𑀺𑀢𑁆𑀯𑀸 𑀯𑀺𑀥𑀁𑀲𑁂𑀢𑁆𑀯𑀸 𑀅𑀲𑀡𑁆𑀞𑀳𑀺𑀢𑁆𑀯𑀸 𑀅𑀦𑀼𑀧𑀮𑀺𑀫𑁆𑀧𑀺𑀢𑁆𑀯𑀸 𑀳𑀻𑀦𑀸𑀬𑀸𑀯𑀢𑁆𑀢𑀦𑁆𑀢𑀺. 𑀓𑀺𑀁 𑀓𑀸𑀭𑀡𑀁? 𑀧𑀭𑀺𑀲𑀼𑀤𑁆𑀥𑀯𑀺𑀫𑀮𑀢𑁆𑀢𑀸 𑀚𑀺𑀦𑀲𑀸𑀲𑀦𑀲𑁆𑀲. 𑀏𑀯𑀁 𑀧𑀭𑀺𑀲𑀼𑀤𑁆𑀥𑀯𑀺𑀫𑀮𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑀺.

‘‘𑀓𑀣𑀁 𑀧𑀸𑀧𑁂𑀳𑀺 𑀅𑀲𑀁𑀯𑀸𑀲𑀺𑀬𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑀺? 𑀬𑀣𑀸, 𑀫𑀳𑀸𑀭𑀸𑀚, 𑀫𑀳𑀸𑀲𑀫𑀼𑀤𑁆𑀤𑁄 𑀦 𑀫𑀢𑁂𑀦 𑀓𑀼𑀡𑀧𑁂𑀦 𑀲𑀁𑀯𑀲𑀢𑀺, 𑀬𑀁 𑀳𑁄𑀢𑀺 𑀫𑀳𑀸𑀲𑀫𑀼𑀤𑁆𑀤𑁂 𑀫𑀢𑀁 𑀓𑀼𑀡𑀧𑀁, 𑀢𑀁 𑀔𑀺𑀧𑁆𑀧𑀫𑁂𑀯 𑀢𑀻𑀭𑀁 𑀉𑀧𑀦𑁂𑀢𑀺 𑀣𑀮𑀁 𑀯𑀸 𑀉𑀲𑁆𑀲𑀸𑀭𑁂𑀢𑀺. 𑀓𑀺𑀁 𑀓𑀸𑀭𑀡𑀁? 𑀫𑀳𑀸𑀪𑀽𑀢𑀸𑀦𑀁 𑀪𑀯𑀦𑀢𑁆𑀢𑀸 𑀫𑀳𑀸𑀲𑀫𑀼𑀤𑁆𑀤𑀲𑁆𑀲. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀓𑁂𑀘𑀺 𑀧𑀸𑀧𑀓𑀸 𑀅𑀲𑀁𑀯𑀼𑀢𑀸 𑀅𑀳𑀺𑀭𑀺𑀓𑀸 𑀅𑀓𑀺𑀭𑀺𑀬𑀸 𑀑𑀲𑀦𑁆𑀦𑀯𑀻𑀭𑀺𑀬𑀸 𑀓𑀼𑀲𑀻𑀢𑀸 𑀓𑀺𑀮𑀺𑀝𑁆𑀞𑀸 𑀤𑀼𑀚𑁆𑀚𑀦𑀸 𑀫𑀦𑀼𑀲𑁆𑀲𑀸 𑀚𑀺𑀦𑀲𑀸𑀲𑀦𑁂 𑀧𑀩𑁆𑀩𑀚𑀦𑁆𑀢𑀺, 𑀢𑁂 𑀦 𑀘𑀺𑀭𑀲𑁆𑀲𑁂𑀯 𑀚𑀺𑀦𑀲𑀸𑀲𑀦𑀢𑁄 𑀅𑀭𑀳𑀦𑁆𑀢𑀯𑀺𑀫𑀮𑀔𑀻𑀡𑀸𑀲𑀯𑀫𑀳𑀸𑀪𑀽𑀢𑀪𑀯𑀦𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀲𑀁𑀯𑀲𑀺𑀢𑁆𑀯𑀸 𑀳𑀻𑀦𑀸𑀬𑀸𑀯𑀢𑁆𑀢𑀦𑁆𑀢𑀺. 𑀓𑀺𑀁 𑀓𑀸𑀭𑀡𑀁? 𑀧𑀸𑀧𑁂𑀳𑀺 𑀅𑀲𑀁𑀯𑀸𑀲𑀺𑀬𑀢𑁆𑀢𑀸 𑀚𑀺𑀦𑀲𑀸𑀲𑀦𑀲𑁆𑀲. 𑀏𑀯𑀁 𑀧𑀸𑀧𑁂𑀳𑀺 𑀅𑀲𑀁𑀯𑀸𑀲𑀺𑀬𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑀺.

‘‘𑀓𑀣𑀁 𑀤𑀼𑀧𑁆𑀧𑀝𑀺𑀯𑁂𑀥𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑀺? 𑀬𑀣𑀸, 𑀫𑀳𑀸𑀭𑀸𑀚, 𑀬𑁂 𑀓𑁂𑀘𑀺 𑀅𑀙𑁂𑀓𑀸 𑀅𑀲𑀺𑀓𑁆𑀔𑀺𑀢𑀸 𑀅𑀲𑀺𑀧𑁆𑀧𑀺𑀦𑁄 𑀫𑀢𑀺𑀯𑀺𑀧𑁆𑀧𑀳𑀻𑀦𑀸 𑀇𑀲𑁆𑀲𑀸𑀲𑀸 [𑀇𑀲𑁆𑀲𑀢𑁆𑀣𑀸 (𑀲𑀻. 𑀲𑁆𑀬𑀸. 𑀧𑀻.)] 𑀯𑀸𑀮𑀕𑁆𑀕𑀯𑁂𑀥𑀁 𑀅𑀯𑀺𑀲𑀳𑀦𑁆𑀢𑀸 𑀯𑀺𑀕𑀴𑀦𑁆𑀢𑀺 𑀧𑀓𑁆𑀓𑀫𑀦𑁆𑀢𑀺. 𑀓𑀺𑀁 𑀓𑀸𑀭𑀡𑀁? 𑀲𑀡𑁆𑀳𑀲𑀼𑀔𑀼𑀫𑀤𑀼𑀧𑁆𑀧𑀝𑀺𑀯𑁂𑀥𑀢𑁆𑀢𑀸 𑀯𑀸𑀮𑀕𑁆𑀕𑀲𑁆𑀲. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀓𑁂𑀘𑀺 𑀤𑀼𑀧𑁆𑀧𑀜𑁆𑀜𑀸 𑀚𑀴𑀸 𑀏𑀴𑀫𑀽𑀕𑀸 𑀫𑀽𑀴𑁆𑀳𑀸 𑀤𑀦𑁆𑀥𑀕𑀢𑀺𑀓𑀸 𑀚𑀦𑀸 𑀚𑀺𑀦𑀲𑀸𑀲𑀦𑁂 𑀧𑀩𑁆𑀩𑀚𑀦𑁆𑀢𑀺, 𑀢𑁂 𑀢𑀁 𑀧𑀭𑀫𑀲𑀡𑁆𑀳𑀲𑀼𑀔𑀼𑀫𑀘𑀢𑀼𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀅𑀯𑀺𑀲𑀳𑀦𑁆𑀢𑀸 𑀚𑀺𑀦𑀲𑀸𑀲𑀦𑀸 𑀯𑀺𑀕𑀴𑀺𑀢𑁆𑀯𑀸 𑀧𑀓𑁆𑀓𑀫𑀺𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀳𑀻𑀦𑀸𑀬𑀸𑀯𑀢𑁆𑀢𑀦𑁆𑀢𑀺. 𑀓𑀺𑀁 𑀓𑀸𑀭𑀡𑀁? 𑀧𑀭𑀫𑀲𑀡𑁆𑀳𑀲𑀼𑀔𑀼𑀫𑀤𑀼𑀧𑁆𑀧𑀝𑀺𑀯𑁂𑀥𑀢𑀸𑀬 𑀲𑀘𑁆𑀘𑀸𑀦𑀁. 𑀏𑀯𑀁 𑀤𑀼𑀧𑁆𑀧𑀝𑀺𑀯𑁂𑀥𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑀺.

‘‘𑀓𑀣𑀁 𑀩𑀳𑀼𑀲𑀁𑀯𑀭𑀭𑀓𑁆𑀔𑀺𑀬𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑀺? 𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀫𑀳𑀢𑀺𑀫𑀳𑀸𑀬𑀼𑀤𑁆𑀥𑀪𑀽𑀫𑀺𑀫𑀼𑀧𑀕𑀢𑁄 𑀧𑀭𑀲𑁂𑀦𑀸𑀬 𑀤𑀺𑀲𑀸𑀯𑀺𑀤𑀺𑀲𑀸𑀳𑀺 𑀲𑀫𑀦𑁆𑀢𑀸 𑀧𑀭𑀺𑀯𑀸𑀭𑀺𑀢𑁄 𑀲𑀢𑁆𑀢𑀺𑀳𑀢𑁆𑀣𑀁 𑀚𑀦𑀫𑀼𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀪𑀻𑀢𑁄 𑀑𑀲𑀓𑁆𑀓𑀢𑀺 𑀧𑀝𑀺𑀦𑀺𑀯𑀢𑁆𑀢𑀢𑀺 𑀧𑀮𑀸𑀬𑀢𑀺. 𑀓𑀺𑀁 𑀓𑀸𑀭𑀡𑀁? 𑀩𑀳𑀼𑀯𑀺𑀥𑀬𑀼𑀤𑁆𑀥𑀫𑀼𑀔𑀭𑀓𑁆𑀔𑀡𑀪𑀬𑀸. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀓𑁂𑀘𑀺 𑀧𑀸𑀧𑀓𑀸 𑀅𑀲𑀁𑀯𑀼𑀢𑀸 𑀅𑀳𑀺𑀭𑀺𑀓𑀸 𑀅𑀓𑀺𑀭𑀺𑀬𑀸 𑀅𑀓𑁆𑀔𑀦𑁆𑀢𑀻 𑀘𑀧𑀮𑀸 𑀘𑀮𑀺𑀢𑀸 𑀇𑀢𑁆𑀢𑀭𑀸 𑀩𑀸𑀮𑀚𑀦𑀸 𑀚𑀺𑀦𑀲𑀸𑀲𑀦𑁂 𑀧𑀩𑁆𑀩𑀚𑀦𑁆𑀢𑀺, 𑀢𑁂 𑀩𑀳𑀼𑀯𑀺𑀥𑀁 𑀲𑀺𑀓𑁆𑀔𑀸𑀧𑀤𑀁 𑀧𑀭𑀺𑀭𑀓𑁆𑀔𑀺𑀢𑀼𑀁 𑀅𑀯𑀺𑀲𑀳𑀦𑁆𑀢𑀸 𑀑𑀲𑀓𑁆𑀓𑀺𑀢𑁆𑀯𑀸 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀮𑀸𑀬𑀺𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀳𑀻𑀦𑀸𑀬𑀸𑀯𑀢𑁆𑀢𑀦𑁆𑀢𑀺. 𑀓𑀺𑀁 𑀓𑀸𑀭𑀡𑀁? 𑀩𑀳𑀼𑀯𑀺𑀥𑀲𑀁𑀯𑀭𑀭𑀓𑁆𑀔𑀺𑀬𑀪𑀸𑀯𑀢𑁆𑀢𑀸 𑀚𑀺𑀦𑀲𑀸𑀲𑀦𑀲𑁆𑀲. 𑀏𑀯𑀁 𑀩𑀳𑀼𑀯𑀺𑀥𑀲𑀁𑀯𑀭𑀭𑀓𑁆𑀔𑀺𑀬𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑀺.

‘‘𑀣𑀮𑀚𑀼𑀢𑁆𑀢𑀫𑁂𑀧𑀺, 𑀫𑀳𑀸𑀭𑀸𑀚, 𑀯𑀲𑁆𑀲𑀺𑀓𑀸𑀕𑀼𑀫𑁆𑀩𑁂 𑀓𑀺𑀫𑀺𑀯𑀺𑀤𑁆𑀥𑀸𑀦𑀺 𑀧𑀼𑀧𑁆𑀨𑀸𑀦𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀅𑀗𑁆𑀓𑀼𑀭𑀸𑀦𑀺 𑀲𑀗𑁆𑀓𑀼𑀝𑀺𑀢𑀸𑀦𑀺 𑀅𑀦𑁆𑀢𑀭𑀸 𑀬𑁂𑀯 𑀧𑀭𑀺𑀧𑀢𑀦𑁆𑀢𑀺, 𑀦 𑀘 𑀢𑁂𑀲𑀼 𑀧𑀭𑀺𑀧𑀢𑀺𑀢𑁂𑀲𑀼 𑀯𑀲𑁆𑀲𑀺𑀓𑀸𑀕𑀼𑀫𑁆𑀩𑁄 𑀳𑀻𑀴𑀺𑀢𑁄 𑀦𑀸𑀫 𑀳𑁄𑀢𑀺. 𑀬𑀸𑀦𑀺 𑀢𑀢𑁆𑀣 𑀞𑀺𑀢𑀸𑀦𑀺 𑀧𑀼𑀧𑁆𑀨𑀸𑀦𑀺, 𑀢𑀸𑀦𑀺 𑀲𑀫𑁆𑀫𑀸 𑀕𑀦𑁆𑀥𑁂𑀦 𑀤𑀺𑀲𑀸𑀯𑀺𑀤𑀺𑀲𑀁 𑀅𑀪𑀺𑀩𑁆𑀬𑀸𑀧𑁂𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀢𑁂 𑀚𑀺𑀦𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀳𑀻𑀦𑀸𑀬𑀸𑀯𑀢𑁆𑀢𑀦𑁆𑀢𑀺, 𑀢𑁂 𑀚𑀺𑀦𑀲𑀸𑀲𑀦𑁂 𑀓𑀺𑀫𑀺𑀯𑀺𑀤𑁆𑀥𑀸𑀦𑀺 𑀯𑀲𑁆𑀲𑀺𑀓𑀸𑀧𑀼𑀧𑁆𑀨𑀸𑀦𑀺 𑀯𑀺𑀬 𑀯𑀡𑁆𑀡𑀕𑀦𑁆𑀥𑀭𑀳𑀺𑀢𑀸 𑀦𑀺𑀩𑁆𑀩𑀡𑁆𑀡𑀸𑀓𑀸𑀭𑀲𑀻𑀮𑀸 𑀅𑀪𑀩𑁆𑀩𑀸 𑀯𑁂𑀧𑀼𑀮𑁆𑀮𑀸𑀬, 𑀦 𑀘 𑀢𑁂𑀲𑀁 𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦 𑀚𑀺𑀦𑀲𑀸𑀲𑀦𑀁 𑀳𑀻𑀴𑀺𑀢𑀁 𑀦𑀸𑀫 𑀳𑁄𑀢𑀺. 𑀬𑁂 𑀢𑀢𑁆𑀣 𑀞𑀺𑀢𑀸 𑀪𑀺𑀓𑁆𑀔𑀽, 𑀢𑁂 𑀲𑀤𑁂𑀯𑀓𑀁 𑀮𑁄𑀓𑀁 𑀲𑀻𑀮𑀯𑀭𑀕𑀦𑁆𑀥𑁂𑀦 𑀅𑀪𑀺𑀩𑁆𑀬𑀸𑀧𑁂𑀦𑁆𑀢𑀺.

‘‘𑀲𑀸𑀮𑀻𑀦𑀫𑁆𑀧𑀺, 𑀫𑀳𑀸𑀭𑀸𑀚, 𑀦𑀺𑀭𑀸𑀢𑀗𑁆𑀓𑀸𑀦𑀁 𑀮𑁄𑀳𑀺𑀢𑀓𑀸𑀦𑀁 𑀅𑀦𑁆𑀢𑀭𑁂 𑀓𑀭𑀼𑀫𑁆𑀪𑀓𑀁 𑀦𑀸𑀫 𑀲𑀸𑀮𑀺𑀚𑀸𑀢𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀅𑀦𑁆𑀢𑀭𑀸 𑀬𑁂𑀯 𑀯𑀺𑀦𑀲𑁆𑀲𑀢𑀺, 𑀦 𑀘 𑀢𑀲𑁆𑀲𑀸 𑀯𑀺𑀦𑀝𑁆𑀞𑀢𑁆𑀢𑀸 𑀮𑁄𑀳𑀺𑀢𑀓𑀲𑀸𑀮𑀻 𑀳𑀻𑀴𑀺𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀬𑁂 𑀢𑀢𑁆𑀣 𑀞𑀺𑀢𑀸 𑀲𑀸𑀮𑀻, 𑀢𑁂 𑀭𑀸𑀚𑀽𑀧𑀪𑁄𑀕𑀸 𑀳𑁄𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀢𑁂 𑀚𑀺𑀦𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀳𑀻𑀦𑀸𑀬𑀸𑀯𑀢𑁆𑀢𑀦𑁆𑀢𑀺, 𑀢𑁂 𑀮𑁄𑀳𑀺𑀢𑀓𑀲𑀸𑀮𑀻𑀦𑀫𑀦𑁆𑀢𑀭𑁂 𑀓𑀭𑀼𑀫𑁆𑀪𑀓𑀸 𑀯𑀺𑀬 𑀚𑀺𑀦𑀲𑀸𑀲𑀦𑁂 𑀦 𑀯𑀟𑁆𑀠𑀺𑀢𑁆𑀯𑀸 𑀯𑁂𑀧𑀼𑀮𑁆𑀮𑀢𑀁 𑀦 𑀧𑀸𑀧𑀼𑀡𑀺𑀢𑁆𑀯𑀸 [𑀯𑀟𑁆𑀠𑀺𑀢𑁆𑀯𑀸 𑀯𑁂𑀧𑀼𑀮𑁆𑀮𑀢𑀁 𑀅𑀧𑀸𑀧𑀼𑀡𑀺𑀢𑁆𑀯𑀸 (𑀲𑀻. 𑀓.)] 𑀅𑀦𑁆𑀢𑀭𑀸 𑀬𑁂𑀯 𑀳𑀻𑀦𑀸𑀬𑀸𑀯𑀢𑁆𑀢𑀦𑁆𑀢𑀺, 𑀦 𑀘 𑀢𑁂𑀲𑀁 𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦 𑀚𑀺𑀦𑀲𑀸𑀲𑀦𑀁 𑀳𑀻𑀴𑀺𑀢𑀁 𑀦𑀸𑀫 𑀳𑁄𑀢𑀺. 𑀬𑁂 𑀢𑀢𑁆𑀣 𑀞𑀺𑀢𑀸 𑀪𑀺𑀓𑁆𑀔𑀽 𑀢𑁂 𑀅𑀭𑀳𑀢𑁆𑀢𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀸 𑀳𑁄𑀦𑁆𑀢𑀺.

‘‘𑀓𑀸𑀫𑀤𑀤𑀲𑁆𑀲𑀸𑀧𑀺, 𑀫𑀳𑀸𑀭𑀸𑀚, 𑀫𑀡𑀺𑀭𑀢𑀦𑀲𑁆𑀲 𑀏𑀓𑀤𑁂𑀲𑀁 [𑀏𑀓𑀤𑁂𑀲𑁂 (𑀓.)] 𑀓𑀓𑁆𑀓𑀲𑀁 𑀉𑀧𑁆𑀧𑀚𑁆𑀚𑀢𑀺, 𑀦 𑀘 𑀢𑀢𑁆𑀣 𑀓𑀓𑁆𑀓𑀲𑀼𑀧𑁆𑀧𑀦𑁆𑀦𑀢𑁆𑀢𑀸 𑀫𑀡𑀺𑀭𑀢𑀦𑀁 𑀳𑀻𑀴𑀺𑀢𑀁 𑀦𑀸𑀫 𑀳𑁄𑀢𑀺. 𑀬𑀁 𑀢𑀢𑁆𑀣 𑀧𑀭𑀺𑀲𑀼𑀤𑁆𑀥𑀁 𑀫𑀡𑀺𑀭𑀢𑀦𑀲𑁆𑀲, 𑀢𑀁 𑀚𑀦𑀲𑁆𑀲 𑀳𑀸𑀲𑀓𑀭𑀁 𑀳𑁄𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀢𑁂 𑀚𑀺𑀦𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀳𑀻𑀦𑀸𑀬𑀸𑀯𑀢𑁆𑀢𑀦𑁆𑀢𑀺, 𑀓𑀓𑁆𑀓𑀲𑀸 𑀢𑁂 𑀚𑀺𑀦𑀲𑀸𑀲𑀦𑁂 𑀧𑀧𑀝𑀺𑀓𑀸, 𑀦 𑀘 𑀢𑁂𑀲𑀁 𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦 𑀚𑀺𑀦𑀲𑀸𑀲𑀦𑀁 𑀳𑀻𑀴𑀺𑀢𑀁 𑀦𑀸𑀫 𑀳𑁄𑀢𑀺. 𑀬𑁂 𑀢𑀢𑁆𑀣 𑀞𑀺𑀢𑀸 𑀪𑀺𑀓𑁆𑀔𑀽, 𑀢𑁂 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀳𑀸𑀲𑀚𑀦𑀓𑀸 𑀳𑁄𑀦𑁆𑀢𑀺.

‘‘𑀚𑀸𑀢𑀺𑀲𑀫𑁆𑀧𑀦𑁆𑀦𑀲𑁆𑀲𑀧𑀺, 𑀫𑀳𑀸𑀭𑀸𑀚, 𑀮𑁄𑀳𑀺𑀢𑀘𑀦𑁆𑀤𑀦𑀲𑁆𑀲 𑀏𑀓𑀤𑁂𑀲𑀁 𑀧𑀽𑀢𑀺𑀓𑀁 𑀳𑁄𑀢𑀺 𑀅𑀧𑁆𑀧𑀕𑀦𑁆𑀥𑀁. 𑀦 𑀢𑁂𑀦 𑀮𑁄𑀳𑀺𑀢𑀘𑀦𑁆𑀤𑀦𑀁 𑀳𑀻𑀴𑀺𑀢𑀁 𑀦𑀸𑀫 𑀳𑁄𑀢𑀺. 𑀬𑀁 𑀢𑀢𑁆𑀣 𑀅𑀧𑀽𑀢𑀺𑀓𑀁 𑀲𑀼𑀕𑀦𑁆𑀥𑀁, 𑀢𑀁 𑀲𑀫𑀦𑁆𑀢𑀸 𑀯𑀺𑀥𑀽𑀧𑁂𑀢𑀺 𑀅𑀪𑀺𑀩𑁆𑀬𑀸𑀧𑁂𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀢𑁂 𑀚𑀺𑀦𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀳𑀻𑀦𑀸𑀬𑀸𑀯𑀢𑁆𑀢𑀦𑁆𑀢𑀺, 𑀢𑁂 𑀮𑁄𑀳𑀺𑀢𑀘𑀦𑁆𑀤𑀦𑀲𑀸𑀭𑀦𑁆𑀢𑀭𑁂 𑀧𑀽𑀢𑀺𑀓𑀤𑁂𑀲𑀫𑀺𑀯 𑀙𑀟𑁆𑀟𑀦𑀻𑀬𑀸 𑀚𑀺𑀦𑀲𑀸𑀲𑀦𑁂, 𑀦 𑀘 𑀢𑁂𑀲𑀁 𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦 𑀚𑀺𑀦𑀲𑀸𑀲𑀦𑀁 𑀳𑀻𑀴𑀺𑀢𑀁 𑀦𑀸𑀫 𑀳𑁄𑀢𑀺. 𑀬𑁂 𑀢𑀢𑁆𑀣 𑀞𑀺𑀢𑀸 𑀪𑀺𑀓𑁆𑀔𑀽, 𑀢𑁂 𑀲𑀤𑁂𑀯𑀓𑀁 𑀮𑁄𑀓𑀁 𑀲𑀻𑀮𑀯𑀭𑀘𑀦𑁆𑀤𑀦𑀕𑀦𑁆𑀥𑁂𑀦 𑀅𑀦𑀼𑀮𑀺𑀫𑁆𑀧𑀬𑀦𑁆𑀢𑀻’’𑀢𑀺.

‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑁂𑀦 𑀢𑁂𑀦 𑀅𑀦𑀼𑀘𑁆𑀙𑀯𑀺𑀓𑁂𑀦 𑀢𑁂𑀦 𑀢𑁂𑀦 𑀲𑀤𑀺𑀲𑁂𑀦 𑀓𑀸𑀭𑀡𑁂𑀦 𑀦𑀺𑀭𑀯𑀚𑁆𑀚𑀫𑀦𑀼𑀧𑀸𑀧𑀺𑀢𑀁 𑀚𑀺𑀦𑀲𑀸𑀲𑀦𑀁 𑀲𑁂𑀝𑁆𑀞𑀪𑀸𑀯𑁂𑀦 𑀧𑀭𑀺𑀤𑀻𑀧𑀺𑀢𑀁, 𑀳𑀻𑀦𑀸𑀬𑀸𑀯𑀢𑁆𑀢𑀫𑀸𑀦𑀸𑀧𑀺 𑀢𑁂 𑀚𑀺𑀦𑀲𑀸𑀲𑀦𑀲𑁆𑀲 𑀲𑁂𑀝𑁆𑀞𑀪𑀸𑀯𑀁 𑀬𑁂𑀯 𑀧𑀭𑀺𑀤𑀻𑀧𑁂𑀦𑁆𑀢𑀻’’𑀢𑀺.

𑀳𑀻𑀦𑀸𑀬𑀸𑀯𑀢𑁆𑀢𑀦𑀧𑀜𑁆𑀳𑁄 𑀧𑀜𑁆𑀘𑀫𑁄.

𑁬. 𑀅𑀭𑀳𑀦𑁆𑀢𑀯𑁂𑀤𑀦𑀸𑀯𑁂𑀤𑀺𑀬𑀦𑀧𑀜𑁆𑀳𑁄

𑁬. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀼𑀫𑁆𑀳𑁂 𑀪𑀡𑀣 ‘𑀅𑀭𑀳𑀸 𑀏𑀓𑀁 𑀯𑁂𑀤𑀦𑀁 𑀯𑁂𑀤𑀬𑀢𑀺 𑀓𑀸𑀬𑀺𑀓𑀁, 𑀦 𑀘𑁂𑀢𑀲𑀺𑀓’𑀦𑁆𑀢𑀺. 𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀭𑀳𑀢𑁄 𑀘𑀺𑀢𑁆𑀢𑀁 𑀬𑀁 𑀓𑀸𑀬𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑀺, 𑀢𑀢𑁆𑀣 𑀅𑀭𑀳𑀸 𑀅𑀦𑀺𑀲𑁆𑀲𑀭𑁄 𑀅𑀲𑁆𑀲𑀸𑀫𑀻 𑀅𑀯𑀲𑀯𑀢𑁆𑀢𑀻’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀦 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀼𑀢𑁆𑀢𑀫𑁂𑀢𑀁, 𑀬𑀁 𑀲𑁄 𑀲𑀓𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀫𑀸𑀦𑁂 𑀓𑀸𑀬𑁂 𑀅𑀦𑀺𑀲𑁆𑀲𑀭𑁄 𑀳𑁄𑀢𑀺 𑀅𑀲𑁆𑀲𑀸𑀫𑀻 𑀅𑀯𑀲𑀯𑀢𑁆𑀢𑀻; 𑀲𑀓𑀼𑀡𑁄𑀧𑀺 𑀢𑀸𑀯, 𑀪𑀦𑁆𑀢𑁂, 𑀬𑀲𑁆𑀫𑀺𑀁 𑀓𑀼𑀮𑀸𑀯𑀓𑁂 𑀧𑀝𑀺𑀯𑀲𑀢𑀺, 𑀢𑀢𑁆𑀣 𑀲𑁄 𑀇𑀲𑁆𑀲𑀭𑁄 𑀳𑁄𑀢𑀺 𑀲𑀸𑀫𑀻 𑀯𑀲𑀯𑀢𑁆𑀢𑀻’’𑀢𑀺.

‘‘𑀤𑀲𑀬𑀺𑀫𑁂, 𑀫𑀳𑀸𑀭𑀸𑀚, 𑀓𑀸𑀬𑀸𑀦𑀼𑀕𑀢𑀸 𑀥𑀫𑁆𑀫𑀸 𑀪𑀯𑁂 𑀪𑀯𑁂 𑀓𑀸𑀬𑀁 𑀅𑀦𑀼𑀥𑀸𑀯𑀦𑁆𑀢𑀺 𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀤𑀲? 𑀲𑀻𑀢𑀁 𑀉𑀡𑁆𑀳𑀁 𑀚𑀺𑀖𑀘𑁆𑀙𑀸 𑀧𑀺𑀧𑀸𑀲𑀸 𑀉𑀘𑁆𑀘𑀸𑀭𑁄 𑀧𑀲𑁆𑀲𑀸𑀯𑁄 𑀫𑀺𑀤𑁆𑀥𑀁 𑀚𑀭𑀸 𑀩𑁆𑀬𑀸𑀥𑀺 𑀫𑀭𑀡𑀁. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀤𑀲 𑀓𑀸𑀬𑀸𑀦𑀼𑀕𑀢𑀸 𑀥𑀫𑁆𑀫𑀸 𑀪𑀯𑁂 𑀪𑀯𑁂 𑀓𑀸𑀬𑀁 𑀅𑀦𑀼𑀥𑀸𑀯𑀦𑁆𑀢𑀺 𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀺, 𑀢𑀢𑁆𑀣 𑀅𑀭𑀳𑀸 𑀅𑀦𑀺𑀲𑁆𑀲𑀭𑁄 𑀅𑀲𑁆𑀲𑀸𑀫𑀻 𑀅𑀯𑀲𑀯𑀢𑁆𑀢𑀻’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑁂𑀦 𑀓𑀸𑀭𑀡𑁂𑀦 𑀅𑀭𑀳𑀢𑁄 𑀓𑀸𑀬𑁂 𑀆𑀡𑀸 𑀦𑀧𑁆𑀧𑀯𑀢𑁆𑀢𑀢𑀺 𑀇𑀲𑁆𑀲𑀭𑀺𑀬𑀁 𑀯𑀸, 𑀢𑀢𑁆𑀣 𑀫𑁂 𑀓𑀸𑀭𑀡𑀁 𑀩𑁆𑀭𑀽𑀳𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀬𑁂 𑀓𑁂𑀘𑀺 𑀧𑀣𑀯𑀺𑀦𑀺𑀲𑁆𑀲𑀺𑀢𑀸 𑀲𑀢𑁆𑀢𑀸, 𑀲𑀩𑁆𑀩𑁂 𑀢𑁂 𑀧𑀣𑀯𑀺𑀁 𑀦𑀺𑀲𑁆𑀲𑀸𑀬 𑀘𑀭𑀦𑁆𑀢𑀺 𑀯𑀺𑀳𑀭𑀦𑁆𑀢𑀺 𑀯𑀼𑀢𑁆𑀢𑀺𑀁 𑀓𑀧𑁆𑀧𑁂𑀦𑁆𑀢𑀺, 𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀢𑁂𑀲𑀁 𑀧𑀣𑀯𑀺𑀬𑀸 𑀆𑀡𑀸 𑀧𑀯𑀢𑁆𑀢𑀢𑀺 𑀇𑀲𑁆𑀲𑀭𑀺𑀬𑀁 𑀯𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀭𑀳𑀢𑁄 𑀘𑀺𑀢𑁆𑀢𑀁 𑀓𑀸𑀬𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑀺, 𑀦 𑀘 𑀅𑀭𑀳𑀢𑁄 𑀓𑀸𑀬𑁂 𑀆𑀡𑀸 𑀧𑀯𑀢𑁆𑀢𑀢𑀺 𑀇𑀲𑁆𑀲𑀭𑀺𑀬𑀁 𑀯𑀸’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑁂𑀦 𑀓𑀸𑀭𑀡𑁂𑀦 𑀧𑀼𑀣𑀼𑀚𑁆𑀚𑀦𑁄 𑀓𑀸𑀬𑀺𑀓𑀫𑁆𑀧𑀺 𑀘𑁂𑀢𑀲𑀺𑀓𑀫𑁆𑀧𑀺 𑀯𑁂𑀤𑀦𑀁 𑀯𑁂𑀤𑀬𑀢𑀻’’𑀢𑀺? ‘‘𑀅𑀪𑀸𑀯𑀺𑀢𑀢𑁆𑀢𑀸, 𑀫𑀳𑀸𑀭𑀸𑀚, 𑀘𑀺𑀢𑁆𑀢𑀲𑁆𑀲 𑀧𑀼𑀣𑀼𑀚𑁆𑀚𑀦𑁄 𑀓𑀸𑀬𑀺𑀓𑀫𑁆𑀧𑀺 𑀘𑁂𑀢𑀲𑀺𑀓𑀫𑁆𑀧𑀺 𑀯𑁂𑀤𑀦𑀁 𑀯𑁂𑀤𑀬𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀕𑁄𑀡𑁄 𑀙𑀸𑀢𑁄 𑀧𑀭𑀺𑀢𑀲𑀺𑀢𑁄 𑀅𑀩𑀮𑀤𑀼𑀩𑁆𑀩𑀮𑀧𑀭𑀺𑀢𑁆𑀢𑀓𑀢𑀺𑀡𑁂𑀲𑀼 𑀯𑀸 𑀮𑀢𑀸𑀬 𑀯𑀸 𑀉𑀧𑀦𑀺𑀩𑀤𑁆𑀥𑁄 𑀅𑀲𑁆𑀲, 𑀬𑀤𑀸 𑀲𑁄 𑀕𑁄𑀡𑁄 𑀧𑀭𑀺𑀓𑀼𑀧𑀺𑀢𑁄 𑀳𑁄𑀢𑀺, 𑀢𑀤𑀸 𑀲𑀳 𑀉𑀧𑀦𑀺𑀩𑀦𑁆𑀥𑀦𑁂𑀦 𑀧𑀓𑁆𑀓𑀫𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀪𑀸𑀯𑀺𑀢𑀘𑀺𑀢𑁆𑀢𑀲𑁆𑀲 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀘𑀺𑀢𑁆𑀢𑀁 𑀧𑀭𑀺𑀓𑁄𑀧𑁂𑀢𑀺, 𑀘𑀺𑀢𑁆𑀢𑀁 𑀧𑀭𑀺𑀓𑀼𑀧𑀺𑀢𑀁 𑀓𑀸𑀬𑀁 𑀆𑀪𑀼𑀚𑀢𑀺 𑀦𑀺𑀩𑁆𑀪𑀼𑀚𑀢𑀺 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀓𑀭𑁄𑀢𑀺. 𑀅𑀣 𑀔𑁄 𑀲𑁄 𑀅𑀪𑀸𑀯𑀺𑀢𑀘𑀺𑀢𑁆𑀢𑁄 𑀢𑀲𑀢𑀺 𑀭𑀯𑀢𑀺 𑀪𑁂𑀭𑀯𑀭𑀸𑀯𑀫𑀪𑀺𑀭𑀯𑀢𑀺, 𑀇𑀤𑀫𑁂𑀢𑁆𑀣, 𑀫𑀳𑀸𑀭𑀸𑀚, 𑀓𑀸𑀭𑀡𑀁, 𑀬𑁂𑀦 𑀓𑀸𑀭𑀡𑁂𑀦 𑀧𑀼𑀣𑀼𑀚𑁆𑀚𑀦𑁄 𑀓𑀸𑀬𑀺𑀓𑀫𑁆𑀧𑀺 𑀘𑁂𑀢𑀲𑀺𑀓𑀫𑁆𑀧𑀺 𑀯𑁂𑀤𑀦𑀁 𑀯𑁂𑀤𑀬𑀢𑀻’’𑀢𑀺.

‘‘𑀓𑀺𑀁 𑀧𑀦 𑀢𑀁 𑀓𑀸𑀭𑀡𑀁, 𑀬𑁂𑀦 𑀓𑀸𑀭𑀡𑁂𑀦 𑀅𑀭𑀳𑀸 𑀏𑀓𑀁 𑀯𑁂𑀤𑀦𑀁 𑀯𑁂𑀤𑀬𑀢𑀺 𑀓𑀸𑀬𑀺𑀓𑀁, 𑀦 𑀘𑁂𑀢𑀲𑀺𑀓’’𑀦𑁆𑀢𑀺? ‘‘𑀅𑀭𑀳𑀢𑁄, 𑀫𑀳𑀸𑀭𑀸𑀚, 𑀘𑀺𑀢𑁆𑀢𑀁 𑀪𑀸𑀯𑀺𑀢𑀁 𑀳𑁄𑀢𑀺 𑀲𑀼𑀪𑀸𑀯𑀺𑀢𑀁 𑀤𑀦𑁆𑀢𑀁 𑀲𑀼𑀤𑀦𑁆𑀢𑀁 𑀅𑀲𑁆𑀲𑀯𑀁 𑀯𑀘𑀦𑀓𑀭𑀁, 𑀲𑁄 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀨𑀼𑀝𑁆𑀞𑁄 𑀲𑀫𑀸𑀦𑁄 ‘𑀅𑀦𑀺𑀘𑁆𑀘’𑀦𑁆𑀢𑀺 𑀤𑀴𑁆𑀳𑀁 𑀕𑀡𑁆𑀳𑀸𑀢𑀺, 𑀲𑀫𑀸𑀥𑀺𑀣𑀫𑁆𑀪𑁂 𑀘𑀺𑀢𑁆𑀢𑀁 𑀉𑀧𑀦𑀺𑀩𑀦𑁆𑀥𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀲𑀫𑀸𑀥𑀺𑀣𑀫𑁆𑀪𑁂 𑀉𑀧𑀦𑀺𑀩𑀦𑁆𑀥𑀦𑀁 𑀦 𑀯𑁂𑀥𑀢𑀺 𑀦 𑀘𑀮𑀢𑀺, 𑀞𑀺𑀢𑀁 𑀳𑁄𑀢𑀺 𑀅𑀯𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀲 𑀯𑁂𑀤𑀦𑀸𑀯𑀺𑀓𑀸𑀭𑀯𑀺𑀧𑁆𑀨𑀸𑀭𑁂𑀦 𑀓𑀸𑀬𑁄 𑀆𑀪𑀼𑀚𑀢𑀺 𑀦𑀺𑀩𑁆𑀪𑀼𑀚𑀢𑀺 𑀲𑀫𑁆𑀧𑀭𑀺𑀯𑀢𑁆𑀢𑀢𑀺, 𑀇𑀤𑀫𑁂𑀢𑁆𑀣, 𑀫𑀳𑀸𑀭𑀸𑀚, 𑀓𑀸𑀭𑀡𑀁, 𑀬𑁂𑀦 𑀓𑀸𑀭𑀡𑁂𑀦 𑀅𑀭𑀳𑀸 𑀏𑀓𑀁 𑀯𑁂𑀤𑀦𑀁 𑀯𑁂𑀤𑀬𑀢𑀺 𑀓𑀸𑀬𑀺𑀓𑀁, 𑀦 𑀘𑁂𑀢𑀲𑀺𑀓’’𑀦𑁆𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀁 𑀦𑀸𑀫 𑀮𑁄𑀓𑁂 𑀅𑀘𑁆𑀙𑀭𑀺𑀬𑀁 𑀬𑀁 𑀓𑀸𑀬𑁂 𑀘𑀮𑀫𑀸𑀦𑁂 𑀘𑀺𑀢𑁆𑀢𑀁 𑀦 𑀘𑀮𑀢𑀺, 𑀢𑀢𑁆𑀣 𑀫𑁂 𑀓𑀸𑀭𑀡𑀁 𑀩𑁆𑀭𑀽𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀫𑀳𑀢𑀺𑀫𑀳𑀸𑀭𑀼𑀓𑁆𑀔𑁂 𑀔𑀦𑁆𑀥𑀲𑀸𑀔𑀸𑀧𑀮𑀸𑀲𑀲𑀫𑁆𑀧𑀦𑁆𑀦𑁂 𑀅𑀦𑀺𑀮𑀩𑀮𑀲𑀫𑀸𑀳𑀢𑁂 𑀲𑀸𑀔𑀸 𑀘𑀮𑀢𑀺, 𑀅𑀧𑀺 𑀦𑀼 𑀢𑀲𑁆𑀲 𑀔𑀦𑁆𑀥𑁄𑀧𑀺 𑀘𑀮𑀢𑀻’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀭𑀳𑀸 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀨𑀼𑀝𑁆𑀞𑁄 𑀲𑀫𑀸𑀦𑁄 ‘𑀅𑀦𑀺𑀘𑁆𑀘’𑀦𑁆𑀢𑀺 𑀤𑀴𑁆𑀳𑀁 𑀕𑀡𑁆𑀳𑀸𑀢𑀺, 𑀲𑀫𑀸𑀥𑀺𑀣𑀫𑁆𑀪𑁂 𑀘𑀺𑀢𑁆𑀢𑀁 𑀉𑀧𑀦𑀺𑀩𑀦𑁆𑀥𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀲𑀫𑀸𑀥𑀺𑀣𑀫𑁆𑀪𑁂 𑀉𑀧𑀦𑀺𑀩𑀦𑁆𑀥𑀦𑀁 𑀦 𑀯𑁂𑀥𑀢𑀺 𑀦 𑀘𑀮𑀢𑀺, 𑀞𑀺𑀢𑀁 𑀳𑁄𑀢𑀺 𑀅𑀯𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀲 𑀯𑁂𑀤𑀦𑀸𑀯𑀺𑀓𑀸𑀭𑀯𑀺𑀧𑁆𑀨𑀸𑀭𑁂𑀦 𑀓𑀸𑀬𑁄 𑀆𑀪𑀼𑀚𑀢𑀺 𑀦𑀺𑀩𑁆𑀪𑀼𑀚𑀢𑀺 𑀲𑀫𑁆𑀧𑀭𑀺𑀯𑀢𑁆𑀢𑀢𑀺, 𑀘𑀺𑀢𑁆𑀢𑀁 𑀧𑀦 𑀢𑀲𑁆𑀲 𑀦 𑀯𑁂𑀥𑀢𑀺 𑀦 𑀘𑀮𑀢𑀺 𑀔𑀦𑁆𑀥𑁄 𑀯𑀺𑀬 𑀫𑀳𑀸𑀭𑀼𑀓𑁆𑀔𑀲𑁆𑀲𑀸’’𑀢𑀺. ‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀦 𑀫𑁂 𑀏𑀯𑀭𑀽𑀧𑁄 𑀲𑀩𑁆𑀩𑀓𑀸𑀮𑀺𑀓𑁄 𑀥𑀫𑁆𑀫𑀧𑀤𑀻𑀧𑁄 𑀤𑀺𑀝𑁆𑀞𑀧𑀼𑀩𑁆𑀩𑁄’’𑀢𑀺.

𑀅𑀭𑀳𑀦𑁆𑀢𑀯𑁂𑀤𑀦𑀸𑀯𑁂𑀤𑀺𑀬𑀦𑀧𑀜𑁆𑀳𑁄 𑀙𑀝𑁆𑀞𑁄.

𑁭. 𑀅𑀪𑀺𑀲𑀫𑀬𑀦𑁆𑀢𑀭𑀸𑀬𑀓𑀭𑀧𑀜𑁆𑀳𑁄

𑁭. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀇𑀥 𑀬𑁄 𑀓𑁄𑀘𑀺 𑀕𑀺𑀳𑀻 𑀧𑀸𑀭𑀸𑀚𑀺𑀓𑀁 𑀅𑀚𑁆𑀛𑀸𑀧𑀦𑁆𑀦𑁄 𑀪𑀯𑁂𑀬𑁆𑀬, 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀧𑀩𑁆𑀩𑀸𑀚𑁂𑀬𑁆𑀬, 𑀅𑀢𑁆𑀢𑀦𑀸𑀧𑀺 𑀲𑁄 𑀦 𑀚𑀸𑀦𑁂𑀬𑁆𑀬 ‘𑀕𑀺𑀳𑀺𑀧𑀸𑀭𑀸𑀚𑀺𑀓𑀁 𑀅𑀚𑁆𑀛𑀸𑀧𑀦𑁆𑀦𑁄𑀲𑁆𑀫𑀻’𑀢𑀺, 𑀦𑀧𑀺 𑀢𑀲𑁆𑀲 𑀅𑀜𑁆𑀜𑁄 𑀓𑁄𑀘𑀺 𑀆𑀘𑀺𑀓𑁆𑀔𑁂𑀬𑁆𑀬 ‘𑀕𑀺𑀳𑀺𑀧𑀸𑀭𑀸𑀚𑀺𑀓𑀁 𑀅𑀚𑁆𑀛𑀸𑀧𑀦𑁆𑀦𑁄𑀲𑀻’𑀢𑀺. 𑀲𑁄 𑀘 𑀢𑀣𑀢𑁆𑀢𑀸𑀬 𑀧𑀝𑀺𑀧𑀚𑁆𑀚𑁂𑀬𑁆𑀬, 𑀅𑀧𑀺 𑀦𑀼 𑀢𑀲𑁆𑀲 𑀥𑀫𑁆𑀫𑀸𑀪𑀺𑀲𑀫𑀬𑁄 𑀪𑀯𑁂𑀬𑁆𑀬𑀸’’𑀢𑀺? ‘‘𑀦 𑀳𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑁂𑀦, 𑀪𑀦𑁆𑀢𑁂, 𑀓𑀸𑀭𑀡𑁂𑀦𑀸’’𑀢𑀺? ‘‘𑀬𑁄 𑀢𑀲𑁆𑀲 𑀳𑁂𑀢𑀼 𑀥𑀫𑁆𑀫𑀸𑀪𑀺𑀲𑀫𑀬𑀸𑀬, 𑀲𑁄 𑀢𑀲𑁆𑀲 𑀲𑀫𑀼𑀘𑁆𑀙𑀺𑀦𑁆𑀦𑁄, 𑀢𑀲𑁆𑀫𑀸 𑀥𑀫𑁆𑀫𑀸𑀪𑀺𑀲𑀫𑀬𑁄 𑀦 𑀪𑀯𑀢𑀻’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀼𑀫𑁆𑀳𑁂 𑀪𑀡𑀣 ‘𑀚𑀸𑀦𑀦𑁆𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀳𑁄𑀢𑀺, 𑀓𑀼𑀓𑁆𑀓𑀼𑀘𑁆𑀘𑁂 𑀲𑀢𑀺 𑀆𑀯𑀭𑀡𑀁 𑀳𑁄𑀢𑀺, 𑀆𑀯𑀝𑁂 𑀘𑀺𑀢𑁆𑀢𑁂 𑀥𑀫𑁆𑀫𑀸𑀪𑀺𑀲𑀫𑀬𑁄 𑀦 𑀳𑁄𑀢𑀻’𑀢𑀺. 𑀇𑀫𑀲𑁆𑀲 𑀧𑀦 𑀅𑀚𑀸𑀦𑀦𑁆𑀢𑀲𑁆𑀲 𑀅𑀓𑀼𑀓𑁆𑀓𑀼𑀘𑁆𑀘𑀚𑀸𑀢𑀲𑁆𑀲 𑀲𑀦𑁆𑀢𑀘𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀓𑁂𑀦 𑀓𑀸𑀭𑀡𑁂𑀦 𑀥𑀫𑁆𑀫𑀸𑀪𑀺𑀲𑀫𑀬𑁄 𑀦 𑀳𑁄𑀢𑀺, 𑀯𑀺𑀲𑀫𑁂𑀦 𑀯𑀺𑀲𑀫𑁂𑀦𑁂𑀲𑁄 𑀧𑀜𑁆𑀳𑁄 𑀕𑀘𑁆𑀙𑀢𑀺, 𑀘𑀺𑀦𑁆𑀢𑁂𑀢𑁆𑀯𑀸 𑀯𑀺𑀲𑀚𑁆𑀚𑁂𑀣𑀸’’𑀢𑀺.

‘‘𑀭𑀼𑀳𑀢𑀺, 𑀫𑀳𑀸𑀭𑀸𑀚, 𑀲𑀼𑀓𑀝𑁆𑀞𑁂 𑀲𑀼𑀓𑀮𑀮𑁂 𑀫𑀡𑁆𑀟𑀔𑁂𑀢𑁆𑀢𑁂 𑀲𑀸𑀭𑀤𑀁 𑀲𑀼𑀔𑀲𑀬𑀺𑀢𑀁 𑀩𑀻𑀚’’𑀦𑁆𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀅𑀧𑀺 𑀦𑀼, 𑀫𑀳𑀸𑀭𑀸𑀚, 𑀢𑀜𑁆𑀜𑁂𑀯 𑀩𑀻𑀚𑀁 𑀖𑀦𑀲𑁂𑀮𑀲𑀺𑀮𑀸𑀢𑀮𑁂 𑀭𑀼𑀳𑁂𑀬𑁆𑀬𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀲𑁆𑀲 𑀧𑀦, 𑀫𑀳𑀸𑀭𑀸𑀚, 𑀢𑀜𑁆𑀜𑁂𑀯 𑀩𑀻𑀚𑀁 𑀓𑀮𑀮𑁂 𑀭𑀼𑀳𑀢𑀺, 𑀓𑀺𑀲𑁆𑀲 𑀖𑀦𑀲𑁂𑀮𑁂 𑀦 𑀭𑀼𑀳𑀢𑀻’’𑀢𑀺? ‘‘𑀦𑀢𑁆𑀣𑀺, 𑀪𑀦𑁆𑀢𑁂, 𑀢𑀲𑁆𑀲 𑀩𑀻𑀚𑀲𑁆𑀲 𑀭𑀼𑀳𑀦𑀸𑀬 𑀖𑀦𑀲𑁂𑀮𑁂 𑀳𑁂𑀢𑀼, 𑀅𑀳𑁂𑀢𑀼𑀦𑀸 𑀩𑀻𑀚𑀁 𑀦 𑀭𑀼𑀳𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂𑀦 𑀳𑁂𑀢𑀼𑀦𑀸 𑀢𑀲𑁆𑀲 𑀥𑀫𑁆𑀫𑀸𑀪𑀺𑀲𑀫𑀬𑁄 𑀪𑀯𑁂𑀬𑁆𑀬, 𑀲𑁄 𑀢𑀲𑁆𑀲 𑀳𑁂𑀢𑀼 𑀲𑀫𑀼𑀘𑁆𑀙𑀺𑀦𑁆𑀦𑁄, 𑀅𑀳𑁂𑀢𑀼𑀦𑀸 𑀥𑀫𑁆𑀫𑀸𑀪𑀺𑀲𑀫𑀬𑁄 𑀦 𑀳𑁄𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀤𑀡𑁆𑀟𑀮𑁂𑀟𑁆𑀟𑀼𑀮𑀕𑀼𑀴𑀫𑀼𑀕𑁆𑀕𑀭𑀸 𑀧𑀣𑀯𑀺𑀬𑀸 𑀞𑀸𑀦𑀫𑀼𑀧𑀕𑀘𑁆𑀙𑀦𑁆𑀢𑀺, 𑀅𑀧𑀺 𑀦𑀼, 𑀫𑀳𑀸𑀭𑀸𑀚, 𑀢𑁂 𑀬𑁂𑀯 𑀤𑀡𑁆𑀟𑀮𑁂𑀟𑁆𑀟𑀼𑀮𑀕𑀼𑀴𑀫𑀼𑀕𑁆𑀕𑀭𑀸 𑀕𑀕𑀦𑁂 𑀞𑀸𑀦𑀫𑀼𑀧𑀕𑀘𑁆𑀙𑀦𑁆𑀢𑀻’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀧𑀦𑁂𑀢𑁆𑀣, 𑀫𑀳𑀸𑀭𑀸𑀚, 𑀓𑀸𑀭𑀡𑀁, 𑀬𑁂𑀦 𑀓𑀸𑀭𑀡𑁂𑀦 𑀢𑁂 𑀬𑁂𑀯 𑀤𑀡𑁆𑀟𑀮𑁂𑀟𑁆𑀟𑀼𑀮𑀕𑀼𑀴𑀫𑀼𑀕𑁆𑀕𑀭𑀸 𑀧𑀣𑀯𑀺𑀬𑀸 𑀞𑀸𑀦𑀫𑀼𑀧𑀕𑀘𑁆𑀙𑀦𑁆𑀢𑀺, 𑀓𑁂𑀦 𑀓𑀸𑀭𑀡𑁂𑀦 𑀕𑀕𑀦𑁂 𑀦 𑀢𑀺𑀝𑁆𑀞𑀦𑁆𑀢𑀻’’𑀢𑀺? ‘‘𑀦𑀢𑁆𑀣𑀺, 𑀪𑀦𑁆𑀢𑁂, 𑀢𑁂𑀲𑀁 𑀤𑀡𑁆𑀟𑀮𑁂𑀟𑁆𑀟𑀼𑀮𑀕𑀼𑀴𑀫𑀼𑀕𑁆𑀕𑀭𑀸𑀦𑀁 𑀧𑀢𑀺𑀝𑁆𑀞𑀸𑀦𑀸𑀬 𑀆𑀓𑀸𑀲𑁂 𑀳𑁂𑀢𑀼, 𑀅𑀳𑁂𑀢𑀼𑀦𑀸 𑀦 𑀢𑀺𑀝𑁆𑀞𑀦𑁆𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀲𑁆𑀲 𑀢𑁂𑀦 𑀤𑁄𑀲𑁂𑀦 𑀅𑀪𑀺𑀲𑀫𑀬𑀳𑁂𑀢𑀼 𑀲𑀫𑀼𑀘𑁆𑀙𑀺𑀦𑁆𑀦𑁄, 𑀳𑁂𑀢𑀼𑀲𑀫𑀼𑀕𑁆𑀖𑀸𑀢𑁂 𑀅𑀳𑁂𑀢𑀼𑀦𑀸 𑀅𑀪𑀺𑀲𑀫𑀬𑁄 𑀦 𑀳𑁄𑀢𑀻𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀣𑀮𑁂 𑀅𑀕𑁆𑀕𑀺 𑀚𑀮𑀢𑀺, 𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀲𑁄 𑀬𑁂𑀯 𑀅𑀕𑁆𑀕𑀺 𑀉𑀤𑀓𑁂 𑀚𑀮𑀢𑀻’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀧𑀦𑁂𑀢𑁆𑀣, 𑀫𑀳𑀸𑀭𑀸𑀚, 𑀓𑀸𑀭𑀡𑀁, 𑀬𑁂𑀦 𑀓𑀸𑀭𑀡𑁂𑀦 𑀲𑁄 𑀬𑁂𑀯 𑀅𑀕𑁆𑀕𑀺 𑀣𑀮𑁂 𑀚𑀮𑀢𑀺, 𑀓𑁂𑀦 𑀓𑀸𑀭𑀡𑁂𑀦 𑀉𑀤𑀓𑁂 𑀦 𑀚𑀮𑀢𑀻’’𑀢𑀺? ‘‘𑀦𑀢𑁆𑀣𑀺, 𑀪𑀦𑁆𑀢𑁂, 𑀅𑀕𑁆𑀕𑀺𑀲𑁆𑀲 𑀚𑀮𑀦𑀸𑀬 𑀉𑀤𑀓𑁂 𑀳𑁂𑀢𑀼, 𑀅𑀳𑁂𑀢𑀼𑀦𑀸 𑀦 𑀚𑀮𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀲𑁆𑀲 𑀢𑁂𑀦 𑀤𑁄𑀲𑁂𑀦 𑀅𑀪𑀺𑀲𑀫𑀬𑀳𑁂𑀢𑀼 𑀲𑀫𑀼𑀘𑁆𑀙𑀺𑀦𑁆𑀦𑁄, 𑀳𑁂𑀢𑀼𑀲𑀫𑀼𑀕𑁆𑀖𑀸𑀢𑁂 𑀅𑀳𑁂𑀢𑀼𑀦𑀸 𑀥𑀫𑁆𑀫𑀸𑀪𑀺𑀲𑀫𑀬𑁄 𑀦 𑀳𑁄𑀢𑀻’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀼𑀦𑀧𑁂𑀢𑀁 𑀅𑀢𑁆𑀣𑀁 𑀘𑀺𑀦𑁆𑀢𑁂𑀳𑀺, 𑀦 𑀫𑁂 𑀢𑀢𑁆𑀣 𑀘𑀺𑀢𑁆𑀢𑀲𑀜𑁆𑀜𑀢𑁆𑀢𑀺 𑀪𑀯𑀢𑀺, 𑀅𑀚𑀸𑀦𑀦𑁆𑀢𑀲𑁆𑀲 𑀅𑀲𑀢𑀺 𑀓𑀼𑀓𑁆𑀓𑀼𑀘𑁆𑀘𑁂 𑀆𑀯𑀭𑀡𑀁 𑀳𑁄𑀢𑀻𑀢𑀺, 𑀓𑀸𑀭𑀡𑁂𑀦 𑀫𑀁 𑀲𑀜𑁆𑀜𑀸𑀧𑁂𑀳𑀻’’𑀢𑀺. ‘‘𑀅𑀧𑀺 𑀦𑀼, 𑀫𑀳𑀸𑀭𑀸𑀚, 𑀯𑀺𑀲𑀁 𑀳𑀮𑀸𑀳𑀮𑀁 𑀅𑀚𑀸𑀦𑀦𑁆𑀢𑁂𑀦 𑀔𑀸𑀬𑀺𑀢𑀁 𑀚𑀻𑀯𑀺𑀢𑀁 𑀳𑀭𑀢𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀚𑀸𑀦𑀦𑁆𑀢𑁂𑀦𑀧𑀺 𑀓𑀢𑀁 𑀧𑀸𑀧𑀁 𑀅𑀪𑀺𑀲𑀫𑀬𑀦𑁆𑀢𑀭𑀸𑀬𑀓𑀭𑀁 𑀳𑁄𑀢𑀺.

‘‘𑀅𑀧𑀺 𑀦𑀼, 𑀫𑀳𑀸𑀭𑀸𑀚, 𑀅𑀕𑁆𑀕𑀺 𑀅𑀚𑀸𑀦𑀺𑀢𑁆𑀯𑀸 𑀅𑀓𑁆𑀓𑀫𑀦𑁆𑀢𑀁 𑀟𑀳𑀢𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀚𑀸𑀦𑀦𑁆𑀢𑁂𑀦𑀧𑀺 𑀓𑀢𑀁 𑀧𑀸𑀧𑀁 𑀅𑀪𑀺𑀲𑀫𑀬𑀦𑁆𑀢𑀭𑀸𑀬𑀓𑀭𑀁 𑀳𑁄𑀢𑀺.

‘‘𑀅𑀧𑀺 𑀦𑀼, 𑀫𑀳𑀸𑀭𑀸𑀚, 𑀅𑀚𑀸𑀦𑀦𑁆𑀢𑀁 𑀆𑀲𑀻𑀯𑀺𑀲𑁄 𑀟𑀁𑀲𑀺𑀢𑁆𑀯𑀸 𑀚𑀻𑀯𑀺𑀢𑀁 𑀳𑀭𑀢𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀚𑀸𑀦𑀦𑁆𑀢𑁂𑀦𑀧𑀺 𑀓𑀢𑀁 𑀧𑀸𑀧𑀁 𑀅𑀪𑀺𑀲𑀫𑀬𑀦𑁆𑀢𑀭𑀸𑀬𑀓𑀭𑀁 𑀳𑁄𑀢𑀺.

‘‘𑀦𑀦𑀼, 𑀫𑀳𑀸𑀭𑀸𑀚, 𑀓𑀸𑀮𑀺𑀗𑁆𑀕𑀭𑀸𑀚𑀸 𑀲𑀫𑀡𑀓𑁄𑀮𑀜𑁆𑀜𑁄 𑀲𑀢𑁆𑀢𑀭𑀢𑀦𑀧𑀭𑀺𑀓𑀺𑀡𑁆𑀡𑁄 𑀳𑀢𑁆𑀣𑀺𑀭𑀢𑀦𑀫𑀪𑀺𑀭𑀼𑀬𑁆𑀳 𑀓𑀼𑀮𑀤𑀲𑁆𑀲𑀦𑀸𑀬 𑀕𑀘𑁆𑀙𑀦𑁆𑀢𑁄 𑀅𑀚𑀸𑀦𑀦𑁆𑀢𑁄𑀧𑀺 𑀦𑀸𑀲𑀓𑁆𑀔𑀺 𑀩𑁄𑀥𑀺𑀫𑀡𑁆𑀟𑀲𑁆𑀲 𑀉𑀧𑀭𑀺𑀢𑁄 𑀕𑀦𑁆𑀢𑀼𑀁, 𑀇𑀤𑀫𑁂𑀢𑁆𑀣, 𑀫𑀳𑀸𑀭𑀸𑀚, 𑀓𑀸𑀭𑀡𑀁, 𑀬𑁂𑀦 𑀓𑀸𑀭𑀡𑁂𑀦 𑀅𑀚𑀸𑀦𑀦𑁆𑀢𑁂𑀦𑀧𑀺 𑀓𑀢𑀁 𑀧𑀸𑀧𑀁 𑀅𑀪𑀺𑀲𑀫𑀬𑀦𑁆𑀢𑀭𑀸𑀬𑀓𑀭𑀁 𑀳𑁄𑀢𑀻’’𑀢𑀺? ‘‘𑀚𑀺𑀦𑀪𑀸𑀲𑀺𑀢𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀸𑀭𑀡𑀁 𑀦 𑀲𑀓𑁆𑀓𑀸 𑀧𑀝𑀺𑀓𑁆𑀓𑁄𑀲𑀺𑀢𑀼𑀁, 𑀏𑀲𑁄𑀯𑁂𑀢𑀲𑁆𑀲 𑀅𑀢𑁆𑀣𑁄 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀅𑀪𑀺𑀲𑀫𑀬𑀦𑁆𑀢𑀭𑀸𑀬𑀓𑀭𑀧𑀜𑁆𑀳𑁄 𑀲𑀢𑁆𑀢𑀫𑁄.

𑁮. 𑀤𑀼𑀲𑁆𑀲𑀻𑀮𑀧𑀜𑁆𑀳𑁄

𑁮. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀕𑀺𑀳𑀺𑀤𑀼𑀲𑁆𑀲𑀻𑀮𑀲𑁆𑀲 𑀘 𑀲𑀫𑀡𑀤𑀼𑀲𑁆𑀲𑀻𑀮𑀲𑁆𑀲 𑀘 𑀓𑁄 𑀯𑀺𑀲𑁂𑀲𑁄, 𑀓𑀺𑀁 𑀦𑀸𑀦𑀸𑀓𑀭𑀡𑀁, 𑀉𑀪𑁄𑀧𑁂𑀢𑁂 𑀲𑀫𑀲𑀫𑀕𑀢𑀺𑀓𑀸, 𑀉𑀪𑀺𑀦𑁆𑀦𑀫𑁆𑀧𑀺 𑀲𑀫𑀲𑀫𑁄 𑀯𑀺𑀧𑀸𑀓𑁄 𑀳𑁄𑀢𑀺, 𑀉𑀤𑀸𑀳𑀼 𑀓𑀺𑀜𑁆𑀘𑀺 𑀦𑀸𑀦𑀸𑀓𑀸𑀭𑀡𑀁 𑀅𑀢𑁆𑀣𑀻’’𑀢𑀺?

‘‘𑀤𑀲 𑀬𑀺𑀫𑁂, 𑀫𑀳𑀸𑀭𑀸𑀚, 𑀕𑀼𑀡𑀸 𑀲𑀫𑀡𑀤𑀼𑀲𑁆𑀲𑀻𑀮𑀲𑁆𑀲 𑀕𑀺𑀳𑀺𑀤𑀼𑀲𑁆𑀲𑀻𑀮𑀢𑁄 𑀯𑀺𑀲𑁂𑀲𑁂𑀦 𑀅𑀢𑀺𑀭𑁂𑀓𑀸, 𑀤𑀲𑀳𑀺 𑀘 𑀓𑀸𑀭𑀡𑁂𑀳𑀺 𑀉𑀢𑁆𑀢𑀭𑀺𑀁 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀺.

‘‘𑀓𑀢𑀫𑁂 𑀤𑀲 𑀕𑀼𑀡𑀸 𑀲𑀫𑀡𑀤𑀼𑀲𑁆𑀲𑀻𑀮𑀲𑁆𑀲 𑀕𑀺𑀳𑀺𑀤𑀼𑀲𑁆𑀲𑀻𑀮𑀢𑁄 𑀯𑀺𑀲𑁂𑀲𑁂𑀦 𑀅𑀢𑀺𑀭𑁂𑀓𑀸? 𑀇𑀥, 𑀫𑀳𑀸𑀭𑀸𑀚, 𑀲𑀫𑀡𑀤𑀼𑀲𑁆𑀲𑀻𑀮𑁄 𑀩𑀼𑀤𑁆𑀥𑁂 𑀲𑀕𑀸𑀭𑀯𑁄 𑀳𑁄𑀢𑀺, 𑀥𑀫𑁆𑀫𑁂 𑀲𑀕𑀸𑀭𑀯𑁄 𑀳𑁄𑀢𑀺, 𑀲𑀗𑁆𑀖𑁂 𑀲𑀕𑀸𑀭𑀯𑁄 𑀳𑁄𑀢𑀺, 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀲𑀕𑀸𑀭𑀯𑁄 𑀳𑁄𑀢𑀺, 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀬 𑀯𑀸𑀬𑀫𑀢𑀺, 𑀲𑀯𑀦𑀩𑀳𑀼𑀮𑁄 𑀳𑁄𑀢𑀺, 𑀪𑀺𑀦𑁆𑀦𑀲𑀻𑀮𑁄𑀧𑀺, 𑀫𑀳𑀸𑀭𑀸𑀚, 𑀤𑀼𑀲𑁆𑀲𑀻𑀮𑁄 𑀧𑀭𑀺𑀲𑀕𑀢𑁄 𑀆𑀓𑀧𑁆𑀧𑀁 𑀉𑀧𑀝𑁆𑀞𑀧𑁂𑀢𑀺, 𑀕𑀭𑀳𑀪𑀬𑀸 𑀓𑀸𑀬𑀺𑀓𑀁 𑀯𑀸𑀘𑀲𑀺𑀓𑀁 𑀭𑀓𑁆𑀔𑀢𑀺, 𑀧𑀥𑀸𑀦𑀸𑀪𑀺𑀫𑀼𑀔𑀜𑁆𑀘𑀲𑁆𑀲 𑀳𑁄𑀢𑀺 𑀘𑀺𑀢𑁆𑀢𑀁, 𑀪𑀺𑀓𑁆𑀔𑀼𑀲𑀸𑀫𑀜𑁆𑀜𑀁 𑀉𑀧𑀕𑀢𑁄 𑀳𑁄𑀢𑀺. 𑀓𑀭𑁄𑀦𑁆𑀢𑁄𑀧𑀺, 𑀫𑀳𑀸𑀭𑀸𑀚, 𑀲𑀫𑀡𑀤𑀼𑀲𑁆𑀲𑀻𑀮𑁄 𑀧𑀸𑀧𑀁 𑀧𑀝𑀺𑀘𑁆𑀙𑀦𑁆𑀦𑀁 𑀆𑀘𑀭𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀇𑀢𑁆𑀣𑀻 𑀲𑀧𑀢𑀺𑀓𑀸 𑀦𑀺𑀮𑀻𑀬𑀺𑀢𑁆𑀯𑀸 𑀭𑀳𑀲𑁆𑀲𑁂𑀦𑁂𑀯 𑀧𑀸𑀧𑀫𑀸𑀘𑀭𑀢𑀺; 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀓𑀭𑁄𑀦𑁆𑀢𑁄𑀧𑀺 𑀲𑀫𑀡𑀤𑀼𑀲𑁆𑀲𑀻𑀮𑁄 𑀧𑀸𑀧𑀁 𑀧𑀝𑀺𑀘𑁆𑀙𑀦𑁆𑀦𑀁 𑀆𑀘𑀭𑀢𑀺. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀤𑀲 𑀕𑀼𑀡𑀸 𑀲𑀫𑀡𑀤𑀼𑀲𑁆𑀲𑀻𑀮𑀲𑁆𑀲 𑀕𑀺𑀳𑀺𑀤𑀼𑀲𑁆𑀲𑀻𑀮𑀢𑁄 𑀯𑀺𑀲𑁂𑀲𑁂𑀦 𑀅𑀢𑀺𑀭𑁂𑀓𑀸.

‘‘𑀓𑀢𑀫𑁂𑀳𑀺 𑀤𑀲𑀳𑀺 𑀓𑀸𑀭𑀡𑁂𑀳𑀺 𑀉𑀢𑁆𑀢𑀭𑀺𑀁 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀺? 𑀅𑀦𑀯𑀚𑁆𑀚𑀓𑀯𑀘𑀥𑀸𑀭𑀡𑀢𑀸𑀬𑀧𑀺 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀺, 𑀇𑀲𑀺𑀲𑀸𑀫𑀜𑁆𑀜𑀪𑀡𑁆𑀟𑀼𑀮𑀺𑀗𑁆𑀕𑀥𑀸𑀭𑀡𑀢𑁄𑀧𑀺 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀺, 𑀲𑀗𑁆𑀖𑀲𑀫𑀬𑀫𑀦𑀼𑀧𑁆𑀧𑀯𑀺𑀝𑁆𑀞𑀢𑀸𑀬𑀧𑀺 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀺, 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀲𑀭𑀡𑀕𑀢𑀢𑀸𑀬𑀧𑀺 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀺, 𑀧𑀥𑀸𑀦𑀸𑀲𑀬𑀦𑀺𑀓𑁂𑀢𑀯𑀸𑀲𑀺𑀢𑀸𑀬𑀧𑀺 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀺, 𑀚𑀺𑀦𑀲𑀸𑀲𑀦𑀥𑀭 [𑀚𑀺𑀦𑀲𑀸𑀲𑀦𑀥𑀦 (𑀲𑀻. 𑀧𑀻.)] 𑀧𑀭𑀺𑀬𑁂𑀲𑀦𑀢𑁄𑀧𑀺 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀺, 𑀧𑀯𑀭𑀥𑀫𑁆𑀫𑀤𑁂𑀲𑀦𑀢𑁄𑀧𑀺 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀺, 𑀥𑀫𑁆𑀫𑀤𑀻𑀧𑀕𑀢𑀺𑀧𑀭𑀸𑀬𑀡𑀢𑀸𑀬𑀧𑀺 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀺, ‘𑀅𑀕𑁆𑀕𑁄 𑀩𑀼𑀤𑁆𑀥𑁄’𑀢𑀺 𑀏𑀓𑀦𑁆𑀢𑀉𑀚𑀼𑀤𑀺𑀝𑁆𑀞𑀺𑀢𑀸𑀬𑀧𑀺 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀺, 𑀉𑀧𑁄𑀲𑀣𑀲𑀫𑀸𑀤𑀸𑀦𑀢𑁄𑀧𑀺 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀺. 𑀇𑀫𑁂𑀳𑀺 𑀔𑁄, 𑀫𑀳𑀸𑀭𑀸𑀚, 𑀤𑀲𑀳𑀺 𑀓𑀸𑀭𑀡𑁂𑀳𑀺 𑀉𑀢𑁆𑀢𑀭𑀺𑀁 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀺.

‘‘𑀲𑀼𑀯𑀺𑀧𑀦𑁆𑀦𑁄𑀧𑀺 𑀳𑀺, 𑀫𑀳𑀸𑀭𑀸𑀚, 𑀲𑀫𑀡𑀤𑀼𑀲𑁆𑀲𑀻𑀮𑁄 𑀤𑀸𑀬𑀓𑀸𑀦𑀁 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀉𑀤𑀓𑀁 𑀲𑀼𑀩𑀳𑀮𑀫𑁆𑀧𑀺 𑀓𑀮𑀮𑀓𑀤𑁆𑀤𑀫𑀭𑀚𑁄𑀚𑀮𑁆𑀮𑀁 𑀅𑀧𑀦𑁂𑀢𑀺; 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀼𑀯𑀺𑀧𑀦𑁆𑀦𑁄𑀧𑀺 𑀲𑀫𑀡𑀤𑀼𑀲𑁆𑀲𑀻𑀮𑁄 𑀤𑀸𑀬𑀓𑀸𑀦𑀁 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀉𑀡𑁆𑀳𑁄𑀤𑀓𑀁 𑀲𑀼𑀓𑀼𑀥𑀺𑀢𑀫𑁆𑀧𑀺 [𑀲𑀼𑀓𑀞𑀺𑀢𑀫𑁆𑀧𑀺 (𑀲𑀻. 𑀧𑀻), 𑀲𑀼𑀔𑀼𑀞𑀺𑀢𑀫𑁆𑀧𑀺 (𑀲𑁆𑀬𑀸.)] 𑀚𑁆𑀚𑀮𑀦𑁆𑀢𑀁 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀸𑀧𑁂𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀼𑀯𑀺𑀧𑀦𑁆𑀦𑁄𑀧𑀺 𑀲𑀫𑀡𑀤𑀼𑀲𑁆𑀲𑀻𑀮𑁄 𑀤𑀸𑀬𑀓𑀸𑀦𑀁 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀪𑁄𑀚𑀦𑀁 𑀯𑀺𑀭𑀲𑀫𑁆𑀧𑀺 𑀔𑀼𑀤𑀸𑀤𑀼𑀩𑁆𑀩𑀮𑁆𑀬𑀁 𑀅𑀧𑀦𑁂𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀼𑀯𑀺𑀧𑀦𑁆𑀦𑁄𑀧𑀺 𑀲𑀫𑀡𑀤𑀼𑀲𑁆𑀲𑀻𑀮𑁄 𑀤𑀸𑀬𑀓𑀸𑀦𑀁 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁂𑀦 𑀤𑁂𑀯𑀸𑀢𑀺𑀤𑁂𑀯𑁂𑀦 𑀫𑀚𑁆𑀛𑀺𑀫𑀦𑀺𑀓𑀸𑀬𑀯𑀭𑀮𑀜𑁆𑀙𑀓𑁂 𑀤𑀓𑁆𑀔𑀺𑀡𑀯𑀺𑀪𑀗𑁆𑀕𑁂 𑀯𑁂𑀬𑁆𑀬𑀸𑀓𑀭𑀡𑁂 𑁋

‘‘‘𑀬𑁄 𑀲𑀻𑀮𑀯𑀸 𑀤𑀼𑀲𑁆𑀲𑀻𑀮𑁂𑀲𑀼 𑀤𑀤𑀸𑀢𑀺 𑀤𑀸𑀦𑀁, 𑀥𑀫𑁆𑀫𑁂𑀦 𑀮𑀤𑁆𑀥𑀁 𑀲𑀼𑀧𑀲𑀦𑁆𑀦𑀘𑀺𑀢𑁆𑀢𑁄;

𑀅𑀪𑀺𑀲𑀤𑁆𑀤𑀳𑀁 𑀓𑀫𑁆𑀫𑀨𑀮𑀁 𑀉𑀴𑀸𑀭𑀁, 𑀲𑀸 𑀤𑀓𑁆𑀔𑀺𑀡𑀸 𑀤𑀸𑀬𑀓𑀢𑁄 𑀯𑀺𑀲𑀼𑀚𑁆𑀛𑀢𑀻’’’𑀢𑀺 [𑀫. 𑀦𑀺. 𑁩.𑁩𑁮𑁨].

‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀸𑀯𑀢𑀓𑀁 𑀫𑀬𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺𑀫𑁆𑀳, 𑀢𑀁 𑀢𑁆𑀯𑀁 𑀑𑀧𑀫𑁆𑀫𑁂𑀳𑀺 𑀓𑀸𑀭𑀡𑁂𑀳𑀺 𑀯𑀺𑀪𑀸𑀯𑁂𑀦𑁆𑀢𑁄 𑀅𑀫𑀢𑀫𑀥𑀼𑀭𑀁 𑀲𑀯𑀦𑀽𑀧𑀕𑀁 𑀅𑀓𑀸𑀲𑀺. 𑀬𑀣𑀸 𑀦𑀸𑀫, 𑀪𑀦𑁆𑀢𑁂, 𑀲𑀽𑀤𑁄 𑀯𑀸 𑀲𑀽𑀤𑀦𑁆𑀢𑁂𑀯𑀸𑀲𑀻 𑀯𑀸 𑀢𑀸𑀯𑀢𑀓𑀁 𑀫𑀁𑀲𑀁 𑀮𑀪𑀺𑀢𑁆𑀯𑀸 𑀦𑀸𑀦𑀸𑀯𑀺𑀥𑁂𑀳𑀺 𑀲𑀫𑁆𑀪𑀸𑀭𑁂𑀳𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀭𑀸𑀚𑀽𑀧𑀪𑁄𑀕𑀁 𑀓𑀭𑁄𑀢𑀺; 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀸𑀯𑀢𑀓𑀁 𑀫𑀬𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺𑀫𑁆𑀳, 𑀢𑀁 𑀢𑁆𑀯𑀁 𑀑𑀧𑀫𑁆𑀫𑁂𑀳𑀺 𑀓𑀸𑀭𑀡𑁂𑀳𑀺 𑀯𑀺𑀪𑀸𑀯𑁂𑀢𑁆𑀯𑀸 𑀅𑀫𑀢𑀫𑀥𑀼𑀭𑀁 𑀲𑀯𑀦𑀽𑀧𑀕𑀁 𑀅𑀓𑀸𑀲𑀻’’𑀢𑀺.

𑀤𑀼𑀲𑁆𑀲𑀻𑀮𑀧𑀜𑁆𑀳𑁄 𑀅𑀝𑁆𑀞𑀫𑁄.

𑁯. 𑀉𑀤𑀓𑀲𑀢𑁆𑀢𑀚𑀻𑀯𑀧𑀜𑁆𑀳𑁄

𑁯. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀇𑀫𑀁 𑀉𑀤𑀓𑀁 𑀅𑀕𑁆𑀕𑀺𑀫𑁆𑀳𑀺 𑀢𑀧𑁆𑀧𑀫𑀸𑀦𑀁 𑀘𑀺𑀘𑁆𑀘𑀺𑀝𑀸𑀬𑀢𑀺 𑀘𑀺𑀝𑀺𑀘𑀺𑀝𑀸𑀬𑀢𑀺 𑀲𑀤𑁆𑀤𑀸𑀬𑀢𑀺 𑀩𑀳𑀼𑀯𑀺𑀥𑀁, 𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀉𑀤𑀓𑀁 𑀚𑀻𑀯𑀢𑀺, 𑀓𑀺𑀁 𑀓𑀻𑀴𑀫𑀸𑀦𑀁 𑀲𑀤𑁆𑀤𑀸𑀬𑀢𑀺, 𑀉𑀤𑀸𑀳𑀼 𑀅𑀜𑁆𑀜𑁂𑀦 𑀧𑀝𑀺𑀧𑀻𑀴𑀺𑀢𑀁 𑀲𑀤𑁆𑀤𑀸𑀬𑀢𑀻’’𑀢𑀺? ‘‘𑀦 𑀳𑀺, 𑀫𑀳𑀸𑀭𑀸𑀚, 𑀉𑀤𑀓𑀁 𑀚𑀻𑀯𑀢𑀺, 𑀦𑀢𑁆𑀣𑀺 𑀉𑀤𑀓𑁂 𑀚𑀻𑀯𑁄 𑀯𑀸 𑀲𑀢𑁆𑀢𑁄 𑀯𑀸, 𑀅𑀧𑀺 𑀘, 𑀫𑀳𑀸𑀭𑀸𑀚, 𑀅𑀕𑁆𑀕𑀺𑀲𑀦𑁆𑀢𑀸𑀧𑀯𑁂𑀕𑀲𑁆𑀲 𑀫𑀳𑀦𑁆𑀢𑀢𑀸𑀬 𑀉𑀤𑀓𑀁 𑀘𑀺𑀘𑁆𑀘𑀺𑀝𑀸𑀬𑀢𑀺 𑀘𑀺𑀝𑀺𑀘𑀺𑀝𑀸𑀬𑀢𑀺 𑀲𑀤𑁆𑀤𑀸𑀬𑀢𑀺 𑀩𑀳𑀼𑀯𑀺𑀥’’𑀦𑁆𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀇𑀥𑁂𑀓𑀘𑁆𑀘𑁂 𑀢𑀺𑀢𑁆𑀣𑀺𑀬𑀸 𑀉𑀤𑀓𑀁 𑀚𑀻𑀯𑀢𑀻𑀢𑀺 𑀲𑀻𑀢𑁄𑀤𑀓𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀤𑀓𑀁 𑀢𑀸𑀧𑁂𑀢𑁆𑀯𑀸 𑀯𑁂𑀓𑀢𑀺𑀓𑀯𑁂𑀓𑀢𑀺𑀓𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀢𑁂 𑀢𑀼𑀫𑁆𑀳𑁂 𑀕𑀭𑀳𑀦𑁆𑀢𑀺 𑀧𑀭𑀺𑀪𑀯𑀦𑁆𑀢𑀺 ‘𑀏𑀓𑀺𑀦𑁆𑀤𑁆𑀭𑀺𑀬𑀁 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀚𑀻𑀯𑀁 𑀯𑀺𑀳𑁂𑀞𑁂𑀦𑁆𑀢𑀻’𑀢𑀺, 𑀢𑀁 𑀢𑁂𑀲𑀁 𑀕𑀭𑀳𑀁 𑀧𑀭𑀺𑀪𑀯𑀁 𑀯𑀺𑀦𑁄𑀤𑁂𑀳𑀺 𑀅𑀧𑀦𑁂𑀳𑀺 𑀦𑀺𑀘𑁆𑀙𑀸𑀭𑁂𑀳𑀻’’𑀢𑀺. ‘‘𑀦 𑀳𑀺, 𑀫𑀳𑀸𑀭𑀸𑀚, 𑀉𑀤𑀓𑀁 𑀚𑀻𑀯𑀢𑀺, 𑀦𑀢𑁆𑀣𑀺, 𑀫𑀳𑀸𑀭𑀸𑀚, 𑀉𑀤𑀓𑁂 𑀚𑀻𑀯𑁄 𑀯𑀸 𑀲𑀢𑁆𑀢𑁄 𑀯𑀸, 𑀅𑀧𑀺 𑀘, 𑀫𑀳𑀸𑀭𑀸𑀚, 𑀅𑀕𑁆𑀕𑀺𑀲𑀦𑁆𑀢𑀸𑀧𑀯𑁂𑀕𑀲𑁆𑀲 𑀫𑀳𑀦𑁆𑀢𑀢𑀸𑀬 𑀉𑀤𑀓𑀁 𑀘𑀺𑀘𑁆𑀘𑀺𑀝𑀸𑀬𑀢𑀺 𑀘𑀺𑀝𑀺𑀘𑀺𑀝𑀸𑀬𑀢𑀺 𑀲𑀤𑁆𑀤𑀸𑀬𑀢𑀺 𑀩𑀳𑀼𑀯𑀺𑀥𑀁.

‘‘𑀬𑀣𑀸, 𑀫𑀳𑀸𑀭𑀸𑀚, 𑀉𑀤𑀓𑀁 𑀲𑁄𑀩𑁆𑀪𑀲𑀭𑀲𑀭𑀺𑀢𑀤𑀳𑀢𑀴𑀸𑀓𑀓𑀦𑁆𑀤𑀭𑀧𑀤𑀭𑀉𑀤𑀧𑀸𑀦𑀦𑀺𑀦𑁆𑀦𑀧𑁄𑀓𑁆𑀔𑀭𑀡𑀺𑀕𑀢𑀁 𑀯𑀸𑀢𑀸𑀢𑀧𑀯𑁂𑀕𑀲𑁆𑀲 𑀫𑀳𑀦𑁆𑀢𑀢𑀸𑀬 𑀧𑀭𑀺𑀬𑀸𑀤𑀺𑀬𑀢𑀺 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀢𑀺, 𑀅𑀧𑀺 𑀦𑀼 𑀢𑀢𑁆𑀣 𑀉𑀤𑀓𑀁 𑀘𑀺𑀘𑁆𑀘𑀺𑀝𑀸𑀬𑀢𑀺 𑀘𑀺𑀝𑀺𑀘𑀺𑀝𑀸𑀬𑀢𑀺 𑀲𑀤𑁆𑀤𑀸𑀬𑀢𑀺 𑀩𑀳𑀼𑀯𑀺𑀥’’𑀦𑁆𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀬𑀤𑀺, 𑀫𑀳𑀸𑀭𑀸𑀚, 𑀉𑀤𑀓𑀁 𑀚𑀻𑀯𑁂𑀬𑁆𑀬, 𑀢𑀢𑁆𑀣𑀸𑀧𑀺 𑀉𑀤𑀓𑀁 𑀲𑀤𑁆𑀤𑀸𑀬𑁂𑀬𑁆𑀬, 𑀇𑀫𑀺𑀦𑀸𑀧𑀺, 𑀫𑀳𑀸𑀭𑀸𑀚, 𑀓𑀸𑀭𑀡𑁂𑀦 𑀚𑀸𑀦𑀸𑀳𑀺 ‘𑀦𑀢𑁆𑀣𑀺 𑀉𑀤𑀓𑁂 𑀚𑀻𑀯𑁄 𑀯𑀸 𑀲𑀢𑁆𑀢𑁄 𑀯𑀸, 𑀅𑀕𑁆𑀕𑀺𑀲𑀦𑁆𑀢𑀸𑀧𑀯𑁂𑀕𑀲𑁆𑀲 𑀫𑀳𑀦𑁆𑀢𑀢𑀸𑀬 𑀉𑀤𑀓𑀁 𑀘𑀺𑀘𑁆𑀘𑀺𑀝𑀸𑀬𑀢𑀺 𑀘𑀺𑀝𑀺𑀘𑀺𑀝𑀸𑀬𑀢𑀺 𑀲𑀤𑁆𑀤𑀸𑀬𑀢𑀺 𑀩𑀳𑀼𑀯𑀺𑀥’𑀦𑁆𑀢𑀺.

‘‘𑀅𑀧𑀭𑀫𑁆𑀧𑀺, 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀺𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺 ‘𑀦𑀢𑁆𑀣𑀺 𑀉𑀤𑀓𑁂 𑀚𑀻𑀯𑁄 𑀯𑀸 𑀲𑀢𑁆𑀢𑁄 𑀯𑀸, 𑀅𑀕𑁆𑀕𑀺𑀲𑀦𑁆𑀢𑀸𑀧𑀯𑁂𑀕𑀲𑁆𑀲 𑀫𑀳𑀦𑁆𑀢𑀢𑀸𑀬 𑀉𑀤𑀓𑀁 𑀲𑀤𑁆𑀤𑀸𑀬𑀢𑀻’𑀢𑀺. 𑀬𑀤𑀸 𑀧𑀦, 𑀫𑀳𑀸𑀭𑀸𑀚, 𑀉𑀤𑀓𑀁 𑀢𑀡𑁆𑀟𑀼𑀮𑁂𑀳𑀺 𑀲𑀫𑁆𑀫𑀺𑀲𑁆𑀲𑀺𑀢𑀁 𑀪𑀸𑀚𑀦𑀕𑀢𑀁 𑀳𑁄𑀢𑀺 𑀧𑀺𑀳𑀺𑀢𑀁 𑀉𑀤𑁆𑀥𑀦𑁂 𑀅𑀞𑀧𑀺𑀢𑀁, 𑀅𑀧𑀺 𑀦𑀼 𑀢𑀢𑁆𑀣 𑀉𑀤𑀓𑀁 𑀲𑀤𑁆𑀤𑀸𑀬𑀢𑀻’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀅𑀘𑀮𑀁 𑀳𑁄𑀢𑀺 𑀲𑀦𑁆𑀢𑀲𑀦𑁆𑀢’’𑀦𑁆𑀢𑀺. ‘‘𑀢𑀁 𑀬𑁂𑀯 𑀧𑀦, 𑀫𑀳𑀸𑀭𑀸𑀚, 𑀉𑀤𑀓𑀁 𑀪𑀸𑀚𑀦𑀕𑀢𑀁 𑀅𑀕𑁆𑀕𑀺𑀁 𑀉𑀚𑁆𑀚𑀸𑀮𑁂𑀢𑁆𑀯𑀸 𑀉𑀤𑁆𑀥𑀦𑁂 𑀞𑀧𑀺𑀢𑀁 𑀳𑁄𑀢𑀺, 𑀅𑀧𑀺 𑀦𑀼 𑀢𑀢𑁆𑀣 𑀉𑀤𑀓𑀁 𑀅𑀘𑀮𑀁 𑀳𑁄𑀢𑀺 𑀲𑀦𑁆𑀢𑀲𑀦𑁆𑀢’’𑀦𑁆𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀘𑀮𑀢𑀺 𑀔𑀼𑀩𑁆𑀪𑀢𑀺 𑀮𑀼𑀴𑀢𑀺 𑀆𑀯𑀺𑀮𑀢𑀺 𑀊𑀫𑀺𑀚𑀸𑀢𑀁 𑀳𑁄𑀢𑀺, 𑀉𑀤𑁆𑀥𑀫𑀥𑁄 𑀤𑀺𑀲𑀸𑀯𑀺𑀤𑀺𑀲𑀁 𑀕𑀘𑁆𑀙𑀢𑀺, 𑀉𑀢𑁆𑀢𑀭𑀢𑀺 𑀧𑀢𑀭𑀢𑀺 𑀨𑁂𑀡𑀫𑀸𑀮𑀻 𑀳𑁄𑀢𑀻𑀢𑀺. 𑀓𑀺𑀲𑁆𑀲 𑀧𑀦 𑀢𑀁, 𑀫𑀳𑀸𑀭𑀸𑀚, 𑀧𑀸𑀓𑀢𑀺𑀓𑀁 𑀉𑀤𑀓𑀁 𑀦 𑀘𑀮𑀢𑀺 𑀲𑀦𑁆𑀢𑀲𑀦𑁆𑀢𑀁 𑀳𑁄𑀢𑀺, 𑀓𑀺𑀲𑁆𑀲 𑀧𑀦 𑀅𑀕𑁆𑀕𑀺𑀕𑀢𑀁 𑀘𑀮𑀢𑀺 𑀔𑀼𑀩𑁆𑀪𑀢𑀺 𑀮𑀼𑀴𑀢𑀺 𑀆𑀯𑀺𑀮𑀢𑀺 𑀊𑀫𑀺𑀚𑀸𑀢𑀁 𑀳𑁄𑀢𑀺, 𑀉𑀤𑁆𑀥𑀫𑀥𑁄 𑀤𑀺𑀲𑀸𑀯𑀺𑀤𑀺𑀲𑀁 𑀕𑀘𑁆𑀙𑀢𑀺, 𑀉𑀢𑁆𑀢𑀭𑀢𑀺 𑀧𑀢𑀭𑀢𑀺 𑀨𑁂𑀡𑀫𑀸𑀮𑀻 𑀳𑁄𑀢𑀻’’𑀢𑀺? ‘‘𑀧𑀸𑀓𑀢𑀺𑀓𑀁, 𑀪𑀦𑁆𑀢𑁂, 𑀉𑀤𑀓𑀁 𑀦 𑀘𑀮𑀢𑀺, 𑀅𑀕𑁆𑀕𑀺𑀓𑀢𑀁 𑀧𑀦 𑀉𑀤𑀓𑀁 𑀅𑀕𑁆𑀕𑀺𑀲𑀦𑁆𑀢𑀸𑀧𑀯𑁂𑀕𑀲𑁆𑀲 𑀫𑀳𑀦𑁆𑀢𑀢𑀸𑀬 𑀘𑀺𑀘𑁆𑀘𑀺𑀝𑀸𑀬𑀢𑀺 𑀘𑀺𑀝𑀺𑀘𑀺𑀝𑀸𑀬𑀢𑀺 𑀲𑀤𑁆𑀤𑀸𑀬𑀢𑀺 𑀩𑀳𑀼𑀯𑀺𑀥’’𑀦𑁆𑀢𑀺. ‘‘𑀇𑀫𑀺𑀦𑀸𑀧𑀺 𑀫𑀳𑀸𑀭𑀸𑀚, 𑀓𑀸𑀭𑀡𑁂𑀦 𑀚𑀸𑀦𑀸𑀳𑀺 ‘𑀦𑀢𑁆𑀣𑀺 𑀉𑀤𑀓𑁂 𑀚𑀻𑀯𑁄 𑀯𑀸 𑀲𑀢𑁆𑀢𑁄 𑀯𑀸, 𑀅𑀕𑁆𑀕𑀺𑀲𑀦𑁆𑀢𑀸𑀧𑀯𑁂𑀕𑀲𑁆𑀲 𑀫𑀳𑀦𑁆𑀢𑀢𑀸𑀬 𑀉𑀤𑀓𑀁 𑀲𑀤𑁆𑀤𑀸𑀬𑀢𑀻’𑀢𑀺.

‘‘𑀅𑀧𑀭𑀫𑁆𑀧𑀺, 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺, 𑀦𑀢𑁆𑀣𑀺 𑀉𑀤𑀓𑁂 𑀚𑀻𑀯𑁄 𑀯𑀸 𑀲𑀢𑁆𑀢𑁄 𑀯𑀸, 𑀅𑀕𑁆𑀕𑀺𑀲𑀦𑁆𑀢𑀸𑀧𑀯𑁂𑀕𑀲𑁆𑀲 𑀫𑀳𑀦𑁆𑀢𑀢𑀸𑀬 𑀉𑀤𑀓𑀁 𑀲𑀤𑁆𑀤𑀸𑀬𑀢𑀺. 𑀳𑁄𑀢𑀺 𑀢𑀁, 𑀫𑀳𑀸𑀭𑀸𑀚, 𑀉𑀤𑀓𑀁 𑀖𑀭𑁂 𑀖𑀭𑁂 𑀉𑀤𑀓𑀯𑀸𑀭𑀓𑀕𑀢𑀁 𑀧𑀺𑀳𑀺𑀢’’𑀦𑁆𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀅𑀧𑀺 𑀦𑀼 𑀢𑀁, 𑀫𑀳𑀸𑀭𑀸𑀚, 𑀉𑀤𑀓𑀁 𑀘𑀮𑀢𑀺 𑀔𑀼𑀩𑁆𑀪𑀢𑀺 𑀮𑀼𑀴𑀢𑀺 𑀆𑀯𑀺𑀮𑀢𑀺 𑀊𑀫𑀺𑀚𑀸𑀢𑀁 𑀳𑁄𑀢𑀺, 𑀉𑀤𑁆𑀥𑀫𑀥𑁄 𑀤𑀺𑀲𑀸𑀯𑀺𑀤𑀺𑀲𑀁 𑀕𑀘𑁆𑀙𑀢𑀺, 𑀉𑀢𑁆𑀢𑀭𑀢𑀺 𑀧𑀢𑀭𑀢𑀺 𑀨𑁂𑀡𑀫𑀸𑀮𑀻 𑀳𑁄𑀢𑀻’’𑀢𑀺. ‘‘𑀦 𑀳𑀺, 𑀪𑀦𑁆𑀢𑁂, 𑀅𑀘𑀮𑀁 𑀢𑀁 𑀳𑁄𑀢𑀺 𑀧𑀸𑀓𑀢𑀺𑀓𑀁 𑀉𑀤𑀓𑀯𑀸𑀭𑀓𑀕𑀢𑀁 𑀉𑀤𑀓’’𑀦𑁆𑀢𑀺.

‘‘𑀲𑀼𑀢𑀧𑀼𑀩𑁆𑀩𑀁 𑀧𑀦 𑀢𑀬𑀸, 𑀫𑀳𑀸𑀭𑀸𑀚, ‘𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀘𑀮𑀢𑀺 𑀔𑀼𑀩𑁆𑀪𑀢𑀺 𑀮𑀼𑀴𑀢𑀺 𑀆𑀯𑀺𑀮𑀢𑀺 𑀊𑀫𑀺𑀚𑀸𑀢𑀁 𑀳𑁄𑀢𑀺, 𑀉𑀤𑁆𑀥𑀫𑀥𑁄 𑀤𑀺𑀲𑀸𑀯𑀺𑀤𑀺𑀲𑀁 𑀕𑀘𑁆𑀙𑀢𑀺, 𑀉𑀢𑁆𑀢𑀭𑀢𑀺 𑀧𑀢𑀭𑀢𑀺 𑀨𑁂𑀡𑀫𑀸𑀮𑀻 𑀳𑁄𑀢𑀺, 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀑𑀲𑁆𑀲𑀓𑁆𑀓𑀺𑀢𑁆𑀯𑀸 [𑀑𑀲𑁆𑀲𑀓𑁆𑀓𑀺𑀢𑁆𑀯𑀸’’𑀢𑀺 𑀧𑀤𑀁 𑀲𑀻. 𑀧𑀻. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺] 𑀯𑁂𑀮𑀸𑀬 𑀧𑀳𑀭𑀢𑀺 𑀲𑀤𑁆𑀤𑀸𑀬𑀢𑀺 𑀩𑀳𑀼𑀯𑀺𑀥’’’𑀦𑁆𑀢𑀺? ‘‘𑀆𑀫, 𑀪𑀦𑁆𑀢𑁂, 𑀲𑀼𑀢𑀧𑀼𑀩𑁆𑀩𑀁 𑀏𑀢𑀁 𑀫𑀬𑀸 𑀤𑀺𑀝𑁆𑀞𑀧𑀼𑀩𑁆𑀩𑀜𑁆𑀘 ‘𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀳𑀢𑁆𑀣𑀲𑀢𑀫𑁆𑀧𑀺 𑀤𑁆𑀯𑁂𑀧𑀺 𑀳𑀢𑁆𑀣𑀲𑀢𑀸𑀦𑀺 𑀕𑀕𑀦𑁂 𑀉𑀲𑁆𑀲𑀓𑁆𑀓𑀢𑀻’’’𑀢𑀺. ‘‘𑀓𑀺𑀲𑁆𑀲, 𑀫𑀳𑀸𑀭𑀸𑀚, 𑀉𑀤𑀓𑀯𑀸𑀭𑀓𑀕𑀢𑀁 𑀉𑀤𑀓𑀁 𑀦 𑀘𑀮𑀢𑀺 𑀦 𑀲𑀤𑁆𑀤𑀸𑀬𑀢𑀺, 𑀓𑀺𑀲𑁆𑀲 𑀧𑀦 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀘𑀮𑀢𑀺 𑀲𑀤𑁆𑀤𑀸𑀬𑀢𑀻’’𑀢𑀺? ‘‘𑀯𑀸𑀢𑀯𑁂𑀕𑀲𑁆𑀲 𑀫𑀳𑀦𑁆𑀢𑀢𑀸𑀬, 𑀪𑀦𑁆𑀢𑁂, 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀘𑀮𑀢𑀺 𑀲𑀤𑁆𑀤𑀸𑀬𑀢𑀺, 𑀉𑀤𑀓𑀯𑀸𑀭𑀓𑀕𑀢𑀁 𑀉𑀤𑀓𑀁 𑀅𑀖𑀝𑁆𑀝𑀺𑀢𑀁 𑀓𑁂𑀳𑀺𑀘𑀺 𑀦 𑀘𑀮𑀢𑀺 𑀦 𑀲𑀤𑁆𑀤𑀸𑀬𑀢𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀯𑀸𑀢𑀯𑁂𑀕𑀲𑁆𑀲 𑀫𑀳𑀦𑁆𑀢𑀢𑀸𑀬 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀘𑀮𑀢𑀺 𑀲𑀤𑁆𑀤𑀸𑀬𑀢𑀺 𑀏𑀯𑀫𑁂𑀯 𑀅𑀕𑁆𑀕𑀺𑀲𑀦𑁆𑀢𑀸𑀧𑀯𑁂𑀕𑀲𑁆𑀲 𑀫𑀳𑀦𑁆𑀢𑀢𑀸𑀬 𑀉𑀤𑀓𑀁 𑀲𑀤𑁆𑀤𑀸𑀬𑀢𑀻’’𑀢𑀺.

‘‘𑀦𑀦𑀼, 𑀫𑀳𑀸𑀭𑀸𑀚, 𑀪𑁂𑀭𑀺𑀧𑁄𑀓𑁆𑀔𑀭𑀁 𑀲𑀼𑀓𑁆𑀔𑀁 𑀲𑀼𑀓𑁆𑀔𑁂𑀦 𑀕𑁄𑀘𑀫𑁆𑀫𑁂𑀦 𑀑𑀦𑀦𑁆𑀥𑀦𑁆𑀢𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂’’. ‘‘𑀅𑀧𑀺 𑀦𑀼, 𑀫𑀳𑀸𑀭𑀸𑀚, 𑀪𑁂𑀭𑀺𑀬𑀸 𑀚𑀻𑀯𑁄 𑀯𑀸 𑀲𑀢𑁆𑀢𑁄 𑀯𑀸 𑀅𑀢𑁆𑀣𑀻’’𑀢𑀺. ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀲𑁆𑀲 𑀧𑀦, 𑀫𑀳𑀸𑀭𑀸𑀚, 𑀪𑁂𑀭𑀻 𑀲𑀤𑁆𑀤𑀸𑀬𑀢𑀻’’𑀢𑀺? ‘‘𑀇𑀢𑁆𑀣𑀺𑀬𑀸 𑀯𑀸, 𑀪𑀦𑁆𑀢𑁂, 𑀧𑀼𑀭𑀺𑀲𑀲𑁆𑀲 𑀯𑀸 𑀢𑀚𑁆𑀚𑁂𑀦 𑀯𑀸𑀬𑀸𑀫𑁂𑀦𑀸’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀲𑁆𑀲 𑀯𑀸 𑀢𑀚𑁆𑀚𑁂𑀦 𑀯𑀸𑀬𑀸𑀫𑁂𑀦 𑀪𑁂𑀭𑀻 𑀲𑀤𑁆𑀤𑀸𑀬𑀢𑀺, 𑀏𑀯𑀫𑁂𑀯 𑀅𑀕𑁆𑀕𑀺𑀲𑀦𑁆𑀢𑀸𑀧𑀯𑁂𑀕𑀲𑁆𑀲 𑀫𑀳𑀦𑁆𑀢𑀢𑀸𑀬 𑀉𑀤𑀓𑀁 𑀲𑀤𑁆𑀤𑀸𑀬𑀢𑀺. 𑀇𑀫𑀺𑀦𑀸𑀧𑀺, 𑀫𑀳𑀸𑀭𑀸𑀚, 𑀓𑀸𑀭𑀡𑁂𑀦 𑀚𑀸𑀦𑀸𑀳𑀺 ‘𑀦𑀢𑁆𑀣𑀺 𑀉𑀤𑀓𑁂 𑀚𑀻𑀯𑁄 𑀯𑀸 𑀲𑀢𑁆𑀢𑁄 𑀯𑀸, 𑀅𑀕𑁆𑀕𑀺𑀲𑀦𑁆𑀢𑀸𑀧𑀯𑁂𑀕𑀲𑁆𑀲 𑀫𑀳𑀦𑁆𑀢𑀢𑀸𑀬 𑀉𑀤𑀓𑀁 𑀲𑀤𑁆𑀤𑀸𑀬𑀢𑀻’𑀢𑀺.

‘‘𑀫𑀬𑁆𑀳𑀫𑁆𑀧𑀺 𑀢𑀸𑀯, 𑀫𑀳𑀸𑀭𑀸𑀚, 𑀢𑀯 𑀧𑀼𑀘𑁆𑀙𑀺𑀢𑀩𑁆𑀩𑀁 𑀅𑀢𑁆𑀣𑀺, 𑀏𑀯𑀫𑁂𑀲𑁄 𑀧𑀜𑁆𑀳𑁄 𑀲𑀼𑀯𑀺𑀦𑀺𑀘𑁆𑀙𑀺𑀢𑁄 𑀳𑁄𑀢𑀺, 𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀲𑀩𑁆𑀩𑁂𑀳𑀺𑀧𑀺 𑀪𑀸𑀚𑀦𑁂𑀳𑀺 𑀉𑀤𑀓𑀁 𑀢𑀧𑁆𑀧𑀫𑀸𑀦𑀁 𑀲𑀤𑁆𑀤𑀸𑀬𑀢𑀺, 𑀉𑀤𑀸𑀳𑀼 𑀏𑀓𑀘𑁆𑀘𑁂𑀳𑀺 𑀬𑁂𑀯 𑀪𑀸𑀚𑀦𑁂𑀳𑀺 𑀢𑀧𑁆𑀧𑀫𑀸𑀦𑀁 𑀲𑀤𑁆𑀤𑀸𑀬𑀢𑀻’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀲𑀩𑁆𑀩𑁂𑀳𑀺𑀧𑀺 𑀪𑀸𑀚𑀦𑁂𑀳𑀺 𑀉𑀤𑀓𑀁 𑀢𑀧𑁆𑀧𑀫𑀸𑀦𑀁 𑀲𑀤𑁆𑀤𑀸𑀬𑀢𑀺, 𑀏𑀓𑀘𑁆𑀘𑁂𑀳𑀺 𑀬𑁂𑀯 𑀪𑀸𑀚𑀦𑁂𑀳𑀺 𑀉𑀤𑀓𑀁 𑀢𑀧𑁆𑀧𑀫𑀸𑀦𑀁 𑀲𑀤𑁆𑀤𑀸𑀬𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀚𑀳𑀺𑀢𑁄𑀲𑀺 𑀲𑀓𑀲𑀫𑀬𑀁, 𑀧𑀘𑁆𑀘𑀸𑀕𑀢𑁄𑀲𑀺 𑀫𑀫 𑀯𑀺𑀲𑀬𑀁, 𑀦𑀢𑁆𑀣𑀺 𑀉𑀤𑀓𑁂 𑀚𑀻𑀯𑁄 𑀯𑀸 𑀲𑀢𑁆𑀢𑁄 𑀯𑀸. 𑀬𑀤𑀺, 𑀫𑀳𑀸𑀭𑀸𑀚, 𑀲𑀩𑁆𑀩𑁂𑀳𑀺𑀧𑀺 𑀪𑀸𑀚𑀦𑁂𑀳𑀺 𑀉𑀤𑀓𑀁 𑀢𑀧𑁆𑀧𑀫𑀸𑀦𑀁 𑀲𑀤𑁆𑀤𑀸𑀬𑁂𑀬𑁆𑀬, 𑀬𑀼𑀢𑁆𑀢𑀫𑀺𑀤𑀁 ‘𑀉𑀤𑀓𑀁 𑀚𑀻𑀯𑀢𑀻’𑀢𑀺 𑀯𑀢𑁆𑀢𑀼𑀁. 𑀦 𑀳𑀺, 𑀫𑀳𑀸𑀭𑀸𑀚, 𑀉𑀤𑀓𑀁 𑀤𑁆𑀯𑀬𑀁 𑀳𑁄𑀢𑀺, 𑀬𑀁 𑀲𑀤𑁆𑀤𑀸𑀬𑀢𑀺, 𑀢𑀁 𑀚𑀻𑀯𑀢𑀺, 𑀬𑀁 𑀦 𑀲𑀤𑁆𑀤𑀸𑀬𑀢𑀺, 𑀢𑀁 𑀦 𑀚𑀻𑀯𑀢𑀻𑀢𑀺. 𑀬𑀤𑀺, 𑀫𑀳𑀸𑀭𑀸𑀚, 𑀉𑀤𑀓𑀁 𑀚𑀻𑀯𑁂𑀬𑁆𑀬, 𑀫𑀳𑀦𑁆𑀢𑀸𑀦𑀁 𑀳𑀢𑁆𑀣𑀺𑀦𑀸𑀕𑀸𑀦𑀁 𑀉𑀲𑁆𑀲𑀦𑁆𑀦𑀓𑀸𑀬𑀸𑀦𑀁 𑀧𑀪𑀺𑀦𑁆𑀦𑀸𑀦𑀁 𑀲𑁄𑀡𑁆𑀟𑀸𑀬 𑀉𑀲𑁆𑀲𑀺𑀜𑁆𑀘𑀺𑀢𑁆𑀯𑀸 𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀼𑀘𑁆𑀙𑀺𑀁 𑀧𑀯𑁂𑀲𑀬𑀦𑁆𑀢𑀸𑀦𑀁, 𑀢𑀫𑁆𑀧𑀺 𑀉𑀤𑀓𑀁 𑀢𑁂𑀲𑀁 𑀤𑀦𑁆𑀢𑀦𑁆𑀢𑀭𑁂 𑀘𑀺𑀧𑁆𑀧𑀺𑀬𑀫𑀸𑀦𑀁 𑀲𑀤𑁆𑀤𑀸𑀬𑁂𑀬𑁆𑀬. 𑀳𑀢𑁆𑀣𑀲𑀢𑀺𑀓𑀸𑀧𑀺 𑀫𑀳𑀸𑀦𑀸𑀯𑀸 𑀕𑀭𑀼𑀓𑀸 𑀪𑀸𑀭𑀺𑀓𑀸 𑀅𑀦𑁂𑀓𑀲𑀢𑀲𑀳𑀲𑁆𑀲𑀪𑀸𑀭𑀧𑀭𑀺𑀧𑀽𑀭𑀸 𑀫𑀳𑀸𑀲𑀫𑀼𑀤𑁆𑀤𑁂 𑀯𑀺𑀘𑀭𑀦𑁆𑀢𑀺, 𑀢𑀸𑀳𑀺𑀧𑀺 𑀘𑀺𑀧𑁆𑀧𑀺𑀬𑀫𑀸𑀦𑀁 𑀉𑀤𑀓𑀁 𑀲𑀤𑁆𑀤𑀸𑀬𑁂𑀬𑁆𑀬. 𑀫𑀳𑀢𑀺𑀫𑀳𑀦𑁆𑀢𑀸𑀧𑀺 𑀫𑀘𑁆𑀙𑀸 𑀅𑀦𑁂𑀓𑀲𑀢𑀬𑁄𑀚𑀦𑀺𑀓𑀓𑀸𑀬𑀸 𑀢𑀺𑀫𑀻 𑀢𑀺𑀫𑀺𑀗𑁆𑀕𑀮𑀸 𑀢𑀺𑀫𑀺𑀭𑀧𑀺𑀗𑁆𑀕𑀮𑀸 𑀅𑀩𑁆𑀪𑀦𑁆𑀢𑀭𑁂 𑀦𑀺𑀫𑀼𑀕𑁆𑀕𑀸 𑀫𑀳𑀸𑀲𑀫𑀼𑀤𑁆𑀤𑁂 𑀦𑀺𑀯𑀸𑀲𑀝𑁆𑀞𑀸𑀦𑀢𑀸𑀬 𑀧𑀝𑀺𑀯𑀲𑀦𑁆𑀢𑀸 𑀫𑀳𑀸𑀉𑀤𑀓𑀥𑀸𑀭𑀸 𑀆𑀘𑀫𑀦𑁆𑀢𑀺 𑀥𑀫𑀦𑁆𑀢𑀺 𑀘, 𑀢𑁂𑀲𑀫𑁆𑀧𑀺 𑀢𑀁 𑀤𑀦𑁆𑀢𑀦𑁆𑀢𑀭𑁂𑀧𑀺 𑀉𑀤𑀭𑀦𑁆𑀢𑀭𑁂𑀧𑀺 𑀘𑀺𑀧𑁆𑀧𑀺𑀬𑀫𑀸𑀦𑀁 𑀉𑀤𑀓𑀁 𑀲𑀤𑁆𑀤𑀸𑀬𑁂𑀬𑁆𑀬. 𑀬𑀲𑁆𑀫𑀸 𑀘 𑀔𑁄, 𑀫𑀳𑀸𑀭𑀸𑀚, 𑀏𑀯𑀭𑀽𑀧𑁂𑀳𑀺 𑀏𑀯𑀭𑀽𑀧𑁂𑀳𑀺 𑀫𑀳𑀦𑁆𑀢𑁂𑀳𑀺 𑀧𑀝𑀺𑀧𑀻𑀴𑀦𑁂𑀳𑀺 𑀧𑀝𑀺𑀧𑀻𑀴𑀺𑀢𑀁 𑀉𑀤𑀓𑀁 𑀦 𑀲𑀤𑁆𑀤𑀸𑀬𑀢𑀺 𑀢𑀲𑁆𑀫𑀸𑀧𑀺 𑀦𑀢𑁆𑀣𑀺 𑀉𑀤𑀓𑁂 𑀚𑀻𑀯𑁄 𑀯𑀸 𑀲𑀢𑁆𑀢𑁄 𑀯𑀸𑀢𑀺, 𑀏𑀯𑀫𑁂𑀢𑀁, 𑀫𑀳𑀸𑀭𑀸𑀚, 𑀥𑀸𑀭𑁂𑀳𑀻’’𑀢𑀺.

‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀤𑁄𑀲𑀸𑀕𑀢𑁄 𑀧𑀜𑁆𑀳𑁄 𑀅𑀦𑀼𑀘𑁆𑀙𑀯𑀺𑀓𑀸𑀬 𑀯𑀺𑀪𑀢𑁆𑀢𑀺𑀬𑀸 𑀯𑀺𑀪𑀢𑁆𑀢𑁄, 𑀬𑀣𑀸 𑀦𑀸𑀫, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀫𑀳𑀕𑁆𑀖𑀁 𑀫𑀡𑀺𑀭𑀢𑀦𑀁 𑀙𑁂𑀓𑀁 𑀆𑀘𑀭𑀺𑀬𑀁 𑀓𑀼𑀲𑀮𑀁 𑀲𑀺𑀓𑁆𑀔𑀺𑀢𑀁 𑀫𑀡𑀺𑀓𑀸𑀭𑀁 𑀧𑀸𑀧𑀼𑀡𑀺𑀢𑁆𑀯𑀸 𑀓𑀺𑀢𑁆𑀢𑀺𑀁 𑀮𑀪𑁂𑀬𑁆𑀬 𑀣𑁄𑀫𑀦𑀁 𑀧𑀲𑀁𑀲𑀁, 𑀫𑀼𑀢𑁆𑀢𑀸𑀭𑀢𑀦𑀁 𑀯𑀸 𑀫𑀼𑀢𑁆𑀢𑀺𑀓𑀁 𑀤𑀼𑀲𑁆𑀲𑀭𑀢𑀦𑀁 𑀯𑀸 𑀤𑀼𑀲𑁆𑀲𑀺𑀓𑀁, 𑀮𑁄𑀳𑀺𑀢𑀘𑀦𑁆𑀤𑀦𑀁 𑀯𑀸 𑀕𑀦𑁆𑀥𑀺𑀓𑀁 𑀧𑀸𑀧𑀼𑀡𑀺𑀢𑁆𑀯𑀸 𑀓𑀺𑀢𑁆𑀢𑀺𑀁 𑀮𑀪𑁂𑀬𑁆𑀬 𑀣𑁄𑀫𑀦𑀁 𑀧𑀲𑀁𑀲𑀁. 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀤𑁄𑀲𑀸𑀕𑀢𑁄 [𑀤𑁂𑀲𑀸𑀕𑀢𑁄 (𑀲𑀻. 𑀧𑀻.)] 𑀧𑀜𑁆𑀳𑁄 𑀅𑀦𑀼𑀘𑁆𑀙𑀯𑀺𑀓𑀸𑀬 𑀯𑀺𑀪𑀢𑁆𑀢𑀺𑀬𑀸 𑀯𑀺𑀪𑀢𑁆𑀢𑁄, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀉𑀤𑀓𑀲𑀢𑁆𑀢𑀚𑀻𑀯𑀧𑀜𑁆𑀳𑁄 𑀦𑀯𑀫𑁄.

𑀩𑀼𑀤𑁆𑀥𑀯𑀕𑁆𑀕𑁄 𑀧𑀞𑀫𑁄.

𑀇𑀫𑀲𑁆𑀫𑀺𑀁 𑀯𑀕𑁆𑀕𑁂 𑀦𑀯 𑀧𑀜𑁆𑀳𑀸.

𑁨. 𑀦𑀺𑀧𑁆𑀧𑀧𑀜𑁆𑀘𑀯𑀕𑁆𑀕𑁄

𑁧. 𑀦𑀺𑀧𑁆𑀧𑀧𑀜𑁆𑀘𑀧𑀜𑁆𑀳𑁄

𑁧. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 ‘𑀦𑀺𑀧𑁆𑀧𑀧𑀜𑁆𑀘𑀸𑀭𑀸𑀫𑀸, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀣 𑀦𑀺𑀧𑁆𑀧𑀧𑀜𑁆𑀘𑀭𑀢𑀺𑀦𑁄’𑀢𑀺, 𑀓𑀢𑀫𑀁 𑀢𑀁 𑀦𑀺𑀧𑁆𑀧𑀧𑀜𑁆𑀘’’𑀦𑁆𑀢𑀺? ‘‘𑀲𑁄𑀢𑀸𑀧𑀢𑁆𑀢𑀺𑀨𑀮𑀁, 𑀫𑀳𑀸𑀭𑀸𑀚, 𑀦𑀺𑀧𑁆𑀧𑀧𑀜𑁆𑀘𑀁, 𑀲𑀓𑀤𑀸𑀕𑀸𑀫𑀺𑀨𑀮𑀁 𑀦𑀺𑀧𑁆𑀧𑀧𑀜𑁆𑀘𑀁, 𑀅𑀦𑀸𑀕𑀸𑀫𑀺𑀨𑀮𑀁 𑀦𑀺𑀧𑁆𑀧𑀧𑀜𑁆𑀘𑀁, 𑀅𑀭𑀳𑀢𑁆𑀢𑀨𑀮𑀁 𑀦𑀺𑀧𑁆𑀧𑀧𑀜𑁆𑀘’’𑀦𑁆𑀢𑀺.

‘‘𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀦𑀺𑀧𑁆𑀧𑀧𑀜𑁆𑀘𑀁, 𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀅𑀭𑀳𑀢𑁆𑀢𑀨𑀮𑀁 𑀦𑀺𑀧𑁆𑀧𑀧𑀜𑁆𑀘𑀁, 𑀓𑀺𑀲𑁆𑀲 𑀧𑀦 𑀇𑀫𑁂 𑀪𑀺𑀓𑁆𑀔𑀽 𑀉𑀤𑁆𑀤𑀺𑀲𑀦𑁆𑀢𑀺 𑀧𑀭𑀺𑀧𑀼𑀘𑁆𑀙𑀦𑁆𑀢𑀺 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀯𑁂𑀬𑁆𑀬𑀸𑀓𑀭𑀡𑀁 𑀕𑀸𑀣𑀁 𑀉𑀤𑀸𑀦𑀁 𑀇𑀢𑀺𑀯𑀼𑀢𑁆𑀢𑀓𑀁 𑀚𑀸𑀢𑀓𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀯𑁂𑀤𑀮𑁆𑀮𑀁, 𑀦𑀯𑀓𑀫𑁆𑀫𑁂𑀦 𑀧𑀮𑀺𑀩𑀼𑀚𑁆𑀛𑀦𑁆𑀢𑀺 𑀤𑀸𑀦𑁂𑀦 𑀘 𑀧𑀽𑀚𑀸𑀬 𑀘, 𑀦𑀦𑀼 𑀢𑁂 𑀚𑀺𑀦𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀁 𑀓𑀫𑁆𑀫𑀁 𑀓𑀭𑁄𑀢𑀻’’𑀢𑀺?

‘‘𑀬𑁂 𑀢𑁂, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀽 𑀉𑀤𑁆𑀤𑀺𑀲𑀦𑁆𑀢𑀺 𑀧𑀭𑀺𑀧𑀼𑀘𑁆𑀙𑀦𑁆𑀢𑀺 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀯𑁂𑀬𑁆𑀬𑀸𑀓𑀭𑀡𑀁 𑀕𑀸𑀣𑀁 𑀉𑀤𑀸𑀦𑀁 𑀇𑀢𑀺𑀯𑀼𑀢𑁆𑀢𑀓𑀁 𑀚𑀸𑀢𑀓𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀯𑁂𑀤𑀮𑁆𑀮𑀁, 𑀦𑀯𑀓𑀫𑁆𑀫𑁂𑀦 𑀧𑀮𑀺𑀩𑀼𑀚𑁆𑀛𑀦𑁆𑀢𑀺 𑀤𑀸𑀦𑁂𑀦 𑀘 𑀧𑀽𑀚𑀸𑀬 𑀘, 𑀲𑀩𑁆𑀩𑁂 𑀢𑁂 𑀦𑀺𑀧𑁆𑀧𑀧𑀜𑁆𑀘𑀲𑁆𑀲 𑀧𑀢𑁆𑀢𑀺𑀬𑀸 𑀓𑀭𑁄𑀦𑁆𑀢𑀺. 𑀬𑁂 𑀢𑁂, 𑀫𑀳𑀸𑀭𑀸𑀚, 𑀲𑀪𑀸𑀯𑀧𑀭𑀺𑀲𑀼𑀤𑁆𑀥𑀸 𑀧𑀼𑀩𑁆𑀩𑁂 𑀯𑀸𑀲𑀺𑀢𑀯𑀸𑀲𑀦𑀸, 𑀢𑁂 𑀏𑀓𑀘𑀺𑀢𑁆𑀢𑀓𑁆𑀔𑀡𑁂𑀦 𑀦𑀺𑀧𑁆𑀧𑀧𑀘 𑀳𑁄𑀦𑁆𑀢𑀺. 𑀬𑁂 𑀧𑀦 𑀢𑁂 𑀪𑀺𑀓𑁆𑀔𑀽 𑀫𑀳𑀸𑀭𑀚𑀓𑁆𑀔𑀸, 𑀢𑁂 𑀇𑀫𑁂𑀳𑀺 𑀧𑀬𑁄𑀕𑁂𑀳𑀺 𑀦𑀺𑀧𑁆𑀧𑀧𑀜𑁆𑀘𑀸 𑀳𑁄𑀦𑁆𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀏𑀓𑁄 𑀧𑀼𑀭𑀺𑀲𑁄 𑀔𑁂𑀢𑁆𑀢𑁂 𑀩𑀻𑀚𑀁 𑀭𑁄𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀬𑀣𑀸𑀩𑀮𑀯𑀻𑀭𑀺𑀬𑁂𑀦 𑀯𑀺𑀦𑀸 𑀧𑀸𑀓𑀸𑀭𑀯𑀢𑀺𑀬𑀸 𑀥𑀜𑁆𑀜𑀁 𑀉𑀤𑁆𑀥𑀭𑁂𑀬𑁆𑀬, 𑀏𑀓𑁄 𑀧𑀼𑀭𑀺𑀲𑁄 𑀔𑁂𑀢𑁆𑀢𑁂 𑀩𑀻𑀚𑀁 𑀭𑁄𑀧𑁂𑀢𑁆𑀯𑀸 𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀓𑀝𑁆𑀞𑀜𑁆𑀘 𑀲𑀸𑀔𑀜𑁆𑀘 𑀙𑀺𑀦𑁆𑀤𑀺𑀢𑁆𑀯𑀸 𑀯𑀢𑀺𑀧𑀸𑀓𑀸𑀭𑀁 𑀓𑀢𑁆𑀯𑀸 𑀥𑀜𑁆𑀜𑀁 𑀉𑀤𑁆𑀥𑀭𑁂𑀬𑁆𑀬. 𑀬𑀸 𑀢𑀢𑁆𑀣 𑀢𑀲𑁆𑀲 𑀯𑀢𑀺𑀧𑀸𑀓𑀸𑀭𑀧𑀭𑀺𑀬𑁂𑀲𑀦𑀸, 𑀲𑀸 𑀥𑀜𑁆𑀜𑀢𑁆𑀣𑀸𑀬. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀢𑁂 𑀲𑀪𑀸𑀯𑀧𑀭𑀺𑀲𑀼𑀤𑁆𑀥𑀸 𑀧𑀼𑀩𑁆𑀩𑁂 𑀯𑀸𑀲𑀺𑀢𑀯𑀸𑀲𑀦𑀸, 𑀢𑁂 𑀏𑀓𑀘𑀺𑀢𑁆𑀢𑀓𑁆𑀔𑀡𑁂𑀦 𑀦𑀺𑀧𑁆𑀧𑀧𑀜𑁆𑀘𑀸 𑀳𑁄𑀦𑁆𑀢𑀺, 𑀯𑀺𑀦𑀸 𑀯𑀢𑀺𑀧𑀸𑀓𑀸𑀭𑀁 𑀧𑀼𑀭𑀺𑀲𑁄 𑀯𑀺𑀬 𑀥𑀜𑁆𑀜𑀼𑀤𑁆𑀥𑀸𑀭𑁄. 𑀬𑁂 𑀧𑀦 𑀢𑁂 𑀪𑀺𑀓𑁆𑀔𑀽 𑀫𑀳𑀸𑀭𑀚𑀓𑁆𑀔𑀸, 𑀢𑁂 𑀇𑀫𑁂𑀳𑀺 𑀧𑀬𑁄𑀕𑁂𑀳𑀺 𑀦𑀺𑀧𑁆𑀧𑀧𑀜𑁆𑀘𑀸 𑀳𑁄𑀦𑁆𑀢𑀺, 𑀯𑀢𑀺𑀧𑀸𑀓𑀸𑀭𑀁 𑀓𑀢𑁆𑀯𑀸 𑀧𑀼𑀭𑀺𑀲𑁄 𑀯𑀺𑀬 𑀥𑀜𑁆𑀜𑀼𑀤𑁆𑀥𑀸𑀭𑁄.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀫𑀳𑀢𑀺𑀫𑀳𑀦𑁆𑀢𑁂 𑀅𑀫𑁆𑀩𑀭𑀼𑀓𑁆𑀔𑀫𑀢𑁆𑀣𑀓𑁂 𑀨𑀮𑀧𑀺𑀡𑁆𑀟𑀺 𑀪𑀯𑁂𑀬𑁆𑀬, 𑀅𑀣 𑀢𑀢𑁆𑀣 𑀬𑁄 𑀓𑁄𑀘𑀺 𑀇𑀤𑁆𑀥𑀺𑀫𑀸 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀨𑀮𑀁 𑀳𑀭𑁂𑀬𑁆𑀬, 𑀬𑁄 𑀧𑀦 𑀢𑀢𑁆𑀣 𑀅𑀦𑀺𑀤𑁆𑀥𑀺𑀫𑀸, 𑀲𑁄 𑀓𑀝𑁆𑀞𑀜𑁆𑀘 𑀯𑀮𑁆𑀮𑀺𑀜𑁆𑀘 𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀺𑀢𑁆𑀯𑀸 𑀢𑀸𑀬 𑀢𑀁 𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀨𑀮𑀁 𑀳𑀭𑁂𑀬𑁆𑀬. 𑀬𑀸 𑀢𑀢𑁆𑀣 𑀢𑀲𑁆𑀲 𑀦𑀺𑀲𑁆𑀲𑁂𑀡𑀺𑀧𑀭𑀺𑀬𑁂𑀲𑀦𑀸, 𑀲𑀸 𑀨𑀮𑀢𑁆𑀣𑀸𑀬. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀢𑁂 𑀲𑀪𑀸𑀯𑀧𑀭𑀺𑀲𑀼𑀤𑁆𑀥𑀸 𑀧𑀼𑀩𑁆𑀩𑁂 𑀯𑀸𑀲𑀺𑀢𑀯𑀸𑀲𑀦𑀸, 𑀢𑁂 𑀏𑀓𑀘𑀺𑀢𑁆𑀢𑀓𑁆𑀔𑀡𑁂𑀦 𑀦𑀺𑀧𑁆𑀧𑀧𑀜𑁆𑀘𑀸 𑀳𑁄𑀦𑁆𑀢𑀺, 𑀇𑀤𑁆𑀥𑀺𑀫𑀸 𑀯𑀺𑀬 𑀭𑀼𑀓𑁆𑀔𑀨𑀮𑀁 𑀳𑀭𑀦𑁆𑀢𑁄. 𑀬𑁂 𑀧𑀦 𑀢𑁂 𑀪𑀺𑀓𑁆𑀔𑀽 𑀫𑀳𑀸𑀭𑀚𑀓𑁆𑀔𑀸, 𑀢𑁂 𑀇𑀫𑀺𑀦𑀸 𑀧𑀬𑁄𑀕𑁂𑀦 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁂𑀦𑁆𑀢𑀺, 𑀦𑀺𑀲𑁆𑀲𑁂𑀡𑀺𑀬𑀸 𑀯𑀺𑀬 𑀧𑀼𑀭𑀺𑀲𑁄 𑀭𑀼𑀓𑁆𑀔𑀨𑀮𑀁 𑀳𑀭𑀦𑁆𑀢𑁄.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀏𑀓𑁄 𑀧𑀼𑀭𑀺𑀲𑁄 𑀅𑀢𑁆𑀣𑀓𑀭𑀡𑀺𑀓𑁄 𑀏𑀓𑀓𑁄 𑀬𑁂𑀯 𑀲𑀸𑀫𑀺𑀓𑀁 𑀉𑀧𑀕𑀦𑁆𑀢𑁆𑀯𑀸 𑀅𑀢𑁆𑀣𑀁 𑀲𑀸𑀥𑁂𑀢𑀺. 𑀏𑀓𑁄 𑀥𑀦𑀯𑀸 𑀥𑀦𑀯𑀲𑁂𑀦 𑀧𑀭𑀺𑀲𑀁 𑀯𑀟𑁆𑀠𑁂𑀢𑁆𑀯𑀸 𑀧𑀭𑀺𑀲𑀸𑀬 𑀅𑀢𑁆𑀣𑀁 𑀲𑀸𑀥𑁂𑀢𑀺. 𑀬𑀸 𑀢𑀢𑁆𑀣 𑀢𑀲𑁆𑀲 𑀧𑀭𑀺𑀲𑀧𑀭𑀺𑀬𑁂𑀲𑀦𑀸, 𑀲𑀸 𑀅𑀢𑁆𑀣𑀢𑁆𑀣𑀸𑀬. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀢𑁂 𑀲𑀪𑀸𑀯𑀧𑀭𑀺𑀲𑀼𑀤𑁆𑀥𑀸 𑀧𑀼𑀩𑁆𑀩𑁂 𑀯𑀸𑀲𑀺𑀢𑀯𑀸𑀲𑀦𑀸, 𑀢𑁂 𑀏𑀓𑀘𑀺𑀢𑁆𑀢𑀓𑁆𑀔𑀡𑁂𑀦 𑀙𑀲𑀼 𑀅𑀪𑀺𑀜𑁆𑀜𑀸𑀲𑀼 𑀯𑀲𑀺𑀪𑀸𑀯𑀁 𑀧𑀸𑀧𑀼𑀡𑀦𑁆𑀢𑀺, 𑀧𑀼𑀭𑀺𑀲𑁄 𑀯𑀺𑀬 𑀏𑀓𑀓𑁄 𑀅𑀢𑁆𑀣𑀲𑀺𑀤𑁆𑀥𑀺𑀁 𑀓𑀭𑁄𑀦𑁆𑀢𑁄. 𑀬𑁂 𑀧𑀦 𑀢𑁂 𑀪𑀺𑀓𑁆𑀔𑀽 𑀫𑀳𑀸𑀭𑀚𑀓𑁆𑀔𑀸, 𑀢𑁂 𑀇𑀫𑁂𑀳𑀺 𑀧𑀬𑁄𑀕𑁂𑀳𑀺 𑀲𑀸𑀫𑀜𑁆𑀜𑀢𑁆𑀣𑀫𑀪𑀺𑀲𑀸𑀥𑁂𑀦𑁆𑀢𑀺, 𑀧𑀭𑀺𑀲𑀸𑀬 𑀯𑀺𑀬 𑀧𑀼𑀭𑀺𑀲𑁄 𑀅𑀢𑁆𑀣𑀲𑀺𑀤𑁆𑀥𑀺𑀁 𑀓𑀭𑁄𑀦𑁆𑀢𑁄.

‘‘𑀉𑀤𑁆𑀤𑁂𑀲𑁄𑀧𑀺, 𑀫𑀳𑀸𑀭𑀸𑀚, 𑀩𑀳𑀼𑀓𑀸𑀭𑁄, 𑀧𑀭𑀺𑀧𑀼𑀘𑁆𑀙𑀸𑀧𑀺 𑀩𑀳𑀼𑀓𑀸𑀭𑀸, 𑀦𑀯𑀓𑀫𑁆𑀫𑀫𑁆𑀧𑀺 𑀩𑀳𑀼𑀓𑀸𑀭𑀁, 𑀤𑀸𑀦𑀫𑁆𑀧𑀺 𑀩𑀳𑀼𑀓𑀸𑀭𑀁, 𑀧𑀽𑀚𑀸𑀧𑀺 𑀩𑀳𑀼𑀓𑀸𑀭𑀸 𑀢𑁂𑀲𑀼 𑀢𑁂𑀲𑀼 𑀓𑀭𑀡𑀻𑀬𑁂𑀲𑀼. 𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀭𑀸𑀚𑀽𑀧𑀲𑁂𑀯𑀻 𑀓𑀢𑀸𑀯𑀻 𑀅𑀫𑀘𑁆𑀘𑀪𑀝𑀩𑀮𑀤𑁄𑀯𑀸𑀭𑀺𑀓𑀅𑀦𑀻𑀓𑀝𑁆𑀞𑀧𑀸𑀭𑀺𑀲𑀚𑁆𑀚𑀚𑀦𑁂𑀳𑀺, 𑀢𑁂 𑀢𑀲𑁆𑀲 𑀓𑀭𑀡𑀻𑀬𑁂 𑀅𑀦𑀼𑀧𑁆𑀧𑀢𑁆𑀢𑁂 𑀲𑀩𑁆𑀩𑁂𑀧𑀺 𑀉𑀧𑀓𑀸𑀭𑀸 𑀳𑁄𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀉𑀤𑁆𑀤𑁂𑀲𑁄𑀧𑀺 𑀩𑀳𑀼𑀓𑀸𑀭𑁄, 𑀧𑀭𑀺𑀧𑀼𑀘𑁆𑀙𑀸𑀧𑀺 𑀩𑀳𑀼𑀓𑀸𑀭𑀸, 𑀦𑀯𑀓𑀫𑁆𑀫𑀫𑁆𑀧𑀺 𑀩𑀳𑀼𑀓𑀸𑀭𑀁, 𑀤𑀸𑀦𑀫𑁆𑀧𑀺 𑀩𑀳𑀼𑀓𑀸𑀭𑀁, 𑀧𑀽𑀚𑀸𑀧𑀺 𑀩𑀳𑀼𑀓𑀸𑀭𑀸 𑀢𑁂𑀲𑀼 𑀢𑁂𑀲𑀼 𑀓𑀭𑀡𑀻𑀬𑁂𑀲𑀼. 𑀬𑀤𑀺, 𑀫𑀳𑀸𑀭𑀸𑀚, 𑀲𑀩𑁆𑀩𑁂𑀧𑀺 𑀅𑀪𑀺𑀚𑀸𑀢𑀺𑀧𑀭𑀺𑀲𑀼𑀤𑁆𑀥𑀸 𑀪𑀯𑁂𑀬𑁆𑀬𑀼𑀁, 𑀅𑀦𑀼𑀲𑀸𑀲𑀦𑁂𑀦 [𑀅𑀦𑀼𑀲𑀸𑀲𑀓𑁂𑀦 (𑀲𑀻. 𑀧𑀻.)] 𑀓𑀭𑀡𑀻𑀬𑀁 𑀦 𑀪𑀯𑁂𑀬𑁆𑀬. 𑀬𑀲𑁆𑀫𑀸 𑀘 𑀔𑁄, 𑀫𑀳𑀸𑀭𑀸𑀚, 𑀲𑀯𑀦𑁂𑀦 𑀓𑀭𑀡𑀻𑀬𑀁 𑀳𑁄𑀢𑀺, 𑀣𑁂𑀭𑁄, 𑀫𑀳𑀸𑀭𑀸𑀚, 𑀲𑀸𑀭𑀺𑀧𑀼𑀢𑁆𑀢𑁄 𑀅𑀧𑀭𑀺𑀫𑀺𑀢𑀫𑀲𑀗𑁆𑀔𑁂𑀬𑁆𑀬𑀓𑀧𑁆𑀧𑀁 𑀉𑀧𑀸𑀤𑀸𑀬 𑀉𑀧𑀘𑀺𑀢𑀓𑀼𑀲𑀮𑀫𑀽𑀮𑁄 𑀧𑀜𑁆𑀜𑀸𑀬 𑀓𑁄𑀝𑀺𑀁 𑀕𑀢𑁄, 𑀲𑁄𑀧𑀺 𑀯𑀺𑀦𑀸 𑀲𑀯𑀦𑁂𑀦 𑀦𑀸𑀲𑀓𑁆𑀔𑀺 𑀆𑀲𑀯𑀓𑁆𑀔𑀬𑀁 𑀧𑀸𑀧𑀼𑀡𑀺𑀢𑀼𑀁. 𑀢𑀲𑁆𑀫𑀸, 𑀫𑀳𑀸𑀭𑀸𑀚, 𑀩𑀳𑀼𑀓𑀸𑀭𑀁 𑀲𑀯𑀦𑀁, 𑀢𑀣𑀸 𑀉𑀤𑁆𑀤𑁂𑀲𑁄𑀧𑀺 𑀧𑀭𑀺𑀧𑀼𑀘𑁆𑀙𑀸𑀧𑀺. 𑀢𑀲𑁆𑀫𑀸 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀧𑀺 𑀦𑀺𑀧𑁆𑀧𑀧𑀜𑁆𑀘𑀸 𑀲𑀗𑁆𑀔𑀢𑀸’’𑀢𑀺. ‘‘𑀲𑀼𑀦𑀺𑀚𑁆𑀛𑀸𑀧𑀺𑀢𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀜𑁆𑀳𑁄, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀦𑀺𑀧𑁆𑀧𑀧𑀜𑁆𑀘𑀧𑀜𑁆𑀳𑁄 𑀧𑀞𑀫𑁄.

𑁨. 𑀔𑀻𑀡𑀸𑀲𑀯𑀪𑀸𑀯𑀧𑀜𑁆𑀳𑁄

𑁨. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀼𑀫𑁆𑀳𑁂 𑀪𑀡𑀣 ‘𑀬𑁄 𑀕𑀺𑀳𑀻 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄, 𑀤𑁆𑀯𑁂 𑀯𑀸𑀲𑁆𑀲 𑀕𑀢𑀺𑀬𑁄 𑀪𑀯𑀦𑁆𑀢𑀺 𑀅𑀦𑀜𑁆𑀜𑀸, 𑀢𑀲𑁆𑀫𑀺𑀁 𑀬𑁂𑀯 𑀤𑀺𑀯𑀲𑁂 𑀧𑀩𑁆𑀩𑀚𑀢𑀺 𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺 𑀯𑀸. 𑀦 𑀲𑁄 𑀤𑀺𑀯𑀲𑁄 𑀲𑀓𑁆𑀓𑀸 𑀅𑀢𑀺𑀓𑁆𑀓𑀫𑁂𑀢𑀼’𑀦𑁆𑀢𑀺. 𑀲𑀘𑁂 𑀲𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀆𑀘𑀭𑀺𑀬𑀁 𑀯𑀸 𑀉𑀧𑀚𑁆𑀛𑀸𑀬𑀁 𑀯𑀸 𑀧𑀢𑁆𑀢𑀘𑀻𑀯𑀭𑀁 𑀯𑀸 𑀦 𑀮𑀪𑁂𑀣, 𑀅𑀧𑀺 𑀦𑀼 𑀔𑁄 𑀲𑁄 𑀅𑀭𑀳𑀸 𑀲𑀬𑀁 𑀯𑀸 𑀧𑀩𑁆𑀩𑀚𑁂𑀬𑁆𑀬 𑀤𑀺𑀯𑀲𑀁 𑀯𑀸 𑀅𑀢𑀺𑀓𑁆𑀓𑀫𑁂𑀬𑁆𑀬, 𑀅𑀜𑁆𑀜𑁄 𑀓𑁄𑀘𑀺 𑀅𑀭𑀳𑀸 𑀇𑀤𑁆𑀥𑀺𑀫𑀸 𑀆𑀕𑀦𑁆𑀢𑁆𑀯𑀸 𑀢𑀁 𑀧𑀩𑁆𑀩𑀸𑀚𑁂𑀬𑁆𑀬 𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑁂𑀬𑁆𑀬 𑀯𑀸’’𑀢𑀺? ‘‘𑀦 𑀲𑁄, 𑀫𑀳𑀸𑀭𑀸𑀚, 𑀅𑀭𑀳𑀸 𑀲𑀬𑀁 𑀧𑀩𑁆𑀩𑀚𑁂𑀬𑁆𑀬, 𑀲𑀬𑀁 𑀧𑀩𑁆𑀩𑀚𑀦𑁆𑀢𑁄 𑀣𑁂𑀬𑁆𑀬𑀁 𑀆𑀧𑀚𑁆𑀚𑀢𑀺, 𑀦 𑀘 𑀤𑀺𑀯𑀲𑀁 𑀅𑀢𑀺𑀓𑁆𑀓𑀫𑁂𑀬𑁆𑀬, 𑀅𑀜𑁆𑀜𑀲𑁆𑀲 𑀅𑀭𑀳𑀦𑁆𑀢𑀲𑁆𑀲 𑀆𑀕𑀫𑀦𑀁 𑀪𑀯𑁂𑀬𑁆𑀬 𑀯𑀸 𑀦 𑀯𑀸 𑀪𑀯𑁂𑀬𑁆𑀬, 𑀢𑀲𑁆𑀫𑀺𑀁 𑀬𑁂𑀯 𑀤𑀺𑀯𑀲𑁂 𑀧𑀭𑀺𑀦𑀺𑀩𑁆𑀩𑀸𑀬𑁂𑀬𑁆𑀬𑀸’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀭𑀳𑀢𑁆𑀢𑀲𑁆𑀲 𑀲𑀦𑁆𑀢𑀪𑀸𑀯𑁄 𑀯𑀺𑀚𑀳𑀺𑀢𑁄 𑀳𑁄𑀢𑀺, 𑀬𑁂𑀦 𑀅𑀥𑀺𑀕𑀢𑀲𑁆𑀲 𑀚𑀻𑀯𑀺𑀢𑀳𑀸𑀭𑁄 𑀪𑀯𑀢𑀻’’𑀢𑀺.

‘‘𑀯𑀺𑀲𑀫𑀁, 𑀫𑀳𑀸𑀭𑀸𑀚, 𑀕𑀺𑀳𑀺𑀮𑀺𑀗𑁆𑀕𑀁, 𑀯𑀺𑀲𑀫𑁂 𑀮𑀺𑀗𑁆𑀕𑁂 𑀮𑀺𑀗𑁆𑀕𑀤𑀼𑀩𑁆𑀩𑀮𑀢𑀸𑀬 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀕𑀺𑀳𑀻 𑀢𑀲𑁆𑀫𑀺𑀁 𑀬𑁂𑀯 𑀤𑀺𑀯𑀲𑁂 𑀧𑀩𑁆𑀩𑀚𑀢𑀺 𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺 𑀯𑀸. 𑀦𑁂𑀲𑁄, 𑀫𑀳𑀸𑀭𑀸𑀚, 𑀤𑁄𑀲𑁄 𑀅𑀭𑀳𑀢𑁆𑀢𑀲𑁆𑀲, 𑀕𑀺𑀳𑀺𑀮𑀺𑀗𑁆𑀕𑀲𑁆𑀲𑁂𑀯𑁂𑀲𑁄 𑀤𑁄𑀲𑁄 𑀬𑀤𑀺𑀤𑀁 𑀮𑀺𑀗𑁆𑀕𑀤𑀼𑀩𑁆𑀩𑀮𑀢𑀸.

‘‘𑀬𑀣𑀸, 𑀫𑀳𑀸𑀭𑀸𑀚, 𑀪𑁄𑀚𑀦𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀆𑀬𑀼𑀧𑀸𑀮𑀓𑀁 𑀚𑀻𑀯𑀺𑀢𑀭𑀓𑁆𑀔𑀓𑀁 𑀯𑀺𑀲𑀫𑀓𑁄𑀝𑁆𑀞𑀲𑁆𑀲 𑀫𑀦𑁆𑀤𑀤𑀼𑀩𑁆𑀩𑀮𑀕𑀳𑀡𑀺𑀓𑀲𑁆𑀲 𑀅𑀯𑀺𑀧𑀸𑀓𑁂𑀦 𑀚𑀻𑀯𑀺𑀢𑀁 𑀳𑀭𑀢𑀺. 𑀦𑁂𑀲𑁄, 𑀫𑀳𑀸𑀭𑀸𑀚, 𑀤𑁄𑀲𑁄 𑀪𑁄𑀚𑀦𑀲𑁆𑀲, 𑀓𑁄𑀝𑁆𑀞𑀲𑁆𑀲𑁂𑀯𑁂𑀲𑁄 𑀤𑁄𑀲𑁄 𑀬𑀤𑀺𑀤𑀁 𑀅𑀕𑁆𑀕𑀺𑀤𑀼𑀩𑁆𑀩𑀮𑀢𑀸. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀯𑀺𑀲𑀫𑁂 𑀮𑀺𑀗𑁆𑀕𑁂 𑀮𑀺𑀗𑁆𑀕𑀤𑀼𑀩𑁆𑀩𑀮𑀢𑀸𑀬 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀕𑀺𑀳𑀻 𑀢𑀲𑁆𑀫𑀺𑀁 𑀬𑁂𑀯 𑀤𑀺𑀯𑀲𑁂 𑀧𑀩𑁆𑀩𑀚𑀢𑀺 𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺 𑀯𑀸. 𑀦𑁂𑀲𑁄, 𑀫𑀳𑀸𑀭𑀸𑀚, 𑀤𑁄𑀲𑁄 𑀅𑀭𑀳𑀢𑁆𑀢𑀲𑁆𑀲, 𑀕𑀺𑀳𑀺𑀮𑀺𑀗𑁆𑀕𑀲𑁆𑀲𑁂𑀯𑁂𑀲𑁄 𑀤𑁄𑀲𑁄 𑀬𑀤𑀺𑀤𑀁 𑀮𑀺𑀗𑁆𑀕𑀤𑀼𑀩𑁆𑀩𑀮𑀢𑀸.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀧𑀭𑀺𑀢𑁆𑀢𑀁 𑀢𑀺𑀡𑀲𑀮𑀸𑀓𑀁 𑀉𑀧𑀭𑀺 𑀕𑀭𑀼𑀓𑁂 𑀧𑀸𑀲𑀸𑀡𑁂 𑀞𑀧𑀺𑀢𑁂 𑀤𑀼𑀩𑁆𑀩𑀮𑀢𑀸𑀬 𑀪𑀺𑀚𑁆𑀚𑀺𑀢𑁆𑀯𑀸 𑀧𑀢𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀕𑀺𑀳𑀻 𑀢𑁂𑀦 𑀮𑀺𑀗𑁆𑀕𑁂𑀦 𑀅𑀭𑀳𑀢𑁆𑀢𑀁 𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀲𑁆𑀫𑀺𑀁 𑀬𑁂𑀯 𑀤𑀺𑀯𑀲𑁂 𑀧𑀩𑁆𑀩𑀚𑀢𑀺 𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺 𑀯𑀸.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀅𑀩𑀮𑁄 𑀤𑀼𑀩𑁆𑀩𑀮𑁄 𑀦𑀺𑀳𑀻𑀦𑀚𑀘𑁆𑀘𑁄 𑀧𑀭𑀺𑀢𑁆𑀢𑀧𑀼𑀜𑁆𑀜𑁄 𑀫𑀳𑀢𑀺𑀫𑀳𑀸𑀭𑀚𑁆𑀚𑀁 𑀮𑀪𑀺𑀢𑁆𑀯𑀸 𑀔𑀡𑁂𑀦 𑀧𑀭𑀺𑀧𑀢𑀢𑀺 𑀧𑀭𑀺𑀥𑀁𑀲𑀢𑀺 𑀑𑀲𑀓𑁆𑀓𑀢𑀺, 𑀦 𑀲𑀓𑁆𑀓𑁄𑀢𑀺 𑀇𑀲𑁆𑀲𑀭𑀺𑀬𑀁 𑀥𑀸𑀭𑁂𑀢𑀼𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀕𑀺𑀳𑀻 𑀢𑁂𑀦 𑀮𑀺𑀗𑁆𑀕𑁂𑀦 𑀅𑀭𑀳𑀢𑁆𑀢𑀁 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑁂𑀦 𑀓𑀸𑀭𑀡𑁂𑀦 𑀢𑀲𑁆𑀫𑀺𑀁 𑀬𑁂𑀯 𑀤𑀺𑀯𑀲𑁂 𑀧𑀩𑁆𑀩𑀚𑀢𑀺 𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺 𑀯𑀸’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀔𑀻𑀡𑀸𑀲𑀯𑀪𑀸𑀯𑀧𑀜𑁆𑀳𑁄 𑀤𑀼𑀢𑀺𑀬𑁄.

𑁩. 𑀔𑀻𑀡𑀸𑀲𑀯𑀲𑀢𑀺𑀲𑀫𑁆𑀫𑁄𑀲𑀧𑀜𑁆𑀳𑁄

𑁩. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀢𑁆𑀣𑀺 𑀅𑀭𑀳𑀢𑁄 𑀲𑀢𑀺𑀲𑀫𑁆𑀫𑁄𑀲𑁄’’𑀢𑀺? ‘‘𑀯𑀺𑀕𑀢𑀲𑀢𑀺𑀲𑀫𑁆𑀫𑁄𑀲𑀸 𑀔𑁄, 𑀫𑀳𑀸𑀭𑀸𑀚, 𑀅𑀭𑀳𑀦𑁆𑀢𑁄, 𑀦𑀢𑁆𑀣𑀺 𑀅𑀭𑀳𑀦𑁆𑀢𑀸𑀦𑀁 𑀲𑀢𑀺𑀲𑀫𑁆𑀫𑁄𑀲𑁄’’𑀢𑀺. ‘‘𑀆𑀧𑀚𑁆𑀚𑁂𑀬𑁆𑀬 𑀧𑀦, 𑀪𑀦𑁆𑀢𑁂, 𑀅𑀭𑀳𑀸 𑀆𑀧𑀢𑁆𑀢𑀺’’𑀦𑁆𑀢𑀺? ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺? ‘‘𑀓𑀼𑀝𑀺𑀓𑀸𑀭𑁂, 𑀫𑀳𑀸𑀭𑀸𑀚, 𑀲𑀜𑁆𑀘𑀭𑀺𑀢𑁆𑀢𑁂, 𑀯𑀺𑀓𑀸𑀮𑁂 𑀓𑀸𑀮𑀲𑀜𑁆𑀜𑀸𑀬, 𑀧𑀯𑀸𑀭𑀺𑀢𑁂 𑀅𑀧𑁆𑀧𑀯𑀸𑀭𑀺𑀢𑀲𑀜𑁆𑀜𑀸𑀬, 𑀅𑀦𑀢𑀺𑀭𑀺𑀢𑁆𑀢𑁂 𑀅𑀢𑀺𑀭𑀺𑀢𑁆𑀢𑀲𑀜𑁆𑀜𑀸𑀬𑀸’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀼𑀫𑁆𑀳𑁂 𑀪𑀡𑀣 ‘𑀬𑁂 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑀺, 𑀢𑁂 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀆𑀧𑀚𑁆𑀚𑀦𑁆𑀢𑀺 𑀅𑀦𑀸𑀤𑀭𑀺𑀬𑁂𑀦 𑀯𑀸 𑀅𑀚𑀸𑀦𑀦𑁂𑀦 𑀯𑀸’𑀢𑀺. 𑀅𑀧𑀺 𑀦𑀼 𑀔𑁄, 𑀪𑀦𑁆𑀢𑁂, 𑀅𑀭𑀳𑀢𑁄 𑀅𑀦𑀸𑀤𑀭𑀺𑀬𑀁 𑀳𑁄𑀢𑀺, 𑀬𑀁 𑀅𑀭𑀳𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻’’𑀢𑀺? ‘‘𑀦 𑀳𑀺, 𑀫𑀳𑀸𑀭𑀸𑀚𑀸’’𑀢𑀺.

‘‘𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀭𑀳𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀦𑀢𑁆𑀣𑀺 𑀘 𑀅𑀭𑀳𑀢𑁄 𑀅𑀦𑀸𑀤𑀭𑀺𑀬𑀁, 𑀢𑁂𑀦 𑀳𑀺 𑀅𑀢𑁆𑀣𑀺 𑀅𑀭𑀳𑀢𑁄 𑀲𑀢𑀺𑀲𑀫𑁆𑀫𑁄𑀲𑁄’’𑀢𑀺? ‘‘𑀦𑀢𑁆𑀣𑀺, 𑀫𑀳𑀸𑀭𑀸𑀚, 𑀅𑀭𑀳𑀢𑁄 𑀲𑀢𑀺𑀲𑀫𑁆𑀫𑁄𑀲𑁄, 𑀆𑀧𑀢𑁆𑀢𑀺𑀜𑁆𑀘 𑀅𑀭𑀳𑀸 𑀆𑀧𑀚𑁆𑀚𑀢𑀻’’𑀢𑀺.

‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀓𑀸𑀭𑀡𑁂𑀦 𑀫𑀁 𑀲𑀜𑁆𑀜𑀸𑀧𑁂𑀳𑀺, 𑀓𑀺𑀁 𑀢𑀢𑁆𑀣 𑀓𑀸𑀭𑀡’’𑀦𑁆𑀢𑀺? ‘‘𑀤𑁆𑀯𑁂𑀫𑁂, 𑀫𑀳𑀸𑀭𑀸𑀚, 𑀓𑀺𑀮𑁂𑀲𑀸 𑀮𑁄𑀓𑀯𑀚𑁆𑀚𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀜𑁆𑀘𑀸𑀢𑀺. 𑀓𑀢𑀫𑀁, 𑀫𑀳𑀸𑀭𑀸𑀚, 𑀮𑁄𑀓𑀯𑀚𑁆𑀚𑀁? 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸, 𑀇𑀤𑀁 𑀯𑀼𑀘𑁆𑀘𑀢𑀺 𑀮𑁄𑀓𑀯𑀚𑁆𑀚𑀁. 𑀓𑀢𑀫𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁? 𑀬𑀁 𑀮𑁄𑀓𑁂 𑀅𑀢𑁆𑀣𑀺 𑀲𑀫𑀡𑀸𑀦𑀁 𑀅𑀦𑀦𑀼𑀘𑁆𑀙𑀯𑀺𑀓𑀁 𑀅𑀦𑀦𑀼𑀮𑁄𑀫𑀺𑀓𑀁, 𑀕𑀺𑀳𑀻𑀦𑀁 𑀅𑀦𑀯𑀚𑁆𑀚𑀁. 𑀢𑀢𑁆𑀣 𑀪𑀕𑀯𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀺 ‘𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬’𑀦𑁆𑀢𑀺. 𑀯𑀺𑀓𑀸𑀮𑀪𑁄𑀚𑀦𑀁, 𑀫𑀳𑀸𑀭𑀸𑀚, 𑀮𑁄𑀓𑀲𑁆𑀲 𑀅𑀦𑀯𑀚𑁆𑀚𑀁, 𑀢𑀁 𑀚𑀺𑀦𑀲𑀸𑀲𑀦𑁂 𑀯𑀚𑁆𑀚𑀁. 𑀪𑀽𑀢𑀕𑀸𑀫𑀯𑀺𑀓𑁄𑀧𑀦𑀁, 𑀫𑀳𑀸𑀭𑀸𑀚, 𑀮𑁄𑀓𑀲𑁆𑀲 𑀅𑀦𑀯𑀚𑁆𑀚𑀁, 𑀢𑀁 𑀚𑀺𑀦𑀲𑀸𑀲𑀦𑁂 𑀯𑀚𑁆𑀚𑀁. 𑀉𑀤𑀓𑁂 𑀳𑀲𑁆𑀲𑀥𑀫𑁆𑀫𑀁, 𑀫𑀳𑀸𑀭𑀸𑀚, 𑀮𑁄𑀓𑀲𑁆𑀲 𑀅𑀦𑀯𑀚𑁆𑀚𑀁, 𑀢𑀁 𑀚𑀺𑀦𑀲𑀸𑀲𑀦𑁂 𑀯𑀚𑁆𑀚𑀁. 𑀇𑀢𑀺 𑀏𑀯𑀭𑀽𑀧𑀸𑀦𑀺 𑀏𑀯𑀭𑀽𑀧𑀸𑀦𑀺, 𑀫𑀳𑀸𑀭𑀸𑀚, 𑀚𑀺𑀦𑀲𑀸𑀲𑀦𑁂 𑀯𑀚𑁆𑀚𑀸𑀦𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁.

‘‘𑀮𑁄𑀓𑀯𑀚𑁆𑀚𑀁 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀢𑀁 𑀅𑀚𑁆𑀛𑀸𑀘𑀭𑀺𑀢𑀼𑀁, 𑀬𑀁 𑀓𑀺𑀮𑁂𑀲𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀢𑀁 𑀅𑀚𑀸𑀦𑀦𑁆𑀢𑁄 𑀆𑀧𑀚𑁆𑀚𑁂𑀬𑁆𑀬. 𑀅𑀯𑀺𑀲𑀬𑁄, 𑀫𑀳𑀸𑀭𑀸𑀚, 𑀏𑀓𑀘𑁆𑀘𑀲𑁆𑀲 𑀅𑀭𑀳𑀢𑁄 𑀲𑀩𑁆𑀩𑀁 𑀚𑀸𑀦𑀺𑀢𑀼𑀁, 𑀦 𑀳𑀺 𑀢𑀲𑁆𑀲 𑀩𑀮𑀁 𑀅𑀢𑁆𑀣𑀺 𑀲𑀩𑁆𑀩𑀁 𑀚𑀸𑀦𑀺𑀢𑀼𑀁. 𑀅𑀦𑀜𑁆𑀜𑀸𑀢𑀁, 𑀫𑀳𑀸𑀭𑀸𑀚, 𑀅𑀭𑀳𑀢𑁄 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀦𑀸𑀫𑀫𑁆𑀧𑀺 𑀕𑁄𑀢𑁆𑀢𑀫𑁆𑀧𑀺, 𑀫𑀕𑁆𑀕𑁄𑀧𑀺 𑀢𑀲𑁆𑀲 𑀫𑀳𑀺𑀬𑀸 𑀅𑀦𑀜𑁆𑀜𑀸𑀢𑁄; 𑀯𑀺𑀫𑀼𑀢𑁆𑀢𑀺𑀁 𑀬𑁂𑀯, 𑀫𑀳𑀸𑀭𑀸𑀚, 𑀏𑀓𑀘𑁆𑀘𑁄 𑀅𑀭𑀳𑀸 𑀚𑀸𑀦𑁂𑀬𑁆𑀬; 𑀙𑀴𑀪𑀺𑀜𑁆𑀜𑁄 𑀅𑀭𑀳𑀸 𑀲𑀓𑀯𑀺𑀲𑀬𑀁 𑀚𑀸𑀦𑁂𑀬𑁆𑀬; 𑀲𑀩𑁆𑀩𑀜𑁆𑀜𑀽, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄𑀯 𑀲𑀩𑁆𑀩𑀁 𑀚𑀸𑀦𑀸𑀢𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀔𑀻𑀡𑀸𑀲𑀯𑀲𑀢𑀺𑀲𑀫𑁆𑀫𑁄𑀲𑀧𑀜𑁆𑀳𑁄 𑀢𑀢𑀺𑀬𑁄.

𑁪. 𑀮𑁄𑀓𑁂 𑀦𑀢𑁆𑀣𑀺𑀪𑀸𑀯𑀧𑀜𑁆𑀳𑁄

𑁪. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀤𑀺𑀲𑁆𑀲𑀦𑁆𑀢𑀺 𑀮𑁄𑀓𑁂 𑀩𑀼𑀤𑁆𑀥𑀸, 𑀤𑀺𑀲𑁆𑀲𑀦𑁆𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸, 𑀤𑀺𑀲𑁆𑀲𑀦𑁆𑀢𑀺 𑀢𑀣𑀸𑀕𑀢𑀲𑁆𑀲 𑀲𑀸𑀯𑀓𑀸, 𑀤𑀺𑀲𑁆𑀲𑀦𑁆𑀢𑀺 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸𑀦𑁄, 𑀤𑀺𑀲𑁆𑀲𑀦𑁆𑀢𑀺 𑀧𑀤𑁂𑀲𑀭𑀸𑀚𑀸𑀦𑁄, 𑀤𑀺𑀲𑁆𑀲𑀦𑁆𑀢𑀺 𑀤𑁂𑀯𑀫𑀦𑀼𑀲𑁆𑀲𑀸, 𑀤𑀺𑀲𑁆𑀲𑀦𑁆𑀢𑀺 𑀲𑀥𑀦𑀸, 𑀤𑀺𑀲𑁆𑀲𑀦𑁆𑀢𑀺 𑀅𑀥𑀦𑀸, 𑀤𑀺𑀲𑁆𑀲𑀦𑁆𑀢𑀺 𑀲𑀼𑀕𑀢𑀸, 𑀤𑀺𑀲𑁆𑀲𑀦𑁆𑀢𑀺 𑀤𑀼𑀕𑁆𑀕𑀢𑀸, 𑀤𑀺𑀲𑁆𑀲𑀢𑀺 𑀧𑀼𑀭𑀺𑀲𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀁 𑀧𑀸𑀢𑀼𑀪𑀽𑀢𑀁, 𑀤𑀺𑀲𑁆𑀲𑀢𑀺 𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑀮𑀺𑀗𑁆𑀕𑀁 𑀧𑀸𑀢𑀼𑀪𑀽𑀢𑀁, 𑀤𑀺𑀲𑁆𑀲𑀢𑀺 𑀲𑀼𑀓𑀢𑀁 𑀤𑀼𑀓𑁆𑀓𑀢𑀁 𑀓𑀫𑁆𑀫𑀁, 𑀤𑀺𑀲𑁆𑀲𑀦𑁆𑀢𑀺 𑀓𑀮𑁆𑀬𑀸𑀡𑀧𑀸𑀧𑀓𑀸𑀦𑀁 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑀽𑀧𑀪𑁄𑀕𑀺𑀦𑁄 𑀲𑀢𑁆𑀢𑀸, 𑀅𑀢𑁆𑀣𑀺 𑀮𑁄𑀓𑁂 𑀲𑀢𑁆𑀢𑀸 𑀅𑀡𑁆𑀟𑀚𑀸 𑀚𑀮𑀸𑀩𑀼𑀚𑀸 𑀲𑀁𑀲𑁂𑀤𑀚𑀸 𑀑𑀧𑀧𑀸𑀢𑀺𑀓𑀸, 𑀅𑀢𑁆𑀣𑀺 𑀲𑀢𑁆𑀢𑀸 𑀅𑀧𑀤𑀸 𑀤𑁆𑀯𑀺𑀧𑀤𑀸 𑀘𑀢𑀼𑀧𑁆𑀧𑀤𑀸 𑀩𑀳𑀼𑀧𑁆𑀧𑀤𑀸, 𑀅𑀢𑁆𑀣𑀺 𑀮𑁄𑀓𑁂 𑀬𑀓𑁆𑀔𑀸 𑀭𑀓𑁆𑀔𑀲𑀸 𑀓𑀼𑀫𑁆𑀪𑀡𑁆𑀟𑀸 𑀅𑀲𑀼𑀭𑀸 𑀤𑀸𑀦𑀯𑀸 𑀕𑀦𑁆𑀥𑀩𑁆𑀩𑀸 𑀧𑁂𑀢𑀸 𑀧𑀺𑀲𑀸𑀘𑀸, 𑀅𑀢𑁆𑀣𑀺 𑀓𑀺𑀦𑁆𑀦𑀭𑀸 𑀫𑀳𑁄𑀭𑀕𑀸 𑀦𑀸𑀕𑀸 𑀲𑀼𑀧𑀡𑁆𑀡𑀸 𑀲𑀺𑀤𑁆𑀥𑀸 𑀯𑀺𑀚𑁆𑀚𑀸𑀥𑀭𑀸, 𑀅𑀢𑁆𑀣𑀺 𑀳𑀢𑁆𑀣𑀻 𑀅𑀲𑁆𑀲𑀸 𑀕𑀸𑀯𑁄 𑀫𑀳𑀺𑀁𑀲𑀸 [𑀫𑀳𑀺𑀲𑀸 (𑀲𑀻. 𑀧𑀻.)] 𑀑𑀝𑁆𑀞𑀸 𑀕𑀤𑁆𑀭𑀪𑀸 𑀅𑀚𑀸 𑀏𑀴𑀓𑀸 𑀫𑀺𑀕𑀸 𑀲𑀽𑀓𑀭𑀸 𑀲𑀻𑀳𑀸 𑀩𑁆𑀬𑀕𑁆𑀖𑀸 𑀤𑀻𑀧𑀻 𑀅𑀘𑁆𑀙𑀸 𑀓𑁄𑀓𑀸 𑀢𑀭𑀘𑁆𑀙𑀸 𑀲𑁄𑀡𑀸 𑀲𑀺𑀗𑁆𑀕𑀸𑀮𑀸, 𑀅𑀢𑁆𑀣𑀺 𑀩𑀳𑀼𑀯𑀺𑀥𑀸 𑀲𑀓𑀼𑀡𑀸, 𑀅𑀢𑁆𑀣𑀺 𑀲𑀼𑀯𑀡𑁆𑀡𑀁 𑀭𑀚𑀢𑀁 𑀫𑀼𑀢𑁆𑀢𑀸 𑀫𑀡𑀺 𑀲𑀗𑁆𑀔𑁄 𑀲𑀺𑀮𑀸 𑀧𑀯𑀸𑀴𑀁 𑀮𑁄𑀳𑀺𑀢𑀗𑁆𑀓𑁄 𑀫𑀲𑀸𑀭𑀕𑀮𑁆𑀮𑀁 𑀯𑁂𑀴𑀼𑀭𑀺𑀬𑁄 𑀯𑀚𑀺𑀭𑀁 𑀨𑀮𑀺𑀓𑀁 𑀓𑀸𑀴𑀮𑁄𑀳𑀁 𑀢𑀫𑁆𑀩𑀮𑁄𑀳𑀁 𑀯𑀝𑁆𑀝𑀮𑁄𑀳𑀁 𑀓𑀁𑀲𑀮𑁄𑀳𑀁, 𑀅𑀢𑁆𑀣𑀺 𑀔𑁄𑀫𑀁 𑀓𑁄𑀲𑁂𑀬𑁆𑀬𑀁 𑀓𑀧𑁆𑀧𑀸𑀲𑀺𑀓𑀁 𑀲𑀸𑀡𑀁 𑀪𑀗𑁆𑀕𑀁 𑀓𑀫𑁆𑀩𑀮𑀁, 𑀅𑀢𑁆𑀣𑀺 𑀲𑀸𑀮𑀺 𑀯𑀻𑀳𑀺 𑀬𑀯𑁄 𑀓𑀗𑁆𑀕𑀼 𑀓𑀼𑀤𑁆𑀭𑀽𑀲𑁄 𑀯𑀭𑀓𑁄 𑀕𑁄𑀥𑀽𑀫𑁄 𑀫𑀼𑀕𑁆𑀕𑁄, 𑀫𑀸𑀲𑁄 𑀢𑀺𑀮𑀁 𑀓𑀼𑀮𑀢𑁆𑀣𑀁, 𑀅𑀢𑁆𑀣𑀺 𑀫𑀽𑀮𑀕𑀦𑁆𑀥𑁄 𑀲𑀸𑀭𑀕𑀦𑁆𑀥𑁄 𑀨𑁂𑀕𑁆𑀕𑀼𑀕𑀦𑁆𑀥𑁄 𑀢𑀘𑀕𑀦𑁆𑀥𑁄 𑀧𑀢𑁆𑀢𑀕𑀦𑁆𑀥𑁄 𑀧𑀼𑀧𑁆𑀨𑀕𑀦𑁆𑀥𑁄 𑀨𑀮𑀕𑀦𑁆𑀥𑁄 𑀲𑀩𑁆𑀩𑀕𑀦𑁆𑀥𑁄, 𑀅𑀢𑁆𑀣𑀺 𑀢𑀺𑀡 𑀮𑀢𑀸 𑀕𑀘𑁆𑀙 𑀭𑀼𑀓𑁆𑀔 𑀑𑀲𑀥𑀺 𑀯𑀦𑀧𑁆𑀧𑀢𑀺 𑀦𑀤𑀻 𑀧𑀩𑁆𑀩𑀢 𑀲𑀫𑀼𑀤𑁆𑀤 𑀫𑀘𑁆𑀙𑀓𑀘𑁆𑀙𑀧𑀸 𑀲𑀩𑁆𑀩𑀁 𑀮𑁄𑀓𑁂 𑀅𑀢𑁆𑀣𑀺. 𑀬𑀁, 𑀪𑀦𑁆𑀢𑁂, 𑀮𑁄𑀓𑁂 𑀦𑀢𑁆𑀣𑀺, 𑀢𑀁 𑀫𑁂 𑀓𑀣𑁂𑀳𑀻’’𑀢𑀺.

‘‘𑀢𑀻𑀡𑀺𑀫𑀸𑀦𑀺, 𑀫𑀳𑀸𑀭𑀸𑀚, 𑀮𑁄𑀓𑁂 𑀦𑀢𑁆𑀣𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀲𑀘𑁂𑀢𑀦𑀸 𑀯𑀸 𑀅𑀘𑁂𑀢𑀦𑀸 𑀯𑀸 𑀅𑀚𑀭𑀸𑀫𑀭𑀸 𑀮𑁄𑀓𑁂 𑀦𑀢𑁆𑀣𑀺, 𑀲𑀗𑁆𑀔𑀸𑀭𑀸𑀦𑀁 𑀦𑀺𑀘𑁆𑀘𑀢𑀸 𑀦𑀢𑁆𑀣𑀺, 𑀧𑀭𑀫𑀢𑁆𑀣𑁂𑀦 𑀲𑀢𑁆𑀢𑀽𑀧𑀮𑀤𑁆𑀥𑀺 𑀦𑀢𑁆𑀣𑀺, 𑀇𑀫𑀸𑀦𑀺 𑀔𑁄, 𑀫𑀳𑀸𑀭𑀸𑀚, 𑀢𑀻𑀡𑀺 𑀮𑁄𑀓𑁂 𑀦𑀢𑁆𑀣𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀮𑁄𑀓𑁂 𑀦𑀢𑁆𑀣𑀺𑀪𑀸𑀯𑀧𑀜𑁆𑀳𑁄 𑀘𑀢𑀼𑀢𑁆𑀣𑁄.

𑁫. 𑀅𑀓𑀫𑁆𑀫𑀚𑀸𑀤𑀺𑀧𑀜𑁆𑀳𑁄

𑁫. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀤𑀺𑀲𑁆𑀲𑀦𑁆𑀢𑀺 𑀮𑁄𑀓𑁂 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸, 𑀤𑀺𑀲𑁆𑀲𑀦𑁆𑀢𑀺 𑀳𑁂𑀢𑀼𑀦𑀺𑀩𑁆𑀩𑀢𑁆𑀢𑀸, 𑀤𑀺𑀲𑁆𑀲𑀦𑁆𑀢𑀺 𑀉𑀢𑀼𑀦𑀺𑀩𑁆𑀩𑀢𑁆𑀢𑀸, 𑀬𑀁 𑀮𑁄𑀓𑁂 𑀅𑀓𑀫𑁆𑀫𑀚𑀁 𑀅𑀳𑁂𑀢𑀼𑀚𑀁 𑀅𑀦𑀼𑀢𑀼𑀚𑀁, 𑀢𑀁 𑀫𑁂 𑀓𑀣𑁂𑀳𑀻’’𑀢𑀺. ‘‘𑀤𑁆𑀯𑁂𑀫𑁂, 𑀫𑀳𑀸𑀭𑀸𑀚, 𑀮𑁄𑀓𑀲𑁆𑀫𑀺𑀁 𑀅𑀓𑀫𑁆𑀫𑀚𑀸 𑀅𑀳𑁂𑀢𑀼𑀚𑀸 𑀅𑀦𑀼𑀢𑀼𑀚𑀸. 𑀓𑀢𑀫𑁂 𑀤𑁆𑀯𑁂? 𑀆𑀓𑀸𑀲𑁄, 𑀫𑀳𑀸𑀭𑀸𑀚, 𑀅𑀓𑀫𑁆𑀫𑀚𑁄 𑀅𑀳𑁂𑀢𑀼𑀚𑁄 𑀅𑀦𑀼𑀢𑀼𑀚𑁄; 𑀦𑀺𑀩𑁆𑀩𑀸𑀦𑀁, 𑀫𑀳𑀸𑀭𑀸𑀚, 𑀅𑀓𑀫𑁆𑀫𑀚𑀁 𑀅𑀳𑁂𑀢𑀼𑀚𑀁 𑀅𑀦𑀼𑀢𑀼𑀚𑀁. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀤𑁆𑀯𑁂 𑀅𑀓𑀫𑁆𑀫𑀚𑀸 𑀅𑀳𑁂𑀢𑀼𑀚𑀸 𑀅𑀦𑀼𑀢𑀼𑀚𑀸’’𑀢𑀺.

‘‘𑀫𑀸, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀚𑀺𑀦𑀯𑀘𑀦𑀁 𑀫𑀓𑁆𑀔𑁂𑀳𑀺, 𑀫𑀸 𑀅𑀚𑀸𑀦𑀺𑀢𑁆𑀯𑀸 𑀧𑀜𑁆𑀳𑀁 𑀩𑁆𑀬𑀸𑀓𑀭𑁄𑀳𑀻’’𑀢𑀺. ‘‘𑀓𑀺𑀁 𑀔𑁄, 𑀫𑀳𑀸𑀭𑀸𑀚, 𑀅𑀳𑀁 𑀯𑀤𑀸𑀫𑀺, 𑀬𑀁 𑀫𑀁 𑀢𑁆𑀯𑀁 𑀏𑀯𑀁 𑀯𑀤𑁂𑀲𑀺 ‘𑀫𑀸, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀚𑀺𑀦𑀯𑀘𑀦𑀁 𑀫𑀓𑁆𑀔𑁂𑀳𑀺, 𑀫𑀸 𑀅𑀚𑀸𑀦𑀺𑀢𑁆𑀯𑀸 𑀧𑀜𑁆𑀳𑀁 𑀩𑁆𑀬𑀸𑀓𑀭𑁄𑀳𑀻’’’𑀢𑀺? ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀼𑀢𑁆𑀢𑀫𑀺𑀤𑀁 𑀢𑀸𑀯 𑀯𑀢𑁆𑀢𑀼𑀁 ‘𑀆𑀓𑀸𑀲𑁄 𑀅𑀓𑀫𑁆𑀫𑀚𑁄 𑀅𑀳𑁂𑀢𑀼𑀚𑁄 𑀅𑀦𑀼𑀢𑀼𑀚𑁄’𑀢𑀺. 𑀅𑀦𑁂𑀓𑀲𑀢𑁂𑀳𑀺 𑀧𑀦, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀸𑀭𑀡𑁂𑀳𑀺 𑀪𑀕𑀯𑀢𑀸 𑀲𑀸𑀯𑀓𑀸𑀦𑀁 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀫𑀕𑁆𑀕𑁄 𑀅𑀓𑁆𑀔𑀸𑀢𑁄, 𑀅𑀣 𑀘 𑀧𑀦 𑀢𑁆𑀯𑀁 𑀏𑀯𑀁 𑀯𑀤𑁂𑀲𑀺 ‘𑀅𑀳𑁂𑀢𑀼𑀚𑀁 𑀦𑀺𑀩𑁆𑀩𑀸𑀦’’’𑀦𑁆𑀢𑀺. ‘‘𑀲𑀘𑁆𑀘𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀅𑀦𑁂𑀓𑀲𑀢𑁂𑀳𑀺 𑀓𑀸𑀭𑀡𑁂𑀳𑀺 𑀲𑀸𑀯𑀓𑀸𑀦𑀁 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀫𑀕𑁆𑀕𑁄 𑀅𑀓𑁆𑀔𑀸𑀢𑁄, 𑀦 𑀘 𑀧𑀦 𑀦𑀺𑀩𑁆𑀩𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬 𑀳𑁂𑀢𑀼 𑀅𑀓𑁆𑀔𑀸𑀢𑁄’’𑀢𑀺.

‘‘𑀏𑀢𑁆𑀣 𑀫𑀬𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀦𑁆𑀥𑀓𑀸𑀭𑀢𑁄 𑀅𑀦𑁆𑀥𑀓𑀸𑀭𑀢𑀭𑀁 𑀧𑀯𑀺𑀲𑀸𑀫, 𑀯𑀦𑀢𑁄 𑀯𑀦𑀢𑀭𑀁 𑀧𑀯𑀺𑀲𑀸𑀫, 𑀕𑀳𑀦𑀢𑁄 𑀕𑀳𑀦𑀢𑀭𑀁 [𑀕𑀳𑀦𑀦𑁆𑀢𑀭𑀢𑁄 𑀕𑀳𑀦𑀦𑁆𑀢𑀭𑀁 (𑀓.)] 𑀧𑀯𑀺𑀲𑀸𑀫, 𑀬𑀢𑁆𑀭 𑀳𑀺 𑀦𑀸𑀫 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀳𑁂𑀢𑀼 𑀅𑀢𑁆𑀣𑀺, 𑀢𑀲𑁆𑀲 𑀧𑀦 𑀥𑀫𑁆𑀫𑀲𑁆𑀲 𑀉𑀧𑁆𑀧𑀸𑀤𑀸𑀬 𑀳𑁂𑀢𑀼 𑀦𑀢𑁆𑀣𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀳𑁂𑀢𑀼 𑀅𑀢𑁆𑀣𑀺, 𑀢𑁂𑀦 𑀳𑀺 𑀦𑀺𑀩𑁆𑀩𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬𑀧𑀺 𑀳𑁂𑀢𑀼 𑀇𑀘𑁆𑀙𑀺𑀢𑀩𑁆𑀩𑁄.

‘‘𑀬𑀣𑀸 𑀧𑀦, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀼𑀢𑁆𑀢𑀲𑁆𑀲 𑀧𑀺𑀢𑀸 𑀅𑀢𑁆𑀣𑀺, 𑀢𑁂𑀦 𑀓𑀸𑀭𑀡𑁂𑀦 𑀧𑀺𑀢𑀼𑀦𑁄𑀧𑀺 𑀧𑀺𑀢𑀸 𑀇𑀘𑁆𑀙𑀺𑀢𑀩𑁆𑀩𑁄. 𑀬𑀣𑀸 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀆𑀘𑀭𑀺𑀬𑁄 𑀅𑀢𑁆𑀣𑀺, 𑀢𑁂𑀦 𑀓𑀸𑀭𑀡𑁂𑀦 𑀆𑀘𑀭𑀺𑀬𑀲𑁆𑀲𑀧𑀺 𑀆𑀘𑀭𑀺𑀬𑁄 𑀇𑀘𑁆𑀙𑀺𑀢𑀩𑁆𑀩𑁄. 𑀬𑀣𑀸 𑀅𑀗𑁆𑀓𑀼𑀭𑀲𑁆𑀲 𑀩𑀻𑀚𑀁 𑀅𑀢𑁆𑀣𑀺, 𑀢𑁂𑀦 𑀓𑀸𑀭𑀡𑁂𑀦 𑀩𑀻𑀚𑀲𑁆𑀲𑀧𑀺 𑀩𑀻𑀚𑀁 𑀇𑀘𑁆𑀙𑀺𑀢𑀩𑁆𑀩𑀁. 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀤𑀺 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀳𑁂𑀢𑀼 𑀅𑀢𑁆𑀣𑀺, 𑀢𑁂𑀦 𑀓𑀸𑀭𑀡𑁂𑀦 𑀦𑀺𑀩𑁆𑀩𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬𑀧𑀺 𑀳𑁂𑀢𑀼 𑀇𑀘𑁆𑀙𑀺𑀢𑀩𑁆𑀩𑁄.

‘‘𑀬𑀣𑀸 𑀭𑀼𑀓𑁆𑀔𑀲𑁆𑀲 𑀯𑀸 𑀮𑀢𑀸𑀬 𑀯𑀸 𑀅𑀕𑁆𑀕𑁂 𑀲𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀫𑀚𑁆𑀛𑀫𑁆𑀧𑀺 𑀅𑀢𑁆𑀣𑀺, 𑀫𑀽𑀮𑀫𑁆𑀧𑀺 𑀅𑀢𑁆𑀣𑀺. 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀤𑀺 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀳𑁂𑀢𑀼 𑀅𑀢𑁆𑀣𑀺, 𑀢𑁂𑀦 𑀓𑀸𑀭𑀡𑁂𑀦 𑀦𑀺𑀩𑁆𑀩𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬𑀧𑀺 𑀳𑁂𑀢𑀼 𑀇𑀘𑁆𑀙𑀺𑀢𑀩𑁆𑀩𑁄’’’𑀢𑀺.

‘‘𑀅𑀦𑀼𑀧𑁆𑀧𑀸𑀤𑀦𑀻𑀬𑀁, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁, 𑀢𑀲𑁆𑀫𑀸 𑀦 𑀦𑀺𑀩𑁆𑀩𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬 𑀳𑁂𑀢𑀼 𑀅𑀓𑁆𑀔𑀸𑀢𑁄’’𑀢𑀺. ‘‘𑀇𑀗𑁆𑀖, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀓𑀸𑀭𑀡𑁂𑀦 𑀫𑀁 𑀲𑀜𑁆𑀜𑀸𑀧𑁂𑀳𑀺, 𑀬𑀣𑀸𑀳𑀁 𑀚𑀸𑀦𑁂𑀬𑁆𑀬𑀁 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀳𑁂𑀢𑀼 𑀅𑀢𑁆𑀣𑀺, 𑀦𑀺𑀩𑁆𑀩𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬 𑀳𑁂𑀢𑀼 𑀦𑀢𑁆𑀣𑀻’’𑀢𑀺.

‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀲𑀓𑁆𑀓𑀘𑁆𑀘𑀁 𑀲𑁄𑀢𑀁 𑀑𑀤𑀳, 𑀲𑀸𑀥𑀼𑀓𑀁 𑀲𑀼𑀡𑁄𑀳𑀺, 𑀯𑀓𑁆𑀔𑀸𑀫𑀺 𑀢𑀢𑁆𑀣 𑀓𑀸𑀭𑀡𑀁, 𑀲𑀓𑁆𑀓𑀼𑀡𑁂𑀬𑁆𑀬, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀧𑀸𑀓𑀢𑀺𑀓𑁂𑀦 𑀩𑀮𑁂𑀦 𑀇𑀢𑁄 𑀳𑀺𑀫𑀯𑀦𑁆𑀢𑀁 𑀧𑀩𑁆𑀩𑀢𑀭𑀸𑀚𑀁 𑀉𑀧𑀕𑀦𑁆𑀢𑀼’’𑀦𑁆𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀲𑀓𑁆𑀓𑀼𑀡𑁂𑀬𑁆𑀬 𑀧𑀦 𑀲𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀧𑀸𑀓𑀢𑀺𑀓𑁂𑀦 𑀩𑀮𑁂𑀦 𑀳𑀺𑀫𑀯𑀦𑁆𑀢𑀁 𑀧𑀩𑁆𑀩𑀢𑀭𑀸𑀚𑀁 𑀇𑀥 𑀆𑀳𑀭𑀺𑀢𑀼’’𑀦𑁆𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀓𑁆𑀓𑀸 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀫𑀕𑁆𑀕𑁄 𑀅𑀓𑁆𑀔𑀸𑀢𑀼𑀁, 𑀦 𑀲𑀓𑁆𑀓𑀸 𑀦𑀺𑀩𑁆𑀩𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬 𑀳𑁂𑀢𑀼 𑀤𑀲𑁆𑀲𑁂𑀢𑀼𑀁.